MAT 1:1 ଇଦ୍ ଆଦୁତ୍‍ତେ ଜିସୁ କ୍ରିଷ୍ଟନ୍ ଆନିଦାଦିଡ଼୍‍ତେ ପେଦେର୍ । ଅଣ୍ଡ୍‌ ଦାଉଦ୍‍ତେ ବଂଶତଣ୍ଡ୍ ନୁ ଦାଉଦ୍ ଅବ୍ରାହାମ୍‍ତେ ବଂଶତଣ୍ଡ୍ ମାତ୍‍ତଣ୍ଡ୍ ।
MAT 1:2 ଅବ୍ରାହାମ୍‍ ତେ ମାର୍‍ ଇସ୍‍ହାକ୍; ଇସ୍‍ହାକ୍‍ତେ ମାର୍‍ ଯାକୁବ୍‍; ଯାକୁବ୍‍ତେ ମାର୍‍ ଯିହୁଦା ନୁ ତାନ୍ ତାମୁଣ୍ଡୁକିଡ଼୍;
MAT 1:3 ଯିହୁଦା ତାମର୍‍ତେ ଜେରହନ୍ ବାବାଲ୍ । ମେଣ୍ଡେ ତାମ୍ ମାର୍‍ ଅଡ଼୍‌ ୟାୟ୍‍ ମାତ୍‍ତେ; ମାଲ୍‍ତନ୍ ହେସ୍ରନତେ ବାବାଲ୍ ମାତ୍‍ତଣ୍ଡ୍;
MAT 1:4 ହେସ୍ରନତେ ମାର୍‍ ଆରାମ୍; ଆରାମ୍‍ତେ ମାର୍‍ ଅମିନାଦାବ; ଅମିନାଦାବ୍‌ତେ ମାର୍‍ ନହଶୋନ; ନହଶୋନତେ ମାର୍‍ ସଲ୍‍ମନ୍;
MAT 1:5 ସଲ୍‍ମନ୍‍ତେ ମାର୍‍ ବୟଜ ମେଣ୍ଡେ ରାହାବ ତାମ୍ ୟାୟ୍‍ ମାତ୍‍ତେ; ବୟଜତେ ମାର୍‍ ଓବେଦ୍ ମେଣ୍ଡେ ଋତ୍‍ ତାମ୍ ୟାୟ୍‍ ମାତ୍‍ତେ; ଓବେଦ୍‍ତେ ମାର୍‍ ଯେଶୀ;
MAT 1:6 ଯେଶୀତେ ମାର୍‍ ଦାଉଦ୍ ରାଜା । ଦାଉଦ୍‍ତେ ମାର୍‍ ଶଲୋମନ୍; ଶଲୋମନ୍‍ତେ ୟାୟ୍‍ ମୁନେନ୍ ଉରିୟତେ ମୁତ୍‍ତେ ମାତ୍‍ତେ;
MAT 1:7 ଶଲୋମନ୍‍ତେ ମାର୍‍ ରହବୟାମ୍; ରହବୟାମ୍‍ତେ ମାର୍‍ ଅବିୟ;
MAT 1:8 ଅବିୟତେ ମାର୍‍ ଅସା; ଅସାନ୍ ମାର୍‍ ଜିହଶାପାଟ୍‍; ଜିହଶାପାଟ୍‍ତେ ମାର୍‍ ଜରାମ୍; ଜରାମ୍‍ତେ ମାର୍‍ ଉଜିୟ;
MAT 1:9 ଉଜିୟତେ ମାର୍‍ ଜତାମ୍; ଜତାମ୍‍ତେ ମାର୍‍ ଅହାଜ; ଆହାଜତେ ମାର୍‍ ହିଜକିୟ;
MAT 1:10 ହିଜକିୟତେ ମାର୍‍ ମନଶେହ; ମନଶେହତେ ମାର୍‍ ଆମନ୍;
MAT 1:11 ଆମନ୍‍ତେ ମାର୍‍ ଜଶିୟ; ଜଶିୟତେ ମାର୍‍ ଜିକନିୟ ନୁ ତାମ୍ ଦାଦାଲଡ଼୍‍; ଇଦ୍ ସମୟ୍‍ତେ ଇସ୍ରାଲୀୟଡ଼୍‍କିଂଙ୍କ୍ ବାବିଲନ୍ ଦେଶ୍‍ତାଗ୍ ତଅସ୍‍ମେଣ୍ଡେ ଆତ୍‍ତଡ଼୍ ଆଦ୍ ସମୟ୍‍ତେ ଜିକନିୟ ଜନମ୍ ଆସ୍ ମାତ୍‍ତଣ୍ଡ୍ ।
MAT 1:12 ବାବିଲନ୍‍ତାଗ୍ ତଅସ୍ ଆତ୍‍ତେ ପେର୍କେ ଜିକନିୟନ୍ ମାର୍‍ ଶଆଲ୍‍ତୀୟେଲ୍ ବାବିଲନ୍‍ତାଗ୍ ଜନମ୍ ଆତ୍‍ତଣ୍ଡ୍ । ଶଆଲ୍‍ତୀୟେଲ୍‍ତେ ମାର୍‍ ଜିରୁବାବେଲ୍;
MAT 1:13 ଜିରୁବାବେଲ୍‍ତେ ମାର୍‍ ଅବୀହୁଦ୍; ଅବୀହୁଦ୍‍ତେ ମାର୍‍ ଏଲିୟାକମ; ଏଲିୟାକମତେ ମାର୍‍ ଅଜ୍‍ଜୁର;
MAT 1:14 ଅଜ୍‍ଜୁରତେ ମାର୍‍ ସାଦକ; ସାଦକତେ ମାର୍‍ ଜାକୀନ; ଜାକିନତେ ମାର୍‍ ଏଲୀହୁଦ୍; ଏଲୀହୁଦ୍‍ତେ ମାର୍‍ ଲାଜାର୍; ଲାଜାର୍‍ତେ ମାର୍‍ ମତ୍‍ତାନ୍;
MAT 1:15 ମତ୍‍ତାନତେ ମାର୍‍ ଯାକୁବ୍; ଯାକୁବ୍‍ତେ ମାର୍‍ ଜସେପ୍ ।
MAT 1:16 ହି ଜସେପ୍ ମରିୟମ୍‍ତିଙ୍କ୍ ପେଣ୍ଡୁଲ୍ ମାଡ଼ିମାତ୍‍ତଣ୍ଡ୍ । ମରୀୟମ୍‍ ତେ ଡଙ୍କେତାଗାଙ୍କ୍ ଜିସୁ ଜନମ୍ ମାଡ଼ିମାତ୍‍ତଣ୍ଡ୍ । ଜିସୁ କ୍ରିଷ୍ଟ ମସିହ ପେଦେର୍‍ତେ ମିକା ପୁତ୍‍ତଣ୍ଡ୍ ।
MAT 1:17 ଇଦ୍‍ରକମ୍ ଅବ୍ରାହାମ୍‍ ତାଗାଙ୍କ୍ ଦାଉଦ୍‍ତାଗ୍ ହେୱୁନା ଚଉଦଟାନ୍ ପିଡ଼ି; ଦାଉଦତାଗାଙ୍କ୍ ବାବିଲନ୍ ବନ୍ଦି ହେୱୁନା ଚଉଦଟାନ୍ ପିଡ଼ି ନୁ ବାବିଲନ୍ ବନ୍ଦିତାଗାଙ୍କ୍ କ୍ରିଷ୍ଟନ୍ ଜନମ୍ ହେୱୁନା ଚଉଦଟାନ୍ ପିଡ଼ି ।
MAT 1:18 ଇଦ୍ ଆଦୁତ୍‍ତେ ଜିସୁ କ୍ରିଷ୍ଟନ୍ ଜନମ୍ କବର୍ । ତାମ୍ ୟାୟ୍‍ ମରୀୟମ୍‍ ତାଦ୍ ଜସେପ୍ ତଡ଼୍ ନିର୍ବନ୍ଦ୍ ଆସ୍‍ମାତ୍‍ତେ । ବାତେଙ୍କ୍ ଇତ୍‍କେ ଅଡ଼ାଦ୍‌ ପେଣ୍ଡୁଲ୍ ଆଦ୍‍ଦାନ୍ ମୁନେଙ୍କ୍ ମରୀୟମ୍ ପୁତ୍‍ତେ ଯେ ପବିତ୍ର ଆତ୍ମାତେ ଆଦ୍ ଡଙ୍କେତ୍ ଆତ୍‍ତେ ।
MAT 1:19 ଜସେପ୍ ସାରେଦାମ୍ ନେଲେତାଦ୍ ପାଡ଼୍‍ୟି ମାଡ଼ମାତ୍‍ତଣ୍ଡ୍ । ଆଦ୍‍ଦିଙ୍କ୍ ମରିୟମ୍‍ତିଙ୍କ୍ ନାରୁଡ଼ାଦ୍ ନିନ୍ଦ୍‍ତାଗାଙ୍କ୍ ରକ୍ଷା ମାଡ଼ାନ୍ ମାଇଦିଙ୍କ୍ ମିଞ୍ଜି ନିର୍ବନ୍ଦ୍‍ତିଙ୍କ୍ ମନାମାଡ଼ାଙ୍କ୍ ଚିନ୍ତେ ମାଡ଼୍‍ତଣ୍ଡ୍ ।
MAT 1:20 ଅଣ୍ଡ୍‌ ଇଦ୍‍ରକମ୍ ଆଲ୍‍ସାନ୍ ୱେଲେ ୱେରଣ୍ଡ୍ ଇଶ୍ୱର୍‌ତେ ଦୂତ ଅଂକିଙ୍କ୍‌ ସପ୍ନତେ ତନ୍ଦି କେତ୍‍ତଣ୍ଡ୍, “ହୋ ଦାଉଦ୍‍ ବଂଶତନି ଜସେପ୍ ! ମରୀୟମ୍‍ ତିଙ୍କ୍ ମୁତ୍‍ତେ ଇଞ୍ଜ ଗ୍ରହନ୍ ମାଡ଼ାଙ୍କ୍ ୱେର୍‍ମା, ବାତେଙ୍କ୍ ଇତ୍‍କେ ପବିତ୍ର ଆତ୍ମା ତଡ଼୍ ଆଦ୍ ଡଙ୍କେତ୍ ଆତ୍‍ତେ ।
MAT 1:21 ତାଂକିଙ୍କ୍ ୱେରନ୍ ମାର୍‍ ଜନମ୍ ଆଦ୍‍ତଣ୍ଡ୍‍ । ନିମ୍‍ ଅନ୍‌ ପେଦେର୍ ‘ଜିସୁ’ ୱାଟିତି, ବାତେଙ୍କ୍ ଇତ୍‍କେ ଅଣ୍ଡ୍‌ ତାମ୍ ନାରୁଡ଼୍‍କ୍ ତାମାଦ୍ ପାପ୍‌ତାଗାଙ୍କ୍ ରକ୍ଷା ମାଡ଼ିତନ୍ ।”
MAT 1:22 ଇଶ୍ୱର୍ ୱେରଣ୍ଡ୍ ବାବବାଦିନ୍ ତଡ଼୍ ବେନ୍ ବବିଷ୍ୟବାଣି କେସ୍‍ମାତ୍‍ତଣ୍ଡ୍, ଆଦ୍ ସାରେ ଆଦାନ୍ ମାଇଦିଙ୍କ୍ ଇଦ୍‍ସାରେ ଗଟେମ୍ ଆତ୍‍ତେ ।
MAT 1:23 ଆଦ୍ ବବିଷ୍ୟବାଣି ଆଦୁତ୍‍ତେ, “ଅଣ୍ଡୟ୍‌‍ ପିକିଡ଼୍ ଡଙ୍କେତ୍ ଆସ୍ ମାର୍‍ ଜନମ୍ ମାଡ଼୍‌ତେ । ଅଣ୍ଡ୍‌ ମାର୍‍ ‘ଇମାନୁୟେଲ୍’ ଇତ୍‍କେ ଇଶ୍ୱର୍ ମାନ୍‍ତଡ଼୍ ମିନ୍ଦେଣ୍ଡ୍ ।”
MAT 1:24 ଜସେପ୍‍ତେ ଉସ୍‍କାଡ଼୍ ତେର୍‍ତେ ପାୟେ ଅଣ୍ଡ୍‌ ଇଶ୍ୱର୍‌ତେ ଦୂତତେ ଗଟ୍‌ ଲେକାମ୍ ପାଡ଼୍‍ୟି ମାଡ଼୍‍ତଣ୍ଡ୍ । ଅଣ୍ଡ୍‌ ମରିୟମ୍‍ତିଙ୍କ୍ ପେଣ୍ଡୁଲ୍ ଆତ୍‍ତଣ୍ଡ୍ ।
MAT 1:25 ବାତେଙ୍କ୍ ଇତ୍‍କେ ଆଦିନ୍ ଆଦ୍ ମାର୍‍ ଜନମ୍ ଆଦାନ୍ ଯାକ ତାନ୍ ତଡ଼୍ ଉଞ୍ଜଣ୍ଡ୍ । ଜସେପ୍ ଆ ମାର୍‍ରିଙ୍କ୍ ଜିସୁ ପେଦେର୍ ହିତ୍‍ତଣ୍ଡ୍ ।
MAT 2:1 ହେରଦ୍ ଶାସନ୍‍ ମାଡ଼ାନ୍ ୱେଲେ ଯିହୁଦା ଦେଶ୍‍ତେ ବେତ୍‍ଲିହିମ୍ ଟାଉନ୍‍ତାଗ୍ ଜିସୁ ଜନମ୍ ଆତ୍‍ତଣ୍ଡ୍ । ଇଦିନ୍ ସୁଦୁଟ୍ ଦିନାମ୍ ପେର୍କେ ମୁନେଙ୍କ୍‍ତେ ଦେଶତଡ଼୍‍ ବେସ୍‍କ୍‍ତଡ଼୍‍ ଜ୍ଞାନିନାରୁଡ଼୍ ଜିରୁଶାଲମ୍‍ତାଗ୍ ୱାସ୍ ପାଚ୍ରାମାଡ଼୍‍ତଡ଼୍,
MAT 2:2 “ବେନ୍ ବାବୁ ଯିହୁଦିଡ଼୍ ରାଜାଲ୍‍ ଆଦାନ୍ ମାଇଦିଙ୍କ୍ ଜନମ୍ ଆତ୍‍ତଣ୍ଡ୍, ଅଣ୍ଡ୍‌ ବେକେ ? ମୁନେତ୍ ମାବ୍‍ତାଗ୍ ଅନାଦ୍‌ ଉକାମ୍ ଉଡ଼ି ଅଂକିଙ୍କ୍‌ ପୂଜା ମାଡ଼ାନ୍ ମାଇଦିଙ୍କ୍ ମାମ୍‍ମେ ୱାତ୍‍ତମ୍ ।”
MAT 2:3 ଅଡ଼ାଦ୍‌ ଇଦ୍ ଗଟ୍ କେଞ୍ଜି ରାଜାଲ୍‌ ହେରଦ୍ ନୁ ଜିରୁଶାଲମ୍‍ତେ ସାରେତଡ଼୍ ଗାଟି ଦାନ୍ଦେ ଆଦ୍‍ତଡ଼୍ ।
MAT 2:4 ହେରଦ୍ ସାରେ ମୁକ୍ୟ ଜାଜକ୍ ନୁ ସାରେ ଦର୍ମଗୁରୁଡ଼୍‍କ୍ କାର୍‍ଙ୍ଗି ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍‍, “ମସିହ ଇତ୍‍କେ କ୍ରିଷ୍ଟ ବେଗେ ଜନମ୍ ଆତ୍‌ତନ୍ ?”
MAT 2:5 ଅଡ଼୍‌ ଉତ୍ତର୍ ହିତ୍‍ତଡ଼୍, “ଯିହୁଦା ଦେଶ୍‍ତେ ବେତ୍‍ଲିହିମ୍‍ତାଗ୍ ।” ଇଦ୍ ବିଷୟ୍‍ତେ ୱେରଣ୍ଡ୍ ବାବବାଦୀ ଲେକିମିନ୍ଦେଣ୍ଡ୍,
MAT 2:6 “ଯିହୁଦା ଦେଶ୍‍ତେ ବେତ୍‍ଲିହିମ୍ ! ଯିହୁଦାତେ ମୁକ୍ୟ ସହର୍ ନାଗାଙ୍କ୍ ନିମ୍‍ ସୁଦୁର୍ ଆୟ୍‍ୱିନ୍, ବାତେଙ୍କ୍ ଇତ୍‍କେ ନା ଇସ୍ରାୟେଲିୟ ନାରୁଡ଼୍‍କିଂଙ୍କ୍ ପଡ଼୍‍ପାନ୍ ମାଇଦିଙ୍କ୍ ନିୟାଗ୍ କଞ୍ଜ୍ ୱେରଣ୍ଡ୍ ରାଜାଲ୍ ଜନମ୍‌ ଆଦ୍‍ତନ୍ ।”
MAT 2:7 ଇଦ୍ କେଞ୍ଜି ହେରଦ୍ ମୁନେତ୍ ଦେଶ୍‍ତେ ଆଦ୍ ଜ୍ଞାନିଡ଼୍‍କିଙ୍କ୍ ଅଣ୍ଡୟ୍‌‍ ଗୁପ୍ତ ମିଟିଙ୍କ୍‍ତାଗ୍ କାର୍‍ଙ୍ଗି ଟିକ୍ ବେନ୍ ସମୟ୍‍ତେ ଆଦ୍ ଉକାମ୍ ପେୟିସ୍ ମାତ୍‍ତେ, ଅଡ଼୍‌ଆଗାଙ୍କ୍ ବୁଜେମ୍ ଆତ୍‍ତଣ୍ଡ୍ ।
MAT 2:8 ତାନ୍ ପେର୍କେ ଅଡ଼୍‌‍କିଂଙ୍କ୍ ବେତ୍‍ଲିହିମ୍ ଟାଉନ୍‍ତାଗ୍ ରଅସ୍ କେତ୍‍ତଣ୍ଡ୍, “ଆନୁଟ୍ ଆ ପେକାଙ୍କ୍ ସାୟେ ମାଡ଼ି ମେହେକାଟ୍ ନୁ ଅଂକିଙ୍କ୍‌ ଦର୍‍ସ୍‍କି ନାକିଂଙ୍କ୍ କେଲାଟ୍, ନାନ୍ ମିକା ଆଞ୍ଜ୍ ଅଂକିଙ୍କ୍‌ ପୂଜା ମାଡ଼ିତାନ୍ ।”
MAT 2:9 ଜ୍ଞାନିଡ଼୍ ଆଦ୍ ପଡ଼ିୟେ ୱିଡ଼୍‍ସି ମେଣ୍ଡନ୍‍ନ୍ଦାମ୍ ଅଡ଼୍‌ ହାର୍‍ଦାଗ୍ ଆଦାନ୍ ୱେଲେ, ମୁନେତ୍ ମାବ୍‍ତାଗ୍ ଉଡ଼ିମାତ୍‍ତାଦ୍ ଆଦ୍ ଉକାମ୍ ମେଣ୍ଡନ୍‍ନ୍ଦାମ୍ ତଅନ୍‌ଦ୍‍ତେ ।
MAT 2:10 ଆଦିଙ୍କ୍ ଉଡ଼ି ଅଡ଼ାଦ୍‌ ବେସର୍ ୱେଡ଼୍‍କା ଆୟ୍‍ୟ ! ଅଡ଼୍‌ ବେସର୍ ସାର୍ଦେ ଆଦ୍‍ତଡ଼୍ ! ଅଡ଼୍‌ ମୁନ୍‍ ଆଞ୍ଜ୍ ଉକାମ୍ ବାବୁ ମାନ୍ଦାନ୍ ଲୋତ୍‍ତେ ପର୍‍ର ନିତ୍‍ତେ ।
MAT 2:11 ଅଡ଼୍‌ ଆଦ୍ ଲୋତ୍‍ତେ ଲପ୍ ହସ୍‍ତଡ଼୍ ନୁ ବାବୁଙ୍କ୍ ୟାୟ୍‍ ମରୀୟମ୍‍ ତେ ତଡ଼୍ ଉଡ଼ି ମର୍‍ମିଣ୍ଡାଇସ୍ ନମସ୍କାର୍ ମାଡ଼୍‍ତଡ଼୍ ନୁ ତାସ୍‍ମାନ୍ଦାନ୍ ସୁନା, କୁନ୍ଦୁରୁ ନୁ ସାଏତ୍ ଗାବ୍‍ତାଦ୍ ରସ୍ ପେସ୍‍ପିଇ ଅଂକିଙ୍କ୍‌ ଉପହାର୍ ହିତ୍‍ତଡ଼୍ ।
MAT 2:12 ଇଦିନ୍ ପେର୍କେ ଅଡ଼୍‌ ମେଣ୍ଡେଅନ୍‌ ହାର୍ ଇସ୍‌ ନିଜେତ୍ ଦେଶ୍‍ତାଗ୍ ମାଲ୍‍ସ୍ ଆତ୍‌ତଡ଼୍ । ବାତେଙ୍କ୍ ଇତ୍‍କେ ହେରଦନ୍ ଗାର୍‍ରେ ମାଲ୍‍ସ୍ ଆନ୍‌‍ମାକିଡ଼୍ ଇଞ୍ଜ ଇଶ୍ୱର୍ ଅଡ଼୍‌‍କିଂଙ୍କ୍ ସାପ୍ନେତେ ଗଟ୍ ଇସ୍‌‍ମାତ୍‍ତଣ୍ଡ୍ ।
MAT 2:13 ଅଡ଼୍‌ ଆତ୍‍ତେ ପେର୍କେ ଇଶ୍ୱର୍‌ତେ ଦୂତ ଯୋସେପ୍‍ତିଙ୍କ୍ ସପ୍ନତେ ଦର୍ଶନ୍ ଇସ୍‌ କେତ୍‍ତଣ୍ଡ୍, “ହେରଦ୍ ପେକାଙ୍କ୍ ଆୱୁକାଙ୍କ୍ ମାଇଦିଙ୍କ୍ ମେହେକିତଣ୍ଡ୍ । ଆଦିଙ୍କ୍ ତେଦ୍‍ଦେ, ବାବୁଙ୍କ୍ ନୁ ତାମ୍ ୟାୟାଙ୍କ୍ ପଇସ୍ ମିସର୍ ଦେଶ୍‍ତାଗ୍ ମିର୍‍ରେ । ଆଦ୍ ପଡ଼୍‍ୟି ୱିଡ଼୍‍ସାଙ୍କ୍ କେଲ୍‍ୱେ ଯାକ ଆଗେ ମାନୁଟ୍ ।”
MAT 2:14 ଯୋସେପ୍ ତେଦି ପେକାଙ୍କ୍ ନୁ ତାମ୍ ୟାୟାଙ୍କ୍ ପଇସ୍ ଆଦ୍ ନାର୍‍କେତ୍ ମିସର୍ ଦେଶ୍‍ତା ଆତ୍‌ତଡ଼୍ ।
MAT 2:15 ହେରଦ୍‍ତେ ଡଲାନ୍ ଯାକ ଅଡ଼୍‌ ଆଗେ ମାତ୍‍ତଡ଼୍ । ଇଦ୍ ସାରେ ଗଟେମ୍ ଆତ୍‍ତାଙ୍କ୍ ବାବବାଦିଡ଼ାଦ୍ ବବିଷ୍ୟବାଣି ସାରେ ଆତ୍‍ତେ । ଅଣ୍ଡ୍‌ କେସ୍‍ମାତ୍‍ତଣ୍ଡ୍, “ନା ମାର୍‍ରିଙ୍କ୍ ନାନ୍ ମିସର୍ ଦେଶ୍‍ତାଗ୍ କାର୍‍ଙ୍ଗି ତାତ୍‍ତାନ୍ ।”
MAT 2:16 ମୁନେତ୍ ଦେଶ୍‍ତାଗାଙ୍କ୍ ୱାସ୍ ମାନ୍ଦାନ୍ ଜ୍ଞାନିଡ଼୍ ଅଂକିଙ୍କ୍‌ ବୁସାମାଡ଼ି ଆତ୍‍ତଡ଼୍‍ ଇଞ୍ଜ ପୁଞ୍ଜ୍, ହେରଦ୍ ଗାଟି କପାମ୍ ଆତ୍‍ତଣ୍ଡ୍ ନୁ ବେତ୍‍ଲିହିମ୍ ନୁ ଆଦିନ୍ ଗାର୍‍ରେ ଗାର୍‍ରେତ୍ ପଡ଼ିୟେତାଗ୍ ମାନ୍ଦାନ୍ ରେଣ୍ଡ୍ ହେଣ୍ଡ୍‍କ୍ ନୁ ସୁଦୁଟ୍ ବୟସ୍‍ତେ ସାରେ ପିଲାଙ୍କ୍ ହାଉକାଙ୍କ୍ ଗଟ୍ ହିତ୍‍ତଣ୍ଡ୍ । ଉକାମ୍ ପେୟ୍‍ତାଦ୍ ଦିନାମ୍ ବିଷୟ୍‍ତେ ଜ୍ଞାନିଡ଼ାଗାଙ୍କ୍ ଅଣ୍ଡ୍‌ ବାତ୍ କେଞ୍ଜି ମାତ୍‍ତଣ୍ଡ୍, ଆଦ୍ ଲେକାମ୍ ଅଣ୍ଡ୍‌ ପିଲାନାୱୁ ବୟସ୍‌ତାଦ୍ ସିମା ପୁଞ୍ଜ୍‍ମାତ୍‍ତଣ୍ଡ୍ ।
MAT 2:17 ଇଦିନ୍ ତଡ଼୍ ବାବବାଦୀ ଜିରିମୀୟତେ ଅଣ୍ଡୟ୍‌ ବବିଷ୍ୟବାଣି ସାରେ ଆତ୍‍ତେ । ଅଣ୍ଡ୍‌ ଲେକିମାତ୍‍ତଣ୍ଡ୍;
MAT 2:18 “ରାମା ସହର୍ କନ୍‍ସ୍ କିଡ଼୍‍କାନାଦ୍ ଲେଙ୍ଗ୍‌ ୱାଦୁତ୍ ଆଦ୍ ଦୁଃକାମ୍‍ତେ କେୟାନାଦ୍ ଲେଙ୍ଗ୍ ରାହେଲ୍ ତାନ୍ ପିଲାନ୍ ସେଙ୍ଗେ କେୟୁତ୍‍; ଅଂକିଙ୍କ୍‌ ବେନ୍ ଗଟ୍‍ତେମିକା ବୁଜାମାଡ଼ାନଙ୍କ୍ ଆୟ୍‍ୟ, ବାତେଙ୍କ୍ ଇତ୍‍କେ ଅଡ଼୍‌ ସାରେତଡ଼୍ ଡଲ୍‍ତଡ଼୍ ।”
MAT 2:19 ହେରଦନ୍ ଡଲ୍‍ତେ ପେର୍କେ ପ୍ରବୁନ୍ ଦୂତ ମିସର୍‍ତାଗ୍ ଜସେପ୍‍ତିଙ୍କ୍ ଦର୍ଶନ୍ ଇସ୍‌ କେତ୍‍ତଣ୍ଡ୍,
MAT 2:20 “ତେଦ୍‍ଦେ, ପେକାଙ୍କ୍ ନୁ ତାମ୍ ୟାୟାଙ୍କ୍ ଅସ୍ ଇସ୍ରାୟେଲ୍ ଦେଶ୍‍ତାଗ୍ ମାଲ୍‍ସ୍ ଆନ୍‌ । ବାତେଙ୍କ୍ ଇତ୍‍କେ ବେନଡ଼୍ ଅଂକିଙ୍କ୍‌ ଜିୱୁଣ୍ଡ୍‌ ମାଡ଼ାଙ୍କ୍ ଆଲ୍‍ସି ମାତ୍‍ତଡ଼୍, ଅଡ଼୍‌ ଡଲ୍‍ତଡ଼୍ ।”
MAT 2:21 ଆଦିଙ୍କ୍ ଜସେପ୍ ପେକାଙ୍କ୍ ନୁ ମରିୟମ୍‍ତିଙ୍କ୍ ଅସ୍ ଇସ୍ରାୟେଲ୍ ଦେଶ୍‍ତାଗ୍ ମାଲ୍‍ସ୍ ଆତ୍‌ତଡ଼୍ ।
MAT 2:22 ବାତେଙ୍କ୍ ଇତ୍‍କେ ହେରଦନ୍ ପେର୍କେ ତାନ୍ ମାର୍‍ ଆରକିଲାୟ୍ ଯିହୁଦାତେ ରାଜାଲ୍ ଆତ୍‍ତଣ୍ଡ୍ ଇଞ୍ଜ କେଞ୍ଜି ଅଣ୍ଡ୍‌ ଆଗେ ଆତ୍‍ତାଙ୍କ୍ ୱେର୍‍ତଣ୍ଡ୍ ।
MAT 2:23 ମେଣ୍ଡେନ୍‍ଦାମ୍ ମେଣ୍ଡ୍‍ଅଣ୍ଡ୍‌‍ରକମ୍ ସପ୍ନତେ ଗଟ୍ ପାଏମ୍‍ଆସ୍ ଅଣ୍ଡ୍‌ ଗାଲିଲୀ ପ୍ରଦେଶ୍‍ତେ ନାଜରିତିୟ ସହର୍‍ତାଗ୍ ଲୋନ୍‌ ମାଡ଼ି ଆଗେ ମାତ୍‍ତଣ୍ଡ୍ । ଇଦିନ୍‍ତଡ଼୍ ବାବବାଦୀଡ଼ାଦ୍ ମଦଲ୍ କେତ୍‍ତାଦ୍ ଅଣ୍ଡୟ୍‌ ବାକ୍ୟ ସାରେ ଆତ୍‍ତେ, “ଅଣ୍ଡ୍‌ ନାଜରିତିୟ ଇଞ୍ଜ ପୁତ୍‍ତନ୍ ।”
MAT 3:1 ଆଦ୍ ସମୟ୍‍ତେ ବାପ୍ତିଜକ ଯୋହନ୍‌ ଯିହୁଦା ପ୍ରଦେଶ୍‍ତେ ଉଚ୍‍କନେଲ୍ ପଡ଼ିୟେତାଗ୍ ୱାସ୍ ପ୍ରଚାର୍‍ମାଡ଼ାଙ୍କ୍ ଆରାମ୍ ମାଡ଼୍‍ତଡ଼୍ ।
MAT 3:2 ଅଣ୍ଡ୍‌ କେସ୍‍ମାତ୍‍ତଣ୍ଡ୍, “ପାପ୍ ହାର୍‍ତାଗାଙ୍କ୍ ମାଲ୍‍ମୁଟ୍, ବାତେଙ୍କ୍ ଇତ୍‍କେ ଇଶ୍ୱର୍‍ ରାଜ୍ୟ ମି ଗାର୍‍ରେ ୱାସ୍ ହେୱ୍‍ସ୍ ମିନ୍ଦେ ।”
MAT 3:3 ଯିଶାଇ ବାବବାଦୀ ବେନ୍ ନାରୁଡ଼୍ ବିଷୟ୍‍ତେ କେସ୍‍ମାତ୍‍ତଣ୍ଡ୍, ଯୋହନ୍‌ ଆଦୁତନ୍ ଆଦ୍ ନାରୁଡ଼୍, “ଉଚ୍‍କନେଲ୍‍ତାଗ୍ ବେନ ୱେରଣ୍ଡ୍ ଗାଟି ଲେଙ୍ଗ୍‍ଦେ କେତୁତଣ୍ଡ୍, ପ୍ରବୁନ୍ ମାଇଦିଙ୍କ୍ ହାର୍ ତିଆର୍ ମାଡ଼ାଟ୍; ଅଣ୍ଡ୍‌ ୱାଦାନ୍ ସେଙ୍ଗେ ତିନାଙ୍କ୍ ଆର୍ ତିଆର୍ ମାଡ଼ାଟ୍ ।”
MAT 3:4 ଯୋହନ୍‌‌ତାଦ୍ ଚକା ଉଟ୍ କେଲ୍‍କିନ୍ ତିଆର୍ ଆସ୍‍ମାତ୍‍ତେ । ଅଣ୍ଡ୍‌ ତାନ୍ ଟିକିଡ଼୍‍ତାଗ୍ ଅଣ୍ଡୟ୍‌ ତଲ୍‌କେତଡ଼୍ ଗାଟ୍ ୱାଟ ମାତ୍‍ତଣ୍ଡ୍ । କାରାପ୍ ମାଡ଼େତ୍ କାୟା ନୁ ଗୁପ୍‍ତାଦ୍ ତେନେ ଅନାଦ୍‌ କାଦି ମାତ୍‍ତେ ।
MAT 3:5 ଯିରୁଶାଲେମ୍‌ ସହର୍‍କନ୍‍ସ୍, ଯିହୁଦା ପ୍ରଦେଶ୍ ନୁ ଯର୍ଦ୍ଦନ୍ ବେଡ଼େଡ଼୍‍ତେ ଗାର୍‍ରେ ସାରେ ପଡ଼ିୟେତାଗାଙ୍କ୍ ନାରୁଡ଼୍ ଅନ୍‌ ଗାର୍‍ରେ ୱାସ ମାତ୍‍ତଡ଼୍ ।
MAT 3:6 ଅଡ଼୍‌ ତାମାଦ୍ ପାପ୍‌ ସୀକାର ମାଡ଼ି ଯୋହନ୍‌ ତଡ଼୍ ଯର୍ଦ୍ଦନ୍ ବେଡ଼େମ୍‍ତାଗ୍ ବାପ୍ତିସ୍ମ ଅସମାତ୍‍ତଡ଼୍ ।
MAT 3:7 ବେସୁଟ୍‌ ଯୋହନ୍‌ ଉଡ଼୍‍ତଣ୍ଡ୍ ନାର୍‍ଗେ ପାରୂଶୀଡ଼୍ ନୁ ସାଦୁକିଡ଼୍ ବାପ୍ତିସ୍ମ ଅଦାନ୍ ମାଇଦିଙ୍କ୍ ୱାଦୁତଡ଼୍; ଅଡ଼୍‌‍କିଂଙ୍କ୍ ଅଣ୍ଡ୍‌ କେତ୍‍ତଣ୍ଡ୍, “ରେ ୱିସାମ୍ ମାନ୍ଦାନ୍ ତାଡ଼ାମ୍‍ ବଂଶତଡ଼୍, ୱାଦାନ୍ ଦଣ୍ଡତେ ୱେଲେ ମିରାନଙ୍କ୍ ସେଙ୍ଗେ ବେନ ମିକିଂଙ୍କ୍ ଚେତନା ହିତ୍‍ତଣ୍ଡ୍ ?
MAT 3:8 ଯଦି ନିଜାମ୍ ପାପ୍‍ତାଗାଙ୍କ୍ ମାଲ୍‍ସ୍ ୱାତ୍‍ତିଡ଼୍, ଇଦ୍ ମିଡ଼୍ ସାୟେତ୍ ପାଡ଼ିୟିଦାଗ୍ ତଅମୁଟ୍ ।
MAT 3:9 ଆଲ୍‍ସ୍‍ମାଟ୍ ଯେ ଅବ୍ରାହାମ୍‌ ମିଇ ମୁନେତ୍ ନାରୁଡ଼୍ ଇଞ୍ଜ କେତ୍‍ତାନ୍ ତଡ଼୍ ମିଡ଼୍ ଦଣ୍ଡତାଗାଙ୍କ୍ ରକ୍ଷା ଦର୍‍କିତ୍ । ନାନ୍ ମିକିଂଙ୍କ୍ କେସମିନ୍ଦେନ୍ ଯେ ଇଶ୍ୱର୍ ଇୱୁ କାଲ୍‍କିଙ୍କ୍ ଅସ୍ ଅବ୍ରାହାମ୍‌ତେ ବଂଶତେ ତିଆର୍ ମାଡ଼େ ପାର୍‍ଦ୍‍ତଣ୍ଡ୍ ।
MAT 3:10 ମେଣ୍ଡେ, ଇଞ୍ଜେ ମିକା ମାଡ଼ାକିନ୍ ମଦଲ୍ ଗଡେଲ୍‍ ମିନ୍ଦେ । ବେନ୍ ମାଡ଼ାକିନାଗ୍ କାୟା ସାୟେ ଆଦକ୍, ଆୱିଙ୍କ୍ ନାଡ଼୍‍କି କିସ୍‍ତାଗ୍ ୱାଟିତଡ଼୍ ।
MAT 3:11 ମିଡ଼୍ ପାପ୍‍ତାଗାଙ୍କ୍ ମାନ୍‍ତିଙ୍କ୍ ମାଲ୍‍ପାଟ୍‍, ଇଦ୍ କେଞ୍ଜ୍‍ପାନଙ୍କ୍ ନାନ୍ ମିକିଂଙ୍କ୍ ଏର୍‍ଦାଗ୍ ବାପ୍ତିସ୍ମ ହିଦୁତାନ୍ । ବାତେଙ୍କ୍ ଇତ୍‍କେ ନା ଅଦିକ୍‍ ବେନ ୱାଦୁତଣ୍ଡ୍, ଅଣ୍ଡ୍‌ ମିକିଂଙ୍କ୍ ପବିତ୍ର ଆତ୍ମା ନୁ କିସ୍‍ତାଗ୍ ବାପ୍ତିସ୍ମ ହିଦ୍‍ତଣ୍ଡ୍ । ଅଣ୍ଡ୍‌ ନାୟାଗାଙ୍କ୍ ମହାନ୍ ଅନାୱୁ ହେର୍‍ପୁକ୍ କାଞ୍ଜାଙ୍କ୍ ମିକା ନାନ୍ ଯୋଗ୍ୟ ଆୟନ୍ ।
MAT 3:12 ଶସ୍ୟତାଗାଙ୍କ୍ ପଲେତିଙ୍କ୍ ତୁଉତାନ୍ ମାଇଦିଙ୍କ୍ ଅନ୍‌ କାଇଦେ ଏତ୍ ମିନ୍ଦେ । ଅଣ୍ଡ୍‌ ଶସ୍ୟକିଙ୍କ୍ ତାନ୍ କୁସ୍‍ତାଗ୍ ନେହେତିତଣ୍ଡ୍ ନୁ ପଲେତିଙ୍କ୍ ନିଡ଼୍‍ତାନାଦ୍ କିସ୍‍ତାଗ୍ ୱାଟି ପଡ଼୍‍ସ୍ପିତଣ୍ଡ୍ ।”
MAT 3:13 ଆସୁଟେ ଜିସୁ ଗାଲିଲୀ ପ୍ରଦେଶ୍‍ତେ ନାଜରିତିୟ ତାଗାଙ୍କ୍ ୱାସ୍ ବାପ୍ତିସ୍ମ ଗ୍ରହନ୍ ମାଡ଼ାନ୍ ମାଇଦିଙ୍କ୍ ଯର୍ଦ୍ଦନ୍ ବେଡ଼େମ୍‍ତାଗ୍ ଆଞ୍ଚିନାଗ୍ ଯୋହନ୍‌‌ତେ ଗାର୍‍ରେ ୱାତ୍‍ତଣ୍ଡ୍ ।
MAT 3:14 ଯୋହନ୍‌ ଜିସୁଙ୍କ୍ ମନାମାଡ଼ି କେତ୍‍ତଣ୍ଡ୍, “ନାନ୍ ସିନା ନିୟାଗାଙ୍କ୍ ବାପ୍ତିସ୍ମ ଅଦାନ୍ ମାତ୍‍ତେ ମିକା ନିମ୍‍ ନା ଗାର୍‍ରେ ୱାତ୍‍ତିନ୍ ?”
MAT 3:15 ବାତେଙ୍କ୍ ଇତ୍‍କେ ଜିସୁ ଉତ୍ତର୍ ହିତ୍‍ତଣ୍ଡ୍, “ନାୱାଦ୍ ଗଟ୍‍ତେ ରାଜି ଆୟିମ୍ । ବାତେଙ୍କ୍ ଇତ୍‍କେ ଇଦିନ୍ ତଡ଼୍ ମାନାଡ଼୍ ଇଶ୍ୱର୍‌ତେ ଇଚ୍ଛା ଲେକାମ୍ ପାଡ଼୍‍ୟି ମାଡ଼୍‍ପାର୍‍ଦ୍‍ତାଡ଼୍ ।” ଆଦିଙ୍କ୍ ଯୋହନ୍‌ ଅଂକିଙ୍କ୍‌ ବାପ୍ତିସ୍ମ ହିଦାଙ୍କ୍ ରାଜି ଆତ୍‍ତଣ୍ଡ୍ ।
MAT 3:16 ଜିସୁ ବାପ୍ତିସ୍ମ ହସ୍ ଏର୍‍ତାଗାଙ୍କ୍ ତେଦି ୱାତ୍‍ତେ ସାଙ୍ଗେ ସାଙ୍ଗେ ଅଣ୍ଡ୍‌ ଉଡ଼୍‍ତଣ୍ଡ୍ ସ୍ୱର୍ଗ କୁଲେମ୍ ଆତ୍‍ତେ ନୁ ପବିତ୍ର ଆତ୍ମା ପାର୍ୱା ରକମ୍ ହାସ୍ ଅନ୍‌ ପର୍‍ର ଡିଗ୍‍ତେ ।
MAT 3:17 ତାନ୍ ପେର୍କେ ସ୍ୱର୍ଗକନ୍‍ସ ଇଦ୍ ବାଣି ଆତ୍‍ତେ, “ନିମେ ମା ପ୍ରିୟ ମାର୍‍, ନିୟାଗେ ନାନେ ଗାଟି ସନ୍ତୁଷ୍ଟ ।”
MAT 4:1 ଆସୁଟେ ପବିତ୍ର ଆତ୍ମା ଜିସୁଙ୍କ୍ ଉଚ୍‍କନେଲ୍‍ତାଗ୍ ଅଂକିଙ୍କ୍‌ ସିମ୍‍ସାମ୍ ପଡ଼ିୟେତାଗ୍ ଅତ୍‍ତେ । ଆଗେ ଅଣ୍ଡ୍‌ ଶୟ୍‍ତାନ୍‍ ତଡ଼୍ ପରିକ୍ଷିତ୍ ଆତ୍‍ତଣ୍ଡ୍ ।
MAT 4:2 ଚାଲିଶି ଦିନ୍ ନୁ ଚାଲିଶି ନାର୍‍କେତ୍ କାଦି ତିନକଟ୍ ମାତ୍‍ତାଙ୍କ୍ ପେର୍କେ ଜିସୁଙ୍କ୍ କାର୍‍ପୟିତେ ।
MAT 4:3 ଆସୁଟେ ଶୟ୍‍ତାନ୍‍ ଅନ୍‌ ଗାର୍‍ରେ ୱାସ୍ କେତ୍‍ତଣ୍ଡ୍, “ନିମେ ଯଦି ଇଶ୍ୱର୍‌ ତେ ମାର୍‍, ଆଲାତ୍କେ ଇଦ୍ କାଲ୍‍ଦିଙ୍କ୍ ରୋଟି ଆଦାନ୍ ସେଙ୍ଗେ ଗଟ୍ ହିମ୍ ।”
MAT 4:4 ଇତ୍‍କେ ଜିସୁ ଉତ୍ତର୍ ହିତ୍‍ତଣ୍ଡ୍, “ଶାସ୍ତ୍ରତାଗ୍ ଲେକାମିନ୍ଦେ, ‘ନାରୁଡ଼୍ ବେସୁଣ୍ଟ୍ ରୋଟି ତିଞ୍ଜ୍‌ ବାଦ୍‍କଡ଼୍ । ବାତେଙ୍କ୍ ଇତ୍‍କେ ଇଶ୍ୱର୍‌ତେ ପାୟୁର୍‍ତାଗାଙ୍କ୍ ପେୟ୍‍ତେ ସାରେ ବାକ୍ୟ ତଡ଼୍ ବାଦ୍‍କିତଣ୍ଡ୍ ।’”
MAT 4:5 ଇଦିନ୍ ପେର୍କେ ଶୟ୍‍ତାନ୍‍ ଜିସୁଙ୍କ୍ ପବିତ୍ର ନାର୍ ଜିରୁଶାଲମ୍‍ତାଗ୍ ଅତ୍‍ତେ । ଆଗେ ଅଂକିଙ୍କ୍‌ ମନ୍ଦିର୍‍ତେ ପର୍‍ର ଜୁଟିନାଗ୍ ଅସ୍‍ କେତ୍‍ତେ,
MAT 4:6 ନିମେ ଯଦି ଇଶ୍ୱରତେ ମାର୍‍, ଆଲାତ୍କେ ଇଗାଙ୍କ୍ ମଦଲ୍ ତୁଲ୍‍ଲେ । ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ନିକିଂଙ୍କ୍ ରକ୍ଷା ମାଡ଼ାନ୍ ସେଙ୍ଗେ ଇଶ୍ୱର୍‌ ତାନ୍ ଦୂତକିଂଙ୍କ୍ ନି ବିଷୟ ତେ ଆଦେଶ୍‍ ହିଦ୍‍ତଣ୍ଡ୍ । ଅଡ଼୍‌ ନିକିଂଙ୍କ୍ କାଇଦେ ପୟିଦ୍‍ତଡ଼୍ । ଆଦିଙ୍କ୍ ନିୟାୱୁ ଡେକାନାଗ୍ କାଲ୍‍କିନ୍ ଦେବ୍‍ ତାଲ୍‍ଗ ।”
MAT 4:7 ମେଣ୍ଡେ, ଜିସୁ ଶୟ୍‍ତାନ୍‍ ତିଙ୍କ୍ କେତ୍ତଣ୍ଡ୍‍, “ଶାସ୍ତ୍ରତାଗ୍ ଲେକାମିନ୍ଦେ, ନିମେ ପ୍ରବୁ ନିଜର୍ ଇଶ୍ୱର୍‌ ତିଙ୍କ୍ ପରିକ୍ଷା ମାଡ଼ାନାଦ୍ ଆୟ୍‍ୟ ।”
MAT 4:8 ତାନ୍ ପେର୍କେ ଶୟ୍‍ତାନ୍‍ ଅଣ୍ଡୟ୍‌‍ ବେଡ଼୍‍ୟାଦ୍‍ ମେଟେତ୍ ଜୁଟିନାଗ୍ ଅତ୍‍ତେ ନୁ ଅଂକିଙ୍କ୍‌ ଜଗତ୍‍ତାଦ୍ ସାରେ ରାଜ୍ୟତାଦ୍ ସମ୍ପତି ତଅସ୍ କେତ୍‍ତଣ୍ଡ୍,
MAT 4:9 ଶୟ୍‍ତାନ୍‍ ଜିସୁଙ୍କ୍ କେତ୍‍ତେ, “ଯଦି ନିମ୍‍ ନାକିଂଙ୍କ୍ ମର୍‍ମିଣ୍ଡା ଇସ୍‌ ପୁଜା ମାଡ଼ିତିନ୍, ନାନ୍ ନିକିଂଙ୍କ୍ ଇଦ୍ ସାରେ ଅଦିକାର ନୁ ଇଦ୍ ସାରେ ସମ୍ପତ୍ତି ହିଦ୍‍ତାନ୍ ।”
MAT 4:10 ଜିସୁ ଉତ୍ତର୍ ହିତ୍‍ତଣ୍ଡ୍, “ଜେକେ ଆନ୍‌ ଶୟ୍‍ତାନ୍‍ ! ଦର୍ମଶାସ୍ତ୍ରତାଗ୍ ଲେକାମିନ୍ଦେ, ‘ମାତର୍ ନି ପ୍ରବୁ ଇଶ୍ୱର୍‌ତିଙ୍କ୍ ଉପବାସ୍ ମାଡ଼େ ନୁ ଅନାଦ୍‌ ସେବା ମାଡ଼େ ।’”
MAT 4:11 ତାନ୍‍ପେର୍କେ ଶୟ୍‍ତାନ୍‍ ଅଂକିଙ୍କ୍‌ ୱିଡ଼୍‍ସି ଆତ୍‍ତେ ନୁ ଦୂତ ୱାସ୍ ଜିସୁନାଦ୍ ଯତ୍ନ ଅତ୍‍ତଡ଼୍ ।
MAT 4:12 ଯୋହନ୍‌‌ତିଙ୍କ୍ ବନ୍ଦି ମାଡ଼୍‍ତଡ଼୍ ଇଞ୍ଜ କେଞ୍ଜି ଜିସୁ ଗାଲିଲୀତାଗ୍ ମାଲ୍‍ସ୍ ୱାତ୍‍ତଣ୍ଡ୍ ।
MAT 4:13 ବାତେଙ୍କ୍ ଇତ୍‍କେ ନାଜରିତିୟ ତାଗ୍ ମାନକନ୍‍ସ୍ ସବୁଲୁନ୍‍ ନୁ ନପ୍‍ତାଲି ପଡ଼ିୟେତାଗ୍ ମାନ୍ଦାନ୍ ଗାଲିଲୀ ସାୱ୍‍ଡ଼େତ୍ ଆଞ୍ଚିନାଗ୍ ମାନ୍ଦାନ୍ କପର୍ନାହୁମ୍‍‍ତାଗ୍ ଅଦ୍‍ତଡ଼୍ ।
MAT 4:14 ଇଦିନ୍ ତଡ଼୍ ବାବବାଦୀ ଜିଶାଇୟତାଦ୍ ବାକ୍ୟ ସାରେ ଆତ୍‍ତେ । ଅଣ୍ଡ୍‌ କେସ୍‍ମାତ୍‍ତଣ୍ଡ୍,
MAT 4:15 “ଜର୍ଦନ୍ ବେଡ଼େତ୍ ମେଣ୍ଡେଅନ୍‌‍ପାକ୍ ସମୁଦ୍ରତା ଆଦାନ୍ ହାର୍‍ଦାଗ୍, ଜବୁଲନ୍ ନୁ ନପ୍‍ତାଲି ରେଣ୍ଡ୍ ଦେଶ୍‍କ୍ ମିନ୍ଦେ ମେଣ୍ଡେ ବିଜାତି ନାରୁଡ଼ାଦ୍ ଗାଲିଲୀ !
MAT 4:16 ଇକାଡ଼୍‌ତାଗ୍ ମାଞ୍ଜ୍ ମାଡ଼ମାନ୍ଦାନ୍ ନାରୁଡ଼୍ ଅଣ୍ଡୟ୍‌‍ ସାଏତ୍ ୱେସ୍ ଉଡ଼ିତଡ଼୍, ଡଲ୍‍ନାଦ୍ ନିଡ଼୍‍କେତ୍ ସହର୍‍ତାଗ୍ ମାନ୍ଦାନ୍ ନାରୁଡ଼୍‍ତେ ପର୍‍ର ଆଦ୍ ୱେସ୍ ସାର୍‍ରେ ପାକେ ଆଦ୍‍ତେ ।”
MAT 4:17 ଆଦ୍ ସମୟ୍‍ତେ କନ୍‍ସ୍ ଜିସୁ ପ୍ରଚାର୍ ମାଡ଼ି କେତ୍‍ତଣ୍ଡ୍, “ପାପ୍ ହାର୍‍ତାଗାଙ୍କ୍ ମାଲ୍‍ମୁଟ୍, ବାତେଙ୍କ୍ ଇତ୍‍କେ ଇଶ୍ୱର୍‍ ରାଜ୍ୟ ମି ଗାର୍‍ରେ ୱାସ୍ ହେୱ୍‍ସ୍ ମିନ୍ଦେ ।”
MAT 4:18 ଜିସୁ ଗାଲିଲୀ ସାୱ୍‍ଡ଼େତ୍ ଆଞ୍ଚ୍ଇସ୍‌ ଆଦାନ୍ ୱେଲେ ଶିମୋନ୍ ପିତର୍ ନୁ ଆନ୍ଦ୍ରିୟ ପେଦେର୍‍ତେ ଇର୍‍ୱୁଡ଼୍ କିକେ ପୟ୍‍ତାନଡ଼୍‍କ୍ କାଇଲ୍‍ତଣ୍ଡ୍ । ଇଡ଼୍ ତାମୁଣ୍ଡ୍‌ ଇର୍‍ୱୁଡ଼୍ ୱାଲେ ୱାଟି ସାୱ୍‍ଡ଼େତାଗ୍ କିକେ ପୟ୍‍ସମାତ୍‍ତଡ଼୍‍ ।
MAT 4:19 ଜିସୁ ଅଡ଼୍‌‍କିଂଙ୍କ୍ କାର୍‍ଙ୍ଗି କେତ୍‍ତଣ୍ଡ୍, “ନା ତଡ଼୍ ୱାଡ଼ାଟ୍ । ନାନ୍ ମିକିଂଙ୍କ୍ ନାରୁଡ଼୍‍କିଂଙ୍କ୍ ପଇତାନାଦ୍ ନାଡ଼୍‍ସ୍ପିତ୍‍ତାନ୍ ।”
MAT 4:20 ଅଡ଼୍‌ ସାଙ୍ଗେ ସାଙ୍ଗେ ଅଡ଼ାୱୁ ୱାଲା ୱିଡ଼୍‍ସି ଅନ୍‌ ତଡ଼୍ ଆତ୍‍ତଡ଼୍ ।
MAT 4:21 ଜିସୁ ସୁଦୁଟ୍ ମୁନେ ଆଞ୍ଜ୍ ଯାକୁବ୍ ନୁ ଯୋହନ୍‌ ପେଦେର୍‍ତେ ଜେବଦିତେ ଇର୍‍ୱୁଡ଼୍ ମାର୍‍କିଙ୍କ୍ କାଇଲ୍‍ତଣ୍ଡ୍ । ଇଡ଼୍ ତାମୁଣ୍ଡ୍‌ଇର୍‍ୱୁଡ଼୍ ନୁ ତାମ୍ ବାବାଲ୍ ଓଡ଼େତାଗ୍ କୁଦି ତାମାଦ୍ ୱାଲା ମଦ୍‍ଦା ମାଡ଼ମାତ୍‍ତଡ଼୍ ।
MAT 4:22 ଜିସୁ ଅଡ଼୍‌‍କିଂଙ୍କ୍ ମିକା କାର୍‍ଙ୍ଗ୍‍ତଣ୍ଡ୍ ମେଣ୍ଡେ ଅଡ଼୍‌ ସାଙ୍ଗେ ସାଙ୍ଗେ ଓଡେ ନୁ ତାମ୍‌ ବାବାଙ୍କ୍ ୱିଡ଼୍‍ସି ଜିସୁନ୍ ତଡ଼୍‍ ଆତ୍‍ତଡ଼୍ ।
MAT 4:23 ଜିସୁ ଗାଲିଲୀତେ ସାରେତାଗ୍ ଉଡିଉଡି ପ୍ରାର୍ତନା ଲୋକିନାଗ୍ ଶିକ୍ଷା ଇତ୍‌ତଣ୍ଡ୍‌ । ଇଶ୍ୱର୍‌ତେ ରାଜ୍ୟତାଦ୍ ସୁସମାଚାର୍ ପ୍ରଚାର୍ ମାଡ଼୍‍ତଣ୍ଡ୍ ମେଣ୍ଡେ ନାର୍‍ଗେ ଲେକାମ୍ ରଗି ନୁ ରଗ୍‍ତେ ନାରୁଡ଼୍‍କ୍ ସୁସ୍ଥ ମାଡ଼୍‍ତଣ୍ଡ୍ ।
MAT 4:24 ସିରିଆତେ ସାରେତାଗ୍ ଅନ୍‌‍ୱାଦ୍ କ୍ୟାତି ସାରେପାକ୍ ଆତ୍‍ତେ ମେଣ୍ଡେ ନାରୁଡ଼୍ ବୁତ୍ ପୟ୍‍ତେନଡ଼୍‍କ୍, ମୁର୍ଚ୍ଛା ରଗିଡ଼୍‍କ୍, ପକ୍ଷାଗାତ୍ ରଗିଡ଼୍‍କ୍ ସାରେ ଲେକାତ୍ ଦୁଃକି ନାରୁଡ଼୍‍କ୍ ଅନ୍‌ ଗାର୍‍ରେ ତାତ୍‍ତଡ଼୍ ।
MAT 4:25 ଜିସୁ ଅଡ଼୍‌ ସାରେ ତଡ଼୍‍କିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ । ଗାଲିଲୀ, ଦେକାପଲୀ, ଯିରୁଶାଲେମ୍‌, ଯିହୂଦା ପ୍ରଦେଶ୍ ନୁ ଜର୍ଦନ୍ ବେଡ଼େତ୍ ଆପାକେ ମାନ୍ଦାନ୍ ପଡ଼ିୟେତାଗାଙ୍କ୍ ନାର୍‍ଗେ ନାରୁଡ଼୍ ଜିସୁନ୍‌ ପେର୍କେ ଆତ୍‍ତଡ଼୍ ।
MAT 5:1 ଜିସୁ ନାର୍‍ଗେ ନାରୁଡ଼୍‍କିଂଙ୍କ୍ ଉଡ଼ି ଅଣ୍ଡୟ୍‌ ମେଟେତାଗ୍ ଆଞ୍ଜ୍ କୁଦ୍‍ତଣ୍ଡ୍ । ଶିଷ୍ୟଡ଼୍ ଅଂକିଙ୍କ୍‌ ଗେରାମାଡ଼ି ମାତ୍‍ତଡ଼୍ ।
MAT 5:2 ଆଗାଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ଶିକ୍ଷାଇସ୍‌ କେତ୍‍ତଣ୍ଡ୍ ।
MAT 5:3 “ଆଦ୍ୟାତ୍ମିକ୍ ଜିୱୁନ୍‍ତାଗ୍ ଦୁର୍ବଲ୍ ଇଞ୍ଜ ଏର୍କା ମାଡ଼ାନ୍ ନାରୁଡ଼୍ ଦନ୍ୟ,” ବାତେଙ୍କ୍ ଇତ୍‍କେ ଅଡ଼୍‌ ସ୍ୱର୍ଗରାଜ୍ୟତେ ଅଦିକାର ଆଦ୍‍ତଡ଼୍ ।
MAT 5:4 ଦୁଃକାମ୍ ନାରୁଡ଼୍ ଦନ୍ୟ, ବାତେଙ୍କ୍ ଇତ୍‍କେ ଇଶ୍ୱର୍ ଅଡ଼୍‌‍କିଂଙ୍କ୍ ସାନ୍ତନା ହିଦ୍‍ତଣ୍ଡ୍ ।
MAT 5:5 ନମ୍ର ନାରୁଡ଼୍ ଦନ୍ୟ, ବାତେଙ୍କ୍ ଇତ୍‍କେ ଅଡ଼୍‌ ପୃତିବିତେ ଅଦିକାରି ଆଦେପାର୍‍ଦ୍‍ତଡ଼୍ ।
MAT 5:6 ଇଶ୍ୱର୍‌ତେ ଇଚ୍ଛା ଲେକାମ୍ ପାଡ଼୍‍ୟି ମାଡ଼ାନଙ୍କ୍ ବେନଡ଼ାଦ୍ ଇଚ୍ଛା, ଅଡ଼୍‌ ଦନ୍ୟ, ବାତେଙ୍କ୍ ଇତ୍‍କେ ଇଶ୍ୱର୍ ଅଡ଼୍‌‍କିଂଙ୍କ୍ ଶାନ୍ତି ମାଡ଼ିତନ୍ ।
MAT 5:7 ବେନଡ଼୍ ବାଗାତ୍ ନାରୁଡ଼୍ ସେଙ୍ଗେ ଦୟାବାନ୍ ଆଦ୍‍ତଡ଼୍ ଅଡ଼୍‌ ଦନ୍ୟ, ବାତେଙ୍କ୍ ଇତ୍‍କେ ଇଶ୍ୱର୍ ଅଡ଼୍‌‍କିଂଙ୍କ୍ ଦୟାମାଡ଼ିତଣ୍ଡ୍ ।
MAT 5:8 ବେନଡ଼ାଦ୍ ହୃଦୟ୍ ନିର୍ମଲ୍ ଅଡ଼୍‌ ଦନ୍ୟ, ବାତେଙ୍କ୍ ଇତ୍‍କେ ଅଡ଼୍‌ ଇଶ୍ୱର୍‌ତେ ଦର୍ଶନ୍ ଉଡ଼ିତଡ଼୍ ।
MAT 5:9 ବେନଡ଼୍ ଶାନ୍ତି ମାଡ଼ାନଙ୍କ୍ ଆଲ୍‍ସି ତଡ଼୍ ଅଡ଼୍‌ ଦନ୍ୟ, ବାତେଙ୍କ୍ ଇତ୍‍କେ ଅଡ଼୍‌ ଇଶ୍ୱର୍‌ତେ ମାର୍‍ ରକମ୍ ପୁନ୍ଦାଙ୍କ୍ ଆଦ୍‍ତଡ଼୍ ।
MAT 5:10 ବେନଡ଼୍ ଇଶ୍ୱର୍‌ତେ ଇଚ୍ଛା ଲେକାମ୍ ପାଡ଼୍‍ୟି ମାଡ଼ି ତାଡ଼ନା ପାହେମ୍‍ ଆଦ୍‍ତଡ଼୍‍, ଅଡ଼୍‌ ଦନ୍ୟ, ବାତେଙ୍କ୍ ଇତ୍‍କେ ଅଡ଼୍‌ ସ୍ୱର୍ଗରାଜ୍ୟତେ ଅଦିକାରିଡ଼୍‍ ଆଦ୍‍ତଡ଼୍‍ ।
MAT 5:11 “ନାରୁଡ଼୍ ବେସୁଣ୍ଟ୍ ନାକିଂଙ୍କ୍ ପେର୍କେ ମାଡ଼ି ମାନ୍ଦାନ୍ ମାଇଦିଙ୍କ୍ ନାରୁଡ଼୍ ଯଦି ମିକିଂଙ୍କ୍ ଅପ୍‍ମାନ୍ ମାଡ଼ିତଡ଼୍, ଗାଟିତିପାଲ୍ ହିଦ୍‍ତଡ଼୍ ନୁ ମିଇ ବିରୁଦ୍ଦ୍‌ତେ ବୁସା କେତିତଡ଼୍‍,
MAT 5:12 ମିଡ଼୍ ୱେଡ଼୍‌କେ ମାଡ଼ି ହେନ୍ଦାଟ୍‌ ।” ବାତେଙ୍କ୍ ଇତ୍‍କେ ସ୍ୱର୍ଗତାଗ୍ ମିଇ ସେଙ୍ଗେ ବେଡ଼୍‍ୟାଦ୍‍ ପୁରସ୍କାର୍ ମିନ୍ଦେ । ହେର୍କା ମାଡ଼ାଟ୍ ମିଇ ମୁନେତ୍ ବାବବାଦୀଡ଼୍‍, ମିକା ଇଦ୍ ରକମ୍ ଗାଟିତିପାଲ୍ ହାସ୍ ମାତ୍‍ତଡ଼୍ ।
MAT 5:13 “ମିଡ଼୍ ସାରେତଡ଼ି ମାନେୟ୍‍ତେ ଜାତିଡ଼୍ ପୃତିବିତେ ଅୱଡ଼୍‌ ଲେକାମ୍ । ବାତେଙ୍କ୍ ଇତ୍‍କେ ଅୱଡ଼୍‌ ଯଦି ତାନାଦ୍ ମିଙ୍ଗାନାଦ୍ ଗୁଣ୍ ଆରାମାଡ଼ିତ୍, ଆସୁଙ୍କ୍ ମେଣ୍ଡେ ଅୱଡ଼୍‌ ମାଡ଼ାଙ୍କ୍ ପାର୍‍ୱାଦ୍ । ତାନ୍ ପେର୍କେ ଆଦ୍ ପୁରାପୁରି ଦର୍‍କାର୍ ଆୟ୍‍ୟ ତାଙ୍କ୍ ବାଇଦେ ହେସ୍‍ସିଦ୍‍ତଡ଼୍ । ନାରୁଡ଼୍ ତାଙ୍କ୍ ୱିକି ଆଦ୍‍ତଡ଼୍ ।”
MAT 5:14 “ମିଡ଼୍ ସାରେ ଜଗତ୍‍ତେ ୱେସ୍ ଲେକାମ୍ ।” ବେନ୍ ନାର୍ ମେଟେତ୍ ପର୍‍ର ତିଆର୍ ଆତ୍‍ତେ, ଆଦ୍ ବେସୁଙ୍କ୍‍ ବା ମିଞ୍ଜିମେଣ୍ଡେ ମାନ୍ଦାଙ୍କ୍ ପାର୍‍ୱ ।
MAT 5:15 କୁପିତିଙ୍କ୍ ନିଡ଼୍‍ସ୍‍ପି ବେନ ବଡ୍ ତଡ଼୍ ମୁସି ୱାଟଣ୍ଡ୍ । ଆଦିଙ୍କ୍ କୂପିୱାଟାନାଗ୍ ୱାଟିତଣ୍ଡ୍ ମେଣ୍ଡେ ଆଦ୍ ଲୋନ୍‌ ମାନ୍ଦାନ୍ ସାରେତଡ଼୍‌କିଂଙ୍କ୍ ୱେସ୍ ହିଦ୍‍ତେ ।
MAT 5:16 ଆଦେପୁଟୁଙ୍କ୍ ମିୱାଦ୍ ୱେସ୍ ସାରେତଡ଼୍ ଗାର୍‍ରେ କେଲିନ୍ । ଆଲେକେ ମିୱାଦ୍ ସତ୍‍କାମ୍ ସାରେ ଉଡ଼ି ଅଡ଼୍‌ ମିଇ ସ୍ୱର୍ଗତଣ୍ଡ୍ ବାବାଲ୍ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ିତଡ଼୍ ।
MAT 5:17 “ହାଲ୍‍ସ୍‍ମାଟ୍ ଯେ ନାନ୍ ମଶାଲ୍‌ ହିତ୍‍ତାଦ୍ ନିୟମ୍ ନୁ ବାବବାଦୀଡ଼ାଦ୍ ଶିକ୍ଷା ସାରେ ଲପ୍ ମାଡ଼ାନଙ୍କ୍ ଆୟ୍‍ୟ ବେଲାନ୍ ସାରେ ମାଡ଼ାଙ୍କ୍ ନାନ୍ ୱାତ୍‍ତାନ୍ ।”
MAT 5:18 ନାନ୍‍ ନିଜାମ୍‍ କେତୁତାନ୍‍ ହେର୍କେମାଡ଼ାଟ୍, ସ୍ୱର୍ଗ ନୁ ପୃତିବି ତିଷ୍ଟି ମାନ୍ଦାନ୍ ଯାକ ଦର୍ମଶାସ୍ତ୍ର ନିୟମ୍‍ତାଦ୍ ଅଣ୍ଡୟ୍‌ ଚିହ୍ନେ ବା ବିସର୍ଗ ଲପ୍‍ପାଏମ୍ ଆୟ୍‍ୟ । ସାରେ ବିଷୟ୍ ଶେଷ୍ ଆଦାନ୍ ଯାକ ଇଦ୍ ଗଟେମ୍ ଆୟ୍‍ୟ ।
MAT 5:19 ଆଦିଙ୍କ୍ ବେନ ଆୟି ନିୟମ୍‍ତାଦ୍ ସାରେତିଙ୍କ୍ ସୁଦୁରାଦ୍ ଗଟ୍‍ତିଙ୍କ୍ ପାଲନ୍ ମାଡ଼ନ୍ ମେଣ୍ଡେ ଆଦେପୁଟୁଙ୍କ୍ ମାଡ଼ାନଙ୍କ୍ ବାଗାତଡ଼୍‍କ୍ ଶିକ୍ଷା ହିଦ୍‍ତଣ୍ଡ୍, ଅଣ୍ଡ୍‌ ସ୍ୱର୍ଗରାଜ୍ୟତାଗ୍ ସାରେତିଙ୍କ୍ ସୁଦୁନଣ୍ଡ୍ ଇଞ୍ଜ କ୍ୟାତି ଆଦ୍‍ତନ୍ ।
MAT 5:20 ଆଦିଙ୍କ୍ ନାନ୍ କେତୁତାନ୍, ଦର୍ମଗୁରୁ ନୁ ପାରୂଶୀ ଡ଼ାଗାଙ୍କ୍ ଗାଟି ବିଶ୍ୱାସ୍ ମାଡ଼ି ଇଶ୍ୱର୍‌ତେ ପାଡ଼୍‍ୟି ମାଡ଼୍‍କେ ଆଞ୍ଜ୍ ମିଡ଼୍ ସ୍ୱର୍ଗରାଜ୍ୟତାଗ୍ ହସାଙ୍କ୍ ପାର୍‍ଦ୍‍ତିନ୍ ।
MAT 5:21 “ବେବିଚାର୍ ମାଡ଼୍‍ମାଟ୍, ହିଦ୍ ଗଟ୍ ମିଡ଼୍ ମୁନେତ୍ କନ୍‍ସ୍ କେଞ୍ଜି ୱାଦୁତିଡ଼୍ । ବେନ ଆଦ୍ ମାଡ଼ିତନ୍, ଅଣ୍ଡ୍‌ ବିଚାରିତ ଆସ୍ ଦଣ୍ଡ୍ ଜିୱେଦର୍‍କିତ୍ ।”
MAT 5:22 ବାତେଙ୍କ୍ ଇତ୍‍କେ ନାନ୍ କେତୁତାନ୍, ବେନ ବେନ୍‌ଆଇ ତାମୁଣ୍ଡ୍‌ତେ ପର୍‍ର କପାମ୍ ଆଦ୍‍ତନ୍, ଅଣ୍ଡ୍‌ ମିକା ବିଚାରିତ ଆସ୍ ଦଣ୍ଡ୍ ଜିୱେଦର୍‍କିତ୍ । ବେନ ତାମୁଙ୍କ୍ ବାକ୍‍ୱା ଇଞ୍ଜ କେସ୍ ପରିହାସ୍ ମାଡ଼ିତନ୍, ଅଣ୍ଡ୍‌ ବେଡ଼୍‍ୟାଦ୍‍ ବିଚାରାଲୟତାଗ୍ ଦଣ୍ଡ୍ ଜିୱେଦର୍‍କିତ୍ । ମେଣ୍ଡେ ବେନ ତାମୁଙ୍କ୍ ମୁର୍କ ଇଞ୍ଜ କେତିତଣ୍ଡ୍, ଅଣ୍ଡ୍‌ ନର୍‍କତେ କିସ୍‍ତାଗ୍ ହେସାନାଦ୍ ଦଣ୍ଡ୍ ଜିୱେଦର୍‍କିତ୍ ।
MAT 5:23 ଆଦିଙ୍କ୍ ଇଶ୍ୱର୍ ଗଟ୍‍ତେ ବଲି ହିଦାଙ୍କ୍ ଆଦାନ୍ ୱେଲେ ଯଦି ନିକିଂଙ୍କ୍ ହେର୍କା ୱାଦ୍‍ତେ ଯେ ନି ସେଙ୍ଗେ ବେନ୍‌ଆଇ ତାମୁଣ୍ଡ୍‌ତେ ମନ୍‍ତାଗ୍ ବାତ୍‍ଆଇ ଲେକେତ୍‍ ଆୟ୍‍ୱେ ମିନ୍ଦେ,
MAT 5:24 ବେଦିତ୍ ମୁନ୍‍ନେ ଆଦ୍ ବଲିତିଙ୍କ୍ ୱିଡ଼୍‍ସିମିକା ସାଙ୍ଗେ ସାଙ୍ଗେ ଆଞ୍ଜ୍, ତାମୁଣ୍ଡ୍‌ତଡ଼୍ ମେଣ୍ଡେନ୍‍ଦାମ୍ କାଇଲେ, ମେଣ୍ଡେ ମାଲ୍‍ସ୍ ୱାସ୍ ଇଶ୍ୱର୍‌ତିଙ୍କ୍ ଆଦ୍ ବଲି ଉତ୍ସର୍ଗ ମାଡ଼ାଟ୍ ।
MAT 5:25 “ଯଦି ବେନ ନି ବିରୁଦ୍ଦ୍‌ତେ ମକଦମା ମାଡ଼ି କୋଟ୍‍ତାଗ୍ ଆଦାନ୍ ମୁନେଙ୍କ୍ ଦିନାମ୍ ମାନ୍‍ନା ଅନ୍‌‍ତଡ଼୍ ନିଜେ ଆଞ୍ଜ୍ କାଇଲାଟ୍ । ଇଲୁକ୍ କୋଟ୍‍ତାଗ୍ ହେୱୁକ୍‍କେ, ଅଣ୍ଡ୍‌ ନିକିଂଙ୍କ୍ ବିଚାର୍‍ପତିନ୍‍ କାଇଦେ ହିଦ୍‍ତଣ୍ଡ୍ ମେଣ୍ଡେ ବିଚାର୍‍ପତି ନିକିଂଙ୍କ୍ ଟାଣ୍ଡେତାଗ୍ ଅଦାନ୍ ମାଇଦିଙ୍କ୍ ପୁଲିସିଡ଼୍ କାଇଦେ ପସ୍ପିଦ୍‍ତଣ୍ଡ୍ ।”
MAT 5:26 ନାନ୍‍ ମିକିଂଙ୍କ୍‍ ନିଜାମ୍‍ କେତୁତାନ୍‍, “ନି ପର୍‍ର ୱାଟ୍‍ତେ ସାରେ କାମ୍‍ଦେନନ୍‍ ୱେରନ୍ ପାଇସା ମିକା ଇୱେଯାକ ନିମ୍‍ ଆଗାଙ୍କ୍ କଲାସ୍ ଆତ୍‍ତାଙ୍କ୍ ପାର୍‍ୱିନ୍ ।”
MAT 5:27 “‘ବେବିଚାର୍ ମାଡ଼୍‍ମାଟ୍,’ ହିଦ୍ ଗଟ୍ ମିଡ଼୍ ମୁନେତ୍ କନ୍‍ସ୍ କେଞ୍ଜି ୱାଦୁତିଡ଼୍ ।”
MAT 5:28 ବାତେଙ୍କ୍ ଇତ୍‍କେ ନାନ୍ କେତୁତାନ୍ ଯଦି ବେନ ଅଡ଼୍‌‍କିଂଙ୍କ୍ ମୁତେନ୍ ପର୍‍ର ନଜର୍ ୱାଟିତଣ୍ଡ୍, ଅଣ୍ଡ୍‌ ଆଦିନ୍ ତଡ଼୍ ହେର୍କା ମାଡ଼ି ବେବିଚାର୍ ବା ଅପରାଦି ମାଡ଼ିତଣ୍ଡ୍ ।
MAT 5:29 ଯଦି ନିୱାଦ୍ ତିନ୍‍ନ୍ଦେ କଣ୍ଡେତ୍ ବେସୁଙ୍କୁ ବାଲାହାଇ ଆଦ୍‌ତେ, ଆଲେକ୍‌ ଆଦିଙ୍କ୍‌ ଟେଣ୍ଡି ହେସ୍‌ସିମୁଟ୍‌, ମିୱାଦ୍ ସାରେ ମେନ୍ଦୁଲ୍ ନର୍‍କତାଗ୍‍ ହେସାନାଗାଙ୍କ୍, ମେନ୍ଦୁଲ୍‍ତେ ଅଣ୍ଡୟ୍‌ ଦୁଡ଼େ ଆରା ମାଡ଼ାନାଗାଙ୍କ୍ ବେଲାନ୍ ସାୟେ ।
MAT 5:30 ଯଦି ନିୱାଦ୍ ତିନ୍ଦେକାୟି ପାପ୍ ମାଡ଼ାଙ୍କ୍ କେତୁତ୍, ଆଦିଙ୍କ୍ ମିକା ନାଡ଼୍‍କି ହେସିମୁଟ୍ । ନିୱାଦ୍ ସାରେ ମେନ୍ଦୁଲ୍ ନର୍‍କତାଗ୍‍ ହେସାନାଗାଙ୍କ୍ ଅଣ୍ଡୟ୍‌ ଅଂକିଙ୍କ୍‌ ଆରା ମାଡ଼ାନାଦ୍ ବେଲାନ୍ ସାୟେ ।
MAT 5:31 “‘ଯଦି ବେନ ନିଜେତ୍ ମୁତେଙ୍କ୍ ୱିଡ଼ସାନ୍ ମାଇଦିଙ୍କ୍ ଇଚ୍ଛା ଆଦ୍‍ତଣ୍ଡ୍, ଅଣ୍ଡ୍‌ ଆଦିଙ୍କ୍ ଲିକିତ୍‍ ଲେକାମ୍ ୱେରଡ଼୍ କାଇଦେ ଏର୍‍ ହିୱୀଣ୍ଡ୍’ ଇଦ୍ ଶିକ୍ଷା ମିଡ଼୍ ମୁନେତ୍ କନ୍‍ସ୍ ପାଏମ୍ଆତ୍‍ତିଡ଼୍ ।”
MAT 5:32 ବାତେଙ୍କ୍ ଇତ୍‍କେ ନାନ୍ କେତୁତାନ୍, ବେବିଚାର୍ ଅପରାଦି ବ୍ୟତିତ୍ ବାଗାତ୍ ବାତ୍‍ଆଇ ବାତେଙ୍କ୍ ଇତ୍‍କେ ମାଇଦିଙ୍କ୍ ତାନ୍ ମୁତେଙ୍କ୍ ଚାଡ଼ପତ୍ର ହିତ୍‍କେ, ଅଣ୍ଡ୍‌ ଆଦିଙ୍କ୍ ବେବିଚାର୍ ମାଡ଼ତଣ୍ଡ୍ ଇଞ୍ଜ କାରାପ୍‍ତେ ଦଷି ଆଦ୍‍ତନ୍ ମେଣ୍ଡେ ବେନ୍ ନାରୁଡ଼୍ ଆଦ୍ ନାଟାଡ଼୍‍ତିଙ୍କ୍ ପେଣ୍ଡୁଲ୍ ଆଦ୍‍ତନ୍, ଅଣ୍ଡ୍‌ ମିକା ବ୍ୟବିଚାର୍ ଆଦ୍‍ତନ୍ ।
MAT 5:33 “ମୁନେତ୍ କନ୍‍ସ୍ ଇଦ୍ ଶିକ୍ଷା କେଞ୍ଜି ୱାଦୁତିଡ଼୍, ‘ଶପତ୍‍ ମାଡ଼ି ୱିଡ଼୍‍ସ୍‍ମାଟ୍ । ଇଶ୍ୱର୍‌ତେ ମୁନ୍‍ନେ ବେନ୍ ଶପତ୍ ମାଡ଼ିତିଡ଼୍, ଆଦିଙ୍କ୍ ସାରେ ମାଡ଼ାଟ୍ ।’”
MAT 5:34 ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ କେତୁତାନ୍, ଶପତ୍‍ ମାଡ଼ାନ୍ ୱେଲେ ରାଣ ନିୟମ୍ ୱାଟ୍‍ମାଟ୍ । ସ୍ୱର୍ଗ ପେଦେର୍‍ତେ ରାଣ ୱାଟ୍‍ମାଟ୍, ବାତେଙ୍କ୍ ଇତ୍‍କେ ଆଦ୍ ଇଶ୍ୱର୍‌ତେ ସିଂହାସନ୍ ।
MAT 5:35 ପୃତିବି ପେଦେର୍‍ତେ ରାଣ ୱାଟ୍‍ମାଟ୍, ବାତେଙ୍କ୍ ଇତ୍‍କେ ଆଦ୍ ଇଶ୍ୱର୍‌ତେ ଡେକେତ୍‍ କୁତୁଲ୍ । ଯିରୁଶାଲେମ୍ ନାର୍ ପେଦେର୍‍ତେ ମିକା ରାଣ ୱାଟାନାଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଆଦ୍ ଆଦୁତ୍‍ତେ ମହାରାଜାନ୍ ନାର୍ ।
MAT 5:36 ମିଇ ତାଲେତ୍ ରାଣ ୱାଟ୍‍ମାଟ୍, ବାତେଙ୍କ୍ ଇତ୍‍କେ ଅଣ୍ଡୟ୍‌ କେଲ୍‍ଦିଙ୍କ୍ କାର୍‍ରି ବା ପାଣ୍ଡେ ମାଡ଼ାଙ୍କ୍ ଶକ୍ତି ମିୟାଦ୍ ଇଲେ ।
MAT 5:37 “ମିଡ଼୍ ରାଣ ନିୟମ୍ ୱାଟକଟ ମାତର୍ ‘ହଁ’ କି ‘ଇଲେ’ କେଲାଟ୍ । ଇଦିନାଗାଙ୍କ୍ ଗଟ୍ କେସ୍ ଶପତ୍‍ ମାଡ଼ାନାଦ୍ ଶୟ୍‍ତାନ୍‍ତାଗ୍ ପେୟିତାନ୍ ଗଟ୍ ରକମ୍ ।”
MAT 5:38 “‘କଣ୍ଡା ବାଦୁଲ୍‍ତେ କଣ୍ଡା, ପାଲ୍‍କ୍ ବାଦୁଲ୍‍ତେ ପାଲ୍‍କ୍ ।’ ଇଦ୍ ଇଂସା ନିସ୍ ମିଡ଼୍ କେଞ୍ଜ୍‍ତିଡ଼୍ ।”
MAT 5:39 ବାତେଙ୍କ୍ ଇତ୍‍କେ ନାନ୍ କେତୁତାନ୍, ବେନ ମିୟାଦ୍ ଅନିଷ୍ଟ ମାଡ଼ିତନ୍ ଅନାଦ୍‌ ପ୍ରତିଶଦ ଅୟିମାଟ୍ । ଯଦି ମିୟାଦ୍ ତିନ୍‍ନ୍ଦେ ବୁକେତାଗ୍ ଚାପୁଡ଼ା ରେହେତିତଣ୍ଡ୍, ଅଂକିଙ୍କ୍‌ ମେଣ୍ଡ ଅଙ୍କ୍‌ ବୁକା ତହସିମୁଟ୍ ।
MAT 5:40 ଯଦି ବେନ ମିୟାଦ୍ ଚକା ଆଦାନ୍ ମାଇଦିଙ୍କ୍ ମିଇ ବିରୁଦ୍ଦ୍‌ତେ ବୁସାମାଡ଼ି ମିକିଂଙ୍କ୍ ବିଚାର୍ ଲତ୍‍ତାଗ୍ ଆଦ୍‍ତନ୍, ଅଂକିଙ୍କ୍‌ ମିୟାଦ୍ କୋଟ୍ ମିକା ଦାନ ମାଡ଼ାଟ୍ ।
MAT 5:41 ଯଦି ଦେଶ୍ ଅଦିକାର୍‌ ମାଡ଼ିମାନ୍ଦାନ୍ ସୈନିକିଡ଼୍ ଲୋପେକ୍ ବେନ ମିକିଂଙ୍କ୍ ବଜ୍ କାଞ୍ଜି ଅନ୍‌‍ତଡ଼୍ ଅଣ୍ଡ୍‌ କିଲମିଟର୍ ଆଦ୍‍ଦାନଙ୍କ୍ ବାଦ୍ୟ ମାଡ଼ିତନ୍, ମିଡ଼୍ ଚିନ୍ତେ ମାଡ଼୍‍ୱେକଟ ଅନ୍‌‍ତଡ଼୍ ରେଣ୍ଡ୍ କିଲମିଟର୍ ଆନୁଟ୍ ।
MAT 5:42 ବେନ ଯଦି ଜିନିଷ୍ ତାଲ୍‍କିତଣ୍ଡ୍ ଅଂକିଙ୍କ୍‌ ହିମୁଟ୍ । ବେନ ବାତ୍ ତାଲ୍‍କେ ଅଂକିଙ୍କ୍‌ ଆଦ୍ ହିମୁଟ୍ ।
MAT 5:43 “‘ସାଙ୍ଗଡ଼୍‍କ୍ ପ୍ରେମ ମାଡ଼ାଟ୍, ଶତ୍ରୁଡ଼୍‍କ୍ ପାସ୍‍କାଟ୍ ।’ ଇଦ୍ ଶିକ୍ଷା ମୁନେନ୍ କେଞ୍ଜ୍‍ତିଡ଼୍ ।”
MAT 5:44 ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ କେତୁତାନ୍ ଶତ୍ରୁଡ଼୍‍କ୍ ପ୍ରେମ ମାଡ଼ାଟ୍ । ବେନଡ଼୍ ମିକିଂଙ୍କ୍ ତାଡ଼ନା ମାଡ଼ିତଡ଼୍ ଅଡ଼ାଦ୍‌ ଲେକେତ୍‍ ସେଙ୍ଗେ ପ୍ରାର୍ତନା ମାଡ଼ାଟ୍ ।
MAT 5:45 ଇଦ୍ ରକମ୍ ମାଡ଼୍‍କେ ଇଶ୍ୱର୍‌ତେ ମାର୍‍ ହିଞ୍ଜ ପୁନ୍‍ତଡ଼୍ । ବାତେଙ୍କ୍ ଇତ୍‍କେ ଇଶ୍ୱର୍ ଲେକେତ୍‍ ନୁ କାରାପ୍ ରେଣ୍ଡ୍ ଲେକାତ୍ ନାରୁଡ଼୍‍କ୍ ପଡ଼୍‍ଦ୍ ୱେସ୍ ହିଦ୍‍ତଣ୍ଡ୍ ନୁ ସାୟେତ୍ ପାଡ଼ିୟିଦେ ନଡ଼୍‍କିଙ୍କ୍ ସାରେତଡ଼୍‌କିଂଙ୍କ୍ ୱାର୍‍ସାମ୍ ମାଡ଼ିତନ୍ ।
MAT 5:46 ମାତର୍ ମିକିଂଙ୍କ୍ ସାୟେ ଇଞ୍ଜ କେତାନଡ଼୍‍କିଙ୍କ୍ ପ୍ରେମ୍ ମାଡ଼ିତଡ଼୍, ଇଶ୍ୱର୍ ବାତେଙ୍କ୍ ମିକିଂଙ୍କ୍ ପୁରସ୍କାର୍ ହିଦ୍‍ତଣ୍ଡ୍ ? କର ଆଦାୟ୍ ମାଡ଼ାନଡ଼ି ମିକା ଆଦ୍‍ଲେକାମ୍ ମାଡ଼ିତଡ଼୍ ।
MAT 5:47 ଯଦି ମିଡ଼୍ ତାମୁଣ୍ଡ୍‌ ତଡ଼୍ ତିର୍‍ୟିତିଡ଼୍‍, ଆଲେକେ ମିଡ଼୍ କି ବାକ୍‍ୱା ପାଡ଼୍‍ୟି ମାଡ଼ୁତିଡ଼୍ ? ବିଶ୍ୱାସ୍ ମାଡ଼୍‍ୱେ ନାରୁଡ଼୍ ମିକା ଆଦ୍ ରକମ୍ ମାଡ଼ିତଡ଼୍ ।
MAT 5:48 ସ୍ୱର୍ଗତଣ୍ଡ୍ ମି ବାବାଲ୍ ବେଦ୍‍ପୁଟୁଙ୍କ୍ ପବିତ୍ର, ମିଡ଼୍ ଆନ୍‌‍ତେ ଆଦେପୁଟୁଙ୍କ୍ ପବିତ୍ର ଆଦାନ୍ ଦର୍‍କାର୍ ।
MAT 6:1 “ନାରୁଡ଼୍‍କିଂଙ୍କ୍ ତଅତାନ୍ ମାଇଦିଙ୍କ୍ ସାରେତଡ଼୍ ମୁନ୍‍ନେ ଦର୍ମକାମ୍ ମାଡ଼୍‍ମାଟ୍ । ଆଲା ମାଡ଼୍‍କେ ବାବାଲ୍ ଇଶ୍ୱର୍‌ତାଗାଙ୍କ୍ ମିଡ଼୍ ପୁରସ୍କାର୍ ପାଏମ୍ ଆୟ୍‍ୱିଡ଼୍ ।”
MAT 6:2 “ୱେରଣ୍ଡ୍ ଅବାବ୍‍ତଣ୍ଡ୍ ନାରୁଙ୍କ୍ ବାତ୍‍ଆଇ ଦାନ ହିଦାନ୍ ୱେଲେ ଦୁଷ୍ଟ ନାରୁଡ଼୍ ଲେକାମ୍ ତଅମାଟ୍ । ଅଡ଼୍‌ ଉପାସନା ଲଅକିନାଗ୍ ନୁ ୱିଦିନ୍ ନାଡ଼୍‍ମେ ନିଜେତ୍ ଦାନଦର୍ମ୍ ତଅତିତଡ଼୍ । ନାରୁଡ଼ାଗାଙ୍କ୍ ପ୍ରସଂଶା ପାଏମ୍ଆଦାଙ୍କ୍ ଅଡ଼୍‌ ଇଦ୍ ରକମ୍ ମାଡ଼ିତଡ଼୍ । ନାରୁଡ଼ାଗାଙ୍କ୍ ପ୍ରସଂଶା ପାଏମ୍ଆଦାନ୍ ମାଇଦିଙ୍କ୍ ଅଡ଼୍‌ ଇଲା ମାଡ଼ିତଡ଼୍ । ନାନ୍ ନିଜାମ୍‍ତେ କେତୁତାନ୍ ଅଡ଼୍‌ ଇଦିନାଗାଙ୍କ୍ ଅଡ଼ାଦ୍‌ ଦର୍‍କାନାଦ୍ ପୁରାପୁରି ପାଏମ୍ ଆଦ୍‍ତଡ଼୍ ।”
MAT 6:3 ବାତେଙ୍କ୍ ଇତ୍‍କେ ମିଡ଼୍ ୱେରନ୍ ଅବାବ୍‍ ତଡ଼୍‍କିଂଙ୍କ୍ ସାହାଯ୍ୟ ମାଡ଼ାନ୍‍ୱେଲେ, ଇଦ୍ ରକମ୍ ମାଡ଼ାଟ୍, ବେଲାକି ମିୱଣ୍ଡ୍ ସାଏତ୍ ସାଙ୍ଗ ମିକା ଇଦ୍ ଗଟ୍ ପୁନ୍ଦାଙ୍କ୍ ପାର୍‍ୱଣ୍ଡ୍ ।
MAT 6:4 ମିୟାଦ୍ ଇଦ୍ ମିଞ୍ଜିମାଞ୍ଜ୍ ଆତ୍‍କେ ମିକା ମିୱଣ୍ଡ୍ ସାରେତିଙ୍କ୍ ଉଡ଼ାନ୍ ବାବାଲ୍ ଇଶ୍ୱର୍ ଆଦ୍ ଉଡ଼ି ପୁରସ୍କାର୍ ହିଦ୍‍ତଣ୍ଡ୍ ।
MAT 6:5 “ପ୍ରାର୍ତନା ମାଡ଼ାନ୍ ୱେଲେ ବୁସା ଦାର୍ମିକ୍ ନାରୁଡ଼୍ ଲେକାମ୍ ଆୟ୍‍ମାଟ୍ । ବେଲା ସାରେତଡ଼୍ ଉଡ଼ିତଡ଼୍, ଆଦିନ୍ ସେଙ୍ଗେ ଉପବାସ୍ ଲଅକିନାଗ୍ ନୁ ରଟ୍ ଚକ୍‍ତାଗ୍ ନିଶ୍‍ମିକା ଅଡ଼୍‌ ପ୍ରାର୍ତନା ମାଡ଼ାଙ୍କ୍ ସାୟେ ଇଞ୍ଜ କେତିତଡ଼୍‍ । ନାନ୍ ମିକିଂଙ୍କ୍ ନିଜାମ୍‍ତେ କେତୁତାନ୍ ଯେ ଅଡ଼୍‌ ନିଜେତ୍ ପୁରସ୍କାର୍ ଦର୍‍କ୍ସି ମିନ୍ଦେଡ଼୍‍ ।”
MAT 6:6 ବାତେଙ୍କ୍ ଇତ୍‍କେ ମିଡ଼୍ ପ୍ରାର୍ତନା ମାଡ଼ାନ୍ ମାଇଦିଙ୍କ୍ ନିଜେତ୍ ବାକ୍‍ଡ଼େ ଲୋପେ ଆନୁଟ୍, କାପାଟ୍ କେଏମୁଟ୍ ନୁ ମିଇ ମିଞ୍ଜିମାନ୍ଦାନ୍ ବାବାଲ୍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାଟ୍ । ମିଡ଼୍ ମିଞ୍ଜିମାଞ୍ଜ୍ ବାତ୍ ମାଡ଼ିତିଡ଼୍, ସାରେତିଙ୍କ୍ ଉଡ଼ାନନ୍ ବାବାଲ୍ ଇଶ୍ୱର୍ ଆଦ୍ ଉଡ଼ି ମିକିଂଙ୍କ୍ ପୁରସ୍କାର୍ ହିଦ୍‍ତଣ୍ଡ୍ ।
MAT 6:7 “ମିଡ଼୍ ପ୍ରାର୍ତନା ମାଡ଼ାନ୍‍ୱେଲେ ବିଶ୍ୱାସ୍ ଇଲ୍‍ୱେ ଲେକାମ୍ ନାର୍‍ଗେ ଇତ୍‍କେ ହିଲ୍‍ୱାଦ୍ ଶଦ୍ଦ ବ୍ୟବହାର୍ ମାଡ଼୍‍ମାଟ୍ । ଅଡ଼୍‌ ହାଲ୍‍ସିତଡ଼୍, ଅଡ଼ାଦ୍‌ ପ୍ରାର୍ତନା ଲାଟି ଆତ୍‍କେ ଇଶ୍ୱର୍ କେଞ୍ଜିତଣ୍ଡ୍ ।”
MAT 6:8 ଅଡ଼୍‌ ଲେକାମ୍ ଆୟ୍‍ମାଟ୍ । ମିଡ଼୍ ତାଲ୍‍କାନ୍ ମୁନେଙ୍କ୍ ମିକିଂଙ୍କ୍ ବାତ୍ ଦର୍‍କାର୍, ମିଇ ବାବାଲ୍ ଇଶ୍ୱର୍ ଆଦ୍‍ ସାରେ ପୁତ୍‍ତଣ୍ଡ୍ ।
MAT 6:9 ଆଦିଙ୍କ୍ ଇଦ୍ ରକମ୍ ପ୍ରାର୍ତନା ମାଡ଼ାନାଦ୍ ଟିକ୍, “ହଁ ସ୍ୱର୍ଗତନି ବାବା, ନିୟାଦ୍ ପେଦେର୍ ପବିତ୍ର ହିଞ୍ଜ ମାନ୍ୟ ହାୟି ।
MAT 6:10 ନିୟାଦ୍ ରାଜ୍ୟ ୱାଡ଼ି । ନିୟାଦ୍ ଇଚ୍ଛା ବେଲା ସ୍ୱର୍ଗତାଗ୍ ଆଦେପୁଟୁଙ୍କ୍ ହି ପୃତିବିତାଗ୍ ମିକା ସାରେ ହାୟି ।
MAT 6:11 ସାରେଦିନା ମାକିଂଙ୍କ୍ ଦର୍‍କାର୍‍ ଆଦାନ୍ କାଦି ହିମ୍ ।
MAT 6:12 ମା ବିରୁଦ୍‍ତେ ଦଷ୍ ମାଡ଼ିମାନ୍ଦାନ୍ ନାରୁଡ଼୍‍କିଂଙ୍କ୍ ମାମ୍‍ମେ ବେଲା କ୍ଷମା ମାଡ଼୍‍ତମ୍, ଆଦେପୁଟୁଙ୍କ୍ ମାୱାଦ୍ ଦଷ୍ ସାରେ କ୍ଷମା ମାଡ଼େ ।
MAT 6:13 ମାକିଂଙ୍କ୍ ତିପାଲ୍ ପରିକ୍ଷାତେ ମୁନ୍‍ନେ ଆଦାନଙ୍କ୍ ହିମା, ମାତର୍ କାରାପ୍ ତାଗାଙ୍କ୍ ମାକିଂଙ୍କ୍ ରକ୍ଷା ମାଡ଼େ । ବାତେଙ୍କ୍ ଇତ୍‍କେ ରାଜ୍ୟ, ପରାକ୍ରମ୍, ଗୌରବ୍ ଯୁଗ୍‍ଯୁଗ୍ ନିୟାଦ୍, ଆମେନ୍ ।”
MAT 6:14 “ମିଇ ବିରୁଦ୍‍ତେ ଦଷ୍ ମାଡ଼ିମାନ୍ଦାନ୍ ବାଗାତ୍ ନାରୁଡ଼୍‍କିଂଙ୍କ୍ ଯଦି ମିଡ଼୍ କ୍ଷମା ମାଡ଼ିତିଡ଼୍, ସ୍ୱର୍ଗତଣ୍ଡ୍‌ ବାବାଲ୍ ଇଶ୍ୱର୍ ମିକା ମିକିଂଙ୍କ୍ କ୍ଷେମା ମାଡ଼ିତଣ୍ଡ୍‍ ।”
MAT 6:15 ବାତେଙ୍କ୍ ଇତ୍‍କେ ମିଡ଼୍ ଯଦି ବାଗାତ୍ ନାରୁଡ଼୍‍କିଂଙ୍କ୍ କ୍ଷମା ମାଡ଼୍‍ୱିଡ଼୍, ବାବାଲ୍ ଇଶ୍ୱର୍ ମିକା ମିଡ଼୍ ମାଡ଼ିମାନ୍ଦାନ୍ ଅପରାଦି ସାରେ କ୍ଷମା ମାଡ଼ଣ୍ଡ୍ ।
MAT 6:16 “ଉପବାସ୍ ମାଡ଼ାନ୍ ୱେଲେ ବୁସା ଦାର୍ମିକିଡ଼୍ ଲେକାମ୍ ମକମ୍‍ତିଙ୍କ୍ ମାଡ଼୍‍ମାଟ୍ । ଅଡ଼୍‌ ଉପବାସ୍ ମାଡ଼ୁତଡ଼୍ ଇଞ୍ଜ ବାଗାତ୍ ନାରୁଡ଼୍‍କିଂଙ୍କ୍ ତଅତାନ୍ ମାଇଦିଙ୍କ୍ ନିଜେତ୍ ମକମ୍‍ତିଙ୍କ୍ ଜତନ୍ ମାଡ଼ି ନେୱଡ଼୍ । ଇଦ୍ ନିଜାମ୍‍ ଯେ ଆଦ୍ ରକମ୍ ମାଡ଼ାନ୍ ତଡ଼୍ ଅଡ଼୍‌ ତାମାଙ୍କ୍ ଦର୍‍କାନାଦ୍ ପାଏମ୍ ଆସ୍‍ମିନ୍ଦେଡ଼୍ ।”
MAT 6:17 ବାତେଙ୍କ୍ ଇତ୍‍କେ ମିଡ଼୍ ଉପବାସ୍ ମାଡ଼୍‍ତେ ୱେଲେ ମକମ୍ ନର୍‍ସ୍, ନିୟ୍‍ ଉସି, ତାଲ୍ ଇଡ଼୍‍ସି ଲେକେତ୍‌ ଆସ୍ ମାନୁଟ୍ ।
MAT 6:18 ବେଦ୍‍ପୁଟୁଙ୍କ୍ ଉପବାସ୍ ମାଡ଼ୁତିଡ଼୍ ଇଞ୍ଜ ବାଗାତ୍ ନାରୁଡ଼୍ ପୁନ୍ଦାଙ୍କ୍ ପାର୍‍ୱଡ଼୍, ବାତେଙ୍କ୍ ଇତ୍‍କେ ମିୱଣ୍ଡ୍ ତନ୍ଦୱେନଣ୍ଡ୍ ବାବାଲ୍ ଇଶ୍ୱର୍ ଆ ସାରେ ଗଟ୍ ପୁନ୍‍ତଣ୍ଡ୍ । ମିଡ଼୍ ମିଞ୍ଜିମାଞ୍ଜ୍ ବାତ୍ ମାଡ଼ୁତିଡ଼୍; ଆଦ୍ ଉଡ଼ି, ଅଣ୍ଡ୍‌ ମିକିଂଙ୍କ୍ ପୁରସ୍କାର୍ ହିଦ୍‍ତଣ୍ଡ୍ ।
MAT 6:19 “ହି ପୃତିବିତାଗ୍ ନିଜେତ୍ ସେଙ୍ଗେ ଦନ୍ ଗୁଡ଼୍‌ପାଟ୍ । ଇଗେତ୍‍ ସେଙ୍ଗେ, କାର୍କେ ପଇସ୍ ଗୁଡ଼୍‍ପାନ୍ ଦନ୍‌ କାରାପ୍ ଆଦ୍‍ତେ, ବା ମାଡ଼୍‍ଡ଼ା ସିନ୍ଦିମାଡ଼ି ଡଙ୍ଗି ଆଦ୍‍ତା ।”
MAT 6:20 ମାତର୍‌ ବେଗେ ପୁଡ଼୍‍ୟୁ ନୁ କାର୍‍କେ ପୟ ମେଣ୍ଡେ ଡଙ୍ଗାଲଡ଼୍‍ ଡଙ୍ଗି ଅଦ୍‍ ପାର୍‍ୱଡ଼୍‍, ଇଦ୍‍ ରକମ୍‍ ସ୍ୱର୍ଗତାଗ୍‍ ନିଜର୍‍ ନିଜର୍‍ ସେଙ୍ଗେ ଦନ୍‍ ଗୁଡ଼୍‌ପାଟ୍‍ ।
MAT 6:21 ବାତେଙ୍କ୍ ଇତ୍କେ ବେଗେ ମିୱାଦ୍ ଦନ୍‍ସମ୍ପତ୍ତି, ଆଗେ ମିକା ମିୱାଦ୍ ମନ୍ ।
MAT 6:22 “କଣ୍ଡା ମେନ୍ଦୁଲ୍‍ତେ କୁପି ରକମ୍ । କଣ୍ଡା ୱେଇସ୍ ମାତ୍‍କେ, ମେନ୍ଦୁଲ୍ ୱେଇସ୍‍ତଡ଼୍ ବର୍ତ୍ତି ଆଦ୍‍ତେ ।”
MAT 6:23 ବାତେଙ୍କ୍ ଇତ୍‍କେ କଣ୍ଡା ଯଦି ଦୁର୍ବଲ୍ ଆଦ୍‍ତେ, ମେନ୍ଦୁଲ୍ ଇକାଡ଼୍‍ତେ ବର୍ତ୍ତି ଆଦ୍‍ତେ । ମିଇ ଜିୱୁତେ ୱେଇସ୍ ଯଦି ଇକାଡ଼୍‍ ତଡ଼୍ ମିଶିଆଦ୍‍ତେ, ଆସୁଟେ ଆଦ୍ ଇକାଡ଼୍ ବେସର୍ ବୟଙ୍କର୍ ହିକାଡ଼୍ ଆୟ୍‍ୟ !
MAT 6:24 “ୱେରଣ୍ଡ୍ ନାରୁଡ଼୍ ଇର୍‍ୱୁଡ଼୍ ମାଲିକ୍‍ତେ ସେବା ପାଡ଼ିୟିମାଡ଼େ ପାର୍‍ୱଡ଼୍ । ଅଣ୍ଡ୍‌ ଅଡ଼୍‌‍କିଂଙ୍କ୍ ପ୍ରେମ ମାଡ଼୍‍କେ ମେଣ୍ଡେ ଅଡ଼୍‌‍କିଂଙ୍କ୍ ପାସ୍‍କି ମାଡ଼ିତନ୍, ଅଡ଼୍‌‍କିଂଙ୍କ୍ ସମ୍ମାନ୍ ମାଡ଼ିତନ୍ ମେଣ୍ଡେ ଅଡ଼୍‌‍କିଂଙ୍କ୍ ସମ୍ମାନ୍ ମାଡ଼ଣ୍ଡ୍ । ଇଶ୍ୱର୍ ଇତ୍‌ତେ ଦନ୍ ସମ୍ପତି ଇର୍‍ୱୁଡ଼ାଦ୍ ଦାସ ଆତ୍‍ତାଙ୍କ୍ ପାର୍‍ୱିଡ଼୍ ।”
MAT 6:25 “ଆଦିଙ୍କ୍ ନାନ୍ କେତୁତାନ୍, ବାଦ୍‍କାନ୍ ସେଙ୍ଗେ ଦର୍‍କାର୍ ଆଦାନ୍ ଆର୍‍ ନୁ ଉନ୍ଦାନ୍‍ନାଦ୍ ନୁ କେର୍‍ତାନ୍ ମାଇଦିଙ୍କ୍ ଦର୍‍କାର୍ ଆଦାନ୍ ଚକାସିଲେ ସେଙ୍ଗେ ଦାନ୍ଦେ ଆୟ୍‍ମାଟ୍ । ତିନ୍ଦାନାୱ୍ ନାଗାଙ୍କ୍ ଜିୱୁନ୍‌ ବାତ୍ ଅଦିକ୍‌ ମୂଲ୍ୟବାନ୍ ଆୟ୍‍ୟ ? ସିଲେକିନାଗାଙ୍କ୍ ମେନ୍ଦୁଲ୍ ବାତ୍ ଅଦିକ୍‌ ମୂଲ୍ୟବାନ୍ ଆୟ୍‍ୟ ?”
MAT 6:26 ପାର୍‍ତାନ୍ ପିଟେଙ୍କ୍ ଉଡ଼ାଟ୍ । ଆହ୍ ୱିତ କି କୟ୍‍ୟ । ପସଲ୍ ଅମଲ୍ ମାଡ଼ି କୁସ୍‍ତାଗ୍ ନେହେୱ । ଇତ୍‌କେ ସ୍ୱର୍ଗତଣ୍ଡ୍‌ ବାବାଲ୍ ଇଶ୍ୱର୍ ଆୱିଙ୍କ୍ ଜତନ୍ ମାଡ଼ି କାଦି ଇଦୁତଣ୍ଡ୍ । ମିଡ଼୍ ବାତେଏ ପିଟେନାଗାଙ୍କ୍ ଅଦିକ୍‌ ମୂଲ୍ୟବାନ୍ ଆୟୱିଡ଼୍ ?
MAT 6:27 ମି ଲୋପ୍ ବେନ ଚିନ୍ତେ ମାଡ଼ି ମାଡ଼ି ନିଜର୍ ଆୟୁସ୍‍ତିଙ୍କ୍ ମେଣ୍ଡେ ସୁଦୁର୍ ଦିନାମ୍‍ତିଙ୍କ୍ କାଲ୍‍ପିତଣ୍ଡ୍ ?
MAT 6:28 “ଚକାସିଲେନ୍ ସେଙ୍ଗେ ବାତେଙ୍କ୍ ଦାନ୍ଦେ ଆଦୁତିଡ଼୍ ? ଉଡ଼ାଟ୍, ଗୁପ୍‍ତାଗ୍ ମାନ୍ଦାନ୍ ପୁଙ୍ଗାର୍‍ ବେଲା ପେର୍‍ସୁତା । ଆୱୁ କଷ୍ଟ ମାଡ଼ କି ନିଜେତ୍ ସେଙ୍ଗେ ଚକାସିଲେ ତିଆର୍ ମାଡ଼;
MAT 6:29 ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ କେତୁତାନ୍ ରାଜା ଶଲୋମନ୍‍ ଅନାଦ୍‌ ସାରେ ସମ୍ପତି ମାତ୍‍କେମିକା ଇୱୁ ପୁଙ୍ଗାନ୍ ଲେକେମ୍ ସୁନ୍ଦର୍ ସିଲେ ବେସୁଙ୍କ୍‍ କେର୍‍ୱେ ମାତ୍‍ତଣ୍ଡ୍ ।
MAT 6:30 ନେଣ୍ଡ୍ ୱାୟାତାଗ୍ ମାନ୍ଦାନ୍ ଗାଡ଼୍ ଯଦି ନାଡ଼୍ ମାନ୍‍ନ, କଇସ୍‍ମିକା ଅୟ୍‌ଦାଲ୍‌ କିସ୍‍ତାଗ୍ କାର୍‍ୱିତା । ବାତେଙ୍କ୍ ଇତ୍‍କେ ଆୱିଙ୍କ୍ ମିକା ଇଶ୍ୱର୍ ବେସର୍ ସୁନ୍ଦର୍ ସିଲେନ୍ ସଜାମାଡ଼୍‍ତଣ୍ଡ୍ । ମିକିଂଙ୍କ୍ ଚକାସିଲେ ହିଦାନ୍ ମାଇଦିଙ୍କ୍ ଅଣ୍ଡ୍‌ ବାତ୍ ଗାଟି ଚିନ୍ତେ ମାଡ଼ଣ୍ଡ୍ ? ମିୱାଦ୍ ବିଶ୍ୱାସ୍ ନିଜାମ୍ ବେସର୍ ସୁଦୁର୍ !”
MAT 6:31 ଆଦିଙ୍କ୍ “ବେଗାକନ୍‍ସ୍ ତିନ୍ଦାନାଦ୍, କେର୍‍ଦାନାୱୁ ଦର୍‍କିତ୍, ଇଦ୍ ବିଷୟ୍‍ତେ ଚିନ୍ତେ ମାଡ଼୍‍ମାଟ୍ ।”
MAT 6:32 ବିଜାତିନାରୁଡ଼୍ ହିସତ୍ ବିଷୟ ତେ ମେହେକ ହୁଡିତଡ଼୍, ଇୱୁ ସାରେ ବିଷୟ୍ ମିକିଂଙ୍କ୍ ଦର୍‍କାର୍ ଇଞ୍ଜ ସ୍ୱର୍ଗତଣ୍ଡ୍‌ ମିଇ ବାବାଲ୍ ଇଶ୍ୱର୍ ପୁତ୍‍ତଣ୍ଡ୍ ।
MAT 6:33 ମିଡ଼୍ ଅନ୍‌ ରାଜ୍ୟତ୍ ମାଇଦିଙ୍କ୍ ହେର୍କା ମାଡ଼ାଟ୍, ଆଲେକେ ଅଣ୍ଡ୍‌ ମିକିଂଙ୍କ୍ ଇଦ୍ ସାର୍‍ରେବିଷୟ୍ ହିଦ୍‍ତଣ୍ଡ୍ । ଆଲେକେ ଅଣ୍ଡ୍‌ ମିକିଂଙ୍କ୍ ବାଗାତ୍ ସାରେ ବିଷୟ୍ ନେହେସମିନ୍ଦେନ୍ ।
MAT 6:34 ଆଦିଙ୍କ୍ ୱାଦାନ୍ ଦିନାମ୍ ସେଙ୍ଗେ ଦାନ୍ଦେ ଆୟ୍‍ମାଟ୍ । ନାଡ଼୍‍ଦେ ଚିନ୍ତେ ମାଡ଼ି ନେଣ୍ଡ୍‍ତେ ଦାନ୍ଦେ ଗାଟି ମାଡ଼୍‍ମାଟ୍ ।
MAT 7:1 “ବିଚାର୍ ମାଡ଼ମାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ ବିଚାର୍ ମାଡ଼ଣ୍ଡ୍ । ଇଶ୍ୱର୍ ମିକା ନିୟାଦ୍ ଦଷ୍ ପୟଣ୍ଡ୍ ।”
MAT 7:2 ବାଗାତ୍ ନାରୁଡ଼ାଦ୍ ଦଷ୍ ବିଷୟ୍‍ତେ ମିଡ଼୍ ବେଦ୍‍ପୁଟୁଙ୍କ୍ ବିଚାର୍ ମାଡ଼ିତିଡ଼୍, ଇଶ୍ୱର୍ ଆଦେପୁଟୁଙ୍କ୍ ମିୟାଦ୍ ବିଚାର୍ ମାଡ଼ିତନ୍ । ମିଡ଼୍ ବାଗାତ୍ ନାରୁଡ଼୍ ସେଙ୍ଗେ ବେନ୍ ନିୟମ୍ ତିଆର୍ ମାଡ଼ୁତିଡ଼୍, ଆଦ୍ ନିୟମ୍ ଇଶ୍ୱର୍ ମିଇ ସେଙ୍ଗେ ମିକା ତିଆର୍ ମାଡ଼ିତନ୍ ।
MAT 7:3 ମେଣ୍ଡେ, ବାତେଙ୍କ୍ ନି ତାମୁଣ୍ଡ୍‌ ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ଉଡ଼ୁତି, ବାତେଙ୍କ୍ ଇତ୍କେ ନି ନିଜେ କଣ୍ଡେତାଗ୍ ବେନେ ଜିଟ୍‍କେ ମିନ୍ଦେ, ଆଦ୍ ହାଲ୍‍ସି ଉଡ଼୍‍ୱିନ୍ ?
MAT 7:4 ନିଜେତ୍ କଣ୍ଡେତାଗ୍ ୱେର୍‍କ୍ ଇଡ଼୍‍ପେ ମାନ୍‍ନା ନିମ୍‍ ବେନ୍ ସାହାସ୍‍ତେ ନି ତାମୁଣ୍ଡ୍‌ତେ କଣ୍ଡେତାଗାଙ୍କ୍ ଇଡ଼୍‍ପେତିଙ୍କ୍ ପେସ୍ପିଦ୍‍ତାନ୍ ଇଞ୍ଜ କେତୁତିନ୍ ?
MAT 7:5 ରେ ଦୁଷ୍ଟ ନାରୁଡ଼୍ ! ମିଇ କଣ୍ଡେତାଗ୍ ମାନ୍ଦାନ୍ ୱେର୍‍କ୍ ଇଡ଼୍‍ପେ ମୁନେନ୍ ଟେଣ୍ଡାଟ୍ । ଆଲେକେ ମିଇ ତାମୁଣ୍ଡ୍‌ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ସହଜ୍‍ତେ ଉଡ଼େ ପାର୍‍ଦ୍‍ତିନ୍ ।
MAT 7:6 “ନେୟ୍‍ ଦିଙ୍କ୍ ପବିତ୍ର ଜିନିଷ୍ ହିମାଟ୍ । ବାତେଙ୍କ୍ ଇତ୍‍କେ ଆଦ୍ ତିଡ଼ିଇମିକା ମିକିଂଙ୍କ୍ କାସ୍ ପାର୍ଦ୍‍ତେ । ପାଦ୍‍ତେ ମୁନ୍‍ନେ ମିକା ୱାଟ୍‍ମାଟ୍ । ଆଦିନ୍ ମୁଲ୍ୟ ପୁନ୍‍ୱେକନ୍‍ସ୍ ତାଙ୍କ୍ ଆଦ୍ ଡେକେତ୍ ୱିକିତ୍ ।”
MAT 7:7 “ତାଲ୍‍କାଟ୍, ଆଲେକେ ମିକିଂଙ୍କ୍ ହିଦ୍‍ତଡ଼୍; ମେହେକାଟ୍, ନିଜାମ୍ ଦର୍‍କିତ୍; କାପାଟ୍‍ତାଗ୍ ତାଲ୍‍ସାଟ୍, କାପାଟ୍ ତେର୍‍ତିତଡ଼୍ ।”
MAT 7:8 ବେନ ଆୟି ତାଲ୍‍କିତଣ୍ଡ୍, ଅଂକିଙ୍କ୍‌ ହିଦ୍‍ତଡ଼୍; ବେନ ମେହେକିତଣ୍ଡ୍, ଅଣ୍ଡ୍‌ ପାଏମ୍ ଆଦ୍‍ତନ୍; ବେନ କାପାଟ୍‍ତାଗ୍ ତାଲ୍‍ସିତଣ୍ଡ୍, ଅନ୍‌ ସେଙ୍ଗେ କାପାଟ୍ ତେର୍‍ସିଦ୍‍ତଡ଼୍ ।
MAT 7:9 ମିଇ ମାର୍‍ ରୂଟି ତାଲ୍‍କ୍‍କେ ଅଂକିଙ୍କ୍‌ ବାତ୍ କାଲ୍‍ବଦା ହିଦ୍‍ତିଡ଼୍ ?
MAT 7:10 ବା ଅଣ୍ଡ୍‌ କିକେ ତାଲ୍‍କ୍‍କେ ଅଂକିଙ୍କ୍‌ ବାତ୍ ତାଡ଼ାମ୍ ହିଦ୍‍ତିଡ଼୍ ?
MAT 7:11 ମିଡ଼୍ ନିଜେତ୍ ଦଷ୍ ଦୁର୍ବଲ୍‍ତେ ମାତ୍‍କେ ମିକା ପିଲାକିଙ୍କ୍ ସାୟେତ୍ ଜିନିଷ୍ ହିଦ୍‍ତିଡ଼୍ । ବେନଡ଼୍ ଇଶ୍ୱର୍‌ତିଙ୍କ୍ ତାଲ୍‍କିତଡ଼୍, ଅଣ୍ଡ୍‌ ଅଡ଼୍‌‍କିଂଙ୍କ୍ ମେଣ୍ଡେ ବେସର୍ ସାୟେତ୍ ଜିନିଷ୍ ନାର୍‍ଗେ ହିୱଣ୍ଡ୍ ?
MAT 7:12 “ମିଇ ସେଙ୍ଗେ ବାଗାତ୍ ନାରୁଡ଼୍ ବାତ୍ ମାଡ଼ିଡ଼୍ ଇଞ୍ଜ ଇଚ୍ଛା ମାଡ଼ୁତିଡ଼୍, ମିଡ଼୍ ବାଗାତ୍ ନାରୁଡ଼୍ ସେଙ୍ଗେ ଆଦ୍ ମାଡ଼ାଟ୍ । ମଶାଲ୍ ଇସ୍‍ମାନ୍ଦାନ୍ ବ୍ୟବସ୍ଥା ନୁ ବାବବାଦୀଡ଼ାଦ୍ ଶିକ୍ଷାତାଦ୍ ଇଦ୍ ଆଦୁତ୍‍ତେ କେତାନାଦ୍ ଗଟ୍ ।”
MAT 7:13 “ସୁଦୁରାଦ୍ ହାର୍‍ଇସ୍ ସ୍ୱର୍ଗତାଗ୍ ଆଦ୍‍ଦାନ୍ ମାଇଦିଙ୍କ୍ ଆଲ୍‍ସାଟ୍ । ବାତେଙ୍କ୍ ଇତ୍‍କେ ନର୍‍କତାଗ୍‍ ଆଦାନ୍ ହାର୍ ଅସାର୍ ନୁ ଆଦିନ୍ ମାର୍ ବେଡ଼୍‍ୟାଦ୍‍ । ନାର୍‍ଗେ ନାରୁଡ଼୍ ନର୍କ ହାର୍‍ ଇସ୍‌ ଆଦ୍‍ତଡ଼୍ ।
MAT 7:14 ବାତେଙ୍କ୍ ଇତ୍‍କେ ସାରେଦିନାତ୍ ଜିୱୁଣ୍ଡ୍‍ତାକ୍ ଆଦାନ୍ ହାର୍ ଗାଟି କଷ୍ଟ ନୁ ଆଦିନ୍ ମାର୍ ସପୁର୍ ମେଣ୍ଡେ ଗାଟି ସୁଦୁଟ୍ ନାରୁଡ଼୍ ଇଦ୍‍ହାର୍ ଇସ୍‌ ଆଦ୍‍ତଡ଼୍ ।”
MAT 7:15 “ବଣ୍ଡବାବବାଦିଡ଼୍ ସେଙ୍ଗେ ସାବ୍‍ଦାନ୍ ! ଅଡ଼୍‌ ବାୟିଦେ ମେଣ୍ଢା ଚକାସିଲେ କେର୍‍ତେ ଲେକାମ୍ ତଅନ୍‌ଦିତଡ଼୍, ବାତେଙ୍କ୍ ଇତ୍‍କେ ମୁନେଙ୍କ୍‍ତେ ଅଡ଼୍‌ ଅଣ୍ଡୟ୍‌ କୁକାଲ୍‍ ।”
MAT 7:16 ଅଡ଼ାଦ୍‌ ପାଡ଼୍‍ୟି ଉଡ଼ି ମିଡ଼୍ ଅଡ଼୍‌‍କିଂଙ୍କ୍ ହେଞ୍ଚାଙ୍କ୍ ପାର୍‍ଦ୍‍ତିଡ଼୍‍ । କୟେ ମାଡ଼େତାଗ୍ ଅଙ୍ଗୁର୍‌ କାୟା ଆଦ ବା ପାର୍‍ୱେଲି ମାଡ଼୍‍ତାଗ୍ ତୟା ଆଦ ।
MAT 7:17 ସାୟେତ୍ ମାଡ଼େତାଗ୍ ସାୟେତ୍ କାୟା ଆଦ୍‍ଦିତ୍‍ତା । କାରାପ୍ ମାଡ଼େତାଗ୍ କାରାପ୍ କାୟା ଆଦ୍‍ଦିତ୍‍ତା ।
MAT 7:18 ସାୟେତ୍ ମାଡ଼େତାଗ୍ କାରାପ୍ କାୟା ଆଦ ବା କାରାପ୍ ମାଡ଼େତାଗ୍ ସାୟେତ୍ କାୟା ଆଦ ।
MAT 7:19 ସାୟେତ୍ କାୟା ଆଦକ୍ ମାଡ଼େତିଙ୍କ୍ ନାଡ଼୍‍କି କିସ୍‍ତାଗ୍ ୱାଟିତଡ଼୍ ।
MAT 7:20 ଆଦେ ପୁଟୁଙ୍କ୍ ବଣ୍ଡବାବବାଦି ନାରୁଡ଼ାଦ୍ ପାଡ଼ିୟି ତାଗାଙ୍କ୍ ଅଡ଼୍‌‍କିଂଙ୍କ୍ ମିଡ଼୍ ହେଞ୍ଚ୍ ପାର୍‍ଦ୍‍ତିଡ଼୍‍ ।
MAT 7:21 “ବେନଡ଼୍ ନାକିଂଙ୍କ୍ ‘ପ୍ରବୁ, ପ୍ରବୁ’ ଇଞ୍ଜ କାର୍‍ଙ୍ଗୁତଡ଼୍, ଅଡ଼୍‌ ସାରେତଡ଼୍ ସ୍ୱର୍ଗରାଜ୍ୟତାଗ୍ ଆଦାନଙ୍କ୍ ପାର୍‍ୱଡ଼୍ । ବେନଡ଼୍ ବାବାଲ୍ ଇଶ୍ୱର୍ ଲେକାମ୍‍ତେ ପାଡ଼୍‍ୟି ମାଡ଼ିତଡ଼୍, ମାତର୍ ଅଡ଼୍‌ ସ୍ୱର୍ଗରାଜ୍ୟତାଗ୍ ଆଦ୍‍ଦେ ପାର୍‍ଦ୍‍ତଡ଼୍ ।”
MAT 7:22 ବେଡ଼୍‍ୟାଦ୍‍ ବିଚାର୍ ଦିନ୍ ହେୱୁକ୍‍କେ ନାର୍‍ଗେ ନାରୁଡ଼୍ ନାକିଂଙ୍କ୍ କେତିତଡ଼୍‍, “ପ୍ରବୁ, ନି ପେଦେର୍‍ତେ ମାମ୍‍ମେ ଇଶ୍ୱର୍‌ତେ ଲେକେତ୍‌ କବର୍ କେତୁତମ୍‌, ପ୍ରବୁ, ନି ପେଦେର୍‍ତେ ବୁତ୍ ୱିଡ଼୍‍ସ୍‍ପୁତମ୍ ମେଣ୍ଡେ ନାର୍‍ଗେ ବାକ୍‍ୱା ପାଡ଼୍‍ୟି ମାଡ଼୍‍ତମ୍ ।”
MAT 7:23 ଆସୁଟେ ଅଡ଼୍‌‍କିଂଙ୍କ୍ ନାନ୍ କେତିତାନ୍, “ମିକିଂଙ୍କ୍ ନାନ୍ ପୁନନ୍ । ଆଦାର୍ମି ନାରୁଡ଼ି, ନାୟାଗାକନ୍ସ୍ ଜେକେ ଆନୁଟ୍ ।”
MAT 7:24 “ବେନ ନା ଗଟ୍ କେଞ୍ଜି ପାଲନ୍ ମାଡ଼ିତନ୍, ଅଣ୍ଡ୍‌ କାଲ୍‍କିନ୍ ପର୍‍ର ଲୋନ୍‌ ତଅସ୍ ମାନ୍ଦାନ୍ ବୁଦ୍‍ତଣ୍ଡ୍ ନାରୁଡ଼୍ ଲେକେମ୍ ।
MAT 7:25 ଗାଟି ୱାର୍‍ସାମ୍ ୱାତ୍‍ତେ, ବେଡ଼େମ୍‍ତାଦ୍ ଏର୍‍ ପେଟ୍‍ ନିଣ୍ଡି ମାୟିସ୍ ଆତ୍‍ତେ ନୁ ଆଦ୍ ଲୋତ୍‍ତେ ପର୍‍ର ଗାଟି ଗାଲ୍ ୱାତ୍‍ତେ, ବାତେଙ୍କ୍ ଇତ୍‍କେ ଆଦ୍ ଲୋନ୍‌ ଉର୍‍ଙ୍ଗ । ବାତେଙ୍କ୍ ଇତ୍‍କେ ଆଦ୍ କାଲ୍‍କିନ୍ ପର୍‍ର ତିଆର୍ ଆସ୍ ମାତ୍‍ତେ ।”
MAT 7:26 “ବାତେଙ୍କ୍ ଇତ୍‍କେ ବେନଡ଼୍ ନା ଗଟି କେଞ୍ଜି ପାଲନ୍ ମାଡ଼ଡ଼୍‍, ଅଡ଼୍‌ ଉଚ୍‍କନେଲ୍ ପର୍‍ର ଲୋନ୍‌ ତିଆର୍ ମାଡ଼ିମାନ୍ଦାନ୍ ମୁର୍କ ଲେକେମ୍ ।
MAT 7:27 ଗାଟି ୱାର୍‍ସାମ୍ ୱାତ୍‍କେ, ବେଡ଼େତ୍ ଏର୍‍ ଆଞ୍ଚ୍‍ ପର୍‍ରକେ ଆତ୍‍ତେ । ଗାଟି ଗାଲ୍ ୱାତ୍‍ତେ ନୁ ଲୋନ୍‌ ଦସଂ ଆତ୍‍ତେ । ଅନାଦ୍‌ ଆଦାନାଦ୍ ଗାଟି ବୟଙ୍କାର୍ ଆତ୍‍ତେ ।”
MAT 7:28 ଶେଷ୍ ଆୟିନା ଜିସୁନାଦ୍ ଇୱୁସାରେ ଶିକ୍ଷା କେଞ୍ଜି ନାରୁଡ଼୍ ଅନ୍‌ ଶିକ୍ଷାତାଗ୍ ବାକ୍‍ୱା ଆଦ୍‍ତଡ଼୍ ।
MAT 7:29 ଅଣ୍ଡ୍‌ ବାଗାତ୍ ଦର୍ମଗୁରୁଡ଼୍ ଲେକେମ୍ ଶିକ୍ଷା ଇୱକଟ କ୍ୟମତାଶାଳୀ ନାରୁଡ଼୍ ଲେକେମ୍ ଶିକ୍ଷା ହିସମାତ୍‍ତଣ୍ଡ୍ ।
MAT 8:1 ଜିସୁ ମେଟେତ୍ ପର୍‍ରକଞ୍ଚ୍ ଡିଗି ୱାତ୍‍ତେ ପେର୍କେ ପିନାକେ ନାରୁଡ଼୍ ଅଂକିଙ୍କ୍‌ ଲେକେତ୍ ମାଡ଼୍‍ତଡ଼୍ ।
MAT 8:2 ଆସୁଟେ ୱେରଣ୍ଡ୍ କୁଷ୍ଠରଗୀ ଅନା ୱାସ୍ କେତ୍‍ତଣ୍ଡ୍, “ପ୍ରବୁ, ନିମେ ଯଦି ଇଚ୍ଛା ମାଡ଼ିତି, ଆଲାତ୍କେ ନାକିଂଙ୍କ୍ ସୁସ୍ଥ ମାଡ଼୍‍ଡ଼େ ପାର୍‍ଦ୍‍ତିନ୍‍ ।”
MAT 8:3 ଜିସୁ କାୟ୍ ଆସ୍ ଅଂକିଙ୍କ୍‌ ଇଟି କେତ୍‍ତଣ୍ଡ୍‍, “ନାନ୍ ଇଚ୍ଛା ମାଡ଼ୁତାନ୍, ନିମ୍‍ ଲେକେତ୍‍ ହାଇମ୍ ।”
MAT 8:4 ଜିସୁ ଅଂକିଙ୍କ୍‌ କେତ୍‍ତଣ୍ଡ୍‍, “କେଞ୍ଜା, ନିମ୍‍ ବେଲା ଆସ୍ ଲେକେତ୍‍ ଆଦ୍‍ତିନ୍‌, ବେନଙ୍କ୍ କେଲ୍‍ମା; ନିମ୍‍ ସିଦା ପୁରହିତ୍‍ତା ଗାର୍‍ରେ ହାଞ୍ଜ୍ ନିଜେତିଙ୍କ୍ ପରିକ୍ଷାମାଡ଼େ ମେଣ୍ଡେ ନିମ୍‍ ସୁସ୍ଥ ଆଦ୍‍ତିନ୍‍ ଇଞ୍ଜ୍ ସାରେତଡ଼୍‌କିଂଙ୍କ୍ କେଞ୍ଜ୍‍ପାଙ୍କ୍ ସେଙ୍ଗେ ମୋଶାନ୍‌ ତଡ଼୍ ତିଆର୍ ଆତ୍‍ତେ ଇଞ୍ଜ ଉସ୍ୱର୍ଗ ମାଡ଼ା ।”
MAT 8:5 ଜିସୁ କଫର୍ନାହୁମ୍ ସହର୍‍ତାଗ୍ ହେଉତ୍‍ତେ ସାଙ୍ଗେ ସାଙ୍ଗେ ୱେରନ୍ ରୋମିୟ ସେନାପତି ଅଂକିଙ୍କ୍‌ କାଇଲି ଅନୁରଦ୍‌‍ ମାଡ଼ି କେତ୍‍ତଣ୍ଡ୍‍,
MAT 8:6 “ପ୍ରବୁ, ନାୱଣ୍ଡ୍ ୱେରଣ୍ଡ୍ ଦାସ ରୋଗ୍‍ତେ ମିନ୍ଦେଣ୍ଡ୍ । ଅଣ୍ଡ୍‌ ମେଇଲାଙ୍କ୍ ପାର୍‍ୱନ୍, ଗାଟି କଷ୍ଟ ଆଦୁତନ୍ ।”
MAT 8:7 ଜିସୁ ଅଂକିଙ୍କ୍‌ କେତ୍‍ତଣ୍ଡ୍‍, “ନାନ୍ ୱାସ୍ ଅଂକିଙ୍କ୍‌ ସୁସ୍ଥ ମାଡ଼ିତାନ୍ ।”
MAT 8:8 ସେନାପତି କେତ୍‍ତଣ୍ଡ୍‍, “ଇଲେ, ପ୍ରବୁ, ନିମ୍‍ ନା ଲନ୍ ୱାଦ୍‍ତିନ୍, ନାନ୍ ହିଦ୍‍ଲେକାମ୍ ଯୋଗ୍ୟ ନାରୁନ୍ ଆୟନ୍ । ନିମ୍‍ ମାତର୍ ୱେରଡ଼୍ ପଦ୍ କେସିମ୍, ନା ଦାସ ସୁସ୍ଥ ଆଦ୍‍ତନ୍ ।
MAT 8:9 ନା ପର୍‍ରତ୍ ଦାସନ୍ ଗଟ୍‍ତେ ନାନ୍ ପାଡ଼୍‍ୟି ମାଡ଼୍‍କେ ମିକା ନା ଗଟ୍‍ତେ ନାର୍‍ଗେ ସୈନିକିଡ଼୍ ମିନ୍ଦେଡ଼୍‍ । ଅଡ଼୍‌ ଲୋପେଙ୍କ୍ ଅର୍‍ତୁଙ୍କ୍ ଯଦି ନାନ୍ ‘ଆନ୍‌’ ଇଞ୍ଜ୍ କେତିତାନ୍, ଅଣ୍ଡ୍‌ ଆଦ୍‍ତନ୍ । ମେଣ୍ଡେ ଅର୍‍ତୁଙ୍କ୍ ‘ୱାଡ଼େ’ ଇଞ୍ଜ କେତ୍‍କେ, ଅଣ୍ଡ୍‌ ୱାଦ୍‍ତନ୍ । ନା ଦାସଙ୍କ୍ ‘ହିଦ୍‍ମାଡ଼େ ହିଞ୍ଜ’ କେତ୍‍କେ ଅଣ୍ଡ୍‌ ଆଦ୍ ମାଡ଼ିତନ୍ ।”
MAT 8:10 ଜିସୁ ଆଦେକେଞ୍ଜି ବାକ୍‍ୱା ଆତ୍‍ତନ୍ ନୁ ମେଣ୍ଡେ ଅନ୍‌ ପେର୍କେ ୱାଦାନଡ଼କ୍ କେତ୍‍ତଣ୍ଡ୍‍, “ନାନ୍ ସତ୍ କେତୁତାନ୍, ଇଶ୍ରାୟେଲ୍‍ତେ ବେନ୍ ନାରୁନ୍‍ନାଗ୍ ଇଣ୍ଡ୍ ନାରୁନ୍ ଲେକାମ୍ ବିଶ୍ୱାସ୍ ନାନ୍ ଉଡ଼ନ୍ ।
MAT 8:11 ଏର୍କା ମାଡ଼ାଟ୍, ମୁନେତ୍ ଦେଶ୍‍ତାଗାଙ୍କ୍ ନୁ ପଡ଼ଦ୍ଆଦାନ୍ ଦେଶ୍‍ତାଗାଙ୍କ୍ ନାର୍‍ଗେ ନାରୁଡ଼୍ ୱାସ୍ ସ୍ୱର୍ଗ ରାଜ୍ୟତାଗ୍ ଅବ୍ରାହାମ୍‌, ଇସ୍‍ହାକ୍ ନୁ ଯାକୁବ୍‍ ଅଣ୍ଡୟାଗେ କାର୍‍ଙ୍ଗି ତିନ୍ଦାନଙ୍କ୍ କୁଦିତଡ଼୍ ।
MAT 8:12 ବାତେଙ୍କ୍ ଇତ୍‍କେ ବେନଡ଼୍ ଇ ରାଜ୍ୟତାଗ୍ ମାନ୍ଦାନ୍ ମାତ୍‍ତେ ଅଡ଼୍‌‍କିଂଙ୍କ୍ ବାଇଦେ ଇକାଡ଼୍‍ତାଗ୍ ୱାଟିଦ୍‍ତଡ଼୍ । ଆଗେ ଅଡ଼୍‌ କେଇକେଇ ପାଲ୍‍କ୍ କର୍‍କିତଡ଼୍ ।”
MAT 8:13 ଜିସୁ ସେନାପତିଙ୍କ୍ କେତ୍‍ତଣ୍ଡ୍‍, “ଲୋନ୍‌ ଆନ୍‌ । ନିମ୍‍ ବାତେଏ ବିଶ୍ୱାସ୍ ମାଡ଼ୁତି, ଆଦେକେ ଆଦ୍‍ତେ ।” ଟିକ୍ ଆଦ୍ ସମୟ୍‍ତେ ସେନାପତିନ୍ ଦାସ ସୁସ୍ଥ ଆତ୍‍ତନ୍ ।
MAT 8:14 ଜିସୁ ପିତର୍‍ତେ ଲୋନ୍‌ ଆଞ୍ଜ୍ ଉଡ଼୍‍ତନ୍, ପିତର୍‍ତେ ପୟେଙ୍କ୍ ବୟଙ୍କାର୍ ହେଡ଼୍‍କ୍ ଆସ୍‍ମାତ୍‍ତେ ।
MAT 8:15 ଜିସୁ ତାନ୍ କାଇଦିଙ୍କ୍ ହିଟ୍‍ତେ ସାଙ୍ଗେ ସାଙ୍ଗେ ହେଡ଼୍‍କ୍ ୱିଡ଼୍‍ସ୍‍ତେ ନୁ ଆଦ୍ ତେଦି ମିକା ଜିସୁନାଦ୍ ସେବା ମାଡ଼ାଙ୍କ୍ ପସ୍ପ୍‍ତେ ।
MAT 8:16 ମୁଲ୍‍ପୁଟ୍ ଆତ୍‍ତାଙ୍କ୍ ନାରୁଡ଼୍ ନାର୍‍ଗେ ବୁତ୍‌ପଇତେ ନାରୁଡ଼୍‍କିଂଙ୍କ୍ ଜିସୁନ୍ ଗାର୍‍ରେ ତାତ୍‍ତଡ଼୍ । ପଦେନ୍ ଗଟ୍‍ତେ ଅଣ୍ଡ୍‌ ବୁତ୍‍ଆତ୍ମାକିଙ୍କ୍ ତଲ୍‍ତନ୍ ନୁ ରଗି ନାରୁଡ଼୍‍କିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ ।
MAT 8:17 ଆଦିନ୍ ସେଙ୍ଗେ ଆଦ୍ ବାବବାଦୀଡ଼୍ ଯିଶାୟିନ୍ ବବିଷ୍ୟତ୍‍ ବାଣିତିଙ୍କ୍ ସାରେ ମାଡ଼୍‍ତଣ୍ଡ୍ । ଯିଶାୟ କେତ୍‍ତଣ୍ଡ୍‍, “ଅଣ୍ଡ୍‌ ମାୱାଦ୍ କଷ୍ଟତିଙ୍କ୍ ଦୁରାମ୍ ମାଡ଼୍‍ତଣ୍ଡ୍ ନୁ ମାକିଂଙ୍କ୍ ରୋଗ୍‍ତାଗାଙ୍କ୍ ମୁକ୍ତି ମାଡ଼୍‍ତଣ୍ଡ୍ ।”
MAT 8:18 ଅନ୍‌ ତିଡ଼୍‍ପାକା ନାରୁଡ଼୍ ଗଅଲି ହାଦାନାଦ୍ ଉଡ଼ି, ଜିସୁ ଶିଷ୍ୟନଡ଼୍‍କ୍ ଇଲ୍‍କେତ୍‍ ଆପାକେ ଆଦାଙ୍କ୍ କେତ୍‍ତଣ୍ଡ୍‍ ।
MAT 8:19 ୱେରନ୍ ଦର୍ମଗୁରୁ ୱାସ୍ ଜିସୁଙ୍କ୍ କେତ୍‍ତଣ୍ଡ୍‍, ହୋ “ଗୁରୁ, ନିମ୍‍ ବେଗେ ଆଦ୍‍ତିନ୍‍, ଆଗେ ନାନ୍‍ନେ ମିକା ଆଦ୍‌ଦାଙ୍କ୍ ତିୟାର୍ ମିନ୍ଦେନ୍ ।”
MAT 8:20 ଜିସୁ ଅଂକିଙ୍କ୍‌ କେତ୍‍ତଣ୍ଡ୍‍, “କଙ୍ଗାନାକାନ୍ ଦୋର୍‌ରା ମିନ୍ଦେ, ପିଟେଙ୍କ୍ ତୁହୁକା ମିନ୍ଦେ । ବାତେଙ୍କ୍ ଇତ୍‍କେ ରମାନ୍ ସେଙ୍ଗେ ନାରୁଡ଼୍‍କ୍ ପଡ଼ିୟେ ଇଲେ ।”
MAT 8:21 ଜିସୁଙ୍କ୍ ମେଣ୍ଡ୍‍ଅର୍‍ତୁନ୍ ଶିଷ୍ୟ କେତ୍‍ତଣ୍ଡ୍‍, “ପ୍ରବୁ, ମୁନେନ୍ ଆଞ୍ଜ୍ ନା ବାବାଙ୍କ୍ ସମାଦି ହିଦାନ୍ ମାଇଦିଙ୍କ୍ ଗଟ୍ ହିମ୍ ।”
MAT 8:22 ଜିସୁ ଅଂକିଙ୍କ୍‌ କେତ୍‍ତନ୍ ନା ପେର୍କେପେର୍କେ ୱାଡ଼େ, ଡଲ୍‍ତେନଡ଼୍‍କିଂଙ୍କ୍ ସମାଦି ହିଦାଙ୍କ୍ ଡୋଲ୍‍ତଡ଼୍‍କ୍ ୱିଡ଼୍‍ସିମୁଟ୍ ।
MAT 8:23 ଅନ୍‌‍ଦିନେ ଜିସୁ ଶିଷ୍ୟଡ଼୍ ତଡ଼୍ ଓଡେତେ ଆଞ୍ଜମାତ୍‍ତଣ୍ଡ୍ ।
MAT 8:24 ହଟାତ୍ ସମୁଦ୍ରତାଗ୍ ଇଦ୍‍ଲେକାମ୍‍ ଗାଟି ଗାଲ୍‍ୱାର୍ସାମ୍ ୱାତ୍‍ତେ ନୁ ଓଡ୍‌ ହେର୍‍ଦାଗ୍ ମୁଡ଼୍‍ନ୍ଦାନ୍ ଲେକାମ୍ ଆତ୍‍ତେ । ବାତେଙ୍କ୍ ଇତ୍‍କେ ଜିସୁ ଆସୁଟେ ଉଞ୍ଜି ମାତ୍‍ତନ୍ ।
MAT 8:25 ଶିଷ୍ୟନଡ଼୍ ଅଂକିଙ୍କ୍‌ ତେସ୍ କେତ୍‍ତଡ଼୍, “ପ୍ରବୁ, ମାକିଂଙ୍କ୍ ରକ୍ଷା ମାଡ଼େ । ହିଲୁକ୍ ମାମ୍‍ମେ ମୁଡ଼୍‍ନ୍ଦି ଡଲିତମ୍ ।”
MAT 8:26 ଜିସୁ ଉତ୍ତର୍ କେତ୍‍ତଣ୍ଡ୍‍, “ବାତ୍‍ତିଙ୍କ୍ ହିସର୍ ୱେର୍‍ଦୁତିଡ଼୍ ? ମିଡ଼୍ ସାରେତଡ଼ି ବାତେଏ ସୁଦୁଟ୍ ବିଶ୍ୱାସିଡ଼୍ ?” ତାନ୍ ପେର୍କେ ଅଣ୍ଡ୍‌ ତେଦି ଗାଲ୍‍ତିଙ୍କ୍ ନୁ ତଲ୍‍କଡ଼୍‍ତିଙ୍କ୍ କଟ ଆଦାଙ୍କ୍ ଆଦେଶ୍ ହିତ୍‍ତନ୍ । ସାଙ୍ଗେ ସାଙ୍ଗେ ସାରେ ଶାନ୍ତି ଆତ୍‍ତେ ।
MAT 8:27 ଆଗାଙ୍କ୍ ସାରେତଡ଼୍ ବାକ୍‍ୱା ଆତ୍‍ତଡ଼୍ । ଅଡ଼୍‌ ନିଜେ ନିଜେ କେତାକେତି ଆତ୍‍ତଡ଼୍ “ହିଣ୍ଡ୍ ବେସତ୍ ନାରୁନ୍ ? ଗାଲ୍ ନୁ ତଲ୍‍କଡ଼୍ ମିକା ଅନ୍‌ ଗଟ୍ କେଞ୍ଜୁତା ।”
MAT 8:28 ଜିସୁ ଇଲ୍‍କେତ୍‍ ମେଣ୍ଡନ୍ ପାକେ ଗଦରିୟ ଯାଗାତାଗ୍ ଆସ୍‍ତେ ସାଙ୍ଗେ ସାଙ୍ଗେ ହିର୍‍ଉଡ଼୍ ନାରୁଡ଼୍‍କ୍ କାହିଲ୍‍ତଣ୍ଡ୍ । ଅଡ଼୍‌ ସମାଦି ପାଡ଼୍‍କିନ୍ ଲୋପେ ମାଞ୍ଜମାତ୍‍ତଡ଼୍ । ଅଡ଼୍‌ ବୁତ୍‍ ପହିତେନଡ଼୍ ନୁ ଗାଟି ବୟଙ୍କାର୍ ମାତ୍‍ତଡ଼୍ ଆଦ୍ ଆର୍‍ ଇସ୍‌ ଆଦ୍‍ଦା ୱାଦା ମାଡ଼ାଙ୍କ୍ ବେନମିକା ସାହାସ୍ ମାଡ଼ାଙ୍କ୍ ପାର୍‍ୱେ ମାତ୍‍ତଡ଼୍ ।
MAT 8:29 ଅଡ଼୍‌ ଜିସୁଙ୍କ୍ ଉଡ଼୍‍ତେ ସାଙ୍ଗେ ସାଙ୍ଗେ ଗାଟିଲେଙ୍କ୍‍ଦେ କେତ୍‍ତଡ଼୍, “ହୋ ଇଶ୍ୱର୍‌ତେ ମାର୍‍ ! ମାୟାଗ୍‌ କଞ୍ଜ୍ ନିମ୍‍ ବାତ୍‍ଇଚ୍ଛା ହାଦୁତିନ୍ ? ମାୱାଦ୍ ଦିନାମ୍ ହେଉୱାକେ ମାକିଂଙ୍କ୍ ବାତ୍ ଦଣ୍ଡ୍ ହିଦାଙ୍କ୍ ୱାତ୍‍ତିନ୍ ?”
MAT 8:30 ଆଗାଙ୍କ୍ ସୁଦୁଟ୍ ଦୁରାମ୍ ପାଦ୍‍ ମାନ୍ଦେ ମେୟମାତ୍‍ତା ।
MAT 8:31 ଆ ନାରିଡ଼୍ ଲୋପେ ମାନ୍ଦାନ୍ ବୁତ୍‌କ୍ ଜିସୁଙ୍କ୍ ଅନୁରଦ୍‌‍ ମାଡ଼ିକେତ୍‍ତା, “ମାକିଙ୍କ୍‍ ଯଦି ତଲାନଙ୍କ୍ ଇଚ୍ଛା ମାଡୁତିନ୍‍ ଆଲାଇତ୍କେ, ଆଉ ମାନ୍ଦେପାଦିନ୍ ଲୋପେ ରହସିମ୍ ।”
MAT 8:32 ଜିସୁ କେତ୍‍ତଣ୍ଡ୍‍ “ଆନୁଟ୍ । ବୁତ୍‌କ୍ ସାଙ୍ଗେ ସାଙ୍ଗେ ନାରୁଙ୍କ୍ ୱିଡ଼୍‍ସି ମାନ୍ଦେପାଦିନ୍ ଲୋପେ ହସ୍‍ତା । ପାଦି ମିରିଆଞ୍ଜ୍ ନୁ ମେଟେତ୍‍ ଆଞ୍ଚ୍ ମଦଲ୍ ଡିଗି ଇଲ୍‍କେତାଗ୍ ରାଲି ଡଲ୍‍ତା ।”
MAT 8:33 ପାଦି କେପାନ୍ ନାରୁଡ଼୍ ଗାର୍‍ରେତ୍ ସହର୍‍ତାଗ୍ ମିରିଆଞ୍ଜ୍ ବୁତ୍‍ପଇତେ ନଣ୍ଡ୍ ସେଙ୍ଗେ ବାତ୍ ଗଟେମ୍ଆତ୍‍ତେ ନୁ ମେଣ୍ଡେ ବାଗାତ୍ ସାରେ ଗଟି ଆଗେ କେସଡ଼୍‍ ଉଡ଼୍‌ତଡ଼୍ ।
MAT 8:34 ଆସୁଟେ ଆଦ୍ ସହର୍‍ତେ ସାରେତଡ଼୍ ଜିସୁଙ୍କ୍ କାଇଲାନ୍ ସେଙ୍ଗେ ପେଇତଡ଼୍ ମେଣ୍ଡେ ଅଂକିଙ୍କ୍‌ କାହିଲି ଆଦ୍ ପଡ଼ିୟେ ୱିଡ଼୍‍ସି ଆଦାନ୍ ସେଙ୍ଗେ ଅଂକିଙ୍କ୍‌ ଅନୁରଦ୍‌ ମାଡ଼୍‍ତଡ଼୍ ।
MAT 9:1 ଜିସୁ ଓଡେତାଗ୍ କୁଦି ଇଲ୍‍କେତ୍ ମେଣ୍ଡନ୍ ପାକ୍ ମାନ୍ଦାନ୍ ନିଜେତ୍ ସହର୍‍ତାଗ୍ ମାଲ୍‍ସ୍ ଆତ୍‍ତନ୍ ।
MAT 9:2 ଆଗେ ୱେରନ୍ ପକ୍ୟାଗାତ୍ ରୋଗିଙ୍କ୍ ନାରୁଡ଼୍ ଅନ୍‌ ଗାର୍‍ରେ ତାତ୍‍ତଡ଼୍ । ରୋଗି ତାନ୍ କେତ୍‍ତାଗ୍ ପାଟ୍‍ଟିମାତ୍‍ତନ୍ । ଜିସୁ ଅଡ଼ାଦ୍‌ ନାର୍‍ଗେ ବିଶ୍ୱାସ୍ ଉଡ଼ି ପକ୍ୟାଗାତ୍ ରୋଗିଙ୍କ୍ କେତ୍‍ତଣ୍ଡ୍, “ବାବୁ, ସାହାସ୍ ପୟିମ୍ । ନିୟାଦ୍ ପାପ୍‌ ସାରେ କ୍ଷମା ଆତ୍‍ତେ ।”
MAT 9:3 ବେସ୍‍କ୍‍ତୁଡ଼୍‍ ଶାସ୍ତ୍ରୀନାରୁଡ଼୍ ଇଦ୍ ଗଟ୍ କେଞ୍ଜି ହେର୍କା ମାଡ଼୍‌ତଡ଼୍, “ହିଣ୍ଡ୍ ନାରୁନ୍ ଇଶ୍ୱର୍‌ତିଙ୍କ୍ ଲିନ୍ଦ୍ ମାଡ଼ୁତଣ୍ଡ୍ ।”
MAT 9:4 ଅଡ଼ାଦ୍‌ ମନ୍‍ତାଦ୍ ଗଟ୍ ପୁଞ୍ଜ୍ ଜିସୁ କେତ୍‍ତଣ୍ଡ୍‍, “ମିଡ଼୍ ବାତେଙ୍କ୍ କାରାପ୍ ଶିନ୍ତେ ମାଡ଼ୁତିଡ଼୍ ?
MAT 9:5 ‘ମିୟାଦ୍ ପାପ୍ କ୍ଷମା ଆତ୍‍ତେ ?’ ହିଦ୍ ଗଟ୍ କେତାନାଦ୍ ସହଜ୍ ନା ‘ତେଦି ଆନ୍‌’ କେତାନାଦ୍ ଅଦିକ୍‌ ସହଜ୍ ?
MAT 9:6 ବାତେଙ୍କ୍ ଇତ୍‍କେ ପୃତିବିତେ ପାପ୍ କ୍ଷମା ମାଡ଼ାନାଦ୍ ଗାଲା ମନୁଷ୍ୟପୁତ୍ରନ୍ ଅଦିକାର୍‌ ମିନ୍ଦେ, ଇଦ୍ ଗଟ୍ ମିଇ ମୁନେ ପ୍ରମାନ୍ ମାଡ଼ିତାନ୍ ।” ତାନ୍ ପେର୍କେ ଜିସୁ ପକ୍ୟାଗାତ୍ ରୋଗିଙ୍କ୍ କେତ୍‍ତଣ୍ଡ୍‍, “ତେଦା, କେତ୍‍ ତେଇସ୍, ଲୋନ୍‌ ମାଲ୍‍ସ୍ ଆନ୍‌ ।”
MAT 9:7 ଅନ୍‍ ମୁନେ ରୋଗି ତେଦିମେଣ୍ଡେ ଲୋନ୍‌ ଆତ୍‍ତନ୍ ।
MAT 9:8 ନାରୁଡ଼୍ ଆଦ୍ ଉଡ଼ି ବାକ୍‍ୱା ଆଦ୍‍ତଡ଼୍ । ବାତେଙ୍କ୍ ଇତ୍‍କେ ନାରୁନ୍‍ପିଲେତିଙ୍କ୍ ହିଦ୍‍ଲେକାମ୍ ଅଦିକାର୍‌ ହିତ୍‍ତାଙ୍କ୍ ଅଡ଼୍‌ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତଡ଼୍ ।
MAT 9:9 ଜିସୁ ଆଗାଙ୍କ୍‌ ଆଦାନ୍ ୱେଲେ ମାତିଉ ପେଦେର୍‍ତଣ୍ଡ୍ ୱେରଣ୍ଡ୍ କରହାଦାୟ୍‍ ମାଡ଼ାନକିଙ୍କ୍ ଅପିସ୍‍ତାଗ୍ କୁଦିମାନ୍ଦାନାଦ୍ ଉଡ଼୍‍ତନ୍ ନୁ ଅଂକିଙ୍କ୍‌ କାର୍‍ଙ୍ଗି କେତ୍‍ତଣ୍ଡ୍‍, “ନା ପେର୍କେପେର୍କେ ୱାଡ଼େ ।” ମାତିଉ ତେଦି ଅଂକିଙ୍କ୍‌ ଲେକେତ୍‌ ମାଡ଼୍‍ତଣ୍ଡ୍ ।
MAT 9:10 ଜିସୁ ମାତିଉନ୍ ଲୋନ୍‌ ତିନ୍ଦାନ୍ ୱେଲେ ନାର୍‍ଗେ କରଆଦାୟନଡ଼୍ ନୁ ଦୁଷ୍ଟ ନାରୁଡ଼୍ ନୁ ତାନ୍ ଶିଷ୍ୟଡ଼୍ ତଡ଼୍ ତିନ୍ଦାଙ୍କ୍ କୁଦ୍‍ତଡ଼୍ ।
MAT 9:11 ବେସ୍‍କ୍‍ତୁଡ଼୍‍ ଦୁଷ୍ଟ ନାରୁଡ଼୍ ଉଡ଼ିମେଣ୍ଡେ ଶିଷ୍ୟଡ଼୍‍କିଂଙ୍କ୍ ପାଚ୍‍ରିଞ୍ଚ୍‍ତଡ଼୍, “ମିଇ ଗୁରୁ ହିଦ୍‍ରକମ୍ ନାରିଡ଼୍ ତଡ଼୍ ବାତ୍‍ତିଙ୍କ୍ ଅଣ୍ଡୟାଗେ କୁଦିତିନ୍ଦୁତଣ୍ଡ୍ ?”
MAT 9:12 ଜିସୁ ଅଂକିଙ୍କ୍‌ ଉତ୍ତର୍ ଇସ୍‌ କେତ୍‍ତଣ୍ଡ୍‍, “ସୁସ୍ଥ ନାରୁଡ଼୍‍ତେ ସେଙ୍ଗେ ଡାକ୍ଟର୍ ଦର୍‍କାର୍ ଆୟ୍‍ୟ । ମାତର୍ ରୋଗି ନାରିଡ଼୍ ସେଙ୍ଗେ ଡାକ୍ଟର୍ ଦର୍‍କାର୍ ।
MAT 9:13 ଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ, ନାୱାଦ୍ ଇଚ୍ଛା ଦୟା, ବଲିଦାନ୍ ଆୟ୍‍ୟ, ଇ ଗଟ୍‍ତେ ଇତ୍‍କେ ବାତେଏ, ଆଞ୍ଜ୍ ମେଣ୍ଡେ ବୁଜେମ୍‍ଆଦାନଙ୍କ୍ ଆଲ୍‍ସି ମାଡ଼େ । ନାନ୍ ଦାର୍ମିକ୍ ନାରିଡ଼୍‍କ୍ କାର୍‍ଙ୍ଗାଙ୍କ୍ ୱାଡ଼ନ୍; ୱାତ୍‍ତାନ୍ ପାପିନାରିଡ଼୍‍ ସେଙ୍ଗେ ।”
MAT 9:14 ତାନ୍ ପେର୍କେ ବାପ୍ତିସ୍ମ ଯୋହନ୍‌‌ତେ ଶିଷ୍ୟନଡ଼୍ ଜିସୁନ୍ ପାକେ ୱାସ୍ ପାଚ୍ରାମାଡ଼୍‍ତଡ଼୍, “ମାମ୍‍ମେ ନୁ ପାରୂଶୀଡ଼୍ ହିସଦାମ୍ ଉପବାସ୍ ମାଡ଼ୁତମ୍, ନି ଶିଷ୍ୟଡ଼୍ ବାତ୍‍ତିଙ୍କ୍ ବେସୁଙ୍କ୍‍ ବା ଉପବାସ୍ ମାଡ଼ଡ଼୍‍ ?”
MAT 9:15 ଜିସୁ କେତ୍‍ତଣ୍ଡ୍‍, ପେଣ୍ଡୁଲ୍ ଆଦାନାଗ୍ ବର ମାନ୍ଦାନ୍ ଯାକ କୁଟ୍‍ମାମ୍‍ ବାତେଏ ଦୁଃକାମ୍ ମାଡ଼ିତଡ଼୍ ? ବେସୁଙ୍କ୍‍ ବା ଆୟ୍‍ୟ । ବାତେଙ୍କ୍ ଇତ୍‍କେ ଦିନାମ୍ ୱାଦ୍‍ତେ, ବେସୁଙ୍କ୍‍ ବର ଆଦ୍‍ତନ୍; ଆସୁଟେ ଅଡ଼୍‌ ଉପବାସ୍ ମାଡ଼ିତଡ଼୍ ।
MAT 9:16 “ବେନ ପାଃନ୍ତେ ସିଲେନାଗ୍ ପୁନାଲାଉ କନାନ୍ ତାଲି ୱାଟଡ଼୍ । ବାତେଙ୍କ୍ ଇତ୍‍କେ ପୁନାଲାଉ କନା ତାଲି ମୁଦାନାଉ ଆସ୍ ଇଙ୍କ୍‍ତେ ପଡ଼ିୟେ ତାଗ୍ ଅଦିକ୍‌ ଇକିତ୍ ।
MAT 9:17 ବେନ ପାଃନ୍ତେ ତଲ୍‍କେ ଗିନେତାଗ୍ ପୁନାଦ୍ ଦ୍ରାକ୍ଷାରସ୍ ବର୍ତ୍ତି ମାଡ଼ଡ଼୍‍ । ବାତେଙ୍କ୍ ଇତ୍‍କେ ଆଦିନ୍ ତଡ଼୍ ତଲ୍‍କେ ତାଲି ହିଙ୍ଗି ନଷ୍ଟ ଆଦ୍‍ତେ ନୁ ଦ୍ରାକ୍ଷାରସ୍ ୱାଙ୍ଗ୍‍ଗି ନେଲ୍ ରାଲ୍‍ତେ । ପୁନାଦ୍ ଦ୍ରାକ୍ଷାରସ୍‍ତିଙ୍କ୍ ପୁନେ ତଲ୍‍କେ ଗିନେତାଗ୍ ୱାଟ୍‍କେ, ରେଣ୍ଡ୍ ଦ୍ରାକ୍ଷାରସ୍ ନୁ ତାଲି ସାୟେ ମାନ୍‍ତେ ।”
MAT 9:18 ଜିସୁ ଇଉ ସାରେ ଶିକ୍ଷା ହିଦାନ୍ ୱେଲେ ୱେରନ୍ ଇହୁଦୀ ମୁକ୍ୟଦାସ ଅନ୍‌ ପାକେୱାସ୍ ମର୍‍ମିଣ୍ଡା ଉସ୍‍ କେତ୍‍ତଣ୍ଡ୍‍, “ହିଞ୍ଜେନେ ନା ମାୟାଡ଼୍ ଡଲ୍‍ତେ । ବାତେଙ୍କ୍ ଇତ୍‍କେ ନିମ୍‍ ୱାସ୍ ତାନ୍ ପର୍‍ର କାୟ୍ ୱାଟ୍‍କେ, ଆଦ୍ ନିଜାମ୍ ଜିୱୁନ୍‍ଆଦ୍‍ତେ ।”
MAT 9:19 ସାଙ୍ଗେ ସାଙ୍ଗେ ଜିସୁ ତେଦ୍‍ତନ୍ ନୁ ଅଣ୍ଡ୍‌ ନୁ ତାନ୍ ଶିଷ୍ୟନଡ଼୍ ଅନ୍‌ ଶିଷ୍ୟ ପେର୍କେ ଆଦ୍‍ତଡ଼୍ ।
MAT 9:20 ଜିସୁ ଆଦାନ୍ ୱେଲେ ୱେରଡ଼୍ ନାଟାଡ଼୍ ଅନ୍‌ ଗାରେ ୱାସ୍ ଅନ୍‌ ସିଲେତିଙ୍କ୍ ହିଟ୍‍ତେ । ଆଦ୍ ବାରହେଣ୍ଡ୍ ଯାକ ଗାଟି ନେତୁର୍ ପେଇତାନ୍ ରୋଗ୍‍ତେ କଷ୍ଟ ଆସମାତ୍‍ତେ ।
MAT 9:21 ଆଦ୍ ଏର୍କା ମାଡ଼୍‍ତେ, “ମାତର୍ ଅନ୍‌ ସିଲେତିଙ୍କ୍ ୱେରଡ଼୍‍ଦାମ୍ ହିଟ୍‍କେ, ନାନ୍ ସୁସ୍ଥ ଆଦ୍‍ତନ୍ ।”
MAT 9:22 ଜିସୁ ତାଙ୍କ୍ ମାଲ୍‍ସ୍ ଉଡ଼୍‍ତନ୍ ନୁ ମେଣ୍ଡନ୍ ପାକ୍ ଇସ୍‌ କେତ୍‍ତାନ୍, “ନନି, ସାହାସ୍ ପହିମ୍ । ନି ବିଶ୍ୱାସ୍ ନିକିଂଙ୍କ୍ ସୁସ୍ଥ ମାଡ଼୍‍ତେ ।” ଆସୁଟେ ଆ ମୁତ୍‍ତେ ସୁସ୍ଥ ଆତ୍‍ତେ ।
MAT 9:23 ତାନ୍ ପେର୍କେ ଜିସୁ ଇହୁଦୀ ଦାସନ୍ ଲୋନ୍‌ ହେଉତନ୍ । ଆଗେ କାର୍‍ଙ୍ଗି ମାନ୍ଦାନ୍ ବାଦ୍ୟକାର୍ ନୁ ମେଣ୍ଡ୍‍ବାଗାତ୍ ନାରୁଡ଼୍ ଗଲ୍‍କ୍ ମାଡ଼ାନାଦ୍ ଉଡ଼ି,
MAT 9:24 ଜିସୁ କେତ୍‍ତଣ୍ଡ୍‍, “ସାର୍‍ତଡ଼ି ହିଗାଙ୍କ୍ ପେଇସ୍ ଆନୁଟ୍ । ପିକିର୍‍ ଡଲ୍‍ଲ । ଆଦ୍ ଉଞ୍ଜିମିନ୍ଦେ ।” ଅନାୱୁ ଗଟି କେଞ୍ଜି ଅଡ଼୍‌ ପରିହାସ୍ ମାଡ଼୍‍ତଡ଼୍ ।
MAT 9:25 ବାତେଙ୍କ୍ ଇତ୍‍କେ ଅଡ଼୍‌ ପେଇସ୍ ଆତ୍‍ତେ ପେର୍କେ ଜିସୁ ପିକ୍‍ତେ ବାକ୍‍ଡ଼େତାଗ୍ ଆଞ୍ଜ୍ ତାନ୍ କାଇଦିଙ୍କ୍ ପଇସ୍ ତେହେତ୍‍ତଣ୍ଡ୍ ନୁ ଆଦ୍ ସାଙ୍ଗେ ସାଙ୍ଗେ ତେଦି କୁଦ୍‍ତଣ୍ଡ୍‍ ।
MAT 9:26 ଇଦ୍ ଗଟନାତାଦ୍ କବର୍ ଆଦ୍ ପଡ଼ିୟେତାଗ୍ ସାରେପାକ୍ ଗଟ୍ ଆତ୍‍ତେ ।
MAT 9:27 ଜିସୁ ଆଗାଙ୍କ୍ ୱାଦାନ୍ ୱେଲେ ଇର୍‍ୱୁଡ଼୍ କାନାଲଡ଼୍‍କ୍ ଅଣ୍ଡ୍‌ ସୁସ୍ଥ ମାଡ଼୍‍ତଡ଼୍ । ଅଡ଼୍‌ ଗାଟି ଲେଙ୍ଗ୍‍ଦେ କେତ୍‍ତଡ଼୍, “ହୋ ଦାଉଦ୍‍ ବଂଶତଣ୍ଡ୍, ମାକିଂଙ୍କ୍ ଦୟା ମାଡ଼େ ।”
MAT 9:28 ଅଡ଼୍‌ ଜିସୁନ୍ ପେର୍କେପେର୍କେ ଆଞ୍ଜ୍ ଅଣ୍ଡୟ୍‌ ଲୋନ୍‌ ହସ୍‍ତଡ଼୍ । ଆଗେ ଜିସୁ ଅଡ଼୍‌‍କିଂଙ୍କ୍ ପାଚ୍ରାମାଡ଼ତଣ୍ଡ୍, “ନାନ୍ ମିକିଂଙ୍କ୍ ସୁସ୍ଥ ମାଡ଼ିତାନ୍ ଇଞ୍ଜ ମିଡ଼୍ ବିଶ୍ୱାସ୍ ମାଡ଼ୁତିଡ଼୍ କି ?” ଅଡ଼୍‌ ଉତ୍ତର୍ ହିତ୍‍ତଡ଼୍, “ହୋ ପ୍ରବୁ ।”
MAT 9:29 ଆସୁଟେ ଜିସୁ ଅଡ଼ାୱୁ କଣ୍ଡାଙ୍କ୍ ଇଟି ମିକା କେତ୍‍ତଣ୍ଡ୍, “ନିମ୍‍ ବେଲା ବିଶ୍ୱାସ୍ ମାଡ଼ୁତିନ୍ ଆଦେରକମ୍ ଆୟି ।”
MAT 9:30 ଆସୁଟେ ସାଙ୍ଗେ ସାଙ୍ଗେ ଅଡ଼୍‌ କଣ୍ଡା ଉଡ଼୍‍ତଡ଼୍ । ଜିସୁ ଅଡ଼୍‌‍କିଂଙ୍କ୍ କଡ଼ା ଗଟ୍ ଇସ୍‌ କେତ୍‍ତଣ୍ଡ୍, “ସାବ୍‍ଦାନ୍ ! ବେନମେଣ୍ଡ୍ ଇଦ୍ ଗଟ୍ ପୁନ୍‍ମାକି ।”
MAT 9:31 ବାତେଙ୍କ୍ ଇତ୍‍କେ ଅଡ଼୍‌ ଆଗାଙ୍କ୍ ଆଞ୍ଜ୍ ଜିସୁନ୍ ଗଟି ସାରେଏକାମ୍ ପ୍ରଚାର୍ ମାଡ଼୍‍ତଡ଼୍ ।
MAT 9:32 ଅଡ଼୍‌ ଆଦାନ୍ ୱେଲେ ବେସ୍‍କ୍‍ତୁଡ଼୍‍ ନାରୁଡ଼୍ ୱେରଣ୍ଡ୍ କନ୍ଦାଙ୍କ୍ ଜିସୁନ୍ ଗାର୍‍ରେ ତାତ୍‍ତଡ଼୍ । ଅଂକିଙ୍କ୍‌ ବୁତ୍ ପଇସ୍ ମାତ୍‍ତାଙ୍କ୍ ଅଣ୍ଡ୍‌ କନ୍ଦାଲ୍ ଆସ୍ ମାତ୍‍ତଣ୍ଡ୍ ।
MAT 9:33 ଜିସୁ ଅନ୍‌ ମେନ୍ଦୁଲ୍‍ତେ କନ୍‍ସ୍ ବୁତ୍‌ତିଙ୍କ୍ ପେସ୍ପ୍‍ତେ ସାଙ୍ଗେ ସାଙ୍ଗେ ଅଣ୍ଡ୍‌ ଗଟି ତିରିୟାଙ୍କ୍ ପସ୍‍ପ୍‍ତଣ୍ଡ୍ । ସାରେତଡ଼୍ ବାକ୍‍ୱା ଆସ୍ କେତ୍‍ତଡ଼୍, “ଇସ୍ରାଏଲ୍ ଦେଶ୍‍ତାଗ୍ ମାମ୍‍ମେ ଇଦ୍‍ରକମ୍ ପାଡ଼୍‍ୟି ବେସୁଙ୍କ୍‍ ଉଡ଼୍‍ୱେ ମାତ୍‍ତମ୍ ।”
MAT 9:34 ବାତେଙ୍କ୍ ଇତ୍‍କେ ପାରୂଶୀଡ଼୍ କେତ୍‍ତଡ଼୍, “ଇଣ୍ଡ୍ ନାରୁଡ଼୍ ବୁତ୍‌ପତି ଶକ୍ତିତଡ଼୍ ବୁତ୍‌କ୍ ୱିଡ଼୍‍ସ୍‍ପୁତଣ୍ଡ୍ ।”
MAT 9:35 ଜିସୁ ଉଡିଉଡି ନାର୍‍ଗେ ସହର୍ ନୁ ନାର୍‍କିନାଗ୍ ଆତ୍‍ତଣ୍ଡ୍ । ସାରେ ପଡ଼ିୟେତାଗ୍ ଅଣ୍ଡ୍‌ ପ୍ରାର୍ତନା ଲୋକିନାଗ୍ ଶିକ୍ଷା ହିତ୍‍ତଣ୍ଡ୍, ସ୍ୱର୍ଗରାଜ୍ୟତେ ସାଏତ୍ କବର୍ ପ୍ରଚାର୍ ମାଡ଼୍‍ତଣ୍ଡ୍ ନୁ ନାର୍‍ଗେ ରଗ୍‍ତେ ନୁ ରୋଗି ନାରୁଡ଼୍‍କ୍ ସୁସ୍ଥ ମାଡ଼୍‍ତଣ୍ଡ୍ ।
MAT 9:36 ନାରୁଡ଼୍‍କିଂଙ୍କ୍ ଉଡ଼ି ଅଣ୍ଡ୍‌ ଦୟା ମାଡ଼୍‍ତଣ୍ଡ୍, ବାତେଙ୍କ୍ ଇତ୍‍କେ ମେୟିତାନଣ୍ଡ୍ ଇଲ୍‍ୱେ ମେଣ୍ଢାନ୍ ରକମ୍ ଅଡ଼୍‌ ଗାଟିଦାନ୍ଦେ ଆସ୍‍ସ ମାତ୍‍ତଡ଼୍ ।
MAT 9:37 ଆଦିଙ୍କ୍ ଅଣ୍ଡ୍‌ ଶିଷ୍ୟଡ଼କିଙ୍କ୍ କେତ୍‍ତଣ୍ଡ୍, “ପସଲ୍ ନାର୍‍ଗେ ଆସ୍‍ମିନ୍ତେ, ବାତେଙ୍କ୍ ଇତ୍‍କେ ଆୱିଙ୍କ୍ ଜତନ୍ ଅଦାନ୍ ସେଙ୍ଗେ କୁଲିକି ସୁକୁକ୍‍ ମିନ୍ଦେ ।
MAT 9:38 ନାର୍‍ଗେ କୁଲି ନାରୁଡ଼୍‍କିଂଙ୍କ୍ ରହସ୍ କେଡ଼୍ କଇସ୍ ଆଦାନ୍ ମାଇଦିଙ୍କ୍ ୱାୟେ ମାଲିକ୍‍ତିଙ୍କ୍ ଅନୁରଦ୍‌‍ ମାଡ଼ି କେଲ୍‍ମୁଟ୍ ।”
MAT 10:1 ଜିସୁ ତାନ୍ ବାରଜାନ୍ ଶିଷ୍ୟଡ଼୍‍କିଂଙ୍କ୍ କାର୍‍ଙ୍ଗି ବୁତ୍ ୱିଡ଼୍‍ସ୍‍ପାନ୍ ସେଙ୍ଗେ ନୁ ସାରେ ଲେକାମ୍ ଦୁଃକାମ୍ କନ୍‍ସ୍ ସୁସ୍ଥ ମାଡ଼ାନ୍ ସେଙ୍ଗେ ଶକ୍ତିଇସ୍ ଅଡ଼୍‌‍କିଂଙ୍କ୍ ରହସିତ୍‍ତଣ୍ଡ୍ ।
MAT 10:2 ଅଡ଼୍‌‍ ବାରଜାନ୍ ପ୍ରେରିତ୍‍ ଶିଷ୍ୟଡ଼୍ ପେଦେର୍ ଶିମୋନ୍ ନୁ ତାନ୍ ତାମୁଣ୍ଡ୍‌ ଆନ୍ଦ୍ରିୟ; ଯେବଦିନ୍ ଇର୍‍ୱୁଡ଼୍ ମାର୍‍କ୍ ଯାକୁବ୍ ନୁ ଯୋହନ୍‌;
MAT 10:3 ପିଲିପ୍, ବର୍ତଲମି, ତୋମା ନୁ କରଆଦାୟକାରି ମାତିଉ; ତଦ୍ଦିୟ, ଆଲ୍‍ଫିତେ ମାର୍‍ ଯାକୁବ୍;
MAT 10:4 ଦେଶ୍‍ପ୍ରେମି ଶିମୋନ୍ ନୁ ଜିସୁଙ୍କ୍ ବିଶ୍ୱାସଗାତକତା ମାଡ଼ିମାନ୍ଦାନ୍ ଇଷ୍କାରିୟୋତିୟ ଯିହୁଦା ।
MAT 10:5 ଅଣ୍ଡ୍ ଅଡ଼୍‌‍କିଂଙ୍କ୍ ରତ୍‍ତାନ୍ ୱେଲେ ଆଦେଶ୍ ଇସ୍ କେତ୍‍ତନ୍ ମିଡ଼୍, “ଅଣଇହୁଦୀଡ଼୍ ଦେଶ୍‍ତାଗ୍ ଆନ୍‌‍ମାଟ୍ । ବେନ୍ ଶମିରୋନିୟ ସହର୍ ତା ମିକା ଆନ୍‌‍ମାଟ୍ ।”
MAT 10:6 ମାଇ ମାନ୍ଦାନ୍ ମେଣ୍ଢାନ୍‍ଲେକେ ଇଶ୍ରାଲୀୟଡ଼୍ ପାକେ ଆନୁଟ୍ ।
MAT 10:7 ଅଡ଼୍‌‍ଲୋପେ ଆଞ୍ଜ୍ ପ୍ରଚାର୍ ମାଡ଼ି କେଲ୍‍ମୁଟ୍, “ସ୍ୱର୍ଗରାଜ୍ୟ ଆଦାନାଦ୍‌ !”
MAT 10:8 ରୋଗି ନାରୁଡ଼୍‍କ୍ ସୁସ୍ଥ ମାଡ଼ାଟ୍, ଡଲ୍‍ତେ ନାରିଡ଼୍‍କ୍ ମେଣ୍ଡେ ଜିୱେ ମାଡ଼ାଟ୍, କୁଷ୍ଠି ନଡ଼କ୍ ରୋଗ୍ ମୁକ୍ତ ମାଡ଼ାଟ୍, ବୁତ୍ ୱିର୍‍ସ୍‍ପାଟ୍ । ବାତ୍ ଆସମ୍ ଡାବ୍‍ତେ ଦର୍‍କ୍‍ତେ, ଆଦ୍ ବାଗାତ୍ ନାରୁଡ଼୍‍କ୍ ଆସାମ୍ ପାଇସାନେ ଦାନ ମାଡ଼ାଟ୍ ।
MAT 10:9 ଆର୍କେ ସୁନା, ରୁପା ନୁ ଡାବ୍‍କ୍ ଅୟ୍‍ମାଟ୍,
MAT 10:10 ବିକ୍ ତାଲି ପଇସ୍ ଉଡ୍‍ମାଟ୍ । ଅଣ୍ଡୟ୍‌ ମିକା ସିଲେ ଅଦିକ୍‌ ଅୟ୍‍ମାଟ୍, ହେର୍‍ପୁକ୍ ନୁ ଟେଙ୍ଗା ମିକା ଅୟ୍‍ମାଟ୍ । ପାଡ଼ିୟିମାଡ଼ାନଡ଼୍ ତାମାଦ୍ ମଜୁରି ଦର୍‍କାନ୍ ସେଙ୍ଗେ ହକ୍‍ଦାର୍ ।
MAT 10:11 “ଅଣ୍ଡୟ୍‌ ସହର୍ ବା ନାର୍‍ଦାଗ୍ ହେଉତେ ୱେଲେ ମିକିଂଙ୍କ୍ ଆଗେ ବେନ ସେବା ମାଡ଼ିତନ୍, ଆଦ୍ ଗଟ୍ ବୁଜେମ୍ ଆସ୍ ମେଣ୍ଡନ୍ ପାକେ ଆଦାନ୍ ଯାକ ଆଦେ ଲୋନ୍‌ ମାନୁଟ୍ ।”
MAT 10:12 ଅଣ୍ଡୟ୍‌ ଲୋନ୍‌ ଅସ୍‍ତେ ୱେଲେ ଆଗେମାନ୍ଦାନ୍ ନାରୁଡ଼୍‍କିଂଙ୍କ୍ ନମସ୍କାର୍‌ ମାଡ଼ି କେଲାଟ୍, “ମିୟାଦ୍ ଶାନ୍ତି ଆୟି ।”
MAT 10:13 ଅଡ଼୍‌ ଯଦି ମିକିଂଙ୍କ୍ କାର୍ଙ୍ଗିତଡ଼୍‍, ଅଡ଼୍‌ ସେଙ୍ଗେ ମିୟାଦ୍ ଆଶିର୍ବାଦ୍‍ ସାରେ ଆଦ୍‍ତେ । ବାତେଙ୍କ୍ ଇତ୍‍କେ ମିକିଂଙ୍କ୍ ଯଦି କାର୍ଙ୍ଗଡ଼୍‍, ମିଡ଼୍ ମିଇ ଆଶିର୍ବାଦ୍‍ ମାଲ୍‍ପି ଅୟ୍‍ମୁଟ୍ ।
MAT 10:14 ଯଦି ବେନ ମିକିଙ୍କ୍ ଗ୍ରହନ୍‍ ମାଡ଼ଣ୍ଡ୍‍ ବା ମିୟାଦ୍‍ ଗଟ୍‍ କେଞ୍ଜଣ୍ଡ୍‍, ଆଦ୍‍ ଲୋନ୍‌ ବା ନାର୍‍ତାଗାଙ୍କ୍‍ ପେୟ୍‍ସ୍‍ ଆଦାନ୍‍ ୱେଲେ ଡେକେତ୍ ମାଣ୍ଡୁଲ୍ କାହିସିସ୍ ଆଦ୍‍ପଡ଼ିୟେ ୱିଡ଼୍‍ସିନ୍ ।
MAT 10:15 ନାନ୍ ନିକିଂଙ୍କ୍ ନିଜାମ୍‍ କେତୁତନ୍, ବିଚାର୍ ଦିନାତେ ହିଡ଼ାକଞ୍ଜ୍ ସଦୋମ୍‍ ନୁ ଗମୋରାତେ ନାରୁଡ଼୍‍କିଂଙ୍କ୍ ଇଶ୍ୱର୍ ଅଦିକ୍‌ ଅନୁଗ୍ରହ ମାଡ଼ିତନ୍ ।
MAT 10:16 “କେଞ୍ଜାଟ୍, ମେଣ୍ଢାଙ୍କ୍ କୁକାଲ୍‍ ପାୟୁର୍‍ତାଦ୍ ତୁର୍‍ସିତ୍‍ତେ ଲେକାମ୍ ନାନ୍ ମିକିଂଙ୍କ୍ ରତୁତାନ୍ । ଆଦିଙ୍କ୍ ମିଡ଼୍ ତାଡ଼ାମ୍ ଲେକାମ୍ ତିଆର୍‍ତେ ମାନୁଟ୍, ବାତେଙ୍କ୍ ଇତ୍‍କେ ମିଡ଼୍ ବଡେ ବେଲା ବେନଙ୍କ୍ ଇଂସା ମାଡ଼, ମିଡ଼୍ ଆଦ୍‍ଲେକାମ୍ ଆୟ୍‍ମୁଟ୍ ।”
MAT 10:17 ତିଆର୍‍ତେ ମାନୁଟ୍, ବାତେଙ୍କ୍ ଇତ୍କେ ନାରୁଡ଼୍ ମିକିଂଙ୍କ୍ ଗିରାପ୍ ମାଡ଼ି ବିଚାର୍‍ଲତ୍‍ତାଗ୍ ଅଦ୍‍ତଡ଼୍ । ପ୍ରାର୍ତନା ଲୋକିନାଗ୍‍ ଅଡ଼୍‌ ମିକିଂଙ୍କ୍ ଚାବୁକ୍ ତଡ଼୍ ରେହେତିତଡ଼୍ ।
MAT 10:18 “ନା ସେଙ୍ଗେ ମିଡ଼୍ ରାଜା ନୁ ଶାସନ୍‍ କର୍ତାଲଡ଼୍‍ ମୁନେ ଅସ୍ ବିଚାର୍ ମାଡ଼ିତଡ଼୍ । ଇଦିନ୍ ତଡ଼୍ ଅଡ଼୍‌‍କିଂଙ୍କ୍ ନୁ ବିଜାତିଡ଼୍ ନାରୁଡ଼୍‍କିଂଙ୍କ୍ ଚାୟେତ୍‍ କବର୍ ଇଦାନ୍ ମାଇଦିଙ୍କ୍ ସାକ୍ଷି ଆଦ୍‍ତିଡ଼୍ ।
MAT 10:19 ମିକିଂଙ୍କ୍ ବିଚାର୍ ମାଡ଼ାନ୍ ୱେଲେ ବାତ୍ କେତିତିଡ଼୍ ନୁ ବେଲାକେତିତିଡ଼୍, ହିଦ୍ ବିଷୟ୍‍ତେ‍ ଚିନ୍ତେ ମାଡ଼୍‍ମାଟ୍ । ଟିକ୍ ସମୟ୍‍ତେ ଆଦ୍ ମିକିଂଙ୍କ୍ କେସ୍‍ସିଦ୍‌ତଡ଼୍‌ ।
MAT 10:20 ବାତେଙ୍କ୍ ଇତ୍‍କେ ମିକିଂଙ୍କ୍ ନିଜେ ବାତ୍‍ମିକା କେତାଙ୍କ୍ ୱେୟ୍ । ବାବାଲ୍ ଇଶ୍ୱର୍‌ତାଦ୍ ପବିତ୍ର ଆତ୍ମା ମିଇ ପାୟୁର୍‍ତେ ଆଲାଇତ୍‍କେ ଗଟ୍‍କେତ୍‍ତିତ୍ ।”
MAT 10:21 “ନାରୁଡ଼୍ ନିଜେତ୍ ତାମୁଣ୍ଡ୍‌କିଡ଼୍‍କ୍ ଡଲାନ୍‍ଦଣ୍ଡ୍ ହିଦାନ୍ ମାଇଦିଙ୍କ୍ ପସ୍‍ପିଦ୍‍ତଡ଼୍‍ । ବାବାଲ୍ ମିକା ନିଜେତ୍ ପିଲାନ୍ ସେଙ୍ଗେ ଆଦ୍‍ଲେକାମ୍ ବେବ୍ୟହାର୍ ମାଡ଼ିତନ୍ । ପିଲା ତାମ୍ ୟାୟ୍‍ ବାବାନ୍ ବିରୁଦ୍‍ତେ ଆଞ୍ଜ୍, ଅଡ଼୍‌‍କିଂଙ୍କ୍ ଆୱକିତଡ଼୍ ।
MAT 10:22 ନା ସେଙ୍ଗେ ସାରେତଡ଼୍ ମିକିଂଙ୍କ୍ ପାସ୍‍କି ତଡ଼୍; ବାତେଙ୍କ୍ ଇତ୍‍କେ ବେନହାୟି ପେର୍କେଆଇନା ଶକ୍ତିତଡ଼୍ ପଇସ୍‌ ମାନ୍‍ତଣ୍ଡ୍, ଅଣ୍ଡ୍‌ ମୁକ୍ତି ଆଦ୍‍ତନ୍ ।
MAT 10:23 ୱେରଡ଼୍ ସହର୍ ତାଗ୍ ମିକିଂଙ୍କ୍ କଷ୍ଟ ଆତ୍‍କେ ମେଣ୍ଡ୍‍ନ୍ ସହର୍ ତାଗ୍ ମିରାଟ୍ । ନାନ୍ ମିକିଂଙ୍କ୍ ନିଜାମ୍‍ ଗଟ୍ ଇସ୍‌ କେତୁତାନ୍, ମିଡ଼୍ ଇଶ୍ରାୟେଲ୍ ତେ ସାରେ ସହର୍‍ତାଗ୍ ପାଡ଼୍‍ୟି ତେର୍‍ସ୍ପାନ୍ ମୁନେଙ୍କ୍ ନାରୁନ୍‍ପିଲେ ମାଲ୍‍ସ୍ ୱାଦ୍‍ତନ୍ ।”
MAT 10:24 “ଶିଷ୍ୟଡ଼୍ ଗୁରୁନାଗା କଞ୍ଜ୍ ବେଡ଼ିୟନ୍ ଆୟ୍‍ୟଣ୍ଡ୍‍ । ମାଲିକ୍ ତାଗାଙ୍କ୍ ଚାକର୍ ବେଡ଼ିୟନ୍ ଆୟ୍‍ୟଣ୍ଡ୍‍ ।
MAT 10:25 ଆଦିଙ୍କ୍ ଶିଷ୍ୟ ଗୁରୁନ୍‍ଲେକେମ୍ ନୁ ଚାକର୍ ମାଲିକ୍ ଲେକାମ୍ ଆଦ୍‍ପାର୍କେ ଅଡ଼୍‌ ଆସର୍‍ତେ ଶାନ୍ତି ଆଦାନ୍ ଦର୍‍କାର୍ । ୱେରଡ଼୍ ଲୋତ୍‍ତେ ମୁକିୟାଙ୍କ୍ ନାରୁଡ଼୍ ଯଦି ବାଲ୍‍ଜିବୁଲ୍‍ ହିଞ୍ଜ କେତିତଡ଼୍‍, ଲୋତ୍‍ତେ ମେଣ୍ଡେ ବାଗାତଡ଼୍‍କିଙ୍କ୍ ବେସର୍ ଅଦିକ୍‌ କେଲଡ଼୍ ?”
MAT 10:26 “ଆଦିନ୍ ସେଙ୍ଗେ ନାରୁଡ଼୍‍କିଂଙ୍କ୍ ୱେର୍‍ମାଟ୍ । ବାତ୍ ଇଞ୍ଜେ ମୁସିଆତ୍‍ତେ, ଆଦ୍ ତେର୍‍ସ୍‍ଆଦ୍‍ତେ ମେଣ୍ଡେ ସାରେ ମିଞ୍ଜିମାନ୍ଦାନ୍ ଗଟି ପେଇତିତା ।”
MAT 10:27 ନାନ୍ ମିକିଂଙ୍କ୍ ବାତ୍ ଇକାଡ଼୍‌ତାଗ୍ କେସମିନ୍ଦେନ୍, ଆଦ୍ ୱେଇସ୍‍ତାଗ୍ କେତ୍‍ୱେଇତିତ୍ ମେଣ୍ଡେ ବାତ୍ ମିଞ୍ଜିମାଞ୍ଜ୍ କେଞ୍ଜ୍‍ତିଡ଼୍, ଆଦ୍ ଲୋତ୍‍ତେ ମୁର୍ସିନାଗାଙ୍କ୍‍ କେଲ୍‍ମୁଟ୍ ।
MAT 10:28 ବେନଡ଼୍ ମାତର୍ ମେନ୍ଦୁଲ୍‍ତିଙ୍କ୍ ନଷ୍ଟ ମାଡ଼ିତଡ଼୍, ବାତେଙ୍କ୍ ଇତ୍‍କେ ଆତ୍ମାତିଙ୍କ୍ ବାତ୍ କ୍ଷତି ମାଡ଼େ ପାର୍‍ୱଡ଼୍, ଅଡ଼୍‌‍କିଂଙ୍କ୍ ୱେର୍‍ମାଟ୍ । ବେଲାନ୍ ବେନ୍ ଇଶ୍ୱର୍ ମିଇ ମେନ୍ଦୁଲ୍ ନୁ ଆତ୍ମାତିଙ୍କ୍ ରେଣ୍ଡିଙ୍କ୍ ନର୍‍କତାଗ୍‍ ଦସଂ ମାଡ଼୍‍ପାର୍‍ଦ୍‍ତଣ୍ଡ୍, ଅଂକିଙ୍କ୍‌ ୱେର୍‍ମୁଟ୍ ।
MAT 10:29 ଅଣ୍ଡୟ୍‌ ପାଇସା ଇସ୍‌ ରେଣ୍ଡ୍ ଆନାପିଟେ ଆସ୍ ପାର୍‍ଦ୍‍ତିନ୍, ବାତେଙ୍କ୍ ଇତ୍‍କେ ବାବାଲ୍ ଇଶ୍ୱର୍‌ତେ ବିନା ଅନୁମତିତେ ଅଣ୍ଡୟ୍‌ ଆନାପିଟେ ନେଲ୍‍ ରାୟ୍‍ୟ ।
MAT 10:30 ହେର୍କା ମାଡ଼ାଟ୍, ମିଇ ତାଲେତ୍ କେଲ୍‍କ୍ ମିକା ଲେକାଆସ୍ ମିନ୍ଦେ ।
MAT 10:31 ୱେର୍‍ମାଟ୍, ପିନା ଆନାପିଟେ ନାଗାଙ୍କ୍ ମିୟାଦ୍ ମୁଲ୍ୟ ଗାଟିନାର୍ଗେ ।
MAT 10:32 “ବେନଆଇ ଗଟ୍‍ତେ ନାକିଂଙ୍କ୍ ପ୍ରବୁ ଇଞ୍ଜ ସ୍ୱୀକାର୍ ମାଡ଼ିତନ୍, ନା ସ୍ୱର୍ଗତଣ୍ଡ୍ ବାବାନ୍ ମୁନ୍‍ନେ ନାନ୍ ଅଂକିଙ୍କ୍‌ ନା ଶିଷ୍ୟ ଇଞ୍ଜ ସ୍ୱୀକାର୍ ମାଡ଼ିତାନ୍ ।
MAT 10:33 ବାତେଙ୍କ୍ ଇତ୍‍କେ ବେନଆଇ ଗଟ୍‍ତେ ନାକିଂଙ୍କ୍ ଅସ୍ୱୀକାର୍ ମାଡ଼ିତନ୍, ଅଂକିଙ୍କ୍‌ ନାନ୍ ମିକା ନା ବାବାନ୍ ମୁନ୍‍ନେ ଅସ୍ୱୀକାର୍ ମାଡ଼ିତାନ୍ ।”
MAT 10:34 “ନାନ୍ ଜଗତ୍‍ତାଗ୍ ଶାନ୍ତି ମାଡ଼ାଙ୍କ୍ ୱାତ୍‍ତାନ୍ ଇଞ୍ଜ ଏର୍କା ମାଡ଼୍‍ମାଟ୍ । ଇଲେ, ନାନ୍ ଶାନ୍ତି ପଇସ୍ ୱାଡ଼ନ୍, ତାଲ୍‍ୱାର୍ ପଇସ୍ ୱାତ୍‍ତାନ୍ ।
MAT 10:35 ନା ମାଇଦିଙ୍କ୍ ମାର୍‍ ବାବାନ୍ ବିରଦ୍ଦ୍‌ ମାଡ଼ିତନ୍, ମାୟାଡ଼୍ ୟାୟାନ୍ ବିରୁଦ୍ ମାଡ଼ିତ୍ ମେଣ୍ଡେ ପୟେନ୍ ବିରୁଦ୍‍ତେ କଡ଼୍‍ୟାଡ଼୍ ତେଦିତ୍ ।
MAT 10:36 ନିଜେତ୍ ପରିବାର୍‍ତେ ନାରୁଡ଼୍ ୱେରଙ୍କ୍ ସାରେତିଙ୍କ୍ ବେଡ଼୍‍ୟେ ଶତ୍ରୁଡ଼୍ ଆଦ୍‍ତଡ଼୍ ।”
MAT 10:37 “ବେନଆଇ ନିଜେତ୍ ବାବାଙ୍କ୍ ବା ୟାୟାଙ୍କ୍ ନାକିଂଙ୍କ୍ ୱିଡ଼୍‍ସି ଅଦିକ୍‌ ପ୍ରେମ ମାଡ଼ିତନ୍, ଅଣ୍ଡ୍‌ ନା ଶିଷ୍ୟ ଆଦାନଙ୍କ୍ ଯୋଗ୍ୟ ଆୟ୍‍ୟଣ୍ଡ୍ । ବେନଆଇ ନିଜେତ୍ ମାର୍‍ ବା ମାୟାଡ଼୍‍ତିଙ୍କ୍ ଅଦିକ୍‌ ପ୍ରେମ ମାଡ଼ିତନ୍, ଅଣ୍ଡ୍‌ ନା ଶିଷ୍ୟ ଆଦାନଙ୍କ୍ ଯୋଗ୍ୟ ଆୟ୍‍ୟଣ୍ଡ୍ ।
MAT 10:38 ବେନଆଇ ନିଜେତ୍ କ୍ରୁଶ କାଞ୍ଜି ନାକିଂଙ୍କ୍ ଲେକାମ୍ ମାଡ଼ଣ୍ଡ୍, ଅଣ୍ଡ୍‌ ନା ଶିଷ୍ୟ ଆଦାନଙ୍କ୍ ଯୋଗ୍ୟ ଆୟ୍‍ୟଣ୍ଡ୍ ।
MAT 10:39 ବେନଆଇ ନିଜେତ୍ ଜିୱୁନ୍‍ ରକ୍ଷା ମାଡ଼ାନଙ୍କ୍ ଆଲ୍‍ସି ମାତ୍‍ତନ୍, ଅଣ୍ଡ୍‌ ଆଦ୍ ଆରା ମାଡ଼ିତନ୍; ବେଲାନ୍ ବେନ ନା ମାଇଦିଙ୍କ୍ ନିଜେତ୍ ଜିୱୁଣ୍ଡ୍ ହିଦ୍‍ତଣ୍ଡ୍, ଅଣ୍ଡ୍‌ ମୁନେଙ୍କ୍‍ତେ ଆଦ୍ ରକ୍ଷା ମାଡ଼ିତନ୍ ।”
MAT 10:40 “ବେନ ମିକିଂଙ୍କ୍ କାର୍ଙ୍ଗିତଣ୍ଡ୍‍, ଅଣ୍ଡ୍‌ ନା ସେଙ୍ଗେ ଆଦ୍ ମାଡ଼ିତନ୍ ମେଣ୍ଡେ ବେନ ନାକିଂଙ୍କ୍ କାର୍ଙ୍ଗିତଣ୍ଡ୍, ଅଣ୍ଡ୍‌ ନା ୱାଦାନଡ଼୍ ସେଙ୍ଗେ ଆଦ୍ ମାଡ଼ିତନ୍ ।
MAT 10:41 ବେନଆଇ ୱେରଣ୍ଡ୍ ବାବବାଦିଙ୍କ୍ ଇଶ୍ୱର୍‌ତେ ଦୂତ୍ ଲେକାମ୍ କାର୍ଙ୍ଗିତଣ୍ଡ୍‍, ଅଣ୍ଡ୍‌ ଆଦ୍ ବାବବାଦୀନ୍ ପୁରସ୍କାର୍‍ତାଗ୍ ତଡ଼୍ ଆଦ୍‍ତନ୍; ମେଣ୍ଡେ ବେନଆଇ ୱେରଣ୍ଡ୍ ଦାର୍ମିକ୍ ନାରୁଙ୍କ୍ ଅନ୍‌‍ୱାଦ୍ ସାଦୁତା ସେଙ୍ଗେ ସମ୍ବଦନ୍ ମାଡ଼ିତନ୍, ଆଦ୍ ନାରୁନ୍ ପୁରସ୍କାର୍‍ତାଗ୍ ଅଣ୍ଡ୍‌ ବାଗିଦାର୍ ଆଦ୍‍ତନ୍ ।
MAT 10:42 ବେନଆଇ ନାରୁଣ୍ଡ୍ ୱେରଣ୍ଡ୍ ସାରେତିଙ୍କ୍ ସୁଦୁନଣ୍ଡ୍ ଶିଷ୍ୟଙ୍କ୍ ଗିନେନ୍ କିଡ଼୍‍ଙ୍ଗ୍‍ତେ ଏର୍‍ ହିଦ୍‍ତଣ୍ଡ୍, ନାନ୍ ମିକିଂଙ୍କ୍ ସତ୍ କେତୁତାନ୍, ଅଣ୍ଡ୍‌ ନିଜାମ୍ ପୁରସ୍କାର୍ ପାଏମ୍ ଆଦ୍‍ତନ୍ ।”
MAT 11:1 ଜିସୁ ତାନ୍ ବାରଜାନ୍ ଶିଷ୍ୟଡ଼୍‍କିଂଙ୍କ୍ ସାରେ ଆଦେଶ୍‍କେସ୍ ତେର୍‍ସ୍ପାନ୍ ଆଦ୍ ସପେତେ ସହର୍‍ତାଗ୍ ଆଞ୍ଜ୍ ଶିକ୍ଷା ଇତ୍‍ତନ୍ ।
MAT 11:2 ଆସୁଙ୍କ୍ ବାପ୍ତିସ୍ମ ଯୋହନ୍‌ ଜଇଲ୍‍ତାଗ୍ ମାତ୍‍ତନ୍ । କ୍ରିଷ୍ଟ ବେନ୍‍ସାରେ ମାଡ଼ମାତ୍‍ତନ୍, ଆଦିନାଦ୍ କବର୍ ପୁଞ୍ଜ୍ ଅଣ୍ଡ୍‌ ନିଜେତ୍ ଇର୍‍ୱୁଡ଼୍ ଶିଷ୍ୟଡ଼୍‍କିଂଙ୍କ୍ ଜିସୁନ୍ ଗାର୍‍ରେ ରହତନ୍ ।
MAT 11:3 ଅଡ଼୍‌ ଆଞ୍ଜ୍ ଜିସୁଙ୍କ୍ ପାଚ୍‍ରିଞ୍ଚ୍‍ତଡ଼୍, “ବେନ୍ ନାରୁଡ଼୍ ୱାଦ୍‍ତନ୍ ଇଞ୍ଜ୍ ଯୋହନ୍‌ କେସ୍‍ମାତ୍‍ତନ୍, ନିମ୍‍ ଅଣ୍ଡେ କି ? ନା, ମାମ୍‍ମେ ମେଣ୍ଡ୍ଅର୍‍ତିଙ୍କ୍ କେପିତମ୍ ?”
MAT 11:4 ଜିସୁ ଉତ୍ତର୍ ହିତ୍‍ତଣ୍ଡ୍, “ମିଡ଼୍ ମାଲ୍‍ସ୍ ଆନୁଟ୍ ବାତ୍‍ସାରେ ଉଡ଼ୁତିଡ଼୍ ନୁ କେଞ୍ଜୁତିଡ଼୍, ଆଦ୍ ଯୋହନ୍‌ ତିଙ୍କ୍ କେଲାଟ୍ ।
MAT 11:5 କାନାଲଡ଼୍ କଣ୍ଡା ଉଡ଼୍‌ତଡ଼୍, କୁଟାଲଡ଼୍ ତାକୁତଡ଼୍, କୁଷ୍ଠିରଗିଡ଼୍ ସୁସ୍ଥଆଦୁତଡ଼୍, ବାଇରା ଲଡ଼୍ କେଞ୍ଜୁତଡ଼୍, ଡଲ୍‍ତେ ନଡ଼୍ ମେଣ୍ଡନ୍ ଦାମ୍ ଜିୱୁନ୍ ଆଦୁତଡ଼୍‍ ନୁ ଦରିଦ୍ର ନାରିଡ଼ାଗ୍ ସୁସମାଚାର୍ ପ୍ରଚାର୍ ମାଡ଼ୁତଡ଼୍ ।
MAT 11:6 ମେଣ୍ଡେ ବେନେ ନାରୁଣ୍ଡ୍‌ ନାକିଂଙ୍କ୍‌ ବାଦା ଆୟଣ୍ଡ୍‍, ଅଣ୍ଡ୍‌‍ ଦନ୍ୟ ।”
MAT 11:7 ଯୋହନ୍‌‌ତେ ଶିଷ୍ୟଡ଼୍ ମାଲ୍‍ସ୍ ଆଦାନ୍ ୱେଲେ ଜିସୁ ନାରିଡ଼୍‍କିଙ୍କ୍ ଯୋହନ୍‌ ବିଷୟ୍‍ତେ କେତ୍‍ତନ୍, “ମିଡ଼୍ ଯୋହନ୍‌‌ତିଙ୍କ୍ ଉଡ଼ାନଙ୍କ୍ ବେସୁଙ୍କ୍‍ ଉଚ୍‍କ ଲେକେଦାଗ୍ ଆଞ୍ଜ୍‍ମାତ୍‍ତିଡ଼୍, ବାତ୍ ଉଡାଙ୍କ୍ ଆଶେମାଡ଼ି ମାତ୍‍ତିଡ଼୍ ? ଗାଲ୍‍ତଡ଼୍ ଉଙ୍ଗାନ୍ ଗାଡ୍‍ତିଙ୍କ୍ ?”
MAT 11:8 ବେନଙ୍କ୍ ଉଡାଙ୍କ୍ ଆଞ୍ଜ୍ ମାତ୍‍ତିଡ଼୍ ? ସୁନ୍ଦର୍‍ତାଉ ଚକାସିଲେ କେର୍‍ସ୍ ମାନ୍ଦାନ୍ ୱେରନ୍ ନାରୁଙ୍କ୍ ? ଆଦ୍‍ଲେକାମ୍ ଚକାସିଲେ କେର୍‍ସ୍ ମାନ୍ଦାନଡ଼୍ ରାଜ୍‍ ପ୍ରସାଦ୍‍ତାଗ୍‍ ମାନ୍‍ତଡ଼୍ ।
MAT 11:9 ନାକିଂଙ୍କ୍ କେଲାଟ୍, ବାତ୍ ଉଡାଙ୍କ୍ ଆଞ୍ଜ୍ ମାତ୍‍ତିଡ଼୍ । ୱେରନ୍ ବାବବାଦୀଙ୍କ୍ କି ? ଆଦ୍‍ତ ନିଜାମ୍, ବାତେଙ୍କ୍ ଇତ୍‍କେ ବାବବାଦି ନାଗାଙ୍କ୍ ୱେରନ୍ ଅଦିକ୍‌ ମହାନ୍ ନାରୁଙ୍କ୍ ଉଡ଼୍‍ତିଡ଼୍ ।
MAT 11:10 ବେନନ୍ ବିଷୟ୍‍ ଇଦ୍‍ ଶାସ୍ତ୍ରତାଗ୍‍ ଲେକାମିନ୍ଦେ, “ଇଶ୍ୱର୍ କେତ୍‍ତାନ୍ ମିଇ ସେଙ୍ଗେ ଆର୍ ତିଆର୍ ମାଡ଼ାଙ୍କ୍ ନାନ୍ ମୁନେନ୍ ନା ଦୂତକିଙ୍କ୍ ରହତିତାନ୍ ।”
MAT 11:11 ନାନ୍‍ନେ ମିକିଂଙ୍କ୍ ସତ୍ କେତୁତାନ୍, ମୁନେନ୍ କଞ୍ଜ୍ ନେଣ୍ଡ୍ ଆଇନା ଇଦ୍ ଜଗତ୍ ତାଗ୍ ବେସ୍‍ତୁଡ଼୍ ଜନମ୍ ଆଦ୍‍ତଡ଼୍, ଅଡ଼୍‌ ସାର୍‍ତଡ଼ା କଞ୍ଜ୍ ଯୋହନ୍‌ ମହାନ୍ ବା ଲେକେତ୍ । ବାତେଙ୍କ୍ ଇତ୍‍କେ ସ୍ୱର୍ଗରାଜ୍ୟତାଗ୍ ବେନ ସାର୍‍ତିଙ୍କ୍ ସୁଦୁନନ୍, ଅଣ୍ଡ୍‌ ଯୋହନ୍‌ ତାଗାଙ୍କ୍ ମହାନ୍ ।
MAT 11:12 ଯୋହନ୍‌ ତାନ୍ ଗଟ୍ ପ୍ରଚାର୍ ମାଡ଼ାନ୍‍ ଦିନ୍ କଞ୍ଜ୍ ନେଣ୍ଡ୍ ଆଇନା ସ୍ୱର୍ଗରାଜ୍ୟତ୍‌ ପରୁ ନାର୍ଗେ ଆକ୍ରମଣ ମାଡ଼ି ୱାଦୁତଡ଼୍ । ଚିଟିରମନ୍ ମାଡ଼ାନଡ଼୍‍ ଆଗେ ଶକ୍ତି ମାଡ଼ି ଅସାନଙ୍କ୍ ଆଲ୍‍ସି ମାଡ଼ୁତଡ଼୍ ।
MAT 11:13 ଯୋହନ୍‌ ୱାଦାନ୍ ଦିନାଯାକ ମୋଶାନ୍‌ ବେବସ୍ଥା ନୁ ବାବବାଦୀଡ଼ାଦ୍ ଗଟ୍ ଆଦ୍ ରାଜ୍ୟ ବିଷୟ୍‍ତେ କେସମାତ୍‍ତଡ଼୍ ।
MAT 11:14 ଯଦି ଅଡ଼ାଦ୍‌ ଗଟ୍ ବିଶ୍ୱାସ୍ ମାଡ଼ିତିଡ଼୍, ଆଲେକେ ଯୋହନ୍‌ ଆଦୁତନ୍ ଏଲିୟ, ବେନ ମୁନେ ୱାଦାନାଦ୍ ମାତ୍‍ତେ ।
MAT 11:15 ବେନନାଦ୍ କେୱୁ ମିନ୍ଦେ, ଅଣ୍ଡ୍‌‍ କେଞ୍ଜାଟ୍‍ ।
MAT 11:16 “ହିଦ୍ ଯୁଗ୍‍ତେ ନାରୁଡ଼୍‍କ୍‍ ବେନନ୍ ତଡ଼୍‍ ସାମାନ୍‍ ମାଡ଼ିତାନ୍ ? ଅଡ଼୍‌ ହାଟିନ୍ ନାଡ଼୍‍ମେ କୁଦି କାର୍‍ସାନ୍ ପିଲାନ୍ ଲେକେ । ୱେରଡ଼୍ ମାନ୍ଦେତ୍ ପେକଡ଼୍ ମେଣ୍ଡ୍‍ନ୍ ଦଲ୍‍ଦିଙ୍କ୍ କେତିତଡ଼୍‍,”
MAT 11:17 “ମାମ୍‍ମେ ପେଣ୍ଡୁଲ୍ ଡଓଲା ପେଞ୍ଜ୍‍ତମ୍, ଇତ୍‍କେ ମିଡ଼୍ ହେନ୍ଦ୍‍ୱିଡ଼୍ । ମାମ୍‍ମେ ଦୁଃକାମ୍ ପାଟ୍‍ ପାର୍‍ତମ୍, ବାତେଙ୍କ୍ ଇତ୍‍କେ ମିଡ଼୍ କେୟ୍‍ୱିଡ଼୍ ।”
MAT 11:18 ଯୋହନ୍‌ ୱାସ୍ ଉପବାସ୍ ମାଡ଼୍‍ତଣ୍ଡ୍ ନୁ ଅଣ୍ଡ୍‌ କାଲ୍ଉନ୍‍ୱେ ମାତ୍‍ତଣ୍ଡ୍ । ସାରେତଡ଼୍ କେତ୍‍ତଡ଼୍, “ଅଂକିଙ୍କ୍‌ ବୁତ୍ ପୟିତ୍‍ତେ ।”
MAT 11:19 ବେସୁଟ୍‌ ନାରୁନ୍‍ପିଲେ ୱାସ୍ କାଦି ତିନ୍ଦାନଙ୍କ୍ ମନା ମାଡ଼ଣ୍ଡ୍, ସାରେତଡ଼୍ କେତ୍‍ତଡ଼୍, “ଇଣ୍ଡ୍ ନାରୁଙ୍କ୍ ଉଡ଼ାଟ୍ । ଅଣ୍ଡ୍‌ ୱେରଣ୍ଡ୍ ପେଟୁ ନୁ ମାତ୍‍ୱାରୀ, କରଆଦାୟ୍‍ ନଡ଼୍ ନୁ ସମାଜଚ୍ୟୁତ ନାରୁଡ଼୍‍ତେ ସାଙ୍ଗ । ଅଣ୍ଡ୍‌ ବାତ୍‍ଆଇ, ଇଶ୍ୱର୍‌ତେ ବିଚାର୍ ମାଡ଼୍‍ତେୱେଲେ, ଆଦ୍ ପୁନ୍ଦାଙ୍କ୍ ଆଦ୍‍ତେ ।”
MAT 11:20 ବେନ୍ ସହର୍‍କିନାଗ୍ ଜିସୁ ଅନ୍‌‍ୱାଦ୍ ନାର୍‍ଗେ ବାକ୍‍ୱା ପାଡ଼୍‍ୟି ମାଡ଼ି ମାତ୍‍ତଣ୍ଡ୍, ଆଦ୍ ପଡ଼ିୟେତ୍ ନାରୁଡ଼୍ ଅଡ଼ାଦ୍‌ ପାପ୍ ସେଙ୍ଗେ ହେର୍କେ ମାଡ଼୍‍ୱାଦ୍ ଉଡ଼ି, ଜିସୁ ଆଦ୍ ଶହର୍‍କିଙ୍କ୍ ପରିହାସ୍ ମାଡ଼ି କେତ୍‍ତଣ୍ଡ୍,
MAT 11:21 “ହୋ କୋରାଜିନ୍, ମିଡ଼୍ ଦସଂ ଆଦ୍‍ତିଡ଼୍ ! ବେତ୍‍ସାଇଦା ମିଡ଼୍ ମିକା ଦସଂ ଆଦ୍‍ତିଡ଼୍ । ମିଇ ଲୋପେ ବେନ୍ ସାରେ ଆଶର୍ଯ୍ୟ ପାଡ଼୍‍ୟି ମାଡ଼୍‍ତଡ଼୍, ଆୱୁସାରେ ଯଦି ସିଦୋନ୍ ନୁ ସୋରତାଗ୍ ମାଡ଼ିମାନେଡ଼୍, ଆଗେତ୍ ନାରୁଡ଼୍ ମେନ୍ଦୁଲ୍‍ତାଗ୍ ନିର୍ ଆକି ବାସ୍ତା କେର୍‍ସ୍ ଅନୁତାପ୍ ମାଡ଼େଡ଼୍ ।”
MAT 11:22 “ନାନ୍ ନିଜାମ୍‍ତେ କେତୁତାନ୍, ଇଶ୍ୱର୍ ବିଚାର୍ ମାଡ଼ାନ୍ ଦିନାତେ ମିକିଂଙ୍କ୍ ଅନ୍‌ ସୋର ନୁ ସିଦନ୍ ନାରୁଡ଼୍‍କିଂଙ୍କ୍ ଅଦିକ୍‌ ଅନୁଗ୍ରହ ତଅତିତଣ୍ଡ୍ ।”
MAT 11:23 “କପର୍ନାହୁମ୍ ! ନିୟାଦ୍ ବାତ୍ ଦଷ୍ ଆଦ୍‍ତେ ! ନିମ୍‍ ବାତ୍ ନିଜେତିଙ୍କ୍ ସ୍ୱର୍ଗତାଗ୍ ଆଦାନ୍ ମାଇଦିଙ୍କ୍ ଆଲ୍‍ସି ମାଡ଼ୁତି ? ନିମ୍‍ ନର୍କତାଗ୍‍ ରାଲିତି । ମିଇ ଲୋପେ ବେନ୍ ଆଶର୍ଯ୍ୟ ପାଡ଼୍‍ୟି ମାଡ଼୍‍ତଡ଼୍, ଆଦ୍ ଯଦି ସଦୋମ୍‍ତାଗ୍ ମାଡ଼ିମାନେଡ଼୍, ଆଦ୍ ନାର୍ ନେଣ୍ଡ୍ ଅନ୍‌‍ପାକେ ସାୟେ ମାନ୍‍ନେଡ଼୍ ।”
MAT 11:24 ନାନ୍ ମିକିଂଙ୍କ୍ ସତ୍ କେତୁତାନ୍, “ଇଶ୍ୱର୍ ବିଚାର୍ ମାଡ଼ାନ୍ ଦିନାତେ ମିୟାଗ୍ କନ୍‍ସ୍ ସଦୋମ୍‍ତିଙ୍କ୍ ଅଦିକ୍‌ ଦୟା ମାଡ଼ିତନ୍ ।”
MAT 11:25 ଆସୁଟେ ଜିସୁ ପ୍ରାର୍ତନା ମାଡ଼ି କେତ୍‍ତଣ୍ଡ୍, “ହଁ ବାବା, ସ୍ୱର୍ଗ ନୁ ପୃତିବିତ୍ ପ୍ରବୁ, ଇଦ୍ ସାରେ ଗଟ୍ ବୁଦ୍ଦିମାନ୍ ନୁ ଶିକିତ୍ ନାରୁଡ଼୍ ମିଞ୍ଜ୍‍ସ୍ପିମାଞ୍ଜ୍ କାର୍‍ୱେ ନାରୁଡ଼ାଗ୍ କେସ୍‍ମାନ୍ଦାନ୍ ମାଇଦିଙ୍କ୍ ନାନ୍ ନିକିଂଙ୍କ୍ ଦନ୍ୟବାଦ୍ ଇଦୁତାନ୍ ।
MAT 11:26 ହଁ ବାବା, ନିୟାଦ୍ ଇଚ୍ଛା ଲେକାମ୍ ଇଦ୍ ସାରେ ଗଟେମ୍ ଆଦୁତ୍‍ତେ ।”
MAT 11:27 “ମା ବାବାଲ୍ ନାକିଂଙ୍କ୍ ସାରେ ଇସ୍‌ ମିନ୍ଦେଣ୍ଡ୍ । ବାବାଙ୍କ୍ ୱିଡ଼୍‍ସ୍‍କେ ମାର୍‍ରିଙ୍କ୍ ମେଣ୍ଡେ ବେନ ପୁନଣ୍ଡ୍ ମେଣ୍ଡେ ମାର୍‍ରିଙ୍କ୍ ୱିଡ଼୍‍ସ୍‍କେ ବାବାଙ୍କ୍ ମେଣ୍ଡେ ବେନ ପୁନଣ୍ଡ୍ । ମାର୍‍ ବେନ ଗାର୍‍ରେ ବାବାନ୍ ଗଟି କେତିତଣ୍ଡ୍, ମାତର୍ ଅଡ଼୍‌ ବାବାଙ୍କ୍ ପୁନ୍‍ତଡ଼୍ ।”
MAT 11:28 “ଗୁରୁ ଦାୟିତ୍ୱ କାଞ୍ଜି ଆୟିତ୍‍ତେ ନାରୁଡ଼୍, ନା ଗାର୍‍ରେ ୱାଡ଼ାଟ୍, ନାନ୍ ମିକିଂଙ୍କ୍ ରମାଙ୍କ୍ ହିଦ୍‍ତାନ୍ ।
MAT 11:29 ନାୱାଦ୍ ଜୁୱାଡ଼୍ କାଞ୍ଜି ନାୟାଗାଙ୍କ୍ ଶିକ୍ଷା ଆୟମୁଟ୍ । ବାତେଙ୍କ୍ ଇତ୍‍କେ ନାନ୍ ନିଜେ ନମ୍ର ନୁ ସରଲ୍ ଆସ୍‍ମାନ୍ଦାଙ୍କ୍ ମିଡ଼୍ ନା ଗାର୍‍ରେ ରମିତିଡ଼୍ ।
MAT 11:30 ନାନ୍ ମିକିଂଙ୍କ୍ ବେନ୍ ଜୁୱାଡ଼୍ ହିଦ୍‍ତାନ୍ ଆଦ୍ କାଞ୍ଜାନଙ୍କ୍ ସହଜ୍ । ମେଣ୍ଡେ ବେନ୍ ଦାୟିତ୍ୱ ହିଦ୍‍ତାନ୍ ଆଦ୍ ମିକା ଗାଟି ହାଲ୍‍କା ।”
MAT 12:1 ଇଦିନ୍ ବେସ୍‌କ୍ ଦିନାତ୍ ପେର୍କେ ୱେରଡ଼୍ ବିଶ୍ରାମ୍‍ଦିନ୍ ଜିସୁ ୱିତି ମାନ୍ଦାନ୍ ୱାୟେତାଲାନ୍ ଆଞ୍ଜମାତ୍‍ତଣ୍ଡ୍ । ତାନ୍ ଶିଷ୍ୟନଡ଼୍‍କ୍ କାର୍‍ପୟିତାଙ୍କ୍ ଅଡ଼୍‌ ୱିତ୍‍ତାଗାଙ୍କ୍ କେଡ଼୍ ଦେହେସ୍ ତିନ୍ଦାଙ୍କ୍ ପସ୍‍ପ୍‍ତ୍‍ତଡ଼୍ ।
MAT 12:2 ପାରୂଶୀନଡ଼୍ ଆଦ୍ ଉଡ଼ି ନାରୁଡ଼୍‍କ୍ କେତ୍‍ତଡ଼୍, “ଉଡ଼ାଟ୍, ବିଶ୍ରାମ୍ ଦିନ୍ ମିଇ ଶିଷ୍ୟନଡ଼୍ ବେଦ୍‍ଲେକାମ୍ ଶାସ୍ତ୍ର ବିରୁଦ୍ଦ୍‌ତେ ପାଡ଼୍‍ୟି ମାଡ଼ୁତଡ଼୍ ?”
MAT 12:3 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ କେତ୍‍ତନ୍, “ଅନ୍‌ ଦିନ୍ ଦାଉଦ୍ ନୁ ତାନ୍ ଶିଷ୍ୟନଡ଼୍ କାର୍‍ୱିନ୍‍ ମାନ୍ଦାନ୍‍ ୱେଲେ ଦାଉଦ୍‍ ବାତ୍ ବାତ୍‍ ମାଡ଼ି ମାତ୍‍ତଣ୍ଡ୍, ମିଡ଼୍ ଶାସ୍ତ୍ରତାଗ୍ କାର୍‍ୱିଡ଼୍ ?
MAT 12:4 ଅଡ଼୍‌ ବେଲାନ୍ ଇଶ୍ୱର୍‌ତେ ମନ୍ଦିର୍ ତେ ଲୋପେ ଆଞ୍ଜ୍ ଇଶ୍ୱର୍‌ତିଙ୍କ୍‍ ଇତ୍‍ତେ ରୂଟି ତିତ୍‍ତଡ଼୍ । ଶାସ୍ତ୍ର ଲେକାମ୍ ପୁରହିତ୍‍ତିଙ୍କ୍ ୱିଡ଼୍‍ସି ଆଉ ରୋଟି ତିନ୍ଦାନ୍ ସେଙ୍ଗେ ବେନନାଦ୍ ମେଣ୍ଡେ ଅଦିକାର୍‌ ଇଲ୍‍ୱେ ମାତ୍‍ତେ ।
MAT 12:5 ମିଡ଼୍ ବାତେଏ କାର୍‍ୱିଡ଼୍ ? ମୋଶାନ୍‌ ବେବସ୍ଥା ଲେକାମ୍ ପୁରହିତ୍‍ନଡ଼୍ ବିଶ୍ରାମ୍ ବାର୍‍ତେ ମନ୍ଦିର୍ ଲୋପେ ପୁରୋହିତ ନଡ଼୍ ବିଶ୍ରାମ୍‍ଦିନ୍ ନିୟମ୍ ବିରୁଦ୍ ମାଡ଼ମାତ୍‍କେ ମିକା ଆଦିନ୍ ସେଙ୍ଗେ ଅଡ଼୍‌ ଦଷ୍ ପୁନ୍ଦାଙ୍କ୍ ଆୟ୍‍ୟଡ଼୍ ?
MAT 12:6 ନାନ୍ ମିକିଂଙ୍କ୍ କେତୁତାନ୍, ମନ୍ଦିର୍‍ତାଦ୍ ମହତ୍‍ ବିଷୟ ନେଣ୍ଡ୍ ଇଗେମିନ୍ଦେ ।
MAT 12:7 ଶାସ୍ତ୍ର କେତିତ୍‍, ‘ନାନ୍ ଦୟା, ବଲିଦାନ୍ ଆୟ୍‍ୟ,’ ଇଦ୍ ଗଟ୍ ତେ ଇତ୍‍କେ ଯଦି ବୁଜେମ୍ ଆଦ୍‍ତିଡ଼୍, ଇଡ଼୍ ଆଦେଶ୍‍ତେ ନାରୁଡ଼୍‍କ୍ ମିଡ଼୍ ଦଷ୍ ମାଡ଼୍‍ୱିଡ଼୍ ଆୟେଡ଼ି ।
MAT 12:8 ପୁଞ୍ଜ୍ ମାନୁଟ୍, ନାରୁନ୍ ପିଲେ ସ୍ୱୟଂ ବିଶ୍ରାମ୍ ବାର୍‍ତେ ପ୍ରଭୁ ।”
MAT 12:9 ଜିସୁ ଆଦ୍ ପଡ଼ିୟେ ତାଗାଙ୍କ୍ ଆଞ୍ଜ୍ ପ୍ରାର୍ତନା ଲୋନ୍‌ ଅସ୍‍ତନ୍ ।
MAT 12:10 ୱେରନ୍ ୱାସ୍‍ତେ କାଇତେନଣ୍ଡ୍ ଆଗେ ମାତ୍‍ତଣ୍ଡ୍ । ଜିସୁନ୍ ଦଷ୍ ପୟିତାନ୍ ସେଙ୍ଗେ ମାନ୍ଦେ ନାରୁଡ଼୍ ଆଗେ କେପିମାତ୍‍ତଡ଼୍ । ଅଡ଼୍‌ ଜିସୁଙ୍କ୍ କେତ୍‍ତଡ଼୍, ବିଶ୍ରାମ୍ ଦିନ୍ ସୁସ୍ଥ ମାଡ଼ାନାଦ୍ ଶାସ୍ତ୍ର ବିରୁଦ୍ ଆୟ୍‍ୟ କି ?
MAT 12:11 ଜିସୁ ଉତ୍ତର୍ ଇସ୍‌ କେତ୍‍ତଣ୍ଡ୍‍, “ବିଶ୍ରାମ୍‍ଦିନ୍ ଯଦି ମିୟାଦ୍ ମେଣ୍ଢା ୱେରଡ଼୍ ଗୁଇନ୍ଦେତାଗ୍ ରାଲିତ୍, ମିଡ଼୍ ଆଦିଙ୍କ୍ ତେସ୍ ତାଡ଼୍‍ୱିଡ଼୍‍କି ?
MAT 12:12 ୱେରନ୍ ନାରୁନ୍ ମୁଲ୍ୟ ୱେରଡ଼୍ ମେଣ୍ଢେତ୍ ମୁଲ୍ୟତ୍ ୱିଡ଼୍‍ସି ଗାଟି ଅଦିକ୍‌ । ଆଲେକେ ବିଶ୍ରାମ୍‍ଦିନ୍ ମେଣ୍ଡ୍ଅର୍‍ତିଙ୍କ୍ ସାହାଯ୍ୟ ମାଡ଼ାନାଦ୍ ମାୟାଦ୍‌ ଶାସ୍ତ୍ରତାଗ୍ ପାଡ଼୍‍ୟି ।”
MAT 12:13 ଆଦ୍ କେସ୍ ଅଣ୍ଡ୍‌ କାୟ୍ ୱାତିମାନ୍ଦାନ୍ ନାରୁଙ୍କ୍ କେତ୍‍ତଣ୍ଡ୍‍, “କାୟ୍ ତିନାଙ୍କ୍ ମାଡ଼େ ।” ନାରୁନ୍ କାୟ୍ ତିନାଙ୍କ୍ ମାଡ଼ାନ୍ ସାଙ୍ଗେ ସାଙ୍ଗେ ଆଦ୍ କାୟ୍ ମେଣ୍ଡନ୍ କାୟ୍ ଇନା ସୁସ୍ଥ ଆତ୍‍ତେ ।
MAT 12:14 ତାନ୍‍ପେର୍କେ ପାରୂଶୀଡ଼୍ ଆଦ୍ ପଡ଼ିୟେତାଗାଙ୍କ୍ ପେଇସ୍ ଆଞ୍ଜ୍ ଜିସୁଙ୍କ୍ ଆୱୁକାନ୍ ସେଙ୍ଗେ ଷଡ଼ଯନ୍ତ୍ର ମାଡ଼୍‍ତଡ଼୍ ।
MAT 12:15 ତାନ୍ ବିରୁଦ୍ଦ୍‌ତେ ଆସମାନ୍ଦାନ୍ ଷଡ଼ଯନ୍ତ୍ର ଗଟ୍ କେଞ୍ଜି ଜିସୁ ଆଦ୍ ଟାଉନ୍‍ ୱିଡ଼୍‍ସି ମେଣ୍ଡନ୍ ପାକେ ଆତ୍‍ତନ୍ । ଇତ୍‍କେ ନାର୍‍ଗେ ନାରୁଡ଼୍ ଅନ୍‌ ପେର୍କେ ଆତ୍‍ତଡ଼୍ ।
MAT 12:16 ଜିସୁ ରୋଗି ନାରୁଡ଼୍‍କ୍ ସୁସ୍ଥ ମାଡ଼ମାତ୍‍ତନ୍, ବାତେଙ୍କ୍ ଇତ୍‍କେ ତାନ୍ ବିଷୟ୍‍ତେ ବାଗାତଡ଼୍‍କିଙ୍କ୍ ବାତେଏ କେଲ୍‍ମାଟ୍ ଇଞ୍ଜ ଗଟ୍ ହିସମାତ୍‍ତନ୍ ।
MAT 12:17 ହିଦିନ୍ ତଡ଼୍ ବାବବାଦୀ ଯିଶାୟତେ ତଡ଼୍ ଇଶ୍ୱର୍ ବେନ୍‍ଗଟ୍ କେଞ୍ଜ୍‍ପିମାତ୍‍ତନ୍, ଆଦ୍ ସାରେ ଆତ୍‍ତେ;
MAT 12:18 “ହିଣ୍ଡ୍ ନା ପ୍ରିୟ ଦାସ, ଅଂକିଙ୍କ୍‌ ନାନ୍ ପ୍ରେମ ମାଡ଼ୁତାନ୍, ଅନ୍‌ ସେଙ୍ଗେ ନାନ୍ ଶାନ୍ତି । ନାୱାଦ୍ ଆତ୍ମା ଅନ୍‌ ପରୁ ଡିଗିତ୍‍ତେ; ସାରେ ବିଜାତିନ୍ ଗାର୍‍ରେ ଅନ୍‌ ନା ନ୍ୟାୟ ବିଚାର୍ ଗଷନା ମାଡ଼ିତନ୍ ।
MAT 12:19 ଅଣ୍ଡ୍‌ ରାମ୍‍କ୍ ଆୟନ୍ କି ମର୍‍ରେ ଆୟନ୍, ରୋଟ୍ ନାଡ଼୍‍ମେ ନିସ୍ ଗାଟିଲେଙ୍କ୍‍ଦେ ଗଟି କେଲ୍‍ଲନ୍ ।
MAT 12:20 ଦୁର୍ବଲ୍‍ମାନ୍ଦାନଡ଼୍‍ ସେଙ୍ଗେ ଅଣ୍ଡ୍‌ କମଲ୍ ବ୍ୟବହାର୍ ମାଡ଼ିତନ୍ ନୁ ରୋଗ୍‍ତେ ମାନ୍ଦାନଡ଼୍‍କ୍ ଦୟା ମାଡ଼ିତନ୍ । ନ୍ୟାୟ ଶାନ୍ତି ଆଦାନ୍ ଯାକ ଅଣ୍ଡ୍‌ ଅନ୍‌ ସାଦନାକଞ୍ଚ୍ ତଡ଼୍‍ ଆୟନ୍ ।
MAT 12:21 ଅନ୍‌ ପର୍‍ର ସାରେ ଜାତିନ୍ ନାରୁଡ଼୍ ଆଶେ ୱାଟିତଡ଼୍ ।”
MAT 12:22 ତାନ୍ ପେର୍କେ ଅନ୍‌ ଦିନ୍ ନାରିଡ଼୍ ୱେରଙ୍କ୍ କାନାଙ୍କ୍ ନୁ କନ୍ଦାଙ୍କ୍ ତାତ୍‍ତଡ଼୍ । ଅଙ୍କ୍‍ ବୁତ୍‌ ପୟ୍‍ତାଙ୍କ୍ ଗଟି ତିର୍‍ୟାନଙ୍କ୍‍ ପାର୍ୱେମାତ୍‍ତନ୍ । ଜିସୁ ଅଂକିଙ୍କ୍‌ ସୁସ୍ଥ ମାଡ଼୍‍ତଣ୍ଡ୍ । ଅଣ୍ଡ୍‌ ଉଡ଼େପାର୍ତନ୍ ନୁ ତିର୍‍ୟାଙ୍କ୍‍ ପାର୍‍ତନ୍ ।
MAT 12:23 ଜିସୁନ୍ ଆଦ୍ ପାଡ଼୍‍ୟି ଉଡ଼ି ନାରୁଡ଼୍ ବାକ୍‍ୱା ଆସ୍ ଅଂକିଙ୍କ୍‌ କେତ୍‍ତଡ଼୍, “ଇଣ୍ଡ୍ ବାତେଏ ଆ ଦାଉଦ୍‍ ତେ ବଂଶତଣ୍ଡ୍ ?”
MAT 12:24 ପାରୂଶୀଡ଼୍ ଆଦେକେଞ୍ଜି କେତ୍‍ତଡ଼୍, “ଅଣ୍ଡ୍‌ ପ୍ରେତପତି ବାଆଲ୍‍ଜିବୁଲ୍ ତାଗାଙ୍କ୍ ଶକ୍ତି ଦର୍‍ସ୍‍କି ବୁତ୍ ୱିର୍‍ସ୍‍ପୁତନ୍ ।”
MAT 12:25 ଅଡ଼୍‌ ବାତେଚିନ୍ତା ମାଡ଼ୁତଡ଼୍ ଜିସୁ ପୁଞ୍ଜ୍ କେତ୍‍ତନ୍, “ୱେରଡ଼୍ ଦେଶ୍‍ତେ ନାରୁଡ଼୍ ୱେରେ ମାନ୍ଦେତାଗ୍ ୱିରି ତାମ୍‍ତାମ୍ ଲୋପେ ଲଡ଼େମ୍ ଆତ୍‍କେ, ଆଦ୍ ଦେଶ୍ ଗାଟି ଦିନ୍ ସାୟେ ମାନ୍ଦେପାର୍‍ୱ । ବେନ୍‌ଆଇ ଟାଉନ୍‍ତାଗ୍‍ ବା ପରିବାର୍ ଲୋପେ ୱେରେ ମାନ୍ଦେ ଆସ୍ ରାମ୍‍କ୍ ଆତ୍‍କେ, ଅଡ଼୍‌ ଯାପେ ଦଂସ ଆଦ୍‍ତଡ଼୍ ।”
MAT 12:26 ଆଲେକେ, ଶୟ୍‍ତାନ୍‍ ରାଜ୍ୟତାଗ୍ ଯଦି ୱେରଡ଼୍ ମାନ୍ଦେ ମେଣ୍ଡ୍‍ନ୍ ମାନ୍ଦେତ୍ ବିରୁଦ୍ଦ୍‌ତେ ଲଡ଼େମ୍ ଆଦ୍‍ତେ, ପୁନ୍ଦାଙ୍କ୍ ଆଦ୍‍ତେ ଯେ ଆଦ୍ ଦୁଡ଼ା ବିକଣ୍ଡ ଆସ୍ ସାରେଦିନାମ୍ ସେଙ୍ଗେ ଦଂସ ଆଦ୍‍ତେ ।
MAT 12:27 ମିଡ଼୍ କେତୁତିଡ଼୍, ନାନ୍ ବାଆଲ୍‍ଜିବୁଲ୍ ଶକ୍ତିତେ ପ୍ରେତାତ୍ମାକିଂଙ୍କ୍ ୱିର୍‍ସ୍‍ପୁତାନ୍ । ଆଲେକେ ଆୱିଙ୍କ୍ ତଲାନ୍ ସେଙ୍ଗେ ମିଇ ଶିଷ୍ୟନଡ଼୍ ଇଦ୍ ପାଡ଼ିୟ୍‍ଦେନଡ଼୍ ମିଇ ଅବିଯଗ୍ ବୁସାଇଞ୍ଜ ପ୍ରମାନ୍ ଆଦୁତ୍‍ତେ ।
MAT 12:28 ବୁତ୍ ୱିର୍‍ସ୍‍ପାନ୍ ଶକ୍ତି ନାନ୍ ବାଆଲ୍‍ଜିବୁଲ୍ ତାଗାଙ୍ଗ୍ ଦର୍‍ସ୍‌କନ୍‍ । ଇଶ୍ୱର୍‌ତେ ଆତ୍ମା ତାଗାଙ୍କ୍ ଆଦ୍ ନାନ୍ ଦର୍‍କ୍ସ୍‍ତାନ୍ । ହିଦିନ୍ ତଡ଼୍ ମେଣ୍ଡେ ୱେରଡ଼୍ ପ୍ରମାନ୍ ଆଦୁତ୍‍, ସ୍ୱର୍ଗରାଜ୍ୟ ମିଇ ପାକେ ୱାସ୍‍ମିନ୍ଦେ ।
MAT 12:29 “ୱେରନ୍ ଶକ୍ତିମାନ୍ଦାନ୍ ନାରିଙ୍କ୍ ମୁନେଙ୍କ୍ ତୱେମାତ୍‍କେ, ବେନ ତାନ୍ ଲୋତାଗାଙ୍କ୍ ଜବର୍‍ଦସ୍ତ ନେଙ୍ଗି ତାନ୍ ସମ୍ପତି ୱିର୍‍ସ୍‍ପି ଅଦେପାର୍‍ୱନ୍ ।”
MAT 12:30 “ବେନ ନା ତଡ଼୍ ଇଲାଣ୍ଡ୍, ଅଣ୍ଡ୍‌ ସାରେତିଙ୍କ୍ ନା ବିରୁଦ୍ଦ୍‌ତେ ମିନ୍ଦେନ୍ । ବେନ ନା ତଡ଼୍ କାହିଲି ଗୁଡ଼୍‍ପନ୍, ଅଣ୍ଡ୍‌ ବାସ୍ତବିକ ନା ବିରୁଦ୍ ମାଡ଼ୁତଣ୍ଡ୍ ।”
MAT 12:31 ଆଲେକେ ନାନ୍ ମିକିଂଙ୍କ୍ କେତୁତାନ୍, ନାରୁଡ଼୍ ଯେ ବାତ୍‍ଆଇ ପାପ୍ ମାଡ଼ିତନ୍ ବା ସାରେ ଗଟି କେଲିନ୍ ଆଦିନ୍ ସେଙ୍ଗେ ଅଂକିଙ୍କ୍‌ କ୍ଷମା ଇଦାଙ୍କ୍ ଆଦ୍‍ତେ । ବାତେଙ୍କ୍ ଇତ୍‍କେ ଯଦି ବେନ୍ ପବିତ୍ରଆତ୍ମା ବିରୁଦ୍ଦ୍‌ତେ ବାତେଏ କେତିତନ୍, ଅନାଦ୍‌ କ୍ଷମା ଇଲେ ।
MAT 12:32 ବେନ୍ ନାରୁନ୍‍ପିଲେ ବିରୁଦ୍ଦ୍‌ତେ ବାତେଏ ପାପ୍ ମାଡ଼୍‍କେ ବା କେତ୍‍କେ, ଅଂକିଙ୍କ୍‌ କ୍ଷମା ଦର୍‍କିତ୍ । ବାତେଙ୍କ୍ ଇତ୍‍କେ ଯେ ବେନ ପବିତ୍ରଆତ୍ମା ବିରୁଦ୍ଦ୍‌ତେ ବାତ୍ କେତିତନ୍, ଅଂକିଙ୍କ୍‌ ଇଞ୍ଜେ ବା ବବିଷ୍ୟତ୍‍ତେ ବେସୁଙ୍କ୍‍ ବା କ୍ଷମା ଦର୍‍କ ।
MAT 12:33 “ଲେକେତ୍‍ କାୟା ଆଦାନ୍ ସେଙ୍ଗେ ମାଡ଼େ ଲେକାମ୍ ଆଦାନ୍ ଦର୍‍କାର୍ । ପିନ୍ଦଲାଉ ମାଡ଼େତାଗ୍ ପିନ୍ଦଲାଉ କାୟା ଆଦ୍‍ଦିତ୍‍ତା । ମାଡ଼େ ବେଦ୍‍ଲେକାମ୍, ତାନ୍ କାୟାନ୍ ତଡ଼୍ ପୁନ୍ଦାଙ୍କ୍ ଆଦ୍‍ତେ ।”
MAT 12:34 ଆରେ ତାଡ଼ାମ୍ ବଂଶତ୍‍ କପାତ୍‍ ନାରୁଡ଼ି ! ନିଜେ କପାମ୍ ଆସ୍ ମିଡ଼୍ ବାତେଏ ସାୟେ ଗଟ୍ କେତ୍‍ପାର୍‍ତିଡ଼୍ ? ହୃଦୟ୍‍ତେ ହେର୍କା ମକମ୍ ଇସ୍‌ ପେହିତିତ୍ ।
MAT 12:35 ୱେରନ୍ ଲେକେତ୍‍ ନାରୁନ୍ ଲେକାମ୍ ବର୍ତ୍ତି ଆସ୍‍ମାନ୍ଦାନ୍ ତାନ୍ ସାୟେତ୍ ବଣ୍ଡାର୍ ତାଗାଙ୍କ୍ ସାୟେତ୍ ଜିନିଷ୍ ପେସ୍‍ପିତଣ୍ଡ୍ । ୱେରନ୍ କାରାପ୍ ନାରୁନ୍ ତାନାଦ୍ କାରାପ୍ ଜିନିଷ୍‍ତେ ବର୍ତ୍ତି ଆସ୍‍ମାନ୍ଦାନ୍ କାରାପ୍ ବଣ୍ଡାର୍‍ତାଗାଙ୍କ୍ କାରାପ୍ ଜିନିଷ୍ ପେସ୍ପିତନ୍ ।
MAT 12:36 “ମିଡ଼୍ କେସ୍‍ମାନ୍ଦାନ୍ ସାରେ ମୁଲ୍ୟ ଇଲ୍‍ୱେ ଗଟ୍ ସେଙ୍ଗେ ବିଚାର୍ ଦିନେତେ ମିକିଂଙ୍କ୍ ସାକ୍ଷି ହିଦାଙ୍କ୍ ଆଦ୍‍ତେ ।
MAT 12:37 ମିଇ ଗଟ୍‍ତେ ସେଙ୍ଗେ ମିଡ଼୍ ବିଚାରିତ ଆସ୍ ନିର୍ଦୋଷ୍ ବା ଦଷି ଶାବ୍ୟସ୍ତ ଆଦ୍‍ତିଡ଼୍ ।”
MAT 12:38 ଅନ୍‌‍ଦିନେ ବେସ୍‍ତୁଡ଼୍ ପାରୂଶୀଡ଼୍ ନୁ ଦର୍ମଗୁରୁଡ଼୍ ଜିସୁଙ୍କ୍ କେତ୍‍ତଡ଼୍, “ଗୁରୁ, ନିୟାଦ୍ ୱେରଡ଼୍ ଆଶର୍ଯ୍ୟ ପାଡ଼୍‍ୟି ଉଡ଼ାନଙ୍କ୍ ଇଚ୍ଛା ମାଡ଼ୁତମ୍ ।”
MAT 12:39 ଜିସୁ ଆଶର୍ଯ୍ୟ ଲେକାମ୍ ମାଡ଼ି କେତ୍‍ତନ୍, ଇ ଯୁଗ୍‍ତେ ନାରୁଡ଼୍ ବେସର୍ ଦୁଷ୍ଟ ନୁ ଇଶ୍ୱର୍ ବିଶ୍ୱାସ୍ ଆୟନ୍ । ମିଡ଼୍ ନାକିଂଙ୍କ୍ ୱେରଡ଼୍ ବାକ୍‍ୱା ପାଡ଼୍‍ୟି ତୱାଙ୍କ୍ କେତୁତିଡ଼୍ ? ମାତର୍ ବାବବାଦୀ ଯୁନସ୍‍ତେ ଜିୱୁନ୍‍ତେ ଗଟେମ୍ ଆସ୍‍ମାନ୍ଦାନ୍ ବାକ୍‍ୱା ପାଡ଼୍‍ୟି କେ ମିକିଂଙ୍କ୍ ତହସିଦ୍ ୱେହିତିତ୍‍ ।
MAT 12:40 ଯୂନସ୍ ବେଦ୍ ଲେକାମ୍ କିକେତ୍‍ ଡଙ୍କେତାଗ୍ ମୁଣ୍ଡ୍‍ଦିନା ନୁ ମୁଣ୍ଡ୍‍ନାର୍‍କା ମାତ୍‍ତନ୍, ଆଦେ ଲେକାମ୍ ନାରୁନ୍ ପିଲେ ମିକା ବୂମ୍‌ତେ ଲୋପେ ମୁଣ୍ଡ୍‍ଦିନା ନୁ ମୁଣ୍ଡ୍‍ନାର୍‍କା ମାନ୍‍ତନ୍ ।
MAT 12:41 ବିଚାର୍ ଦିନ୍‍ ନିନିବୀତେ ନାରୁଡ଼୍ ମିଇ ବିରୁଦ୍ଦ୍‌ତେ ଅବିଯଗ୍ ମାଡ଼ାଙ୍କ୍ ନିଲ୍‍ଦ୍‍ତଡ଼୍, ବାତେଙ୍କ୍ ଇତ୍‍କେ ଯୁନସ୍‍ତେ ପ୍ରଚାର୍ କେଞ୍ଜି ଅଡ଼୍‌ ପାପ୍ ଆର୍ଦାଗା ମାଲ୍‍ସ୍ ୱାତ୍‍ତଡ଼୍ । ନାନ୍ ମିକିଂଙ୍କ୍ କେତୁତାନ୍, ଯୁନସ୍‍ତାଗାଙ୍କ୍ ବେଡ଼୍‍ୟଣ୍ଡ୍‍ ୱେରନ୍ ହିଗେ ମିନ୍ଦେନ୍ ।
MAT 12:42 ବିଚାର୍ ଦିନେତେ ଶିବାର ନାଟାଡ଼୍ ମିୟାଦ୍ ଦଷ୍ ତଅତାନ୍‍ ସେଙ୍ଗେ ନିତିତେ, ବାତେଙ୍କ୍ ଇତ୍‍କେ ନାରୁଡ଼୍ ବୁଦ୍‍ତେ ଗଟ୍ କେଞ୍ଜାନ୍ ସେଙ୍ଗେ ପୃତିବିତେ ସାରେଏକାମ୍‍ତେ ୱାତ୍‍ତଡ଼୍; ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ ନିଜାମ୍ ତେ କେତୁତାନ୍, ଶଲୋମନ୍‍ ତାଗାଙ୍କ୍ ମହୀୟାନ୍ ୱେରନ୍ ଇଗେ ମିନ୍ଦେନ୍ ।
MAT 12:43 “ନାରୁନ୍ ମେନ୍ଦୁଲ୍ ତାଗାଙ୍କ୍ ପେଇସ୍‌ ଆତ୍‍ତେ ପେର୍କେ ୱେରଡ଼୍ ପ୍ରେତ୍‍ ଆତ୍ମା ଉସ୍କ ନାର୍‍ତାଗେ ବିଚରନ୍ ମାଡ଼ି ମେଣ୍ଡନ୍ ପଡ଼ିୟେ ନେଲ୍ ମେହେକିତ୍ ।
MAT 12:44 ଆଦ୍ ଦର୍‍କ୍‍ୱେ ମାତ୍‍କେ, ତାନ୍ ମୁନେତ୍ ଲୋତ୍‍ତା ମାଲ୍‍ସ୍ ଆଦାଙ୍କ୍ ଇଚ୍ଛାମାଡ଼ିତ୍ । ଯଦି ମାଲ୍‍ସ୍ ଆଞ୍ଜ୍ ଉଡ଼ିତ୍, ଆଦ୍ ଲୋନ୍‌ ଲେକେତ୍‍ ସପାସୁତରା ଆସ୍ ଆସାମେ ମିନ୍ଦେ,
MAT 12:45 ଅନାଗ୍, ମେଣ୍ଡେ ଦୁଷ୍ଟ ସାତ୍‍ଟାନ୍ ପ୍ରେତତିଙ୍କ୍ ନିମନ୍ତ୍ରନ ମାଡ଼ିତାତିତ୍ ନୁ ଆୱ୍ ସାରେ ଆଦ୍ ଲୋନ୍‌ ମାନ୍‍ତା । ଇଦିନ୍‍ତଡ଼୍, ଆଦ୍ ବୁତ୍ ପୟିତ୍‍ତେ ନାରୁନ୍ ଶେଷ୍ ଦଷ୍ ମୁନେତ୍ ଦଷ୍‌ତାଗାଙ୍କ୍ ଗାଟି ଗଡ଼୍‍ବଡ଼୍‍ ଆଦ୍‍ତେ । ହିଦ୍ ଯୁଗ୍‍ତେ ଦୁଷ୍ଟ ନାରୁଡ଼୍ ହିଦ୍‍ଲେକାମ୍ ଗାଟି ତିପାଲ୍‍ ଆଦ୍‍ତଡ଼୍ ।”
MAT 12:46 ଜିସୁ ନାରୁଡ଼୍ ତଡ଼୍ ଗଟିଆଦାନ୍ ୱେଲେ ତାନ୍ ୟାୟ୍‍ ନୁ ଦାଦାଲଡ଼୍‍ ଆଦ୍ ପଡ଼ିୟେତାଗ୍ ହେଉସ୍ ଅଂକିଙ୍କ୍‌ କେତାନଙ୍କ୍ ବାଇଦେ କେପି ଅଂକିଙ୍କ୍‌ କାର୍‍ଙ୍ଗ୍‍ତଡ଼୍ ।
MAT 12:47 ୱେରନ୍ ନାରୁନ୍ ୱାସ୍ ଜିସୁଙ୍କ୍ କେତ୍‍ତଣ୍ଡ୍‍, “ଉଡ଼େ, ନି ୟାୟ୍‍ ନୁ ଦାଦାଲଡ଼୍‍ ନି ସେଙ୍ଗେ ବାଇଦେ କେପ୍‍ତଡ଼୍ ।”
MAT 12:48 ଜିସୁ ଉତ୍ତର୍ କେତ୍‍ତଣ୍ଡ୍‍, “ବେନ ନା ୟାୟ୍‍ ନୁ ବେନ ନା ଦାଦାଲ୍ ?”
MAT 12:49 ଶିଷ୍ୟନଡ଼୍ ପାକେ କାୟ୍ ତଅସ୍ କେତ୍‍ତଣ୍ଡ୍‍, “ହିଡ଼୍ ଆଦୁତଡ଼୍‍ ନା ୟାୟ୍‍ ନୁ ନା ଦାଦାଲଡ଼୍‍ ।
MAT 12:50 ବେନ ଆୟି ନା ସ୍ୱର୍ଗତେ ବାବାନ୍ ଇଚ୍ଛା ଲେକାମ୍ ମାଡ଼ିତନ୍, ଅଣ୍ଡ୍‌ ନା ଦାଦାଲ୍, ନା ଏଲାଡ଼୍‍ ନୁ ନା ୟାୟ୍‍ ।”
MAT 13:1 ଆଦ୍ ଦିନ୍ ଜିସୁ ପେଇସ୍‌ ହିଲ୍‍କେ ଆଞ୍ଚିନା ଆତ୍‍ତନ୍ । ଆଗେ ଅଣ୍ଡ୍‌ ଶିକ୍ଷା ହିଦାନ୍ ସେଙ୍ଗେ କୁଦ୍‍ତନ୍ ।
MAT 13:2 ଅନ୍‌ ତିଡ଼୍‍ପାକେ ହିସର୍ ନାରୁଡ଼୍ କୁଦ୍‍ତଡ଼୍ ଯେ ଅଣ୍ଡ୍‌ ୱେରଡ଼୍ ଓଡେତାଗ୍ ଆଞ୍ଜ୍ କୁଦ୍‍ତନ୍ । ନାରୁଡ଼୍ ହିଲ୍‍କେ ଆଞ୍ଚିନା ନିସ୍‍ମିକା ଅନ୍‌ ଗଟି କେଞ୍ଜ୍‍ତଡ଼୍ ।
MAT 13:3 ଅଣ୍ଡ୍‌ ୱେଷଡ଼୍ ହିନା ଅଡ଼୍‌‍କିଂଙ୍କ୍ ନାର୍‍ଗେ ଗଟି ଶିକ୍ଷା ହିତ୍‍ତନ୍ । ଅଣ୍ଡ୍‌ କେତ୍‍ତାନ୍, “ଅନ୍‌‍ଦାମ୍ ୱେରନ୍ ନାରୁନ୍ ୱିଜ୍ ୱିତାନଙ୍କ୍ ପେହିତ୍‍ତନ୍ ।
MAT 13:4 ଅଣ୍ଡ୍‌ ୱାୟେତାଗ୍ ୱିଜ୍ ୱିତାନ୍ ୱେଲେ ବେସ୍‌କ୍ ପେଡ଼େକ୍ ଆର୍‍ଦାଗ୍ ଲାହିନ୍ ରାଲ୍‍ତାଙ୍କ୍ ପିଟେ ୱାସ୍ ଆୱିଙ୍କ୍ ତିଞ୍ଜ୍‍ଜିତା ।
MAT 13:5 ମେଣ୍ଡେ ବେସ୍‌କ୍ ପେଡ଼େକ୍ ଗାଟି ସୁଦୁଟ୍ ମାଣ୍ଡୁଲ୍ ମାନ୍ଦାନାଗ୍ ରାଲ୍‍ତା ସୁଦୁଟ୍ ପନ୍ଦି ମାନ୍‍ନାଙ୍କ୍ ୱାଞ୍ଜ୍‍ଜି ଯାପେ ମଡ଼୍‍ତା ।
MAT 13:6 ବାତେଙ୍କ୍ ଇତ୍‍କେ ଆୱୁ ମାଡ଼ା ଲୋପେ ଆନ୍‌‍ୱାଙ୍କ୍ ପଡ଼ଦ୍ ହେଦ୍‍ତ୍‍ତେ ଆଉ ୱାସିଆତ୍‍ତା ।
MAT 13:7 ବେସ୍‌କ୍ ୱିଜ୍ କୟେନାଗ୍ ରାଲ୍‍ତା । ଆଉ କୟେମାଡ଼ାକ୍ ସାରେ ପେଡ଼େକିଙ୍କ୍ ଆଦ୍‍ପ୍ତା ମାଡ଼୍‍ତେ ।
MAT 13:8 ବାତେଙ୍କ୍ ଇତ୍‍କେ ମେଣ୍ଡେ ବେଷ୍‍କ୍ ୱିଜ୍ ଲେକେତ୍‍ ବୁମ୍‌ତାଗା ରାଲି ମାଡ଼େ ଆସ୍ କାୟା ଆଦ୍‍ତେ । ବେସ୍‌କ୍ ଶହେଗୁନ୍, ବେସ୍‌କ୍ ଷାଟିଏ ଗୁନ୍ ନୁ ବେସ୍‌କ୍ ତିରିଶ୍ ଗୁନ୍ ଆଦ୍‍ତେ ।”
MAT 13:9 ଜିସୁ ୱେଷଡ଼୍ ତେର୍‍ସ୍‍ପି କେତ୍‍ତାନ୍, “କେଞ୍ଜାନଙ୍କ୍ କେଉ ମାତ୍‍କେ କେଞ୍ଜାଟ୍ ।”
MAT 13:10 ତାନ୍ ପେର୍କେ ଶିଷ୍ୟନଡ଼୍ ଜିସୁନ୍ ଗାର୍‍ରେ ୱାସ୍ କେତ୍‍ତଡ଼୍, ନାରୁଡ଼୍‍କ୍ ଶିକ୍ଷା ହିଦାନ୍ ୱେଲେ ନିମ୍‍ ବାତ୍‍ତିଙ୍କ୍ ୱେଷଡ଼୍ ହିନା କେତୁତିନ୍ ?
MAT 13:11 ଜିସୁ ଉତ୍ତର୍ ଇତ୍‍ତନ୍, “ସ୍ୱର୍ଗରାଜ୍ୟତେ ରହସ୍ୟ ବୁଜେମ୍ ଆତ୍‍ତାଙ୍କ୍ ମିଡ଼୍ ବୁଦ୍‍ତେ ଦର୍‍ସ୍‍କି ମିନ୍ଦେଡ଼ି, ଅଡ଼୍‌ ଦର୍‍ସ୍କ୍‍କଡ଼୍ ।”
MAT 13:12 ବେନନାଦ୍ ମିନ୍ଦେ, ଅଂକିଙ୍କ୍‌ ଅଦିକ୍‌ ହିଦ୍‍ତଡ଼୍ ନୁ ଆଗାଙ୍କ୍ ଅଣ୍ଡ୍‌ ନାର୍‍ଗେ ଲାବ୍ ମାଡ଼ିତନ୍ । ବାତେଙ୍କ୍ ଇତ୍‍କେ ବେନନାଦ୍ ଇଲେ, ହୋ ନାଦ୍ ବାତ୍‍ମିନ୍ଦେ, ଆଦ୍‍ମିକା ଟେଣ୍ଡି ଆଦ୍‍ତଡ଼୍ ।
MAT 13:13 ଆଦିନ୍‌ ସେଙ୍ଗେ, ଅଡ଼୍‌ ଉଡ଼ଡ଼୍ ମାନ୍‍ତଡ଼୍ ଇତ୍‍କେ ବାତେଏ ଉଡ଼େ ପାର୍‍ୱଡ଼୍ । ସାରେ ଗଟି କେଞ୍ଜିମାନ୍ତଡ଼୍, ବାତେଙ୍କ୍ ଇତ୍‍କେ ବାତେଏ ବୁଜେମ୍ ଆୟ୍‍ୟଡ଼୍; ଅଡ଼୍‌ ଯଦି ପ୍ରକୃତ୍‍ତେ ଉଡ଼େଡ଼୍‍ ନୁ ବୁଜେମ୍ ଆୟେଡ଼୍ ।
MAT 13:14 ବାବବାଦି ଯିଶାଇୟନ୍ ବବିଷ୍ୟଦ୍ ବାଣି ଅଡ଼୍‌ ସେଙ୍ଗେ ପ୍ରଯୁଦ୍‌ୟ । ହି ନାରୁଡ଼୍ କେଞ୍ଜିକେଞ୍ଜି ବାତେଏ ବୁଜେମ୍ ଆୟ୍‍ୟଡ଼୍ । ଉଡ଼ି ମାନ୍‍ତଡ଼୍ ବାତେଙ୍କ୍ ଇତ୍‍କେ ଉଡାଙ୍କ୍ ପାର୍‍ୱଡ଼୍ ।
MAT 13:15 କିନ୍ତୁ ଅଡ଼୍‌ ସ୍ଥୁଲ ବୁଦିଡ଼୍ । ଅଡ଼୍‌ କେୱୁକ୍‍ ବନ୍ଦ୍ ମାଡ଼ିତ୍‍ତଡ଼୍ ନୁ କୋଣ୍ଡା ପିଇସ୍ ମିନ୍ଦେ । ଆଲା ଆୟ୍‍ୱେ ମାତ୍‍କେ ଅଡ଼୍‌ ଉଡାଙ୍କ୍ ପାର୍‍ୱେଡ଼୍, ଅଡ଼ାୱୁ କେୱୁକ୍‍ କେଞ୍ଜାଙ୍କ୍‍ ପାର୍‍ୱେଡ଼୍‍, ନୁ ଅଡ଼୍‌‍ ବୁଜେମ୍‍ ଆଦାଙ୍କ୍‍ ପାର୍‍ୱେଡ଼୍‍, ଅଡ଼୍‌ ନା ଗାର୍‍ରେ ମାଲ୍‍ସ୍ ଆନେଡ଼୍ ନୁ ଅଡ଼୍‌‍କ୍ ନାନ୍ ସୁସ୍ଥ ମାଡ଼ିୱେନ୍ ହିଦ୍ ଗଟ୍ ଇଶ୍ୱର୍ କେତ୍‍ତଣ୍ଡ୍ ।
MAT 13:16 “ମିଡ଼୍ ବେସର୍ ବାଗ୍ୟବାନ୍ ! ମିଡ଼୍ ଉଡ଼େ ପାର୍‍ଦୁତିଡ଼୍ ନୁ କେଞ୍ଜ୍‍ ପାର୍‍ଦୁତିଡ଼୍ ।
MAT 13:17 ହିଦ୍ ଗଟ୍ ନିଜାମ୍‍ତେ ନାନ୍ ମିକିଂଙ୍କ୍ କେତୁତାନ୍, ନାର୍‍ଗେ ବାବବାଦୀ ନୁ ଦାର୍ମିକ୍ ନାରୁଡ଼୍, ମିଡ଼୍ ବାତେଏ ଉଡ଼ୁତିଡ଼୍; ଆଦ୍ ଉଡ଼ାନଙ୍କ୍; ନୁ ବାତ୍ କେଞ୍ଜୁତିଡ଼୍ ଆଦ୍ କେଞ୍ଜାନ୍ ସେଙ୍ଗେ ଇଚ୍ଛା ମାଡ଼ ମାତ୍‍ତଡ଼୍, ବାତେଙ୍କ୍ ଇତ୍‍କେ ପାର୍‍ୱଡ଼୍ ।”
MAT 13:18 “ଆଲେକେ ୱିଜେୱିତାନ୍ ୱେଷଡ଼୍‍ କେଞ୍ଜାଟ୍ କେତୁତାନ୍, ବୁଜେମ୍ ଆତ୍‍ତାଙ୍କ୍ ଆଲ୍‍ସି ମାଡ଼ାଟ୍ ।
MAT 13:19 ବେନଡ଼୍ ସ୍ୱର୍ଗରାଜ୍ୟତେ ଗଟ୍ କେଞ୍ଜିତଡ଼୍, ଅଡ଼୍‌ ହୃଦୟତାଗାଙ୍କ୍ ଶୟ୍‍ତାନ୍‍ ଆଦ୍ ଟେଣ୍ଡି ଆଦ୍‍ତେ । ଆର୍‍ଦାଗ୍ ରାଲିମାନ୍ଦାନ୍ ୱିଜ୍ ଆତ୍‍ତେ ଇଦିନ୍ ତାତ୍ପର୍ଯ୍ୟ ।
MAT 13:20 ବେନଡ଼୍ ଗଟ୍ କେଞ୍ଜାନ୍ ସାଙ୍ଗେ ସାଙ୍ଗେ ଆଗ୍ରହତେ ଗ୍ରହନ୍ ମାଡ଼ିତଡ଼୍, ଆଦ୍‌ ପତୁରିଆ ପଡ଼ିୟେତାଗ୍ ରାଲିମାନ୍ଦାନ୍ ୱିଜେଲେକାମ୍,
MAT 13:21 ଅଡ଼୍‌ ମାନ୍‍ଦେ ଲୋପେ ଆଞ୍ଜ୍ ମାନ୍‍ୱାଙ୍କ୍ ଅଡ଼୍‌ ଆଦିଙ୍କ୍ ନାର୍ଗେସମୟ୍‍ ପଇସ୍‌ ନେହେତେ ପାର୍‍ୱଡ଼୍ । ହିଦ୍ ଗଟ୍ ସେଙ୍ଗେ ବେସୁଙ୍କ୍‍ କଷ୍ଟ ନୁ ତାଡ଼ନା ୱାଦ୍‍ତେ, ଅଡ଼୍‌ ଆଦିଙ୍କ୍ ଯାପେ ୱିଡ଼୍‍ସିତ୍‍ ତଡ଼୍ ।
MAT 13:22 କୟେ ମାଡ଼ାକ୍ ବେଦ୍‍ଲେକାମ୍ ବେସ୍‍କିଙ୍କ୍ ୱିଜେତିଙ୍କ୍ ଆଦ୍‍ପ୍ତା ମାଡ଼ିଦ୍‍ତେ, ଆଦେଲେକାମ୍ ହିଦ୍ ଜଗତ୍‍ତେ ଜଞ୍ଜାଲ ନୁ ଦନ୍ ସମ୍ପତିତ୍‍ତେ ଆଶେ ବେସ୍‌କ୍ ନାରୁଡ଼ାଗ୍ ହେଉସ୍ ମାନ୍ଦାନ୍ ଗଟ୍‍ତିଙ୍କ୍ ନଷ୍ଟ ମାଡ଼ିଦ୍‍ତେ ନୁ ଅଡ଼୍‌ ବାତେଏ ସୁପଲ୍ ଦର୍‍ସ୍‍କେ ପାର୍‍ୱଡ଼୍ ।
MAT 13:23 ବେନଡ଼୍ ଗଟ୍ କେଞ୍ଜି ବୁଜେମ୍ ଆଦ୍‍ତଡ଼୍, ଲେକେତ୍‍ ୱାୟେତାଗ୍ ରାଲିମାନ୍ଦାନ୍ ୱିଜ୍ ଲେକାମ୍ ଆଦିନ୍ ଲେକାମ୍ ସୁପଲ୍ ଲାବ୍ ମାଡ଼ିତଡ଼୍ । ବେନଙ୍କ୍ ଦର୍‍କିତ୍ ଶହେ ଗୁନ୍, ବେନ ଷାଟିଏ ଗୁନ୍ ନୁ ବେନ୍ ତିରିଶ୍ ଗୁନ୍ ।”
MAT 13:24 ଜିସୁ ମେଣ୍ଡନ୍ ୱେଷଡ଼୍ ଗଟ୍ କେତ୍‍ତାନ୍, “ସ୍ୱର୍ଗରାଜ୍ୟ ହିଦ୍‍ଲେକାମ୍, ୱେରନ୍ ନାରୁନ୍ ଅନ୍‌ ୱାୟେତାଗ୍ ଲେକାମ୍ ଗହମ୍ ୱିଜ୍ ୱିତ୍‍ତନ୍ ।
MAT 13:25 ଅନ୍‌‍ଦିନେ ହିକାଡ଼୍‍ତେ ଅଡ଼୍‌ ଉଞ୍ଜି ମାନ୍ଦାନ୍ ୱେଲେ ୱେରନ୍ ଶତ୍ରୁଡ଼୍ ୱାସ୍ ଆଦ୍ ୱାୟେତାଗ୍ ନାର୍‍ଗେ ବାଲୁଙ୍ଗା ପେଡ଼େକ୍ ୱିତ୍‍ତିସ୍ ଆତ୍‍ତନ୍ ।
MAT 13:26 ବେସୁଙ୍କ୍‍ ମାଡ଼ାକ୍‍ସାରେ ପେର୍‍ସି କେଡ଼୍ ପେହିତା, ନାଡ଼୍‍ମେ ନାଡ଼୍‍ମେ ବାଲୁଙ୍ଗା ତଅନ୍‌ଦ୍‍ତା ।
MAT 13:27 ଆଦ୍ ନାରିନ୍ ଚାକରିଡ଼୍ ୱାସ୍ କେତ୍‍ତଡ଼୍, ଗଟ୍, ନିମ୍‍ ତ ୱାୟାନାଗ୍ ସାୟେତ୍ ପେଡ଼େକ୍ ୱିତିମାତ୍‍ତିନ୍, ବାଲୁଙ୍ଗା ସାରେ ବେକାଙ୍କ୍ ୱାତ୍‍ତା ?
MAT 13:28 ୱାୟେତ୍‍ ମାଲିକ୍ କେତ୍‍ତାନ୍, ‘ୱେରନ୍ ଶତ୍ରୁଡ଼୍ ଇଲାମାଡ଼୍‍ତନ୍ ।’ ମେଣ୍ଡେ ଦାସଡ଼୍‍ କେତ୍‍ତଡ଼୍, ‘ଆଲେକେ ମାମ୍‍ମେ ଆଞ୍ଜ୍ ଆୱିଙ୍କ୍ ତାହାକିଦ୍‍ତମ୍ ?’
MAT 13:29 ମାଲିକ୍ କେତ୍‍ତାନ୍, ‘ଇଲା, ବାଲୁଙ୍ଗା ତାହାକାନ୍ ୱେଲେ ଆଲେତ ଗହମ୍ ପଦ୍‍ଲେ ହେଲିତ୍ ।
MAT 13:30 ବେଡ଼ିଇ ହାଇନା ଗହମ୍ ନୁ ବାଲୁଙ୍ଗା ୱେରଡ଼୍ ତାଗ୍ ପେର୍‍ସି । ଆସୁଙ୍କ୍ କଇଦାନଡ଼୍ କେତିକା, ଅଡ଼୍‌ ମୁନେ ବାଲୁଙ୍ଗା କଇସ୍, ମୁଟା ତହସ୍ ପୋଡ଼୍‍ସିଦ୍‍ତଡ଼୍ । ତାନ୍ ପେର୍କେ ଗହମ୍ ପାଣ୍ଡ୍‌ସ୍ପି ମିକା ଆଟୁତାଗ୍ ୱାଟିତଡ଼୍ ।’”
MAT 13:31 ଜିସୁ ୱେରଡ଼୍ ୱେଷଡ଼୍ ଇସ୍‌ କେତ୍‍ତାନ୍, “ୱେରନ୍ ନାରୁନ୍ ଅନ୍‌ ୱାୟେତାଗ୍ ସୋରିଷ ପେଡ଼େମ୍ ଲେକାମ୍ ୱେରଡ଼୍ ପେଡ଼େମ୍ ମିଚ୍‍ତନ୍ ।
MAT 13:32 ଆଦ୍ ପେଡ଼େମ୍ ସାର୍‍ରେ ତାଗାଙ୍କ୍ ଇସୁର୍ ଆତ୍‍ତେ ମିକା ଆଗାଙ୍କ୍ ବେନ୍ ମାଡ଼େ ଆତ୍‍ତେ, ୱାୟେତାଗ୍ ବାଗାତାଉ ସାରେ ମାଡ଼ାକ୍ ୱିଡ଼୍‍ସି ଗାଟି ଡେଙ୍ଗ୍ ନୁ ମାନ୍ଦେଆତ୍‍ ନୁ ତାନ୍ ପର୍‍ର ପିଟେ ତୁଉକା ତାର୍ତ୍‍ତା । ସ୍ୱର୍ଗରାଜ୍ୟତେ ପେର୍‍ସାନାଦ୍ ଇଦ୍‍ଲେକାମ୍ ।”
MAT 13:33 ମେଣ୍ଡ୍‍ନ୍ ଦାମ୍ ଜିସୁ ଉଦାରନ୍ ଇସ୍‌ କେତ୍‍ତାନ୍, “ୱେରଡ଼୍ ନାଟାଡ଼୍ ସୁଦୁଟ୍ କମିର୍ ଆସ୍ ଦୁଡ଼୍‍ବାସ୍ତା ନିଇସ୍‌ ମହିଦାତାଗ୍ କାଲ୍‍ପ୍‍ତନ୍ । ଟିକ୍ ସମୟ୍‍ତେ ସାରେ ମହିଦା ତାଲିତାଗ୍ କାହିଲି ତୟ୍‍ତେ । ସ୍ୱର୍ଗରାଜ୍ୟ ହିଦ୍‍ଲେକାମ୍ ନାର୍ଗେ ଆଦ୍‍ତେ ।”
MAT 13:34 ଜିସୁ ଇଦ୍‍ଲେକାମ୍ ୱେଷଡ଼୍ ଇସ୍‌ ଶିକ୍ଷା ହିସମାତ୍‍ତନ୍ । ୱେଷଡ଼୍ ହିୱକଟ୍ ଅଣ୍ଡ୍‌ ବେନେମିକା ଶିକ୍ଷା ହିୱେମାତ୍‍ତନ୍ ।
MAT 13:35 ଇଦିନ୍ ତଡ଼୍ ବାବବାଦୀନଡ଼୍ ହିଦ୍ ବବିଷ୍ୟତ୍‍ବାଣି ସାରେ ଆତ୍‍ତେ । “ନାନ୍ ୱେଷଡ଼୍ ଲେକାମ୍ ଅଡ଼୍‌‍ତଡ଼୍ ଗଟି ତିର୍ରିତାନ୍ । ତିଆର୍ ମୁନେଙ୍କ୍ ପୁନ୍‍ୱେମାନ୍ଦାନ୍ ସାରେ ଗଟି ହିଦ୍‍ଲେକାମ୍ ନାନ୍ ଅଡ଼୍‌‍କ୍ ବୁଜାମାଡ଼ିତାନ୍ ।”
MAT 13:36 ନାରୁଡ଼୍ ଗଓଲିତାଗାଙ୍କ୍ ପେଇସ୍‌ ୱାସ୍ ଜିସୁ ବେସୁଙ୍କ୍‍ ଲୋନ୍‌ ଲୋପେ ଆତ୍‍ତନ୍, ତାନ୍ ଶିଷ୍ୟନଡ଼୍ ୱାସ୍ ପଚାର୍‍ମାଡ଼୍‍ତଡ଼୍, “ବାଲୁଙ୍ଗା ୱେଷଡ଼୍ ଇତ୍‍କେ ମାକିଂଙ୍କ୍ ବୁଜାମାଡ଼ିମ୍ ।”
MAT 13:37 ଜିସୁ ଉତ୍ତର୍ ହିତ୍‍ତନ୍, “ବେନ୍ ନାରୁନ୍ ଲେକେତ୍‍ ୱିଜ୍ ୱିତ୍‍ତନ୍, ଅଣ୍ଡ୍‌ ନାରୁନ୍ ପିଲେ ।”
MAT 13:38 ହିଦ୍ ଜଗତ୍ ଆଦୁତ୍‍ତେ ୱାୟେ । ବେନଡ଼୍ ସ୍ୱର୍ଗରାଜ୍ୟ ଆଦିବାସିଡ଼୍, ଅଡ଼୍‌ ଲେକେତ୍‍ ୱିଜ୍ । ବାଲୁଙ୍ଗା ଆଦ୍‍ତେ ଶୟତାନ୍‍ତାଦ୍ ଉଡ଼ାନାଦ୍ ।
MAT 13:39 ବେନ୍ ଶତ୍ରୁଡ଼୍ ବାଲୁଙ୍ଗା ୱିତ୍‍ତନ୍, ଅଣ୍ଡ୍‌ ଶୟ୍‍ତାନ୍‍ । ପାଣ୍ଡାନ୍‌ ଦିନାମ୍ ଆଦୁତ୍‍ତେ ତେରାନ୍‌ ଦିନ୍‌ । ଶସ୍ୟକହିଦାନଡ଼୍ ଆଦୁତ୍‍ତେ ଦୂତ ।
MAT 13:40 ବାଲୁଙ୍ଗା ବେଦ୍‍ଲେକାମ୍ କଇସ୍ କାର୍‍ୱିମାନ୍ତା, ଯୁଗାନ୍ତ କାଲ୍ ଆଦେଲେକାମ୍ ଆଦ୍‍ତେ ।
MAT 13:41 ନାରୁନ୍ ପିଲେ ତାନ୍ ରାଜ୍ୟତାଗାଙ୍କ୍ ସାରେ ଅପରାଦ୍‌ ପାଡ଼ିୟିଦେ ନଡ଼୍‍କ୍ ନୁ ବେନଡ଼୍ ବାଗାତଡ଼୍‍କ୍ ପାପ୍ ମାଡ଼ାଙ୍କ୍ କେତିତଡ଼୍‍, ଅଡ଼୍‌‍କ୍ ଅଣ୍ଡୟାଗେ ମାଡ଼ାନ୍ ସେଙ୍ଗେ ଦୂତକିଙ୍କ୍ ରହତିତଡ଼୍ ।
MAT 13:42 ଅଡ଼୍‌ ହି ସାରେତଡ଼୍‍କ୍ ନିଡ଼୍‍ତାନାଦ୍ କିସ୍‍ତାଗ୍ ହେସିତଡ଼୍ । ଆଗେ ଇ ନାରୁଡ଼୍ କେଇତଡ଼୍ ନୁ ତିପାଲ୍‍ତେ ଆଗେ ପାଲ୍‍କ୍ କିଟ୍ରୁମ୍ କାଟ୍ରୁମ୍ ମାଡ଼ିତଡ଼୍ ।
MAT 13:43 ଆଦ୍ ସମୟ୍‍ତେ ଦାର୍ମିକ୍ ନାରୁଡ଼୍‍ ସ୍ୱର୍ଗରାଜ୍ୟତାଗ୍ ପଡ଼ଦ୍‍ଲେକାମ୍ ୱେଇସ୍ ଆଦ୍‍ତଡ଼୍ । କେଞ୍ଜାନଙ୍କ୍ ଇଚ୍ଛା ମାତ୍‍କେ କେୱୁଇସ୍ କେଞ୍ଜାଟ୍ ।
MAT 13:44 “ଅନ୍‌ ଦିନ୍ ୱେରନ୍ ନାରୁନ୍ ୱାୟେତାଗ୍ ଡେୱ ଡେୱ ମିଶିମାନ୍ଦାନ୍ ଦନ୍ ଦର୍‍କ୍‍ତେ । ଆଦିଙ୍କ୍ ଅଣ୍ଡ୍‌ ମୁଚିୱାଟ୍‍ତଣ୍ଡ୍ । ମେଣ୍ଡେ ୱେଡ଼୍‍କେତେ ନିଜେତ୍ ସାରେ ସମ୍ପତି ୱାମି ମିକା ଆଦ୍ ୱାୟେତିଙ୍କ୍ ଆଶ୍‍ତନ୍ । ସ୍ୱର୍ଗରାଜ୍ୟ ହିଦ୍ ମିଶିତାଦ୍ ଦନ୍ ଲେକାମ୍ ।”
MAT 13:45 “ୱେରନ୍ ବେପାରି ସାୟେତ୍ ମୁକ୍ତାତିଙ୍କ୍ ମେହେକ ମାତ୍‍ତନ୍ ।
MAT 13:46 ୱେରଡ଼୍ ଗାଟି ମୁଲ୍ୟତାଦ୍ ମୁକ୍ତାତାଦ୍ ସନ୍ଦାନ୍ ଦର୍‍ସ୍‍କି ଅଣ୍ଡ୍‌ ହୋନାଉ ସାରେ ସମ୍ପତି ୱାମିମିକା ଆଦିଙ୍କ୍ ଆଶ୍‍ତନ୍ । ସ୍ୱର୍ଗରାଜ୍ୟ ଆଦ୍ ମୁକ୍ତା ଲେକାମ୍ ।”
MAT 13:47 “ସ୍ୱର୍ଗରାଜ୍ୟ ୱେରଡ଼୍ କିକେପହିତାନ୍ ତଲ୍‌କେ ଲେକାମ୍ । କିକେ ପୟ୍‍ତାନଡ଼୍ ଇଲ୍‍କେତାଗ୍ ୱାଲାୱାଟି ବାତ୍ ବାତ୍ କିକେ ପହିଦ୍‍ତଡ଼୍ ।
MAT 13:48 ୱାଲେ ନିଣ୍ଡ୍‍କେ ଆଞ୍ଚିନା ଲାଗିତାସ୍ ଲେକେ ଲେକାମ୍ କିକେ ହେଞ୍ଚି ଜୁଡ଼ିନାଗ୍ ୱାଟିତଡ଼୍ ନୁ ଅଜାତିଆ କିକେ ହେସ୍‍ସିଦ୍‍ତଡ଼୍ ।
MAT 13:49 ଯୁଗାନ୍ତ ସମୟ୍‍ତେ ହିଦ୍‍ଲେକାମ୍ ଆଦ୍‍ତେ । ଦୂତକି ଦାର୍ମିକ୍ ନାରୁଡ଼ାଗାଙ୍କ୍ ପାପିନଡ଼୍‍କ୍ ୱେରେ ମାଡ଼ି ଅଡ଼୍‌‍କିଂଙ୍କ୍ ନିଡ଼୍‍ତାନାଦ୍ କିସ୍‍ତାଗ୍ ହେସ୍‍ସିଦ୍‍ତଡ଼୍ ।
MAT 13:50 ଆଗେ ଅଡ଼୍‌ କେୟାନ୍ ଲେକାମ୍ ଆସ୍ ତିପାଲ୍‍ତେ ପାଲ୍‍କ୍ କିଟ୍ରୁମ୍ କାଟ୍ରୁମ୍ ମାଡ଼ିତଡ଼୍ ।”
MAT 13:51 ଜିସୁ ଶିଷ୍ୟନଡ଼୍‍କ୍ ପାଚ୍ରାମାଡ଼୍‍ତଣ୍ଡ୍, “ହିଉସାରେ ବିଷୟ ବୁଜେମ୍ ଆଦୁତିଡ଼୍ ?” ଅଡ଼୍‌ ଉତ୍ତର୍ ହିତ୍‍ତଡ଼୍, “ହୋ ପ୍ରବୁ ।”
MAT 13:52 ଜିସୁ ଅଡ଼୍‌‍କ୍ କେତ୍‍ତାନ୍, “ବେଦ୍‍ଲେକାମ୍ ୱେରନ୍ ଲନ୍‍ମାଲିକ୍ ତାନାଦ୍ ବଣ୍ଡାର୍ ଲୋନ୍‌‍ତାଗାଙ୍କ୍ ବାତ୍‍ତେ ଇଲ୍‍ୱେ ଲେକାମ୍ ପୁନେଲାୱ୍ ନୁ ପାହାନ୍ତାଲାୱ୍ ନିୟ୍ ପେସ୍‍ପିତଣ୍ଡ୍, ସ୍ୱର୍ଗରାଜ୍ୟ ସେଙ୍ଗେ ତାଲିମ୍ ଆସ୍‍ମାନ୍ଦାନ୍ ୱେରନ୍ ଦର୍ମଗୁରୁ ଟିକ୍ ଆଦେଲେକାମ୍ ମାଡ଼ିତନ୍ ।”
MAT 13:53 ହିଉସାରେ ୱେଷଡ଼୍ କେସ୍ ତେର୍‍ସ୍ପାନ୍ ପେର୍‍କେ ଜିସୁ ନିଜେ ମାନ୍ଦାନ୍ ଲୋନ୍‌ ମାଲ୍‍ସ୍ ଆତ୍‍ତନ୍ ।
MAT 13:54 ଆଗେତ୍ ପ୍ରାର୍ତନାଲୋନ୍‌ ଅନ୍‌ ଶିକ୍ଷା କେଞ୍ଜି ନାରୁଡ଼୍ ବାକ୍‍ୱା ଆସ୍ କେତ୍‍ତଡ଼୍, “ହିସର୍ ବୁଦ୍‍ତେ ଅଣ୍ଡ୍‌ ବେଗେ ଦର୍‍ସ୍କ୍‍ତନ୍ ? ହିଉସାରେ ବାକ୍‍ୱା ପାଡ଼୍‍ୟି ମାଡ଼ାନଙ୍କ୍ ଅଂକିଙ୍କ୍‌ ବେନ ଶକ୍ତି ହିତ୍‍ତନ୍ ?
MAT 13:55 ହିଦ୍ ବାତେଏ ଅଣ୍ଡ୍‌ ବଡ଼େଇ ତେ ମାର୍‍ ଆୟନ୍ ? ମରୀୟମ୍‍ ବାତ୍ ତାମ୍ ୟାୟ୍‍ ଆୟ୍‍ୟ ? ଯାକୁବ୍, ଯୋସେପ୍, ଶିମୋନ୍ ନୁ ଯିହୁଦା ବାତେଏ ତାନ୍ ତାମୁଣ୍ଡ୍‌ ଆୟନ୍ ?
MAT 13:56 ତାନ୍ ଏଲାଡ଼୍‍ ବାତେଏ ଇଗେ ଇଲା ? ହିଉସାରେ ଶକ୍ତି ଅଂକିଙ୍କ୍‌ ବେଗେ ଦର୍‍କ୍‍ତେ ?”
MAT 13:57 ହିଦ୍ କେସ୍ ଜିସୁଙ୍କ୍ କେପ୍‍ତଡ଼୍ । ଜିସୁ ଅଡ଼୍‌‍କ୍ କେତ୍‍ତାନ୍, “ୱେରନ୍ ବାବବାଦୀ ନିଜେତ୍ ପରିବାର୍ ନୁ ନାର୍ ୱିଡ଼୍‍ସି ମେଣ୍ଡେ ସାରେତାଗ୍ ତନ୍ଦିତନ୍ ।”
MAT 13:58 ଅଡ଼୍‌ ଅଂକିଙ୍କ୍‌ ଅବିଶ୍ୱାସୀ ଆଇନାଙ୍କ୍ ଅଣ୍ଡ୍‌ ଆଗେ ଅନାହୁ ବାକ୍‍ୱା ପାଡ଼୍‍ୟି ମେଣ୍ଡେ ଅଦିକ୍‌ ମାଡ଼ନ୍ ।
MAT 14:1 ଆଦ୍ ସମୟ୍‍ତେ ଗାଲିଲୀତେ ଶାସକ ହେରଦ୍ ଜିସୁନ୍ ବିଷୟ୍‍ତେ କେଞ୍ଜ୍‍ତନ୍‍ ।
MAT 14:2 ଅଣ୍ଡ୍‌ ତାନ୍ ଚାକରିଡ଼୍‍କ୍ କେତ୍‍ତାନ୍, “ହିଣ୍ଡ୍ ନିଜାମ୍ ବାପ୍ତିସ୍ମ ଯୋହନ୍‌, ମେଣ୍ଡନ୍‍ନ୍ଦାମ୍ ଜନମ୍ ଆସ୍ ମାଲ୍‍ସ୍ ୱାତ୍‍ତନ୍ । ଅଦିନ୍‌ ସେଙ୍ଗେ ଅଂକିଙ୍କ୍‌ ବାକ୍‍ୱା ପାଡ଼୍‍ୟି ମାଡ଼ାନଙ୍କ୍ ଶକ୍ତି ମିନ୍ଦେ ।”
MAT 14:3 ଇଦିନ୍ ମୁନେଙ୍କ୍ ହେରଦ୍ ଯୋହନ୍‌‌ତିଙ୍କ୍ ଗିରାପ୍ ମାଡ଼ାନ୍ ସେଙ୍ଗେ କେସ୍‍ମାତ୍‍ତନ୍ ନୁ ଅଂକିଙ୍କ୍‌ ହିକ୍‍ଲେତଡ଼୍ ତହସ୍ ତାନାତାଗ୍ ନେହେସ୍ ମାତ୍‍ତନ୍ । ତାନ୍ ତାମୁଣ୍ଡ୍‌ ପିଲିପ୍ ତେ ମୁତ୍‍ତେ ହେରଦିଆତ୍ ସେଙ୍ଗେ ଅଣ୍ଡ୍‌ ହିଦ୍‍ଲେକାମ୍ ମାଡ଼ିମାତ୍‍ତନ୍ ।
MAT 14:4 ବାପ୍ତିଜିକ ଯୋହନ୍‌ ଅଂକିଙ୍କ୍‌ କେସ୍‍ମାତ୍‍ତନ୍, “ହେରଦିଆତିଙ୍କ୍ ପେଣ୍ଡୁଲ୍ ମାଡ଼୍‍ତାଦ୍ ନିୟାଦ୍ ଟିକ୍ ନିୟମ୍‍ ଆୟ୍‍ୟ ।”
MAT 14:5 ଆଦିନ୍ ସେଙ୍ଗେ ହେରଦ୍ ଯୋହନ୍‌‌ତିଙ୍କ୍ ହାଉକାନ୍ ସେଙ୍ଗେ ଆଲ୍‍ସି ମାତ୍‍ତନ୍, ବାତେଙ୍କ୍ ଇତ୍‍କେ ଇହୁଦୀ ନାରୁଡ଼୍‍କ୍ ଅଣ୍ଡ୍‌ ୱେର୍‍ସ ମାତ୍‍ତନ୍ । ବାତେଙ୍କ୍ ଇତ୍‍କେ ଅଡ଼୍‌ ଯୋହନ୍‌ ୱେରନ୍ ବାବବାଦୀ ଇଞ୍ଜ୍ ହେର୍କ ମାଡ଼ମାତ୍‍ତଡ଼୍ ।
MAT 14:6 ହେରୋଦ୍‍ତେ ଜନମ୍‍ଦିନେ ହେରୋଦିଆତେ ମାୟାଡ଼୍ ଅତିତିଡ଼୍‍ ମୁନେ ଏକ୍‍ସନ୍ ମାଡ଼ିମାତ୍‍ତେ ।
MAT 14:7 ଆଦିନ୍ ପର୍‍ର ପ୍ରୀତ ଆସ୍ ହେରୋଦ୍ ପ୍ରତିଜ୍ଞା ମାଡ଼ି କେତ୍‍ତାନ୍, “ନାନ୍ ଶପତ୍ ମାଡ଼ିକେତୁତାନ୍, ନିମ୍‍ ବାତ୍ ତାଲ୍‍କିତିନ୍, ନାନେନିକ୍ ଇଦ୍‍ତାନ୍ ।”
MAT 14:8 ତାନ୍ ୟାୟାନ୍ ମନ୍ତ୍ରନା ଲେକାମ୍ ପିକିଡ଼୍ କେତ୍‍ତେ, “ବାପ୍ତିଜିକ ଯୋହନ୍‌ ତେ ତାଲ୍‍ଲେ ହିଞ୍ଜେ ୱେରଡ଼୍ ତାଲିତାଗ୍ ୱାଟି ନାକିଂଙ୍କ୍ ଇମୁଟ୍ ।”
MAT 14:9 ଆଦେକେଞ୍ଜି ରାଜାଲ୍ ଦୁଃକାମ୍ ଆତ୍‍ତନ୍ । ବାତେଙ୍କ୍ ଇତ୍‍କେ ସାରେତଡ଼୍ ମୁନେ ପ୍ରତିଜ୍ଞା ମାଡ଼ିମାନ୍‍ନାଙ୍କ୍ ପିକ୍‍ତେ ଗଟ୍ ସାରେ ମାଡ଼ାନ୍ ସେଙ୍ଗେ ଗଟ୍ ହିତ୍‍ତେ ।
MAT 14:10 ଆଦିଙ୍କ୍ ତାନାତାଗ୍ ଯୋହନ୍‌ ତେ ତାଲେତିଙ୍କ୍ କୟିତଡ଼୍ ନୁ
MAT 14:11 ତାଲିତାଗ୍ ଅନ୍‌ ତାଲ୍‍ଲେ ୱାଟି ଆଦ୍ ପିକ୍‍ତିଙ୍କ୍ ଇତ୍‍ତଡ଼୍ । ଆଦ୍ ଆସ୍ ତାନ୍ ୟାୟାଙ୍କ୍ ଇତ୍‍ତେ ।
MAT 14:12 ତାନ୍ ପେର୍କେ ଯୋହନ୍‌‌ତେ ଶିଷ୍ୟନଡ଼୍ ୱାସ୍ କବର୍ ହିଦାଙ୍କ୍ ଅନାଦ୍‌ ଡଲ୍‍ତେ ମେନ୍ଦୁଲ୍‍ତିଙ୍କ୍ ଆତ୍‍ତଡ଼୍ । ଅଡ଼୍‌ ଆଞ୍ଜ୍ ଜିସୁଙ୍କ୍ ଇଦୁଃକାମ୍ କାବୁର୍ କେତ୍‍ତଡ଼୍ ।
MAT 14:13 ଯୋହନ୍‌‌ତେ କବର୍ କେଞ୍ଜ୍‍ତେ ୱେଲେ ଓଡତାରି ୱେରଡ଼୍ ସିମ୍‍ସାମ୍ ପଡ଼ିୟେତାଗ୍ ଆତ୍‍ତନ୍ । ଜିସୁ ଆଗେ ଆଦାନାଦ୍ ପୁଞ୍ଜ୍‍ମିକା ଗାର୍‍ରେମାନ୍ଦାନ୍ ସହର୍‍ନାଗାଙ୍କ୍ ନାର୍‍ଗେ ନାରୁଡ଼୍ ଆଞ୍ଚ୍ ଆଞ୍ଚ୍ ଆଞ୍ଜ୍ ଜିସୁନ୍ ପେର୍କେ ଆଦ୍‍ତଡ଼୍ ।
MAT 14:14 ଜିସୁ ବେସୁଙ୍କ୍‍ ଓଡ୍‍ତାଗାଙ୍କ୍ ଡିଗ୍‍ତନ୍ ହିଦ୍ ବେଡ଼ିୟାଦ୍ ମାନ୍ଦେ ଉଡ଼୍‍ତନ୍, ଅନ୍‌ ହୃଦୟ୍ ଦୟାତେ ବିଗଲିତ ଆତ୍‍ତେ । ନାର୍‍ଗେ ରୋଗିଡ଼୍‍କ୍ ଅଣ୍ଡ୍‌ ସୁସ୍ଥ ମାଡ଼୍‍ତଣ୍ଡ୍ ।
MAT 14:15 ଆଦ୍ ଦିନ୍ ମୁଲ୍‍ପୁଟ୍ ଶିଷ୍ୟନଡ଼୍ ୱାସ୍ କେତ୍‍ତଡ଼୍, “ଗାଟି ଡେରିଆଦୁତ୍, ମେଣ୍ଡେ ହିଦ୍ ପଡ଼ିୟେ ନିଚାଟିଆ, ନାରୁଡ଼୍‍କ୍ ଆତ୍‍ତାଙ୍କ୍ କେଲେମ୍ । ଅଡ଼୍‌ ନାକିନାଗ୍ ଆଞ୍ଜ୍ କାଦି ଜାଗାଡ଼୍‍ ମାଡ଼ିତଡ଼୍ ।”
MAT 14:16 ଜିସୁ ଅଡ଼୍‌‍କ୍ କେତ୍‍ତନ୍, “ଅଡ଼୍‌ ହିଗାଙ୍କ୍ ଆଦାନ୍ ଦର୍‍କାଡ଼୍ ଆୟ୍‍ୟ । ମିଡ଼୍ ଅଡ଼୍‌‍କ୍ ବାତ୍ ସୁଦୁଟ୍ ତିନ୍ଦାଙ୍କ୍ ହିମୁଟ୍ ।”
MAT 14:17 ଶିଷ୍ୟନଡ଼୍ ଉତ୍ତର୍ କେତ୍‍ତଡ଼୍, “ହିଗେ ମାହାପାକେ ମାତର୍ ହେଇଙ୍କ୍ ରୂଟି ନୁ ରେଣ୍ଡ୍ କିକେ ମିନ୍ଦେ ।”
MAT 14:18 ଜିସୁ କେତ୍‍ତାନ୍, “ଆସ୍‍କ୍ ନା ପାକେ ତାଡ଼ାଟ୍ ।”
MAT 14:19 ନାରୁଡ଼୍‍କ୍ ଗାଡ଼୍ ପର୍‍ର କୁଦାଙ୍କ୍ କେସ୍ ଜିସୁ ଆଉ ହେଇଙ୍କ୍ ରୂଟି ନୁ ରେଣ୍ଡେ କିକେଙ୍କ୍ ଆତ୍‍ତନ୍ ନୁ ସ୍ୱର୍ଗତ୍‍ ପାକେ ଉଡ଼ି ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତନ୍ । ମେଣ୍ଡେ ଆଉ ରୂଟିଙ୍କ୍ ଦୁଡ଼ା ଦୁଡ଼ା ମାଡ଼ି ଶିଷ୍ୟଡ଼୍ କାଇଦାଗ୍ ହିତ୍‍ତନ୍ । ଶିଷ୍ୟଡ଼୍ ଆଉହାସ୍ ନାରୁଡ଼୍‍କିଂଙ୍କ୍ ତୁଉସିତ୍‍ତଡ଼୍ ।
MAT 14:20 ସାରେତଡ଼୍ ତିଞ୍ଜ୍ ପଟ୍‍ ନିଇତ୍‍ତଡ଼୍ । ତାନ୍ ପେର୍କେ ଶିଷ୍ୟଡ଼୍ ମିଗ୍ଲୀମାନ୍ଦାନ୍ ରୂଟି ନୁ କିକେ ଦୁଡ଼ାକିଂଙ୍କ୍ ପେହେକି ୱାଟ୍‍ଟାନ୍ ଜୁଡ଼ିନାଗ୍ ନିହିତଡ଼୍ ।
MAT 14:21 ନାଟାଙ୍କ୍ ନୁ ପିଲାଙ୍କ୍ ୱିଡ଼୍‍ସି ଏଇଙ୍କ୍ ହଜାର୍‌ ନାରୁଡ଼୍ ଆଦ୍ କାଦି ତିତ୍‍ତଡ଼୍ ।
MAT 14:22 ତାନ୍ ପେର୍‍କେ ଜିସୁ ଶିଷ୍ୟଡ଼୍‍କିଂଙ୍କ୍ ଓଡେତେ ସମୁଦ୍ର ଆପାକେ ଆତ୍‍ତାଙ୍କ୍ କେତ୍‍ତାନ୍ । ମେଣ୍ଡେ ଅଣ୍ଡ୍‌ ନିଜେ ପେର୍କେ ମାଞ୍ଜ୍ ନାରୁଡ଼୍‍କ୍ ଆତ୍‍ତାଙ୍କ୍ କେତ୍‍ତଣ୍ଡ୍ ।
MAT 14:23 ଅଣ୍ଡ୍‌ ୱେରନ୍ ପ୍ରାର୍ତନା ମାଡ଼ାନ୍‍ସେଙ୍ଗେ ମେଟେତ୍‍ ପର୍‍ର ଆତ୍‍ତନ୍ ।
MAT 14:24 ମୁଲ୍‍ପୁଟ୍ ଆଦାନ୍ ୱେଲେ ଜିସୁ ଆଗେ ୱେରଣ୍ଡ୍ ମାତ୍‍ତନ୍ । ଆଦ୍ ଦିନାମ୍ ତେ ଜିସୁ ଉଡ଼୍‍ତନ୍ ଯେ ଅଡ଼୍‌ ବୂମ୍‌ତାଗାଙ୍କ୍ ପିନା ଜେକାଆଞ୍ଜ୍ ମାତ୍‍ତେ ନୁ ଗାଟି ଗାଲ୍ ୱାସମାନାଙ୍କ୍ ଗାଙ୍କ୍‍କୁଡ଼୍‍ତେ ଓଡ୍‌ ଉଙ୍ଗମାତ୍‍ତେ ।
MAT 14:25 ନାର୍‍କେତ୍ ୱିୟ୍‍ଦାନ୍ ୱେଲେ ଜିସୁ ହେର୍‍ଦେ ପର୍‍ର ତାଆକି ଶିଷ୍ୟଡ଼୍ ଗାର୍‍ରେ ୱାତ୍‍ତନ୍ ।
MAT 14:26 ଶିଷ୍ୟ ଅଂକିଙ୍କ୍‌ ଉଡ଼ି ୱେର୍‍ସ୍‍ ମାତ୍‍ତଡ଼୍, “ବୁତ୍ ବୁତ୍” ଇଞ୍ଜ ମର୍‍ପହିତ୍‍ତଡ଼୍ ।
MAT 14:27 ସାଙ୍ଗେ ସାଙ୍ଗେ ଜିସୁ ଅଡ଼୍‌‍କିଂଙ୍କ୍ ସାହାସ୍ ଇସ୍‌ କେତ୍‍ତାନ୍, “ନାନ୍ ବାନେ ! ୱେର୍‍ମାଟ୍ ।”
MAT 14:28 ଆଦ୍ କେଞ୍ଜି ପିତର୍ କେତ୍‍ତାନ୍, “ପ୍ରବୁ, ଯଦି ନିମ୍‍ ସତ୍ ଆସ୍ ମାନ୍‍ତିଡ଼୍, ହେର୍‍ଦେ ପର୍‍ର ତାଆକି ନିୟ୍ ଗାର୍‍ରେ ଆଦାନଙ୍କ୍ ଗଟ୍ ହିମ୍ ।”
MAT 14:29 ଜିସୁ କେତ୍‍ତାନ୍, “ତାଆକି ୱାଡ଼ା ।” ପିତର୍ ଓଡେତାଗଙ୍ଗା ଡିଗି ଜିସୁନ୍ ପାକେ ଏର୍‍ଦେ ପର୍‍ର ତାକାନଙ୍କ୍ ପସ୍ପ୍‍ତନ୍ ।
MAT 14:30 ବାତେଙ୍କ୍ ଇତ୍‍କେ ଗାଲ୍‍ପିନା ୱାଦାନାଦ୍ ଉଡ଼ି ୱେର୍‍ତନ୍ ନୁ ହେର୍‍ଦାଗ୍ ମୁଡ଼୍‍ନ୍ଦାନଙ୍କ୍ ପସ୍ପ୍‍ତନ୍ । ଆସୁଙ୍କ୍ ଅଣ୍ଡ୍‌ ମର୍‍ରେତେ କାର୍‍ଙ୍ଗ୍‍ତନ୍, “ପ୍ରବୁ ନାକିଂଙ୍କ୍ ରକ୍ଷା ମାଡ଼େ ।”
MAT 14:31 ହଟାତ୍ ଜିସୁ କାୟ୍ ଆସ୍ ପିତର୍‍ତିଙ୍କ୍ ପଇସ୍‌ କେତ୍‍ତାନ୍, “ବେସତ୍ ବିଶ୍ୱାସ୍ ଇଲ୍‍ୱେନନୀ ନିମ୍‍ ! ଏର୍କା ମାଡ଼୍‍ତିନ୍ ବାତ୍‍ତିଙ୍କ୍ ?”
MAT 14:32 ଅଡ଼୍‌ ଇର୍‍ୱୁଡ଼୍‍କ୍ ଓଡେତ୍ ପର୍‍ର ତାର୍‍ତଡ଼୍ ନୁ ଆସୁଟେ ସାଙ୍ଗେ ସାଙ୍ଗେ ଗାଲ୍ ମାଦ୍‍ତେ ।
MAT 14:33 ଶିଷ୍ୟଡ଼୍ ଜିସୁଙ୍କ୍ ଆରାଦାନା ମାଡ଼ି କେତ୍‍ତଡ଼୍ “ନିମ୍‍ ନିଜାମ୍ ଇଶ୍ୱର୍‌ତେ ମାର୍‍ ।”
MAT 14:34 ଅଡ଼୍‌ ସମୁଦ୍ରତିଙ୍କ୍ ୱେଇସ୍ ଗିନେସର୍‍ ବୁମ୍‌ତାଗା ହେୱ୍‍ତଡ଼୍ ।
MAT 14:35 ଆଗେ ନାରୁଡ଼୍ ଜିସୁଙ୍କ୍ ପୁଞ୍ଜ୍‍ମେଣ୍ଡେ ଗାର୍ରେ ନାର୍‍ଦେ ମାନ୍ଦାନ୍ ରୋଗିଡ଼୍‍କିଙ୍କ୍ ଜିସୁନ୍ ଗାର୍‍ରେ କାର୍‍ଙ୍ଗି ତାତ୍‍ତଡ଼୍ ।
MAT 14:36 ପିଡ଼ିତ୍ ନାରୁଡ଼୍‍କିଂଙ୍କ୍ ସୁଦୁଟ୍ ଅନାଦ୍‌ ସିଲେତ୍ କଙ୍ଗିଙ୍କ୍‌ ଇଟାନଙ୍କ୍ ଗଟ୍ ହିୱୀଣ୍ଡ୍ ଇଞ୍ଜ, ଅଡ଼୍‌ ଜିସୁଙ୍କ୍ ଅନୁରଦ୍‌ ମାଡ଼୍‍ତଡ଼୍ । ବେନଡ଼୍ ଆଦ୍ ମାଡ଼୍‍ତଡ଼୍, ଅଡ଼୍‌ ସୁସ୍ଥ ଆଦ୍‍ତଡ଼୍ ।
MAT 15:1 ଆଦ୍ ସମୟ୍‍ତେ ଯିରୁଶାଲେମ୍ ତାଗାଙ୍କ୍ ପାରୂଶୀଡ଼୍ ନୁ ଶାସ୍ତ୍ରିନଡ଼୍ ଜିସୁନ୍ ପାକେ ୱାସ୍ କେତ୍‍ତଡ଼୍,
MAT 15:2 “ମାମ୍‍ମେ ମୁନେତ୍‍ନାରୁମ୍ ବେନ୍‍ସାରେ ଶିକ୍ଷା ଇସ୍ ଆତ୍‍ତମ୍, ନି ଶିଷ୍ୟନଡ଼୍ ବାତ୍‍ତିଙ୍କ୍ ପାଲନ୍ ମାଡ଼୍‍ଡ଼ ? ତିନ୍ଦାନ୍ ମୁନେଙ୍କ୍ ଅଡ଼୍‌ ବାତ୍‍ତିଙ୍କ୍ କାୟ୍ ନର୍‍ୱଡ଼୍ ।”
MAT 15:3 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ଇତ୍‍ତନ୍, “ମିଡ଼୍ ଆନ୍‌‍ତେ ମିଇ ଇଶ୍ୱର୍‌ତେ ପାଡ଼୍‍ୟି ପାଲନ୍ ମାଡ଼କଟ୍ ନିଜେତ୍ ଶିକ୍ଷା ଲେକାମ୍ ପାଡ଼୍‍ୟି ମାଡ଼ୁତିଡ଼୍ ?”
MAT 15:4 ଇଶ୍ୱର୍ କେତ୍‍ତନ୍, “ୟାୟ୍‍ ବାବାଙ୍କ୍ ସନ୍‍ମାନ୍ ମାଡ଼ାଟ୍,” ମେଣ୍ଡେ ବେନଆଇ ବାବାଙ୍କ୍ କି ୟାୟାଙ୍କ୍ ଅବିଶାପ୍‌ ଇଦ୍‍ତନ୍, ଅଣ୍ଡ୍‌ ନିଜାମ୍ ଡଲାନ୍ଦଣ୍ଡ୍ ତିପାଲ୍‍ଆଦାଙ୍କ୍ ।
MAT 15:5 “ବାତେଙ୍କ୍ ଇତ୍‍କେ ମିଡ଼୍ ଶିକ୍ଷା ଇଦୁତିଡ଼୍ ବେନ୍ ୱେରନ୍ ନାରୁଙ୍କ୍ ବେନ୍ ସେଙ୍ଗେତ୍‍ ମାଇଦିଙ୍କ୍ ନିଜେତ୍ ୟାୟ୍‍ ବାବାଙ୍କ୍ ସାହାଯ୍ୟ ମାଡ଼ାଙ୍କ୍ ପାର୍‍ୱେଣ୍ଡ୍, ଅନ୍‌ ଇଶ୍ୱର୍‌ତିଙ୍କ୍ ଦାନ ମାଡ଼ିତନ୍ ଇଞ୍ଜ କେତ୍‍ତାନ୍,
MAT 15:6 ଅଣ୍ଡ୍‌ ମେଣ୍ଡେ ତାନ୍ ୟାୟ୍‍ ବାବାଙ୍କ୍ ଉଡ଼ାନଙ୍କ୍ ଅନାଦ୍‌ ଆଶେ ଇଲ୍‍ଲେ । ମିଡ଼୍ ଆଦ୍‍ଲେକାମ୍ ଇଶ୍ୱର୍‌ତେ ଗଟି କେଞ୍ଜକଟ୍ ନିଜେତ୍ ଶିକ୍ଷା ଲେକାମ୍ ଆଦ୍‍ତିଡ଼୍ ।
MAT 15:7 ରେ ଦୁଷ୍ଟଡ଼ି, ଯିଶାଇୟ ମିଇ ବିଷୟ୍‍ତେ ସାୟେତ୍ ବାବବାନି କେସ୍‍ମିନ୍ଦେନ୍,
MAT 15:8 ଇଶ୍ୱର୍ କେତିତ୍‍, ଇ ନାରୁଡ଼୍ ମାତର୍ ଗଟ୍‍ତେ ନାକିଂଙ୍କ୍ ସନ୍‍ମାନ୍ ଇଦ୍‍ତଡ଼୍, ବାତେଙ୍କ୍ ଇତ୍‍କେ ଅଡ଼୍‌ ହୃଦୟ୍ ନାୟାଗାଙ୍କ୍ ନାର୍‍ଗେ ଦୁରାମ୍ ।
MAT 15:9 ନାକିଂଙ୍କ୍ ଅଡ଼୍‌ ଆରାଦାନା ମାଡ଼ାଙ୍କ୍ ଦର୍‍କାର୍ ଇଲେ, ବାତେଙ୍କ୍ ଇତ୍‍କେ ଅଡ଼୍‌ ମାନେଇ ମାଡ଼୍‍ତାଦ୍ ନିୟମ୍‍ତିଙ୍କ୍ ନାୟାଦ୍ ଗଟ୍ ଇଞ୍ଜ କେତୁତଡ଼୍ ।”
MAT 15:10 ତାନ୍‍ପେର୍କେ ଜିସୁ ନାରୁଡ଼୍‍କିଂଙ୍କ୍ ଗାର୍‍ରେ କାର୍‍ଙ୍ଗି ଅଡ଼୍‌‍କିଂଙ୍କ୍ କେତ୍‍ତାନ୍, “କେଞ୍ଜାଟ୍ ନୁ ବୁଜେମ୍ଆଦାଙ୍କ୍ ଆଲ୍‍ସି ମାଡ଼ାଟ୍ ।
MAT 15:11 ନାରୁନ୍ ପାୟୁର୍ ତାଲାନ୍ ବାତେଏ ଆଦ୍‍ତେ ଆଦ୍ ଲୋପେ ଆଦ୍‍ତେ, ଆଦ୍ ଅଂକିଙ୍କ୍‌ ଅପବିତ୍ର ମାଡ଼; ମେଣ୍ଡେ ବାତେଏ ଅନ୍‌ ପାୟୁର୍‍ତାଲାନ୍ ପେଇତିତ୍‍, ଆଦ୍ ଅଂକିଙ୍କ୍‌ ଅପବିତ୍ର ମାଡ଼ିତ୍ ।”
MAT 15:12 ଆସୁଙ୍କ୍ ଶିଷ୍ୟନଡ଼୍ ଅନ୍‌ ଗାର୍‍ରେ ଆଞ୍ଜ୍ କେତ୍‍ତଡ଼୍, “ପାରୂଶୀଡ଼୍ ଆଦ୍ ଗଟ୍ କେଞ୍ଜି ବିରକ୍ତ ଆସ୍ ମିନ୍ଦେ, ନିମେବାତେ ଇଦ୍ ପୁତ୍‍ତିନ୍ ?”
MAT 15:13 ବାତେଙ୍କ୍ ଇତ୍‍କେ ଜିସୁ ଉତ୍ତର୍ କେତ୍‍ତାନ୍, “ନା ସ୍ୱର୍ଗ ବାବାଲ୍ ବେନ୍ ସାରେ ମାଡ଼ାକ୍ ଉର୍‍ସ୍କନ୍, ହାଉସାରେ ଗାଜ୍‍ଜେ ଆଦ୍‍ତା ।”
MAT 15:14 “ଅଡ଼୍‌ ବିଷୟ୍‍ତେ ଦାନ୍ଦେ ଆୟ୍‍ମାଟ୍‍ । ଅଡ଼୍‌ କାନାଙ୍କ୍ ଆର୍ ତତାନଣ୍ଡ୍ । ୱେରଣ୍ଡ୍ କାନାଲ୍ ମେଣ୍ଡେ ୱେରଣ୍ଡ୍ କାନାଙ୍କ୍ ଆର୍ ତତ୍‍କେ ଇର୍‍ୱୁଡ଼୍ ଆସ୍‍ସ ଗୁଇନ୍ଦେତାଗ୍ ରାଲିତଡ଼୍ ।”
MAT 15:15 ଆଗାଙ୍କ୍ ପିତର୍ ଅଂକିଙ୍କ୍‌ କେତ୍‍ତାନ୍, “ଆଦ୍ ଗଟ୍ ମାକିଂଙ୍କ୍ ବୁଜା ମାଡ଼ିମ୍ ।”
MAT 15:16 ଜିସୁ କେତ୍‍ତାନ୍, “ମିଡ଼୍‍ ଆନ୍‌‍ନ୍ତେ ବାତ୍ ଇଞ୍ଜେ କଞ୍ଜ୍ ବୁଜେମ୍ ଆୟୱିନ୍ ।
MAT 15:17 ବାତ୍‍ଆଇ ପାୟୁର୍ ତାଲାନ୍ ନେଙ୍କ୍‍ତେ, ଆଦ୍ ଲୋପେ ଆଞ୍ଜ୍ ମେଣ୍ଡେ ମେନ୍ଦୁଲ୍ ତାଲାନ୍ ପେଇସ୍ ଆଦ୍‍ତେ । ଇଦ୍ ବାତେଏ ବୁଜେମ୍ ଆୟ୍‍ୱିଡ଼୍‍ ?
MAT 15:18 ବାତେଙ୍କ୍ ଇତ୍‍କେ ପାୟୁର୍‍ତାଲାନ୍ ବାତେଏ ପେୟ୍‍ତିତ୍, ଆଦ୍ ହୃଦୟତାଗାଙ୍କ୍ ପେୟ୍‍ତିତ୍ ନୁ ଆଦ୍ ଇ ନାରୁଙ୍କ୍ ଅପବିତ୍ର ମାଡ଼ିତେ ।
MAT 15:19 ବାତେଙ୍କ୍ ଇତ୍‍କେ ହୃଦୟ୍‍ତାଗ୍ କାରାପ୍ ଚିନ୍ତେ, ଆୱୁକାନାଦ୍, ବ୍ୟାବିଚାର୍, ଲାଞ୍ଜେକାମ୍‌, ଚୋର୍ଯ୍, ମିଚ୍‌ କେତାନାଦ୍‌ ନୁ ନିନ୍ଦ୍ ପେଇତିତ୍‍;
MAT 15:20 ଇୱୁ ସାରେ ପାଡ଼୍‍ୟି ନାରୁଙ୍କ୍ ଅପବିତ୍ର ମାଡ଼ିତ୍ । ବାତେଙ୍କ୍ ଇତ୍‍କେ ଅଡ଼୍‌ କେତ୍‍ତାନ୍ ଲେକାମ୍ କାୟ୍ ନର୍‍ୱକଟ୍ ତିତ୍‍କେ ବେନ ଅପବିତ୍ର ଆୟନ୍ ।”
MAT 15:21 ଜିସୁ ଆଦ୍ ପଡ଼ିୟେ ୱିଡ଼୍‍ସି ସୋର୍ ନୁ ସୀଦନ୍ ନାର୍ ଆତ୍‍ତନ୍ ।
MAT 15:22 ଆଗେ ମାନ୍ଦାନ୍ ୱେର୍‍ଡ଼୍ କିନାନିୟ ନାଟାଡ଼୍ ୱାସ୍ ଗାଟିଲେଙ୍କ୍ ଦେ କେତାଙ୍କ୍ ପସ୍ପ୍‍ତେ, “ହୋ ପ୍ରବୁ, ଦାଉଦ୍‍ତେ ମାର୍‍, ନାକିଂଙ୍କ୍ ଦୟାମାଡ଼େ, ନା ପିକ୍‍ତିଙ୍କ୍ ବୟଙ୍କାର୍ ବୁତ୍‍ ପଇତେ ।”
MAT 15:23 ବାତେଙ୍କ୍ ଇତ୍‍କେ ଜିସୁ ଆଦିଙ୍କ୍ ଅଣ୍ଡ୍‌ ପଦ୍‍ମିକା ଉତ୍ତର୍ ହିୱଣ୍ଡ୍ । ଶିଷ୍ୟନଡ଼୍ ଅନ୍‌ ଗାର୍‍ରେ ୱାସ୍ ଅନୁରଦ୍‌ ମାଡ଼୍‍ତଡ଼୍, “ଆଦିଙ୍କ୍ ଯାପେ ଆତ୍‍ତାଙ୍କ୍ କେଲ୍‍ମୁଟ୍ । ଉଡ଼ାଟ୍ ଆଦ୍ ବେଦ୍‍ଲେକାମ୍ ମର୍‍ପଇସ୍ ମାନ୍‍ ପେର୍କେ ୱାଦୁତ୍ ।”
MAT 15:24 ବାତେଙ୍କ୍ ଇତ୍‍କେ ଜିସୁ ଉତ୍ତର୍ ହିତ୍‍ତନ୍, ନାନ୍‍ନେ ଇସ୍ରାଏଲ୍ ବଂଶତେ “ମାହିମାନ୍ଦାନ୍ ମେଣ୍ଢାନ୍ ସେଙ୍ଗେ ମେଣ୍ଡେ ବେନ ପାକେ ୱାଡ଼ନେ ।”
MAT 15:25 ବାତେଙ୍କ୍ ଇତ୍‍କେ ଆଦ୍ ନାଟାଡ଼୍ ୱାସ୍ ଅଂକିଙ୍କ୍‌ ମଡ଼୍‍କ୍‍ କି କେତାଙ୍କ୍ ପସ୍ପ୍‍ତେ, “ହୋ ପ୍ରବୁ, ନାକିଂଙ୍କ୍ ସାହାଯ୍ୟ ମାଡ଼େ ।”
MAT 15:26 ମାତର୍ ଜିସୁ କେତ୍‍ତାନ୍, “ପିଲାନ୍ ଚାକୁର୍ ଅସ୍ ନେୟ୍‍କିନାଗ୍ ୱାଟାନାଦ୍ ଆୟ୍‍ୟ ।”
MAT 15:27 ନାଟାଡ଼୍ କେତ୍‍ତେ, “ଆଦ୍ ସତ୍ ପ୍ରବୁ, ବାତେଙ୍କ୍ ଇତ୍‍କେ ନେୟ୍‍କ୍‍ ମିକା ମେଜତ୍‍ମଦଲ୍ ମୁନିବର୍ ହେଙ୍ଗୁଲ୍ ତିନ୍ଦାଙ୍କ୍ ଦର୍‍କିତ୍ ।”
MAT 15:28 ଆଗାଙ୍କ୍ ଅଣ୍ଡ୍‌ ଆଦିଙ୍କ୍ କେତ୍‍ତାନ୍, “ହୋ ନାଟାତନି, ନିୟାଦ୍ ବେଡ଼ିଇ ବିଶ୍ୱାସ୍,” ନି ଇଚ୍ଛାତେ ନି ଲେକାମ୍ ଆୟି । ଆଦ୍ ଦଣ୍ଡତାଗାଙ୍କ୍ ତାନ୍ ମାୟାଡ଼୍ ସୁସ୍ଥ ଆତ୍‍ତେ ।
MAT 15:29 ଆଗାଙ୍କ୍ ପେଇସ୍ ଜିସୁ ଗାଲିଲୀ ସମୁଦ୍ର ଆଞ୍ଚ୍‍ ଆଞ୍ଚ୍ ଆଞ୍ଜ୍ ୱେରଡ଼୍ ମେଟେତ୍‍ ପର୍‍ର କୁଦ୍‍ତନ୍ ।
MAT 15:30 ନାର୍‍ଗେ ନାରୁଡ଼୍ ଅନ୍‌‍ଗାରେ ୱାସ୍ ନିତ୍‍ତଡ଼୍ । ଅଡ଼୍‌ କୁଟାଲଡ଼୍, କାନାଲଡ଼୍‍କ୍, କନ୍ଦାଲଡ଼୍, ନୁ ବାତ୍ ବାତା ନାର୍‍ଗେ ରୋଗିଡ଼୍‍କ୍ ଅନ୍‌ ମୁନେ ନିଲ୍‍ସ୍ପିତ୍‍ ତଡ଼୍ ନୁ ଅଡ଼୍‌‍କିଂଙ୍କ୍ ଅନ୍‌ ଡେକାନ୍ ମୋଦଲ୍ ୱାଟିତ୍‍ତଡ଼୍, ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ ।
MAT 15:31 ଆଦେଲେକା‍ମ୍ କନ୍ଦାଲଡ଼୍ ଗଟି କେତ୍‍ତଡ଼୍, କୁଟାଲଡ଼୍ ତାକୁତଡ଼୍, ନୁ କାନାଲଡ଼୍, ଉଡ଼ୁତଡ୍, ଇସ୍ରାଏଲ୍‍ତେ ଇଶ୍ୱର୍‌ତିଙ୍କ୍ ପ୍ରସଂଶା କିର୍ତ୍ତନ୍ ମାଡ଼୍‍ତଡ଼୍ ।
MAT 15:32 ଜିସୁ ଶିଷ୍ୟନଡ଼କ୍ କାର୍‍ଙ୍ଗି କେତ୍‍ତାନ୍, “ଇ ନାରୁଡ଼୍ ସେଙ୍ଗେ ନାକିଂଙ୍କ୍ ଦୁଃକାମ୍ ପଇତେ, ବାତେଙ୍କ୍ ଇତ୍‍କେ ହି ନାରୁଡ଼୍ ନା ତଡ଼୍ ମୁଣ୍ଡ୍ ଦିନା ମିନ୍ଦେ ନୁ ଇଞ୍ଜେ ଅଡ଼ାଗ୍ ବାତେଇଲେ । ଅଡ଼୍‌ ତିନକଟ୍ ଆନ୍‌‍ମାକି, ଇ ଗଟ୍ କେତୁତାନ୍; ବାତେଙ୍କ୍ ଇତ୍‍କେ ଆଦାନ୍ ୱେଲେ ଆର୍‍ଦାଗ୍ ଆଇଦ୍ ତଡ଼୍ ।”
MAT 15:33 ଶିଷ୍ୟନଡ଼୍ ଅଂକିଙ୍କ୍‌ କେତ୍‍ତଡ଼୍, ଇସର୍ ନାରୁଡ଼୍‍କ୍ ପଟ୍‍ ନିଇତାଙ୍କ୍ ମାନାଡ଼୍ “ଇ ଉଚ୍‍କ ଲେକେଦାଗ୍ ଆସର୍ କାଦି ବେଗେ ଦର୍‍କିତ୍ ?”
MAT 15:34 ଜିସୁ କେତ୍‍ତନ୍, “ମିୟାଗ୍ ବେସ୍‌କ୍ ରୂଟି ମିନ୍ଦେ ?” ଅଡ଼୍‌ କେତ୍‍ତଡ଼୍, “ସାତ୍‍ଟାନ୍ ରୋଟି ନୁ ସୁକୁକ୍ ସୁଦୁ କିକେ ।”
MAT 15:35 ଆଗାଙ୍କ୍ ଅଣ୍ଡ୍‌ ନାରୁଡ଼୍‍କିଂଙ୍କ୍ ନେଲ୍ କୁଦାଙ୍କ୍ କେତ୍‍ତାନ୍,
MAT 15:36 ମେଣ୍ଡେ ଅଣ୍ଡ୍‌ ଆଉ ସାତ୍‍ଟାନ୍ ରୂଟି ନୁ କିକେଙ୍କ୍ ଅସ୍ ଦନ୍ୟବାଦ୍ ଇସ୍ ଆଉସାରେ ଶିଷ୍ୟଡ଼୍‍କ୍ ଇତ୍‍ତନ୍, ଅଡ଼୍‌ ନାରୁଡ଼୍‍କିଂଙ୍କ୍ ଇତ୍‍ତଡ଼୍ ।
MAT 15:37 ମେଣ୍ଡେ, ସାରେତଡ଼୍ ତିଞ୍ଜ୍ ପଟ୍‍ନିତଡ଼୍ ନୁ ଉର୍‍ଙ୍ଗ୍‍ତେ ରୂଟି ନାଗାଙ୍କ୍ ବେସ୍‌କ୍ ମିଗିଲ୍‍ ତାଉ, ଆଉ ଅଡ଼୍‌ ପେହେକି ସାତ୍‍ଟାନ୍ ଜୁଡ଼ିନାଗ୍ ନିହିତଡ଼୍ ।
MAT 15:38 ତିତ୍‍ତେ ନାରୁଡ଼୍, ନାଟାଙ୍କ୍ ନୁ ପିଲାଙ୍କ୍ ୱିଡ଼୍‍ସି ନାଲୁ ହଜାର୍‌ ନାରୁଡ଼୍ ମାତ୍‍ତଡ଼୍ ।
MAT 15:39 ତାନ୍ ପେର୍କେ ଜିସୁ ନାରୁଡ଼୍‍କ୍ ଆତ୍‍ତାଙ୍କ୍ କେସ୍ ଓଡ଼େତାରି ମଗଦାଲାନ୍ ନାର୍ ଆଦ୍‍ତଡ଼୍ ।
MAT 16:1 ପାରୂଶୀଡ଼୍ ନୁ ସାଦ୍ଦୂକିଡ଼୍ ଅନ୍‌ ଗାର୍‍ରେ ୱାସ୍ ଅଂକିଙ୍କ୍‌ ପରିକ୍ଷା ମାଡ଼ାନ୍ ଅବିଯଗ୍‍ତେ ଅଂକିଙ୍କ୍‌ ମାବ୍‍ତାଗ୍ ୱେରଡ଼୍ ଚିହ୍ନେ ତତାଙ୍କ୍ ଅନୁରଦ୍‌ ମାଡ଼୍‍ତଡ଼୍ ।
MAT 16:2 ବାତେଙ୍କ୍ ଇତ୍‍କେ ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ଇତ୍‍ତଣ୍ଡ୍, “ମୁଲ୍‍ପୁଟ୍ ମିଡ଼୍ କେସ୍‍ମାନୁଟ୍, ଲେକେତ୍‍ ପାଗ୍ ଆଦ୍‍ତେ, ବାତେଙ୍କ୍ ଇତ୍‍କେ ମାବ୍‍ଏର୍ ଆସ୍‍ମିନ୍ଦେ,
MAT 16:3 ସାରେଦିନା କେସମାନୁଟ୍, ନେଣ୍ଡ୍ ୱାର୍‍ସାମ୍ ଆଦ୍‍ତେ, ବାତେଙ୍କ୍ ଇତ୍‍କେ ମାବ୍‍ଏର୍ ଆସ୍‌ ମିନ୍ଦେ ମାବ୍‍ପଇସ୍ ମିନ୍ଦେ । ମିଡ଼୍ ମାବ୍ ଉଡ଼ିକେ କେତା କେତି ଆସ୍ ପୁନ୍ଦୁତିଡ଼୍, ବାତେଙ୍କ୍ଇତ୍କେ ଦିନାକିଙ୍କ୍ ଉଡ଼ାନାଦ୍ ସାରେ ବୁଜେମ୍ ଆୟୱିଡ଼୍ ?
MAT 16:4 ଇ ଯୁଗ୍‍ତେ ନାରୁଡ଼୍ ବେସର୍ ଦୁଷ୍ଟ ନୁ ଇଶ୍ୱର୍‌ତେ ଅବିଶ୍ୱାସ୍ । ମିଡ଼୍ ୱେରଡ଼୍ ଆଶର୍ଯ୍ୟ କାମ୍ ମାଡ଼ାଙ୍କ୍ କେତୁତିଡ଼୍ ? ବାତେଙ୍କ୍ ଇତ୍‍କେ ଯୁନସ୍‍ତେ ଜିୱୁନ୍‍ତେ ଗଟେମ୍ ଆସ୍‍ମାନ୍ଦାନ୍ ବାକ୍‍ୱାକାମ୍ ୱିଡ଼୍‍ସି ବାତେମିକା ବାକ୍‍ୱାକାମ୍ ମିଡ଼୍ ନାୟାଗେ ଉଡ଼୍‍ୱିଡ଼୍ ।” ଆଦ୍ କେସ୍ ଜିସୁ ଅଡ଼୍‌‍କ୍ ୱିଡ଼୍‍ସି ଆତ୍‍ତନ୍ ।
MAT 16:5 ଶିଷ୍ୟନଡ଼୍ ସମୁଦ୍ର ମେଣ୍ଡେନ୍ ପାକେ ହେଉସ୍ ଉଡ଼୍‌ତଡ଼୍ ଯେ, ଅଡ଼୍‌ ରୂଟି ଅଦାଙ୍କ୍ ମାର୍‍ଙ୍କ୍‍ତଡ଼୍ ।
MAT 16:6 ଜିସୁ ଅଡ଼୍‌‍କିଂଙ୍କ୍ କେତ୍‍ତନ୍, “ସର୍ତକ ଆୟ୍‍ମୁଟ୍, ପାରୂଶୀଡ଼୍ ନୁ ସାଦ୍ଦୂକିଡ଼୍ କମୀର୍‍ତାଗାଙ୍କ୍ ସାବ୍‍ଦାନ୍ ଆସ୍‍ମାନୁଟ୍ ।”
MAT 16:7 ଆଗାଙ୍କ୍ ଅଡ଼୍‌ ତାମ୍‍ତାମ୍ କେତାକେତି ଆଦ୍‍ତଡ଼୍, “ମାନାଡ଼୍ ରୂଟି ତାଡ଼୍‍ୱାଡ଼୍ ଇଞ୍ଜ ଅଣ୍ଡ୍‌ ଆଦ୍ କେତୁତନ୍ ।”
MAT 16:8 ବାତେଙ୍କ୍ ଇତ୍‍କେ ଜିସୁଆଦ୍ ପୁଞ୍ଜ୍ କେତ୍‍ତାନ୍, ହୋ ସୁଦୁଟ୍ ବିଶ୍ୱାସିନଡ଼ି, “ମିଇ ୟାଗ୍‍ ରୂଟି ଇଲାଇଞ୍ଜ୍ ବାତ୍‍ତିଙ୍କ୍ ନିଜେ ନିଜେ ରାମ୍‍କ୍ ଆଦୁତିଡ଼୍ ?
MAT 16:9 ମିଡ଼୍‍ବାତେ ଇଞ୍ଜ ବା ବୁଜେମ୍ ଆୟ୍‍ୱିଡ଼୍‍ ? ଏଇଙ୍କ୍ ହଜାର୍‌ ନାରୁଡ଼୍ ଆଗାଙ୍କ୍ ରୋଟି ମେଣ୍ଡେ ବେସ୍‌କ୍ ଜୁଡ଼ିନାଗ୍ ପେହେକ୍‍ତିଡ଼୍,
MAT 16:10 ଆଦ୍ ନାଲୁହଜାର୍‌ ନାରୁଡ଼୍ ସାତ୍‍ଟାନ୍ ରୂଟି ମେଣ୍ଡେ ବେସ୍‌କ୍ ଜୁଡ଼ିନାଗ୍ ପେହେକ୍‍ତିଡ଼୍, ଆଉସାରେ ମିକିଂଙ୍କ୍ ଏର୍କା ଇଲେ ?”
MAT 16:11 “ନାନ୍ ମିକିଂଙ୍କ୍ ରୋଟି ବିଷୟ୍‍ତେ କେଲନ୍, ଇଦ୍ ବେଲା ବୁଜେମ୍ ଆୟୱିଡ଼୍ ? ବାତେଙ୍କ୍ ଇତ୍‍କେ ପାରୂଶୀଡ଼୍ ନୁ ସାଦ୍ଦୂକିଡ଼୍ କମୀର ବିଷୟ୍‍ତେ ସାବ୍‍ଦାନ୍ ଆସ୍‍ମାନୁଟ୍ ।”
MAT 16:12 ଜିସୁ ଯେ ରୋଟିତେ କମୀର୍‍ତାଗାଙ୍କ୍ ସାବ୍‍ଦାନ୍ ଆଶେ ମାନ୍ଦାନ୍ ମାଇଦିଙ୍କ୍ କେଲକଟ ଫାରୁଶି ନୁ ସାଦୁକିଡ଼୍ ଶିକ୍ଷାତେ ସାବ୍‍ଦାନ୍‍ ଆଶେ ମାନ୍ଦାନ୍ ମାଇଦିଙ୍କ୍ ଅଡ଼୍‌‍କିଂଙ୍କ୍ କେସ୍‍ମାତ୍‍ତଣ୍ଡ୍, ଇଦ୍ ଅଡ଼୍‌ ଆସୁଟେ ବୁଜେମ୍ ଆଦ୍‍ତଡ଼୍ ।
MAT 16:13 ତାନ୍ ପେର୍କେ ଜିସୁ କାଇସରୀୟା ପିଲିପ୍ ନାର୍‍ଦେ ପାକେ ୱାସ୍ ତାନ୍ ଶିଷ୍ୟନଡ଼୍‍କ୍ କେତାଙ୍କ୍ ପସ୍ପତନ୍, “ନାରୁନ୍‍ପିଲେ ବେନ୍ ଇଞ୍ଜ ନାରୁଡ଼୍ କେତୁତଡ଼୍ ?”
MAT 16:14 ଆଗାଙ୍କ୍ ଅଡ଼୍‌ କେତ୍‍ତଡ଼୍, “ବେନ କେତିତଡ଼୍‍, ବାପ୍ତିସ୍ମ ଯୋହନ୍‌, ବେନ ଏଲିୟ, ମେଣ୍ଡେ ବେନ ଜିରିମୀୟ ବା ବାବବାଦୀନଡ଼୍ ଆଗାଙ୍କ୍ ୱେରନ୍ ।”
MAT 16:15 ଜିସୁ ଅଡ଼୍‌‍କିଂଙ୍କ୍ କେତ୍‍ତାନ୍, ବାତେଙ୍କ୍ ଇତ୍‍କେ “ନାନ୍ ବେନ ଇଞ୍ଜ ମିଡ଼୍ କେତୁତିଡ଼୍ ?”
MAT 16:16 ଶିମୋନ୍ ନୁ ପିତର୍ କେତ୍‍ତଡ଼୍, “ନିମ୍‍ କ୍ରିଷ୍ଟ, ଜିୱୁତେ ଇଶ୍ୱର୍ ତେ ମାର୍‍ ।”
MAT 16:17 ଆଗାଙ୍କ୍ ଅଣ୍ଡ୍‌ କେତ୍‍ତାନ୍, “ହୋ ଯୁନସ୍‍ତେ ମାର୍‍ ଶିମୋନ୍, ନିମ୍‍ ଦନ୍ୟ, ବାତେଙ୍କ୍ ଇତ୍‍କେ ନାରୁଡ଼୍ ପାକେ ଆୱୁଙ୍ଗ୍‍ ନୁ ନେତୁର୍‍ କେଲନ୍, ବେଲାନ୍ ନା ସ୍ୱର୍ଗତେ ବାବାଲ୍ କେସ୍‍ମିନ୍ଦେନ୍ ।”
MAT 16:18 “ମେଣ୍ଡେ, ନାନ୍ ମିକା ନିକିଂଙ୍କ୍ କେତୁତାନ୍, ନିମ୍‍ ପିତର୍, ମେଣ୍ଡେ ଇ କାଲ୍‍ଦେ ପର୍‍ର ନାନ୍ ନିଜେତ୍ ମୋଣ୍ଡଲି ମାଡ଼ିତାନ୍, ମେଣ୍ଡେ ନର୍କତେ ଶକ୍ତି ଆଦିଙ୍କ୍ ଆରେମ୍‍ ମାଡ଼ ।
MAT 16:19 ନାନ୍ ନିକିଂଙ୍କ୍ ସ୍ୱର୍ଗରାଜ୍ୟତେ କୁଚ୍‍କାଇ ଇଦ୍‍ତାନ୍, ମେଣ୍ଡେ ନିମ୍‍ ପୃତିବି ତାଗ୍ ବାତେଏ ସାରେ ବନ୍ଦ୍‍ମାଡ଼ିତିନ୍, ସ୍ୱର୍ଗତାଗ୍ ଆଦ୍ ବନ୍ଦ୍‍ମାନ୍‍ତେ, ମେଣ୍ଡେ ପୃତିବିତାଗ୍ ବାତ୍‍ଆଇ ମୁକ୍ତ ମାଡ଼ିତିନ୍, ସ୍ୱର୍ଗତାଗ୍ ଆଦ୍ ମୁକ୍ତ ମାନ୍‍ତେ ।”
MAT 16:20 ଆସୁଙ୍କ୍ ଅଣ୍ଡ୍‌ ଯେ କ୍ରିଷ୍ଟ ଆଦ୍‍ତନ୍, ଇଦ୍ ବେନଙ୍କ୍ ବା କେଲ୍‍ମାଟ୍ ହିଞ୍ଜ ଅଣ୍ଡ୍‌ ଶିଷ୍ୟଡ଼୍‍କ୍ ଦୃଡ଼ ଗଟ୍ ଇତ୍‍ତନ୍ ।
MAT 16:21 ଆଦ୍ ସମୟ୍‍ତାଗାଙ୍କ୍ ଜିସୁ କ୍ରିଷ୍ଟ ତାନ୍ ଶିଷ୍ୟନଡ଼କ୍ ବୁଜାମାଡ଼ାଙ୍କ୍ ପସ୍ପତନ୍ ଯେ, “ନାନ୍, ଯିରୁଶାଲେମ୍‍ତା ଆଞ୍ଜ୍ ଦର୍ମଯାଜକ୍, ଦର୍ମଗୁରୁ ନୁ ଦର୍ମନେତାନଡ଼୍‍ ତଡ଼୍ ନିର୍ଯ୍ୟାତିତ ଆସ୍ ଗାଟି କଷ୍ଟ ଆଦ୍‍ତଣ୍ଡ୍‌ । ଅଦିକ୍‍ ଡଲିତାନ୍, ବାତେଙ୍କ୍ ଇତ୍‍କେ ମୁଣ୍ଡ୍‍ଦିନା ପେର୍କେ ମେଣ୍ଡେଜିୱେ ଆସ୍ ତେଦିତନ୍ ।”
MAT 16:22 ପିତର୍ ଜିସୁଙ୍କ୍ ୱେରଙ୍କ୍ କାର୍‍ଙ୍କି ଅସ୍ ମଜା ମାଡ଼ି କେତ୍‍ତାନ୍, “ଇଶ୍ୱର୍ ମାଡ଼୍‍ମାକିଣ୍ଡ୍, ପ୍ରବୁ, ନି ସେଙ୍ଗେ ଇଲା ବେସୁଙ୍କ୍‍ ଆୟ୍‍ମାକି ।”
MAT 16:23 ଜିସୁ ମେଣ୍ଡେ ମାଲ୍‍ସ୍ କେତ୍‍ତନ୍, “ନା ମୁନେଙ୍କ୍ ଜେକ୍ ଅନ୍‌ ଶୟ୍‍ତାନ୍‍, ନା ସେଙ୍ଗେ ପ୍ରତିବନ୍ଦକ ଆୟ୍‍ମା । ବାତେଙ୍କ୍ ଇତ୍କେ ନିୟାଦ୍ ଇ ଚିନ୍ତେ ମାତର୍ ମାନବିକ, ସମ୍ପତି ଆୟ୍‍ୟ ।”
MAT 16:24 ତାନ୍‍ପେର୍କେ ଜିସୁ ତାନ୍ ଶିଷ୍ୟଡ଼କ୍ କେତ୍‍ତନ୍, “ବେନ ବେସୁଙ୍କ୍‍ ନା ପେର୍କେ ୱାଦାଙ୍କ୍ ଇଚ୍ଛା ମାଡ଼ୁତଣ୍ଡ୍, ଆଲେକେ ଅଣ୍ଡ୍‌ ନିଜେତିଙ୍କ୍ ଅସ୍ୱୀକାର୍ ମାଡ଼ିଣ୍ଡ୍, ମେଣ୍ଡେ ନିଜେ କ୍ରୁଶକାଞ୍ଜି ନା ପେର୍କେ ତାକିଣ୍ଡ୍ ।
MAT 16:25 ବାତେଙ୍କ୍ ଇତ୍‍କେ ବେନ ଆୟି ନିଜେତ୍ ଜିୱୁନ୍‍ ରକ୍ଷା ମାଡ଼ାଙ୍କ୍ ଇଚ୍ଛା ମାଡ଼ିତନ୍, ଆଦ୍ ଅଣ୍ଡ୍‌ ଆରାମ୍ ମାଡ଼ିତନ୍, ବାତେଙ୍କ୍ ଇତ୍‍କେ ବେନ ନିଜେତ୍ ଜିୱୁଣ୍ଡ୍‍ତିଙ୍କ୍ ଉତ୍ସର୍ଗ ମାଡ଼ିତନ୍ ଅଣ୍ଡ୍‌ ଆଦ୍ ପ୍ରାପ୍ତ ଆଦ୍‍ତନ୍ ।
MAT 16:26 ନାରୁନ୍ ବେସୁଙ୍କ୍‍ ସାରେ ଜଗତ୍ ଲାବ୍ ମାଡ଼ି ନିଜେତ୍ ଜିୱୁନ୍‍ ହିଦ୍‍ତନ୍, ଆଲେକେ ଅନାଦ୍‌ ବାତ୍ ଲାବ୍ ଆଦ୍‍ତେ ?
MAT 16:27 ମେଣ୍ଡେ ନାରୁଡ଼୍ ପିଲେ ନିଜେତ୍ ବାବଙ୍କ୍ ମାଇମାତେ ଗୌରବ୍ ପାଏମ୍ ଆସ୍ ନିଜେ ଦୂତତଡ଼୍‍ ୱାଦ୍‍ତଣ୍ଡ୍ ନୁ ଆସୁଙ୍କ୍ ଅଣ୍ଡ୍‌ ସାରେନାରୁଡ଼୍ ଅନ୍‌ ପାଡ଼୍‍ୟି ଲେକାମ୍ କାୟେ ହିଦ୍‍ତନ୍ ।
MAT 16:28 ନାନ୍ ମିକିଂଙ୍କ୍ ସତ୍ କେତୁତାନ୍, ନାରୁନ୍ ପିଲେ ନିଜେତ୍ ରାଜ୍ୟତାଗ୍ ୱାଦାନାଦ୍ ଉଡ଼୍‍ୱେ ଯାକ ଇଗେ ନିସ୍ ମାନ୍ଦାନ୍ ନାରୁଡ଼୍ ଡ଼ାଗାଙ୍କ୍ ବେସ୍‌କ୍ ବେଦ୍‍ଲେକାମ୍ ଡଲ୍‍ତାଗାଙ୍କ୍ ଆସ୍ୱାଦ ପାଏମ୍ ଆୟନ୍ ।”
MAT 17:1 ଜିସୁ ହିଦିନ୍ ଆରୁଦିନା ପେର୍କେ ପିତର୍ ନୁ ଯାକୁବ୍ ଯୋହନ୍‌ ତେ ଇର୍‍ୱୁଡ଼୍ ତାମୁଣ୍ଡ୍‌କିଡ଼୍‍କ୍ ଆସ୍ ୱେରଡ଼୍ ଡେଙ୍ଗ୍ ମେଟେତାଗ୍ ଆଦ୍‍ତଡ଼୍ ଆଗେ ବେନ ହିଲ୍‍ୱେ ମାତ୍‍ତଡ଼୍ ।
MAT 17:2 ଶିଷ୍ୟଡ଼୍ ଉଡ଼୍‍ନା ଜିସୁନ୍ ମୁନେତ୍ ଲେକାମ୍ ମିଡ଼୍‍ନ୍‍ତଣ୍ଡ୍ । ଅନ୍‌ ମକମ୍ ପଡ଼ଦ୍ ଲେକାମ୍ ୱେସ୍ ଆତ୍‍ତେ ନୁ ଅନ୍‌ ଚକା ୱେସ୍‍ଇନା ସାୟେ ତନ୍ତତେ ।
MAT 17:3 ମଶାଲ୍‌ ନୁ ଏଲିୟ ଜିସୁନ୍ ତଡ଼୍ ଗଟି ତିର୍‍ୟାନାଦ୍ ଶିଷ୍ୟଡ଼୍ ଉଡ଼୍‌ତଡ଼୍ ।
MAT 17:4 ପିତର୍ ଜିସୁଙ୍କ୍ କେତ୍‍ତାନ୍, “ବେସର୍ ସୁକାମ୍‍ତେ ଗଟ୍, ନେଣ୍ଡ୍ ମାମ୍‍ମେ ଇଗେ ମିନ୍ଦେମ୍ । ନିମ୍‍ ଯଦି ଇଚ୍ଛା ମାଡ଼ୁତିନ୍, ଇଗେ ନାନ୍ ମୁଣ୍ଡ୍ ଗୁଡ଼ୁସା ମାଡ଼ିତାନ୍ । ୱେରଡ଼୍ ନି ମାଇଦିଙ୍କ୍, ମେଣ୍ଡେ ରେଣ୍ଡ୍ ମଶାଲ୍‌ ନୁ ଏଲିୟନ୍ ମାଇଦିଙ୍କ୍ ।”
MAT 17:5 ପିତର୍ ଆଦ୍ କେତ୍‍ତାନ୍ ୱେଲେ ୱେରଡ଼୍ ୱେସ୍‍ତେ ମାବ୍ ଅଡ଼୍‌‍କିଂଙ୍କ୍ ତାଲେତ୍ ପର୍‍ର ୱାତ୍‍ତେ ନୁ ଆଗାଙ୍କ୍ କେଞ୍ଜ୍‍ତଡ଼୍, “ହୋ ନା ପ୍ରିୟ ମାର୍‍, ଇନାଗେ ନାନ୍ ପେର୍କେ ସାର୍‍ଦେ । ଅନ୍‌ ଗଟ୍ ମନ୍ଇସ୍ କେଞ୍ଜାଟ୍ ।”
MAT 17:6 ଶିଷ୍ୟନଡ଼୍ ଆଦ୍‍ଲେଙ୍ଗ୍ କେଞ୍ଜି ଦାଦ୍‍ରେଲି ନେଲ୍ କାପ୍‍ମୁଡ଼୍‍ନ୍ଦି ରାଲ୍‍ତଡ଼୍ ।
MAT 17:7 ଜିସୁ ଅଡ଼୍‌ ଗାର୍‍ରେ ୱାସ୍ ଅଡ଼୍‌‍କ୍ ହିଟିମିକା କେତ୍‍ତାନ୍ “ତେଦାଟ୍ ୱେର୍‍ମାଟ୍ ।”
MAT 17:8 ଆସୁଟ୍‍ ଶିଷ୍ୟଡ଼୍ ସାରେ ପାକା ସିଟ୍‍ପାଟ୍‍ ଉଡ଼ି ମାତର୍‍ ଜିସୁନ୍‍ ୱିଡ଼୍‍ସି ଆଗେ ୱେର୍‍ ବେନଙ୍କ୍ ଉଡ଼ଡ଼୍ ।
MAT 17:9 ଅଡ଼୍‌ ମେଟେତାଗାଙ୍କ୍ ଡିଗି ୱାଦାନ୍ ୱେଲେ ଜିସୁ ଅଡ଼୍‌‍କିଂଙ୍କ୍ ଆଦେଶ୍ ଇସ୍‌ କେତ୍‍ତାନ୍, “ନାରୁନ୍‍ପିଲେ ଡଲ୍‍ତାଗାଙ୍କ୍ ତେଦ୍‍ନା ଯାକ ଇଦ୍ ଉଡ଼୍‍ତାଦ୍‍ ଗଟ୍ ମିଡ଼୍ ବେନଙ୍କ୍ କେଲ୍‍ମାଟ୍ ।”
MAT 17:10 ଶିଷ୍ୟଡ଼୍ ଜିସୁଙ୍କ୍ କେତ୍‍ତଡ଼୍, “ଏଲିୟ ମୁନେ ୱାଦ୍‍ତନ୍ ଇଞ୍ଜ୍ ମା ଦର୍ମଗୁରୁଡ଼୍‍କ୍ ବାତ୍‍ତିଙ୍କ୍ କେତ୍‍ତମ୍ ?”
MAT 17:11 ଜିସୁ କେତ୍‍ତାନ୍ “ହୋ ଏଲିୟ ମୁନେ ୱାସ୍ ସାରେ ବିଷୟ ତିଆର୍ ମାଡ଼ି ନେହେତାନ୍ ଗଟ୍;”
MAT 17:12 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ କେତୁତାନ୍, “ଏଲିୟ ୱାସ୍ ତେରୁତନ୍ ନୁ ଅଂକିଙ୍କ୍‌ ହେଞ୍ଚକଟ୍ ନାରୁଡ଼୍ ଅନ୍‌‍ସାଙ୍ଗେ ବାତ୍‍ଇଚ୍ଛା, ଆଦ୍ ମାଡ଼୍‍ତଡ଼୍ । ନାରୁନ୍ ପିଲେତ୍‍ ସେଙ୍ଗେ ମିକା ଅଡ଼୍‌ ଆଦେଲେକାମ୍ କାରାପ୍ କାମ୍ ମାଡ଼ିତଡ଼୍ ।”
MAT 17:13 ଆସୁଙ୍କ୍ ଶିଷ୍ୟନଡ଼୍ ବୁଜେମ୍ ଆଦ୍‍ତଡ଼୍ ଯେ, ଜିସୁ ବାପ୍ତିସ୍ମ ଯୋହନ୍‌ ତେ ବିଷୟ୍‍ତେ କେତୁତନ୍ ।
MAT 17:14 ଜିସୁ ନୁ ତାନ୍ ଶିଷ୍ୟନଡ଼୍ ନାରୁଡ଼୍ ଗଓଲି ଲୋପେଙ୍କ୍ ମାଲ୍‍ସ୍ ୱାଦାନ୍ ୱେଲେ ୱେରନ୍ ନାରୁଡ଼୍ ଗାର୍‍ରେୱାସ୍ ମର୍‍ମିଣ୍ଡା ଉସ୍‍ କେତ୍‍ତାନ୍,
MAT 17:15 “ପ୍ରବୁ, ନା ମାରିଙ୍କ୍ ଦୟା ମାଡ଼େ । କୁନ୍ଦେଲ୍ ରଗ୍ ଲେକାମ୍ ଅଣ୍ଡ୍‌ ନାର୍‍ଗେ ଦାମ୍ କିସ୍ ବା ଏର୍‍ଦାଗ୍ ରାଲ୍‍ତନ୍ ।
MAT 17:16 ଅଂକିଙ୍କ୍‌ ନାନ୍ ନି ଶିଷ୍ୟଡ଼ା ତାସ୍‍ମାତ୍‍ତାନ୍; ବାତେଙ୍କ୍ ଇତ୍‍କେ ଅଡ଼୍‌ ଅଂକିଙ୍କ୍‌ ସୁସ୍ଥମାଡ଼ାଙ୍କ୍ ପାର୍‍ୱଡ଼୍ ଆଦ୍‍ତଡ଼୍ ।”
MAT 17:17 ଜିସୁ କେତ୍‍ତାନ୍ “ମିଡ଼୍ ବିଶ୍ୱାସ୍ ଆୟ୍‍ୱିଡ଼୍ ନୁ ନଷ୍ଟ; ମିଇ ତଡ଼୍ ନାନ୍ ବେସ୍‌କ୍ ଦିନାମାନ୍‍ନ୍ଦାନ୍ ? ମେଣ୍ଡେ ବେସ୍‌କ୍ ୱାଡ଼୍‍ଷା ମିୟାଦ୍ ବ୍ୟବହାର୍ ସାରେ ମାଡ଼ିତାନ୍ ? ଆଦ୍ ପେକାଙ୍କ୍ ନା ପାକେ ତାଡ଼ାଟ୍ ।”
MAT 17:18 ପେକାନ୍ ଲୋପେ ବୁତ୍‌ତିଙ୍କ୍ ଜିସୁ ଦମକ୍ ଇତ୍‍ତନ୍ । ବୁତ୍ ଅଂକିଙ୍କ୍‌ ୱିଡ଼୍‍ସି ଆତ୍‍ତେ ନୁ ଆସୁଙ୍କ୍ ପେକାଲ୍ ସୁସ୍ଥ ଆତ୍‍ତନ୍ ।
MAT 17:19 ତାନ୍‍ପେର୍କେ ଶିଷ୍ୟଡ଼୍ ଜିସୁଙ୍କ୍ ସାରେତଡ଼୍ କାଇଲି କେତ୍‍ତଡ଼୍, “ମାମ୍‍ମେ ବାତ୍‍ତିଙ୍କ୍ ଆଦ୍ ବୁତ୍‌ତିଙ୍କ୍ ୱିର୍‍ସ୍‍ପେ ପାର୍‍ୱମ୍ ?”
MAT 17:20 ଜିସୁ କେତ୍‍ତାନ୍ “ମିୟାଦ୍ ବିଶ୍ୱାସ୍ ଗାଟି ଦୁର୍ବଲ୍ । ନାନ୍ ମିକିଂଙ୍କ୍ ସତ୍ କେତୁତାନ୍, ଯଦି ୱେରଡ଼୍ ସୋରିଷ ପେଡ଼େମ୍ ଲେକାମ୍ ମିୟାଦ୍ ବିଶ୍ୱାସ୍ ମାନ୍‍ତେ, ଇଦ୍ ମେଟେତିଙ୍କ୍ ଇଗାଙ୍କ୍ ଆଗେ ଗୁସ୍‍ପାଙ୍କ୍ କେତ୍‍କେ, ଆଦ୍ ଗୁସିଆଦ୍‍ତେ । ବିଶ୍ୱାସ୍ ଶକ୍ତିତେ ସାରେ ମାଡ଼୍ ପାର୍‍ତିଡ଼୍ ।”
MAT 17:21 ବାତେଙ୍କ୍ ଇତ୍‍କେ ପ୍ରାର୍ତନା ନୁ ଉପବାସ୍ ୱିଡ଼୍‍ସି ମେଣ୍ଡେ ବେନ୍ ଉପାୟ୍‍ତେ ଇଦ୍‍ଲେକାମ୍ ବୁତ୍ ପେଇସ୍ ଅନ୍‌ ।
MAT 17:22 ଶିଷ୍ୟନଡ଼୍ ସାରେତଡ଼୍ ଗାଲିଲୀତାଗ୍ ୱେରଡ଼୍ ତାଗ୍ ଆଦାନ୍ ପେର୍କେ ଜିସୁ ଅଡ଼୍‌‍କ୍ କେତ୍‍ତାନ୍,
MAT 17:23 “ବେନ୍ ନାରୁଡ଼୍ ମାନେଇ ପିଲେତିଙ୍କ୍ ହାଉକିତଡ଼୍, ଅଡ଼୍‌ କାଇଦେ ସମର୍‍ପିତ ଆତ୍‍ତାଙ୍କ୍ ଅଣ୍ଡ୍‌ ଇଞ୍ଜେ ଆଦୁତନ୍, ବାତେଙ୍କ୍ ଇତ୍‍କେ ମୁଣ୍ଡୁଦିନା ପେର୍କେ ଅଣ୍ଡ୍‌ ମେଣ୍ଡେ ତେଦିତନ୍ ।”
MAT 17:24 ଜିସୁ ନୁ ଶିଷ୍ୟନଡ଼୍ କପର୍ନାହୁମତା ୱାଦାନ୍ ପେର୍କେ ମନ୍ଦିର୍‍ତେ ସିସ୍ତୁ ଆଦାୟକାରୀଡ଼୍ ପିତର୍‍ତିଙ୍କ୍ କେତ୍‍ତଡ଼୍, “ମିଇ ଗୁରୁ ମନ୍ଦିର୍‍ତେ ସିସ୍ତୁ ଇଦ୍‍ତନ୍ କି ?”
MAT 17:25 ପିତର୍ କେତ୍‍ତାନ୍ “ନିଜାମ୍ ।” ପିତର୍ ଲୋନ୍‌ ଲୋପେ ନେଙ୍ଗାନ୍ ୱେଲେ ଜିସୁ ଅଂକିଙ୍କ୍‌ କେତ୍‍ତାନ୍, “ଶିମୋନ୍, ନିମ୍‍ ବାତେଏ ଆଲ୍‍ସୁତିନ୍ ? ଇ ଜଗତ୍‍ତେ ରାଜାନଡ଼୍‍କ୍ ବେନ୍ ସିସ୍ତୁ ଇଦ୍‍ତନ୍ ଅଡ଼୍‌ ରାଜ୍ୟତେ ଶନ୍ୟନଡ଼୍‍ ନା ବିଦେଶୀ ନଡ଼୍ ?”
MAT 17:26 ପିତର୍ କେତ୍‍ତାନ୍ “ବିଦେଶୀଡ଼୍‍ ।” ଜିସୁ କେତ୍‍ତାନ୍, “ଆଲେକେ ରାଜ୍ୟତେ ନାରୁଡ଼୍ କର ହିଦାନାଗାଙ୍କ୍ ଗେଲ୍‍ସିତ୍‍ତେ ?
MAT 17:27 ବାତେଙ୍କ୍ ଇତ୍‍କେ ମାମ୍‍ମେ ଇଞ୍ଜେ ଅଡ଼୍‌‍କ୍ ଅପ୍‍ମାନ୍ ମାଡ଼ାଙ୍କ୍ ଇଚ୍ଛା ଆୟମ୍ । ମିଡ଼୍ ସମୁଦ୍ର ଆଞ୍ଚିନା ଆଞ୍ଜ୍ ଗାଲାକ୍ ୱାଟାଟ୍ । ମୁନେଙ୍କ୍ ବେନ୍ କିକେ ଆର୍‍ଦ୍‍ତେ, ତାନ୍ ପାୟୁର୍‍ତାଗାଙ୍କ୍ ୱେରଡ଼୍ ମୁଦ୍ରା ଦର୍‍କିତ୍ । ଆଦ୍ ଆସ୍ ନା ସେଙ୍ଗେ ନୁ ମିଇ ସେଙ୍ଗେ ମନ୍ଦିର୍ ସିସ୍ତୁ ଇମୁଟ୍ ।”
MAT 18:1 ଅନ୍‌‍ଦିନେ ଶିଷ୍ୟନଡ଼୍ ଜିସୁଙ୍କ୍ କେତ୍‍ତଡ଼୍, “ସ୍ୱର୍ଗ ରାଜ୍ୟତାଗ୍ ସାରେତିଙ୍କ୍ ବେଡ଼ିୟନ୍ ବେନ ?”
MAT 18:2 ଜିସୁ ୱେରଡ଼୍ ପିଲେତିଙ୍କ୍ ଅଡ଼୍‌ ମୁନେ ନିଲ୍‍ପି କେତ୍‍ତନ୍,
MAT 18:3 ନାନ୍ ମିକିଂଙ୍କ୍ ନିଜାମ୍‍ ହେର୍କେତେ କେତୁତାନ୍, “ମିୱାଦ୍ ମନ୍ ପିରିବର୍ତ୍ତିତ ଆସ୍ ପିଲେ ଲେକାମ୍ ଆୟ୍‍ୟ କଟମାତ୍‍କେ ସ୍ୱର୍ଗ ରାଜ୍ୟତାଗ୍ ବେସୁଙ୍କ୍‌ବା ଆଦେ ପାର୍‍ୱିଡ଼୍ ।
MAT 18:4 ବେନ ନିଜେତିଙ୍କ୍ ନମ୍ର ମାଡ଼ି ଇ ପିଲେ ଲେକାମ୍ ଆଦ୍‍ତନ୍, ଅଣ୍ଡ୍‌ ସ୍ୱର୍ଗ ରାଜ୍ୟତାଗ୍ ସାରେତିଙ୍କ୍ ବେଡ଼୍‍ୟନ୍,
MAT 18:5 ବେନଆଇ ନା ପେଦେର୍‍ତେ ଇଦ୍‍ଲେକାମ୍ ୱେରଡ଼୍ ସୁଦୁ ପିଲେତିଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍‌ ନାକିଂଙ୍କ୍ ମିକା ଗ୍ରହନ୍ ମାଡ଼ିତନ୍ ।”
MAT 18:6 “ନାର୍‍ଗେ ବିଶ୍ୱାସ୍ ମାଡ଼ିମାନ୍ଦାନ୍ ଇ ପିଲାନାଗାଙ୍କ୍ ୱେରନ୍ ବିଶ୍ୱାସ୍‍ତେ ବେନ ବା ବେଡ଼ିୟ୍ ମାଡ଼ିତନ୍, ଅନ୍‌ ଗୁଡ଼ୁଙ୍ଗାତାଗ୍ ୱେରଡ଼୍ ଜାତ୍‍ତେକାଲ୍ ତଅସ୍ ଅଂକିଙ୍କ୍‌ ସମୁଦ୍ର ତାଗ୍ ହେସାନାଦ୍ ସାୟେ ।
MAT 18:7 ନାରୁଡ଼ାଦ୍ ବିଶ୍ୱାସ୍‍ତାଗ୍ କଷ୍ଟ ହିଦାନ୍ ସେଙ୍ଗେ ନାର୍‍ଗେ ବିଷୟ ମିନ୍ଦେ । ଆଦିନ୍ ସେଙ୍ଗେ ଇ ଜଗତ୍‍ତେ ଅବସ୍ଥାତେ ଇସର୍ ବୟଙ୍କାର୍ । ସାରେଦାମ୍ ଇଲ୍‍ଲେ ବେଡ଼ିୟ୍ ଆଦ୍‍ତେ, ବାତେଙ୍କ୍ ଇତ୍‍କେ ବେନ୍ ବେଡ଼ିୟ୍ ମାଡ଼ିତନ୍, ଅନ୍‌ ପରିନତି ବେସର୍ ଶଚନିୟ ।”
MAT 18:8 “ଯଦି ମିୟାଦ୍ କାୟ୍ ବା ଡେକେତ୍ ସେଙ଼୍ଗେ ନିମ୍‍ ବିଶ୍ୱାସ୍ ଆରାମ୍ ମାଡ଼ିତନ୍ ଆଲେକେ ଆଦିଙ୍କ୍ କଇସ୍ ହେସ୍‍ସିମୁଟ୍ । ରେଣ୍ଡେ କାଇକ୍ ନୁ ରେଣ୍ଡ୍ ଡେକା ମାଞ୍ଜ୍ ଗାଟି ନିଡ଼୍‍ତାନାଦ୍ କିସ୍‍ତାଗ୍ ଆଦାନ୍ ବେଲାନ୍ ସଟାନ୍ ଲେକାମ୍ ଆସ୍ ସାରେଦିନାତ୍ ଜିୱୁନ୍‍ତେ ଆଦାନାଦ୍ ସାୟେ ।”
MAT 18:9 “ନି କଣ୍ଡାତ୍ ସେଙ୍ଗେ ଯଦି ମିୟାଦ୍ ବିପଦ୍‍ତେ ବାତେଙ୍କ୍ ଇତ୍କେ ଆୟେଡ଼୍‍; ଆଦିଙ୍କ୍ ଟେଣ୍ଡି ହେସିତିନ୍ । ରେଣ୍ଡ୍ କଣ୍ଡାମାଞ୍ଜ୍ ନର୍‍କତା ଆଦାନ୍ ୱିଡ଼୍‍ସି ୱେରଡ଼୍ କଣ୍ଡା ଆସ୍ ସାରେଦିନାତ୍ ଜିୱୁନ୍‍ତେ ଆଦାନାଦ୍ ସାୟେ ।”
MAT 18:10 “ଇ ନଗନ୍ୟଡ଼୍‍ଗାଙ୍କ୍ ୱେରଙ୍କ୍ ଆଲେ ତୁଚ୍ଛ ମନେମାଡ଼୍‍କେ ନାନ୍ ମିକିଂଙ୍କ୍ କେତୁତାନ୍, ଇଡ଼ାଦ୍ ଯନ୍ ଆସମାନ୍ଦାନ୍ ସ୍ୱର୍ଗଦୂତକି ସାରେଦିନା ବାବାଲ୍ ଇଶ୍ୱର୍‌ତେ ପାକେ ମିନ୍ଦେନ୍ ।”
MAT 18:11 “ବାତେଙ୍କ୍ ଇତ୍କେ ହାର୍‍ପୁନ୍‍ୱେ ନାରୁଙ୍କ୍ ରକ୍ଷା ମାଡ଼ାଙ୍କ୍ ନାରୁନ୍ ପିଲେ ୱାସ୍‍ମିନ୍ଦେନ୍ ।”
MAT 18:12 “ନିମ୍‍ ବାତେଏ ଏର୍କା ମାଡ଼ୁତିନ୍, ଯଦି ୱେରନ୍ ନାରୁନ୍ ଶହେ ମେଣ୍ଢାନାଗାଙ୍କ୍ ନୁ ୱେରଡ଼୍ ମେଣ୍ଢା ମାଇତେ, ଆଲେକେ ଅଣ୍ଡ୍‌ ବାତେଏ ମାଡ଼ିତନ୍ ? ନବେ ନଟାନ୍ ମେଣ୍ଢାଙ୍କ୍ ମେଟେତାଗ୍ ୱିଡ଼୍‍ସି ଆଦ୍ ମାଇମାନ୍ଦାନ୍ ମେଣ୍ଢାତିଙ୍କ୍ ମେହେକାଂଙ୍କ୍ ଆଦ୍‍ତନ୍ ।
MAT 18:13 ବେସୁଙ୍କ୍‍ ଅଣ୍ଡ୍‌ ଆଦିଙ୍କ୍ ଦର୍ସ୍କିତନ୍, ମାଇୱେ ମାନ୍ଦାନ୍ ନବ୍‍ବେ ନହଟାନ୍ ମେଣ୍ଢାନ୍ ସେଙ୍ଗେ ନିଜାମ୍‍ ଅନ୍‌ ବେସର୍ ୱେଡ଼୍‍କିତନ୍, ଇ ୱେଡ଼୍‍କ୍‍ ମେଣ୍ଢେତ୍ ସେଙ୍ଗେ ତାନ୍ ସେଙ୍ଗେ ଅଦିକ୍‌ ୱେଡ଼୍‍କିତନ୍ ।
MAT 18:14 ଟିକ୍ ଆଦେଲେକାମ୍, ଇ ନଗନ୍ୟ ନାରୁଡ଼ାଗାଙ୍କ୍ ୱେରଣ୍ଡ୍ ମିକା ହାର୍‍ବୁଲ୍‍କା ଆଇନା ଇଦ୍ ମିଇ ସ୍ୱର୍ଗସ୍ଥ ବାବାଲ୍ ଇଶ୍ୱର୍ ଇଚ୍ଛା ଆତ୍‍କେ ଆୟନ୍ ।”
MAT 18:15 “ୱେରଣ୍ଡ୍ ତାମୁଣ୍ଡ୍‌ ଯଦି ନି ବିରୁଦ୍‍ତେ ବାତେଏ ଦଷମାଡ଼ିତନ୍, ଅନ୍‌ ଗାର୍‍ରେ ଆଞ୍ଜକେ ଦଷ ଅଂକିଙ୍କ୍‌ ତଶ୍‍ସିମୁଟ୍ । ବାତେଙ୍କ୍ ଇତ୍‍କେ ନିମ୍‍ ଇର୍‍ୱୁଡ଼୍ ୱେରଡ଼୍ ତାଗ୍ ମାନ୍ଦାନ୍ ୱେଲେ ଇଦ୍ ମିଞ୍ଜିପାଟ୍ । ଯଦି ଅଣ୍ଡ୍‌ ନି ଗଟ୍ କେଞ୍ଜିତଣ୍ଡ୍, ନି ତାମୁଙ୍କ୍ ମେଣ୍ଡେ ଦର୍‍ସ୍‍କେ ପାର୍‍ଦ୍‍ତିନ୍ ।”
MAT 18:16 ଯଦି ଅଣ୍ଡ୍‌ କେଞ୍ଜଣ୍ଡ୍, “ୱେରଙ୍କ୍ ବା ଇର୍‍ୱୁଡ଼୍ ନାରୁଙ୍କ୍ ଆସ୍ ଅନ୍‌ ଗାର୍‍ରେ ଆନୁଟ୍ । ମାନ୍‍ ଶାସ୍ତ୍ରତେ ବ୍ୟବସ୍ତାତେ ୱେରଣ୍ଡ୍ ବା ଇର୍‍ୱୁଡ଼୍ ସାକ୍ଷିନ୍‍ ମକତାଗ୍ ନି ଅବିଯଗ୍ ସତ୍ ଇଞ୍ଜ ପ୍ରମାନିତ୍ ଆୟି ।”
MAT 18:17 ଆଲେକେ ମିକା ଯଦି ଅଣ୍ଡ୍‌ ନି ଗଟିଙ୍କ୍ କେଞ୍ଜଣ୍ଡ୍, ଇ ବିଷୟ ଉପବାସ୍‍ତେ ମଣ୍ଡଲିତିଙ୍କ୍ କେଞ୍ଜ୍‍ପିତମ୍, ଆଗେକ୍ ବା ଅଣ୍ଡ୍‌ ଯଦି ମଣ୍ଡଲିତ୍ ଗଟ୍ କେଞ୍ଜଣ୍ଡ୍, ଆଲେକେ ଅଂକିଙ୍କ୍‌ ୱେରନ୍ କରଆଦାୟକାରି ବା ବିଜାତିୟ ଇଞ୍ଜ ଅନ୍‌ ତଡ଼୍ ସମ୍ପର୍କ ୱିଡ଼୍‍ସିମ୍ ।
MAT 18:18 “ମିକ୍ ଇଦ୍‍ଗଟ୍ କେସ୍ ନେହେତୁତାନ୍, ମିଡ଼୍ ଇ ପୃତିବିତାଗ୍ ବାତ୍ ନିଶେଦ ମାଡ଼୍‍ତିଡ଼୍ ସ୍ୱର୍ଗତାଗ୍ ମିକା ଆଦ୍ ନିଜାମ୍‍ ଆଦ୍‍ତେ ନୁ ବେନ୍ ସେଙ୍ଗେ ନିମ୍‍ ପୃତିବିତାଗ୍ ଗଟ୍ ଇଦ୍‍ତି, ସ୍ୱର୍ଗତାଗ୍ ମିକା ଆଦ୍ ଆନୁମଦିତ ଆଦ୍‍ତେ ।”
MAT 18:19 “ମାତର୍ ଆସ୍‍ର ଆୟ୍‍ୟ, ପୃତିବିତାଗାଙ୍କ୍ ବେସୁଙ୍କ୍‍ ମିୟାଗାଙ୍କ୍ ଇର୍‍ୱୁଡ଼୍ ଯେ ବାତେଆଇ ବିଷୟ୍‍ତେ ୱେରଡ଼୍ ମାନ୍‍ ଆସ୍ ଆଦିନ୍ ସେଙ୍ଗେ ପ୍ରାର୍ତନା ମାଡ଼ିତିଡ଼୍, ନା ସ୍ୱର୍ଗତେ ବାବାଲ୍ ନିୟାଦ୍ ଆଦେ ଇଚ୍ଛା ସାରେ ସତ୍ ମାଡ଼ିତନ୍ ।”
MAT 18:20 “ବାତେଙ୍କ୍ ଇତ୍‍କେ ବେଗେ ଇର୍‍ୱୁଡ଼୍ ବା ନାର୍‍ଗେ ନାରୁଡ଼୍ ନା ପେଦେର୍‍ତେ ଅଣ୍ଡୟ୍‌‍ତାଗ୍ ଆଦ୍‍ତଡ଼୍, ନାନ୍ ଆଗେ ମାନ୍‍ତାନ୍ ।”
MAT 18:21 ଅନ୍‌ ଦିନ୍ ପିତର୍ ୱାସ୍ ଜିସୁଙ୍କ୍ କେତ୍‍ତାନ୍, “ପ୍ରବୁ ୱେରଣ୍ଡ୍ ନା ତାମୁଣ୍ଡ୍‌ ନା ବିରୁଦ୍‍ତେ ସେନେମାନ୍ ଦଷ୍ ମାଡ଼ମାତ୍‍କେ, ଅଂକିଙ୍କ୍‌ ନାନ୍ ବେସ୍‍ଦାମ୍ କ୍ଷମା ମାଡ଼ିତାନ୍ ? ବାତେଏ ସାତ୍‍ଦାମ୍ ?”
MAT 18:22 ଜିସୁ କେତ୍‍ତାନ୍, “ଇଲ୍‍ଲେ ସାତ୍‍ଦାମ୍ ଆୟ୍‍ୟ । ସାତ୍‍ଦାମ୍ ସତୁରି ଗୁଣ୍ ।
MAT 18:23 ସ୍ୱର୍ଗରାଜ୍ୟତେ ମେଣ୍ଡେ ୱେରଡ଼୍ ଗଟ୍ କେଞ୍ଜା । ଅଣ୍ଡ୍‌ ଦିନ୍ ରାଜାଲ୍ ଦାସଡ଼୍‍କିଙ୍କ୍ ହିସାବ୍‍ତେ ଇସାପ୍ ମାଡ଼ାଙ୍କ୍ ଏର୍କା ମାଡ଼୍‍ତଣ୍ଡ୍ ।
MAT 18:24 ଅଣ୍ଡ୍‌ ଇ ପାଡ଼୍‍ୟି ଆରାମ୍ ମାଡ଼୍‍ତେ ୱେଲେ ୱେରଙ୍କ୍ ସାକର୍‍ତିଙ୍କ୍ ପୟ୍‍ସ୍ ଅନ୍‌‍ପାକେ ତାତ୍‍ତଡ଼୍ । ଅଣ୍ଡ୍‌ ତାନାଗାଙ୍କ୍ ଲକ୍ଷ ଲକ୍ଷ ଡାବ୍‍କ୍ ଉଦାର୍ ଆସ୍ ମାତ୍‍ତନ୍ ।
MAT 18:25 ଉଦାର୍ ଦେହେତାଙ୍କ୍ ସେଙ୍ଗେ ଆ ନାରୁନାୱୁ ଆସର୍ ସମ୍ପତି ଇଲ୍‍ୱେ ମାତ୍‍ତେ । ଆଦିଙ୍କ୍ ଅନ୍‌ ମୁତେଙ୍କ୍ ନୁ ପିଲାଙ୍କ୍ ୱାମି ମିକା ଇଦାଙ୍କ୍ ରାଜାଲ୍ ଅଂକିଙ୍କ୍‌ କେତ୍‍ତାନ୍ ।”
MAT 18:26 ଆଦ୍ ଚାକର୍ ରାଜାନ୍ ଡେକାନ୍ ମଦଲ୍ ରାଲି ଅନୁରଦ୍‌‍ ମାଡ଼ି କେତ୍‍ତାନ୍, “ମେଣ୍ଡେ ସୁଦୁଟ୍ ଶକ୍ତିତେ ମାନ୍‍ ମଣିମା ନାନ୍ ନିୟାଦ୍ ସାରେ ଉଦାର୍ ଦେହେସିଦ୍‍ତାନ୍ ।”
MAT 18:27 ରାଜାନ୍ ମନ୍‍ଦାଗ୍ ଦୟା ଆତ୍‍ତେ, ଆଦିଙ୍କ୍ ଉଦାର୍‍ତାଗାଙ୍କ୍ କ୍ଷମା ଇସ୍ ଅଣ୍ଡ୍‌ ଦାସଙ୍କ୍ ୱିଡ଼୍‍ସିତ୍‍ତନ୍ ।
MAT 18:28 “ଆ ନାରୁଡ଼୍ ଆଦାନ୍ ୱେଲେ ଅନାଗାଙ୍କ୍ ସୁଦୁଟ୍ ଉଦାର୍ ଆସ୍‍ମାନ୍ଦାନ୍ ମେଣ୍ଡେ ୱେରନ୍ ସେବକ୍‍ ତଡ଼୍ କାଇଲ୍‍ତଣ୍ଡ୍ । ଅଣ୍ଡ୍‌ ଅନ୍‌ ବଣ୍ଡ୍‍କ୍‍ତିଙ୍କ୍ ପଇସ୍ କେତ୍‍ତାନ୍, ‘ନାୟାଗ୍ କଞ୍ଜ୍ ଆସ୍‍ମାନ୍ଦାନ୍ ଉଦାର୍ ଡାବ୍‍କ୍ ଇମ୍ ।’”
MAT 18:29 ଦ୍ୱିତିୟ ସେବକ୍‍ ଅନ୍‌ ଡେକାଙ୍କ୍ ପଇସ୍ କେତ୍‍ତାନ୍, “ବେସ୍‌କ୍ ଦିନା ମାନ୍‍, ନିୟାଉ ସାରେ ଡାବ୍‍କ୍ ହିଦ୍‍ତାନ୍ ।”
MAT 18:30 “ବାତେଙ୍କ୍ ଇତ୍‍କେ ମୁନ୍‍ତନାଦ୍ ପ୍ରାର୍ତନା କେଞ୍ଜଣ୍ଡ୍, ବାତେଙ୍କ୍ ଇତ୍‍କେ ଉଦାର୍ ଦେହେନା ଯାକ ଅଂକିଙ୍କ୍‌ ଜେଲ୍‍ତାଗ୍ ୱାଟିତ୍‍ତନ୍ ।
MAT 18:31 ଇଦ୍ ଗଟ୍‍ନା ଉଡ଼ି ବାଗାତଡ଼୍ ସେବକିଡ଼୍ ଗାଟି ଦାନ୍ଦେଆସ୍ ଆଞ୍ଜ୍ ବାତ୍ ଗଟେମ୍ ଆତ୍‍ତେ ଆଦ୍ ରାଜାଙ୍କ୍ କେସ୍‍ସିତ୍‍ତଡ଼୍ ।
MAT 18:32 ରାଜାଲ୍ ମୁନେଙ୍କ୍ ପାଡ଼୍‍ୟି ମାଡ଼୍‍ତେନଙ୍କ୍ କାର୍‍ଙ୍ଗି କେତ୍‍ତାନ୍, ଆର୍ ଅଯୋଗ୍ୟ ଦାସନି, ନିମ୍‍ ପ୍ରାର୍ତନା ମାଡ଼୍‍ନାଙ୍କ୍ ନାନ୍ ନିୟାଉ ସାରେ ଉଦାର୍ ୱିଡ଼୍‍ସିତ୍‍ତାନ୍ ।
MAT 18:33 ନାନ୍ ବାଲାନ୍ ନି ସେଙ୍ଗେ ଦୟା ତଅତାନ୍, ନି ସେବକିଙ୍କ୍ ମିକା ଆଦେଲେକାମ୍ ଦୟା ମାଡ଼ାନାଦ୍ ନିୟାଦ୍ ମାତ୍‍ତେ ।”
MAT 18:34 “ରାଜାଲ୍ ଗାଟି କପାମ୍ ଆସ୍ ସାରେ ଉଦାର୍ ଦେହ୍‍ୱେ ଯାକ ଦଣ୍ଡ୍ ଆତ୍‍ତାଙ୍କ୍ ଅଂକିଙ୍କ୍‌ ବନ୍ଦିଲନ୍ ରହସିତ୍‍ତନ୍ ।”
MAT 18:35 ଜିସୁ କେତାନାଦ୍ ତେର୍‍ସ୍ପାନ୍ କେତ୍‍ତାନ୍, “ମିଇ ବିରୁଦ୍‍ତେ ଦଷ୍ ମାଡ଼ିମାନ୍ଦାନ୍ ତାମୁଣ୍ଡ୍‌ତିଙ୍କ୍‌ ଜିୱୁତେ କ୍ଷମା ହିମୁଟ୍, ଆଲେକେ ନା ସ୍ୱର୍ଗତେ ବାବାଲ୍ ମିକା ମିଇ ସେଙ୍ଗେ ଇଦ୍‍ଲେକାମ୍ ବ୍ୟବହାର୍ ମାଡ଼ିତନ୍ ।”
MAT 19:1 ଜିସୁ ଆୱୁସାରେ ଗଟି କେସ୍ ତେର୍‍ତେ ପେର୍କେ ଗାଲିଲୀ ୱିଡ଼୍‍ସି ଯର୍ଦ୍ଦନ୍ ଚାଉଡ଼େତ୍‍ ମେଣ୍ଡନ୍ ପାକେ ଯିହୁଦା ନାର୍ ଆତ୍‍ତନ୍ ।
MAT 19:2 ନାର୍‍ଗେ ନାରୁଡ଼୍ ଅନ୍‌ ପେର୍କେ ୱାତ୍‍ତଡ଼୍ ନୁ ଅନ୍‌ ନାର୍‍ଗେ ରଗିଡ଼୍‍କ୍ ସୁସ୍ଥ ମାଡ଼୍‍ତଣ୍ଡ୍ ।
MAT 19:3 ବେସ୍‍କ୍‍ତୁଡ଼୍‍ ପାରୂଶୀଡ଼୍ ଅନ୍‌ଗାରେ ୱାସ୍ ଅଂକିଙ୍କ୍‌ ଉଡ଼ୀଇଦାଗ୍ ୱାଟାଙ୍କ୍ ଆଲ୍‍ସି ମାଡ଼୍‍ତଡ଼୍ । ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ମା ଦର୍ମତେ ନିୟମ୍‍ ଲେକାମ୍‌ ୱେରନ୍ ଯେ ବାତ୍‍ଆଇ କାରନ୍‍ ସେଙ୍ଗେ ତାନ୍ ମୁତେଙ୍କ୍ ୱିଡ଼୍‍ସିଦ୍‍ତନ୍ କି ?”
MAT 19:4 ଜିସୁ କେତ୍‍ତନ୍, “ଶାସ୍ତ୍ରତାଗ୍ କାର୍‍ୱିଡ଼୍ କି, ମୁନେଙ୍କ୍ ସୃଷ୍ଟି କର୍ତ୍ତାଲ୍ ମାନେଇ ନୁ ନାଟାଡ଼୍‍ତିଙ୍କ୍ ତିଆର୍ ମାଡ଼୍‍ତଣ୍ଡ୍ ?
MAT 19:5 ଆସୁଙ୍କ୍ ଜିସୁ କେତ୍‍ତନ୍, ‘ଇଦିନ୍ ସେଙ୍ଗେ ମାନେଇ ତାନ୍’ ୟାୟ୍‍ ବାବାଙ୍କ୍ ୱିଡ଼୍‍ସି ତାନ୍ ମୁଦ୍‍ପାନ୍ ତଡ଼୍ କାଇଲିମାନ୍ତେ ନୁ ଅଡ଼୍‌ ଇର୍‍ୱୁଡ଼୍ ୱେରନ୍ ଇନା ମାନ୍‍ତଡ଼୍ ।
MAT 19:6 ଅଡ଼୍‌ ମେଣ୍ଡେ ଇର୍‍ୱୁଡ଼୍ ଆୟ୍‍ୟଡ଼୍, ଅଡ଼୍‌ ମେଣ୍ଡେ ୱେରନ୍ ଇନା ମାନ୍‍ତଡ଼୍ । ବେନଡ଼୍‍କ୍ ଇଶ୍ୱର୍ କାଲ୍‍ପି ମିନ୍ଦେଣ୍ଡ୍, ନାରୁଡ଼୍ ଅଡ଼୍‌‍କିଂଙ୍କ୍ ୱେରେ ୱେରେ ମାଡ଼ାନାଦ୍ ଟିକ୍ ଆୟ୍‍ୟ ।”
MAT 19:7 ପାରୂଶୀଡ଼୍ ମେଣ୍ଡେ କେତ୍‍ତଡ଼୍, “ଆଲେକେ ନାଟାଡ଼୍ ତିଙ୍କ୍ ୱିଡ଼୍‍ସିଦାଙ୍କ୍ ସେଙ୍ଗେ ମଶାଲ୍‌ ବାତ୍‍ତିଙ୍କ୍ କାଇଦେ ଏର୍‍ ବ୍ୟବସ୍ତା ମାଡ଼୍‍ତଣ୍ଡ୍ ।”
MAT 19:8 ଜିସୁ କେତ୍‍ତନ୍, “ମିଇ ହୃଦୟ୍‍ତେ କଷ୍ଟ ସେଙ୍ଗେ ମଶାଲ୍‌ ଆଦ୍ ଲେକାମ୍ ମାଡ଼ି ମାତ୍‍ତନ୍ । ବାତେଙ୍କ୍ ଇତ୍କେ ମୁନେଙ୍କ୍ ତିଆର୍ ୱେଲେ ଇଦ୍‍ଲେକାମ୍ ବ୍ୟବସ୍ଥା ଇଲ୍‍ୱେ ମାତ୍‍ତେ ।
MAT 19:9 ମାତର୍ ନାନ୍ ମିକିଂଙ୍କ୍ କେତୁତାନ୍ ଯେ, ବେନ ଅନ୍‌ ମୁତେଙ୍କ୍ ବ୍ୟବିଚାର୍ କାରାପ୍ ୱିଡ଼୍‍ସି ମେଣ୍ଡେ ବାତ୍‍ତାୟି ଆଂକାର୍ ତିଙ୍କ୍ ୱିଡ଼୍‍ସି ମେଣ୍ଡେଅନ୍‌ ମୁତେଙ୍କ୍ ପେଣ୍ଡୁଲ୍ ଆତ୍‍କେ, ଅଣ୍ଡ୍‌ ନିଜେ ବ୍ୟବିଚାର୍ ଆଦ୍‍ତନ୍ ।”
MAT 19:10 ଜିସୁନ୍ ଶିଷ୍ୟନଡ଼୍ କେତ୍‍ତଡ଼୍, “ମୁତେନ୍ ତଡ଼୍ ମାନେଇତାଦ୍ ଇଦ୍ ଲେକାମ୍ ସମ୍ପର୍କ ମାତ୍‍କେ, ଆଲେକେ ପେଣ୍ଡୁଲ୍ ଆଦାନାଦ୍ ସାୟେ ଆୟ୍‍ୟ ।”
MAT 19:11 ଜିସୁ କେତ୍‍ତାନ୍, “ଇ ଶିକ୍ଷା ସାରେତଡ଼୍ ସେଙ୍ଗେ ଉଦ୍ଦିଷ୍ଟ ଆୟ୍‍ୟ । ଇଶ୍ୱର୍‌ତେ ତଡ଼୍ ବେନଡ଼୍‍କ୍ ଇଦ୍ କେସ୍‍ମିନ୍ଦେନ୍ ଆସ୍‍ମିନ୍ଦେ, ମାତର୍ ଅଡ଼୍‌ ଇଦ୍ ଗ୍ରହନ୍ ମାଡ଼େ ପାର୍‍ୱଡ଼୍ ।
MAT 19:12 ନାର୍‍ଗେ ବାତେଙ୍କ୍ ଇତ୍‍କେ ମାଇଦିଙ୍କ୍ ନାରୁଡ଼୍ ପେଣ୍ଡୁଲ୍ ଆସ୍ ମାନ୍‍ତଡ଼୍ । ବେସ୍‌କ୍ ତଡ଼୍ ଜନମ୍‍ତାଗାଙ୍କ୍ ପେଣ୍ଡୁଲ୍ ସେଙ୍ଗେ ଅନୁପଯୁକ୍ତ, ବେସ୍‍କ୍‍ତଡ଼୍‍କିଙ୍କ୍ ନାରୁଡ଼୍ ଆଦେଲେକାମ୍ ମାଡ଼୍‍ତଡ଼୍, ମେଣ୍ଡେ ବେସ୍‍କ୍‍ତୁଡ଼୍‍ ସ୍ୱର୍ଗରାଜ୍ୟ ସେଙ୍ଗେ ପାଡ଼୍‍ୟି ମାଡ଼ାଙ୍କ୍ ପେଣ୍ଡୁଲ୍ ଆୟ୍‍ୟକଟ ମାତ୍‍ତନ୍ । ବେନଆଇ ଶିକ୍ଷାତେ ଅର୍ତ ବୁଜେମ୍ ଆଦୁତ୍‍ତେ, ଅଡ଼୍‌ ଆଦ୍ ଗ୍ରହନ୍ ମାଡ଼ିଡ଼୍ ।”
MAT 19:13 ପିଲାନ୍ ପର୍‍ର କାୟ୍ ୱାଟି ପ୍ରାର୍ତନା ମାଡ଼ାଙ୍କ୍ ସେଙ୍ଗେ ବେସ୍‌କ୍ ତଡ଼୍ ନାରୁଡ଼୍ ପିଲାଙ୍କ୍ ଜିସୁନ୍ ପାକେ ତାତାଙ୍କ୍ ପସ୍ପ୍‍ତ୍‍ତଡ଼୍ । ଆଦ୍ ନାରୁଡ଼୍‍କ୍ ଶିଷ୍ୟନଡ଼୍ ଦମକ୍ ଇତ୍‍ତଡ଼୍ ।
MAT 19:14 ବାତେଙ୍କ୍ ଇତ୍‍କେ ଜିସୁ କେତ୍‍ତାନ୍, “ପିଲାଙ୍କ୍ ନାୟା ୱାଦାଙ୍କ୍ ଇମୁଟ୍ । ଅଡ଼୍‌‍କ୍ ମନା ମାଡ଼୍‍ମାଟ୍ । ବାତେଙ୍କ୍ ଇତ୍‍କେ ଇଡ଼୍ ସ୍ୱର୍ଗରାଜ୍ୟ ତେ ଅଦିକାରିଡ଼୍ ।”
MAT 19:15 ଅଡ଼୍‌‍ପରୁ କାଇୱାଟି ଆର୍ଶିବାଦ୍ ମାଡ଼୍‍ତେ ପେର୍କେ ଅଡ଼୍‌ ଆଗାଙ୍କ୍ ଆତ୍‍ତଡ଼୍‌ ।
MAT 19:16 ଅଣ୍ଡ୍‌ ଦିନ୍ ୱେରଣ୍ଡ୍ ପେକାଲ୍ ଜିସୁନ୍ ପାକେ ୱାସ୍ କେତ୍‍ତନ୍, “ଗୁରୁ ସାରେଦିନାତ୍ ଜିୱୁନ୍ ଲାବ୍ ମାଡ଼ାଙ୍କ୍ ସେଙ୍ଗେ ବାତ୍ ଲେକେତ୍‍ ମାଡ଼େ ୱେଇତିତ୍ ?”
MAT 19:17 ଜିସୁ ଅକିଂଙ୍କ୍‌ କେତ୍‍ତନ୍, “ସତ୍‍କାମ୍ ବିଷୟ୍‍ତେ ନାକିଂଙ୍କ୍ ବାତ୍‍ତିଙ୍କ୍ କେତୁତିନ୍ ? ଇଶ୍ୱର୍ କେ ସତ୍ । ଅନ୍‌ ଗଟ୍ ପାଲନ୍ ମାଡ଼୍‍କେ, ସାରେ ଦିନା ଲେକେତ୍‍ମାନ୍ଦ୍ ପାର୍‍ତିନ୍ ।”
MAT 19:18 ଅଣ୍ଡ୍‌ କେତ୍‍ତାନ୍, “ବେନ୍ ସାରେ ଗଟ୍ ?” ଜିସୁ କେତ୍‍ତାନ୍, “ଆୱୁକାନାଦ୍ ମାଡ଼୍‍ମାଟ୍, ବ୍ୟବିଚାର୍ ମାଡ଼୍‍ମାଟ୍ । ଡଙ୍ଗ୍‍ମାଟ୍, ବେନନ୍ ବିରୁଦ୍‍ତେ ଅବିଯଗ୍ ମାଡ଼୍‍ମାଟ୍ ।
MAT 19:19 ୟାୟ୍‍ ବାବାଙ୍କ୍ ସନ୍‍ମାନ୍ ମାଡ଼ାଟ୍ ନୁ ମିଇ ଗାର୍‍ରେତଡ଼୍‍କ୍ ଆତ୍ମାତେ ପ୍ରେମ ମାଡ଼ାଟ୍ ।”
MAT 19:20 ପେକାଲ୍ କେତ୍‍ତନ୍, “ଇଉସାରେ ଗଟି ପାଲନ୍ ମାଡ଼୍‍ତାନ୍ । ନାକିଂଙ୍କ୍ ମେଣ୍ଡେ ବାତେଏ ମାଡ଼ାନାଦ୍ ଦର୍‍କାର୍ ?”
MAT 19:21 ଜିସୁଅଙ୍କ୍‌ ଉତ୍ତର୍ କେତ୍‍ତାନ୍, “ଯଦି ନିମ୍‍ ସାରେଦିନାତ୍ ଜିୱୁନ୍ ଦର୍‍କାନଙ୍କ୍ ଇଚ୍ଛା, ଅନ୍‌ ମିୟାଦ୍ ସାରେ ସମ୍ପତି ୱାମିମିକା ଡାବ୍‍କ୍ ଗରିବ୍‍ ନାରୁଡ଼୍‍କ୍ ଦାନ ମାଡ଼େ । ଆଲା ମାଡ଼୍‍କେ ନିମ୍‍ ସ୍ୱର୍ଗତାଗ୍ ସମ୍ପତି ଦର୍‍କିତ୍ ହାଉସାରେ ମାଡ଼ିମେଣ୍ଡେ ନା ପେର୍କେ ପେର୍କେ ୱାଡ଼ା ।”
MAT 19:22 ଆଦ୍ ପେକାଲ୍ କେଞ୍ଜି ମୁର୍‍ମୁରା ଆସ୍ ଆତ୍‍ତନ୍, ବାତେଙ୍କ୍ ଇତ୍କେ ଅଣ୍ଡ୍‌ ବେଡ଼ିଇ ସାଉକାର୍ ମାତ୍‍ତଣ୍ଡ୍‌ ।
MAT 19:23 ଜିସୁ ଶିଷ୍ୟଡ଼୍‍କ୍ କେତ୍‍ତନ୍, “ନାନ୍ ମିକିଂଙ୍କ୍ ସତ୍ କେତୁତାନ୍, ସାଉକାର୍ ନାରୁଡ଼୍ ସେଙ୍ଗେ ସ୍ୱର୍ଗତାଗ୍ ଆଦ୍‌ଦାଙ୍କ୍ ଗାଟି ତିପାଲ୍‍ତେ ବିଷୟ ।
MAT 19:24 ମେଣ୍ଡନ୍‍ଦାମ୍ କେସ୍‍ମିନ୍ଦେନ୍, ସୁଜ୍‌ବସ୍‍ ଇସ୍ ଉଟ୍ ଆଦାନ୍ ୱିଡ଼୍‍ସି ସାଉକାର୍ ନାରୁଡ଼୍ ସ୍ୱର୍ଗରାଜ୍ୟତା ଆତ୍‍ତାଙ୍କ୍ ଅଦିକ୍‌ କଷ୍ଟ ।”
MAT 19:25 ଶିଷ୍ୟଡ଼୍ ଇଦ୍ କେଞ୍ଜି ବାକ୍‍ୱା ଆସ୍ କେତ୍‍ତଡ଼୍, “ବେନ୍ ଆଲେକେ ମୁକ୍ତି ପାଏମ୍ ଆଦ୍‍ତନ୍ ?”
MAT 19:26 ଜିସୁ ଅଡ଼୍‌‍ପାକେ ଉଡ଼ି କେତ୍‍ତନ୍, “ନାରୁଡ଼୍ ମୁନେ ଇଦ୍ ସତ୍ ଆଦେପାର୍‍ୱ, ବାତେଙ୍କ୍ ଇତ୍‍କେ ଇଶ୍ୱର୍‌ତେ ମୁନେ ସାରେ ମିକା ସତ୍ ।”
MAT 19:27 ଆଦ୍ କେଞ୍ଜି ପିତର୍ କେତ୍‍ତନ୍, “ଉଡ଼େ, ମାମ୍‍ମେ ସାରେ ୱିଡ଼୍‍ସି ନି ପେର୍କେ ୱାଦ୍‍ତମ୍ । ମାକିଂଙ୍କ୍ ବାତେଏ ଦର୍‍କିତ୍ ?”
MAT 19:28 ଜିସୁ ଉତ୍ତର୍ କେତ୍‍ତନ୍, “ଇଦ୍ ଗଟ୍ ସତ୍ ଇଞ୍ଜ୍ ଆଲ୍‍ସି ତିଡ଼୍, ପୁଃନେ ଯୁଗ୍‍ତେ ବେସୁଙ୍କ୍‍ ନାରୁଡ଼୍‍ପିଲେ ଅନ୍‌ ଗୌରବ୍ ସିଂହାସନ୍‍ତାଗ୍ କୁଦିତିତନ୍, ଆସୁଙ୍କ୍ ନାୟାଦ୍ ଇ ବାରଜାନ୍ ଶିଷ୍ୟମିକା ବାର୍‍ଟାନ୍ ସିଂହାସନ୍‍ତାଗ୍ କୁଦି ଇଶ୍ରାଏଲ୍‍ତେ ବାର୍‍ଟାନ୍ ନାର୍‍କିନ୍ ପର୍‍ର ରାଜତ୍ୱ ମାଡ଼ିତଡ଼୍ ।
MAT 19:29 ବେନଡ଼୍ ନା ସେଙ୍ଗେ ନିଜେତ୍ ଲୋନ୍‌, ତାମୁଣ୍ଡ୍‌ ଏଲାସ୍କ୍‌, ୟାୟବାବାଲ୍, ପିଲାଜିଲା ନୁ ବୁମ୍‍ନେଲ୍ ୱିଡ଼୍‍ସିତଡ଼୍, ଅଡ଼୍‌ ଆୱୁ ଶହେଗୁନ୍ ଦର୍‍କିତ୍; ମେଣ୍ଡେ ସାରେଦିନାତ୍ ଜିୱୁନ୍ ମିକା ଦର୍‍କିତ୍ ।”
MAT 19:30 “ଇଞ୍ଜେ ବେନଡ଼୍ ମୁନେ ମିନ୍ଦେ, ଅଡ଼୍‌‍ଆଗାଙ୍ଗ୍ ନାର୍‍ଗେ ପେର୍କେ ୱାଦ୍‍ତଣ୍ଡ୍ ନୁ ବେନଡ଼୍ ମୁନେ ମିନ୍ଦେ, ଅଡ଼୍‌ ତାଗାଙ୍କ୍ ନାର୍‍ଗେ ମୁନେ ଆଦ୍‍ତଡ଼୍ ।”
MAT 20:1 “ସ୍ୱର୍ଗରାଜ୍ୟ ବେଲାନ୍, ହିଦିନାଦ୍ ୱେରଡ଼୍ ୱେଷଡ଼୍ କେଞ୍ଜାଟ୍ । ୱେରଣ୍ଡ୍ ନାରୁନ୍ ଅନ୍‌‍ଦିନେ ନାର୍‍କୁକ୍ ତାନ୍ ଅଙ୍ଗୁର୍ ୱାୟେତା ପାଡ଼୍‍ୟି ମାଡ଼ାନ୍ ସେଙ୍ଗେ କୁଲିକିଙ୍କ୍ ତାତାଙ୍କ୍ ଆତ୍‍ତନ୍ ।
MAT 20:2 ବେନଡ଼୍‍କ୍ ଦର୍ସକ୍‍ତନ୍, ସାରେତଡ଼୍‌କିଂଙ୍କ୍ ଦୈନିକ ୱେରଲାକା ରୁପାଡାବ୍‍କ୍ ହିଦାଙ୍କ୍ ଚୁକ୍ତି ମାଡ଼ି ଅଡ଼୍‌‍କିଂଙ୍କ୍ ଅନ୍‌ ୱାୟେତା ରହସିତ୍‍ତନ୍ ।
MAT 20:3 ତାନ୍ ମେଣ୍ଡନ୍ ଦିନ୍ ନଅଟାତିଙ୍କ୍ ହାଟିନା ଆଞ୍ଜ୍ ଉଡ଼୍‍ତନ୍, ମାନ୍ଦେନାରୁଡ଼୍ ପାଡ଼୍‍ୟି ମାଡ଼୍‍ୱେ କନ୍‍ସ୍ ନିସ୍‍ମିନ୍ଦେଡ଼୍ ।”
MAT 20:4 ଅଡ଼୍‌‍କ୍ ଅଣ୍ଡ୍‌ କେତ୍‍ତାନ୍, ମିଡ଼୍‍ଆନ୍‌ନ୍ତେ ନା ୱାୟେତା ଆଞ୍ଜ୍ ପାଡ଼୍‍ୟି ମାଡ଼ାଟ୍, ମିକିଂଙ୍କ୍ ଟିକ୍ ମଜୁରି ହିଦ୍‍ତାନ୍ ।
MAT 20:5 ଅଡ଼୍‌ ଆଞ୍ଜ ପାଡ଼୍‍ୟି ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ । ଅଣ୍ଡ୍‌ ଦିନ୍ ବାର୍‍ଟା ନୁ ତିନ୍‍ଟାତିଙ୍କ୍ ଟିକ୍ ଆଦେଲେକାମ୍ ମେଣ୍ଡେ ବେସ୍‌କ୍ କୁଲିଙ୍କ୍ ତାସ୍ ପାଡ଼ିୟିଦାଗ୍ କାଲ୍‍ପ୍‍ତନ୍ ।
MAT 20:6 ପାୟାଲ୍ ଅଲ୍ ପାଞ୍ଚଟା ତିଙ୍କ୍ ମେଣ୍ଡନ୍ ଦାମ୍ ହାଟିନା ଆଞ୍ଜ୍ ଉଡ଼୍‍ତନ୍, ମେଣ୍ଡେ ବେସ୍‍କ୍‍ତୁଡ଼୍‍ ନିସ୍‍ମିନ୍ଦେଡ଼୍ । ଅଡ଼୍‌‍କ୍ କେତ୍‍ତାନ୍, ପାୟାଲ୍ ପଡ଼୍‍ଗିନ୍ ପାଡ଼୍‍ୟି ମାଡ଼କଟ୍ ବାତ୍‍ତିଙ୍କ୍ ଇଗେ ଦିନାମ୍ ନଷ୍ଟ ମାଡ଼ୁତିଡ଼୍ ?
MAT 20:7 ଅଡ଼୍‌ କେତ୍‍ତଡ଼୍, ବେନ ତ ମାକିଂଙ୍କ୍ ପାଡ଼୍‍ୟିଦିଙ୍କ୍ କାର୍‍ଙ୍ଗ୍‍ଗଡ଼୍ । ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତାନ୍, “ଆଲେକେ, ମିଡ଼୍ ସାରେତଡ଼ି ନା ୱାୟେତାଗ୍ ଆଞ୍ଜ୍ ପାଡ଼୍‍ୟି ମାଡ଼ାଟ୍ ।”
MAT 20:8 “ଆଦ୍‍ଦିନେ ମୁଲ୍‍ପୁଟ୍ ୱାୟେତାଗ୍ ମାଲିକ୍ ଗୁମାସ୍ତାଲ୍ କେତ୍‍ତାନ୍, ‘କୁଲିକିଙ୍କ୍ କାର୍‍ଙ୍ଗାଟ୍ । ବେନଡ଼୍ ସାରେତାଗାଙ୍କ୍ ପେର୍କେ ପାଡ଼୍‍ୟି ଦାଗ୍ ୱାତ୍‍ତଡ଼୍, ମୁନେ ଅଡ଼ାୱୁ ଡାବ୍‍କ୍ ଇମୁଟ୍ ।
MAT 20:9 ବେନଡ଼୍ ସାରେତିଙ୍କ୍ ମୁନେ ପାଡ଼ିୟିମାଡ଼ାଙ୍କ୍ ୱାୟେତାଗ୍ ୱାତ୍‍ତଡ଼୍, ଅଡ଼ାୱୁ ଡାବ୍‍କ୍ ପେର୍କେ ଇମୁଟ୍ । ପର୍‍ରତ୍ ଅଲ୍ ପାଞ୍ଚଟା ତିଙ୍କ୍ ବେନଡ଼୍ ପାଡ଼୍‍ୟି ତାଗ୍ କାଇଲ୍‍ତଡ଼୍, ଅଡ଼୍‌‍କିଂଙ୍କ୍ ସାରେତଡ଼୍ ୱେର୍‍ର ଲାକା ରୁପା ମୁଦ୍ରା ହିମୁଟ୍ ।
MAT 20:10 ବେନଡ଼୍ ମୁନେଙ୍କ୍ କଞ୍ଜ୍ ପାଡ଼୍‍ୟି ମାଡ଼ାନଡ଼୍‍କ୍, ଅଡ଼୍‌ ଆଲ୍‍ସ୍‍ତଡ଼୍, ଅଡ଼୍‌‍କିଂଙ୍କ୍ ଅଦିକ୍‌ ଡାବ୍‍କ୍ ଦର୍‍କିତ୍ । ବାତେଙ୍କ୍ ଇତ୍‍କେ ଅଡ଼୍‌‍କ୍ ଆନ୍‌‍ତେ ୱେରକେ ରୁପାଡ଼ାବ୍‍କ୍ ଦର୍‍କ୍‍ତା ।
MAT 20:11 ବାତେଙ୍କ୍ ଇତ୍‍କେ ଅଡ଼୍‌ ସାରେତଡ଼୍ ଆଞ୍ଜ୍ ମାଲିକ୍ ବିରୁଦ୍ଦ୍‌ତେ ଗଟି କେତାନଙ୍କ୍ ପସ୍‍ପ୍‍ତ୍‍ତଡ଼୍,
MAT 20:12 ପରତ୍‍ଅଲ୍ ପାଞ୍ଚଟା ତିଙ୍କ୍ ପାଡ଼୍‍ୟି ଆରାମ୍ ମାଡ଼ିମାନ୍ଦାନ୍ କୁଲିକିଙ୍କ୍ ମାତର୍ ୱେରଡ଼୍ ଗାଣ୍ଟା ପାଡ଼୍‍ୟି ମାଡ଼୍‍ତଡ଼୍ । ମାମ୍‍ମେ ବେସର୍ ଏଦ୍‍ତେ ଦିନ୍‍ଯାକ କଷ୍ଟ ଆତ୍‍ତମ୍, ମଜୁରି ହିଦାନ୍ ୱେଲେ ଅଡ଼୍‌‍କିଂଙ୍କ୍ ମା ସାମାନ୍ ହିତ୍‍ତିନ୍ ।’
MAT 20:13 ମାଲିକ୍ ଅଡ଼୍‌ ତାଗାଙ୍କ୍ ୱେରଙ୍କ୍ କେତ୍‍ତାନ୍, ନାନ୍ ମିକିଂଙ୍କ୍ ବୁସାମାଡ଼ନ୍ । ଅଣ୍ଡ୍‌ ଦିନ୍ ଯାକ ପାଡ଼୍‍ୟି ମାଡ଼୍‍କେ ୱେରଡ଼୍ ଡାବ୍ ଆସ୍ ପାଡ଼ିୟିମାଡ଼ାଙ୍କ୍ ମିଡ଼୍ ସାରେତଡ଼ି ତ ରାଜି ଆସ୍ ୱାତ୍‍ତିଡ଼୍ ।
MAT 20:14 ମିଡ଼୍ ଆଉ ଡାବ୍‍କ୍ ଆସ୍ ଲନ୍ଆନୁଟ୍ । ମିକିଂଙ୍କ୍ ବାତ୍ ହିତ୍‍ତାନ୍, ଅନ୍‌ ଗାଣ୍ଟା ପାଡ଼୍‍ୟି ମାଡ଼୍‍ତେ ନାରିଙ୍କ୍ ଆସର୍ ହିଦାଙ୍କ୍ ନାୟାଦ୍ ଇଚ୍ଛା ।
MAT 20:15 ନିଜେତ୍ ସମ୍ପତିତିଙ୍କ୍ ନିଜେତ୍ ଇଚ୍ଛାତେ ଲେକେତ୍‍ ମାଡ଼ାଙ୍କ୍ ବାତେଏ ନାୟାଦ୍ ଅଦିକାର୍‌ ଇଲ୍‍ଲେ ? ଇଲା ନାନ୍ ସୁଦୁଟ୍ ଦୟା ମାଡ଼ୁତାନ୍ ଇଞ୍ଜ୍ ମିଡ଼୍ ଆଂକାର୍ ଆଦୁତିଡ଼୍ ?”
MAT 20:16 ଆଦ୍ ୱେଷଡ଼୍ ତେର୍‍ସ୍‍ପି ଜିସୁ କେତ୍‍ତାନ୍, “ବେନଡ଼୍ ଇଞ୍ଜେ ପେର୍କେ ମିନ୍ଦେ ଅଡ଼୍‌ ମୁନେ ୱାଦ୍‍ତଣ୍ଡ୍ ନୁ ବେନଡ଼୍ ମୁନେ ମିନ୍ଦେ, ଅଡ଼୍‌ ପେର୍କେ ଆଦ୍‍ତଡ଼୍ ।”
MAT 20:17 ଜିସୁ ଜିରୁଶାଲମ୍‍ତା ଆଦାନ୍ ଆର୍‍ଦାଗ୍ ବାରଜାନ୍ ଶିଷ୍ୟଡ଼୍‍କ୍ ଅଣ୍ଡୟାଗେ କାର୍‍ଙ୍ଗି ଅସ୍ ୱେରଡ଼୍ ଦାମ୍ କେତ୍‍ତନ୍,
MAT 20:18 “କେଞ୍ଜାଟ୍ ମାନାଡ଼୍ ଯିରୁଶାଲେମ୍ ତା ଆଦୁତାଡ଼୍ । ଆଗେ ମୁକ୍ୟ ଯାଜକ୍ ନୁ ଦର୍ମଗୁରୁନଡ଼୍ ଅଂକିଙ୍କ୍‌ ଡଲାନ୍ ଦଣ୍ଡ୍ ହିଦ୍‍ତଡ଼୍ ।
MAT 20:19 ଅଡ଼୍‌ ନାକିଂଙ୍କ୍ ଡଲାନ୍ ଦଣ୍ଡ୍ ହିଦ୍‍ତଡ଼୍ ନୁ ବିଜାତିୟ ଅଣଯିହୁଦିଡ଼୍ କାଇଦେ ୱିଡ଼୍‍ସିଦ୍‍ତଡ଼୍ । ବିଜାତିଡ଼୍ ଅଂକିଙ୍କ୍‌ ପରିହାସ୍ ମାଡ଼ିତଡ଼୍, କରଡ଼ାତଡ଼୍ ରେହେତିତଡ଼୍ ନୁ କ୍ରୁଶତାଗ୍ ତାର୍ପିତଡ଼୍ । ବାତେଙ୍କ୍ ଇତ୍‍କେ ମୁଣ୍ଡ୍‍ଦିନାନ୍ ପେର୍କେ ପେର୍କେ ମେଣ୍ଡେ ଜିୱେ ଆଦ୍‍ତନ୍ ।”
MAT 20:20 ଆଦ୍ ସମୟ୍‍ତେ ଜେବଦିନ୍ ମୁତ୍‍ତେ ତାନ୍ ରେଣ୍ଡେ ପିଲାନ୍ ତଡ଼୍ ଜିସୁନ୍ ପାକେ ୱାତ୍‍ତେ । ଜିସୁଙ୍କ୍ ପ୍ରଣାମ୍ ମାଡ଼ି ଅଂକିଙ୍କ୍‌ ଅନୁଗ୍ରହ ତାଲ୍‍କ୍‍ତେ ।
MAT 20:21 ଜିସୁ ତାଙ୍କ୍ କେତ୍‍ତାନ୍, “ବାତେଏ ଇଚ୍ଛା ମାଡ଼ୁତିନ୍ ?” ଆଦ୍ କେଲ୍‌ଲା, “ନିମ୍‍ ବେସୁଙ୍କ୍‍ ରାଜାନି ଆଦ୍‍ତିଡ଼୍, ନା ଇ ରେଣ୍ଡ୍ ପିଲାଙ୍କ୍ ନି ଡେବେ ପାକେ ନୁ ତିନ୍ଦେ ପାକେ କୁସ୍‍ପାଙ୍କ୍ ନିମ୍‍ ନାକ୍ ଗଟ୍‍ଇମ୍ ।”
MAT 20:22 ଜିସୁ ଜେବଦିନ୍ ପିଲାଙ୍କ୍ ଉତ୍ତର୍ ଇସ୍ ତାଙ୍କ୍ କେତ୍‍ତାନ୍, “ନିମ୍‍ ବାତେଏ ତାଲ୍‍କୁତିନ୍, ନାନ୍ ବୁଜେମ୍ ଆୟନ୍ । ନାନ୍ ବେନ୍ ଦୁଃକାମ୍ ତେ ପାନପାତ୍ର ଉନ୍ଦାଙ୍କ୍ ଆଦୁତାନ୍, ମିଡ଼୍ ବାତେଏ ଆଦିଙ୍କ୍ ଉନ୍ଦେ ପାର୍‍ତିଡ଼୍ ?” ଅଡ଼୍‌ କେତ୍‍ତଡ଼୍, “ହୋ ପାର୍‍ତମ୍ ।”
MAT 20:23 ଜିସୁ ଅଡ଼୍‌‍କିଂଙ୍କ୍ କେତ୍‍ତାନ୍, “ବାସ୍ତବିକ ମିଡ଼୍ ନାୟାଦ୍ ଆଦ୍ ପାନପାତ୍ର ତାଗାଙ୍କ୍ ଉନ୍ଦ୍‍ତିଡ଼୍ । ବାତେଙ୍କ୍ ଇତ୍‍କେ ତିନ୍ଦେପାକେ ବା ଡେବେପାକେ କୁଦାନ୍ ସେଙ୍ଗେ ବେନଙ୍କ୍ ହେଞ୍ଚି ମାଡ଼ମାନ୍ଦାନ୍‌ ଅଦିକାର୍‌ ନାୟାଦ୍ ଇଲ୍‍ଲେ । ବେନଡ଼୍ ସେଙ୍ଗେ ନା ବାବାଲ୍ ଆଦ୍ ପଡ଼ିୟେ ତିଆର୍ ମାଡ଼୍‍ତଣ୍ଡ୍, ଆଦ୍ ମାତର୍ ଅଡ଼୍‌ ସେଙ୍ଗେ ।”
MAT 20:24 ବେସୁଙ୍କ୍‍ ବାଗାତଡ଼୍ ଶିଷ୍ୟଡ଼୍ ଇଦ୍ ଗଟ୍ କେଞ୍ଜ୍‍ତଡ଼୍, ଅଡ଼୍‌ ତାମୁଣ୍ଡ୍‌ ଇର୍‍ୱୁଡ଼୍ ପର୍‍ର କପାମ୍ ଆତ୍‌ତଡ଼୍‌ ।
MAT 20:25 ଜିସୁ ଶିଷ୍ୟଡ଼୍‍କ୍ ଅଣ୍ଡୟାଗେ ମାଡ଼ି କେତ୍‍ତନ୍, “ମିଡ଼୍ ପୁତ୍‍ତିଡ଼୍, ଇ ଜଗତ୍‍ତେ ରାଜାନଡ଼୍ ବିଜାତିଡ଼୍ ପର୍‍ର ପ୍ରବୁନ୍‍ଲେକାମ୍ ବିଚାର୍ ମାଡ଼ମାନ୍‍ତଡ଼୍ ନୁ ବେଡ଼ିଇ ନେତ୍‍ତାନଡ଼୍ ମିକା ବାଗାତଡ଼୍ ପର୍‍ର ଶାସନ୍‍ ମାଡ଼ିତଡ଼୍ ।
MAT 20:26 ମିଇ ଲୋପେ ଆଦ୍‍ଲେକାମ୍ ଆୟ୍‍ୟ, ବାତେଙ୍କ୍ ଇତ୍‍କେ ମିଇ ଲୋପେ ବେନ ବେଡ଼ିୟନ୍ ଆତ୍‍ତାଙ୍କ୍ ଇଚ୍ଛା ମାଡ଼ୁତଣ୍ଡ୍, ଅଣ୍ଡ୍‌ ମିଇ ଦାସ ଲେକାମ୍ ଆୟିନ୍ ।
MAT 20:27 ମିୟାଗାଙ୍କ୍ ୱେରନ୍ ବେଡ଼୍‍ୟନ୍ ଆତ୍‍ତାଙ୍କ୍ ଆଲ୍‍ସ୍‍କେ, ଅଣ୍ଡ୍‌ ବାଗାତଡ଼୍ ଦାସ ଆଦ୍‍ତନ୍ । ମିୟାଗାଙ୍କ୍ ବେନ ମହାନ୍ ଆତ୍‍ତାଙ୍କ୍ ଆଲ୍‍ସିତନ୍, ଅଣ୍ଡ୍‌ ମିଇ ଦାସ ଆୟ୍‍ୟଣ୍ଡ୍,
MAT 20:28 ବେଦ୍‍ଲେକାମ୍ ନାରିନ୍ ପିଲେ ସେବା ଆଦାନ୍ ସେଙ୍ଗେ ୱାଡ଼ଣ୍ଡ୍ ସେବାମାଡ଼ି ବାଗାତଡ଼ାଉ ମୁକ୍ତି ସେଙ୍ଗେ ନିଜେତ୍ ଜିୱୁନ୍‍ ହିଦାଙ୍କ୍ ୱାତ୍‍ତନ୍ ।”
MAT 20:29 ଅନ୍‌ ଦିନ୍ ଜିସୁ ଶିଷ୍ୟଡ଼୍‍ତଡ଼୍ ଯିରୀୟ ସହର୍‍ତିଙ୍କ୍ ୱିଡ଼୍‍ସି ଆଦାନ୍ ୱେଲେ ନାର୍‍ଗେ ନାରୁଡ଼୍ ଅନ୍‌ ପର୍କେ ପେର୍କେ ଆଦ୍‍ତଡ଼୍ ।
MAT 20:30 ରଟ୍ ଆଞ୍ଚିନା କୁଦିମାନ୍ଦାନ୍ ଇର୍‍ୱୁଡ଼୍ କାନାଲଡ଼୍, ଜିସୁ ଆଦ୍‍ଆର୍ ୱାଦୁତନ୍ ଇଞ୍ଜ କାନାଲଡ଼୍ କେଞ୍ଜି ଗାଟି ଲେଙ୍ଗ୍‍ଦେ କାର୍‍ଙ୍ଗୁତଡ଼୍ “ହୋ ପ୍ରବୁ, ଦାଉଦ୍‍ ତେ ମାର୍‍; ମାକିଂଙ୍କ୍ ଦୟା ମାଡ଼େ ।”
MAT 20:31 ନାରୁଡ଼୍ ଅଡ଼୍‌‍କ୍ ଦମକ୍ ଇସ୍ କଟ ଆତ୍‍ତାଙ୍କ୍ କେତ୍‍ତଡ଼୍ । ବାତେଙ୍କ୍ ଇତ୍‍କେ ଅଡ଼୍‌ ମେଣ୍ଡେ ଗାଟି ଲେଙ୍ଗ୍‍ଦେ କାର୍‍ଙ୍କ୍ ତଡ଼୍, “ଦାଉଦ୍‍ତେ ମାର୍‍; ମାକିଂଙ୍କ୍ ଦୟାମାଡ଼େ ।”
MAT 20:32 ଜିସୁ ଆଗେନିସ୍‍ ଅଡ଼୍‌‍କିଂଙ୍କ୍ କାର୍‍ଙ୍ଗି କେତ୍‍ତାନ୍, “ନାନ୍ ମିଇ ସେଙ୍ଗେ ବାତେଏ ମାଡ଼ିତାନ୍ ଇଞ୍ଜ ଆଲ୍‍ସୁତିଡ଼୍ ?”
MAT 20:33 ଅଡ଼୍‌ କେତ୍‍ତଡ଼୍, “ପ୍ରବୁ ମାକିଂଙ୍କ୍ ଉଡ଼ାନ୍ ଶକ୍ତି ଇମ୍ ।”
MAT 20:34 ଜିସୁ ଦୟାତେ ବିଗଲିତ ଆସ୍ ଅଡ଼୍‌ କଣ୍ଡାଙ୍କ୍ ଇଟ୍‍ତଣ୍ଡ୍ । ସାଙ୍ଗେ ସାଙ୍ଗେ ଅଡ଼୍‌ ଉଡ଼୍‌ତଡ଼୍ ନୁ ଜିସୁନ୍ ପେର୍କେ ପେର୍କେ ଆଦ୍‍ତଡ଼୍ ।
MAT 21:1 ଜିସୁ ନୁ ତାନ୍ ଶିଷ୍ୟଡ଼୍ ଯିରୁଶାଲେମ୍ ତେ ଗାର୍‍ରେହେଉସ୍ ବେତ୍‍ପାଗୀ ସହର୍ ସୁଦୁଟ୍ ଯେକା ମାନ୍ଦାନ୍ ଜୀତ ମେଟେତାଗ୍ ହେଉତଡ଼୍ ।
MAT 21:2 ଇର୍‍ୱୁଡ଼୍ ଶିଷ୍ୟଡ଼୍‍କ୍ ଆଦେଶ୍ ଇସ୍ ଜିସୁ କେତ୍‍ତାନ୍, “ମୁନେ ମାନ୍ଦାନ୍ ଆଦ୍ ନାର୍ ଆନୁଟ୍ । ଆଗେ ହେଉଦାନ୍ ୱେଲେ ଉଡ଼ିତିଡ଼୍, ୱେରଡ଼୍ ଗଦ ତହସ୍ ମାନ୍‍ତଡ଼୍ ନୁ ତାନ୍ ଗାର୍‍ରେ ତାନ୍ ପିଲେ ମିନ୍ଦେ । ଆଦିଙ୍କ୍ ଲେସ୍ ନା ପାକେ ତାଡ଼ାଟ୍ ।
MAT 21:3 ବେନ ବାତେଏ କେତ୍‍କେ, କେତିତିଡ଼୍ ଇଦ୍ ଗୁରୁଙ୍କ୍ ଦର୍‍କାର୍ ମିନ୍ଦେ । ଆସୁଙ୍କ୍ ସାଙ୍ଗେ ସାଙ୍ଗେ ଅଣ୍ଡ୍‌ ଅଡ଼୍‌‍କିଂଙ୍କ୍ ରସିତ୍‍ତନ୍ ।”
MAT 21:4 ହି ଗଟ୍‍ନା ତଡ଼୍ ବାବବାଦୀଡ଼୍ ମଦଲ୍ କେତ୍‍ତାଦ୍ ବାଣି ସାରେ ହାତ୍‍ତେ ।
MAT 21:5 “ସିୟନ୍‍ତେ କନ୍ୟାୟାତିଙ୍କ୍ କେଲ୍‍ମୁଟ୍ । ଉଡ଼ାଟ୍, ମିଇ ରାଜାଲ୍ ମିଇ ପାକେ ୱାଦୁତନ୍, ଅଣ୍ଡ୍‌ ବେସର୍ ନମ୍ର ଗଦପିଲେତ୍‍ ପରୁକୁଦି ୱାଦୁତନ୍; ଉଡ଼ାଟ୍, ଅଣ୍ଡ୍‌ ଗଦପରୁ କୁଦି ୱାଦୁତନ୍ ।”
MAT 21:6 ଶିଷ୍ୟଡ଼୍ ଆଞ୍ଜ୍ ଜିସୁ କେତ୍‍ତେ ଲେକାମ୍ ମାଡ଼୍‍ତଡ଼୍ ।
MAT 21:7 ଗଦ ନୁ ତାନ୍ ପିଲେତିଙ୍କ୍ ତାସ୍ ନିଜେ ନିଜେତାଉ ସିଲେ ଗଦତ୍‍ ପରୁ ୱାଟି ଜିସୁଙ୍କ୍ କୁସ୍‍ପ୍‍ତଡ଼୍ ।
MAT 21:8 ଆଗେ ମାନ୍ଦାନ୍ ନାରୁଡ଼୍ ଜିସୁ ଆଦାନ୍ ଆର୍‍ଦାଗ୍ ନିଜେ ନିଜେତ୍‍ତାଉ ସିଲେ ତାର୍‍ତଡ଼୍ ନୁ ବେସ୍‌କ୍ ତଡ଼୍ ହେତେଲ୍ ମାଡ଼େତ୍‍ ମେଟା ନାଡ଼୍‍କି ତାସ୍ ଆଦାନ୍ ଆର୍‍ଦାଗ୍ ୱାଟ୍‍ଟଡ଼୍ ।
MAT 21:9 ଜିସୁନ୍ ମୁନେ ନୁ ପେର୍କେ ଆଞ୍ଜମାନ୍ଦାନ୍ ନାରୁଡ଼୍ ଗାଟି ଲେଙ୍ଗ୍‍ଦେ କେତ୍‍ତଡ଼୍, “ଦାଉଦ୍‍ତେ ମାରିଙ୍କ୍ ପ୍ରସଂଶା ହାଇ, ବେନ ପ୍ରବୁନ୍ ପେଦେର୍‍ତେ ୱାଦୁତନ୍, ଇଶ୍ୱର୍ ଅଂକିଙ୍କ୍‌ ଆର୍ଶିବାଦ୍ ମାଡ଼ିଣ୍ଡ୍ । ଇଶ୍ୱର୍‌ତେ ପ୍ରସଂଶା ମାଡ଼ାଟ୍ ।”
MAT 21:10 ଜିସୁ ଯିରୁଶାଲେମ୍ ହେଉଦାନ୍ ୱେଲେ ଆଗେ ଅଂକିଙ୍କ୍‌ ଉଡାଙ୍କ୍ ନାରୁଡ଼୍ ଗୁଡ଼୍‍ତଡ଼୍ ।
MAT 21:11 ନାରୁଡ଼୍ କେତ୍‍ତଡ଼୍, ଅଣ୍ଡ୍‌ ବେନ ? ବାଗାତଡ଼୍ କେତ୍‍ତଡ଼୍, “ଅଣ୍ଡ୍‌ ଆଦୁତନ୍, ଗାଲିଲୀତେ ନାଜରିତିୟ ବାବବାଦୀ ଜିସୁ ।”
MAT 21:12 ଜିସୁ ମନ୍ଦିର୍ ଲୋପେ ଆଞ୍ଜ୍ ଆଗେ ଆସାନ୍ ୱାମାନ୍ ମାଡ଼ମାନ୍ଦାନ୍ ସାରେତଡ଼୍‌କିଂଙ୍କ୍ ବାଇଦେ ପେସ୍ପିତନ୍ । ଡାବ୍‍କ୍ ବ୍ୟବସାହୀଡ଼୍‍ ବେଦି ନୁ ବଡେ ୱାମାନଡ଼୍ ମେଜତିଙ୍କ୍ ଉଲ୍‍ଟା ମାଡ଼ିତ୍‍ତନ୍ ।
MAT 21:13 ଅଡ଼୍‌‍କ୍ ଅନ୍‌ କେତ୍‍ତାନ୍, “ଦର୍ମଶାସ୍ତ୍ରତାଗ୍ ଲେକାମିନ୍ଦେ, ‘ନା ମନ୍ଦିର୍ ପ୍ରାର୍ତନା ଲୋନ୍‌ ଇଞ୍ଜ୍ କ୍ୟାତ ଆଦ୍‍ତେ,’ ବାତେଙ୍କ୍ ଇତ୍‍କେ ମିଡ଼୍ ଆଦିଙ୍କ୍ ଦସ୍ୟୁଡ଼୍ ଲୋନ୍‌ ଲେକାମ୍ ମାଡ଼୍‍ତିଡ଼୍ ।”
MAT 21:14 ଜିସୁ ମନ୍ଦିର୍‍ତାଗ୍ ମାନ୍ଦାନ୍ ୱେଲେ କାନାଲଡ଼୍ ନୁ କୁଟାଲଡ଼୍‍କ୍ ଅନ୍‌ ପାକେ ୱାତ୍‍ତଡ଼୍ ନୁ ଜିସୁ ଅଡ଼୍‌‍କ୍ ସୁସ୍ଥ ମାଡ଼୍‍ତଣ୍ଡ୍ ।
MAT 21:15 ବେଡ଼ିଇ ଯାଜକ୍ ନୁ ଦର୍ମଗୁରୁଡ଼୍ ଅନ୍‌ ବାକ୍‍ୱା ପାଡ଼୍‍ୟି ସାରେ ଉଡ଼ି ନୁ ପିଲାକି ଦାଉଦ୍‍ତେ ମାରିଙ୍କ୍‍ ପ୍ରସଂଶା ଇଞ୍ଜ୍ କେସମାନ୍ଦାନ୍ କେଞ୍ଜି କପାମ୍ ଆଦ୍‍ତଡ଼୍ ।
MAT 21:16 ଅଡ଼୍‌ ଜିସୁଙ୍କ୍ କେତ୍‍ତଡ଼୍, “ଇଡ଼୍ ବାତେଏ କେସମିନ୍ଦେଡ଼୍, ନିମ୍‍ କେଞ୍ଜୁତିନ୍ ?” ଜିସୁ କେତ୍‍ତାନ୍, “ନିଜାମ୍ କେଞ୍ଜୁତାନ୍ । ଦର୍ମଶାସ୍ତ୍ରତାଗ୍ ଇଦ୍ ଗଟ୍ ବାତେଏ କାର୍‍ୱିଡ଼୍ ? ନିମ୍‍ ପିଲା ନୁ ସୁଦୁ ପିଲାଙ୍କ୍ ସାୟେଲେକାମ୍ ପ୍ରସଂଶା ମାଡ଼ାନ୍ ଶିକ୍ଷା ହିତ୍‍ତିନ୍ ।”
MAT 21:17 ଇଦ୍ କେସ୍ ଜିସୁ ଅଡ଼୍‌‍କ୍ ୱିଡ଼୍‍ସି ଯିରୁଶାଲେମ୍ ତାଗାଙ୍କ୍ ବେତନିୟାତାଗ୍ ଆତ୍‍ତଣ୍ଡ୍ । ଆଗେ ଅଣ୍ଡ୍‌ ନାର୍‍କା ତିଙ୍କ୍ ମାତ୍‍ତନ୍ ।
MAT 21:18 ତାନ୍ ମେଣ୍ଡନ୍ ଦିନ୍ ନାର୍‍କୁକ୍ ଜିସୁ ଯିରୁଶାଲେମ୍ ତା ଆଦାନ୍ ୱେଲେ ଗାଟି କାର୍‍ପୟିତେ ।
MAT 21:19 ଆର୍ ଗାର୍‍ରେ ୱେରଡ଼୍ ତୟାମାଡ଼ା ମାତ୍‍ତେ । ଜିସୁ ମାଡ଼େତ୍‍ ଗାର୍‍ରେ ଆଞ୍ଜ୍ ଆଗେ ଅଂକିଙ୍କ୍‌ ୱିଡ଼୍‍ସି ମେଣ୍ଡେ ବାତେଏ ଉଡ଼ନ୍ । ଆଦିଙ୍କ୍ ଅଣ୍ଡ୍‌ ମାଡ଼େତିଙ୍କ୍ କେତ୍‍ତାନ୍, “ନିମ୍‍ ମେଣ୍ଡେ ବେସୁଙ୍କ୍‌ବା କାୟା ଆଦ୍‍ୱିନ୍ ।” ଆସୁଙ୍କ୍ ସାଙ୍ଗେ ସାଙ୍ଗେ ତୟା ମାଡ଼ା ୱାସିଆତ୍‍ତେ ।
MAT 21:20 ଶିଷ୍ୟଡ଼୍ ଆଦ୍‍ଉଡ଼ି ବାକ୍‍ୱା ଆସ୍ କେତ୍‍ତଡ଼୍, “ତୟା ମାଡ଼େ ହିସର୍ ଯାପେ ବେଲା ୱାସ୍‍ତେ ?”
MAT 21:21 ଜିସୁ ଉତ୍ତର୍ କେତ୍‍ତାନ୍ “ନାନ୍ ନିକିଂଙ୍କ୍ ନିଜାମ୍‍ କେତୁତାନ୍, ମନ୍‍ତାଗ୍ ଇସୁର୍‍ମିକା ଏର୍କା ମାଡ଼କଟ୍ ସାରେ ବିଶ୍ୱାସ୍ ମାଡ଼ାଟ୍, ନାନ୍ ଇ ତୟା ମାଡ଼େତ୍‍ ସେଙ୍ଗେ ବାତ୍‍ମାଡ଼୍‍ତାନ୍, ମିଡ଼୍ ମିକା ଆଲା ମାଡ଼େ ପାର୍‍ଦ୍‍ତିଡ଼୍ । ମାତର୍ ଆସର ଆୟ୍‍ୟ, ଇ ମେଟେ ତେଦିମିକା ସମୁଦ୍ର ତାଗ୍ ରାଲ୍ ଇଞ୍ଜ କେତ୍‍କେ, ଆଦ୍‍ମିକା ଆଦ୍‍ତେ ।
MAT 21:22 ବିଶ୍ୱାସ୍‌ତେ ପ୍ରାର୍ତନାତାଗ୍ ବାତ୍ ତାଲ୍‍କିତିଡ଼୍ ଆଦ୍ ଦର୍‍କିତ୍ ।”
MAT 21:23 ଜିସୁ ମନ୍ଦିର୍ ତା ମାଲ୍‍ସ୍ ୱାସ୍ ଆଗେ ଶିକ୍ଷା ହିଦାନ୍ ୱେଲେ ବେଡ଼ିଇ ଯାଜକ୍ ନୁ ଯିହୁଦିନେତାନଡ଼୍ ଅଂକିଙ୍କ୍‌ କେତ୍‍ତଡ଼୍, “ବେନ୍ ଅଦିକାର୍‌‍ତେ ନିମ୍‍ ହିଉସାରେ ପାଡ଼୍‍ୟି ମାଡ଼ୁତିନ୍ ? ନିକିଂଙ୍କ୍ ଇ ଅଦିକାର୍‌ ବେନ ହିତ୍‍ତନ୍ ?”
MAT 21:24 ଜିସୁ କେତ୍‍ତାନ୍, “ନାନ୍ ମିକିଂଙ୍କ୍ ମାତର୍ ୱେରଡ଼୍ ପ୍ରଶ୍ନ କେତିତାନ୍ । ତାନ୍ ଉତ୍ତର୍ ଇତ୍‍କେ, ନାନ୍ ବେନ୍ ଅଦିକାର୍‌‍ତେ ହିଉସାରେ ପାଡ଼୍‍ୟି ମାଡ଼ୁତାନ୍, ମିକିଂଙ୍କ୍ କେତିତାନ୍ ।
MAT 21:25 ବାପ୍ତିସ୍ମ ଇଦାନ୍ ଯୋହନ୍‌ ବେନନାଗାଙ୍କ୍ ଶକ୍ତି ପାଏମ୍ଆତ୍‍ତନ୍ ଇଶ୍ୱର୍‌ତାଗାଙ୍କ୍ ନା ନାରୁଡ଼ାଗାଙ୍କ୍ ?” ଅଡ଼୍‌ ତାମ୍ ତାମ୍ ଲୋପେ ହେର୍କା ମାଡ଼୍‍ତଡ଼୍, “ଇ ବିଷୟ୍‍ତେ ବାତେଏ କେତିକାଡ଼୍ ? ଯଦି କେତିକା ଇଶ୍ୱର୍ ତାଗାଙ୍କ୍, ଆଲେକେ ଯୋହନ୍‌ ତିଙ୍କ୍ ବାତ୍‍ତିଙ୍କ୍ ବିଶ୍ୱାସ୍ ମାଡ଼୍‍ୱିଡ଼୍ ଇଞ୍ଜ୍ ଅଣ୍ଡ୍‌ ମାନ୍‍ କେତିତଣ୍ଡ୍ ।
MAT 21:26 ନାରୁନାଗାଙ୍କ୍ ଇଞ୍ଜ୍ ଯଦି କେତିତାଡ଼୍‍, ଆଲେକେ ନାରୁଡ଼୍‍କ୍ ମାନାଙ୍କ୍‌ କାଲ୍‍କିନ୍ ତଡ଼୍ ରେହେତିତଡ଼୍, ବାତେଙ୍କ୍ ଇତ୍‍କେ ଯୋହନ୍‌ ୱେରନ୍ ବାବବାଦୀ ଇଞ୍ଜ୍ ଅଡ଼୍‌ ବିଶ୍ୱାସ୍ ମାଡ଼ୁତଡ଼୍ ।”
MAT 21:27 ଆଦ୍ ଏର୍କା ମାଡ଼ି ଜିସୁଙ୍କ୍ କେତ୍‍ତଡ଼୍, ମାମ୍‍ମେ ପୁନମ୍ । ଜିସୁ ଅଡ଼୍‌ କେତ୍‍ତାନ୍, “ବେନ୍ ଅଦିକାର୍‌‍ତେ ହିୱୁସାରେ ମାଡ଼ୁତାନ୍, ନାନ୍ ମିକା ମିକିଂଙ୍କ୍ କେଲନ୍ ।”
MAT 21:28 “ଆଲେକେ ଇ ବିଷୟ୍‍ତେ ମିଡ଼୍ ବାତେଏ ଆଲ୍‍ସୁତିଡ଼୍, କେଲ୍‍ମୁଟ୍ । ୱେରନ୍ ନାରୁନ୍, ଇର୍‍ୱୁଡ଼୍ ମାର୍‍କ୍ ମାତ୍‍ତଡ଼୍ । ଅନ୍‌‍ଦିନେ ବେଡ଼୍‍ଇ ପେକାଙ୍କ୍ କେତ୍‍ତାନ୍, ବାବୁ ନେଣ୍ଡ୍ ମାନ୍‍ ଅଙ୍ଗୁର୍ ୱାୟେତାଗ୍ ଆଞ୍ଜ୍ ପାଡ଼୍‍ୟି ମାଡ଼େ ।
MAT 21:29 ଇଲା ନାନ୍ ମାଡ଼ନ୍, ଇଞ୍ଜ୍ ବେଡ଼ିଇ ପେକାଲ୍ କେତ୍‍ତାନ୍ । ବାତେଙ୍କ୍ ଇତ୍‍କେ ତାନ୍ ପେର୍କେ ମନ୍‍ଦାଗ୍ ଏର୍କା ମାଡ଼ି ପାଡ଼୍‍ୟି ମାଡ଼ାଙ୍କ୍ ଆତ୍‍ତନ୍ ।
MAT 21:30 ଆଦ୍ ନାରୁନ୍ ସୁଦୁନ୍ ପେକାଙ୍କ୍ ଆଦ୍ ପାଡ଼୍‍ୟି ମାଡ଼ାଙ୍କ୍ କେତ୍‍ତାନ୍ । ଆଲେ ବାବା, ଆଦ୍‍ତନ୍ ଇଞ୍ଜ୍ ସୁଦୁନ୍ ପେକାଲ୍ କେତ୍‍ତାନ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ପାଡ଼ିୟିଦାଗ୍ ମିକା ଆନନ୍ ।”
MAT 21:31 କେଲ୍‍ମୁଟ୍ ଇର୍‍ୱୁଡ଼୍ ପେକଡ଼ାଗାଙ୍କ୍ ବେନ ତାମ୍ ବାବାନ୍ ଗଟ୍ କେଞ୍ଜ୍‍ତନ୍‍ । ଅଡ଼୍‌ କେତ୍‍ତଡ଼୍‌ ବେଡ଼ିଇ ପେକାଲ୍ । ଜିସୁ ଅଡ଼୍‌‍କିଂଙ୍କ୍ କେତ୍‍ତାନ୍, “ନାନ୍ କେତୁତାନ୍ କର ଆଦାୟ୍‍ ମାଡ଼ାନଡ଼ି ନୁ କଜାନଡ଼୍ ମିୟାଗାଙ୍କ୍ ମୁନେଙ୍କ୍ ଇଶ୍ୱର୍‌ତେ ରାଜ୍ୟତାଗ୍ ଆଦ୍‍ତଡ଼୍ ।”
MAT 21:32 ବାପ୍ତିଜିକ ଯୋହନ୍‌ ମିଇ ପାକେ ୱାସ୍ ସାୟେତ୍ ଆର୍ ତଅସିସ୍‍ ମାତ୍‍ତନ୍, ବାତେଙ୍କ୍ ଇତ୍‍କେ ମିଡ଼୍ ଅଂକିଙ୍କ୍‌ ବିଶ୍ୱାସ୍ ମାଡ଼୍‍ୱିଡ଼୍ । ଆଗେକ୍ ବା କର ଆଦାୟ୍‍ ମାଡ଼ାନଡ଼ି ନୁ କଜାନଡ଼୍ ଅନ୍‌ ଗଟ୍‍ତେ ବିଶ୍ୱାସ୍ ମାଡ଼୍‍ତଡ଼୍, ଆଦ୍ ଉଡ଼ିମିକା ମିଡ଼୍ ମନ୍ ବାଦ୍‍ଲାମାଡ଼ି ଅଂକିଙ୍କ୍‌ ବିଶ୍ୱାସ୍ ମାଡ଼ାଟ୍ ।
MAT 21:33 ଜିସୁ କେତ୍‍ତାନ୍, “ମେଣ୍ଡନ୍ ୱେଷଡ଼୍ କେଞ୍ଜାଟ୍ ।” ୱେରନ୍ ୱାୟେତ୍‍ ମାଲିକ୍ ତାନ୍ ୱାୟାନାଗ୍ ଅଙ୍ଗୁର୍ ଚାଷ୍‍ ମାଡ଼୍‍ତଣ୍ଡ୍ । ୱେଲୁମ୍ କୁର୍‍ତନ୍ ନୁ ମାନ୍ଦାନ୍ ସେଙ୍ଗେ ୱେରଡ଼୍ ଗୁଡ଼ୁସା ମିକା ତିଆର୍ ମାଡ଼୍‍ତଣ୍ଡ୍ । ତାନ୍ ପେର୍କେ ୱାୟାନାଗାଙ୍କ୍ ଚାଷିନଡ଼୍‍କିଙ୍କ୍ ଦୁଡ଼େ ୱିଡ଼୍‍ଷିସ୍ ଅଣ୍ଡ୍‌ ବିଦେଶ୍ ଆତ୍‍ତନ୍ ।
MAT 21:34 ୱାୟେତାଗ୍ ପସଲ୍ ମାଡ଼ାନ୍ ୱେଲେ ଅଣ୍ଡ୍‌ ଚାଷୀଡ଼୍ ଆଗାଙ୍କ୍ ନିଜେତ୍ ଦୁଡ଼େ ଆଦାୟ୍‍ ମାଡ଼ାନ୍ ସେଙ୍ଗେ ନିଜେତ୍ ଦାସଡ଼୍‍କ୍ ରହତନ୍ ।
MAT 21:35 ଚାଷୀଡ଼୍ ଆଦ୍ ଦାସଙ୍କ୍ ୱେରଙ୍କ୍ ପିଞ୍ଜ୍‍ପ୍‍ତଡ଼୍, ୱେରଙ୍କ୍ ହାଉକିତାଡ଼୍‍ ନୁ ହେସିତ୍‍ତଡ଼୍, ମେଣ୍ଡ୍ଆର୍‍ତୁଙ୍କ୍ ପର୍‍ର କାଲ୍‍କ୍ ହେସ୍‍ତଡ଼୍ ।
MAT 21:36 ଆଦିଙ୍କ୍ ୱାୟେତ୍‍ ମାଲିକ୍ ନାର୍‍ଗେ ମାନ୍ଦେ ବାଗାତ୍ ଚାକରିଡ଼୍‍କ୍ ମେଣ୍ଡ୍‍ନ୍ ଦାମ୍ ରହତନ୍ । ଅଡ଼୍‌‍କ୍ ମିକା ଚାଷୀନଡ଼୍‍କ୍ ଆଦେଲେକାମ୍ କାରାପ୍ ବ୍ୟବହାର୍‌ ମାଡ଼୍‍ତଡ଼୍ ।
MAT 21:37 ବାତେଙ୍କ୍ ଇତ୍‍କେ ନା ମାରିଙ୍କ୍ ଅଡ଼୍‌ ମାନେମ୍‍ ଆଦ୍‍ତଡ଼୍, ଆଦ୍ ଆଲ୍‍ସି ଅଣ୍ଡ୍‌ ତାନ୍ ମାରିଙ୍କ୍ ଅଡ଼୍‌‍ପାକେ ରହତନ୍ ।
MAT 21:38 ମାତର୍ ଆଦ୍ ଚାଷୀଡ଼୍ ପେକାଙ୍କ୍ ଉଡ଼ି ତାମ୍ ତାମ୍ କେତ୍‍ତଡ଼୍, ଇଣ୍ଡ୍ ତ ମାଲିକ୍‍ତେ ମାର୍‍; ୱାଡ଼ାଟ୍ ଇଙ୍କ୍ ହାଉକିକାଡ଼୍‍ ମିକା ଇଣ୍ଡ୍ ଅଦିକାର୍‌ ମାନ୍‍ କାଇଦେ ମାଡ଼ିକାଡ଼୍‍ ।
MAT 21:39 ଆଦ୍ କେସ୍ ଅଂକିଙ୍କ୍‌ ୱାୟେତାଗାଙ୍କ୍ ପେସ୍‍ପି ମିକା ବାଇଦେ ହାୱୁକିତାଡ଼୍‍ ।
MAT 21:40 “କେଲ୍‍ମୁଟ୍ ତ, ୱାୟେତ୍‍ ମାଲିକ୍ ବେସୁଙ୍କ୍‍ ୱାଦ୍‍ତନ୍, ଅଣ୍ଡ୍‌ ଚାଷୀନଡ଼୍‍କ୍ ବାତେଏ ମାଡ଼ିତନ୍ ?”
MAT 21:41 ଅଡ଼୍‌ କେତ୍‍ତଡ଼୍, “ଆଦ୍ ଦୁଷ୍ଟନଡ଼କ୍ ଅଣ୍ଡ୍‌ ନିଜାମ୍ ରେହେତିତନ୍ ନୁ ବେନ୍ ଚାଷୀନଡ଼୍ ଟିକ୍ ସମୟ୍‍ତେ ଅନ୍‌ ବାଗ୍ ଇଦ୍‍ତଡ଼୍, ୱାୟାଙ୍କ୍ ଅଡ଼୍‌ କାଇଦେ ୱିଡ଼୍‍ସିଦ୍‍ତନ୍ ।”
MAT 21:42 ଜିସୁ ଅଡ଼୍‌‍କିଂଙ୍କ୍ କେତ୍‍ତାନ୍, “ଇଦ୍ ଶାସ୍ତ୍ରତେ ଗଟି ବାତେଏ କାର୍‍ୱିଡ଼୍ ? ଲକ୍ ମାଡ଼ାନଡ଼ି ବେନ୍ କାଲ୍‍ଦିଙ୍କ୍ ପାସ୍‍କି ମାତ୍‍ତଡ଼୍, ଆଦ୍ ମୁଲେ ବେଡ଼୍‍ୟାଦ୍‍ ପ୍ରସ୍ତର୍ ଆତ୍‍ତେ; ପ୍ରବୁନାଗଙ୍କ୍ ଇଦ୍ ଆତ୍‍ତେ, ମେଣ୍ଡେ ଆଦ୍ ମାନ୍‍ କଣ୍ଡେତେ ବେସର୍ ବାକ୍‍ୱା ପାଡ଼୍‍ୟି ?”
MAT 21:43 ଜିସୁ ମେଣ୍ଡେ କେତ୍‍ତାନ୍, “ଆଦିଙ୍କ୍ କେତୁତାନ୍, ଇଶ୍ୱର୍‌ତେ ରାଜ୍ୟତା ଆତ୍‍ତାଙ୍କ୍ ଅଦିକାର୍‌ ମିୟାଗାଙ୍କ୍ ଟେଣ୍ଡି ଆଦ୍‍ତଡ଼୍ ନୁ ବେନ୍ ନାର୍ ଇ ରାଜ୍ୟତେ ସାରେ ତଅତ୍‍ତେ ପାର୍‍ଦ୍‍ତଡ଼୍, ଅଡ଼୍‌‍କ୍ ଆଦ୍ ହିଦ୍‍ତଡ଼୍ ।”
MAT 21:44 ମେଣ୍ଡେ ବେନ ଇ କାଲ୍‍ଦାଗ୍ ପର୍‍ର ରାଲିତଣ୍ଡ୍, ଅଣ୍ଡ୍‌ ଦୁଡ଼ା ଦୁଡ଼ା ଆଦ୍‍ତନ୍, ମେଣ୍ଡେ ଇଦ୍ କାଲ୍ ବେନ ପର୍‍ର ରାଲିତ୍, ଅଂକିଙ୍କ୍‌ ଆଦ୍ ଗୁଣ୍ଡାଲ୍ ମାଡ଼ିତ୍ ।
MAT 21:45 ବେଡ଼ିଇ ପୁରହିତ୍ ନୁ ପାରୂଶୀଡ଼୍ ଆଦ୍ ୱେଷଡ଼୍ ଗଟ୍ କେଞ୍ଜି ଜିସୁ ଅଡ଼୍‌‍କିଂଙ୍କ୍ ଉଡ଼୍‍ତନ୍ ଇଞ୍ଜ୍ ପୁତ୍‍ତଡ଼୍ ।
MAT 21:46 ଆଦିଙ୍କ୍ ଅଡ଼୍‌ ଅଂକିଙ୍କ୍‌ ପଇଦାନ୍ ସେଙ୍ଗେ ଆଲ୍‍ସି ମାଡ଼୍‍ତଡ଼୍, ବାତେଙ୍କ୍ ଇତ୍‍କେ ନାରୁଡ଼୍‍କ୍ ୱେର୍‍ଙ୍ଗିଙ୍କ୍ ଅଡ଼୍‌ ଆଦ୍ ମାଡ଼୍ ପାର୍‍ୱଡ଼୍, ବାତେଙ୍କ୍ ଇତ୍‍କେ ନାରୁଡ଼୍ ଜିସୁଙ୍କ୍ ୱେରଣ୍ଡ୍ ବାବବାଦୀ ଇଞ୍ଜ ଏର୍କା ମାଡ଼ମାତ୍‍ତଡ଼୍ ।
MAT 22:1 ଜିସୁ ମେଣ୍ଡନ୍‍ଦାମ୍ ୱେଷଡ଼୍ ତଡ଼୍ ନାରୁଡ଼୍‍କିଂଙ୍କ୍ ଶିକ୍ଷା ଇତ୍‍ତଣ୍ଡ୍,
MAT 22:2 “ଇଶ୍ୱର୍‌ତେ ରାଜ୍ୟ ବେଦ୍‍ପୁଟୁଙ୍କ୍, ତାନାଦ୍ ମେଣ୍ଡେ ୱେରଡ଼୍ ୱେଷଡ଼୍ କେଞ୍ଜାଟ୍ । ୱେରଡ଼୍ ଦିନ୍ ୱେରନ୍ ରାଜାଲ୍ ରାଜ୍‍କୁମାର୍‍ତେ ପେଣ୍ଡୁଲ୍‍ତେ ବଜି ମିଟିଙ୍କ୍ ମାଡ଼୍‍ତଡ଼୍ ।”
MAT 22:3 କାର୍‍ଙ୍ଗି ମାନ୍ଦାନ୍ ନାରୁଡ଼୍‍କିଂଙ୍କ୍ ବଜିତାଗେ କାର୍‍ଙ୍ଗି ତାତାନ୍ ମାଇଦିଙ୍କ୍ ଅଣ୍ଡ୍‌ ଚାକରିଡ଼୍‍କ୍ ରହ୍‍ତଣ୍ଡ୍ । ବାତେଙ୍କ୍ ଇତ୍‍କେ ଆଦ୍ ନାରୁଡ଼୍ ୱାଦାଙ୍କ୍ ଇଚ୍ଛା ମାଡ଼ଡ଼୍‍ ।
MAT 22:4 ରାଜାଲ୍ ମେଣ୍ଡନ୍‍ଦାମ୍ ୱେରେ ଚାକରିଡ଼୍ ତଡ଼୍ ହି କବର୍ ରହ୍‍ତଣ୍ଡ୍, ପେଣ୍ଡୁଲ୍ ବଜି ତିଆର୍ ଆତ୍‍ତେ, ଲେକେତ୍‍ ମେନ୍ଦୁଲ୍‍ତେ କଅନ୍‌ଦା ନୁ ପେୟ୍‍ତିଙ୍କ୍ ହେଣ୍ଡି ସାରେ ମିଟିଙ୍କ୍ ଆସ୍‍ମିନ୍ଦେ, ବଜିତାଗେ ସିଟ୍‍ପାଟ୍ ୱାଡ଼ାଟ୍ ।
MAT 22:5 ବାତେଙ୍କ୍ ଇତ୍କେ କାର୍‍ଙ୍ଗିମାନ୍ଦାନ୍ ନାରୁଡ଼୍ ହି ଗଟ୍ ତିଙ୍କ୍ ମନ୍ ହିୱକଟ୍ ନିଜେତ୍ ନିଜେତ୍ ପାଡ଼୍‍ୟି ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍, ୱେରଣ୍ଡ୍ ତାନ୍ ୱାୟାନା ଆତ୍‍ତଣ୍ଡ୍, ମେଣ୍ଡେ ୱେରଣ୍ଡ୍ ଦୁକାନ୍‍ତା ଆତ୍‍ତଣ୍ଡ୍ ନୁ
MAT 22:6 ମେଣ୍ଡେ ବାଗାତଡ଼୍ ରାଜାନ୍ ଚାକରିଡ଼୍‍କ୍ ପୟ୍‍ସ୍ ରେହେସ୍ ଆୱ୍‍କିତ୍‍ତଡ଼୍‍ ।
MAT 22:7 ରାଜାଲ୍ କପାମ୍ ଆଶେ ସୌନ୍ୟଡ଼୍‍କିଙ୍କ୍ ରହ୍‍ତଣ୍ଡ୍ । ଅଡ଼୍‌ ଆଦ୍ ନରହନ୍ତାଲଡ଼୍‍କ୍‍ ହାୱ୍‍କି ଅଡ଼୍‌ ଶହର୍‍ତିଙ୍କ୍ କିସ୍ ପସ୍ପିତ୍‍ତଡ଼୍‍ ।
MAT 22:8 ତାନ୍ ପେର୍କେ ରାଜାଲ୍ ଚାକରିଡ଼୍‍କ୍ କାର୍‍ଙ୍ଗି କେତ୍‍ତଣ୍ଡ୍, “ପେଣ୍ଡୁଲ୍‍ତେ ବଜି ତିଆର୍ ଆତ୍‍ତେ, ବାତେଙ୍କ୍ ଇତ୍‍କେ କାର୍ଙ୍ଗିମାନ୍ଦାନ୍ ନାରୁଡ଼୍ ୱାଡ଼ଡ଼୍‌ ।”
MAT 22:9 ଇଞ୍ଜ୍ ବେଡ଼୍‍ୟା ସାହିକିନାଗ୍‍ ଆଞ୍ଜ୍ ବେସର୍ ନାରୁଡ଼୍‍କିଂଙ୍କ୍ ଦର୍‍ସ୍କିତିଡ଼୍, ସାରେତଡ଼୍‌କିଂଙ୍କ୍ ମାନ୍‍ ବଜିତାଗେ କାର୍‍ଙ୍ଗି ତାଡ଼ାଟ୍ ।
MAT 22:10 ଆଦିଙ୍କ୍ ଚାକରିଡ଼୍ ସାହି ସାହିକିଙ୍କ୍ ଉଡ଼ି ଲେକେତ୍‍ଆଇ କି, କାରାପ୍ ଆୟି, ବେସର୍ ନାରୁଡ଼୍‍କ୍ ଦର୍‍ସ୍କ୍‍ତଡ଼୍, ସାରେତଡ଼୍‍କ୍ କାର୍ଙ୍ଗି ତାତ୍‍ତଡ଼୍ ନୁ ପେଣ୍ଡୁଲ୍‍ ଲନ୍‍ ବର୍ତ୍ତି ଆତ୍‍ତେ ।
MAT 22:11 “ରାଜାଲ୍ କୁଟ୍‍ମାମ୍‍ ଉଡ଼ାନ୍ ମାଇଦିଙ୍କ୍ ୱାତ୍‍ତଣ୍ଡ୍ । ଅଣ୍ଡ୍‌ ଉଡ଼୍‍ତଣ୍ଡ୍, ଅଡ଼୍‌ ଲୋପେଙ୍କ୍ ୱେରଣ୍ଡ୍ ପେଣ୍ଡୁଲ୍‍ତେ ଚକାସିଲେ କେର୍‍ୱଣ୍ଡ୍ ।
MAT 22:12 ରାଜାଲ୍ ଅଂକିଙ୍କ୍‌ ପାଚ୍‍ରାମାଡ଼୍‍ତଣ୍ଡ୍, ‘ସାଙ୍ଗ, ପେଣ୍ଡୁଲ୍ ଚକାସିଲେ କେର୍‍ୱକଟ ହିଗେ ବେଲା ୱାତ୍‍ତିନ୍ ?’ ନାରୁଡ଼୍ ଉତ୍ତର୍ ହିୱକଟ୍ କଟ ମାତ୍‍ତଣ୍ଡ୍ ।
MAT 22:13 ରାଜାଲ୍ ଚାକରିଡ଼୍‍କ୍ କେତ୍‍ତଣ୍ଡ୍, ‘ଅନ୍‌ କାୟ୍‍କ୍ ଡେକା ତହସ୍ ବାୟିଦେ ୱାଟିମୁଟ୍‍ । ଆଗେ ଅଣ୍ଡ୍‌ କେୟି ପାଲ୍‍କ୍ କର୍‍କିତଣ୍ଡ୍ ।’”
MAT 22:14 ୱେଷଡ଼୍‍ ତେର୍‍ସ୍‍ପି ଜିସୁ କେତ୍‍ତଣ୍ଡ୍, “ନାର୍ଗେମାନ୍ଦେ ୱାଦୁତଡ଼୍, ବାତେଙ୍କ୍ ଇତ୍‍କେ ସୁକୁକ୍‍ ମାନ୍ଦ୍ ବେସ୍‌କ୍ ତଡ଼୍ ହେଞ୍ଜ୍‍ତେନଡ଼୍ ।”
MAT 22:15 ବେସ୍‍କ୍‍ତୁଡ଼୍‍ ପାରୂଶୀଡ଼୍ ଜିସୁଙ୍କ୍ ପ୍ରଶ୍ନ ପାଚ୍ରାମାଡ଼ି ଅଂକିଙ୍କ୍‌ ଉଡ଼୍‍ୟ୍‍ଦାଗ୍‍ ଆର୍‍ସ୍ପାନ୍‍ ମାଇଦିଙ୍କ୍ ଉପାୟ୍‍ ଆଲ୍‍ସ୍‍ତଡ଼୍‍ ।
MAT 22:16 ଅଡ଼୍‌ ନିଜେତ୍ ବେସ୍‍କ୍‍ତୁଡ଼୍‍ ଶିଷ୍ୟଡ଼୍‍କିଂଙ୍କ୍ ନୁ ହେରଦ୍ ପାକେ ବେସ୍କ୍‍ତଡ଼୍‍ ନାରୁଡ଼୍‍କିଂଙ୍କ୍ ଜିସୁନ୍ ଗାର୍‍ରେ ରହ୍‍ତଡ଼୍ । ଇଡ଼୍ ୱାସ୍ ଜିସୁଙ୍କ୍ ପାଚ୍ରାମାଡ଼୍‍ତଡ଼୍, “ଗୁରୁ, ମାମ୍ ପୁତ୍‍ତମ୍, ନିମ୍‍ ସତ୍ ଶିକ୍ଷା ହିଦୁତିନ୍‍ । ନିମ୍‍ ନାରୁନ୍ ପଦ ମର୍ଯ୍ୟାଦାତିଙ୍କ୍ କାତିର୍‍ ମାଡ଼୍‍ୱାଙ୍କ୍ ନାରୁଡ଼୍ ବାତେଏ ଆଲ୍‍ସିତିଡ଼୍, ଚିନ୍ତେ ମାଡ଼କଟ୍ ନାରୁଡ଼୍ ମାଇଦିଙ୍କ୍ ଇଶ୍ୱର୍‌ତେ ସଂକଳ୍ପ ନାର୍‍ଗେ ବୁଜାମାଡ଼୍‍ ପାର୍‍ଦ୍‍ତଣ୍ଡ୍ ।
MAT 22:17 ଆଲାଇତ୍‍କେ କେଲ୍‍ମ୍, ଇ ବିଷୟ୍‍ତେ ନିୟାଦ୍ ମତ ବାତେଏ ? ରୋମ୍‍ ସମ୍ରାଟ୍‍ତିଙ୍କ୍ କର ଇଦାନ୍ ମାଇଦିଙ୍କ୍ ଦର୍ମଶାସ୍ତ୍ର ନିୟମ୍‍ ଲେକାମ୍‌ତେ ଟିକ୍‍ କି ଇଲ୍‍ଲେ ?”
MAT 22:18 ବାତେଙ୍କ୍ ଇତ୍‍କେ ଜିସୁ ଅଡ଼ାଦ୍‌ କୁଟ୍‍ ଲେକାମ୍ ପୁଞ୍ଜ୍ ମାତ୍‍ତଣ୍ଡ୍ । ପେର୍କେ ଅଣ୍ଡ୍‌ କେତ୍‍ତଣ୍ଡ୍, “ଆୟେ ମୁର୍କଡ଼୍, ନାକିଂଙ୍କ୍ ଉଡ଼୍‍ୟ୍‍ଦାଗ୍‍ ଆର୍‍ସ୍ପାଙ୍କ୍ ବାତେଙ୍କ୍ ଆଲ୍‍ସି ମାଡ଼ୁତିଡ଼୍ ?
MAT 22:19 ବେନ ମୁଦ୍ରାତେ କର ହିଦୁତିଡ଼୍, ଆଗାଙ୍କ୍ ୱେରଡ଼୍ ମୁଦ୍ରା ତାସ୍ ନାକିଂଙ୍କ୍ ତମୁଟ୍‍ । ଅଡ଼୍‌ ୱେରଡ଼୍ ମୁଦ୍ରା ତାସ୍ ଅଂକିଙ୍କ୍‌ ହିତ୍‍ତଡ଼୍ ।
MAT 22:20 ଅଣ୍ଡ୍‌ ଅଡ଼୍‌‍କିଂଙ୍କ୍ ପାଚ୍‍ରାମାଡ଼୍‍ତଣ୍ଡ୍, ହି ମୁଦ୍ରେତେ ପର୍‍ର ବେନନାଦ୍ ପେଦେର୍ ନୁ ଆଦ୍‍ରକମ୍ ଲେକ୍‍ତାଦ୍ ଆସ୍‍ମିନ୍ଦେ ?”
MAT 22:21 ଅଡ଼୍‌ ଉତ୍ତର୍ ହିତ୍‍ତଡ଼୍, “ସମ୍ରାଟ୍‍ତାଦ୍‍ ।” ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଆଲାଇତ୍‍କେ ବେଦ୍ ସମ୍ରାଟ୍‍ତାଦ୍‍, ଆଦ୍ ସମ୍ରାଟ୍‍ତିଙ୍କ୍ ହିମୁଟ୍ ନୁ ବେଦ୍ ଇଶ୍ୱର୍‌ତାଦ୍‍, ଆଦ୍ ଇଶ୍ୱର୍‌ତିଙ୍କ୍ ହିମୁଟ୍ ।”
MAT 22:22 ହାଦ୍‍ କେଞ୍ଜି ଅଡ଼୍‌ ସୁୟ୍‍ମୁୟ୍‍ ଆଶେ ଆଦ୍‍ତଡ଼୍ ।
MAT 22:23 ଆଦିନ୍ ସାଦୁକିଡ଼୍ ମାନ୍ଦେତେ ବେସ୍‍କ୍‍ତୁଡ଼୍‍ ଜିସୁନ୍ ଗାର୍‍ରେ ୱାତ୍‍ତଡ଼୍ । ସାଦୁକିଡ଼୍ ବିଶ୍ୱାସ୍ ମାଡ଼ମାତ୍‍ତଡ଼୍ ଯେ, ମେଣ୍ଡେ ପୁନରୁତ୍‍ତାନ୍ ଇଲା ।
MAT 22:24 ଅଡ଼୍‌ ଜିସୁଙ୍କ୍ ପାଚ୍ରାମାଡ଼୍‍ତଡ଼୍, “ଗୁରୁ, ମଶାଲ୍ ବ୍ୟବସ୍ଥା ମାଡ଼ିସ୍‍ ମିନ୍ଦେଣ୍ଡ୍ ଯେ, ଯଦି ୱେରଣ୍ଡ୍ ନାରୁଡ଼୍ ପିଲାଜିଲା ଆୟ୍‍ୟକଟ ଡଲିଆଦ୍‍ତଣ୍ଡ୍, ଆଲାଇତ୍‍କେ ଅନ୍‌ ତାମୁଣ୍ଡ୍‌ ଅନ୍‌ ରାଣ୍ଡି ମୁତେଙ୍କ୍ ପେଣ୍ଡୁଲ୍ ଆଦ୍‍ତନ୍ ନୁ ଅଡ଼୍‌ ପିଲାକି ଆଦ୍ ଡଲିମାନ୍ଦାନ୍ ନାରୁନ୍ ପିଲାନ୍ ଲେକାମ୍ ଆଲେ ଆଦ୍‍ତେ ।
MAT 22:25 ୱେରଡ଼୍ ଗଟ୍ କେଞ୍ଜାଟ୍ । ଇଗେ ମା ସାତ୍‍ଟାନ୍ ଦାଦାଲଡ଼୍ ମାତ୍‍ତଡ଼୍ । ବେଡ଼୍‍ୟ୍ ଦାଦାଲ୍ ପିଲାଜିଲା ଇଲକଟ୍ ଡଲ୍‍ତାଙ୍କ୍ ଅନ୍‌ ଦ୍ୱିତିୟ ତାମୁଣ୍ଡ୍ ତାନ୍ ଦାଦାନ୍‍ ମୁତେଙ୍କ୍ ପେଣ୍ଡୁଲ୍ ମାଡ଼୍‍ତଣ୍ଡ୍ ।
MAT 22:26 ବାତେଙ୍କ୍ ଇତ୍‍କେ ଇ ଦ୍ୱିତିୟ, ତୃତୀୟ ନୁ ସାରେ ଶେଷତେ ସାତ୍‍ଜାନ୍ ଦାଦାନାଦ୍‍ ମିକା ଆଦେରକମ୍ ଗଟେମ୍ ଆତ୍‍ତେ ।
MAT 22:27 ଶେଷତେ ଆଦ୍ ମୁତ୍‍ତେ ଆନ୍‌‍ତେ ଡଲିଆତ୍‍ତେ ।
MAT 22:28 ବେନ୍ ଦିନ୍ ଡଲିମନ୍ଦାନ୍ ନାରୁଡ଼ାଦ୍ ମେଣ୍ଡନ୍‍ନ୍ଦାମ୍ ଆଦ୍‍ତେ, ହି ମୁତ୍‍ତେ ବେନନ୍ ମୁତ୍‍ତେ ଇଞ୍ଜ ପୁନ୍ଦାଙ୍କ୍ ଆଦ୍‍ତେ ? ସାରେତଡ଼୍ ତ ତାଙ୍କ୍ ପେଣ୍ଡୁଲ୍ ଆସ୍ ମାତ୍‍ତଡ଼୍ ।”
MAT 22:29 ଜିସୁ ଉତ୍ତର୍ ହିତ୍‍ତଣ୍ଡ୍, “ମିଡ଼୍ ବେସର୍ ନଷ୍ଟ ! ଶାସ୍ତ୍ର ବା ଇଶ୍ୱର୍‌ତେ ଶକ୍ତି ବିଷୟ୍‍ତେ ମିକିଂଙ୍କ୍ ଟିକ୍ ଏର୍କା ହିଲ୍‍ୱାଙ୍କ୍ ହି ଗଟ୍ ପାଚ୍‍ରାମାଡ଼ୁତିଡ଼୍ ।
MAT 22:30 ପୁନରୁତ୍‍ତାନ୍ ପେର୍କେ ଡଲ୍‍ତେ ନାରୁଡ଼୍ ଦୂତତେ ଲେକାମ୍ ଆଦ୍‍ତଡ଼୍ । ଅଡ଼୍‌ ପେଣ୍ଡୁଲ୍ ମାଡ଼ଡ଼୍‍ ।
MAT 22:31 ଡଲ୍‍ତେ ନାରୁଡ଼୍ ମେଣ୍ଡନ୍‍ନ୍ଦାମ୍ ଆଦ୍‍ଦାନ୍ ବିଷୟ୍‍ତେ ଇଶ୍ୱର୍ ବାତେଏ କେସ୍‍ମିନ୍ଦେଣ୍ଡ୍, ମିଡ଼୍ ବାତେଏ ଶାସ୍ତ୍ରତାଗ୍ ବେସୁଙ୍କ୍‍ କାର୍‍ୱିଡ଼୍ ?
MAT 22:32 ଇଶ୍ୱର୍ କେତ୍‍ତଣ୍ଡ୍, ମାମ୍‍ମେ ଅବ୍ରାହାମ୍‌, ଇସ୍‍ହାକ୍ ନୁ ଯାକୁବ୍‍ତେ ଇଶ୍ୱର୍ । ଇଶ୍ୱର୍ ତ ଜିୱୁନ୍ ମାନ୍ଦାନଡ଼୍ ଇଶ୍ୱର୍ ଡଲି ମାନ୍ଦାନ୍‍ନଡ଼୍‍ତେ ଇଶ୍ୱର୍ ଆୟ୍‍ୟକଟ ମାନ୍‍ତଣ୍ଡ୍ ।”
MAT 22:33 ନାରୁଡ଼୍ ଜିସୁନ୍ ଶିକ୍ଷା କେଞ୍ଜି ବକୁୱା ଆତ୍‌ତଡ଼୍ ।
MAT 22:34 ବେସୁଙ୍କ୍‍ ପାରୂଶୀଡ଼୍ କେଞ୍ଜ୍‍ତଡ଼୍ ଯେ, ଜିସୁ ସାଦୁକିଡ଼୍‍କ୍‍ ଉତ୍ତର୍ ହିୱ୍‍ଲେକାମ୍‍ ମାଡ଼ିସ୍‍ ମିନ୍ଦେଣ୍ଡ୍, ଅଡ଼୍‌ ଅଣ୍ଡୟ୍‌‍ ଆଶ୍ ଜିସୁନ୍ ଗାର୍‍ରେ ୱାତ୍‍ତଡ଼୍
MAT 22:35 ଅଡ଼୍‌ ଲୋପେଙ୍କ୍ ୱେରଣ୍ଡ୍ ଜିସୁଙ୍କ୍ ଉଡ଼୍‍ୟ୍‍ଦାଗ୍‍ ରାପାନ୍‍ ମାଇଦିଙ୍କ୍ ୱେରଡ଼୍ ପ୍ରଶ୍ନ ପାଚ୍‍ରାମାଡ଼୍‍ତଣ୍ଡ୍,
MAT 22:36 “ଗୁରୁ, ମାନ୍‍ ଦର୍ମଶାସ୍ତ୍ରତେ ବ୍ୟବସ୍ଥାତାଗ୍‍ ବେନ୍ ଗଟ୍ ସାରେତିଙ୍କ୍ ବେଡ଼୍‍ୟାଦ୍‍ ?”
MAT 22:37 ଜିସୁ କେତ୍‍ତଣ୍ଡ୍, “ମିଇ ପ୍ରବୁ ଇଶ୍ୱର୍‌ତିଙ୍କ୍ ସାରେ ହୃଦୟ୍, ସାରେ ଆତ୍ମା ନୁ ସାରେ ମନ୍‍ ଇସ୍‌ ପ୍ରେମ ମାଡ଼ାଟ୍ ।
MAT 22:38 ହିଦ୍ ଆଦୁତ୍‍ ସାର୍‍ରେ ବେଡ଼୍‍ୟାଦ୍‍ ନୁ ଲେକେତ୍ ଗଟ୍ ।
MAT 22:39 ଦ୍ୱିତିୟ ଲେକେତ୍ ଗଟ୍ ଆଦୁତ୍‍, ମିଇ ଗାର୍‍ରେତଡ଼୍‍କିଂଙ୍କ୍ ଆତ୍ମାତଡ଼୍ ପ୍ରେମ ମାଡ଼ାଟ୍ ।
MAT 22:40 ହି ରେଣ୍ଡ୍ ଗଟ୍ ମୋଶାନ୍‌ ସାରେ ବ୍ୟବସ୍ଥାତେ ନୁ ବାବବାଦୀଡ଼୍ ଶିକ୍ଷାତେ ଗଟ୍ ।”
MAT 22:41 ବେସ୍‌କ୍ ତଡ଼୍ ପାରୂଶୀଡ଼୍ ଜିସୁନ୍ ଗାର୍‍ରେ ମାନ୍ଦାନ୍‍ୱେୟ୍‍ ଜିସୁ ଅଡ଼୍‌‍କିଂଙ୍କ୍ ପାଚ୍‍ରାମାଡ଼୍‍ତଣ୍ଡ୍,
MAT 22:42 “ମସିହନ୍‍ ବିଷୟ୍‍ତେ ମିଡ଼୍ ବାତ୍ ଆଲ୍‍ସୁତିଡ଼୍‍ ? ଅଣ୍ଡ୍‌ ବେନନ୍ ବଂଶତଣ୍ଡ୍ ?” ଅଡ଼୍‌ ଉତ୍ତର୍ ଇତ୍‍ତଡ଼୍, “ଅଣ୍ଡ୍‌ ଦାଉଦ୍‍ତେ ବଂଶତଣ୍ଡ୍ ।”
MAT 22:43 ଜିସୁ ପାଚ୍‍ରାମାଡ଼୍‍ତଣ୍ଡ୍, “ଆଲାଇତ୍‍କେ ଦାଉଦ୍‍ ମସିହଙ୍କ୍ ‘ନା ପ୍ରବୁ’ ଇଞ୍ଜ ବାତେଙ୍କ୍ କେସ୍‍ମିନ୍ଦେଣ୍ଡ୍ ? ପରମାଆତ୍ମାତେ ପ୍ରେରନାତେ ଅଣ୍ଡ୍‌ ଲେକିମିନ୍ଦେଣ୍ଡ୍,”
MAT 22:44 “ଇଶ୍ୱର୍ ନା ପ୍ରବୁଙ୍କ୍ କେତ୍‍ତଣ୍ଡ୍, ମାମ୍ ନି ଶତ୍ରୁଡ଼୍‍କ୍ ନି ଡେକେତ୍ ମଦଲ୍ ମାଡ଼୍‍ନା ଯାକ ନିମ୍‍ ମା ତିନ୍ଦେ ପାକେ କୁଦା ।”
MAT 22:45 “ଯଦି ଦାଉଦ୍‍ ମସିହଙ୍କ୍ ପ୍ରବୁ ଇଞ୍ଜ ସମ୍ୱଦନ ମାଡ଼ିମିନ୍ଦେଣ୍ଡ୍, ଆଲାଇତ୍‍କେ ମସିହ ବେଦ୍‍ପୁଟୁଙ୍କ୍ ତାମ୍ ବଂଶତଣ୍ଡ୍ ଆଦ୍ ପାର୍‍ଦ୍‍ତଣ୍ଡ୍ ?”
MAT 22:46 ଜିସୁଙ୍କ୍ ବେନ ହିଦିନ୍ ଉତ୍ତର୍ ହିଦ୍‍ପାର୍‍ୱଡ଼୍‍ । ଆଦ୍ ଦିନ୍‍କଞ୍ଚ୍‍ ଅଂକିଙ୍କ୍‌ ମେଣ୍ଡେ ବାତେମେଣ୍ଡେ ପ୍ରଶ୍ନ ପାଚ୍ରାମାଡ଼ାଙ୍କ୍ ବେନ ବା ସାହାସ୍ ମାଡ଼ଡ଼୍‍ ।
MAT 23:1 ଜିସୁ ଶିଷ୍ୟଡ଼୍‍କିଂଙ୍କ୍ ନୁ ଗୁଡ଼ିମାନ୍ଦାନ୍‍ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍,
MAT 23:2 “ଦର୍ମଗୁରୁ ନୁ ପାରୂଶୀଡ଼୍ ମୋଶାନ୍‌ ବ୍ୟବସ୍ଥାତାଗ୍‍ କ୍ୟମତା ପାହେମ୍‍ଆତ୍‍ତେ ବାକ୍ୟାକାରିଡ଼୍,”
MAT 23:3 ଆଦିଙ୍କ୍ ଅଡ଼୍‌ ବାତେଏ ମାଡ଼ାଙ୍କ୍ କେତୁତଡ଼୍, ଆଦ୍ ମାଡ଼ାଟ୍ । ବାତେଙ୍କ୍ ଇତ୍‍କେ ଅଡ଼୍‌ ପାଡ଼ିୟିଦିଙ୍କ୍ ଏର୍କା ମାଡ଼୍‍ମାଟ୍ । ବାତ୍‍ତେଙ୍କ୍ ଇତ୍‍କେ ଅଡ଼୍‌ ନିଜେ ହିସମାନ୍ଦାନ୍ ଶିକ୍ଷା ଲେକାମ୍‍ତେ ପାଡ଼୍‍ୟି ମାଡ଼ଡ଼୍‍ ।
MAT 23:4 ଅଡ଼୍‌ ନାରୁଡ଼୍ ମେନ୍ଦୁଲ୍‍ତେ ପର୍‍ର ଦୁର୍ବହ ବଜ୍ କାଞ୍ଜାନ୍ ମାଇଦିଙ୍କ୍ ନିଜେତ୍ ୱାଡ଼୍‍ଞ୍ଜ୍‍କିନ୍‍ତଡ଼୍‍ ସୁଦୁର୍ ଆନ୍‌‍ତେ ସାହାଯ୍ୟ ମାଡ଼ଡ଼୍‍ ।
MAT 23:5 ଅଡ଼୍‌ ନାରୁଡ଼୍‍କ୍ ତଅତାନ୍ ମାଇଦିଙ୍କ୍ ନିଜେତ୍ ନିଜେତାଦ୍ ସାରେ ପାଡ଼୍‍ୟି ମାଡ଼ିତଡ଼୍, ବାତ୍‍ତେଙ୍କ୍ ଇତ୍‍କେ ଅଡ଼୍‌ ନିଜେତ୍ ନିଜେତ୍ କବଚ ଆସର୍ ମାଡ଼ିତଡ଼୍ ନୁ ଚକେତାଦ୍‍ ଜୁମୁକା ବେଡ଼୍‍ୟ୍ ମାଡ଼ିତଡ଼୍ ।
MAT 23:6 ମେଣ୍ଡେ ବଜିତାଗେ ବେଡ଼୍‍ୟ୍ ପଡ଼୍‍ୟି ନୁ ପ୍ରାର୍ତନା ଲତ୍‍ତାଗେ ବେଡ଼୍‍ୟାଦ୍‍ ମିଟିଙ୍କ୍‍ତାଗେ,
MAT 23:7 ମେଣ୍ଡେ ହାଟିନାଗେ ନମସ୍କାର୍ ପାହେମ୍‍ଆଦାଙ୍କ୍ ନୁ ନାରୁଡ଼୍‍ତଡ଼୍ ଗୁରୁ ଇଞ୍ଜ ସମ୍ୱୋଦିତ ଆତ୍‍ତାଙ୍କ୍ ଅଡ଼୍‌ ଇଚ୍ଛା ଆଦ୍‍ତଡ଼୍ ଆଦୁତଡ଼୍‍ ।
MAT 23:8 ବାତେଙ୍କ୍ ଇତ୍‍କେ ମିଡ଼୍ ଗୁରୁ ଇଞ୍ଜ ସମ୍ୱଦିତ ଆୟ୍‍ମାଟ୍‍, ବାତ୍‍ତେଙ୍କ୍ ଇତ୍‍କେ ମିଇ “ଗୁରୁ,” ୱେରଣ୍ଡେ ମେଣ୍ଡେ ମିଡ଼୍ ସାରେ ତାମୁଣ୍ଡ୍‌ ।
MAT 23:9 ମେଣ୍ଡେ, ପୃତିବିତାଗେ ବେନଙ୍କ୍ ମେଣ୍ଡେ ବାବା ଇଞ୍ଜ ସମ୍ୱଦନ ମାଡ଼୍‍ମାଟ୍, ବାତେଙ୍କ୍ ଇତ୍‍କେ ମିଇ ବାବାଲ୍ ୱେରଣ୍ଡେ, ସ୍ୱର୍ଗତାଗ୍ ମିନ୍ଦେଣ୍ଡ୍ ।
MAT 23:10 ମେଣ୍ଡେ, ମିଡ଼୍ ନେତା ଇଞ୍ଜ ସମ୍ୱଦିତ ଆୟ୍‍ମାଟ୍‍, ବାତେଙ୍କ୍ ଇତ୍‍କେ ମିଇ ନେତାଲ୍‍ ୱେରଣ୍ଡେ, ଅଣ୍ଡ୍‌ ମସୀହ ।
MAT 23:11 ମିଇ ଲୋପେ ଯେ ସାରେତଡ଼୍‍କ୍ ବାଡ଼୍‍ୟଣ୍ଡ୍, ଅଣ୍ଡ୍‌ ମିଇ ସେବା ମାଡ଼ିଣ୍ଡ୍ ।
MAT 23:12 ମେଣ୍ଡେ, ବେନ ନିଜ୍‍ତିଙ୍କ୍ ଉନ୍ନତ ଇଞ୍ଜ ତହ୍‍ତିତଣ୍ଡ୍, ଅଂକିଙ୍କ୍‌ ଆୱେକେ ମାଡ଼୍‍ୱେୟ୍‍ତିତ୍‍, ମେଣ୍ଡେ ବେନ ନିଜ୍‍ତିଙ୍କ୍ ମାଡ଼ିତନ୍, ଅଂକିଙ୍କ୍‌ ଉନ୍ନତ ମାଡ଼୍‍ୱେୟ୍‍ତିତ୍‍ ।
MAT 23:13 ଆୟେ ଦର୍ମଗୁରୁ ନୁ ପାରୂଶୀଡ଼୍, ମିୟାଦ୍ ଶେଷ ଦଶା ବେସର୍ ବୟଙ୍କାର୍, ଆର୍ ଚଲ ଦାର୍ମିକ୍‍ମାନ୍ଦେ, ସର୍ଗରାଜ୍ୟତେ ଆସାନ୍ ଆର୍‍ଦିଙ୍କ୍ ବନ୍ଦ୍‍ ମାଡ଼ି ନେହେସ୍ ମିନ୍ଦେଡ଼ି । ନିଜେ ଆଦିନାଗେ ନେଙ୍ଗ୍‍ୱିଡ଼୍‍ ନୁ ବେନଡ଼୍ ନେଙ୍ଗାଙ୍କ୍ ଆଲ୍‍ସି ମାଡ଼ୁତଡ଼୍ ଅଡ଼୍‌‍କିଂଙ୍କ୍ ଆର୍ ୱିଡ଼୍‍ସିୱିଡ଼୍‍ ।
MAT 23:14 ହାୟ, ଦଣ୍ଡତେ ନାରୁଡ଼୍ ମୁର୍କ ଦର୍ମଗୁରୁ ନୁ ପାରୂଶୀଡ଼୍ ଦଣ୍ଡ୍ ସଶନିୟ, ବାତ୍‍ତେଙ୍କ୍ ଇତ୍‍କେ ମିଡ଼୍ ଚଲତେ ନାର୍ଗେଜେଲ୍‍ ପ୍ରାର୍ତନା ମାଡ଼ାନ୍ ସାଙ୍ଗେ ସାଙ୍ଗେ ରାଣ୍ଡିକିନ୍‍ ଲକ୍‍ସାରେ ନଷ୍ଟ ମାଡ଼ୁତିଡ଼୍; ଆଦିଙ୍କ୍ ମିଡ଼୍ ଗୁରୁଦତେ ଦଣ୍ଡ୍ ଦର୍‍କିତ୍‍ ।
MAT 23:15 ଆୟ୍‍ୟ, ଦଣ୍ଡତେ ନାରୁଡ଼୍ ମୁର୍କ ଦର୍ମଗୁରୁ ନୁ ପାରୂଶୀଡ଼୍, ବାତ୍‍ତେଙ୍କ୍ ଇତ୍‍କେ ମିଡ଼୍ ଅର୍‍ତୁଙ୍କ୍ ମିଇ ଦର୍ମଲେଟ୍‍ ମାଡ଼ାନ୍ ମାଇଦିଙ୍କ୍ ଏର୍‍ଦେ ଗାର୍‍ରେ ଉଡ଼ ମାନ୍‍ତିଡ୍, ମେଣ୍ଡେ ବେସୁଙ୍କ୍‍ ଅଣ୍ଡ୍‌ ଆଦ୍‍ତନ୍, ଆସୁଟେ ଅଂକିଙ୍କ୍‌ ମିଇ ୱିଡ଼୍‍ସି ରେଣ୍ଡ୍ ଗୁଣ୍ ନର୍‍କ ପଡ଼ିୟେ ମାଡ଼ୁତିଡ଼୍ ।
MAT 23:16 “ଆର୍ କାନାଙ୍କ୍ ଆର୍‍ ତଅତାନଡ଼ି, ମିୟାଦ୍ ଦଶା ବେସର୍ ବୟଙ୍କାର୍ ଆଦ୍‍ତେ । ମିଡ଼୍ କେସମାନୁଟ୍ ଶିକ୍ଷା ହିସମାନ୍ତ୍‍ତିଡ଼୍‍, ବେନ ମନ୍ଦିର୍‍ତାଗ୍ ମାନ୍ଦାନାଦ୍ ସୁବର୍ଣ୍ଣ ପେଦେର୍‍ତେ ବେନ ପ୍ରତିଜ୍ଞା ମାଡ଼ିତନ୍, ଅଂକିଙ୍କ୍‌ ଆଦ୍ ପାଲନ୍ ମାଡ଼୍‍ୱେୟ୍‍ତିତ୍‍ ।”
MAT 23:17 ଆର୍ କାନାଲ୍‌ ମଣ୍ଡିଡ଼ି, ଆଶେ ବେଡ଼୍‍ୟାଦ୍‍ ନା ଆଶେତିଙ୍କ୍ ପବିତ୍ର ମାଡ଼ମାନ୍ଦାନ୍ ମନ୍ଦିର୍ ବେଡ଼୍‍ୟାଦ୍‍ ?
MAT 23:18 ମିଡ଼୍ ଶିକ୍ଷା ଇସ୍‌‍ମାନ୍ତ୍‍ତିଡ଼୍‍ ଯେ, ମିଡ଼୍‍ଆନ୍‌ନ୍ତେ ୱେରନ୍ ନାରୁଡ଼୍ ବେଦି ପେଦେର୍‍ତେ ଶପତ୍ ମାଡ଼୍‍କେ, ଅଣ୍ଡ୍‌ ଆଦ୍ ପାଲନ୍ ମାଡ଼ାଙ୍କ୍ ବାଦ୍ୟ ଆୟ୍‍ୟଣ୍ଡ୍ । ବାତେଙ୍କ୍ ଇତ୍‍କେ ବେଦିତେ ପର୍‍ର ନେହ୍‍ସ୍‍ମାନ୍ଦାନ୍‍ ନୈବେଦ୍ୟ ପେଦେର୍‍ତେ ପ୍ରତିଜ୍ଞା ମାଡ଼୍‍କେ, ଆଦ୍ ଆଲଙ୍ଗନୀୟ ।
MAT 23:19 ବେସର୍ କାନାନି ନିମ୍‍ । ବେଗେ ବେଡ଼୍‍ୟାଦ୍‍ ନୈବେଦ୍ୟ ନା ନୈବେଦ୍ୟତିଙ୍କ୍ ପବିତ୍ର ମାଡ଼ାନାଦ୍ ବେଦି ?
MAT 23:20 ଇତ୍‍କେ ବେନ ବେଦି ପେଦେର୍‍ତେ ଶପତ୍ ମାଡ଼୍‍କେ, ଅଣ୍ଡ୍‌ ବେଦି ନୁ ଆଦିନ୍ ପର୍‍ର ମାନ୍ଦାନ୍ ସୁଦୁଟ୍ ନୈବେଦ୍ୟ ସାମଗ୍ରି ପେଦେର୍‍ତେ ଶପତ୍ ମାଡ଼େଣ୍ଡ୍ ।
MAT 23:21 ବେନ ମନ୍ଦିର୍ ପେଦେର୍‍ତେ ଶପତ୍‍ମାଡ଼୍‍କେ ଅଣ୍ଡ୍‌ ମନ୍ଦିର୍‍ତାଗ୍ ମାନ୍‍ତାନ୍ ଇଶ୍ୱର୍‌ତେ ପେଦେର୍‍ତେ ଶପତ୍ ମାଡ଼ିତନ୍ ।
MAT 23:22 ବେନ ସ୍ୱର୍ଗ ପେଦେର୍‍ତେ ଶପତ୍ ମାଡ଼ିତନ୍, ଅଣ୍ଡ୍‌ ଇଶ୍ୱର୍ ସିଂହାସନ ନୁ କୁଦିମାନ୍ତାନ୍ ଇଶ୍ୱର୍‌ତେ ପେଦେର୍‍ତେ ଶପତ୍ ମାଡ଼ିତନ୍ ।
MAT 23:23 ଆର୍, ମୁର୍କ ଦର୍ମଗୁରୁ ନୁ ଫାରୂଶୀଡ଼୍, ମିୟାଦ୍ ପରିଣତି ବେସର୍ ଶଚନିୟ, ମିଡ଼୍ ଇଶ୍ୱର୍‌ତେ ଗଟ୍‍ତେ ପଦିନା, ପାନ ମହୁରୀ ନୁ ଜିରାର ଆନ୍‌‍ତେ ଦଶମାଂଶ ଦାନ ହିସମିନ୍ଦେଡ଼ି, ବାତେଙ୍କ୍ ଇତ୍‍କେ ନ୍ୟାୟ ଦୟା ସାଦୁତା ସାରେ ବ୍ୟବସ୍ଥାତାଉ ଲେକେତ୍‍ ବିଷୟ୍‍ଆନ୍‌ତେ ୱିଡ଼୍‍ସି ମିନ୍ଦେଡ଼ି । ବ୍ୟବସ୍ଥାତା ହି ବିଷୟ୍‍ତାଉ ମୁନେଙ୍କ୍ ପୁଞ୍ଜ୍‍ମାନ୍ଦାନାଦ୍ ଲେକାମ୍ ।
MAT 23:24 ଆର୍ କାନାଙ୍କ୍ ଆର୍ ତଅତାନଡ଼ି, ମିଡ଼୍ ବାତେଏ ତିନ୍ଦାନ୍ ୱେଲେ ଆଗେ ପୁଡ଼ିୟି ରାଲିମାନ୍‍ତେ ହିଞ୍ଜ ଆଦିଙ୍କ୍ ଚାନାମାଡ଼ିତିଡ଼୍‍, ଇତ୍‍କେ ମିଡ଼୍ ୱେର୍‍ର ଉଟ୍‍ତିଙ୍କ୍ ଲୋପିତିଡ଼୍‍ ।
MAT 23:25 ହାୟ, ଦଣ୍ଡତେ ନାରୁଡ଼୍ ମୁର୍କ ଶାସ୍ତ୍ରୀ ନୁ ପାରୂଶୀଡ଼୍, ମିଡ଼୍ ଗିନା ନୁ ତାଲିତେ ବାୟିଦେ ନର୍‌ଦ୍‌ତିଡ଼୍‌, ମାତର୍ ଲୋପେ ଆଦ୍ ସାରେ ବୁସା ପାଡ଼୍‍ୟି ନୁ ଇନ୍ଦ୍ରିୟ କାମ୍‌ଦେ ବର୍ତ୍ତି ଆସ୍‍ମିନ୍ଦେ ।
MAT 23:26 ହୋ କାନାଲ୍‌ ଫାରୁଶି, ମୁନେଙ୍କ୍ ଗିନେତ୍‍ ଲପ୍ ନର୍‌ମୁଟ୍‌, ବେଦ୍‍ପୁଟୁଙ୍କ୍ ଆଦିନାଗେ ବାୟିଦେ ଆନ୍‌‍ତେ ନର୍‌ସ୍‌ ଆଦ୍‌ତେ ।
MAT 23:27 ଆୟ୍‌, ଦଣ୍ଡତେ ନାରୁଡ଼୍ କପଟି ଶାସ୍ତ୍ରୀ ନୁ ପାରୂଶୀଡ଼୍, ବାତ୍‍ତେଙ୍କ୍ ଇତ୍‍କେ ମିଡ଼୍ ଚୂନ୍ ଆକ୍‍ତେ ସମାଦିତ୍‍ ଲେକାମ୍ ଆଦ୍ ବାଇଦେ ସୁନ୍ଦର୍ ଇତ୍‍କେ ଲୋପେ ଡଲ୍‍ତେ ମେନ୍ଦୁଲ୍ ନୁ ଡଲ୍‍ତେ ବୁଲା ।
MAT 23:28 ରକମ୍ ମିଡ଼୍‍ଆନ୍‌ନ୍ତେ ବାୟ୍‍ଦେତ୍‍ ନାରୁଡ଼୍ କଣ୍ଡେତେ ଦାର୍ମିକ୍ ତନ୍ଦିତିଡ଼୍‍, ବାତେଙ୍କ୍ ଇତ୍‍କେ ମିଇ ଲୋପେ ଅପରାଦ୍‌ ନୁ ପାପ୍‍ତେ ବର୍ତ୍ତି ଆଶେ ମାନ୍‍ତେ ।
MAT 23:29 ହାୟ, ଦଣ୍ଡତେ ନାରୁଡ଼୍ ମୁର୍କ ଶାସ୍ତ୍ରୀ ନୁ ପାରୂଶୀଡ଼୍, ବାତ୍‍ତେଙ୍କ୍ ଇତ୍‍କେ ମିଡ଼୍ ବାବବାଦୀଲଡ଼ାଦ୍‍ ସମାଦି ତିଆର୍ ମାଡ଼ି ନୁ ଦାର୍ମିକ୍ଡ଼ାଦ୍ ସମାଦିସ୍ତମ୍ଭ ସୁଶବିତ ମାଡ଼ି ମାନ୍‍ତିଡ୍,
MAT 23:30 ମାମ୍ ବେସୁଙ୍କ୍‍ ମା ଆନିଦାଦିଡ଼୍ ସମୟ୍‍ତେ ମାନେମ୍‍ ଆତ୍‍କେ, ଆଲେକ୍ ବାବବାଦୀଡ଼୍ ନେତୁର୍‍ତେ ଅଡ଼୍‌ ତୋଡ଼୍ ଅୟମ୍‍ ଆୟେମ୍‍ ।
MAT 23:31 ଆଦ୍‍ଦିଙ୍କ୍ ମିଡ଼୍ ଯେ ଆୱ୍‍କାନ୍‍ ବାବବାଦୀ ବଂଶତଡ଼ି, ଆଦ୍ ସମ୍ୱନ୍ଦତେ ମିଡ଼୍ ହି ନିଜେତ୍ ନିଜେତ୍ ବିଷୟ୍‍ତେ ସାକ୍ଷ୍ୟ ଇସମିନ୍ଦେଡ଼ି ।
MAT 23:32 ଆଲାଇତ୍‍କେ ମୁନେ ଦାଟ୍‍, ମିଇ ମୁନେତ୍ ଆନିଦାଦିଡ଼ାଦ୍‍ ସାରେ ଆୟ୍‍ୱେ ପାଡ଼ିୟିତିଙ୍କ୍ ସାରେ ମାଡ଼ିମୁଟ୍‍ ।
MAT 23:33 ଆର୍ ତାଡ଼ାକିନଡ଼ି, କାଲସର୍ପର ବଂଶତଡ଼ି ! ନର୍‍କ ଦଣ୍ଡକଞ୍ଜ୍ ରକ୍ଷା ପାହେମ୍‍ ଆଦ୍‍ତିଡ଼୍ ?
MAT 23:34 ଆଦିଙ୍କ୍ ଉଡ଼େ, ନାନ୍‍ନେ ମିଇ ଗାର୍‍ରେ ବାବବାଦୀ, ଜ୍ଞାନି ନୁ ଶାସ୍ତ୍ରିଡ଼ିକ୍‍ ରୟ୍‍ସ୍ ମିନ୍ଦେନ୍; ଅଡ଼୍‌ ଲୋପେଙ୍କ୍ ବେନ ବେନଙ୍କ୍ ମିଡ଼୍ ଆୱ୍‍କିତିଡ଼୍‍ ନୁ କ୍ରୁଶତାଗେ ଆୱୁକିତିଡ଼୍, ମେଣ୍ଡେ ବେନ ବେନଙ୍କ୍ ମିଇ ଉପାସନା ଲତ୍‍ତାଗେ କରଡ଼ା ରେହ୍‍ତିତିଡ଼୍‍ ନୁ ନାର୍‍ଦେ ନାର୍ ତାଡ଼ନା ମାଡ଼ିତିଡ଼୍ ।
MAT 23:35 ସାରେଲେକେତ୍ ହେବଲ୍‍ତାଗାଙ୍କ୍ ଆରାମ୍ ମାଡ଼ି ମନ୍ଦିର୍ ନୁ ବେଦି ମଦ୍ୟସ୍ଥଳତାଗେ କାୟି ମାନ୍ଦାନ୍ ଜିକରିୟ ବରକିଅନ୍‌‍ତେ ମାର୍‍ ଦେ କଞ୍ଜ୍ ପୃତିବିତେ ସାରେତଡ଼୍ ଦାର୍ମିକ୍ ନାରୁଡ଼ାଦ୍ ଆୱୁକାନ୍‍ ମାଇଦିଙ୍କ୍ ମିଡ଼୍ ଦଣ୍ଡିତ୍ ଆଦ୍‍ତିଡ଼୍ ।
MAT 23:36 ନାନ୍‍ନେ ମିକିଂଙ୍କ୍ ନିଜାମ୍‍ କେତୁତାନ୍, ହି ସାରେ ନାରିଡ଼୍ ଆୱୁକାନ୍ ମାଇଦିଙ୍କ୍ ହି ଯୁଗ୍‍ତେ ନାରୁଡ଼୍ ଦଣ୍ଡତ୍‍ ତିପାଲ୍ ଆଦ୍‍ତିନ୍ ।
MAT 23:37 “ହୋ ଯିରୁଶାଲେମ୍, ହୋ ଯିରୁଶାଲେମ୍ । ମିଡ଼୍ ବାବବାଦୀଡ଼୍‍କ୍‍ ଆୱୁକୁତିଡ଼୍ ନୁ ଇଶ୍ୱର୍ ରୟ୍‍ସ୍‍ମାନ୍ଦାନ୍ ଗଟିକେ ଅଡ଼୍‌କିଂଙ୍କ୍ କାଲ୍‍କ୍ ହେସି ରେହ୍‍ତୁତିଡ଼୍‍ । କର୍‍ ତାନ୍ ରେକାନ୍‍ ମଦଲ୍ ପିଲାଙ୍କ୍ ପୟ୍‍ସ୍ ନେହେତାନ୍ ଲେକାମ୍, ମିଇ ନାରୁଡ଼୍‍କିଂଙ୍କ୍ ନା ବାହୁତ୍‍ ମଦଲ୍ ରକ୍ଷା ମାଡ଼ାନ୍ ମାଇଦିଙ୍କ୍ ନାନ୍ ବେସଦାମ୍‍ ଆଲ୍‍ସି ମାଡ଼୍‍ତାନ୍ । ବାତେଙ୍କ୍ ଇତ୍‍କେ ମିଡ଼୍ ନାକିଂଙ୍କ୍ ଆଦ୍ ମାଡ଼ାନଙ୍କ୍ ଇୱିଡ଼ି ।”
MAT 23:38 ଉଡ଼େ, ମିଇ ମନ୍ଦିର୍ ମିୟିକାଇଦେ ୱିଡ଼୍‍ସିଦୁତମ୍‍ ।
MAT 23:39 ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ କେତୁତାନ୍, ପ୍ରବୁନ୍ ପେଦେର୍‍ତେ ବେନ ୱାଦୁତଣ୍ଡ୍, ଅଣ୍ଡ୍‌ ଦନ୍ୟ, ମିଡ଼୍ ହି ଗଟ୍ କେଲକଟ ମାନ୍‍ନା ଯାକ ନାକିଂଙ୍କ୍ ମେଣ୍ଡେ ଉଡ଼େ ପାର୍‍ୱିଡ଼୍ ।
MAT 24:1 ଜିସୁ ମନ୍ଦିର୍‍ତାଗାଙ୍କ୍ ପେୟିସ୍ ଆଦ୍‍ଦାନ୍ ୱେୟ୍ ଶିଷ୍ୟଡ଼୍ ମନ୍ଦିର୍ ବେଡ଼େତାଗେ ମାନ୍ଦାନ୍ ବେଡ଼୍‍ୟା ସୌଦତ୍‍ ପାକେ ଜିସୁନ୍ ଦୃଷ୍ଟି ତିଆର୍ ମାଡ଼୍‍ତେ ।
MAT 24:2 ବାତେଙ୍କ୍ ଇତ୍‍କେ ଜିସୁ ସତ୍ କେତ୍‍ତଣ୍ଡ୍, “ଇଞ୍ଜେ ସିନା ଇସାର୍‍ରେ ଉଡ଼୍‍ତିଡ଼୍ । ନାନ୍ ମିକିଂଙ୍କ୍ କେତୁତାନ୍, ହି ମନ୍ଦିର୍‍ତାଗ୍ ୱେରଡ଼୍ ଆନ୍‌‍ତେ କାଲ୍ ଅନ୍‌‍ ପଡ଼ିୟେତାଗ୍ ମାନ୍‍ନ । ସାରେ ବୂମିସାତ୍‍ ଆଦ୍‍ତେ ।”
MAT 24:3 ଜିସୁ ଜିତ ମେଟେତ୍‍ ପର୍‍ର କୁଦି ମାନ୍ଦାନ୍‍ୱେଲେ ଶିଷ୍ୟଡ଼୍ ଅଣ୍ଡୟ୍‌‍ଦାମ୍ ୱାସ୍ ପାଚ୍ରା ମାଡ଼୍‍ତଡ଼୍, “ଇସାର୍‍ରେ ବେସୁଟ୍‌ ଗଟେମ୍‌ ଆଦ୍‍ତେ, ମାକିଂଙ୍କ୍ କେଲ୍‍ମ୍ । ବାତେଏ ଗଟେମ୍ ଆତ୍‍କେ ମାମ୍‍ମେ ପୁନ୍ତମ୍‍ ଯେ ନିୟାଦ୍ ୱାଦାନ୍ ଦିନାମ୍ ଆଦୁତ୍‍ ନୁ ଇ ଯୁଗାନ୍ତ ଆଦ୍‍ତେ ।”
MAT 24:4 ଜିସୁ କେତ୍‍ତଣ୍ଡ୍, “ସତର୍କ ମାନୁଟ୍ ।” ବେନ ବେଦ୍‍ପୁଟୁଙ୍କ୍ ମିକିଂଙ୍କ୍ ବୁଲ୍‍କା ମାଡ଼୍‍ମାକିଡ଼୍‍ ।
MAT 24:5 ନା ପେଦେର୍ ଆସ୍ ନାର୍‍ଗେ ୱାସ୍ କେତିତଡ଼୍‍, “ନାନ୍‍ନେ ବାନେ ମସୀହ ।” ଇଲା କେସ୍ ଅଡ଼୍‌ ସାର୍‍ତଡ଼୍‍କିଙ୍କ୍ ବୁଲ୍‍କା ମାଡ଼ିତଡ଼୍ ।
MAT 24:6 ମିଡ଼୍ ଗାର୍‍ରେ ଯୁଦ୍ଦ୍‌ତେ ଆସମାନ୍ଦାନ୍ ମର୍‍ରେ କେଞ୍ଜିତିଡ଼୍‍ ନୁ ଜୁୟ୍‍ ଚାଲେମ୍‍ ଆସ୍‍ମାନ୍ଦାନ୍ ଯୁଦ୍‌ତେ କବର୍ କେଞ୍ଜ୍‍ତିଡ଼୍ । ବାତେଙ୍କ୍ ଇତ୍‍କେ ଦାନ୍ଦେ ଆୟ୍‍ମାଟ୍‍ । ହିଦ୍‍ପୁଟୁଙ୍କ୍ ସାରେ ନିଜାମ୍ ଗଟେମ୍ ଆଦ୍‍ତେ । ବାତେଙ୍କ୍ ଇତ୍‍କେ, ହିଦିନ୍ ଇତ୍‍କେ ଆୟଜେ ଯୁଗାନ୍ତ ଦିନାମ୍ ହେୱ୍‍ତେ ।
MAT 24:7 ଦେଶ୍‍ ଦେଶ୍‍ ଲୋପେ ଯୁଦ୍‌ ଆଦ୍‍ତେ, ୱେରଡ଼୍ ରାଜ୍ୟ ମେଣ୍ଡନ୍ ରାଜ୍ୟତ୍‍ପରୁ ଚିଟିରମନ୍ ମାଡ଼ିତେ । ପଡ଼ିୟେ ପଡ଼ିୟାନାଗ୍ ଦୁର୍‍ବିକ୍ଷା ନୁ ବୁମିକମ୍ପ ଆଦ୍‍ତେ ।
MAT 24:8 ବାତେଙ୍କ୍ ଇତ୍‍କେ ନାଟାଡ଼୍ ଇଚ୍ଛାତେ ପ୍ରସବ୍‍ ବେଦନାତେ ଆରାମ୍ ଲେକାମ୍ ।
MAT 24:9 “ମିଡ଼୍ ଦରାପଡ଼େମ୍‍ ଆଶେ ଉତ୍‍ପିଡ଼ିତ ନୁ ଡଲିତିଡ଼୍‍ ନୁ ମେଣ୍ଡେ ନାୟାଗେ ବିଶ୍ୱାସ୍ ମାଡ଼ାନ୍ ସେଙ୍ଗେ ମିଡ଼୍ ସାରେ ଜାତିତଡ଼୍ ତ ଗୃନାତେ ପାତ୍ରଡ଼ି ଆଦ୍‍ତିଡ଼୍ ।
MAT 24:10 ଆସୁଟେ ବେସ୍‍କ୍‍ତୁଡ଼୍‍ ଅଡ଼୍‌ ବିଶ୍ୱାସ୍‍ତିଙ୍କ୍ ଆରାମାଡ଼ିତଡ଼୍‍, ନିଜେ ନିଜେତିଙ୍କ୍ ପାସ୍‍କି ମାଡ଼ି ନିଜେତ୍ ବିଶ୍ୱାସ୍‍ତିଙ୍କ୍ ୱିଡ଼୍‍ସିଦ୍‍ତଡ଼୍ ।
MAT 24:11 ଆସୁଟେ ବେସ୍‌କ୍ ତଡ଼୍ ବଣ୍ଡବାବବାଦିଡ଼୍ ନାରୁଡ଼୍‍କିଂଙ୍କ୍ ବୁଲ୍‍କା ମାଡ଼ିତଡ଼୍ ।
MAT 24:12 ହିଦ୍‍ପୁଟୁଙ୍କ୍ ଅପରାଦ୍‌ ନାର୍ଗେ ଆଦ୍‍ତେ ନୁ ନାର୍‍ଗେ ନାରୁଡ଼୍‍ତେ ପ୍ରେମ ଇଶ୍ୱର୍‌ତେ ସେଙ୍ଗେ ଶିନ୍ତେ ଆଦ୍‍ତେ ।
MAT 24:13 ବାତେଙ୍କ୍ ଇତ୍କେ ବେନଆଇ ତେର୍‍ନା ଯାକ ଶକ୍ତିତଡ଼୍ ପୟ୍‍ସ୍ ମାନ୍‍ତଣ୍ଡ୍, ଅଣ୍ଡ୍‌ ପରିତ୍ରାଣ୍ ପାହେମ୍‍ ଆଦ୍‍ତନ୍ ।
MAT 24:14 ଇଶ୍ୱର୍‌ତେ ରାଜ୍ୟ ବିଷୟ୍ ସାୟେତ୍ ଗଟ୍ ସାରେ ନାରୁଡ଼୍ ଜାତିଡ଼୍ ମାଇଦିଙ୍କ୍ ସତ୍ କାଇଲ୍‍ତେ ଲେକାମ୍ ସାରା ଜଗତ୍‍ତାଗେ ପ୍ରଚାର୍ ଆଦ୍‍ତେ । ତାନ୍‍ପେର୍କେ ଯୁଗ୍ ଶେଷ ଆଦ୍‍ତେ ।”
MAT 24:15 “ବାବବାଦୀଡ଼୍ ଦାନିୟେଲ୍‍ ତିଆର୍ ମାଡ଼ିମାନ୍ଦାନ୍ ୱିଡ଼୍‍ସି ମାଡ଼ାନ୍ ପାସ୍‍କି ଜିନିଷ୍‍ । ପବିତ୍ର ଜାଗାତିଙ୍କ୍ ଆଦ୍ କଳୁଷିତ ମାଡ଼ିତେ । ଇଦିନ୍ ଇତ୍‍କେ ବାତେଏ, କାପାଟ୍ ବନ୍ଦ୍‍ ମାଡ଼ାନାଦ୍ ।”
MAT 24:16 ଆସୁଟେ ବେନଡ଼୍ ଯିହୁଦା ଦେଶ୍‌ତାଗେ ମାନ୍‍ତଡ଼୍, ଅଡ଼୍‌ ମେଟେତାଗେ ମିରିଡ଼୍‍ ।
MAT 24:17 ବେନଡ଼୍ ଲୋତ୍‍ତେ ମୁର୍ସିନାଗ୍‍ ମାନ୍‍ତଡ଼୍, ଅଡ଼୍‌ ଲୋତ୍‍ତେ ମଦଲ୍ ୱାସ୍ ଦିନାମ୍ ନଷ୍ଟ ମାଡ଼୍‍ମାଟ୍ ।
MAT 24:18 ବେନଡ଼୍ ୱାୟାନା ଆଞ୍ଜ୍‍ମାନ୍‍ତନ୍, ନିଜେତ୍ ଚକା ଆଦ୍‍ଦାନ୍ ମାଇଦିଙ୍କ୍ ଲୋନ୍‌ ମାଲ୍‍ସ୍ ହାନ୍‍ମାକି ।
MAT 24:19 ଆସୁଟେ ଡଙ୍କେତ୍‌ ମୁତେକି ନୁ ଡେକାନାଗ୍‌ ବାବୁଙ୍କ୍ ପୟ୍‍ସ୍‍ମାନ୍ଦାନ୍ ଅବସ୍ଥାତେ ବେସର୍ ଶୋଚନୀୟ ଆଦ୍‍ତେ ।
MAT 24:20 ଇଶ୍ୱରତିଙ୍କ୍ ପ୍ରାର୍ତନା ମାଡ଼ମାନୁଟ୍‍, ସାଲ୍‍ଦେ ଦିନାତେ ବା ବିଶ୍ରାମ୍‍ବାର୍‍ଦେ ମିକିଂଙ୍କ୍ ବେଦ୍‍ପୁଟୁଙ୍କ୍ ମିରାଙ୍କ୍ ଆୟ୍‍ୟ ।
MAT 24:21 ଆସୁଟେ ବେନ ଦୁଃକାମ୍ ମାଡ଼୍‍ୱେୟ୍‍ତିତ୍‍, ଜଗତ୍‍ତେ ତିଆର୍‍ତାଗାଙ୍କ୍ ନେଣ୍ଡ୍‍ଜାକ ଗଟେମ୍ ଆସ୍‍ମାନ୍ଦାନ୍ ସାରେ କଷ୍ଟତିଙ୍କ୍ ଆଦ୍ ବଲି ଆଦ୍‍ତେ । ରକମ୍ ଦୁଃକାମ୍ ପାୟେ ବେସୁଙ୍କ୍‍ ୱାଡ଼ ।
MAT 24:22 ବାତେଙ୍କ୍ ଇତ୍‍କେ ହି ଦୁଃକତ୍‍ ଦିନାମ୍‍ତିଙ୍କ୍ ଇଶ୍ୱର୍ କମ୍‍ ମାଡ଼ିସ୍‍ ମିନ୍ଦେଣ୍ଡ୍ । ଆଲା ଆୟ୍‍ୟକଟ ମାନ୍ଦାନ୍‍ଇତ୍କେ, ମେଣ୍ଡେ ବେନ ବାଦ୍‍କ୍‍ ପାର୍‍ୱଣ୍ଡ୍ ଆୟେଣ୍ଡ୍ । ବାତେଙ୍କ୍ ଇତ୍‍କେ ତାନ୍ ହେଞ୍ଚିମାନ୍ଦାନ୍ ନାରୁଡ଼୍‍କିଂଙ୍କ୍ ଗେଲ୍‍ସ୍ପାନ୍ ମାଇଦିଙ୍କ୍ ଇଶ୍ୱର୍ ଆଦ୍ ସମୟ୍‍ତିଙ୍କ୍ ସୁଦୁଟ୍ ମାଡ଼ିସ୍‍ ମିନ୍ଦେଣ୍ଡ୍ ।
MAT 24:23 “ଆସୁଟେ ଯଦି ବେନ ମିକିଂଙ୍କ୍ କେତିତଣ୍ଡ୍, ‘ଇଗେ କ୍ରିଷ୍ଟ ମିନ୍ଦେଣ୍ଡ୍ ବା ଆଗେ ଅଣ୍ଡ୍‌ ମିନ୍ଦେଣ୍ଡ୍,’ ତାଙ୍କ୍ ବିଶ୍ୱାସ୍ ମାଡ଼୍‍ମାଟ୍ ।
MAT 24:24 ବାତେଙ୍କ୍ ଇତ୍କେ ନିଜ୍‍ତିଙ୍କ୍ ବଣ୍ଡକ୍ରିଷ୍ଟ କେସମାନ୍ତ୍‍ତଡ଼୍‍ ବୁସାମାଡ଼ାନଡ଼୍‍ ଆସୁଟେ ତନ୍ଦିତଡ଼୍‍ । ଅଡ଼୍‌ ବାକ୍‍ୱା ନୁ ବାକ୍‍ୱାତାଉ ପାଡ଼୍‍ୟି ତୟ୍‍ସ୍‍ ଇଶ୍ୱର୍‌ତେ ହେଞ୍ଚିମାନ୍ଦାନ୍ ନାରୁଡ଼୍‍କ୍ ବୁଲ୍‍କା ମାଡ଼ିତଡ଼୍ ।
MAT 24:25 କେଞ୍ଜାଟ୍, ଆଦ୍ ଦିନାମ୍ ୱାଦାନ୍ ମୁନେଙ୍କ୍ ନାନ୍ ମିକିଂଙ୍କ୍ ହିସରେ ଗଟ୍ କେଞ୍ଜ୍‍ପିଦୁତାନ୍ ।”
MAT 24:26 “ଉଡ଼ାଟ୍, ଅଣ୍ଡ୍‌ ଉସ୍କ ନାର୍‍ତାଗ୍‍ ମିନ୍ଦେଣ୍ଡ୍ ଇଞ୍ଜେ ଯଦି ନାରୁଡ଼୍ କେତିତଡ଼୍‍, ଆଗେ ଆନ୍‌‍ମାଟ୍, ଯଦି ଅଡ଼୍‌ କେତିତଡ଼୍‍, ‘ଉଡ଼େ, ହିଗେ ଅଣ୍ଡ୍‌ ମିଞ୍ଜିମିନ୍ଦେଣ୍ଡ୍’ ଅଡ଼୍‌‍କିଂଙ୍କ୍ ବିଶ୍ୱାସ୍ ମାଡ଼୍‍ମାଟ୍ ।”
MAT 24:27 ପିଡ଼୍‍ଗ୍‍ ବେଦ୍‍ପୁଟୁଙ୍କ୍ ପଡ଼ଦ୍‍ ପେଇତାନାଗାଙ୍କ୍ ପଡ଼ଦ୍‍ ଆଦାନ୍ ଯାକ ମାବ୍‍ତିଙ୍କ୍‍ ୱେସ୍‍ମାଡ଼ିତ୍‍, ନାରୁନ୍‍ପିଲେ ଆନ୍‌‍ତେ ରକମ୍ ୱାଦ୍‍ତଣ୍ଡ୍ ।
MAT 24:28 “ବେଗେ ଡଲ୍‍ତାଦ୍ ବାତେଏ ମାନ୍‍ତେ, ଆଗେ ଡାମର୍‍ପିଟେ ଗୁଡ଼୍‍ଡି ମାନ୍‍ତା ।”
MAT 24:29 ଆଦ୍ ଦୁଃକାମ୍‍ତେ ଦିନାମ୍ ଶେଷ ଆଦ୍‍ଦାନ୍ ୱେୟ୍ ପଡ଼୍‍ଦ୍ ଇକାଡ଼୍ ଆଦ୍‍ତେ, ନେଲ୍‍ଞ୍ଜ୍‍ ମେଣ୍ଡେ ୱେସ୍ ହିଦ୍‍ପାର୍‍ୱ, ନୁ ମହାଶୂନ୍ୟତେ ନାର୍‍ଗେ ହୁକାକ୍‍ ଇକେ ଆକେ ଆଦ୍‌ତା ।
MAT 24:30 ତାନ୍ ପେର୍କେ ମନୁଷ୍ୟପୁତ୍ରତିଙ୍କ୍ ମାବ୍‍ତାଗ୍ ୱାଦାନାଦ୍ ଉଡ଼ିତିଡ଼୍ ନୁ ମାବ୍‍ତେ ଲୋପେଙ୍କ୍ ନାର୍‍ଗେ ଶକ୍ତି ନୁ ଗୌରବ୍ ତେ ୱାଦାନାଦ୍ ଉଡ଼ି ପୃତିବିତେ ସାରେ ବାଷାତ୍‍ ନାରୁଡ଼୍ ଉଡ଼ି କେଇତଡ଼୍ ।
MAT 24:31 ମହିର୍‍ତେ ଶଦ୍ଦ ନୁ ପୃତିବିତାଗ୍ ୱେରଡ଼୍ ପଡ଼ିୟେ ତାଗାଙ୍କ୍ ମେଣ୍ଡନ୍ ପଡ଼ିୟେ ହେୱ୍‍ନା ଅନ୍‌ ହେଞ୍ଚଣ୍ଡ୍ ନାରୁଡ଼୍‍କ୍ ମଦ୍‍ମାଡ଼ି ତାତାନ୍ ମାଇଦିଙ୍କ୍ ନାରୁନ୍‍ପିଲେ ତାନ୍ ଦୂତକିଙ୍କ୍ ରହ୍‍ତିତନ୍‍ ।
MAT 24:32 “ତୟାମାଡ଼େତ୍ ଆଗାଙ୍କ୍ ଶିକ୍ଷା ଗ୍ରହନ୍ ମାଡ଼ାଟ୍ ବେସୁଙ୍କ୍‍ ତାନାଦ୍ ଚିଟି‍ ରଙ୍ଗ୍‍ଦେ ଲେକ୍‍ତ୍‍ତେ କମେ ସୁଦୁକମା ନାଗାଙ୍କ୍ ପୁନେ ଆକି ପେୟ୍‍ତିତା, ହେଦ୍‍କାଲାମ୍‍ ଆଦ୍‍ତେ ଇଞ୍ଜ ମିଡ଼୍ ପୁନ୍‍ତିଡ଼୍ ।
MAT 24:33 ଟିକ୍ ରକମ୍ ହିସାର୍‍ରେ ଗଟନା ଉଡ଼୍‍କେ, ମୁନେତ୍ ଦିନାକଞ୍ଜ୍ ଆରାମ୍ ଆତ୍‍ତେ ଇଞ୍ଜ ମିଡ଼୍ ପୁନ୍‍ତିଡ଼୍ ।”
MAT 24:34 ମନେମାଡ଼ାଟ୍‍, ଇଞ୍ଜେ ହି ଯୁଗ୍‍ତେ ନାରୁଡ଼୍‍ତେ ଲୋପେଙ୍କ୍ ସାରେତଡ଼୍ ଡଲାନ୍ ମୁନେଙ୍କ୍ ଇୱୁ ସାରେ ବିଷୟ୍ ନିଜାମ୍‍ ଗଟେମ୍ ଆଦ୍‍ତେ ।
MAT 24:35 ମାବ୍ ନୁ ପୃତିବି ନଷ୍ଟ ଆଦ୍‍ତେ ସିନା; ବାତେଙ୍କ୍ ଇତ୍‍କେ ନା ଗଟ୍ ବେସୁଙ୍କ୍‍ ଲୋପ୍ ପାହେମ୍‍ ଆୟ୍‍ୟ ।
MAT 24:36 “ଆଦିନ୍, ଆଦ୍ ସମୟତେ ବେସୁଙ୍କ୍‍ ୱାଦ୍‍ତେ, ବେନ କେତ୍‍ ପାର୍‍ୱଡ଼୍ । ସ୍ୱୟଂ ଇଶ୍ୱର୍‌ତେ ମାର୍‍ ନୁ ସ୍ୱର୍ଗଦୂତ ଆନ୍‌ତେ ଆଦ୍ ଗଟ୍ ପୁନ୍‍ନ, ମାତର୍ ବାବାଲ୍ ଇଶ୍ୱର୍ ପୁନ୍‌ତଣ୍ଡ୍ ।”
MAT 24:37 ନହତେ ଦିନାମ୍ ବେଦ୍‍ପୁଟୁଙ୍କ୍ ଗଟେମ୍ ଆସ୍‍ମାତ୍‍ତେ, ମନୁଷ୍ୟପୁତ୍ରନ୍ ୱାଦାନାଦ୍ ସମୟ୍‍ତେ ରକମ୍ ଆଦ୍‍ତେ ।
MAT 24:38 ଏର୍‍ତୁପାନ୍‌ ଆଦ୍‍ଦାନ୍ ମୁନେଙ୍କ୍ ନହ ଜାହାଜ୍‍ତାଗେ ଅସ୍‍ନା ଯାକ ନାରୁଡ଼୍ ତିନ୍ଦାନ୍ ଉନ୍ଦାନ୍ ନୁ ପେଣ୍ଡୁଲ୍ ଆଦାନାଦ୍ ଆସତ୍‍ ପାଡ଼ିୟିଦାଗ୍‌ ଦାନ୍ଦେ ମାନ୍‌ତଡ଼୍ ।
MAT 24:39 ଏର୍‍ ଗାଲ୍‍ଦେ ଅଡ଼୍‌ ବୁଡ଼େଲ୍‍ ଅୟ୍‍ନା ଯାକ ବାତେଏ ଗଟେମ୍ ଆଦୁତ୍‍ତେ, ବେନ ପୁନକଟ୍ ମାତ୍‍ତଡ଼୍ । ନାରୁନ୍‍ପିଲେ ୱାଦାନ୍ ଦିନ୍ ଟିକ୍ ଆଦ୍‍ତେ ।
MAT 24:40 ଆଦ୍ ସମୟ୍‍ତେ ୱାୟାନାଗେ ପାଡ଼୍‍ୟି ମାଡ଼ାନଡ଼ି ଇର୍‍ୱୁଡ଼୍ ମାନ୍‍ତଡ଼୍, ଅଡ଼୍‌ ଲୋପେଙ୍କ୍ ୱେରଣ୍ଡେ ହେଞ୍ଚିମାନ୍ଦାନ୍ ଆଶେ ଆଦ୍‍ତନ୍ । ମେଣ୍ଡେ ୱେରଣ୍ଡ୍ ହେଞ୍ଚିମାନ୍ଦାନ୍ ଆୟ୍‍ୟକଟ ପେର୍କେ ମାନ୍‍ତଣ୍ଡ୍ ।
MAT 24:41 ରେଣ୍ଡ୍ ଜାତ୍‍ତେ ତିହିତାନ୍ ନାଟାକିନ୍‍ ଲୋପେଙ୍କ୍ ୱେରଡ଼୍ ଆଦ୍‍ତେ ନୁ ମେଣ୍ଡନ୍ ଆଗେ ମାନ୍‍ତେ ।
MAT 24:42 ମିଡ଼୍ ସତର୍କ ମାନୁଟ୍, ବାତ୍‍ତେଙ୍କ୍ ଇତ୍‍କେ ମିଇ ପ୍ରବୁ ବେସୁଙ୍କ୍‍ ୱାଦ୍‍ତଣ୍ଡ୍, ମିଡ଼୍ ପୁନ୍‍ୱିଡ଼୍ ।
MAT 24:43 ବେସୁଙ୍କ୍‍ ଡଙ୍ଗାଲ୍ ନେଙ୍ଗିତଣ୍ଡ୍ ଇଞ୍ଜ ପୁଞ୍ଜ୍‍ମାତ୍‍ତ୍କେ, ଲୋତ୍‍ତେ ମାଲିକ୍ ତିଆର୍‍ତେ ମାଞ୍ଜ୍ ଡଙ୍ଗାଲ୍‍ତିଙ୍କ୍ ଲୋପେ ନେୱଣ୍ଡ୍ ଆୟେଣ୍ଡ୍ ।
MAT 24:44 ମିଡ଼୍‍ଆନ୍‌ନ୍ତେ ସାରେଦାମ୍ ତିଆର୍ ଆସ୍‍ମାନୁଟ୍‍ । ବାତେଙ୍କ୍ ଇତ୍‍କେ ମିଡ଼୍ ଅଂକିଙ୍କ୍‌ ୱିଡ଼୍‍ସି ମାଡ଼୍‍ୱେ ସମୟ୍‍ତେ ଅଣ୍ଡ୍‌ ୱାସ୍ ହେୱ୍‍ଦେ ପାର୍ଦ୍‍ତଣ୍ଡ୍ ।
MAT 24:45 “ବେନ ଆଲାଇତ୍‍କେ ବିଶ୍ୱାସ୍ତ ନୁ ବୁଦିମାନ୍‍ ଚାକର୍ ? ବେନନ୍ ପର୍‍ର ମାଲିକ୍ ବାଗାତ୍ ଚାକରିଡ଼୍‍କ୍ ଟିକ୍ ସମୟ୍‍ତେ କାଦି ଇଦାନ୍ ବାର ନ୍ୟସ୍ତ ମାଡ଼ିତନ୍ ।”
MAT 24:46 ମାଲିକ୍ ମାଲ୍‍ସ୍ ୱାଦାନ୍ ୱେଲେ ଆଦ୍ ଚାକର୍ ଯଦି ବିଶ୍ୱାସ୍‍ତେ ଅନାଦ୍‌ ପାଡ଼୍‍ୟି ପାଲନ୍ ମାଡ଼ମାନ୍‍ତଣ୍ଡ୍, ଅଣ୍ଡ୍‌ ବେସର୍ ସାର୍‍ଦ୍‍ ଆଦ୍‍ତନ୍ !
MAT 24:47 ନାନ୍‍ନେ ନିଜାମ୍‍ କେସମିନ୍ଦେନ୍, ଆସତ୍‍ ଚାକର୍‍ତିଙ୍କ୍ ମାଲିକ୍ ଦିନ୍ ଅନାଦ୍‌ ସାରେ ସମ୍ପତିତ୍‍ତେ ଦାୟିତ୍ୱତେ ନେହ୍‍ତିତଣ୍ଡ୍ ।
MAT 24:48 ବାତେଙ୍କ୍ ଇତ୍‍କେ ଆଦ୍ ଚାକର୍ ଯଦି ବିଶ୍ୱାସ୍ ଆୟ୍‍ୟକଟ ମାଲିକ୍ ସିଟ୍‍ପାଟ୍ ୱାଡ଼ଣ୍ଡ୍ ଇଞ୍ଜ ଆଲ୍‍ସିତିଡ଼୍ ନୁ
MAT 24:49 ବାଗାତେ ସେବକ୍‍ ନଡ଼୍‍କିଙ୍କ୍ ରେହେତା ରେହେତି ମାଡ଼ି କାଲ୍‍ଉନ୍ଦାନଡ଼୍‍ତ କାଇଲି ତିନ୍ଦାନ୍ ଉନ୍ଦାନାଗ୍‍ କାୟ୍‍ଲିତଣ୍ଡ୍,
MAT 24:50 ଅଣ୍ଡ୍‌ ୱିଡ଼୍‍ସି ମାଡ଼କଟ୍ ମାନ୍ଦାନ୍, ବେଦ୍‍ଦିନେ ଅଣ୍ଡ୍‌ ପୁନ୍‍ୱେ ମାନ୍‍ତନ୍ ଆଦ୍ ସମୟ୍‍ତେ ଅନ୍‌‍ଦିନେ ଦାସନ୍‍ ମାଲିକ୍ ମାଲ୍‍ସ୍ ୱାଦ୍‍ତଣ୍ଡ୍,
MAT 24:51 ଅଂକିଙ୍କ୍‌ ଅଣ୍ଡ୍‌ ତିପାଲ୍‍ତେ ଦଣ୍ଡ୍ ହିଦ୍‍ତଣ୍ଡ୍ । ଅଣ୍ଡ୍‌ ଅଂକିଙ୍କ୍‌ ମୁର୍କନାରୁଡ଼୍ ତ ବେଗେକି ନାରୁଡ଼୍ କେଇତଡ଼୍ ନୁ ଯନ୍ତ୍ରନାତାଗ୍‍ ପାଲ୍‍କ୍ କିଟ୍ରୁମ୍ କାର୍ଟ୍ରୁମ୍ ମାଡ଼ିତଡ଼୍ ଆଦ୍ ପଡ଼ିୟେତାଗ୍ ରୟ୍‍ସିଦ୍‍ତଣ୍ଡ୍ ।
MAT 25:1 “ଆଦ୍ ସମୟ୍‍ତେ ସର୍ଗରାଜ୍ୟତେ ୱାଦାନାଦ୍ ହିଦ୍ ଲେକାମ୍ ଆଦ୍‍ତେ ।” ଦଶ୍‍ଟାନ୍‍ ପିକି ସାର୍‍ତାୱ୍‍ ୱେରଡ଼୍ ୱେରଡ଼୍ କୁପି ଆସ୍ ବରଙ୍କ୍ କାଇଲାନ୍ ମାଡ଼ାଙ୍କ୍ ଆଞ୍ଜ୍‍ମାତ୍‍ତା ।
MAT 25:2 ଆୱିନ୍ ଲୋପେ ଏଇଙ୍ଗ୍ ବୁଦ୍‍ ହିଲ୍‍ୱାୱ୍‍ ନୁ ଏଇଙ୍ଗ୍ ବୁଦ୍‍ ମାନ୍ଦାନାୱ୍‍ ।
MAT 25:3 ବୁଦ୍‍ ହିଲ୍‍ୱେ ପିକି କୁପି ଆତ୍‍ତା ବାତେଙ୍କ୍ ଇତ୍‍କେ ଆର୍କେ ନାର୍‍ଗେ ନିୟ୍ ଆୟକଟ ମାତ୍‍ତା ।
MAT 25:4 ବୁଦି ମାନ୍ଦାନାୱ୍‍ ପିକି ଆର୍କେ କୁପି ଆତ୍‍ତା ନୁ ବତଲ୍‍ତାଗେ ନାର୍‍ଗେ ନିୟ୍ ଆସ୍ ମାତ୍‍ତା ।
MAT 25:5 ବର ୱାଦାନାଦ୍ ଲେଟ୍ ଆତ୍‍ତାଙ୍କ୍ ପିକି କୁଡ଼୍‍କି କୁଡ଼୍‍କି ହୁଞ୍ଜ୍‍ତା ।
MAT 25:6 ନାଡ୍‍ନାର୍କା ମର୍‍ରେ କେଞ୍ଜ୍‍ତା, “ହିକ୍‍ ଉଡ଼ାଟ୍ ବର ୱାଦୁତଣ୍ଡ୍, ୱାଡ଼ାଟ୍ ଅଡ଼୍‌‍କିଂଙ୍କ୍ କାର୍‍ଙ୍ଗି ତାତିତାଡ଼୍‍ ।”
MAT 25:7 ପିକି ତେଦିମେଣ୍ଡେ ନିଜେତ୍ ନିଜେତ୍ କୁପି ତିଆର୍ ମାଡ଼୍‍ତେ ।
MAT 25:8 ଆସୁଟେ ବୁଦ୍‍ହିଲ୍‍ୱେ ପିକି ବୁଦ୍‍ ମାନ୍ଦାନାୱିଙ୍କ୍ କେତ୍‍ତା, “ମାକିଂଙ୍କ୍ ସୁଦୁର୍ ନିୟ୍ ହିମୁଟ୍ । ମାୟାୱ୍‍ କୁପି ପିୟ୍‍ଦୁତା ।”
MAT 25:9 ବୁଦ୍‍ମାନ୍ଦାନାୱ୍‍ କେତ୍‍ତା, “ଇଲେ, ମି ସେଙ୍ଗେ ନୁ ମା ମାଇଦିଙ୍କ୍ ନିୟ୍ ଆଲକଟ୍ ଆଦ୍‍ତେ । ମିଡ଼୍ ଦୁକାନ୍‍ତାଗେ ଆଞ୍ଜ୍ ନିଜେତ୍ ନିଜେତ୍ ମାଇଦିଙ୍କ୍ ବେସର୍ ନିୟ୍ ଆସି ତାଡ଼ାଟ୍ ।”
MAT 25:10 ଆଦିଙ୍କ୍ ବୁଦ୍‍ହିଲ୍‍ୱେ ପିକି ନିୟ୍ ଆସାଙ୍କ୍ ପେୟ୍‍ତା । ଆୱ୍ ଆତ୍‍ତେ ପେର୍କେ ବର ୱାସ୍ ହେୱ୍‍ତଣ୍ଡ୍ । ତିଆର୍ ଆଶେ ମାନ୍ଦାନ୍ ଏଇଙ୍ଗ୍ ପିକି ଅନ୍‌‍ତଡ଼୍ ପେଣ୍ଡୁଲ୍ ବଜିତାଗେ ଆଦ୍ କାପାଟ୍ ବନ୍ଦ୍ ଆତ୍‍ତେ ।
MAT 25:11 “ପେର୍କେ ବାଗାତେ ପିକି ଆଗେ ୱାତ୍‍ତା । ପ୍ରବୁ, କାପାଟ୍ ତେର୍‍ମ୍‍; ମାମ୍‍ମେ ଲୋପ୍ ଆଦ୍‍ତମ୍‍ ଇଞ୍ଜ ଆୱ୍ ମର୍‍ପୟ୍‍ତା ।
MAT 25:12 ବର ଉତ୍ତର୍ ଇତ୍‍ତଣ୍ଡ୍, ‘ନାନ୍ ମିକିଂଙ୍କ୍ ସତ୍ କେତୁତାନ୍, ମିଡ଼୍ ବେନଡ଼ି, ନାନ୍ ମିକିଂଙ୍କ୍ ପୁନନ୍ ।’”
MAT 25:13 ଗଟ୍ କେତାନାଦ୍ ତେର୍‍ସ୍‍ପି ଜିସୁ କେତ୍‍ତଣ୍ଡ୍, “ସତର୍କ ମାନୁଟ୍ । ଆଦ୍ ଦିନ୍ ବା ଆଦ୍ ଦିନାମ୍ ବେନ ବା ପୁନଡ଼୍ ।”
MAT 25:14 “ସ୍ୱର୍ଗ ରାଜ୍ୟ ଇଦ୍‍ପୁଟୁଙ୍କ୍,” ଆଦିନ୍ ମେଣ୍ଡ୍‍ଅଣ୍ଡୟ ୱେଷଡ଼୍ କେଞ୍ଜାଟ୍ । ଅନ୍‌‍ଦାମ୍ ୱେରଣ୍ଡ୍ ନାରୁନ୍ ଚାକର୍‍କିଡ଼୍‍ କାୟ୍‍ଦେ ଅନାଦ୍‌ ସମ୍ପତ୍ତି ୱିଡ଼୍‍ସି ମେଣ୍ଡେ ବିଦେଶ୍‍ତା ଆଦ୍‌ଦାଙ୍କ୍ ପେୟ୍‍ତଣ୍ଡ୍ ।
MAT 25:15 ଅଡ଼ାଦ୍‌ ଶକ୍ତି ଲେକାମ୍ ଅଡ଼୍‌‍କିଂଙ୍କ୍ ବେସର୍ ବେସର୍ ଇତ୍‍କେ ଗୁଡ଼୍‍ପି ମାଡ଼ିତନ୍, ଅର୍‍ତୁଙ୍କ୍ ହିତ୍‍ତଣ୍ଡ୍ ଏଇଙ୍ଗ୍ ହଜାର୍‌ ରୁପା ମୁଦ୍ରା, ମେଣ୍ଡେ ଅର୍‍ତୁଙ୍କ୍ ରେଣ୍ଡ୍ ହଜାର୍‌ ନୁ ମେଣ୍ଡେ ଅର୍‍ତୁଙ୍କ୍ ଅଣ୍ଡୟ୍‌ ହଜାର୍‌ ଇସ୍‌ ବିଦେଶ୍ ଆତ୍‍ତନ୍ ।
MAT 25:16 ଏଇଙ୍ଗ୍ ହଜାର୍‌ ରୁପା ମୁଦ୍ରା ପାହେମ୍‍ ଆତ୍‍ତେନଣ୍ଡ୍ ଚାକର୍ ଆଦ୍ ଦନ୍‍ଦିଙ୍କ୍ ବେପାର୍ ମାଡ଼ି ମେଣ୍ଡେ ଏଇଙ୍ଗ୍ ହଜାର୍‌ ରୁପା ମୁଦ୍ରା ଲାବ୍ ମାଡ଼୍‍ତଣ୍ଡ୍ ।
MAT 25:17 ରକମ୍ ରେଣ୍ଡ୍ ହଜାର୍‌ ମୁଦ୍ରା ପାହେମ୍‍ ଆଦ୍ ଚାକର୍ ମେଣ୍ଡେ ରେଣ୍ଡ୍ ହଜାର୍‌ ମୁଦ୍ରା ଲାବ୍ ମାଡ଼୍‍ତଣ୍ଡ୍ ।
MAT 25:18 ବାତେଙ୍କ୍ ଇତ୍‍କେ ବେନ୍ ଚାକର୍ ହଜାର୍‌ ପାହେମ୍‍ ଆଶେ ମାତ୍‍ତେନଣ୍ଡ୍‍, ଅଣ୍ଡ୍‌ ନେଲ୍ ୱେରଡ଼୍ ଦର୍‍ ଡେୱି ମାଲିକ୍‍ତେ ଆଦ୍ ମୁଦ୍ରାକିଂଙ୍କ୍ ମିଞ୍ଜ୍‍ପି ନେହ୍‍ସ୍ ମାତ୍‍ତଣ୍ଡ୍ ।
MAT 25:19 ନାର୍‍ଗେ ଦିନ୍‍ତେ ପେର୍କେ ମାଲିକ୍ ମାଲ୍‍ତଣ୍ଡ୍ ନୁ ଚାକରିଡ଼୍ ତଡ଼୍ ହିସାପ୍ କିତାବ୍‍ ମାଡ଼୍‍ତଣ୍ଡ୍ ।
MAT 25:20 ଏଇଙ୍ଗ୍ ହଜର୍‍ ଅସ୍ ମାନ୍ଦାନ୍ ଚାକର୍ ମାଲିକ୍‍ତିଙ୍କ୍ ମେଣ୍ଡେ ଏଇଙ୍ଗ୍ ହଜାର୍‌ ହିତ୍‍ତଣ୍ଡ୍, “ଗଟ୍, ନିମ୍‍ ନାକିଂଙ୍କ୍ ଏଇଙ୍ଗ୍ ହଜାର୍‌ ରୁପା ମୁଦ୍ରା ଇସ୍‌‍ମାତ୍‍ତିନ୍‍, ହିୱ୍‍ଉଡ଼ା, ନାନ୍ ମେଣ୍ଡେ ଏଇଙ୍ଗ୍ ହଜାର୍‌ ଲାବ୍ ପାହେମ୍‍ ଆତ୍‍ତାନ୍‍ ।”
MAT 25:21 ମାଲିକ୍ ସାର୍‍ଦେ ଆଶେ କେତ୍‍ତଣ୍ଡ୍, ଟିକ୍ ମାଡ଼୍‍ତିନ୍, ନିମ୍‍ ଲେକେତ୍‍ ନୁ ବିଶ୍ୱାସ୍ତ ଦାସନି । ନିମ୍‍ ବିଶ୍ୱାସ୍ତେ ଲେକାମ୍ ସୁଦୁର୍ ଦନ୍‍ତିଙ୍କ୍ କାର୍‍ବାର୍‍ ମାଡ଼ି ମାନ୍ଦାନ୍ ମାଇଦିଙ୍କ୍ ନି କାୟିଦେ ନାର୍‍ଗେ ଦନ୍ ୱିଡ଼୍‍ସିଦ୍‍ତାନ୍‍ । ୱାଡ଼ା, ନା ତଡ଼୍ ୱେଡ଼୍‍କା ମାଡ଼ା ।
MAT 25:22 “ରେଣ୍ଡ୍ ହଜାର୍‌ ରୁପା ମୁଦ୍ରା ଆସ୍‍ମାନ୍ଦାନ୍ ଚାକର୍ ୱାସ୍ କେତ୍‍ତଣ୍ଡ୍, ଗଟ୍, ନିମ୍‍ ନାକିଂଙ୍କ୍ ରେଣ୍ଡ୍ ହଜାର୍‌ ଇସ୍‌‍ମାତ୍‍ତିନ୍‍, ନାନ୍‍ନେ ମେଣ୍ଡେ ରେଣ୍ଡ୍ ହଜାର୍‌ ଲାବ୍ ମାଡ଼୍‍ତାନ୍ ।”
MAT 25:23 ମାଲିକ୍ କେତ୍‍ତଣ୍ଡ୍, “ଲେକେତ୍‌ ମାଡ଼୍‍ତି । ନିମ୍‍ଆନ୍ତେ ଲେକେତ୍‍ ଚାକର୍ ତନି । ସୁଦୁର୍ ଦନ୍‍ତାଗେ ବିଶ୍ୱାସ୍ ତତ୍‍ତିନ୍‍ । ନାର୍‍ଗେ ଦନ୍ ନାନ୍ ନି ମାଇଦିଙ୍କ୍ ଗୁଡ଼୍‍ପି ମାଡ଼ିଦ୍‍ତାନ୍‍ । ୱାଡ଼ା ନା ସାର୍‍ଦେ ତାଗ୍ ବାଗି ଆୟ୍‍ମ୍‍ ।”
MAT 25:24 ଶେଷତ ୱେରଡ଼୍ ହଜାର୍‌ ମୁଦ୍ରା ଆସ୍‍ମାନ୍ଦାନ୍ ଚାକର୍ ୱାସ୍ କେତ୍‍ତଣ୍ଡ୍, “ପ୍ରବୁ, ନାନ୍ ପୁତ୍‍ତାନ୍, ନିମ୍‍ ୱେରେତନି କଟରି ନାରୁନୀ ୱିତ୍‍ୱେ ୱାୟେତାଗାଙ୍କ୍ ନିମ୍‍ ପାଣ୍ଡ୍‌ସ୍ପା ନନି । ୱିଜ୍‍ ୱିତକଟ୍ ପସଲ୍‍ତିଙ୍କ୍ ଗୁଡ଼୍‍ପାନନି ।
MAT 25:25 ଆଦିନ୍ ମାଇଦିଙ୍କ୍ ନାନ୍‍ନେ ନିକିଂଙ୍କ୍ ୱେର୍‍ସ୍‍ ମେଣ୍ଡେ ନି ଡାବ୍‍ତିଙ୍କ୍ ଅସ୍ ବୂମ୍‌ତାଗ୍‍ ମିସି ମାତ୍‍ତାନ୍ । ଉଡ଼େ, ନିୟାଦ୍ ଆଦ୍ ଡାବ୍ ।”
MAT 25:26 ମାଲିକ୍ କେତ୍‍ତଣ୍ଡ୍, “ଆରେ ଅଯୋଗ୍ୟ, ମଣ୍ଡି ଦାସ ! ନିମ୍‍ବାନେ ପୁଞ୍ଜ୍‍ମାତ୍‍ତିନ୍‍ ନାନ୍‍ନେ ବେଗେ ୱିତନ୍‍, ଆଗେ ପାଣ୍ଡ୍‌ସ୍ପାନଙ୍କ୍‌, ଆଦ୍‍ନିମେ ପୁତ୍‍ତିନ୍ ।
MAT 25:27 ଆଲାଇତ୍‍କେ ନା ଡାବ୍‍କ୍ ଆସ୍ ନିମ୍‍ ବ୍ୟାଙ୍କ୍‍ତାଗ୍ ଗୁଡ଼୍‍ପି ମାଡ଼େନି । ଆସୁଙ୍କ୍ ନାନ୍ ଆୱିଙ୍କ୍ ସୁଦତଡ଼୍ ମାଲ୍‍ପିୱେନ୍ ।
MAT 25:28 ଆଲାକେସ୍‍ ମାଲିକ୍ ଗଟ୍ ହିତ୍‍ତଣ୍ଡ୍, ହି ଚାକର୍‍ତେ କାୟ୍‍ଦେକଞ୍ଚ୍ ହି ଡାବ୍‍କ୍ ଟେଣ୍ଡିଅସ୍‍ ବେନ କାୟ୍‍ଦେ ଦଶ ହଜାର୍‌ ମିନ୍ଦେ, ଅଂକିଙ୍କ୍‌ ଆଉ ହିମୁଟ୍ ।
MAT 25:29 ବାତେଙ୍କ୍ ଇତ୍‍କେ ବେନନାଗ୍‍ ମିନ୍ଦେ, ଅଂକିଙ୍କ୍‌ ଅଦିକ୍‌ ହିଦ୍‍ୱେୟ୍‍ତିତ୍‍ ନୁ ଅଣ୍ଡ୍‌ ନାର୍‍ଗେ ଲାବ୍ ମାଡ଼ିତନ୍ ବାତେଙ୍କ୍ ଇତ୍‍କେ ବେନନାଗ୍‍ ଇଲେ, ଅନାୱୁ ବାତା ମିନ୍ଦେ, ଆଉ ଆନ୍ତେ ଟେଣ୍ଡି ଆଦ୍‍ଦେ ୱେୟିତିତ୍ ।
MAT 25:30 ହି ବେସତ୍ ଚାକର୍‍ତିଙ୍କ୍ ବାୟିଦେ ଇକାଡ଼୍‌ତାଗ୍ ଆୟ୍‍ମୁଟ୍ । ଆଗେ ଅଣ୍ଡ୍‌ କେୟ୍‍ତନ୍ ନୁ ପାଲ୍‍କ୍ କିଟ୍ରୁମ୍‍ କାଟ୍ରୁମ୍ ମାଡ଼ମାନିଣ୍ଡ୍ ।”
MAT 25:31 “ବେସୁଙ୍କ୍‍ ନାରୁନ୍‍ପିଲେ ରାଜାଲ୍ ଆଶେ ତାନ୍ ଦୂତକି ତ ୱାଦ୍‍ତଣ୍ଡ୍, ଅଣ୍ଡ୍‌ ଗୌରବମୟତେ ସିଂହାସନ୍‍ତାଗ୍ କୁଦିତଣ୍ଡ୍,”
MAT 25:32 ଜଗତ୍‍ତେ ସାରେ ଜାତିତ୍ ନାରୁଡ଼୍ ଅନ୍‌ ମୁନେ ଅଣ୍ଡୟ୍‌‍ ଆଦ୍‍ତଡ଼୍ । ଆସୁଟେ ମେକ୍‍ଗଲାଲ୍‍ ବେଦ୍‍ପୁଟୁଙ୍କ୍ ମେକା ନୁ ମେଣ୍ଢାକିଂଙ୍କ୍ ୱେରେ ମାଡ଼ିତନ୍, ନାରୁନ୍‍ପିଲେ ରକମ୍ ନାରୁଡ଼୍‍କିଂଙ୍କ୍ ରେଣ୍ଡ୍ ମାନ୍ଦେତେ ୱେରେ ମାଡ଼ିଦ୍‍ତଣ୍ଡ୍ ।
MAT 25:33 ଦାର୍ମିକ୍ ନାରୁଡ଼୍‍କିଂଙ୍କ୍ ଅଣ୍ଡ୍‌ ତିନ୍ଦେପାକ୍ ନୁ ୱେର୍‍ତଡ଼୍‍କିଙ୍କ୍ ଅନ୍‌ ଡେବ୍‍ପାକେ ନେହ୍‍ତିତଣ୍ଡ୍ ।
MAT 25:34 ତାନ୍‍ପେର୍କେ ଅନ୍‌ ତିନ୍ଦେପାକ୍ ମାନ୍ଦାନ୍ ନାରୁଡ଼୍‍କିଂଙ୍କ୍ ରାଜାଲ୍ କେତିତଣ୍ଡ୍, ୱାଡ଼ାଟ୍, ମିକିଂଙ୍କ୍ ନା ବାବାଲ୍ ଆର୍ଶିବାଦ୍ ମାଡ଼ିମିନ୍ଦେଣ୍ଡ୍ । ତିଆର୍‍ତେ ମୁନେଙ୍କ୍ ବେନ୍ ରାଜ୍ୟ ମିଇ ମାଇଦିଙ୍କ୍ ତିଆର୍ ଆସ୍‍ମିନ୍ଦେ, ୱାଡ଼ାଟ୍, ଆଗେ ନେଙ୍ଗାଟ୍‍ ।
MAT 25:35 ନାନ୍‍ନେ କାର୍‍ୱିନ୍ ମାତ୍‍ତାନ୍, ମିଡ଼୍ ନାକିଂଙ୍କ୍ ତିନ୍ଦାଙ୍କ୍ ହିତ୍‍ତିଡ଼୍‍; ନାକ୍ ଉନ୍ଦ୍‍ୱାହ୍‍ସ୍‍ ମାତ୍‍ତେ, ମିଡ଼୍‍ନାକିଙ୍କ୍ ହୁନ୍ଦାନ୍‍ ମାଇଦିଙ୍କ୍ ହିତ୍‍ତିଡ଼୍‍ । ନାନ୍‍ନେ ପୁନ୍‍ୱେ ମାତ୍‍ତାନ୍, ମିଡ଼୍ ନାକିଂଙ୍କ୍ ଲୋନ୍‌ କାର୍‍ଙ୍ଗିତିଡ଼୍ ।
MAT 25:36 ନାନ୍‍ନେ ବାଣ୍ଡା ମାତ୍‍ତାନ୍, ମିଡ଼୍ ନାକିଂଙ୍କ୍ ଚକାସେଡ଼ି କେର୍‍ସ୍ପିତିଡ଼୍ । ନାନ୍‍ନେ ରଗ୍‍ତେ ମାତ୍‍ତାନ୍, ନା ଯତନ୍ ଆତ୍‍ତିଡ଼୍‍ । ନାନ୍‍ନେ ବନ୍ଦିଲତ୍‍ତାଗେ ମାତ୍‍ତାନ୍, ନାକିଂଙ୍କ୍ ଉଡାଙ୍କ୍ ୱାତ୍‍ତିଡ଼୍ ।
MAT 25:37 ଦାର୍ମିକ୍ ନାରୁଡ଼୍‍ ଉତ୍ତର୍ ହିଦ୍‍ତଡ଼୍, “ପ୍ରବୁ ! ବେସୁଙ୍କ୍‍ ନିକିଂଙ୍କ୍ କାର୍‍ୱିନ୍ ମାନ୍ଦାନାଦ୍ ଉଡ଼ି ତିନ୍ଦାଙ୍କ୍ ହିତ୍‍ତମ୍‍ ? ବେସୁଙ୍କ୍‍ ନିକିଂଙ୍କ୍ ଉନ୍ଦେ ୱାତ୍‍ତାଦ୍ ଉଡ଼ି ହୁନ୍ଦାଙ୍କ୍ ହିତ୍‍ତମ୍‍ ?
MAT 25:38 ବେସୁଙ୍କ୍‍ ନିମ୍‍ ପୁନ୍‍ୱେ ଆୟ୍‍ୟକଟ ମାତ୍‍ୱେୟ୍‍ ନିକିଂଙ୍କ୍ କାର୍‍ଙ୍ଗିତିଡ଼୍ ମାଡ଼୍‍ତମ୍ ? ବେସୁଙ୍କ୍‍ ବାଣ୍ଡା ମାନ୍ଦାନାଦ୍ ଉଡ଼ି ଚକା କେର୍ସ୍ପତମ ?
MAT 25:39 ବେସୁଙ୍କ୍‍ ନିକିଂଙ୍କ୍ ରଗ୍‍ତେ ବା ବନ୍ଦି ଅବସ୍ଥାତେ ଉଡ଼ି ନିକିଂଙ୍କ୍ ସେବା ମାଡ଼୍‍ତମ୍ ?
MAT 25:40 ରାଜାଲ୍ ଉତ୍ତର୍ ହିତ୍‍ତଣ୍ଡ୍, ନାନ୍‍ନେ ସତ୍ କେତୁତାନ୍, ହି ଦାଦାଲଡ଼୍ ଲୋପେ ସାର୍‍ରେତଡ଼୍‍ ଡ଼ାଗାଙ୍କ୍ ସୁଦୁର୍ ମାଇଦିଙ୍କ୍ ବାତେଏ ମାଡ଼୍‍ତିଡ଼୍ ଆଦ୍ ନା ମାଇଦିଙ୍କ୍ ମାଡ଼ିତିଡ଼୍ ।”
MAT 25:41 ତାନ୍‍ପେର୍କେ ଡେବ୍‍ପାକେ ମାନ୍ଦାନ୍ ନାରୁଡ଼୍‍କିଂଙ୍କ୍ ଅଣ୍ଡ୍‌ କେତିତଣ୍ଡ୍, “ଆର୍ ଅବିଶାପ୍‌‍ତେ ମାନ୍ଦେ ! ନା ମୁନେକଙ୍କ୍ ଦୁରାମ୍ ଆୟ୍‍ମୁଟ୍‍ ।” ଶୟ୍‍ତାନ୍‍ ନୁ ତାନ୍ ଦୂତତେ ପେର୍କେ ଆଦାନଡ଼୍‍ ମାଇଦିଙ୍କ୍ ବେଗେ ସାରେଦିନା ନିଡ଼୍‍ତାନାଦ୍ କିସ୍ ତିଆର୍ ଆସ୍‍ମିନ୍ଦେ, ଆଗେ ଆନୁଟ୍ ।
MAT 25:42 ନାନ୍‍ନେ କାର୍‍ୱିନ୍ ମାତ୍‍ତାନ୍, ମିଡ଼୍ ନାକିଂଙ୍କ୍ ତିନ୍ଦାଙ୍କ୍ ହିୱିଡ଼୍‍ । ନାକ୍ ଉନ୍ଦେୱାହ୍‍ତେ ୱେୟ୍ ଏର୍‍ ହୁନ୍ଦାଙ୍କ୍ ହିୱିଡ଼୍‍ ।
MAT 25:43 ନାନ୍‍ନେ ପୁନ୍‍ୱେ ମାନ୍ଦାନ୍ ୱେୟ୍ ନାକ୍ ମିଇ ଲୋନ୍‌ କାର୍‍ଙ୍ଗିତିଡ଼୍ ମାଡ଼୍‍ୱିଡ଼୍ । ନାନ୍‍ନେ ବାତ୍‍କେର୍‍ୱେ ୱେୟ୍ ଚକାସେଡ଼ି କେର୍‍ସ୍ପିୱିଡ଼୍‍ । ରଗ୍‍ତେ ନୁ ବନ୍ଦି ଅବସ୍ଥାତେ ମାନ୍ଦାନ୍‍ୱେୟ୍‍ ନାକିଂଙ୍କ୍ ଉଡାଙ୍କ୍ ୱାଡ଼୍‍ୱିଡ଼୍‍ ।
MAT 25:44 ଆସୁଟେ ଅଡ଼୍‌ ଉତ୍ତର୍ ହିଦ୍‍ତଡ଼୍, “ପ୍ରବୁ, ବେସୁଙ୍କ୍‍ ନିକିଂଙ୍କ୍ କାର୍‍ପୟିତେ, ଉନ୍ଦେୱାହ୍‍ତେ, ପୁନ୍‍ୱେ, ବାତେଏ କେର୍‍ୱେ ୱେୟ୍, ରଗ୍‍ତେ ବା ବନ୍ଦି ମାନ୍ଦାନାଦ୍ ଉଡ଼ି ମାମ୍‍ମେ ନିକିଂଙ୍କ୍ ସାହାଯ୍ୟ ମାଡ଼ମ୍ ?”
MAT 25:45 “ରାଜାଲ୍ ଉତ୍ତର୍ ହିଦ୍‍ତଣ୍ଡ୍, ‘ନାନ୍ ସତ୍ କେତୁତାନ୍, ହି ସୁଦୁର୍ ନାରୁଡ଼୍ ଲୋପେଙ୍କ୍ ଅର୍‍ତୁଙ୍କ୍ ସାହାଯ୍ୟ ମାଡ଼ାଙ୍କ୍ ମନା ମାଡ଼ାନ୍‍ୱେୟ୍‍, ନିମ୍‍ ନାକିଂଙ୍କ୍ ସାହାଯ୍ୟ ମାଡ଼୍‍ୱିଡ଼୍ ।’
MAT 25:46 ହି ନାରୁଡ଼୍ ସାରେ ଦିନାତ୍ ମାଇଦିଙ୍କ୍ ଦଣ୍ଡ୍ ଆଦ୍‍ତଡ଼୍ ନୁ ଦାର୍ମିକିଡ଼୍‍ ସାରେଦିନାତ୍ ଜିୱୁନ୍ ଲାବ୍ ମାଡ଼ିତଡ଼୍ ।
MAT 26:1 ହି ସାରେ ଶିକ୍ଷାଇସ୍‌ ତେର୍‍ସ୍ପ୍‍ତେ ପେର୍କେ ଜିସୁ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍,
MAT 26:2 ମିଡ଼୍ ପୁତ୍‍ତିଡ଼୍, ନିସ୍ତାର୍ ପାଣ୍ଡୁମ୍ ଆଦ୍‍ଦାନ୍ ମାଇଦିଙ୍କ୍ ମେଣ୍ଡ୍‍ରେଣ୍ଡ୍ ଦିନା ମିନ୍ଦେ ଇଦ୍ ମିଡ଼୍ ପୁତ୍‍ତିଡ଼୍ । ଆସୁଟେ ନାରୁନ୍‍ପିଲେ କ୍ରୁଶତାଗ୍ ତାର୍‍ପ୍ସାନ୍ ଆଦ୍‍ଦାନ୍ ମାଇଦିଙ୍କ୍ ସମର୍‍ପିତ ଆଦ୍‍ତନ୍ ।”
MAT 26:3 ହି ସମୟ୍‍ତେ ମୁକ୍ୟ ଦାଇତ୍ୟତେ ମାନ୍ଦାନ୍ ନୁ ବାଗାତଡ଼୍‍ ଯିହୁଦିନେତାଲଡ଼୍ ବେଡ଼ିୟ୍‍ଯାଜକ୍ କୟାପାନ୍‍ ଲୋତେ ଦୁୱାଡ଼୍‍ତାଗେ ଅଣ୍ଡୟ୍‌‍ୟାଗେ ଗୁଡ଼୍‍ତଡ଼୍ ।
MAT 26:4 ଜିସୁଙ୍କ୍ ବେନ ଚଲନାମାଡ଼ି ପୟ୍‍ସ୍ ରେହ୍‍ତାନ୍‍ ମାଇଦିଙ୍କ୍ ଚକ୍ରାନ୍ତ ମାଡ଼୍‍ତଡ଼୍ ।
MAT 26:5 ବାତେଙ୍କ୍ ଇତ୍‍କେ ଅଡ଼୍‌ କେତ୍‍ତଡ଼୍ “ହି ପାଡ଼୍‍ୟି ମାମ୍ ମାଡ଼ାନାଦ୍ ଲେକାମ୍ ହିଲକଟ୍ ମାତ୍‍କେ । ଆସୁଟେ ନାରୁଡ଼୍ ଅଶାନ୍ତି ମାଡ଼୍‍ପାର୍‍ୱେଡ଼୍‍ ।”
MAT 26:6 ଅନ୍‌‍ଦିନେ ଜିସୁ ବେତନିତାଗେ ମୁନେଙ୍କ୍ କୁଷ୍ଟରଗ ଆସ୍‍ମାନ୍ଦାନ୍ ଶିମୋନ୍ ଲୋନ୍‌ ମାତ୍‍ତଣ୍ଡ୍ ।
MAT 26:7 ଶିମୋନ୍‍ତେ ଲୋନ୍‌ ଜିସୁ ତିନ୍ଦାଙ୍କ୍ କୁଦାନ୍‍ୱେଲେ ୱେରଡ଼୍ ମୁତ୍‍ତେ ଅଣ୍ଡୟ୍‌ କାଲ୍‍ଦେ ତିଆର୍ ଆତ୍‍ତେ ଗିନେତାଗେ ମୁଲ୍ୟତାଦ୍ ସାୟ୍‍ତ୍‌ ଗାବ୍‍ତେ ନିୟ୍ ବର୍ତ୍ତି ମାଡ଼ି ଜିସୁନ୍ ତାଲେତ୍ ପର୍‍ର ତଶ୍‍ସିତ୍‍ତେ ।
MAT 26:8 ଶିଷ୍ୟଡ଼୍ ଇଦ୍ ଉଡ଼ି କପାମ୍ ଆଦ୍‍ତଡ଼୍ । ଅଡ଼୍‌ ତାଙ୍କ୍ କେତ୍‍ତଡ଼୍, “ହିସର୍ ନଷ୍ଟ ମାଡ଼୍‍ତି ବାତେଙ୍କ୍ ?
MAT 26:9 ହି ଗାବ୍‍ ମାନ୍ଦାନ୍ ନିୟ୍‍ଦିଙ୍କ୍ ନାର୍‍ଗେ ଡାବ୍‍ତେ ୱାମାଙ୍କ୍ ପାର୍‍ୱେନି ନୁ ଆଦ୍ ଦନ୍‍ତିଙ୍କ୍ ଗରିବ୍‍ନଡ଼୍‍କ୍ ଦାନ ମାଡ଼ିଦ୍‍ ପାର୍‍ୱେନି ।”
MAT 26:10 ଅଡ଼୍‌ ବାତ୍‍ କେତୁତଡ଼୍, ଜିସୁ ପୁଞ୍ଜ୍‍ମେଣ୍ଡେ କେତ୍‍ତଣ୍ଡ୍, “ଆଦ୍ ମୁତେଙ୍କ୍ ବାତେଙ୍କ୍ ଅଇରାନ୍ ମାଡ଼ୁତିଡ଼୍ ? ନା ମାଇଦିଙ୍କ୍ ଆଦ୍ ଅଣ୍ଡୟ୍‌ ସାୟେତ୍ ନୁ ସୁନ୍ଦର୍ ପାଡ଼୍‍ୟି ମାଡ଼୍‍ତେ ।”
MAT 26:11 ଗରିବ୍‍ ନାରୁଡ଼୍‍କିଂଙ୍କ୍ ମିଡ଼୍ ସାରେଦାମ୍ ପାହେମ୍‍ ଆଦ୍‍ତିଡ଼୍ ବାତେଙ୍କ୍ ଇତ୍‍କେ ନାକିଂଙ୍କ୍ ସାରେଦାମ୍ ପାହେମ୍‍ ଆୟ୍‍ୱିଡ଼୍‍ ।
MAT 26:12 ନା ତାଲ୍‍ତାଗ୍‍ ଗାବ୍‍ ମାନ୍ଦାନ୍ ନିୟ୍ ତଶ୍‍ସି ଆଦ୍ ନାକିଂଙ୍କ୍ ସମାଦି ଇଦାନଙ୍କ୍ ତିଆର୍ ମାଡ଼୍‍ତେ ।
MAT 26:13 ନାନ୍‍ନେ ମିକିଂଙ୍କ୍ ନିଜାମ୍‍ କେତୁତାନ୍, ସାରେ ଜଗତ୍‍ତାଗେ ଯେ ବେନ୍‌ଆଇ ପଡ଼ିୟେତାଗ୍, ଇ ସୁସମାଚାର୍ ପ୍ରଚାର୍ ଆଦ୍‍ତେ, ଇ ମୁତ୍‍ତେ ବାତେଏ ମାଡ଼ିତେ, ତାଙ୍କ୍ ହେର୍କା ମାଡ଼ି ଆଦିଙ୍କ୍ ଆନ୍‌‍ତେ ଲେକେ ୱେୟିତିତ୍ ।
MAT 26:14 ଜିସୁନ୍ ବାରଜାନ୍ ଶିଷ୍ୟଡ଼୍ ଲପ୍ ଇଷ୍କାରିୟ ଯିହୁଦା ପେଦେର୍ ତଣ୍ଡ୍ ୱେରଣ୍ଡ୍ ଶିଷ୍ୟ ମୁକ୍ୟ ଯାଜକିଡ଼୍‍ ଗାର୍‍ରେ ଆଞ୍ଜ୍ ପାଚ୍ରା ମାଡ଼୍‍ତଣ୍ଡ୍,
MAT 26:15 “ଜିସୁଙ୍କ୍ ପସ୍ପିତ୍‍କେ ନାକିଂଙ୍କ୍ ବାତେଏ ଇଦ୍‍ତିଡ଼୍ ?” ଅଡ଼୍‌ ଅଂକିଙ୍କ୍‌ ତିରିଶ୍‍ଟାନ୍ ରୁପାମୁଦ୍ରାଲେକି ଇତ୍‍ତଡ଼୍ ।
MAT 26:16 ଆଦ୍ ଦିନ୍ କଞ୍ଜ୍ ଜିସୁଙ୍କ୍ ଅଡ଼୍‌ କାୟ୍‍ଦେ ପସ୍ପିଦାନ୍‍ ମାଇଦିଙ୍କ୍ ଯିହୁଦାଲ୍‍ ସୁଯଗ୍‍ ମେହ୍‍କ୍‍ ତଣ୍ଡ୍ ।
MAT 26:17 ତାଡ଼ି ଶୁନ୍ୟ ରୂଟି ପାଣ୍ଡୁମ୍‍ତେ ମୁନେତ୍ ଦିନେତେ ଶିଷ୍ୟଡ଼୍ ୱାସ୍ ଜିସୁଙ୍କ୍ ପାଚ୍ରା ମାଡ଼୍‍ତଡ଼୍, “ମାମ୍ ବେଗାକଞ୍ଚ୍ ନି ମଇଦିଙ୍କ୍ ନିସ୍ତାର୍ ପାଣ୍ଡୁମ୍ ବଜ ତିଆର୍ ମାଡ଼ିତମ୍ ?”
MAT 26:18 ଜିସୁ ଉତ୍ତର୍ ହିତ୍‍ତଣ୍ଡ୍, “ସହର୍‍ତାଗ୍ ଆଞ୍ଜ୍ ଆଦ୍ ବେନ୍‌ଆଇ ନାରୁଙ୍କ୍ କେତିତିଡ଼୍, ‘ଗୁରୁ କେତୁତଣ୍ଡ୍ ନାୟାଦ୍ ଦିନାମ୍ ଗାର୍‍ରେ ହେୱ୍‍ସ୍‍ ୱାସମିନ୍ଦେ । ତାନ୍ ଶିଷ୍ୟଡ଼୍ ତ ମିଇ ଲୋନ୍‌ ଅଣ୍ଡ୍‌ ନିସ୍ତାର୍ ପାଣ୍ଡୁମ୍ ପାଲନ୍ ମାଡ଼ିତନ୍ ।’”
MAT 26:19 ଜିସୁ କେତ୍‍ତାନ୍ ଲେକାମ୍ ଶିଷ୍ୟଡ଼୍ ନିସ୍ତାର୍ ପାଣ୍ଡୁମ୍ ବଜ୍ ମିଟିଙ୍କ୍ ମାଡ଼୍‍ତଡ଼୍ ।
MAT 26:20 ମୁଲ୍‍ପୁଟ୍ ଆତ୍‍ତାଙ୍କ୍ ଜିସୁ ନୁ ବାରଜାନ୍ ଶିଷ୍ୟଡ଼୍ ତିନ୍ଦାଙ୍କ୍ କୁଦ୍‍ତଡ଼୍ ।
MAT 26:21 ତିନ୍ଦାନ୍ ୱେୟ୍ ଜିସୁ କେତ୍‍ତଣ୍ଡ୍, “ନାନ୍ ମିକିଂଙ୍କ୍ ସତ୍ କେତୁତାନ୍, ମିଇ ଲୋପେଙ୍କ୍ ୱେରଣ୍ଡ୍ ନାକିଂଙ୍କ୍ ଶତ୍ରୁଡ଼୍ କାଇଦେ ସମର୍‍ପନ୍ ମାଡ଼ିତନ୍ ।”
MAT 26:22 ଶିଷ୍ୟଡ଼୍ ଗାଟି ଦାନ୍ଦେ ଆଶେ ୱେରନ୍ ପେର୍କେ ୱେରନ୍ ଜିସୁଙ୍କ୍ ପାଚ୍ରା ମାଡ଼୍‍ତଡ଼୍, ନିମ୍‍ ନିଜାମ୍ ନାକିଂଙ୍କ୍ ଉଡ଼ି କେଲ୍‍ୱିନ୍‍ ।
MAT 26:23 ଜିସୁ କେତ୍‍ତଣ୍ଡ୍, “ବେନ ନା ତଡ଼୍ ୱେରଡ଼୍ ପାତ୍ରତାଗେ ରୂଟି ଲିହ୍‍ତିତଣ୍ଡ୍, ଅଣ୍ଡ୍‌ ନାକିଂଙ୍କ୍ ଶତ୍ରୁଡ଼୍ କାଇଦେ ସମର୍‍ପନ୍ ମାଡ଼ିତନ୍ ।
MAT 26:24 ଶାସ୍ତ୍ରତାଗ୍ ଲେକ୍‍ତାଦ୍ ଲେକାମ୍‍ତେ ନାରୁନ୍‍ପିଲେ ଡଲିତଣ୍ଡ୍, ବାତେଙ୍କ୍ ଇତ୍‍କେ ନାରୁନ୍‍ପିଲେତିଙ୍କ୍ ବେନ ପସ୍ପିଦ୍‍ତଣ୍ଡ୍, ଅନାଦ୍‌ ଦଶା ବେସର୍ ବୟଙ୍କର୍ ଆଦ୍‍ତେ ! ବେସୁଙ୍କ୍‍ ଜନମ୍ ଆୟ୍‍ୟକଟ ମାତ୍‍କେ ଅନ୍‌ ମାଇଦିଙ୍କ୍ ସାୟ୍‍ ଆୟେଡ଼୍‍ ।”
MAT 26:25 ଶତ୍ରୁଡ଼୍ କାଇଦେ ସମର୍‍ପନ୍ ମାଡ଼ାନ୍ ଯିହୁଦାଲ୍‍ ତେଦି ପାଚ୍ରା ମାଡ଼୍‍ତଣ୍ଡ୍, “ଗୁରୁ, ନିମ୍‍ ନାକିଂଙ୍କ୍ ଉଡ଼ି କେଲ୍‍ୱିନ୍‍ ତ !” ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ନିମ୍‍ ଆଦ୍ କେତୁତିନ୍ ।”
MAT 26:26 ଅଡ଼୍‌ ତନ୍ଦାନ୍‍ ସମୟ୍‍ତେ ଜିସୁ ୱେରଡ଼୍ ରୂଟି ଅସ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତଣ୍ଡ୍ ନୁ ଆଦିଙ୍କ୍ ଉସ୍ ଶିଷ୍ୟଡ଼୍‍କିଂଙ୍କ୍ ଇସ୍‌ କେତ୍‍ତଣ୍ଡ୍, “ଆୟ୍‍ମୁଟ୍, ତିନୁଟ୍‍, ହିଦ୍ ନାୟାଦ୍ ମେନ୍ଦୁଲ୍ ।”
MAT 26:27 ତାନ୍‍ପେର୍କେ ଅଣ୍ଡ୍‌ ଦେବ୍‍ତିଙ୍କ୍ ଆସ୍ ଇଶ୍ୱରତିଙ୍କ୍‍ ଦନ୍ୟବାଦ୍ ଇତ୍‍ତଣ୍ଡ୍ ନୁ ଆଦ୍ ଶିଷ୍ୟଡ଼୍‍କିଂଙ୍କ୍ ଇସ୍‌ କେତ୍‍ତଣ୍ଡ୍, “ମିଡ଼୍ ସାରେ ଇଗାଙ୍କ୍ ଉନୁଟ୍‍ ।
MAT 26:28 ଇଦ୍ ନାୟାଦ୍ ନେତୁର୍ । ନାରୁଡ଼ାଦ୍ ପାପ୍ କ୍ଷମାତେ ମାଇଦିଙ୍କ୍ ନାନ୍‍ନେ ନା ବେନ୍ ନେତୁର୍‍ ତଶ୍‍ସିଦାଙ୍କ୍ ଆଦୁତାନ୍, ବେଦ୍ ଇଶ୍ୱର୍‌ତେ ପୁନାଦ୍ ନିୟମ୍‍ତିଙ୍କ୍ ମୁଦ୍ରାଙ୍କିତ ମାଡ଼ିତ୍ ।
MAT 26:29 ନାନ୍‍ନେ କେସ୍ ନେହ୍‍ତୁତାନ୍‍, ନା ବାବାନ୍ ରାଜ୍ୟତାଗେ ମିଇ ତ ପୁନାଦ୍ ଦ୍ରାକ୍ଷାରସ୍ ଉନ୍‍ନା ଯାକ ନାନ୍ ମେଣ୍ଡେ ବେସୁଙ୍କ୍‍ ଅଙ୍ଗୁର୍‌ରସ୍ ଉନ୍‍ନନ୍ ।”
MAT 26:30 ଆଦିନ୍ ପେର୍କେ ଅଡ଼୍‌ ଦନ୍ୟବାଦ୍ ପାଟା ପାର୍‍ରି ମେଟେତାଗେ ଆତ୍‌ତଡ଼୍ ।
MAT 26:31 ଆଦ୍ ସମୟ୍‍ତେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନେଣ୍ଡ୍ ନାର୍‍କେତ୍ ମିଡ଼୍ ସାରେ ନାକିଂଙ୍କ୍ ୱିଡ଼୍‍ସି ଆଦ୍‍ତିଡ଼୍ । ଶାସ୍ତ୍ରତାଗ୍ ଲେକାମିନ୍ଦେ, ନାନ୍ ମେଣ୍ଢା ପଡ଼୍‍ପାନଙ୍କ୍ ଆୱ୍‍କିତାନ୍‍ ନୁ ମେଣ୍ଢା ୱେରେ ୱେରେ ଆଦ୍‍ତା ।
MAT 26:32 ବାତେଙ୍କ୍ ଇତ୍କେ ନାନ୍‍ନେ ମେଣ୍ଡେ ଆଦ୍ ଅଦିକ୍‌ ମିଇ ମୁନେଙ୍କ୍ ଗାଲିଲୀତାଗ୍ ଆଦ୍‍ତାନ୍ ।”
MAT 26:33 ପିତର୍ ଜିସୁଙ୍କ୍ କେତ୍‍ତଣ୍ଡ୍, “ସାର୍‍ତଡ଼୍ ନିକିଂଙ୍କ୍ ୱିଡ଼୍‍ସି ଆତ୍‍କେ ବା ନାନ୍‍ନେ ବେସୁଙ୍କ୍‍ ବା ଆନନ୍ ।”
MAT 26:34 ଜିସୁ ପିତର୍‍ତିଙ୍କ୍ କେତ୍‍ତଣ୍ଡ୍, ନାନ୍‍ନେ ନିଜାମ୍‍ କେତୁତାନ୍, ନେଣ୍ଡ୍ ନାର୍‍କେତ୍ କର୍କ୍‍କୁସାନ୍ ମୁନେଙ୍କ୍ ନିମ୍‍ ନାକିଂଙ୍କ୍ ପୁନନ୍ ଇଞ୍ଜ ମୁଣ୍ଡ୍‍ଦାମ୍ କେତିତିନ୍ ।
MAT 26:35 ପିତର୍ ଉତ୍ତର୍ ହିତ୍‍ତଣ୍ଡ୍, “ନି ତ ଡଲାଙ୍କ୍ ଇତ୍‍ତ୍କେ ବା ନାନ୍‍ନେ ବେସୁଙ୍କ୍‍ ନିକିଂଙ୍କ୍ ଅସ୍ୱୀକାର୍ ମାଡ଼ନ୍ ।” ବାଗାତ୍ ଶିଷ୍ୟଡ଼୍ ଆନ୍‌‍ତେ ସାରେ ରକମ୍ କେତ୍‍ତଡ଼୍ ।
MAT 26:36 ତାନ୍ ପେର୍କେ ଜିସୁ ଶିଷ୍ୟଡ଼୍ ତ ଗେତ୍‍ସମନି ପେଦେର୍‍ତେ ୱେରଡ଼୍ ପଡ଼ିୟେତାଗ୍ ଆଞ୍ଜ୍ କେତ୍‍ତଡ଼୍, “ମିଡ଼୍ ହିଗ୍ ସେନେକ୍‍ କୁଦାଟ୍‍ । ନାନ୍‍ନେ ଆଗେ ଆଞ୍ଜ୍ ମାଡ଼ିତାନ୍ ।”
MAT 26:37 ଆଦ୍ ପିତର୍ ନୁ ଜେବଦିନ୍ ଇର୍‍ୱୁଡ଼୍ ମାର୍‍କିଙ୍କ୍ ଅନ୍‌‍ତଡ଼୍ ଆତ୍‍ତେ । ଆସୁଟେ ଜିସୁ ଗାଟି ଦୁଃକ ଯନ୍ତ୍ରତାଗେ ବ୍ୟାକୁଲ ଆତ୍‍ତଣ୍ଡ୍ ।
MAT 26:38 ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଦୁଃକତେ ନା ହୃଦୟ୍ ୱାଡ଼୍‍କୁତ୍‍ । ହିଗେ ନାକିଙ୍କ୍‌ କେପି ମାନୁଟ୍ ।”
MAT 26:39 ଜିସୁ ସୁଦୁର୍ ଦୁରାମ୍ ଆଞ୍ଜ୍ ବୁମ୍‍ତାଗେ ମକମ୍ ମଦଲ୍ ମାଡ଼ି ପ୍ରାର୍ତନା ମାଡ଼୍‍ତଣ୍ଡ୍, “ବାବାଲ୍ ! ଯଦି ନିଜାମ୍ ଆତ୍‍କେ, ଇ ଦୁଃକାମ୍‍ତାଦ୍ ଦାୟାକ୍ ନାୟାଗାଙ୍କ୍ ଦୁର୍‍ ମାଡ଼ା, ବାତେଙ୍କ୍ ଇତ୍‍କେ ନା ଇଚ୍ଛା ଆୟ୍‍ୟ, ନିୟାଦ୍ ଇଚ୍ଛା ସାରେ ଆୟି ।”
MAT 26:40 ତାନ୍ ପେର୍କେ ଅଣ୍ଡ୍‌ ମୁୱୁଡ଼୍‍ ଶିଷ୍ୟଡ଼୍ ଗାର୍‍ରେ ମାଲ୍‍ସ୍ ୱାସ୍ ଉଡ଼୍‍ତଣ୍ଡ୍, ଅଡ଼୍‌ ପୁଞ୍ଜ୍ ମିନ୍ଦେଡ଼୍‍ । ଜିସୁ ପିତର୍‍ତିଙ୍କ୍ କେତ୍‍ତଣ୍ଡ୍, “ମିଡ଼୍ ମୁୱୁଡ଼୍‍ ଯାକ ନା ତଡ଼୍ ୱେରଡ଼୍ ଗାଣ୍ଟା ଯାକ କେପ୍‍ପେ ପାର୍‍ୱିଡ଼୍ ?
MAT 26:41 ପରିକ୍ଷାତେ ବେଦ୍‍ପୁଟୁଙ୍କ୍ ଆଗ୍ ଆୟ୍‍ୱିଡ଼୍‍, ଆଦିନ୍ ମାଇଦିଙ୍କ୍ କେପିମେଣ୍ଡେ ପ୍ରାର୍ତନା ମାଡ଼ାଟ୍ । ମିୟାଦ୍ ଆତ୍ମା ଉଦ୍‍ଯଗ, ବାତେଙ୍କ୍ ଇତ୍‍କେ ମେନ୍ଦୁଲ୍ ଦୁର୍ବଲ୍ ।”
MAT 26:42 ଜିସୁ ମେଣ୍ଡନ୍ ଦାମ୍ ଆଞ୍ଜ୍ ପ୍ରାର୍ତନା ମାଡ଼୍‍ତଣ୍ଡ୍, “ବାବାଲ୍ ! ଯଦି ହି ଦୁଃକାମ୍‍ତେ ପାନପାତ୍ରତିଙ୍କ୍ ନାୟାଗାଙ୍କ୍ ଯେକା ମାଡ଼ାଙ୍କ୍ ଆୟ୍‍ୟ ନୁ ନାକିଂଙ୍କ୍ ଆଦ୍ ଉନ୍ଦ୍‍ୱେୟ୍‍ତିତ୍‍, ନିୟାଦ୍ ଇଚ୍ଛା ସାରେ ସଫଲ ଆୟି ।”
MAT 26:43 ଅଣ୍ଡ୍‌ ମେଣ୍ଡନ୍ ଦାମ୍ ୱାସ୍ ଶିଷ୍ୟଡ଼୍ ଉଞ୍ଜିମାନ୍ଦାନାଦ୍‍ ଉଡ଼୍‍ତଣ୍ଡ୍ । ଅଡ଼୍‌ କଣ୍ଡା ତେର୍‍ସ୍‍ ଉଡ଼ି ମାନ୍ଦ୍ ପାର୍‍ୱ କଟ ମାତ୍‍ତଡ଼୍ ।
MAT 26:44 ଜିସୁ ଅଡ଼୍‌‍କିଂଙ୍କ୍ ୱିଡ଼୍‍ସି ସୁଦୁର୍ ଦୁରାମ୍ ଆଞ୍ଜ୍ ମୁଣ୍ଡ୍‍ଦାମ୍‍ତେ ଆଦେପଟୁଙ୍କ୍ ପ୍ରାର୍ତନା ମାଡ଼୍‍ତଣ୍ଡ୍ ।
MAT 26:45 ତାନ୍ ପେର୍କେ ଶିଷ୍ୟଡ଼୍ ଗାର୍‍ରେ ୱାସ୍ କେତ୍‍ତଣ୍ଡ୍, “ମିଡ଼୍ ଇଞ୍ଜେକ୍ ଆଇନା ଉଞ୍ଜି ରମୁତିଡ଼୍‍ ? ଉଡ଼ାଟ୍, ନାରୁନ୍‍ପିଲେ ଦୁଷ୍ଟ ନାରୁଡ଼୍ କାୟ୍‍ଦେ ସମର୍‍ପିତ ଆଦ୍‍ଦାନ୍ ଦିନାମ୍ ହେୱ୍‍ତେ ।
MAT 26:46 ତେଦାଟ୍ ମାନାଡ଼୍‌ ଅଦିକା, ଉଡ଼ାଟ୍, ବରନ ନାକିଂଙ୍କ୍ ଶତ୍ରୁଡ଼୍‌ କାଇଦେ ପସ୍ପିତେ ନାରୁଡ଼୍ ୱାସ୍ ହେୱ୍‍ସ୍‍ ମିନ୍ଦେଣ୍ଡ୍ ।”
MAT 26:47 ଜିସୁ ହି ଗଟ୍ କେତ୍‍ତାନ୍ ୱେୟ୍, ଅନ୍‌ ବାରଶିଷ୍ୟଡ଼୍‍ ଲପ୍ ଯିହୁଦା ପେଦେର୍‍ତେ ଶିଷ୍ୟ ୱାସ୍ ହେୱ୍‍ତଣ୍ଡ୍ । ଅନ୍‌ ତଡ଼୍ ସୁରି ନୁ ଟେଙ୍ଗା ପୟ୍‍ସ୍ ନାର୍‍ଗେ ନାରୁଡ଼୍ ଆଗେ ଗୁଡ଼୍‍ତଡ଼୍ । ଅଡ଼୍‌‍କିଂଙ୍କ୍ ମୁକ୍ୟ ପୁଜାରି ନୁ ଦର୍ମନେତାଲଡ଼୍‍ ରୟ୍‍ସ୍ ମାତ୍‍ତଡ଼୍ ।
MAT 26:48 ବିଶ୍ୱାସ୍ ଆୟ୍‍ୱିଡ଼୍ ଯିହୁଦାଲ୍‍ ଅଡ଼୍‌‍କିଂଙ୍କ୍ ୱେରଡ଼୍ ସଙ୍କେତ ହିଦାନ୍ ମାଇଦିଙ୍କ୍ ଟିକ୍ ମାଡ଼ିମାତ୍‍ତଣ୍ଡ୍ । ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ବେନ୍ ନାରୁଙ୍କ୍ ନାନ୍‍ନେ ସୁମା ହିଦ୍‍ତାନ୍, ଅଂକିଙ୍କ୍‌ ମିଡ଼୍ ମେହେକୁତିଡ଼୍ । ଅଂକିଙ୍କ୍‌ ପୟ୍‍ତିଡ଼୍‍ ।
MAT 26:49 ଯିହୁଦାଲ୍‍ ଆଞ୍ଜଡ଼େ ଜିସୁନ୍ ଗାର୍‍ରେ ଆଞ୍ଜ୍ ଅଂକିଙ୍କ୍‌ ନମସ୍କାର୍ ମାଡ଼ି ସୁମା ହିତ୍‍ତଣ୍ଡ୍ ।
MAT 26:50 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ସାଙ୍ଗ, ନିୟାଦ୍ ପାଡ଼୍‍ୟି ସିଟ୍‍ପାଟ୍ ତେର୍‍ସ୍ପାନ୍ ।” ତାନ୍ ପେର୍କେ ଅଡ଼୍‌ ଜିସୁଙ୍କ୍ ପୟ୍‍ସ୍ ବନ୍ଦି ମାଡ଼୍‍ତଡ଼୍ ।
MAT 26:51 ଜିସୁନ୍ ପାକାଙ୍କ୍ ୱେରଣ୍ଡ୍ ନାରୁଡ଼୍ ନିଜେତ୍ ସାକୁ ପେସ୍‍ପି ମୁକ୍ୟ ପୁଜାରିନ୍ ଚାକର୍‍ତିଙ୍କ୍ ରେହ୍‍ତଣ୍ଡ୍ । ଆଦ୍ ନାରୁନ୍ କେୱୁ ତେଗ୍‍ତେ ।
MAT 26:52 ଜିସୁ ପିତର୍‌ତିଙ୍କ୍‌ କେତ୍‍ତଣ୍ଡ୍, “ନି ସାକୁତିଙ୍କ୍ ତାନ୍ ପଡ଼ିୟେତାଗ୍ ନେହେମ୍ । ବେନଡ଼୍ ସାକୁତେ ଲାଗେମ୍‍ ଆଦ୍‍ତଡ଼୍, ଅଡ଼୍‌ ସାକୁତେକେ ଡଲିତଡ଼୍ ।
MAT 26:53 ମିଡ଼୍ ବାତେଏ ପୁନ୍‍ୱିଡ଼୍, ନାନ୍‍ନେ ନା ବାବାଙ୍କ୍ ସାହାଯ୍ୟ ତାଲ୍‍କାନ୍ ହିତ୍‍କେ, ଅଣ୍ଡ୍‌ ନା ମାଇଦିଙ୍କ୍ ସାଙ୍ଗେ ସାଙ୍ଗେ ବାର୍‍ଟାନ୍ ବାହିନିକିନ୍‍ ୱିଡ଼୍‍ସି ନାର୍‍ଗେ ଦୂତକିଙ୍କ୍ ରହତ୍‍ ପାର୍‍ତଣ୍ଡ୍ ?
MAT 26:54 ବାତେଙ୍କ୍ ଇତ୍‍କେ ଆଲାଇତ୍‍କେ ହିସାର୍‍ରେ ଗଟେମ୍ ଆଦ୍‍ତେ ଇଞ୍ଜ ଶାସ୍ତ୍ରତାଗ୍ ବାତ୍ ଲେକାମିନ୍ଦେ, ଆଦ୍ ସାରେ ଆଦ୍‍ତେ ବେଦ୍‍ପୁଟୁଙ୍କ୍ ?”
MAT 26:55 ଜିସୁ ତାନ୍‍ପେର୍କେ ଗୁଡ଼୍‍ଡି ମାନ୍ଦାନ୍ ଆଦ୍ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, ନାନ୍ ବାତେଏ ୱେରଣ୍ଡ୍ ଡଙ୍ଗାଲ୍, ସାକୁ ଟେଙ୍ଗା ପୟ୍‍ସ୍ ନାକିଂଙ୍କ୍ ପୟ୍‍ଦାଙ୍କ୍ ୱାତ୍‍ତିଡ଼୍ ? ସାରେ ଦିନା “ନାନ୍‍ନେ ମନ୍ଦିର୍ ତାଗ୍ କୁଦି ଶିକ୍ଷା ଇସମାତ୍‍ତାନ୍‍, ଆସୁଙ୍କ୍ ତ ନାକିଂଙ୍କ୍ ପୟ୍‍ୱିଡ଼୍‍ !
MAT 26:56 ଅଣ୍ଡ୍‌ ବାତ୍‍ଆଇ, ବାବବାଦୀଡ଼୍ ଶାସ୍ତ୍ରତାଗ୍ ବାତା ଲେକିମିନ୍ଦେଡ଼୍, ଆଦ୍ ସାରେ ସପଲ୍‍ ଆଦ୍‍ଦାନ୍ ମାଇଦିଙ୍କ୍ ହିଦ୍ ଗଟେମ୍ ଆଦୁତ୍‍ ।” ଆଦ୍ ସମୟ୍‍ତେ ଶିଷ୍ୟଡ଼୍ ସାରେତଡ଼୍ ଜିସୁଙ୍କ୍ ୱିଡ଼୍‍ସି ମିର୍‍ତଡ଼୍ ।
MAT 26:57 ଜିସୁଙ୍କ୍ ପସ୍ପିତ୍‍ନଣ୍ଡ୍ ଅଂକିଙ୍କ୍‌ ବେଡ଼ିଇ ଯାଜକ୍‍ତାଗେ କୟାପାନ୍‍ ଲୋନ୍‌ ଆତ୍‍ତଡ଼୍ । ଆଗେ ଦର୍ମଗୁରୁ ନୁ ଦର୍ମନେତାଲଡ଼୍‍ ସମବେତ ଆଶେ ମାତ୍‍ତଡ଼୍ ।
MAT 26:58 ପିତର୍ ସୁଦୁର୍ ଦୁରାମ୍ ମାଞ୍ଜ୍ ଜିସୁଙ୍କ୍ ପେର୍କେ ଆଞ୍ଜମାତ୍‍ତଣ୍ଡ୍ ନୁ ଅଣ୍ଡ୍‌ କୟାପାନ୍‍ ଲୋନ୍‌ ଗେଟ୍‍ ଯାକ ଆତ୍‍ତଣ୍ଡ୍ । ହି ସାରେ ଗଟ୍‍ନାତେ ପରିନତ ବାତେଏ ଆଦ୍‍ତେ, ଉଡ଼ାନ୍ ମାଇଦିଙ୍କ୍ ପିତର୍ ଆଗେ ପ୍ରହରିନାରୁଡ଼୍‍ ତ କୁଦ୍‍ତଣ୍ଡ୍ !
MAT 26:59 ମୁକ୍ୟ ଯାଜକ୍‍କିଡ଼୍‍ ନୁ ବେଡ଼ିୟ୍‍ମିଟିଙ୍କ୍‍ତେ ସଦସିଡ଼୍‍ ଜିସୁଙ୍କ୍ ଡଲାନ୍‍ଦଣ୍ଡ ହିଦାନ୍ ମାଇଦିଙ୍କ୍ ଅନ୍‌ ବିରୁଦ୍‍ତେ ବଲାନ୍‍ ପ୍ରମାନ୍ ଗୁଡ଼୍‍ପାନଙ୍କ୍ ଆଲ୍‍ସି ମାଡ଼୍‍ତଡ଼୍ ।
MAT 26:60 ନାର୍‍ଗେ ନାରୁଡ଼୍ ଜିସୁନ୍ ବିରୁଦ୍‍ତେ ବୁସା କେତ୍‍ତଡ଼୍ । ବାତେଙ୍କ୍ ଇତ୍‍କେ ରକମ୍ ବାତେମେଣ୍ଡେ ସତ୍ ପାହେମ୍‍ ଆୟ୍‍ୟଡ଼୍ । ଶେଷତେ ଇର୍‍ୱୁଡ଼୍ ତେଦ୍‍ତଡ଼୍‍ ।
MAT 26:61 ଅଡ଼୍‌ କେତ୍‍ତଡ଼୍, “ଇ ନାରୁଡ଼୍ କେସ୍‍ମାତ୍‍ତଣ୍ଡ୍, ନାନ୍ ଇଶ୍ୱର୍‌ତେ ମନ୍ଦିର୍‍ତିଙ୍କ୍ ଲିକି ମୁଣ୍ଡ୍‍ଦିନାତେ ଲପ୍ ଆଦିଙ୍କ୍ ମେଣ୍ଡେ ତିଆର୍ ମାଡ଼ିଦ୍‍ ପାର୍‍ଦ୍‍ତାନ୍‍ ?”
MAT 26:62 ବେଡ଼ିୟେ ପୁରହିତ୍‌ ନିସ୍ ଜିସୁଙ୍କ୍ କେତ୍‍ତଣ୍ଡ୍, ନିମ୍‍ ବାତ୍‍ତିଙ୍କ୍ ବାତେଏ କେଲ୍‍ୱି ? ନି ବିରୁଦ୍‍ତେ ହି ଅବିଯଗ୍ କଣ୍ଡନ୍‍ ମାଡ଼ାନଙ୍କ୍ ନିୟାଦ୍ ବାତେଏ କେତାନାଦ୍ ଇଲ୍‍ଲେ ?
MAT 26:63 ବାତେଙ୍କ୍ ଇତ୍‍କେ ଜିସୁ କଟ ମାତ୍‍ତଣ୍ଡ୍ । ବେଡ଼୍‍ୟାଦ୍‍ ଜାଜକ୍ କେତ୍ତଣ୍ଡ୍, ଜିୱୁନ୍‍ମାନ୍ଦାନ୍‍ ଇଶ୍ୱର୍‌ତେ ପେଦେର୍ ତେ ନାନ୍‍ନେ ନିକିଂଙ୍କ୍ ପାଚ୍ରା ମାଡ଼ୁତାନ୍, ସତ୍‍ତେ କେଲ୍‍ମ୍, ନିମ୍‍ ବାତେଏ ଇଶ୍ୱର୍‌ତେ ମାର୍‍ କ୍ରିଷ୍ଟ ନି ?
MAT 26:64 ଜିସୁ ଉତ୍ତର୍ ଇତ୍‍ତଣ୍ଡ୍, “ନିମ୍‍ ଟିକ୍ କେତୁତିନ୍ । ବାତେଙ୍କ୍ ଇତ୍‍କେ ନାନ୍‍ନେ ମିଇ ସାର୍‍ତଡ଼୍‍କ୍‍ କେତୁତାନ୍, ସିଟ୍‍ପାଟ୍ ନାରୁନ୍‍ପିଲେ ସାରେତିଙ୍ଗ୍ ଶକ୍ତିନଡ଼୍ ତିନ୍ଦେପାକ୍ କୁଦାଙ୍କ୍ ଆଦୁତନ୍, ମେଣ୍ଡେ ଅଂକିଙ୍କ୍‌ ସର୍ଗତାଗେ ମାବ୍‍ମୟଲ୍‍ତେ ତ ଡିଗି ୱାଦାନାଦ୍ ମିଡ଼୍ ଉଡ଼ିତିଡ଼୍ ।”
MAT 26:65 ଇଲା କେଞ୍ଜି ବେଡ଼୍‍ୟାଦ୍‍ ଯାଜକ୍ ନିଜେତ୍ ତାଦ୍‍ ଚକା ତିଙ୍କ୍ ହିକି ମେଣ୍ଡେ କେତ୍‍ତଣ୍ଡ୍, “ଇଦ୍ ତ ଇଶ୍ୱରତାଦ୍‍ ନିନ୍ଦ୍ । ମେଣ୍ଡେ ୱେରେ ସାକ୍ଷି ଦର୍‍କାର୍ ଇଲେ । ଇଞ୍ଜେକେ ହିନାଦ୍‍ ଇଶ୍ୱର୍‌ତେ ନିନ୍ଦ୍ ତ ନିମ୍‍ କେଞ୍ଜ୍‍ତିନ୍‍ ।
MAT 26:66 ଇ ବିଷୟ୍‍ତେ ମିୟାଦ୍ ମତ ବାତେଏ ?” ଅଡ଼୍‌ ଉତ୍ତର୍ ହିତ୍‍ତଡ଼୍, “ଅଣ୍ଡ୍‌ କାରାପ୍ ନାରୁନ୍, ଅଣ୍ଡ୍‌ ଡଲାନ୍ ମାଇଦିଙ୍କ୍ ଯଗ୍ୟ ।”
MAT 26:67 ତାନ୍‍ପେର୍କେ ଅଡ଼୍‌ ଜିସୁନ୍ ମକତାଗ୍‍ ଉସି ଅଂକିଙ୍କ୍‌ ରେହ୍‍ତଡ଼୍‍ । ବେସ୍‍କ୍‍ତୁଡ଼୍‍ ଅଂକିଙ୍କ୍‌ ଚାପୁଡ଼ା ରେହେସ୍ କେତ୍‍ତଡ଼୍,
MAT 26:68 “ଏୟ୍‍ଇ କ୍ରିଷ୍ଟ ! ନିମ୍‍ ବାବବାଦି ବାବବାନି ସୁଦୁଟ୍ କେଲ୍‍ଲା । ବେନ ନିକିଂଙ୍କ୍ ରେହ୍‍ତଣ୍ଡ୍, କେଲ୍‍ମ୍ ତ !”
MAT 26:69 ମୁକ୍ୟ ଜାଜକ୍ ବାୟ୍‍ଦେତ୍‍ ଦୁଆତାଗେ ପିତର୍ କୁଦିମାନ୍ଦାନ୍ ୱେଲେ ୱେରଣ୍ଡ୍ ଚାକର୍ ଗାର୍‍ରେ ୱାସ୍ କେତ୍‍ତଣ୍ଡ୍, ନିମ୍‍ ଆନ୍‌‍ତେ ଗାଲିଲୀୟ ଜିସୁନ୍ ତଡ଼୍ ମାତ୍‍ତିନ୍‍ ।
MAT 26:70 ବାତେଙ୍କ୍ ଇତ୍କେ ପିତର୍ ସାର୍‍ତଡ଼୍ ମୁନ୍‍ ଇଦ୍‌ଗଟ୍‍ ଅସ୍ୱୀକାର୍ ମାଡ଼ି କେତ୍‍ତଣ୍ଡ୍, “ନିମ୍‍ ବାତେଏ କେତୁତିନ୍, ନାନ୍‍ନେ ବୁଜେମ୍ ଆୟନ୍‍ ।”
MAT 26:71 ଇଲା କେସ୍ ଅଣ୍ଡ୍‌ ଦୁୱାଡ଼୍‌‍ତେ ଆର୍‍ଦେ ଗାର୍‍ରେ ଆତ୍‍ତଣ୍ଡ୍ । ମେଣ୍ଡେ ୱେରଣ୍ଡ୍ ଦାସ ଅଂକିଙ୍କ୍‌ ଉଡ଼ି ଆଗେ ମାନ୍ଦାନ୍ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, “ହିଣ୍ଡ୍ ନାଜରିତିୟ ଜିସୁନ୍ ତଡ଼୍ ମାତ୍‍ତଣ୍ଡ୍ ।”
MAT 26:72 ପିତର୍ ମେଣ୍ଡନ୍ ଦାମ୍ ଅସ୍ୱୀକାର୍ ମାଡ଼ି କେତ୍‍ତଣ୍ଡ୍, “ରାଣୱାଟି କେତୁତାନ୍, ଇଲ୍‍ଲେ ଆଦ୍ ନାରୁଙ୍କ୍ ନାନ୍‍ନେ ପୁନନ୍ ।”
MAT 26:73 ସୁଦୁଟ୍ ପେର୍କେ ଆଗେ ମାନ୍ଦାନ୍ ନାରୁଡ଼୍ ପିତର୍‍ତେ ଗାର୍‍ରେ ୱାସ୍ କେତ୍‍ତଡ଼୍ “ନିମ୍‍ ନିଜାମ୍ ଅଡ଼୍‌ ଲୋପେଙ୍କ୍ ୱେରେତନି । ନି ଗଟ୍ ତିର୍‍ୟାନାଗ୍ ଗଟ୍ ପୁନ୍ଦାଙ୍କ୍ ଆଦୁତ୍‍ ।”
MAT 26:74 ଆସୁଟେ ପିତର୍ କେତ୍‍ତଣ୍ଡ୍, “ରାଣ ଇସ୍‌ କେତୁତାନ୍, ନା ଗଟ୍ ସତ୍ । ସତ୍ ଆୟ୍‍ୟକଟ ମାତ୍‍କେ ଇଶ୍ୱର୍ ନାକିଂଙ୍କ୍ ଦଣ୍ଡ୍ ଇୱୀଣ୍ଡ୍ ।” ଆଦ୍ ନାରୁଙ୍କ୍ ନାନ୍‍ନେ ପୁନନ୍ । ଆସୁଟେ ସାଙ୍ଗେ ସାଙ୍ଗେ କର୍କ୍ କୁସ୍‍ତା ।
MAT 26:75 ଜିସୁ ବାତେଏ କେସ୍‍ମାତ୍‍ତଣ୍ଡ୍, ପିତର୍‍ତିଙ୍କ୍ ହେର୍କା ୱାତ୍‍ତେ, “କର୍କ୍ କୁସାନ୍‍ ମୁନେଙ୍କ୍ ନାକିଂଙ୍କ୍ ପୁନନ୍ ଇଞ୍ଜ ନିମ୍‍ ମୁଣ୍ଡ୍‍ଦାମ୍ କେତିତିନ୍ ।” ଅଣ୍ଡ୍‌ ବାୟିଦେ ଆଞ୍ଜ୍ ବ୍ୟାକୁଲ ଆଶେ କେୟ୍‍ତଣ୍ଡ୍ ।
MAT 27:1 ତାନ୍ ମେଣ୍ଡନ୍ ଦିନ୍ ନାର୍‍କା ଜିସୁଙ୍କ୍ ରେହ୍‍ତାନ୍‍ ମାଇଦିଙ୍କ୍ ମୁକ୍ୟ ଯାଜକ୍ ନୁ ଦର୍ମନେତାଲଡ଼୍‍ ରାଜି ଆଦ୍‍ତଡ଼୍ ।
MAT 27:2 ଅଡ଼୍‌ ଅଂକିଙ୍କ୍‌ ଇକ୍‍ଲେତେ ତହସ୍ ରମିୟ ସାର୍‍ରେ ରାଜ୍ୟତେ ରାଜ୍ୟପାଳ ପିଲାତନ୍‍ ଗାର୍‍ରେ ଆତ୍‍ତଡ଼୍ ।
MAT 27:3 ଶତ୍ରୁଡ଼୍ କାଇଦେ ହିଦାନ୍ ଯିହୁଦାଲ୍‍ କେଞ୍ଜ୍‍ତଣ୍ଡ୍ ଯେ, ଜିସୁଙ୍କ୍ ଦଣ୍ଡାଦେଶ ଆତ୍‍ତଣ୍ଡ୍, ଅଣ୍ଡ୍‌ ଅନୁତାପ୍‍ ମାଡ଼୍‍ତଣ୍ଡ୍ ତିରିଶ୍‍ଟାନ୍‍ ରୁପାଡ଼ାବ୍‍କ୍ ମାଲ୍‍ପିସ୍‍ କେତ୍‍ତଣ୍ଡ୍,
MAT 27:4 ୱେରନ୍ ନିର୍ଦଷ୍ ନାରୁନ୍ ନେତୁର୍‍ ସେଙ୍ଗେ ବିଶ୍ୱାସ୍ ଗାତକତା ମାଡ଼ି ନାନ୍‍ନେ ବେଡ଼୍‍ୟାଦ୍‍ ପାପ୍ ମାଡ଼୍‍ତାନ୍ । ଅଡ଼୍‌ ଉତ୍ତର୍ ହିତ୍‍ତଡ଼୍, “ମାୟାଦ୍‌ ଆଦିନାଗେ ବାତେଏ ମିନ୍ଦେ ? ଆଦ୍ ନିୟାଦ୍ ନିଜେତ୍ ଗଟ୍ ।”
MAT 27:5 ଯିହୁଦାଲ୍‍ ମୁଦ୍ରାକିଙ୍କ୍ ମନ୍ଦିର୍‍ତେ ଲୋପେ ହେସିସ୍‍ ଆତ୍‍ତଣ୍ଡ୍ । ତାନ୍ ପେର୍କେ ଆଞ୍ଜ୍ ଗୁଡ଼ୁଙ୍ଗାତାଗ୍ ନଡ଼ମ୍‍ ତହସ୍ ଗୁସ୍‍କ୍‍ ୱିଡ଼ି ଡଲ୍‍ତଣ୍ଡ୍ ।
MAT 27:6 ମୁକ୍ୟ ଯାଜକ୍ ମୁଦ୍ରାକିଙ୍କ୍ ପେହ୍‍କି କେତ୍‍ତନ୍‌, “ଇ ନେତୁର୍‍ତେ ମୁଲ୍ୟ । ହିୱ୍ ମନ୍ଦିର୍‌ତେ ବଣ୍ଡାର୍‌ତାଗେ ନେହ୍‍ତାନ୍‌ ନିୟମ୍‍ ବିରୁଦ୍‍ତେ ପାଡ଼୍‍ୟି ।”
MAT 27:7 ଆଦ୍ ଦନ୍‍ତିଙ୍କ୍ ବେଦ୍‍ପୁଟୁଙ୍କ୍ କର୍ସ ମାଡ଼ିତଡ଼୍, ହି ସମ୍ପର୍କତେ ୱେରଡ଼୍ ଆଲ୍‍ସି ମିକା ମାଡ଼ି “କୁମ୍ଭାର୍‍ତେ ୱାୟା,” ପେଦେର୍‍ତେ ସୁକୁକ୍ ୱାୟା ଆସ୍‍ତଡ଼୍‍ । ହିଦ୍ ବିଦେସିଡ଼୍‍ କବର୍ ହିଦାନ୍ ପଡ଼ିୟେ ଲେକାମ୍ ବ୍ୟବହୃତ ଆତ୍‍ତେ ।
MAT 27:8 ନେଣ୍ଡ୍‍ଜାକ ଆଦ୍ ୱାୟାଙ୍କ୍ ନେତୁର୍‍ ୱାୟା ଇଞ୍ଜ କେତୁତଡ଼୍ ।
MAT 27:9 ହିଦ୍‍ଲେକାମ୍ ଜିରିମୀୟ ବାବବାଦୀ କେସ୍‍ମାନ୍ଦାନ୍ ବାବବାନି ସାରେ ଆତ୍‍ତେ, “ବାତେଏ ତିରିଶ୍‍ପାଇସାତେ ୱାମାନ୍ ସେଙ୍ଗେ ଇସ୍ରାୟେଲିୟ ପେକଡ଼୍ ସମତ ମାଡ଼ିମାତ୍‍ତଡ଼୍ ଆଦ୍ ଆତ୍‍ତଡ଼୍,
MAT 27:10 ତିରିଶ୍‍ଟାନ୍‍ ମୁଦ୍ରାନେ ଅଡ଼୍‌ କୁମ୍ଭାର ୱାୟାଙ୍କ୍ ଆସ୍‍ତଡ଼୍‍ ହିଦ୍ ମାଡ଼ାନ୍ ଇଶ୍ୱର୍ ନାକିଂଙ୍କ୍ ଗଟ୍ ଇସ୍‌‍ମାତ୍‍ତନ୍ ।”
MAT 27:11 ଜିସୁଙ୍କ୍ ମୁନ୍‍ ଉଡ଼ି ରମିୟ ରାଜ୍ୟପାଲ ଅଂକିଙ୍କ୍‌ ପାଚ୍ରା ମାଡ଼୍‍ତଣ୍ଡ୍, “ନିମ୍‍ ବାତେଏ ଯିହୁଦିଡ଼୍ ରାଜାନି ?” ଜିସୁ ଅଂକିଙ୍କ୍‌ କେତ୍‍ତାନ୍, ହୋ ନିମ୍‍ ଆଦ୍ କେତୁତିନ୍ ।
MAT 27:12 ବାତେଙ୍କ୍ ଇତ୍‍କେ ବେଡ଼ିୟ୍‍ ଯାଜକ୍ ନୁ ଦର୍ମନେତାଲଡ଼୍‍ ଅନ୍‌ ବିରୁଦ୍ଦ୍‌ତେ ତାସ୍‍ମାନ୍ଦାନ୍ ଅବିଯଗ୍, ଅଣ୍ଡ୍‌ ବାତେଏ କେଲଣ୍ଡ୍ ।
MAT 27:13 ଆଦିଙ୍କ୍ ପିଲାତ ଅଂକିଙ୍କ୍‌ କେତ୍‍ତଣ୍ଡ୍, ନି ବିରୁଦ୍‍ତେ ଅଡ଼ାଦ୍‌ ଅବିଯଗ୍ ସାରେ ନିମ୍‍ ବାତେଏ କେଞ୍ଜ୍‍ୱିନି ?
MAT 27:14 ବାତେଙ୍କ୍ ଇତ୍କେ ଜିସୁ ଉତ୍ତର୍‍ତେ ୱେରଡ଼୍ ବା ଗଟ୍ କେଲ୍‍ୱାଙ୍କ୍ ପିଲାତ ଗାଟି ବାକ୍‍ୱା ଆତ୍‍ତଣ୍ଡ୍ ।
MAT 27:15 ୱିଜା ପାଣ୍ଡୁମ୍ ୱେଲେ ନାରୁଡ଼୍ ଇଚ୍ଛା ଲେକାମ୍ ରମିୟ ଶାସନ୍‍କର୍ତାଲ୍ ଯେ ବେନ୍‌ଆଇ ଅର୍‍ତୁଙ୍କ୍ ବନ୍ଦି ନାରୁଙ୍କ୍ ମୁକ୍ତି ହିଦାନ୍ ନିତିମାତ୍‍ତେ ।
MAT 27:16 ଆସୁଟେ “ବାରବ୍‍ବା,” ପେଦେର୍‍ତଣ୍ଡ୍ ୱେରଣ୍ଡ୍ କାରାପ୍ ପାଡ଼ିୟିଦେ ବନ୍ଦି ଆସ୍ ମାତ୍‍ତଣ୍ଡ୍ ।
MAT 27:17 ଆଗେ ୱାସ୍‍ମନ୍ଦାନ୍ ନାରୁଡ଼୍‍କିଂଙ୍କ୍ ପିଲାତ ପାଚ୍ରା ମାଡ଼୍‍ତଣ୍ଡ୍, “ନାନ୍‍ନେ ବେନଙ୍କ୍ ମୁକ୍ତିଇତାନ୍ ଇଞ୍ଜ ମିୟାଦ୍ ଇଚ୍ଛା ? ବାରବ୍‍ବାତିଙ୍କ୍ ନା ଜିସୁଙ୍କ୍ ବେନଙ୍କ୍ କ୍ରିଷ୍ଟ ହିଞ୍ଜ କେତାନଙ୍କ୍ ।
MAT 27:18 ପିଲାତ ସାୟ୍‍ ପୁଞ୍ଜ୍‍ମାତ୍‍ତଣ୍ଡ୍ ଯେ ଯିହୁଦି ନେତାନଡ଼୍ କର୍ତ୍ତୁପକ୍ଷଡ଼ିଡ଼୍ ଇର୍ଷାତେ ସମର୍‍ପନ୍ ମାଡ଼୍‍ତଡ଼୍ ।
MAT 27:19 ପିଲାତ ବିଚାର୍‍ପଡ଼ିୟେତାଗେ କୁଦିମାନ୍ଦାନ୍ ୱେୟ୍ ଅନ୍‌ ମୁତ୍‍ତେ ୱେରଡ଼୍ ଗଟ୍ ରହ୍‍ତେ ଆ ଦାର୍ମିକ୍ ନାରୁଙ୍କ୍ ବାତେଏ ମାଡ଼୍‍ମାଟ୍ । ନିନେତ୍‍ ନାର୍‍କେତ୍ ୱେରଡ଼୍ ସାପ୍‍ନେତେ ଅନ୍‌ ମାଇଦିଙ୍କ୍ ନାନ୍‍ନେ ନାର୍‍ଗେ ଦୁଃକାମ୍ ମାଡ଼୍‍ତାନ୍ ।”
MAT 27:20 ବେଡ଼୍‍ୟାଦ୍‍ ଯାଜକ୍ ନୁ ଦର୍ମନେତାଲଡ଼୍‍ ବାର୍‍ବ୍‍ବାଙ୍କ୍ ପେସ୍‍ପି, ଜିସୁଙ୍କ୍ ଡଲାନ୍ ଦଣ୍ଡ୍ ଇଦାନ୍ ମାଇଦିଙ୍କ୍ ପିଲାତଙ୍କ୍‍ ଦାବୀ ମାଡ଼ାନଙ୍କ୍ ନାରୁଡ଼୍‍କିଂଙ୍କ୍ ଅସ୍ପିତ୍‍ତଡ଼୍‍ ।
MAT 27:21 ପିଲାତ ମେଣ୍ଡେ ପାଚ୍ରା ମାଡ଼୍‍ତଣ୍ଡ୍, “ଇ ଇର୍‍ୱୁଡ଼୍ ଲପ୍ ନାନ୍‍ନେ ବେନଙ୍କ୍ ମୁକ୍ତି ମାଡ଼ିଦ୍‍ତାନ୍‍ ଇଞ୍ଜ ମିୟାଦ୍ ଇଚ୍ଛା ?” ଅଡ଼୍‌ କେତ୍‍ତଡ଼୍, “ବାରବ୍‍ବାଙ୍କ୍ ।”
MAT 27:22 ପିଲାତ ପାଚ୍ରା ମାଡ଼୍‍ତଣ୍ଡ୍, ଆଲାଇତ୍‍କେ କ୍ରିଷ୍ଟ ଇଞ୍ଜ ପୁଞ୍ଜ୍‍ମାନ୍ଦାନଙ୍କ୍ ବାତେଏ ମାଡ଼ିତାନ୍ ? “ଅଂକିଙ୍କ୍‌ କ୍ରୁଶତାଗେ ତାର୍‍ସ୍ପାଟ୍‍” ଇଞ୍ଜ ଅଡ଼୍‌ ସାରେତଡ଼୍ ମର୍‍ପୟ୍‍ତଡ଼୍‍ ।
MAT 27:23 ପିଲାତ ପାଚ୍ରା ମାଡ଼୍‍ତଣ୍ଡ୍, “ବାତେଙ୍କ୍ ଇତ୍‍କେ ଅଣ୍ଡ୍‌ ବାତେଏ ବୁଲ୍‍ ମାଡ଼୍‍ତଣ୍ଡ୍ ?” ଅଡ଼୍‌ ମେଣ୍ଡେ ମର୍‍ପୟ୍‍ସ୍‍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, ଅଂକିଙ୍କ୍‌ କ୍ରୁଶତାଗେ ତାର୍‍ସ୍ପାଟ୍‍ ।
MAT 27:24 ବେସୁଙ୍କ୍‍ ପିଲାତ ଉଡ଼୍‍ତଣ୍ଡ୍ ଯେ, ଅଡ଼୍‌‍କିଂଙ୍କ୍ କେସ୍‍ମେଣ୍ଡେ ବାତ୍‍ଲାବ୍‍ ଇଲେ, ବେଲାନ୍ ଶାନ୍ତି ବଙ୍ଗର୍‍ ଆଶଙ୍କା ମିନ୍ଦେ, ଅଣ୍ଡ୍‌ ସୁଦୁର୍ ଏର୍‍ ଆସ୍, ନାରୁଡ଼୍ ମୁନେ କାୟ୍ ନର୍‍ତଣ୍ଡ୍, “ହି ନାରୁନ୍ ଡଲାନ୍ ସେଙ୍ଗେ ନାନ୍‍ନେ ଦାୟି ଆୟନ୍‍ । ହିଦ୍ ମିୟାଦ୍ ପାଡ଼୍‍ୟି ।”
MAT 27:25 ନାରୁଡ଼୍ ଉତ୍ତର୍ ହିତ୍‍ତଡ଼୍, “ଅନାଦ୍‌ ଡଲାନ୍ ଦଷ୍, ମାକିଂଙ୍କ୍ ବା ମା ପିଲାନ୍ ପର୍‍ର ଆୟି ।”
MAT 27:26 ଶେଷତେ ପିଲାତ ବାରବ୍‍ବାଙ୍କ୍ ପେସ୍ପିସ୍‍ ଜିସୁଙ୍କ୍ କରଡାତେ ରେହ୍‍ତାଙ୍କ୍ ଆଦେଶ୍ ହିତ୍‍ତଣ୍ଡ୍, ତାନ୍, ପେର୍କେ କ୍ରୁଶତାଗ୍ ତାର୍‍ପାନ୍ ମାଇଦିଙ୍କ୍ ସନ୍ୟଡ଼୍ କାଇଦେ ୱିଡ଼୍‍ସିତ୍‍ତଣ୍ଡ୍ ।
MAT 27:27 ପିଲାତନ୍ ସୈନ୍ୟହିଡ଼୍‍ ଜିସୁଙ୍କ୍ ରମିୟ ଶାସକ୍‍ତିଙ୍କ୍ ପ୍ରାସାଦତାଗ୍‍ ଆତ୍‍ତଡ଼୍ ନୁ ସାରେତଡ଼୍ ସୈନ୍ୟଡ଼୍ ଅଂକିଙ୍କ୍‌ ତିଡ଼୍‍ୟି ଆସ୍ ନିତ୍‍ତଡ଼୍ ।
MAT 27:28 ଅନାଦ୍‌ ଚକା କୁସ୍‍ପି ଆସ୍ ଅଂକିଙ୍କ୍‌ ଅଣ୍ଡୟ୍‌ ଆପେ ରଙ୍ଗ୍‍ଦେ ଚକେ କେର୍‍ସ୍ପ୍‍ତଡ଼୍ ।
MAT 27:29 କୟେ ମାଡ଼୍‍ତେ ସୁଦୁଟ୍‍ତେ ୱେରଡ଼୍ ସହଜ୍‌ ତିଆର୍ ମାଡ଼ି ଅନ୍‌ ତାଲେତ୍ ପର୍‍ର କେର୍‍ସ୍ପିତ୍‍ ତଡ଼୍ ନୁ ଅନ୍‌ ତିନ୍ଦେକାୟିଦା ୱେରଡ଼୍ ଡୁଡ୍ ପସ୍ପ୍‍ତ୍‍ତଡ଼୍ । ତାନ୍‍ପେର୍କେ ଅଡ଼୍‌ ମୁନେ ବଟ୍‍ମିଣ୍ଡା ହୁହ୍‍ସି ଅଂକିଙ୍କ୍‌ ପରିଆସ ମାଡ଼ି କେତ୍‍ତଡ଼୍, ଯିହୁଦିଡ଼୍ ରାଜା ଚିରଜିବି ଆୟ୍‍ମ୍‍ ।
MAT 27:30 ଅଡ଼୍‌ ଅନ୍‌‍ପରୁ ଉସ୍‍ତଡ଼୍‍, ଆଦ୍ ଡୁଡ୍‍ ତଡ଼୍ ଅନ୍‌ ତାଲ୍‍ତାଗ୍‍ ରେହ୍‍ତଡ଼୍‍ ।
MAT 27:31 ହିଦ୍‍ପୁଟୁଙ୍କ୍ ଅଂକିଙ୍କ୍‌ ପରିହାସ୍‌ ମାଡ଼୍‍ତେ ପେର୍କେ ରାଜକିୟ ଚକା ପେସ୍‍ପି ଅନାଦ୍‌ ନିଜେତ୍ ଚକା କେର୍‍ସ୍ପି ତଡ଼୍ ନୁ କ୍ରୁଶତାଗେ ତାର୍‍ସ୍ପାନ୍‍ ମାଇଦିଙ୍କ୍ ଅଂକିଙ୍କ୍‌ ଆଗାଙ୍କ୍ ଆତ୍‍ତଡ଼୍ ।
MAT 27:32 ଅଡ଼୍‌ ଆଦ୍‍ଦାନ୍ ୱେଲେ ଆର୍‍ଦାଗ୍ କୁରୁନିୟ ସହର୍‍ତେ ଶିମୋନ୍ ପେଦେର୍‍ତେ ୱେରନ୍ ନାରୁଙ୍କ୍ କାୟ୍‍ଲ୍‍ତଡ଼୍ ନୁ ସୈନକିଡ଼୍‍ ଅଂକିଙ୍କ୍‌ ଜିସୁନ୍ କ୍ରୁଶ କାଞ୍ଜାନ୍ ମାଇଦିଙ୍କ୍ ବାଦ୍ୟ ମାଡ଼୍‍ତଡ଼୍ ।
MAT 27:33 ଅଡ଼୍‌ ଗଲ୍‍ଗତା ପେଦେର୍‍ତେ ୱେରଡ଼୍ ପଡ଼ିୟେତାଗ୍ ହେୱୁଦ୍‍ତଡ଼୍ । ଗଲ୍‍ଗତାତେ ଇତ୍‍କେ କପୁରି ଲେକେତାଦ୍ ପଡ଼ିୟେ ।
MAT 27:34 ଆଗେ ଅଡ଼୍‌ ଜିସୁଙ୍କ୍ କାଇତାଦ୍ କାୟ୍‍ଲି ମାନ୍ଦାନ୍ ଦ୍ରାକ୍ଷାରସ୍ ଉନ୍ଦାଙ୍କ୍ ହିତ୍‍ତଡ଼୍ । ଜିସୁ ଆଦିଙ୍କ୍ ସୁଦୁର୍ ନାକି ମେଣ୍ଡେ ଉନଣ୍ଡ୍ ।
MAT 27:35 ଅଡ଼୍‌ ଜିସୁଙ୍କ୍ କ୍ରୁଶତାଗେ ତାର୍‍ସ୍ପି ଗୁଲିବାଣ୍ଟ ତଡ଼୍ ଅନ୍‌ ଚକାତିଙ୍କ୍ ନିଜେତ୍ ଲୋପେ ତୁସି ଆତ୍‍ତଡ଼୍ ।
MAT 27:36 ତାନ୍‍ପେର୍କେ ଅଡ଼୍‌ ଆଗେ କୁଦି କ୍ରୁଶତାଗେ ତାର୍‍ସ୍ପ୍‍ତେ ଜିସୁଙ୍କ୍ କେପି ମାତ୍‍ତଡ଼୍ ।
MAT 27:37 ଅନ୍‌ ବିରୁଦ୍ଦ୍‌ତେ ଆସ୍‍ମାନ୍ଦାନ୍ ଅବିଯଗତେ ୱେରଡ଼୍ ଲେକିମାନ୍ଦାନ୍‍ ବାଲା ଅନ୍‌ ତାଲେତ୍ ପର୍‍ର କ୍ରୁଶତାଗ୍ ୱେଇସ୍‍ ମାତ୍‍ତଡ଼୍, “ଇଣ୍ଡ୍ ଆଦୁତନ୍ ଜିସୁ ଯିହୁଦିନାରୁଡ଼୍‍ ରାଜାଲ୍ ।”
MAT 27:38 ତାନ୍‍ପେର୍କେ ଅଡ଼୍‌ ଇର୍‍ୱୁଡ଼୍ ଡଙ୍ଗାଲଡ଼୍‍କିଙ୍କ୍ ଆଗେ କ୍ରୁଶତାଗେ ତାର୍‍ସ୍ପ୍‍ତଡ଼୍‍, ଅର୍‍ତୁଙ୍କ୍ ଜିସୁନ୍ ତିନ୍ଦେକାୟିଦେ ପାକେ ନୁ ମେଣ୍ଡେ ଅର୍‍ତୁଙ୍କ୍ ଡେବ୍‍କାୟ୍‍ଦେ ପାକ୍ ।
MAT 27:39 ଆଦ୍ ଆର୍ ଆଦ୍‍ଦାନ୍ ନାରୁଡ଼୍ ତାଲ୍‍ତିଙ୍କ୍ ଉଷ୍‍ ଜିସୁଙ୍କ୍ ଅପ୍‍ମାନ୍ ଇସ୍‌ କେତ୍‍ତଡ଼୍,
MAT 27:40 “ନିମ୍‍ ବାନେ ମନ୍ଦିର୍‍ତିଙ୍କ୍ ଉସ୍ ମୁଣ୍ଡ୍‍ଦିନାନେ ମେଣ୍ଡେ ଆଦିଙ୍କ୍ ତିଆର୍ ମାଡ଼ିସ୍‍ ମାତ୍‍ତିନ୍‍ । ନିମ୍‍ ଯଦି ଇଶ୍ୱର୍‌ତେ ମାର୍‍, ନିଜ୍‍ତିଙ୍କ୍ ଗେଲ୍‍ସ୍ପା । କ୍ରୁଶତାଗାଙ୍କ୍ ଡିଗିୱାଡ଼୍ ।”
MAT 27:41 ବେଡ଼ିଇଯାଜକ, ଦର୍ମଗୁରୁ ନୁ ସଂପ୍ରଦାୟତେ ମୁୟୁତେ ନେତାଲଡ଼୍ ଆନ୍‌‍ତେ ଜିସୁଙ୍କ୍ ପରିଆସ ମାଡ଼ି କେତ୍‍ତଡ଼୍,
MAT 27:42 “ଅଣ୍ଡ୍‌ ବାଗାତଡ଼୍‍କ୍ ଗେଲ୍‍ସ୍ପ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ନିଜ୍‍ତିଙ୍କ୍ ଗେଲ୍‍ସ୍ପ ପାର୍‍ୱଣ୍ଡ୍ । ଅଣ୍ଡ୍‌ ବାନେ ଇସ୍ରାୟେଲ୍‍ତେ ରାଜାଲ୍ । ଇଞ୍ଜ୍ ଯଦି ଅଣ୍ଡ୍‌ କ୍ରୁଶତାଗାଙ୍କ୍ ଡିଗି ୱାଦ୍ ପାର୍‍ଦ୍‍ତଣ୍ଡ୍, ଆଲାଇତ୍‍କେ ମାମ୍ ଅଂକିଙ୍କ୍‌ ବିଶ୍ୱାସ୍ ମାଡ଼ିତମ୍ ।
MAT 27:43 ଅଣ୍ଡ୍‌ ନିଜ୍‍ତିଙ୍କ୍ ଇଶ୍ୱର୍‌ତେ ମାର୍‍ ଇଞ୍ଜ କେସ୍ ଇଶ୍ୱର୍‌ତେ ପର୍‍ର ଆସ୍ ନେହେସ୍ ମିନ୍ଦେଣ୍ଡ୍ । ହାଲେକ୍ ଉଡାଙ୍କ୍ ଆଦ୍‍ତେ, ଇଶ୍ୱର୍ ଅଂକିଙ୍କ୍‌ ଗେଲ୍‍ସ୍ପାଙ୍କ୍ ଇଚ୍ଛା ମାଡ଼ୁତଣ୍ଡ୍ କି ଇଲେ ।”
MAT 27:44 ଅନ୍‌ ତଡ଼୍ କ୍ରୁଶତାଗ୍ ମାନ୍ଦାନଣ୍ଡ୍ ଡଙ୍ଗାଲ୍ ଆନ୍ତେ ଅଂକିଙ୍କ୍‌ ଆଦେ ରକମ୍ ପରିହାସ୍ ମାଡ଼୍‍ତଣ୍ଡ୍ ।
MAT 27:45 ଆଦ୍‍ଦିନେ ପାୟାଲ୍ ତାଲେତ୍ ପଡ଼୍‍ଦିନ୍‍ ସାରେ ଦେଶ୍‍ଜାକ ହିକାଡ଼୍ ଆତ୍‍ତେ ନୁ ମୁଣ୍ଡ୍ ଗାଣ୍ଟା ଯାକ ମାତ୍‍ତେ ।
MAT 27:46 ପାୟାଲ୍‌ ଅଲ ତିନ୍‍ଟାୱେଲେ ଜିସୁ ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, ଏଲି, ଏଲି, ଲାମା ସବକ୍‍ତାନି । ଇତ୍‍କେ “ହୋ ଇଶ୍ୱର୍‌ତନି, ହୋ ଇଶ୍ୱର୍‌ତନି, ନାକିଂଙ୍କ୍ ବାତେଙ୍କ୍ ୱିଡ଼୍‍ସ୍‍ତିନ୍ ?”
MAT 27:47 ଗାର୍‍ରେ ନିସ୍ ମାନ୍ଦାନ୍ ବେସ୍‍କ୍‍ତୁଡ଼୍‍ ଇଦ୍ କେଞ୍ଜି କେତ୍‍ତଡ଼୍, “ଅଣ୍ଡ୍‌ ଏଲିୟଙ୍କ୍ କାର୍‍ଙ୍ଗୁତଣ୍ଡ୍ ।”
MAT 27:48 ୱେରଣ୍ଡ୍ ନାରୁଡ଼୍ ମିରି ଆଞ୍ଜ୍ କାଇତାଦ୍ ଦ୍ରକ୍ଷାରସ୍‍ତେ ୱେରଡ଼୍ ପସ୍କେ ମୁହ୍‍ସ୍‍ ଅଂକିଙ୍କ୍‌ କାରେତ୍ ମୁନ୍‍ ତହସ୍ ଉନ୍ଦାନଙ୍କ୍ ଜିସୁନ୍ ପାକେ ଆସିତ୍‍ତନ୍ ।
MAT 27:49 ବାଗାତଡ଼୍ କେତ୍‍ତଡ଼୍, କେପାଟ୍, ଉଡାଙ୍କ୍ ଆଦ୍‍ତେ, ଅଂକିଙ୍କ୍‌ ଗେଲ୍‍ସ୍ପାଙ୍କ୍ ଏଲିୟ ୱାଦ୍‍ତଣ୍ଡ୍ କି ଇଲେ ।
MAT 27:50 ଜିସୁ ମେଣ୍ଡନ୍ ଦାମ୍ ଗାଟି ଲେଙ୍ଗ୍‍ଦେ କେସ୍ ଶେଷ ନିଶ୍ୱାସ୍‍ ୱିଡ଼୍‍ସ୍‍ତଣ୍ଡ୍ ବା ନିଜେତ୍ ଜିୱୁନ୍ ୱିଡ଼୍‍ସିତ୍‍ତନ୍ ।
MAT 27:51 ଆଦ୍ ସମୟ୍‍ତେ ମନ୍ଦିର୍‍ତାଗ୍ ଉଙ୍ଗମାନ୍ଦାନ୍‍ ପର୍ଦା ପର୍‍ରକଞ୍ଚ୍ ମଦଲ୍ ହେଉନା ରେଣ୍ଡ୍ ଗାନା ଆସ୍‌ ହିଙ୍ଗ୍‍ତେ । ବୂମିକମ୍ପ ଆତ୍‍ତେ, ମେଟେଆନ୍‌‍ତେ ପକ୍‍ତ୍‍ତା
MAT 27:52 ନୁ କବର୍ କୁଲାଆସ୍‍ ନାର୍‍ଗେ ଇଶ୍ୱର୍ ଆଶେ ଡଲିମନ୍ଦାନ୍ ନାରୁଡ଼୍ ମେଣ୍ଡେ ଜିୱୁନ୍ ଆଦ୍‍ତଡ଼୍ ।
MAT 27:53 ହିଡ଼୍ କବର୍ ତାଗାଙ୍କ୍ ତେଦି ୱାତ୍‍ତଡ଼୍ ନୁ ଜିସୁନ୍ ପୁନରୁତ୍‍ତାନ୍ ପେର୍କେ ହିଡ଼୍‍କିଙ୍କ୍ ପବିତ୍ର ନାର୍ ଯିରୁଶାଲେମ୍‍ତାଗ୍ ଆଦାନାଦ୍ ବେସ୍‌କ୍ ତଡ଼୍ ଉଡ଼୍‌ତଡ଼୍ ।
MAT 27:54 ଜିସୁଙ୍କ୍ କେପି ମାନ୍ଦାନ୍ ସେନାପତି ନୁ ସୈନ୍ୟହିଡ଼୍‍ ବୁମିକମ୍ପ ନୁ ବାଗାତାଉ ଗଟ୍‍ନା ଉଡ଼ି ୱେର୍‍ସ୍‍ ଆଦ୍‍ତଡ଼୍ । ଅଡ଼୍‌ କେତ୍‍ତଡ଼୍, “ହିଣ୍ଡ୍ ନିଜାମ୍ ଇଶ୍ୱର୍‌ତେ ମାର୍‍ ।”
MAT 27:55 ଗାଲିଲୀ ତାଗାଙ୍କ୍ ଜିସୁଙ୍କ୍ ଲେକେତ୍‌ ମାଡ଼ି ଅଂକିଙ୍କ୍‌ ସାହାଯ୍ୟ ମାଡ଼ିମାନ୍ଦାନ୍ ବେସ୍‌କ୍ ମୁତ୍‍ତେ ଦୁରାମ୍ ମାଞ୍ଜ୍ ସାରେ ଉଡ଼ମାତ୍‍ତା ।
MAT 27:56 ହାୱିନ୍‍ ଲୋପେ ମାତ୍‍ତେ ମଗ୍‍ଦଲୀନି ମରୀୟମ୍, ଯାକୁବ୍ ନୁ ଯସେପ୍‍ତେ ୟାୟ୍‍ ମରୀୟମ୍ ନୁ ଜେବଦିନ୍ ମୁତ୍‍ତେ ।
MAT 27:57 ମୁଲ୍‍ପୁଟ୍ ଆରମାତିଆତେ ସହର୍ ଯସେପ୍‍ ପେଦେର୍‍ତେ ୱେରଣ୍ଡ୍ ସାଉକାର୍ ନାରୁଡ଼୍ ୱାସ୍ ହେୱ୍‍ତଣ୍ଡ୍ । ଅଣ୍ଡ୍‌ ଜିସୁନ୍ ୱେରଣ୍ଡ୍ ଶିଷ୍ୟ ମାତ୍‍ତଣ୍ଡ୍ ।
MAT 27:58 ଅଣ୍ଡ୍‌ ପିଲାତଙ୍କ୍ କାୟ୍‍ଲି ଜିସୁନ୍ ଡଲ୍‍ତେ ମେନ୍ଦୁଲ୍‍ତିଙ୍କ୍ ଆଦାନ୍ ମାଇଦିଙ୍କ୍ ଗଟ୍ ତାଲ୍‍କ୍‍ତଣ୍ଡ୍ ପିଲାତ ଗଟ୍ ହିତ୍‍ତାଙ୍କ୍ ।
MAT 27:59 ଯସେପ୍‍ ଜିସୁନ୍ ମେନ୍ଦୁଲ୍‍ତିଙ୍କ୍ ଅସ୍‍ମେଣ୍ଡେ ୱେରଡ଼୍ ପାଲ୍‍ସାଲାଦ୍ ସିଲେ ଇତ୍‌ତଣ୍ଡ୍‌ ନୁ
MAT 27:60 ଅନ୍‌ ନିଜେତ୍ ମାଇଦିଙ୍କ୍ କାଲ୍‍ଦାଗ୍ ଡେୱିମାନ୍ଦାନ୍‍ ୱେରଡ଼୍ ପୁନାଦ୍ ସମାଦିତାଗେ ଅଂକିଙ୍କ୍‌ ୱାଟ୍‍ତଡ଼୍‍ ନୁ ସମାଦିତେ ମୁନେ ୱେରଡ଼୍ ବେଡ଼୍‍ୟାଦ୍‍ କାଲ୍ କୁହୁସି ଆତ୍‍ତଣ୍ଡ୍ ।
MAT 27:61 ମଗ୍‍ଦଲୀନି ମରୀୟମ୍ ନୁ ମେଣ୍ଡନ୍ ମରୀୟମ୍ ଆଦ୍ ସମାଦିତା ମୁନ୍‍ମାଡ଼ି କୁଦିମାତ୍‍ତା ।
MAT 27:62 ତାନ୍ ମେଣ୍ଡନ୍‍ଦିନେ ବିଶ୍ରାମଦିନେତେ ବେଡ଼ିଇଯାଜକ ନୁ ପାରୂଶୀଡ଼୍ ପିଲାତ୍‍ତଙ୍କ୍ କାୟ୍‍ଲି କେତ୍‍ତଣ୍ଡ୍,
MAT 27:63 “ଗଟ୍, ମାକ୍‍ ହେର୍କା ମିନ୍ଦେ, ଅଣ୍ଡ୍‌ ମିତ୍ୟାବାଦି ଗେଲ୍‍ସି ମାନ୍ଦାନ୍‍ୱେୟ୍‍ କେସମାତ୍‍ତନ୍, ମୁଣ୍ଡ୍‍ଦିନାନ୍ ପେର୍କେ ନାନ୍‍ନେ ପୁନରୁତ୍‍ତାନ୍ ଆଦ୍‍ତନ୍ ।
MAT 27:64 ଆଦିଙ୍କ୍ ମୁଣ୍ଡ୍‍ଦିନା ଯାକ ଆଦ୍ ସମାଦିତିଙ୍କ୍ କେପି ମାନ୍ଦାଙ୍କ୍ ସୈନ୍ୟଡ଼୍‍କ୍ ଆତ୍‍ତାଙ୍କ୍ ନିମ୍‍ ଗଟ୍ ହିମ୍, ଆଲାଇତ୍‍କେ ଅନ୍‌ ଶିଷ୍ୟଡ଼୍ ଅନ୍‌ ମେନ୍ଦୁଲ୍‍ତିଙ୍କ୍ ଡଙ୍ଗି ଆସ୍, ଅଣ୍ଡ୍‌ ଗେଲ୍‍ସି ତେଦ୍‍ତଣ୍ଡ୍ ଇଞ୍ଜ କେତ୍‍ ପାର୍‍ୱଡ଼୍ । ଅଡ଼ାଦ୍‌ ହି ମିଚ୍ ପ୍ରଚାର୍ ସାର୍‍ରେ ଅଦିକ୍‌ ଅନିଷ୍ଟ ଆଦ୍‍ତେ ।”
MAT 27:65 ପିଲାତ ଉତ୍ତର୍ ହିତ୍‍ତଣ୍ଡ୍, “ମିଡ଼୍ ଅଣ୍ଡ୍‌‍ମାନ୍ଦେ କେପାନଡ଼୍‍କ୍ ଆୟ୍‍ମୁଟ୍ ଆଦ୍ ସମାଦିତିଙ୍କ୍ ଲେକେତ୍‍ କେପିତଡ଼୍ ।”
MAT 27:66 ଅଡ଼୍‌ ଆଞ୍ଜ୍ ସମାଦିତିଙ୍କ୍ କେପାନ୍ ମାଇଦିଙ୍କ୍ ଲେକେତ୍‍ ତିଆର୍‍ମାଡ଼୍‍ତଡ଼୍ । ଅନ୍‌ ମାଇଦିଙ୍କ୍ ମୁସିମାନ୍ଦାନ୍‍ କାଲ୍‍ଦେ ପର୍‍ର କୁଦି ଅଂକିଙ୍କ୍‌ କେପାନ୍ ମାଇଦିଙ୍କ୍ ନୁ ସୈନ୍ୟଡ଼୍‍କ୍ ଆଗେ ମାନ୍ଦାଙ୍କ୍ କେତ୍‍ତଣ୍ଡ୍ ।
MAT 28:1 ବିଶ୍ରାମ୍‍ଦିନେ ମେଣ୍ଡ୍‍ନ୍ଆତ୍‍ତେ ଦିନ୍ ରବିବାର୍‍ ଦିନ୍ ନାର୍‍କେତ୍ ମଗ୍‍ଦଲୀନି ମରୀୟମ୍ ନୁ ମେଣ୍ଡନ୍ ମରୀୟମ୍ ସମାଦି ଉଡାଙ୍କ୍ ଆଦ୍‍ତେ ।
MAT 28:2 ଆସୁଟେ ହଟାତ୍ ୱେରଡ଼୍ ବୁମିକମ୍ପ ଆତ୍‍ତେ । ପ୍ରବୁନ୍ ୱେରଡ଼୍ ଦୂତ ପର୍‍ରକଞ୍ଚ୍ ଡିଗି ୱାସ୍, ସମାଦି ୱାଟିମାନ୍ଦାନ୍ କାଲ୍‍ଦିଙ୍କ୍ ଗୁସ୍‍ପି ଆଦ୍ କାଲ୍‍ଦେ ପର୍‍ର କୁଦ୍‍ତନ୍ ।
MAT 28:3 ତାନାଦ୍ ମକମ୍ ପିଡ଼୍‍ଗ୍‍ହିନା ୱେସ୍‍ମାତ୍‍ତେ ନୁ ତାନାଦ୍ ଚକା ଇମ୍ ଲେକାମ୍ ପାଣ୍ଡେ ମାତ୍‍ତେ ।
MAT 28:4 ସୈନ୍ୟଡ଼୍ ୱେର୍‍ସ୍‍ ୱାଡ଼୍‍କ୍‍ତଡ଼୍‍ ନୁ ଡଲ୍‍ତେ ଲେକାମ୍ ଆସ୍‌ ମାତ୍‍ତଡ଼୍ ।
MAT 28:5 ଦୂତ ଆଦ୍ ନାଟାଙ୍କ୍ କେତ୍‍ତେ, “ୱେର୍‍ମାଟ୍ ।” ନାନ୍ ୱେରନ୍, ମିଡ଼୍ କ୍ରୁଶତାଗ୍ ତାର୍ପିମ୍‍ନ୍ଦାନ୍ ଜିସୁଙ୍କ୍ ଉଡାଙ୍କ୍ ୱାତ୍‍ତିଡ଼୍ ।
MAT 28:6 ଅଣ୍ଡ୍‌ ହିଗେ ଇଲେଣ୍ଡ୍ । ଅଣ୍ଡ୍‌ କେତ୍‍ତେ ଲେକାମ୍ ଅଣ୍ଡ୍‌ ପୁନରୁତ୍‍ତାନ୍ ଆଶେ ମିନ୍ଦେଣ୍ଡ୍ । ହିଗ୍ ୱାସ୍ ଉଡ଼ାଟ୍, ହିଗେ ଅଂକିଙ୍କ୍‌ ୱାଟିସ୍‍ ମାତ୍‍ତଡ଼୍ ।
MAT 28:7 ଶିଟ୍‍ପାଟ୍‍ ଆଞ୍ଜ୍ ନା ଶିଷ୍ୟଡ଼୍‍କିଂଙ୍କ୍ କେଲ୍‍ମୁଟ୍, “ଅଣ୍ଡ୍‌ ମେଣ୍ଡନ୍ ଦାମ୍ ଜିୱୁନ୍ ଆତ୍‍ତଣ୍ଡ୍ ନୁ ମିଇ ମୁନେ ମୁନେ ଅଣ୍ଡ୍‌ ଗାଲିଲୀତା ଆଦୁତନ୍ । ଆଗେ ମିଡ଼୍ ଅଂକିଙ୍କ୍‌ ଉଡ଼ିତିଡ଼୍ । ନାନ୍‍ନେ ବାତ୍ କେତ୍‍ତାନ୍, ହେର୍କା ନେହେମୁଟ୍ ।”
MAT 28:8 ଇଦ୍ କେଞ୍ଜି ଆୱ୍ ସିଟ୍‍ପାଟ୍ କବର୍ ୱିଡ଼୍‍ସି ଶିଷ୍ୟଡ଼୍ ଗାର୍‍ରେ ମିର୍‍ତା । ୱେର୍‍ସ୍‍ ମାତ୍‍କେ ବା ଆୱିନ୍ ମନ୍‍ଦାଗ୍ ଗାଟି ସାର୍‍ଦେ ନୁ ୱେଡ଼୍‍କେତେ ମାତ୍‍ତା ।
MAT 28:9 ଜିସୁ ଆୱିଙ୍କ୍ କାୟ୍‍ଲି କେତ୍‍ତଣ୍ଡ୍ “ମିୟାଦ୍ ଶାନ୍ତି ଆୟି !” ଆୱ୍ ଅନ୍‌‍ଗାରେ ଆଞ୍ଜ୍ ଅନ୍‌ ଡେକାଙ୍କ୍ ପୟ୍‍ସ୍ ମଡ଼୍‍କ୍‍ତଡ଼୍ ।
MAT 28:10 ଜିସୁ ଆୱିଙ୍କ୍ କେତ୍‍ତଣ୍ଡ୍, ୱେର୍‍ମାଟ୍ ନା, ଦାଦାଲଡ଼୍‍କିଙ୍କ୍ କେଲ୍‍ମୁଟ୍, ଅଡ଼୍‌ ଗାଲିଲୀତାଗ୍ ଆଦ୍‍ତଡ଼୍ । ଆଗେ ଅଡ଼୍‌ ୱାସ୍ ନାକିଂଙ୍କ୍ ଉଡ଼ିତିଡ଼୍ ।
MAT 28:11 ନାଟାଙ୍କ୍ ଆଗାଙ୍କ୍ ଆଦାନ୍‍ ୱେଲେ ସମାଦିତିଙ୍କ୍ କେପିମାତ୍‍ତେ ସୈନିକିଡ଼୍ ସହର୍‍ତାଗ୍ ମାଲ୍‍ସ୍ ଆଞ୍ଜ୍ ବେଡ଼୍‍ୟାଦ୍‍ ଯାଜକ୍‍ନଡ଼୍ ହି ସାରେ ଗଟ୍‍ନା କେତ୍‍ତଡ଼୍ ।
MAT 28:12 ମୁକ୍ୟ ବେଡ଼ିୟ୍ ଯାଜକ୍‍ନଡ଼୍ ଦର୍ମନେତାଲଡ଼୍‍ ତ ମନ୍ତ୍ରନା ମାଡ଼ି, ଆଦ୍ ସୈନ୍ୟକିଡ଼୍‍କ୍‍ ନାର୍‍ଗେ ଡାବ୍‍ଲାଞ୍ଚ୍‍ ଇସ୍‌ ଅଡ଼୍‌‍କିଂଙ୍କ୍
MAT 28:13 କେତ୍‍ତଡ଼୍, “ମିଡ଼୍ କେଲ୍‍ମୁଟ୍ ଯେ ନାର୍‍କେତ୍ ମାମ୍ ହୁଞ୍ଜିମାତ୍‍ ୱେୟ୍ ତାନ୍ ଶିଷ୍ୟଡ଼୍ ୱାସ୍ ଅନ୍‌ ମେନ୍ଦୁଲ୍‍ତିଙ୍କ୍ ଡଙ୍ଗିମେଣ୍ଡେ ଆତ୍‍ତଡ଼୍ ।”
MAT 28:14 ଯଦି ଶାସକ ହି ଗଟ୍ କେଞ୍ଜ୍‍କେ ମାମ୍ ଅଂକିଙ୍କ୍‌ ବୁଜାମାଡ଼ିଦ୍‍ ତମ୍‍ ଯେ ମିଡ଼୍ ଦଷି । ହି ବିଷୟ୍‍ତେ ମିଡ଼୍ ଦାନ୍ଦେ ଆୟ୍‍ମାଟ୍‍ ।
MAT 28:15 ସୈନିନଡ଼୍ ଡାବ୍ ଆସ୍ ଅଡ଼୍‌‍କିଂଙ୍କ୍ କେସ୍ ମାନ୍ଦାନ୍ ଲେକାମ୍ ପାଡ଼୍‍ୟି ମାଡ଼୍‍ତଡ଼୍ । ଅଡ଼୍‌ ଆସୁଙ୍କ୍ ବାତ୍ କେତ୍‍ତଡ଼୍, ଯିହୁଦିଡ଼୍ ନେଣ୍ଡ୍ ଯାକ ଆଦ୍ ଗଟ୍ ପ୍ରଚାର୍ ମାଡ଼ୁତଡ଼୍ ।
MAT 28:16 ଜିସୁ କେସ୍‍ମାତ୍‍ତେ ଲେକାମ୍ ତାନ୍ ଏଗାର୍‍ଜାନ୍ ଶିଷ୍ୟଡ଼୍ ଗାଲିଲୀତେ ୱେରଡ଼୍ ମେଟେତ୍‍ ପର୍‍ର ଆଦ୍‍ତଡ଼୍ ।
MAT 28:17 ଆଗେ ଜିସୁଙ୍କ୍ ଉଡ଼ି ଅଡ଼୍‌ ଅଂକିଙ୍କ୍‌ ମଡ଼୍‍କ୍‍ତଡ଼୍ ନୁ ବେନଡ଼୍‍ ଡାଉଟ୍ ମାଡ଼୍‍ତଡ଼୍ ।
MAT 28:18 ଜିସୁ ଅଡ଼୍‌ ଗାର୍‍ରେ ୱାସ୍ କେତ୍‍ତଣ୍ଡ୍, “ସ୍ୱର୍ଗ ନୁ ପୃତିବି ସାରେ ଅଦିକାର୍‌ ନାକିଂଙ୍କ୍ ଇସ୍‌‍ମିନ୍ଦେନ୍ ।
MAT 28:19 ମେଣ୍ଡେ ମିଡ଼୍‍ଆଞ୍ଜ୍ ସାରେ ଜାତିତ୍‍ ନାରୁଡ଼୍ ଆଞ୍ଜ୍ ଅଡ଼୍‌‍କିଂଙ୍କ୍ ନା ଶିଷ୍ୟ ମାଡ଼ାଟ୍ । ବାବାଲ୍, ମାର୍‍ ନୁ ପବିତ୍ର ଆତ୍ମା ପେଦେର୍‍ତେ ଅଡ଼୍‌‍କିଂଙ୍କ୍ ବାପ୍ତିସ୍ମ ହିମୁଟ୍
MAT 28:20 ମେଣ୍ଡେ ନାନ୍‍ନେ ବେନ୍‍ସାରେ ଶିକ୍ଷା ଇସ୍‌‍ମିନ୍ଦେନ୍, ଆଦ୍ ପାଲନ୍ ମାଡ଼ାଙ୍କ୍ ଅଡ଼୍‌‍କିଂଙ୍କ୍ ଶିକ୍ଷା ହିମୁଟ୍ । ମେଣ୍ଡେ ହେର୍କା ନେହେମୁଟ୍, ତେରାନ୍‌ ଯାକ ନାନ୍ ସାରେ ଦିନା ମିଇ ତଡ଼୍ ମାନ୍‍ତାନ୍ ।”
MAR 1:1 ଇଶ୍ୱର୍‌ତେ ମାର୍‍ ଜିସୁ କ୍ରିଷ୍ଟନ୍ ସୁସମାଚାର୍ ଇଦ୍‍ଲେକାମ୍ ଆରାମ୍ ଆତ୍‍ତେ ।
MAR 1:2 ଯିଶାଇୟ ବାବବାଦୀ ଶାସ୍ତ୍ରତାଗ୍ ବେଦ୍‍ଲେକାମ୍ ଲେକାମିନ୍ଦେ, ଉଡ଼େ, ମାମ୍‍ମେ ମା ଦୂତକିଙ୍କ୍ ମିଇ ମୁନେ ରହସ୍ ମିନ୍ଦେମ୍, ଅଣ୍ଡ୍‌ ମିୟାଦ୍ ଆର୍ ତିଆର୍‍ ମାଡ଼ିତଣ୍ଡ୍ ।
MAR 1:3 “ଉଚ୍‍କ ନେଏଲ୍‍ଦାଗ୍ ଯିଶାଇ ବେନ ଗାଟି ଲେଙ୍କ୍‍ଦେ କେସମିନ୍ଦେନ୍, ପ୍ରବୁନ୍ ସେଙ୍ଗେ ଆର୍ ତିଆର୍ ମାଡ଼ାଟ୍; ଅନାଦ୍‌ ୱାଦାନ୍ ସେଙ୍ଗେ ଆର୍ ତିଆର୍ ମାଡ଼ାଟ୍ ।”
MAR 1:4 ଆଦ୍ ଲେକାମ୍ ବାପ୍ତିଜକ ଯୋହନ୍‌ ଉସ୍କ ନେଲ୍‍ଦା ୱାସ୍ ପ୍ରଚାର୍ ମାଡ଼ାତନ୍ ନୁ ବାପ୍ତିସ୍ମ ଇଦାନଙ୍କ୍ ପସ୍‍ପତନ୍ । ଅଣ୍ଡ୍‌ ନାରୁଡ଼୍‍କିଂଙ୍କ୍ କେସ୍‍ମାତ୍‍ତନ୍ “ନିଜେ ନିଜେତ୍ ପାପ୍ ସେଙ୍ଗେ ୱିଡ଼୍‍ସାଟ୍ ନୁ ବାପ୍ତିସ୍ମ ଗ୍ରହନ୍ ମାଡ଼ାଟ୍ । ଆଲାଇତ୍‍କେ ଇଶ୍ୱର୍ ମିୟାଦ୍ ପାପ୍ କ୍ଷମା ମାଡ଼ିତନ୍ ।”
MAR 1:5 ଯିହୁଦା ପ୍ରଦେଶ୍‍ ନୁ ଯିରୁଶାଲେମ୍ ସହର୍‍ତାଗାଙ୍କ୍ ନାର୍‍ଗେ ନାରୁଡ଼୍ ଯୋହନ୍‌‌ତେ ପ୍ରଚାର୍ କେଞ୍ଜାନ୍ ସେଙ୍ଗେ ୱାତ୍‍ତଡ଼୍ । ଅଡ଼୍‌ ନିଜେ ନିଜେ ପାପ୍ ସ୍ୱୀକାର୍ ମାଡ଼୍‍ତଡ଼୍ ନୁ ଯୋହନ୍‌ ଅଡ଼୍‌‍କିଂଙ୍କ୍ ଯର୍ଦ୍ଦନ୍ ବେଡ଼େମ୍‍ତାଗ୍ ବାପ୍ତିସ୍ମ ଇତ୍‍ତନ୍ ।
MAR 1:6 ଯୋହନ୍‌‌ତାଦ୍‍ ଚକା ଉଟ୍‍ କେଲ୍‍କିନ୍ ତିଆର୍‍ ଆସ୍‍ମାତ୍‍ତେ ନୁ ଅନ୍‌ ଟିକିଡ଼୍‍ତାଗ୍ ତଲ୍‌କେ ତହସ୍ ମାତ୍‍ତନ୍ । କାରାପ୍ ମାଡ଼େତ୍ କାୟା ନୁ ଗୁପ୍‍ତାଦ୍ ତେନେ ଅନାଦ୍ କାଦି ମାତ୍‍ତେ, ଅଣ୍ଡ୍‌ ନାରୁଡ଼୍ ପାକେ କେସ୍‍ ମାତ୍‍ତନ୍ ।
MAR 1:7 “ବେନ୍ ନାରୁଡ଼୍ ନା ପେର୍କେ ୱାଦ୍‍ତନ୍, ଅଣ୍ଡ୍‌ ନାୟାଗାଙ୍କ୍ ମହାନ୍ । ନାନେ ଆଦ୍‍ଲେକାମ୍ ଅନ୍‌ ଡେକାନ୍ ବନ୍ଦନ୍ କୁସ୍‍ପାନଙ୍କ୍ ମିକା ନାନ୍‍ନେ ଅଯୋଗ୍ୟ ।
MAR 1:8 ନାନେ ମିକିଂଙ୍କ୍ ଏର୍‍ଦାଗ୍ ବାପ୍ତିସ୍ମ ଇଦୁତାନ୍, ବାତେଙ୍କ୍ ଇତ୍‍କେ ଅଣ୍ଡ୍‌ ପବିତ୍ର ଆତ୍ମାତେ ବାପ୍ତିସ୍ମ ଇଦ୍‍ତନ୍ ।”
MAR 1:9 ଆଦ୍ ସମୟ୍‍ତେ ଜିସୁ ଗାଲିଲୀ ପ୍ରଦେଶ୍‍ତେ ନାଜରିତିୟ ତାଗାଙ୍କ୍ ୱାସ୍ ଯୋହନ୍‌ ତଡ଼୍ ଯର୍ଦ୍ଦନ୍ ବେଡ଼େମ୍‍ତାଗ୍ ବାପ୍ତିସ୍ମ ଅତ୍‍ତନ୍ ।
MAR 1:10 ଜିସୁ ଏର୍‍ଦାଗାଙ୍କ୍ ତେଦି ୱାଦାନ୍ ୱେଲେ ଉଡ଼୍‍ତନ୍, ସ୍ୱର୍ଗ କୁଲାଆସ୍‍ ନୁ ପରମାଆତ୍ମା ପାର୍ୱା ରକମ୍ ଅନ୍‌ ପରୁ ଡ଼ିଗ୍‍ତେ ।
MAR 1:11 ମେଣ୍ଡେ ସ୍ୱର୍ଗତାଗାଙ୍କ୍‍ ଇଦ୍ ଗଟ୍‍ ୱାତ୍‍ତେ, “ନିମେ ମା ପ୍ରିୟ ମାର୍‍, ନିୟାଗେ ନାନେ ଗାଟି ସନ୍ତୁଷ୍ଟ ।”
MAR 1:12 ଆସୁଙ୍କ୍ ପବିତ୍ର ଆତ୍ମା ଅଂକିଙ୍କ୍‌ ସିମ୍‍ସାମ୍ ପଡ଼ିୟେତାଗ୍ ଅତ୍‍ତେ ।
MAR 1:13 ଆଗେ ଅଣ୍ଡ୍‌ ଚାଳିଶ୍‍ ଦିନ୍ ମାତ୍‍ତନ୍ । ଆଦ୍ ସମୟ୍‍ତେ ଶୟ୍‍ତାନ୍‍ ବେସ୍‍ ବେସ ତାଉ ପରିକ୍ଷା ପ୍ରଲୋଭନ୍‍ତେ ଅଂକିଙ୍କ୍‌ ୱିଡ଼୍‍ସି ଆତ୍‍ତେ । ଆଗେ ଅଣ୍ଡ୍‌ ମେଟେତ୍ ଜିୱାକିନ୍ ତଡ଼୍ ମାତ୍‍ତନ୍, ବାତେଙ୍କ୍ ଇତ୍‍କେ ଦୂତ ୱାସ୍ ଜିସୁନାଦ୍ ଯତ୍ନ ଅତ୍‍ତା ।
MAR 1:14 ଯୋହନ୍‌‌ତିଙ୍କ୍ ବନ୍ଦି ଆତ୍‍ତେ ପେର୍‍କେ ଜିସୁ ଗାଲିଲୀତାଗ୍ ଆଞ୍ଜ୍ ଇଶ୍ୱର୍‌ତେ ରାଜ୍ୟତେ ଲେକାମ୍ ଗଟ୍ ପ୍ରଚାର୍ ମାଡ଼୍‍ତଣ୍ଡ୍ ।
MAR 1:15 ଅଣ୍ଡ୍‌ କେତ୍‍ତାନ୍, “ଲେକାମ୍ ଦିନାମ୍ ୱାସ୍‍ମିନ୍ଦେ, ଇଶ୍ୱର୍‌ତେ ରାଜ୍ୟ ମି ଗାର୍‍ରେ ୱାସ୍ ହେୱ୍‍ସ୍ ମିନ୍ଦେ ! ପାପ୍ ସେଙ୍ଗେ ମାଲ୍ସ୍‍ୱାସ୍ ଇଦ୍ ଲେକେତ୍ ଗଟ୍ ବିଶ୍ୱାସ୍ ମାଡ଼ାଟ୍ ।”
MAR 1:16 ଜିସୁ ଗାଲିଲୀ ସାୱ୍‍ଡ଼େତ୍ ଆଞ୍ଚ୍‍ଇସ୍ ଆଦାନ୍ ୱେଲେ ଶିମୋନ୍ ନୁ ଆନ୍ଦ୍ରିୟ, ଇଡ଼୍ ତାମୁଣ୍ଡ୍‌ଇର୍‍ୱୁଡ଼୍ ୱାଲେ ୱାଟି ସାୱ୍‍ଡ଼େତାଗ୍ କିକେ ପୟ୍‍ସମାତ୍‍ତଡ଼୍‍ ।
MAR 1:17 ଜିସୁ ଅଡ଼୍‌‍କିଂଙ୍କ୍ କାର୍‍ଙ୍ଗି କେତ୍‍ତଣ୍ଡ୍, “ନା ତଡ଼୍ ୱାଡ଼ାଟ୍ । ନାନ୍ ମିକିଂଙ୍କ୍ ନାରୁଡ଼୍‍କିଂଙ୍କ୍ ପଇତାନାଦ୍ ନାଡ଼୍‍ସ୍ପିତ୍‍ତାନ୍ ।”
MAR 1:18 ଆସୁଙ୍କ୍ ସାଙ୍ଗେ ସାଙ୍ଗେ ଅଡ଼ାୱୁ ୱାଲା ୱିଡ଼୍‍ସି ଅନ୍‌ ତଡ଼୍ ଆତ୍‍ତଡ଼୍ ।
MAR 1:19 ଜିସୁ ମେଣ୍ଡେ ସୁଦୁଟ୍ ମୁନେ ଆଞ୍ଜ୍ ଜେବଦିନ୍ ଇର୍‍ୱୁଡ଼୍ ମାର୍‍କିଡ଼୍ ଯାକୁବ୍ ନୁ ତାନ୍‌ ତାମୁଣ୍ଡ୍‌ ଯୋହନ୍‌ ତିଙ୍କ୍ ଉଡ଼୍‍ତନ୍ । ଅଡ଼୍‌ ଜାରି ୱାଟାନଙ୍କ୍ ନିଜେତ୍ ଓଡେତାଗ୍ ତିଆର୍ ଆସ୍‍ମାତ୍‍ତଡ଼୍ ।
MAR 1:20 ଜିସୁ ଅଡ଼୍‌‍କିଂଙ୍କ୍ ଉଡ଼ିମିକା ଗାର୍‍ରେ କାର୍‍ଙ୍କ୍‍ତନ୍ । ଓଡେତାଗ୍ ଚାକର୍‍ନଡ଼୍ ତଡ଼୍ ଅଡ଼୍‌ ବାବାଲ୍ ଜେବଦୀଙ୍କ୍ ୱିଡ଼୍‍ସି ଅଡ଼୍‌ ଜିସୁନ୍ ପାକେ ୱାତ୍‍ତଡ଼୍ ।
MAR 1:21 ଜିସୁ ନୁ ତାନ୍ ଶିଷ୍ୟନଡ଼୍ କପର୍ନାହୁମ୍‍‍ତାଗ୍ ଆତ୍‌ତଡ଼୍, ମେଣ୍ଡନ୍‍ଦିନେ ଜିସୁ ଯିହୁଦିଡ଼୍ ମିଟିଙ୍କ୍‍ ଲୋନ୍‌ ଆଞ୍ଜ୍ ଶିକ୍ଷା ଇତ୍‍ତନ୍ ।
MAR 1:22 ଅନାଦ୍‌ ଶିକ୍ଷା କେଞ୍ଜି ନାରୁଡ଼୍ ବକୁୱା ଆଦ୍‍ତଡ଼୍; ବାତେଙ୍କ୍‍ଇତ୍କେ ଅଡ଼୍‌ ଶାସ୍ତ୍ରିନଡ଼୍ ଲେକାମ୍ ଶିକ୍ଷା ଇୱକଟ୍ ୱେରନ୍ କ୍ଷମତାପନ୍‍ ନାରୁନ୍ ଲେକାମ୍ ଶିକ୍ଷା ଇସମାତ୍‍ତନ୍ ।
MAR 1:23 ଆସୁଙ୍କ୍ ୱେରନ୍ ବୁତ୍‌ପଇତେ ନାରୁଡ଼୍ ପ୍ରାର୍ତନା ଲୋନ୍‌ ନେହେଙ୍ଗି ମିକା କିଡ଼୍‍କ୍‍ତନ୍ ।
MAR 1:24 “ହୋ ନାଜରିତିୟ ଜିସୁ, ମା ତଡ଼୍ ନିୟାଦ୍ ବାତ୍ ସମ୍ପର୍କ ? ନିମେ ବାତେଏ ମାକିଂଙ୍କ୍ ଦ୍ୱଂସ ମାଡ଼ାନଙ୍କ୍ ଇଗେ ୱାତ୍‍ତିନ୍; ନିମ୍‍ ଇଶ୍ୱର୍‌ତାଗାଙ୍କ୍ ୱାସ୍‍ମାନ୍ଦାନ୍ ଆ ପବିତ୍ର ନାରୁନୀ ।”
MAR 1:25 ଜିସୁ ଆସୁଙ୍କ୍ ଦମକ୍ ଇସ୍ କେତ୍‍ତନ୍; “ଶାନ୍ତି ଆୟମ୍ ! ଇ ନାରୁନ୍ ଲୋପେଙ୍କ୍ ପେଇସ୍ ଆନ୍‌ ।
MAR 1:26 ଆ ବୁତ୍, ଆ ନାରିଙ୍କ୍ ଗାଟି ୱାଡ଼୍‍ସ୍‍କି, ଗାଟି ଲେଙ୍ଗ୍ ମାଡ଼ି ଅନ୍‌ ମେନ୍ଦୁଲ୍‍ତାଗାଙ୍କ୍ ପେଇସ୍ ଆତ୍‍ତେ ।
MAR 1:27 ଇଗେ ସାରେତଡ଼୍ ବାକ୍‍ୱା ଆସ୍ ନିଜେ ନିଜେ କେତାକେତି ଆତ୍‍ତଡ଼୍, ଇଦ୍ ବେସତ୍ ଗଟ୍ ? ଅଣ୍ଡ୍‌ ଅଦିକାର୍‌ ନୁ ଶକ୍ତି ତଡ଼୍ ଅଶୁଚି ଆତ୍ମାକିଂଙ୍କ୍ ଗଟ୍ ହିଦ୍‍ତଣ୍ଡ୍, ମେଣ୍ଡେ ଆୱ୍ ପେୟିସ୍ ଆଦ୍‍ତା ।”
MAR 1:28 ଆଗେ ଅନ୍‌‍ୱାଦ୍ ବିଷୟତେ ସୁସମାଚାର୍ ସାରେ ପାକା ସାରେ ପଡ଼ିୟେତାଗ୍ ପ୍ରଚାର୍ ଆତ୍‍ତେ ।
MAR 1:29 ଯାକୁବ୍, ଯୋହନ୍‌ ନୁ ବାଗାତ୍ ଶିଷ୍ୟନଡ଼୍ ତଡ଼୍ ଜିସୁ ପ୍ରାର୍ତନା ଲୋନ୍‌ ୱିଡ଼୍‍ସି ଶିମୋନ୍ ନୁ ଆନ୍ଦ୍ରିୟନ୍ ଲୋନ୍‌ ଆତ୍‍ତଡ଼୍ ।
MAR 1:30 ଆଗେ ହେଉଦାନ୍ ୱେଲେ ଅଣ୍ଡ୍‌ କେଞ୍ଜ୍‍ତଣ୍ଡ୍ ଯେ ଶିମୋନ୍‍ତେ ପୋୟେ ଏଡ଼୍‍କିନେ ପାଟିମିନ୍ଦେ ।
MAR 1:31 ଅଣ୍ଡ୍‌ ତାନ୍ ଗାର୍‍ରେ ଆଞ୍ଜ୍ ତାନାଦ୍ କାଇ ପଇସ୍ କେତ୍‍ତାନ୍, ତାନାଦ୍ ଏଡ଼୍‍କ୍‍ ୱିଡ଼୍‍ସିଆତ୍‍ତେ ନୁ ଆଦ୍ ଅଡ଼୍‌‍କିଂଙ୍କ୍ ସେବା ମାଡ଼ାଙ୍କ୍‍ ଦାନ୍ଦେଆତ୍‍ତେ ।
MAR 1:32 ପଡ଼୍‍ଦ୍‍ ପେଇତାନ୍ ୱେଲେ ନାରୁଡ଼୍ ଜିସୁନ୍‍ପାକେ ରୋଗ୍ ନୁ ବୁତ୍‌ପଇତେ ନାରୁଡ଼୍‍କିଂଙ୍କ୍ ତାତ୍‍ତଡ଼୍ ।
MAR 1:33 ସାରେ ସହର୍‍ତେ ନାରୁଡ଼୍ ୱାସ୍ ଦ୍ୱାର୍‍ମୁନେ ଗୁଡ଼୍‍ତଡ଼୍ ।
MAR 1:34 ବାତ୍‍ବାତ୍ ରୋଗୀଡ଼୍ ମାତ୍‍ତଡ଼୍ ବା ନାର୍‍ଗେ ରୋଗିଡ଼୍‍କ୍‌ ଜିସୁ ସୁସ୍ଥ ମାଡ଼୍‍ତଣ୍ଡ୍ ନୁ ନାର୍ଗେନାରୁଡ଼୍‍ଗାଙ୍କ୍ ବୁତ୍‌କ୍‍ ୱିର୍‍ପ୍‍ତନ୍ ଆ ବୁତ୍‌କିଂଙ୍କ୍ ଗଟି କେତାନଙ୍କ୍ ଇୱେ ମାତ୍‍ତନ୍, ବାତେଙ୍କ୍‍ଇତ୍କେ ଆୱୁ ଅଂକିଙ୍କ୍‌ ପୁଞ୍ଜ୍‍ମାତ୍‍ତା ।
MAR 1:35 ତାନ୍ ମେଣ୍ଡନ୍ ଦିନ୍ ପଡଦ୍ ପେଇୱେ ମୁନେଙ୍କ୍ ଜିସୁ ତେଦି ଲୋତ୍‍ତାଗାଙ୍କ୍ ପେଇସ୍‍ଆତ୍‍ତନ୍ । ଅଣ୍ଡ୍‌ ନାର୍ ୱିଡ଼୍‍ସି ୱେରଡ଼୍ ସିମ୍‍ସାମ୍ ପଡ଼ିୟେତାଗ୍ ଆଞ୍ଜ୍ ପ୍ରାର୍ତନା ମାଡ଼୍‍ତଣ୍ଡ୍ ।
MAR 1:36 ଶିମୋନ୍ ନୁ ତାନ୍ ସାଙ୍ଗନଡ଼୍ ଜିସୁଙ୍କ୍ ମେହେକାନଙ୍କ୍ ପସ୍‍ପ୍‍ ତ୍‍ତଡ଼୍ ।
MAR 1:37 ଅଂକିଙ୍କ୍‌ ଦର୍ସିକି ଅଡ଼୍‌ କେତ୍‍ତଡ଼୍, ମାମ୍‍ମେ ସାରେତମ୍ ନିକିଂଙ୍କ୍ ମେହେକୁତମ୍ ।
MAR 1:38 ବାତେଙ୍କ୍ ଇତ୍‍କେ ଜିସୁ ଅଡ଼୍‌‍କିଂଙ୍କ୍ କେତ୍ତନ୍, “ଗାର୍‍ରେମାନ୍ଦାନ୍ ବେନା ବେନା ନାକିନାଗ୍ ମାନା ଆଦାଙ୍କ୍ ଆଦ୍‍ତେ । ନାନ୍‍ନେ ଆଗେ ମିକା ପ୍ରଚାର୍ ମାଡ଼ିତାନ୍, ବାତେଙ୍କ୍‍ଇତ୍କେ ଆଦ୍ ଉଦ୍ଦେଶ୍ୟତେ ନାନ୍‍ନେ ଆଦୁତାନ୍ ।”
MAR 1:39 ତାନ୍‍ପେର୍କେ ଅଣ୍ଡ୍‌ ଗାଲିଲୀତେ ସାରେ ନାକିନାଗ୍ ଉଡି ପ୍ରାର୍ତନା ଲୋକିନାଗ୍ ପ୍ରଚାର୍ ମାଡ଼୍‍ତଣ୍ଡ୍ ନୁ ବୁତ୍‌କ୍ ୱିର୍‍ସ୍ପତନ୍ ।
MAR 1:40 ୱେରଣ୍ଡ୍ କୃଷ୍ଠରୋଗି ଜିସୁନ୍ ପାକେ ୱାତ୍‍ତନ୍ । ମର୍‍ମିଣ୍ଡା ଇସ୍ ବିନତି ମାଡ଼ି କେତ୍‍ତାନ୍, “ପ୍ରବୁ, ନିମେ ଯଦି ଇଚ୍ଛା ମାଡ଼ିତି, ଆଲାତ୍କେ ନାକିଂଙ୍କ୍ ସୁସ୍ଥ ମାଡ଼୍‍ଡ଼େ ପାର୍‍ତିଡ଼୍ ।”
MAR 1:41 ଜିସୁ ଦୟାତେ କାଇ ଆସ୍ ଅଂକିଙ୍କ୍‌ ଇଟ୍‍ତନ୍ ନୁ କେତ୍‍ତାନ୍, “ନାନ୍‍ନେ ଆଦେକେ ଇଚ୍ଛା ମାଡ଼ୁତାନ୍, ନିମ୍‍ ଶୁଚି ଆୟାମ୍ ।”
MAR 1:42 ସାଙ୍ଗେ ସାଙ୍ଗେ ଆଦ୍ ରୋଗ୍ ଅନାଗାଙ୍କ୍ ଦୁର୍ ଆତ୍‍ତେ ନୁ ଅଣ୍ଡ୍‌ ଶୁଚି ଆତ୍‍ତନ୍ ।
MAR 1:43 ତାନ୍‍ପେର୍କେ ଜିସୁ ଅଙ୍କ୍‌ ସତର୍କ ମାଡ଼ି କେତ୍‍ତାନ୍,
MAR 1:44 “କେଞ୍ଜା ଇଦ୍‍ଗୋଟ୍ ବେନଙ୍କ୍ ବା କେଲ୍‍ମା ବାତେଙ୍କ୍ ଇତ୍‍କେ ଦର୍ମ ଯାଜଗ୍‍ନଡ଼୍ ପାକେ ଆନ୍‌ । ଅଣ୍ଡ୍‌ ନିକିଂଙ୍କ୍ ପରିକ୍ଷା ମାଡ଼ି ଉଡ଼ିତନ୍ । ତାନ୍‍ପେର୍କେ ନିମ୍‍ ସାରେ ଶୁଚିଆତ୍‍ତିନ୍ ଇଞ୍ଜ ବାଗାତଡ଼୍ ପାକେ ପ୍ରମାନ୍‍ ମାଡ଼ାନ୍ ସେଙ୍ଗେ ମୋଶାନ୍‌ ନିର୍ଦ୍ଦେଶ୍‍ ଲେକାମ୍ ପାଲନ୍‍ ମାଡ଼େ ।” ଇଦ୍ କେସ୍ ଜିସୁ ଅଂକିଙ୍କ୍‌ ସାଙ୍ଗେ ସାଙ୍ଗେ ରହସିତ୍‍ତନ୍ ।
MAR 1:45 ବାତେଙ୍କ୍ ଇତ୍‍କେ ନାରୁଡ଼୍ ଆଗାଙ୍କ୍ ଆଞ୍ଜ ଇଦ୍‍ଗୋଟ୍ ସାରେପାକ୍ କେତ୍‍ତଡ଼୍ । ଆଦ୍ ଇ ବିଷୟ୍‍ତେ ଇସର୍ କେସ୍ ଉଡ଼୍‍ତଣ୍ତ ଯେ, ଜିସୁ କେତାନଙ୍କ୍ ବେନ୍ ସହର୍ ଲୋପେ ଆଦେ ପାର୍‍ୱନ୍ । ଆଦିଙ୍କ୍ ଅଣ୍ଡ୍‌ ସିମ୍‍ ସାମ୍ ପଡ଼ିୟେତାଗ୍ ମାତ୍‍ତନ୍, ଆଗେକ୍‍ ବା ସାରେ ପାକେତ୍ ନାରୁଡ଼୍ ଅନ୍‌‍ପାକେ ୱାତ୍‍ତଡ଼୍ ।
MAR 2:1 ବେସ୍‌କ୍ ଦିନାତ୍ ପେର୍‍କେ ଜିସୁ କପର୍ନାହୁମ୍ ମାଲ୍‍ସ୍ ଆତ୍‍ତନ୍ । ଅଣ୍ଡ୍‌ ଲୋନ୍‌ ମିନ୍ଦେନ୍ ଇଞ୍ଜ କବର୍ ସାରେ ପାକେ ଆତ୍‍ତେ ।
MAR 2:2 ଆଗେ ଇସର୍ ନାରୁଡ଼୍ ୱାସ୍ ଗୁଡ଼୍‍ତଡ଼୍ ଯେ ଦ୍ୱାର୍‍ପାକ୍ ମିକା ସୁଦୁଟ୍ ବା ପଡ଼ିୟେ ଇଲ୍‍ୱେ ମାତ୍‍ତେ । ମେଣ୍ଡେ ଅଣ୍ଡ୍‌ ଅଡ଼୍‌‍ ପାକେ ବାକ୍ୟ ପ୍ରଚାର୍ ମାଡ଼ାନଙ୍କ୍ ପସ୍ପ୍‍ତନ୍ ।
MAR 2:3 ଜିସୁ ଅଡ଼୍‌‍ପାକେ ସୁସମାଚାର୍ ପ୍ରଚାର୍ ମାଡ଼ାନ୍ ୱେଲେ, ନାଲ୍‍ୱୁଡ଼୍ ନାରୁଡ଼୍ ୱେରଙ୍କ୍ ପକ୍ଷାଗାତ୍ ରୋଗିଙ୍କ୍ କାଞ୍ଜି ତାତ୍‍ତଡ଼୍ ।
MAR 2:4 ବାତେଙ୍କ୍ ଇତ୍କେ ନାରୁଡ଼୍ ମାନ୍ଦେ ସେଙ୍ଗେ ଅଡ଼୍‌ ଅଂକିଙ୍କ୍‌ ଜିସୁନ୍ ଗାର୍‍ରେ ତାତାଙ୍କ୍ ଆୟେୱେ ମାତ୍‍ତେ । ଆଦିଙ୍କ୍ ଜିସୁ ବେନ୍ ପଡ଼ିୟେତାଗ୍ ମାତ୍‍ତନ୍, ଟିକ୍ ଆଦେ ପଡ଼ିୟେତାଗ୍ ମୁର୍ସ୍‌ତିଙ୍କ୍ ଟେଣ୍ଡ୍‍ତଡ଼୍ ନୁ ଆଦ୍‍ ଆଲାନ୍ ରୋଗିଙ୍କ୍ କେତିତାଗ୍ ପାଡ଼୍‍ସ୍ପି ମଦଲ୍ ଡିପିତ୍‍ତଡ଼୍ ।
MAR 2:5 ଆ ନାରୁଡ଼୍ ବିଶ୍ୱାସ୍ ଉଡ଼ି ଜିସୁ ପକ୍ଷାଗାତ ରୋଗିଙ୍କ୍ କେତ୍‍ତନ୍, “ପେକା ! ନିୟାଦ୍ ପାପ୍ ସାରେକ୍ଷମା ଆତ୍‍ତେ ।”
MAR 2:6 ଆଗେ କୁଦିମାନ୍ଦାନ୍ ବେସ୍‍ତୁଡ଼୍ ଶାସ୍ତ୍ରୀନାରୁଡ଼୍ ଆଦ୍‍ କେଞ୍ଜି ମାନ୍‍ଦାଗ୍ ଆଲ୍‍ସତଡ଼୍,
MAR 2:7 “ଅଣ୍ଡ୍‌ ଇଦ୍‍ଗୋଟ୍ କେତାନଙ୍କ୍ ସାହାସ୍ ମାଡ଼୍‍ତଣ୍ଡ୍ ବେଲାନ୍ ? ଇଦ୍ ଇଶ୍ୱର୍‌ତେ ନିନ୍ଦ୍ । ଇଶ୍ୱର୍‌ତିଙ୍କ୍ ୱିଡ଼୍‍ସି ବେନ ପାପ୍‍କ୍ଷମା ମାଡ଼୍‍ଡ଼େ ପାର୍‍ୱଣ୍ଡ୍ ?”
MAR 2:8 ଅଡ଼୍‌ ମାନ୍‍ଦେ ହେର୍କା ପୁଞ୍ଜ୍ ଜିସୁ ପଚାର୍ ମାଡ଼୍‍ତଣ୍ଡ୍, “ବାତ୍‍ତିଙ୍କ୍ ଇଦ୍‍ଲେକାମ୍ କାରାପ୍‍ ଗଟି ସାରେ ଆଲ୍‍ସୁତିଡ଼୍ ?
MAR 2:9 ଆ ପକ୍ଷାଗାତ ରୋଗିଙ୍କ୍ ‘ନିୟାଦ୍ ପାପ୍ କ୍ଷମା ଆତ୍‍ତେ,’ ଇଞ୍ଜ କେତାନାଦ୍ ସହଜ୍ ନା ‘ତେଦା, କେତ୍ ପଇସ୍ ଅନ୍‌’ ଇଞ୍ଜ କେତାନାଦ୍ ସହଜ୍ ?”
MAR 2:10 “ପୃତିବିତାଗ୍ ପାପ୍ କ୍ଷମା ମାଡ଼ାନ୍ ସେଙ୍ଗେ ନାରୁନ୍‍ପିଲେତିଙ୍କ୍ ଅଦିକାର୍‌ ମିନ୍ଦେ, ଇଦ୍ ମିଡ଼୍ ଇଞ୍ଜେ ପୁନ୍ଦେପାର୍‍ୱିଡ଼୍ ।”
MAR 2:11 ଇଦିନ୍‍ପେର୍କେ ଜିସୁ ଆ ରୋଗିଙ୍କ୍ କେତ୍‍ତନ୍, “ନାନ୍‍ନେ ନିକିଂଙ୍କ୍ କେତୁତାନ୍, ତେଦ୍‍ଦେ, ନିୟାଦ୍ କେତ୍ ପଇସ୍ ଲୋନ୍‌ଆନ୍‌ ।”
MAR 2:12 ସାରେତଡ଼୍ ଉଡ଼ି ମାନ୍ଦାନ୍ ୱେଲେ, ରୋଗି ତେଦିମିକା କେତ୍‍ ପଇସ୍ ଆତ୍‍ତନ୍ । ଆଗାଙ୍କ୍ ସାରେତଡ଼୍ ବାକୁୱା ଆସ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସ୍ କେତ୍‍ତଡ଼୍, “ମାମ୍‍ମେ ଇଦ୍‍ଲେକାତ୍ କାମ୍ ବେସୁଙ୍କ୍‍ ଉଡ଼୍‍ୱେ ମାତ୍‍ତମ୍ ।”
MAR 2:13 ଜିସୁ ମେଣ୍ଡନ୍‍ନ୍ଦାମ୍ ଇଲ୍‍କେ ଗୁୟ୍‍ନ୍ଦେ ଆଞ୍ଚିନା ଆତ୍‍ତନ୍ । ଆଗେ ନାରୁଡ଼୍ ଗୁଡ଼୍‍ନାଙ୍କ୍ ଜିସୁ ଅଡ଼୍‌‍କିଂଙ୍କ୍ ଶିକ୍ଷା ଇତ୍‍ତନ୍ ।
MAR 2:14 ଅଣ୍ଡ୍‌ ଆଗାଙ୍କ୍ ଆଦ୍‍ଦାନ୍ ଆର୍‍ଦାଗ୍ ଆଲପିନ୍‍ ମାର୍‍ ସିସ୍ତୁ ଆଦାୟ୍‍ ମାଡ଼ାନଣ୍ଡ୍ ଲେବୀଙ୍କ୍ ତାନ୍ କାମ୍‍ମାଡ଼ାନଙ୍କ୍ ଲୋତ୍‍ତାଗ୍ କୁଦିମାନ୍ଦାନାଦ୍ ଉଡ଼୍‍ତନ୍ । ଜିସୁ ଅଂକିଙ୍କ୍‌ କେତ୍‍ତାନ୍, “ନା ପେର୍‍କେ ପେର୍‍କେ ୱାଡ଼ା ।” ଲେବିୟତେଦି ଅନ୍‌ ପେର୍‍କେ ଆତ୍‍ତନ୍ ।
MAR 2:15 ତାନ୍‍ପେର୍କେ ଜିସୁ ଲେବିନ୍‍ ଲୋନ୍‌ ତିନ୍ଦାନାଗ୍ କୁଦ୍‍ତନ୍ । ଜିସୁନ୍ ପେର୍‍କେ ଆଞ୍ଜ୍ ମାନ୍ଦାନ୍ ନାର୍ଗେନାରୁଡ଼୍ ସିସ୍ତୁ ଆଦାୟ୍‍ ମାଡ଼ାନଣ୍ଡ୍ ନୁ ସମାଜ ଲୋତ୍‍ତେ ନାରୁଡ଼୍ ଜିସୁ ନୁ ତାନ୍ ଶିଷ୍ୟନଡ଼୍‍ ତଡ଼୍ ଅଣ୍ଡୟାଗେ ତିନ୍ଦାନାଗ୍ କୁଦ୍‍ତଡ଼୍ ।
MAR 2:16 ଆଦ୍ ଉଡ଼ି ପାରୂଶୀଡ଼୍ ମାନ୍ଦେତାଗ୍ ବେସ୍‍ତୁଡ଼୍‍ ଶାସ୍ତ୍ରୀଡ଼୍ ଜିସୁନ୍ ଶିଷ୍ୟଡ଼୍‍କ୍ ପଚାର୍‍ମାଡ଼୍‍ତନ୍, “ଇଦ୍‍ଲେକାମ୍ ନାରୁଡ଼୍‍ତଡ଼୍ ଅଣ୍ଡ୍‌ ବାତ୍‍ତିଙ୍କ୍ ତିଞ୍ଚମିନ୍ଦେନ୍ ?”
MAR 2:17 ଆଦ୍‍ଗଟ୍ କେଞ୍ଜି ଜିସୁ ଉତ୍ତର୍ ଇତ୍‍ତନ୍, “ସୁସ୍ଥନାରୁଣ୍ଡ୍ ସେଙ୍ଗେ ଚିକିତ୍ସା ମାଡ଼ାନାଦ୍ ଦର୍‍କାଡ଼୍ ଇଲ୍‍ଲେ । ଦର୍‍କାର୍‍ ମିନ୍ଦେ ମାତର୍ ଅସୁସ୍ଥ ନାରୁଡ଼୍‍ ସେଙ୍ଗେ । ନାନ୍‍ ଦାର୍ମିକ୍ ନଡ଼୍ ସେଙ୍ଗେ ୱାଡ଼ନ୍, ୱାତ୍‍ତାନ୍ ପାପୀନଡ଼୍ ସେଙ୍ଗେ ।”
MAR 2:18 ଅଣ୍ଡ୍‌ ଦାମ୍ ବାପ୍ତିସ୍ମଇଦାନ୍ ଯୋହନ୍‌‌ତେ ଶିଷ୍ୟନଡ଼୍ ନୁ ପାରୂଶୀଡ଼୍ ଉପବାସ୍ ମାଡ଼ାନ୍‍ୱେଲେ, ବେସ୍‌କ୍ ତଡ଼୍ ଜିସୁନ୍‍ପାକେ ୱାସ୍ ପଚାର୍‍ମାଡ଼୍‍ତଡ଼୍, “ଯୋହନ୍‌ ନୁ ଫାରୁଶୀନଡ଼୍ ଶିଷ୍ୟନଡ଼୍ ଉପବାସ୍ ମାଡ଼ିତଡ଼୍ ବାତେଙ୍କ୍ ଇତ୍‍କେ ନି ଶିଷ୍ୟନଡ଼୍ ବାତ୍‍ତିଙ୍କ୍ ଉପବାସ୍ ମାଡ଼ଡ଼୍‍ ?”
MAR 2:19 ଜିସୁ ଉତ୍ତର୍‍ ଇତ୍‍ତନ୍, “ସାଙ୍ଗେତେ ମାନ୍ଦା‍ନ୍ ଯାକ ପେଣ୍ଡୁଲ୍‍ ପେକାନ୍‍ତଡ଼୍‍ ମାନ୍ଦାନ୍‍ ନାରୁଡ଼୍‍ ବାତେଏ ଉପବାସ୍ ମାନ୍ଦେ ପାର୍‍ୱଡ଼୍ ? ବେସୁଙ୍କ୍‍ ଆୟ୍‍ୟ । ଅଡ଼୍‌‍ତଡ଼୍ ବର ମାନ୍ଦନ୍ ଯାକ ଅଡ଼୍‌‍ଆଦ୍ ମାଡ଼ଡ଼୍ ।
MAR 2:20 ବାତେଙ୍କ୍ ଇତ୍‍କେ ଦିନାମ୍ ୱାତ୍‍ତେ, ବେସୁଙ୍କ୍‍ ବର ଆ ନାରୁଡ଼୍‍ଡ଼ାଗାଙ୍କ୍ ଯେକା ଆଦ୍‍ତଡ଼୍ । ଆସୁଙ୍କ୍‍ ଅଡ଼୍‌ ଉପବାସ୍ ମାଡ଼ିତଡ଼୍ ।”
MAR 2:21 “ବେନ ପାଃନ୍ତେ ଚକାନେ ପୁନେ କନାତେ ତାଲି ୱାଟନ୍ । ବାତେଙ୍କ୍‍ଇତ୍କେ ପୁନେ କନାତେ ତାଲି କୁଙ୍କ୍‍ସି ମିକା ସିଲେ ଅଦିକ୍‌ ଇକି ତିଡ଼୍‍ ।
MAR 2:22 ମେଣ୍ଡେ, ବେନ ପାଃନ୍ତେ ତଲ୍‍‍କେତ୍‍ କୁଣ୍ଡେତାଗ୍ ପୁନାଦ୍‍ ଦ୍ରାକ୍ଷାରସ୍‍ ୱାଟଡ଼୍; ଇତ୍କେ ପୁନାଲାଦ୍‍ ଦ୍ରାକ୍ଷାରସ୍‍ ୱାଟ୍‍କେ ଆଦ୍ କୁଣ୍ଡେ ପାର୍‍କ୍ ମାଡ଼ିଦ୍‍ତେ, ନୁ ମେଣ୍ଡେ ଦ୍ରାକ୍ଷାରସ୍‍ ନୁ କୁଣ୍ଡେ ରେଣ୍ଡ୍‍ଆସ ନଷ୍ଟ ଆଦ୍‍ତେ । ଆସୁଙ୍କ୍‍ ପୁଃନେ ଦ୍ରାକ୍ଷାରସ୍‍ ପୁଃନେ ତଲ୍‍କେ କୁଣ୍ଡେତାଗ୍ ୱାଟାନଙ୍କ୍‍ ଆଦ୍‍ତେ ।”
MAR 2:23 ଅନ୍‌‍ଦିନ୍‌ ବିଶ୍ରାମ୍‍ଦିନେତେ ଜିସୁ ୱେରଡ଼୍ କେଡ଼୍ ୱାୟେତାଲାନ୍ ନାଡ଼୍‍ମେଙ୍କ୍ ଆଞ୍ଜମାତ୍‍ତଣ୍ଡ୍ । ଅନ୍‌‍ତଡ଼୍ ଶିଷ୍ୟନଡ଼୍ ଆଦ୍‍ଆର୍ ଆଦାନ୍‍ୱେଲେ ଶସ୍ୟକେଡ଼୍ ଦେହେତାନଙ୍କ୍ ପସ୍ପ୍‍ତ୍‍ତଡ଼୍ ।
MAR 2:24 ଫାରୁଶୀନଡ଼୍ ଜିସୁଙ୍କ୍ କେତ୍‍ତଡ଼୍, “ଉଡ଼ାଟ୍, ବିଶ୍ରାମ୍‍ଦିନେତେ ମିଇ ଶିଷ୍ୟନଡ଼୍ ମା ଶାସ୍ତ୍ରବିରୁଦ୍ଦ୍‌ତେ ପାଡ଼୍‍ୟି ମାଡ଼ୁତଡ଼୍ ।”
MAR 2:25 ଜିସୁ ଅଡ଼୍‌କିଂଙ୍କ୍‌ ଉତ୍ତର୍‍ ଇତ୍‍ତନ୍, “ବେସୁଙ୍କ୍‍ ଦାଉଦ୍‍ତେ ତିନ୍ଦାନାଦ୍ ନାର୍‍ଗେ ଆତ୍‍ତେ, ଅଣ୍ଡ୍‌ ବାତ୍‍ତେ ମାଡ଼ିତନ୍, ଆଦ୍ ଗୋଟ୍‍ମିଡ଼୍ ବେସୁଙ୍କ୍‍ କାର୍‍ୱିଡ଼୍ ?”
MAR 2:26 “ଅଣ୍ଡ୍‌ ନୁ ତାନ୍ ସାଙ୍ଗନଡ଼୍ କାର୍‍ୱିଙ୍କ୍ ଆଇନାଙ୍କ୍ ଇଶ୍ୱର୍‌ତେ ମନ୍ଦିର୍‍ତାଗ୍ ଲୋପେ ଆଞ୍ଜ୍ ଇଶ୍ୱର୍‌ତେ ଉଦ୍ଦେଶ୍ୟତେ ଉତ୍ସର୍ଗିତ ରୂଟି ତିଞ୍ଜ୍ ମାତ୍‍ତଡ଼୍ । ଆବିଆଥାତେ ବେଡ଼ିଇ ପୁରହିତ ମାନ୍ଦାନ୍‍ୱେଲେ ଇଦ୍ ଗଟନା ଗଟେମ୍ ଆସ୍‍ମାତ୍‍ତେ । ମାୟାଦ୍‌ ଶାସ୍ତ୍ରଲେକାମ୍ ମାତର୍ ପୁରହୀତନଡ଼୍ ଇଦ୍ ରୂଟି ତିନ୍ଦାନ୍ ଦର୍‍କାର୍‍ । ବାତେଙ୍କ୍ ଇତ୍‍କେ ଦାଉଦ୍ ନିଜେ ଇଦ୍‍ତିଞ୍ଜ୍ ତାନ୍ ସାଙ୍ଗନଡ଼୍‍କ୍‍ ମିକା ଇସ୍‍ମାତ୍‍ତନ୍ ।”
MAR 2:27 ତାନ୍‍ପେର୍କେ ଜିସୁ କେତ୍‍ତନ୍, “ନାରୁଡ଼୍ ସେଙ୍ଗେ ବିଶ୍ରାମ୍‍ଦିନେ ଆସ୍‍ମିନ୍ଦେ, ନାରୁଡ଼୍ ବିଶ୍ରାମ୍‍ଦିନେ ସେଙ୍ଗେ ଆୟ୍‍ୟ ।
MAR 2:28 ଆଦିଙ୍କ୍‍ ନାରୁନ୍‍ ପିଲେ ବିଶ୍ରାମ୍‍ଦିନେତେ ମିକା ପ୍ରବୁ ।”
MAR 3:1 ଜିସୁ ପ୍ରାର୍ତନା ଲୋନ୍‌ ମାଲ୍‍ସ୍ ଆତ୍‍ତନ୍ । ଆଗେ ୱେରଣ୍ଡ୍ ନାରୁଡ଼୍ ମାତ୍‍ତନ୍‍ । ଅନାଦ୍‌ କାଇ ୱାସି ମାତ୍‍ତେ ।
MAR 3:2 ଜିସୁ ବିଶ୍ରାମ୍ ଦିନେତେ ଆ ନାରୁଙ୍କ୍ ସୁସ୍ଥ ମାଡ଼ିତ୍‍ତନ୍ କି ଇଲ୍‍ଲେ, ଇଦ୍ ବିଷୟ୍‍ତେ ଅନାଦ୍‌ ଦଷ୍ ପଇସ୍ କାରାପ୍ ଗଟି ତତାନ୍‍ସେଙ୍ଗେ ବେସ୍‍ତୁଡ଼୍ ନାରୁଡ଼୍ ଅନ୍‌‍ପରୁ ଲେକେତ୍‍ କଣ୍ଡେ ୱାଟ୍‍ତଡ଼୍‍ ।
MAR 3:3 ଜିସୁ ଆ ନାରୁଙ୍କ୍ କେତ୍‍ତନ୍, “ନା ମୁନେ ତେଦିୱାଡ଼ା ।”
MAR 3:4 ଅଣ୍ଡ୍‌ ନାରୁଡ଼୍‍କିଂଙ୍କ୍ ପଚାର୍‍ମାଡ଼୍‍ତନ୍, “ବିଶ୍ରାମ୍‍ଦିନେତେ ବାଆତେ ମାଡ଼ାନାଦ୍‍ ଟିକ୍‍ ନିୟମ୍‍ ? ବେନ୍ ଦିନ୍ ୱେରନାଦ୍ ଲେକେତ୍‍ ମାଡ଼ିକାଡ଼୍ ନା କାରାପ୍‍ ମାଡ଼ିକା ? ୱେରନାଦ୍‍ ତ ଜିୱୁନ୍‍ତିଙ୍କ୍‌ ରକ୍ଷା ମାଡ଼ାନାଦ୍ ନା ବିନାସ ମାଡ଼ାନାଦ୍ ? ବାତେଙ୍କ୍ ଇତ୍‍କେ ଅଡ଼୍‌ କଟମାତ୍‍ତଡ଼୍ ।”
MAR 3:5 ଜିସୁ ଅଡ଼୍‌‍ପାକେଙ୍କ୍ କପାମ୍‍ ଆସ୍ ଉଡ଼୍‍ତନ୍‍ ନୁ ଅଡ଼ାଦ୍‌ ତିପାଲ୍‌ ହୃଦୟତିଙ୍କ୍‍ ଉଡ଼ି ଦୁଃକାମ୍ ଆତ୍‍ତନ୍ । ତାନ୍‍ପେର୍କେ ଆ ନାରୁଙ୍କ୍ କେତ୍‍ତନ୍, “କାଇ ଆମ୍‍ ।” ଅଣ୍ଡ୍‌ କାଇ ଆତାନ୍‍ ୱେଲେ ସୁସ୍ଥ ଆତ୍‍ତେ ।
MAR 3:6 ଆସୁଙ୍କ୍ ଫାରଶୀଡ଼୍‍ ପ୍ରାର୍ତନା ଲୋତ୍‍ତାଗାଙ୍କ୍ ପେଇସ୍ ଆଞ୍ଜ୍ ଜିସୁଙ୍କ୍ ଆୱୁକାନ୍ ସେଙ୍ଗେ “ହେରଦୀନ୍‍” ମାନ୍ଦେତ୍ ନାରୁଡ଼୍‍ତଡ଼୍ ତିର୍‍ୟ୍‍ତନ୍ ।
MAR 3:7 ଜିସୁ ନୁ ତାନ୍ ଶିଷ୍ୟନଡ଼୍ ଗାଲିଲୀ ଇଲ୍‍କେତ୍ ଆଞ୍ଚିନାଗ୍ ଆଦ୍‍ତଡ଼୍ ନୁ ନାରୁଡ଼୍ ନାର୍ଗେମାନ୍ଦେ ଅନ୍‌‍ପେର୍କେ ତାକ୍‍ତଡ଼୍ ମେଣ୍ଡେ, ଯିହୂଦା ପ୍ରଦେଶ୍ ।
MAR 3:8 ଅଡ଼୍‌ ଗାଲିଲୀ, ଯିହୁଦା, ଯିରୁଶାଲେମ୍, ଏଦୋମ, ଯର୍ଦ୍ଦନ ବେଡ଼୍‍ମ୍‍ତେ ମୁନେମାନ୍ଦାନ୍ ସହର୍ ନୁ ସୋର୍‍ ନୁ ସିଦୋନ୍‍ ସହର୍‍ତେ ଗାର୍‍ରେମାନ୍ଦାନ୍ ନାର୍‍ଦାଗାଙ୍କ୍ ୱାସ୍ ମାତ୍‍ତଡ଼୍ ।
MAR 3:9 ଆଗେ ଇସର୍ ନାରୁଡ଼୍‍ଗହଲି ଆଦ୍‍ତଡ଼୍ ଯେ, ମାନ୍ଦେତାଗାଙ୍କ୍ ରକ୍ଷା ଆଦାନ୍‍ ସେଙ୍ଗେ ଜିସୁ ୱେରଡ଼୍ ଓଡେ ଯୋଗାଡ଼୍ ମାଡ଼ାନଙ୍କ୍ ଶିଷ୍ୟନଡ଼୍‍କ୍‍ କେତ୍‍ତନ୍ ।
MAR 3:10 ଅଣ୍ଡ୍‌ ନାର୍‍ଗେ ନାରୁଡ଼୍‍କିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ । ନପିନ୍‍ନେ ମାନ୍ଦାନ୍ ନାରୁଡ଼୍ ଅଙ୍କ୍‌ ଇଟାନ୍‍ ସେଙ୍ଗେ ମୁନେ ଆଞ୍ଜମାତ୍‍ତଡ଼୍ ।
MAR 3:11 ମେଣ୍ଡେ ବୁତ୍‍ପଇତେ ନାରୁଡ଼୍ ଅଂକିଙ୍କ୍‌ ଉଡ଼ାନ୍ ସାଙ୍ଗେ ସାଙ୍ଗେ ଅନ୍‌‍ମୁନେ ନେଲ୍‍ରାଲି ଗାଟିଲେଙ୍କ୍‍ଦେ କେସମାତ୍‍ତଡ଼୍ “ନିମେକେ ଇଶ୍ୱର୍‌ତେ ମାର୍‍ ।”
MAR 3:12 ଅଣ୍ଡ୍‌ ବେନ, ଇଦ୍‍ଗଟ୍ ବେନଙ୍କ୍ ବା କେଲ୍‍ମାଟ୍ ଇଞ୍ଜ ଜିସୁ ବୁତ୍‌କିଂଙ୍କ୍ ଦମକ୍‍ ଇସ୍ କେସମାତ୍‍ତନ୍ ।
MAR 3:13 ତାନ୍‍ପେର୍କେ ଜିସୁ ମେଟେତ୍‍ପରୁ ଆଞ୍ଜ୍ ବେନଡ଼୍‍କ୍ ଇଚ୍ଛା ମାଡ଼ୁତଣ୍ଡ୍, ଅଡ଼୍‌‍କିଂଙ୍କ୍ ଗାର୍‍ରେ କାର୍‍ଙ୍କ୍‍ତନ୍ ।
MAR 3:14 ଅଣ୍ଡ୍‌ ବାରଜାନ୍‍ତିଙ୍କ୍ ହେଞ୍ଚିମିକା ପ୍ରେରିତ୍‍ ଶିଷ୍ୟଡ଼୍ ପେଦେର୍ ଇତ୍‍ତନ୍ । ଅଡ଼୍‌‍କିଂଙ୍କ୍ ଅଣ୍ଡ୍‌ କେତ୍‍ତାନ୍, “ନା ତୋଡ଼୍ ମାନ୍ଦାନଙ୍କ୍ ନାନ୍‍ନେ ମିକିଂଙ୍କ୍ ହେଞ୍ଚି ମିନ୍ଦେନ୍ ନୁ ପ୍ରଚାର୍ ମାଡ଼ାନ୍ ସେଙ୍ଗେ ନାନ୍‍ନେ ମିକିଂଙ୍କ୍ ରତିତାନ୍ ।
MAR 3:15 ମିଡ଼୍ ବୁତ୍‌ୱିର୍‍ସ୍ପାନଙ୍କ୍ ଆନ୍‌‍ତେ ଅଦିକାର୍‌ ପାହେମ୍‍ ଆଦ୍‍ତିଡ଼୍ ।”
MAR 3:16 ଅଡ଼୍‌‍ ବାରଜାନ୍‍ତିଙ୍କ୍ ହେଞ୍ଚ୍‍ତନ୍ ଶିମୋନ୍ ଜିସୁ ଅଂକିଙ୍କ୍‌ ପିତର୍ ଇଞ୍ଜ ପେଦେର୍ ଇତ୍‍ତନ୍;
MAR 3:17 ଜେବଦୀଙ୍କ୍ ଇର୍‍ୱୁଡ଼୍ ମାର୍‍କ୍ ଯାକୁବ୍ ନୁ ତାନ୍‌ ତାମୁଣ୍ଡ୍‌ ଯୋହନ୍‌ ଜିସୁ ଅଡ଼୍‌‍କିଂଙ୍କ୍ ବିନେରିଗୋଷ ଇତ୍‍କେ “ମାବ୍‍ତାଗାଙ୍କ୍ ୱାତ୍‍ତେ ମାର୍‍କ୍,” ପେଦେର୍‍ ଇତ୍‍ତନ୍ ।
MAR 3:18 ଆନ୍ଦ୍ରିୟ, ଫିଲିପ୍, ବର୍ତଲମି, ମାତିଉ, ତୋମା, ଆଲ୍‍ଫିନ୍ ଇର୍‍ୱୁଡ଼୍ ମାର୍‍କ୍‍ ଯାକୁବ୍ ନୁ ତଦ୍ଦିୟ, ଦେଶ୍‍ତିଙ୍କ୍ ପ୍ରେମ୍‍ ମାଡ଼ାନ୍ ଶିମୋନ୍ ନୁ
MAR 3:19 ଇଷକାରିୟତେ ଯିହୁଦାଲ୍‍ ପେର୍‍କେ ଯେ ଜିସୁନ୍ ତଡ଼୍ ବିଶ୍ୱାସଗାତକତା ମାଡ଼୍‍ତଣ୍ଡ୍ ।
MAR 3:20 ତାନ୍‍ପେର୍କେ ଜିସୁ ବେସୁଙ୍କ୍‍ ଲୋନ୍‌ ମାଲ୍‍ତନ୍, ଆଗେମିକା ଇସର୍ ନାରୁଡ଼୍ ଗୁଡ଼୍‍ତଡ଼୍ ଯେ ଜିସୁ ନୁ ତାନ୍‍ଶିଷ୍ୟନଡ଼୍ ତିନ୍ଦାଙ୍କ୍‍ମିକା ପାର୍‍ୱଡ଼୍ ।
MAR 3:21 ଜିସୁ ବାୟ୍‍ ଆତ୍‍ତନ୍ ଇଞ୍ଜ ନାରୁଡ଼୍‍ କେତାନାଦ୍ କେଞ୍ଜି, ଜିସୁନ୍ ଆତ୍ମୀୟନଡ଼୍ ଅଙ୍କ୍‌ପଇସ୍‍ ଆଦାନଙ୍କ୍ ୱାତ୍‍ତଡ଼୍ ।
MAR 3:22 ଯିରୁଶାଲେମ୍ ତାଗାଙ୍କ୍ ୱାସ୍‍ମାନ୍ଦାନ୍ ବେସ୍‍ତୁଡ଼୍ ଦର୍ମଗୁରୁଡ଼୍ କେତ୍‍ତଡ଼୍, “ବାଆଲ୍‍ଜିବୁଲ୍ ଅଂକିଙ୍କ୍‌ ଅଦିକାର୍‌ ମାଡ଼୍‍ତେ । ମେଣ୍ଡେ ବୁତ୍‌କିନ୍ ଅଦିପତି ବୁତ୍‌କ୍ ୱିର୍‍ସ୍ପାନଙ୍କ୍ ଅଂକିଙ୍କ୍‌ ଶକ୍ତି ଇତ୍‍ତେ ।”
MAR 3:23 ଜିସୁ ଅଡ଼୍‌‍କିଂଙ୍କ୍ କାର୍‍ଙ୍ଗି ୱେଷଡ଼୍‍ଲେକାମ୍ ବୁଜାମାଡ଼ି କେତ୍‍ତାନ୍, “ଶୟ୍‍ତାନ୍‍ ବେଲାନ୍ ଶୟ୍‍ତାନ୍‍ତିଙ୍କ୍ ତୋଲାନଙ୍କ୍ ପାର୍‍ତେ ?
MAR 3:24 ରାଜ୍ୟତେ ନାରୁଡ଼୍ ଯଦି ମାନ୍ଦା ମାନ୍ଦାଆସ୍ ନିଜେତ୍ ବିରୁଦ୍ଦ୍‌ତେ ଯୁଦ୍‌ ମାଡ଼ିତଡ଼୍, ଆଦ୍ ରାଜ୍ୟ ଦୁଡ଼ା ଦୁଡ଼ା ଆଦ୍‍ତେ ।
MAR 3:25 ୱେରଡ଼୍ ପରିବାର୍‍ତେ ନାରୁଡ଼୍ ଯଦି ବେନ୍‍ବେନ୍ ମାନ୍ଦେତାଗାଙ୍କ୍ ୱିରିମିକା ନିଜେ ନିଜେ ବିରୁଦ୍ଦ୍‌ ମାଡ଼ିତଡ଼୍, ଆଦ୍ ପରିବାର୍ ଉର୍‍ଙ୍ଗି ଆଦ୍‍ତେ ।
MAR 3:26 ଆଲେକେ ଯଦି ଶୟତାନ୍‍ତେ ରାଜ୍ୟ ୱେରେ ଆଦ୍‍ତେ, ଆଲେକେ ଆଦ୍ ରାଜ୍ୟ ମାନ୍ଦେପାର୍ୱ, ଦୁଡ଼ା ଦୁଡ଼ା ଆସ୍ ଦ୍ୱଂସ ଆଦ୍‍ତେ ।”
MAR 3:27 ଶକ୍ତିନାରୁନ୍ ଲୋନ୍‌ ବେନଆୟି ନେଙ୍କି ମୁନେ ଅଂକିଙ୍କ୍‌ ତୱେମାତ୍‍କେ, ଅନାଦ୍‌ ଜିନିଷ୍‍ ଡ଼ଙ୍ଗି ଅଦେ ପାରେୱଡ଼୍ ।
MAR 3:28 “ନାନ୍‍ନେ ମିକିଂଙ୍କ୍ ନିଜାମ୍‍ତେ କେତୁତାନ୍ ଯେ, ସାରେ ପାପ୍ ନୁ ଇଶ୍ୱର୍ ଲିନ୍ଦ୍ ସେଙ୍ଗେ ନାରୁଡ଼୍‍କିଂଙ୍କ୍ କ୍ଷମା ଇଦ୍‍ପାର୍‍ତନ୍ ।
MAR 3:29 ବାତେଙ୍କ୍ ଇତ୍‍କେ ବେନାୟି ପବିତ୍ରଆତ୍ମାତିଙ୍କ୍ ଲିନ୍ଦ୍ ମାଡ଼୍‍କେ, ଅନାଦ୍‌ ବେସୁଙ୍କ୍‌ବା କ୍ଷମାଇଲେ । ବାତେଙ୍କ୍‍ଇତ୍କେ ଅନାଦ୍‌ ପାପ୍ ସାରେ ଦିନାମ୍‍ ମାନ୍‍ତେ ।
MAR 3:30 ଜିସୁଙ୍କୁ ବୁତ୍‌ପଇତେ ଇଞ୍ଜ ବେସ୍‍କ୍‍ତୁଡ଼୍‍ କେଲ୍‍ନାଙ୍କ୍ ଜିସୁ ଇଦ୍‍ଗଟ୍ କେତ୍‍ତନ୍ ।”
MAR 3:31 ଆସୁଙ୍କ୍ ଜିସୁନ୍ ୟାୟ୍‍ ନୁ ଦାଦାଲଡ଼୍ ୱାସ୍ ୱେଉତ୍‍ତଡ଼୍ । ଅଡ଼୍‌ ବାଇଦେ ନିସ୍ ଜିସୁଙ୍କ୍‍କାର୍ଗି ତାତାନ୍‍ସେଙ୍ଗେ କବର୍ ରତ୍‍ତଡ଼୍ ।
MAR 3:32 ଜିସୁଙ୍କ୍ ନାର୍ଗେ ନାରୁଡ଼୍ ତିଡ଼ିଇ କୁଦିମାତ୍‍ତଡ଼୍ । ଅଡ଼୍‌ ଅଙ୍କ୍‌ କେତ୍‍ତଡ଼୍, “ନି ୟାୟ୍‍ ନୁ ଦାଦାଲଡ଼୍ ନୁ ଏଲାସ୍କ୍‌ ନିୟ୍ ସେଙ୍ଗେ ବାଇଦେ କେପ୍‍ତଡ଼୍ ।”
MAR 3:33 ଜିସୁ ଉତ୍ତର୍ ଇତ୍‍ତନ୍, “ବେନ ନା ୟାୟ୍‍, ବେନ୍ ନା ଦାଦାଲଡ଼୍‍ ବେନ ନା ହେଲାଡ଼୍‍ ?”
MAR 3:34 ତାନ୍ ସାରେପାକ୍ କୁଦିମାନ୍ଦାନ୍ ନାରୁଡ଼୍‍କିଂଙ୍କ୍ ଉଡ଼ି ଅଣ୍ଡ୍‌ କେତ୍‍ତାନ୍, “ଉଡ଼େ ଇଡ଼୍‍ ନା ୟାୟ୍‍, ନୁ ଇଡ଼୍ ନା ଦାଦାଲଡ଼୍ !
MAR 3:35 ବେନଆଇ ଇଶ୍ୱର୍‌ତେ ଇଚ୍ଛା ପାଲନ୍ ମାଡ଼ିତଡ଼୍‍, ଅନ୍‌ ନା ଦାଦାଲ୍, ଏଲାସ୍କ୍‌ ନୁ ୟାୟ୍‍ ।”
MAR 4:1 ସମୁଦ୍ର ଆଞ୍ଚିନା ଜିସୁ ମେଣ୍ଡନ୍ ଦାମ୍ ଶିକ୍ଷାଇଦାନଙ୍କ୍ ଆରାମ୍ ମାଡ଼୍‍ତଣ୍ଡ୍ । ଜିସୁନ୍ ସାରେପାକା ଇସର୍ ନାରୁଡ଼୍ ଯେ ଅଣ୍ଡ୍‌ ୱେରଡ଼୍ ଓଡ଼େତାଗ୍ ଆଞ୍ଜ୍ କୁଦ୍‍ତନ୍ । ଓଡ଼େତାଗ୍ ଏର୍‍ଦେ ଲୋପେ ସୁଦୁଟ୍ ଯେକା ମାତ୍‍ତେ ନୁ ନାରୁଡ଼୍ ଆଞ୍ଚିନ୍‍ ବୂମ୍‌ତାଗ୍‍ ନିସ୍ ମାତ୍‍ତଡ଼୍ ।
MAR 4:2 ଜିସୁ ୱେଷଡ଼୍‍ ଇନା ଅଡ଼୍‌‍କିଂଙ୍କ୍ ନାର୍‍ଗେ ଶିକ୍ଷା ଇତ୍‍ତନ୍, ମେଣ୍ଡେ କେତ୍‍ତଣ୍ଡ୍ ।
MAR 4:3 ଅନ୍‌ କେତ୍‍ତନ୍, “କେଞ୍ଜାଟ୍ ! ଅନ୍‌‍ଦାମ୍ ୱେରଣ୍ଡ୍ ନାରୁଡ଼୍ ୱାୟେତାଗ୍ ୱିତାନଙ୍କ୍ ପେଇତ୍‍ତନ୍ ।
MAR 4:4 ଅନ୍‌ ୱିଜ୍ ୱିତାନ୍‍ୱେଲେ ଆର୍‍ଦେ ପରୁ ବେସ୍‌କ୍ ରାଲ୍‍ତା ନୁ ପିଟେ ଆୱିଙ୍କ୍ ତିତ୍‍ତା ।
MAR 4:5 ମେଣ୍ଡେ ବେସ୍‌କ୍ ୱିଜ୍ କାଲ୍‍କିନ୍‍ ୱାୟେତାଗ୍ ରାଲ୍‍ତା, ଆଗେ ଅଦିକ୍‌ ଇଶୁର୍ ମାଣ୍ଡୁଲ୍‍ମାତ୍‍ତେ । ଆଗେ ମାଣ୍ଡୁଲ୍‍ତେ ଲୋପେ ଇଲ୍‍ୱାଙ୍କ୍ ଜାପେ ୱିଜ୍ ଗାଜ୍‍ ଆତ୍‍ତେ, ବାତେଙ୍କ୍ ଇତ୍‍କେ ମାଡା ଲୋପେ ଆଦ୍‍ଦେ ପାର୍‍ୱ ।
MAR 4:6 ପେର୍‍କେ ପଡ଼ଦ୍‍ତେ ଗାଟିକାମ୍‍କେତେ ଆୱୁ ଗାଜେ ସାରେ ୱାସିଆତ୍‍ତା ।
MAR 4:7 ମେଣ୍ଡେ ବେସ୍‌କ୍ ୱିଜ୍ କୟେ ଦୀବାନାଗ୍ ରାଲ୍‍ତା । ଆୱୁ କୟେମାଡ଼ାକ୍ ପେର୍‍ସି ଇସୁ ଇସୁ ଗାଜେନ୍ ପରୁ ମାନ୍‍ନାଙ୍କ୍ ଆଗେମେଣ୍ଡେ ପେଡ଼େକ୍ ଆୟ ।
MAR 4:8 ମେଣ୍ଡେ ବେସ୍‌କ୍ ୱିଜ୍ ଲେକେତ୍‍ ୱାୟେତାଗ୍ ରାଲ୍‍ତା, ହାଉସାରେ ଗାଯେଆସ୍ ପେର୍‍ସ୍ତା ନୁ ସାୟେ ଆଦ୍‍ତା; ବେସ୍‌କ୍ ତିରିଶି ଗୁଣ୍, ବେସ୍‌କ୍ ଷାଟିଏ ଗୁଣ୍ ନୁ ବେସ୍‌କ୍ ଶହେ ଗୁଣ୍‍ ଆଦ୍‍ତା ।”
MAR 4:9 ଜିସୁଆଦ୍‍ ୱେଷଡ଼୍ ତେର୍‍ପ୍ତି କେତ୍‍ତନ୍, “ବେନନାୱୁ କେଞ୍ଜାନଙ୍କ୍ କେୱୁକ୍‍ ମିନ୍ଦେ, ଅଣ୍ଡ୍‌ ମନ୍‍ଇସ୍ କେଞ୍ଜିନ୍ ।”
MAR 4:10 ଜିସୁ ୱେରଣ୍ଡ୍ ମାନ୍ଦାନ୍‍ୱେଲେ କେଞ୍ଜାନଡ଼୍‍ ଆଗାଙ୍କ୍ ବେସ୍‍କ୍‍ତୁଡ଼୍‍ ବାର ଶିଷ୍ୟନଡ଼୍‍ ନୁ ଅନ୍‌‍ ପାକେ ବେସ୍‍ତୁଡ଼୍ ମାତ୍‍ତେନଡ଼୍ ଅଣ୍ଡ୍‌ କେସ୍‍ମାନ୍ଦାନ୍ ୱେଷଡ଼୍‍ତେ ଇତ୍‍କେ ବୁଜାମାଡ଼ାଙ୍କ୍ ଅନୁରଦ୍‌ ମାଡ଼୍‍ତଡ଼୍ ।
MAR 4:11 ଜିସୁ ଉତ୍ତର୍ ଇତ୍‍ତନ୍, “ଇଶ୍ୱର୍‌ତେ ରାଜ୍ୟ ବିଶ୍ୱାସ୍‍ତେ ମିଇପାକେ କେସ୍‍ମିନ୍ଦେନ୍ । ବାତେଙ୍କ୍ ଇତ୍‍କେ ବାଗାତଡ଼୍‍କିଙ୍କ୍ ଇୱୁ ସୁଦୁଟ୍ ୱେଷଡ଼୍‍ତେ ଲେକାମ୍‍ କେତୁତଡ଼୍‍ ।
MAR 4:12 ଆଦିନ୍‌ ସେଙ୍ଗେ, ଅଡ଼୍‌ ଉଡ଼ଡ଼୍ ମାନ୍‍ତଡ଼୍ ଇତ୍‍କେ ବାତେଏ ଉଡ଼େ ପାର୍‍ୱଡ଼୍ । ସାରେ ଗଟି କେଞ୍ଜିମାନ୍ତଡ଼୍, ବାତେଙ୍କ୍ ଇତ୍‍କେ ବାତେଏ ବୁଜେମ୍ ଆୟ୍‍ୟଡ଼୍; ଅଡ଼୍‌ ଯଦି ପ୍ରକୃତ୍‍ତେ ଉଡ଼େଡ଼୍‍ ନୁ ବୁଜେମ୍ ଆୟେଡ଼୍, ଅଡ଼୍‌ ଇଶ୍ୱର୍‌ତେ ପାକେ ମାଲ୍‍ସ୍ ୱାଡେଡ଼୍ ନୁ ଇଶ୍ୱର୍ ଅଡ଼୍‌‍କିଂଙ୍କ୍ କ୍ଷମା ଇୱେଣ୍ଡ୍ ।”
MAR 4:13 ଜିସୁ ଅଡ଼୍‌‍କିଂଙ୍କ୍ ପଚାର୍‍ମାଡ଼୍‍ତନ୍, “ଇଦ୍ ୱେଷଡ଼୍‍ତେ ଇତ୍‍କେ ବାତେଏ ବୁଜେମ୍ ଆୟ୍‍ୱିଡ଼୍ ? ଆଲେକେ ମେଣ୍ଡନ୍ ୱେଷଡ଼୍ ସାରେତିଙ୍କ୍ ବୁଜେମ୍ ଆଦ୍‍ତିଡ଼୍ ବେଲାନ୍ ?
MAR 4:14 ଇଶ୍ୱର୍‌ତେ ଗଟ୍ ପଚାର୍‌ମାଡ଼ାନ୍‌ଡ଼୍‍, ୱିଜ୍ ୱିତାନନ୍ ଲେକାମ୍ ।
MAR 4:15 ଆର୍‍ଦାଗ୍ ରାଲିମାନ୍ଦାନ୍ ୱିଜେଲେକାମ୍ ଆଦ୍ ଗଟ୍‍ତିଙ୍କ୍ ବେସ୍‍କ୍‍ତୁଡ଼୍‍ ନାରୁଡ଼୍ ଗ୍ରହନ୍ ମାଡ଼ିତଡ଼୍ । ବାତେଙ୍କ୍ ଇତ୍‍କେ ଅଡ଼୍‌ କେଞ୍ଜାନ୍‍ ସାଙ୍ଗେ ସାଙ୍ଗେ ଶୟ୍‍ତାନ୍‍ ଅନାଦ୍‌ ଡଙ୍ଗିଆଦ୍‍ତେ ।
MAR 4:16 କାଲ୍‍କିନ୍‍ ୱାୟେତାଗ୍ ରାଲିମାନ୍ଦାନ୍ ୱିଜେଲେକାମ୍ ଆଦ୍ ଗଟ୍‍ତିଙ୍କ୍ ବେସ୍‍କ୍‍ତୁଡ଼୍‍ ନାରୁଡ଼୍ କେଞ୍ଜ୍‍ତେ ୱେଲେ ୱେଡ଼୍‍କେତେ ଗଟ୍‍ ଗ୍ରହନ୍ ମାଡ଼୍‍ତଡ଼୍,
MAR 4:17 ବାତେଙ୍କ୍ ଇତ୍‍କେ ବିଶ୍ୱାସ୍‍ତେ ଆଦ୍ ହୃଦୟଙ୍ଗମ ମାଡ଼୍‍ୱାଙ୍କ୍ ଅଡ଼୍‌ ଆଗାଙ୍କ୍ ତିଆର୍‍ତେ ମାନ୍‍ନ୍ଦେ ପାର୍‍ୱଡ଼୍ ନୁ ଆଦ୍ ଗଟ୍ ସେଙ୍ଗେ ବେସୁଙ୍କ୍‍ ଦୁଃକାମ୍ କଷ୍ଟ ନୁ ଉତ୍‍ପିଡ଼ିତ ୱାସ୍‍ହେଉତେ, ଅଡ଼ାଦ୍‌ ଦଂସ ଆଦ୍‍ତେ ।
MAR 4:18 କୟେ ଦିବାନାଗ୍ ରାଲିମାନ୍ଦାନାୱୁ ୱିଜେଲେକାମ୍ ଆଦ୍ ଗଟ୍‍ତିଙ୍କ୍ ମେଣ୍ଡେ ବେସ୍‍କ୍‍ତୁଡ଼୍‍ ନାରୁଡ଼୍ କେଞ୍ଜିତଡ଼୍,
MAR 4:19 ବାତେଙ୍କ୍ ଇତ୍‍କେ ସଂସାର୍‍ତେ ଚିନ୍ତେ, ଡାବ୍‍କିନ୍‍ ଆସେ ନୁ ଲେକେତାୱୁ ବେଶତାୱ୍‍ ଲାଲସା ତାମ୍‍ ମାନ୍‍ତାଗ୍ ମାନ୍‍ନାଙ୍କ୍ ମାଡ଼ାନଙ୍କ୍ ଆଦ୍ ଗଟ୍ ବେସୁଙ୍କ୍‌ବା କାୟେ ଆଦ ।
MAR 4:20 ଲେକେତ୍‍ ୱାୟେତାଗ୍ ରାଲିମାନ୍ଦାନ୍ ୱିଜେଲେକାମ୍, ଆଦ୍ ଗଟ୍‍ତିଙ୍କ୍ ମେଣ୍ଡେ ବେସ୍‍କ୍‍ତୁଡ଼୍‍ କେଞ୍ଜି ଗ୍ରହନ୍ ମାଡ଼ିତଡ଼୍ ନୁ ଜିୱେତାଗ୍ ବେନ ତିରିଶ୍ ଗୁଣ୍, ବେନ ଷାଟିଏ ଗୁଣ୍ ନୁ ବେନ ଶହେ ଗୁଣ୍ କାୟା ଆଦ୍‍ଦିତ୍‍ତା ।”
MAR 4:21 ଜିସୁ ମେଣ୍ଡେ କେତ୍‍ତଣ୍ତ୍, ବେନ ବାତ୍‍ତେ କୁପିତିଙ୍କ୍ ନିଡ଼୍‍ସ୍‍ପି ବଡ଼୍‍ ମଦଲ୍ ମୁସ୍‍ସି ୱାଟିତନ୍ ବା କାଟୁଲ୍‍ ମଦଲ୍ ୱାଟିତନ୍ ? ଆଦ୍ ବାତ୍‍ତେ ୱେସ୍‍ୱାଟାନ୍ ପରୁ ୱାଟାନଙ୍କ୍‍ ଆୟ୍‍ୟ ?
MAR 4:22 ବାତେଏ ମିଞ୍ଜି ମିନ୍ଦେ, ଆଦ୍ ପ୍ରକାଶ୍‍ ଆଦ୍‍ତେ; ବାତେଏ ତନ୍ଦମିନ୍ଦେ, ଆଦ୍ ବେସୁଙ୍କ୍‍ ବା ତନ୍ଦ ।
MAR 4:23 ବେନଙ୍କ୍ କେଞ୍ଜାନଙ୍କ୍ କେୱୁ ମିନ୍ଦେ, ଅନ୍‌ କେଞ୍ଜିନ୍ ।
MAR 4:24 ଜିସୁ ଅଡ଼୍‌‍କିଂଙ୍କ୍ କେତ୍‍ତାନ୍, “ବାତ୍‍ତେ କେଞ୍ଜିତିଡ଼୍, ଆଦିନ୍ ସେଙ୍ଗେ ମାନ୍‍ଇସ୍ କେଞ୍ଜାନଙ୍କ୍ ମାନୁଟ୍ । ବେନ୍‍ବାଡ଼୍‍ତେ ମିଡ଼୍ ବାଗାତଡ଼୍ ବିଚାର୍ ମାଡ଼ାଟ୍, ଆଦ୍ ବାଡ଼୍‍ତେ ବାତେଙ୍କ୍ ଇତ୍‍କେ ଅଦିକ୍‌ କଷ୍ଟତେ ଇଶ୍ୱର୍ ମିୟାଦ୍ ବିଚାର୍ ମାଡ଼ିତନ୍ ।
MAR 4:25 ବେନନାଉ ମିନ୍ଦେ, ଅଂକିଙ୍କ୍‌ ଅଦିକ୍‌ ଇଦ୍‍ତନ୍ । ବେନନାଉ ଇଲା, ଅନାହୁ ବାତେସାରେ ମିନ୍ଦେ, ଆଦ୍ ମିକା ଟେଣ୍ଡିଆଦ୍‍ତନ୍ ।”
MAR 4:26 ଜିସୁ କେତାନଙ୍କ୍ ପସ୍ପ୍‍ତନ୍; ଇଶ୍ୱର୍‌ତେ ରାଜ୍ୟତେ ଆସର୍ ଇଦ୍‍ଲେକାମ୍ । ୱେରନ୍ ନାରୁନ୍ ୱାୟେତାଗ୍ ୱିତିତନ୍ ।
MAR 4:27 ନାର୍‍କେତ୍ ଉଞ୍ଜାଙ୍କ୍ ଆଦ୍‍ତନ୍ ନୁ ପାୟାଲ୍ କେପିତନ୍, ବାତେଙ୍କ୍ ଇତ୍‍କେ ୱିଜ୍ ଗାଜେଆସ୍ ବେଲାନ୍ ନାର୍‍ଗେ ଆଦ୍‍ତେ, ଆଦ୍‍ ଅଣ୍ଡ୍‌ ପୁନଣ୍ଡ୍ ।
MAR 4:28 ମାଡ଼େ ପେର୍‍ସି କାୟାଆଦାନ୍ ସେଙ୍ଗେ ମାଣ୍ଡୁଲ୍ଏ‍କେ ସାରେ ମାଡ଼ିତେ, ମୁନେଙ୍କ୍ ମାଡ଼େତେ ଚିଟି, ତାନ୍‍ପେର୍କେ କଡ଼୍‍ସିତ୍‍ ନୁ ପେର୍‍କେ କେଡ଼୍‍ତାଗ୍ ପେଡ଼େକ୍‍ ଆଦ୍‍ଦିତ୍‍ତା ।
MAR 4:29 ପେଡ଼େକ୍ ପାଣ୍ଡି କଇଦାନ୍ ଦିନାମ୍ ହେଉକେ; ଅଣ୍ଡ୍‌ ଏଟାକେସେର୍ ପଇସ୍ କଇଦ୍‍ତନ୍ ।
MAR 4:30 ଜିସୁ କେତ୍‍ତଣ୍ତ ; ଇଶ୍ୱର୍‌ତେ ରାଜ୍ୟତଡ଼୍ ବେନଙ୍କ୍ ସାମାନ୍ ମାଡ଼ାନଙ୍କ୍ ଆଦ୍‍ତେ ? ଅଂକିଙ୍କ୍‌ ବୁଜାମାଡ଼ାନ୍‍ ସେଙ୍ଗେ ବାତେଏ ୱେଷଡ଼୍ କେତିତାନ୍ ?
MAR 4:31 ଇଦ୍ ୱେଷଡ଼୍ ଗର୍ର୍ ପେଡ଼େମ୍‍ ଲେକାମ୍ । ଗର୍ର୍‌ ପେଡ଼େମ୍ ଗାଟି ସୁଦୁରାଦ୍ ଆତ୍କେ ମିକା,
MAR 4:32 ମାଣ୍ଡୁଲ୍‍ତାଗ୍ ରାଲ୍‍କେ ଆଦ୍ ବେଡ଼ିୟାଦ୍ ମାଡ଼େ ଆସ୍ କମା ଆଦ୍‍ତେ ନୁ ବେଡ଼ିୟାଦ୍ ମାଡେ ଲେକାମ୍ ତିଆର୍‍ଆଦ୍‍ତେ ନୁ ପିଟେ ତାନ୍ ତୁଉକାନାଗ୍ ବାସେ ମାନ୍‍ତା ।
MAR 4:33 ଇଦ୍‍ଲେକାମ୍ ନାର୍‍ଗେ ୱେଷଡ଼୍‍ତେ ଗଟି କେସ୍‍ ଜିସୁ ଅନାୱୁ ଗଟି ପ୍ରଚାର୍ ମାଡ଼୍‍ତଣ୍ଡ୍; ଅଡ଼୍‌ ବେସର୍ ବୁଜେମ୍ ଆତ୍‍ତଡ଼୍, ଅଣ୍ଡ୍‌ ଆସର୍ କେସ୍‍ମାତ୍‍ତନ୍ ।
MAR 4:34 ୱେଷଡ଼୍‍ତିଙ୍କ୍ ୱିଡ଼୍‍ସି ଅନ୍‌ ଅଡ଼୍‌‍କିଂଙ୍କ୍ କେତାନାଦ୍ ଇୱେମାତ୍‍ତନ୍ । ବାତେଙ୍କ୍ ଇତ୍‍କେ ମାତର୍ ଶିଷ୍ୟନଡ଼୍‍ତଡ଼୍ ମାନ୍ଦାନ୍ ୱେଲେ ଅନ୍‌ ଅଡ଼୍‌‍କିଂଙ୍କ୍ ସାରେ ଗଟି କେସ ମାତ୍‍ତଣ୍ଡ୍ ।
MAR 4:35 ଆଦ୍ ଦିନ୍ ମୁଲ୍‍ପୁଟ୍ ଜିସୁ ଶିଷ୍ୟନଡ଼୍‍କ୍ କେତ୍‍ତନ୍, “ଦାଟିଟ୍‍, ମାନାଡ଼୍ ବେଡ଼େମ୍ ଆପାକ୍‍କେ ଆଦିକାଡ଼୍‍ ।”
MAR 4:36 ଅନ୍‌ଦିନେ ଅଡ଼୍‌ ନାରୁଡ଼୍‍କ୍‍ ୱିଡ଼୍‍ସି ଓଡେତାଗ୍ ଆଞ୍ଜ୍ କୁଦ୍‍ତଡ଼୍ । ଆଗାଙ୍କ୍ ଜିସୁ ମୁନେକେ କୁଦିମାତ୍‍ତଣ୍ଡ୍ । ଅଡ଼୍‌ ଓଡେତିଙ୍କ୍ କଅତାନଙ୍କ୍ ପସ୍‍ପ୍‍ତ୍‍ ତଡ଼୍ । ବେଡ଼େମ୍‍ତାଗ୍ ମେଣ୍ଡେ ନାର୍‍ଗେ ଓଡା ମାତ୍‍ତା ।
MAR 4:37 ହଟାତ୍ ଗାଟି ଗାଲ୍‍ ୱାତ୍‍ତେ ନୁ ଓଡେତ୍ ଲୋପେ ତଲ୍‍କଡ଼୍‍ତେ ଏର୍‍ ଓଡ଼େତାଗ୍ ନିଣ୍ଡାନଙ୍କ୍ ପସ୍ପତ୍‍ତେ ।
MAR 4:38 ଜିସୁ ଓଡେତ୍ ପେର୍କେତ୍‍ ପାକେ ବାଲିସ୍‍ତେ ପରୁ ତାଲେୱାଟି ଉଞ୍ଜିମାତ୍‍ତନ୍ । ଶିଷ୍ୟନଡ଼୍ ଅଙ୍କ୍‌ ତେସ୍‍ କେତ୍‍ତଡ଼୍, “ଗୁରୁ, ମାମ୍‍ମେ ମୁଡ଼ୁନ୍ଦି ଡଲିତମ୍, ନିୟାଦ୍ ବାତେଏ ଚିନ୍ତାଇଲେ ?”
MAR 4:39 ଜିସୁ ନିସ୍‍ମିକା ଗାଲ୍‍ଦିଙ୍କ୍ ଦମକ୍‍ଇସ୍ କେତ୍‍ତନ୍, “ଶାନ୍ତି ଆୟିମ୍,” ନୁ ତଲ୍‍କଡ଼୍‍ତିଙ୍କ୍ କେତ୍‍ତନ୍, “ସୁସ୍ଥିର ଆୟିମ୍ ।” ହଟାତ୍ ଗାଲ୍ ମାଦ୍‍ତେ ନୁ ସାରେ ଶାନ୍ତି ଆତ୍‍ତେ ।
MAR 4:40 ତାନ୍‍ପେର୍କେ ଜିସୁ ଶିଷ୍ୟନଡ଼୍‍କ୍ ପଚାର୍‍ମାଡ଼୍‍ତନ୍, “ବାତ୍‍ତିଙ୍କ୍ ଆସର୍ ୱେର୍‍ଦୁତିଡ଼୍ ? ଇଞ୍ଜେକ୍ ଆଇନା ବାତେଏ ମିୟାଦ୍ ବିଶ୍ୱାସ୍ ଇଲେ ?”
MAR 4:41 କିନ୍ତୁ ଅଡ଼୍‌ ଗାଟି ୱେର୍‍ସ୍‍ ମିକା ତାମେ ତାମେ କେତ୍‍ତଡ଼୍, ଇ ନାରୁଣ୍ଡ୍ ବେନ ? ଏର୍‍ ନୁ ଗାଲ୍ ଅନ୍‌‍ ଗଟି ମାନେମ୍‍ ଆଦ୍‍ତା ।
MAR 5:1 ଜିସୁ ନୁ ତାନ୍ ଶିଷ୍ୟନଡ଼୍ ଗାଲିଲୀ ବେଡ଼େମ୍ ମେଣ୍ଡନ୍‍ ପାକେ ଗରାଶୀୟନଡ଼୍ ନାର୍ଦାଗ୍ ହେଉତ୍‍ତଡ଼୍ ।
MAR 5:2 ଜିସୁ ଓଡେତାଗାଙ୍କ୍ ଡ଼ିଗାନ୍‍ ସାଙ୍ଗେ ସାଙ୍ଗେ ଆଗେ ମାନ୍ଦାନ୍ କବର୍ ବା ପାଡ଼୍‍କିନ୍ ଲୋପେଙ୍କ୍ ୱେରନ୍ ବୁତ୍‌ପଇତେ ନାରୁନ୍ ୱାସ୍ ଅଙ୍କ୍‌ କାଇଲ୍‍ତନ୍ ।
MAR 5:3 ଅଣ୍ଡ୍‌ ୱିସ୍‍କିନାଗ୍ ମାନ୍‍ନୁନ୍ । ବେନ ଅଙ୍କ୍‌ ଇକ୍‍ଲେମ୍‍ତ ମିକା ତଅତ୍‍ତେ ପାର୍‍ୱେ ମାନ୍‍ମାନ ।
MAR 5:4 ଅଣ୍ଡ୍‌ କାଇକିନାଉ ଇକ୍‍ଲେମ୍‍ ଦେହେସ୍‍ ମାତ୍‍ତନ୍ ନୁ ଡେକାନ୍ ବେଡ଼ି ଉୱୁସ୍ ମାନ୍‍ନୁନ୍ । ଅନାହୁ କାଇକ୍ ଡ଼େକା ଇକ୍‍ଲେକ୍ ତହସ୍ ମାତ୍‍ତଡ଼୍ । କିନ୍ତୁ ଅଙ୍କ୍‌ ପଇତାନ୍ ସେଙ୍ଗେ ବେନନାଦ୍ ଶକ୍ତି ଇଲ୍‍ଲେ ।
MAR 5:5 ଅଣ୍ଡ୍‌ ନାର୍କା ପାୟାଲ୍ ମେଟାନାଗ୍ ନୁ ୱିଷ୍‍କିନାଗ୍ ଉଡମାନ୍‍ନୁନ୍, କିଡ଼୍‍କି ମିକା କାଲ୍‍କିନାଗ୍ ନିଜେତ୍ ମେନ୍ଦୁଲ୍‍ତିଙ୍କ୍ ଚିହ୍ନା ମାଡ଼ମାତ୍‍ତଣ୍ତ୍‌ ।
MAR 5:6 ସୁଦୁଟ୍ ଯେକା ଜିସୁଙ୍କ୍ ଉଡ଼ି ଅଣ୍ଡ୍‌ ମିରିୱାସ୍ ଅନ୍‌ ମୁନେ ମର୍‍ମିଣ୍ଡା ଇସ୍,
MAR 5:7 ଗାଟିଲେଙ୍ଗ୍‍ଦେ କେତ୍‍ତାନ୍, “ହୋ ସର୍ବୋପରିସ୍ଥ ଇଶ୍ୱର୍‌ତେ ମାର୍‍ ଜିସୁ ! ନା ପାକେ ନିୟାଦ୍‍ ବାତେ ପାଡ଼୍‍ୟି ? ଇଶ୍ୱର୍‌ତେ ପେଦେର୍‍ତେ କେତୁତାନ୍, ନାକିଙ୍କ୍ ଯନ୍ତ୍ରଣା ଇମା ।”
MAR 5:8 ଅଣ୍ଡ୍‌ ଇଦ୍‍ଗଟ୍ କେତ୍‍ତନ୍, ବାତେଙ୍କ୍‍ ଇତ୍‍କେ ଆସୁଙ୍କ୍ ଅନାଗେ ମାନ୍ଦା‍ନ୍ ବୁତ୍‌କିଂଙ୍କ୍ ପେଇସ୍‍ ଆଦାନ୍ ସେଙ୍ଗେ କେସମାତ୍‍ତନ୍ ।
MAR 5:9 ଜିସୁଅଙ୍କ୍‌ କେତ୍‍ତନ୍, “ନି ପେଦେର୍‍ ବାତ୍‍ତେ ?” ଅଣ୍ଡ୍‌ ଉତ୍ତର୍‍ ହିତ୍‍ତନ୍, “ନା ପେଦେର୍ ବାହିନୀ ।”
MAR 5:10 “ମାମେ ନାର୍ଗେ ।” ଆୱିକିଂଙ୍କ୍ ଆଦ୍ ନାର୍‍ଦାଗାଙ୍କ୍ ଯେକା ତଲ୍‍ମାଟ୍ ଇଞ୍ଜ ଅଣ୍ଡ୍‌ ଜିସୁଙ୍କ୍ କେତାନଙ୍କ୍ ପସ୍ପ୍‍ତନ୍ ।
MAR 5:11 ଗାର୍‍ରେ ମାନ୍ଦାନ୍ ମେଟେତାଗ୍ ମାନ୍ଦେ ପାଦି ମେୟ ମାତ୍‍ତା ।
MAR 5:12 ବୁତ୍‌କ୍ ଜିସୁଙ୍କ୍ ଅନୁରଦ୍‌ ମାଡ଼ି କେତ୍‍ତା, “ଆୱୁ ପାଦି ମାନ୍ଦେ ଲୋପେ ନେଙ୍ଗାନ୍ ସେଙ୍ଗେ ମାକିଙ୍କ୍ ଇମ୍ ।”
MAR 5:13 ଜିସୁ କେସ୍‍ ଇତ୍‍ତ‍ନ୍ ନୁ ବୁତ୍‌କ୍ ଆ ନାରୁନାଗାଙ୍କ୍ ପେଇସ୍‍ ୱାସ୍ ପାଦି ମାନ୍ଦେ ଲୋପେ ନେଙ୍ଗ୍‍ତା ନୁ ସାରେ ରେଣ୍ଡ୍‍ହଜାର୍‌ ପାଦି ଗାଟି ଉର୍‍ଗିଙ୍କ୍ ମିରି ମେଟେତ୍‍ ଜୁଟିନାଗାଙ୍କ୍ ରାଲ୍‍ଲି ମୁଡ଼୍‍ନ୍ଦି ଡଲ୍‍ତା ।
MAR 5:14 ପାଦିଙ୍କ୍ କେପାନଡ଼୍ ମିରିଆଞ୍ଜ୍ ଇଦ୍ କବର୍ ସହର୍ ନୁ ଗାରେମାନ୍ଦାନ୍ ନାକିନାଗ୍ କେସ୍‍ସିତ୍‍ତଡ଼୍ । ବାତେ ଗଟେମ୍ ଆତ୍‍ତେ, ଉଡ଼ାନଙ୍କ୍ ନାର୍ଗେ ନାରୁଡ଼୍ ଆତ୍‍ତଡ଼୍ ।
MAR 5:15 ଅଡ଼୍‌ ଉଡ଼୍‌ତଡ଼୍ ଯେ ବୁତ୍‌ପଇତେ ନାରୁନ୍ ଚକା କେର୍‍ସ୍ ଲେକେତ୍‍ ତିଆର୍ ଆସ୍ ଜିସୁନ୍ ଗାରେ କୁଦ୍‍ତନ୍ । ଆଦ୍ ଉଡ଼ି ଅଡ଼୍‌ ବାକ୍‍ୱା ଆତ୍‍ତଡ଼୍ ।
MAR 5:16 ବୁତ୍‌ପଇତେ ନାରୁନ୍ ବେଲାନ୍ ସୁସ୍ଥ ଆତ୍‍ତନ୍ ନୁ ପାଦି ବେଲାନ୍ ନଷ୍ଟ ଆସ୍ ମାତ୍‍ତା, ଇୱୁସାରେ ଗଟ୍‍ନା ଉଡ଼ିମାନ୍ଦାନ୍ ନାରୁଡ଼୍ ଅଡ଼୍‌‍କିଂଙ୍କ୍ କେତ୍‍ତଡ଼୍ ।
MAR 5:17 ଆଦ୍ କେଞ୍ଜି ଅଡ଼୍‌‍ ଜିସୁଙ୍କ୍ ଆଦ୍ ନାର୍ ୱିଡ଼୍‍ସି ଆଦାଙ୍କ୍ କେତ୍‍ତଡ଼୍ ।
MAR 5:18 ଜିସୁ ଓଡେତାଗ୍ ତାରେନଙ୍କ୍ ଆଦାନ୍ ୱେଲେ ବୁତ୍‌ତାଗାଙ୍କ୍ ରକ୍ଷା ଆସ୍‍ମାନ୍ଦାନ୍ ନାରୁଣ୍ଡ୍ ଅନ୍‌‍ତଡ଼୍ ଆଦାନ୍ ସେଙ୍ଗେ କେତ୍‍ତନ୍ ।
MAR 5:19 ଜିସୁ ଅଙ୍କ୍‌ ତାନ୍‌ଡ଼୍‌ ଆଦାଙ୍କ୍‌ ଇୱକଟ୍ କେତ୍‍ତନ୍, “ଲେକେତ୍ ମିଇ ଲୋନ୍‌‍ ମୀଇ ନାରୁଡ଼୍‍ ପାକେ ମାଲ୍‍ସ୍ ଆନ୍‌ । ପ୍ରବୁ ନିଇ ସେଙ୍ଗେ ବାତ୍‍ତେ ସାରେ ମାଡ଼୍‍ତନ୍ ନୁ ନିଇ ମାଇଦିଙ୍କ୍ ବେନ୍ ଦୟା ତତ୍‍ତନ୍, ଇଦ୍ ଗଟ୍ ଅଡ଼୍‌‍କିଂଙ୍କ୍ କେଲ୍‍ମ୍ ।”
MAR 5:20 ନାରୁଣ୍ଡ୍ ଦେକାପଲୀ ଅଞ୍ଚଲ୍‍ତା ଆଞ୍ଜ୍ ଜିସୁ ଅନ୍‌‍ସେଙ୍ଗେ ବାତେ ମାଡ଼ିମାତ୍‍ତନ୍, ସାରେପାକେ କେତ୍‍ତନ୍ । ବେନଡ଼୍ ଅନ୍‌ ଗଟି କେଞ୍ଜ୍‍ତଡ଼୍, ସାରେତଡ଼୍ ବାକ୍‍ୱା ଆତ୍‍ତଡ଼୍ ।
MAR 5:21 ଜିସୁ ବେଡ଼େମ୍‍ତେ ମେଣ୍ଡ୍‍ନ୍ ପାକେ ମାଲ୍‍ସ୍‍ ଆତ୍‍ତନ୍ । ଆ ସମୁଦ୍ର ଆଞ୍ଚିନାଗ୍ ନାର୍ଗେ ନାରୁଡ଼୍ ଅଙ୍କ୍‌ ତିଡ଼ିୟି ନିସ୍‍ ଗୁଡ଼୍‍ତଡ଼୍ ।
MAR 5:22 ଆଗେମାନ୍ଦାନ୍ ଲୋତ୍‍ତେ ଯାଇରସ୍ ପେଦେର୍‍ତନ୍ ୱେରଣ୍ଡ୍ ନାରୁଣ୍ଡ୍ ଆଗେ ହେଉତ୍‍ତନ୍,
MAR 5:23 ନୁ ଜିସୁଙ୍କ୍ ଉଡ଼ି ଅନ୍‌ ଡେକାନ୍ ମଦଲ୍ ରାଲି ହୃଦୟତେ ନିବେଦନ୍ ମାଡ଼୍‍ତନ୍, “ନା ମାୟାଡ଼୍ ନାର୍ଗେ ରୋଗ୍‍ତେ ମିନ୍ଦେ । ନିମେ ୱାସ୍ ତାନ୍ ପରୁ କାଇ ୱାଟ୍‍କେ, ଆଦ୍ ସାୟେ ଆସ୍ ଗେଲ୍‍ସିତ୍ ।”
MAR 5:24 ଜିସୁ ଅନ୍‌‍ତୋଡ଼୍ ଆଦାନଙ୍କ୍ ପେଇତ୍‍ତନ୍ । ନାର୍ଗେ ମୁଲ୍‍ ନାରୁଡ଼୍‍ ଅନ୍‌‍ତଡ଼୍ ଆଞ୍ଜମାତ୍‍ତଡ଼୍ ଯେ ଅନ୍‌ ପରୁ ଅଡ଼୍‌ ସାରେପାକେଙ୍କ୍ ତାଲ୍‍ଗି ରାୟମାତ୍‍ତଡ଼୍ ।
MAR 5:25 ୱେରଡ଼୍ ମୁତ୍‍ତେ ପ୍ରାୟ ବାର ହେଣ୍ଡେକ୍ ପୟିସ୍ ନେତୁର୍‍ ପେଇତାନ୍ ରୋଗ୍‍ତେ ଗାଟି ତିପାଲ୍ ଆସମାତ୍‍ତେ ।
MAR 5:26 ନାର୍ଗେଦାମ୍‍ ସାୟେ ମାଡ଼୍‍କେ ମିକା ସାୟେ ଆୱେ ମାତ୍‍ତେ, ତାନାଉ ସାରେ ଡାବ୍‍କ୍‍ ତେରମାତ୍‍ତେ ମିକା, ରୋଗ୍ ଲେକେତ୍‍ ଆୟ୍‍ୱେ ମାତ୍‍ତେ ନୁ ନାର୍ଗେ ଆସମାତ୍‍ତେ ।
MAR 5:27 ଆଦ୍ ଜିସୁନ୍ ବିଷୟ୍‍ତେ କେଞ୍ଜିମାତ୍‍ତେ ନୁ ନାରୁଡ଼୍ ଗହଲି ଲୋପେଙ୍କ୍ ଜିସୁନ୍‍, ସିଲେତିଙ୍କ୍‍ ହିଟ୍‍ତେ,
MAR 5:28 ପେର୍କେଙ୍କ୍ ୱାସ୍‍ ଆଲ୍‍ସମାତ୍‍ତେ, “ନାନେ ଯଦି ଅନାଦ୍‌ ସିଲେତିଙ୍କ୍, ହିଟ୍‌କେ ନାନେ ସାୟେ ଆଦ୍‍ତାନ୍ ।”
MAR 5:29 ଆଦ୍ ଜିସୁନ୍ ସିଲେତିଙ୍କ୍ ଇଟ୍‍ତେ ସାଙ୍ଗେ ସାଙ୍ଗେ ତାନାଦ୍ ନେତୁର୍ ପେଇତାନାଦ୍ ବନ୍ଦ ଆତ୍‍ତେ ନୁ ଆଦ୍ ରୋଗ୍‍ତାଗାଙ୍କ୍ ସାୟେ ଆତ୍‍ତେ ଇଞ୍ଜ ଏର୍କେ ମାଡ଼୍‍ତେ ।
MAR 5:30 ଆସୁଙ୍ଗେ ଜିସୁ ଅନାଗାଙ୍କ୍ ଶକ୍ତି ପେୟିସ୍ ଆଦାନାଦ୍ ପୁତ୍‍ତନ୍ ନାରୁଡ଼୍‍ ପାର୍କେ ମିଡ଼୍‍ନ୍ଦି ମିକା କେତ୍‍ତନ୍, “ବେନ ନା ସିଲେତିଙ୍କ୍‍ ଇଟ୍‍ତନ୍ ?”
MAR 5:31 ତାନ୍‍ ଶିଷ୍ୟନଡ଼୍ ଉତ୍ତର୍ ହିତ୍‍ତଡ଼୍, “ନିମେ ତ ଉଡ଼ମିନ୍ଦେନି, ବେଲାନ୍ ନି ସାରେ ପାକା ନାରୁଡ଼୍ ମାନ୍ଦେ ଆସ୍‍ମିନ୍ଦେଡ଼୍ । ନିକିଙ୍କ୍ ବେନ ଇଟ୍‍ତନ୍ ଇଞ୍ଜ କେସମିନ୍ଦେନି ବାତ୍‍ତିଙ୍କ୍ ?”
MAR 5:32 କିନ୍ତୁ ବେନ ଅଙ୍କ୍‌ ଇଟ୍‍ତନ୍, ପୁନ୍ଦାନ୍‍ ମାଇଦିଙ୍କ୍ ଜିସୁ ସାରେ ପାକ୍‍କେ ଉଡ଼୍‍ତନ୍ ।
MAR 5:33 ସାରେ ଗଟି ପୁନ୍ଦେପାର୍‍ସ୍ ଆ ନାଟାଡ଼୍ ୱେର୍‍ଗିଙ୍କ୍ ଜିସୁନ୍ ଡେକାନ୍ ମଦଲ୍ ମର୍‍ମିଣ୍ଡା ଇସ୍ ସାରେ ସତ୍‍ ଗଟି କେତ୍‍ତେ ।
MAR 5:34 ଜିସୁ ଆଦିଙ୍କ୍‍ କେତ୍‍ତନ୍, “ପିକି ! ନିୟାଦ୍ ବିଶ୍ୱାସ୍ ନିକିଙ୍କ୍ ସୁସ୍ଥ ମାଡ଼୍‍ତେ । ସାରେତାଗାଙ୍କ୍ ସାୟେ ଆସ୍ ଶାନ୍ତିତେ ମାଲ୍‍ସ୍ ଅନ୍‌ ।”
MAR 5:35 ଜିସୁ ଇଦ୍‍ଗଟ୍ କେତାନ୍‍ ୱେଲେ, ଯାଇରସ୍‍ତେ ଲୋତ୍‍ତେ କଞ୍ଜ୍ କବର୍‍ ତାସ୍‍ ମାନ୍ଦାନ୍ ନାରୁଡ଼୍ ଅଙ୍କ୍‌ କେତ୍‍ତଡ଼୍, “ନି ମାୟାଡ଼୍ ଡଲିଆତ୍‍ତେ, ମେଣ୍ଡେ ବାତ୍‍ତିଙ୍କ୍ ଗୁରୁଙ୍କ୍ ତିପାଲ୍ ମାଡ଼ୁତିନ୍ ।”
MAR 5:36 ଜିସୁ ଅଡ଼ାୱୁ ଗଟିଙ୍କ୍ କେଞ୍ଜିମିକା ଯାଇରସ୍‍ତିଙ୍କ୍ କେତ୍‍ତନ୍, “ୱେର୍‍ମା; ମାତର୍ ବିଶ୍ୱାସ୍‍ ମାଡ଼େ ।”
MAR 5:37 ତାନ୍‍ ପେର୍କେ ଯାକୁବ୍, ତାନ୍ ତାମୁଣ୍ଡ୍‌ ଯୋହନ୍‌‌ ନୁ ପିତର୍‍ତିଙ୍କ୍ ୱିଡ଼୍‍ସି ସାଙ୍ଗେତେ ମେଣ୍ଡେ ବେନଙ୍କ୍ ଆୟକଟ୍ ଜିସୁ ଯାଇରସ୍‍ତେ ଲୋନ୍‌‍ ଆତ୍‍ତଣ୍ତ୍‌ ।
MAR 5:38 ଆଗେ ହେଉସ୍ ଅଣ୍ଡ୍‌ ଉଡ଼୍‍ତନ୍, ନାଟା ଗାଟିଲେଙ୍ଗ୍‍ଦେ କେୟ ମାତ୍‍ତା,
MAR 5:39 ଆଦ୍ ମାନ୍ଦେତିଙ୍କ୍ ଆଞ୍ଜ୍ ଆୱିଙ୍କ୍ କେତ୍‍ତନ୍, “ବାତ୍‍ତିଙ୍କ୍ ମର୍‍ ଆଦୁତିଡ଼୍ ? ବାତ୍‍ତିଙ୍କ୍ କେୟୁତିଡ଼୍ ? ପିକିଡ଼୍ ଡଲ୍‍ଲ, ଉଞ୍ଜ୍‍ତେ ।”
MAR 5:40 ଅଡ଼୍‌‍ ଅଙ୍କ୍‌ ବାକ୍‍ୱାଲ୍ ଆଲ୍‍ସି କାୱୁତ୍‍ତଡ଼୍ । ଜିସୁ ସାରେତଡ଼୍‍କ୍ ପେସ୍‍ପିତ୍‍ତନ୍ ନୁ ମାତର୍ ନିଜେତ୍ ମୁୱୁଡ଼୍ ଶିଷ୍ୟ ନୁ ପିଲେତ୍ ୟାୟ ବାବାଙ୍କ୍ ଆସ୍ ଆଦ୍ ଉଞ୍ଜିମାନ୍ଦାନ୍ ବାକ୍‍ଡ଼େତାଗ୍ ଆତ୍‍ତଡ଼୍‍ ।
MAR 5:41 ପିଲେତ୍ କାଇଦିଙ୍କ୍ ପଇସ୍‍ ଜିସୁ କେତ୍‍ତନ୍, “ତାଲିତା କୁମ୍,” ଇତ୍‍କେ “ପିକି, ନାନ୍ କେତୁତାନ୍ ତେଦା ।”
MAR 5:42 ପିକିଡ଼୍ ଆସୁଙ୍ଗେ ତେଦ୍‍ଦି ତାଆକ ଉଡ଼ାଙ୍କ୍ ପସ୍‍ପ୍‍ତେ । ଆସୁଙ୍ଗ୍ ତାନ୍ ବୟସ୍ ମାତର୍ ବାର ହେଣ୍ଡେକ୍ । ଇଦ୍ ଗଟ୍‍ନାତାଗ୍ ସାରେତଡ଼୍ ବାକ୍‍ୱା ଆତ୍‍ତଡ଼୍ ।
MAR 5:43 କିନ୍ତୁ ଇଦ୍ ବିଷୟ୍‍ତେ ବେନଙ୍କ୍ ବାତ୍‍ତେ କେତାନଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ କେଲ୍‍ମାଟ୍ ଇଞ୍ଜ କେତ୍‍ତନ୍ । ତାନ୍‍ପେର୍କେ ପିକ୍‍ତିଙ୍କ୍ ବାତ୍‍ତେ ତିନ୍ଦାଙ୍କ୍ ଇଦାନ୍‍ ସେଙ୍ଗେ ଜିସୁ ଅଡ଼୍‌‍କିଂଙ୍କ୍ କେତ୍‍ତନ୍ ।
MAR 6:1 ଜିସୁ ଆଦ୍‍ ସହର୍ ୱିଡ଼୍‍ସି ଶିଷ୍ୟନଡ଼୍‍ତଡ଼୍ ନିଜେତ୍ ନାର୍ ନାଜରିତତା ମାଲ୍‍ସ୍ ଆତ୍‍ତଣ୍ତ ।
MAR 6:2 ଆଗେ ରମାନ୍‍ ଦିନେ ପ୍ରାର୍ତନା ଲୋତ୍‍ତାଆଗ୍ ଅଣ୍ଡ୍‌ ଉପଦେଶ୍‍ ହିଦାନ୍‍ ୱେଲେ ନାର୍ଗେ ନାରୁଡ଼୍ ମାତ୍‍ତଡ଼୍ । ଜିସୁନ୍ ଗଟି କେଞ୍ଜି ଅଡ଼୍‌ ବାକୁୱାଆସ୍ କେତ୍‍ତଡ଼୍, “ଇସର୍ ଗଟି ଅଣ୍ଡ୍‌ ବେଗାଙ୍କ୍ ପୁତ୍‍ତନ୍ ? ଇସର୍ ଜ୍ଞାନ୍ ଅଣ୍ଡ୍‌ ବେଗାଙ୍କ୍ ପୁତ୍‍ତନ୍ ? ଇୱୁସାରେ ଆଶର୍ଯ୍ୟ ପାଡ଼୍‍ୟି ଅଣ୍ଡ୍‌ ବେଲାନ୍ ମାଡ଼ୁତନ୍ ?
MAR 6:3 ଇଣ୍ଡ୍‌ ବାତ୍‍ତେ ମରୀୟମ୍‍ ତେ ମାର୍‍, ଅଣ୍ଡ୍‌ କୁମାଲ୍ ଆୟନ୍ ? ଇଣ୍ଡ୍ ବାତ୍‍ତେ ଯାକୁବ୍, ଯୋସେପ୍, ଯିହୁଦାଲ୍ ନୁ ଶିମୋନ୍‍ତେ ଦାଦାଲ୍ ଆୟଣ୍ଡ୍ ? ତାନ୍ ଏଲାସ୍କ୍‌ ବାତ୍‍ତେ ମାନ୍‍ତଡ଼୍ ଇଗେ ମାନ୍‍ନ ?” ଇଦ୍ କେସ୍ ଅଡ଼୍‌‍ ଜିସୁଙ୍କ୍ ଉଡ଼ି କାୱୁତ୍‍ତଡ଼୍ ।
MAR 6:4 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ତ, “ବାବବାଦୀ ନିଜେତ୍ ନାର୍‍, ପରିବାର୍ ନୁ ଆତ୍ମାତେ ସାରେତଡ଼୍‍କ୍ ୱିଡ଼୍‍ସି ବାଗାତ୍ ସାରେତଡ଼୍ ତ ସମ୍ମାନିତ ଆୟଣ୍ଡ୍ ।”
MAR 6:5 ଆଦିଙ୍କ୍ ବେସ୍‍କ୍‍ତୁଡ଼୍‍ ରୋଗ୍‍ତେ ନାରୁଡ଼୍‍ ପରୁ କାଇ ୱାଟି ଅଡ଼୍‌‍କିଂଙ୍କ୍ ସୁସ୍ଥ ମାଡ଼ାନାଦ୍ ୱିଡ଼୍‍ସି ଜିସୁ ଆଗେ ମେଣ୍ଡନ୍‍ ବାତ୍‍ତେ ବାକ୍‍ୱା କାମ୍ ମାଡ଼୍‍ଡ଼େ ପାର୍‍ୱଣ୍ଡ୍‍ ।
MAR 6:6 ଅଡ଼ାଦ୍‌ ଅବିଶ୍ୱାସୀ ଉଡ଼ି ଜିସୁ କାବା ଆତ୍‍ତଣ୍ତ୍‌ । ତାନ୍‍ପେର୍କେ ଜିସୁ ଗାର୍‍ରେ ମାନ୍ଦାନ୍ ନାର୍‍କିନାଗ୍ ଆଞ୍ଜ୍ ନାରୁଡ଼୍‍କ୍ ଶିକ୍ଷା ଇତ୍‍ତନ୍ ।
MAR 6:7 ଅଣ୍ଡ୍‌ ବାର ଜାନ୍ ଶିଷ୍ୟଡ଼୍‌କ୍‌ କାର୍‍ଙ୍ଗି ଇର୍‍ୱୁ ଇର୍‍ୱୁଡ଼୍ ମାଡ଼ି ରତ୍‍ତନ୍ । ଅଶୁଚି ଆତ୍ମାଙ୍କ୍ ତଲାନ୍ ସେଙ୍ଗେ ଅଡ଼୍‌‍କିଂଙ୍କ୍ ଅଦିକାର୍‌ ଇସ୍‍ କେତ୍‍ତଣ୍ତ୍‌,
MAR 6:8 “ମିୟାଦ୍ ଆଦାନ୍‍ ସେଙ୍ଗେ ସୁଦୁର୍ ଡୁଡ୍‍ ଅଦେପାର୍‍ତିଡ଼୍‍ ନୁ
MAR 6:9 ରୂଟି ମାନ୍ଦାନ୍‍ ମୁନା କି ପାନ୍‌ଡ଼ତାଗ୍‍ ଡାବକ୍‍ ଅୟ୍‍ମାଟ୍‍ ଇଞ୍ଜ କେତ୍‍ତଡ଼୍‍ । ଇତ୍‍କେ ଅଡ଼୍‌‍କିଂଙ୍କ୍‍ ଏର୍‍ପୁକ୍‍ କେର୍‍ଦାନଙ୍କ୍‍ କେତ୍‍ତଣ୍ଡ୍‌ । ମେଣ୍ଡେ ରେଣ୍ଡ୍‍ ଚକା କେର୍‍ଦାନଙ୍କ୍ ମନା ମାଡ଼୍‍ତଣ୍ଡ୍‌ ।”
MAR 6:10 ମେଣ୍ଡେ ଅଣ୍ଡ୍‌ କେତ୍‍ତଣ୍ତ୍‌, “ବେନ୍ ଲୋତ୍‍ତାଗ୍ ମିକିଂଙ୍କ୍ କାର୍‍ଙ୍ଗିତଡ଼୍, ଆଦ୍ ପଡ଼ିୟେତାଗାଙ୍କ୍ ପେଇସ୍‌ ଆନ୍‌ୱେ ଯାକ ଆଗେ ମାନୁଟ୍ ।
MAR 6:11 ଯଦି ବାତ୍‍ତେବା ପଡ଼ିୟେତାଗ୍ ନାରୁଙ୍କ୍ ମିକିଙ୍କ୍ କାର୍‍ଙ୍କ୍‍ଗଡ଼୍ ବା ମିଇ ଗଟି କେଞ୍ଜଡ଼୍, ମୀଇ ଡେକେତ୍ ଦୂମ୍ କାଇସ୍ ଆଦ୍ ପଡ଼ିୟେ ୱିଡ଼୍‍ସି ଆନୁଟ୍ । ଇଦ୍ ମିୟାଦ୍ ବିରୁଦ୍ଦ୍‌ତେ ସାକ୍ଷି ଲେକାମ୍ ଆଦ୍‍ତେ ।”
MAR 6:12 ତାନ୍‍ପେର୍କେ ଶିଷ୍ୟନଡ଼୍ ଆଞ୍ଜ୍ ପାପ୍ ଆର୍‍ଦାଗାଙ୍କ୍ ମାଲ୍‍ନ୍ଦାନ୍ ସେଙ୍ଗେ ନାରୁଡ଼୍‍କିଙ୍କ୍ ଉପଦେଶ୍ ଇତ୍‍ତଡ଼୍‌ ।
MAR 6:13 ଅଡ଼୍‌ ନାର୍ଗେ ବୁତ୍‌କ୍ ୱିର୍‍ସ୍ପ୍‍ତଡ଼୍ ନୁ ରୋଗ୍‍ତେ ନାରୁଡ଼୍‍କ୍ ନିୟ୍‍ ତମି ସୁସ୍ଥ ମାଡ଼୍‍ତଡ଼୍ ।
MAR 6:14 ଇଦ୍‍ ସାରେ ବିଷୟ୍‍ତେ ରାଜାଲ୍ ହେରଦ୍ କେଞ୍ଜ୍‍ତଣ୍ତ୍‌, ବାତେଙ୍କ୍‍ଇତ୍କେ ଜିସୁନାଦ୍ ସୁକାମ୍‍ ଦୁଃକାମ୍ ସାରେପାକ୍ ଆତ୍‍ତେ । ବେସ୍‍ତୁଡ଼୍ କେସମାତ୍‍ତଡ଼୍, “ବାପ୍ତିସ୍ମ ଯୋହନ୍‌ ମେଣ୍ଡେଜିୱେ ଆତ୍‍ତନ୍ । ଆଦିନ୍‌ସେଙ୍ଗେ ଇଦ୍‍ ସାରେ ବାକ୍‌ୱାକାମ୍ ମାଡ଼ାନଙ୍କ୍ ଅଣ୍ଡ୍‌ ଶକ୍ତି ଦର୍‍ସ୍‍ତଣ୍ଡ୍‌ ।”
MAR 6:15 ବାଗାତଡ଼୍ କେସ୍‍ମାତ୍‍ତଡ଼୍, “ଅଣ୍ଡ୍‌ ଏଲିୟ, ମେଣ୍ଡେ ବେସ୍‍ତୁଡ଼୍ କେତ୍‍ତଡ଼୍, ମୁନେତ୍‍ କାଲାମ୍‍ତେ ବାବବାଦୀ ନଡ଼୍‍ ଲେକାମ୍ ଅଣ୍ଡ୍‌ ମିକା ୱେରଣ୍ଡ୍ ବାବବାଦୀ ।”
MAR 6:16 ହେରୋଦ ଜିସୁନ୍‍ ବିଷୟ୍‍ତେ କେଞ୍ଜି କେତ୍‍ତଣ୍ତ୍‌, “ଅଣ୍ଡ୍‌ ନିଜାମ୍ ବାପ୍ତିସ୍ମ ଯୋହନ୍‌ । ନାନେ ଅନାଦ୍‌ ତାଲେତିଙ୍କ୍ କଇସ୍‍ ମାତ୍‍ତାନ୍, କିନ୍ତୁ ଅଣ୍ଡ୍‌ ମେଣ୍ଡେ ଗେଲ୍‍ସି ତେଦ୍‍ତଣ୍ଡ୍‌ ।”
MAR 6:17 ହେରଦ ନିଜେ ଯୋହନ୍‌‌ତିଙ୍କ୍ ଗିରପ୍‍ ମାଡ଼ାନଙ୍କ୍ ଆଦେଶ୍ ଇସ୍‍ମାତ୍‍ତନ୍ ନୁ ଯୋହନ୍‌ ବନ୍ଦି ଆସ୍ ଜଇଲ୍‍ତାଗ୍ ମାତ୍‍ତଣ୍ତ୍‌ । ହେରଦ୍ ନିଜେତ୍ ଦାଦାନ୍‌ ମୁତେଙ୍କ୍ ହେରଦ୍‍ତିଙ୍କ୍ ପେଣ୍ଡୁଲ୍ ମାଡ଼ି ମାନ୍‍ନାଙ୍କ୍ ଯୋହନ୍‌
MAR 6:18 ଅଙ୍କ୍‌ ମେଣ୍ଡେ ପ୍ରମାନ୍ ମାଡ଼ି କେସ୍‍ମାତ୍‍ତଣ୍ଡ୍‌, “ତାମୁଣ୍ଡ୍‌ ମୁତେଙ୍କ୍ ପେଣ୍ଡୁଲ୍ ମାଡ଼ି ନିମେସାୟେତ୍‍ କାମ୍ ମାଡ଼୍‌ୱିନ୍‌ ।”
MAR 6:19 ଆଦିନ୍ ସେଙ୍ଗେ ହେରଦିଆ ଯୋହନ୍‌‌ତେ ସେଙ୍ଗେ କପାମ୍ ନେହେସ୍ ଅଙ୍କ୍‌ ଆୱୁକାଙ୍କ୍ ଇଚ୍ଛା ମାଡ଼ମାତ୍‍ତନ୍, କିନ୍ତୁ ହେରଦ୍‍ତେ ସେଙ୍ଗେ ଇଦ୍ ମାଡ଼୍‍ଡ଼େ ପାର୍‍ୱେ ମାତ୍‍ତଣ୍ଡ୍‌ ।
MAR 6:20 ବାତେଙ୍କ୍‍ଇତ୍କେ ଯୋହନ୍‌ ୱେରନ୍ ଦାର୍ମିକ୍ ନୁ ପବିତ୍ର ନାରୁନ୍ ଇଞ୍ଜ ପୁଞ୍ଜ୍ ହେରଦ୍ ଅଙ୍କ୍‌ ୱେର୍‍ସ ମାତ୍‍ତଣ୍ତ୍‌ ଅଂକିଙ୍କ୍‌ ଲେକେତ୍ ପଡ଼ିୟେ ତାଗ୍ ୱାଟିମାତ୍‍ତଣ୍ଡ୍‌ । ଯୋହନ୍‌‌ତେ ଶିକ୍ଷା କେଞ୍ଜି ସାରେଦିନା ଅଣ୍ଡ୍‌ କପାମ୍ ଆସ ମାତ୍‍କେ ମିକା ଅନ୍‌ ଗୋଟି କେଞ୍ଜାନଙ୍କ୍ ଅଣ୍ଡ୍‌ ଇଚ୍ଛା ମାଡ଼ମାତ୍‍ତଣ୍ଡ୍‌ ।
MAR 6:21 ଅଣ୍ଡ୍‌‍ଦାମ୍ ହେରୋଦିଆଙ୍କ୍‌ ୱେରଡ଼୍ ସୁଯୋଗ୍ ଦର୍‍କ୍‍ତେ । ହେରୋଦ୍‍ତ୍‍ତେ ଜନମ୍‍ଦିନେ ୱାତ୍‍ତେ, ତିଆର୍‍ଆତ୍‍ତେ ବୋଜିତିଙ୍କ୍ ବେଡ଼ିୟେ କର୍ମଚାରିଡ଼୍, ସେନାଦ୍ୟକ୍ଷ ନୁ ଗାଲିଲୀତେ ମାନ୍ଦାନ୍‍ ନାରୁଡ଼୍ କାର୍‍ଙ୍ଗ୍‍ତାଙ୍କ୍ ୱାସ୍‍ମାତ୍‍ତଡ଼୍ ।
MAR 6:22 ହେରୋଦ୍‍ତେ ପିକିଡ଼୍ ଇଦ୍ ଉତ୍ସବତାଗ୍ ହେନ୍ଦି ମିକା ହେରୋଦତେ କୁଟ୍‍ମାମ୍‍ ତିଙ୍କ୍ ୱେଡ଼୍‌କେ ମାଡ଼ିମାତ୍‍ତେ । ଆଦିଙ୍କ୍ ହେରୋଦ୍‍ ପିକ୍‍ତିଙ୍କ୍ କେତ୍‍ତଣ୍ଡ୍‌, “ନିମେ ବାତ୍‍ତେ ଇଚ୍ଛା ମାଡ଼ୁତିନ୍, ବାତ୍‍ତେ ତାଲ୍‍କିତିନ୍ ଆଦ୍ ନାନେ ଇଦ୍‍ତାନ୍ ।”
MAR 6:23 ରାଜାଲ୍ ଗଟ୍‍ଇସ୍ କେତ୍‍ତଣ୍ଡ୍‌, “ନାନେ ପ୍ରାମାନ୍ ମାଡ଼ି କେତୁତାନ୍, ନିମେ ବାତ୍‍ତେ ତାଲ୍‍କିତିନ୍, ଇଦ୍‍ତାନ୍ ଇଦ୍‍ଲେକା‍ମ୍ ରାଜ୍ୟତାଗାଙ୍କ୍ ଦୁଡ଼େ ତାଲ୍‍କେ ମିକା ଇଦ୍‍ତାନ୍ ।”
MAR 6:24 ପିକିଡ଼୍ ୟାୟନ୍ ପାକେ ଆଞ୍ଜ୍ କେତ୍‍ତେ, “ବାତ୍‍ତେ ତାଲ୍‍କିତାନ୍ ?” ସାଙ୍ଗେ ସାଙ୍ଗେ ହେରୋଦ୍‍ତେ ମୁତେ କେତ୍‍ତେ, “ବାପ୍ତିସ୍ମ ଯୋହନ୍‌‌ତେ ତାଲେ ।”
MAR 6:25 ପିକିଡ଼୍ ମିରିୱାସ୍ ରାଜାଙ୍କ୍ କେତ୍‍ତେ, “ଇଞ୍ଜେକେ ବାପ୍ତିସ୍ମ ଯୋହନ୍‌‌ତେ ତାଲ୍ ତାଲିତାଗ୍ ୱାଟି ନାକ୍‍ ଇମୁଟ୍ ।”
MAR 6:26 ଇଦ୍ କେଞ୍ଜି ରାଜାଙ୍କ୍‍ ଗାଟି ଦୁଃକାମ୍‍ ଆତ୍‍ତେ, କିନ୍ତୁ କୁଟ୍‍ମାମ୍‍ତେ ମୁନେ ପ୍ରାମାନ୍ ମାଡ଼ିମାନ୍‍ନାଙ୍କ୍ ଇଲ୍‍ଲେ ଇଞ୍ଜ କେତ୍‍ତେ ପାର୍‍ୱେ ମାତ୍‍ତଣ୍ଡ୍‌ ।
MAR 6:27 ଆଦିଙ୍କ୍ ଯୋହନ୍‌‌ତେ ତାଲେ କୟିସ୍‍ ତାତାନଙ୍କ୍ ରାଜାଲ୍‍ ସାଙ୍ଗେ ସାଙ୍ଗେ ଚାକର୍‍ନଡ଼୍‍କ୍ ରହତ୍‍ତଣ୍ଡ୍‌ ।
MAR 6:28 ଚାକର୍‍ନଡ଼୍ ଜଇଲ୍‍ତାଗ୍ ଆଞ୍ଜ୍ ଯୋହନ୍‌‌ତେ ତାଲ୍‍ଲେ କୟିତ୍‍ତଡ଼୍ ନୁ ତାଲ୍‍ଲେ ତିଙ୍କ୍ ତାଲିତାଗ୍ ୱାଟି ଆ ପିକ୍‍ତିଙ୍କ୍ ଇ‍ତ୍‍ତଡ଼୍ । ଆଦ୍ ଅସ୍ ୟାୟଙ୍କ୍ ଇତ୍‍ତେ ।
MAR 6:29 ଯୋହନ୍‌‌ତେ ଶିଷ୍ୟନଡ଼୍ କବର୍‍ କେଞ୍ଜି ଅନାଦ୍‌ ଡଲ୍‍ତେ ମେନ୍ଦୁଲ୍‍ତିଙ୍କ୍ ଅସ୍ ସମାଦି ଇସ୍‍ମାତ୍‍ତଡ଼୍ ।
MAR 6:30 ପ୍ରେରିତ୍‍ ଶିଷ୍ୟଡ଼୍ ମାଲ୍‍ସ୍‍ ୱାସ୍ ବାତ୍ ବାତ୍ ଅଡ଼୍‌ ମାଡ଼ିମାତ୍‍ତଡ଼୍ ନୁ ଶିକ୍ଷା ଇସ୍‍ମାତ୍‍ତଡ଼୍, ଜିସୁଙ୍କ୍ କେତ୍‍ତଡ଼୍ ।
MAR 6:31 ଇସର୍ ନାରୁଡ଼୍‍ ମାନ୍ଦେତ୍‍ ଲୋପେ ଜିସୁ ନୁ ତାନ୍ ଶିଷ୍ୟନଡ଼୍ ତିନ୍ଦାନଙ୍କ୍ ଦିନାମ୍ ଦର୍‍କ୍‍ୱେ ମାତ୍‍ତେ । ଜିସୁ ଅଡ଼୍‌‍କିଂଙ୍କ୍ କେତ୍‍ତନ୍, “ଦାଟିଟ୍, ମାନାଡ଼୍ ୱେରଡ଼୍ ବେନ ଇଲ୍‍ୱେ ଜାଗେତାଗ୍ ଆଦିକାଡ଼୍‍ । ଆଗେ ମିଡ଼୍ ସୁଦୁଟ୍ ଜେଲ୍ ରମେ ପାର୍‍ତିଡ଼୍ ।”
MAR 6:32 ତାନ୍‍ପେର୍କେ ଜିସୁ ନୁ ତାନ୍ ଶିଷ୍ୟନଡ଼୍ ଓଡା ତାରି ୱେରଡ଼୍ ଚିମ୍ ଚାମ୍ ଜାଗେତାଗ୍ ଆଦାନଙ୍କ୍ ପେଇତ୍‍ତଡ଼୍ ।
MAR 6:33 ଅଡ଼୍‌ ଆଦାନ୍‍ୱେଲେ ନାର୍ଗେ ନାରୁଡ଼୍ ଅଡ଼୍‌‍କିଂଙ୍କ୍ ଉଡ଼େ ପାର୍‍ୱଡ଼୍‍ ଆତ୍‍ତଡ଼୍ । ଆଦିଙ୍କ୍ ଅଡ଼୍‌ ବେନ୍‍ ବେନା ପଡ଼ିୟାନାଗାଙ୍କ୍ ପେଇସ୍ ଜିସୁ ନୁ ତାନ୍ ଶିଷ୍ୟନଡ଼୍ ବେନ୍‍ ଜାଗେତାଗ୍ ଆଞ୍ଜମାତ୍‍ତଡ଼୍, ମିରି ମିରି ଆଗେ ମୁନେ ଆଞ୍ଜ୍ ହେଉତ୍‍ତଡ଼୍ ।
MAR 6:34 ଜିସୁ ଓଡେ ତାଗାଙ୍କ୍ ଡିଗି ଆଦ୍ ବେଡ଼୍‍ୟାଦ୍ ନାରୁଡ଼୍‍ ମାନ୍ଦେ ଉଡ଼ି ଅନାଦ୍‌ ହୃଦୟ ଦୟାତେ ନତ୍‍ତେ । ବାତେଙ୍କ୍‍ଇତ୍କେ ଅଡ଼୍‌‍ ମେୟ୍‍ତାନଣ୍ଡ୍‍ ଇଲ୍‍ୱେ ମେଣ୍ଢା ମାନ୍ଦେ ଲେକାମ୍ ମାତ୍‍ତଡ଼୍‌ । ଆଗେ ଜିସୁ ଅଡ଼୍‌‍କିଂଙ୍କ୍ ନାର୍ଗେ ବିଷୟ୍‍ତେ ଶିକ୍ଷା ଇଦାଙ୍କ୍ ପସ୍ପତ୍‍ତଣ୍ଡ୍‌ ।
MAR 6:35 ପଡ଼ଦ୍‍ ଆଦାନାଦ୍ ଉଡ଼ି, ଶିଷ୍ୟନଡ଼୍ ଜିସୁଙ୍କ୍ ୱାସ୍ କେତ୍‍ତଡ଼୍, “ନାର୍ଗେ ଗମାଡ଼୍ ଆସମିନ୍ଦେ ନୁ ଇଦ୍ ପଡ଼ିୟେ ଗାଟି ଚିମ୍‍ଚାମ୍ ।
MAR 6:36 ନାରୁଡ଼୍‍ ବେଲାନ୍ ଚାରେପାକା ଗୁଡ଼୍‍ଏକ୍‍ ବା ନାକିନାଗ୍ ଆଞ୍ଜ୍ ନିଜେ ନିଜେତ୍‌ ସେଙ୍ଗେ ତିନ୍ଦାନଙ୍କ୍ ବାତ୍‍ତେ ଆସିତଡ଼୍, ଆଦିନ୍‍ ସେଙ୍ଗେ ଅଡ଼୍‌‍କିଂଙ୍କ୍ ରହସିମୁଟ୍ ।”
MAR 6:37 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‌, “ମିଡ଼୍‍ ନିଜେ ଅଡ଼୍‌‍କିଂଙ୍କ୍ ବାତ୍‍ତେ ତିନ୍ଦାନଙ୍କ୍ ଇମୁଟ୍ ।” ଅଡ଼୍‌‍ କେତ୍‍ତଡ଼୍, “ନିମେ ବାତ୍‍ତେ ଇଚ୍ଛା ମାଡ଼ୁତିନ୍, ମାମେ ରେଣ୍ଡ୍‍ୱାନ୍ଦା ରୁପା ଡାଉକ୍‍ଙ୍କିନ୍‍ ତଡ଼୍ ରୋଟି ଆସି ତାସ୍ ଇଡ଼୍‍କିଙ୍କ୍ ଇଦିକାଡ଼୍ ?”
MAR 6:38 ଜିସୁ ପଚାର୍‍ମାଡ଼୍‍ତଣ୍ଡ୍‌, “ମିଇପାକେ ବେସ୍‌କ୍ ରୋଟି ମିନ୍ଦେ, ଉଡ଼ି ୱାଡ଼ାଟ୍ ।” ଅଡ଼୍‌‍ ଉଡ଼ି ୱାସ୍ ମାତର୍‌ ଏଇଙ୍କ୍ ରୋଟି ନୁ ରେଣ୍ଡ୍ କିକେ ମିନ୍ଦେ ଇଞ୍ଜ କେତ୍‍ତଡ଼୍ ।
MAR 6:39 ନାରୁଡ଼୍‍କିଙ୍କ୍ ମାନ୍ଦା ମାନ୍ଦା ମାଡ଼ି ଗାଡ୍‍ତେ ପରୁ କୁସ୍ପାନଙ୍କ୍ ଜିସୁ ଶିଷ୍ୟନଡ଼୍‍କ୍ କେତ୍‍ତଣ୍ଡ୍‌ ।
MAR 6:40 ଅନ୍‌‍ ଗଟ୍‍ତେ ଲେକାମ୍ ନାରୁଡ଼୍‍କିଙ୍କ୍ ଲାଇନ୍‍ତେ ଶହେ ବା ପଚାଶ୍ ଲାକା କୁସ୍ପ୍‌ତଡ଼୍ ।
MAR 6:41 ତାନ୍‍ପେର୍କେ ଜିସୁ ଆୱୁ ଏଇଙ୍କ୍ ରୋଟି ନୁ ରେଣ୍ଡ୍‍ କିକେ ଅସ୍ ସ୍ୱର୍ଗପାକେ ପରୁଉଡ଼ି ମିକା ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇତ୍‍ତଣ୍ଡ୍‌ । ମେଣ୍ଡେ ଆୱୁ ରୋଟିକିଙ୍କ୍ ଉସ୍‍ ନାରୁଡ଼୍ ପାକେ ସାରେତଡ଼୍‍କ୍ ତୁଉସିଦ୍‍ନଙ୍କ୍ ଶିଷ୍ୟନଡ଼୍‍କ୍ ଇତ୍‍ତଣ୍ଡ୍‌ ।
MAR 6:42 ସାରେତଡ଼୍ ତିଞ୍ଜ୍ ଡଙ୍କ୍‍ ନିହିତ୍‍ତଡ଼୍ ।
MAR 6:43 ତାନ୍‍ପେର୍କେ ଶିଷ୍ୟନଡ଼୍ ମିଗ୍ଲିମାନ୍ଦାନ୍ ରୋଟି ନୁ କିକେ ଦୁଡ଼ାକି ପେହେକି ବାରଟାନ୍ ଜୁଡ଼ିନାଗ୍ ନିହିତ୍‍ତଡ଼୍ ।
MAR 6:44 ବେନଡ଼୍ ଆଦ୍ କାଦ୍ୟ ତିଞ୍ଜ୍‍ମାତ୍‍ତଡ଼୍, ଅଡ଼୍‌‍ ଆଗାଙ୍କ୍ ଆସାମ୍ ମାନେଇତେ ମାନ୍ଦେ ମାତ୍‍ତେ ଏଇଙ୍କ୍ ହଜାର୍‌ ।
MAR 6:45 ତାନ୍‍ପେର୍କେ ଜିସୁ ଶିଷ୍ୟନଡ଼୍‍କିଙ୍କ୍‌ ସମୁଦ୍ର ମେଣ୍ଡନ୍‍ ପାକେ ବେତ୍‌ସାଇଦାତା ଆଦାନ୍‍ ସେଙ୍ଗେ ମୁନେଙ୍କେ ଓଡେତାଗ୍ ରହସିତ୍‍ତଣ୍ଡ୍‌ ।
MAR 6:46 ନାରୁଡ଼୍‍କିଙ୍କ୍ ରଅସିସ୍ ମିକା ଅଣ୍ଡ୍‌ ନିଜେ ପ୍ରାର୍ତନା ମାଡ଼ାନ୍‍ ସେଙ୍ଗେ ୱେରଡ଼୍‍ ମେଟେତ୍‍ ପରୁ ଆତ୍‍ତଣ୍ଡ୍‌ ।
MAR 6:47 ମୁଲ୍‍ପୁଟ୍ ଆସ ମାନ୍ଦାନ୍‍ ୱେଲେ ଜିସୁ ୱେରଣ୍ଡେ ଆଞ୍ଚିନା ବୂମ୍‌ତାଗ୍‍ ମାତ୍‍ତଣ୍ତ୍‌ ନୁ ଓଡେ ସାଉଡ଼େ ନାଡ଼୍‍ମେ ମାତ୍‍ତେ ।
MAR 6:48 ଅଡ଼୍‌‍ ମୁନେଙ୍କ୍ ଗାଲ୍‍ ୱାସମାନ୍‍ନାଙ୍କ୍ ଶିଷ୍ୟନଡ଼୍ ଗାଟି ତିପାଲ୍‍ତେ ଓଡେ କହସ ମାନ୍ଦାନାଦ୍ ଅଣ୍ଡ୍‌ ଉଡ଼୍‍ତଣ୍ଡ୍‌ । ଆଙ୍କାଡ଼୍‍ତେ ନାର୍କା ୩ ଟା ତାଗାଙ୍କ୍ ୬ ଟା ଆଇନା
MAR 6:49 ଜିସୁ ଏର୍‍ଦେ ପରୁ ତାକିତାକି ଅଡ଼୍‌‍ପାକେ ଗାର୍ରେ ହେଉତ୍‍ତଣ୍ଡ୍‌ । ଅଡ଼୍‌‍କିଂଙ୍କ୍ ହେରି ମିକା ଅଣ୍ଡ୍‌ ଆନେନ୍ । କିନ୍ତୁ ଅଙ୍କ୍‌ ଏର୍‍ଦେ ପରୁ ତାକାନାଦ୍ ଉଡ଼ି ଶିଷ୍ୟନଡ଼୍ ବୁତ୍‍ ଆଲ୍‍ସି ମର୍‍ପଇତ୍‍ତଡ଼୍ ।
MAR 6:50 ଅଙ୍କ୍‌ ଉଡ଼ି ଅଡ଼୍‌ ୱେର୍‍ସ୍‍ ମାତ୍‍ତଡ଼୍ । ତାନ୍‍ ପେର୍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‌, “ସାହାସ୍ ପୟିମ୍ ଇଣ୍ଡ୍ ନାନେ, ୱେର୍‍ମାଟ୍ ।”
MAR 6:51 ଆଦ୍ କେସ୍ ଓଡେତାଗ୍ ତାର୍‍ତନ୍ ନୁ ଆସୁଙ୍ଗେ ଗାଲ୍‍ ମାଦ୍‍ତେ । ଶିଷ୍ୟନଡ଼୍ ଆଦ୍‍ଉଡ଼ି ବାକ୍‍ୱା ଆତ୍‍ତଡ଼୍,
MAR 6:52 ବେଦିନ୍ ଏଇଙ୍କ୍ ରୋଟି ଗଟ୍‍ଣାତେ କାମ୍ ଅଡ଼୍‌ ପୁନ୍‍ୱେ ମାତ୍‍ତଡ଼୍, ବାତେଙ୍କ୍‍ଇତ୍କେ ଅଡ଼ାଦ୍‌‍ ଜ୍ଞାନ୍ ଶକ୍ତି ଇଲ୍‍ୱେ ମାତ୍‍ତେ ।
MAR 6:53 ସମୁଦ୍ରତିଙ୍କ୍ ହେରି ମିକା ଅଡ଼୍‌ ଗିନେସର୍‍ତାଗ୍ ହେୱୁସ୍ ଆଞ୍ଚିନ୍‍ ବୂମ୍‌ତାଗ୍‍ ଓଡେତିଙ୍କ୍ ତହସିତ୍‍ତଡ଼୍ ।
MAR 6:54 ଅଡ଼୍‌‍ ଓଡେତାଗାଙ୍କ୍ ଡିଗାନ୍ ସାଙ୍ଗେ ସାଙ୍ଗେ ନାରୁଡ଼୍‍ ଜିସୁଙ୍କ୍ ହେଞ୍ଚତଡ଼୍,
MAR 6:55 ଆଦିଙ୍କ୍ ମିରିଆଞ୍ଜ୍ ଆଦ୍ ଗାର୍ରେ ନାର୍‍କିନାଗ୍ ମାନ୍ଦାନ୍ ନାର୍ଗେ ହେଣ୍ଡ୍‍କିନ୍ ରୋଗିନଡ଼୍‍କ୍ ଅନ୍‌‍ ପାକେ କାଞ୍ଜି ତାତ୍‍ତଡ଼୍ ।
MAR 6:56 ଜିସୁ ବେନ୍ ନାର୍, ସହର୍ ନୁ ସୁଦୁଗୁଡ଼ିୟେ ନାକିନାଗ୍ ହେଉତ୍‍ତନ୍, ଆଗେ ଆଟ୍ ବାଜାର୍‍ତାଗ୍ ମାନ୍ଦାନ୍ ନାରୁଡ଼୍ ଲେକାମ୍‍ ରୋଗ୍‍ତେ ନଡ଼୍‍କିଙ୍କ୍ ୱାଟ୍‍ତଡ଼୍‍ ଅନ୍‌ ଚକାତିଙ୍କ୍ ଇଟାନଙ୍କ୍ ଅଂକିଙ୍କ୍‌ ଗଟ୍ ତାଲ୍‍କ୍‍ତଡ଼୍ ନୁ ଅନ୍‌ ସିଲେତ୍ କଙ୍ଗିଙ୍କ୍ ଇଟାନ୍ ସାଙ୍ଗେ ସାଙ୍ଗେ ରୋଗିନଡ଼୍ ସୁସ୍ଥ ଆତ୍‍ତଡ଼୍ ।
MAR 7:1 ଯିରୁଶାଲାମ୍‍ ତାଗାଙ୍କ୍ ୱାସ୍‍ମାନ୍ଦାନ୍‍ ବେସ୍‍କ୍‍ତୁଡ଼୍‍ ପାରୂଶୀଡ଼୍ ନୁ ଶାସ୍ତ୍ରିଡ଼୍‍ ଜିସୁନ୍ ଗାର୍‍ରେ ଗୁଡ଼୍‍ତଡ଼୍ ।
MAR 7:2 ଅଡ଼୍‌‍ ଉଡ଼୍‌ତଡ଼୍‍ ଯେ, ଜିସୁନ୍‍ ବେସ୍‍କ୍‍ତଡ଼୍ ଶିଷ୍ୟଡ଼୍ ନିୟମ୍ ଲେକାମ୍‌ କାଇକ୍‍ ନର୍ସ୍ ତିନଡ଼୍‍ । ଫାରୁଶିଡ଼୍‍ ତିନ୍ଦାନ୍‍ ମୁନେ କାଇ ନର୍‍ଦାନ୍‍ ମାଇଦିଙ୍କ୍‍ ବେନ୍‍ ନିୟମ୍‍ ସାରେ ମାଡ଼ିମାତ୍‍ତଡ଼୍‍, ଶିଷ୍ୟଡ଼୍ ଆଦିଙ୍କ୍‍ ପାଲନ୍‍ ମାଡ଼କଟ ମାତ୍‍ତଡ଼୍‍ ।
MAR 7:3 ଫାରୁଶିଡ଼୍‍ ନୁ ବାଗାତ୍ ଯିହୁଦିଡ଼୍‍ ଅଡ଼୍‌‍ ମୁନେଙ୍କ୍‍ ତେ ଆନିଦାଦିଡ଼୍‍ ନିତିନିୟମ୍‍ ପାଲନ୍‍ ମାଡ଼ାନଡ଼୍‍, ନିୟମ୍‍ ତେ କାଇ ନର୍‍ୱକଟ ଅଡ଼୍‌‍ ତିନ୍‍ନଡ଼୍‍ ।
MAR 7:4 ଆଟି ନାଗାଙ୍କ୍‍ ମାଲ୍‍ତେ ୱେୟେ ମୁନେଙ୍କେତେ ନିୟମ୍‍ ଲେକାମ୍ ଡେକା କାଇକ୍‍ ନର୍‍ୱକଟ ବାତ୍‍ ବା ତିନ୍‍ଅଡ଼୍‌‍ । ୱେଡ଼୍‍ତ୍‍ତେ, ଗିନେ, କୁଣ୍ଡା ନୁ ତାରାନାୱ୍‍ ଆକି ନର୍‍ଦାନ୍‍ ମାଇଦିଙ୍କ୍ ବେସ୍‍ ବେସତ୍ ତିଆର୍‍ ଆତ୍‍ତେ ନିୟମ୍‍ ଅଡ଼୍‌‍ ପାଲନ୍‍ ମାଡ଼ିତଡ଼୍‍ ।
MAR 7:5 ପାରୁଶୀଡ଼୍‍ ନୁ ଶାସ୍ତ୍ରୀଡ଼୍‍ ଜିସୁଙ୍କ୍ ପାଚାରା ମାଡ଼୍‍ତଡ଼୍‍, “ମାନ୍‍ ମୁନେଙ୍କ୍‍ତେ ଆନିଦାଦିଡ଼୍‍ ବେନ୍‍ସାରେ ନିତିନିୟମ୍‍ ତିଆର୍‍ ମାଡ଼ିସ୍‍ ଆଞ୍ଜ୍‍ମିନ୍ଦେଡ଼୍‍, ନି ଶିଷ୍ୟଡ଼୍ ଆଦିଙ୍କ୍ ପାଲନ୍‍ ମାଡ଼ଡ଼୍‍ ବାତେଙ୍କ୍‍ ? ନିୟମ୍‍ ଲେକାମ୍ ତିନ୍ଦାନ୍‍ ମୁନେଙ୍କ୍ କାଇକ୍‍ ନର୍‍ୱଡ଼୍‍ ବାତେଙ୍କ୍‍ ?”
MAR 7:6 ଜିସୁ ଉତ୍ତର୍‍ ଇତ୍‍ତଣ୍ଡ୍, “ମି ବିଷୟ୍‍ତେ ବାବବାଦି ଯିଶାଇୟ ବାତେ କେସ୍‍ମାତ୍‍ତଣ୍ଡ୍, ଆଦ୍‍ ନିଜାମ୍ । ଅନ୍‌‍ ଲେକ୍‌ତେ ଲେକାମ୍‌ ମିଡ଼୍‍ ସାରେ ବୁଚା ମାଡ଼ାନ୍ ଦାର୍ମିକ୍‍ନଡ଼ି । ଇଶ୍ୱର କେତ୍‍ତଣ୍ଡ୍, ‘ଇ ନାରୁଡ଼୍‍, ମାତର୍‍ ମକମ୍‍ତାଗ୍‍ ନାକିଙ୍କ୍ ସମ୍ମାନ୍‍ ଇଦ୍‍ତଡ଼୍‍, କିନ୍ତୁ ହୃଦୟ୍‍ ତାୟାଗାଙ୍କ୍ ନାର୍ଗେ ଦୁରାମ୍‍ ।’
MAR 7:7 ନାକିଙ୍କ୍ ଆରାଦନା ମାଡ଼ାନାଦ୍‍ ଅଡ଼ାଦ୍‌‍ ଇଲେ । ବାତେଙ୍କ୍‍ଇତ୍କେ ଅଡ଼୍‌‍ ନାରୁଡ଼୍‍ ମାଡ଼ିମାନ୍ଦାନ୍‍ ନିୟମ୍‍ତିଙ୍କ୍ ।
MAR 7:8 ମିଡ଼୍ ଇଶ୍ୱର୍‌ତେ ନିୟମ୍‍ତିଙ୍କ୍ ୱିଡ଼୍‍ସି, ନାରୁଡ଼ାଦ୍ ନିୟମ୍‍ତିଙ୍କ୍ ପାଲନ୍ ମାଡ଼ିତିଡ଼୍ ।”
MAR 7:9 ଜିସୁ ମେଣ୍ଡନ୍‍ଦାମ୍‍ କେତ୍‍ତଣ୍ଡ୍, ଇଶ୍ୱର୍‌ତେ ନିୟମ୍‍ତିଙ୍କ୍ କେପି ନିଜର୍‍ ଶିକ୍ଷାତିଙ୍କ୍‍ ପୟ୍‍ସ୍‍ ନେହ୍‍ତାନ୍‍ ମାଇଦିଙ୍କ୍ ମିଡ଼୍‍ ଲେକେତ୍‍ ଉପାୟ୍‍ ମାଡ଼ିମିନ୍ଦେଡ଼ି ।
MAR 7:10 ମୋଶାଲ୍‌‍ ଆଜ୍ଞା ଇସ୍‌‍ମାତ୍‍ତଣ୍ଡ୍, ୟାୟ୍‍ବାବାଙ୍କ୍‍ ସମାଦର୍‍ ମାଡ଼ାଟ୍‍; ମେଣ୍ଡେ ବେନ ନିଜର୍‍ ୟାୟବାବାଙ୍କ୍‍ ଅବିସାପ୍‍ ଇତ୍‍ତଣ୍ଡ୍, ଅଙ୍କ୍‌ ଡଲାନ୍‍ ଦଣ୍ଡ୍‍ ଦର୍‍କିତ୍‍ ।
MAR 7:11 ମି ପାକେ ବାତ୍‍ତେ ମିନ୍ଦେ ଆଦ୍ ୟାୟବାବାଙ୍କ୍ ସାହାଯ୍ୟ ମାଡ଼ାନାଦ୍‍, ଇଦ୍‍ରକମ୍ ଶିକ୍ଷା ଇଦ୍‍ତଣ୍ଡ୍, କିନ୍ତୁ ମିଡ଼୍ ବାତ୍‍ କେତୁତିଡ଼୍ ଆଦ୍‍ ଇଶ୍ୱର୍‌ତିଙ୍କ୍ “କୁର୍ବାନ୍,” ମାଡ଼ାଟ୍, ଇଦିନ୍‍ ଅର୍ତ ଇଶ୍ୱର୍‌ତିଙ୍କ୍ ଇମୁଟ୍‍,
MAR 7:12 ୟାୟ୍‍ବାବାଙ୍କ୍ ସାହାଯ୍ୟ ମାଡ଼ାନ୍‍ ଦାୟିତ୍ୟତାଗାଙ୍କ୍ ମୁକ୍ତ ଆଦ୍‍ତିଡ଼୍‍,
MAR 7:13 ଇଦ୍‍ଲେକାମ୍‍ ୱେର୍‍ ଅର୍‌ତୁଙ୍କ୍‌ ଇଦାନାଦ୍‌ ମିୟାଦ୍‍ ଶିକ୍ଷା ଇଶ୍ୱର୍‌ତେ ଆଜ୍ଞାତିଙ୍କ୍ ଫାଲନ୍‌ ମାଡ଼ୁତ୍‍ । ହିଦ୍‍ଲେକାମ୍‍ ମେଣ୍ଡେ ନାର୍ଗେ ପାଡ଼୍‍ୟି ମିଡ଼୍‍ ମାଡ଼ୁତିଡ଼୍‍ ।
MAR 7:14 ଜିସୁ ମେଣ୍ଡନ୍‍ଦାମ୍‍ ନାରୁଡ଼୍‍କିଙ୍କ୍‍ କାର୍ଙ୍ଗି କେତ୍‍ତଣ୍ଡ୍, “ନା ଗଟ୍‍ ମନ୍‍ଇସ୍‌‍ କେଞ୍ଜାଟ୍‍ ନୁ ବୁଜେମ୍‍ ଆଦାଙ୍କ୍ ଚେଷ୍ଟା ମାଡ଼ାଟ୍‍ ।
MAR 7:15 ବାୟ୍‍ଦେତ୍‍ ବାତ୍‍ ବିଷୟ୍‍ ନେଙ୍ଗି ଅଂକିଙ୍କ୍‌ ଅପବିତ୍ର ମାଡ଼୍‍ପାର୍‍ୱ । ବରଂ ବେନ୍‍ ବିଷୟ୍‍ ନାରୁତେ ଲୋପେଙ୍କ୍ ବାୟ୍‍ଦେ ପେୟ୍‍ତିତ୍‍, ଆଦେ କେ ଅଂକିଙ୍କ୍‌ ଅପବିତ୍ର ମାଡ଼ିତ୍‍ ।”
MAR 7:16 ଯଦି ବେନନାଦ୍ କେଞ୍ଜାନଙ୍କ୍ କେଉ ମିନ୍ଦେ ଅଣ୍ଡ୍‌ କେଞ୍ଜିଣ୍ଡ୍ ।
MAR 7:17 ଜିସୁ ମୁଲ୍‍ଦେ ଲୋପେଙ୍କ୍ ୱାସ୍‍ ଲୋନ୍‌‍ ନେଙ୍ଗ୍‍ତେ ପେର୍କେ, ଅନାଦ୍‌‍ ଇ ଶିକ୍ଷାତିଙ୍କ୍‍ ବୁଜାମାଡ଼ାନ୍‍ ମାଇଦିଙ୍କ୍‍ ଶିଷ୍ୟଡ଼୍ ଜିସୁଙ୍କ୍‍ ଅନୁରଦ୍‌ ମାଡ଼୍‍ତଡ଼୍‍ ।
MAR 7:18 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ୱେର୍‍ତଡ଼୍‍ ଲେକାମ୍‍ ମିଡ଼୍‍ ଆନ୍‌ତେ ବୁଜେମ୍‍ ଆଦାନ୍‍ ଶକ୍ତି ବାତେ ଇଚୁର୍‌ ? ଇସର୍‍ତିଙ୍କ୍ ବୁଜେମ୍‍ ଆଦାଙ୍କ୍ ପାର୍‍ୱିଡ଼୍‍ ? ବାତା ସାରେ ନାରୁନ୍‍ ମେନ୍ଦୁଲ୍‍ତେ ବାୟ୍‍ଦେକଞ୍ଚ୍‍ ଲୋପ୍‍ ନେଙ୍ଗିତା, ଆୱ୍‍ ଅଂକିଙ୍କ୍‌ ଅପବିତ୍ର ମାଡ଼୍‍ପାର୍‍ୱ
MAR 7:19 ବାତେଙ୍କ୍‍ଇତ୍କେ ଆଦ୍‍ ହୃଦୟ୍‍ତାଗ୍‍ ନେଙ୍ଗକଟ ଲୋପେ ଆଦ୍‍ତେ ନୁ ତାନ୍‍ପେର୍କେ ମେନ୍ଦୁଲ୍‍ ତାଗାଙ୍କ୍ ପେଇସ୍‍ ଆଦ୍‍ତେ । ଇଦ୍‍ କେତାନ୍‍ ଲେକାମ୍‍ ସାରେ କାଦି ସୁଚ୍ଛି ଇଞ୍ଜ ଜିସୁ କେସିସ୍‍ ମାତ୍‍ତଣ୍ଡ୍‍ ।
MAR 7:20 ଅଣ୍ଡ୍‌ ମେଣ୍ଡ୍ କେତ୍‍ତଣ୍ଡ୍, ବାତା ସାରେ ନାରୁନ୍‍ ଲୋପେତାଗାଙ୍କ୍‍ ପେୟ୍‍ତିତା, ଆଦେ କେ ଅଂକିଙ୍କ୍‌ ଅପବିତ୍ର ମାଡ଼ିତେ,
MAR 7:21 ବାତେଙ୍କ୍‍ଇତ୍କେ ଅନାଦ୍‌‍ ହୃଦୟ୍‍ତାଗାଙ୍କ୍ ପେୟ୍‍ତିତ୍‍ କାରାପ୍‍ ଚିନ୍ତେତ୍‍ ତଡ଼୍‍ ଅଣ୍ଡ୍‌ ବେସ୍‍ ବେସତ୍‍ ନିୟମ୍‍ତାଗ୍‍ ଇଲ୍‍ୱେ ଲେକେତ୍‍ ପାଡ଼୍‍ୟି ମାଡ଼ିତ୍‍ତେ,
MAR 7:22 ଇତ୍କେ ଡଙ୍ଗାନାଦ୍‍, ନାରିଙ୍କ୍ ଆୱ୍‍କାନାଦ୍‍, ଆର୍‍ଲା ମାଡ଼ାନାଦ୍, ଆଶେ ନୁ ବେସ୍‍ ବେସତ୍‍ କାରାପ୍‍ କାମ୍‍, କାରାପ୍‍ ବ୍ୟବହାର୍‍, କପାମ୍‍, ଆଙ୍କାର୍‍ ନୁ ମୁର୍କ ।
MAR 7:23 ଇୱୁ ସାରେ କାରାପ୍‍ ବିଷୟ୍‍ ନାରୁନ୍‍ତେ ହୃଦୟ୍‍ତାଗାଙ୍କ୍‍ ଜନମ୍‌ ଆସ୍ ଅଂକିଙ୍କ୍‌ କାରାପ୍ ମାଡ଼ିତେ ।
MAR 7:24 ତାନ୍‍ପେର୍କେ ଜିସୁ ଆଦ୍‍ ପଡ଼୍‍ୟି ୱିଡ଼୍‍ସି ଶହର୍‍ ଗାରେମାନ୍ଦାନ୍ ଅଞ୍ଚଲତାଗ୍‍ ଆତ୍‍ତଣ୍ଡ୍ । ଆଗେ ଅଣ୍ଡ୍‌ ୱେରଡ଼୍‍ ଲୋନ୍‌‍ ନେଙ୍ଗି ପୁନ୍‍ୱେକଟ ମାନ୍ଦାନ୍‍ ମାଇଦିଙ୍କ୍ ଇଚ୍ଛା ମାଡ଼୍‍ତଣ୍ଡ୍, କିନ୍ତୁ ଅଣ୍ଡ୍‌ ଲୋପେ ମାନ୍ଦ୍‍ପାର୍‍ୱଣ୍ଡ୍ ।
MAR 7:25 ୱେର୍‌ଡ଼୍‌ ନାଟାଡ଼୍‍ତେ ମାୟାଡ଼୍‍ତିଙ୍କ୍ ବୁତ୍‌ ପୟିସ୍‍ ମାତ୍‍ତେ । ଜିସୁନ୍‍ ୱାଦାନ୍‍ ଗଟ୍‍ କେଞ୍ଜି ଆଦ୍‍ ଅନ୍‌‍ଗାରେ ୱାସ୍‍ ଅନ୍‌‍ ଡେକେତ୍‍ ମଦଲ୍‍ ରାଲ୍‍ତେ ।
MAR 7:26 ଆଦ୍‍ ମାତ୍‍ତେ ସୁରପୈନିକି ଅଞ୍ଚଲ୍‍ତେ ଗ୍ରୀକ୍ ଅଣଇହୁଦିଲ୍‌ । ତାନ୍‍ ମାୟାଡ଼୍‍ ତାଗାଙ୍କ୍‍ ବୁତ୍‌ ୱିଡ଼୍‍ସ୍‍ପାନ୍‍ ମାଇଦିଙ୍କ୍ ଆଦ୍‍ ଜିସୁଙ୍କ୍ କେତ୍‍ତେ ।
MAR 7:27 କିନ୍ତୁ ଜିସୁ ଉତ୍ତର୍‍ ହିତ୍‍ତଣ୍ଡ୍, ନିଜର୍‍ ପିଲାଙ୍କ୍ ମୁନେଙ୍କ୍ ତିହିତ୍‍ ୱେୟ୍‍ତିତ୍‍ । ପିଲାନ୍‍ କାଦି ଅସ୍‍ ନେୟ୍‍କିନ୍‍ ମୁନେ ୱାଟିଦାନାଦ୍‍ ସାୟେ ଆୟ ।
MAR 7:28 ନାଟାଡ଼୍‍ କେତ୍‍ତେ, ଆଜ୍ଞା, ନେୟ୍‍କ୍‍ ଟେବୁଲ୍‍ତେ ମଦଲ୍‍ ମାଞ୍ଜ୍ ପିଲାନ୍‍ ଏଙ୍ଗୁଲ୍‍ତିଙ୍କ୍ ତିନ୍ତ୍‍ତା ।
MAR 7:29 ଜିସୁ ତାଙ୍କ୍‍କିଙ୍କ୍ କେତ୍‍ତଣ୍ଡ୍, ନିଜାମ୍‍ ଗଟ୍‍, ଇଞ୍ଜେକେ ଲୋନ୍‌‍ ମାଲ୍‍ସ୍‍ ଆଞ୍ଜ୍‍ ଉଡ଼େ, ନି ମାୟାଡ଼୍‍ ତାଗାଙ୍କ୍‍ ବୁତ୍‌ ୱିଡ଼୍‍ସି ଆଞ୍ଜ୍‍ମିନ୍ଦେ ।
MAR 7:30 ନାଟାଡ଼୍‍ ଲୋନ୍‌‍ ମାଲ୍‍ସ୍‍ ଆଞ୍ଜ୍ ଉଡ଼୍‍ତେ ଯେ, ତାନ୍‍ ମାୟାଡ଼୍‍ କେତିତାଗ୍‍ ପାଟିମିନ୍ଦେ ନୁ ନିଜାମ୍‍ ବୁତ୍‌ ତାଙ୍କ୍‍କିଙ୍କ୍ ୱିଡ଼୍‍ସି ମିନ୍ଦେ ।
MAR 7:31 ତାନ୍‍ ପେର୍କେ ଜିସୁ ସୋର ଅଞ୍ଚଲତାଗାଙ୍କ୍ ସିଦନ୍‍ତାଗ୍‍ ଆଞ୍ଜ୍‍ ଆଗାକଞ୍ଚ୍‍ ଦେକାପଲୀ ପ୍ରଦେଶ ଲୋପେଙ୍କ୍‍ ଇସ୍‌‍ ଗାଲିଲୀ ଆଞ୍ଚିନାଗ୍‍ ୱାସ୍‍ ହେୱ୍‍ତଣ୍ଡ୍ ।
MAR 7:32 ଆଗାକଞ୍ଚ୍‍ ବେସ୍‍କ୍‍ତଡ଼୍ ନାରୁଡ଼୍‍ ୱେରଙ୍କ୍‌ ବୟ୍‍ରାଙ୍କ୍ ଜିସୁନ୍‍ ଗାରେ ତାତ୍‍ତଡ଼୍‍ । ଅଣ୍ଡ୍‌ ଲେକେତ୍‍ ଗଟି ତିର୍‍ୟେ ପାର୍‍ୱକଟ ମାତ୍‍ତଣ୍ଡ୍ । ଅନ୍‌‍ ପର କାଇ ୱାଟାନ୍ ମାଇଦିଙ୍କ୍ ଅଡ଼୍‌‍ ଜିସୁ ଅନୁରଦ୍‌‌ ମାଡ଼୍‍ତଡ଼୍‍ ।
MAR 7:33 ଜିସୁ ଅଂକିଙ୍କ୍‌ ୱେର୍‌ଙ୍କେ ନାରୁଡ଼୍‍ ଲୋପେଙ୍କ୍‍ ସୁଦୁର୍‍ ଦୁରାମ୍‍ ଆତ୍‍ତଣ୍ଡ୍ । ଅଣ୍ଡ୍‌ କେୱ୍‍ଦାଗ୍‍ ୱାଡ଼୍‍ଞ୍ଜ୍‍ ଆଦ୍‍ପି, ଉଚି ଅନ୍‌‍ ୱାଞ୍ଜେର୍‍ତିଙ୍କ୍ ହିଟ୍‍ତଣ୍ଡ୍ ।
MAR 7:34 ତାନ୍‍ପେର୍କେ ସ୍ୱର୍ଗତ୍‍ପାକେ ପର୍‍ଉଡ଼ି, ଗାଟିନେସ୍‍କି କେତ୍‍ତଣ୍ଡ୍ “ଇପ୍‍ପତଃ !” ଅର୍ତ ଲେଙ୍ଗା ।
MAR 7:35 ସାଙ୍ଗେ ସାଙ୍ଗେ ନାରୁଣ୍ଡ୍ କେଞ୍ଜାନ୍‍ ଶକ୍ତି ପାଏମ୍‍ ଆତ୍‍ତଣ୍ଡ୍, ଅନାଦ୍‌‍ କନ୍ଦାଲ୍‍ ବନ୍ଦନ୍‍ ଦୁର୍‍ ଆତ୍‍ତେ ନୁ ଅଣ୍ଡ୍‌ ଇଞ୍ଜ୍‍ ଲେକେତ୍‍ ଗଟି ତିର୍‍ୟେ ପାର୍‍ଦୁତଣ୍ଡ୍ ।
MAR 7:36 ଇ ଗଟନା ବିଷୟ୍‍ତେ ୱେର୍‍ତଡ଼୍‍କିଙ୍କ୍‍ ବାତେ ବା କେଲ୍‍ମାଟ୍‍ ଇଞ୍ଜ ଜିସୁ ନାରୁଡ଼୍‍କ୍‍ ଆଦେଶ୍‍ ହିତ୍‍ତଣ୍ଡ୍ । କିନ୍ତୁ ଜିସୁ ବେସର୍‍ ମନା ମାଡ଼୍‍ତଣ୍ଡ୍‍, ନାରୁଡ଼୍‍ ଆସର୍‍ କେସ ଉଡ଼୍‌ତଡ଼୍‍ ।
MAR 7:37 ବେନଡ଼୍‍ ଇ ସାରେ ଗଟି କେଞ୍ଜ୍‍ତଡ଼୍‍, ଅଡ଼୍‌‍ କାବା ଆସ୍‍ କେତ୍‍ତଡ଼୍‍, ଅଣ୍ଡ୍‌ ବେସର୍‍ ଚମତ୍କାର୍‍ତେ ପାଡ଼୍‍ୟି ମାଡ଼ୁତଣ୍ଡ୍, ବୟ୍‍ରାଙ୍କ୍‍ କେଞ୍ଜାନ୍‍ ଶକ୍ତି, କନ୍ଦାଙ୍କ୍‍ ତିର୍‍ୟାନ୍‍ ଶକ୍ତି ଇସ୍‍ ମିନ୍ଦେଣ୍ଡ୍ ।
MAR 8:1 ଆ ବେସ୍‌କ୍ ଦିନାତେ ପେର୍କେ ଅଣ୍ଡ୍‌‍ଦାମ୍‍ ନାର୍ଗେ ନାରୁଡ଼୍‍ ଜିସୁନ୍‍ ଗାରେ ଗୁଡ଼ିମାତ୍‍ତଡ଼୍‍ । ବେସୁଙ୍କ୍‍ ଅଡ଼ାଦ୍‌‍ କାଦି ତେର୍‍ତେ, ଜିସୁ ଶିଷ୍ୟଡ଼୍‍କିଙ୍କ୍ କାର୍‍ଙ୍ଗି କେତ୍‍ତଣ୍ଡ୍,
MAR 8:2 ଇ ନାରୁଡ଼୍‍ ମୁଣ୍ଡ୍‍ଦିନା ଆତ୍‍ତେ ନା ଗାରେ ମିନ୍ଦେଡ଼୍‍ ଇଞ୍ଜେ । ଅଡ଼୍‌‍ କାୟ୍‍ଦେ ତିନ୍ଦାନ୍‍ ମାଇଦିଙ୍କ୍ ବାତା ଇଲ୍‍ୱାଙ୍କ୍‍ ନାକିଙ୍କ୍‍ ଦୁଃକାମ୍‌ ୱେସୁତ୍‍ ।
MAR 8:3 ଅଡ଼୍‌‍କିଂଙ୍କ୍‍ ତିୱ୍‌କଟ ୱିଡ଼୍‍ସିତ୍‍କେ, ମାଲ୍‍ସ୍‍ ଆଦାନ୍‍ ୱେଲେ ଅଡ଼୍‌‍ ଆଇଦ୍‌ତଡ଼୍‍ । ଅଡ଼୍‌‍ ଲୋପେଙ୍କ୍ ବେସ୍‍କ୍‍ତଡ଼୍ ନାର୍ଗେ ଦୁରାକଞ୍ଚ୍‍ ୱାସ୍‍ମିନ୍ଦେଡ଼୍ ।
MAR 8:4 ଶିଷ୍ୟଡ଼୍ ପାଚ୍ରାରା ମାଡ଼୍‍ତଡ଼୍‍, ଇଗ୍‍ ବାତ୍‍ଇଲ୍‍ୱେ ଜାଗାତାଗ୍‍ ଇସର୍‍ ନାରୁଡ଼୍‍କିଙ୍କ୍ ତିନ୍ଦାନ୍‌ ମାଇଦିଙ୍କ୍ ମାମ୍‍ ବେଗାକଞ୍ଚ୍ କାଦି ଯୋଗାଡ଼୍‍ ମାଡ଼୍‍ପାର୍‍ଦ୍‍ ତମ୍‍ ?
MAR 8:5 ଜିସୁ ପାଚ୍ରାରା ମାଡ଼୍‍ତଣ୍ଡ୍, ମି ଗାରେ ବେସ୍‌କ୍ ରୂଟି ମିନ୍ଦେ ?
MAR 8:6 ମାତର୍‍ ସାତ୍‍ଟାନେ ଇଞ୍ଜ ଅଡ଼୍‌‍ ଉତ୍ତର୍‍ ଇତ୍‌ତଣ୍ଡ୍‌ । ଜିସୁ ନାରୁଡ଼୍‍କିଙ୍କ୍‍ ନେଲ୍‍ କୁଦାନ୍‍ ମାଇଦିଙ୍କ୍‍ କେତ୍‍ତଣ୍ଡ୍‍ । ତାନ୍‍ପେର୍କେ ଆ ସାତ୍‍ଟାନ୍‍ ରୂଟିଙ୍କ୍ ଅସ୍‍ ଜିସୁ ଇଶ୍ୱର୍‌ତିଙ୍କ୍ ଦନ୍ୟବାଦ୍‍ ଇତ୍‌ତଣ୍ଡ୍‌ ନୁ ଆୱିଙ୍କ୍ ଉୱୁସ୍‍ ନାରୁଡ଼୍‍ ଲୋପେ ତୁସାନ୍‍ ମାଇଦିଙ୍କ୍ ଶିଷ୍ୟଡ଼୍ କାଇଦେ ଇତ୍‌ତଣ୍ଡ୍‌‍ । ଶିଷ୍ୟଡ଼୍ ଆୱିଙ୍କ୍ ତୁସ୍‍ତଡ଼୍‍ ।
MAR 8:7 ଅଡ଼୍‌‍ ଗାରେ ବେସ୍‌କ୍ ସୁଦୁରାୱ୍‍ କିକେ ଆନ୍‌ତେ ମାତ୍‍ତା । ଆଦିନ୍‍ ମାଇଦିଙ୍କ୍ ଅଣ୍ଡ୍‌ ଇଶ୍ୱର୍‌ତିଙ୍କ୍‍ ଅଣ୍ଡ୍‌‍ ମେଣ୍ଡ୍‍ନ୍‍ ଦାମ୍‍ ଦନ୍ୟବାଦ୍‌ ଇସ୍ ଆୱିଙ୍କ୍‍ ତୁଉସାନ୍‌‍ ମାଇଦିଙ୍କ୍‍ ଶିଷ୍ୟଡ଼୍‍କ୍‍ କେତ୍‍ତଣ୍ଡ୍‍ ।
MAR 8:8 ସାରେ ତଡ଼୍‍ ନାର୍ଗେ ତିଞ୍ଜ୍ ପାଞ୍ଚ୍‍ତଡ଼୍‍ । ମିଗିଲ୍‍ତାୱୁ ରୂଟି ସାତ୍‍ଟାନ୍‍ ଜୁଡ଼ିନାଗ୍‍ ପେଏକି ନେଏତ୍‍ତଡ଼୍‍ ।
MAR 8:9 ନାଲୁ ହଜାର୍‍ ନାରୁଡ଼୍‍ ଇ କାଦି ତିଞ୍ଜ୍‍ମାତ୍‍ତଡ଼୍‍ ନୁ ମିଗ୍‍ଲି ରାଲି ମାନ୍ଦାନ୍‍ ଉର୍‍ଙ୍ଗ୍‍ତାଉ ରୂଟିକିଙ୍କ୍ ଶିଷ୍ୟଡ଼୍ ପେହେକି ସାତ୍‍ଟାନ୍‍ ଜୁଡ଼ି ନିଃହ୍‍ତଡ଼୍‍ ।
MAR 8:10 ତାନ୍‍ପେର୍କେ ଜିସୁ ନାରୁଡ଼୍‍କିଙ୍କ୍ ରହ୍‍ସିସ୍‌ ଶିଷ୍ୟଡ଼୍ ତ ଓଡ୍‍ତାଗେ ତାରି ଦଲ୍‍ମନୁତା ନାର୍‍ଦା ଆତ୍‍ତଣ୍ଡ୍‍ ।
MAR 8:11 ଅଣ୍ଡ୍‌ ଦିନେ ବେସ୍‍କ୍‍ତଡ଼୍ ଫାରୁଶିଡ଼୍‍ ଜିସୁନ୍‍ ଗାରେୱାସ୍‍ ଅନ୍‌‍ ତଡ଼୍‍ ରାମ୍‍କ୍ ମାଡ଼ାଙ୍କ୍‍ ପସ୍‍ପ୍‍ତଡ଼୍‍ । ଜିସୁନ୍‍ ଦୋଷତିଙ୍କ୍ ପୟ୍‍ଦାନ୍‍ ମାଇଦିଙ୍କ୍ ଉଡ଼୍‍ୟ୍‍ ୱାଟି ଅଡ଼୍‌‍ ଅଂକିଙ୍କ୍‌ ଅନୁରଦ୍‌ ମାଡ଼୍‍ତଡ଼୍‍ ଅଣ୍ଡୟ୍‌ ଆଶର୍ଯ୍ୟ ପାଡ଼ିୟ୍‍ ମାଡ଼ି ଅଣ୍ଡ୍‌ ପ୍ରମାଣ୍ ମାଡ଼ିଣ୍ଡ୍ ଯେ, ଅନ୍‌‍ ସେଙ୍ଗେ ଇଶ୍ୱର୍‌ତେ ଶକ୍ତି ମିନ୍ଦେ ।
MAR 8:12 ଜିସୁ ଗାଟି ନେସ୍‍କି କେତ୍‍ତଣ୍ଡ୍, “ଇ ଯୁଗ୍‍ତେ ନାରୁଡ଼୍‍, ବାକ୍‍ୱା ପାଡ଼ିୟ୍‍ ଉଡ଼ାନ୍‍ ମାଇଦିଙ୍କ୍‍ ବାତେଙ୍କ୍‍ ଇସର୍‍ ଦାନ୍ଦେ ? ନାନ୍‍ ମିକିଂଙ୍କ୍‍ ସତ୍‍ କେସ୍‍ ନେହ୍‍ତୁତାନ୍‍, ଇ ଲେକେତ୍‍ ପ୍ରମାଣ୍ ଇ ନାରୁଡ଼୍‍କ୍‍ ଇଦାନାଦ୍‍ ଆୟ୍‍ୟ ।”
MAR 8:13 ଇଲା କେସ୍‍ ଜିସୁ ଅଡ଼୍‌‍କିଂଙ୍କ୍‍ ୱିଡ଼୍‍ସି ଓଡ୍‍ତାଗ୍‍ ମାଲ୍‍ସ୍‍ ୱାତ୍‍ତଣ୍ଡ୍ ନୁ ମାଡ଼୍‍ଗିନ୍‍ ଆପ୍‍ପାକା ଆତ୍‍ତଣ୍ଡ୍‍ ।
MAR 8:14 ଅଣ୍ଡ୍‌‍ଦିନେ ଶିଷ୍ୟଡ଼୍ ରୂଟି ଅଦାନଙ୍କ୍‍ ମାର୍ଙ୍ଗି ମାତ୍‍ତଡ଼୍‍ । ଅଡ଼୍‌‍ ଗାରେ ମାତର୍‍ ଅଣ୍ଡୟ୍‌‍ ରୂଟି ମାତ୍‍ତେ ।
MAR 8:15 ଜିସୁ ଅଡ଼୍‌‍କିଂଙ୍କ୍ ସତର୍କ ମାଡ଼ି କେତ୍‍ତଣ୍ଡ୍‍, “ସାବଦାନ୍‍, ଫାରୁଶିଡ଼୍‍ ନୁ ହେରଦ୍‍ତେ ପାଣ୍ଡୁମ୍‍ତାଗାଙ୍କ୍‍ ସତର୍କ ମାନୁଟ୍‍ ।”
MAR 8:16 ଶିଷ୍ୟଡ଼୍ ଇ ବିଷୟ୍‍ତେ ନିଜର୍‍ ନିଜର୍‍ ଲୋପେ ଆଲ୍‍ସି ମିକା କେତ୍‍ତଡ଼୍‍, “ମାମ୍‍ ସାଙ୍ଗ୍‍ତେ ରୂଟି ତାଡ଼୍‍ୱାଙ୍କ୍‍ ଅଣ୍ଡ୍‌‍ ଇଗଟି କେତୁତଣ୍ଡ୍‍ ।”
MAR 8:17 ଅଡ଼୍‌‍ ବାତେ ଆଲ୍‍ସି ମିନ୍ଦେଡ଼୍‍, ପୁଞ୍ଜ୍‍ମେଣ୍ଡେ ଜିସୁ କେତ୍‍ତଣ୍ଡ୍‍, “ଗାରେ ରୂଟି ଇଲେ ଇଞ୍ଜ ଇସର୍‍ ଆଲ୍‍ସୁତିଡ଼୍‍ ବାତେଙ୍କ୍‍ ? ମିଡ଼୍‍ ବାତେ ଇଞ୍ଜ୍‍ଜେକ୍‍ ଆଇନା ପୁନ୍ଦ୍‍ପାର୍‍ୱିଡ଼୍‍ କି ବୁଜେମ୍‍ ଆଦ୍‍ପାର୍‍ୱିଡ଼୍‍ ? ଇସର୍ ବାକ୍‍ୱା ନଡ଼ି !
MAR 8:18 କଣ୍ଡା ମାଞ୍ଜ୍‍ ବାତେ ଉଡ଼୍‍ପାର୍‍ୱିଡ଼୍‍, କେୱ୍‍କ୍‍ ମାଞ୍ଜ୍‍ କେଞ୍ଜ୍‍ ପାର୍‍ୱିଡ଼୍‍ ଏର୍କେ ମାଡ଼ିୱିଡ଼୍‌ ?
MAR 8:19 ଏଇଙ୍ଗ୍‍ ରୂଟି ଉୱୁସ୍‍ ବେଲା ଏଇଙ୍ଗ୍‍ ହଜାର୍‍ ନାରୁଡ଼୍‍କିଙ୍କ୍‍ ତିହ୍‍ସ୍‍ମାତ୍‍ତିଡ଼୍‍, ମିକ୍‍ ବାତେ ହେର୍କେ ଇଲେ ? ଆ ଦିନେତ୍‍ ଲେକାମ୍‍ ରାଲି ମାନ୍ଦାନ୍‍ ରୂଟି ଦୁଙ୍କା ସାରେ ପେହ୍‍କି ବେସ୍‌କ୍ ଜୁଡ଼ି ନିହ୍‍ସ୍‍ ମାତ୍‍ତିଡ଼୍‍, ହେର୍କେ ମିନ୍ଦେ ?” “ବାର୍‍ଟାନ୍‍” ଇଞ୍ଜ ଶିଷ୍ୟଡ଼୍ ଉତ୍ତର ହିତ୍‍ତଡ଼୍‍ ।
MAR 8:20 ଜିସୁ ମେଣ୍ଡେ ପାଚ୍ରାରା ମାଡ଼୍‍ତଣ୍ଡ୍‍, “ମେଣ୍ଡେ ବେସୁଙ୍କ୍‍ ନାଲୁ ହଜାର୍‍ ନାରୁଡ଼୍‍ ମାଇଦିଙ୍କ୍‍ ସାତ୍‍ଟାନ୍‍ ରୂଟି ଉୱୁସ୍‍ ମାତ୍‍ତାନ୍‍, ମିଗିଲି ମାତ୍‍ତେ ରୂଟି ଦୁଙ୍କା ପେହ୍‍କି ବେସ୍‌କ୍ ଜୁଡ଼ି ନୀଇସ୍‍ ମାତ୍‍ତିଡ଼୍‍ ?” ଅଡ଼୍‌‍ ଉତ୍ତର୍ ଇତ୍‍ତଡ଼୍‍, “ସାତ୍‍ଟାନ୍‍ ।”
MAR 8:21 ଜିସୁ ପ୍ରଶ୍ନ ମାଡ଼୍‍ତଣ୍ଡ୍‍, “ଆଗେକ୍‍ ବା ବାତେ ମିଡ଼୍‍ ବୁଜେମ୍‍ ଆୟ୍‍ୱିଡ଼୍‍ ?”
MAR 8:22 ଅଡ଼୍‌‍ ବେସୁଙ୍କ୍‍ ବେତ୍‍ସାଇଦା ନାର୍‍ ଏୱ୍‍ତଡ଼୍‍, ନାରୁଡ଼୍‍ ୱେରଙ୍କ୍‍ କାନାଙ୍କ୍‍ ଜିସୁନ୍ ଗାରେ ତାସ୍‍ ଅଂକିଙ୍କ୍‌ ଇଟାନ୍‍ ମାଇଦିଙ୍କ୍‍ ଅନୁରୋଦ ମାଡ଼୍‍ତଡ଼୍‍ ।
MAR 8:23 ଜିସୁ କାନାନ୍‍ କାଇ ପୟ୍‍ସ୍‍ ଅଂକିଙ୍କ୍‌ ନାର୍‍ଦେ ବାୟ୍‍ଦ୍‌ ଅତ୍‍ତଣ୍ଡ୍‍ । ଆଗେ ଅଂକିଙ୍କ୍‌ କଣ୍ଡାନାଗ୍‍ ଉସୁଲ୍‍ ମେହେସିସ୍‍ ଅନ୍‌‍ ମେନ୍ଦୁଲ୍‍ ତାଗେ କାୟ୍‍ୱାଟି ଅଂକିଙ୍କ୍‌ ପାଚ୍ରାରା ମାଡ଼୍‍ତଣ୍ଡ୍‍, “ବାତା ଉଡ଼୍‍ ପାର୍‍ଦୁତି ?”
MAR 8:24 ନାରୁଡ଼୍‌କ୍‌ ଉଡ଼ି କେତ୍‍ତଣ୍ଡ୍‍, “ହ, ନାରୁଡ଼୍‍କିଙ୍କ୍‍ ଉଡ଼୍‍ ପାର୍‍ଦୁତାନ୍‍ । ଅଡ଼୍‌‍ ବୁଚା ମାଡ଼ାନ୍‍ଡ଼୍‌ ଲେକାମ୍‍ ତନ୍ଦମିନ୍ଦେଡ଼୍‍ ।”
MAR 8:25 ଜିସୁ ନାରୁନ୍‍ତେ କଣ୍ଡେତ୍‍ ପର ନିଜର୍‍ କାଇୱାଟି ନୁ ନାରୁଣ୍ଡ୍‍ ସାୟେ ହେର୍କେ ମାଡ଼୍‍ତଣ୍ଡ୍‍ । ହଟାତ୍‍ ଅନାଦ୍‌‍ ଉଡ଼ାନ୍‍ ଶକ୍ତି ମାଲ୍‍ସ୍‍ ୱାତ୍‍ତେ ନୁ ଅଣ୍ଡ୍‌‍ ଲେକେତ୍‍ ଉଡ଼୍‍ପାର୍‍ତଣ୍ଡ୍‍ ।
MAR 8:26 ଜିସୁ ଅଂକିଙ୍କ୍‌ ଆ ନାର୍‍ ମାଲ୍‍ସ୍‍ ଆନ୍‌‍ମା ଇଞ୍ଜ ଗଟ୍ ଇସ୍‍ ଅନ୍‌‍ ଲୋନ୍‌‍ ରୟ୍‍ସିତ୍‍ତଣ୍ଡ୍‍ ।
MAR 8:27 ତାନ୍‍ ପେର୍କେ ଜିସୁ ନୁ ତାନ୍‍ ଶିଷ୍ୟଡ଼୍ କାଇସରିୟା ଫିଲିପ୍‍ପୀ ନାର୍‍ଦେ ଗାରେ ନାର୍‍କି ନା ଆଦାନ୍‍ୱେଲେ ଆର୍‍ଦାଗ୍‍ ଜିସୁ ପାଚ୍ରାରା ମାଡ଼୍‍ତଣ୍ଡ୍‍, “ନାନ୍‍ ବେନନ୍, ଇ ବିଷୟ୍‍ତେ ନାରୁଡ଼୍‍ ବାତେ କେତୁତଡ଼୍‍ ?”
MAR 8:28 ଅଡ଼୍‌‍ ଉତ୍ତର୍‍ ହିତ୍‍ତଡ଼୍‍, “ବେସ୍‌କ୍ ତଡ଼୍‍ କେତୁତଡ଼୍‍, ନିମେ ବାପ୍ତିସ୍ମ ଯୋହନ୍‌‌,” ମେଣ୍ଡେ ବେସ୍‌କ୍ ତଡ଼୍ ‍କେତୁତଡ଼୍‍, ନିମେ ଏଲିୟ । ମେଣ୍ଡେ ୱେର୍‍ତଡ଼୍‍ ମନେ ମାଡ଼ୁତଡ଼୍‍, ନିମେ ବାବବାଦୀଡ଼୍‍ ଲୋପେଙ୍କ୍‍ ୱେରନି ।
MAR 8:29 ଜିସୁ ଅଡ଼୍‌‍କିଂଙ୍କ୍‍ ପାଚ୍ରାରା ମାଡ଼୍‍ତଣ୍ଡ୍‍, “ମେଣ୍ଡେ ମିଡ଼୍‍ ବାତେ ଆଲ୍‍ସୁତିଡ଼୍‍ ? ନାନ୍‍ ବେନନ୍, ଇ ବିଷୟ୍‍ତେ ମିଡ଼୍‍ ବାତେ କେତୁତିଡ଼୍‍ ।” ପିତର୍‍ ଉତ୍ତର୍‍ ଇତ୍‌ତଣ୍ଡ୍‌‍, “ନିମେ ଇଶ୍ୱର୍‌ତେ ହେଞ୍ଚିମାନ୍ଦାନ୍ ତ୍ରାଣକର୍ତ୍ତାନ୍‍ ମସୀହନି ।”
MAR 8:30 ଜିସୁ ଅଡ଼୍‌‍କିଂଙ୍କ୍ ଗଟ୍‍ ଇତ୍‌ତଣ୍ଡ୍‌‍, “ନା” ବିଷୟ୍‍ତେ ଇ ଗଟ୍‍ ବେନଙ୍କ୍ କେଲ୍‍ମାଟ୍‍ ।
MAR 8:31 ଜିସୁ ଶିଷ୍ୟଡ଼୍‍କିଙ୍କ୍‍ ବୁଜାମାଡ଼ି କେତ୍‍ତଣ୍ଡ୍, ନାରୁନ୍‌ ପିଲେତିଙ୍କ୍‍ ନାର୍ଗେ କଷ୍ଟ ଆଦ୍‍ ୱେୟ୍‍ତିତ୍‍ । ଦର୍ମନେତା, ମୁକ୍ୟ ପୁରହିତ ନୁ ଦର୍ମଗୁରୁଡ଼୍‍ ନଡ଼୍‍ତ ତିପାଲ୍‍ ଆସ୍‍ ଅଣ୍ଡ୍‌ ଡଲିତଣ୍ଡ୍‍ । କିନ୍ତୁ ମୁଣ୍ଡ୍‍ଦିନାତେ ପେର୍କେ ଅଣ୍ଡ୍‌‍ ମେଣ୍ଡନ୍‍ଦାମ୍‍ ତେଦିତଣ୍ଡ୍‍ ।
MAR 8:32 ଇ ସାରେ ଗଟି ଜିସୁ ଗାଟି ଲେକେତ୍‍ତେ ଶିଷ୍ୟଡ଼୍‍କିଙ୍କ୍ ବୁଜାମାଡ଼ିତ୍‍ତଣ୍ଡ୍‍ । ଆଦିଙ୍କ୍‍ ପିତର୍‍ ଅଂକିଙ୍କ୍‌ ଲୋପେ କାର୍ଙ୍ଗି ଅସ୍‍ ଅନ୍‌‍ତଡ଼୍‍ କାଇଲି କେତ୍‌ତଣ୍ଡ୍‌ ।
MAR 8:33 କିନ୍ତୁ ଜିସୁ ମାଲ୍‍ସ୍‍ ଶିଷ୍ୟଡ଼ା ଉଡ଼୍‍ତଣ୍ଡ୍ ନୁ ପିତର୍‍ତିଙ୍କ୍‍ ଲେକେତ୍‍ ଉଡ଼ି କେତ୍‍ତଣ୍ଡ୍‍, “ନାୟାଗାଙ୍କ୍‍ ଦୁର୍‍ ଆୟ୍‍ମ୍‍ ଶୟ୍‍ତାନ୍‍, ନିୟାଦ୍‍ ଚିନ୍ତା ମାତର୍‍ ନାରୁଡ଼ାଦ୍, ଇଶ୍ୱର୍‌ତେ ଶକ୍ତି ଆୟ୍‌ ।”
MAR 8:34 ତାନ୍‍ ପେର୍କେ ଜିସୁ ଶିଷ୍ୟଡ଼୍‍କିଙ୍କ୍‍ ନୁ ସାରେ ତଡ଼କ୍‌ କାର୍‍ଙ୍ଗି ମିକା କେତ୍‍ତଣ୍ଡ୍‍, “ବେନ କି ନା ସାଙ୍ଗେ ୱାଦାନ୍‍ ମାଇଦିଙ୍କ୍ ଇଚ୍ଛା ଆଦ୍‍ତଣ୍ଡ୍‍, ଅଣ୍ଡ୍‌ ସାରେ ୱିଡ଼୍‍ସିଣ୍ଡ୍ ନୁ ନିଜର୍‍ କ୍ରୁଶ କାଞ୍ଜି ନା ପେର୍କେପେର୍କେ ୱାଡ଼ିଣ୍ଡ୍‍ ।
MAR 8:35 ବେନ ଆୟି ନିଜର୍‍ ଜିୱୁନ୍‌ ଗେଲ୍‍ସ୍ପାଙ୍କ୍‍ ଇଚ୍ଛା ମାଡ଼ିତଣ୍ଡ୍, ଅଣ୍ଡ୍‌ ଆଦ୍‍ ହରା ମାଡ଼ିତଣ୍ଡ୍‍; କିନ୍ତୁ ବେନ ଆୟି ନା ମାଇଦିଙ୍କ୍‍ ନୁ ଇ ଲେକେତ୍ ଗଟ୍‍ ମାଇଦିଙ୍କ୍ ନିଜର୍‍ ଜିୱୁନ୍‍ତିଙ୍କ୍ ଇସ୍‍ମିକା, ଅଣ୍ଡ୍‌‍ ଆଦ୍‍ଲେକାମ୍ ଆଦ୍‍ ନେହେତିତଣ୍ଡ୍ ।
MAR 8:36 ଅର୍‍ତୁଣ୍ଡ୍‍ ନାରୁଣ୍ଡ୍‍ ସାରେ ଜଗତ୍‍ତିଙ୍କ୍ ଲାବ୍ ମାଡ଼ି ନିଜର୍‍ ଜିୱୁନ୍‍ତିଙ୍କ୍‍ ହରାମାଡ଼୍‍କେ, ଅନାଦ୍‌‍ ବାତେ ଲାବ୍ ଆଦ୍‍ତେ ? ନିଜାମ୍ ଲେକାମ୍‍ ଆୟ ।
MAR 8:37 ବେନ୍‍ ବିଷୟ୍‍ତେ ବିନିମୟ୍‍ତେ ଅଣ୍ଡ୍‌‍ ଅନାଦ୍‌‍ ଜିୱୁନ୍‍ତିଙ୍କ୍‍ ଦର୍ସ୍କେ ପାର୍‍ୱଣ୍ଡ୍‍ ।
MAR 8:38 ଇଶ୍ୱର୍‍ ୱାଦାନ୍ ଦିନାମ୍‍ତେ ଯଦି ବେନ ନା ମାଇଦିଙ୍କ୍‍ ନୁ ନା ଶିକ୍ଷାତେ ମାଇଦିଙ୍କ୍ ସିଗ୍‍ ଆଦ୍‍ତ, ଆଲାଇତ୍କେ ଇଶ୍ୱରତେ ଗୌରବତେ ନିଣ୍ଡି ଆସ୍‍ ନାରୁନ୍‌ ପିଲେ ବେସୁଙ୍କ୍‍ ପବିତ୍ର ସ୍ୱର୍ଗତେ ଦୂତକିନ୍‍ ତ ମେଣ୍ଡନ୍‍ ଦାମ୍‍ ୱାଦ୍‍ତଣ୍ଡ୍, ଅଣ୍ଡ୍‌‍ ଆନ୍ତେ ଅଡ଼୍‌‍ସେଙ୍ଗେ ସିଗ୍‍ ଆଦ୍‍ତଣ୍ଡ୍‍ ।”
MAR 9:1 ଜିସୁ ଅଡ଼୍‌‍କିଂଙ୍କ୍‍ ମେଣ୍ଡ୍‍ କେତ୍‍ତଣ୍ଡ୍‍, “ନାନ୍‍ ମିକିଙ୍କ୍ ସତ୍‍ କେସ୍‍ ନେଏତୁତାନ୍‍, ଇଶ୍ୱର୍‌ତେ ରାଜ୍ୟ ଶକ୍ତିତଡ଼୍‍ ୱାଦାନାଦ୍‍ ନୁ ଆଦାନାଦ୍‍ ଉଡ଼ାନ୍‍ ଯାକ ଇଗ୍‍ ମାନ୍ଦାନ୍‍ ବେସ୍‍କ୍‍ତଡ଼୍ ନାରୁଡ଼୍‍ ଡଲଡ଼୍‍ ।”
MAR 9:2 ଆଦିନ୍‌ ଆରୁ ଦିନାତେ ପେର୍କେ ପିତର, ଯାକୁବ୍‍ ନୁ ଯୋହନ୍‌‌ତିଙ୍କ୍ ସାଙ୍ଗେ ଅସ୍‍ ଜିସୁ ଅଣ୍ଡୟ୍‌ ଡେଙ୍ଗ୍‍ମାନ୍ଦାନ୍‍ ମେଟେତାଗ୍‍ ଆତ୍‍ତଡ଼୍‍ । ଆଗେ ବେନଡ଼୍‍ବା ଇଲକଟ ମାତ୍‍ତଡ଼୍‍ । ଶିଷ୍ୟଡ଼୍ ଉଡ଼ଉଡ଼ ଜିସୁନାଦ୍‍ ଅଣ୍ଡୟ୍‌‍ ବେସୁଙ୍କ୍‍ ଉଡ଼୍‍ୱେ ଲେକାମ୍ ତନ୍ଦତଣ୍ଡ୍ ।
MAR 9:3 ଅନାଦ୍‌‍ ସିଲା ପାଣ୍ଡ୍ରି ଆସ୍‍ ଗାଟି ୱେୟ୍‍ସ୍‍ ଆତ୍‍ତେ ଜଗତ୍‍ତେ ବେନ ଆଦିଙ୍କ୍‍ ନର୍‍ସ୍‍ ଆସର୍‍ ପାଣ୍ଡ୍ରି ମାଡ଼୍‍ପାର୍‍ୱଡ଼୍‍ ଆୟେଡ଼୍‍ ।
MAR 9:4 ତାନ୍‍ ପେର୍କେ ମୁୱୁଡ଼୍‍ ଶିଷ୍ୟଡ଼୍ ଉଡ଼୍‌ତଡ଼୍‍, ଏଲିୟ ନୁ ମୋଶାଲ୍‌‍ ପେଇସ୍‍ ମିକା ଜିସୁନ୍‍ତଡ଼୍‍ ତିର୍‍ୟା ତିର୍‍ୟି ଆଦୁତଡ଼୍‍ ।
MAR 9:5 ପିତର୍‍ ଜିସୁଙ୍କ୍‍ କେତ୍‍ତଣ୍ଡ୍‍, “ଗୁରୁ, ଇଦ୍‍ ବେସର୍‍ ସାର୍‍ଦେତେ ଗଟ୍‍ ଯେ ନେଣ୍ଡ୍‍ ମାନାଡ଼୍‍ ଇଗେ ମିନ୍ଦେଡ଼୍‍ । ଇଗ୍‍ ମୁଣ୍ଡ୍ ଗୁଡ଼୍‍ସା ତିଆର୍‍ ମାଡ଼ିକା । ଅଣ୍ଡୟ୍‌‍ ନି ମାଇଦିଙ୍କ୍ ଅଣ୍ଡୟ୍‌‍ ମୋଶାନ୍‌‌ ମାଇଦିଙ୍କ୍ ନୁ ମେଣ୍ଡ୍‍ ଅଣ୍ଡୟ୍‌ ଏଲିୟନ୍‍ ମାଇଦିଙ୍କ୍ ।”
MAR 9:6 ପିତର୍‍ ବାତେ କେତିତଣ୍ଡ୍‍, ଇଞ୍ଜ୍‍ ଆଲ୍‍ସକଟ ଇ ଗଟ୍‍ କେସ୍‍ମାତ୍‍ତଣ୍ଡ୍‍ । ଇତ୍କେ ଶିଷ୍ୟଡ଼୍ ପିନା ୱେର୍‍ସ୍‍ ମାତ୍‍ତଡ଼୍‍ ।
MAR 9:7 ଅଟାତ୍‍ ମୟଲ୍‍ ତାଗାଙ୍କ୍‍ ଅଣ୍ଡୟ୍‌‍ ମାବ୍‍ ତନ୍ଦ୍‍ତେ ନୁ ଆଦିନ୍‌ ନିଡ଼୍‍କେ ଅଡ଼୍‌‍କିଂଙ୍କ୍ ମିସ୍‍ତେ । ମେଣ୍ଡେ ଆ ମାବ୍‍ତେ ଲୋପେଙ୍କ୍ ଅଣ୍ଡୟ୍‌‍ ଗଟ୍‍ କେଞ୍ଜାଙ୍କ୍ ଆତ୍‍ତେ, “ହୋ ନା ପ୍ରିୟ ମାର୍‍, ଇନାଦ୍‍ ଲେଙ୍ଗ୍ ମାନ୍‍ ଇସ୍‍ କେଞ୍ଜାଟ୍‍ ।”
MAR 9:8 ଆସୁଟ୍‍ ଶିଷ୍ୟଡ଼୍ ସାରେ ପାକା ସିଟ୍‍ପାଟ୍‍ ଉଡ଼ି ମାତଡ଼୍‌ ଜିସୁନ୍‍ ୱିଡ଼୍‍ସି ଆଗେ ୱେର୍‍ ବେନଙ୍କ୍ ଉଡ଼ଡ଼୍ ।
MAR 9:9 ଅଡ଼୍‌‍ ମେଟେତାଗାଙ୍କ୍‍ ଡିଗାନ୍‍ ୱେଲେ ଜିସୁ ଅଡ଼୍‌‍କିଂଙ୍କ୍‍ ଗଟ୍‍ ଇସ୍‍ ତେତ୍‍ତଣ୍ଡ୍‍, “ନେଣ୍ଡ୍‍ ବାତେ ଉଡ଼ି ମିନ୍ଦେଡ଼ି, ନାରୁନ୍‌ପିଲେ ଡଲ୍‍ତାଙ୍କ୍‍ ତେଦ୍‍ନା ଜାକ ଆ ଗଟ୍‍ ବେନଡ଼୍‍କ୍‌ କେଲ୍‍ମାଟ୍‍ ।”
MAR 9:10 ଜିସୁନ୍‍ ଆଦେଶ୍‍ ଅଡ଼୍‌‍ ପାଲନ୍‍ ମାଡ଼୍‍ତଡ଼୍‍, କିନ୍ତୁ ଇ ବିଷୟ୍‍ତେ ଅଡ଼୍‌‍ ଅଡ଼୍‌ ଲୋପେ ଆଲଚନା ମାଡ଼୍‍ତଡ଼୍‍, “ଡଲି ତେଦାନାଦ୍‍” ଇତ୍‍କେ ବାତେ ?
MAR 9:11 ଅଣ୍ଡ୍‌‍ ଜିସୁଙ୍କ୍ ପାଚାରା ମାଡ଼୍‍ତଣ୍ଡ୍‍, “ଏଲିୟ ମୁନେଙ୍କ୍‍ ୱାଦ୍‍ତଣ୍ଡ୍ ଇଞ୍ଜ ମାନ୍‍ ଦର୍ମଶାସ୍ତ୍ର ତେ ଗୁରୁଡ଼୍‍ ବାତେଙ୍କ୍‍ କେତୁତଡ଼୍‍ ?”
MAR 9:12 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍ “ମୁନେତ୍‍ ଲେକାମ୍ ସାରେ ବିଷୟ୍‍ତେ ତିଆର୍‍ ମାଡ଼ନ୍‍ ମାଇଦିଙ୍କ୍‍ ଏଲିୟ ମୁନେ ୱାଦାନ୍‍ ଗଟ୍‍ । ମେଣ୍ଡେ ନାରୁନ୍‌ଫିଲେ ନାର୍ଗେ ଦୁଃକାମ୍‍ ତିପାଲ୍‍ ଆତ୍‍ତଡ଼୍‍ ଇଞ୍ଜ ଶାସ୍ତ୍ରତାଗ୍‍ ବାତେଙ୍କ୍‍ ଲେକା ମିନ୍ଦେ ?
MAR 9:13 ଅଣ୍ଡ୍‌ ବେଲା ଆଇନ୍‍, ନାନ୍‍ ମିକିଂଙ୍କ୍‍ କେସିଦୁତାନ୍, ଏଲିୟ ୱାସ୍‍ ହେୱ୍‍ସ୍‍ ମିନ୍ଦେଣ୍ଡ୍‍ ନୁ ନାରୁଡ଼୍‍ ଅନ୍‌‍ ପରୁ ମନ୍‍ ଇଚ୍ଛା ବ୍ୟବହାର୍‌ ମାଡ଼ିମିନ୍ଦେଡ଼୍‍ । ଇଦିନ୍‍ ମାଇଦିଙ୍କ୍‍ ଅନ୍‌‍ ବିଷୟ୍‍ତେ ଶାସ୍ତ୍ରତାଗ୍‍ ବାତେ କେସ୍‍ମିନ୍ଦେଡ଼୍‍, ଆୱ୍‍ସାରେ ଗଟେମ୍‍ ଆଦ୍‍ତା ।”
MAR 9:14 ଅଡ଼୍‌‍ ୱେର୍‍ ଶିଷ୍ୟଡ଼୍ ଗାରେ ହେୱ୍‍ସ୍‍ ମାନ୍ଦାନ୍‍ୱେୟ୍‍, ଆଗେ ନାର୍ଗେ ନାରୁଡ଼୍‍ ଗୁଡ଼ି ମାତ୍‍ତଡ଼୍‍ ନୁ ଆ ଶିଷ୍ୟଡ଼୍‍ତ ବେସ୍‍କ୍‍ତଡ଼୍ ଦର୍ମଗୁରୁଡ଼୍‍ ରାମ୍‍କ୍ ମାଡ଼ମାତ୍‍ତଡ଼୍‍ ।
MAR 9:15 ନାରୁଡ଼୍‍ ଜାପେ ଜିସୁଙ୍କ୍ ଉଡ଼ି ଦାଦ୍‍ରେଲ୍‍ତଡ଼୍‍ ନୁ ମିରି ଆଞ୍ଜ୍ ଅଂକିଙ୍କ୍‌ ମଡ଼୍‍କ୍‍ ତଡ଼୍‍ ।
MAR 9:16 ଜିସୁ ଶିଷ୍ୟଡ଼୍‍କିଙ୍କ୍‍ କେତ୍‍ତଣ୍ଡ୍‍, “ଅଡ଼୍‌‍ ତ ବେନ୍‍ ବିଷୟ୍‍ତେ ରାମ୍‍କ୍ ମାଡ଼ମାତ୍‍ତିଡ଼୍‍ ?”
MAR 9:17 ନାରୁଡ଼୍‍ ଲୋପେଙ୍କ୍ ଅର୍‍ତୁଣ୍ଡ୍‍ ଉତ୍ତର୍‍ ଇସ୍‍ କେତ୍‍ତଣ୍ଡ୍‍, ଗୁରୁ, ନା ମାରିଙ୍କ୍ ବୁତ୍‌ ‍ପୟ୍‍ତେ ନୁ ଅଣ୍ଡ୍‌ ଗଟି ତିର୍ୟାଙ୍କ୍‍ ପାର୍‍ୱଣ୍ଡ୍‍ ।
MAR 9:18 ବୁତ୍‌ ଅଂକିଙ୍କ୍‌ ବେସୁଙ୍କ୍‍ ବେସୁଙ୍କ୍‍ ନେଲ୍‍ ରାପିଦୁତ୍‌ । ଆସୁଟ୍‍ ଅନ୍‌‍ ପାୟୁର୍‍ତାଗାଙ୍କ୍‍ ବୟୁଲ୍‍ ପେୟ୍‍ତିତ୍‍, ଅଣ୍ଡ୍‌ ଅନ୍‌‍ ପାଲ୍‍କିଙ୍କ୍‍ କର୍‍କୁତଣ୍ଡ୍‍ ନୁ ଅନ୍‌‍ ମେନ୍ଦୁଲ୍‍ ମେୟ୍‍ଲ । ବୁତ୍‌ ୱିର୍‍ସ୍ପାନ୍‍ ମାଇଦିଙ୍କ୍‍ ନି ଶିଷ୍ୟଡ଼୍‍କିଙ୍କ୍‍ କେତ୍‍ତାନ୍‍, କିନ୍ତୁ ଅଡ଼୍‌‍ ବାତ୍ ବା ମାଡ଼୍‍ପାର୍‍ୱଡ଼୍‍ ।
MAR 9:19 ଜିସୁ ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, “ମିଡ଼୍ ବେସର୍‍ କମ୍‍ ବିଶ୍ୱାସିଡ଼୍ । ମି ତଡ଼୍‍ ନାନ୍‍ ମେଣ୍ଡେ ବେସ୍‌କ୍ ଦିନା ମାନ୍ତ୍‍ତାନ୍‍ ? ପେକାଙ୍କ୍‍ ନା ଗାରେ ପୟ୍‍ସ୍‍ ତାଡ଼ାଟ୍‍ !” ଅଡ଼୍‌‍ ଅକିଂଙ୍କ୍‍ ଜିସୁନ୍ ଗାରେ ତାତ୍‍ତଡ଼୍ ।
MAR 9:20 ପ୍ରେତାତ୍ମା ଜିସୁଙ୍କ୍‍ ଉଡ଼ ୱାନାକେ ପେକାଙ୍କ୍‍ ଚେତ୍‍ ଇଲ୍‍ୱେ ମାଡ଼ି ନେଲ୍‍ ରାପି ପେକାନ୍‍ ପାୟୁର୍‍ତାଗାଙ୍କ୍‍ ବୟୁଲ୍‍ ପେସ୍‍ପି ନେଲ୍‍ ପର୍‍ଲାଙ୍କ୍‍ ପସ୍‍ତଣ୍ଡ୍‍ ।
MAR 9:21 ଜିସୁ ତାମ୍‍ ବାବାଙ୍କ୍‍ କେତ୍‍ତଣ୍ଡ୍‍, “ବେସ୍‌କ୍ ଦିନା ପୟ୍‍ସ୍‍ ଅଣ୍ଡ୍‌‍ ଇଲା ଆତ୍‍ତଣ୍ଡ୍‍ ?”
MAR 9:22 ଅଣ୍ଡ୍‌‍ ଉତ୍ତର୍‍ ଇତ୍‌ତଣ୍ଡ୍‌‍ “ପିଲେକଂସ୍‍ । ବୁତ୍‌ ଅଂକିଙ୍କ୍‌ କିସ୍‍ତାଗ୍‍ ବା ଏର୍‍ଦାଗ୍‍ ରାପି ଆୱ୍‍କାନ୍‍ ମାଇଦିଙ୍କ୍‍ ନାର୍ଗେଦାମ୍‍ ଚେଷ୍ଟା ମାଡ଼୍‍ତେ । ଗୁରୁ ! ନିଜାମ୍‍ ଆତ୍କେ, ଦୟାମାଡ଼ି ମାକିଙ୍କ୍‍ ଇଗାଙ୍କ୍‍ ସାହାଯ୍ୟ ମାଡ଼ା ।”
MAR 9:23 ଜିସୁ କେତ୍‍ତଣ୍ଡ୍‍, “ହଁ !” ବେନ ବିଶ୍ୱାସ ମାଡ଼ିତଣ୍ଡ୍‍, ଅନ୍‌‍ ଗାରେ ସାରେ ନିଜାମ୍ ।
MAR 9:24 ପେକାଲଡ଼୍‍ ବାବାଲ୍‍ ଗାଟି ଲେଙ୍ଗ୍‍ତେ କେତ୍‍ତଣ୍ଡ୍‍, “ନା ବିଶ୍ୱାସ୍‍ ମିନ୍ଦେ, କିନ୍ତୁ ଅବିଶ୍ୱାସି । ନା ବିଶ୍ୱାସ୍‍ ଅଦିକ୍‌ ମାଡ଼ାନ୍‍ ମାଇଦିଙ୍କ୍‍ ନାକିଙ୍କ୍‍ ସାହାଯ୍ୟ ମାଡ଼ା ।”
MAR 9:25 ଜିସୁ ଉଡ଼୍‍ତଣ୍ଡ୍ ସାରେ ପାକାଙ୍କ୍‍ ନାରୁଡ଼୍‍ ଅନ୍‌‍ଗାରେ ୱାସ୍‍ମାତ୍‍ତଡ଼୍‍ । ଆଦିଙ୍କ୍‍ ଆ ପ୍ରେତାତ୍ମାତିଙ୍କ୍‍ ଗଟ୍‍ ଇତ୍‌ତଣ୍ଡ୍‌‍, “ତିର୍‍ୟେ ପାର୍‍ୱେ ନନ୍ ନୁ କେଞ୍ଜାଙ୍କ୍ ପାର୍‍ୱେ ଆତ୍ମା ନାନ୍‍ ନିକିଙ୍କ୍ କେତୁତାନ୍‍, ଇ ପେକାନ୍‍ ଲୋପେଙ୍କ୍‍ ପେୟ୍‍ସ୍‍ ଅନ୍‌‍ ମେଣ୍ଡେ ବେସୁଙ୍କ୍‍ ବା ଅନ୍‌‍ ଲୋପେ ନେଙ୍ଗ୍‍ମା ।”
MAR 9:26 ପ୍ରେତାତ୍ମା ଲେଙ୍ଗ୍‌ଦେ କିଡ଼୍‍କି ମିକା ପେକାଙ୍କ୍‍ ନେଲ୍‍ ରାପି ଅନ୍‌‍ଲୋପେଙ୍କ୍‍ ପେୟ୍‍ସ୍‍ ଆତ୍‍ତେ । ଚେତ୍‍ଇଲ୍‍ୱେ ମାଡ଼ି ପେକାଙ୍କ୍ ମଡ଼୍‍ଦେ ଲେକାମ୍‍ ତନ୍ଦ୍‍ତଣ୍ଡ୍‍ ନୁ ସାରେତଡ଼୍‍ କେତ୍‍ତଡ଼୍‍, “ଅନ୍‌‍ ଡଲ୍‍ତଣ୍ଡ୍‍ ।”
MAR 9:27 କିନ୍ତୁ ଜିସୁ ଅନ୍‌‍ କାଇ ପୟ୍‍ସ୍‍ ଅଂକିଙ୍କ୍‌ କେତ୍‍ତଣ୍ଡ୍‍ ନୁ ଅଣ୍ଡ୍‌‍ ତେଦି ନିତ୍‍ତଣ୍ଡ୍‍ ।
MAR 9:28 ଜିସୁ ଲନ୍‍ ଲୋପେ ଆତ୍‍ତେ ପେର୍କେ ଶିଷ୍ୟଡ଼୍ ଅଂକିଙ୍କ୍‌ ୱେର୍‍କଟ୍‌ ପାଚାରା ମାଡ଼୍‍ତଡ଼୍‍, “ମାମ୍‍ ବାତେଙ୍କ୍‍ ଆ ପ୍ରେତାତ୍ମାତିଙ୍କ୍‍ ତଲିଦ୍‍ ପାର୍‍ୱମ୍‍ ?”
MAR 9:29 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ଇଦ୍‍ଲେକାମ୍ ପ୍ରେତାତ୍ମାକିଙ୍କ୍‍ ମାତର୍ ପ୍ରାର୍ତନାତେ ଶକ୍ତି ତଡ଼୍ ତଲାଙ୍କ୍ ଆଦ୍‍ତେ-ୱେର୍‍ ଉପାୟ୍‍ ଇଲେ ।”
MAR 9:30 ଜିସୁ ନୁ ତାନ୍‍ ଶିଷ୍ୟଡ଼୍ ଆ ପଡ଼୍‍ୟ୍‍ ୱିଡ଼୍‍ସି ଗାଲିଲୀ ଅଞ୍ଚଲ ଲୋପେଇସ୍‍ ଆତ୍‍ତଡ଼୍‍ । ଅଣ୍ଡ୍‌‍ ବେଗ୍‍ମିନ୍ଦେଣ୍ଡ୍‍, ବେନଡ଼୍‍ ପୁନ୍‍ମାକିଡ଼୍‍ ଇଞ୍ଜ ଜିସୁ ଇଚ୍ଛା ମାଡ଼ ମାତ୍‍ତଣ୍ଡ୍‍,
MAR 9:31 କିନ୍ତୁ ଇଦ୍‍ ସମୟତେ ଜିସୁ ଶିଷ୍ୟଡ଼୍‍କିଙ୍କ୍‍ ବୁଜାମାଡ଼ି କେସ୍‍ମାତ୍‍ତଣ୍ଡ୍‍, ବେଦ୍‍ପୁଟୁଙ୍କ୍, “ମନୁଷ୍ୟପୁତ୍ର,” ନାରୁଡ଼୍‍ କାଇଦେ ଦର୍ସ୍କି ଅସ୍‍ ମାୟି ଆଦ୍‍ତଡ଼୍‍, କିନ୍ତୁ ବେଦ୍‍ପୁଟୁଙ୍କ୍ ଅଣ୍ତ୍‌ ଡଲାନ୍‍ ମୁଣ୍ଡ୍‍ଦିନାତେ ପେର୍କେ ଅଣ୍ଡ୍‌ ଜିୱେ ଆଦ୍‍ତଣ୍ଡ୍‍ ।
MAR 9:32 ଶିଷ୍ୟଡ଼୍ ଇ ଗଟ୍‍ତେ ଅର୍ତ ପୁନ୍ଦାଙ୍କ୍‍ ପାର୍‍ୱଡ଼୍‍ । କିନ୍ତୁ ଆ ବିଷୟ୍‍ତେ ଅଂକିଙ୍କ୍‌ ମେଣ୍ଡେ ପ୍ରଶ୍ନ ମାଡ଼ାଙ୍କ୍‍ ୱେର୍‍ତଡ଼୍‍ ।
MAR 9:33 ଅଡ଼୍‌‍ କପର୍ନାହୁମ୍‍ ତାଗ୍‍ ଏୱ୍‍ତଡ଼୍‍ ଲୋନ୍‌‍ ନେଙ୍ଗ୍‍ତେ ପେର୍କେ ଜିସୁ ଶିଷ୍ୟଡ଼୍‍କିଙ୍କ୍‍ ପାଚାରାମାଡ଼୍‍ତଣ୍ଡ୍, “ଆର୍‍ଦାଗ୍‍ ୱାଦାନ୍‍ୱେୟ୍‍ ମିଡ଼୍‍ ବେନ୍‍ ବିଷୟ୍‍ତେ ରାମ୍‍କ୍‍ ମାଡ଼ମାତ୍‍ତିଡ଼୍‍ ?”
MAR 9:34 ଅଡ଼୍‌‍ ଉତ୍ତର୍‍ ଇୱକଟ ମାତ୍‍ତଡ଼୍‍, ବାତେଙ୍କ୍‌ଇତ୍କେ ଅଡ଼୍‌‍ ଲୋପେଙ୍କ୍‍ ସାରେତିଙ୍କ୍ ବେନଣ୍ଡ୍ ବେଡ଼୍‍ୟଣ୍ଡ୍‍, ଇ ବିଷୟତେ ଅଡ଼୍‌‍ ଆର୍‍ଦାଗ୍‍ ଆଲ୍‍ସ ମାତ୍‍ତଡ଼୍‍ ।
MAR 9:35 ଜିସୁ କୁଦି ଅନ୍‌‍ ବାରଜାନ୍‍ ଶିଷ୍ୟଡ଼୍‍କିଙ୍କ୍‍ ଗାରେ କାର୍ଙ୍ଗି ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, “ବେନ ମୁନେ ଜାଗା ଇଚ୍ଛା ମାଡ଼ିତଣ୍ଡ୍‍, ଅଣ୍ଡ୍‌ ପେର୍କେ ମାନିଣ୍ଡ୍‍ ନୁ ସାରେତଡ଼୍‍ଦେ ସେବକ ଆଇନ୍‍ ।”
MAR 9:36 ତାନ୍‍ପେର୍କେ ଅଣ୍ଡ୍‌ ଅର୍‍ତୁଙ୍କ୍‍ ବାବୁଙ୍କ୍‍ ତାସ୍‍ ସାରେତଡ଼୍‍ ମୁନେ ନିଲ୍‍ସ୍ପ୍‍ତଣ୍ଡ୍‍, ମେଣ୍ଡେ ଅଂକିଙ୍କ୍‌ ବର୍‍ ମାଡ଼ି କେତ୍‍ତଣ୍ଡ୍,
MAR 9:37 “ବେନଆଇ ନା ପେଦେର୍‍ତେ ଇଦ୍‍ଲେକାମ୍‍ ଅର୍‌ତୁଙ୍କ୍‌ ବାବୁଙ୍କ୍‍ ସ୍ୱାଗତ୍‍ ମାଡ଼ିତଣ୍ଡ୍‍, ଅଣ୍ଡ୍‌ ନାକିଙ୍କ୍‍ ସ୍ୱାଗତ୍‍ ମାଡ଼ିତଣ୍ଡ୍‍ ନୁ ବେନ ନାକିଙ୍କ୍‍ ଗ୍ରହଣ ମାଡ଼ିତଣ୍ଡ୍, ଅଣ୍ଡ୍‌‍ ମାତର୍‍ ନାକିଙ୍କ୍‍ ଆୟ, ନା ତ୍ରାନକର୍ତ୍ତାଙ୍କ୍‍ ଆନ୍ତେ ଗ୍ରହଣ ମାଡ଼ିତଣ୍ଡ୍‍ ।”
MAR 9:38 ଯୋହନ୍‍ ଜିସୁଙ୍କ୍‍ କେତ୍‍ତଣ୍ଡ୍‍, “ଗୁରୁ ନି ପେଦେର୍‍ ଆସ୍‍ ୱେରଣ୍ଡ୍‍ ନାରୁଣ୍ଡ୍‍ ବୁତ୍‌ ୱୁଡ଼୍‍ସ୍ପାନାଦ୍‍ ମାମ୍‍ ଉଡ଼୍‍ତମ୍‍ ଅଣ୍ଡ୍‌‍ ମା ଦଲତଣ୍ଡ୍‍ ଆୟ୍‍ୱାଙ୍କ୍‍ ମାମ୍‍ ଅଂକିଙ୍କ୍‌ କାର୍‍ଙ୍ଗ୍ ତାଡ଼୍‍ମ ।”
MAR 9:39 ଜିସୁ କେତ୍‍ତଣ୍ଡ୍, “ଇ କାମ୍‍ଦାଗ୍‍ ଅଂକିଙ୍କ୍‌ ତିପାଲ୍ ଇମାଟ୍‍ ।” ବେନ ନା ପେଦେର୍‍ ଆସ୍‍ ଆଶର୍ଯ୍ୟ ପାଡ଼୍‌ୟି ମାଡ଼ିତଣ୍ଡ୍‍, ଅଣ୍ଡ୍‌‍ ସାଙ୍ଗେ ସାଙ୍ଗେ ନା ବିରୁଦ୍ଦ୍‌ତେ ବାତେ କେତ୍‍ ପାର୍‍ୱଣ୍ଡ୍ ।
MAR 9:40 ବେନ ମାନ୍‍ ବିରୁଦ୍ଦ୍‌ ଆୟଣ୍ଡ୍‍, ଅଣ୍ଡ୍‌‍ ମାନ୍‍ ପାକ୍‍ତଣ୍ଡ୍ ।
MAR 9:41 ନାନ୍‍ ନିଜାମ୍‌ କେତୁତାନ୍‍, ନା ପେର୍‌କ୍‌ତଣ୍ତ୍‌ ଇଞ୍ଜ ମିକିଂଙ୍କ୍‍ ବେନ ଯଦି ଉନ୍ଦାନ୍‍ ମାଇଦିଙ୍କ୍‍ ଗିଲାସ୍‍ତାଗ୍‍ ଏର୍‍ ଇଦ୍‍ତ, ଅଣ୍ଡ୍‌ ନିଜାମ୍‍ ଅଣ୍ଡ୍‌‍ ମସୀହ ନାଗାଙ୍କ୍‍ ପୁରସ୍କାର୍ ପାହେମ୍‍ ଆଦ୍‍ତଣ୍ଡ୍‍ ।
MAR 9:42 ବେନଆଇ ନା ଇ ବିଶ୍ୱାସିଡ଼୍ ଲୋପେଙ୍କ୍‍ ସାରେତାଗାଙ୍କ୍‍ ସୁଜୁର୍ ମିକା ବିଶ୍ୱାସ୍‍ ଇଲ୍‍ୱେନନ୍ ଗଟାମାଡ଼ିତଣ୍ଡ୍‍, ଅନ୍‌‍ ବଣ୍ଡ୍‍କ୍‍ତାଗ୍‍ ଅଣ୍ଡୟ୍‌‍ ଜାତେକାଲ୍‍ ତହ୍‍ସିସ୍‍ ଅଂକିଙ୍କ୍‌ ସମୁଦ୍ରତାଗ୍‌ ଏସିଦାଙ୍କ୍‍ ଅନ୍‌‍ ମାଇଦିଙ୍କ୍‍ ସାୟ୍‍ ଆଦ୍‍ତେ ।
MAR 9:43 ଯଦି ନି ଅଣ୍ଡୟ୍‌ କାଇଦେ ସେଙ୍ଗେ ବିଶ୍ୱାସ୍‍ ୱିଡ଼୍‍ସିତ୍‍କେ, ଆ କାଇଦିଙ୍କ୍‍ ନାଡ଼୍‍କି ହେସିମୁଟ୍ । ରେଣ୍ଡ୍ କାଇକ୍‍ ଗାଟି ନିଡ଼୍‍ସ ମାନ୍ଦାନ୍‍ ନର୍‍କତାଗେ ରାଲାନାଗାଙ୍କ୍‍ ଅଣ୍ଡୟ୍‌‍ କାଇ ଇଲକଟ ଅନନ୍ତ ଜିୱୁନ୍‍ତାଗ୍‍ ଆଦାନାଦ୍‌ ସାୟେ ।
MAR 9:44 ବାତେଙ୍କ୍ ଇତ୍କେ ଅଡ଼୍‌‍କିଂଙ୍କ୍ ନର୍କତାଗ୍ ପୁଡ଼ିୟ୍‍କ୍ ଡଲ୍‍ଅ, କିସ୍‍ ବେସୁଙ୍କ୍‍ ପିୟ ।
MAR 9:45 ଯଦି ମି ୱେରଟ୍‍ ଡେକେତ୍‍ ସେଙ୍ଗେ ବିଶ୍ୱାସ୍‍ ମାଡ଼ିମାନ୍ତ୍‍ତାଡ଼୍‍, ଆ ଡେକେତିଙ୍କ୍‍ ନାଡ଼୍‍କିମୁଟ୍‍ । ରେଣ୍ଡ୍‍ ଡେକାମାଞ୍ଜ୍‍ ନର୍‍କତାଗ୍‍ ରାଲାନ୍ ୱିଡ଼୍‌ସି ୱେରଡ଼୍‍ ଡେକ୍‍ ଇଲକଟ ଅନନ୍ତ ଜିୱୁନ୍‍ ଲାବ୍ ମାଡ଼ାନ୍‍ ନାଦ୍‍ ସାୟେ ।
MAR 9:46 ବାତେଙ୍କ୍ ଇତ୍କେ ଅଡ଼୍‌‍କିଂଙ୍କ୍ ନର୍କତାଗ୍ ପୁଡ଼ିୟ୍‍କ୍ ଡଲ୍‍ଅ, କିସ୍‍ ବେସୁଙ୍କ୍‍ ପିୟ ।
MAR 9:47 ଯଦି ମି ୱେର୍‌ଡ୍‍ କଣ୍ଡେତ୍‍ ସେଙ୍ଗେ ବିଶ୍ୱାସ୍ ମାଡ଼ିମାନ୍ତାଡ଼୍, ଆଦିଙ୍କ୍‍ ଏଲ୍‍ସ୍ପିମୁଟ୍‍ । ରେଣ୍ଡ୍ କଣ୍ଡା ମାଞ୍ଜ୍‍ ନର୍‍କତାଗ୍‍ ରାଲାନାଦ୍‌ ୱିଡ଼୍‌ସି ୱେରଡ଼୍‍ କଣ୍ଡା ମାଞ୍ଜ ଇଶ୍ୱର୍‌ତେ ରାଜ୍ୟତାଗ୍‍ ନେଙ୍ଗାଙ୍କ୍‍ ନାଦ୍‍ ସାୟେ ।
MAR 9:48 ମନେ ନେହ୍‍ମୁଟ୍‍, ନର୍‍କତ୍‍ ପୁଡ଼୍‍ୟି ବେସୁଙ୍କେ ବା ଡଲ, ଆଗେ ନିଡ଼୍‍ସ ମାନ୍ଦାନ୍‍ କିସ୍‍ ବେସୁଙ୍କ୍‍ ବା ପିୟ୍‍ୟ ।
MAR 9:49 “ଅୱଡ଼୍‍ ତଡ଼୍‍ ବେଦ୍‍ପୁଟୁଙ୍କ୍ ପୁଜାନାଦିନ୍‍ ତଡ଼୍‍ ସାୟେ ଆଦ୍‍ତେ, ଆଦେପୁଟୁଙ୍କ୍ କିସ୍‌ ତଡ଼୍‌ ସାରେତଡ଼୍‌ ପବିତ୍ର ଆଦ୍‌ତଡ଼୍‌ ।”
MAR 9:50 “ଅୱଡ଼୍‍ ଅଣ୍ଡ୍‌ ସାୟେତ୍‍ ଜିନିଷ୍; କିନ୍ତୁ ଅୱଡ଼୍‍ ଯଦି ତାନ୍‍ ଅୱଡ଼୍‍ତେ ମିଙ୍କ୍‍ସ୍ପାନାଦ୍‍ ହରାମାଡ଼ିତେ, ଆଦିଙ୍କ୍‍ ବେଦ୍‍ପୁଟୁଙ୍କ୍ ମିଙ୍କ୍‍ସ୍ପାଙ୍କ୍‍ ଆଦ୍‍ତେ ?” “ମି ହୃଦୟତାଗ୍‍ ସାଙ୍ଗନ୍‍ ଲୋପେ ଅୱଡ଼୍‌ଇନା କାଇଲି ମାନୁଟ୍, ଆଲାଇତ୍କେ ମିଡ଼୍‍ଆନ୍‌ତେ ମାନ୍ଦ୍‍ପାର୍‍ଦ୍‍ତିଡ଼୍‍ ।”
MAR 10:1 ତାନ୍‍ପେର୍କେ ଜିସୁ ଯର୍ଦ୍ଦନ ବେଡ଼େମ୍ ୱେୟ୍‍ସ୍‍ ଇହୁଦିୟା ନାର୍‍ତାଗ୍‍ ହେୱ୍‍ତଡ଼୍‍ । ଆଗେ ଆନ୍‌ତେ ନାରୁଡ଼୍‍ ନାର୍ଗେ ସଂକ୍ୟାତେ ୱାସ୍‍ ଅନ୍‌‍ ଗାରେ ଗୁଡ଼୍‍ତେ ନୁ ଅଣ୍ଡ୍‌‍ ମୁନେତ୍‍ ଲେକାମ୍‍ ଅଡ଼୍‌‍କିଂଙ୍କ୍‍ ଶିକ୍ଷା ଇଦାଙ୍କ୍‍ ପସ୍ପ୍‍ତଣ୍ଡ୍ ।
MAR 10:2 ବେସ୍‍କ୍‍ତଡ଼୍ ଫାରୂଶୀଡ଼୍‍ ଅନ୍‌‍ ଗାରେ ୱାସ୍‍ ଅଂକିଙ୍କ୍‌ ଉଡ଼୍‍ୟିଦାଗ୍‍ ରାପାଙ୍କ୍‍ ଚେଷ୍ଟା ମାଡ଼୍‍ତଡ଼୍‍ । ଅଡ଼୍‌‍ କେତ୍‍ତଡ଼୍‍, “ମା ଶାସ୍ତ୍ରତେ ନିୟମ୍‍ ଅନୁସାରେ ଅର୍‍ତୁଣ୍ଡ୍ ଅନ୍‌‍ ମୁତେଙ୍କ୍‍ କାଇଦେ ଏର୍‍ ଇଦ୍‍ପାର୍‍ଦ୍‍ତଣ୍ଡ୍‍ କି ?”
MAR 10:3 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ଇ ବିଷୟ୍‍ତେ ମୋଶାନ୍‌‌ ନିୟମ୍‍ ବାତେ କେତୁତେ ?”
MAR 10:4 ଅଡ଼୍‌‍ ଉତ୍ତର୍‍ ଇତ୍‍ତଡ଼୍‍, “କାଇଦେ ଏର୍‍ ଇସ୍‍ ମୁତେଙ୍କ୍‍ ୱିଡ଼୍‍ସାନ୍‍ ମାଇଦିଙ୍କ୍‍ ମୋଶାଲ୍‌‍ ଅନୁମତି ଇତ୍‌ତଣ୍ଡ୍‌‍ ।”
MAR 10:5 ଜିସୁ କେତ୍‍ତଣ୍ଡ୍‍, “ମି ହୃଦୟ୍‍ତେ ଡୁଟାଙ୍କ୍‍ତେ ମାଇଦିଙ୍କ୍‍ ମୋଶାଲ୍‍ ଇ ଲେକାମ୍‍ ନିୟମ୍‍ ମାଡ଼ିମାତ୍‍ତଣ୍ଡ୍‍ ।
MAR 10:6 ଇତ୍କେ ସୃଷ୍ଟି ସମୟତେ ଇଶ୍ୱର୍‍ ନାରୁଡ଼୍‍କ୍‍ ମାନେଇ ନୁ ନାଟାଡ଼୍ ଲେକାମ୍‍ ତିଆର୍‍ ମାଡ଼ିମାତ୍‍ତଣ୍ଡ୍ ନୁ ଶାସ୍ତ୍ରତାଗ୍‍ କେତ୍‍ତାଦ୍‍ ମିନ୍ଦେ ଯେ,
MAR 10:7 ଆଦିନ୍‌ ମାଇଦିଙ୍କ୍‍ ନାରୁଣ୍ଡ୍‍‍ ୟାୟ୍‍ ବାବାଲଡ଼୍‍କ୍‍ ୱିଡ଼୍‍ସି ତାନ୍‍ ମୁତେନ୍‍ ତ କାହିଲିତଣ୍ଡ୍‍ ନୁ
MAR 10:8 ଅଡ଼୍‌ ଇର୍‌ୱୁଡ଼୍‌ କାଇଲି ଅଣ୍ଡୟ୍‌‍ ଆଦ୍‍ତଡ଼୍‍ । ଅଡ଼୍‌‍ ମେଣ୍ଡେ ଇର୍‍ୱୁଡ଼୍ ଆସ୍‍ ମାନଡ଼୍‍, କିନ୍ତୁ ଅଣ୍ଡୟ୍‌‍ ଆଦ୍‍ତଡ଼୍‍ ।
MAR 10:9 ଇଶ୍ୱର୍‍ ବେନଡ଼କ୍ କାଲ୍‌ପି ମାଡ଼ିମିନ୍ଦେଣ୍ଡ୍‍, ନାରୁଡ଼୍‍ ଅଡ଼୍‌‍କିଂଙ୍କ୍‍ ୱେର୍‍ୱେର୍‍ ମାଡ଼୍‍ମାକିଡ଼୍‍ ।”
MAR 10:10 ଅଡ଼୍‌‍ ଲୋନ୍‌‍ ମାଲ୍‍ତେ ପେର୍କେ ଶିଷ୍ୟଡ଼୍ ଜିସୁଙ୍କ୍ ଇ ବିଷୟତେ ମେଣ୍ଡନ୍‍ଦାମ୍‍ ପାଚାରା ମାଡ଼୍‍ତଡ଼୍‍ ।
MAR 10:11 ଜିସୁ ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, “ବେନ୍‍ ନାରୁଣ୍ଡ୍‍ କି ମୁତେଙ୍କ୍‍ କାଇଦେ ଏର୍‍ ଇସ୍‍ ମେଣ୍ଡନ୍‍ ମୁତେଙ୍କ୍‍ ତାତ୍‍କେ, ଅଣ୍ଡ୍‌‍ ନିଜେ ବ୍ୟବିଚାରି ଆଦ୍‍ତଣ୍ଡ୍‍ ନୁ
MAR 10:12 ବେନ୍‍ ମୁତେ ମୁଦ୍‍ପାଙ୍କ୍‍ କାଇଦେ ଏର୍‍ ଇସ୍‍ ମେଣ୍ଡ୍‍ ଅର୍‌ତୁଙ୍କ୍‌ ପେଣ୍ଡୁଲ୍‍ ଆତ୍‍କେ, ଆଦ୍‍ଆନ୍‌ତେ ବ୍ୟବିଚାର୍‍ ଆଦ୍‌ତେ ।”
MAR 10:13 ଅଡ଼୍‌‍ ପର କାଇୱାଟି ଆର୍ଶିବାଦ୍‌ ମାଡ଼ାନ୍‍ ମାଇଦିଙ୍କ୍‍ ବେସ୍‌କ୍ ତଡ଼୍‍ ଶିଷ୍ୟଡ଼୍ କେତ୍‍ତଡ଼୍ ପିଲାକିଙ୍କ୍‍ ଜିସୁନ୍‍ ଗାରେ ତାଡ଼୍‍ମାଟ୍‍ ।
MAR 10:14 ଆ ନାରୁଡ଼୍‍କ୍‍ ଶିଷ୍ୟଡ଼୍ ତିରସ୍କାର୍ ମାଡ଼ମାନ୍ଦାନାଦ୍‍ ଉଡ଼ି, ଜିସୁ ଶିଷ୍ୟଡ଼୍ ପର୍‌ କପାମ୍‍ ଆସ୍‍ କେତ୍‍ତଣ୍ଡ୍‍, “ପିଲାକିଙ୍କ୍‍ ନା ଗାରେ ୱାଦାଙ୍କ୍ ଇମୁଟ୍; ଅଡ଼୍‌‍କ୍‍ ଦମକ୍‍ ଇମାଟ୍‍, ବାତେଙ୍କ୍‍ଇତ୍କେ ସୁଦୁପିଲାନ୍‍ ଲେକାମ୍‍ ନାରୁଡ଼୍‍ ସ୍ୱର୍ଗରାଜ୍ୟ ଅଦିକାର୍‌‍ ମାଡ଼ିତଡ଼୍‍ ।
MAR 10:15 ଇ ଗଟ୍‍ ନାନ୍‍ ମିକିଂଙ୍କ୍‌ ନିଜାମ୍‍ କେତୁତାନ୍‍ ଯେ, ସୁଦୁପିଲାନ୍‍ ଲେକାମ୍‍ ଅର୍‍ତୁଣ୍ଡ୍‍ ଇଶ୍ୱର୍‌ତେ ରାଜ୍ୟ ଗ୍ରହଣ ମାଡ଼ାଙ୍କ୍‍ ତିଆର୍‍ ଆୟକଟ ମାତ୍କେ, ଅଣ୍ଡ୍‌‍ ଆଦିନାଗ୍‍ ନେଙ୍ଗାନଙ୍କ୍‌ ପାର୍‍ୱଣ୍ଡ୍‍ ।”
MAR 10:16 ତାନ୍‍ପେର୍କେ ଜିସୁ ପିଲାଙ୍କ୍‍ ବର୍‍ତାଗ୍ ୱାଟି ଅଡ଼୍‌‍ ପର୍‌ କାଇୱାଟି ଆର୍ଶିବାଦ୍‌ ମାଡ଼୍‍ତଣ୍ଡ୍‍ ।
MAR 10:17 ଜିସୁ ମେଣ୍ଡନ୍‍ଦାମ୍‍ ଅନାଦ୍‌‍ ଆଦାନାଦ୍‍ ଆରାମ୍‌ ମାଡ଼୍‍ତେ ୱେଲେ ଅର୍‍ତୁଣ୍ଡ୍‍ ନାରୁଣ୍ଡ୍‍ ମିରିୱାସ୍‍ ଅନ୍‌‍ ମୁନେ ମର୍‍ମିଣ୍ଡା ଉୱୁସି ପାଚାରାମାଡ଼୍‍ତଣ୍ଡ୍‍, “ଗୁରୁ, ସାରେଦିନାତ୍‌ ଜିୱୁନ୍‍ ଲାବ୍‍ ମାଡ଼ାଙ୍କ୍‍ ନାକିଙ୍କ୍‍ ଲେକେତ୍‍ ବାତେ ମାଡ଼୍‍ୱେୟ୍‍ତିତ୍‍ ?”
MAR 10:18 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ନାକିଙ୍କ୍‍ ବାତେଙ୍କ୍‍ ସାୟ୍‍ ଇଞ୍ଜ କେତୁତିନ୍‍ ? ଇଶ୍ୱର୍‌ତିଙ୍କ୍ ୱିଡ଼୍‍ସି ୱେର୍‍ଅର୍‍ତୁଣ୍ଡ୍‍ ବେନ ଲେକେତ୍‍ ଇଲେଣ୍ଡ୍‍ ।
MAR 10:19 ନିମେ ଶାସ୍ତ୍ରତେ ଆଜ୍ଞା ସାରେ ପୁତ୍‍ତି ନାରୁଡ଼୍‍କ୍‍ ଆୱ୍‍କ୍‌ମା, ଆର୍‍ଲା ମାଡ଼୍‍ମାଟ୍‍, ଡଙ୍ଗ୍‍ ମା, ବେନନ୍ ବିରୁଦ୍‍ତେ ମିଚ୍‌ ଗଟି ତାଡ଼୍‍ମାଟ୍‍, ତିପାଲ୍‍ ମାଡ଼୍‍ମାଟ୍‍, ୟାୟ୍‍ବାବାଙ୍କ୍‍ ସାୟେ ଉଡ଼ାଟ୍ ।”
MAR 10:20 ନାରୁଣ୍ଡ୍‍ କେତ୍‍ତଣ୍ଡ୍‍, “ଗୁରୁ,” ନା ମୁନେକଞ୍ଜ୍‍ ଇ ସାରେ ଗଟି ମାନେମ୍‍ ଆସ ୱାସ୍‍ମିନ୍ଦେନ୍‍ ।
MAR 10:21 ଜିସୁ ଅନ୍‌‍ପାକେ ପ୍ରେମତେ ଉଡ଼ି କେତ୍‍ତଣ୍ଡ୍‍, “ଅଣ୍ଡୟ୍‌ ବିଷୟ୍‍ ମାତର୍ ନିୟାଦ୍‍ ଅବାବ୍‍ ମିନ୍ଦେ । ଆନ୍‌‍ ନିୟାଦ୍‍ ସାରେ ସମ୍ପତ୍ତି ୱାମ୍ମି ଆ ଦନ୍‍ତିଙ୍କ୍‍, ଗରିବିଡ଼୍‍କ୍‍ ଇମ୍‍, ଆଲାଇତ୍କେ ମିଡ଼୍‍ ସ୍ୱର୍ଗତେ ଦନ୍‍ ପାହେମ୍‍ ଆଦ୍‍ତିନ୍‍ । ତାନ୍‍ପେର୍କେ ୱାସ୍‍ ନା ପେର୍କେ ୱାଡ଼େ ।”
MAR 10:22 ଇ ଗଟ୍‍ କେଞ୍ଜୱାନାକେ ଆ ନାରୁନ୍‍ ମକମ୍‍ତାଗ୍‍ ମୁର୍‍ମୁର୍‍ ଆସ୍‍ ଆତ୍‍ତନ୍‍ ନୁ ଅଣ୍ଡ୍‌ ଦଃକମ୍‍ତେ ଆତ୍‍ତଣ୍ଡ୍‍, ବାତେଙ୍କ୍‌ ଇତ୍କେ ଅଣ୍ଡ୍‌ ବେଡ଼୍‍ୟ୍‍ ଦନି ମାତ୍‍ତଣ୍ଡ୍ ।
MAR 10:23 ଜିସୁ ଶିଷ୍ୟଡ଼ା ଉଡ଼ି କେତ୍‍ତଣ୍ଡ୍, “ଡାବ୍‌ କିନ୍‌ ସାଉକାରିଡ଼୍‌ ସର୍ଗରାଜ୍ୟତାଗ୍‍ ଆଦାଙ୍କ୍‍ ବେସର୍‍ ତିପପାଲ୍‍ ।”
MAR 10:24 ଇଦ୍‍ କେଞ୍ଜି ଶିଷ୍ୟଡ଼୍ ବିସ୍ମିତ ଆତ୍‍ତଡ଼୍‍ । କିନ୍ତୁ ଜିସୁ ମେଣ୍ଡେ କେତ୍‍ତଣ୍ଡ୍, “ଶିଷ୍ୟନଡ଼ି, ବାସ୍ତବିକ୍‍ ସର୍ଗରାଜ୍ୟତାଗ୍‍ ଆଦାଙ୍କ୍‍ ବେସର୍‍ ତିପ୍‍ପାଲ୍‍ ।
MAR 10:25 ଦନି ନାରୁଣ୍ଡ୍‍ ସର୍ଗରାଜ୍ୟତାଗ୍‍ ଆଦାନ୍‍ ୱିଡ଼୍‌ସି ଉଟ୍‍ ସୁଜ୍‍ତେ ବସ୍‌ଇଷ୍‌ ଆଦାଙ୍କ୍‍ ଗାଟି ସହଜ୍‍ ଆଦ୍‍ତେ ।”
MAR 10:26 ଇ ଗଟ୍‍ତେ ଶିଷ୍ୟଡ଼୍ ଗାଟି ବକୁୱା ଆସ୍‍ ନିଜ୍‍ ନିଜ୍‍ତିଙ୍କ୍‍ ପାଚାରା ମାଡ଼୍‍ତଡ଼୍‍, “ଆଲାଇତ୍କେ ବେନ ପରିତ୍ରାଣ ପହେମ୍‍ ଆଦ୍‍ତଣ୍ଡ୍‍ ?”
MAR 10:27 ଜିସୁ ଅଡ଼୍‌‍କିଂଙ୍କ୍‍ ସିଦା ଉଡ଼ି କେତ୍‍ତଣ୍ଡ୍, “ନାରୁନ୍‍ ପାକେ ଇଦ୍‍ ଆଦ୍‍ପାର୍‍ୱ; ଇଶ୍ୱର ସାରେ ମାଡ଼୍‍ ପାର୍‍ଦ୍‍ତଣ୍ଡ୍‍ ।”
MAR 10:28 ଇ ଗଟ୍‍ କେଞ୍ଜି ପିତର୍‍ କେତ୍‍ତଣ୍ଡ୍‍, “ଉଡ଼ା, ମାମ୍‍ ସାରେ ୱିଡ଼୍‍ସି ନି ପେର୍କେ ୱାତ୍‍ତମ୍‍ ।”
MAR 10:29 ଜିସୁ କେତ୍‍ତଣ୍ଡ୍‍, “ନାନ୍‍ ମିକିଂଙ୍କ୍‍ ସତ୍‍ କେସ୍‍ ନେହ୍‍ତୁତାନ୍‍, ନା ମାଇଦିଙ୍କ୍‍ ନୁ ‘ସୁସମାଚାର୍‍’ ମାଇଦିଙ୍କ୍ ବେନଆଇ ଲୋନ୍‌‍, ତାମୁଣ୍ଡ୍‌, ଏଲାଡ଼୍‍, ବାବାଲ୍‍, ୟାୟ, ପିଲା ବା ଅନାଦ୍‌‍ ୱାୟା ସାରେ ୱିଡ଼୍‍ସିତଣ୍ଡ୍‍, ଇ ଜିୱୁନ୍‍ତେ ଅଣ୍ଡ୍‌ ମେଣ୍ଡେ ନାର୍‍ଗେ ପାହେମ୍‍ ଆଦ୍‍ତଣ୍ଡ୍‍ ।
MAR 10:30 ଇସତ୍‍ ଲୋନ୍‌‍, ତାମୁଣ୍ଡ୍‌ ଏଲାଡ଼୍‍, ୟାୟ, ପିଲା, ୱାୟାନ୍‍ ଶହେ ଗୁଣ ପାହେମ୍‍ ଆଦାନ୍‍ ତଡ଼୍‍ ତିପାଲ୍‍ ଆନ୍‌ତେ ବଗେମ୍‍ଆଦ୍‍ତଣ୍ଡ୍‍; କିନ୍ତୁ ଅଣ୍ଡ୍‌‍ ଆକାଲାତେ ଅନନ୍ତ ଜିୱୁନ୍‍ ଲାବ୍‍ ମାଡ଼ିତଣ୍ଡ୍‍ ।
MAR 10:31 ବେନଡ଼୍‍ ଇଞ୍ଜେ ମୁନ୍‍ ମିନ୍ଦେଡ଼୍‍, ଅଡ଼୍‌‍ ଲୋପେଙ୍କ୍‍ ନାର୍ଗେ ପଡ଼େମ୍‍ ଆଦ୍‍ତଡ଼୍‍ ନୁ ବେନଡ଼୍‍ ଇଞ୍ଜ୍‍ ପେର୍କେ ମିନ୍ଦେଡ଼୍‍; ଅଡ଼୍‌‍ ଲୋପେଙ୍କ୍‍ ନାର୍ଗେ ମୁନ୍‍ ଆଦ୍‍ତଡ଼୍‍ ।”
MAR 10:32 ତାନ୍‍ପେର୍କେ ଜିସୁ ନୁ ତାନ୍‍ ଶିଷ୍ୟଡ଼୍ ଜିରୁଶାଲାମ୍‍ ଆର୍‍ଦାଲା ଆତ୍‍ତଡ଼୍‍ ଜିସୁ ଶିଷ୍ୟଡ଼୍ ମୁନ୍‍ମୁନ୍‍ ଆଞ୍ଜ ମାତ୍‍ତଣ୍ଡ୍‍, ଶିଷ୍ୟଡ଼୍ ୱେର୍‍ସ୍‍ ଆସ୍‍ ମାତ୍‍ତଡ଼୍‍ ନୁ ପେର୍କେ ତାକାନ୍‍ ୱେରେ ନାରୁଡ଼୍‍ ଆନ୍‌ତେ ୱେର୍‍ସ୍‍ ମାତ୍‍ତଡ଼୍‍ । ଜିସୁ ମେଣ୍ଡନ୍‍ ଦାମ୍ ତାନ୍‍ ବାରଜାନ୍‍ ଶିଷ୍ୟଡ଼୍‍କିଙ୍କ୍‍ ଅଣ୍ଡୟ୍‌‍ ଆଗେ କାର୍ଙ୍ଗି ବବିଷ୍ୟତ୍‍ତେ ଅଡ଼୍‌‍ ପ୍ରତି ବାତେ ସାୟ୍‍ ଗଟେମ୍‍ ଆଦ୍‍ତେ, ଆ ବିଷୟ୍‍ତେ ଅଣ୍ଡ୍‌‍ କେତ୍‍ତଣ୍ଡ୍‍ ।
MAR 10:33 “କେଞ୍ଜାଟ୍‍, ମାମ୍‍ ଜିରୁଶାଲାମ୍‍ତା ଆଦୁତମ୍ । ଆଗେ ମନୁଷ୍ୟପୁତ୍ର ବେଡ଼ିୟି ଦର୍ମପୁରହିତ ନୁ ଦର୍ମଗୁରୁଡ଼୍‍ କାଇଦେ ସମର୍ପିତ ଆଦ୍‍ତଣ୍ଡ୍‍ । ଅଡ଼୍‌‍ ଅଂକିଙ୍କ୍‌ ଡଲାନ୍‍ ଦଣ୍ଡ ଇସ୍‍ ଅଣଇହୁଦୀଡ଼୍‍ କାଇଦେ ୱିଡ଼୍‍ସିତ୍‍ତଡ଼୍ ।
MAR 10:34 ଅଡ଼୍‌‍ ଅଂକିଙ୍କ୍‌ ପରିହାସ୍‍ ମାଡ଼ିତଡ଼୍‍, ଅନ୍‌‍ପର୍ ଉସିତଡ଼୍‍, ଅଂକିଙ୍କ୍‌ କୋରଡାତେ ରେହ୍‍ତିତଡ଼୍‍ ନୁ ଆୱ୍‍କିତଡ଼୍‍, କିନ୍ତୁ ମୁଣ୍ଡ୍‍ଦିନା ପେର୍କେ ଅଣ୍ଡ୍‌‍ ଡଲ୍‍ତାଗାଙ୍କ୍ ତେଦିତଣ୍ଡ୍‍ ।”
MAR 10:35 ଅଣ୍ଡ୍‌‍ଦିନେ ଜେବତିନ୍‍ ଇର୍‍ୱୁଡ଼୍‍ ମାର୍କ୍ ଯାକୁବ ନୁ ଯୋହନ୍‌‌ ଜିସୁଙ୍କ୍‍ କେତ୍‍ତଡ଼୍‍, “ଗୁରୁ, ନିମେ ମା ମାଇଦିଙ୍କ୍‍ ବାତ୍‍ ମାଡ଼ା, ଇଦ୍‍ ମାମ୍‍ ଇଚ୍ଛା ମାଡ଼ୁତମ୍‍ ।”
MAR 10:36 ଜିସୁ ପଚ୍ରା ମାଡ଼୍‍ତଣ୍ଡ୍‍, “ବାତ୍‍ ଇଚ୍ଛା ମାଡ଼ୁତିଡ଼୍‍ ?”
MAR 10:37 ଅଡ଼୍‌‍ ଉତ୍ତର୍‍ ଇତ୍‍ତଡ଼୍‍, “ଗୌରବମୟ ରାଜ ସିଂହାସନତାଗ୍‍ ନିମେ ବେସୁଙ୍କ୍‍ କୁଦିତି, ମା ଲୋପେଙ୍କ୍‍ ଅର୍‌ତୁଙ୍କ୍‌ ନି ତିନ୍ଦେପାକେ ନୁ ମେଣ୍ଡ୍‍ଅର୍‌ତୁଙ୍କ୍‌ ଡେବ୍‍ବେ ପାକା କୁଦାଙ୍କ୍‍ ଇମ୍‍ ।”
MAR 10:38 ଜିସୁ ଅଡ଼୍‌‍କିଂଙ୍କ କେତ୍‍ତଣ୍ଡ୍‍, “‍ମିଡ଼୍‍ ବାତା ତାଲ୍‍କୁତିଡ଼୍‍, ପୁନ୍‍ୱିଡ଼୍‍ । ନାନ୍‍ ବେନ୍‍ ଦୁଃକ ବଗତେ ପାନପାତ୍ରତାଗାଙ୍କ୍‍ ଉନ୍ଦାଙ୍କ୍‍ ଆଞ୍ଜମିନ୍ଦେନ୍‍, ଆଗାକଞ୍ଚ୍‍ ମିଡ଼୍‍ ଉନ୍ଦ୍‍ପାର୍‍ଦ୍‍ତିଡ଼୍‍ ? ନାନ୍‍ ବେଲା ତିପାଲ୍‌ ଆଦାଙ୍କ୍‍ ଆଞ୍ଜମିନ୍ଦେନ୍, ଆ ଦିକ୍ଷା ମିଡ଼୍‍ ବାତ୍‍ ଅଦେ ପାର୍‍ଦ୍‍ତିଡ଼୍‍ ?”
MAR 10:39 ନାନେ ବେନ୍‍ ପାନପାତ୍ର ଉନ୍ଦାଙ୍କ୍‌ ଆସ ମିନ୍ଦେମ୍‌ ମିଡ଼୍‌ ବାତେ ଅଦ୍‍ ଉନ୍ଦାଙ୍କ୍‌ ପାର୍‌ତିଡ଼୍, ଅଡ଼୍‌‍ ପାର୍‌ତମ୍‌ ଇଞ୍ଜ କେତ୍‍ତଡ଼୍‍ ।
MAR 10:40 ଜିସୁ କେତ୍‍ତଣ୍ଡ୍, “ବାସ୍ତବିକ ମିଡ଼୍‍ ନା ପାନପାତ୍ରତାଗାଙ୍କ୍‍ ଉନ୍ଦ୍‍ତିଡ଼୍‍ ନୁ ନା ଲେକାମ୍‍ ତିପାଲ୍‌ ଆଦ୍‍ତିଡ଼୍‍, କିନ୍ତୁ ନା ତିନ୍ଦେପାକେ ବା ଡେବ୍‍ବେ ପାକା ବେନ କୁଦିତିତଡ଼୍‍, ଇଦ୍‍ ସ୍ଥିର୍‌ ମାଡ଼ାଙ୍କ୍‍ ନା ଅଦିକାର୍‌‍ ଇଲେ । ବେନଡ଼୍‍ ମାଇଦିଙ୍କ୍‍ ଇଶ୍ୱର ଆ ଜାଗା ତିଆର୍‍ ମାଡ଼ିମିନ୍ଦେଣ୍ଡ୍‍, ଆଦ୍‍ ଅଣ୍ଡ୍‌‍ ଅଡ଼୍‌‍କିଂଙ୍କ୍‍ ଇଦ୍‍ତଣ୍ଡ୍ ।”
MAR 10:41 ଇ ସାରେ ଗଟ୍‍ କେଞ୍ଜି ଦଶ୍‍ଜାନ୍‍ ଶିଷ୍ୟଡ଼୍ ଯାକୁବ୍ ନୁ ଯୋହନ୍‌‌ତେ ପର୍‌ କପାମ୍‍ ଆତ୍‍ତଡ଼୍‍ ।
MAR 10:42 ଜିସୁ ଅଡ଼୍‌‍କିଂଙ୍କ୍‍ ଅଣ୍ଡୟାଗେ କାର୍ଙ୍ଗି କେତ୍‍ତଣ୍ଡ୍‍, “ମିଡ଼୍ ପୁନୁଟ୍‍, ଇ ଜଗତ୍‍ତାଗ୍‍ ଶାସକିଡ଼୍‍ ନାରୁଡ଼୍‍ ଲୋପେ ମାପୃଇନା ମାଡ଼ିତଡ଼୍‍ ନୁ ନେତାଲଡ଼୍‍ ବିଜାତିଡ଼୍‍ ପର ଶାସନ୍‍ ମାଡ଼ିତଡ଼୍‍ ।
MAR 10:43 କିନ୍ତୁ ମିଡ଼୍‍ ଇ ନିତିତେ ଚାଲେମ୍‍ ଆୟ୍‍ୱିଡ଼୍‍ । ମି ଲୋପେଙ୍କ୍‍ ଅର୍‍ତୁଣ୍ଡ୍‍ ଯଦି ବେଡ଼୍‍ୟଣ୍ଡ୍‍ ଆଦାଙ୍କ୍‍ ଚାହେମ୍‍ ଆଦ୍‍ତଣ୍ଡ୍‍, ଅଣ୍ଡ୍‌‍ ୱେର୍‍ଅର୍‍ତୁଣ୍ଡ୍‍ ସେବକ ଆଇଣ୍ଡ୍‍
MAR 10:44 ମେଣ୍ଡେ ମି ଲୋପେଙ୍କ୍‍ ଯଦି ଅର୍‍ତୁଣ୍ଡ୍‍ ମୁନେତ୍‌ ଜାଗା ଅଦିକାର୍ ମାଡ଼ାଙ୍କ୍ ଇଚ୍ଛା ମାଡ଼୍‍କେ, ଅଣ୍ଡ୍‌‍ ଅଡ଼୍‌‍ ଦାସତ୍‍ ଲେକାମ୍‍ ଆଇଣ୍ଡ୍‍ ।
MAR 10:45 ନାରୁଡ଼୍‌ ପିଲେଆନ୍ତେ ସେବା ପାହେମ୍‍ ଆଦାଙ୍କ୍‍ ୱାଡ଼ଣ୍ଡ୍, କିନ୍ତୁ ସେବା ମାଡ଼ାଙ୍କ୍‍ ନୁ ସାରେତଡ଼୍‍ ମୁକ୍ତିତେ ମୁଲ୍ୟ ଲେକାମ୍‍ ନିଜର୍‍ ଜିୱୁନ୍‍ ଉସର୍ଗ ମାଡ଼ଙ୍କ୍‍ ୱାସ୍‍ମିନ୍ଦ୍‍ଦେଣ୍ଡ୍‍ ।”
MAR 10:46 ଜିସୁ ନୁ ତାନ୍‍ ଶିଷ୍ୟଡ଼୍ ଯିରୀୟତାଗ୍‍ ୱାତ୍‍ତଡ଼୍ । ଅଡ଼୍‌‍ ଆ ଟାଉନ୍‍ତିଙ୍କ୍‍ ୱିଡ଼୍‍ସି ଆଦାନ୍‍ ୱେଲେ ନାର୍ଗେ ନାରୁଡ଼୍‍ ଅନ୍‌‍ ପେର୍କେ ଆତ୍‍ତଡ଼୍‍ । ଟିମୟର୍‍ତେ ମାର୍‍ ବାର୍ଟିମୟ ପେଦେର୍‍ତେ ଅର୍‍ତୁଣ୍ଡ୍‍ କାନାଲ୍‌ ବିକାରି ଆର୍‍ଦାଗ୍‍ କୁଦିମାତ୍‍ତଣ୍ଡ୍‍ ।
MAR 10:47 ନାଜରିତିୟ ଜିସୁ ଆ ଆର୍‍ ଆଦୁତଣ୍ଡ୍‍ ଇଞ୍ଜ କେଞ୍ଜି ଅଣ୍ଡ୍‌‍ ଗାଟି ଲେଙ୍ଗ୍‌ ମାଡ଼ି କେତ୍‍ତଣ୍ଡ୍‍, “ହୋ ଦାଉଦ୍‍ତେ ମାର୍‍ ଜିସୁ ନାକିଙ୍କ୍‍ ଦୟା ମାଡ଼ା ।”
MAR 10:48 ନାରୁଡ଼୍‍ ଅଂକିଙ୍କ୍‌ ଦମକା ମାଡ଼ି କଟ ମାନ୍ଦାଙ୍କ୍‍ କେତ୍‍ତଡ଼୍‍, କିନ୍ତୁ ଅଣ୍ଡ୍‌ ମେଣ୍ଡେ ଗାଟିଲେଙ୍ଗ୍‍ କାର୍ଙ୍ଗ୍‍ତଣ୍ଡ୍; “ହୋ ଦାଉଦ୍‍ତେ ମାରିନ୍‍ ଜିସୁ, ନାକିଙ୍କ୍‍ ଦୟା ମାଡ଼ା ।”
MAR 10:49 ଜିସୁ ନିସ୍‌ ମିକା କେତ୍‍ତଣ୍ଡ୍‍, “ଅଂକିଙ୍କ୍‌ କାର୍ଙ୍ଗ୍‍ଗାଟ୍‍ ।” ନାରୁଡ଼୍‍ କାନାଙ୍କ୍‍ କାର୍ଙ୍ଗି କେତ୍‍ତଡ଼୍‍, “ଦାନ୍ଦ୍‍ ଆୟ୍‍ମା, ତେଦିୱାଡ଼ା, ଅଣ୍ଡ୍‌‍ ନିକିଙ୍କ୍‍ କାର୍ଙ୍ଗ ମିନ୍ଦେଣ୍ଡ୍‍ ।”
MAR 10:50 କାନାଲ୍‌ ତାନ୍‍ ଚାଦର୍‍ ହେସି ୱେଡ଼୍‌କେତେ ତୁଲ୍ଲି ଜିସୁନ୍‍ ଗାରେ ଏୱ୍‍ତଣ୍ଡ୍ ।
MAR 10:51 ଜିସୁ ଅଂକିଙ୍କ୍‌ ପାଚାରା ମାଡ଼୍‍ତଣ୍ଡ୍‍, “ନି ମାଇଦିଙ୍କ୍‍ ନାନେ ବାତେ ମାଡ଼ିତାନ୍‍ ଇଞ୍ଜ ଇଚ୍ଛା ମାଡ଼ୁତି ?” କାନାଲ୍‌ କେତ୍‍ତଣ୍ଡ୍, “ଗୁରୁ ! ନାନ୍‍ ଉଡ଼ାନ୍‍ ମାଇଦିଙ୍କ୍‍ ଇଚ୍ଛା ମାଡ଼ୁତାନ୍‍ ।”
MAR 10:52 ଜିସୁ ଅଂକିଙ୍କ୍‌ କେତ୍‍ତଣ୍ଡ୍‍, “ଅନ୍‌‍, ନି ବିଶ୍ୱାସ୍‍ ନିକିଙ୍କ୍‍ ସାୟ୍‍ ମାଡ଼୍‍ତେ ।” ସାଙ୍ଗେ ସାଙ୍ଗେ କାନାଲ୍‌ ତାନ୍‍ ଉଡ଼ାନ୍‍ ଶକ୍ତି ପାହେମ୍‍ ଆତ୍‍ତଣ୍ଡ୍ ନୁ ଅଣ୍ଡ୍‌‍ ଆନ୍ତେ ଜିସୁନ୍‍ ପେର୍କେ ପେର୍କେ ତାକ୍‍ତଣ୍ଡ୍‍ ।
MAR 11:1 ଅଡ଼୍‌‍ ଯିରୁଶାଲାମ୍‍ତେ ଗାରେ ଏୱ୍‍ସ୍‍ ବେତ୍‍ପାଗୀ ନୁ ବେତାନି ନାର୍‍ଦେ ପରୁତ୍‌ ପାକେ ମାନ୍ଦାନ୍‍ ଜିତମେଟେତ୍‍ ଗାରେ ଏୱ୍‍ତଡ଼୍‍ । ଜିସୁ ତାନ୍‍ ଇର୍‍ୱୁଡ଼୍‍ ଶିଷ୍ୟଡ଼୍‍କିଙ୍କ୍‍ ନିର୍ଦେଶ୍‍ ଇସ୍‍ ମୁନେଙ୍କ୍‍ ରୟ୍‍ସ୍‍ କେସ୍‍ମାତ୍‍ତଣ୍ଡ୍‍,
MAR 11:2 “ମୁନ୍‍ ମାନ୍ଦାନ୍‍ ନାର୍‍ କି ନାଗ୍‍ ଆନୁଟ୍‍, ଆଗେ ଏୱ୍‍କେ ବେନ ବେସୁଙ୍କ୍‍ ତାରକଟ ମାନ୍ଦାନ୍‍ ଅଣ୍ଡୟ୍‌‍ ଗଦ ପିଲ୍‍ତିଙ୍କ୍‍ ତହ୍‍ସ୍‍ ମାନ୍ଦାନାଦ୍‍ ଉଡ଼ିତିଡ଼୍, ତାଙ୍କ୍‍ ଲେୟ୍‍ସ୍‍ ନା ଗାରେ ପୟ୍‍ସ୍‍ ତାଡ଼ାଟ୍‍ ।
MAR 11:3 ‘ବାତେଙ୍କ୍‍ ଇଦ୍‍ ମାଡ଼ୁତିଡ଼୍‍’ ଇଞ୍ଜ ବେନ ଯଦି ପାଚାରା ମାଡ଼୍‍ କ; ଅଂକିଙ୍କ୍‌ କେତିତିଡ଼୍‍, ‘ଗୁରୁଙ୍କ୍‍ ଦର୍‍କାର୍‍ ମିନ୍ଦେ ନୁ ସିଟ୍‍ପାଟ୍‍ ଆଦିଙ୍କ୍‍ ମାଲ୍‍ପିଦ୍‍ତଡ଼୍‍ ।’”
MAR 11:4 ଅଡ଼୍‌‍ କେତ୍‍ତେ ନାର୍‍ ଆଞ୍ଜ୍‍ ଉଡ଼୍‌ତଡ଼୍‍ ଅଣ୍ଡୟ୍‌‍ ଗଦ ପିଲ୍‍ ନାର୍‍ଦେ ଦୁୱାଡ଼୍‍ତାଗ୍‍ ଅଣ୍ଡୟ୍‌‍ ଆର୍‍ଦାଗ୍‍ ତହ୍‍ସ୍‍ ମିନ୍ଦେଡ଼୍‍ ।
MAR 11:5 ଆଦିଙ୍କ୍‍ ଲେତାନ୍‍ୱେଲେ ଗାରେ ନିସ୍‍ ମାନ୍ଦାନ୍‍ ବେସ୍‌କ୍ ତଡ଼୍‍ କେତ୍‍ତଡ଼୍‍, “ବାତ୍‍ ମାଡ଼ୁତିଡ଼୍‍, ଗଦ ପିଲ୍‍ତିଙ୍କ୍‍ ଲେତୁତିଡ଼୍‍ ବାତେଙ୍କ୍‍ ?”
MAR 11:6 ଜିସୁ କେସ୍‍ମାନ୍ଦାନ୍‍ ଲେକାମ୍‌ ଶିଷ୍ୟଡ଼୍ ଉତ୍ତର୍ ଇତ୍‍ତଡ଼୍‍ ନୁ ନାର୍‍ଦେନଡ଼୍‍ ଅଡ଼୍‌‍କିଂଙ୍କ୍‍ ୱିଡ଼୍‍ସିତ୍‍ତଡ଼୍ ।
MAR 11:7 ଶିଷ୍ୟଡ଼୍ ଗଦ ପିଲ୍‍ତିଙ୍କ୍‍ ତାସ୍‍ ମେନ୍ଦୁଲ୍‍ତାଗ୍‍ ନିଜର୍‍ ସିଲେ ତାରିତ୍‍ତଡ଼୍‍ ନୁ ଜିସୁ ତାନ୍‍ ପର କୁଦ୍‍ତଣ୍ଡ୍‍ ।
MAR 11:8 ବେସ୍‍କ୍‍ତଡ଼୍ ଆର୍‍ଦେ ପର ଆନ୍ତେ ନିଜର୍‍ ସିଲେ ତାରିତ୍‍ତଡ଼୍‍ । ବାଗାତଡ଼୍‍ ମାଡ଼େତ୍‍ କମା ସାରେ ନାଡ଼୍‍କି ଆର୍‍ଦେ ପର ୱାଟ୍‍ତଡ଼୍‍ ।
MAR 11:9 ଜିସୁନ୍‍ ମୁନେ ନୁ ପେର୍କେ ଆଦାନ୍‍ ନାରୁଡ଼୍‍ ବେଡ଼୍‍ୟ୍‍ ଲେଙ୍ଗ୍‍ଦେ କେତାଙ୍କ୍‍ ପସ୍ପ୍‍ତଡ଼୍‍, ପ୍ରସଂଶା
MAR 11:10 “ପ୍ରବୁନ୍‍ ପେଦେର୍‍ତେ ବେନ ୱାଦୁତଣ୍ତ୍‌, ଅନାଦ୍‌‍ ପ୍ରସଂଶା ଆୟି । ମେଣ୍ଡେ ତିଆର୍‍ ଆଦାଙ୍କ୍‍ ଆଞ୍ଜମାନ୍ଦାନ୍‍ ମା ବାବାଲ୍‍ ଦାଉଦ୍‍ ରାଜାନ୍‍ ରାଜ୍ୟତିଙ୍କ୍‍ ଇଶ୍ୱର ଆର୍ଶିବାଦ୍‌ ମାଡ଼ିଣ୍ଡ୍‍ । ଇଶ୍ୱର୍‌ତେ ଗୌରବ୍ ଆୟି ।”
MAR 11:11 ଜିସୁ ଯିରୁଶାଲାତାଗ୍‍ ନେଙ୍ଗ୍‍ତଣ୍ଡ୍‍ ନୁ ମନ୍ଦିର୍‍ତାଗ୍‍ ଆଞ୍ଜ୍‍ ସାରେପାକା ଉଡ଼୍‍ତଣ୍ଡ୍‍ । କିନ୍ତୁ ଆସୁଟ୍‍ ମୂଲ୍‍ପୁଟ୍‍ ଆସ ମାନ୍ଦାନ୍‍ ମାଇଦିଙ୍କ୍‍ ବାରଜାନ୍‍ ଶିଷ୍ୟଡ଼୍ ତ ଜିସୁ ବେତାନି ନାର୍‍ଦା ଆତ୍‍ତଡ଼୍‍ ।
MAR 11:12 ତାନ୍‍ ମେଣ୍ଡନ୍‍ ଦିନେ ଅଡ଼୍‌‍ ବେତାନିତାଗାଙ୍କ୍‍ ମାଲ୍‍ଦାନ୍‍ ୱେଲେ ଜିସୁ କାର୍‍ୱିଙ୍କ୍ ଆତ୍‍ତଣ୍ଡ୍‍ ।
MAR 11:13 ଅଣ୍ଡୟ୍‌‍ ତୟ୍‍ ମାଡ଼୍‍ତାଗ୍‍ ନାର୍ଗେ ଆକି ମାନ୍ଦାନାଦ୍ ଅଣ୍ଡ୍‌ ଜୁୟ୍‍କଙ୍କ୍‍ ଉଡ଼୍‍ତଣ୍ଡ୍‍ । ଆଗେ କାୟା ମିନ୍ଦେ କି ଇଲ୍‌ଲେ, ଉଡ଼ାନ୍‍ ମାଇଦିଙ୍କ୍‍ ଜିସୁ ତାନ୍‍ ଗାର୍‍ରେ ଆତ୍‍ତଣ୍ଡ୍‍ । ଆଗେ ଆକିଙ୍କ୍‌ ୱିଡ଼୍‍ସି ବାତ୍‍ ମେଣ୍ଡେ ଉଡ଼ଣ୍ଡ୍‍, କାରନ୍‍ ଆସୁଟ୍‍ ତୟା ଆଦାନାଦ୍‍ ସମୟ୍‍ ଏୱକଟ ମାତ୍‍ତେ ।
MAR 11:14 ଜିସୁ ଆ ମାଡ଼୍‍ତିଙ୍କ୍‍ ଉଡ଼ି କେତ୍‍ତଣ୍ଡ୍‍, “ନିୟାଗାଙ୍କ୍‍ ବେନ ମେଣ୍ଡେ ବେସୁଙ୍କ୍‌ବା କାୟା ତିନ୍ଦାନଙ୍କ୍‍ ପାହେମ୍‍ ଆୟଡ଼୍‍ ।” ଶିଷ୍ୟଡ଼୍ ଇଦ୍‍ କେଞ୍ଜ୍‍ତଡ଼୍‍ ।
MAR 11:15 ଅଡ଼୍‌‍ ଯିରୁଶାଲେମ୍‍ତାଗ୍ ଏୱ୍‍ସ୍‍ ମନ୍ଦିର୍‍ତେ ଲୋପେ ଆତ୍‍ତଡ଼୍‍ ନୁ ଆଗେ ଆସାନ୍ ୱାମାନ୍ ମାଡ଼ାନ୍‍ ନାରୁଡ଼୍‍କିଙ୍କ୍‍ ଜିସୁ ବାୟ୍‍ଦେ ପେସ୍ପିତ୍‍ତଣ୍ଡ୍‍ । ମୁଦ୍ରା ବ୍ୟବସାୟି ମାଡ଼ମାନ୍ଦାନ୍‍ ନାରୁଡ଼୍‍ତେ ବେଞ୍ଚ୍‍ ନୁ ପାର୍‍ୱା ୱାମନ୍‍ନାରୁଡ଼ାଦ୍‍ ଟେଙ୍ଗା ସାରେ ମିଇସିତ୍‍ତଣ୍ଡ୍‍ ।
MAR 11:16 ମନ୍ଦିର୍‍ତେ ଦୁୱାଡ଼୍ ଇସ୍‍ ଜିନିଷପତ୍ର ଅଦା ତାତ୍‍ତା ମାଡ଼ାଙ୍କ୍‍ ବେନଙ୍କ୍ ବା ୱିଡ଼୍‍ସଣ୍ଡ୍‍ ।
MAR 11:17 ତାନ୍‍ ପେର୍କେ ଜିସୁ ନାରୁଡ଼୍‍କିଙ୍କ୍‍ ଶିକ୍ଷାଇସ୍ କେତ୍‍ତଣ୍ଡ୍‍, “ଦର୍ମଶାସ୍ତ୍ରତାଗ୍‍ ଲେକା ମିନ୍ଦେ, ‘ନା ମନ୍ଦିର୍‍ ସାରେ ଦେଶ୍‍ ନାରୁଡ଼୍‍ ମାଇଦିଙ୍କ୍‍ ପ୍ରାର୍ତନା ଲୋନ୍‌‍ ଇଞ୍ଜ ପେଦେର୍‍ ଆଦ୍‍ତେ,’ କିନ୍ତୁ ମିଡ଼୍‍ ଆଦିଙ୍କ୍‍ ଡ଼ଙ୍ଗାନ୍‍ ଲୋନ୍‌‍ ମାଡ଼୍‍ତିଡ଼୍‍ ।”
MAR 11:18 ବେଡ଼େଇ ଯାଜକ୍‌ ନୁ ଶାସ୍ତ୍ରୀଡ଼୍‍ ଇଦ୍‌ ଗଟନା ବିଷୟ୍‍ତେ କେଞ୍ଜି ଜିସୁଙ୍କ୍‍ ଆୱୁକାଙ୍କ୍‍ ଉପାୟ୍‍ ମେହେକାଙ୍କ୍‍ ପସ୍ପ୍‍ତଡ଼୍‍ । ଅଡ଼୍‌‍ ଜିସୁଙ୍କ୍‍ ୱେର୍‍ସ ମାତ୍‍ତଡ଼୍‍ । କାରନ୍‍ ନାରୁଡ଼୍ ଅନ୍‌‍ ଶିକ୍ଷାତେ ଆଶର୍ଯ୍ୟ ଆତ୍‍ତଡ଼୍‍ ।
MAR 11:19 ଆ ଦିନ୍‍ ମୂଲ୍‍ପୁଟ୍‍ ୱେଲେ ଜିସୁ ନୁ ତାନ୍‍ ଶିଷ୍ୟଡ଼୍ ଟାଉନ୍‍ତିଙ୍କ୍‍ ୱିଡ଼୍‍ସି ଆତ୍‍ତଡ଼୍‍ ।
MAR 11:20 ତାନ୍‍ମେଣ୍ଡ ଦିନ୍‍ ନାର୍‌କୁକେ ଅଡ଼୍‌‍ ଆର୍‍ଦାଲା ଆଦାନ୍‍ୱେଲେ ଉଡ଼୍‌ତଡ଼୍‍ ଆ ତୟା ମାଡ଼୍‍ ମଦଲ୍‍ କଞ୍ଚ୍‍ ୱାସିମିନ୍ଦେ ।
MAR 11:21 ମୁନେତ୍‍ ଦିନାତ୍‍ ଗଟ୍‍ ହେର୍କେ ମାଡ଼ି ପିତର୍‍ ଜିସୁଙ୍କ୍‍ କେତ୍‍ତଣ୍ଡ୍‍, “ଗୁରୁ ଉଡ଼େ ନି ତଡ଼୍‍ ଅବିଶାପ୍‍ ଆସ୍‍ମାନ୍ଦାନ୍‍ ତୟା ମାଡ଼୍‍ ଡଲିମିନ୍ଦେ ।”
MAR 11:22 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ଇଶ୍ୱର୍‍ ତିଙ୍କ୍‍ ବିଶ୍ୱାସ୍‍ ମାଡ଼ାଟ୍‍ ।
MAR 11:23 ନାନ୍‍ ନିଜାମ୍‍ ମିକିଂଙ୍କ୍‍ କେତୁତାନ୍‍, ଯଦି ବେନ ଇ ମେଟେତିଙ୍କ୍‍ ତେଦିଆଞ୍ଜ୍‍ ସନ୍ଦୁର୍‍ତାଗ୍‍ ରାଲାନ୍‍ ମାଇଦିଙ୍କ୍‍ କେତିତଣ୍ଡ୍ ନୁ ମନ୍‍ଦାଗ୍‍ ସନ୍ଦେହ ନେହ୍‍ୱକଟ, ଅଣ୍ଡ୍‌‍ ବାତେ କେତ୍‍ତଣ୍ଡ୍‍, ଆଦ୍‍ ଆଦ୍‍ତେ ଇଞ୍ଜ ବିଶ୍ୱାସ୍‍ ମାଡ଼ିତଣ୍ଡ୍‍, ଆଲାଇତ୍କେ ଆଦ୍‍ ନିଜାମ୍‍ ଗଟେମ୍‍ ଆଦ୍‍ତେ ।
MAR 11:24 ଅଦିନ୍‌ ମାଇଦିଙ୍କ୍‍ ନାନ୍‍ କେତୁତାନ୍‍ ପ୍ରାର୍ତନା ମାଡ଼ାନ୍‍ ୱେଲେ ବାତ୍‍ ତାଲ୍‍କୁତିଡ଼୍‍, ଆୱ୍‍ ଦର୍‍କ୍‍ତା ଇଞ୍ଜ ବିଶ୍ୱାସ୍‍ ମାଡ଼ାଟ୍‍, ଆଲାଇତ୍କେ ଆୱ୍‍ ମିଡ଼୍‍ ନିଜାମ୍‍ ପାହେମ୍‍ ଆଦ୍‍ତିଡ଼୍‍ ।
MAR 11:25 ପ୍ରାର୍ତନା ମାଡ଼ାନ୍‍ ମାଇଦିଙ୍କ୍‍ ନିତ୍‍ତେ ୱେଲେ, ଯଦି ବେନନ୍ ବିରୁଦ୍‍ତେ ମିୟାଦ୍‍ ବାତେ କେତାନାଦ୍‍ ମାନ୍ତ୍‍ତେ, ଆଦିଙ୍କ୍‍ କ୍ଷେମା ମାଡ଼ିମୁଟ୍‍ । ଆଲାଇତ୍କେ ମି ସ୍ୱର୍ଗତେ ବାବାଲ୍ ଇଶ୍ୱର୍ ମିୟାଦ୍‍ ସାରେ ଦଷ୍ କ୍ଷେମା ମାଡ଼ିତଣ୍ଡ୍‍ ।”
MAR 11:26 କିନ୍ତୁ ମିଡ଼୍‍ ଯଦି ୱେର୍‍ତଡ଼୍‍କିଙ୍କ୍ କ୍ଷେମା ମାଡ଼୍‍ୱିଡ଼୍‍, ମି ସ୍ୱର୍ଗତେ ବାବାଲ୍‍ ଆନ୍‌ତେ ମି ପାପ ଆନ୍ତେ କ୍ଷେମା ମାଡ଼ଣ୍ଡ୍‍ ।
MAR 11:27 ଅଡ଼୍‌‍ ମେଣ୍ଡନ୍‍ ଦାମ୍‍ ଯିରୁଶାଲେମ୍‍ତାଗ୍ ୱାତ୍‍ତଡ଼୍ । ଜିସୁ ମନ୍ଦିର୍‍ତେ ଲୋପେ ଉଡମାନ୍ଦାନ୍‍ ସମୟ୍‍ତେ ମୁକ୍ୟ ପୁରହିତ, ଦର୍ମଗୁରୁ ନୁ ଇହୁଦି ଦର୍ମନେତାଲଡ଼୍‍ ଅନ୍‌‍ ଗାରେ ୱାସ୍‍ ପାଚାରାମାଡ଼୍‍ତଡ଼୍‍,
MAR 11:28 “ଇ ସାରେ ପାଡ଼୍‌ୟି ମାଡ଼ାନ୍‍ ମାଇଦିଙ୍କ୍‍ ନିୟାଦ୍‍ ବାତେ ଅଦିକାର୍‌‍ ମିନ୍ଦେ ? ନିକିଙ୍କ୍‍ ଇ ଅଦିକାର୍‌‍ ବେନ ଇତ୍‌ତଣ୍ଡ୍‌‍ ?”
MAR 11:29 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ମିକିଂଙ୍କ୍‍ ଅଣ୍ଡୟ୍‌‍ ପ୍ରଶ୍ନ ପାଚାରାମାଡ଼ିତାନ୍‍ । ଯଦି ତାନ୍‍ ଉତ୍ତର୍‍ ଇଦ୍‍ପାର୍‍ଦ୍‍ତିଡ଼୍‍, ଇ ମାଡ଼ାନ୍‍ ମାଇଦିଙ୍କ୍‍ ନାୟାଦ୍‍ ବାତ୍‍ ଅଦିକାର୍‌‍ ମିନ୍ଦେ, ଆଦ୍‍ ମିକିଂଙ୍କ୍‍ କେତିତାନ୍‍ ।
MAR 11:30 ବାପ୍ତିସ୍ମ ଇଦାନ୍‍ ଯୋହନ୍‌‌ ବେନନାଗାଙ୍କ୍ ଅଦିକାର୍‌ ପାହେମ୍ ‍ଆସ୍‍ମାତ୍‍ତଣ୍ଡ୍‍, ଇଶ୍ୱର୍‍ତାଗାଙ୍କ୍‍ ନା ନାରୁଡ଼୍‍ ଡ଼ାଗାଙ୍କ୍‍ ?”
MAR 11:31 ଅଡ଼୍‌‍ ନିଜର୍‍ ନିଜର୍‍ ଲୋପେ ରାମ୍‍କ୍ ମାଡ଼ାଙ୍କ୍‍ ପସ୍ପ୍‍ତଡ଼୍‍, “ଇ ଗଟ୍‍ତେ ବାତ୍‍ ଉତ୍ତର୍‍ ଇଦ୍‍ତାଡ଼୍‍ ?” ଯଦି କେତିତାଡ଼୍‍, “ଇଶ୍ୱର୍‍ତାଗାଙ୍କ୍‍,” ଯୋହନ୍‌‍ତିଙ୍କ୍‍ ମାଡ଼୍ ବାତେଙ୍କ୍‍ ବିଶ୍ୱାସ୍‍ ମାଡ଼୍‍ୱାଡ଼୍‍ ଇଞ୍ଜ ଅଣ୍ଡ୍‌‍ ପାଚାରାମାଡ଼ିତଣ୍ଡ୍ ।
MAR 11:32 ଯଦି କେତିତାଡ଼୍‍, “ନାରୁଡ଼୍‍ଡ଼ାଗାଙ୍କ୍‍” ଅଡ଼୍‌‍ ନାରୁଡ଼୍‍କ୍‍ ୱେର୍‍ସ ମାତ୍‍ତଡ଼୍‍, କାରନ୍‍ ସାରେତଡ଼୍ ପୁଞ୍ଜ୍‍ ମାତ୍‍ତେ ଯେ, ଯୋହନ୍‌‌ ଇଶ୍ୱର୍‌ତେ ଅର୍‍ତୁଣ୍ଡ୍‍ ବାବବାଦୀ ମାତ୍‍ତଣ୍ଡ୍ ।
MAR 11:33 ଅଡ଼୍‌‍ ଜିସୁଙ୍କ୍‍ ଉତ୍ତର୍‍ ଇତ୍‍ତଡ଼୍‍, “ମାମ୍‍ ପୁନମ୍‍ ।” ଜିସୁ ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, “ବେନ୍‍ ଅଦିକାର୍‌‍ତେ ହିୱୁସାରେ ମାଡ଼ୁତାନ୍‍, ନାନ୍‍ ମିକା ମିକିଙ୍କ୍ କେଲନ୍‍ ।”
MAR 12:1 ତାନ୍‍ପେର୍କେ ଜିସୁ ୱେଷଡ଼୍‍ ଇସ୍‍ କେତ୍‍ତଣ୍ଡ୍‍, “ଅଣ୍ଡୟ୍‌‍ୟାଗ୍‍ ଅର୍‍ତୁଣ୍ଡ୍‍ ନାରୁଣ୍ଡ୍ ୱେରଡ୍‍ ଅଙ୍ଗୁର୍‌ୱାୟେ ଆରାମ୍‍ ମାଡ଼ି ତାନ୍‍ ତିଡ଼ିୟିପାକା ୱେଲୁମ୍‍ କୁର୍‍ଦୁତଣ୍ଡ୍‍ । ଅଙ୍ଗୁର୍‍କିନ୍‍ ମାଇଦିଙ୍କ୍‍ ଅଣ୍ଡୟ୍‌‍ ଗୁୟ୍‍ନ୍ଦେ ଡେୱ୍‍ତଡ଼୍ ନୁ କେପାନଡ଼୍‍ ମାଇଦିଙ୍କ୍ ଡଡ୍‍ ତହ୍‍ତଡ଼୍‍ । ତାନ୍‍ପେର୍କେ ଅଣ୍ଡ୍‌ କ୍ଷେତତିଙ୍କ୍‍ ବାଗ୍‍ ଚାଷିଡ଼୍‍ କାଇଦେ ୱିଡ଼୍‍ସିସ୍‍ ଦୁରାମ୍‍ ପଡ଼୍‍ୟ୍‍ତାଗ୍‍ ଆତ୍‍ତଣ୍ଡ୍‍ ।”
MAR 12:2 ଆସୁଟ୍‍ ଅଙ୍ଗୁର୍‌ ଆଦାୟ୍‍ ମାଡ଼ାନ୍‍ ସମୟ୍‍ ୱାତ୍‍ତେ, ନିଜର୍ ବାଗ୍‍ ଆଦାୟ୍‍ ମାଡ଼ାନ୍‍ ମାଇଦିଙ୍କ୍ ୱେରଣ୍ଡ୍‍ ଦାସ୍‍ତିଙ୍କ୍‍ ଅଡ଼୍‌‍ ଗାରେ ରହ୍‍ତଣ୍ଡ୍‍ ।
MAR 12:3 ଚାଷିଡ଼୍‍ ଆ ଦାସ୍‍ତିଙ୍କ୍‍ ପୟ୍‍ସ୍‍ ରେହ୍‍ସ୍‍ ଆସାମ୍‍ କାଇଦେ ରୟ୍‍ସିତ୍‍ତଡ଼୍‍ ।
MAR 12:4 ୱାୟେତ୍‍ ମାଲିକ୍‍ ମେଣ୍ଡ୍‍ଅର୍‍ତୁନ୍‍ ଦାସତିଙ୍କ୍‍ ରହ୍‍ତଣ୍ଡ୍‍ । ଚାଷିଡ଼୍‍ ଅଙ୍କ୍‌ ଆନ୍‌ତେ କାରାପ୍‍ ବ୍ୟବହାର୍‌ ମାଡ଼୍‍ତଡ଼୍‍ ନୁ ରେହ୍‍ସ୍ ଅନ୍‌‍ ତାଲ୍‍ତିଙ୍କ୍‍ ପାଃସିତ୍‍ତଡ଼୍‍ ।
MAR 12:5 ତାନ୍‍ପେର୍କେ ମାଲିକ୍‍ ବେନ୍‍ ଦାସଙ୍କ୍‍ ରହ୍‍ତଣ୍ଡ୍‍, ଅଂକିଙ୍କ୍‌ ଚାଷିଡ଼୍ ଡ଼ଲ୍‍ନା ରେହ୍‍ସିତ୍‍ତଡ଼୍‍ । ମାଲିକ୍‍ତେ ପାକେତ୍‍ ୱେର୍‍ବାଗାତଡ଼୍‍ ୱାତ୍‍ତଡ଼୍, ଚାଷିଡ଼୍‍ ଅଡ଼୍‌‍କ୍‍ ଆନ୍ତେ ଆଲେକେ ମାଡ଼୍‍ତଡ଼୍‍ । ବେସ୍‍କ୍‍ତଡ଼୍‍କିଙ୍କ୍ ରେହ୍‍ତଡ଼୍‍ ନୁ ୱେର୍‍ତଡ଼୍‍କିଙ୍କ୍‍ ଆୱ୍‍କ୍‌ତଡ଼୍ ।
MAR 12:6 ଇଞ୍ଜେ ମାଲିକ୍‍ତେ ଗାରେ ମାତର୍‍ ୱେରଣ୍ଡେ ମାତର୍‌ ବାକି ମିନ୍ଦେଣ୍ଡ୍ ତାନ୍ ପ୍ରିୟ ମାର୍‍ । ମାଲିକ୍‍ ଆଲ୍‍ସ୍‍ତଣ୍ଡ୍‍, “ଅଡ଼୍‌‍ ନା ମାରିଙ୍କ୍‍ ନିଜାମ୍‍ ମାନେମ୍‍ ଆଦ୍‍ତଡ଼୍‍ ।” ଇଲା ଆଲ୍‍ସି ମାଡ଼େଙ୍କ୍‌ତେ ଚାଷିଡ଼୍‍ ଗାରେ ନିଜର୍‍ ମାରିଙ୍କ୍ ରହ୍‍ତଣ୍ଡ୍‍ ।
MAR 12:7 କିନ୍ତୁ ଆ ଚାଷିଡ଼୍‍ ନିଜେନିଜ୍‍ତିଙ୍କ୍‍ କେତ୍‍ତଡ଼୍‍, “ଇଣ୍ଡ୍‍ ମାଲିକ୍‍ତେ ମାର୍‌ । ୱାଡ଼ାଟ୍‍ ଅଂକିଙ୍କ୍‌ ରେହ୍‍ସିନ୍‍ନା ଆଲାଇତ୍କେ ମାଲିକ୍‍ତେ ସମ୍ପତି ମାନ୍‍ କାଇଦେ ୱାଦ୍‍ତେ ।”
MAR 12:8 ଇଲା କେସ୍‍ ଅଡ଼୍‌‍ ମାଲିକ୍‍ତେ ମାରିଙ୍କ୍‍ ପୟ୍‍ସ୍‍ ଆୱ୍‍କ୍‌ତଡ଼୍‍ ନୁ ମଡ଼୍‍ତିଙ୍କ୍‍ ୱାୟେତ୍‍ ବାୟ୍‍ଦେ ଏସିତ୍‍ତଡ଼୍‍ ।
MAR 12:9 ଜିସୁ ପାଚାରାମାଡ଼୍‍ତଣ୍ଡ୍‍, “କେସୁଡ଼ାଟ୍‍, ତାନ୍‍ ପେର୍କେ ଆ ଅଙ୍ଗୁର୍‌ ୱାୟେତ୍‍ ମାଲିକ୍‍ ବାତ୍ ‍ମାଡ଼ିମାନ୍ତ୍‍ତଣ୍ଡ୍‍ ? ଅଣ୍ଡ୍‌ ୱାସ୍‍ ନିଜାମ୍‍ ଆ ଚାଷିଡ଼୍‍କ୍‍ ଡ଼ଲ୍‌ନା ରେହ୍‍ସିସ୍‍ ୱାୟେତିଙ୍କ୍ ୱେର୍ ‍ଚାଷିଡ଼୍‍କ୍‍ ଇସ୍‍ମାନ୍ତ୍‍ତଣ୍ଡ୍‍ ।”
MAR 12:10 ଶାସ୍ତ୍ରତାଗ୍‍ ଇ ଗଟ୍‍ ମିଡ଼୍‍ ନିଜାମ୍‍ କାର୍‍ତିଡ଼୍‍ । “ଲୋନ୍‌‍ ତିଆର୍‍ ମାଡ଼ାନଡ଼୍‍ ବେନ୍‍ କାଲ୍‍ଦିଙ୍କ୍ ଦର୍‍କାର୍‍ ଆୟ ଇଞ୍ଜ ଆଲ୍‍ସି ୱିଡ଼୍‍ସିସ୍‍ ମାତ୍‍ତଡ଼୍‍, ଆଦ୍‍ ଲୋତ୍‍ତେ ମୁକ୍ୟ ମୂଲ୍‍ତେ କାଲ୍‍ ଆତ୍‍ତେ ।
MAR 12:11 ନିଜେ ପ୍ରବୁ ଇଦ୍‍ କେତ୍‍ତଣ୍ଡ୍, ବେସର୍‍ ଚମତ୍କାର୍‍ ଇ ପାଡ଼୍‍ୟି !”
MAR 12:12 ଇହୁଦିଡ଼୍‍ ନେତାଙ୍କ୍‍ ଗିରପ୍‍ ମାଡ଼ାନ୍‍ ମାଇଦିଙ୍କ୍‍ ଚେଷ୍ଟା ମାଡ଼୍‍ତଡ଼୍‍, କାରନ୍‍ ଅଡ଼୍‌‍ ପୁତ୍‍ତଡ଼୍‍, ଅଡ଼୍‌‍କିଂଙ୍କ୍‍ ଉଡ଼ି ମିକା ଜିସୁ ଇ ୱେଷଡ଼୍‍ କେତୁତଣ୍ଡ୍ । କିନ୍ତୁ ନାରୁଡ଼୍‍ ୱେର୍‍ଙ୍ଗିଙ୍କ୍‍ ଅଡ଼୍‌‍ ଜିସୁଙ୍କ୍‍ ୱିଡ଼୍‍ସି ଆତ୍‍ତଡ଼୍‍ ।
MAR 12:13 ବେସ୍‍କ୍‍ତୁଡ଼୍‍ ପାରୁସିଡ଼୍‍ ନୁ ହେରୋଦ୍‍ତେ ମାନ୍ଦେତେ ବେସ୍‍କ୍‍ତୁଡ଼୍‍ ଜିସୁଙ୍କ୍‍ ପ୍ରଶ୍ନ ପାଚାରାମାଡ଼ି ଉଡ଼୍‍ୟିଦାଗ୍‍ ରାପାନ୍‍ ମାଇଦିଙ୍କ୍‍ ୱାସ୍‍ମାତ୍‍ତଡ଼୍‍ ।
MAR 12:14 ଅଡ଼୍‌‍ ଜିସୁଙ୍କ୍‍ ପାଚାରାମାଡ଼୍‍ତଡ଼୍‍, “ଗୁରୁ, ମାମ୍‍ ପୁତ୍‍ତମ୍‍ ନାରୁଡ଼୍‍କିଙ୍କ୍‍ ୱେର୍‍ୱକଟ ନିମେ ସତ୍‍ ଗଟି କେତିତିନ୍‍ । ବେନନ୍ ସିଗ୍‍ ମାର୍‍ଜାଦ୍ ସେଙ୍ଗ୍ ଉଡ଼କଟ ନିମେ ଇଶ୍ୱର୍‌ତେ ଇଚ୍ଛା ବିଷୟ୍‍ତେ ଶିକ୍ଷା ଇଦ୍‍ତିନ୍‍ । କେଲ୍‍ମ୍‍, ରୋମ୍‍ ସମ୍ରାଟ୍‍ତିଙ୍କ୍‍ ଶିସ୍ତୁ ଇଦାଙ୍କ୍‍ ମା ଦର୍ମ ନିୟମ୍‍ତେ ବିରୁଦ୍‍ କି ଆୟ ? ମାମ୍‍ ଶିସ୍ତୁ ଇଦ୍‍ତମ୍‍ କି ଇଲେ ?”
MAR 12:15 ଜିସୁ ଅଡ଼୍‌‍ ଚାଲାକ୍‌ତିଙ୍କ୍‌ ବୁଜେମ୍‍ ଆସ୍‍ କେତ୍‍ତଣ୍ଡ୍‍, “ନାକିଙ୍କ୍‍ ବାତେଙ୍କ୍‍ ଉଡ଼୍‍ୟିଦାଗ୍‍ ରାପାଙ୍କ୍‍ ଚେଷ୍ଟା ମାଡ଼ୁତିଡ଼୍‍ ? ୱେରଟ୍‍ ରୁପାମୁଦ୍ରା ତାଡ଼ାଟ୍‍, ନାନ୍‍ ଉଡ଼ିତାନ୍ ।”
MAR 12:16 ଅଡ଼୍‌‍ ଡାବ୍‌ ତାତ୍‍ତାଙ୍କ୍‍ ଜିସୁ ପାଚାରାମାଡ଼୍‍ତଣ୍ଡ୍, “ଇଦିନ୍‍ ପର ବେନନ୍ ମୁର୍ତ୍ତି ନୁ ପେଦେର୍‍ ମିନ୍ଦେ ?” “ସମ୍ରାଟ୍‍ତାଦ୍‍” ଇଞ୍ଜ ଅଡ଼୍‌‍ ଉତ୍ତର୍‍ ଇତ୍‍ତଡ଼୍‍ ।
MAR 12:17 ଜିସୁ କେତ୍‍ତଣ୍ଡ୍‍, “ଆଲାଇତ୍କେ, ବେନ୍‍ ସମ୍ରାଟ୍‍ତଦ୍‍, ଆଦ୍‍ ସମ୍ରାଟ୍‍ତିଙ୍କ୍‍ ଇମୁଟ୍‍; ବେନ୍‍ ଇଶ୍ୱର୍‌ତାଦ୍‍, ଆଦ୍‍ ଇଶ୍ୱର୍‌ତିଙ୍କ୍‍ ଇମୁଟ୍‍ ।” ଜିସୁନ୍‍ ଇ ଗଟ୍‍ ଅଡ଼୍‌‍ କେଞ୍ଜି ବାକ୍‌ୱା ଆତ୍‍ତଡ଼୍‍ ।
MAR 12:18 ଡଲ୍‍ତେ ନାରୁଡ଼୍‍ତେ ପୁନରୁତ୍‍ତାନ୍‍ ବିଶ୍ୱାସ୍‍ ମାଡ଼୍‍ୱେ ସାଦୁକିଡ଼୍‍ ମାନ୍ଦେ ବେସ୍‍କ୍‍ତୁଡ଼୍‍ ୱାସ୍‍ ଜିସୁଙ୍କ୍‍ ପାଚାରା ମାଡ଼୍‍ତଡ଼୍‍,
MAR 12:19 “ଆ ଗୁରୁ, ମୋଶାଲ୍‌‍ ମା ମାଇଦିଙ୍କ୍‍ ଇ ବ୍ୟବସ୍ଥା ଲେକ୍‍ତଣ୍ଡ୍‍, ୱେରଣ୍ଡ୍‍ ପିଲାଜିଲା ଇଲକଟ ଆସ୍‍ ଡଲ୍‍କେ ଆ ନାରୁନ୍‍ତେ ରାଣ୍ଡିମୁତେଙ୍କ୍‍ ତାନ୍‍ ତାମୁଣ୍ଡ୍‌ ପେଣ୍ଡୁଲ୍‍ ଆଦ୍‍ ୱେୟ୍‍ତିତ୍‍ ନୁ ଅଡ଼ାୱ୍‍ ବେନ୍‍ ପିଲା ଜନମ୍‌ ଆଦ୍‍ତା, ଆୱ୍‍ ଡଲ୍‍ତେ ନାରୁନ୍‍ତେ ପିଲା ଇଞ୍ଜ ପେଦେର୍‍ ଆଦ୍‍ତେ ।
MAR 12:20 ଆଲେକେ ସାତ୍‍ ଜାନ୍‍ ତାମୁସ୍‍କ୍‍ ମାତ୍‍ତଡ଼୍‍ । ବେଡ଼୍‍ୟ୍‍ ଦାଦାଲ୍‍ ପେଣ୍ଡୁଲ୍‍ ଆସ୍‍ ପିଲାଜିଲା ଆୟକଟ ଡଲ୍‍ତଣ୍ଡ୍‍ ।
MAR 12:21 ଡଲିମାନ୍ଦାନନ୍‍ ରାଣ୍ଡି ନାଟାଡ଼୍‍ତିଙ୍କ୍‍ ଦ୍ୱିତିୟ ତାମୁଣ୍ଡ୍ ପେଣ୍ଡୁଲ୍‍ ଆସ୍‍ ଅଣ୍ଡ୍‌‍ ଆନ୍ତେ ପିଲାଜିଲା ଆୟକଟ ଡଲ୍‍ତଣ୍ଡ୍‍ । ତୃତିୟ ତାମୁଣ୍ଡ୍‍ବା ଆଲେ ଆତ୍‍ତଣ୍ଡ୍‍,
MAR 12:22 ମେଣ୍ଡେ ୱେର୍‍ବାଗାତ୍‍ ସାତ୍‍ ଜାନ୍‍ ତାମୁସ୍‍କିଡ଼୍‍ ଆ ୱେରଡ୍‍ ନାଟାଡ଼୍‍ ପେଣ୍ଡୁଲ୍‍ ଆସ୍‍ ସାରେତଡ଼୍‍ ପିଲାଜିଲା ଆୟକଟ ଡଲ୍‍ତଡ଼୍‍ । ମାଡ଼େଙ୍ଗ୍‍ ନାଟାଡ଼୍‍ ଆନ୍‌ତେ ଡଲ୍‍ତେ ।
MAR 12:23 ଇଞ୍ଜେ କେଲ୍‍ମୁଟ୍‍, ପୁନରୁତ୍‍ତାନ୍‍ ଦିନ୍‍ତେ, ବେସୁଙ୍କ୍‍ ଡଲ୍‍ତେନଡ଼୍‍ ପୁନର୍ଜିବିତ୍‍ ଆସ୍‍ ତେଦିତଡ଼୍‍, ଆ ନାଟାଡ଼୍‍ ବେନନ୍ ମୁତେ ଆଦ୍‍ତେ ? ସାତ୍‍ଜାନ୍‍ ଯାକ ତ ତାଙ୍କିକ୍‍ ପେଣ୍ଡୁଲ୍‍ ଆସ୍‍ ମାତ୍‍ତଡ଼୍‍ ।”
MAR 12:24 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ମିକିଙ୍କ୍‌ ବେସର୍‍ ବୁସା ଚିନ୍ତେ ମିନ୍ଦେ । ଦର୍ମଶାସ୍ତ୍ର ନୁ ଇଶ୍ୱର୍‌ତେ ଶକ୍ତି ବିଷୟ୍‍ତେ ମିଡ଼୍‍ ବାତେ ପୁନ୍‍ୱିଡ଼୍‍ ।
MAR 12:25 କାରନ୍‍ ଡଲ୍‍ତେନାରୁଡ଼୍‍ ପୁନରୁତ୍‍ତିତ୍ ଆତ୍‍ତଡ଼୍‍, ଅଡ଼୍‌‍ ସ୍ୱର୍ଗତେ ଦୂତକିନ୍‍ ଲେକାମ୍‍ ଆଦ୍‍ତଡ଼୍‍ ଅଡ଼୍‌‍ ପେଣ୍ଡୁଲ୍‍ ଆୟ୍‍ୟଡ଼୍‍ କି ପେଣ୍ଡୁଲ୍‍ ଇୱଡ଼୍‍ ।”
MAR 12:26 ଡଲ୍‍ତେନାରୁଡ଼୍‍ ପୁନରୁତ୍‍ତାନ୍‍ ଗଟ୍‍ ପାଚାର୍‌ମାଡ଼ୁତିଡ଼୍‌ ? ମୋଶାନ୍‌‌ ବଇତାଗ୍‍ ନିଡ଼୍‍ତାନ୍‍ ପଦ୍‍ଲେ ବିଷୟ୍‍ତେ କାର୍‍ୱିଡ଼୍‍ କି ? ଆଗେ ଲେକା ମିନ୍ଦେ, ଇଶ୍ୱର୍‍ ମୋଶାଙ୍କ୍‍ କେତ୍‍ତଣ୍ଡ୍‍, “ନାନ୍‍ ଅବ୍ରାହାମ୍‌ତେ ଇଶ୍ୱର୍, ଇସାହାକତେ ଇଶ୍ୱର୍‍ ନୁ ଯାକୁବ୍‍ତେ ଇଶ୍ୱର୍ !
MAR 12:27 ଅଣ୍ଡ୍‌‍ ଡଲ୍‍ତ୍‍ନାରୁଡ଼୍‍ତେ ଇଶ୍ୱର୍‍ ଆୟଣ୍ଡ୍, ଅଣ୍ଡ୍‌‍ ଜିୱୁମାନ୍ଦାନଡ଼୍‍ ଇଶ୍ୱର । ମିଡ଼୍‍ ପୁରାପୁରି ବୁଲ୍‍ ।”
MAR 12:28 ଅର୍‍ତୁଣ୍ଡ୍‍ ଦର୍ମଗୁରୁ ଆଗେ ମାଞ୍ଜ୍‍ ଇ ସାରେ ରାମ୍‍କ୍ ଲେକାମ୍ ଆଦାନାଦ୍ କେଞ୍ଜମାତ୍‍ତଣ୍ଡ୍‍ । ସାଦୁକିଡ଼୍‍କ୍‍ ଜିସୁ ଟିକ୍‍ ଜବାବ୍‍ ଇତ୍‌ତଣ୍ଡ୍‌ ଇଞ୍ଜ ପୁଞ୍ଜ୍‍ ଅଣ୍ଡ୍‌ ଜିସୁଙ୍କ୍‍ ମେଣ୍ଡ୍‍ ଅଣ୍ଡୟ୍‌‍ ପ୍ରଶ୍ନ ପାଚାର୍‌ମାଡ଼୍‍ତଣ୍ଡ୍‍, “ମା ଦର୍ମଶାସ୍ତ୍ରତାଗ୍‍ ବେନ୍‍ ଆଜ୍ଞା ସାରେକେ ବେଡ଼୍‍ୟାଦ୍‍ ?”
MAR 12:29 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, “ଇଶ୍ରାଏଲିୟ ନାରୁଡ଼୍‍ କେଞ୍ଜାଟ୍‍ ସାରେକେ ବେଡ଼୍‍ୟାଦ୍‍ ଆଜ୍ଞା ଆଦୁତେ, ‘ମାନ୍‍ ପ୍ରବୁ ଇଶ୍ୱର ୱେରଣ୍ଡେ ପ୍ରବୁ ।
MAR 12:30 ପ୍ରବୁ ଇଶ୍ୱର୍‌ତିଙ୍କ୍‍ ପୁରା ହୃଦୟ୍‍, ପୁରା ଆତ୍ମା, ପୁରା ମନ୍‍, ଶକ୍ତି ସାମର୍ତ୍ୟ ଇସ୍‍ ପ୍ରେମ ମାଡ଼ାଟ୍‌ ବା ବକ୍ତି ମାଡ଼ାଟ୍‍ ।’
MAR 12:31 ଦ୍ୱିତିୟ ବେଡ଼୍‍ୟାଦ୍‍ ଆଜ୍ଞା ଆଦୁତେ, ‘ମି ଗାରେତଡ଼୍‍କ୍‍ ଆତ୍ମାତେଲେକାମ୍‍ ପ୍ରେମ ମାଡ଼ାଟ୍ ।’ ଇ ରେଣ୍ଡିନ୍‍ ୱିଡ଼୍‌ସି ବେଡ଼୍‍ୟ୍‍ ଆଜ୍ଞା ମେଣ୍ଡ୍‍ ଇଲେ ।”
MAR 12:32 ଦର୍ମଗୁରୁ କେତ୍‍ତଣ୍ଡ୍‍, “ଗୁରୁ, ନିମେ ସତ୍‍ କେତ୍‍ତିନ୍‍ ! ବାସ୍ତବିକ୍‍ ନିମ୍‍ କେତାନ୍‍ ଲେକାମ୍‌, ମାତର୍‍ ମାନ୍‍ ପ୍ରବୁ ଆଦୁତଣ୍ଡ୍‍ ୱେରଣ୍ଡେ ଇଶ୍ୱର ଅଙ୍କ୍‌ ୱିଡ଼୍‌ସି ୱେର୍‍ ଇଶ୍ୱର୍‍ ଇଲେ ।
MAR 12:33 ନାରୁଡ଼୍‍ ତାନ୍‍ ପୁରାହୃଦୟ୍, ପୁରାମନ୍, ପୁରାଶକ୍ତି ଇସ୍‍ ଅଂକିଙ୍କ୍‌ ପ୍ରେମ ନୁ ବକ୍ତି ମାଡ଼ାନ୍‍ ସାଙ୍ଗେ ସାଙ୍ଗେ ତାନ୍‍ ପଡ଼ଶିଡ଼୍‍କ୍‍ ଆତ୍ମାତେ ଲେକାମ୍‍ ପ୍ରେମ ମାଡ଼ାଟ୍ । ଇଶ୍ୱର୍‌ତେ ଲେକେତ୍‍ ପଶୁ ନୁ ୱେର୍‍ ବଲି ଉସର୍ଗ ମାଡ଼ାନ୍‍ ୱିଡ଼୍‌ସି, ଇ ରେଣ୍ଡ୍‍ ଆଜ୍ଞା ପାଲନ୍‌ ମାଡ଼ାଙ୍କ୍‍ ପେର୍କେ ଦର୍‍କାର୍‍ ।”
MAR 12:34 ତାମ୍‍ ଜ୍ଞାନବାନ୍ ଉତ୍ତର୍‍ କେଞ୍ଜି ଜିସୁ କେତ୍‍ତଣ୍ଡ୍‍, “ମିଡ଼୍‍ ଇଶ୍ୱର୍‌ତେ ରାଜ୍ୟତାଗାଙ୍କ୍‍ ନାର୍ଗେଦୁରାମ୍‍ ଇଲେଡ଼ି ।” ତାନ୍‍ ପେର୍କେ ଜିସୁଙ୍କ୍‍ ମେଣ୍ଡେ ପ୍ରଶ୍ନ ପାଚାରାମାଡ଼ାଙ୍କ୍‍ ବେନବା ସାହାସ୍‍ ମାଡ଼ଡ଼୍‍ ।
MAR 12:35 ଦାଉଦ୍‍ତେ ମନ୍ଦିର୍‍ତାଗ୍‍ ଅଣ୍ଡ୍‌‍ଦିନେ ଶିକ୍ଷା ଇଦାନ୍‍ୱେଲେ କ୍ରିଷ୍ଟ ୱେରଡ୍‍ ପ୍ରଶ୍ନ ପାଚାର୍‌ମାଡ଼୍‍ତଣ୍ଡ୍, ଦର୍ମଗୁରୁଡ଼୍‍ ବାତେଙ୍କ୍‍ କେତୁତଡ଼୍‍, ମସିହ ଦାଉଦ୍‍ତେ ମାର୍‍ ଇଞ୍ଜ ?
MAR 12:36 ପବିତ୍ର ଆତ୍ମାତାଗାଙ୍କ୍‍ ପ୍ରେରଣା ପାହେମ୍‍ଆସ୍‍ ଦାଉଦ୍‍ କେତ୍‍ତଣ୍ଡ୍‍, “ପ୍ରବୁ ନା ପ୍ରବୁଙ୍କ୍ କେତ୍‍ତଣ୍ଡ୍‍,” ମାମ୍‍ ମି ସାରେ ଶତ୍ରୁଡ଼୍‍କିଙ୍କ୍‍ ମି ଡେକେତ୍‍ ମଦଲ୍‍ ମାଡ଼୍‍ନା ଯାକ, ନିମେ ମା ତିନ୍ଦେ ପାକେ କୁଦିମାନ୍‍ ।
MAR 12:37 ଇଗାଙ୍କ୍‍ ପୁନ୍ଦାଙ୍କ୍‍ ଆଦୁତ୍‍ତେ ଯେ, ମସିହଙ୍କ୍ ଦାଉଦ୍‍ ପ୍ରବୁ ଇଞ୍ଜ ଲେକା ଆତ୍‍ତେ । ଆଲାଇତ୍କେ ମସିହ ଦାଉଦ୍‍ତେ ମାର୍‍ ଆଦ୍‍ତଣ୍ଡ୍‍ ବେଲା ? ଅନ୍‌‍ଦାମ୍‍ ୱେରଡ୍‍ ବେଡ଼ିୟା ମାନ୍ଦେ ନାରୁଡ଼୍‍ ଜିସୁନ୍‍ ଗଟ୍‍ ଇଚ୍ଛାତେ କେଞ୍ଜମାତ୍‍ତଡ଼୍‍ ।
MAR 12:38 ଅଡ଼୍‌‍କିଂଙ୍କ୍‍ ଶିକ୍ଷା ଇଦାନ୍‍ୱେଲେ ଜିସୁ କେତ୍‍ତଣ୍ଡ୍‍, “ଲାଟି ଚକା କେର୍‍ସ୍‍ ଆଟ୍‍ ବଜାର୍‍ତା ନାରୁଡ଼୍‍ଡ଼ାଗାଙ୍କ୍‍ ସମ୍ମାନ ପାହେମ୍‍ ଆଦ୍‌ ଦର୍ମଗୁରୁଡ଼୍‍ ସେଙ୍ଗେ ସତର୍କ ମାନୁଟ୍‍ ।
MAR 12:39 ଉପାସନା ଲୋନ୍‌‍ ନୁ ବଜିକିନାଗ୍‍ ଜାଗା ଅଦିକାର୍‌‍ ମାଡ଼ମାନ୍ଦାନ୍‍ !
MAR 12:40 ଅଡ଼୍‌‍ ରାଣ୍ଡିମୁତେକିନ୍‍ ଇଲ୍‍ୱେ ସୁଯଗ୍‍ ଅସ୍‍ ଆୱିନ୍‍ ସମ୍ପତି ଅଦ୍‍ତଡ଼୍‍ । କିନ୍ତୁ ଚାଲାକ୍‍ ମାଡ଼ି ଲେକେତ୍‍ ପ୍ରାର୍ତନା ମାଡ଼ିତଡ଼୍‍ । ଆଦିନ୍‌ ମାଇଦିଙ୍କ୍‍ ଅଡ଼୍‌‍ ନାର୍ଗେ କଷ୍ଟ ଦଣ୍ଡପାହେମ୍‌ ଆଦ୍‍ତଡ଼୍‍ ।”
MAR 12:41 ଅନ୍‌‍ଦାମ୍‍ ଜିସୁ ମନ୍ଦିର୍‌ତାଗ୍‍ ଦାନ ଇଦାନ୍‍ ଜାଗେତ୍‍ ଗାରେ କୁଦିମାତ୍‍ତଣ୍ଡ୍ । ନାରୁଡ଼୍‍ ୱାସ୍‍ ଆଗେ ନେହ୍‍ସ୍‍ ମାନ୍ଦାନ୍ ବାକ୍‍ସତାଗ୍‍ ଦାନ ୱାଟାନାଦ୍ ଅଣ୍ଡ୍‌‍ ଉଡ଼ ମାତ୍‍ତଣ୍ଡ୍‍ । ଦନିଡ଼୍‍ ଆଗେ ନାର୍ଗେ ଡାବ୍‍କ୍‍ ୱାଟମାତ୍‍ତଡ଼୍‍ ।
MAR 12:42 ଆସୁଟ୍‍ ଅଣ୍ଡୟ୍‌‍ ଗରିବ୍‍ ରାଣ୍ଡିଲ୍‍ ଆଗେ ୱାସ୍‍ ମାତର୍‍ ରେଣ୍ଡ୍‍ ସୁଦୁରାୱ୍‍ ତମ୍ୱା ମୁଦ୍ରା ଆ ବାକ୍‍ସତାଗ୍‍ ୱାଟ୍‍ତେ ।
MAR 12:43 ଜିସୁ ଶିଷ୍ୟଡ଼୍‍କିଙ୍କ୍‍ ସତ୍‍ କେତ୍‍ତଣ୍ଡ୍‍, “ଇ ଗରିବ୍‍ ରାଣ୍ଡିନ୍‍ ଦାନ ୱେର୍‍ବାଗାତଡ଼୍‍ ଇସ୍‍ମାନ୍ଦାନ୍‍ ଦନ୍‍ତାଗାଙ୍କ୍‍ ନାର୍ଗେ ।
MAR 12:44 ସାୱ୍‌କାରିଡ଼୍‌ ତାମ୍‍ ମିଗ୍‍ଲ୍‍ତେ ଦନ୍‍ତାଗାଙ୍କ୍‍ ଇସ୍‍ମିନ୍ଦେଡ଼୍‍, କିନ୍ତୁ ଇ ନାଟାଡ଼୍‍ ତାନ୍‍ ଦରିଦ୍ର୍ୟ ତଡ଼୍‍ ତାନ୍‍ ଗାରେ ସମ୍ପତି ବାତ୍‍ ମାତ୍‍ତେ, ସାରେ ଇତ୍‍ତେ ।”
MAR 13:1 ଅଣ୍ଡ୍‌ ଦିନେ ଜିସୁ ମନ୍ଦିର୍‍କଞ୍ଚ୍‍ ପେଇସ୍‍ ଆଦାନ୍‍ ୱେଲେ ତାନ୍ ଶିଷ୍ୟ ଅର୍ତୁଣ୍ଡ୍ କେତଣ୍ଡ୍, “ଗୁରୁ ! ଉଡ଼େ, ବେସର୍‍ ସୁନ୍ଦର୍‍ କାଲ୍‍କ୍‍ ନୁ ବେସର୍‍ ସୁନ୍ଦର୍‍ ଲୋକ୍‍ !”
MAR 13:2 ଜିସୁ ଉତ୍ତର ଇସ୍‌ କେତ୍‍ତଣ୍ଡ୍, “ନେଣ୍ଡ୍ ଇଦ୍‍ ବାଡ଼ିୟା ଲୋନତିଙ୍କ୍ ଉଡ଼ୁତିଡ଼୍ ? ଆଦ୍ ୱେରଟ୍‍ବା କାଲ୍‍ ନିଜର୍‍ ପଡ଼ିୟେତାଗ୍‍ ମାନ୍‌ । ଆଦ୍ ସାର୍ରେ ବୂମ୍‌ଦାଗ୍‍ କାଇଲିତେ ।”
MAR 13:3 ଅଣ୍ଡ୍‌ ଦିନେ ଜିସୁ ମନ୍ଦିର୍ ମୁନେତ୍‍ ଜିତ ମେଟେତେ ପର କୁଦିମାତ୍‍ତଣ୍ଡ୍ । ପିତର୍, ଯାକୁବ, ଯୋହନ ନୁ ଆନ୍ଦ୍ରିୟ କାଇଲି ତାନ୍ ଗାରେ ୱାସ୍ ପାସ୍‍ରିଞ୍ଚ୍‍ତଡ଼୍,
MAR 13:4 “ଇୱୁସାରେ ବେସୁଙ୍କୁ ଗଟେମ୍ ଆଦ୍‍ତେ ମାକିଙ୍କ୍ କେଲ୍‌ମ୍ । ବାତେଏ ଉଡ଼ି ଇୱୁ ସାର୍ରେ ବକେତେ ଏୱୁତା ଇଞ୍ଜ୍ ମାମେ ପୁନ୍‍ତମ୍‍ ?”
MAR 13:5 ଜିସୁ ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, “ସାବଦାନ୍, ବେନ ବେଲା ମିକିଂଙ୍କ୍‍ ବୁସା ମାଡ଼୍‍ମାକିଣ୍ଡ୍‍ ।”
MAR 13:6 ନାର୍ଗେ ନା ପେଦେର୍‍ତିଙ୍କ୍‍, ଅସ୍‌ କେତିତଡ଼୍‍, ନୁ ନାନେ ଅଣ୍ଡେ ଇଦିନ୍‍ତଡ଼୍ ଅଡ଼୍‌ ପିନା ନାରୁଙ୍କୁ ବୁସା ମାଡ଼ିତଡ଼୍‍ ।
MAR 13:7 ଗାର୍ରେତେ ଯୁଦ୍ଦ୍‌ ବା ଜେକେତେ ଯୁଦ୍‌ ମରେ କେଞ୍ଜି ମିଡ଼୍ ୱେର୍ରେମାଟ୍‍ । ଇଦିନ୍ ଲେକେ ପିନା ଗଟେମ୍‍ ଆଦ୍‍ତା । କିନ୍ତୁ ଇଦିନ୍ ଅର୍ତ ଆୟ ଯେ ତେରାନ୍‍ ଦିନାମ୍‍ ଏୱୁତେ ।
MAR 13:8 ଦେଶ୍‌ ଦେଶ୍‌ ଲୋପେ ଯୁଦ୍‌ ଆଦ୍‍ତେ । ଅଣ୍ଡ୍‌‍ ରାଜ୍ୟ ମେଣ୍ଡନ୍ ରାଜ୍ୟତିଙ୍କି ଯୁଦ୍‌ ମାଡ଼ିତେ । ସାର୍ରେ ହେକାମ୍‍ ବୂମ୍‌ ମେୟିଦ୍‍ତେ ନୁ ମୁଡ଼ୁନ୍ଦି ଆଦ୍‍ତେ । କିନ୍ତୁ ଇୱୁସାରେ ଡଙ୍କେତ୍‍ ମାନ୍ଦାନ୍‍ ମୁତେନ୍‍ ଡଙ୍କେନପ୍‍ ଆରାମ୍‍ ଆଦାନ୍‍ ମୁନେତେ ଗଟି ।
MAR 13:9 “ମିକିଙ୍କ୍ ସାବଦାନ୍ ମାନ୍ଦେ ୱେୟ୍‍ତିତ୍ ।” ମିଡ଼୍ ତହଃସ୍‍ ଜେଲ୍ ଦାଗ୍ ଆତ୍‍ତିଡ଼ି । ମିଡ଼୍‍ ଉପାସନା ଲତ୍‍ତାଗ୍‍ ଦେବ୍‍ ତିନ୍ତ୍‍ତିଡ଼୍‍ । ନା ମାଇଦିଙ୍କ୍‍ ମିଡ଼୍‍ ସାସନ୍‍କର୍ତାଲଡ଼୍‍ ନୁ ରାଜାଲଡ଼୍‍ ମୁନେ ନିସ୍‍ ସୁସମାଚାର୍‍ ଗଟ୍‍ କେଞ୍ଚ୍‍ସ୍ପ ୱେୟ୍‍ତିତ୍‍ ।
MAR 13:10 କିନ୍ତୁ ଅଣ୍ଡ୍‌‍ ବାତ୍‍ ଆୟଣ୍ଡ୍‍ବା, ତେରାନ୍‍ ଦିନାମ୍‍ ୱାଦାନ୍‍ ମୁନେକେ ସାରେ ଜାତି ନୁ ସାରେ ନାରୁଡ଼୍‍ ଗାରେ ଇଦ୍‍ ସୁସମାଚାର୍‍ ନିଜାମ୍‍ତେ ପ୍ରଚାର୍ ଆଦ୍‍ତେ ।
MAR 13:11 ମିକିଂଙ୍କ୍‍ ତହ୍‍ସ୍‍ ଜେଲ୍ ଦାଗ୍‍ ଅଦାନ୍‍ ୱେଲେ, ଆଗ୍‍ ବାତେକେତାଙ୍କ୍‍ ଆଦ୍‍ତେ, ଇଦ୍‍ ବିଷୟ୍‍ତିଙ୍କ୍‍ ଦାନ୍ଦ୍‍ ଆଇମାଟ୍‍ । ଆ ସମୟତେ ବାତ୍‍ କେତାଙ୍କ୍‍ ଆଦ୍‍ତେ, ଆଦ୍‍ ମିକିଙ୍କ୍ କେଞ୍ଜ୍‌ପିଦ୍‍ତଡ଼୍‍ । ଆସୁଟ୍‍ ମିକିଂଙ୍କ୍‍ ନିଜର୍‍ ମନ୍‍ଦେ ବାତ୍‍ କେତ୍‍ୱେୟ । ମିଡ଼୍‍ ବାତ୍‍ ତେତିତିଡ଼୍‍, ଆଦ୍‍ ପବିତ୍ର ଆତ୍ମା ପୁଞ୍ଜ୍‍ପିତ୍‍ ।
MAR 13:12 ଆ ସମୟ୍‍ତେ ନାରୁଡ଼୍‍ ନିଜର୍‍ ଦାଦାଲଡ଼୍‍କିଙ୍କ୍‍ ଆୱ୍‍କାନଙ୍କ୍‍ ପସ୍ପିଦ୍‍ତଡ଼୍‍, ବାବାଲଡ଼୍ ନିଜର୍‍ ମାର୍‍କିନ୍‍ ପର ଆଲେ ମାଡ଼ିତଡ଼୍‍ । ପିଲାକି ନିଜର୍ ୟାୟବାବାନ୍‍ ପର ବିରଦ୍‍ତେ ତେଦିତଡ଼୍‍ ଅଡ଼୍‌‍କିଂଙ୍କ୍‍ ଆୱ୍‍କ୍‌ନା ମାଡ଼ିତଡ଼୍‍ ।
MAR 13:13 ନା ସେଙ୍ଗେ ସାରେତଡ଼୍‍ ମିକିଙ୍କ୍ ଗୃନା ମାଡ଼ିତଡ଼୍‍, କିନ୍ତୁ ବେନଡ଼୍‍ ମାଡ଼େଙ୍ଗ୍‍ ଆୟ୍‍ନା ନିସ୍‍ମାନ୍ତ୍‍ତଡ଼୍‍, ଅଡ଼୍‌‍ ପରିତ୍ରାଣ ପାଏମ୍‍ ଆଦ୍‍ତଡ଼୍‍ ।
MAR 13:14 “ମିଡ଼୍‍ ଆ ‘ଦ୍ୱଂସ କାରିଡ଼ି’ ପିନ୍ଦଲାଦିଙ୍କ୍‍ ଉଡ଼ିତିଡ଼୍‍, ବେନ୍‍ କି ମାଡ଼ାନାଦ୍‍ ଆୟ, ଆଗେ ଆଦିଙ୍କ୍ ଉଡ଼ିତିଡ଼୍‍,” କାର୍‍ୟାନଡ଼ି ଇଦିଙ୍କ୍ ବୁଜେମ୍‍ ଆଦାଙ୍କ୍‍ ଚେଷ୍ଟା ମାଡ଼ାଟ୍‍, “ଆସୁଟ୍‌ ଯିହୁଦାବାସିଡ଼୍‍ ମେଟେତ୍‍ ପର ମିରିଡ଼୍‍ ।”
MAR 13:15 ବେନ୍‌ଅ ଲୋତ୍‍ତେ ମୁର୍ସିନାଗ୍‍ ଆଞ୍ଜ୍‍ ମିନ୍ଦେଣ୍ଡ୍ ଲନ୍‍ ଲୋପେତ୍‍ ବେନ୍‍ ଜିନିଷ୍‍ ଅଦାନଙ୍କ୍ ଅଣ୍ଡ୍‌‍ ଡିଗିୱାସ୍‍ ସମୟ୍‍ ନଷ୍ଟ ମାଡ଼୍‍ମାକିଣ୍ଡ୍‍ ।
MAR 13:16 ବେନ୍‌ଅ ୱାୟ୍‍ତା ଆଞ୍ଜ୍‍ ମିନ୍ଦେଣ୍ଡ୍‍, ଚକାସିଲେ ଆଦାନଙ୍କ୍ ଅଣ୍ଡ୍‌‍ ଲନ୍‍‍ ୱାଡ଼୍‍ମାକିଣ୍ଡ୍‍ ।
MAR 13:17 ଆସୁଟ୍‍ ଡଙ୍କେତ୍‍ ମାନ୍ଦାନ୍‍ ନାଟା ନୁ କାୟ୍‍ଦାଗ୍‍ଗେ ପିଲ୍‍ଲେ ପୟ୍‍ସ୍‍ ମାନ୍ଦାନ୍‍ ୟାୟକି ବେସର୍‍ କଷ୍ଟ ଆୟ ।
MAR 13:18 ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାଟ୍‍, ଇ ଗଟନା ବେଲା ସାଲ୍‍ଦେ ୱେଲେ ଆୟ୍‍ମାକି ।
MAR 13:19 ଆ ଦୁର୍ଦିନତେ ଦୁଃକ୍‍କଷ୍ଟ ସାରେ ସୃଷ୍ଟି ଆରାମ୍‍ତେ ନେଣ୍ଡ୍‍ ଆୟ୍‍ନା ଗଟେମ୍‍ ଆସ୍‍ ମାନ୍ଦାନ୍‍ ସାରେ ତିପାଲ୍‍ ପେର୍କେ ବୟଙ୍କର୍‍ ଆଦ୍‍ତେ ।
MAR 13:20 କିନ୍ତୁ ପ୍ରବୁ ଆ ଦୁର୍ଦିନ୍‍ତେ ସମୟ୍‍ତିଙ୍କ୍ କମ୍‍ ମାଡ଼ିସ୍‍ ମିନ୍ଦେଣ୍ଡ୍‍ । ଆଲା ଆୟ୍‍ୱେ ମାତ୍କେ, ଆଗାଙ୍କ୍ ବେନ ରକ୍ଷା ପାୟେମ୍‍ ଆଦାଙ୍କ୍‍ ପାର୍‍ୱଣ୍ଡ୍‍ । ତାନ୍‍ ଏଞ୍ଚିମାନ୍ଦାନ୍‍ ନାରୁଡ଼୍‍ ସେଙ୍ଗେ ଅଣ୍ଡ୍‌‍ ସମୟ୍‍ ନେହ୍‍ସ୍‍ ମିନ୍ଦେଣ୍ଡ୍ ।
MAR 13:21 ଆସୁଟ୍‍ ବେନ୍‌ଅ କେତିତଣ୍ଡ୍, “ଉଡ଼େ, ମସିହ ଇଗେ ମିନ୍ଦେଣ୍ଡ୍,” ଆଗେ ଉଡ଼େ ମସିହ ଆଗେମିନ୍ଦେଣ୍ଡ୍, ଆଦିଙ୍କ୍‍ ବିଶ୍ୱାସ୍ ମାଡ଼୍‍ମାଟ୍‍ ।
MAR 13:22 ବୁସା ମାଡ଼ାନ୍ ମସିହ ନୁ ବୁସା ମାଡ଼ାନ୍ ବଣ୍ଡକ୍ରିଷ୍ଟଡ଼୍‍ ତନ୍ଦିତଡ଼୍ । ଅଦିକ୍‌ ଆକେ ଇଶ୍ୱର ଏଞ୍ଚ୍‍ତେ ନାରୁଡ଼ୁକ୍‍ ବା ଟକା ମାଡ଼ାନ୍‍ ଅଡ଼୍‌ ବେପଡ଼୍‍ ମାଡ଼୍‍ୱେ ପାଡ଼ିୟି ମାଡ଼ିତଡ଼୍‍ ନୁ ବେସୁଙ୍କ୍‍ ଉଡ଼୍‍ୱେ ଆସୁଙ୍କ୍‌ତାୱୁ ତଅତିତଡ଼୍ ।
MAR 13:23 ମିଡ଼୍‍ ସାବଦାନ୍‍ ମାନୁଟୁ । ହିୱୁ ସାରେ ଗଟେମ୍ ଆଦାନ୍‍ ମୁନେ ନାନେ ମିକିଂଙ୍କ୍‍ କେଞ୍ଜ୍‌ପିତାନ୍‍ ।
MAR 13:24 “ଆ ଦୁକାମ୍‍ଦିନେ ୱାତ୍‍ତେ ପେର୍କେ ପଡ଼୍‍ଦ୍‍ତିଙ୍କ୍‍ ଇକାଡ଼୍‍ ଆଦ୍‍ତେ, ନେଞ୍ଜ୍‍ତିଙ୍କ୍‍ ୱେସ୍‍ ଆଦ୍‍ତେ,”
MAR 13:25 ଉକାକ୍‍ ମୟଲତାଗାଙ୍କ୍‍ ରାଇତା ମହାଶୂନ୍ୟତେ ଶକ୍ତିସାରେ ୱାଡ଼୍‍କି ଆଦ୍‍ତା ।
MAR 13:26 ଆସୁଟ୍ ନାରୁନ୍‍ପିଲେ ଗୌରବ୍ ନୁ ମହା ପରାକ୍ରମତେ ମାବ୍‍ତାଗାଙ୍କ୍‍ ୱାଦାନାଦ୍‌ ଉଡ଼ିତିଡ଼୍‌ ।
MAR 13:27 ତାନ୍‍ ଏଞ୍ଚ୍‍ସି ମାନ୍ଦା ନାରୁଡ଼୍‍କ୍ ଜଗତ୍‍ତେ ଅଣ୍ଡ୍‌‍ ପଡ଼୍‍ୟେତାଗାଙ୍କ୍‍ ମେଣ୍ଡନ୍ ପଡ଼ିୟେତାଗ୍‍ ମେକି ଆଦାନ୍‍ ମାଇଦିଙ୍କ୍ ଅଣ୍ଡ୍‌‍ ତାନ୍‍ ଦୂତକିଙ୍କ୍‍ ସାର୍‍ଏକାମ୍‍ ବା ପୃତିବିତେ ଶେଷ୍‍ସିମା ଏୱୁନା ରଅତିତଣ୍ଡ୍ ।
MAR 13:28 “ତୟେ ମାଡ଼୍‍ତାଗ୍‍ଙ୍କ୍ ଶିକ୍ଷା ନାଡ଼୍‍ସାଟ୍‍ । ବେସୁଟ୍‌ ଲେତାୱୁ ଆକି କଡ଼୍‍ସିତା, ଆସୁଟ୍‍ ଏଦ୍‍ କାଲାମ୍‍ ଏୱୁତେ ଇଞ୍ଜ୍‍ ମିଡ଼୍ ପୁନ୍ଦ୍‍ତିଡ଼୍‍ ।
MAR 13:29 ଟିକ୍‍ ଆଲେନେ ହିୱୁସାରେ ଗଟନା ଉଡ଼୍‍କେ, ତେରାନ୍‍ ଦିନାମ୍‍ ଏୱୁତେ ଇଞ୍ଜ ପୁନ୍ତିଡ଼୍ ।
MAR 13:30 ନାନ୍‍ ମିକିଂଙ୍କ୍‍ ନିଜାମ୍‍ କେତୁତାନ୍‍, ବେନଡ଼୍‍ ଜିୱ୍‍ ମିନ୍ଦେଡ଼୍‍, ଅଡ଼୍‌‍ ଡଲାନ୍‍ ମୁନେଙ୍କ୍ ଇୱୁ ସାରେ ଗଟେମ୍‍ ଆଦ୍‍ତା ।
MAR 13:31 ମୟଲ୍‍ ନୁ ପୃତିବି ଦଂସ ଆଦ୍‍ତେ, କିନ୍ତୁ ନା ଗଟ୍‍ ବେସୁଙ୍କ୍‍ ଦଂସ ଆୟ ।”
MAR 13:32 “ଆଦିନ୍, ବେସୁଟ୍‌ ୱାଦ୍‍ତଣ୍ଡ୍, ବେନ ପୁନଡ଼୍‍ । ସ୍ୱୟଂ ଇଶ୍ୱର୍‍ ତେ ମାର୍‍ କିମ୍ୱା ସ୍ୱର୍ଗତେ ଦୂତ ବା ଇଗଟି ପୁନ ଇତ୍କେ ବାବାଲ୍‍ ଇଶ୍ୱର୍ ଇ ଗଟି ପୁତ୍‍ତଣ୍ଡ୍ ।
MAR 13:33 ସାବ୍‍ଦାନ୍‍ ଆସ୍‍ କେପିମାନୁଟ୍‍, ଆଦ୍‍ ସମୟ୍‍ ବେସୁଟ୍‌ ୱାଦ୍‍ତେ ଆଦ୍‍ ମିଡ଼୍‍ ପୁନ୍‍ୱିଡ଼୍‍ ।
MAR 13:34 ଅର୍‍ତୁଣ୍ଡ୍‍ ନାରୁଣ୍ଡ୍ ଉଡାଙ୍କ୍ ଆଦାଙ୍କ୍‍ ପେୟ୍‍ତ୍‍ ୱେଲେ, ତାନ୍‍ ଲୋନ୍‌‍ ଚାକରିଡ଼୍‍ ଦାଇତ୍ୟ ୱିଡ଼୍‍ସିସ୍‍ ଆଦ୍‍ତଣ୍ଡ୍‍ । ଅଡ଼୍‌‍ ଲୋପେଙ୍କ୍ ବେନ ବାତ୍‍ ମାଡ଼ିତଣ୍ଡ୍‍, ବୁଜାମାଡ଼ିସ୍‍, କେପାନଡ଼୍‍କିଙ୍କ୍‍ ତିଆର୍ ଆସ୍‍ ମାନ୍ଦାଙ୍କ୍‍ କେସ୍‍ ଆଦ୍‍ତଣ୍ଡ୍‍ ।
MAR 13:35 ଆଲେ ନେ ନାନେ ମିକିଂଙ୍କ୍‍ ସାବ୍‍ଦାନ୍‍ କେସମିନ୍ଦେନ୍‍, ବାତାଙ୍କ୍‍ ଇତ୍କେ ଲୋତ୍‍ତେ ମୁଦ୍‍ପାଲ୍‍ ବେସୁଙ୍କ୍‍ ୱାଦ୍‍ତଣ୍ଡ୍, ମିଡ଼୍‍ ପୁନ୍‍ୱିଡ଼୍‍ ମୂଲ୍‍ପୁଟ୍‍ ବା ନାଡ୍‍ନାର୍କା, ୱିୟ୍‍ଦାନ୍‍ ଗାରେ ବା ପଡ଼୍‍ଦ୍‍ ପେୟ୍‍ତାନ୍‍ ୱେଲେ ଅଣ୍ଡ୍‌‍ ୱାଦ୍‍ ପାର୍ଦ୍‍ତଣ୍ଡ୍‍ ।
MAR 13:36 ଅଣ୍ଡ୍‌‍ ଯଦି ଅଟାତ୍‍ ୱାସ୍‍ ଏୱ୍‍ଦ୍‍ତଣ୍ଡ୍‍, ମିକିଂଙ୍କ୍‍ ଉଞ୍ଜ୍‍ତେ ପଡ଼୍‍ୟ୍‍ତାଗେ ଅଣ୍ଡ୍‌‍ ଉଡ଼୍‍ମାକିଣ୍ଡ୍ ।
MAR 13:37 ନାନ୍‍ ମିକିଂଙ୍କ୍‍ ବାତେ କେତୁତାନ୍‍, ୱେର୍‍ତଡ଼୍‍କିଙ୍କ୍‍ ବା ଆଦେ କେତୁତାନ୍‍ ଜାଗ୍ରତ୍‍ ଆସ୍‍ ମାନୁଟ୍‍ ।”
MAR 14:1 ନିସ୍ତାର୍‌ ପାଣ୍ଡୁମ୍ ନୁ କମିରଶୂନ୍ୟ ରୂଟି ପାଣ୍ଡୁମ୍‍ତେ ରେଣ୍ଡ୍‌ ଦିନା ମୁନେ ଜିସୁଙ୍କ୍‍ ମିଞ୍ଜ୍‍ପି ତଅସ୍ ଅସ୍‌ ଆୱୁକାନଙ୍କ୍ ମୁକ୍ୟ ପୁରୋଇତ ନୁ ଦର୍ମଗୁରୁଡ଼୍ ଉପାୟ ମେହେକୁତଡ଼୍ ।
MAR 14:2 ଅଡ଼୍‌ କେତ୍‍ତଡ଼୍, “ପାଣ୍ଡୁମ୍‍ତେ ୱେଲେ ଇଦ୍‍ ପାଡ଼୍‍ୟି ମାଡ଼୍‍ମାଟ୍‍, ବାତେଙ୍କ୍‍ଇତ୍କେ ଆସୁଟ ନାରୁଡ଼୍ ରାମକ୍‌ କଟ ମାଡ଼ିତଡ଼୍‍ ।”
MAR 14:3 ଜିସୁ ବେନିତାଗେତେ କୁଷ୍ଠି ଶିମୋନ ପେଦେର୍‍ତେ ଅର୍ତୁଣ୍ଡ୍‍ ନାରୁନ୍ତେ ଲୋନ୍‌‍ କୁଟ୍‍ମାମ୍ ଆସ୍‍ମାତଣ୍ଡ୍‍ । ଜିସୁ ଆଗେ ତିନ୍ଦାଙ୍କ୍‍ କୁଦି ମାତ୍‍ତେ ୱେଲେ ଅଣ୍ଡ୍‌ ନାଟାଡ଼୍ ୱାସ୍ ନାର୍ଗେ ଦାମିନ୍ ପାଇସାନାଦ୍ ଜଟାମାଂସି ଗାବ୍‍ମାନ୍ଦାନ୍‍ ନିୟ୍ ବର୍‍ତିମାନ୍ଦାନ୍ ଅଣ୍ଡ୍‌ ପାଣ୍ଡିରିଲାଦ୍‍ ଗିନେ ପୟସ୍ ୱାତ୍‍ତେ । ଆଦ୍ ଗିନେତିଙ୍କ୍ ଉସ୍ ଜିସୁନ୍ ମୁଞ୍ଜିନ୍‌ ପର୍ ସାରେ ନିୟ୍ ତସ୍‍ତେ ।
MAR 14:4 ଆଗେ ମାନ୍ଦା ବେସ୍‍କେ ନାରୁଡ଼୍ ଅଦିନ୍‌ ଆ ପାଡ଼୍‍ୟି ଉଡ଼ି କପାମ୍‍ ଆତ୍‍ତଡ଼୍ ନୁ ତାମ୍‍ତାମ୍ ଲୋପେ କେତାକେତି ଆତ୍‍ତଡ଼୍, “ଇଦ୍ ଗାବ୍‍ମାନ୍ଦାନ୍‍ ନିୟ୍ ଇଲା ନଷ୍ଟ ମାଡ଼ାନାଦ୍‍ ସାୟ୍ ଆତ୍‍ତେ କି ?
MAR 14:5 ତାଂକିଙ୍କ୍‍ ୱାମିକେ, ତିନିଶହ ପିନା ରୌପ୍ୟ ମୁଦ୍ରା ଦର୍‍କେ ନୁ ଆ ଡ଼ାବ୍‍କ୍‍ ଗରିବ୍‍ ନାରୁଡ଼୍‍କ୍ ଇଦାଙ୍କ୍‍ ଆୟେଡ଼୍,” ଆ ନାଟାଡ଼୍‍ତିଙ୍କି ନାର୍ଗେ ଗଟି କେତ୍‍ତଡ଼୍ ।
MAR 14:6 କିନ୍ତୁ ଜିସୁ କେତ୍‍ତଡ଼୍, “ତାଙ୍କି ଆସର ଅଇରାନ୍‍ ମାଡ଼ୁତି ବାତାଙ୍କ୍‍ ? ଆଦ୍ ନାମା ଇଦିଙ୍କ୍‍ ଅଣ୍ଡ୍‌ ସୁନ୍ଦର୍ ପାଡ଼ିୟ୍‌ ମାଡ଼ିମିନ୍ଦେ ।
MAR 14:7 ଗରିବ୍ ନାରୁଡ଼୍‍ ମିକିଂଙ୍କ୍ ସାରେ ୱେଲେ ଦକିତଡ଼୍ । କିନ୍ତୁ ମିଡ଼୍‍ ଅଡ଼୍‌‍କିଂଙ୍କ୍‍ ସାହାଯ୍ୟ ମାଡ଼ାଙ୍କ୍‍ ଇଚ୍ଛା ମାଡ଼ିତିଡ଼୍‍ ଆସୁଟ୍‍ ସାହାଯ୍ୟ ମାଡ଼େ ପାର୍‍ଦ୍‍ତିଡ଼୍‍, ନାନେ ମିକିଂଙ୍କ୍ ସାରେ ୱେଲେ ଦରକ୍‍ନ ।
MAR 14:8 ଆଦ୍ ତାନ୍‍ ସାମର୍ତ୍ୟ ଅନୁସାର୍‍ତେ ଇଦି ନା ମାୟିଦିଙ୍କ୍‍ ମାଡ଼୍‍ତେ ନାନେ ସମାଦି ଆଦାନ୍ ମୁନେନେ ଆଦ୍ ନାପର ଗାବ୍‍ ମାନ୍ଦାନ୍ ନିୟ୍ ତସ୍‍ତେ ।
MAR 14:9 ନାନ୍ ସତ୍ କେତୁତାନ୍‍, ସାରା ଜଗତ୍‍ତାଗେ ନା ସୁସମାଚାର୍ ବେଗେ ପ୍ରଚାର୍ ଆଦ୍‍ତେ, ଆଗେ ଇ ନାଟାଡ଼୍ ବାତେ ମାଡ଼୍‍ତେ, ଆଦ୍ ସାରେ ଏର୍କେ ମାଡ଼ାନ୍ ମାଇଦିଙ୍କ୍ କେସ୍‍ମାନ୍‍ତଡ଼୍ ।”
MAR 14:10 ଜିସୁନ୍ ବାରଜାନ୍ ଶିଷ୍ୟଡ଼୍ ଆଗାଙ୍କ୍‍ ଇଷ୍କରିୟୋ ଯିହୁଦା ପେଦେର୍‍ତଣ୍ଡ୍ ଅର୍ତୁଣ୍ଡ୍‍ ଶିଷ୍ୟ ଜିସୁଙ୍କୁ ପସ୍କ୍‍ପିଦାଙ୍କ୍ ମୁକ୍ୟ ପୁରହିତ୍‌ତେ ଗାରେ ଆତ୍‍ତଣ୍ଡ୍ ।
MAR 14:11 ଅଡ଼୍‌ ଅନ୍‌ ଗଟିନେ କେଞ୍ଜି ୱେଡ଼୍‍ତଡ଼୍ ନୁ ଅଂକିଙ୍କ୍‌ ଆଦିନ୍‌ ମାଇଦିଙ୍କ୍‍ ବେସର୍‍ ଡ଼ାବ୍‍କ୍‍ ଅଦ୍‍ତି ଇଞ୍ଜ୍‍ ଅଂକିଙ୍କ୍‌ କେତ୍‍ତଡ଼୍ । ଆ ସମୟତେ ଜିସୁଙ୍କ୍‍ ଅଡ଼୍‌ କାଇଦା ପସ୍ପିଦାଙ୍କ୍‍ ଯିହୁଦାଲ୍ ସୁଯୋଗ ମେହେକ୍‍ତଣ୍ଡ୍‍ ।
MAR 14:12 କମିରଶୂନ୍ୟ ରୋଟି, ପାଣ୍ଡୁ ଦିନାତେ ୱେଲେ ନିସ୍ତାର୍ ପାଣ୍ଡୁ ତିନ୍ଦାନ୍‍ ୱେଲେ ମେଣ୍ଢେପିଲେ ପୁଜ୍‍ଜେ ଇଦ୍‍ତଡ଼୍, ଶିଷ୍ୟଡ଼୍ ଜିସୁଙ୍କ୍ ପାଚ୍‍ରାମାଡ଼୍‍ତଡ଼୍, ମାମେ ବେନ୍‍ଏଡ଼୍ ନି ସେଙ୍ଗେ ନିସ୍ତାର୍ ପାଣ୍ଡୁମ୍ ତିୟାର୍‍ ମାଡ଼ିତମ୍‍ ?
MAR 14:13 ଜିସୁ ଇଡ଼୍‍ୱୁଡ଼୍‍ ଶିଷ୍ୟଡ଼୍‍କିଙ୍କ୍‍ ଇଦି ପାଡ଼୍‍ୟି ମାଡ଼ାନ୍‍ଙ୍କ୍‍ ରଅତଣ୍ଡ୍, “ମିଡ଼୍ ଟାଉନ୍‍ ଲୋପେ ଆନୁଟ୍ ।” ଆଗେ କୁଣ୍ଡେତାଗ୍‍ ଏର୍ ଅସ୍ ମାନ୍ଦାନ୍‍ ଅର୍ତୁଣ୍ଡ୍ ନାରୁଣ୍ଡ୍ କାଇଲିତଣ୍ଡ୍ । ଅନ୍‌ ପେର୍କେ ଆନୁଟ୍‍ ।
MAR 14:14 ଅଣ୍ଡ୍‌ ବେନ୍‍ ଲୋନ୍‌‍ ନେଙ୍ଗିତଣ୍ଡ୍, ଆ ଲୋତ୍‍ତେ ମାଲିକିତିଙ୍କ୍ କେଲ୍‍ମୁଟ୍‍, “ଗୁରୁ କେତ୍‍ତଣ୍ଡ୍, ବେନ୍‍ ବାକ୍‍ଡ଼େତାଗେ ଅଣ୍ଡ୍‌ ତାମ୍‍ ଶିଷ୍ୟଡ଼୍‍ତଡ଼୍ ନିସ୍ତାର ପାଣ୍ଡୁମ୍‍ ମାଡ଼ିତଡ଼୍ ?”
MAR 14:15 ଅଣ୍ଡ୍‌ ମିକିଂଙ୍କ୍‍ ପରତାଦ୍‍ ଅଣ୍ଡୟ୍‌ ଲେକେତ୍ ସଜାମାଡ଼୍‍ତେ ବାକେଡ଼େ ତଅତିତଣ୍ଡ୍ । ଆଗେ ମିଡ଼୍ ମା ମାୟ୍‍ଦିଙ୍କ୍‍ ସାର୍ ବିଷୟ ତିଆର୍ ମାଡ଼ିତିଡ଼୍ ।
MAR 14:16 ଅଡ଼୍‌ ଇଡ଼୍‍ୱୁଡ଼୍‍ ଶିଷ୍ୟଡ଼୍ ଟାଉନ୍‍ତାଗ୍‍ ଆତ୍‍ତଡ଼୍ ନୁ ଜିସୁ କେତ୍‍ତେ ଲେକେ ସାର୍ ଗଟି ଉଡ଼୍‌ତଡ଼୍ । ଆଗେ ଅଡ଼୍‌ ନିସ୍ତାର୍ ପାଣ୍ଡୁମ୍‍ ମାଡ଼୍‍ତଡ଼୍ ।
MAR 14:17 ମୁଲୁପୁଟ୍‍ ଜିସୁ ଶିଷ୍ୟଡ଼୍‍ତଡ଼୍‍ ଆ ବାକ୍‍ଡ଼େତାଗ୍ ଆତ୍‍ତଣ୍ଡ୍ ।
MAR 14:18 ତିନ୍ଦାଙ୍କ୍‍ କୁଦ୍‍ତେ ୱେଲେ ଜିସୁ କେତ୍‍ତଣ୍ଡ୍‍, ନାନେ ନିଜାମ୍‍ କେତୁତାନ୍ ମି ଲୋପେଙ୍କ୍‍ ଅର୍ତୁଣ୍ଡ୍ ନା ବିରୋଦ୍ଦି ଆଦ୍‍ତଣ୍ଡ୍ । ଅଣ୍ଡ୍‌ ନା ତଡ଼୍ ତିନ୍ଦାଙ୍କ୍‍ କୁଦ୍‍ତଣ୍ଡ୍ ।
MAR 14:19 ଶିଷ୍ୟଡ଼୍ ଇ ଗଟି କେଞ୍ଜି ୱେର୍‌ ୱେର୍‌ ପାଚାର୍‌ମାଡ଼୍‍ତଡ଼୍, “ନିମେ ନାକିଙ୍କ୍‍ ଉଡ଼ି ଇ ଗଟି କେଲ୍‍ୱିଡ଼୍‍ ତ ।”
MAR 14:20 ଜିସୁ ଉତ୍ତର ଇତ୍‌ତଣ୍ଡ୍‌, ମି ବାର ଜାନ୍‍ ଲୋପେଙ୍କ୍‍ ଅର୍ତୁଣ୍ଡ୍; ଅଣ୍ଡ୍‌ ନା ତଡ଼୍ ଅଣ୍ଡୟ୍‌ ତାଲିତାଗ୍‍ ରୋଟି ମୁଉସ୍ ତିନ୍ଦୁତଣ୍ଡ୍ ।
MAR 14:21 ଶାସ୍ତ୍ରତାଗ୍‍ ଲେକ୍‌ତେ ଲେକାମ୍‌ ନାରୁଣ୍ଡ୍‍ ପିଲେ ଡ଼ଲିତେ । କିନ୍ତୁ ବେନ୍‍ ନାରୁଣ୍ଡ୍ ଅନ୍‌‍ ପର ବିରୋଦ୍‍ ମାଡ଼ିତଣ୍ଡ୍, ଅନ୍‌ ଦଶା ବେସର୍‍ ବୟଙ୍କ୍‍କର୍‍ ଆଦ୍‍ତେ । ଅଣ୍ଡ୍‌ ଜନମ୍‌ ଆୟିୱେ ମାତ୍‍କେ ଅନ୍‌‍ ପାକେ ଆୟ୍ଡ଼୍‍ ।
MAR 14:22 ଅଡ଼୍‌ ତିନ୍ଦା ସମୟ୍‍ତେ ଜିସୁ ଅଣ୍ଡୟ୍‌ ରୂଟି ଅସ୍ ଇଶ୍ୱରତିଙ୍କ୍‍ ଦନ୍ୟବାଦ୍‍ ଇତଣ୍ଡ୍ ନୁ ତାଙ୍କି ଉୱୁସ୍ ଶିଷ୍ୟଡ଼୍‍ଙ୍କି ଇସ୍ କେତ୍‍ତଣ୍ଡ୍‍, “ଅୟମୁଟୁ, ତିନୁଟ୍‍ ଇଦି ନା ମେନ୍ଦୁଲୁ ।”
MAR 14:23 ତାନ୍‍ ପେର୍କେ ଦ୍ରାକ୍ଷାରସ୍ ବର୍ତି ମାନ୍ଦାନ୍ ସଲ୍‍ତିଙ୍କ୍‍ ଅସ୍ ଇଶ୍ୱରତିଙ୍କ୍‍ ଦନ୍ୟବାଦ୍‍ ଇତଣ୍ଡ୍ ନୁ ଆଦ୍‍ ଶିଷ୍ୟଡ଼୍‍ଙ୍କି ଇତଣ୍ଡ୍ । ଅଡ଼୍‌ ଆଗାକଞ୍ଚ୍‌ ଉତ୍‍ତଡ଼୍ ।
MAR 14:24 ଜିସୁ କେତଣ୍ଡ୍, “ଇଦ୍‍ ନା ନେତୁର୍‍, ନାରୁନ୍‍ ପାପ୍‍ କ୍ଷମାତେ ମାଇଦିଙ୍କ୍‍ ନାନ୍‍ ନା ବେନ୍‍ ନେତୁରୁ ତସିଦାଙ୍କ୍‍ ଆଦୁତାନ୍‍, ଆଦ୍‍ ଇଶ୍ୱରତେ ପୁଃନେ ନିୟମ୍‍ ମାଡ଼ିତେ ।
MAR 14:25 ମିକିଂଙ୍କି କେସ୍ ନେଏତୁତାନ୍‍, ଇଶ୍ୱରତେ ରାଜ୍ୟ ପୁଃନେ ଅଙ୍ଗୁର୍‌ରସ୍ ଉନ୍ଦାନାଗାଙ୍କ୍‍, ନିଜାମ୍‍ ନାନେ ମେଣ୍ଡେ ବେସୁଙ୍କ୍‍ ଦ୍ରାକ୍ଷାରସ୍ ଉନନ୍‍ ।”
MAR 14:26 ତାନ୍‍ ପେର୍କେ ଜିସୁ ନୁ ତାମ୍‍ ଶିଷ୍ୟଡ଼୍ ପାଟା ପାରଡ଼୍‍ ଜିତ ମେଟେତାଗ୍‍ ଆତ୍‍ତଡ଼୍ ।
MAR 14:27 ଜିସୁ ଶିଷ୍ୟଡ଼୍‍ଙ୍କି କେତଣ୍ଡ୍, ମିଡ଼୍‍ ନାକିଙ୍କ୍‍ ୱିଡ଼୍‍ସି ମିରିତିଡ଼ି । ଇ ବିଷୟତେ ଶାସ୍ତ୍ରତାଗେ ଲେକାଆସ୍ ମିନ୍ଦେ, ନାନେ ମେଣ୍ଢା ମେଇତାନଙ୍କ୍ ଆୱୁକିତାନ୍‍ ନୁ ମେଣ୍ଢା ଏକାମ୍‍ ଆଦ୍‍ତା ।
MAR 14:28 କିନ୍ତୁ ନାନେ ଡଲ୍‍ତାଗାଙ୍କ୍‍ ତେଏଦ୍‍ତେ ପେର୍କେ ମିଡ଼୍ ଆଦାନ୍‍ ମୁନେନ୍‍ନେ ଗାଲିଲୀତାଗ୍‍ ଆଦ୍‍ତାନ୍‍ ।
MAR 14:29 ପିତର କେତଣ୍ଡ୍, ସାରେତଡ଼୍ ୱିଡ଼୍‍ସି ଆତ୍‍କେ ବା ନାନେ ୱିଡ଼୍‍ସି ଆନନ୍‍ ।
MAR 14:30 ଜିସୁ ପିତରତିଙ୍କ୍‍ କେତଣ୍ଡ୍, ନାନ୍‍ ନିକିଙ୍କ୍‍ ସତ୍‍ କେତୁତାନ୍, ନେଣ୍ଡେ ନାର୍କା ରେଣ୍ଡେଦାମ୍‍ କର୍କ୍ କୁସାନ୍‍ ମୁନେ ନିମେ ନାକିଙ୍କି ମୁଣ୍ଡ୍‍ଦାମ୍‍ ପୁନନ୍‍ ଇଞ୍ଜ କେତିତିନ୍‍ ।
MAR 14:31 ପିତର ମେଣ୍ଡେ କେତ୍‍ତଣ୍ଡ୍‍, “ନିତଡ଼୍ ଡଲାନ୍‍ଙ୍କ୍‍ ଆତ୍‌କେମିକା ବେସୁଙ୍କ୍‍ ବା ନିକିଙ୍କ୍‍ ପୁନନ୍‍ ଇଞ୍ଜ କେଲନ୍‍ ।” ବାଗାତ୍‌‍ ଶିଷ୍ୟଡ଼୍‌ ମିକା ଆଲେ କେତ୍‍ତଡ଼୍‍ ।
MAR 14:32 ତାନ୍‍ ପେର୍କେ ଅଡ଼୍‌‍ ଗେତ୍‍ସମନି ପେଦେର୍‍ତେ ପଡ଼୍‍ୟତାଗ୍‍ ୱାତ୍‍ତଡ଼୍ ନୁ ଜିସୁ ଶିଷ୍ୟଡ଼୍‍କିଙ୍କ୍‍ କେତ୍‍ତଣ୍ଡ୍, ମିଡ଼୍ ଇଗେ ସେନେକ୍‍ କୁଦାଟ୍‍ । ନାନେ ପ୍ରାର୍ତନା ମାଡ଼ାନ୍‍ଙ୍କ୍‍ ଆଦୁତାନ୍‍ ।
MAR 14:33 ପିତର, ଯାକୁବ୍‍ ନୁ ଯୋହନ୍‌ତିଙ୍କ୍‌ ତଡ଼େକ୍‍ ଅସ୍ ଅଣ୍ଡ୍‌ ମୁନେ ଆତ୍‍ତଣ୍ଡ୍ । ଅଣ୍ଡ୍‌ ନାର୍ଗେ ଦୁଃକାମ୍‍ତେ ତିପାଲ୍ ଆତ୍‍ତଣ୍ଡ୍‍,
MAR 14:34 ଆଗାଙ୍କ୍‌ ଶିଷ୍ୟଡ଼୍‍କିଙ୍କ୍‍ କେତଣ୍ଡ୍, ଦୁଃକାମ୍‍ ନା ହୃଦୟତିଙ୍କ୍‍ ଦୁସ୍‌ତେ, ମିଡ଼୍ ଇଗେ କେପି ମାନୁଟୁ ।
MAR 14:35 ଜିସୁ ଇସୁର୍ ଆବାଡ଼୍‍ ଆଞ୍ଜ୍‍ କାପ୍‍ମୁଡ଼୍‍ନ୍ଦି ନେଲ୍‍ ରାଲତଣ୍ଡ୍ ନୁ ଯଦି ସମ୍ଵବ ଆୟେଡ଼୍, ଦୁକାମ୍‍ ଇୱକନ୍‍ ଆଦାଙ୍କ୍‍ ପ୍ରାର୍ତନା ମାଡ଼ି କେତ୍‍ତଣ୍ଡ୍‍,
MAR 14:36 “ହୋ ନା ବାବାନି ! ନିଗାରେ ସାରେ ସମ୍ୱବ । ଇଦି ଉନ୍ଦାନ୍ ସଲେତ୍‍ ଏର୍‍ ନାୟାଗ୍‍କନ୍‍ ଜେକେ ଆୟମ୍ । ଆଦ୍ ଇଞ୍ଜେବା ନାୟାଦ୍‍ ଇଚ୍ଛା ଆୟ୍‌ୟ ନି ଇଚ୍ଛା ସଫଲ ଆୟି ।”
MAR 14:37 ତା ପେର୍କେ ମାଲସ୍ ଉଡ଼୍‍ତଣ୍ଡ୍, ମୁୱୁଡ଼୍ ଆସ୍‍ ଶିଷ୍ୟଡ଼୍ ଉଞ୍ଜି ମିନ୍ଦେଡ଼୍ । ଜିସୁ ପିତରତିଙ୍କ୍‍ କେତଣ୍ଡ୍, “ଶିମୋନ, ଉଞ୍ଜିତି ? ଅଣ୍ଡୟ୍‌‍ ଗଣ୍ଟେ କେପି ମାନ୍ଦାନଙ୍କ୍‍ ପାରିୱିଡ଼୍ ?”
MAR 14:38 ଜିସୁ ଅଡ଼୍‌‍କିଂଙ୍କ୍‌ ମେଣ୍ଡେ କେତଣ୍ଡ୍, “କେପି ମାନୁଟୁ ବେଲା ପରିକ୍ଷାତାଗେ ପଡ଼େମ୍‍ ଆୱିଡ଼୍, ଆଦି ମାଇଦିଙ୍କ୍‍ ପ୍ରାର୍ତନା ମାଡ଼ାଟ୍ । ଆତ୍ମା ଇଚ୍ଛା, କିନ୍ତୁ ମେନ୍ଦୁଲ୍‍ ଦୁର୍ବଲ ।”
MAR 14:39 ଅଣ୍ଡ୍‌ ଆଗାକନ୍‍ ମେଣ୍ଡେ ସୁଦୁର୍‌ ଜେକେ ଆଞ୍ଜ୍‍ ମୁନେ ଲେକେ ପ୍ରାର୍ତନା ମାଡ଼୍‍ତଣ୍ଡ୍ ନୁ
MAR 14:40 ମେଣ୍ଡେଦାମ୍‍ ମାଲ୍ସ୍‍ ୱାସ୍‍ ଉଡ଼ୁତଣ୍ଡ୍, ଶିଷ୍ୟଡ଼୍ ଉସ୍କାଡ଼୍‍ତେ ଅଡ଼୍‌ କଣ୍ଡା ତେର୍ତାଙ୍କ୍‍ ପାର୍ରୱଡ଼୍‌ ମାତ୍‍ତଡ଼୍ । ଅଡ଼୍‌‍ ଅଙ୍କ୍‌ ବାତେ ଉତ୍ତର ଇତଣ୍ଡ୍, ପୁନ୍ଦେ ପାରୱଡ଼୍ ।
MAR 14:41 ମୁଣ୍ଡ୍ ଦାମ୍‍ ମାଲ୍‌ତେ ୱେଲେ ଜିସୁ ଶିଷ୍ୟଡ଼୍‍ଙ୍କି କେତଣ୍ଡ୍, ମିଡ଼୍ ଇଞ୍ଜେ ଆଇନା ଉଞ୍ଜି ମିନ୍ଦେଡ଼୍ ? ପିନା ଆଦୁତ୍‍ । ଉଡ଼ାଟ୍‍ ! ନାରୁଣ୍ଡ୍‍ ପିଲେତିଙ୍କି ନାରୁଡ଼୍ କାଇଦେ ପସ୍କିଦାନ୍‍ ସମୟ୍‍ ଏୱୁତେ ।
MAR 14:42 ତେଦାଟ୍‍, ଆନାଟି, ଉଡ଼ାଟ୍‍ ନାକିଙ୍କି ପସ୍ପିଦାନଣ୍ଡ୍ ନାରୁଣ୍ଡ୍‍ ୱାସ୍ ହେୱୁତଣ୍ଡ୍ ।
MAR 14:43 ଜିସୁ ଇ ଗଟି କେତାନ୍‍ ୱେଲେ ତାନ୍‍ ବାର୍‍ଜାନ୍‍ ଶିଷ୍ୟଡ଼୍ ଲୋପେଙ୍କେ ଯିହୁଦା ପେର୍ଦେତେ ଶିଷ୍ୟୟ୍ ୱାସ୍ ଏୱୁତଣ୍ଡ୍ । ଅନ୍‌‍ ତଡ଼୍‍, ସୁରି ଟେଙ୍ଗା, ଡ଼ୁଡ଼ି ପଇସ୍ ପିନା ନାରୁଡ଼୍ ୱାସ୍‍ମାତଡ଼୍‍ । ମୁକ୍ୟ ପୁରହିତ୍‍ତଡ଼୍, ଦର୍ମଗୁରୁଡ଼୍ ନୁ ଦର୍ମନେତାଲଡ଼୍ ଅଡ଼୍‌‍କିଂଙ୍କ୍‌ ରସ୍‍ମାତଡ଼୍‍ ।
MAR 14:44 ବିରଦ୍‍ତେ ଯିହୁଦାଲ୍‍ ଜିସୁଙ୍କୁ ପସ୍ପିଦାଙ୍କ୍‍ ୱାଦାନ୍‍ ନାରୁକିଙ୍କି ଅଣ୍ଡୟ୍‌ ଚିନ୍ନେ ଇଦାନଙ୍କ୍‍ ଇଞ୍ଜ୍‍ ଟିକ୍‍ ମାଡ଼ିମାତ୍‍ତଣ୍ଡ୍‍ । ଅଣ୍ଡ୍‌ କେତ୍‍ତଣ୍ଡ୍‍, ବେନଙ୍କ୍‍ ନମସ୍କାର୍‍ ମାଡ଼ିତାନ୍‍, ଅଙ୍କେ ମିଡ଼୍ ମେହେକ ମାନ୍ଦାନଣ୍ଡ୍‍ । ଅଂକିଙ୍କ୍‌ ଗିର୍‍ପ୍‍ ମାଡ଼ି ତସ୍କ୍‍ ଅୟ୍‍ମୁଟୁ ।
MAR 14:45 ଯିହୁଦାଲ୍‍ ୱାସ୍‍ୱାନାଙ୍କ୍‍ ଜିସୁନ୍‍ ଗାରେ ଆଞ୍ଜ ଅଂକିଙ୍କ୍‌ “ଗୁରୁ,” ଇଞ୍ଜ୍‍ କେସଡ଼୍ କେସଡ଼୍‍ ନମସ୍କାର୍‍ ମାଡ଼୍‍ତଣ୍ଡ୍ ।
MAR 14:46 ଆସୁଟ୍‍ ଅଡ଼୍‌ ଜିସୁଙ୍କ୍‍ ଗିରପ୍‍ ମାଡ଼ି ତଃତଡ଼୍ ।
MAR 14:47 କିନ୍ତୁ ଗାରେ ନିସ୍ ମାନ୍ଦାନ୍‍ ଅର୍ତୁଣ୍ଡ୍ ନାରୁନ୍‌ ସୁରୁ ପେସ୍ପି ବାଡ଼ିୟେ ଯାଜକତେ ଦାସଙ୍କ୍‍ ତୁର୍ସି ଅନ୍‌‍ କେୱ୍‍ ନାଡ଼୍‍କ୍‍ତଣ୍ଡ୍ ।
MAR 14:48 ଜିସୁ ନାରୁଡ଼କିଙ୍କି କେତ୍‍ତଣ୍ଡ୍‍, “ନାନେ ବାତେ ବେଏ ମିରୁତାନ୍‍ ଯେ, ଟେଙ୍ଗା, ଡ଼ୁଡ଼ି ପୟିସ୍‍ ନାକିଙ୍କ୍ ପଇତାନଙ୍କ୍‍ ୱାତିଡ଼ି ?
MAR 14:49 ଦିନା ଦିନା ପଇସ୍ ନାନେ ମନ୍ଦିର୍‍ତାଗେ ଶିକ୍ଷା ଇସମାତ୍‍ତାନ୍‍; ଆସୁଟ୍ ତ ନାକିଙ୍କି ଗିରାପ୍‍ ମାଡ଼ିୱିଡ଼୍ । କିନ୍ତୁ ଶାସ୍ତ୍ରତେ ଗଟି ସାରେ ଆଦ୍‍ତା ।”
MAR 14:50 ଆସୁଟ୍ ଶିଷ୍ୟଡ଼୍ ସାରେତଡ଼୍ ଅଂକିଙ୍କ୍‌ ୱିଡ଼୍‍ସି ମିରିତଡ଼୍‌ ।
MAR 14:51 ଅର୍ତୁଣ୍ଡ୍‍ ଲେୟଣ୍ଡ୍ ଅଣ୍ଡୟ୍‌‍ ଚାଦର୍‍ ମୁସି ଜିସୁନ୍‍ ପେର୍କେ ଆଞ୍ଜ୍‍ ମାତ୍‍ତଣ୍ଡ୍ । ଅଡ଼୍‌ ଅଂକିଙ୍କ୍‌ ପଇତାଙ୍କ୍‍ ଆଦାନ୍‍ ୱେଲେ,
MAR 14:52 ଅଣ୍ଡ୍‌ ତାନ୍‍ ଚକାସିଲେ ଏସି ଡ଼ୁନ୍‍ଟାଲ୍‍ ଆସ୍‍ ମିର୍‍ତଣ୍ଡ୍ ।
MAR 14:53 ତାନ୍‍ ପେର୍କେ ଅଡ଼୍‌ ଜିସୁଙ୍କୁ ବାଡ଼ିୟ୍‍ ପୁରହିତ୍‌ତନ୍ ଲନ୍ ଅତ୍‍ତଡ଼୍ । ଆଗେ ମୁକ୍ୟ ପୁରହିତଡ଼୍‌, ର୍ଦମ ନେତାଲଡ଼୍ ନୁ ର୍ଦମ ଗୁରୁଡ଼୍ ଗୁଡ଼ିମାତଡ଼୍ ।
MAR 14:54 ପିତର ଇସୁର୍ ଯେକେ ମାଞ୍ଜ୍‍ ଅଡ଼୍‌ ପେର୍କେ ଆତଣ୍ଡ୍ ନୁ ବାଡ଼ିୟେ ପୁରହିତଡ଼୍‌ ଲନ୍‍ କୁଦି ମାନ୍ଦ୍‍ନାଗ୍‍ ନେଙ୍ଗ୍‌ତଣ୍ଡ୍ । ଆଗେ କେପାନଡ଼୍‍ ତଡ଼୍ ନିଜେତିଙ୍କ୍‍ କାପାନଙ୍କ୍‍ ଆଗେ କିସ୍‍ ଗାରେ କୁଦ୍‍ତଣ୍ଡ୍ ।
MAR 14:55 ମୁକ୍ୟ ପୁରହିତିଡ଼୍ ନୁ ମହାସବାତେ ସଦସ୍ୟନଡ଼୍ ଜିସୁଙ୍କୁ ଡଲାନ୍‌ଦଣ୍ଡ୍ ଇଦାଙ୍କ ଅନ୍‌‍ ବିରୁଦ୍ଦ୍‌ତେ ଦଷ୍‌ ମେକାନଙ୍କ୍ ପସ୍ପ୍‍ତଡ଼୍, କିନ୍ତୁ ବାତେବା ଦର୍ସ୍‍କଡ଼୍ ।
MAR 14:56 ବେସ୍‍କ୍‍ତୁଡ଼୍‍ ନାରୁଡ଼ୁ ଜିସୁନ୍‍ ବିରୁଦ୍ଦ୍‌ତେ ମିଚ୍‍ ସାକ୍ଷି ଇତଡ଼୍, କିନ୍ତୁ ଅଡ଼୍‌ ସାକ୍ଷି ତାମ୍‍ତାମ୍ ଲୋପେ କାଇଲ୍‍ ଆତା ।
MAR 14:57 ତାନ୍‍ ପେର୍କେ ବେସ୍‍କ୍‍ତୁଡ଼୍‍ ନାରୁଡ଼ୁ ନିସ୍ ଜିସୁନ୍‍ ବିରୁଦ୍ଦ୍‌ତେ ମେଣ୍ଡ୍‍ ମିଚ୍‍ ଗଟ୍‍ କେତ୍‍ତଡ଼୍ ।
MAR 14:58 ଅଡ଼୍‌ କେତ୍‍ତଡ଼୍, ମାମ୍‍ କେଞ୍ଚ୍‍ତମ୍‍ ଅଣ୍ଡ୍‌ କେଲ୍‍ନୁଣ୍ଡ୍, “ନୁରୁଡ଼ୁ କାଇଦେ ତିଆର୍‍ ମାଡ଼୍‍ତେ ମନ୍ଦିର୍‌ତିଙ୍କ୍ ନାନେ ମାଣ୍ଡୁଲ୍‍ ତାଗେ କାଲ୍‍ପିତାନ୍‍, ମୁଣ୍ଡ୍ ଦିନା ଲୋପେ ନାରୁଡ଼ୁ ତିଆର୍ ମାଡ଼୍‍ୱାଦ୍‍ ମେଣ୍ଡନ୍‌ ମନ୍ଦିର୍‍ ତିଆର୍‍ ମାଡ଼ିତାନ୍‍ ।”
MAR 14:59 ଇଡ଼୍ ଗଟିବା ବେନ ବେନନାଗେ କାଇଲ୍‍ ।
MAR 14:60 ବାଡ଼ିୟେ ପୁରହିତ୍ ସାରେତଡ଼୍ ମୁନେ ନିସ୍‍ ଜିସୁଙ୍କୁ ପ୍ରଶ୍ନ ମାଡ଼୍‍ତଣ୍ଡ୍, ନି ବିରୁଦ୍ଦ୍‌ତେ ଅଡ଼୍‌ ତାସ୍ ମାନ୍ଦାନ୍‍ ଇଗଟି ବିରୁଦ୍ଦ୍‌ତେ ନିମେ ବାତେ କେତାନାଦ୍‍ ଇଲେ ?
MAR 14:61 କିନ୍ତୁ ଜିସୁ ବାତେ କେଲକଟ କଟମାତ୍‍ତଣ୍ଡ୍ । ବାଡ଼ିୟେ ପୁରହିତ୍ ମେଣ୍ଡ୍‍ଦାମ୍‍ ଅଂକିଙ୍କ୍‌ ପାସ୍‍ରିଞ୍ଚତଣ୍ଡ୍, ନିମେ ବାତେ ମସୀହ ମହାମହିମ୍‍ତେ ଇଶ୍ୱରତେ ମାରିନି ?
MAR 14:62 ଜିସୁ ଉତ୍ତର ଇତଣ୍ଡ୍, “ହଁ ନାନେ ଅଣ୍ତେ । ନିମେ ନାରୁଡ଼ୁ ପିଲେତିଙ୍କ୍‍ ସର୍ବ ଶକ୍ତିମାନ୍‍ତେ ତିନ୍ଦେ ପାକେ କୁଦି ମାନ୍ଦ୍‍ନାଦ୍‍ ଉଡ଼ିତିଡ଼୍ ନୁ ଅଣ୍ଡ୍‌ ସ୍ୱର୍ଗତେ ମୟଲତାଗାଙ୍କ୍‍ ୱାଦାନାଦ୍‍ ଉଡ଼ିତିଡ଼୍ ।”
MAR 14:63 ବାଡ଼ିୟେ ପୁରହିତ୍ ନିଜ୍‍ ସିଲେ ଇକି କେତଣ୍ଡ୍, ମେଣ୍ଡ୍ ବାତେ ସାକ୍ଷି ଦରକାର୍‍ ଇଲେ,
MAR 14:64 ଅଣ୍ଡ୍‌ ଇଶ୍ୱରତିଙ୍କି ଲିନ୍ଦେ ମାଡ଼ୁତଣ୍ଡ୍, ମିଡ଼୍ କେଞ୍ଜୁତିଡ଼୍ । ମିୟାଦ୍‌ ବାତେ ଇଚ୍ଛା ? ଅଡ଼୍‌ ତାନ୍‍ ବିରୁଦ୍ଦ୍‌ କେତ୍‍ତଡ଼୍‍ ଅଙ୍କ୍‌ ଦଷି ନୁ ଡଲାନ୍‌ଦଣ୍ଡ୍ ଇଦାନାଦ୍‍ ସାୟେ ।
MAR 14:65 ବେସ୍‍କେ ନାରୁଡ଼ୁ ଜିସୁନ୍‍ ପର୍ ଉସ୍‍ତଡ଼୍ । ଅଡ଼୍‌ ଅନ୍‌ କଣ୍ଡାଙ୍କ୍ ସିଲେ ତଃସ୍ ଅଂକିଙ୍କ୍‌ ରେହେସ୍‌ ପାସ୍‍ରିଞ୍ଚ୍ ତଡ଼୍, “ବେନ୍ ନିକିଙ୍କି ରେହେତଡ଼୍‍, କେଲ୍‌ମ୍‍ ।” କେପାନଡ଼୍ ଅଂକିଙ୍କ୍‌ ତହସ୍ ସାପୁଡ଼ା ରେହେତଡ଼୍ ।
MAR 14:66 ପିତର ବାଡ଼୍‍ୟେ ପୁରହିତ୍‌ତନ୍‍ ଲନ୍‍ତେ ଲୋପେ ମାନ୍ଦାନ୍ ୱେଲେ ବାଡ଼୍‍ୟେ ପୁରହିତ୍‌ତେ ଆ ଦାସି ଆଦେ ଆର୍ର୍ ଇସ୍ ଆତ୍‍ତେ
MAR 14:67 ନୁ ପିତର କିସ୍‍ ଆରାନାଦ୍‍ ଉଡ଼ି ଅକିଂଙ୍କ୍‌ ଲେକେତ୍‍ ଉଡ଼ି କେତ୍‌ତନ୍‌, ନିମେବା ନାଜରିତେ ଜିସୁନ୍‌ତଡ଼୍ ମାତ୍‍ତିନି ।
MAR 14:68 ପିତର ପୁନ୍‍ୱେ ଲେକେ କେତଣ୍ଡ୍, ନାନେ ଅଂକିଙ୍କ୍‌ ପୁନନ୍‍ । ନିମେ ବାତେ କେତୁତି ନାନେ ବୁଜେମ୍‍ ଆୟନ୍‌ । ଆଲା କେସ୍ ଅଣ୍ଡ୍‌ ଲୋତ୍‍ତେ ଲୋପେତେ ଆର୍ର୍‍ଦେ ପାକେ ପେଇସ୍‍ ଆତଣ୍ଡ୍ । ଆସୁଟେ କର୍କ୍ କୁସ୍‍ତା ।
MAR 14:69 ଆ ଦାସିଲି ଅଂକିଙ୍କ୍‌ ମେଣ୍ଡ୍ ଦାମ୍‍ ଉଡ଼ି ଆଗେ ନିସ୍ ମାନ୍ଦାନ୍‍ ନାରୁଡ଼ୁକିଙ୍କି କେତ୍‍ତେ, ଇ ନାରୁଣ୍ଡୁ ଅଡ଼୍‌ ଲୋପେଙ୍କେ ଅର୍ତୁଣ୍ଡ୍‍ ।
MAR 14:70 ପିତର ମେଣ୍ଡ୍‍ଦାମ୍‍ ପୁନ୍‍ୱେ ଲେକେ ମାତ୍‍ତଣ୍ଡ୍ । ସେନେକ୍‍ ମାଞ୍ଜ୍‍ ଆଗେ ନିସ୍ ମାନ୍ଦାନ୍ ନାରୁଡ଼ୁ ପିତରତିଙ୍କ୍‍ କେତ୍‍ତଡ଼୍, ନିଜାମ୍‍ ନିମେ ଅଡ଼୍‌ ମାନ୍ଦେତନି ଆୟ ଇଞ୍ଜ କେତାନଙ୍କ୍‍ ପାରିୱି । ବାତେଙ୍କ୍‌ଇତ୍କେ ନିମା ଗାଲିଲୀତେ ନାରୁନି ।
MAR 14:71 ପିତର ଉତ୍ତର ଇତଣ୍ଡ୍, ନାନେ ପ୍ରମାଣ୍ ମାଡ଼ି କେତୁତାନ୍‍, ନା ଗଟ ସତ୍‍ । ଇଲୁକ୍‍ ଇଶ୍ୱର ନାକିଙ୍କି ଦଣ୍ଡ୍ ଇୱିଣ୍ଡ୍ । ବେନନ୍‍ ଗଟି କେତୁତିଡ଼୍, ଅଂକିଙ୍କ୍‌ ନାନେ ପୁନନ୍‍ ।
MAR 14:72 ଆସୁଟେ ମୁଣ୍ଡ୍‍ଦାମ୍‍ କର୍କ୍ କୁସ୍‍ତା ନୁ ପିତରତିଙ୍କ୍‍ ଏର୍କେଆତ୍‍ତେ; ଜିସୁ କେସ୍ ମାତ୍‍ତଣ୍ଡ୍, କର୍କ୍ ରେଣ୍ଡ୍‍ଦାମ୍‍ କୁସାନ୍‍ ମୁନେ ନିମେ ନାକିଙ୍କି ମୁଣ୍ଡ୍‍ଦାମ୍‍ ପୁନନ୍‍ ଇଞ୍ଜ କେତିତି । ଅଣ୍ଡ୍‌ ଦୁଃକାତେ ମୁର୍‍ମୁରା ଆସ୍‍ କେୟ୍‍ତଣ୍ଡ୍ ।
MAR 15:1 ବାଡ଼ିୟେ ପୁରହିତଡ଼୍‌ ୱିୟ୍‍ତେ ୱିୟ୍‍ୱାକେ ଦର୍ମନେତାଲଡ଼୍, ଦର୍ମଗୁରୁଡ଼୍ ନୁ ବାଡ଼ିୟେ ମିଟିଙ୍ଗ୍‍ତେ ସଦ୍ୟନଡ଼୍ ତଡ଼୍ କେସ୍ ଅଡ଼୍‌‍କିଂଙ୍କ୍‌ ପାଡ଼୍‌ୟି ମାତ୍‍ତଡ଼୍‍ । ଜିସୁଙ୍କୁ ଇକ୍‍ଲେମ୍‍ତାଗେ ତସ୍କ୍‍ ଆସ୍‍ ପିଲାତନ୍‌ କାଇଦେ ଇତଡ଼୍ ।
MAR 15:2 ପିଲାତ୍ ଜିସୁଙ୍କୁ ପାର୍ରିଞ୍ଚ୍‍ତଣ୍ଡ୍, ନିମେ ବେନ୍‍ ଇହୁଦିଡ଼୍‍ ରାଜାନି ? ଜିସୁ ଉତ୍ତର ଇତଣ୍ଡ୍, ନିମେ ତ ଆଦ୍‍ କେତୁତି ।
MAR 15:3 ମୁକ୍ୟ ପୁରହିତିଡ଼୍ ଜିସୁନ୍‍ ବିରୁଦ୍ଦ୍‌ତେ ବେସର୍‍ ଗଟି କେତ୍‍ତଡ଼୍ ।
MAR 15:4 ଆସୁଟ୍‍ ପିଲାତ୍‍ ମେଣ୍ଡ୍‍ଦାମ୍‍ ଜିସୁଙ୍କୁ ପାର୍ରିଞ୍ଚ୍‍ତଣ୍ଡ୍, ନିମେ ବାତେ ଉତ୍ତର ଇୱିନ୍‍ ? ନି ବିରୁଦ୍ଦ୍‌ତେ ଇ ସାରେ ଗଟି କେତାନାଦ୍‍ କେଞ୍ଜୁତିନ୍‍ ତ !
MAR 15:5 ଜିସୁ ପଦେଣ୍ଡେ ବା ଗଟ କେଲ୍‍ୱାଙ୍କ୍‍ ପିଲାତ୍‍ କଟ ଆତଣ୍ଡ୍ ।
MAR 15:6 ସାରେ ଏଣ୍ଟକ୍‍ ନିସ୍ତାର ପାଣ୍ଡୁମ୍‍ ସମୟତେ ନାରୁଡ଼୍‍ ଦାବି ଲେକାମ୍‌ ପିଲାତ୍‍ ୱେରଙ୍ଗ୍‍ ବନ୍ଦି ନାରୁଙ୍କ୍‌ ମୁକ୍ତି ମାଡ଼ିସମାତଣ୍ଡ୍ ।
MAR 15:7 ଆସୁଟ୍‍ ଗଲ୍‍କିନଡ଼୍ ନୁ ନାରୁଙ୍ଗ୍‍ ଆୱୁକ୍‍ତେ ନାରୁଡ଼୍‍କୁ ବେସ୍କ୍‍ତୁଡ଼୍‍ ବିଦ୍ରୋହିଡ଼୍ ତଡ଼୍ ବାରବ୍‍ବା ପେଦେର୍‌ତଣ୍ଡ୍ ନାରୁଣ୍ଡୁ ଜେଲ୍‍ ଦଣ୍ଡ୍ ବଗେମ୍‍ ଆସ୍ ମାତ୍‍ତଣ୍ଡ୍ ।
MAR 15:8 ଆସୁଟ୍‍ ସାରେ ଗୁଡ଼ି ମାନ୍ଦାନ୍‍ ନାରୁଡ଼୍ ମୁନେତ୍‍ ରିତି ଲେକାମ୍‌ ଅର୍‌ତୁଙ୍କୁ ୱିଡ଼୍‍ସିଦାଙ୍କ୍‍ ଦାବି ମାଡ଼ି କେତ୍‍ତଡ଼୍‍,
MAR 15:9 ପିଲାତ୍‍ ଅଡ଼୍‌‍କିଂଙ୍କ୍‌ ପାର୍ରିଞ୍ଚ୍‍ତଣ୍ଡ୍‍, ଇହୁଦିଡ଼୍ ରାଜାଙ୍କ୍ ନାନେ ମୁକ୍ତି ମାଡ଼ିତାନ୍‍ ଇଞ୍ଜ୍ ମିଡ଼୍ ଇଚ୍ଛା ମାଡ଼ୁତିଡ଼୍ ?
MAR 15:10 ପିଲାତ୍‍ ପୁଞ୍ଜ୍‍ ମାତ୍‍ତଣ୍ଡ୍ ଯେ ମୁକ୍ୟ ପୁରହିତ୍‌ତଡ଼୍‌ ଇଂସା ଆସ୍‍ ଜିସୁଙ୍କୁ ଅନ୍‌‍ କାଇଦେ ପସ୍କ୍‍ପିତଡ଼୍ ।
MAR 15:11 କିନ୍ତୁ ବାରବ୍‍ବାଙ୍କ୍‍ ମୁକ୍ତି ମାଡ଼ାନ୍‍ ମାଇଦିଙ୍କ୍‍ ପିଲାତ୍ ଗାରେ ଦାବି ଜଣାମାଡ଼୍‍ଙ୍କ୍‍ ମୁକ୍ୟ ପୁରହିତ୍‌ତଡ଼୍‌ ନାରୁଡ଼୍‍କ୍‍ କେତ୍‍ତଡ଼୍‍ ।
MAR 15:12 ପିଲାତ୍‍ ନାରୁଡ଼୍‍କ୍ ମେଣ୍ଡ୍‍ଦାମ୍‍ ପାର୍ରିଞ୍ଚ୍‍ତଣ୍ଡ୍, ଆଲେକେ ମିଡ଼୍ ବେନଙ୍କ୍ ଇହୁଦିଡ଼୍ ରାଜାଲ୍‍ ଇଞ୍ଜ୍‍ କେତୁତିଡ଼୍, ଅଂକିଙ୍କ୍‌ ନାନେ ବାତେ ମାଡ଼ିତାନ୍‍ ?
MAR 15:13 ନାରୁଡ଼୍ କିଡ଼୍‍କି କେତ୍‍ତଡ଼୍, ଅଂକିଙ୍କ୍‌ କ୍ରୁଶତାଗେ ତାରସ୍କ୍‍ପାଟ୍‍ ।
MAR 15:14 ପିଲାତ୍‍ ପାର୍ରିଞ୍ଚ୍‍ତଣ୍ଡ୍, କିନ୍ତୁ ଅଣ୍ଡ୍‌ ବାତେ ଦୋଷ ମାଡ଼୍‍ତଣ୍ଡ୍ ? ଅଡ଼୍‌ ମେଣ୍ଡ୍ ମର୍‍ଆସ୍ କେତ୍‍ତଡ଼୍, “ଅଂକିଙ୍କ୍‌ କ୍ରୁଶତାଗ୍‍ ତାରସ୍କ୍‍ପାଟ୍ ।”
MAR 15:15 ପିଲାତ୍‍ ନାରୁଡ଼୍‍କିଂଙ୍କ୍‍ ଶାନ୍ତି ମାଡ଼ାନଙ୍କ୍‍ ପାର୍ୱେ ମାତ୍‍ତଣ୍ଡ୍, ଆଦିଙ୍କ୍‍ ଅଣ୍ଡ୍‌ ବାରବ୍‍ବାଙ୍କ୍‍ ମୁକ୍ତି ମାଡ଼ିତଣ୍ଡ୍ ନୁ ଜିସୁଙ୍କୁ କଡ଼ାନ୍‍ତଡ଼୍ ରେହେସ୍ କ୍ରୁଶତାଗେ ତାର୍‌ସ୍ପାନଙ୍କ୍‍ ଅଡ଼୍‌ କାଇଦେ ୱିଡ଼୍‍ସିତଣ୍ଡ୍ ।
MAR 15:16 ସୈନିକିଡ଼୍ ଜିସୁଙ୍କୁ ପିଲାତନ୍‌ ପ୍ରାସାଦ୍‍ତେ ଲୋପେ ଆତ୍‍ତଡ଼୍ । ଆଗେ ସୈନିକିଡ଼୍ ସାରେତଡ଼୍ ଅଣ୍ଡୟ୍‌‍ତାଗେ ଗୁଡ଼୍‌ତଡ଼୍‌ ।
MAR 15:17 ଅଡ଼୍‌ ଜିସୁଙ୍କୁ ଅଣ୍ଡୟ୍‌ ଆପେ ରଙ୍ଗ୍‌ତାଦ୍‌ ସିଲେ କେର୍ସ୍ପତଡ଼୍ ନୁ କୟେ ମାଡ଼େତେ କମେତେ ଅଣ୍ଡ୍‌ ସହଜ୍‌ ତିଆର୍‍ ମାଡ଼ି ଅନ୍‌‍ ତାଲେତାଗେ କେର୍‍ସ୍ପ୍‍ତଡ଼୍ ।
MAR 15:18 ତାନ୍‍ପେର୍ରକେ ଜିସୁଙ୍କୁ ନମସ୍କାର ମାଡ଼ି କେତ୍‍ତଡ଼୍, ଇହୁଦିଡ଼୍ ରାଜାଲ୍ ଚିରଞ୍ଜିବି ଆଇଣ୍ଡ୍ ।
MAR 15:19 ଅଡ଼୍‌ ଅନ୍‌‍ ତାଲ୍‍ତିଙ୍କ୍‍ ଡୁତେ ରେହେତଡ଼୍, ଅନ୍‌‍ ପର୍‍ ଉସ୍‍ତଡ଼୍ ନୁ ମରମିଣ୍ଡା ଉୱୁସ୍ ପ୍ରଣାମ୍‍ ମାଡ଼ାନ୍‍ କେତ୍‍ତଡ଼୍ ।
MAR 15:20 ଇଲାନେ ଅଂକିଙ୍କ୍‌ ପରିହାସ୍‍ ମାଡ଼ି ତେରେତେ ପେର୍କେ ଆପେ କଲର୍‍ତେ ସିଲେ ଟେଣ୍ଡି ଅନ୍‌‍ ନିଜର ସିଲେ କେର୍‍ସ୍ପିତଡ଼୍ । ତାନ୍‍ ପେର୍କେ ଅଂକିଙ୍କ୍‌ କ୍ରୁଶତାଗ୍ ତାର୍‍ସ୍ପାନଙ୍କ୍‍ ଅତ୍‍ତଡ଼୍ ।
MAR 15:21 ଆର୍ରଦାଗ୍‍ ଅଡ଼୍‌ ଶିମୋନ ପେର୍ଦେତେ ଅର୍‌ତୁଙ୍କ୍‌ ନାରୁଙ୍କୁ କାୟ୍‍ଲ୍‍ତଡ଼୍ । ଅଣ୍ଡ୍‌ ନାର୍‍କନ୍‍ ଟାଉନ୍‍ତା ୱାସମାତଣ୍ଡ୍ । ଜିସୁଙ୍କୁ କ୍ରୁଶ କାଞ୍ଚ୍‍ପାନଙ୍କ୍‍ ସୈନ୍ୟଡ଼୍ ଅଂକିଙ୍କ୍‌ ବାଦ୍ୟ ମାଡ଼୍‍ତଡ଼୍ ଇ ଶିମୋନ କୁରୁନିୟତେ ନାରୁଣ୍ଡୁ ମାତ୍‍ତଣ୍ଡ୍ । ଅଙ୍କ୍‌ ଇଉଡ଼୍ ମାର୍କ୍ ମାତ୍‍ତଡ଼୍ ଆଲେକ୍‍ଜାଣ୍ଡାର ନୁ ରୁଫସ୍‍ ।
MAR 15:22 ଅଡ଼୍‌ ଜିସୁଙ୍କୁ ଗଲ୍‍ଗତା ପେର୍ଦେତେ ପଡ଼ିୟତାଗ୍‍ ଅତ୍‍ତଡ଼୍ । ଗଲଗତାତେ ଅର୍ତ ଆଦୁତ୍‍ ତାଲେତ୍‍ ମୁଞ୍ଜ୍‍,
MAR 15:23 ଆଗ୍‍ ଅଡ଼୍‌ ଜିସୁଙ୍କୁ ଗାବ୍‍ମାନ୍ଦାନ୍‌ କାଲ୍‍ କାଲିପି ଉନ୍ଦାନଙ୍କ୍‍ ଇତଡ଼୍ । କିନ୍ତୁ ଜିସୁ ଆଦିଙ୍କ୍‍ ଉନଣ୍ଡ୍ ।
MAR 15:24 ତାନ୍‍ ପେର୍ରକେ ଅଡ଼୍‌ ଜିସୁଙ୍କୁ କ୍ରୁଶବିଦ୍ଦ୍‌ ମାତ୍‍ତଡ଼୍ ନୁ ଲଟ୍ରି ମାଡ଼ି ଅନ୍‌‍ ସିଲେ ସାର୍‍ ନିଜନିଜ ଲୋପେ ବାଗ୍‍ମାଡ଼ି ଅତ୍‍ତଡ଼୍ ।
MAR 15:25 ନାର୍କୁକ୍‍ ନଟାତେ ଜିସୁ କ୍ରୁଶବିଦ୍ଦ୍‌ ଆତଣ୍ଡ୍ ।
MAR 15:26 ଅନ୍‌‍ ସମ୍ପର୍କତେ ଅବିଯୋଗ୍‍ ଚିଟି‍ ଇଲା ଲେକେ ଆସ୍ ମାତ୍‍ତେ, “ଇହୁଦିଡ଼୍ ରାଜାଲ୍‍ ଇଞ୍ଜ୍‍ ଲେକା ମାତ୍‍ତେ ।
MAR 15:27 ଅଡ଼୍‌ ଆଦ୍‍ନାଣ୍ଡ୍ ଇରିଉଡ଼୍ ଦସିଡ଼୍‍କ୍‍ ବା କ୍ରୁଶତାଗ୍‍ ତାସ୍ପ୍‍ତଡ଼୍ ଅର୍‌ତୁଙ୍କ୍‌ ଜିସୁନ୍‍ ଡ଼େବ୍‍ ପାକେ ନୁ ମେଣ୍ଡ୍ ଅର୍ତୁଣ୍ଡ୍ ଅନ୍‌‍ ତିନ୍‍ପାକେ କ୍ରୁଶବିଦ୍ଦ୍‌ ମାଡ଼୍‍ତଡ଼୍‍ ।
MAR 15:28 ଅଣ୍ଡ୍‌ ଅପରାଦିତଡ଼୍ ଦଶା ଆତ୍‍ତେ ।” ଶାସ୍ତ୍ରତେ ଇ ବବିଷ୍ୟତ୍‍ବାଣି ଇଲାନେ ସଫଲ୍‍ ଆତ୍‍ତେ ।
MAR 15:29 ଆଲା ଆଞ୍ଜମାନ୍ଦାନ୍‌ ନାରୁଡ଼୍ ତାଲେ ତେସ୍ ଜିସୁଙ୍କୁ ଅପମାନ୍‍ ଇସ୍ କେତ୍‍ତଡ଼୍, ହୋ ନିମ୍‍ତ ମନ୍ଦିର୍‌ ଉୱୁସ୍ ମୁଣ୍ଡୁ ଦିନାଲୋପେ ତିଆର୍‍ ମାଡ଼ିଦାନ୍‍ନି ।
MAR 15:30 ଇଞ୍ଜେ କ୍ରୁଶକନ୍‍ ଡ଼ିଗି ୱାସ୍ ନିଜେତିଙ୍କି ରକ୍ଷା ମାଡ଼୍ ।
MAR 15:31 ମୁକ୍ୟ ପୁରହିତ୍‌ତଡ଼୍‌ ନୁ ଦର୍ମଗୁରୁଡ଼୍ ଆଲେନେ ଅଂକିଙ୍କ୍‌ କେଞ୍ଜ୍‍ତେ ଲେକେ ତାମ୍‍ତାମ୍‍ କେତା କେତି ଆତଡ଼୍, ଅଣ୍ଡ୍‌ ୱେରେ ତଡ଼୍‍କିଙ୍କି ରକ୍ଷା ମାଡ଼୍ ମାତ୍‍ତଣ୍ଡ୍, କିନ୍ତୁ ଇଞ୍ଜେ ନିଜେତିଙ୍କ୍‍ ରକ୍ଷା ମାଡ଼୍‍ପାର୍‍ୱ୍‍ଣ୍ଡ୍ ।
MAR 15:32 ଇଶ୍ରାୟେଲ୍‍ତେ ରାଜାଲ୍‍ ମସୀହ ଇଞ୍ଜେ କ୍ରୁଶକନ୍‍ ଡ଼ିଗି ୱାଡ଼୍‍ଣ୍ଡି, ଆଲେକେ ମାମ୍‍ ଅଙ୍କ୍‌ ବିଶ୍ୱାସ ମାଡ଼ିତମ୍‍ ତାନ୍‍ ତଡ଼୍ ମାନ୍ଦାନ୍‍ ଇର୍‌ୱୁଡ଼୍ ସାଙ୍ଗଡ଼୍‌ ଅଂକିଙ୍କ୍‌ କାୱୁସ୍ କାୱୁସ୍‍ କେତ୍‍ତଡ଼୍ ।
MAR 15:33 ଆଦ୍‍ନାଣ୍ଡ୍ ପାୟ୍‍ଲ୍‍ତେ ହଲ୍‍ ମୁଣ୍ଡୁ ଗଣ୍ଟା ସାରେ ଦେଶ୍‍ ଇକାଡ଼୍ ଆତ୍‍ତେ ।
MAR 15:34 ପାୟାଲ୍‍ତେ ଅଲ୍‍ ତିନିଟାୱେଲେ ଜିସୁ ଲେଙ୍ଗ୍‍ଟେଣ୍ଡି କେତ୍‍ତଣ୍ଡ୍, ଏଲୋହି, ଏଲୋହି, ଲାମା ଶବକ୍‍ତାନି । ହୋ ନାଆ ଇଶ୍ୱର ତନି, ହୋ ନାଆ ଇଶ୍ୱର ତନି, ନାକିଙ୍କି ବାତେଙ୍କ୍‍ ୱିଡ଼୍‍ସି ମିନ୍ଦେନି ?
MAR 15:35 ଅନ୍‌‍ ହି ଗଟି କେଞ୍ଜି ବେସ୍‍କ୍‍ତୁ କେତ୍‍ତଡ଼୍, ଅଣ୍ଡ୍‌ ଏଲିୟ୍‍ଙ୍କ୍‍ କାର୍‍ଙ୍ଗୁତଣ୍ଡ୍ ।
MAR 15:36 ଅଡ଼୍‌ ଲୋପେଙ୍କେ ଅର୍ତୁଣ୍ଡ୍‍ ମିରି ଆଞ୍ଜ୍‍ ପସ୍କେତିଙ୍କି ପୁଲ୍ଲେ ଅଙ୍ଗୁର୍‌ ଏର୍‌ ମୁହୁସ୍ ଅଣ୍ଡୟ୍‌‍ ଡ଼ୁଡ଼୍‍ତେ ମୁନେ ତସ୍କ୍‍ ନୁ ଆଦ୍‍ ଜିସୁ ପାୟୁର୍‍‍ତେ ଗାର୍‌ରେ ପଇସ୍‌‍ କେତ୍‍ତଣ୍ଡ୍, “ଉଡ଼ିତାନ୍‍, ଅଂକିଙ୍କ୍‌ କ୍ରୁଶକନ୍‍ ଡ଼ିପାନଙ୍କ୍‍ ଏଲିୟ ୱାଦୁତ୍‍ଣ୍ଡ୍ ଇଲେ ?”
MAR 15:37 ଜିସୁ ଆସୁଟେ ଗାଟି ଲେଙ୍ଗ୍‍ଦେ କେସ୍ ଡଲ୍‍ତଣ୍ଡ୍ ।
MAR 15:38 ମନ୍ଦିର୍‍ ତାଗେ ଉଙ୍ଗମାତେ ପରଦା ପର୍‍କନ୍‍ ମଦଲ୍ ହେୱୁନା ରେଣ୍ଡେ ଦୁଡ଼୍ ଇଙ୍ଗିଆତେ ।
MAR 15:39 ଅର୍ତୁଣ୍ଡ୍ ସେନାପତି ଜିସୁନ୍‍ କ୍ରୁଶତେ ମୁନେ ନିସ୍‍ ଅଣ୍ଡ୍‌ ବେଲା ଡ଼ଲ୍‍ତଣ୍ଡ୍, ଆଦ୍‍ ଲେକେତ୍‍ ଉଡ଼୍ ମାତ୍‍ତଣ୍ଡ୍ । ଅଣ୍ଡ୍‌ କେତଣ୍ଡ୍, ଇ ନାରୁଣ୍ଡୁ ନିଜାମ୍‍ ଇଶ୍ୱରତେ ମାର୍‍ ।
MAR 15:40 ବେସ୍‍କେ ନାଟା ଜେକେ ମାଞ୍ଜ୍‍ ଇ ସାରେ ଉଡ଼୍ ମାତ୍‍ତା । ଆୱିନ୍‍ ଲୋପେ ମାତ୍‍ତେ ମଗ୍‍ଦଲୀନି ମରୀୟମ୍, ସୁଜୁରୁ ଯାକୁବ ନୁ ଯୋଶିନ୍‍ତେ ୟାୟ୍‍ ମରୀୟମ୍ ନୁ ଶଲୋମି ।
MAR 15:41 ଜିସୁ ଗାଲିଲୀତାଗ୍‍ ମାନ୍ଦାନ୍‍ ୱେଲେ ଆୱୁ ଅଙ୍କ୍‌ ଅନ୍‌ପେର୍କେ ଆଞ୍ଜ ସାହାଯ୍ୟ ମାଡ଼ ମାତ୍‍ତା । ତାନ୍‍ ତଡ଼୍ ଯିରୁଶାଲମତେ କନ୍‍ ୱାସ୍‍ ମାତ୍‍ତେ ପିନା ନାଟା ଆଗେ ମାତ୍‍ତା ।
MAR 15:42 ଆଦ୍‍ ନାଣ୍ଡ୍ ମୁଲୁପୁଟ୍‍ ଆରମାତିଆତେ ଯୋସେପ୍‌ ୱାସ୍ ହେୱୁତଣ୍ଡ୍ । ଅଣ୍ଡ୍‌ ବାଡ଼ିୟେ ମିଟିଙ୍ଗିତେ ସମ୍ମାନତେ ସଦସ୍ୟ ମାତ୍‍ତଣ୍ଡ୍ ନୁ ଇଶ୍ୱରତେ ରାଜ୍ୟ ୱାଦାନାଦିଙ୍କି କେପମାତ୍‍ତଣ୍ଡ୍ ।
MAR 15:43 ଆଦ୍ ନାଣ୍ଡ୍ ମାତ୍‍ତେ ତିଆର୍‍ ମାଡ଼ନ୍‍ ଦିନାମ୍ ବା ରମାନ୍‌ଦିମ୍‍ତେ ମୁନେତ୍‌ ଦିନାମ୍‍ । ଆରମାତିଆତେ ଯୋସେଫ ୱେର୍ରୱ କନ୍ ପିଲାତେ ଗାରେ ଆଞ୍ଜ୍ ଜିସୁନ୍‍ ଡ଼ଲତେ ମଡ଼୍ ଆଦାନଙ୍କ୍‍ ତାଲ୍‍ ତଣ୍ଡ୍ ।
MAR 15:44 ଜିସୁ ଆସୁଟ୍ ଡ଼ଲତଣ୍ଡ୍ ଇଞ୍ଜ୍‍ କେଞ୍ଜି ପିଲାତ ଦାଦ୍‌ରେଲ୍‌ତଣ୍ଡ୍ । ଆଗେ ମାନ୍ଦ୍ ସେନାପତିଙ୍କି କାଙ୍ଗି ଜିସୁ ଡ଼ଲି ପିନାଜେଲ୍‍ ଆଦୁତ୍‍ କି ଇଞ୍ଜ୍‍ ପାର୍ରିଞ୍ଚ୍‍ତଣ୍ଡ୍ ।
MAR 15:45 ଆଦ୍‍ ଅନାଗାଙ୍କ୍‍ ଇଦି ବିଷୟ ସାରେ କେଞ୍ଜି ପିଲାତ ଜିସୁନ୍‍ ଡ଼ଲତେ ମଡ଼୍ ଆଦାନଙ୍କ୍‍ ଯୋସେଫତିଙ୍କି ଇତ୍‍ଣ୍ଡ୍ ।
MAR 15:46 ଯୋସେଫ ଜିସୁନ୍‍ ମେନ୍ଦୁଲୁତିଙ୍କି କ୍ରୁଶ କନ୍‍ ଡ଼ିପି ତାସ୍‍ ଅଣ୍ଡ୍‌ ସିଲେ ତାସ୍ ଜିସୁନ୍‍ ମେନ୍ଦୁଲୁତିଙ୍କି ଅଣ୍ଡ୍‌ ମୁସ୍‍ପିତଣ୍ଡ୍ ନୁ ମେଟେତାଗ୍‍ ଡ଼େୱି ଆସମାନ୍ଦାନ୍ ଅଣ୍ଡ୍‌ ଦର୍ରତାଗ୍‍ ଅସ୍‍ ଆଦ୍‍ ୱାଟ୍‍ତଣ୍ଡ୍ । ମେଣ୍ଡେ ଅଣ୍ଡ୍‌ ବାଡ଼ିୟାଦ୍‍ କାଲ୍ ଦର୍ରତିଙ୍କି ମୁସିତଣ୍ଡ୍ ।
MAR 15:47 ମଗ୍‍ଦଲୀନି ମରୀୟମ୍ ନୁ ଯୋଶିତେ ୟାୟ୍‍ ମରୀୟମ୍ ଆଗେ ମାଞ୍ଜ୍ ଜିସୁନ୍‍ ମେନ୍ଦୁଲୁ ବେଗେ ୱାଟିତଡ଼୍, ଉଡ଼୍ ମାତ୍‍ତା ।
MAR 16:1 ରମାନ୍‍ ଦିନାମ୍‍ ତେର୍ରତେ ପେର୍ରକେ ମଗ୍‍ଦଲୀନି ମରୀୟମ୍; ଯାକୁବତେ ୟାୟ୍‍ ମରିୟମ୍‍ ନୁ ଶଲୋମି ଜିସୁନ୍‍ ମେନ୍ଦୁଲ୍‍ତିଙ୍କି ଉସାନଙ୍କ୍ ବେସ୍‌କ୍ ଲେକେତ୍‍ ଗାବ୍‍ ମାନ୍ଦାନ୍‍ ନିୟ୍‍ ଜିନିଷ୍‌ ଆସି ତାତ୍‍ଆ ।
MAR 16:2 ରବାର୍‌ନାଣ୍ଡ୍ ୱିୟ୍‍ଦାନ୍‍ ୱେଲେ ପଡ଼୍‍ଦ୍ ପେସ୍‍ମାତେ ୱେଲେ ଆୱୁ ସମାଦିତାଗ୍ ଆତ୍‍ତା
MAR 16:3 ଆର୍ରଦାଗ୍‍ ଆୱୁ ତାମ୍‍ତାମ୍‍ ଲୋପେ କେତା, “ସମାଦିତାଗେ ଆ କାଲ୍‍ଦିଙ୍କି ମାନ୍‍ ମାଇଦିଙ୍କ୍ ବେନ ତୁର୍ସିଦ୍‍ତଣ୍ଡ୍ ?” ଆଦ୍‍ କାରଣ ବାଡ଼ାତାଦ୍‍ କାଲ୍ ମାତ୍‍ତେ,
MAR 16:4 କିନ୍ତୁ ଆୱୁ ମାଡ଼ିକି ଉଡ଼୍‍ତା, କାଲ୍‍ଦିଙ୍କି ତୁର୍ସିଇସ୍ ମିନ୍ଦେଡ଼୍ ।
MAR 16:5 ସମାଦିତେ ଦର୍ରରେ ଲୋପେ ଆଞ୍ଜ୍‍ ଉଡ଼୍‍ତା ଯେ ଆଗ୍‍ଗେ ଲାଟି ପାଣ୍ଡ୍ରି ଚକା କେର୍‍ତେନଣ୍ଡ୍ ଅର୍ତୁଣ୍ଡ୍‍ ଲେୟଣ୍ଡ୍ ସମାଦି ତିନ୍‍ କାଇଦେ ପାକେ କୁଦ୍‍ତଣ୍ଡ୍ । ଇୱୁସାରେ ଉଡ଼ି ଆୱୁ ୱେର୍ରତା ।
MAR 16:6 ଲେୟଣ୍ଡ୍ କେତଣ୍ଡ୍, ୱେର୍ରମାଟ୍ । ନାନେ ପୁତାନ୍‍, ମିଡ଼୍ କ୍ରୁଶତାଗ୍‌ ଡଲିମାନ୍ଦାନ୍‌ ନାଜରିତିୟ ଜିସୁଙ୍କୁ ମେକୁତିଡ଼୍ । ଅଣ୍ଡ୍‌ ଇଗେ ଇଲାଣ୍ଡ୍ । ଅଣ୍ଡ୍‌ ମେଣ୍ଡେ ଜିୱେ ଆସ୍‍ମିନ୍ଦେଣ୍ଡ୍ । ଉଡ଼ାଟ୍‍, ଅଡ଼୍‌ ଇପଡ଼ିୟେ ତାଗେ ଅଂକିଙ୍କ୍‌ ୱାଟିମାତ୍‍ତଡ଼୍ ।
MAR 16:7 ଇଞ୍ଜେ ଆଞ୍ଜ୍ ପିତର ନୁ ଜିସୁନ୍‍ ବାଗାତ୍‍ ଶିଷ୍ୟଡ଼୍‍କିଙ୍କି ଇ କବର୍‍ ଇମୁଟୁ । ଅଡ଼୍‌‍କିଂଙ୍କ୍‌ କେଲ୍‍ମୁଟ୍, ଜିସୁ ମିଇ ମୁନେ ଗାଲିଲୀତାଗ୍‍ ଆଦୁତଣ୍ଡ୍ । ଅଣ୍ଡ୍‌ କେତାନ୍‍ ଲେକାମ୍‌ ମିଡ଼୍ ଅଂକିଙ୍କ୍‌ ଆଗ୍‍ ଉଡ଼୍ ପାର୍ରତିଡ଼୍ ।
MAR 16:8 ନାଟାକି ସମାଦିକନ୍‍ ପେଇସ୍ ୱେର୍ରସ୍‍ ମିରି ମିରି ଆତ୍‍ତା । ଆୱୁ ପିନା ଦାଦ୍‍ରେଲ୍‍ତା ଆନ୍ତେ ଆଶର୍ଯ୍ୟ ଆତ୍‍ତା, ଆସୁଟ୍ ବେନଙ୍କ୍ ବା ତିରିୟାଙ୍କ୍ ପାର୍‍ୱମାତ୍‍ତା ।
MAR 16:9 ଜିସୁ ରବାର୍‍ନାଣ୍ଡ୍ ପୁନରୁତ୍‍ତି ଆସ୍‍ ମଗ୍‍ଦଲୀନି ମରୀୟମତିଙ୍କ୍‍ ମୁନେନ୍‍ ଦର୍ଶନ ଇସ୍‍ମାତ୍‍ତଣ୍ଡ୍ । ଇ ମରୀୟମ୍ ତଡ଼୍ ଅଣ୍ଡ୍‌ ସାତ୍‍ଟାନ୍‍ ବୁତ୍‌କ୍ ୱିସ୍ପିମାତଣ୍ଡ୍ ।
MAR 16:10 ମରୀୟମ୍ ଆଞ୍ଜ୍ ଜିସୁନ୍‍ ସାଙ୍ଗନଡ଼୍‍କ୍‍ ଇଦି ବିଷୟ କେଞ୍ଜ୍‌ପ୍‍ତେ । ଅଡ଼୍‌ ଦୁକାତେ କେୟମାତ୍‍ତଡ଼୍ ।
MAR 16:11 ଜିସୁ ଜିୱି ଆତଣ୍ଡ୍ ନୁ ଆଦ୍‍ ଅଂକିଙ୍କ୍‌ ଉଡ଼୍‍ତାନ୍‍, ଇଞ୍ଜ୍‍ ଇ ଗଟି ମରୀୟମ୍ କେତାଙ୍କ୍ ଅଡ଼୍‌ ତାନ୍‍ ଗଟିଙ୍କି ବିଶ୍ୱାସ୍‌ ମାଡ଼୍ ।
MAR 16:12 ତାନ୍‍ ପର୍ରକେ ଜିସୁନ୍‍ ଇଉଡ଼୍ ଶିଷ୍ୟଡ଼୍ ଅଣ୍ଡ୍‌ ନାର୍ର ଦାଗ୍‍ ଆଦାନ୍‍ ୱେଲେ ଆର୍ର ଦାଗ୍‍ ଜିସୁ ଅଡ଼୍‌‍କିଂଙ୍କ୍‌ ମେଣ୍ଡେ ଅଣ୍ଡ୍‌‍ ରକମ୍‍ ତନ୍ଦତଣ୍ଡ୍ ।
MAR 16:13 ଅଡ଼୍‌ ମାଲସ୍‍ ୱାସ୍ ବାଗାତଡ଼୍‍କିଙ୍କି ଇ ଗଟି କେତ୍‍ତଡ଼୍, କିନ୍ତୁ ଅଡ଼୍ ଗଟିଙ୍କି ବେନ୍‍ ବିଶ୍ୱାସ୍‌ ମାଡ଼ଡ଼୍‍ ।
MAR 16:14 ତାନ୍‍ପେର୍ରକେ ତାନ୍‍ ଏଗାର୍ ଜାନ୍ ଶିଷ୍ୟଡ଼୍ ତିନ୍ଦାନଙ୍କ୍‍ କୁଦି ମାତ୍‍ତଡ଼୍ ଆସୁଟ୍‍ ଜିସୁ ଅଡ଼୍‌‍କିଂଙ୍କ୍‌ ଦର୍ଶନ ଇତଣ୍ଡ୍ । ଅଡ଼୍‌‍ୱାଦ୍‍ ଅବିଶ୍ୱାସୀ ମାଇଦିଙ୍କ୍ ଅଂକିଙ୍କ୍‌ ଜିୱୁତେ ଉଡ଼ି ମାନ୍ଦାନ୍‍ ନାରୁଡ଼୍ ଗଟି ବେଲା ବୁସା ଆଇମାକି ଇଞ୍ଜ୍‍ ଜିସୁ ଅଡ଼୍‌‍କିଂଙ୍କ୍‌ କାଇଲ୍‌ତଣ୍ଡ୍‍ ।
MAR 16:15 ମେଣ୍ଡେ ଅଣ୍ଡ୍‌ କେତ୍‍ତଣ୍ଡ୍, “ସମଗ୍ର ଜଗତ୍‍ତାଗ୍‍ ଆଞ୍ଜ୍‍ ନାୟାଦ୍‍ ଇଦ୍‍ ସାଏତ୍‍ କାବୁର୍‍ ସାରେତଡ଼୍ ଗାରେ ଆଞ୍ଜ୍‍ କେଲ୍‍ମୁଟୁ ।
MAR 16:16 ବେନ୍‍ ଇଦିଙ୍କି ବିଶ୍ୱାସ ମାଡ଼ି ବାପ୍ତିସ୍ମ ଅଦ୍‍ତଣ୍ଡ୍, ଅଣ୍ଡ୍‌ ପରିତ୍ରାଣ ପାୟେମ୍‍ ଆଦ୍‍ତଡ଼୍ । ବେନ୍‍ ବିଶ୍ୱାସ ମାଡ଼ଣ୍ଡ୍, ଅଡ଼୍‌ ଦୋଷି ଆଦ୍‍ତଣ୍ଡ୍ ।
MAR 16:17 ବିଶ୍ୱାସିଡ଼୍ ବାକ୍‌ୱା ପାଡ଼୍‍ୟି ମାଡ଼ାନଙ୍କ୍‍ ଶକ୍ତି ପାୟେମ୍‍ ଆଦ୍‍ତଡ଼୍ । ନା ପେଦେର୍‍ତେ ଅଡ଼୍‌ ବୁତ୍‌ ୱିସ୍ପିତଡ଼୍, ପୁଃନେ ଗଟ୍‍ତେ ଗଟିତିର୍ରିତଡ଼୍,
MAR 16:18 ଅଡ଼୍‌ ତାଡ଼୍‍ତିଙ୍କି କାଇଦେ ପୟ୍‍କେ କିମ୍ୱା ୱିସାତିଙ୍କି ଉତ୍‍କେ, ଅଡ଼୍‌‍କିଂଙ୍କ୍‌ ବାତେ ଆୟ୍‍ । ଅଡ଼୍‌ ରୋଗ୍‍ତେ ମାନ୍ଦା ନାରୁଡ଼୍‍ତେ ପର୍‍ କାଇ ୱାଟ୍‍କେ, ଅଡ଼୍‌ ସୁସ୍ଥ ଆଦ୍‍ତଡ଼୍ ।”
MAR 16:19 ଅଡ଼୍‌‍କିଂଙ୍କ୍‌ ଇ ସାରେ ଗଟି କେସ୍ ତେରି ପ୍ରବୁ ଜିସୁ ସ୍ୱର୍ଗ ଇଶ୍ୱରତେ ତିନ୍ଦେ କାଇଦେ ପାକେ କୁଦ୍‍ତଣ୍ଡ୍ ।
MAR 16:20 ଶିଷ୍ୟଡ଼୍ ଆଞ୍ଜ୍‍ ସାର୍ର ଏକାମ୍‍ ପ୍ରଚାର୍ ମାଡ଼୍‍ତଡ଼୍‍ । ଅଡ଼୍‌ କେତାନାଦ୍‍ ସତ୍‍ ପ୍ରମାଣ ମାଡ଼ାନଙ୍କ୍‍ ପ୍ରବୁ ଅଡ଼୍‌ ତଡ଼୍ ମାଞ୍ଜ୍‍ ବାକ୍‌ୱା ପାଡ଼୍‍ୟି ମାଡ଼ାନଙ୍କ୍‍ ଅଡ଼୍‌‍କିଂଙ୍କ୍‌ ଶକ୍ତି ଇତ୍‌ତନ୍‌ ।
LUK 1:1 ଅ ତିୟପିଲ୍, ମାୟାଗ୍‌ ବାତ୍ ବାତ୍ ଆଦ୍‍ତେ, ଆଦିନାଦ୍ ଚିଟି ଲେକାନ୍ ସେଙ୍ଗେ ନାର୍ଗେ ନାରୁଡ଼୍ ପାର୍‍ତେ ଆସର୍ କିସୁଡ଼୍‍ତଡ଼୍ ।
LUK 1:2 ମୁନ୍‍ନେ କଞ୍ଚ୍‍ ଇଦ୍ ସାରେତିଙ୍କ୍ ଉଡ଼ିମାନ୍ଦାନ୍ ନାରୁଡ଼୍ ବେଲା ନେଲା କାବୁର୍‍ କେସ୍‍ମାତ୍‍ତଡ଼୍, ଆଦ୍ ଇସାବ୍‍ତେ ଇଦ୍ ଚିଟି ଲେକାଆସ୍ ମିନ୍ଦେ ।
LUK 1:3 ହୋ ବେଡ଼୍‍ୟନ୍ ତିୟପିଲ୍, ନାନ୍ ଆର୍‍କୁଲ୍‍ତେ ମୁନ୍‍ନେ କନ୍‍ସ୍ ଇଦ୍‍ସାରେ ଗଟ୍ ଏର୍କେ ମାଡ଼୍‍ତାନ୍, ଆଦିନ୍ ମାଇଦିଙ୍କ୍ ମି ସେଙ୍ଗେ ଇଦିନାଦ୍ ୱେରନ୍ ପୁନ୍ଦାନାଦ୍ ବିବରନୀ ଲେକାଙ୍କ୍ ଲେକେତ୍ ହେର୍କେ ମାଡ଼୍‍ତାନ୍ ।
LUK 1:4 ଇଦ୍ ବିଷୟତେ ମିଡ଼୍ ବେନ୍ ସାରେ ବିଷୟ୍ ପୁତ୍‍ତିଡ଼୍, ଆଦିନାଦ୍ ସାରେ ସତ୍ ବେଲା ପୁଞ୍ଜ୍ ପାର୍‍ଦ୍‍ତିଡ଼୍, ଆଦିନ୍ ମାଇଦିଙ୍କ୍ ନାନ୍ ଇଦ୍ ଲେକୁତାନ୍ ।
LUK 1:5 ଯିହୁଦା ଦେଶ୍‍ତେ ରାଜାଲ୍ ହେରୋଦତେ ସମୟ୍‍ତେ ଅବିୟତେ ମାନ୍ଦେତେ ନାନେ ଜିକରୀୟ ପେଦେର୍‍ତଣ୍ଡ୍ ୱେର୍‍ଣ୍ଡ୍ ଯାଜକ୍ ମାତ୍‍ତଣ୍ଡ୍; ଅନ୍‌ ମୁତ୍‍ତେ ହାରୋଣ ବଂଶତେ ପିକିଡ଼୍, ଆଦିନ୍ ପେଦେର୍ ଏଲୀଶାବେତ୍‌ ।
LUK 1:6 ଅଡ଼୍‌‍ ଇର୍‍ୱୁଡ୍ ଆସ୍‍ସ ପ୍ରବୁନାଦ୍ ଗଟ୍ ନୁ ପାଲନ୍ ଲେକାମ୍ ନିର୍ଦୋଷ୍‍ ଲେକାମ୍ କାମ୍ ମାଡ଼ି ପରମେଶ୍ୱର୍ ମୁନ୍‍ ଦାର୍ମିକ୍ ମାତ୍‍ତଡ୍ ।
LUK 1:7 ଅଡ଼୍‌‍କିଂଙ୍କ୍ ମାର୍‍ ମାୟାଡ଼୍ ଇଲ୍‍ୱେ ମାତ୍‍ତେ, ବାତେଙ୍କ୍ ଇତ୍କେ ଏଲୀଶାବେତ୍‌ ୱାଞ୍ଜଲ୍ ମାତ୍‍ତେ, ମେଣ୍ଡେ ଇର୍‍ୱିଡ଼ାଦ୍ ବିଷୟ୍‍ ନାର୍ଗେଆସ୍ ମାତ୍‍ତେ ।
LUK 1:8 ଜିକରୀୟ ତାମ୍ ମାନ୍ଦେତେ ପାଲି ହିସାପ୍ ତେ ପରମେଶ୍ୱର୍‍ତେ ମୁନ୍‍ନେ ଯାଜକ୍ ପାଡ଼ିୟି ମାଡ଼ମାନ୍ଦାନ୍ ଦିନାମ୍‍ତେ,
LUK 1:9 ଯାଜକ୍ ପାଡ଼ିୟିଦେ ଲେକେତ୍ ଲେକାମ୍‍ତେ ଗୁଲିବାଣ୍ଟ ମାଡ଼୍‍ତାଙ୍କ୍ ଅଂକିଙ୍କ୍‌ ପ୍ରବୁନ୍ ମନ୍ଦିର୍‍ତେ ଲୋପେ ହସି ଦୂପାମ୍ ଇଦାଙ୍କ୍ ୱେୟ୍‍ତେ,
LUK 1:10 ମେଣ୍ଡେ ଦୂପାମ୍ ଇଦାନ୍ ୱେଲେ ସାର୍‍ରେ ତୋଡ୍ ନାରୁଡ଼୍ ବାଇଦେ ପ୍ରାର୍ତନା ମାଡ଼ ମାତ୍‍ତଡ଼୍ ।
LUK 1:11 ଆସୁଣ୍ଟ୍ ପ୍ରବୁନାଦ୍ ୱେର୍‍ଣ୍ଡ୍ ଦୂତ ଦୂପାମ୍ ଇଦାନ୍ ବାକ୍‍ଡ଼େତେ ତିନ୍ଦେ କାଇଦେ ପାକ୍ ନିଶ୍‍ମିକା ଅଂକିଙ୍କ୍‌ ତନ୍ଦ୍‍ତଣ୍ଡ୍ ।
LUK 1:12 ଜିକରୀୟ ଅଂକିଙ୍କ୍‌ ଉଡ଼ି ଦାଦ୍‍ରେଲି ମିକା ୱେର୍‍ତଣ୍ଡ ।
LUK 1:13 ବାତେଙ୍କ୍ ଇତ୍କେ ଦୂତ ଅଂକିଙ୍କ୍‌ କେତ୍‍ତେ, ଜିକରୀୟ, “ୱେର୍‍ମା ବାତେଙ୍କ୍ ଇତ୍କେ ନିୟାଦ୍ ପ୍ରାର୍ତନା ସଦାପ୍ରବୁ କେଞ୍ଜ୍‍ତଣ୍ଡ୍, ମେଣ୍ଡେ ନି ମୁତ୍‍ତେ ଏଲୀଶାବେତ୍‌ ନି ମାଇଦିଙ୍କ୍ ୱେର୍‍ଣ୍ଡ୍ ମାର୍‍ ଜନମ୍ ମାଡ଼ିତା, ମେଣ୍ଡେ ନିମେ ଅନ୍‌ ପେଦେର୍ ଯୋହନ୍‌ ଇଦ୍‍ତିନ୍ ।
LUK 1:14 ଅଣ୍ଡ୍‌ ନିୱାଦ୍ କୁସି ନୁ ସାର୍‍ଦେତେ ବିଷୟ ଆଦ୍ ତଣ୍ଡ୍, ମେଣ୍ଡେ ନାର୍ଗେ ନାରୁଡ଼୍ ଅନ୍‌ ଜନମ୍‍ତେ ୱେଡ଼୍‍କିତଡ଼୍ ।
LUK 1:15 ଅଣ୍ଡ୍‌ ପ୍ରବୁନ୍ ମୁନ୍‍ନେ ମହାନ୍ ଆଦ୍‍ତୋଣ୍ଡ୍; ଅଣ୍ଡ୍‌ ଦ୍ରାକ୍ଷାରସ୍ କି ସୁରା ବେସୁଟ୍‌ ବା ହୁନଣ୍ଡ୍ ମେଣ୍ଡେ ୟାୟନ୍ ଡଙ୍କେତାଗ୍ ମିକା ପବିତ୍ର ଆତ୍ମାତେ ସାରେ ଆଦ୍‍ତେ ।
LUK 1:16 ଆସୁଣ୍ଟ୍ ଅଣ୍ଡ୍‌ ଇସ୍ରାଏଲ ନାରୁଡ଼୍ ଲୋପ୍ ନାର୍ଗେ ନାରୁଡ଼୍‍କିଙ୍କ୍ ପ୍ରବୁ ଅଡ଼୍‌‍ୱାଦ୍ ଇଶ୍ୱର୍‌ତେ ସେଙ୍ଗେ ମାଲ୍‍ପି ମାଡ଼ି ତାତିତଣ୍ଡ୍ ।
LUK 1:17 ୟାୟବାବାନ୍ ହୃଦୟ୍ ପିଲାନ୍ ସେଙ୍ଗେ ନୁ ପୁନ୍‍ୱେ ନାରୁଡ଼୍ ଦାର୍ମିକ୍ ନାରୁଡ଼୍‍ତେ ବୁଦ୍‍ତେ କାମ୍ ମାଡ଼ାନ୍ ସେଙ୍ଗେ ମାଲ୍‍ପାନଙ୍କ୍ ମେଣ୍ଡେ ପ୍ରବୁନ୍ ସେଙ୍ଗେ ସାଏତ୍‍ ଦଣ୍ଡଆତ୍‍ତେ ୱେରନ୍ ନାରୁଡ଼୍‌ମଣ୍ଡଲି ତିଆର୍ ମାଡ଼ାଙ୍କ୍ ଅଣ୍ଡ୍‌ ଏଲିୟତେ ଆତ୍ମା ନୁ ଶକ୍ତିତେ ଅନ୍‌ ମୁନ୍‍ନେ ତାକି ଆଦ୍‍ତନ୍ ।”
LUK 1:18 ଇଗେ ଜିକରୀୟ ଦୂତ ତିଙ୍କ୍ କେତ୍ତଣ୍ଡ୍, “ନାନ୍ ବେନ୍ ଚିହ୍ନେତେ ଇଦ୍ ପୁନ୍‍ତାନ୍ ? ବାତେଙ୍କ୍ ଇତ୍କେ ନାନ୍ ତ ମୁଇତାନ୍, ମେଣ୍ଡେ ନା ମୁତେନ୍ ବୟଷ୍ ଗାଟି ଆଦୁତେ ।”
LUK 1:19 ଦୂତ ଅଂକିଙ୍କ୍‌ କେତ୍‍ତେ, “ନାନ୍ ଗାବ୍ରିଏଲ୍‌, ନାନ୍ ପରମେଶ୍ୱର୍ ତେ ମୁନ୍‍ନେ ନିଶ୍‍ମାନ୍ଦାନ୍, ମେଣ୍ଡେ ନିକିଂଙ୍କ୍ କେତାଙ୍କ୍ ନୁ ଇଦ୍ ସୁସମାଚାର୍ କେଞ୍ଜ୍‍ପାଙ୍କ୍ ନାନ୍ ୱାସମିନ୍ଦେନ୍ ।
LUK 1:20 ଉଡ଼ାଟ୍, ଇଦ୍ ସାରେ ଗଟେମ୍ ହାଇୱା ଦିନ୍ ଯାକ ନିମେ କନ୍ଦାହାସ୍‍ ଗଟ୍‍ତ୍ରିୟ୍ ପାର୍‍ୱିନ୍, ନାୱାଦ୍ ବେନ୍ ସାରେ ବାକ୍ୟ କେତ୍‍ତାନ୍ ଆଦ୍ ଟିକ୍ ଦିନାମ୍‍ତେ ସାରେ ଆଦ୍‍ତେ, ଆଦ୍ ସାରେତିଙ୍କ୍ ନିମେ ବିଶ୍ୱାସ୍ ମାଡ଼୍‍ୱିନ୍ ।”
LUK 1:21 ଆଦ୍ ଦିନାମ୍‍ତେ ନାରୁଡ଼୍ ଜିକରୀୟଙ୍କ୍ କେପି ମାତ୍‍ତଡ଼୍, ମନ୍ଦିର୍ ତାଗ୍ ଅନ୍‌‍ୱାଦ୍ ଡେରି ଆତ୍‍ତାଙ୍କ୍ ଅଡ଼୍‌‍ ଦାଦ୍‍ରେଲ୍‍ତଡ଼୍ ।
LUK 1:22 ବାତେଙ୍କ୍ ଇତ୍କେ ଅଣ୍ଡ୍‌ ବାଇଦେୱାସ୍ ଅଡ଼୍‌‍କିଂଙ୍କ୍ ଗଟ୍ କେତାଙ୍କ୍ ପାର୍‍ୱଣ୍ଡ୍; ଇଗେ ଅଣ୍ଡ୍‌ ମନ୍ଦିର୍‍ତାଗ୍ ତନ୍ଦ୍‍ତଣ୍ଡ୍‍ ଇଞ୍ଜ ଆତ୍‍ତଣ୍ଡ୍ ଇଞ୍ଜ ଅଡ଼୍‌‍ ପୁତ୍‍ତଡ଼୍ । ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ ଚିନ୍ନେ ମାଡ଼ାଙ୍କ୍ ପସ୍‍ପ୍‍ତଣ୍ଡ୍ ନୁ କନ୍ଦାଲ୍ ହାସ୍ ମାତ୍‍ତଣ୍ଡ୍ ।
LUK 1:23 ପେର୍‍କେ ଅନ୍‌‍ୱାଦ୍ ସେବାମାଡ଼ାନ୍ ଦିନାକ୍ ତେର୍‍ତାଙ୍କ୍, ଅଣ୍ଡ୍‌ ତାମ୍ ଲୋନ୍‌ ମାଲ୍‍ସ୍ ଆତ୍‍ତଣ୍ଡ୍ ।
LUK 1:24 ତାନ୍ ମୁତ୍‍ତେ ଏଲୀଶାବେତ୍‌ ଡଙ୍କେତ୍ ଆତ୍‍ତେ, ମେଣ୍ଡେ ଏଇଙ୍ଗ୍ ନେଲ୍‍ଞ୍ଜ୍ ହେଉନା ଇଦ୍ ବିଷୟ ବେନଙ୍କେ କେଲକଟ ମିଞ୍ଜିମାଞ୍ଜ୍ ମାତ୍‍ତା,
LUK 1:25 ମେଣ୍ଡେ ଏଲୀଶାବେତ୍ କେତ୍‍ତା, “ନାରୁଡ଼୍‍ତେ ଲୋପେ ନା ଅପ୍‍ମାନ୍ ଦୁରାମ୍ ମାଡ଼ାନ୍ ସେଙ୍ଗେ ପ୍ରବୁ ଦାୟାମାଡ଼ି ନା ମାଇଦିଙ୍କ୍ ଇଲା ମାଡ଼ିମିନ୍ଦେଣ୍ଡ୍ ।”
LUK 1:26 ଏଲୀଶାବେତ୍ ଡଙ୍କେତ୍ ଆଦ୍‍ତେ ଆରୁ ନେଲ୍ଞ୍ଜ୍‍ତେ ପେର୍‍କେ ଇଶ୍ୱରତାଦ୍ ଗାବ୍ରିଏଲ୍‌ ଦୂତ ଗାଲିଲୀତେ ନାଜରିତିୟ ପେଦେର୍‍ତେ ନଗର୍‍ତାଗ୍ ଅରଟ୍ ପିକିଡ଼୍ ଗାର୍‍ରେ ପ୍ରେରିତ୍ ଆତ୍‍ତେ;
LUK 1:27 ଦାଉଦ୍‍ ବଂଶତେ ଯୋଷେପ୍ ପେଦେର୍ ତଣ୍ଡ୍ ୱେର୍‍ଣ୍ଡ୍ ନାରୁଡ଼୍ ତଡ଼୍ ଆଦିନାଦ୍ ବେନ୍‍ଆସ୍ ମାତ୍‍ତେ; ଆଦ୍ ପିକିଡ଼୍ ତେ ପେଦେର୍ ମରୀୟମ୍‍ ।
LUK 1:28 ଗାବ୍ରିଏଲ୍ ଦୂତ୍ ଆଦିନ୍ ଗାର୍‍ରେ ୱାସ୍ କେତ୍ତଣ୍ଡ୍, “ଆଗୋ ଅନୁଗ୍ରହପାତ୍ରୀ, ନିୟାଦ୍ ଲେକେତ୍ ହାୟି, ପ୍ରବୁ ନି ତଡ଼୍ ।”
LUK 1:29 ବାତେଙ୍କ୍ ଇତ୍କେ ଆଦ୍ ଇଦ୍ ବାକ୍ୟତେ ଗାଟି ଦାନ୍ଦେ ଆତ୍‍ତେ ନୁ ଇଦ୍ ବେସତ୍ କବର୍ ହିଞ୍ଜ ମାନ୍‍ ଦେ ହାଲ୍‍ସାନଙ୍କ୍ ପସ୍‍ପିତ୍‍ତେ ।
LUK 1:30 ଆସୁଣ୍ଟ୍ ଦୂତ ତାକିଂଙ୍କ୍ କେତ୍‍ତେ, “ଆଗୋ ମରୀୟମ୍‍, ‘ୱେର୍‍ମା,’ ବାତେଙ୍କ୍ ଇତ୍କେ ନିମେ ଇଶ୍ୱର୍‌ତାଦ୍ ଆର୍ଶିବାଦ୍ ହାସମିନ୍ଦେନି ।
LUK 1:31 ମେଣ୍ଡେ ଉଡ଼େ, ନିମେ ଡଙ୍କେତ୍ ଆସ୍‍ସ ୱେର୍‍ଣ୍ଡ୍ ମାର୍‍ ଜନମ୍ ମାଡ଼ିତି ନୁ ଅନ୍‌ ପେଦେର୍ ଜିସୁ ଇଦ୍‍ତିନ୍ ।
LUK 1:32 ଅଣ୍ଡ୍‌ ମହାନ୍ ଆଦ୍‍ତନ୍ ନୁ ସତ୍‍ଇଶ୍ୱର୍‍ତେ ମାର୍‍ ହିଞ୍ଜ ପୁନ୍‍ତଡ଼୍; ପ୍ରବୁ ଇଶ୍ୱର୍‌ ଅଂକିଙ୍କ୍‌ ତାମ୍ ଆନୀଦାଦିଡ଼୍ ଦାଉଦ୍‍ ତେ ରକମ୍ ରାଜାଲ୍ ମାଡ଼ିତନ୍ ।
LUK 1:33 ଅଣ୍ଡ୍‌ ଯାକୁବ୍ ବଂଶତାଗ୍ ଯୁଗ୍‍ଯୁଗ୍ ତିଙ୍କ୍ ଶାସନ୍‍ ମାଡ଼ିତନ୍, ମେଣ୍ଡେ ଅନ୍‌ ରାଜ୍ୟ ଶେଷ୍ ଆୟ୍‍ୟ !”
LUK 1:34 ବାତେଙ୍କ୍ ଇତ୍କେ ମରୀୟମ୍‍ ଦୂତ ତିଙ୍କ୍ କେତ୍‍ତେ, “ଇଦ୍ ବେଲା ଆଦ୍ ତେ ? ନାନ୍ ତ ବେନ୍ ମାନେଇ ତଡ଼୍ ଉଞ୍ଜନ୍ ।”
LUK 1:35 ଦୂତ ଆଦିଙ୍କ୍ କେତ୍‍ତେ, “ପବିତ୍ର ଆତ୍ମା ନି ପରୁ ଡିଗିତେ ନୁ ସତ୍‍ଇଶ୍ୱର୍‍ତେ ଶକ୍ତିତେ ନିକିଂଙ୍କ୍ ମିସିତେ, ନୁ ବେନ ଜନମ୍ ଆଦ୍‍ତଣ୍ଡ୍, ଅଣ୍ଡ୍‌ ପବିତ୍ର ନୁ ଇଶ୍ୱର୍‌ତେ ମାର୍‍ ହିଞ୍ଜ ନାରୁଡ଼୍ ପୁନ୍‍ତଡ୍ ।
LUK 1:36 ମେଣ୍ଡେ ଉଡେ, ମି ଆତ୍ମୀୟ ଏଲୀଶାବେତ୍‌ ମିକା ଡକ୍ରି ବୟଷ୍ ତେ ୱେର୍‍ଣ୍ଡ୍ ମାର୍‍ ଡଙ୍କେତ୍ ଆସ୍‍ସ ମିନ୍ଦେ । ବାଦିଙ୍କ୍ ୱାଞ୍ଜଲ୍ ହିଞ୍ଜ କେସ ମାତ୍‍ତଡ଼୍, ତାମ୍‍ୱାଦ୍ ଇଞ୍ଜେ ଆରୁ ନେଲଞ୍ଜ୍ ଆଦୁତ୍‍ତେ;
LUK 1:37 ବାତେଙ୍କ୍ ଇତ୍କେ ଇଶ୍ୱର୍‌ତେ ପାୟୁର୍ କଞ୍ଜ୍ ପେଇତାନ୍ ବେନ୍ ବାକ୍ୟ ମିକା ଶକ୍ତିହୀନ ଆୟ ।”
LUK 1:38 ଇଗେତିଞ୍ଚ ମରୀୟମ୍‍ କେତ୍‍ତେ, “ଉଡେ ନାନ୍ ପ୍ରବୁନ୍ ଦାସୀ; ନିୱାଦ୍ ବାକ୍ୟ ଲେକାମ୍ ନାୟାଗେ ହାୟି ।” ତାନ୍ ପେର୍କେ ଦୂତ ଆଦିନାଗାଙ୍କ୍ ମାଲ୍‍ସ୍ ଆତ୍‍ତେ ।
LUK 1:39 ଇଦ୍ ସମୟ୍ ତେ ମରୀୟମ୍‍ ତେଦି ଯିହୁଦା ଦେଶ୍‍ତେ ମେଟେତାଗ୍ ମାନ୍ଦାନ୍ ୱେରନ୍ ନଗର୍‍ତାଗ୍ ଆତ୍‍ତେ,
LUK 1:40 ମେଣ୍ଡେ ଆଦ୍ ଜିକରୀୟତେ ଲୋନ୍‌ ହସି ଏଲୀଶାବେତ୍‌ ତିଙ୍କ୍ ନମସ୍କାର୍ ମାଡ଼୍‍ତେ ।
LUK 1:41 ମେଣ୍ଡେ ଆଦ୍ ମରୀୟମ୍‍ ତେ ନମସ୍କାର୍ କେଞ୍ଜ୍‍ତେ ସାଙ୍ଗେ ସାଙ୍ଗେ ବାବୁ ଏଲୀଶାବେତ୍‌ ଡଙ୍କେତ୍ ଲୋପେମାଞ୍ଜ୍ ହେନ୍ଦଣ୍ଡ୍, ମେଣ୍ଡେ ଏଲୀଶାବେତ୍‌ ପବିତ୍ର ଆତ୍ମାତେ ପୁରା ହାସ୍
LUK 1:42 ଗାଟି ଲେଙ୍ଗ୍‍ଦେ କେତ୍‍ତେ, “ନାଟାନ୍ ଲୋପ୍ ନିମେ ଦନ୍ୟ, ମେଣ୍ଡେ ଦନ୍ୟ ନି ଡଙ୍କେତ୍ କାୟେ ତିଙ୍କ୍ ।
LUK 1:43 ମେଣ୍ଡେ, ନା ପ୍ରବୁନ୍ ୟାୟ ଯେ ନା ଗାର୍‍ରେ ୱାଦ୍‍ତେ, ନାୱାଦ୍ ଇଦ୍ ସାଏତ୍ ବିଷୟ ବେଗେତିନ୍‍ସ୍ ଆତ୍‍ତେ ?
LUK 1:44 ଇଦିନ୍ ସେଙ୍ଗେ ଉଡ଼େ, ନି ନମସ୍କାର୍ କେଞ୍ଜ୍ ତେ ପେର୍‍କେ ନା ଡଙ୍କେତ୍ ଲୋପେ ବାବୁ ସାର୍‍ଦେ ଆସ୍ ହେନ୍ଦ୍ ତଣ୍ଡ୍ ।
LUK 1:45 ପ୍ରବୁ ବାତେଏ କେତ୍‍ତଣ୍ଡ୍ ହାଉସାରେ ଅଣ୍ଡ୍‌ ସାରେ ମାଡ଼ିତନ୍ ଇଞ୍ଜ ନିମେ ବିଶ୍ୱାସ୍ ମାଡ଼୍‍ତାଙ୍କ୍ ନିମେ ଆର୍ଶିବାଦ୍ ହାତ୍‍ତି ।”
LUK 1:46 ତାନ୍ ପେର୍‍କେ ମରୀୟମ୍‍ କେତ୍‍ତେ, “ନା ଜିୱେ ପ୍ରବୁନ୍ ପ୍ରସଂଶା ମାଡୁତେ,
LUK 1:47 ମେଣ୍ଡେ ନାୱାଦ୍ ଆତ୍ମା ନା ତ୍ରାଣକର୍ତ୍ତାଲ୍ ଇଶ୍ୱର୍‌ତାଗ୍ ସାର୍‍ଦେ ମାଡ଼ମିନ୍ଦେ;
LUK 1:48 ଆଦିନ୍ ସେଙ୍ଗେ ନାନ୍ ୱେରନ୍ ସୁଦୁର୍ ଦାସୀ ହାତ୍କେମିକା ଅଣ୍ଡ୍‌ ନାକିଂଙ୍କ୍ ହେର୍କା ମାଡ଼୍‍ତଣ୍ଡ୍, ଇଞ୍ଜେ ସାରେତଡ଼୍ ନାକିଂଙ୍କ୍ ୱେଡ଼୍‍କେ ନାରୁଡ଼୍ ଇଞ୍ଜ କେତିତଡ଼୍ । ମେଣ୍ଡେ ଉଡ଼ାଟ୍, ଯୁଗ୍‍ଯୁଗ୍ ମାନେଇ ସାର୍‍ରେତଡ୍ ନାକିଂଙ୍କ୍ ଦନ୍ୟ ହିଞ୍ଜ କେତିତଡ଼୍‍,
LUK 1:49 ବାତେଙ୍କ୍ ଇତ୍କେ ସାରେତିଙ୍କ୍‍ ଶକ୍ତିନଣ୍ଡ୍‌ ଇଶ୍ୱର, ଅଣ୍ଡ୍‌ ନା ସେଙ୍ଗେ ମହାନ୍‍ କାମ୍‍ ମାଡ଼୍‍ତଣ୍ଡ୍; ଅନ୍‌‍ୱାଦ୍ ପେଦେର୍ ପବିତ୍ର,
LUK 1:50 ମେଣ୍ଡେ ଅଂକିଙ୍କ୍‌ ୱେର୍‍ତାନ୍ ନାରୁଡ଼୍‍ତେ ସେଙ୍ଗେ ଅନ୍‌‍ୱାଦ୍ ଦୟା ଯୁଗ୍‍ଯୁଗ୍ ମାନ୍‍ତା ।
LUK 1:51 ଅଣ୍ଡ୍‌ ତାନ୍‍ୱାଦ୍ କାଇତାଦ୍ ଶକ୍ତିତିଙ୍କ୍ କେତ୍‍ତଣ୍ଡ୍, ଆଂକାର ମାଡ଼ମାନ୍ଦାନ୍ ନାରୁଡ଼୍‍କ୍ ତାମ୍ ହୃଦୟ୍‍ତେ ଆଲ୍‍ସାନାଦ୍‍ ୱେରେୱେରେ ମାଡ଼ିମିନ୍ଦେଣ୍ଡ୍,
LUK 1:52 ଅଣ୍ଡ୍‌ ଶକ୍ତିତଡ଼୍ ରାଜାଲଡ଼୍‍କ୍ ତାମ୍ ସିଂହାସନ୍ ତେ କଞ୍ଚ୍‌ ମଦଲ୍ ତାତ୍‍ତଣ୍ଡ୍ ନୁ ଗରିବ୍ ନାରୁଡ଼୍‍କ୍ ପରୁ ତେହେତ୍‍ତଣ୍ଡ୍,
LUK 1:53 ଅଣ୍ଡ୍‌ କାର୍ୱିନ୍ ନାରୁଡ଼୍‍କ୍ ସାଏତ୍ ଜିନିଷ୍ ତେ ନିଇତ୍‌ତଣ୍ଡ୍‌, ସାଉକାର୍ ନାରୁଡ଼୍‍କ୍ ଆସାମ୍ କାଇଦେ ରହସ୍ ମିନ୍ଦେଣ୍ଡ୍ ।
LUK 1:54 ମା ପିତୃପୁରୁଷତେ ସେଙ୍ଗେ କେତ୍‍ତାଦ୍ ଅନ୍‌‍ୱାଦ୍ ବାକ୍ୟଲେକାମ୍ ତେ ଅଣ୍ଡ୍‌ ଆବ୍ରାହାମ୍ ନୁ ତାନ୍ ମାର୍‍କିଡ୍ ସେଙ୍ଗେ,
LUK 1:55 ଯୁଗ୍‍ଯୁଗ୍ ଦୟା ହେର୍କା ମାଡ଼ାନ୍ ସେଙ୍ଗ୍ ଅବ୍ରାହାମ୍‌ ନୁ ତାନ୍‍ ଦାସ୍ ଇସ୍ରାଏଲ ତେ ଉପକାର୍ ମାଡ଼ତଣ୍ଡ୍ ।”
LUK 1:56 ମେଣ୍ଡେ, ମରୀୟମ୍‍ ତାନ୍ ତଡ଼୍ ମୁଣ୍ଡ୍ ନେଲଞ୍ଜ୍ ମାଞ୍ଜ୍ ତାମ୍ ଲୋନ୍‌ ମାଲ୍‍ସ୍ ଆତ୍‍ତେ ।
LUK 1:57 ପେର୍‍କେ ଏଲୀଶାବେତ୍‌ ତେ ସାୟେ ମାଡ଼ାନ୍ ଅଦାନ୍‌ଦିନାମ୍‌ ଦିନାମ୍ ହେୱତାଙ୍କ୍, ଆଦ୍ ୱେର୍‍ଣ୍ଡ୍ ମାର୍‍ ଜନମ୍ ମାଡ଼୍‍ତେ,
LUK 1:58 ମେଣ୍ଡେ ପ୍ରବୁ ଯେ ତାନ୍ ମାଇଦିଙ୍କ୍ ଗାଟି ଦୟା ମାଡ଼୍‍ତଣ୍ଡ୍, ଇଦ୍ କେଞ୍ଜି ତାମ୍ ଗାରେତଡ଼୍ ନୁ ଲୋତେନଡ୍ ତାନ୍ ତୋଡ୍ କାଇଲି ସାର୍‍ଦେ ମାଡ଼୍‍ତଡ଼୍ ।
LUK 1:59 ଆଟ୍‌ ଦିନାତିଙ୍କ୍ ଅଡ଼୍‌‍ ବାବୁଙ୍କ୍ ହେକ୍ ମାଡ଼ାଙ୍କ୍ ୱାତତୋଡ୍ ନୁ ତାମ୍ ବାବାନ୍ ପେଦେର୍ ଲେକାମ୍ ଅନ୍‌ ପେଦେର୍ ଜିକରୀୟ ହିଦାଙ୍କ୍ ଇଚ୍ଛା ମାଡ଼୍‍ତଡ଼୍ ।
LUK 1:60 ବାତେଙ୍କ୍ ଇତ୍କେ ତାମ୍ ୟାୟ କେତ୍‍ତେ, “ଇଲ୍‍ଲେ, ଅନ୍‌ ପେଦେର୍ ଯୋହନ୍‌ ଆଦ୍ ତେ ।”
LUK 1:61 ଅଡ଼୍‌‍ ତାକିଂଙ୍କ୍ କେତ୍‍ତଡ଼୍‍, “ମି ଆତ୍ମାତେ ନାରୁଡ଼୍ ଲୋପ୍ ତ ବେନନାଦ୍ ଇସତ୍ ପେଦେର୍ ଇଲ୍‍ଲେ ।”
LUK 1:62 ଇଗେ ଅଂକିଙ୍କ୍‌ ବାତ୍ ପେଦେର୍ ହିଦାନାଦ୍ ହିଞ୍ଜ ତାମ୍ ବାବାଲ୍ ଇଚ୍ଛା ମାଡ଼ୁତଣ୍ଡ୍, ଆଦ୍ ଅଡ଼୍‌‍ ଅଂକିଙ୍କ୍‌ ଚିନ୍ନେ ମାଡ଼ି ପଚାର୍ ମାଡ଼୍‍ତଡ଼୍ ।
LUK 1:63 ଆଗେ ଆଦ୍ ୱେରନ୍ ଲେକ୍‍ତଦ୍ ଇଦ୍ ଲେକାମ୍ ଲେକ୍‍ତଣ୍ଡ୍, “ଅନ୍‌ ପେଦେର୍ ଯୋହନ୍‌ ।” ଇଗେ ସାର୍‍ରେ ତୋଡ୍ ଦାଦ୍‍ରେଲ୍‍ତଡ଼୍ ।
LUK 1:64 ମେଣ୍ଡେ, ସେନେକ୍ ତିଙ୍କ୍ ତାନ୍ ପାୟୁର୍ ନୁ ୱାଞ୍ଜେର୍ ଟେଣ୍ଡି ଆତ୍‍ତେ ନୁ ମେଣ୍ଡନ୍ଦାମ୍ ଅଣ୍ଡ୍‌ ଗଟ୍‍ତିର୍‍ୟି ପରମେଶ୍ୱର୍‍ ତେ ପ୍ରସଂଶା ମାଡ଼ାଙ୍କ୍ ପସ୍‍ପିତ୍‍ତଣ୍ଡ୍ ।
LUK 1:65 ଇଗେ ତାମ୍ ଗାର୍‍ରେତଡ଼୍ ସାରେ ୱେର୍‍ତଡ୍, ମେଣ୍ଡେ ଇଦ୍ ସାରେ ଗଟ୍ ଯିହୁଦା ଦେଶ୍ ତେ ମେଣ୍ଡନ୍ ଅଞ୍ଚଲତ୍ ସାରେ ପାକେତ୍ ନାରୁଡ଼୍ ତିରିୟା ତିରିୟି ଆତ୍‍ତଡ଼୍,
LUK 1:66 ମେଣ୍ଡେ କେଞ୍ଜାନ୍ ନାରୁଡ଼୍ ସାରେତଡ଼୍ ଆଦ୍ ସାରେ ନିଜ୍‍ନିଜ୍ ହୃଦୟ୍‍ତାଗ୍ ନେଏସ୍ କେତ୍‍ତଡ଼୍‍, “ଇ ବାବୁ ଆଲାତ୍କେ ବାତ୍ ଆଦ୍‌ତଣ୍ଡ୍ ? ବାତେଙ୍କ୍ ଇତ୍କେ ପ୍ରବୁନ୍ କାୟ୍ ଅନ୍‌‍ତଡ଼୍ ମିନ୍ଦେ ।”
LUK 1:67 ମେଣ୍ଡେ, ତାମ୍ ବାବାଲ୍ ଜିକରୀୟ ପବିତ୍ର ଆତ୍ମାତେ ପୁରା ଆସ୍ ଇଦ୍ ବାବବାନି କେତ୍‍ତଣ୍ଡ୍,
LUK 1:68 “ଇସ୍ରାଏଲ୍ ତେ ଇଶ୍ୱର୍‌ତାଦ୍ ପ୍ରସଂଶା ଆୟି, ବାତେଙ୍କ୍ ଇତ୍କେ ଅଣ୍ଡ୍‌ ଦାୟାମାଡ଼ି ତାମ୍ ନାରୁଡ଼୍‍କ୍ ତେ ସେଙ୍ଗ୍ ମୁକ୍ତି ତିଆର୍ ମାଡ଼ିମିନ୍ଦେଣ୍ଡ୍;
LUK 1:69 ଅଣ୍ଡ୍‌ ତାମ୍ ଦାସ୍ ଦାଉଦ୍‍ ତେ ବଂଶତ୍ ୱେର୍‍ଣ୍ଡ୍ ଶକ୍ତିନଡ଼୍ ପରିତ୍ରାଣ୍‍କର୍ତ୍ତାଙ୍କ୍ ମା ସେଙ୍ଗ୍ ରହ୍‍ତଣ୍ଡ୍
LUK 1:70 ପୁରାକାଲ୍‌ଦେ କଞ୍ଜ୍ ତାମ୍ ପବିତ୍ର ବାବବାଦୀ ନାରୁଡ଼୍ ତେ ପାୟୁର୍ ତଡ଼୍ ବେଦ୍ ପୁଟୁଙ୍କ୍ କେସ୍ ମାତ୍‍ତଡ଼୍,
LUK 1:71 ଆଦ୍ ରକମ୍ ମାନ୍‍ ଶତ୍ରୁଡ଼ାଗାଙ୍କ୍ ନୁ ମାନ୍‍ ସାରେ ପାସ୍‍କାନ୍ ନାରୁଡ଼୍ ତେ କାଇଦେକଞ୍ଜ୍ ପରିତ୍ରାଣ ତିଆର୍ ମାଡ଼ି ମିନ୍ଦେଡ଼୍,
LUK 1:72 ବେଲା କି ଅଣ୍ଡ୍‌ ମା ଆନିଦାଦିଡ଼୍ ସେଙ୍ଗେ ଦୟା ବ୍ୟବହାର୍ ମାଡ଼ିତନ୍, ନୁ ଅଡ଼୍‌‍ ସେଙ୍ଗେ ମାଡ଼ିମାନ୍ଦାନ୍ ନିଜର୍ ପବିତ୍ର ନିୟମ୍ ହେର୍କା ମାଡ଼ିତନ୍,
LUK 1:73 ମାନ୍‍ ବାବାଲ୍ ଅବ୍ରାହାମ୍‌ତେ ଗାର୍‍ରେ ବେନେ ଶପତ୍‍ ମାଡ଼ିମାତ୍‍ତଣ୍ଡ୍, ତାମ୍ଆଦ୍ ଆଦ୍ ପବିତ୍ର ନିୟମ୍ ହେର୍କା ମାଡ଼ିତନ୍ ।
LUK 1:74 ମାନାଡ଼୍ ମାନ୍‍ ଶତ୍ରୁଡ଼ାଗାଙ୍କ୍ ଉଦ୍ଦାର୍‍ ଆତ୍‍ତାଡ଼୍,
LUK 1:75 ବେଲା କି ମାନାଡ଼୍ ମାୟାଦ୍‌ ସାରେଜିୱୁଣ୍ଡ୍ ଅନ୍‌ ମୁନ୍‍ନେ ପବିତ୍ର ନୁ ଦାର୍ମିକ୍ ଆଦ୍ ପାର୍‍ଦ୍‍ତା ।
LUK 1:76 ହୋ ନା ମାର୍‍ ନିମେ ସାରେତିଙ୍କ୍ ପର ଇଶ୍ୱର୍‌ତେ ୱେର୍‍ଣ୍ଡ୍ ବାବବାଦୀ ଲେକାମ୍ ତିଆର୍ ଆଦ୍‍ତିଡ଼୍ । ନିମେ ପ୍ରବୁନ୍ ୱେର୍‍ଣ୍ଡ୍ ଅଗ୍ରଦୂତ ଲେକାମ୍ ଅନାଦ୍‌ ହାର୍ ତିଆର୍ ମାଡ଼ିତି ।
LUK 1:77 ପାପ୍ କ୍ଷମା ଆଦାନ୍ ତଡ଼୍ ଅଡ଼୍‌‍କିଂଙ୍କ୍ ଯେ ପରିତ୍ରାଣ ଦର୍‍କିତେ, ତାମ୍ ନାରୁଡ଼୍‍କ୍ ଇଦ୍ ଗଟ୍ କେତାଙ୍କ୍ ଆତ୍‌ତେ ।
LUK 1:78 ମାନ୍‍ ଇଶ୍ୱର୍‌ କୃପା ନୁ କୋମଲ ହୃଦୟ୍ ଅଣ୍ଡ୍‌ ମାନ୍‍ ସେଙ୍ଗେ ପରିତ୍ରାଣତେ ପଡ଼ଦ୍ ପେସ୍‍ପିତଣ୍ଡ୍ ।
LUK 1:79 ବେନଡ଼୍ ଡଲାନ୍ ଲେକାମ୍ ଇକାଡ଼୍ ନିଡ଼୍‍କେତାଗ୍ ବାଦ୍‍କିତଡ଼୍, ଅଡ଼୍‌‍କିଂଙ୍କ୍ ଶାନ୍ତି ହାର୍ ତେ ଆଦାନ୍ ସେଙ୍ଗେ ଅଣ୍ଡ୍‌ ସାରେତଡ଼୍ ପରୁ ସ୍ୱର୍ଗତେ ୱେସ୍ ମାଡ଼ିତନ୍ ।”
LUK 1:80 ମେଣ୍ଡେ, ବାବୁ ପେର୍‍ସି ଆତ୍ମାତେ ଶକ୍ତିତଣ୍ଡ୍‌ ଆଦାଙ୍କ୍ ପସ୍ପ୍‍ତଣ୍ଡ୍ ନୁ ଇସ୍ରାଏଲତେ ଗାର୍‍ରେ କେଲ୍‍ୱାଙ୍କ୍ ହାଇୱା ଯାକ୍ ଆଞ୍ଚିନା ମାତ୍‍ତଣ୍ଡ୍ ।
LUK 2:1 ଆଦ୍ ଦିନାମ୍‍ତେ ରୋମ୍‍ ରାଜ୍ୟ ସମ୍ରାଟ୍ ଅଗଷ୍ଟ କାଇସର୍‍ତେ ତଡ଼୍ ଦେଶ୍‍ତେ ସାରେ ନାରୁଡ଼୍ ପେଦେର୍ ଲେକାନ୍‍ ସେଙ୍ଗେ ଗଟ୍ କେତାନଙ୍କ୍ ।
LUK 2:2 ସିରିଆତେ ଶାସନ୍‍ କର୍ତ୍ତାଲ୍ କ୍ୱିରୀଣିୟତେ ୱେଲେ ମୁନେ ଦାମ୍ଇଦ୍ ପେଦେର୍ ଲେକାନାଲ୍‌ଦ୍ ଆସ୍ ମାତ୍‍ତେ ।
LUK 2:3 ଆଦିନ୍ ସେଙ୍ଗେ ସାରେତଡ଼୍ ପେଦେର୍ ଲେକାମାଡ଼ାନ୍ ସେଙ୍ଗେ ନିଜେ ନିଜେ ନଗର୍‍ତାଗ୍ ଆଦ୍‍ତଡ଼୍ ।
LUK 2:4 ମେଣ୍ଡ, ଯୋଷେପ୍ ମିକା ପେଦେର୍ ଲେକାମାଡ଼ାନ୍ ସେଙ୍ଗେ ମରୀୟମ୍‍‍ତଡ୍ ଗାଲିଲୀତେ ନାଜରିତିୟ ନଗର୍‍ ତାଗାଙ୍କ୍ ଯିହୁଦା ନାର୍‍ଦେ ବେତ୍‌ଲିହିମ୍‌ ପେଦେର୍ ଡ଼ାଦ୍ ଦାଉଦ୍‍ ତେ ନଗର୍‍ତାଗ୍ ଆତ୍‍ତଡ଼୍, ବାତେଙ୍କ୍ ଇତ୍କେ ଅଣ୍ଡ୍‌ ଦାଉଦ୍ ତେ ବଂଶ ନୁ ନାର୍‍ଦେ ନାରୁଡ଼୍ ମାତ୍‍ତଣ୍ଡ୍;
LUK 2:5 ଅନ୍‌ ତଡ଼୍ ମରୀୟମ୍‍ ତେ ଯୱ ଆସ୍ ମାତ୍‍ତେ ନୁ ଆଦ୍ ଡଙ୍କେତ୍ ମାତ୍‍ତେ ।
LUK 2:6 ଅଡ଼୍‌‍ ଆଦ୍ ପଡ଼ିୟେତାଗ୍ ମାନ୍ଦାନ୍ ୱେଲେ ତାନ୍‍ୱାଦ୍ ପିଲେ ଜନମ୍ ମାଡ଼ାନ୍ ଦିନାମ୍ ୱାସ୍ ହେୱେତେ,
LUK 2:7 ମେଣ୍ଡେ ଆଦ୍ ତାନ୍ ମୁନେ ଜନମ୍‍ତେ ମାର୍‍ ଜନମ୍ ମାଡ଼୍‍ତେ ନୁ ଅଂକିଙ୍କ୍‌ ସିଲେତଡ୍ ଉତ୍‍ତି ଗୋଡ୍ କଟାମ୍ ତାଗ୍ ପଡ଼୍‍ପ୍‍ତଡ଼୍, ବାତେଙ୍କ୍ ଇତ୍କେ ବାଡ଼ା ଲୋନ୍‌‍ତାଗ୍ ଅଡ଼୍‌‍ ସେଙ୍ଗେ ପଡ଼ିୟ୍ ଇଲ୍ୱେ ମାତ୍‍ତେ ।
LUK 2:8 ଆଦ୍ ପଡ଼ିୟେତାଗ୍ ବେସ୍‍କ୍‍ତୁଡ଼୍‍ ମେଣ୍ଢା ମେଇତାନଡ୍ ବାଇଦେ ମାଞ୍ଜ୍ ଇକାଡ଼୍ ତେ ତାମ୍ ମେଣ୍ଢାଙ୍କ୍ କେପ ମାତ୍‍ତଡ଼୍ ।
LUK 2:9 ପ୍ରବୁନାଦ୍ ୱେର୍‍ଣ୍ଡ୍ ଦୂତ ଅଡ଼୍‌‍ ଗାର୍‍ରେ ତଅନ୍‍ତଣ୍ଡ୍, ମେଣ୍ଡେ ପ୍ରବୁନାଦ୍ ଗୌରବ୍ ୱେସ୍ ଅଡ଼୍‌‍ ସାର୍‍ରେପାକେ ତନ୍ଦ୍‍ତେ, ମେଣ୍ଡେ ଅଡ଼୍‌‍ ୱେର୍‍ତଡ଼୍ ।
LUK 2:10 ଆଗେତିନ୍‍ସ୍ ଦୂତ ଅଡ଼୍‌‍କିଂଙ୍କ୍ କେତ୍‍ତେ, “ୱେର୍‍ମାଟ୍, ଉଡାଟ୍, ନାନ୍ ସାରେତଡ଼୍ ନାରୁଡ଼୍ ଡ଼ାଦ୍ ଗାଟି ୱେଡ଼୍‍କେ ତେ ସୁସମାଚାର୍ ମିକିଂଙ୍କ୍ କେତୁତାନ୍,
LUK 2:11 ବାତେଙ୍କ୍ ଇତ୍କେ ନେଣ୍ଡ୍ ଦାଉଦ୍‍ ତେ ନାର୍ ତାଗ୍ ମି ସେଙ୍ଗେ ତ୍ରାଣକର୍ତ୍ତାଲ୍ ଜନମ୍ ଆତ୍‍ତଣ୍ଡ୍, ଅଣ୍ଡ୍‌ କ୍ରିଷ୍ଟ ପ୍ରବୁ ।
LUK 2:12 ମେଣ୍ଡେ, ମି ସେଙ୍ଗେ ଇଦ୍ ଚିହ୍ନେ ଲେକାମ୍ ଆଦ୍‍ତ୍‍ତେ, ମିଡ଼୍ ୱେର୍‍ଣ୍ଡ୍ ବାବୁଙ୍କ୍ ସିଲ୍‍ଲେ ତାଗ୍ ଉତ୍‍ତି ମିକା ଗୋଡ୍ କଟାମ୍ କୁଣ୍ଡତାଗ୍ ଉଞ୍ଜି ମାନ୍ଦାନାଦ୍ ଉଡ଼ିତିଡ଼୍‍ ।”
LUK 2:13 ମେଣ୍ଡେ, ତାନ୍ ପେର୍‍କେ ଆଦ୍ ଦୂତକିନ୍ ତଡ଼୍ ସ୍ୱର୍ଗକନ୍‍ସ୍ ଦୂତକିନ୍ ୱେରନ୍ ବେଡ଼୍‍ୟାଦ୍‍ ମାନ୍ଦେ ତହନ୍ଦି ଇଶ୍ୱର୍‌ତେ ପ୍ରସଂଶା ମାଡ଼ି କେତ୍‍ତା,
LUK 2:14 “ସ୍ୱର୍ଗତାଗ୍ ଇଶ୍ୱର୍‌ତେ ମହିମା, ମେଣ୍ଡେ ପୃତିବିତାଗ୍ ଅନ୍‌ ଶାନ୍ତି ନାରୁଡ଼୍ ତେ ସେଙ୍ଗେ ଶାନ୍ତି ଆୟି ।”
LUK 2:15 ଦୂତକି ତାମାଗା କଞ୍ଜ୍ ସ୍ୱର୍ଗତାଗ୍ ମାଲ୍‍ସ୍ ଆତ୍‍ତେ ସାଙ୍ଗେ ସାଙ୍ଗେ “ମେଣ୍ଢା ପଡ଼୍‍ପାନଡ଼୍ ତାମ୍‍ତାମ୍ ଲୋପେ କେତାକେତି ଆତ୍‍ତଡ଼୍, ୱାଡ଼ାଟ୍, ମାନାଡ଼୍ ବେତ୍‌ଲିହିମ୍‌ ହେଉନା ଆଞ୍ଜ୍, ପ୍ରବୁ ମାନ୍‍ ଇଦ୍ ବେନେ ଗଟନା କେତ୍‍ତଣ୍ଡ୍, ଆଦିଙ୍କ୍ ଉଡ଼ିକାଡ଼୍‍ ।”
LUK 2:16 ଇଗେ ଅଡ଼୍‌‍ ସିଟ୍‍ପାଟ୍ ଆଞ୍ଜ୍ ମେଦ୍‍କି ମିକା ମରୀୟମ୍‍ ନୁ ଯୋଷେପ୍ ତିଙ୍କ୍, ମେଣ୍ଡେ କଟାମ୍ କୁଣ୍ଡତାଗ୍ ବାବୁ ଉଞ୍ଜି ମାନ୍ଦାନାଦ୍ ଉଡ଼୍‌ତଡ୍ ।
LUK 2:17 ଅଡ଼୍‌‍ ଅଂକିଙ୍କ୍‌ ଉଡ଼ି ଆଦ୍ ବାବୁନ୍ ବିଷୟତେ ଦୂତ୍‍କ୍ ଅଡ଼୍‌‍କିଂଙ୍କ୍ ବେନ୍ ଗଟ୍ କେସ୍ ମାତ୍‍ତଡ଼୍, ଆଦ୍ ପ୍ରକାଶ୍ ମାଡ଼୍‍ତଡ଼୍,
LUK 2:18 ମେଣ୍ଡେ ବେସ୍‍କ୍‍ତୁଡ଼୍‍ ନାରୁଡ଼୍ ମେଣ୍ଢା ପଡ଼୍‍ପାନଡ଼୍ ଦେ କଞ୍ଜ୍ ଆଦ୍ ସାରେ ଗଟ୍ କେଞ୍ଜ୍ ତଡ଼୍, ଅଡ଼୍‌‍ ସାରେତଡ଼୍ ଆଗେ ଦାଦ୍‍ରେଲ୍‍ତଡ଼୍ ।
LUK 2:19 ବାତେଙ୍କ୍ ଇତ୍କେ ମରୀୟମ୍‍ ଇଦ୍ ସାରେ ଗଟ୍ ହୃଦୟ୍ ତାଗ୍ ନେସ୍‍ଗାଟି ଚିନ୍ତେ ମାଡ଼ାଙ୍କ୍ ପସ୍‍ପ୍‍ତେ ।
LUK 2:20 ମେଣ୍ଡେ, ମେଣ୍ଢା ପଡ଼୍‍ପାନଡ଼୍‍କିଙ୍କ୍ ଦୂତ୍ ବେଲା କେସ୍ ମାତ୍‍ତଡ଼୍, ଆଦ୍ ଲେକାମ୍ ଅଡ଼୍‌‍ ବାତେଏ କେଞ୍ଜ୍‍ତଡ଼୍‍ ନୁ ଉଡ଼୍‌ତଡ୍, ଆଦ୍ ସାରେତାୱିନ୍ ସେଙ୍ଗେ ଇଶ୍ୱର୍‌ତେ ଗୌରବ୍ ନୁ ପ୍ରସଂଶା ମାଡ଼ି ମାଲ୍‍ସ୍ ଆତ୍‍ତଡ଼୍ ।
LUK 2:21 ଆଟ ଦିନାତେ ଜିସୁଙ୍କ୍ ହେକ୍ ମାଡ଼ାନ୍ ସେଙ୍ଗେ ମନ୍ଦିର୍‌ତାଗ୍ ଆତ୍‍ତଡ଼୍, ଅନ୍‌ ପେଦେର୍ ଜିସୁ ହିତ୍‍ତଡ଼୍; ଇ ପେଦେର୍ ଅଣ୍ଡ୍‌ ଡଙ୍କେତ୍ ମାତ୍‍ତେ ମୁନେଙ୍କ୍ ଦୂତ ଇସ୍‌ ମାତ୍‍ତା ।
LUK 2:22 ପେର୍‍କେ ବେସୁଣ୍ଟ୍ ମଶାନାଦ୍ ବ୍ୟବସ୍ଥା ଲେକାମ୍ ତେ ତାମ୍‍ୱାଦ୍ ସୁସ୍ଥ ଆଦାନ୍ ଦିନାମ୍ ସାରେ ଆତ୍‍ତେ, ତ ଅଡ଼୍‌‍ ବାବୁଙ୍କ୍ ପ୍ରବୁନ୍ ଗାର୍‍ରେ ଉତ୍ସର୍ଗ ମାଡ଼ାଙ୍କ୍ ସେଙ୍ଗେ ଯିରୁଶାଲେମ୍‍ତାଗ୍ ମନ୍ଦିର୍‌ତାଗ୍ ଆତ୍‍ତଡ଼୍ ।
LUK 2:23 ବେଲା ପ୍ରବୁନ୍ ବ୍ୟବସ୍ଥା ଶାସ୍ତ୍ରତାଗ୍ ଲେକ୍‍ତାଦ୍ ଲେକାମ୍ ଆସୁଣ୍ଟ୍ ସାର୍‍ରେତଡ୍ ମୁନେ ଜନମ୍ ଆତ୍‍ତେ ପିଲାଙ୍କ୍ ମାର୍‍କିଡ଼୍ ପ୍ରବୁନ୍ ଉଦ୍ଦେଶ୍ୟତେ ପବିତ୍ର ହିଞ୍ଜ ଗଣିତ ଆଦ୍‍ତଡ଼୍,
LUK 2:24 ମେଣ୍ଡେ ମିକା ଇଦ୍ ଗଟ୍ ଲେକାମ୍ ତେ ତାମ୍ ପ୍ରବୁନ୍ ଉଦ୍ଦେଶ୍ୟତେ ଉତ୍ସର୍ଗ ମାଡ଼ାନ୍ ସେଙ୍ଗେ ନୁ ପ୍ରବୁନ୍ ବ୍ୟବସ୍ଥା ଶାସ୍ତ୍ରତାଗ୍ ଲେକାଆତ୍‍ତେ ବିଷୟ ଲେକାମ୍ ତେ ରେଣ୍ଡ୍ ବଡେ ବା ରେଣ୍ଡ୍ ପାର୍‍ୱେ ପିଟେ ପିଲା ବଲିଦାନ୍ ମାଡ଼ାନ୍ ସେଙ୍ଗେ ଅଂକିଙ୍କ୍‌ ଯିରୁଶାଲେମ୍ ତାଗ୍ ହତ୍‍ତଡ଼୍ ।
LUK 2:25 ମେଣ୍ଡେ ଉଡାଟ୍, ଯିରୁଶାଲେମ୍ ତାଗ୍ ଶିମୀୟୋନ ପେଦେର୍ ତଣ୍ଡ୍ ୱେର୍‍ଣ୍ଡ୍ ଦାର୍ମିକ୍ ନୁ ଲେକେତ୍ ନାରୁଡ଼୍ ମାତ୍‍ତଣ୍ଡ୍; ଅଣ୍ଡ୍‌ ଇସ୍ରାଏଲ ତେ ଉଦ୍ଦାର୍‍ କର୍ତ୍ତାନ୍ କେପି ମାତ୍‍ତଣ୍ଡ୍, ମେଣ୍ଡେ ପବିତ୍ର ଆତ୍ମା ଅନ୍‌ ତଡ଼୍ ମାତ୍‍ତେ ।
LUK 2:26 କ୍ରିଷ୍ଟନ୍ ଉଦ୍ଦାର୍ କର୍ତ୍ତାଲ୍ ତନ୍ଦ୍‍ୱେ କଟ ଅନ୍‌‍ୱାଦ୍ ଯେ ଡଲାନାଦ୍ ଆୟ୍‍ୟ, ପବିତ୍ର ଆତ୍ମା ତଡ଼୍ ଅଂକିଙ୍କ୍‌ ଇଦ୍ ଗଟ୍ କେସ୍ ମାତ୍‍ତଡ଼୍ ।
LUK 2:27 ଅଣ୍ଡ୍‌ ଆତ୍ମାତେ ତଡ଼୍ ଚାଲେମ୍ ଆସ୍ ମନ୍ଦିର୍‌ ତାଗ୍ ଆତ୍‍ତଣ୍ଡ୍, ମେଣ୍ଡେ ସୁଦୁନ୍ ଜିସୁନ୍ ୟାୟବାବ ବେସୁଣ୍ଟ୍ ତାନ୍ ବିଷୟତେ ବ୍ୟବସ୍ଥାତେ ପାଲନ୍ ଲେକାମ୍ ପାଡ଼ିୟି ମାଡ଼ାନ୍ ସେଙ୍ଗେ ଅଂକିଙ୍କ୍‌ ମନ୍ଦିର୍‌ ଲୋପେ ତାତ୍‍ତଡ଼୍,
LUK 2:28 ଆସୁଣ୍ଟ୍ ଶିମୀୟୋନ ସୁଦୁନ୍ ବାବୁଙ୍କ୍ ଏତି ଇଶ୍ୱର୍‌ ତିଙ୍କ୍ ଦନ୍ୟବାଦ୍ ଇସ୍‌ କେତ୍‍ତଣ୍ଡ୍,
LUK 2:29 “ହୋ ପ୍ରବୁ, ଇଞ୍ଜେ ନିମେ ନି ବାକ୍ୟ ଲେକାମ୍ ତେ ନିଜ୍ ଦାସଙ୍କ୍ ଶାନ୍ତିତେ ଆଦାଙ୍କ୍ ଗଟ୍ ହିସମିନ୍ଦେନି;
LUK 2:30 ବାତେଙ୍କ୍ ଇତ୍କେ ନା କଣ୍ଡେ ନିୱାଦ୍ ପରିତ୍ରାଣ ଉଡିମିନ୍ଦେ,
LUK 2:31 ବାତେଏ ମିଡ଼୍ ସାରେତଡ଼୍ ନାରୁଡ଼୍ ତେ ମୁନ୍‍ନେ ତିଆର୍ ମାଡ଼ିମିନ୍ଦେଡ଼ି,
LUK 2:32 ମେଣ୍ଡେ ବିଜାତିନାରୁଡ଼୍‍କ୍ ସତ୍ ତଅତାନ୍ ୱେସ୍, ମେଣ୍ଡେ ମି ନାରୁଡ଼୍ ଇସ୍ରାଏଲତଡ଼୍‍କ୍ ଗୌରବ୍ ମାଡ଼୍‍ତି ।”
LUK 2:33 ପିଲେତ୍ ବିଷୟତେ ଶିମୀୟନ୍ ବାତେଏ କେତ୍‍ତଣ୍ଡ୍ ଆଦ୍ କେଞ୍ଜି ତାମ୍ ୟାୟବାବ ବାକ୍‍ୱା ଆସମାତ୍‍ତଡ୍ ।
LUK 2:34 ମେଣ୍ଡେ, ଶିମୀୟୋନ ଅଡ଼୍‌‍କିଂଙ୍କ୍ ଆର୍ଶିବାଦ୍ ମାଡ଼ି ତାମ୍ ୟାୟ ମରୀୟମ୍‍ ତିଙ୍କ୍ କେତ୍‍ତେ, “ଉଡ଼େ ଇଣ୍ଡ୍ ପିଲେତ୍ ମାଇଦିଙ୍କ୍ ଇସ୍ରାଏଲତେ ଲୋପେକେ ନାର୍ଗେ ନାରୁଡ଼୍ ଦଷି ଆଦ୍‍ତଡ଼୍ ନୁ ନାର୍ଗେ ନାରୁଡ଼୍ ଉଦ୍ଦାର୍ ଆଦ୍‍ତଡ଼୍, ଇଦିନ୍ ସେଙ୍ଗେ ଇଶ୍ୱର୍‌ତେ ତଡ଼୍ ହେଞ୍ଜ୍‍ତାଦ୍ । ବେନନ୍ ବିରୁଦ୍‍ତେ ନାର୍ଗେ ନାରୁଡ଼୍ ଗଟ୍ କେତିତଡ଼୍ ଇଦ୍ ରକମ୍ ଚିହେହ୍ନେ ଲେକାମ୍ ଆଦ୍‍ତନ୍ ।
LUK 2:35 ନାର୍ଗେ ଅଂକିଙ୍କ୍‌ ବିରୁଦ୍ ମାଡ଼ି ନିଜର୍ ହୃଦୟ୍‍ତାଗ୍ ମିସ୍‍ତାଦ କେତ୍‍ତଡ଼୍ । ଦୁଃକାମ୍ ରକମ୍ ୱେରନ୍ ୱାୟେମାନ୍ଦାନ୍ ଚୁର୍‌ତଡ଼୍ ହୃଦୟ୍ ତିଙ୍କ୍ ଦର୍‍ରେ ମାଡ଼ିତଡ଼୍ ।”
LUK 2:36 ମେଣ୍ଡେ, ହାନ୍ନା ପେଦେର୍ ତେ ୱେର୍‍ଡ୍ ଡକ୍‍ରିଲ୍ ବାବବାଦୀନି ମାତ୍‍ତେ; ଆଦ୍ ଆଶେର୍ ବଂଶତାଦ୍ ପିନୂୟେଲ ତେ ପିକିଡ଼୍ । ଆଦିନାଦ୍ ଗାଟି ବୟଷ୍ ଆସ୍ ମାତ୍‍ତେ; ଆଦ୍ କୁମାରୀ ଅବସ୍ଥାତେ ପେର୍‍କେ ସାତ୍‍ହେଣ୍ଡ୍ ମୁଦ୍‍ପାନ୍‍ ତଡ଼୍ ମାତ୍‍ତେ ନୁ ଚୁଉରାଅଶୀ ୱାଡ଼୍‍ଷା ହେଉନା ରାଣ୍ଡିଲ୍ ମାତ୍‍ତେ ।
LUK 2:37 ଆଦ୍ ମନ୍ଦିର୍‌ତିଙ୍କ୍ ୱିଡ଼୍‍ସ୍‍ୱେ କଞ୍ଜ୍ ବାୟିଦେ ଆନ୍‌‍ୱମାତ୍‍ତେ, ଉପବାସ୍ ନୁ ପ୍ରାର୍ତନା ତଡ଼୍ ନାର୍କେପାୟାଲ ଉପବାସ୍ ମାଡ଼ମାତ୍‍ତେ ।
LUK 2:38 ଆଦ୍ ଦିନାମ୍‍ତେ ଆଦ୍ ଉପସ୍ଥିତ୍ ଆସ୍ ଇଶ୍ୱର୍‌ତେ ପ୍ରସଂଶା ମାଡ଼ମାଡ଼ ଯିରୁଶାଲେମ୍‍ତେ ମୁକ୍ତି କେପି ମାନ୍ଦାନ୍ ସାରେତଡ଼୍‍କିଙ୍କ୍ ଜିସୁନ୍ ବିଷୟ କେସମାତ୍ତେ ।
LUK 2:39 ପେର୍‍କେ ଅଡ଼୍‌‍ ପ୍ରବୁନ୍ ବ୍ୟବସ୍ଥାଲେକାମ୍ ସାରେ ପାଡ଼ିୟି ତେର୍‍ସ୍‍ପି ମିକା ଗାଲିଲୀତେ, ନିଜ୍ ନଗର୍‍ ନାଜରିତିୟ ତାଗ୍ ମାଲ୍‍ତଡ୍ ।
LUK 2:40 ମେଣ୍ଡେ, ସୁଦୁନଣ୍ଡ୍ ବେଡ଼େୟନ୍ ଆତ୍‍ତଣ୍ଡ୍ ନୁ ବୁଦ୍‍ତେ ସାରେ ଆସ୍‍ସ ଆସ୍‍ସ ଶକ୍ତିନଡ଼୍ ଆତ୍‍ତଣ୍ଡ୍, ମେଣ୍ଡେ ଇଶ୍ୱର୍‌ତାଦ୍ ଅନୁଗ୍ରହ ଅନ୍‌ ପରୁ ମାତ୍‍ତେ ।
LUK 2:41 ଜିସୁନ୍ ୟାୟବାବ ସାରେ ହେଣ୍ଡ୍ ନିସ୍ତାର୍ ପାଣ୍ତୁତେ ୱେଲେ ଯିରୁଶାଲେମ୍‍ତାଗ୍ ଆଞ୍ଜମାତ୍‍ତଡ଼୍ ।
LUK 2:42 ଜିସୁନ୍ ବାର ହେଣ୍ଡ୍ ତେ ୱେଲେ ଅଡ଼୍‌‍ ରୀତି ଲେକାମ୍ ତେ ଯିରୁଶାଲେମ୍ ପାଣ୍ଡୁମ୍‍ତାଗ୍ ଆତ୍‍ତଡ଼୍ ।
LUK 2:43 ପାଣ୍ଡୁତେ ସମୟ୍ ତେର୍‍ସ୍‍ପି ମିକା ବେସୁଣ୍ଟ୍ ଅଡ଼୍‌‍ ମାଲ୍‍ସ୍ ୱାସମାତ୍‍ତଡ୍, ଆସୁଣ୍ଟ୍ ଇସୁନ୍ ଜିସୁ ଯିରୁଶାଲେମ୍‍ତାଗ୍ ମାତ୍‍ତଣ୍ଡ୍, ମେଣ୍ଡେ ତାନ୍ ୟାୟବାବାଲ୍ ଆଦ୍ ପୁନୱେକଟ୍ ମାତ୍‍ତଡ଼୍ ।
LUK 2:44 ବାତେଙ୍କ୍ ଇତ୍କେ ଅଣ୍ଡ୍‌ ମାନ୍ଦେତାଗ୍ ମିନ୍ଦେଣ୍ଡ୍ ହିଞ୍ଜ ହେର୍କେ ମାଡ଼ି ଅଡ଼୍‌‍ ୱେରନ୍ ଦିନ୍ ତେ ହାର୍ ତାକିଆତ୍‍ତଡ୍, ମେଣ୍ଡେ ଆତ୍ମାତେ ନୁ ପୁତ୍‍ତେ ନାରୁଡ଼୍ ତେ ଲୋପେ ଅଂକିଙ୍କ୍‌ ମେହେକ ମାତ୍‍ତଡ଼୍,
LUK 2:45 ମେଣ୍ଡେ ଅଂକିଙ୍କ୍‌ ଦର୍‍ସ୍‍କ କଟ ମେହେକ ଯିରୁଶାଲେମ୍‍ତା ମାଲ୍‍ସ୍ ଆତ୍‍ତଡ଼୍ ।
LUK 2:46 ମୁଣ୍ଡ୍ ଦିନାତେ ପେର୍‍କେ ଅଡ଼୍‌‍ ଅଂକିଙ୍କ୍‌ ମନ୍ଦିର୍‌ ତାଗ୍ ଦର୍‍ସ୍‍କ୍‍ତଡ଼୍; ଅଣ୍ଡ୍‌ ପଣ୍ଡିତ୍‍ନାରୁଡ୍ ଲୋପେ କୁଦି ଅଡ଼ାଦ୍‌ ଗଟ୍ କେଞ୍ଜ ମାତ୍‍ତଣ୍ଡ୍ ନୁ ଅଡ଼୍‌‍କିଂଙ୍କ୍ ପଶ୍ନ କେସ ମାତ୍‍ତଣ୍ଡ୍ ।
LUK 2:47 ମେଣ୍ଡେ, ବେସର୍ ନାରୁଡ଼୍ ଅନାଦ୍‌ ଗଟ୍ କେଞ୍ଜ ମାତ୍‍ତଡ଼୍, ସାରେତଡ଼୍ ଅନାଦ୍‌ ବୁଦ୍‍ ନୁ ଉତ୍ତର୍ ତେ ବାକ୍‍ୱା ଆସ୍‍ସ ମାତ୍‍ତଡ଼୍ ।
LUK 2:48 ଅଡ଼୍‌‍ ଅଂକିଙ୍କ୍‌ ଉଡ଼ି ବାକ୍‍ୱା ଆତ୍‍ତଡ଼୍, ମେଣ୍ଡେ ତାମ୍ ୟାୟ ଅଂକିଙ୍କ୍‌ କେତ୍‍ତେ, “ପେକାଲ୍ ମା ସେଙ୍ଗେ ବାତେଙ୍କ୍ ଇଦ୍ ରକମ୍ ବ୍ୟବହାର୍ ମାଡ଼୍‍ତି ? ଉଡ଼େ, ମି ବାବାଲ୍ ନୁ ନାନ୍ ଗାଟି ଦାନ୍ଦେ ଆସ୍ ମିକା ନିକିଂଙ୍କ୍ ମେହେକ୍‍ତମ୍ ।”
LUK 2:49 ଇଗେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ବାତେଙ୍କ୍ ମିଡ଼୍ ନାକିଂଙ୍କ୍ ମେହେକ ମାତ୍‍ତିଡ୍ ? ନା ବାବାନ୍ ଲୋନ୍‌ ମାନ୍ଦାନାଦ୍ ଯେ ନାୱାଦ୍ ପାଡ଼ିୟି, ଇଦ୍ ପୁନ୍‍ୱେକଟ୍ ମାତ୍‍ତିଡ୍ କି ?
LUK 2:50 ବାତେଙ୍କ୍ ଇତ୍କେ ଅଣ୍ଡ୍‌ ଅଡ଼୍‌‍କିଂଙ୍କ୍ ବେନେ ଗଟ୍ କେତ୍‍ତଣ୍ଡ୍, ଆଦିଙ୍କ୍ ଅଡ଼୍‌‍ ବୁଜେମ୍ ଆଦାଙ୍କ୍ ପାର୍‍ୱଡ୍ ।
LUK 2:51 ପେର୍‍କେ ଅଣ୍ଡ୍‌ ଅଡ଼୍‌‍ ତଡ଼୍ ମାଲ୍‍ସ୍ ନାଜରିତିୟ ତାଗ୍ ୱାତ୍‍ତଣ୍ଡ୍ ନୁ ଅଡ଼ାଦ୍‌ ଗଟ୍ କେଞ୍ଜି ମାତ୍‍ତଣ୍ଡ୍; ମେଣ୍ଡେ, ତାମ୍ ୟାୟ ଇଦ୍ ସାରେ ଗଟ୍ ସାବ୍‍ଦାନ୍ ତଡ଼୍ ତାନ୍ ହୃଦୟ୍ ତାଗ୍ ନେହେତ୍‍ତେ ।
LUK 2:52 ମେଣ୍ଡେ, ଜିସୁ ବୁଦ୍‍ ତେ ନୁ ମେନ୍ଦୁଲ୍ ତେ, ମେଣ୍ଡେ ଇଶ୍ୱର୍‌ ନୁ ନାରୁଡ଼୍ ତେ ଅନୁଗ୍ରହ ତେ ପେର୍‍ସାଙ୍କ୍ ପସ୍‍ପ୍‍ତଣ୍ଡ୍ ।
LUK 3:1 ସମ୍ରାଟ୍ ତିବିରିଆ କାଇସର୍‍ତେ ଶାସନ୍‍ ତେ ପନ୍ଦ୍ର ୱାଡ଼୍‍ଷା ତେ, ବେସୁଣ୍ଟ୍ ପନ୍ତୀୟ ପିଲାତ ଯିହୂଦା ନାର୍‍ଦେ ଶାସନ୍‍କର୍ତ୍ତାଲ୍ ନୁ ହେରୋଦ୍ ଗାଲିଲୀତା ସାମନ୍ତରାଜାଲ୍ ମାତ୍‍ତଣ୍ଡ୍, ମେଣ୍ଡେ ତାନ୍ ତାମୁଣ୍ଡ୍‌ ପିଲିପ୍‍ପ ଇତୂରୀୟା ନୁ ତ୍ରାକୋନୀତି ନାର୍‍ଦେ ସାମନ୍ତରାଜାଲ୍, ମେଣ୍ଡେ ଲୂସାନୀୟା ଅବିଲୀନୀ ନଗର୍‍ତେ ସାମନ୍ତରାଜାଲ୍ ମାତ୍‍ତଣ୍ଡ୍ ।
LUK 3:2 ମେଣ୍ଡେ ହାନାନ ନୁ କୟାପା ବେଡ଼ିୟିଯାଜକ ମାତ୍‍ତଡ଼୍, ଆସୁଣ୍ଟ୍ ପରମେଶ୍ୱର୍‍ ତେ ବାକ୍ୟ ଉସ୍କ ନେଲ୍‍ଦାଗ୍ ମାନ୍ଦାନ୍ ଜିକରୀୟ ତେ ମାର୍‍ ଯୋହନ୍‌ ଗାର୍‍ରେ ଉପସ୍ଥିତ୍ ହାତ୍‍ତେ ।
LUK 3:3 ଆଗେ ବାପ୍ତିଜକ ଯୋହନ୍‌ ଯର୍ଦ୍ଦନ ବେଡ଼େମ୍ ତେ ଗାର୍‍ରେ ସାରେ ଜାଗେତାଗ୍ ଆଞ୍ଜ୍ “ପାପ୍‍କ୍ଷମା ସେଙ୍ଗେ ମନପରିବର୍ତ୍ତନ୍ ତେ ବାପ୍ତିସ୍ମ କେତାନଙ୍କ ପସ୍‍ପ୍‍ତଣ୍ଡ୍,”
LUK 3:4 ବେଦ୍‍ଲେକାମ୍ ଯିଶାଇୟ ବାବବାଦୀ ଶାସ୍ତ୍ରତାଗ୍ ଲେକାମିନ୍ଦେ, “ବେନ ୱେରଣ୍ଡ୍ ଉସ୍କନେଲ୍‍ କଞ୍ଜ୍ ଗାଟି ଲେଙ୍ଗ୍‍ତେ କେସମିନ୍ଦେଣ୍ଡ୍, ପ୍ରବୁନ୍ ସେଙ୍ଗେ ହାର୍ ତିଆର୍ ମାଡ଼ାଟ୍; ଅନାଦ୍‌ ଆଦାନାଦ୍ ସେଙ୍ଗେ ତିନାଙ୍କ୍ ହାର୍ ତିଆର୍ ମାଡ଼ାଟ୍;
LUK 3:5 ସାର୍‍ରେ ଉପତ୍ୟକା ସାରେ ମାଡ଼ାଙ୍କ୍ ଆଦ୍‍ତେ, ମେଣ୍ଡେ ସାର୍‍ରେ ମେଟା ନୁ ସୁଦୁ ମେଟା ସାମାନ୍ ମାଡ଼ାଙ୍କ୍ ଆଦ୍‍ତେ, ୱାଙ୍କ୍‍ଙ୍ଗ ହାର୍ ସାରେ ତିନାଙ୍କ୍ ଆଦ୍‍ତେ, ମେଣ୍ଡେ ଗୁଇନ୍ଦା ଗପ୍ ବୁମ୍ ସାମାନ୍ ହାର୍ ତେ ସାୟେ ଆଦ୍‍ତେ;
LUK 3:6 ମେଣ୍ଡେ, ସାରେତଡ଼୍ ନାରୁଡ଼୍ ଇଶ୍ୱର୍ ତେ ପରିତ୍ରାଣ ଉଡ଼ିତଡ଼୍‍ ।”
LUK 3:7 ଆସୁଣ୍ଟ୍ ଅଣ୍ଡ୍‌ ତାନ୍ ତଡ଼୍ ବାପ୍ତିସ୍ମ ଆଦାନ୍ ସେଙ୍ଗେ ପେଇସ୍ ୱାଦାନ୍ ନାରୁଡ଼୍‍କ୍ ଯୋହନ୍‌ କେତ୍ତଣ୍ଡ୍, “ରେ ୱିସାମ୍ ମାନ୍ଦାନ୍ ତାଡ଼ାମ୍‍ ବଂଶତଡ଼୍, ୱାଦାନ୍ ଦଣ୍ଡତେ ୱେଲେ ମିରାନଙ୍କ୍ ସେଙ୍ଗେ ବେନ ମିକିଂଙ୍କ୍ ଚେତନା ହିତ୍‍ତଣ୍ଡ୍ ?
LUK 3:8 ଯଦି ନିଜାମ୍ ପାପ୍‍ତାଗାଙ୍କ୍ ମାଲ୍‍ସ୍ ୱାତ୍‍ତିଡ଼୍, ଇଦ୍ ମିଡ଼୍ ସାୟେତ୍ ପାଡ଼ିୟିଦାଗ୍ ତଅମୁଟ୍; ମେଣ୍ଡେ, ଅବ୍ରାହାମ୍‌ ମା ବାବାଲ୍ ଇଞ୍ଜ, ମନ୍ ତେ ମନ୍ ତେ ମିକା ଇଦ୍ ଲେକାମ୍ କେଲମାଟ୍; ବାତେଙ୍କ୍ ଇତ୍କେ ନାନ୍ ତ ମିକିଂଙ୍କ୍ କେତୁତାନ, ପରମେଶ୍ୱର୍‍ ଇଦ୍ କାଲ୍‍କିନ୍ ତଡ଼୍ ଆବ୍ରାହାମ୍ ତେ ସେଙ୍ଗ୍ ମାର୍‍ ତିଆର୍‍ମାଡ଼୍‍ଡ଼େ ପାର୍‍ଦ୍‍ତଣ୍ଡ୍ ।
LUK 3:9 ମେଣ୍ଡେ, ଇଞ୍ଜେ ମିକା ମାଡ଼ାକିନ୍ ମଦଲ୍ ଗଡେଲ୍‍ ମିନ୍ଦେ; ବେନ୍ ମାଡ଼ାକିନାଗ୍ କାୟା ସାୟେ ଆଦକ୍, ଆୱିଙ୍କ୍ ନାଡ଼୍‍କି କିସ୍‍ତାଗ୍ ୱାଟିତଡ଼୍ ।”
LUK 3:10 ଇଗେ ନାରୁଡ଼୍ ଅଂକିଙ୍କ୍‌ କେତ୍‍ତଡ଼୍, “ଆଲାତ୍କେ ମାନାଡ଼୍ ବାତେଏ ମାଡ଼ିକାଡ଼୍ ?”
LUK 3:11 ଯୋହନ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ବେନନାଗ୍‍ ରେଣ୍ଡ୍ ଚକା ମିନ୍ଦେ, ଅଣ୍ଡ୍‌ ବେନନାଗ୍‍ ଇଲ୍‍ଲେ, ଅଂକିଙ୍କ୍‌ ୱେରନ୍ ହିୱୀଣ୍ଡ୍; ମେଣ୍ଡେ ବେନଙ୍କ୍ ତିନ୍ଦାନାଦ୍ ମିନ୍ଦେ, ଅଣ୍ଡ୍‌ ଆଦ୍ ଲେକାମ୍ ମାଡ଼ିଣ୍ଡ୍ ।”
LUK 3:12 କର ଆଦାୟ୍ ମାଡ଼ାନ୍ ନାରୁଡ଼୍ ମିକା ବାପ୍ତିସ୍ମ ଆଦାଙ୍କ୍ ୱାସ୍ ଯୋହନ୍‌‌ତିଙ୍କ୍ କେତ୍‍ତଡ଼୍, “ହୋ ଗୁରୁ, ମାନାଡ଼୍ ବାତେଏ ମାଡ଼ିକାଡ଼୍ ?”
LUK 3:13 ମେଣ୍ଡେ ଅଣ୍ଡ୍‌ ଅଡ଼୍‌କିଂଙ୍କ୍ କେତ୍ତଣ୍ଡ୍, “ମି ସେଙ୍ଗେ ବେସର୍ ନିୟମ୍ ମିନ୍ଦେ, ତାନାଗାକସ୍‍ ଗାଟି ଆଦାୟ ମାଡ଼ମାଟ୍ ।”
LUK 3:14 ସୈନିକ୍ ମିକା ଯୋହନ୍‌‌ତିଙ୍କ୍ କେତ୍‍ତଡ଼୍, “ମାନାଡ଼୍ ବାତେଏ ମାଡ଼ିକାଡ଼୍ ?” ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଶକ୍ତି ତେ କି ଚଲଣା ତେ ବେନନ୍ ଦନ୍ ହଇମାଟ୍, ମେଣ୍ଡେ, ମି ଦରମାତେ ଶାନ୍ତି ଆଇମୁଟ୍ ।”
LUK 3:15 ନାରୁଡ଼୍ ୱିଡ଼୍‍ସି ମାଡ଼ିମାତାଙ୍କ୍ ଯୋହନ୍‌ ମାନ୍‌ କ୍ରିଷ୍ଟ ଆଦ୍‍ତଣ୍ଡ୍, ଇଦ୍‍ ତାନ୍ ବିଷୟ ତେ ସାରେତଡ଼୍ ତାମ୍‍ତାମ୍ ଲୋପେ ହାଲ୍‍ସ ମାତ୍‍ତଡ଼୍ ।
LUK 3:16 ଆଦିନ୍ ସେଙ୍ଗେ ଯୋହନ୍‌ ସାରେତଡ଼୍‍କିଙ୍କ୍ କେତ୍‍ତଣ୍ଡ୍, “ନାନ୍ ସିନା ମିକିଂଙ୍କ୍ ଏର୍‍ ଦାଗ୍ ବାପ୍ତିସ୍ମ ହିଦୁତାନ୍, ମାତର୍ ନାୟାଗ୍ କଞ୍ଜ୍ ବେନ ଗାଟି ମହାନ୍, ଅଣ୍ଡ୍‌ ୱାସ ମିନ୍ଦେଣ୍ଡ୍, ଅନ୍‌‍ୱାଦ୍ ହେର୍‍ପୁକ୍ ତେ ନୁଲ୍ କୁସ୍ପାନଙ୍କ୍ ମିକା ନାନ୍ ଯୋଗ୍ୟ ଆୟନ୍; ଅଣ୍ଡ୍‌ ମିକିଂଙ୍କ୍ ପବିତ୍ର ଆତ୍ମା ନୁ କିସ୍ ତାଗ୍ ବାପ୍ତିସ୍ମ ହିଦ୍‍ତଣ୍ଡ୍ ।
LUK 3:17 ଅନ୍‌ କାଇଦେ ଏତ୍ ମିନ୍ଦେ, ତ ଅଣ୍ଡ୍‌ ପଲେ ମାନ୍ଦାନ୍ ଶସ୍ୟ ପରିଷ୍କାର୍ ମାଡ଼ି ତାନ୍ କୁସ୍‍ତାଗ୍ ନେହେତିତଣ୍ଡ୍ ନୁ ପଲେତିଙ୍କ୍ ଅଣ୍ଡ୍‌ ସାରେ ଦିନ୍ ନିଡ଼୍‍ତାନ୍ କିସ୍‍ତାଗ୍ ପଡ଼୍‍ସ୍ପିତଣ୍ଡ୍ ।”
LUK 3:18 ଅଣ୍ଡ୍‌ ଇଦ୍ ରକମ୍ ଗାଟି କେତାନାଦ୍ ଇସ୍, ମେଣ୍ଡେ ନାର୍ଗେ ଲେକାମ୍ ଉତ୍ସାହ ରକମ୍ ବାକ୍ୟ କେସ୍ ନାରୁଡ଼୍ ତେ ଗାର୍‍ରେ ଗଟ୍ ପ୍ରଚାର୍ ମାଡ଼ ମାତ୍‍ତଣ୍ଡ୍ ନୁ ମାନ୍‍ ପରିବର୍ତ୍ତନ୍ ମାଡ଼ାନ୍ ସେଙ୍ଗେ କେତାନାଦ୍ ହିତ୍‍ତଣ୍ଡ୍;
LUK 3:19 ବାତେଙ୍କ୍ ଇତ୍କେ ସାମନ୍ତରାଜାଲ୍ ହେରୋଦ୍ ନିଜେ ତାମୁଣ୍ଡ୍‌ ତେ ମୁତ୍‍ତେ ହେରୋଦ୍ ବିଷୟ ତେ ନୁ ତାନ୍ ମାଡ଼୍‍ତେ କାରାବ୍ ବିଷୟ ତେ ଯୋହନ୍‌ ତାକିଂଙ୍କ୍ ବିରୋଦ୍ ମାଡ଼୍‍ତଣ୍ଡ୍,
LUK 3:20 ଅଣ୍ଡ୍‌ ଅଂକିଙ୍କ୍‌ ଜେଲ୍ ତାଗ୍ ତୁର୍‍ୱି ନିଜର୍ ବାଗାତ୍ କାରାବ୍ ତଡ଼୍ ଇଦ୍ କାରାବ୍ ମିକା କାଲ୍‍ପ୍‍ତଣ୍ଡ୍ ।
LUK 3:21 ସାରେତଡ଼୍ ନାରୁଡ଼୍ ବାପ୍ତିସ୍ମ ଆତ୍‍ତା ପେର୍‍କେ ଜିସୁ ମିକା ବାପ୍ତିସ୍ମ ହତ୍‍ତଣ୍ଡ୍ । ମେଣ୍ଡେ ପ୍ରାର୍ତନା ମାଡ଼ାନ୍ ୱେଲେ ସ୍ୱର୍ଗ ତେର୍‍ସ୍‍ଆତ୍‍ତେ,
LUK 3:22 ମେଣ୍ଡେ ପବିତ୍ର ଆତ୍ମା ଡିଗିୱାସ୍ ଜିସୁନ୍ ପରୁ ପାର୍ୱା ରକମ୍ ମେନ୍ଦୁଲ୍‍ ପୟ୍‍ସ୍‍ କୁଦ୍‍ତେ; ମେଣ୍ଡେ ସ୍ୱର୍ଗତାଗାଙ୍କ୍ ଇଦ୍ ଗଟ୍‍ନା ଆତ୍‍ତେ, “ନିମେ ମା ପ୍ରିୟ ମାର୍‍, ନିୟାଗେ ନାନେ ଗାଟି ସନ୍ତୁଷ୍ଟ ।”
LUK 3:23 ଜିସୁ ପାଡ଼ିୟି ଆରାମ୍ ମାଡ଼ାନ୍ ୱେଲେ ଅଂକିଙ୍କ୍‌ ମାତର୍ ତିରିଶ୍ ହେଣ୍ଡ୍ ବୟଷ୍ ଆସ୍ ମାତ୍‍ତେ; ନାରୁଡ଼୍ ତେ ହାଲ୍‍ସାନ୍ ଲେକାମ୍ ତେ ଜିସୁ ଯୋଷେପ୍ ତେ ମାର୍‍; ଯୋଷେପ୍ ଏଲୀ ତେ ମାର୍‍,
LUK 3:24 ଏଲୀ ମତ୍‍ତାତେ ତେ ମାର୍‍; ମତ୍‍ତାତେ ଲେବୀ ତେ ମାର୍‍, ଲେବୀ ମଲାକୀ ତେ ମାର୍‍, ମଲାକୀ ଯନ୍ନୟ ତେ ମାର୍‍, ଯନ୍ନୟ ଯୋଷେପ୍ ତେ ମାର୍‍,
LUK 3:25 ଯୋଷେପ୍ ମତ୍‍ତିତ୍ୟା ତେ ମାର୍‍, ମତ୍‍ତିତ୍ୟା ଆମୋସ ତେ ମାର୍‍, ଆମୋସ ନାହୂମ୍ ତେ ମାର୍‍, ନାହୂମ୍ ହେସ୍ଲୀ ତେ ମାର୍‍, ହେସ୍ଲୀ ନଗୟ ତେ ମାର୍‍,
LUK 3:26 ନଗୟ ମହତ ତେ ମାର୍‍, ମହତ ମତ୍‍ତିତ୍ୟା ତେ ମାର୍‍, ମତ୍‍ତିତ୍ୟା ଶିମୟୀ ତେ ମାର୍‍, ଶିମୟୀ ଯୋସେକ ତେ ମାର୍‍, ଯୋସେକ ଯୋଦା ତେ ମାର୍‍,
LUK 3:27 ଯୋଦା ଯୋହନ୍‌ ତେ ମାର୍‍, ଯୋହନ୍‌ ରେଷା ତେ ମାର୍‍, ରେଷା ଜିରୁବବାବେଲ୍‍ ତେ ମାର୍‍, ଜିରୁବବାବେଲ୍‍ ଶଆଲ୍‌ତୀୟେ ତେ ମାର୍‍, ଶଆଲ୍‌ତୀୟେ ନେରୀ ତେ ମାର୍‍,
LUK 3:28 ନେରୀ ମଲାକୀ ତେ ମାର୍‍, ମଲାକୀ ଆଦ୍ଦି ତେ ମାର୍‍, ଅଦ୍ଦି କୋସାମ ତେ ମାର୍‍, କୋସାମ ଏଲ୍ମଦାନ ତେ ମାର୍‍, ଏଲ୍ମଦାନ ଏର ତେ ମାର୍‍,
LUK 3:29 ଏର ଯିହୋଶୂୟ ତେ ମାର୍‍, ଯିହୋଶୂୟ ଏଲୀୟେଜର ତେ ମାର୍‍, ଏଲୀୟେଜର ଯୋରୀମ ତେ ମାର୍‍, ଯୋରୀମ ମତ୍‍ତାତେ ମାର୍‍, ମେତୁଶେଲାତେ ଲେବୀ ତେ ମାର୍‍,
LUK 3:30 ଲେବୀ ଶିମୀୟୋନ ତେ ମାର୍‍, ଶିମୀୟୋନ ଯିହୂଦା ତେ ମାର୍‍, ଯିହୂଦା ଯୋଷେପ୍ ତେ ମାର୍‍, ଯୋଷେପ୍ ଯୋନାମ ତେ ମାର୍‍, ଯୋନାମ ଏଲୀୟାକୀମ ତେ ମାର୍‍,
LUK 3:31 ଏଲୀୟାକୀମ ମଲାହ ତେ ମାର୍‍, ମଲାହ ମନ୍ନା ତେ ମାର୍‍, ମନ୍ନା ମତ୍ତଥାତେ ତେ ମାର୍‍, ମତ୍ତଥାତେ ନାତ୍‍ନ ତେ ମାର୍‍, ନାତ୍‍ନ ଦାଉଦ୍‍ ତେ ମାର୍‍,
LUK 3:32 ଦାଉଦ୍ ଯେଶୀତେ ମାର୍‍, ଯିଶାୟ ଓବେଦ ତେ ମାର୍‍, ଓବେଦ ବୋୟଜ ତେ ମାର୍‍, ବୋୟଜ ଶେଲହ ତେ ମାର୍‍, ଶେଲହ ନହଶୋନ ତେ ମାର୍‍,
LUK 3:33 ନହଶୋନ ଅମିନାଦାବ୍‌ ତେ ମାର୍‍, ଅମିନାଦାବ ଆଦ୍ମୀନ ତେ ମାର୍‍, ଆଦ୍ମୀନ ଆର୍ଣ୍ଣୀ ତେ ମାର୍‍, ଆର୍ଣ୍ଣୀ ହେସ୍ରୋଣ ତେ ମାର୍‍, ହେସ୍ରୋଣ; ମାଲ୍‍ପିତେ ମାର୍‍, ମାଲ୍‍ତେ ଯିହୁଦା ତେ ମାର୍‍,
LUK 3:34 ଯିହୁଦା ଯାକୁବ୍ ତେ ମାର୍‍, ଯାକୁବ୍ ଇସ୍‍ହାକ ତେ ମାର୍‍, ଇସ୍‍ହାକ ଅବ୍ରାହାମ୍ ତେ ମାର୍‍, ଅବ୍ରାହାମ୍‌ ତେରହ ତେ ମାର୍‍, ତେରହ ନାହୋର୍ ତେ ମାର୍‍,
LUK 3:35 ନହୋର୍ ସେରଗ୍‍ତେ ମାର୍‍, ସେରଗ୍‍ତେ ମାର୍‍, ରେଉ ପେଲେଗ୍‍ତେ ମାର୍‍, ପେଲେଗ୍‍ ଏବର୍‍ତେ ମାର୍‍, ଏବର୍‍ ଶେଲାଙ୍କତେ ମାର୍‍,
LUK 3:36 ଶେଲା କେଇନାନ୍‍ତେ ମାର୍‍, କେଇନାନ୍‍ ଆର୍‍ପାକ୍‍ସଡ଼ତେ ମାର୍‍, ଆର୍‍ପାକ୍‍ସଡ଼ ଶେମ୍‍ତେ ମାର୍‍, ଶେମ୍‍ ନୋହତେ ମାର୍‍, ନୋହ ଲାମେକ୍‍ତେ ମାର୍‍,
LUK 3:37 ଲାମେକ୍‍ ମେତୁଶେଲାତେ ମାର୍‍, ମେତୁଶେଲା ଅନୋକତେ ମାର୍‍, ହନୋକ୍‍ ଯାରେଦନ୍‍ତେ ମାର୍‍, ଯାରେଦ ମହାଲାଲୀଲ୍‍ତେ ମାର୍‍, ମହାଲାଲୀଲ୍‍ କେନାନ୍‍ତେ ମାର୍‍ ।
LUK 3:38 କେନାନ୍‍ ଏନୋଶତେ ମାର୍‍, ଏନୋଶ ଶେତ୍‍ତେ ମାର୍‍, ଶେତ୍‍ ଆଦମ୍‍ତେ ମାର୍‍, ଆଦମ୍‍ ଇଶ୍ୱରତେ ମାର୍‍ ।
LUK 4:1 ଜିସୁ ପବିତ୍ର ଆତ୍ମାତେ ପୁରା ଆସ୍ ଯର୍ଦ୍ଦନ ବେଡ଼େମ୍ କଞ୍ଜ୍ ମାଲ୍‍ତଣ୍ଡ୍, ମେଣ୍ଡେ ପବିତ୍ର ଆତ୍ମାତେ ତଡ଼୍ ଚାଲେମ୍ ଆସ୍ ଅଂକିଙ୍କ୍‌ ସିମ୍‍ସାମ୍ ପଡ଼ିୟେତାଗ୍ ଆତ୍‍ତେ । ଆଗେ ଅଣ୍ଡ୍‌ ଚାଳିଶ୍ ଦିନ୍ ହେଉନା ଶୟ୍‍ତାନ୍‍ ତଡ଼୍ ପରୀକ୍ଷିତ ଆସମାତ୍‍ତଣ୍ଡ୍ ।
LUK 4:2 ଆୱ୍ ସାରେ ଦିନାକ୍ ତେ ଅଣ୍ଡ୍‌ ବାଆତେ ତିନ୍‍ୱେକଟ ମାତ୍‍ତଣ୍ଡ୍, ମେଣ୍ଡେ ଆୱ୍ ସାରେ ଦିନାକ୍ ଶେଷ୍ ଆତ୍‍ତେ ୱେଲେ, ଅଂକିଙ୍କ୍‌ ଗାଟି କାର୍‍ପଇତେ ।
LUK 4:3 ଆଗେ ଶୟ୍‍ତାନ୍‍ ଅଂକିଙ୍କ୍‌ କେତ୍‍ତେ, “ନିମେ ଯଦି ଇଶ୍ୱର୍‌ ତେ ମାର୍‍, ଆଲାତ୍କେ ଇଦ୍ କାଲ୍‍ଦିଙ୍କ୍ ରୋଟି ଆଦାନ୍ ସେଙ୍ଗେ ଗଟ୍ ହିମ୍ ।”
LUK 4:4 ଇତ୍‍କେ ଜିସୁ ଉତ୍ତର୍ ହିତ୍‍ତଣ୍ଡ୍, “ଶାସ୍ତ୍ରତାଗ୍ ଲେକାମିନ୍ଦେ, ‘ନାରୁଡ଼୍ ବେସୁଣ୍ଟ୍ ରୋଟି ତଡ଼୍ ବାଦ୍‍କଡ଼୍ ।’”
LUK 4:5 ତାନ୍ ପେର୍କେ ଶୟ୍‍ତାନ୍‍ ଅଣ୍ଡୟ୍‌‍ ବେଡ଼୍‍ୟାଦ୍‍ ମେଟେତ୍ ଜୁଟିନାଗ୍ ଆତ୍‍ତେ ନୁ ଅଂକିଙ୍କ୍‌ ଜଗତ୍‍ତାଦ୍ ସାରେ ରାଜ୍ୟତାଦ୍ ସମ୍ପତି ତଅସ୍ କେତ୍‍ତଣ୍ଡ୍ ।
LUK 4:6 ମେଣ୍ଡେ, ଶୟ୍‍ତାନ୍‍ ଜିସୁଙ୍କ୍ କେତ୍‍ତେ, “ନାନ୍ ନିକିଂଙ୍କ୍ ଇଦ୍ ସାରେ ଅଦିକାର୍ ନୁ ଇଦ୍ ସାରେ ସମ୍ପତ୍ତି ହିଦ୍‍ତାନ୍, ବାତେଙ୍କ୍ ଇତ୍କେ ନାକିଂଙ୍କ୍ ଆଦ୍ ସମର୍ପିତ୍ ଆସ୍ ମିନ୍ଦେ, ମେଣ୍ଡେ ନାନ୍ ବେନଙ୍କ୍ ଇଚ୍ଛା ମାଡ଼ିତାନ୍, ଅଂକିଙ୍କ୍‌ ଆଦ୍ ହିଦ୍‍ତାନ୍ ।
LUK 4:7 ମେଣ୍ଡେ, ନିମେ ଯଦି ନାକିଂଙ୍କ୍ ମଡ଼୍‍କିତି, ଆସୁଟ, ସାରେ ନିୟାୱୁ ଆଦ୍‍ତେ ।”
LUK 4:8 ଜିସୁ ଉତ୍ତର୍ ହିତ୍‍ତଣ୍ଡ୍, “ଜେକେ ଅନ୍‌ ଶୟ୍‍ତାନ୍‍ ! ଦର୍ମଶାସ୍ତ୍ରତାଗ୍ ଲେକାମିନ୍ଦେ, ‘ମାତର୍ ନି ପ୍ରବୁ ଇଶ୍ୱର୍‌ତିଙ୍କ୍ ଉପବାସ୍ ମାଡ଼େ ନୁ ଅନାଦ୍‌ ସେବା ମାଡ଼େ ।’”
LUK 4:9 ମେଣ୍ଡେ, ଅଣ୍ଡ୍‌ ଜିସୁଙ୍କ୍ ଯିରୁଶାଲେମ୍ ତାଗ୍ ଆସ୍ ମନ୍ଦିର୍‌ ତେ ଜୁଟିନାଗ୍‌ ନିଲ୍‍ପି ଅଂକିଙ୍କ୍‌ କେତ୍‍ତଣ୍ଡ୍, “ନିମେ ଯଦି ଇଶ୍ୱରତେ ମାର୍‍, ଆଲାତ୍କେ ଇଗାଙ୍କ୍ ମଦଲ୍ ତୁଲ୍‍ଲେ;”
LUK 4:10 ବାତେଙ୍କ୍ ଇତ୍କେ ଶାସ୍ତ୍ରତାଗ୍ ଲେକାମିନ୍ଦେ, “ନିକିଂଙ୍କ୍ ରକ୍ଷା ମାଡ଼ାନ୍ ସେଙ୍ଗେ ଇଶ୍ୱର୍‌ ତାନ୍ ଦୂତକିଂଙ୍କ୍ ନି ବିଷୟ ତେ ଆଦେଶ୍‍ ହିଦ୍‍ତଣ୍ଡ୍;
LUK 4:11 ଇଦ୍ ମିକା ଶାସ୍ତ୍ରତାଗ୍ ଲେକାମିନ୍ଦେ, ‘ଇତ୍‍କେ ନି ଡେକେ କାଲ୍‍ଦାଗ୍ ତାଲ୍‍ଗିତେ, ଇଦ୍ ସେଙ୍ଗେ ଦୂତୁକ୍ ନିକିଂଙ୍କ୍ କାଇଦେ ତେଇସ୍ ପଇତିତା ।’”
LUK 4:12 ମେଣ୍ଡେ, ଜିସୁ ଶୟ୍‍ତାନ୍‍ ତିଙ୍କ୍ କେତ୍ତଣ୍ଡ୍‍, “ଶାସ୍ତ୍ରତାଗ୍ ଲେକାମିନ୍ଦେ, ନିମେ ପ୍ରବୁ ନିଜର୍ ଇଶ୍ୱର୍‌ ତିଙ୍କ୍ ପରିକ୍ଷା ମାଡ଼ାନାଦ୍ ଆୟ୍‍ୟ ।”
LUK 4:13 ଜିସୁଙ୍କ୍, ଶୟ୍‍ତାନ୍‍ ସାରେ ଲେକାମ୍ ପରିକ୍ଷା ମାଡ଼ି ତେର୍‍ସ୍ପ୍‍ତେ ପେର୍‍କେ ବେସ୍‌କ୍ ଦିନାତ୍ ସେଙ୍ଗେ ଅଂକିଙ୍କ୍‌ ୱିଡ଼୍‍ସି ଆତ୍‍ତେ ।
LUK 4:14 ଇଦିନ୍ ପେର୍‍କେ ଜିସୁ ଆତ୍ମାନ୍‌ ଶକ୍ତିତେ ଗାଲିଲୀତାଗ୍ ମାଲ୍‍ତଣ୍ଡ୍‍, ମେଣ୍ଡେ ସାରେ ପଡ଼ିୟେତାଗ୍ ତାନ୍ ବିଷୟତେ ଗଟି ପ୍ରଚାର୍ ଆତ୍‍ତେ ।
LUK 4:15 ମେଣ୍ଡେ, ଜିସୁ ଯିହୁଦୀଡ଼୍ ପ୍ରାର୍ତନା ଲୋକିନାଗ୍ ଶିକ୍ଷା ଇସ୍‌ ଗୌରବ୍‍ ପାଏମ୍‍ ଆତ୍‍ତଣ୍ଡ୍‌ ।
LUK 4:16 ତାନ୍ ପେର୍‍କେ ଜିସୁ ବେନେ ନାଜରିତିୟ ତାଗ୍ ପେର୍ସି ମାତ୍‍ତଣ୍ଡ୍, ଆଦ୍ ପଡ଼ିୟେତାଗ୍ ଅଣ୍ଡ୍‌ ଆତ୍‍ତଣ୍ଡ୍ ନୁ ତାମ୍ ରୀତି ଲେକାମ୍ ବିଶ୍ରାମବାରତେ ଉପାସନା ଲତ୍‍ତାଗ୍ ଅସ୍‍ତଣ୍ଡ୍‍, ମେଣ୍ଡେ ଦର୍ମଶାସ୍ତ୍ର କାର୍‍ତାନ୍ ସେଙ୍ଗେ ନିତ୍‍ତଣ୍ଡ୍ ।
LUK 4:17 ଆସୁଣ୍ଟ୍ ଯିଶାଇୟ ବାବବାଦୀ ବଇ ଅଂକିଙ୍କ୍‌ ହିତ୍‍ତଡ଼୍, ମେଣ୍ଡେ ଜିସୁ ଆଦିଙ୍କ୍ ଟେଣ୍ଡିମିକା, ବେଗେ ଇଦ୍ ବାକ୍ୟ ଲେକା ଆସ୍‍ମାତ୍‍ତେ, ଆଦ୍ ଦରସ୍‍କ୍‍ତଣ୍ଡ୍,
LUK 4:18 “ପ୍ରବୁନାଦ୍ ଆତ୍ମା ନା ପରୁ ମିନ୍ଦେ, ଆଦିନ୍ ସେଙ୍ଗେ ଦୁଃକାମ୍ ନାରୁଡ଼୍‍ତେ ଗାର୍‍ରେ ସୁସମାଚାର୍ ପ୍ରଚାର୍ ମାଡ଼ାନ୍ ସେଙ୍ଗେ ଅଣ୍ଡ୍‌ ନାକିଂଙ୍କ୍ ହେଞ୍ଚିମିନ୍ଦେଣ୍ଡ୍, ବନ୍ଦୀ ନାରୁଡ଼୍‍କିଂଙ୍କ୍ ମୁକ୍ତି ନୁ କାନାଲଡ଼୍‍କ୍ କଣ୍ଡେତ୍ ୱେସ୍ ବିଷୟ କେତାନଙ୍କ୍, ମେଣ୍ଡେ ଅତ୍ୟାଚାରି ନାରୁଡ଼୍‍କ୍ ମୁକ୍ତି ମାଡ଼ାଙ୍କ୍,
LUK 4:19 ପ୍ରବୁ ତାନ୍ ନାରୁଡ଼୍‍କ୍ ରକ୍ଷା ମାଡ଼ାନ୍ ସମୟ୍ ଯେ ଉପସ୍ଥିତ ଇଦ୍‍ କେତାନଙ୍କ୍ ଅଣ୍ଡ୍‌ ନାକିଂଙ୍କ୍ ରହସ୍ ମିନ୍ଦେଣ୍ଡ୍ ।”
LUK 4:20 ପେର୍‍କେ ଅଣ୍ଡ୍‌ ବଇତିଙ୍କ୍ ବନ୍ଦ୍ ମାଡ଼ି ଦାସନଡ଼୍ ଆଦ୍ ଇସ୍‌ ମିକା କୁଦ୍‍ତଣ୍ଡ୍, ମେଣ୍ଡେ ସମାଜ୍ ଲୋତ୍‍ତାଗ୍ ସାରେତଡ଼ାୱ୍ କଣ୍ଡା ଅନ୍‌ ପରୁ ମାତ୍‍ତା ।
LUK 4:21 ମେଣ୍ଡେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ନେଣ୍ଡ୍ ଦର୍ମଶାସ୍ତ୍ରତାଦ୍ ଇଦ୍ ବାକ୍ୟ ମିଡ଼୍ ବାଆତେ କେଞ୍ଜ୍‍ତିଡ଼୍ ଆଦ୍ ସାରେ ଆତ୍‍ତେ ।
LUK 4:22 ମେଣ୍ଡେ, ସାରେତଡ଼୍ ଅନ୍‌ ବିଷୟ ତେ ସାକ୍ଷ୍ୟ ହିତ୍‍ତଡ଼୍ ନୁ ଅନ୍‌‍ୱେ ପାୟୁର୍ କଞ୍ଜ୍ ପେୟିତେ ଆକର୍ଷନ୍ ବାକ୍ୟତେ ବାକ୍‍ୱା ଆଦ୍‍ତଡ଼୍; ମେଣ୍ଡେ ଅଡ଼୍‌‍ କେତୁତଡ଼୍‍, “ଇଣ୍ଡ୍ ଯଷେପ୍ ତେ ମାର୍‍ ଆୟ୍‍ୟଣ୍ଡ୍ କି ?”
LUK 4:23 ତାନ୍‍ପେର୍କେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, ମିଡ଼୍ ନିଜାମ୍ ନାକିଂଙ୍କ୍ ମୁନେତ୍ ମାତ୍‍ତା ବାକ୍ୟ କେତିତିଡ଼୍‍, ହୋ ଚିକିତ୍ସା ମାଡ଼ାନଡ଼ି, ମୁନେନ୍ ମିକିଂଙ୍କ୍ ସୁସ୍ଥ ମାଡ଼ାଟ୍; ମେଣ୍ଡେ ମିକା କେତିତିଡ଼୍ କପର୍‍ନାହୂମ୍‍ତାଗ୍ ବାତେଏ ଗଟେମ୍ ଆତ୍‍ତେ ଇଞ୍ଜ ମାନାଡ଼୍ କେଞ୍ଜ୍‍ତାଡ଼୍, ଆଦ୍ ସାରେ ଇଦ୍ ପଡ଼ିୟେତାଗ୍ ନିଜର୍ ଜନମ୍ ନେଲ୍‍ତାଗ୍ ମିକା ମାଡ଼ାଟ୍ ।
LUK 4:24 ମେଣ୍ଡେ, ଜିସୁ କେତ୍ତଣ୍ଡ୍, “ନାନ୍ ମିକିଂଙ୍କ୍ ନିଜାମ୍‍ କେତୁତାନ୍, ବେନେ ବାବବାଦୀ ମିକା ନିଜର୍ ଜନମ୍ ନଗର୍‍ତାଗ୍ ସମ୍ମାନ୍ ଆୟଡ଼୍ ।”
LUK 4:25 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ ନିଜାମ୍ କେତୁତାନ୍, “ଏଲୀୟ ତେ ୱେଲେ ବେସୁଣ୍ଟ୍ ଇସ୍ରାଏଲ୍‍ତାଗ୍ ମୁଣ୍ଡ୍ ହେଣ୍ଡ୍ ଆରୁ ନେଲଞ୍ଜ୍ ହେଉନା ୱାର୍‍ସାମ୍ ୱାଡ଼ୱାଙ୍କ୍ ଦେଶ୍ ଏକାମ୍ ଏର୍‍ ମୁଉସ୍‍ ଆତ୍‍ତେ, ଆସୁଣ୍ଟ୍ ଇସ୍ରାଏଲ ତାଗ୍ ଗାଟି ରାଣ୍ଡିଲ୍ ମାତ୍‍ତା;
LUK 4:26 ମିକା ଇଶ୍ୱର୍ ଏଲୀୟଙ୍କ୍ ଆୱିନାଗେ ଗାର୍‍ରେ ବେନଡାଗେ ରଉୱକଟ ସୀଦୋନ୍ ଦେଶ୍‍ତେ ସାରିପତ୍‍ତେ ୱେରଡ଼୍ ରାଣ୍ଡିନାଗ୍ ରହତଣ୍ଡ୍ ।
LUK 4:27 ମେଣ୍ଡେ, ବାବବାଦୀ ଇଲୀଶାୟତେ ୱେଲେ ଇସ୍ରାଏଲତାଗେ ଗାଟି କୁଷ୍ଠୀରୋଗି ମାତ୍‍ତଡ଼୍; ମିକା ଅଡ଼୍‌‍ ଲୋପେ ବେନଙ୍କେ ସୁସ୍ଥ ମାଡ଼୍‍ୱେ ମାତ୍‍ତଡ଼୍, ମାତର୍ ସୁରିଆ ଦେଶ୍‍ତେ ନାମାନ୍ ସୁସ୍ଥ ମାଡ଼ିମାତ୍‍ତଡ଼୍ ।”
LUK 4:28 ସମାଜ୍ ଲୋତ୍‍ତାଗେ ଇଦ୍ ସାରେ ଗଟ୍ କେଞ୍ଜ ସାରେତଡ଼୍ କପାମ୍‍ତେ ସାରେ ଆତ୍‍ତଡ଼୍,
LUK 4:29 ମେଣ୍ଡେ, ଅଡ଼୍‌‍ ତେଦି ଅଂକିଙ୍କ୍‌ ନଗର୍‍ କଞ୍ଜ୍ ପେସ୍‍ପିତ୍‍ତଡ଼୍ ନୁ ଅଡ଼ାଦ୍‌ ନଗର୍‍ ବେନେ ମେଟେତ୍ ପରୁ ତିଆର୍ ଆସ୍‍ମାତ୍‍ତେ, ଆଦିନାଦ୍ ଜୁଟିନାଗା କନ୍‍ସ୍ ମଦଲ୍ ହେସାନ୍ ସେଙ୍ଗେ ଅଂକିଙ୍କ୍‌ ଆଗେ ହତ୍‍ତଡ଼୍;
LUK 4:30 ବାତେଙ୍କ୍ ଇତ୍କେ ଜିସୁ ଅଡ଼୍‌‍ ଲୋପେତ୍ କେ ପେଇସ୍ ଆତ୍‍ତଣ୍ଡ୍ ।
LUK 4:31 ଅଣ୍ଡ୍‌ କପର୍ନାହୁମ୍‍‍କଞ୍ଜ୍‌ ଗାଲିଲୀତେ ୱେରଡ଼୍‌ ନଗର୍‍ତାଗେ ୱାତ୍‍ତଣ୍ଡ୍, ମେଣ୍ଡେ ବିଶ୍ରାମବାରତେ ନାରୁଡ଼୍‍କିଂଙ୍କ୍ ଶିକ୍ଷା ହିଦାଙ୍କ୍ ପସ୍‍ପ୍‍ତଣ୍ଡ୍,
LUK 4:32 ମେଣ୍ଡେ ଅଡ଼୍‌‍ ଅନ୍‌‍ୱାଦ୍ ଶିକ୍ଷା କେଞ୍ଜି ଆଶର୍ଯ୍ୟ ଆତ୍‍ତଡ଼୍, ବାତେଙ୍କ୍ ଇତ୍କେ ଅନ୍‌‍ୱାଦ୍ ବାକ୍ୟ ଅଦିକାର୍‌ ମାତ୍‍ତେ ।
LUK 4:33 ଅଣ୍ଡ୍‌ ଦିନେ ସମାଜ୍ ଲତ୍‍ତାଗ୍ ୱେର୍‍ଣ୍ଡ୍ ଅଶୁଚି ବୁତ୍‌ପଇତେ ନାରୁଡ଼୍ ମାତ୍‍ତଣ୍ଡ୍; ଅଣ୍ଡ୍‌ ଗାଟି ଲେଙ୍ଗ୍‍ଦେ କେତ୍ତଣ୍ଡ୍,
LUK 4:34 “ହୋ, ନାଜରିତ ଜିସୁ, ମା ତଡ଼୍ ନିୱାଦ୍ ବାତେଏ ମିନ୍ଦେ ? ନିମେ ମାକିଂଙ୍କ୍ ଆୱକାଙ୍କ୍ ୱାତିକି ? ନିମେ ବେନନି, ଆଦ୍ ନାନ୍ ପୁତ୍‍ତାନ୍; ନିମ୍‍ ଇଶ୍ୱର୍‌ତାଗାଙ୍କ୍ ୱାସ୍‍ମାନ୍ଦାନ୍ ଆଦ୍ ପବିତ୍ର ନାରୁନୀ ।”
LUK 4:35 “ଜିସୁ ଆସୁଙ୍କ୍ ଦମକ୍ ଇସ୍ କେତ୍‍ତନ୍, କଟ ଆୟମ୍, ଇନାଗା କଞ୍ଜ୍ ପେୟିସ୍ ଅନ୍‌ । ଆଗେ ଆଦ୍ ବୁତ୍ ଅଡ଼୍‌‍ ମୁନ୍‍ନେ ୱାଟି ଅଂକିଙ୍କ୍‌ ବାତେଏ କ୍ଷତି ମାଡ଼କଟ୍ ପେୟିସ୍ ଆତ୍‍ତେ ।
LUK 4:36 ଇଗେ ସାରେତଡ଼୍ ବାକ୍‍ୱା ଆସ୍ ନିଜେନିଜେ କେତାକେତି ଆତ୍‍ତଡ଼୍, ଇଦ୍ ବେସତ୍ ଗଟ୍ ? ଅଣ୍ଡ୍‌ ଅଦିକାର୍‌ ନୁ ଶକ୍ତି ତଡ଼୍ ଅଶୁଚି ଆତ୍ମାକିଂଙ୍କ୍ ଗଟ୍ ହିଦ୍‍ତଣ୍ଡ୍, ମେଣ୍ଡେ ଆୱ୍ ପେୟିସ୍ ଆତ୍‌ତେ ।
LUK 4:37 ଆଗେ ଅନ୍‌‍ୱାଦ୍ ବିଷୟତେ ସୁସମାଚାର୍ ସାରେ ପାକା ସାରେ ପଡ଼ିୟେତାଗ୍ ପ୍ରଚାର୍ ଆତ୍‍ତେ ।”
LUK 4:38 ପେର୍‍କେ ଜିସୁ ସମାଜ୍‍ଲନ୍ ତାଗାଙ୍କ୍ ତେଦି ଶିମୋନ୍‍ତେ ଲୋନ୍‌ ଆତ୍‍ତଣ୍ଡ୍ । ଶିମୋନ୍ ତେ ପୟେଙ୍କ୍ ଗାଟି ହେଡ଼େକ୍ ଆସ୍ ମାତ୍‍ତେ, ମେଣ୍ଡେ ଅଡ଼୍‌‍ ଶାସନ୍‍ ବିଷୟତେ ତାଙ୍କ୍ ସୁସ୍ଥ ମାଡ଼ାଙ୍କ୍ ଜିସୁଙ୍କ୍ ଅନୁରଦ୍‌‍ ମାଡ଼୍‍ତ୍‍ତଡ଼୍ ।
LUK 4:39 ଆଗେ ଅଣ୍ଡ୍‌ ତାମ୍ ଗାର୍‍ରେ ନିଶ୍‍ମିକା ହେଡ଼େକ୍ ତିଙ୍କ୍ ଦମକ୍ ହିତ୍‍ତଣ୍ଡ୍, ମେଣ୍ଡେ ଆଦିଙ୍କ୍ ହେଡ଼େକ୍ ୱିଡ଼୍‍ସ୍ତା, ମେଣ୍ଡେ ଆଦ୍ ସାଙ୍ଗେ ସାଙ୍ଗେ ତେଦି ଅଡ଼୍‌‍କିଂଙ୍କ୍ ସେବା ମାଡ଼ାଙ୍କ୍ ପସ୍ପିତ୍‍ତଣ୍ଡ୍ ।
LUK 4:40 ପଡ଼ଦ୍ ଆଦାନ୍ ୱେଲେ, ବେନଡ଼ାଗ୍ ନାଆ ଲେକାମ୍ ରଗ୍‍ତେ ନାରୁଡ଼୍ ମାତ୍‍ତଡ଼୍, ଅଡ଼୍‌‍ ସାରେତଡ଼୍‍କିଙ୍କ୍ ଅନ୍‌ ଗାର୍‍ରେ ତାତ୍‍ତଡ଼୍ ନୁ ଅଣ୍ଡ୍‌ ସାରେ ନାରୁଡ଼୍ ତେ ପରୁ କାୟ୍ ୱାଟି ଅଡ଼୍‌‍କିଂଙ୍କ୍ ସୁସ୍ଥ ମାଡ଼ତ୍‍ତଣ୍ଡ୍ ।
LUK 4:41 ମେଣ୍ଡେ, ବୁତ୍‌କ୍‍ ମିକା କିଡ଼୍‍କ କିଡ଼୍‍‍କ ନିମେ ଇଶ୍ୱର୍‌ ତେ ମାର୍‍ ଇଞ୍ଜ କେସ୍ ନାର୍ଗେ ନାରୁଡ଼୍ ତେ କଞ୍ଜ୍ ପେୟିସ୍ ଆତ୍‍ତା । ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ ଦମକ୍ ଇସ୍‌ ଗଟ୍ କେତାଙ୍କ୍ ହିୱଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ ଯେ କ୍ରିଷ୍ଟ, ଇଦ୍ ଅଡ଼୍‌‍ ପୁଞ୍ଜ୍ ମାତ୍‍ତଡ଼୍ ।
LUK 4:42 ନାର୍‍କୁକ୍ ଆତ୍‍ତେୱେଲେ, ଅଣ୍ଡ୍‌ ନଗର୍‍କଞ୍ଜ୍ ପେଇସ୍ ୱେରଡ଼୍ ବେନଇଲ୍‍ୱେ ପଡ଼ିୟେତାଗ୍ ଆତ୍‍ତଣ୍ଡ୍; ମେଣ୍ଡେ, ନାରୁଡ଼୍ ସାରେତଡ଼୍ ଅଂକିଙ୍କ୍‌ ମେଦ୍‍କି ମେଦ୍‍କି ଅନ୍‌ ଗାର୍‍ରେ ୱାତ୍‍ତଡ଼୍, ମେଣ୍ଡେ ଅଣ୍ଡ୍‌ ବେଲା ଅଡ଼୍‌‍ ଗାର୍‍ରେ କନ୍‍ସ୍ ଆତ୍ମାକିନ୍ ଆଦ୍ ସେଙ୍ଗେ ଅଂକିଙ୍କ୍‌ ନିଲ୍‍ସ୍ପାନଙ୍କ୍ ଆଲ୍‍ସି ମାଡ଼୍‍ତ୍‍ତଡ଼୍ ।
LUK 4:43 ବାତେଙ୍କ୍ ଇତ୍କେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, ବେନ୍‍ବେନା ନଗର୍‍ତାଗେ ମିକା ନାକିଂଙ୍କ୍ ଆଦ୍‍ଲେକାମ୍ ଇଶ୍ୱର୍‌ତେ ରାଜ୍ୟ ଡ଼ାଦ୍ “ସୁସମାଚାର୍ ପ୍ରଚାର ମାଡ଼ାଙ୍କ୍ ଆଦ୍ ତେ, ବାତେଙ୍କ୍ ଇତ୍କେ ଆଦିନ୍ ସେଙ୍ଗେ ଇଶ୍ୱର୍ ନାକିଂଙ୍କ୍ ରହସ୍ ମିନ୍ଦେଣ୍ଡ୍ ।”
LUK 4:44 ମେଣ୍ଡେ, ଅଣ୍ଡ୍‌ ଯିହୁଦା ଦେଶ୍ ତେ ପ୍ରାର୍ତନା ଲୋକିନାଗ୍ ପ୍ରଚାର ମାଡ଼ାଙ୍କ୍ ପସ୍‍ପିତ୍‍ତଣ୍ଡ୍ ।
LUK 5:1 ଅଣ୍ଡ୍‌ ଦିନେ ଜିସୁ ଗିନେସର୍‍ତ ସାୱୁଡ଼େ ଆଞ୍ଚିନାଗ୍‌ ନିଶ୍ ମାତ୍‍ତଣ୍ଡ୍, ମେଣ୍ଡେ ନାରୁଡ଼୍ ଅନ୍‌ ବାକ୍ୟ କେଞ୍ଜାନଙ୍କ୍ ତୁର୍ସାତୁର୍ସି ଆସମାତ୍‍ତଡ଼୍;
LUK 5:2 ମେଣ୍ଡେ, ଅଣ୍ଡ୍‌ ସାୱୁଡ଼େ ଆଞ୍ଚିନାଗ୍‌ ରେଣ୍ଡ୍ ଓଡା ମାନ୍ଦାନାଦ୍ ଉଡ଼୍‍ତ୍ତଣ୍ଡ୍; କିକେ ପଇତାନଡ଼୍ ଆଗାକନ୍‍ସ୍ ଡିଗି ଜାରି ନର୍‍ସ୍ ମାତ୍‍ତଡ଼୍ ।
LUK 5:3 ଆୱ ଅଡ଼୍‌ ଲୋପେ ବେଦ୍ ଶିମୋନ୍ ଡ଼ାଦ୍ ମାତ୍‍ତେ, ଆଗେଅଣ୍ଡ୍‌ ତାରି ବୂମ୍‌କନ୍‍ସ୍‍ ସୁଦୁର୍ ଜେକେ ଆଦାନ୍ ସେଙ୍ଗେ ଅଂକିଙ୍କ୍‌ ଅନୁରଦ୍‌‍ ମାଡ଼୍‍ତଣ୍ଡ୍; ମେଣ୍ଡେ, ଅଣ୍ଡ୍‌ ଓଡ଼େତାଗ୍ କୁଦି ନାରୁଡ଼୍‍କିଂଙ୍କ୍ ଶିକ୍ଷା ହିଦାଙ୍କ୍ ପସ୍‍ପିତ୍‍ତଣ୍ଡ୍ ।
LUK 5:4 ଅଣ୍ଡ୍‌ ଗଟି ତେର୍‍ସ୍‍ପି “ଶିମୋନ୍ ତିଙ୍କ୍ କେତ୍ତଣ୍ଡ୍, କୁଇଙ୍ଗ୍ ଏର୍‍ ଦାଗେ ଆଞ୍ଜ୍ କିକେ ପଇତାନ୍ ସେଙ୍ଗେ ମିୱାଦ୍ ଜାରି ୱାଟାଟ୍ ।
LUK 5:5 ଇଗେତିସ୍‍ନ୍‍ ଶିମୋନ୍ କେତ୍ତଣ୍ଡ୍, ହୋ ଗୁରୁ, ମାମ୍ ନିଟେ ନାର୍କେ ତିପାଲ୍ ମାଡ଼ି ବାତେଏ ପୟ୍‍ମ୍; ବାତେଙ୍କ୍ ଇତ୍କେ ନି ଗଟ୍ ତେ ନାନ୍ ଜାରି ୱାଟିତାନ୍ ।”
LUK 5:6 ମେଣ୍ଡେ, ଅଡ଼୍‌‍ ଆଦ୍ ୱାଟି ଗାଟି କିକେ ପୟିତ୍‍ତଡ୍, ମେଣ୍ଡେ ଅଡ଼୍‌‍ୱାଦ୍ ଜାରି ଦେଗାଙ୍କ୍ ଲେକାମ୍ ହାତ୍‍ତା ।
LUK 5:7 ଆଗେ ତାମ୍ ବେନ୍ ଉଦାର୍‍ ଆତ୍‍ତେନଡ଼୍ ବାଗାତ୍ ଓଡେ ତାଗ୍ ମାତ୍‍ତଡ଼୍, ଅଡ଼୍‌‍ ବେଲା ୱାସ୍ ସାହାଯ୍ୟ ମାଡ଼ିତ୍‍ତଡ଼୍, ଇଦିନ୍ ସେଙ୍ଗେ ଅଡ଼୍‌‍ ଅଡ଼୍‌‍କିଂଙ୍କ୍ କାଇଦେ କାରଙ୍ଗ୍‍ତଡ଼୍‍ । ଇଗେ ଅଡ଼୍‌‍ ୱାସ୍ ରେଣ୍ଡ୍ ଓଡାକିଂଙ୍କ୍ ଇଦ୍ ରକମ୍ ସାରେ ମାଡ଼ିତଡ୍ ଯେ ଆୱ ମୁଡୁନ୍ଦାନ୍ ରକମ୍ ଆତ୍‍ତା ।
LUK 5:8 “ବାତେଙ୍କ୍ ଇତ୍କେ ଶିମୋନ୍ ପିତର୍ ଇଦ୍ ଉଡ଼ି ଜିସୁନ୍ ଡେକାନ୍ ମଦଲ୍ ମଡ଼୍‍କି କେତ୍‍ତଣ୍ଡ୍, ହୋ ପ୍ରବୁ, ନାୟାଗ୍ କଞ୍ଜ୍ ଆଦାନଙ୍କ୍ ଆଇମ୍, ବାତେଙ୍କ୍ ନାନ୍ ୱେରଣ୍ଡ୍ ପାପି ନାରୁନ୍ ।”
LUK 5:9 ବାତେଙ୍କ୍ ଇତ୍କେ ଅଡ଼୍‌‍ ଆଗେ ୱିଡ଼୍‍ସଡ଼୍ କିକେ ପଡ଼ିୟିହିତ୍‍ତଡ଼୍ ଯେ, ଆଦ୍ ଉଡ଼ି ଶିମୋନ୍ ନୁ ତାମ୍ ସାଙ୍ଗଡ଼୍ ସାରେତଡ଼୍ ବାକ୍‍ୱା ଆତ୍‍ତଡ଼୍;
LUK 5:10 ମେଣ୍ଡେ, ଜେବଦିତେ ଇଡ଼ିୱୁଡ଼୍‍ ମାର୍‍କ୍ ଯାକୁବ୍ ନୁ ଯୋହନ୍‌, ବେନଡ଼୍ ଶିମୋନ୍‍ତେ ସାଙ୍ଗଡ଼୍ ମାତ୍‍ତଡ଼୍, ଅଡ଼୍‌‍ ମିକା ଆଦ୍ ରକମ୍ ବାକ୍‍ୱା ଆତ୍‍ତଡ଼୍ । ମେଣ୍ଡେ, ଜିସୁ ଶିମୋନ୍‍ତିଙ୍କ୍ କେତ୍‍ତଣ୍ଡ୍, “ନା ତଡ଼୍ ୱାଡ଼ାଟ୍ । ନାନ୍ ମିକିଂଙ୍କ୍ ନାରୁଡ଼୍‍କିଂଙ୍କ୍ ପଇତାନାଦ୍ ନାଡ଼୍‍ସ୍ପିତ୍‍ତାନ୍ ।”
LUK 5:11 ଆଗେଙ୍କ୍ ଅଡ଼୍‌‍ ସାଙ୍ଗେ ସାଙ୍ଗେ ଅଡ଼ାୱୁ ୱାଲା ୱିଡ଼୍‍ସି ଅନ୍‌ ତଡ଼୍ ପେର୍‍କେ ଆତ୍‍ତଡ଼୍ ।
LUK 5:12 ଅନ୍‌‍ଦାମ୍ ଜିସୁ ୱେରନ୍ ନଗର୍‍ ତାଗ୍ ମାନ୍ଦାନ୍ ୱେଲେ, ଉଡାଟ୍, ୱେର୍‍ଣ୍ଡ୍ କୁଷ୍ଠୀରୋଗି ନାରୁଡ଼୍ ଆଦ୍ ଜାଗେତାଗେ ମାତ୍‍ତଣ୍ଡ୍; ଅଣ୍ଡ୍‌ ଜିସୁଙ୍କ୍ ଉଡ଼ି କାପ୍‍ମୁଡୁନ୍ଦି ଅଂକିଙ୍କ୍‌ ଦନ୍ୟବାଦ୍ ମାଡ଼ି କେତ୍‍ତଣ୍ଡ୍, “ହୋ ପ୍ରବୁ, ନିମେ ଯଦି ଇଚ୍ଛା ମାଡ଼ିତି, ଆଲାତ୍କେ ନାକିଂଙ୍କ୍ ସୁସ୍ଥ ମାଡ଼୍‍ଡ଼େ ପାର୍‍ତିଡ଼୍ ।”
LUK 5:13 ଆଗେଙ୍କ୍ ଅଣ୍ଡ୍‌ କାୟ୍ ଆଇସ୍ ଅଂକିଙ୍କ୍‌ ଇଟି କେତ୍ତଣ୍ଡ୍, “ନାନ୍ ଇଚ୍ଛା ମାଡ଼ୁତାନ୍, ସୁସ୍ଥ ଆଇମ୍ ।” ସାଙ୍ଗେ ସାଙ୍ଗେ କୃଷ୍ଟ ରୋଗ୍ ଅନାଗ୍‍କଞ୍ଚ୍‍ ମାୟିଆତ୍‍ତେ ।
LUK 5:14 ମେଣ୍ଡେ, ଜିସୁ ଅଂକିଙ୍କ୍‌ ଗଟ୍ ଇସ୍‌ କେତ୍ତଣ୍ଡ୍, “ବେନଙ୍କେ କେଲ୍‍ମା, ବାତେଙ୍କ୍ ଇତ୍କେ ସିଦା ଯାଜକତେ ଗାର୍‍ରେ ଅନ୍‌ ନୁ ଅଣ୍ଡ୍‌ ନିକିଂଙ୍କ୍ ପରିକ୍ଷା ମାଡ଼ିଣ୍ଡ୍, ତାନ୍ ପେର୍‍କେ ନିମେ ସୁସ୍ଥ ଆତ୍‍ତିନ୍ ଇଞ୍ଜ ବାଗାତ୍ ନାରୁଡ଼୍‍ତେ ଗାର୍‍ରେ ପ୍ରମାନ୍ ହିଦାନ୍ ସେଙ୍ଗେ ମୋଶାନ୍‌ ଆଦେଶ୍‍ ଲେକାମ୍ ବଲି ଉତ୍ସର୍ଗ ମାଡ଼ା ।”
LUK 5:15 ବାତେଙ୍କ୍ ଇତ୍କେ ଜିସୁନ୍ ବିଷୟ ତେ ଗଟ୍ ମେଣ୍ଡେ ଅଦିକ୍‌ ସାରେପାକ୍ ଆତ୍‍ତେ, ମେଣ୍ଡେ ଗାଟି ନାରୁଡ଼୍ କେଞ୍ଜାନ୍ ସେଙ୍ଗେ ନୁ ନିଜ୍ ରୋଗ୍ କନ୍‍ସ୍ ସୁସ୍ଥ ଆଦାନ୍ ସେଙ୍ଗେ ଅଣ୍ଡୟାଗେ ଗୁଡୁତଡ଼୍‍;
LUK 5:16 ମାତର୍ ୱେରଡ଼୍ ସିମ୍‍ସାମ୍ ଜାଗେତାଗେ ମାଞ୍ଜ୍ ପ୍ରାର୍ତନା ମାଡ଼ମାତ୍‍ତଣ୍ଡ୍ ।
LUK 5:17 ଅନ୍‌ ଦିନେ ଜିସୁ ଶିକ୍ଷା ଇସ୍‌‍ମାତ୍‍ତଣ୍ଡ୍, ମେଣ୍ଡେ ଗାଲିଲୀତେ ସାରେ ନାର୍, ମେଣ୍ଡେ ଯିହୁଦା ପ୍ରଦେଶ୍ ନୁ ଯିରୁଶାଲେମ୍ କନ୍‍ସ୍ ୱାସ୍ ମାନ୍ଦାନ୍ ପାରୂଶୀ ନୁ ଶାସ୍ତ୍ରୀଡ଼୍ ଗାର୍‍ରେ କୁଦିମାତ୍‍ତଡ଼୍ । ମେଣ୍ଡେ, ଅଣ୍ଡ୍‌ ବେଦ୍ ରକମ୍ ରୋଗିଙ୍କ୍ ସୁସ୍ଥ ମାଡ଼ିତନ୍, ଇଦ୍ ସେଙ୍ଗେ ପ୍ରବୁନାଦ୍ ଶକ୍ତି ଉପସ୍ଥିତ୍ ମାତ୍‍ତେ ।
LUK 5:18 ମେଣ୍ଡେ, ଉଡାଟ୍, ବେସ୍‍କ୍‍ତୁଡ଼୍‍ ନାରୁଡ଼୍ ଅରଟ୍ ପକ୍ଷାଘାତ ରୋଗି ନାରୁଙ୍କ୍ କାଟୁଲ୍ ତାଗ୍ କାଞ୍ଜି ତାସ୍ ଅଂକିଙ୍କ୍‌ ଲୋପେ ଆଦାନ୍ ସେଙ୍ଗେ ନୁ ଜିସୁନ୍ ମୁନ୍‍ନେ ରେହେତାନ୍ ସେଙ୍ଗେ ଆଲ୍‍ସି ମାଡ଼ମାତ୍‍ତଡ଼୍ ।
LUK 5:19 ବାତେଙ୍କ୍ ଇତ୍କେ ମିଡ଼୍ ଆତ୍‍ତାଙ୍କ୍ ଅଂକିଙ୍କ୍‌ ଲୋପେ ଆଦାନ୍ ସେଙ୍ଗେ ହାର୍ ଦରସ୍‍କାଙ୍କ୍ ଅଡ଼୍‌‍ ଲୋତ୍‍ତେ ପରୁ ଆଞ୍ଜ୍ ମୁର୍ସିଙ୍କ୍ ଟେଣ୍ଡି ଲୋପେକେ କାଟୁଲ୍ ତଡ଼୍ ଅଂକିଙ୍କ୍‌ ନାଡ଼ମେ ଜିସୁନ୍ ମୁନ୍‍ନେ ୱେହେସିତ୍‍ତଡ୍ ।
LUK 5:20 ଅଣ୍ଡ୍‌ ଅଡ଼୍‌‍ୱାଦ୍ ବିଶ୍ୱାସ୍ ଉଡ଼ି କେତ୍ତଣ୍ଡ୍, “ହୋ ବାବୁ, ନିୟାଦ୍ ପାପ୍ ସାରେ କ୍ଷମା ମାଡ଼ିତ୍‍ତଡ଼୍ ।”
LUK 5:21 ଆଗେ ଶାସ୍ତ୍ରୀନାରୁଡ଼୍‌ ନୁ ପାରୂଶୀଡ଼୍ ତିରିୟା ତିରିୟି ହାସ୍ ଇଲା କେତାଙ୍କ୍ ପସ୍ପ୍‍ତ୍‍ତଡ଼୍, ଇଣ୍ଡ୍ ଯେ ଇଶ୍ୱର୍‌ତିଙ୍କ୍‌ ଅପ୍‌ମାନ୍‌ ମାଡ଼ୁତଣ୍ଡ୍, “ଇଣ୍ଡ୍ ବେନ ? ମାତର୍‍ ଇଶ୍ୱର୍‌ ତେ ୱିଡ଼୍‍ସି ମେଣ୍ଡେ ବେନ ପାପ୍ କ୍ଷମାମାଡ଼୍ ପାର୍‍ଦ୍‍ତଣ୍ଡ୍ ?”
LUK 5:22 ବାତେଙ୍କ୍ ଇତ୍କେ ଜିସୁ ଅଡ଼୍‌‍ୱାଦ୍ ଗଟ୍ ତିରିୟାନାଦ୍ ପୁଞ୍ଜ୍ ମିକା ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ମିଡ଼୍ ନିଜ୍‍ନିଜ୍ ମାନ୍‍ଦାଗ୍ ବାତେଙ୍କ୍ ଆଦ୍ ରକମ୍ କାରାପ୍‍ ଗଟି ତିରିୟୁତିଡ୍ ?
LUK 5:23 ବେନ୍ କେତାନାଦ୍ ସହଜ୍ ? ନି ପାପ୍ ସାରେ କ୍ଷମା ମାଡ଼୍‍ତଡ଼୍ ଇଞ୍ଜ କେତାନାଦ୍, ନା, ତେଏଦେ, ଅନ୍‌ ଇଞ୍ଜ କେତାନାଦ୍ ?
LUK 5:24 ବାତେଙ୍କ୍ ଇତ୍କେ ପୃତିବିତେ ପାପ୍ କ୍ଷମା ମାଡ଼ାଙ୍କ୍ ନାରୁନ୍‍ପିଲେ ତିଙ୍କ୍‌ ଅଦିକାର୍‌ ମିନ୍ଦେ, ଇଦ୍ ବେଲା ମିଡ଼୍ ପୁଞ୍ଜ୍ ପାର୍‍ଦ୍‍ତିଡ଼୍-ଇଦ୍ ସେଙ୍ଗେ ଜିସୁ ପକ୍ଷାଘାତ ରୋଗ୍‍ତିଙ୍କ୍ କେତ୍ତଣ୍ଡ୍, ନାନ୍ କେତୁତାନ୍ ତେଦ୍‍ଦେ,” ନି କାଟୁଲ୍ ପୟିସ୍ ନି ଲୋନ୍‌ ହାନ୍ ।
LUK 5:25 ଆଗେତିନ୍‍ସ୍ ଅଣ୍ଡ୍‌ ସାଙ୍ଗେ ସାଙ୍ଗେ ଅଡ଼୍‌‍ ମୁନେତ୍‍କେ ତେଏଦି, ବେନେ କାଟୁଲ୍‍ତେ ପରୁ ଅଣ୍ଡ୍‌ ପାଟିମାତ୍‍ତଣ୍ଡ୍, ଆଦିଙ୍କ୍ ପୟିସ୍ ଇଶ୍ୱର୍‌ ତେ ମହିମା କୀର୍ତ୍ତନ୍ ମାଡ଼ମାଡ଼ ନିଜେ ଲୋନ୍‌ ଆତ୍‍ତଣ୍ଡ୍ ।
LUK 5:26 ଆସୁଣ୍ଟ୍ “ସାରେତଡ଼୍ ବାକ୍‍ୱା ଆସ୍ ଇଶ୍ୱର୍‌ତେ ମହିମା କୀର୍ତ୍ତନ୍ ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ ନୁ ଗାଟି ୱେର୍‍ସ୍ କେତ୍ତଡ଼୍, ନେଣ୍ଡ୍ ମାମ୍ ଗାଟି ଆଦ୍‍ବୁତ୍ ଗଟନା ଉଡ଼୍‍ତମ୍ !
LUK 5:27 ଇଦିନ୍ ପେର୍‍କେ ଜିସୁ ପେୟିସ୍ ଆଞ୍ଜ୍ ଲେବୀ ପେଦେର୍ ତେ ୱେର୍‍ଣ୍ଡ୍ କର ଆଦାୟ ମାଡ଼ାନକିଂଙ୍କ୍ କର ଆଦାୟ ପଡ଼ିୟେତାଗ୍ କୁଦିମାନ୍ଦାନାଦ୍ ଉଡ଼ି ଅଂକିଙ୍କ୍‌ କେତ୍ତଣ୍ଡ୍, ନା ପେର୍‍କେ ୱାଡ଼ା ।”
LUK 5:28 ଆଗେଙ୍କ୍ ଲେବୀ ସାରେତାୱିଙ୍କ୍ ୱିଡ଼୍‍ସି ମିକା ତେଦି ଅନ୍‌ ପେର୍କେ ତାକାଙ୍କ୍ ପସ୍‍ପ୍‍ତଣ୍ଡ୍ ।
LUK 5:29 ମେଣ୍ଡେ, ଲେବୀ ନିଜେ ଲୋନ୍‌ ଅନ୍‌ ସେଙ୍ଗେ ୱେରନ୍ ବେଡ଼େୟାଦ୍ ବଜି ମାଡ଼ତ୍‍ତଣ୍ଡ୍, ମେଣ୍ଡେ ଗାଟି ନାର୍ଗେମାନ୍ଦେ କରଗ୍ରାହୀ ନୁ ତାନ୍‌ ନାରୁଡ଼୍ ଅଡ଼୍‌‍ ତଡ଼୍ ତିନ୍ଦାନଙ୍କ୍ କୁଦ୍‍ତଡ଼୍ ।
LUK 5:30 ଆଗେ ପାରୂଶୀଡ଼୍ ନୁ ଅଡ଼୍‌‍ ମାନ୍ଦେତେ ଶାସ୍ତ୍ରୀଡ଼୍ ଅନ୍‌ ଶିଷ୍ୟନ୍ ବିରୁଦ୍ ତେ ଅବିଯୋଗ୍ ମାଡ଼ି କେତୁତଡ଼୍, “ମିଡ଼୍ ବାତେଙ୍କ୍ କରଗ୍ରାହୀ ନୁ ପାପି ନାରୁଡ଼୍ ତଡ଼୍ ତଡ଼େକ୍ ତିନ୍ଦାନ୍ ଉନ୍ଦାନ୍ ମାଡ଼ୁତିଡ଼୍ ?”
LUK 5:31 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ସୁସ୍ଥ ନାରୁଡ଼୍‍କ୍ ଡାକ୍ଟର୍‍ତେ ଦର୍‍କାର୍ ଇଲ୍‍ଲେ, ମାତର୍ ରଗ୍‍ତେ ନାରୁଡ଼୍‍କିଂଙ୍କ୍ ଦର୍‍କାର୍ ମିନ୍ଦେ ।
LUK 5:32 ନାନ୍ ଦାର୍ମିକ୍ ନାରୁଡ଼୍‍କ୍ କାରଙ୍ଗାନ୍ ସେଙ୍ଗେ ୱାଡ଼ନ୍, ବାତେଙ୍କ୍ ଇତ୍କେ ମନପରିବର୍ତ୍ତନ୍ ସେଙ୍ଗେ ପାପି ନାରୁଡ଼୍‍କ୍ କାରଙ୍ଗାନ୍ ସେଙ୍ଗେ ୱାସ୍‍ମିନ୍ଦେନ୍ ।”
LUK 5:33 ବେସ୍‍କ୍‍ତୁଡ଼୍‍ ନାରୁଡ଼୍ ଜିସୁଙ୍କ୍ କେତ୍ତଡ଼୍, “ଯୋହନ୍‌ ତେ ଶିଷ୍ୟଡ଼୍ ନାର୍ଗେ ଦିନାମ୍‍ତେ ଉପବାସ୍ ନୁ ପ୍ରାର୍ତନା ମାଡ଼ିତଡ଼୍, ପାରୂଶୀଡ଼୍ ତେ ଶିଷ୍ୟଡ଼୍ ମିକା ଆଦ୍ ରକମ୍ ମାଡ଼ିତଡ଼୍, ବାତେଙ୍କ୍ ଇତ୍କେ ମିଇ ଶିଷ୍ୟଡ଼୍ ତିନ୍ଦାନ୍ ଉନ୍ଦାନ୍ ମାଡ଼ିତଡ଼୍ ।”
LUK 5:34 ଆଗେତିନ୍‍ସ୍ “ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, ପେଣ୍ଡୁଲ୍ ନାରୁଡ଼୍‍ତଡ଼୍ ବର ମାନ୍ଦାନ୍ ୱେଲେ ମିଡ଼୍ କି ଅଡ଼୍‌‍କିଂଙ୍କ୍ ଉପବାସ୍ ମାଡ଼େ ପାର୍‍ଦ୍‍ତିଡ଼୍ ? ବେସୁଟ୍‌ ମିକା ଆୟ୍‍ୟ ।
LUK 5:35 ବାତେଙ୍କ୍ ଇତ୍କେ ସମୟ୍ ୱାଦ୍‍ତା; ମେଣ୍ଡେ, ବେସୁଣ୍ଟ୍ ଅଡ଼ାଗାକନ୍‍ସ୍ ବରତିଙ୍କ୍ ୱିରସ୍‍ପି ହଦ୍‍ତଡ଼୍, ଆସୁଣ୍ଟ୍ ଆଦ୍ ଦିନାମ୍‍ତେ ଅଡ଼୍‌‍ ଉପବାସ୍ ମାଡ଼ିତଡ଼୍ ।”
LUK 5:36 ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ ୱେରଡ୍‍ ୱେଷଡ଼୍ କେତ୍ତଣ୍ଡ୍, “ବେନ ପୁଃନେ ସିଲେତ୍ କନ୍‍ସ୍ ତାଲି ଦେହେସ୍ ପାଃନ୍ତେ ସିଲେତାଗ୍ ୱାଟଣ୍ଡ୍; ୱାଟକେ ଅଣ୍ଡ୍‌ ପୁଉନାଦିଙ୍କ୍ ଇକିତଣ୍ଡ୍, ମେଣ୍ଡେ ପୁଃନେ ସିଲେତ୍ ତାଲି ପାଃନ୍‌ତାଦ୍‌ ତଡ଼୍ କାୟିଲ ।”
LUK 5:37 ମେଣ୍ଡେ, ବେନ ପୁଃନେ ଦ୍ରାକ୍ଷାରସ୍ ପାଃନ୍ତେ କୁଣ୍ଡେତାଗ୍ ୱାଟଣ୍ଡ୍; ୱାଟକେ ପୁଃନେ ଦ୍ରାକ୍ଷାରସ୍ କୁଣ୍ଡେତିଙ୍କ୍ ହୁଃତିତେ, ମେଣ୍ଡେ କୁଣ୍ଡେ ନୁ ଅଙ୍ଗୁର୍ ରସ୍ ନଷ୍ଟ ଆଦ୍‍ତେ ।
LUK 5:38 ବାତେଙ୍କ୍ ଇତ୍କେ ପୁଃନେ ଦ୍ରାକ୍ଷାରସ୍ ପୁଃନେ କୁଣ୍ଡେତାଗେ ନେହେତାନ୍ ଲେକେତ୍ ।
LUK 5:39 ମେଣ୍ଡେ, ବେନ ପାଃନ୍ତେ ଦ୍ରାକ୍ଷାରସ୍ ଉଞ୍ଜ୍ ମିକା ପୁଃନେ ଦ୍ରାକ୍ଷାରସ୍ ଉନ୍ଦାନଙ୍କ୍ ଇଚ୍ଛା ମାଡ଼ଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ କେତିତଣ୍ଡ୍, ପାଃନ୍‌ତାଦ୍‌ ତ ସାଏ ।
LUK 6:1 ଅଣ୍ଡ୍‌‍ଦିନ୍ ଜିସୁ ବିଶ୍ରାମଦିନେ ତାଗ୍ ଶସ୍ୟୱାୟେ ତାଲାନ୍ ଆଞ୍ଜ ମାନ୍ଦାନ୍ ୱେଲେ ଅନ୍‌ ଶିଷ୍ୟଡ଼୍ କେଡ଼୍ ଦେହେସ୍ କାଇଦେ ନଅକି ତିଞ୍ଜ ମାତ୍‍ତଡ଼୍ ।
LUK 6:2 ଇତ୍କେ ପାରୂଶୀଡ଼୍ ଲୋପେ ବେସ୍‍କ୍‍ତୁଡ଼୍‍ କେତ୍‍ତଡ଼୍‍, “ବିଶ୍ରାମଦିନେ ଦାଗେ ବାତେଏ ମାଡ଼ାନାଦ୍ ନିୟମ୍‍ ଆୟ୍‍ୟ, ଆଦ୍ ମିଡ଼୍ ବାତେଙ୍କ୍ ମାଡ଼ୁତିଡ଼୍ ?”
LUK 6:3 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, ଦାଉଦ୍‍ ନୁ ତାମ୍ ସାଙ୍ଗଡ଼୍ କାରୱିନ୍ ମାନ୍ଦାନ୍ ୱେଲେ ଅଣ୍ଡ୍‌ ବାତେଏ ମାଡ଼ତ୍‍ତଣ୍ଡ୍, ଆଦ୍ ମିଡ଼୍ କାର୍‍ୱିଡ଼୍ କି ?
LUK 6:4 ଅଣ୍ଡ୍‌ ବେଲା ଇଶ୍ୱର୍ ତେ ଲୋନ୍‌ ଆସି, ବେନେ ଦର୍ଶନୀରୂଟି ମାତର୍ ଯାଜକିଡ଼୍ ୱିଡ଼୍‍ସି ମେଣ୍ଡେ ବେନଙ୍କେ ତିନ୍ଦାନଙ୍କ୍ ନିୟମ୍‍ ଆୟ୍‍ୟ, ଆଦ୍ ତାସ୍ ତିତ୍‍ତଣ୍ଡ୍, ମେଣ୍ଡେ ତାନ୍ ସାଙ୍ଗଡ଼କ୍ ମିକା ହିତ୍‍ତଣ୍ଡ୍ ।
LUK 6:5 ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ନାରୁନ୍‍ପିଲେ ବିଶ୍ରାମଦିନେତେ ପ୍ରବୁ ଆଦ୍‍ତନ୍ ।”
LUK 6:6 ଜିସୁ ମେଣ୍ଡେଅଣ୍ଡ୍‌ ବିଶ୍ରାମଦିନେ ତେ ସମାଜ୍ ଲତ୍‍ତାଗେ ନେଙ୍ଗିମିକା ଶିକ୍ଷା ହିସ ମାତ୍‍ତଣ୍ଡ୍; ଆଗେ ୱେରନ୍ ନାରୁଡ଼୍ ମାତ୍‍ତଣ୍ଡ୍, ଅନ୍‌‍ୱାଦ୍ ତିନ୍ଦେକାଇ ୱାତିମାତ୍‍ତେ ।
LUK 6:7 ମେଣ୍ଡେ, ଅଣ୍ଡ୍‌ ଉମ୍ଭ ବିଶ୍ରାମଦିନେ ଦାଗେ ସୁସ୍ଥ ମାଡ଼ିତନ୍, ଇଦ୍ ଉଡ଼ାନ୍ ସେଙ୍ଗେ ଶାସ୍ତ୍ରୀ ନୁ ପାରୂଶୀଡ଼୍ ଅଂକିଙ୍କ୍‌ ଉଡ଼ ମାତ୍‍ତଡ଼୍, ବେଲାକି ଅଡ଼୍‌‍ ଅନ୍‌ ବିରୁଦ୍ ତେ ଦଷ୍ ପଇତାଙ୍କ୍ ପାର୍‍ଦ୍‍ତଡ଼୍ ।
LUK 6:8 ବାତେଙ୍କ୍ ଇତ୍କେ ଜିସୁ ଅଡ଼୍‌‍ୱାଦ୍ ମନ୍‍ତାଦ୍ ହେର୍କା ପୁଞ୍ଜ୍, ବେନ୍ ନାରୁଡ଼୍ ତେ କାୟ୍ ୱାତିମାତ୍‍ତେ, ଅଂକିଙ୍କ୍‌ କେତ୍ତଣ୍ଡ୍, ତେଦ୍‍ଦା ନାଡ଼ମେ ନିଲ୍‍ମ୍ । ମେଣ୍ଡେ ଅଣ୍ଡ୍‌ ତେଦି ନିତ୍‍ତଣ୍ଡ୍ ।
LUK 6:9 ଆଗେଙ୍କ୍ “ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, ନାନ୍ ମିକିଂଙ୍କ୍ ପାଚ୍ରାମାଡୁତାନ୍, ବିଶ୍ରାମଦିନେ ତେ ବାତେଏ ମାଡ଼ାନାଦ୍ ନିୟମ୍‍ ? ସାୟେ ମାଡ଼ାନାଦ୍ ନା କାରାପ୍ ମାଡ଼ାନାଦ୍ ? ଜିୱୁଣ୍ଡ୍ ରକ୍ଷା ମାଡ଼ାନାଦ୍ ନା ଆୱକାନାଦ୍ ?”
LUK 6:10 ମେଣ୍ଡେ, “ଅଣ୍ଡ୍‌ ସାର୍‍ରେପାକେ ସାରେତଡ଼୍‌କିଂଙ୍କ୍ ଉଡ଼ି ଅଂକିଙ୍କ୍‌ କେତ୍ତଣ୍ଡ୍, ନି କାଇଆମ୍ । ଆସୁଣ୍ଟ୍ ଅଣ୍ଡ୍‌ ଆଲା ମାଡ଼ତ୍‍ତଣ୍ଡ୍, ଆସୁଟେ ଅନ୍‌‍ୱାଦ୍ କାୟ୍ ସୁସ୍ଥ ଆତ୍‍ତେ ।”
LUK 6:11 ବାତେଙ୍କ୍ ଇତ୍କେ ଅଡ଼୍‌‍ କପାମ୍ ଆଦ୍‍ତଡ଼୍, ମେଣ୍ଡେ ଜିସୁନ୍ ସେଙ୍ଗେ ବାତେମାଡ଼୍ ପାର୍‍ଦ୍‍ତଡ଼୍, ଆଦ୍ ବିଷୟତେ ନିଜେ ନିଜେ ଗଟି ତିରିୟା ତିରିୟି ଆତ୍‍ତଡ଼୍ ।
LUK 6:12 ଆସୁଣ୍ଟ୍ ଜିସୁ ଅନ୍‌‍ଦିନେ ପ୍ରାର୍ତନା ମାଡ଼ାନ୍ ସେଙ୍ଗେ ମେଟେତାଗ୍ ଆଞ୍ଜ୍ ପରମେଶ୍ୱରତେ ଗାର୍‍ରେ ପ୍ରାର୍ତନା ମାଡ଼ମାଡ଼ ନିଟ୍‍ଟା ନାର୍କେ ମାତ୍‍ତଣ୍ଡ୍ ।
LUK 6:13 ନାର୍‍କୁକ୍, ଜିସୁ ତାନ୍ ପ୍ରେରିତ୍‍ ଶିଷ୍ୟଡ଼୍ ଗାର୍‍ରେ କାର୍‍ଙ୍ଗି ଅଡ଼୍‌‍ ଲୋପେ ବାରଜାନ୍‍ତିଙ୍କ୍ ଏଞ୍ଚତଣ୍ଡ୍; ଅଣ୍ଡ୍‌ ଅଡ଼୍‌‍କିଂଙ୍କ୍ ମିକା ପ୍ରେରିତ୍ ପେଦେର୍ ହିତ୍‍ତଣ୍ଡ୍;
LUK 6:14 ଅଡ଼୍‌‍ ଆତ୍‍ତଡ଼୍ ଶିମୋନ୍, ବେନଙ୍କ୍ ଅଣ୍ଡ୍‌ ମିକା ପିତର୍ ପେଦେର୍ ହିତ୍‍ତଣ୍ଡ୍, ମେଣ୍ଡେ ତାମ୍ ଦାଦାଲ୍‌ ଆନ୍ଦ୍ରିୟ, ଯାକୁବ୍ ନୁ ଯୋହନ୍‌, ପିଲିପ୍‍ପ ନୁ ବର୍ତଲମି,
LUK 6:15 ମାତିଉ ନୁ ତୋମା, ଆଲ୍‍ଫିତେ ମାର୍‍ ଯାକୁବ୍ ନୁ ଶିମୋନ୍, ବେନଙ୍କ୍ ଉଦଯୋଗୀ ଇଞ୍ଜ କେତିତଡ଼୍‍,
LUK 6:16 ଯାକୁବ୍ ତେ ମାର୍‍ ଯିହୂଦା ନୁ ଇଷ୍କାରିୟୋତୀୟ ଯିହୂଦା, ବେନ ଜିସୁଙ୍କ୍ ଶତ୍ରୁଡ଼୍ କାଇଦେ ଇତ୍‍ତନ୍ ।
LUK 6:17 ମେଣ୍ଡେ, ଜିସୁ ପ୍ରେରିତ୍ ତଡ଼୍ ମେଟେତାଗାଙ୍କ୍ ମଦଲ୍ ୱାତ୍‍ତଣ୍ଡ୍ । ମେଣ୍ଡେ ତାନ୍ ଗାଟି ନାର୍ଗେ ଶିଷ୍ୟଡ଼୍ ତଡ଼୍ ୱେରନ୍ ସାମ୍‍ନ୍ ବୁମ୍‍ତାଗେ ନିତ୍‍ତଡ଼୍ । ମେଣ୍ଡେ ସାରେ ଯିହୂଦା ପ୍ରଦେଶ୍, ଯିରୁଶାଲେମ୍, ମେଣ୍ଡେ ସୋର ନୁ ସୀଦୋନ୍‍ତେ ଆଞ୍ଚିନାଗା କଞ୍ଜ୍ ଗାଟି ନାରୁଡ଼୍ ଉପସ୍ଥିତ୍ ଆତ୍‍ତଡ୍;
LUK 6:18 ଅଡ଼୍‌‍ ଅନ୍‌ ବାକ୍ୟ କେଞ୍ଜାନଙ୍କ୍ ନୁ ନିଜ୍‍ନିଜ୍ ରୋଗତେ କନ୍‍ସ୍ ସୁସ୍ଥ ଆଦାନ୍ ସେଙ୍ଗେ ୱାସ୍ ମାତ୍‍ତଡ଼୍, ମେଣ୍ଡେ ବେନ ଅଶୁଚି ଆତ୍ମା ତଡ଼୍ କଷ୍ଟ ଆସ୍‍ସ ମାତ୍‍ତଡ଼୍, ଅଡ଼୍‌‍ ସାରେତଡ଼୍‍କ୍ ଜିସୁ ସୁସ୍ଥ ମାଡ଼ତଣ୍ଡ୍;
LUK 6:19 ମେଣ୍ଡେ ନାରୁଡ଼୍ ଅଂକିଙ୍କ୍‌ ଇଟାନଙ୍କ୍ ଆଲ୍‍ସି ମାଡ଼ମାତ୍‍ତଡ଼୍, ବାତେଙ୍କ୍ ଇତ୍କେ ଅନାଗା କଞ୍ଜ୍ ଶକ୍ତି ପେୟିସ୍ ସାରେତଡ଼୍‌କିଂଙ୍କ୍ ସୁସ୍ଥ ମାଡ଼ମାତ୍‍ତେ ।
LUK 6:20 ଆସୁଣ୍ଟ୍ ଜିସୁ ତାନ୍ ଶିଷ୍ୟଡ଼୍ ପାକ୍‍କେ ଉଡ଼ି କେତ୍ତଣ୍ଡ୍, “ଅଦାତ୍ମିକ୍ ଜିୱୁନ୍‍ତାଗ୍ ଦୁର୍ବଲ୍ ଇଞ୍ଜ ଏର୍କା ମାଡ଼ାନ୍ ନାରୁଡ଼୍ ଦନ୍ୟ,” ବାତେଙ୍କ୍ ଇତ୍‍କେ ଅଡ଼୍‌ ସ୍ୱର୍ଗରାଜ୍ୟତେ ଅଦିକାର୍ ଆଦ୍‍ତଡ଼୍ ।
LUK 6:21 ଇଞ୍ଜେ କାର୍‍ୱିନ୍ ଯେ ମିଡ଼୍, ମିଡ଼୍ ଦନ୍ୟ, ବାତେଙ୍କ୍ ଇତ୍କେ ମିଡ଼୍ ତିଞ୍ଜ୍‌ ପାଞ୍ଜିତିଡ଼୍‌ । ଇଞ୍ଜେ କେୟୁତିଡ଼୍‍ ଯେ ମିଡ଼୍, ମିଡ଼୍ ଦନ୍ୟ, ବାତେଙ୍କ୍ ଇତ୍କେ ମିଡ଼୍ କାୱଦିତିଡ଼୍‍ ।
LUK 6:22 ନାରୁଡ଼୍ ବେସୁଣ୍ଟ୍ ନାରୁନ୍‍ପିଲେ ସେଙ୍ଗେ ମିକିଂଙ୍କ୍ ୱେଏରେ ମାଡ଼ିତଡ଼୍, ପାସ୍‍କିତଣ୍ଡ୍, ମେଣ୍ଡେ ନିନ୍ଦା ମାଡ଼ିତଡ଼୍ ନୁ ମି ପେଦେର୍‍ତିଙ୍କ୍ କାରାବ୍‍ ଇଞ୍ଜ ପୟଡ୍, ଆସୁଣ୍ଟ୍ ମିଡ଼୍ ଦନ୍ୟ ।
LUK 6:23 ଆଦ୍‍ଦିନେ ୱେଡ଼୍‍କା ମାଡ଼ି ହେନ୍ଦାଟ୍, ବାତେଙ୍କ୍ ଇତ୍କେ ଉଡ଼ାଟ୍, ସ୍ୱର୍ଗତାଗେ ମିୱାଦ୍ ପୁରସ୍କାର୍ ମିନ୍ଦେ; ମେଣ୍ଡେ, ଆଦ୍ ରକମ୍ ତ ଅଡ଼୍‌‍ୱାଦ୍‌ ପିତୃପୁରୁଷନଡ଼୍ ବାବବାଦୀଡ଼୍ ସେଙ୍ଗେ ମାଡ଼ମାତ୍‍ତଡ଼୍ ।
LUK 6:24 ବାତେଙ୍କ୍ ଇତ୍କେ ହାୟେ, ଦଣ୍ଡତେ ନାରୁଡ଼ି ସାଉକାର୍ ଯେ ମିଡ଼୍, ବାତେଙ୍କ୍ ଇତ୍କେ ମିଡ଼୍ ନିଜେ ନିଜେ ସୁକାମ୍‍ତେ ମିନ୍ଦେଡ଼ି ।
LUK 6:25 ହାୟେ, ଦଣ୍ଡତେ ନାରୁନ୍ ନାର୍ଗେମାନ୍ଦାନ୍ ନାରୁଡ଼୍ ଯେ ମିଡ଼୍, ବାତେଙ୍କ୍ ଇତ୍କେ ମିଡ଼୍ କାରୱିନ୍ ଆଦ୍‍ତିଡ଼୍ । ହାୟେ, ଦଣ୍ଡତେ ପାତ୍ର ଇଞ୍ଜେ କାୱଦୁତିଡ଼୍‍ ଯେ ମିଡ଼୍, ବାତେଙ୍କ୍ ଇତ୍କେ ମିଡ଼୍ ଦୁଃକାମ୍ ନୁ କେୟିତିଡ଼୍ ।
LUK 6:26 ବେସୁଣ୍ଟ୍ ନାରୁଡ଼୍ ସାରେତଡ଼୍ ମିକିଂଙ୍କ୍ ପ୍ରସଂଶା ମାଡ଼ି କେତିତଡ଼୍, ଆସୁଣ୍ଟ୍ ହାୟେ, ମିଡ଼୍ ଦଣ୍ଡତେ ପାତ୍ର; ଆଦ୍ ରକମ୍ ତ ଅଡ଼୍‌‍ୱାଦ୍‌ ପିତୃପୁରୁଷନଡ଼୍ ବଣ୍ଡବାବବାଦିଡ଼୍‍ ସେଙ୍ଗେ ମାଡ଼ମାତ୍‍ତଡ଼୍ ।
LUK 6:27 ବାତେଙ୍କ୍ ଇତ୍କେ କେଞ୍ଜୁତିଡ଼୍‍ ଯେ ମିଡ଼୍, ମିକିଂଙ୍କ୍ ନାନ୍ କେତୁତାନ୍, ମି ଶତ୍ରୁନଡ଼୍‍କ୍ ପ୍ରେମ୍ ମାଡ଼ାଟ୍; ବେନଡ଼୍ ମିକିଂଙ୍କ୍ ପାସ୍‍କିତଡ଼୍, ଅଡ଼ାଦ୍‌ ଲେକେତ୍ ମାଡ଼ାଟ୍;
LUK 6:28 ବେନଡ଼୍ ମିକିଂଙ୍କ୍ ଅବିଶାପ୍‌ ହିଦ୍‍ତଡ଼୍, ଅଡ଼୍‌‍କିଂଙ୍କ୍ ଆର୍ଶିବାଦ୍ ମାଡ଼ାଟ୍; ବେନଡ଼୍ ମିକିଂଙ୍କ୍ ଅପ୍‍ମାନ୍ ମାଡ଼ିତଡ଼୍, ଅଡ଼୍‌‍ ସେଙ୍ଗେ ପ୍ରାର୍ତନା ମାଡ଼ାଟ୍ ।
LUK 6:29 ବେନ ମିକିଂଙ୍କ୍ ୱେରନ୍ ବୁକେତାଗ୍ ଚାପୁଡ଼ା ରେହେତିତଣ୍ଡ୍, ଅଂକିଙ୍କ୍‌ ମେଣ୍ଡ ଅଙ୍କ୍‌ ବୁକା ତହସିମୁଟ୍; ମେଣ୍ଡେ, ବେନ ମିଇ ଡୁପଟ୍ ହଦ୍‍ତଣ୍ଡ୍, ଅଂକିଙ୍କ୍‌ ମିଇ ଚକା ମିକା ଆଦାଙ୍କ୍ ମନା ମାଡ଼ମାଟ୍ ।
LUK 6:30 ବେନ ମିକିଂଙ୍କ୍ ତାଆଲ୍‍କିତଣ୍ଡ୍, ଅଂକିଙ୍କ୍‌ ହିମୁଟ୍; ମେଣ୍ଡେ ବେନ ମିଇ ସମ୍ପତ୍ତି ଆଦ୍‍ତଣ୍ଡ୍, ଅନାଗା କଞ୍ଜ୍ ଆଦ୍ ମେଣ୍ଡେ ତାଲ୍‍କ୍‍ମାଟ୍ ।
LUK 6:31 ନାରୁଡ଼୍ ମି ସେଙ୍ଗେ ବେଦ୍ ଲେକାମ୍ ବ୍ୟବହାର୍ ମାଡ଼ିଡ୍ ଇଞ୍ଜ ମିଡ଼୍ ଇଚ୍ଛା ମାଡ଼ୁତିଡ଼୍, ମିଡ଼୍ ଅଡ଼୍‌‍ ସେଙ୍ଗେ ଆଦ୍ ଲେକାମ୍ ମାଡ଼ାଟ୍ ।
LUK 6:32 ମେଣ୍ଡେ, ବେନଡ଼୍ ମିକିଂଙ୍କ୍ ପ୍ରେମ୍ ମାଡ଼ିତଡ଼୍, ମିଡ଼୍ ଯଦି ମାତର୍ ଅଡ଼୍‌‍କିଂଙ୍କ୍ ପ୍ରେମ୍ ମାଡ଼କେ ମିଡ଼୍ କି ଅନୁଗ୍ରହ ପାଏମ୍‍ ଆଦ୍‍ତିଡ୍ ? ବାତେଙ୍କ୍ ଇତ୍କେ ପାପିଡ୍ ମିକା ନିଜେ ନିଜେ ପ୍ରେମ୍‍କାରୀନଡ଼କ୍ ପ୍ରେମ୍ ମାଡ଼ିତଡ଼୍ ।
LUK 6:33 ମେଣ୍ଡେ, ବେଏନଡ୍ ମିକିଂଙ୍କ୍ ଲେକେତ୍ ମାଡ଼ିତଡ଼୍, ଯଦି ମିଡ଼୍ ମାତର୍‍ ଅଡ଼୍‌‍ୱାଦ୍ ଲେକେତ୍ ମାଡ଼ିତିଡ଼୍, ଆସୁଣ୍ଟ୍ ମିଡ଼୍ କି ଅନୁଗ୍ରହ ପାଏମ୍‍ ଆଦ୍‍ତିଡ୍ ? ବାତେଙ୍କ୍ ଇତ୍କେ ପାପିଡ୍ ମିକା ଆଲାମାଡ଼ୁତଡ୍ ।
LUK 6:34 ମେଣ୍ଡେ, ବେନଡ଼ାଗା କନ୍‍ସ୍ ମିଡ଼୍ ଆଦାନ୍ ଆଶେ ମାନ୍‍ତେ, ମାତର୍ ଅଡ଼୍‌‍କିଂଙ୍କ୍ ଋଣ୍‍ ଇତ୍‍କେ ମିଡ଼୍ କି ଅନୁଗ୍ରହ ପାଏମ୍‍ ଆଦ୍‍ତିଡ଼୍ ? ପାପିଡ୍ ମିକା ସମାନ୍ କାମ୍‍ ମାଡ଼୍‍ତେ କାୟେତେ ଆଦାନ୍ ସେଙ୍ଗେ ପାପିନଡ଼କ୍ ଉଦାର୍ ହିଦ୍‍ତଡ଼୍ ।
LUK 6:35 ମାତର୍ ମିଇ ଶତ୍ରୁନଡ଼୍‍କ୍ ପ୍ରେମ୍ ମାଡ଼ାଟ୍ ନୁ ଅଡ଼ାଦ୍‌ ଲେକେତ୍ ମାଡ଼ାଟ୍, ମେଣ୍ଡେ ପରିଶୋଦତେ ଆଶେ ୱାଟକଟ ଋଣ୍‍ ହିମୁଟ୍; ଆଲାତ୍କେ ମି ପୁରସ୍କାର୍ ବେଡ଼୍‍ୟାଦ୍‍ ଆଦ୍‍ତେ ନୁ ମିଡ଼୍ ସତ୍‍ଇଶ୍ୱର୍‍ ତେ ମାର୍‍ ଆଦ୍‍ତିଡ୍, ବାତେଙ୍କ୍ ଇତ୍କେ ବେନ ଦର୍‍କ୍‍ତା ପେର୍‍କେ ମିକା ଉପକାର୍ ପୁନଣ୍ଡ୍ ଆଦ୍ ରକମ୍ ନାରୁଡ଼୍ ନୁ ଦୁଷ୍ଟ ନାରୁଡ଼୍‍ତେ ସେଙ୍ଗେ ମିକା କୃପାବାନ୍ ଆଦ୍‍ତନ୍ ।
LUK 6:36 ମି ବାବାଲ୍ ବେଦ୍ ରକମ୍ ଦୟାତନ୍, ମିଡ଼୍ ଆଦ୍ ପୁଟୁଙ୍କ୍ ଦୟାତନ୍ ଆୟ୍‍ମୁଟ୍ ।
LUK 6:37 “ମେଣ୍ଡେ, ବିଚାର୍ ମାଡ଼ମାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ ବିଚାର୍ ମାଡ଼ଣ୍ଡ୍; ଦଷ୍ ହିମାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ ଦଷି ମାଡ଼ଣ୍ଡ୍ । କ୍ଷମା ମାଡ଼ାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ କ୍ଷମା ମାଡ଼ିତନ୍;
LUK 6:38 ଦାନ ମାଡ଼ାଟ୍, ଆଲାତ୍କେ ଇଶ୍ୱର୍ ମିକିଂଙ୍କ୍ ଦାନ ହିଦ୍‍ତଣ୍ଡ୍; ଅଣ୍ଡ୍‌ ବଡ୍‍ତିଙ୍କ୍ ସାରେ ମାଡ଼ି ତାଙ୍କ୍ ଆଦ୍‍ମି ମାୟିନା ମିକିଂଙ୍କ୍ ହିଦ୍‍ତଣ୍ଡ୍; ବାତେଙ୍କ୍ ଇତ୍କେ ବେନେ କଲ୍‍ସାନାଦିନ୍ ତଡ଼୍‌ କଲସିତିଡ୍, ଆଦ୍ କଲ୍‍ସାନାଦିନ୍ ତଡ଼୍‌ ଇଶ୍ୱର୍‌ ମିକିଂଙ୍କ୍ ମେଣ୍ଡେ କଲ୍‍ସି ହିଦ୍‍ତଣ୍ଡ୍ ।”
LUK 6:39 ଅଣ୍ଡ୍‌ ଅଡ଼୍‌‍କିଂଙ୍କ୍ ୱେରନ୍ ୱେଷଡ଼୍ ମିକା କେତ୍ତଣ୍ଡ୍, “କାନାଲ୍ କି କାନାଙ୍କ୍ ହାର୍ ତଅତ୍‍ତେ ପାର୍‍ଦ୍‍ତଣ୍ଡ୍ ? ଯଦି ଅଣ୍ଡ୍‌ ଆଲାମାଡ଼ିତଣ୍ଡ୍ ଅଡ଼୍‌‍ କି ଇଡ଼୍‍ୱୁଡ଼୍‍ ଗୁଇନ୍ଦେ ତାଗ୍ ରାୟଡ୍ ?”
LUK 6:40 ଗୁରୁ ତାଗାଙ୍କ୍‌ ଶିଷ୍ୟ ଯଗ୍ୟ ଆୟ୍‍ୟଣ୍ଡ୍; ବାତେଙ୍କ୍ ଇତ୍କେ ସାରେ ଶିଷ୍ୟ ଶିକ୍ଷା ଶେଷ୍ ମାଡ଼କେ ଗୁରୁନ୍‍ ଲେକାମ୍ ଆଦ୍‍ତନ୍ ।
LUK 6:41 ମେଣ୍ଡେ, ବାତେଙ୍କ୍ ନି ତାମୁଣ୍ଡ୍‌ ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ଉଡ଼ୁତି, ବାତେଙ୍କ୍ ଇତ୍କେ ନି ନିଜେ କଣ୍ଡେତାଗ୍ ବେନେ ଜିଟ୍‍କେ ମିନ୍ଦେ, ଆଦ୍ ହାଲ୍‍ସି ଉଡ଼୍‍ୱିନ୍ ?
LUK 6:42 ନିମେ ନିଜେ କଣ୍ଡେତାଗ୍ ମାନ୍ଦାନ୍ ଜିର୍‍କେତିଙ୍କ୍ ଉଡ଼କଟ ବେଲା ନିଜେ ତାମୁଣ୍ଡ୍‌ତିଙ୍କ୍ କେତ୍‍ତେ ପାର୍‍ଦ୍‍ତି, ତାମୁନ୍, ୱାଡେ, ନି କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ପେସ୍‍ପି ହିଦ୍‍ତାନ୍ ? ହୋ ଟେମ୍‌ପରି, ମୁନେନ୍ ନିଜେ କଣ୍ଡେତାଦ୍ ଜିଟ୍‍କେ ପେସ୍‍ପେ ପାର୍‍ୱନ୍, ତାନ୍ ପେର୍‍କେ ନିଜେ ତାମୁସ୍ ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ପେସ୍‍ପାନ୍ ସେଙ୍ଗେ ସହଜ୍‍ତେ ଉଡ଼େପାର୍‍ଦ୍‍ତି ।
LUK 6:43 “ସାଏତ୍ ମାଡ଼େତାଗ୍ କାରାପ୍ କାୟା ଆଦ କାରାପ୍ ମାଡ଼େତାଗ୍ ସାଏତ୍ କାୟା ଆଦ ।”
LUK 6:44 ବାତେଙ୍କ୍ ଇତ୍କେ ସାରେ ମାଡ଼ାକ୍ ନିଜେ କାୟାନ୍ ତଡ଼୍ ପୁନ୍ଦାଙ୍କ୍ ଆଦ୍‍ତେ; କୟେ ମାଡ଼ାକିନାଗେ କଞ୍ଜ୍ ତ ନାରୁଡ଼୍ ତୋୟା କୟୋଡ୍, ବା କୟେ ଟଣ୍ଡେତ୍ କଞ୍ଜ୍ ଅଙ୍ଗୁର୍‌ କୟୋଡ୍ ।
LUK 6:45 ସାୟେତ୍ ନାରୁଡ଼୍ ତାନ୍ ହୃଦୟ୍ ଲେକେତ୍‍ ସାଏତ୍ ଗୁଦାମ୍‌ତେ କଞ୍ଜ୍ ସାଏତ୍ ଜିନିଷ୍ ପେସ୍‍ପିତଣ୍ଡ୍, ମେଣ୍ଡେ, କାରାପ୍ ନାରୁଡ଼୍ କାରାପ୍ ଗୁଦାମ୍‌ତେ କଞ୍ଜ୍ କାରାପ୍ ଜିନିଷ୍ ପେସ୍‍ପିତଣ୍ଡ୍; ବାତେଙ୍କ୍ ଇତ୍କେ ହୃଦୟ୍ ତେ ସାରେତେ କଞ୍ଜ୍ ପାୟୁର୍ ତିରିୟିତେ ।
LUK 6:46 ମେଣ୍ଡେ, “ମିଡ଼୍ ବାତେଙ୍କ୍ ନାକିଂଙ୍କ୍ ପ୍ରବୁ ଇଞ୍ଜ କେତୁତିଡ଼୍‍, ମାତର୍ ନାୱାଦ୍ ବାକ୍ୟ ପାଲନ୍ ମାଡ଼୍‍ୱିଡ଼୍ ?
LUK 6:47 ବେନ ନା ଗାର୍‍ରେ ୱାସ୍ ନାୱାଦ୍ ଗଟ୍ କେଞ୍ଜି ଆୱୁସାରେ ପାଲନ୍ ମାଡ଼ିତନ୍, ଅଣ୍ଡ୍‌ ବେନନ୍ ରକମ୍ ଆଦ୍‍ତନ୍, ଆଦ୍ ନାନ୍ ମିକିଂଙ୍କ୍ କେତିତାନ୍ ।
LUK 6:48 ଅଣ୍ଡ୍‌ ଇଦ୍ ରକମ୍ ୱେର୍‍ଣ୍ଡ୍ ଲୋନ୍‌ ତିଆର୍ ମାଡ଼ାନ୍ ନାରୁଡ଼୍ ତେ ରକମ୍, ବେନ କୁଇଙ୍ଗ୍ ଡେୱି ଗନ୍ଦ କାଲ୍‍କିନ୍ ପରୁ ୱାଟ୍‍ତଣ୍ଡ୍; ମେଣ୍ଡେ, ବନ୍ୟା ଆତ୍‍କେ, ଏର୍‍ ଆଦ୍ ଲତ୍‍ତିଙ୍କ୍ ଗାଟି ଜର୍‍ଦେ ଦକ୍‍କା ରେହେତ୍‍ତେ, ବାତେଙ୍କ୍ ଇତ୍କେ ଆଦ୍ ହୁଉତାନଙ୍କ୍ ପାର୍‍ୱ, ବାତେଙ୍କ୍ ଇତ୍କେ ଆଦ୍ ସାଏ ଲେକାମ୍ ତିଆର୍ ମାଡ଼ିମାତ୍‍ତଡ଼୍ ।
LUK 6:49 ବାତେଙ୍କ୍ ଇତ୍କେ ବେନ କେଞ୍ଜି ପାଲନ୍ ମାଡ଼ଣ୍ଡ୍, ଅଣ୍ଡ୍‌ ଗନ୍ଦ ୱାଟକଟ ମାଣ୍ଡୁଲ୍‍ତେ ପରୁ ଲୋନ୍‌ ମାଡ଼ାନ୍ ନାରୁଡ଼୍ ତେ ରକମ୍; ଏର୍‍ ଆଦ୍ ଲନ୍‍ତିଙ୍କ୍ ଗାଟି ଜର୍‍ତେ ଦକ୍‍କା ରେହେତ୍‍କେ, ସାଙ୍ଗେ ସାଙ୍ଗେ ଆଦ୍ ଉରୁଙ୍ଗିତେ ନୁ ଆଦିନାଦ୍ ଦଂସ ବୟଙ୍କାର୍ ଆତ୍‍ତେ ।”
LUK 7:1 ଜିସୁ ନାରୁଡ଼୍‍କ୍ ତାନ୍‍ୱାଦ୍ ସାରେ ଗଟ୍ କେତାନାଦ୍ ତେର୍‍ସ୍‍ପି କଫର୍ନାହୁମ୍‍ ଟାୱୁନ୍‍ତାଗେ ଆତ୍‍ତଣ୍ଡ୍ ।
LUK 7:2 ଆଦ୍ ଦିନାମ୍‍ତେ ୱେର୍‍ଣ୍ଡ୍ ଶତସେନାପତିତେ ଦାସ୍ ରଗାମ୍ ଆସ୍ ଡଲାନ୍ ରକମ୍ ଆସ୍‍ମାତ୍ତଣ୍ଡ୍, ଅଣ୍ଡ୍‌ ତାନୱେ ପ୍ରିୟଦାସ, ମାତ୍‍ତଣ୍ଡ୍ ।
LUK 7:3 ଅଣ୍ଡ୍‌ ଜିସୁନ୍ ବିଷୟତେ କାବୁର୍ ଆସ୍, ଅଣ୍ଡ୍‌ ବେଲା ୱାସ୍ ତାନ୍ ଦାସତେ ଜିୱେ ରକ୍ଷା ମାଡ଼ତଣ୍ଡ୍, ଇଦିନ୍ ସେଙ୍ଗେ ଅନ୍‌ ଗାର୍‍ରେ ଯିହୁଦୀଡ଼୍ ଲୋପେ ବେସ୍‍କ୍‍ତୁଡ଼୍‍ ମୁକ୍ୟା ନାରୁଡ଼୍‍କିଂଙ୍କ୍ ରହସ୍ ଅଂକିଙ୍କ୍‌ ଅନୁରଦ୍‌‍ ମାଡ଼ତଣ୍ଡ୍ ।
LUK 7:4 ଅଡ଼୍‌‍ ଜିସୁନ୍ ଗାର୍‍ରେ ଆଞ୍ଜ୍ ଅଂକିଙ୍କ୍‌ ନିଜାମ୍ ବିନତି ମାଡ଼ି କେତାଙ୍କ୍ ପସ୍‍ପ୍‍ତ୍‍ତଡ଼୍, “ଅଣ୍ଡ୍‌ ନିୱାଦ୍ ସାହାଯ୍ୟ ଆଦାନ୍ ସେଙ୍ଗେ ଯୋଗ୍ୟ ଆଦ୍‍ତନ୍;
LUK 7:5 ବାତେଙ୍କ୍ ଇତ୍କେ ଅଣ୍ଡ୍‌ ମାନ୍‍ ଜାତିତିଙ୍କ୍ ପ୍ରେମ୍ ମାଡ଼ୁତଣ୍ଡ୍ ନୁ ଅଣ୍ଡ୍‌ ନିଜେ ମାନ୍‍ ସେଙ୍ଗେ ସମାଜ୍‍ଲନ୍ ତିଆର୍ ମାଡ଼ିସ୍ ମିନ୍ଦେଣ୍ଡ୍ ।”
LUK 7:6 ଆଗେଙ୍କ୍ ଜିସୁ ଅଡ଼୍‌‍ ତଡ଼୍ ଆତ୍‍ତଣ୍ଡ୍ । ଅଣ୍ଡ୍‌ ଲୋତ୍‍ତେ ସୁଦୁର୍ ଦୁରାମ୍ ହେୱତାୱେୟେ, ଶତସେନାପତି ସାଙ୍ଗଡ଼କ୍ ରହସ୍ ଅଂକିଙ୍କ୍‌ କେତ୍ତଣ୍ଡ୍, “ପ୍ରବୁ କଷ୍ଟ ମାଡ଼୍‍ମାଟ୍; ବାତେଙ୍କ୍ ଇତ୍କେ ନିମ୍‍ ଯେ ନା ଲନ୍ ଡେକେ ୱାଟିତି, ନାନ୍ ଇଦ୍ ରକମ୍ ଯୋଗ୍ୟ ଆୟ୍‍ୟ;
LUK 7:7 ତ ନାନ୍ ନି ଗାର୍‍ରେ ଆଦାଙ୍କ୍ ନିଜେତିଙ୍କ୍ ଯୋଗ୍ୟ ହେର୍କେ ମାଡ଼ନ୍; ବାତେଙ୍କ୍ ଇତ୍କେ ୱେରନ୍ ପଦ୍ ଗଟ୍ ମାଡ଼ା, ନା ଦାସ ସୁସ୍ଥ ଆଦ୍‍ତନ୍ ।
LUK 7:8 ବାତେଙ୍କ୍ ଇତ୍କେ ନାନ୍ ୱେରନ୍ ଅଦିନତେ ମାତ୍‍କେ ମିକା ନା ଆଦିନ୍ ତେ ସୈନିଡ଼୍ ମିନ୍ଦେଡ଼୍; ମେଣ୍ଡେ, ନାନ୍ ଅର୍‌ତୁଙ୍କ୍ ଆନ୍‌ ଇତ୍କେ ଅଣ୍ଡ୍‌ ଆଦ୍‍ତନ୍; ଅର୍‌ତୁଙ୍କ୍ ୱାଡ଼ା ଇତ୍କେ ଅଣ୍ଡ୍‌ ୱାଦ୍‍ତଣ୍ଡ୍; ମେଣ୍ଡେ ନା ଦାସଙ୍କ୍ ଇଦ୍ ମାଡ଼ା ଇତ୍କେ ଅଣ୍ଡ୍‌ ଆଦ୍ ମାଡ଼ିତନ୍ ।”
LUK 7:9 ଜିସୁ ଇଦ୍ ସାରେ ଗଟ୍ କେଞ୍ଜି ବାକ୍‍ୱା ଆତ୍‍ତଣ୍ଡ୍, ମେଣ୍ଡେ ତିଡ଼ିୟି ମିକା ପେର୍‍କେ ୱାସ୍ ମାନ୍ଦାନ୍ ନାରୁଡ଼୍ ସାରେତଡ଼୍‌କିଂଙ୍କ୍ କେତ୍ତଣ୍ଡ୍, “ନାନ୍ ମିକିଂଙ୍କ୍ କେତୁତାନ୍, ଇସ୍ରାଏଲ୍ ଲୋପେ ଇସ ବାଡ଼ିୟାଦ୍ ବିଶ୍ୱାସ୍ ଦର୍‍ସ୍‍କନ୍ !”
LUK 7:10 ମେଣ୍ଡେ, ରହତେ ନାରୁଡ଼୍ ଲୋନ୍‌ ମାଲ୍‍ସ୍ ୱାସ୍ ଦାସଙ୍କ୍ ସୁସ୍ଥ ଉଡ଼୍‌ତଡ୍ ।
LUK 7:11 ଇଗେଙ୍କ୍ ଜିସୁ ନାଇନ ପେଦେର୍‍ତେ ନଗର୍‍ତାଗ୍ ଆତ୍‍ତଣ୍ଡ୍, ମେଣ୍ଡେ ଅନ୍‌‍ୱେ ଶିଷ୍ୟଡ଼୍ ନୁ ନାର୍ଗେ ନାରୁଡ଼୍ ଅନ୍‌ ତଡ଼୍ ଆଞ୍ଜ ମାତ୍‍ତଡ଼୍ ।
LUK 7:12 ଅଣ୍ଡ୍‌ ନଗର୍‍ତେ ହାର୍ ତାଗ୍ ହେୱତେ ୱେଲେ, ଉଡାଟ୍, ନାରୁଡ଼୍ ୱେର୍‍ଣ୍ଡ୍ ଡୋଲତେ ନାରୁଙ୍କ୍ ବାଇଦେ କାଞ୍ଜି ତାସ ମାତ୍‍ତଣ୍ଡ୍, ଅଣ୍ଡ୍‌ ତାମ୍ ୟାୟଙ୍କ୍ ୱେରନ୍ ମାର୍‍, ମେଣ୍ଡେ ଆଦ୍ ନାଟାଡ଼୍ ରାଣ୍ଡିଲ୍; ମେଣ୍ଡେ ନାର୍ ତେ ନାର୍ଗେ ନାରୁଡ଼୍ ଅନ୍‌ ତଡ଼୍ ମାତ୍‍ତଡ଼୍ ।
LUK 7:13 ଆଦିଙ୍କ୍ ଉଡ଼ି ପ୍ରବୁ ତାନ୍ ସେଙ୍ଗେ ଦୟାତେ ଦାନ୍ଦେ ଆସ୍ ଆଦିଙ୍କ୍ କେତ୍ତଣ୍ଡ୍, “କେୟିମା ।”
LUK 7:14 ମେଣ୍ଡେ, ଅଣ୍ଡ୍‌ ଗାର୍‍ରେ ଆଞ୍ଜ୍ ଡଲୋତିଙ୍କ୍ ହିଟ୍‍ତ୍‍ତଣ୍ଡ୍, ମେଣ୍ଡେ, କାଞ୍ଜ୍‍ତେନଡ଼୍ ନିତ୍‍ତଡ଼୍, ଜିସୁ କେତ୍ତଣ୍ଡ୍, “ପେକାଲ୍, ନାନ୍ ନିକିଂଙ୍କ୍ କେତୁତାନ୍, ତେଦ୍‍ଦେ ।”
LUK 7:15 ଆଗେତିନ୍‍ସ୍ ଡୋଲତେ ନାରୁଡ଼୍ ତେଦି କୁଦ୍‍ତଣ୍ଡ୍, ମେଣ୍ଡେ ଗଟ୍ ତିରିୟାଙ୍କ୍ ପସ୍‍ପିତ୍‍ତଣ୍ଡ୍, ମେଣ୍ଡେ ଜିସୁ ଅଂକିଙ୍କ୍‌ ତାମ୍ ୟାୟଙ୍କ୍ କାଇଦେ ପସ୍‍ପିତ୍‍ତଣ୍ଡ୍ ।
LUK 7:16 ଇଗେତିସ୍‍ନ୍‍ ସାରେତଡ଼୍ ୱେର୍‍ତଡ଼୍, ମେଣ୍ଡେ ଇଶ୍ୱର୍‌ତେ ମହିମା କୀର୍ତ୍ତନ୍ ମାଡ଼ କେତାଙ୍କ୍ ପସ୍‍ପ୍‍ତଣ୍ଡ୍, “ମାନ୍‍ ଲୋପେ ୱେର୍‍ଣ୍ଡ୍ ବାଡ଼ିୟଣ୍ଡ୍ ବାବବାଦୀ ୱାସ୍‍ମିନ୍ଦେଣ୍ଡ୍ ନୁ ଇଶ୍ୱର୍ ତାମ୍ ନାରୁଡ଼୍‍କ୍ ଉଦାର୍ ମାଡ଼ାଙ୍କ୍ ୱାସ୍‍ମିନ୍ଦେଣ୍ଡ୍ ।”
LUK 7:17 ମେଣ୍ଡେ, ଜିସୁନ୍ ବିଷୟତେ ଇଦ୍ ଗଟ୍ ଯିହୁଦା ଦେଶ୍ ଏକାମ୍ ନୁ ସାରେ ପାକା ସାରେ ପଡ଼ିୟେତାଗ୍ ପ୍ରଚାର୍ ଆତ୍‍ତେ ।
LUK 7:18 ପେର୍‍କେ ଯୋହନ୍‌‌ତେ ଶିଷ୍ୟଡ଼୍ ଇଦ୍ ସାରେ ବିଷୟ୍ ଯୋହନ୍‌‌ତିଙ୍କ୍ କେତ୍‍ତଡ଼୍‍ ।
LUK 7:19 ଆଗେ ଯୋହନ୍‌ ତାମ୍ ଶିଷ୍ୟଡ଼ତେ ଲୋପେ ଇର୍‌ୱୁଡ଼୍‌କିଙ୍କ୍ ଗାର୍‍ରେ କାର୍‍ଙ୍ଗି ପ୍ରବୁନ୍ ଗାର୍‍ରେ ଇଲା କେସ୍ ରହତଣ୍ଡ୍, “ବେନନାଦ୍ ଆଗମନ୍ ଆଦ୍‍ତେ, ଅଣ୍ଡ୍‌ ନାରୁଡ଼୍ କି ନିମେ, କି ମାମ୍ ମେଣ୍ଡେ ଅଡ଼୍‌‍କିଂଙ୍କ୍ କେପି ମାନ୍‍ତମ୍ ?”
LUK 7:20 ଆଦ୍ ନାରୁଡ଼୍ ଜିସୁ ଗାର୍‍ରେ ୱାସ୍ କେତ୍‍ତଡ଼୍‍, “ବାପ୍ତିସ୍ମ ଯୋହନ୍‌ ମାକିଂଙ୍କ୍ ନି ଗାର୍‍ରେ ଇଲା କେସ୍ ରହତଣ୍ଡ୍, ବେନନାଦ୍ ୱାଦାନାଦ୍ ଆଦ୍‍ତେ, ଅଣ୍ଡ୍‌ ନାରୁଡ଼୍ କି ନିମେ, କି ମାମ୍ ମେଣ୍ଡେ ଅଡ଼୍‌‍କିଂଙ୍କ୍ କେପିତମ୍ ?”
LUK 7:21 ଆସୁଣ୍ଟ୍ ଜିସୁ ନାର୍ଗେ ନାରୁଡ଼୍‍କିଂଙ୍କ୍ ରୋଗ୍, ତିପାଲ୍‍ ନୁ ଦୁଷ୍ଟ ଆତ୍ମା କଞ୍ଜ୍ ସାଏ ମାଡ଼ତଣ୍ଡ୍, ମେଣ୍ଡେ ନାର୍ଗେ କାନାଲଡ଼କ୍ ଉଡ଼ାନାଦ୍ ଶକ୍ତି ହିତ୍‍ତଣ୍ଡ୍ ।
LUK 7:22 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ମିଡ଼୍ ଆଞ୍ଜ୍ ବାତା ଉଡ଼୍‍ତିଡ଼୍‍ ନୁ କେଞ୍ଜ୍‍ତିଡ଼୍‍, ଆଦ୍ ସାରେ ଯୋହନ୍‌ତିଙ୍କ୍ କେଲାଟ୍; କାନାଲଡ୍ ଉଡ଼ାଙ୍କ୍ ପାର୍‍ଦ୍‍ତଡ଼୍, କୁଟାଲଡ଼୍‍ ତାଆକାଂଙ୍କ୍ ପାର୍‍ଦ୍‍ତଡ଼୍, କୁଷ୍ଠୀ ନାରୁଡ଼୍ ସୁସ୍ଥ ଅଦୁତଡ୍, ବାୟିରାଲଡ୍ କେଞ୍ଜାଙ୍କ୍ ପାର୍‍ଦ୍‍ତଡ଼୍, ଡୋଲତେ ନଡ୍ ଜିୱେ ଆଦ୍‍ତଡ଼୍, ଦରିଦ୍ରଡ଼୍‍ ଗାର୍‍ରେ ସୁସମାଚାର୍ ପ୍ରଚାର୍ ମାଡ଼ୁତଡ଼୍;
LUK 7:23 ମେଣ୍ଡେ, ବେନେ ନାରୁଣ୍ଡ୍‍ ନାକିଂଙ୍କ୍ ବାଦା ଇୱଣ୍ଡ୍‍, ଅଣ୍ଡ୍‌ ଦନ୍ୟ ।
LUK 7:24 ଯୋହନ୍‌‌ତେ ଶିଷ୍ୟଡ଼୍ ଆତ୍‍ତେ ପେର୍‍କେ ଜିସୁ ଯୋହନ୍‌‌ତେ ବିଷୟ୍ ନାରୁଡ଼୍‍କିଂଙ୍କ୍ କେତାଙ୍କ୍ ପସ୍‍ପ୍‍ତଣ୍ଡ୍, ମିଡ଼୍ ବାତେଏ ଉଡ଼ାନ୍ ସେଙ୍ଗେ ଉସ୍କ ନେଲ୍‍ଦା ପେଇସ୍ ଆଞ୍ଜ୍ ମାତ୍‍ତିଡ୍ ? ବାଆତେ ଗାଲ୍‍ଦେ ଉଙ୍ଗାନାଦ୍ ୱେରଟ୍ ୱେଦୁର୍ ?
LUK 7:25 ଆଦ୍ ଆୟୋକ୍ ମିଡ଼୍ ବାତେଏ ଉଡ଼ାନ୍ ସେଙ୍ଗେ ପେଇସ୍ ଆଞ୍ଜ୍ ମାତ୍‍ତିଡ୍ ? ବେନଙ୍କ୍ ଦାମ୍‍ଦେ ସିଲେ କେର୍ ତେ ଅର୍‌ତୁଣ୍ଡ୍ ନାରୁଙ୍କ୍ ? ଉଡ଼ାଟ୍, ବେନଡ଼୍ ଦାମ୍‍ଦାଉ ସିଲେ କେର୍‍ତିତଡ଼୍, ଅଡ଼୍‌‍ ରାଜ ପ୍ରସାଦତାଗ୍ ମାନ୍‍ତଡ଼୍ ।
LUK 7:26 ନାକିଂଙ୍କ୍ କେଲ୍‍ମ୍, ଆଦ୍ ଆୟୋକ୍ ବାତେଏ ଉଡ଼ାନ୍ ସେଙ୍ଗେ ପେଇସ୍ ଆଞ୍ଜ୍ ମାତ୍‍ତିଡ୍ ? ବେନଙ୍କ୍ ଅର୍‌ତୁଣ୍ଡ୍ ବାବବାଦୀଙ୍କ୍ ? ନାନ୍ ମିକିଂଙ୍କ୍ ନିଜାମ୍ କେତୁତାନ୍, ବାବବାଦୀନ୍ କଞ୍ଜ୍ ଗାଟି ବାଡ଼ିୟଣ୍ଡ୍ ନାରୁଙ୍କ୍ ।
LUK 7:27 ଯୋହନ୍‌‌ତେ ବିଷୟତେ ଇଦ୍ ଶାସ୍ତ୍ରତାଗ୍ ଲେକାମିନ୍ଦେ, ଇଶ୍ୱର୍‌ କେତ୍‍ତଣ୍ଡ୍, ଉଡ଼ାଟ୍, ମାମ୍ ମା ଦୂତ୍‍ତିଙ୍କ୍ ମି ମୁନେ ରହତୁତମ୍, ଅଣ୍ଡ୍‌ ମି ମୁନେ ମିୱାଦ୍ ହାର୍ ତିଆର୍ ମାଡ଼ିତନ୍, ଇଣ୍ଡ୍ ଆଦ୍ ନାରୁଡ଼୍ ଯୋହନ୍‌ ।
LUK 7:28 ନାନ୍ ମିକିଂଙ୍କ୍ କେତୁତାନ୍, “ନାଟାଡ଼୍ ତାଗାଙ୍କ୍‍ ଜନମ୍ ସାରେତଡ଼୍ ଲୋପେ ଯୋହନ୍‌‌ତେ କଞ୍ଜ୍ ମହାନ୍ ବେନ ଇଲାଣ୍ଡ୍; ମିକା ଇଶ୍ୱର୍‌ତେ ରାଜ୍ୟତାଗ୍ ଯେ ସୁଦୁନଣ୍ଡ୍, ଅଣ୍ଡ୍‌ ଯୋହନ୍‌ କନ୍‍ସ୍ ମିକା ମହାନ୍ ।”
LUK 7:29 ବେନଡ଼୍ ଇଦ୍ ସାରେ ଗଟ୍ କେଞ୍ଜ ମାତ୍‍ତଡ଼୍, ଅଡ଼୍‌‍, ବିସ୍ୱାଶ୍‍ତଡ଼୍‍ କର ଆଦାୟ ମାଡ଼ାନଡ଼ି, ଇଶ୍ୱର୍‌ତେ ନିଜାମ୍ ଦାବୀ ସାରେ ମାଡ଼ି ଯୋହନ୍‌‌ତେ ତଡ଼୍ ବାତିସ୍ମ ଇସ୍‌‍ମାତ୍‍ତଡ଼୍ ।
LUK 7:30 ବାତେଙ୍କ୍ ଇତ୍କେ ପାରୂଶୀଡ଼୍ ନୁ ଦର୍ମଗୁରୁଡ୍ ତାମ୍ ଜିୱୁଣ୍ଡ୍ ତେ ସେଙ୍ଗେ ଇଶ୍ୱର୍‌ତେ ଉଦ୍ଦେଶ୍ୟ ଗ୍ରହନ୍ ମାଡ଼କଟ୍ ଯୋହନ୍‌‌ତେ କନ୍‍ସ୍ ବାତିସ୍ମ ଆ‍ୟୱେ ମାତ୍‍ତଡ଼୍ ।
LUK 7:31 ଜିସୁ ମେଣ୍ଡେ କେତ୍‍ତଣ୍ଡ୍, “ଇ ଯୁଗ୍‍ତେ ନାରୁଡ଼୍‍କିଂଙ୍କ୍ ନାନ୍ ବେନନ୍ ତଡ଼୍ ସାମାନ୍ ମାଡ଼ିତାନ୍, ମେଣ୍ଡେ ଅଡ଼୍‌‍ ବେନନ୍ ରକମ୍ ଆଦ୍‍ତଡ଼୍ ?
LUK 7:32 ବେନେ ପିଲା ହାଟ୍ ବାଜାର୍‍ତାଗ୍ କୁଦି କାର୍‍ଙ୍ଗା କାର୍‍ଙ୍ଗି ହାସ୍ କେତିତଡ଼୍‍, ମାମ୍ ମି ବକେତ୍ ଅଷଡ଼୍‍ ଉଦ୍‍ତନ୍, ମିଡ଼୍ ହେନ୍ଦୱିଡ୍; ମାମ୍ ଡୋଲତେ ପାଟେ ପାର୍‍ତମ୍, ମିଡ଼୍ କେୟିୱିଡ଼୍‍, ଅଡ଼୍‌‍ ଆଦ୍ ପିଲାନ୍ ଲେକାମ୍ ।
LUK 7:33 ବାତେଙ୍କ୍ ଇତ୍କେ ବାପ୍ତିସ୍ମ ଯୋହନ୍‌ ୱାସ୍ ରୋଟି ତିନଣ୍ଡ୍ ନୁ ଦ୍ରାକ୍ଷାରସ୍ ଉନଣ୍ଡ୍, ମେଣ୍ଡେ ମିଡ଼୍ ଯୋହନ୍‌‌ତେ ବିଷୟତେ କେତ୍‍ତିଡ଼୍, ଅଂକିଙ୍କ୍‌ ବୁତ୍ ପୟିତେ ।
LUK 7:34 ନାରୁନ୍‍ପିଲେ ୱାସ୍ ତିନ୍ତେ, ମେଣ୍ଡେ, ମିଡ଼୍ କେତୁତିଡ଼୍‍, ଉଡ଼ାଟ୍, ଇଣ୍ଡ୍ ଅରତୁଣ୍ଡ୍ ପେଟୁ ନୁ ମାତ୍‍ୱାରି, କରଗ୍ରାହୀ ନୁ ପାପି ନାରୁଡ଼୍‍ତେ ସାଙ୍ଗ ।
LUK 7:35 ବେନଡ଼୍ ଇଶ୍ୱର୍‌ତେ ଜ୍ଞାନତିଙ୍କ୍ ଗ୍ରହନ୍ ମାଡ଼ିତଡ଼୍, ଅଡ଼୍‌‍ ଜିୱୁଣ୍ଡ୍ ତାଗ୍ ଅନାଦ୍‌ ସତ୍‍ତେ ତନ୍ଦିତେ ।”
LUK 7:36 ମେଣ୍ଡେ, ପାରୂଶୀଡ଼୍ ଲୋପେ ୱେର୍‍ଣ୍ଡ୍ ଜିସୁଙ୍କ୍ ତାନ୍ ତଡ଼୍ ତିନ୍ଦାନଙ୍କ୍ କାରଙ୍ଗ୍‍ତଣ୍ଡ୍ । ଆଗେ ଅଣ୍ଡ୍‌ ପାରୂଶୀନଡ଼୍ ଲୋନ୍‌ ଆସି ତିନ୍ଦାନଙ୍କ୍ କୁଦ୍‍ତଡ଼୍‍ ।
LUK 7:37 ମେଣ୍ଡେ ଉଡ଼ାଟ୍, ଆଦ୍ ନାର୍ ତାଗ୍ ଅରଟ୍ ପାପି ନାଟାଡ଼୍ ମାତ୍‍ତେ; ଜିସୁ ଆଦ୍ ପାରୂଶୀନ୍ ଲୋନ୍‌ ତିନ୍ଦାନଙ୍କ୍ କୁଦିମିନ୍ଦେଣ୍ଡ୍, ଇଦ୍ ପୁଞ୍ଜ୍ ଆଦ୍ ୱେରନ୍ ଦାମ୍‍ତାଦ୍ ବତଲ୍‍ତାଗ୍ ଲେକେତ୍ ଗାବ୍‍ତେ ନିୟି ତାସ୍,
LUK 7:38 ପେର୍‍କେ ଜିସୁନ୍ ଲାବ୍ ଡେକେତ୍ ଗାର୍‍ରେ ନିଶ୍‍ମିକା କେୟକେୟ କାଣ୍ଡେଡି ଏର୍‍ଦେ ଅନାଦ୍‌ ଲାବ୍ ଡେକେତିଙ୍କ୍ ନାଆସ୍‍ପି ନିଜର୍ ତାଲେତ୍ କେଲ୍‍କିନ୍ ତଡ଼୍ ଆଦ୍ ଉମ୍‍ସାନଙ୍କ୍ ପସ୍‍ପିତ୍‍ତେ, ମେଣ୍ଡେ ଅନ୍‌‍ୱେ ଲାବ୍ ଡେକେତିଙ୍କ୍ ଚୁମା ମାଡ଼ି ସାୟେ ଗାବ୍‍ତେ ନିୟ୍‍ ଅକାନଙ୍କ୍ ପସ୍ପ୍‍ତେ ।
LUK 7:39 ଆଦ୍ ଉଡ଼ି, ବେନେ ଫାରୂଶୀ ଅଂକିଙ୍କ୍‌ ନିମନ୍ତ୍ରଣ ମାଡ଼ିମାତ୍‍ତଣ୍ଡ୍, ଅଣ୍ଡ୍‌ ହେର୍କେତ୍‍ କେତ୍ତଣ୍ଡ୍, “ଇଣ୍ଡ୍ ଯଦି ବାବବାଦୀ ଆସ୍ ମାନେଣ୍ଡ୍, ଆଲାତ୍କେ ହିକିଂଙ୍କ୍ ହିଟୁତ୍, ଆଦ୍ ବାତେଏ ନୁ ବେସତ୍ ନାଟାଡ଼୍, ଇତ୍‍କେ, ଆଦ୍ ଯେ ପାପି, ଇଦ୍ ପୁଞ୍ଜ୍ ମାନେଣ୍ଡ୍ ।”
LUK 7:40 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ଶିମୋନ୍, ନିକିଂଙ୍କ୍ ନାନ୍ ଅଣ୍ଡ୍‌ ଗଟ୍ କେତ୍‍ତାନ୍ ମିନ୍ଦେ ।” ଅଣ୍ଡ୍‌ କେତ୍ତଣ୍ଡ୍, “ଗୁରୁ କେଲ୍‍ମ୍ ।”
LUK 7:41 “ୱେର୍‍ଣ୍ଡ୍ ସାଉକାର୍‍ତେ କନ୍‍ସ୍ ଇଡ଼ିୱୁଡ଼୍‍ ଋଣ୍‍ ହସ୍‍ମାତ୍‍ତଡ୍; ଅର୍‌ତୁଣ୍ଡ୍ ପାଞ୍ଚଶହ ଦିନାରୀ ନୁ ମେଣ୍ଡେ ଅର୍‌ତୁଣ୍ଡ୍ ପାଚାଶ୍ ଦିନାରୀ ଋଣ୍‍ ମାଡ଼ିମାତ୍‍ତଡ଼୍ ।
LUK 7:42 ମାଲ୍‍ପିଦାଙ୍କ୍ ଅଡ଼୍‌‍କିଂଙ୍କ୍ ବାତେଏ ଇଲ୍‍ୱାଙ୍କ୍ ଅଣ୍ଡ୍‌ ଇଡ଼୍‍ୱୁଡ଼ାଦ୍ ଉଦାର୍ ୱିଡ଼୍‍ସିଦ୍‍ତନ୍ । ତ ଅଡ଼୍‌‍ ଲୋପେ ବେନ ଅଂକିଙ୍କ୍‌ ଗାଟି ପ୍ରେମ୍ ମାଡ଼ିତନ୍ ?”
LUK 7:43 ଶିମୋନ୍ କେତ୍‍ତଣ୍ଡ୍, “ନାନ୍ ହାଲ୍‍ସୁତାନ୍, ଅଣ୍ଡ୍‌ ବେନନାଦ୍ ଗାଟି ଉଦାର୍ ୱିଡ଼୍‍ସ୍‍ଦ୍‍ତଣ୍ଡ୍, ଅଣ୍ଡ୍‌ ।” ଜିସୁ ଅଂକିଙ୍କ୍‌ କେତ୍ତଣ୍ଡ୍, “ନିମେ ଟିକ୍ କେତ୍‍ତି ।”
LUK 7:44 ମେଣ୍ଡେ, ଜିସୁ ଆଦ୍ ନାଟାଡ଼୍ ସେଙ୍ଗେ ତିଡ଼ିୟି ଶିମୋନ୍‍ତିଙ୍କ୍ କେତ୍ତଣ୍ଡ୍, “ଇଦ୍ ନାଟାଡ଼୍‍ତିଙ୍କ୍ ଉଡ଼ୁତି ? ନାନ୍ ମି ଲୋନ୍‌ ୱାତ୍‍ତାନ୍, ନିମେ ନା ଡେକେତ୍ ସେଙ୍ଗେ ଏର୍‍ ଇୱିନ୍, ବାତେଙ୍କ୍ ଇତ୍କେ ଇଦ୍ କାଣ୍ଡେଡ୍ ଏର୍‍ ତଡ଼୍ ନା ଡେକେ ନାଆସ୍ ମିକା ତାନ୍ କେଲ୍‍କିନ୍ ତଡ଼୍ ଅଂକିଙ୍କ୍‌ ଉମ୍‍ସିତ୍‍ତେ ।
LUK 7:45 ନିମେ ନାକିଂଙ୍କ୍ ଚୁମା ଇସ୍‌ କାରଙ୍ଗ୍‍ୱିନ୍, ବାତେଙ୍କ୍ ଇତ୍କେ ନାନ୍ ଲୋପେ ୱାଦାନ୍ ସମୟ୍ ତେ କନ୍‍ସ୍ ଇଦ୍ ନା ଡେକେତିଙ୍କ୍ ଚୁମା ହିଦୁତେ ।
LUK 7:46 ନିମେ ନା ତାଲେତାଗ୍ ନିୟ୍‍ ଉସିୱିନ୍, ବାତେଙ୍କ୍ ଇତ୍କେ ଇଦ୍ ନା ଡେକେତାଗ୍ ସାୟେ ଗାବ୍‍ତେ ନିୟି ଉସିତ୍‍ତେ ।
LUK 7:47 ତ ନାନ୍ ନିକିଂଙ୍କ୍ କେତୁତାନ୍, ଇଦିନାଦ୍ ନାର୍ଗେ ପାପ୍ କ୍ଷମା ହାସ୍ ମିନ୍ଦେ, କାରନ୍‍ ଆଦ୍ ଗାଟି ପ୍ରେମ୍ ମାଡ଼ତ୍‍ତେ; ବାତେଙ୍କ୍ ଇତ୍କେ ବେନଙ୍କ୍ ସୁଦୁଟ୍ କ୍ଷମା ହିଦ୍‍ତଡ଼୍, ଅଣ୍ଡ୍‌ ସୁଦୁଟ୍ ପ୍ରେମ୍ ମାଡ଼ିତନ୍ ।”
LUK 7:48 ମେଣ୍ଡେ, ଜିସୁ ଆଦ୍ ନାଟାଡ଼୍ ତିଙ୍କ୍ କେତ୍ତଣ୍ଡ୍, “ନିୱାଦ୍ ପାପ୍ ସାରେ କ୍ଷମା ହାସ୍‍ମିନ୍ଦେ ।”
LUK 7:49 ଆଗେ ଅନ୍‌ ତଡ଼୍ ତିନ୍ଦାନଙ୍କ୍ କୁଦିମାନ୍ଦାନ୍ ନାରୁଡ଼୍ ହେର୍କେତ୍‍ କେତାନଙ୍କ୍ ପସ୍ପ୍‍ତ୍‍ତଡ଼୍, “ଇଣ୍ଡ୍ ନାରୁଡ଼୍ ବେନ ଯେ ପାପ୍ ମିକା କ୍ଷମା ମାଡ଼ୁତଣ୍ଡ୍ ?”
LUK 7:50 ବାତେଙ୍କ୍ ଇତ୍କେ ଜିସୁ ଆଦ୍ ନାଟାଡ଼୍‍ତିଙ୍କ୍ କେତ୍ତଣ୍ଡ୍, “ନିୱାଦ୍ ବିଶ୍ୱାସ୍ ନିକିଂଙ୍କ୍ ରକ୍ଷା ମାଡ଼ିତେ; ଶାନ୍ତି ତେ ହାନ୍ ।”
LUK 8:1 ତାନ୍ ପେର୍‍କେ ଜିସୁ ନାର୍‍ନାର୍ ନୁ ସହର୍‍ତାଗ୍‍ କେସ୍ ଇଶ୍ୱର୍‌ତେ ରାଜ୍ୟତେ ସୁସମାଚାର୍ ପ୍ରଚାର୍ ମାଡ଼ି ଉଡାଙ୍କ୍ ପସ୍‍ପ୍‍ତଣ୍ଡ୍, ମେଣ୍ଡେ ବାର ଜାନ୍ ଶିଷ୍ୟଡ଼୍ ଅନ୍‌ ତଡ଼୍ ମାତ୍‍ତଣ୍ଡ୍,
LUK 8:2 ବେନେ ନାଟାଙ୍କ୍ ଜିସୁ ଦୁଷ୍ଟ ଆତ୍ମା ନୁ ରୋଗ୍ କଞ୍ଜ୍ ସୁସ୍ଥ ମାଡ଼ିମାତ୍‍ତଡ଼୍, ମେଣ୍ଡେ ବେସ୍‌କ୍ ନାଟା ଅନ୍‌ ତଡ଼୍ ଆଞ୍ଜମାତ୍‍ତା, ଇଦ୍ ରକମ୍ ବେସ୍‍କ୍‍ତୁଡ଼୍‍ ନାଟା, ଇତ୍‍କେ, ମଗ୍‍ଦଲୀନି ପେଦେର୍ ତେ ମରୀୟମ୍, ବେନ ନାଗାଙ୍କ୍ ସାତ୍‍ଟାନ୍ ବୁତ୍‌କ୍ ପେଇସ୍ ଆଞ୍ଜ୍ ମାତ୍‍ତା,
LUK 8:3 ହେରୋଦତେ ବେବର୍ତ୍ତା କୁଜାନ୍ ମୁତ୍‍ତେ ଯୋହନ୍‌, ଶୋଶନ୍‍ନା, ମେଣ୍ଡେ ନାର୍ଗେ ନାଟା ଅନ୍‌ ତଡ଼୍ ମାଞ୍ଜ୍ ନିଜର୍ ସମ୍ପତ୍ତି ଇସ୍‌ ଜିସୁ ନୁ ତାନ୍ ଶିଷ୍ୟଡ଼କ୍ ସେବା ମାଡ଼ମାତ୍‍ତା ।
LUK 8:4 ନାର୍ଗେ ନାରୁଡ଼୍ ୱାସ୍ ଗୁଡ଼୍‍ତଡ୍ ନୁ ନାର୍ କଞ୍ଜ୍ ନାରୁଡ଼୍ ଅନ୍‌ ଗାର୍‍ରେ ୱାତ୍‍ତାଙ୍କ୍, ଜିସୁ ଇଦ୍ ୱେଷଡ଼୍ କେତ୍ତଣ୍ଡ୍ ।
LUK 8:5 “ୱେର୍‍ଣ୍ଡ୍ ୱିତାନଣ୍ଡ୍ ତାନ୍ ୱିଜ୍ ୱିତାନଙ୍କ୍ ପେଇତଣ୍ଡ୍ । ଅଣ୍ଡ୍‌ ୱିତ ୱିତ ବେସ୍‌କ୍ ୱିଜ୍ ହାର୍‍ଦାକ୍ ରାୟତା ନୁ ଡେକେତ୍ ମଦଲ୍ ମିସିଆତ୍‍ତେ, ମେଣ୍ଡେ ମାବ୍‍ତାଗ୍ ପାର୍‍ତାନ୍‍ ପିଟେ ଆୱିଙ୍କ୍ ତିତ୍‍ତା ।
LUK 8:6 ମେଣ୍ଡେ ବେସ୍‌କ୍ କାଲକ୍ ମାନ୍ଦାନ୍ ନେଲ୍‍ତାଗ୍ ରାୟତା, ମେଣ୍ଡେ ଗାଜ୍‍ଜେ ଆସ୍ ଏର୍‍ ଇଲ୍‍ୱାଙ୍କ୍ ୱାସିଆତ୍‍ତା ।
LUK 8:7 ମେଣ୍ଡେ ବେସ୍‌କ୍ କୟେ ମାଡ଼ାକ୍ ଲୋପେ ରାୟତା, ମେଣ୍ଡେ କୟେ ମାଡ଼ାକ୍ ଆୱୁ ତଡ଼୍ ଗାଟି ପେର୍‍ସି ଆୱିଙ୍କ୍ ଆଦ୍‍ମିତ୍‍ତା ।
LUK 8:8 ମେଣ୍ଡେ ବେସ୍‌କ୍ ସାୟେତ୍ ନେଲ୍ ତାଗ୍ ରାୟତା, ମେଣ୍ଡେ ପେର୍‍ସି ଶହେ ଗୁଣ୍ କାୟା ଆଦ୍‍ତା ।” ଅଣ୍ଡ୍‌ ଇଲା କେସ୍ କେସ୍ ଗାଟି ଲେଙ୍ଗ୍‍ଦେ କେତ୍ତଣ୍ଡ୍, “ବେନଙ୍କ୍ କେଞ୍ଜାନଙ୍କ୍ କେୱ୍ ମିନ୍ଦେ, ଅଣ୍ଡ୍‌ କେଞ୍ଜାଟ୍ ।”
LUK 8:9 ଜିସୁନ୍ ଶିଷ୍ୟଡ଼୍ ଇଦ୍ ୱେଷଡ଼୍‍ତେ ଇତ୍‍କେ ବାତେଏ ଇଞ୍ଜ ଅଂକିଙ୍କ୍‌ ପାଚ୍ରାମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ ।
LUK 8:10 ଆଗେଙ୍କ୍ ଜିସୁ ଇତ୍‌ତନ୍‌, “ଇଶ୍ୱର୍ ତେ ମିଞ୍ଜି ମାନ୍ଦାନ୍‌ ବିଷୟ୍ ପୁନ୍ଦାନ୍ ସେଙ୍ଗେ ମିକିଂଙ୍କ୍ ବୁଦ୍‍ ଇସ୍‌‍ମିନ୍ଦେଣ୍ଡ୍, ବାତେଙ୍କ୍ ଇତ୍କେ ବାଗାତ୍ ନାରୁଡ଼୍‍କ୍ ୱେଷଡ଼୍ ତେ କେତିତଡ଼୍‍, ବେଦ୍ ରକମ୍ ଅଡ଼୍‌‍ ଉଡ଼ଉଡ଼ ନୁ କେଞ୍ଜ କେଞ୍ଜ କେଞ୍ଜଡ଼୍ ।”
LUK 8:11 ୱେଷଡ଼୍‍ତେ ଇତ୍‍କେ ଇଦ୍, ୱିଜ୍ ଇଶ୍ୱର୍ ତେ ବାକ୍ୟ,
LUK 8:12 ମେଣ୍ଡେ ହାର୍ ଦେ ଗାରେତ୍ ୱିଜ୍ ଅଡ଼୍‌‍କିଂଙ୍କ୍ ବୁଜାମାଡ଼ିତେ, ବେନଡ଼କ୍ ବାକ୍ୟ କେଞ୍ଜାନ୍ ପେର୍‍କେ ଶୟ୍‍ତାନ୍‍ ୱାସ୍, ବେଲା କି ଅଡ଼୍‌‍ ବିଶ୍ୱାସ୍ ମାଡ଼ି ପରିତ୍ରାଣ ଆୟୋଡ୍, ଇଦ୍ ସେଙ୍ଗେ ଅଡ଼ାଦ୍‌ ହୃଦୟ୍ କଞ୍ଜ୍ ବାକ୍ୟ ଡଙ୍ଗି ଆଦ୍‍ତେ ।
LUK 8:13 ମେଣ୍ଡେ, କାଲ୍‍କିନ୍ ବୁମ୍‍ତେ ୱିଜ୍ ଅଡ଼୍‌‍କିଂଙ୍କ୍ ବୁଜାମାଡ଼ିତେ, ବେନଡ଼୍, ବାକ୍ୟ କେଞ୍ଜି ୱେଡ଼୍‍କେତେ ଗ୍ରହନ୍ ମାଡ଼ିତଡ଼୍; ବାତେଙ୍କ୍ ଇତ୍କେ ଅଡ଼୍‌‍ୱାଦ୍ ମାଡ଼୍ ଲୋପେ ଇଲ୍‍ୱାଙ୍କ୍ ଅଡ଼୍‌‍ ସୁଦୁଟ୍ ସମୟ୍ ବିଶ୍ୱାସ୍ ମାଡ଼ିତଡ଼୍ ନୁ ପରିକ୍ଷାତ୍ ୱେଲେ ରାୟିତଡ଼୍ ।
LUK 8:14 ମେଣ୍ଡେ, କୟେ ମାଡ଼ାକିନ୍ ଲୋପେ ରାୟିତା ୱିଜ୍ ଅଡ଼୍‌‍କିଂଙ୍କ୍ ବୁଜାମାଡ଼ିତେ, ବେନଡ଼୍ ବାକ୍ୟ କେଞ୍ଜିତଡ଼୍ ମାତର୍ ସସାର୍‍ତେ ଚିନ୍ତେ, ଦନ୍ ନୁ ସୁକାମ୍‍ତେ ମୁଡ଼ୁନ୍ଦି ମିକା ବାଦ୍‍କଡ଼୍ ମୁଡ଼ୁନ୍ଦି ଆଦ୍‍ତଡ଼୍, ମେଣ୍ଡେ ସାୟେତ୍ କାୟା ତିୟାର୍‍ ମାଡ଼େ ପାର୍‍ୱଡ୍ ।
LUK 8:15 ମେଣ୍ଡେ, ସାୟେତ୍ ନେଲ୍ ଦାଗ୍ ରାୟିତା ୱିଜ୍ ଅଡ଼୍‌‍କିଂଙ୍କ୍ ବୁଜାମାଡ଼ିତେ, ବେନଡ଼୍ ଲେକେତ୍ ହୃଦୟ୍‍ତେ ବାକ୍ୟ କେଞ୍ଜି ଆଦ୍ ପଇସ୍ ନେହେତିତଡ଼୍ ନୁ ଶକ୍ତି ତଡ଼୍ ସାୟେତ୍ କାୟା ଆଦ୍‍ପିସ୍‍ତଡ଼୍ ।
LUK 8:16 ବେନ କୁପିତିଙ୍କ୍ ନିଡ଼୍‍ସ୍‍ପି ବଡ୍ ଆଡ଼୍‌ଗି ମୁଶି ୱାଟଣ୍ଡ୍, ବା କାଟୁଲ୍ ତେ ମଦଲ୍ ୱାଟଣ୍ଡ୍, ମାତର୍ କୂପି ପରୁ ୱାଟିତଣ୍ଡ୍, ବେଲାକି ଆସାନଡ଼୍‍ ନାରୁଡ଼୍ ୱେସ୍ ତିଙ୍କ୍ ଉଡ଼େ ପାର୍‍ଦ୍‍ତଡ଼୍ ।
LUK 8:17 “ବାତେଙ୍କ୍ ଇତ୍କେ ବାତେଏ ପ୍ରକାଶିତ୍ ଆୟ୍‍ୟ, ଇଦ୍ ରକମ୍ ମିଞ୍ଜି ମାନ୍ଦାନ୍‌ ବିଷୟ ବାତେଏ ଇଲ୍‍ଲେ, ବା ବାତେଏ କେସ୍ ମିକା ପ୍ରକାଶ୍ ଆୟ୍‍ୟ, ଇଦ୍ ରକମ୍ ମିଞ୍ଜିମାନ୍ଦାନାଦ୍ ବିଷୟ୍ ବାତେଏ ଇଲ୍‍ଲେ ।”
LUK 8:18 ମେଣ୍ଡେ, “ବେଲା କେଞ୍ଜୁତିଡ଼୍‍, ଆଦ୍ ବିଷୟତେ ସେଙ୍ଗେ ସାବ୍‍ଦାନ୍; ବାତେଙ୍କ୍ ଇତ୍କେ ବେନନାଗେ ମିନ୍ଦେ, ଅଂକିଙ୍କ୍‌ ଗାଟି ହିଦ୍‍ତଡ଼୍, ମେଣ୍ଡେ ବେନନାଗେ ଇଲା, ଅଣ୍ଡ୍‌ ବାତେଏ ନିଜର୍ ଡ଼ାଦ୍ ମିନ୍ଦେ ଇଞ୍ଜ ହେର୍କେ ମାଡ଼ିତନ୍, ଆଦ୍ ମିକା ଅନାଗ୍‍କଞ୍ଚ୍‍ ଆଦ୍‍ତଡ଼୍ ।”
LUK 8:19 ଜିସୁନ୍ ୟାୟ ନୁ ତାମୁଣ୍ଡ୍‌କିଡ଼୍‍ ଅନ୍‌ ଗାର୍‍ରେ ୱାତ୍‍ତଡ଼୍, ବାତେଙ୍କ୍ ଇତ୍କେ ଗାଟି ନାରୁଡ଼୍‍ତେ ସେଙ୍ଗେ ଅନ୍‌‍ତଡ଼୍ କାଲ୍‍ପେ ପାର୍‍ୱେମାତ୍‍ତଡ୍ ।
LUK 8:20 ଆଗେ ଅଂକିଙ୍କ୍‌ ୱେରଣ୍ଡ୍ ଇଦ୍ କବର୍ ହିତ୍‍ତଡ଼୍, “ମି ୟାୟ ନୁ ତାମୁଣ୍ଡ୍‌କିଡ଼୍‍ ନିକିଂଙ୍କ୍ ଉଡ଼ାନ୍ ସେଙ୍ଗେ ବାଇଦେ କେପ୍‌ତଡ଼୍‌ ।”
LUK 8:21 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ବେନଡ଼୍ ଇଶ୍ୱର୍ ତେ ବାକ୍ୟ କେଞ୍ଜିତଡ଼୍‍ ନୁ ପାଲନ୍ ମାଡ଼ିତଡ଼୍, ଅଡ଼୍‌‍ ନା ୟାୟ ନୁ ତାମୁଣ୍ଡ୍‌କିଡ଼୍‍ ।”
LUK 8:22 ଅନ୍‌‍ଦିନେ ଜିସୁ ନୁ ତାମ୍ ଶିଷ୍ୟଡ଼ତେ ୱେରଡ଼୍‌ ଓଡ଼େତାଗ୍ ତାର୍‍ତଣ୍ଡ୍, ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ୱାଡ଼ାଟ୍, ସାୱୁଡ଼େତେ ମେଣ୍ଡେ ଅଣ୍ଡ୍‌ ପାକେ ଆଦିକାଡ଼୍‍ ।” ଆସୁଣ୍ଟ୍ ଅଡ଼୍‌‍ ଓଡେତିଙ୍କ୍ କୁସ୍‍ପିତଡ଼୍ ।
LUK 8:23 ଇତ୍କେ ଅଟାତ୍ ଅଡ଼୍‌‍ ଓଡେତିଙ୍କ୍ ଚାଲାମାଡ଼ି ଆଦାନ୍ ୱେଲେ ଜିସୁ ଉଞ୍ଜିମାତ୍‍ତଣ୍ଡ୍ । ଆସୁଣ୍ଟ୍ ଷାୱୁଡ଼େତାଗ୍ ତୁପାନ୍ ଆତ୍‍ତେ, ମେଣ୍ଡେ ଅଡ଼ାଦ୍‌ ଓଡ଼େତାଗ୍ ଏର୍‍ ନିଣ୍ଡାନଙ୍କ୍ ପସ୍‍ପିତ୍‍ତେ ନୁ ଅଡ଼୍‌‍ ବିପଦ୍ ତାଗ୍ ରାୟତଡ଼୍ ।
LUK 8:24 ଆସୁଣ୍ଟ୍ ଶିଷ୍ୟଡ଼୍ ଗାର୍‍ରେ ୱାସ୍ ଅଂକିଙ୍କ୍‌ ତେଇସ୍ କେତ୍‍ତଡ଼୍‍, “ହୋ ଗୁରୁ, ହୋ ଗୁରୁ, ମାନାଡ଼୍ ଡଲ୍‌ତାଡ୍ ।” ଇଗେତିସ୍‍ନ୍‍ ଅଣ୍ଡ୍‌ ତେଦି ଗାଲ୍ ନୁ ବେଡ଼େୟାଦ୍ ତଲ୍‍କଡ଼୍‍ ତିଙ୍କ୍ ଦମକ୍ ହିତ୍‍ତଣ୍ଡ୍, ମେଣ୍ଡେ ଆୱ ସାରେ କଟଆସ୍ ଶାନ୍ତି ଆତ୍‍ତେ ।
LUK 8:25 ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ମିୱାଦ୍ ବିଶ୍ୱାସ୍ ବେଗେ ?” ବାତେଙ୍କ୍ ଇତ୍କେ ଅଡ଼୍‌‍ ୱେର୍‍ସ୍ ନୁ ବାକ୍‍ୱା ଆସ୍ ନିଜେନିଜେ କେତାଙ୍କ୍ ପସ୍‍ପ୍‍ତ୍‍ତଡ଼୍, “ଇଣ୍ଡ୍ ଆଲାତ୍କେ ବେନ ଯେ, ଅଣ୍ଡ୍‌ ଗାଲ୍ ନୁ ଏର୍‍ଦିଙ୍କ୍ ମିକା ଗଟ୍ ହିତ୍‍କେ, ଆୱ ଅନ୍‌‍ୱାଦ୍ ଗଟ୍ କେଞ୍ଜିତା ।”
LUK 8:26 ପେର୍‍କେ ଜିସୁ ନୁ ଶିଷ୍ୟଡ଼୍ ଗାଲିଲୀତେ ମୁନେତ୍ ପାକେ ଆପାକେ ଗରାଶୀୟନଡ଼୍‍ତେ ପଡ଼ିୟେତାଗ୍ ହେୱତ୍‍ତଡ୍ ।
LUK 8:27 ଅଣ୍ଡ୍‌ ଓଡେତ୍ କନ୍‍ସ୍ ପେଇସ୍ ଆଞ୍ଚିନାଗ୍‌ ଡିଗଡ଼େ, ଆଦ୍ ନାର୍‌ଦେ ୱେର୍‍ଣ୍ଡ୍ ବୁତ୍ ପଇତ୍‍ତେ ନାରୁଡ଼୍ ଅଂକିଙ୍କ୍‌ କାଇଲ୍‍ତଣ୍ଡ୍; ଅଣ୍ଡ୍‌ ଗାଟି ଜେଲ୍ ହେଉନା ସିଲେ କେରୱକଟ ନୁ ଲୋନ୍‌ ମାନ୍‍ୱକଟ ୱିସ୍‍କିନାଗେ ମାଞ୍ଜ ମାତ୍‍ତଣ୍ଡ୍ ।
LUK 8:28 ଅଣ୍ଡ୍‌ ଜିସୁଙ୍କ୍ ଉଡ଼ି ଗାଟି କିଡ଼୍‍କି ଅନ୍‌‍ୱାଦ୍ ଡେକେତ୍ ମଦଲ୍ ରାଲି ଗାଟି ଲେଙ୍ଗେତେ କେତ୍ତଣ୍ଡ୍, “ହୋ ଇଶ୍ୱର୍ ତେ ମାର୍‍ ଜିସୁ, ନି ତଡ଼୍ ନାୱାଦ୍ ବାତେଏ ମିନ୍ଦେ ? ନାନ୍ ନିକିଂଙ୍କ୍ ଦନ୍ୟବାଦ୍ ମାଡ଼ୁତାନ୍, ନାକିଂଙ୍କ୍ କଷ୍ଟ ହିମା ।”
LUK 8:29 ବାତେଙ୍କ୍ ଇତ୍କେ ଜିସୁ ଅଶୁଚି ଆତ୍ମାତିଙ୍କ୍ ଆଦ୍ ନାରୁଡ଼୍ ତେ କନ୍‍ସ୍ ପେଇସ୍ ଆଦାନ୍ ସେଙ୍ଗେ ଗଟ୍ ଇସ୍‌‍ମାତ୍‍ତଣ୍ଡ୍ । ଆଦ୍ ଆତ୍ମା ଗାଟିଦାମ୍ ଅଂକିଙ୍କ୍‌ ପଇସ୍ ମାତ୍‍ତେ, ମେଣ୍ଡେ ନାରୁଡ଼୍ ଅଂକିଙ୍କ୍‌ କାଇତାଗ୍ ଇକ୍‌ଲେମ୍‍ ନୁ ଡେକେତାଗ୍ ବେଡ଼ି ତହସ୍ ନେହେସ୍ ମାତ୍‍ତଡ଼୍, ମାତର୍ ଅନ୍‌‍ୱାଦ୍ ବନ୍ଦନ୍ ସାରେ ଦେହେସ୍ ବୁତ୍ ଅଂକିଙ୍କ୍‌ ବେନ ଇଲ୍‌ୱେ ପଡ଼ିୟେତାଗ୍ ପଇସ୍ ହସମାତ୍‍ତେ ।
LUK 8:30 ଜିସୁ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ନି ପେଦେର୍ ବାତେଏ ?” ଅଣ୍ଡ୍‌ କେତ୍ତଣ୍ଡ୍, ବାହିନୀ; “ନାର୍ଗେ ବୁତ୍‌କ୍;” ବାତେଙ୍କ୍ ଇତ୍କେ ଗାଟି ବୁତ୍‌କ୍‍ ଅନାଗେ ଅସିମାତ୍‍ତା ।
LUK 8:31 ମେଣ୍ଡେ, ଅଣ୍ଡ୍‌ ବେଲା ଅଡ଼୍‌‍କିଂଙ୍କ୍ ପାତାଲ୍‍ତାଗେ ଆଦାନ୍ ସେଙ୍ଗେ ଗଟ୍ ହିମାକିଣ୍ଡ୍, ଇଦ୍ ସେଙ୍ଗେ ଅଡ଼୍‌‍ ଅଂକିଙ୍କ୍‌ ବିନତି ମାଡ଼ାଙ୍କ୍ ପସ୍ପ୍‍ତ୍‍ତଣ୍ଡ୍‌ ।
LUK 8:32 ଆଗେ ମେଟେତାଗ୍ ୱେରନ୍ ବାଡ଼ିୟାଦ୍ ମାନ୍ଦାପାଦି ମେୟମାତ୍‍ତା, ମେଣ୍ଡେ ଅଣ୍ଡ୍‌ ବେଦ୍ ଲେକାମ୍ ଆୱିଙ୍କ୍ ଆୱେ ପାଦିନ୍ ଲୋପେ ଆସାନ୍ ସେଙ୍ଗେ ଗଟ୍ ହିତ୍‍ତଣ୍ଡ୍, ଇଦ୍ ସେଙ୍ଗେ ଆୱ ଅଂକିଙ୍କ୍‌ ବିନତି ମାଡ଼୍‍ତେ ।
LUK 8:33 ଜିସୁ ଆୱିଙ୍କ୍ ଗଟ୍ ହିତ୍‍ତାଙ୍କ୍, ବୁତ୍‌କ୍‍ ଆଦ୍ ନାରୁଡ଼୍ ତେ କନ୍‍ସ୍ ପେଇସ୍ ପାଦିନ୍ ଲୋପେ ଅସ୍‍ତା; ଆସୁଣ୍ଟ୍ ଆଦ୍ ମାନ୍ଦାପାଦି ଗାଟି ଉର୍‍ଗିନ୍‍ ମିରି ଆଞ୍ଜ୍ ମେଟେତ୍ ପରୁ କନ୍‍ସ୍ ସାୱୁଡ଼େ ତାଗ୍ ରାଲି ମୁଡ଼ୁନ୍ଦି ଡୋଲ୍‍ତା ।
LUK 8:34 ମେୟେତାନ୍ ନାରୁଡ଼୍ ଆଦ୍ ଗଟନା ଉଡ଼ି ମିରି ଆଞ୍ଜ୍ ନାର୍ ନୁ ନାଟେନାଗ୍ ଆଦ୍ ବିଷୟ୍ କେଞ୍ଜ୍‍ସ୍ପ୍‍ତଡ଼୍‍ ।
LUK 8:35 ଆସୁଣ୍ଟ୍ ନାରୁଡ଼୍ ଆଦ୍ ଗଟନା ଉଡ଼ାଙ୍କ୍ ପେଇସ୍ ୱାତ୍‍ତଡ଼୍; ମେଣ୍ଡେ, ଅଡ଼୍‌‍ ଜିସୁନ୍ ଗାର୍‍ରେ ୱାସ୍, ବେନେ ନାରୁଡ଼୍ କନ୍‍ସ୍ ବୁତ୍‌କ୍ ପଇସ୍ ମାତ୍‍ତା; ଅଣ୍ଡ୍‌ ସିଲେ କେର୍‍ସ୍ ସାୟେତ୍ ମାନ୍‍ ତେ ଜିସୁନ୍ ଡେକେତ୍ ମଦଲ୍ କୁଦିମାନ୍ଦାନ୍ ଉଡ଼ି ୱେର୍‍ତ୍‍ତଡ୍ ।
LUK 8:36 ମେଣ୍ଡେ, ବେନଡ଼୍ ଉଡ଼ିମାତ୍‍ତଡ଼୍‍, ଅଡ଼୍‌‍ ଆଦ୍ ବୁତ୍‌ପଇତ୍‍ତେ ନାରୁଡ଼୍ ବେଲା ସୁସ୍ଥ ଆତ୍‍ତଣ୍ଡ୍, ଆଦ୍ ଅଡ଼୍‌‍କିଂଙ୍କ୍ କେତ୍ତଡ଼୍ ।
LUK 8:37 ଆଗେତିନ୍‍ସ୍ ଗରାଶୀୟ ନାରୁଡ଼୍ ତେ ପଡ଼ିୟେତାଗ୍ ସାରେପାକା ସାରେତଡ଼୍ ନାରୁଡ଼୍ ଅଡ଼୍‌ଆଗାଙ୍କ୍‌ ଆଦାନ୍ ସେଙ୍ଗେ ଅଂକିଙ୍କ୍‌ ଅନୁରଦ୍‌‍ ମାଡ଼୍‍ତଡ଼୍, ବାତେଙ୍କ୍ ଇତ୍କେ ଅଡ଼୍‌‍ ଗାଟି ୱେର୍‍ସ୍ ମାତ୍‍ତଡ଼୍; ମେଣ୍ଡେ ଜିସୁ ୱେରନ୍ ଓଡ଼େତାଗ୍ ତାରି ମାଲ୍‍ସ୍ ୱାତ୍‍ତଡ଼୍ ।
LUK 8:38 ବାତେଙ୍କ୍ ଇତ୍କେ ବେନେ ନାରୁଡ଼୍ କନ୍‍ସ୍ ବୁତ୍‌କ୍ ପେଇସ୍ ଆଞ୍ଜ୍ ମାତ୍‍ତା, “ଅଣ୍ଡ୍‌ ତାନ୍ ତଡ଼୍ ମାନ୍ଦାନ୍ ସେଙ୍ଗେ ଦନ୍ୟବାଦ୍ ମାଡ଼୍‍ତଣ୍ଡ୍;”
LUK 8:39 ମାତର୍ ଅଣ୍ଡ୍‌ ଅଂକିଙ୍କ୍‌ ରହସ୍‍ ମେଣ୍ଡେ କେତ୍ତଣ୍ଡ୍, “ନିମେ ଲୋନ୍‌ ମାଲ୍‍ସ୍ ଆନ୍‌, ମେଣ୍ଡେ ଇଶ୍ୱର୍ ନି ସେଙ୍ଗେ ବାତେଏ ପାଡ଼ିୟି ମାଡ଼ି ମିନ୍ଦେଣ୍ଡ୍, ଆୱ୍ ସାରେ ନାରୁଡ଼୍‍କିଂଙ୍କ୍ କେଲେ । ଆଗେତିନ୍‍ସ୍ ଅଣ୍ଡ୍‌ ଆଞ୍ଜ୍ ମିକା, ଜିସୁ ଅନ୍‌ ସେଙ୍ଗେ ବାତେଏ ପାଡ଼ିୟି ମାଡ଼ିମାତ୍‍ତଣ୍ଡ୍, ଆୱ୍ ସାରେ ନାର୍ ଏକାମ୍ କେତାନଙ୍କ୍ ପସ୍‍ପିତ୍‍ତଣ୍ଡ୍ ।”
LUK 8:40 ମେଣ୍ଡେ ଜିସୁ ମେଣ୍ଡେଅଣ୍ଡ୍‌‍ ପାକେ ମାଲ୍‍ସ୍ ୱାତ୍‍ତାଙ୍କ୍, ନାରୁଡ଼୍ ଅଂକିଙ୍କ୍‌ ୱେଡ଼୍‍କା ତେ ଗ୍ରହନ୍ ମାଡ଼୍‍ତଡ଼୍, ବାତେଙ୍କ୍ ଇତ୍କେ ସାର୍‍ରେତଡ୍ ଅଙ୍କ୍‌ କେପି ମାତ୍‍ତଡ଼୍ ।
LUK 8:41 ମେଣ୍ଡେ, ଉଡ଼ାଟ୍ ଯାଇରସ୍ ପେଦେର୍ ତଣ୍ଡ୍ ୱେର୍‍ଣ୍ଡ୍ ନାରୁଡ଼୍ ୱାତ୍‍ତଣ୍ଡ୍; ଅଣ୍ଡ୍‌ ସମାଜ୍‍ଲନ୍ ତେ ବାଡ଼୍ୟ୍‍ଣ୍ଡ ମାତ୍‍ତଣ୍ଡ୍ । ଅନ୍‌ ଜିସୁନ୍ ଡେକେତ୍ ମଦଲ୍ ରାଲି ତାମ୍ ଲୋନ୍‌ ୱାଦାନ୍ ସେଙ୍ଗେ ଅଂକିଙ୍କ୍‌ ବିନତି ମାଡ଼ତ୍‍ତଣ୍ଡ୍,
LUK 8:42 ବାତେଙ୍କ୍ ଇତ୍କେ ଅନ୍‌‍ୱାଦ୍ ବାର ହେଣ୍ଡେତ୍ ୱେର୍‍ଟେ ମାତର୍ ପିକିଡ଼୍ ମାତ୍‍ତେ, ମେଣ୍ଡେ ଆଦ୍ ଡଲାନ୍ ରକମ୍ ଆସ୍ ମାତ୍‍ତେ । ବାତେଙ୍କ୍ ଇତ୍କେ ଅଣ୍ଡ୍‌ ଆଦାନ୍ ୱେଲେ ନାରୁଡ଼୍ ଅନ୍‌ ପରୁ ରାୟ ମାତ୍‍ତଡ଼୍ ।
LUK 8:43 ଆସୁଣ୍ଟ୍ ବାର ହେଣ୍ଡ୍ ଯାକ ନେତୁର୍‍ ରୋଗ୍ ତେ ଅରଟ୍ ନାଟାଡ଼୍ ମାତ୍‍ତେ, ବେନ କି ତାନ୍‍ୱାଦ୍ ସାରେ ଡାବ୍‍କ୍ କର୍ଚ୍ଚ ମାଡ଼କେ ମିକା ବେନନ୍ ତଡ଼୍ ସୁସ୍ଥ ଆୟ୍‍ୟ ମାତ୍‍ତେ,
LUK 8:44 ଆଦ୍ ପେର୍‍କେ କନ୍‍ସ୍ ୱାସ୍ ଜିସୁନ୍ ସିଲେତିଙ୍କ୍ ଇଟ୍‍ତା, ମେଣ୍ଡେ, ସାଙ୍ଗେ ସାଙ୍ଗେ ଆଦିନାଦ୍ ନେତୁର୍‍ ପେଇତାନାଦ୍ ବନ୍ଦ୍ ଆତ୍‍ତେ ।
LUK 8:45 ଆସୁଣ୍ଟ୍ ଜିସୁ କେତ୍ତଣ୍ଡ୍, “ବେନ ନାକିଂଙ୍କ୍ ହିଟ୍‍ତଣ୍ଡ୍ ?” ମାତର୍ ସାରେତଡ଼୍ ଅସ୍ୱୀକାର୍ ମାଡ଼୍‍ତଡ଼୍, ପିତର୍ କେତ୍ତଣ୍ଡ୍, “ହୋ ଗୁରୁ, ନାରୁଡ଼୍ ସାରେତଡ଼୍ ତୁର୍ସାତୁର୍ସି ଆସ୍ ନି ପରୁ ରାୟୁତଡ୍ ।”
LUK 8:46 ବାତେଙ୍କ୍ ଇତ୍କେ ଜିସୁ କେତ୍ତଣ୍ଡ୍, “ବେନ ୱେର୍‍ଣ୍ଡ୍ ନାକିଂଙ୍କ୍ ହିଟ୍‍ତଣ୍ଡ୍, ବାତେଙ୍କ୍ ଇତ୍କେ ନାୟାଗେ କନ୍‍ସ୍ ଶକ୍ତି ପେଇତ୍‍ତେ ନାନ୍ ପୁତ୍‍ତାନ୍ ।”
LUK 8:47 ଆସୁଣ୍ଟ୍ ନାଟାଡ଼୍ ଉଡ୍ ତେ ଯେ, ଆଦ୍ ମିଞ୍ଜି ମାନ୍ଦାଙ୍କ୍ ପାର୍‍ୱ, ଆସୁଟେ ଆଦ୍ ୱାଡ଼୍‍‍କ ୱାଡ଼୍‍‍କ ୱାସ୍ ଅନ୍‌ ଡେକେତ୍ ମଦଲ୍ ରାଲି, ବାତେଙ୍କ୍ ଅଂକିଙ୍କ୍‌ ହିଟ୍ ତେ, ମେଣ୍ଡେ ବେଲା ସାଙ୍ଗେ ସାଙ୍ଗେ ସୁସ୍ଥ ଆତ୍‍ତେ, ଆଦ୍ ସାରେତଡ଼୍ ନାରୁଡ଼୍ ମୁନ୍‍ନେ କେତ୍‍ତେ ।
LUK 8:48 ଆଗେତିନ୍‍ସ୍ ଜିସୁ ଆଦିଙ୍କ୍ କେତ୍ତଣ୍ଡ୍, “ହୋ ପିକି, ନି ବିଶ୍ୱାସ୍ ନିକିଂଙ୍କ୍ ସୁସ୍ଥ ମାଡ଼ିତେ, ଶାନ୍ତି ତେ ଆନ୍ ।”
LUK 8:49 ଅଣ୍ଡ୍‌ ଇଦ୍ ଗଟ୍ କେତ୍‍ତାନ୍ ୱେଲେ ସମାଜ୍‍ଲନ୍ ତେ ମୁକ୍ୟାନ୍ ଲୋତ୍‍ତେ କନ୍‍ସ୍ ୱେର୍‍ଣ୍ଡ୍ ୱାସ୍ କେତ୍ତଣ୍ଡ୍, “ନି ମାୟାଡ଼୍ ଡୋଲିଆତ୍‌ତେ, ଗୁରୁଙ୍କ୍ ମେଣ୍ଡେ କଷ୍ଟ ହିମା ।”
LUK 8:50 ବାତେଙ୍କ୍ ଇତ୍କେ ଜିସୁ ଇଦ୍ କେଞ୍ଜି ଯାଇରସ୍‍ତିଙ୍କ୍ କେତ୍ତଣ୍ଡ୍, “ୱେର୍‍ମାଟ୍, ମାତର୍ ବିଶ୍ୱାସ୍ ମାଡ଼ାଟ୍, ମେଣ୍ଡେ ଆଦ୍ ଗେଲ୍‌ସିତେ ।”
LUK 8:51 ମେଣ୍ଡେ, ଜିସୁ ଯାଇରସ୍‍ତେ ଲୋନ୍‌ ୱାସ୍ ପିତର୍, ଯୋହନ୍‌ ନୁ ଯାକୁବ୍, ମେଣ୍ଡେ ପିକିଡ଼୍ ତେ ୟାୟବାବଡ୍ ୱିଡ଼୍‍ସି ମେଣ୍ଡେ ବେନଙ୍କେ ଅନ୍‌‍ତଡ଼୍ ଲୋପେ ଆଦାଙ୍କ୍ ହିୱଣ୍ଡ୍ ।
LUK 8:52 ମାତର୍ ସାରେତଡ଼୍ ଆଦିନ୍ ସେଙ୍ଗେ କେୟକେୟ ଗୁଣ୍ଡେତାଗ୍ ରେହେସ ମାତ୍‍ତଡ଼୍ । ଆଗେତିନ୍‍ସ୍ ଜିସୁ କେତ୍ତଣ୍ଡ୍, “କେୟ୍‍ମାଟ୍; ଆଦ୍‍ଡୋଲ, ମାତର୍ ଉଞ୍ଜିମିନ୍ଦେ ।”
LUK 8:53 ବାତେଙ୍କ୍ ଇତ୍କେ ଆଦ୍ ଡୋଲିଆତ୍‌ତେ ଇଞ୍ଜ ପୁଞ୍ଜ୍ ମାତ୍‍ତାଙ୍କ୍ ଅଡ଼୍‌‍ ଜିସୁଙ୍କ୍ ପରିହାସ୍ ମାଡ଼ାଙ୍କ୍ ପସ୍ପ୍‍ତ୍‍ତଡ଼୍ ।
LUK 8:54 ମାତର୍ ଜିସୁ ଆଦିନାଦ୍ କାଇଦିଙ୍କ୍ ପଇସ୍ କାର୍‍ଙ୍ଗି କେତ୍ତଣ୍ଡ୍, “ହୋ ପିକି, ତେଦ୍‍ଦେ ।”
LUK 8:55 ଆଗେତିନ୍‍ସ୍ ତାନାଦ୍ ଜିୱୁଣ୍ଡ୍ ମାଲ୍‍ସ୍ ୱାତ୍‍ତେ, ମେଣ୍ଡେ ଆଦ୍ ସାଙ୍ଗେ ସାଙ୍ଗେ ତେଦ୍‍ଦେ, ମେଣ୍ଡେ ଅଣ୍ଡ୍‌ ଆଦିଙ୍କ୍ ସୁଦୁର୍ ତିନ୍ଦାନଙ୍କ୍ ହିଦାନ୍ ସେଙ୍ଗେ କେସିତ୍‍ଣ୍ଡ୍‌ ।
LUK 8:56 ଇଗେତିସ୍‍ନ୍‍ ତାମ୍ ୟାୟବାବ ବାକ୍‍ୱା ଆତ୍‍ତଡ଼୍; ବାତେଙ୍କ୍ ଇତ୍କେ ଆଦ୍ ଜାଗେତାଦ୍ ଗଟନା ତେ ଗଟ୍ ବେନଙ୍କେ କେତାନାଦ୍ ଆୟ୍‍ୟ ଇଞ୍ଜ ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍ ।
LUK 9:1 ଜିସୁ ବାରଜାନ୍ ଶିଷ୍ୟଡ଼୍‍କ୍ କାର୍‍ଙ୍ଗି ଅଣ୍ଡୟାଗେ ଗୁଡ଼୍‍ପି ଅଡ଼୍‌‍କିଂଙ୍କ୍ ସାର୍‍ରେ ବୁତ୍‌କିଂଙ୍କ୍ ୱିର୍‍ସ୍‍ପି, ମେଣ୍ଡେ, ରୋଗ୍ ୱିର୍‍ସ୍‍ପାନ୍ ମାଇଦିଙ୍କ୍ ଶକ୍ତି ନୁ ଅଦିକାର୍ ହିତ୍‍ତଣ୍ଡ୍ ।
LUK 9:2 ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ ଇଶ୍ୱର୍‌ତାଦ୍ ରାଜ୍ୟ କେତାନଙ୍କ୍ ନୁ ରୋଗି ନାରୁଡ଼୍‍କ୍ ସାୟେ ମାଡ଼ାଙ୍କ୍ ରହତ୍‍ତଣ୍ଡ ।
LUK 9:3 ମେଣ୍ଡେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ଆଦ୍‍ଦାନ୍ ୱେୟେ ଟେଙ୍ଗା, କି ମୁନା କି ରୂଟି କି ଡାବ୍, ବାତାମେଣ୍ଡେ ଆୟ୍‍ମାଟ୍, ରେଣ୍ଡ୍ ଚକା ସାଙ୍ଗେତେ ଆୟ୍‍ମାଟ୍ ।
LUK 9:4 ମେଣ୍ଡେ, ମିଡ଼୍ ବେନ୍‌ଆଇ ଲୋତ୍‍ତାଗ୍ ନେଙ୍ଗିତିଡ଼ି, ଆଦ୍ ଜାଗାତାଗାଙ୍କ୍ ଆନ୍‌‍ୱକଟ ଆଦେ ପଡ଼ିୟେତାଗ୍ ମାନୁଟ୍ ।
LUK 9:5 ଆସୁଟେ ବେଗେ ନାରୁଡ଼୍ ମିକିଂଙ୍କ୍ ଗ୍ରହନ୍ ମାଡ଼କ୍, ଆଦ୍ ନାର୍ କନ୍‍ସ୍ ଆଦାନ୍ ୱେୟେ ଅଡ଼୍‌‍ ବିରୁଦ୍‍ତେ ସାକ୍ଷ୍ୟ ଇଦାନ୍‍ମାଇଦିଙ୍ଗ୍ ମି ଡେକେତ୍ ଦୁମ୍‌ କାୟ୍‍ସିମୁଟ୍ ।”
LUK 9:6 ଆଗେତିନ୍‍ସ୍ ଅଡ଼୍‌‍ ଆଞ୍ଜ୍ ମିକା ସୁସମାଚାର୍ ପ୍ରଚାର ମାଡ଼ି ନୁ ରୋଗିଡ଼୍‍କ୍ ସୁସ୍ଥମାଡ଼ି ନାର୍ ଉଡାଙ୍କ୍ ପେୟ୍‍ତଡ଼୍ ।
LUK 9:7 ଇଗ୍‍ତିନ୍‍ସ୍‍ ସାମନ୍ତରାଜାଲ୍ ହେରୋଦ୍ ଇଦ୍‍ସାର୍ ଗଟ୍ କେଞ୍ଜି ଉନ୍‍କେମାନ୍‍କେ ଆତ୍‍ତଣ୍ଡ୍, ବାତେଙ୍କ୍ ଇତ୍କେ ବାପ୍ତିସ୍ମ ଯୋହନ୍‌ ଡଲ୍‍ତେ ନାରୁଡ଼୍ ଆଗାଙ୍କ୍ ତେଦି ମିନ୍ଦେଣ୍ଡ୍ ଇଞ୍ଜ ବେନ୍‍ ବେନଡ଼୍ କେସମାତ୍‍ତଡ଼୍ ।
LUK 9:8 ମେଣ୍ଡେ, ବେନ୍‍ ବେନଡ଼୍ ଏଲିୟ ତନ୍ଦତଣ୍ଡ୍ ହିଞ୍ଜ କେସମାତ୍ତଡ଼୍, ମେଣ୍ଡେ ବାଗାତଡ଼୍ ମୁନେତ୍ ବାବବାଦୀ ଡ଼ାଗାଙ୍କ୍ ୱେରଣ୍ଡ୍ ତେଦ୍‍ତଣ୍ଡ୍ ଇଞ୍ଜ କେସମାତ୍ତଡ଼୍ ।
LUK 9:9 ବାତେଙ୍କ୍ ଇତ୍କେ ହେରଦ୍ ରାଜାଲ୍ କେତ୍‍ତଣ୍ଡ୍, “ଯୋହନ୍‌‌ତାଦ୍ ତାଲ୍‍ତିଙ୍ଗ୍ ନାନ୍ ତ ନାଡ଼‍କ୍‍ତମ୍, ମାତର୍ ଅନ୍‌ ବିଷୟ୍‍ତେ ମାମ୍ ଇଦ୍‍ପୁଟୁଙ୍କ୍ ଗଟି କେଞ୍ଜୁତମ୍, ଇଣ୍ଡ୍ ବେନ ?” ମେଣ୍ଡେ, ଜିସୁଙ୍କ୍ ଉଡ଼ାନ୍ ମାଇଦିଙ୍କ୍ ଅଣ୍ଡ୍‌ ଆଲ୍‍ସି ମାଡ଼ମାତଣ୍ଡ୍ ।
LUK 9:10 ପେର୍‍କେ ପ୍ରେରିତ୍‍ ଶିଷ୍ୟଡ଼୍ ମାଲ୍‍ସ୍‍ୱାସ୍, ବାତ୍‍ ବାତା ମାଡ଼ିମାତ୍‍ତଡ଼୍, ଆୱ୍‍ସାରେ ଅନ୍‌ ଗାର୍‍ରେ ତିଆର୍ ମାଡ଼୍‍ତଡ଼୍ । ମେଣ୍ଡେ ଜିସୁ ଅଡ଼୍‌‍କିଂଙ୍କ୍ ସାଙ୍ଗେତେଅସ୍ ବେତ୍‍ସାଇଦା ପେଦେର୍ ତେ ନାର୍‍ତାଗ୍ ହାତ୍‍ତଡ଼୍ ।
LUK 9:11 ବାତେଙ୍କ୍ ଇତ୍କେ ନାରୁଡ଼୍ ଅଂକିଙ୍କ୍‌ କେଞ୍ଜି ଅନ୍‌ ପେର୍‍କେ ତାସିତ୍‌ତଡ୍; ଜିସୁ ଅଡ଼୍‌‍କିଂଙ୍କ୍ କାର୍‍ଙ୍ଗି ଗ୍ରହନ୍ ମାଡ଼ି ଇଶ୍ୱର୍‌ତେ ରାଜ୍ୟ ବିଷୟତେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ମେଣ୍ଡେ, ବେନଡ଼୍ ସୁସ୍ଥ ଆଦାଙ୍କ୍ ଇଚ୍ଛା ମାଡ଼ମାତ୍‍ତଡ଼୍, ଅଡ଼୍‌‍କିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ ।
LUK 9:12 ହା ଦିନାମ୍‍ତେ ଦିନାମ୍ ମୁଲ୍‍ପୁଟ୍ ଆଦାଙ୍କ୍ ଆଞ୍ଜମାତ୍‍ତେ; ମେଣ୍ଡେ ବାରଜାନ୍ ଶିଷ୍ୟଡ଼୍ ଜିସୁନ୍ ଗାର୍‍ରେ ୱାସ୍ କେତ୍‍ତଡ଼୍, “ନାରୁଡ଼୍ ବେଦ୍‍ପୁଟୁଙ୍କ୍ ଗାର୍‍ରେ ନାକିନାଗ୍ ଆଞ୍ଜ୍ ନୁ ନଗର୍‍ତାଗ୍ ଆଞ୍ଜ୍ କାଦି ତିନ୍‌ତଡ଼୍‌, ଅଦିନ୍‌ ମାଇଦିଙ୍କ୍ ରଅସିମ୍, ବାତେଙ୍କ୍ ଇତ୍କେ ମାନାଡ଼୍ ଇଗେ ବାତେଏ ଇଲ୍‍ୱେ ପଡ଼ିୟେତାଗ୍ ମିନ୍ଦେଡ଼୍ ।”
LUK 9:13 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼େ ଅଡ଼୍‌‍କିଂଙ୍କ୍ ତିନ୍ଦାନ୍ ମାଇଦିଙ୍କ୍ ହିମୁଟ୍ ।” ଅଡ଼୍‌‍ କେତ୍ତଡ଼୍, “ମା ଗାର୍‍ରେ ଏଇଙ୍ଗ୍ ରୂଟି ନୁ ରେଣ୍ଡ୍ କିକେ ମିନ୍ଦେ ଆୱିଙ୍କ୍‍ ୱିଡ଼୍‍ସି ମେଣ୍ଡେ ମାୟାଗ୍‌ ବାତା ଇଲେ । ଆଲାତ୍କେ ମାନାଡ଼୍ ଆଞ୍ଜ୍ ବାତା ଇଡ଼୍‍ସାର୍ ନାରୁଡ଼୍ ମାଇଦିଙ୍କ୍ କାଦି ଆସିତାଡ଼୍ ?”
LUK 9:14 ଅଡ଼୍‌‍ ସାର୍‍ରେତଡ଼୍ ଏଇଙ୍ଗ୍ ହଜାର୍‌ ନାରୁଡ଼୍ ମାତ୍‍ତଡ଼୍ । ମେଣ୍ଡେ, ଜିସୁ ତାମ୍ ଶିଷ୍ୟଡ଼କ୍ କେତ୍ତଣ୍ଡ୍, “ପାଚାଶ୍ ପାଚାଶ୍ ନାରୁଡ଼୍‍କ୍ ମାନ୍ଦେ ମାନ୍ଦେ ମାଡ଼ି କୁସ୍‍ପାଟ୍ ।”
LUK 9:15 ଆସୁଟେ ଅଡ଼୍‌‍ ରକମ୍ ସାର୍‍ରେ ତଡ଼୍‍କିଂଙ୍କ୍ କୁସ୍‍ପ୍‍ତଡ଼୍ ।
LUK 9:16 ଜିସୁ ଆୱ୍ ଏଇଙ୍ଗ୍ ରୂଟି ନୁ ରେଣ୍ଡ୍ କିକେ ଆସ୍ ସ୍ୱର୍ଗତ୍ ପାକ୍ ମୁନ୍‍ମାଡ଼ି ଆୱ୍‍ଚାରେ ଆର୍ଶିବାଦ୍ ମାଡ଼୍‍ତଣ୍ଡ୍, ନାରୁଡ଼୍ ମୁନେ ଉଉସ୍ ମେଣ୍ଡେ, ଅଡ଼୍‌‍ ନାରୁଡ଼୍‍କ୍ ହିଦ୍‍ନ୍ ମାଇଦିଙ୍କ୍ ଶିଷ୍ୟଡ଼କ୍ ହିତ୍‍ତଣ୍ଡ୍ ।
LUK 9:17 ମେଣ୍ଡେ ସାରେତଡ଼୍, ତିଞ୍ଜ୍ ପାଞ୍ଜ୍‍ତଡ଼୍, ଅଡ଼୍‌‍ ମେଣ୍ଡେ ଅଡ଼ାୱୁ ମିଗ୍‍ଲିମାନ୍ଦାନ୍ ଉରୁଙ୍ଗ୍‍ତେ ରୂଟି ସାରେ ବାର୍‍ଟାନ୍ ଜୁଡ଼ୀନାଗ୍ ପେହେକି ନିହ୍‍ତଡ଼୍ ।
LUK 9:18 ଜିସୁ ଦିନେ ପ୍ରାର୍ତନା ମାଡ଼ାନ୍ ୱେୟ୍ ଶିଷ୍ୟଡ଼୍ ଅନ୍‌‍ଗାରେ ୱାତ୍‍ତଡ଼୍, ମେଣ୍ଡେ ଜିସୁ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍, “ନାନେ ବେନନ୍ ଇଞ୍ଜ ନାରୁଡ଼୍ କେତୁ‍ତଡ଼୍ ?”
LUK 9:19 ଆସୁଟେ ଅଡ଼୍‌‍ ଉତ୍ତର୍ ହିତ୍‍ତଡ଼୍, “ବାପ୍ତିସ୍ମ ଯୋହନ୍‌ ଇଞ୍ଜ,” ମେଣ୍ଡେ, “ବେନ୍‍ ବେନଡ଼୍ କେତୁତଡ଼୍, ଏଲିୟ ଇଞ୍ଜ, ବାଗାତଡ଼୍ କେତୁତଡ଼୍ ମୁନେତଣ୍ଡ୍ ବାବବାଦୀ ଡ଼ାଗାଙ୍କ୍ ୱେରଣ୍ଡ୍ ପୁନରୁତ୍‍ତିତ୍ ଆସ୍‍ମିନ୍ଦେଣ୍ଡ୍ ।”
LUK 9:20 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‍, “ନାନେ ବେନନ୍ ଇଞ୍ଜ ମିଡ଼୍ କେତୁତିଡ଼୍ ?” ପିତର୍ ଉତ୍ତର୍ ହିତ୍‍ତଣ୍ଡ୍ “ନିମେ ଇଶ୍ୱରତେ କ୍ରିଷ୍ଟନି ।”
LUK 9:21 ଜିସୁ ଆସୁଟେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍ ଇଦ୍ ବେନଙ୍କ୍ କେଲ୍‍ମାଟ୍ ଇଦ୍ ବେନଙ୍କେ କେଲ୍‍ମାଟ୍ ଇଞ୍ଜ ଅଡ଼୍‌‍କିଂଙ୍କ୍ ଦୃଡ଼ ଗଟ୍ ଇସ୍ କେତ୍‍ତଣ୍ଡ୍‍,
LUK 9:22 ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାରୁନ୍‍ପିଲେତିଙ୍କ୍ ଗାଟି ଦୁଃକାମ୍ ମାଡ଼ିତନ୍ ଆସୁଟେ ଅଂକିଙ୍କ୍‌ ଯିହୁଦୀ ନେତା, ମୁକ୍ୟଯାଜକ୍ ନୁ ଶାସ୍ତ୍ରୀଡ଼୍ ଜିସୁଙ୍କ୍ ରେହେତିତଡ଼୍, ମେଣ୍ଡେ ଅଣ୍ଡ୍‌ ମୁଣ୍ଡ୍ ଦିନାତିଙ୍କ୍ ଜିୱେ ଆସ୍ ତେଦିତଣ୍ଡ୍ ।”
LUK 9:23 ଆସୁଟେ ଜିସୁ ସାର୍‍ରେତଡ୍‍କିଙ୍ଗ୍ କେତ୍‍ତଣ୍ଡ୍‍, “ବେନ ନା ପେର୍‍କେ ତାକାଙ୍କ୍ ଇଚ୍ଛାମାଡ଼ୁତଣ୍ଡ୍, ଆଲାଇତ୍କେ ଅଣ୍ଡ୍‌ ନିଜେ ଅସ୍ୱୀକାର୍ ମାଡ଼ିଣ୍ଡ୍, ସାର୍‍ଦିନା ଅଂକିଙ୍କ୍‌ ଇସ୍ ମାନ୍ଦାନାଦ୍ କ୍ରୁଶତିଙ୍କ୍ କାଞ୍ଜି, ନା ପେର୍‍କେ ୱାଡ଼ିଣ୍ଡ୍ ।”
LUK 9:24 ମାତର୍ ବେନ ନିଜର୍ ଜିୱୁନ୍‍ତିଙ୍କ୍ ରକ୍ଷା ମାଡ଼ାଙ୍କ୍ ଇଚ୍ଛା ମାଡ଼ୁତଣ୍ଡ୍, ଅଣ୍ଡ୍‌ ଆଉ ୱିଡ଼୍‍ସାନ୍ ମିନ୍ଦେ; ବେନ ନା ମାଇଦିଙ୍କ୍ ଅନ୍‌ ଜିୱୁନ୍ ୱିଡ଼୍‍ସିଦ୍‍ତଣ୍ଡ୍, ଅଣ୍ଡ୍‌ ରକ୍ଷା ମାଡ଼ିତଣ୍ଡ୍ ।
LUK 9:25 ମାତର୍ ନାରୁନ୍ ବେସୁଟ୍‌ ସାର୍‍ରେ ଜଗତ୍‍ତିଙ୍କ୍ ଲାବ୍ ମାଡ଼ି, ନିଜେତ୍ ଜିୱୁଣ୍ଡ୍ ନଷ୍ଟ ମାଡ଼ିତନ୍, ଆଲାତ୍କେ ଅଂକିଙ୍କ୍‌ ବାତ୍ ଲାବ୍ ?
LUK 9:26 ବେନଆଇ ନାକିଂଙ୍କ୍ ନୁ ନାୟାଦ୍ ବାକ୍ୟବିଷୟତେ ସିଗ୍ ଆଦ୍‍ତଣ୍ଡ୍, ନାରୁନ୍‍ପିଲେ ଆସୁଟେ ଅନ୍‌ ମାଇମାତେ, ପରମେଶ୍ୱର୍‍ତେ ମାଇମାତେ ନୁ ପବିତ୍ର ଦୂତକିନ୍ ମହିମା ତେ ୱାଦାନାଦ୍ ମାଡ଼ିତନ୍, ଆସୁଟେ ଅଣ୍ଡ୍‌ ଆ ବିଷୟ୍ ତେ ସିଗ୍ ଆଦ୍‍ତନ୍ ।
LUK 9:27 ମାତର୍, ନାନେ ମିକିଂଙ୍କ୍ ସତ୍ କେତୁତାନ୍, “ମିଇ ନାରୁଡ଼୍ ଲୋପ୍ ନିଶ୍‍ମାନ୍ଦାନ୍ ବେସ୍‍ତୁଡ଼୍ ନାରୁଡ଼୍ ଡଲାନ୍ ମୁନେଙ୍କ୍ ପରମେଶ୍ୱରତାଦ୍ ରାଜ୍ୟତିଙ୍କ୍ ଉଡ଼ିତଡ୍ ।”
LUK 9:28 ହି ସାର୍‍ରେ ଗଟ୍‍ନା ଆସ୍ ମାତର୍ ଆଟ୍‍ ଦିନ୍ ପେର୍‍କେ ଜିସୁ, ପିତର୍, ଯୋହନ୍‌ ନୁ ଯାକୁବଙ୍କ୍ ସାଙ୍ଗେତେଆସ୍ ପ୍ରାର୍ତନା ମାଡ଼ାନ୍ ମାଇଦିଙ୍କ୍ ମେଟେତ୍ ପରୁ ଆଦ୍‍ତଡ଼୍ ।
LUK 9:29 ଜିସୁ ପ୍ରାର୍ତନା ମାଡ଼ାନ୍ ଦିନାମ୍‍ତେ ଅନ୍‌‍ୱାଦ୍ ମକମ୍ ତନ୍ଦାନାଦ୍ ମେଣ୍ଡନ୍ ଲେକାମ୍ ଆତ୍‍ତା ଅନାୱୁ କେର୍ସ୍ ମାନ୍ଦାନ୍ ଚକା ପାଣ୍ଡେ ଆସ୍ ୱେସ୍ ଆଦ୍‍ତେ ।
LUK 9:30 ମେଣ୍ଡେ, ଉଡ଼ାଟ୍, ହଟାତ୍ ମଶାଲ୍‌ ନୁ ଏଲିୟ, ଇର୍‍ୱୁଡ଼୍ ଜିସୁନ୍ ତଡ଼୍ ତିର୍‍ୟୁତଡ଼୍;
LUK 9:31 ଅଡ଼୍‌‍ ସ୍ୱର୍ଗୀୟ ଗୌରବ୍‍ତେ ତଅନ୍‌ଦମାତ୍ତଡ଼୍, ଜିସୁ ଡଲାନାଦ୍ ବିଷୟ ତେ ଯୀରୁଶାଲାମ୍ ଗଟେମ୍ ଆଦାଙ୍କ୍ ଆଦୁତ୍‍ତେ ଆଦ୍ ବିଷୟ ତେ ଅଡ଼୍‌‍ ଅଣ୍ଡ୍‌ ତଡ଼୍ ତିର୍‍ୟୁତଡ଼୍ ।
LUK 9:32 ଆସୁଟେ, ପିତର୍ ନୁ ଅନ୍‌ ସାଙ୍ଗଡ଼୍ ଉଞ୍ଜିମାତ୍‍ତଡ଼୍; ବେସୁଙ୍କ୍‍ ଅଡ଼୍‌‍ ତେଦି ଉଡ଼ୁ‍ତଡ଼୍, ଜିସୁନାଦ୍ ମହିମା, ମେଣ୍ଡେ ଅନ୍‌‍ତଡ଼୍ ଇର୍‍ୱୁଡ଼୍ ନିସ୍ ମାନ୍ଦାନାଦ୍ ଉଡ଼୍‍ତଡ଼୍ ।
LUK 9:33 ମେଣ୍ଡେ ମଶାଲ୍‌ ନୁ ଏଲିୟ ଜିସୁନାଗାଙ୍କ୍ ଆଦ୍‍ଦାନ୍ ୱେୟ୍ ପିତର୍ ଜିସୁଙ୍କ୍ କେତ୍‍ତଣ୍ଡ୍, “ହୋ ଗୁରୁ, ସାୟେ ଆତ୍‍ତେ ମାନାଡ଼୍ ଇଗ୍ ମିନ୍ଦେଡ଼୍; ମାନାଡ଼୍ ଇଗେ ମୁଣ୍ଡ୍ ଗୁଡ୍‍ସା ତିଆର୍ ମାଡ଼ିକାଡ଼୍, ନି ମାଇଦିଙ୍କ୍ ଅଣ୍ଡୟ୍‌, ମୋଶାନ୍‌ ମାଇଦିଙ୍କ୍ ଅଣ୍ଡୟ୍‌, ଏଲିୟନ୍ ମାଇଦିଙ୍କ୍ ଅଣ୍ଡୟ୍‌ ।” ବାତେଙ୍କ୍ ଇତ୍କେ ଅଣ୍ଡ୍‌ ବାତ୍ କେତ୍ତଣ୍ଡ୍, ଆଦ୍ ଅଣ୍ଡ୍‌ ପୁନଣ୍ଡ୍ ।
LUK 9:34 ପିତର୍ ଆଦ୍ ଗଟି କେସମାନ୍ଦାନ୍‌ ୱେୟ୍ ମାବ୍‍ୱାସ୍ ଇଡ଼୍‍କ୍ ମିସ୍‍ତା, ମେଣ୍ଡେ, ଅଡ଼୍‌‍ ମାବ୍‍ତାଗ୍ ନେଙ୍ଗାନ୍ ୱେୟ୍ ପିତର୍, ଯାକୁବ୍ ନୁ ଯୋହନ୍‌ ୱେର୍‍ତଡ଼୍ ।
LUK 9:35 ଆସୁଟେ ଆଦ୍ ମାବ୍‍ତାଗାଙ୍କ୍ ଇଦ୍‍ପୁଟୁଙ୍କ୍ ଲେଙ୍ଗ୍ ଆତ୍‍ତେ, “ହୋ ମା ପ୍ରିୟ ମାର୍‍, ଇକିଂଙ୍କ୍ ମାମ୍ ହେଞ୍ଚି ମିନ୍ଦେମ୍, ଇନ୍‍ ବାକ୍ୟତିଙ୍କ୍ କେଞ୍ଜାଟ୍ ।”
LUK 9:36 ମେଣ୍ଡେ ଆଦ୍ ଲେଙ୍ଗ୍ଆସ୍ ତେର୍‍ତ୍ ୱେୟ୍ ଜିସୁ ୱେରଣ୍ଡେ ଆଗେ ତଅନ୍‌ତତଣ୍ଡ୍ । ପିତର୍, ଯାକୁବ୍ ନୁ ଯୋହନ୍‌ କଟ ଆସ୍ ମାତ୍‍ତଡ଼୍, ଅଡ଼୍‌‍ ବାତ୍‍ ବାତା ଉଡ଼ିମାତ୍‍ତଡ଼୍, ଆଗେତାୱୁ ବେନେ ବା ଗଟ୍‌ ଆଦ୍‌ ସମୟତେ ବେନଙ୍କ୍‌ ମିକା କେଲଡ଼୍‌ ।
LUK 9:37 ମେଣ୍ଡେନ୍‍ଦିନ୍ ଜିସୁ ନୁ ଅଡ଼୍‌‍ୱାଦ୍‌ ମୁୱୁଡ଼୍ ଶିଷ୍ୟଡ଼୍ ମେଟେତାଗାଙ୍କ୍ ଡିଗି ୱାତ୍‍ତେ ୱେୟ୍, ନାର୍ଗେ ନାରୁଡ଼୍ ୱାସ୍ ଜିସୁନ୍ ତଡ଼୍ କାୟ୍‍ଲ୍‍ତଡ଼୍ ।
LUK 9:38 ମେଣ୍ଡେ ଉଡ଼ାଟ୍; ନାରୁଡ଼୍ ଲୋପେଙ୍କ୍ ୱେରଣ୍ଡ୍ ନାରୁଡ଼୍ ଗାଟି ଲେଙ୍ଗଦେ କେତ୍‍ତଣ୍ଡ୍, “ହୋ ଗୁରୁ, ନାନେ ନିକିଂଙ୍କ୍ ଦନ୍ୟବାଦ୍ ମାଡ଼ୁତାନ୍, ଦୟାମାଡ଼ି ନା ମାର୍‍ଦିଙ୍କ୍ ୱାସ୍ ଉଡ଼େ ବାତେଙ୍କ୍ ଇତ୍କେ ନାକିଂଙ୍କ୍ ଅଣ୍ଡ୍‌ ୱେରଣ୍ଡେ ଇଞ୍ଜ ମାର୍‍;
LUK 9:39 ଉଡ଼େ, ଅଂକିଙ୍କ୍‌ ବୁତ୍ ପୟିନୁଡ଼୍, ମେଣ୍ଡେ ଅଣ୍ଡ୍‌ ଅଟାତ୍‍ ତେ ମର୍‍ପୟ୍‍ତୁତଣ୍ଡ୍, ଅଂକିଙ୍କ୍‌ ବୁତ୍ ଇଦ୍‍ପୁଟୁଙ୍କ୍ ମାଡ଼୍‍ତେ ଯେ, ଅନ୍‌ ପାୟୁର୍‍ତାଗାଙ୍କ୍ ବୟୁଲ୍ ପେୟିନୁଡ଼୍‌, ବୁତ୍ ଅଂକିଙ୍କ୍‌ ଉକେୱେକ୍ ମାଡ଼ି ଅନ୍‌ଆଗାଙ୍କ୍ ତିପାଲ୍‍ତେ ପେୟିସ୍ ଆତ୍‍ତେ ।”
LUK 9:40 ବୁତ୍‌ତିଙ୍କ୍ ୱିର୍‍ସ୍‍ପାନ୍ ମାଇଦିଙ୍କ୍ ନାନେ ନି ଶିଷ୍ୟଡ଼୍‍କିଂଙ୍କ୍ କାର୍‍ଙ୍ଗି ମାତ୍‍ତାନ୍, ମାତର୍ ଅଡ଼୍‌‍ ପାର୍‍ୱଡ଼୍ ।
LUK 9:41 ଜିସୁ ଉତ୍ତର୍ ହିତ୍‍ତଣ୍ଡ୍, “ଆର୍ ଅବିଶ୍ୱାସ୍‌ଡ଼ି ନୁ ପେର୍‍କେ ୱାଦାନ୍ ବଂଶତଡ଼ି, ମେଣ୍ଡେ ବେସ୍‌କ୍‌ଦିନା ନାନେ ମି ତଡ଼୍ ମାନ୍‍ତା, ବେସର୍‍ଦିନା ନାନେ ମିୟାଦ୍ ମାଡ଼ାନ୍ କାମ୍‍ତିଙ୍କ୍ ‍କେଞ୍ଜ୍‍ତାନ୍, ତାନ୍ ପେର୍‍କେ ଜିସୁ ଆଦ୍ ନାରୁଙ୍କ୍ କେତ୍‍ତଣ୍ଡ୍, ନି ମାର୍‍ଦିଙ୍କ୍ ଇଗ୍ ପୟ୍‍ସ୍ ତାଡ଼ା ।”
LUK 9:42 ପେକାଲ୍ ୱାଦାନ୍ ୱେୟ୍ ବୁତ୍ ଅଂକିଙ୍କ୍‌ ନେଏଲ୍ ‍ରାପି ବୟଙ୍କାର୍ ତେ ପଇସ୍‍ଉକିତ୍ତେ, ବାତେଙ୍କ୍ ଇତ୍କେ ଜିସୁ ଅଶୁଚି ଆତ୍ମାତିଙ୍କ୍ ଦମକ୍ ହିତ୍‍ତଣ୍ଡ୍ ନୁ ପେକାଙ୍କ୍ ସୁସ୍ଥ ମାଡ଼ି ଅଂକିଙ୍କ୍‌ ତାମ୍ ବାବାନ୍ କାଇଦେ ଇତ୍‍ତନ୍ ମାଡ଼୍‍ତଣ୍ଡ୍ ।
LUK 9:43 ଆଗେତିନ୍‍ସ୍ ଅଡ଼୍‌‍ ସାର୍‍ତଡ଼୍ ଇଶ୍ୱର୍ ତେ ନାର୍ଗେଶକ୍ତି ତେ ବାକ୍‍ୱା ଆଦ୍‍ତଡ଼୍ । ମାତର୍ ତାନ୍ ମାଡ଼୍‍ତେ ସାରେ ପାଡ଼ିୟି ସେଙ୍ଗେ ସାରେତଡ଼୍ ବାକ୍‍ୱା ଆଦାନ୍ ୱେଲେ ଜିସୁ ତାମ୍ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍ ।
LUK 9:44 “ଜିସୁ ତାନ୍ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍, ନାନ୍ ବାତେଏ କତ୍‍ତାନ୍ ଆଦ୍ ମାର୍‍ଙ୍ଗ୍‌ମାଟ୍ ଆଦ୍ ସାର୍‍ରେଗଟି ମି କେୱକିନାଗ୍ ନେହେମୁଟ୍; ବାତେଙ୍କ୍ ଇତ୍କେ ନାରୁନ୍ ମାର୍‍ ଶତୃଡ଼୍ କାଇଦେ ସମର୍ପିତ୍ ହାଦାଙ୍କ୍ ଆଦୁତନ୍ ।”
LUK 9:45 ବାତେଙ୍କ୍ ଇତ୍କେ ଶିଷ୍ୟଡ଼୍ ଆଦ୍ ଗଟ୍‍ତିଙ୍କ୍ ବୁଜେମ୍ ଆୟ୍‍ୟଡ଼୍, ଆଦ୍ ଗଟ୍ ତେ ଇତ୍‍କେ ଅଡ଼୍‌‍ ମାଇଦିଙ୍କ୍ ପୁନ୍ଦାନ୍ ସେଙ୍ଗେ ମିଞ୍ଜିମାତ୍‍ତେ, ଆସୁଟେ ଅଡ଼୍‌‍ ଜିସୁଙ୍କ୍ ଆଦ୍ ଗଟ୍ ବିଷୟ୍ ତେ କେତ୍‍ତାନ୍ ମାଇଦିଙ୍କ୍ ୱେର୍‍ସ ମାତ୍‍ତଡ଼୍ ।
LUK 9:46 ଅଡ଼୍ ଲପେଙ୍କ୍‌ ବେନଣ୍ଡ୍ ବାଡ଼୍‍ୟଣ୍ଡ୍ ଆଦ୍‌ ବିଷୟତେ ଅଡ଼୍‌ ଲପେ ରାମ୍‌କ୍‌ ରଦ୍‌ଦେ ଆତ୍‌ତେ ।
LUK 9:47 ବାତେଙ୍କ୍ ଇତ୍କେ ଜିସୁ ଅଡ଼୍‌‍ ଆଲ୍‍ସାନାଦ୍ ପୁଞ୍ଜ୍, ଅର୍‍ତୁଙ୍କ୍ ସୁଦୁନ୍ ପେକାଙ୍କ୍ ଅନ୍‌ ଗାର୍‍ରେ ତାସ୍ ନିଲ୍‍ସ୍ପି ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍,
LUK 9:48 “ବେନଆଇ ନା ପେଦେର୍‍ତେ ହି ସୁଦୁଣ୍ଡ୍ ପେକାଙ୍କ୍ ଗ୍ରହନ୍ ମାଡ଼ିତନ୍ ଅଣ୍ଡ୍‌ ନାକିଂଙ୍କ୍ ଗ୍ରହନ୍ ମାଡ଼ିତନ୍, ବେନଆଇ ନାକିଂଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍‌ ନା ତ୍ରାଣକର୍ତ୍ତାଙ୍କ୍ ଗ୍ରହନ୍ ମାଡ଼ିତନ୍; ବାତେଙ୍କ୍ ଇତ୍କେ ମି ସାର୍‍ରେତଡ଼୍ ଲୋପ୍ ବେନ ସୁଦୁନଣ୍ଡ୍, ଅଣ୍ଡେ ବାଡ଼୍‍ୟଣ୍ଡ୍ ।”
LUK 9:49 ଆସୁଙ୍କ୍ ଯୋହନ୍‌ ଉତ୍ତର୍ ହିତ୍‍ତଣ୍ଡ୍, “ହୋ ଗୁରୁ, ମାମ୍ ଅର୍‍ତୁଙ୍କ୍ ନି ପେଦେର୍ ତେ ବୁତ୍ ୱିଡ଼୍‍ସ୍‍ପାନାଦ୍ ଉଡ଼୍‍ତମ୍, ମେଣ୍ଡେ ଅଣ୍ଡ୍‌ ମା ମାନ୍ଦେ ତାଗ୍ ଇଲ୍‍ୱାଙ୍କ୍ ଅଂକିଙ୍କ୍‌ ମାମ୍ ମନା ମାଡ଼୍‍ତମ୍ ।”
LUK 9:50 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମନା ମାଡ଼୍‍ମାଟ୍, ବେନ୍ ମିଇ ତୋଡ଼୍ ଆୟ୍‍ୟଣ୍ଡ୍ ଅଣ୍ଡ୍‌ ତୋଡ଼୍ ।”
LUK 9:51 ଜିସୁ ଜଗତ୍‍ତିଙ୍କ୍ ୱିଡ଼୍‍ସି ସ୍ୱର୍ଗତା ମାଲ୍‍ସ୍‍ଆଦାନ୍ ଦିନାମ୍ ଗାର୍‍ରେ ହେୱ୍‍ସ୍ ମାତ୍‍ତେ, ଆସୁଟେ ଅଣ୍ଡ୍‌ ଯିରୁଶାଲେମ୍‍ତା ଆଦାନ୍ ମାଇଦିଙ୍କ୍ ତିୟାର୍ ଆତ୍‍ତଣ୍ଡ୍ ।
LUK 9:52 ଜିସୁ ଅନ୍‌ ମୁନେଙ୍କ୍ ବେସ୍‍କ୍‍ତୁଡ଼କ୍ ନାରୁଡ଼୍‍କିଂଙ୍କ୍ ରହତଣ୍ଡ୍, ଅଡ଼୍‌‍ ଆଞ୍ଜ୍ ଜିସୁନ୍ ମାଇଦିଙ୍କ୍ ଆୟୋଜନ୍ ମାଡ଼ାନ୍ ସେଙ୍ଗେ ଶମିରୋଣୀୟ ନାର୍‍ଦାଗ୍ ଅସ୍‍ତଡ଼୍,
LUK 9:53 ବାତେଙ୍କ୍ ଇତ୍କେ ଜିସୁ ଯୀରୁଶାଲାମ୍ ଆଦାଙ୍କ୍ ଇଚ୍ଛା ମାଡ଼୍‍ତଣ୍ଡ୍ ଇଞ୍ଜ ପୁଞ୍ଜ୍ ଅଡ଼୍‌‍ ଅଂକିଙ୍କ୍‌ ଗ୍ରହନ୍ ମାଡ଼ଡ଼୍‍ ।
LUK 9:54 ଆଦ୍ ଉଡ଼ି, ଯାକୁବ୍ ନୁ ଯୋହନ୍‌, ହି ଇର୍‍ୱୁଡ଼୍ ଶିଷ୍ୟ ଜିସୁଙ୍କ୍ କେତ୍‍ତଡ଼୍, “ପ୍ରବୁ ଏଲିୟ ବେଦ୍‍ପୁଟୁଙ୍କ୍ ମାଡ଼ିମାତ୍‍ତଣ୍ଡ୍, ଆଦ୍‍ପୁଟୁଙ୍କ୍ ମାବ୍‍ତାଗାଙ୍କ୍ କିସ୍ ରାଲି ଅଡ଼୍‌‍କିଂଙ୍କ୍ ନଷ୍ଟ ବା ୱିଡ଼୍‍ସି ମାଡ଼ି, ଆଦ୍ ମାମ୍ କେତିତମ୍ ଇଞ୍ଜ ବାତ୍ ମିୱାଦ୍ ଇଚ୍ଛା ?”
LUK 9:55 ବାତେଙ୍କ୍ ଇତ୍କେ ଅଣ୍ଡ୍‌ ତିଡ଼୍‍ୟିମେଣ୍ଡେ ଅଡ଼୍‌‍କିଂଙ୍କ୍ ଆନୁଯୋଗ୍ ମାଡ଼ି କେତ୍‍ତଣ୍ଡ୍, ମିଡ଼୍ ବେନ୍ ଲେକାମ୍ ଆତ୍ମାତ୍ ନାରୁଡ଼ି, ଇଦ୍ ନାନ୍ ପୁନନ୍ । ନାରୁନ୍ ମାର୍‍ ନାରୁଡ଼୍‍ତେ ଜିୱୁନ୍‍ତିଙ୍କ୍ ହାଉକାଙ୍କ୍ ୱାଡ଼ଣ୍ଡ୍ ବା ଗେଲ୍‍ସ୍‍ପାଙ୍କ୍ ୱାସ୍ ମିନ୍ଦେଣ୍ଡ୍ ।
LUK 9:56 ଆସୁଟେ ଅଡ଼୍‌‍ ମେଣ୍ଡେ ଅଣ୍ଡ୍‌ ନାର୍ ଆଦ୍‍ତଡ଼୍ ।
LUK 9:57 ଅଡ଼୍‌‍ ଆର୍‍ଦାଲାନ୍ ଆଦାନ୍ ଦିନାମ୍ ତେ ୱେରନ୍ ନାରୁଡ଼୍ ଜିସୁଙ୍କ୍ କେତ୍‍ତଣ୍ଡ୍, “ନିମେ ବେନେ ଜାଗେତାଗ୍ ଆଦ୍‍ତିଡ଼୍, ନାନେ ନି ପେର୍‍କେ ୱାଦ୍‍ତାନ୍ ।”
LUK 9:58 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “କଙ୍ଗାନାକାଙ୍କ୍ ଦୋର୍‌ରା ମିନ୍ଦେ, ମାବ୍ ତେ ପରୁ ଉଡାନ୍ ପିଟେଙ୍କ୍ ତୁହ୍‍କା ମିନ୍ଦେ, ମାତର୍ ନାରୁନ୍‍ପିଲେତାଦ୍‍ ତାଲାଙ୍କ୍‌ ଗୁଞ୍ଚାମାଡ଼ାଙ୍କ୍ ପଡ଼ିୟେ ଇଲା ।”
LUK 9:59 ମେଣ୍ଡେ, ଅର୍‍ତୁଙ୍କ୍ କେତ୍‍ତଣ୍ଡ୍, “ନା ପେର୍‍କେ ୱାଡ଼ା ।” ବାତେଙ୍କ୍ ଇତ୍କେ ଅଣ୍ଡ୍‌ କେତ୍‍ତଣ୍ଡ୍, “ମୁନେ ଆଞ୍ଜ୍ ନା ବାବାଙ୍କ୍ ସମାଦି ହିଦାନ୍ ମାଇଦିଙ୍କ୍ ନାକିଂଙ୍କ୍ ଗଟ୍ ହିମ୍ ।”
LUK 9:60 ମାତର୍ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଡଲ୍‍ତେନଡ଼୍‍କିଂଙ୍କ୍ ସମାଦି ହିଦାଙ୍କ୍ ଡୋଲ୍‍ତଡ଼୍‍କ୍ ୱିଡ଼୍‍ସିମୁଟ୍, ବାତେଙ୍କ୍ ଇତ୍କେ ମିଡ଼୍ ଆଞ୍ଜ ଇଶ୍ୱର୍‌ତ୍ ରାଜ୍ୟତେ ପ୍ରଚାର୍ ମାଡ଼ାଟ୍ ।”
LUK 9:61 ମେଣ୍ଡେ ୱେରଣ୍ଡ୍ ଆନ୍‌‍ତେ କେତ୍‍ତଣ୍ଡ୍, “ନାନେ ନି ପେର୍‍କେ ତାକିତାନ୍, ମାତର୍ ମୁନେ ନା ଲୋନ୍‌ ମାନ୍ଦାନ୍ ନାରୁଡ଼ାଗାଙ୍କ୍ ୱିଡ଼୍‍ସିଦାନ୍ ମାଇଦିଙ୍କ୍ ନାକିଂଙ୍କ୍ ଗଟ୍ ହିମ୍ ।”
LUK 9:62 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ବେନ ନାଙ୍ଗେଲ୍‍ତାଗ୍ କାୟ୍‍ପୟ୍‍ସ୍ ପେର୍‍କେ ଉଡ଼ିତଣ୍ଡ୍, ଅଣ୍ଡ୍‌ ଇଶ୍ୱରତେ ରାଜ୍ୟ ସେଙ୍ଗେ ବାତ୍ ପାଡ଼ିୟିଦିଙ୍କ୍ ମିକା ଯୋଗ୍ୟ ଆୟ୍‍ୟଣ୍ଡ୍ ।”
LUK 10:1 ତାନ୍ ପେର୍‍କେ ଜିସୁ ପ୍ରବୁ ସତୁରି ଇର୍‍ୱୁଡ଼କ୍ ଜାନ୍ ନାରୁଡ଼୍‍କ୍ ଏଞ୍ଚତଣ୍ଡ୍ । ବେନ୍ ନଗର୍‍ ନୁ ପଡ଼ିୟେତାଗ୍ ଆଦାନ୍ ମାଇଦିଙ୍କ୍ ଇଚ୍ଛା ମିନ୍ଦେ, ଆଦ୍ ଜାଗାକିନାଗ୍ ଇର୍‍ୱୁଡ଼୍ ମାଡ଼ି ଜିସୁ ଆଦାନ୍ ମୁନେଙ୍କ୍ ଅଡ଼୍‌‍କିଂଙ୍କ୍ ରହ୍‍ତଣ୍ଡ୍ ।
LUK 10:2 ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ଶସ୍ୟ ସିନା ନାର୍ଗେ, ମାତର୍ ପାଡ଼ିୟିମାଡ଼ାନ୍ ନାରୁଡ଼୍ ସୁକୁକେ; ଆଦିନ୍ ମାଇଦିଙ୍କ୍ ପସଲ୍‍ମାଡ଼୍‍ତେ ମାଲିକ୍‍ତିଙ୍କ୍ ପ୍ରାର୍ତନା ମାଡ଼ାଟ୍ ଯେ, ମାଲିକ୍ ବେଲାକି କୟ୍‍ଦାନ୍ ମାଇଦିଙ୍କ୍ ନାର୍ଗେ ନାରୁଡ଼୍‍କିଂଙ୍କ୍ ରହ୍‍ତିତଣ୍ଡ୍ ।
LUK 10:3 ମିଡ଼୍ ଆନୁଟ୍, ଉଡ଼ାଟ୍, ନାନେ ମିକିଂଙ୍କ୍ କୁକାଲ୍‍କିନ୍ ଲୋପ୍ ମେଣ୍ଢାପିଲାନ୍ ଲେକାମ୍ ମାଡ଼ି ରହ୍‍ତୁତାନ୍ ।
LUK 10:4 ଆଦାନ୍‌ ୱେଲେ ସାଙ୍ଗେ ଡାବ୍, ମୁନେ, ହେର୍‍ପୁକ୍ କି ବାତାମେଣ୍ଡେ ଆୟ୍‍ମାଟ୍, ମେଣ୍ଡେ, ଆର୍‍ଦାଗ୍ ବେନଙ୍କ୍ ନମସ୍କାର୍ ମାଡ଼୍‍ମାଟ୍ ।
LUK 10:5 ଆସୁଟେ, ବେନେଆୟି ଲୋନ୍‌ ନେଙ୍ଗାନ୍ ମୁନେନ୍‍ କେଲ୍‍ମୁଟ୍, “ଇ ଲୋତ୍‍ତେ ସେଙ୍ଗେ ଶାନ୍ତି ଆୟି ।”
LUK 10:6 ଯଦି ଆଗେ ବେନ ଶାନ୍ତିତ୍ ନାରୁଡ଼୍ ମାତ୍‍କେ, ଆଲାତ୍କେ ମିୱାଦ୍ ଆର୍ଶିବାଦ୍ ଅଡ଼୍‌‍କିଂଙ୍କ୍ ଦର୍‍କିତ୍ । ଯଦି ଆଗେ ବେନ ଶାନ୍ତିତ୍ ନାରୁଡ଼୍ ହିଲକଟ୍ ମାନ୍‍ତଣ୍ଡ୍, ଆଲାତ୍କେ ମିୱାଦ୍ ଆର୍ଶିବାଦ୍ ମିୟାଗ୍ ମାଲ୍‍ସ୍ ୱାଦ୍‍ତେ ।
LUK 10:7 ଆ ନାରୁଡ଼୍ ବାତାଆଇ ତିନ୍ଦାଙ୍କ୍ ହିଦ୍‍ତଡ଼୍ ଆୱୁ ତିନୁଟ୍ । ପାଡ଼ିୟେ ମାଡ଼ାନ୍ ନାରୁଡ଼୍‍କ୍ ମଜୁରି ଦର୍‍କାନାଦ୍ ଅଦିକାର୍‌ ମିନ୍ଦେ । ଲୋତ୍‍ତେ କନ୍‍ସ୍ ମେଣ୍ଡେଅଣ୍ଡ୍‌ ଲୋନ୍‌ ଆନ୍‌‍ମାଟ୍ ।
LUK 10:8 ଯଦି ମିଡ଼୍ ବେନ୍‌ଆଇ ନାର୍ ଆଦ୍‍ତିଡ଼୍, ଯଦି ମିକିଂଙ୍କ୍ ଆଗେତ୍ ନାରୁଡ଼୍ କାର୍‍ଙ୍ଗିତଡ଼୍, ଆଲାତ୍କେ ଅଡ଼୍‌‍ ମିକିଂଙ୍କ୍ ବାତ୍ କାଦି ହିଦ୍‍ତଡ଼୍ ଆଦ୍ ତିନୁଟ୍ ।
LUK 10:9 ଆଦ୍ ଜାଗାକିନାଗ୍ ମାନ୍ଦାନ୍ ରୋଗିନାରୁଡ଼୍ ସୁସ୍ଥ ମାଡ଼ାଟ୍, ଆସୁଟେ ଅଡ଼୍‌‍କିଂଙ୍କ୍ କେଲ୍‍ମୁଟ୍, ପରମେଶ୍ୱରତେ ରାଜ୍ୟ ମି ଗାର୍‍ରେ ୱାସ୍ ହେୱ୍‍ସ୍ ମିନ୍ଦେ ।
LUK 10:10 ଯଦି ବେନ୍‌ଆଇ ନାର୍ ଆଦ୍‍ତିଡ଼୍ ଯଦି ଆଗେତ୍ ନାରୁଡ଼୍ ମିକିଂଙ୍କ୍ ଗ୍ରହନ୍ ମାଡ଼ଡ଼୍‍, ଆଲାତ୍କେ ଆଦ୍ ନାର୍‍ଦେ ବାଇଦେ ଆଞ୍ଜ କେଲ୍‍ମୁଟ୍ ।
LUK 10:11 ମି ନାର୍‍ଦେ ଦୂମ୍ ମା ଡେକାନାଗ୍ ଟୁଣ୍ଡିମିନ୍ଦେ ଆଦ୍ ମିକା ମିୟାଗେ କାୟ୍‍ସିଦୁତମ୍ । ବେଲାହିତ୍‍କେ ମେଣ୍ଡେ ପରମେଶ୍ୱର୍‍ତାଦ୍ ରାଜ୍ୟ ମି ଗାର୍‍ରେ ୱାସ୍ ହେୱ୍‍ସ୍ ମିନ୍ଦେ, ଇଦ୍ ପୁଞ୍ଜ୍ ମାନୁଟ୍ ।
LUK 10:12 ନାନେ ମିକିଂଙ୍କ୍ କେସମିନ୍ଦେନ୍ ଯେ, ବିଚାର୍ ଆଦାନ୍‍ଦିନାତେ ଆଦ୍ ନାର୍ ଦେ ନାରୁଡ଼୍ ତେ ଦଣ୍ଡ୍ ୱିଡ଼୍‍ସି ସଦୋମ୍‍ ନଗର୍‍ତେ ଦଣ୍ଡ୍ ସହ୍ୟ ମାଡ଼ାଙ୍କ୍ ଆଦ୍ ତେ ।
LUK 10:13 ହୋ, “କୋରାଜିନ୍ ନିୟାଦ୍ ଦଣ୍ଡ୍ କି ବୟଙ୍କାର୍ ଆଦ୍ ତେ, ହୋ, ବେତ୍‍ସାଇଦା ନିୟାଦ୍ ମିକା ଦଣ୍ଡ୍ କି ବୟଙ୍କାର୍ ଆଦ୍ ତେ, ମି ମାଇଦିଙ୍କ୍ ନାନେ ନାର୍ଗେ ଆଶର୍ଯ୍ୟ ପାଡ଼ିୟେ ତଅତାନ୍ । ଯଦି ହିସତାଦ୍ ସୋର ନୁ ସିଦୋନ୍‍ତେ ନାରୁଡ଼୍‍କିଂଙ୍କ୍ ମାଡ଼ି ମାନ୍ଦାନ୍ ହିତ୍‍କେ, ହାଲାଇତ୍କେ ଅଡ଼୍‌‍ ନାର୍ଗେଦିନାତେ ମୁନେଙ୍କ୍ ବାସ୍ତା କେର୍ସ୍ ନିର୍‍ତାଗ୍ କୁଦି ମନପରିବର୍ତ୍ତନ୍ ମାଡ଼ି ମାନେଡ଼ି ।
LUK 10:14 ହାଲାଇତ୍କେ ବିଚାର୍ ଦିନାତେ ମିୟାଦ୍ ଦଣ୍ଡ୍ ୱିଡ଼୍‍ସି ସୋର୍ ନୁ ସୀଦୋନ୍‍ତେ ନାରୁଡ଼୍ ତେ ଦଣ୍ଡ୍ ସହ୍ୟ ମାଡ଼ାଙ୍କ୍ ଆଦ୍‌ତେ ।
LUK 10:15 ହୋ କପର୍ନାହୂମ୍ ନିମ୍‍ ବାତ୍ ସ୍ୱର୍ଗ ହେଉନା ଡେଙ୍ଗ୍ ଆଦ୍‍ତିଡ଼୍ ? ପାତାଲ୍‍ ହେଉନା ନିମେ ରାୟିତି ।”
LUK 10:16 ଜିସୁ ତାମ୍ ଶିଷ୍ୟଡ଼କିଙ୍କ୍ କେତ୍‍ତଣ୍ଡ୍, “ବେନମେଣ୍ଡ୍ଆଇ ମିୱାଦ୍ ଗଟି କେଞ୍ଜିତଣ୍ଡ୍; ଅଣ୍ଡ୍‌ ନା ଗଟି କେଞ୍ଜିତଣ୍ଡ୍, ମେଣ୍ଡେ ବେନ ମିକିଂଙ୍କ୍ ଗ୍ରହନ୍ ମାଡ଼ଣ୍ଡ୍, ଅଣ୍ଡ୍‌ ନାକିଂଙ୍କ୍ ଗ୍ରହନ୍ ମାଡ଼ଣ୍ଡ୍, ମେଣ୍ଡେ ବେନ ନାକିଂଙ୍କ୍ ଗ୍ରହନ୍ ମାଡ଼ଣ୍ଡ୍ ଅଣ୍ଡ୍‌ ନା ତ୍ରାଣକର୍ତ୍ତାଙ୍କ୍ ଗ୍ରହନ୍ ମାଡ଼ଣ୍ଡ୍ ।”
LUK 10:17 ଆସୁଟେ ଅଡ଼୍‌‍ ସତୁରି ଇର୍‍ୱୁଡ଼୍ ଜାନ୍ ନାରୁଡ଼୍ ମାଲ୍‍ସ୍‍ୱାସ୍ ସାର୍‍ଦେତେ କେତ୍‍ତଡ଼୍, “ପ୍ରବୁ, ମାମ୍ ବେସୁଟ୍‌ ନିୟାଦ୍ ପେଦେର୍ ପୟ୍‍ସ୍ କେତ୍‍ତମ୍, ଆସୁଟେ ବୁତ୍‌କ୍ ଆନ୍‌‍ତେ ମା ଗଟିଙ୍କ୍ କେଞ୍ଜ୍‍ତା ।”
LUK 10:18 ବାତେଙ୍କ୍ ଇତ୍କେ ଜିସୁ କେତ୍‍ତଣ୍ଡ୍, “ପିଡ଼୍‍ଗ୍ ହିନା ସ୍ୱର୍ଗତାଗାଙ୍କ୍ ଶୟ୍‍ତାନ୍‍ ରାଲାନାଦ୍ ନାନ୍ ଉଡ଼ିମା‍ତ୍ତାନ୍ ।”
LUK 10:19 ଉଡ଼ାଟ୍, ନାନ୍ ମିକିଂଙ୍କ୍ ତାଡ଼ାକିନାଗ୍ ନୁ ଏଟ୍‍ଗଡେଲ୍‍କିନ୍ ପରୁ ତାଆକାନ୍ ମାଇଦିଙ୍କ୍ ଶକ୍ତି ନୁ ଅଦିକାର୍‌ ହିତ୍‍ତାନ୍, ମେଣ୍ଡେ ଶତ୍ରୁଡ଼୍ ଶକ୍ତିତ୍ ପରୁ ଆନ୍‌‍ତେ ଅଦିକାର୍‌ ହିତ୍‍ତାନ୍, ମିକିଂଙ୍କ୍ ବେନଡ଼୍ ମେଣ୍ଡେ ବାତ୍ କ୍ଷତି ମାଡ଼୍ ପାର୍‍ୱଡ଼୍ ।
LUK 10:20 ମିକା, କାରାପ୍ ଆତ୍ମା ଆନ୍‌‍ତେ ମିଆୱ୍ ଗଟି କେଞ୍ଜୁତ୍ ଇଞ୍ଜ ମିଡ଼୍ ସାର୍‍ଦ୍‍ ଆୟ୍‍ମାଟ୍ । ବାତେଙ୍କ୍ ଇତ୍କେ ମିୱାଦ୍ ପେଦେର୍ ଯେ ସ୍ୱର୍ଗତାଗ୍ ଲେକାମିନ୍ଦେ, ଆଦିନ୍ ମାଇଦିଙ୍କ୍ ସାର୍‍ଦେ ଆୟିମୁଟ୍ ।
LUK 10:21 ତାନ୍ ପେର୍‍କେ ଜିସୁ ପବିତ୍ରଆତ୍ମାତେ ତଡ଼୍ ସାର୍‍ଦେତେ ସାରେଆସ୍ କେତ୍‍ତଣ୍ଡ୍, “ହୋ ବାବା, ହୋ ସ୍ୱର୍ଗ ନୁ ପୃତିବିତେ ପ୍ରବୁ ନାନ୍ ନି ପ୍ରସଂଶା ମାଡ଼ୁତାନ୍ । ବାତେଙ୍କ୍ ଇତ୍କେ ନିମେ ଜ୍ଞାନି ନୁ ବୁଦ୍‍ ନାରୁଡ଼ାଗାଙ୍କ୍ ମିଞ୍ଜିପି ନେହେସ୍ ମାତ୍‍ତିନ୍, ପିଲାନ୍ ଲେକାମ୍ ନାରୁଡ଼୍‍କିଂଙ୍କ୍ ତଅତିନ୍ । ଆଦିନ୍‌ମାଇଦିଙ୍କ୍ ନିୱାଦ୍ ସ୍ତୁତି ମାଡ଼ୁତାନ୍; ଇଦ୍ ହିଁ ଆଦାଙ୍କ୍ ନିମେ ଇଚ୍ଛା ମାଡ଼୍‍ତି ।”
LUK 10:22 “ନା ବାବାଲ୍ ଅନାଦ୍‌ ସାରେ ବିଷୟ୍ ନାକିଂଙ୍କ୍ ହିତ୍‍ତଣ୍ଡ୍; ମେଣ୍ଡେ, ମାର୍‍ ବେନ, ଇଦ୍ ବାବାନ୍ ୱିଡ଼୍‍ସି ବେନମେଣ୍ଡେ ପୁନଡ଼୍, ମେଣ୍ଡେ ବାବାଲ୍ ବେନ, ଅନ୍‌‍ମାର୍‍ ୱିଡ଼୍‍ସି ବେନମେଣ୍ଡେ ପୁନଡ଼୍, ଆସୁଟେ ମାର୍‍ ବେନଣ୍ଡ୍ ମୁନ୍‍ନେ ଅଂକିଙ୍କ୍‌ ତଅତାନ୍ ମାଇଦିଙ୍କ୍ ଇଚ୍ଛାମାଡ଼ିତଣ୍ଡ୍, ଅଣ୍ଡ୍‌ ଅଂକିଙ୍କ୍‌ ପୁନ୍‍‍ତଣ୍ଡ୍ ।”
LUK 10:23 ମେଣ୍ଡେ, ଜିସୁ ତାମ୍ ଶିଷ୍ୟଡ଼ା ମୁନ୍‍ମାଡ଼ି ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ଇୱେ ସାରେ ବିଷୟ ଉଡ଼୍‍ତାଙ୍କ୍ ମିଡ଼୍ ଦନ୍ୟ ।”
LUK 10:24 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ କେତୁତାନ୍, ମିଡ଼୍ ବାତାବାତା ଉଡ଼୍‍ତିଡ଼୍, ଆୱ୍ ସାରେ ବାବବାଦୀଡ଼୍ ନୁ ରାଜାଲଡ଼୍ ଉଡ଼ାନ୍‍ମାଇଦିଙ୍କ୍ ଇଚ୍ଛା ମାଡ଼ମାତଡ଼୍, ବାତେଙ୍କ୍ ଇତ୍କେ ଉଡ଼ାଙ୍କ୍ ପାର୍‍ୱଡ଼୍; ମେଣ୍ଡେ, ମିଡ଼୍ ବାତା କେଞ୍ଜ୍‍ତିଡ଼୍, ହାଉସାରେ ଅଡ଼୍‌‍ କେଞ୍ଜାନ୍ ଇଚ୍ଛା ମାଡ଼ମାତଡ଼୍, ବାତେଙ୍କ୍ ଇତ୍କେ କେଞ୍ଜେ ପାର୍‍ୱଡ଼୍ ।
LUK 10:25 ଆସୁଟେ ଉଡ଼େ, ୱେରନ୍ ବ୍ୟବସ୍ଥାଶାସ୍ତ୍ରଜ୍ଞ ତେଦୀ ଅଂକିଙ୍କ୍‌ ପରିକ୍ଷା ମାଡ଼ି କେତ୍‍ତଣ୍ଡ୍, “ହୋ ଗୁରୁ, ସାରେଦିନାତ୍ ଜିୱୁଣ୍ଡ୍ ଆଦାନ୍ ସେଙ୍ଗେ ନାନ୍ ବାତା ମାଡ଼ିତାନ୍ ?”
LUK 10:26 ଆସୁଟେ ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ବ୍ୟବସ୍ଥାତାଗ୍ ବାତ୍ ଲେକାମିନ୍ଦେ ? ନିମେ ବେଲା କାର୍‍ତୁତିନ୍ ?”
LUK 10:27 ଅଣ୍ଡ୍‌ ଉତ୍ତର୍ ହିତ୍‍ତଣ୍ଡ୍, “ନିମେ ନିୱାଦ୍ ସାର୍‍ରେ ହୃଦୟ୍, ସାରେ ଜିୱେ, ସାରେ ଶକ୍ତି ନୁ ସାର୍‍ରେ ମାନ୍‍ ଇସ୍‌ ପ୍ରବୁ ଇଶ୍ୱର୍‌ତିଙ୍କ୍ ପ୍ରେମ୍ ମାଡ଼ାଟ୍; ମେଣ୍ଡେ, ନି ଗାର୍‍ରେତଡ଼୍‍କିଂଙ୍କ୍ ନିଜେଲାକାମ୍ ପ୍ରେମ ମାଡ଼ାଟ୍ ।”
LUK 10:28 ଆସୁଟେ ଅଂକିଙ୍କ୍‌ ଜିସୁ କେତ୍‍ତଣ୍ଡ୍, “ନିମେ ଟିକ୍ ଉତ୍ତର୍ ହିତ୍‍ତି, ଇଲା ମାଡ଼ାଟ୍ ହାଲାଇତ୍କେ ନିମେ ଜିୱୁଣ୍ଡ୍ ଦର୍‍କିତ୍ ।”
LUK 10:29 ବାତେଙ୍କ୍ ଇତ୍କେ ଶାସ୍ତ୍ରଜ୍ଞ ନିଜ୍‍ତିଙ୍କ୍ ଦାର୍ମିକ୍ ଇଞ୍ଜ ତଅତାଙ୍କ୍ ଇଚ୍ଛା ମାଡ଼ି ଜିସୁଙ୍କ୍ କେତ୍‍ତଣ୍ଡ୍, “ହାଲାଇତ୍କେ ନା ଗାରେତଡ଼୍ ବେନ ?”
LUK 10:30 ଜିସୁ ଆଦ୍ ପ୍ରଶ୍ନତେ ଉତ୍ତର୍ ଇସ୍‌ କେତ୍‍ତଣ୍ଡ୍, “ୱେରଣ୍ଡ୍ ନାରୁଡ଼୍ ଯୀରୁଶାଲାମ୍ ତାଗାଙ୍କ୍ ଯିରୀୟ ନାର୍ ଆଞ୍ଜ ମାତ୍‍ତଣ୍ଡ୍, ଆଞ୍ଜ ଆଞ୍ଜ ଡଙ୍ଗାଲଡ଼୍ କାୟ୍‍ଦେ ଆତ୍‍ତଡ଼୍ । ଅଡ଼୍‌‍ ଅନାୱୁ ଚକାସିଲେଙ୍କ୍ ୱିର୍‍ସ୍‍ପି, ଅଂକିଙ୍କ୍‌ ରେହେସ୍ ଡଲାନ୍ ଲେକାମ୍ ଆଦାନ୍ ଅବସ୍ଥାତେ ୱିଡ଼୍‍ସି ଆଦ୍‍ତଡ଼୍ ।
LUK 10:31 ଗଟନା ଆଶେ ତେର୍‍ତ୍ ୱେୟ୍ ୱେରଣ୍ଡ୍ ଯାଜକ ଆଦେ ହାର୍ ଇସ୍‌ ଆଞ୍ଜମାତଣ୍ଡ୍, ଆସୁଟେ ଅଣ୍ଡ୍‌ ଅଂକିଙ୍କ୍‌ ଉଡ଼ି ଆର୍‍ଦାଲା ଏରି ଆତ୍‍ତଣ୍ଡ୍ ।
LUK 10:32 ମେଣ୍ଡେ ୱେରଣ୍ଡ୍ ଲେବୀୟ ନାରୁଡ଼୍ ଆଦେ ପଡ଼ିୟେତାଗ୍ ହେଉସ୍ ଅଂକିଙ୍କ୍‌ ଉଡ଼ି ଆର୍‍ଦିଙ୍କ୍ ହେରି ଆତ୍‍ତଣ୍ଡ୍ ।
LUK 10:33 ବାତେଙ୍କ୍ ଇତ୍କେ ୱେରଣ୍ଡ୍ ଶମିରୋଣୀୟ ପତିକ ନାରୁଡ଼୍ ଅନ୍‌ ଗାର୍‍ରେ ୱାସ୍ ଅଂକିଙ୍କ୍‌ ଉଡ଼ି ଦୟାତେ ଦାନ୍ଦେ ଆତ୍‍ତଣ୍ଡ୍,
LUK 10:34 ଆସୁଟେ ଅଣ୍ଡ୍‌ ଅନ୍‌ ଗାର୍‍ରେ ଆଞ୍ଜ୍ ଦେବ୍‍ ତାଲ୍‍ଗ୍‍ତାଗ୍ ନିୟ୍‍ ନୁ ଦ୍ରାକ୍ଷାରସ୍ ତଶ୍‍ସି ତହସିତ୍‍ତଣ୍ଡ୍, ଅଂକିଙ୍କ୍‌ ଆସୁଟେ ନିଜର୍ ଗଦତାଗ୍ କୁସ୍‍ପି ଅଂକିଙ୍କ୍‌ ୱେରଡ଼୍ ବେନିଲ୍‍ୱେ ଲତ୍‍ତାଗ୍ ଅସ୍ ମେଣ୍ଡେ ଅଂକିଙ୍କ୍‌ ସେବା ମାଡ଼୍‍ତଣ୍ଡ୍ ।
LUK 10:35 ମେଣ୍ଡନ୍‍ଦିନେ ଶମିରୋଣୀୟ ନାରୁଡ଼୍ ରେଣ୍ଡ୍ ଦିନାରୀ ପେସ୍‍ପି ବେନିଲ୍‍ୱେ ଲତ୍‍ତାଗ୍ ମାନ୍ଦାନ୍ ମୁକ୍ୟାଙ୍କ୍ ଇସ୍‌ କେତ୍‍ତଣ୍ଡ୍, ହିନ୍‍ୱାଦ୍‍ ଯତନ୍ ମାଡ଼େ, ନିମେ ଅନ୍‌‍ମାଇଦିଙ୍କ୍ ବାତ୍ ‘ମେଣ୍ଡେ କର୍ଚ୍ଚମାଡ଼ିମାନ୍ତି, ନାନ୍ ଆକାଙ୍କ୍ ମାଲ୍‍ସ୍‍ୱାସ୍ ବେସର୍ କର୍ଚ୍ଚ ମାଡ଼ିମାନ୍‍ତିନ୍ ଆସର୍ ଡାବ୍ ନିକିଂଙ୍କ୍ ହିଦ୍‍ତାନ୍ ।’”
LUK 10:36 “ଇଡ଼୍ ମୁୱୁଡ଼୍ ଲୋପ୍ ବେନ ଡଙ୍ଗାନ୍ କାଇଦେ ହାର୍‍ସ୍‍ ମାତ୍‍ତଣ୍ଡ୍ ଅନ୍‌ ଗାରେ‍ତଣ୍ଡ୍ ବେନ ଇଞ୍ଜ ମିଡ଼୍ ହାଲ୍‍ସୁତିଡ଼୍ ?”
LUK 10:37 ବ୍ୟବସ୍ଥା ଶାସ୍ତ୍ରଜ୍ଞ ଉତ୍ତର୍ ହିତ୍‍ତଣ୍ଡ୍, “ବେନ ଅଂକିଙ୍କ୍‌ ଦୟାମାଡ଼୍‍ତଣ୍ଡ୍ ଅଣ୍ଡ୍‌ । ଜିସୁ ଅଂକିଙ୍କ୍‌ କେତ୍‍ତଣ୍ଡ୍, ଅନ୍‌ ନିମେ ମିକା ରକମ୍ ମାଡ଼େ ।”
LUK 10:38 ଜିସୁ ତାମ୍ ଶିଷ୍ୟଡ଼୍ ତଡ଼୍ ଆଞ୍ଜମାନ୍ଦାନ୍ ୱେଲେ ୱେରଡ଼୍ ନାର୍ ଆସ୍‍ତଣ୍ଡ୍ । ମାର୍ତା ପେଦେର୍ ତେ ୱେରଡ଼୍ ନାଟାଡ଼୍ ତାମ୍ ଲୋନ୍‌ ଜିସୁଙ୍କ୍ କାର୍‍ଙ୍ଗି ସ୍ୱାଗତ୍ ମାଡ଼ିତେ ।
LUK 10:39 ମରୀୟମ୍ ପେଦେର୍‍ତାଦ୍ ୱେରନ୍ ତାନ୍ ଏଲାଡ଼୍‍ ମାତ୍‍ତେ, ଆଦ୍ ପ୍ରବୁନ୍ ଡେକେତ୍ ମଦଲ୍ କୁଦି ଅନାଦ୍‌ ବାକ୍ୟ କେଞ୍ଜମାତ୍‍ତେ ।
LUK 10:40 ବାତେଙ୍କ୍ ଇତ୍କେ ମାର୍ତା ସେବା ପାଡ଼୍‍ୟି ମାଡ଼ାଙ୍କ୍ ଗାଟି ଦାନ୍ଦେ ଆସମାତ୍‍ତେ; ଆସୁଟେ ଆଦ୍ ଜିସୁନ୍ ଗାର୍‍ରେ ୱାସ୍ କେତ୍‍ତେ, ହୋ ପ୍ରବୁ, ନା ଏଲାଡ଼୍‍ ଯେ ୱେରଡେ ନା ପରୁ ସାର୍‍ରେ ସେବା ମାଡ଼ାଙ୍କ୍ ୱିଡ଼୍‍ସିତ୍‍ତେ, ଆଦ୍ ବିଷୟ ନିକିଂଙ୍କ୍ ହେର୍କା ଇଲେ କି ? ନାକିଂଙ୍କ୍ ସାହାଯ୍ୟ ମାଡ଼ାଙ୍କ୍ ମାଇଦିଙ୍କ୍ ତାଙ୍କ୍ କେସିମ୍ ।
LUK 10:41 ବାତେଙ୍କ୍ ଇତ୍କେ ପ୍ରବୁ ତାକିଂଙ୍କ୍ କେତ୍‍ତଣ୍ଡ୍, “ମାର୍ତା, ମାର୍ତା ନିମେ ଗାଟି ବିଷୟ୍‍ତିଙ୍କ୍ ଚିନ୍ତେ ନୁ ଦାନ୍ଦେ ଅଦୁତିନ୍,
LUK 10:42 ବାତେଙ୍କ୍ ଇତ୍କେ ୱେରଡ଼୍ ବିଷୟ ଗାଟି ଦର୍‍କାଡ଼୍ । ମରୀୟମ୍ ନିଜେତ୍ ମାଇଦିଙ୍କ୍ ଆଦ୍ ଲେକେତ୍‍ ବିଷୟତିଙ୍କ୍ ପସନ୍ଦ ମାଡ଼୍‍ତେ, ଆଦ୍ ତାନ୍‍ଆଗାଙ୍କ୍ ୱିର୍‍ସ୍‍ପି ଆଦାଙ୍କ୍ ଆୟ୍‍ୟ ।”
LUK 11:1 ଅନ୍‌‍ଦାମ୍ ଜିସୁ ୱେରଡ଼୍ ପଡ଼ିୟେତାଗ୍ ପ୍ରାର୍ତନା ମାଡ଼ ମାତ୍‍ତଣ୍ଡ୍; ଅଣ୍ଡ୍‌ ପ୍ରାର୍ତନା ତେରପ୍‍ସ୍‍ତେ ୱେୟ୍, ତାମ୍ ଶିଷ୍ୟଡ଼୍ ଲୋପେକେ ୱେରଣ୍ଡ୍ ଅଂକିଙ୍କ୍‌ କେତ୍‍ତଣ୍ଡ୍, ହୋ ପ୍ରବୁ, ବାପ୍ତିସ୍ମ ଯୋହନ୍‌ ବେଦ୍‍ପୁଟୁଙ୍କ୍ ଅନ୍‌ ଶିଷ୍ୟଡ଼୍‍କିଂଙ୍କ୍ ପ୍ରାର୍ତନା ମାଡ଼ାଙ୍କ୍ ନାଡ଼ସ୍ପତଣ୍ଡ୍, ନିମେ ‍ଆଦେ ରକମ୍ ମାକିଂଙ୍କ୍ ପ୍ରାର୍ତନା ନାଡ଼ସ୍ପେ ।
LUK 11:2 ଜିସୁ ଆସୁଟେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ବେସୁଟ୍‌ ମିଡ଼୍ ପ୍ରାର୍ତନା ମାଡ଼ିତିଡ଼୍, ଆସୁଟେ କେଲ୍‍ମୁଟ୍, ‘ହଁ ସ୍ୱର୍ଗତନି ବାବା, ନିୟାଦ୍ ପେଦେର୍ ପବିତ୍ର ହିଞ୍ଜ ମାନ୍ୟ ହାୟି । ନିୟାଦ୍ ରାଜ୍ୟ ୱାଡ଼ି ।
LUK 11:3 ସାରେଦିନା ମାକିଂଙ୍କ୍ ଦର୍‍କାର୍‍ ଆଦାନ୍ କାଦି ହିମ୍ ।
LUK 11:4 ମାକିଂଙ୍କ୍ ତିପାଲ୍ ପରିକ୍ଷାତେ ମୁନ୍‍ନେ ଆଦାନଙ୍କ୍ ହିମା, ମାତର୍ ପାପ୍‌ ତାଗାଙ୍କ୍ ମାକିଂଙ୍କ୍ ରକ୍ଷା ମାଡ଼େ ।’”
LUK 11:5 ଆସୁଟେ, ଜିସୁ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍ କି, ମିଲୋପ୍ ବେନଣ୍ଡ୍ ଇସତ୍ ସାଙ୍ଗ ମିନ୍ଦେଣ୍ଡ୍ କି, ବେନନାଗ୍‍ଆଇ ନାର୍କା ଆଞ୍ଜ୍ କେତିତଣ୍ଡ୍, ହୋ ସାଙ୍ଗ, ନାକିଂଙ୍କ୍ ମୁଣ୍ଡ୍ ରୂଟି ଉଦାର୍ ହିମ୍,
LUK 11:6 ବାତେଙ୍କ୍ ଇତ୍କେ ନା ୱେରଣ୍ଡ୍ ପତିକ ସାଙ୍ଗ ନା ଲୋନ୍‌ ‍ୱାସ୍‍ମିନ୍ଦେଣ୍ଡ୍, ଅଂକିଙ୍କ୍‌ ତିନ୍ଦାଙ୍କ୍ ହିଦାନ୍ ମାଇଦିଙ୍କ୍ ନାୟାଗେ ବାତେଏ ମିକା ଇଲେ,
LUK 11:7 ଆସୁଟେ ଅଣ୍ଡ୍‌ ଲୋପ୍‍ମାଞ୍ଜ୍ ଇଲା କେତି‍ତଣ୍ଡ୍, ନାକିଂଙ୍କ୍ କଷ୍ଟ ଇମା; ମାଆର୍‍ ବନ୍ଦ୍ଆଦୁତ୍, ନା ପିଲା ନା ତଡ଼୍ ଉଞ୍ଜିମିନ୍ଦେ; ନାନେ ତେଦୀ ନିକିଂଙ୍କ୍ ହିଦ୍‍ପାର୍‍ୱନ୍ ।
LUK 11:8 ନାନ୍ ମିକିଂଙ୍କ୍ କେତୁତାନ୍, ଅଣ୍ଡ୍‌ ତାମ୍ ସାଙ୍ଗ ଆସ୍ ମିକା ତେଦି ହିୱକଟ ମାନ୍‍ତଣ୍ଡ୍, ହାଲାଇତ୍କେ ଅଣ୍ଡ୍‌ ସିଗ୍ ଆୟ୍‍ୟକଟ ସେନେକ୍‍ ସେନେକ୍ ତାଲ୍‍କାନ୍ ମାଇଦିଙ୍କ୍ ଅଣ୍ଡ୍‌ ତେଦି, ଅଂକିଙ୍କ୍‌ ବେସର୍ ଦର୍‍କାର୍, ଆସର୍ ଅଂକିଙ୍କ୍‌ ହିଦ୍‍ତଣ୍ଡ୍ ।
LUK 11:9 ନାନ୍ ମିକିଂଙ୍କ୍ କେତୁତାନ୍, ତାଲ୍‍କାଟ୍, ହାଲାଇତ୍କେ ମିକିଂଙ୍କ୍ ହିଦ୍‍ତଡ଼୍; ମେହେକାଟ୍, ହାଲାଇତ୍କେ ମିଡ଼୍ ଦର୍‍ସ୍‍କ୍‍ତିଡ଼୍; ମାଆର୍‍ଦିଙ୍କ୍ ତାଲ୍‍ସା, ହାଲାଇତ୍କେ ମି ମାଇଦିଙ୍କ୍ ତେର୍‍ସିଦ୍‍ତଡ଼୍ ।
LUK 11:10 ବେନ ଆୟି ତାଲ୍‍କିତଣ୍ଡ୍, ଅଂକିଙ୍କ୍‌ ହିଦ୍‍ତଡ଼୍; ବେନ ମେହେକିତଣ୍ଡ୍, ଅଣ୍ଡ୍‌ ଦର୍‍ସ୍‍କିତଣ୍ଡ୍, ବେନ ମାଆର୍‍ଦିଙ୍କ୍ ତାଲ୍‍ସିତଣ୍ଡ୍, ଅନ୍‌ ମାଇଦିଙ୍କ୍ ତେର୍‍ସିତଡ଼୍ ।
LUK 11:11 ଇଦ୍‌ରକମ୍‌ ବେନ ମିଇ ବାବାଲ୍‌ ମିନ୍ଦେଣ୍ଡ୍,ତାନ୍‌ ମାର୍‌ ରୂଟି ତାଲ୍‍କ୍‍କେ ଅଂକିଙ୍କ୍‌ ବାତ୍ କାଲ୍‍ବଦା ହିଦ୍‍ତିଡ଼୍ ? ବା ଅଣ୍ଡ୍‌ କିକେ ତାଲ୍‍କ୍‍କେ ଅଂକିଙ୍କ୍‌ ବାତ୍ ତାଡ଼ାମ୍ ହିଦ୍‍ତିଡ଼୍ ?
LUK 11:12 ମେଣ୍ଡେ ଗାଡ଼୍‍ବାମ୍ ତାଲ୍‍କେ ଅଣ୍ଡ୍‌ ଅଂକିଙ୍କ୍‌ ଏଟ୍‍ଗଡେଲ୍‍ ହିଦ୍‍ତଣ୍ଡ୍ କି ?
LUK 11:13 ମିଡ଼୍ ଦୁଷ୍ଟ ଆତ୍‍କେ ମେଣ୍ଡେ, ମି ପିଲାଙ୍କ୍ ସାୟ୍‍ ସାୟ୍‍ତାୱ ହିଦାଙ୍କ୍ ପୁତ୍‍ତିଡ଼୍, ବେନ ବାବାଲ୍ ସ୍ୱର୍ଗତାଗାଙ୍କ୍ ହିଦ୍‍ତଣ୍ଡ୍ ଅନ୍‌ ଗାର୍‍ରେ ତାଲ୍‍କାନ୍ ନାରୁଡ଼୍‍କ୍ ନାର୍ଗେ ପବିତ୍ର ଆତ୍ମା ହିଦ୍‍ତଣ୍ଡ୍ !
LUK 11:14 ୱେରଟ୍‍ଦିନ୍ ଜିସୁ ଗଟି ତିର୍‍ୟାଙ୍କ୍ ପାର୍‍ୱେ ନାରୁନ୍ ମେନ୍ଦୁଲ୍ ତାଗାଙ୍କ୍ ବୁତ୍‌ତିଙ୍କ୍ ତଲ ମାତ୍‍ତଣ୍ଡ୍ । ବୁତ୍‌ତିର୍‍ୟାଙ୍କ୍ ପାର୍‍ୱେ ନାରୁନ୍ ମେନ୍ଦୁଲ୍‍ତାଗାଙ୍କ୍ ପେୟିସ୍ ଆତ୍‍ତେୱେୟ୍, ଗୁଡ଼୍‍ତେ ନାରୁଡ଼୍ ଉଡ଼ି ବାକ୍‍ୱା ଆଦ୍‍ତଡ଼୍ ।
LUK 11:15 ବାତେଙ୍କ୍ ଇତ୍କେ ଅଡ଼୍‌‍ ଆଗାଙ୍କ୍ ବେସ୍‍କ୍‍ତୁଡ଼୍‍ କେତ୍‍ତଡ଼୍, “ବୁତ୍‌ପତି ବାଲ୍‌ଜିବୁଲ୍‌ ଶକ୍ତିତେ ଜିସୁ ବୁତ୍ ୱିର୍‍ସ୍‍ପୁତଣ୍ଡ୍ ।”
LUK 11:16 ବାଗାତ୍ ନାରୁଡ଼୍ ଅଂକିଙ୍କ୍‌ ଉଡ଼ିୟିତାଗ୍ ୱାଟାଙ୍କ୍ ଇଚ୍ଛା ମାଡ଼ମାତଡ଼୍ ତ ଇଶ୍ୱର ଯେ ତାମ୍ କାଇଲାନ୍‍ନଡ଼୍ ଇଦିନ୍ ଚିହ୍ନେ ଲେକାମ୍ ମାବ୍‍ତାଗାଙ୍କ୍ ୱେରଡ଼୍ ଚିଏହ୍ନେ ତଅତାଙ୍କ୍ କେତ୍‍ତଣ୍ଡ୍ ।
LUK 11:17 ବାତେଙ୍କ୍ ଇତ୍କେ ଜିସୁ ଅଡ଼ାଦ୍‌ ମନ୍‍ତେ ହେର୍‍କାତିଙ୍କ୍ ପୁଞ୍ଜ୍, ହଡ଼୍‍କିଙ୍କ୍ କେତ୍‍ତଣ୍ଡ୍, ବେନ୍ ଆୟି ରାଜ୍ୟ ୱେରେଆସ୍ ନିଜର୍ ବିରୁଦତେ ତେଦିତ୍, ହାଲାଇତ୍କେ ଦ୍ୱଂସ ଆଦ୍ ତେ, ମେଣ୍ଡେ ବେନେଆଇ ଲୋନ୍‌ ୱେରେ ଆତ୍‍କେ ଆଦ୍ ଆର୍ ଆଦ୍‍ତେ ।
LUK 11:18 ଆଲେକେ, ଶୟ୍‍ତାନ୍‍ ମେଣ୍ଡେ ୱେରେ ଆସ୍ ନିଜର୍ ବିରୁଦ୍ଦ୍‌ ତେ ନିଜେ ତେଦିତ୍, ହାଲାଇତ୍କେ ତାନାଦ୍ ରାଜ୍ୟ ବେଦ୍‍ପୁଟୁଙ୍କ୍ ତିଆର୍ ଆସ୍ ମାନ୍‍ତେ ? ନାନ୍ ବାଲ୍‌ଜିବୁଲ୍‌ ଶକ୍ତିତେ ବୁତ୍‌କିଂଙ୍କ୍ ୱିର୍‍ସ୍‍ପୁତାନ୍ ଇଞ୍ଜ ମିଡ଼୍ ତ କେତୁତିଡ଼୍ ।
LUK 11:19 ବାତେଙ୍କ୍ ଇତ୍କେ ନାନ୍ ବେସୁଙ୍କ୍‍ ବାଆଲ୍‍ଜିବୁଲ୍‍ତ୍ ଶକ୍ତିତେ ବୁତ୍‌କିଂଙ୍କ୍ ୱିର୍‍ସ୍‍ପୁତାନ୍, ଆଲାଇତ୍କେ ମି ମାର୍‍କ୍ ବେନନ୍ ଶକ୍ତିତେ ଆୱିଙ୍କ୍ ୱିର୍‍ସ୍‍ପୁତଡ଼୍ ? ମି ମାର୍‍କ୍ ପ୍ରମାନ୍ ମାଡ଼ିତା ଯେ ମିଡ଼୍ ବୁଲ୍‍ ।
LUK 11:20 ନାନ୍ ଯଦି ପରମେଶ୍ୱର୍‍ତେ ଶକ୍ତିତେ ବୁତ୍‌ତିକିଂଙ୍କ୍‍ ୱିର୍‍ସ୍‍ପୁତାନ୍, ଆଲାଇତ୍କେ ଇଦ୍ ପ୍ରମାନ୍ ମାଡ଼ିତ୍ ଯେ ପରମେଶ୍ୱରତାଦ୍ ରାଜ୍ୟ ମି ଗାର୍‍ରେ ହେୱ୍‍ଦୁତ୍ ।
LUK 11:21 ୱେରଣ୍ଡ୍ ଶକ୍ତିତେ ମାନ୍ଦାନ୍ ନାରୁଡ଼୍ କାଡ଼ିୱିଲ୍‍କ୍ ପୟ୍‍ସ୍ ନିଜର୍ ଲୋତ୍‍ତିଙ୍କ୍ କେପିମାନ୍ତତଣ୍ଡ୍, ଆସୁଙ୍କ୍ ଅନ୍‌ ସମ୍ପତ୍ତି ଯତନ୍‍ତେ ଆସ୍ ମାନ୍‍ତା;
LUK 11:22 ବାତେଙ୍କ୍ ଇତ୍କେ ବେସୁଟ୍‌ ଅଂକିଙ୍କ୍‌ ଅନ୍‌ ଗାଟି ଶକ୍ତିତ୍ ନାରୁଡ଼୍ ୱାସ୍, ଅନନ୍ତ ଯୁଦ୍‌ ଆସ୍ ଅଂକିଙ୍କ୍‌ ଜିଡ଼୍‍ତଣ୍ଡ୍, ଆସୁଟେ ଅନ୍‌ କାଡ଼ିୱିଲ୍‍କ୍ ପୟ୍‍ସ୍ ମାନ୍ଦାନ୍ ସାରେ ଅଣ୍ଡ୍‌ ଲାଗି ଆତ୍‍ତେ, ଅନାୱୁ ଲାଗ୍‍ ତେ ଜିନିଷ୍‍ତିଙ୍କ୍ ତୁଉସି ଆତ୍‍ତେ ।
LUK 11:23 ବେନ ନା ତୋଡ଼୍ ଆୟ୍‍ୟଣ୍ଡ୍, ଅନ୍‌ ନା ତୋଡ଼୍‍ଦେନଣ୍ଡ୍, ମେଣ୍ଡେ ବେନ ନା ତଡ଼୍ ଅଣ୍ଡୟାଗେ ମାଡ଼ଣ୍ଡ୍, ଅଣ୍ଡ୍‌ ୱେରେ ମାଡ଼ିତନ୍ ।
LUK 11:24 “ଅଶୁଚି ଆତ୍ମା ୱେରନ୍ ନାରୁନାଗାଙ୍କ୍ ପେୟିସ୍ଆତ୍‍ତେ ୱେୟ୍ ଏର୍‍ ‍ହିଲ୍‍ୱା ଜାଗାକିନାଗ୍ ଆଞ୍ଜ୍ ଉଡ଼ିମେଣ୍ଡେ ରମାଙ୍କ୍ ମେହ୍‍କିତ୍, ଆସୁଟେ ମେହ୍‍କି ଦର୍‍ସ୍‍କକଟ୍ କେତିତ୍‍, ନାନେ ବେନ୍ ଲୋତ୍‍କଂଙ୍କ୍ ୱାସ୍‍ମିନ୍ଦେନ୍ ନାନେ ଆଦ୍ ଲୋନ୍‌ ମାଲ୍‍ସ୍ ଆଦ୍‍ତନ୍;
LUK 11:25 ଆସୁଙ୍କ୍ ବୁତ୍ ଆଦ୍ ନାରୁନାଗ୍ ମାଲ୍‍ସ୍ ଆଞ୍ଜ୍ ଉଡ଼ିତ୍, ହି ଲୋନ୍‌ ସାକ୍‍ସାକା ନୁ ଟିକ୍‍ଟାକ୍ ମିନ୍ଦେ ।
LUK 11:26 ତାନ୍ ପେର୍‍କେ ଆଦ୍ ବୁତ୍ ଆଞ୍ଜ୍ ତାକିଂଙ୍କ୍ ଅନ୍‌ ପେର୍କେ ଦୁଷ୍ଟ ବୁତ୍‌କିଂଙ୍କ୍ ସାତ୍‍ଟାନ୍‍କିଂଙ୍କ୍ କାର୍‍ଙ୍ଗି ତାତ୍‍ତା, ଆୱ୍‍ଚାରେ ବୁତ୍‌କ୍ ଆଦ୍ ନାରୁନ୍ ଲୋପ୍ ନେଙ୍ଗି ଅଣ୍ଡୟାଗ୍ ମାନ୍‍ତା । ଆସୁଟେ ଆଦ୍ ନାରୁଡ଼୍ ମୁନେଙ୍କ୍‍ତେ କେପି ପେର୍‍କେ ଗାଟି କାରାପ୍‍ ଆଦ୍‍ତେ ।”
LUK 11:27 ଜିସୁ ଆଦ୍ ସାରେ ଗଟି କେତ୍‍ତାନ୍ ଦିନାମ୍‍ତେ ମାନ୍ଦେ ନାରୁଡ଼୍ ଲୋପେଙ୍କ୍ ଅଣ୍ଡ୍‌ ନାଟାଡ଼୍ ଗାଟିବେଡ଼୍‍ୟ୍ ଲେଙ୍ଗ୍‍ତେ କେତ୍‍ତା, “ଦନ୍ୟ ମି ୟାୟ୍‍ । ଆଦ୍ ନିକିଂଙ୍କ୍ ଜନମ୍‍ଇତ୍ ନୁ ପାୟାଲ୍‍ ହୁସ୍‍ପ୍‍ତେ ।”
LUK 11:28 ମାତର୍ ଜିସୁ କେତ୍‍ତଣ୍ଡ୍, “ଇଲା, ବେନଡ଼୍ ପରମେଶ୍ୱର୍‍ତେ ବାକ୍ୟ କେଞ୍ଜିତଡ଼୍, ମେଣ୍ଡେ ପାଲନ୍ ମାଡ଼ିତଡ଼୍, ପ୍ରକୃତ୍ ତେ ଆସତ୍ ନାରୁଡ଼୍ ଦନ୍ୟ ।”
LUK 11:29 ନାର୍ଗେ ନାରୁଡ଼୍ ଜିସୁନାଗେ ଅଣ୍ଡୟ୍‌‍ ଆଦାଙ୍କ୍ ଅଣ୍ଡ୍‌ କେତ୍‍ତଣ୍ଡ୍, ଇଦ୍ ୱେରଡ଼୍ ଅଦାର୍ମିକିଡ଼୍ ବଂଶ । ଇଡ଼୍ ଅଣ୍ଡୟ୍‌ ବାକ୍‍ୱା ଚିହ୍ନତିଙ୍କ୍ ଉଡ଼ାନ୍‍ମାଇଦିଙ୍କ୍ ତାଲ୍‍କୁତଡ଼୍ । ବାତେଙ୍କ୍ ଇତ୍କେ ଯୂନସ୍‍ତେ ଚିହ୍ନେ ୱିଡ଼୍‍ସି ୱେରେ ‍ଅଣ୍ଡୟ୍‌‍ ଚିହ୍ନେ ଅଡ଼୍‌‍କିଂଙ୍କ୍ ହିଦାନାଦ୍ ଆୟ୍‍ୟ ।
LUK 11:30 ଇତ୍କେ ଯୂନସ୍ ବେଦ୍‍ପୁଟୁଙ୍କ୍ ନୀନିବି ନାରୁଡ଼୍ ସେଙ୍ଗେ ଚିହ୍ନେତ୍‍ ଲେକାମ୍ ଆତ୍‍ତଣ୍ଡ୍, ଆଦେ ରକମ୍‍ ନାରୁନ୍‍ପିଲେ ଇଞ୍ଜେ ମାନ୍ଦାନ୍ ନାରୁଡ଼୍ ବଂଶତ୍ ମୁନେ ଚିହ୍ନେତ୍‍ ଲେକାମ୍ ଆଦ୍‍ତନ୍ ।
LUK 11:31 ଦକ୍ଷିଣ୍ ପାକା ଦେଶ୍‍ତାଦ୍ ଶିବା ରାଣିଲ୍ ବିଚାର୍ ଦିନାତେ ହି ବଂଶତ୍ ନାରୁଡ଼୍ ବିରୁଦ୍ ତେ ତେଦି ଅଡ଼୍‌‍କିଂଙ୍କ୍ ଦଷି ମାଡ଼ିତ୍; କାରନ୍‍ ଆଦ୍ ଶଲୋମନ୍‍ତେ ବୁଦ୍‍ତେ ଗଟ୍ କେଞ୍ଜାଙ୍କ୍ ପୃତିବିତେ ପ୍ରନ୍ତତାଗାଙ୍କ୍ ୱାସ୍‍ମାତ୍‍ତା; ମେଣ୍ଡେ ଉଡ଼ାଟ୍, ଲୋମନ୍‍ତିଙ୍କ୍ ଅନ୍‌ ବେଡ଼୍‍ୟନ୍ ୱେରଣ୍ଡ୍ ହିଗ୍ ମିନ୍ଦେଣ୍ଡ୍ ।
LUK 11:32 ବିଚାର୍ ଦିନ୍‍ ନିନିବୀତେ ନାରୁଡ଼୍ ମିଇ ବିରୁଦ୍ଦ୍‌ତେ ଅବିଯଗ୍ ମାଡ଼ାଙ୍କ୍ ନିଲ୍‍ଦ୍‍ତଡ଼୍, ବାତେଙ୍କ୍ ଇତ୍‍କେ ଯୁନସ୍‍ତେ ପ୍ରଚାର୍ କେଞ୍ଜି ଅଡ଼୍‌ ପାପ୍ ଆର୍ଦାଗା ମାଲ୍‍ସ୍ ୱାତ୍‍ତଡ଼୍ । ନାନ୍ ମିକିଂଙ୍କ୍ କେତୁତାନ୍, ଯୁନସ୍‍ତାଗାଙ୍କ୍ ମହାନ୍ ୱେରନ୍ ହିଗେ ମିନ୍ଦେନ୍ ।
LUK 11:33 “ବେନ କୁପିତିଙ୍କ୍ ନିଡ଼୍‍ସ୍‍ପି ତାକିଂଙ୍କ୍ ଉଡ଼୍‍ପାର୍‍ୱା ପଡ଼୍‍ୟ୍‍ତାଗ୍, ମେଣ୍ଡେ, ବଡ୍ ମଦଲ୍ ମୁସି ୱାଟଡ଼୍, ମାତର୍ କୁପିତିଙ୍କ୍ ଦୀପରୂକା ପରକେ ୱାଟିତଡ଼୍, ବେଦ୍‍ପୁଟୁଙ୍କ୍ ଲୋପ୍ ନେଙ୍ଗାନ୍ ନାରୁଡ଼୍ ୱେୟ୍‍ସିଇଙ୍କ୍ ଉଡ଼୍‍ ପାର୍‍ତଡ଼୍ ।
LUK 11:34 କଣ୍ଡା ମେନ୍ଦୁଲ୍‍ତେ କୁପି ରକମ୍ । ବେସୁଙ୍କ୍‍ ମି କଣ୍ଡା‌ ସାୟ୍‍ ମାନ୍‍ତା, ଆସୁଙ୍କ୍ ମି ସାରେ ମେନ୍ଦୁଲ୍ କୁପି ଲେକାମ୍‍ ୱେୟ୍‍ସ୍ ଆଦ୍‍ତେ; ବାତେଙ୍କ୍ ଇତ୍କେ ବେସୁଙ୍କ୍‍ ମି କଣ୍ଡା କାରାପ୍ ଆଦ୍‍ତେ, ଆସୁଙ୍କ୍ ମି ମେନ୍ଦୁଲ୍ ଆନ୍‌‍ତେ ହିକାଡ଼୍‍ ଆଦ୍‍ତା ।
LUK 11:35 ମିଡ଼୍ ସାବ୍‍ଦାନ୍, ବେଲା କି ମିୟାଦ୍ ହୃଦୟ୍‍ତେ ୱେୟ୍‍ସ୍ ଇକାଡ଼୍ ଆୟ୍‍ମାକି ।
LUK 11:36 ଯଦି ମିୟାଦ୍ ମେନ୍ଦୁଲ୍ ସାରେ ୱେୟ୍‍ସ୍ ଆଦ୍ ତେ, ଆଗେତ୍ ବେନେ ଲେକାତ୍ ହିକାଡ଼୍ ମାନ୍‍, ହାଲାଇତ୍କେ କୁପି ମିକିଂଙ୍କ୍ ୱେୟ୍‍ସ୍ ମାଡ଼୍‍ତେ ଲେକାମ୍, ଆଦ୍‍ପୁଟୁଙ୍କ୍ ମି ମେନ୍ଦୁଲ୍‍ତେ ସାରେ ୱେୟ୍‍ସ୍ ଆଦ୍‍ତେ ।”
LUK 11:37 ଜିସୁ ଗଟି କେତ୍‍ତାନ୍ ତେର୍‍ସ୍‍ପି ୱେରଣ୍ଡ୍ ପାରୂଶୀ ଜିସୁଙ୍କ୍ ତାନ୍ ଲୋନ୍‌ ତିନ୍ଦାନ୍ ମାଇଦିଙ୍କ୍ କାର୍‍ଙ୍ଗତଣ୍ଡ୍ । ଆସୁଟେ ଜିସୁ ଆଦ୍ ଲୋନ୍‌ ନେଙ୍ଗି ତିନ୍‍ନ୍ଦାଙ୍କ୍ କୁଦ୍‍ତଣ୍ଡ୍ ।
LUK 11:38 ବାତେଙ୍କ୍ ଇତ୍କେ ତିନ୍ଦାନ୍ ମୁନେଙ୍କ୍ ଜିସୁ ଯିହୁଦୀ ରୀତି ଲେକାମ୍ କାୟ୍‍କ୍ ଡେକା ନର୍‍ୱାଙ୍କ୍ ଇଦ୍ ପାରୂଶୀ ଉଡ଼ି ବାକ୍‍ୱା ଆତ୍‍ତଣ୍ଡ୍ ।
LUK 11:39 ଆସୁଙ୍କ୍ ପ୍ରବୁଜିସୁ ଅଂକିଙ୍କ୍‌ କେତ୍‍ତଣ୍ଡ୍, ମିଡ଼୍ ତ ଫାରୂଶୀନାରୁଡ଼ି ତାଲିଗିନାଙ୍କ୍ ବାୟ୍‍ଦେତ୍ ପାକେ ପରିଷ୍କାର୍ ମାଡ଼ୁତିଡ଼୍, ମାତର୍ ମି ଲୋପେ ବୁସାମାଡ଼୍‍ ତେ ପାଡ଼ିୟେ ନୁ କାରାପ୍ ନିଣ୍ଡିମିନ୍ଦେ ମିନ୍ଦେ ।
LUK 11:40 ହୋ ମଣ୍ଡି ନାରୁଡ଼ି, ବେନ ବାୟିଦେ ତିଆର୍ ମାଡ଼୍‍ତଣ୍ଡ୍, ଅଣ୍ଡ୍‌ ବାତ୍ ଲୋପ୍‍ଆନ୍‌‍ତେ ତିଆର୍ ମାଡ଼ଣ୍ଡ୍ କି ?
LUK 11:41 ମିୟାଗ୍ ବାତା ମିନ୍ଦେ ଆୱ୍ ସାରେ ଗରିବ୍ ନାରୁଡ଼୍‍କ୍ ଦାନ ମାଡ଼ାଟ୍ ଆସୁଟେ ନିଜାତେ ସାରେ ପୁରା ପରିଷ୍କାର୍ ଆଦ୍‍ତେ ।
LUK 11:42 ହୋ ଫାରୂଶୀ ନାରୁଡ଼୍ ମିଡ଼୍ ଦଣ୍ଡତେ ପାତ୍ର ! ମିଡ଼୍ ସାରେ ବିଷୟ୍ ତେ ଦଶମାଂଶ ପରମେଶ୍ୱରତିଙ୍କ୍ ଇସ୍‌‍ମାନୁଟ୍ । ପୋଦିନା, ଆରୁଦ ନୁ ନ୍ୟାୟ ବିଚାର୍ ନୁ ପରମେଶ୍ୱର୍‍ତେ ପ୍ରେମତିଙ୍କ୍ ଗମାଡ଼୍ ମାଡ଼୍‍ମାଟ୍; ହିଦ୍ ସାରେ ପାଲନ୍ ମାଡ଼ିକାଡ଼୍ ବାଗାତ୍ ସାର୍‍ତିଙ୍କ୍ ଗମାଡ଼୍ ମାଡ଼ାନାଦ୍ ଲେକେତ୍ ଆୟ୍‍ୟ ।
LUK 11:43 “ହୋ ପାରୂଶୀନାରୁଡ଼ି, ମିଡ଼୍ ଦଣ୍ଡତେ ପାତ୍ର, ବାତେଙ୍କ୍ ଇତ୍କେ ମିଡ଼୍ ସମାଜ୍ ଲୋତ୍‍ତାଗ୍ ବାଡ଼୍‍ୟଣ୍ଡ୍ ଆଦାଙ୍କ୍ ନୁ ହାଟ୍ ବାଜାର୍‍ତାଗ୍ ନମସ୍କାର୍ ଦର୍‍କାଙ୍କ୍ ସାୟେ ପ୍ରେମ ଇଞ୍ଜ ଇଚ୍ଛା ମାଡ଼ୁତିଡ଼୍ ।
LUK 11:44 ହୋ, ମିଡ଼୍ ଦଣ୍ଡତେ ନାରୁଡ଼୍‌ ଆଦ୍‍ତିଡ଼୍, କାରନ୍‍ ମିଡ଼୍ ମିଞ୍ଜି ମାନ୍ଦାନ୍ ସମାଦି ଲେକାମ୍; ଆଦିନ୍ ପରୁ ନାରୁଡ଼୍ ପୁନକଟ ତାକିଆଦ୍‍ତଡ଼୍ ।”
LUK 11:45 ଆସୁଟେ, ୱେରଣ୍ଡ୍ ଶାସ୍ତ୍ରୀ ଜିସୁଙ୍କ୍ କେତ୍‍ତଣ୍ଡ୍, “ହୋ ଗୁରୁ, ଇଦ୍ କେସ୍ ନିମେ ମାକିଂଙ୍କ୍ ଆନ୍‌‍ତେ ଅପ୍‍ମାନ୍ ମାଡ଼ୁତିନ୍ ।”
LUK 11:46 ଆଦ୍ ‍କେଞ୍ଜି ଜିସୁ କେତ୍‍ତଣ୍ଡ୍, ହୋ ଦର୍ମଶାସ୍ତ୍ରନାରୁଡ଼ି ହାୟ, ମିଡ଼୍ ନାରୁଡ଼୍ ପରୁ କଷ୍ଟତ୍ ନିୟମ୍‍ତେ ବୋଜ୍ କାଞ୍ଜ୍‍ପିସ୍ ମିନ୍ଦେଡ଼ି ଯେ, ଆଦିଙ୍କ୍ କଞ୍ଜାନଙ୍କ୍ କଷ୍ଟ ଆଦୁତ୍‍ତେ । ହି ନିୟମ୍‍ତିଙ୍କ୍ କେଞ୍ଜାନଙ୍କ୍ ମିଡ଼୍ ନାରୁଡ଼୍‍କିଂଙ୍କ୍ ତିଆର୍ ମାଡ଼ୁତିଡ଼୍ । ବାତେଙ୍କ୍ ଇତ୍କେ ନିଜେ ବେସୁଟ୍‌ ଆନ୍‌‍ତେ ହିଗାଙ୍କ୍ ୱେରଡ଼୍ ମେଣ୍ଡେ ନିୟମ୍ ପାଲନ୍ ମାଡ଼ାଙ୍କ୍ ସାହାଯ୍ୟ ମାଡ଼୍‍ୱିଡ଼୍ ।
LUK 11:47 ମିଡ଼୍ ଦଣ୍ଡ ଆଦ୍‍ତିଡ଼୍ ! ମିଡ଼୍ ବାବବାଦୀଡ଼ାଦ୍‍ ସମାଦି ସୁନ୍ଦର୍ ତିଆର୍ ମାଡ଼ୁତିଡ଼୍, ବେନଡ଼କ୍ ମି ମୁନେତ୍ ନାରୁଡ଼୍ ଆୱ୍‍କି ମାତ୍‍ତଡ଼୍ ।
LUK 11:48 ମିଡ଼୍ କେଞ୍ଜୁତିଡ଼୍ ଯେ ମି ଆନିଦାଦିଡ଼୍ ବାତେଏ ମାଡ଼୍‍ତଡ଼୍ ଆଦିଙ୍କ୍ ମିଡ଼୍ ତଡ଼େକ୍ ମାଡ଼ୁତିଡ଼୍, ଅଡ଼୍‌‍ ବାବବାଦୀଡ଼୍‍କ୍ ହାୱ୍‍କ୍‍ତଡ଼୍ ମେଣ୍ଡେ ମିଡ଼୍ ଅଡ଼ାୱୁ ସମାଦି ତିଆର୍ ମାଡ଼ୁତିଡ଼୍ ।
LUK 11:49 ପରମେଶ୍ୱର୍ ଆନ୍‌‍ତେ ନିଜର୍ ବୁଦ୍‍ତେ କେସ୍‍ମିନ୍ଦେଣ୍ଡ୍, ନାନେ ଅଡ଼୍‌‍ ଗାର୍‍ରେ ବାବବାଦୀନଡ଼କ୍ ନୁ ପ୍ରେରିତ୍‍ ଶିଷ୍ୟଡ଼୍‍କ୍ ରହ୍‍ତିତାନ୍, ଅଡ଼୍‌‍ ଲୋପେଙ୍କ୍ ବେସ୍‍କ୍‍ତୁଡ଼୍‍କିଂଙ୍କ୍ ଅଡ଼୍‌‍ ଆୱ୍‍କିତଡ଼୍ ନୁ ମେଣ୍ଡେ ବାଗାତଡ଼୍‍କିଙ୍କ୍ ତାଡ଼ନା ମାଡ଼ିତଡ଼୍,
LUK 11:50 ଇଦ୍ ଯୁଗ୍‍ତେ ନାରୁଡ଼୍ ପୃତିବିତେ ତିଆର୍ ମୁନେଙ୍କ୍ ସାରେତଡ଼୍ ବାବବାଦୀଡ଼୍ ହାୱୁକ୍‍ତେ ସେଙ୍ଗେ ଦଣ୍ଡ୍ ଆଦ୍‍ତଡ଼୍ ।
LUK 11:51 ହେବଲ୍‍ତେ ହାୱୁକ୍‍ତେ ଆରାମ୍ ମାଡ଼ି ଯିକରୀୟନ୍ ହେଉନା ବେନଡ଼୍‍କ୍ ବେଦୀ ନୁ ପବିତ୍ର ପଡ଼ିୟେତାଗ୍ ହାୱୁକ୍‍ତେ ମାଡ଼ିମାତ୍‍ତଡ଼୍ । ହଁ, ନାନ୍ ମିକିଂଙ୍କ୍ କେତୁତାନ ଇଦ୍ ଯୁଗ୍‍ତେ ନାରୁଡ଼୍ ଦଣ୍ଡ ଆଦ୍‍ତଡ଼୍ । ତିଆର୍ ଆତ୍‍ତାଗାଙ୍କ୍ ବେସ୍‍କ୍‍ତଡ଼୍ ବବିଷ୍ୟଦ୍ ବକ୍ତାଲଡ଼୍ ନେତୁର୍‍ ଇସ୍‍ମିନ୍ଦେ, ଆଦିନ୍‌ମାଇଦିଙ୍କ୍ ହି ଦିନାମ୍‍ତେ ଜିୱୁନ୍ ମାନ୍ଦାନ୍ ନାରୁଡ଼୍‍କିଂଙ୍କ୍ ଦଣ୍ଡ ଆଦ୍‍ଦେ ୱେୟ୍‍ତିତ୍ ।
LUK 11:52 “ହୋ ଦର୍ମଶାସ୍ତ୍ରୀଡ଼୍ ! ମିଡ଼୍ ଦଣ୍ଡ ଆଦ୍‍ତିଡ଼୍, ମିଡ଼୍ ପରମେଶ୍ୱର୍‍ତେ ଜ୍ଞାନତାଦ୍ କୁଚ୍‍କାଇତିଙ୍କ୍ ମିଞ୍ଜ୍‍ପିତିଡ଼୍, ବେଦ୍ ଜ୍ଞାନତାଦ୍ ହାର୍‍ଦିଙ୍କ୍ ଟେଣ୍ଡି । ମିଡ଼୍ ନିଜେ ଐଶ୍ୱରିକ୍ ବୁଦ୍‍ ନାଡ଼ସ୍‍ୱିଡ଼୍ କି, ବେନଡ଼୍ ନାଡ଼୍‍ସାଙ୍କ୍ ଇଚ୍ଛା ମାଡ଼ମାତ୍‍ତଡ଼୍, ଅଡ଼୍‌‍କିଂଙ୍କ୍ ଆନ୍‌‍ତେ ନାଡ଼୍‍ସାଙ୍କ୍ ହିୱୀଡ଼୍ ।”
LUK 11:53 ଆସୁଙ୍କ୍ ଜିସୁ ଅଡ଼୍‌‍ ଆଗାଙ୍କ୍ ପେୟିସ୍ ଆଦ୍‍ଦାନ୍ ୱେୟେ ଶାସ୍ତ୍ରୀଡ଼୍ ନୁ ପାରୂଶୀଡ଼୍ ଗାଟି ଇର୍ଷା ବା କପାମ୍ ଆସ୍,
LUK 11:54 ବାତେଙ୍କ୍ ଇତ୍କେ ଅଡ଼୍‌‍ ଜିସୁଙ୍କ୍ ବେସ୍‌କ୍ ବୁଲ୍ ଗଟ୍ କେସ୍ ଉଡ଼ୁଇତାଗ୍ ରାପାନଙ୍କ୍ ହାର୍ ମେହେକ ମାତ୍‍ତଡ଼୍ ।
LUK 12:1 ହଜାର୍‌ ହଜାର୍‌ ନାରୁଡ଼୍ ୱାସ୍ ଅଣ୍ଡୟାଗ୍ ଗୁଡ଼୍‍ପି ଆଦ୍‍ତଡ଼୍ । ନାରୁଡ଼୍ ୱେରନ୍ ପରୁ ୱେରନ୍ ତାଲ୍‍ଗା ତାଲ୍‍ଗି ଆସମାତ୍‍ତଡ଼୍ । ଜିସୁ ମୁନେ ତାମ୍ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍, ପାରୂଶୀନାରୁଡ଼୍ କପଟ‍ତାଗାଙ୍କ୍ ଜେଏକେ ମାନୁଟ୍ । ନାନ୍ କେତାନାଦ୍ ଲେକାମ୍‌ ଆଦୁତ୍‍ତେ ଯେ, ଅଡ଼୍‌‍ ଦୁଷ୍ଟ ନାରୁଡ଼୍ ।
LUK 12:2 ବାତେଏ ତଅନ୍‌ଦ, ଇଦ୍‍ରକତାଦ୍ ବାତେ ମୁସ୍‍ତାଦ୍ ଇଲେ, ବାତେ ପୁନ୍ଦାନଙ୍କ୍ ଆୟ, ଇସତାଦ୍‍ ମିଞ୍ଜ୍‍ତାଦ୍ ବାତେ ଇଲେ ।
LUK 12:3 ମିଡ଼୍ ବାତା ହିକାଡ଼୍ ତାଗ୍ କେସମିନ୍ଦେଡ଼ି, ଆୱ୍‍ଚାରେ ପାୟାଲ୍ କେଞ୍ଜ୍‍ପାଙ୍କ୍ ୱେୟ୍‍ତିତ୍, ମେଣ୍ଡେ, ବାତେଏ ତନ୍ଦ୍‍ୱେ ଲୋତ୍‍ତାଗ୍ ମିଞ୍ଜିମିକା କେସ୍ ମିନ୍ଦେଡ଼ି, ଆଦିଙ୍କ୍ ଲୋତ୍‍ତେ ମୁର୍ସିନାଗ୍‍ ଆଞ୍ଜ୍ କେସିଦ୍‍ ୱେୟ୍‍ତିତ୍ ।
LUK 12:4 ବାତେଙ୍କ୍ ଇତ୍କେ ନା ସାଙ୍ଗଡ଼ି ଯେ, ମିଡ଼୍, ମିକିଂଙ୍କ୍ ନାନେ କେତୁତାନ୍, “ବେନଡ଼୍ ମି ମେନ୍ଦୁଲ୍‍ତିଙ୍କ୍ ରେହେତିତଡ଼୍, ମାତର୍ ତାନ୍ ପେର୍‍କେ ମେଣ୍ଡେ ଅଡ଼୍‌‍ ବାତା ମାଡ଼ା ପାର୍‍ୱଡ଼୍, ଅଡ଼୍‌‍କିଂଙ୍କ୍ ୱେର୍‍ମାଟ୍ ।”
LUK 12:5 ବାତେଙ୍କ୍ ଇତ୍କେ ମିଡ଼୍ ବେନଙ୍କ୍ ୱେର୍‍ଦ୍‍ତିଡ଼୍, ଆଦ୍ ନାନେ ମିକିଂଙ୍କ୍ କେତିତାନ୍; ଡୋଲ୍‍ତେ ପେର୍‍କେ ନର୍‍କତାଗ୍‍ ହେସାଙ୍କ୍ ବେନେ ଇଶ୍ୱର୍ କାଇଦେ ଅଦିକାର୍‌ ମିନ୍ଦେ, ଅଂକିଙ୍କ୍‌ ୱେର୍‍ମୁଟ୍, ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ ନିଜାମ୍ କେତୁତାନ୍, ଅଂକିଙ୍କ୍‌ ୱେର୍‍ମୁଟ୍ ।
LUK 12:6 ଏଇଙ୍ଗ୍ ଆନାପିଟେ ବାତେଏ ସୁଦୁଟ୍ ଡାବ୍ ତେ ୱାମାଙ୍କ୍ ଆୟ୍‍ୟ କି ? ମିକା ପରମେଶ୍ୱର୍‍ ହାୱିନାଗାଙ୍କ୍ ୱେରଡିଙ୍କ୍ ମେଣ୍ଡେ ମାର୍‍ଙ୍ଗେ ପାର୍‍ୱଣ୍ଡ୍ ।
LUK 12:7 ବାତେଙ୍କ୍ ଇତ୍କେ ମି ତାଲେତ୍ କେଲ୍‍କିଙ୍କ୍ ସାରେ ଲେକିମିନ୍ଦେଣ୍ଡ୍ । ୱେର୍‍ମାଟ୍; ମିଡ଼୍ ଆନାପିଟେ ନାଗାଙ୍କ୍ ଗାଟି ମୁଲ୍ୟ ।
LUK 12:8 ମେଣ୍ଡେ ନାନେ ମିକିଂଙ୍କ୍ କେତୁତାନ୍, ବେନନ୍ ନାରୁଡ଼୍‍ତେ ମୁନ୍‍ ନାକିଂଙ୍କ୍ ସ୍ୱୀକାର୍‍ ମାଡ଼ିତନ୍, ନାରୁନ୍‍ପିଲେ ଆନ୍‌‍ତେ ପରମେଶ୍ୱର୍‍ତେ ଦୂତକିନ୍ ମୁନ୍‍ କେତିତଣ୍ଡ୍ ଯେ, ଆଦ୍ ନାରୁଡ଼୍ ନା ନିଜର୍ ନାରୁଡ଼୍ ।
LUK 12:9 ବେନ ନାରୁଡ଼୍ ମୁନ୍‍ ନାକିଂଙ୍କ୍ ଅସ୍ୱୀକାର୍ ମାଡ଼ିତନ୍, ନାରୁଡ଼୍ ପିଲେ ପରମେଶ୍ୱର୍‍ତେ ଦୂତକିନ୍ ମୁନ୍‍ କେତିତଣ୍ଡ୍ ଯେ, ଆଦ୍ ନାରୁଡ଼୍ ନା ନିଜର୍ ନାରୁଡ଼୍ ଆୟ୍‍ୟଣ୍ଡ୍ ।
LUK 12:10 ବେନ ନାରୁନ୍‍ପିଲେତ୍‍ ବିରୁଦ୍ଦ୍‌ତେ ଗଟି କେତିତଣ୍ଡ୍, ଅଂକିଙ୍କ୍‌ କ୍ଷମା ଇଦାଙ୍କ୍ ଆଦ୍‍ତେ; ମାତର୍ ବେନ ପବିତ୍ର ଆତ୍ମାତ୍ ବିରୁଦ୍ଦ୍‌ତେ ନିନ୍ଦା ଗଟି କେତିତଣ୍ଡ୍, ଅଂକିଙ୍କ୍‌ କ୍ଷମା ଇଦାଙ୍କ୍ ଆୟ୍‍ୟ ।
LUK 12:11 “ଅଡ଼୍‌‍ ବେସୁଙ୍କ୍‍ ମିକିଂଙ୍କ୍ ସମାଜ୍‍ଲନ୍, ରାଜ୍ୟପାଳ, ବିଚାର୍ ମାଡ଼ାନଣ୍ଡ୍ ମୁନ୍‍ନେ ବିଚାର୍ ମାଡ଼ାଙ୍କ୍ ଆଦ୍‍ତଡ଼୍, ଆସୁଙ୍କ୍ ମିଡ଼୍ ବେଲା ଉତ୍ତର୍ ହିଦ୍‍ତିଡ଼୍ ମେଣ୍ଡ୍ ବାତ୍ କେତିତିଡ଼୍ ଆଦ୍ ବିଷୟତେ ସୁଦୁର୍ ମେଣ୍ଡେ ଚିନ୍ତା ମାଡ଼୍‍ମାଟ୍ ।
LUK 12:12 ବାତେଙ୍କ୍ ଇତ୍କେ ବାତେଏ କେତାଙ୍କ୍ ଆଦ୍‍ତେ ଆଦ୍ ସମୟ୍ ତେ ପବିତ୍ର ଆତ୍ମା ମିକିଂଙ୍କ୍ ନାଡ଼୍‍ସ୍‍ପିଦ୍‍ ତେ ।”
LUK 12:13 ନାରୁଡ଼୍ ଲୋପେଙ୍କ୍ ୱେରଣ୍ଡ୍ ଜିସୁଙ୍କ୍ କେତ୍‍ତଣ୍ଡ୍, “ହୋ ଗୁରୁ, ନା ଦାଦାଲ୍‌ ନା ତଡ଼୍ ବାବାନ୍ ସମ୍ପତ୍ତିତିଙ୍କ୍ ୱିର୍‍ସ୍‍ପାନ୍ ମାଇଦିଙ୍କ୍ କେସିମ୍ ।”
LUK 12:14 ବାତେଙ୍କ୍ ଇତ୍କେ ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ହୋ ସାଙ୍ଗ, ବେନ ନାକିଂଙ୍କ୍ ମି ପରୁ ବିଚାର୍ ମାଡ଼ାଙ୍କ୍ ବା ସମ୍ପତ୍ତି ୱିର୍‍ପାଙ୍କ୍ ବେନ ନାକିଂଙ୍କ୍ ଅଦିକାର୍ ହିତ୍‍ତଣ୍ଡ୍ ।”
LUK 12:15 ଜିସୁ ଅଡ଼୍‌‍କିଂଙ୍କ୍ କେତୁତଣ୍ଡ୍, “ସାବ୍‍ଦାନ୍, ସାରେ ଲେକାମ୍ ଆଶେତାଗାଙ୍କ୍ ନିଜ୍‍ତିଙ୍କ୍ ଜେକେ ନେହେମ୍, ବାତେଙ୍କ୍ ଇତ୍କେ ୱେରନ୍ ନାରୁନାଦ୍ ଜିୱୁନ୍ ଅନ୍‌‍ୱାଦ୍ ସମ୍ପତ୍ତି ସାରେତେ ପରୁ ଆଶେ ମାଡ଼ ।”
LUK 12:16 ଆସୁଙ୍କ୍ ଜିସୁ ଅଡ଼୍‌‍କିଂଙ୍କ୍ ଇଦ୍ ୱେଷଡ଼୍ କେତ୍‍ତଣ୍ଡ୍, ୱେରଣ୍ଡ୍ ସାଉକାର୍ ନାରୁନ୍ ୱାୟେତାଗ୍ ଗାଟି ପସଲ୍ ଆତ୍‍ତା ।
LUK 12:17 ଆସୁଟେ ଆଦ୍ ନାରୁଡ଼୍ ହେର୍କେ ଆଲ୍‍ସି କେତ୍‍ତଣ୍ଡ୍, ବାତା ମାଡ଼ିତାନ୍ ? ବାତେଙ୍କ୍ ଇତ୍କେ ନାୟାଦ୍ ସାରେ ଗୁଡ଼୍‍ପି ନେହେତାନ୍ ମାଇଦିଙ୍କ୍ ପଡ଼୍‍ୟ୍ ଇଲା ।
LUK 12:18 ମେଣ୍ଡେ, ଆଦ୍ ନାରୁନ୍ କେତ୍‍ତଣ୍ଡ୍, ଇଦ୍‍ପୁଟୁଙ୍କ୍ ମାଡ଼ିତାନ୍; ନାୟାଦ୍ ଅମାର ସାରେ ହୁଉସୁ ବେଡ଼୍‍ୟା ତିଆର୍ ମାଡ଼ିତାନ୍ ନୁ, ଆୱ୍ ‍ଚାରେତାୱିନାଗ୍ ନାୟାୱୁ ଶସ୍ୟ ନୁ ନିୟ୍ ଗୁଡ଼୍‍ପି ମାଡ଼ି ନେହ୍‍ତିତାନ୍,
LUK 12:19 ଆସୁଟେ, ନାନେ ନାୟାଦ୍ ଜିୱୁନ୍‍ତିଙ୍କ୍ କେତିତାନ୍, ହୋ ଜିୱୁନ୍, ନାର୍ଗେ ୱାଡ଼୍‍ଷାତ୍ ମାଇଦିଙ୍କ୍ ନିୟାଦ୍ ନିୟ୍ ତିଆର୍‍ତେମିନ୍ଦେ, ରମାଟ୍, ତିନ୍ଦାନାଦ୍ ମାଡ଼ାଟ୍, ପାନ ମାଡ଼ାଟ୍ ନୁ ସାର୍‍ଦା ମାଡ଼ାଟ୍;
LUK 12:20 ବାତେଙ୍କ୍ ଇତ୍କେ ପରମେଶ୍ୱର୍‍ ଅଂକିଙ୍କ୍‌ କେତ୍‍ତଣ୍ଡ୍, ରେ ମଣ୍ଡି, ନେଣ୍ଡ୍ ନାର୍କା ନି ଜିୱୁନ୍‍ତିଙ୍କ୍ ନିୟାଗାଙ୍କ୍ ଆଦ୍‍ତାନ୍; ଆସୁଟେ ନିମେ ବାତା ନିଜର୍ ସେଙ୍ଗେ ହକ୍‍ରିଞ୍ଚିମିନ୍ଦେନୀ, ହାଉସାରେ ବେନନାୱୁ ଆଦ୍‍ତେ ?
LUK 12:21 ଜିସୁ କେତ୍‍ତଣ୍ଡ୍, “ବେନ ନିଜର୍ ମାଇଦିଙ୍କ୍ ଦନ୍ ଗୁଡ଼୍‍ପି ମାଡ଼ିତନ୍, ବାତେଙ୍କ୍ ଇତ୍କେ ଇଶ୍ୱର୍ ତେ ମୁନେ ସାଉକାର୍ ଆୟ୍‍ୟଣ୍ଡ୍, ଅନ୍‌ ସେଙ୍ଗେ ଇଦ୍‍ପୁଟୁଙ୍କ୍ ଗଟେମ୍ ଆଦ୍ ତେ ।”
LUK 12:22 ଜିସୁ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍, ଇ ବିଷୟ୍ ତେ ନାନେ ମିକିଂଙ୍କ୍ କେତୁତାନ୍, ବାତା ତିନ୍‍ତିଡ଼୍ ଇଦ୍‍ପୁଟୁଙ୍କ୍ ଆଲ୍‍ସି ମି ଜିୱୁନ୍‍ ତେ ମାଇଦିଙ୍କ୍, ମେଣ୍ଡେ, ବାତା କେର୍‍ଦ୍‍ତିଡ଼୍, ଇଦ୍‍ପୁଟୁଙ୍କ୍ ଆଲ୍‍ସି ମି ମେନ୍ଦୁଲ୍‍ତେ ମାଇଦିଙ୍କ୍ ଆନ୍‌‍ତେ ଚିନ୍ତେ ମାଡ଼୍‍ମାଟ୍ ।
LUK 12:23 ବାତେଙ୍କ୍ ଇତ୍କେ ତିନ୍ଦାନାଦ୍ କନ୍‍ସ୍ ଜିୱୁଣ୍ଡ୍ ନୁ ଚକାସିଲେ କନ୍‍ସ୍ ମେନ୍ଦୁଲ୍‍ତେ ବେଡ଼୍‍ୟା ।
LUK 12:24 ପାର୍‍ତାନ୍ ପିଟେଙ୍କ୍ ଉଡ଼ାଟ୍, ଆହ୍ ୱିତ କି କୟ୍‍ୟ, ମେଣ୍ଡେ, ଆୱିନ୍ ତିନ୍ଦାନ୍ ଲୋନ୍‌ ଇଲେକି ନେହ୍‍ତାନାଦ୍‍ ଅମାର ଇଲା, ବାତେଙ୍କ୍ ଇତ୍କେ ପରମେଶ୍ୱର୍‍ ଆୱିଙ୍କ୍ ତିନ୍ଦାଙ୍କ୍ ହିଦ୍‍ତଣ୍ଡ୍; ମିଡ଼୍ ତ ପିଟେଙ୍କ୍ ଆନ୍‌‍ତେ ବେସତ୍ ଗାଟି ଯଗ୍ୟ ।
LUK 12:25 ମି ଲୋପ୍ ବେନ ଚିନ୍ତେ ମାଡ଼ି ମାଡ଼ି ନିଜର୍ ଆୟୁସ୍‍ତିଙ୍କ୍ ମେଣ୍ଡେ ସୁଦୁର୍ ଦିନାମ୍‍ତିଙ୍କ୍ କାଲ୍‍ପିତଣ୍ଡ୍ ?
LUK 12:26 ଆଲାତ୍କେ ମିଡ଼୍ ଯଦି ସୁଦୁରାୱ୍ ପାଡ଼ିୟିମାଡ଼୍ ପାର୍‍ୱିଡ଼୍, ହାଲାଇତ୍କେ ମେଣ୍ଡେବାଗାତ୍ ବେଡ଼୍‍ୟା ପାଡ଼ିୟ୍‍ତେ ମାଇଦିଙ୍କ୍ ବାତେଙ୍କ୍ ଦାନ୍ଦେ ଆଦୁତିଡ଼୍ ?
LUK 12:27 ପୁଙ୍ଗାନ୍ ବିଷୟତେ ହେର୍କା ମାଡ଼ାଟ୍, ଆୱ୍ ବେଦ୍‍ପୁଟୁଙ୍କ୍ ପେର୍‍ସ୍‍ତା ? ମେଣ୍ଡେ ଆୱ୍ ପାଡ଼ିୟି ମାଡ଼ କି ନୁଲ୍ ଆଲ୍‍ସ; ବାତେଙ୍କ୍ ଇତ୍କେ ନାନେ ମିକିଂଙ୍କ୍ କେତୁତାନ୍, ବେନ ସାର୍‍ତିଙ୍କ୍ ବାଡ଼୍‍ୟଣ୍ଡ୍, ନୁ ସାଉକାର୍ ରାଜାଲ୍ ଶଲୋମନ୍‍ ଆନ୍‌‍ତେ ଅନାଦ୍‌ ସାରେ ସମ୍ପତିତିଙ୍କ୍ ଆୱ୍ ପୁଙ୍ଗାନ୍ ଲୋପେଙ୍କ୍ ବେନେଆଇ ୱେରଡ଼୍ ତେ ଲେକାମ୍ ମିକା ସୁନ୍ଦର୍ ଚକା କେର୍‍ଦାଙ୍କ୍ ପାର୍‍ୱଣ୍ଡ୍ ।
LUK 12:28 ୱାୟାନାଗା ବେନ ପୁଙ୍ଗା ନେଣ୍ଡ୍ ମିନ୍ଦେ, ଆୱିଙ୍କ୍ ନାଡ଼୍ ଅୟ୍‌ଦାଲ୍‌ କିସ୍‍ତାଗ୍ ୱାଟାନାଦ୍, ଆୱିଙ୍କ୍ ଯଦି ପରମେଶ୍ୱର୍‍ ଇସତ୍ ଲେକ୍‍ତାଦ୍ ହିଦ୍‍ତଣ୍ଡ୍, ଆଲାତ୍କେ; ହାୟ ସୁଦୁର୍ ବିଶ୍ୱାସୀନାରୁଡ଼ି, ଅନ୍‌ ମିକିଂଙ୍କ୍ ବେଚର୍ ନାର୍ଗେ ହିୱ୍‍ଣ୍ଡ୍ ଆଦ୍‍ତନ୍ ?
LUK 12:29 ମିଡ଼୍ ବାତା ତିନ୍‍ତିଡ଼୍, ମେଣ୍ଡେ ବାତା ଉନ୍ତିଡ଼୍, ଆୱିଙ୍କ୍ ମିଡ଼୍ ମେହେକ୍‍ମାଟ୍ ବା ଚିନ୍ତେ ମାଡ଼୍‍ମାଟ୍
LUK 12:30 ବାତେଙ୍କ୍ ଇତ୍କେ ଜଗତ୍ ତେ ବିଜାତିନାରୁଡ଼୍ ହିସତ୍ ବିଷୟ ତେ ମେହେକ ହୁଡିତଡ଼୍; ବାତେଙ୍କ୍ ଇତ୍କେ ଆୱ୍‍ଚାର୍ ବିଷୟ ମିକିଂଙ୍କ୍ ଆନ୍‌‍ତେ ଦର୍‍କାର, ଆଦ୍ ମି ପରମେଶ୍ୱର୍‍ ପୁତ୍‍ତଣ୍ଡ୍ ।
LUK 12:31 ମିଡ଼୍ ଅନ୍‌ ରାଜ୍ୟତ୍ ମାଇଦିଙ୍କ୍ ହେର୍କା ମାଡ଼ାଟ୍, ଆଲେକେ ଅଣ୍ଡ୍‌ ମିକିଂଙ୍କ୍ ଇଦ୍ ସାର୍‍ରେବିଷୟ୍ ହିଦ୍‍ତଣ୍ଡ୍ ।
LUK 12:32 ହୋ ସୁଦୁର୍ ମାନ୍ଦେମେଣ୍ଡା, ୱେର୍‍ମାଟ୍, ବାତେଙ୍କ୍ ଇତ୍କେ ମିକିଂଙ୍କ୍ ଆ ରାଜ୍ୟ ହିଦାନ୍‍ମାଇଦିଙ୍କ୍ ମି ପରମେଶ୍ୱର୍‍ ଇଚ୍ଛାମାଡ଼ୁତଣ୍ଡ୍ ।
LUK 12:33 ମିୟାୱୁ ବାତା ମିନ୍ଦେ, ଆୱିଙ୍କ୍ ୱାମି ଗରିବ୍ ନାରୁଡ଼୍‍କ୍ ଦାନ ମାଡ଼ାଟ୍; ବାତେଏ ନଷ୍ଟ ଆୟ୍‍ୟ, ଆସତ୍ ପଡ଼ିୟ୍‍ତାଗ୍ ନିଜର୍ ମାଇଦିଙ୍କ୍ ୱିଜ୍‍ ନେହ୍‍ମୁଟ୍; ବେଗେ ଡଙ୍ଗାଲଡ଼୍ ଗାର୍‍ୱାଡ଼ଡ଼୍ ବା ପୁଡ଼୍‍ୟି ନଷ୍ଟ ମାଡ଼, ଆସତ୍ ସ୍ୱର୍ଗତାଗ୍ ତେର୍‍ୱେ ଦନ୍‍ସମ୍ପତ୍ତି ଅସ୍‍ରିଞ୍ଚାଟ୍ ।
LUK 12:34 ବାତେଙ୍କ୍ ଇତ୍କେ ବେଗେ ମିୱାଦ୍ ଦନ୍‍ସମ୍ପତ୍ତି, ଆଗେ ମିକା ମିୱାଦ୍ ମନ୍ ।
LUK 12:35 “ପାଡ଼ିୟିତେ ମାଇଦିଙ୍କ୍ ସାରେଦାମ୍ ତିଆର୍ ଆଶେ ମାନୁଟ୍ । ମି କୁପିତିଙ୍କ୍ ନିଡ଼୍‍ସ୍‍ପିମାନୁଟ୍ ।
LUK 12:36 ପ୍ରବୁ ପେଣ୍ଡୁଲ୍‍ତାଗ୍ ମାଞ୍ଜ୍ ମାଲ୍‍ସ୍ ୱାସ୍ ହାର୍‍ଦାଗ୍ ତାଲ୍‍ସାନ୍ ୱେଇ ବେନ୍ ନାରୁଡ଼୍ ଅନ୍‌ ମାଇଦିଙ୍କ୍ ସାଙ୍ଗେ ସାଙ୍ଗେ କାପାଟ୍ ତେର୍‍ସିଦାଙ୍କ୍ କେପି ମାନ୍‍ତଡ଼୍, ମିଡ଼୍‍ଆନ୍‌‍ତେ ଅଡ଼୍‌‍ ଲେକାମ୍ ଆସ୍ ମାନୁଟ୍ ।
LUK 12:37 ପ୍ରବୁ ୱାସ୍ ବେନ୍ ଚାକରିଡ଼୍ ତିଆର୍‍ତେ ମାନ୍‍ତଡ଼୍ ଅଡ଼୍‌‍କିଂଙ୍କ୍ ଉଡ଼ିତଣ୍ଡ୍, ଅଡ଼୍‌‍ ଦନ୍ୟ; ନାନେ ମିକିଂଙ୍କ୍ ସତ୍ କେତୁତାନ୍, ମାଲିକ୍ ଆନ୍‌‍ତେ ଅଡ଼୍‌‍ ସେବା ମାଡ଼ାନ୍ ମାଇଦିଙ୍କ୍ ନିଜେ ତିଆର୍ ଆଦ୍‍ତନ୍ । ଅନ୍‌ ଅଡ଼୍‌‍କିଂଙ୍କ୍ କୁଦାନ୍ ମାଇଦିଙ୍କ୍ କେତିତଣ୍ଡ୍, ନୁ ନିଜେ ଅଣ୍ଡ୍‌ ତିନ୍ଦାଙ୍କ୍ ଇଦ୍‍ତଣ୍ଡ୍ ।
LUK 12:38 ଆସୁଟେ, ଅନ୍‌ ଯଦି ରେଣ୍ଡ୍ କି ମୁଣ୍ଡ୍ ନାଡ୍‍ନାର୍କା ୱାସ୍ ଅଡ଼୍‌‍କିଂଙ୍କ୍ ରକମ୍ ଉଡ଼ିତଣ୍ଡ୍, ଆଲାତ୍କେ ଆଦ୍ ଚାକରିଡ଼୍ ଦନ୍ୟ ।
LUK 12:39 ବାତେଙ୍କ୍ ଇତ୍କେ ଇଦ୍ ପୁଞ୍ଜ୍ ମାନୁଟ୍, ବେସୁଟ୍‌ ଡଙ୍ଗାଲ୍ ୱାଦ୍‍ତଣ୍ଡ୍, ଆଦ୍ ଯଦି ଲତ୍‌ତେ ମାଲିକ୍ ପୁନେଣ୍ଡ୍, ଆଲାତ୍କେ ତାମ୍ ଲୋନ୍‌ ଡଙ୍ଗାଙ୍କ୍ ନେଙ୍ଗାଙ୍କ୍ ହିୱଣ୍ଡ୍ ଆୟେଣ୍ଡ୍ ।
LUK 12:40 ମିଡ଼୍ ଆନ୍‌‍ତେ ତିଆର୍ ଆଶେ ମାନୁଟ୍, ବାତେଙ୍କ୍ ଇତ୍କେ ନାରୁନ୍‍ପିଲେ ଜିସୁ ଇସତ୍ ଦିନାମ୍‍ତେ ୱାଦ୍‍ତଣ୍ଡ୍, ଆଦ୍ ଦିନାମ୍‍ତେ ମିଡ଼୍ ହେର୍କା ମାଡ଼କଟ୍ ମାନ୍‍ତିଡ଼୍‍ ।”
LUK 12:41 ଆସୁଟେ ପିତର୍ କେତ୍‍ତଣ୍ଡ୍, “ହୋ, ପ୍ରବୁ, ନିମେ ବାତ୍ ମାକିଂଙ୍କ୍ କେତୁତିନ୍ ନା ସାରେତଡ଼୍‌କିଂଙ୍କ୍ ଇଦ୍ ୱେଷଡ଼୍ କେତୁତିନ୍ ?”
LUK 12:42 ପ୍ରବୁ ଉତ୍ତର୍ କେତ୍‍ତଣ୍ଡ୍, ଆଲେକ୍ ବିଶ୍ୱାସ୍‌ତେ ନୁ ଜ୍ଞାନି ଦାସ ବେନ ? ବେନଙ୍କ୍ ମାଲିକ୍‍ତେ ଲୋନ୍‌ ତୁୱୁସାନ୍ ମାଇଦିଙ୍କ୍ ନେହିତ୍‍ତଣ୍ଡ୍; ଅଣ୍ଡ୍‌ ଲେକେତ୍ ନାରୁଡ଼୍ ମେଣ୍ଡେ ଦାସଡ଼୍‍କିଂଙ୍କ୍ ତିନ୍ଦାଙ୍କ୍ ଇତ୍‍ତନ୍ । ଅଣ୍ଡ୍‌ ଲେକେତ୍ ଦିନାମ୍‍ତେ ନାରୁଡ଼୍‍କ୍ ତିନ୍ଦାଙ୍କ୍ ଇଦ୍‍ତଣ୍ଡ୍ ?
LUK 12:43 ପ୍ରବୁ ୱାସ୍ ବେନ୍ ଦାସ ଆଦ୍ ରକମ୍ ମାଡ଼ାନାଦ୍ ଉଡ଼ିତଣ୍ଡ୍, ଅଣ୍ଡ୍‌ ଦନ୍ୟ ।
LUK 12:44 ନାନେ ମିକିଂଙ୍କ୍ ନିଜାମ୍ କେତୁତାନ୍, ଅଣ୍ଡ୍‌ ଅଂକିଙ୍କ୍‌ ନିଜର୍ ସାରେ ସମ୍ପତି ପରୁ ଦାୟିତ୍ୱ ଇଦ୍‍ତଣ୍ଡ୍ ।
LUK 12:45 ବାତେଙ୍କ୍ ଇତ୍କେ ହେର୍କେ ମାଡ଼ାଟ୍, ଆଦ୍ ଦାସ୍ ଲୋପ୍ ଲୋପ୍ କେତିତଣ୍ଡ୍, ନା ପ୍ରବୁ ୱାଦାନାଦ୍ ଗାଟି ଲେଟ୍ଆଦ୍‍ତେ, ଆସୁଟେ ଅନ୍‌ ଯଦି ଦାସ ନାରୁଡ଼୍‍କିଂଙ୍କ୍ ରେହେତା ରେହେତି ମାଡ଼ିତନ୍ ମେଣ୍ଡେ, ତିଞ୍ଜ୍ ଉଞ୍ଜ୍ ମାତ୍‍ୱାରି ଆଦାଙ୍କ୍ ଆରାମ୍ ମାଡ଼ିତନ୍,
LUK 12:46 ଆଲାତ୍କେ ବେନ୍ ‍ଦିନ୍ ଅଣ୍ଡ୍‌ ଅଂକିଙ୍କ୍‌ ୱିଡ଼୍‍ସି ମାଡ଼କଟ୍ ମାନ୍‍ତଣ୍ଡ୍ ମେଣ୍ଡେ, ବେନ୍ ଦିନାମ୍ ତେ ଅନ୍‌ ପୁନକଟ ମାନ୍‍ତଣ୍ଡ୍, ଆଦ୍ ଦିନାତେ ନୁ ଆଦ୍ ଦିନାମ୍ ତେ ଆଦ୍ ଦାସ୍ ତେ ମାଲିକ୍ ୱାସ୍ ହେୱ୍‍ଦ୍‍‍ତଣ୍ଡ୍ । ଅଣ୍ଡ୍‌ ଆଦିଙ୍କ୍ ଗାଟି ଦଣ୍ଡ୍ ହିଦ୍‍ତଡ଼୍ ନୁ ଅବିଶ୍ୱାସ୍ ଆୟ୍‍ୱିଡ଼୍ ନାରୁଡ଼୍ ତଡ଼୍ ପାଲ୍‍କ୍ ତୁଉସିତଣ୍ଡ୍ ।
LUK 12:47 ଆସୁଟେ, ବେନ୍ ଦାସ୍ ନିଜର୍ ପ୍ରବୁନ୍ ଇଚ୍ଛାତିଙ୍କ୍ ପୁଞ୍ଜ୍ ବା ତିୟାର୍ ଆୟ୍‍ୟକଟ ମାନ୍‍ତଣ୍ଡ୍, ଆଲାତ୍କେ ଅନ୍‌ ଇସଲେକାତେ ପାଡ଼ିୟି ମାଡ଼କଟ୍ ମାନ୍‍ତଣ୍ଡ୍, ଅଂକିଙ୍କ୍‌ ଗାଟି ଦେବେତେ ପରୁ ଦେବ୍‍ ଦର୍‍କିତ୍ ।
LUK 12:48 ବାତେଙ୍କ୍ ଇତ୍କେ ବେନ ପୁନକଟ ଦେବ୍‍ ତିନ୍ଦାଙ୍କ୍ ପାଡ଼ିୟ୍‍ ମାଡ଼ିମାନ୍‍ତଣ୍ଡ୍; ଅନ୍‌ ସୁଦୁର୍ ଦେବ୍‍ ତିନ୍‍ତଣ୍ଡ୍ । ବେନଙ୍କ୍ ଗାଟି ଦେବ୍‍ ଦର୍‍କି ମିନ୍ଦେ, ଅନ୍‌ ଆଗାଙ୍କ୍ ଗାଟି ଦାବୀ ମାଡ଼୍ ୱେୟ୍‍ତିତ୍; ମେଣ୍ଡେ, ନାରୁଡ଼୍ ବେନନାଗେ ଗାଟି ଇତ୍‍ତନ୍ ମାଡ଼ି ମିନ୍ଦେଡ଼୍, ଅନାଗାଙ୍କ୍ ଗାଟି ଦାବୀମାଡ଼୍ ୱେୟ୍‍ତିତ୍ ।
LUK 12:49 “ନାନ୍ ପୃତିବିତାଗ୍ କିସ୍‍ ରାପାନ୍ ମାଇଦିଙ୍କ୍ ୱାସ୍‍ମିନ୍ଦେନ୍, ମେଣ୍ଡେ, ଆଦ୍ କିସ୍‍ ନିଡ଼୍‍ୱି ଇଦ୍ ନାୱାଦ୍ ବାତେଏ ଇଚ୍ଛା !
LUK 12:50 ବାତେଙ୍କ୍ ଇତ୍କେ ନାକିଂଙ୍କ୍ ଅଣ୍ଡୟ୍‌ ବାପ୍ତିସ୍ମ ଇସ୍‌ ଆଦ୍ ୱେୟ୍‍ତିତ୍ ବାତେଙ୍କ୍ ଇତ୍କେ ଆଦ୍ ତେରୱେ ଯାକ ନାନେ ଯେ, ବେସର୍ ଦାନ୍ଦେ ଆଦୁତାନ୍ ।
LUK 12:51 ନାନେ ପୃତିବିତାଗ୍ ଶାନ୍ତି ଇଦାଙ୍କ୍ ୱାସ୍ ମିନ୍ଦେନ୍ ଇଞ୍ଜ ବାତ୍ ମିଡ଼୍ ଆଲ୍‍ସ ମିନ୍ଦେଡ଼ି ? ନାନେ ମିକିଂଙ୍କ୍, କେତୁତାନ୍, ଇଲା, ନାନେ, ପୃତିବୀତିଙ୍କ୍ ୱେରେ ମାଡ଼ାଙ୍କ୍ ୱାସ୍‍ମିନ୍ଦେନ୍ ?
LUK 12:52 ଅଣ୍ଡୟ୍‌ ଲୋନ୍‌ ଯଦି ଏୟ୍‍ୱୁଡ଼୍ ଡ଼ାଗାଙ୍କ୍‌ ରାମ୍‌କ୍‌ ସୃଷ୍ଟି ଆଦ୍‌ତେ, ଆଲାତ୍କେ ଇର୍‍ୱୁଡ଼୍ ବିରୁଦ୍ ତେ ମୁୱୁଡ଼୍ ନୁ ମୁୱୁଡ଼୍ ବିରୁଦ୍ ତେ ଇର୍‍ୱୁଡ଼୍ ତେଦିତଡ଼୍ ।
LUK 12:53 ବାବାନ୍ ବିରୁଦ୍ ତେ ମାର୍‍, ମାର୍‍ ବିରୁଦ୍‍ତେ ବାବାଲ୍, ମାୟାଡ଼୍ ବିରୁଦ୍ ତେ ୟାୟ, ୟାୟନ୍ ବିରୁଦ୍ ତେ ମାୟ୍‍ୟାଡ଼୍, କଡ଼୍‍ୟାଡ଼୍‍ ବିରୁଦ୍ ତେ ପୟେ, ନୁ ପୟେନ୍ ବିରୁଦ୍ ତେ କଡ଼୍‍ୟାଡ଼୍ ତେଦିତ୍ ।”
LUK 12:54 ଜିସୁ ନାରୁଡ଼୍‍କିଂଙ୍କ୍ ତେତ୍‍ତଣ୍ଡ୍ ପଶ୍ଚିମ୍‍ତେ ପାକେ ମାବ୍ ତେଦାନାଦ୍ ଉଡ଼୍ କେ ମିଡ଼୍ ସାଙ୍ଗେ ସାଙ୍ଗେ କେଲ୍‍ମୁଟ୍, ୱାର୍‍ସାମ୍ ୱାଦୁତ୍, ଆଦ୍‍ଲେକାମ୍ ଗଟେମ୍ ଆଦ୍ ତେ ।
LUK 12:55 ମେଣ୍ଡେ, ଦକ୍ଷିଣ୍ ପାକେତ୍ ଗାଲ୍ ୱାଦୁତ୍ ଇତ୍‍କେ, ମିଡ଼୍ କେଲ୍‍ମୁଟ୍, ଏଦ୍ ତାର୍‍ଦିତେ, କେତ୍‍କେ ଆଲେ ଆଦ୍‍ତେ ।
LUK 12:56 ରେ ମଣ୍ଡିଡ଼ି, ମିଡ଼୍ ପୃତିବି ନୁ ମାବ୍‍ତିଙ୍କ୍ ଉଡ଼ି ୱାର୍‍ସାମ୍ ପାଗ୍ ବିଷୟତେ କେତେ ପାର୍‌ଦ୍‌ତିଡ଼୍; ଆଗେକ୍‍ବା ଇଞ୍ଜେତ୍ ଯୁଗ୍‍ତାଦ୍ ପରିକ୍ଷାସାରେ ପୁନ୍ଦାଙ୍କ୍ ପାର୍‍ୱିଡ଼୍ ?
LUK 12:57 “ମେଣ୍ଡେ, ନିଜେ ନିଜେ ବାତେଙ୍କ୍ ସାୟେତାଦ୍ ବିଚାର୍ ମାଡ଼୍‍ୱିଡ଼୍ ?
LUK 12:58 ଯଦି ବେନ ମିକିଂଙ୍କ୍ ମକଦମା ମାଡ଼ି ବିଚାର୍ ଲୋତ୍‍ତାଗ୍ ଆଦ୍‍ତନ୍, ଆସୁଟେ ଅନ୍‌ ତଡ଼୍ ନିଜର୍ ବିଷୟତେ ନିଲ୍‍ପ୍‍ତେ ମାଡ଼ାଙ୍କ୍ ଆଲ୍‍ସି ମାଡ଼ିତି । ଯଦି ଆଲା ମାଡ଼କ୍ ଅଣ୍ଡ୍‌ ନିକିଂଙ୍କ୍ ବିଚାର୍ କର୍ତ୍ତାନ୍ ଗାର୍‍ରେ ଆଦ୍‍ତନ୍ ନୁ ଅଣ୍ଡ୍‌ ନିକିଂଙ୍କ୍ ପୁଲିସିଡ଼୍ କାଇଦେ ପସ୍‍ପିଦ୍‍ତଣ୍ଡ୍ ନୁ ପୁଲିସିଡ଼୍ ନିକିଂଙ୍କ୍ କାରାଗାର୍‍ ତାଗ୍ ୱାଟିଦ୍‍ତଡ଼୍ ।
LUK 12:59 ନାନେ ନିକିଂଙ୍କ୍ କେତୁତାନ୍, ନି ପର୍‍ର ୱାଟ୍‍ତେ ସାରେ କାମ୍‍ଦେନନ୍‍ ୱେରନ୍ ପାଇସା ମିକା ଇୱେଯାକ ନିମ୍‍ ଆଗାଙ୍କ୍ କଲାସ୍ ଆଦାଙ୍କ୍ ପାର୍‍ୱିନ୍ ।”
LUK 13:1 ଆଦ୍ ଦିନାମ୍ ତେ ଆଗେ ମାନ୍ଦାନ୍ ବେସ୍‍ତୁଡ଼୍ ନାରୁଡ଼୍ ଜିସୁଙ୍କ୍ କେତ୍‍ତଡ଼୍ ଯେ, ଗାଲିଲୀୟ ନାରୁଡ଼୍ ଇଶ୍ୱର୍‌ ତେ ଗାର୍‍ରେ ବଲି ଉତ୍ସର୍ଗ ମାଡ଼ାନ୍ ୱେଲେ ପିଲାତ ଅଡ଼୍‌‍କିଂଙ୍କ୍ ହାୱ୍‍କି ମାତ୍‍ତଡ଼୍ ।
LUK 13:2 ଆସୁଟେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ମିଡ଼୍ ବାତ୍ ଆଲ୍‍ସୁତିଡ଼୍ ଯେ, ହି ନାରୁଡ଼୍ ଗାଲିଲୀୟ ନାର୍‍ଦେ ଲୋପେଙ୍କ୍ ଗାଟି ପାପି ମାତ୍‍ତଡ଼୍ ଇଞ୍ଜ ଅଡ଼୍‌‍କିଂଙ୍କ୍ ଇଦ୍ ହାୱୁକ୍‍ତେ ଆଦ୍ ୱେୟ୍‍ତା କି ?
LUK 13:3 ନାନେ ମିକିଂଙ୍କ୍ କେତୁତାନ୍, ଇଲା, ବାତେଙ୍କ୍ ଇତ୍କେ ପାପତାଗାଙ୍କ୍ ମନ୍ ପରିବର୍ତ୍ତନ୍ ମାଡ଼କଟ୍ ମାତ୍‍କେ ମିଡ଼୍‍ଆନ୍‌‍ତେ ସାରେ ରକମ୍ ନଷ୍ଟ ଆଦ୍‍ତିଡ଼୍ ।
LUK 13:4 ଶିଲୋହତାଗ୍ ବେଲା ୱେରନ୍ ନାରୁଡ଼୍ ପରୁ ବେଡ଼୍‍ୟାଦ୍‍ ଲୋନ୍‌‍ ଉର୍‍ଙ୍ଗି ରାଲ୍‍ତେ, ମିଡ଼୍ ବାତ୍ ଆଲ୍‍ସୁତିଡ଼୍ ? ଅଡ଼୍‌‍ ଯିରୁଶାଲେମ୍‍ତାଗ୍ ମାନ୍ଦାନ୍ ନାରୁଡ଼୍ ୱିଡ଼୍‍ସି ଅଦିକ୍‌ ପାପି ମାତ୍‍ତଡ଼୍ କି ?
LUK 13:5 ନାନେ ମିକିଂଙ୍କ୍ କେତୁତାନ୍, ଇଲା, ବାତେଙ୍କ୍ ଇତ୍କେ ପାପତାଗାଙ୍କ୍ ମନ୍ ପରିବର୍ତ୍ତନ୍ ମାଡ଼କଟ୍ ମାତ୍‍କେ ମିଡ଼୍‍ଆନ୍‌‍ତେ ସାରେ ରକମ୍ ନଷ୍ଟ ଆଦ୍‍ତିଡ଼୍ ।
LUK 13:6 ଆସୁଟେ, ଜିସୁ ଅଡ଼୍‌‍କିଂଙ୍କ୍ ଇଦ୍ ୱେଷଡ଼୍ କେତ୍‍ତଣ୍ଡ୍, “ୱେରନ୍ ଅଙ୍ଗୁର୍ ଗୁଡ଼େତାଗ୍ ୱେରଡ଼୍ ତୟେମାଡ଼ା ମାତ୍‍ତା, ଅଣ୍ଡ୍‌ କାୟାନ୍ ସେଙ୍ଗେ ମାଡ଼େତ୍ ଗାର୍‍ରେ ଆତ୍‍ତଣ୍ଡ୍, ବାତେଙ୍କ୍ ଇତ୍କେ ବାତେମିକା ଦର୍‍କ୍‍ତଣ୍ଡ୍ ।
LUK 13:7 ଆସୁଟେ ଅଣ୍ଡ୍‌ ଆଦ୍ ବଗିଚାତେ ମାଲିକ୍‍ତିଙ୍କ୍ କେତ୍‍ତଣ୍ଡ୍, ଉଡ଼େ, ମୁଣ୍ଡ୍ ଏଣ୍ଡ୍ ଆଦୁତ୍‍ ନାନେ ୱାସ୍ ହି ତୟେମାଡ଼୍‍ତାଗ୍‍ କାୟା ମେହ୍‍କୁତାନ୍, ଇତ୍କେ ଦର୍‍ସ୍‍କାନଙ୍କ୍ ପାର୍‍ୱନ୍‍; ଇଦିଙ୍କ୍‍ ନାଡ଼୍‍କି ଏସାଟ୍‍ ବାତେଙ୍କ୍‍ଇତ୍‍କେ ଇଦ୍‍ ବୂମ୍‌ଦିଙ୍କ୍‍ ମିକା ନଷ୍ଟ ମାଡ଼ୁତେ ।
LUK 13:8 ବାତେଙ୍କ୍ ଇତ୍କେ ଚାକର୍ ମାଲିକ୍‍ତିଙ୍କ୍ କେତ୍‍ତଣ୍ଡ୍, ୱେରଡ଼୍ ଏଣ୍ଡେତ୍ ମାଇଦିଙ୍କ୍ ଇଦିଙ୍କ୍ ୱିଡ଼୍‍ସିମ୍, ନାନେ ଇଦିଙ୍କ୍ ଚାର୍‍ପାକା ଡେୱିମେଣ୍ଡେ କାତାମ୍ ହିଦ୍‍ତାନ୍,
LUK 13:9 ୱାଦାନ୍ ଏଣ୍ଡ୍ ଯଦି ହି ମାଡ଼େତାଗ୍ କାୟା ଆଦିତ୍‍ ହିତ୍‍କେ ତ ସାୟ୍ । ଇଲୁକ୍‍ ଆଦକଟ ମାତ୍‍କେ ଆସୁଟେ ହି ମାଡ଼େତିଙ୍କ୍ ନାଡ଼୍‍କିମ୍ ।”
LUK 13:10 ଅଣ୍ଡ୍‌‍ଦାମ୍‍ ଜିସୁ ବିଶ୍ରାମ୍‍ଦିନାତେ ୱେରଡ଼୍ ଯିହୁଦୀ ପ୍ରାର୍ତନା ମାଡ଼ାନ୍ ଲୋନ୍‌ ଶିକ୍ଷା ହିସମାତ୍‍ତଣ୍ଡ୍ ।
LUK 13:11 ଆଗେ ୱେରଡ଼୍ ନାଟାଡ଼୍ ମାତ୍‍ତେ ବେଲା କି ଅଟ୍ର ଏଣ୍ଡ୍ ଯାକ ଅଣ୍ଡୟ୍‌ ବୁତ୍ ଆତ୍ମା ତେ ମୁର୍ଗ ଆଶେ ମାତ୍‍ତେ । ନିଜ୍‍ତିଙ୍କ୍ ବେଲାମେଣ୍ଡେ ମାଡ଼ି ତିନାଙ୍କ୍ ଆଦାଙ୍କ୍ ପାର୍‍ୱକଟ ମାତ୍‍ତେ ।
LUK 13:12 ଜିସୁ ତାକିଂଙ୍କ୍ ଉଡ଼ି ଗାର୍‍ରେ କାର୍‍ଙ୍ଗି କେତ୍‍ତଣ୍ଡ୍, ହୋ ନାଟାଡ଼୍‍ତି, ନି ଦୁର୍ବଲ୍‍ତାଗାଙ୍କ୍ ମୁକ୍ତ ଆଦ୍‍ତିଡ଼୍ ।
LUK 13:13 ଆସୁଟେ, ଜିସୁ ତାନ୍ ପରୁ କାୟ୍ ୱାଟ୍‍ତଣ୍ଡ୍, ଆସୁଟେ, ଆଦ୍ ନାଟାଡ଼୍ ସାଙ୍ଗେ ସାଙ୍ଗେ ତିନାଙ୍କ୍ ଆସ୍ ନିସ୍ ପର୍‍ମେଶ୍ୱରତ୍ ମହିମା ବା ସ୍ତୁତି ମାଡ଼୍‍ତେ ।
LUK 13:14 ବାତେଙ୍କ୍ ଇତ୍କେ ଜିସୁ ବିଶ୍ରାମ୍‍ଦିନାତେ ସୁସ୍ଥ ମାଡ଼୍ ତାଙ୍କ୍ ପ୍ରାର୍ତନା ମାଡ଼ାନ୍ ‍ଲୋତ୍‍ତେ ମୁକ୍ୟାଲ୍ କପାମ୍ ଆସ୍ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, “ପାଡ଼ିୟ୍‍ ମାଡ଼ାନ୍ ମାଇଦିଙ୍କ୍ ଆରୁଦିନା ଦିନାମ୍ ମିନ୍ଦେ । ଆଦ୍ ଦିନାତେ ୱାସ୍ ସୁସ୍ଥ ଆୟ୍‍ମୁଟ୍, ବିଶ୍ରାମଦିନା ତେ ୱାଡ଼୍‍ମାଟ୍‍ ।”
LUK 13:15 ବାତେଙ୍କ୍ ଇତ୍କେ ପ୍ରବୁ ଅଂକିଙ୍କ୍‌ କେତ୍‍ତଣ୍ଡ୍, “ହୋ ମଣ୍ଡିଡ଼ି ମିଡ଼୍ ବାତ୍ ବିଶ୍ରାମ୍‍ଦିନାତେ ମି ଗଡ୍‌କିଂଙ୍କ୍ କି ଗଦତିଙ୍କ୍ କଟାତାଗାଙ୍କ୍ ୱିଡ଼୍‍ସି ହେର୍‍ ହୁସ୍‍ପାଙ୍କ୍ ବାୟିଦେ ଆୟ୍‍ୱିଡ଼୍ କି ?
LUK 13:16 ଆଦ୍ ଅଣ୍ଡୟ୍‌ ଅବ୍ରାହାମ୍‌ତେ ବଂଶତେ ପିକିଡ଼୍ । ଶୟ୍‍ତାନ୍‍ ତାକିଂଙ୍କ୍ ଅଟ୍ର ଏଣ୍ଡ୍ ଆଇନା ତହ୍‍ସ୍‍ମାତ୍, ବିଶ୍ରାମ୍‍ଦିନାତେ ଆଦ୍ ମୁକ୍ତ ବା ସୁସ୍ଥ ଆଦ୍‍ଦାନ୍ ଲେକେତ୍ ଇଲେ କି ?”
LUK 13:17 ଇଦ୍ ଗଟ୍ ତାମ୍ ଶିଷ୍ୟଡ଼କ୍ ସିଗ୍ ମାଡ଼୍‍ତେ, ଆଗେକ୍‍ବା ତାମାଦ୍ ବାକ୍‍ୱା ପାଡ଼ିୟିତ୍ ମାଇଦିଙ୍କ୍ ନାରୁଡ଼୍ ସାରେତଡ଼୍ ସାର୍‍ଦା ଆଦ୍‍ତଡ଼୍ ।
LUK 13:18 ଆସୁଟେ ଜିସୁ ପାଚ୍ରାମାଡ଼୍‍ତଣ୍ଡ୍, “ପରମେଶ୍ୱର୍‍ତେ ରାଜ୍ୟ ବେଦ୍‍ପୁଟୁଙ୍କ୍ ? ମେଣ୍ଡେ, ନାନେ ହିଦିଙ୍କ୍ ବେନନ୍ ତ ସାମାନ୍‍ ମାଡ଼୍‍ପାର୍‍ଦ୍‍ ତାନ୍ ?
LUK 13:19 ପରମେଶ୍ୱର୍‍ତେ ରାଜ୍ୟ ଅଣ୍ଡୟ୍‌ ସୋରିଷ ପେଡ଼େମ୍‍ତେ ଲେକାମ୍ । ୱେରନ୍ ନାରୁଡ଼୍ ଆଦ୍ ସୋରିଷ ପେଡ଼େମ୍‍ତିଙ୍କ୍ ଅଣ୍ଡ୍‌ ବଗିଚାତାଗ୍ ୱିତିତଣ୍ଡ୍ । ପେଡ଼େମ୍‍ତାଗାଙ୍କ୍ ଗାଜ୍‍ଜେ ପେୟ୍‍ସ୍‍ ମାଡ଼ା ଆଦ୍ ତେ ଆଦ୍ ମାଡ଼୍‍ତେ କମ୍‍ତାଗ୍ ପିଟେ ତୁଉକା ତାରିତା ।”
LUK 13:20 ଜିସୁ ମେଣ୍ଡେ କେତ୍‍ତଣ୍ଡ୍, “ନାନ୍ ପରମେଶ୍ୱର୍‍ତେ ରାଜ୍ୟତିଙ୍କ୍ ବେନନ୍ ତ ସାମାନ୍‍ ମାଡ଼୍‍ପାର୍‍ଦ୍‍ ତାନ୍ ?
LUK 13:21 ଇଦ୍ ଅଣ୍ଡ୍‌ କମୀରତେ ଲେକାମ୍ । ୱେରଡ଼୍ ନାଟାଡ଼୍ ରୂଟି ତିଆର୍ ମାଡ଼ାନ୍ ମାଇଦିଙ୍କ୍ ଅଣ୍ଡୟ୍‌ ବେଡ଼୍‍ୟାଦ୍‍ ଗିନେତାଗ୍ ମାନ୍ଦାନ୍ ଅଟା ତଡ଼୍ ହି କମୀରତିଙ୍କ୍ କାଲ୍‍ପିତ୍ । କମୀର ଅଟାତିଙ୍କ୍ ତୟ୍‍ପିତ୍‍ତେ ।”
LUK 13:22 ଜିସୁ ସାରେ ନାର୍ ନୁ ନାର୍ ଆଞ୍ଜ୍ ଶିକ୍ଷା ହିସମାତ୍‍ତଣ୍ଡ୍, ଅନ୍‌ ତାକି ଯିରୁଶାଲେମ୍‍ତ୍‍ ପାକେ ଆତ୍‍ତଣ୍ଡ୍ ।
LUK 13:23 ଆସୁଟେ, ମେଣ୍ଡେ ୱେରଣ୍ଡ୍ ଜିସୁଙ୍କ୍ କେତ୍‍ତଣ୍ଡ୍, “ପ୍ରବୁ ବେସ୍‍ତୁଡ଼୍ ନାରୁଡ଼୍ ପରିତ୍ରାଣ ଆଦ୍ ପାର୍‍ଦ୍‍ତଡ଼୍ ? ବାତେଏ ସୁକୁକେ ନାରୁଡ଼୍ ?”
LUK 13:24 “ସୁଦୁରାଦ୍ ହାର୍‍ଇସ୍ ସ୍ୱର୍ଗତାଗ୍ ଆଦ୍‍ଦାନ୍ ମାଇଦିଙ୍କ୍ ଆଲ୍‍ସି ମାଡ଼ାଟ୍ । ବାତେଙ୍କ୍ ଇତ୍କେ ନାନେ କେତୁତାନ୍, ନାର୍ଗେମାନ୍ଦେ ଆଦ୍‍ଦାନ୍ ମାଇଦିଙ୍କ୍ ଆଲ୍‍ସି ମାଡ଼ିତଡ଼୍ ? ବାତେଙ୍କ୍ ଇତ୍କେ ଆଦାଙ୍କ୍ ପାର୍‍ୱଡ଼୍ ।
LUK 13:25 ଲୋତ୍‍ତେ ମାଲିକ୍ ତେଦି କାପାଟ୍‍ତିଙ୍କ୍ ବନ୍ଦ୍ ମାଡ଼୍‍ତେ ପେର୍‍କେ, ମିଡ଼୍ ବାୟିଦେ ନିସ୍ ମେଣ୍ଡେ କାପାଟ୍‍ତିଙ୍କ୍ ତାଲ୍‍ସିତିଡ଼୍, ବା ଅନୁରଦ୍‌‍ ମାଡ଼ି କେତିତିଡ଼୍, ମାଲିକ୍, ମା ମାଇଦିଙ୍କ୍ କାପାଟ୍‍ ତେର୍‍ସିମ୍ । ବାତେଙ୍କ୍ ଇତ୍କେ ଅଣ୍ଡ୍‌ କେତିତଣ୍ଡ୍, ମିଡ଼୍ ବେନେ ଜାଗେତେ ନାରୁଡ଼ି, ବା ବେଗାଙ୍କ୍ ୱାସ୍‍ମିନ୍ଦେଡ଼ି, ନାନେ ଆଦ୍ ପୁନନ୍ ।
LUK 13:26 ତାନ୍ ପେର୍‍କେ ମିଡ଼୍ କେତିତିଡ଼୍, ନିମ୍‍ ନୁ ମାମ୍ ଅଣ୍ଡୟାଗେ ମାଞ୍ଜ କାୟ୍‍ଲି ତିତ୍‍ତାଡ଼୍ । ନିମେ ମା ନାର୍ ଶିକ୍ଷା ଇସ୍‌‍ମାତିନ୍
LUK 13:27 ଆସୁଟେ, ଅଣ୍ଡ୍‌ କେତ୍‍ତଣ୍ଡ୍, ମିଡ଼୍ ବେନେ ପାଡ଼୍‍ଗେତେ ନାରୁଡ଼ି, ବା ବେଗାଙ୍କ୍ ୱାସ୍‍ମିନ୍ଦେଡ଼ି, ନାନେ ଆଦ୍ ପୁନନ୍ । ମିଡ଼୍ କାରାପ୍‍ ପାଡ଼୍‌ୟି ମାଡ଼ାନ୍ ନାରୁଡ଼ି, ନାୟାଗାଙ୍କ୍ ଜେକା ଆୟ୍‍ମୁଟ୍ ।
LUK 13:28 ବେସୁଙ୍କ୍‍ ମିଡ଼୍ ଅବ୍ରାହାମ୍‌, ଇସ୍‍ହାକ୍ ନୁ ଯାକୁବ୍ ନୁ ସାରେ ବାବବାଦୀଡ଼୍ ପରମେଶ୍ୱର୍‍ତେ ରାଜ୍ୟତାଗ୍ ମାନ୍ଦାନାଦ୍ ଉଡ଼ିତଡ଼୍ ବାତେଙ୍କ୍ ଇତ୍କେ ନିଜେ ବାୟିଦେ ରାଲିମାନ୍ଦାନାଦ୍ ଉଡ଼ିତଡ଼୍, ଆସୁଙ୍କ୍ ଆଗେ ନିଜେ କେୟାନାଦ୍ ନୁ ପାଲ୍‍କ୍ କିଟ୍‍ରୁମ୍ କାଟ୍‍ରୁମ୍ ଆଦାନାଦ୍ କେଞ୍ଜିତଡ଼୍ ।
LUK 13:29 ପୂର୍ବ ନୁ ପଶ୍ଚିମ୍, ଉତ୍ତର୍ ନୁ ଦକ୍ଷିଣ୍‍ପାକେତ୍ ନାରୁଡ଼୍ ୱାସ୍ ପରମେଶ୍ୱର୍‍ତେ ରାଜ୍ୟତାଗ୍ ତିନ୍ଦାଙ୍କ୍ କୁଦିତଡ଼୍ ।
LUK 13:30 ଆସୁଟେ ଉଡ଼ାଟ୍, ବେନଡ଼୍ ଇଞ୍ଜେ ପେର୍‍କେ ମାନ୍ଦାନଡ଼୍ ବେସ୍‍ତୁଡ଼୍ ମୁନ୍‍ ଆଦ୍‍ତଡ଼୍ ମେଣ୍ଡେ, ମୁନ୍‍ ମାନ୍ଦାନଡ଼୍ ବେସ୍‍ତୁଡ଼୍ ପେର୍‍କେ ଆଦ୍‍ତଡ଼୍ ।”
LUK 13:31 ଆଦ୍ ଦିନାମ୍ ତେ ବେସ୍‍ତୁଡ଼୍ ପାରୂଶୀ ନାରୁଡ଼୍ ୱାସ୍ ଜିସୁଙ୍କ୍ କେତ୍‍ତଡ଼୍, “ହି ପଡ଼ିୟ୍ ୱିଡ଼୍‍ସି ବେଗ୍‍ଆୟି ଅନ୍‌ । ବାତେଙ୍କ୍ ଇତ୍କେ ହେରଦ୍ ରାଜାଲ୍ ନିକିଂଙ୍କ୍ ଆୱ୍‍କାଂଙ୍କ୍ ଇଚ୍ଛା ମାଡ଼ୁତଣ୍ଡ୍ ।”
LUK 13:32 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ଆନୁଟ୍, ଆଦ୍ କଙ୍ଗାନାକାତିଙ୍କ୍ କେଲ୍‍ମୁଟ୍, ନାନେ ନେଣ୍ଡ୍ ନୁ ନାଡ଼୍ ବୁତ୍‌କିଂଙ୍କ୍ ତଲିତାନ୍ ମେଣ୍ଡେ ନୁ ନାରୁଡ଼୍‍କିଂଙ୍କ୍ ସୁସ୍ଥ ମାଡ଼ିତାନ୍, ମୁଣ୍ଡ୍ ଦିନାତେ ନା ପାଡ଼ିୟ୍‍ ତେରିତ୍ ।
LUK 13:33 ବେଲାମେଣ୍ଡେ ଆୟି, ନାକିଂଙ୍କ୍ ନେଣ୍ଡ୍, ନାଡ଼୍ ନୁ ମାନେଟି ଯାକ ଆଦ୍‍ ୱେୟ୍‍ତିତ୍, ବାତେଙ୍କ୍ ଇତ୍କେ ଯିରୁଶାଲେମ୍‍ତେ ବାୟିଦେ ବାବବାଦୀଡ଼୍ ଡୋଲାନାଦ୍ ଲେକେତ୍ ଆୟ୍‍ୟ ।
LUK 13:34 ହୋ ଯିରୁଶାଲେମ୍ ହୋ ଯିରୁଶାଲେମ୍ ନିମେ ତ ବାବବାଦୀ ଲଡ଼୍‍କିଙ୍କ୍ ଆୱ୍‍କ୍‌ତି । ବେନ୍ ନାରୁଡ଼୍‍କିଂଙ୍କ୍ ପରମେଶ୍ୱର୍‍ ନି ଗାର୍‍ରେ ରୟ୍‍ସ୍‍ ମାତ୍‍ତେ, ନିମେ ଅଡ଼୍‌‍କିଂଙ୍କ୍ କାଲ୍‍କ୍ ହେସି ରେହେତିଡ଼୍‍ । ୱେରଡ଼୍ କୋର୍‍ ତାନ୍ ରେକାନ୍ ମଦଲ୍ କୋର୍‍ପିଲାଙ୍କ୍ ଅଣ୍ଡୟ୍‌‍ୟାଗ୍ ଗୁଡ଼୍‍ପାନ୍ ଲେକାମ୍, ନାନେ ମି ନାରୁଡ଼୍‍କିଂଙ୍କ୍ ଅଣ୍ଡୟ୍‌‍ୟାଗ୍ ଗୁଡ଼୍‍ପାଙ୍କ୍ ଇଚ୍ଛା ମାଡ଼ିମାତ୍‍ତାନ୍ । ବାତେଙ୍କ୍ ଇତ୍କେ ମିଡ଼୍ ନାକିଂଙ୍କ୍ ଆଦ୍ ଲେକାମ୍ ମାଡ଼ାଙ୍କ୍ ହିୱିଡ଼୍ ।
LUK 13:35 ଉଡ଼େ, ନିୟାଦ୍ ମନ୍ଦିର୍‍ତିଙ୍କ୍ ମି ନାରୁଡ଼୍ ୱିଡ଼୍‍ସିତ୍‍ତଡ଼୍ । ନାନେ ନିକିଂଙ୍କ୍ କେତୁତାନ୍, “ପ୍ରବୁନ୍ ପେଦେର୍ ତେ ବେନ ୱାଦୁତଣ୍ଡ୍, ଅନ୍‌ ଦନ୍ୟ, ଇଦ୍ କେଲ୍‍ୱେ ଯାକ ନିମ୍‍ ନାକିଂଙ୍କ୍ ମେଣ୍ଡେ ଉଡ଼୍ ପାର୍‍ୱିନ୍ ।”
LUK 14:1 ଅନ୍‌‍ଦାମ୍ ବିଶ୍ରାମ୍‍ଦିନାତେ ଜିସୁ ୱେରଣ୍ଡ୍ ପାରୂଶୀ ନାରୁଡ଼୍ ନେତାନ୍ ଲୋନ୍‌ ତିନ୍ଦାନ୍ ମାଇଦିଙ୍କ୍ ଆତ୍‍ତଣ୍ଡ୍, ମେଣ୍ଡେ ଅଡ଼୍‌‍ ଆଗେ ଜିସୁଙ୍କ୍ ସାୟ୍ ଲକ୍ଷ ମାଡ଼ି ଉଡ଼ମାତ୍‍ତଡ଼୍ ।
LUK 14:2 ଆସୁଟେ ଉଡ଼େ, ଜିସୁନ୍ ମୁନେ ୱେରଣ୍ଡ୍ ଜଲଦର ରୋଗ୍‍ତେ ନାରୁନ୍‌ ମାତ୍‍ତଣ୍ଡ୍ ।
LUK 14:3 ଜିସୁ ପାରୂଶୀନଡ଼କ୍ ନୁ ଦର୍ମଶାସ୍ତ୍ରୀନଡ଼କ୍ କେତ୍‍ତଣ୍ଡ୍, ବିଶ୍ରାମ୍‍ଦିନାତେ ସୁସ୍ଥ ମାଡ଼ାନାଦ୍ ଟିକ୍ ନିୟମ୍‍ ନା ଆୟ ? ବାତେଙ୍କ୍ ଇତ୍କେ ଅଡ଼୍‌‍ କଟ ଆଶେ ମାତ୍‍ତଡ଼୍ ।
LUK 14:4 ଆସୁଟେ, ଜିସୁ ଆଦ୍ ନାରୁଙ୍କ୍ ପୟିସ୍ ସୁସ୍ଥ ମାଡ଼୍‍ତଣ୍ଡ୍ ନୁ ରୟ୍‍ସିତ୍‍ ତଣ୍ଡ୍ ।
LUK 14:5 ଆସୁଟେ, ଜିସୁ ଅଡ଼୍‌‍କିଂଙ୍କ୍ ଉତ୍ତର୍‌ ଇସ୍‌ କେତ୍‍ତଣ୍ଡ୍, “ମି ଲୋପେଙ୍କ୍ ବେନନ୍ ମାର୍‍ କି ଗଡ୍‌କନ୍ଦ୍‌ ବିଶ୍ରାମ୍‍ଦିନ୍‍ ତେ ନୂୟ୍‍ଦାଗ୍‍ ରାଲ୍‍କେ, ମିଡ଼୍ ବାତେଏ ତାକିଂଙ୍କ୍ ସାଙ୍ଗେ ସାଙ୍ଗେ ତେୟ୍‍ସ୍ ତାଡ଼୍‍ୱିଡ଼୍ ?”
LUK 14:6 ମେଣ୍ଡେ ଅଡ଼୍‌‍ ଆଦ୍ ବିଷୟ ତେ ବାତ୍ ଉତ୍ତର୍ ଇଦ୍ ପାର୍‍ୱଡ଼୍ ।
LUK 14:7 ଜିସୁ ଉଡ଼୍‍ତଣ୍ଡ୍ ଯେ, ବେସ୍‍ତୁଡ଼୍ କୁଟ୍‍ମାମ୍‍ ତଡ଼୍ କୁଦାନ୍‍ ମାଇଦିଙ୍କ୍ ସାୟେତ୍ କେତ୍‌ ମେହ୍‍କ ମାତ୍‍ତଡ଼୍ । ଆସୁଟେ, ଜିସୁ ଅଡ଼୍‌‍କିଂଙ୍କ୍ ହି ୱେଷଡ଼୍ କେତ୍‍ତଣ୍ଡ୍,
LUK 14:8 “ଯଦି ୱେରଣ୍ଡ୍ ନାରୁଡ଼୍ ନିକିଂଙ୍କ୍ ପେଣ୍ଡୁଲ୍‍ତାଗ୍ କାର୍‍ଙ୍ଗୁତଣ୍ଡ୍, ଆଲାତ୍କେ ସାର୍‍ତିଙ୍କ୍ ମୁକ୍ୟ କୁର୍‍ସ୍‍ତାଗ୍‍ କୁଦ୍‍ମା । ବାତେଙ୍କ୍ ଇତ୍କେ ଆଦ୍ ନାରୁଡ଼୍ ନିକିଂଙ୍କ୍‌ ଆନ୍ତେ ଅଦିକ୍‌ ବେଡ଼୍‍ୟ୍ ନାରୁଡ଼୍ କାର୍‍ଙ୍ଗି ମାନ୍‍ତଣ୍ଡ୍ ।
LUK 14:9 ନିମ୍‍ ଯଦି ସାର୍‍ତିଙ୍କ‍ ଅନ୍‌ ମୁକ୍ୟ ଆସନ୍ ତାଗ୍ କୁଦି ମାନ୍‍ତି, ଆଲାତ୍କେ ନିକିଂଙ୍କ୍ କାର୍‍ଙ୍ଗିମାନ୍ଦାନ୍ ନାରୁଡ଼୍ ୱାସ୍ କେତିତଣ୍ଡ୍, ହି ନାରୁଙ୍କ୍ ନିୟାଦ୍ ଆସନ୍ ହିମ୍ । ଆସୁଙ୍କ୍ ନିକିଂଙ୍କ୍ ଗାଟି ଅପ୍‍ମାନ୍ ଆଦ୍ ତେ ।
LUK 14:10 ବେସୁଙ୍କ୍‍ ୱେରଣ୍ଡ୍ ନାରୁଡ଼୍ ନିକିଂଙ୍କ୍ ବଜିତାଗ୍ କାର୍‍ଙ୍ଗୁତଣ୍ଡ୍ ଆସୁଟେ, ନିମେ ୱେରଡ଼୍ ସୁଦୁରାଦ୍ ଆସନ୍ ତାଗ୍ କୁଦ୍ । ଆସୁଙ୍କ୍ ନିକିଂଙ୍କ୍ କାର୍‍ଙ୍ଗ୍‍ତେ ନାରୁଡ଼୍ ୱାସ୍ ନିକିଂଙ୍କ୍ କେତିତଣ୍ଡ୍, ହୋ ସାଙ୍ଗ, ନିମେ, ହିଗେ କୁଦକଟ ସୁଦୁର୍ ମୁନ୍‍ୱାସ୍ ହି ସାୟେତ୍ ଆସନ୍ ତାଗ୍ କୁଦ୍‍ । ଆସୁଙ୍କ୍ ବାଗାତଡ଼୍ ୱାସ୍‍ମାନ୍ଦାନ୍ କୁଟ୍‍ମାମ୍‍ ଆନ୍‌‍ତେ ନିକିଂଙ୍କ୍ ସମ୍ମାନ୍ ଇଦ୍‍ତଡ଼୍ ।
LUK 14:11 ବେନ୍ ନାରୁଡ଼୍ ନିଜ୍‍ତିଙ୍କ୍ ମହାନ୍ ଇଞ୍ଜ ଆଲ୍‍ସିତିଡ଼୍, ଅଂକିଙ୍କ୍‌ ହୀନ ମାଡ଼୍‍ୱେୟ୍‍ତିତ୍ । ବେନ୍ ନାରୁଡ଼୍ ନିଜ୍‍ତିଙ୍କ୍ ହୀନ ଇଞ୍ଜ ଆଲ୍‍ସିତିଡ଼୍, ଅଂକିଙ୍କ୍‌ ମହାନ୍ ମାଡ଼୍‍ୱେୟ୍‍ତିତ୍ ।”
LUK 14:12 ଜିସୁ ଅଂକିଙ୍କ୍‌ କାର୍‍ଙ୍ଗି ମାନ୍ଦାନ୍ ପାରୂଶୀ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, “ନିମେ ବେନଙ୍କ୍ ଆୟି ପାୟାଲ୍ ବା ନାର୍କାତେ ତିନ୍ଦାଙ୍କ୍ କାର୍‍ଙ୍ଗ୍‍ତେ ୱେୟ୍ ମାତର୍ ନି ଦାଦାଲ୍‌, ସାଙ୍ଗଙ୍କ୍, କୁଟୁମାମ୍‍ ସାଉକାର୍‍ରିଡ଼୍ ନୁ ଗାରେତଡ଼୍ ନାରୁଡ଼୍‍କିଂଙ୍କ୍ କାର୍‍ଙ୍ଗ୍‍ମାଟ୍, ବାତେଙ୍କ୍ ଇତ୍କେ ମେଣ୍ଡନ୍‍ଦାମ୍ ଦାମ୍ ଅଡ଼୍‌‍ ଆନ୍‌‍ତେ ନିକିଂଙ୍କ୍ ଅଡ଼୍‌‍ ତ ତିନ୍ଦାଙ୍କ୍ କାର୍‍ଙ୍ଗି ତଡ଼୍ । ଆସୁଙ୍କ୍ ନିମେ ନିୟାଦ୍ ସାରେଦାନ୍ ଦର୍‍ସ୍‍ତିନ୍ ।
LUK 14:13 ବାତେଙ୍କ୍ ଇତ୍କେ ବୋଜି ହିଦାନ୍ ଦିନାମ୍ ତେ ଗୋରିବ୍, ପଙ୍ଗୁ, କୁଟାଲଡ଼୍‍କ୍ ନୁ କାନାଲଡ଼୍‍କିଙ୍କ୍ କାର୍‍ଙ୍ଗାଟ୍ ।
LUK 14:14 ହି ନାରୁଡ଼୍‍କିଂଙ୍କ୍ ବାତା ହିଲ୍‍ୱାଙ୍କ୍ ସାରେବଦଲ୍‍ ତେ ବାତା ଇଦ୍ ପାର୍‍ୱଡ଼୍ । ଆଲାତ୍କେ ମି ମାଇଦିଙ୍କ୍ ଆର୍ଶିବାଦ୍ ଆଦ୍ ତେ । ବାତେଙ୍କ୍ ଇତ୍କେ ବେସୁଙ୍କ୍‍ ଦାର୍ମିକ୍ ନାରୁଡ଼୍ ଡଲ୍‍ତେ ନାରୁଡ଼୍ ଲୋପେଙ୍କ୍ ତେଦିତଡ଼୍, ଆଦ୍ ଦିନାମ୍ ତେ ମିଡ଼୍ ମିୟାଦ୍ ପୁରସ୍କାର୍ ଦର୍‍କିତ୍ ।”
LUK 14:15 ଜିସୁନ୍ ତ ତିନ୍ଦାଙ୍କ୍ କୁଦି ମାନ୍ଦାନ୍ ନାରୁଡ଼୍ ଲୋପେଙ୍କ୍ ୱେରନ୍ ନାରୁଡ଼୍ ହି ସାରେ ଗଟି କେଞ୍ଜି ଜିସୁଙ୍କ୍ କେତ୍‍ତଣ୍ଡ୍, “ପରମେଶ୍ୱର୍‍ତେ ରାଜ୍ୟତାଗ୍ ତିନ୍ଦାନ୍ ମାଡ଼ାନ୍ ନାରୁଡ଼୍ ଗାଟି କୁସି ବା ସାର୍‍ଦା ଆଦ୍‍ତନ୍ ।”
LUK 14:16 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, ୱେରଣ୍ଡ୍ ନାରୁଡ଼୍ ୱେରଡ଼୍ ବେଡ଼୍‍ୟାଦ୍‍ ବଜି ମାଡ଼୍‍ତଣ୍ଡ୍ ନୁ ନାର୍ଗେ ନାରୁଡ଼୍‍କିଂଙ୍କ୍ କାର୍‍ଙ୍ଗ୍ ତଣ୍ଡ୍ ।
LUK 14:17 ତିନ୍ଦାନ୍ ଦିନାମ୍ ଆଦାଙ୍କ୍ ଅଣ୍ଡ୍‌ କୁଟ୍‍ମାମ୍ କାର୍‍ଙ୍ଗାନ୍ ମାଇଦିଙ୍କ୍ ନିଜର୍ ଚାକର୍‍ତିଙ୍କ୍ ରହ୍‍ତଣ୍ଡ୍, ୱାଡ଼ାଟ୍, ତିନ୍ଦାନାଦ୍ ସାରେ ତିଆର୍‍ତେ ଆତ୍‍ତେ ।
LUK 14:18 ବାତେଙ୍କ୍ ଇତ୍କେ କାର୍‍ଙ୍ଗ୍‍ତେ ନାରୁଡ଼୍ କେତ୍‍ତଡ଼୍ ଯେ, ଅଡ଼୍‌‍ ଆଦେ ପାର୍‍ୱଡ଼୍ । ମୁନେ ନାରୁଡ଼୍ କେତ୍‍ତଣ୍ଡ୍, ନାନେ ଇଞ୍ଜେ ୱେରନ୍ ୱାୟା ଆସ୍‍ତାନ୍ । ଆଦ୍ ୱାୟାଙ୍କ୍ ଉଡ଼ାନ୍ ମାଇଦିଙ୍କ୍ ନାକିଂଙ୍କ୍ ଇଞ୍ଜ୍ ଆଦ୍ ୱେୟ୍‍ତିତ୍ । ଦୟା ମାଡ଼ି ନାକିଂଙ୍କ୍ କ୍ଷମା ହିମ୍ ।
LUK 14:19 ମେଣ୍ଡେ ୱେରଣ୍ଡ୍ କେତ୍‍ତଣ୍ଡ୍, ନାନେ ଏଇଙ୍ଗ୍ ହେଣ୍ଡ୍‍କ୍ ଗଡ୍‌କନ୍ଦା ଆସିମିନ୍ଦେନ୍ । ନାନେ ଆୱିଙ୍କ୍ ପରିକ୍ଷା ମାଡ଼ାନ୍ ମାଇଦିଙ୍କ୍ ଆଦ୍‍ଦାନ୍ ମିନ୍ଦେ । ଦୟା ମାଡ଼ି ନାକିଂଙ୍କ୍ କ୍ଷମା ମାଡ଼ା ।
LUK 14:20 ତୃତୀୟ ନାରୁଡ଼୍ କେତ୍‍ତଣ୍ଡ୍, ନାନେ ପୁଃନେ ପୁଃନେ ପେଣ୍ଡୁଲ୍ ଆତ୍‍ତାନ୍‍, ନାନ୍ ଆଦ୍‍ପାର୍‍ୱନ୍ ।
LUK 14:21 ଆସୁଟେ, “ଚାକର୍ ମାଲ୍‍ସ୍ ୱାସ୍, ମାଲିକ୍‍ତିଙ୍କ୍ ସାର୍‍ରେଗଟି କେସିତ୍‍ତଣ୍ଡ୍, ମାଲିକ୍ ଆଦ୍ ଗଟି କେଞ୍ଜି ଗାଟି କପାମ୍ ଆତ୍‍ତଣ୍ଡ୍ ବା, କେତ୍‍ତଣ୍ଡ୍, ସିଟ୍‍ପାଟ୍ ନାର୍ ଗଲିକିନାଗ୍ ଆଞ୍ଜ୍ ଦରିଦ୍ର, ପଙ୍ଗୁ, କାନାଲଡ଼କ୍ ନୁ କୁଟା ନାରୁଡ଼୍‍କିଂଙ୍କ୍ କାର୍‍ଙ୍ଗି ତାଡ଼ାଟ୍ ।
LUK 14:22 ପେର୍‍କେ ଚାକର୍ ମାଲ୍‍ସ୍ ୱାସ୍ କେତ୍‍ତଣ୍ଡ୍, ମାଲିକ୍ ନିମେ ବାତ୍ କେତ୍‍ତିନ୍, ଆଦ୍ ନାନେ ମାଡ଼୍‍ତାନ୍ । ମେଣ୍ଡେ, ପେର୍କେ ନାରୁଡ଼୍ ମାଇଦିଙ୍କ୍ ପଡ଼ିୟେ ମାୟ୍‍ତା ।
LUK 14:23 ମାଲିକ୍ ଚାକର୍‍ତିଙ୍କ୍ କେତ୍‍ତଣ୍ଡ୍, ରାଜଆର୍‍ତା ନୁ ନାର୍‍ଦେ ଆର୍‍ଦା ଆଞ୍ଜ୍ । ଆଗେ ମାନ୍ଦାନ୍ ନାରୁଡ଼୍‍କିଂଙ୍କ୍ ୱାଦାନ୍ ମାଇଦିଙ୍କ୍ କେଲ୍‍ମ୍ । ନାନେ ଆଲ୍‍ସୁତାନ୍, ନା ଲୋନ୍‌‍ ପୁରାପୁରି ନିଣ୍ଡି ଇଞ୍ଜ ।
LUK 14:24 ନାନ୍ ମି ସାରେତଡ଼୍‌କିଂଙ୍କ୍ କେତୁତାନ୍, ବଜିତାଗ୍ କାର୍‍ଙ୍ଗ୍ ତେ ନାରୁଡ଼୍ ଲୋପେଙ୍କ୍ ବେନ ନାୱାଦ୍ ବଜି ତିନ୍ଦାଙ୍କ୍ ପାର୍‍ୱଡ଼୍ ।”
LUK 14:25 ଅନ୍‌‍ଦାମ୍ ନାର୍ଗେ ନାରୁଡ଼୍ ଜିସୁନ୍ ତ ଆଞ୍ଜ ମାତ୍‍ତଡ଼୍ । ଜିସୁ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍,
LUK 14:26 ଯଦି ୱେରଣ୍ଡ୍ ନାରୁଡ଼୍ ନା ଗାର୍‍ରେ ୱାଦ୍‍ତଣ୍ଡ୍, ଯଦି ନାକିଂଙ୍କ୍‍ ୱିଡ଼୍‍ସି ତେ ୟାୟ୍‍ବାବାଙ୍କ୍, ମୁତ୍‍ତେ, ପିଲାଙ୍କ୍, ଏଲାଡ଼୍‍ ତାମୁଣ୍ଡ୍‌ତିଙ୍କ୍‌ ଜିୱୁଣ୍ଡ୍‍ତେ ପ୍ରେମ୍ ମାଡ଼ମାନ୍‍ତଣ୍ଡ୍, ଆସତ୍‍ ନାରୁଡ଼୍ ହିତ୍‍କେ ନା ଶିଷ୍ୟ ଆଦ୍ ପାର୍‍ୱଣ୍ଡ୍ ।
LUK 14:27 ୱେରଣ୍ଡ୍ ନାରୁଡ଼୍ ନିଜର୍ କ୍ରୁଶତିଙ୍କ୍ କାଞ୍ଜି ନା ପେର୍‍କେ ତାକକଟ୍‍ ମାତ୍‍କେ, ଆସତ୍‍ ନାରୁଡ଼୍ ନା ଶିଷ୍ୟ ଆଦ୍ ପାର୍‍ୱଣ୍ଡ୍ ।
LUK 14:28 ମିଡ଼୍ ଯଦି କେପାନ୍ ଲୋନ୍‌ ମାଡ଼ାଙ୍କ୍ ଇଚ୍ଛା ମାଡ଼ୁତିଡ଼୍, ଆଲାତ୍କେ ମିଡ଼୍ କୁଦି ମୁନେ ଚିହ୍ନେ ମାଡ଼ାନ୍ ମିନ୍ଦେ ଯେ, ଇଦିନ୍‍ ମାଇଦିଙ୍କ୍ ବେସର୍ କର୍ଚ୍ଚ ଆଦ୍‍ତେ । ମିଡ଼୍ ହିସାପ୍ ମାଡ଼ି ଉଡ଼ାନ୍ ମିନ୍ଦ୍ ଯେ, ପାଡ଼ିୟି ମାଡ଼ାନାଦ୍ ତେର୍‍ନା ଯାକ ମିୟାଗ୍ ଡାବ୍ ମିନ୍ଦେ କି ଇଲେ ।
LUK 14:29 ବାତେଙ୍କ୍ ଇତ୍କେ ଅଣ୍ଡ୍‌ ଯଦି ମୁର୍ସ ମାଡ଼ି ଲୋନ୍‌‍ ତେର୍‍ସ୍‍ପେ ପାର୍‍ୱଣ୍ଡ୍, ସାର୍‍ତଡ଼୍ ଆଦିଙ୍କ୍ ଉଡ଼ାନ୍ ନାରୁଡ଼୍ ଅଂକିଙ୍କ୍‌ ପରିହାସ୍ ମାଡ଼ିତଡ଼୍,
LUK 14:30 ଅଡ଼୍‌‍ କେତିତଡ଼୍, ହି ନାରୁଣ୍ଡ୍ ତିଆର୍ ମାଡ଼୍‍ତଣ୍ଡ୍ ବାତେଙ୍କ୍ ଇତ୍କେ ତେର୍‍ସ୍‍ପାଙ୍କ୍ ପାର୍‍ୱଣ୍ଡ୍ ।
LUK 14:31 ୱେରଣ୍ଡ୍ ରାଜାଲ୍‍ ମେଣ୍ଡେଅର୍‍ତୁନ୍‍ ରାଜାନ୍ ବିରୁଦ୍ ତେ ଯୁଦ୍‌ ମାଡ଼ାଙ୍କ୍ ତିଆର୍ ଆଦ୍‍ତନ୍ । ତାମ୍ ବିରୁଦ୍ ତେ ନିଜର୍ କୁଡ଼ିଏ ହଜାର୍‍ ସୌନ୍ୟଡ଼୍‍କ୍ ପୟ୍‍ସ୍ ୱାଦାନ୍ ରାଜାନ୍ ତ ନିଜର୍ ୱେରନ୍ ରାଜା ଦଶ୍‍ହଜାର୍‍ ସୌନ୍ୟଡ଼୍ ଆସ୍ କୁଡ଼ିଏ ହଜାର୍‌ ସୈନିଡ଼୍ ପୟିସ୍ ୱାଦାନ୍ ରାଜାନ୍ ତଡ଼୍ ଯୁଦ୍‌ ମାଡ଼ାଙ୍କ୍ ପାର୍‍ଦ୍‍ତଡ଼୍ କି ଇଲେ, ଆଦ୍ ବାତେଏ ଅଣ୍ଡ୍‌ ମୁନେ କୁଦି ଆଦ୍ ବିଷୟତିଙ୍କ୍ ହେର୍କା ମାଡ଼ଣ୍ଡ୍ କି ?
LUK 14:32 ଯଦି ପାର୍‍ୱଡ଼୍, ଆଲାତ୍କେ ବିରଦି ରାଜାଲ୍‍ ଗାଟି ଯେକା ମାନ୍ଦାନ୍ ୱେୟେ କେ ଅନ୍‌‍ଗାରେ ବେସ୍‍ତୁଡ଼୍ ନାରୁଡ଼୍‍କିଂଙ୍କ୍ ରୟ୍‍ସ୍‍ ପାର୍‍ୱମ୍‍ ଇଞ୍ଜ କେସିଦ୍‍ ତଡ଼୍ ।
LUK 14:33 ଆଦ୍ ପୁଟୁଙ୍କ୍ ମି ଲୋପେଙ୍କ୍ ବେନ ଯଦି ନିଜର୍ ବାତ୍‍ତେବା ୱିଡ଼୍‍ସଣ୍ଡ୍, ଆଲାତ୍କେ ଅଣ୍ଡ୍‌ ନା ଶିଷ୍ୟ ଆଦ୍ ପାର୍‍ୱଣ୍ଡ୍ ।
LUK 14:34 “ଅୱଡ଼୍‌ ତ ସାୟେ; ବାତେଙ୍କ୍ ଇତ୍କେ ଅୱଡ଼୍‌ ଯଦି ତାନ୍ କାର୍‌ଅ ହାରାମାଡ଼ିତ୍‍, ଆଲାତ୍କେ ତାକିଂଙ୍କ୍ ବେଦ୍‍ପୁଟୁଙ୍କ୍ ଅୱଡ଼୍‌ ମାଡ଼୍ ପାର୍‍ଦ୍‍ତାଡ଼୍ ?
LUK 14:35 ଆଦ୍ ବୁମ୍ ବା ମାଣ୍ଡୁଲ୍ ଦିବେତ୍‍ ମାଇଦିଙ୍କ୍ ଆନ୍‌‍ତେ ଲେକେତ୍ ଆୟ୍‍ୟ, ତାକିଂଙ୍କ୍ ବାୟିଦେ ହେସିଦ୍‍ତଡ଼୍ । ବେନଙ୍କ୍ କେଞ୍ଜାଙ୍କ୍ କେୱୁ ମିନ୍ଦେ, ଅଣ୍ଡ୍‌ କେଞ୍ଜିଣ୍ଡ୍ ।”
LUK 15:1 ଅନ୍‌‍ଦିନେ କରଆଦାୟ୍ ମାଡ଼ାନଡ଼ି ନୁ ସମାଜ୍ କଞ୍ଜ୍ ପେସ୍‍ପି ମାନ୍ଦାନ୍ ନାରୁଡ଼୍ ଜିସୁନ୍ ବାକ୍ୟ କେଞ୍ଜାନ୍ ମାଇଦିଙ୍କ୍ ଅନ୍‌ ଗାର୍‍ରେ ୱାସ୍ ମାତ୍‍ତଡ଼୍ ।
LUK 15:2 ବାତେଙ୍କ୍ ଇତ୍କେ ପାରୂଶୀଡ଼୍ ନୁ ଦର୍ମଶାସ୍ତ୍ରୀଡ଼୍ ଅବିଯଗ୍ ମାଡ଼ି କେସମାତ୍‍ତଡ଼୍, ହି ନାରୁଡ଼୍ ସମାଜ୍ କଞ୍ଜ୍ ପେସ୍‍ପି ମାନ୍ଦାନ୍ ନାରୁଡ଼୍‍କିଂଙ୍କ୍ କାର୍‍ଙ୍ଗି ଅଡ଼୍‌‍ ତ କାଇଲି ତିନ୍ଦୁ‍ତଣ୍ଡ୍,
LUK 15:3 ଆଦିଙ୍କ୍, ଜିସୁ ଅଡ଼୍‌‍କିଂଙ୍କ୍ ହି ୱେଷଡ଼୍ କେତ୍‍ତଣ୍ଡ୍ ।
LUK 15:4 ହେର୍କେ ମାଡ଼ାଟ୍ ୱେରନ୍ ନାରୁନାୱୁ ଶହେଟାନ୍ ମେଣ୍ଢା ମାନ୍‍ତା, ମେଣ୍ଡେ ଆୱିନାଗାଙ୍କ୍ ୱେରଡ଼୍ ମେଣ୍ଢା ମାଇହାତ୍କେ, ଆଲାତ୍କେ ଅଣ୍ଡ୍‌ ବାତେଏ ନବ୍‍ବେ ନଅଟାନ୍ ମେଣ୍ଢାଙ୍କ୍ ଡୁକ୍‍ତାଗ୍‍ ୱିଡ଼୍‍ସି, ମାଇ ମାନ୍ଦାନ୍ ମେଣ୍ଢାତିଙ୍କ୍ ଦର୍‍ସ୍‍କ୍‍ ନା ଯାକ ତାକିଂଙ୍କ୍ ମେହ୍‍କାଙ୍କ୍ ଆନଣ୍ଡ୍ କି ?
LUK 15:5 ଅଣ୍ଡ୍‌ ମେହ୍‍କି ଦର୍‍ସ୍‍କି ଗାଟି ସାର୍‍ଦେ ଆଦ୍‍ତନ୍ ମେଣ୍ଡେ ମେଣ୍ଢାତିଙ୍କ୍ ଆଟେତାଗ୍ କାଞ୍ଜି ଲୋନ୍‌‍ ତାତିତଣ୍ଡ୍ ।
LUK 15:6 ଅଣ୍ଡ୍‌ ଲୋନ୍‌ ଆଞ୍ଜ୍ ତାନ୍ ସାଙ୍ଗନଡ଼୍ ନୁ ଗାରେତଡ଼୍‍କ୍ ଅଣ୍ଡୟ୍‌ ଆଗେ କାର୍‍ଙ୍ଗି କେତିତଣ୍ଡ୍, ନା ତଡ଼୍ ସାର୍‍ଦେ ମାଡ଼ାଟ୍, ବାତେଙ୍କ୍ ଇତ୍କେ ନାନେ ନାୟାଦ୍ ମାଇ ମାନ୍ଦାନ୍ ମେଣ୍ଢାତିଙ୍କ୍ ଦର୍‍ସ୍‍କ୍‍ ତାନ୍ ।
LUK 15:7 ଆଦେପୁଟୁଙ୍କ୍ ନାନେ ଆନ୍‌‍ତେ ମିକିଂଙ୍କ୍ କେତୁତାନ୍, ବେନ୍ ନାରୁଡ଼୍ ମନ୍ ପରିବର୍ତ୍ତନ୍ ଆଦ୍‍ଦାନ୍ ଦର୍‍କାର୍ ଇଲେ, ଇସତଡ଼୍ ନବ୍‍ବେ ନଅଜାନ୍ ଦାର୍ମିକ୍ ନାରୁଡ଼୍ ୱିଡ଼୍‍ସି ୱେରଣ୍ଡ୍ ପାପିନାରୁନ୍ ହୃଦୟ୍ ପରିବର୍ତ୍ତନ୍ ଆତ୍‍କେ ସ୍ୱର୍ଗତାଗ୍ ଗାଟି ସାର୍‍ଦ୍‍ ଆଦ୍‌ତେ ।
LUK 15:8 ହେର୍କେ ମାଡ଼ାଟ୍ ଅଣ୍ଡୟ୍‌ ନାଟାଡ଼୍‍ତାଗ୍ ଦଶ୍‍ଟାନ୍‍ ରୂପାଡାବ୍‌ ମାତ୍‍ତା, ବାତେଙ୍କ୍ ଇତ୍କେ ଆୱିନ୍‍ ଲୋପେଙ୍କ୍ ଅଣ୍ଡୟ୍‌ ମାଇ ଆଦ୍‍ତେ । ଆଲେକେ ଆଦ୍ ବାତ୍ ମାଡ଼ିତ୍ ? ଆଲାତ୍କେ ଆଦ୍ ନାଟାଡ଼୍ କୁପି ନିଡ଼୍‍ସ୍‍ପି ଲୋନ୍‌‍ସାରେ ସାୟ୍‍ ମାଡ଼ି କାୟ୍‍ତିତ୍, ମେଣ୍ଡେ, ରୂପାଡାବ୍‌ ଦର୍‍ସ୍‍କ୍‍ ନା ଯାକ ଯତନ୍ ତେ ମେହ୍‍କ କି ?
LUK 15:9 ମେହ୍‍କି ଦର୍‍ସ୍‍କି ଆଦ୍ ତାନ୍ ସାଙ୍ଗକିଂଙ୍କ୍ ନୁ ଗାରେତଡ଼୍‍କ୍ କାର୍‍ଙ୍ଗି କେତିତ୍‍, ନାନେ ଗାଟି ସାର୍‍ଦା । ବାତେଙ୍କ୍ ଇତ୍କେ ନାୟାଦ୍ ମାଇ ମାନ୍ଦାନାଦ୍ ରୂପାଡାବ୍‌ ଦରସ୍‍କ୍‍ତାନ୍ । ୱାଡ଼ାଟ୍ ନା ତଡ଼୍ ସାର୍‍ଦେ ମାଡ଼ାଟ୍ ।
LUK 15:10 ଆଦେପୁଟୁଙ୍କ୍ ୱେରଣ୍ଡ୍ ପାପିନାରୁଣ୍ଡ୍ ତାନ୍ ହୃଦୟ୍‍ତିଙ୍କ୍ ପରିବର୍ତ୍ତନ୍ ମାଡ଼କେ, ପରମେଶ୍ୱରତେ ଦୂତକିନ୍ ମୁନ୍‍ନେ ଗାଟି ସାର୍‍ଦ୍‍ ଆଦ୍‍ତେ ।
LUK 15:11 ଜିସୁ ମେଣ୍ଡନ୍‍ଦାମ୍ କେତ୍‍ତଣ୍ଡ୍, ୱେରଣ୍ଡ୍ ନାରୁଙ୍କ୍ ଇର୍‍ୱୁଡ଼୍ ମାର୍‍କ୍ ମାତ୍‍ତଡ଼୍ ।
LUK 15:12 ସୁଦୁର୍‍ ମାର୍‍ ତାମ୍ ବାବାଙ୍କ୍ କେତ୍‍ତଣ୍ଡ୍, ବାବା, ନା ଦୁଡ଼େ ସମ୍ପତ୍ତି ନାକିଂଙ୍କ୍ ହିମ୍ । ଆସୁଟେ ତାମ୍‍ବାବାଲ୍ ତାନ୍ ସମ୍ପତ୍ତିତିଙ୍କ୍ ଇର୍‍ୱୁଡ଼୍‍କ୍‍ ତୁସିତ୍‍ତଣ୍ଡ୍ ।
LUK 15:13 ବେସ୍‍କ୍‍ଦିନାତ୍‍ ପେର୍‍କେ ସୁଦୁର୍‍ ମାର୍‍ ଅନ୍‌ ଦୁଡ଼େ ସମ୍ପତ୍ତି ପୟ୍‍ସ୍ ଯେକା ଦେଶ୍ ଆଦ୍‍ତନ୍ । ଅଣ୍ଡ୍‌ ଆଗେ ମଣ୍ଡି ହିନା ଗେଲ୍‍ସି ସାରେ ଦନ୍‍ସମ୍ପତ୍ତି ଉଡ଼ାମାଡ଼୍‍ ତଣ୍ଡ୍ ।
LUK 15:14 ଅଣ୍ଡ୍‌ ସାର୍‍ରେ ଡାବ୍ କର୍ଚ୍ଚମାଡ଼ି ତେର୍‍ତେ ୱେୟ୍, ଆଦ୍ ଦେଶ୍‍ତାଗ୍ ବୟ୍‍ଙ୍କାର୍‍ ତୁପାନ୍‌ ଆଦ୍‍ତା । ଅଂକିଙ୍କ୍‌ ଆଗେ ବାତେମେଣ୍ଡେ ଦର୍‍କ୍‍ୱାଙ୍କ୍ କାର୍‍ୱିନ୍ ମାନ୍ଦେୱେୟ୍‍ତେ । ଅଂକିଙ୍କ୍‌ ଅବାବ୍ ଆଦ୍ ୱେୟ୍‍ତେ ।
LUK 15:15 ଆସୁଟେ ଅଣ୍ଡ୍‌ ଆଦ୍ ଦେଶ୍‍ତେ ଅରତୁଣ୍ଡ୍ ନାରୁନାଗ୍ ଆଞ୍ଜ୍ ଗତିତ୍‍ ଲେକାମ୍ ମାତ୍‍ତଣ୍ଡ୍, ଆଦ୍ ନାରୁଡ଼୍ ଅଂକିଙ୍କ୍‌ ଅନ୍‌ ୱାୟାନା ପାଦି ମେଇତାଙ୍କ୍ ରହ୍‍ତଣ୍ଡ୍ ।
LUK 15:16 ପାଦି ତିନ୍ଦାନ୍ କାଦି, ତିଞ୍ଜ୍ ଅଣ୍ଡ୍‌ ପଟ୍‍ଟେ ନିହ୍‍ତାଙ୍କ୍ ଇଚ୍ଛା ମାଡ଼୍‍ତଣ୍ଡ୍, ବାତେଙ୍କ୍ ଇତ୍କେ ବେନମେଣ୍ଡେ ଅଂକିଙ୍କ୍‌ ବାତା ହିୱଡ଼୍ ।
LUK 15:17 ଆସୁଙ୍କ୍ ଅଂକିଙ୍କ୍‌ ହେର୍କା ମାଡ଼ି କେତ୍‍ତଣ୍ଡ୍, ନା ବାବାନ୍ ଲୋନ୍‌ ଚାକରିଡ଼୍ ଚାକୁର୍‍ତିନ୍ଦାନ୍‍ ୱେୟ୍ ଚାକର୍ ମାଇସ୍ ଆଦୁତ୍‍, ବାତେଙ୍କ୍ ଇତ୍କେ ନାନେ ଇଗ୍ କାର୍‍ୱିନ୍ ଡଲୁତାନ୍ ।
LUK 15:18 ନାନେ ତେଦୀ ନା ବାବାନ୍ ଗାର୍‍ରେ ମାଲ୍‍ସ୍ ଆଦ୍‍ତନ୍ ବା ଅଂକିଙ୍କ୍‌ କେତିତାନ୍, ବାବା, ଇଶ୍ୱରତେ ବିରୁଦି ତେ ନୁ ନି ବିରୁଦି ତେ ନାନେ ପାପ୍‌ ମାଡ଼୍‍ତାନ୍ ।
LUK 15:19 ନି ମାର୍‍ ଇଞ୍ଜ କାର୍‍ଙ୍ଗାନଙ୍କ୍ ନାନେ ଯୋଗ୍ୟ ଇଲେନ୍ । ନାକିଂଙ୍କ୍ ନି ଚାକର୍ ହିନା ନେହେମ୍ ।
LUK 15:20 ଆସୁଟେ ଅଣ୍ଡ୍‌ ତେଦି ତାମ୍ ବାବାନ୍ ଗାର୍‍ରେ ଆତ୍‍ତଣ୍ଡ୍ । ବାତେଙ୍କ୍ ଇତ୍କେ ଅଣ୍ଡ୍‌ ଯେକା ମାନ୍ଦାନାଦ୍ ତାମ୍ ବାବାଲ୍ ଅଂକିଙ୍କ୍‌ ଉଡ଼ି ଦୟାତେ ବିଗଲିତ ଆତ୍‍ତଣ୍ଡ୍, ବା ମିରିଆଞ୍ଜ୍ ଅଂକିଙ୍କ୍‌ ଉର୍‍ଙ୍ଗି ନମସ୍କାର୍‍ ମାଡ଼୍‍ତଣ୍ଡ୍ ।
LUK 15:21 ମାର୍‍ ଅଂକିଙ୍କ୍‌ କେତ୍‍ତଣ୍ଡ୍, ବାବା, ଇଶ୍ୱର୍‌ତେ ବିରୁଦି ତେ ନୁ ନି ବିରୁଦି ତେ ନାନେ ପାପାମ୍ ମାଡ଼୍‍ତାନ୍, ମାର୍‍ ଇଞ୍ଜ କାର୍‍ଙ୍ଗାନାଦ୍‍ ନାନେ ଯୋଗ୍ୟ ଇଲେନ୍ ।
LUK 15:22 ବାତେଙ୍କ୍ ଇତ୍କେ ବାବାଲ୍ ତାମ୍ ଚାକରିଡ଼ିକ୍ କେତ୍‍ତଣ୍ଡ୍, ସିଟ୍‍ପାଟ୍ ଆଞ୍ଜ୍ ସାର୍‍ରେ ଲେକେତାଉ ଚକାସିଲେ ତାସ୍ ଇକିଂଙ୍କ୍ କେର୍‍ସ୍ପିମୁଟ୍ । ଇନ୍‍ କାୟ୍‍ଦାଗ୍‍ ମୁଦ୍‍ ନୁ ଡେକାନାଗ୍‍ ହେର୍‍ପୁକ୍ କେର୍‍ସ୍ପିମୁଟ୍ ।
LUK 15:23 ମେନ୍ଦୁଲ୍ ମାନ୍ଦାନ୍ ପେୟେତିଙ୍କ୍ ତାସ୍ ଆୱୁକାଟ୍, ୱାଡ଼ାଟ୍, ମାନାଡ଼୍ ବୋଜିତାଗ୍ ସାର୍‍ଦେ ମାଡ଼୍‍ନା ।
LUK 15:24 ବାତେଙ୍କ୍ ଇତ୍କେ ନା ହି ମାର୍‍ ଡଲି ମାତ୍‍ତଣ୍ଡ୍, ମେଣ୍ଡନ୍‍ଦାମ୍ ଗେଲ୍‍ସ୍‍ତଣ୍ଡ୍; ମାଇମାତ୍‍ତଣ୍ଡ୍, ମେଣ୍ଡେ ଦରକ୍‍ତଣ୍ଡ୍ । ଆସୁଟେ ଅଡ଼୍‌‍ ଗାଟି ସାର୍‍ଦ୍‍ ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ ।
LUK 15:25 ଆଦ୍ ଦିନାମ୍ ତେ ବେଡ଼୍‍ୟ୍ ମାର୍‍ ୱାୟାନା ମାତ୍‍ତଣ୍ଡ୍ । ଅଣ୍ଡ୍‌ ବେସୁଙ୍କ୍‍ ଲୋତ୍ ଗାର୍‍ରେ ୱାସ୍ ହେଉତଣ୍ଡ୍, ଆସୁଟେ, ଅଣ୍ଡ୍‌ ଡୋଲା ନୁ ହେନ୍ଦାନାଦ୍ ମର୍‍ରେ କେଞ୍ଜ୍‍ତଡ଼୍,
LUK 15:26 ଆସୁଟେ ଅଣ୍ଡ୍‌ ୱେରଣ୍ଡ୍ ଚାକର୍‍ତିଙ୍କ୍ କାର୍‍ଙ୍ଗି ଇଗ୍ ବାତ୍ ଆଦୁତ୍‍ ଇଞ୍ଜ କେତ୍‍ତଣ୍ଡ୍ ।
LUK 15:27 ଚାକର୍ ଅଂକିଙ୍କ୍‌ କେତ୍‍ତଣ୍ଡ୍, ନି ତାମୁଣ୍ଡ୍‌ ଲୋନ୍‌ ମାଲ୍‍ସ୍ ୱାସ୍‍ମିନ୍ଦେଣ୍ଡ୍, ସାଏତ୍ ମେନ୍ଦୁଲ୍ ତେ ମାଲ୍‍ସ୍ ୱାସ୍ ମାନ୍ଦାନ୍ ମାଇଦିଙ୍କ୍ ମେନ୍ଦୁଲ୍‍ମାନ୍ଦାନ୍ ଗଡ୍‍ତିଙ୍କ୍ ଆୱୁକି ବଜି ମାଡ଼ୁତଡ଼୍ ।
LUK 15:28 “ବେଡ଼୍‍ୟ୍ ଦାଦାଲ୍ କପାମ୍ ଆଶେ ଲୋପ୍ ଆଦାଙ୍କ୍ ରାଜି ଆୟ୍‍ୟଣ୍ଡ୍ । ଆସୁଟେ ତାମ୍ ବାବାଲ୍ ବାୟିଦେ ୱାସ୍ ଅଂକିଙ୍କ୍‌ ଗାଟି ବୁଜାମାଡ଼୍‍ତଣ୍ଡ୍ ।
LUK 15:29 ବାତେଙ୍କ୍ ଇତ୍କେ ବେଡ଼୍‍ୟ୍ ମାର୍‍ ତାମ୍ ବାବାଙ୍କ୍ କେତ୍‍ତଣ୍ଡ୍, ଉଡ଼େ, ହିସ ଏଣ୍ଡ୍ ଆଦୁତ୍‍ତେ ନାନେ ନି ଦାସ ଲେକାମ୍ ତାକ ୱାଦୁତାନ୍, ବାତେଙ୍କ୍ ଇତ୍କେ ବେସୁଙ୍କ୍‍ ବା ନି ଗଟ୍ ଅମାନ୍ୟ ମାଡ଼ାନ୍, ବେସୁଙ୍କ୍‍ ବା ନାକିଂଙ୍କ୍ ନା ସାଙ୍ଗଡ଼୍ ତ ବଜି ମାଡ଼ାଙ୍କ୍ ନିମ୍‍ ନାକିଂଙ୍କ୍ ମେକ୍‍ପିଲ୍ ବା ହିୱିନ୍‍ ।
LUK 15:30 ବାତେଙ୍କ୍ ଇତ୍କେ ହିଣ୍ଡ୍ ନି ମାର୍‍ ନି ସମ୍ପତ୍ତିତିଙ୍କ୍ କଜାନଡ଼୍ ତ ଉଡ଼ାମାଡ଼ିସ୍‍ ଇଞ୍ଜ୍ ବେସୁଟ୍‌ ଅଣ୍ଡ୍‌ ଲୋନ୍‌ ମାଲ୍‍ସ୍ ୱାସ୍ ମିନ୍ଦେଣ୍ଡ୍ ନିମ୍‍ ଅନ୍‌ ମାଇଦିଙ୍କ୍ ମେନ୍ଦୁଲ୍ ମାନ୍ଦାନ୍ ପେୟେତିଙ୍କ୍ ରେହେସ୍ ବୋଜି ମାଡ଼୍‍ତିନ୍ ।
LUK 15:31 ଆସୁଟେ ତାମ୍ ବାବାଲ୍ କେତ୍‍ତଣ୍ଡ୍, ପେକାଲ୍, ନିମ୍‍ ତ ସାର୍‍ଦାମ୍‍ ନା ତ ମାନ୍ଦୁତି, ବାତାମେଣ୍ଡେ ସାରେ ନାୟାୱୁ, ହାଉସାରେ ନିୟାୱୁ;
LUK 15:32 ବାତେଙ୍କ୍ ଇତ୍କେ ହିଣ୍ଡ୍ ଯେ, ନି ତାମୁଣ୍ଡ୍‌ ଡଲି ମାତ୍‍ତଣ୍ଡ୍, ମେଣ୍ଡନ୍‍ଦାମ୍ ଗେଲ୍‍ସ୍‍ତଣ୍ଡ୍; ମାଇମାତ୍‍ତଣ୍ଡ୍, ମେଣ୍ଡେ ଦରକ୍‍ତଣ୍ଡ୍, ଆଦିନ୍ ମାଇଦିଙ୍କ୍ ମାନାଡ଼୍ ଗାଟିସାର୍ଦା ମାଡ଼ାନ୍ ମାତ୍‍ତା ।”
LUK 16:1 ଜିସୁ ତାନ୍ ଶିଷ୍ୟଡ଼୍‍କ୍ ଆନ୍‌‍ତେ କେତ୍‍ତଣ୍ଡ୍‍, ୱେରଣ୍ଡ୍, ସାଉକାର୍‍ ନାରୁଡ଼୍ ମାତ୍‍ତଣ୍ଡ୍; ସାଉକାର୍‍ ତାନ୍ ସମ୍ପତ୍ତିତିଙ୍କ୍ ବୁଜାସୁଜା ମାଡ଼ାନ୍ ମାଇଦିଙ୍କ୍ ଗୁମାସ୍ତାଙ୍କ୍ ନେହେସ୍ ମାତ୍‍ତଣ୍ଡ୍ । ସାଉକାର୍‍ ଅର୍‍ତୁନ୍‍ ନାଗାଙ୍କ୍ କେଞ୍ଜ୍‍ତଣ୍ଡ୍ ଯେ, ଗୁମାସ୍ତାଲ୍ ଅଂକିଙ୍କ୍‌ ବୁସାମାଡ଼ ମାତ୍‍ତଣ୍ଡ୍ ।
LUK 16:2 ଆସୁଙ୍କ୍ ଅଣ୍ଡ୍‌ ଆଦାନଡ଼୍‌କିଂଙ୍କ୍ କାର୍‍ଙ୍ଗି କେତ୍‍ତଣ୍ଡ୍, ନାନେ ନି ବିଷୟତେ ଇଲା ବାତେଙ୍କ୍ କେଞ୍ଜୁତାନ୍ ? ନିୟାୱ୍‍ ଆୟବ୍ୟୟତ୍ ହିସାପ୍ ହିମ୍, କାରନ୍‍ ନିମେ ମେଣ୍ଡେ ଗୁମାସ୍ତା ଆସ୍ ମାନ୍ଦେପାର୍‍ୱିନ୍ ।
LUK 16:3 ଗୁମାସ୍ତାଲ୍ ହେର୍କେ କେତ୍‍ତଣ୍ଡ୍, ନାନେ ଇଞ୍ଜ୍ ବାତ୍ ମାଡ଼ିତାନ୍ ? ନା ମାଲିକ୍ ତ ପାଡ଼ିୟିତାଗାଙ୍କ୍ ନାକିଂଙ୍କ୍ ପେସ୍ପିଦୁତଣ୍ଡ୍ । ମାଣ୍ଡୁଲ୍‍ ଡେୱାଙ୍କ୍ ତ ନାକିଂଙ୍କ୍ ଶକ୍ତି ଇଲେ, ବିକ୍‍ ତାଲ୍‍କାଙ୍କ୍ ନାକିଂଙ୍କ୍ ସିଗ୍ ୱେସିତ୍‍ ।
LUK 16:4 ଇଗାଙ୍କ୍ ନା ଚାକିରି ଆଦ୍ କେ ନାରୁଡ଼୍ ବେଦ୍‍ପୁଟୁଙ୍କ୍ ନାକିଂଙ୍କ୍ ନିଜେ ନିଜେ ଲୋନ୍‌ ୱେଡ଼୍‍କେତେ ଗ୍ରହନ୍ ମାଡ଼ିତଡ଼୍, ଆଦ୍ ନାନେ ପୁନ୍‍ତାନ୍ ।
LUK 16:5 ଆସୁଟେ ଗୁମାସ୍ତାଲ୍ ମାଲିକ୍‍ତାଗାଙ୍କ୍ ଉଦାର୍ ଆସ୍‍ମାନ୍ଦାନ୍‍ ସାରେ ନାରୁଡ଼୍‍କିଂଙ୍କ୍ କାର୍‍ଙ୍ଗ୍ ତଣ୍ଡ୍ । ଅଣ୍ଡ୍‌ ମୁନ୍ ନାରୁଙ୍କ୍ କେତ୍‍ତଣ୍ଡ୍, ନା ମାଲିକ୍‍ତିଙ୍କ୍ ନିମେ ବେଚର୍ ହିଦାନ୍ ମିନ୍ଦେ ? ଅଣ୍ଡ୍‌ କେତୁତଣ୍ଡ୍, ଶହେ କୁଣ୍ଡାନାଗ୍ ନିୟ୍ ।
LUK 16:6 ଗୁମାସ୍ତାଲ୍ ଅଂକିଙ୍କ୍‌ କେତ୍‍ତଣ୍ଡ୍, ଇଦ୍ ନିୟାଦ୍ ନିୟ୍‍ ରସିଦ୍‍ ଆୟ୍‍ମ୍‍ । ସିଟ୍‍ପାଟ୍ କୁଦି ପଚାଶ୍ ଇଞ୍ଜ ଲେକିମ୍ ।
LUK 16:7 ତାନ୍‍ପେର୍କେ ଅଣ୍ଡ୍‌ ଦ୍ୱିତିୟ ନାରୁଙ୍କ୍ କେତ୍‍ତଣ୍ଡ୍, ନାୟାଦ୍ ବେସର୍ ଋଣ୍ ମାଲ୍‍ପିଦାନାଦ୍ ମିନ୍ଦେ ? ନାରୁଡ଼୍ କେତ୍‍ତଣ୍ଡ୍, ଶହେ ବାସ୍ତା ଗହମ୍, ଅଣ୍ଡ୍‌ ଅଂକିଙ୍କ୍‌ କେତ୍‍ତଣ୍ଡ୍, ଇଦ୍ ଆୟ୍‍ମ୍ ନିୟାଦ୍ ରସିଦ୍‍ । ଅଶୀ ବାସ୍ତା ଇଞ୍ଜ ଲେକିମ୍ ।
LUK 16:8 ଆସୁଟେ ମାଲିକ୍ ଆଦ୍ ଅସାଦୁ ଗୁମାସ୍ତାଙ୍କ୍ ପ୍ରସଂଶା ମାଡ଼୍‍ତଣ୍ଡ୍ । ବାତେଙ୍କ୍ ଇତ୍କେ ଗୁମାସ୍ତାଲ୍ ଚାଲାକ୍ ତେ ପାଡ଼୍‌ୟି ମାଡ଼୍‍ତଣ୍ଡ୍ । ଅନ୍‌ ଲେକାମ୍, ବାଗାତ୍‍ନାରୁଡ଼୍‍ ତ ବ୍ୟବସାୟ୍‍ ମାଡ଼ାଙ୍କ୍, ହି ସସାର୍‍ତେ ନାରୁଡ଼୍ ଆଦ୍ୟାତ୍ମିକ ନାରୁଡ଼୍ ୱିଡ଼୍‍ସି ଗାଟି ଚାଲାକ୍ ।
LUK 16:9 ନାନେ ମିକିଂଙ୍କ୍ କେତୁତାନ୍, ମିଡ଼୍ ମିକା ଜଗତ୍ ତେ ଦନ୍ ତଡ଼୍ ନିଜେ ନିଜେ ସାଙ୍ଗଡ଼୍ ଦର୍‍ସ୍‍କାଟ୍ । ବେସୁଙ୍କ୍‍ ହି ଜଗତ୍ ଦନ୍ ତେରିଆଦ୍‍ତା, ଆସୁଙ୍କ୍ ସାରେଦିନାତେ ବାଦ୍‍କାନ୍ ନାରୁଡ଼୍ ମିକିଂଙ୍କ୍ କାର୍‍ଙ୍ଗିତଣ୍ଡ୍ ।
LUK 16:10 ବେନ ସୁଦୁର୍‍ ବିଷୟ ତେ ଆନ୍‌‍ତେ ବିଶ୍ୱାସ୍‍ତଣ୍ଡ୍‍, ଅଣ୍ଡ୍‌ ନାର୍ଗେ ବିଷୟ ତେ ଆନ୍‌‍ତେ ବିଶ୍ୱାସ୍‍ତଣ୍ଡ୍‍, ବେନ ସୁଦୁର୍‍ ବିଷୟ ତେ ଆନ୍‌‍ତେ ବିଶ୍ୱାସ୍‍ଇଲ୍‍ୱେ, ଅଣ୍ଡ୍‌ ନାର୍ଗେ ବିଷୟ ତେ ଆନ୍‌‍ତେ ବିଶ୍ୱାସ୍‍ଇଲ୍‍ଲେ ।
LUK 16:11 ଇତ୍କେ ମିଡ଼୍ ଯଦି ଜାଗତିକ ଦନସମ୍ପତ୍ତିତାଗ୍ ବିଶ୍ୱାସ୍‍ତଣ୍ଡ୍‍ ଆୟ୍‍ୱିନ୍‍ ? ଆଲାତ୍କେ ବେନ ମିକିଂଙ୍କ୍ ପ୍ରକୃତ ଦନ୍‍ସମ୍ପତ୍ତି କାଇଦେ ଇଦାଙ୍କ୍ ବିଶ୍ୱାସ୍ ମାଡ଼ିତଡ଼୍ ?
LUK 16:12 ମେଣ୍ଡେ ମିଡ଼୍ ଯଦି ଅର୍‍ତୁନାଦ୍‍ ଦନ୍‍ସମ୍ପତ୍ତିତିଙ୍କ୍ ବିଶ୍ୱାସ୍ ମାଡ଼୍‍ୱିଡ଼୍, ଆଲାତ୍କେ ବେନ ମିକିଂଙ୍କ୍ ମି ନିଜେତ୍ ମାଇଦିଙ୍କ୍ ଦନ୍‍ସମ୍ପତ୍ତିତିଙ୍କ୍ ଇଦ୍‍ତଣ୍ଡ୍ ?
LUK 16:13 “ୱେରଣ୍ଡ୍ ଦାସ ଇର୍‍ୱୁଡ଼୍ ମାଲିକ୍‍ତେ ସେବା ମାଡ଼େପାର୍‍ୱଣ୍ଡ୍ । ଅଣ୍ଡ୍‌ ଅର୍‍ତୁଙ୍କ୍ ପାସ୍‍କିତନ୍ ନୁ ମେଣ୍ଡେ ଅର୍‍ତୁଙ୍କ୍ ପ୍ରେମ୍ ମାଡ଼ିତନ୍ । ବାତେଙ୍କ୍ ଇତ୍କେ ଅଣ୍ଡ୍‌ ୱେରଣ୍ଡ୍ ପରୁ ବିଶ୍ୱାସ୍ ତେ ମାନ୍‍ତଣ୍ଡ୍ ବା ଅର୍‍ତୁଙ୍କ୍ ମୁର୍କ ମାଡ଼ିତନ୍ । ମିଡ଼୍ ଅଣ୍ଡୟ୍‌‍ଦାମ୍ ପରମେଶ୍ୱର୍‍ ନୁ ଦନ୍‍ସମ୍ପତ୍ତି ରେଣ୍ଡିଙ୍କ୍ ସେବା ମାଡ଼୍‍ପେ ପାର୍‍ୱିଡ଼୍ ।”
LUK 16:14 ଇଦ୍ ସାରେ ଗଟ୍ କେଞ୍ଜି ଜିସୁନ୍ ପରୁ କପାମ୍ ଆଦ୍‍ତଡ଼୍ ବାତେଙ୍କ୍ ଇତ୍କେ ଅଡ଼୍‌‍ ଡାବ୍‍କିଂକ୍ ପ୍ରେମ୍ ମାଡ଼ ମାତ୍‍ତଡ଼୍ ।
LUK 16:15 ଆସୁଟେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ବେନ୍‍ନାରୁଡ଼୍‍ ମୁନେଙ୍କ୍ ନିଜ୍‍ତିଙ୍କ୍ ଦାର୍ମିକ୍ ଇଞ୍ଜ ତଅତିତଡ଼୍, ମିଡ଼୍ ଆଦେପୁଟୁଙ୍କତ୍ ନାରୁଡ଼ି । ବାତେଙ୍କ୍ ଇତ୍କେ ପରମେଶ୍ୱର୍‍ ମି ହୃଦୟ୍‍ତିଙ୍କ୍ ପୁତ୍‍ତଣ୍ଡ୍ । ବେନେସାରେ ବିଷୟତିଙ୍କ୍ ନାରୁଡ଼୍ ଗାଟି ମୂଲ୍ୟବାନ୍ ଇଞ୍ଜ ତନ୍ଦିତଡ଼୍, ଆଦ୍ ପରମେଶ୍ୱର୍‍ତେ ମୁନ୍‍ କାରାପ୍‌ ।
LUK 16:16 ମୋଶାନ୍‌ ନିୟମ୍ ନୁ ବାବବାଦୀ ବକ୍ତାଲଡ଼୍ ଲେକ୍‍ତ୍‍ତେ ଲେକାମ୍ ନାରୁଡ଼୍ ବାଦ୍‍କମାନ୍‍ତଡ଼୍‍ ଇଞ୍ଜ ପରମେଶ୍ୱର୍‍ ଇଚ୍ଛା ମାଡ଼୍‍ତଣ୍ଡ୍ । ଆଦ୍ ଦିନାମ୍‍ତେ କଞ୍ଜ୍ ଇଶ୍ୱର୍‌ତେ ରାଜ୍ୟତାଦ୍ ସୁସମାଚାର୍ ପ୍ରଚାର ଆଦୁତ୍‍ତେ । ମେଣ୍ଡେ ସାରେ ଜାନ୍ ଶକ୍ତିତଡ଼୍ ଆଗେ ହସୁତଡ଼୍ ।
LUK 16:17 ବାତେଙ୍କ୍ ଇତ୍କେ ବ୍ୟବସ୍ଥାତାଦ୍‍ ୱେରଡ଼୍ ଚିହ୍ନେ ନଷ୍ଟ ଆଦ୍‍ଦାନ୍ ୱିଡ଼୍‍ସି ସ୍ୱର୍ଗ ନୁ ପୃତିବି ନଷ୍ଟ ଆଦାନାଦ୍ ସହଜ୍ ।
LUK 16:18 ବେନଆଇ ନିଜର୍ ମୁତେଙ୍କ୍ ୱିଡ଼୍‍ସି ମେଣ୍ଡନ୍ ମୁତେଙ୍କ୍ ପେଣ୍ଡୁଲ୍ ଆଦ୍‍ତନ୍, ଅଣ୍ଡ୍‌ ବ୍ୟବିଚାର୍ ମାଡ଼ୁତଣ୍ଡ୍ ମେଣ୍ଡେ, ବେନ ଆଦ୍ ୱିଡ଼୍‍ସିତ୍‍ତେ ମୁତେଙ୍କ୍ ପେଣ୍ଡୁଲ୍ ଆଦ୍‍ତନ୍, ଅଣ୍ଡ୍‌ ବ୍ୟବିଚାର୍ ଆଦ୍‍ତନ୍ ।
LUK 16:19 ୱେରନ୍ ନାରୁନ୍ ସାଉକାର୍ ନାରୁଡ଼୍ ମାତ୍‍ତଣ୍ଡ୍, ଅଣ୍ଡ୍‌ ଗାଟିଦାମ୍ ଆଉ ଚକାସିଲେ କେର୍ସ୍, ନିତ୍‍ତେଦିନାଲ୍‍ ଗାଟି ଆମଦ୍‍ ପ୍ରମୋଦ୍ ମାଡ଼ମାତ୍‍ତଣ୍ଡ୍ ।
LUK 16:20 ବାତେଙ୍କ୍ ଇତ୍କେ ଅନ୍‌ ମାର୍ ଦେ ଗାର୍‍ରେ ଲାଜାର୍ ପେଦେର୍‍ତେ ବିକାରି ନାରୁଡ଼୍ ମାତ୍‍ତଣ୍ଡ୍, ଅନ୍‌ ମେନ୍ଦୁଲ୍‍ସାରେ ପୁଣ୍ଡୁକ୍ ଆସ୍ ମାତ୍‍ତା;
LUK 16:21 ଅଣ୍ଡ୍‌ ସାଉକାର୍‍ ନାରୁଡ଼୍ ତେ ଚାକର୍ ତିଞ୍ଜ୍ ହେସାନ୍ ହେଙ୍ଗୁଲ୍‍ତିଙ୍କ୍ ତିଞ୍ଜ୍ ପଟ୍‍ଟେ ନିହ୍‍ତାଙ୍କ୍ ଆଶେ ମାଡ଼ିମାତ୍‍ତଣ୍ଡ୍ । ମେଣ୍ଡେ ଇଦ୍‍ପୁଟୁଙ୍କ୍ ଯେ, ନେୟ୍‍ ମିକା ୱାସ୍ ଅନ୍‌ ପୁଣ୍ଡୁକିଂଙ୍କ୍ ନାକମାତ୍‍ତା ।
LUK 16:22 ବେସ୍‌କ୍ ଦିନାତେ ପେର୍‍କେ ଲାଜାର୍ ଡଲିଆତ୍‍ତଣ୍ଡ୍, ଆସୁଟେ ଦୂତକିନ୍ ତଡ଼୍ ଅଂକିଙ୍କ୍‌ ଅବ୍ରାହାମ୍‌ତେ ଗୁଦ୍‍ତାଗ୍‍ ଆତ୍‍ତା; ବେସ୍‍କ୍‍ଦିନାତ୍‍ ପେର୍‍କେ ଆଦ୍ ସାଉକାର୍‍ ନାରୁଡ଼୍ ଆନ୍‌‍ତେ ଡଲ୍‍ତ୍‍ତଣ୍ଡ୍ ଅଂକିଙ୍କ୍‌ ସମାଦି ହିତ୍‍ତଡ଼୍ ।
LUK 16:23 ଆସୁଟେ, ଅଣ୍ଡ୍‌ ନର୍କ ତିପାଲ୍‍ତାଗେ କଲବଲ ଆସ୍‍ ପରୁ ଯେକା ଉଡ଼୍‍ତଣ୍ଡ୍ ଅବ୍ରାହାମ୍‌ତେ ଗୁଦ୍‍ତାଗ୍‍ ଲାଜାର୍‍ତିଙ୍କ୍ କୁଦିମାନ୍ଦାନାଦ୍ ଉଡ଼୍‍ତଣ୍ଡ୍ ।
LUK 16:24 ଆସୁଟେ ଅଣ୍ଡ୍‌ କାର୍‍ଙ୍ଗି କେତ୍‍ତଣ୍ଡ୍‍, ହୋ, ବାବା ଅବ୍ରାହାମ୍‌, ନା ସେଙ୍ଗେ ଦୟାମାଡ଼ି ଲାଜାର୍‍ତିଙ୍କ୍ ରୟ୍‍ସିମ୍, ବେଦ୍‍ପୁଟୁଙ୍କ୍ ଅଣ୍ଡ୍‌ ଏର୍‍ଦାଗ୍‍ ଅନ୍‌‍ଆଦ୍‍ ୱାଡ଼୍‍ଞ୍ଜ୍ ଟିପ ମୁହୁସ୍ ନା ୱାଞ୍ଜେର୍‍ତିଙ୍କ୍ ତଣ୍ଡା ମାଡ଼ିତ୍, ବାତେଙ୍କ୍ ଇତ୍କେ ନାନେ ହି କିସ୍ ତାଗ୍ କଲବଲ ଆଦୁତାନ୍ ।
LUK 16:25 ବାତେଙ୍କ୍ ଇତ୍କେ ଅବ୍ରାହାମ୍‌ କେତ୍‍ତଣ୍ଡ୍, ହୋ ମାର୍‍, ନିମ୍‍ ଯେ ଜିୱୁନ୍‍ମାନ୍ଦାନ୍‍ ଦିନାମ୍ ତେ ଚାୟେତ୍‍ ବିଷୟ୍‍ଚାରେ ପୁଞ୍ଜ୍‍ମାତ୍ତିନ୍, ଆସୁଟେ, ଲାଜାର୍ ଆଦେପୁଟୁଙ୍କ୍ କାରାପ୍‍ ବିଷୟ୍‍ଚାରେ ଦର୍‍ସ୍‍କ୍‍ତନ୍, ଆଦ୍ ହେର୍କା ମାଡ଼ାଟ୍; ବାତେଙ୍କ୍ ଇତ୍କେ ଇଞ୍ଜ୍ ଅଣ୍ଡ୍‌ ଶାନ୍ତିତେ ପଡ଼୍‍ତାଗ୍‍ ମିନ୍ଦେଣ୍ଡ୍ ବାତେଙ୍କ୍ ଇତ୍କେ ଇଞ୍ଜ୍ ନିମ୍‍ କଲବଲ ଆଦ୍‍ତିନ୍ ।
LUK 16:26 ତାନ୍ ୱିଡ଼୍‍ସି ନିୟାଗ୍ ନୁ ମାୟାଗ୍‌ ୱେରଡ଼୍ ବେଡ଼୍‍ୟ୍‍ୟାଦ୍‍ ଗୁୟ୍‍ନ୍ଦ୍‍ମିନ୍ଦେ । ନିକିଂଙ୍କ୍ ସାହାଯ୍ୟ ମାଡ଼ାନ୍ ମାଇଦିଙ୍କ୍ ଆଦ୍ ଗୁୟ୍‍ନ୍ଦ୍‍ତିଙ୍କ୍ ବେନ ବା ୱେୟସ୍ ଆଦ୍ ପାର୍‍ୱଡ଼୍ ବାତେଙ୍କ୍ ଇତ୍କେ ଆଦ୍ ପଡ଼୍‍ୟ୍‍ୱିଡ଼୍‍ସି ବେନ ବା ଇଗ୍ ୱାଦ୍ ପାର୍‍ୱଡ଼୍ ।
LUK 16:27 ଆସୁଟେ ଅଣ୍ଡ୍‌ କେତ୍‍ତଣ୍ଡ୍, ହୋ ବାବା ଆବ୍ରାହାମ୍, ଆଲାତ୍କେ ନିକିଂଙ୍କ୍ ଅନୁରଦ୍‌‍ ମାଡ଼ୁତାନ୍, ଅଂକିଙ୍କ୍‌ ନା ବାବାନ୍ ଲୋନ୍‌‍ ରୟ୍‍ସିମ୍,
LUK 16:28 ବାତେଙ୍କ୍ ଇତ୍କେ ଆଗେ ନା ଏୟିୱୁଡ଼୍‍ ଦାଦାଲଡ଼୍ ମିନ୍ଦେଡ଼୍; ଅଡ଼୍‌‍ ଆନ୍‌‍ତେ ବେଦ୍‍ପୁଟୁଙ୍କ୍ ହିସତ୍ ତିପାଲ୍ ପଡ଼ିୟେତାଗ୍ ୱାଡ଼୍‍ମାକିଡ଼୍‍; ଆଦିନ୍ ମାଇଦିଙ୍କ୍ ଅଣ୍ଡ୍‌ ଆଞ୍ଜ୍ ଅଡ଼୍‌‍କିଂଙ୍କ୍ ସତର୍କ ମାଡ଼ିତନ୍ ।
LUK 16:29 ବାତେଙ୍କ୍ ଇତ୍କେ ଅବ୍ରାହାମ୍‌ କେତ୍‍ତଣ୍ଡ୍, “ଅଡ଼୍‌‍ ଗାର୍‍ରେ ମୋଶାନ୍‌ ନିୟମ୍ ନୁ ବାବବାଦୀ ବକ୍ତାଲଡ଼୍ ଦର୍ମଶାସ୍ତ୍ର ମିନ୍ଦେ, ଅଡ଼୍‌‍ ଅଡ଼୍‌‍ଗଟିଙ୍କ୍ କେଞ୍ଜାନ୍ ଲେକେତ୍ ।
LUK 16:30 ଆସୁଟେ ସାଉକାର୍‍ ନାରୁଡ଼୍ କେତ୍‍ତଣ୍ଡ୍, ହୋ, ବାବା ଅବ୍ରାହାମ୍‌, ଆଦ୍ ଆସର୍ ଆୟ୍‍ୟ, ଯଦି ଡଲିମାନ୍ଦାନ୍ ନାରୁଡ଼୍ ଲୋପେଙ୍କ୍ ବେନଆଇ ଆଡ଼୍ ଗାର୍‍ରେ ଆଦ୍‍ତନ୍, ଆଲାତ୍କେ ଅଡ଼୍‌‍ ବିଶ୍ୱାସ୍ ମାଡ଼ିତଡ଼୍, ନୁ ମନ୍ ପରିବର୍ତ୍ତନ୍ ମାଡ଼ିତଡ଼୍ ।
LUK 16:31 ବାତେଙ୍କ୍ ଇତ୍କେ ଆବ୍ରାହାମ୍ ଅଂକିଙ୍କ୍‌ କେତ୍‍ତଣ୍ଡ୍, ଇଲେ, ଯଦି ମି ଦାଦାଲଡ଼୍ ମଶାନାଦ୍ ନୁ ବାବବାଦୀ ବକ୍ତାଲଡ଼୍ ଗଟି କେଞ୍ଜଡ଼୍ ଆଲାତ୍କେ ଅଡ଼୍‌‍ ଡଲ୍‍ତାଗାଙ୍କ୍ ତେଦିମାନ୍ଦାନ୍ ବେନ୍ ନାରୁଡ଼୍ ଗଟି ଆନ୍‌‍ତେ କେଞ୍ଜଡ଼୍ ।”
LUK 17:1 ଜିସୁ ତାମ୍ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍, ବେନେ ସାରେ ହେର୍କା ତଡ଼୍ ନାରୁଡ଼୍ ପାପତାଗ୍ ରାଇତଣ୍ଡ୍ ନୁ ବେନ୍ ଅଙ୍କ୍‌ ଇଦ୍ ପାପତାଗ୍ ରାପିତଣ୍ଡ୍ ଅନ୍‌‍ୱାଦ୍ ଦଣ୍ଡ୍ ଯେ ବେସର୍ ବୟଙ୍କାର୍ ଆଦ୍‍ତେ !
LUK 17:2 ହିଡ଼୍ ଲେକେତ୍‌ ନାରୁଡ଼୍‍କ୍ ପାପତାଗ୍ ରାପାନ୍ ୱିଡ଼୍‍ସି ଅନ୍‌ ପାପତାଗ୍ ଅଣ୍ଡୟ୍‌ ବାଡ଼େୟାଦ୍ ଜାତ୍‍ତେକାଲ୍ ୱେହେସ୍ ଅଂକିଙ୍କ୍‌ ସମୁଦ୍ରତାଗ୍ ହେସିତ୍କେ ମିକା ଲେକେତ୍ ଆୟେଡ଼୍ ।
LUK 17:3 ତ ମିଡ଼୍ ନିଜ୍, ବିଷୟତେ ସାବ୍‍ଦାନ୍ ଆସ୍ ମାନୁଟ୍ । ଯଦି ନି ତାମୁଣ୍ଡ୍‌ ପାପ୍‌ ମାଡ଼ିତନ୍, ଅଂକିଙ୍କ୍‌ ମନ୍‍ ପରିବର୍ତ୍ତନ୍ ମାଡ଼ାଙ୍କ୍ କେଲାଟ୍; ମେଣ୍ଡ୍ ଅଣ୍ଡ୍‌ ଯଦି ମନ୍ ପରିବର୍‍ତନ୍ ମାଡ଼ିତନ୍, ଆଲାତ୍କେ ଅଂକିଙ୍କ୍‌ କ୍ଷମା ହିମୁଟ୍ ।
LUK 17:4 ମେଣ୍ଡେ, ଯଦି ଅଣ୍ଡ୍‌ ଅଣ୍ଡୟ୍‌‍ଦିନ୍ ତେ ଲୋପେ ସାତ୍‍ଦାମ୍, ନି ବିରୁଦ୍‍ତେ ପାପ୍‌ ମାଡ଼ିତନ୍ ନୁ ସାତ୍‍ଦାମ୍ ନି ଗାର୍‍ରେ ମାଲ୍‍ସ୍ ୱାସ୍ କେତିତଣ୍ଡ୍ ନାନ୍ ମନ୍‍ ପରିବର୍ତ୍ତନ୍ ମାଡ଼୍‍ତାନ୍ ଇଞ୍ଜ କେତିତଣ୍ଡ୍, ଆଲେକେ ଅଂକିଙ୍କ୍‌ ଆଦ୍‍ଲେକାମ୍ କ୍ଷମା ମାଡ଼ାଟ୍ ।
LUK 17:5 ଆଗାଙ୍କ୍ ପ୍ରେରିତ୍‍ ଶିଷ୍ୟଡ଼୍ ପ୍ରବୁଙ୍କ୍ କେତ୍‍ତଡ଼୍, ମାୟାଦ୍‌ ବିଶ୍ୱାସ୍ ଅଦିକ୍‌ ମାଡ଼ିମ୍ ।
LUK 17:6 ପ୍ରବୁ କେତ୍‍ତଣ୍ଡ୍, ଯଦି ୱେରଡ଼୍ ସୋରିଷପେଡ଼େମ୍ ଲେକେମ୍ ମିୱାଦ୍ ବିଶ୍ୱାସ୍ ମିନ୍ଦେ, ଆଲେକେ ଇଦ୍ ତୁତକଳି ମାଡ଼େତିଙ୍କ୍ ମଦଲ୍ କଞ୍ଚ୍ ତାହାକି ସମୁଦ୍ରତାଗ୍ ଉର୍ସ୍କିଆୟି ଇଞ୍ଜ କେତ୍‌କେ ବାତେ ଆଦ୍‌ ମିୟାଦ୍‌ ଗଟ୍‌ କେଞ୍ଜିତ୍ ।
LUK 17:7 ବାତେଙ୍କ୍ ଇତ୍କେ ମି ଲୋପେ ଇଦ୍ ଲେକେମ୍ ନାରୁଡ଼୍ ବେନ ମିନ୍ଦେଣ୍ଡ୍, ବେନନ୍ ଦାସ ହୁଡ଼୍‍ସ୍ ୱାସ୍ ବା ଗଡ଼କ୍‍ ମେୟେସ୍ ୱାୟାନାକାଙ୍କ୍ ୱାତ୍‍କେ ଅଣ୍ଡ୍‌ ଅଂକିଙ୍କ୍‌ କେତିତଣ୍ଡ୍, ଇଞ୍ଜେ ୱାସ୍ ତିନ୍ଦାଙ୍କ୍ କୁଦା ?
LUK 17:8 ବାତେଙ୍କ୍ ଇତ୍କେ ଅଣ୍ଡ୍‌ ତାନ୍ ଚାକର୍ ତିଙ୍କ୍ କେତିତଣ୍ଡ୍, ନାୟାଦ୍ ତିନ୍ଦାନାଦ୍ ଟିକ୍ ମାଡ଼ା, ମେଣ୍ଡେ ନାନ୍ ତିନ୍ଦାନାଦ୍ ଉନ୍ଦାନାଦ୍ ତେର୍‍ସ୍ପାସ୍‍ନା ଯାକ ନାକିଂଙ୍କ୍ ସେବା ମାଡ଼େ, ତାନ୍ ପେର୍‍କେ ନିମେ ତିନ୍ଦାନ୍ ଉନ୍ଦାନ୍ ମାଡ଼ିତି ।
LUK 17:9 ଦାସ ଆଦେଶ୍‍ ଲେକାମ୍ ପାଡ଼ିୟି ମାଡ଼କେ ଅଣ୍ଡ୍‌ ଅଂକିଙ୍କ୍‌ ଦନ୍ୟବାଦ୍ ଇଦ୍‍ତଣ୍ଡ୍ କି ?
LUK 17:10 ଆଦ୍ ଲେକେମ୍ ମିଡ଼୍ ଆନ୍‌‍ତେ ଆଦେଶ୍‍ ଲେକାମ୍ ସାର୍‍ରେ ପାଡ଼ିୟି ମାଡ଼୍‍ତେ ପେର୍‍କେ କେଲ୍‍ମୁଟ୍, ମାନାଡ଼୍ ଅଯୋଗ୍ୟ ଦାସଡ଼୍, ବାତ୍ ପାଡ଼ିୟି, ମାତର୍ ଆଦିଙ୍କ୍ ମାଡ଼ିତମ୍ ।
LUK 17:11 ଜିସୁ ଯିରୁଶାଲେମ୍‍ତା ଆଞ୍ଜ ମାନ୍ଦାନ୍ ୱେଲେ ଶମିରୋଣ ନୁ ଗାଲିଲୀ ତାଲାନ୍ ଆଞ୍ଜ ମାତ୍‍ତଡ଼୍ ।
LUK 17:12 ମେଣ୍ଡେ, ଅଣ୍ଡ୍‌ ବେନେ ୱେରନ୍ ନାର୍ ଆସାନ୍ ୱେଲେ, ଦଶ୍‍ଜାନ୍ କୁଷ୍ଟିନାରୁଡ଼୍ ଜିସୁନ୍ ତଡ଼୍ କାୟିଲ୍‍ତଡ଼୍;
LUK 17:13 ଅଡ଼୍‌‍ ଯେକା ନିସ୍ ଗାଟି ଲେହେଙ୍ଗ୍ ତେ କେତ୍ତଡ଼୍, “ହୋ ଜିସୁ, ଗୁରୁ, ମାକିଂଙ୍କ୍ ଦୟା ମାଡ଼ା ।”
LUK 17:14 ମେଣ୍ଡେ, ଅଣ୍ଡ୍‌ ଅଡ଼୍‌‍କିଂଙ୍କ୍ ଉଡ଼ି କେତ୍ତଣ୍ଡ୍, “ମିଡ଼୍ ଆଞ୍ଜ୍ ନିଜେ ନିଜେ ଯାଜକିଡ଼କ୍ ତଅମୁଟ୍ । ମେଣ୍ଡେ ଅଡ଼୍‌ ଆଞ୍ଜ ଆଞ୍ଜ ସୁସ୍ଥ ଆତ୍‍ତଡ଼୍ ।”
LUK 17:15 ବାତେଙ୍କ୍ ଇତ୍କେ ଅଡ଼୍‌‍ଆଗାଙ୍କ୍ ୱେରଣ୍ଡ୍ ତାନ୍ ସୁସ୍ଥ ଆତ୍‍ତାଦ୍ ଉଡ଼ି ଗାଟି ଲେଙ୍ଗଦେ ପ୍ରବୁଙ୍କ୍ ମହିମା କୀର୍ତ୍ତନ୍ ମାଡ଼ମାଡ଼ ମାଲ୍‍ସ୍ ୱାତ୍‍ତଣ୍ଡ୍,
LUK 17:16 ମେଣ୍ଡେ ଜିସୁନ୍ ଡେକାନ୍ ମଦଲ୍ ଆଡ଼୍‌‍କି ଅଂକିଙ୍କ୍‌ ଦନ୍ୟବାଦ୍ ମାଡ଼ାଙ୍କ୍ ପାସ୍‍କ୍‍ତଣ୍ଡ୍; ଅଣ୍ଡ୍‌ ୱେରଣ୍ଡ୍ ଶମିରୋଣୀୟ ନାରୁଡ଼୍ ।
LUK 17:17 ଆଗାଙ୍କ୍ ଜିସୁ କେତ୍ତଣ୍ଡ୍, “ଦଶ୍‍ଜାନ୍ ବାତ୍ ସୁସ୍ଥ ଆୟ୍‍ୟଡ଼୍ ?” ଆଲାତ୍କେ ନଅଜାନ୍ ବେଏକେ ଆଦ୍‍ତଡ଼୍ ?
LUK 17:18 ଇଶ୍ୱରତାଦ୍ ଗୌରବ୍ ମାଡ଼ାନ୍ ସେଙ୍ଗେ ଇଣ୍ଡ୍ ବିଜାତି ନାରୁଡ଼୍ ୱିଡ଼୍‍ସି ମେଣ୍ଡେ ବେନ ମାଲ୍‍ସ୍ ୱାଡ଼ଣ୍ଡ୍ ?
LUK 17:19 ମେଣ୍ଡେ, ଜିସୁ ଅଂକିଙ୍କ୍‌ କେତ୍ତଣ୍ଡ୍, “ତେଦ୍‍ଦେ, ହାନ୍, ନିୱାଦ୍ ବିଶ୍ୱାସ୍ ନିକିଂଙ୍କ୍ ସୁସ୍ଥ ମାଡ଼ିତେ ।”
LUK 17:20 ଇଶ୍ୱର୍‌ତାଦ୍ ରାଜ୍ୟ ବେସୁଙ୍କ୍‍ ୱାସମିନ୍ଦେନ୍, ହିଦ୍ ବିଷୟତେ ପାରୂଶୀନାରୁଡ଼୍ ଜିସୁଙ୍କ୍ ପାଚ୍ରାମାଡ଼୍‍ତାଙ୍କ୍ ପସ୍‍ପ୍‍ତ୍‍ତଡ଼୍ ନୁ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଇଶ୍ୱର୍‌ତାଦ୍ ରାଜ୍ୟ ତଅନ୍‌ଦାନ୍ ରକମ୍ ୱାଡ଼;
LUK 17:21 ମେଣ୍ଡେ ଉଡ଼ାଟ୍, ଇଶ୍ୱର୍‌ତେ ରାଜ୍ୟ ଇଗେ ବା ଆଗେ ମିନ୍ଦେ ଇଞ୍ଜ ନାରୁଡ଼୍ କେଲଡ଼୍; ବାତେଙ୍କ୍ ଇତ୍କେ ଉଡ଼ାଟ୍, ଇଶ୍ୱର୍‌ତାଦ୍ ରାଜ୍ୟ ମି ଲୋପେ ମିନ୍ଦେ ।”
LUK 17:22 ବାତେଙ୍କ୍ ଇତ୍କେ ଅଣ୍ଡ୍‌ ଶିଷ୍ୟକିଂଙ୍କ୍ କେତ୍ତଣ୍ଡ୍, ଇଦ୍ ଲେକାମ୍ ସମୟ୍ ୱାଦୁତେ, ବେସୁଙ୍କ୍‍ ମିଡ଼୍ ନାରୁଡ଼୍ ପିଲେତ୍ ଦିନାମ୍ ଲୋପେକ୍ ୱେରନ୍ ଦିନ୍ ଉଡ଼ାନଙ୍କ୍ ଇଚ୍ଛା ମାଡ଼ିତିଡ଼୍, ବାତେଙ୍କ୍ ଇତ୍କେ ଉଡ଼ାଙ୍କ୍ ପାର୍‍ୱିଡ଼୍ ।
LUK 17:23 ଉଡ଼ାଟ୍, ଆଗେ, ଉଡ଼ାଟ୍, ଇଗେ ଇଞ୍ଜ ନାରୁଡ଼୍ ମିକିଂଙ୍କ୍ କେତିତଡ଼୍; ବାତେଙ୍କ୍ ଇତ୍କେ ମିଡ଼୍ ଅଡ଼୍‌‍ ପେର୍‍କେ ହାନ୍‍ମାଟ୍ ।
LUK 17:24 ବାତ୍‍ତେଙ୍କ୍ ଇତ୍କେ ମାବ୍‍ତାଗ୍ ୱାର୍ରସୁତ୍‍ ୱେରଡାଗାଙ୍କ୍ ମେଣ୍ଡନ୍ ପାକ୍ ୱେସ୍ ଇଦ୍‍ତା, ନାରୁଡ଼୍ ପିଲେ ତାମ୍ ଦିନାତେ ଆଦ୍‍ଲେକାମ୍ ତଅନ୍‌ଦିତଣ୍ଡ୍ ।
LUK 17:25 ବାତେଙ୍କ୍ ଇତ୍କେ ମୁନେ ଅଂକିଙ୍କ୍‌ ନାର୍ଗେ ଦୁଃକାମ୍ କଷ୍ଟ ମାଡ଼୍ ୱେଇତିତ୍ ନୁ ଇଦ୍ ଇଞ୍ଜେତ୍ ମାନେଇ ଦ୍ୱାର୍‍ ଆଗ୍ରାହ୍ୟ ମାଡ଼ିତଡ଼୍ ।
LUK 17:26 ମେଣ୍ଡେ, ନୋହତେ ୱେଲେ ବେଦ୍ ଲେକାମ୍ ଗଟେମ୍ଆସ୍ ମାତ୍‍ତେ, ନାରୁଡ଼୍ ପିଲେତ୍ ୱେଲେ ମିକା ଆଦ୍ ଲେକେମ୍ ଗଟେମ୍ ଆଦ୍‍ତେ;
LUK 17:27 ନୋହ ଜାହାଜତାଗ୍ ଅସାନ୍ ଦିନାମ୍ ଯାକ ନାରୁଡ଼୍ ତିନ୍ଦାନଙ୍କ୍ ନୁ ପେଣ୍ଡୁଲ୍ ଆଦାନଙ୍କ୍ ନୁ ପେଣ୍ଡୁଲ୍ ମାଡ଼ାନଙ୍କ୍ ଦାନ୍ଦେ ମାନ୍‌ତଡ଼୍, ମେଣ୍ଡେ ଏର୍‍ ତୁପାନ୍ ୱାସ୍ ସାର୍‍ରେ ତଡ଼୍‍କିଂଙ୍କ୍ ଆୱୁକ୍‍ତେ ।
LUK 17:28 ଲୋଟତେ ୱେଲେ ମିକା ଆଦ୍‍ଲେକାମ୍ ଗଟେମ୍ ଆସ୍ ମାତ୍‍ତା, ନାରୁଡ଼୍ ତିନ୍ଦାନଙ୍କ୍, ହାସାନ୍‍ ୱାମାନ୍, ମାଡ଼ାକ୍ ଉର୍ସ୍‍କାଙ୍କ୍ ନୁ ଲୋକ୍ ମାଡ଼ାଙ୍କ୍ ଦାନ୍ଦ୍ ଆସମାତ୍‍ତଡ଼୍,
LUK 17:29 ବାତେଙ୍କ୍ ଇତ୍କେ ଲୋଟ ସଦୋମ୍‍ କନ୍‍ସ୍ ପେଇସ୍ ଆଦ୍‍ଦାନ୍ ଦିନେ ମାବ୍ ତାଗାଙ୍କ୍ କିସ୍ ନୁ ଗନ୍ଦକ ୱାର୍‍ସାମ୍ ୱାସ୍ ସାରେତଡ଼୍‌କିଂଙ୍କ୍ ୱିଡ଼୍‍ସି ମାଡ଼୍‍ତେ ।
LUK 17:30 ନାରୁଡ଼୍ ପିଲା ମାଲ୍‍ସ୍ ୱାଦାନ୍ ଦିନେ ଆଦ୍‍ଲେକାମ୍ ଗଟେମ୍ ଆଦ୍‍ତେ ।
LUK 17:31 ଆଦ୍ ଦିନେ ବେନ ଲୋତ୍‍ତେ ମୁର୍ସିନାଗ୍‍ ମାନ୍‍ତଣ୍ଡ୍, ଅଣ୍ଡ୍‌ ଲୋତ୍ ତେ ଲୋପେ ମାନ୍ଦାନ୍ ତାମ୍ ଜିନିଷ୍‍ତିଙ୍କ୍ ଆଦାନଙ୍କ୍ ଡିଗି ୱାଡ଼୍‍ମାକିନ୍; ଆଦ୍‍ଲେକାମ୍ ବେନ ୱାୟାନାକ୍‍ ମାନ୍‍ତଣ୍ଡ୍, ଅଣ୍ଡ୍‌ ମାଲ୍‍ସ୍ ଲୋନ୍‌ ଆନ୍‌‍ମାକିନ୍‍ ।
LUK 17:32 ଲୋଟନ୍ ମୁତେନ୍ ଗଟି ହେର୍କା ମାଡ଼ାଟ୍ ।
LUK 17:33 ବେନ୍ ନାରୁଡ଼୍ ନିଜ୍ ଜିୱୁଣ୍ଡ୍ ରକ୍ଷା ମାଡ଼ାନଙ୍କ୍ ଆଲ୍‍ସି ମାଡ଼ିତନ୍, ଅନ୍‌ ଆଦ୍ ହାରାମାଡ଼ିତଣ୍ଡ୍, ମେଣ୍ଡେ ବେନ ତାନ୍ ଜିୱୁଣ୍ଡ୍ ହରା ମାଡ଼ିତନ୍, ଅଣ୍ଡ୍‌ ଆଦିଙ୍କ୍ ଗେଲ୍‍ସ୍‍ପିତଣ୍ଡ୍ ।
LUK 17:34 ନାନ୍ ମିକିଂଙ୍କ୍ କେସମିନ୍ଦେନ୍, ଆଦ୍ ନାର୍କେ ଇର୍‍ୱୁଡ଼୍ ୱେରନ୍ ପଡ଼ିୟେତାଗ୍ ମାନ୍‍ତଡ଼୍, ୱେରଙ୍କ୍ ଅଣ୍ଡ୍‌ତଡ଼୍ ନୁ ମେଣ୍ଡେଅର୍‍ତୁଙ୍କ୍ ୱିଡ଼୍‍ସିଦ୍‍ତଡ଼୍ ।
LUK 17:35 ରେଣ୍ଡ୍ ମୁତ୍‍ତେ ଅଣ୍ଡୟ୍‌ ତାଗ୍ ଯାତେତିଙ୍କ୍ ଉଡ଼୍‍ସ୍ପମାନ୍‍ତା, ୱେରଡିଙ୍କ୍ ଅଦ୍‌ତା ନୁ ମେଣ୍ଡେଅଣ୍ଡିଙ୍କ୍ ୱିଡ଼୍‍ସିଦ୍‍ତଡ଼୍ ।
LUK 17:36 ଇର୍‍ୱୁଡ଼୍ ୱାୟେତାଗ୍ ମାନ୍‍ତଡ଼୍, ଅର୍‍ତୁଙ୍କ୍ ଗ୍ରହନ୍ ମାଡ଼ିତଡ଼୍ ନୁ ମେଣ୍ଡେଅର୍‍ତୁଙ୍କ୍ ୱିଡ଼୍‍ସିଦ୍‍ତଡ଼୍ ।
LUK 17:37 ଆଗାଙ୍କ୍ ଅଡ଼୍‌‍ ଅଂକିଙ୍କ୍‌ କେତ୍‍ତଡ଼୍, “ହୋ ପ୍ରବୁ, ବେଗେ ?” ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ବେଗ୍ ମଡ଼୍, ଆଗେ ଡାମରାପିଟେ ମିକା ଅଣ୍ଡୟ୍‌‍ତାଗ୍‍ ଗୁଡ଼ିତା ।”
LUK 18:1 ହତାସ୍ ଆୟ୍‍ୟକଟ ସାରେଦାମ୍ ପ୍ରାର୍ତନା ମାଡ଼ାନାଦ୍ ସାୟେ, ଇ ବିଷୟତେ ଜିସୁ ଅଡ଼୍‌‍କିଂଙ୍କ୍ ଇଦ୍ ଗଟ୍ କେତ୍‍ତଣ୍ଡ୍,
LUK 18:2 ଅଣ୍ଡୟ୍‌ ନାର୍‍ଦାଗ୍ ୱେରଣ୍ଡ୍ ବିଚାର୍‍କର୍‍ତାଲ୍ ମାତ୍‍ତଣ୍ଡ୍, ଅଣ୍ଡ୍‌ ଇଶ୍ୱର୍‌ତିଙ୍କ୍ ୱେର୍‍ୟକଟ ମାତ୍‍ତଣ୍ଡ୍ କି ନାରୁଡ଼୍‍କିଂଙ୍କ୍ ଉଡ଼୍‍ପୁନ୍ୱେ ମାତ୍‍ତଣ୍ଡ୍ ।
LUK 18:3 ଆଦ୍ ନାର୍‍ଦାଗ୍ ୱେରଡ଼୍ ରାଣ୍ଡିଲ୍ ମାତ୍‍ତେ, ଆଦ୍ ଅଣ୍ଡ୍‌ ଅଣ୍ଡ୍‌‍ଦାମ୍‍ ଆନା ଆଞ୍ଜ୍ କେସ ମାତ୍‍ତେ, ୱେର୍‍ଣ୍ଡ୍ ନା ବିରୁଦ୍ ତେ ଅନ୍‌ୟାୟ୍ ମାଡ଼ୁତଣ୍ଡ୍ ଆଦିନାଦ୍ ବିଚାର୍ ମାଡ଼େ ।
LUK 18:4 ନାର୍ଗେ ଦିନାମ୍ ଯାକ ବିଚାର୍ କର୍ତ୍ତାଲ୍ ରାଜି ଆୟ୍‍ୟକଟ ମାତ୍‍ତଣ୍ଡ୍; ବାତେଙ୍କ୍ ଇତ୍କେ ପେର୍‍କେ ଅଣ୍ଡ୍‌ ହେର୍କା ମାଡ଼୍‍ତଣ୍ଡ୍, ଯଦି ନାନ୍ ଇଶ୍ୱତିଙ୍କ୍ ୱେର୍‍ୱନ୍ କି ନାରୁଡ଼୍‍କିଂଙ୍କ୍ କେଞ୍ଜନ୍,
LUK 18:5 ଆଗେକ୍ ବାଡ଼େ ଆଦ୍ ରାଣ୍ଡିଲ୍ ନାକିଂଙ୍କ୍ କଷ୍ଟ ଇସମିନ୍ଦେ ନାନ୍ ତାନ୍ ସେଙ୍ଗେ ଆତ୍‍ତେ ଅନ୍‌ୟାୟତାଦ୍ ବିଚାର୍ ମାଡ଼ିତାନ୍, ଇଲୁକ୍ ଆଦ୍ ସାରେଦାମ୍ ୱାସ୍ ନାକିଂଙ୍କ୍ ଦାନ୍ଦେ ଆସମାତ୍‍ତେ ।
LUK 18:6 ଆଗାଙ୍କ୍ ପ୍ରବୁ କେତ୍ତଣ୍ଡ୍, “ଇଣ୍ଡ୍ ଅଦାର୍ମିକିଡ଼୍ ବିଚାର୍‍କର୍‍ତାଲ୍ ବାତ୍ କେତୁତନ୍, ଆଦ୍ କେଞ୍ଜାଟ୍ ।
LUK 18:7 ଇଶ୍ୱର୍‌ ହେଞ୍ଚତେ ନାରୁଡ଼୍ ନାର୍କାପାୟାଲ୍ ଅଂକିଙ୍କ୍ କାର୍‍ଙ୍ଗମାନ୍ତଡ଼୍, ଅଣ୍ଡ୍‌ କି ଅଡ଼୍‌‍ ସେଙ୍ଗେ ଆତ୍‍ତେ ଅନ୍‌ୟାୟତେ ବିଚାର୍ ମାଡ଼ଣ୍ଡ୍, ଅଡ଼୍‌‍କିଂଙ୍କ୍ ସାହାଯ୍ୟ ମାଡ଼ାଙ୍କ୍ ଅଣ୍ଡ୍‌ ଲେଟ୍ ମାଡ଼ିତନ୍ କି ?
LUK 18:8 ନାନ୍ ମିକିଂଙ୍କ୍ କେସମିନ୍ଦେନ୍, ଅଣ୍ଡ୍‌ ଯାପେ ଅଡ଼୍‌‍ ସେଙ୍ଗେ ଆତ୍‍ତେ ଅନ୍‌ୟାୟତାଦ୍ ବିଚାର୍ ମାଡ଼ିତନ୍ । ବାତେଙ୍କ୍ ଇତ୍କେ ନାରୁଡ଼୍ ପିଲେ ୱାସ୍ ପୃତିବିତାଗ୍ ବାତ୍ ବିଶ୍ୱାସ୍ ଉଡ଼ିତଣ୍ଡ୍ ?”
LUK 18:9 ନିଜେ ନିଜେ ଦାର୍ମିକ୍ ଇଞ୍ଜ ହାଲ୍‍ସି ମେଣ୍ଡେ ବାଗାତଡ଼କିଂଙ୍କ୍ ବାଗାତ୍ ନାରୁଡ଼୍‍କ୍ ତୁଚ୍ଛ ହେର୍କେ ମାଡ଼ମାନ୍ଦାନ୍ ବେସ୍‍କ୍‍ତୁଡ଼୍‍ ଆତ୍ମା ଆଶେତ୍ ନାରୁଡ଼୍‍କିଂଙ୍କ୍ ଜିସୁ ଇଦ୍ ୱେଷଡ଼୍ କେତ୍‍ତଣ୍ଡ୍,
LUK 18:10 ୱେର୍‍ଡ୍ ଦିନେ ଇର୍‍ୱୁଡ଼୍ ନାରୁଡ଼୍ ପ୍ରାର୍ତନା ମାଡ଼ାନ୍ ମାଇଦିଙ୍କ୍ ମନ୍ଦିର୍‍ତାଗ୍ ଆତ୍‍ତଡ଼୍, ୱେରଣ୍ଡ୍ ପାରୂଶୀ ନୁ ମେଣ୍ଡ୍ଅର୍ତୁଣ୍ଡ୍ କରଗ୍ରାହୀ ।
LUK 18:11 ପାରୂଶୀ ନିଶ୍‍ମିକା ତାନ୍ ସେଙ୍ଗେ ଇଦ୍ ଲେକାମ୍ ପ୍ରାର୍ତନା ମାଡ଼ାଙ୍କ୍ ପସ୍‍ପ୍‍ତଣ୍ଡ୍, ହୋ ଇଶ୍ୱର୍‌ ନାନ୍ ନିକିଂଙ୍କ୍ ଦନ୍ୟବାଦ୍ ଇଦୁତାନ୍ ଯେ, ନାନ୍ ବାଗାତ୍ ସାରେତଡ଼୍ ନାରୁଡ଼୍ ଲେକାମ୍ ହାୱୁକାନଡ଼୍, ଆଦାର୍ମିକ୍, ବ୍ୟବିଚାରୀଡ଼୍‍ ବା ଇଣ୍ଡ୍ କରଗ୍ରାହୀ ଲେକେମ୍ ମିକା ଆୟନ୍;
LUK 18:12 ନାନ୍ ସପ୍‍ତାତିଙ୍କ୍ ରେଣ୍ଡ୍ ଦାମ୍ ଉପବାସ୍ ମାଡ଼ୁତାନ୍ ନୁ ନାୱାଦ୍ ସାରେ କାମ୍‍ମାଡ଼ି ଗୁଡ଼୍‍ପ୍‍ତାଦ୍ ଦଶ୍‍ବାଗ୍ କନ୍‍ସ୍ ୱେରନ୍ ପାଲ୍‍କ୍ ଦାନ ମାଡ଼ୁତାନ୍ ।
LUK 18:13 ବାତେଙ୍କ୍ ଇତ୍କେ କରଗ୍ରାହୀ ଜେକେ ନିସ୍ ମିକା ସ୍ୱର୍ଗତା ପରୁ ଉଡ଼ାନଙ୍କ୍ ସେଙ୍ଗେ ମେଣ୍ଡେ ସାହାସ୍ ମାଡ଼ଣ୍ଡ୍, ବାତେଙ୍କ୍ ଇତ୍କେ ତାନ୍ ଗୁଣ୍ଡେତାଗ୍ ରେହେସ୍ କେତାନଙ୍କ୍ ପସ୍‍ପ୍‍ତଣ୍ଡ୍, ହୋ ଇଶ୍ୱର୍‌, ନାନ୍ ପାପି, ନାକିଂଙ୍କ୍ ଦୟା ମାଡ଼ା ।
LUK 18:14 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଅଣ୍ଡ୍‌ ପାରୂଶୀ ଆୟ୍‍ୟଣ୍ଡ୍, ବା ଇଣ୍ଡ୍ କରଗ୍ରାହୀ ଦାର୍ମାମ୍ ଆସ୍ ତାମ୍ ଲୋନ୍‌ ଆତ୍‍ତଣ୍ଡ୍; ବାତେଙ୍କ୍ ଇତ୍କେ ବେନଆଇ ନିଜେତିଙ୍କ୍ ଉନ୍ନତ ଇଞ୍ଜ ତଅତିତଣ୍ଡ୍, ଅଂକିଙ୍କ୍‌ ଆୱେକେ ମାଡ଼ିତଡ଼୍, ବାତେଙ୍କ୍ ଇତ୍କେ ବେନ ନିଜେତିଙ୍କ୍ ଆୱେକେ ମାଡ଼ିତନ୍, ଅଂକିଙ୍କ୍‌ ଉନ୍ନତ ମାଡ଼ିତଡ଼୍ ।”
LUK 18:15 ଜିସୁ ବେଦ୍ ଲେକାମ୍ ପିଲାଙ୍କ୍ ହିଟିତଣ୍ଡ୍, ଇଦ୍ ସେଙ୍ଗ୍ ନାରୁଡ଼୍ ଅଡ଼୍‌‍କିଂଙ୍କ୍ ମିକା ଅନ୍‌ ଗାର୍‍ରେ ତାତାନଙ୍କ୍ ପସ୍‍ପ୍‍ତ୍‍ତଡ଼୍; ମାତର୍ ଶିଷ୍ୟଡ଼୍ ଆଦ୍ ଉଡ଼ି ଅଡ଼୍‌‍କିଂଙ୍କ୍ ଗୋଲକ୍ ହିଦାନଙ୍କ୍ ପସ୍ପ୍‍ତ୍‍ତଡ଼୍ ।
LUK 18:16 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ ଅନ୍‌ ଗାର୍‍ରେ କାର୍‍ଙ୍ଗି କେତ୍ତଣ୍ଡ୍, “ପିଲାଙ୍କ୍ ନା ଗାର୍‍ରେ ୱାଦାଙ୍କ୍ ଇମୁଟ୍, ମେଣ୍ଡେ ଅଡ଼୍‌‍କିଂଙ୍କ୍ ମନା ମାଡ଼ମାଟ୍, ବାତେଙ୍କ୍ ଇତ୍କେ ଇଶ୍ୱରତାଦ୍ ରାଜ୍ୟ ଇଦ୍ ଲେକେମ୍ ପିଲାନାଦ୍ ।
LUK 18:17 ନାନ୍ ମିକିଂଙ୍କ୍ ନିଜାମ୍‍ କେସମିନ୍ଦେନ୍, ବେନବା ପିଲାନ୍ ଲେକେମ୍ ଇଶ୍ୱରତାଦ୍ ରାଜ୍ୟ ଗ୍ରହନ୍ ମାଡ଼ଣ୍ଡ୍, ଅଣ୍ଡ୍‌ ବେସୁଟ୍‌ ମିକା ଆଗେ ଆସ୍ ପାର୍‍ୱଣ୍ଡ୍ ।”
LUK 18:18 ୱେରଣ୍ଡ୍ ଯିହୁଦୀ ମୁକ୍ୟାଲ୍ ଜିସୁଙ୍କ୍ କେତ୍ତଣ୍ଡ୍, “ହୋ ସତ୍‍ ଗୁରୁ, ସାରେଦିନାତ୍ ଜିୱୁଣ୍ଡ୍ ଲେକେତ୍‍ ଆଦାନ୍ ମାଇଦିଙ୍କ୍ ନାନ୍ ବାତ୍ ମାଡ଼ିତାନ୍ ?”
LUK 18:19 ଆଗାଙ୍କ୍ ଜିସୁ ଅଂକିଙ୍କ୍‌ କେତ୍ତଣ୍ଡ୍, “ନାକିଂଙ୍କ୍ ସତ୍‌ଗୁରୁ ହିଞ୍ଜ ବାତେଙ୍କ୍ କେତୁତି ? ୱେରଣ୍ଡ୍ ୱିଡ଼୍‍ସି, ଇତ୍‍କେ, ଇଶ୍ୱତିଙ୍କ୍‌ ୱିଡ଼୍‍ସି ମେଣ୍ଡେ ବେନ ମିକା ସାୟେ ଇଲାଣ୍ଡ୍ ।”
LUK 18:20 ଇଶ୍ୱର୍‌ତେ ଆଦେଶ୍‍ତିଙ୍କ୍ ତ ନିମେ ପୁତ୍‍ତିନ୍, ବ୍ୟବିଚାର୍ ମାଡ଼୍‍ମାଟ୍, ନାରୁଙ୍କ୍ ଆୱୁକ୍‍ମାଟ୍, ଡଙ୍ଗ‍ମା, ୱିଶାମ୍ ଗଟି କେଲ୍‍ମା, ନିଜେ ୟାୟବାବାଙ୍କ୍‍ ସମ୍ମାନ୍ ଇମ୍ ।
LUK 18:21 ଅଣ୍ଡ୍‌ କେତ୍ତଣ୍ଡ୍, “ଇୱୁ ସାରେ ନାନ୍ ପିଲେତ୍ ଦିନାକ୍ କନ୍‍ସ୍ ପାଲନ୍ ମାଡ଼ି ୱାଦୁତାନ୍ ।”
LUK 18:22 ଜିସୁ ଇଦ୍ କେଞ୍ଜି ଅଂକିଙ୍କ୍‌ କେତ୍ତଣ୍ଡ୍, “ମିୱାଦ୍ ମେଣ୍ଡେ ୱେରଟ୍ ବିଷୟ ସୁଦୁଟ୍ ମିନ୍ଦେ; ନିମେ ନିୟାଦ୍ ସାରେ ଜିନିଷ୍ ୱାମି ଦରିଦ୍ର ନାରୁଡ଼୍‍କ୍ ତୁଉସିମ୍, ମେଣ୍ଡେ ନିକିଂଙ୍କ୍ ସ୍ୱର୍ଗତାଗ୍ ଦନ୍ ଦର୍‍କିତ୍; ମେଣ୍ଡେ ୱାସ୍ ନା ପେର୍କେ ୱାଡ଼ାଟ୍‌ ।”
LUK 18:23 ବାତେଙ୍କ୍ ଇତ୍କେ ଅଣ୍ଡ୍‌ ଇଦ୍ ସାରେ ଗଟି କେଞ୍ଜି ଗାଟି ଦୁଃକାମ୍ ଆତ୍‍ତଣ୍ଡ୍, ବାତ୍‍ତେଙ୍କ୍ ଇତ୍କେ ଅଣ୍ଡ୍‌ ଗାଟି ବାଡ଼୍‍ୟଣ୍ଡ୍ ସାଉକାର୍ ମାତ୍‍ତଣ୍ଡ୍ ।
LUK 18:24 ଆଗାଙ୍କ୍ ଅଣ୍ଡ୍‌ ଦୁଃକାମ୍ ଆଦାନାଦ୍ ଉଡ଼ି ଜିସୁ କେତ୍ତଣ୍ଡ୍, “ବେନନାଗ୍‍ ଦନ୍ ମିନ୍ଦେ, ଅଡ଼୍‌‍ ବେସର୍ ତିପାଲ୍‍ତେ ଇଶ୍ୱର୍‌ତେ ରାଜ୍ୟତ୍ ଲୋପେ ଅସ୍‍ ପାର୍‍ଦ୍‍ତଡ଼୍ !
LUK 18:25 ବାତ୍‍ତେଙ୍କ୍ ଇତ୍କେ ଇଶ୍ୱର୍‌ତେ ରାଜ୍ୟତାଗ୍ ସାଉକାର୍ ନାରୁଣ୍ଡ୍ ନେଙ୍ଗାନ୍ ୱିଡ଼୍‍ସି, ଚୁଜ୍‍ ବସେତ୍‍ ଆଲା ଉଟ୍ ନେଙ୍ଗାନାଦ୍ ସହଜ୍ ।”
LUK 18:26 ବେନେ ନାରୁଡ଼୍ ଇଉଗୋଟି କେଞ୍ଜ୍‍ତଡ଼୍, ଅଡ଼୍‌‍ କେତ୍ତଡ଼୍, “ଇଲୁକ୍‍ ବେନ ପରିତ୍ରାଣ ଆଦ୍‍ତନ୍ ?”
LUK 18:27 ବାତେଙ୍କ୍ ଇତ୍କେ ଜିସୁ କେତ୍ତଣ୍ଡ୍, “ବେନ୍‌ ନାରୁଡ଼୍ ତଡ଼୍ ଆୟ୍‍ୟ ଆଦ୍ ଇଶ୍ୱରତେ ତଡ଼୍ ଆଦ୍ ତେ ।”
LUK 18:28 ଆଗେତିନ୍‍ସ୍ ପିତର୍ କେତ୍ତଣ୍ଡ୍, “ଉଡ଼େ, ମାମେ ନିଜେ ନିଜର୍ ସାରେତିଙ୍କ୍ ୱିଡ଼୍‍ସି ନି ପେର୍କେ ୱାସ୍‍ମିନ୍ଦେମ୍‍ ।”
LUK 18:29 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ନାନ୍ ମିକିଂଙ୍କ୍ ସତ୍ କେତୁତାନ୍; ବେନ୍ ନାରୁଡ଼୍ ଇଶ୍ୱରତାଦ୍ ରାଜ୍ୟ ସେଙ୍ଗେ ଲୋନ୍‌‍ କି ମୁତ୍‍ତେ କି ତାମୁଣ୍ଡ୍‌ କି ୟାୟବାବ କି ନିଜର୍ ପିଲାଙ୍କ୍ ୱିଡ଼୍‍ସ୍‍ତଡ଼୍,
LUK 18:30 ଇଞ୍ଜେତ୍ ଦିନାତେ ଗାଟି ଗୁଣାମ୍ ଦର୍‍କିତେ ମେଣ୍ଡ୍ ପେର୍‍କେତ୍‍ ଦିନାତେ ସାରେଦିନାତ୍ ଜିୱୁଣ୍ଡ୍ ଦର୍‍କିତ୍, ଇଦ୍ ଲେକେମ୍ ନାରୁଡ଼୍ ବେନ ଇଲାଣ୍ଡ୍ ।”
LUK 18:31 ପେର୍‍କେ ଜିସୁ ବାରଜାନ୍ ଶିଷ୍ୟଡ଼କ୍ ୱେରେ ମାଡ଼ି ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଉଡ଼ାଟ୍, ମାନାଡ଼୍ ଯିରୁଶାଲେମ୍‍ତା ଆଞ୍ଜ ମିନ୍ଦେମ୍, ମେଣ୍ଡେ ନାରୁଡ଼୍ ପିଲେତ୍ ବିଷୟତେ ବାବବାଦୀଡ଼୍ ବାତା ଲେକ୍‍ତଡ଼୍ ଆଉ ସାରେ ସଫଲ୍‍ ଆଦ୍‍ତେ ।
LUK 18:32 ଅଣ୍ଡ୍‌ ବିଜାତି ନାରୁଡ଼୍‍ତେ କାଇଦେ ସମର୍ପିତ୍ ଆଦ୍‍ତନ୍, ମେଣ୍ଡେ ଅଡ଼୍‌‍ ଅଂକିଙ୍କ୍‌ ପରିହାସ୍ ମାଡ଼ିତଡ଼୍, ଅନ୍‌ ସେଙ୍ଗେ ଆୱୁକିତ୍‍ତଡ଼୍‍ ନୁ ଅନ୍‌ ପରୁ ଉଚିତଡ଼୍,
LUK 18:33 ଅଂକିଙ୍କ୍‌ ଚାବୁକତଡ଼୍ ରେହେସ୍ ହାୱକିତଡ଼୍, ମେଣ୍ଡେ ମୁଣ୍ଡ୍ ଦିନାମ୍‌ତେ ପେର୍କେ ଅଣ୍ଡ୍‌ ମେଣ୍ଡେ ଜିୱୁଣ୍ଡ୍ ଆଦ୍‍ତନ୍ ।”
LUK 18:34 ବାତେଙ୍କ୍ ଇତ୍କେ ଅଡ଼୍‌‍ ଇଦ୍‍ସାରେ ବିଷୟତେ ବାତେମିକା ପୁନଡ଼୍; ଇଦ୍ ବାକ୍ୟ ଅଡ଼୍‌‍ ଆଗାଙ୍କ୍ ମିଞ୍ଜି ମାତ୍‍ତେ, ମେଣ୍ଡେ ଜିସୁ ବାତ୍ ବାତ୍ କେସ‍ମାତ୍‍ତଡ଼୍, ଆଉ ସାରେ ଅଡ଼୍‌ ବୁଜେମ୍ ଆୟ୍‍ୟ ମାତ୍‍ତଡ଼୍ ।
LUK 18:35 ଅଣ୍ଡ୍‌ ଯିରୀୟ ନଗର୍‍ତେ ଗାର୍‍ରେ ହେଉଦାନ୍‍ ୱେଲେ, ୱେରଣ୍ଡ୍ କାନାଲ୍ ହାର୍‍ଦେ ଗାର୍‍ରେ କୁଦି ତାଆଲ୍‍କ ମାତ୍‍ତଣ୍ଡ୍ ।
LUK 18:36 ଅଣ୍ଡ୍‌ ନାରୁଡ଼୍ ସାରେତଡ଼୍ ଆଦାନାଦ୍ ଲେଙ୍ଗ୍ କେଞ୍ଜି ଗଟ୍ ବାତେଏ ଇଞ୍ଜ ପାଚ୍ରାମାଡ଼ାଙ୍କ୍ ପସ୍‍ପ୍‍ତଣ୍ଡ୍ ।
LUK 18:37 ଅଡ଼୍‌‍ କାନାଙ୍କ୍ କେତ୍‍ତଡ଼୍, “ନାଜରିତିୟ ଜିସୁ ଇଦ୍ ଆର୍‍ଇସ୍ ଆଦୁତନ୍ ।”
LUK 18:38 ଆଗାଙ୍କ୍ ଅଣ୍ଡ୍‌ କାନାଲ୍ ଗାଟି ଲେଙ୍ଗଦେ କାର୍‍ଙ୍ଗତଣ୍ଡ୍, “ହୋ ଜିସୁ, ଦାଉଦ୍‍ତେ ମାର୍‍, ନାକିଂଙ୍କ୍ ଦୟା ମାଡ଼ା ।”
LUK 18:39 ମାତର୍ ମୁନେ ଆଦାନଡ଼୍ ନାରୁଡ଼୍ କାନାଙ୍କ୍ ଦମକ୍ ଇସ୍‌ ଅଂକିଙ୍କ୍‌ କଟ ଆଦାଙ୍କ୍ କେତ୍‍ତଡ଼୍, ବାତେଙ୍କ୍ ଇତ୍କେ ଅଣ୍ଡ୍‌ ମେଣ୍ଡ୍ ଗାଟି ଲେଙ୍ଗତେ କାର୍‍ତଣ୍ଡ୍, “ହୋ ଦାଉଦ୍‍ ତେ ମାର୍‍, ନାକିଂଙ୍କ୍ ଦୟା ମାଡ଼ା ।”
LUK 18:40 ଜିସୁ ଆଗାଙ୍କ୍ ନିସ୍ ମିକା କାନାଙ୍କ୍ ଗାର୍‍ରେ ତାତାନଙ୍କ୍ କେତ୍ତଣ୍ଡ୍, ମେଣ୍ଡ୍ ଅଣ୍ଡ୍‌ ଗାର୍‍ରେ ୱାତ୍‌ତେ ୱେଲେ, ଜିସୁ ଅଂକିଙ୍କ୍‌ କେତ୍ତଣ୍ଡ୍,
LUK 18:41 ନାନ୍ ନି ମାଇଦିଙ୍କ୍ ବାତ୍ ମାଡ଼ିତାନ୍ ଇଞ୍ଜ ନିମେ ଇଚ୍ଛା ମାଡ଼ୁତିନ୍ ? କାନାଲ୍ କେତ୍ତଣ୍ଡ୍, “ହୋ ପ୍ରବୁ, ନାନ୍ ବେଲାକି ମେଣ୍ଡେ ଉଡ଼୍‍ପାର୍ଦ୍‍ତାନ୍ ।”
LUK 18:42 ଜିସୁ କାନାଙ୍କ୍ କେତ୍ତଣ୍ଡ୍, “ତ ନିମେ କଣ୍ଡା ଉଡ଼େ; ନିୱାଦ୍ ବିଶ୍ୱାସ୍ ନିକିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ ।”
LUK 18:43 ସାଙ୍ଗେ ସାଙ୍ଗେ ଅଣ୍ଡ୍‌ କଣ୍ଡାଉଡ଼ି, ଇଶ୍ୱରତେ ମହିମା କୀର୍ତ୍ତନ୍‍ ମାଡ଼ମାଡ଼ ଅନ୍‌ ପେର୍କେ ପେର୍କେ ତାଆକାନଙ୍କ୍ ପସ୍ପ୍‍ତଣ୍ଡ୍ ନୁ ନାରୁଡ଼୍ ସାରେତଡ଼୍ ଆଦ୍ ଉଡ଼ି ଇଶ୍ୱର୍‌ ତେ ପ୍ରସଂଶା ମାଡ଼୍‍ତଡ଼୍ ।
LUK 19:1 ପେର୍‍କେ ଜିସୁ ଯିରୀୟତାଗ୍ ଆସି ମିକା ଆଦ୍ ଆଲା ଇସ୍‌ ଆଞ୍ଜ ମାତ୍‍ତଣ୍ଡ୍ ।
LUK 19:2 ମେଣ୍ଡେ ଉଡ଼ାଟ୍, ଜକୀୟ ପେଦେର୍ ତଣ୍ଡ୍ ୱେରଣ୍ଡ୍ ନାରୁଡ଼୍ ମାତ୍‍ତଣ୍ଡ୍, ଅଣ୍ଡ୍‌ ୱେରଣ୍ଡ୍ ମୁକ୍ୟକରଗ୍ରାହୀ ନୁ ସାଉକାର୍ ନାରୁଡ଼୍ ମାତ୍‍ତଣ୍ଡ୍ ।
LUK 19:3 ଜିସୁ ବେନଣ୍ଡ୍, ଅଂକିଙ୍କ୍‌ ଉଡ଼ାଙ୍କ୍ ଅଣ୍ଡ୍‌ ଇଚ୍ଛା ଆସମାତ୍‍ତଣ୍ଡ୍, ବାତେଙ୍କ୍ ଇତ୍କେ ନାରୁଡ଼୍ ମାନ୍ଦେ ମାଇଦିଙ୍କ୍ ଉଡ଼୍‍ ପାର୍‍ୱ ମାତ୍‍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ ବୁଟି ମାତ୍‍ତଣ୍ଡ୍ ।
LUK 19:4 ଆଦିଙ୍କ୍ ଅଣ୍ଡ୍‌ ନାରୁଡ଼୍‍ତେ ମୁନେ ମିରିଆଞ୍ଜ୍ ଜିସୁଙ୍କ୍ ଉଡ଼ାନ୍ ସେଙ୍ଗ୍ ୱେରଡ଼୍ ତୟା ମାଡ଼େତାଗ୍ ତାର୍‍ତଣ୍ଡ୍, ବାତେଙ୍କ୍ ଇତ୍କେ ଆଦ୍ ହାର୍ ଇସ୍‌ ଜିସୁ ଆଦାନ୍ ମାତ୍‍ତେ ।
LUK 19:5 ଜିସୁ ଆଦ୍ ପଡ଼ିୟେତାଗ୍‍ ୱାସ୍ ପରୁ ଉଡ଼ି ଜକୀୟଙ୍କ୍ କେତ୍ତଣ୍ଡ୍, “ଜକୀୟ ସିଟ୍‍ପାଟ୍ ଡିଗି ୱାଡ଼ା, ବାତେଙ୍କ୍ ଇତ୍କେ ନେଣ୍ଡ୍ ନାକିଂଙ୍କ୍ ବେଲାମେଣ୍ଡେ ନି ଲୋନ୍‌‍ ମାନ୍ଦେୱେଇତିତ୍‍ ।”
LUK 19:6 ଆଗାଙ୍କ୍ ଅଣ୍ଡ୍‌ ସିଟ୍‍ପାଟେ ଡିଗି ୱାସ୍ ୱେଡ଼୍‍କେତେ ଜିସୁଙ୍କ୍ ତାନ୍ ଲୋନ୍‌‍ କାର୍‍ଙ୍ଗି ହତ୍‍ତଣ୍ଡ୍ ।
LUK 19:7 ଆଦ୍ ଉଡ଼ି ସାରେତଡ଼୍ ତାମ୍‍ତାମ୍ ଲୋପେ ତିରିୟି କେତାଙ୍କ୍ ପସ୍ପ୍‍ତ୍‍ତଡ଼୍, “ଅଣ୍ଡ୍‌ ୱେରଣ୍ଡ୍ ପାପି ମାନେୟ୍‍ତେ ଲୋନ୍‌‍ ମାନ୍ଦାଙ୍କ୍ ଆଦୁତନ୍ ।”
LUK 19:8 ଜକୀୟ ନିସ୍ ମିକା ପ୍ରବୁଙ୍କ୍ କେତ୍ତଣ୍ଡ୍, “ହୋ ପ୍ରବୁ ଉଡ଼େ, ନାୟାଦ୍ ସମ୍ପତ୍ତି କନ୍‍ସ୍ ଆଦ୍‍ ଦାନ ନାନେ ଗରିବ୍ ନାରୁଡ଼୍‍କିଂଙ୍କ୍ ଇଦୁତାନ୍‍, ମେଣ୍ଡେ ଯଦି ଅନ୍‌ୟାୟତେ, ବେନନାଗାଙ୍କ୍ ବାତ୍‍ତେ ଅସ୍‍ମାତ୍କେ, ମେଣ୍ଡେ ନାଲୁ ଗୁଣତେ ଆଦ୍ ମାଲ୍‌ପିଦୁତାନ୍ ।”
LUK 19:9 ଆଦିଙ୍କ୍ ଜିସୁ ଅଡ଼୍‌‍ ବିଷୟତେ କେତ୍ତଣ୍ଡ୍, “ନେଣ୍ଡ୍ ଇଦ୍ ଲୋନ୍‌‍ ପରିତ୍ରାଣ ୱାତ୍‍ତେ, ତ ଇଣ୍ଡ୍ ମିକା ୱେର୍‍ଣ୍ଡ୍ ଅବ୍ରାହାମ୍‌ତେ ମାର୍‍ ।
LUK 19:10 ବାତ୍ ମାୟିମିନ୍ଦେ, ଆଦ୍ ମେହେକି ଗେଲ୍‍ସ୍‍ପାନ୍ ସେଙ୍ଗେ ନାରୁଡ଼୍ ପିଲେ ୱାସ୍‍ମିନ୍ଦେଣ୍ଡ୍ ।”
LUK 19:11 ନାରୁଡ଼୍ ଇଦ୍ ଗଟିସାରେ କେଞ୍ଜାନ୍ ୱେଲେ ଜିସୁ ମେଣ୍ଡେ ୱେରଡ଼୍ ୱେଷଡ଼୍‍ କେତ୍ତଣ୍ଡ୍, ଅଣ୍ଡ୍‌ ଯୀରୁଶାଲମ୍ ଗାର୍‍ରେ ଆଶେ ମାତ୍‍ତଣ୍ଡ୍ ନୁ ଇଶ୍ୱରତେ ରାଜ୍ୟ ଗାଟି ଯାପେ ତିଆର୍ ଆଦ୍‍ତେ ଇଞ୍ଜ ଅଡ଼୍‌ ହେର୍କା ମାଡ଼ମାତ୍‍ତଡ଼୍ ।
LUK 19:12 ଆଦିଙ୍କ୍ ଜିସୁ କେତ୍ତଣ୍ଡ୍, “ୱେରଣ୍ଡ୍ ବାଡ଼୍‍ୟଣ୍ଡ୍ ମାନେଇ ତାନ୍ ସେଙ୍ଗେ ରାଜପଦ ଦର୍‍ସ୍‍କି ମାଲ୍‍ସ୍ ୱାଦାନ୍ ମାତ୍‍ତେ ଅଣ୍ଡ୍‌ ଜେଏକେ ଦେଶ୍ ଆତ୍‍ତଣ୍ଡ୍ ।”
LUK 19:13 ଅଣ୍ଡ୍‌ ତାମ୍ ଦଶ୍‌ଜାନ୍ ଦାସଡ଼୍‍କ୍‍ କାର୍‍ଙ୍ଗି ଅଡ଼୍‌‍କିଂଙ୍କ୍ ୱେରନ୍ ସୁନା ରୂପାଡାବ୍‌ ଇସ୍‌ କେତ୍ତଣ୍ଡ୍, “ନାନ୍ ୱାଦାନ୍ ଯାକ ବେପାର୍ ମାଡ଼ାଟ୍ ।”
LUK 19:14 ବାତେଙ୍କ୍ ଇତ୍କେ ତାନ୍ ଦେଶ୍ ତେ ନାରୁଡ଼୍ ଅଂକିଙ୍କ୍‌ ପାସ୍‍କ ମାତ୍‍ତଡ଼୍, ମେଣ୍ଡେ ଅଡ଼୍‌‍ ଅନ୍‌ ପେର୍‍କେ ଦୂତ୍‍କିଂଙ୍କ୍ ରହସ୍ କେତ୍‍ତଡ଼୍‍, “ଇ ନାରୁଡ଼୍ ଯେ ମା ପରୁ ରାଜତ୍ୱ ମାଡ଼ିତନ୍, ଇଦ୍ ମାନ୍‍ ଇଚ୍ଛା ଆୟ୍‍ୟ ।”
LUK 19:15 ପେର୍‍କେ ଅଣ୍ଡ୍‌ ରାଜପଦ ଦର୍‍ସ୍‍କି ଆଗାଙ୍କ୍ ମାଲ୍‍ସ୍ ୱାତ୍‍ତଣ୍ଡ୍ । ବେନ୍ ଦାସଡ଼୍‍କ୍‍ ରୂପାଡାବ୍‌ ଇସ୍‌ ମାତ୍‍ତଣ୍ଡ୍, ଅଡ଼୍‌‍ ଲୋପେ ବେପାର୍ ମାଡ଼ି ବେନ ବେସର୍ ଲାବ୍ ମାଡ଼୍‍ତଡ଼୍, ଆଦ୍ ପୁନ୍ଦାଙ୍କ୍ ସେଙ୍ଗେ ଅଡ଼୍‌‍କିଂଙ୍କ୍ ତାନ୍ ଗାର୍‍ରେ କାର୍‍ଙ୍ଗି ତାତାନଙ୍କ୍ କେତ୍‍ତଣ୍ଡ୍ ।
LUK 19:16 ଆଗାଙ୍କ୍ ମୁନେଙ୍କ୍ ୱେରଣ୍ଡ୍ ୱାସ୍ କେତ୍ତଣ୍ଡ୍, “ପ୍ରବୁ, ନିୟାୱୁ ସୁନା ରୂପାଡାବ୍‌ତେ ମେଣ୍ଡେ ନାନ୍ ଦଶ୍‍ଟାନ୍ ସୁନା ରୂପାଡାବ୍‌ ଲାବ୍ ମାଡ଼୍‍ତାନ୍ ।”
LUK 19:17 ଅଣ୍ଡ୍‌ ଅଂକିଙ୍କ୍‌ କେତ୍ତଣ୍ଡ୍, “ଲେକେତ୍‍, ସାୟେ ଦାସ, ନିମେ ଗାଟି ସୁଦୁର୍‍ ବିଷୟତେ ବିଶ୍ୱାସ୍ତ ଆଦାଙ୍କ୍ ଦଶ୍‍ଟାନ୍ ନଗର୍‍ ତେ ପରୁ ଅଦିକାର୍‌ ଦର୍‍କିତ୍ ।”
LUK 19:18 ମେଣ୍ଡେ ଦ୍ୱିତିୟ ନାରୁଣ୍ଡ୍‌ ୱାସ୍ କେତ୍ତଣ୍ଡ୍, “ପ୍ରବୁ, ନିୟାୱ୍‍ ରୂପାଡାବ୍‌ନ୍‍ ଏଇଙ୍ଗ୍ ରୁପେୟ୍ ଲାବ୍ ମାଡ଼୍‍ତାନ୍ ।”
LUK 19:19 ଅଣ୍ଡ୍‌ ଅଂକିଙ୍କ୍‌ ମିକା କେତ୍ତଣ୍ଡ୍, “ନିମେ ଆନ୍‌‍ତେ ଏଇଙ୍ଗ୍ ନଗର୍‍ତେ ପରୁ ଅଦିକାର୍‌ ଦର୍‍କ୍‍ତେ ।”
LUK 19:20 ମେଣ୍ଡେ ୱେରଣ୍ଡ୍ ୱାସ୍ କେତ୍ତଣ୍ଡ୍, “ପ୍ରବୁ, ଉଡ଼େ, ଇଦ୍ ନିୱାଦ୍ ସୁନା ରୁପେୟ୍, ନାନ୍ ଇଦିଙ୍କ୍ ତୁୱାଲ୍ ତାଗ୍ ତହସ୍ ନେହେସ୍ ମାତ୍‍ତାନ୍ ।
LUK 19:21 ବାତେଙ୍କ୍ ଇତ୍କେ ନାନ୍ ନିକିଂଙ୍କ୍ ୱେର୍‍ତାନ୍, ବେଲାକି ନିମେ ୱେରନ୍ ଗାଡ଼୍‍ସିନ୍ ମାନେଇ, ବାତେଏ ନେହେସ୍ ମାନଡ଼୍‍, ଆଦିଙ୍କ୍ ପେହେକି ଆଦ୍‍ତିନ୍, ମେଣ୍ଡେ ବାତେଏ ୱିତୱେ ମାନ୍‍ତଡ଼୍, ଆଦିଙ୍କ୍ କଇଦ୍‍ତିନ୍ ।”
LUK 19:22 ଅଣ୍ଡ୍‌ ଅଂକିଙ୍କ୍‌ କେତ୍ତଣ୍ଡ୍, “ରେ ଦୁଷ୍ଟ ଦାସ, ନି ମକମ୍‍ତେ ଗଟିନେ ନିୱାଦ୍ ବିଚାର୍ ମାଡ଼ିତାନ୍ । ନାନ୍ ୱେରନ୍ ଗାଡ଼୍‍ସିନ୍ ମାନେଇ, ବାତେଏ ନେୱକଟ ମାନ୍‍ତାନ୍, ଆଦିଙ୍କ୍ ପେହେକି ଆଦ୍‍ତାନ୍, ମେଣ୍ଡେ ବେଗେୱିତି ମାନନ୍, ଆଦିଙ୍କ୍ କୟଦ୍‍ତାନ୍, ଆଦ୍ ନିମେ ପୁଞ୍ଜ୍ ମାତ୍‍ତି ।
LUK 19:23 ଆଲାତ୍କେ, ବ୍ୟାଙ୍କ୍ ତାଗ୍ ବାତେଙ୍କ୍ ନାୟାୱ୍ ରୁପେୟ୍ ନେହେୱିନ୍ ? ଆଲାତ୍କେ ନାନ୍ ୱାସ୍ ଉଦାର୍ ତଡ଼୍ ଆଦିଙ୍କ୍ ଆଦାୟ ମାଡ଼େନ୍ ?”
LUK 19:24 ମେଣ୍ଡ୍, ଆଦ୍ ବକେତ୍ ନିସ୍ ମାନ୍ଦାନ୍ ମାନେଇନଡ଼୍‍କ୍ କେତ୍‍ତଣ୍ଡ୍, “ଇନାଗାଞ୍ଚ୍ ଇଦ୍ ରୁପେୟ୍ ହସ୍‍ମିକା, ବେନନାଦ୍ ଦଶ୍‍ଟାନ୍ ରୁପେୟ୍ ମିନ୍ଦେ, ଅଂକିଙ୍କ୍‌ ହିମୁଟ୍ ।”
LUK 19:25 ଆଗାସ୍‍ ଅଡ଼୍‌‍ ଅଂକିଙ୍କ୍‌ କେତ୍ତଡ଼୍, “ପ୍ରବୁ, ଅନାଦ୍‌ ତ ଦଶ୍‍ଟାନ୍ ରୂପାଡାବ୍‌ ମିନ୍ଦେ ।”
LUK 19:26 ନାନ୍ ମିକିଂଙ୍କ୍ କେସମିନ୍ଦେନ୍, “ବେନ୍ ମାନେଇତିଙ୍କ୍ ମିନ୍ଦେ, ଅଂକିଙ୍କ୍‌ ହିଦ୍‍ତଡ଼୍; ବାତେଙ୍କ୍ ଇତ୍କେ ବେନନାଦ୍ ଇଲ୍‍ଲେ, ଅନାଗ୍ ବାତ୍ ମିନ୍ଦେ, ଆଦେ ମିକା ଅନାଗାଙ୍କ୍ ଆଦ୍‍ତଡ଼୍ ।
LUK 19:27 ବାତେଙ୍କ୍ ଇତ୍କେ, ନାୟାୱୁ ଇ ବେନ୍ ଶତ୍ରୁଡ଼୍ ନାନ୍ଅଡ଼୍‌‍ ପରୁ ରାଜତ୍ୱ ମାଡ଼ିତାନ୍ ଇଞ୍ଜ ଇଚ୍ଛା ମାଡ଼୍‍ୱେ ମାତ୍‍ତଡ଼୍, ଅଡ଼୍‌‍କିଂଙ୍କ୍ ଇଗେ ତାସ୍ ନା ମୁନ୍‍ନେ ହାୱ୍‍କାଟ୍‍ ।”
LUK 19:28 ଜିସୁ ଇଦ୍‍ସାରେ ଗଟିକେସ୍ ତେର୍‍ସ୍ପ୍‍ତେ ପେର୍‍କେ ଶିଷ୍ୟଡ଼୍ ମୁନେ ଯିରୁଶାଲେମ୍‍ତା ଆଦାନଙ୍କ୍ ପସ୍ପ୍‍ତଣ୍ଡ୍ ।
LUK 19:29 ମେଣ୍ଡ୍, ବେସୁଟ୍‌ ଅଣ୍ଡ୍‌ ଜୀତ ମେଟେତ୍ ଗାର୍‍ରେ ବେତ୍‍ପାଗୀ ନୁ ବେତନିୟା ଗାର୍‍ରେ ହେଉତଣ୍ଡ୍, ଆସୁଙ୍କ୍ ଅଣ୍ଡ୍‌ ତାନ୍ ଶିଷ୍ୟନଡ଼୍ ଲୋପେଙ୍କ୍ ଇର୍‍ୱୁଡ଼୍‍କିଙ୍କ୍ ଇଦ୍ ଗଟ୍ କେସ୍ ରହତଣ୍ଡ୍,
LUK 19:30 “ମି ମୁନେ ଆଦ୍ ନାର୍‍ଦାଗ୍ ଆନୁଟ୍; ଆଗେ ଅସାନ୍ ୱେଲେ, ବେନେ ତାନ୍‌ପରୁ କୁଦ୍‍ୱେ ମାନ୍‍ତଣ୍ଡ୍, ଇଦ୍ ରକମ୍ ଅଣ୍ଡ‍ୟ୍ ଗଦପିଲ୍ ତହସ୍ ମାନ୍ଦାନାଦ୍ ଉଡ଼ିତିଡ଼୍; ଆଦିଙ୍କ୍ ଲେହେସ୍ ତାଡ଼ାଟ୍ ।
LUK 19:31 ମେଣ୍ଡେ, ଆସୁଙ୍କ୍ ବେନ ମିକିଂଙ୍କ୍ ବାତେଙ୍କ୍ ଲେତୁତିଡ଼୍ ଇଞ୍ଜ ପାଚ୍ରା ମାଡ଼ିତଡ଼୍, ଆସୁଙ୍କ୍ ଇଲା କେତିତିଡ଼୍, ବାତ୍‍ତେଙ୍କ୍ ଇତ୍କେ ହିଦ୍ ପ୍ରବୁଙ୍କ୍ ଦର୍‍କାଡ଼୍‍ ମିନ୍ଦେ ।”
LUK 19:32 ଆ ରହତ୍‌ତେ ଶିଷ୍ୟଡ଼୍‌ ଆଞ୍ଜ୍, ଅଣ୍ଡ୍‌ ଅଡ଼୍‌‍କିଂଙ୍କ୍ ବେଲାକେସ୍‍ ମାତ୍‍ତଣ୍ଡ୍, ଆଦେପୁଟୁଙ୍କ୍ ଉଡ଼୍‍ତଡ଼୍ ।
LUK 19:33 ମେଣ୍ଡେ, ଅଡ଼୍‌‍ ଗଦପିଲେତିଙ୍କ୍ ଲେତାନ୍‍ ୱେଲ୍‍ ଆଦିନ୍ ମାଲିକ୍ ହଡ଼୍‍କିଙ୍କ୍ ପଚ୍ରାମାଡ଼୍‍ତଡ଼୍, “ବାତେଙ୍କ୍ ଗଦ ପିଲେତିଙ୍କ୍ ଲେତୁତିଡ଼୍ ?”
LUK 19:34 ଅଡ଼୍‌‍ କେତ୍‍ତଡ଼୍, “ବାତେଙ୍କ୍ ଇତ୍କେ ଇଦିନାଗ୍‍ ପ୍ରବୁନାଦ୍ ଦର୍‍କାର୍ ମିନ୍ଦେ ।”
LUK 19:35 ମେଣ୍ଡେ, ଆଦିଙ୍କ୍ ଜିସୁନ୍ ଗାରେତାସ୍‍ ତାନ୍‍ପରୁ ନିଜେ ନିଜେତ୍ ସିଲେ ୱାଟି ଜିସୁଙ୍କ୍ କୁସ୍‍ପ୍‍ତଡ଼୍ ।
LUK 19:36 ମେଣ୍ଡେ, ଅନ୍‌ ଆଦାନ୍ ୱେଲେ ନାରୁଡ଼୍‌ ରୋଟିନାଗ୍‍ ସିଲେ ତାରାନଙ୍କ୍ ପସ୍ପ୍‍ତ୍‍ତଡ଼୍ ।
LUK 19:37 ମେଣ୍ଡେ, ଅଣ୍ଡ୍‌ ବେସୁଙ୍କ୍‍ ଜୀତ ମେଟେତାଗ୍ ଡିଗୁଡ଼୍ ପଡ଼ିୱେତ୍ ଗାର୍‍ରେ ଏୱୁତଡ଼୍‍, ଆସୁଙ୍କ୍ ସାର୍‍ରେତଡ଼୍ ଶିଷ୍ୟଡ଼୍ ଉଡ଼ିମାନ୍ଦାନ୍‍ ସାରେ ଶକ୍ତିତାଦ୍‍ ପାଡ଼ିୟି ମାଇଦିଙ୍କ୍ ୱେଡ଼୍‍କେତେ ଗାଟିଲେଙ୍ଗ୍‍ଦେ ଇଶ୍ୱରତିଙ୍କ୍ ପ୍ରସଂଶା ମାଡ଼ଡ଼୍‍ ମାଡ଼ଡ଼୍‍ କେତ୍‍ତଡ଼୍,
LUK 19:38 “ପ୍ରବୁନ୍ ପେଦେର୍‍ତେ ବେନ୍ ରାଜାଲଡ଼୍ ୱାସ ମିନ୍ଦେଡ଼୍, ଅଣ୍ଡ୍‌ ଦନ୍ୟ । ସ୍ୱର୍ଗତାଗ୍ ଶାନ୍ତି ନୁ ପ୍ରବୁନାଦ୍ ମହିମା ଆୟି ।”
LUK 19:39 ଆଗାଙ୍କ୍ ବେସ୍‍କ୍‍ତୁଡ଼୍‍ ପାରୂଶୀଡ଼୍ ଅଂକିଙ୍କ୍‌ କେତ୍‍ତଡ଼୍, “ହୋ ଗୁରୁ, ନି ଶିଷ୍ୟଡ଼୍‍କିଂଙ୍କ୍ କଟ ଆଦାଙ୍କ୍ କେଲମ୍ ।”
LUK 19:40 ଜିସୁ ଉତ୍ତର୍ କେତ୍‍ତଣ୍ଡ୍, “ନାନ୍ ମିକିଂଙ୍କ୍ କେସମିନ୍ଦେନ୍ ଇଡ଼୍ ଯଦି କଟ ମାତ୍‍କେ, କାଲ୍ ଆନ୍‌‍ତେ ଗଟି କେତିତା ।”
LUK 19:41 ମେଣ୍ଡେ, ବେସୁଙ୍କ୍‍ ଜିସୁ ଯିରୁଶାଲେମ୍‍ତାଗ୍ ୱାତ୍‍ତଣ୍ଡ୍, ଆସୁଙ୍କ୍ ନାର୍‍ତିଙ୍କ୍ ଉଡ଼ି ଆଦିନ୍ ସେଙ୍ଗେ କେୟି କେତ୍‍ତଣ୍ଡ୍,
LUK 19:42 “ନିମ୍‍, ହଁ, ନିମ୍‍ ଯଦି ନେଣ୍ଡ୍ ଶାନ୍ତିତେ ବିଷୟତିଙ୍କ୍ ପୁଞ୍ଜ୍‍ମାନେନି, ମାତର୍ ଇଞ୍ଜେ ଆଉ ତ ତୋନ୍ଦକଟ ମିଞ୍ଜି ମିନ୍ଦେ ।
LUK 19:43 ତ ନି ପରୁ ମାନ୍ଦାନ୍ ଦୟାତାଦ୍ ସମୟ୍ ପୁନ୍‍ୱାଙ୍କ୍, ଶତ୍ରୁଡ଼୍ ନି ସାରେ ପାକେ ପେଟି ତହସ୍ ନିକିଂଙ୍କ୍ ବନ୍ଦି ମାଡ଼ିତଡ଼୍ ମେଣ୍ଡେ ନିୟାୱୁ ସାରେ ହାର୍ ବନ୍ଦ୍ ମାଡ଼ିତଡ଼୍ ।
LUK 19:44 ମେଣ୍ଡେ ଅଡ଼୍‌‍ ନିକିଂଙ୍କ୍ ନୁ ନି ପାକେ ମାନ୍ଦାନ୍ ନାରୁଡ଼୍‍କ୍ ପୁରା ଦସଂ ମାଡ଼ିତଡ଼୍, ଅଣ୍ଡୟ୍‌ କାଲ୍ ବଦେ ମିକା ଅଡ଼୍‌‍ ପଡ଼୍‍ୟେତାଗ୍‍ ୱିଡ଼୍‍ସଡ଼୍‍, ବାତେଙ୍କ୍ ଇତ୍କେ ବେସୁଟ୍‌ ଇଶ୍ୱର୍‌ ରକ୍ଷା ମାଡ଼ାଙ୍କ୍ ୱାତ୍‍ତଣ୍ଡ୍ ନିମେ ଅଂକିଙ୍କ୍‌ ହେଞ୍ଚାଙ୍କ୍ ପାର୍‍ୱି ।”
LUK 19:45 ମେଣ୍ଡେ, ଜିସୁ ମନ୍ଦିର୍‍ତେ ଲୋପେ ଆସ୍‍ତଣ୍ଡ୍, ୱାମ ମାନ୍ଦାନ୍ ମାନେଇକିଂଙ୍କ୍ ଇଲା କେସ୍ ପେସ୍‍ପାନଙ୍କ୍ ପସ୍‍ପ୍‍ତଣ୍ଡ୍ ।
LUK 19:46 “ଦର୍ମଶାସ୍ତ୍ରତାଗ୍ ଲେକାମିନ୍ଦେ, ଇଶ୍ୱର୍ କେତ୍‍ତଣ୍ଡ୍, ମାୱାଦ୍‍ ଲୋନ୍‌ ପ୍ରାର୍ତନାଲୋନ୍‌ ଆଦ୍ ତେ, ବାତେଙ୍କ୍ ଇତ୍କେ ମିଡ଼୍ ଆଦିଙ୍କ୍ ଡଙ୍ଗାଲଡ଼୍ ଲୋନ୍‌ ଲେକାମ୍ ମାଡ଼ିମିନ୍ଦେଡ଼ି ।”
LUK 19:47 ମେଣ୍ଡେ, ଅଣ୍ଡ୍‌ ସାରେଦିନାମ୍ ଯିରୁଶାଲେମ୍ ମନ୍ଦିର୍‍ତାଗ୍ ଶିକ୍ଷା ହିସମାତ୍‍ତଣ୍ଡ୍, ମାତର୍ ବେଡ଼ିୟି ଯାଜକ୍‌ ନୁ ଶାସ୍ତ୍ରୀନଡ଼୍ ନାରୁଡ଼୍‌ତେ ନେତାଲଡ଼୍ ତଡ଼୍ ଅଂକିଙ୍କ୍‌ ଆୱୁକାନଙ୍କ୍ ଇଚ୍ଛା ମାଡ଼ମାତ୍‍ତଡ଼୍,
LUK 19:48 ବାତେଙ୍କ୍ ଇତ୍କେ ମାନେଇ ସାରେତଡ଼୍ ଅଣ୍ଡୟ୍‌‍ମନ୍ ଆସ୍‍ ଜିସୁନ୍ ଶିକ୍ଷା କେଞ୍ଜମାତ୍‍ତଡ଼୍ ଆଦିଙ୍କ୍ ଅଡ଼୍‌‍ ବାତେଏ ମାଡ଼ିତଡ଼୍ ଆଦିନାଦ୍ ଉପାୟ୍ ଦର୍‍ସ୍‍କାଙ୍କ୍ ପାର୍ୱେମାତ୍‍ତଡ଼୍ ।
LUK 20:1 ଆଗ୍‍ତିନ୍‍ସ୍ ଆଦ୍ ଦିନାମ୍ ବେସୁଙ୍କ୍‍ ଜିସୁ ମନ୍ଦିର୍‍ତାଗ୍ ନାରୁଡ଼୍‍କିଂଙ୍କ୍ ଶିକ୍ଷା କେସମାତ୍‍ତଣ୍ଡ୍ ନୁ ସୁସମାଚାର୍ କେସମାତ୍‍ତଣ୍ଡ୍, ଆସୁଙ୍କ୍ ମୁକ୍ୟାଲଡ଼୍ ମାନେଇ ନୁ ଶାସ୍ତ୍ରୀଡ଼୍ ବାଡ଼ିୟା ନାରୁଡ଼୍ ତଡ଼୍ ୱାସ୍ ଅଂକିଙ୍କ୍‌ କେତ୍‍ତଡ଼୍,
LUK 20:2 “ନିମେ ବେନ୍ ଅଦିକାର୍‌‍ତେ ଇଦ୍‍ସାରେ ମାଡ଼ୁତିନ୍, ନିକିଂଙ୍କ୍ ଇଦ୍ ଅଦିକାର୍‌ ବେନ ଇତ୍‍ତନ୍, ଅଣ୍ଡ୍‌ ବେନନ୍, ମାକିଂଙ୍କ୍ କେଲେ ।”
LUK 20:3 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ଇତ୍‌ତଣ୍ଡ୍‌, “ନାନ୍ ମିକା ମିକିଂଙ୍କ୍ ୱେରଡ଼୍ ଗଟ୍ ପାଚ୍ରାମାଡ଼ିତାନ୍, ନାକିଂଙ୍କ୍ କେଲ୍‍ମୁଟ୍,
LUK 20:4 ବାପ୍ତିସ୍ମ ଯୋହନ୍‌‌ତାଦ୍ ବାପ୍ତିସ୍ମ ହିଦାନାଦ୍ ଅଦିକାର୍‌ ସ୍ୱର୍ଗତାଗାଙ୍କ୍ ନା ନାରୁଡ଼ାଗାଙ୍କ୍ ଦର୍ସିମାତ୍‌ତନ୍‌ ?”
LUK 20:5 ଆଗାଙ୍କ୍ ଅଡ଼୍‌ ନିଜେ ନିଜେ ଯୁକ୍ତିତର୍କ ମାଡ଼ି କେତାକେତି ଆତ୍‍ତଡ଼୍, “ଯଦି ସ୍ୱର୍ଗତାଗାଙ୍କ୍ ଇଞ୍ଜ କେତିତାଡ଼୍‍, ଆଲାତ୍କେ ଅଣ୍ଡ୍‌ କେତିତଣ୍ଡ୍, ମିଡ଼୍ ବାତେଙ୍କ୍ ଅଂକିଙ୍କ୍‌ ବିଶ୍ୱାସ୍ ମାଡ଼୍‍ୱିଡ଼୍ ?
LUK 20:6 ଯଦି ମାନେଇ କନ୍‍ସ୍ ଇଞ୍ଜ କେତିତାଡ଼୍‍, ଆଲେକେ ମାନେଇ ସାରେତଡ଼୍ ମାନାଙ୍କ୍‍ କାଲ୍‍କିନ୍ ତଡ଼୍ ପିଞ୍ଜ୍‍ପ୍‍ତଡ଼୍, ବାତେଙ୍କ୍ ଇତ୍କେ ଯୋହନ୍‌ ଯେ ୱେରଣ୍ଡ୍ ବାବବାଦୀ ଇଦ୍ ଅଡ଼୍‌‍ୱାଦ୍ ଗାଟି ବିଶ୍ୱାସ୍ ମିନ୍ଦେ ।”
LUK 20:7 ଆଦିଙ୍କ୍ ଆଦ୍ ବେଗାଙ୍କ୍ ଆତ୍‍ତେ, ଇଦ୍ ପୁନମ୍ ଇଞ୍ଜ ଅଡ଼୍‌‍ କେତ୍‍ତଡ଼୍ ।
LUK 20:8 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଆଲେକ୍‍ ନାନ୍ ବେନ୍ ଅଦିକାର୍‌‍ତେ ଇଦ୍‍ସାରେ ମାଡ଼ୁତାନ୍, ଆଦ୍ ନାନ୍ ମିକା ମିକିଂଙ୍କ୍ କେଲନ୍ ।”
LUK 20:9 ଜିସୁ ନାରୁଡ଼୍‍କିଂଙ୍କ୍ ଇଦ୍‍ ୱେଷଡ଼୍‍ କେତାନଙ୍କ୍ ପସ୍‍ପ୍‍ତଣ୍ଡ୍ । ୱେରଣ୍ଡ୍ ନାରୁଡ଼୍ ଅଙ୍ଗୁର୍‌ୱାୟେ ମାଡ଼ି ଆଦିନ୍ ଅଣ୍ଡୟ୍‌‍ ଦୁଡ଼େ ଚାଷିନାରୁଡ଼୍‍କ୍ ଇସ୍‌ ନାର୍ଗେ ଦିନାତ୍ ସେଙ୍ଗେ ବିଦେଶ୍‍ ଆତ୍‍ତଣ୍ଡ୍ ।
LUK 20:10 ମେଣ୍ଡେ, ଚାଷିନାରୁଡ଼୍‍ ଅଂକିଙ୍କ୍‌ ଅଙ୍ଗୁର୍ ୱାୟେତ୍‍କନ୍‍ସ କାୟାନେ ପାଲ୍‍କ୍ ହିଦ୍‍ତଡ଼୍, ଇଦିନ୍‍ ସେଙ୍ଗେ ଅଣ୍ଡ୍‌ ୱେରଣ୍ଡ୍ ଦାସଙ୍କ୍ ଟିକ୍ ଦିନାମ୍ ତେ ଅଡ଼୍‌‍ ଗାର୍‍ରେ ରଅତଣ୍ଡ୍, ବାତେଙ୍କ୍ ଇତ୍କେ ଆଦ୍ ଚାଷିନାରୁଡ଼୍‍ ଅଂକିଙ୍କ୍‌ ରେହେସ୍ ଆସାମ୍ କାଇଦେ ରଅତଡ଼୍‍ ।
LUK 20:11 ଅଣ୍ଡ୍‌ ମେଣ୍ଡେଅର୍‍ତୁନ୍‍ ଦାସଙ୍କ୍ ରଅତଣ୍ଡ୍; ଅଡ଼୍‌‍ ଅଂକିଙ୍କ୍‌ ମିକା ଅପ୍‍ମାନ୍ ମାଡ଼ି ବାତେଏ ହିୱକଟ ଆସାମ୍ କାଇଦେ ରହସିତ୍ ତଡ଼୍ ।
LUK 20:12 ପେର୍‍କେ ଅଣ୍ଡ୍‌ ତୃତୀୟ ନାରୁଙ୍କ୍ ମିକା ଆଦ୍‍ଲେକାମ୍ ରଅତଣ୍ଡ୍; ବାତେଙ୍କ୍ ଇତ୍କେ ଅଡ଼୍‌‍ ଅଂକିଙ୍କ୍‌ ମିକା ଚିହ୍ନେନେ ମାଡ଼ି ରେହେସ୍ ବାଇଦେ ହେସିତ୍‍ତଡ଼୍ ।
LUK 20:13 ଆଗାଙ୍କ୍ ଅଙ୍ଗୁର୍ ୱାୟେତେ ମାଲିକ୍ କେତ୍‍ତଣ୍ଡ୍, ନାନ୍ ବାତ୍ ମାଡ଼ିତାନ୍ ? ନା ପ୍ରିୟ ମାର୍‍ଦିଙ୍କ୍ ରହତିତାନ୍, ଅଡ଼୍‌‍ ନିଜାମ୍ ଅନ୍‌ ଗଟି କେଞ୍ଜିତଡ଼୍‍ ।
LUK 20:14 ମାତର୍ ଚାଷିନାରୁଡ଼୍‍ ଅଂକିଙ୍କ୍‌ ଉଡ଼ି ତାମ୍‍ତାମ୍ ଲୋପେ କେତାକେତି ଆସ୍‍ କେତ୍‍ତଡ଼୍, ଇଣ୍ଡ୍ ତ ଉତ୍ତରାଦିକାରି, ଇକିଂଙ୍କ୍ ଆୱକିକାଡ଼୍‍, ବେଲାକି ସାରେ ସମ୍ପତି ମାନାଦ୍‍ ଆଦ୍‍ତେ ।
LUK 20:15 ମେଣ୍ଡେ, ଅଡ଼୍‌ ଅଂକିଙ୍କ୍‌ ଅଙ୍ଗୁର୍ ୱାୟେତେ ବାଇଦେ ତାସ୍‌ ଆଉକ୍‍ତ୍‍ତଡ଼୍ । ଜିସୁ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍, ଇଞ୍ଜେ ଅଙ୍ଗୁର୍ ୱାୟତେ ମାଲିକ୍ ଅଡ଼୍‌‍କିଂଙ୍କ୍ ବାତ୍ ମାଡ଼ିତନ୍ ?
LUK 20:16 ଅଣ୍ଡ୍‌ ୱାସ୍ ଚାଷିନାରୁଡ଼୍‍କ୍ ଆୱକିତଣ୍ଡ୍ ନୁ ମେଣ୍ଡେ ବାଗାତଡ଼୍‍କ୍‍ ଅଙ୍ଗୁର୍ ୱାୟା ହିଦ୍‍ତଣ୍ଡ୍ । ଆଦ୍ କେଞ୍ଜି ଅଡ଼୍‌ କେତ୍ତଡ଼୍‍ ଆଲା ଆଇମା କି ।
LUK 20:17 ବାତେଙ୍କ୍ ଇତ୍କେ ଜିସୁ ଅଡ଼୍‌‍କିଂଙ୍କ୍ ଅଣ୍ଡୟ୍‌ ନଜର୍‍ ଉଡ଼ି କେତ୍ତଣ୍ଡ୍, “ଇଦ୍ ବେନ୍ ବାକ୍ୟ ଲେକାମିନ୍ଦେ, ଆଦିନ୍ ଅର୍ତ ବାତେଏ,” ଲୋନ୍‌‍ ମାଡ଼ାନ୍ ନାରୁଡ଼୍ ବେନେ କାଲ୍‍କିଙ୍କ୍ ପାହାସ୍କ୍‍ତଡ଼୍‍, ଆଦ୍ ମୁନେତ୍ ମୁକ୍ୟ କାଲ୍ ଆତ୍‍ତେ ।
LUK 20:18 ବେନବାଡ଼େ ଆଦ୍ କାଲ୍ ଦେ ପରୁ ରାଲିତଣ୍ଡ୍, ଅଣ୍ଡ୍‌ ଦୁଡ଼ାଦୁଡ଼ା ଆଦ୍‍ତନ୍, ମେଣ୍ଡେ ଆଦ୍ କାଲ୍ ବେନନ୍ ପରୁ ରାଲିତେ, ଅଂକିଙ୍କ୍‌ ଆଦ୍ ଇଦି‍ଲ୍‍ସ୍ପିତ୍‍ ।
LUK 20:19 ଆଗାଙ୍କ୍ ଶାସ୍ତ୍ରୀ ନୁ ବେଡ଼ିଇ ଯାଜକିଡ଼୍ ଆଦ୍ ଦଣ୍ଡ୍ ତାଗ୍ ଅଙ୍କ୍‌ ପଇଦାନଙ୍କ୍ ଆଲ୍‍ସି ମାଡ଼୍‍ତଡ଼୍, ବାତେଙ୍କ୍ ଇତ୍କେ ଅଡ଼୍‌ ନାରୁଡ଼୍‍କ୍ ୱେର୍‍ତଡ଼୍, ବାତେଙ୍କ୍ ଇତ୍କେ ଅଣ୍ଡ୍‌ ଆଦ୍ ୱେଷଡ଼୍ ଅଡ଼୍‌‍କିଂଙ୍କ୍ ଉଡ଼ି ମିକା କେସ୍‍ମାତ୍‍ତଣ୍ଡ୍ ଇଞ୍ଜ ଅଡ଼୍‌‍ ପୁତ୍‍ତଡ଼୍ ।
LUK 20:20 ଆଗାଙ୍କ୍ ଅଡ଼୍‌‍ ଅଂକିଙ୍କ୍‌ ଅନ୍‌ ପରତ୍ ଅଦିକାର୍‌ କାଇଦେ ନୁ ଶାସନ୍‍ ମୁକ୍ୟାନ୍ ଅଦିନତାଗ୍ ଇତ୍‍ତନ୍ ମାଡ଼ାନ୍ ସେଙ୍ଗେ ସୁଯୋଗ୍ ମେହେକି ଅନାଦ୍‌ ଗଟିନେ ସୁଦୁଟ୍ ବୁଲ୍ ପଇତାନଙ୍କ୍ ଦାର୍ମିକ୍ ଇଞ୍ଜ ତଅତାନ୍ ଡଙ୍ଗାଲଡ଼କ୍‍ ଜିସୁନ୍ ଗାର୍‍ରେ ରହତଣ୍ଡ୍ ।
LUK 20:21 ଅଡ଼୍‌‍ ଅଂକିଙ୍କ୍‌ କେତ୍‍ତଡ଼୍, “ହୋ ଗୁରୁ, ମାମେପୁତ୍‍ତମ୍, ନିମେ ବାତେଏ କେତୁତିନ୍ ନୁ ଶିକ୍ଷା ହିଦୁତିନ୍‍, ମେଣ୍ଡେ ନିମେ ବେନନ୍ ମକମ୍‍ତିଙ୍କ୍ ଉଡ଼ି ମାଡ଼୍‍ୱିନ୍, ମାତର୍ ନାରୁଡ଼୍‍ତେ ସେଙ୍ଗେ ଇଶ୍ୱର୍‌ତାଦ୍ ଇଚ୍ଛା ବିଷୟତେ ସତ୍‍ ଶିକ୍ଷା ହିଦ୍‍ତଣ୍ଡ୍ ।
LUK 20:22 ମାକିଂଙ୍କ୍ କେଲେ, ରୋମୀୟ ଶାସନ୍‍ କର୍ତ୍ତାଲ୍ କାଇସର୍‍ତିଙ୍କ୍ କର ଇଦାନ୍ ମାନାଦ୍‍ ନିୟମ୍‍ ମିନ୍ଦେ କି ଇଲ୍‍ଲେ ?”
LUK 20:23 କିନ୍ତୁ ଜିସୁ ଅଡ଼ାଦ୍‌ ଚାଲାକି ପୁଞ୍ଜ୍ ମେଣ୍ଡେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍,
LUK 20:24 ନାକିଂଙ୍କ୍ ୱେରନ୍ ରୁପାଡ଼ାବ୍‍କ୍ ତଅମୁଟ୍ । ଇଗେ ବେନନାଦ୍ ମୂର୍ତ୍ତି ନୁ ପେଦେର୍ ମିନ୍ଦେ ? ଅଡ଼୍‌‍ କେତ୍‍ତଡ଼୍ କାଇସର୍‌ତାଦ୍ ।
LUK 20:25 ଆଗାଙ୍କ୍ ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଆଲେକେ କାଇସର୍‌ତାଦ୍ ବାତେଏ, ଆଦ୍ କାଇସର୍‍ତିଙ୍କ୍ ହିମୁଟ୍; ମେଣ୍ଡେ, ଇଶ୍ୱର୍‌ତାଦ୍‍ ବାତେଏ, ଆଦ୍ ଇଶ୍ୱର୍‌ତିଙ୍କ୍ ଇମୁଟ୍ ।”
LUK 20:26 ଆଗ୍‍ତିନ୍‍ସ୍ ଅଡ଼୍‌‍ ଜିସୁନ୍ ବୁଲ୍‍ ପଇତାଙ୍କ୍ ପାର୍‍ୱଡ଼୍, ମେଣ୍ଡେ, ଅନ୍‌ ଗଟି କେଞ୍ଜି ବାକ୍‍ୱା ଆସ୍ କୋଟ ମାତ୍‍ତଡ଼୍ ।
LUK 20:27 ତାନ୍ ପେର୍‍କେ ନାରୁଡ଼ାଦ୍ ପୁନରୁତ୍‍ତାନ୍ ମିନ୍ଦେ ଇଞ୍ଜ ବିଶ୍ୱାସ୍ ମାଡ଼୍‍ୱେ ବେସ୍‍କ୍‍ତୁଡ଼୍‍ ସାଦ୍ଦୂକିଡ଼୍‍ ଜିସୁନ୍ ଗାର୍‍ରେ ୱାସ୍ କେତ୍‍ତଡ଼୍,
LUK 20:28 “ହୋ ଗୁରୁ, ମଶାଲ୍‌ ମା ସେଙ୍ଗେ ଲେକିମିନ୍ଦେଣ୍ଡ୍ ଯେ, ଯୋଦି ବେନ ନାରୁଡ଼୍ ତେ ପେଣ୍ଡୁଲ୍ ଆସ୍ ପିଲା ଇଲକଟ ଡଲ୍‍କେ, ଆଲାତ୍କେ ତାନ୍ ତାମୁଣ୍ଡ୍‌ ତାମ୍ ଦାଦାନ୍ ମୁତେଙ୍କ୍ ପେଣ୍ଡୁଲ୍ ଆସ୍, ତାମ୍ ଦାଦାନ୍ ସେଙ୍ଗେ ପିଲାଜିଲା ମାଡ଼ିତନ୍ ।
LUK 20:29 ମେଣ୍ଡେ ସାତ୍‍ଜାନ୍ ତାମୁସ୍‍କ୍‍ ମାତ୍‍ତଡ଼୍; ମୁନେଙ୍କ୍ ତଣ୍ଡ ବେଡ଼ିଇ ଦାଦାଲ୍ ପେଣ୍ଡୁଲ୍ ଆଶେ ନିଃସନ୍ତାନ ଆଶେ ଡଲ୍‍ତଣ୍ଡ୍;
LUK 20:30 ତାନ୍ ପେର୍‍କେ ଦ୍ୱିତିୟ ତଣ୍ଡ ତାଙ୍କ୍ ପେଣ୍ଡୁଲ୍ ଆତ୍‍ତଣ୍ଡ୍ ନୁ ମେଣ୍ଡେ ତୃତୀୟ ତଣ୍ଡ୍‌ ଅଣ୍ଡ୍‌ ମିକା ତିପାଲ୍ ଆସ୍ ଡଲ୍‍ତଣ୍ଡ୍ ।
LUK 20:31 ଆଦିନ୍ ଲେକେମ୍ ସାତ୍‍ଜାନ୍‍ଯାକ ଆଲେ ତିପାଲ୍ ଆସ୍ ଡଲ୍‍ତଡ଼୍ ।
LUK 20:32 ତାନ୍ ପେର୍କେ ମୁତ୍‍ତେ ମିକା ଡଲ୍‍ତେ ।
LUK 20:33 ତ, ମେଣ୍ଡଅନ୍‌‍ଦାମ୍ ପୁନରୁତ୍‍ତାନ୍ ଆତ୍‍ତେୱେଲେ ଅଡ଼୍‌‍ ଆଗାଙ୍କ୍ ଆଦ୍ ବେନନ୍ ମୁତ୍‍ତେ ଆଦ୍ ତେ ? ସାତ୍‍ଜାନ୍ ଯାକ ତ ଆଦିଙ୍କ୍ ପେନ୍‍ଣ୍ଡୁଲ୍ ଆସ୍‍ମାତ୍‍ତଡ଼୍ ।”
LUK 20:34 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଇଦ୍ ଜଗତ୍ ତାଗ୍ ନାରୁଡ଼୍ ପେଣ୍ଡୁଲ୍ ଆଦ୍‍ତଡ଼୍ ନୁ ପେଣ୍ଡୁଲ୍ ହିଦ୍‍ତଡ଼୍ ।
LUK 20:35 ବାତେଙ୍କ୍ ଇତ୍କେ ବେନଡ଼୍ ପୁନରୁତ୍‍ତିତ୍ ହାସ୍ ସ୍ୱର୍ଗତାଗ୍ ବାଦ୍‍କାନ୍ ମାଇଦିଙ୍କ୍ ଯୋଗ୍ୟ, ଅଡ଼୍‌‍ ମେଣ୍ଡେ ପେଣ୍ଡୁଲ୍ ଆୟ୍‍ୟଡ଼୍ ।
LUK 20:36 ଅଡ଼୍‌ ମେଣ୍ଡେ ଡଲ୍‍ଲେ ପାର୍‍ୱଡ଼୍, ବାତେଙ୍କ୍ ଇତ୍କେ ଅଡ଼୍‌ ଦୂତକିନ୍ ଲେକେମ୍ ମାନ୍‍ତଡ଼୍, ନୁ ମେଣ୍ଡେ ଅନ୍‌‍ଦାମ୍ ଜିୱେ ଆତ୍‍ତାଙ୍କ୍ ଇଶ୍ୱର୍‌ତେ ମାର୍‍ ମାୟାଡ଼୍ ଆଦ୍‍ତଡ଼୍ ।
LUK 20:37 ମାତର୍ ଡଲତେନଡ଼୍‍ ଯେ ତେଦିତଡ଼୍, ଇଦ୍ ମଶାଲ୍‌ ମିକା ନିଡ଼୍‍ତାନ୍ ପଦ୍ଲାତେ ୱେଷଡ଼୍ ତଡ଼୍ ପ୍ରବୁଙ୍କ୍ ଅବ୍ରାହାମ୍‌ ତେ ଇଶ୍ୱର୍‌, ଇସ୍‍ହାକ୍ ତେ ଇଶ୍ୱର୍‌ ନୁ ଯାକୁବ୍ ତେ ଇଶ୍ୱର୍‌ ଇଞ୍ଜ କେସ୍ ନିୟମ୍ ଇତ୍‍ତନ୍ ।
LUK 20:38 ଅଣ୍ଡ୍‌ ତ ଡଲ୍‍ତେ ନଡ଼ାଦ୍ ଇଶ୍ୱର୍‌ ଆୟଣ୍ଡ୍, ମାତର୍ ଜିୱୁଣ୍ଡ୍ ମାନ୍ଦାନଡ଼ାଦ୍; ବାତେଙ୍କ୍ ଇତ୍କେ ସାରେତଡ଼୍ ଅଣ୍ଡ୍‌ ମୁନେ ଜିୱୁଣ୍ଡ୍ ନାରୁଡ଼୍ ।”
LUK 20:39 ଆଗାଙ୍କ୍ ଶାସ୍ତ୍ରୀଡ଼୍ ବେସ୍‌କ୍ ତୁଡ଼୍ ଉତ୍ତର୍ ହିତ୍‍ତଡ଼୍, “ହୋ ଗୁରୁ, ନିମେ ଟିକ୍ କେତ୍‍ତିନ୍ ।”
LUK 20:40 ବାତେଙ୍କ୍ ଇତ୍କେ ଅଡ଼୍‌‍ ଅଂକିଙ୍କ୍‌ ବାତେଏ ମିକା ପ୍ରଶ୍ନ କେତାନଙ୍କ୍ ମେଣ୍ଡେ ଅନ୍‌ ଦାମ୍ ସାହାସ୍ ମାଡ଼ଡ଼୍‍ ।
LUK 20:41 ଜିସୁ ଅଡ଼୍‌‍କିଂଙ୍କ୍ କେତ୍‍ତଡ଼୍‍, “କ୍ରିଷ୍ଟ ଯେ ଦାଉଦ୍‍ଉତ୍ ମାର୍‍, ଇଦ୍ ନାରୁଡ଼୍ ବେଲା କେତିତଡ଼୍ ?
LUK 20:42 ବାତେଙ୍କ୍ ଇତ୍କେ ନିଜେ ଦାଉଦ୍‍ ଗୀତସଂହିତାତାଗ୍ କେତ୍ତଣ୍ଡ୍, ପ୍ରବୁ ନା ପ୍ରବୁଙ୍କ୍ କେତ୍ତଣ୍ଡ୍,
LUK 20:43 ମାମେ ବେସୁଟ୍‌ ଯାକ ମି ଶତ୍ରୁଡ଼୍‍କ୍ ମିୱାଦ୍ ଡେକେତ୍ ମଦଲ୍‍କଞ୍ଜ୍ ତାଡ଼ାମ୍, ଆସୁଙ୍କ୍ ହେଉନା ମା ତିନ୍ଦେକାଇଦେ ପାକେ କୁଦିମାନୁଟ୍ ।
LUK 20:44 ଦାଉଦ୍‍ ଜିସୁଙ୍କ୍ ପ୍ରବୁ ଇଞ୍ଜ କେତିତଣ୍ଡ୍; ଆଲାତ୍କେ ଅଣ୍ଡ୍‌ ବେଲା ଅନ୍‌ ମାର୍‍ ?”
LUK 20:45 ପେର୍‍କେ ଜିସୁ ସାରେତଡ଼୍ ନାରୁଡ଼୍ ମୁନ୍‍ନେ ଶିଷ୍ୟକିଂଙ୍କ୍ କେତ୍ତଣ୍ଡ୍,
LUK 20:46 “ଶାସ୍ତ୍ରୀନଡ଼୍‍ ଆଗାଙ୍କ୍ ସାବ୍‍ଦାନ୍ ! ଅଡ଼୍‌‍ ଲାଟି ଚକା କେର୍‍ଦିତଡ଼୍ । ମେଣ୍ଡେ ହାଟ୍ ବାଜାର୍‍ତାଗ୍ ନମସ୍କାର୍, ସମାଜ୍ ଲତ୍‍ତାଗ୍ ମୁକ୍ୟ ଆସନ୍ ନୁ ବଜିତାଗ୍ ସାଏତ୍ ପଡ଼ିୟିତାଗ୍ କୁଦାନଙ୍କ୍ ଇଚ୍ଛା ମାଡ଼ିତଡ଼୍ ।
LUK 20:47 ଅଡ଼୍‌‍ ରାଣ୍ଡିମୁତେନ୍ ଲୋକିଙ୍କ୍ ଆଦ୍‍ତଡ଼୍ ନୁ ବୁସାମାଡ଼ି ଲାଟି ପ୍ରାର୍ତନା ମାଡ଼ିତଡ଼୍; ଅଡ଼୍‌‍କିଂଙ୍କ୍ ଗାଟି ଦଣ୍ଡ ଦର୍‍କିତ୍ ।”
LUK 21:1 ଜିସୁ ସାରେପାକେ ଉଡ଼ି ବେସ୍‍କ୍‍ତୁଡ଼୍‍ ସାଉକାର୍ ନାରୁଡ଼୍ ମନ୍ଦିର୍‍ତାଗ୍ ଦାନପେଟ୍‌ତାଗ୍ ଦାନ ୱାଟାନାଦ୍ ଉଡ଼୍‍ତଣ୍ଡ୍ ।
LUK 21:2 ମେଣ୍ଡେ ଆଦ୍ ୱେରଡ଼୍ ଗରିବ୍ ରାଣ୍ଡିଲ୍ ଆଗେ ରେଣ୍ଡ୍ ରୁପି ୱାଟାନାଦ୍ ଉଡ଼ି କେତ୍‍ତଣ୍ଡ୍,
LUK 21:3 ନାନ୍ ମିକିଂଙ୍କ୍ ସତ୍ କେତୁତାନ୍, “ଇଦ୍ ଗୋରିବ୍ ରାଣ୍ଡି ମୁତ୍‍ତେ ସାର୍‍ରେ ତାଗାଙ୍କ୍ ନାର୍ଗେ ଦାନ ୱାଟ୍‍ତା,
LUK 21:4 ବାତେଙ୍କ୍ ଇତ୍କେ ଇଡ଼୍‍ ସାର୍‍ରେ ତୁଡ଼୍ ପେଟ୍‍ତାଗ୍ ତାମ୍‍ତାମ୍ ନାର୍ଗେ ଦନ୍ ତାଗାଙ୍କ୍ ସୁକୁ ସୁକୁ ୱାଟ୍‍ଟଡ଼୍, ବାତେଙ୍କ୍ ଇତ୍କେ ତାନ୍ ମାନ୍ଦାନାଦ୍ ଅବସ୍ଥାତେ ବା ନିଜେତ୍ ଜିୱୁଣ୍ଡ୍ ଗେଲସ୍‍ପାନ୍ ମାଇଦିଙ୍କ୍ ତାନାଗ୍‍ ବେସର୍ ମାତ୍‍ତା ହାୱୁସାରେ ୱାଟ୍‍ତା ।”
LUK 21:5 ମେଣ୍ଡେ, ବେସ୍‍କ୍‍ତୁଡ଼୍‍ ଶିଷ୍ୟଡ଼୍ ମନ୍ଦିର୍ ବିଷୟତେ ମିଟିଙ୍କ୍ ମାଡ଼ମାତ୍‍ତଡ଼୍ । ଅଡ଼୍‌‍ କେସ ମାତ୍‍ତଡ଼୍, “ଆଗେ ୱାଟ୍‍ତାଉ ସୁନ୍ଦର୍ କାଲ୍‍କ୍ ନୁ ଇଶ୍ୱର୍‌ତେ ସେଙ୍ଗେ ଇସ୍‌ ମାନ୍ଦାନ୍ ଉପହାର୍ ତଡ଼୍ ମନ୍ଦିର୍ ଗାଟି ସୁନ୍ଦର୍ ତଅନ୍‌ଦୁତେ !”
LUK 21:6 “ମିଡ଼୍ ଇଦ୍ ବାତେସାରେ ଉଡ଼ୁତିଡ଼୍, ଦିନାମ୍‌ ୱାଦ୍‍ତା, ଆସୁଙ୍କ୍ ଅଣ୍ଡ୍‌ କାଲ୍ ମେଣ୍ଡନ୍ କାଲ୍ ଦେ ପଡ଼ିୟେତାଗ୍ ମାନ୍‍, ସାରେତଡ଼୍ ବୂମ୍‌ତାଗ୍ ଆଦ୍‍ତଡ଼୍ ।”
LUK 21:7 ଆଗାଙ୍କ୍ ଅଡ଼୍‌‍ ଜିସୁଙ୍କ୍ କେତ୍ତଡ଼୍, “ହୋ, ଗୁରୁ, ଇଦ୍‍ସାରେ ବେସୁଙ୍କ୍‍ ଗଟେମ୍ ଆଦ୍ ତେ ? ମେଣ୍ଡେ, ବେନ୍ ଦିନାମ୍‍ତେ ଇଦ୍‍ସାରେ ଗଟନା ଦିନାମ୍ ତେରିତେ, ଆଦ୍ ଦିନାମ୍‍ତେ ବେଲା ତଅନ୍‌ଦିତେ ?”
LUK 21:8 ଆଗାଙ୍କ୍ ଜିସୁ କେତ୍‍ତଣ୍ଡ୍, “ସାବ୍‍ଦାନ୍, ମିଡ଼୍ ବେଲା ବୁଲ୍‍କା ଆୟମାଟ୍; ବାତେଙ୍କ୍ ଇତ୍କେ ନାର୍ଗେ ନାରୁଡ଼୍ ନା ପେଦେର୍‍ତେ ୱାସ୍, ନାନ୍ କ୍ରିଷ୍ଟ ନୁ ଟିକ୍ ସମୟ୍ ୱାସ୍ ହେୱୁତେ ଇଞ୍ଜ କେତିତଡ଼୍; ଅଡ଼୍‌‍ ପେର୍‍କେ ଆନ୍‌‍ମାଟ୍ ।
LUK 21:9 ମାତର୍ ମିଡ଼୍ ବେସୁଙ୍କ୍‍ ଯୁଦ୍ଦ୍‌ ବା ଗୋଲକ୍ ବିଷୟତେ କେଞ୍ଜ୍‍କେ, ଆସୁଙ୍କ୍ ୱେର୍‍ମାଟ୍; ବାତେଙ୍କ୍ ଇତ୍କେ ଇଦ୍‍ସାରେ ଗଟନା ପ୍ରତମ୍‌ ଦାମ୍ ତେ ଗଟେମ୍ ଆଦ୍‍ତା, ବାତେଙ୍କ୍ ଇତ୍କେ ସାଙ୍ଗେ ସାଙ୍ଗେ ଯୁଗାନ୍ତ୍ ଆୟ୍‍ୟ ।”
LUK 21:10 ତାନ୍‍ପେର୍କେ ଜିସୁ ଅଡ଼୍‌‍କିଂଙ୍କ୍ ମେଣ୍ଡେ କେତ୍ତଣ୍ଡ୍, ଜାତି ବିରୁଦ୍‍ତେ ଜାତି ନୁ ରାଜ୍ୟ ବିରୁଦ୍‍ତେ ରାଜ୍ୟ ତେଦିତ୍ ।
LUK 21:11 ମେଣ୍ଡେ ସାର୍‍ରେପାକ୍‍ ଏର୍‍ତୁପାନ୍, ଦୁର୍ବିକ୍ଷ ନୁ ମହାମାରୀ ଆଦ୍‍ତେ, ମାବ୍‍ତାଗ୍ ଅଦ୍‍ବୁତ୍ ନୁ ବୟଙ୍କାର୍ କାମ୍‍ସାରେ ତଅନ୍‌ଦିତା ।
LUK 21:12 ବାତେଙ୍କ୍ ଇତ୍କେ ଇଦ୍ ସାରେ ବିଷୟ ଗଟେମ୍ ଆଦାନ୍ ମୁନେଙ୍କ୍ ମିକିଂଙ୍କ୍ ବନ୍ଦୀ ମାଡ଼ିତଡ଼୍ । ସମାଜ୍ ଲୋନ୍‌‍ତାଗ୍ ବିଚାରିତ ଆଦାନ୍ ସେଙ୍ଗେ ମିକିଂଙ୍କ୍ ପୟ୍‍ସ୍‍ ବନ୍ଦି ମାଡ଼ିତଡ଼୍ ନୁ ଜଇଲ୍‌ତାଗ୍‍ ନେହେତିତଡ଼୍ ।
LUK 21:13 ଇଦ୍ ମିକିଂଙ୍କ୍ ସାକ୍ଷ୍ୟ ଇଦାଙ୍କ୍ ସୁଯୋଗ୍ ହିଦ୍ ତେ ।
LUK 21:14 ଆଲାତ୍କେ, ନିଜର୍ ପାକେଙ୍କ୍ ବେଲା ଉତ୍ତର୍ ଇଦ୍‍ତିଡ଼୍, ଆଦ୍ ବିଷୟତେ ମୁନେଙ୍କ୍ ଚିନ୍ତେ ମାଡ଼୍‍ୱାଙ୍କ୍ ନିଜ୍ ମନ୍‍ତାଗ୍ ହେର୍କା ମାଡ଼ାଟ୍ ।
LUK 21:15 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ ଇଦ୍‌ଲେକାମ୍ ଗଟ୍ ନୁ ବୁଦ୍‍ ଇଦ୍‍ତାନ୍ ଯେ, ମିକିଂଙ୍କ୍ ସାରେତଡ଼୍ ବିରଦ୍‍ତେ ନାରୁଡ଼୍ ଆଦିନାଦ୍ ଉତ୍ତର୍ ହିଦାଙ୍କ୍ ପାର୍‍ୱଡ଼୍ ।
LUK 21:16 ବାତେଙ୍କ୍ ଇତ୍କେ ମିଡ଼୍ ୟାୟବାବ, ତାମୁଣ୍ଡ୍‌କିଡ଼୍‍, ଲୋତ୍‍ନଡ଼୍‍ ନୁ କୁଟ୍‍ମାମ୍‍ତାଗ୍ ସମର୍ପିତ୍ ଆଦ୍‍ତିଡ଼୍, ମେଣ୍ଡେ ମି ଲୋପେଙ୍କ୍ ନାରୁଡ଼୍ ବେସ୍‍କ୍‍ତୁଡ଼କ୍ ହାୱ୍‍କିତଡ଼୍,
LUK 21:17 ମେଣ୍ଡେ ନା ପେଦେର୍ ସେଙ୍ଗେ ମିଡ଼୍ ସାରେତଡ଼୍ ସାରେତଡ଼୍ ତଡ଼୍ ଗୃଣିତ ଆଦ୍‍ତିଡ଼୍ ।
LUK 21:18 ବାତେଙ୍କ୍ ଇତ୍କେ ମି ତାଲେତ୍ ଅଣ୍ଡୟ୍‌‍ମିକା କେଲେମ୍ କାରାବ୍‍ ଆୟ୍‍ୟ;
LUK 21:19 ମିଡ଼୍ ଶକ୍ତିତଡ଼୍ ନିଜ୍ ଜିୱୁଣ୍ଡ୍ ଦର୍‍କିତ୍ ।
LUK 21:20 ମିଡ଼୍ ଯିରୁଶାଲେମ୍ ଚାରେପାକେ ସୈନିନଡ଼୍ ଗେରାମାଡ଼ି ମାନ୍ଦାନାଦ୍ ଉଡ଼ିତିଡ଼୍ । ଆସୁଟେ ମିଡ଼୍ ପୁଞ୍ଜ୍ ପାର୍‍ଦ୍‍ତିଡ଼୍ ଯେ ଯିରୁଶାଲେମ୍ ଦ୍ୱଂସ ଆଦ୍‍ଦାନ୍ ସମୟ୍ ୱାସ୍ ହେଉତେ ।
LUK 21:21 ଆସୁଙ୍କ୍ ବେନଡ଼୍ ଯିଉଦା ଦେଶ୍‍ତାଗ୍ ମାନ୍‍ତଡ଼୍, ଅଡ଼୍‌‍ ଆଦ୍‍ଲେକାମ୍ ମେଟାତାଗ୍ ମିରାଟ୍; ମେଣ୍ଡେ ବେନଡ଼ ନଗର୍‍ତାଗ୍ ମାନ୍‍ତଡ଼୍, ଅଡ଼୍‌‍ ଆଦ୍‍ଲେକାମ୍ ଆଦ୍ ପଡ଼ିୟେ ୱିଡ଼୍‍ସିଡ଼୍; ମେଣ୍ଡେ, ବେନଡ଼୍ ନାର୍‍କିନାଗ୍‍ ମାନ୍‍ତଡ଼୍, ଅଡ଼୍‌‍ ଆଦ୍‍ଲେକାମ୍ ନଗର୍‍ତାଗ୍ ଆନ୍‌‍ମାଟ୍;
LUK 21:22 ବାତେଙ୍କ୍ ଇତ୍କେ ଲେକ୍‍ତାଦ୍‍ ବିଷସାରେ ସତ୍ଆଦାନ୍‍ ମାଇଦିଙ୍କ୍ ଆଦ୍ ନିଜାମ୍ ଦଣ୍ଡ୍ ହିଦ୍‍ନ୍ ଦିନାମ୍ ଆଦ୍ ତେ ।
LUK 21:23 ଆଦ୍ ଦିନାମ୍‍ତେ ବେନ୍ ନାଟା ଡଙ୍କେତ୍ ନୁ ସୁଦୁପିଲା ମାନ୍ଦାନାୱ୍‍ ୟାୟ, ଆୱ୍ ତିପାଲ୍ ଆଦ୍‍ତି ! ବାତେଙ୍କ୍ ଇତ୍କେ ଦେଶ୍‍ତାଗ୍ ଗାଟି ବେଡ଼ିୟାଦ୍ ବିପଦ୍ ନୁ ଇଦ୍ ଜାତି ସେଙ୍ଗେ ଇଶ୍ୱର୍ ତେ ଦଣ୍ଡ୍ ୱାଦ୍‍ତା ।
LUK 21:24 ମେଣ୍ଡେ ଅଡ଼୍‌‍ ତାଲ୍‍ୱାର୍ ତଡ଼୍ ଡଲିତଡ଼୍ ନୁ ବନ୍ଦି ଆସ୍ ସାରେତଡ଼୍ ବିଜାତିନଡ଼କ୍ ମେଣ୍ଡେଅଣ୍ଡ୍‌ ଦେଶ୍ ରହସିଦ୍‍ତଡ଼୍, ମେଣ୍ଡେ ବିଜାତିଡ଼ାଦ୍ ଯୁଗ୍ ତେର୍‍ୱାଯାକ ଯିରୁଶାଲେମ୍ ଅଡ଼ାଦ୍‌ ଡେକେତ୍ ମଦଲ୍ ଆଦ୍‍ମି ମାନ୍‍ତେ ।
LUK 21:25 “ମେଣ୍ଡେ ପଡ଼ଦ୍, ନେଲ୍‍ଞ୍ଜ୍ ନୁ ଉକାକ୍‍କିନାଗ୍ କାମ୍‍ସାରେ ତଅନ୍‌ଦିତେ, ମେଣ୍ଡେ ପୃତିବିତାଗ୍ ଜାତିନଡ଼୍ ଦୁଃକାମ୍ ଆଦ୍‍ତଡ଼୍, ସମୁଦ୍ର ନୁ ଗାଙ୍କ୍‍କୁଡ଼୍‍ ଗାଟି ନେକ୍‌ନାଙ୍କ୍ ଅଡ଼୍‌‍ ଇଲା ବାତେଙ୍କ୍ ଆଦୁତ୍‍ ଇଞ୍ଜ ପୁନଡ଼୍ ।
LUK 21:26 ମେଣ୍ଡେ ଜଗତ୍ ତେ ପରୁ ୱାସ ମାନ୍ଦାନାଦ୍ ଗଟ୍‍ନା ସାରେତିଙ୍କ୍ କେପି ମାଞ୍ଜ୍ ନାରୁଡ଼୍ ଆନ୍‌‍ତେ ସିମ୍‍କ୍ ଆତ୍‍ତଡ଼୍, ବାତେଙ୍କ୍ ଇତ୍କେ ମୟଲ୍‍ତାଗ୍ ସାରେ ବିଷୟ ବଦଲେମ୍ ଆଦ୍‍ତେ ।
LUK 21:27 ଆସୁଙ୍କ୍ ନାରୁଡ଼୍ ପିଲେ ଗାଟି ଶକ୍ତିତଡ଼୍ ନୁ ମହିମାତଡ଼୍ ମାବ୍ ତେ କନ୍‍ସ୍ ୱାଦାନାଦ୍ ଉଡ଼ିତିଡ଼୍ ।
LUK 21:28 ବାତେଙ୍କ୍ ଇତ୍କେ ଇଦ୍‍ସାରେ ଗଟ୍‍ନା ଆଦ୍‍ଦାନ୍ ୱେଲେ ମିଡ଼୍ ତେଦି ନିଲ୍‍ମୁଟ୍ ନୁ ପରୁ ଉଡ଼ାଟ୍ ନୁ ତାଲେତିଙ୍କ୍‍ ପରୁ ତେହେମୁଟ୍, ଆସୁଟେ ମିୱାଦ୍ ମୁକ୍ତି ଗାର୍‍ରେ ୱାସ୍ ହେଉଦୁତ୍ ।”
LUK 21:29 ଜିସୁ ଅଡ଼୍‌‍କିଂଙ୍କ୍ ୱେରଡ଼୍ ୱେଷଡ଼୍‍ କେତ୍ତଣ୍ଡ୍, ତୟା ମାଡ଼େ, ମେଣ୍ଡେ ସାରେତାୱ୍‍ ମାଡ଼ାକିଂଙ୍କ୍ ବିଷୟତେ ଚିନ୍ତେ ମାଡ଼ାଟ୍;
LUK 21:30 ବେସୁଟ୍‌ ମାଡ଼ାକିନାଗେ ଲେଏତା ଆକି ପେଇତିତା, ଆସୁଙ୍କ୍ ମିଡ଼୍ ଆଦ୍ ଉଡ଼ି ଏଦିକାଲାମ୍ ବକେତ୍ ହେଉଦୁତ୍ ଇଞ୍ଜଡ୍ ନିଜେ ନିଜେ ପୁନ୍‍ତିଡ଼୍ ।
LUK 21:31 ଆଦେଲେକାମ୍ ମିଡ଼୍‍ଆନ୍ତେ ଆଦ୍‍ ସାର୍‍ରେ ଗଟନା ଉଡ଼୍‍କେ ଇଶ୍ୱର୍‌ତାଦ୍ ରାଜ୍ୟ ଯେ ବକେତ୍ ହେୱୁତେ, ଇଦ୍ ପୁନ୍‍ତିଡ଼୍ ।
LUK 21:32 ନାନ୍ ମିକିଂଙ୍କ୍ ସତ୍ କେସମିନ୍ଦେନ୍, ଡଲାନ୍ ମୁନେଙ୍କ୍ ଇୱୁ ସାରେ ଗଟେମ୍ ଆଦ୍‍ତେ । ଇଦ୍ ଇଞ୍ଜେତ୍ ଯୁଗ୍‍ତେ ମାନେଇ ବେସୁଟ୍‌ ଲୋପ୍ ଆୟ୍‍ୟଡ଼୍,
LUK 21:33 ମାବ୍ ନୁ ପୃତିବି ଦଂସ ଆଦ୍‌ତେ, ମାତର୍ ନାୱାଦ୍ ବାକ୍ୟ ବେସୁଙ୍କ୍‍ ଲୋପ୍ ଆୟ୍‍ୟ ।
LUK 21:34 “ବାତେଙ୍କ୍ ଇତ୍କେ ମିଡ଼୍ ନିଜେ ନିଜେ ବିଷୟତେ ସତର୍କ ଆସ୍ ମାନୁଟ୍, ବେସୁଟ୍‌ ବା ମିୱାଦ୍ ହୃଦୟ୍‍ତାଗ୍ ଗାଟି ୱେଡ଼୍‍କା ନୁ କାଲ୍ ନିଜାତାଦ୍, ମେଣ୍ଡେ ବାଦ୍‍କାନ୍ ଚିନ୍ତାତେ ମୁଡ଼ୁନ୍ଦିମାଞ୍ଜ୍ ଦୁଃକାମ୍ ଆଦ୍‍ତିଡ଼୍, ମେଣ୍ଡେ ଆଦ୍‍ଦିନ୍ ହଟାତ୍ ୱାସ୍ ମିପର;
LUK 21:35 ବାତେଙ୍କ୍ ଇତ୍କେ ଆଦ୍ ଉଡ଼ୁଇ ଲେକେମ୍ ୱାସ୍ ପୃତିବି ନାରୁଡ଼୍ ସାରେତଡ଼୍ ପରୁ ରାଲିତେ ।
LUK 21:36 ତିଆର୍‍ତେ ମାନୁଟ୍ ନୁ ତିପାଲ୍‍ତେ ଆଦାନଙ୍କ୍ ଶକ୍ତି ଆଦାନ୍ ସେଙ୍ଗେ ନୁ ନାରୁଡ଼୍ ପିଲାତନ୍ ମୁନେ ନିତାନ୍ ମାଇଦିଙ୍କ୍ ସାରେଦାମ୍ ପ୍ରାର୍ତନା ମାଡ଼ାଟ୍ ।”
LUK 21:37 ଜିସୁ ସାରେଦିନାମ୍ ମନ୍ଦିର୍ ତାଗ୍ ଶିକ୍ଷା ଇସମାତ୍ତଣ୍ଡ୍, ମେଣ୍ଡେ ସାରେ ନାର୍କା ପେଇସ୍ ମିକା ଜୀତ ମେଟାତାଗ୍ ମାନ୍‍ନୁଣ୍ଡ୍ ।
LUK 21:38 ମେଣ୍ଡେ, ସାରେତଡ଼୍ ନାରୁଡ଼୍ ମନ୍ଦିର୍‍ତାଗ୍ ଜିସୁନାଦ୍ ଶିକ୍ଷା କେଞ୍ଜାନ୍ ମାଇଦିଙ୍କ୍ ନାର୍‍କୁକ୍ ଅନ୍‌ ଗାର୍‍ରେ ୱାସ ମାତ୍‍ତଡ଼୍ ।
LUK 22:1 ନିସ୍ତାର୍ ପାଣ୍ଡୁମ୍ ପେଦେର୍ ତେ କମୀରଶୂନ୍ୟ ରୂଟି ପାଣ୍ଡୁମ୍ ବକେତ୍ ଆସମାତ୍‍ତେ ।
LUK 22:2 ମେଣ୍ଡେ ମୁକ୍ୟ ଯାଜକ ନୁ ଶାସ୍ତ୍ରୀଡ଼୍ ନାରୁଡ଼୍‍କ୍ ୱେର୍ସମାତ୍‍ତାଙ୍କ୍, ମିଞ୍ଜିମାଞ୍ଜ୍ ଜିସୁଙ୍କ୍ ହାୱ୍‍କାଙ୍କ୍ ଉପାୟ ମେହେକ ମାତ୍‍ତଡ଼୍ ।
LUK 22:3 ଆସୁଙ୍କ୍ ଜିସୁନ୍ ବାରଜାନ୍ ଶିଷ୍ୟନାଗାଙ୍କ୍ ୱେରଣ୍ଡ୍ ଇଷ୍କାରିୟୋତ୍ ପେଦେର୍ ତଣ୍ଡ୍ ଯିହୂଦାନାଗେ ଶୟ୍‍ତାନ୍‍ ନେଙ୍ଗ୍‍ତେ ।
LUK 22:4 ଇଷ୍କାରିୟୋ ଆଞ୍ଜ୍, ବେନ୍ ଉପାୟ୍‍ତେ ଜିସୁଙ୍କ୍ ମୁକ୍ୟଯାଜକ୍ ନୁ ସେନାପତିନଡ଼୍ କାଇଦେ ପସ୍‍ପିଦାଙ୍କ୍ ଅଣ୍ଡ୍‌ ଅଡ଼୍‌‍ତଡ଼୍ ତିର୍‍ୟି‍ତଣ୍ଡ୍ ।
LUK 22:5 ଆଗାଙ୍କ୍ ଅଡ଼୍‌ ୱେଡ଼୍‍କିତଡ଼୍ ନୁ ଅଂକିଙ୍କ୍‌ ଡାବ୍‍କ୍ ଇଦାନଙ୍କ୍ କେତ୍‍ତଡ଼୍ ।
LUK 22:6 ମେଣ୍ଡେ ଅଡ଼୍‌‍ ସାରେତଡ଼୍ କାଇଲି ନାରୁଡ଼୍ ଉଡ଼ୁୱେ ୱେଲେ ଜିସୁଙ୍କ୍ ଅଡ଼୍‌‍ କାଇଦେ ପସ୍‍ପିଦାନ୍ ମାଇଦିଙ୍କ୍ ସୁଯୋଗ୍ ମେହେକାଙ୍କ୍ ପସ୍‍ପ୍‍ତଣ୍ଡ୍ ।
LUK 22:7 ପେର୍‍କେ ବେନେ ଦିନେ ନିସ୍ତାର୍ ପାଣ୍ଡୁମ୍ ୱେଲେ ମେଣ୍ଢାକିଙ୍କ୍ ବଲିଦାନ୍ ମାଡ଼ାନାଦ୍, କମୀର୍‍ଶୂନ୍ୟ ରୂଟି ପାଣ୍ଡୁମ୍‍ତାଗ୍‍ ଆଦ୍ ଦିନାମ୍ ହେୱୁତ୍‍ତେ;
LUK 22:8 ଜିସୁ, ପିତର୍ ନୁ ଯୋହନ୍‌‌ତିଙ୍କ୍ ଇଦ୍ କେସ୍ ରଅତଣ୍ଡ୍, ମାନାଡ଼୍ ବେଲାକି ନିସ୍ତାର୍ ପାଣ୍ଡୁତେ ବୋଜି ତିନ୍ଦେ ପାର୍‍ତାଡ଼୍, “ଆଦିଙ୍କ୍ ମିଡ଼୍ ଆଞ୍ଜ୍ ମା ମାଇଦିଙ୍କ୍ ନିସ୍ତାର୍ ପାଣ୍ଡୁମ୍‍ତାଦ୍ ବୋଜି ତିଆର୍ ମାଡ଼ାଟ୍ ।”
LUK 22:9 ଆଗାଙ୍କ୍ ଅଡ଼୍‌‍ ଜିସୁଙ୍କ୍ କେତ୍ତଡ଼୍, “ମାମେ ବେନ୍ ପଡ଼ିୟାତାଗ୍ ତିୟାର୍ ମାଡ଼ିତମ୍ ଇଞ୍ଜ ନିମେ ଇଚ୍ଛା ମାଡ଼ୁତିନ୍ ।”
LUK 22:10 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଉଡ଼ାଟ୍, ମିଡ଼୍ ନଗର୍‍ତାଗ୍ ଆଦାନ୍ ୱେଲେ, ପେଣ୍ଡୁଲ୍ କୁଣ୍ଡା ଆଦାନଣ୍ଡ୍ ୱେରଣ୍ଡ ମିକିଂଙ୍କ୍ କାଇଲିତଣ୍ଡ୍; ଅଣ୍ଡ୍‌ ବେନ୍ ପାକେ ଆଦ୍‍ତନ୍, ଅନ୍‌ ପେର୍କେ ଆଦ୍ ହାର୍ ଆଞ୍ଜ୍ ଲୋତ୍‌ତେ ମୁକିୟାଙ୍କ୍ କେତିତଣ୍ଡ୍ ।
LUK 22:11 ଗୁରୁ ନିକିଂଙ୍କ୍ କେସ୍‍ମିନ୍ଦେମ୍, ନାନ୍ ନାୟାୱୁ ଶିଷ୍ୟଡ଼୍ ତଡ଼୍ ବେଗେ ନିସ୍ତାର୍ ପାଣ୍ଡୁମ୍ ବଜି ମାଡ଼ିତମ୍ ଆଦ୍ ଲୋନ୍‌ ମାକିଂଙ୍କ୍ ତସିମ୍ ।
LUK 22:12 ଆଗାଙ୍କ୍ ଅଣ୍ଡ୍‌ ମିକିଂଙ୍କ୍ ସାଏ ରସ୍‍ତେ ୱେରନ୍ ପରତାଦ୍‍ ବାକ୍‍ଡ଼େ ତଅସିଦ୍‍ତଣ୍ଡ୍; ଆଦ୍ ପଡ଼ିୟିତାଗ୍ ତିଆର୍ ମାଡ଼ାଟ୍ ।”
LUK 22:13 ଅଡ଼୍‌‍ ଆଞ୍ଜ୍, ଅଡ଼୍‌‍କିଂଙ୍କ୍ ବେଲାକେତ୍‍ତଣ୍ଡ୍, ଆଦ୍‍ଲେକାମ୍ ଉଡ଼ି ନିସ୍ତାର୍ ପାଣ୍ଡୁମ୍ ବଜି ମାଡ଼୍‍ତଡ଼୍ ।
LUK 22:14 ମେଣ୍ଡେ, ସମୟ୍ ହେଉତାଙ୍କ୍, ଜିସୁ ନୁ ଅନ୍‌‍ତଡ଼୍ ପ୍ରେରିତ୍‍ ଶିଷ୍ୟଡ଼୍ ତିନ୍ଦାଙ୍କ୍ କୁଦ୍‍ତଡ଼୍ ।
LUK 22:15 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ନାକିଂଙ୍କ୍ କଷ୍ଟ ଦର୍‍କାନ୍ ମୁନେ ନାନ୍ ମିତଡ଼୍ କାଇଲି ନିସ୍ତାର୍ ପାଣ୍ଡୁମ୍ ବଜି ତିନ୍ଦାଙ୍କ୍ ଗାଟି ଇଚ୍ଛା ମାଡ଼ତାନ୍ !
LUK 22:16 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ କେସମିନ୍ଦନ୍, ଇଶ୍ୱର୍‌ତେ ରାଜ୍ୟତାଗ୍ ଇଦିନାଦ୍ ପୁରାଅର୍ତ ପ୍ରକାଶିତ୍‍ ଆୟିୱେ ଯାକ ନାନ୍ ଆଦ୍ ବେସୁଟ୍‌ ମିକା ତିନନ୍ ।”
LUK 22:17 ମେଣ୍ଡେ ଜିସୁ ଆଦ୍ ବୋଜି ତିଞ୍ଜ୍ ଦନ୍ୟବାଦ୍ ଇସ୍ କେତ୍ତଣ୍ଡ୍, “ଇଦ୍ ଆସ୍ ମିଡ଼୍ ମିଲୋପେ ତୁସାଟ୍,
LUK 22:18 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ କେସମିନ୍ଦେନ୍, ଇଶ୍ୱର୍‌ତାଦ୍ ରାଜ୍ୟ ୱାଡ଼ୱେ ଯାକ ନାନ୍ ନେଟ୍‍ତେ କଞ୍ଚ୍ ଅଙ୍ଗୁର୍‌ କାୟାନ୍ ରସ୍ ଉନନ୍ ।”
LUK 22:19 ମେଣ୍ଡେ ଅଣ୍ଡ୍‌ ଆଦ୍ ରୂଟି ଅସ୍ ଦନ୍ୟବାଦ୍ ଇତ୍‍ତନ୍ ନୁ ଆଦିଙ୍କ୍ ଉହୁସ୍ ଅଡ଼୍‌‍କିଂଙ୍କ୍ ଇସ୍ କେତ୍ତଣ୍ଡ୍, “ମି ସେଙ୍ଗେ ହିତ୍‍ତାଦ୍ ତିନ୍ଦାନାଦ୍ ରୂଟି ନାୱାଦ୍ ମେନ୍ଦୁଲ୍ ନାକିଂଙ୍କ୍ ଏର୍କାମାଡ଼ଙ୍କ୍ ମାଇଦିଙ୍କ୍ ଇଲା ମାଡ଼ାଟ୍ ।”
LUK 22:20 ତିତ୍‍ତା ପେର୍‍କେ ଅଣ୍ଡ୍‌ ଅଡ଼୍‌‍କିଂଙ୍କ୍ ଦ୍ରାକ୍ଷାରସ୍ ମାନ୍ଦେତାଗ୍ ତାସ୍ କେତ୍‍ତଣ୍ଡ୍, ଇଦ୍ ଉନ୍ଦାନାଦ୍ ମି ମାଇଦିଙ୍କ୍ ନାୟାଗ୍‍ କନ୍‍ସ୍ ପେଇତାନ୍ ନେତୁର୍ ଇଦ୍ ନେତୁର୍‍ତାଗାଙ୍କ୍ ପୁଃନେ ନିୟମ୍ ଆରାମ୍ ଆଦ୍‍ତେ ।
LUK 22:21 “ବାତେଙ୍କ୍ ଇତ୍କେ ଉଡ଼ାଟ୍, ବେନ ନାକିଂଙ୍କ୍ ଶତ୍ରୁଡ଼୍ କାଇଦେ ଇତ୍‍ତନ୍ ମାଡ଼୍‍ତଣ୍ଡ୍, ଅନାଦ୍‌ କାୟ୍ ନା କାଇତଡ଼୍ ଟେବୁଲ୍ ପରୁ ମିନ୍ଦେ ।
LUK 22:22 ବାତେଙ୍କ୍ ଇତ୍କେ ପରମେଶ୍ୱର୍ ବେଲା କେସ୍‍ମିନ୍ଦେଣ୍ଡ୍, ନାରୁଡ଼୍ ପିଲେ ଆଦେପୁଟୁଙ୍କ୍ ମାଡ଼ମିନ୍ଦେଣ୍ଡ୍ ନିଜାମ୍, ମିକା ବେନେ ମାନେଇ ତଡ଼୍ ଅଣ୍ଡ୍‌ ଶତ୍ରୁଡ଼୍ କାଇଦେ ପସ୍‍ପିଦାଙ୍କ୍ ଆଦୁତନ୍, ହାୟ ଅଂକିଙ୍କ୍‌ ଦଣ୍ଡ ଦର୍‍କିତେ !”
LUK 22:23 ତ ଅଡ଼୍‌‍ ଲୋପେକେ ବେନ ଇଦ୍ ମାଡ଼ାନଙ୍କ୍ ଆଦୁତନ୍, ଆଦ୍ ବିଷୟତେ ଅଡ଼୍‌‍ ତାମ୍ ତାମ୍‍ଲୋପେ କେତାକେତି ଆଦାଙ୍କ୍ ପସ୍ପ୍‍ତ୍‍ତଡ଼୍ ।
LUK 22:24 ମେଣ୍ଡେ ଅଡ଼୍‌ଆଗାଙ୍କ୍‌ ବେନ ମହାନ୍ ଆଦ୍‍ତନ୍, ଆଦ୍ ବିଷୟତେ ଅଡ଼୍‌‍ ଜାଗ୍‍ଡ଼ା ବା ରାମ୍‍କ୍ ଆଦ୍‍ତଡ଼୍ ।
LUK 22:25 ଆଗାଙ୍କ୍ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ବିଜାତିଡ଼୍ ରାଜାଲଡ଼୍ ନିଜର୍ ନାରୁଡ଼୍ ପରୁ ଶାସନ୍‍ ମାଡ଼ିତନ୍ । ମେଣ୍ଡେ ଅଡ଼ାୱୁ ଶାସନ୍‍ କର୍ତ୍ତାଲଡ଼୍ ଦେଶ୍ ସାଙ୍ଗଡ଼୍‍ ଇଞ୍ଜ ଦାବୀ ମାଡ଼ିତଡ଼୍ ।
LUK 22:26 ବାତେଙ୍କ୍ ଇତ୍କେ ମିଡ଼୍ ଆଲା ଆୟମାଟ୍, ମାତର୍ ମିୟାଗାଙ୍କ୍ ବେନ ବାଡ଼୍‍ୟଣ୍ଡ୍, ଅଣ୍ଡ୍‌ ସୁଦୁନଣ୍ଡ୍ ଲେକେମ୍ ଆୱିଣ୍ଡ୍, ମେଣ୍ଡେ ବେନ ନେତାଲ୍, ଅଣ୍ଡ୍‌ ସେବା ମାଡ଼ାନଣ୍ଡ୍‍ ଲେକେମ୍ ଆଇଣ୍ଡ୍‍ ।
LUK 22:27 ବେନ ଯଗ୍ୟ ? ବେନ ତିନ୍ଦାନଙ୍କ୍ କୁଦ୍‍ତଣ୍ଡ୍, ନା ସେବା ମାଡ଼ାନଣ୍ଡ୍ ? ବେନ ତିନ୍ଦାନଙ୍କ୍ କୁଦ୍‍ତଣ୍ଡ୍, ଅଣ୍ଡ୍‌ ଯଗ୍ୟ । ବାତେଙ୍କ୍ ଇତ୍କେ ନାନ୍ ମିୟାଗାଙ୍କ୍ ୱେରଣ୍ଡ୍ ସେବକ ଲେକେମ୍ ମିନ୍ଦେନ୍ ।
LUK 22:28 ମାତର୍ ମିଡ଼୍ ନାୱାଦ୍ ସାରେ ପରିକ୍ଷାତାଗ୍ ନା ତଡ଼୍ ମାଞ୍ଜ୍ ୱାଦୁତିଡ଼୍;
LUK 22:29 ମେଣ୍ଡେ ନା ବାବାଲ୍ ବେଲା ନାକିଂଙ୍କ୍ ଶାସନ୍‍ ମାଡ଼ାନ୍ ଅଦିକାର୍‌ ଇସ୍‌‍ମିନ୍ଦେଣ୍ଡ୍ । ଆଦ୍‍ଲେକାମ୍ ନାନ୍ ଆନ୍‌‍ତେ ମିକିଂଙ୍କ୍ ଶାସନ୍‍ ମାଡ଼ାନ୍ ଅଦିକାର୍‌ ହିତ୍‍ତାନ୍ ।
LUK 22:30 ବେଲାକି ମିଡ଼୍ ନାୱାଦ୍ ରାଜ୍ୟତାଗ୍ ନା ଟେବୁଲ୍ ତାଗ୍ ତିନ୍ଦାନ୍ ଉନ୍ଦାନ୍ ପାର୍‍ତିଡ଼୍, ମେଣ୍ଡେ ସିଂହାସନତାଗ୍ କୁଦି ଇସ୍ରାଏଲତାଦ୍ ବାର୍‍ଟାନ୍ ସହର୍‍ତିଙ୍କ୍ ଶାସନ୍‍ ମାଡ଼ିତିଡ଼୍ ।
LUK 22:31 “ଶିମୋନ୍, ଶିମୋନ୍, ଉଡ଼ାଟ୍, ଚାଷୀ ଗୋହମତିଙ୍କ୍ ଏର୍‍ତଡ଼୍ ତଡ଼୍ ନେମି ତଗ୍ ୱେରେ ମାଡ଼ାନ୍ ଲେକାମ୍, ଶୟ୍‍ତାନ୍‍ ମିକା ମିକିଂଙ୍କ୍ ମୁର୍‍ମୁରା ମାଡ଼ାନଙ୍କ୍ ଆଦେଶ୍‌ ଆତ୍‍ତେ ।
LUK 22:32 ବାତେଙ୍କ୍ ଇତ୍କେ ମିୱାଦ୍ ବିଶ୍ୱାସ୍ ବେଲାକି ଲପ୍ ଆୟ୍‍ୟ, ଆଦିନ୍ ମାଇଦିଙ୍କ୍ ନାନ୍ ମି ମାଇଦିଙ୍କ୍ ପ୍ରାର୍ତନା ମାଡ଼ିମିନ୍ଦେଣ୍ଡ୍; ମେଣ୍ଡେ, ମିଡ଼୍ ୱାଦାନ୍ ୱେଲେ ମି ତାମୁଣ୍ଡ୍‌କିଡ଼୍‍କ୍ ବିଶ୍ୱାସ୍ ମାଡ଼ାଙ୍କ୍ କେଲମୁଟ୍ ।”
LUK 22:33 ମାତର୍ ପିତର୍ ଜିସୁଙ୍କ୍ କେତ୍ତଣ୍ଡ୍, “ପ୍ରବୁ ନାନ୍ ନିତଡ଼୍ ଜଇଲ୍‌ତା ଆଦାଙ୍କ୍ ନୁ ଡଲାଙ୍କ୍ ବାଡ଼େ ତିଆର୍ ଆସ୍ ମିନ୍ଦେନ୍ !”
LUK 22:34 ବାତେଙ୍କ୍ ଇତ୍କେ ଜିସୁ କେତ୍ତଣ୍ଡ୍, “ହୋ ପିତର୍,” ନାନ୍ ନିକିଂଙ୍କ୍ କେସମିନ୍ଦେନ୍, “ନେଣ୍ଡ୍ କର୍କ୍ କୁସାନ୍ ମୁନେଙ୍କ୍ ନିମେ ନାକିଂଙ୍କ୍ ପୁନ୍‍ନନ୍ ଇଞ୍ଜ, ମୁଣ୍ଡ୍ ଦାମ୍ କେତିତିନ୍ ।”
LUK 22:35 ତାନ୍ ପେର୍‍କେ ଜିସୁ ତାନ୍ ଶିଷ୍ୟଡ଼କ୍ ପାଚ୍ରାମାଡ଼୍‍ତଣ୍ଡ୍, “ନାନ୍ ବେସୁଙ୍କ୍‍ ମିକିଂଙ୍କ୍ ଆଦ୍ ଦିନାମ୍‍ତେ ହେତି, ମୁନା ନୁ ହେର୍‍ପୁକ୍ ଆୟ୍‍ମାଟ୍ ଇଞ୍ଜ କେସ୍ ରହସ୍‍ମାତ୍‍ତାନ୍, ମିୱାଦ୍ ବାତ୍ ଅବାବ୍ ଆସ୍‍ମାତ୍‍ତେ କି ?” ଅଡ଼୍‌‍ କେତ୍‍ତଡ଼୍, “ଇଲେ, ବାତ୍ ଆୟ୍‍ୟ ।”
LUK 22:36 ଆଗାଙ୍କ୍ ଅଣ୍ଡ୍‌ ଅଡ଼୍‌‍କ୍ କେତ୍‍ତଣ୍ଡ୍, “ମାତର୍ ଇଞ୍ଜେ, ବେନନାଦ୍ ୱାଦାନାଦ୍ ମିନ୍ଦେ, ଆଦ୍‍ଅଣ୍ଡ୍‌ ଆୟିଣ୍ଡ୍, ଆଦ୍‍ଲେକାମ୍ ମୁନା ଆନ୍‌‍ତେ ଆୟିଣ୍ଡ୍, ମେଣ୍ଡେ ବେନନାଦ୍ ତାଲ୍‍ୱାର୍ ଇଲ୍‍ଲେ, ଅଣ୍ଡ୍‌ ତାନାଦ୍ ଡୁପଟ୍‍‍ତିଙ୍କ୍ ୱାମି ତାଲ୍‍ୱାର୍ ଆସିଣ୍ଡ୍ ।
LUK 22:37 ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ କେସମିନ୍ଦେନ୍, ଶାସ୍ତ୍ର କେତୁତ୍ ଯେ ଅଣ୍ଡ୍‌ ଅପ୍‍ରାଦି ତଡ଼୍ ଦଣ୍ଡ ଆତ୍‍କେ ନା ବିଷୟତେ ଲେକ୍‍ତାଦ୍ ସାର୍‍ରେବିଷୟ୍ ‍ଅନ୍‌ୟାୟ୍‍ ଆଦାନ୍ ସେଙ୍ଗେ ଇଦ୍ ଗଟ୍ ନାୟାଗ୍ ସାରେ ଆଦ୍‍ତେ ।”
LUK 22:38 ଆଗାଙ୍କ୍ ଅଡ଼୍‌‍ କେତ୍‍ତଡ଼୍‍, “ପ୍ରବୁ ଉଡ଼େ, ଇଗେ ରେଣ୍ଡ୍ ଚୁରୀ ମିନ୍ଦେ ।” ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍ତଣ୍ଡ୍, ରେଣ୍ଡ୍ ଚୁରୀ ଆଦ୍‍ତେ ।
LUK 22:39 ଜିସୁ ପେଇସ୍ ତାନାଦ୍ ନିଜର୍ ରୀତି ଲେକାମ୍ ଜୀତ ମେଟେତାଗ୍ ଆତ୍‍ତଣ୍ଡ୍; ମେଣ୍ଡେ ଶିଷ୍ୟଡ଼୍ ମିକା ଅନ୍‌ ପେର୍‍କେ ପେର୍କେ ଆତ୍‍ତଡ଼୍ ।
LUK 22:40 ଆଦ୍ ପଡ଼ିୟିତାଗ୍ ହେୱୁସ୍ ମିକା ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ପରିକ୍ଷାତାଗ୍ ବେଲାକି ରାୟ୍‍ୱିଡ଼୍, ଆଦିନ୍ ମାଇଦିଙ୍କ୍ ପ୍ରାର୍ତନା ମାଡ଼ାଟ୍ ।”
LUK 22:41 ଜିସୁ ଅଡ଼ାଗାକନ୍‍ସ୍ ସୁଦୁର୍ ଜେକେ ଆଞ୍ଜ୍ ମର୍‍ମିଣ୍ଡା ଇସ୍‌ ଇସତ୍ ପ୍ରାର୍ତନା ମାଡ଼ାଙ୍କ୍ ପସ୍‍ପ୍‍ତଣ୍ଡ୍ ।
LUK 22:42 ହୋ ବାବା ଯଦି ନିୱାଦ୍ ଇଚ୍ଛା ମାନ୍‍ତା, ଆଲାତ୍କେ ଇଦ୍ ଦୁଃକାତାଦ୍ ପାତ୍ର ନା କନ୍‍ସ୍ ଦୂରାମ୍‍ମାଡ଼ା; ମିକା ନାୱାଦ୍ ଇଚ୍ଛା ଇଲା, ମାତର୍ ନିୱାଦ୍ ଇଚ୍ଛା ସାରେ ଆୟି ।
LUK 22:43 ମେଣ୍ଡେ, ସ୍ୱର୍ଗତାଗାଙ୍କ୍ ୱେରଣ୍ଡ୍ ଦୂତ୍ ଅନ୍‌ ଗାର୍‍ରେ ୱାସ୍ ଅଂକିଙ୍କ୍‌ ଶକ୍ତି ଇସ୍ ଆତ୍‍ତେ ।
LUK 22:44 ଅଣ୍ଡ୍‌ ମନ୍‍ତାଗ୍ ଦୁଃକାମ୍ ଆସ୍ ଅଣ୍ଡୟ୍‌ ହେର୍କେତେ ପ୍ରାର୍ତନା ମାଡ଼ାଙ୍କ୍ ପସ୍‍ପ୍‍ତଣ୍ଡ୍ ନୁ ଅନାଦ୍‌ ଉବାମ୍ ନାର୍ଗେ ଆସ୍ ନେତୁର୍ ହିନା ନେଲ୍ ରାୟିତା ।
LUK 22:45 ଜିସୁ ପ୍ରାର୍ତନା କଞ୍ଚ୍ ତେଦି ଶିଷ୍ୟଡ଼ାଗେ ଗାର୍‍ରେ ୱାସ୍ ଅଡ଼୍‌‍କିଂଙ୍କ୍ ଦୁଃକାମ୍ ମାଇଦିଙ୍କ୍ ଉସ୍କାଡ଼୍ ତେ ଉଞ୍ଜି ମାନ୍ଦାନାଦ୍ ଉଡ଼୍‍ତଣ୍ଡ୍;
LUK 22:46 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ବାତ୍‍ତିଙ୍କ୍ ଉଞ୍ଜୁତିଡ଼୍ ? ପରିକ୍ଷାତାଗ୍ ବେଲାକି ପଡ଼େମ୍ ‍ଆୟିୱିଡ଼୍, ଇଦିନ୍ ସେଙ୍ଗେ ତେଦି ପ୍ରାର୍ତନା ମାଡ଼ାଟ୍ ।”
LUK 22:47 ଅଣ୍ଡ୍‌ ଗଟି କେତ୍‍ତାନ୍ ୱେଲେ, ଉଡ଼ାଟ୍, ନାରୁଡ଼୍ ୱାସ୍ ହେଉତଡ଼୍, ମେଣ୍ଡେ, ବାରଜାନ୍ ତାଗାଙ୍କ୍ ଯିହୂଦା ପେଦେର୍ ତଣ୍ଡ୍ ୱେରଣ୍ଡ୍ ଅଡ଼୍‌‍ ମୁନେ ୱାସ୍ ଜିସୁଙ୍କ୍ ବୁରାନଙ୍କ୍ ଅନ୍‌ ଗାର୍‍ରେ ଆତ୍‍ତଣ୍ଡ୍ ।
LUK 22:48 ବାତେଙ୍କ୍ ଇତ୍କେ ଜିସୁ ଅଂକିଙ୍କ୍‌ କେତ୍ତଣ୍ଡ୍, “ହୋ ଯିହୂଦା, ବୁରି ମିକା ନାରୁଡ଼୍ ପିଲେତିଙ୍କ୍ ଶତ୍ରୁଡ଼୍ କାଇଦେ ପସ୍‍ପିଦୁତି ?”
LUK 22:49 ଆଗାଙ୍କ୍ ବାତ୍ ଗଟେମ୍ ଆଦ୍‍ତେ, ଆଦ୍ଉଡ଼ି ତାମ୍ ସାଙ୍ଗଡ଼୍ କେତ୍ତଡ଼୍, “ପ୍ରବୁ, ମାମେ ବାତେଏ ଚୁର୍‌ଦେ ରେଏତିତମ୍ ?”
LUK 22:50 ମେଣ୍ଡେ ଶିଷ୍ୟଡ଼୍ ଆଗାଙ୍କ୍ ୱେରଣ୍ଡ୍ ଚୁର୍ ପେସ୍‍ପି ମୁକ୍ୟ ଯାଜକତେ ଚାକର୍‍ତିଙ୍କ୍ ଅନାଦ୍‌ ତିନ୍ଦେକାଇଦେ ପାକେତ୍ କେଉଦିଙ୍କ୍ ନାଡ଼୍‌କିତ୍‌ତଣ୍ଡ୍ ।
LUK 22:51 ବାତେଙ୍କ୍ ଇତ୍କେ ଜିସୁ କେତ୍‍ତଣ୍ଡ୍, “ଇସରେ ମାନୀ;” ମେଣ୍ଡେ ଅଣ୍ଡ୍‌ ଅନାଦ୍‌ କେଉଦିଙ୍କ୍ ଇଟି ସୁସ୍ଥ ମାଡ଼ତଣ୍ଡ୍ ।
LUK 22:52 ମେଣ୍ଡେ ଜିସୁ ତାନ୍ ବିରୁଦ୍ ତେ ୱାସ୍‍ମାନ୍ଦାନ୍ ମୁକ୍ୟ ଯାଜକ, ମନ୍ଦିର୍‍ତେ ସେନାପତି ନୁ ବେଡ଼ିୟି ନାରୁଡ଼୍‍କ୍ କେତ୍‍ତଣ୍ଡ୍, “ମିଡ଼୍ ବାତେଏ ଡଙ୍ଗାଲଡ଼୍ ବିରୁଦ୍ଦ୍‌ତେ ପେଇତାନ୍ ଲେକେମ୍ ଚୁରୀ ନୁ ଟେଙ୍ଗା ପଇସ୍ ନାକିଂଙ୍କ୍ ପଇଦାଙ୍କ୍ ପେଇସ୍ ୱାତ୍‍ତିଡ଼୍ ?
LUK 22:53 ନାନ୍ ସାର୍‍ରେ ଦିନାମ୍ ମିତଡ଼୍ ମନ୍ଦିର୍ ତାଗ୍ ମାନ୍ଦାନ୍ ୱେଲେ ମିଡ଼୍ ନା ବିରୁଦ୍‍ତେ କାୟ୍ ଆୱିଡ଼୍, ବାତେଙ୍କ୍ ଇତ୍କେ ଇଦ୍ ମିୱାଦ୍ ସମୟ୍ ନୁ ଇକାଡ଼୍ ତେ ଶାସନ୍‍ ।”
LUK 22:54 ପେର୍‍କେ ଅଡ଼୍‌‍ ଜିସୁଙ୍କ୍ ପଇସ୍ ଆସ୍ ବେଡ଼ୀଇ ଯାଜକିନ୍ ଲୋନ୍‌ ତାତ୍‍ତଡ଼୍; ବାତେଙ୍କ୍ ଇତ୍କେ ପିତର୍ ଜେକେ ମାଞ୍ଜ୍ ପେର୍କେ ପେର୍କେ ଆତ୍‍ତଣ୍ଡ୍ ।
LUK 22:55 ମେଣ୍ଡେ ଅଡ଼୍‌‍ ଦୁୱାଡ଼୍‌ ତାଗ୍ କିସ୍ ନିଡ଼୍‍ସ୍‍ପି ଅଣ୍ଡୟ୍‌ ତାଗ୍ କୁଦ୍‍ତଡ଼୍, ପିତର୍ ଆନ୍‌‍ତେ ଅଡ଼୍‌‍ତଡ଼୍ କୁଦିମାତ୍‍ତଣ୍ଡ୍ ।
LUK 22:56 ୱେରଣ୍ଡ୍ ଦାସୀ ପିତର୍‍ତିଙ୍କ୍ କିସ୍‍ତେ ଗାର୍‍ରେ କୁଦିମାନ୍ଦାନ୍ ଉଡ଼ି ଅଂକିଙ୍କ୍‌ ଅନାକେ ଉଡ଼ି କେତ୍‍ତେ, “ଇ ନାରୁଡ଼୍ ମିକା ଅନ୍‌ ତଡ଼୍ ମାତ୍‍ତଣ୍ଡ୍ ।”
LUK 22:57 ବାତେଙ୍କ୍ ଇତ୍କେ ପିତର୍ କେତ୍ତଣ୍ଡ୍, “ଇଲେ, ନାନ୍ ଅକିଂଙ୍କ୍‌ ପୁନନ୍ ।”
LUK 22:58 ସୁଦୁଟ୍ ସମୟତେ ପେର୍କେ ମେଣ୍ଡ୍ ୱେରନ୍ ଅଂକିଙ୍କ୍‌ ଉଡ଼ି କେତ୍ତଣ୍ଡ୍, “ନିମ୍‍ ମିକା ଅଡ଼୍‌‍ଆଗାଙ୍କ୍ ୱେର୍‍ନି ।” ବାତେଙ୍କ୍ ଇତ୍କେ ପିତର୍ କେତ୍ତଣ୍ଡ୍, “ଇଲା, ନାନ୍ ଆୟ୍‍ୟ ।”
LUK 22:59 ମାତର୍ ଅଣ୍ଡ୍‌ ଗଣ୍ଟାତ୍ ପେର୍‍କେ ମେଣ୍ଡେ ୱେରନ୍ ସତ୍ଇଞ୍ଜ କେତାନଙ୍କ୍ ପସ୍ପ୍‍ତଣ୍ଡ୍, “ଇ ନାରୁଡ଼୍ ମିକା ନିଜାମ୍ ଅନ୍‌ ତଡ଼୍ ମାତ୍‍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ ତ ଗାଲିଲୀୟ ନାରୁଡ଼୍ ।”
LUK 22:60 ବାତେଙ୍କ୍ ଇତ୍କେ ପିତର୍ କେତ୍ତଣ୍ଡ୍, “ନିମେ ବାତେଏ କେତୁତିନ୍ ନାନେ ଆଦ୍ ପୁନନ୍ ।” ଆସୁଙ୍କେ ଅଣ୍ଡ୍‌ ଗଟି କେସ କର୍କ୍ କୁସ୍ତା ।
LUK 22:61 ପ୍ରବୁ ତିଡ଼ିୟିମିକା ପିତର୍‍ତିଙ୍କ୍ ୱେରନ୍ ଲେକାମ୍ ଉଡ଼୍‍ତଣ୍ଡ୍ ନୁ ପ୍ରବୁ ଅଂକିଙ୍କ୍‌ ବାତ୍ କେସ୍‍ମାତ୍‍ତଣ୍ଡ୍, ଆଦ୍ ଅଂକିଙ୍କ୍‌ ହେର୍କା ୱାତ୍‍ତା “ନେଣ୍ଡ୍ ନାର୍କେ କର୍କ୍ କୁସାନ୍ ମୁନେଙ୍କ୍ ନିମେ ନାକିଂଙ୍କ୍ ମୁଣ୍ଡ୍ ଦାମ୍ ଅସ୍ୱୀକାର୍ ମାଡ଼ିତିନ୍ ।”
LUK 22:62 ତାନ୍ ପେର୍‍କେ ପିତର୍ ବାଇଦେ ଆଞ୍ଜ୍ ଦୁଃକାମ୍‍ତେ ଗାଟି କେୟ୍‍ତଣ୍ଡ୍ ।
LUK 22:63 ବେନେ ନାରୁଡ଼୍ ଜିସୁଙ୍କ୍ ପଇସ୍ ନେହେସ୍ ମାତ୍‍ତଡ଼୍, ଅଡ଼୍‌‍ ଜିସୁଙ୍କ୍ ରେହେସ୍‍ ପରିହାସ୍ ମାଡ଼ତଡ଼୍,
LUK 22:64 ଜିସୁନ୍ ମକମ୍‍ତିଙ୍କ୍ ମୁସି ଅଂକିଙ୍କ୍‌ ପାଚ୍ରାମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍, “ନିମେ ୱେରନ୍ ବାବବାଦୀବାନେ ! କେଲମ୍ ତ ନିକିଂଙ୍କ୍ ବେନ ପିଞ୍ଜ୍‍ପ୍‍ତଡ଼୍ ?”
LUK 22:65 ମେଣ୍ଡେ ଅଡ଼୍‌‍ ନାର୍ଗେ ଗଟି ଅନ୍‌ ବିରୁଦ୍ ତେ କେସ୍ ଅଂକିଙ୍କ୍‌ ଲିନ୍ଦ୍ ମାଡ଼ାନଙ୍କ୍ ପସ୍‍ପ୍‍ତ୍‍ତଡ଼୍ ।
LUK 22:66 ନାରୁଡ଼୍‍କିଂଙ୍କ୍ ଆତ୍‍ତେ ୱେଲେ ଯିହୁଦୀ ମୁକ୍ୟନାରୁଡ଼୍, ମେଣ୍ଡେ ମୁକ୍ୟ ଯାଜକ ନୁ ଶାସ୍ତ୍ରୀଡ଼୍ ଅଣ୍ଡୟାଗେ ଆସ୍ ତାମ୍ ବେଡ଼ିୟାଦ୍ ମାନ୍ଦେତାଗ୍‍ ଅସ୍ କେତ୍‍ତଡ଼୍, “ନିମ୍‍ ଯଦି କ୍ରିଷ୍ଟ, ଇଞ୍ଜେ ମାକିଂଙ୍କ୍ କେଲେମ୍ ।”
LUK 22:67 ବାତେଙ୍କ୍ ଇତ୍କେ କ୍ରିଷ୍ଟ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ନାନ୍ ଯଦି ମିକିଂଙ୍କ୍ କେତିତାନ୍, ମିଡ଼୍ ତ ବିଶ୍ୱାସ୍ ମାଡ଼୍‍ୱିଡ଼୍;”
LUK 22:68 ମେଣ୍ଡେ ନାନ୍ ଯଦି ପ୍ରଶ୍ନ କେତିତାନ୍, ମିଡ଼୍ ଉତ୍ତର୍ ଇୱିଡ଼୍ ।
LUK 22:69 ବାତେଙ୍କ୍ ଇତ୍କେ ଇଞ୍ଜେକଞ୍ଚ୍ ନାରୁଡ଼୍ ପିଲେ ସାରେତିଙ୍କ୍‍ ଶକ୍ତିନଡ଼୍ ଇଶ୍ୱର୍‌ତାଦ୍ ତିନ୍ଦେକାଇଦେ ପାକେ କୁଦିତଣ୍ଡ୍ ।
LUK 22:70 ଆଗାଙ୍କ୍ ସାରେତଡ଼୍ କେତ୍ତଡ଼୍, “ତ ନିମେ ବାତେଏ ଇଶ୍ୱର୍ ମାର୍‍ ?” ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ନାନ୍ ଅଣ୍ଡେ ଇଞ୍ଜ୍ ମିଡ଼୍ କେତୁତିଡ଼୍ ।”
LUK 22:71 ଆସୁଟେ ଅଡ଼୍‌‍ କେତ୍ତଡ଼୍, “ମାମ୍ ତ ନିଜେ ନିଜେ ଅନ୍‌ ନିଜ୍ ମକତାଗାଙ୍କ୍ ଇଦ୍ ଗଟି କେଞ୍ଜ୍‍ତମ୍ ।”
LUK 23:1 ପେର୍‍କେ ସବାତାଗାଙ୍କ୍ ସାରେତଡ଼୍ ତେଦି ପିଲାତନ୍ ଗାର୍‍ରେ ଜିସୁଙ୍କ୍ ଆତ୍‍ତଡ଼୍ ।
LUK 23:2 ଅଡ଼୍‌‍ ସାରେତଡ଼୍ କ୍ରିଷ୍ଟଙ୍କ୍ ପିଲାତନ୍ ଗାର୍‍ରେ ପଇସ୍ ଆତ୍‍ତଡ଼୍ ।
LUK 23:3 ଆଗାଙ୍କ୍ ପିଲାତ ଜିସୁଙ୍କ୍ କେତ୍ତଣ୍ଡ୍, “ନିମେ କି ଯିହୁଦାନଡ଼୍ ରାଜାନି ?” ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ନିମେ ଆଦ୍‌ କେତୁତିନ୍ ।”
LUK 23:4 ଆଗାଙ୍କ୍ ପିଲାତ ମୁକ୍ୟଯାଜକ୍ ନୁ ନାରୁଡ଼୍‍କ୍ କେତ୍‍ତଣ୍ଡ୍, “ମାମେ ଇ ନାରୁନାଗାଙ୍କ୍ ବାତ୍ ମିକା ଦଷ୍ ଦର୍‍ସ୍‍କମ୍ ।”
LUK 23:5 ବାତେଙ୍କ୍ ଇତ୍କେ ଅଡ଼୍‌‍ ସେନେକ୍‍ ସେନେକ୍ ଗାଟି ଲେଙ୍ଗ୍‍ଦେ କେତ୍ତଡ଼୍, “ଅନାଦ୍‌ ଶିକ୍ଷାତଡ଼୍ ଅଣ୍ଡ୍‌ ସାରେଯିହୂଦା ଦେଶ୍‍ତା ନାରୁଡ଼୍ ଲୋପେ ରାମ୍‌କ୍‌ ତିଆର୍ ମାଡ଼୍‍ତଣ୍ଡ୍ । ଅଣ୍ଡ୍‌ ଆଦ୍ ଗାଲିଲୀତାଗାଙ୍କ୍ ଆରାମ୍ ମାଡ଼ି ଇଞ୍ଜେ ଇଦ୍ ପଡ଼ିୟିତାଗ୍ ୱାତ୍‍ତଣ୍ଡ୍ ।”
LUK 23:6 ବାତେଙ୍କ୍ ଇତ୍କେ ପିଲାତ ଆଦ୍ କେଞ୍ଜି କେତ୍ତଣ୍ଡ୍, “ଇ ନାରୁଡ଼୍ ବାତ୍ ୱେରଣ୍ଡ୍ ଗାଲିଲୀୟତଣ୍ଡ୍ ।”
LUK 23:7 ଜିସୁ ଯେ ହେରଦ୍ ରାଜ୍ୟତ୍ ନାରୁଡ଼୍, ଇଦ୍ ପୁଞ୍ଜ୍ ଅଣ୍ଡ୍‌ ଅଂକିଙ୍କ୍‌ ହେରୋଦ୍‍ତା ରୋସିତ୍‍ତଣ୍ଡ୍, ଆସୁଙ୍କ୍ ଅଣ୍ଡ୍‌ ମିକା ଯୀରୁଶାଲମ୍‍ତାଗ୍ ମାତ୍‍ତଣ୍ଡ୍ ।
LUK 23:8 ହେରଦ୍ ଜିସୁଙ୍କ୍ ଉଡ଼ି, ଗାଟି ୱେଡ଼୍‍କିତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ ଅନାଦ୍‌ ବିଷୟ କେଞ୍ଜି ମାତ୍‍ତାଙ୍କ୍ ଅଂକିଙ୍କ୍‌ ଗାଟି ଦିନାମ୍ କଞ୍ଜ୍ ଉଡ଼ାନ୍ ମାଇଦିଙ୍କ୍ ଆଶେ ମାଡ଼ମାତ୍‍ତଣ୍ଡ୍, ମେଣ୍ଡେ ଅନ୍‌ ଆଗାଙ୍କ୍ ବାତେମିକା ବାକ୍‍ୱା ପାଡ଼ିୟି ଅଣ୍ଡ୍‌ ଉଡ଼ାଙ୍କ୍ ଆଶ୍ ମାଡ଼ିମାତ୍‍ତଣ୍ଡ୍ ।
LUK 23:9 ଆଦିଙ୍କ୍ ହେରୋଦ୍ ଅଂକିଙ୍କ୍‌ ବାତ୍ ବାତ୍ ଗଟି କେତାନଙ୍କ୍ ପସ୍‍ପ୍‍ତଣ୍ଡ୍, ବାତେଙ୍କ୍ ଇତ୍କେ ଜିସୁ ଅଂକିଙ୍କ୍‌ ବାତେମିକା ଉତ୍ତର୍ ଇୱଣ୍ଡ୍ ।
LUK 23:10 ମେଣ୍ଡେ ବେଡ଼ିୟି ଯାଜକ ନୁ ଶାସ୍ତ୍ରୀନଡ଼୍‍ ନିସ୍‍ମିକା ଜିସୁନ୍ ବିରୁଦ୍ ତେ ଗାଡ଼୍‍ସ୍ ଗଟି କେସ୍ ଅବିଯଗ୍ ମାଡ଼ମାତ୍‍ତଡ଼୍ ।
LUK 23:11 ହେରୋଦ୍ ତାନ୍ ସୌନ୍ୟକିନ୍ ତଡ଼୍ ଅଂକିଙ୍କ୍‌ ତୁଚ୍ଛ ମାଡ଼ି ଇଙ୍ଗ୍‍ତାୱ୍ ଚକା କେର୍‍ସ୍‍ପି ପିଲାତନ୍ ଗାର୍‍ରେ ମେଣ୍ଡନ୍‍ଦାମ୍ ରହତଣ୍ଡ୍ ।
LUK 23:12 ଆଦ୍ ଦିନାମ୍ ହେରୋଦ୍ ନୁ ପିଲାତ ଇର୍ୱୁଡ଼୍ ସାଙ୍ଗ ଆତ୍‍ତଡ଼୍; ଆଦିନ୍ ମୁନେଙ୍କ୍ ଅଡ଼୍‌‍ ଇର୍ୱୁଡ଼୍ ଶତ୍ରୁ ମାତ୍‍ତଡ଼୍ ।
LUK 23:13 ଆଦିନ୍ ମାଇଦିଙ୍କ୍ ପିଲାତ, ବେଡ଼ିୟି ଯାଜକ, ଅଦକ୍ଷ ନୁ ସାର୍‍ରେତଡ଼୍ ନାରୁଡ଼୍‍କ୍ କାର୍‍ଙ୍ଗି ଅଣ୍ଡୟାଗେ ମାଡ଼ି ଅଡ଼୍‌‍କିଂଙ୍କ୍ କେତ୍ତଣ୍ଡ୍,
LUK 23:14 “ଅଣ୍ଡ୍‌ ନାରୁଡ଼୍ ଗୋଲକ୍ ମାଡ଼ୁତଣ୍ଡ୍ ଇଞ୍ଜ ମିଡ଼୍ ଅଂକିଙ୍କ୍‌ ନାୟାଗ୍ ତାତ୍‍ତିଡ଼୍ । ନାନ୍ ଅଂକିଙ୍କ୍‌ ପରିକ୍ଷା ମାଡ଼୍‍ତାନ୍; ବାତେଙ୍କ୍ ଇତ୍କେ ମିଡ଼୍ ଅବିଯଗ୍ ମାଡ଼ିମାନ୍ଦାନ୍ ବାତ୍‍ମିକା ଦଷ୍ ଅନାଗେ ଦର୍‍ସ୍‍କନ୍ ।
LUK 23:15 ହେରୋଦ୍ ମିକା ଦର୍‍ସ୍‍କାଙ୍କ୍ ପାର୍‍ୱଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ ଅଂକିଙ୍କ୍‌ ମା ଗାର୍‍ରେ ମେଣ୍ଡେ ରସିତ୍‍ତଣ୍ଡ୍; ମେଣ୍ଡେ ଉଡ଼ାଟ୍, ଇଣ୍ଡ୍ ଡଲାନାଦ୍ ଦଣ୍ଡ୍ ରକମ୍ ବାତେମିକା ପାଡ଼ିୟି ମାଡ଼ଣ୍ଡ୍;
LUK 23:16 ମେଣ୍ଡେ ମାମେ ଇଙ୍କ୍ ଦଣ୍ଡ ଇସ୍ ୱିଡ଼ସିଦ୍‍ତମ୍ ।
LUK 23:17 ପାଣ୍ଡୁମ୍‍ତେ ୱେଲେ ଅଡ଼୍‌‍ ସେଙ୍ଗେ ଅଂକିଙ୍କ୍‌ ୱେରଣ୍ଡ୍ ବନ୍ଦି ନାରୁଙ୍କ୍ ମୁକ୍ତ ମାଡ଼ାଙ୍କ୍ ଆସମାତ୍‍ତଡ଼୍ ।”
LUK 23:18 ସାରେତଡ଼୍ ନାରୁଡ଼୍ କିଡ଼୍‍କି କେତ୍‍ତଡ଼୍, “ଅଂକିଙ୍କ୍‌ ଆଉକାଟ୍ । ମା ସେଙ୍ଗେ ବାରବାଙ୍କ୍ ମୁକ୍ତ ମାଡ଼ାଟ୍ ।”
LUK 23:19 ଅଣ୍ଡ୍‌ ବାରବା ନାର୍‍ଦାଗ୍ ଗଟେମ୍ ଆତ୍‍ତାଦ୍ ବେନମିକା ରାମ୍‍କ୍ ମାଇଦିଙ୍କ୍ ନୁ ନାରୁଙ୍କ୍ ଆଉକ୍‍ତେ ସେଙ୍ଗେ କାରାଗାର୍ ତାଗ୍ ୱାଟିମାତ୍‍ତଡ଼୍ ।
LUK 23:20 ମାତର୍ ପିଲାତ ଜିସୁଙ୍କ୍ ୱିଡ୍‌ସିଦାନଙ୍କ୍ ଇଚ୍ଛାମାଡ଼ି ଅଡ଼୍‌‍କିଂଙ୍କ୍ ମେଣ୍ଡନ୍ଦାମ୍ ବୁଜା ମାଡ଼ତଣ୍ଡ୍ ।
LUK 23:21 ବାତେଙ୍କ୍ ଇତ୍କେ ଅଡ଼୍‌‍ ଗାଟି ଲେଙ୍ଗ୍‍ଦେ କେତାନଙ୍କ୍ ପସ୍‍ପ୍‍ତ୍‍ତଡ଼୍, “ଅଂକିଙ୍କ୍‌ କ୍ରୁଶତାଗ୍ ତାର୍‍ସ୍‍ପାଟ୍, କ୍ରୁଶତାଗ୍ ତାର୍‍ସ୍‍ପାଟ୍ ।”
LUK 23:22 ମେଣ୍ଡେ ପିଲାତ ଅଡ଼୍‌‍କିଂଙ୍କ୍ ତୃତୀୟ ଦାମ୍ କେତ୍ତଣ୍ଡ୍, “ବାତେଙ୍କ୍, ଅଣ୍ଡ୍‌ ବାତ୍ ଦଷ୍ ମାଡ଼୍‍ତଣ୍ଡ୍ ? ମାମେ ଅନାଗାଙ୍କ୍ ଡଲାନାଦ୍ ବାତେମିକା ଦଷ୍ ଦର୍‍ସ୍‍କମ୍‍; ମେଣ୍ଡେ, ମାନାଡ଼୍ ଅଂକିଙ୍କ୍‌ ଦଣ୍ଡ ଇସ୍ ୱିଡ଼ସିଦ୍‍‍ତାଡ଼୍‍ ।”
LUK 23:23 ମାତର୍ ଅଂକିଙ୍କ୍‌ କ୍ରୁଶତାଗ୍ ତାର୍‍ସ୍‍ପାଟ୍, ଇଞ୍ଜ୍ ଦାବୀ ମାଡ଼ି ଅଡ଼୍‌‍ ଗାଟିଲେଙ୍ଗ୍‍ଦେ ଜିଦ୍ ମାଡ଼ାନଙ୍କ୍ ପସ୍‍ପ୍‍ତ୍‍ତଡ଼୍, ମେଣ୍ଡେ ଅଡ଼ାଦ୍‌ ମର୍‍ରେ ହିଁ ଜିଡ଼୍‍ତା ।
LUK 23:24 ମେଣ୍ଡେ ଅଡ଼ାଦ୍‌ ଦାବୀ ଲେକାମ୍ ମାଡ଼ାଟ୍ ଇଞ୍ଜ୍ ପିଲାତ ଆଦେଶ୍ ଇତ୍ତଣ୍ଡ୍ ।
LUK 23:25 ବାତେଙ୍କ୍ ଇତ୍କେ ଗୋଲକ୍ ନୁ ଆଉକ୍‍ତେ ମାଇଦିଙ୍କ୍ କାରାଗାର୍ ତାଗ୍ ୱାଟିମାତ୍‍ତେ ନାରୁଡ଼୍ ମାଇଦିଙ୍କ୍ ଅଡ଼୍‌‍ ଦାବୀ ମାଡ଼ ମାତ୍‍ତଡ଼୍, ଅଂକିଙ୍କ୍‌ ଅଣ୍ଡ୍‌ ୱିଡ଼୍‍ସିତ୍‍ତଣ୍ଡ୍ ମେଣ୍ଡେ ଜିସୁଙ୍କ୍ ଅଣ୍ଡ୍‌ ଅଡ଼ାଦ୍‌ ଇଚ୍ଛାତେ ମାଡ଼ାନଙ୍କ୍ ଇତ୍‍ତନ୍ ।
LUK 23:26 ଅଡ଼୍‌‍ ଜିସୁଙ୍କ୍ ଆଦାନ୍ ୱେଲେ ମେଣ୍ଡ ଅଙ୍କ୍‌ ନାର୍ କନ୍‍ସ୍ ୱାସମିନ୍ଦେନ୍ ଶିମୋନ୍ ପେଦେର୍‍ତଣ୍ଡ୍ ୱେରଣ୍ଡ୍ କୁରୁନିୟ ନାରୁଙ୍କ୍ ପଇସ୍ ଜିସୁନ୍ ପେର୍‍କେ ପେର୍‍କେ କ୍ରୁଶକାଞ୍ଜାନ୍ ମାଇଦିଙ୍କ୍ ଅନ୍‌ ଆଟ୍‍ତାଗ୍ ଆଦ୍ ୱାଟିତ୍‍ତଡ଼୍ ।
LUK 23:27 ମେଣ୍ଡେ ନାର୍ଗେ ନାରୁଡ଼୍ ନୁ ଅନ୍‌‍ମାଇଦିଙ୍କ୍ ଗୁଣ୍ଡେତାଗ୍ ରେହେସ୍ କେୟମାନ୍ଦାନ୍ ମୁତ୍‍ତେନ୍ ୱେରନ୍ ବେଡ଼େୟାଦ୍ ମାନ୍ଦେ ଅନ୍‌ ପେର୍‍କେ ୱାସମାତ୍‍ତେ ।
LUK 23:28 ଜିସୁ ଅଡ଼ାକ୍ ମାଲ୍‍ସ୍ ଉଡ଼ି କେତ୍ତଣ୍ଡ୍, “ଯିରୁଶାଲେମ୍‍ତେ ନାଟାନଡ଼ି ନା ମାଇଦିଙ୍କ୍ କେୟ୍‍ମାଟ୍ ବା ମି ମାଇଦିଙ୍କ୍ ନୁ ମି ପିଲାନ୍ ମାଇଦିଙ୍କ୍ କେୟାଟ୍;
LUK 23:29 ବାତେଙ୍କ୍ ଇତ୍କେ ଉଡ଼ାଟ୍, ବେନଡ଼୍ ୱାଞ୍ଜଲ୍, ମେଣ୍ଡେ ବେନଡ଼୍ ବେସୁଙ୍କେ ବା ଡଙ୍କେତ୍ ଆୟ୍‍ୟ ମାନ୍‍ତା ନୁ ପାୟାଲ୍ ଉସ୍ୱେ ମାନ୍‍ତା ହାୱିଙ୍କ୍ ନାରୁଡ଼୍, ବେସୁଙ୍କ୍‍ ଦନ୍ୟ ଦନ୍ୟ ଇଞ୍ଜ କେତିତଡ଼୍, ଇଦଲେକାମ୍ ସମୟ୍ ୱାଦୁତ୍ ।
LUK 23:30 ଆସୁଙ୍କ୍ ନାରୁଡ଼୍ ମେଟାକିଂଙ୍କ୍ କେତାନଙ୍କ ପସ୍‍ପିତ୍‍ତଡ଼୍, ମା ପରୁ ମେଇସ୍ ରାଲାଟ୍, ମେଣ୍ଡେ ସୁଦୁମେଟାକିଙ୍କ୍ କେତାଙ୍କ୍ ପସ୍‍ପିତ୍‍ତଡ଼୍, ମାକିଂଙ୍କ୍ ମିସିଇମୁଟ୍ !
LUK 23:31 ବାତେଙ୍କ୍ ଇତ୍କେ ନାରୁଡ଼୍ ଯଦି ଜିୱେତ୍ ମାଡ଼େତିଙ୍କ୍ ଇଦ୍ ଲେକେମ୍ ମାଡ଼ିତଡ଼୍, ଆଲେକେ ୱାସ୍‌ତେ ମାଡ଼େ ସେଙ୍ଗେ ବାତେଏ ଗଟେମ୍ ଆୟ୍‍ୟ ?”
LUK 23:32 ବାଗାତ୍ ଇର୍‌ୱୁଡ଼୍ ଅପ୍‍ରାଦିଡ଼୍‍କ୍ ମିକା ଜିସୁନ୍ ତଡ଼୍ ଡଲାନାଦ୍ ଦଣ୍ଡ ହିଦାନ୍ ସେଙ୍ଗେ ଆସମାତ୍‍ତଡ଼୍ ।
LUK 23:33 ଅଡ଼୍‌‍କିଂଙ୍କ୍ କପାଲ ପେଦେର୍ ପଡ଼ିୟିତାଗ୍ ଏୱୁସ୍ ମିକା ଜିସୁଙ୍କ୍ କ୍ରୁଶତାଗ୍ ତାର୍‍ସ୍‍ପ୍‍ତଡ଼୍, ମେଣ୍ଡେ ଅପ୍‍ରାଦିଡ଼୍‍କ୍ ୱେରଙ୍କ୍ ଡେବେ କାଇଦେପାକେ ନୁ ଅର୍‍ତୁଙ୍କ୍ ତିନ୍ଦେ କାଇଦେପାକେ କ୍ରୁଶତାଗ୍ ତାର୍‍ସ୍‍ପ୍‍ତଡ଼୍ ।
LUK 23:34 ଆସୁଙ୍କ୍ ଜିସୁ କେତ୍ତଣ୍ଡ୍, “ବାବା ଇଡ଼କିଙ୍କ୍ କ୍ଷମା ମାଡ଼ା, ବାତେଙ୍କ୍ ଇତ୍କେ ଇଡ଼୍ ବାତ୍ ମାଡ଼ୁତଡ଼୍ ଆଦ୍ ପୁନଡ଼୍ ।” ମେଣ୍ଡେ ଅଡ଼୍‌‍ ଜିସୁନ୍ ଚକାତିଙ୍କ୍ ତୁସାନ୍ ମାଇଦିଙ୍କ୍ ଗୁଲିବାଣ୍ଟ ମାଡ଼୍‍ତଡ଼୍ ।
LUK 23:35 ନାରୁଡ଼୍ ନିସ୍‍ମିକା ଉଡ଼ମାତ୍ତଡ଼୍, ମେଣ୍ଡେ ଯିହୂଦି ନେତାଲଡ଼୍ ମିକା ଅଂକିଙ୍କ୍‌ ତୁଚ୍ଛ ମାଡ଼ି କେତୁତଡ଼୍, “ଅଣ୍ଡ୍‌ ଆର୍‍ତିଡ଼କ୍ ରକ୍ଷା ମାଡ଼ତଣ୍ଡ୍; ଅଣ୍ଡ୍‌ ଯଦି ଇଶ୍ୱର୍‌ତେ ହେଞ୍ଚିମାନ୍ଦାନ୍ କ୍ରିଷ୍ଟ, ଆଲେକେ ନିଜ୍ ତିଙ୍କ୍ ରକ୍ଷା ମାଡ଼ିଣ୍ଡ୍ ।”
LUK 23:36 ସୌନ୍ୟନାରୁଡ଼୍ ମିକା ଅନ୍‌ ଗାର୍‍ରେ ୱାସ୍ ପୁଲସ୍ତାଉ କାଲ୍ ଇସ୍ ଅଂକିଙ୍କ୍‌ ପରିହାସ୍ ମାଡ଼ି କେତ୍ତଡ଼୍,
LUK 23:37 “ନିମ୍‍ ଯଦି ଯିହୂଦୀଡ଼୍ ରାଜାନନି, ଆଲେକେ ନିଜେତିଙ୍କ୍ ରକ୍ଷା ମାଡ଼ା ।”
LUK 23:38 ଜିସୁନ୍ ତାଲେତ୍ ପରୁ ଇଦ୍ ଲେକ୍‍ତାଦ୍ ମାତ୍‍ତା, “ଇଣ୍ଡ୍ ଯିହୂଦୀଡ଼୍ ରାଜାଲ୍ ।”
LUK 23:39 କ୍ରୁଶତାଗ୍ ତାର୍‍ସ୍‍ପ୍‍ତା ଅପ୍‍ରାଦିଡ଼୍ ଲୋପେକେ ୱେରଣ୍ଡ୍ ଅଂକିଙ୍କ୍‌ ଲିନ୍ଦେ ମାଡ଼ି କେତ୍‍ତଣ୍ଡ୍, “ନିମ୍‍ ବାତ୍ କ୍ରିଷ୍ଟ ଆୱୟି କି ? ନିଜେତିଙ୍କ୍ ନୁ ମାକିଂଙ୍କ୍ ଆନ୍‌‍ତେ ରକ୍ଷାମାଡ଼ା ।”
LUK 23:40 ମେଣ୍ଡେ ୱେରନ୍ ଅଂକିଙ୍କ୍‌ ଦମକ୍ ଇସ୍‌ କେତ୍ତଣ୍ଡ୍, ନିମ୍‍ ଆନ୍‌‍ତେ ସାମାନ୍ ଦଣ୍ଡ ଅଦୁତିନ୍, “ନିମ୍‍ ଇଶ୍ୱର୍‌ତିଙ୍କ୍ ବାତ୍ ୱେର୍‍ୟକଟ ମିନ୍ଦେନି ।
LUK 23:41 ମାମେ ସିନା ନ୍ୟାୟ ମାଇଦିଙ୍କ୍ ଦଣ୍ଡ ଅଦୁତମ୍, ବାତେଙ୍କ୍ ଇତ୍କେ ମାମେ ନିଜ୍ ପାଡ଼ିୟିତାଗ୍ ଦଣ୍ଡ ଦର୍‍କ୍‍ତେ, ବାତେଙ୍କ୍ ଇତ୍କେ ଇ ନାରୁଡ଼୍ ବାତେମିକା ଦଷ୍ ମାଡ଼ଣ୍ଡ୍ ।”
LUK 23:42 ମେଣ୍ଡେ ଅଣ୍ଡ୍‌ କେତ୍ତଣ୍ଡ୍, ହଁ ଜିସୁ, “ନିମେ ରାଜାନ୍ ଲେକାମ୍ ମାଲ୍‍ସ୍ ୱାତ୍‍କେ ନାକିଂଙ୍କ୍ ଆନ୍‌‍ତେ ହେର୍କା ମାଡ଼ିତିନ୍ ।”
LUK 23:43 ଆଗାଙ୍କ୍ ଜିସୁ ଅଙ୍କ୍‌ କେତ୍ତଣ୍ଡ୍, ନାନ୍ ମିକିଂଙ୍କ୍ ସତ୍ କେତୁତାନ୍, “ନେଣ୍ଡ୍ ନିମେ ନାତଡ଼୍ ସ୍ୱର୍ଗ ଦେଶ୍‍ତାଗ୍ ଆଦ୍‍ତିଡ଼୍ ।”
LUK 23:44 ଆସୁଙ୍କ୍ ମାତର୍ ବାର ଗାଣ୍ଟା ଦିନାମ୍ ଆସ୍‍ମାତ୍‍ତା, ପଡ଼ଦ୍ ୱେସ୍ ଇଦେ ପାର୍‍ୱେ ମାତ୍‍ତା ମୁଣ୍ଡ୍ ଗାଣ୍ଟା ହେଉନା ଦେଶ୍‍ଯାକ ଇକାଡ଼୍ ଆତ୍‍ତା,
LUK 23:45 ମେଣ୍ଡେ ମନ୍ଦିର୍ ଡ଼ାଦ୍ ପାର୍ଦାସିଲା ପରତ୍ କଞ୍ଜ୍ ମଦଲ୍ ହେଉନା ହିଙ୍ଗି ରେଣ୍ଡ୍ ଦୁଡ଼ା ଆଦ୍‍ତେ ।
LUK 23:46 ଆସୁଙ୍କ୍ ଜିସୁ ଗାଟି ଲେଙ୍ଗ୍‍ତେ କାର୍‍ଙ୍ଗି କେତ୍‍ତଣ୍ଡ୍, ହଁ ବାବା, ନି କାଇଦେ ନାନ୍ ନାୱାଦ୍ ଆତ୍ମା ଇସମିନ୍ଦେନ୍ । ଇଦ୍ କେସ୍ ଅଣ୍ଡ୍‌ ଡଲ୍‍ତଣ୍ଡ୍ ।
LUK 23:47 ଶତସେନାପତି ଇଦ୍ ଗଟନା ଉଡ଼ି ଇଶ୍ୱର୍‌ତିଙ୍କ୍ ଗୌରବ୍‍ ମାଡ଼ି କେତ୍ତଣ୍ଡ୍, “ନିଜାମ୍ ଇ ନାରୁଡ଼୍ ଦାର୍ମିକ୍ ମାତ୍‍ତଣ୍ଡ୍ ।”
LUK 23:48 ମେଣ୍ଡେ ବେନ୍ ନାରୁଡ଼୍ ଉଡ଼ାନଙ୍କ୍ ଅଣ୍ଡୟାଗେ ଆସ୍‍ମାତଡ଼୍, ଅଡ଼୍‌‍ ସାରେତଡ଼୍ ଆଦ୍ ଗଟନା ଉଡ଼ି ଗୁଣ୍ଡେତିଙ୍କ୍ ରେହେସ୍ ମାଲ୍‍ସ୍ ଆଦାଙ୍କ୍ ପସ୍‍ପ୍‍ତ୍‍ତଡ଼୍ ।
LUK 23:49 ବାତେଙ୍କ୍ ଇତ୍କେ ଅଙ୍କ୍‌ ପୁତ୍‍ତେନଡ଼୍ ସାରେତଡ଼୍ ନୁ ଗାଲିଲୀତାଗାଙ୍କ୍ ଅଣ୍ଡୟ୍‌‍ତାଗ୍ ଆସ୍ ଅନ୍‌ ପେର୍କେ ପେର୍କେ ୱାସ୍‍ମାନ୍ଦାନ୍ ମୁତ୍‍ତେ ଯେକା ନିସ୍ ଇଦ୍ ସାରେ ଉଡ଼ମାତ୍ତା ।
LUK 23:50 ମେଣ୍ଡେ ଉଡ଼ାଟ୍, ଯିହୁଦିନଡ଼୍ ହାରାମାତିୟା ନାର୍ ତେ ଯୋଷେପ୍ ପେଦେର୍ ତଣ୍ଡ୍ ୱେରଣ୍ଡ୍ ନାରୁଡ଼୍ ବେଡ଼ିୟେ ମିଟିଙ୍କ୍‍ତାଗ୍ ସବ୍ୟ ମାତ୍‍ତଣ୍ଡ୍; ଅଣ୍ଡ୍‌ ୱେରଣ୍ଡ୍ ଲେକେତ୍‍ ନୁ ଦାର୍ମିକ୍ ନାରୁଡ଼୍ ।
LUK 23:51 ମେଣ୍ଡେ ଅଡ଼ାଦ୍‌ ମନ୍ତ୍ରନା ନୁ କାମ୍‌ଦାଗ୍‌ ଇଲ୍‌ୱେ ମାତ୍‌ତନ୍‌, ମେଣ୍ଡେ ଇଶ୍ୱର୍‌ତେ ରାଜ୍ୟତିଙ୍କ୍‌ କେପିମାତ୍‌ତନ୍‌ ।
LUK 23:52 ଅଣ୍ଡ୍‌ ପିଲାତନ୍ ଗାର୍‍ରେ ଆଞ୍ଜ୍ ଜିସୁନାଦ୍ ମେନ୍ଦୁଲ୍ ତିଙ୍କ୍ ତାଲ୍‍କ୍‍ତଣ୍ଡ୍,
LUK 23:53 ଅଣ୍ଡ୍‌ ଜିସୁନ୍ ମେନ୍ଦୁଲ୍ ଡିପିତାସ୍ ପାଲ୍‍ସାଲାଦ୍ ସିଲେତ୍ ମୁସି, ବେଗେ ବେନବା ବେସୁଙ୍କ୍‍ ୱାଟ୍‍ୱେମାତ୍‍ତଡ଼୍, ମେଟେତ୍ କାଲ୍‍ତାଗ୍ ଡେୱି ମାନ୍ଦାନ୍ ଇସତାଦ୍ ୱେରନ୍ ସମାଦିତାଗ୍ ଅଂକିଙ୍କ୍‌ ୱାଟ୍‍ତଡ଼୍ ।
LUK 23:54 ଆଦ୍ ଦିନ୍ ତିଆର୍ ମାଡ଼୍‍ତେ ଦିନ୍ ଶୁକୁର୍‍ବାର୍ ମାତ୍‍ତା, ମେଣ୍ଡେ ବିଶ୍ରାମ୍ ଦିନାତ୍ ଆସ୍ ୱାସମାତ୍‍ତେ ।
LUK 23:55 ମେଣ୍ଡେ ଗାଲିଲୀତାଗାଙ୍କ୍ ଅଡ଼୍‌‍ତଡ଼୍‍ ୱାସ୍‌ମାନ୍ଦାନ୍ ମୁତେକି ଯୋଷେପ୍‍ତେ ପେର୍କେ ପେର୍କେ ଆଞ୍ଜ୍ ଦିମ୍‍ତିଙ୍କ୍ ନୁ ଅନାଦ୍‌ ମେନ୍ଦୁଲ୍‍ତିଙ୍କ୍ ବେଲା ୱାଟ୍‍ତଡ଼୍, ଆଦ୍ ଉଡ଼୍‍ତା ।
LUK 23:56 ମେଣ୍ଡେ ଆୱ୍ ମାଲ୍‍ସ୍ ଆଞ୍ଜ୍ ସାଏତ୍ ଗାବ୍‍ତାଦ୍ ଜିନିଷ୍ ନୁ ନିୟି ତିଆର୍ ମାଡ଼୍‍ତେ । ମେଣ୍ଡେ ଆୱ୍ ବ୍ୟବସ୍ଥା ଲେକାମ୍ ରମାନ୍‍ ଦିନାତେ ରମ୍‌ତା, ବାତେଙ୍କ୍ ଇତ୍କେ ଆଦ୍ ନିୟମ୍‍ତାଗ୍ ମିନ୍ଦେ ।
LUK 24:1 ସପ୍‍ତାତିଙ୍କ୍ ମୁନେତ୍‍ଦିନେ ଆୱ୍ ନାଟା ନାର୍କୁକ୍ ତାମ୍ ତିଆର୍ ମାଡ଼ିତେ ସାଏତ୍ ଗାବ୍‍ତାୱ୍ ଜିନିଷ୍ ପଇସ୍ ସମାଦିତା ଆଦ୍‍ତେ ।
LUK 24:2 ମେଣ୍ଡେ ଆୱ୍ ନାଟା ସମାଦିତାଗ୍ କାଲ୍‍ବଦ୍‍ତିଙ୍କ୍ ଗୁସ୍‍ପ୍‍ତାଦ୍ ଉଡ଼୍‍ତା,
LUK 24:3 ଆଦିଙ୍କ୍ ଆୱ୍ ଲୋପେ ଆଞ୍ଜ୍‌ ଉଡ଼୍‌ତା ପ୍ରବୁ ଜିସୁନାଦ୍ ମେନ୍ଦୁଲ୍ ଆଗେ ଇଲ୍‌ୱେ ମାତ୍‌ତେ,
LUK 24:4 ଆୱ୍ ନାଟା ଆସୁଙ୍କ୍ ବୁଦ୍‍ତେନନ୍ ହାସ୍ ନିସ୍‍ମାତ୍‍ତା, ଆଦ୍ ଦିନାମ୍‍ତେ ଉଡ଼ାଟ୍, ୱେସ୍‍ତେ ଚକା କେର୍ସ୍ ଇର୍ଉଡ଼୍ ନାରୁଡ଼୍ ଆୱୁ ଗାର୍‍ରେ ୱାତ୍‍ତଡ଼୍,
LUK 24:5 ଆଗାଙ୍କ୍ ଆୱ୍ ନାଟା ଗାଟି ୱେର୍‍ତା ନୁ ତାମାଉ ତାଲାନ୍ ଆଡ଼୍‌‍ଗି ମାଡ଼ିମାତ୍‌ତା । ଆୱ୍ ଦୂତ୍‍କ୍ ଆଦ୍ ନାଟାଙ୍କ୍ କେତ୍‍ତା, “ଡୋଲ୍‌ ତାଗ୍ ଜିୱୁଣ୍ଡ୍ ମାନ୍ଦାନ୍ ନାରୁଙ୍କ୍ ବାତେଙ୍କ୍ ମେହେକୁତିଡ଼୍ ?”
LUK 24:6 ଅଣ୍ଡ୍‌ ଇଗେ ଇଲାଣ୍ଡ୍, ମାତର୍ ଡଲ୍‍ତାକଞ୍ଜ୍‍ ତେଦିମିନ୍ଦେଣ୍ଡ୍ । ଅଣ୍ଡ୍‌ ବେନେ ବାକ୍ୟ ଗାଲିଲୀତାଗ୍ ମାନ୍ଦାନ୍ ୱେଲେ ମିକିଂଙ୍କ୍ କେସ୍ ମାତ୍‍ତଣ୍ଡ୍, ଆଦ୍ ହେର୍କା ମାଡ଼ାଟ୍ ।
LUK 24:7 ନାରୁଡ଼୍ ପିଲେ ଯେ ଆଦ୍‍ଲେକାମ୍ ପାପିନଡ଼କ୍ କାଇଦେ ପସ୍‍ପିସ୍ ମିକା କ୍ରୁଶତାଗ୍ ଡଲିତଣ୍ଡ୍‌ ନୁ ମୁଣ୍ଡ୍ ଦିନାମାଞ୍ଜ୍ ମେଣ୍ଡେ ତେଦିତଣ୍ଡ୍ ।
LUK 24:8 ଆସୁଟେ ଆୱ୍ ଅନାଦ୍‌ ବାକ୍ୟତିଙ୍କ୍ ହେର୍କା ମାଡ଼୍‍ତେ,
LUK 24:9 ମେଣ୍ଡେ ସମାଦି କଞ୍ଜ୍ ମାଲ୍‍ସ୍ ଆଞ୍ଜ୍ ଆୱ୍ ଏଗାର୍ ଜାନ୍ ଶିଷ୍ୟଡ଼କ୍ କେତ୍‍ତା ନୁ ବାଗାତ୍ ସାରେତଡ଼୍‌କିଂଙ୍କ୍ ଇଦ୍ କାବୁର୍ କେତ୍‍ତା ।
LUK 24:10 ଆୱ୍ ନାଟା ମଗ୍‍ଦଲୀନି ମରୀୟମ୍, ଯୋହନ୍‌, ଯାକୁବତେ ୟାୟ ମରୀୟମ୍ ନୁ ଇୱିନ୍ ତଡ଼୍ ମାନ୍ଦାନ୍ ମେଣ୍ଡେ ବାଗାତେ ନାଟା, ପ୍ରେରିତ୍‍ ଶିଷ୍ୟଡ଼୍‍କ୍ ଇଦ୍ ସାରେ ବିଷୟ୍ କେତ୍‍ତା ।
LUK 24:11 ମାତର୍ ହାଉସାରେ ଗଟି ଅଡ଼୍‌‍କିଂଙ୍କ୍‍ ବାୟେଦେ ନାରୁଡ଼୍ ତେ ଗଟି ଇନା କେଞ୍ଜ୍‍ତାନ୍, ମେଣ୍ଡେ ଶିଷ୍ୟଡ଼କ୍ ଆୱିଙ୍କ୍ ବିଶ୍ୱାସ୍ ମାଡ଼ଡ଼୍‍ ।
LUK 24:12 ବାତେଙ୍କ୍ ଇତ୍କେ ପିତର୍ ତେଦି ସମାଦିତା ମିର୍‍ତଣ୍ଡ୍, ଆଡ଼୍‌‍କି ମିକା ମାତର୍ ଜିସୁନ୍ ମେନ୍ଦୁଲ୍‍ତିଙ୍କ୍ ମିସମାତ୍‍ତେ ସିଲେତିଙ୍କ୍ ଉଡ଼୍‍ତଣ୍ଡ୍, ମେଣ୍ଡେ ଆୱୁ ଆଦ୍ ଗଟନା ବିଷୟତେ ୱେର୍‌ସ୍‌ ମିକା ତାମ୍ ଲୋନ୍‌ ଆତ୍‍ତଣ୍ଡ୍ ।
LUK 24:13 ମେଣ୍ଡେ ଉଡ଼େ, ଆଦ୍ ଦିନେ ଅଡ଼୍‌‍ ଲୋପେଙ୍କ୍ ଇର୍‍ୱୁଡ଼୍ ଯୀରୁଶାଲାମ୍ କନ୍‍ସ୍ ମାତର୍ ଏଗାର୍ କିଲମିଟର୍ ଜେକେତ୍ ଇମ୍ମାୟୁ ନାର୍ ଆଞ୍ଜ ମାତ୍‍ତଡ଼୍,
LUK 24:14 ଆଦ୍ ଦିନାମ୍‍ତେ ସାର୍‍ରେତଡ଼୍ ବେନେ ଗଟନା ଗଟେମ୍ ଆସ୍ ମାତ୍‍ତା ଆଦିନ୍ ବିଷୟତେ ତାମ୍ ଲୋପେ କେସମାତ୍‍ତଡ଼୍,
LUK 24:15 ଅଡ଼୍‌‍ ଗଟି ତିର୍‍ୟାନ୍ ୱେଲେ ନୁ ମିଟିଙ୍କ୍ ମାଡ଼ମାନ୍ଦାନ୍ ୱେଲେ ଜିସୁ ନିଜେ ଅଡ଼୍‌‍ ଗାର୍‍ରେ ୱାସ୍ ଅଡ଼୍‌‍ତଡ଼୍ ଆଦାନଙ୍କ୍ ପସ୍‍ପ୍‍ତଣ୍ଡ୍;
LUK 24:16 ବାତେଙ୍କ୍ ଇତ୍କେ ଅଡ଼୍‌‍ ଅଂକିଙ୍କ୍‌ ଉଡ଼୍‍ତଡ଼୍ ବାତେଙ୍କ୍ ଇତ୍କେ ଅଡ଼୍‌‍ ଜିସୁଙ୍କ୍ ଉଡ଼ି ଏଞ୍ଚାନଙ୍କ୍ ପାର୍‍ୱଡ଼୍ ।
LUK 24:17 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ତାକ ତାକ ବେନ୍ ସାରେ ବିଷୟତେ ମିଡ଼୍ ତିର୍‍ୟୁତିଡ଼୍, ଆୱ୍ ସାରେ ବାତା ?” ଆଗାଙ୍କ୍ ଅଡ଼୍‌‍ ଦୁଃକାମ୍ ମକମ୍ ତେ ନିସ୍ ମାତ୍‍ତଡ଼୍ ।
LUK 24:18 ଅଡ଼୍‌ଆଗାଙ୍କ୍‌ କ୍ଲେୟପା ପେଦେର୍‍ତଣ୍ଡ୍ ଜିସୁଙ୍କ୍ ଉତ୍ତର୍ ହିତ୍‍ତଣ୍ଡ୍, “ଯିରୁଶାଲେମ୍ ତାଗ୍ ମାନ୍ଦାନ୍ ନାରୁଡ଼୍ ଲୋପେକେ ନିମ୍‍ ୱେର୍‍ନି ଆଦ୍ ଜାଗେତାଦ୍ ଇଦ୍ ବେସର୍ ଦିନାତେ ଗଟନା ପୁନ୍‍ୱିନ୍ ?”
LUK 24:19 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଇଦ୍ ବେସତ୍ ଗଟନା ?” ଅଡ଼୍‌‍ ଅଂକିଙ୍କ୍‌ କେତ୍ତଡ଼୍, “ନାଜରିତିୟ ଜିସୁନ୍ ବିଷୟ; ଅଣ୍ଡ୍‌ ଇଶ୍ୱର୍‌ ନୁ ସାରେତଡ଼୍ କନ୍‍ସ୍ ପାଡ଼ିୟି ନୁ ବାକ୍ୟତେ ୱେରଣ୍ଡ୍ ଶକ୍ତିନଡ଼୍ ବାବବାଦି ମାତ୍‍ତଣ୍ଡ୍ ।
LUK 24:20 ମେଣ୍ଡେ ମା ମୁକ୍ୟ ଯାଜକ ନୁ ଶାସନ୍‍ କର୍ତ୍ତାଲଡ଼୍ ଅଙ୍କ୍‌ ଜିୱେ ଇସ୍‌ କ୍ରୁଶବିଦ୍ଦ ମାଡ଼୍‍ତଡ଼୍ ନୁ ଅଣ୍ଡ୍‌ ଡୋଲ୍‍ତଣ୍ଡ୍ ।
LUK 24:21 ବାତେଙ୍କ୍ ଇତ୍କେ ବେନ ଇସ୍ରାଏଲ୍ ତିଙ୍କ୍ ମୁକ୍ତ ମାଡ଼ିତନ୍, ଅଣ୍ଡ୍‌ ଯେ ଇ ନାରୁଡ଼୍, ଆଦ୍ ମାମେ ଆଶେ ମାଡ଼ିମାତମ୍; ମାତର୍ ଆଉ ସାରେ ୱିଡ଼୍‍ସିକ୍‍କେ ଇଦ୍ ସାରେ ଗଟେମ୍ ଆତ୍‍ତାଦ୍ ନେଟ୍‍ତେ କଞ୍ଜ୍ ମୁଣ୍ଡ୍ ଦିନା ଆତ୍‍ତେ ।
LUK 24:22 ମେଣ୍ଡେ ମିକା, ମା ଲୋପେକେ ବେସ୍‌କ୍ ନାଟା ମାକିଂଙ୍କ୍ ବାକ୍‍ୱା ଗଟି କେତ୍‍ତା; ଆୱ୍ ନାର୍‍କୁକେ ସମାଦିତା ଆଞ୍ଜ୍ ମାତ୍‍ତା,
LUK 24:23 ଆୱ୍ ନାଟା ଜିସୁନ୍ ମେନ୍ଦୁଲ୍ ଦର୍ସ୍‍କ୍‍ୱେକଟ ୱାସ୍ କେତ୍‍ତା ଯେ, ଆୱ୍ ନାଟା ଦୂତକିନାୱ୍ ଦର୍ଶନ୍ ମିକା ଆସ୍ ମିନ୍ଦେ ନୁ ଆୱ୍ ଦୂତ୍‍କ୍ କେତ୍‍ତା ଯେ, ଅଣ୍ଡ୍‌ ଜିୱେ ମିନ୍ଦେଣ୍ଡ୍ ।
LUK 24:24 ମେଣ୍ଡେ, ମା ସାଙ୍ଗନ୍ ଲୋପେକେ ବେନ ସମାଦି ଗାର୍‍ରେ ଆଞ୍ଜ୍, ନାଟା ବେଲା କେସ୍‍ମାତ୍‍ତା, ଆଦେପୁଟୁଙ୍କ୍ ଉଡ଼୍‍ତଡ଼୍, ବାତେଙ୍କ୍ ଇତ୍କେ ଅଂକିଙ୍କ୍‌ ଉଡ଼ଡ଼୍ ।”
LUK 24:25 ଆଗାଙ୍କ୍ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ବେସର୍ ବାକ୍‍ୱା, ବବିଷ୍ୟଦ୍ ବକ୍ତାଲଡ଼୍ ବାତେଏ ସାରେ କେସ୍‍ମାତ୍‍ତଡ଼୍ ଆଦ୍ ସତ୍‍ତିଙ୍କ୍ ବିଶ୍ୱାସ୍ ମାଡ଼ାଙ୍କ୍ ମିଡ଼୍ ବେସର୍ ଲେଟ୍ ମାଡ଼୍‍ତିଡ଼୍,
LUK 24:26 ଇଦ୍ ସାରେ ଦୁଃକାମ୍ ତେ କଷ୍ଟ ଆସ୍ ତାନ୍ ମଇମାତାଗ୍ ଆସାନଙ୍କ୍ ବାତେଏ କ୍ରିଷ୍ଟନାଦ୍ ଦର୍‍କାର୍ ଇଲ୍‍ୱେମାତ୍‍ତେ ?”
LUK 24:27 ମଶାଲ୍‌ ନୁ ସାରେତଡ଼୍ ବାବବାଦୀନି ଡ଼ାଗାଙ୍କ୍ ଆରାମ୍ ମାଡ଼ି ସାରେ ଦର୍ମଶାସ୍ତ୍ରତାଗ୍ ତାନ୍ ବିଷୟତେ ଗଟି ଜିସୁ ଅଡ଼୍‌‍କିଂଙ୍କ୍ ବୁଜାମାଡ଼ତଣ୍ଡ୍ ।
LUK 24:28 ଅଡ଼୍‌‍ ବେନ୍ ନାର୍ ଆଞ୍ଜମାତ୍‍ତଡ଼୍, ଆଦ୍ ନାର୍ ଗାର୍‍ରେ ହେଉତାଙ୍କ୍, ଅଣ୍ଡ୍‌ ମେଣ୍ଡେ ମୁନେ କେନେ ଆଦାନଙ୍କ୍ ଆଦାନ୍ ରକମ୍ ମାଡ଼ତଣ୍ଡ୍ ।
LUK 24:29 ବାତେଙ୍କ୍ ଇତ୍କେ ଅଡ଼୍‌‍ ଜିସୁଙ୍କ୍ ଅନୁରଦ୍‌‍ ମାଡ଼ି କେତ୍‍ତଡ଼୍‍, “ମା ତଡ଼୍ ମାନ୍‍, ବାତେଙ୍କ୍ ଇତ୍କେ ମୁଲ୍‍ପୁଟ୍ ଆସମିନ୍ଦେ ନୁ ପଡ଼ଦ୍ ଆଞ୍ଜମିନ୍ଦେ ।” ଆଗାଙ୍କ୍ ଅଣ୍ଡ୍‌ ଅଡ଼୍‌‍ତଡ଼୍ ମାନ୍ଦାନଙ୍କ୍ ଲୋତ୍‍ତେ ଲୋପେ ଆତ୍‍ତଣ୍ଡ୍ ।
LUK 24:30 ଅଡ଼୍‌‍ତଡ଼୍ ତିନ୍ଦାନଙ୍କ୍ କୁଦ୍‍ତେୱେଲେ ଅଣ୍ଡ୍‌ ରୂଟି ଆସ୍ ଆର୍ଶିବାଦ୍ ମାଡ଼ତଣ୍ଡ୍, ମେଣ୍ଡେ ଆଦ୍ ରୂଟି ଉହୁସ୍ ଅଡ଼୍‌‍କିଂଙ୍କ୍ ଇଦାନଙ୍କ୍ ପସ୍‍ପ୍‍ତଣ୍ଡ୍ ।
LUK 24:31 ତାନ୍‍ପେର୍କେ ଅଡ଼୍‌ କଣ୍ଡା କୁଲେମ୍ ଆତ୍‍ତା ନୁ ଅଡ଼୍‌ ଆସୁଙ୍କ୍ ଜିସୁଙ୍କ୍ ଉଡ଼୍‍ତଡ଼୍; ମେଣ୍ଡେ ଅଣ୍ଡ୍‌ ଅଡ଼୍‌‍ ଉଡ଼ାନାଗାଙ୍କ୍ ମାୟିଆତ୍‍ତଣ୍ଡ୍ ।
LUK 24:32 ଆଗାଙ୍କ୍ ଅଡ଼୍‌‍ ତାମ୍‍ତାମ୍ କେତ୍‍ତଡ଼୍, “ବେସୁଙ୍କ୍‍ ଆର୍‍ଦାଗ୍ ଅଣ୍ଡ୍‌ ମା ସାଙ୍ଗେ ଗଟି ତିର୍‍ୟମାତ୍ତଣ୍ଡ୍ ନୁ ମାକିଂଙ୍କ୍ ଦର୍ମଶାସ୍ତ୍ର ବୁଜାମାଡ଼ ମାତ୍‍ତଣ୍ଡ୍, ଆସୁଙ୍କ୍ ବାତେଏ ମା ହୃଦୟ୍ କାମ୍‍କେ ଆୟିୱେ ମାତ୍‍ତେ ?”
LUK 24:33 ତାନ୍ ପେର୍‍କେ ଅଡ଼୍‌‍ ଜାପେ ଆଗାଙ୍କ୍ ତେଦି ଯିରୁଶାଲେମ୍‍ତା ମାଲ୍‍ସ୍ଆଞ୍ଜ୍ ଗୁଡ଼୍‍ଡି ମାନ୍ଦାନ୍ ଏଗାର୍ ଜାନ୍ ଶିଷ୍ୟ ନୁ ତାମ୍ ସାଙ୍ଗଡ଼କ୍ ଉଡ଼୍‍ତଡ଼୍;
LUK 24:34 ଅଡ଼୍‌‍ କେସମାତ୍‍ତଡ଼୍, “ପ୍ରବୁ ନିଜାମ୍ ତେଦ୍‍ତଣ୍ଡ୍ ନୁ ଶିମୋନ୍‍ତିଙ୍କ୍ ତଅନ୍‌ଦି ମିନ୍ଦେଣ୍ଡ୍ ।”
LUK 24:35 ତାନ୍ ପେର୍‍କେ ଅଡ଼୍‌‍ ଇର୍‍ୱୁଡ଼୍ ହାର୍‍ଦାଗ୍ ବାତେସାରେ ଗଟେମ୍ ଆସ୍‍ମାତ୍‍ତେ, ମେଣ୍ଡେ ଅଡ଼୍‌‍ କେତ୍‍ତଡ଼୍, ଅଡ଼୍‌‍ ବେଲା ଜିସୁଙ୍କ୍ ରୂଟି ଉହୁତାନ୍ ୱେଲେ ହେଞ୍ଚ୍ ପାର୍‍ତଡ଼୍ । ଆଦ୍ ସାରେ ଗଟନା ଅଡ଼୍‌‍ ମୁନେ କେତ୍‍ତଡ଼୍ ।
LUK 24:36 ଅଡ଼୍‌‍ ଇର୍‍ୱୁଡ଼୍ ସାରେ ଗଟି କେସମାନ୍ଦାନ୍ ୱେଲେ ଜିସୁ ନିଜେ ଅଡ଼ାଗ୍ ୱାତ୍‍ତଣ୍ଡ୍ ନୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମି ସେଙ୍ଗେ ଶାନ୍ତି ଆୟି ।”
LUK 24:37 ମାତର୍ ଅଡ଼୍‌‍ ଦାଦ୍‍ରେଲ୍‍ତଡ଼୍ ନୁ ୱେର୍‍ସ୍ ୱେରନ୍ ବୁତ୍ ଉଡ଼୍‍ତଡ଼୍ ଇଞ୍ଜ ଏର୍କା ମାଡ଼୍‍ତଡ଼୍ ।
LUK 24:38 ତାନ୍ ପେର୍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ବାତ୍‍ତିଙ୍କ୍ ଦାନ୍ଦେ ଆଦୁତିଡ଼୍, ମେଣ୍ଡେ ମି ମନ୍‍ତାଗ୍ ବାତ୍‍ତିଙ୍କ୍ ଇଦ୍ ରକମ୍ ନାକିଂଙ୍କ୍ ହେର୍କା ମାଡ଼ୁତିଡ଼୍‌ ?
LUK 24:39 ନାନ୍ ତ ନିଜେ, ନାୱାଉ କାଇକ୍ ନୁ ଡେକା ଉଡ଼ାଟ୍, ନାକିଂଙ୍କ୍ ଇଟ୍‍ଟାଟ୍, ବାତେଙ୍କ୍ ଇତ୍କେ ନାୱାଉ ବେଲା ଆଉଙ୍ଗ୍ ନୁ ବୁଲା ମାନ୍ଦାନାଉ ଉଡ଼ୁତିଡ଼୍, ବୁତ୍‌ତାଉ ଆଦ୍ ଲେକାମ୍ ଇଲା ।”
LUK 24:40 ମେଣ୍ଡେ ଜିସୁ ଅଡ଼୍‌‍କିଂଙ୍କ୍ ଆଦ୍ କେସ୍ ଅଡ଼୍‌‍କିଂଙ୍କ୍ ଅନାହୁ କାଇକ୍ ଡେକା ତଅତଣ୍ଡ୍ ।
LUK 24:41 ଆଲେକେ ମିକା ଅଡ଼୍‌ ୱେଡ଼୍‍କେତେ ମାଇଦିଙ୍କ୍ ବିଶ୍ୱାସ୍ ମାଡ଼କଟ‍ ବାକ୍‍ୱା ଆଦାଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଇଗେ ମି ଗାର୍‍ରେ ବାତେଏ ସୁଦୁଟ୍ ତିନ୍ଦାନାଦ୍ ମିନ୍ଦେ ?”
LUK 24:42 ତାନ୍ ପେର୍‍କେ ଅଡ଼୍‌ ଜିସୁଙ୍କ୍ ଆଟ୍‍ତାଦ୍ କିକେ ୱେରଡ଼୍‌ ଦୁଡ଼େ ହିତ୍‍ତଡ଼୍ ।
LUK 24:43 ଜିସୁ ଆଦ୍ କିକେ ଅଡ଼୍‌ ମୁନ୍‍ନେ ତିତ୍‍ତଣ୍ଡ୍ ।
LUK 24:44 ମେଣ୍ଡେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମୋଶାନ୍‌ ନିୟମ୍‍ତାଗ୍ ନୁ ବାବବାଦିଡ଼ାଦ୍ ନୁ ଗୀତସହିଂତା ଦର୍ମଶାସ୍ତ୍ରତାଗ୍ ନା ବିଷୟତେ ବାତ୍ ବାତ୍ ଲେକା ମିନ୍ଦେ, ଆୱ୍ ସାରେ ଆଦାନ୍ ମିନ୍ଦେ, ନାନ୍ ମିଇତଡ଼୍ ମାନ୍ଦାନ୍ ୱେଲେ ମିକିଂଙ୍କ୍ ଇଉସାରେ ଗଟି କେସ୍‍ମାତ୍‍‍ତାନ୍ ।”
LUK 24:45 ଆସୁଙ୍କ୍ ଅଡ଼୍‌ ବେଲା ଦର୍ମଶାସ୍ତ୍ର ବୁଜେମ୍ ଆଦ୍‍ତଡ଼୍, ଆଦିଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ସାରେ ଗଟି ବୁଜା ମାଡ଼ତଣ୍ଡ୍;
LUK 24:46 ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, “ଇଦ୍ ଲେକେମ୍ ଲେକାମିନ୍ଦା, କ୍ରିଷ୍ଟ କଷ୍ଟ ଆଦ୍‍ତନ୍ ନୁ ମୁଣ୍ଡ୍ ଦିନାତେ ଡଲ୍‍ତଡ଼ାଗାଙ୍କ୍ ଜିୱୁଅସ୍ ତେଦିତଣ୍ଡ୍,
LUK 24:47 ଯିରୁଶାଲେମ୍‍ତାଗ୍ ଆରାମ୍ ମାଡ଼ି ସାରେ ଜାତିନଡ଼କ୍ ଅନ୍‌ ପେଦେର୍‍ତେ ପାପ୍‍କ୍ଷମା ମାଇଦିଙ୍କ୍ ମନ୍ ପରିବର୍‍ତନ୍ ମାଡ଼ାଙ୍କ୍ ପ୍ରଚାର ମାଡ଼ିତଡ଼୍ ।
LUK 24:48 ମିଡ଼୍ ଇଦ୍ ସାରେ ବିଷୟତାଦ୍ ସାକ୍ଷୀ ଆଦ୍‍ତିଡ଼୍ ।
LUK 24:49 ମେଣ୍ଡେ ଉଡ଼ାଟ୍ ନା ବାବାଲ୍ ବାତ୍ ପ୍ରତିଜ୍ଞା ମାଡ଼ିମିନ୍ଦେଣ୍ଡ୍, ଆଦ୍ ନାନ୍ ମି ଗାର୍‍ରେ ରଅତିତାନ୍, ବାତେଙ୍କ୍ ଇତ୍କେ ସ୍ୱର୍ଗତାଗାଙ୍କ୍ ଶକ୍ତି ଦର୍‍କ୍‍ୱେଯାକ ମିଡ଼୍ ଯିରୁଶାଲେମ୍ ତାଗ୍ ମାନୁଟ୍ ।”
LUK 24:50 ତାନ୍ ପେର୍‍କେ ଜିସୁ ଅଡ଼୍‌‍କିଂଙ୍କ୍ ବେତନିୟା ଆଦାନ୍ ହାର୍‍ଦାଗ୍ ହେଉନା କାର୍‍ଙ୍ଗି ଆତ୍‍ତେ ନୁ ତାନ୍ କାୟ୍ ତେହେସ୍ ଆର୍ଶିବାଦ୍ ମାଡ଼ତଣ୍ଡ୍ ।
LUK 24:51 ତାନ୍ ପେର୍‍କେ ଅଡ଼୍‌‍କିଂଙ୍କ୍ ଆର୍ଶିବାଦ୍ ମାଡ଼ି ଅଣ୍ଡ୍‌ ଅଡ଼୍‌‍ଆଗାଙ୍କ୍ ମାୟିମିକା ସ୍ୱର୍ଗତାଗ୍ ଆତ୍‍ତଣ୍ଡ୍ ।
LUK 24:52 ଅଡ଼୍‌‍ ଅଂକିଙ୍କ୍‌ ମଡ଼୍‍କିମିକା ଗାଟି ୱେଡ଼୍‍କାତେ ଯିରୁଶାଲେମ୍‍ତାଗ୍ ମାଲ୍‍ସ୍ ଆଦ୍‍ତଡ଼୍,
LUK 24:53 ମେଣ୍ଡେ ସାରେଦିନାମ୍ ଯୀରୁଶାଲାମ୍ ମନ୍ଦିର୍‍ତାଗ୍ ମାଞ୍ଜ୍ ଇଶ୍ୱର୍‌ତିଙ୍କ୍ ସ୍ତୁତି ପ୍ରସଂଶା ମାଡ଼ାଙ୍କ୍ ପସ୍ପ୍‍ତ୍‍ତଡ଼୍ ।
JOH 1:1 ମୁନେଙ୍କ୍ ବାକ୍ୟ ମାତ୍‍ତେ, ବାକ୍ୟ ଇଶ୍ୱରତଡ଼୍ ମାତ୍‍ତେ, ବାକ୍ୟ ନୁ ଇଶ୍ୱର୍ ୱେରନ୍ ମାତ୍‍ତଣ୍ଡ୍ ।
JOH 1:2 ବାକ୍ୟ ମୁନେଙ୍କ୍ ଇଶ୍ୱରତଡ଼୍ ମାତ୍‍ତେ ।
JOH 1:3 ଅଣ୍ଡ୍‌ ତଡ଼୍ ଇଶ୍ୱର୍ ସାରେ ତିଆର୍ ମାଡ଼୍‍ତଣ୍ଡ୍; ମେଣ୍ଡେ ବେନ୍‍ସାରେ ତିଆର୍ ଆସ୍‍ମିନ୍ଦେ, ଆୱିନାଗାଙ୍କ୍ ୱେରଡ଼୍ ମେଣ୍ଡେ ଅଙ୍କ୍‌‍ୱିଡ଼୍‍ସି ତିଆର୍ ଆୟ୍‍ୟ ।
JOH 1:4 ଅନ୍‌‍ଆଗେ ଜିୱୁନ୍ ମାତ୍‍ତେ ନୁ ଆଦ୍ ଜିୱୁନ୍ ନାରୁଡ଼୍‍ତେ ୱେସ୍ ।
JOH 1:5 ଆଦ୍ ୱେସ୍ ହିକାଡ଼୍‍ତାଗ୍ ନିଡ଼୍‍ସ ୱାସମିନ୍ଦେ, ମେଣ୍ଡେ ହିକାଡ଼୍ ତାକିଙ୍କ୍ ଗ୍ରହନ୍ ମାଡ଼ ।
JOH 1:6 ଇଶ୍ୱରତେ ଗାରେକନ୍‍ ୱେରଣ୍ଡ୍ କବର୍ ଆଦାନଣ୍ଡ୍ ନାରୁଡ଼୍ ଆତ୍‍ତଣ୍ଡ୍; ଅନ୍‌ ପେଦେର୍ ଯୋହନ୍‌ ।
JOH 1:7 ଅଣ୍ଡ୍‌ ବେଦ୍‍ପୁଟୁଙ୍କ୍ ୱେସ୍ ବିଷୟ୍‍ତେ ସାକ୍ଷ୍ୟ ହିଦ୍‍ତଣ୍ଡ୍, ମେଣ୍ଡେ ଆଦ୍ କେଞ୍ଜି ସାରେତଡ଼୍ ବିଶ୍ୱାସ୍ ମାଡ଼ିତଡ଼୍, ଆଦିନ୍ ମାଇଦିଙ୍କ୍ ଅଣ୍ଡ୍‌ ୱାତ୍‍ତଣ୍ଡ୍ ।
JOH 1:8 ଯୋହନ୍‌ ନିଜେ ଆଦ୍ ୱେସ୍ ହିଲକଟ୍ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ୱେସ୍ ବିଷୟ୍‍ତେ ସାକ୍ଷ୍ୟ ହିଦାନ୍ ମାଇଦିଙ୍କ୍ ୱାତ୍‍ତଣ୍ଡ୍
JOH 1:9 ବେନ୍ ସତ୍ ୱେସ୍ ଜଗତ୍‍ତାଗ୍ ୱାସ୍ ସାରେତଡ଼୍ ନାରୁଡ଼୍‍କ୍ ୱେସ୍ ମାଡ଼ିତେ, ଆଦେ ନିଜାତାଦ୍ ୱେସ୍ ।
JOH 1:10 ଅଣ୍ଡ୍‌ ଜଗତ୍‍ତାଗେ ମାତ୍‍ତଣ୍ଡ୍ ନୁ ଜଗତ୍ ଅନ୍‌ ତଡ଼୍ ତିଆର୍ ଆତ୍‍କେ, ମିକା ଜଗତ୍ ଅଂକିଙ୍କ୍‌ ହେଞ୍ଚ୍‍ ପାର୍‍ୱ ।
JOH 1:11 ଅଣ୍ଡ୍‌ ନିଜେତ୍ ରାଜ୍ୟତାଗ୍ ୱାତ୍‍ତଣ୍ଡ୍, ମିକା ଅନ୍‌ ନିଜେତ୍ ନାରୁଡ଼୍ ଅଂକିଙ୍କ୍‌ ଗ୍ରହନ୍ ମାଡ଼ଡ଼୍‍ ।
JOH 1:12 ମାତର୍ ବେସର୍ ନାରୁଡ଼୍ ଅଂକିଙ୍କ୍‌ ଗ୍ରହନ୍ ମାଡ଼୍‍ତଡ଼୍, ଇତ୍‍କେ ବେନଡ଼୍ ଅନ୍‌ ପେଦେର୍‍ତେ ବିଶ୍ୱାସ୍ ମାଡ଼୍‍ତଡ଼୍, ଆ ସାରେତଡ଼୍‌କିଂଙ୍କ୍ ଅଣ୍ଡ୍‌ ଇଶ୍ୱରତେ ମାର୍‍ ଆଦ୍‍ଦାନ୍ ମାଇଦିଙ୍କ୍ ଅଦିକାର୍‌ ହିତ୍‍ତଣ୍ଡ୍;
JOH 1:13 ଅଡ଼୍‌ ନେତୁର୍‍ତାଗାଙ୍କ୍, ମେନ୍ଦୁଲ୍‍ତେ ଇଚ୍ଛାତେ ବା ନାରୁଡ଼୍ ଇଚ୍ଛାତେ ଜନମ୍ ଆୟ୍‍ୟଡ଼୍, ବେଲାନ୍ ଇଶ୍ୱରତାଗାଙ୍କ୍ ଜନମ୍ ଆଦ୍‍ତଡ଼୍ ।
JOH 1:14 ମେଣ୍ଡେ, ଆଦ୍ ବାକ୍ୟ ମେନ୍ଦୁଲ୍ ପଇତେ, ମେଣ୍ଡେ ଅନୁଗ୍ରହ ନୁ ସତ୍‍ତେ ନିଣ୍ଡି ମାନ୍‍ ଲୋପେ ବାସେ ମାଡ଼୍‍ତଣ୍ଡ୍, ମେଣ୍ଡେ ବାବାନାଗାଙ୍କ୍ ୱାତ୍ ୱେରଡ଼୍ ଇଞ୍ଜ ମାର୍‍ଦେ ମହିମା ଲେକାମ୍ ମାମ୍‍ମେ ଅନ୍‌ ମହିମାତିଙ୍କ୍ ଉଡ଼୍‍ତମ୍ ।
JOH 1:15 ଯୋହନ୍‌ ତାନ୍ ବିଷୟ୍‍ତେ ସାକ୍ଷ୍ୟ ଇସ୍‌ ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, “ବେନ ନା ପେର୍‍କେ ୱାଦୁତଣ୍ଡ୍, ଅଣ୍ଡ୍‌ ନାକିଙ୍କ୍ଅନ୍‌ ବାଡ଼୍‍ୟଣ୍ଡ୍, ବାତେଙ୍କ୍ ଇତ୍କେ ‘ଅଣ୍ଡ୍‌ ନା ଜନମ୍‍ତେ ମୁନେକ୍ କନ୍‍ସ୍ ମାତ୍‍ତଣ୍ଡ୍, ବେନ ବିଷୟ୍‍ତେ ନାନେ ଇଲା କେସ୍‍ମାତ୍‍ତାନ୍ ଅଣ୍ଡ୍‌ ହିଣ୍ଡେ ।’”
JOH 1:16 ତ ଅଣ୍ଡ୍‌ ସାରେତାଗାଙ୍କ୍ ମାମ୍‍ମେ ସାରେତମ୍ ପାଏମ୍ ଆସ୍‍ମିନ୍ଦେମ୍, ଅନୁଗ୍ରହତେ ପର୍‍ ଅନୁଗ୍ରହ ପାଏମ୍ ଆସ୍‍ମିନ୍ଦେମ୍ ।
JOH 1:17 ଇଶ୍ୱର୍‌ତେ ବ୍ୟବସ୍ଥା ମୋଶାନ୍‌ ତଡ଼୍ ଦର୍‍କି ମିନ୍ଦେ, ବାତେଙ୍କ୍ ଇତ୍‍କେ ଅନୁଗ୍ରହ ନୁ ସତ୍ ଜିସୁକ୍ରିଷ୍ଟନ୍ ତଡ଼୍ ଉପସ୍ଥିତ ଆତ୍‍ତେ ।
JOH 1:18 ବେନ ବେସୁଙ୍କ୍‍ ଇଶ୍ୱରତିଙ୍କ୍ ଉଡ଼ଣ୍ଡ୍, ଅନ୍‌ ଡ଼େକାନାଗ୍ ମାନ୍ଦାନ୍ ୱେରଣ୍ଡେ ମାର୍‍ ଅଂକିଙ୍କ୍‌ କେସ୍ ମାଡ଼ିମିନ୍ଦେଣ୍ଡ୍ ।
JOH 1:19 ଯିରୁଶାଲେମ୍‍ତେ ଯିହୁଦୀ ନେତାଲଡ଼୍ ବେସ୍‍କ୍‍ତୁଡ଼୍‍ ଦର୍ମ ଯାଜକ୍ ନୁ ଲେବୀୟ ନାରୁଡ଼୍‍କ୍ ଯୋହନ୍‌‌ତେ ଗାର୍‍ରେ “ନିମ୍‍ ବେନ,” ଇଞ୍ଜ ପାଚ୍ରାମାଡ଼ାନ୍‍ ମାଇଦିଙ୍କ୍ ରହ୍‍ତଡ଼୍ ।
JOH 1:20 ଅଣ୍ଡ୍‌ ଅସ୍ୱୀକାର୍ ମାଡ଼କଟ୍ ସାଏମାଡ଼ି କେତ୍‍ତଣ୍ଡ୍, “ନାନ୍ ମସିହ ଆୟନ୍ ।”
JOH 1:21 ଆସୁଟେ ଅଡ଼୍‌‍ ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ଆଲାଇତ୍‍କେ ନିମ୍‍ ବାତେଏ ଏଲୀୟନି ?” ଅଣ୍ଡ୍‌ କେତ୍‍ତଣ୍ଡ୍, “ନାନେ ଆୟନ୍ । ନିମ୍‍ ବାତେଏ ଆ ବାବବାଦୀନୀ ?” ଅଣ୍ଡ୍‌ ଉତ୍ତର୍ ହିତ୍‍ତଣ୍ଡ୍ “ଇଲା ।”
JOH 1:22 ଆସୁଟେ ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ମାକିଂଙ୍କ୍ ରୟ୍‍ସ୍‍ମାନ୍ଦାନ୍ ନାରୁଡ଼୍‍କିଂଙ୍କ୍ ବେଦ୍‍ପୁଟୁଙ୍କ୍ ଉତ୍ତର୍ ହିଦ୍‍ପାର୍‍ଦ୍‍ତମ୍, ଆଦିନ୍ ମାଇଦିଙ୍କ୍ ନିମ୍‍ ବେନନି ? ନିମ୍‍ ନିଜ୍ ବିଷୟ୍‍ତେ ବାତେଏ କେତୁତିନ୍ ?”
JOH 1:23 ଯିଶାଇୟ ବାବବାଦୀ ବେଦ୍‍ପୁଟୁଙ୍କ୍ କେସ୍‍ମାତ୍‍ତଣ୍ଡ୍, ଯୋହନ୍‌ ଆଦେପୁଟୁଙ୍କ୍ କେତ୍‍ତଣ୍ଡ୍, “ନାନ୍ ଉସ୍କ ନେଲ୍‍ଦାଗ୍ କିଡ଼୍‍କମାନ୍ଦାନ୍‍ ୱେରନ୍ ନାରୁନ୍ ଲେଙ୍ଗ୍, ପ୍ରବୁନ୍ ଆର୍ ତିଆର୍ ମାଡ଼ାଟ୍ ।”
JOH 1:24 ପାରୂଶୀନାରୁଡ଼୍ ରହସ୍ ମାନ୍ଦାନ୍ କବର୍ କେତାନଡ଼୍,
JOH 1:25 ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ନିମ୍‍ ଯଦି କ୍ରିଷ୍ଟ କି ଏଲୀୟ କି ଆ ବାବବାଦୀ ଆୟ୍‍ୱିନ୍, ଆଲାଇତ୍‍କେ ବାତେଙ୍କ୍ ବାପ୍ତିସ୍ମ ହିଦୁତିନ୍ ?”
JOH 1:26 ଯୋହନ୍‌ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ନାନ୍ ଏର୍‍ଦାଗ୍ ବାପ୍ତିସ୍ମ ଇଦୁତାନ୍; ବେନଙ୍କ୍ ମିଡ଼୍ ପୁନ୍‍ୱିଡ଼୍, ଅଣ୍ଡ୍‌ ମିଇ ଲୋପେ ମିନ୍ଦେଣ୍ଡ୍;
JOH 1:27 ଅଣ୍ଡ୍‌ ନା ପେର୍‍କେ ୱାସମିନ୍ଦେଣ୍ଡ୍, ଅନ୍‌ ଡେକେତ୍ ବନ୍ଦନ୍ ଲେଏତାଙ୍କ୍ ନାନ୍ ଯୋଗ୍ୟ ଆୟନ୍ ।”
JOH 1:28 ହି ସାରେ ଗଟନା ଯର୍ଦ୍ଦନ୍ ବେଡ଼େମ୍‍ତେ ମେଣ୍ଡନ୍ ପାକେ ମାନ୍ଦାନ୍ ବେତାନି ନାର୍ ଗଟେମ୍ ଆସ୍‍ମାତେ । ହି ପଡ଼ିୟେତାଗ୍ ଯୋହନ୍‌ ନାରୁଡ଼୍‍କିଂଙ୍କ୍ ବାପ୍ତିସ୍ମ ଇସ୍‌‍ମାତ୍‍ତଣ୍ଡ୍ ।
JOH 1:29 ଆସୁଟେ ମେଣ୍ଡନ୍ ଦିନ୍ ଯୋହନ୍‌ ଜିସୁଙ୍କ୍ ନିଜେତ୍ ଗାର୍‍ରେ ୱାଦାନାଦ୍ ଉଡ଼ି କେତ୍‍ତଣ୍ଡ୍, “ହି ଉଡ଼ାଟ୍, ଇଶ୍ୱର୍‌ତେ ମେଣ୍ଢାମେଇତାନଣ୍ଡ୍, ବେନ ଜଗତ୍‍ତେ ପାପ୍ କାଞ୍ଜିଆଦ୍‍ତଣ୍ଡ୍ ।
JOH 1:30 ନା ପେର୍‍କେ ବେନ ୱାସ ମିନ୍ଦେଣ୍ଡ୍, ଅଣ୍ଡ୍‌ ନା କନ୍‍ସ୍ ବାଡ଼୍‍ୟଣ୍ଡ୍ ୱାସମିନ୍ଦେଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍‌ ନା ଜନମ୍‍ତେ ମୁନେକନ୍‍ସ୍ ମାତ୍‍ତଣ୍ଡ୍, ବେନ ବିଷୟ୍‍ତେ ନାନ୍ ଇଦ୍ କେସ୍‍ମିନ୍ଦେନ୍ ଅଣ୍ଡ୍‌ ହିଣ୍ଡେ ।
JOH 1:31 ନାନ୍ ଆନ୍‌‍ତେ ଅଂକିଙ୍କ୍‌ ହେଞ୍ଚକଟ୍ ମାତ୍‍ତାନ୍, ବାତେଙ୍କ୍ ଇତ୍‍କେ ଅଣ୍ଡ୍‌ ବେଦ୍‍ପୁଟୁଙ୍କ୍ ଇସ୍ରାଏଲ୍‍ ନାରୁଡ଼୍‍ତେ ଗାର୍‍ରେ ତିଆର୍ ଆଦ୍‍ତନ୍, ଆଦିନ୍ ସେଙ୍ଗେ ନାନ୍ ଏର୍‍ଦାଗ୍ ବାପ୍ତିସ୍ମ ହିଦାଙ୍କ୍ ୱାସ୍‍ମିନ୍ଦେନ୍ ।”
JOH 1:32 ମେଣ୍ଡେ, ଯୋହନ୍‌ ସାକ୍ଷ୍ୟ ଇସ୍‌ କେତ୍‍ତଣ୍ଡ୍, “ନାନ୍ ଆତ୍ମାତିଙ୍କ୍ ପାର୍ୱା ରକମ୍ ସ୍ୱର୍ଗତାଗାଙ୍କ୍ ଡିଗାନାଦ୍, ମେଣ୍ଡେ ଆଦ୍ ଅନ୍‌ ପର୍‍ର କୁଦାନାଦ୍‍ ଉଡ଼୍‍ତାନ୍ ।
JOH 1:33 ନାନେ ଆନ୍‌‍ତେ ଅଂକିଙ୍କ୍‌ ହେଞ୍ଚକଟ୍ ମାତ୍‍ତାନ୍, ମାତର୍ ବେନ ନାକିଂଙ୍କ୍ ଏର୍‍ଦାଗ୍ ବାପ୍ତିସ୍ମ ହିଦାଙ୍କ୍ ରହ୍‍ତଣ୍ଡ୍, ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ବେନଡ଼୍‍ ପର୍‍ ଆତ୍ମାତିଙ୍କ୍ ଡିଗାନାଦ୍ ଉଡ଼ିତିନ୍, ଅଣ୍ଡ୍‌ ଆ ନାରୁଡ଼୍‌ଣ୍ଡ୍‌, ବେନ ପବିତ୍ର ଆତ୍ମାତେ ବାପ୍ତିସ୍ମ ହିଦ୍‍ତଣ୍ଡ୍ ।
JOH 1:34 ମେଣ୍ଡେ ନାନ୍ ଆଦ୍ ଉଡ଼ିମିନ୍ଦେନ୍ ନୁ ଅଣ୍ଡ୍‌ ଇଶ୍ୱର୍‌ତେ ମାର୍‍ ଇଞ୍ଜ ସାକ୍ଷ୍ୟ ଇସ୍‌‍ମିନ୍ଦେନ୍ ।”
JOH 1:35 ମେଣ୍ଡନ୍‍ଦିନେ ମେଣ୍ଡନ୍‍ଦାମ୍ ଯୋହନ୍‌ ନୁ ତାମ୍ ଶିଷ୍ୟଡ଼୍ ଲୋପେଙ୍କ୍ ଇର୍‍ୱୁଡ଼୍ ତଡ଼୍ ନିସ୍ ମାତ୍‍ତଣ୍ଡ୍ ।
JOH 1:36 ମେଣ୍ଡେ, ଅଣ୍ଡ୍‌ ଜିସୁଙ୍କ୍ ଆଦ୍ ଆର୍ ଇସ୍‌ ଆଦାନାଦ୍ ଉଡ଼ି ଅଂକିଙ୍କ୍‌ ଅଣ୍ଡୟ୍‌‍ ଦୃଷ୍ଟିତେ ଉଡ଼ି କେତ୍‍ତଣ୍ଡ୍, “ହିକ୍ ଉଡ଼ାଟ୍ ଇଶ୍ୱର୍‌ତେ ମେଣ୍ଢାମେଇତାନଣ୍ଡ୍ ।”
JOH 1:37 ଆଦ୍ ଇର୍‍ୱୁଡ଼୍ ଶିଷ୍ୟଡ଼୍ ଯୋହନ୍‌‌ତେ ଗଟି କେଞ୍ଜି ଜିସୁନ୍ ପେର୍‍କେ ପେର୍‍କେ ଆଦ୍‍ତଡ଼୍ ।
JOH 1:38 ଜିସୁ ମାଲ୍‍ସ୍ ଅଡ଼୍‌‍ ପେର୍‍କେ ପେର୍‍କେ ୱାଦାନାଦ୍ ଉଡ଼ି ପାଚ୍ରାମାଡ଼୍‍ତଣ୍ଡ୍, “ମିଡ଼୍ ବାତେଏ ମେହ୍‍କୁତିଡ଼୍ ?” ଅଡ଼୍‌ ଅଂକିଙ୍କ୍‌ ଉତ୍ତର୍ ହିତ୍‍ତଡ଼୍, “ରାବ୍‍ବି, ହିଦିନ୍ ଅର୍ତ ଗୁରୁ ନିମ୍‍ ବେଗେ ମାନ୍ଦୁତି ?”
JOH 1:39 ଜିୱୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ୱାଡ଼ାଟ୍, ଉଡ଼ିତିଡ଼୍ ।” ଆସୁଟେ ଅଡ଼୍‌ ଆଞ୍ଜ୍ ଅନ୍‌ ପଡ଼୍‍ୟ୍ ଉଡ଼୍‍ତଡ଼୍, ମେଣ୍ଡେ ଆଦ୍ ଦିନ୍ ଅନ୍‌‍ତଡ଼୍ ମାତ୍‍ତଡ଼୍; ଆସୁଟେ ପାୟାଲ୍ ନାଲୁ ଗାଣ୍ଟା ଆସ୍‍ମାତ୍‍ତେ ।
JOH 1:40 ବେନଡ଼୍ ଇର୍‍ୱୁଡ଼୍ ଯୋହନ୍‌‌ତେ ଗଟି କେଞ୍ଜି ଜିସୁନ୍ ପେର୍‍କେ ପେର୍‍କେ ଆଞ୍ଜ୍ ମାତ୍‍ତଡ଼୍, ଅଡ଼୍‌ ଲୋପେଙ୍କ୍ ୱେରଣ୍ଡ୍ ଶିମୋନ୍ ପିତର୍‍ତେ ଦାଦାଲ୍ ଆନ୍ଦ୍ରିୟ ମାତ୍‍ତଣ୍ଡ୍ ।
JOH 1:41 ଆନ୍‌ଦ୍ରିୟ ପ୍ରତମ୍ ନିଜର୍ ତାମୁଣ୍ଡ୍‌ ଶିମୋନ୍‍ତିଙ୍କ୍ ଉଡ଼ିମେଣ୍ଡେ ଅଂକିଙ୍କ୍‌ କେତ୍‍ତଣ୍ଡ୍, “ମାମ୍‍ମେ ମସିହଙ୍କ୍ ଉଡ଼ିମିନ୍ଦେମ୍ ।”
JOH 1:42 ଆନ୍‌ଦ୍ରିୟ ଅଂକିଙ୍କ୍‌ ଜିସୁନ୍ ଗାର୍‍ରେ ତାତ୍‍ତଣ୍ଡ୍ । ଜିସୁ ଅଂକିଙ୍କ୍‌ ଅଣ୍ଡୟ୍‌‍ ଦୃଷ୍ଟିତେ ଉଡ଼ି କେତ୍‍ତଣ୍ଡ୍, “ନିମ୍‍ ଶିମୋନ୍, ଯୋହନ୍‌‌ତେ ମାର୍‍ । ନିମ୍‍ କେଫା ପେଦେର୍ ତେ କ୍ୟାତ୍‌ ଆଦ୍‍ତିନ୍‌ ।”
JOH 1:43 ମେଣ୍ଡନ୍‍ଦିନେ ଜିସୁ ଗାଲିଲୀତାଗ୍ ଆଦ୍‍ଦାନ୍ ମାଇଦିଙ୍କ୍ ଇଚ୍ଛା ମାଡ଼୍‍ତଣ୍ଡ୍, ମେଣ୍ଡେ ଅଣ୍ଡ୍‌ ପିଲିପ୍‍ତିଙ୍କ୍ ଉଡ଼ିମେଣ୍ଡେ ଅଂକିଙ୍କ୍‌ କେତ୍‍ତଣ୍ଡ୍, “ନା ପେର୍‍କେ ୱାଡ଼ା ।”
JOH 1:44 ପିଲିପ୍ ବେତ୍‍ସାଇଦାତେ ନାରୁଣ୍ଡ୍‍ ମାତ୍‍ତଣ୍ଡ୍, ଆଦ୍ ଆନ୍ଦ୍ରିୟ ନୁ ପିତର୍‍ତେ ନାର୍ ମାତ୍‍ତେ ।
JOH 1:45 ପିଲିପ୍ ନିତନିୟେଲ୍‍ତିଙ୍କ୍ ଉଡ଼ିମେଣ୍ଡେ ଅଂକିଙ୍କ୍‌ କେତ୍‍ତଣ୍ଡ୍, “ବେନ ବିଷୟ୍‍ତେ ମୋଶାଲ୍‌ ବ୍ୟବସ୍ଥା ବଇତାଗ୍ ଲେକିମିନ୍ଦେଣ୍ଡ୍, ମେଣ୍ଡେ ବାବବାଦିଡ଼୍ ଆନ୍‌‍ତେ ଲେକିମିନ୍ଦେଡ଼୍, ମାମ୍ ଅଂକିଙ୍କ୍‌ ଉଡ଼ି ମିନ୍ଦେମ୍; ଅଣ୍ଡ୍‌ ଯଷେପ୍‍ତେ ମାର୍‍ ନାଜରିତିୟ ଜିସୁ ।”
JOH 1:46 ନିତନିୟେଲ୍ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ନାଜରିତ ତାଗାଙ୍କ୍ ବାତ୍ ସାୟେତ୍ ବିଷୟ୍ ପେଇତେ ପାର୍‍ଦ୍‍ତେ ?” ପିଲିପ୍ ଅଂକିଙ୍କ୍‌ କେତ୍‍ତଣ୍ଡ୍, “ୱାସ୍ ଉଡ଼ୁ ।”
JOH 1:47 ଜିସୁ ନିତନିୟେଲ୍‍ତିଙ୍କ୍ ତାନ୍ ଗାର୍‍ରେ ୱାଦାନାଦ୍ ଉଡ଼ି ଅନ୍‌ ବିଷୟ୍‍ତେ କେତ୍‍ତଣ୍ଡ୍, “ହି ଉଡ଼ାଟ୍, ହିଣ୍ଡ୍ ୱେରଣ୍ଡ୍ ନିଜାମ୍ ଇସ୍ରାଏଲ୍‍ତେ ନାରୁଡ଼୍, ହିନାଗ୍ ଚାଲାକି ଇଲେ ।”
JOH 1:48 ନିତନିୟେଲ୍ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ନିମ୍‍ ନାକିଂଙ୍କ୍ ବେଲା ହେଞ୍ଚ୍‍ତିନ୍ ?” ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ପିଲିପ୍ ନିକିଂଙ୍କ୍ କାର୍‍ଙ୍ଗାନ୍‍ ମୁନେ ନିମ୍‍ ବେସୁଙ୍କ୍‍ ତୟେମାଡ଼େତ୍ ମଦଲ୍ ମାତ୍‍ତି, ଆସୁଟେ ନାନ୍‍ନେ ନିକିଂଙ୍କ୍ ଉଡ଼ିମାତ୍‍ତାନ୍ ।”
JOH 1:49 ନିତନିୟେଲ୍ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ହୋ ଗୁରୁ, ନିମ୍‍ ଇଶ୍ୱର୍‌ତେ ମାର୍‍, ନିମ୍‍ ଇସ୍ରାଏଲ୍‍ତେ ରାଜାନି ।”
JOH 1:50 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ନାନ୍ ନିକିଂଙ୍କ୍ ତୟେମାଡ଼େତ୍ ମଦଲ୍ ଉଡ଼ିମାତ୍‍ତାନ୍ ଇଞ୍ଜ କେତ୍‍ତାଙ୍କେ ନିମ୍‍ ବିଶ୍ୱାସ୍ ମାଡ଼ୁତି ? ନିମ୍‍ ଇଦିଙ୍କ୍‌ ଅଣ୍ଡ୍‌ ମେଣ୍ଡେ ବେଡ଼୍‍ୟା ବେଡ଼୍‍ୟାଦ୍‍ ବିଷୟ ଉଡ଼ିତି ।”
JOH 1:51 ମେଣ୍ଡେ, ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେତୁତାନ୍, ମିଡ଼୍ ସ୍ୱର୍ଗତିଙ୍କ୍ କୁଲା ନୁ ଇଶ୍ୱର୍‌ତେ ଦୂତକିଂଙ୍କ୍ ନାରୁଡ଼୍ ପିଲେତ୍ ପର୍‍ର ତାରାନାଦ୍ ନୁ ଡିଗାନାଦ୍ ଉଡ଼ିତିଡ଼୍ ।”
JOH 2:1 ରେଣ୍ଡ୍ ଦିନା ପେର୍‍କେ ଗାଲିଲୀ ନାର୍ ୱେରଡ଼୍ ପେଣ୍ଡୁଲ୍ ଆତ୍‍ତେ, ମେଣ୍ଡେ ଜିସୁନ୍ ୟାୟ୍‍ ଆଗେ ମାତ୍‍ତେ;
JOH 2:2 ଜିସୁ ଆନ୍‌‍ତେ ନିଜେତ୍ ଶିଷ୍ୟଡ଼୍ ତଡ଼୍ ଆଦ୍ ପେଣ୍ଡୁଲ୍‍ତାଗେ ୱାତ୍‍ତଡ଼୍ ।
JOH 2:3 ପେର୍‍କେ ଦ୍ରାକ୍ଷାରସ୍ ତେରି ଆତ୍‍ତାଙ୍କ୍ ଜିସୁନ୍ ୟାୟ୍‍ ଅଂକିଙ୍କ୍‌ କେତ୍‍ତେ, “ଅଡ଼ାଦ୍‌ ଦ୍ରାକ୍ଷାରସ୍ ତେରିଆତ୍‍ତେ ।”
JOH 2:4 ଆସୁଟେ ଜିସୁ ତାଙ୍କ୍ କେତ୍‍ତଣ୍ଡ୍, “ନି ତଡ଼୍ ନାୱାଦ୍ ବାତ୍ ଇଲେ, ନାକିଂଙ୍କ୍ ବାତେଙ୍କ୍ ଆଦିନାଗ୍ କାସ୍‍ପମାତ୍‍ତି ? ନାୟାଦ୍ ଦିନାମ୍ ଇଞ୍ଜେକ୍ ଆୟ୍‍ନା ହେୱକେ ।”
JOH 2:5 ତାମ୍ ୟାୟ୍‍ ତୁସାନଡ଼୍‍କିଙ୍କ୍‍ କେତ୍‍ତେ, “ଅଣ୍ଡ୍‌ ମିକିଂଙ୍କ୍ ବାତେମେଣ୍ଡେ କେତିତଣ୍ଡ୍, ଆଦ୍ ମାଡ଼ାଟ୍ ।”
JOH 2:6 ମେଣ୍ଡେ, ଆଗେ ଯିହୁଦୀନାରୁଡ଼ାଦ୍ ଶୁଚିଆଦାନ୍ ନିୟମ୍ ଲେକାମ୍‍ତେ ରେଣ୍ଡ୍ ବା ମୁଣ୍ଡ୍ ମହଣିଆ ଆରୁଟାନ୍ କାଲ୍‍କିନ୍ କୁଣ୍ଡା ନେହେସ୍ ମାତ୍‍ତଡ଼୍ ।
JOH 2:7 ଜିସୁ ଦାସଡ଼୍‍କିଂଙ୍କ୍ କେତ୍‍ତଣ୍ଡ୍, “କୁଣ୍ଡାନାଗ୍ ଏର୍‍ ବର୍ତ୍ତି ମାଡ଼ାଟ୍ ।” ଆସୁଟେ ଅଡ଼୍‌ ହାଉସାରେ ନିଣ୍ଡ୍‍ନା ଯାକ ବର୍ତ୍ତି ମାଡ଼୍‍ତଡ଼୍ ।
JOH 2:8 ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଇଞ୍ଜେ ଟେଣ୍ଡି ଅସ୍ ବଜିତ୍ ମୁକ୍ୟାନ୍ ଗାର୍‍ରେ ଆୟ୍‍ମୁଟ୍,” ଆସୁଟେ ଅଡ଼୍‌ ଅତ୍‍ତଡ଼୍ ।
JOH 2:9 ବଜିତେ ମୁକ୍ୟାଲ୍ ଦ୍ରାକ୍ଷାରସ୍ ଆସ୍‍ମାନ୍ଦାନ୍ ଆଦ୍ ଏର୍‍ଦିଙ୍କ୍ ନାକି ଆଦ୍ ବେଗାଙ୍କ୍ ୱାତ୍‍ତେ ଇଦ୍ ପୁନକଟ୍ ମାତ୍‍ତଣ୍ଡ୍ ବାତେଙ୍କ୍ ଇତ୍‍କେ ଇଦ୍ ବେଗାଙ୍କ୍ ୱାତ୍‍ତେ ଆଦ୍ ଦାସଡ଼୍ ପୁଞ୍ଜ୍ ମାତ୍‍ତଡ଼୍, ଆଗାଙ୍କ୍ ଅଣ୍ଡ୍‌ ବରତିଙ୍କ୍ କାର୍‍ଙ୍ଗି କେତ୍‍ତଣ୍ଡ୍,
JOH 2:10 “ସାରେତଡ଼୍ ମୁନେଙ୍କ୍‍ତେ ସାୟେତ୍ ଦ୍ରାକ୍ଷାରସ୍ ହିଦ୍‍ତଡ଼୍, ମେଣ୍ଡେ ନାରୁଡ଼୍ ଆସ୍‍ତେ ୱେୟ୍, ପିନ୍ଦ୍‍ୱାଦ୍ ହିଦ୍‍ତଡ଼୍; ମିଡ଼୍ ହି ଯାକ ସାୟେତାଦ୍‍ ଦ୍ରାକ୍ଷାରସ୍ ନେହେସ୍ ମିନ୍ଦେଡ଼ି ।”
JOH 2:11 ଜିସୁ ହିଦ୍‍ଲେକାମ୍ ଗାଲିଲି ନାର୍‍ତେ ମୁନେଙ୍କ୍‍ତେ ବାକ୍‍ୱାକାମ୍ ଆରମ୍ଭମାଡ଼ି ନିଜେତ୍ ମହିମା ମାଡ଼୍‍ଡ଼ିତ୍‍ତନ୍, ମେଣ୍ଡେ ଅନ୍‌ ଶିଷ୍ୟଡ଼୍ ଅଂକିଙ୍କ୍‌ ବିଶ୍ୱାସ୍ ମାଡ଼୍‍ତଡ଼୍ ।
JOH 2:12 ତାନ୍‍ପେର୍କେ ଅଣ୍ଡ୍‌ ନିଜେତ୍ ୟାୟ୍‍, ଦାଦାଲ୍‍ତାମୁଣ୍ଡ୍‍ ନୁ ଶିଷ୍ୟଡ଼୍ ତଡ଼୍ କପର୍ନାହୁମ୍‍‍ତାଗ୍ ଆଦ୍‍ତଡ଼୍; ମେଣ୍ଡେ ଅଡ଼୍‌ ଆଗେ ନାର୍ଗେଦିନା ମାନଡ଼୍‍ ।
JOH 2:13 ଆସୁଟେ ଯିହୁଦି ନାରୁଡ଼ାଦ୍ ନିସ୍ତାର୍ ପାଣ୍ଡୁମ୍ ଗାର୍‍ରେ ହେୱସ୍‍ ମାତ୍‍ତେ, ମେଣ୍ଡେ ଜିସୁ ଯିରୁଶାଲେମ୍‌‍ତା ଆତ୍‍ତଣ୍ଡ୍ ।
JOH 2:14 ମେଣ୍ଡେ, ଜିସୁ ମନ୍ଦିର୍‍ତାଗ୍ ଗଡ୍‍କ୍, ମେଣ୍ଢା ନୁ ବଡେ ୱାମାନ୍‍ନାରୁଡ଼୍‍କ୍ ମେଣ୍ଡେ ଡାବ୍ ବ୍ୟବସାୟିନାରୁଡ଼୍‍କ୍ କୁଦିମାନ୍ଦାନାଦ୍ ଉଡ଼୍‍ତଣ୍ଡ୍ ।
JOH 2:15 ଆଗାଙ୍କ୍ ଅଣ୍ଡ୍‌ ନଡ଼େତେ ୱେରଡ଼୍ ଇକ୍‍ଲେମ୍ ତିଆର୍ ମାଡ଼ି ମେଣ୍ଢା ନୁ ଗଡ୍‍କିଂଙ୍କ୍ ତଅସ୍ ସାରେତାୱିଙ୍କ୍ ମନ୍ଦିର୍‍ତାଗାଙ୍କ୍ ବାୟିଦେ ପେସ୍‍ପିତ୍‍ତଣ୍ଡ୍; ଡାବ୍ ବ୍ୟବସାୟି ନାରୁଡ଼୍‍ଡାୱ୍‍ ଡାବ୍‌କ୍‌ସାରେ ଲେକିସ୍ ଅଡ଼ାୱୁ ଟେବୁଲ୍‍କିଙ୍କ୍ ଉଲ୍‍ଟା ମାଡ଼ିତ୍‍ତଣ୍ଡ୍ ।
JOH 2:16 ମେଣ୍ଡେ ଜିସୁ ବଡେ ୱାମାନଡ଼୍‍କିଙ୍କ୍ କେତ୍‍ତଣ୍ଡ୍, “ହିୱିଙ୍କ୍ ଇଗାଙ୍କ୍ ଆୟ୍‍ମୁଟ୍, ନା ବାବାନ୍ ଲୋତ୍‍ତିଙ୍କ୍ ଆସାନ୍ ୱାମାନ୍ ଲୋନ୍‌ ମାଡ଼୍‍ମାଟ୍ ।”
JOH 2:17 ଇଦ୍ ଉଡ଼ି ତାନ୍ ଶିଷ୍ୟଡ଼୍ ଶାସ୍ତ୍ରତାଗ୍ କେତ୍‍ତାଦ୍ ୱେରନ୍ ବାକ୍ୟ ହେର୍କା ମାଡ଼୍‍ତଡ଼୍; “ମିଇ ଲୋତ୍‍ତେ ସେଙ୍ଗେ ନାୟାଦ୍ ଉକ୍ତି ନା ଲୋପେ କିସ୍ ଲେକାମ୍ ନିଡ଼୍‍ସମିନ୍ଦେ ।”
JOH 2:18 ଆସୁଟେ ଯିହୁଦୀ ଅଦକ୍ଷଲଡ଼୍ ଜିସୁନ୍ ଗାର୍‍ରେ ମାଲ୍‍ସ୍ ୱାସ୍ ଇଦ୍ ପ୍ରଶ୍ନ ପାଚ୍ରାମାଡ଼୍‍ତଡ଼୍, “ନିମ୍‍ ହି ସାରେ ପାଡ଼୍‍ୟି ମାଡ଼ାନ୍ ସେଙ୍ଗେ ଅଦିକାର୍‌ ଦର୍‍କାନ୍ ମାତ୍‍ତେ ଇଞ୍ଜ ମାମ୍‍ମେ ବେଲା ପୁନ୍‍ତମ୍ ? ମେଣ୍ଡେ ବେନ୍ ଚିହିହ୍ନେ ତଡ଼୍ ମାକିଂଙ୍କ୍ ତୟ୍‍ସ ମିନ୍ଦେନି ?”
JOH 2:19 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ମିଡ଼୍ ହି ମନ୍ଦିର୍‍ତିଙ୍କ୍ ଉହୁସିମୁଟ୍, ମେଣ୍ଡେ ମୁଣ୍ଡ୍ ଦିନାତେ ଲୋପ୍ ନାନେ ଆଦିଙ୍କ୍ ତିଆର୍ ମାଡ଼ିଦ୍‍ତାନ୍‍ ।”
JOH 2:20 ଆସୁଟେ ଯିହୁଦୀଡ଼୍‍ କେତ୍‍ତଡ଼୍, “ହି ମନ୍ଦିର୍ ତିଆର୍ ମାଡ଼ାନ୍ ମାଇଦିଙ୍କ୍ ଚୟାଳିଶ ହେଣ୍ଡ୍‍କ୍ ଲାଗେମ୍‍ ଆତ୍‍ତେ; ମେଣ୍ଡେ ନିମ୍‍ ବାତେଏ ତାଙ୍କ୍ ମୁଣ୍ଡ୍ ଦିନାତେ ତିଆର୍ ମାଡ଼ିଦ୍‍ତି ?”
JOH 2:21 ବାତେଙ୍କ୍ ଇତ୍‍କେ ଅଣ୍ଡ୍‌ ନିଜର୍ ମେନ୍ଦୁଲ୍‍ତେ ଲେକାମ୍ ମନ୍ଦିର୍‍ତିଙ୍କ୍ ରକ୍ଷାମାଡ଼ି ଇଦ୍ ବିଷୟ୍ କେସମାତ୍‍ତନ୍ ।
JOH 2:22 ତାନ୍‍ପେର୍କେ ଅଣ୍ଡ୍‌ ଡଲିମାନ୍ଦାନ୍ ନାରୁଡ଼୍ ଲୋପେଙ୍କ୍ ତେଦ୍‍ତା ପେର୍‍କେ ତାନ୍ ଶିଷ୍ୟଡ଼୍ ଅଣ୍ଡ୍‌ ଇଲା କେସମାତ୍‍ତନ୍ ଇଞ୍ଜ ହେର୍କା ମାଡ଼୍‍ତଡ଼୍; ଅଡ଼୍‌ ଦର୍ମଶାସ୍ତ୍ର ନୁ ଜିସୁନ୍ କେସ୍‍ମାନ୍ଦାନ୍ ବାକ୍ୟତିଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।
JOH 2:23 ନିସ୍ତାର୍ ପାଣ୍ଡୁମ୍ ହେଉତେ ସମୟ୍‍ତେ ଜିସୁ ଯିରୁଶାଲେମ୍‌‍ତାଗ୍ ମାନ୍ଦାନ୍‍ୱେଲେ ନାର୍‍ଗେ ଅନାଦ୍‌ ମାଡ଼୍‍ତାଦ୍ ଆଶର୍ଯ୍ୟ କାମ୍ ଉଡ଼ି ଅନ୍‌ ପେଦେର୍‍ତେ ବିଶ୍ୱାସ୍ ମାଡ଼୍‍ତଡ଼୍ ।
JOH 2:24 ବାତେଙ୍କ୍ ଇତ୍‍କେ ଜିସୁ ଅଡ଼୍‌ ପର୍‍ର ଆଶେ ୱାଟେ ପାର୍‍ୱଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ସାରେତଡ଼୍‌କିଂଙ୍କ୍ ସାୟେ ପୁଞ୍ଜ୍‍ମାତ୍‍ତଣ୍ଡ୍,
JOH 2:25 ମେଣ୍ଡେ, ବେନ ଯେ ନାରୁନ୍ ବିଷୟ୍‍ତେ ସାକ୍ଷହିଦ୍‍ତ, ଇଦ୍ ଅନ୍‌‍ୱାଦ୍ ଦର୍‍କାର୍ ହିଲକଟ୍ ମାତ୍‍ତେ, ବାତେଙ୍କ୍ ଇତ୍‍କେ ନାରୁନ୍ ହୃଦୟ୍‍ତାଗ୍ ବାତା ମିନ୍ଦେ, ଆୱ୍ ଅଣ୍ଡ୍‌ ପୁଞ୍ଜ୍‍ମାତ୍‍ତଣ୍ଡ୍ ।
JOH 3:1 ପାରୂଶୀଡ଼୍ ଲୋପେ ନିକଦୀମ୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଣ୍ଡ୍‍ ମାତ୍‍ତଣ୍ଡ୍, ଅଣ୍ଡ୍‌ ଯିହୁଦିଡ଼୍ ୱେରଣ୍ଡ୍ ନେତାଲ୍‍ ।
JOH 3:2 ଅଣ୍ଡ୍‌ ନାର୍‍କା ଜିସୁନ୍ ଗାର୍‍ରେ ୱାସ୍ ଅଂକିଙ୍କ୍‌ କେତ୍‍ତଣ୍ଡ୍, “ହୋ ଗୁରୁ, ନିମ୍‍ ଯେ ଇଶ୍ୱର୍‌ତାଗାଙ୍କ୍ ୱାସ୍ ମିନ୍ଦେନି, ହିଦ୍ ମାମ୍ ପୁତ୍‍ତମ୍, ବାତେଙ୍କ୍ ଇତ୍‍କେ ନିମ୍‍ ହିୱ୍ ବେନ୍‍ସାରେ ବାକ୍‌ୱାକାମ୍ ମାଡ଼ମିନ୍ଦେନି, ଇଶ୍ୱର୍ ତଡ଼୍ ହିଲକଟ୍ ମାତ୍‍କେ ହାଉସାରେ ବେନ ମାଡ଼୍‍ପାର୍‍ୱଡ଼୍‍ ।”
JOH 3:3 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ସତ୍ ନାନେ ନିକିଂଙ୍କ୍ କେତୁତାନ୍, ମେଣ୍ଡନ୍‍ଦାମ୍ ଜନମ୍ ଆୟ୍‍ୟକଟ ମାତ୍‍କେ ବେନମେଣ୍ଡେ ଇଶ୍ୱର୍‌ତେ ରାଜ୍ୟ ଉଡ଼୍‍ ପାର୍‍ୱଡ଼୍ ।”
JOH 3:4 ନିକଦୀମ୍ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ମୁୟ୍‍କେ ନାରୁଡ଼୍ ବେଦ୍‍ପୁଟୁଙ୍କ୍ ଜନମ୍ ଆଦ୍‍ପାର୍ଦତଣ୍ଡ୍ ? ଅଣ୍ଡ୍‌ ବାତେଏ ଦ୍ୱିତୀୟଦାମ୍‍ ନିଜେତ୍ ୟାୟାନ୍ ଡଙ୍କେତ୍‍ତାଗାଙ୍କ୍ ନେଙ୍ଗି ଜନମ୍ ଆଦ୍‍ପାର୍ଦତଣ୍ଡ୍ ?”
JOH 3:5 ଜିସୁ ଉତ୍ତର୍ ହିତ୍‍ତଣ୍ଡ୍, “ସତ୍ ନାନ୍ ନିକିଂଙ୍କ୍ କେତୁତାନ୍, ଏର୍‍ ନୁ ଆତ୍ମାତେ ଜନମ୍ ଆୟ୍‍ୟକଟ ମାତ୍‍କେ ବେନମେଣ୍ଡେ ଇଶ୍ୱର୍‌ତେ ରାଜ୍ୟତାଗ୍ ନେଙ୍ଗାଙ୍କ୍‍ ପାର୍‍ୱଡ଼୍ ।
JOH 3:6 ମେନ୍ଦୁଲ୍‍ତାଗାଙ୍କ୍‍ ବାତେଏ ତିଆର୍ ଆତ୍‍ତେ, ଆଦ୍ ମେନ୍ଦୁଲ୍; ମେଣ୍ଡେ ଆତ୍ମାତାଗାଙ୍କ୍‍ ବାତେଏ ଆତ୍‍ତେ, ଆଦ୍ ଆତ୍ମା ।
JOH 3:7 ମିକିଂଙ୍କ୍ ନିଜାମ୍ ମେଣ୍ଡଣ୍ଡ୍‍ଦାମ୍ ଜନମ୍ ଆଦ୍‍ ୱେୟ୍‍ତିତ୍ ଇଞ୍ଜ ନାନ୍ ଯେ ନିକିଂଙ୍କ୍ କେତ୍‍ତାନ୍, ଆଦିଙ୍କ୍ ଦାଦ୍‍ ରେଲ୍‍ମା ।
JOH 3:8 ଗାଲ୍ ବେନ୍ ପାକେ ଇଚ୍ଛା ମାଡ଼ିତେ, ଆଦ୍ ପାକେ ଆଦ୍‍ତେ, ମେଣ୍ଡେ ନିମ୍‍ ତାନ୍‍ୱାଦ୍ ମର୍‍ରେ କେଞ୍ଜିତିନ୍, ବାତେଙ୍କ୍ ଇତ୍‍କେ ଆଦ୍ ବେଗାକନ୍‍ସ୍ ୱାଦ୍‍ତେ ମେଣ୍ଡେ ବେକେ ଆଦ୍‍ତେ, ଆଦ୍‍ପୁନ୍‍ୱିନ୍; ଆତ୍ମାତାଗାଙ୍କ୍‍ ପୁଟ୍‍ତେନଡ଼୍‍ ସାରେ ନାରୁଡ଼୍ ଆଦ୍‌ ରକମ୍ ।”
JOH 3:9 ନିକଦୀମ୍ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ହି ସାରେ ବେଦ୍‍ପୁଟୁଙ୍କ୍ ଆଦ୍ ପାର୍‍ଦ୍‍ତା ?”
JOH 3:10 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ନିମ୍‍ ଇସ୍ରାଏଲ୍‍ତେ ୱେରଣ୍ଡ୍ ଗୁରୁ ଆଶେ ମିକା ବାତେଏ ହି ସାରେ ବୁଜେମ୍ ଆଦ୍‍ପାର୍‍ୱିନି ?
JOH 3:11 ନାନ୍ ନିକିଂଙ୍କ୍ ସତ୍ କେତୁତାନ୍, ମାନାଡ଼୍ ବାତେଏ ପୁତ୍‍ତାଡ଼୍‍, ଆଦ୍ କେତିତାଡ଼୍‍, ମେଣ୍ଡେ ବାତେଏ ଉଡ଼ିମାନ୍ତ୍‍ତାଡ଼୍‍, ଆଦିନ୍ ବିଷୟ୍‍ତେ ସାକ୍ଷ୍ୟ ହିଦ୍‍ତାଡ଼୍‍, ମେଣ୍ଡେ ମିଡ଼୍ ମାୱାଦ୍ ସାକ୍ଷ୍ୟ ଗ୍ରହନ୍ ମାଡ଼୍‍ୱିଡ଼୍ ।
JOH 3:12 ନାନେ ମିକିଂଙ୍କ୍ ସଂସାର୍ ବିଷୟ୍‍ତେ କେତ୍‍କେ ଯଦି ମିଡ଼୍ ବିଶ୍ୱାସ୍ ମାଡ଼୍‍ୱିଡ଼୍, ଆଲାଇତ୍‍କେ ମିକିଂଙ୍କ୍ ସ୍ୱର୍ଗତ୍‍ ବିଷୟ୍‍ତେ କେତ୍‍କେ ବେଦ୍‍ପୁଟୁଙ୍କ୍ ବିଶ୍ୱାସ୍ ମାଡ଼ିତିଡ଼୍ ?
JOH 3:13 ବେନ ନାରୁନ୍‍ପିଲେ ସ୍ୱର୍ଗକଞ୍ଜ୍ ଡିଗିୱାତ୍‍ତଣ୍ଡ୍, ଅନ୍‌ ୱିଡ଼୍‍ସି ମେଣ୍ଡେ ବେନ ସ୍ୱର୍ଗତାଗ୍ ଆନଣ୍ଡ୍ ।”
JOH 3:14 ମୋଶାଲ୍ ବେଦ୍‍ପୁଟୁଙ୍କ୍ ଉସ୍କ ନେଲ୍‍ଦାଗ୍ ବାବାଲ୍ ତାଡ଼ାତିଙ୍କ୍ ଗୁଞ୍ଜେତ୍ ପର୍‍ର ତେୟ୍‍ସ୍‍ ମାତ୍‍ତଣ୍ଡ୍, ନାରୁନ୍‍ପିଲେ ଆନ୍‌‍ତେ ଆଦ୍‌ ରକମ୍ ପର୍‍ର ତେଦିତଣ୍ଡ୍,
JOH 3:15 ବେଦ୍‍ପୁଟୁଙ୍କ୍ ବେନଆଇ ଅନ୍‌‍ଆଗେ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ସାରେଦିନାତ୍ ଜିୱୁନ୍‍ ଦର୍ସିକିତନ୍ ।
JOH 3:16 ବାତେଙ୍କ୍ ଇତ୍‍କେ ଇଶ୍ୱର୍ ଜଗତ୍‍ତିଙ୍କ୍ ଇସର୍ ପ୍ରେମ ମାଡ଼୍‍ତଣ୍ଡ୍ ଯେ, ଅଣ୍ଡ୍‌ ନିଜେତ୍ ଅଦ୍ୱିତିୟ ମାର୍‍ଦିଙ୍କ୍ ଦାନ ହିତ୍‍ତଣ୍ଡ୍, ବେଦ୍‍ପୁଟୁଙ୍କ୍ ବେନଆଇ ଅନ୍‌‍ଆଗେ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ବିନଷ୍ଟ ଆୟ୍‍ୟକଟ ସାରେଦିନାତ୍ ଜିୱୁନ୍ ଦର୍ସିକିତନ୍ ।
JOH 3:17 ଇଶ୍ୱର୍ ତାନ୍ ମାର୍‍ଦିଙ୍କ୍ ଜଗତ୍‍ତାଗ୍ ବିଚାର୍ ମାଡ଼ାନ୍ ମାଇଦିଙ୍କ୍ ରୱଣ୍ଡ୍, ବାତେଙ୍କ୍ ଇତ୍କେ ଜଗତ୍ ବେଦ୍‍ପୁଟୁଙ୍କ୍ ଅନ୍‌‍ତଡ଼୍ ପରିତ୍ରାଣ୍ ଦର୍‍କିତ୍‍ତେ, ଆଦିନ୍ ମାଇଦିଙ୍କ୍ ଅଂକିଙ୍କ୍‌ ରହ୍‍ତଣ୍ଡ୍ ।
JOH 3:18 ବେନ ମାରିନାଗ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ବିଚାରିତ ଆୟ୍‍ୟଣ୍ଡ୍; ବେନ ବିଶ୍ୱାସ୍ ମାଡ଼ଣ୍ଡ୍, ଅଣ୍ଡ୍‌ ବିଚାରିତ ଆଶେ ତେର୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଇଶ୍ୱର୍‌ତେ ଅଦ୍ୱିତିୟ ମାର୍‍ଦେ ପେଦେର୍ ତିଙ୍କ୍ ବିଶ୍ୱାସ୍ ମାଡ଼ଣ୍ଡ୍ ।
JOH 3:19 ମେଣ୍ଡେ, ଆଦ୍ ବିଚାର୍ ଇଦ୍, ଜଗତ୍‍ତାଗ୍ ୱେସ୍ ତିଆର୍ ଆସ୍‍ମିନ୍ଦେ, ମେଣ୍ଡେ ନାରୁଡ଼୍ ପ୍ରେମ ତାଦ୍‌ ସାୟେ ୱେସ୍ ୱିଡ଼୍‍ସି ହିକାଡ଼୍‍ତିଙ୍କ୍ ପସନ୍ଦ୍ ମାଡ଼୍‍ତଡ଼୍, ଆଦିଙ୍କ୍ ଅଡ଼୍‌‍ୱାଦ୍‍ ପାଡ଼ିୟି ସାରେ କାରାପ୍ ।
JOH 3:20 ବାତେଙ୍କ୍ ଇତ୍‍କେ ବେନଆଇ କାରାପ୍ ପାଡ଼ିୟି ମାଡ଼ିତନ୍, ଅଣ୍ଡ୍‌ ୱେସ୍‍ତିଙ୍କ୍‍ ପାସ୍‍କିତ୍‍ତଣ୍ଡ୍, ମେଣ୍ଡେ ବେସୁଙ୍କ୍‍ଆଇ ଅନ୍‌‍ୱାଦ୍ ପାଡ଼୍‌ୟିଦେ ଦଷ୍ ତନ୍ଦିତେ, ଆଦିନ୍ ମାଇଦିଙ୍କ୍ ଅଣ୍ଡ୍‌ ୱେସିନ୍‍ ଗାର୍‍ରେ ୱାଡ଼ଣ୍ଡ୍ ।
JOH 3:21 ବାତେଙ୍କ୍ ଇତ୍‍କେ ବେନଆଇ ନିଜାମ୍‍ ପାଡ଼୍‍ୟି ମାଡ଼ିତନ୍, ବେଦ୍‍ପୁଟୁଙ୍କ୍ ଅନ୍‌‍ୱାଦ୍ ପାଡ଼ିୟି ସାରେ ଇଶ୍ୱର୍‌ତାଦ୍, ଇଶ୍ୱର୍‌ତେ ଇଚ୍ଛା ଲେକାମ୍‍ତେ ମାଡ଼୍‍ତଣ୍ଡ୍ ଇଞ୍ଜ ତନ୍ଦିତେ, ଅଣ୍ଡ୍‌ ୱେୟ୍‍ସିନ୍ ଗାର୍‍ରେ ୱାଦ୍‍ତଣ୍ଡ୍ ।
JOH 3:22 ଆସୁଟେ ଜିସୁ ନୁ ତାନ୍ ଶିଷ୍ୟଡ଼୍ ଯିହୁଦା ପ୍ରଦେଶ୍‍ତାଗ୍ ଆଦ୍‍ତଡ଼୍, ମେଣ୍ଡେ ଅଣ୍ଡ୍‌ ଆଦ୍ ପଡ଼ିୟେତାଗ୍ ଅଡ଼୍‌ ତ ମାଞ୍ଜ୍ ବାପ୍ତିସ୍ମ ହିଦାଙ୍କ୍ ପସ୍‍ପ୍‍ତଣ୍ଡ୍ ।
JOH 3:23 ଯୋହନ୍‌ ଆନ୍‌‍ତେ ଶାଲମତ୍ ଗାର୍‍ରେ ଏନୋନ୍‍ତାଗ୍ ବାପ୍ତିସ୍ମ ହିସମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଆଗେ ଗାଟି ଏର୍‍ ମାତ୍‍ତେ, ମେଣ୍ଡେ ନାରୁଡ଼୍ ୱାସ୍ ବାପ୍ତିସ୍ମ ହସମାତ୍‍ତଡ଼୍ ।
JOH 3:24 ଆସୁଙ୍କ୍ ହେଉନା ଯୋହନ୍‌ ଜେଲ୍‌ତାଗ୍ ଆନ୍‌‍ୱେକଟ୍ ମାତ୍‍ତଣ୍ଡ୍ ।
JOH 3:25 ଆଗାକଞ୍ଜ୍ ଶୁଚି ପାଡ଼୍‍ୟି ବିଷୟ୍‍ତେ ଯୋହନ୍‌‌ତେ ଶିଷ୍ୟଡ଼୍ ଲୋପେଙ୍କ୍ ୱେରଣ୍ଡ୍ ଯିହୁଦୀନ୍‍ ତୋ ତିର୍‍ୟାତିର୍‍ୟି ଆଦ୍‍ତଡ଼୍ ।
JOH 3:26 ମେଣ୍ଡେ, ଯୋହନ୍‌‌ତେ ଶିଷ୍ୟଡ଼୍ ଯୋହନ୍‌‌ତେ ଗାର୍‍ରେ ଆଞ୍ଜ୍ ଅଂକିଙ୍କ୍‌ କେତ୍‍ତଡ଼୍, “ହୋ ଗୁରୁ, ବେନ ଯର୍ଦ୍ଦନ୍ ବେଡ଼େମ୍‍ତେ ମୁନେତ୍ ପାକ୍ ନିତଡ଼୍ ମାତ୍‍ତଣ୍ଡ୍, ବେନ ବିଷୟ୍‍ତେ ନିମ୍‍ ସାକ୍ଷ୍ୟ ଇସ୍‌‍ମିନ୍ଦେନି, ଉଡ଼େ, ଅଣ୍ଡ୍‌ ବାପ୍ତିସ୍ମ ଇଦୁତଣ୍ଡ୍ ନୁ ସାରେତଡ଼୍ ଅନ୍‌ ଗାର୍‍ରେ ୱାଦୁତଡ଼୍ ।”
JOH 3:27 ଯୋହନ୍‌ ଉତ୍ତର୍ ହିତ୍‍ତଣ୍ଡ୍, “ସ୍ୱର୍ଗତାଗାଙ୍କ୍ ହିୱକଟ୍ ମାତ୍‍କେ ନାରୁଡ଼୍ ବାତେଏ ପାଏମ୍ ଆଦାଙ୍କ୍ ପାର୍‍ୱଡ଼୍ ।
JOH 3:28 ନାନ୍ ଯେ ମସିହ ଆୟନ୍, ବାତେଙ୍କ୍ ଇତ୍‍କେ ଅନ୍‌ ମୁନେଙ୍କ୍ ପ୍ରେରିତ୍ ଆସ୍‍ମିନ୍ଦେନ୍, ହିଦ୍ ନାନ୍ କେସ୍‍ମାତ୍‍ତାନ୍ ଇଞ୍ଜ ମିଡ଼୍ ନିଜେ ନିଜେ ନା ସାକ୍ଷି ।
JOH 3:29 ବେନ ମୁତେଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍‌ ବର, ବାତେଙ୍କ୍ ଇତ୍‍କେ ବରତ୍‍ ବେନ୍ ସାଙ୍ଗ ଗାର୍‍ରେ ନିସ୍ ଅନ୍‌ ଗଟି କେଞ୍ଜିତଣ୍ଡ୍, ଅଣ୍ଡ୍‌ ବରତ୍‍ ଲେଙ୍ଗ୍‍ଦେ ସେଙ୍ଗେ ଗାଟି ସାର୍‍ଦେ ଆଦ୍‍ତନ୍ । ହିଦ୍‍ରକମ୍ ନାୟାଦ୍ ସାର୍‍ଦେ ସାରେ ଆସ୍‍ମିନ୍ଦେ ।
JOH 3:30 ଅଂକିଙ୍କ୍‌ ନିଜାମ୍ ନାର୍ଗେ ଆଦ୍ ୱେୟ୍‍ତିତ୍, ବାତେଙ୍କ୍ ଇତ୍‍କେ ନାକିଂଙ୍କ୍ ସୁଦୁର୍ ଆଦ୍ ୱେୟ୍‍ତିତ୍ ।”
JOH 3:31 ବେନ ପର୍‍ରକଞ୍ଚ୍ ୱାଦାନାଦ୍ ମାଡ଼ିତନ୍, ଅଣ୍ଡ୍‌ ସାରେତଡ଼୍ ଆଗାଙ୍କ୍ ବାଡ଼୍‍ୟଣ୍ଡ୍; ବେନ ପୃତିବି ତାଗାଙ୍କ୍ ତିଆର୍‍ଆତ୍‍ତଣ୍ଡ୍, ଅଣ୍ଡ୍‌ ପୃତିବିତଣ୍ଡ୍, ମେଣ୍ଡେ ଅଣ୍ଡ୍‌ ପୃତିବିତେ ଗଟି କେତିତଣ୍ଡ୍; ବେନ ସ୍ୱର୍ଗତାଗାଙ୍କ୍ ୱାଦାନାଦ୍ ମାଡ଼ିତନ୍, ଅଣ୍ଡ୍‌ ସାରେତଡ଼୍‌କିଂଙ୍କ୍ ବାଡ଼୍‍ୟଣ୍ଡ୍ ।
JOH 3:32 ଅଣ୍ଡ୍‌ ବାତେଏ ଉଡ଼ିମିନ୍ଦେଣ୍ଡ୍ ନୁ କେଞ୍ଜିମିନ୍ଦେଣ୍ଡ୍ ଆଦ୍ ବିଷୟ୍‍ତେ ଅଣ୍ଡ୍‌ ସାକ୍ଷ୍ୟ ହିତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅନ୍‌‍ୱାଦ୍ ସାକ୍ଷ୍ୟ ବେନ ଗ୍ରହନ୍ ମାଡ଼ଡ଼୍‍ ।
JOH 3:33 ବେନ ଅନ୍‌‍ୱାଦ୍ ସାକ୍ଷ୍ୟ ଗ୍ରହନ୍ ମାଡ଼ିତନ୍, ଅଣ୍ଡ୍‌ ଇଶ୍ୱର୍‌ତିଙ୍କ୍ ଯେ ସତ୍ୟତାଦ୍ ପୁଟୁଙ୍କ୍ ଇଞ୍ଜ ସ୍ୱୀକାର୍ ମାଡ଼ିତନ୍ ।
JOH 3:34 ବାତେଙ୍କ୍ ଇତ୍‍କେ ଇଶ୍ୱର୍ ବେନଙ୍କ୍ ରୟ୍‍ସ୍‍ମିନ୍ଦେଣ୍ଡ୍, ଅଣ୍ଡ୍‌ ଇଶ୍ୱର୍‌ତେ ବାକ୍ୟ କେତିତଣ୍ଡ୍, ଆଦିଙ୍କ୍ ଅଣ୍ଡ୍‌ ପୁରାପୁରି ଲେକାମ୍ ଆତ୍ମାତିଙ୍କ୍ ବେଡ଼୍‍ୟାଦ୍‍ ମାଡ଼ିତନ୍ ।
JOH 3:35 ବାବାଲ୍ ମାର୍‍ଦିଙ୍କ୍ ପ୍ରେମ ମାଡ଼ିତନ୍, ମେଣ୍ଡେ ସାରେ ବିଷୟ ଅନ୍‌ କାଇଦାଗ୍ ଅର୍ପଣ ମାଡ଼ିସ୍‍ ମିନ୍ଦେଣ୍ଡ୍ ।
JOH 3:36 ବେନ ମାର୍‍ଦିଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ସାରେଦିନାତ୍ ଜିୱୁନ୍ ଦର୍ସିକି ଆସ୍‍ମିନ୍ଦେଣ୍ଡ୍, ମାତର୍ ବେନ ମାର୍‍ଦିଙ୍କ୍ ଉର୍‍ଗାଡ଼୍ ମାଡ଼ିତନ୍, ଅଣ୍ଡ୍‌ ଜିୱୁନ୍‍ତିଙ୍କ୍ ଉଡ଼୍‍ଅଣ୍ଡ୍‌, ବାତେଙ୍କ୍ ଇତ୍‍କେ ଅଣ୍ଡ୍‌ ଇଶ୍ୱର୍‌ତେ କପାମ୍ ନାରୁଡ଼୍ ଆଶ୍ ମାନ୍‍ତଣ୍ଡ୍ ।
JOH 4:1 ପାରୂଶୀଡ଼୍ କେଞ୍ଜ୍‍ତଡ଼୍ ଯେ ଜିସୁ ବାପ୍ତିସ୍ମ ଯୋହନ୍‌‌ତେ କନ୍‍ସ୍ ନାର୍‍ଗେ ଶିଷ୍ୟ ମାଡ଼ୁତଣ୍ଡ୍ ନୁ ଅଡ଼୍‌‍କିଂଙ୍କ୍ ବାପ୍ତିସ୍ମ ଇଦୁତଣ୍ଡ୍ ।
JOH 4:2 ପ୍ରକୃତ୍‍ରେ ଜିସୁ ନିଜେ ବେନଙ୍କ୍‍ବା ବାପ୍ତିସ୍ମ ହିୱକଟ୍ ମାତ୍‍ତଣ୍ଡ୍, ମାତର୍ ଆଦ୍ ତାମ୍ ଶିଷ୍ୟଡ଼୍ ହିସମାତ୍‍ତଡ଼୍ ।
JOH 4:3 ହିଦ୍ ପାରୂଶୀଡ଼୍ କେତୁତଡ଼୍ ଇଞ୍ଜ ଜିସୁ ବେସୁଟ୍‌ କେଞ୍ଜ୍‍ତଣ୍ଡ୍, ଆସୁଟେ ଅଣ୍ଡ୍‌ ଯିହୁଦା ପ୍ରଦେଶ୍‍ତିଙ୍କ୍ ୱିଡ଼୍‍ସି ମେଣ୍ଡନ୍‍ନ୍ଦାମ୍ ଗାଲିଲୀତାଗ୍ ଆତ୍‍ତଣ୍ଡ୍ ।
JOH 4:4 ଆଦାନ୍ ହାର୍‍ଦାଗ୍ ଶମିରୋଣ ଲୋପେଙ୍କ୍ ଇସ୍‌ ଅଂକିଙ୍କ୍‌ ଆଦ୍‍ୱେୟ୍‍ତେ ।
JOH 4:5 ଆଦିଙ୍କ୍ ଜିସୁ ଆଞ୍ଜ୍ ଯାକୁବ୍ ନିଜେତ୍ ମାର୍‍ ଯଷେପ୍‍ତିଙ୍କ୍ ବେନ୍ ୱାୟାଙ୍କ୍ ତୁସି ମାତ୍‍ତଡ଼୍, ଆଦିନ୍ ଗାର୍‍ରେ ଶମିରଣତେ ସୁକାର୍‍ ପେଦେର୍‍ତେ ୱେରଡ଼୍ ନାର୍‍ଦାଗ୍ ହେୱ୍‍ତଣ୍ଡ୍;
JOH 4:6 ଆଦ୍ ପଡ଼ିୟେତାଗ୍ ଯାକୁବନ୍ ନୂୟ୍ ମାତ୍‍ତେ । ଜିସୁ ଆୟ୍‍ୱି ମାନ୍ଦାନ୍ ମାଇଦିଙ୍କ୍ ଆଦ୍ ନୂୟ୍‍ଦ୍‍ ଗାର୍‍ରେ କୁଦିମାତ୍‍ତଣ୍ଡ୍ । ଆସୁଟେ ପାୟାଲ୍ ଆସ୍‍ମାତ୍‍ତେ ।
JOH 4:7 ଅଣ୍ଡୟ୍‌ ଶମିରୋଣୀୟ ମୁତ୍‍ତେ ଏର୍‍ ତରାନ୍‍ ମାଇଦିଙ୍କ୍ ୱାତ୍‍ତେ । ଜିସୁ ତାଙ୍କ୍ କେତ୍‍ତଣ୍ଡ୍, “ନାକିଂଙ୍କ୍ ଉନ୍ଦାନ୍ ମାଇଦିଙ୍କ୍ ଏର୍‍ ହିମ୍ ।”
JOH 4:8 ଆସୁଟେ ତାନ୍ ଶିଷ୍ୟଡ଼୍ କାଦି ଆସାନ୍ ମାଇଦିଙ୍କ୍ ନାର୍‍ଦାଗ୍ ଆଞ୍ଜ ମାତ୍‍ତଡ଼୍ ।
JOH 4:9 ଆସୁଟେ ଶମିରୋଣୀୟ ମୁତ୍‍ତେ ଜିସୁଙ୍କ୍ କେତ୍‍ତେ, “ନିମ୍‍ ୱେରନ୍ ଯିହୁଦିନି ମେଣ୍ଡେ ନାନ୍ ୱେରନ୍ ଶମିରୋଣୀୟ ମୁତେନ୍‍, ବେଲା ନା କାୟ୍‍ଦେ ଉନ୍ଦାଙ୍କ୍ ତାଲ୍‍କୁତିନ୍‍ ?” ବାତେଙ୍କ୍ ଇତ୍‍କେ ଶମିରୋଣୀୟଡ଼୍ ତଡ଼୍ ଯିହୁଦୀ ନାରୁଡ଼ାଦ୍ ବ୍ୟବହାର୍ ଇଲା ।
JOH 4:10 ଜିସୁ ତାଙ୍କ୍ ଉତ୍ତର୍ ହିତ୍‍ତଣ୍ଡ୍, “ଇଶ୍ୱର୍ ବାତେଏ ହିଦ୍‍ପାର୍‍ତଣ୍ଡ୍ ନିମ୍‍ ଯଦି ପୁଞ୍ଜ୍ ମାନେନି ମେଣ୍ଡେ ବେନ ନି କାଇଦେ କନ୍‍ସ୍ ଉନ୍ଦାନଙ୍କ୍ ତାଲ୍‍କୁତଣ୍ଡ୍ ଆଦ୍ ଯଦି ପୁଞ୍ଜ୍ ମାନେନି ନିମ୍‍ ଅଂକିଙ୍କ୍‌ ତାଲ୍‍କେନି, ମେଣ୍ଡେ ଅଣ୍ଡ୍‌ ନିକିଂଙ୍କ୍ ଜିୱୁନ୍‍ତେ ଏର୍‍ ହିୱେଣ୍ଡ୍ ।”
JOH 4:11 ଆଦ୍ ମୁତ୍‍ତେ ଅଂକିଙ୍କ୍‌ କେତ୍‍ତେ, “ଗୁରୁ, ଏର୍‍ ତରାନ୍‍ ମାଇଦିଙ୍କ୍ ନି ଗାର୍‍ରେ ବାତେଏ ଜିନିଷ୍ ଇଲା, ମେଣ୍ଡେ ନୂୟ୍ ତ କୁୟ୍‍ଙ୍ଗ୍; ଆଲାଇତ୍‍କେ ନିମ୍‍ ବେଗାକନ୍‍ସ୍ ଆଦ୍ ଜିୱୁନ୍‍ ଏର୍‍ ଦର୍ସିକି ଆସ୍‌ମିନ୍ଦେନୀ ?
JOH 4:12 ମା ଆନିଦାଦି ଯାକୁବ୍ ହି ନୂୟ୍ ମାକିଂଙ୍କ୍ ଇସ୍‌‍ମାତ୍‍ତଣ୍ଡ୍, ମେଣ୍ଡେ ନିଜେ, ମେଣ୍ଡେ ତାନ୍ ମାର୍‍କ୍ ନୁ ଜିୱାକିନ୍‍ ଲନ୍ ହିଗାଙ୍କ୍ ହୁଞ୍ଜ ମାତ୍‍ତା, ଅନ୍‌ ଆଗାଙ୍କ୍ କି ନିମ୍‍ ବେଡ଼୍‍ୟନି ?”
JOH 4:13 ଜିସୁ ତାଙ୍କ୍ ଉତ୍ତର୍ ହିତତଣ୍ଡ୍, “ବେନ୍‌ଆଇ ହି ଏର୍‍ ଉନ୍‍ତଣ୍ଡ୍, ଅଂକିଙ୍କ୍‌ ମେଣ୍ଡନ୍ ଦାମ୍ ଉନ୍ଦ୍ ୱାହାତିତ୍‍;
JOH 4:14 ବାତେଙ୍କ୍ ଇତ୍‍କେ ନାନ୍ ବେନ୍ ଏର୍‍ ହିଦ୍‍ତାନ୍, ଆଦ୍ ବେନମେଣ୍ଡେ ଉନ୍‍ତଣ୍ଡ୍, ଅଂକିଙ୍କ୍‌ ବେସୁଙ୍କ୍‍ମେଣ୍ଡେ ଉନ୍ଦେୱାୱ, ବେଲାନ୍ ନାନ୍ ହିସମାନ୍ଦାନ୍ ଏର୍‍ ଅନ୍‌ ହୃଦୟ୍‍ତାଗ୍ ୱେରନ୍ ଜିୱୁନ୍ ହିଦାନଣ୍ଡ୍ ନିର୍ଜତେ ପରିନତ ଆଦ୍‍ତେ, ଆଗାଙ୍କ୍ ଉତ୍‍କେ ଅଣ୍ଡ୍‌ ସାରେଦିନାତ୍ ଜିୱୁନ୍‍ ଜିୱେଦର୍‍କିତ୍ ।”
JOH 4:15 ନାଟାଡ଼୍ ଅଂକିଙ୍କ୍‌ କେତ୍‍ତେ, “ଗୁରୁ, ନାକିଂଙ୍କ୍ ଆଦ୍ ଏର୍‍ ହିମ୍, ମେଣ୍ଡେ ବେସୁଙ୍କ୍‌ବା ଉନ୍ଦେୱାୱ, ଇସ ଜେକେ ୱାଦାଙ୍କ୍ ମେଣ୍ଡେ ଦର୍‍କାର୍ ଆୟ୍‍ୟ ।”
JOH 4:16 ଜିସୁ ତାଙ୍କ୍ କେତ୍‍ତଣ୍ଡ୍, “ଅନ୍‌, ନି ମୁଦ୍‍ପାଙ୍କ୍ କାର୍‍ଙ୍ଗି ଇଗେ ତାଡ଼ା ।”
JOH 4:17 ନାଟାଡ଼୍ ଅଂକିଙ୍କ୍‌ ଉତ୍ତର୍ ହିତ୍‍ତେ, ନା ମୁଦ୍‍ପାଲ୍‍ ଇଲେଣ୍ଡ୍ । ଜିସୁ ତାଙ୍କ୍ କେତ୍‍ତଣ୍ଡ୍, “ନା ମୁଦ୍‍ପାଲ୍‍ ଇଲେଣ୍ଡ୍ ଇଞ୍ଜ କେତାନାଦ୍ ଟିକ୍ କେତ୍‍ତିନ୍;
JOH 4:18 ବାତେଙ୍କ୍ ଇତ୍‍କେ ନିକିଂଙ୍କ୍ ଏୟ୍‍ୱୁଡ଼୍‍ ମୁଦ୍‍ପାଲଡ଼୍‍ ମାତ୍‍ତଡ଼୍, ମେଣ୍ଡେ ଇଞ୍ଜେ ନିମ୍‍ ବେନନ୍‌ ତଡ଼୍ ମିନ୍ଦେନି, ଅଣ୍ଡ୍‌ ନି ମୁଦ୍‍ପାଲ୍‍ ଆୟ୍‍ୟଣ୍ଡ୍; ଇଦ୍ ସତ୍ କେସ୍‍ମିନ୍ଦେନି ।”
JOH 4:19 ନାଟାଡ଼୍ ଅଂକିଙ୍କ୍‌ କେତ୍‍ତେ, “ଗୁରୁ, ନିମ୍‍ ଯେ ୱେରେତନି ବାବବାଦୀ, ଇଦ୍ ନାନ୍ ଉଡ଼ୁତାନ୍ ।
JOH 4:20 ମା ଆନିଦାଦିଡ଼୍ ହି ମେଟେତାଗ୍ ଉପବାସ୍ ମାଡ଼୍‍ତଡ଼୍; ମେଣ୍ଡେ, ମିଡ଼୍ ଯିହୁଦିଡ଼୍ କେସମିନ୍ଦେଡ଼ି, ବେନ୍ ପଡ଼୍‍ୟ୍‍ତାଗ୍ ଉପବାସ୍ ମାଡ଼ାନାଦ୍ ଲେକାମ୍, ଆଦ୍ ଜିରୂଶାଲାମ୍‍ତାଗ୍ ମିନ୍ଦେ ।”
JOH 4:21 ଜିସୁ ତାଙ୍କ୍ କେତ୍‍ତଣ୍ଡ୍, “ଆଗୋ ନାଟାଡ଼୍‍ତନୀ, ନା ଗଟ୍ ବିଶ୍ୱାସ୍ ମାଡ଼ା, ଇଦ୍‍ରକମ୍ ଦିନାମ୍ ୱାଦୁତେ, ବେନ୍ ସମୟ୍‍ତେ ମିଡ଼୍ ହି ମେଟେତାଗ୍ ବା ଯିରୁଶାଲେମ୍ ତାଗ୍ ବାବାନାଦ୍ ଉପବାସ୍ ମାଡ଼୍‍ୱିଡ଼୍ ।
JOH 4:22 ମିଡ଼୍ ଶମିରନିୟଡ଼ି ପ୍ରକୃତ୍‍ତେ ବେନଙ୍କ୍ ପୁନ୍‍ୱିଡ଼୍, ଅନାଦ୍‌ ଉପବାସ୍ ମାଡ଼ିତିଡ଼୍, ବାତେଙ୍କ୍ ଇତ୍‍କେ ମାମ୍‍ମେ ଯିହୂଦୀମ୍ ବେନଙ୍କ୍ ପୁତ୍‍ତମ୍, ଅଂକିଙ୍କ୍‌ ଉପବାସ୍ ମାଡ଼ିତମ୍, ବାତେଙ୍କ୍ ଇତ୍‍କେ ପରିତ୍ରାଣ୍ ଯିହୂଦିଡ଼ାଗାଙ୍କ୍ ୱାଦ୍‍ତେ ।
JOH 4:23 ବାତେଙ୍କ୍ ଇତ୍‍କେ ବେନ୍ ସମୟ୍‍ତେ ସତ୍ ଉପବାସ୍ ମାଡ଼ାନଡ଼ି ଆତ୍ମାତେ ନୁ ସତ୍ୟତେ ବାବାନାଦ୍ ଉପବାସ୍ ମାଡ଼ିତଡ଼୍, ଆସତ୍‍ ଦିନାମ୍ ୱାସମିନ୍ଦେ; ମେଣ୍ଡେ ଇଞ୍ଜେକ୍ ମିକା ମିନ୍ଦେ; ବାତେଙ୍କ୍‍ଇତ୍କେ ବାବାଲ୍ ହିସତ୍ ଉପବାସ୍ ଇଚ୍ଛାମାଡ଼ୁତନ୍ ।
JOH 4:24 ଇଶ୍ୱର୍ ୱେରନ୍ ଆତ୍ମା, ମେଣ୍ଡେ ବେନଡ଼୍ ଅନ୍‌‍ଆଦ୍‍ ଉପବାସ୍ ମାଡ଼ିତଡ଼୍, ଆତ୍ମାତେ ନୁ ସତ୍ୟତେ ଉପବାସ୍ ମାଡ଼ାନାଦ୍ ଅଡ଼୍‌କିଂଙ୍କ୍‍ ଦର୍‌କାର୍‍ ।”
JOH 4:25 ନାଟାଡ଼୍ ଅଂକିଙ୍କ୍‌ କେତ୍‍ତେ, “ମସିହ, ବେନଙ୍କ୍ କ୍ରିଷ୍ଟ କେତିତଡ଼୍‍, ଅଣ୍ଡ୍‌ ୱାସମିନ୍ଦେଣ୍ଡ୍ ଇଞ୍ଜ ନାନ୍ ପୁତ୍‍ତାନ୍; ବେସୁଙ୍କ୍‍ ଅଣ୍ଡ୍‌ ୱାଦ୍‍ତଣ୍ଡ୍, ଅଣ୍ଡ୍‌ ମାନ୍‍ ସାରେ ବିଷୟ୍‍ତିଙ୍କ୍ କେତିତନ୍ ।”
JOH 4:26 ଜିସୁ ତାଙ୍କ୍ କେତ୍‍ତଣ୍ଡ୍, “ନି ତଡ଼୍ ତିର୍‍ୟୁତାନ୍ ଯେ ନାନ୍, ଅଣ୍ଡେ ।”
JOH 4:27 ଆଦ୍ ସମୟ୍‍ତେ ତାନ୍ ଶିଷ୍ୟଡ଼୍ ୱାସ୍ ଅଂକିଙ୍କ୍‌ ୱେରଡ଼୍ ନାଟାଡ଼୍ ତ ତିର୍‍ୟ ମାନ୍ଦାନାଦ୍ ଉଡ଼ି ବାକ୍‍ୱା ଆଦ୍‍ତଡ଼୍, “ମିକା ନିମ୍‍ ବାତେଏ ଇଚ୍ଛାମାଡ଼ୁତିନ୍‌, ବା ବାତେଙ୍କ୍ ତାନ୍ ତଡ଼୍ ଗଟି କେସମିନ୍ଦେନି, ହିଦ୍ ବେନମେଣ୍ଡେ ପାଚ୍ରାମାଡ଼ାଙ୍କ୍ ସାହାସ୍ ମାଡ଼ଡ଼୍‍ ।”
JOH 4:28 ଆସୁଟେ ଆଦ୍ ନାଟାଡ଼୍ ତାନାଦ୍ ଏର୍‍ କୁଣ୍ଡ୍ ନେଲ୍ ୱାଟି ନାର୍‍ଦାଗ୍ ଆଞ୍ଜ୍ ନାରୁଡ୍‍କ୍‍ କେତ୍‍ତେ,
JOH 4:29 ୱାଡ଼ାଟ୍, ଅର୍‍ତୁଙ୍କ୍ ଉଡ଼ିତିଡ଼୍, “ନାନ୍ ବାତା ମାଡ଼ିମିନ୍ଦେଣ୍ଡ୍, ହାଉସାରେ ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍; ଅଣ୍ଡ୍‌ ଉମ୍ଭ ମସିହ ଆଦ୍‍ତନ୍ ୱେୟ୍‍ୟ ?”
JOH 4:30 ଆସୁଟେ ନାରୁଡ଼୍ ନାର୍‍ତାଗାଙ୍କ୍ ପେୟିସ୍ ଅନ୍‌‍ଗାରେ ଆଦାଙ୍କ୍ ପସ୍‍ପ୍‍ତ୍‍ତଡ଼୍ ।
JOH 4:31 ଆଗାକଞ୍ଜ୍ ଶିଷ୍ୟଡ଼୍ ଅଂକିଙ୍କ୍‌ ଅନୁରଦ୍‌ ମାଡ଼ି କେତ୍‍ତଡ଼୍, ହୋ ଗୁରୁ, ସୁଦୁଟ୍ ତିନ୍ଦାନଙ୍କ୍ ୱାଡ଼ା ।
JOH 4:32 ବାତେଙ୍କ୍ ଇତ୍‍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ତିନ୍ଦାନଙ୍କ୍ ବେନ୍ କାଦି ନାୟାଗ୍ ମିନ୍ଦେ ତାନ୍ ବିଷୟ୍‍ତେ ମିଡ଼୍ ବାତେମିକା ପୁନ୍‍ୱିଡ଼୍ ।”
JOH 4:33 ଆସୁଟେ ଶିଷ୍ୟଡ଼୍ ନିଜେ ନିଜେ କେତାଙ୍କ୍ ପସ୍‍ପ୍‍ତ୍‍ତଡ଼୍, “ବେନ ଅଂକିଙ୍କ୍‌ କାଦି ତାସିସ୍‍ ମିନ୍ଦେଡ଼୍‍ ବାନେ ?”
JOH 4:34 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନା ପ୍ରେରଣାକର୍ତ୍ତାନ୍ ଇଚ୍ଛା ପାଲନ୍ ମାଡ଼ାନାଦ୍ ନୁ ଅନ୍‌ ତଡ଼୍ ଇସ୍‌ ମାନ୍ଦାନ୍ ପାଡ଼ିୟି ତେର୍‍ସ୍ପାନାଦ୍‍ ଇଦ୍‍ଏକେ ନାୟାଦ୍ କାଦି ।
JOH 4:35 ମିଡ଼୍ କେତୁତିଡ଼୍ କେଡ଼୍ କୟ୍‍ଦାନ୍‍ ମାଇଦିଙ୍କ୍ ମଣ୍ଡେ ନାଲୁ ନେଲ୍‍ଞ୍ଜ୍‍ ମିନ୍ଦେ । ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ କେତୁତାନ୍ କେଡ଼୍ ୱାୟାଙ୍କ୍ ଉଡ଼ାଟ୍, ଆୱ୍ ସାରେ କଇଦାନଙ୍କ୍ ଆସ୍‍ମିନ୍ଦେ ।
JOH 4:36 ଇଞ୍ଜ୍ ଆନ୍‌‍ତେ କୟ୍‍ତେନଣ୍ଡ୍ ମଜୁରି ଦର୍‍କିତ୍‍ତା ନୁ ସାରେଦିନାତ୍ ଜିୱୁନ୍‍ତେ ମାଇଦିଙ୍କ୍ କାୟା ଗୁଡ଼୍‍ପି ମାଡ଼ମିନ୍ଦେନ୍, ବେଦ୍‍ପୁଟୁଙ୍କ୍ ୱିତାନଣ୍ଡ୍ ନୁ କୟ୍‍ଦାନଣ୍ଡ୍ ହିର୍‍ୱୁଡ଼୍‍ କାୟ୍‍ଲି ୱେଡ଼୍‍କା ମାଡ଼ିତଡ଼୍ ।
JOH 4:37 ବାତେଙ୍କ୍ ଇତ୍‍କେ ୱେରଣ୍ଡ୍ ୱିତିତଣ୍ଡ୍ ନୁ ମେଣ୍ଡେଆର୍‍ତୁଣ୍ଡ୍ କୟ୍‍ଦ୍‍ତଣ୍ଡ୍, ହିଦ୍ ଗଟ୍ ସତ୍ ।
JOH 4:38 ମିଡ଼୍ ବାତେତ୍‍ ମାଇଦିଙ୍କ୍ କଷ୍ଟ ମାଡ଼୍‍ୱିଡ଼୍, ଆୱ୍ କୟ୍‍ଦାନ୍‍ ମାଇଦିଙ୍କ୍ ନାନ୍ ମିକିଂଙ୍କ୍ ରହ୍‍ତାନ୍; ମେଣ୍ଡେ ବାଗାତଡ଼୍ ତିପାଲ୍ ମାଡ଼ିମିନ୍ଦେଡ଼୍, ମେଣ୍ଡେ ମିଡ଼୍ ଅଡ଼୍‌‍ୱାଦ୍‍ ତିପାଲ୍‍ତେ କାୟା ଦର୍ସକୁତିଡ଼୍ ।”
JOH 4:39 “ନାନ୍ ବାତା ମାଡ଼ିମିନ୍ଦେଣ୍ଡ୍, ହାଉସାରେ ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ଇଞ୍ଜ ବେନ୍ ନାଟାଡ଼୍ ସାକ୍ଷ୍ୟ ଇସ୍‌‍ମାତେ, ତାନାଦ୍ ଗଟ୍‍ତେ ମାଇଦିଙ୍କ୍ ଆଦ୍ ନଗର୍‍ ଶମିରୋଣୀୟ ଡ଼ାଗାଙ୍କ୍ ଲୋପେଙ୍କ୍ ନାର୍‍ଗେ ନାରୁଡ଼୍ ଅନ୍‌‍ଆଗେ ବିଶ୍ୱାସ୍ ମାଡ଼୍‍ତଡ଼୍ ।”
JOH 4:40 ଆଦ୍ ଶମିରୋଣିୟଡ଼୍ ଆନ୍‌‍ତେ ଅନ୍‌ ଗାର୍‍ରେ ୱାସ୍ ଅଡ଼୍‌ ତ ମାନ୍ଦାନ୍ ମାଇଦିଙ୍କ୍ ଅଂକିଙ୍କ୍‌ ଅନୁରଦ୍‌ ମାଡ଼୍‍ତଡ଼୍ । ମେଣ୍ଡେ ଅଣ୍ଡ୍‌ ରେଣ୍ଡ୍ ଦିନା ଆଦ୍ ପଡ଼ିୟେତାଗ୍ ମାତ୍‍ତଣ୍ଡ୍ ।
JOH 4:41 ମେଣ୍ଡେ, ଜିସୁନ୍ ଗଟ୍ କେଞ୍ଜି ମେଣ୍ଡେ ନାର୍‍ଗେ ନାରୁଡ଼୍ ଅନାଗ୍ ବିଶ୍ୱାସ୍ ମାଡ଼୍‍ତଡ଼୍;
JOH 4:42 ମେଣ୍ଡେ, ଅଡ଼୍‌ ଆଦ୍ ନାଟାଡ଼୍‍ତିଙ୍କ୍ କେତ୍‍ତଡ଼୍, “ଇଞ୍ଜେ ନି ଗଟ୍‍ତେ ସେଙ୍ଗେ ମାତର୍ ମାମ୍‍ମେ ବିଶ୍ୱାସ୍ ମାଡ଼ମ୍, ବାତେଙ୍କ୍ ଇତ୍‍କେ ମାମ୍‍ମେ ନିଜେ ନିଜେ କେଞ୍ଜିମିନ୍ଦେମ୍, ମେଣ୍ଡେ ଇଣ୍ଡ୍ ଯେ ନିଜାମ୍ ଜଗତ୍‍ତେ ତ୍ରାଣକର୍ତ୍ତାଲ୍, ହିଦ୍ ମାମ୍‍ମେ ପୁଞ୍ଜ୍‍ମିନ୍ଦେମ୍ ।”
JOH 4:43 ରେଣ୍ଡ୍‍ଦିନାତେ ପେର୍‍କେ ଜିସୁ ଆଗାଙ୍କ୍ ପେୟିସ୍ ଗାଲିଲୀତାଗ୍ ଆତ୍‍ତଣ୍ଡ୍ ।
JOH 4:44 “ବାତେଙ୍କ୍ ଇତ୍‍କେ ବାବବାଦୀ ସ୍ୱଦେଶ୍‍ତେ ଆଦର୍‍ ଦର୍‍କିତ୍‍ତେ ଆୟ୍‍ୟଡ଼୍ ଇଞ୍ଜ୍ ଜିସୁ ନିଜେ ସାକ୍ଷ୍ୟ ହିତ୍‍ତଣ୍ଡ୍ ।”
JOH 4:45 ମେଣ୍ଡେ, ଅଣ୍ଡ୍‌ ଗାଲିଲୀତାଗ୍ ୱାତ୍‍ତେ ସାଙ୍ଗେ ସାଙ୍ଗେ, ପାଣ୍ଡୁମ୍ ଦିନାମ୍ ତେ ଅଣ୍ଡ୍‌ ଯିରୁଶାଲେମ୍‌‍ତାଗ୍ ବାତା ମାଡ଼ି ମାତ୍‍ତଣ୍ଡ୍, ହାଉସାରେ ଉଡ଼ିମାନ୍ଦାନ୍ ଗାଲିଲୀୟଡ଼୍‍ ଅଂକିଙ୍କ୍‌ ଗ୍ରହନ୍ ମାଡ଼୍‍ତଡ଼୍, ବେଲାକି ଅଡ଼୍‌‍ ଆନ୍‌‍ତେ ପାଣ୍ଡୁମ୍‍ତାଗ୍ ଆଞ୍ଜ୍ ମାତ୍‍ତଡ଼୍ ।
JOH 4:46 ଇଗାକଞ୍ଜ୍ ଗାଲିଲୀତାଗ୍ ବେନ୍ କାନାଲ୍‌ ନାର୍‍ଦାଗ୍ ଜିସୁ ଏର୍‍ଦିଙ୍କ୍ ଦ୍ରାକ୍ଷାରସ୍ ମାଡ଼ି ମାତ୍‍ତଣ୍ଡ୍, ଆଦ୍ ପଡ଼ିୟେତାଗ୍ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଆଦ୍‍ତନ୍ । ମେଣ୍ଡେ ଆଗେ ୱେରଣ୍ଡ୍ ରାଜକର୍ମଚାରୀ ମାତ୍‍ତଣ୍ଡ୍, ଅନ୍‌ ମାର୍‍ କଫର୍ନାହୁମ୍‍ତାଗ୍‍ ପିଡ଼ିତ୍ ମାତ୍‍ତଣ୍ଡ୍ ।
JOH 4:47 ଜିସୁ ଯିହୁଦା ପ୍ରଦେଶ୍‍ତାଗାଙ୍କ୍ ଗାଲିଲୀତାଗ୍ ପେୟିସ୍ ୱାସ୍ ମିନ୍ଦେଣ୍ଡ୍, ଇଦ୍ କେଞ୍ଜି ଅଣ୍ଡ୍‌ ଅନ୍‌ ଗାର୍‍ରେ ଆଞ୍ଜ୍ ଅଣ୍ଡ୍‌ ବେଦ୍‍ପୁଟୁଙ୍କ୍ ଆଞ୍ଜ୍ ତାନ୍ ମାର୍‍ଦିଙ୍କ୍ ସୁସ୍ଥ ମାଡ଼ିଦ୍‍ତଣ୍ଡ୍, ଆଦିନ୍‌ମାଇଦିଙ୍କ୍ ଅଂକିଙ୍କ୍‌ ଅନୁରଦ୍‌ ମାଡ଼ାଙ୍କ୍ ପସ୍‍ପ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଡଲାନ୍ ରକମ୍ ଆସ୍ ମାତ୍‍ତଣ୍ଡ୍ ।
JOH 4:48 ଆସୁଟେ ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ଚିହ୍ନେ ନୁ ଆଶର୍ଯ୍ୟ ପାଡ଼୍‍ୟି ହୁଡ଼କଟମାତ୍କେ ମିଡ଼୍ ବେସୁଟ୍‌ ବା ବିଶ୍ୱାସ୍ ମାଡ଼୍‍ୱିଡ଼୍ ।”
JOH 4:49 ରାଜାନ୍‍ଦାସ ଅଂକିଙ୍କ୍‌ କେତ୍‍ତଣ୍ଡ୍, “ହୋ ଗୁରୁ, ନା ମାର୍‍ ଡଲାନ୍ ମୁନେଙ୍କ୍ ୱାଡ଼ା ।”
JOH 4:50 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ଅନ୍‌ ନି ମାର୍‍ ଗେଲ୍‍ସି ଆତ୍‍ତଣ୍ଡ୍ । ଆଦ୍ ନାରୁନ୍ ଜିସୁଙ୍କ୍ କେତ୍‍ତେ ଗଟ୍ ବିଶ୍ୱାସ୍ ମାଡ଼ି ମାଲ୍‍ସ୍ ଆଦ୍‍ତନ୍ ।”
JOH 4:51 ମେଣ୍ଡେ, ଅଣ୍ଡ୍‌ ଆଞ୍ଜ ଆଞ୍ଜ ଅନ୍‌ ଦାସଡ଼୍ ଅଂକିଙ୍କ୍‌ କାୟ୍‍ଲି ନି ମାର୍‍ ଗେଲ୍‍ସି ଆତ୍‍ତଣ୍ଡ୍ ଇଞ୍ଜ କେତ୍‍ତଡ଼୍ ।
JOH 4:52 ଆଦିଙ୍କ୍ ବେନ୍ ସମୟ୍‍ତେ ଅଣ୍ଡ୍‌ ସୁସ୍ଥ ଆତ୍‍ତଣ୍ଡ୍, ଆଦ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍ । ଆସୁଟେ ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ନିନେ ପାୟାଲ୍ ଗାଣ୍ଟେ ସମୟ୍‍ତେ ଅଂକିଙ୍କ୍‌ ହେଡ଼୍‍କ୍ ୱିଡ଼୍‍ସ୍‍ତେ ।”
JOH 4:53 ଆସୁଟେ ବାବାଲ୍ ବୁଜେମ୍ ଆତ୍‍ତଣ୍ଡ୍ ଯେ, “ଜିସୁ ବେନ୍ ସମୟ୍‍ତେ ନିମାର୍‍ ଗେଲ୍‍ସ୍‍ତଣ୍ଡ୍ ଇଞ୍ଜ ଅଂକିଙ୍କ୍‌ କେସ୍‍ମାତ୍‍ତଣ୍ଡ୍, ଟିକ୍ ଆଦ୍ ସମୟ୍‍ତେକେ ହିଦ୍ ଗଟେମ୍‍ଆସ୍‍ ମାତ୍‍ତେ । ମେଣ୍ଡେ, ଅଣ୍ଡ୍‌ ନିଜେ ନୁ ତାନ୍ ପରିବାର୍‍ତେ ସାର୍‍ତଡ଼୍ ଜିସୁଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।”
JOH 4:54 ଯିହୁଦାତାଗାଙ୍କ୍ ମେଣ୍ଡନ୍‍ନ୍ଦାମ୍ ଗାଲିଲୀତାଗ୍ ୱାତ୍‍ତେ ପେର୍‍କେ ହିଦ୍ ଜିସୁନ୍ ଦ୍ୱିତୀୟ ବାକ୍‌ୱାକାମ୍ ମାଡ଼୍‍ତଣ୍ଡ୍ ।
JOH 5:1 ତାନ୍‍ପେର୍କେ ଯିହୂଦୀଡ଼ାଦ୍‍ ୱେରଡ଼୍ ପାଣ୍ଡୁମ୍ ଦିନ୍ ଆତ୍‍ତେ, ମେଣ୍ଡେ ଜିସୁ ଯିରୁଶାଲେମ୍‌‍ତା ଆତ୍‍ତଣ୍ଡ୍ ।
JOH 5:2 ଯିରୁଶାଲେମ୍‍ତେ ମେଣ୍ଢାନ୍ ଆର୍‍ଦେ ଗାର୍‍ରେ ୱେରଡ଼୍ ହେର୍‍ୱ୍‍ ମିନ୍ଦେ; ଏବ୍ରି ଗଟ୍‍ତେ ତାଆକିଂଙ୍କ୍‍ ବେତେସ୍‍ଦା ଇଞ୍ଜ କେତିତଡ଼୍‍, ତାନାଦ୍ ଏଇଙ୍ଗ୍ ମଣ୍ଡପ୍‍ ମାତ୍‍ତା ।
JOH 5:3 ଗୁଡ଼୍‍ସାତେ ପର୍‍ର ନାର୍ଗେ ନାର୍ଗେ ରଗିନାରୁଡ଼୍‍, କାନାଲଡ଼୍, କୁଟାଲଡ଼୍ ନୁ ଶୁଷ୍କାଙ୍ଗ ନାରୁଡ଼୍ ଆଗେ ମାତ୍‍ତଡ଼୍ । ଅଡ଼୍‌ ଏର୍‍ ଉଙ୍ଗାନାଦିନ୍‍ କେପି ମାତ୍‍ତଡ଼୍;
JOH 5:4 ବାତେଙ୍କ୍ ଇତ୍‍କେ ବେନ୍ ସମୟ୍‍ତେ ପ୍ରବୁନାଦ୍ ୱେରଡ଼୍ ଦୂତ୍ ଏର୍‍ୱିନାଗ୍ ଡିଗି ଏର୍‍ଦିଙ୍କ୍ ହୁୟ୍‍ସ ମାତ୍‍ତେ, ମେଣ୍ଡେ ଏର୍‍ ଉଙ୍ଗାନ୍‍ ପେର୍‍କେ ବେନଆଇ ମୁନେଙ୍କ୍ ଆଦିନାଗେ ମୁଡ଼୍‍ନ୍ଦ ମାତ୍‍ତଣ୍ଡ୍, ଅଣ୍ଡ୍‌ ବେନେମେଣ୍ଡେ ରଗ୍‍ତେ ଆସ୍ ମାତ୍‍କେ ବାଡ଼େ ସୁସ୍ଥ ଆସ୍‍ସ ମାତ୍‍ତଡ଼୍ ।
JOH 5:5 ଆଗେ ଅଟ୍‍ତିରିଶ୍‍ ହେଣ୍ଡ୍‍ ରୋଗତେ ପିଡ଼ିତ୍ ୱେରଣ୍ଡ୍ ନାରୁଣ୍ଡ୍‌ ମାତ୍‍ତଣ୍ଡ୍ ।
JOH 5:6 ଜିସୁ ଅଂକିଙ୍କ୍‌ ପାଟି ମାନ୍ଦାନାଦ୍ ଉଡ଼ି ନାର୍‍ଗେ ହେଣ୍ଡେତ୍ ରୋଗି ଇଞ୍ଜ ପୁଞ୍ଜ୍ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ନିମ୍‍ ବାତେଏ ସୁସ୍ଥ ଆଦାଙ୍କ୍ ଇଚ୍ଛା ଅଦୁତିନ୍ ?”
JOH 5:7 ରଗି ନାରୁଣ୍ଡ୍‌ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ପାୟ୍‍କା ଏର୍‍ ଉଙ୍ଗାନ୍‍ ୱେୟ୍ ନାକିଂଙ୍କ୍ ଏର୍‍ୱିନ୍‍ ଲୋପେ ଆଦାନ୍ ମାଇଦିଙ୍କ୍ ନାକିଂଙ୍କ୍ ବେନ ହିଲ୍‍ଲେଡ଼୍; ମେଣ୍ଡେ, ନାନ୍ ଆଦାନ୍ ମୁନେଙ୍କ୍ ମେଣ୍ଡେ ୱେରଣ୍ଡ୍ ନା ମୁନ୍‍ଆଞ୍ଜ୍ ନେଙ୍ଗି ଆଦୁତଡ଼୍‍ ।”
JOH 5:8 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ତେଦ୍‍ଦେ, ନିୟାଦ୍ କେତ୍ ପୟ୍‍ସ୍ ତାକା ।”
JOH 5:9 ଆସୁଙ୍କେ ଆ ନାରୁଣ୍ଡ୍‌ ସୁସ୍ଥ ଆତ୍‍ତଣ୍ଡ୍ ନୁ ନିଜେତ୍ କେତ୍ ପୟ୍‍ସ୍ ତାକାଙ୍କ୍ ପସ୍‍ପ୍‍ତଣ୍ଡ୍ । ଆଦ୍ ଦିନ୍ ବିଶ୍ରାମ୍‍ଦିନେ ମାତ୍‍ତେ ।
JOH 5:10 ଆଦିନ୍ ମାଇଦିଙ୍କ୍ ଯିହୂଦିଡ଼୍ ସୁସ୍ଥ ଆଶେ ମାନ୍ଦାନ୍ ନାରୁଙ୍କ୍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, “ନେଣ୍ଡ୍ ବିଶ୍ରାମ୍‍ଦିନ୍, କେତ୍ କାଞ୍ଜି ଆଦାନାଦ୍ ନିୟାଦ୍ ମା ନିୟମ୍‍ ବିରୁଦ୍‍ତେ ପାଡ଼୍‍ୟି ।”
JOH 5:11 ବାତେଙ୍କ୍ ଇତ୍‍କେ, ଅଣ୍ଡ୍‌ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ବେନ ନାକିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍, ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ନି କେତ୍ ପୟ୍‍ସ୍ ତାକା ।”
JOH 5:12 ଅଡ଼୍‌ ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ନି କେତ୍ ପୟ୍‍ସ୍ ତାକା ଇଞ୍ଜ ବେନ ନିକିଂଙ୍କ୍ କେତ୍‍ତଣ୍ଡ୍, ଆ ନାରୁଣ୍ଡ୍‌ ବେନ ?”
JOH 5:13 ବାତେଙ୍କ୍ ଇତ୍‍କେ ଅଣ୍ଡ୍‌ ବେନ, ଆଦ୍ ସୁସ୍ଥ ଆଶେ ମାନ୍ଦାନ୍ ନାରୁଡ଼୍ ପୁନକଟ୍ ମାତ୍‍ତଣ୍ଡ୍, ବାତେଙ୍କ୍‍ଇତ୍କେ ଆ ପଡ଼ିୟେତାଗ୍ ନାର୍‍ଗେ ନାରୁଡ଼୍ ମାନ୍ଦାନ୍ ମାଇଦିଙ୍କ୍ ଜିସୁ ତନ୍ଦକଟ ଆଞ୍ଜ୍ ମାତ୍‍ତଣ୍ଡ୍ ।
JOH 5:14 ଆଦିନ୍ ପେର୍‍କେ ଜିସୁ ମନ୍ଦିର୍‍ତାଗ୍ ଅଂକିଙ୍କ୍‌ ଉଡ଼ି ଅଂକିଙ୍କ୍‌ କେତ୍‍ତଣ୍ଡ୍, “ଉଡ଼େ ନିମ୍‍ ସୁସ୍ଥ ଆଶେ ମିନ୍ଦେନି, ମେଣ୍ଡେ ପାପ୍ ମାଡ଼୍‍ମା, ଇଲୁକ୍ ନି ସେଙ୍ଗେ ଗାଟି ଅନିଷ୍ଟ ଗଟେମ୍‍ଆଦ୍‍ତେ ।”
JOH 5:15 ଆ ନାରୁଡ଼୍ ମାଲ୍‍ସ୍ ଆଞ୍ଜ୍, ବେନ ଅଂକିଙ୍କ୍‌ ସୁସ୍ଥ ମାଡ଼ିମାତ୍‍ତଣ୍ଡ୍, ଅଣ୍ଡ୍‌ ଜିସୁ ଇଞ୍ଜ ଯିହୁଦୀ ନେତାଲଡ଼୍‍କିଙ୍କ୍ କେତ୍‍ତଣ୍ଡ୍ ।
JOH 5:16 ଆଦିଙ୍କ୍ ଜିସୁ ବିଶ୍ରାମ୍‍ଦିନେତାଗ୍ ଇଲା ମାଡ଼ାନ୍ ମାଇଦିଙ୍କ୍ ଯିହୁଦୀଡ଼୍‍ ଅଂକିଙ୍କ୍‌ ତାଡ଼ନା ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ ।
JOH 5:17 ମାତର୍ ଅଣ୍ଡ୍‌ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ନା ବାବାଲ୍ ସାରେଦାମ୍ ପାଡ଼୍‍ୟି ମାଡ଼ମିନ୍ଦେନ୍, ମେଣ୍ଡେ ନାନ୍ ଆନ୍‌‍ତେ ମାଡ଼ମିନ୍ଦେନ୍ ।”
JOH 5:18 ହିଦିନ୍ ସେଙ୍ଗେ ଯିହୁଦୀଡ଼୍‍ ଅଂକିଙ୍କ୍‌ ଆୱ୍‍କାନ୍ ମାଇଦିଙ୍କ୍ ମେଣ୍ଡେ ଅଦିକ୍‌ ଚେଷ୍ଟା ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ଯେ ବିଶ୍ରାମ୍‍ଦିନେତେ ନିୟମ୍ ମାନେମ୍‍ ଆୟ୍‍ୟକଟ ମାତ୍‍ତଣ୍ଡ୍, ମାତର୍ ଆଦ୍ ଆୟ୍‍ୟ, ମାତର୍ ଇଶ୍ୱର୍‌ତିଙ୍କ୍ ନିଜେତ୍ ବାବାଲ୍ ଇଞ୍ଜ କେସ୍ ନିଜ୍‍ତିଙ୍କ୍ ଇଶ୍ୱର୍‌ତେ ତଡ଼୍ ସମାନ ମାଡ଼ମାତ୍‍ତଣ୍ଡ୍ ।
JOH 5:19 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ସତ୍ ନାନେ ମିକିଂଙ୍କ୍ କେସମିନ୍ଦେନ୍, ମାର୍‍ ନିଜେ ବାତେମିକା ମାଡ଼େ ପାର୍‍ୱଣ୍ଡ୍ । ମାର୍‍ ବାବଙ୍କ୍ ବାତେଏ ମାଡ଼ାନାଦ୍ ଉଡ଼ିତଣ୍ଡ୍, ଅଣ୍ଡ୍‌ ଆନ୍‌‍ତେ ଆଦେ ମାଡ଼ିତନ୍ । ବାତେଙ୍କ୍ ଇତ୍‍କେ ବାବାଲ୍ ବାତେଏ ମାଡ଼ିତନ୍ ମାର୍‍ ଆନ୍‌‍ତେ ଆଦେ ମାଡ଼ିତନ୍ ।
JOH 5:20 ବାତେଙ୍କ୍ ଇତ୍‍କେ ବାବାଲ୍ ମାର୍‍ଦିଙ୍କ୍ ପ୍ରେମ ମାଡ଼ିତନ୍, ମେଣ୍ଡେ ନିଜେ ବାତା ମାଡ଼ିତନ୍, ହାଉସାରେ ଅଂକିଙ୍କ୍‌ ତଅତିତଣ୍ଡ୍, ମେଣ୍ଡେ ମିଡ଼୍ ବେଦ୍‍ପୁଟୁଙ୍କ୍ ବାକ୍‍ୱା ଆଦ୍‍ତିଡ଼୍, ଅଦିନ୍‌ ମାଇଦିଙ୍କ୍ ଅଣ୍ଡ୍‌ ଅଂକିଙ୍କ୍‌ ହିଗାଙ୍କ୍ ମେଣ୍ଡେ ବେଡ଼୍‍ୟା ପାଡ଼ିୟ୍‍ ତତିତଣ୍ଡ୍ ।
JOH 5:21 ବାବାଲ୍ ବେଦ୍‍ପୁଟୁଙ୍କ୍ ଡଲି ମାନ୍ଦାନଡ଼୍‍କିଙ୍କ୍ ତେୟ୍‍ସ୍‍ମେଣ୍ଡେ ଜିୱୁ ମାଡ଼ିତନ୍, ଆଦେ ରକମ୍ ମାର୍‍ଆନ୍‌ତେ ବେନ୍ ବେନଙ୍କ୍ ଇଚ୍ଛା ମାଡ଼ିତନ୍, ଅଡ଼୍‌‍କିଂଙ୍କ୍ ଜିୱୁ ମାଡ଼ିତନ୍ ।
JOH 5:22 ମେଣ୍ଡେ, ବାବାଲ୍ ଆନ୍‌‍ତେ ବେନନାଦ୍ ବିଚାର୍ ମାଡ଼ଣ୍ଡ୍, ବିଚାର୍ ମାଡ଼ାନ୍ ମାଇଦିଙ୍କ୍ ଅଣ୍ଡ୍‌ ମାର୍‍ଦିଙ୍କ୍ ସାରେ ଅଦିକାର୍‌ ହିଦ୍‍ତଣ୍ଡ୍, ବେଲା ମାର୍‍ଦିଙ୍କ୍ ସନ୍‍ମାନ୍ ମାଡ଼ିତଡ଼୍ ।
JOH 5:23 ବେନ ମାର୍‍ଦିଙ୍କ୍ ସମ୍ମାନ୍ ମାଡ଼ଣ୍ଡ୍, ଅଣ୍ଡ୍‌ ଅନ୍‌‍ୱାଦ୍ ମାଲ୍‍ସ୍‍ୱାଦାନ୍ ବାବାଙ୍କ୍ ଆନ୍‌‍ତେ ସମ୍ମାନ୍ ମାଡ଼ଣ୍ଡ୍ ।”
JOH 5:24 “ସତ୍ ନାନ୍ ମିକିଂଙ୍କ୍ କେତୁତାନ୍, ବେନ ନା ବାକ୍ୟ କେଞ୍ଜି ନା ପ୍ରେରଣାକର୍ତ୍ତାଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ସାରେଦିନାତ୍ ଜିୱୁନ୍‍ ଦର୍ସିକି ମିନ୍ଦେଣ୍ଡ୍, ମେଣ୍ଡେ ଅଣ୍ଡ୍‌ ବିଚାରିତ ଆୟ୍‍ୟକଟ ବେଲାନ୍ ଡଲାନାଦିଙ୍କ୍ ମେଣ୍ଡନ୍‍ରକମ୍‌ ଆସ୍‌ ଜିୱୁନ୍‍ତାଗ୍‍ ନେଙ୍ଗି ମିନ୍ଦେଣ୍ଡ୍ ।
JOH 5:25 ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ହିସତ୍ ଦିନାମ୍ ୱାସମିନ୍ଦେ, ମେଣ୍ଡେ ଇଞ୍ଜେକ୍ ମିକା ହେୱ୍‍ସ୍‍ ମିନ୍ଦେ, ବେନ୍ ଦିନାମ୍ ତେ ଡଲ୍‍ତେନଡ଼୍ ଇଶ୍ୱର୍‌ତେ ମାର୍‍ଦେ ଲେଙ୍ଗ୍ କେଞ୍ଜିତଡ଼୍ ନୁ ବେନଡ଼୍ କେଞ୍ଜିତଡ଼୍, ଅଡ଼୍‌ ଜିୱୁନ୍‍ ଆଦ୍‍ତଡ଼୍ ।
JOH 5:26 ବାତେଙ୍କ୍ ଇତ୍‍କେ ବାବାଲ୍ ବେଦ୍‍ପୁଟୁଙ୍କ୍ ଜିୱୁଣ୍ଡ୍‍ତାଦ୍ ୱେଡ଼୍‍କେ, ଆଦେପୁଟୁଙ୍କ୍ ମାର୍‍ଦିଙ୍କ୍ ଆନ୍‌‍ତେ ଜିୱୁଣ୍ଡ୍‍ତାଦ୍ ୱେଡ଼୍‍କେ ଆତ୍‍ତାଙ୍କ୍ ହିଦ୍‍ତଣ୍ଡ୍ ।
JOH 5:27 ମେଣ୍ଡେ, ଅଣ୍ଡ୍‌ ନାରୁନ୍‍ପିଲେ ଆତ୍‍ତାଙ୍କ୍ ଅଣ୍ଡ୍‌ ଅଂକିଙ୍କ୍‌ ବିଚାର୍ ମାଡ଼ାନ୍ ଅଦିକାର୍‌‍ ହିତ୍‍ତଣ୍ଡ୍ ।
JOH 5:28 ହିସର୍‍ତେ ଦାଦ୍‍ରେଲ୍‍ମାଟ୍, ବାତେଙ୍କ୍ ଇତ୍‍କେ ଦିନାମ୍ ୱାଦୁତେ ବେସୁଟ୍‌ ଡଲ୍‍ତେନଡ଼୍‍ ସାରେତଡ଼୍ ଅନ୍‌‍ୱାଦ୍ ଲେଙ୍ଗ୍ କେଞ୍ଜିତଡ଼୍,
JOH 5:29 ମେଣ୍ଡେ ଅଡ଼୍‌ ସମାଦିକନ୍‍ସ୍ ତେଦିତଡ଼୍, ବେନଡ଼୍ ଲେକେତ୍‍ ପାଡ଼୍‍ୟି ମାଡ଼ିମିନ୍ଦେଡ଼୍ ଅଡ଼୍‌ ମେଣ୍ଡଅନ୍‌‍ଦାମ୍ ତେଦି ଜିୱୁଣ୍ଡ୍ ଆଦ୍‍ତଡ଼୍ । କାରାପ୍ ପାଡ଼୍‍ୟି ମାଡ଼୍‍ତେନଡ଼୍ ମେଣ୍ଡନ୍‍ନ୍ଦାମ୍ ତେଦିତଡ଼୍ ନୁ ଦଣ୍ଡ୍ ଦର୍‍କିତ୍ ।”
JOH 5:30 “ନାନ୍ ନିଜେ କ୍ଷମତାତାଗାଙ୍କ୍‍ ବାତେଏ ମାଡ଼େପାର୍‍ୱଣ୍ଡ୍; ମାତର୍ ଇଶ୍ୱର୍‌ତେ ଗଟ୍ ଲେକାମ୍‍ତେ ନାନ୍ ବିଚାର୍ ମାଡ଼ିତାନ୍, ମେଣ୍ଡେ ନାୟାଦ୍ ବିଚାର୍ ଟିକ୍, ବାତେଙ୍କ୍ ଇତ୍‍କେ ନାନ୍ ନିଜ୍‍ତେ ଇଚ୍ଛା ସାଦନ୍ ମାଡ଼ାଙ୍କ୍ ଚେଷ୍ଟା ମାଡ଼କଟ୍ ନା ପ୍ରେରଣାକର୍ତ୍ତାନ୍ ଇଚ୍ଛା ସାଦନ୍ ମାଡ଼ାଙ୍କ୍ ଆଲ୍‍ସି ମାଡ଼ିତାନ୍ ।”
JOH 5:31 “ଯଦି ନାନ୍ ନିଜର୍ ବିଷୟ୍‍ତେ ନିଜେ ସାକ୍ଷ୍ୟ ହିଦ୍‍ତାନ୍, ଆଲାଇତ୍‍କେ ନା ସାକ୍ଷ୍ୟ ସତ୍ ପ୍ରମାନିତ୍ ଆୟ୍‍ୟ ।
JOH 5:32 ବାତେଙ୍କ୍ ଇତ୍‍କେ ମେଣ୍ଡେ ୱେରଣ୍ଡ୍ ନା ବିଷୟ୍‍ତେ ସାକ୍ଷ୍ୟ ହିଦ୍‍ତଣ୍ଡ୍, ମେଣ୍ଡେ, ନା ବିଷୟ୍‍ତେ ଅନ୍‌‍ୱାଦ୍ ସାକ୍ଷ୍ୟ ସତ୍, ଆଦ୍ ନାନ୍ ପୁତ୍‍ତାନ୍ ।
JOH 5:33 ମିଡ଼୍ ଯୋହନ୍‌‌ତେ ଗାର୍‍ରେ କବର୍ ଆଦାନ୍ ନାରୁଙ୍କ୍ ରୟ୍‍ସ୍ ମିନ୍ଦେନି ନୁ ଅଣ୍ଡ୍‌ ସତ୍ ପାକେଙ୍କ୍ ସାକ୍ଷ୍ୟ ହିସମିନ୍ଦେଣ୍ଡ୍;
JOH 5:34 ବାତେଙ୍କ୍ ଇତ୍‍କେ ନାନ୍ ନାରୁଡ଼ାଗାଙ୍କ୍ ସାକ୍ଷ୍ୟ ଗ୍ରହନ୍ ମାଡ଼ନ୍, ମିକ୍‍ ବେଦ୍‍ପୁଟୁଙ୍କ୍ ପରିତ୍ରାଣ୍ ଦର୍‍କିତ୍‍ତେ, ଆଦିନ୍ ମାଇଦିଙ୍କ୍ ହିଦ୍ ସାରେ କେସମିନ୍ଦେନ୍ ।
JOH 5:35 ଯୋହନ୍‌ ୱେରଣ୍ଡ୍ ନିଡ଼୍‍ତାନାଦ୍ ନୁ ଗାଟି ୱେୟ୍‍ସ୍‍ତେ କୁପି ରକମ୍ ମାତ୍‍ତଣ୍ଡ୍, ମେଣ୍ଡେ ମିଡ଼୍ ସୁଦୁଟ୍ ସମୟ୍‍ତେ ଅନ୍‌ ୱେୟ୍‍ସିନେ ସାର୍‍ଦେ ମାଡ଼ାନ୍ ମାଇଦିଙ୍କ୍ ଇଚ୍ଛା ମାଡ଼୍‍ତିଡ଼୍ ।
JOH 5:36 ବାତେଙ୍କ୍ ଇତ୍‍କେ ଯୋହନ୍‌‌ତେ ସାକ୍ଷ୍ୟ ୱିଡ଼୍‍ସି ନାୟାଦ୍ ଇସରେ ସାକ୍ଷ୍ୟ ମିନ୍ଦେ, ବାତେଙ୍କ୍ ଇତ୍‍କେ ବାବାଲ୍ ନାକିଂଙ୍କ୍ ବେନ୍ ପାଡ଼ିୟି ତେର୍‍ସ୍‍ପାଙ୍କ୍ ହିସମିନ୍ଦେଣ୍ଡ୍, ବେନ୍‍ସାରେ ପାଡ଼ିୟି ନାନ୍ ମାଡ଼ମିନ୍ଦେନ୍, ବାବାଲ୍ ନାକିଂଙ୍କ୍ ରୟ୍‍ସ୍ ମିନ୍ଦେଣ୍ଡ୍ ଇଞ୍ଜ ହାଉସାରେ ନା ବିଷୟ୍‍ତେ ସାକ୍ଷ୍ୟ ହିସମିନ୍ଦେ ।
JOH 5:37 ମେଣ୍ଡେ, ବେନ ବାବାଲ୍ ନାକିଂଙ୍କ୍ ରୟ୍‍ସ୍ ମିନ୍ଦେଣ୍ଡ୍, ଅଣ୍ଡ୍‌ ନା ବିଷୟ୍‍ତେ ସାକ୍ଷ୍ୟ ଇସ୍‌‍ମିନ୍ଦେନ୍ । ମିଡ଼୍ ବେସୁଙ୍କ୍‍କେ ବା ଅନ୍‌‍ୱାଦ୍ ଲେଙ୍ଗ୍ କେଞ୍ଜ୍‍ୱିଡ଼୍ ବା ଅନ୍‌‍ୱାଦ୍ ମକମ୍ ଉଡ଼୍‍ୱିଡ଼୍‍ ।
JOH 5:38 ମେଣ୍ଡେ ଅନ୍‌‍ୱାଦ୍ ବାକ୍ୟତିଙ୍କ୍‌ ମିଇ ହୃଦୟ୍‍ତାଗ୍ ପଡ଼ିୟ୍ ହିୱିଡ଼୍‍, ବାତେଙ୍କ୍ ଇତ୍‍କେ ଅଣ୍ଡ୍‌ ବେନଙ୍କ୍ ରହତଣ୍ଡ୍, ଅଂକିଙ୍କ୍‌ ମିଡ଼୍ ବିଶ୍ୱାସ୍ ମାଡ଼୍‍ୱିଡ଼୍ ।
JOH 5:39 ମିଡ଼୍ ଦର୍ମଶାସ୍ତ୍ରତିଙ୍କ୍ ମେହେକ ମିନ୍ଦେଡ଼ି, ବାତେଙ୍କ୍ ଇତ୍‍କେ ଆଗାଙ୍କ୍ ସାରେଦିନାତ୍ ଜିୱୁନ୍‍ ଦର୍‍କିତ୍‍ତେ ଇଞ୍ଜ ହେର୍କା ମାଡ଼ମିନ୍ଦେଡ଼ି, ମେଣ୍ଡେ, ଆଦ୍ ଦର୍ମଶାସ୍ତ୍ର ନା ବିଷୟ୍‍ତେ ସାକ୍ଷ୍ୟ ହିସମିନ୍ଦେ ।
JOH 5:40 ବାତେଙ୍କ୍ ଇତ୍‍କେ ମିଡ଼୍ ଜିୱୁନ୍‍ ଦର୍‍କାନ୍ ମାଇଦିଙ୍କ୍ ନା ଗାର୍‍ରେ ୱାଦାଙ୍କ୍ ଇଚ୍ଛା ମାଡ଼୍‍ୱିଡ଼୍ ।”
JOH 5:41 “ନାନ୍ ନାରୁଡ଼ାଗାଙ୍କ୍ ଗୌରବ୍ ଆଦାନଙ୍କ୍ ଇଚ୍ଛା ମାଡ଼ନ୍‌,
JOH 5:42 ମାତର୍ ନାନ୍ ମିକିଂଙ୍କ୍ ପୁଞ୍ଜ୍ ମିନ୍ଦେନ୍, ମିଡ଼୍ ବେଦ୍ ରକମ୍ ନାରୁଡ଼ି, ମିଇ ଜିୱୁତେ ଲୋପେ ଇଶ୍ୱର୍‌ତେ ସେଙ୍ଗେ ପ୍ରେମ ଇଲା ।
JOH 5:43 ନାନ୍ ନା ବାବାନ୍ ପେଦେର୍‍ତେ ୱାସ୍‍ମିନ୍ଦେନ୍‍, ମେଣ୍ଡେ ମିଡ଼୍ ନାକିଂଙ୍କ୍ ଗ୍ରହନ୍ ମାଡ଼୍‍ୱିଡ଼୍; ମେଣ୍ଡେଅର୍‍ତୁନ୍ ଯଦି ନିଜେତ୍ ପେଦେର୍‍ତେ ୱାଦ୍‍ତଣ୍ଡ୍, ଆଲାଇତ୍‍କେ ମିଡ଼୍ ଅଂକିଙ୍କ୍‌ ଗ୍ରହନ୍ ମାଡ଼ୁତିଡ଼୍ ।
JOH 5:44 ମିଡ଼୍ ବେଦ୍‍ପୁଟୁଙ୍କ୍ ନାକିଂଙ୍କ୍ ବିଶ୍ୱାସ୍ ମାଡ଼୍‍ପାର୍‍ଦ୍‍ତିଡ଼୍‍ ? ମିଡ଼୍ ନିଜେ ନିଜେତାଗାଙ୍କ୍ ଗୌରବ୍ ଗ୍ରହନ୍ ମାଡ଼ମିନ୍ଦେଡ଼ି, ମେଣ୍ଡେ ୱେରଡ଼୍ ମାତର୍ ଇଶ୍ୱର୍‍ତାଗାଙ୍କ୍‍ ବେନ୍ ଗୌରବ୍, ଆଦ୍ ଦର୍‍ସ୍କାଙ୍କ୍ ଚେଷ୍ଟା ମାଡ଼୍‍ୱିଡ଼୍ ।
JOH 5:45 ନାନ୍ ଯେ ବାବାନ୍ ମୁନେ ମିଇ ବିରୁଦ୍‍ତେ ଅବିଯଗ୍‍ ମାଡ଼ିତାନ୍, ଇଦ୍ ହେର୍କା ମାଡ଼୍‍ମାଟ୍; ବେନ୍ ମୋଶାନାଗ୍‍ ମିଡ଼୍ ଆଶେ ନେହେସ୍ ମିନ୍ଦେଡ଼ି, ଅଣ୍ଡ୍‌ ମିଇ ବିରୁଦ୍ଦ୍‌ତେ ଅବିଯଗ୍ ମାଡ଼ମିନ୍ଦେଣ୍ଡ୍ ।
JOH 5:46 ମିଡ଼୍ ଯଦି ମୋଶାଙ୍କ୍ ବିଶ୍ୱାସ୍ ମାଡ଼େଡ଼ି, ଆଲାଇତ୍‍କେ ନାକିଂଙ୍କ୍ ବିଶ୍ୱାସ୍ ମାଡ଼େଡ଼ି, ବାତେଙ୍କ୍ ଇତ୍‍କେ ଅଣ୍ଡ୍‌ ନା ବିଷୟ୍‍ତେ ଲେକିମିନ୍ଦେଣ୍ଡ୍ ।
JOH 5:47 ବାତେଙ୍କ୍ ଇତ୍‍କେ ମିଡ଼୍ ଯଦି ମୋଶାଲ୍ ଲେକ୍‍ତାଦ୍‍ ବାକ୍ୟତିଙ୍କ୍ ବିଶ୍ୱାସ୍ ମାଡ଼୍‍ୱିଡ଼୍, ଆଲାଇତ୍‍କେ ବେଦ୍‍ପୁଟୁଙ୍କ୍ ନାୟାଦ୍ ବାକ୍ୟ ବିଶ୍ୱାସ୍ ମାଡ଼ିତିଡ଼୍ ?”
JOH 6:1 ତାନ୍‍ପେର୍କେ ଜିସୁ ଗାଲିଲି ବେଡ଼େଡ଼୍‍ତେ, ଇତ୍‍କେ ତିବିରିୟା ବେଡ଼୍‍ମ୍‍ତିଙ୍କ୍ ୱେୟସ୍ ଆପାକ୍ ଆତ୍‍ତଣ୍ଡ୍ ।
JOH 6:2 ମେଣ୍ଡେ, ଅଣ୍ଡ୍‌ ରଗିନାରୁନ୍‍ତେ ସେଙ୍ଗେ ବେନ୍ ଆଶର୍ଯ୍ୟ ପାଡ଼ିୟି ମାଡ଼ମାତ୍‍ତଣ୍ଡ୍, ଆଉସାରେ ଉଡ଼ି ନାର୍‍ଗେ ନାରୁଡ଼୍ ଅନ୍‌‍ପେର୍କେ ତାକାନଙ୍କ୍‍ ପସ୍‍ପ୍‍ତ୍‍ତଡ଼୍ ।
JOH 6:3 ଆସୁଟେ ଜିସୁ ମେଟେତ୍‍ ପର୍‍ର ଆଞ୍ଜ୍ ନିଜେତ୍ ଶିଷ୍ୟଡ଼୍ ତ ଆଗେ କୁଦ୍‍ତଣ୍ଡ୍ ।
JOH 6:4 ଆସୁଟେ ଯିହୁଦିଡ଼ାଦ୍‍ ନିସ୍ତାର୍ ପାଣ୍ଡୁମ୍ ଗାର୍‍ରେ ଏୱୁସ୍ ମାତ୍‍ତେ ।
JOH 6:5 ମେଣ୍ଡେ, ଜିସୁ ନାର୍‍ଗେ ନାରୁଡ଼୍ ତାନ୍ ଗାର୍‍ରେ ୱାଦାନାଦ୍ ଉଡ଼ି ପିଲିପ୍‍ତିଙ୍କ୍ କେତ୍‍ତଣ୍ଡ୍, “ଇଡ଼୍ ତିନ୍ଦାନ୍ ମାଇଦିଙ୍କ୍ ମାନାଡ଼୍ ବେଗାଙ୍କ୍ ନାର୍‍ଗେ ରୁଟି ଆସିତାଡ଼୍ ?”
JOH 6:6 ବାତେଙ୍କ୍ ଇତ୍‍କେ ଅଣ୍ଡ୍‌ ପିଲିପ୍‍ତିଙ୍କ୍ ପରିକ୍ଷା ମାଡ଼୍‍ତେ ଲେକାମ୍ ଇଲା କେତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ବାତେଏ ମାଡ଼ାଙ୍କ୍ ଆଞ୍ଜମିନ୍ଦେଣ୍ଡ୍, ଆଦ୍ ଅଣ୍ଡ୍‌ ନିଜେ ପୁଞ୍ଜ୍‍ମାତ୍‍ତଣ୍ଡ୍ ।
JOH 6:7 ପିଲିପ୍ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ସାରେତଡ଼୍ ସୁଦୁର୍ ପାହେମ୍‍ଆଦାନ୍‍ ମାଇଦିଙ୍କ୍ ଇଡ଼୍ ସେଙ୍ଗେ ରେଣ୍ଡ୍ ୱାନ୍ଦା ଦିନାରୀତେ ରୂଟି ଆସର୍‍ ଆୟ୍‍ୟ ।”
JOH 6:8 ଶିମୋନ୍ ପିତର୍‍ତେ ଦାଦାଲ୍ ଆନ୍ଦ୍ରିୟ ପେଦେର୍‍ତଣ୍ଡ୍ ଅଡ଼୍‌ ଶିଷ୍ୟଡ଼୍ ଲୋପେଙ୍କ୍ ୱେରଣ୍ଡ୍ ଅଂକିଙ୍କ୍‌ କେତ୍‍ତଣ୍ଡ୍,
JOH 6:9 “ଇଗ୍ ୱେରଣ୍ଡ୍ ପେକାଲ୍‍ ମିନ୍ଦେଣ୍ଡ୍, ଅନ୍‌‍ଆଗେ ଏଇଙ୍ଗ୍ ରୂଟି ନୁ ରେଣ୍ଡ୍ ୱାୱ୍‍ତାଉ କିକେ ମିନ୍ଦେ, ବାତେଙ୍କ୍ ଇତ୍‍କେ ଇସର୍ ନାରୁଡ଼୍ ମାଇଦିଙ୍କ୍ ଆୱ୍ ଆସର୍‌ ଆୟ୍‍ୟ ।”
JOH 6:10 ଜିସୁ ଶିଷ୍ୟଡ଼୍‍କ୍ କେତ୍‍ତଣ୍ଡ୍, “ନାରୁଡ଼୍‍କିଂଙ୍କ୍ କୁସ୍‍ପାଟ୍‍ ।” ଆଦ୍ ପଡ଼ିୟେତାଗ୍ ଗାଟି ଗାଡ଼୍ ମାତ୍‍ତେ, ଆଦ୍ ଗାଡ଼୍ ପର୍‍ର ସାରେତଡ଼୍ କୁଦ୍‍ତଡ଼୍ । ସାରେ ଏଇଙ୍ଗ୍ ହଜାର୍‌ ନାରୁଡ଼୍ ଆଗେ କୁଦ୍‍ତଡ଼୍ ।
JOH 6:11 ଆସୁଟେ ଜିସୁ ଆ ରୂଟିଙ୍କ୍ ଅସ୍ ଦନ୍ୟବାଦ୍ ଇସ୍ କୁଦିମାନ୍ଦାନ୍ ନାରୁଡ଼୍‍କିଂଙ୍କ୍ ଆୱ୍ ତୁଉସିତ୍‍ତଣ୍ଡ୍‌, ଆଦେ ପୁଟୁଙ୍କ୍ କିକେ ଆନ୍‌‍ତେ ତୁଉସିତ୍‍ତଣ୍ଡ୍‌, ଅଡ଼୍‌ ବେସର୍ ଇଚ୍ଛା ମାଡ଼୍‌ତଡ଼୍‌ ଆସର୍ ଇତ୍‍ତଡ଼୍ ।
JOH 6:12 ମେଣ୍ଡେ, ଅଡ଼୍‌ ତିଞ୍ଜ୍ ପାଞ୍ଜ୍‍ତେ ପେର୍‍କେ, ଜିସୁ ତାନ୍ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍, “ମିଗ୍‍ଲି ମାନ୍ଦାନ୍ ଉର୍‍ଙ୍ଗ୍‍ତେ ଦୁଡ଼ାକିଂଙ୍କ୍ ୱେରଡ଼୍ ଆଗେ ଗୁଡ଼୍‍ପାଟ୍‍ ।” ବେଦ୍‍ପୁଟୁଙ୍କ୍ ବାତେବା ନଷ୍ଟ ଆୟ୍‍ମାକି,
JOH 6:13 ଆସୁଟେ ଅଡ଼୍‌ ହାୱୁସାରେ ୱେରଡ଼୍ ଆଗେ ଗୁଡ଼୍‍ପ୍‍ତଡ଼୍, ମେଣ୍ଡେ ନାରୁଡ଼୍‍ତିତ୍‍ ପେର୍‍କେ ଏଇଙ୍ଗ୍ ରୂଟିନାଗାଙ୍କ୍ ବେନା ଉର୍‍ଙ୍ଗ୍‍ତେ ଦୁଙ୍କ୍‍କାକିଂଙ୍କ୍ ମିଗ୍‍ଲି ମାତ୍‍ତା, ଆଗାଙ୍କ୍ ଅଡ଼୍‌ ବାର୍‍ଟାନ୍ ଜୁଡ଼ିନାଗ୍‍ ବର୍ତ୍ତି ମାଡ଼୍‍ତଡ଼୍ ।
JOH 6:14 ଆଗେ ମାନ୍ଦାନ୍ ନାରୁଡ଼୍ ଜିସୁ ମାଡ଼୍‍ତେ ବାକ୍‍ୱା ପାଡ଼ିୟି ଉଡ଼ି କେତ୍‍ତାଙ୍କ୍ ପସ୍ପ୍‍ତ୍‍ତଡ଼୍, “ଜଗତ୍‍ତାଗେ ବେନ୍ ବାବବାଦିଡ଼୍ ୱାଦାନାଦ୍ ମାତ୍‍ତେ, ଇଣ୍ଡ୍ ନିଜାମ୍ ଅଣ୍ଡେ ।”
JOH 6:15 ଆଦିଙ୍କ୍ ନାରୁଡ଼୍ ଅଂକିଙ୍କ୍‌ ଶକ୍ତିତେ ପୟ୍‍ସ୍ ରାଜା ମାଡ଼ାନ୍ ମାଇଦିଙ୍କ୍ ଇଚ୍ଛା ମାଡ଼ୁତଡ଼୍, ଇଦ୍ ପୁଞ୍ଜ୍ ଜିସୁ ମେଣ୍ଡନ୍‍ନ୍ଦାମ୍ ୱେରଣ୍ଡେ ମେଟେତାଗ୍ ପେୟିସ୍ ଆତ୍‍ତଣ୍ଡ୍ ।
JOH 6:16 ଆଦ୍‍ଦିନେ ମୁଲ୍‍ପୁଟ୍ ଆତ୍‍ତାଙ୍କ୍ ଜିସୁନ୍ ଶିଷ୍ୟଡ଼୍ ସମୁଦ୍ରତାଗ୍‍ ଆତଡ଼୍,
JOH 6:17 ମେଣ୍ଡେ ଓଡ୍‍ତାଗ୍‍ କୁଦି ସମୁଦ୍ରତେ ଆପ୍‍ପାକେ କପର୍ନାହୁମ୍ ପାକେ ଆଦାଙ୍କ୍ ପସ୍ପ୍‍ତ୍‍ତଡ଼୍ । ଇକାଡ଼୍ ଆତ୍‍ତେ, ମେଣ୍ଡେ ଜିସୁ ଆସୁଙ୍କ୍‍ ଯାକ ଅଡ଼୍‌ ଗାର୍‍ରେ ୱାଡ଼କଟ ମାତ୍‍ତଣ୍ଡ୍,
JOH 6:18 ମେଣ୍ଡେ ଗାଟି ଗାଲ୍‍ୱାଦାନ୍‍ ମାଇଦିଙ୍କ୍ ବେଡ଼େମ୍‍ତାଗ୍ ଗାହାଙ୍କ୍‍କୁଡ଼୍ ତେଦ୍‍ତେ ।
JOH 6:19 ଶିଷ୍ୟଡ଼୍ ଇଲ୍‍କେତାଗ୍ ଏଇଙ୍ଗ୍ ବା ଆରୁ କିଲମିଟର୍ ଜେକେ ଓଡା ଆତ୍‍ତେୱେୟ୍, ଜିସୁ ଏର୍‍ଦା ପର୍‍ର ତାକି ଓଡେତ୍ ଗାର୍‍ରେ ୱାସମାନ୍ଦାନାଦ୍‍ ଉଡ଼ି ୱେର୍‍ତଡ଼୍‍ ।
JOH 6:20 ବାତେଙ୍କ୍ ଇତ୍‍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଇଣ୍ଡ୍ ତ ନାନ୍, ୱେରେ ମାଟ୍‍ ।”
JOH 6:21 ତାନ୍‍ପେର୍କେ ଅଡ଼୍‌ ଅଂକିଙ୍କ୍‌ ଓଡେତେ ଆଦାନଙ୍କ୍ ଇଚ୍ଛା ମାଡ଼୍‍ତଡ଼୍, ମେଣ୍ଡେ ଅଡ଼୍‌ ବେନ୍ ପଡ଼ିୟେତାଗ୍ ଆଞ୍ଜମାତ୍‍ତଡ଼୍, ଓଡ୍‍ ସାଙ୍ଗେ ସାଙ୍ଗେ ଆଦ୍ ଆଞ୍ଚିନାଗ୍‌ ହେୱ୍‍ତେ ।
JOH 6:22 ଆଦ୍ ପଡ଼ିୟେତାଗ୍ ମାତର୍ ୱେରଡ଼୍ ଓଡା ମାତ୍‍ତା, ମେଣ୍ଡେ ଆଗେ ଯେ ଜିସୁ ତାନ୍ ଶିଷ୍ୟଡ଼୍ ତଡ଼୍ ଅନ୍‌‍ୱେ ମାତ୍‍ତଣ୍ଡ୍, ମାତର୍ ତାନ୍ ଶିଷ୍ୟଡ଼୍ ଆଞ୍ଜ୍ ମାତ୍‍ତଡ଼୍, ଇଦ୍ ବେନ୍ ନାରୁଡ଼୍ ମେଣ୍ଡନ୍‍ଦିନେ ବେଡ଼େମ୍‍ତେ ମେଣ୍ଡନ୍ ପାକେ ନିସ୍ ମାତ୍‍ତଡ଼୍, ଅଡ଼୍‌ ଉଡ଼ିମାତ୍‍ତଡ଼୍ ।
JOH 6:23 ବେଗେ ଜିସୁ ପ୍ରାର୍ତନା ମାଡ଼ି ନାରୁଡ଼୍‍କିଂଙ୍କ୍ ରୂଟି ତିନ୍ଦାନଙ୍କ୍ ଇସ୍‍ମାତ୍‍ତଣ୍ଡ୍, ଆଦ୍ ପଡ଼୍‍ୟିତାଗ୍ ତିବିରୀୟାତେ ବେସ୍‌କ୍ ଓଡା ୱାସ୍ ହେୱୁତା;
JOH 6:24 ଜିସୁ ନୁ ତାନ୍ ଶିଷ୍ୟଡ଼୍ ଆଗେ ଇଲ୍‍ଲେଡ଼୍, ଇଦ୍ ବେସୁଙ୍କ୍‍ ନାରୁଡ଼୍ ଉଡ଼୍‍ତଡ଼୍, ଆସୁଟେ ଅଡ଼୍‌ ହାଉସାରେ ଓଡ୍‍ତାଗ୍‍ ତାରି ଜିସୁଙ୍କ୍ ମେହ୍‍କ କପର୍ନାହୁମ୍ ତାଗ୍ ଆଦ୍‍ତଡ଼୍ ।
JOH 6:25 ମେଣ୍ଡେ, ଅଡ଼୍‌ ବେଡ଼େମ୍‍ତେ ଆପାକ୍ ଜିସୁଙ୍କ୍ ଉଡ଼ି ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ହୋ ଗୁରୁ ନିମ୍‍ ବେସୁଙ୍କ୍‍ ହିଗ୍ ୱାତ୍‍ତିନ୍ ?”
JOH 6:26 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ଇତ୍‌ତଣ୍ଡ୍‌, “ସତ୍ ନାନ୍ ମିକିଂଙ୍କ୍ କେତୁତାନ୍, ବାକ୍‍ୱା ପାଡ଼୍‍ୟି ଉଡ଼୍‍ତାଙ୍କ୍ ଯେ ମିଡ଼୍ ନାକିଂଙ୍କ୍ ମେହ୍‍କୁତିଡ଼୍, ଆଦ୍ ଆୟ୍‍ୟ, ମାତର୍ ରୋଟି ତିଞ୍ଜ୍ ପଟ୍‍ଟେ ନିଣ୍ଡ୍‍ତାଙ୍କ୍ ନାକିଂଙ୍କ୍ ମେହେକୁତିଡ଼୍ ।
JOH 6:27 ବେନ୍ କାଦି ତେରିତେ, ଆଦିନ୍ ମାଇଦିଙ୍କ୍ କଷ୍ଟ ମାଡ଼୍‍ମାଟ୍ । ବେଲାନ୍ ବେନ୍ କାଦି ସାରେଦିନାତ୍ ଜିୱୁନ୍ ଇଦ୍‍ତଣ୍ଡ୍‌, ଆଦିନ୍ ସେଙ୍ଗେ କଷ୍ଟ ମାଡ଼ାଟ୍ । ଆଦ୍ କାଦି ନାରୁନ୍‍ପିଲେ ମିକିଂଙ୍କ୍ ହିଦ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଂକିଙ୍କ୍‌ ବାବାଲ୍ ଇଶ୍ୱର୍ ଇଦ୍ ଅଦିକାର୍‌ ହିତ୍‍ତଣ୍ଡ୍ ।”
JOH 6:28 ଆସୁଟେ ଅଡ଼୍‌ ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ଇଶ୍ୱର୍ ବାତ୍ ଇଚ୍ଛା ମାଡ଼ୁତଣ୍ଡ୍, ଆଦ୍ ପାଡ଼୍‍ୟି ମାଡ଼ାଙ୍କ୍ ମାକିଂଙ୍କ୍ ବାତ୍ ମାଡ଼୍ ୱେୟ୍‍ତିତ୍ ?”
JOH 6:29 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ବେନଙ୍କ୍ ଇଶ୍ୱର୍ ରୟ୍‍ସ୍ ମିନ୍ଦେଣ୍ଡ୍, ଅନ୍‌‍ଆଗେ ବିଶ୍ୱାସ୍ ମାଡ଼ାନ୍ ତଡ଼୍ ମିଡ଼୍ ଆଦ୍ ମାଡ଼୍ ପାର୍ଦିତିଡ଼୍ ।”
JOH 6:30 ଆସୁଟେ ଅଡ଼୍‌ ଜିସୁଙ୍କ୍ ପାଚ୍ରାମାଡ଼୍‍ତଡ଼୍, “ଆଲେକେ ନିମ୍‍ ଚିହିହ୍ନେ ରକମ୍ ବାତେଏ ମାଡ଼ମିନ୍ଦେନି ଯେ, ଆଦ୍ ଉଡ଼ି ମାମ୍ ନିକିଂଙ୍କ୍ ବିଶ୍ୱାସ୍ ମାଡ଼୍ ପାର୍‍ଦ୍‍ତମ୍‍ ? କେଲାଟ୍ ବାତେଏ ମାଡ଼୍ ପାର୍‍ଦ୍‍ତିଡ଼୍ ?
JOH 6:31 ମାନ୍‍ ଆନିଦାଦିଡ଼୍ ଉସ୍କ ନେଲ୍‍ଦାଗ୍ ମାନ୍‍ନା ତିଞ୍ଜମାତ୍‍ତଡ୍‍, ବେଦ୍‍ପୁଟୁଙ୍କ୍ ଶାସ୍ତ୍ରତାଗ୍ ଲେକାମିନ୍ଦେ, ତିନ୍ଦାନ୍ ମାଇଦିଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ସ୍ୱର୍ଗତାଗାଙ୍କ୍ ଇଦ୍ କାଦି ହିତ୍‍ତଣ୍ଡ୍ ।”
JOH 6:32 ଆସୁଟେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେସ୍ ମିନ୍ଦେନ୍, ବାତ୍ ମୋଶାଲ୍ ମିକିଂଙ୍କ୍ ହିତ୍‍ତଣ୍ଡ୍ ଆଦ୍ ସ୍ୱର୍ଗତାଦ୍ କାଦି ଆୟ୍‍ୟ, ବାତେଙ୍କ୍ ଇତ୍‍କେ ନା ବାବାଲ୍ ମିକିଂଙ୍କ୍ ସ୍ୱର୍ଗତାଗାଙ୍କ୍ ଆଦ୍‍ରକତ୍ କାଦି ହିଦ୍‍ତଣ୍ଡ୍;
JOH 6:33 ବେନ କାଦି ସ୍ୱର୍ଗତାଗାଙ୍କ୍ ଡିଗି ଜଗତ୍‍ତିଙ୍କ୍ ଜିୱୁନ୍‍ ବେଡ଼୍‍ୟାଦ୍‍ ମାଡ଼ିତେ, ଆଦ୍ ଇଶ୍ୱର୍‌ତେ କାଦି ।”
JOH 6:34 ଅଡ଼୍‌ ଜିସୁଙ୍କ୍ କେତ୍‍ତଡ଼୍, “ପ୍ରବୁ, ସାର୍‍ଦାମ୍‍ ମାକିଂଙ୍କ୍ ହିସତେ କାଦି ହିମ୍ ।”
JOH 6:35 ଆସୁଟେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନେ ଆଦ୍ ଜିୱେମାନ୍ଦାନ୍ କାଦି; ବେନ ନା ଗାର୍‍ରେ ୱାଦ୍‍ତଣ୍ଡ୍ ଅଣ୍ଡ୍‌ ବେସୁଙ୍କେ କାର୍‍ୱିନ୍ ଆୟ୍‍ୟଣ୍ଡ୍, ମେଣ୍ଡେ ବେନ ନାୟାଗେ ବିଶ୍ୱାସ୍ ମାଡ଼ିତନ୍, ଅଂକିଙ୍କ୍‌ ବେସୁଙ୍କେ ବା ଏର୍‍ ହୁନ୍ଦ୍‍ୱାହ୍‍ଓ ।
JOH 6:36 ବାତେଙ୍କ୍ ଇତ୍‍କେ ମିଡ଼୍ ନାକିଂଙ୍କ୍ ଉଡ଼୍‍କେ ମିକା ବିଶ୍ୱାସ୍ ମାଡ଼୍‍ୱିଡ଼୍, ଇଦ୍ ନାନ୍ ମିକିଂଙ୍କ୍ କେତୁତାନ୍ ।
JOH 6:37 ବାବାଲ୍ ବେନଡ଼୍‍କିଂଙ୍କ୍ ନାକିଂଙ୍କ୍ ଦାନ ମାଡ଼ିତନ୍, ଅଡ଼୍‌ ନା ଗାର୍‍ରେ ୱାଦ୍‍ତଡ଼୍‍; ମେଣ୍ଡେ, ବେନ ନା ଗାର୍‍ରେ ୱାଦ୍‍ତଣ୍ଡ୍, ଅଂକିଙ୍କ୍‌ ନାନ୍ ବେଦ୍‍ଲେକାମ୍ ବାୟିଦେ ପେସ୍‍ପିୱନ୍‍;
JOH 6:38 ବାତେଙ୍କ୍ ଇତ୍‍କେ ନାନ୍ ନିଜେତ୍ ଇଚ୍ଛାତିଙ୍କ୍ ସାଦନ୍‍ ମାଡ଼ାଙ୍କ୍ ୱାଡ଼ନ୍‍ ବେଲାନ୍ ନା ପ୍ରେରଣାକର୍ତ୍ତାନ୍ ଇଚ୍ଛା ସାଦନ୍‍ ମାଡ଼ାଙ୍କ୍ ସ୍ୱର୍ଗତାଗାଙ୍କ୍ ୱାସ୍‍ମିନ୍ଦେନ୍‍ ।
JOH 6:39 ମେଣ୍ଡେ, ନା ପ୍ରେରଣାକର୍ତ୍ତାଲ୍‍ ବେନ୍ ସାର୍‍ତଡ଼୍‍କିଙ୍କ୍ ନାକିଂଙ୍କ୍ ଦାନ ମାଡିସ୍‍ମିନ୍ଦେଣ୍ଡ୍, ଅଡ଼୍‌ ଲୋପେଙ୍କ୍ ବେନଙ୍କ୍ ମେଣ୍ଡେ ବେଦ୍‍ପୁଟୁଙ୍କ୍ ନାନ୍ ହରାମାଡ଼କଟ୍‍ ବେଲାନ୍ ଶେଷ ଦିନ୍‍ତେ ଅଡ଼୍‌‍କିଂଙ୍କ୍ ମେଣ୍ଡେନ୍‍ଦାମ୍ ବାଦ୍‍କିତାନ୍, ଇଦ୍ ଅନାଦ୍‌ ଇଚ୍ଛା ।
JOH 6:40 ବାତ୍‍ତେଙ୍କ୍ ଇତ୍‍କେ ବାବାଲ୍ ଇଚ୍ଛା ମାଡ଼ିତନ୍ ବେନଆଇ ମାର୍‍ଦିଙ୍କ୍ ଦର୍ଶନ୍ ମାଡ଼ି ଅନ୍‌‍ଆଗେ ବିଶ୍ୱାସ୍ ମାଡ଼ିତନ୍, ଅଡ଼୍‌ ସାରେଦିନାତ୍ ଜିୱୁନ୍‍ ଦର୍‍କିତ୍‍, ଆଦିନ୍ ମାଇଦିଙ୍କ୍ ଶେଷ ଦିନ୍‍ତେ ନାନ୍ ସାରେତଡ଼୍‌କିଂଙ୍କ୍ ମେଣ୍ଡଅନ୍‌‍ଦାମ୍ ଜିୱୁଣ୍ଡ୍ ମାଡ଼ିତାନ୍ ।”
JOH 6:41 ଜିସୁ ନାନ୍ ସ୍ୱର୍ଗକଞ୍ଜ୍ ୱାସ୍‍ମାନ୍ଦାନ୍ କାଦି ଇଞ୍ଜ କେତ୍‍ତାଙ୍କ୍, ଯିହୁଦିଡ଼୍ ଅନ୍‌ ବିରୁଦ୍ଦ୍‌ତେ ନିନ୍ଦ୍ ମାଡ଼ି କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍ ।
JOH 6:42 ଆଗାଙ୍କ୍ ଅଡ଼୍‌ କେତ୍‍ତଡ଼୍, “ହିଣ୍ଡ୍ ବାତେଏ ଯୋଷେପ୍‍ତେ ମାର୍‍ ଜିସୁ ଆୟ୍‍ୟଣ୍ଡ୍ କି ? ମେଣ୍ଡେ ମାମ୍‍ମେ ତାମ୍ ୟାୟ୍‍ବାବାଙ୍କ୍ ପୁତ୍‍ତମ୍, ଆଲେକ୍ ନାନ୍ ସ୍ୱର୍ଗକଞ୍ଜ୍ ୱାସ୍‍ ମିନ୍ଦେଣ୍ଡ୍ ଇଞ୍ଜ ଅଣ୍ଡ୍‌ ଇଞ୍ଜେ ବେଦ୍ ପୁଟୁଙ୍କ୍ କେସମିନ୍ଦେଣ୍ଡ୍ ?”
JOH 6:43 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନିଜେତ୍ ନିଜେତ୍ ଲୋପ୍ ନିନ୍ଦ୍ ମାଡ଼୍‍ମାଟ୍ ।
JOH 6:44 ନା ମାଲ୍‍ସ୍ ୱାଦାନ୍ ବାବାଲ୍ ବେନଙ୍କ୍ ତିଆର୍ ମାଡ଼ିତନ୍, ମାତର୍ ଅଣ୍ଡ୍‌ ନା ଗାର୍‍ରେ ୱାଦ୍‍ପାର୍‍ଦ୍‍ ତଣ୍ଡ୍, ମେଣ୍ଡେ ନାନ୍ ଶେଷ ଦିନ୍‍ତେ ମେଣ୍ଡଅନ୍‌‍ଦାମ୍ ଅଂକିଙ୍କ୍‌ ଜିୱୁଣ୍ଡ୍ ମାଡ଼ିତାନ୍ ।
JOH 6:45 ବାବବାଦିଡ଼୍ ଦର୍ମଶାସ୍ତ୍ରତାଗ୍ ଲେକିମିନ୍ଦେଡ଼୍, ସାରେତଡ଼୍ ମାତର୍ ଇଶ୍ୱର୍‌ତେ କନ୍‍ସ୍ ଶିକ୍ଷା ଦର୍ସିକି ଆଦ୍‍ତଡ଼୍ । ବେନଆଇ ବାବାନାଗାଙ୍କ୍ କେଞ୍ଜି ଶିକ୍ଷା ଲାବ୍ ମାଡ଼ିତନ୍, ଅଣ୍ଡ୍‌ ନା ଗାର୍‍ରେ ୱାଦ୍‍ତଣ୍ଡ୍ ।
JOH 6:46 ଇଦିନ୍ ଇତ୍‍କେ ଆୟ୍‍ୟ ଯେ ବେନ ବାବାଙ୍କ୍ ଉଡ଼ିମିନ୍ଦେଣ୍ଡ୍, ବେନ ଇଶ୍ୱର୍‌ତାଗାଙ୍କ୍ ୱାସ୍‍ମିନ୍ଦେଣ୍ଡ୍, ଅଣ୍ଡ୍‌ ମାତର୍ ବାବାଙ୍କ୍ ଉଡ଼ିମିନ୍ଦେଣ୍ଡ୍ ।
JOH 6:47 ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ବେନ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ସାରେଦିନାତ୍ ଜିୱୁନ୍ ଦର୍ସିକି ମିନ୍ଦେଣ୍ଡ୍ ।
JOH 6:48 ନାନ୍ ଜିୱୁମାନ୍ଦାନ୍ କାଦି ।
JOH 6:49 ମିଇ ଆନିଦାଦିଡ଼୍ ଉସ୍କ ନେଲ୍‍ଦାଗ୍ ମାନ୍‍ନା ତିତ୍‍ତଡ଼୍ ମିକା ଅଡ଼୍‌ ଡଲ୍‍ତଡ଼୍ ।
JOH 6:50 ବାତେଙ୍କ୍ ଇତ୍‍କେ ବେନ୍ କାଦି ସ୍ୱର୍ଗତାଗାଙ୍କ୍ ୱାଦ୍‍ତେ ଆଦିଙ୍କ୍ ବେନ ତିନ୍‍ତଣ୍ଡ୍ ଅଣ୍ଡ୍‌ ସାରେଦିନାତ୍ ଜିୱୁଣ୍ଡ୍ ଜିୱେଦର୍‍କିତ୍ ।
JOH 6:51 ନାନ୍ ସ୍ୱର୍ଗତାଗାଙ୍କ୍ ୱାସ୍‍ମାନ୍ଦାନ୍ ଆଦ୍ ଜିୱେମାନ୍ଦାନ୍ କାଦି; ବେନ ହିଦ୍ କାଦି ତିନ୍‍ତଣ୍ଡ୍, ଅଣ୍ଡ୍‌ ଅନନ୍ତକାଲ୍ ଯାକ ଜିୱୁ ମାନ୍‍ତଣ୍ଡ୍; ନାନ୍ ବେନ୍ କାଦି ହିଦ୍‍ତାନ୍, ଆଦ୍ ନାୟାଦ୍ ଆଉଙ୍ଗ୍, ନାନ୍ ଆଦ୍ ଜଗତ୍‍ତିଙ୍କ୍ ବାଦ୍‍ସ୍କ୍‌କାନ୍ ମାଇଦିଙ୍କ୍ ହିଦ୍‍ତାନ୍ ।”
JOH 6:52 ଆସୁଟେ ଯିହୁଦୀଡ଼୍‍ ନିଜେ ନିଜେ ରାମ୍‍କ୍ ଆସ୍ କେତାଙ୍କ୍ ପସ୍‍ପ୍‍ତ୍‍ତଡ଼୍, “ହିଣ୍ଡ୍ ବେଲା ମାନାଙ୍କ୍‌ ନିଜେତ୍ ଆଉଙ୍ଗ୍ ତିନ୍ଦାଙ୍କ୍ ହିଦ୍ ପାର୍‍ଦ୍‍ତଣ୍ଡ୍ ?”
JOH 6:53 ଆସୁଟେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ମନୁଷ୍ୟପୁତ୍ରନ୍ ଆଉଙ୍ଗ୍ ତିନକଟ୍ ମାତ୍‍କେ ନୁ ଅନାଦ୍‌ ନେତୁର୍‍ତିଙ୍କ୍ ଉନକଟ ମାତ୍‍କେ, ମିଡ଼୍ ଜିୱୁନ୍‍ ପାଏମ୍ ଆଦ୍‍ପାର୍‍ୱିଡ଼୍ ।
JOH 6:54 ବେନ ନା ଆଉଙ୍ଗ୍ ତିନ୍‍ତଣ୍ଡ୍ ନୁ ନା ନେତୁର୍ ଉନ୍‍ତଣ୍ଡ୍, ଅଣ୍ଡ୍‌ ସାରେଦିନାତ୍ ଜିୱୁନ୍ ଦର୍ସିକିତଣ୍ଡ୍, ମେଣ୍ଡେ ନାନ୍ ଶେଷ ଦିନାତେ ଅଂକିଙ୍କ୍‌ ମେଣ୍ଡଅନ୍‌‍ଦାମ୍ ବାଦ୍‍କିତାନ୍ ।
JOH 6:55 ବାତେଙ୍କ୍ ଇତ୍‍କେ ନା ଆଉଙ୍ଗ୍ ଆଦ୍‍ରକତ୍ କାଦି ନୁ ନା ନେତୁର୍ ଆଦ୍‍ରକତ୍ ଉନ୍ଦାନାଦ୍ ।
JOH 6:56 ବେନ ନା ଆଉଙ୍ଗ୍ ତିନ୍‍ତଣ୍ଡ୍ ନୁ ନା ନେତୁର୍ ଉନ୍‍ତଣ୍ଡ୍, ଅଣ୍ଡ୍‌ ନାୟାଗେ ମାନ୍‍ତଣ୍ଡ୍ ନୁ ନାନ୍ ଅନ୍‌‍ଆଗେ ମାନ୍‍ତାନ୍ ।
JOH 6:57 ଜିୱୁତେ ବାବାଲ୍ ବେଦ୍‍ପୁଟୁଙ୍କ୍ ନାକିଂଙ୍କ୍ ରହ୍‍ତଣ୍ଡ୍ ନୁ ନାନ୍ ବାବାନ୍ ସେଙ୍ଗେ ଜିୱୁ ମିନ୍ଦେନ୍, ଆଦିନ୍‌ ରକମ୍ ବେନ ନାକିଂଙ୍କ୍ ତିନ୍‍ତଣ୍ଡ୍, ଅଣ୍ଡ୍‌ ଆନ୍‌‍ତେ ନା ମାଇଦିଙ୍କ୍ ଜିୱୁନ୍ ମାନ୍‍ତଣ୍ଡ୍ ।
JOH 6:58 ବେନ କାଦି ସ୍ୱର୍ଗକଞ୍ଜ୍ ୱାସ୍‌ ମିନ୍ଦେ, ଆଦ୍ ହିଦ୍; ଆନିଦାଦିଡ଼୍ ବେଦ୍‍ପୁଟୁଙ୍କ୍ ତିଞ୍ଜ୍ ଡଲିମିନ୍ଦେଡ଼୍, ଆଦ୍‍ଲେକାମ୍ ଆୟ୍‍ୟ; ବେନ ହିଦ୍ କାଦି ତିନ୍‍ତଣ୍ଡ୍, ଅଣ୍ଡ୍‌ ଅନନ୍ତକାଲ୍ ଯାକ ଜିୱୁ ମାନ୍‍ତଣ୍ଡ୍ ।”
JOH 6:59 ଜିସୁ କଫର୍ନାହୁମ୍‍ତେ ୱେରଡ଼୍ ସମାଜ୍ ଲତ୍‍ତାଗେ ଶିକ୍ଷା ହିସମାନ୍ଦାନ୍ ସମୟ୍‍ତେ ହି ସାରେ ଗଟି କେତ୍‍ତଣ୍ଡ୍ ।
JOH 6:60 ତାମ୍ ଶିଷ୍ୟଡ଼୍ ଲୋପେଙ୍କ୍ ବେସ୍‍କ୍‍ତୁଡ଼୍‍ ହିଦ୍ କେଞ୍ଜି କେତ୍‍ତଡ଼୍, “ହିଦ୍ ଶିକ୍ଷା ବୁଜେମ୍ ଆଦାନାଦ୍ ଗାଟି କଷ୍ଟ, ବେନ ହିଦ୍ ସାରେ କେଞ୍ଜିତଣ୍ଡ୍ ?”
JOH 6:61 ହିଦ୍ ବିଷୟ୍‍ତେ ଜିସୁଙ୍କ୍ ବେନ ବାତେଏ କେଲକଟ ମାତ୍‍କେ ମିକା ତାନ୍ ଶିଷ୍ୟଡ଼୍ ନିନ୍ଦ୍ ମାଡ଼ୁତଡ଼୍ ଇଞ୍ଜ ପୁଞ୍ଜ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ହିଦ୍ ଗଟ୍‍ତେ ମିଡ଼୍ ଚିନ୍ତେ ଆଦୁତିଡ଼୍ ?
JOH 6:62 ଆଲାଇତ୍‍କେ ନାରୁନ୍‍ପିଲେ ମୁନେଙ୍କ୍ ବେନ୍ ପଡ଼ିୟେତାଗ୍ ମାତ୍‍ତଣ୍ଡ୍, ଆଦ୍ ପଡ଼ିୟେତାଗ୍ ମାଲ୍‍ସ୍ ଆଦାନାଦ୍ ଉଡ଼୍‍କେ ଆସୁଟେ ବାତ୍ ମାଡ଼ିତିଡ଼୍ ?
JOH 6:63 ମାତର୍ ଇଶ୍ୱର୍‌ତେ ଆତ୍ମା ଜିୱୁନ୍‍ ହିଦ୍‍ପାର୍‍ଦ୍‍ତେ; ନାରୁଡ଼୍‍ତେ ଶକ୍ତି ବାତେମିକା ମାଡ଼୍ ପାର୍‍ୱ; ଇଶ୍ୱର୍‌ତେ ଆଦ୍ ଜିୱୁନ୍ ହିଦାନ୍ ଆତ୍ମା, ଆତ୍ମାତିଙ୍କ୍ ମିଡ଼୍ ବେଲା ଏର୍କା ମାଡ଼୍ ପାର୍ଦିତିଡ଼୍, ଆଦିନ୍ ମାଇଦିଙ୍କ୍ ନାନ୍ ମିକିଂଙ୍କ୍ ହିଦ୍ ସାରେ ଗଟି କେତ୍‍ତାନ୍ ।
JOH 6:64 ଆତ୍‍କେମିକା ମିଇ ଲୋପେଙ୍କ୍ ବେନଡ଼୍ ବିଶ୍ୱାସ୍ ମାଡ଼ଡ଼୍‍ । ବାତେଙ୍କ୍ ଇତ୍‍କେ ବେନଡ଼୍ ବିଶ୍ୱାସ୍ ମାଡ଼କଟ୍ ମାତ୍‍ତଡ଼୍ ନୁ ବେନ ଅଂକିଙ୍କ୍‌ ଶତ୍ରୁଡ଼୍‍କାଇଦେ ସମର୍‍ପନ୍ ମାଡ଼ିତନ୍, ଆଦ୍ ଜିସୁ ମୁନେଙ୍କ୍ ପୁଞ୍ଜ୍ ମାତ୍‍ତଣ୍ଡ୍ ।”
JOH 6:65 ମେଣ୍ଡେ ଜିସୁ କେତ୍‍ତଣ୍ଡ୍, “ବାବାନାଗାଙ୍କ୍ ମାଲ୍‍ୱେ କଟମାତ୍‍କେ ବେନ ନା ଗାର୍‍ରେ ୱାଦ୍ ପାର୍‍ୱଣ୍ଡ୍ ।”
JOH 6:66 ଆ ସମୟ୍‍ତାଗାଙ୍କ୍ ଅନ୍‌ ଶିଷ୍ୟଡ଼୍ ଲୋପେଙ୍କ୍ ନାର୍‍ଗେ ଅଂକିଙ୍କ୍‌ ପେର୍‍କେ ମାଡ଼କଟ୍ ପେୟିସ୍ ଆଦ୍‍ତଡ଼୍, ମେଣ୍ଡେ ଅନ୍‌ ତଡ଼୍ ମେଣ୍ଡେ ତାକଡ଼୍ ।
JOH 6:67 ଆସୁଟେ ଜିସୁ ବାରଜାନ୍‍ତିଙ୍କ୍ ପାଚ୍ରାମାଡ଼୍‍ତଣ୍ଡ୍, “ମିଡ଼୍ ଆନ୍‌‍ତେ ବାତେଏ ନାକିଂଙ୍କ୍ ୱିଡ଼୍‍ସି ମାଲ୍‍ସ୍ଆଦାଙ୍କ୍ ଇଚ୍ଛା ମାଡ଼ୁତିଡ଼୍ ?”
JOH 6:68 ଶିମୋନ୍ ପିତର୍ ଜିସୁଙ୍କ୍ ଉତ୍ତର୍ ହିତ୍‍ତଡ଼୍, “ପ୍ରବୁ, ମେଣ୍ଡେ ବେନନ୍ ଗାର୍‍ରେ ଆଦ୍‍ତମ୍ ? ସାରେଦିନାତ୍ ଜିୱୁନ୍‍ତାଦ୍ ବାକ୍ୟ ତ ନିୟାଗ୍ ମିନ୍ଦେ;
JOH 6:69 ମେଣ୍ଡେ ନିମ୍‍ ଯେ ଇଶ୍ୱର୍‌ତେ ଆଦ୍ ପବିତ୍ର ନାରୁନି, ହିଦ୍ ମାମ୍‍ମେ ବିଶ୍ୱାସ୍ ମାଡ଼ିମିନ୍ଦେମ୍ ନୁ ପୁଞ୍ଜ୍‍ମିନ୍ଦେମ୍ ।”
JOH 6:70 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ନାନ୍ ମିଡ଼୍ ବାରଜାନ୍‍ତିଙ୍କ୍ ହେଞ୍ଚି ମାନନ୍ କି ?” ମିକା, ମିଇ ଲୋପେଙ୍କ୍ ୱେରଣ୍ଡ୍ ଶୟ୍‍ତାନ୍‍ ।
JOH 6:71 ଜିସୁ ଇଷ୍କାରୀୟତିୟ ଶିମନତେ ମାର୍‍ ଯିହୁଦାଙ୍କ୍ ଉଡ଼ିମିକା ଇଦ୍ କେତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ବାରଜାନ୍ ଲୋପେଙ୍କ୍ ୱେରଣ୍ଡେ, ମେଣ୍ଡେ ଅଣ୍ଡ୍‌ ଅଂକିଙ୍କ୍‌ ଶତ୍ରୁଡ଼୍‍କାୟ୍‍ଦେ ସମର୍‍ପନ୍ ମାଡ଼ାଙ୍କ୍ ଆଞ୍ଜମାତ୍‍ତଣ୍ଡ୍ ।
JOH 7:1 ତାନ୍‍ପେର୍କେ ଜିସୁ ଗାଲିଲୀତାଗ୍ ଉଡାଙ୍କ୍ ପସ୍‍ପ୍‍ତଣ୍ଡ୍, ବାତ୍‍ତେଙ୍କ୍ ଇତ୍‍କେ ଯିହୁଦୀଡ଼୍‍ ଅଂକିଙ୍କ୍‌ ଆୱ୍‍କାନ୍ ମାଇଦିଙ୍କ୍ ଚେଷ୍ଟା ମାଡ଼୍‍ନାଙ୍କ୍ ଅଣ୍ଡ୍‌ ଯିହୁଦା ପ୍ରଦେଶ୍‍ତାଗ୍ ଉଡାନ୍‌ ମାଇଦିଙ୍କ୍ ଇଚ୍ଛା ମାଡ଼କଟ୍ ମାତ୍‍ତଣ୍ଡ୍ ।
JOH 7:2 ଯିହୁଦୀଡ଼ାଦ୍‍ କୁଟୀର ବାସ ପାଣ୍ଡୁମ୍‍ତେ ଦିନାମ୍ ଗାର୍‍ରେ ହେୱ୍‍ସ୍‍ମାତ୍‍ତେ,
JOH 7:3 ତାନ୍ ତାମୁଣ୍ଡ୍‌କିଡ଼୍ ଜିସୁଙ୍କ୍ କେତ୍‍ତଡ଼୍, “ନିମ୍‍ ବେନ୍ ପାଡ଼ିୟି ମାଡ଼ମିନ୍ଦେନି, ହାଉସାରେ ବେଦ୍‍ପୁଟୁଙ୍କ୍ ମିଇ ଶିଷ୍ୟଡ଼୍ ଆନ୍‌‍ତେ ଉଡ଼ିତିଡ଼୍, ଆଦିନ୍ ମାଇଦିଙ୍କ୍ ହିଗାଙ୍କ୍ ପେୟ୍‍ସ୍‍ଆଞ୍ଜ୍ ଯିହୁଦା ପ୍ରଦେଶ୍‍ତାଗ୍ ଅନ୍‌,
JOH 7:4 ବାତେଙ୍କ୍ ଇତ୍‍କେ ବେନ ତିଆର୍ ଆତ୍‍ତାଙ୍କ୍ ଇଚ୍ଛା ମାଡ଼୍‍କେ ମିଞ୍ଜିମିକା ବାତେଏ ମାଡ଼ଣ୍ଡ୍ । ମିଡ଼୍ ଯଦି ହିସାର୍‍ରେ ମାଡ଼ୁତିଡ଼୍, ଆଲାଇତ୍‍କେ ନିଜେତିଙ୍କ୍ ଜଗତ୍‍ତେ ଗାର୍‍ରେ ତିଆର୍ ମାଡ଼ା ।”
JOH 7:5 ବାତ୍‍ତେଙ୍କ୍ ଇତ୍‍କେ ତାନ୍ ତାମୁଣ୍ଡ୍‌କିଡ୍‍ ମିକା ଅନ୍‌‍ଆଗେ ବିଶ୍ୱାସ୍ ମାଡ଼କଟ୍ ମାତ୍‍ତଡ଼୍ ।
JOH 7:6 ଆସୁଟେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାୟାଦ୍ ଦିନାମ୍ ହି ଯାକ ଉପସ୍ଥିତ ଆୟକେ, ମାତର୍ ମିକିଂଙ୍କ୍ ସାରେ ଦିନାମ୍ ଲେକାମ୍ ।
JOH 7:7 ଜଗତ୍ ମିକିଂଙ୍କ୍ ପାସ୍‍କ, ବାତେଙ୍କ୍ ଇତ୍‍କେ ନାକିଂଙ୍କ୍ ପାସ୍‍କିତ୍‍ତେ, ବାତେଙ୍କ୍ ଇତ୍‍କେ ତାନାଦ୍ ପାଡ଼୍‍ୟି କାରାପ୍, ନାନ୍ ତାନ୍ ବିଷୟ୍‍ତେ ହି ସାକ୍ଷ୍ୟ ଇସ୍‌ ୱାଦୁତାନ୍ ।
JOH 7:8 ମିଡ଼୍ ହି ପାଣ୍ଡୁମ୍‍ତାଗେ ଆନୁଟ୍, ନାନ୍ ଇଞ୍ଜେ ହି ପାଣ୍ଡୁମ୍‍ତାଗ୍ ଆନନ୍‍, ବାତ୍‍ତେଙ୍କ୍ ଇତ୍‍କେ ନାୟାଦ୍ ଦିନାମ୍ ହି ଯାକ ଉପସ୍ଥିତ ଆୟକେ ।”
JOH 7:9 ଜିସୁ ଅଡ଼୍‌‍କିଂଙ୍କ୍ ହିୱ୍ ସାରେ ଗଟି କେସ୍ ଗାଲିଲୀତାଗ୍ ମାତ୍‍ତଣ୍ଡ୍ ।
JOH 7:10 ବାତେଙ୍କ୍ ଇତ୍‍କେ ତାନ୍ ତାମୁଣ୍ଡ୍‌କିଡ଼୍ ପାଣ୍ଡୁମ୍‍ତାଗେ ଆଦ୍‌ ୱେୟେ ଅଣ୍ଡ୍‌ ଆନ୍‌‍ତେ ଆତ୍‍ତଣ୍ଡ୍, ଉଡ଼୍‍ତେଲେକେ ଆୟ୍‍ୟ, ମାତର୍ ଅଣ୍ଡୟ୍‌ ଲେକାତ୍ ଉଡ଼୍‍ତେ ।
JOH 7:11 ଆଦିଙ୍କ୍ ଯିହୁଦୀ ନେତାଲଡ଼୍ ପାଣ୍ଡୁମ୍‍ତାଗେ ମେହ୍‍କ ପାଚ୍ରାମାଡ଼୍‍ତଡ଼୍, ଅଣ୍ଡ୍‌ ବେକେ ?
JOH 7:12 ମେଣ୍ଡେ, ଅନ୍‌ ବିଷୟ୍‍ତେ ନାରୁଡ଼୍ ତାମ୍‍ତାମ୍ ଲୋପ୍ ତିରିୟାନଙ୍କ୍ ପସ୍‍ପ୍‍ତ୍‍ତଡ଼୍; ମେଣ୍ଡେ ବେନ୍‍ ବେନ କେତ୍‍ତଡ଼୍, “ଅଣ୍ଡ୍‌ ଅର୍‍ତୁଣ୍ଡ୍ ସାୟେତ୍ ନାରୁଡ଼୍;” ମେଣ୍ଡେ ବେନ କେତ୍‍ତଡ଼୍, “ଇଲେ, ଅଣ୍ଡ୍‌ ନାରୁଡ଼୍‍କିଂଙ୍କ୍ ବୁସା ମାଡ଼ମିନ୍ଦେଣ୍ଡ୍ ।”
JOH 7:13 ମିକା ଯିହୁଦୀ ନେତାଲଡ଼୍ ୱେର୍‍ଙ୍ଗିଙ୍କ୍ ଅନ୍‌ ବିଷୟ୍‍ତେ ପୁତ୍‍ତେଲେକେ ବେନ ବାତେଏ କେଲକଟ ମାତ୍‍ତଡ଼୍ ।
JOH 7:14 ବାତେଙ୍କ୍ ଇତ୍‍କେ ପାଣ୍ଡୁମ୍‍ତେ ଆଦା ଦିନାମ୍ ତେର୍‍ତେପେୟ୍, ଜିସୁ ମନ୍ଦିର୍‍ତାଗ୍ ଆଞ୍ଜ୍ ଶିକ୍ଷା ହିଦାଙ୍କ୍ ପସ୍‍ପ୍‍ତଣ୍ଡ୍ ।
JOH 7:15 ଆସୁଟେ ଯିହୁଦୀ ନେତାଲଡ଼୍ ଦାଦ୍‍ରେଲି କେତ୍‍ତଡ଼୍, “ହିଣ୍ଡ୍ ପାଟ୍ କାର୍‍ୱକଟ୍ ବେଲା ହିସର୍ ବିଷୟ୍ ପୁତ୍‍ତଣ୍ଡ୍ ?”
JOH 7:16 ଆସୁଙ୍କ୍ ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ନାୟାଦ୍ ଶିକ୍ଷା ନାୟାଦ୍ ନିଜ୍‍ତାଦ୍‍ ଆୟ୍‍ୟ, ବାତେଙ୍କ୍ ଇତ୍‍କେ ନାକିଂଙ୍କ୍ ରହତେନଣ୍ଡ୍ ଇଶ୍ୱର୍‌ତେ କନ୍‍ସ୍ ୱାସ୍‍ମିନ୍ଦେ ।
JOH 7:17 ବେନଆଇ ଯଦି ଇଶ୍ୱର୍‌ତେ ଇଚ୍ଛା ସାଦନ୍‍ ମାଡ଼ାଙ୍କ୍ ଇଚ୍ଛାମାଡ଼ୁତନ୍, ଆଲାଇତ୍‍କେ ହି ଶିକ୍ଷା ଇଶ୍ୱରତାଗାଙ୍କ୍ ତିଆର୍, ନା ନାନ୍ ନା ନିଜର୍‍ତାଗାଙ୍କ୍ କେତୁତାନ୍, ଆଦ୍ ଅଣ୍ଡ୍‌ ପୁନ୍‍ତଣ୍ଡ୍ ।
JOH 7:18 ବେନ ନିଜେତ୍ ତାଗାଙ୍କ୍ କେତିତଣ୍ଡ୍, ଅଣ୍ଡ୍‌ ନିଜେତ୍ ଗୌରବତିଙ୍କ୍ ମେହ୍‍କିତନ୍, ବାତେଙ୍କ୍ ଇତ୍‍କେ ବେନ ନିଜେତ୍ ପ୍ରେରଣାକର୍ତ୍ତାନ୍ ଗୌରବ୍ ମେହ୍‍କିତନ୍, ଅଣ୍ଡ୍‌ ସତ୍, ମେଣ୍ଡେ ଅନାଗେ ବାତେମେଣ୍ଡେ ବିଶ୍ୱାସ୍ ଇଲେ ।
JOH 7:19 ମୋଶାଲ୍ ବାତେଏ ମିକିଂଙ୍କ୍ ବ୍ୟବସ୍ଥା ହିୱଣ୍ଡ୍ ? ମିକା ମିଇ ଲୋପେଙ୍କ୍ ବେନମିକା ବ୍ୟବସ୍ଥା ପାଲନ୍ ମାଡ଼୍‍ୱିଡ଼୍ । ମିଡ଼୍ ବାତେଙ୍କ୍ ନାକିଂଙ୍କ୍ ଆୱ୍‍କାଂଙ୍କ୍ ଚେଷ୍ଟା ମାଡ଼ମିନ୍ଦେଡ଼ି ?”
JOH 7:20 ନାରୁଡ଼୍ ଉତ୍ତର୍ ହିତ୍‍ତଡ଼୍, “ନିକିଂଙ୍କ୍ ବୁତ୍ ପୟ୍‍ସ୍ ମିନ୍ଦେ, ବେନ ନିକିଂଙ୍କ୍ ଆୱ୍‍କାଂଙ୍କ୍ ଚେଷ୍ଟା ମାଡ଼ୁତଣ୍ଡ୍ ?”
JOH 7:21 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ନାନ୍ ୱେରଡ଼୍ ମହାନ୍ ପାଡ଼୍‍ୟି ମାଡ଼୍‍ତାନ୍, ମେଣ୍ଡେ ମିଡ଼୍ ସାରେତଡ଼ି ଦାଦ୍‍ରେଲି ମିନ୍ଦେଡ଼ି ।
JOH 7:22 ଆଦିନ୍ ମାଇଦିଙ୍କ୍ ମୋଶାଲ୍ ମିକିଂଙ୍କ୍ ସୁନ୍ନତ୍ ପାଲନ୍ ଇସ୍‌‍ମିନ୍ଦେନ୍, ହିଦ୍ ଯେ ମୋଶାନାଗାଙ୍କ୍ ଆଶେ ମିନ୍ଦେ, ଆଦ୍ ଆୟ୍‍ୟ, ମାତର୍ ଆନିଦାଦିଡ଼୍ ଡ଼ାଗାଙ୍କ୍, ମେଣ୍ଡେ ମିଡ଼୍ ବିଶ୍ରାମ୍‍ଦିନେତାଗ୍ ପେକାଲଡ଼ାଦ୍ ସୁନ୍ନତ୍ ମାଡ଼ମିନ୍ଦେଡ଼ି ।
JOH 7:23 ଯଦି ବିଶ୍ରାମ୍‍ଦିନେ ଦିନାତେ ପେକାଙ୍କ୍ ସୁନ୍ନତ୍ ମାଡ଼୍‍କେ ମୋଶାନାଦ୍‍ ବ୍ୟବସ୍ଥା ଉର୍‍ଗାଡ଼୍ ଆୟ୍‍ୟ, ଆଲାଇତ୍‍କେ ନାନ୍ ବିଶ୍ରାମ୍‍ଦିନେ ଦିନାତେ ୱେରନ୍ ନାରୁଙ୍କ୍ ସାରେ ସୁସ୍ଥ ମାଡ଼୍‍କେ ମିଡ଼୍ ବାତେଙ୍କ୍ ନା ପର୍‍ର କପାମ୍ ଆଦୁତିଡ଼୍ ?
JOH 7:24 ବାୟ୍‍ଦେତ୍‍ ବିଷୟ୍ ଉଡ଼ି ବିଚାର୍ ମାଡ଼୍‍ମାଟ୍, ଲେକାମ୍ ନ୍ୟାୟତେ ବିଚାର୍ ମାଡ଼ାଟ୍ ।”
JOH 7:25 ଆସୁଟେ ଜିରୂଶାଲାମ୍‍ତେ ନାରୁଡ଼୍ ଲୋପେଙ୍କ୍ ବେନଡ଼୍ କେତାଙ୍କ୍ ପସ୍‍ପ୍‍ତ୍‍ତଡ଼୍, “ଯିହୁଦୀ ନେତାଲଡ଼୍ ବେନଙ୍କ୍ ଆୱ୍‍କାନ୍ ମାଇଦିଙ୍କ୍ ଚେଷ୍ଟା ମାଡ଼ୁତଡ଼୍, ହିଣ୍ଡ୍ ବାତେଏ ଅଣ୍ଡ୍‌ ଆୟ୍‍ୟ ?
JOH 7:26 ମେଣ୍ଡେ ଉଡ଼ାଟ୍, ଅଣ୍ଡ୍‌ ସାରେତଡ଼୍ କେଞ୍ଜ୍‍ତେ ଲେକେମ୍ ଗଟି କେସମିନ୍ଦେନ୍, ମେଣ୍ଡେ ଅଡ଼୍‌ ଅଂକିଙ୍କ୍‌ ବାତେଏ ମାଡ଼ଡ଼୍‍ । ହିଣ୍ଡ୍ ଯେ ମସିହ, ହିଦ୍ ବାତେଏ ନେତାଲଡ଼୍ ନିଜାମ୍ ପୁତ୍‍ତଡ଼୍ ?
JOH 7:27 ବେଲା ଆୟି, ହିଣ୍ଡ୍ ବେଗାକନ୍‍ସ୍ ୱାସ୍ ମିନ୍ଦେଣ୍ଡ୍ ମାନାଡ଼୍ ପୁତ୍‍ତାଡ଼୍‍, ବାତେଙ୍କ୍ ଇତ୍‍କେ ମସିହ ବେସୁଙ୍କ୍‍ ୱାଦ୍‍ତଣ୍ଡ୍, ଆସୁଟେ ଅଣ୍ଡ୍‌ ୱାଦାନାଦ୍ ବେନ ପୁନ୍‍ଅଡ଼୍‌‍ ।”
JOH 7:28 ଆସୁଟେ ଜିସୁ ମନ୍ଦିର୍‍ତାଗ୍ ଶିକ୍ଷା ହିସ ବେଡ଼୍‍ୟ୍ ଲେଙ୍ଗ୍‍ତେ କେତ୍‍ତଣ୍ଡ୍, “ମିଡ଼୍ ନାକିଂଙ୍କ୍ ନୁ ନାୟାଦ୍ ଉତ୍ପତ୍ତିଙ୍କ୍ ପୁତ୍‍ତିଡ଼୍ କି ? ନାନ୍ ନିଜର୍‍ତାଗାଙ୍କ୍ ୱାଡ଼ନ୍‍, ବାତେଙ୍କ୍ ଇତ୍‍କେ ନା ପ୍ରେରଣାକର୍ତ୍ତାଲ୍‍ ସତ୍, ଅଂକିଙ୍କ୍‌ ମିଡ଼୍ ପୁନ୍‍ୱିଡ଼୍ ।
JOH 7:29 ବାତେଙ୍କ୍ ଇତ୍‍କେ ନାନ୍ ଅଂକିଙ୍କ୍‌ ପୁତ୍‍ତାନ୍, ବାତେଙ୍କ୍ ଇତ୍‍କେ ନାନ୍ ଅନ୍‌‍ଆଗାଙ୍କ୍ ୱାସ୍‍ମିନ୍ଦେନ୍, ମେଣ୍ଡେ ଅଣ୍ଡ୍‌ ନାକିଂଙ୍କ୍ ରହ୍‍ତଣ୍ଡ୍ ।”
JOH 7:30 ଆସୁଟେ ଅଡ଼୍‌ ଅଂକିଙ୍କ୍‌ ପୟ୍‍ତାଙ୍କ୍ ଚେଷ୍ଟା ମାଡ଼୍‍ତଡ଼୍; ବାତେଙ୍କ୍ ଇତ୍‍କେ ବେନମେଣ୍ଡେ ଅନ୍‌ ପର୍‍ର କାୟ୍‍ ୱାଟଡ଼୍‍, ବାତ୍‍ତେଙ୍କ୍ ଇତ୍‍କେ ଅନାଦ୍‌ ଦିନାମ୍ ଆଦ୍ ଯାକ ହେୱକଟ୍ ମାତ୍‍ତେ ।
JOH 7:31 ବାତେଙ୍କ୍ ଇତ୍‍କେ ନାରୁଡ଼୍ ଲୋପେଙ୍କ୍ ନାର୍‍ଗେ ଅନ୍‌‍ଆଗେ ବିଶ୍ୱାସ୍ ମାଡ଼ି କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, “ହିଣ୍ଡ୍ ବେନ୍‍ସାରେ ବାକ୍‍ୱା ପାଡ଼ିୟି ମାଡ଼ିମିନ୍ଦେଣ୍ଡ୍ ମସିହ ୱାସ୍ ଆୱିଙ୍କ୍‍ଅନ୍‌‍ ବାତେଏ ନାର୍‍ଗେ ମାଡ଼ିତନ୍ ?”
JOH 7:32 ଜିସୁନ୍ ବିଷୟ୍‍ତେ ନାରୁଡ଼୍ ନିଜେ ନିଜେ ତିରିୟାନାଦ୍ ପାରୂଶୀଡ଼୍ କେଞ୍ଜ୍‍ତଡ଼୍, ଆସୁଟେ ମୁକ୍ୟଯାଜକ୍ ନୁ ପାରୂଶୀଡ଼୍ ଅଂକିଙ୍କ୍‌ ପୟ୍‍ଦାନ୍‍ ମାଇଦିଙ୍କ୍ ପ୍ରହରୀଡ଼୍‍କ୍ ରହ୍‍ତଡ଼୍ ।
JOH 7:33 ଆସୁଟେ ଜିସୁ କେତ୍‍ତଣ୍ଡ୍, “ନାନ୍ ମେଣ୍ଡେ ସୁଦୁର୍ ସମୟ୍‍ଜାକ ମିଇ ତଡ଼୍ ମାନ୍‍ତାନ୍, ତାନ୍‍ପେର୍କେ ନାକିଂଙ୍କ୍ ରୟ୍‍ସ୍‍ମାନ୍ଦାନନ୍‍ ଗାର୍‍ରେ ମାଲ୍‍ସ୍ ଆଦ୍‍ତନ୍ ।
JOH 7:34 ମିଡ଼୍ ନାକିଂଙ୍କ୍ ମେହ୍‍କିତିଡ଼୍‍, ମାତର୍ ଦର୍‍ସ୍‍କ୍‍ ପାର୍‍ୱିଡ଼୍, ମେଣ୍ଡେ, ନାନ୍ ବେଗେ ମାନ୍‍ତାନ୍, ଆଗେ ମିଡ଼୍ ଆତ୍‍ତାଙ୍କ୍ ପାର୍‍ୱିଡ଼୍ ।”
JOH 7:35 ଆସୁଟେ ଯିହୁଦୀଡ଼୍‍ ନିଜେ ନିଜେତିଙ୍କ୍ କେତ୍‍ତଡ଼୍, “ହିଣ୍ଡ୍ ବେଗେ ଆଦ୍‍ଦାନ୍ ମାଇଦିଙ୍କ୍ ପେୟିସ୍ ମିନ୍ଦେନ୍ ଯେ, ମାନ୍‍ଡ଼୍‍ ଅଂକିଙ୍କ୍‌ ଦର୍‍ସ୍କାଙ୍କ୍ ପାର୍‍ୱାଡ଼୍‍ ? ହିଣ୍ଡ୍ ବାତେଏ ଗ୍ରୀକ୍‍ନାରୁଡ଼୍‍ ଲୋପେଙ୍କ୍ ଦୁଡ଼ାଦୁଡ଼ା ଯିହୁଦୀଡ଼୍‍ ଗାର୍‍ରେ ଆଞ୍ଜ୍ ଗ୍ରୀକ୍‍ ନାରୁଡ଼୍‍କିଙ୍କ୍ ଶିକ୍ଷା ହିଦାଙ୍କ୍ ପେୟିସ୍ ମିନ୍ଦେନ୍ ?
JOH 7:36 ମିଡ଼୍ ନାକିଂଙ୍କ୍ ମେହ୍‍କିତିଡ଼୍‍, ମାତର୍ ଦର୍‍ସ୍‍ୱିଡ଼୍, ମେଣ୍ଡେ ନାନ୍ ବେଗେ ମାନ୍‍ତାନ୍, ମିଡ଼୍ ଆଦ୍ ପାର୍‍ୱିଡ଼୍, ଅଣ୍ଡ୍‌ ହି ବେନ ଗଟି କେତ୍‍ତଣ୍ଡ୍, ଇଦିନ୍ ଇତ୍‍କେ ବାତେଏ ?”
JOH 7:37 ପାଣ୍ଡୁମ୍‍ତେ ଶେଷଦିନେ, ଇତ୍‍କେ, ମୁକ୍ୟଦିନେ, ଜିସୁ ନିସ୍‍ମେଣ୍ଡେ ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, “ବେନଙ୍କ୍ ଯଦି ଉନ୍ଦେୱାହ୍‍ତେ, ଅଣ୍ଡ୍‌ ନା ଗାର୍‍ରେ ୱାଡ଼ିଣ୍ଡ୍ ।
JOH 7:38 ବେନ ନାୟାଗେ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ଉନିଣ୍ଡ୍, ଦର୍ମଶାସ୍ତ୍ରତାଗ୍ ଲେକାମିନ୍ଦେ, ବେନ ନାୟାଗ୍ ବିଶ୍ୱାସ୍ ମାଡ଼ିତନ୍ ଅନାଦ୍‌ ଜିୱୁତାଦ୍ ସ୍ରୋତ ପ୍ରବାହିତ ଆସମାନ୍‍ତେ ।”
JOH 7:39 ଜିସୁ ପବିତ୍ର ଆତ୍ମା ବିଷୟ୍‍ତେ ହିଦ୍‍ଗଟ୍ କେତ୍‍ତଣ୍ଡ୍, ବେନ ଜିସୁନାଗ୍ ବିଶ୍ୱାସ୍ ମାଡ଼ମାତ୍‍ତଡ଼୍, ଅଡ଼୍‌ ପେର୍‍କେ ପବିତ୍ର ଆତ୍ମା ପାଏମ୍ ଆଦ୍‍ତଡ଼୍, ବାତ୍‍ତେଙ୍କ୍ ଇତ୍‍କେ ଜିସୁ ଆଦ୍ ଯାକ ମହିମା ପାଏମ୍ ଆୟ୍‍ୱାଙ୍କ୍ ପବିତ୍ର ଆତ୍ମା ହିୱକଟ୍ ମାତ୍‍ତଡ଼୍ ।
JOH 7:40 ବେସୁଟ୍‌ ନାରୁଡ଼୍ ଜିସୁନ୍ ହିଦ୍ ଗଟ୍ କେଞ୍ଜ୍‍ତଡ଼୍, ଅଡ଼୍‌ ଲୋପେଙ୍କ୍ ବେନଡ଼୍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, “ହିଣ୍ଡ୍ ନିଜାମ୍ ତେ ଆ ବାବବାଦୀ ।”
JOH 7:41 ମେଣ୍ଡେ ବାଗାତଡ଼୍ କେତାଙ୍କ୍ ପସ୍‍ପ୍‍ତ୍‍ତଡ଼୍, “ହିଣ୍ଡ୍ ମସିହ;” ବାତେଙ୍କ୍ ଇତ୍‍କେ ବାଗାତଡ଼୍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, “ମସିହ ଗାଲିଲୀତାଗାଙ୍କ୍ ୱାଡ଼ଣ୍ଡ୍ ।
JOH 7:42 ଶାସ୍ତ୍ରତାଗ୍ ଲେକାମିନ୍ଦେ, ମସିହ ଯେ ଦାଉଦ୍‍ତେ ବଂଶତାଗାଙ୍କ୍ ନୁ ଦାଉଦ୍ ବେଗ୍‍ମାତ୍‍ତଣ୍ଡ୍, ଆଦ୍ ବେତ୍‍ଲିହିମ୍‍ ନାର୍‍ତାଗାଙ୍କ୍ ୱାଦ୍‍ତଣ୍ଡ୍ ।”
JOH 7:43 ଆଦିଙ୍କ୍ ନାରୁଡ଼୍ ଲୋପେ ଜିସୁନ୍ ମାଇଦିଙ୍କ୍ ମତବେଦ ଗଟେମ୍‍ଆତ୍‍ତେ;
JOH 7:44 ମେଣ୍ଡେ, ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଜିସୁ ବନ୍ଦି ଆୟିଣ୍ଡ୍ ଇଞ୍ଜ ଇଚ୍ଛା ମାଡ଼ମାତ୍‍ତଡ଼୍, ବାତେଙ୍କ୍ ଇତ୍‍କେ ବେନ ଅନ୍‌ ପର୍‍ର କାୟ୍‍ ୱାଟ୍‍ପାର୍‍ୱଡ଼୍ ।
JOH 7:45 ହିଦିନ୍ ଲୋପେ ପ୍ରହରୀଡ଼୍ ମାଲ୍‍ସ୍ ୱାତ୍‍ତାଙ୍କ୍, ମୁକ୍ୟ ଯାଜକ୍ ନୁ ପାରୂଶୀଡ଼୍ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଡ଼୍, “ମିଡ଼୍ ବାତେଙ୍କ୍ ଜିସୁଙ୍କ୍ ତାଡ଼୍‍ୱିଡ଼୍‍ ?”
JOH 7:46 ପ୍ରହରୀଡ଼୍ ଉତ୍ତର୍ ହିତ୍‍ତଡ଼୍, “ହି ନାରୁଡ଼୍ ବେଦ୍‍ପୁଟୁଙ୍କ୍ ଗଟି କେତୁତଣ୍ଡ୍, ବେନ୍ ନାରୁଡ଼୍ ବେସୁଙ୍କ୍‌ବା ଆଦ୍‍ପୁଟୁଙ୍କ୍ କେଲଣ୍ଡ୍ ।”
JOH 7:47 ଆଗାକଞ୍ଜ୍ ପାରୂଶୀଡ଼୍ ଅଡ଼୍‌‍କ୍ କେତ୍‍ତଡ଼୍, “ମିକିଂଙ୍କ୍ ମିକା ବାତେଏ ଅଣ୍ଡ୍‌ ବକ୍‍ୱା ମାଡ଼ିସ୍‍ ମିନ୍ଦେଣ୍ଡ୍‌ ?
JOH 7:48 ନେତାଲଡ଼୍ ଲୋପେଙ୍କ୍ ବା ପାରୂଶୀଡ଼୍ ଲୋପେଙ୍କ୍ ବାତେଏ ବେନ ୱେରଣ୍ଡ୍‍ମିକା ଅନ୍‌‍ଆଗେ ବିଶ୍ୱାସ୍ ମାଡ଼ିମିନ୍ଦେଡ଼୍ ଇଞ୍ଜ ହିଦ୍ ମିଡ଼୍ ପୁତ୍‍ତିଡ଼୍ କି ?
JOH 7:49 ବାତେଙ୍କ୍ ଇତ୍‍କେ ହି ନାରୁଡ଼୍ ମୋଶାନ୍‌ ବ୍ୟବସ୍ଥାତିଙ୍କ୍ ପୁନଡ଼୍, ଆଦିନ୍ ମାଇଦିଙ୍କ୍ ଇଡ଼୍‌କ୍ ଅବିଶାପ୍‌ ଦର୍‍କ୍‍ତେ ।”
JOH 7:50 ବେନ୍ ନିକଦୀମ୍ ହିଦିନ୍ ମୁନେଙ୍କ୍ ଅନ୍‌ ଗାର୍‍ରେ ୱାସ୍‍ମାତ୍‍ତଣ୍ଡ୍ ନୁ ଯେ ଅଡ଼୍‌ ଲୋପେଙ୍କ୍ ୱେରଣ୍ଡେ, ଅଣ୍ଡ୍‌ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍,
JOH 7:51 “ୱେରଣ୍ଡ୍ ନାରୁନାଗାଙ୍କ୍ ମୁନେଙ୍କ୍‍କଞ୍ଜ୍ କେଞ୍ଜକଟ ନୁ ଅନାଦ୍‌ ଆଚରଣ ବିଷୟ୍ ପୁନକଟ୍ ମାନାଦ୍‍ ବ୍ୟବସ୍ଥା ବାତେଏ ଅଂକିଙ୍କ୍‌ ଦୋଷି ମାଡ଼ିତେ ?”
JOH 7:52 ଅଡ଼୍‌ ଅଂକିଙ୍କ୍‌ ଉତ୍ତର୍ ହିତ୍‍ତଡ଼୍, “ନିମ୍‍ ମିକା ବାତେଏ ୱେର୍‍ନି ଗାଲିଲୀ ନାରୁନୀ ? ଗାଲିଲୀତାଗ୍ ବେନ୍‌ଆଇ ବାବବାଦୀ ତିଆର୍ ଆୟଡ଼େ, ହିଦ୍ ମେହ୍‍କିମେଣ୍ଡେ ଉଡ଼େ ।”
JOH 7:53 ମେଣ୍ଡେ ଅଡ଼୍‌ ସାର୍‍ତଡ଼୍ ନିଜେତ୍ ନିଜେତ୍ ଲୋକିନାଗ୍ ଆଦ୍‍ତଡ଼୍ ।
JOH 8:1 ଜିସୁ ଜୀତ ମେଟେତା ଆତ୍‍ତଣ୍ଡ୍ ।
JOH 8:2 ମେଣ୍ଡନ୍‍ଦିନେ ଅଣ୍ଡ୍‌ ମନ୍ଦିର୍‍ତାଗ୍ ୱାତ୍‍ତଣ୍ଡ୍, ମେଣ୍ଡେ ସାରେତଡ଼୍ ନାରୁଡ଼୍ ଗୁଡ଼୍‍ପି ଆତ୍‍ତାଙ୍କ୍, ଜିସୁ କୁଦିମାଞ୍ଜ୍ ଅଡ଼୍‌‍କିଂଙ୍କ୍ ଶିକ୍ଷା ଇଦାଙ୍କ୍ ପସ୍‍ପ୍‍ତଣ୍ଡ୍ ।
JOH 8:3 ମେଣ୍ଡେ, ଶାସ୍ତ୍ରୀଡ଼୍ ନୁ ପାରୂଶୀନଡ଼୍ ବ୍ୟବିଚାରିନି ନାଟାଡ଼୍‍ତିଙ୍କ୍ ପୟ୍‍ସ୍ ତାସ୍ ସାର୍‍ତଡ଼୍ ମୁନେ ନିଲ୍‍ସ୍‍ପି ଜିସୁଙ୍କ୍ କେତ୍‍ତଡ଼୍,
JOH 8:4 “ହୋ ଗୁରୁ, ଇଦ୍ ନାଟାଡ଼୍ ବ୍ୟବିଚାର୍ ପାଡ଼୍‍ୟି ମାଡ଼ମାନ୍ଦାନ୍ ୱେଲେ ଦର୍‍କ୍‍ତେ ।
JOH 8:5 ଇସତ୍‍ ନାଟାକିଙ୍କ୍ କାଲ୍‍କିନ୍ ତ ରେହେତାଙ୍କ୍ ମୋଶାନ୍‌ ନିୟମ୍‍ତାଗ୍ ମାକିଂଙ୍କ୍ ଗଟ୍ ଇସ୍‌‍ମିନ୍ଦେଣ୍ଡ୍‍, ଇଞ୍ଜେ ଆଲେକେ ନିମ୍‍ ବାତେଏ କେତୁତିନ୍ ?”
JOH 8:6 ଅଡ଼୍‌ ବେଲା ଅନ୍‌ ବିରୁଦ୍‍ତେ ଅବିଯଗ୍‍ତେ ବାତେଙ୍କ୍ ଇତ୍‍କେ ପାଏମ୍ ଆତ୍‍ତାଙ୍କ୍, ଆଦିନ୍ ସେଙ୍ଗେ ଅଡ଼୍‌ ଅଂକିଙ୍କ୍‌ ପରିକ୍ଷା ମାଡ଼ାନ୍ ମାଇଦିଙ୍କ୍ ଆଦ୍ କେତ୍‍ତଡ଼୍ । ବାତେଙ୍କ୍ ଇତ୍‍କେ ଜିସୁ ଆଡ଼୍‌‍କିମେଣ୍ଡେ ୱାଡ଼୍‍ଞ୍ଜ୍ ତ ବୂମ୍‌ତାଗ୍‍ ଲେକାଙ୍କ୍ ପସ୍‍ପ୍‍ତଣ୍ଡ୍ ।
JOH 8:7 ଅଡ଼୍‌ ଆଗେ ନିସ୍ ମେଣ୍ଡେ ପ୍ରଶ୍ନ କେଲ୍‍ନାଙ୍କ୍, ଜିସୁ ତାଲେ ତେସ୍ ଅଡ଼୍‌‍କ୍ କେତ୍‍ତାନ୍, “ମିୟାଗାଙ୍କ୍ ବେନ୍ ବା ବାତେବା ପାପ୍ ମାଡ଼ନ୍, ଅଣ୍ଡ୍‌ ମୁନେ ଆଦିଙ୍କ୍ କାଲ୍ ହେସିତନ୍ ।”
JOH 8:8 ମେଣ୍ଡନ୍‍ଦାମ୍ ଅଣ୍ଡ୍‌ ଅଡ଼୍‌‍ମିକା ନେଲ୍ ଲେକାଙ୍କ୍ ପସ୍‍ପ୍‍ତଣ୍ଡ୍ ।
JOH 8:9 ଆଦ୍ କେଞ୍ଜି ଅଡ଼୍‌ ବେଡ଼ିୟନାଗାଙ୍କ୍ ଆରାମ୍ ମାଡ଼ି ୱେରଣ୍ଡ୍ ୱେରଣ୍ଡ୍ ପେଇସ୍ ସାରେତଡ଼୍ ଆଦାଙ୍କ୍ ପସ୍‍ପ୍‍ତ୍‍ତଡ଼୍ ।
JOH 8:10 ମେଣ୍ଡେ, ଜିସୁ ତାଲେତେସ୍ ଆଦିଙ୍କ୍ କେତ୍‍ତଣ୍ଡ୍, “ଅଡ଼୍‌ ବେକେ ? ନିକିଂଙ୍କ୍ ଦଣ୍ଡ୍ ହିଦାଙ୍କ୍ ୱେରଣ୍ଡ୍‍ବା ହିଲ୍‍ଲେଡ଼୍ ?”
JOH 8:11 ଆଦ୍ କେତ୍‍ତେ, “ବେନ ଇଲାଡ଼୍, ପ୍ରବୁ ।” ତାନ୍‍ପେର୍କେ ଜିସୁ ଆଦିଙ୍କ୍ କେତ୍‍ତଣ୍ଡ୍, “ନାନ୍ ବା ନିକିଂଙ୍କ୍ ଦଷି ମାଡ଼ନ୍; ଅନ୍‌, ନେଣ୍ଡ୍‍କଞ୍ଜ୍ ମେଣ୍ଡେ ପାପ୍ ମାଡ଼୍‍ମା ।”
JOH 8:12 ଜିସୁ ମେଣ୍ଡ୍‍ନ୍ ଦାମ୍ ନାରୁଡ଼୍‍କ୍ ଶିକ୍ଷା ଇସ୍ କେତ୍‍ତଣ୍ଡ୍, “ନାନ୍ ଜଗତ୍‍ତେ ୱେସ୍; ବେନ ନା ପେର୍‍କେ ୱାଦ୍‍ତଣ୍ଡ୍, ଅଣ୍ଡ୍‌ ବେସୁଙ୍କ୍‍ ବା ଇକାଡ଼୍‍ତା ଆଦାଙ୍କ୍ ପାର୍‍ୱଣ୍ଡ୍, ବେଲାନ୍ ଜିୱୁତେ ୱେସ୍ ଦର୍‍କିତ୍ ।”
JOH 8:13 ଆଗାଙ୍କ୍ ପାରୂଶୀନଡ଼୍ ଅଂକିଙ୍କ୍‌ କେତ୍‍ତଡ଼୍, “ନିମ୍‍ ନିଜେ ନିଜେତ୍ ବିଷୟ୍ ସାକ୍ଷ୍ୟ ଇଦୁତିନ୍, ନିୱାଦ୍ ସାକ୍ଷ୍ୟ ସତ୍ ଆୟ୍‍ୟ ।”
JOH 8:14 ଜିସୁ ଅଡ଼୍‌‍କ୍ ଉତ୍ତର୍ ଇତ୍‍ତନ୍, “ଇଲେ, ନାନ୍ ଯଦି ନିଜେତ୍ ବିଷୟ୍‍ତେ ସାକ୍ଷ୍ୟ ଇଦୁତାନ୍ ଆଲେକେ ମିକା ନାୱାଦ୍ ସାକ୍ଷ୍ୟ ସତ୍, ବାତେଙ୍କ୍ ଇତ୍‍କେ ନାନ୍ ବେନ୍ ପଡ଼ିୟେ ତାଗାଙ୍କ୍ ୱାସ୍ ମିନ୍ଦେନ୍ ନୁ ବେନ୍ ପଡ଼ିୟେତାଗ୍ ଆଦ୍‍ତନ୍, ଆଦ୍ ପୁତ୍‍ତାନ୍, ବାତେଙ୍କ୍ ଇତ୍‍କେ ନାନ୍ ବେନ୍ ପଡ଼ିୟେତାଗାଙ୍କ୍ ୱାଦ୍‍ତାନ୍ ନୁ ବେନ୍ ପଡ଼ିୟେତାଗ୍ ଆଦ୍‍ତନ୍, ଆଦ୍ ମିଡ଼୍ ପୁନ୍‍ୱିଡ଼୍ ।
JOH 8:15 ମିଡ଼୍ ନାରୁଡ଼୍ ଲେକାମ୍ ବିଚାର୍ ମାଡ଼ ମାନୁଟ୍, ନାନ୍ ବେନନାଦ୍ ବିଚାର୍ ମାଡ଼ନ୍ ।
JOH 8:16 ବାତେଙ୍କ୍ ଇତ୍‍କେ ନାନ୍ ଯଦି ବିଚାର୍ ମାଡ଼ିତାନ୍, ଆଲେକେ ମିକା ନାୱାଦ୍ ବିଚାର୍ ସତ୍; ବାତେଙ୍କ୍ ଇତ୍‍କେ ନାନ୍ ୱେରନ୍ ଆୟନ୍, ମାତର୍ ନାୱାଦ୍ ୱାଦାନ୍‍କର୍ତ୍ତାଲ୍ ନା ସାଙ୍ଗେ ମିନ୍ଦେନ୍ ।
JOH 8:17 ମେଣ୍ଡେ, ଇର୍‍ଉଡ଼ାଦ୍ ସାକ୍ଷ୍ୟ ସମାନ ଆତ୍‍କେ, ଅଡ଼୍‌ କେତାନାଦ୍ ସତ୍, ଇଦ୍ ମିଇ ନିୟମ୍‍ତାଗ୍ ଲେକ୍‍ତାଦ୍ ମିନ୍ଦେ ।
JOH 8:18 ନାନ୍ ନିଜେ ନିଜେତାଦ୍ ସାକ୍ଷି, ମେଣ୍ଡେ ନା ୱାଦାନ୍ କର୍ତ୍ତାଲ୍ ବାବାଲ୍ ନା ବିଷୟ୍‍ତେ ସାକ୍ଷ୍ୟ ଇସମିନ୍ଦେନ୍ ।”
JOH 8:19 ଆଗାଙ୍କ୍ ଅଡ଼୍‌ କେତାଙ୍କ୍ ପସ୍‍ପ୍‍ତ୍‍ତଡ଼୍, “ମିଇ ବାବାଲ୍ ବେକେ ?” ଜିସୁ ଉତ୍ତର୍ ଇତ୍‍ତନ୍, “ମିଡ଼୍ ନାକିଂଙ୍କ୍ ପୁନ୍‍ୱିଡ଼୍ ବା ନା ବାବାଙ୍କ୍ ମିକା ପୁନ୍‍ୱିଡ଼୍ ଯଦି ନାକିଂଙ୍କ୍ ପୁନେଡ଼ି, ଆଲେକେ ନା ବାବାଙ୍କ୍ ଆନ୍‌‍ତେ ପୁନେଡ଼ି ।”
JOH 8:20 ଅଣ୍ଡ୍‌ ମନ୍ଦିର୍‍ତାଗ୍ ଶିକ୍ଷା ଇସମାନ୍ଦାନ୍ ୱେଲେ ଦାନବାକ୍ସ ମାନ୍ଦାନ୍ ବାକ୍‍ଡ଼ାତାଗ୍ ଆନ୍‌‍ତେ ଇଦ୍‍ସାରେ ଶିକ୍ଷା କେତ୍‍ତଣ୍ଡ୍, ବାତେଙ୍କ୍ ଇତ୍‍କେ ବେନ ଅଂକିଙ୍କ୍‌ ପଇୟଡ଼୍, ବାତେଙ୍କ୍ ଇତ୍‍କେ ଅନାଦ୍‌ ଦିନାମ୍ ଆସୁଙ୍କ୍‍ଯାକ ଉପସ୍ଥିତ ଆୟିୱେ ମାତ୍‍ତେ ।
JOH 8:21 ଜିସୁ ମେଣ୍ଡନ୍‍ଦାମ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ ଆଞ୍ଜମିନ୍ଦେନ୍, ମେଣ୍ଡେ ମିଡ଼୍ ନାକିଂଙ୍କ୍ ମେହେକିତିଡ଼୍ ନୁ ମିଡ଼୍ ପାପ୍‍ତାଗ୍ ଡଲିତିଡ଼୍, ନାନ୍ ବେଗେ ଆଦୁତାନ୍, ମିଡ଼୍ ଆଗେ ଆଦ୍‍ପାର୍‍ୱିଡ଼୍ ।”
JOH 8:22 ତାନ୍ ପେର୍‍କେ ଯିହୁଦୀନଡ଼୍ କେତାଙ୍କ୍ ପସ୍‍ପ୍‍ତ୍‍ତଡ଼୍, “ଅଣ୍ଡ୍‌ କେସମିନ୍ଦେନ୍, ଅଣ୍ଡ୍‌ ବେଗେ ଆଦ୍‍ତନ୍, ମାନାଡ଼୍‍ ଆଗେ ଆଦେପାର୍‌ୱାଡ଼୍ । ଅଣ୍ଡ୍‌ ଆଉକାନଙ୍କ୍ ମାଡ଼ାଙ୍କ୍ ଆଦୁତନ୍ କି ?”
JOH 8:23 ଜିସୁ ଅଡ଼୍‌‍କ୍ କେତ୍‍ତଣ୍ଡ୍, “ମିଡ଼୍ ଇଦ୍ ଜଗତ୍‍କଞ୍ଜ୍‍ ଜନମ୍, ନାନ୍ ସ୍ୱର୍ଗକଞ୍ଜ୍ ଜନମ୍, ମିଡ଼୍ ଇ ଜଗତ୍‍ତଡ଼ି, ନାନ୍ ଇ ଜଗତ୍‍ତଣ୍ଡ୍ ଆୟ୍‍ୟ ।
JOH 8:24 ମିଡ଼୍ ଯେ ନିଜେ ନିଜେ ପାପ୍‍ତାଗ୍ ଡଲିତିଡ଼୍, ନାନ୍ ମିକିଂଙ୍କ୍ ଇଦ୍ କେତୁତାନ୍; ବାତେଙ୍କ୍ ଇତ୍‍କେ ‘ନାନ୍ ଯେ ନିଜେ ଅଣ୍ଡ୍‌, ଇଦ୍ ମିଡ଼୍ ବିଶ୍ୱାସ୍ ମାଡ଼କଟ୍ ମାତ୍‍କେ ନିଜେ ନିଜେ ପାପ୍‍ତାଗ୍ ଡଲିତିଡ଼୍ ।’”
JOH 8:25 ଆଗାଙ୍କ୍ ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ନିମ୍‍ ବେନ ?” ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଆଦ୍‍ଗଟ୍‍ ମୁନେନ୍ କେସ୍‍ମିନ୍ଦେନ୍ ।
JOH 8:26 ମିଇ ବିଷୟ କେତାଙ୍କ୍ ନୁ ବିଚାର୍ ମାଡ଼ାଙ୍କ୍ ନାୱାଦ୍ ନାର୍‍ଗେ ଗଟି ମିନ୍ତେ; ବାତେଙ୍କ୍ ଇତ୍‍କେ, ନା ୱାଦାନ୍ କର୍ତ୍ତାଲ୍ ସତ୍, ମେଣ୍ଡେ ନାନ୍ ଅନାଗାଙ୍କ୍ ବାତେଏ କେଞ୍ଜ୍‍ତାନ୍, ଆଦ୍‍ ସାରେ ଜଗତ୍‍ତାଗ୍ କେସମିନ୍ଦେନ୍ ।”
JOH 8:27 ଜିସୁ ତାନ୍ ବାବାନ୍ ବିଷୟ କେସମାତ୍‍ତନ୍ ଆଦ୍ ଅଡ଼୍‌ ବୁଜେମ୍ ଆୟ୍‍ୟଡ଼୍ ।
JOH 8:28 ଜିସୁ କେତ୍‍ତଣ୍ଡ୍, “ବେସୁଙ୍କ୍‍ ମିଡ଼୍ ନାରୁନ୍ ପିଲେତିଙ୍କ୍ ପର୍‍ର ତେସ୍‍ମାତ୍‍ତିଡ଼୍, ଆସୁଙ୍କ୍ ନାନ୍ ଯେ ଆଦ୍ ନାରୁନ୍ ନୁ ନାନ୍ ନିଜ୍‍ତାଗାଙ୍କ୍ ବାତେଏ ମାଡ଼୍‍ୱେ ବେଲାନ୍ ବାବାଲ୍ ନାକିଂଙ୍କ୍ ବେଦ୍‍ଲେକାମ୍ ଶିକ୍ଷା ଇତ୍‍ତନ୍, ଆଦେଲେକାମ୍ ଇଦ୍ ସାରେ ଗଟି କେସମିନ୍ଦେନ୍, ଇଦ୍ ମିଡ଼୍ ପୁନ୍‍ତିଡ଼୍ ।
JOH 8:29 ନା ବାବାଲ୍ ନା ସାଙ୍ଗେ ମିନ୍ଦେନ୍; ଅଣ୍ଡ୍‌ ନାକିଂଙ୍କ୍ ୱେରଙ୍କ୍ ରହତଣ୍ଡ୍, ବାତେଙ୍କ୍ ଇତ୍‍କେ ନାନ୍ ସାରେଦାମ୍ ଅନାଦ୍‌ ସାୟେତ୍ ପାଡ଼୍‍ୟି ମାଡ଼ୁତାନ୍ ।”
JOH 8:30 ଜିସୁ ଇଦ୍ ସାରେ ଗଟି କେତ୍‍ତାଙ୍କ୍, ନାର୍‍ଗେ ନାରୁଡ଼୍ ଅନ୍‌‍ଆଗାଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।
JOH 8:31 ତାନ୍‍ପେର୍କେ ଜିସୁ ଅନାଗ୍ ବିଶ୍ୱାସ୍ ମାଡ଼ମାନ୍ଦାନ୍ ଯିହୁଦିନଡ଼୍‍କ୍ କେତ୍‍ତଣ୍ଡ୍; “ଯଦି ନାୱାଦ୍ ବାକ୍ୟ ନିଜାମ୍‍ ପାଲନ୍ ମାଡ଼ିତିଡ଼୍, ଆଲେକେ ମିଡ଼୍ ସାରେଦାମ୍ ନା ଶିଷ୍ୟଡ଼ି,
JOH 8:32 ମେଣ୍ଡେ ମିଡ଼୍ ସତ୍ ପେଇତିତିଡ଼୍ ନୁ ଆଦ୍ ସତ୍ ମିକିଂଙ୍କ୍ ମୁକ୍ତମାଡ଼ିତେ ।”
JOH 8:33 ଅଡ଼୍‌ ଅଂକିଙ୍କ୍‌ ଉତ୍ତର୍ ହିତ୍‍ତଡ଼୍, “ମାମ୍‍ମେ ଅବ୍ରାହାମ୍‌ ବଂଶତେ ନାରୁମ୍‌, ମେଣ୍ଡେ ବେସୁଙ୍କ୍‍ ମିକା ବେନନ୍‌ ଦାସ ଆୟୱାଡ଼୍, ଆଲେକେ ମିଡ଼୍ ମୁକ୍ତ ଆଦ୍‍ତିଡ଼୍ ଇଞ୍ଜ ମିଡ଼୍ ବେଲାକେତୁତିଡ଼୍ ?”
JOH 8:34 ଜିସୁ ଅଡ଼୍‌‍କ୍ ଉତ୍ତର୍ କେତ୍‍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେତୁତାନ୍, ବେନବା ପାପ୍ ମାଡ଼ିତନ୍, ଅଣ୍ଡ୍‌ ପାପ୍ ତେ ଦାସ ।
JOH 8:35 ଦାସ ସାରେ ଦିନାତାତ୍‍ ସେଙ୍ଗେ ପରିବାର୍‍ତେ ୱେରନ୍ ଆସ୍‍ମାନନ୍ । ବାତେଙ୍କ୍‍ଇତ୍କେ ପରିବାର୍‍ତେ ମାର୍‍ଦେ ପଡ଼ିୟେ ସାରେଦିନା ମାନ୍‍ତେ ।
JOH 8:36 ମାର୍‍ ଯଦି ମିକିଂଙ୍କ୍ ମୁକ୍ତ ମାଡ଼ିତନ୍, ଆଲେକେ ମିଡ଼୍ ପ୍ରକୃତ୍‍ରେ ମୁକ୍ତ ଆସ୍‍ମାନ୍‍ତିଡ଼୍‍ ।
JOH 8:37 ମିଡ଼୍ ଯେ ଅବ୍ରାହାମ୍‌ ତେ ପିଲା, ଆଦ୍ ନାନ୍ ପୁତ୍‍ତାନ୍; ବାତେଙ୍କ୍ ଇତ୍‍କେ ନାୱାଦ୍ ବାକ୍ୟ ମିଇ ଜିୱେତାଗ୍ ଇଲ୍‍ୱାଙ୍କ୍ ମିଡ଼୍ ନାକିଂଙ୍କ୍ ଆଉକାନଙ୍କ୍ ଚେଷ୍ଟା ମାଡ଼ୁତିଡ଼୍ ।
JOH 8:38 ନାନ୍ ବାବାନ୍ ପାକେ ବାତ୍ ବାତ୍ ଉଡ଼ିମିନ୍ଦେନ୍, ଆଦ୍ ସାରେ କେସ ମିନ୍ଦେନ୍; ମିଡ଼୍ ମିକା ମିଇ ବାବାନ୍ ନାଗାଙ୍କ୍ ବାତ୍ ବାତ୍ କେସମିନ୍ଦେନ୍ ଆଦ୍‍ ସାରେ ମାଡ଼ାଟ୍ ।”
JOH 8:39 ଅଡ଼୍‌ ଅଂକିଙ୍କ୍‌ ଉତ୍ତର୍ କେତ୍‍ତଡ଼୍, “ଅବ୍ରାହାମ୍ ମାନ୍‍ ବାବାଲ୍,” ଜିସୁ ଅଡ଼୍‌‍କ୍ କେତ୍‍ତଣ୍ଡ୍, “ଯଦି ମିଡ଼୍ ଅବ୍ରାହାମ୍‌ତେ ପିଲାନଡ଼ି, ଆଲେକେ ଆବ୍ରାହାମ୍ ତେ ପାଡ଼୍‍ୟି ମାଡ଼ାଟ୍;
JOH 8:40 ବାତେଙ୍କ୍ ଇତ୍‍କେ ଯେ ଇଶ୍ୱର୍‌ତାଗାଙ୍କ୍ କେଞ୍ଜିମାନ୍ଦାନ୍‍ ସତ୍ ମିକିଂଙ୍କ୍ କେସମିନ୍ଦେନ୍, ଇଦ୍‍ଲେକାମ୍ ନାରୁନ୍ ଯେ ନାନ୍, ନାକିଂଙ୍କ୍ ମିଡ଼୍ ଇଞ୍ଜେ ଆଉକାନଙ୍କ୍ ଚେଷ୍ଟା ମାଡ଼ୁତିଡ଼୍; ଅବ୍ରାହାମ୍‌ ଇଦ୍‍ଲେକାମ୍ ପାଡ଼୍‍ୟି ମାଡ଼ଣ୍ଡ୍ ।
JOH 8:41 ମିଡ଼୍ ମିଇ ବାବାନ୍ କାମ୍‍ସାରେ ମାଡ଼ମିନ୍ଦେଡ଼ି,” ଅଡ଼୍‌ ଜିସୁଙ୍କ୍ କେତ୍‍ତଡ଼୍, “ମାମ୍‍ମେ ବ୍ୟବିଚାର୍ ଲେକାମ୍ ଇଲେମ୍ ମାୟାଗାଙ୍କ୍ ମାତର୍ ୱେରନ୍ ବାବାଲ୍, ଅଣ୍ଡ୍‌ ଇଶ୍ୱର୍ ।”
JOH 8:42 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଇଶ୍ୱର୍ ଯଦି ମିଇ ବାବାଲ୍ ଆୟେଣ୍ଡ୍, ଆଲେକେ ମିଡ଼୍ ନାକିଂଙ୍କ୍ ପ୍ରେମ ମାଡ଼େଡ଼ି; ବାତେଙ୍କ୍ ଇତ୍‍କେ ନାନ୍ ଇଶ୍ୱର୍‌ତାଗାଙ୍କ୍ ୱାସ୍ ଇଞ୍ଜେ ହିଗେ ମିନ୍ଦେନ୍; ନାନ୍ ନିଜେ ତାଗାଙ୍କ୍ ୱାଡ଼ନ୍ ବାତେଙ୍କ୍ ଇତ୍‍କେ ଅଣ୍ଡ୍‌ ନାକିଂଙ୍କ୍ ରହସ୍‍ମିନ୍ଦେନ୍ ।
JOH 8:43 ନାନ୍ ବାତେଏ କେତୁତାନ୍ ମିଡ଼୍ ବାତ୍‍ତିଙ୍କ୍ ନା ଗଟି ବୁଜେମ୍ ଆୟ୍‍ୱିଡ଼୍ ? ବାତେଙ୍କ୍ ଇତ୍‍କେ ମିଡ଼୍ ନାୱାଦ୍ ବାକ୍ୟ କେଞ୍ଜି ସାରେ ମାଡ଼୍‍ପେ ପାର୍‍ୱିଡ଼୍ ।
JOH 8:44 ମିଡ଼୍ ମିଇ ବାବାଲ୍ ଶୟତାନ୍‍ତେ ମାର୍‍; ଅନ୍‌ ଇଚ୍ଛାତେ ପାଡ଼୍‍ୟି ମାଡ଼ାଙ୍କ୍ ଇଚ୍ଛା ମାଡ଼ିତିଡ଼୍ । ସୃଷ୍ଟିଆତେ ମୁନେଙ୍କ୍ କଞ୍ଜ୍ ମାତ୍‍ତନ୍ ଆୱୁକାନାଦ୍ । ଅଣ୍ଡ୍‌ ବେସୁଙ୍କ୍‌ବା ସତ୍‍ତେ ବାବାଲ୍ ଆୟନ୍ ବାତେଙ୍କ୍ ଇତ୍‍କେ ଅନାଗେ ସୁଦୁଟ୍ ମିକା ସତ୍ ଇଲ୍‍ଲେ । ମିଚ୍ କେତାନାଦ୍ ଅନାଗ୍ ସ୍ୱାବାବିକ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ନିଜେ ମିତ୍ୟାବାଦି ନୁ ସୁଦୁଟ୍ ମିତ୍ୟାତେ ବାବାଲ୍ ।
JOH 8:45 ବାତେଙ୍କ୍ ଇତ୍‍କେ ନାନ୍ ସତ୍ କେଲ୍‍ନାଙ୍କ୍ ମିଡ଼୍ ନାକିଂଙ୍କ୍ ବିଶ୍ୱାସ୍ ମାଡ଼୍‍ୱିଡ଼୍ ।
JOH 8:46 ନାୟାଗ୍ ପାପ୍ ମିନ୍ଦେଇଞ୍ଜ ମିୟାଗାଙ୍କ୍ ବେନ ପ୍ରମାନ୍ ଇତ୍‍ତଡ଼୍ ? ନାନ୍ ବେସୁଙ୍କ୍‍ ସତ୍ କେତିତାନ୍, ଆଲେକେ ମିଡ଼୍ ବାତ୍‍ତିଙ୍କ୍ ନାକିଂଙ୍କ୍ ବିଶ୍ୱାସ୍ ମାଡ଼୍‍ୱିଡ଼୍ ?
JOH 8:47 ବେନ ଇଶ୍ୱର୍‌ତାଗାଙ୍କ୍ ଜନମ୍, ଅଣ୍ଡ୍‌ ଇଶ୍ୱର୍‌ତେ ବାକ୍ୟ କେଞ୍ଜିତଣ୍ଡ୍; ଇଦିନ୍ ମାଇଦିଙ୍କ୍ ମିଡ଼୍ କେଞ୍ଜ୍‍ୱିଡ଼୍, ବାତେଙ୍କ୍ ଇତ୍‍କେ ମିଡ଼୍ ଇଶ୍ୱର୍‌ତାଗାଙ୍କ୍ ଜନମ୍ ଆୟୱିଡ଼୍ ।”
JOH 8:48 ଯିହୁଦୀନଡ଼୍ ଜିସୁଙ୍କ୍ ପାଚ୍ରାମାଡ଼୍‍ତଡ଼୍, “ନିମ୍‍ ଯେ ୱେରନ୍ ଶୋମିରଣିୟ ନୁ ନିକିଂଙ୍କ୍ ଯେ ବୁତ୍ ପଇସ୍‍ମିନ୍ଦେ, ଇଦ୍ ବାତେଏ ମାମ୍‍ମେ ଟିକ୍ କେଲମ୍ କି ?”
JOH 8:49 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ନାକିଂଙ୍କ୍ ବୁତ୍ ପୟ୍‍ୟ, ନାନ୍ ନା ବାବାଙ୍କ୍ ସମାଦର୍‍ ମାଡ଼ୁତାନ୍, ବାତେଙ୍କ୍ ଇତ୍‍କେ ମିଡ଼୍ ନାକିଂଙ୍କ୍ ଅନାଦର୍ ମାଡ଼ୁତିଡ଼୍ ।
JOH 8:50 ବାତେଙ୍କ୍ ଇତ୍‍କେ ନାନ୍ ନିଜେ ନିଜେତ୍ ଗୌରବ୍‍ତେ ପେର୍‍କେ ଆନୁଟ୍; ବାତେଙ୍କ୍ ଇତ୍‍କେ ଇଦ୍ ଗଟ୍ ନା ସେଙ୍ଗେ ମେଣ୍ଡେଅର୍‍ତୁନ୍ ନୁ ନା ପାକେଙ୍କ୍ ବିଚାର୍ ମାଡ଼ିତନ୍ ।
JOH 8:51 ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ବେନ ନାୱାଦ୍ କେତାନାଦ୍ ପାଲନ୍ ମାଡ଼ିତନ୍, ଅଣ୍ଡ୍‌ ବେସୁଙ୍କ୍‌ବା ଡଲନ୍ ।”
JOH 8:52 ଯିହୁଦୀନଡ଼୍ ଅଂକିଙ୍କ୍‌ କେତ୍‍ତଡ଼୍, “ଇଞ୍ଜେ ମାମ୍‍ମେ ପୁତ୍‍ତମ୍ ଯେ, ନିକିଂଙ୍କ୍ ବୁତ୍‌ପଇସ୍ ମିନ୍ଦେ, ଅବ୍ରାହାମ୍‌ ନୁ ବାବବାଦିଡ଼ି ଡଲିମିନ୍ଦେଡ଼୍, ମେଣ୍ଡେ ନିମ୍‍ କେତୁତିନ୍, ଯଦି ବେନ ନାୱାଦ୍ କେତାନାଦ୍ ପାଲନ୍ ମାଡ଼ିତନ୍, ଆଲାଇତ୍‍କେ ଅନାଗେ ବେସୁଙ୍କ୍‌ବା ଡଲ୍‍ନାଦ୍ ମାନ୍‍ନ ।
JOH 8:53 ମା ଆନିଦାଦିଡ଼୍ ଡଲିମିନ୍ଦେଡ଼୍ ନୁ ବାବବାଦିଡ଼୍ ମିକା ଡଲ୍‍ତଡ଼୍ ବାବାନି ଅବ୍ରାହାମ୍‌ ଲେକାମ୍ ନିମ୍‍ ସାୟେ ? ଅଣ୍ଡ୍‌ ତ ଡଲିମିନ୍ଦେନ୍, ନିମ୍‍ ନିଜ୍‍ତିଙ୍କ୍ ବେନ ଇଞ୍ଜ୍ କେତୁତିନ୍ ?”
JOH 8:54 ଜିସୁ ଉତ୍ତର୍ ହିତ୍‍ତଣ୍ଡ୍, “ନାନ୍ ଯଦି ନିଜ୍‍ତିଙ୍ଗ୍ ଗୌରବ୍‍ ବାନ୍ୱିତ ମାଡ଼ାଙ୍କ୍ ଚେଷ୍ଟା ମାଡ଼େନ୍ ଇଦିନାଦ୍ ବାତେବା ମୁଲ୍ୟ ମାନ୍‍ନ ଆୟେଡ଼୍‍ । ବେନ ନାକିଂଙ୍କ୍ ଗୌରବ୍ ବାନ୍ୱିତ ମାଡ଼ିତନ୍, ଅଣ୍ଡ୍‌ ନା ବାବାଲ୍, ବେନଙ୍କ୍ ମିଡ଼୍ ନିଜେତ୍ ଇଶ୍ୱର୍ ଇଞ୍ଜ କେତୁତିଡ଼୍ ।
JOH 8:55 ମିଡ଼୍ ଅଂକିଙ୍କ୍‌ ବେସୁଙ୍କ୍‍ ପୁନ୍‍ୱିଡ଼୍, ବାତେଙ୍କ୍ ଇତ୍‍କେ ନାନ୍ ଅଂକିଙ୍କ୍‌ ପୁତ୍‍ତାନ୍ । ନାନ୍ ଅଂକିଙ୍କ୍‌ ପୁନନ୍ ଇଞ୍ଜ ଯଦି କେତିତାନ୍, ଆଲେକେ ନାନ୍ ମିକା ମିଇ ଲେକାମ୍ ମିତ୍ୟାବାଦି ଆଦ୍‍ତନ୍, ନାନ୍ ଅଂକିଙ୍କ୍‌ ପୁତ୍‍ତାନ୍ ନୁ ଅନାଦ୍‌ ବାକ୍ୟ ପାଲନ୍ ମାଡ଼ୁତାନ୍ ।
JOH 8:56 ମିଇ ବାବାଲ୍ ଅବ୍ରାହାମ୍‌ ନାୱାଦ୍ ୱାଦାନାଦ୍ ଦିନ୍ ଉଡାଙ୍କ୍ ଆଶେତେ ୱେଡ଼୍‍କିତନ୍, ମେଣ୍ଡେ ଆଦ୍ ଅଣ୍ଡ୍‌ ଉଡ଼ି ୱେଡ଼୍‍କା ମାଡ଼ିତଡ଼୍ ।”
JOH 8:57 ଅବ୍ରାହାମ୍‌ ତାଗାଙ୍କ୍ ଯିହୁଦିନଡ଼୍ ଅଂକିଙ୍କ୍‌ କେତ୍‍ତଡ଼୍, “ନିକିଂଙ୍କ୍ ତ ଇଞ୍ଜେ ପଚାଶ୍‍ବର୍ଷ ବୟଷ୍ ମିକା ଆୟକେ, ନିମ୍‍ ବାତେଏ ଅବ୍ରାହାମ୍‌ ତିଙ୍କ୍ ଉଡ଼୍‍ତିନ୍ ?”
JOH 8:58 ଜିସୁ ଅଡ଼୍‌‍କ୍ କେତ୍‍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେତୁତାନ୍, ଅବ୍ରାହାମ୍‌ ତେ ଜନମ୍ ମୁନେଙ୍କ୍ କନ୍‍ସ୍ ନାନ୍ ମିନ୍ଦେନ୍ ।”
JOH 8:59 ଆଗାଙ୍କ୍ ଅଡ଼୍‌ ଅନ୍‌ ପର୍‍ର ହେସାନ୍ ମାଇଦିଙ୍କ୍ କାଲ୍‍କ୍ ପେହେକ୍ ତଡ଼୍, ବାତେଙ୍କ୍ ଇତ୍‍କେ ଜିସୁ ମୀଞ୍ଜି ମନ୍ଦିର୍‍ତାଗାଙ୍କ୍ ପେଇସ୍ ଆତ୍‍ତଣ୍ଡ୍ ।
JOH 9:1 ଜିସୁ ହାର୍‍ଦାଗ୍ ଆଦାନ୍ ୱେଲେ ୱେରଣ୍ଡ୍ ଜନମ୍ କାନାଙ୍କ୍ ଉଡ଼୍‍ତଣ୍ଡ୍ ।
JOH 9:2 ମେଣ୍ଡେ, ଅନ୍‌ ଶିଷ୍ୟନଡ଼୍ ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ହୋ ଗୁରୁ, ବେନ ପାପ୍ ମାଡ଼୍‍ତାଙ୍କ୍ ଇଣ୍ଡ୍ କାନାଲ୍ ଆସ୍‍ମିନ୍ଦେଣ୍ଡ୍ ? ତାନ୍ ନିଜେତାଦ୍ ନା ତାମ୍ ୟାୟ୍‍ ବାବାଲଡ଼ାଦ୍ ?”
JOH 9:3 ଜିସୁ ଉତ୍ତର୍ ହିତ୍‍ତଣ୍ଡ୍, “ଅନ୍‌‍ୱାଦ୍ ବା ଅନ୍‌ ୟାୟ୍‍ ବାବାଲ୍ ପାପ୍ ମାଡ଼ଡ଼୍‍, ବାତେଙ୍କ୍ ଇତ୍‍କେ ଇଶ୍ୱର୍‌ତେ ଶକ୍ତିତାଦ୍‍ ପାଡ଼୍‍ୟି ବେଲାନ୍ ଇନାଗେ ତିଆର୍ ଆଦ୍‍ତେ, ଆଦିନ୍ ସେଙ୍ଗେ ଇଦ୍ ଗଟେମ୍ ଆଦ୍‍ତେ ।
JOH 9:4 ଦିନାମ୍ ମାଞ୍ଜ୍ ମାଞ୍ଜ୍ ନା ୱାଦାନ୍‍କର୍ତ୍ତାଲ୍ ଇଶ୍ୱର୍‌ତେ ପାଡ଼୍‍ୟି ମାଡ଼ାଙ୍କ୍ ମାନାଦ୍‍ ପାଡ଼୍‍ୟି; ବେନ୍ ସମୟ୍‍ତେ ବେନ୍ ପାଡ଼୍‍ୟି ମାଡ଼େପାର୍‍ୱଣ୍ଡ୍, ଇଦ୍‍ଲେକାମ୍ ଇକାଡ଼୍ ୱାସମିନ୍ଦେ ବେସୁଟ୍‌ ବେନ ବାତେଏ ପାଡ଼୍‍ୟି ମାଡ଼େପାର୍‍ୱଣ୍ଡ୍ ।
JOH 9:5 ନାନ୍ ବେସୁଙ୍କ୍‍ଯାକ ଜଗତ୍‍ତାଗ୍ ମିନ୍ଦେନ୍, ଆସୁଟେ ଯାକ ନାନ୍ ଜଗତ୍‍ତେ ୱେସ୍ ।”
JOH 9:6 ଇଦ୍ କେତ୍‍ତେ ପେର୍‍କେ ଜିସୁ ନେଲ୍ ଉସି ଅଣ୍ଡ୍‌ ଉସ୍‍ତାଦିନ୍‍ ତଡ଼୍ ବୁରୁଦା ମାଡ଼୍‍ତଣ୍ଡ୍, ମେଣ୍ଡେ ଅନାଦ୍‌ ରେଣ୍ଡେ କଣ୍ଡାନାଗ୍ ବୁରୁଦା ତମି ଅଂକିଙ୍କ୍‌ କେତ୍‍ତଣ୍ଡ୍,
JOH 9:7 ଅନ୍‌, “ଶିଲୋହ ଏର୍‍ୱିନାଗ୍ ମକମ୍ ନର୍‍ମ୍ ।” ଆଗାଙ୍କ୍ ଅଣ୍ଡ୍‌, ପେଇସ୍ ଆଞ୍ଜ୍ ନର୍‍ତଣ୍ଡ୍ ନୁ ଅଂକିଙ୍କ୍‌ କଣ୍ଡା ତନ୍‍ତା ।
JOH 9:8 ଅନ୍‌ ଗାରେତଡ଼୍‍ ନାରୁଡ଼୍ ନୁ ବେନଡ଼୍ ଅଂକିଙ୍କ୍‌ ମୁନେଙ୍କ୍ ତାଲ୍‍କାନାଦ୍ ଉଡ଼ିମାତ୍‍ତଡ଼୍, ଅଡ଼୍‌ କେତ୍‍ତଡ଼୍ “ଇ ନାରୁନ୍ ବାତେଏ କୁଦି ତାଲ୍‍କମାନନ୍ ?”
JOH 9:9 ବେନ କେତ୍‍ତଡ଼୍, “ଇଣ୍ଡ୍ ତ ଅଣ୍ଡେ;” ମେଣ୍ଡେ ବେନ୍ ବେନ କେତ୍‍ତଡ଼୍, “ଇଲା, ଇଣ୍ଡ୍, ଅନ୍‌ ଲେକାମ୍ ।” ବାତେଙ୍କ୍ ଇତ୍‍କେ ଅଣ୍ଡ୍‌ କେତ୍‍ତଣ୍ଡ୍, “ନାନ୍ ଆ ନାରୁନ୍ ।”
JOH 9:10 ଆଗାଙ୍କ୍ ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ଆଲାଇତ୍‍କେ ନିୟାଉ କୋଣ୍ଡା ବେଲା ତନ୍ଦ୍‍ତା ?”
JOH 9:11 ଅଣ୍ଡ୍‌ ଉତ୍ତର୍ କେତ୍‍ତଣ୍ଡ୍, “ବେନଙ୍କ୍ ଜିସୁ ଇଞ୍ଜ କେତିତଡ଼୍‍, ଆ ନାରୁଣ୍ଡ୍‌ ବୁରୁଦା ମାଡ଼ି ନାୱାଉ ରେଣ୍ଡ୍ କୋଣ୍ଡାନାଗ୍ ବୁରୁଦା ତମିତ୍‍ତଣ୍ଡ୍, ମେଣ୍ଡେ ନାକିଂଙ୍କ୍ କେତ୍‍ତଣ୍ଡ୍, ଶିଲହ ତାଗ୍ ଆଞ୍ଜ୍ ମକମ୍ ନର୍‍ମ୍, ଆଦିଙ୍କ୍ ନାନ୍ ପେଇସ୍ ଆଞ୍ଜ୍ ନର୍‍ତାନ୍ ନୁ ମେଣ୍ଡେ ନାୱାଉ କଣ୍ଡା ତନ୍‍ତା ।”
JOH 9:12 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ଅଣ୍ଡ୍‌ ବେକେ ?” ଅଣ୍ଡ୍‌ କେତ୍‍ତଣ୍ଡ୍, “ନାନ୍ ପୁନନ୍ ।”
JOH 9:13 ବେନ ମୁନେଙ୍କ୍ କାନାଲ୍ ମାତ୍‍ତଣ୍ଡ୍, ଅଡ଼୍‌ କାନାଙ୍କ୍ ପାରୂଶୀନଡ଼୍ ପାକେ ତାତ୍‍ତଡ଼୍ ।
JOH 9:14 ଜିସୁ ବେନ୍ ଦିନ୍ ବୁରୁଦା ମାଡ଼ି ଅନ୍‌ କୋଣ୍ଡାଙ୍କ୍ ୱେସ୍ ମାଡ଼୍‍ତଣ୍ଡ୍, ଆଦ୍ ଦିନ୍ ବିଶ୍ରାମ୍‍ଦିନେ ଦିନ୍ ମାତ୍‍ତେ ।
JOH 9:15 ଅଣ୍ଡ୍‌ ବେଲା କଣ୍ଡା ଉଡ଼୍‍ତଣ୍ଡ୍, ଆଦ୍ ପାରୂଶୀଡ଼୍ ମିକା ଅଂକିଙ୍କ୍‌ ମେଣ୍ଡନ୍‍ନ୍ଦାମ୍ କେତାନଙ୍କ୍ କେତ୍‍ତଡ଼୍, ଆଗାଙ୍କ୍ ଅଣ୍ଡ୍‌ ଅଡ଼୍‌‍କ୍ କେତ୍‍ତଣ୍ଡ୍, “ଅଣ୍ଡ୍‌ ନା କଣ୍ଡାନାଗ୍ ବୁରୁଦା ତମିତ୍‍ତଣ୍ଡ୍, ତାନ୍‍ପେର୍କେ ନାନ୍ ଶିଲହ ତାଗ୍ ଆଞ୍ଜ୍ ନର୍‍ତାନ୍ ନୁ ଉଡ଼୍‍ପାର୍‍ତାନ୍,” ଇଞ୍ଜେ ନାନ୍ ଉଡ଼୍‍ ପାର୍‍ତାନ୍ ।
JOH 9:16 ପାରୂଶୀଡ଼୍ ଡ଼ାଗାଙ୍କ୍ ବେନ କେତ୍‍ତଡ଼୍, “ବେନ ଇ ପାଡ଼୍‍ୟି ମାଡ଼୍‍ତଣ୍ଡ୍, ଅଣ୍ଡ୍‌ ଇଶ୍ୱର୍‌ତାଗାଙ୍କ୍ ୱାଡ଼ନ୍, ବାତେଙ୍କ୍ ଇତ୍‍କେ ବିଶ୍ରାମ୍‍ଦିନେ ପାଲନ୍ ମାଡ଼ନ୍ ।” ବାଗାତଡ଼୍ କେତ୍‍ତଡ଼୍, “ୱେରନ୍ ପାପି ଆସ୍ ଇଦ୍ ଲେକାମ୍ ଆଶର୍ଯ୍ୟ ପାଡ଼୍‍ୟି ମାଡ଼େପାର୍‍ତନ୍ ?” ଇ ବିଷୟ ତେ ଅଡ଼୍‌‍ଲୋପେ ମତବେଦ ଆତ୍‍ତେ ।
JOH 9:17 ତାନ୍‍ପେର୍କେ ଅଡ଼୍‌ ମେଣ୍ଡନ୍‍ନ୍ଦାମ୍ ଆଦ୍ କାନାଙ୍କ୍ ପଚ୍ରାରା ମାଡ଼୍‍ତଡ଼୍, “ଅଣ୍ଡ୍‌ ଯେ ନି କଣ୍ଡାଙ୍କ୍ ସାୟେ ମାଡ଼୍‍ତେନଣ୍ଡ୍, ଆଗାଙ୍କ୍ ନିମ୍‍ ଅନ୍‌ ବିଷୟ୍‍ତେ ବାତେଏ କତୁତିନ୍ ?” ଅଣ୍ଡ୍‌ କେତ୍‍ତଣ୍ଡ୍, “ଅଣ୍ଡ୍‌ ୱେରଣ୍ଡ୍ ବାବବାଦି ।”
JOH 9:18 ଅଣ୍ଡ୍‌ ଯେ କାନାଲ୍ ମାତ୍‍ତଣ୍ଡ୍ ମେଣ୍ଡେ କଣ୍ଡା ତନ୍ଦିତା, ଆ କାନାନ୍ ୟାୟ୍‍ ବାବାଲ୍ କେଲ୍‍ୱେ ଯାକ ଯିହୁଦୀ ନେତାନଡ଼୍ ଆଦ୍ ଅନ୍‌ ମୁନେ ବିଶ୍ୱାସ୍ ମାଡ଼ଡ଼୍‍ ।
JOH 9:19 ଅଡ଼୍‌ ୟାୟ୍‍ ବାବାଙ୍କ୍ କେତ୍‍ତଡ଼୍, ମିଇ ବେନ୍ ମାର୍‍ କାନାଲ୍ ଆସ୍ ଜନମ୍ ଆସ୍‍ମାତ୍‍ତଣ୍ଡ୍ ଇଞ୍ଜ କେସମିନ୍ଦେଡ଼ି, “ଇଣ୍ଡ୍ ବାତେଏ ମିଇ ମାର୍‍ ? ଆଲାଇତ୍‍କେ ଅଣ୍ଡ୍‌ ବେଲା ଇଞ୍ଜେ ଉଡ଼ୁତଣ୍ଡ୍ ?”
JOH 9:20 ଆଗାଙ୍କ୍ ଅନ୍‌ ୟାୟବାବାଡ଼୍‍ ଅଡ଼୍‌‍କିଂଙ୍କ୍ କେତ୍‍ତଡ଼୍, “ଇଣ୍ଡ୍ ଯେ ମାନ୍‍ ମାର୍‍ ନୁ ଇଣ୍ଡ୍ ତ କାନାଲ୍ ଆସ୍ ଜନମ୍ ଆସ୍ ମାତ୍‍ତଣ୍ଡ୍ ଇଦ୍ ଯେ ମାମ୍‍ମେ ପୁତ୍‍ତମ୍;
JOH 9:21 ବାତେଙ୍କ୍ ଇତ୍‍କେ ଇଣ୍ଡ୍ ବେଲା ଇଞ୍ଜେ ଉଡ଼ୁତଣ୍ଡ୍, ଆଦ୍ ପୁନମ୍, ବେନ ଅନାହୁ କଣ୍ଡା ସାୟେମାଡ଼ିତ୍‍ତଣ୍ଡ୍, ଆଦ୍ ବାଡ଼େ ମାମ୍‍ମେ ପୁନମ୍, ଅଂକିଙ୍କ୍‌ କେଲ୍‍ମୁଟ୍, ଅଣ୍ଡ୍‌ ତ ବୟସ୍‍ତେ ମିନ୍ଦେଣ୍ଡ୍, ଅଣ୍ଡ୍‌ ମିଇ ଗଟି ଜାମେ କେତିତଣ୍ଡ୍ ।”
JOH 9:22 ତାମ୍ ୟାୟ୍‍ ବାବାଲଡ଼୍ ଯିହୁଦୀ ନେତାନଡ଼୍ ୱେର୍‍ସ୍‍ମାନାଙ୍କ୍ ଇଦ୍ ସାରେ ଗଟି କେତ୍‍ତଡ଼୍, ବାତେଙ୍କ୍ ଇତ୍‍କେ ଯଦି ବେନ ଆଦିଙ୍କ୍ ମସିହ ଇଞ୍ଜ ସ୍ୱୀକାର୍ ମାଡ଼୍‍କେ, ଆଲେକେ ଅଣ୍ଡ୍‌ ସମାଜ୍ ବାଇଦେ ମାଡ଼ାନଙ୍କ୍ ଇଞ୍ଜ ମୁନେଙ୍କ୍ ଯିହୁଦୀନଡ଼୍ ୱେରଡ଼୍ ମାନ୍‍ ଆସ୍‍ମାତ୍‍ତଡ଼୍ ।
JOH 9:23 ଆଦିନ୍ ମାଇଦିଙ୍କ୍ ଅନ୍‌ ୟାୟ୍‍ ବାବାଲ୍ କେତ୍‍ତଡ଼୍, “ଅଣ୍ଡ୍‌ ବୟସ୍‍ତେ ମିନ୍ଦେଣ୍ଡ୍ ଅଂକିଙ୍କ୍‌ କେଲ୍‍ମୁଟ୍ ।”
JOH 9:24 ଆଗାଙ୍କ୍ ମୁନେଙ୍କ୍ କଞ୍ଜ୍ କାନାଲ୍ ଆସ୍ ମାନ୍ଦାନ୍ ନାରୁଙ୍କ୍ ଅଡ଼୍‌ ଦ୍ୱିତିୟ ଦାମ୍ କେତ୍‍ତଡ଼୍, “ଇଶ୍ୱତିଙ୍କ୍ ସମ୍ମାନ୍ ଇସ୍ କେତ୍‍ତଣ୍ଡ୍, ଅଣ୍ଡ୍‌ ଯେ ପାପି, ଇଦ୍‍ମାମେ ପୁତ୍‍ତମ୍ ।”
JOH 9:25 ଆଗାଙ୍କ୍ ଅଣ୍ଡ୍‌ ଅଡ଼୍‌‍କ୍ କେତ୍‍ତଣ୍ଡ୍, “ଅଣ୍ଡ୍‌ ପାପି କି ଇଲ୍‍ଲେ, ନାନ୍ ଆଦ୍ ପୁନନ୍; ନାନ୍ ଅଣ୍ଡୟ୍‌ ବିଷୟ ପୁତାନ୍, ନାନ୍ କାନାଲ୍ ଆସ୍ ମାତାନ୍, ଇଞ୍ଜେ ଉଡ଼େ ପାର୍‍ଦୁତାନ୍ ।”
JOH 9:26 ଆସୁଙ୍କ୍ ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ଅଣ୍ଡ୍‌ ନିକିଂଙ୍କ୍ ବାତେଏ ମାଡ଼ିତନ୍ ? ଅଣ୍ଡ୍‌ ବେଲା ନିୟାଉ କଣ୍ଡାଙ୍କ୍ ସାୟେମାଡ଼୍‍ତଣ୍ଡ୍ ?”
JOH 9:27 ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ କେସ୍ ତେର୍‍ତାନ୍, ମେଣ୍ଡେ ମିଡ଼୍ କେଞ୍ଜ୍‍ତିଡ଼୍; ବାତେଙ୍କ୍ ମେଣ୍ଡନ୍‍ନ୍ଦାମ୍ କେଞ୍ଜାଙ୍କ୍ ଇଚ୍ଛା ମାଡ଼ୁତିଡ଼୍ ?” ବାତେଙ୍କ୍‍ଇତ୍କେ ମିଡ଼୍ ଆନ୍‌‍ତେ ଅନ୍‌ ଶିଷ୍ୟ ଆତ୍‍ତାଙ୍କ୍ ଇଚ୍ଛା ମାଡ଼ୁତିଡ଼୍ ।
JOH 9:28 ଆଗାଙ୍କ୍ ଅଡ଼୍‌ ଅଂକିଙ୍କ୍‌ ଅବିଶାପ୍‌ ଇସ୍‌ କେତ୍‍ତଡ଼୍, “ନିମ୍‍ ଆଗେତ୍ ଶିଷ୍ୟ, ମାମ୍‍ମେ ମୋଶାନ୍‌ ଶିଷ୍ୟ ।
JOH 9:29 ମାମ୍‍ମେ ପୁତ୍‍ତମ୍ ଯେ, ଇଶ୍ୱର୍ ମୋଶାଙ୍କ୍ ଗଟ୍ କେସ୍‍ମିନ୍ଦେଣ୍ଡ୍, ବାତେଙ୍କ୍ ଇତ୍‍କେ ଇ ନାରୁଣ୍ଡ୍‌ ବେଗାଙ୍କ୍ ୱାସ୍‍ମିନ୍ଦେଣ୍ଡ୍, ଆଦ୍ ମିକା ମାମ୍‍ମେ ପୁନମ୍ ।”
JOH 9:30 ଆ ନାରୁଡ଼୍ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, ଅଣ୍ଡ୍‌ ନା କଣ୍ଡାଙ୍କ୍ ସାୟେମାଡ଼ି ମିନ୍ଦେଣ୍ଡ୍, ମେଣ୍ଡେ ଅଣ୍ଡ୍‌ ବେଗାକନ୍‍ସ୍ ୱାତ୍‍ତଣ୍ଡ୍, ଆଦ୍ ମିଡ଼୍ ପୁନ୍‍ୱିଡ଼୍, “ଇଦ୍ ତ ଆଶର୍ଯ୍ୟ ଗଟ୍ । ଅଂକିଙ୍କ୍‌ ମିଡ଼୍ ପୁନ୍‍ୱିଡ଼୍ ।
JOH 9:31 ଇଶ୍ୱର୍ ଯେ ପାପୀଡ଼୍ ଗଟି କେଞ୍ଜଣ୍ଡ୍, ଇଦ୍ ମାମ୍‍ମେ ପୁତ୍‍ତମ୍, ବାତେଙ୍କ୍ ଇତ୍‍କେ ଯଦି ବେନ ଇଶ୍ୱର୍‌ତେ ବକ୍ତ ଆସ୍ ଅନାଦ୍‌ ଇଚ୍ଛା ସାଦନା ମାଡ଼ିତନ୍, ଆଲେକେ ଆଦ୍ ଅନ୍‌ ଗଟ୍ କେଞ୍ଜିତଣ୍ଡ୍ ।
JOH 9:32 ତିଆର୍‍ତେ ଆରାମ୍ ଆତ୍‍ତାଗାଙ୍କ୍ ବେନ କାନାଙ୍କ୍ କଣ୍ଡାଙ୍କ୍ ସାୟେମାଡ଼୍‍ତଣ୍ଡ୍, ଇଦ୍ ତ ବେସୁଙ୍କ୍‍ କେଞ୍ଜ୍‍ୱେ ମାତ୍‍ତମ୍ ।
JOH 9:33 ଇ ନାରୁଡ଼୍ ଇଶ୍ୱର୍ ତାଗାଙ୍କ୍ ୱାଡ଼୍‍ୱେକଟ ମାତ୍‍କେ ଅଣ୍ଡ୍‌ ବେସୁଟ୍‌ ହିଦ୍ ପାଡ଼୍‍ୟି ମାଡ଼େପାର୍‍ୱଣ୍ଡ୍ ଆୟେଣ୍ଡ୍ ।”
JOH 9:34 ଅଡ଼୍‌ ଅଂକିଙ୍କ୍‌ ଉତ୍ତର୍ ହିତ୍‍ତଡ଼୍, “ନିମ୍‍ ତ ସାରେ ପାପ୍ ତାଗାଙ୍କ୍ ଜନମ୍ ଆଦ୍‍ତିଡ଼୍ ନୁ ପାପ୍‍ତାଗ୍ ପେର୍‍ସ୍ତି, ମେଣ୍ଡେ ନିମ୍‍ ମାକିଂଙ୍କ୍ ଶିକ୍ଷା ଇଦୁତିନ୍ ?” ଆଗାଙ୍କ୍ ଅଡ଼୍‌ ଅଂକିଙ୍କ୍‌ ବାଇଦେ ପେସ୍‍ପିତ୍‍ତଡ଼୍ ।
JOH 9:35 ଅଡ଼୍‌ ଅଂକିଙ୍କ୍‌ ସମାଜ୍ ଲତ୍‍ତାଗାଙ୍କ୍ ବାଇଦେ ପେସ୍‍ପିତ୍‍ତଡ଼୍, ଜିସୁ ଇଦ୍ କେଞ୍ଜି ଅଂକିଙ୍କ୍‌ କାଇଲି କେତ୍‍ତଣ୍ଡ୍, “ନିମ୍‍ ବାତେଏ ନାରୁନ୍ ପିଲ୍‌ତିଙ୍କ୍ ବିଶ୍ୱାସ୍ ମାଡ଼ୁତିନ୍ ?”
JOH 9:36 ଅଣ୍ଡ୍‌ ଉତ୍ତର୍ ହିତ୍‍ତଣ୍ଡ୍, “ହୋ ଗଟ୍, ଅଣ୍ଡ୍‌ ବେନ କେଲ୍‍ମ୍, ବେଲାକି ନାନ୍ ଅନାଗ୍ ବେଲା ବିଶ୍ୱାସ୍ ମାଡ଼ିତାନ୍ ?”
JOH 9:37 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ନିମ୍‍ ଅଂକିଙ୍କ୍‌ ଉଡ଼ିମିନ୍ଦେନି, ମେଣ୍ଡେ ବେନ ନି ତଡ଼୍ ଗଟି କେସମିନ୍ଦେଣ୍ଡ୍, ଅଣ୍ଡେ ଆଦ୍ ନାରୁଡ଼୍ ।”
JOH 9:38 ଆଗାଙ୍କ୍ ଅଣ୍ଡ୍‌ କେତ୍‍ତଣ୍ଡ୍, “ପ୍ରବୁ, ନାନ୍ ବିଶ୍ୱାସ୍ ମାଡ଼ୁତାନ୍ !” ମେଣ୍ଡେ ଅଣ୍ଡ୍‌ ଅଂକିଙ୍କ୍‌ ମୋର୍‍ମିଣ୍ଡାଇସ୍ ପ୍ରନାମ୍ ମାଡ଼୍‍ତଣ୍ଡ୍ ।
JOH 9:39 ମେଣ୍ଡେ ଜିସୁ କେତ୍‍ତଣ୍ଡ୍, “ନାରୁଡ଼ାଦ୍ ବିଚାର୍ ମାଡ଼ାଙ୍କ୍ ନାନ୍ ଜଗତ୍‍ତାଗ୍ ୱାସ୍‍ମିନ୍ଦେନ୍, ଉଡ଼୍‍ୱେ ମାନ୍ଦାନ୍ ନାରୁନ୍ ବେଲା ଉଡ଼ିତଣ୍ଡ୍ ନୁ ଉଡ଼ମାନ୍ଦାନ୍ ନାରୁଡ଼୍ ବେଲାକି କାନାଲ୍ ଆଦ୍‍ତନ୍ ।”
JOH 9:40 ପାରୂଶୀଡ଼୍ ଡ଼ାଗାଙ୍କ୍ ବେନଡ଼୍ ଅନ୍‌ ତଡ଼୍ ମାତ୍‍ତଡ଼୍, ଅଡ଼୍‌ ଆଦ୍ କେଞ୍ଜି ଅଂକିଙ୍କ୍‌ କେତ୍‍ତଡ଼୍, “ମାମ୍‍ମେ ବାତ୍‍ତେ କାନାମ୍ ?”
JOH 9:41 ଜିସୁ ଉତ୍ତର୍ ହିତ୍‍ତଣ୍ଡ୍, “କାନାଲ୍ ଆସ୍ ମାତ୍‍କେ ମିଡ଼୍ ଦସି ଆୟ୍‍ୟ ଆୟେଡ଼ି, ବାତେଙ୍କ୍ ଇତ୍‍କେ ମାମ୍‍ମେ ଉଡ଼ୁତମ୍, ଇଦ୍ ଇଞ୍ଜେ କେତୁତିଡ଼୍, ମିୱାଦ୍ ପାପ୍ ମିନ୍ଦେ ।”
JOH 10:1 “ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ବେନ ହାର୍‍ଇସ୍ ମେଣ୍ଢା ଗୁଡ଼ୁସା ତାଗ୍ ନେଙ୍ଗଣ୍ଡ୍, ମାତର୍ ଗୁଡ଼୍‍ସାତିଙ୍କ୍ ତୁଲି ନେଙ୍ଗୀତଣ୍ଡ୍, ଅଣ୍ଡ୍‌ ଡଙ୍ଗାଲ୍ ବା ଡକାଇତ୍;
JOH 10:2 ବାତେଙ୍କ୍ ଇତ୍‍କେ ବେନ ହାର୍‍ଇସ୍ ଆଦ୍‍ତଣ୍ଡ୍ ଅଣ୍ଡ୍‌ ମେଣ୍ଢା ମେଇତାନଣ୍ଡ୍ ।
JOH 10:3 ମାର୍‍ ତେର୍‍ତାନଣ୍ଡ୍ ଆୱିନ୍‌ ମାଇଦିଙ୍କ୍ ମାର୍‍ ଟେଣ୍ଡିଦ୍‍ତଣ୍ଡ୍, ମେଣ୍ଡେ ମେଣ୍ଢା ଅନାଦ୍‌ ଲେଙ୍ଗ୍ କେଞ୍ଜିତା, ମେଣ୍ଡେ ଅଣ୍ଡ୍‌ ନିଜ୍‍ତାଉ ମେଣ୍ଢାକିଂଙ୍କ୍ ପେଦେର୍ ପଇସ୍ କାର୍‍ଙ୍ଗି ବାଇଦେ ପେସ୍‍ପି ଆଦ୍‍ତନ୍ ।
JOH 10:4 ଅଣ୍ଡ୍‌ ନିଜ୍‍ତାଉ ମେଣ୍ଢାଙ୍କ୍ ବାଇଦେ ପେସ୍‍ପ୍‍ତେ ପେର୍‍କେ ଆୱିନ୍‌ ମୁନ୍‍ ଆଦ୍‍ତନ୍ ନୁ ମେଣ୍ଢା ଅନ୍‌ ପେର୍‍କେ ଆଦ୍‍ତା, ବାତେଙ୍କ୍ ଇତ୍‍କେ ଆଉ ଅନାଦ୍‌ ଲେଙ୍ଗ୍‍ଦିଙ୍କ୍ ପୁନ୍‍ତାଆ;
JOH 10:5 ବାତେଙ୍କ୍ ଇତ୍‍କେ ଆଉ ପୁନ୍‍ୱେ ନାରିନ୍ ପେର୍‍କେ ବେସୁଙ୍କ୍‍ ବା ଅନ୍‌, ମାତର୍ ଆଉ ଅନାଗାଙ୍କ୍ ମିରିତା, ଆଉ ପୁନ୍‍ୱେ ନାରୁନ୍ ଲେଙ୍ଗ୍ ହେନ୍‍ସ ।”
JOH 10:6 ଜିସୁ ଅଡ଼୍‌‍କିଂଙ୍କ୍ ହିଦ୍ ଗଟି କେତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଅଡ଼୍‌‍କିଂଙ୍କ୍ ବାତ୍ ବାତ୍ କେସ୍‍ମାତ୍‍ତଣ୍ଡ୍, ଆଦ୍‍ ସାରେ ବାତେଏ ଅଡ଼୍‌ ବୁଜେମ୍ ଆୟ୍‍ୟଡ଼୍ ।
JOH 10:7 ଆଗାଙ୍କ୍ ଜିସୁ ମେଣ୍ଡନ୍‍ନ୍ଦାମ୍ କେତ୍‍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ନାନ୍ ନିଜେ ମେଣ୍ଢାକିନ୍ ହାର୍ ।
JOH 10:8 ବେସ୍‌କ୍ ତଡ଼୍ ନା ମୁନେ ୱାସ୍‍ମିନ୍ଦେଡ଼ି, ଅଡ଼୍‌ ସାରେତଡ଼୍ ଡଙ୍ଗା ବା ଡକାଇତ୍, ବାତେଙ୍କ୍ ଇତ୍‍କେ ସାରେ ମେଣ୍ଢା ଅଡ଼୍‌ ଗଟି କେଞ୍ଜ ।
JOH 10:9 ନାୟାଦ୍ ମାର୍‍ ଇସ୍, ଯଦି ବେନ ନା ଆଲାଇସ୍ ଆଦ୍‍ତନ୍, ଆଲେକେ ଅଣ୍ଡ୍‌ ରକ୍ଷା ଜିୱେଦର୍‍କିତ୍ ନୁ ଲୋପେୱାସ୍ ନୁ ବାଇଦେଆଞ୍ଜ୍ ତିନ୍ଦାନାହୁ ଦର୍‍କିତ୍ ।
JOH 10:10 ଡଙ୍ଗାଲ୍ ୱାଦ୍‍ତଣ୍ଡ୍ ଡଙ୍ଗାଙ୍କ୍, ଆୱୁକାନଙ୍କ୍‌ ନୁ ଦଂସ ମାଡ଼ାଙ୍କ୍, ନାନ୍ ୱାତ୍‍ତାନ୍ ମିକିଂଙ୍କ୍ ଜିୱୁଣ୍ଡ୍ ହିଦାନ୍ ସେଙ୍ଗେ, ମିଡ଼୍ ବେଲାକି ଜିୱୁଣ୍ଡ୍‍ତେ ଗାଟି ତିପାଲ୍‍ମାଡ଼େ ପାର୍‍ତିଡ଼୍ ।”
JOH 10:11 “ନାନ୍ ସାୟେତ୍‍ମେଣ୍ଢା ମେଇତାନନ୍; ସାୟେତ୍‍ମେଣ୍ଢା ମେଇତାନନ୍ ମେଣ୍ଢାନ୍ ମାଇଦିଙ୍କ୍ ନିଜେତ୍ ଜିୱୁଣ୍ଡ୍ ହିଦ୍‍ତାନ୍ ।
JOH 10:12 ବେନ ମୁଲ୍ୟ ଆସ୍ ମେଣ୍ଢା ମେଇତିତଣ୍ଡ୍, ଅଣ୍ଡ୍‌ ମେଇତାନଣ୍ଡ୍ ଆୟ୍‍ୟ, ଅଣ୍ଡ୍‌ କୁକାଲ୍‍ ୱାଦାନାଦ୍ ଉଡ଼ି ମେଣ୍ଢାଙ୍କ୍ ୱିଡ଼୍‍ସି ମିର୍‍ତଣ୍ଡ୍,
JOH 10:13 ବେନ ମୁଲ୍ୟ ଆସ୍ ମେଇତିତଣ୍ଡ୍, ଅଣ୍ଡ୍‌ ମିର୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଗଲାଲ୍ ମେଣ୍ଢାନ୍ ମାଇଦିଙ୍କ୍ ଚିନ୍ତେ ମାଡ଼ଣ୍ଡ୍ ।
JOH 10:14 ନାନ୍ ସାୟେତ୍ ମେଣ୍ଢା ମେଇତାନନ୍ । ବାବାଲ୍ ବେଲା ନାକିଂଙ୍କ୍ ପୁତ୍‍ତଣ୍ଡ୍ ନୁ ନାନ୍ ବାବଙ୍କ୍ ପୁତ୍‍ତାନ୍,
JOH 10:15 ଆଦ୍‍ଲେକାମ୍ ନାନ୍ ନା ନିଜେତ୍ ମେଣ୍ଢାଙ୍କ୍ ପୁତ୍‍ତାନ୍, ମେଣ୍ଡେ ନାୟାୱୁ ନିଜେତ୍ ମେଣ୍ଢା ନାକିଂଙ୍କ୍ ପୁତ୍‍ତା, ମେଣ୍ଡେ ମେଣ୍ଢାନ୍ ମାଇଦିଙ୍କ୍ ନାନ୍ ନାୟାଦ୍ ଜିୱୁଣ୍ଡ୍ ଇଦ୍‍ତାନ୍ ।
JOH 10:16 ନାୟାଉ ମେଣ୍ଡେ ବାଗାତାଉ ମେଣ୍ଢା ମିନ୍ଦେ, ବେନା ଇ ଗୁଡ଼ୁସେତ୍ ଲୋପେ ଇଲା । ଆୱିଙ୍କ୍ ମିକା ନାନ୍ ତାତେୱେଇତିତ୍‍ । ଆଉ ନାୟାଦ୍ କାର୍‍ଙ୍ଗା ନାଦ୍ କେଞ୍ଜିତା ନୁ ସାରେ ୱେରଡ଼୍ ଗଲାନ୍ ୱେରଡ଼୍ ଗୁଡ଼୍‍ସା ଆଶେ ମାନ୍‍ତା ।”
JOH 10:17 “ନାନ୍ ନାୟାଦ୍ ଜିୱୁନ୍‍ ଇଦାଙ୍କ୍ ଇଚ୍ଛା ମାଡ଼୍‍ତାଙ୍କ୍ ବାବାଲ୍ ନାକିଂଙ୍କ୍ ପ୍ରେମ ମାଡ଼ିତନ୍, ନାନ୍ ନାୟାଦ୍ ଜିୱୁତିଙ୍କ୍ ହିତ୍‍କେ, ମେଣ୍ଡ୍‍ନ୍ ଦାମ୍ ନାକିଂଙ୍କ୍ ଜିୱୁଣ୍ଡ୍ ଦର୍‍କିତ୍ ନାୟାଦ୍ ହିଦ୍ ଅଦିକାର୍‌ ମିନ୍ଦେ । ନାନ୍ ନାୟାଦ୍ ବାବାନାଗାଙ୍କ୍ ଇଦ୍ ବୁଦ୍‍ତେ ଇସ୍‍ମିନ୍ଦେନ୍ ।
JOH 10:18 ବେନ ନାଗେ ଆଦ୍ ଆୟନ୍, ମାତର୍ ନାନ୍ ନିଜେତ୍ ଇଚ୍ଛାତେ ଆଦ୍ ଦାନ ୱାଟିତାନ୍ । ଆଦ୍ ୱାଟାନଙ୍କ୍ ନାୟାଦ୍ ଅଦିକାର୍‌ ମିନ୍ଦେ ନୁ ନା ବାବାନାଗାଙ୍କ୍ ଇଦ୍ ଗଟ୍ ଇସ୍‍ମିନ୍ଦେନ୍ ।”
JOH 10:19 ଜିସୁନ୍ ଇୱୁସାରେ ଗଟିନ୍‌ ମାଇଦିଙ୍କ୍ ନାରୁଡ଼୍ ଲୋପେ ମେଣ୍ଡନ୍‍ନ୍ଦାମ୍ ମତବେଦ ଗଟେମ୍‍ଆତ୍‍ତେ ।
JOH 10:20 ବେସ୍‍କ୍‍ତୁଡ଼୍‍ କେତାଙ୍କ୍ ପସ୍‍ପ୍‍ତ୍‍ତଡ଼୍, “ଅଂକିଙ୍କ୍‌ ବୁତ୍ ପଇତେ, ଅଣ୍ଡ୍‌ ବାୟାଲ୍, ବାତ୍‍ତିଙ୍କ୍ ଅନ୍‌ ଗଟି କେଞ୍ଜୁତିଡ଼୍ ।”
JOH 10:21 ବାଗାତଡ଼୍ କେତ୍‍ତଡ଼୍, “ଇଦ୍‍ସାରେ ଗଟି ତ ବୁତ୍ ପଇତେ ନାରୁନାଦ୍ ଆୟ୍‍ୟ; ବୁତ୍ ବାତେଏ କାନାଲ୍‌ ନାୟାୱୁ କଣ୍ଡାଙ୍କ୍ ସାୟେ ମାଡ଼୍ ପାର୍‍ତଣ୍ଡ୍ ?”
JOH 10:22 ଆସୁଙ୍କ୍ ଜିରୂଶାଲମ୍ ମନ୍ଦିର୍ ତିଆର୍ ପାଣ୍ଡୁମ୍ ଆସମାତ୍‍ତେ; ଆଦ୍ ଦିନାମ୍ ଶାଲ୍ କାଲାମ୍ ମାତ୍‍ତେ,
JOH 10:23 ମେଣ୍ଡେ ଜିସୁ ମନ୍ଦିର୍‍ତାଗ୍ “ଶଲୋମନ୍‍” ମଣ୍ଡପ୍‍ତାଗ୍ ଉଡମାତ୍‍ତଣ୍ଡ୍ ।
JOH 10:24 ଆଗାଙ୍କ୍ ଯିହୁଦୀନଡ଼୍ ଅଂକିଙ୍କ୍‌ ତିଡ଼ିଇ ପାକେ ଉଡ଼ି କେତାଙ୍କ୍ ପସ୍‍ପ୍‍ତ୍‍ତଡ଼୍, “ମେଣ୍ଡେ ବେସ୍‌କ୍ ଦିନା ମାକିଂଙ୍କ୍ ଏର୍କା ତାଗ୍ ନେହେତିଡ଼୍ ? ଯଦି ନିମ୍‍ ମସିହ, ଆଲେକେ ମାକିଂଙ୍କ୍ ଇଟି ମିକା କେଲ୍‍ମ୍ ।”
JOH 10:25 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ କେତ୍‍ତଣ୍ଡ୍, “ନାନ୍ ମିକିଂଙ୍କ୍ କେସ୍‍ମିନ୍ଦେନ୍, ବାତେଙ୍କ୍ ଇତ୍‍କେ ମିଡ଼୍ ବିଶ୍ୱାସ୍ ମାଡ଼୍‍ୱିଡ଼୍; ନା ବାବାନ୍ ପେଦେର୍ ତେ ନାନ୍ ବେନ୍ ପାଡ଼୍‍ୟି ମାଡ଼ୁତାନ୍, ଆଦ୍‍ ସାରେ ନା ବିଷୟ୍‍ତେ ସାକ୍ଷ୍ୟ ଇଦୁତାନ୍;
JOH 10:26 ବାତେଙ୍କ୍ ଇତ୍‍କେ ମିଡ଼୍ ବିଶ୍ୱାସ୍ ମାଡ଼୍‍ୱିଡ଼୍, ବାତେଙ୍କ୍ ଇତ୍‍କେ ମିଡ଼୍ ନା ଗୁଡ଼ୁସେତ୍ ମେଣ୍ଢାନଡ଼ି ଆୟୱିଡ଼୍ ।
JOH 10:27 ନା ମେଣ୍ଢା ସାରେ ନାୱାଦ୍ ଲେଙ୍ଗ୍ କେଞ୍ଜିତା ନୁ ନାନ୍ ଆୱିଙ୍କ୍ ପୁତ୍‍ତାନ୍, ମେଣ୍ଡେ ଆଉ ନା ପେର୍‍କେ ପେର୍‍କେ ୱାଦ୍‍ତା,
JOH 10:28 ମେଣ୍ଡେ ନାନ୍ ଆୱିଙ୍କ୍ ସାରେଦିନାତ୍ ଜିୱୁ ଇଦ୍‍ତାନ୍, ମେଣ୍ଡେ ବେସୁଙ୍କ୍‌ବା ଆଉ ବିନଷ୍ଟ ଆୟ୍‍ୟ, ମେଣ୍ଡେ ବେନ ନା କାଇଦାଗାଙ୍କ୍ ଆୱିଙ୍କ୍ ଆଦ୍ ପାର୍‍ୱଡ଼୍ ।
JOH 10:29 ନା ବାବାଲ୍ ନାକିଂଙ୍କ୍ ବାତେଏ ଇସ୍‍ମିନ୍ଦେଣ୍ଡ୍ ଆଦ୍ ସାରେତାଗଙ୍କ୍ ଗାଟି ମୁଲ୍ୟ, ମେଣ୍ଡେ ବାବାନ୍ କାଇଦେ କନ୍‍ସ୍ ବେନବା ଆଦାଙ୍କ୍ ପାର୍‍ୱଡ଼୍ ।
JOH 10:30 ବାବାଲ୍ ନୁ ନାନ୍ ୱେରଣ୍ଡ୍‌ ।”
JOH 10:31 ଇଦ୍ ଗଟ୍ କେଞ୍ଜି ନାରୁଡ଼୍ ଅଂକିଙ୍କ୍‌ ରେହେତାଙ୍କ୍ ମାଇଦିଙ୍କ୍ ମେଣ୍ଡନ୍ ଦାମ୍ କାଲ୍‍କ୍ ତାତ୍‍ତଡ଼୍ ।
JOH 10:32 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ ବାବାନାଗାଙ୍କ୍ ଗାଟି ସାୟେତ୍ ପାଡ଼୍‍ୟି ମିକିଂଙ୍କ୍ ତଅସ୍ ମିନ୍ଦେନ୍; ଆଦ୍ ସାରେ ପାଡ଼ିୟିତାଗାଙ୍କ୍ ନାକିଂଙ୍କ୍ କାଲ୍‍କିନ୍ ରେହେତାଙ୍କ୍ ଆଦୁତିଡ଼୍ ?”
JOH 10:33 ଅଡ଼୍‌ କେତ୍‍ତଡ଼୍, “ସାୟେତ୍ ପାଡ଼୍‍ୟି ମାଇଦିଙ୍କ୍ ମାମ୍‍ମେ ନିକିଂଙ୍କ୍ କାଲ୍‍କିନ୍ ରେହମ୍, ବାତେଙ୍କ୍ ଇତ୍‍କେ ଇଶ୍ୱର୍‌ତେ ନିନ୍ଦେତ୍‍ ମାଇଦିଙ୍କ୍, ମେଣ୍ଡେ ନାରୁଡ଼୍ ଆସ୍ ନିଜେତିଙ୍କ୍ ଇଶ୍ୱର୍ ଇଞ୍ଜ୍ କେସମାନାଙ୍କ୍ ।”
JOH 10:34 ଜିସୁ ଅଡ଼୍‌‍କ୍ ଉତ୍ତର୍ ହିତ୍‍ତଣ୍ଡ୍, “ମିୱାଦ୍ ଶାସ୍ତ୍ରତାଗ୍ ଲେକାମିନ୍ଦେ, ଇଶ୍ୱର୍ କେତିତଣ୍ଡ୍, ‘ମିଡ଼୍ ଆଦ୍‍ତିଡ଼୍ ଇଶ୍ୱର୍ ।’
JOH 10:35 ବେନଡ଼୍ ପାକେ ଇଶ୍ୱର୍‌ତାଦ୍ ବାକ୍ୟ ମିନ୍ଦେ ଇତ୍‍କେ, ଅଡ଼୍‌‍କିଂଙ୍କ୍ ଯଦି ଅଣ୍ଡ୍‌ ଇଶ୍ୱର୍ ଇଞ୍ଜ କେତ୍‍କେ ମେଣ୍ଡେ, ଦର୍ମଶାସ୍ତ୍ର କଣ୍ଡନ୍ ମାଡ଼ାଙ୍କ୍ ପାର୍‍ୱଡ଼୍,
JOH 10:36 ଆଲେକେ ବେନଙ୍କ୍ ଇଶ୍ୱର୍ ପବିତ୍ର ମାଡ଼ି ଜଗତ୍‍ତାଗ୍ ରହସିତ୍‍ତଣ୍ଡ୍, ଆଦିଙ୍କ୍ ବାତେଏ ମିଡ଼୍, ନାନ୍ ଇଶ୍ୱର୍‌ତେ ମାର୍‍, ଇଦ୍ ନାନ୍ କେଲ୍‍ନାଙ୍କ୍, ନିମ୍‍ ଇଶ୍ୱର୍‌ତିଙ୍ଗ୍ ନିନ୍ଦ୍ ମାଡ଼ୁତିନ୍ ଇଞ୍ଜ କେସମିନ୍ଦେନି ?
JOH 10:37 ଯଦି ନାନ୍ ନା ବାବାନ୍ କାମ୍‍ସାରେ ମାଡ଼ନ୍ ଆଲାଇତ୍‍କେ ନାକିଂଙ୍କ୍ ବିଶ୍ୱାସ୍ ମାଡ଼୍‍ମାଟ୍;
JOH 10:38 ବାତେଙ୍କ୍ ଇତ୍‍କେ ଯଦି ନାନ୍ ମାଡ଼ିତାନ୍, ଆଲାଇତ୍‍କେ ଆଗେଙ୍କ୍ ମିଡ଼୍ ନାକିଂଙ୍କ୍ ବିଶ୍ୱାସ୍ ମାଡ଼୍‍ମାଟ୍, ଆଗେକ୍ ବାବାଲ୍ ଯେ ନାୟାଗେ ମିନ୍ଦେଣ୍ଡ୍ ନୁ ନାନ୍ ବାବାନାଗ୍ ମିନ୍ଦେନ୍, ଇଦ୍ ବେଲାକି ମିଡ଼୍ ପୁତ୍‍ତିଡ଼୍ ନୁ ପୁନୁଟ୍, ଆଦିନ୍ ମାଇଦିଙ୍କ୍ କାମ୍‍ସାରେ ବିଶ୍ୱାସ୍ ମାଡ଼ାଟ୍ ।”
JOH 10:39 ଆଗାଙ୍କ୍ ଅଡ଼୍‌ ଅଂକିଙ୍କ୍‌ ପଇତାନ୍ ମାଇଦିଙ୍କ୍ ମେଣ୍ଡନ୍ ଦାମ୍ ଚେଷ୍ଟା ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ଅଡ଼୍‌ କାଇଦେ ଦର୍‍କ୍‍ୱେ ପେଇସ୍ ଆତ୍‍ତଣ୍ଡ୍ ।
JOH 10:40 ଆଦିନ୍ ମାଇଦିଙ୍କ୍ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଯର୍ଦ୍ଦନ୍‍ତେ ମେଣ୍ଡନ୍ ପାକେ ଆଞ୍ଜ୍, ଯୋହନ୍‌ ବେନ୍ ପଡ଼ିୟେତାଗ୍ ମୁନେଙ୍କ୍ ବାପ୍ତିସ୍ମ ଇସମାତ୍‍ତଣ୍ଡ୍, ଆଦ୍ ପଡ଼ିୟେ ତାଗ୍ ୱାସ୍ ଆଗେ ମାତ୍‍ତଣ୍ଡ୍ ।
JOH 10:41 ମେଣ୍ଡେ, ନାର୍‍ଗେ ଅନାଗ୍ ୱାସ୍ କେତ୍‍ତଣ୍ଡ୍, “ଯୋହନ୍‌ ବାତେବା ବାକ୍‍ୱା ପାଡ଼୍‍ୟି ମାଡ଼ନ୍, ବାତେଙ୍କ୍ ଇତ୍‍କେ ଇ ନାରୁଡ଼୍ ବିଷୟ୍‍ତେ ଯୋହନ୍‌ ବେନ୍ ସାରେ ଗଟି କେତ୍‍ତଣ୍ଡ୍, ଆଦ୍‍ ସାରେ ସତ୍;”
JOH 10:42 ମେଣ୍ଡେ, ଆଦ୍ ପଡ଼ିୟେତାଗ୍ ନାର୍‍ଗେ ନାରୁଡ଼୍ ଜିସୁଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।
JOH 11:1 ବେତନିୟା ମାନ୍ଦାନ୍ ଲାଜାର୍ ପେଦେର୍ ତଣ୍ଡ୍ ୱେରଣ୍ଡ୍ ନାରୁଣ୍ଡ୍‌ ରୋଗ୍‍ତେ ମାତ୍‍ତଣ୍ଡ୍; ମରୀୟମ୍ ନୁ ତାନ୍ ଏଲାଡ଼୍‍ ମାର୍ତା ଆଦ୍ ନାର୍ ମାଞ୍ଜମାତ୍‍ତା ।
JOH 11:2 ବେନ୍ ନାଟାଡ଼୍ ପ୍ରର୍‍ବୁଙ୍କ୍ ସାଏତ୍ ଗାବ୍‍ତାଦ୍ ନିୟ୍‍ ଲେକେତ୍‍ ମାଡ଼ି ତାନ୍ କେଲ୍‍କିନେ ଅନ୍‌ ଡେକାଙ୍କ୍ ଉଞ୍ଜ୍‍ପିତେ, ଇଦ୍ ଆ ମରୀୟମ୍; ତାମ୍ ଦାଦାଲ୍ ଲାଜାର୍ ରୋଗ୍‍ତେ ମାତ୍‍ତଣ୍ଡ୍ ।
JOH 11:3 ଆଉ ଏଲାସ୍କ୍‌ ଜିସୁନ୍ ପାକେ କେସ୍ ରହତାଆ, “ପ୍ରବୁ, ଉଡ଼େ, ବେନଙ୍କ୍ ନିମ୍‍ ସ୍ନେହ ମାଡ଼୍‍ନିନ୍, ଅଣ୍ଡ୍‌ ରୋଗ୍‍ତେ ମିନ୍ଦେଣ୍ଡ୍ ।”
JOH 11:4 ଇଦ୍ କବର୍ କେଞ୍ଜି ଜିସୁ କେତ୍‍ତଣ୍ଡ୍, “ଇ ରୋଗ୍‍ତେ ଲାଜାର୍ ଡଲନ୍ । ବାତେଙ୍କ୍ ଇତ୍‍କେ ଇଦିନ୍ ତଡ଼୍ ଇଶ୍ୱର୍ ମହିମାନିତ ଆଦ୍‍ତନ୍ ନୁ ଆଦିନ୍ ତଡ଼୍ ଇଶ୍ୱର୍‌ତେ ମାର୍‍ ମିକା ଗୌରବ୍‍ ପାଏମ୍ ଆଦ୍‍ତନ୍ ।”
JOH 11:5 ଜିସୁ ମାର୍ତା ନୁ ତାନ୍‌ ଏଲାଡ଼୍‍ ନୁ ଲାଜାର୍‍ତିଙ୍କ୍ ପ୍ରେମତେ ସ୍ନେହ ମାଡ଼ମାତ୍‍ତନ୍‌ ।
JOH 11:6 ଆତ୍‍କେମିକା ଲାଜାର୍ ରୋଗ୍‍ତେ ମିନ୍ଦେଣ୍ଡ୍ ଇଞ୍ଜ ବେସୁଙ୍କ୍‍ ଜିସୁ କେଞ୍ଜ୍‍ତଣ୍ଡ୍, ଆସୁଙ୍କ୍ ଅଣ୍ଡ୍‌ ବେନ୍ ପଡ଼ିୟେତାଗ୍ ମାତ୍‍ତଣ୍ଡ୍, ଆଦେପଡ଼ିଇ ତାଗ୍ ମେଣ୍ଡେ ରେଣ୍ଡ୍ ଦିନା ମାତ୍‍ତଣ୍ଡ୍ ।
JOH 11:7 ତାନ୍‍ପେର୍କେ ଜିସୁ ଶିଷ୍ୟକିଂଙ୍କ୍ କେତ୍‍ତଣ୍ଡ୍, “ଦାଟ୍‍ଟି, ମାନାଡ଼୍ ମେଣ୍ଡ୍‍ନ୍ ଦାମ୍ ମାଲ୍‍ସ୍ ଯିହୁଦାତାଗ୍ ଆଦିକାଡ଼୍‍ ।”
JOH 11:8 ଶିଷ୍ୟଡ଼୍ ଅଂକିଙ୍କ୍‌ କେତ୍‍ତଡ଼୍, “ହୋ ଗୁରୁ, ବେସ୍‌କ୍ ଦିନାତେ ମୁନେନ୍ ନାରୁଡ଼୍ ମେଣ୍ଡେ ନିକିଂଙ୍କ୍ କାଲ୍‍କ୍ ହେସାଙ୍କ୍ ଚେଷ୍ଟା ମାଡ଼ମାତ୍‍ତଡ଼୍, ମେଣ୍ଡେ ନିମ୍‍ ମେଣ୍ଡନ୍ ଦାମ୍ ଆଦାଙ୍କ୍ କେତୁତିନ୍ ?”
JOH 11:9 ଜିସୁ ଉତ୍ତର୍ ହିତ୍‍ତଣ୍ଡ୍, “ପାୟାଲ୍ ବାତେଏ ବାର ଗାଣ୍ଟା ଇଲା ? ବେନ ବେସୁଙ୍କ୍‍ ୱେସ୍‍ତେ ତାକାନ୍‍ୱେଲେ ରାଲଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଇ ଜଗତ୍‍ତାଗ୍ ୱେସ୍ ଉଡ଼ିତଣ୍ଡ୍;
JOH 11:10 ବାତେଙ୍କ୍ ଇତ୍‍କେ ଇକାଡ଼୍ ତେ ତାକ୍‍କେ ଅଣ୍ଡ୍‌ ରାଲିତଣ୍ଡ୍, ବାତେଙ୍କ୍ ଇତ୍‍କେ ଆଦ୍ ଅଣ୍ଡ୍‌ ଆଦାନ୍ ୱେଲେ ୱେସ୍‍ଇଲେ ।”
JOH 11:11 ଜିସୁ ଆହୁସାରେ ଗଟି କେତ୍‍ତଣ୍ଡ୍ ଅଡ଼୍‌‍କ୍ ମେଣ୍ଡେ ଅଦିକ୍‌ କେତ୍‍ତଣ୍ଡ୍, “ମାନ୍‍ ସାଙ୍ଗ ଲାଜାର୍ ଉସ୍‍କାଡ଼୍‍ତେ ମିନ୍ଦେଣ୍ଡ୍, ବାତେଙ୍କ୍ ଇତ୍‍କେ ଅଂକିଙ୍କ୍‌ ଉସ୍‍କାଡ଼୍ ତାଗାଙ୍କ୍‍ ତେତାନ୍ ମାଇଦିଙ୍କ୍ ନାନ୍ ଆଦୁତାନ୍ ।”
JOH 11:12 ତାନ୍ ପେର୍‍କେ ଶିଷ୍ୟଡ଼୍ ଅଂକିଙ୍କ୍‌ କେତ୍‍ତଡ଼୍, “ପ୍ରବୁ ଯଦି ଅଣ୍ଡ୍‌ ଉସ୍‍କାଡ଼୍‍ତେ ମିନ୍ଦେଣ୍ଡ୍, ଆଲେକେ ଅଣ୍ଡ୍‌ ସୁସ୍ଥ ଆଦ୍‍ତନ୍ ।”
JOH 11:13 ଜିସୁ ଅନାଦ୍‌ ଡଲାନ୍ ବିଷୟ୍‍ତେ କେସ୍‍ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଉଞ୍ଜିମାନ୍ଦାନ୍ ବିଷୟ୍‍ତେ କେତ୍‍ତଣ୍ଡ୍ ଇଞ୍ଜ ଅଡ଼୍‌ ଏର୍କା ମାଡ଼୍‍ତଡ଼୍ ।
JOH 11:14 ଜିସୁ ଆସୁଙ୍କ୍ ଅଡ଼୍‌‍କିଂଙ୍କ୍ ସତ୍ କେତ୍‍ତଣ୍ଡ୍, “ଲାଜାର୍ ଡଲ୍‍ତଣ୍ଡ୍;
JOH 11:15 ନାନ୍ ଯେ ଆଦ୍‍ପଡ଼ିୟେ ତାଗ୍ ଇଲ୍‍ୱେ ମାତ୍‍ତାନ୍, ଆଦିନ୍ ମାଇଦିଙ୍କ୍ ମିତଡ଼୍ ନାନ୍ ୱେଡ଼୍‍କା ମାଡ଼ୁତାନ୍, ବେଦ୍‍ଲେକାମ୍ ମିଡ଼୍ ବିଶ୍ୱାସ୍ ମାଡ଼ିତିଡ଼୍; ବାତେଙ୍କ୍ ଇତ୍‍କେ ଦାଟ୍‍ଟି, ମାନାଡ଼୍ ଅଂକିଙ୍କ୍‌ ଉଡାଙ୍କ୍ ଆଦିକାଡ଼୍ ।”
JOH 11:16 ତୋମା ବେନଙ୍କ୍ ଦିଦୁମ୍ ଇଞ୍ଜ କେତିତଡ଼୍‍, ଅଣ୍ଡ୍‌ ମାନ୍‍ ସାଙ୍ଗ ଶିଷ୍ୟଡ଼୍‍କ୍ କେତ୍‍ତଣ୍ଡ୍, “ଦାଟ୍‍ଟି ମାନାଡ଼୍ ଆନ୍‌‍ତେ ଗୁରୁନ୍‍ ତଡ଼୍ ଆଞ୍ଜ୍ ଅନ୍‌‍ତଡ଼୍ ଡଲିକାଡ଼୍ ।”
JOH 11:17 ଜିସୁ ହେଉସ୍ କେଞ୍ଜ୍‍ତଣ୍ଡ୍ ଯେ, ଅଣ୍ଡ୍‌ ନାଲୁଦିନା ଆତ୍‍ତେ ଅଂକିଙ୍କ୍‌ ସମାଦି ତାଗ୍ ୱାଟ୍‍ତଡ଼୍ ।
JOH 11:18 ବେତନିଆ ଯିରୁଶାଲେମ୍ ତା ଗାର୍‍ରେ ମାତ୍‍ତେ, ମାତର୍ ମୁଣ୍ଡ୍ କିଲମିଟର୍ ଦୁରାମ୍;
JOH 11:19 ଯିହୁଦୀ ଡ଼ାଗାଙ୍କ୍ ନାର୍‍ଗେ ମାର୍ତା ନୁ ମରୀୟମ୍ ତିଙ୍କ୍ ତାମ୍ ଦାଦାଲ୍‌ ବିଷୟ୍‍ତେ ସାନ୍ତନା ହିଦାନ୍ ମାଇଦିଙ୍କ୍ ଆୱିନା ୱାସ୍‍ମାତ୍‍ତଡ଼୍‍ ।
JOH 11:20 ଆଗାଙ୍କ୍ ଜିସୁ ୱାତ୍‍ତଣ୍ଡ୍ ଇଞ୍ଜ ବେସୁଙ୍କ୍‍ ମାର୍ତାଲ୍ କେଞ୍ଜ୍‍ତେ, ଆସୁଙ୍କ୍ ଆଦ୍ ଜିସୁଙ୍କ୍ କାଇଲାନ୍ ମାଇଦିଙ୍କ୍ ଆତ୍‍ତେ, ବାତେଙ୍କ୍ ଇତ୍‍କେ ମରୀୟମ୍ ଲୋନ୍‌ ମାତ୍‍ତେ ।
JOH 11:21 ମାର୍ତା ଜିସୁଙ୍କ୍ କେତ୍‍ତେ, “ପ୍ରବୁ, ନିମ୍‍ ଯଦି ଇଗେ ମାନେନି ଆଲେକେ ମା ଦାଦାଲ୍ ଡଲନ୍ ଆୟେନ୍ ।
JOH 11:22 ବାତେଙ୍କ୍ ଇତ୍‍କେ ନାନ୍ ପୁତ୍‍ତାନ୍ ନିମ୍‍ ଇଶ୍ୱର୍‌ତିଙ୍କ୍ ବାତେଏ ମେଣ୍ଡେ ତାଲ୍‍କେ, ଇଶ୍ୱର୍ ଯେ ଆଦ୍ ଇଦ୍‍ତଣ୍ଡ୍, ହିଦ୍ ନାନ୍ ପୁତ୍‍ତାନ୍ ।”
JOH 11:23 ଜିସୁ ଆଦିଙ୍କ୍ କେତ୍‍ତଣ୍ଡ୍, “ମିଇ ଦାଦାଲ୍ ମେଣ୍ଡେ ଜିୱୁ ଆସ୍ ତେଦିତଣ୍ଡ୍ ।”
JOH 11:24 ମାର୍ତା ଜିସୁଙ୍କ୍ କେତ୍‍ତେ, “ଅଣ୍ଡ୍‌ ଯେ ଶେଷ୍ ଦିନାତେ ମେଣ୍ଡନ୍‍ନ୍ଦାମ୍ ତେଦିତଣ୍ଡ୍ ଇଦ୍ ନାନ୍ ପୁତ୍‍ତାନ୍ ।”
JOH 11:25 ଜିସୁ ଆଦିଙ୍କ୍ କେତ୍‍ତଣ୍ଡ୍, “ନାନ୍ ପୁନର୍‍ରୁତାନ୍ ନୁ ଜିୱୁନ୍; ବେନ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ବେସୁଙ୍କ୍‌ବା ଡଲ୍‍କେ, ମିକା ଅଣ୍ଡ୍‌ ଜିୱୁଅଦ୍‍ତଣ୍ଡ୍ ।
JOH 11:26 ମେଣ୍ଡେ ବେନ ଗେଲ୍‍ସ୍‍କେ ନୁ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅନ୍‌ ବେସୁଙ୍କ୍‌ବା ଡଲନ୍; ଇଦ୍ ବାତେଏ ବିଶ୍ୱାସ୍ ମାଡ଼ୁତିଡ଼୍ ?”
JOH 11:27 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ହୋ, ପ୍ରବୁ, ବେନ ଜଗତ୍‍ତାଗ୍ ଆଗମନ୍ ମାଡ଼ାନ୍ ମାତ୍‍ତେ, ନିମ୍‍ ଯେ ଇଶ୍ୱତେ ମାର୍‍ ଆଦ୍ ମସିହ, ଇଦ୍ ନାୱାଦ୍ ବିଶ୍ୱାସ୍ ।”
JOH 11:28 ମରୀୟମ୍ କେତ୍‍ତେ ପେର୍‍କେ ମାର୍ତା ଆଞ୍ଜ୍ ତାନ୍ ଏଲାଡ଼୍‍ ମରୀୟମ୍ ତିଙ୍କ୍ ଜାମେ କାର୍‍ଙ୍ଗି କେତ୍‍ତେ, “ଗୁରୁ ୱାତ୍‍ତଣ୍ଡ୍ ମେଣ୍ଡେ ନିକିଂଙ୍କ୍ କାର୍‍ଙ୍ଗୁତଣ୍ଡ୍ ।”
JOH 11:29 ଆଦ୍ ଇଦ୍ କେଞ୍ଜି ଜାପେତେଦି ଅନ୍‌ ଗାର୍‍ରେ ଆତ୍‍ତେ ।
JOH 11:30 ଜିସୁ ଆସୁଙ୍କ୍ ନାର୍ ଲୋପେ ୱାଡ଼୍‍ୱେ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ମାର୍ତା ଅଂକିଙ୍କ୍‌ ବେନ୍ ପଡ଼ିୟେତାଗ୍ କାଇଲିମାତ୍‍ତେ, ଆସୁଙ୍କ୍ ଯାକ ଜିସୁ ଆଗେମାତ୍‍ତଣ୍ଡ୍ ।
JOH 11:31 ବେନ୍ ଯିହୁଦୀନଡ଼୍ ଅଦିନ୍‌ତଡ଼୍ ଲୋନ୍‌ ମାଞ୍ଜ୍ ତାଙ୍କ୍ ସାନ୍ତନା ଇସମାତ୍‍ତଡ଼୍, ଅଡ଼୍‌ ମରୀୟମ୍ ଜାପେ ତେଦି ପେଇସ୍ ଆଦାନାଦ୍ ଉଡ଼ି, ଆଦ୍ ସମାଦି ପାକେ କେୟାନ୍ ସେଙ୍ଗେ ଆଦୁତ୍‍ତେ, ଆଦ୍ ଏର୍କା ମାଡ଼ି ଆଦିନ୍ ପେର୍‍କେ ପେର୍‍କେ ଆଦ୍‍ତଡ଼୍ ।
JOH 11:32 ଆଗାଙ୍କ୍ ଜିସୁ ବେନ୍ ପଡ଼ିୟେତାଗ୍ ମାତ୍‍ତଣ୍ଡ୍, ମରୀୟମ୍ ଆଦ୍ ପଡ଼ୟେ ତାଗ୍ ହେଉସ୍ ଅଂକିଙ୍କ୍‌ ଉଡ଼ି ଅନ୍‌ ଡେକାନ୍ ମଦଲ୍ ରାଲୀ କେତ୍‍ତେ, “ପ୍ରବୁ, ଯଦି ନିମ୍‍ ଇଗେ ମାନେନି, ଆଲେକେ ମା ଦାଦାଲ୍ ଡଲ୍‍ଲାନଙ୍କ୍ ଆୟେନ୍ ।”
JOH 11:33 ଜିସୁ ମରିୟମ୍‍ତିଙ୍କ୍ କେୟାନାଦ୍ ଉଡ଼୍‍ତଣ୍ଡ୍, ଅଣ୍ଡ୍‌ ଯିହୁଦୀନଡ଼୍‍କ୍ ଆଦିନ୍ ତଡ଼୍ ୱାତ୍‍ତାଦ୍ ଉଡ଼୍‍ତଣ୍ଡ୍ । ଅଡ଼୍‌ ମିକା କେୟମାତ୍‍ତଡ଼୍, ଆଦ୍ ଉଡ଼ି ଜିସୁ ଗାଟି ଦୁଃକ ମାଡ଼୍‍ତଣ୍ଡ୍ ନୁ ଗାଟି ଦାନ୍ଦେ ଆତ୍‍ତଣ୍ଡ୍ ।
JOH 11:34 “ଅଂକିଙ୍କ୍‌ ବେଗା ୱାଟ୍‍ତିଡ଼୍ ?” ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ପ୍ରବୁ ୱାସ୍ ଉଡ଼େ ।”
JOH 11:35 ଜିସୁ କେୟ୍‍ତଣ୍ଡ୍ ।
JOH 11:36 ତାନ୍ ପେର୍‍କେ ଯିହୁଦୀନଡ଼୍ କେତ୍‍ତଡ଼୍, “ଉଡ଼ାଟ୍, ଅଣ୍ଡ୍‌ ଅଂକିଙ୍କ୍‌ ବେସର୍ ସ୍ନେହ ମାଡ଼ମାତ୍‍ତଣ୍ଡ୍ ।”
JOH 11:37 ବାତେଙ୍କ୍ ଇତ୍‍କେ ଅଡ଼୍‌ ଆଗାଙ୍କ୍ ବେନ ବେନ୍ କେତ୍‍ତଡ଼୍, “ଇଣ୍ଡ୍ ବେନ୍ ନାରୁଣ୍ଡ୍‌ ଆ କାନାନ୍ କଣ୍ଡାଙ୍କ୍ ବେନ ସାୟେ ମାଡ଼୍‍ତଣ୍ଡ୍, ଅଣ୍ଡ୍‌ ବାତେଏ ଇନାଦ୍ ଡ଼ଲ୍‍ତାଦ୍ ମିକା ଗେଲ୍‍ସ୍‍ପେ ପାର୍‍ୱଣ୍ଡ୍ ଆୟେଣ୍ଡ୍ ?”
JOH 11:38 ଆଗାଙ୍କ୍ ଜିସୁ ମେଣ୍ଡ୍‍ନ୍ ଦାମ୍ ମନ୍‍ତାଗ୍ ବ୍ୟାକୁଲ୍ ଆସ୍ ସମାଦି ପାକେ ଆତ୍‍ତଣ୍ଡ୍; ଆଦ୍ ୱେରଡ଼୍ ପାଡ଼୍‍କିନାଗ୍ ମେଣ୍ଡେ ଅନ୍‌ ମୋକତାଗ୍ ୱେରଡ଼୍ କାଲ୍ ମାତ୍‍ତା ।
JOH 11:39 ଜିସୁ ଗଟ୍ ହିତ୍‍ତଣ୍ଡ୍, “ଇଦ୍ କାଲ୍ ଗୁସ୍‍ପିମୁଟ୍,” ଡଲ୍‍ତେ ନାରୁନ୍ ଏଲାଡ଼୍‍ ମାର୍ତା ଅଂକିଙ୍କ୍‌ କେତ୍‍ତେ, “ପ୍ରବୁ, ଅଣ୍ଡ୍‌ ଗାଟି ଗାବ୍ ପୋଇତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଡଲି ନାଲୁ ଦିନା ଆଦୁତ୍‍ତେ ।”
JOH 11:40 ଜିସୁ ଆଦିଙ୍କ୍ କେତ୍‍ତଣ୍ଡ୍, “ଯଦି ନିମ୍‍ ବିଶ୍ୱାସ୍ ମାଡ଼କେ, ଆଲେକେ ଇଶ୍ୱର୍ ତେ ମହିମା ଉଡ଼ିତିନ୍, ଇଦ୍ ବାତେଏ ନାନ୍ ମିକିଂଙ୍କ୍ କେଲନ୍ ?
JOH 11:41 ଆଗାଙ୍କ୍ ଅଡ଼୍‌ କାଲ୍ ଟେଣ୍ଡ୍‍ଡ଼ିତ୍‍ତଡ଼୍ ।” ମେଣ୍ଡେ ଜିସୁ ପରୁ ଉଡ଼ିମିକା କେତ୍‍ତଣ୍ଡ୍, “ହୋ ବାବା ନିମ୍‍ ନାୟାଦ୍ ପ୍ରାର୍ତନା କେଞ୍ଜତିନ୍ ଇଞ୍ଜେ ନାନ୍ ନିକିଂଙ୍କ୍ ଦନ୍ୟବାଦ୍ ଇଦୁତାନ୍ ।
JOH 11:42 ନିମ୍‍ ଯେ ନାୱାଦ୍ ପ୍ରାର୍ତନା କେଞ୍ଜୁତିନ୍ ଇଦ୍ ନାନ୍ ପୁତ୍‍ତାନ୍; ବାତେଙ୍କ୍ ଇତ୍‍କେ ବେନ୍ ନାରୁଡ଼୍ ସାରେପାକା ନିସ୍‍ମିନ୍ଦେଡ଼୍, ନିମ୍‍ ନାକିଂଙ୍କ୍ ରସ୍ ମିନ୍ଦେନି ଇଞ୍ଜ ଅଡ଼୍‌ ବେଲା ବିଶ୍ୱାସ୍ ମାଡ଼ିତଡ଼୍, ଆଦିନ୍ ମାଇଦିଙ୍କ୍ ଅଡ଼୍‌ ସେଙ୍ଗେ ନାନ୍ ଇଦ୍ କେତ୍‍ତାନ୍ ।”
JOH 11:43 ଅଣ୍ଡ୍‌ ଆଦ୍ କେସ୍ ଗାଟି ଲେଙ୍ଗ୍‍ଦେ କାର୍‍ଙ୍କ୍ ତୋଣ୍ଡ୍, “ଲାଜାର୍ ପେଇସ୍ ୱାଡ଼ା ।”
JOH 11:44 ଅଣ୍ଡ୍‌ ପେଇସ୍ ୱାତ୍‍ତଣ୍ଡ୍; ଅନ୍‌ କାୟ୍ ନୁ ଡେକା ସମାଦି ସିଲେତ୍ ତୋହସ୍ ମାତ୍‍ତଡ଼୍, ମେଣ୍ଡେ ଅନ୍‌ ମକତାଗ୍ ସୁଦୁଟ୍ ତୁୱାଲ୍ ଉତ୍‍ତାଦ୍ ମାତ୍‍ତେ । ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଇନାଦ୍ ବନ୍ଦନ୍ ଲେହେସିଶ୍ ଆଦାଙ୍କ୍ ହିମୁଟ୍ ।”
JOH 11:45 ଯିହୁଦୀନଡ଼୍ ଆଗାଙ୍କ୍ ନାର୍‍ଗେ, ବେନଡ଼୍ ମରୀୟମ୍ ତେ ଗାର୍‍ରେ ୱାସ୍‍ମାତ୍‍ତଡ଼୍ ନୁ ଜିସୁନ୍ ପାଡ଼୍‍ୟି ଉଡ଼୍‍ତଡ଼୍, ଅଡ଼୍‌ ଅନାଗ୍ ବିଶ୍ୱାସ୍ ମାଡ଼୍‍ତଡ଼୍;
JOH 11:46 ମେଣ୍ଡେ, ଅଡ଼୍‌ ତାଗାଙ୍କ୍ ବେନ ପାରୂଶୀଡ଼୍ ପାକେ ଆଞ୍ଜ୍, ଜିସୁ ବାତ୍ ବାତେଏ ପାଡ଼୍‍ୟି ମାଡ଼ିମାତ୍‍ତଣ୍ଡ୍, ଆଦ୍ ସାରେ ଅଡ଼୍‌‍କ୍ କେତ୍‍ତଣ୍ଡ୍;
JOH 11:47 ଆଗାଙ୍କ୍ ବେଡ଼ିଇ ଯାଜକ୍ ନୁ ପାରୂଶୀଡ଼୍ ବେଡ଼ିଇ ଶବାତାଗ୍ ଆଞ୍ଜ୍ କେତ୍‍ତଡ଼୍, “ମାନାଡ଼୍ ବାତେଏ ମାଡ଼ିକାଡ଼୍ ? ଇ ନାରୁନ୍ ତ ନାର୍‍ଗେ ବାକ୍‍ୱାକାମ୍ ମାଡ଼ୁତଣ୍ଡ୍ ।
JOH 11:48 ଯଦି ମାମ୍‍ମେ ଅଂକିଙ୍କ୍‌ ଆଲେନ୍ ୱିଡ଼୍‍ସିଦ୍‍ତମ୍, ଆଲେକେ ସାରେତଡ଼୍ ଅନାଗ୍ ବିଶ୍ୱାସ୍ ମାଡ଼ିତଡ଼୍, ମେଣ୍ଡେ ରୋମିୟ ନାରୁଡ଼୍ ୱାସ୍ ମାନ୍‍ନାଦ୍ ମନ୍ଦିର୍‍ତିଙ୍କ୍ ନୁ ଜାତିତିଙ୍କ୍ ଦଂସ ମାଡ଼ିଦ୍‍ତଡ଼୍ ।”
JOH 11:49 ଅଡ଼୍‌ ଆଗାଙ୍କ୍ ଆ ହେଣ୍ଡେତ୍ ବେଡ଼୍‍ୟାଦ୍‍ ଯାଜକ୍ କୋୟାପାଲ୍‍ କେତ୍‍ତଣ୍ଡ୍, “ମିଡ଼୍ ବାତେଏ ପୁନ୍‍ୱିଡ଼୍;
JOH 11:50 ସାରେ ଜାତି ବିନଷ୍ଟ ଆଦାନ୍ ୱିଡ଼୍‍ସି ୱେରଣ୍ଡ୍ ନାରୁଡ଼୍ ଡଲ୍‍ନାଦ୍ ସାଏ ହିଦ୍‍ବାତ୍ ମିଡ଼୍ ବୁଜେମ୍ ଆୟୱିଡ଼୍ ।”
JOH 11:51 କୟାପା ନିଜେତ୍ ମାନ୍‍ ତାଗାଙ୍କ୍ ହିଦ୍ କେଲଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଆଦ୍ ୱାଡ଼୍‍ସେତେ ବେଡ଼ିଇ ଯାଜକ୍ ମାନ୍ଦାନ୍ ମାଇଦିଙ୍କ୍ ହିଦ୍ ଗଟ୍ ଅନ୍‌ ମକତାଗାଙ୍କ୍ ପେଇସ୍ ମାତ୍‍ତେ,
JOH 11:52 ଚିହ୍ନେ ୱେରେ ଆସ୍‍ମାନ୍ଦାନ୍ ଇଶ୍ୱର୍‌ତେ ନାରୁଡ଼୍, ୱେରଡ଼୍ ଗଷ୍ଟିତାଗ୍ ଅଣ୍ଡୟାଗେ ମାଡ଼ାଙ୍କ୍ ଜିସୁଙ୍କ୍ ଡଲେ ୱେଇତିତ୍ ।
JOH 11:53 ଆଦିଙ୍କ୍ ଆଦ୍ ଦିନ୍‍କଞ୍ଜ୍ ଅଡ଼୍‌ ଜିସୁଙ୍କ୍ ହାଉକାଙ୍କ୍ ମାଇଦିଙ୍କ୍ ଚକ୍ରାନ୍ତ ମାଡ଼୍‍ତଡ଼୍ ।
JOH 11:54 ଜିସୁ ଯିହୁଦୀନଡ଼୍ ଆଗାଙ୍କ୍ ମେଣ୍ଡେ ଆଦ୍‍ଦା ୱାଦା ଆୟ୍‍ୟଣ୍ଡ୍, ବାତେଙ୍କ୍ ଇତ୍‍କେ ଆଦ୍ ପଡ଼ୟେ ତାଗାଙ୍କ୍ ପେଇସ୍‍ଆଞ୍ଜ୍ ଜିରୂଶାଲମ୍ ୱିଡ଼୍‍ସି ଉଚ୍‍କ ମାନ୍ଦାନ୍ ଏପ୍ରୟିମ୍ ପେଦେର୍‍ତେ ୱେରଡ଼୍ ସହର୍ ଆତ୍‍ତଣ୍ଡ୍, ମେଣ୍ଡେ ଆ ଶିଷ୍ୟନଡ଼୍‍ତଡ଼୍ ଆଗେ ମାତ୍‍ତଣ୍ଡ୍ ।
JOH 11:55 ଯିହୁଦୀନଡ଼୍ “ନିସ୍ତାର୍,” ପାଣ୍ଡୁମ୍ ଗାର୍‍ରେ ଏୱୁସ୍ ମାତ୍‍ତେ, ମେଣ୍ଡେ ରାଜ୍ୟକିନାଗାଙ୍କ୍ ନାର୍‍ଗେ ନାରୁଡ଼୍ ସୁସ୍ଥ ଆଦାନ୍ ମାଇଦିଙ୍କ୍ ନିସ୍ତାର୍ ପାଣ୍ଡୁମ୍ ତାଗ୍ ଜିରୂଶାଲମ୍ ଆଦ୍‍ତଡ଼୍ ।
JOH 11:56 ଆଗେ ଅଡ଼୍‌ ଜିସୁଙ୍କ୍ ମେହେକ ମନ୍ଦିର୍ ତାଗ୍ ନିସ୍‍ମାନ୍ଦାନ୍ ୱେଲେ ତାମ୍‍ତାମ୍ କେତାଙ୍କ୍ ପସ୍‍ପ୍‍ତ୍‍ତଡ଼୍, “ମିଡ଼୍ ବାତେଏ ଏର୍କା ମାଡ଼ୁତିଡ଼୍ ? ଅଣ୍ଡ୍‌ ବାତ୍ ପାଣ୍ଡୁମ୍ ତାଗ୍ ୱାଦ୍‍ତଣ୍ଡ୍ ନା ଇଲେ ?”
JOH 11:57 ମୁକ୍ୟ ଯାଜକିଡ଼୍ ନୁ ପାରୂଶୀଡ଼୍ ଜିସୁଙ୍କ୍ ପଇତାନ୍ ସେଙ୍ଗେ, ଅଣ୍ଡ୍‌ ବେଗା ମିନ୍ଦେଣ୍ଡ୍, ଇଦ୍ ଯଦି ବେନ ପୁନ୍‍ତଣ୍ଡ୍, ଆଦ୍ କେତାନଙ୍କ୍ ଗଟ୍ ଇସ୍‍ମାତ୍‍ଡ଼୍ ।
JOH 12:1 ଜିସୁ ନିସ୍ତାର୍ ପାଣ୍ଡୁମ୍‍ତ ଆରୁଦିନା ମୁନେଙ୍କ୍ ବେତନିୟାତାଗ୍ ୱାତ୍‍ତନ୍; ବେନ୍ ଲାଜାର୍‍ତିଙ୍କ୍ ଅଣ୍ଡ୍‌ ଡଲ୍‍ତେ ଆଗାଙ୍କ୍ ତେସ୍ ମାତ୍‍ତନ୍, ଅଣ୍ଡ୍‌ ଆଦ୍ ପଡ଼ିୟେ ତାଗ୍ ମାତ୍‍ତଣ୍ଡ୍ ।
JOH 12:2 ଆଦିଙ୍କ୍ ଅଡ଼୍‌ ଜିସୁନ୍ ମାଇଦିଙ୍କ୍ ଆଦ୍ ପଡ଼ିୟେତାଗ୍ ଅଣ୍ଡୟ୍‌ ନାର୍କା ବଜି ମାଡ଼୍‍ତଡ଼୍; ମାର୍ତାଲ୍ ସେବା ମାଡ଼ମାତ୍‍ତେ, ମେଣ୍ଡେ ବେନଡ଼୍ ଅନ୍‌ ତଡ଼୍ ତିନ୍ଦାଙ୍କ୍ କୁଦ୍‍ତଡ଼୍, ଲାଜାର୍ ଅଡ଼୍‌ ଆଗାଙ୍କ୍ ୱେରଣ୍ଡ୍ ମାତ୍‍ତନ୍ ।
JOH 12:3 ଆସୁଙ୍କ୍ ମରୀୟମ୍ ଅଦ୍‍ଦା ଲିଟର୍ ଗାଟି ଦାମ୍ ତେ ନିୟ୍‍ ଲେକେତ୍‍ ଗାବ୍‍ତାଦା ନିୟ୍ ଅସ୍ ଜିସୁନ୍ ଡ଼େକାନାଗ୍ ଆଦ୍ ତୋମି ତାନ୍ କେଲ୍‍କିନେ ଅନ୍‌ ଡେକାଙ୍କ୍ ଉଞ୍ଜ୍‍ପିତେ, ମେଣ୍ଡେ ନିୟ୍‍ଦେ ଗାବ୍ ଦେ ଲୋନ୍‌ ଆନ୍‌‍ତେ ମହକେମ୍ ଆତ୍‍ତେ
JOH 12:4 ବାତେଙ୍କ୍ ଇତ୍କେ ଜିସୁନ୍ ଶିଷ୍ୟନଡ଼୍ ଆଗାଙ୍କ୍ ଇଷ୍କାରୀୟତିୟ ଯିହୁଦା ପେଦେର୍ ତନ୍ ବେନ୍ ଶିଷ୍ୟ ଅଂକିଙ୍କ୍‌ ଶତ୍ରୁଡ଼୍ କାଇଦେ ପସ୍‍ପିଦାଙ୍କ୍ ଆଞ୍ଜମାତ୍‍ତଣ୍ଡ୍, ଅଣ୍ଡ୍‌ କେତ୍‍ତଣ୍ଡ୍‌,
JOH 12:5 “ଆଦ୍ ନିୟ୍ ମୁଣ୍ଡ୍‍ୱାନ୍ଦା ରୁପାଡାବ୍‍କିନ୍ ବାତେଙ୍କ୍ ୱାମ୍‍ତା ? ବାତ୍‍ତିଙ୍କ୍ ଦରିଦ୍ର ନାରୁଡ଼୍‍କ୍ ଇୱ ଆତ୍‍ତେ ?”
JOH 12:6 ଅଣ୍ଡ୍‌ ଯେ ଦରିଦ୍ର ନାରୁଡ଼୍ ସେଙ୍ଗେ ଚିନ୍ତେ ମାଡ଼ମାତ୍‍ତନ୍ ଇଞ୍ଜ ଇଦ୍ କେତ୍‍ତେ, ଆଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଅଣ୍ଡ୍‌ ୱେରଣ୍ଡ୍ ଡଙ୍ଗାଲ୍, ମେଣ୍ଡେ ଅନାଗାଙ୍କ୍ ଡାବ୍‍ ମୁନେ ମାନ୍‍ନାଙ୍କ୍, ଆଗେ ବାତା ୱାଟି ମାତ୍‍ତଡ଼୍, ହାଉସାରେ ଡଙ୍ଗି ମିକା ଆସମାତ୍‍ତନ୍ ।
JOH 12:7 ବାତେଙ୍କ୍ ଇତ୍କେ ଜିସୁ କେତ୍‍ତଣ୍ଡ୍‌, “ଇଦିଙ୍କ୍ ୱିଡ଼୍‍ସିମୁଟ୍, ବେଲା ନା ସମାଦି ଦିନାତ୍ ୱେଲେ ଅଣ୍ଡ୍‌ ଇଦ୍ ନେହେତେ ପାର୍‍ତଣ୍ଡ୍ ।
JOH 12:8 ଦରିଦ୍ର ନାରୁଡ଼୍ ତ ସାରେଦିନା ମିଇ ପାକେ ମିନ୍ଦେଡ଼୍‍, ମାତର୍ ନାନ୍ ସାରେଦାମ୍ ମିଇ ପାକେ ମାନନ୍ ।”
JOH 12:9 ଆଗାଙ୍କ୍ ଗାଟି ଯିହୁଦି ନାରୁଡ଼୍ ଜିସୁ ବେତନିୟାତାଗ୍ ମିନ୍ଦେଣ୍ଡ୍ ଇଞ୍ଜ୍ ପୁଞ୍ଜ୍ ମିକା ମାତର୍ ଜିସୁନ୍ ମାଇଦିଙ୍କ୍ ଆୟ୍‍ୟ, ମାତର୍ ବେନ୍ ଲାଜାର୍‍ତିଙ୍କ୍ ଅଣ୍ଡ୍‌ ଡଲ୍‍ତାଗାଙ୍କ୍ ତେହେସ୍‍ମାତ୍‍ତନ୍, ଅଂକିଙ୍କ୍‌ ଉଡାଙ୍କ୍ ମାଇଦିଙ୍କ୍ ୱାତ୍‍ତଡ଼୍ ।
JOH 12:10 ଆଗେ ଲାଜାର୍ ତିଙ୍କ୍ ମିକା ହାଉକାଙ୍କ୍ ସେଙ୍ଗେ ବେଡ଼ିଇ ଯାଜକ୍‍ନଡ଼୍ ମନ୍ତ୍ରନା ମାଡ଼୍‍ତଡ଼୍,
JOH 12:11 ବାତେଙ୍କ୍ ଇତ୍‍କେ ଅନ୍‌ ସେଙ୍ଗେ ଯିହୁଦିନଡ଼୍ ଆଗାଙ୍କ୍ ନାର୍‍ଗେ ନାରୁଡ଼୍ ଆଞ୍ଜ୍ ଅଡ଼୍‌‍କ୍ ଅବିଶ୍ୱାସ୍ ମାଡ଼ମାତ୍‍ତଡ଼୍ ନୁ ଜିସୁ ନାଗେ ବିଶ୍ୱାସ୍ ମାଡ଼ମାତ୍‍ତଡ଼୍ ।
JOH 12:12 ମେଣ୍ଡେଅନ୍‌ ଦିନ୍ ନିସ୍ତାର୍ ପାଣ୍ଡୁମ୍‍ତାଗ୍ ୱାସ୍ ମାନ୍ଦାନ୍ ନାର୍‍ଗେ ନାରୁଡ଼୍ ଜିସୁ ଜିରୂଶାଲମ୍ ତା ୱାଦୁତନ୍ ଇଞ୍ଜ କେଞ୍ଜ୍‍ତଡ଼୍,
JOH 12:13 ଆଦିଙ୍କ୍ ହେତେଲ୍ ମାଟା ଆସ୍ ଅଂକିଙ୍କ୍‌ କାଇଲାନ୍ ସେଙ୍ଗେ ପେଇସ୍ ଆଦ୍‍ତଡ଼୍ ନୁ ଗାଟି ଲେଙ୍ଗ୍‍ଦେ କେତାଙ୍କ୍ ପସ୍‍ପ୍‍ତ୍‍ତଡ଼୍, “ପ୍ରସଂଶା । ପ୍ରବୁନ୍ ପେଦେର୍‍ତେ ବେନ ୱାଦୁତନ୍, ଅଣ୍ଡ୍‌ ଦନ୍ୟ; ଦନ୍ୟ ଇସ୍ରାଏଲ୍‍ତେ ରାଜା ।”
JOH 12:14 ଜିସୁ ୱେରଡ଼୍ ଗଦ ପର୍‍ର କୁଦି ୱାସମାତ୍‍ତନ୍ । ହିଦିନ୍ ତଡ଼୍ ଶାସ୍ତ୍ରତାଗ୍ ୱେର୍‍ଡ଼୍ ବାବବାନି ସାରେ ଆତ୍‍ତେ;
JOH 12:15 “ହୋ ସିୟନ୍‍ତେ ପିକିଡ଼୍, ୱେର୍‍ମା; ଉଡ଼େ ମିୱନ୍‌ ରାଜାଲ୍ ୱାଦୁତନ୍, ଅଣ୍ଡ୍‌ ଗଦତ୍ ପର୍‍ର କୁଦି ୱାଦୁତନ୍ ।”
JOH 12:16 ଅନ୍‌ ଶିଷ୍ୟନଡ଼୍ ମୁନେଙ୍କ୍ ଇଦ୍ ସାରେ ବିଷୟ ବୁଜେମ୍ ଆୟ୍‍ୟଡ଼୍, ବାତେଙ୍କ୍ ଇତ୍‍କେ ଜିସୁ ମହିମାନିତ ଆତ୍‍ତେ ୱେଲେ ଇଦ୍ ସାରେ ବିଷୟ ଯେ ଅନ୍‌ ମୁନେ ଲେକାମାତ୍‍ତେ, ମେଣ୍ଡେ ଅନ୍‌ ସେଙ୍ଗେ ଅଡ଼୍‌ ଯେ ଇଦ୍‍ସାରେ ମାଡ଼ିମାତ୍‍ତଡ଼୍, ଆଦ୍ ଅଡ଼୍‌ ମାନ୍‍ ଦାଗ୍ ୱାତ୍‍ତେ ।
JOH 12:17 ମେଣ୍ଡେ, ଜିସୁ ଲାଜାର୍ ତିଙ୍କ୍ ସମାଦି ତାଗାଙ୍କ୍ ଡଲ୍‍ତେ ଆଗାଙ୍କ୍ ତେତାନ୍ ୱେଲେ ବେନ୍ ନାରୁଡ଼୍ ମୁନେ ଅନ୍‌ ତଡ଼୍ ମାତ୍‍ତଡ଼୍, ଅଡ଼୍‌ ଆଦ୍ ଗଟ୍‍ନା ବିଷୟ୍‍ତେ ସାକ୍ଷ୍ୟ ହିଦାଙ୍କ୍ ପସ୍‍ପ୍‍ତ୍‍ତଡ଼୍ ।
JOH 12:18 ହିଦିନ୍ ସେଙ୍ଗେ ନାରୁଡ଼୍ ଅଂକିଙ୍କ୍‌ କାହିଲାନଙ୍କ୍‌ ଆଞ୍ଜ୍ ମାତ୍‍ତଡ଼୍, ବାତେଙ୍କ୍ ଇତ୍‍କେ ଆଦିଙ୍କ୍ ଅଣ୍ଡ୍‌ ଇଦ୍ ବାକ୍‌ୱାକାମ୍ ମାଡ଼୍‍ତଣ୍ଡ୍ ଇଞ୍ଜ ଅଡ଼୍‌ କେଞ୍ଜିମାତ୍‍ତଡ଼୍ ।
JOH 12:19 ଆଗାଙ୍କ୍ ପାରୂଶୀଡ଼୍ ତାମ୍‍ତାମ୍ କେତା କେତି ଆଦ୍‍ତଡ଼୍, “ଉଡ଼ୁତିଡ଼୍ ତ, ମାୱାଦ୍ ସାରେତଡ଼ାଦ୍ ଆଲ୍‍ସି ଲେକେତ୍ ଆଦୁତେ; ଉଡ଼ାଟ୍, ଜଗତ୍‍ଯାକ ସାରେତଡ଼୍ ଅନ୍‌ ପେର୍‍କେ ଅଦୁତ୍‍ତଡ଼୍ ।”
JOH 12:20 ପାଣ୍ଡୁମ୍ ସମୟ୍‍ତେ ଉପବାସ୍ ମାଡ଼ାନ୍ ସେଙ୍ଗେ ୱାସ୍‍ମାନ୍ଦାନ୍ ନାରୁଡ଼ାଗାଙ୍କ୍ ବେସ୍‌କ୍ ତୁଡ଼୍ ଗ୍ରୀକ୍‍ ନାରୁଡ଼୍ ମାତ୍‍ତଡ଼୍ ।
JOH 12:21 ଅଡ଼୍‌ ଗାଲିଲୀତେ ବେତ୍‍ସାଇଦା ନାରୁଡ଼୍ । ଅଡ଼୍‌ ପିଲିପ୍‍ତେ ଗାର୍‍ରେ ଆଞ୍ଜ୍ କେତ୍‍ତଡ଼୍, “ପାୟ୍‍କା ମାମ୍‍ମେ ଜିସୁଙ୍କ୍ କାଇଲାନ୍‌ ସେଙ୍ଗେ ମାୟାଦ୍‌ ଇଚ୍ଛା ।”
JOH 12:22 ପିଲିପ୍ ଆଞ୍ଜ୍ ଆନ୍‌ଦ୍ରିୟଙ୍କ୍ କେତ୍‍ତଣ୍ଡ୍‍, ମେଣ୍ଡେ ଆନ୍ଦ୍ରିୟ ନୁ ପିଲିପ୍ ଆଞ୍ଜ୍ ଜିସୁଙ୍କ୍ କେତ୍‍ତଡ଼୍ ।
JOH 12:23 ଜିସୁ ଅଡ଼୍‌‍କ୍ ଉତ୍ତର୍ ହିତ୍‍ତନ୍, “ନାରୁନ୍ ପିଲେ ମହିମାନିତ ଆଦାନ୍ ସେଙ୍ଗେ ଦିନାମ୍ ହେୱୁତେ ।”
JOH 12:24 ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ଗଅମ୍ ପେଡ଼େମ୍ ଯଦି ବୂମ୍‌ଦାଗେ ରାଲୀ ଡ଼ଲ୍‍ୱେ ମାନ୍‍ତେ, ଆଲେକେ ଆଦ୍ ଅଣ୍ଡୟ୍‌ ମାନ୍‍ତେ, ବାତେଙ୍କ୍ ଇତ୍‍କେ ଡଲିତ୍, ଆଲେକେ ନାର୍‍ଗେ କାୟା ଆଦିତେ ।
JOH 12:25 ବେନ ନିଜେତ୍ ଜିୱୁଣ୍ଡ୍‍ତିଙ୍କ୍ ପ୍ରେମ ମାଡ଼ିତନ୍, ଅଣ୍ଡ୍‌ ଆଦ୍ ଆରା ମାଡ଼ିତନ୍; ମେଣ୍ଡେ ବେନ ନିଜେତ୍ ଜିୱେତିଙ୍କ୍ ପ୍ରେମ ମାଡ଼ଣ୍ଡ୍ ନୁ ଜଗତ୍ ଅଙ୍କ୍‌ ପାସ୍‍କିତ୍, ଅଣ୍ଡ୍‌ ଆଦ୍ ସାରେଦିନାତ୍ ଜିୱୁନ୍ ସେଙ୍ଗେ ରକ୍ଷା ମାଡ଼ିତନ୍ ।
JOH 12:26 ବେନ ନା ଦାସ ଆତ୍‍ଦାଙ୍କ୍ ଇଚ୍ଛା ମାଡ଼ିତନ୍, ଆଲେକେ ଅଣ୍ଡ୍‌ ନା ପେର୍‍କେ ୱାଡ଼ିଣ୍ଡ୍; ମେଣ୍ଡେ, ନାନ୍ ବେଗା ମାନ୍‍ତାନ୍, ଆଗେ ଅଣ୍ଡ୍‌ ଆନ୍‌‍ତେ ମାନ୍‍ତନ୍; ବେନ ନା ସେବା ମାଡ଼ିତନ୍, ଆଲେକେ ବାବାଲ୍ ଅଂକିଙ୍କ୍‌ ସମ୍ମାନ୍ ହିଦ୍‍ତଣ୍ଡ୍ ।
JOH 12:27 “ଇଞ୍ଜେ ନାନ୍ ଗାଟି ଦୁଃକାମ୍, ନାନ୍ ବାତେଏ ମାଡ଼ିତାନ୍ ? ‘ବାବା, ଇଦ୍ ଦୁଃକ ସମୟ୍‍ତାଗାଙ୍କ୍ ନାକିଂଙ୍କ୍ ଉଦାର୍ ମାଡ଼େ, ଆଦିନ୍ ସେଙ୍ଗେ ତ ନାନ୍ ଇ ସମୟ୍‍ତାଗ୍ ୱାସ୍ ମିନ୍ଦେନ୍ ।’
JOH 12:28 ବାବା, ନିୱାଦ୍ ପେଦେର୍ ମହିମାନିତ ମାଡ଼େ ।” ଆଗାଙ୍କ୍ ମାବ୍ ତାଗାଙ୍କ୍ ଇଦ୍ ବାଣି ଆତ୍‍ତେ, “ମାମ୍‍ମେ ଆଦ୍ ମହିମାନିତ ମାଡ଼ିମିନ୍ଦେମ୍, ମେଣ୍ଡନ୍ ଦାମ୍ ମହିମାନିତ ମାଡ଼ିତମ୍ ।”
JOH 12:29 ଆସୁଙ୍କ୍ ଗାର୍‍ରେ ନିସ୍ ମାନ୍ଦାନ୍ ନାରୁଡ଼୍ ଇଦ୍ କେଞ୍ଜି ମାବ୍ ନେକ୍‍ତେ ଇଞ୍ଜ୍ କେତ୍‍ତଡ଼୍; ମେଣ୍ଡେ ବାଗାତଡ଼୍ କେତ୍‍ତଡ଼୍, “ୱେରନ୍ ଦୂତ ଅଂକିଙ୍କ୍‌ ଗଟ୍ କେସ୍‍ମିନ୍ଦେ ।”
JOH 12:30 ଜିସୁ ଅଡ଼୍‌‍କ୍ କେତ୍‍ତଣ୍ଡ୍, “ନା ମାଇଦିଙ୍କ୍ ଇଦ୍ ବାଣି ଆୟ୍‍ୟ, ମାତର୍ ମିଇ ମାଇଦିଙ୍କ୍ ଆସ୍‍ମିନ୍ଦେ ।
JOH 12:31 ଇଞ୍ଜେ ଇ ଜଗତ୍‍ତାଦ୍ ବିଚାର୍ ହେୱୁତେ; ଇଞ୍ଜେ ଇ ଜଗତ୍‍ତଣ୍ଡ୍ ଅଦିପତିଙ୍କ୍ ବାଇଦେ ଏସ୍ ୱେଇତିତ୍ ।
JOH 12:32 ଯଦି ନାନ୍ ପୃତିବିତେ ପର୍‍ର ଆଦ୍‍ତନ୍, ଆଲେକେ ସାରେତଡ଼୍‌କିଂଙ୍କ୍ ନା ଗାର୍‍ରେ ଅଦ୍‍ତାନ୍ ।”
JOH 12:33 ଅଣ୍ଡ୍‌ ବେଦ୍‍ଲେକାମ୍ ଡଲାନଙ୍କ୍ ଆଦୁତନ୍, ଆଗେତ୍ ଗଟ୍ ଇସ୍ ଇଦ୍ କେତ୍‍ତାନ୍ ।
JOH 12:34 ଆଗାଙ୍କ୍ ନାରୁଡ଼୍ କେତ୍‍ତଡ଼୍, “ମସିହ ସାରେଦିନାମ୍ ମାନ୍ଦାନାଦ୍ ମାମ୍‍ମେ ବ୍ୟବସ୍ଥାତାଗ୍ ସାରେ କେଞ୍ଜିମିନ୍ଦେମ୍, ଆଲେକେ ନାରୁନ୍ ପିଲା ପର୍‍ର ଆଦ୍‍ତନ୍ ଇଞ୍ଜ୍ ନିମ୍‍ ବେଲା କେତୁତି ? ଇ ନାରୁନ୍ ପିଲା ବେନ ?”
JOH 12:35 ଆଗାଙ୍କ୍ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‌, “ମେଣ୍ଡେ ସୁଦୁଟ୍ ଦିନାମ୍ ମାତର୍ ୱେସ୍ ମିୟାଗ୍ ମିନ୍ଦେ । ଇକାଡ଼୍ ବେଲା ମିକିଂଙ୍କ୍ ଆଦ୍‍ପାପ୍ ମାଡ଼, ଆଦିନ୍ ସେଙ୍ଗେ ମିଡ଼୍ ୱେସ୍ ମାନ୍‍ନା ଆଦାନଙ୍କ୍ ତିଆର୍ ଆୟ୍‍ମୁଟ୍, ବେନ ଇକାଡ଼୍‌ତାଗ୍ ତାକିତନ୍, ଅନ୍‌ ବେକେ ଆଦୁତନ୍, ଆଦ୍ ପୁନନ୍ ।
JOH 12:36 ମିଡ଼୍ ବେଲା ୱେସ୍‍ତେ ପିଲା ଆଦ୍‍ତିଡ଼୍, ଆଦିନ୍ ସେଙ୍ଗେ ୱେସ୍ ମିୟାଗେ ମାନ୍‍ନା ୱେସ୍‍ତିଙ୍କ୍‍ ବିଶ୍ୱାସ୍ ମାଡ଼ାଟ୍ ।” ଜିସୁ ଇଦ୍‍ସାରେ ଗଟି କେସ୍ ପେଇସ୍‍ଆଞ୍ଜ୍ ଅଡ଼୍‌ଆଗାଙ୍କ୍‌ ମାୟି ଆତ୍‍ତଣ୍ଡ୍ ।
JOH 12:37 ଯଦି ଜିସୁ ଅଡ଼୍‌ ମୁନେ ଆସର୍ ଆଶର୍ଯ୍ୟ ପାଡ଼୍‍ୟି ମାଡ଼ିମାତନ୍, ଆଗେକ୍ ବା ଅଡ଼୍‌ ଅନାଗ୍ ବିଶ୍ୱାସ୍ ମାଡ଼୍‍ୱେ ମାତ୍‍ତଡ଼୍,
JOH 12:38 ବେଦ୍‍ଲେକାମ୍ ଜିଶାଇୟ ବାବବାଦିଡ଼୍ ବାକ୍ୟ ସାରେ ଆଦ୍‍ତେ, “ହଁ ପ୍ରବୁ, ବେନ ମା ସମ୍ୱାଦ ବିଶ୍ୱାସ୍ ମାଡ଼୍‍ତଣ୍ଡ୍ ? ମେଣ୍ଡେ ବେନ ଗାର୍‍ରେ ପ୍ରବୁ ଅନାଦ୍‌ ଶକ୍ତି ତିଆର୍ ମାଡ଼୍‍ତଣ୍ଡ୍ ?”
JOH 12:39 ଇଦିନ୍ ସେଙ୍ଗେ ଅଡ଼୍‌ ବିଶ୍ୱାସ୍ ମାଡ଼୍ ପାର୍‍ୱେ ମାତ୍‍ତଡ଼୍, ବାତେଙ୍କ୍ ଇତ୍‍କେ ଜିଶାଇୟ ମେଣ୍ଡନ୍‌ଦାମ୍‌ କେସ୍‍ମିନ୍ଦେନ୍,
JOH 12:40 “ଇଶ୍ୱର୍ ଅଡ଼ାୱୁ କଣ୍ଡାଙ୍କ୍ କାନାଲ୍‌ ମାଡ଼ିମିନ୍ଦେଣ୍ଡ୍, ମେଣ୍ଡେ ଅଡ଼ାଦ୍‌ ଜିୱୁନ୍ ଡୁଟ୍‍ଟାଙ୍କ୍ ମାଡ଼ିମିନ୍ଦେଡ଼୍, ବେଦ୍‍ଲେକାମ୍ ଅଡ଼୍‌ କଣ୍ଡାନେ ଉଡ଼େ ପାର୍‍ୱାଦ୍, ମେଣ୍ଡେ ଜିୱେତାଗ୍ ବୁଜେମ୍ ଆଦ୍‍ପାର୍‍ୱଡ଼୍, ମେଣ୍ଡେ ମାଲ୍‍ଦେ ପାର୍‍ୱଡ଼୍, ମାମ୍‍ମେ ଅଡ଼୍‌‍କିଂଙ୍କ୍ ସୁସ୍ଥ ମାଡ଼ମ୍ ।”
JOH 12:41 ଜିଶାଇୟ ଇଦ୍‍ସାରେ କେତ୍‍ତାଙ୍କ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଜିସୁନାଦ୍ ମହିମା ଉଡ଼୍‍ତନ୍ ନୁ ଅନ୍‌ ବିଷୟ୍‍ତେ ଗଟିକେତ୍‍ତନ୍ ।
JOH 12:42 ଆଗେକ୍ ବା ନେତ୍‍ତାନଡ଼୍ ଲୋପେଙ୍କ୍ ନାର୍‍ଗେ ଜିସୁନାଗ୍ ବିଶ୍ୱାସ୍ ମାଡ଼୍‍ତଡ଼୍, ବାତେଙ୍କ୍ ଇତ୍‍କେ ବେସୁଙ୍କ୍‍ ଅଡ଼୍‌ ସମାଜଚ୍ୟୁତ ଆଦ୍‍ତଡ଼୍, ଆଦିନ୍ ସେଙ୍ଗେ ପାରୂଶୀନଡ଼୍ ମାଇଦିଙ୍କ୍ ଆଦ୍ ସ୍ୱୀକାର୍ ମାଡ଼୍‍ୱେ ମାତ୍‍ତଡ଼୍,
JOH 12:43 ବାତେଙ୍କ୍ ଇତ୍‍କେ ଅଡ଼୍‌ ଇଶ୍ୱର୍‌ତେ ପ୍ରଶଂସା ୱିଡ଼୍‍ସି ବେଲାନ୍ ନାରୁଡ଼ାଦ୍ ଅନୁମତିତିଙ୍କ୍ ଗାଟି ପ୍ରେମ ମାଡ଼୍‍ତଡ଼୍ ।
JOH 12:44 ଜିସୁ ଗାଟିଲେଙ୍କ୍‍ଦେ କେତ୍‍ତଣ୍ଡ୍‌, “ବେନ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ମାତର୍ ନାୟାଗେ ବିଶ୍ୱାସ୍ ମାଡ଼ନ୍, ମାତର୍ ନା ପ୍ରେରଣାକର୍ତ୍ତାନ୍ ନାଗେ ବିଶ୍ୱାସ୍ ମାଡ଼ିତନ୍;
JOH 12:45 ବେନ ନାକିଂଙ୍କ୍ ଉଡ଼୍‍ତନ୍, ଅଣ୍ଡ୍‌ ନା ୱାଦାନ୍‍କର୍ତାଙ୍କ୍ ମିକା ଉଡ଼୍‍ତନ୍ ।
JOH 12:46 ଆଦିନ୍ ସେଙ୍ଗେ ନାନ୍ ଜଗତ୍‍ତେ ୱେସ୍ ଆସ୍ ୱାସ୍‍ମିନ୍ଦେନ୍, ବେନ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ଇକାଡ଼୍‌ତାଗ୍ ମାନନ୍ ।
JOH 12:47 ବେନ ନା ଗଟି କେଞ୍ଜି ପାଲନ୍ ମାଡ଼ନ୍, ନାନ୍ ଅନାଦ୍‌ ବିଚାର୍ ମାଡ଼ନ୍, ବାତେଙ୍କ୍ ଇତ୍‍କେ ନାନ୍ ଜଗତ୍‍ତାଗ୍ ବିଚାର୍ ମାଡ଼ାଙ୍କ୍ ୱାଡ଼ନ୍, ନାନ୍ ଜଗତ୍‍ତିଙ୍କ୍ ରକ୍ଷା ମାଡ଼ାଙ୍କ୍ ୱାତ୍‍ତାନ୍ ।
JOH 12:48 ବେନ ନାକିଂଙ୍କ୍ ଆଗ୍ରାହ୍ୟ ମାଡ଼ିତନ୍ ନୁ ନାୟାଦ୍ ବାକ୍ୟ ଗ୍ରହନ୍ ମାଡ଼ନ୍, ନାୟାଦ୍ ମକମ୍‍ତେ ଗଟ୍ ଶେଷ ଦିନେତେ ଅନାଦ୍‌ ବିଚାର୍ ମାଡ଼ିତ୍ ।
JOH 12:49 ଇଦ୍ ସତ୍, ବାତେଙ୍କ୍ ଇତ୍‍କେ ନାନ୍ ନିଜେତାଗାଙ୍କ୍ କେଲନ୍, ମାତର୍ ନାନ୍ ବାତେଏ କେତିତାନ୍ ନୁ ବାତେଏ କେଞ୍ଜ୍‍ପିତାନ୍, ଆଦ୍ ନା ମାଲ୍‍ସ୍‍ୱାଦାନ୍ ବାବାଲ୍ ନାକିଂଙ୍କ୍ ଗଟ୍ ହିତ୍‍ତନ୍;
JOH 12:50 ମେଣ୍ଡେ ନାନ୍ ପୁତ୍‍ତାନ୍ ଅନ୍‌ ଗଟ୍ ସାରେଦିନାତ୍ ଜିୱୁନ୍ ହିଦ୍‍ତେ, ନା ବାବାଲ୍ ନାକିଂଙ୍କ୍ ବାତେଏ କେତାଙ୍କ୍ କେସ୍‍ମିନ୍ଦେଣ୍ଡ୍, ଆଦେ ଲେକାମ୍ କେତ୍‍ତାନ୍ ।”
JOH 13:1 ନିସ୍ତାର୍ ପାଣ୍ଡୁମ୍ ଆଦାନ୍ ମୁନେଙ୍କ୍ ଜିସୁ ଇଦ୍ ଜଗତ୍‍ତାଗାଙ୍କ୍ ବାବାନ୍ ଗାର୍‍ରେ ଆଦାନଙ୍କ୍ ଅନାଦ୍‌ ଦିନାମ୍ ଉପସ୍ଥିତ୍ ଆତ୍‍ତାଦ୍ ପୁଞ୍ଜ୍, ଜଗତ୍ ତାଗ୍ ମାନ୍ଦାନ୍ ନିଜେତ୍ ବେନ୍ ନାରୁଡ଼୍‍କ୍ ଅଣ୍ଡ୍‌ ପ୍ରେମ ମାଡ଼ି ୱାସମାତ୍‍ତନ୍, ଅଡ଼୍‌ ସାରେ ନାରୁଡ଼୍‍କ୍ ପ୍ରେମ ତିଆର୍ ମାଡ଼୍‍ତଣ୍ଡ୍ ।
JOH 13:2 ମେଣ୍ଡେ ଜିସୁ ନାର୍‍କେତ୍ ବଜିତ୍ ୱେଲେ, ବେସୁଙ୍କ୍‍ ଶୟ୍‍ତାନ୍‍ ଶିମୋନ୍‍ତେ ମାର୍‍ ଇଷ୍କାରୀୟତିୟ ଯିହୁଦାନ୍ ଜିୱୁତେ ଜିସୁଙ୍କ୍ ଶତ୍ରୁଡ଼୍ କାଇଦେ ପସ୍‍ପିଦାନ୍ ସେଙ୍ଗେ ସଂକଳ୍ପ ତିଆର୍ ମାଡ଼ିମାତ୍‍ତଣ୍ଡ୍,
JOH 13:3 ଆସୁଙ୍କ୍, ବାବାଲ୍ ଯେ ଅନ୍‌ କାଇଦେ ସାରେ କ୍ଷମତା ସମର୍‍ପନ୍ ମାଡ଼ି ମିନ୍ଦେନ୍ ନୁ ଅଣ୍ଡ୍‌ ଯେ ଇଶ୍ୱର୍‌ତେ କଞ୍ଜ୍ ୱାସ୍‍ମିନ୍ଦେନ୍, ମେଣ୍ଡେ ଇଶ୍ୱର୍‌ତାକେ ଆଞ୍ଜମିନ୍ଦେନ୍, ଆଦ୍ ପୁଞ୍ଜ୍‍ମାତ୍‍ତଣ୍ଡ୍ ।
JOH 13:4 ଆଦିଙ୍କ୍ ଜିସୁ ତିନ୍ଦାନ୍ ପଡ଼ିୟେ ତାଗାଙ୍କ୍ ତେଦି ତାନ୍ ସିଲାଟେଣ୍ଡି ୱେରଡ଼୍ ତୁୱାଲ୍ ଅସ୍ ଅଡ଼ାଦ୍‌ କଟି ବନ୍ଦନ୍ ମାଡ଼୍‍ତଣ୍ଡ୍ ।
JOH 13:5 ଆସୁଙ୍କ୍ ଜିସୁ କୁଣ୍ଡାନାଗ୍ ଏର୍‍ ତସ୍‍ତଣ୍ଡ୍, ମେଣ୍ଡେ ଶିଷ୍ୟଡ଼ାଉ ଡେକା ନର୍‍ସିସ୍ ଅନ୍‌ କଟି ବନ୍ଦନ୍ ମାଡ଼୍‍ତେ ତୁୱାଲ୍‍ତାଗ୍ ଉଞ୍ଜ୍‍ପାଙ୍କ୍ ପସ୍‍ପ୍‍ତଣ୍ଡ୍‌ ।
JOH 13:6 ଆସୁଙ୍କ୍ ଅଣ୍ଡ୍‌ ଶିମୋନ୍ ପିତର୍‍ତେ ପାକେ ୱାତ୍‍ତନ୍; ଅଣ୍ଡ୍‌ ଜିସୁଙ୍କ୍ କେତ୍‍ତାନ୍, ପ୍ରବୁ ନିମ୍‍ ନା ଡେକାଙ୍କ୍ ନର୍‍ସିତ୍‍ତିନ୍ ?
JOH 13:7 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, ନାନ୍ ବାତେଏ ମାଡ଼ୁତାନ୍, ଆଦ୍ ଇଞ୍ଜେ ମିଡ଼୍ ପୁନ୍‍ୱିଡ଼୍, ବାତେଙ୍କ୍ ଇତ୍‍କେ ପେର୍‍କେ ପୁନ୍‍ତିଡ଼୍ ।
JOH 13:8 ପିତର୍ ଅଂକିଙ୍କ୍‌ କେତ୍‍ତଣ୍ଡ୍, ନିମ୍‍ ତ ବେସୁଙ୍କ୍‌ବା ନା ଡେକା ନର୍‍ସିୱିନ୍ । ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତନ୍, ଯଦି ନାନ୍ ନିକିଂଙ୍କ୍ ନର୍‍ୱନ୍, ଆଲେକେ ନାତଡ଼୍ ନିୱାଦ୍ ବାତେବା କାଇଲେ ଇଲେ ।
JOH 13:9 ଶିମୋନ୍ ପିତର୍ ଅଂକିଙ୍କ୍‌ କେତ୍‍ତଣ୍ଡ୍, ପ୍ରବୁ, ମାତର୍ ନାୱାଦ୍ ଡେକା ଆୟ୍‍ୟ ନାୟାଉ କାଇକ୍ ନୁ ତାଲ୍ ମିକା ନର୍‍ସିମ୍ ।
JOH 13:10 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‌, ବେନ ଏର୍‍ ମିଚ୍‍ ମିନ୍ଦେନ୍, ଅନାହୁ ଡେକା ନର୍‍ଦାନାଦ୍ ୱିଡ଼୍‍ସି ମେଣ୍ଡେ ବାତେଏ ଦର୍‍କାର୍ ଆୟ୍‍ୟ । ମିଡ଼୍ ସାରେତଡ଼୍ ଶୁଚି ବାତେଙ୍କ୍ ଇତ୍‍କେ ୱେରଣ୍ଡ୍ ଆୟ୍‍ୟ ।
JOH 13:11 ବାତେଙ୍କ୍ ଇତ୍‍କେ ବେନ ଅଂକିଙ୍କ୍‌ ଶତ୍ରୁଡ଼୍ କାଇଦେ ପସ୍‍ପିତନ୍, ଅଣ୍ଡ୍‌ ଅଂକିଙ୍କ୍‌ ପୁଞ୍ଜ୍ ମାତ୍‍ତନ୍, ଅଣ୍ଡ୍‌ କେତ୍‍ତଣ୍ଡ୍‌, ଅର୍‍ତୁଙ୍କ୍ ୱିଡ଼୍‍ସିତ୍‍କେ, ମିଡ଼୍ ସାରେତଡ଼ି ଶୁଚି ।
JOH 13:12 ତାନ୍‍ପେର୍କେ ଜିସୁ ଅଡ଼ାୱୁ ଡେକା ନର୍‍ସି ଅନ୍‌ ସିଲେ କେର୍‍ସ୍ ମେଣ୍ଡନ୍ ଦାମ୍ କୁଦ୍‍ତେୱେଲେ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍, ନାନ୍ ମିଇ ମାଇଦିଙ୍କ୍ ବାତେଏ ମାଡ଼୍‍ତାନ୍, ଆଦ୍ ବାତେଏ ମିଡ଼୍ ବୁଜେମ୍ ଆତ୍‍ତିଡ଼୍‍ ?
JOH 13:13 ମିଡ଼୍ ନାକ୍ ଗୁରୁ ନୁ ପ୍ରବୁ ଇଞ୍ଜ କାର୍‍ଙ୍ଗୁତିଡ଼୍, ଆଦ୍ ଲେକେତ୍, ବାତେଙ୍କ୍ ଇତ୍‍କେ ଅଣ୍ଡେ ତ ନାନ୍ ।
JOH 13:14 ମିଇ ଗୁରୁ ନୁ ପ୍ରବୁ ଆସ୍ ନାନ୍ ଯଦି ମିୟାୱୁ ଡେକା ନର୍‍ତାନ୍, ଆଲେକେ ମିଡ଼୍ ଆନ୍‌‍ତେ ନିଜେ ନିଜେ ଡେକା ନର୍‍ଦାନାଦ୍ ସାୟେ ।
JOH 13:15 ମିଡ଼୍ ନାକିଂଙ୍କ୍ ଏର୍କାମାଡ଼ାଙ୍କ୍ ଇଞ୍ଜ ନାନ୍ ଇଦ୍‍ଲେକାମ୍ ମାଡ଼୍‍ତାନ୍ ।
JOH 13:16 ନାନ୍ ସତ୍ କେତୁତାନ୍, ବେନବା ଦାସ ଅନ୍‌ ମାଲିକ୍ ତାଗାଙ୍କ୍ ବେଡ଼୍‍ୟନ୍ ଆୟନ୍; ପ୍ରେରିତନଡ଼୍ ତାନ୍ ପ୍ରେରନାକର୍ତା ନାଗାଙ୍କ୍ ବେନ ବେଡ଼୍‍ୟନ୍ ଆୟ୍‍ୟ ।
JOH 13:17 ଯଦି ମିଡ଼୍ ଆଦ୍‍ ସାରେ ପୁଞ୍ଜ୍, ଆଲେକେ ଆଦେଲେକାମ୍ ମାତ୍‍କେ ମିଡ଼୍ ଦନ୍ୟ ।
JOH 13:18 ନାନ୍ ମିଇ ସାରେତଡ଼୍‍କ୍ ଇଦ୍ ଗଟ୍ କେଲନ୍; ବେନ୍ ଲେକାମ୍ ନାରୁଡ଼୍‌କ୍‍ ନାନ୍ ହେଞ୍ଚି ମିନ୍ଦେନ୍‍, ଆଦ୍ ନାନ୍ ପୁତ୍‍ତାନ୍; ବାତେଙ୍କ୍ ଇତ୍‍କେ ଦର୍ମଶାସ୍ତ୍ରତାଗ୍ ଇଦ୍ ବାକ୍ୟ ବେଦ୍‍ଲେକାମ୍ ସାରେ ଆଦ୍‍ତେ, ଆଦିଙ୍କ୍ ଇଦ୍‍ଲେକାମ୍ ଗଟେମ୍ ଆଦୁତ୍‍, ବେନ ନାୟାଦ୍ ଅନ୍‌ନ ତିନ୍ଦ୍‍ତନ୍, ଅଣ୍ଡ୍‌ ନା ବିରୁଦ୍‍ତେ ଲାତ୍ ତେହେତ୍‍ତଣ୍ଡ୍ ।
JOH 13:19 ଆଦ୍ ଗଟେମ୍ ଆଦାନ୍ ମୁନେଙ୍କ୍ ନାନ୍ ମିକିଂଙ୍କ୍ କେତୁତାନ୍ । ବେସୁଙ୍କ୍‍ ଆଦ୍ ଗଟେମ୍ ଆଦ୍‍ତେ, ମିଡ଼୍ ବିଶ୍ୱାସ୍ ମାଡ଼ିତିଡ଼୍ ଯେ, ନାନ୍ ବେନ ଅଣ୍ଡେ ନାନ୍ ।
JOH 13:20 ସତ୍ ନାନ୍ ମିକିଂଙ୍କ୍ କେତୁତାନ୍, ଯେ ନା ପ୍ରେରିତ୍ ନାରୁଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍‌ ନାକିଂଙ୍କ୍ ଗ୍ରହନ୍ ମାଡ଼ିତନ୍ ନୁ ବେନ ନାକିଂଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍‌ ନା ତ୍ରାଣକର୍ତ୍ତାଙ୍କ୍‍ ଗ୍ରହନ୍ ମାଡ଼ିତନ୍ ।
JOH 13:21 ଜିସୁ ଇଦ୍‍ସାରେ ଗଟିକେତ୍‍ତେ ପେର୍‍କେ ଆତ୍ମାତାଗ୍ ଉଦ୍‍ବିଗ୍ନ ଆତ୍‍ତନ୍ ନୁ ବେନ୍‍ଲେକାମ୍ ସାକ୍ଷ୍ୟ ଇସ୍ କେତ୍‍ତନ୍, ସତ୍ ନାନ୍ ମିକିଂଙ୍କ୍ କେତୁତାନ୍, ମିୟାଗାଙ୍କ୍ ୱେରନ୍ ନାକିଂଙ୍କ୍ ଶତ୍ରୁଡ଼୍ କାଇଦେ ପସ୍‍ପିଦ୍‍ତନ୍ ।
JOH 13:22 ଜିସୁ ବେନଙ୍କ୍ ଲକ୍ଷ ମାଡ଼ି କେତ୍‍ତଣ୍ଡ୍‌, ଆଦ୍ ବିଷୟ୍‍ତେ ଅତବୁଦି ଆସ୍ ଶିଷ୍ୟନଡ଼୍ ତାମ୍‍ତାମ୍ ଉଡାଙ୍କ୍ ପସ୍‍ପ୍‍ତ୍‍ତଡ଼୍,
JOH 13:23 ଅଡ଼୍‌ ଆଗାଙ୍କ୍‌ ବେନ୍ ଶିଷ୍ୟଙ୍କ୍ ଜିସୁ ଗାଟି ପ୍ରେମ ମାଡ଼ମାତ୍‍ତନ୍, ଅନ୍‌ ଜିସୁନ୍ ଗାର୍‍ରେ କୁଦିମାତ୍‍ତଣ୍ଡ୍ ।
JOH 13:24 ଶିମୋନ୍ ପିତର୍ ଅଂକିଙ୍କ୍‌ ଶଙ୍କେତ ମାଡ଼ି କେତ୍‍ତଣ୍ଡ୍, ଅଣ୍ଡ୍‌ ବେନ ବିଷୟ୍‍ତେ କେତୁତନ୍, ଆଦ୍ କେଲ୍‍ମୁଟ୍ ।
JOH 13:25 ଅଣ୍ଡ୍‌ ଆଦେଲେକାମ୍ କୁଦିମାଞ୍ଜ୍ ଜିସୁନ୍ ଗାର୍‍ରେୱାସ୍ ଆଡ଼୍‌‍ଗି ମାଡ଼୍‍କି କେତ୍‍ନ୍, ଅଣ୍ଡ୍‌ ବେନ ପ୍ରବୁ ?
JOH 13:26 ଆସୁଙ୍କ୍ ଜିସୁ ଉତ୍ତର୍ କେତ୍‍ତଣ୍ଡ୍‌, ବେନ ସେଙ୍ଗେ ନାନ୍ ଇଦ୍‍ରୁଟିତିଙ୍କ୍ ମୁହୁସ୍ ନୁ ବେନଙ୍କ୍ ଆଦ୍ ଇଦ୍‍ତାନ୍, ଅଣ୍ଡ୍‌ । ଆଗାଙ୍କ୍ ଅଣ୍ଡ୍‌ ରଟିତିଙ୍କ୍ ମୁହୁସ୍ ଆଦ୍‍ଅସ୍ ଇଷ୍କାରୀୟତିୟ ଶିମୋନ୍‍ତେ ମାର୍‍ ଯିହୁଦାଙ୍କ୍ ହିତ୍‍ତନ୍ ।
JOH 13:27 ଅଣ୍ଡ୍‌ ରୂଟି ଇତ୍‍ତେ ୱେଲେ ଶୟ୍‍ତାନ୍‍ ଅନାଗ୍ ନେଙ୍ଗ୍‍ତେ । ଆଗାଙ୍କ୍ ଜିସୁ ଅଂକିଙ୍କ୍‌ କେତ୍‍ତଣ୍ଡ୍‌, ବାତେଏ ମାଡ଼ୁତିନ୍, ଆଦ୍ ଜାପେ ମାଡ଼େ ।
JOH 13:28 ବାତେଙ୍କ୍ ଇତ୍‍କେ ଅଣ୍ଡ୍‌ ବେନ୍ ଗଟ୍‍ତେ ଅଂକିଙ୍କ୍‌ ଇଦ୍ ଗଟ୍ କେତ୍‍ତଣ୍ଡ୍‌, ଆଗେ ବଜିତାଗ୍ କୁଦିମାନ୍ଦାନ୍ ନାରୁଡ଼ାଗାଙ୍କ୍ ବେନ ପୁନଡ଼୍ ।
JOH 13:29 ବାତେଙ୍କ୍ ଇତ୍‍କେ ଯିହୁଦାତାଗ୍ ଡାବ୍‍ ମୁନେ ମାନ୍‍ନାଙ୍କ୍, ପାଣ୍ଡୁମ୍ ସେଙ୍ଗେ ବାତେଏ ଆଦାନାଦ୍, ଆଦ୍ ଆସାନଙ୍କ୍ ବା ଦରିଦ୍ର ନାରୁଡ଼୍‍କ୍ ବାତେଏ ଦାନ ମାଡ଼ାଙ୍କ୍ ଜିସୁ ଅଂକିଙ୍କ୍‌ କେତ୍‍ତଣ୍ଡ୍‌ ଇଞ୍ଜ ବେନ ଏର୍କା ମାଡ଼୍‍ତଡ଼୍ ।
JOH 13:30 ରୂଟିସୁଦୁଟ୍ ଆସ୍‍ମିକା ଅଣ୍ଡ୍‌ ଆସୁଙ୍କ୍ ଯାପେ ପେଇସ୍ ଆତ୍‍ତଣ୍ଡ୍, ଆସୁଙ୍କ୍ ଇକାଡ଼୍ ମାତ୍‍ତେ ।
JOH 13:31 ଅଣ୍ଡ୍‌ ପେଇସ୍ ଆତ୍‍ତେ ୱେଲେ ଜିସୁ କେତ୍‍ତଣ୍ଡ୍‌, ଇଞ୍ଜେ ନାରୁନ୍ ପିଲା ମହିମାନିତ ପ୍ରକାଶ୍ ଆତ୍‍ତେ ନୁ ଅନ୍‌ ତଡ଼୍ ଇଶ୍ୱର୍ ମାହିମାନିତ ଆତ୍‍ତେ ।
JOH 13:32 ଯଦି ଇଶ୍ୱର୍ ଅନାଗେ ମହିମାନିତ ଆତ୍‍ତଣ୍ଡ୍, ଆଲେକେ ଇଶ୍ୱର୍ ମିକା ନାରୁନ୍‍ପିଲ୍ ଅନାଗ୍ ମହିମାନିତ ମାଡ଼ିତନ୍, ମେଣ୍ଡେ ଯାପେ ଅଂକିଙ୍କ୍‌ ମହିମାନିତ ମାଡ଼ିତନ୍ ।
JOH 13:33 ଜିସୁ କେତ୍‍ତଣ୍ଡ୍ ପିଲାନଡ଼ି ନାନ୍ ମିତଡ଼୍ ମେଣ୍ଡେ ନାର୍‍ଗେ ଦିନାମ୍ ମାନନ୍ । ମିଡ଼୍ ନାକିଂଙ୍କ୍ ମେହେକିତିଡ଼୍, ମେଣ୍ଡେ ନାନ୍ ବେନ୍ ପଡ଼ିୟେତାଗ୍ ଆଦୁତାନ୍, ମିଡ଼୍ ଆଦ୍‍ପଡ଼ିୟେତାଗ୍ ଆଦ୍ ପାର୍‍ୱିଡ଼୍, ଇଦ୍ ନାନ୍ ବେଲା ଇହୁଦିନଡ଼କ୍ କେତ୍‍ତାନ୍, ଆଦେଲେକାମ୍ ନାନ୍ ମିକିଂଙ୍କ୍ କେତୁତାନ୍ ।
JOH 13:34 ମିଡ଼୍ ସାରେ ତଡ଼କିଙ୍କ୍ ପ୍ରେମ ମାଡ଼ାଟ୍, ଇଦ୍ ପୁଃନେ ଗଟ୍ ନାନ୍ ମିକିଂଙ୍କ୍ ଇସମିନ୍ଦେନ୍; ନାନ୍ ବେଦ୍‍ଲେକାମ୍ ମିକିଂଙ୍କ୍ ପ୍ରେମ ମାଡ଼୍‍ତାନ୍, ମିଡ଼୍‍ଆନ୍‌ନ୍ତେ ଆଦେଲେକାମ୍ ନିଜେ ନିଜେ ପ୍ରେମ ମାଡ଼ାନ୍ ଲେକାମ୍ ।
JOH 13:35 ଯଦି ମିୱାଦ୍ ମିଇ ମିଇ ଲୋପେ ପ୍ରେମ ମାତ୍‍କେ, ଆଲେକେ ମିଡ଼୍ ଯେ ନା ଶିଷ୍ୟ, ଇଦ୍ ସାରେତଡ଼୍ ଇଦିନ୍ ତଡ଼୍ ଗ୍ୟାତ ଆଦ୍‍ତିଡ଼୍ ।
JOH 13:36 ଶିମୋନ୍ ପିତର୍ ଜିସୁଙ୍କ୍ ପାଚ୍ରା ମାଡ଼୍‍ତଣ୍ଡ୍, ପ୍ରବୁ, ନିମ୍‍ ବେଗା ଅଦୁତିନ୍ ? ଜିସୁ ଉତ୍ତର୍ ହିତ୍‍ତନ୍, ନାନ୍ ବେଗା ଆଦୁତାନ୍, ମିଡ଼୍ ଇଞ୍ଜେ ନା ପେର୍‍କେ ପେର୍‍କେ ଆଗେ ଆଦ୍ ପାର୍‍ୱିଡ଼୍, ବାତେଙ୍କ୍ ଇତ୍‍କେ ପାୟେ ଆଦ୍‍ତିଡ଼୍ ।
JOH 13:37 ପିତର୍ ଅଂକିଙ୍କ୍‌ କେତ୍‍ତଣ୍ଡ୍‌, ପ୍ରବୁ, ନାନ୍ ଇଞ୍ଜେ ବାତ୍‍ତିଙ୍କ୍ ନି ପେର୍‍କେ ଆତ୍‍ତାଙ୍କ୍ ପାର୍‍ୱନ୍ ? ନାନ୍ ନି ସେଙ୍ଗେ ନିଜେତ୍ ଜିୱୁଣ୍ଡ୍ ହିଦାଙ୍କ୍ ତିଆର୍ ମିନ୍ଦେନ୍ ।
JOH 13:38 ଜିସୁ କେତ୍‍ତଣ୍ଡ୍, ନିମ୍‍ ବାତେଏ ନା ସେଙ୍ଗେ ନିଜେତ୍ ଜିୱୁଣ୍ଡ୍ ହିଦ୍‍ତିନ୍ ? ସତ୍ ନାନ୍ ନିକିଂଙ୍କ୍ କେସ୍‍ମିନ୍ଦେନ୍, କର୍କ୍ କୁସ୍‍ୱେ ମୁନେଙ୍କ୍ ନିମ୍‍ ନାକିଂଙ୍କ୍ ମୁଣ୍ଡୁ ଦାମ୍ ଅସ୍ୱୀକାର୍ ମାଡ଼ିତିନ୍ ।
JOH 14:1 ଜିସୁ କେତ୍‍ତଣ୍ଡ୍, ମିୟାଦ୍ ହୃଦୟ୍ ଉଦ୍‍ବିଗ୍ନ ଆୟ୍‍ମା; ମିଡ଼୍ ଇଶ୍ୱର୍‌ତିଙ୍କ୍ ବିଶ୍ୱାସ୍ ମାଡ଼ାଟ୍, ନାକିଂଙ୍କ୍ ମିକା ବିଶ୍ୱାସ୍ ମାଡ଼ାଟ୍ ।
JOH 14:2 ନା ବାବାନ୍ ଲୋନ୍‌ ନାର୍‍ଗେ ପଡ଼ିୟେମିନ୍ଦେ; ଯଦି ଇଲକଟ୍ ମାନେଡ଼୍‍, ଆଲେକେ ନାନ୍ ମିକିଂଙ୍କ୍ କେଲନ୍ ଆୟେନ୍, ନାନ୍ ମିଇ ସେଙ୍ଗେ ପଡ଼ିୟେ ମାଡ଼ାଙ୍କ୍ ଆଦୁତାନ୍;
JOH 14:3 ମେଣ୍ଡେ ନାନ୍ ଆଞ୍ଜ୍ ମିଇ ମାଇଦିଙ୍କ୍ ପଡ଼ିୟେ ମାଡ଼ି ମେଣ୍ଡନ୍ ଦାମ୍ ୱାଦ୍‍ତାନ୍, ମେଣ୍ଡେ ନାନ୍ ବେନ୍ ପଡ଼ିୟେ ତାଗ୍ ମାନ୍‍ତାନ୍, ମିଡ଼୍‍ଆନ୍‌ନ୍ତେ ଆଗେ ମାନ୍‍ତିଡ଼୍, ଆଦିନ୍ ସେଙ୍ଗେ ମିଇ ପାକେ ୱାଦ୍‍ତାନ୍ ।
JOH 14:4 ନାନ୍ ବେନ୍ ପଡ଼ିୟେତାଗ୍ ଆଦୁତାନ୍, ଆଦ୍ ଆର୍ ମିଡ଼୍ ପୁତ୍‍ତିଡ଼୍ ।
JOH 14:5 ତୋମାଲ୍‌ ଅଂକିଙ୍କ୍‌ ପଚ୍ରାରା ମାଡ଼୍‍ତଣ୍ଡ୍‌, ପ୍ରବୁ, ନିମ୍‍ ବେନ୍ ପଡ଼ିୟେ ତାଗ୍ ଅଦୁତିନ୍, ଆଦ୍‍ମାମେ ପୁନ୍‍ନମ୍; ଆର୍ ବା ବେଲା ପୁତ୍‍ତମ୍ ?
JOH 14:6 ଜିସୁ ଅଂକିଙ୍କ୍‌ କେତ୍‍ତଣ୍ଡ୍‌, ନାନ୍ ଆର୍, ସତ୍ ନୁ ଜିୱୁନ୍; ନାଆଲାନ୍ ଅନ୍‌‍ୱେ ବେନବା ବାବାନ୍ ଗାର୍‍ରେ ଆଦ୍‍ପାର୍‍ୱଡ଼୍ ।
JOH 14:7 ଯଦି ମିଡ଼୍ ନାକିଂଙ୍କ୍ ପୁଞ୍ଜ୍ ମାନେଡ଼ି, ଆଲେକେ ନା ବାବାଙ୍କ୍ ମିକା ପୁନେଡ଼ି; ଇଞ୍ଜେ ଅଂକିଙ୍କ୍‌ ପୁତ୍‍ତିଡ଼୍ ନୁ ଅଂକିଙ୍କ୍‌ ଉଡ଼ୁତିଡ଼୍ ।
JOH 14:8 ପିଲିପ୍ ଅଂକିଙ୍କ୍‌ କେତ୍‍ତେ, ପ୍ରବୁ, ମାକିଂଙ୍କ୍ ବାବାନ୍ ତ ଦର୍ଶନ୍ ମାଡ଼ିମ୍, ଆଦ୍ ମା ସେଙ୍ଗେ ଯତେଷ୍ଟ ।
JOH 14:9 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, ପିଲିପ୍, ଇସର୍ ଯାକ ନାନ୍ ନି ସାଙ୍ଗେତେ ମିନ୍ଦେନ୍, ମେଣ୍ଡେ ନିମ୍‍ ବାତେଏ ନାକିଂଙ୍କ୍ ପୁନ୍‍ୱିନ୍ ? ବେନ ନାକିଂଙ୍କ୍ ଦର୍ଶନ୍ ମାଡ଼ିମିନ୍ଦେଣ୍ଡ୍, ଅଣ୍ଡ୍‌ ବାବାଙ୍କ୍ ଦର୍ଶନ୍ ମାଡ଼୍‍ତଣ୍ଡ୍; ମାକିଂଙ୍କ୍ ବାବାନ୍ ଦର୍ଶନ୍ ମାଡ଼ିମ୍ ଇଞ୍ଜ ନିମ୍‍ ବେଲା କେତୁତିନ୍ ?
JOH 14:10 ନାନ୍ ଯେ ବାବାନାଗେ ମିନ୍ଦେନ୍ ନୁ ବାବାଲ୍ ନାୟାଗ୍ ମିନ୍ଦେନ୍, ଇ ଗଟ୍ ବାତେଏ ବିଶ୍ୱାସ୍ ମାଡ଼୍‍ୱିନ୍ ? ନାନ୍ ମିକିଂଙ୍କ୍ ବେନ୍ ସାରେ ବାକ୍ୟ କେତ୍‍ତାନ୍, ଆଦ୍‍ ସାରେ ନା ନିଜେତ୍ ତାଗାଙ୍କ୍ କେଲନ୍, ବାତେଙ୍କ୍ ଇତ୍‍କେ ବାବାନାଗେ ମାଞ୍ଜ୍ ନିଜେତ୍ ପାଡ଼୍‍ୟି ମାଡ଼ୁତଣ୍ଡ୍ ।
JOH 14:11 ନାନେଜେ ବାବାନାଗେ ମିନ୍ଦେନ୍ ନୁ ବାବା ନାଗେ ମିନ୍ଦେନ୍, ନାୟାଉ ଇଉସାରେ ଗଟି ବିଶ୍ୱାସ୍ ମାଡ଼ାଟ୍, ଇଲୁକ୍ ନାୟାଦ୍ ପାଡ଼୍‍ୟି ଉଡ଼ି ବିଶ୍ୱାସ୍ ମାଡ଼ାଟ୍ ।
JOH 14:12 ସତ୍ ନାନ୍ ମିକିଂଙ୍କ୍ କେତୁତାନ୍, ନାୟାଗେ ବେନ ବିଶ୍ୱାସ୍ ମାଡ଼ିତନ୍, ନାନ୍ ବେନ୍ ପାଡ଼୍‍ୟି ମାଡ଼ୁତାନ୍, ଅଣ୍ଡ୍‌ ମିକା ଆଦେ ମାଡ଼ିତନ୍, ମେଣ୍ଡେ ଆଦ୍‍ ସାରେ ୱିଡ଼୍‍ସି ଗାଟି ଲେକାମ୍ ପାଡ଼୍‍ୟି ମାଡ଼ିତନ୍, ବାତେଙ୍କ୍ ଇତ୍‍କେ ନାନ୍ ବାବାନ୍ ଗାର୍‍ରେ ଆଦୁତାନ୍ ।
JOH 14:13 ମେଣ୍ଡେ ନା ପେଦେର୍ ତେ ବାତେଏ ତାଲ୍‍କିତିଡ଼୍, ଆଦ୍ ନାନ୍ ମାଡ଼ିତାନ୍ । ବେଲାକି ପିଲାନ୍ ତଡ଼୍ ବାବାନାଦ୍ ମହିମା ପ୍ରକାଶ୍ ଆଦ୍‍ତେ ।
JOH 14:14 ଯଦି ମିଡ଼୍ ନା ପେଦେର୍ ତେ ବାତେଏ ବିଷୟ ନାକିଂଙ୍କ୍ ତାଲ୍‍କିତିଡ଼୍, ନାନ୍ ଆଦ୍ ମାଡ଼ିତାନ୍ ।
JOH 14:15 ଯଦି ମିଡ଼୍ ନାକିଂଙ୍କ୍ ପ୍ରେମ ମାଡ଼ୁତିଡ଼୍, ଆଲେକେ ନାଉ ଗଟ୍ ସାରେ ପାଲନ୍ ମାଡ଼ିତିଡ଼୍ ।
JOH 14:16 ମେଣ୍ଡେ, ନାନ୍ ବାବାଙ୍କ୍ ଅନୁରଦ୍‌ ମାଡ଼ିତାନ୍, ମେଣ୍ଡେ ମିଇ ସାଙ୍ଗେତେ ସାରେଦିନା ମାନ୍ଦାନ୍ ସେଙ୍ଗେ ଅଣ୍ଡ୍‌ ମିକିଂଙ୍କ୍ ମେଣ୍ଡେ ୱେରନ୍ ସାହାଜ୍ୟ କାର୍‍ଙ୍ଗି ହିଦ୍‍ତଣ୍ଡ୍,
JOH 14:17 ଅଣ୍ଡ୍‌ ସତ୍ୟମୟ ଆତ୍ମାଙ୍କ୍ ହିଦ୍‍ତନ୍ । ଜଗତ୍ ଅଂକିଙ୍କ୍‌ ଗ୍ରହନ୍ ମାଡ଼େ ପାର୍‍ୱ, ବାତ୍‍ତିଙ୍କ୍ ଜଗତ୍ ଅଂକିଙ୍କ୍‌ ଉଡ଼ କି ପୁନ୍‍ନ; ବାତେଙ୍କ୍ ଇତ୍‍କେ ମିଡ଼୍ ଅଂକିଙ୍କ୍‌ ପୁତ୍‍ତିଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ମିଇ ତଡ଼୍ ମାନ୍‍ତନ୍, ମେଣ୍ଡେ ଅଣ୍ଡ୍‌ ମିଇ ଜିୱେତାଗ୍ ମାନ୍‍ତନ୍ ।
JOH 14:18 ନାନ୍ ୱିଡ଼୍‍ସି ଆତ୍‍ତେ ପେର୍‍କେ, ମିକିଂଙ୍କ୍ ଅନାତ୍ ମାଡ଼ି ୱିଡ଼୍‍ସି ଆନନ୍, ନାନ୍ ମିଇ ଗାର୍‍ରେ ମାଲ୍‍ସ୍ ୱାଦ୍‍ତାନ୍ ।
JOH 14:19 ସୁଦୁଟ୍ ମାତର୍ ଦିନାମ୍ ମିନ୍ଦେ, ଜଗତ୍ ନାକିଂଙ୍କ୍ ମେଣ୍ଡେ ଉଡ଼; ମାତର୍ ମିଡ଼୍ ନାକିଂଙ୍କ୍ ଉଡ଼ିତିଡ଼୍, ବାତେଙ୍କ୍ ଇତ୍‍କେ ନାନ୍ ଜିୱେ, ମେଣ୍ଡେ ମିଡ଼୍ ଆନ୍‌‍ତେ ଜିୱେ ମାନ୍ଦ୍‍ତିଡ଼୍ ।
JOH 14:20 ନାନ୍ ବାବାନାଗ୍ ମେଣ୍ଡେ ମିଡ଼୍ ନାୟାଗ୍ ମିନ୍ଦେଡ଼ି, ଇଦ୍ ଆଦ୍ ଦିନ୍ ୱାତ୍‍କେ ପୁନ୍‍ତିଡ଼୍ ।
JOH 14:21 ବେନ ନା ଗଟିସାରେ ଗ୍ରହନ୍ ମାଡ଼ି ପାଲନ୍ ମାଡ଼ିତନ୍, ଅଣ୍ଡ୍‌ ନାକିଂଙ୍କ୍ ପ୍ରେମ ମାଡ଼ିତନ୍, ମେଣ୍ଡେ ବେନ୍ ନାକିଂଙ୍କ୍ ପ୍ରେମ ମାଡ଼ିତନ୍, ନା ବାବାଲ୍ ଅଂକିଙ୍କ୍‌ ପ୍ରେମ ମାଡ଼ିତନ୍, ମେଣ୍ଡେ ନାନେମିକା ଅଂକିଙ୍କ୍‌ ପ୍ରେମ ମାଡ଼ିତାନ୍ ନୁ ଅଂକିଙ୍କ୍‌ ପ୍ରକାଶ୍ ମାଡ଼ିତାନ୍ ।
JOH 14:22 ଯିହୁଦା, ବେନ ଇଷ୍କାରୀୟତିୟ ଆୟନ୍ ଅଂକିଙ୍କ୍‌ କେତ୍‍ତଣ୍ଡ୍‌, ହଁ ପ୍ରବୁ, ଇଦ୍ ବେଲା ଆଦ୍‍ତେ, ନିଜେତିଙ୍କ୍ ଜଗତ୍‍ତାଗ୍ ତିଆର୍ ମାଡ଼କଟ୍ ମା ପାକେ ବେଲା ତିଆର୍ ମାଡ଼ିତି ?
JOH 14:23 ଜିସୁ ଅଂକିଙ୍କ୍‌ ଉତ୍ତର୍ କେତ୍‍ତଣ୍ଡ୍‌, ଯଦି ବେନ ନାକିଂଙ୍କ୍ ପ୍ରେମ ମାଡ଼୍‍କେ ଆଲେକେ ଅଣ୍ଡ୍‌ ନା ବାକ୍ୟ ପାଲନ୍ ମାଡ଼ିତନ୍, ମେଣ୍ଡେ ନା ବାବାଲ୍ ଅଂକିଙ୍କ୍‌ ପ୍ରେମ ମାଡ଼ିତନ୍, ମେଣ୍ଡେ ମାମ୍‍ମେ ଅନ୍‌ ପାକେ ୱାସ୍ ଅନ୍‌ ତଡ଼୍ ମାନ୍‍ତମ୍ ।
JOH 14:24 ବେନ ନାକିଂଙ୍କ୍ ପ୍ରେମ ମାଡ଼ନ୍, ଅଣ୍ଡ୍‌ ନା ବାକ୍ୟ ପାଲନ୍ ମାଡ଼ନ୍ । ନାନ୍ ଇସ୍‍ମାନ୍ଦାନ୍ ଶିକ୍ଷା ନାୱାଦ୍ ଆୟ୍‍ୟ ଆଦ୍ ନା ପ୍ରେରଣାକର୍ତ୍ତାନ୍ ଇଶ୍ୱର୍‌ତାଦ୍ ।
JOH 14:25 “ନାନ୍ ମିଇ ପାକେ ମାନ୍ଦାନ୍‍ୱେଲେ ଇଦ୍ ସାରେ ଗଟ୍ କେସ୍‍ସିତ୍‍ତାନ୍ ।
JOH 14:26 ଆଦ୍ ସାହାଯ୍ୟୟକାରି ବେନ୍ ପବିତ୍ର ଆତ୍ମାତିଙ୍କ୍ ବାବାଲ୍ ନା ପେଦେର୍ ତେ ମାଲ୍‍ପିତନ୍, ଅଣ୍ଡ୍‌ ସାରେ ବିଷୟ୍‍ତେ ମିକିଂଙ୍କ୍ ବାତେଏ କେସ୍‍ମିନ୍ଦେନି, ଆଦ୍‍ ସାରେ ମିକିଂଙ୍କ୍ ଏର୍କା ମାଡ଼ିଦ୍‍ତଣ୍ଡ୍‌ ।”
JOH 14:27 ନାନ୍ ମିକିଂଙ୍କ୍ ଶାନ୍ତି ଦାନ ମାଡ଼ି ଆଦୁତାନ୍, ନାୱାଦ୍ ନିଜେତ୍ ଶାନ୍ତି ମିକିଂଙ୍କ୍ ଇଦୁତାନ୍; ଜଗତ୍ ବେଲା ଦାନ ମାଡ଼ିତେ, ନାନ୍ ମିକିଂଙ୍କ୍ ଆଦେଲେକାମ୍ ଦାନ ମାଡ଼ନ୍ । ମିୱାଦ୍ ହୃଦୟ୍ ଉଦ୍‍ବିଗ୍ନ କି ୱେର୍‍ମାକି ।
JOH 14:28 ନାନ୍ ଆଦୁତାନ୍ ନୁ ମେଣ୍ଡେ ମିଇ ପାକେ ୱାଦ୍‍ତାନ୍, ନାୱାଦ୍ ଇଦ୍ ଗଟ୍ ତ କେଞ୍ଜି ମିନ୍ଦେଡ଼ି । ଯଦି ମିଡ଼୍ ନାକିଂଙ୍କ୍ ପ୍ରେମ ମାଡ଼େଡ଼ି, ଆଲେକେ ନାନ୍ ନା ବାବାନ୍ ପାକେ ଆଦୁତାନ୍ ଇଞ୍ଜ କେଞ୍ଜି ୱେଡ଼୍‍କେ ମାଡ଼େଡ଼ି, ବାତେଙ୍କ୍ ଇତ୍‍କେ ବାବାଲ୍ ନାୟାଗ୍‍କଞ୍ଜ୍ ମହାନ୍ ।
JOH 14:29 ମେଣ୍ଡେ, ଇଦ୍ ଗଟେମ୍ ଆଦାନ୍ ୱେଲେ ମିଡ଼୍ ବେଲାକି ବିଶ୍ୱାସ୍ ମାଡ଼ିତିଡ଼୍, ଆଦିନ୍ ସେଙ୍ଗେ ଆଦ୍ ଗଟେମ୍ ଆଦାନ୍ ମୁନେଙ୍କ୍ ନାନ୍ ମିକିଂଙ୍କ୍ କେତୁତାନ୍ ।
JOH 14:30 ନାନ୍ ମିତଡ଼୍ ନାର୍‍ଗେ ଜେଲ୍ ଗଟି ମାନନ୍, ବାତେଙ୍କ୍ ଇତ୍‍କେ ଇ ଜଗତ୍‍ତେ ଅଦିପତି ୱାଦୁତଣ୍ଡ୍ । ନା ପର୍‍ର ଅନାଦ୍‌ ବାତେମିକା ଇଲେ ।
JOH 14:31 ବାତେଙ୍କ୍ ଇତ୍‍କେ ବାବାଲ୍‌ ନାକିଂଙ୍କ୍ ବେଲା ଗଟ୍ ଇତ୍‍ତନ୍, ଆଦେ ଲେକାମ୍ ନାନ୍ ପାଡ଼୍‍ୟି ମାଡ଼ିତାନ୍ । ଆଲେକେ, ନାନ୍ ନା ବାବାଙ୍କ୍ ପ୍ରେମ ମାଡ଼ୁତାନ୍ ଇଞ୍ଜ ଜଗତ୍ ପୁନ୍‍ତେ, “ୱାଡ଼ାଟ୍ ମାନାଡ଼୍ ଇଗାଙ୍କ୍ ଆଦିକାଡ଼୍ ।”
JOH 15:1 “ନାନ୍ ନିଜାତାଦ୍ ଅଙ୍ଗୁର୍‌ ଟଣ୍ଡ୍, ମେଣ୍ଡେ ନା ବାବାଲ୍ ଚାଷୀ ନାରୁଣ୍ଡ୍‌ ।
JOH 15:2 ନାୟାଗେ ମାନ୍ଦାନ୍ ବେନ୍ ଆୟି କମ୍‍ମା କାୟା ଆଦକ୍, ଆଦିଙ୍କ୍ ଅଣ୍ଡ୍‌ ନାଡ଼୍‍କିତଣ୍ଡ୍; ମେଣ୍ଡେ କାୟା ଆଦ୍‍କେ, ଗାଟି କାୟା ଆଦାନ୍ ସେଙ୍ଗେ ଅଣ୍ଡ୍‌ ଆଦିଙ୍କ୍ ସାଏ ଜତନ୍ ମାଡ଼ିତନ୍ ।
JOH 15:3 ନାନ୍ ମିକିଂଙ୍କ୍ ବେନ୍ ବାକ୍ୟ କେସ୍‍ମିନ୍ଦେନ୍ ଆଦିନ୍ ସେଙ୍ଗେ ମିଡ଼୍ ସାଏ ଆସ୍ ମିନ୍ଦେଡ଼ି ।
JOH 15:4 ନାୟାଗେ ମାନୁଟ୍, ଆଲେକେ ନାନ୍ ମିୟାଗ୍ ମାନ୍‍ତାନ୍ । କମ୍‍ମା ବେଲା ଅଙ୍ଗୁର୍‌ ଟଣ୍ଡେତାଗ୍ ମାନୋକ୍ କାୟା ଆଦେ ପାର୍‍ୱେ, ଆଦେପୁଟୁଙ୍କ୍ ମିଡ଼୍ ମିକା ନାୟାଗେ ମାନୋକ୍ କାୟା ଆଦେ ପାର୍‍ୱିଡ଼୍ ।”
JOH 15:5 “ନାନ୍ ଅଙ୍ଗୁର୍‌ ଟଣ୍ଡ୍ ମିଡ଼୍ ଆଦୁତିଡ଼୍ କମ୍‍ମା; ବେନ ନାୟାଗ୍ ମାନ୍‍ତଣ୍ଡ୍ ନୁ ନାନ୍ ବେନନାଗ୍‍ ମାନ୍‍ତାନ୍, ଅଣ୍ଡ୍‌ ଗାଟି କାୟା ଆଦିତଣ୍ଡ୍; ବାତେଙ୍କ୍ ଇତ୍‍କେ ନାନ୍ ଇଲ୍‍ଉକ୍ ମିଡ଼୍ ବାଆତେ ମିକା ମାଡ଼୍ ପାର୍‍ୱିଡ଼୍ ।
JOH 15:6 ବେନ ବେସୁଟେ ନାୟାଗ୍ ମାନନ୍, ଆଲାଇତ୍‍କେ ଅଙ୍କ୍‌ ନାଡ଼୍‌କ୍‍ତାଦ୍ କମ୍‍ମା ଲେକାମ୍ ବାଇଦେ ହେସିଦ୍‍ତଡ଼୍ ନୁ ୱାସ୍‍ପିତ୍‍ଡ଼୍, ମେଣ୍ଡେ ନାରୁଡ଼୍ ଆୱିଙ୍କ୍ ଅଣ୍ଡୟାଗେ ମାଡ଼ି କିସ୍‍ତାଗ୍ ୱାଟିଦ୍‍ତଡ଼୍ ନୁ ଆୱ୍‍ଚାରେ କାଡ଼୍‍ୱିତା ।
JOH 15:7 ଯଦି ମିଡ଼୍ ନାୟାଗେ ମାନ୍‍ତିଡ଼୍, ମେଣ୍ଡେ ନାୟାୱ୍ ବାକ୍ୟ ମିୟାଗ୍ ମାନ୍‍ତା, ଆଲେକେ ବେନେଆୟି ବିଷୟ୍ ଇଚ୍ଛା ମାଡ଼ିତିଡ଼୍, ଆଦ୍ ତାଲ୍‍କାଟ୍, ମେଣ୍ଡେ ମିଇ ମାଇଦିଙ୍କ୍ ଆଦ୍ ଦର୍‍କିତେ ।
JOH 15:8 ମିଡ଼୍ ନାର୍‍ଗେ କାୟା ଆଦ୍‍କେ ନା ବାବାଲ୍ ମହିମାନିତ ଆଦ୍‍ତନ୍, ମେଣ୍ଡେ ମିଡ଼୍ ନା ସାଏତ୍ ଶିଷ୍ୟଡ଼୍ ଆଦ୍‍ତିଡ଼୍ ।
JOH 15:9 ବାବାଲ୍ ବେଲା ନାକିଂଙ୍କ୍ ପ୍ରେମ ମାଡ଼୍‍ତଣ୍ଡ୍, ନାନ୍ ମିକା ଆଲେକେ ମିକିଂଙ୍କ୍ ପ୍ରେମ ମାଡ଼୍‍ତାନ୍; ନା ପ୍ରେମାତାଗ୍ ତିଆର୍ ଆସ୍ ମାନୁଟ୍ ।
JOH 15:10 ନାନ୍ ବେଲା ନା ବାବାନ୍ ଗଟ୍ ପାଲନ୍ ମାଡ଼ି ଅନାଦ୍‌ ପ୍ରେମାତାଗ୍ ତିଆର୍ ଆତ୍‍ତାନ୍, ଆଦେପୁଟୁଙ୍କ୍ ମିଡ଼୍ ମିକା ନା ଗଟ୍ ପାଲନ୍ ମାଡ଼ିତିଡ଼୍, ନା ପ୍ରେମାତାଗ୍ ତିଆର୍ ଆଦେ ପାର୍‍ଦ୍‍ତିଡ଼୍ ।”
JOH 15:11 “ନାୱାଦ୍ ୱେଡ଼୍‍କ୍ ବେଲାକି ମିୟାଗ୍ ମାନ୍‍ତେ, ମେଣ୍ଡେ ମିୱାଦ୍ ୱେଡ଼୍‍କା ବେଲା ସାରେ ଆଦ୍‍ତେ, ଇଦିନ୍ ସେଙ୍ଗେ ନାନ୍ ଇୱୁସାରେ ମିକିଂଙ୍କ୍ କେତ୍‍ତାନ୍ ।
JOH 15:12 ନାନ୍ ବେଲା ମିକିଂଙ୍କ୍ ପ୍ରେମ ମାଡ଼୍‍ତାନ୍, ମିଡ଼୍ ମିକା ଆଲେକେ ମିଇ ମିଲୋପେ ପ୍ରେମ ମାଡ଼ାଟ୍, ଇଦ୍ ନାୱାଦ୍ ଗଟ୍ ।
JOH 15:13 ନିଜେତ୍ ସାଙ୍ଗନ୍ ସେଙ୍ଗେ ଜିୱୁନ୍‍ ଇଦାନ୍ କନ୍‍ସ୍ ବେନନାଦ୍ ମେଣ୍ଡେ ଗାଟି ପ୍ରେମ ଇଲେ ।
JOH 15:14 ନାନ୍ ମିକିଂଙ୍କ୍ ବେନ୍ ଗଟ୍ ହିସମିନ୍ଦେନ୍, ଆଦ୍ ଯଦି ପାଲନ୍ ମାଡ଼ିତିଡ଼୍, ଆଲେକେ ମିଡ଼୍ ନା ସାଙ୍ଗ ।
JOH 15:15 ନାନ୍ ମିକିଂଙ୍କ୍ ଚାକର୍ ଇଞ୍ଜ ମେଣ୍ଡେ କେଲନ୍, ବାତେଙ୍କ୍ ଇତ୍‍କେ ମାଲିକ୍ ବାତେଏ ମାଡ଼ିତନ୍, ଚାକର୍ ଆଦ୍ ପୁନଣ୍ଡ୍, ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ ସାଙ୍ଗ ଇଞ୍ଜ କେସ୍‍ମିନ୍ଦେନ୍, ବାତେଙ୍କ୍ ଇତ୍‍କେ ନାନ୍ ନା ବାବାନ୍ କନ୍‍ସ୍ ବାତେଏ କେଞ୍ଜିମିନ୍ଦେନ୍, ଆୱ୍‍ଚାରେ ମିକିଂଙ୍କ୍ କେତ୍‍ତାନ୍ ।
JOH 15:16 ମିଡ଼୍ ନାକିଂଙ୍କ୍ ହେଞ୍ଚୱିଡ଼୍, ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ ହଞ୍ଚିମିନ୍ଦେନ୍, ମେଣ୍ଡେ ବେଲା ଆଞ୍ଜ୍ କାୟା ଆଦ୍‍ସ୍‍ପିତିଡ଼୍ ନୁ ମିୟାୱୁ କାୟା ସାରେଦିନା ଆଦଡ଼େ ମାନ୍‍ତା, ଇଦିନ୍ ସେଙ୍ଗେ ମିକିଂଙ୍କ୍ ହେଞ୍ଚିମିନ୍ଦେନ୍ । ଆଗାଙ୍କ୍ ମିଡ଼୍ ନା ପେଦେର୍ ତେ ବାବାଙ୍କ୍ ବାତେମିକା ତାଲ୍‍କିତିଡ଼୍, ଅଣ୍ଡ୍‌ ଆଦ୍ ମିକିଂଙ୍କ୍ ହିଦ୍‍ତଣ୍ଡ୍;
JOH 15:17 ମିଡ଼୍ ବେଲା ମିଇ ମିଲୋପେ ପ୍ରେମ ମାଡ଼ିତିଡ଼୍, ଇଦିନ୍ ସେଙ୍ଗେ ନାନ୍ ମିକିଂଙ୍କ୍ ଇଦ୍‍ସାରେ ଗଟ୍ ଇସମିନ୍ଦେନ୍ ।”
JOH 15:18 “ଯଦି ଜଗତ୍ ମିକିଂଙ୍କ୍ ପାସ୍‍କି ତେ, ଆଲେକେ ମିକିଂଙ୍କ୍ ପାସ୍‍କାନ୍‌ ମୁନେଙ୍କ୍ ଆଦ୍ ନାକିଂଙ୍କ୍ ପାସ୍‍କି ତେ, ଇଦ୍ ପୁଞ୍ଜ୍ ମାନୁଟ୍ ।
JOH 15:19 ମିଡ଼୍ ଯଦି ଜଗତ୍‍ତାଗ୍ ମାନେଡ଼ି, ଜଗତ୍ ମିକିଂଙ୍କ୍ ନିଜେତ୍ ନାରୁଡ଼୍ ଇଞ୍ଜ ସ୍ନେହ ମାଡ଼େଡ଼୍; ବାତେଙ୍କ୍ ଇତ୍‍କେ ଜଗତ୍‍ତାଗାଙ୍କ୍ ନାନ୍ ମିକିଂଙ୍କ୍ ଜଗତ୍ ଲୋପେଙ୍କ୍ ହେଞ୍ଚିମିନ୍ଦେନ୍, ମେଣ୍ଡେ ମିଡ଼୍ ଜଗତ୍‍ତଡ଼ି ଆୟୱିଡ଼୍, ଇଦିନ୍ ସେଙ୍ଗେ ଜଗତ୍ ମିକିଂଙ୍କ୍ ପାସ୍‍କି ତେ ।
JOH 15:20 ‘ଚାକର୍ ତାନ୍ ମାଲିକ୍ ତାଗାଙ୍କ୍ ବାଡ଼୍‍ୟଣ୍ଡ୍ ଆୟ୍‍ୟଣ୍ଡ୍,’ ନାନ୍ ମିକିଂଙ୍କ୍ ଇଦ୍ ବେନ୍ ବାକ୍ୟ କେସ୍‍ମିନ୍ଦେନ୍, ଆଦିଙ୍କ୍ ହେର୍କା ମାଡ଼ାଟ୍ । ଯଦି ଅଡ଼୍‌ ନାକିଂଙ୍କ୍ ତାଡ଼ନା ମାଡ଼ିମିନ୍ଦେଡ଼୍, ଆଲାଇତ୍‍କେ ମିକିଂଙ୍କ୍ ମିକା ତାଡ଼ନା ମାଡ଼ିତଡ଼୍; ଯଦି ଅଡ଼୍‌ ନାୱାଦ୍ ବାକ୍ୟ ପାଲନ୍ ମାଡ଼ିମିନ୍ଦେଡ଼୍, ଆଲାଇତ୍‍କେ ମିୱାଦ୍ ବାକ୍ୟ ମିକା ପାଲନ୍ ମାଡ଼ିତଡ଼୍ ।
JOH 15:21 ବାତେଙ୍କ୍ ଇତ୍‍କେ ଅଡ଼୍‌ ନାକିଂଙ୍କ୍ ରଅତେନଙ୍କ୍ ପୁନ୍‍ୱା ମାଇଦିଙ୍କ୍ ନାୱାଦ୍ ପେଦେର୍ ସେଙ୍ଗେ ମିକିଂଙ୍କ୍ ଇଦ୍‍ସାରେ ମାଡ଼ିତଡ଼୍ ।
JOH 15:22 ଯଦି ନାନ୍ ୱାସ୍ ଅଡ଼୍‌‍କିଂଙ୍କ୍ କେଲ୍‍ୱକଟ୍ ମାନେନ୍, ଆଲାଇତ୍‍କେ ଅଡ଼୍‌‍ୱାଦ୍ ପାପ୍ ଆୟ୍‍ ଆୟେଡ଼୍; ବାତେଙ୍କ୍ ଇତ୍‍କେ ଇଞ୍ଜେ ଅଡ଼୍‌ ଅଡ଼ାଦ୍‌ ପାପ୍ ବିଷୟ୍ ତେ ବାତେମିକା ବାହାନା ମାଡ଼େ ପାର୍‍ୱଡ଼୍ ।
JOH 15:23 ବେନ ନାକିଂଙ୍କ୍ ପାସ୍‍କିତନ୍, ଅଣ୍ଡ୍‌ ନା ବାବାଙ୍କ୍ ମିକା ପାସ୍‍କିତନ୍ ।
JOH 15:24 ବେନ୍ ପାଡ଼୍‍ୟି ସାରେ ମେଣ୍ଡେ ବେନମିକା ମାଡ଼ଣ୍ଡ୍, ନାନ୍ ଯଦି ଆୱୁସାରେ ଅଡ଼୍‌ ଲୋପେ ମାଡ଼୍‍ୱକଟ ମାନେନ୍, ଆଲାଇତ୍‍କେ ଅଡ଼ାଦ୍‌ ପାପ୍ ଆୟ୍‍ୟ ଆୟେଡ଼୍; ବାତେଙ୍କ୍ ଇତ୍‍କେ ଇଞ୍ଜେ ଅଡ଼୍‌ ଉଡ଼ିମିନ୍ଦେଡ଼୍, ମେଣ୍ଡେ ନାକିଂଙ୍କ୍ ନୁ ନା ବାବାଙ୍କ୍ ଇର୍‍ୱୁଡ଼୍‍କ୍ ପାସ୍‍କି ମିନ୍ଦେଡ଼୍ ।
JOH 15:25 ‘ମାତର୍ ଅଡ଼୍‌ ନାକିଂଙ୍କ୍ ବାତେଙ୍କ୍ ଇତ୍‍କେ ଇଲ୍‍ୱାକଟ ପାସ୍‍କି ମାଡ଼୍‍ତଡ଼୍,’ ଅଡ଼ାଦ୍‌ ଶାସ୍ତ୍ରତାଗ୍ କେତ୍‍ତାଦ୍ ଇଦ୍ ବାକ୍ୟ ବେଲା ସାରେ ଆଦ୍‍ତେ, ଇଦିନ୍ ସେଙ୍ଗେ ଇଲା ଆଦୁତେ ।”
JOH 15:26 “ବାବା ନାୟାଗ୍‍କଞ୍ଜ୍ ନାନ୍ ମିଇ ଗାର୍‍ରେ ବେନ ସାହାଜ୍ୟ ମାଡ଼ାନଙ୍କ୍ ରଅତିତାନ୍, ବାବା ନାୟାଗ୍‍କଞ୍ଜ୍ ପେଇତାଦ୍ ଆଦ୍ ସତ୍ ଆତ୍ମା ୱାତ୍‍କେ ନା ବିଷୟ୍‍ତେ ସାକ୍ଷି ହିଦ୍‍ତା;
JOH 15:27 ମେଣ୍ଡେ ମିଡ଼୍ ମିକା ସାକ୍ଷି, ବାତେଙ୍କ୍ ଇତ୍‍କେ ମିଡ଼୍ ଆରାମ୍ କନ୍‍ସ୍ ନା ତଡ଼୍ ମିନ୍ଦେଡ଼ି ।”
JOH 16:1 “ମିଡ଼୍ ବେଲା ବିଶ୍ୱାସ୍ ଆରା ମାଡ଼୍‍ୱିଡ଼୍ ଇଦିନ୍ ସେଙ୍ଗେ ନାନ୍ ମିକିଂଙ୍କ୍ ଇଦ୍‍ସାରେ ଗଟ୍ କେସ୍‍ମିନ୍ଦେନ୍ ।”
JOH 16:2 ଅଡ଼୍‌ ମିକିଂଙ୍କ୍ ପ୍ରାର୍ତନା କନ୍‍ସ୍ ପେସ୍ପିତଡ଼୍, ଇଦ୍ ଲେକାମ୍ ଦିନାମ୍ ୱାଦୁତେ, ବେସୁଟ୍‌ ବେନ ମିକିଂଙ୍କ୍ ହାୱ୍‍କିତଣ୍ଡ୍, ଅଣ୍ଡ୍‌ ଇଶ୍ୱର୍‌ତେ ସେଙ୍ଗେ ବଲି ଇଦୁତାନ୍ ଇଞ୍ଜ ହେର୍କା ମାଡ଼ିତନ୍ ।
JOH 16:3 ନାରୁଡ଼୍ ଇୱୁସାରେ ମାଡ଼ିତଡ଼୍, ବାତେଙ୍କ୍ ଇତ୍‍କେ ଅଡ଼୍‌ ବାବାଙ୍କ୍ ନୁ ନାକିଂଙ୍କ୍ ପୁନଡ଼୍ ।
JOH 16:4 ମାତର୍ ଇଦ୍‍ସାରେ ଗଟେମ୍‍ଆଦାନ୍ ଦିନାମ୍ ୱାତ୍‍କେ, ନାନ୍ ବାତେଏ ମିକିଂଙ୍କ୍ କେସ୍‍ମାତ୍‍ତାନ୍, ଇଦ୍ ମିଡ଼୍ ହେର୍କା ମାଡ଼ାଟ୍, ଇଦିନ୍ ସେଙ୍ଗେ ନାନ୍ ଇଦ୍‍ସାରେ ଗଟ୍ ମିକିଂଙ୍କ୍ କେତ୍‍ତାନ୍ । ନାନ୍ ମିଇ ତଡ଼୍ ମାତ୍‍ତାଙ୍କ୍ ଆରାମ୍ କନ୍‍ସ୍ ଇଦ୍‍ସାରେ ଗଟ୍ ମିକିଂଙ୍କ୍ କେତ୍‍ତାନ୍ ।
JOH 16:5 ବାତେଙ୍କ୍ ଇତ୍‍କେ ଇଞ୍ଜେ ନାନ୍ ନା ପ୍ରେରଣାକର୍ତ୍ତାନ୍ ଗାର୍‍ରେ ଆଦୁତାନ୍, ମେଣ୍ଡେ ମିଡ଼୍ ବେନ୍ ପଡ଼ିୟେତାଗ୍ ଅଦୁତି ଇଞ୍ଜ ମିଇ ଲୋପେକେ ବେନମିକା ପାଚ୍ରାମାଡ଼୍‍ୱିଡ଼୍ ।
JOH 16:6 ମାତର୍ ନାନ୍ ମିକିଂଙ୍କ୍ ଇଦ୍‍ସାରେ ଗଟ୍ କେତ୍‍ତାଙ୍କ୍ ମିଇ ହୃଦୟ୍ ଦୁଃକାମ୍‍ତେ ବର୍ତ୍ତି ଆଦ୍‍ତେ ।
JOH 16:7 ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ ସତ୍ କେତୁତାନ୍, ନାନ୍ ଆତ୍‍କେନେ ମିୟାଦ୍ ଲେକେତ୍ ଆଦ୍‍ତେ, ବାତେଙ୍କ୍ ଇତ୍‍କେ ନାନ୍ ଆନୋକ୍ ଅଣ୍ଡ୍‌ ସାହାଜ୍ୟ ମାଡ଼ାନଣ୍ଡ୍ ନାରୁଡ଼୍ ମିଇ ଗାର୍‍ରେ ୱାଡ଼ଣ୍ଡ୍, ମାତର୍ ନାନ୍ ଆତ୍‍କେ ଅଙ୍କ୍‌ ମିଇ ଗାର୍‍ରେ ରହସିଦ୍‍ତାନ୍ ।
JOH 16:8 ଅଣ୍ଡ୍‌ ୱାସ୍ ପାପ୍, ଦାର୍ମିକତା ନୁ ନ୍ୟାୟ ବିଚାର୍ ବିଷୟ୍‍ତେ ଜଗତ୍‍ତିଙ୍କ୍ ସତ୍ ହିଦ୍‍ତଣ୍ଡ୍;
JOH 16:9 ପାପ୍ ବିଷୟ୍‍ତେ-ବାତେଙ୍କ୍ ଇତ୍‍କେ ଅଡ଼୍‌ ନାକିଂଙ୍କ୍ ବିଶ୍ୱାସ୍ ମାଡ଼ଡ଼୍‍;
JOH 16:10 ଦାର୍ମିକତା ବିଷୟ୍‍ତେ-ବାତେଙ୍କ୍ ଇତ୍‍କେ ନାନ୍ ବାବାନ୍ ଗାର୍‍ରେ ଆଦୁତାନ୍ ନୁ ମିଡ଼୍ ନାକିଂଙ୍କ୍ ମେଣ୍ଡେ ଉଡାଙ୍କ୍ ପାର୍‍ୱିଡ଼୍;
JOH 16:11 ବିଚାର୍ ବିଷୟ୍‍ତେ-ଅଡ଼୍‌ ବୁଲ୍‍ ବାତେଙ୍କ୍ ଇତ୍‍କେ ଇଦ୍ ଜଗତ୍‍ତିଙ୍କ୍ ଶାସନ୍‍ ଅଦିପତି ଦସି ଆତ୍‍ତଣ୍ଡ୍ । ଇଗାଙ୍କ୍ ଇଶ୍ୱର୍‌ତେ ନ୍ୟାୟ ବିଚାର୍ ତିଆର୍ ଆତ୍‍ତେ ।
JOH 16:12 “ନାୱାଦ୍ ମିକିଂଙ୍କ୍ ମେଣ୍ଡେ ଗାଟି ଗଟି କେତ୍‍ତାନ୍ ମିନ୍ଦେ, ମାତର୍ ମିଡ଼୍ ଇଞ୍ଜେ ଆୱ୍‍ଚାରେ ସୟ୍ୟ ମାଡ଼ାଙ୍କ୍ ପାର୍‍ୱିଡ଼୍ ।
JOH 16:13 ବାତେଙ୍କ୍ ଇତ୍‍କେ ଅଣ୍ଡ୍‌, ଇତ୍‍କେ, ସତ୍ କେତାନାଦ୍ ଆତ୍ମା ୱାତ୍‍କେ, ଅଣ୍ଡ୍‌ ହାର୍ ତଅସ୍ ମିକିଂଙ୍କ୍ ସାରେ ସତ୍ ବିଷୟ୍ କେତିତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ନିଜେତାଦ୍ ଗଟ୍ କେଲଣ୍ଡ୍, ଅଣ୍ଡ୍‌ ବାତେଏ କେଞ୍ଜିତଣ୍ଡ୍, ଆଦେ ଆ ମିକିଂଙ୍କ୍ କେତିତଣ୍ଡ୍, ମେଣ୍ଡେ ୱାଦାନ୍ ଦିନାକ୍ ବିଷୟତାଦ୍ ଗଟ୍ ମିକିଂଙ୍କ୍ କେତିତଣ୍ଡ୍ ।
JOH 16:14 ଅଣ୍ଡ୍‌ ନାକିଂଙ୍କ୍ ଗୌରବ୍‍ ମାଡ଼ିତନ୍, ବାତେଙ୍କ୍ ଇତ୍‍କେ ଅଣ୍ଡ୍‌ ନାୱାଦ୍ ବିଷୟ୍ ଆସ୍ ମିକିଂଙ୍କ୍ କେତିତଣ୍ଡ୍ ।
JOH 16:15 ବାତା ବାବାନାଦ୍, ଆୱୁସାରେ ନାୟାୱୁ; ଇଦିନ୍ ସେଙ୍ଗେ ନାନ୍ କେତ୍‍ତାନ୍, ଅଣ୍ଡ୍‌ ନାୱାଦ୍ ସାରେ ବିଷୟ୍ ଆସ୍ ମିକିଂଙ୍କ୍ କେତିତଣ୍ଡ୍ ।”
JOH 16:16 “ସୁଦୁଟ୍ ଦିନାମ୍ ମିନ୍ଦେ, ମିଡ଼୍ ନାକିଂଙ୍କ୍ ମେଣ୍ଡେ ଉଡାଙ୍କ୍ ପାର୍‍ୱିଡ଼୍, ମେଣ୍ଡଅନ୍‌‍ଦାମ୍ ସୁଦୁଟ୍ ସମୟ୍‍ତେ ଲୋପେ ମିଡ଼୍ ନାକିଂଙ୍କ୍ ଉଡାଙ୍କ୍ ପାର୍ଦିତିଡ଼୍ ।”
JOH 16:17 ଆଗାଙ୍କ୍ ତାନ୍ ଶିଷ୍ୟଡ଼୍ ଲୋପେଙ୍କ୍ ବେସ୍‍କ୍‍ତୁଡ଼୍‍ କେତ୍‍ତଡ଼୍, ସୁଦୁଟ୍ ଦିନାମ୍ ମିନ୍ଦେ, ମିଡ଼୍ ନାକିଂଙ୍କ୍ ଉଡାଙ୍କ୍ ପାର୍‍ୱିଡ଼୍, ମେଣ୍ଡଅନ୍‌‍ଦାମ୍ ସୁଦୁଟ୍ ସମୟ୍‍ତେ ଲୋପେ ମିଡ଼୍ ନାକିଂଙ୍କ୍ ଉଡ଼ିତିଡ଼୍ ନୁ ନାନ୍ ବାବାନ୍ ଗାର୍‍ରେ ଆଦୁତାନ୍, ଇଦ୍ ବେନ୍ ଗଟି ଅଣ୍ଡ୍‌ ମାକିଂଙ୍କ୍ କେତୁତଣ୍ଡ୍, “ଇଦିନ୍ ଅର୍ତ ବାତେଏ ?
JOH 16:18 ଅଡ଼୍‌ କେତ୍‍ତଡ଼୍, ଆଦ୍ ‘ସୁଦୁଟ୍ ସମୟ୍‍ତାଦ୍’ ଇତ୍‍କେ ବାତେଏ ? ଅଣ୍ଡ୍‌ ବାତେଏ କେତୁତଣ୍ଡ୍, ମାମ୍‍ମେ ବୁଜେମ୍ ଆଦାଙ୍କ୍ ପାର୍‍ୱମ୍ ।”
JOH 16:19 ଅଡ଼୍‌ ଅଂକିଙ୍କ୍‌ ପାଚ୍ରାମାଡ଼ାଙ୍କ୍ ଇଚ୍ଛା ମାଡ଼ୁତଡ଼୍ ଇଞ୍ଜ ପୁଞ୍ଜ୍ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ କେତ୍‍ତାନ୍, ‘ସୁଦୁଟ୍ ଦିନାମ୍ ମିନ୍ଦେ, ମିଡ଼୍ ନାକିଂଙ୍କ୍ ଉଡାଙ୍କ୍ ପାର୍‍ୱିଡ଼୍, ମେଣ୍ଡଅନ୍‌‍ଦାମ୍ ସୁଦୁଟ୍ ସମୟ୍‍ତେ ଲୋପେ ମିଡ଼୍ ନାକିଂଙ୍କ୍ ଉଡ଼ିତିଡ଼୍,’ ନାନ୍ ଇଦ୍ ବେନ୍ ଗଟ୍ କେତ୍‍ତାନ୍, ଆଦ୍ ବିଷୟ୍ ଆସ୍ ମିଡ଼୍ ବାତେଏ ମିଲୋପେ କେତାକେତି ଆଦୁତିଡ଼୍ ?
JOH 16:20 ସତ୍, ସତ୍ ନାନ୍ ମିକିଂଙ୍କ୍ କେତୁତାନ୍, ମିଡ଼୍ କେୟିତିଡ଼୍ ନୁ ଦୁଃକାମ୍ ଆଦ୍‍ତିଡ଼୍, ବାତେଙ୍କ୍ ଇତ୍‍କେ ଜଗତ୍ ୱେଡ଼୍‍କିତ୍; ମିଡ଼୍ ଦୁଃକାମ୍ ଆଦ୍‍ତିଡ଼୍, ବାତେଙ୍କ୍ ଇତ୍‍କେ ମିୱାଦ୍ ଦୁଃକାମ୍ ୱେଡ଼୍‍କେତେ ସାୟେ ଆଦ୍‍ତେ ।
JOH 16:21 ଜନମ୍ ମାଡ଼ାନ୍ ଦିନାମ୍ ୱାସ୍ ହେୱ୍‍କେ ନାଟାଙ୍କ୍ କଷ୍ଟ ଦର୍‍କିତ୍; ବାତେଙ୍କ୍ ଇତ୍‍କେ ଆଦ୍ ଜନମ୍ ମାଡ଼୍‍ତେ ପାୟେ ଜଗତ୍‍ତାଗ୍ ପୁନଣ୍ଡ୍ ନାରୁଡ଼୍ ଜନମ୍ ମାଡ଼୍‍ତେ, ଇଦ୍ ୱେଡ଼୍‍କାତ୍ ସେଙ୍ଗେ ମେଣ୍ଡେ କଷ୍ଟ ହେର୍କା ମାଡ଼ ।
JOH 16:22 ଆଦ୍ ଲେକାମ୍ ମିଡ଼୍ ଇଞ୍ଜେ କଷ୍ଟ ଆଦ୍‍ତିଡ଼୍, ବାତେଙ୍କ୍ ଇତ୍‍କେ ନାନ୍ ମେଣ୍ଡଅନ୍‌‍ଦାମ୍ ମିକିଂଙ୍କ୍ ତଅନ୍‌ଦିତାନ୍, ମେଣ୍ଡେ ମିଇ ହୃଦୟ୍ ୱେଡ଼୍‍କିତେ ନୁ ବେନ ମିୟାଗ୍ କନ୍‍ସ୍ ମିୟାଦ୍ ୱେଡ଼୍‍କା ଡଙ୍ଗି ଆୟଡ଼୍ ।”
JOH 16:23 “ଆଦ୍ ଦିନ୍ ୱାଦ୍‍ତେ ମିଡ଼୍ ନାକିଂଙ୍କ୍ ବାତେଏ ତାଲ୍‍କାଙ୍କ୍ ୱେୟ୍ । ସତ୍ ନାନ୍ ମିକିଂଙ୍କ୍ କେତୁତାନ୍, ଯଦି ମିଡ଼୍ ବାବାଙ୍କ୍ ବାତ୍ ତାଆଲ୍‍କିତିଡ଼୍, ଆସୁଟେ ନା ପେଦେର୍ ତେ ଅଣ୍ଡ୍‌ ମିକିଂଙ୍କ୍ ଆଦ୍ ହିଦ୍‍ତଣ୍ଡ୍ ।
JOH 16:24 ଇଞ୍ଜେକ୍‍ଆନା ମିଡ଼୍ ନା ପେଦେର୍ ତେ ବାତ୍ ତାଆଲ୍‍କ୍‍ୱିଡ଼୍; ତାଲ୍‍କାଟ୍, ମିଡ଼୍ ଆଦ୍ ଦର୍ସିକିତିଡ଼୍, ମେଣ୍ଡେ ମିୱାଦ୍ ୱେଡ଼୍‍କା ବର୍ତ୍ତି ଆଦ୍‍ତେ ।”
JOH 16:25 “ନାନ୍ ମିକିଂଙ୍କ୍ ଆଲଙ୍କାରିକ ଶଦ୍ଦ ତଡ଼୍ ଇଦ୍‍ସାରେ ଗଟ୍ କେତ୍‍ତାନ୍; ଦିନାମ୍ ୱାଦୁତେ ନାନ୍ ମେଣ୍ଡେ ଚିନ୍ନେ ତଡ଼୍ କେଲନ୍, ବାତେଙ୍କ୍ ଇତ୍‍କେ ବାବାନ୍ ବିଷୟ୍‍ତେ ସାୟେ କେତିତାନ୍ ।
JOH 16:26 ଆଦ୍ ଦିନ୍ ମିଡ଼୍ ନା ପେଦେର୍‍ତେ ଅଂକିଙ୍କ୍‌ ତାଲ୍‍କିତିଡ଼୍; ନାନ୍ ମିୱାଦ୍ ବିଷୟ୍‍ତେ ବାବାଙ୍କ୍ ଅନୁରଦ୍‌ ମାଡ଼ିତାନ୍, ଇଦ୍ ନାନ୍ ମିକିଂଙ୍କ୍ କେଲନ୍;
JOH 16:27 ବାବାଲ୍ ନିଜେ ମିକିଂଙ୍କ୍ ପ୍ରେମ ମାଡ଼ିତନ୍, ବାତେଙ୍କ୍ ଇତ୍‍କେ ମିଡ଼୍ ନାକିଂଙ୍କ୍ ପ୍ରେମ ମାଡ଼୍‍ତିଡ଼୍ ନୁ ନାନ୍ ଯେ ଇଶ୍ୱର୍‌ତାଗାଙ୍କ୍ ୱାସ୍‍ମିନ୍ଦେନ୍, ଆଦ୍ ମିଡ଼୍ ବିଶ୍ୱାସ୍ ମାଡ଼୍‍ତିଡ଼୍ ।
JOH 16:28 ସତ୍ ନାନ୍ ବାବାନାଗାଙ୍କ୍ ଜଗତ୍‍ତାଗ୍ ୱାସ୍‍ମିନ୍ଦେନ୍; ମେଣ୍ଡଅନ୍‌‍ଦାମ୍ ଜଗତ୍‍ତିଙ୍କ୍ ୱିଡ଼୍‍ସି ବାବାନ୍ ଗାର୍‍ରେ ଆଦୁତାନ୍ ।”
JOH 16:29 ଇଦ୍ ଗଟ୍ କେଞ୍ଜି ଶିଷ୍ୟଡ଼୍ କେତ୍‍ତଡ଼୍, “ଉଡ଼େ ଇଞ୍ଜେ ନିମ୍‍ ସାୟେ କେତୁତିନ୍ ନୁ ଆଲଙ୍କାରି ଶଦ୍ଦ ତଡ଼୍ ମେଣ୍ଡେ କେଲ୍‍ୱିନ୍ ।
JOH 16:30 ଇଞ୍ଜେ ନିମ୍‍ ଯେ ସାରେ ବିଷୟ୍ ପୁତ୍‍ତିନ୍, ମେଣ୍ଡେ ନିମ୍‍ ବେନଙ୍କ୍ ପ୍ରଶ୍ନ ମାଡ଼ାଙ୍କ୍ ଦର୍‍କାର୍ ଇଲେ, ଆଦ୍ ଇଞ୍ଜେ ମାମ୍‍ମେ ପୁତ୍‍ତମ୍; ଇଶ୍ୱର୍‌ତାଗାଙ୍କ୍ ୱାତ୍‍ତିନ୍ ଇଞ୍ଜ ମାମ୍‍ମେ ଇଦ୍ ମାମ୍‍ମେ ବିଶ୍ୱାସ୍ ମାଡ଼ୁତମ୍ ।”
JOH 16:31 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, “ମିଡ଼୍ ବାତ୍ ଇଞ୍ଜେ ବିଶ୍ୱାସ୍ ମାଡ଼ୁତିଡ଼୍ ?
JOH 16:32 ଉଡ଼ାଟ୍, ଦିନାମ୍ ୱାଦୁତ୍, ହୋ ୱାତ୍‍ତା, ବେସୁଟ୍‌ ମିଡ଼୍ ୱେରେୱେରେ ଆସ୍ ନିଜେ ନିଜେତ୍ ଲୋନ୍‌ ଆଦ୍‍ତିଡ଼୍, ମେଣ୍ଡେ ନାକିଂଙ୍କ୍ ୱେରଙ୍କେ ୱିଡ଼୍‍ସି ଆଦ୍‍ତିଡ଼୍; ନାନ୍ ୱେରନ୍ ଆୟନ୍, ନା ତଡ଼୍ ବାବାଲ୍ ମିନ୍ଦେଣ୍ଡ୍ ।
JOH 16:33 ମିଡ଼୍ ବେଲା ନାୟାଗ୍ କାଇଲି ଶାନ୍ତି ଦର୍ସିକିତିଡ଼୍, ଇଦିନ୍ ସେଙ୍ଗେ ନାନ୍ ମିକିଂଙ୍କ୍ ଇଦ୍‍ସାରେ ବିଷୟ୍ କେତୁତାନ୍ । ଜଗତ୍‍ତାଗ୍ ମିଇ ସେଙ୍ଗେ କଷ୍ଟ ମିନ୍ଦେ, ବାତେଙ୍କ୍ ଇତ୍‍କେ ସାହାସ୍ ପୟିମୁଟ୍; ନାନ୍ ଜଗତ୍‍ତିଙ୍କ୍ ଜିଡ଼୍‌ତାନ୍ ।”
JOH 17:1 ଜିସୁ ଇଦ୍‍ସାରେ ଗଟି କେସ୍ ତେର୍‍ତେପେୟ୍ ସ୍ୱର୍ଗତା ଉଡ଼ି କେତ୍‍ତଣ୍ଡ୍, “ବାବା, ଦିନାମ୍ ଆଦ୍‍ତେ; ନି ମାର୍‍ରିଙ୍କ୍ ମହିମାନିତ ମାଡ଼ା, ବେଲା ମାର୍‍ ନିୱାଦ୍ ମହିମା ମାଡ଼ିତନ୍,
JOH 17:2 ନିମ୍‍ ଅଂକିଙ୍କ୍‌ ସାରେ ନାରୁଡ଼୍ ପର୍‍ର ଅଦିକାର୍‌ ହିତ୍‍ତି, ବେଦ୍‍ରକମ୍‍ ନିମ୍‍ ଅଂକିଙ୍କ୍‌ ବେନ୍ ନାରୁଡ଼୍‍କ୍ ହିତ୍‍ତିନ୍, ଅଡ଼୍‌‍କ୍ ସାରେଦିନାତ୍ ଜିୱୁଣ୍ଡ୍ ହିଦ୍‍ତଣ୍ଡ୍ ।
JOH 17:3 ନିମ୍‍ ୱେର୍‍ନି ସତ୍ ଇଶ୍ୱର୍, ନିକିଂଙ୍କ୍ ନୁ ନିମ୍‍ ରଅତେନଣ୍ଡ୍ ଜିସୁ କ୍ରିଷ୍ଟଙ୍କ୍ ପୁନ୍ଦାନାଦ୍ ଆଦୁତ୍‍ତେ ସାରେଦିନାତ୍ ଜିୱୁଣ୍ଡ୍ ।
JOH 17:4 ନିମ୍‍ ନାକିଂଙ୍କ୍ ବେନ୍ ପାଡ଼୍‍ୟି ମାଡ଼ାନଙ୍କ୍ ହିତ୍‍ତିନ୍, ଆଦ୍ ନାନ୍ ତେର୍‍ସ୍‍ପି ପୃତିବିତାଗ୍ ନିକିଂଙ୍କ୍ ମହିମାନିତ ମାଡ଼୍‍ତାନ୍ ।
JOH 17:5 ଇଞ୍ଜେ, ହୋ ବାବା, ଜଗତ୍‍ତାଦ୍ ତିଆର୍ ମୁନେଙ୍କ୍ ନି ତଡ଼୍ ନାୱାଦ୍ ବେନ୍ ମହିମା ମାତ୍‍ତା, ଇଞ୍ଜେ ନିମ୍‍ ନାକିଂଙ୍କ୍ ଆଦ୍ ମହିମା ହିମ୍ ।”
JOH 17:6 “ନିମ୍‍ ନାକିଂଙ୍କ୍ ଜଗତ୍‍ତାଗ୍ ବେନ୍ ନାରୁଡ଼୍‍କ୍ ଦାନ ମାଡ଼୍‍ତି, ନାନ୍ ଅଡ଼୍‌ ଗାର୍‍ରେ ନି ପେଦେର୍ ପ୍ରକାଶ୍ ମାଡ଼୍‍ତାନ୍; ଅଡ଼୍‌‍ ନି ମାନେଇ ନୁ ନିମ୍‍ ଅଡ଼୍‌‍କିଂଙ୍କ୍ ନାକିଂଙ୍କ୍ ଦାନ ମାଡ଼୍‍ତି, ମେଣ୍ଡେ ଅଡ଼୍‌ ନିୱାଦ୍ ବାକ୍ୟ ପାଲନ୍ ମାଡ଼୍‍ତଡ଼୍ ।
JOH 17:7 ନିମ୍‍ ବାତା ଦାନ ମାଡ଼୍‍ତି ଆୱୁସାରେ ନିୟାଗ୍ କନ୍‍ସ୍ ତିଆର୍ ଆଦ୍‍ତେ, ଇଦ୍ ଅଡ଼୍‌ ଇଞ୍ଜେ ବୁଜେମ୍ ଆଦ୍‍ତଡ଼୍;
JOH 17:8 ବାତେଙ୍କ୍ ଇତ୍‍କେ ନିମ୍‍ ନାକିଂଙ୍କ୍ ବେନ୍ ସାରେ ବାକ୍ୟ ଦାନ ମାଡ଼୍‍ତି, ନାନ୍ ଅଡ଼୍‌‍କିଂଙ୍କ୍ ଆୱ୍ ସାରେ ଦାନ ମାଡ଼୍‍ତାନ୍, ମେଣ୍ଡେ ଅଡ଼୍‌ ଗ୍ରହନ୍ ମାଡ଼୍‍ତଡ଼୍, ମେଣ୍ଡେ ନାନ୍ ଯେ ନିୟାଗ୍ କନ୍‍ସ୍ ୱାସ୍‍ମିନ୍ଦେନ୍, ଆଦ୍ ସତ୍ ଇଞ୍ଜ ପୁଞ୍ଜ୍ ମିନ୍ଦେଡ଼୍‌ ନୁ ନିମ୍‍ ନାକିଂଙ୍କ୍ ରଅତି ଇଞ୍ଜ ବିଶ୍ୱାସ୍ ମାଡ଼୍‍ତଡ଼୍ ।”
JOH 17:9 “ନାନ୍ ଅଡ଼୍‌ ସେଙ୍ଗେ ପ୍ରାର୍ତନା ମାଡ଼ୁତାନ୍; ଜଗତ୍ ସେଙ୍ଗେ ପ୍ରାର୍ତନା ମାଡ଼ନ୍, ବାତେଙ୍କ୍ ଇତ୍‍କେ ନିମ୍‍ ନାକିଂଙ୍କ୍ ବେନ୍ ନାରୁଡ଼୍‍କ୍ ହିତ୍‍ତିନ୍, ଅଡ଼୍‌ ସେଙ୍ଗେ ପ୍ରାର୍ତନା ମାଡ଼ୁତାନ୍, ବାତେଙ୍କ୍ ଇତ୍‍କେ ଅଡ଼୍‌ ନି ମାନେଇ;
JOH 17:10 ବାତା ନାୟାୱୁ, ଆୱୁସାରେ ନିୟାୱ୍‌, ମେଣ୍ଡେ ବାତା ନିୟାୱ୍‌, ଆୱୁସାରେ ନାୟାୱୁ; ମେଣ୍ଡେ ନାନ୍ ଅଡ଼୍‌ ତଡ଼୍ ମହିମାନିତ ଆସ୍ ମିନ୍ଦେନ୍ ।
JOH 17:11 ନାନ୍ ମେଣ୍ଡେ ଇଦ୍ ଜଗତ୍‍ତାଗ୍ ମାନନ୍, ବାତେଙ୍କ୍ ଇତ୍‍କେ ଇଡ଼୍ ଇଦ୍ ଜଗତ୍‍ତାଗ୍ ମାନ୍‍ତଡ଼୍; ମେଣ୍ଡେ ନାନ୍ ନି ଗାର୍‍ରେ ଆଦୁତାନ୍ । ପବିତ୍ର ବାବା, ନିମ୍‍ ନାକିଂଙ୍କ୍ ହିତ୍‍ତେ ପେଦେର୍‍ତେ ଶକ୍ତି ତଡ଼୍ ଅଡ଼୍‌‍କିଂଙ୍କ୍ ରକ୍ଷା ମାଡ଼ା ବେନ୍ ପେଦେର୍ ନାକିଂଙ୍କ୍ ହିତ୍‍ତି, ବେଦ୍‍ରକମ୍‍ ମାନାଡ଼୍ ଅଣ୍ଡୟାଗେ ଆଦ୍‍ତାଡ଼୍, ଅଡ଼୍‌ ଆଦେରକମ୍ ଅଣ୍ଡୟାଗେ ଆଦ୍‍ତଡ଼୍ ।”
JOH 17:12 ଅଡ଼୍‌ ତଡ଼୍ ମାନ୍ଦାନ୍ ୱେଲେ ନାନ୍ ଅଡ଼୍‌‍କିଂଙ୍କ୍ ନିୱାଦ୍ ପେଦେର୍‍ତେ ଶକ୍ତିତଡ଼୍ ରକ୍ଷା ମାଡ଼ି ୱାସମିନ୍ଦେନ୍ ବେନ୍ ପେଦେର୍ ନିମ୍‍ ନାକିଂଙ୍କ୍ ହିତ୍‍ତି, ମେଣ୍ଡେ ନାନ୍ ଅଡ଼୍‌‍କିଂଙ୍କ୍ ସାବଦାନ୍‍ତେ ରକ୍ଷା ମାଡ଼ିମିନ୍ଦେଣ୍ଡ୍ ନୁ ଦର୍ମଶାସ୍ତ୍ରତାଦ୍ ବାକ୍ୟ ବେଲା ସାରେ ଆଦ୍‍ତେ, ଇଦିନ୍ ସେଙ୍ଗେ ଡଲାନ୍ ମାଆର୍‍ ୱିଡ଼୍‍ସି ମେଣ୍ଡେ ବେନମିକା ନର୍କତା ଆନ୍‌‍ନଡ଼୍ ।
JOH 17:13 ବାତେଙ୍କ୍ ଇତ୍‍କେ ନାନ୍ ଇଞ୍ଜେ ନି ଗାର୍‍ରେ ଆଦୁତାନ୍, ମେଣ୍ଡେ ଅଡ଼୍‌ ଲୋପେ ନାୱାଦ୍ ୱେଡ଼୍‍କା ବର୍ତ୍ତି ଆୟି, ଆଦିନ୍ ସେଙ୍ଗେ ଜଗତ୍‍ତାଗ୍ ମାନ୍ଦାନ୍ ୱେଲେ ନାନ୍ ଇୱୁସାରେ କେତୁତାନ୍ ।
JOH 17:14 ନାନ୍ ଅଡ଼୍‌‍କିଂଙ୍କ୍ ନିୟାୱୁ ବାକ୍ୟ କେଞ୍ଜ୍‍ପ୍‍ତାନ୍, ମେଣ୍ଡେ ଜଗତ୍ ଅଡ଼୍‌‍କିଂଙ୍କ୍ ପାସ୍‍କି ମିନ୍ଦେ, ବାତେଙ୍କ୍ ଇତ୍‍କେ ନାନ୍ ବେଦ୍‍ଲେକାମ୍ ଇଦ୍ ଜଗତ୍‍ତଣ୍ଡ୍ ଆୟନ୍, ଅଡ଼୍‌ ଆଦେରକମ୍ ଇଦ୍ ଜଗତ୍‍ତଡ଼୍ ଆୟ୍‍ୟଡ଼୍ ।
JOH 17:15 ନିମ୍‍ ଅଡ଼୍‌‍କିଂଙ୍କ୍ ଜଗତ୍‍ତାଗାଙ୍କ୍ ଆୟମ୍ ଇଞ୍ଜ ନାନ୍ ପ୍ରାର୍ତନା ମାଡ଼ନ୍, ବାତେଙ୍କ୍ ଇତ୍‍କେ ଅଡ଼୍‌‍କିଂଙ୍କ୍ ସୟ୍‍ତାନ୍‍ତାଗାଙ୍କ୍ ରକ୍ଷା ମାଡ଼େ ଇଞ୍ଜ ପ୍ରାର୍ତନା ମାଡ଼ୁତାନ୍ ।
JOH 17:16 ନାନ୍ ବେଲା ଜଗତ୍‍ତଣ୍ଡ୍ ଆୟନ୍, ଅଡ଼୍‌ ଆଦେପୁଟୁଙ୍କ୍ ଜଗତ୍‍ତଡ଼୍‍ ଆୟ୍‍ୟଡ଼୍ ।
JOH 17:17 ସତ୍ ତଡ଼୍ ଅଡ଼୍‌‍କିଂଙ୍କ୍ ପବିତ୍ର ମାଡ଼େ; ନିୱାଦ୍ ବାକ୍ୟ ଆ ସତ୍ ।
JOH 17:18 ନିମ୍‍ ନାକିଂଙ୍କ୍ ବେଲା ଜଗତ୍‍ତାଗ୍ ରହତ୍‍ତିନ୍, ନାନ୍ ମିକା ଅଡ଼୍‌‍କିଂଙ୍କ୍ ଆଦେପୁଟୁଙ୍କ୍ ଜଗତ୍‍ତାଗ୍ ରହତ୍‍ତାନ୍ ।
JOH 17:19 ଅଡ଼୍‌ ବେଲା ଆଦ୍ ସତ୍ ତଡ଼୍ ପବିତ୍ର ଆଦ୍‍ତଡ଼୍, ଇଦିନ୍‍ମାଇଦିଙ୍କ୍ ନାନ୍ ଅଡ଼୍‌ ସେଙ୍ଗେ ନିଜ୍‍ତିଙ୍କ୍ ପବିତ୍ର ମାଡ଼ୁତାନ୍ ।
JOH 17:20 “ନାନ୍ ମାତର୍ ଅଡ଼୍‌ ସେଙ୍ଗେ ପ୍ରାର୍ତନା ମାଡ଼ନ୍, ମାତର୍ ଇଡ଼ାଦ୍ ବାକ୍ୟ ତଡ଼୍ ବେନଡ଼୍ ନାୟାଗ୍ ବିଶ୍ୱାସ୍ ମାଡ଼ିତଡ଼୍, ଅଡ଼୍‌‍କିଂଙ୍କ୍ ମିକା ପ୍ରାର୍ତନା ମାଡ଼ୁତାନ୍,
JOH 17:21 ବେଲା ଅଡ଼୍‌ ସାରେତଡ଼୍ ଅଣ୍ଡୟାଗେ ଆଦ୍‍ତଡ଼୍; ହଁ ବାବା ନିମ୍‍ ବେଲା ନାୟାଗେ ମିନ୍ଦେନି ନୁ ନାନ୍ ନିୟାଗ୍ ମିନ୍ଦେନ୍, ଅଡ଼୍‌ ମିକା ଆଲେକେ ମାୟାଗ୍‌ ମାନିଡ଼୍, ବେଦ୍‍ଲେକାମ୍ ନିମ୍‍ ନାକିଂଙ୍କ୍ ରହତ୍‍ତି ଇଞ୍ଜ ଜଗତ୍ ବିଶ୍ୱାସ୍ ମାଡ଼ିତ୍ ।
JOH 17:22 ମେଣ୍ଡେ ନିମ୍‍ ନାକିଂଙ୍କ୍ ବେନ୍ ମହିମା ହିତ୍‍ତିନ୍, ନାନ୍ ଅଡ଼୍‌‍କିଂଙ୍କ୍ ଆଦ୍ ହିତ୍‍ତାନ୍, ବେଲା ମାନାଡ଼୍ ଅଣ୍ଡୟାଗେ ଆଦ୍‍ତାଡ଼୍, ଅଡ଼୍‌ ଆଦେଲେକାମ୍ ଅଣ୍ଡୟାଗେ ଆଦ୍‍ତଡ଼୍ ।
JOH 17:23 ନାନ୍ ଅଡ଼ାଗ୍ ନୁ ନିମ୍‍ ନାୟାଗ୍ ବେଦ୍‍ଲେକାମ୍ ଅଡ଼୍‌ ପବିତ୍ର ଆସ୍ ଅଣ୍ଡୟାଗେ ଆଦ୍‍ତଡ଼୍, ଆଲେକେ ଜଗତ୍ ପୁନ୍‍ତେ ଯେ ନିମ୍‍ ନାକିଂଙ୍କ୍ ରଅତିନ୍, ମେଣ୍ଡେ ନାକିଂଙ୍କ୍ ବେନ୍ ଲେକାତ୍ ପ୍ରେମ ମାଡ଼୍‍ତି, ଅଡ଼୍‌‍କିଂଙ୍କ୍ ମିକା ଆଦେ ଲେକାତ୍ ପ୍ରେମ ମାଡ଼୍‍ତିନ୍ ।”
JOH 17:24 “ହଁ ବାବା ! ନିମ୍‍ ନାକିଂଙ୍କ୍ ବେନଡ଼କ୍ ହିତ୍‍ତିନ୍, ନାନ୍ ବେଗେ ମାନ୍‍ତାନ୍, ଅଡ଼୍‌ ଆନ୍‌‍ତେ ଆଦେପୁଟୁଙ୍କ୍ ଆଗେ ନା ତଡ଼୍ ମାନ୍‍ତଡ଼୍ ନୁ ଜଗତ୍ ତିଆର୍ ଆଦାନ୍ ମୁନେଙ୍କ୍ ନିମ୍‍ ନାକିଂଙ୍କ୍ ପ୍ରେମ ମାଡ଼ି ବେନ୍ ଗୌରବ୍ ହିତ୍‍ତିନ୍, ନାୱାଦ୍ ଆଦ୍ ଗୌରବ୍ ଅଡ଼୍‌ ବେଲା ଉଡ଼ିତଡ଼୍, ଇଦ୍ ନାୱାଦ୍ ଇଚ୍ଛା ।
JOH 17:25 ହୋ ଦାର୍ମିକ୍ ବାବା ! ଜଗତ୍ ନିକିଂଙ୍କ୍ ପୁନନ୍, ବାତେଙ୍କ୍ ଇତ୍‍କେ ନାନ୍ ନିକିଂଙ୍କ୍ ପୁତ୍‍ତାନ୍; ମେଣ୍ଡେ ନିମ୍‍ ଯେ ନାକିଂଙ୍କ୍ ରହତି, ଆଦ୍ ଇଡ଼୍ ପୁତ୍‍ତଡ଼୍;
JOH 17:26 ମେଣ୍ଡେ, ନିମ୍‍ ନାକିଂଙ୍କ୍ ବେଦ୍‍ଲେକାମ୍ ପ୍ରେମ ମାଡ଼୍‍ତିନ୍, ଆଦ୍ ବେଲା ଅଡ଼ାଗ୍ ମାନ୍‍ତା ନୁ ନାନ୍ ଅଡ଼ାଗ୍ ମାନ୍‍ତାନ୍, ଇଦିନ୍ ସେଙ୍ଗେ ନାନ୍ ଅଡ଼୍‌‍କିଂଙ୍କ୍ ନି ପେଦେର୍ କେତ୍‍ତାନ୍ ନୁ କେତିତାନ୍ ।”
JOH 18:1 ଜିସୁ ଇଦ୍‍ସାରେ ଗଟି କେସ୍ ତାନ୍ ଶିଷ୍ୟଡ଼୍ ତଡ଼୍ କିଦ୍ରୋଣ ଉପତ୍ୟକାତ୍ ମେଣ୍ଡେଅନ୍‌‍ପାକେ ଆଦ୍‍ତଡ଼୍ । ଆଗେ ଅଣ୍ଡ୍‌ ବଗିଚା ମାତ୍‍ତା, ଅଣ୍ଡ୍‌ ନୁ ତାମ୍ ଶିଷ୍ୟଡ଼୍ ଆଗେ ଅସ୍‍ତଡ଼୍ ।
JOH 18:2 ବେନ୍ ଯିହୁଦାଲ୍ ଅଂକିଙ୍କ୍‌ ଶତ୍ରୁଡ଼୍ କାଇଦେ ପସ୍‍ପ୍‍ତଣ୍ଡ୍, ଅଣ୍ଡ୍‌ ମିକା ଆଦ୍ ପଡ଼ିୟେତିଙ୍କ୍ ପୁଞ୍ଜ୍ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଜିସୁ ନାର୍ଗେଦାମ୍ ତାନ୍ ଶିଷ୍ୟଡ଼୍ ତଡ଼୍ ଆଦ୍ ପଡ଼ିୟେତାଗ୍ ଆଞ୍ଜମାତ୍‍ତଡ଼୍ ।
JOH 18:3 ଯିହୁଦା ରମୀୟ ସୈନ୍ୟମାନ୍ଦେ, ମୁକ୍ୟ ଯାଜକ୍ ନୁ ଫାରୂଶୀଡ଼୍ ଲୋପେକେ ବେସ୍‍କ୍‍ତୁଡ଼୍‍ ମନ୍ଦିର୍‍ତିଙ୍କ୍ କେପାନଡ଼୍ ଲଣ୍ଠନ୍, ମୋଶାଲ୍ ନୁ ସୁରୀଟେଙ୍ଗା ପଇସ୍ ଆଗେ ୱାତଡ଼୍ ।
JOH 18:4 ଆଗାଙ୍କ୍ ଜିସୁ, ଅଡ଼୍‌ ସେଙ୍ଗେ ବାତା ଗଟେମ୍‍ଆଦାଙ୍କ୍ ଆଦୁତେ, ଆଦ୍ ପୁଞ୍ଜ୍ ମୁନ୍‍ନେ ଆଞ୍ଜ୍ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍, “ମିଡ଼୍ ବେନଙ୍କ୍ ମେହେକୁତିଡ଼୍ ?”
JOH 18:5 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ନାଜରିତିୟତଣ୍ଡ୍ ଜିସୁଙ୍କ୍ ।” ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ ଅଣ୍ଡେ ।” ବେନ୍ ଯିହୁଦା ଅଂକିଙ୍କ୍‌ ଶତ୍ରୁଡ଼୍ କାଇଦେ ପସ୍‍ପ୍‍ତଣ୍ଡ୍, ଅଣ୍ଡ୍‌ ମିକା ଅଡ଼୍‌ ତଡ଼୍ ନିସ୍‍ମାତ୍‍ତଣ୍ଡ୍ ।
JOH 18:6 ଜିସୁ ଆସୁଟେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ ଅଣ୍ଡେ,” ଆସୁଟେ ଅଡ଼୍‌ ପେର୍‍କେ ଆଞ୍ଜ୍ ନେଲ୍ ରାୟ୍‍ତଡ଼୍ ।
JOH 18:7 ଆଗାଙ୍କ୍ ଜିସୁ ଅଡ଼୍‌‍କିଂଙ୍କ୍ ମେଣ୍ଡଅନ୍‌‍ଦାମ୍ ପାଚ୍ରାମାଡ଼୍‍ତଣ୍ଡ୍, “ମିଡ଼୍ ବେନଙ୍କ୍ ମେହେକୁତିଡ଼୍ ?” ଅଡ଼୍‌ କେତ୍‍ତଡ଼୍, “ନାଜରିତିୟତଣ୍ଡ୍ ଜିସୁଙ୍କ୍ ।”
JOH 18:8 ଜିସୁ କେତ୍‍ତଣ୍ଡ୍, “ନାନ୍ ଯେ ଅଣ୍ଡ୍‌, ଇଦ୍ ତ ନାନ୍ ମିକିଂଙ୍କ୍ କେତ୍‍ତାନ୍ ।” ଯଦି ମିଡ଼୍ ନାକିଂଙ୍କ୍ ମେହେକୁତିଡ଼୍, ଆଲେକେ ଇଡ଼୍‍କିଂଙ୍କ୍ ଆଦାଙ୍କ୍ ଇମୁଟ୍ ।
JOH 18:9 ଜିସୁ କେତ୍‍ତଣ୍ଡ୍, ବେଲା ଅନ୍‌‍ୱାଦ୍ ଇଦ୍ ବାକ୍ୟ ସାରେ ଆଦ୍‍ତେ, “ବାବା ନିମ୍‍ ନାକିଂଙ୍କ୍ ବେନଡ଼କ୍ ହିତ୍‍ତିନ୍, ଅଡ଼୍‌ ଲୋପେଙ୍କ୍ ନାନ୍ ୱେରଙ୍କ୍ ମିକା ମାପନ୍ ।”
JOH 18:10 ଶିମୋନ୍ ପିତର୍‍ତାଗ୍ ଚୁର୍ ମାତ୍‍ତାଙ୍କ୍ ଅଣ୍ଡ୍‌ ଆଦିଙ୍କ୍ ପେସ୍ପିମିକା ମହାଯାଜକିନ୍ ଦାସଙ୍କ୍ ରେହେତଣ୍ଡ୍ ନୁ ଅନାଦ୍‌ ତିନ୍ଦେକାଇ କେୱ୍‍ଦିଙ୍କ୍ ନାଡ଼୍‍କ୍‍ତଣ୍ଡ୍; ଆ ଦାସତେ ପେଦେର୍ ମାଲ୍‍କ ।
JOH 18:11 ଆଗାଙ୍କ୍ ଜିସୁ ପିତର୍‍ତିଙ୍କ୍ କେତ୍‍ତଣ୍ଡ୍, “ଚୁର୍ ଗାର୍‍ରେ ନେହେମ୍; ବାବାଲ୍ ଇଶ୍ୱର୍‍ ନାକିଂଙ୍କ୍ ଇସ୍‍ମାନ୍ଦାନ୍ ଇଦ୍ ଦୁଃକାମ୍ ଆଦାନ୍ କଷ୍ଟତାଗାଙ୍କ୍ ନାନ୍‍ନେ ତିନନ୍‍ କି ?”
JOH 18:12 ତିନ୍ ପେର୍‍କେ ରମୀୟ ସୈନ୍ୟମାନ୍ଦେ, ବେଡ଼୍‍ୟାଦ୍‍ ସେନାପତି ନୁ ଯିହୁଦୀଡ଼୍‍କ୍ କେପାନଡ଼୍ ଜିସୁଙ୍କ୍ ପୟ୍‍ସ୍ ବନ୍ଦି ମାଡ଼୍‍ତଡ଼୍,
JOH 18:13 ଅଂକିଙ୍କ୍‌ ତଅସ୍ ମୁନେନ୍ କୟାପାନ୍ ମାମାଲ୍ ହାନାନତେ ଗାର୍‍ରେ ଆତ୍‍ତଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ଆଦ୍ ହେଣ୍ଡେତ୍ ବେଡ଼ିୟ୍‍ ଯାଜକ୍ ମାତ୍‍ତଣ୍ଡ୍ ।
JOH 18:14 ସାରେତଡ଼୍ ନାରୁଡ଼୍ ସେଙ୍ଗେ ୱେରଣ୍ଡ୍ ଡଲ୍‍ନାଦ୍ ସାଏ ଇଞ୍ଜ ଯିହୁଦୀଡ଼୍‍କ୍ ବେନ କେସ୍‍ମାତ୍‍ତଣ୍ଡ୍, ଇଣ୍ଡ୍ ଅଣ୍ଡ୍‌ କାୟାପା ।
JOH 18:15 ଶିମୋନ୍ ପିତର୍ ନୁ ମେଣ୍ଡେଅର୍‍ତୁଣ୍ଡ୍ ଶିଷ୍ୟ ଜିସୁନ୍ ପେର୍‍କେ ପେର୍‍କେ ଆଞ୍ଜ ମାତ୍‍ତଡ଼୍‌ । ଆ ଶିଷ୍ୟ ମହାଯାଜକତିଙ୍କ୍ ପୁଞ୍ଜ୍ ମାତ୍‍ତଣ୍ଡ୍ ନୁ ଜିସୁନ୍ ତଡ଼୍ ବେଡ଼୍‍ୟାଦ୍‍ ଯାଜକତାଦ୍ ଲୋତ୍‍ତେ ଦୁୱାଡ଼୍‌ ହେୱୁନା ଆତ୍‍ତଣ୍ଡ୍ ।
JOH 18:16 ବାତେଙ୍କ୍ ଇତ୍‍କେ ପିତର୍ ବାଇଦେ ମାର୍‍ ଗାର୍‍ରେ ନିସ୍ ମାତ୍‍ତଣ୍ଡ୍ । ଅଣ୍ଡ୍‌ ବାଇଦେ ଆଞ୍ଜ୍ ମାର୍‍ତାଗ୍ କେପିମାନ୍ଦାନ୍ ଦାସିଙ୍କ୍ କେସ୍ ପିତର୍‍ତିଙ୍କ୍ ଲୋପେ ତାତ୍‍ତେ ।
JOH 18:17 ଆଗାଙ୍କ୍ ଅଣ୍ଡ୍‌ ଦାସି ପିତର୍‍ତିଙ୍କ୍ କେତ୍‍ତା, “ନିମ୍‍ ମିକା ବାତେଏ ଇ ନାରୁଡ଼୍ ଶିଷ୍ୟଡ଼୍ ଲୋପେକେ ୱେରନ୍ ଆୟିୱିନ୍ ?” ଅଣ୍ଡ୍‌ କେତ୍‍ତଣ୍ଡ୍, “ନାନ୍ ଆୟନ୍ ।”
JOH 18:18 ଶାଲ୍‍ଦେ ସେଙ୍ଗେ ଦାସ ନୁ କେପାନଡ଼୍ ଇର୍କି ନିଡ଼୍‍ସ୍‍ପି ଆଗେ ନିସ୍ କିସ୍ ହାର ମାତ୍‍ତଡ଼୍; ପିତର୍ ମିକା ଅଡ଼୍‌ ତଡ଼୍ କାଇଲି କିସ୍ ହାର ମାତ୍‍ତଣ୍ଡ୍ ।
JOH 18:19 ତିନ୍ ଲୋପେ ବେଡ଼ିୟ୍‍ଯାଜକ୍ ଜିସୁଙ୍କ୍ ତାନ୍ ଶିଷ୍ୟଡ଼୍ ବିଷୟ୍‍ତେ ନୁ ତାନ୍ ଶିକ୍ଷା ବିଷୟ୍‍ତେ ପାଚ୍ରାମାଡ଼୍‍ତଣ୍ଡ୍ ।
JOH 18:20 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ନାନ୍ ନାରୁଡ଼୍ ଗାର୍‍ରେ ସାରେ ଗଟ୍ କେସ୍‍ମିନ୍ଦେନ୍; ବେଗେ ସାରେ ଯିହୁଦିଡ଼୍ ଅଣ୍ଡୟାଗେ ଆଦ୍‍ତଡ଼୍, ଇଦ୍ ଲେକାମ୍ ସମାଜ୍ ଲୋନ୍‌ ନୁ ମନ୍ଦିର୍‍ତାଗ୍ ନାନ୍ ସାରେଦାମ୍ ଶିକ୍ଷା ଇସ୍‌‍ମିନ୍ଦେନ୍; ନାନ୍ ମିଞ୍ଜୀ ମିକା ବାତେଏ କେଲନ୍ ।
JOH 18:21 ନାକିଂଙ୍କ୍ ବାତେଙ୍କ୍ ପାଚ୍ରାମାଡ଼ୁତିନ୍ ? ନାନ୍ ଅଡ଼୍‌‍କିଂଙ୍କ୍ ବାତେଏ କେତ୍‍ତାନ୍, ବେନଡ଼୍ କେଞ୍ଜ୍‍ତଡ଼୍, ଅଡ଼୍‌‍କିଂଙ୍କ୍ ପାଚ୍ରାମାଡ଼ା; ଉଡ଼େ, ନାନ୍ ବାତା କେତ୍‍ତାନ୍, ଅଡ଼୍‌ ଆୱ୍‍ଚାରେ ପୁତ୍‍ତଡ଼୍ ।”
JOH 18:22 ଜିସୁ ଇଲା କେତ୍‍ତାଙ୍କ୍ ପ୍ରହରୀଡ଼୍ ଲୋପେକେ ଗାରେ ନିସ୍ ମାନ୍ଦାନ୍ ୱେରଣ୍ଡ୍ ଜିସୁଙ୍କ୍ ଚାପୁଡ଼ା ରେହେସ୍ କେତ୍‍ତଣ୍ଡ୍, ନିମ୍‍ ମହାଯାଜକତିଙ୍କ୍ ଇଲା କେତୁତି ?
JOH 18:23 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ଯଦି ନାନ୍ କାରାପ୍ କେତ୍‍ତାନ୍, ଆଲେକେ କାରାବ୍‍ତାଦ୍ ସାରେତଡ଼୍ ମୁନେ ସତ୍ ହିମ୍; ବାତେଙ୍କ୍ ଇତ୍‍କେ ଯଦି ସାଏ କେତ୍‍ତାନ୍, ଆଲେକେ ବାତେଙ୍କ୍ ନାକିଂଙ୍କ୍ ରେହେତୁତିନ୍ ?”
JOH 18:24 ଆଗାଙ୍କ୍ ହାନାନ ଅଂକିଙ୍କ୍‌ ତହଃସ୍‍ ମାନ୍ଦାନ୍ ଅବସ୍ଥାତେ ବେଡ଼ିୟ୍‍ଯାଜକ୍ କାୟାପାନ୍ ଗାର୍‍ରେ ରହତଣ୍ଡ୍ ।
JOH 18:25 ଆଗାଙ୍କ୍ ଶିମୋନ୍ ପିତର୍ ନିସ୍‍ମିକା କିସ୍ ହାର ମାତ୍‍ତଣ୍ଡ୍ । ଆଗେ ଗୁଡ଼୍‍ତା ନାରୁଡ଼୍ ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, “ନିମ୍‍ମିକା ବାତେଏ ଶିଷ୍ୟଡ଼୍ ଲୋପେକେ ୱେରଣ୍ଡ୍ ଆୟିୱିନ୍ ?” ଶିମୋନ୍ ପିତର୍ ଅସ୍ୱୀକାର୍ ମାଡ଼ି କେତ୍‍ତଣ୍ଡ୍, “ଇଲେ, ନାନ୍ ଆୟନ୍ ।”
JOH 18:26 ବେଡ଼ିୟ୍‍ଯାଜକ୍ ଦାସଡ଼୍ ଲୋପେକେ ୱେରଣ୍ଡ୍, ଇତ୍‍କେ ପିତର୍ ବେନ କେୱ୍ କଇସ୍ ମାତ୍‍ତଣ୍ଡ୍, ଅନ୍‌ ନିଜର୍ ନାରୁଡ଼୍ କେତ୍‍ତଣ୍ଡ୍, “ନାନ୍ ବାତେଏ ନିକିଂଙ୍କ୍ ଜିସୁନ୍ ତଡ଼୍ ବଗିଚାତାଗ୍ ଉଡ଼ି ମାନନ୍ ?”
JOH 18:27 ଆଗେ ପିତର୍ ମେଣ୍ଡଅନ୍‌‍ଦାମ୍ ଅସ୍ୱୀକାର୍ ମାଡ଼ି କେତ୍‍ତଣ୍ଡ୍, “ଇଲେ ।” ଆସୁଟେ, ସାଙ୍ଗେ ସାଙ୍ଗେ କର୍କ୍ କୁସ୍‍ତା ।
JOH 18:28 ପେର୍‍କେ ଯିହୁଦି ନେତାନଡ଼୍ ଜିସୁଙ୍କ୍ କୟାପାନ୍ ଗାର୍‍ରେ ରମୀୟ ରାଜ୍ୟପାଲ୍‍ତେ ପ୍ରାସାଦ୍‍ତାଗ୍ ହତ୍‍ତଡ଼୍; ଆସୁଟ୍‌ ୱିଇସ ମାତ୍‍ତା; ମେଣ୍ଡେ ଅଡ଼୍‌ ଅପବିତ୍ର ଆୟ୍‍ୟକଟ ନିସ୍ତାର୍ ପାଣ୍ଡୁତାଦ୍ ବଜି ତିନ୍ଦାନ୍ ସେଙ୍ଗେ, ଅଡ଼୍‌‍ ପ୍ରାସାଦ୍‍ତେ ଲୋପେ ହସଡ଼୍ ।
JOH 18:29 ପିଲାତ ଅଡ଼୍‌‍ ଗାର୍‍ରେ ପେଇସ୍ ୱାସ୍ କେତ୍‍ତଣ୍ଡ୍, “ଇଣ୍ଡ୍ ନାରୁଡ଼୍ ବିରୁଦ୍‍ତେ ମିଡ଼୍ ବାତେଏ ଅବିଯଗ୍ ତାତୁତିଡ଼୍ ?”
JOH 18:30 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ଇଣ୍ଡ୍ ୱେରନ୍ ଅପରାଦି ନାରୁଣ୍ଡ୍‌, ଆଦିନ୍ ସେଙ୍ଗେ ମାମ୍‍ମେ ଅଂକିଙ୍କ୍‌ ନି ଗାର୍‍ରେ ତାତ୍‍ତମ୍ ।”
JOH 18:31 ପିଲାତ ଯିହୁଦୀଡ଼୍‍କ୍ କେତ୍‍ତଣ୍ଡ୍, “ମିଡ଼୍ ହିକିଂଙ୍କ୍ ହସ୍ ମିୟାଦ୍ ନିୟମ୍‍ ଲେକାମ୍ ବିଚାର୍ ମାଡ଼ାଟ୍ ।” ଯିହୁଦୀଡ଼୍ ପୀଲାତଙ୍କ୍ କେତ୍‍ତଡ଼୍, “ଜିସୁଙ୍କ୍ ଡଲାନ୍‍ଦଣ୍ଡ୍ ହିଦାନଙ୍କ୍ ମାୱାଦ୍ ଅଦିକାର୍‌ ଇଲେ ।”
JOH 18:32 ଜିସୁ ବେନ୍ ରକମ୍ ଡଲିତଣ୍ଡ୍, ଆଦିଙ୍କ୍ ପୁଞ୍ଜ୍ ଅଣ୍ଡ୍‌ ବେନ୍ ବାକ୍ୟ କେସ୍‍ମାତ୍‍ତଣ୍ଡ୍, ଆଦ୍ ବେଲା ସତ୍ ଆଦ୍‍ତେ, ଇଦିନ୍ ସେଙ୍ଗେ ଅଡ଼୍‌ ଇଲା କେସ୍‍ମାତ୍‍ତଡ଼୍ ।
JOH 18:33 ପିଲାତ ମେଣ୍ଡେ ଅନ୍‌‍ଦାମ୍ ପ୍ରାସାଦ୍‍ତେ ଲୋପେ ଆସି ଜିସୁଙ୍କ୍ କାର୍‍ଙ୍ଗି କେତ୍‍ତଣ୍ଡ୍, “ନିମ୍‍ ବାତେଏ ଯିହୁଦୀଡ଼୍ ରାଜା ?”
JOH 18:34 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ନିମ୍‍ ବାତେଏ ଇଦ୍ ନିଜେ କେତୁତିନ୍, ନା ବାଗାତ୍‍ନାରୁଡ଼୍ ନା ବିଷୟ୍‍ତେ ନିକିଂଙ୍କ୍ ଇଦ୍ କେତ୍‍ତଡ଼୍ ?”
JOH 18:35 ପିଲାତ ଉତ୍ତର୍ ହିତ୍‍ତଣ୍ଡ୍, “ନାନ୍ ଯିହୁଦି ଆୟନ୍ । ନି ନିଜେତ୍ ନାରୁଡ଼୍ ନୁ ମୁକ୍ୟ ଯାଜକିଡ଼୍ ନିକିଂଙ୍କ୍ ନା ଗାର୍‍ରେ ତାତ୍‍ତଡ଼୍; ନିମ୍‍ ବାତେଏ ଦଷ୍ ମାଡ଼୍‍ତି ?”
JOH 18:36 ଜିସୁ ଉତ୍ତର୍ ହିତ୍‍ତଣ୍ଡ୍, “ନାୱାଦ୍ ରାଜ୍ୟ ଇଦ୍ ଜଗତ୍ ତେ ସେଙ୍ଗେ ଆୟ୍‍ୟ; ଯଦି ନାୱାଦ୍ ରାଜ୍ୟ ଇଦ୍ ଜଗତ୍ ତେ ସେଙ୍ଗେ ଆୟେଡ଼୍, ଆଲେକେ ନାନ୍ ଯିହୁଦି ନେତାନଡ଼୍ କାଇଦେ ସମର୍‍ପିତ ଆୟନ୍ ଆୟେନ୍, ଆଦିନ୍ ସେଙ୍ଗେ ନା ଦାସଡ଼୍ ଯୁଦ୍‌ ମାଡ଼େଡ଼୍; ବାତେଙ୍କ୍ ଇତ୍‍କେ ନା ରାଜ୍ୟ ଇଗେ ଆୟ୍‍ୟ ମେଣ୍ଡେଅଣ୍ଡାଗ୍ ।”
JOH 18:37 ଆଗାଙ୍କ୍ ପିଲାତ ଜିସୁଙ୍କ୍ କେତ୍‍ତଣ୍ଡ୍, “ଆଲେକେ ନିମ୍‍ ୱେରନ୍ ରାଜା ?” ଜିସୁ କେତ୍‍ତଣ୍ଡ୍, “ନିମ୍‍ ତ କେତୁତିନ୍ ନାନ୍ ୱେରନ୍ ରାଜା । ନାନ୍ ସତ୍ ବିଷୟ କେତାନଙ୍କ୍ ଜନମ୍ ଆତ୍‍ତାନ୍ ନୁ ଜଗତ୍‍ତାଗ୍ ୱାସ୍‍ମିନ୍ଦେନ୍ । ବେନ ସତ୍ୟତିଙ୍କ୍ ସାଏ କେତିତଡ଼୍‍ ଅଣ୍ଡ୍‌ ନା ଗଟି କେଞ୍ଜିତଡ଼୍ ।”
JOH 18:38 ପିଲାତ ଜିସୁଙ୍କ୍ କେତ୍‍ତଣ୍ଡ୍, “ବାତେଏ ନିଜାମ୍ ?” ଇଦ୍ କେସ୍ ପିଲାତ ଯିହୁଦୀଡ଼୍ ଗାର୍‍ରେ ବାଇଦେ ଆଞ୍ଜ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ ଇନାଗେ ବାତେମିକା ଦଷ୍ ପାଏମ୍ ଆୟନ୍ ।
JOH 18:39 ବାତେଙ୍କ୍ ଇତ୍‍କେ ସାରେ ହେଣ୍ଡକ୍ ନିସ୍ତାର୍ ପାଣ୍ଡୁତେ ୱେଲେ ମିଇ ସେଙ୍ଗେ ଅର୍‍ତୁଙ୍କ୍ ବନ୍ଦି ନାରୁଙ୍କ୍ ମୁକ୍ତି ମାଡ଼ୁତାନ୍, ଇଦ୍ ମିୟାଦ୍ ଉଦାର୍ ମିନ୍ଦେ; ତ ଯଦି ମିଡ଼୍ ଇଚ୍ଛା ମାଡ଼ିତିଡ଼୍, ନାନ୍ ଇଣ୍ଡ୍ ଯିହୁଦୀଡ଼୍ ରାଜାଙ୍କ୍ ମୁକ୍ତି ମାଡ଼ିତାନ୍ ।”
JOH 18:40 ଆଗାଙ୍କ୍ ଅଡ଼୍‌ ଗାଟି ଲେଙ୍ଗ୍ ଦେ କେତ୍‍ତଡ଼୍, “ଇଲେ, ଇ ମାନେଇତିଙ୍କ୍ ଆୟ୍‍ୟ । ବାରବ୍‍ବାଙ୍କ୍ ମୁକ୍ତି ମାଡ଼ିମ୍ ।” ଇଣ୍ଡ୍ ବାରବ୍‍ବାଲ୍ ୱେରନ୍ ଡଙ୍ଗାଲ୍ ମାତ୍‍ତଣ୍ଡ୍ ।
JOH 19:1 ତାନ୍ ପେର୍‍କେ ପିଲାତ ଜିସୁଙ୍କ୍ ହସ୍‍ମିକା କରଡ଼ା ତଡ଼୍ ରେହେତାନ୍ ସେଙ୍ଗେ ଗଟ୍ ହିତ୍‍ତଣ୍ଡ୍ ।
JOH 19:2 ସୈନିକିଡ଼୍ କୟେ ମାଡ଼େତ୍ ସହଜ୍‍ ତିଆର୍ ମାଡ଼ି ଜିସୁନ୍ ତାଲେତାଗ୍ କେର୍‍ସ୍ପତଡ଼୍ ନୁ ଅଂକିଙ୍କ୍‌ ଆପ୍ ରଙ୍ଗତାଦ୍ ଚକା କେର୍‍ସ୍ପତଡ଼୍ ।
JOH 19:3 ଅଡ଼୍‌ ଜିସୁନ୍ ଗାର୍‍ରେ ୱାସ୍ କେତ୍‍ତଡ଼୍, “ହଁ ଯିହୁଦୀଡ଼୍ ରାଜା, ନିମ୍‍ ନାର୍‍ଗେ ଜେଲ୍ ବାଦ୍‍କା;” ମେଣ୍ଡେ ଅଡ଼୍‌ ଅଂକିଙ୍କ୍‌ ଚାପୁଡ଼ା ରେହେତାଙ୍କ୍ ପସ୍ପ୍‍ତ୍‍ତଡ଼୍ ।
JOH 19:4 ପିଲାତ ମେଣ୍ଡେ ଅନ୍‌‍ଦାମ୍ ବାଇଦେ ଆଞ୍ଜ୍ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, “ଉଡ଼ାଟ୍, ନାନ୍ ଅନାଗେ ବାତେଏ ମିକା ଦଷ୍ ଦର୍‍ସ୍‍କନ୍, ଇଦ୍ ବେଲା ମିଡ଼୍ ପୁନ୍‍ତିଡ଼୍, ଇଦିନ୍ ସେଙ୍ଗେ ନାନ୍ ଅଂକିଙ୍କ୍‌ ମିଇ ଗାର୍‍ରେ ବାଇଦେ ତାତ୍‍ତାନ୍ ।”
JOH 19:5 ଆଗାଙ୍କ୍ ଜିସୁ ଆ କୟେନାଦ୍ ସହଜ୍‍ ନୁ ଆପ୍ କାୟାନ୍ ରଙ୍ଗତାଦ୍ ଚକା କେର୍‍ସ୍ ବାଇଦେ ୱାତ୍‍ତଣ୍ଡ୍ । ପିଲାତ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଉଡ଼ାଟ୍, ଇଣ୍ଡ୍ ଆ ନାରୁଣ୍ଡ୍‌ !”
JOH 19:6 ଆଗାଙ୍କ୍ ମୁକ୍ୟ ଯାଜକ୍ ନୁ ମନ୍ଦିର୍‍ତିଙ୍କ୍ ସୁରକ୍ଷାହିଦାନଡ଼୍ ଉଡ଼ି ଗାଟି ଲେଙ୍ଗ୍ ଦେ କେତ୍‍ତଡ଼୍, “କ୍ରୁଶତାଗ୍ ତାର୍‍ସ୍‍ପାଟ୍, କ୍ରୁଶତାଗ୍ ତାର୍‍ସ୍‍ପାଟ୍,” ପିଲାତ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ଅଂକିଙ୍କ୍‌ ଅସ୍ କ୍ରୁଶତାଗ୍ ତାର୍‍ସ୍‍ପାଟ୍, ବାତେଙ୍କ୍ ଇତ୍‍କେ ନାନ୍ ଅନାଗେ ବାତେଏ ମିକା ଦଷ୍ ଦର୍‍ସ୍‍କନ୍ ।”
JOH 19:7 ଯିହୁଦୀଡ଼୍ ଅଂକିଙ୍କ୍‌ କେତ୍‍ତଡ଼୍, “ମାୟାଗ୍‌ ୱେରନ୍ ନିୟମ୍ ମିନ୍ଦେ ନୁ ଆଦ୍ ନିୟମ୍ ଲେକାମ୍ ଅଣ୍ଡ୍‌ ଡଲାନ୍‍ଦଣ୍ଡ୍ ଜିୱେଦର୍‍କିତ୍, ବାତେଙ୍କ୍ ଇତ୍‍କେ ଅଣ୍ଡ୍‌ ନିଜେତିଙ୍କ୍ ‘ଇଶ୍ୱର୍‌ତେ ମାର୍‍’ ଇଞ୍ଜ କେସ୍‍ମିନ୍ଦେଣ୍ଡ୍ ।”
JOH 19:8 ଆଗାଙ୍କ୍ ପିଲାତ ଇଦ୍ ଗଟ୍ କେଞ୍ଜି ଗାଟି ୱେର୍‍ତଣ୍ଡ୍;
JOH 19:9 ମେଣ୍ଡେ ଅଣ୍ଡ୍‌ ପ୍ରାସାଦ୍‍ତେ ଲୋପେ ଆସି ଜିସୁଙ୍କ୍ ପାଚ୍ରାମାଡ଼୍‍ତଣ୍ଡ୍, “ନିମ୍‍ ବେଗାଙ୍କ୍ ୱାତ୍‍ତିନ୍ ?” ବାତେଙ୍କ୍ ଇତ୍କେ ଜିସୁ ଅଂକିଙ୍କ୍‌ ଉତ୍ତର୍ ହିୱଣ୍ଡ୍ ।
JOH 19:10 ଆଗାଙ୍କ୍ ପିଲାତ ମେଣ୍ଡେ ଜିସୁଙ୍କ୍ କେତ୍‍ତଣ୍ଡ୍, “ନିମ୍‍ ନାକିଂଙ୍କ୍ ବାତେଙ୍କ୍ ଗଟି ତିରିୟ୍‍ୱି ? ନିକିଂଙ୍କ୍ ମୁକ୍ତି ମାଡ଼ାନଙ୍କ୍ ନାୟାଗ୍ ଅଦିକାର୍‌ ମିନ୍ଦେ ନୁ ନିକିଂଙ୍କ୍ କ୍ରୁଶତାଗ୍ ତାର୍ସ୍‍ପାନଙ୍କ୍ ମିକା ନାୟାଦ୍ ଅଦିକାର୍‌ ମିନ୍ଦେ, ଇଦ୍ ନିମ୍‍ ପୁନ୍‍ୱିନ୍ କି ?”
JOH 19:11 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, “ନା ପର୍‍ର ନିୱାଦ୍ ବେନ୍ ଅଦିକାର୍‌ ମିନ୍ଦେ, ଆଦ୍ ଅଦିକାର୍‌ ନିକିଂଙ୍କ୍ ପରମେଶ୍ୱର୍ ହିତ୍‍ତଣ୍ଡ୍ । ତ ବେନ ନାକିଂଙ୍କ୍ ନି ଗାର୍‍ରେ ତାତ୍‍ତଣ୍ଡ୍, ଅଣ୍ଡ୍‌ ଗାଟି ପାପ୍ ମାଡ଼୍‍ତଣ୍ଡ୍ ।”
JOH 19:12 ଆଗାଙ୍କ୍ ପିଲାତ ଜିସୁଙ୍କ୍ ମୁକ୍ତି ମାଡ଼ାଙ୍କ୍ ଆଲ୍‍ସି ମାତ୍‌ଣ୍ଡ୍, ବାତେଙ୍କ୍ ଇତ୍‍କେ ଯିହୁଦୀଡ଼୍ ଗାଟି ଲେଙ୍ଗ୍ ଦେ କେତ୍‍ତଡ଼୍, “ଯଦି ନିମ୍‍ ଇ ନାରୁଙ୍କ୍ ମୁକ୍ତି ମାଡ଼ିତିନ୍, ଆଲେକେ ନିମ୍‍ ସମ୍ରାଟ୍‍ତେ ସାଙ୍ଗ ଆୟିୱିନ୍; ବେନଆଇ ନିଜେତିଙ୍କ୍ ରାଜା ଇଞ୍ଜ କେତିତଣ୍ଡ୍, ଅଣ୍ଡ୍‌ କାଇସର୍‍ତେ ବିରଦ୍ଦ୍‌ତାଦ୍ ଗଟ୍ କେତିତଣ୍ଡ୍ ।”
JOH 19:13 ପିଲାତ ଇଦ୍ ସାରେ ଗଟ୍ କେଞ୍ଜି ଜିସୁଙ୍କ୍ ପେସ୍ପିତାସ୍ “କାଲ୍‍ମଣ୍ଡପ୍,” ବେଦିଙ୍କ୍ ଏବ୍ରି ଗଟ୍‍ ତେ “ଗବ୍‍ବତା,” ଇଞ୍ଜ କେତିତଡ଼୍‍, ଆଦ୍ ପଡ଼ିୟେତାଗ୍ ବିଚାର୍ ମାଡ଼ାନାଦ୍ କେତିତାଗ୍ କୁଦ୍‍ତଣ୍ଡ୍ ।
JOH 19:14 ଆଦ୍ ଦିନ୍ ନିସ୍ତାର୍ ପାଣ୍ଡୁତାଦ୍ ମିଟିଙ୍କ୍ ଦିନାମ୍ ମାତ୍‍ତା, ମେଣ୍ଡେ ଆସୁଟେ ଦିନାମ୍ ବାର ଗାଣ୍ଟା ଆସ୍‍ମାତ୍‍ତା । ପିଲାତ ଯିହୁଦୀଡ଼୍‍କ୍ କେତ୍‍ତଣ୍ଡ୍, “ଉଡ଼ାଟ୍, ମିୱଣ୍ଡ୍ ରାଜାଲ୍ !”
JOH 19:15 ଆଗାଙ୍କ୍ ଅଡ଼୍‌ ଗାଟି ଲେଙ୍ଗ୍ ଦେ କେତ୍‍ତଡ଼୍, “ଅଂକିଙ୍କ୍‌ ହାୱ୍‍କାଟ୍, ହାୱ୍‍କାଟ୍, କ୍ରୁଶତାଗ୍ ତାର୍‍ସ୍‍ପାଟ୍ ।” ପିଲାତ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ବାତେଏ ଇଚ୍ଛା ମାଡ଼ୁତିଡ଼୍ ନାନ୍ ମିଇ ରାଜାଙ୍କ୍ କ୍ରୁଶତାଗ୍ ତାର୍‍ସ୍ପି ହାୱ୍‍କିତାନ୍ ?” ମୁକ୍ୟ ଯାଜକିଡ଼୍ କେତ୍‍ତଡ଼୍, “ସମ୍ରାଟ୍‍ତେ ୱିଡ଼୍‍ସି ମାକିଂଙ୍କ୍ ମେଣ୍ଡେ ରାଜାଲ୍ ଇଲାଣ୍ଡ୍ ।”
JOH 19:16 ଆସୁଣ୍ଟ୍ ପିଲାତ ଜିସୁଙ୍କ୍ କ୍ରୁଶତାଗ୍ ତାର୍‍ପାନ୍ ସେଙ୍ଗେ ଅଡ଼୍‌ କାଇଦେ ସମର୍‍ପନ୍ ମାଡ଼୍‍ତଣ୍ଡ୍ । ଆସୁଣ୍ଟ୍ ଅଡ଼୍‌ ଜିସୁଙ୍କ୍ ହତ୍‍ତଡ଼୍ ।
JOH 19:17 ମେଣ୍ଡେ ଜିସୁ ନିଜେ କ୍ରୁଶତିଙ୍କ୍ କାଞ୍ଜି “କାପାଲସ୍ଥଲ,” ପେଦେର୍‍ତେ ପଡ଼ିୟେତାଗ୍, ବେଦିଙ୍କ୍ ଏବ୍ରି ଗଟ୍‍ ତେ “ଗଲ୍‍ଗତା,” ଇଞ୍ଜ କେତିତଡ଼୍‍, ଆଗେ ପେଇସ୍ ଆତ୍‍ତଣ୍ଡ୍ ।
JOH 19:18 ଆଗେ ଅଡ଼୍‌ ଜିସୁଙ୍କ୍ କ୍ରୁଶତାଗ୍ ତାର୍‍ସ୍ପତଡ଼୍ ନୁ ଅନ୍‌ ତଡ଼୍ ମେଣ୍ଡେ ଇର୍‍ୱୁଡ଼୍‍କ୍ ତାର୍‍ସ୍ପତଡ଼୍, ରେଣ୍ଡ୍ ପାକେ ଇର୍‍ୱୁଡ଼୍‍କ୍ ନୁ ନାଡ଼୍‍ମେ ଜିସୁଙ୍କ୍ ୱାଟ୍‍ତଡ଼୍ ।
JOH 19:19 ପିଲାତ ୱେରନ୍ ଚିଟି ଲେକି କ୍ରୁଶତେ ପର୍‍ର ୱାଟିତ୍‍ତଣ୍ଡ୍ । ଆଗେ ଲେକ୍‍ତାଦ୍ ମାତ୍‍ତା, “ନାଜରିତିୟ ଜିସୁ, ଯିହୁଦୀଡ଼୍ ରାଜାଲ୍ ।”
JOH 19:20 ଯିହୁଦୀଡ଼୍ ଲୋପେକେ ନାର୍‍ଗେ ନାରୁଡ଼୍ ଇଦ୍ ଚିଟି କାର୍‍ତଡ଼୍, ବାତେଙ୍କ୍ ଇତ୍‍କେ ବେନ୍ ପଡ଼୍‍ୟ୍‍ତାଗ୍ ଜିସୁଙ୍କ୍ କ୍ରୁଶତାଗ୍ ତାର୍‍ସ୍ପିମାତ୍‍ତଡ଼୍, ଆଦ୍ ନାର୍ ଗାର୍‍ରେ ମାତ୍‍ତା; ମେଣ୍ଡେ ଆଦ୍ ଚିଟି ଲାଟିନ୍, ଗ୍ରୀକ୍ ନୁ ଏବ୍ରି ଗଟ୍‍ ତେ ଲେକ୍‍ତାଦ୍ ଆସ୍‍ମାତ୍‍ତା ।
JOH 19:21 ଆଦିଙ୍କ୍ ଯିହୁଦୀଡ଼୍ ମୁକ୍ୟ ଯାଜକିଡ଼୍ ପୀଲାତଙ୍କ୍ କେତ୍‍ତଡ଼୍, “‘ଅଣ୍ଡ୍‌ ଯିହୁଦୀଡ଼୍ ରାଜା ଇଞ୍ଜ ଲେକାମ୍ ବେଲାନ୍ ନାନ୍ ଯିହୁଦୀଡ଼୍ ରାଜାନ୍ ଇଞ୍ଜ ଅଣ୍ଡ୍‌ କେତ୍‍ତଣ୍ଡ୍,’ ଇଲା ଲେକିମ୍ ।”
JOH 19:22 ପିଲାତ କେତ୍‍ତଣ୍ଡ୍, “ନାନ୍ ବାତ୍ ଲେକ୍‍ତାନ୍, ଆଦ୍ ଆଦ୍‍ଲେକାମ୍ ଲେକ୍‍ତାଦ୍ ମାନ୍‍ତେ ।”
JOH 19:23 ନାଲୁୱୁଡ଼୍ ସୈନିକ୍ ଜିସୁଙ୍କ୍ କ୍ରୁଶତାଗ୍ ତାର୍‍ସ୍ପ୍‌ତେ ପେର୍‍କେ ଅନ୍‌‍ୱାଦ୍ ଚକାତିଙ୍କ୍ ଅସ୍ ନାଲୁ ଦୁଡ଼ା ମାଡ଼୍‍ତଡ଼୍, ସାରେତଡ଼୍ ସୈନ୍ୟଡ଼କ୍ ସେଙ୍ଗେ ଅଣ୍ଡୟ୍‌ ଦୁଡ଼ା, ମେଣ୍ଡେ ଅଡ଼୍‌ ଜିସୁନ୍ ଉତରୀୟ ସିଲେତିଙ୍କ୍ ମିକା ଆତ୍‍ତଡ଼୍ । ଆଦ୍ ପରକନ୍‍ସ ମଦଲ୍ ହେୱୁନା ୱିଡ଼୍‍ସି ସିଲେଇତେ ଅଣ୍ଡୟ୍‌ ସିଲେ ମାତ୍‍ତା ।
JOH 19:24 ଆଦିଙ୍କ୍ ସୈନ୍ୟଡ଼୍ ତାମ୍‍ତାମ୍ ତିରିୟ୍‍ତଡ଼୍, “ଇଦିଙ୍କ୍ ହିକ୍‍ମାଟ୍, ବାତେଙ୍କ୍ ଇତ୍‍କେ ଇଦ୍ ବେନନାଦ୍ ଆଦ୍‍ତେ ଆଦିନ୍ ସେଙ୍ଗେ ଗୁଲିବାଣ୍ଟ ମାଡ଼ିକାଡ଼୍,” ଦର୍ମଶାସ୍ତ୍ରତାଗ୍ ଇଦ୍ ଗଟ୍ ସତ୍ ଆଦ୍‍ତେ, “ଅଡ଼୍‌ ତାମ୍‍ତାମ୍ ଲୋପେ ନାୟାଦ୍ ଚକାତିଙ୍କ୍ ତୁହୁସ୍‍ତଡ଼୍, ମେଣ୍ଡେ ନାୟାଦ୍ ଉତରୀୟ ସିଲେତ୍ ସେଙ୍ଗେ ଗୁଲିବାଣ୍ଟ ମାଡ଼୍‍ତଡ଼୍ ।” ଇଦିନ୍ ସେଙ୍ଗେ ସୈନ୍ୟଡ଼୍ ଇଲା ମାଡ଼୍‍ତଡ଼୍ ।
JOH 19:25 ବାତେଙ୍କ୍ ଇତ୍‍କେ ଜିସୁନ୍ କ୍ରୁଶତେ ଗାର୍‍ରେ ତାମ୍ ୟାୟ୍‍, ତାମ୍ ୟାୟାନ୍ ଏଲାଡ଼୍‍, କ୍ଲପାନ୍ ମୁତ୍‍ତେ ମରୀୟମ୍ ନୁ ମଗ୍‍ଦଲୀନି ମରୀୟମ୍ ନିସ୍ ମାତ୍‍ତା ।
JOH 19:26 ଜିସୁ ତାମ୍ ୟାୟ୍‍ ନୁ ବେନ୍ ଶିଷ୍ୟଙ୍କ୍ ପ୍ରେମ ମାଡ଼ମାତ୍‍ତଣ୍ଡ୍, ଅଡ଼୍‌‍କିଂଙ୍କ୍ ଗାର୍‍ରେ ନିସ୍ ମାନ୍ଦାନାଦ୍ ଉଡ଼ି ୟାୟାଙ୍କ୍ କେତ୍‍ତଣ୍ଡ୍, “ଉଡ଼େ, ନି ମାର୍‍ରିଙ୍କ୍ !”
JOH 19:27 ତାନ୍‍ପେର୍କେ ଆ ଶିଷ୍ୟଙ୍କ୍ କେତ୍‍ତଣ୍ଡ୍, “ଉଡ଼େ, ମିଇ ୟାୟାଙ୍କ୍ !” ଆ ଶିଷ୍ୟ ଆସୁଣ୍ଟ୍ ଜିସୁନ୍ ୟାୟାଙ୍କ୍ ତାମ୍ ଲୋନ୍‌ ଅତ୍‌ତଣ୍ଡ୍ ।
JOH 19:28 ଇଞ୍ଜେ ସାରେ ବିଷୟ୍ ଶେଷ୍ ଆଦ୍‍ତେ, ଜିସୁ ଇଦ୍ ପୁତ୍‍ତଣ୍ଡ୍ । ଦର୍ମଶାସ୍ତ୍ରତାଦ୍ ବାକ୍ୟ ସତ୍ ଆତ୍‍ତାଙ୍କ୍ ଅଣ୍ଡ୍‌ କେତ୍‍ତଣ୍ଡ୍, “ନାକିଂଙ୍କ୍ ଉନ୍ଦେୱାତୁତ୍ ।”
JOH 19:29 ଆଗେ ଗିନେତାଗ୍ ବର୍ତ୍ତି ପୁଲ୍‍ସ୍‍ତାଦ୍ ରସ୍ ମାତ୍‍ତା । ଅଡ଼୍‌‍ ସପ୍‍ଆଞ୍ଜ୍ ପସ୍କେତିଙ୍କ୍ ରସ୍‍ତାଗ୍ ମୁହୁସ୍ ଏଜୋପ ଟିକ୍‍କାତାଗ୍ ୱାଟି ଜିସୁନ୍ ପାୟୁର୍ ବକେତ୍ ଆତ୍‍ତଡ଼୍ ।
JOH 19:30 ଜିସୁ ଆଦିଙ୍କ୍ ଉଞ୍ଜ୍ କେତ୍‍ତଣ୍ଡ୍, “ଶେଷ୍ ଆଦ୍‍ତେ ।” ତାନ୍‍ପେର୍କେ ଅଣ୍ଡ୍‌ ତାଲେତିଙ୍କ୍ ମଦଲ୍ ମାଡ଼ି ଡଲ୍‍ତଣ୍ଡ୍ ।
JOH 19:31 ଆଦ୍ ଦିନ୍ ନିସ୍ତାର୍ ପାଣ୍ଡୁତେ ତିଆର୍ ଦିନାମ୍ ମାତ୍‍ତା । ଅନାଦ୍‌ ମେନ୍ଦୁଲ୍ ବେଲା କ୍ରୁଶତାଗ୍ ମାନ୍‍ନ, ତାନ୍ ମେଣ୍ଡେଅନ୍‌ ଦିନ୍ ବିଶ୍ରାମବାରତାଦ୍ ବେଡ଼େୟାଦ୍ ଦିନାମ୍ ମାତ୍‍ତା । ଆଦିନ୍ ସେଙ୍ଗେ ବିଶ୍ରାମ୍‍ଦିନେତାଗ୍ କ୍ରୁଶତାଗ୍ ପର୍‍ର ମାନ୍ଦାନାୱ୍ ମେନ୍ଦୁଲ୍‍କିନ୍ ଡେକା ଉହୁସ୍ ନୁ ଅଡ଼୍‌‍କିଂଙ୍କ୍ ମେଣ୍ଡେଅନ୍‌ ପଡ଼ିୟେତାଗ୍ ଆଦାନଙ୍କ୍ ଯିହୁଦୀଡ଼୍ ପୀଲାତଙ୍କ୍ ଅନୁରଦ୍‌ ମାଡ଼୍‍ତଡ଼୍ ।
JOH 19:32 ତାନ୍‍ପେର୍କେ ସୈନିକିଡ଼୍ ୱାସ୍ ପ୍ରତମ୍ ଅର୍‍ତୁନାଦ୍ ଡେକେ ନୁ ଅନ୍‌ ତଡ଼୍ ମେଣ୍ଡେ ୱେରଣ୍ଡ୍ କ୍ରୁଶତାଗ୍ ତାର୍‍ସ୍ପି ମାତ୍‍ତଡ଼୍, ଅନାଦ୍‌ ଡେକେ ଉହୁତ୍‍ତଡ଼୍ ।
JOH 19:33 ମାତର୍ ଅଡ଼୍‌ ଜିସୁନ୍ ଗାର୍‍ରେ ୱାସ୍ ଅଣ୍ଡ୍‌ ଡଲ୍‍ତଣ୍ଡ୍ ଇଞ୍ଜ ଉଡ଼ି ଅନାଦ୍‌ ଡେକେତିଙ୍କ୍ ଉହୁୱଡ଼୍ ।
JOH 19:34 ବାତେଙ୍କ୍ ଇତ୍‍କେ ସୈନିକିଡ଼୍ ଲୋପେକେ ୱେରଣ୍ଡ୍ ଜିସୁନ୍ ଗୁଣ୍ଡେତାଗ୍ ବର୍ଚ୍ଛାତଡ଼୍ କଟ୍‍ତଣ୍ଡ୍, ମେଣ୍ଡେ ସାଙ୍ଗେ ସାଙ୍ଗେ ନେତୁର୍ ନୁ ଏର୍‍ ପେଇତା ।
JOH 19:35 ବେନ ଉଡ଼୍‍ତଣ୍ଡ୍ ଅଣ୍ଡ୍‌ ସାକ୍ଷ୍ୟ ହିତ୍‍ତଣ୍ଡ୍, ବେଲାକି ମିଡ଼୍ ଆନ୍‌‍ତେ ବିଶ୍ଵାସ୍ ମାଡ଼ାଟ୍; ମେଣ୍ଡେ ଅନାଦ୍‌ ଗଟ୍ ନିଜାମ୍, ଅଣ୍ଡ୍‌ ନିଜାମ୍ କେତୁତଣ୍ଡ୍ ଇଦ୍ ଅଣ୍ଡ୍‌ ପୁତ୍‍ତଣ୍ଡ୍ ।
JOH 19:36 ଦର୍ମଶାସ୍ତ୍ରତାଗ୍ ହିଦ୍ ଗଟ୍ ସତ୍ ଆଦାନ୍ ସେଙ୍ଗେ ଇଦ୍ ସାରେ ଗଟେମ୍ଆତ୍‍ତା, “ଅନାଦ୍‌ ୱେରନ୍ ମିକା ବୁଲା ଉହୁତାନାଦ୍ ଆୟ୍‍ୟ ।”
JOH 19:37 ଦର୍ମଶାସ୍ତ୍ରତାଗ୍ ମେଣ୍ଡେ ଅଣ୍ଡ୍‌ ବାକ୍ୟ ଲେକ୍‍ତାଦ୍ ମିନ୍ଦେ, “ଅଡ଼୍‌ ବେନଙ୍କ୍ ବର୍ଚ୍ଛାତଡ଼୍ କଟ୍‍ତଣ୍ଡ୍, ଅନ୍‌ପରୁ କଣ୍ଡେ ୱାଟାନାଦ୍‌ ।”
JOH 19:38 ତାନ୍‍ପେର୍କେ ଆରମାତିଆତଣ୍ଡ୍ ଜଷେପ୍‍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଡ଼୍ ପୀଲାତଙ୍କ୍ ଜିସୁନ୍ ମେନ୍ଦୁଲ୍ ତାଲ୍‍କ୍‍ତଣ୍ଡ୍ । ଜଷେପ୍‍ ଜିସୁନ୍ ୱେରନ୍ ଶିଷ୍ୟ ମାତ୍‍ତଣ୍ଡ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ନାରୁଡ଼୍‍କ୍ ଜିସୁନ୍ ଶିଷ୍ୟ ଇଞ୍ଜ କେଲଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଯିହୁଦି ନେତାନଡ଼୍‍କ୍ ୱେର୍‍ସ୍ ମାତ୍‍ତଣ୍ଡ୍ । ପିଲାତ ଜଷେପ୍‍ତିଙ୍କ୍ ଜିସୁନ୍ ମେନ୍ଦୁଲ୍ ଆଦାନ୍ ସେଙ୍ଗେ ଗଟ୍ ହିତ୍‍ତଣ୍ଡ୍ । ଆଦିଙ୍କ୍ ଜଷେପ୍‍ ୱାସ୍ ଜିସୁନ୍ ମେନ୍ଦୁଲ୍‍ତିଙ୍କ୍ ହତ୍‍ତଣ୍ଡ୍ ।
JOH 19:39 ନିକଦୀମ ମିକା ଜଷେପ୍‍ତଡ଼୍ ଆତ୍‍ତଣ୍ଡ୍ । ଅଣ୍ଡ୍‌ ମୁନେନ୍ ଜିସୁଙ୍କ୍ ଉଡାଙ୍କ୍ ନାର୍‍କେତ୍ ୱାସ୍ ମାତ୍‍ତଣ୍ଡ୍ ନୁ ଅନ୍‌ ତଡ଼୍ ତିରିଇ ମାତ୍‍ତଣ୍ଡ୍ । ଅଣ୍ଡ୍‌ ଜିସୁନ୍ ମେନ୍ଦୁଲ୍‍ତାଗ୍ ଅକାନ୍ ସେଙ୍ଗେ ତିରିଶ୍ କେଜି ସାଏତ୍ ଗାବ୍ କାଇଲ୍‍ତାଦ୍ ଅଗୁର୍ ତାତ୍‍ତଣ୍ଡ୍ ।
JOH 19:40 ଯିହୁଦୀଡ଼୍ ସମାଦି ଇଦାନ୍ ନିୟମ୍ ଲେକାମ୍ ଅଡ଼୍‌ ଇର୍‍ୱୁଡ଼୍ ଜିସୁନ୍ ମୋଡ଼୍‍ତିଙ୍କ୍ ସାଏତ୍ ଗାବ୍‍ତାଦ୍ ଜିନିଷ୍‍ତଡ଼୍ ପାଲ୍‍ସା ସିଲେତ୍ ମୁସିତ୍‍ତଡ଼୍ ।
JOH 19:41 ଜିସୁଙ୍କ୍ ବେଗେ କ୍ରୁଶବିଦ୍ଦ ମାଡ଼ିମାତ୍‍ତଡ଼୍, ଆଦ୍ ପଡ଼ିୟେତ୍ ଗାର୍‍ରେ ୱେରନ୍ ବଗିଚା ମାତ୍‍ତା । ଆଦ୍ ବଗିଚାତାଗ୍ ୱେରନ୍ ପୁନାଦ୍ କବର୍ ମାତ୍‍ତା, ଆଗେ ମୁନେନ୍ ବେନଙ୍କେ ମିକା ସମାଦି ହିୱକଟ୍ ମାତ୍‍ତଡ଼୍ ।
JOH 19:42 ମେଣ୍ଡେ ଯିହୁଦୀଡ଼ାଦ୍‍ ଆୟୋଜନ ଦିନ୍‍ତେ, ଅଡ଼୍‌ ଜିସୁଙ୍କ୍ ଆଦ୍ ପଡ଼ିୟେତାଗ୍ ସମାଦି ଇତ୍‍ତଡ଼୍, ବାତେଙ୍କ୍ ଇତ୍‍କେ ଆଦ୍ ସମାଦି ଗାର୍‍ରେ ମାତ୍‍ତା ।
JOH 20:1 ସାପ୍ତାତେ ପ୍ରତମ୍ ଦିନ୍ ନାର୍‍କା ଇକାଡ଼୍ ମାନ୍ଦାନ୍ ୱେଲେ ମଗ୍‍ଦଲୀନି ମରୀୟମ୍ ଜିସୁନ୍ ସମାଦି ଗାର୍‍ରେ ୱାସ୍ ଆଗେ କାଲ୍‍ଦିଙ୍କ୍ ଟେଣ୍ଡିମାନ୍ଦାନାଦ୍ ଉଡ଼୍‍ତେ ।
JOH 20:2 ଆଦିଙ୍କ୍ ଆଦ୍ ମିରିଆଞ୍ଜ୍ ଶିମୋନ୍ ପିତର୍ ନୁ ଜିସୁ ବେନଙ୍କ୍ ଗାଟି ପ୍ରେମ ମାଡ଼ମାତ୍‍ତଣ୍ଡ୍, ଆ ଶିଷ୍ୟନ୍ ଗାର୍‍ରେ ୱାତ୍‍ତା ନୁ ଅଂକିଙ୍କ୍‌ କେତ୍‍ତା, “ଅଡ଼୍‌ ସମାଦି କନ୍‍ସ୍ ପ୍ରବୁଙ୍କ୍ ଆତ୍‍ତଡ଼୍, ମେଣ୍ଡେ ଅଂକିଙ୍କ୍‌ ବେଗେ ୱାଟ୍‍ତଡ଼୍ ମାମ୍‍ମେ ପୁନମ୍ ।”
JOH 20:3 ଆଗାଙ୍କ୍ ପିତର୍ ନୁ ବାଗାତ୍ ଶିଷ୍ୟ ସମାଦିତା ଆଦାନଙ୍କ୍ ପେଇତ୍‍ତଡ଼୍ ।
JOH 20:4 ଅଡ଼୍‌ ଇର୍‍ୱୁଡ଼୍ ଅଣ୍ଡୟ୍‌‍ତଡ଼୍ ମିରାନଙ୍କ୍ ପସ୍‍ପ୍‍ତ୍‍ତଡ଼୍, ମେଣ୍ଡେ ଅଣ୍ଡ୍‌ ବାଗାତ୍ ଶିଷ୍ୟ ପିତର୍‍ତିଙ୍କ୍ ପେର୍‍କେ ୱାଟି ମୁନେନ୍ ସମାଦିତ୍ ଗାର୍‍ରେ ହେୱୁତ୍‍ତଣ୍ଡ୍,
JOH 20:5 ଅଣ୍ଡ୍‌ ହାଡ଼୍‍କିମିକା ଲୋପେ ଉଡ଼୍‍ତଣ୍ଡ୍ ବେନ୍ ସରୁ ସିଲେସାରେ ଜିସୁନ୍ ମେନ୍ଦୁଲ୍‍ତିଙ୍କ୍ ମୁସିସ୍ ମାତ୍‍ତଡ଼୍ ଆଦ୍ ରାୟିମାତ୍‍ତା, ମିକା ଅଣ୍ଡ୍‌ ଲୋପେ ହସଣ୍ଡ୍ ।
JOH 20:6 ଆସୁଟେ ଶିମୋନ୍ ପିତର୍ ମିକା ଅନ୍‌ ପେର୍‍କେ ପେର୍‍କେ ୱାସ୍ ହେୱୁତ୍‍ତଣ୍ଡ୍ ନୁ ସମାଦି ଲୋପେ ହସି ଉଡ଼୍‍ତଣ୍ଡ୍ ଯେ, ସରୁ ସିଲେ ରାୟିମିନ୍ଦେ,
JOH 20:7 ଜିସୁନ୍ ତାଲେତାଗ୍ ବେନ୍ ତୁୱାଲ୍ ତଅସ୍ ମାତ୍‍ତଡ଼୍, ଆଦ୍ ସରୁ ସିଲେତଡ଼୍ ମାନକଟ୍ ମେଣ୍ଡେଅନ୍‌ ପଡ଼ିୟେତାଗ୍ ଉତ୍‍ତି ମାତ୍‍ତା ।
JOH 20:8 ଆସୁଣ୍ଟ୍ ବେନ ବାଗାତ୍ ଶିଷ୍ୟ ଆଗେ ବେନ ସମାଦି ଗାର୍‍ରେ ୱାସ୍ ମୁନେନ୍ ହେଉସ୍ ମାତ୍‍ତଣ୍ଡ୍, ଅଣ୍ଡ୍‌ ମିକା ଲୋପେ ହସି ଉଡ଼୍‍ତଣ୍ଡ୍ ନୁ ବିଶ୍ଵାସ୍ ମାଡ଼୍‍ତଣ୍ଡ୍;
JOH 20:9 ଦର୍ମଶାସ୍ତ୍ର ଲେକାମ୍, “ଜିସୁ ଡଲ୍‍ନାଦ୍ କନ୍‍ସ୍ ମେଣ୍ଡଅନ୍‌‍ଦାମ୍ ତେଦିତଣ୍ଡ୍,” ଇଦିନାଦ୍ ଇତ୍‍କେ ଆଦ୍ ଶିଷ୍ୟଡ଼୍ ଆସୁଙ୍କ୍ ହେୱୁନା ପୁନ୍‍ୱକଟ୍ ମାତ୍‍ତଡ଼୍ ।
JOH 20:10 ତାନ୍‍ପେର୍କେ ଶିଷ୍ୟଡ଼୍ ମେଣ୍ଡଅନ୍‌‍ଦାମ୍ ତାମ୍ ଲୋକ୍ ଆଦ୍‍ତଡ଼୍ ।
JOH 20:11 ବାତେଙ୍କ୍ ଇତ୍‍କେ ମରୀୟମ୍ କେୟକେୟ ସମାଦି ବାଇଦେ ନିସ୍‍ମାତ୍‍ତା; ମେଣ୍ଡେ ଆଦ୍ କେୟକେୟ ଅଡ଼୍‌‍କିଂଙ୍କ୍ ସମାଦି ଲୋପେ ଉଡ଼୍‍ତା,
JOH 20:12 ଜିସୁନ୍ ମେନ୍ଦୁଲ୍‍ତିଙ୍କ୍ ବେନ୍ ପଡ଼ିୟେତାଗ୍ ୱାଟିମାତ୍‍ତଡ଼୍‍, ଆଗେ ତାଲେତ୍ ପାକ୍ ୱେରଣ୍ଡ୍ ନୁ ଡେକେତ୍ ପାକ୍ ୱେରଣ୍ଡ୍, ପାଣ୍ଡେ ସିଲେ କେର୍‍ସ୍ ଇର୍‍ୱୁଡ଼୍ ଦୂତ କୁଦିମାନ୍ଦାନାଦ୍ ଉଡ଼୍‍ତା ।
JOH 20:13 ଆଦ୍ ଦୂତଡ଼୍ ଆଦିଙ୍କ୍ କେତ୍‍ତା, “ହଁ ୟାୟ୍‍, ବାତେଙ୍କ୍ କେୟୁତିନ୍ ?” ଆଦ୍ ନାଟାଡ଼୍ କେତ୍‍ତେ, “ବେନଡ଼୍ ନା ପ୍ରବୁଙ୍କ୍ ହତ୍‍ତଡ଼୍, ମେଣ୍ଡେ ଅଂକିଙ୍କ୍‌ ବେନ୍ ପଡ଼ିୟେତାଗ୍ ୱାଟ୍‍ତଡ଼୍, ଆଦ୍ ନାନ୍ ପୁନନ୍ ।”
JOH 20:14 ଆଦ୍ ଇଲା କେସ୍ ପେର୍‍କେ ତିଡ଼ିଇପାକା ଜିସୁଙ୍କ୍ ନିସ୍ ମାନ୍ଦାନାଦ୍ ଉଡ଼୍‍ତା, ବାତେଙ୍କ୍ ଇତ୍‍କେ ଅଣ୍ଡ୍‌ ଜିସୁ ଇଞ୍ଜ ଆଦ୍ ପୁନ୍ଦାଙ୍କ୍ ପାର୍‍ୱ ।
JOH 20:15 ଜିସୁ ଆଦିଙ୍କ୍ କେତ୍‍ତଣ୍ଡ୍, “ହଁ ୟାୟ୍‍, ବାତେଙ୍କ୍ କେୟୁତିନ୍ ? ବେନଙ୍କ୍ ମେହେକୁତିନ୍ ?” ଆଦ୍ ଅଂକିଙ୍କ୍‌ ବଗିଚାତଣ୍ଡ୍ ଗତିଆଲ୍ ଇଞ୍ଜ ହେର୍କା ମାଡ଼ି କେତ୍‍ତା, “ଗଟ୍ ନିମ୍‍ ଯଦି ଜିସୁଙ୍କ୍ ହତ୍‍ତି, ଆଲେକେ ଅଂକିଙ୍କ୍‌ ବେଗେ ୱାଟ୍‍ତି ନାକିଂଙ୍କ୍ କେଲ୍‍ମ୍, ନାନ୍ ଅଂକିଙ୍କ୍‌ ଆଦ୍‍ତାନ୍ ।”
JOH 20:16 ଜିସୁ ଆଦିଙ୍କ୍ କେତ୍‍ତଣ୍ଡ୍, “ମରୀୟମ୍ !” ଆଦ୍ ତିଡ଼ିଇମିକା ଏବ୍ରି ଗଟ୍‍ତେ ଅଂକିଙ୍କ୍‌ କେତ୍‍ତା, “ରାବ୍‍ବୂନୀ,” ଇତ୍‍କେ, “ହଁ ଗୁର ।”
JOH 20:17 ଜିସୁ ଆଦିଙ୍କ୍ କେତ୍‍ତଣ୍ଡ୍, “ନାକିଂଙ୍କ୍ ପଇସ୍ ନେହେମା, ବାତେଙ୍କ୍ ଇତ୍‍କେ ନାନ୍ ଇଞ୍ଜେକ୍ ଅନ୍‌‍ପାକେ ବାବାନାଗ୍ ଆନନେ; ନା ତାମୁଣ୍ଡ୍‌କିଡ଼୍ କେଲ୍‍ଲା, ନାନ୍ ନା ବାବାଲ୍ ନୁ ଅଡ଼୍‌ ବାବାଲ୍, ନା ଇଶ୍ୱର୍ ନୁ ଅଡ଼୍‌ ଇଶ୍ୱର୍‌ତେ ଗାର୍‍ରେ ଆଦୁତାନ୍ ।”
JOH 20:18 ମଗ୍‍ଦଲୀନି ମରୀୟମ୍ ଆଞ୍ଜ୍, ନାନ୍ ପ୍ରବୁଙ୍କ୍ ଉଡ଼୍‍ତାନ୍, ମେଣ୍ଡେ ଅଣ୍ଡ୍‌ ନାକିଂଙ୍କ୍ ଇୱୁସାରେ କେତ୍‍ତଣ୍ଡ୍ ଇଞ୍ଜ ଶିଷ୍ୟଡ଼କ୍ କବର୍ ଇତ୍‍ତା ।
JOH 20:19 ଆଦ୍ ଦିନ୍ ଇତ୍‍କେ ସାପ୍ତାହତେ ପ୍ରତମ୍ ଦିନ୍ ମୁଲ୍‍ପୁଟ୍ ଶିଷ୍ୟଡ଼୍ ବେନ୍ ଲୋନ୍‌ ମାତ୍‍ତଡ଼୍, ଆଦ୍ ଲୋତ୍‍ତା କାପାଟ୍ ସାରେ ଯିହୁଦୀଡ଼୍ ୱେରେତେ ସେଙ୍ଗେ ବନ୍ଦ୍ ମାତ୍‍ତା, ଆସୁଟେ ଜିସୁ ୱାସ୍ ନାଡ଼୍‍ମେ ନିସ୍ କେତ୍‍ତଣ୍ଡ୍, “ମିୟାଦ୍ ଶାନ୍ତି ଆୟି ।”
JOH 20:20 ଇଦ୍ କେସ୍ ଜିସୁ ଶିଷ୍ୟଡ଼କ୍ ତାନ୍ କାଇକ୍ ନୁ ଗୁଣ୍ଡେତିଙ୍କ୍ ତଅତ୍‍ତଣ୍ଡ୍ । ଆଗାଙ୍କ୍ ଶିଷ୍ୟଡ଼୍ ପ୍ରବୁଙ୍କ୍ ଉଡ଼ି ୱେଡ଼୍‍କ୍ ଆଦ୍‍ତଡ଼୍ ।
JOH 20:21 ଜିସୁ ଅଡ଼୍‌‍କିଂଙ୍କ୍ ମେଣ୍ଡେ ଅନ୍‌‍ଦାମ୍ କେତ୍‍ତଣ୍ଡ୍, “ମିୟାଦ୍ ଶାନ୍ତି ଆୟି; ବାବାଲ୍ ନିକିଂଙ୍କ୍ ବେଦ୍ ରକମ୍ ରହତଣ୍ଡ୍, ଆଦେ ପୁଟୁଙ୍କ୍ ନାନ୍ ମିକା ମିକିଂଙ୍କ୍ ରହତୁତାନ୍ ।”
JOH 20:22 ଜିସୁ ଇଲା କେସ୍ ଅଡ଼୍‌ ପର୍‍ର ନେହେସ୍‍କି କେତ୍‍ତଣ୍ଡ୍, “ପବିତ୍ର ଆତ୍ମାତିଙ୍କ୍ ଗ୍ରହନ୍ ମାଡ଼ାଟ୍ ।
JOH 20:23 ମିଡ଼୍ ଯଦି ବେନନାଦ୍ ପାପ୍ କ୍ଷମା ମାଡ଼ିତିଡ଼୍, ଅନାଦ୍‌ ପାପ୍ କ୍ଷମା ଆଦ୍‍ତେ; ମେଣ୍ଡେ ବେନନାଦ୍ ପାପ୍ କ୍ଷମା ମାଡ଼କ୍, ଅନାଦ୍‌ ପାପ୍ କ୍ଷମା ଆୟ୍‍ୟ ।”
JOH 20:24 ଜିସୁ ବେସୁଟ୍‌ ୱାସ୍ ମାତ୍‍ତଣ୍ଡ୍, ଆସୁଟେ ବାରଜାନ୍ ଶିଷ୍ୟଡ଼୍ ଲୋପେ ତୋମା ପେଦେର୍‍ତଣ୍ଡ୍ ବେନଙ୍କ୍ “ଦିଦୁମ୍,” ଇଞ୍ଜ କେତିତଡ଼୍‍, ଅଣ୍ଡ୍‌ ଅଡ଼୍‌‍ତଡ଼୍ ହିଲ୍‍ୱାମାତ୍‍ତଣ୍ଡ୍ ।
JOH 20:25 ବାଗାତ୍ ଶିଷ୍ୟଡ଼୍ ଅଂକିଙ୍କ୍‌ କେତ୍‍ତଡ଼୍, “ମାମ୍‍ମେ ପ୍ରବୁଙ୍କ୍ ଉଡ଼୍‍ତମ୍ ।” ବାତେଙ୍କ୍ ଇତ୍‍କେ ତୋମା ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଅନାଦ୍‌ କାଇକିନାଗ୍ କୋୟେତ୍ ଚିହିହ୍ନେ ଉଡ଼କ୍ ନୁ ଆଗେ ନା ୱାଡ଼ଞ୍ଜ୍ ହିଟ୍‍ହକ୍ ନୁ ଅନାଦ୍‌ ଗୁଣ୍ଡେତାଗ୍ ନା କାୟ୍ ହିଟ୍‍ହକ୍ ନାନ୍ ବେସୁଟେ ବିଶ୍ୱାସ୍ ମାଡ଼ନ୍ ।”
JOH 20:26 ଆଟ୍‍ ଦିନାତ୍ ପେର୍‍କେ ତାନ୍ ଶିଷ୍ୟଡ଼୍ ମେଣ୍ଡଅନ୍‌‍ଦାମ୍ ଲୋପେ ମାତ୍‍ତଡ଼୍ ନୁ ତୋମାଲ୍‌ ଅଡ଼୍‌‍ତଡ଼୍ ମାତ୍‍ତଣ୍ଡ୍ । ହାର୍ ବନ୍ଦ୍ ମାତ୍‍ତା ୱେଲେ ଜିସୁ ୱାସ୍ ନାଡ଼୍‍ମେ ନିସ୍ କେତ୍‍ତଣ୍ଡ୍, “ମିୟାଦ୍ ଶାନ୍ତି ଆୟି ।”
JOH 20:27 ପେର୍‍କେ ଜିସୁ ତୋମାଙ୍କ୍ କେତ୍‍ତଣ୍ଡ୍, “ଇଗେ ୱାଡ଼୍‍ଞ୍ଜ୍ ତାସ୍ ନା କାଇକିଂଙ୍କ୍ ଉଡ଼େ ନୁ କାୟ୍ ହାହାସ୍ ନା ଗୁଣ୍ଡେତାଗ୍ ହିଟ୍‍ତା; ଅବିଶ୍ୱାସୀ ଆୟିୱେକନ୍‍ସ୍ ବିଶ୍ୱାସୀ ଆୟିମ୍ ।”
JOH 20:28 ତୋମା ଜିସୁଙ୍କ୍ କେତ୍‍ତଣ୍ଡ୍, “ନା ପ୍ରବୁ ନା ଇଶ୍ୱର୍ !”
JOH 20:29 ଜିସୁ ତୋମାଙ୍କ୍ କେତ୍‍ତଣ୍ଡ୍, “ନିମ୍‍ ନାକିଂଙ୍କ୍ ଉଡ଼୍‍ତାଙ୍କ୍ ବିଶ୍ୱାସ୍ ମାଡ଼୍‍ତି, ବେନଡ଼୍ ଉଡ଼୍‍ୱାକନ୍‍ସ୍ ବିଶ୍ୱାସ୍ ମାଡ଼ିମିନ୍ଦେଡ଼୍, ଅଡ଼୍‌ ଦନ୍ୟ !”
JOH 20:30 ଜିସୁ ଶିଷ୍ୟଡ଼କ୍ ଉପସ୍ଥିତ୍‍ତେ ନାର୍‍ଗେ ବାକ୍‍ୱା ପାଡ଼୍‍ୟି ମାଡ଼୍‍ତଣ୍ଡ୍, ଆୱୁସାରେ ଇଦ୍ ବଇତାଗ୍ ଲେକ୍‍ତାଦ୍ ଇଲେ;
JOH 20:31 ବାତେଙ୍କ୍ ଇତ୍‍କେ ମିଡ଼୍ ବିଶ୍ୱାସ୍ ମାଡ଼ିତିଡ଼୍ ଯେ, ଜିସୁ ଆଦୁତନ୍ ଇଶ୍ୱର୍‌ତେ ମାର୍‍ ମସିହ, ମେଣ୍ଡେ ଅନାଗ୍ ବିଶ୍ୱାସ୍ ମାଡ଼ି ମିଡ଼୍ ବେଲା ଜିୱୁଣ୍ଡ୍ ଦର୍‍କିତ୍, ଇଦିନ୍ ସେଙ୍ଗେ ଇୱୁସାରେ ଲେକ୍‍ତାଦ୍ ଆସ୍‍ମିନ୍ଦେ ।
JOH 21:1 ପେର୍‍କେ ଜିସୁ ତିବିରୀୟା ସମୁଦ୍ର ଆଞ୍ଚିନାଗ୍ ଶିଷ୍ୟଡ଼୍‍କ୍ ମେଣ୍ଡଅନ୍‌‍ଦାମ୍ ଦର୍ଶନ୍ ହିତ୍‍ତଣ୍ଡ୍ । ଅଣ୍ଡ୍‌ ଇଦ୍ ରକମ୍ ଦର୍ଶନ୍ ହିତ୍‍ତଣ୍ଡ୍;
JOH 21:2 ଶିମୋନ୍ ପିତର୍, ତୋମା, ବେନଙ୍କ୍ ଦିଦୁମ୍ କେତିତଡ଼୍‍, ଗାଲିଲୀତେ କାନାନଡ଼୍‍ ନିତନିୟେଲ୍, ଜେବଦିତେ ମାର୍‍କିଡ଼୍ ନୁ ତାନ୍ ଶିଷ୍ୟଡ଼୍ ଲୋପେକେ ମେଣ୍ଡେ ଇର୍‍ୱୁଡ଼୍ ଅଣ୍ଡୟାଗେ ମାତ୍‍ତଡ଼୍ ।
JOH 21:3 ଶିମୋନ୍ ପିତର୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ କିକେ ପଇଦାନଙ୍କ୍ ଆଦୁତାନ୍ ।” ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ମାମ୍‍ମେ ମିକା ନି ତଡ଼୍ ଆଦ୍‍ତମ୍ ।” ଅଡ଼୍‌ ପେଇସ୍ ଆଞ୍ଜ୍ ଓଡାତାଗ୍ ତାର୍‍ତଡ଼୍, ମେଣ୍ଡେ ଅଡ଼୍‌‍କିଂଙ୍କ୍ ଆଦ୍ ନାର୍‍କା ୱାଲା ୱାଟ୍‍ତଡ଼୍ ବାତେଙ୍କ୍ ଇତ୍‍କେ ବାତେମିକା ଦର୍‍କ ।
JOH 21:4 ବାତେଙ୍କ୍ ଇତ୍‍କେ ୱିଇଦାନ୍ ୱେଲେ ଜିସୁ ଆଞ୍ଚିନାଗ୍ ନିତ୍‍ତଣ୍ଡ୍; ମିକା ଅଣ୍ଡ୍‌ ଜିସୁ ହିଞ୍ଜ ଶିଷ୍ୟଡ଼୍ ପୁନଡ଼୍ ।
JOH 21:5 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ପିଲାନଡ଼ି ମିୟାଗେ ବାତେଏ ତିନ୍ଦାନାଦ୍ ମିନ୍ଦେ ?” ଅଡ଼୍‌ ଅଂକିଙ୍କ୍‌ ଉତ୍ତର୍ ହିତ୍‍ତଡ଼୍, “ଇଲେ ।”
JOH 21:6 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଓଡେତ୍ ତିନ୍ଦେକାଇଦା ପାକ୍ ୱାଲା ୱାଟାଟ୍‌ ତ, ଆସୁଟେ ମିକିଂଙ୍କ୍ ଦର୍‍କିତା ।” ଆଗାଙ୍କ୍ ଅଡ଼୍‌ ୱାଲା ୱାଟ୍‍ତଡ଼୍, ମେଣ୍ଡେ ଗାଟି କିକେ ୱାଲାତାଗ୍ ହାର୍‍ତା ଅଡ଼୍‌‍ ୱାଲେତିଙ୍କ୍ ପିଡ଼ିଙ୍ଗାଙ୍କ୍ ପାର୍‍ୱଡ଼୍ ।
JOH 21:7 ଜିସୁ ବେନ୍ ଶିଷ୍ୟଙ୍କ୍ ପ୍ରେମ ମାଡ଼ମାତ୍‍ତଣ୍ଡ୍, ଅଣ୍ଡ୍‌ ପିତର୍‍ତିଙ୍କ୍ କେତ୍‍ତଣ୍ଡ୍, “ଇଣ୍ଡ୍ ତ ପ୍ରବୁ ।” ଶିମୋନ୍ ପିତର୍ ଇଣ୍ଡ୍ ତ ପ୍ରବୁ ଇଞ୍ଜ କେତାନାଦ୍ କେଞ୍ଜି ତାନ୍ ଚକା କେର୍‍ସ୍ ସମୁଦ୍ରତାଗ୍ ତୁଲ୍‍ତଣ୍ଡ୍;
JOH 21:8 ବାତେଙ୍କ୍ ଇତ୍‍କେ ବାଗାତ୍ ଶିଷ୍ୟଡ଼୍ କିକେ ମାନ୍ଦାନ୍ ୱାଲେତିଙ୍କ୍ ପିଡ଼ିଙ୍ଗି ସୁଦୁର୍ ଓଡାତାଗ୍ ୱାତ୍‍ତଡ଼୍, ବାତେଙ୍କ୍ ଇତ୍‍କେ ଅଡ଼୍‌ କୂଳତ୍‍ ଗାର୍‍ରେ ଦୁଇଶହ କାୟ୍ ଜେକେ ମାତ୍‍ତଡ଼୍ ।
JOH 21:9 ଅଡ଼୍‌ ଆଞ୍ଚିନାଗ୍‌ ଡିଗି ଆଗେ ଇର୍କିନାଗ୍ କିସ୍, ମେଣ୍ଡେ ତାନ୍ ପରୁ ୱାଟ୍‍ତାଉ ସୁକୁକ୍ କିକେ ନୁ ରୂଟି ୱାଟି ମାନ୍ଦାନାଦ୍ ଉଡ଼୍‍ତଡ଼୍ ।
JOH 21:10 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ଇଞ୍ଜେ ବେନା କିକେ ପୟିତ୍‍ତିଡ଼୍, ଆଗାଙ୍କ୍ ସୁକୁକ୍ ତାଡ଼ାଟ୍ ।”
JOH 21:11 ଶିମୋନ୍ ପିତର୍ ଆଞ୍ଜ୍ ଶହେ ପାଚାଶ୍‍ମୁଣ୍ଡ୍ ବେଡ଼୍‍ୟା କିକେ ନିଣ୍ଡିମାନ୍ଦାନ୍ ୱାଲେତିଙ୍କ୍ ଆଞ୍ଚିନାଗ୍‌ ପିଡ଼ିଙ୍ଗି ତାତ୍‍ତଡ଼୍; ଆସର୍ କିକେଙ୍କ୍ ମିକା ୱାଲା ଦେଗ ।
JOH 21:12 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ୱାସ୍ ମିକା ତିନୁଟ୍ ।” ଶିଷ୍ୟଡ଼୍ ଲୋପେ ବେନମିକା “ଅଂକିଙ୍କ୍‌ ବେନ,” ଇଞ୍ଜ ପାଚ୍ରାମାଡ଼ାଙ୍କ୍ ପାର୍‍ୱଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ଯେ ପ୍ରବୁ, ଇଦ୍ ଅଡ଼୍‌ ପୁତ୍‍ତଡ଼୍ ।
JOH 21:13 ଜିସୁ ୱାସ୍ ରୂଟି ତାସ୍ ଅଡ଼୍‌‍କିଂଙ୍କ୍ ହିତ୍‍ତଣ୍ଡ୍, ମେଣ୍ଡେ ଆଦେପୁଟୁଙ୍କ୍ କିକେ ମିକା ହିତ୍‍ତଣ୍ଡ୍ ।
JOH 21:14 ଡଲ୍‍ତଡ଼୍ ଲୋପେଙ୍କ୍ ତେଦ୍‍ତା ପେର୍‍କେ ଜିସୁ ଶିଷ୍ୟଡ଼୍‍କ୍ ଇଦ୍ ମୁଣ୍ଡ୍‍ଦାମ୍ ଦର୍ଶନ୍ ହିତ୍‍ତଣ୍ଡ୍ ।
JOH 21:15 ଶିଷ୍ୟଡ଼୍ ତିତ୍‍ତା ପେର୍‍କେ ଜିସୁ ଶିମୋନ୍ ପିତର୍‍ତିଙ୍କ୍ କେତ୍‍ତଣ୍ଡ୍, “ହଁ ଯୋହନ୍‌‌ତେ ମାର୍‍ ଶିମୋନ୍, ନିମ୍‍ ବାତେଏ ନାକିଂଙ୍କ୍ ଇଡ଼୍ ଲୋପେଙ୍କ୍ ଗାଟି ପ୍ରେମ ମାଡ଼ୁତି ?” ଅଣ୍ଡ୍‌ ଜିସୁଙ୍କ୍ କେତ୍‍ତଣ୍ଡ୍, “ହଁ, ପ୍ରବୁ, ନାନ୍ ଯେ ନିକିଂଙ୍କ୍ ପ୍ରେମ ମାଡ଼ୁତାନ୍, ଆଦ୍ ନିମ୍‍ ପୁତ୍‍ତି ।” ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ନାୟାଦ୍ ମେଣ୍ଢାପିଲାଙ୍କ୍ ମେଇମ୍ ।”
JOH 21:16 ଜିସୁ ଦ୍ୱିତୀୟଦାମ୍ ଅଂକିଙ୍କ୍‌ କେତ୍‍ତଣ୍ଡ୍, “ହଁ ଯୋହନ୍‌‌ ମାର୍‍ ଶିମୋନ୍, ନିମ୍‍ ବାତେଏ ନାକିଂଙ୍କ୍ ପ୍ରେମ ମାଡ଼ୁତିନ୍ ?” ଅଣ୍ଡ୍‌ ଜିସୁଙ୍କ୍ କେତ୍‍ତଣ୍ଡ୍, “ହଁ, ପ୍ରବୁ, ନାନ୍ ଯେ ନିକିଂଙ୍କ୍ ପ୍ରେମ ମାଡ଼ୁତାନ୍, ଆଦ୍ ନିମ୍‍ ପୁତ୍‍ତି ।” ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ନା ମେଣ୍ଢାକିଂଙ୍କ୍ ପୋଡ଼୍‍ପା ।”
JOH 21:17 ଜିସୁ ମୁଣ୍ଡ୍‍ଦାମ୍ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ହଁ ଯୋହନ୍‌‌ତେ ମାର୍‍ ଶିମୋନ୍, ନିମ୍‍ ବାତେଏ ନାକିଂଙ୍କ୍ ପ୍ରେମ ମାଡ଼ୁତି ?” ଇଗେ ପିତର୍ ମାନ୍‍ଦୁଃକାମ୍ ଆତ୍‍ତଣ୍ଡ୍ । ବାତେଙ୍କ୍ ଇତ୍‍କେ ଜିସୁ ମୁଣ୍ଡ୍‍ଦାମ୍ ପିତର୍‍ତିଙ୍କ୍ ପାଚ୍ରାମାଡ଼୍‍ତଣ୍ଡ୍, ନିମ୍‍ ବାତେଏ ନାକିଂଙ୍କ୍ ପ୍ରେମ ମାଡ଼ୁତି ? ଅଣ୍ଡ୍‌ କେତ୍‍ତଣ୍ଡ୍, “ପ୍ରବୁ, ନିମ୍‍ ସାରେ ବିଷୟ ପୁତ୍‍ତି; ନାନ୍ ଯେ ନିକିଂଙ୍କ୍ ପ୍ରେମ ମାଡ଼ୁତାନ୍, ଆଦ୍ ନିମ୍‍ ପୁତ୍‍ତିନ୍ ।” ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ନାୟାୱୁ ମେଣ୍ଢାକିଂଙ୍କ୍ ମେଇମ୍ ।”
JOH 21:18 ନାନ୍ ନିଜାମ୍‍ କେତୁତାନ୍, ଲେୟ୍‍ ମାନ୍ଦାନ୍ ୱେଲେ ନିମ୍‍ ନିଜେତ୍ ସିଲେତିଙ୍କ୍ ଗାଟ୍ ୱାଟି ବେକେ ଇଚ୍ଛା, ଚିଟି ଆଞ୍ଜ ମାତ୍‍ତିନ୍, ବାତେଙ୍କ୍ ଇତ୍‍କେ ମୁଇତା ୱେଲେ ନିମ୍‍ ନିୟାୱୁ କାଇକ୍ ହାଆତିତି ନୁ ମେଣ୍ଡେ ୱେରଣ୍ଡ୍ ନିକିଂଙ୍କ୍ ଗାଟ୍ ୱାଟି, ବେକେ ନିୟାଦ୍ ଇଚ୍ଛା ଇଲେ, ଚିଟି ନିକିଂଙ୍କ୍ ଆଦ୍‍ତନ୍ ।
JOH 21:19 ପରମେଶ୍ୱର୍‍ତେ ଗୌରବ୍‍ ସେଙ୍ଗେ ପିତର୍ ବେଦ୍‍ରକମ୍‍ ଡଲିତଣ୍ଡ୍, ଇଦ୍ ବୁଜାମାଡ଼ାନଙ୍କ୍ ଜିସୁ ଆଦ୍ ରକମ୍ କେସ୍ ମାତ୍‍ତଣ୍ଡ୍ । ତିନ୍‍ପେର୍କେ ଜିସୁ ଅଂକିଙ୍କ୍‌ କେତ୍‍ତଣ୍ଡ୍, “ନା ପେର୍‍କେ ୱାଡ଼ାଟ୍ ।”
JOH 21:20 ଜିସୁ ବେନ୍ ଶିଷ୍ୟଙ୍କ୍ ପ୍ରେମ ମାଡ଼ମାତ୍‍ତଣ୍ଡ୍ ନୁ ବେନ ନାର୍‍କେତ୍ ବଜିତାଗ୍ ଜିସୁନ୍ ପର୍‍ର ରହି, “ପ୍ରବୁ, ନିକିଂଙ୍କ୍ ବେନ ଶତ୍ରୁଡ଼୍ କାଇଦେ ପସ୍‍ପିତଣ୍ଡ୍ ଇଞ୍ଜ କେସ୍ ମାତ୍‍ତଣ୍ଡ୍,” ଆ ଶିଷ୍ୟଙ୍କ୍ ପିତର୍ ତିଡ଼ିଇ ପେର୍‍କେ ୱାଦାନାଦ୍ ଉଡ଼୍‍ତଣ୍ଡ୍ ।
JOH 21:21 ପିତର୍ ଅଂକିଙ୍କ୍‌ ଉଡ଼ି ଜିସୁଙ୍କ୍ କେତ୍‍ତଣ୍ଡ୍, “ପ୍ରବୁ, ଇଡ଼୍‍ୱାଦ୍ ବିଷୟ୍ ବେଲା ଆଦ୍‍ତେ ?”
JOH 21:22 ଜିସୁ ପିତର୍‍ତିଙ୍କ୍ କେତ୍‍ତଣ୍ଡ୍, “ନାୟାଦ୍ ମେଣ୍ଡଅନ୍‌‍ଦାମ୍ ୱାଦାନାଦ୍ ଆଦାନ୍ ଯାକ ଅଣ୍ଡ୍‌ ବାଦ୍‍କିନ୍ ଇଞ୍ଜ ଯଦି ଇଚ୍ଛା ମାଡ଼ିତାନ୍, ଆଲାଇତ୍‍କେ ଆଗେ ନିୟାଦ୍ ବାତେଏ ମିନ୍ଦେ ? ନିମ୍‍ ନାକିଂଙ୍କ୍ ପେର୍‍କେ ମାଡ଼ା ।”
JOH 21:23 ଆଗାଙ୍କ୍ ଆ ଶିଷ୍ୟ ବେସୁଟ୍‌ ମିକା ଡଲନ୍, ତାମୁଣ୍ଡ୍‌କିଡ଼୍ ଲୋପେ ଇଦ୍ ଗଟ୍ ପ୍ରଚାର୍ ଆଦ୍‍ତେ, ମାତର୍ ଅଣ୍ଡ୍‌ ଡଲନ୍ ଇଞ୍ଜ ଜିସୁ ଅଡ଼୍‌‍କିଂଙ୍କ୍ କେଲଣ୍ଡ୍ । ଅଣ୍ଡ୍‌ ମାତର୍, “ନାୟାଦ୍ ୱାଦାନାଦ୍ ଯାକ ଅଣ୍ଡ୍‌ ମାନିଣ୍ଡ୍ ଇଞ୍ଜ ଯଦି ନାନ୍ ଇଚ୍ଛା ମାଡ଼ିତାନ୍, ଆଲେକେ ଆଗେ ନିୟାଦ୍ ବାତେଏ ମିନ୍ଦେ,” ଇଞ୍ଜ କେସ୍‍ମାତ୍‍ତଣ୍ଡ୍ ।
JOH 21:24 ବେନ ଇ ସାରେ ବିଷୟ୍‍ତେ ସାକ୍ଷ୍ୟ ହିତ୍‍ତଣ୍ଡ୍ ନୁ ଇୱୁସାରେ ଲେକିମିନ୍ଦେଣ୍ଡ୍, ଅଣ୍ଡ୍‌ ଆ ଶିଷ୍ୟ; ମେଣ୍ଡେ ଅନାଦ୍‌ ସାକ୍ଷ୍ୟ ନିଜାମ୍, ଆଦ୍‌ ମାମ୍‍ମେ ପୁତ୍‍ତମ୍ ।
JOH 21:25 ଜିସୁ ମେଣ୍ଡେ ନାର୍‍ଗେ ପାଡ଼୍‍ୟି ମାଡ଼ିମାତ୍‍ତଣ୍ଡ୍; ଆଉ ସାରେ ଯଦି ୱେରୱେର ମାଡ଼ି ଲେକି ମାନ୍ଦାନ୍‌ ଇତ୍କେ, ଆଲେକେ ଇସର୍‌ ବଇ ଲେକା ଆୟେଡ଼୍ ଯେ, ନାୟାଦ୍ ବିଚାର୍‍ତେ ଇଦ୍ ଜଗତ୍‍ତାଗ୍ ମିକା ଆୱୁ ସାରେ ନେହେତାନ୍ ସେଙ୍ଗେ ପଡ଼ିୟେ ଆୟ୍‍ୟ ଆୟେଡ଼୍ ।
ACT 1:1 ପ୍ରିୟ ତିୟଫୀଲସ୍‍, ନାୱାଦ୍ ମୁନେନ୍ ତିଆର୍ ଆତ୍‍ତେ ଲୁକ ବଇତାଗ୍ ଜିସୁ ତାନ୍ ପାଡ଼୍‍ୟି ଆରାମ୍ ମାଡ଼୍‍ତାଗାକନ୍ସ୍‍,
ACT 1:2 ସ୍ୱର୍ଗତାଗ୍ ଆଦାନ୍ ଯାକ ବେନାସାର୍ରେ ପାଡ଼୍‍ୟି ମାଡ଼ିମାତ୍‍ତଣ୍ଡ୍ ନୁ ଶିକ୍ଷା ଇସ୍‌ ମାତ୍‍ତଣ୍ଡ୍, ଆୱ୍‍ଚାରେ ବିଷୟ୍ ଲେକିମାତ୍‍ତାନ୍ । ସ୍ୱର୍ଗତାଗ୍ ଆଦାନ୍ ମୁନେଙ୍କ୍ ବେନଡ଼୍‍କ୍ ଅଣ୍ଡ୍‌ ନିଜେତ୍ ପ୍ରେରିତ ଶିଷ୍ୟ ଇଞ୍ଜ ଏଞ୍ଚି ମାତ୍‍ତଣ୍ଡ୍, ଅଡ଼୍‌‍କିଂଙ୍କ୍ ଅଣ୍ଡ୍‌ ପବିତ୍ର ଆତ୍ମାତେ ଶକ୍ତିତେ ଆଦେଶ୍‍ ଇସ୍‌‍ମାତ୍‍ତଣ୍ଡ୍ ।
ACT 1:3 ଆସୁଟେ ଅଣ୍ଡ୍‌ ଜିୱୁନ୍‍ ମାତ୍‍ତଣ୍ଡ୍, ଇଦ୍ ପ୍ରମାନ୍ ମାଡ଼ାଙ୍କ୍ ନୁ ଶିଷ୍ୟଡ଼ାଦ୍ ଏର୍କା ଦୁର୍‍ ମାଡ଼ାଙ୍କ୍ ଅଣ୍ଡ୍‌ ତାନାଦ୍ ଡଲ୍‍ତେ ପେର୍‍କେ ଚାଲିଶ୍ ଦିନ୍ ଏୱୁନା ନାର୍ଗେଦାମ୍ ଅଡ଼୍‌‍କିଂଙ୍କ୍ ଦର୍ଶନ୍ ଇସ୍‌ ମାତ୍‍ତଣ୍ଡ୍ । ଅଡ଼୍‌ ଜିସୁଙ୍କ୍ ଉଡ଼ିମାତ୍‍ତଡ଼୍ ନୁ ଜିସୁ ଅଡ଼୍‌‍କିଂଙ୍କ୍ ଇଶ୍ୱର୍‌ତାଦ୍ ରାଜ୍ୟ ବିଷୟ୍‍ତେ କେସ୍‍ମାତ୍‍ତଣ୍ଡ୍ ।
ACT 1:4 ଯିରୁଶାଲେମ୍‍ ଅଡ଼୍‌ ଅଣ୍ଡୟାଗେ ତିନ୍ଦାଙ୍କ୍‍ ଗୁଡ଼୍‍ତେ ୱେଲେ ଜିସୁ ଅଡ଼୍‌‍କିଂଙ୍କ୍ ଇଦ୍ ଗଟ୍ ହିତ୍‍ତଣ୍ଡ୍, “ଜିରୂଶାଲମ୍ ୱିଡ଼୍‍ସ୍‍ମାଟ୍ । ସ୍ୱର୍ଗତେ ବାବାଲ୍ ମିକିଂଙ୍କ୍ ବାଆତେ ହିଦ୍‍ତଣ୍ଡ୍ ଇଞ୍ଜ ପ୍ରତିଜ୍ଞା ମାଡ଼୍‍ତଣ୍ଡ୍ ନୁ ବେନ୍ ଦାନ ବିଷୟ୍‍ତେ ନାନ୍ ମିକିଂଙ୍କ୍ କେସ୍‍ମାତ୍‍ତାନ୍, ଆଦ୍ ପାଏମ୍ ଆଦାନ୍ ଯାକ କେପାଟ୍ ।
ACT 1:5 ଯୋହନ୍‌ ହେର୍‍ତାଗ୍ ବାପ୍ତିସ୍ମ ହିତ୍‍ତଣ୍ଡ୍, ବାତେଙ୍କ୍ ଇତ୍‍କେ ସୁଦୁଟ୍ ଦିନାତ୍ ଲୋପେ ମିଡ଼୍ ପବିତ୍ର ଆତ୍ମାତଡ଼୍ ବାପ୍ତିସ୍ମ ଆଦ୍‍ତିଡ଼୍ ।”
ACT 1:6 ଅନ୍‌‍ଦିନେ ପ୍ରେରିତ ଶିଷ୍ୟଡ଼୍ ଅଣ୍ଡୟାଗେ ମାନ୍ଦାନ୍‍ୱେଲେ ଜିସୁଙ୍କ୍ କେତ୍‍ତଣ୍ଡ୍, “ପ୍ରବୁ, ନିମ୍‍ ଇଞ୍ଜେ ଇସ୍ରାଏଲ୍‍ଡ଼୍‍କିଙ୍କ୍ ଅଡ଼ାଦ୍‌ ରାଜ୍ୟ ମାଲ୍‍ପି ଇଦ୍‍ତିନ୍‍ ?”
ACT 1:7 ଜିସୁ କେତ୍‍ତଣ୍ଡ୍, “ତାରିକ୍ ନୁ ସମୟ୍‍ତିଙ୍କ୍ ନା ବାବାଲ୍ ତାନ୍ ଅଦିକାର୍‌‍ ଗଟ୍‍ତେ ମାଡ଼ିମିନ୍ଦେଣ୍ଡ୍ । ଇୱୁସାରେ ବେସୁଟ୍‌ ଗଟେମ୍ ଆଦ୍‍ତେ, ମିଡ଼୍ ପୁନ୍ଦାଙ୍କ୍ ଦର୍‍କାର୍ ଇଲେ ।
ACT 1:8 ବାତେଙ୍କ୍ ଇତ୍‍କେ ମିଇ ପର୍‍ର ପବିତ୍ର ଆତ୍ମା ଡିଗ୍‍କେ, ମିଡ଼୍ ଶକ୍ତିଶାଲୀ ଆଦ୍‍ତିଡ଼୍ ନୁ ଜିସୁ, ପୁରା ଯିରୁଶାଲେମ୍‍ ଯିହୁଦା ନୁ ଶମିରୋମ୍ ନୁ ପୃତିବିତାଗ୍ ଶେଷସୀମା ଏୱୁନା ନା ସେଙ୍ଗେ ମିଡ଼୍ ସାକ୍ଷି ଆଦ୍‍ତିଡ଼୍ ।”
ACT 1:9 ଇଦ୍ କେତ୍‍ତେ ପେର୍‍କେ ଜିସୁଙ୍କ୍ ସ୍ୱର୍ଗତାଗ୍ ମାୟିଆତ୍‍ତାଦ୍ ଅଡ଼୍‌ ଉଡ଼୍‍ତଡ଼୍ ନୁ ୱେରଡ଼୍ ମାବ୍ ଲୋପେ ଅଣ୍ଡ୍‌ ଅଡ଼ାୱୁ କଣ୍ଡାନ୍ ମୁନେକନ୍ସ୍ ମାୟିଆତ୍‍ତଣ୍ଡ୍ ।
ACT 1:10 ଅଣ୍ଡ୍‌ ପର୍‍ର ଆତ୍‍ତେ ପେର୍‍କେ ମିକା ଅଡ଼୍‌ ଅଣ୍ଡୟ୍‌ କଣ୍ଡେତେ ସ୍ୱର୍ଗତାଗ୍ ଉଡ଼ିମାତ୍‍ତଡ଼୍‍ । ପାଣ୍ଡ୍ରି ଚକାସିଲେ କେର୍‍ତେ ଇର୍‍ୱୁଡ଼୍ ନାରୁଡ଼୍ ହଟାତ୍ ଅଡ଼୍‌ ଗାର୍‍ରେ ୱାସ୍ ନିତ୍‍ତଡ଼୍
ACT 1:11 ନୁ କେତ୍‍ତଡ଼୍, “ହୋ ଗାଲିଲୀୟଡ଼ି, ବାତେଙ୍କ୍ ଇଗେ ନିସ୍ ମୟଲ୍‍ତାଗ୍ ଉଡ଼ିମିନ୍ଦେଡ଼ି ? ହି ଜିସୁ ମିୟାଗାଙ୍କ୍ ସ୍ୱର୍ଗତାଗ୍ ଆତ୍‍ତଣ୍ଡ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ବେଦ୍‍ରକମ୍‍ ସ୍ୱର୍ଗତା ଆଦାନାଦ୍ ଉଡ଼୍‍ତିଡ଼୍, ଟିକ୍ ଆଦେରକମ୍ ଅଣ୍ଡ୍‌ ମେଣ୍ଡେ ମାଲ୍‍ସ୍ ୱାଦ୍‍ତଣ୍ଡ୍ ।”
ACT 1:12 ଯିରୁଶାଲେମ୍‍ତେ ପେର୍କେ ପ୍ରେରିତ ଶିଷ୍ୟଡ଼୍ ଜୀତ ମେଟେତାଗାଙ୍କ୍ ଜିରୂଶାଲମ୍ ମାଲ୍‍ସ୍ ଆଦ୍‍ତଡ଼୍ । ଜୀତ ମେଟେ ସହର୍‍କନ୍‍ସ୍ ଅଣ୍ଡୟ୍‌‍ କିଲମିଟର୍ ଦୁରାମ୍ ମାତ୍‍ତେ ।
ACT 1:13 ଯାକୁବ୍ ଆଞ୍ଜ୍ ଅଡ଼୍‌ ବେଗେ ମାତ୍‍ତଡ଼୍‍ ତାନ୍ ପରତ୍‍ ବାକ୍‍ଡ଼େତାଗ୍ ଅସ୍‍ତଡ଼୍ । ଆଦ୍ ପ୍ରେରିତ ଶିଷ୍ୟଡ଼୍ ଆଦୁତଡ଼୍‍ ପିତର୍, ଯୋହନ୍‌, ରଙ୍ଗ୍‍ବୁମ୍‍, ଆନ୍ଦ୍ରିୟ, ଫିଲିପ୍‍ପ, ତୋମା, ବର୍ତଲମି, ମାତିଉ, ଆଲ୍‍ଫିନ୍ ମାର୍‍ ଜାକୁବ୍‍ତେ ଦେଶ୍‍ତିଙ୍କ୍‍ପ୍ରେମ ମାଡ଼ାନ୍ ଶିମୋନ୍ ନୁ ରଙ୍ଗ୍‍ବୁମ୍‍ନ୍ ମାର୍‍ ଯିହୁଦା ।
ACT 1:14 ଅଡ଼୍‌ ନାର୍ଗେଦାମ୍ ୱେରଡ଼୍ ମାନ୍ଦେ ଆସ୍ ପ୍ରାର୍ତନା ମାଡ଼ାନ୍ ସେଙ୍ଗେ ଅଣ୍ଡୟାଗେ ଆସମାତ୍‍ତଡ଼୍ ନୁ ଅଡ଼୍‌‍ତଡ଼୍ ଜିସୁନ୍‍ ୟାୟ୍‍ ମରୀୟମ୍ ନୁ ବାଗାତ୍ ନାଟାଙ୍କ୍ ନୁ ଜିସୁନ୍ ବିଶ୍ୱାସୀ ତାମୁଣ୍ଡ୍‌କିଡ଼୍ ମିକା କାୟ୍‍ଲମାତ୍‍ତଡ଼୍ ।
ACT 1:15 ଆଦେ ବେସ୍‍କେ ଦିନାନ୍‍ ଲୋପେ ସାରେ ଶହେ କୁଡ଼ିଏ ଜାନ୍‍ ବିଶ୍ୱାସୀ ତାମୁଣ୍ଡ୍‌ ଅଣ୍ଡୟ୍‌ ମିଟିଙ୍ଗ୍‌ତାଗ୍‌ ପିତର୍ ପେଦେର୍‍ତଣ୍ଡ୍‍ ନିସ୍‍ମିକା କେତ୍‍ତଣ୍ଡ୍;
ACT 1:16 “ଦାଦାଲଡ଼୍‍ ନୁ ଏଲାସ୍କ୍‍, ବେନ୍ ଇସ୍କରିୟ ଯିହୁଦା ଜିସୁଙ୍କ୍ ପସ୍‍ପିଦାନ୍ ମାଇଦିଙ୍କ୍ ଶତ୍ରୁଡ଼୍ ସେଙ୍ଗେ ହାର୍ ତଅସ୍ ମାତ୍‍ତଣ୍ଡ୍, ଅନ୍‌ ବିଷୟ୍‍ତେ ଦାଉଦ୍ ପବିତ୍ର ଆତ୍ମାତଡ଼୍‍ ଚାଲେମ୍ ଆସ୍ ବବିଷ୍ୟତ୍‍ ଗଟ୍ କେଞ୍ଜ୍‍ସ୍ପି ମାତ୍‍ତଣ୍ଡ୍ । ଦର୍ମଶାସ୍ତ୍ରତାଗ୍ କେତ୍‍ତାଦ୍ ଆଦ୍ ଗଟ୍ ସାରେ ଆଦାନାଦ୍ ନିଜାମ୍ ମାତ୍‍ତେ ।
ACT 1:17 ବାତେଙ୍କ୍‍ଇତ୍‍କେ ଯିହୁଦାଲ୍ ମା ଦଲ୍‍ତାଗ୍ ମେମ୍ବର୍‍ ମାତ୍‍ତଣ୍ଡ୍ ନୁ ମା ତଡ଼୍ ପାଡ଼୍‍ୟିଦାଗ୍‍ କାଇଲାନ୍ ସେଙ୍ଗେ ହେଞ୍ଚିମାନ୍ଦାନ୍ ଆସ୍ ମାତ୍‍ତଣ୍ଡ୍ ।”
ACT 1:18 ଅନାଦ୍‌ କାରାପ୍ ପାଡ଼୍‍ୟି ତଡ଼୍ ଯିହୁଦା ଦର୍‍ସ୍କିମାନ୍ଦାନ୍ ଡାବ୍‍କିନେ ୱେରଡ଼୍ ବୁମ୍ ଆସିମାତ୍‍ତଣ୍ଡ୍ ନୁ ଆଦ୍ ବୁମ୍‍ତାଗ୍ ରାଲି ଅଣ୍ଡ୍‌ ଡଲ୍‍ତଣ୍ଡ୍ । ଅନାଦ୍‌ ଡଙ୍କେ ପାର୍କ୍ ଆସ୍ ପଅକ୍ ପେୟ୍‍ତା ।
ACT 1:19 ଯିରୁଶାଲେମ୍‍ତାଗ୍‍ ମାନ୍ଦାନ୍ ନାରୁଡ଼୍‍ ଇଦ୍‍ସାରେ ପୁଞ୍ଜ୍‍ମିକା ଅଡ଼ାଦ୍‌ ଗଟ୍‍ତେ ଆଦ୍ ବୁମ୍‍ତେ ପେଦେର୍ “ଆକେଲ୍‍ଦାମା,” ଇତ୍‍କେ “ନେତୁର୍‍ ବୁମ୍,” ଇଞ୍ଜ ହିତ୍‍ତଡ଼୍ ।
ACT 1:20 “ଇଦ୍ ବିଷୟ୍ ଗୀତ ସଂହିତାତାଗ୍ ଲେକା ଆସ୍‍ମିନ୍ଦେ, ଅନାଦ୍‌ ଲନ୍ ଜନଶୁନ୍ୟ ଆୟି ଆଗେ ବେନ ମାନ୍‍ମାକିଣ୍ଡ୍ ମେଣ୍ଡେ ଲେକ୍‍ତାଦ୍ ମିନ୍ଦେ ମେଣ୍ଡେଅର୍‍ତୁଣ୍ଡ୍ ଅନ୍‌ ପଡ଼୍‍ୟେତାଗ୍ ମାନିଣ୍ଡ୍ ।”
ACT 1:21 “ଆଦିଙ୍କ୍ ପ୍ରବୁ ଜିସୁନ୍‍ ପୁନରୁତ୍‍ତାନ୍‍ତେ ସାକ୍ଷି ଆଦାନ୍ ମାଇଦିଙ୍କ୍ ମେଣ୍ଡେଅର୍‍ତୁଣ୍ଡ୍ ମା ତଡ଼୍ କାୟ୍‍ଲାନ୍ ଦର୍‍କାର୍ ।
ACT 1:22 ଜିସୁ ଯୋହନ୍‌ ତାଗାଙ୍କ୍ ଏର୍‍ଦିକ୍ୟା ଗ୍ରହନ୍‍ ମାଡ଼୍‍ତେ ସମୟ୍‍ତାଗାଙ୍କ୍ ସ୍ୱର୍ଗତାଗ୍ ପୁନରୁତାନ୍ ଆଦାନ୍ ଯାକ ସାରେଦାମ୍ ପ୍ରବୁ ଜିସୁ ମା ତଡ଼୍ ଆଦାୱାଦା ମାଡ଼ାନ୍ ୱେଲେ, ବେନ୍ ନାରୁଡ଼୍ ମାନ୍‍ ଦଲ୍‍ତାଗ୍ ମାତ୍‍ତଡ଼୍, ଅଡ଼୍‌ ଲୋପେଙ୍କ୍ ଅର୍‍ତୁଙ୍କ୍ ସାକ୍ଷି ମାଡ଼ାଙ୍କ୍ ଆଦ୍‍ତେ ।”
ACT 1:23 ଅଡ଼୍‌ ଇର୍‍ୱୁଡ଼ାଦ୍ ପେଦେର୍ ହେଞ୍ଚ୍‍ତଡ଼୍; ଯୋଷେଫ୍ ବେନଙ୍କ୍ ବର୍ଶବା ବା ଯୁସ୍ତସ ଇଞ୍ଜ କେତିତଡ଼୍‍ ନୁ ମଥୀୟସ୍;
ACT 1:24 ମେଣ୍ଡେ ପ୍ରାର୍ତନା ମାଡ଼୍‍ତଡ଼୍, “ପ୍ରବୁ ନିମ୍‍ ସାରେତଡ଼ାଦ୍ ହୃଦୟ୍‍ ପୁତ୍‍ତି । ଇଡ଼୍‍ ଇର୍‍ୱୁଡ଼୍‍ ଲୋପେଙ୍କ୍‍ ନି ତଡ଼୍ ବେନ ମନନିତ ମାକିଙ୍କ୍ କେଲ୍ ।‍ ଅନ୍‌ ପାଡ଼ିୟିତାଗ୍ ନି ତଡ଼୍ ଏଞ୍ଚିମାନ୍ଦାନ୍ ଇଡ଼୍‍ ଇର୍‍ୱୁଡ଼୍ ଲୋପେକ୍ ବେନ
ACT 1:25 ଇଣ୍ଡ୍‍ ନାରୁଣ୍ଡ୍‍ ଯିହୁଦାନ୍‍ ପଡ଼୍‍ୟେତାଗ୍ ପ୍ରେରତ ଶିଷ୍ୟନ୍ ପାଡ଼୍‍ୟି ମାଡ଼ିତନ୍ ।”
ACT 1:26 ତାନ୍‍ପେର୍କେ ଇର୍‍ୱୁଡ଼୍ ଲୋପେକ୍ ଅର୍‍ତୁଙ୍କ୍ ହେଞ୍ଚାନ୍ ସେଙ୍ଗେ ଗୁଲିବାଣ୍ଟ ଆତ୍‍ତେ । ଗୁଲିବାଣ୍ଟତାଗ୍ ମଥୀୟସ୍ ମନନିତ ଆସ୍ ଏଗାର୍ ଜାନ୍‍ ପ୍ରେରିତ ଶିଷ୍ୟଡ଼୍ ଦଲ୍‍ତାଗ୍ କାୟ୍‍ଲ୍‍ତଣ୍ଡ୍ ।
ACT 2:1 ପେଣ୍ଟିକଷ୍ଟ୍ ପାଣ୍ଡୁମ୍‍ ଦିନ୍ ସାରେ କ୍ରିଷ୍ଟ ବିଶ୍ୱାସୀଡ଼୍ ୱେରଡ଼୍ ପଡ଼୍‍ୟେତାଗ୍ ଗୁଡ଼ିମାତ୍‍ତଡ଼୍ ।
ACT 2:2 ହଟାତ୍ ସ୍ୱର୍ଗତାଗାଙ୍କ୍ ଗାଟି ୱାଦାନ୍ ବେଡ଼୍‍ୟାଦ୍‍ ଗାଲ୍ ଲେଙ୍ଗ୍‍ ଲେକାମ୍ ୱେରଡ଼୍ ଲେଙ୍ଗ୍‍ ୱାତ୍‍ତେ ନୁ ଅଡ଼୍‌ ବେନ୍ ଲୋନ୍‌ କୁଦିମାତ୍‍ତଡ଼୍, ଆଦ୍ ଲୋନ୍‌ ସାରେ ଆଦ୍ ଲେଙ୍ଗ୍‍ତେ ବର୍ତ୍ତି ଆତ୍‍ତେ ।
ACT 2:3 ତାନ୍‍ପେର୍କେ ଅଡ଼୍‌ ଉଡ଼୍‍ତଡ଼୍, ବେସ୍‌କ୍ କିସ୍ ୱାଞ୍ଜେର୍ ଲାଟିଆସ୍ ଆଗେ ମାନ୍ଦାନ୍ ସାରେତଡ଼୍‌କିଂଙ୍କ୍ ଇଟ୍‍ତେ ।
ACT 2:4 ଆଗାଙ୍କ୍ ଅଡ଼୍‌ ସାରେତଡ଼୍ ପବିତ୍ର ଆତ୍ମାତେ ବର୍ତ୍ତି ଆଦ୍‍ତଡ଼୍ ନୁ ଆତ୍‍ମା ଅଡ଼୍‌‍କିଂଙ୍କ୍ ବେଦ୍‍ପୁଟୁଙ୍କ୍ କେତାଙ୍କ୍ ଶକ୍ତି ହିତ୍‍ତେ, ଆଦ୍ ରକମ୍ ଅଡ଼୍‌ ବେନ୍‍ବେନା ଗଟ୍‍ତଡ଼୍ ତିରିୟାଙ୍କ୍ ପସ୍‍ତଡ଼୍ ।
ACT 2:5 ପୃତିବିତେ ୱେର୍‍ୱେର୍‍ ସ୍ୱର୍ଗତାଗାଙ୍କ୍ ୱାସ୍‍ମାନ୍ଦାନ୍ ଇହୁଦୀ ବକ୍ତାଲଡ଼୍‍ ଆସୁଟେ ଯିରୁଶାଲେମ୍‍ ଦେଶ୍‍ତାଗ୍ ମାତ୍‍ତଡ଼୍ ।
ACT 2:6 ବେସୁଟ୍‌ ଅଡ଼୍‌ ଇଦ୍ ଲେଙ୍ଗ୍‍ କେଞ୍ଜ୍‍ତଡ଼୍, ନାର୍‍ଗେ ନାରୁଡ଼୍ ଆଗେ ଗୁଡ଼୍‍ତଡ଼୍ । ବିଶ୍ୱାସୀ ନାରୁଡ଼୍ ଆଗେ ମାନ୍ଦାନ୍ ସାରେତଡ଼୍‍ୱାଦ୍ ବାଷାତ୍‍ ଗଟ୍ କେତାନାଦ୍ କେଞ୍ଜି ଅଡ଼୍‌ ସାରେତଡ଼୍ କାବା ଆତ୍‍ତଡ଼୍ ।
ACT 2:7 କାବା ଆସ୍ ନୁ ଦାଦ୍‍ରେଲି ଅଡ଼୍‌ କେତ୍‍ତଡ଼୍, “ଇଦ୍ ରକମ୍ ଗଟ୍ ତିରିୟାନଡ଼୍ ଇଡ଼୍ ବାତେଏ ଗାଲିଲୀୟ ଆୟ୍‍ୟଡ଼୍ ?
ACT 2:8 ଆଲେକେ ମାମ୍‍ମେ ସାରେତମ୍ ବେଲା ଅଡ଼୍‌‍କିଂଙ୍କ୍ ମା ନିଜର୍‍ ନିଜର୍‍ ଜନମ୍‍ ଆତ୍‍ତେ ଗଟ୍ କେତାନାଦ୍ କେଞ୍ଜୁତମ୍ ?
ACT 2:9 ମାନାଡ଼୍ ପାର୍ତୀୟ, ମାଦୀୟ ନୁ ଏଲାମୀୟ, ମେଣ୍ଡେ ମେସପଟାମିୟା, ଯିହୁଦା ଦେଶ୍ ନୁ କାପ୍‍ପାକିଆ, ପନ୍ତ ନୁ ଏସିୟା,
ACT 2:10 ଫ୍ରୁଗିୟା ନୁ ପଂଫୁଲିୟା, ମିସର୍ ନୁ କୁରିନୀ ଗାରେତ୍ ଲିବିୟା ଜାଗେତ୍‍ ନାରୁଡ଼୍ ମେଣ୍ଡେ ରୋମ୍‍ତାଗାଙ୍କ୍ ୱାତ୍‍ତେ,
ACT 2:11 ଇହୁଦୀ ନୁ ଇହୁଦୀ ଦର୍ମ ଗ୍ରହନ୍ ମାଡ଼ିମାନ୍ଦାନ୍ ଅବିଶ୍ୱାସୀ ନାରୁଡ଼୍, ମେଣ୍ଡେ ମା ଲୋପେଙ୍କ୍ ବେସ୍‍କ୍‍ତୁଡ଼୍‍ କ୍ରୀତୀୟ ନୁ ଆରବୀୟ ନାରୁଡ଼୍ । ମିକା ଇଶ୍ୱର୍ ବେନ୍ ମହତ୍‍ ବିଷୟ୍ ସାରେ ମାଡ଼୍‍ତଣ୍ଡ୍, ଆୱୁସାରେ ମାମ୍‍ମେ ସାରେତମ୍ ଅଡ଼୍‌ଆଗାଙ୍କ୍‌ ମା ନିଜେତ୍ ନିଜେତ୍ ଗଟ୍‍ତେ କେଞ୍ଜୁତମ୍ ।”
ACT 2:12 କାବା ନୁ ଦାନ୍ଦେ ଆସ୍ ଅଡ଼୍‌ ତାମ୍‍ତାମ୍ ଲୋପେ ପାଚ୍ରା ମାଡ଼୍‍ତଡ଼୍, “ଇଦିନ୍ ଅର୍ତ ବାଆତେ ?”
ACT 2:13 ଇତ୍‍କେ ବାଗାତ୍ ନାରୁଡ଼୍ ବିଶ୍ୱାସିଡ଼୍‍କ୍ ପରିହାସ୍ ମାଡ଼ି କେତ୍‍ତଡ଼୍, “ଇହି ନାରୁଡ଼୍ ମାତ୍‍ୱାରିଡ଼୍‍ ଆତ୍‍ତଡ଼୍ ।”
ACT 2:14 ତାନ୍‍ପେର୍କେ ବାଗାତ୍ ଏଗାର୍ ଜାନ୍‍ ପ୍ରେରତ ଶିଷ୍ୟଡ଼୍ ତଡ଼୍ ପିତର୍ ନିଶ୍‍ମିକା ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, ହୋ ଇହୁଦୀ ଦାଦାଲଡ଼ି ନୁ ଏଲାସ୍କିନଡ଼ି ମେଣ୍ଡେ ଯିରୁଶାଲେମ୍‍ତାଗ୍ ବାଦ୍‍କାନ୍ ନାରୁଡ଼୍, ନା ଗଟି କେଞ୍ଜାଟ୍, ନାନ୍ ଇଦିନ୍ ଅର୍ତ ବୁଜାମାଡ଼ି କେତିତାନ୍ ।
ACT 2:15 ମିଡ଼୍ ବେଲା ହେର୍କା ମାଡ଼ୁତିଡ଼୍, ଇଡ଼୍‍ ଆଦ୍‍ରକମ୍‍ ମାତାଲ୍‍ ଆୟ୍‍ୟଡ଼୍, ବାତେଙ୍କ୍ଇତ୍‍କେ ଦିନାମ୍ ଇଞ୍ଜେ ନାର୍କକ୍‍ ନଅ ଗାଣ୍ଟା ଆତ୍‍ତେ ।
ACT 2:16 ଇତ୍‍କେ ଯୋୟେଲ୍ ବାବବାଦୀ ବେନ୍ ଗଟ୍‍ନା ବିଷୟ୍ କେତ୍‍ତଣ୍ଡ୍, ଇଦ୍ ଆଦ୍ ଗଟ୍‍ନା,
ACT 2:17 “ଇଶ୍ୱର୍ କେତିତଣ୍ଡ୍, ‘ତେରାନ୍‍ ଦିନାତେ ଇୱୁ ସାରେ ଗଟେମ୍ ଆଦ୍‍ତେ, ନାନ୍‍ନେ ସାରେତଡ଼ାଗ୍ ନାୱାଦ୍ ମେନ୍ଦୁଲ୍‍ତିଙ୍କ୍‍ ଆତ୍ମା ବର୍ତ୍ତି ମାଡ଼ିତାନ୍ । ମିଇ ମାର୍‍କ୍ ନୁ ମାୟାସ୍କ୍ ନାୱାଦ୍‍ ସୁସମାଚାର୍‍ କେତିତା । ମିୱଡ଼୍ ଲେୟଡ଼୍ ଦିବ୍ୟ ଦର୍ଶନ୍ ଦର୍‍କିତ୍ ନୁ ବୟସ୍କା ନାରୁଡ଼୍ ସାପ୍ନା ଉଡ଼ିତଡ଼୍ ।
ACT 2:18 ଆ, ନା’ ଦାସ ନୁ ଦାସୀଡ଼୍ ଲୋପେ ନାନ୍ ନାୱାଦ୍ ଆତ୍ମା ହସ୍ପିତାନ୍, ଅଡ଼୍‌ ନାୱାଦ୍ ସୁସମାଚାର୍‍ ପ୍ରଚାର୍ ମାଡ଼ିତଡ଼୍ ।
ACT 2:19 ନାନ୍ ସ୍ୱର୍ଗତାଗ୍ ନାର୍‍ଗେ ଆଦ୍‍ବୁତ୍‌ ପାଡ଼୍‍ୟି; ମେଣ୍ଡେ ପୃତିବିତାଗ୍ ନାର୍‍ଗେ ଚିଏନ୍ନେ ତଅତିତାନ୍ । ଆଗେ ନେତୁର୍‍, କିସ୍ ନୁ ଗାଟି ଉମ୍‍ମେ ବର୍ତ୍ତି ଆଦ୍‍ତେ ।
ACT 2:20 ପ୍ରବୁନାଦ୍ ମହାନ୍ ନୁ ଗୌରବ୍ ଦିନାମ୍ ଏୱୁଦାନ୍ ମୁନେଙ୍କ୍ ପଡ଼୍‍ଦ୍ ଇକାଡ଼୍‍ ତଅନ୍‌ଦିତ୍‍ ନୁ ନେଲ୍‍ଞ୍ଜ୍ ନେତୁର୍‍ ଲେକାମ୍ ଏର୍‍ରେ ରଙ୍ଗ୍ ଆଦ୍‍ତେ ।
ACT 2:21 ଆସୁଟେ ବେନଆଇ ପ୍ରବୁନ୍ ପେଦେର୍‍ତେ ପ୍ରାର୍ତନା ମାଡ଼ିତନ୍, ଅଣ୍ଡ୍‌ ପରିତ୍ରାଣ୍ ପାଏମ୍‍ ଆଦ୍‍ତଣ୍ଡ୍ ।”
ACT 2:22 “ହୋ ଇସ୍ରାଏଲୀୟ ନାରୁଡ଼ି, ଇୱୁ ସାରେ ଗଟି କେଞ୍ଜାଟ୍, ନାଜରିତିୟ ଜିସୁ ନାର୍‍ଗେ ଶକ୍ତିତ୍‍ ପାଡ଼୍‍ୟି, ଆଶର୍ଯ୍ୟ ପାଡ଼୍‍ୟି ନୁ ଚିଏନ୍ନେ ତଡ଼୍ ମିଇ ଗାର୍‍ରେ ଇଶ୍ୱର୍ ରଅତେ ନାରୁଣ୍ଡ୍‍ ଇଞ୍ଜ ପ୍ରମାନିତ୍ ଆତ୍‍ତଣ୍ଡ୍, ଅନ୍‌ ତଡ଼୍ ଇଶ୍ୱର୍ ଜେ ମିଇ ଲୋପେ ଇୱୁସାରେ ପାଡ଼୍‍ୟି ମାଡ଼ିମିନ୍ଦେଣ୍ଡ୍, ଇଦ୍ ମିଡ଼୍ ନିଜେ ନିଜେ ପୁତ୍‍ତିଡ଼୍ ।
ACT 2:23 ଇଶ୍ୱର୍ ଅନାଦ୍‌ ଜୋଜନା ଲେକାମ୍‌ ଜିସୁଙ୍କ୍ ମିଇ କାୟ୍‍ତାଗ୍ ପସ୍‍ପିଦାନଙ୍କ୍ ଟିକ୍ ମାଡ଼ିମାତ୍‍ତଣ୍ଡ୍ ମେଣ୍ଡେ ମିଡ଼୍ ଅଂକିଙ୍କ୍‌ ପାପି ନାରୁଡ଼୍‍ ତଡ଼୍‍ କ୍ରୁଶତାଗ୍ ତାର୍‍ସ୍ପି ହାୱ୍‍କି ମାତ୍‍ତିଡ଼୍ ।
ACT 2:24 ଇତ୍‍କେ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ମୁକ୍ତି ମାଡ଼ି ପୁନର୍‍ଜିବିତ୍‍ ମାଡ଼୍‍ତଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ଜେ ଡଲିମାତ୍‍ତଣ୍ଡ୍ ଆଦ୍ ସମ୍ଭବ୍ ଆୟ୍‍ୟ ।
ACT 2:25 ଦାଉଦ୍ ଅନ୍‌ ବିଷୟ୍‍ତେ କେତୁତଣ୍ଡ୍, ‘ନାନ୍ ସାରେଦାମ୍ ପ୍ରବୁଙ୍କ୍ ନା’ ମୁନ୍‍ନେ ଉଡ଼୍‍ତାନ୍, ବାତେଙ୍କ୍ ଇତ୍କେ ନାନ୍‍ନେ ବେଲା ଦାନ୍ଦେ ଆୟନ୍, ଆଦିଙ୍କ୍ ଅଣ୍ଡ୍‌ ନା ତିନ୍ଦେପାକ୍ ମିନ୍ଦେଣ୍ଡ୍ ।
ACT 2:26 ଆଦିଙ୍କ୍ ନା ହୃଦୟ୍ କୁସ୍ ଆତ୍‍ତେ ନୁ ନା ମକତାଗାଙ୍କ୍ ୱେଡ଼୍‍କେତ୍‍ ଗଟି ପେୟ୍‍ତା । ମେଣ୍ଡେ ନାୱାଦ୍ ମେନ୍ଦୁଲ୍‍ ଡଲାନାଦ୍‍ ଆତ୍‍କେ ମିକା ନିଜାମ୍‍ ଆଶେ ମାଡ଼ି ବଞ୍ଚେମ୍‍ ଆଦ୍‍ତେ ।
ACT 2:27 ବାତେଙ୍କ୍ ଇତ୍‍କେ ନିମ୍‍ ନାକିଂଙ୍କ୍ ଡଲ୍‍ତଡ଼ାଦ୍‍ ଜଗତ୍‍ ୱିଡ଼୍‍ସ୍‍ୱିନ୍‍, ନିମ୍‍ ନି ବିଶ୍ୱସ୍ତ ସେବକିଙ୍କ୍ ପାତାଲ୍‍ ଲୋପେ ନଷ୍ଟ ଆଦାଙ୍କ୍ ହିୱିନ୍ ।
ACT 2:28 ନିମ୍‍ ନାକିଂଙ୍କ୍ ଜିୱୁଣ୍ଡ୍ ଆର୍ ତହଃସ୍‍ ମିନ୍ଦେନି ନୁ ନିୱାଦ୍‍ ଉପସ୍ଥିତି ନାକିଂଙ୍କ୍ ୱେଡ଼୍‍କ୍‍ ମାଡ଼ିତ୍ ।”
ACT 2:29 “ଆ ଇସ୍ରାଏଲୀୟ ଦାଦାଲଡ଼୍‍ ନୁ ଏଲାସ୍କିଡ଼୍‍, ବୁଜାମାଡ଼ି ନାନ୍‍ନେ ମିକିଂଙ୍କ୍ ମା ଆନିଦାଦିଡ଼୍ ବଂଶତଣ୍ଡ୍ ଦାଉଦ୍ ରାଜାନ୍ ବିଷୟ୍‍ତେ ସୁଦୁଟ୍ କେତ୍‍ତେ ପାର୍‍ଦ୍‍ତାନ୍ କି । ଅଣ୍ଡ୍‌ ଡଲ୍‍ତଣ୍ଡ୍ ନୁ ସମାଦି ପାଏମ୍‍ଆତ୍‍ତଣ୍ଡ୍, ମେଣ୍ଡେ ତାମାଦ୍ ସମାଦି ନେଣ୍ଡ୍ ଯାକ ଇଗେ ମାନ୍‍ଲୋପେ ମିନ୍ଦେ ।
ACT 2:30 ଅଣ୍ଡ୍‌ ୱେରଣ୍ଡ୍ ବାବବାଦୀ ମାତ୍‍ତଣ୍ଡ୍, ଆଦିଙ୍କ୍ ଇଶ୍ୱର୍ ଅଂକିଙ୍କ୍‌ ପ୍ରାମାଣ୍‍ ମାଡ଼୍‍ତାଦ୍ ଅଣ୍ଡ୍‌ ପୁଞ୍ଜ୍‍ମାତ୍‍ତଣ୍ଡ୍ । ଦାଉଦ୍ ବଂଶତଡ଼୍‍ ଲୋପେଙ୍କ୍ ଅର୍‍ତୁଙ୍କ୍ ରାଜାଲ୍ ସିଂହାସନ୍‍ ମାଡ଼ିତନ୍ ଇଞ୍ଜ ଇଶ୍ୱର୍ ପ୍ରାମାଣ୍‍ ମାଡ଼ିମାତ୍‍ତଣ୍ଡ୍ ।
ACT 2:31 ଇଶ୍ୱର୍ ବବିଷ୍ୟତ୍‍ତେ ବାଆତେ ମାଡ଼ାଙ୍କ୍ ଆଦୁତନ୍, ଦାଉଦ୍ ଆଦ୍ ପୁଞ୍ଜ୍, ମସୀହନ୍ ପୁନରୁତାନ୍ ବିଷୟ୍‍ତେ କେତ୍‍ତଣ୍ଡ୍; ‘ଅଂକିଙ୍କ୍‌ ଡଲ୍‍ତଡ଼ାଦ୍ ଜଗତ୍‍ତାଗ୍ ୱିଡ଼୍‍ସିୱଡ଼୍‍ । ଅନାଦ୍‌ ମେନ୍ଦୁଲ୍‍ ପାତାଲ୍‍ ଲୋପେ ନଷ୍ଟ ଆୟ୍‍ୟ ।’
ACT 2:32 ଇଶ୍ୱର୍ ଜିସୁଙ୍କ୍ ଡଲ୍‌ତାଗାଙ୍କ୍ ପୁନରୁତ୍‍ତାନ୍ ମାଡ଼୍‍ତଣ୍ଡ୍ ନୁ ମାନାଡ଼୍ ସାରେତଡ଼୍ ଇଦିନାଦ୍ ସାକ୍ଷି ଆତ୍‍ତାଡ଼୍‍ ।
ACT 2:33 ଜିସୁ ତାମ୍ ବାବାନ୍ ତିନ୍ଦେପାକ୍ ତେଦିମିନ୍ଦେଣ୍ଡ୍ ନୁ ବାବାନ୍ ପ୍ରତିଜ୍ଞା ଲେକାମ୍ ଅନାଗାଙ୍କ୍ ପବିତ୍ର ଆତ୍‍ମା ପାଏମ୍‍ଆତ୍‍ତଣ୍ଡ୍ । ଇଞ୍ଜେ ମିଡ଼୍ ବାଆତେ ଉଡ଼ୁତିଡ଼୍ ନୁ କେଞ୍ଜୁତିଡ଼୍, ଆଦ୍ ଇଶ୍ୱର୍‌ତାଦ୍‍ ଦାନ । ଆଦ୍ ଅଣ୍ଡ୍‌ ମା ପର୍‍ର ତସିସ୍‍ ମିନ୍ଦେଣ୍ଡ୍ ।
ACT 2:34 ଦାଉଦ୍ ନିଜେ ସ୍ୱର୍ଗତାଗ୍ ଆନଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ କେସ୍‍ମାତ୍‍ତଣ୍ଡ୍, ‘ପ୍ରବୁ ନା ପ୍ରବୁଙ୍କ୍ କେତ୍‍ତଣ୍ଡ୍,
ACT 2:35 ନାନ୍ ନି ଶତ୍ରୁଡ଼୍‍କ୍ ନିୱାଦ୍ କୁତୁଲ୍‍ ଡେକେତ୍ ମଦଲ୍‍ ମାଡ଼୍‍ୱେ ଯାକ, ନା ତିନ୍ଦେପାକ୍ କୁଦିମାନ୍ ।’”
ACT 2:36 “ହଁ ଇସ୍ରାଏଲ୍‍ଡ଼ି, ସାରେତଡ଼୍ ନିଶ୍ଚୟ୍‍ ପୁନୁଟ୍ ଯେ, ବେନ୍ ଜିସୁଙ୍କ୍ ମିଡ଼୍ କ୍ରୁଶତାଗ୍ ଆୱକ୍‍ତିଡ଼୍‍, ଇଶ୍ୱର୍ ଅଂକିଙ୍କ୍‌ ପ୍ରବୁ ନୁ ମସୀହ ରେଣ୍ଡ୍ ପେଦେର୍‍ ଇତ୍‌ତଣ୍ଡ୍‌ !”
ACT 2:37 ବେସୁଟ୍‌ ନାରୁଡ଼୍ ଇଦ୍ କେଞ୍ଜ୍‍ତଡ଼୍, ଅଡ଼୍‌ ଗାଟି ହୃଦୟତେ ଦାନ୍ଦେ ଆତ୍‍ତଡ଼୍ ନୁ ପିତର୍ ନୁ ବାଗାତ୍ ପ୍ରେରିତ ଶିଷ୍ୟଡ଼୍‍କ୍ କେତ୍‍ତଡ଼୍, “ଦାଦାଲଡ଼୍‍ ମାନାଡ଼୍ ବାଆତେ ମାଡ଼ିକାଡ଼୍ ?”
ACT 2:38 ପିତର୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ହେର୍କା ମାଡ଼ି ସାରେତଡ଼ି ପାପ୍‍ତାଗାଙ୍କ୍ ମାଲ୍‍ମୁଟ୍ ନୁ ପାପ୍ କେମା ସେଙ୍ଗେ ଜିସୁ କ୍ରିଷ୍ଟନ୍ ପେଦେର୍‍ତେ ଏର୍‍ଦିକ୍ଷା ଆୟ୍‍ମୁଟ୍; ଆଲେକେ ମିଡ଼୍ ଇଶ୍ୱର୍‌ତେ ଉପହାର୍, ପବିତ୍ର ଆତ୍ମା ପାଏମ୍‍ଆଦ୍‍ତିଡ଼୍‍ ।
ACT 2:39 ବାତେଙ୍କ୍ଇତ୍‍କେ ଇଶ୍ୱର୍‌ତେ ପ୍ରତିଜ୍ଞା ମିଇ ସେଙ୍ଗେ, ମିଇ ପିଲାନ୍ ସେଙ୍ଗେ ନୁ ଜେକେ ମାନ୍ଦାନଡ଼୍ ବେନଡ଼୍‍କ୍ ପ୍ରବୁ ଇଶ୍ୱର୍ କାର୍‍ଙ୍ଗ୍‍ତଣ୍ଡ୍, ଅଡ଼୍‌ ସାରେତଡ଼୍ ସେଙ୍ଗେ ମାଡ଼୍‍ତଣ୍ଡ୍ ।”
ACT 2:40 ପିତର୍ ଅଡ଼୍‌‍କିଂଙ୍କ୍ ଅନୁରଦ୍‌‍ ମାଡ଼ାନାଦ୍‍ ନୁ ନାର୍‍ଗେ ଲେକାତ୍ ସାକ୍ଷ୍ୟ ଇସ୍‌ କେତ୍‍ତାନ୍, “ଇ କାରାପ୍ ନାରୁଡ଼୍ ସେଙ୍ଗେ ୱାସମିନ୍ଦେନ୍ ଶାସ୍ତିତାଗାଙ୍କ୍ ନିଜେ ନିଜେତିଙ୍କ୍ ରକ୍ଷା ମାଡ଼ାଟ୍ ।”
ACT 2:41 ଅଡ଼୍‌ ଲୋପେଙ୍କ୍ ନାର୍‍ଗେ ନାରୁଡ଼୍ ଅନ୍‌ ଗଟ୍‍ତେ ବିଶ୍ୱାସ୍ ମାଡ଼ି ଏର୍‍ଦିକ୍ଷା ହତ୍‍ତଡ଼୍ । ଆଦ୍‍ନାଣ୍ଡ୍ ମାତର୍ ମୁଣ୍ଡ୍ ହଜାର୍‌ ନାରୁଡ଼୍ ଶିଷ୍ୟଡ଼୍ ଦଲ୍‍ତାଗ୍ କାୟ୍‍ଲ୍‍ତଡ଼୍ ।
ACT 2:42 ଅଡ଼୍‌ ପ୍ରେରିତ ଶିଷ୍ୟଡ଼ାଦ୍ ଶିକ୍ଷାତାଗ୍, ସହବାଗିତାଗ୍, ରୂଟି ଉହୁତାନାଗ୍ ନୁ ପ୍ରାର୍ତନା ମାଡ଼ାନାଗ୍ ଅଣ୍ଡୟ୍‌‍ମନ୍‍ ଆସ୍ ମାତ୍‍ତଡ଼୍ ।
ACT 2:43 ପ୍ରେରିତ ଶିଷ୍ୟଡ଼୍ ନାର୍‍ଗେ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼ିୟି ମାଡ଼୍‍ତଡ଼୍ ନୁ ସାରେତଡ଼୍ ଆଗାଙ୍କ୍ କାବା ଆସ୍ ୱେର୍‍ତଡ଼୍ ।
ACT 2:44 ବିଶ୍ୱାସୀଡ଼୍‍ ସାରେତଡ଼୍ ତଡ଼୍ ସାଙ୍ଗ ଆତ୍‍ତଡ଼୍ ନୁ ଅଣ୍ଡୟାଗେ କାୟ୍‍ଲି ଅଡ଼ାଦ୍‌ ସାରେ ସମ୍ପତିତିଙ୍କ୍ ତୁହୁସ୍‍ତଡ଼୍ ।
ACT 2:45 ଅଡ଼୍‌ ନିଜେ ନିଜେତ୍ ସମ୍ପତିତିଙ୍କ୍ ୱାମି, ପାଏମ୍‍ଆତ୍‍ତେ ଡାବ୍‍କିଙ୍କ୍ ସାରେତଡ଼ାଦ୍ ଦର୍‍କାଡ଼୍ ଲେକାମ୍ ସାରେତଡ଼୍‌କିଂଙ୍କ୍ ତୁହୁସ୍‍ତଡ଼୍ ।
ACT 2:46 ଅଡ଼୍‌ ସାରେଦିନେ ଉପବାସ୍ ମନ୍ଦିର୍‍ତାଗ୍ ୱେରଡ଼୍ ଦଲ୍‍ ଆସ୍ ଗୁଡ଼ମାତ୍‍ତଡ଼୍ ନୁ ୱେଡ଼୍‍କେତେ ନୁ ସରଲ୍‍ ହୃଦୟତେ,
ACT 2:47 ଅନୁଗ୍ରହ ପାଏମ୍‍ଆତ୍‍ତେ ନାରୁଡ଼୍‍ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ି ଲକ୍ ଲକ୍ ରୂଟି ଉହୁସ୍ ତିଞ୍ଜମାତ୍‍ତଡ଼୍ । ଅଡ଼୍‌ ସାରେତଡ଼୍ ବିଶ୍ୱାସୀ ଆଦ୍‍ତଡ଼୍ ନୁ ନିତ୍‍ଦିନ୍ ପରିତ୍ରାଣ୍ ପାଏମ୍‍ଆତ୍‍ତେ ନାରୁଡ଼୍‍କିଂଙ୍କ୍ ପ୍ରବୁ ଅଡ଼ାଦ୍‌ ଦଲ୍‍ତାଗ୍ କାଲ୍‍ପ୍‍ତଣ୍ଡ୍ ।
ACT 3:1 ଅଣ୍ଡୟ୍‌‍ଦିନ୍ ପିତର୍ ନୁ ଯୋହନ୍‌ ପ୍ରାର୍ତନା ସମୟ୍‍ତେ ପାୟାଲ୍ ମୁଣ୍ଡ୍ ଗାଣ୍ଟାତ୍‍ ୱେଲେ ପ୍ରାର୍ତନା ମାଡ଼ାନ୍ ମନ୍ଦିର୍‍ତାଗ୍ ଆଞ୍ଜମାତ୍‍ତଡ଼୍ ।
ACT 3:2 ଆସୁଟେ ଆଗେ “ସୁନ୍ଦର୍,” ପେଦେର୍‍ତାଦ୍ ମାର୍‍ତାଗ୍ ୱେରଣ୍ଡ୍ ନାରୁଣ୍ଡ୍‍ ମାତ୍‍ତଣ୍ଡ୍, ଅଣ୍ଡ୍‌ ଜନମ୍ କନ୍‍ସ୍ କୁଟାଲ୍ । ମନ୍ଦିର୍‍ତାଗ୍ ଆଞ୍ଜମାନ୍ଦାନ୍ ନାରୁଡ଼ାଗାଙ୍କ୍ ବିକ୍ୟା ତାଲ୍‍କାନ୍ ମାଇଦିଙ୍କ୍ ସାରେଦିନ୍ ଅଣ୍ଡ୍‌ ମାର୍ ଗାର୍‍ରେ କାଞ୍ଜୀ ଆଞ୍ଜମାତ୍‍ତଣ୍ଡ୍ ।
ACT 3:3 ପିତର୍ ନୁ ଯୋହନ୍‌‌ତିଙ୍କ୍ ମନ୍ଦିର୍‍ ଲୋପେ ଆଦାନାଦ୍ ଉଡ଼ି, ଅଣ୍ଡ୍‌ ଅଡ଼୍‌‍କିଂଙ୍କ୍ ଅନୁରଦ୍‌‍ ମାଡ଼ି କେତ୍‍ତଣ୍ଡ୍ ।
ACT 3:4 ଅଡ଼୍‌ ଯୋହନ୍‌‌ତିଙ୍କ୍ ଅଣ୍ଡୟ୍‌‍ କଣ୍ଡେତେ ଉଡ଼୍‍ତଡ଼୍ ନୁ ପିତର୍ କେତ୍‍ତଣ୍ଡ୍, “ମାୟାକ୍ ଉଡ଼େ !”
ACT 3:5 ଆସୁଟେ ଅଣ୍ଡ୍‌ ଅଡ଼୍‌ଆଗାଙ୍କ୍‌ ବାତେଆୟି ପାହେମ୍ ଆତ୍‍ତାଙ୍କ୍ ଆଶେମାଡ଼ି ଅଡ଼ାକ୍ ଉଡ଼ି ମାତ୍‍ତଣ୍ଡ୍ ।
ACT 3:6 ଇତ୍‍କେ ପିତର୍ କେତ୍‍ତଣ୍ଡ୍, “ନାୟାଗ୍ ସୁନା ଡାବ୍‍କ୍ ଇଲା, ମାତ୍ରମ୍‍ ବାଆତେ ମିନ୍ଦେ, ନାନ୍ ନିକିଂଙ୍କ୍ ଇଦୁତାନ୍; ନାଜରିତିୟ ଜିସୁ କ୍ରିଷ୍ଟନ୍‍ ପେଦେର୍‍ତେ ନାନ୍ ନିକିଂଙ୍କ୍ ଗଟ୍ ଇଦୁତାନ୍ ତେଦ୍‍ଦେ ନୁ ତାଆକେ !”
ACT 3:7 ତାନ୍‍ପେର୍କେ ଅଣ୍ଡ୍‌ ଅନାଦ୍‌ ତିନ୍ଦେ କାଇଦିଙ୍କ୍ ପଇସ୍‍ ତେହେତ୍‍ତଣ୍ଡ୍ । ଆସୁଟେ ସାଙ୍ଗେ ସାଙ୍ଗେ ଅନ୍‌ ଡେକା ନୁ ଡେକ୍‍ଗାଟି ଶକ୍ତି ଆତ୍‍ତା ।
ACT 3:8 ମେଣ୍ଡେ ଅଣ୍ଡ୍‌ ତୁଲି ତେଦ୍‍ତଣ୍ଡ୍, ମେଣ୍ଡେ ତାଆକାଙ୍କ୍ ପସ୍‍ପ୍‍ତଣ୍ଡ୍ । ତାନ୍‍ପେର୍କେ ଅଣ୍ଡ୍‌ ତାଆକି ତାଆକି, ତୁଲି ତୁଲି ମେଣ୍ଡେ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ି ମାଡ଼ି ଅଡ଼୍‌ ତଡ଼୍ ମନ୍ଦିର୍‍ତାଗ୍ ଆତ୍‍ତଣ୍ଡ୍ ।
ACT 3:9 ଆଗେତ୍‍ ନାରୁଡ଼୍ ସାରେତଡ଼୍ ଅଂକିଙ୍କ୍‌ ତାଆକାନାଦ୍ ନୁ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ାନାଦ୍ ଉଡ଼୍‍ତଡ଼୍;
ACT 3:10 ଅଂକିଙ୍କ୍‌ ମନ୍ଦିର୍‍ତେ ସୁନ୍ଦର୍ ମାର୍‍ ଗାର୍‍ରେ କୁଦିମାନ୍ଦାନ୍ ବିକାରୀ ଇଞ୍ଜ ପୁତ୍‍ତଡ଼୍ ନୁ ଅନ୍‌ ସେଙ୍ଗେ ବାଆତେ ଗଟେମ୍ ଆତ୍‍ତେ, ସାରେ ଉଡ଼ି ଅଡ଼୍‌ ବାକ୍‍ୱା ନୁ କାବା ଆତ୍‍ତଡ଼୍ ।
ACT 3:11 ଆ ନାରୁଣ୍ଡ୍‍ ପିତର୍ ନୁ ଯୋହନ୍‌‌ତିଙ୍କ୍ ପୟିସ୍‍ମାନ୍ଦାନ୍ ୱେଲେ ନାରୁଡ଼୍ ସାରେତଡ଼୍ ଶଲୋମନ୍‍ତେ ମଣ୍ଡପ୍‍ତାଗ୍ ଉଡ଼ି କାବା ଆସ୍‍ ଅଡ଼୍‌ ଗାର୍‍ରେ ମିରି ୱାତ୍‍ତଡ଼୍ ।
ACT 3:12 ପିତର୍ ଆଦ୍ ଉଡ଼ି ନାରୁଡ଼୍‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, ହୋ ଇସ୍ରାଏଲୀୟ ନାରୁଡ଼ି, ବାତେଙ୍କ୍ ମିଡ଼୍ କାବା ଆଦୁତିଡ଼୍ ନୁ ମାକିଂଙ୍କ୍ ୱେରଡ଼୍ କଣ୍ଡେତେ ଉଡ଼ୁତିଡ଼୍ ? ମିଡ଼୍‍ ବାତ୍‍ ଆଲ୍‍ସୁତିଡ଼୍‍ ମାମ୍‍ ମାୱାଦ୍‍ ନିଜର୍‍ ବକ୍ତି ନୁ ଶକ୍ତି ତଡ଼୍ ଇଣ୍ଡ୍‍ ନାରୁଙ୍କ୍‍ ତାଆକାନ୍‍ ଶକ୍ତି ଇତ୍‍ତମ୍‍ ?
ACT 3:13 ଅବ୍ରାହାମ୍, ଇସ୍‍ହାକ୍ ନୁ ଯାକୁବ୍‍ତେ ଇଶ୍ୱର୍, ମାନ୍‍ ଆନିଦାଦିଡ଼୍‍ତେ ଇଶ୍ୱର୍, ତାମ୍ ଦାସ ଜିସୁଙ୍କ୍ ସ୍ୱର୍ଗୀୟ ଗୌରବ୍‍ ମାଡ଼୍‍ତଣ୍ଡ୍ । ଇତ୍‍କେ ମିଡ଼୍ ଅଂକିଙ୍କ୍‌ ପେଦାନ୍ କାଇଦେ ସମର୍‍ପନ୍ ମାଡ଼୍‍ତିଡ଼୍ । ଇଦ୍ ଲେକାମ୍ ପିଲାତ ଅଂକିଙ୍କ୍‌ ମୁକ୍ତି ମାଡ଼ାଙ୍କ୍ ବିଚାର୍ ମାଡ଼ିମାତ୍‍କେ ମିକା, ଅଂକିଙ୍କ୍‌ ପିଲାତନ୍ ମୁନେ ମନା ମାଡ଼୍‍ତିଡ଼୍ ।
ACT 3:14 ଅଣ୍ଡ୍‌ ୱେରଣ୍ଡ୍ ପବିତ୍ର ନୁ ଦାର୍ମିକ୍ ନାରୁଣ୍ଡ୍‍, ଇତ୍‍କେ ମିଡ଼୍ ଅଂକିଙ୍କ୍‌ ମନା ମାଡ଼୍‍ତିଡ଼୍ ନୁ ଅନ୍‌ ବଦଲ୍‍ତେ ମିଡ଼୍ ୱେରଣ୍ଡ୍ ନାରୁଙ୍କ୍‌ ଆୱ୍‌କାନଙ୍କ୍‍ ମୁକ୍ତ ମାଡ଼ାନ୍ ସେଙ୍ଗେ ପୀଲାତଙ୍କ୍ କେତ୍‍ତିଡ଼୍‍ ।
ACT 3:15 ବେନ ଜିୱୁଣ୍ଡ୍ ହାର୍ ତଅତିତଣ୍ଡ୍, ମିଡ଼୍ ଅଂକିଙ୍କ୍‌ ଆୱ୍‍କ୍‌ତିଡ଼୍‍, ଇତ୍‍କେ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ମେଣ୍ଡେଜିୱେ ମାଡ଼୍‍ତଣ୍ଡ୍ ନୁ ମାମ୍‍ମେ ଅଦୁତମ୍ ଇଦିନାଦ୍ ସାକ୍ଷି ।
ACT 3:16 ଅନ୍‌ ପେଦେର୍‍ତେ ଶକ୍ତି କେ ଇଣ୍ଡ୍ କୁଟାଙ୍କ୍ ସୁସ୍ଥ ମାଡ଼୍‍ତେ । ଆଦ୍ ମିଡ଼୍ ନିଜେ ଉଡ଼ି ନିଜାମ୍ ଇଞ୍ଜ ପୁତ୍‍ତିଡ଼୍, ଆଦ୍ ମାତ୍ରମ୍‍ ଅନ୍‌ ପେଦେର୍‍ତିଙ୍କ୍ ବିଶ୍ୱାସ୍ ମାଡ଼୍‍ତାଙ୍କ୍ ସମ୍ଭବ୍ ଆତ୍‍ତେ । ଜିସୁନାଗ୍ ବିଶ୍ୱାସ୍ ମାଡ଼୍‍ତାଙ୍କ୍ ଅଣ୍ଡ୍‌ ଜେ ସୁସ୍ଥ ଆତ୍‍ତଣ୍ଡ୍, ଇଦ୍ ମିଡ଼୍ ଉଡ଼୍‍ତିଡ଼୍‍ ।
ACT 3:17 “ଆଦିଙ୍କ୍ ଏୟ୍‍ ଇସ୍ରାଏଲୀୟ ଦାଦାଲଡ଼୍‍ ନୁ ଏଲାସ୍କ୍‍, ମିଡ଼୍ ନୁ ମିଇ ନେତାଲଡ଼୍ ଜିସୁନ୍‍ ସେଙ୍ଗେ ବାଆତେ ମାଡ଼୍‍ତିଡ଼୍, ଆଦ୍ ପୁନ୍‍ୱେକଟ ମାତ୍‍ତିଡ଼୍‍, ଇଦ୍ ନାନ୍ ପୁତ୍‍ତାନ୍ ।
ACT 3:18 ନାର୍‍ଗେ ଦିନାତ୍ ମୁନେଙ୍କ୍ ସାରେ ବାବବାଦୀଡ଼୍‍ ପାୟୁର୍‍ତାଗାଙ୍କ୍ ଇଶ୍ୱର୍ ଗୋଷ୍‍ନା ମାଡ଼ିମାତ୍‍ତଣ୍ଡ୍ ଯେ, କ୍ରିଷ୍ଟଙ୍କ୍ ଦୁଃକାମ୍ କଷ୍ଟ ମାଡ଼୍‍ୱେୟ୍‍ତିତ୍‍ । ଇଦ୍ ରକମ୍ ଅଣ୍ଡ୍‌ ଆଦିଙ୍କ୍ ସାରେ ମାଡ଼୍‍ତଣ୍ଡ୍ ।
ACT 3:19 ହେର୍କା ମାଡ଼ି ଇଶ୍ୱର୍‌ତେ ଗାର୍‍ରେ ମାଲ୍‍ସ୍ ୱାଡ଼ାଟ୍ । ଆସୁଟେ ଅଣ୍ଡ୍‌ ମିୟାଦ୍ ପାପ୍ କ୍ଷମା ମାଡ଼ିତନ୍ ।
ACT 3:20 ଆଦିଙ୍କ୍ ପ୍ରବୁନାଗାଙ୍କ୍ ମିଡ଼୍ ପବିତ୍ର ଆତ୍ମାନ୍‍ ଶକ୍ତି ପାଏମ୍ ଆଦ୍‍ତିଡ଼୍, ଇଶ୍ୱର୍ ମିଇ ମାୟ୍‍ଦିଙ୍କ୍ ମୁନେନ୍ ଏଞ୍ଚ୍‍ତେ ମସୀହ ଜିସୁଙ୍କ୍ ମେଣ୍ଡନ୍‍ନ୍ଦାମ୍ ରହତିତଣ୍ଡ୍ ।
ACT 3:21 ମୁନେତ୍ କାଲାମ୍‍ତେ ପବିତ୍ର ବାବବାଦୀଡ଼୍‍ ତଡ଼୍ ଇଶ୍ୱର୍‌ତେ ଗଷନା ଲେକାମ୍ ସାରେ ବିଷୟ୍ ପୁନେ ଆଦ୍‍ଦାନ୍ ଯାକ ଅଣ୍ଡ୍‌ ସ୍ୱର୍ଗତାଗ୍‍ ମାନ୍‍ତଣ୍ଡ୍ ।
ACT 3:22 ଇଦ୍ ବିଷୟ୍‍ତେ ମଶାଲ୍‌‍ କେତ୍‍ତଣ୍ଡ୍, ‘ପ୍ରବୁ ଇଶ୍ୱର୍ ମିଇ ବକେତ୍ ନା ରକମ୍‍ ୱେରଣ୍ଡ୍ ବାବବାଦୀଙ୍କ୍ ରହତିତଣ୍ଡ୍ । ଅଣ୍ଡ୍‌ ମିଇ ନିଜେତ୍ ବିଶ୍ୱାସୀ ଲୋପେଙ୍କ୍ ୱେରଣ୍ଡ୍ । ଦାଦାଲ୍‌ ମିକିଂଙ୍କ୍ ବାତ୍ କେତିତଣ୍ଡ୍, ଆଦ୍ ସାରେ ବିଷୟ୍ ମିଡ଼୍ ପାଲନ୍ ମାଡ଼୍ ୱେୟ୍‍ତିତ୍ ।
ACT 3:23 ବେନଆଇ ଆ ବାବବାଦୀନ୍ ବାକ୍ୟ ପାଲନ୍ ମାଡ଼ନ୍, ଅଂକିଙ୍କ୍‌’ ଇଶ୍ୱର୍‌ତେ ନାରୁଡ଼ାଗାଙ୍କ୍ ୱେରେ ମାଡ଼ି ଦଂସ ମାଡ଼ିତଡ଼୍ ।
ACT 3:24 ଇଞ୍ଜେ ବାତ୍‍ ଗଟେମ୍‍ ଆଦୁତ୍‍ ଆଦ୍‍ ବିଷୟ୍‍ତେ ଶାମୁୟେଲ୍‍ ନୁ ଅଣ୍ଡ୍‌ ପେର୍‍କେ ବେସର୍ ବାବବାଦୀଡ଼୍‍ ଗଟ୍ କେତ୍‍ତଡ଼୍, ଅଡ଼୍‌ ସାରେତଡ଼୍ ମିକା ଇଦ୍ ଜୁଗ୍‍ ବିଷୟ୍‍ତେ ପ୍ରଚାର୍ ମାଡ଼୍‍ତଡ଼୍ ।
ACT 3:25 ବାବବାଦୀଡ଼୍‍ ପାୟୁର୍‍ତାଗାଙ୍କ୍ ଇଶ୍ୱର୍ ବେନ୍‍ସାରେ ପ୍ରତିଜ୍ଞା ମାଡ଼୍‍ତଣ୍ଡ୍, ଆଦ୍ ମିଇ ସେଙ୍ଗେ ଟିକ୍, ମେଣ୍ଡେ ଇଶ୍ୱର୍ ମିଇ ଆନିଦାଦିଡ଼୍ ତଡ଼୍ ବେନ୍ ଚୁକ୍ତି ତିଆର୍ ମାଡ଼୍‍ତଣ୍ଡ୍, ମିଡ଼୍ ଆଗେତ୍ ବାଗୀଦାର୍ । ଇଶ୍ୱର୍ ଅବ୍ରାହାମ୍‌ତିଙ୍କ୍‍ କେସ୍‍ମାତ୍‍ତଣ୍ଡ୍, ‘ମିଇ ବଂଶତଡ଼୍‍ ତଡ଼୍ ନାନ୍‍ନେ ପୃତିବିତାଗ୍ ସାରେ ନାରୁଡ଼୍‍କିଙ୍କ୍ ଆର୍ଶିବାଦ୍ ମାଡ଼ିତାନ୍ ।’
ACT 3:26 ଆଦିଙ୍କ୍ ଇଶ୍ୱର୍ ପ୍ରତମେ ମିଇ ସେଙ୍ଗେ ତାନ୍ ଦାସଡ଼୍‍କ୍‍ ଡଲ୍‍ତାଗାଙ୍କ୍‍ ତେଏସ୍‍ ରହତଣ୍ଡ୍, ବେଲାକି ଅଣ୍ଡ୍‌ ମିୟାଦ୍ ସାରେ ନାରୁଙ୍କ୍ ନିଜେତ୍ ନିଜେତ୍ କାରାପ୍ ହାର୍‍ତାଗାଙ୍କ୍ ମାଲ୍‍ପି ଆର୍ଶିବାଦ୍‍ ମାଡ଼ିତନ୍ ।”
ACT 4:1 ପିତର୍ ନୁ ଯୋହନ୍‌ ନାରୁଡ଼୍‍କିଂଙ୍କ୍ ଇଦ୍‍ରକମ୍ ଶିକ୍ଷା ଇଦାନ୍‍ୱେଲେ ମନ୍ଦିର୍‍ତେ ବେସ୍‍କ୍‍ତୁଡ଼୍‍ ଜାଜକୀଡ଼୍, ମନ୍ଦିର୍ ପ୍ରହରିଡ଼୍‍ତେ ସେନାପତି ନୁ ସାଦୁକୀଡ଼୍‍ ୱାସ୍ ହେୱୁତଡ଼୍ ।
ACT 4:2 ଅଡ଼୍‌ ବିଜାର୍‍ ଆତ୍‍ତଡ଼୍, ବାତେଙ୍କ୍ଇତ୍‍କେ ଜିସୁ ଡଲ୍‍ତାଗାଙ୍କ୍ ପୁନରୁତାନ୍ ଆତ୍‍ତନ୍ ଇଞ୍ଜ ଇର୍‍ୱୁଡ଼୍ ପ୍ରେରିତ ଶିଷ୍ୟଡ଼୍‌ ଶିକ୍ଷା ହିସମାତ୍‍ତଡ଼୍ ନୁ ଡଲ୍‍ତେନଡ଼୍‍ ମେଣ୍ଡେଅନ୍‌‍ଦାମ୍‍ ଜିୱେ ଆଦ୍‍ତଡ଼୍‍ ଇଞ୍ଜ ପ୍ରାମାନ୍‍ ମାଡ଼ମାତଡ଼୍‍ ।
ACT 4:3 ଆଦିଙ୍କ୍ ଅଡ଼୍‌ ଇର୍‍ୱୁଡ଼୍ ପ୍ରେରିତ ଶିଷ୍ୟଡ଼୍‍କ୍ ଗିରାପ୍ ମାଡ଼୍‍ତଡ଼୍ ନୁ ମେଣ୍ଡନ୍‍ଦିନ୍‍ ଯାକ ଅଡ଼୍‌‍କ୍ ଜେଲ୍‍ତାଗ୍ ନେହେତଡ଼୍, ବାତେଙ୍କ୍ଇତ୍‍କେ ଆସୁଟେ ମୁଲ୍‍ପୁଟ୍ ଆସ୍‍ମାତ୍‍ତେ ।
ACT 4:4 ଇତ୍‍କେ ଅଡ଼୍‌‍ୱାଦ୍‍ ଶିକ୍ଷା କେଞ୍ଜିମାନ୍ଦାନ୍‍ ନାର୍‍ଗେ ନାରୁଡ଼୍ ବିଶ୍ୱାସ୍ ମାଡ଼୍‍ତଡ଼୍ ନୁ ଅଡ଼୍‌‍ୱାଦ୍‍ ସଂକ୍ୟା ନାର୍ଗେ ଅସ୍‍ ମାତ୍ରମ୍‍ ପାଞ୍ଚ୍‍ ହଜାର୍‌ ଆତ୍‍ତେ ।
ACT 4:5 ମେଣ୍ଡନ୍‍ଦିନେ ଯିହୁଦି ନେତାଲଡ଼୍, ବୟସ୍କା ନାରୁଡ଼୍ ନୁ ଦର୍ମଗୁରୁଡ଼୍‍ ଯିରୁଶାଲେମ୍‍ତାଗ୍ ଅଣ୍ଡୟାଗେ ଗୁଡ଼୍‍ତଡ଼୍ ।
ACT 4:6 ଆଗେ ଅଡ଼୍‌ ବେଡ଼୍‍ୟେ ଜାଜକ୍ ହାନାନ, କାୟାପା, ଯୋହନ୍‌, ଆଲେକ୍‍ଜାଣ୍ଡାର୍ ନୁ ବେଡ଼୍‍ୟେ ଜାଜକ୍‍ ପରିବାର୍‍ତେ ମେଣ୍ଡେବାଗାତଡ଼୍‍କିଙ୍କ୍ କାଇଲ୍‍ତଡ଼୍‍ ।
ACT 4:7 ଅଡ଼୍‌ ପ୍ରେରତ ଶିଷ୍ୟଡ଼୍‍କ୍ ମୁନେ ତାସ୍ ପ୍ରଶ୍ନ ମାଡ଼୍‍ତଡ଼୍, “ମିଡ଼୍ ଇଦ୍ ସାରେ ବେଲା ମାଡ଼ୁତିଡ଼୍ ? ବେନନ୍ ଶକ୍ତିତେ ନୁ ବେନନ୍ ପେଦେର୍‍ତେ ଇଦ୍ ମାଡ଼ୁତିଡ଼୍ ?”
ACT 4:8 ଆସୁଟେ ପିତର୍ ପବିତ୍ର ଆତ୍‍ମାତେ ପୁର୍ଣ୍ଣ ଆସ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଏୟ୍‍ ନାରୁଡ଼୍‍ତେ ନେତାଲଡ଼୍ ନୁ ବୟସ୍କା ନାରୁଡ଼ି;
ACT 4:9 ନେଣ୍ଡ୍ ଯଦି ମାକିଂଙ୍କ୍ ଇ କୁଟାନ୍ ଲେକେତ୍ ଆତ୍‍ତେ ପାଡ଼ିୟି ବିଷୟ୍‍ତେ ପାଚ୍ରାମାଡ଼ିତଡ଼୍‍ ଜେ, ଇଣ୍ଡ୍ ନାରୁଣ୍ଡ୍‌ ବେଲା ଅସ୍ ସୁସ୍ଥ ଆତ୍‍ତଣ୍ଡ୍,
ACT 4:10 ଆଦିଙ୍କ୍ ମିଡ଼୍ ନୁ ଇସ୍ରାଏଲ୍‍ତେ ସାରେତଡ଼୍ ପୁନ୍ଦ୍‍ ୱେୟ୍‍ତିତ୍ ଜେ, ମିଇ ମୁନେ ନିସ୍ ମାନ୍ଦାନ୍ ଇ ନାରୁଣ୍ଡ୍ ମାତ୍ରମ୍‍ ନାଜରିତିୟ ଜିସୁ କ୍ରିଷ୍ଟନ୍ ପେଦେର୍‍ତେ ଶକ୍ତିତଡ଼୍ ସାରେ ସୁସ୍ଥ ଆତ୍‍ତଣ୍ଡ୍ । ବେନଙ୍କ୍ ମିଡ଼୍ କ୍ରୁଶତାଗ୍ ଆୱକ୍‍ତିଡ଼୍‍ ମେଣ୍ଡେ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ମେଣ୍ଡନ୍‍ଦାମ୍ ଜିୱୁନ୍ ମାଡ଼୍‍ତଣ୍ଡ୍ ।
ACT 4:11 ଜିସୁ ଆଦୁତନ୍ ୱେରଣ୍ଡ୍ ବେନଙ୍କ୍ ଦର୍ମଶାସ୍ତ୍ର କେତିତ୍‍, ‘ବେନ୍ କାଲ୍‍ଦିଙ୍କ୍ ଲକ୍ ତିଆର୍‍ମାଡ଼ାନଡ଼୍‍ ପାସ୍କ୍‍ତଡ଼୍‍, ଆଦ୍ କାଲ୍ ସାରେତିଙ୍କ୍ ଲେକେତ୍ ଆତ୍‍ତେ ।’
ACT 4:12 ମାତ୍ରମ୍‍ ଅନ୍‌ ତଡ଼୍ ପରିତ୍ରାନ୍‍ ସମ୍ଭବ୍‍ ଆଦ୍‍ତେ, ବାତେଙ୍କ୍ଇତ୍‍କେ ଇଦ୍ ସ୍ୱର୍ଗତାଗ୍ ମାନ୍ଦାନ୍ ମେଣ୍ଡେଅନ୍‌ ପେଦେର୍‍ତଡ଼୍‍ ନାରୁଡ଼୍‍କିଂଙ୍କ୍ ମୁକ୍ତି ଦର୍‍କ ।”
ACT 4:13 ପିତର୍ ନୁ ଯୋହନ୍‌ ଅଶିକିତ୍‍ ନୁ ସାଦାରନ୍‍ ନାରୁଡ଼୍ ମାତ୍‍ତଡ଼୍ ଇଞ୍ଜ ବେଡ଼ିୟ୍‍ମିଟିଙ୍କ୍‍ତେ ସଦସ୍ୟଡ଼୍ ପୁଞ୍ଜ୍‍ମାତ୍‍ତଡ଼୍ । ଆଦିଙ୍କ୍ ଇର୍‍ୱୁଡ଼ାଦ୍ ସାହାସ୍ ଉଡ଼ି ଅଡ଼୍‌ କାବା ଆତ୍‍ତଡ଼୍ ମେଣ୍ଡେ ଅଡ଼୍‌ ଇର୍‍ୱୁଡ଼୍ ଜିସୁନ୍‍ ସାଙ୍ଗ ମାତ୍‍ତଡ଼୍ ଇଞ୍ଜ ଅଡ଼୍‌ ପୁତ୍‍ତଡ଼୍ ।
ACT 4:14 ଇତ୍‍କେ ଅଡ଼୍‌ ବିରଦ୍‍ ମାଡ଼ି ବାଆତେ କେତାଙ୍କ୍ ପାର୍‍ୱଡ଼୍, ବାତେଙ୍କ୍ ଇତ୍‍କେ ସୁସ୍ଥ ଆସ୍‍ମାନ୍ଦାନ୍ ନାରୁଙ୍କ୍ ପିତର୍ ନୁ ଯୋହନ୍‌‌ ତଡ଼୍ ନିଶ୍‍ ମାନ୍ଦାନାଦ୍ ଅଡ଼୍‌ ଉଡ଼୍‍ତଡ଼୍ ।
ACT 4:15 ଆଦିଙ୍କ୍ ନେତାଲଡ଼୍ ନାରୁଡ଼୍‍କିଂଙ୍କ୍ ମିଟିଙ୍ଗ୍‍ତାଗାଙ୍କ୍ ବାୟିଦେ ପେସ୍‍ପିସ୍‍ ଅଡ଼୍‌ ବିଷୟ୍‍ତେ ତାମ୍‍ତାମ୍‍ ଲୋପେ ତିର୍‍ୟାତିର୍‍ୟି ଆତ୍‍ତଡ଼୍ ।
ACT 4:16 ଅଡ଼୍‌ କେତ୍‍ତଡ଼୍, “ମାମ୍ ଇଡ଼୍‍ ସେଙ୍ଗେ ବାଆତେ ମାଡ଼ିତାଡ଼୍ ? ଯିରୁଶାଲେମ୍‍ତାଗ୍ ସାରେତଡ଼୍ ଇଡ଼୍ ମାଡ଼୍‍ତେ ଆଶର୍ଯ୍ୟ ପାଡ଼୍‍ୟି ବିଷୟ୍‍ତେ ପୁତ୍‍ତଡ଼୍ । ମାମ୍ ଇଦ୍ ଅସ୍ୱୀକାର୍ ମାଡ଼ାନଙ୍କ୍ ପାର୍‍ୱମ୍ ।
ACT 4:17 ବାତେଙ୍କ୍ ଇତ୍‍କେ ଇଦ୍ ଗଟ୍ ବେଲା ନାରୁଡ଼୍ ଲୋପେ ମେଣ୍ଡେ ଅଦିକ୍‌ ପ୍ରଚାର୍ ଆୟ୍‍ମାକି, ଇଦିନ୍‍ ସେଙ୍ଗେ ଜିସୁନ୍‍ ପେଦେର୍‍ତେ ମେଣ୍ଡେ ବେନଡ଼୍‍କିଂଙ୍କ୍ ବାଆତେ କେଲ୍‍ମାକିଡ଼୍ ଇଞ୍ଜ ଅଡ଼୍‌‍କିଂଙ୍କ୍ ସତର୍କ ମାଡ଼ିକାଡ଼୍ ।”
ACT 4:18 ଆଦିଙ୍କ୍ ଅଡ଼୍‌ ଅଡ଼୍‌‍କିଂଙ୍କ୍ କାର୍‍ଙ୍ଗି ଜିସୁନ୍‍ ପେଦେର୍‍ତେ ମେଣ୍ଡେ ବାଆତେ କେଲ୍‍ମାକିଡ଼୍ ବା ଶିକ୍ଷା ହିମାକିଡ଼୍‍ ଇଞ୍ଜ ଗଟ୍ ହିତ୍‍ତଡ଼୍ ।
ACT 4:19 ବାତେଙ୍କ୍ଇତ୍‍କେ ପିତର୍ ନୁ ଯୋହନ୍‌ ଅଡ଼୍‌‍କିଂଙ୍କ୍ ଉତର୍‍ ହିତ୍‍ତଡ଼୍, “ମିୟାଦ୍ ଗଟ୍ କେଞ୍ଜୀତମ୍ ନା ଇଶ୍ୱର୍‌ତେ ଗଟ୍ କେଞ୍ଜିତମ୍, ବେନ୍ ବିଷୟ୍ ଇଶ୍ୱର୍‌ତେ କଣ୍ଡେତେ ସାୟେ, ଆଦ୍ ମିଡ଼୍ ନିଜେ ନିଜେ ଲୋପେ ବିଚାର୍ ମାଡ଼ାଟ୍ ।
ACT 4:20 ବାତେଙ୍କ୍ଇତ୍‍କେ ମାମ୍‍ମେ ବାଆତେ ଉଡ଼୍‍ତମ୍ ନୁ କେଞ୍ଜ୍‍ତମ୍, ଆଦ୍ ବିଷୟ୍ କେଲ୍‍ୱେ ମାନ୍ଦାଙ୍କ୍ ପାର୍‍ୱମ୍ ।”
ACT 4:21 ଇତ୍‍କେ ମହାସବା ଅଡ଼୍‌‍କିଂଙ୍କ୍ ମେଣ୍ଡେ ଅଦିକ୍‌ ସତର୍କ ମାଡ଼ି ୱିଡ଼୍‍ସିତ୍‍ତେ । ଅଡ଼୍‌‍କିଂଙ୍କ୍ ଦଣ୍ଡ୍ ହିଦାନାଦ୍ ଦର୍‌କାର୍‌ ଆୟ୍‍ୟ ଇଞ୍ଜ ଅଡ଼୍‌ ପୁତ୍‍ତଡ଼୍, ବାତେଙ୍କ୍ଇତ୍‍କେ ବାଆତେ ଗଟେମ୍ ଆତ୍‍ତେ ଆଦିନ୍ ସେଙ୍ଗେ ନାରୁଡ଼୍ ସାରେତଡ଼୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିଦାଙ୍କ୍ ପସ୍‍ପ୍‍ତ୍‍ତଡ଼୍ ।
ACT 4:22 ବେନ୍ ନାରୁଣ୍ଡ୍‌ ଇଦ୍ ଆଶର୍ଯ୍ୟ ପାଡ଼ିୟି ତଡ଼୍ ସୁସ୍ଥ ଆତ୍‍ତଣ୍ଡ୍, ଅନାଦ୍‌ ବୟସ୍‍ ଚାଲିଶ୍‍ ହେଣ୍ଡ୍‍କ୍ ପର୍‍ର ଆସ୍‍ମାତ୍‍ତେ ।
ACT 4:23 ପିତର୍ ନୁ ଜହନ୍‍ ମୁକ୍ତି ଆତ୍‍ତେ ସାଙ୍ଗେ ସାଙ୍ଗେ ତାମ୍ ଦଲ୍‍ତାଗ୍ ମାଲ୍‍ସ୍ ଆଦ୍‍ତଡ଼୍ ମେଣ୍ଡେ ମୁକ୍ୟ ଜାଜକ୍ ନୁ ବୟସ୍କା ନାରୁଡ଼୍ ବାତେଏ କେସ୍‍ମାତ୍‍ତଡ଼୍, ଆଦ୍ ଅଡ଼୍‌‍କିଂଙ୍କ୍ କେତ୍‍ତଡ଼୍ ।
ACT 4:24 ବିଶ୍ୱାସିଡ଼୍‍ ସାରେଗଟ୍‍ କେଞ୍ଜ୍‍ତେ ପେର୍‍କେ ସାରେତଡ଼୍ ଅଣ୍ଡୟାଗେ ଆସ୍ ଇଶ୍ୱର୍‌ତେ ଗାର୍‍ରେ ଇଦ୍‍ରକମ୍‍ ପ୍ରାର୍ତନା ମାଡ଼୍‍ତଡ଼୍, “ହଁ ପ୍ରବୁ, ନିମ୍‍ ସ୍ୱର୍ଗ, ପୃତିବିତାଗ୍, ସମୁଦ୍ର ନୁ ଆୱୁ ସାରେ ଲୋପେ ମାନ୍ଦାନ୍ ସାରେବିଷୟ୍‍ ତିଆର୍ ମାଡ଼୍‍ତିନ୍ ।
ACT 4:25 ପବିତ୍ର ଆତ୍ମା ତଡ଼୍ ନିମ୍‍ ଆନିଦାଦୀ ଦାଉଦ୍, ନିୱଣ୍ଡ୍ ଦାସନ୍‍, ପାୟୁର୍ ଇସ୍‌ ଇଦ୍ ଗଟ୍ କେସ୍‍ମାତ୍‍ତି; ‘ଅଣଇହୁଦୀ ନାରୁଡ଼୍ ବାତେଙ୍କ୍ କାଡ଼ାମ୍ ଆଦ୍‍ତଡ଼୍, ମେଣ୍ଡେ ନାରୁଡ଼୍ ବାତେଙ୍କ୍ କାରାପ୍ ଚିନ୍ତେ ମାଡ଼ୁତଡ଼୍ ?
ACT 4:26 ପ୍ରବୁନ୍ ବିରୁଦ୍‍ତେ ନୁ ତାନ୍ ମସୀହାନ୍‍ ବିରୁଦ୍‍ତେ ପୃତିବିତାଗ୍ ରାଜାଲଡ଼୍‍ ନିଜେତିଙ୍କ୍ ତିଆର୍ ମାଡ଼୍‍ତଡ଼୍ ମେଣ୍ଡେ ଶାସନ୍‍ମାଡ଼ାନଡ଼୍‍ ଅଣ୍ଡୟାଗେ ଆଦ୍‍ତଡ଼୍ ।’
ACT 4:27 ନିଜାମ୍ ହେରଦ୍ ନୁ ପନ୍ତୀୟ ପିଲାତ ଇଦ୍ ନାର୍‍ତାଗ୍ ଅଣଇହୁଦୀ ନୁ ଇସ୍ରାଏଲ୍‍ ନାରୁଡ଼୍ ତଡ଼୍ କାଇଲି ମିୱଣ୍ଡ୍ ପବିତ୍ର ଦାସ, ବେନଙ୍କ୍ ମିଡ଼୍ ମସୀହା ଇଞ୍ଜ ଏଞ୍ଚିମିନ୍ଦେଡ଼ି, ଅଣ୍ଡ୍‌‍ ଜିସୁନ୍‍ ବିରୁଦ୍‍ତେ ଷଡ଼ଜନ୍ତ୍ର ମାଡ଼୍‍ତଡ଼୍ ।
ACT 4:28 ମିୟାଦ୍ ଶକ୍ତି ନୁ ଇଚ୍ଛା ଲେକାମ୍ ବାଆତେ ଗଟେମ୍ ଆତ୍‍ତେ ଇଞ୍ଜ ମିଡ଼୍ ତିଆର୍ ମାଡ଼ିମାତ୍‍ତିଡ଼୍, ଅଡ଼୍‌ ଅଣ୍ଡୟାଗେ ଆସ୍ ଆୱୁସାରେ ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ ।
ACT 4:29 ପ୍ରବୁ, ଅଡ଼୍‌ ମାକିଂଙ୍କ୍ ବେନ୍ ଦମକ୍ ହିତ୍‍ତଡ଼୍, ନିମ୍ମେ ଆଦ୍ ବିଷୟ୍ ସେଙ୍ଗେ ମନଯୋଗ୍ ମାଡ଼େ ନୁ ସାହାସ୍ ମାଡ଼ି ନିୟାଦ୍ ସୁସମାଚାର୍ ପ୍ରଚାର୍ ମାଡ଼ାଙ୍କ୍, ମିୱଡ଼୍‍ ଇ ଦାସଡ଼୍‍କିଂଙ୍କ୍ ସାହାସ୍‍ ହିମ୍ ।
ACT 4:30 ନିୱଣ୍ଡ୍ ପବିତ୍ର ଦାସ ଜିସୁନ୍‍ ପେଦେର୍‍ତେ ସୁସ୍ଥ ମାଡ଼ାନ୍ ସେଙ୍ଗେ ନୁ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ସାଦନା ମାଡ଼ାନ୍ ମାଇଦିଙ୍କ୍ ନିୟାଦ୍ କାୟି ହାଆମ୍ ।”
ACT 4:31 ଅଡ଼୍‌ ପ୍ରାର୍ତନା ମାଡ଼ାନ୍ ୱେଲେ ବେନ୍ ପଡ଼୍‍ୟେତାଗ୍ ଅଣ୍ଡୟାଗେ ଆସ୍‍ମାତ୍‍ତଡ଼୍, ଆଦ୍ ପଡ଼୍‍ୟି ଲେଙ୍ଗ୍‍ଦେ ବର୍ତ୍ତି ଆତ୍‍ତେ । ମେଣ୍ଡେ ସାରେତଡ଼୍ ପବିତ୍ର ଆତ୍‍ମା ତଡ଼୍ ପୁରା ଆସ୍ ସାହାସ୍ ତଡ଼୍ ଇଶ୍ୱର୍‌ତେ ବାକ୍ୟ କେତାଙ୍କ୍ ପସ୍‍ସ୍ପ୍‍ତଡ଼୍ ।
ACT 4:32 ବିଶ୍ୱାସୀଡ଼୍ ୱେରଡ଼୍ ମାନ୍‍ ନୁ ୱେରଡ୍‌ ହୃଦୟ ତେ ମାତ୍‌ତଡ଼୍ । ବେନଡ଼୍ ତାମ୍ ସମ୍ପତିତିଙ୍କ୍ ନିଜେତ୍ ସମ୍ପତି ଇଞ୍ଜ ଦାବୀ ମାଡ଼ଡ଼୍‍, ସାରେତଡ଼୍‍ୱାଦ୍ ସମ୍ପତିତିଙ୍କ୍ ଅଡ଼୍‌ ସାମାନ୍ ତୁହୁସ୍‍ତଡ଼୍ ।
ACT 4:33 ବେଡ଼୍‍ୟାଦ୍‍ ଶକ୍ତି ତଡ଼୍ ପ୍ରେରିତ ଶିଷ୍ୟଡ଼୍ ପ୍ରବୁ ଜିସୁନ୍ ପୁନରୁତାନ୍ ବିଷୟ୍‍ତେ ସାକ୍ଷ୍ୟ ହିତ୍‍ତଡ଼୍ ନୁ ଇଶ୍ୱର୍ ଅଡ଼୍‌ ପର୍‍ର ନାର୍‍ଗେ ଅନୁଗ୍ରହ ମାଡ଼୍‍ତଣ୍ଡ୍ ।
ACT 4:34 ଅଡ଼ାଦ୍‌ ମାନ୍ଦେତାଗ୍ ବେନ୍ ନାରୁଣ୍ଡ୍‍ ଅବାବ୍ ଇଲ୍‍ୱେମାତ୍‍ତଣ୍ଡ୍ । ବେନଡ଼ାୱୁ ୱାୟା ନୁ ଲନ୍‍ ମାତ୍‍ତା, ଅଣ୍ଡ୍‌ ଆୱୁସାରେ ୱାମି ଡାବ୍‍କ୍ ତାସ୍,
ACT 4:35 ଅଡ଼୍‌ ପ୍ରେରିତ ଶିଷ୍ୟଡ଼୍‍କ୍ ହିସମାତ୍‍ତଡ଼୍ ମେଣ୍ଡେ ଆୱୁ ଡାବ୍‍କ୍ ଅଡ଼୍‌ ଲୋପେ ସାରେତଡ଼୍‍ୱାଦ୍ ଦର୍‍କାର୍ ଲେକାମ୍ ତୁହୁସିସମାତ୍‍ତଡ଼୍‍ ।
ACT 4:36 ସାଇପ୍ରସ୍‍ ଜାଗେତାଗ୍ ଜନମ୍ ଆସ୍‍ମାନ୍ଦାନ୍ ଲେବୀୟ ବଂଶତଣ୍ଡ୍ ଯୋଷେଫ୍, ବେନଙ୍କ୍ ପ୍ରେରିତ ଶିଷ୍ୟଡ଼୍ ବର୍ଣ୍ଣବା ଇଞ୍ଜ ପେଦେର୍ ଇସ୍‌‍ମାତ୍‍ତଡ଼୍, ବର୍ଣ୍ଣବା ଇତ୍‍କେ ସାର୍‍ଦେତ୍‍ ମାର୍‍,
ACT 4:37 ଅନାଦ୍‌ ଅଣ୍ଡୟ୍‌ ୱାୟେ ମାତ୍‍ତେ, ଅଣ୍ଡ୍‌ ଆଦ୍ ୱାମିମିକା ଡାବ୍‍କ୍ ତାସ୍ ପ୍ରେରିତଶିଷ୍ୟଡ଼୍‍କ୍ ହିତ୍‍ତଣ୍ଡ୍ ।
ACT 5:1 ହନନୀୟ ପେଦେର୍‍ତେ ୱେରଣ୍ଡ୍ ନାରୁଣ୍ଡ୍‍ ନୁ ତାନ୍ ମୁତ୍‍ତେ ଶଫୀରା ତାମ୍‍ୱାଦ୍ ବେସ୍‍କେ ୱାୟା ୱାମ୍‍ତଡ଼୍ ।
ACT 5:2 ଇତ୍‍କେ ମୁତେନ୍‍ ରାଜି ଲେକାମ୍ ଅଣ୍ଡ୍‌ ବେସର୍ ଡାବ୍‍କ୍ ତାମ୍‍ ନିଜେତ୍ ସେଙ୍ଗେ ନେହେତଣ୍ଡ୍ ନୁ ମେଣ୍ଡେ ବାଗାତ୍ ସାରେ ଡାବ୍‍କ୍ ତାସ୍ ପ୍ରେରିତ ଶିଷ୍ୟଡ଼୍‍କ୍ ହିତ୍‍ତଣ୍ଡ୍ ।
ACT 5:3 ପିତର୍ ଅଂକିଙ୍କ୍‌ କେତ୍‍ତଣ୍ଡ୍, “ହନନୀୟ, ନିମ୍‍ ବାତେଙ୍କ୍ ଶୟ୍‍ତାନ୍‍ ହୃଦୟତେ ୱାମିମିକା ଦର୍‍କି ମାନ୍ଦାନ୍ ଡାବ୍‍କ୍ ନିଜେତ୍ ମାଇଦିଙ୍କ୍ ବେସର୍ ନେହେସ୍ ପବିତ୍ର ଆତ୍‍ମାନ୍ ଗାର୍‍ରେ ମିଚ୍‍ କେତ୍‍ତିନ୍ ?
ACT 5:4 ୱାମାନ୍‍ ମୁନେଙ୍କ୍ ଆଦ୍ ନିୟାଦ୍ ମାତ୍‍ତେ, ୱାମ୍‍ତେ ପେର୍‍କେ ମିକା ଆଦ୍ ଅଦିକାର୍‌‍ ନିୟାଦ୍ ମାତ୍‍ତେ । ବାତେଙ୍କ୍ ନିମ୍‍ ଇଦ୍ ରକମ୍ ପାଡ଼୍‍ୟି ମାଡ଼ାଙ୍କ୍ ହୃଦୟତାଗ୍‍ ଚିନ୍ତେ ମାଡ଼୍‍ତି ? ନିମ୍‍ ନାରୁଡ଼୍‍କିଂଙ୍କ୍ ମିଚ୍‍ କେଲ୍‍ୱିନ୍, ବାତେଙ୍କ୍ ଇତ୍‍କେ ଇଶ୍ୱର୍‌ତିଙ୍କ୍ ନିମ୍‍ ମିଚ୍‍ କେତ୍‍ତିନ୍ ।”
ACT 5:5 ହନନୀୟ ଇଦ୍ ଗଟ୍ କେଞ୍ଜାନ୍‍ ସାଙ୍ଗେ ସାଙ୍ଗେ ନେଲ୍ ଗୁବ୍‍ରାଲି ଡଲ୍‍ତଣ୍ଡ୍, ମେଣ୍ଡେ ବେନଡ଼୍ ଇଦ୍ ଗଟ୍ କେଞ୍ଜ୍‍ତଡ଼୍, ଅଡ଼୍‌ ସାରେ ଗାଟି ୱେର୍‍ତଡ଼୍ ।
ACT 5:6 ଲେୟଡ଼୍‍ ତେଦିୱାସ୍‍ ଅଂକିଙ୍କ୍‌ ସିଲେତଡ଼୍ ଉତ୍‍ତଡ଼୍ ନୁ ବାୟିଦେ ଆସ୍ ସମାଦି ହିତ୍‍ତଡ଼୍ ।
ACT 5:7 ପ୍ରାୟ୍‍ ମୁଣ୍ଡ୍ ଗାଣ୍ଟା ପେର୍‍କେ ତାନ୍ ମୁତ୍‍ତେ ୱାତ୍‍ତେ, ଇତ୍‍କେ ବାଆତେ ଗଟେମ୍ ଆତ୍‍ତେ, ଆଦ୍ ବିଷୟ୍ ପୁନ୍‍ୱେ ମାତ୍‍ତେ ।
ACT 5:8 ପିତର୍ ଆଦିଙ୍କ୍ ପାଚ୍ରା ମାଡ଼୍‍ତଣ୍ଡ୍, “ନାକିଙ୍କ୍‍ କେଲ୍‍ମ୍‍, ନିମ୍‍ ନୁ ନିଇ ମୁଦ୍‍ପାଲ୍ ବେନ୍‍ ୱାୟା ୱାମ୍‍ତିଡ଼୍, ଇଦ୍ ବାଆତେ ଆଦିନାଦ୍ ସାରେ ମୁଲ୍ୟ ?” ଆଦ୍ କେତ୍‍ତେ, “ହଁ, ଆସରେ ।”
ACT 5:9 ପିତର୍ ଆଦିଙ୍କ୍ କେତ୍‍ତଣ୍ଡ୍, “ପ୍ରବୁନ୍ ଆତ୍ମାଙ୍କ୍ ପରିକ୍ଷା ମାଡ଼ାଙ୍କ୍ ନିମ୍‍ ନୁ ନି ମୁଦ୍‍ପାଲ୍‍ ବାତେଙ୍କ୍ ଆଲ୍‍ସ୍‍ତିଡ଼୍ ? ବେନଡ଼୍ ନି ମୁଦ୍‍ପାଙ୍କ୍ ସମାଦି ହିତ୍‍ତଡ଼୍, ଅଡ଼୍‌ ଇଞ୍ଜେ ମାର୍‍ ବକେତ୍ ହେୱୁତ୍‍ତଡ଼୍, ଅଡ଼୍‌ ନିକିଂଙ୍କ୍ ମିକା କାଞ୍ଜୀ ବାୟିଦେ ଆଦ୍‍ତଡ଼୍ ।”
ACT 5:10 କେତ୍‍ତେ ସାଙ୍ଗେ ସାଙ୍ଗେ ଆଦ୍ ଅନ୍‌ ଡେକେତ୍ ମଦଲ୍ ରାଲି ଡଲ୍‍ତେ । ଲେୟଡ଼୍‍ ଲୋପେ ୱାସ୍ ଆଦିଙ୍କ୍ ଡଲିମାନ୍ଦାନାଦ୍ ଉଡ଼ି କାଞ୍ଜୀ ବାୟିଦେ ଆତ୍‍ତଡ଼୍ । ନୁ ତାନ୍ ମୁଦ୍‍ପାନ୍ ସମାଦି ଗାର୍‍ରେ ତାଙ୍କ୍ ସମାଦି ହିତ୍‍ତଡ଼୍ ।
ACT 5:11 ଆଗାଙ୍କ୍ ମଣ୍ଡଲିତେ ସାରେତଡ଼୍ ନାରୁଡ଼୍ ନୁ ବେନଡ଼୍ ଇୱୁ ଗଟି କେଞ୍ଜ୍‍ତଡ଼୍, ସାରେତଡ଼୍ ଗାଟି ୱେର୍‍ତଡ଼୍ ।
ACT 5:12 ପ୍ରେରିତ ଶିଷ୍ୟଡ଼୍ ତଡ଼୍ ନାରୁଡ଼୍ ଲୋପେ ନାର୍‍ଗେ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ଆସମାତ୍‍ତେ । ସାରେତଡ଼୍ ବିଶ୍ୱାସୀଡ଼୍ ଶଲୋମନ୍‍ତେ ମଣ୍ଡପ୍‍ତାଗ୍ ଅଣ୍ଡୟାଗେ ଆସମାତ୍‍ତଡ଼୍ ।
ACT 5:13 ଦଲ୍‍ଦେ ବାୟିଦେ ମାନ୍ଦାନ୍ ନାରୁଡ଼୍‍କିନ୍ ଲୋପେକ୍ ବେନ ଅଡ଼୍‌‍ତଡ଼୍ କାଇଲାନଙ୍କ୍‍ ସାହାସ୍ ମାଡ଼୍‍ୱେମାତ୍‍ତଡ଼୍, ମିକା ନାରୁଡ଼୍ ଅଡ଼ାଦ୍‌ ପ୍ରସଂଶା ମାଡ଼ି କେସମାତ୍‍ତଡ଼୍ ।
ACT 5:14 ମେଣ୍ଡେ ନାର୍‍ଗେ ମାନେୟ୍‍ ନୁ ନାଟା ବିଶ୍ୱାସ୍ ମାଡ଼ି ପ୍ରବୁନ୍ ତଡ଼୍ କାଇଲାନ୍‍ ମାଇଦିଙ୍କ୍ ମାନ୍ଦେତାଗ୍ ୱାତ୍‍ତଡ଼୍ ।
ACT 5:15 ପ୍ରେରିତ ଶିଷ୍ୟଡ଼ାଦ୍‍ ପାଡ଼୍‍ୟି ନିତ୍‍ଦିନ୍‍ ନର୍ଗେ ଆତ୍‍ତେ, ପିତର୍ ୱାଦାନ୍‍ୱେଲେ ଅନାଦ୍‌ ନିଡ଼୍‍କେ ବେଲାକି ରୋଗୀଡ଼୍ ଲୋପେଙ୍କ୍ ବେନଡ଼୍‍ ବେନଡ଼୍‍ ପର୍‍ର ରାଲିତ୍‍, ଇଦିନ୍‍ ସେଙ୍ଗେ ନାରୁଡ଼୍ ଅଡ଼୍‌‍କିଂଙ୍କ୍ ଦୁଆତାଗ୍ କାଞ୍ଜୀ ଆସ୍, କେତିନାଗ୍ ନୁ କାଟୁଲ୍‍କିନାଗ୍ ୱାଟିସ ମାତ୍‍ତଡ଼୍ ।
ACT 5:16 ଯିରୁଶାଲେମ୍‍ତେ ସାରେପାକ୍ ଟାୱୁନ୍‍କିନାଗାଙ୍କ୍ ନାରୁଡ଼୍ ମିକା ରୋଗିଡ଼୍‍କ୍ ନୁ ବୁତ୍ ପୟ୍‍ତେନଡ଼୍‍କ୍ ତାସମାତ୍‍ତଡ଼୍‍, ମେଣ୍ଡେ ଅଡ଼୍‌ ସାରେତଡ଼୍ ସୁସ୍ଥ ଆତ୍‍ତଡ଼୍ ।
ACT 5:17 ତାନ୍‍ପେର୍କେ ମହାଜାଜକ୍ ନୁ ତାମ୍ ସାଙ୍ଗଡ଼୍ ସାରେତଡ଼୍, ମେଣ୍ଡେ ସାଦୁକୀଡ଼୍ ମାନ୍ଦେ, ପ୍ରେରିତ ଶିଷ୍ୟଡ଼୍‍କ୍ ଗାଟି ଇର୍ଷା ମାଡ଼୍‍ତଡ଼୍, ଆଦିଙ୍କ୍ ଅଡ଼୍‌ ଦଣ୍ଡ୍ ହିଦାନ୍ ମାଇଦିଙ୍କ୍ ତିଆର୍ ମାଡ଼୍‍ତଡ଼୍ ।
ACT 5:18 ଅଡ଼୍‌ ପ୍ରେରିତଡ଼୍‍କ୍‍ ଗିରାପ୍ ମାଡ଼୍‍ତଡ଼୍ ନୁ ଜଇଲ୍‍ଦାଗ୍ ତୁର୍ର୍‍ତଡ଼୍ ।
ACT 5:19 ଇତ୍‍କେ ପ୍ରବୁନାଦ୍ ଅଣ୍ଡୟ୍‌ ଦୂତ୍, ନାର୍‍କେତ୍ ୱେଲେ ଜଇଲ୍‍ତେ ମାର୍‍ ସାରେ ତେର୍‍ସିତ୍‍ତେ ନୁ ପ୍ରେରିତଡ଼୍‍କ୍ ପେସ୍‍ପିଇ ତାସ୍, କେତ୍‍ତେ,
ACT 5:20 “ଆନୁଟ୍, ମନ୍ଦିର୍‍ତାଗ୍ ନିଶ୍‍ ଇଦ୍ ପୁନାଦ୍ ଜିୱୁଣ୍ଡ୍ ବିଷୟ୍‍ତେ ଗଟି ନାରୁଡ଼୍‍କିଂଙ୍କ୍ କେଲାଟ୍ ।”
ACT 5:21 ଇଦ୍ କେଞ୍ଜି ପ୍ରେରିତଡ଼୍ ନାର୍‍କା ମନ୍ଦିର୍‍ତାଗ୍ ହସି ଶିକ୍ଷା ହିଦାଙ୍କ୍ ପସ୍‍ପ୍‍ତ୍‍ତଡ଼୍ । ଆଗେ ବେଡ଼୍‍ୟେ ଜାଜକ୍ ନୁ ତାମ୍ ସାଙ୍ଗଡ଼୍ ବୟସ୍କା ଇହୁଦୀଡ଼୍‍ ବାଡ଼୍‍ୟେମିଟିଙ୍ଗ୍ ଅର୍ତ ଇସ୍ରାଏଲ୍‍ତେ ସାର୍ରେ ବୟସ୍କା ନାରିଡ଼୍‍ ଗୁଡ଼ି ମିଟିଙ୍ଗ୍‍ ମାଡ଼ାନଙ୍କ୍ କାର୍‍ଙ୍ଗୁତଡ଼୍, ତାନ୍‍ପେର୍କେ ପ୍ରେରିତଡ଼୍‍କିଙ୍କ୍‍ ତାତାନ୍ ସେଙ୍ଗେ ଜଇଲ୍‍ତାଗ୍ କାବୁର୍‍ ହିତ୍‍ତଡ଼୍ ।
ACT 5:22 ଇତ୍‍କେ କର୍ମଚାରୀଡ଼୍‍ ଆଞ୍ଜ୍ ଜଇଲ୍‍ତାଗ୍ ଅଡ଼୍‌ ଦର୍କୱାଙ୍କ୍ ମାଲ୍‍ସ୍ ୱାସ୍ ବେଡ଼୍‍ୟେସବାତିଙ୍କ୍‍ କେତ୍‍ତଡ଼୍,
ACT 5:23 “ମାମ୍‍ମେ ଜଇଲ୍‍ତାଗ୍ ଏୱୁସ୍‍ ଉଡ଼୍‍ତମ୍, ଜଇଲ୍‍ ସାରେ ବନ୍ଦ୍‍ ମାତ୍‍ତେ, ମେଣ୍ଡେ ମାର୍‍ତାଗ୍ କେପାନଡ଼୍ ନିଶ୍‍ମାତ୍‍ତଡ଼୍, ଇତ୍‍କେ ମାର୍‍ ଟେଣ୍ଡି ଉଡ଼୍‍ତାଙ୍କ୍ ଲୋପେ ବେନ ଇଲାଡ଼୍ !”
ACT 5:24 ଇୱୁସାରେ ଗଟି କେଞ୍ଜି ମୁକ୍ୟ ଜାଜକ୍ ନୁ ମନ୍ଦିର୍‍ତେ ସେନାପତି, ପ୍ରେରିତଡ଼୍‍ ସେଙ୍ଗେ ବାତେଏ ଗଟେମ୍ ଆଦ୍‍ତେ ଇଞ୍ଜ ହାଲ୍‍ସି କାବା ଆଦ୍‍ତଡ଼୍ ।
ACT 5:25 ଆସୁଟେ ୱେରଣ୍ଡ୍ ନାରୁଣ୍ଡ୍‍ ୱାସ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‍, “କେଞ୍ଜାଟ୍ ! ବେନଡ଼୍‍କିଂଙ୍କ୍ ମିଡ଼୍ ଜଇଲ୍‍ତାଗ୍ ୱାଟିମାତ୍‍ତିଡ଼୍ ଅଡ଼୍‌ ମନ୍ଦିର୍‍ତାଗ୍ ନାରୁଡ଼୍‍କିଂଙ୍କ୍ ଶିକ୍ଷା ଇଦୁତଡ଼୍ !”
ACT 5:26 ଆସୁଟେ ସେନାପତି କାମ୍‍ମାଡ଼ାନଡ଼୍ ତଡ଼୍ ଆଞ୍ଜ୍ ଅଡ଼୍‌‍କ୍ ମେଣ୍ଡେଅନ୍‌‍ଦାମ୍‍ ମାଲ୍‍ପି ତାତ୍‍ତଣ୍ଡ୍‍, ଅଡ଼୍‌‍ ବାତ୍‍ବା ଶାତ୍‍ୱାମ୍‍ତଡ଼୍‍ ମାଡ଼ଡ଼୍‍, ବାତେଙ୍କ୍ଇତ୍‍କେ କାଳେ ନାରୁଡ଼୍ ତାମ୍ ପର୍‍ର କାଲ୍‍କ୍ ଏସିତଡ଼୍ ଇଦ୍ ୱେର୍‍ ଅଡ଼୍‌‍କ୍ ମାତ୍‍ତେ ।
ACT 5:27 ଅଡ଼୍‌ ପ୍ରେରିତଡ଼୍‍କ୍ ତାସ୍ ମହାସବାତ୍‍ ମୁନ୍‍ନେ ନିସ୍ପ୍‍ତଡ଼୍ । ଆଗାଙ୍କ୍ ବେଡ଼୍‍ୟଣ୍ଡ୍‍ ଜାଜକ୍ ଅଡ଼୍‌‍କିଂଙ୍କ୍ ପ୍ରଶ୍ନ ପାଚ୍ରା ମାଡ଼୍‍ତଣ୍ଡ୍ ।
ACT 5:28 “ଅଣ୍ଡ୍‌ କେତ୍‍ତଣ୍ଡ୍, ମାମ୍‍ମେ ମିକିଂଙ୍କ୍ ଇଦ୍ ପେଦେର୍‍ତେ ଶିକ୍ଷା ହିଦାଙ୍କ୍ ସାରେ ମନା ମାଡ଼ିମାତ୍‍ତମ୍, ଇତ୍‍କେ ଉଡ଼ାଟ୍ ମିଡ଼୍ ବାତେ ମାଡ଼୍‍ତିଡ଼୍ ! ମିଡ଼୍ ମିୟାଦ୍ ଶିକ୍ଷା ଯିରୁଶାଲେମ୍‍ ସାରେଏକାମ୍ ପ୍ରଚାର୍ ମାଡ଼ି ଆଦ୍ ନାରୁଣ୍ଡ୍‍ତେ ଦଂସ ଆଦାନାଦ୍ ମା ପର୍‍ର ଦାୟୀ ମାଡ଼ାଙ୍କ୍ ଚାଏମ୍ ଆଦୁତିଡ଼୍ !”
ACT 5:29 ପିତର୍ ନୁ ପ୍ରେରିତ ଶିଷ୍ୟଡ଼୍ ଉତ୍ତର୍ ହିତ୍‍ତଡ଼୍, “ମାମ୍ ଇଶ୍ୱର୍‌ତେ ଗଟ୍ କେଞ୍ଜୀତମ୍ ମାତ୍ରମ୍‍ ନାରୁଡ଼୍‍କିଂଙ୍କ୍ ଆୟ୍‍ୟ ।
ACT 5:30 ବେନ୍ ଜିସୁଙ୍କ୍ ମିଡ଼୍ କ୍ରୁଶତାଗ୍ ୱେଃସ୍ ଆୱ୍‍କି ମାତ୍‍ତିଡ଼୍, ମାନ୍‍ ଆନିଦାଦୀଡ଼୍‍ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ତେଏସ୍‍ ମିନ୍ଦେଣ୍ଡ୍ ।
ACT 5:31 ଇସ୍ରାଏଲ୍‍ତେ ନାରୁଡ଼୍‍କିଂଙ୍କ୍ ଅନୁତାପ୍ ମାଡ଼ି ପାପ୍ କେମା ଇଦାନ୍ ସୁଯୋଗ୍ ଇଦାଙ୍କ୍ ଇଶ୍ୱର୍ ଅଂକିଙ୍କ୍‌ ତିନ୍ଦେପାକେତ୍‍ ନେତା ନୁ ତ୍ରାଣକର୍ତ୍ତାଲ୍ ଲେକାମ୍ ତେଇସ୍‍ ମିନ୍ଦେଣ୍ଡ୍ ।
ACT 5:32 ମାନାଡ଼୍ ଇଦ୍ ସାରେ ବିଷୟ୍‍ତାଦ୍‍ ସାକ୍ଷି, ମେଣ୍ଡେ ବେନ୍ ପବିତ୍ର ଆତ୍ମାଙ୍କ୍ ଇଶ୍ୱର୍ ତାନ୍ ଗଟି ପାଲନ୍ ମାଡ଼ାନଡ଼୍‍କ୍‍ ହିତ୍‍ତଣ୍ଡ୍, ଅଣ୍ଡ୍‌ ମିକା ସାକ୍ଷି ।”
ACT 5:33 ବେଡ଼ିୟ୍‍ମିଟିଙ୍କ୍‍ତେ ସଦସ୍ୟଡ଼୍ ଇଦ୍ ଗଟ୍ କେଞ୍ଜି ଗାଟି କାଡ଼ାମ୍ ଆଦ୍‍ତଡ଼୍, ମେଣ୍ଡେ ଅଡ଼୍‌ ଶିଷ୍ୟଡ଼୍‍କିଂଙ୍କ୍ ଆୱ୍‍କାଂଙ୍କ୍ ଚାଏମ୍‍ଆତ୍‍ତଡ଼୍ ।
ACT 5:34 ବାତେଙ୍କ୍ ଇତ୍‍କେ ଗମଲୀୟେଲ୍‍ ପେଦେର୍‍ତଣ୍ଡ୍ ୱେରଣ୍ଡ୍ ପାରୂଶୀ, ଅଣ୍ଡ୍‌ ୱେରଣ୍ଡ୍ ନିୟମ୍‍ ଗୁରୁ ନୁ ସାରେତଡ଼୍‌କିଂଙ୍କ୍ ସାୟେତ୍ ନାରୁଡ଼୍ ମାତ୍‍ତଣ୍ଡ୍, ଅଣ୍ଡ୍‌ ବେଡ଼ିୟେ ମିଟିଙ୍କ୍‍ତାଗ୍ ନିଶ୍‍ ପ୍ରେରିତଡ଼୍‍କିଙ୍କ୍ ବେସ୍‍କେ ଦିନାମ୍‍ତେ ସେଙ୍ଗେ ବାଇଦେ ଆତ୍‍ତାଙ୍କ୍ ଗଟ୍ ହିତ୍‍ତଣ୍ଡ୍,
ACT 5:35 ବେଡ଼୍‍ୟେମିଟିଙ୍ଗ୍‍ତେ ବାଡ଼୍‍ୟେ ନାରୁଡ଼୍‍କିଂଙ୍କ୍ ଅଣ୍ଡ୍‌ କେତ୍‍ତଣ୍ଡ୍, “ଏୟ୍‍ ଇସ୍ରାଏଲୀୟ ନାରୁଡ଼ି, ମିଡ଼୍ ଇଡ଼୍‍କିଙ୍କ୍ ବାଆତେ ମାଡ଼ାଙ୍କ୍ ଆଦୁତିଡ଼୍, ଆଦ୍ ବିଷୟ୍‍ତେ ସାବ୍‍ଦାନ୍ ଆୟ୍‍ମୁଟ୍ ।
ACT 5:36 ମିଡ଼୍ ଏର୍କା ମାଡ଼ାଟ୍, ବେସ୍‍କେ ଦିନାମ୍ ମୁନେଙ୍କ୍ ଯିଉଦା ନିଜେ ୱେରଣ୍ଡ୍ ବେଡ଼୍‍ୟଣ୍ଡ୍‍ ଯାଜକ୍‌ ଇଞ୍ଜ କେତ୍‍ତଣ୍ଡ୍ ନୁ ମାତ୍ରମ୍‍ ଚାର୍‍ଶହ୍ ନାରୁଡ଼୍ ଅନ୍‌‍ତଡ଼୍ ବିଶ୍ୱାସ୍‍ତେ କାଇଲ୍‍ତଡ଼୍; ଇତ୍‍କେ ଅଣ୍ଡ୍‌ ଡଲ୍‍ତଣ୍ଡ୍, ଅନ୍‌‍ ପେର୍‍କେ ମାନ୍ଦାନଡ଼୍‍ ଚିନ୍‍ବିନ୍‍ ଆଦ୍‍ତଡ଼୍ ନୁ ଅନାଦ୍‌ ଦଲ୍‍ ଦଂସ ପାଏମ୍‍ଆତ୍‍ତେ ।
ACT 5:37 ତାନ୍‍ପେର୍କେ ଜନଗନନା ସମୟ୍‍ତେ ଗାଲିଲୀୟ ଯିହୁଦା ପେଦେର୍‍ତଣ୍ଡ୍ ମେଣ୍ଡେ ୱେରଣ୍ଡ୍ ୱାତ୍‍ତଣ୍ଡ୍, ଅଣ୍ଡ୍‌ ମିକା ନାର୍‍ଗେ ନାରୁଡ଼୍‍କିଂଙ୍କ୍ ଆକର୍ଷନ ମାଡ଼୍‍ତଣ୍ଡ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ମିକା ଡଲ୍‍ତଣ୍ଡ୍ ମେଣ୍ଡେ ଅନ୍‌ ବିଶ୍ୱାସ୍‍ ମାଡ଼ି ପେର୍କେମାନ୍ଦାନଡ଼୍ ଚିନ୍‍ବିନ୍‍ ଆଦ୍‍ତଡ଼୍ ।
ACT 5:38 ଆଦିଙ୍କ୍ ନାନ୍‍ନେ ମିକିଂଙ୍କ୍ କେତୁତାନ୍, ମିଡ଼୍ ଇହି ନାରୁଡ଼୍‍କିଂଙ୍କ୍ ବାଆତେ ମାଡ଼କଟ୍ ଅଡ଼୍‌‍କିଂଙ୍କ୍ ୱିଡ଼୍‍ସିମୁଟ୍, ବାତେଙ୍କ୍ଇତ୍‍କେ ଇଦ୍ ଜୋଜନା ବା ଇଦ୍ ପାଡ଼୍‍ୟି ଯଦି ନାରୁଡ଼ାଗାଙ୍କ୍ ଆତ୍‍ତେ, ଆଲେକେ ଆଦ୍ ଦଂସ ପାଏମ୍ ଆଦ୍‍ତେ;
ACT 5:39 ଇତ୍‍କେ ଆଦ୍ ଯଦି ଇଶ୍ୱର୍‌ତାଗାଙ୍କ୍ ଆସ୍‍ମାନ୍‍ତେ ଇଞ୍ଜ ବିଶ୍ୱାସ୍‍, ଆଲେକେ ମିଡ଼୍ ଅଡ଼୍‌‍କିଂଙ୍କ୍ ଦଂସ ମାଡ଼ାନଙ୍କ୍ କଷ୍ଟ ଆଦ୍‍ତେ, କାଳେ ମିଡ଼୍ ଇଶ୍ୱର୍‌ତେ ବିରୁଦତେ ଯୁଦ୍‍ ମାଡ଼ୁତିଡ଼୍ ଇଞ୍ଜ ତଅନ୍‌ଦିତ୍‍ ।” ବେଡ଼୍‍ୟେମିଟିଙ୍ଗ୍‍ ଗମଲିଏତ୍ ପରାମର୍ଶ ଗ୍ରହନ୍‍ ମାଡ଼୍‍ତେ ।
ACT 5:40 ଅଡ଼୍‌ ପ୍ରେରିତ ଶିଷ୍ୟଡ଼୍‍କ୍ ଲୋପେ କାର୍‍ଙ୍ଗି, ଅଡ଼୍‌‍କିଂଙ୍କ୍ କଡ଼ାତେ ରେହେତଡ଼୍ ନୁ ଜିସୁନ୍‍ ପେଦେର୍‍ତେ ବାଆତେ ଗଟି କେଲ୍‍ମା ଇଞ୍ଜ ଗଟ୍ ଇସ୍‌ ୱିଡ଼୍‍ସିତ୍‍ତଡ଼୍ ।
ACT 5:41 ପ୍ରେରିତ ଶିଷ୍ୟଡ଼୍ ପେଦେର୍‍ତେ ବେଡ଼୍‍ୟେମିଟିଙ୍ଗ୍‍ତାଗାଙ୍କ୍ ପେଇସ୍ ଆଦ୍‍ତଡ଼୍, ବାତେଙ୍କ୍ଇତ୍‍କେ ଇଶ୍ୱର୍‌ତେ କଣ୍ଡେତେ ଅଡ଼୍‌ ଜିସୁନ୍‍ ସେଙ୍ଗେ ଅପମାନିତ ଆଦାନଙ୍କ୍ ଯୋଗ୍ୟ ଆସ୍‍ମାତ୍‍ତଡ଼୍ ।
ACT 5:42 ମେଣ୍ଡେ ଅଡ଼୍‌ ସାରେଦିନେ ମନ୍ଦିର୍‍ତାଗ୍ ନୁ ନାରୁଡ଼୍‍ତେ ଲଅକିନାଗ୍ ଶିକ୍ଷା ହିତ୍‍ତଡ଼୍ ନୁ ମସୀହ ଜିସୁନ୍ ବିଷୟ୍‍ତେ ସୁସମାଚାର୍‍ ପ୍ରଚାର୍ ମାଡ଼୍‍ତଡ଼୍ ।
ACT 6:1 ବେସ୍‍କେ ଦିନାମ୍ ପେର୍‍କେ ଶିଷ୍ୟଡ଼ାଦ୍ ସଂକ୍ୟା ନାର୍ଗେ ଆଦାନ୍‍ୱେଲେ ଗ୍ରୀକ୍‍ ଗଟ୍ କେତ୍‍ତାନ୍ ଇହୁଦୀଡ଼୍‍ ନୁ ଏବ୍ରିୟ ନାରୁଡ଼୍ କପାମ୍ ଆଦ୍‍ତଡ଼୍ । ନିତିଦିନେତ୍‍ ପାଡ଼୍‍ୟି ଡାବ୍‍କ୍ ତୁସାନ୍‍ୱେଲେ ତାମ୍ ରାଣ୍ଡିକିଙ୍କ୍ ଗମାଡ଼୍ ମାଡ଼ୁତଡ଼୍ ଇଞ୍ଜ ଗ୍ରୀକ୍‍ ଗଟ୍ କେତ୍‍ତାନ୍ ଇହୁଦୀଡ଼୍‍ ଆପତି ମାଡ଼୍‍ତଡ଼୍ ।
ACT 6:2 ଆଦିଙ୍କ୍ ବାରଜାନ୍ ପ୍ରେରିତ ଶିଷ୍ୟ ସାରେ ବିଶ୍ୱାସୀ ମାନ୍ଦେତିଙ୍କ୍ ଅଣ୍ଡୟାଗେ କାର୍‍ଙ୍ଗି କେତ୍‍ତଡ଼୍, “ନିତ୍‍ଦିନ୍‍ ଦର୍‍କାର୍‍ ଜିନିଷ୍‍ କାର୍‍ବାର୍‍ତେ ସେଙ୍ଗେ ଇଶ୍ୱର୍‌ତେ ବାକ୍ୟ ପ୍ରଚାର୍ ସେବା ମାଡ଼ାନାଗ୍‍ ଗମାଡ଼୍ ମାଡ଼ାନାଦ୍ ମାନ୍‍ ମାଇଦିଙ୍କ୍ ଟିକ୍ ଆୟ୍‍ୟ ।
ACT 6:3 ଆଦିଙ୍କ୍ ହୋ ଦାଦାଲଡ଼୍‍ ନୁ ଏଲାସ୍କ୍‍, ମିଇ ଲୋପେଙ୍କ୍ ପବିତ୍ର ଆତ୍ମା ନୁ ବୁଦ୍‍ତେ ବର୍ତ୍ତି ଆସ୍‍ମାନ୍ଦାନ୍ ସାତ୍‍ ଜାନ୍‍ତିଙ୍କ୍ ଏଞ୍ଚାଟ୍‍ । ମାନାଡ଼୍ ଅଡ଼୍‌‍କିଂଙ୍କ୍ ଇଦ୍ ସାରେ ବିଷୟ୍‍ତେ ଦାୟିତ ହିଦ୍‍ତାଡ଼୍ ।
ACT 6:4 ଆଲେଇତ୍କେ ପ୍ରାର୍ତନା ନୁ ପ୍ରଚାର୍ ପାଡ଼୍‍ୟି ମାନାଡ଼୍ ସାରେ ଦିନାମ୍ ଇଦେପାର୍‍ଦ୍‍ତାଡ଼୍‍ ।”
ACT 6:5 ସାରେ ଗଷ୍ଠିତଡ଼୍‍ ପ୍ରେରିତ ଶିଷ୍ୟଡ଼୍ ପ୍ରସ୍ତାବ୍‍ତାଗ୍ ରାଜି ଆଦ୍‍ତଡ଼୍ ମେଣ୍ଡେ ଇଦ୍ ପାଡ଼୍‍ୟି ସେଙ୍ଗେ ଅଡ଼୍‌ ବିଶ୍ୱାସ୍‍ ନୁ ପବିତ୍ର ଆତ୍ମାତେ ପୁର୍ନ ଆସ୍‍ମାନ୍ଦାନ୍ ସ୍ତିଫାନ୍‍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍, ମେଣ୍ଡେ ଫିଲିପ୍‍ପ, ପ୍ରକର୍, ନୀକୋନର୍, ତୀମୋନ୍‍, ପାର୍ମନା ନୁ ମୁନେ ଆଣ୍ଟିୟୋକତେ ଇହୁଦି ଦର୍ମ ଗ୍ରହନ୍ ମାଡ଼୍‍ତେ ଅବିଶ୍ୱାସୀ ନିକୋଲାୟଙ୍କ୍ ଏଞ୍ଚିତଡ଼୍ ।
ACT 6:6 ଅଡ଼୍‌‍କିଂଙ୍କ୍ ପ୍ରେରିତଡ଼୍ ମୁନ୍‍ନେ ତାତ୍‍ତଡ଼୍, ମେଣ୍ଡେ ଅଡ଼୍‌ ପର କାଇୱାଟି ପ୍ରାର୍ତନା ମାଡ଼୍‍ତଡ଼୍‍ ।
ACT 6:7 ଇଦ୍ ରକମ୍ ଇଶ୍ୱର୍‌ତେ ବାକ୍ୟ ପ୍ରଚାର୍ ଆତ୍‍ତେ । ଯିରୁଶାଲେମ୍‍ତାଗ୍‍ ଶିଷ୍ୟଡ଼ାଦ୍‍ ସଂକ୍ୟା ଅଦିକ୍‌‌ ଆତ୍‍ତେ; ନାର୍‍ଗେ ଜାଜକୀଡ଼୍‍ ମିକା କ୍ରିଷ୍ଟଙ୍କ୍‍ ବିଶ୍ୱାସ୍‍ ଆତ୍‍ତଡ଼୍ ।
ACT 6:8 ଇଶ୍ୱର୍‌ତାଗାଙ୍କ୍ ନାର୍‍ଗେ ଅନୁଗ୍ରହ ନୁ ଶକ୍ତି ପାଏମ୍‍ଆତ୍‍ତେ ସ୍ତିଫାନ୍‍, ନାରୁଡ଼୍ ଲୋପେ ନାର୍‍ଗେ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ମାଡ଼୍‍ତଣ୍ଡ୍ ।
ACT 6:9 କିନ୍ତୁ କୁରିନୀୟ ନୁ ଆଲେକ୍‍ଜାଣ୍ଡ୍ରିୟାଲ୍‍ କାଇଦି ଜଇଲ୍‍ ତାଗାଙ୍କ୍‍ ମୁକ୍ତି ଆସ୍‍ମାନ୍ଦାନ୍‍ ଇହୁଦିଡ଼୍‍କ୍‍ ଆସ୍‍ ତିଆର୍‍ ଆସ୍‍ ମାନ୍ଦାନ୍‍ ଉପାସନା ଲୋକ୍‍ ବେସ୍କ୍‍ତୁଡ଼୍‍ ସ୍ତିଫାନ୍‍ତିଙ୍କ୍‍ ବିରୁଦ୍‍ ମାଡ଼୍‍ତଡ଼୍ । ଅଡ଼୍‌ ନୁ ସିଲିଷୀଆ ଏସିଆ ଦେଶ୍‍ତେ ବାଗାତ୍‍ ଇହୁଦୀଡ଼୍‍ ସ୍ତିପାନ୍‍ ତଡ଼୍‍ ଯୁକ୍ତି ମାଡ଼ାନଙ୍କ୍‍ ପସ୍ପ୍‍ତଡ଼୍‍ ।
ACT 6:10 ବାତେଙ୍କ୍ ଇତ୍‍କେ ପବିତ୍ର ଆତ୍ମା ସ୍ତିପାନ୍‍ତିଙ୍କ୍ ଇଦ୍ ରକମ୍ ମାଡ଼ାନାଦ୍‍ ଶକ୍ତି ବୁଦ୍‍ ହିତ୍‍ତେ ଯେ, ବେନବା ଅନ୍‌ ଗଟ୍‍ତିଙ୍କ୍ ବିରଦ୍ ମାଡ଼ାଙ୍କ୍ ପାର୍‍ୱଡ଼୍ ।
ACT 6:11 ଆସୁଟ୍‍, “ଅଣ୍ଡ୍‌‍ ମୋଶାଲ୍‌‍ ବିରୁଦ୍‍ତେ ଇଶ୍ୱର୍‌ତେ ବିରୁଦ୍‍ତେ ଗଟି କେତାନାଦ୍‍ ମାମ୍‍ କେଞ୍ଜ୍‍ତମ୍‍,” ଇଦ୍‍ ମିଚ୍‍ ସାକ୍ଷି ଇଦାନ୍‍ ମାଇଦିଙ୍କ୍‍ ବେସ୍କ୍‍ତଡ଼୍‍କିଙ୍କ୍‍ ଲାଞ୍ଚ୍‍ ଇସ୍‍ ମିଚ୍‌କେତାଙ୍କ୍‍ କେତ୍‍ତଡ଼୍‍ ।
ACT 6:12 ଇଦ୍ ରକମ୍ ଅଡ଼୍‌ ନାରୁଡ଼୍‍କିଂଙ୍କ୍, ଦର୍ମ ନେତାଲଡ଼୍‍କ୍ ନୁ ଦର୍ମଗୁରୁଡ଼୍‍କ୍ କପାମ୍ ମାଡ଼ି ଅଂକିଙ୍କ୍‌ ଚିଟିରମନ୍ ମାଡ଼୍‍ତଡ଼୍ ନୁ ସ୍ତିଫାନ୍‍ତିଙ୍କ୍‍ ବେଡ଼୍‍ୟେ ମିଟିଙ୍କ୍‍ତାଗ୍ ପୟ୍‍ସ୍ ଆତ୍‍ତଡ଼୍ ।
ACT 6:13 ତାନ୍‍ପେର୍କେ ଅଡ଼୍‌ ଅନ୍‌ ବିରୁଦ୍‍ତେ ମିଚ୍‍ ସାକ୍ଷି ହିଦାନ୍ ସେଙ୍ଗେ ବେସ୍କ୍‍ତୁଡ଼୍‍ ନାରୁଡ଼୍‍କିଂଙ୍କ୍ ଲୋପେ ତାତ୍‍ତଡ଼୍ । ଅଡ଼୍‌ କେତ୍‍ତଡ଼୍, “ଇଣ୍ଡ୍ ନାରୁଡ଼୍ ସାରେଦାମ୍ ମାନ୍‍ ପବିତ୍ର ମନ୍ଦିର୍ ନୁ ମୋଶାନ୍‌‌ ନିୟମ୍‍ ବିରୁଦ୍‍ତେ ଗଟି କେତୁତଣ୍ଡ୍ ।
ACT 6:14 ନାଜରିତିୟ ଜିସୁ ମନ୍ଦିର୍‍ତିଙ୍କ୍ ଉହୁତିତଣ୍ଡ୍ ନୁ ମୋଶାଲ୍‌‍ ପାଏମ୍‍ଆତ୍‍ତେ ସାରେ ନିତିନିୟମ୍‍ ବଦ୍‍ଲା ମାଡ଼ିତନ୍ ଇଞ୍ଜ ଇଣ୍ଡ୍ ନାରୁଡ଼୍ କେସମାନ୍ଦାନାଦ୍ ମାମ୍ କେଞ୍ଜ୍‍ତମ୍ !”
ACT 6:15 ଆସୁଟେ ବେଡ଼ିୟେ ମିଟିଙ୍କ୍‍ତାଗ୍ କୁଦିମାନ୍ଦାନ୍ ସାରେତଡ଼୍ ଅନାକ୍ ଅଣ୍ଡୟ୍‌ କଣ୍ଡେତେ ଉଡ଼୍‍ତଡ଼୍ ଯେ ଅନ୍‌ ମକମ୍ ସ୍ୱର୍ଗ ଦୂତତେ ମକମ୍ ଇନା ତଅନ୍‌ଦମାତ୍‍ତେ ।
ACT 7:1 ବେଡ଼୍‍ୟି ଜାଜକ୍ ସ୍ତିପାନ୍‍ତିଙ୍କ୍ ପାଚ୍ରାମାଡ଼୍‍ତଣ୍ଡ୍, “ଇଦ୍ ବାତ୍ ନିଜାମ୍ ?”
ACT 7:2 ସ୍ତିପାନ୍ ଉତର୍‍ ହିତ୍‍ତଣ୍ଡ୍, “ହଁ ଦାଦାଲଡ଼୍‍ ନୁ ବାବାଲଡ଼୍, କେଞ୍ଜାଟ୍ ! ମାନ୍‍ ଆନିଦାଦି ଅବ୍ରାହାମ୍ ହାରାନତାଗ୍ ମାନ୍ଦାନ୍‍ ମୁନେଙ୍କ୍ ଗୌରବମୟ ଇଶ୍ୱର୍ ମେସପଟାମିୟାତାଗ୍ ଦର୍ଶନ୍ ଇସ୍,
ACT 7:3 ମେଣ୍ଡ୍‍ ଅଂକିଙ୍କ୍‌ କେତ୍‍ତଣ୍ଡ୍, ନି ପରିବାର୍ ନୁ ଦେଶ୍‍ ୱିଡ଼୍‍ସି ନାନ୍ ବେନ୍ ଦେଶ୍ ହିଦ୍‍ତାନ୍, ଆଗେ ଅନ୍‌ ।
ACT 7:4 ଆଦିଙ୍କ୍ ଅଣ୍ଡ୍‌ ତାନ୍ ଦେଶ୍ କ୍ଲିଡିଅନ୍‌‍ ୱିଡ଼୍‍ସି ହାରାନତାଗ୍ ମାନ୍ଦାନଙ୍କ୍‍ ଆତ୍‍ତଣ୍ଡ୍ । ଅବ୍ରାହାମ୍‌ତେ ବାବାଲ୍ ଡଲ୍‍ତେ ପେର୍‍କେ ଇଶ୍ୱର୍ ଅଂକିଙ୍କ୍‌ ଆଦ୍ ଦେଶ୍‍ତାଗ୍ ତାତ୍‍ତଣ୍ଡ୍, ବେନ୍ ଦେଶ୍‍ତାଗ୍ ମିଡ଼୍ ଇଞ୍ଜେ ମାନ୍ଦୁ ତିଡ଼୍ ।”
ACT 7:5 ଇଶ୍ୱର୍ ଆସୁଟେ ଅବ୍ରାହାମ୍‌ତିଙ୍କ୍ ଇଦ୍ ଦେଶ୍‍ତେ ବାତେମିକା ଇୱଣ୍ଡ୍, ଇଦ୍ ରକମ୍ କି ଅଣ୍ଡୟ୍‌ ପାଦାମ୍‍ ବୁମ୍ ମିକା ଇୱଣ୍ଡ୍ । ବାତେଙ୍କ୍ ଇତ୍‍କେ ଇଶ୍ୱର୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଅବ୍ରାହାମ୍‌ତିଙ୍କ୍ ଇଦ୍ ଦେଶ୍ ହିଦ୍‍ତଣ୍ଡ୍ ନୁ ଇଦ୍ ଅନ୍‌‍ୱାଦ୍ ନୁ ତାନ୍ ବଂଶଦର୍‍ତେ ନିଜେତାଦ୍ ଆଦ୍‍ତେ । ଇଶ୍ୱର୍ ଆଦ୍ ପ୍ରତିଜ୍ଞା ମାଡ଼ାନ୍‍ୱେଲେ ଅବ୍ରାହାମ୍‌ତିଙ୍କ୍ ପିଲା ଇଲ୍‍ୱେକଟ ମାତ୍‍ତ ।
ACT 7:6 ଆସୁଟେ ଇଶ୍ୱର୍ ଅଂକିଙ୍କ୍‌ ଇଦ୍ ଗଟ୍ କେତ୍‍ତଣ୍ଡ୍; “ନି ବଂଶଦର୍ କ୍ରୀତଦାସ ଲେକାମ୍ ବେନ୍‍ ଦେଶ୍‍ତାଗ୍ ମାନ୍ତ୍‍ତଡ଼୍ ନୁ ଚାରିଶହ୍ ହେଣ୍ଡ୍‍କ୍ ଯାକ ଗାଟିତିପାଲ୍ ଦର୍‍କିତ୍ ।”
ACT 7:7 ମେଣ୍ଡେ ଇଶ୍ୱର୍ କେତ୍‍ତଣ୍ଡ୍, “ଅଡ଼୍‌ ବେନ୍ ଜାତିତେ ଦାସ ଆଦ୍‍ତଡ଼୍, ମାମ୍‍ମେ ଅଡ଼ାଦ୍‌ ବିଚାର୍ ମାଡ଼ିତମ୍; ତାନ୍‍ପେର୍କେ ଅଡ଼୍‌ ଦେଶ୍‍ତାଗାଙ୍କ୍‍ ପେଇସ୍ ୱାସ୍ ଇଦ୍ ପଡ଼୍‍ୟେତାଗ୍ ମାୱାଦ୍ ଉପାସନା ମାଡ଼ିତଡ଼୍ ।”
ACT 7:8 ତାନ୍‍ପେର୍କେ ଇଶ୍ୱର୍ ଅବ୍ରାହାମ୍‌ତିଙ୍କ୍ ସୁନ୍ନତବିଦି ହିତ୍‍ତଣ୍ଡ୍, ମେଣ୍ଡେ ଅବ୍ରାହାମ୍ ଆଦ୍ ଲେକାମ୍ ଇସ୍‍ହାକ୍‍ତିଙ୍କ୍ ଜନମ୍ ମାଡ଼ି ଆଟ୍‌ ଦିନେତେ ଅଂକିଙ୍କ୍‌ ସୁନ୍ନତ୍ ମାଡ଼୍‍ତଣ୍ଡ୍; ଇସ୍‍ହାକ୍ ଯାକୁବ୍‍, ମେଣ୍ଡେ ଯାକୁବ ବାରଜାନ୍ ମୁନେତ୍‍ ଆନିଦାଦିଡ଼୍‍କ୍ ଜନମ୍ ଇସ୍‌ ଆଦ୍ ରକମ୍ ନିୟମ୍ ମାଡ଼୍‍ତଣ୍ଡ୍ ।
ACT 7:9 “ଜାକୁବ୍‍ତେ ମାର୍‍କ୍ ଅଡ଼୍‌ ତାମୁଣ୍ଡ୍ ଯୋଷେଫ୍‍ତିଙ୍କ୍ ଇର୍ଷାମାଡ଼ି କ୍ରୀତଦାସ ଲେକାମ୍ ମିସର୍‍ ଦେଶ୍ ଆଦାନ୍ ସେଙ୍ଗେ ଅଂକିଙ୍କ୍‌ ୱାମ୍‍ତଡ଼୍; ବାତେଙ୍କ୍ ଇତ୍‍କେ ଇଶ୍ୱର୍ ଅନ୍‌ ତଡ଼୍ ମାତ୍‍ତଣ୍ଡ୍,
ACT 7:10 ଅନାଦ୍‌ ସାରେ କଷ୍ଟତାଗାଙ୍କ୍ ଅଂକିଙ୍କ୍‌ ଉଦ୍ଦାର୍ ମାଡ଼୍‍ତଣ୍ଡ୍ ନୁ ମିସର୍‍ତେ ରାଜାଲ୍ ଫାରୋନ୍‍ ମୁନ୍‍ନେ ଅଂକିଙ୍କ୍‌ ଅନୁଗ୍ରହ ମାଡ଼ି ସାୟେତ୍ ବୁଦ୍ ନୁ ଜ୍ଞାନ୍‍ ହିତ୍‍ତଣ୍ଡ୍; ଆଗାଙ୍କ୍ ଫାରୋ ଅଂକିଙ୍କ୍‌ ମିସର୍ ନୁ ତାନାଦ୍ ସାରେ ଲୋକିନ୍ ଶାସନ୍‍ କର୍ତାଲ୍‍ ଲେକାମ୍ ନିଯୁକ୍ତ ମାଡ଼୍‍ତଣ୍ଡ୍ ।
ACT 7:11 ତାନ୍‍ପେର୍କେ ମିସର୍‍ ଦେଶ୍ ଏକାମ୍ ନୁ କିନାନ୍‍ତାଗ୍ ଦୁର୍ବିକ୍ୟ ଆତ୍‍ତାଙ୍କ୍ ନାରୁଡ଼୍ ଗାଟି କଷ୍ଟ ଦର୍‍କ୍‍ତେ । ମେଣ୍ଡେ ମାନ୍‍ ଆନିଦାଦିଡ଼୍‍କ୍ କାଦି ଦର୍‍କ ।
ACT 7:12 ବାତେଙ୍କ୍ ଇତ୍‍କେ ମିସର୍‍ତାଗ୍ କାଦି ମିନ୍ଦେ ଇଞ୍ଜ କେଞ୍ଜି, ଯାକୁବ୍‍ ତାନ୍ ମାର୍‍କିଡ଼୍‍କ୍ ନୁ ମାନ୍‍ ଆନିଦାଦିଡ଼୍‍କ୍ ମୁନ୍‍ନେନ୍ ଦାମ୍‍ ରହତଣ୍ଡ୍ ।
ACT 7:13 ରେଣ୍ଡ୍‍ଦାମ୍ ଆତ୍‍ତେ ୱେଲେ ଯୋଷେଫ୍‍ ତାମ୍ ଦାଦାଲଡ଼୍‍ ପରିଚୟ ହିତ୍‍ତଣ୍ଡ୍, ମେଣ୍ଡେ ଫାରୋ ଜସେଫ୍‍ତେ ପରିବାର୍‍ ବିଷୟ୍‍ତେ ପୁତ୍‍ତଣ୍ଡ୍ ।
ACT 7:14 ତାନ୍‍ପେର୍କେ ଯୋଷେଫ୍‍ ତାମ୍ ବାବାଲ୍ ଯାକୁବ୍‍ ନୁ ତାମ୍ ପରିବାର୍‍ତେ ସାରେ ସତୁରିଏଇଙ୍ଗ୍‍ ଜାନ୍‍ତିଙ୍କ୍ ମିସର୍ ୱାଦାନଙ୍କ୍ କେତ୍‍ତଣ୍ଡ୍ ।
ACT 7:15 ଯାକୁବ୍‍ ମିସର୍ ଦେଶ୍‍ତାଗ୍ ଆତ୍‍ତଣ୍ଡ୍, ଆଗେ ଅଣ୍ଡ୍‌ ନୁ ତାମ୍ ମାର୍‍କିଡ଼ାଦ୍ ଡଲ୍‍ନାଦ୍ ଆତ୍‍ତେ ।
ACT 7:16 ଅଡ଼ାଦ୍‌ ମଡ଼୍‍ତିଙ୍କ୍ ଶିକିମ୍‍ତାଗ୍ ଆତ୍‍ତଡ଼୍ ନୁ ଅବ୍ରାହାମ୍ ହାମୋର୍‍ ନାରୁନାଗାଙ୍କ୍ ରୁପା ଡାବ୍‍କ୍ ଇସ୍‌ ଆସିମାନ୍ଦାନ୍ କବର୍‍ତାଗ୍ ଅଡ଼୍‌‍କିଂଙ୍କ୍ ସମାଦି ହିତ୍‍ତଡ଼୍ ।”
ACT 7:17 “ବାତେଙ୍କ୍ ଇତ୍‍କେ ଇଶ୍ୱର୍ ଅବ୍ରାହାମ୍‌ତେ ଗାର୍‍ରେ ବେନ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଆଦ୍ ପ୍ରତିଜ୍ଞା ସାରେ ପୁରା ଆଦାନ୍ ଦିନାମ୍ ହେୱୁତାଙ୍କ୍, ମା ନାରୁଡ଼୍ ନାର୍‍ଗେ ମିସର୍‍ ଆଦାଙ୍କ୍ ପସ୍‍ପ୍‍ତ୍‍ତଡ଼୍ ।
ACT 7:18 ପେର୍କେ ଯୋଷେଫ୍‍ତେ ବିଷୟ୍ ପୁନ୍‍ୱେନଣ୍ଡ୍ ୱେରଣ୍ଡ୍ ରାଜାଲ୍ ମିସର୍‍ ଦେଶ୍‍ତିଙ୍କ୍ ଶାସନ୍‍ ମାଡ଼୍‍ତଣ୍ଡ୍ ।
ACT 7:19 ଅଣ୍ଡ୍‌ ମାନ୍‍ ଆନିଦାଦିଡ଼୍ ସେଙ୍ଗେ ନିଷ୍ଟୁର୍ ନୁ ଗଲକ୍ ବ୍ୟବହାର୍ ମାଡ଼୍‍ତଣ୍ଡ୍, ଅଡ଼ାୱୁ ପୁନେ ଜନମ୍ ଆତ୍‍ତେ ପିଲାକିଙ୍କ୍ ହାୱ୍‍କାନ୍ ସେଙ୍ଗେ ଅଡ଼୍‌‍କିଂଙ୍କ୍ ବାୟିଦେ ନେହେତାନଙ୍କ୍ ଗଟ୍ କେତ୍‍ତଣ୍ଡ୍ ।
ACT 7:20 ଆଦ୍ ସମୟ୍‍ତେ ମୋଶାଲ୍‌‍ ଜନମ୍ ଆତ୍‍ତଣ୍ଡ୍, ଅଣ୍ଡ୍‌ ଗାଟି ସୁନ୍ଦର୍ ମାତ୍‍ତଣ୍ଡ୍ । ଇଶ୍ୱର୍ ମୁଣ୍ଡ୍ ନେଲ୍‍ଞ୍ଜ୍‍କ୍ ତାମ୍‍ ଲୋନ୍‌ ବାଦ୍‍କ୍‍ତଣ୍ଡ୍,
ACT 7:21 ମେଣ୍ଡେ ବେସୁଟ୍‌ ଅଂକିଙ୍କ୍‌ ବାୟିଦେ ରହ୍‍ସିତ୍‍ତ୍‍ତଡ଼୍, ଫାରୋନ୍ ମାୟାଡ଼୍ ଅଂକିଙ୍କ୍‌ ନିଜେତ୍ ମାର୍‍ ଲେକାମ୍ ପଡ଼୍‍ପ୍‍ତେ ।
ACT 7:22 ମୋଶାଲ୍‌‍ ମିଶର୍‍ତେ ସାରେ ବିଦ୍ୟାତାଗ୍ ଶିକିତ୍ ଆସ୍, ଅନ୍‌‍ୱାଦ୍ ଗଟ୍‍ ନୁ ପାଡ଼ିୟିଦାଗ୍ ମହାନ୍ ବ୍ୟକ୍ତି ଲେକାମ୍ ପରିଚିତ ଆତ୍‍ତଣ୍ଡ୍ ।”
ACT 7:23 “ବେସୁଟ୍‌ ମୋଶାନ୍‌ ବୟସ୍‍ ଚାଲିଶ୍ ହେଣ୍ଡ୍‍କ୍ ଆତ୍‍ତେ, ଅଣ୍ଡ୍‌ ତାନ୍ ଇସ୍ରାଏଲ୍‍ ବିଶ୍ୱାସୀଡ଼୍‍ ଦାଦାଲ୍‌ଡ଼୍‌ ବେଦ୍‍ପୁଟୁଙ୍କ୍ ବ୍ୟବହାର୍ ମାଡ଼ୁତଡ଼୍, ଆଦ୍ ପୁନ୍ଦାନ୍ ମାଇଦିଙ୍କ୍ ଇଚ୍ଛା ମାଡ଼୍‍ତଣ୍ଡ୍ ।
ACT 7:24 ଅଡ଼୍‌ ଲୋପେଙ୍କ୍ ଅର୍‍ତୁଙ୍କ୍, ୱେରଣ୍ଡ୍ ମିଶର୍‍ତେ କାରାପ୍ ବ୍ୟବହାର୍ ମାଡ଼ାନାଦ୍ ଉଡ଼ି, ମୋଶଲ୍ ଅଂକିଙ୍କ୍‌ ରକ୍ଷା ମାଡ଼ାନ୍ ସେଙ୍ଗେ ମିସରୀୟ ନାରୁଙ୍କ୍ ପ୍ରତିଶଦ୍‍ ଆସ୍ ଅଂକିଙ୍କ୍‌ ହାୱ୍‍କ୍‍ତଣ୍ଡ୍ ।
ACT 7:25 ଅନ୍‌ ତଡ଼୍ ଇଶ୍ୱର୍ ଜେ ତାମ୍ ନାରୁଡ଼୍‍କିଂଙ୍କ୍ ମୁକ୍ତି ମାଡ଼ୁତଣ୍ଡ୍, ଇଦ୍ ଆ ବିଶ୍ୱାସୀଡ଼୍‍ ଦାଦାଲଡ଼୍‌ ବୁଜେମ୍‍ଆତ୍‍ତଡ଼୍ ଇଞ୍ଜ ଅଣ୍ଡ୍‌ ହାଲ୍‍ସି ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଡ଼୍‌ ବୁଜେମ୍ ଆୟ୍‍ୟଡ଼୍ ।
ACT 7:26 ମେଣ୍ଡନ୍‍ଦିନେ ଅଣ୍ଡ୍‌ ଇର୍‍ୱୁଡ଼୍ ଇସ୍ରାଏଲୀୟ ଦାଦାଲଡ଼୍‍ ଗଲ୍‍କ୍ ଆଦାନାଦ୍ ଉଡ଼୍‍ତଣ୍ଡ୍ ନୁ ଅଡ଼୍‌‍କିଂଙ୍କ୍ ଶାନ୍ତି ମାଡ଼ାନଙ୍କ୍ କେତ୍‍ତନ୍ । ଅଣ୍ଡ୍‌ କେତ୍‍ତଣ୍ଡ୍, ‘କେଞ୍ଜାଟ୍, ମିଡ଼୍ ଇର୍‍ୱୁଡ଼୍ ତ ଇସ୍ରାଏଲୀୟ ନାରୁଡ଼ି । ବାତେଙ୍କ୍ ଇଦ୍ ରକମ୍ ପ୍ରତିଶଦ୍‍ ମାଡ଼ୁତିଡ଼୍ ?’
ACT 7:27 ବାତେଙ୍କ୍ ଇତ୍କେ ବେନ୍ ନାରୁଡ଼୍ ମେଣ୍ଡ୍‍ଅଡ଼୍‌‍ତିଙ୍କ୍ କାରାପ୍ ବ୍ୟବହାର୍ ମାଡ଼ମାତ୍‍ତଣ୍ଡ୍, ଅଣ୍ଡ୍‌ ମୋଶାଙ୍କ୍ ତୁର୍ସି କେତ୍‍ତଣ୍ଡ୍, ‘ମା ପର୍‍ର ନିକିଂଙ୍କ୍ ବେନ ଶାସନ୍‍ କର୍ତାଲ୍ ନୁ ବିଚାର୍‍ପତି ମାଡ଼୍‍ତଣ୍ଡ୍ ?
ACT 7:28 ନିନେ ବେଲା ମିଶର୍‍ତେ ନାରୁଙ୍କ୍ ହାୱ୍‍କ୍‍ତି, ନାକିଂଙ୍କ୍ ବାତେ ଆଦେରକମ୍ ହାୱ୍‍କାଙ୍କ୍ ଇଚ୍ଛା ମାଡ଼ୁତି ?’
ACT 7:29 ମୋଶାଲ୍‌‍ ଇଦ୍ କେଞ୍ଜି ମିସର୍‍ ଦେଶ୍ ମିର୍‍ତଣ୍ଡ୍ ନୁ ମିଦିୟୋନ୍ ଦେଶ୍‍ତାଗ୍ ମାତ୍‍ତଣ୍ଡ୍ । ଆଗେ ଅନାୱୁ ଇର୍‍ୱୁଡ଼୍ ମାର୍‍କ୍ ଜନମ୍ ଆତ୍‍ତଡ଼୍ ।”
ACT 7:30 “ଚାଲିଶ୍ ହେଣ୍ଡ୍‍କ୍ ଆତ୍‍ତେ ପେର୍‍କେ ସୀନୟ ମେଟେତ୍ ଗାରେ ଉସ୍କ ନେଲ୍‌ତାଗ୍ ନିଡ଼୍‍ତାନ୍‌ ପଦ୍‍ଲେତ୍‌ ତାଗ୍‌ ନିଡ଼୍‍ତାନାଦ୍ କିସ୍ ଲୋପେ ଇଶ୍ୱର୍‌ତେ ୱେରଡ୍‍ ଦୂତ୍ ମୋଶାଙ୍କ୍ ଦର୍ଶନ୍ ଇତ୍‍ତେ ।
ACT 7:31 ମୋଶାଲ୍‌‍ ଆଦ୍ ଦୃଶ୍ୟ ଉଡ଼ି କାବା ଆତ୍‍ତଣ୍ଡ୍, ମେଣ୍ଡେକେନ୍ ସାୟେ ଉଡ଼ାନଙ୍କ୍ ବକେତ୍ ଆଦାନ୍ ୱେଲେ ଅଣ୍ଡ୍‌ ପ୍ରବୁନାଦ୍ ବାକ୍ୟ କେଞ୍ଜ୍‍ତଣ୍ଡ୍,
ACT 7:32 ‘ନାନ୍ ମିଇ ଆନିଦାଦି ଅବ୍ରାହାମ୍, ଇସ୍‍ହାକ୍ ନୁ ଯାକୁବ୍‍ତେ ଇଶ୍ୱର୍ ।’ ମୋଶାଲ୍‌‍ ୱେର୍ରେସ୍‍ ୱାଡ଼୍‍କ୍‍ତଣ୍ଡ୍ ମେଣ୍ଡେ ଉଡ଼ାନଙ୍କ୍ ସାହାସ୍ ମାଡ଼ଣ୍ଡ୍ ।”
ACT 7:33 ତାନ୍‍ପେର୍କେ ପ୍ରବୁ ଅଂକିଙ୍କ୍‌ କେତ୍‍ତଣ୍ଡ୍, “ନିୟାୱୁ ହେର୍‍ପୁକ୍ ଟେଣ୍ଡେ, ବାତେଙ୍କ୍ ଇତ୍କେ ନିମ୍‍ ବେଗେ ନିତ୍‍ତିନ୍, ଆଦ୍ ବୂମ୍‌ ପବିତ୍ର ପଡ଼୍‍ୟେ ।
ACT 7:34 ମିସର୍‍ତାଗ୍ ନାନ୍ ନାୱଡ଼୍ ନାରୁଡ଼୍‍କ୍ କଷ୍ଟ ପାଏମ୍‍ଆଦାନାଦ୍ ଉଡ଼୍‍ତାନ୍ । ନାନ୍ ଅଡ଼ାଦ୍‌ କେୟାନାଦ୍ କେଞ୍ଜ୍‍ତାନ୍ ମେଣ୍ଡେ ଅଡ଼୍‌‍କିଂଙ୍କ୍ ଉଦ୍ଦାର୍ ମାଡ଼ାନଙ୍କ୍ ମଦଲ୍ ୱାତ୍‍ତାନ୍ । ଇଞ୍ଜେ ୱାଡ଼େ, ନାନ୍ ନିକିଂଙ୍କ୍ ମିସର୍‍ ଦେଶ୍ ରହତିତାନ୍ ।”
ACT 7:35 “ବେନ୍ ମୋଶାଲ୍‌‍ ଇସ୍ରାଏଲୀୟଡ଼୍ ପରିହାସ୍ ମାଡ଼ିମାତ୍‍ତଡ଼୍ ଅଂକିଙ୍କ୍‌ ଅଡ଼୍‌ ପାଚ୍ରାମାଡ଼୍‍ତଡ଼୍, ‘ମା ପର୍‍ର ନିକିଂଙ୍କ୍ ବେନ ଶାସନ୍‍ କର୍ତାଲ୍‍ ନୁ ବିଚାର୍‍ପତି ମାଡ଼୍‍ତଣ୍ଡ୍ ?’ ବାତେଙ୍କ୍ ଇତ୍କେ ଇଶ୍ୱର୍ ଅଂକିଙ୍କ୍‌ ନିଡ଼୍‍ତାନାଦ୍ ପଦ୍‍ଲେତ୍‍ ବକେତ୍ ଦର୍ଶନ୍ ଇସ୍‌‍ମାନ୍ଦାନ୍ ଦୂତନ୍ ସାହାଯ୍ୟତେ ନାରୁଡ଼୍‍କିଂଙ୍କ୍ ଶାସନ୍‍ ମାଡ଼ାନଙ୍କ୍ ନୁ ଅଡ଼୍‌‍କିଂଙ୍କ୍ ଉଦ୍ଦାର୍ ମାଡ଼ାନଙ୍କ୍ ରହତଣ୍ଡ୍ ।”
ACT 7:36 ଅଣ୍ଡ୍‌ ମିସର୍‍ ଦେଶ୍‍ତାଗ୍ ନୁ ଏର୍ରେରଙ୍ଗ୍ ସାୱ୍‍ଡ଼େତାଗ୍ ନାର୍‍ଗେ ଅଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ତଅସ୍ ନାରୁଡ଼୍‍କିଂଙ୍କ୍ ମିସର୍‍ତାଗାଙ୍କ୍ ବାୟିଦେ ପେସ୍‍ପି ତାତ୍‍ତଣ୍ଡ୍, ଚାଲିଶ୍ ହେଣ୍ଡ୍‍କ୍ ଯାକ ମରୁବୁମ୍‍ତାଗ୍ ଅଡ଼୍‌‍କିଂଙ୍କ୍ ହାର୍ ତଅତଣ୍ଡ୍ ।
ACT 7:37 ମୋଶାଲ୍‌‍ ନିଜେ ଇସ୍ରାଏଲ୍‍ତେ ବାବବାଦୀ ନାରୁଡ଼୍‍କିଂଙ୍କ୍ କେସ୍‍ମାତ୍‍ତଣ୍ଡ୍, “ଇଶ୍ୱର୍ ନାକିଂଙ୍କ୍ ବେଲା ରହତଣ୍ଡ୍, ଆଦେ ରକମ୍ ମିଇ ବକେତ୍ ୱେରଣ୍ଡ୍ ଦାଦାଲଡ଼୍‍ ରହତିତଣ୍ଡ୍, ଅଣ୍ଡ୍‌ ମିଇ ନାରୁଡ଼୍ ଲୋପେଙ୍କ୍ ୱେରଣ୍ଡ୍ ତାମୁସ୍‍ ଆଦ୍‍ତନ୍ ।”
ACT 7:38 ଆଦ୍‍ନାଣ୍ଡ୍‍ ଆ ମୋଶାଲ୍ ଉସ୍କ ନେଲ୍‌ତାଗ୍ ଗୁଡ଼ିମାନ୍ଦାନ୍ ଇସ୍ରାଏଲୀୟ ନାରୁଡ଼୍ ତଡ଼୍ ମାତ୍‍ତଣ୍ଡ୍, ଅଣ୍ଡ୍‌ ସୀନୟ୍ ମେଟେତାଗ୍ ମାନ୍‍ ଆନିଦାଦିଡ଼୍ ତଡ଼୍ ନୁ ଅନ୍‌‍ତଡ଼୍ ଗଟ୍ ତିର୍‍ୟମାନ୍ଦାନ୍ ଦୂତ ମାତ୍‍ତଣ୍ଡ୍ ନୁ ମା ଗାର୍‍ରେ ତୁହୁସାନ୍ ମାଇଦିଙ୍କ୍ ଅଣ୍ଡ୍‌ ଇଶ୍ୱର୍‌ତାଗାଙ୍କ୍ ଜିୱେତ୍ ବାକ୍ୟ ଗ୍ରହନ୍ ମାଡ଼୍‍ତଣ୍ଡ୍ ।
ACT 7:39 “ବାତେଙ୍କ୍ ଇତ୍‍କେ ମାୱଡ଼୍ ଆନିଦାଦିଡ଼୍ ଅନ୍‌ ଗଟି କେଞ୍ଜଡ଼୍, ଅଡ଼୍‌ ଅଂକିଙ୍କ୍‌ ପାସ୍କି ମିସର୍‍ତାଗ୍ ମାଲ୍‍ସ୍ ଆଦାନଙ୍କ୍ ଇଚ୍ଛା ମାଡ଼୍‍ତଡ଼୍ ।
ACT 7:40 ଆଦିଙ୍କ୍ ଅଡ଼୍‌ ହାରୋଣତିଙ୍କ୍ କେତ୍‍ତଡ଼୍‍, ‘ବେସ୍‌କ୍ ଦେୟାକ୍ ପୁତ୍‍ଲାମ୍ ତିଆର୍ ମାଡ଼ିମ୍ । ମାକିଂଙ୍କ୍ ମିସର୍‍ ଦେଶ୍‍ତାଗାଙ୍କ୍ ପେସ୍‍ପି ତାତ୍‍ତେ ମୋଶାଲ୍‌‍ ବେକେ ଆତ୍‍ତଣ୍ଡ୍, ଆଦ୍ ମାମ୍‍ମେ ପୁନମ୍ ।’
ACT 7:41 ଆସୁଟେ ଆଗେ ଅଡ଼୍‌ ଅଣ୍ଡୟ୍‌ ଗଡ୍‍ପିଲେ ପୁତ୍‍ଲାମ୍ ତିଆର୍ ମାଡ଼୍‍ତଡ଼୍ ନୁ ତାନ୍‍ ଲେକାମ୍‌ତେ ପୁଜେ ମାଡ଼୍‌ତଡ଼୍‍ । ମେଣ୍ଡେ ନିଜେ ତିଆର୍ ମାଡ଼୍‍ତେ ପୁତ୍‍ଲାମ୍‍ତେ ସମ୍ମାନ୍ ସେଙ୍ଗେ ଅଣ୍ଡୟ୍‌ ବଜି ମାଡ଼୍‍ତଡ଼୍ ।
ACT 7:42 ଆଦିଙ୍କ୍ ଇଶ୍ୱର୍ ଅଡ଼୍‌ ସେଙ୍ଗେ କପାମ୍ ଆତ୍‍ତଣ୍ଡ୍ ନୁ ଅଡ଼୍‌‍କିଂଙ୍କ୍ ସ୍ୱର୍ଗତାଗ୍ ମାନ୍ଦାନ୍ ଉକାକିଙ୍କ୍ ଉପାସନା ମାଡ଼ାନଙ୍କ୍ ୱିଡ଼୍‍ସିତ୍‍ତଣ୍ଡ୍ । ଇଦ୍ ବିଷୟ୍‍ତେ ବାବବାଦୀଡ଼ାଦ୍ ବଇତାଗ୍ ଲେକାମିନ୍ଦେ, ‘ହୋ ଇସ୍ରାଏଲ୍‍ ବଂଶତଡ଼୍ ! ଉସ୍କ ନେଲ୍‌ତାଗ୍ ଚାଲିଶ୍‍ ହେଣ୍ଡ୍‍କ୍ ଯାକ ମିଡ଼୍ ନା’ ସେଙ୍ଗେ ପଶୁ ବଲି ନୁ ହୋମବଲି ହିୱକଟ୍ ମାତ୍‍ତିଡ଼୍ ।
ACT 7:43 ବାତେଙ୍କ୍ ଇତ୍‍କେ ମିଡ଼୍ ପୁଜା ମାଡ଼ାନଙ୍କ୍ ବେନ୍ ପୁତ୍‍ଲାକିଙ୍କ୍ ତିଆର୍ ମାଡ଼ିମାତ୍‍ତିଡ଼୍, ଆଦ୍ ମାଲିକ୍‌ତେ ତମ୍ବୁ ନୁ ଉକାମ୍ ଦେୟାମ୍ ରମ୍ପା ପୁତ୍‍ଲାତିଙ୍କ୍ କାଞ୍ଜୀ ହତ୍‍ତିଡ଼୍ । ଆଦିଙ୍କ୍ ନାନ୍ ମିକିଂଙ୍କ୍ ବାବିଲୋନ୍‌ ଦେଶ୍‍ତେ ମେଣ୍ଡନ୍‍ପାକ୍ ରହତିତାନ୍ ।”
ACT 7:44 ଉସ୍କ ନେଲ୍‌ତାଗ୍ ମାନ୍‍ ଆନିଦାଦିଡ଼୍ ତଡ଼୍ ଇଶ୍ୱର୍‌ତେ ପବିତ୍ର ତମ୍ବୁ ସାକ୍ଷ୍ୟ । ଇଶ୍ୱର୍ ମୋଶାଲ୍‌‍ ବେଲା ତିଆର୍ ମାଡ଼ାଙ୍କ୍ କେସ୍‍ମାତ୍‍ତଣ୍ଡ୍ ନୁ ମୋଶାଙ୍କ୍ ବେଦ୍ ନକ୍‍ସା ତଅସ୍‍ମାତ୍‍ତଣ୍ଡ୍, ଇଦ୍ ଆଦେରକମ୍ ତିଆର୍ ଆସ୍ ମାତ୍‍ତେ ।
ACT 7:45 ପେର୍‍କେ ମାନ୍‍ ଆନିଦାଦିଡ଼୍ ଅଡ଼୍‌ ବାବାଲଡ଼ାଗାଙ୍କ୍ ଦର୍‍କି ମାନ୍ଦାନ୍ ଆଦ୍ ତମ୍ବୁତିଙ୍କ୍ ଜିହୋଶୁୟନ୍ ତଡ଼୍ କାଞ୍ଜୀ ମୁନ୍‍ନେ ଆଦ୍‍ତଡ଼୍ ନୁ ଇଶ୍ୱର୍ ତଲିମାନ୍ଦାନ୍ ବାଗାତ୍ ଅଣଯିହୁଦିଡ଼୍‍ଡ଼ାଦ୍ ଦେଶ୍‍ ଅଦିକାର୍‌ ମାଡ଼୍‍ତଡ଼୍ । ଦାଉଦନ୍ ଦିନାମ୍ ଯାକ ଆଦ୍ ଆଗେ ମାତ୍‍ତେ ।
ACT 7:46 ଅଣ୍ଡ୍‌ ଇଶ୍ୱର୍‌ତେ ଅନୁଗ୍ରହ ନାରୁଣ୍ଡ୍‍ ହାସ୍ ମାତ୍‍ତଣ୍ଡ୍, ଅଣ୍ଡ୍‌ ପରମେଶ୍ୱର୍‍ତିଙ୍କ୍ ଯାକୁବ୍‍ ଇଶ୍ୱର୍‌ତେ ମାଇଦିଙ୍କ୍ ଅଣ୍ଡୟ୍‌ ମନ୍ଦିର୍ ତିଆର୍ ମାଡ଼ାନଙ୍କ୍ ଗଟ୍ ମାଡ଼୍‍ତଣ୍ଡ୍ ।
ACT 7:47 ଇତ୍‍କେ ପେର୍‍କେ ଆ ମନ୍ଦିର୍ ଶଲୋମନ୍‍ ତିଆର୍ ମାଡ଼୍‍ତଣ୍ଡ୍ ।
ACT 7:48 “ଆଗେକ୍‍ବା ସାରେତିଙ୍କ୍ ବେଡ଼୍‍ୟେ ଇଶ୍ୱର୍ ନାରୁଡ଼୍ ମାଡ଼୍‍ତେ ଲୋକିନାଗ୍ ମାନଣ୍ଡ୍ । ଇଦ୍ ବିଷୟ୍ ବାବବାଦୀଡ଼୍‍ ଲେକିମିନ୍ଦେଡ଼୍;
ACT 7:49 ‘ପ୍ରବୁ କେତ୍‍ତଣ୍ଡ୍, ସ୍ୱର୍ଗ ନା’ ସିଂହାସନ୍‍ ନୁ ପୃତିବି ନାୱାଦ୍ ଡେକେତ୍ କୁତୁଲ୍‍ । ମିଡ଼୍ ନା ମାଇଦିଙ୍କ୍ ବେସତ୍ ଲୋନ୍‌ ତିଆର୍ ମାଡ଼ିତିଡ଼୍ ? ନାନ୍ ରହମାନ୍ ସେଙ୍ଗେ ପଡ଼୍‍ୟେ ବେଗେ ?
ACT 7:50 ଇୱୁ ସାରେ ବିଷୟ୍ ବାତ୍ ନାନ୍ ନିଜେ ତିଆର୍ ମାଡ଼ନ୍ ?”
ACT 7:51 ସ୍ତିଫାନ୍ ମେଣ୍ଡେ କେତ୍‍ତଣ୍ଡ୍, “ମିଡ଼୍ ବେସର୍ ଜିଦ୍‍ତଡ଼ି ! ମିୱାଦ୍ ହୃଦୟ୍ ବେସର୍ ଅସୁନ୍ନତ, ଇଶ୍ୱର୍‌ତେ ବାକ୍ୟ ସେଙ୍ଗେ ମିଡ଼୍ ବେସର୍ ବାୟିରାଲଡ଼ି ! ମିଡ଼୍ ଟିକ୍ ମିୱଡ଼୍ ଆନିଦାଦିଡ଼୍ ଲେକାମ୍, ମିଡ଼୍ ସାରେଦାମ୍ ପବିତ୍ର ଆତ୍ମାତିଙ୍କ୍ ବିରୋଦ୍ ମାଡ଼ିତିଡ଼୍ ।
ACT 7:52 ବାବବାଦୀଡ଼୍ ଲୋପେଙ୍କ୍ ବେନଙ୍କ୍ ମିୱଡ଼୍ ଆନିଦାଦିଡ଼୍ ତାଡ଼ନା ମାଡ଼୍‍ୱେ ମାତ୍‍ତଡ଼୍ କି ? ବେନଡ଼୍ ଆଦ୍ ଦାର୍ମିକ୍ ନାରୁଣ୍ଡ୍‍ ୱାଦାନ୍ ବିଷୟ୍ ମୁନେଙ୍କ୍ କେସ୍‍ମାତ୍‍ତଡ଼୍, ଅଡ଼୍‌‍କିଂଙ୍କ୍ ଅଡ଼୍‌ ହାୱ୍‍କ୍‍ତଡ଼୍; ଇଞ୍ଜେ ମିଡ଼୍ ଅଂକିଙ୍କ୍‌ ଶତ୍ରୁଡ଼୍ କାୟିଦେ ସମର୍‍ପନ୍ ମାଡ଼ି ହାୱ୍‍କ୍‍ତିଡ଼୍ ।
ACT 7:53 ମିଡ଼୍ ଦୂତଡ଼୍ ହିତ୍‍ତାଦ୍ ଇଶ୍ୱର୍‌ତେ ନିତିନିୟମ୍ ସାରେ ପାଏମ୍‍ଆତ୍‍ତିଡ଼୍, ଆଗେକ୍‍ବା ଆଦିଙ୍କ୍ ମୋଶାନ୍‌‌ ନିୟମ୍‍ ପାଲନ୍ ମାଡ଼୍‍ୱିଡ଼୍ ।”
ACT 7:54 ବେଡ଼ିୟ୍‍ମିଟିଙ୍କ୍‍ତେ ସଦସ୍ୟଡ଼୍ ସ୍ତିଫାନ୍‍ତେ ବାଷନ୍ କେଞ୍ଜି ଗାଟି କପାମ୍ ଆତ୍‍ତଡ଼୍, ମେଣ୍ଡେ ଅଡ଼୍‌ ଅନ୍‌ ସେଙ୍ଗେ ପାଲ୍‍କ୍ କର୍‍କ୍‌ତଡ଼୍ ।
ACT 7:55 ବାତେଙ୍କ୍ ଇତ୍‍କେ ସ୍ତିଫାନ୍ ପବିତ୍ର ଆତ୍ମାତେ ଗୌରବମୟ ଆସ୍ ସ୍ୱର୍ଗତା ଉଡ଼୍‍ତଣ୍ଡ୍ ନୁ ଇଶ୍ୱର୍‌ତେ ମହିମା ନୁ ଜିସୁଙ୍କ୍ ତିନ୍ଦେପାକ୍ ନିଶ୍‍ମାନ୍ଦାନାଦ୍ ଉଡ଼୍‍ତଣ୍ଡ୍ ।
ACT 7:56 ଅଣ୍ଡ୍‌ କେତ୍‍ତଣ୍ଡ୍, “ଉଡ଼ାଟ୍, ନାନ୍ ସ୍ୱର୍ଗତିଙ୍କ୍ କୁଲା ଆତ୍‍ତାଦ୍ ନୁ ନାରୁଣ୍ଡ୍‍ ପିଲେ ଇଶ୍ୱର୍‌ତେ ତିନ୍ଦେପାକ୍ ନିଶ୍‍ମାନ୍ଦାନାଦ୍ ଉଡ଼ୁତାନ୍ ।”
ACT 7:57 ଗାଟି ଲେଙ୍ଗ୍‍ଦେ ମିଟିଙ୍ଗ୍‍ତେ ବେଡ଼୍‍ୟେ ନାରୁଡ଼୍ ଇଦ୍ ଗଟ୍ କେଞ୍ଜମ୍ ଇଞ୍ଜ କେୱ୍‍କିଙ୍କ୍ କାୟିକିନ୍‍ତଡ଼୍ ବନ୍ଦ୍ ମାଡ଼୍‍ତଡ଼୍ । ତାନ୍‍ପେର୍କେ ଅଡ଼୍‌ ଅଣ୍ଡୟ୍‌‍ତଡ଼୍ ଅନ୍‌ ବକେତ୍ ୱାତ୍‍ତଡ଼୍ ।
ACT 7:58 ସହରତେ ବାୟିଦେ ଅଂକିଙ୍କ୍‌ ଲାଗି ଅସ୍, ଅନ୍‌ ପର୍‍ କାଲ୍‍କ୍ ହେସି ହାୱକ୍‍ତଡ଼୍ । ମିଚ୍‍ ସାକ୍ଷୀଡ଼୍ ଶାଉଲ୍‍ ପେଦେର୍‍ତଣ୍ଡ୍ ୱେରଣ୍ଡ୍ ଲେୟଣ୍ଡ୍‍ତେ ଡେକେତ୍ ବକେତ୍ ଅଡ଼ାୱୁ ସାରେ ଚକା ୱିଡ଼୍‍ସି ଆଞ୍ଜ୍‍ମାତ୍‍ତଡ଼୍ ।
ACT 7:59 ଅଡ଼୍‌ ସ୍ତିଫାନ୍‍ତେ ପର୍‍ କାଲ୍‍କ୍ ହେସାନ୍ ୱେଲେ ଅଣ୍ଡ୍‌ ପ୍ରବୁଙ୍କ୍ ପ୍ରାର୍ତନା ମାଡ଼ି କେତ୍‍ତଣ୍ଡ୍, “ପ୍ରବୁ ଜିସୁ, ନାୱାଦ୍ ଆତ୍ମାତିଙ୍କ୍ ଗ୍ରହନ୍ ମାଡ଼େ ।”
ACT 7:60 ଅଣ୍ଡ୍‌ ମର୍‍ମିଣ୍ଡା ଉୱୁସ୍ ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, “ପ୍ରବୁ ! ଇଡ଼୍ ବିରୁଦ୍‍ତେ ଇଦ୍ ପାପ୍ ଏର୍କା ମାଡ଼୍‍ମାଟ୍ ।” ଇଦ୍ କେସ୍ ଅଣ୍ଡ୍‌ ଡଲ୍‍ତଣ୍ଡ୍ ।
ACT 8:1 ଶାଉଲ୍‍ ସ୍ତିଫାନ୍‍ତେ ଡଲାନାଦିଙ୍କ୍ ସମର୍ତନ୍ ମାଡ଼୍‍ତନ୍ । ଆଦ୍ ଦିନେକନ୍ସ୍ ଯିରୁଶାଲେମ୍‍ତେ ମଣ୍ଡଲି ସେଙ୍ଗେ ତାଡ଼ନା ଆରାମ୍ ଆତ୍‍ତେ । ପ୍ରେରିତ ଶିଷ୍ୟଡ଼୍‍କ୍ ୱିଡ଼୍‍ସି ମେଣ୍ଡେ ସାରେତଡ଼୍ ବିଶ୍ୱାସୀଡ଼୍ ଯିହୁଦା ନୁ ଶମିରୋମ୍ ଦେଶ୍‍ତେ ପଡ଼ିୟେତାଗ୍ ୱେକ୍‍ୱେକ୍ ଆତ୍‍ତଡ଼୍ ।
ACT 8:2 ବେସ୍‍କ୍‍ତୁଡ଼୍‍ ଇଶ୍ୱର୍‌ତେ ବକ୍ତନଡ଼୍‌ ଗାଟି ଲେଙ୍ଗ୍‍ଦେ କେୟିମିକା ସ୍ତିଫାନ୍‍ତେ ମଡ଼୍‍ତିଙ୍କ୍ ସମାଦି ହିତ୍‍ତଡ଼୍ ।
ACT 8:3 ବାତେଙ୍କ୍ ଇତ୍କେ ଶାଉଲ୍‍ ମଣ୍ଡଲିତିଙ୍କ୍ ଦଂସ ମାଡ଼ାନଙ୍କ୍ ଆଲ୍‍ସି ମାଡ଼୍‍ତଣ୍ଡ୍, ଲକ୍ ଲକ୍ ଆଞ୍ଜ୍ କ୍ରିଷ୍ଟ ବିଶ୍ୱାସୀ ମାନେୟ୍‍ ନାଟାଙ୍କ୍ ସାରେତଡ଼୍‌କିଂଙ୍କ୍ ଲାଗିତାସ୍ ଜଇଲ୍‍ତାଗ୍ ତୁର୍‍ତଡ଼୍ ।
ACT 8:4 ୱେକ୍ ୱେକ୍ ଆତ୍‍ତେ ବିଶ୍ୱାସିଡ଼୍ ସାରେଏକାମ୍ ଆଞ୍ଜ୍ ସୁସମାଚାର୍‍ ପ୍ରଚାର୍ ମାଡ଼୍‍ତଡ଼୍ ।
ACT 8:5 ଶମିରୋମ୍ ମୁକ୍ୟ ନାର୍‍ତାଗ୍ ଆଞ୍ଜ୍ ଫିଲିପ୍‍ପ, ଆଗେତ୍ ନାରୁଡ଼୍‍କିଂଙ୍କ୍ ମସୀହାନାଦ୍ ସୁସମାଚାର୍ ପ୍ରଚାର୍ ମାଡ଼୍‍ତଣ୍ଡ୍ ।
ACT 8:6 ଫିଲିପ୍‍ପନ୍‍ ଗଟି କେଞ୍ଜି ନୁ ଅନ୍‌‍ୱାଦ୍ ଆଶର୍ଯ୍ୟ ପାଡ଼୍‍ୟି ଉଡ଼ି ନାରୁଡ଼୍ ମେଣ୍ଡେ ଅଦିକ୍‌ ଗଟି କେଞ୍ଜାଙ୍କ୍ ଇଚ୍ଛା ମାଡ଼୍‍ତଡ଼୍ ।
ACT 8:7 ନାର୍‍ଗେ ନାରୁଡ଼ାଗାଙ୍କ୍ ବୁତ୍‌କ୍ କିଡ଼୍‍କି କିଡ଼୍‍କି ପେଇସ୍ ଆତ୍‍ତା, ନାର୍‍ଗେ ପକ୍ୟାଗାତ୍ ରଗି ନୁ କୁଟାଲଡ଼୍ ସୁସ୍ଥ ଆତ୍‍ତଡ଼୍ ।
ACT 8:8 ଇଦିନ୍ ସେଙ୍ଗେ ଆଦ୍ ନଗର୍‍ତେ ନାରୁଡ଼୍ ଗାଟି ୱେଡ଼୍‍କ୍‍ତଡ଼୍ ।
ACT 8:9 ଶିମୋନ୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଡ଼୍ ଅନ୍‌‍ୱାଦ୍ ମନ୍ତ୍ର ବିଦ୍ୟାତଡ଼୍ ଆଦ୍ ଦେଶ୍‍ତେ ନାରୁଡ଼୍‍କିଂଙ୍କ୍ ଆଶର୍ଯ୍ୟ ମାଡ଼ି ନେହେସ୍ ମାତ୍‍ତଣ୍ଡ୍ । ଅଣ୍ଡ୍‌ ନିଜେତିଙ୍କ୍ ୱେରଣ୍ଡ୍ ବେଡ଼୍‍ୟେ ନାରୁଡ଼୍ ଇଞ୍ଜ କେସ୍ ସମରୀୟାତେ ସାରେ ନାରୁଡ଼୍‍କିନ୍ ଲୋପେଙ୍କ୍ ବାଡ଼୍‍ୟଣ୍ଡ୍ ଆସ୍ ମାତ୍‍ତଣ୍ଡ୍ ।
ACT 8:10 ଅଣ୍ଡ୍‌‍ ନିଜ୍‍ତିଙ୍କ୍‍ ଅର୍‍ତୁଣ୍ଡ୍‍ ବାଡ଼୍‍ୟଣ୍ଡ୍ ଇଞ୍ଜ୍‍ କେସ୍‍ ସମାଜ୍‍ତେ ସାରେ ନାରୁଡ଼୍‍ ଲୋପେଙ୍କ୍‍ ବାଡ଼୍‍ୟଣ୍ଡ୍‍ ଆସ୍‍ମାତ୍‍ତଣ୍ଡ୍‍ । ଅଡ଼୍‌ କେସ୍‍ମାତ୍‍ତଡ଼୍, “ଅଣ୍ଡ୍‌ ‘ମହାଶକ୍ତି’ ପେଦେର୍‍ତଣ୍ଡ୍ ଇଶ୍ୱର୍‌ତେ ଅଣ୍ଡୟ୍‌ ଶକ୍ତି ।”
ACT 8:11 ଆଦ୍ ମନ୍ତ୍ର ବିଦ୍ୟାତଡ଼୍ ନାର୍‍ଗେ ଦିନ୍ ଯାକ ଶମିରୋଣ ନାରୁଡ଼୍‍କିଂଙ୍କ୍ ତାନ୍ ଶିଷ୍ୟ ମାଡ଼ି ନେହେସ୍ ମାତ୍‍ତଣ୍ଡ୍ ।
ACT 8:12 ବାତେଙ୍କ୍ ଇତ୍‍କେ ଫିଲିପ୍‍ପ ପେଦେର୍‍ ଇଶ୍ୱର୍‌ତେ ରାଜ୍ୟ ନୁ ଜିସୁ କ୍ରିଷ୍ଟନ୍ ବିଷୟ୍‍ତେ ସୁସମାଚାର୍‍ କେଞ୍ଜି, ଅନ୍‌ ସେଙ୍ଗେ ନାରୁଡ଼ାଦ୍ ବିଶ୍ୱାସ୍ ଜନମ୍ ଆତ୍‍ତେ ନୁ ଆଦ୍ ଜାଗେତ୍‍ ସାରେ ନାଟା ନୁ ମାନେୟ୍‍ ଏର୍‍ଦିକ୍ୟା ଗ୍ରହନ୍ ମାଡ଼୍‍ତଡ଼୍ ।
ACT 8:13 ଶିମୋନ୍ ନିଜେ ଆଦ୍ ଗଟ୍‍ତିଙ୍କ୍ ବିଶ୍ୱାସ୍ ମାଡ଼୍‍ତଣ୍ଡ୍ । ଫିଲିପ୍‍ପ ତଡ଼୍ ମାଡ଼ିମାନ୍ଦାନ୍ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ଉଡ଼ି ଅଣ୍ଡ୍‌ ଏର୍‍ଦିକ୍ଷା ଗ୍ରହନ୍‍ ମାଡ଼ି ଫିଲିପ୍‍ପ ତଡ଼୍ ମାତ୍‍ତଣ୍ଡ୍ ।
ACT 8:14 ସମରୀୟାତେ ନାରୁଡ଼୍ ଇଶ୍ୱର୍‌ତେ ଗଟ୍ ଗ୍ରହନ୍ ମାଡ଼୍‍ତଡ଼୍ ଇଞ୍ଜ ଯିରୁଶାଲେମ୍‍ତାଗ୍ ମାନ୍ଦାନ୍ ପ୍ରେରିତ ଶିଷ୍ୟଡ଼୍ କେଞ୍ଜି, ପିତର୍ ନୁ ଯୋହନ୍‌‌ତିଙ୍କ୍ ଅଡ଼୍‌ ଗାର୍‍ରେ ରହତଡ଼୍ ।
ACT 8:15 ଅଡ଼୍‌ ଆଗେ ଏୱୁତ୍‍ତେ ପେର୍‍କେ ଶମିରୋନୀୟ ବିଶ୍ୱାସୀଡ଼୍ ବେଲା ପବିତ୍ର ଆତ୍ମା ଦର୍‍କିତ୍, ଆଦିନ୍ ସେଙ୍ଗେ ପ୍ରାର୍ତନା ମାଡ଼୍‍ତଡ଼୍ ।
ACT 8:16 ବାତେଙ୍କ୍ ଇତ୍‍କେ ଆସୁଟ୍‍ ଯାକ ଅଡ଼୍‌ ଲୋପେଙ୍କ୍ ବେନ ପର୍‍ର ପବିତ୍ର ଆତ୍ମା ଡିଗ୍‍ୱେ ମାତ୍‍ତେ । ଅଡ଼୍‌ ମାତର୍ ଜିସୁ ପ୍ରବୁନ୍‌ ପେଦେର୍‍ତେ ଏର୍‍ଦିକ୍ଷା ଗ୍ରହନ୍ ମାଡ଼ି ମାତ୍‍ତଡ଼୍ ।
ACT 8:17 ପିତର୍ ନୁ ଯୋହନ୍‌ ଅଡ଼୍‌ ପର୍‍ର କାୟି ୱାଟ୍‍ତେ ସାଙ୍ଗେ ସାଙ୍ଗେ ଅଡ଼୍‌ ପବିତ୍ର ଆତ୍ମା ପାଏମ୍‍ଆତ୍‍ତଡ଼୍ ।
ACT 8:18 ଶିମୋନ୍ ଉଡ଼୍‍ତଣ୍ଡ୍ ଯେ, ପ୍ରେରିତ ଶିଷ୍ୟଡ଼୍ ବିଶ୍ୱାସୀଡ଼୍ ପର୍‍ର କାୟ୍‍ ୱାଟ୍‍ତାଙ୍କ୍ ଅଡ଼୍‌ ପବିତ୍ର ଆତ୍ମା ପାଏମ୍‍ଆତ୍‍ତଡ଼୍ । ଆଦିଙ୍କ୍ ଅଣ୍ଡ୍‌ ପିତର୍ ନୁ ଯୋହନ୍‌‌ତିଙ୍କ୍ ଡାବ୍‍କ୍ ଇସ୍‌ କେତ୍‍ତଣ୍ଡ୍,
ACT 8:19 “ନାନ୍ ବାଗାତ୍ ନାରୁଡ଼୍ ପର୍‍ର କାୟ୍‍ ୱାଟ୍‍କେ, ଅଡ଼୍‌ ବେଲାକି ପବିତ୍ର ଆତ୍ମା ଦର୍‍କିତ୍, ଆଦିଙ୍କ୍ ନାକିଂଙ୍କ୍ ଇଦ୍ ଅଦିକାର୍‌‍ ହିମ୍ ।”
ACT 8:20 ବାତେଙ୍କ୍ ଇତ୍‍କେ ପିତର୍ ଅଂକିଙ୍କ୍‌ କେତ୍‍ତଣ୍ଡ୍, “ନି ତଡ଼୍ ନିୟାୱୁ ଡାବ୍‍କ୍ ଗାଲା ଦସଂ ହାୟି, ବାତେଙ୍କ୍ ଇତ୍‍କେ ଡାବ୍‍କ୍ ତଡ଼୍ ନିମ୍‍ ଇଶ୍ୱର୍‌ତେ ଦାନ ହାସାନଙ୍କ୍ ହାଲ୍‍ସୁତି !
ACT 8:21 ମାୱାଦ୍ ପଡ଼୍‍ୟେତାଗ୍ ନିୱାଦ୍ ବାତ୍‍ମିକା ବାଗ୍‍ ଇଲ୍‍ଲେ । ବାତେଙ୍କ୍ ଇତ୍‍କେ ଇଶ୍ୱର୍‌ତେ କଣ୍ଡେତେ ନିୱାଦ୍ ହୃଦୟ୍ ସାୟେ ଆୟ୍‍ୟ ।
ACT 8:22 ଆଦିଙ୍କ୍ ନିୱାଦ୍ ହୃଦୟ୍ ତାଦ୍‍ ଇଦ୍ କାରାପ୍ ଚିନ୍ତେ ସେଙ୍ଗେ ହେର୍କେ ମାଡ଼ାଟ୍‍, ଇଦ୍ ରକମ୍ ଚିନ୍ତେ ମାଡ଼ିମାନ୍ଦାନଙ୍କ୍ ପ୍ରବୁ ବେଲା କ୍ଷମା ମାଡ଼ିତନ୍, ଆଦିନ୍ ମାଇଦିଙ୍କ୍ ପ୍ରବୁଙ୍କ୍ ପ୍ରାର୍ତନା ମାଡ଼େ ।
ACT 8:23 ବାତେଙ୍କ୍ ଇତ୍‍କେ ଉଡ଼ୁତାନ୍ ଯେ ନିୱାଦ୍ ହୃଦୟ୍ ଇର୍ଷାତଡ଼୍ ବର୍ତ୍ତି ଆତ୍‍ତେ, ନିମ୍‍ କାରାପ୍ ପାଡ଼୍‍ୟି ତଡ଼୍‍ ବନ୍ଦନ୍‍ତାଗ୍ ବନ୍ଦି ହାସ୍‍ମିନ୍ଦେନି ।”
ACT 8:24 ଶିମୋନ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ବାତ୍ କେତୁତିଡ଼୍, ଆଦ୍ ବେଲାକି ନା ପର୍‍ର ୱାଡ଼୍‍ମାକି, ଇଦିନ୍ ସେଙ୍ଗେ ଦୟାମାଡ଼ି ପ୍ରବୁଙ୍କ୍ ପ୍ରାର୍ତନା ମାଡ଼ାଟ୍ ।”
ACT 8:25 ସାକ୍ଷ୍ୟ ଇସ୍‌ ନୁ ପ୍ରବୁନ୍ ସୁସମାଚାର୍‍ କେତ୍‍ତାନ୍ ପିତର୍ ନୁ ଯୋହନ୍‌ ଯିରୁଶାଲେମ୍‍ତାକ୍ ମାଲ୍‍ସ୍ ଆଦ୍‍ତଡ଼୍ । ମାଲ୍‍ସ୍ ୱାଦାନ୍ ୱେଲେ ହାର୍‍ଦାଗ୍ ଅଡ଼୍‌ ଶମିରୋଣ ଦେଶ୍‍ତେ ନାର୍‍ଗେ ନାଆକି ନାଗ୍‍ ସୁସମାଚାର୍ କେତ୍‍ତନ୍ ।
ACT 8:26 ପ୍ରବୁନ୍‍ ୱେରଣ୍ଡ୍ ଦୂତ୍ ଫିଲିପ୍‍ପତିଙ୍କ୍ କେତ୍‍ତଣ୍ଡ୍, “ତିଆର୍ ଆସ୍ ମାନୁଟ୍, ତିନ୍ଦେପାକ୍ ଯିରୁଶାଲେମ୍‍ କନ୍‍ସ୍ ଗାଜାତାକ୍ ଆତ୍‍ତେ ଆଦ୍‍ ହାର୍‍ ଆନୁଟ୍ ।” ଇଞ୍ଜେ ଆଦ୍ ହାର୍‍ଦାଗ୍ ବେନଗାଲା ଆଦ୍‍ଦା ୱାଦା ମାଡ଼ଣ୍ଡ୍ । ଆଦ୍‍ ପଡ଼୍‍ୟେତାଗ୍‍ ବେନ ଇଲ୍‍ୱେମାତ୍‍ତଣ୍ଡ୍‍ । ଇଞ୍ଜେ ଆ ଆର୍‍ ବେନ ଅନ୍‌‍ନଡ଼୍ ବା ବ୍ୟବହାର୍‍ ମାଡ଼ଡ଼୍‍ ।
ACT 8:27 ଫିଲିପ୍‍ପ ତିଆର୍ ଆତ୍‍ତଣ୍ଡ୍ । ଆସୁଟେ ଇଥିଓପିଆତ୍ ରାଜ୍ୟତେ କାଣ୍ଡକି ରାଣୀନ୍ ରାଜତିଙ୍କ୍ ଶାସନ୍‍ ମାଡ଼ନଣ୍ଡ୍ ମାନ୍ଦାନ୍ ଇଥିଓପିଆତେ ୱେରଣ୍ଡ୍ ୱାଞ୍ଜାଲ୍ କର୍ମଚାରୀ ତାନ୍ ଲୋନ୍‌ ମାଲ୍‍ସ ମାତ୍‍ତଣ୍ଡ୍ । ଅଣ୍ଡ୍‌ ଇଶ୍ୱର୍‌ତିଙ୍କ୍ ପୁଜା ମାଡ଼ାନ୍ ସେଙ୍ଗେ ଯିରୁଶାଲେମ୍‍ ଆଞ୍ଜ୍‍ ମାତ୍‍ତଣ୍ଡ୍ ।
ACT 8:28 ଅଣ୍ଡ୍‌‍ ଆଦ୍ ରତ୍‌ତାଗ୍ କୁଦି ଲୋନ୍‌ ମାଲ୍‍ସ ମାତ୍‍ତଣ୍ଡ୍ । ଆଦ୍ ରତ୍‌ତାଗ୍ ମାଲ୍‍ଦାନ୍ ୱେଲେ ଯିଶାଇୟ ବାବବାଦୀ ବଇ ଗାଟି ଲେଙ୍ଗ୍‍ଦେ କାର୍‍ସ ମାତ୍‍ତଣ୍ଡ୍ ।
ACT 8:29 ପବିତ୍ର ଆତ୍ମା ଫିଲିପ୍‍ପଙ୍କ କେତ୍‍ତେ, “ଆଦ୍ ରତ୍‍ତେ ବକେତ୍ ଅନ୍‌ ନୁ ଆଦିନ୍ ଗାର୍‍ରେ ମାନ୍‍ ।”
ACT 8:30 ଫିଲିପ୍‍ପ ମିରି ମିରି ଆତ୍‍ତଣ୍ଡ୍ ନୁ ଆ କର୍ମଚାରୀ ଯିଶାଇୟ ବାବବାଦୀନ୍ ବଇ ଗାଟି ଲେଙ୍ଗ୍‍ଦେ କାର୍‍ସ ମାନ୍ଦାନାଦ୍ କେଞ୍ଜ୍‍ତଣ୍ଡ୍ । ଅଣ୍ଡ୍‌ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, “ନିମ୍‍ ବାତ୍ କାର୍‍ତୁତି, ଆଦ୍ ବୁଜେମ୍ ଆଦୁତି କି ?”
ACT 8:31 କର୍ମଚାରୀ ଉତ୍ତର୍ ହିତ୍‍ତଣ୍ଡ୍, “ବେନ ଅନୁରଦ୍‌‍ ମାଡ଼ାନାଦ୍‍ ୱେରଣ୍ଡ୍ ବୁଜାମାଡ଼ିୱ କଟ ମାତ୍କେ, ନାନ୍ ବେଲା ବୁଜେମ୍ ଆଦ୍‍ତାନ୍ ?” ତାନ୍‍ତଡ଼୍ ରତ୍‌ତାଗ୍ କୁଦାନ୍‍ ମାଇଦିଙ୍କ୍ ଅଣ୍ଡ୍‌ ଫିଲିପ୍‍ପତିଙ୍କ୍ କାର୍‍ଙ୍ଗ୍‍ତଣ୍ଡ୍ ।
ACT 8:32 ଅଣ୍ଡ୍‌ ଦର୍ମଶାସ୍ତ୍ରତାଦ୍ ଇଦ୍ ବିଷୟ୍ କାର୍‍ସ୍ ମାତ୍‍ତଣ୍ଡ୍; “ହାୱ୍‍କାନ୍ ମାଇଦିଙ୍କ୍ ଆଦାନ୍ ମେଣ୍ଢା ଲେକାମ୍, କେଲ୍‍କ୍ କୟ୍‍ଦାନ୍‍ ୱେଲେ କଟମାନ୍ଦାନ୍ ମେଏଣ୍ଡେ ଲେକାମ୍, ଅଣ୍ଡ୍‌ ଅଣ୍ଡୟ୍‌ ପଦ୍‍ବା ଗଟ୍‍ ତିର୍‍ୟଣ୍ଡ୍ ।
ACT 8:33 ଅଣ୍ଡ୍‌ ଅପମାନିତ ଆତ୍‍ତଣ୍ଡ୍ ନୁ ନ୍ୟାୟତାଗାଙ୍କ୍ ବଞ୍ଚେମ୍‍ ଆତ୍‍ତଣ୍ଡ୍ । ତାମ୍ ବଂଶତଡ଼୍‍ ବିଷୟ୍‍ତେ ବେନ ବାଆତେ କେତାଙ୍କ୍ ପାର୍‍ୱଡ଼୍, ବାତେଙ୍କ୍ ଇତ୍‍କେ ପୃତିବିତାଗ୍ ଅଡ଼ାଦ୍‌ ଜିୱୁଣ୍ଡ୍ ତେରି ଆତ୍‍ତେ ।”
ACT 8:34 ୱାଞ୍ଜାଲ୍‍ କର୍ମଚାରୀ ଫିଲିପ୍‍ପତିଙ୍କ୍ ପାଚ୍ରାମାଡ଼୍‍ତଣ୍ଡ୍, “ବାବବାଦୀ ବେନ ବିଷୟ୍‍ତେ ପ୍ରାର୍ତନା ମାଡ଼ୁତଣ୍ଡ୍, ନାକିଂଙ୍କ୍ କେଲାଟ୍ । ତାନ୍ ନିଜେତ୍ ବିଷୟ୍‍ତେ ନା ମେଣ୍ଡେ ୱେରଣ୍ଡ୍ ବିଷୟ୍‍ତେ ?”
ACT 8:35 ଫିଲିପ୍‍ପ ଦର୍ମଶାସ୍ତ୍ରତେ ଇଦ୍ ବାକ୍ୟତାଗାଙ୍କ୍ ଆରାମ୍ ମାଡ଼ି ଜିସୁନ୍ ବିଷୟ୍‍ତେ କେତ୍‍ତାଦ୍ ସାରେ ସୁସମାଚାର୍‍ ଅଂକିଙ୍କ୍‌ କେତ୍‍ତଣ୍ଡ୍ ।
ACT 8:36 ଅଡ଼୍‌ ହାର୍‍ଦାଗ୍ ଆଦାନ୍ ୱେଲେ ଅଣ୍ଡୟ୍‌ ଏର୍‍ୱେତାଗ୍ ଏୱୁତ୍‍ତଡ଼୍ । ୱାଞ୍ଜାଲ୍‍ କର୍ମଚାରୀ କେତ୍‍ତଣ୍ଡ୍,
ACT 8:37 “ଇଗେ ଏର୍‍ ମିନ୍ଦା, ଇଞ୍ଜେ ନାକିଂଙ୍କ୍ ଏର୍‍ଦିକ୍ଷା ଆଦାନଙ୍କ୍ ବାତ୍ ଅସୁବିଦା ମିନ୍ଦ୍‍ କି ?”
ACT 8:38 ୱାଞ୍ଜାଲ୍‍ କର୍ମଚାରୀ ରତ୍‌ତିଙ୍କ୍ ନିଲ୍‍ସ୍ପାନଙ୍କ୍ ଗଟ୍ ହିତ୍‍ତଣ୍ଡ୍ । ଫିଲିପ୍‍ପ ନୁ କର୍ମଚାରୀ ଏର୍‍ଦେ ଲୋପେ ଆତ୍‍ତଡ଼୍ ନୁ ଫିଲିପ୍‍ପ ଅଂକିଙ୍କ୍‌ ଏର୍‍ଦିକ୍ଷା ହିତ୍‍ତଣ୍ଡ୍ ।
ACT 8:39 ଅଡ଼୍‌ ଏର୍‍ତାଗାଙ୍କ୍ ତେଦି ୱାତ୍‍ତେ ପେର୍‍କେ ପ୍ରବୁନ୍‍ ପବିତ୍ର ଆତ୍ମା ଫିଲିପ୍‍ପଙ୍କ୍ ମାପିତ୍‍ତେ । କର୍ମଚାରୀ ମେଣ୍ଡେ ଅଂକିଙ୍କ୍‌ ଉଡ଼ାଙ୍କ୍ ପାର୍‍ୱଣ୍ଡ୍, ବାତେଙ୍କ୍ ଇତ୍‍କେ କୁସି ଆସ୍ ତାନ୍ ହାର୍ ଆତ୍‍ତଣ୍ଡ୍ ।
ACT 8:40 ବେସ୍‍କେ ଦିନାତ୍‍ ପେର୍‍କେ ଫିଲିପ୍‍ପ ଉଡ଼୍‍ତଣ୍ଡ୍ ଜେ ଅଣ୍ଡ୍‌ ଅସଦୋଦତାଗ୍ ଏୱୁତ୍‍ତଣ୍ଡ୍ । ଆଗାଙ୍କ୍ ଅଣ୍ଡ୍‌ କାଇସରିଆତାଗ୍ ଆତ୍‍ତଣ୍ଡ୍ ନୁ ହାର୍‍ଦାଗ୍ ମାନ୍ଦାନ୍ ଟାଉନ୍‍କିନାଗ୍ ସୁସମାଚାର୍‍ ପ୍ରଚାର୍ ମାଡ଼୍‍ତଣ୍ଡ୍ ।
ACT 9:1 ଇଦ୍ ସମୟ୍‍ତେ ଶାଉଲ୍‍ ପ୍ରବୁନ୍ ଶିଷ୍ୟଡ଼୍‍କିଂଙ୍କ୍ ଆୱ୍‍କିତାନ୍ ଇଞ୍ଜ ଦମକ୍ ଇସମାତ୍‍ତଣ୍ଡ୍ । ମେଣ୍ଡେ ଅଣ୍ଡ୍‌ ମହା ଯାଜକ୍‍ତେ ଗାର୍ରେ ଆତ୍‍ତଣ୍ଡ୍ ।
ACT 9:2 ଦାମାସ୍‍କସ୍‍ତେ ଉପାସନା ଲଅକିନାଗ୍ ପ୍ରବୁନ୍‍ ଆର୍‍ଦିଙ୍କ୍ ୱାସମାନ୍ଦାନ୍‌ ନାରୁଡ଼୍‌ ବନ୍ଦିମାଡ଼ି ଯିରୁଶାଲେମ୍‍ତାଗ୍ ତାତାନ୍ ମାଇଦିଙ୍କ୍ ବେଡ଼ିୟି ଯାଜକ୍‍କନ୍ସ୍ ଆନୁମତି ଚିଟି ତାଲ୍‍କ୍‍ତଣ୍ଡ୍ ।
ACT 9:3 ଶାଉଲ୍ ଦାମାସ୍‍କସ୍‍ ଟାୱୁନ୍ ଗାର୍‍ରେ ଏୱୁଦାନ୍‍ ୱେଲେ ହଟାତ୍ ସ୍ୱର୍ଗତାଗାଙ୍କ୍ ଅଣ୍ଡୟ୍‌ ୱେସ୍ ଅନ୍‌ ସାରେପାକ୍ ୱେସ୍ ଆତ୍‍ତେ ।
ACT 9:4 ଅଣ୍ଡ୍‌ ବୂମ୍‌ଦାଗ୍‍ ରାୟ୍‍ତଣ୍ଡ୍ ନୁ ଅଣ୍ଡୟ୍‌‍ଗଟ୍ କେଞ୍ଜ୍‍ତଣ୍ଡ୍, “ଶାଉଲ୍ ! ନିମ୍‍ ବାତେଙ୍କ୍ ନାକିଂଙ୍କ୍ ଗାଟିତିପାଲ୍ ମାଡ଼ୁତି ?”
ACT 9:5 ଅଣ୍ଡ୍‌ କେତ୍‍ତଣ୍ଡ୍, “ପ୍ରବୁ ନିମ୍‍ ବେନ ?” ମେଣ୍ଡନ୍‍ନ୍ଦାମ୍ ଆଦେ ଗଟ୍ କେଞ୍ଜ୍‍ତଣ୍ଡ୍, “ନିମ୍‍ ବେନଙ୍କ୍ ଗାଟିତିପାଲ୍ ମାଡ଼ୁତିନ୍, ନାନ୍ ଅଣ୍ଡେ ଜିସୁ ।
ACT 9:6 ତେଦ୍‍ଦେ ଟାୱୁନ୍‍ତାଗ୍ ଅନ୍‌, ବାତ୍ ମାଡ଼ାନଙ୍କ୍ ଆଦ୍‍ତେ, ଆଗେ ନିକିଂଙ୍କ୍ କେସିଦ୍‍ତଡ଼୍ ।”
ACT 9:7 ବେନଡ଼୍‍ କି ଶାଉଲ୍‍ତେ ତଡ଼୍‍ ଆଞ୍ଜ ମାତ୍‍ତଡ଼୍‍ ଅନ୍‌‍ ସାଙ୍ଗଡ଼୍ ଉଡ଼ି ବାକୁୱାହାସ୍ ନିତ୍‍ତଡ଼୍; ଅଡ଼୍‌ ଆଦେ ଗଟ୍ କେଞ୍ଜ୍‍ତଡ଼୍, ଇତ୍‍କେ ବେନଙ୍କ୍ ଉଡ଼ାଙ୍କ୍ ପାର୍‍ୱଡ଼୍ ।
ACT 9:8 ଶାଉଲ୍‍ ବୂମ୍‌ ତାଗାଙ୍କ୍‍ ତେଦି ଉଡ଼୍‍ତଣ୍ଡ୍, ଇତ୍‍କେ ଅଂକିଙ୍କ୍‌ ବାଆତେ ତଅନ୍‌ଦ । ଆଦିଙ୍କ୍ ଅଡ଼୍‌ କାୟ୍‍ଦିଙ୍କ୍ ପୟ୍‍ସ୍ ଦାମାସ୍‍କସ୍‍ ଏୱୁନା ଆର୍ ତଅସିତ୍‍ତଡ଼୍ ।
ACT 9:9 ମୁଣ୍ଡ୍ ଦିନା ଯାକ ଅଣ୍ଡ୍‌ ଉଡ଼ାଙ୍କ୍ ପାର୍‍ୱଣ୍ଡ୍ ନୁ ଆଦ୍ ଦିନାମ୍ ତିନ୍ଦାନ୍ ଉନ୍ଦାନ୍ ମାଡ଼ଣ୍ଡ୍ ।
ACT 9:10 ଦାମାସ୍‍କସ୍‍ ହନନୀୟ ପେଦେର୍‍ତଣ୍ଡ୍ ୱେରଣ୍ଡ୍ କ୍ରିଷ୍ଟ ବିସ୍ୱାଶି ଶିଷ୍ୟ ମାତ୍‍ତଣ୍ଡ୍ । ଅଣ୍ଡ୍‌ ୱେରଡ଼୍ ଦର୍ଶନ୍ ଉଡ଼୍‍ତଣ୍ଡ୍, ପ୍ରବୁ ଅଂକିଙ୍କ୍‌ କେତ୍‍ତଣ୍ଡ୍, “ହନନୀୟ !” ଅଣ୍ଡ୍‌ ଉତ୍ତର୍ ହିତ୍‍ତଣ୍ଡ୍, “ହୋ ପ୍ରବୁ କେଲ୍‍ମ୍ ।”
ACT 9:11 ପ୍ରବୁ କେତ୍‍ତଣ୍ଡ୍, “ସାୟେ ଆୟ୍‍ମୁଟ୍ । ‘ତିନାଙ୍କ୍’ ପେଦେର୍‍ତେ ରଟ୍ ପୟ୍‍ସ୍ ଯିହୁଦାନ୍ ଲନ୍‍ ଆନୁଟ୍ । ଆଗେ ତାର୍ଷିସ୍‍ କନ୍‍ସ୍ ୱାତ୍‍ତେ ୱେରଣ୍ଡ୍ ଶାଉଲ୍‍ ପେଦେର୍‍ତଣ୍ଡ୍ ନାରୁଙ୍କ୍ ମେହେକାଟ୍ । ଅଣ୍ଡ୍‌ ପ୍ରାର୍ତନା ମାଡ଼ୁତଣ୍ଡ୍ ।
ACT 9:12 ହନନୀୟ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଣ୍ଡ୍‍ ୱାସ୍ ଅନ୍‌ ପର୍‍ର କାୟ୍‍ ୱାଟ୍‍ତଣ୍ଡ୍, ଅଣ୍ଡ୍‌ ମେଣ୍ଡେ ବେଲା ଉଡ଼୍‍ ପାର୍‍ଦ୍‍ତଣ୍ଡ୍‍ ଇଞ୍ଜ ଦର୍ଶନ୍ ଉଡ଼୍‍ତଣ୍ଡ୍‍ ।”
ACT 9:13 ହନନୀୟ କେତ୍‍ତଣ୍ଡ୍, “ପ୍ରବୁ, ଇଣ୍ଡ୍ ପବିତ୍ର ନାରୁଣ୍ଡ୍‍ ଯିରୁଶାଲେମ୍‍ତାଗ୍ ନି ନାରୁଡ଼୍ ସେଙ୍ଗେ ବେନ୍‍ସାରେ କାରାପ୍ ପାଡ଼୍‍ୟି ମାଡ଼୍‍ତଣ୍ଡ୍, ଆଦ୍ ବିଷୟ୍‍ତେ ନାର୍‍ଗେ ନାରୁଡ଼୍ ନାକିଂଙ୍କ୍ କେତ୍‍ତଡ଼୍ ।
ACT 9:14 ମେଣ୍ଡେ ଅଣ୍ଡ୍‌ ମୁକ୍ୟ ଯାଜକ୍‍ତାଗାଙ୍କ୍ ଅଦିକାର୍‌‍ ଚିଟି ଆସ୍, ଦାମାସ୍‍କସ୍‍ ପେଦେର୍‍ତାଗ୍ ନିକିଂଙ୍କ୍ ଉପବାସ୍ ମାଡ଼ାନଡ଼୍‍କିଙ୍କ୍ ପୟ୍‍ସ୍ ଆଦାନ୍ ସେଙ୍ଗେ ୱାତ୍‍ତଣ୍ଡ୍ ।”
ACT 9:15 ପ୍ରବୁ ଅଂକିଙ୍କ୍‌ କେତ୍‍ତଣ୍ଡ୍, “ଅନ୍‌, ଇସ୍ରାଏଲ୍‍ ନାରୁଡ଼୍ ନୁ ଅଣଇହୁଦୀ ନୁ ରାଜାଲଡ଼୍ ମୁନ୍‍ନେ, ନା ପେଦେର୍ କେତାନଙ୍କ୍ ନୁ ନାୱାଦ୍ ସେବା ମାଡ଼ାନଙ୍କ୍ ନାନ୍ ଅଂକିଙ୍କ୍‌ ହେଞ୍ଚ୍‍ତାନ୍ ।
ACT 9:16 ନା ପେଦେର୍‍ ସେଙ୍ଗେ ଅଣ୍ଡ୍‌ ବେନ୍ ସାରେ କଷ୍ଟ ପାଏମ୍ ଆଦ୍‍ତନ୍, ନାନ୍ ନିଜେ ଅଂକିଙ୍କ୍‌ କେତିତାନ୍ ।”
ACT 9:17 ହନନୀୟ ଆତ୍‍ତଣ୍ଡ୍, ଶାଉଲ୍ ମାନ୍ଦାନ୍ ଲନ୍‍ ହସିମିକା ଅନ୍‌ ପର୍‍ର କାୟ୍‍ ୱାଟ୍‍ତଣ୍ଡ୍ । ଅଣ୍ଡ୍‌ କେତ୍‍ତଣ୍ଡ୍, “ବିଶ୍ୱାସୀ ଦାଦାଲ୍‌ ଶାଉଲ୍, ଇଗେ ୱାଦାନ୍ ମୁନେଙ୍କ୍‌ ନାକିଙ୍କ୍‌ ପ୍ରବୁ ଜିସୁ ନାକିଂଙ୍କ୍ ଦର୍ଶନ୍ ହିତ୍‍ତଣ୍ଡ୍, ଅଣ୍ଡ୍‌ ନାକିଂଙ୍କ୍ ରହତ୍‍ତଣ୍ଡ୍, ବେଲାକି ନିମ୍‍ ମେଣ୍ଡେ ଦୃଷ୍ଟି ପାଏମ୍‍ଆଦ୍‍ତି ନୁ ପବିତ୍ର ଆତ୍ମାତଡ଼୍ ବର୍ତ୍ତି ଆଦ୍‍ତିଡ଼୍ ।”
ACT 9:18 ଆସୁଟେ ସାଙ୍ଗେ ସାଙ୍ଗେ ଶାଉଲ୍‍ତେ କଣ୍ଡ୍‍ତାଗାଙ୍କ୍ କିକେ ଉୟ୍‍କା ଲେକାମ୍ ବାତ୍ ରାୟ୍‍ତେ ନୁ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଉଡ଼ାନଙ୍କ୍ ପାର୍‍ତ୍‍ତଣ୍ଡ୍ । ଅଣ୍ଡ୍‌ ତେଦି ଏର୍‍ଦିକ୍ଷା ଗ୍ରହନ୍ ମାଡ଼୍‍ତଣ୍ଡ୍,
ACT 9:19 ନୁ ଦାମାସ୍‍କସ୍‍ତିଙ୍କ୍ ତିନ୍ଦାନ୍ ଉନ୍ଦାନ୍ ମାଡ଼୍‍ନାଦ୍‍ ଶକ୍ତି ଦର୍‍କ୍‍ତେ । ଶାଉଲ୍‍ କ୍ରିଷ୍ଟ ବିଶ୍ୱାସି ଶିଷ୍ୟଡ଼୍ ତ ବେସ୍‌କ୍ ଦିନା ମାତ୍‍ତଣ୍ଡ୍ ।
ACT 9:20 ଅଣ୍ଡ୍‌ ସିଦା ଉପାସନା ଲୋକିନାଗ୍ ଆଞ୍ଜ୍ ଜିସୁ ଇଶ୍ୱର୍‌ତେ ମାର୍‍, ଇଦ୍ ଗଟ୍ ପ୍ରଚାର୍ ମାଡ଼ାଙ୍କ୍ ପସ୍‍ପ୍‍ତଣ୍ଡ୍ ।
ACT 9:21 ବେନଡ଼୍ ଅନ୍‌ ଗଟି କେଞ୍ଜ୍‍ତଡ଼୍, ଅଡ଼୍‌ ଦାଦ୍‍ରିଲି ପାଚ୍ରାମାଡ଼୍‍ତଡ଼୍, “ଯିରୁଶାଲେମ୍‍ତାଗ୍ ଜିସୁନ୍‍ ପେଦେର୍‍ତେ ଉପବାସ୍ ମାଡ଼ାନଡ଼୍‍କିଙ୍କ୍ ବେନ ହାୱ୍‍କ ମାତ୍‍ତଣ୍ଡ୍, ଇଣ୍ଡ୍ ଅଣ୍ଡ୍‌ ଆୟନ୍ କି ? ଅଡ଼୍‌‍କିଂଙ୍କ୍ ମୁକ୍ୟ ଯାଜକ୍‍ତେ ବକେତ୍ ପୟ୍‍ସ୍ ଆଦାନଙ୍କ୍ ଅଣ୍ଡ୍‌ ଇଗେ ଦାମାସ୍‍କତା ୱାସ୍ ମାନଣ୍ଡ୍ ?”
ACT 9:22 ବାତେଙ୍କ୍ ଇତ୍‍କେ ଶାଉଲ୍‍ତେ ପ୍ରଚାର୍ ଗାଟି ଶକ୍ତି ମାତ୍‍ତେ, ଜିସୁ ହୋ ମସୀହା, ଇଦ୍ ବିଷୟ୍‍ତେ ଅନାଦ୍‌ ପ୍ରମାନ୍‍ ଗାଟି ଯୁକ୍ତି ମାତ୍‍ତେ ଜେ ଦାମାସ୍‍କସ୍‍ତାଗ୍ ବାସେ ମାଡ଼ାନଡ଼ି ଇହୁଦୀଡ଼୍, ଅନାଦ୍‌ ବେନ୍ ଗଟ୍‍ତେ ମିକା ଉତ୍ତର୍ ହିଦାଙ୍କ୍ ପାର୍‍ୱଡ଼୍ ।
ACT 9:23 ନାର୍‍ଗେ ଦିନ୍ ଆତ୍‍ତେ ପେର୍‍କେ ଇହୁଦୀଡ଼୍ ଅଣ୍ଡୟାଗେ ଆସ୍ ଶାଉଲ୍‍ତିଙ୍କ୍ ହାୱ୍‍କାଙ୍କ୍ ସେଙ୍ଗେ ହାଲ୍‍ସ୍‍ତଡ଼୍,
ACT 9:24 ଶାଉଲ୍‍ତିଙ୍କ୍ ଆୱୁକାନଙ୍କ୍ ନାର୍‍କେତ୍ ପାୟାଲ୍ । ଅଡ଼୍‌ ନାର୍ ମାର୍ ସାରେତାଗ୍ କେପିମାତ୍‍ତଡ଼୍ ।
ACT 9:25 ବାତେଙ୍କ୍ ଇତ୍କେ ଅଣ୍ଡ୍‌ ଦିନ୍ ନାର୍କେତ୍‍ ୱେଲେ ଶାଉଲ୍‍ତେ ଶିଷ୍ୟଡ଼୍ ଅଂକିଙ୍କ୍‌ ୱେରଡ଼୍ ଜୁଡ଼ିତାଗ୍ ୱାଟି ପାଚେରିତ୍‍ କୁଲାମାନ୍ଦାନ୍‍ ଜର୍‌କାତାଲାନ୍‌ ମଦଲ୍ ରାପିତ୍‍ତଡ଼୍‍ ।
ACT 9:26 ଶାଉଲ୍‍ ଯିରୁଶାଲେମ୍‍ତାଗ୍ ଆଞ୍ଜ୍ ତାମ୍ ଶିଷ୍ୟଡ଼୍ ତଡ଼୍ କାଇଲାନଙ୍କ୍‍ ଆଲ୍‍ସି ମାଡ଼୍‍ତଣ୍ଡ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ୱେରଣ୍ଡ୍ ଶିଷ୍ୟ ଇଞ୍ଜ ଅଡ଼୍‌ ବିଲ୍‍କୁଲ୍ ବିଶ୍ୱାସ୍ ମାଡ଼ଡ଼୍‍ । ସାରେତଡ଼୍ ଅଂକିଙ୍କ୍‌ ୱେର୍‍ତଡ଼୍ ।
ACT 9:27 ବାତେଙ୍କ୍ ଇତ୍‍କେ ପେର୍‍କେ ବର୍ଣ୍ଣବା ଅଂକିଙ୍କ୍‌ ପ୍ରେରିତ ଶିଷ୍ୟଡ଼ାଗ୍ ଆସ୍ ଦାମାସ୍‍କସ୍‍ ହାର୍‍ଦାଗ୍ ଶାଉଲ୍‍ ବେଲା ପ୍ରବୁନ୍ ଦର୍ଶନ୍ ପାଏମ୍ ଆତ୍‍ତଣ୍ଡ୍ ନୁ ପ୍ରବୁ ବେଲା ଅଂକିଙ୍କ୍‌ ଗଟି ତିରିୟି ମାତ୍‍ତଣ୍ଡ୍, ଇଦ୍ ସାରେ ବିଷୟ୍ ଅଡ଼୍‌‍କିଂଙ୍କ୍ ବୁଜା ମାଡ଼୍‍ତଣ୍ଡ୍ । ଦାମାସ୍‍କସ୍‍ତାଗ୍ ଜିସୁନ୍ ପେଦେର୍‍ତେ ଶାଉଲ୍‍ ବେଲା ୱେର୍‍ୱେକନ୍ସ୍ ପ୍ରଚାର୍ ମାଡ଼ିମାତ୍‍ତଣ୍ଡ୍, ଅଡ଼୍‌‍କିଂଙ୍କ୍ ସାୟେ ତିଆର୍ ମାଡ଼ି କେତ୍‍ତଣ୍ଡ୍ ।
ACT 9:28 ଇଦିନ୍ ପେର୍‍କେ ଶାଉଲ୍‍ ପ୍ରେରତ ଶିଷ୍ୟଡ଼୍ ତଡ଼୍ ମାତ୍‍ତଣ୍ଡ୍ ନୁ ଯିରୁଶାଲେମ୍‍ତାଗ୍ ସାରେ ଏକାମ୍ ଆଞ୍ଜ୍ ସାହାସ୍ ତଡ଼୍ ପ୍ରବୁନ୍ ପେଦେର୍‍ତେ ପ୍ରଚାର୍ ମାଡ଼୍‍ତଣ୍ଡ୍ ।
ACT 9:29 ଇଦ୍ ସାରେ ବିଷୟ୍‍ତେ ଅଣ୍ଡ୍‌ ଗ୍ରୀକ୍‍ ଗଟ୍‍ତଡ଼୍‍ ଇହୁଦୀଡ଼୍ ତଡ଼୍ ମିକା ତର୍କବିତର୍କ ମାଡ଼୍‍ତଣ୍ଡ୍, ବାତେଙ୍କ୍ ଇତ୍‍କେ ଅଡ଼୍‌ ଅଂକିଙ୍କ୍‌ ଆୱୁକାନଙ୍କ୍ ଆଲ୍‍ସି ମାତ୍‍ଡ଼୍ ।
ACT 9:30 ବିଶ୍ୱାସୀଡ଼୍ ଦାଦାଲ ଇଦ୍ ଗଟ୍ ପୁଞ୍ଜ୍ ମିକା, ଶାଉଲ୍‍ତିଙ୍କ୍ କାଇସରିଆତାଗ୍ ଆତ୍‍ତଡ଼୍ ନୁ ଆଗାଙ୍କ୍ ଅଂକିଙ୍କ୍‌ ତାର୍ଷିସ୍‍ତାଗ୍ ରହସିତ୍‍ତଡ଼୍ ।
ACT 9:31 ଯିହୁଦା, ଗାଲିଲୀ ନୁ ଶମିରୋତାଗ୍ ମାନ୍ଦାନ୍ କ୍ରିଷ୍ଟୀୟ ମଣ୍ଡଲି ଆଦ୍ ସମୟ୍‍ତେ ଶାନ୍ତି ମାତ୍‍ତେ ନୁ ପବିତ୍ର ଆତ୍ମାତ୍‍ ସାର୍‍ଦେତଡ଼୍ ଅଡ଼ାଦ୍‌ ନାରୁଡ଼୍ ସଂଖ୍ୟା ନାର୍ଗେ ଆତ୍‍ତେ ନୁ ଅଡ଼୍‌ ଶକ୍ତିନଡ଼୍ ଆତ୍‍ତଡ଼୍ । କ୍ରିଷ୍ଟ ବିଶ୍ୱାସୀଡ଼୍ ପ୍ରବୁଙ୍କ୍ ୱେର୍‍ସ୍ ମିକା ବାଦ୍‍କ୍‍ତଡ଼୍ ।
ACT 9:32 ପିତର୍ ପିନା ପଡ଼ିୟେ ଉଡ ଉଡ ଅନ୍‌‍ଦାମ୍ ଲୁଦାତାଗ୍ ବାସେ ମାଡ଼ମାନ୍ଦାନ୍ ପ୍ରବୁନ୍ ନାରୁଡ଼୍‍କ୍ ପବିତ୍ର ମାଡ଼ାଙ୍କ୍‍ ଆତ୍‍ତଣ୍ଡ୍ ।
ACT 9:33 ଆଗେ ଏନିୟ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍ କାଇଲ୍‍ତଣ୍ଡ୍ । ଅଂକିଙ୍କ୍‌ ପକ୍ୟାଗାତ୍ ରୋଗ୍ ହାସ୍ ଆଟ୍‌ ହେଣ୍ଡ୍‍କ୍ କାଟୁଲ୍‍ତାଗାଙ୍କ୍ ତେଦାଙ୍କ୍ ପାର୍‍ୱେ ମାତ୍‍ତଣ୍ଡ୍ ।
ACT 9:34 ପିତର୍ ଅଂକିଙ୍କ୍‌ କେତ୍‍ତଣ୍ଡ୍, “ଏନିୟ, ଜିସୁ କ୍ରିଷ୍ଟ ନିକିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍ । ତେଏଦେ ନିୟାଦ୍ କେତ୍‍ ତେଏମ୍ ।” ଆସୁଟେ ସାଙ୍ଗେ ସାଙ୍ଗେ ଏନିୟ ତେଦି ନିତ୍‍ତଣ୍ଡ୍ ।
ACT 9:35 ଇଦ୍‍ ଉଡ଼ି ଲୁଦା ନୁ ଶମିରୋଣତାଗ୍ ବାସେ ମାଡ଼ାନ୍ ନାରୁଡ଼୍ ସାରେତଡ଼୍ ପ୍ରବୁନାକ୍ ମନ୍ ମାଲ୍‍ପ୍‍ତଡ଼୍ ।
ACT 9:36 ଯୋପାତାଗ୍ ଟାବିଥା ପେଦେର୍‍ତେ ୱେରଡ଼୍ ବିଶ୍ୱାସୀ ନାଟାଡ଼୍ ବାସେ ମାଡ଼ମାତ୍‍ତେ । ଆଦିନାଦ୍ ଗ୍ରୀକ୍ ପେଦେର୍ ଦର୍କାସ୍ ଇତ୍‍କେ ଇଦ୍‍ ଅର୍ତ “ହରିଣୀ,” ମାତ୍‍ତେ । ଆଦ୍ ତାନାଦ୍ ସାରେ ଦିନାମ୍ ସାୟେକାମ୍ ଦାଗ୍ ନୁ ଗରିବ୍ ନାରୁଡ଼୍‍କ୍ ସେବା ମାଡ଼ାନାଗ୍ ହିସମାତ୍‍ତେ ।
ACT 9:37 ଆସୁଟେ ରୋଗ୍ ଆସ୍ ଆଦ୍ ଡଲ୍‍ତେ । ସାଙ୍ଗଡ଼୍ ତାନ୍ ମେନ୍ଦୁଲ୍‍ତିଙ୍କ୍ ଏର୍‍ ମିସ୍‍ସ୍ପି ପରତ୍‍ ବାକ୍‍ଡ଼େତାଗ୍ ପାଟ୍‍ପିସ୍‍ତଡ଼୍ ।
ACT 9:38 ଯୋପ୍‍ପା ଲୁଦାତ୍‍ ବକେତ୍ ମାତ୍‍ତେ । ପିତର୍ ଲୁଦାତାଗ୍ ମିନ୍ଦେଣ୍ଡ୍ ଇଞ୍ଜ କେଞ୍ଜି, ଯୋପାତାଗ୍ ମାନ୍ଦାନ୍ ବିଶ୍ୱାସୀ ଶିଷ୍ୟ ଇର୍‍ୱୁଡ଼୍ ନାରୁଡ଼୍‍କ୍ ରହତଡ଼୍, “ଅନୁରଦ୍‌‍ ମାଡ଼ୁତମ୍‍ ସିଟ୍‍ପାଟ୍ ମା ବକେତ୍ ୱାଡ଼େ ।”
ACT 9:39 ପିତର୍ ତିଆର୍ ଆସ୍ ଅଡ଼୍‌‍ତଡ଼୍ ଆତ୍‍ତଣ୍ଡ୍ । ଆଗେ ଏୱୁତ୍‍ତେ ସାଙ୍ଗେ ସାଙ୍ଗେ ନାରୁଡ଼୍ ଅଂକିଙ୍କ୍‌ ପରତ୍‍ ବାକ୍‍ଡ଼େତାଗ୍ ଆତ୍‍ତଡ଼୍ । ଆଗେ ରାଣ୍ଡିକି କେୟି କେୟି ଦର୍କାସ୍ ମାତ୍‍ତେ ସମୟ୍‍ତେ ସିଲେୟ୍ ମାଡ଼୍‍ତେ ଚକା ନୁ ସିଲେ ତଅତ୍‍ତା ।
ACT 9:40 ପିତର୍ ସାରେତଡ଼୍‌କିଂଙ୍କ୍ ବାୟିଦେ ପେସ୍‍ସ୍ପିତଣ୍ଡ୍ ନୁ ମର୍‍ମିଣ୍ଡା ଇସ୍‌ ପ୍ରାର୍ତନା ମାଡ଼୍‍ତଣ୍ଡ୍ । ତାନ୍ ପେର୍‍କେ ଅଣ୍ଡ୍‌ ଦର୍କାସ୍‍ତେ ଡଲ୍‍ତେ ମେନ୍ଦୁଲ୍‍ତିଙ୍କ୍ ଉଡ଼ି କେତ୍‍ତଣ୍ଡ୍, “ଟାବିଥା, ତେଏଦେ !” ଦର୍କାସ୍ କଣ୍ଡା ତେର୍‍ତଣ୍ଡ୍ ନୁ ପିତର୍‍ତିଙ୍କ୍ ଉଡ଼ି ତେଦି କୁଦ୍‍ତଣ୍ଡ୍ ।
ACT 9:41 ପିତର୍ କାୟ୍‍ ହାଆସ୍‍ ଆଦିଙ୍କ୍ ତେହେତ୍‍ତଣ୍ଡ୍ । ତାନ୍ ପେର୍‍କେ ଗୁଡ଼ିମାନ୍ଦାନ୍ ସାରେ ବିଶ୍ୱାସୀ ନୁ ରାଣ୍ଡି ନାଟାକିଙ୍କ୍ କାର୍‍ଙ୍ଗି ଜିୱୁନ୍‍ ପବିତ୍ରଆତ୍ମାତିଙ୍କ୍ ଅଡ଼୍‌ କାୟ୍‍ଦେ ହିତ୍‍ତଣ୍ଡ୍ ।
ACT 9:42 ଇଦ୍ ଗଟ୍ ଯୋପାତେ ସାରେ ପାକ୍ ପୁତ୍‍ତଡ଼୍ ନୁ ନାର୍‍ଗେ ନାରୁଡ଼୍ ପ୍ରବୁଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।
ACT 9:43 ପିତର୍ ନାର୍‍ଗେ ଦିନା ଯୋପାତେ ଶିମୋନ୍ ପେଦେର୍‍ତଣ୍ଡ୍ ୱେରଣ୍ଡ୍ ତଲ୍‍କା ବେପାରିନ୍ ଲୋନ୍‌ ମାତ୍‍ତଣ୍ଡ୍ ।
ACT 10:1 କାଇସରିଆତଣ୍ଡ୍ କର୍ଣ୍ଣୀଲିୟ “ଇଟାଲୀୟ ବାହିନୀ,” ପେଦେର୍‍ତେ ରୋମୀୟ ସୈନ୍ୟବାହିନୀତେ ଶତସେନାପତି ମାତ୍‍ତଣ୍ଡ୍ ।
ACT 10:2 ଅଣ୍ଡ୍‌ ୱେରଣ୍ଡ୍ ଦାର୍ମିକ୍ ନାରୁଣ୍ଡ୍‍ ମାତ୍‍ତଣ୍ଡ୍ । ଅଣ୍ଡ୍‌ ନୁ ତାମ୍ ପରିବାର୍‍ତେ ସାରେତଡ଼୍ ଇଶ୍ୱର୍‌ତିଙ୍କ୍ ଉପାସନା ମାଡ଼ମାତ୍‍ତଡ଼୍ । ଅଣ୍ଡ୍‌ ଯିହୁଦି ଗରିବ୍ ନାରୁଡ଼୍‍କିଂଙ୍କ୍ ନାର୍‍ଗେ ସାହାଯ୍ୟ ମାଡ଼ମାତ୍‍ତଣ୍ଡ୍ ନୁ ସାରେଦାମ୍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ମାତ୍‍ତଣ୍ଡ୍ ।
ACT 10:3 ଅଣ୍ଡ୍‌‍ଦିନ୍ ପାୟାଲ୍ ମୁଣ୍ଡ୍ ଗାଣ୍ଟା ସମୟ୍‍ତେ ଅଣ୍ଡ୍‌ ସାୟ୍‍ ଅଣ୍ଡୟ୍‌ ଦର୍ଶନ୍‍ ଉଡ଼୍‍ତଣ୍ଡ୍ ଯେ ଇଶ୍ୱର୍‌ତେ ଦୂତ୍ ୱାସ୍ ଅଂକିଙ୍କ୍‌ କାର୍‍ଙ୍ଗୁତଣ୍ଡ୍, “କର୍ଣ୍ଣୀଲିୟ ।”
ACT 10:4 ଅଣ୍ଡ୍‌ ୱେର୍‍ ସ୍ୱର୍ଗ ଦୂତତାକ୍ ଉଡ଼ି କେତ୍‍ତଣ୍ଡ୍, “ପ୍ରବୁ ବାତ୍ କେତୁତିନ୍ ?” ଦୂତ୍ ଉତ୍ତର୍ ହିତ୍‍ତଣ୍ଡ୍, “ଇଶ୍ୱର୍ ନିୟାଦ୍ ପ୍ରାର୍ତନା ନୁ ଦାନ ଉଡ଼ି ସାର୍‍ଦେ ଆତ୍‍ତଣ୍ଡ୍ ନୁ ଆଦିଙ୍କ୍ ନିକିଂଙ୍କ୍ ଉପହାର୍ ହିଦାଙ୍କ୍ ତିଆର୍ ଆତ୍‍ତଣ୍ଡ୍ ।
ACT 10:5 ଇଞ୍ଜେ ଶିମୋନ୍ ପିତର୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍ କାର୍‍ଙ୍ଗି ତାତାନ୍ ମାଇଦିଙ୍କ୍ ଯୋପାତାଗ୍ ନାରୁଡ଼୍‍କ୍ ରହମୁଟ୍ ।
ACT 10:6 ଅଣ୍ଡ୍‌ ଗଦାଡ଼୍ ହାଞ୍ଚିନାଗ୍ ବାସେ ମାଡ଼ମାନ୍ଦାନ୍ ଶିମୋନ୍ ପେଦେର୍‍ତଣ୍ଡ ୱେରଣ୍ଡ୍ ତଲ୍‍କା ବେପାରିନ୍ ଲନ୍‍ ମିନ୍ଦେଣ୍ଡ୍ ।”
ACT 10:7 ଇଦ୍ କେସ୍ ଦୂତ୍ ଆତ୍‍ତଣ୍ଡ୍ । କର୍ଣ୍ଣୀଲିୟ ତାମ୍ ଲୋତ୍‍ତେ ଇର୍‍ୱୁଡ଼୍ ଦାସ ନୁ ୱେରଣ୍ଡ୍ ସୈନିକ୍‍ତିଙ୍କ୍ ପେର୍ରକେ ଆଦାନଙ୍କ୍‌ କାର୍‍ଙ୍ଗ୍‍ତଣ୍ଡ୍ ।
ACT 10:8 ଅଣ୍ଡ୍‌ ଅଡ଼୍‌‍କିଂଙ୍କ୍ ସାରେ ବିଷୟ୍ କେସ୍ ଯୋପାତାଗ୍ ରହତଣ୍ଡ୍ ।
ACT 10:9 ମେଣ୍ଡେଅନ୍‌‍ଦିନ୍ ପାୟାଲ୍ ଅଡ଼୍‌ ଯୋପ୍‍ପାତ୍ ଗାର୍‍ରେ ଏୱୁଦାନ୍ ୱେଲେ, ପିତର୍ ପ୍ରାର୍ତନା ମାଡ଼ାନ୍ ସେଙ୍ଗେ ମୁର୍ସିନାଗ୍‍ ଆଞ୍ଜ୍‍ମାତ୍‍ତଣ୍ଡ୍ ।
ACT 10:10 ଅଣ୍ଡ୍‌ କାର୍‍ପୟ୍‍ତ୍‍ତାଙ୍କ୍ ସୁଦୁଟ୍ ତିନ୍ଦାନଙ୍କ୍ ହାଲ୍‍ସ୍‍ତଣ୍ଡ୍ ନୁ କାଦି ତିଆର୍ ଆତ୍‍ତେ ସମୟ୍‍ତେ ଅଣ୍ଡ୍‌ ଅଣ୍ଡୟ୍‌ ଦର୍ଶନ୍ ଉଡ଼୍‍ତଣ୍ଡ୍ ।
ACT 10:11 ଅଣ୍ଡ୍‌ ଉଡ଼୍‍ତଣ୍ଡ୍, ସ୍ୱର୍ଗ କୁଲେମ୍ ଆତ୍‍ତେ ନୁ ଅଣ୍ଡୟ୍‌ ବେଡ଼୍‍ୟାଦ୍‍ ଡୁପଟ୍ ନାଲୁ ମୁଲାନାଗ୍ ଉଙ୍ଗିମିକା ପୃତିବିତାଗ୍ ପର୍‍ର ଡିଗୁତ୍ ।
ACT 10:12 ସ୍ୱର୍ଗ ନାର୍‍ଗେ ରକମ୍‍ତାୱ୍ ଜୀୱାକ୍, ପୃତିବିତାଗ୍ ବେନ୍‍ ଜିୱାକ୍ ନେଲ୍‍ ମେନ୍ଦୁଲ୍‍ ମସ୍‍ସ୍ପି ତାଆକାନାୱୁ ଜିୱାକ୍‍ ନୁ ଗୁପେତ୍ ପିଟ୍‍ଟେ ମିନ୍ଦେ ।
ACT 10:13 ମେଣ୍ଡେ ଅଣ୍ଡ୍‌ ଅଣ୍ଡୟ୍‌ ଗଟ୍ କେଞ୍ଜ୍‍ତଣ୍ଡ୍, “ପିତର୍ ! ତେଏଦେ, ହାୱ୍‍କି ମିକା ତିନ୍ !”
ACT 10:14 ବାତେଙ୍କ୍ ଇତ୍‍କେ ପିତର୍ କେତ୍‍ତଣ୍ଡ୍, “ଇଲ୍‍ଲେ ପ୍ରବୁ, ନାନ୍ ପାର୍‍ୱନ୍ ! ନାନ୍‍ନେ ବେସୁଟ୍‌ ଅଶୁଚି ନୁ କାରାପ୍ ମାନ୍ଦାନ୍ ଜିନିଷ୍ ତିନନ୍ ।”
ACT 10:15 ମେଣ୍ଡେ ଅଣ୍ଡ୍‌ କେଞ୍ଜ୍‍ତଣ୍ଡ୍; “ଇଶ୍ୱର୍ ବେନଙ୍କ୍ ଶୁଚି ମାଡ଼୍‍ତଣ୍ଡ୍, ନିମ୍‍ ଅଂକିଙ୍କ୍‌ କାରାପ୍ ଇଞ୍ଜ ହାଲ୍‍ସ୍‍ମା ।”
ACT 10:16 ମୁଣ୍ଡ୍‍ଦାମ୍ ଇଦ୍ ରକମ୍ ଆତ୍‍ତେ ପେର୍‍କେ, ଡୁପଟ୍‍ତିଙ୍କ୍ ସ୍ୱର୍ଗତାକ୍ ତେଇସ୍ ଆତ୍‍ତଡ଼୍ ।
ACT 10:17 ପିତର୍ ତାନ୍ ଦର୍ଶନ୍ ଉଡ଼୍‍ତେ ଇତ୍‍କେ ଆଲ୍‍ସି କାବା ଆତ୍‍ତଣ୍ଡ୍ । ଆସୁଟେ କର୍ଣ୍ଣୀଲିୟ ବେନଡ଼୍‍କ୍ ରହସ୍‍ମାତ୍‍ତଣ୍ଡ୍, ଅଡ଼୍‌ ଶିମୋନ୍‍ତେ ଲନ୍‍ ତିଙ୍କ୍ ଦର୍‍ସ୍‍କି ମାର୍ ବକେତ୍ ନିଶ୍‍ମାତ୍‍ତଡ଼୍ ।
ACT 10:18 ଅଡ଼୍‌ କାର୍ଙ୍ଗି ପାଚ୍ରାମାଡ଼୍‍ତଡ଼୍, ଶିମୋନ୍ ପିତର୍ ପେଦେର୍‍ତେ ଇଗେ ୱେରଣ୍ଡ୍ କୁଟ୍‍ମାମ୍‍ ନାରୁଡ଼୍ ମିନ୍ଦେଣ୍ଡ୍ କି ?
ACT 10:19 ପିତର୍ ଆସୁଟ୍‍ ଯାକ ଦର୍ଶନ୍‍ତାଦ୍ ଅର୍ତ ବୁଜେମ୍ ଆଦାଙ୍କ୍ ଆଲ୍‍ସମାତ୍‍ତଣ୍ଡ୍, ଆସୁଟେ ପବିତ୍ର ଆତ୍ମା କେତ୍‍ତେ, “ଉଡ଼େ, ଇଗେ ମୁୱୁଡ଼୍ ନାରୁଡ଼୍ ନିକିଂଙ୍କ୍ ମେହେକୁତଡ଼୍ ।
ACT 10:20 ତିଆର୍ ଆସ୍ ମଦଲ୍ ଅନ୍‌ ନୁ ଅଡ଼୍‌ ତଡ଼୍ ଆଦାନଙ୍କ୍ ଆଲ୍‍ସାନାଦ୍‍ ଇଲେ, ବାତେଙ୍କ୍ ଇତ୍‍କେ ନାନ୍ ଅଡ଼୍‌‍କିଂଙ୍କ୍ ରହତ୍‍ତାନ୍ ।”
ACT 10:21 ପିତର୍ ମଦଲ୍ ଆଞ୍ଜ୍ ଆ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ବେନଙ୍କ୍ ମେହେକୁତିଡ଼୍, ନାନ୍ ଅଣ୍ଡେ । ମିଡ଼୍ ବାତେଙ୍କ୍ ୱାତ୍‍ତିଡ଼୍ ?”
ACT 10:22 ଅଡ଼୍‌ ଉତ୍ତର୍ ହିତ୍‍ତଡ଼୍, “ସେନାପତି କର୍ଣ୍ଣୀଲିୟ ମାକିଂଙ୍କ୍ ରହତ୍‍ତଣ୍ଡ୍ । ଅଣ୍ଡ୍‌ ୱେରଣ୍ଡ୍ ସାୟେତ୍ ନାରୁଣ୍ଡ୍‍ । ଅଣ୍ଡ୍‌ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାନଣ୍ଡ୍‍ ନୁ ଇହୁଦୀ ନାରୁଡ଼୍‍ ସାରେତଡ଼୍ ଅଂକିଙ୍କ୍‌ ସନ୍‍ମ୍ମାନ୍ ହିଦ୍‍ତଡ଼୍ । ନିକିଂଙ୍କ୍ ତାମ୍ ନାର୍ କାର୍‍ଙ୍ଗି ମିକା ନିୟାଦ୍ ଗଟି କେଞ୍ଜାନ୍ ମାଇଦିଙ୍କ୍ ଇଶ୍ୱର୍‌ତେ ୱେରଣ୍ଡ୍ ପବିତ୍ର ଦୂତ୍ ଅଂକିଙ୍କ୍‌ ଗଟ୍ ହିତ୍‍ତଣ୍ଡ୍ ।”
ACT 10:23 ପିତର୍ ଅଡ଼୍‌‍କିଂଙ୍କ୍ ଲୋପେ କାର୍‍ଙ୍ଗି ଆସ୍ ଆଦ୍ ନାର୍‍କେତ୍ ଆଗେ ମାନ୍ଦାନ୍ ମାଇଦିଙ୍କ୍ ଅନୁରଦ୍‌‍ ମାଡ଼୍‍ତଣ୍ଡ୍ । ମେଣ୍ଡନ୍‍ଦିନେ ତିଆର୍ ଆସ୍ ଅଡ଼୍‌ ତଡ଼୍ ଆତ୍‍ତଡ଼୍ । ଯୋପାତାଗ୍ ବେସ୍‍ତୁଡ଼୍ ବିଶ୍ୱାସିଡ଼୍ ଦାଦାଲଡ଼୍‍ ମିକା ଅଡ଼୍‌ ତଡ଼୍ ଆତ୍‍ତଡ଼୍ ।
ACT 10:24 ପେର୍‍ନେଟି ଅଡ଼୍‌ କାଇସରିଆତାଗ୍ ଏୱୁତ୍‍ତଡ଼୍ । ଆଗେ କର୍ଣ୍ଣୀଲିୟ ତାନ୍ ସାଙ୍ଗ ନୁ ଲୋତ୍‍ତେନଡ଼୍ ତଡ଼୍ ପିତର୍‍ତିଙ୍କ୍ କେପିମାତ୍‍ତଡ଼୍ ।
ACT 10:25 ପିତର୍ ଲୋପେ ଆଦ୍‍ଦାନ୍ ୱେଲେ କର୍ଣ୍ଣୀଲିୟ ଅଂକିଙ୍କ୍‌ କାଇଲିମିକା ଡେକେତ୍ ମଦଲ୍ ରାଲି ପ୍ରଣାମ୍ ମାଡ଼୍‍ତଣ୍ଡ୍ ।
ACT 10:26 ଇତ୍‍କେ ପିତର୍ ଅଂକିଙ୍କ୍‌ ତେଇସ୍‍ କେତ୍‍ତଣ୍ଡ୍, “ତେଏଦେ, ନାନ୍ ନିଜେ ୱେରଣ୍ଡ୍ ନାରୁନ୍ ।”
ACT 10:27 ପିତର୍ କର୍ଣ୍ଣୀଲିୟ ତଡ଼୍ ତିର୍‍ୟ ତିର୍‍ୟ ଲୋତ୍‍ତେ ଲୋପେ ହସ୍‍ତଣ୍ଡ୍ ନୁ ଆଗେ ନାର୍‍ଗେ ନାରୁଡ଼୍‍କିଂଙ୍କ୍ ଅଣ୍ଡୟାଗେ ଗୁଡ଼ିମାନ୍ଦାନାଦ୍ ଉଡ଼୍‍ତଣ୍ଡ୍‍,
ACT 10:28 ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ମିଡ଼୍ ସାୟେ ପୁଞ୍ଜ୍ ମାନୁଟ୍, ୱେରଣ୍ଡ୍ ଇହୁଦୀ ନାରୁଡ଼୍ ତାନ୍ ବିଶ୍ୱାସ୍ ଲେକାମ୍ ଅବିଶ୍ୱାସୀ ନାରୁଡ଼୍ ତଡ଼୍ କାଇଲାନଙ୍କ୍ ପାର୍‍ୱଣ୍ଡ୍ । ଇତ୍‍କେ ଇଶ୍ୱର୍ ନାକିଂଙ୍କ୍ କେତ୍‍ତଣ୍ଡ୍, ବେନଙ୍କ୍ ବା କାରାପ୍ ବା ଅପବିତ୍ର ହେର୍କା ମାଡ଼ାନାଦ୍ ଅଶୁଚି ଆୟ୍‍ୟ ।
ACT 10:29 ଆଦିଙ୍କ୍ ମିଡ଼୍ ବେସୁଟ୍‌ ନାକିଂଙ୍କ୍ କାର୍‍ଙ୍ଗ୍‍ତିଡ଼୍, ନାନ୍ ବାତେମିକା ଆପତ୍ତି ମାଡ଼୍‍ୱେ କନ୍‍ସ୍ ୱାତ୍‍ତାନ୍ । ନାନ୍ ପୁନ୍ଦାଙ୍କ୍ ଇଚ୍ଛା ମାଡ଼ୁତାନ୍, ମିଡ଼୍ ବାତେଙ୍କ୍ ନାକିଂଙ୍କ୍ କାର୍‍ଙ୍ଗ୍‍ତିଡ଼୍ ?”
ACT 10:30 କର୍ଣ୍ଣୀଲିୟ କେତ୍‍ତଣ୍ଡ୍, “ନାଲୁ ଦିନା ମୁନେଙ୍କ୍‍ ଇଦ୍ ସମୟ୍‍ତେ ପାୟାଲ୍ ମୁଣ୍ଡ୍ ଗାଣ୍ଟାତ୍‍ ୱେଲେ ନାନ୍ ନା ଲୋନ୍‌ ପ୍ରାର୍ତନା ମାଡ଼ମାତ୍‍ତାନ୍ । ହଟାତ୍ ପାଣ୍ଡ୍ରି ଚକାସିଲେ କେର୍‍ତେନଣ୍ଡ୍ ୱେରଣ୍ଡ୍ ନାରୁଡ଼୍ ନା ମୁନ୍‍ନେ ନିତ୍‍ତଣ୍ଡ୍‍; ଅଣ୍ଡ୍‌ କେତ୍‍ତଣ୍ଡ୍
ACT 10:31 ‘କର୍ଣ୍ଣୀଲିୟ ! ଇଶ୍ୱର୍ ନିୟାଦ୍ ପ୍ରାର୍ତନା କେଞ୍ଜ୍‍ତଣ୍ଡ୍ ନୁ ଗରିବିଡ଼୍‍କ୍ ଦାନ୍‍ ମାଡ଼ାନ୍‍ ସେବାକାମ୍ ଉଡ଼୍‍ତଣ୍ଡ୍ ।
ACT 10:32 ଶିମୋନ୍ ପିତର୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍ ତାତାନ୍ ସେଙ୍ଗେ ଯୋପାତାଗ୍ ନାରୁଡ଼୍‍କ୍ ରହମୁଟ୍ । ଅଣ୍ଡ୍‌ ଗଦାଡ଼୍‍ତେ ବକେତ୍ ମାନ୍ଦାନ୍ ତଲ୍‍କା ବେପାରିନ୍ ଲନ୍‍ କୁଟ୍‍ମାମ୍‍ ଆସ୍ ମିନ୍ଦେଣ୍ଡ୍ ।’
ACT 10:33 ଆଦିଙ୍କ୍ ସାଙ୍ଗେ ସାଙ୍ଗେ ନାନ୍ ନିକିଂଙ୍କ୍ କାର୍‍ଙ୍ଗ୍‍ତାନ୍ ନୁ ନିମେ ଦୟା ମାଡ଼ି ୱାତ୍‍ତିନ୍‍ । ପ୍ରବୁ ନିକିଂଙ୍କ୍ ବାତ୍ କେତାନଙ୍କ୍ ବୁଦ୍ଦ୍‌ ହିତ୍‍ତଣ୍ଡ୍, ଆଦ୍ କେଞ୍ଜାନଙ୍କ୍ ମାମ୍‍ମେ ସାରେତମ୍ ଇଞ୍ଜେ ଇଶ୍ୱର୍‌ତେ ବକେତ୍ ମିନ୍ଦେମ୍ ।”
ACT 10:34 ପିତର୍ ଶିକ୍ଷା ହିଦାନଙ୍କ୍ ଆରାମ୍ ମାଡ଼ି କେତ୍‍ତଣ୍ଡ୍, “ଇଞ୍ଜେ ନାନ୍ ନିଜାମ୍ ବୁଜେମ୍ ଆତ୍‍ତାନ୍ ଯେ ପ୍ରକୃତ୍‍ତେ ଇଶ୍ୱର୍ ସାରେତଡ଼୍‌କିଂଙ୍କ୍ ସାମାନ୍ ଉଡ଼ୁତଣ୍ଡ୍ ।
ACT 10:35 ବେନ୍ ନାର୍‍ଦେନଣ୍ଡ୍‍ ଆୟି ନାରୁଣ୍ଡ୍ ପ୍ରବୁଙ୍କ୍‍ ପ୍ରାର୍ତନା ମାଡ଼୍‍କେ ନୁ ଅନ୍‌ କଣ୍ଡେତେ ସତ୍‍ କର୍ମ ମାଡ଼୍‍କେ ପ୍ରବୁ ଅଂକିଙ୍କ୍‌ ଗ୍ରହନ୍ ମାଡ଼ିତନ୍ ।
ACT 10:36 ମିଡ଼୍ ପୁତ୍‍ତିଡ଼୍ ଯେ ଇଶ୍ୱର୍ ଇସ୍ରାଏଲ୍‍ ନାରୁଡ଼୍‍କ୍ ଗାରେ ବେନ୍ କାବୁର୍ ରହସ୍‍ମାତ୍‍ତଣ୍ଡ୍, ଆଦେ ଜିସୁ ଦ୍ୱାରା ଗଷଣା ମାଡ଼୍‍ତାଦ୍ ଶାନ୍ତି ସୁସମାଚାର୍‍ । ହି ଜିସୁ କ୍ରିଷ୍ଟ ସାରେ ତଡ଼୍‍ ପ୍ରବୁ ।
ACT 10:37 ଯୋହନ୍‌ ମନ୍ ପରିବର୍ତ୍ତନ୍ ନୁ ଏର୍‍ ଦୀକ୍ଷା କାବୁର୍ ପ୍ରଚାର୍ ମାଡ଼୍‍ତେ ପେର୍‍କେ, ଗାଲିଲୀତାଗାଙ୍କ୍ ଆରାମ୍ ମାଡ଼ି ସାରେ ଯିହୁଦା ଦେଶ୍‍ତାଗ୍ ବେନ୍ ଗଟନା ଗଟେମ୍ ଆତ୍‍ତେ, ଆଦ୍ ମିଡ଼୍ ପୁତ୍‍ତିଡ଼୍ ।
ACT 10:38 ମିଡ଼୍ ନାଜରିତ ଜିସୁନ୍ ବିଷୟ୍‍ତେ ନୁ ଇଶ୍ୱର୍ ବେଲା ଅଙ୍କ୍‌ ଏଞ୍ଚି ଅନ୍‌ ପର୍‍ର ପବିତ୍ର ଆତ୍ମା ନୁ ଶକ୍ତି ହିତ୍‍ତଣ୍ଡ୍, ଆଦ୍ ପୁତ୍‍ତିଡ଼୍ । ଅଣ୍ଡ୍‌ ସାରେ ପାକ୍ ଆଞ୍ଜ୍ ସାୟେତ୍ ପାଡ଼୍‍ୟି ମାଡ଼୍‍ତଣ୍ଡ୍ । ଶୟ୍‍ତାନ୍‍ ଅଦିନ୍‌ତେ ମାନ୍ଦାନ୍ ନାରୁଡ଼୍‍କ୍ ସୁସ୍ଥ ମାଡ଼୍‍ତଣ୍ଡ୍, ବାତେଙ୍କ୍ ଇତ୍‍କେ ଇଶ୍ୱର୍ ଅନ୍‌ ତଡ଼୍ ମାତ୍‍ତଣ୍ଡ୍ ।
ACT 10:39 ଯିହୁଦା ଦେଶ୍‍ତାଗ୍ ନୁ ଯିରୁଶାଲେମ୍‍ ଦେଶ୍‍ତାଗ୍ ଅଣ୍ଡ୍‌ ବେନ୍ ସାରେ ପାଡ଼୍‍ୟି ମାଡ଼୍‍ତଣ୍ଡ୍, ମାମ୍‍ମେ ଆୱ୍ ସାରେତ୍ ସାକ୍ଷି । ତାନ୍‍ପେର୍କେ ଅଂକିଙ୍କ୍‌ ଅଡ଼୍‌ କ୍ରୁଶବିଦ୍ଦ ମାଡ଼ି ହାୱ୍‍କ୍‍ତଡ଼୍ ।
ACT 10:40 ଇତ୍‍କେ ଇଶ୍ୱର୍ ମୁଣ୍ଡ୍ ଦିନା ଲୋପେ ଅଂକିଙ୍କ୍‌ ଡଲ୍‍ତାଗାଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ମାଡ଼୍‍ତଣ୍ଡ୍ । ଅଣ୍ଡ୍‌ ନାରୁଡ଼୍ ବକେତ୍‍ ପ୍ରକାଶଆସ୍ ତଅନ୍‌ଦ୍‍ତଣ୍ଡ୍ ।
ACT 10:41 ଅଣ୍ଡ୍‌ ସାରେତଡ଼୍‌କିଂଙ୍କ୍ ତନ୍ଦଣ୍ଡ୍, ଇଶ୍ୱର୍ ବେନଙ୍କ୍ ସାକ୍ଷି ଲେକାମ୍ ହେଞ୍ଚ୍‍ତଣ୍ଡ୍ ଅଡ଼୍‌‍କିଂଙ୍କ୍ ତନ୍ଦ୍‍ତଣ୍ଡ୍ । ଇଶ୍ୱର୍ ଅଂକିଙ୍କ୍‌ ମେଣ୍ଡେଜିୱେ ମାଡ଼୍‍ତେ ପେର୍‍କେ ମାମ୍‍ମେ ଅନ୍‌‍ତଡ଼୍ ତିନ୍ଦାନ୍‍ଉନ୍ଦାନ୍‍ ମାଡ଼୍‍ତମ୍ ।
ACT 10:42 ନାରୁଡ଼୍ ଗାର୍‍ରେ ସୁସମାଚାର୍ ପ୍ରଚାର୍ ମାଇଦିଙ୍କ୍ ନୁ ଇଶ୍ୱର୍ ଯେ ଅଂକିଙ୍କ୍‌ ଜିୱେ ମାନ୍ଦାନଡ଼୍‍କିଙ୍କ୍ ନୁ ଡଲ୍‍ତେ ନାରିଡ଼୍‍ ବିଚାର୍ କର୍ତ୍ତାଲ୍ ଲେକାମ୍ ନିଯୁକ୍ତି ମାଡ଼୍‍ତଣ୍ଡ୍, ଇଦ୍ ଗଟ୍‍ତାଦ୍ ସାକ୍ଷ୍ୟ କେତାନ୍ ସେଙ୍ଗେ ଅଣ୍ଡ୍‌ ମାକିଂଙ୍କ୍ ଆଜ୍ଞା ହିତ୍‍ତଣ୍ଡ୍ ।
ACT 10:43 ସାରେ ବାବବାଦୀଡ଼୍ ଅନ୍‌ ବିଷୟ୍‍ତେ ପ୍ରଚାର୍ ମାଡ଼ି ଇଦ୍ ଗଟ୍ କେସ୍ ମାତ୍‍ତଡ଼୍, ଯେ ବେନ ଅଂକିଙ୍କ୍‌ ବିଶ୍ୱାସ୍ ମାଡ଼ିତନ୍, ଅନ୍‌ ପେଦେର୍‍ତେ ଶକ୍ତିତଡ଼୍ ଅନାଦ୍‌ ପାପ୍ କ୍ଷମା ଆଦ୍‍ତେ ।”
ACT 10:44 ପିତର୍ ଶିକ୍ଷା ହିଦାନ୍ ୱେଲେ ବେନଡ଼୍ ଅନାଦ୍‌ ଶିକ୍ଷା କେଞ୍ଜ ମାତ୍‍ତଡ଼୍, ଅଡ଼୍‌ ସାରେତଡ଼୍ ପର୍‍ର ପବିତ୍ର ଆତ୍ମା ହସ୍‍ତେ ।
ACT 10:45 ଅଣଇହୁଦୀଡ଼୍ ପର୍‍ର ଗାଲା ଇଶ୍ୱର୍ ଅନାଦ୍‌ ପବିତ୍ର ଆତ୍ମା ଇସ୍‌ ମାନ୍ଦାନାଦ୍ ଉଡ଼ି ପିତର୍ ତଡ଼୍ ୱାସ୍ ମାନ୍ଦାନ୍ ଯୋପ୍‍ପାତେ ସୁନ୍ନତଇହୁଦୀ ବିଶ୍ୱାସୀଡ଼୍ କାବା ଆତ୍‍ତଡ଼୍ ।
ACT 10:46 ବାତେଙ୍କ୍ ଇତ୍‍କେ ଇହୁଦୀ ବିଶ୍ୱାସୀଡ଼୍ ଅଡ଼୍‌‍କିଂଙ୍କ୍ ଇଶ୍ୱର୍‌ତେ ପ୍ରସଂଶା ମାଡ଼ମାନ୍ଦାନାଦ୍ ନୁ ୱେରେ ଗଟ୍‍ତେ ତ୍ରିୟାନାଦ୍ କେଞ୍ଜ୍‍ତଡ଼୍ । ପିତର୍ କେତ୍‍ତଣ୍ଡ୍,
ACT 10:47 “ମା ଲେକାମ୍ ଇଡ଼୍‍ ନାରୁଡ଼୍ ଗାଲା ପବିତ୍ର ଆତ୍ମା ପାଏମ୍ ଆତ୍‍ତଡ଼୍ । ଏର୍‍ ଦୀକ୍ଷା ଆଦାନ୍ ସେଙ୍ଗେ ବାତ୍ ବେନ ବାଦା ଇଦେ ପାର୍‍ଦ୍‍ତଣ୍ଡ୍ ?”
ACT 10:48 ଆଦିଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ଜିସୁ କ୍ରିଷ୍ଟ ପେଦେର୍‍ତେ ଏର୍‍ ଦୀକ୍ଷା ଆଦାନ୍ ମାଇଦିଙ୍କ୍ ଗଟ୍ କେତ୍‍ତଣ୍ଡ୍ । ତାନ୍‍ପେର୍କେ ଅଡ଼୍‌ ଅଂକିଙ୍କ୍‌ ମେଣ୍ଡେ ବେସ୍‌କ୍ ଦିନା ଅଡ଼୍‌ ତଡ଼୍ ମାନ୍ଦାନଙ୍କ୍ ଅନୁରଦ୍‌‍ ମାଡ଼୍‍ତଡ଼୍ ।
ACT 11:1 ଅଣଇହୁଦୀଡ଼୍ ଗାଲା ଇଶ୍ୱର୍‌ତେ ଗଟ୍ ଗ୍ରହନ୍ ମାଡ଼୍‍ତଡ଼୍ ଇଞ୍ଜ ପ୍ରେରିତ ଶିଷ୍ୟଡ଼୍ ନୁ ଯିହୁଦା ଦେଶ୍‍ତଡ଼୍ ବାଗାତ୍ ବିଶ୍ୱାସୀଡ଼୍ ଦାଦାଲ କେଞ୍ଜ୍‍ତଡ଼୍ ।
ACT 11:2 ପିତର୍ ବେସୁଟ୍‌ ଯିରୁଶାଲେମ୍‍ତାଗ୍ ଆତ୍‍ତଣ୍ଡ୍, ଅଣଇହୁଦୀଡ଼୍‍ ପାକେଙ୍କ୍ ମାନ୍ଦାନ୍ ସୁନ୍ନତ ନାରୁଡ଼୍ ଅଂକିଙ୍କ୍‌ ହାଲ୍‍ସାନାଦ୍‍ ନୁ କେତ୍‍ତଡ଼୍,
ACT 11:3 “ନିମ୍‍ ଅସୁନ୍ନତ ଅଣଇହୁଦୀଡ଼୍ ଲୋନ୍‌ କୁଟ୍‍ମାମ୍ ଆତ୍‍ତି, ମେଣ୍ଡେ ଅଡ଼୍‌ ତଡ଼୍ ତିତ୍‍ତିଡ଼୍‍ ।”
ACT 11:4 ବାତେଙ୍କ୍ ଇତ୍‍କେ ଆରାମ୍‍ତାଗାଙ୍କ୍ ବାତ୍ ବାତ୍ ଗଟେମ୍ ଆତ୍‍ତେ, ପିତର୍ ଅଡ଼୍‌‍କିଂଙ୍କ୍ ଆଦିନାଦ୍ ସାରେ ଗଟ୍ କେତ୍‍ତଣ୍ଡ୍ ।
ACT 11:5 “ନାନ୍ ଯୋପା ନାର୍‍ତାଗ୍ ପ୍ରାର୍ତନା ମାଡ଼ାନ୍ ୱେଲେ ଅଣ୍ଡୟ୍‌ ଦର୍ଶନ୍ ଉଡ଼୍‍ତାନ୍ । ଅଣ୍ଡୟ୍‌ ବେଡ଼୍‍ୟାଦ୍‍ ଡୁପଟ୍ ନାଲୁ ମୁଲାନାଗ୍ ଉଙ୍ଗି ସ୍ୱର୍ଗତାଗାଙ୍କ୍ ମଦଲ୍ ଡିଗାନାଦ୍ ଉଡ଼୍‍ତାନ୍, ଆଦ୍ ନା ବକେତ୍ ନିତ୍‍ତେ ।
ACT 11:6 ନାନ୍ ସାୟେ ମାଡ଼ି ଲୋପେ ଉଡ଼୍‍ତାନ୍ ଆଦିନ୍ ସ୍ୱର୍ଗ ନାଲୁ ଡେକାନ୍ ଲୋନ୍‌ ପଡ଼୍‍ପାନ୍ ପିଟ୍‍ଟେ ନୁ ଗୁପେତ୍ ପଶୁ, ପୃତିବିତାଗ୍ ବେନ୍‍ ନେଲ୍‍ ମେନ୍ଦୁଲ୍‍ ମସ୍‍ସ୍ପି ତାଆକାନାୱୁ ଜିୱାକ୍‍ ନୁ ଗୁପେତ୍‍ ପିଟେ ମିନ୍ଦେ ।
ACT 11:7 ତାନ୍‍ପେର୍କେ ନାନ୍ ଇଦ୍ ଗଟ୍ କେଞ୍ଜ୍‍ତାନ୍, ‘ପିତର୍ ! ତେଏଦେ, ହାୱ୍‍କି ତିନ୍ ।’
ACT 11:8 ଇତ୍‍କେ ନାନ୍ ଉତ୍ତର୍ ହିତ୍‍ତାନ୍, ‘ଇଲ୍‍ଲେ ପ୍ରବୁ ! ନାନ୍ ପାର୍‍ୱନ୍ । ଇଞ୍ଜେକ୍ଆନା ବାତେଏ କାରାପ୍ ବା ଅଶୁଚି କାଦି ତିନନେ ।’”
ACT 11:9 ସ୍ୱର୍ଗତାଗାଙ୍କ୍ ମେଣ୍ଡେ ଇଦ୍ ଗଟ୍ ୱାତ୍‍ତେ, “ଇଶ୍ୱର୍ ବେନଙ୍କ୍ ଶୁଚି ମାଡ଼୍‍ତଣ୍ଡ୍, ନିମ୍‍ ଆଦିଙ୍କ୍ ଅଶୁଚି ହେର୍କା ମାଡ଼୍‍ମା ।”
ACT 11:10 ମୁଣ୍ଡ୍‍ଦାମ୍ ଇଦ୍‍ରକମ୍ ଆତ୍‍ତେ, ମାଡ଼େଙ୍କ୍‌ତେ ଆୱୁ ସାରେତାୱିଙ୍କ୍ ସ୍ୱର୍ଗତାଗ୍ ତେଇସ୍ ଆତ୍‍ତଡ଼୍ ।
ACT 11:11 ଟିକ୍ ଆସୁଟେ ସିସେରିଆ ତାଗାଙ୍କ୍‌ ନାୟାକ୍ ରହତେନଡ଼୍ ମୁୱୁଡ଼୍ ନାରୁଡ଼୍ ନାନ୍ ବେନ୍‍ ଲନ୍‍ ମାତ୍‍ତାନ୍ ଆଗେ ଏୱୁତ୍‍ତଡ଼୍ ।
ACT 11:12 ବାତ୍‍ମିକା ଆଲ୍‍ସାନାଦ୍‍ ଅଡ଼୍‌ ତଡ଼୍ ଆଦାନଙ୍କ୍ ପବିତ୍ର ଆତ୍ମା ନାକିଂଙ୍କ୍ ଗଟ୍ ହିତ୍‍ତଣ୍ଡ୍ । ଯୋପ୍‍ପାତାଗାଙ୍କ୍ ଆରୁ ଜାନ୍‍ ବିଶ୍ୱାସୀ ନା ତଡ଼୍ ସିସେରିଆତାଗ୍ ଆତ୍‍ତଡ଼୍ ନୁ ମାମ୍‍ମେ ସାରେତମ୍ କର୍ଣ୍ଣୀଲିୟତେ ଦାଦାଲ ଲୋନ୍‌ ଏୱୁତ୍‍ତମ୍ ।
ACT 11:13 ତାମ୍ ଲୋନ୍‌ ବେଲା ସ୍ୱର୍ଗ ଦୂତ ଦର୍ଶନ୍ ପାଏମ୍‍ଆତ୍‍ତଣ୍ଡ୍, ଆଦ୍ ବିଷୟ୍ ମାକିଂଙ୍କ୍ କେତ୍‍ତଣ୍ଡ୍ । ସ୍ୱର୍ଗ ଦୂତ ଅଂକିଙ୍କ୍‌ କେତ୍‍ତଣ୍ଡ୍, “ଯୋପାତାଗ୍ ମାନ୍ଦାନ୍ ଶିମୋନ୍ ପିତର୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍ ତାତାନଙ୍କ୍ ନାରୁଡ଼୍‍କ୍ ରହମୁଟ୍ ।
ACT 11:14 ଅଣ୍ଡ୍‌ ୱାସ୍ ମିକିଂଙ୍କ୍ ଶିକ୍ଷା ହିଦ୍‍ତଣ୍ଡ୍ ମେଣ୍ଡେ ମିଡ଼୍ ନୁ ମିଇ ପରିବାର୍ ପରିତ୍ରାଣ୍ ପାଏମ୍‍ଆଦ୍‍ତେ ।
ACT 11:15 ମେଣ୍ଡେ ନାନ୍ ବେସୁଟ୍‌ ଶିକ୍ଷା ହିଦାନଙ୍କ୍ ପସ୍‍ସ୍ପ୍‍ତାନ୍, ମୁନ୍‍ନେନ୍ ପବିତ୍ର ଆତ୍ମା ମା ପର୍‍ର ବେଲା ୱାସ୍‍ମାତ୍‍ତେ, ଆଦେ ରକମ୍ ଅଡ଼୍‌ ପର୍‍ର ୱାତ୍‍ତେ ।
ACT 11:16 ତାନ୍‍ପେର୍କେ ନାନ୍ ପ୍ରବୁନାଦ୍ ଇଦ୍ ଶିକ୍ଷା ହେର୍କା ମାଡ଼୍‍ତାନ୍; ‘ଯୋହନ୍‌ ଏର୍‍ଦାଗ୍ ଦୀକ୍ଷା ହିତ୍‍ତଣ୍ଡ୍, ଇତ୍‍କେ ମିଡ଼୍ ପବିତ୍ର ଆତ୍ମାତଡ଼୍ ବାପ୍ତିସ୍ମ ଆଦ୍‍ତିଡ଼୍ ।’
ACT 11:17 ଇଦ୍ ସ୍ପଷ୍ଟ ଯେ ମାମ୍‍ମେ ପ୍ରବୁ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ାନ୍ ତଡ଼୍ ଇଶ୍ୱର୍ ମାକିଂଙ୍କ୍ ବେନ୍ ଦାନ୍‍ ହିତ୍‍ତଣ୍ଡ୍, ଅଣଇହୁଦୀଡ଼୍‍କ୍‍ ମିକା ଆଦେ ଦାନ୍‍ ହିତ୍‍ତଣ୍ଡ୍; ନାନ୍ ବେନ ଯେ ଇଶ୍ୱର୍‌ତେ ଇଦ୍ ପାଡ଼ିୟିତିଙ୍କ୍ ବିରୋଦ୍ ମାଡ଼ିତାନ୍ !”
ACT 11:18 ଅଡ଼୍‌ ଇଦ୍ କେଞ୍ଜ୍‍ତେ ପେର୍‍କେ ମେଣ୍ଡେ ସମାଲୋଚନା ମାଡ଼କଟ୍ ଇଶ୍ୱର୍‌ତିଙ୍କ୍ ଗୌରବ୍‍ ମାଡ଼ି କେତ୍‍ତଡ଼୍, “ଆଲେକେ ଇଶ୍ୱର୍ ଅଣଇହୁଦୀଡ଼୍‍କ୍ ମିକା ଅନୁତାପ୍ ମାଡ଼ାନଙ୍କ୍ ନୁ ଜିୱୁଣ୍ଡ୍ ବାଦ୍‍କାନ୍ ସେଙ୍ଗେ ସୁଯୋଗ୍ ହିତ୍‍ତଣ୍ଡ୍ ।”
ACT 11:19 ସ୍ତିଫାନ୍‍ତେ ଡଲ୍‍ତେ ପେର୍‍କେ ବେନ୍ ତାଡ଼ନା ଆତ୍‍ତେ, ଆଦିନ୍ ମାଇଦିଙ୍କ୍ ବଶ୍ୱାସୀଡ଼୍‍ ସାରେଏକାମ୍ ଚିନ୍‍ବିନ୍‍ ଆଦାନ୍‍ ୱେଲେ ଅଡ଼୍‌‍ ଲୋପେଙ୍କ୍‍ ବେସ୍‍କ୍‍ତୁଡ଼୍‍ ମାତର୍‍ ଇହୁଦୀଡ଼୍ ଗାର୍ରେ ସମ୍ବାଦ ପ୍ରଚାର୍‍ ମାଡ଼୍‍ତଡ଼୍‍ । ଅଡ଼୍‌ ଲୋପେଙ୍କ୍ ବେସ୍‍ତୁଡ଼୍ ଫିନିସିଆ, ସାଇପ୍ରସ୍ ନୁ ଆନ୍ତିୟକିଆ ହେୱୁନା ଆତ୍‍ତଡ଼୍ ।
ACT 11:20 ଇତ୍‍କେ ସାଇପ୍ରସ୍‍ ନୁ କୁରିନୀୟତେ ମେଣ୍ଡେ ବେସ୍‍କ୍‍ତୁଡ଼୍‍ ବିଶ୍ୱାସୀଡ଼୍ ଆନ୍ତିୟକିଆ ତାଗ୍ ଆଞ୍ଜ୍ ଅଣଇହୁଦୀଡ଼୍ ଗାର୍‍ରେ ପ୍ରବୁ ଜିସୁନ୍ ସୁସମାଚାର୍‍ ଗ୍ରୀକ୍‍ ଗଟ୍‍ତେ ପ୍ରଚାର୍ ମାଡ଼୍‍ତଡ଼୍ ।
ACT 11:21 ପ୍ରବୁନ୍‌ ଶକ୍ତି ଅଡ଼୍‌‍ତଡ଼୍ ମାତ୍‍ତେ ନୁ ନାର୍‍ଗେ ନାରୁଡ଼୍ ବିଶ୍ୱାସ୍ ମାଡ଼ି ପ୍ରବୁନାକ୍ ମନ୍ ମାଲ୍‍ପ୍‍ତଡ଼୍ ।
ACT 11:22 ବେସୁଟ୍‌ ଇଦ୍ ସମ୍ୱାଦ୍ ଯିରୁଶାଲେମ୍‍ ମଣ୍ଡଲିତାଗ୍ ହେୱୁତ୍‍ତେ, ଅଡ଼୍‌ ବର୍ଣ୍ଣବାଙ୍କ୍ ଆନ୍ତିୟକିଆ ରହତ୍‍ତଡ଼୍ ।
ACT 11:23 ଅଣ୍ଡ୍‌ ଆଗେ ହେୱୁସ୍‍ ଇଶ୍ୱର୍ ଆ ନାରୁଡ଼୍‍କିଂଙ୍କ୍ ବେଲା ଅନୁଗ୍ରହ ମାଡ଼୍‍ତଣ୍ଡ୍ ଆଦ୍‍ ଉଡ଼ି ୱେଡ଼୍‍କେ ଆତ୍‍ତଣ୍ଡ୍‍ ନୁ ସାରେତଡ଼୍‍ତେ ହୃଦୟ୍‍ତାଗ୍ ପ୍ରବୁନ୍ ସେଙ୍ଗେ ବିଶ୍ୱାସ୍ ମାଡ଼ି ଅନୁରଦ୍‌‍ ମାଡ଼ାନ୍ ମାଇଦିଙ୍କ୍ ଅଡ଼୍‌‍କିଂଙ୍କ୍ ସାର୍‍ଦେ ମାଡ଼୍‍ତଣ୍ଡ୍ ।
ACT 11:24 ବର୍ଣ୍ଣବା ପବିତ୍ର ଆତ୍ମା ନୁ ବିଶ୍ୱାସ୍‍ତାଗ୍‍ ୱେରଣ୍ଡ୍‍ ସାୟେକାମ୍‍ଦେ ନାରୁଣ୍ଡ୍‍ ମାତ୍‍ତଣ୍ଡ୍ । ଅନାଦ୍‌ ପ୍ରଚାର୍ ତଡ଼୍ ନାର୍‍ଗେ ନାରୁଡ଼୍ ପ୍ରବୁନ୍ ଗାର୍‍ରେ ୱାତ୍‍ତଡ଼୍ ।
ACT 11:25 ତାନ୍‍ପେର୍କେ ବର୍ଣ୍ଣବା ଶାଉଲ୍‍ତିଙ୍କ୍ ମେହେକାନଙ୍କ୍ ତାର୍ଷିସ୍‍ତାଗ୍ ଆତ୍‍ତଣ୍ଡ୍ ।
ACT 11:26 ଆଗେ ଅଣ୍ଡ୍‌ ଅଂକିଙ୍କ୍‌ ଦର୍‍ସ୍‍କି ଆନ୍ତିୟକିଆତାଗ୍ ତାତ୍‍ତଣ୍ଡ୍ । ମେଣ୍ଡେ ସାରେ ଅଣ୍ଡୟ୍‌‍ ହେଣ୍ଡ୍‍କ୍ ଯାକ ଇଡ଼୍ ଇର୍‍ୱୁଡ଼୍ ଗାର୍‍ରେତ୍ ମଣ୍ଡଲିତାଗ୍ ବିଶ୍ୱାସୀ ଶିଷ୍ୟଡ଼୍‍ ତଡ଼୍ କାଇଲି ନାର୍‍ଗେ ନାରୁଡ଼୍‍କିଂଙ୍କ୍ ଶିକ୍ଷା ହିତ୍‍ତଡ଼୍ । ଆଣ୍ଟିୟୋକ୍‌ତେ ବିଶ୍ୱାସୀଡ଼୍‍କ୍ ନାରୁଡ଼୍ ମୁନ୍‍ନେନ୍ କ୍ରିଷ୍ଟିୟାନ୍ ଇଞ୍ଜ କେତ୍‍ତଡ଼୍ ।
ACT 11:27 ଆସୁଟେ ବେସ୍‍କ୍‍ତୁଡ଼୍‍ ବାବବାଦୀଡ଼୍‍ ଯିରୁଶାଲେମ୍‍ କନ୍‍ସ୍ ଆନ୍ତିୟକିଆ ୱାତ୍‍ତଡ଼୍ ।
ACT 11:28 ଅଡ଼୍‌ ଲୋପେଙ୍କ୍ ଆଗାବ୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଡ଼୍ ଆତ୍ମାନ୍‍ ଶକ୍ତିତଡ଼୍ ଜଗତ୍‍ ଏକାମ୍‍ ଅଣ୍ଡୟ୍‌ ବେଡ଼୍‍ୟାଦ୍‍ ଦୁର୍ଭିକ୍ଷ ଆଦ୍‍ତେ ଇଞ୍ଜ ବବିଷ୍ୟ ଗଟ୍‍ କେତ୍‍ତଣ୍ଡ୍ । ସମ୍ରାଟ୍ କ୍ଲଡିୟସ୍‍ତେ ୱେଲେ ଇଦ୍ ଆସ୍‍ମାତ୍‍ତେ ।
ACT 11:29 ଶିଷ୍ୟଡ଼୍ ଯିହୁଦାତାଗ୍ ବାସେ ମାଡ଼ମାନ୍ଦାନ୍ ବିଶ୍ୱାସିଡ଼୍ ଦାଦାଲଡ଼୍‍ ଗାର୍‍ରେ ଅଡ଼୍‌ ପାର୍‍ଦାନ୍ ପାଡ଼୍‍ୟି ଇସ ସାହାଯ୍ୟ ରହତିତଡ଼୍ ଇଞ୍ଜ ଟିକ୍‍ ମାଡ଼୍‍ତଡ଼୍ ।
ACT 11:30 ଅଡ଼୍‌ ଡାବ୍‍କ୍ ଗୁଡ଼୍‍ପି ମିକା ବର୍ଣ୍ଣବା ନୁ ଶାଉଲ୍‍ତେ କାୟ୍‍ଦେ ମଣ୍ଡଲିତେ ବୟସ୍କା ନାରୁଡ଼୍‍ ଗାର୍‍ରେ ଆୱ୍ ରହତ୍‍ତଡ଼୍ ।
ACT 12:1 ଇଦ୍ ସମୟ୍‍ତେ ରାଜାଲ୍‌ ହେରଦ୍ ମଣ୍ଡଲିତେ ବେସ୍‍କ୍‍ତୁଡ଼୍‍ ସବ୍ୟଡ଼୍‍କ୍ ଅତ୍ୟାଚାର୍ ମାଡ଼୍‍ତଣ୍ଡ୍ ।
ACT 12:2 ଅଣ୍ଡ୍‌ ବିଶ୍ୱାସୀ ଯୋହନ୍‌‌ତେ ତାମୁଣ୍ଡ୍‌ ଜାକୁବଙ୍କ୍ ଚୁର୍‌ତଡ଼୍ ନାରୁଡ଼୍‍କିଂଙ୍କ୍ କେସ୍ ଆୱୁକ୍‍ତଣ୍ଡ୍ ।
ACT 12:3 ଇହୁଦୀ ନାରୁଡ଼୍ ଇଦ୍ ଉଡ଼ି କୁସି ଆତ୍‍ତଡ଼୍ ମେଣ୍ଡେ ଅଣ୍ଡ୍‌ ପିତର୍‍ତିଙ୍କ୍ ମିକା ବନ୍ଦି ମାଡ଼୍‍ତଣ୍ଡ୍ । ଇଦ୍ ଗଟନା ସୋଡ଼ା ୱାଟ୍‍ୱାଦ୍‍ ରୋଟି ପାଣ୍ଡୁମ୍ ସମୟ୍‍ତେ ଆସ୍‍ମାତ୍‍ତେ ।
ACT 12:4 ପିତର୍ ବନ୍ଦି ଆସ୍ ଜଇଲ୍‍ତାଗ୍ ଆତ୍‍ତଣ୍ଡ୍ ନୁ ନାଲୁ ଜାନ୍‍ତିଙ୍କ୍ ଆସ୍ ତିଆର୍ ଆତ୍‍ତେ ନାଲୁ ମାନ୍ଦେ ସୈନିକ୍ ଅଂକିଙ୍କ୍‌ କେପିମାତ୍‍ତଡ଼୍ । ନିସ୍ତାର୍ ପାଣ୍ଡୁମ୍‍ତେ ପେର୍‍କେ ସାରେତଡ଼୍ ମୁନ୍‍ନେ ଅନାଦ୍‌ ବିଚାର୍ ମାଡ଼ାନଙ୍କ୍ ହେରଦନ୍ ଇଚ୍ଛା ମାତ୍‍ତେ ।
ACT 12:5 ପିତର୍ ଜଇଲ୍‍ତାଗ୍ ମାନ୍ଦାନ୍ ୱେଲେ ମଣ୍ଡଲିତ୍ ନାରୁଡ଼୍ ଅଣ୍ଡୟ୍‌ ମନ୍‍ତେ ଅନ୍‌ ସେଙ୍ଗେ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ମାତ୍‍ତଡ଼୍ ।
ACT 12:6 ହେରଦ୍ ବେନ୍ ଦିନ୍ ପିତର୍‍ତିଙ୍କ୍ ବିଚାର୍ ମାଡ଼ାନଙ୍କ୍ ବାୟିଦେ ତାତାନଙ୍କ୍ ହାଲ୍‍ସି ମାତ୍‍ତଣ୍ଡ୍, ତାନ୍ ମୁନେତ୍ ନାର୍‍କେତ୍ ପିତର୍ ରେଣ୍ଡ୍ ଇକ୍‍ଲେମ୍‍ତେ ତଅସ୍ ଇର୍‍ୱୁଡ଼୍ ସୈନିକିନ୍ ନାଡ଼୍‍ମେ ପାଟିମାତ୍‍ତଣ୍ଡ୍ । ନାର୍‍ଗେ କେପାନଡ଼୍ ମାର୍‍ତାଗ୍ ମାଞ୍ଜ୍ ଜଇଲ୍‍ତିଙ୍କ୍ କେପି ମାତ୍‍ତଡ଼୍ ।
ACT 12:7 ହଟାତ୍ ପ୍ରବୁନାଦ୍ ୱେରଣ୍ଡ୍ ଦୂତ୍ ୱାସ୍ ନିତ୍‍ତଣ୍ଡ୍ ନୁ ଆଦ୍ ବାକ୍‍ଡ଼େ ୱେସ୍ ଆତ୍‍ତେ । ଦୂତ୍ ପିତର୍‍ତିଙ୍କ୍ ହାଟ୍‍ଜାବ୍‍ତିଙ୍କ୍ ଉହୁସ୍ ତେଏସ୍ କେତ୍‍ତଣ୍ଡ୍, “ସିଟ୍‍ପାଟ୍ ତେଏଦେ !” ସାଙ୍ଗେ ସାଙ୍ଗେ ପିତର୍‍ତିଙ୍କ୍ ତଅସ୍‍ମାତ୍‍ତେ ଇକ୍‍ଲେମ୍ କୁସି ରାୟ୍‍ତେ ।
ACT 12:8 ତାନ୍‍ପେର୍କେ ଦୂତ୍ କେତ୍‍ତଣ୍ଡ୍, “ଟିକିଡ଼୍ ତୁୱାଲ୍‍ ଉତ୍‍ତେ, ପିତା ହେର୍‍ପୁକ୍ କେର୍‍ମ୍ ।” ପିତର୍ ଆଲା ମାଡ଼୍‍ତଣ୍ଡ୍‍ ପେର୍‍କେ ଦୂତ୍ କେତ୍‍ତଣ୍ଡ୍, “ମେନ୍ଦୁଲ୍‍ତାଗ୍ ଡୁପଟ୍ ମୁସି ନା ତଡ଼୍ ୱାଡ଼େ ।”
ACT 12:9 ଦୂତ୍ ବାତ୍‍ମାଡ଼ମାତ୍‍ତଣ୍ଡ୍ ଆଦ୍ ନିଜାତାଦ୍ କି ଆୟ୍‍ୟ, ପିତର୍ ପୁନ୍ଦାନଙ୍କ୍ ପାର୍‍ୱଣ୍ଡ୍ । ଅଣ୍ଡ୍‌ ସାପ୍ନା ଉଡ଼୍‍ତଣ୍ଡ୍ ଇଞ୍ଜ ହାଲ୍‍ସ୍‍ତଣ୍ଡ୍ । ମିକା ପିତର୍ ଜେଲ୍‍ତାଗାଙ୍କ୍ ପେଇସ୍ ଦୂତନ୍‍ ପେର୍କେପେର୍କେ ଆତ୍‍ତଣ୍ଡ୍ ।
ACT 12:10 ଅଡ଼୍‌ କେପାନଡ଼ାଦ୍ ରେଣ୍ଡ୍ ପଡ଼ିୟେ ପାର୍ ଆତ୍‍ତେ ପେର୍‍କେ ନାର୍‍ତାଗ୍ ହସାନାଗ୍ ମାନ୍ଦାନ୍ ଲୁହା ମାର୍ ବକେତ୍ ଆତ୍‍ତଡ଼୍ । ଅଡ଼୍‌ ସେଙ୍ଗେ ମାର୍ ତାନ୍ ମାନ୍‍ତେ କୁଲେମ୍ ଆତ୍‍ତେ ନୁ ଅଡ଼୍‌ ପେଇସ୍ ଆତ୍‍ତଡ଼୍ । ଅଡ଼୍‌ ହାର୍‍ଦାଗ୍ ଆଦାନ୍ ୱେଲେ ହଟାତ୍ ସ୍ୱର୍ଗ ଦୂତ ଅଂକିଙ୍କ୍‌ ୱିଡ଼୍‍ସି ଆତ୍‍ତଣ୍ଡ୍ ।
ACT 12:11 ତାନ୍‍ପେର୍କେ ବାତ୍ ଗଟେମ୍ ଆତ୍‍ତେ, ପିତର୍ ଆଦ୍ ପୁଞ୍ଜ୍ କେତ୍‍ତଣ୍ଡ୍, “ଇଦ୍ ନିଜାମ୍ ଇଞ୍ଜ ନାନ୍ ପୁନ୍ଦ୍‍ତାନ୍ । ହେରଦ୍‍ତାଗାଙ୍କ୍ ନୁ ଇହୁଦୀଡ଼ାଗାଙ୍କ୍ ବାତ୍ ଗଟେମ୍ ଆଦ୍‍ତେ ଇଞ୍ଜ ଆଶେ ମାଡ଼ିମାତ୍‍ତଡ଼୍, ଆଗାଙ୍କ୍ ନାକିଂଙ୍କ୍ ଉଦ୍ଦାର୍ ମାଡ଼ାନଙ୍କ୍ ପ୍ରବୁ ସ୍ୱର୍ଗ ଦୂତତିଙ୍କ୍ ରହତ୍‍ତଣ୍ଡ୍ ।”
ACT 12:12 ନିଜେତ୍ ପରିସ୍ଥିତି ବିଷୟ୍‍ତେ ହେର୍କେମାଡ଼ି ଅଣ୍ଡ୍‌ ଯୋହନ୍‌ ନୁ ମାର୍କନ୍ ୟାୟ୍‍ ମରୀୟମ୍‍ତେ ଲନ୍‍ ଆତ୍‍ତଣ୍ଡ୍ । ଆଗେ ନାର୍‍ଗେ ନାରୁଡ଼୍ ଅଣ୍ଡୟାଗେ ଗୁଡ଼ି ପ୍ରାର୍ତନା ମାଡ଼ମାତ୍‍ତଡ଼୍ ।
ACT 12:13 ପିତର୍ ବାୟିଦେ ମାର୍‍ତାଗ୍ ତାଲ୍‍ସ୍କ୍‍ତଣ୍ଡ୍, ରୋଦା ପେଦେର୍‍ତେ ଅଣ୍ଡୟ୍‌ କ୍ରୀତଦାସୀ କାପାଟ୍ ତେର୍‍ତାନଙ୍କ୍ ୱାତ୍‍ତେ ।
ACT 12:14 ପିତର୍‍ତେ ଲେଙ୍ଗ୍ ପୁଞ୍ଜ୍ ମିକା ଆଦ୍ ଇସର୍ ୱେଡ଼୍‌କେତେ ଆତ୍‍ତେ ଯେ ମାର୍ ତେର୍‍ୱକଟ ପିତର୍ ବାୟିଦେ ନିସ୍ ମିନ୍ଦେଣ୍ଡ୍ ଇଞ୍ଜ କେତ୍‍ତେ ।
ACT 12:15 ଅଡ଼୍‌ ଆଦିଙ୍କ୍ କେତ୍‍ତଡ଼୍, “ନିମ୍‍ ବାୟେ ଆତ୍‍ତି ।” ଇତ୍‍କେ “ଇଦ୍ ନିଜାମ୍,” ଇଞ୍ଜ ଆଦ୍ କେତ୍‍ତାଙ୍କ୍, ଅଡ଼୍‌ ହାଲ୍‍ସ୍‍ତଡ଼୍, “ଆଲେକେ ଇଦ୍ ଅନାଦ୍‌ ଦୂତ ।”
ACT 12:16 ପିତର୍ ସେନେମାନ୍ କାପାଟ୍‍ତିଙ୍କ୍ ତାଲ୍‍ସ୍କମାତ୍‍ତଣ୍ଡ୍ । ପେର୍‍କେ ଅଡ଼୍‌ କାପାଟ୍ ତେର୍‍ସ୍‍ ଅଂକିଙ୍କ୍‌ ଉଡ଼ି ଦାଦ୍‍ରେଲ୍‍ତଡ଼୍ ।
ACT 12:17 ଅଣ୍ଡ୍‌ କାୟ୍ ଉହୁସ୍ କଟମାନ୍ଦାନଙ୍କ୍ କେତ୍‍ତଣ୍ଡ୍ ନୁ ପ୍ରବୁ ବେଲା ଅଂକିଙ୍କ୍‌ ଜଇଲ୍‍ତାଗାଙ୍କ୍ ପେସ୍‍ପି ତାତ୍‍ତଣ୍ଡ୍, ଆଦ୍ ବିଷୟ୍ ଅଡ଼୍‌ ମୁନ୍‍ନେ କେତ୍‍ତଣ୍ଡ୍ । ତାନ୍‍ପେର୍କେ ଇୱୁସାରେ ଗଟି “ଯାକୁବ୍‍ ନୁ ବାଗାତ୍ ସାରେତଡ଼୍ ବିଶ୍ୱାସୀ ଦାଦାଲଡ଼୍‍ କେତାନଙ୍କ୍ ଗଟ୍ ଇସ୍‌,” ଅଣ୍ଡ୍‌ ଆଗାଙ୍କ୍ ମେଣ୍ଡେଅଣ୍ଡା ଆତ୍‍ତଣ୍ଡ୍ ।
ACT 12:18 ନାର୍‍କା ଆତ୍‍ତେ ୱେଲେ ପିତର୍ ବେକେ ଆତ୍‍ତଣ୍ଡ୍ ଇଞ୍ଜ କେପାନଡ଼୍ ଗାବ୍‍ରା ଆତ୍‍ତଡ଼୍ ।
ACT 12:19 ହେରଦ୍ ଅଂକିଙ୍କ୍‌ ମେହେକାନଙ୍କ୍ ଗଟ୍ ହିତ୍‍ତଣ୍ଡ୍, ବାତେଙ୍କ୍ଇତ୍‍କେ ଅଡ଼୍‌ ଅଂକିଙ୍କ୍‌ ଦର୍‍ସ୍କାଙ୍କ୍ ପାର୍‍ୱଡ଼୍ । ପେର୍‍କେ କେପାନଡ଼୍‍କିଙ୍କ୍ ପାଚ୍ରାମାଡ଼ି ଅଡ଼୍‌‍କିଂଙ୍କ୍ ଡଲାନ୍‍ଦଣ୍ଡ୍ ହିଦାନ୍ ସେଙ୍ଗେ ଗଟ୍ ହିତ୍‍ତଣ୍ଡ୍ । ତାନ୍‍ପେର୍କେ ହେରଦ୍ ଯିହୁଦା ପ୍ରଦେଶ୍‍ତାଗାଙ୍କ୍ ଆଞ୍ଜ୍ କାଇସରିଆତାଗ୍ ମାତ୍‍ତଣ୍ଡ୍ ।
ACT 12:20 ଆସୁଟେ ହେରଦ୍ ସୋର ନୁ ସିଦନ୍‍ତେ ନାରୁଡ଼୍‍ତେ ପର୍‍ର କପାମ୍ ଆସ୍ ମାତ୍‍ତଣ୍ଡ୍ । ଆଦିଙ୍କ୍ ଅଡ଼୍‌ ଲୋପେଙ୍କ୍ ୱେରଡ଼୍ ମାନ୍ଦେ ଅଂକିଙ୍କ୍‌ ଉଡ଼ାନଙ୍କ୍ ଆତ୍‍ତଡ଼୍ । ମୁନେନ୍ ଅଡ଼୍‌ ରାଜ୍‍ପ୍ରାସାଦ୍ ଦାୟିତ୍ୱତେ ମାନ୍ଦାନ୍ ବ୍ଲାଷ୍ଟସ୍‍ତିଙ୍କ୍ ବୁଜାମାଡ଼ି ଅନାଗାଙ୍କ୍ ସାହାଯ୍ୟ ପାଏମ୍‍ଆତ୍‍ତଡ଼୍ । ତାନ୍‍ପେର୍କେ ଅଡ଼୍‌ ହେରଦ୍‍ତେ ବକେତ୍ ଆଞ୍ଜ୍ ଶାନ୍ତି ତାଲ୍‍କ୍‍ତଡ଼୍, ବାତେଙ୍କ୍ଇତ୍‍କେ ହେରଦ୍‍ତେ ରାଜ୍ୟତାଗାଙ୍କ୍ ଅଡ଼୍‌ ଦେଶ୍ କାଦି ଆଞ୍ଜମାତ୍‍ତେ ।
ACT 12:21 ଟିକ୍‌‍ମାଡ଼୍‍ତେ ଦିନେ ହେରଦ୍ ରାଜାଲଡ଼୍ ଚକାସିଲେ କେର୍‍ତଣ୍ଡ୍ ନୁ ବିଚାର୍ ଲୋତ୍‍ତାଗ୍ କୁଦି ନାରୁଡ଼୍‍କିଂଙ୍କ୍ ୱେରଡ଼୍ ବାଷଣ ହିତ୍‍ତଣ୍ଡ୍ ।
ACT 12:22 ଅଡ଼୍‌ କିଡ଼୍‍କି କେତ୍‍ତଡ଼୍, “ଇଦ୍ ବେନ୍ ନାରୁନାଦ୍ ଆୟ୍‍ୟ, ମାତ୍ରମ୍‍ ୱେରଣ୍ଡ୍ ଇଶ୍ୱର୍‌ତେ ଲେଙ୍ଗ୍ !”
ACT 12:23 ଆସୁଟେ ସାଙ୍ଗେ ସାଙ୍ଗେ ପ୍ରବୁନାଦ୍ ଦୂତ୍ ହେରୋଦତିଙ୍କ୍ ରେହେତ୍‍ତଣ୍ଡ୍, ବାତେଙ୍କ୍ଇତ୍‍କେ ଇଶ୍ୱର୍‌ତିଙ୍କ୍ ବେନ୍ ଗୌରବ୍ ହିଦାନ୍‍ମାତ୍‍ତେ ଅଣ୍ଡ୍‌ ଆଦ୍ ଇୱେମାତ୍‍ତଣ୍ଡ୍ । ପୁଡ଼୍‍ୟି ଡଲ୍‍ତେ ପୁଟୁଙ୍କ୍ ଅଣ୍ଡ୍‌ ଡଲ୍‍ତଣ୍ଡ୍ ।
ACT 12:24 ଇଦ୍ ସମୟ୍‍ତେ ଇଶ୍ୱର୍‌ତେ ବାକ୍ୟ ନାର୍ଗେ ଆସ୍ ଗାଟି ପ୍ରଚାର୍ ଆତ୍‍ତେ ।
ACT 12:25 ବର୍ଣ୍ଣବା ନୁ ଶାଉଲ୍‍ ଯିରୁଶାଲେମ୍‍ତାଗ୍ ସେବା ପାଡ଼୍‍ୟି ଶେଷ୍‍ମାଡ଼ି ଯୋହନ୍‌ ଇତ୍‍କେ ଓରଫ ମାର୍କଙ୍କ୍ ସାଙ୍ଗେ ଆସ୍ ଯିରୁଶାଲମ୍‍ତାଗାଙ୍କ୍ ମାଲ୍‍ତ୍‍ତଡ଼୍ ।
ACT 13:1 ଆନ୍ତିୟକିଆ ମଣ୍ଡଲିତାଗ୍ ବେସ୍‍କ୍‍ତୁଡ଼୍‍ ବାବବାଦୀ ନୁ ଶିକ୍ଷାଗୁରୁଡ଼୍ ମାତ୍‍ତଡ଼୍ । ଅଡ଼୍‌ ଲୋପେଙ୍କ୍ ବର୍ଣ୍ଣବା, ଶିମୋନ୍ ବେନଙ୍କ୍ ଗୁଡି ନାରୁଣ୍ଡ୍‍ ଇଞ୍ଜ କେତିତଡ଼୍‍, ଲୁସିଆତେ କୁରିନୀୟ ନାର୍‍ଦେନଣ୍ଡ୍, ମନହେମ୍ ଶାଉଲ୍‍ ରାଜ୍ୟପାଳ ହେରଦ୍‍ତେ ପରିବାର୍‍ତାଗ୍ ପେର୍‍ସ୍‍ତଣ୍ଡ୍ ।
ACT 13:2 ଅଡ଼୍‌ ପ୍ରବୁନାଦ୍ ସେବା ନୁ ଉପାସନା ମାଡ଼ାନ୍ ୱେଲେ, ପବିତ୍ର ଆତ୍ମା ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ନାନ୍ ବେନ୍ ପାଡ଼୍‍ୟି ସେଙ୍ଗେ ବର୍ଣ୍ଣବା ନୁ ଶାଉଲ୍‍ତିଙ୍କ୍ କାର୍‍ଙ୍ଗ୍‍ତାନ୍, ଆଦିନ୍ ମାଇଦିଙ୍କ୍ ଅଡ଼୍‌‍କିଂଙ୍କ୍ ନା ସେଙ୍ଗେ ୱେରେ ମାଡ଼ାଟ୍ ।”
ACT 13:3 ଆଗାଙ୍କ୍‍ ଅଡ଼୍‌‍ ଉପାସନା ନୁ ପ୍ରାର୍ତନା ମାଡ଼ି ଅଡ଼୍‌ ଇର୍‍ୱୁଡ଼୍‍କିଙ୍କ୍ ପର କାୟ୍‍ ୱାଟି ଅଡ଼୍‌‍କିଂଙ୍କ୍ ପ୍ରଚାର୍ ମାଡ଼ାନଙ୍କ୍ ରହତ୍‍ତଡ଼୍ ।
ACT 13:4 ଇଦ୍‍ ରକମ୍‍ ପବିତ୍ର ଆତ୍ମା ତଡ଼୍ ପ୍ରେରିତ ଆସ୍ ବର୍ଣ୍ଣବା ନୁ ଶାଉଲ୍ ସେଲ୍ୟୁକିଆତାଗ୍ ଆତ୍‍ତଡ଼୍ ନୁ ଆଗାକନ୍‍ସ୍ ସାଇପ୍ରସ୍ ଏର୍‍ଜାହାଜ୍‍ ତଡ଼୍ କୁପ୍ର ଗପ୍‍ତାଗ୍ ଆତ୍‍ତଡ଼୍ ।
ACT 13:5 ଅଡ଼୍‌‍ ସାଲାମି ସହର୍‍ତାଗ୍ ହେଉସ୍ ଇହୁଦୀ ଉପାସନା ଲକିନାଗ୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼୍‍ତଡ଼୍ । ଦାସ ଯୋହନ୍‌ ମାର୍କ ଅଡ଼୍‌ ତଡ଼୍ ମାଞ୍ଜ୍ ସାହାଯ୍ୟ ମାଡ଼୍‍ତଣ୍ଡ୍‍ ।
ACT 13:6 ଅଡ଼୍‌ ସାଇପ୍ରସ୍‍ ଗପ୍ ୱେଇସ୍‍ ପାଫୋସ୍‍ତାଗ୍ ଆଦ୍‍ତଡ଼୍ । ଆଗେ ଅଡ଼୍‌ ବାର ଜିସୁ ପେଦେର୍‍ତଣ୍ଡ୍ ୱେରଣ୍ଡ୍ ଇହୁଦୀ ୱାଡେଙ୍କ୍ କାଇଲ୍‍ତଡ଼୍ । ଅଣ୍ଡ୍‌ ନିଜେତିଙ୍କ୍ ବାବବାଦୀ ଇଞ୍ଜ କେସମାତ୍‍ତନ୍ ।
ACT 13:7 ଅଣ୍ଡ୍‌ ଆଦ୍ ଗପ୍‍ତେ ଶାସନ୍‍ କର୍ତ୍ତାଲ୍ ସର୍ଗିୟସ୍ ପାଉଲ୍‍ସନ୍‍ତେ ସାଙ୍ଗ ମାତ୍‍ତଣ୍ଡ୍ । ସର୍ଗିୟସ୍ ୱେରଣ୍ଡ୍ ବୁଦ୍ଦିମାନ୍ ନାରୁଡ଼୍ ମାତ୍‍ତଣ୍ଡ୍ । ଅଣ୍ଡ୍‌ ଇଶ୍ୱର୍‌ତେ ଗଟ୍ କେଞ୍ଜାନଙ୍କ୍ ବର୍ଣ୍ଣବା ନୁ ଶାଉଲ୍‍ତିଙ୍କ୍ କାର୍‍ଙ୍ଗ୍‍ତଣ୍ଡ୍ ।
ACT 13:8 ଇତ୍‍କେ ୱାଡେ ଏଲୀମାସ୍ ଇଦ୍ ଅନ୍‌‍ୱାଦ୍ ଗ୍ରୀକ୍ ପେଦେର୍ ଅଡ଼୍‌‍କିଂଙ୍କ୍ ବାଦା ଇତ୍‍ତେ, ବାତେଙ୍କ୍ଇତ୍‍କେ ଅଣ୍ଡ୍‌ ଶାସନ୍‍ କର୍ତ୍ତାଙ୍କ୍ କ୍ରିଷ୍ଟନାଗ୍‍ ବିଶ୍ୱାସ୍ ମାଡ଼ାନଙ୍କ୍ ହାଲ୍‍ସ୍‍ୱେ ମାତ୍‍ତଣ୍ଡ୍ ।
ACT 13:9 ଇତ୍‍କେ ଶାଉଲ୍‍ ବେନନ୍ ମେଣ୍ଡେଅନ୍‌ ପେଦେର୍ ପାଉଲ୍ ପବିତ୍ର ଆତ୍ମାତେ ବର୍ତ୍ତି ଆସ୍ ୱାଡ଼େନାକ୍ କପାମ୍‍ତେ ଉଡ଼୍‍ତଣ୍ଡ୍ ନୁ କେତ୍‍ତଣ୍ଡ୍,
ACT 13:10 “ହୋ ଶୟ୍‍ତାନ୍‍ତେ ମାର୍‍ ! ନିମ୍‍ ସାରେ ସାୟେତ୍ ବିଷୟ୍‍ତାଦ୍ ଶତ୍ରୁଡ଼୍ । ନିମ୍‍ ସାରେ ଲେକାତ୍ କାରାପ୍ ବିଦ୍ୟା ପୁତ୍‍ତି ନୁ ସାରେଦାମ୍ ପ୍ରବୁନ୍ ସତ୍‍ତିଙ୍କ୍ ମିଚ୍‍ ଇଞ୍ଜ ପ୍ରମାଣ୍ ମାଡ଼ାନଙ୍କ୍ ହାଲ୍‍ସୁତିନ୍ ।
ACT 13:11 ଇଞ୍ଜେ ନିମ୍‍ ପ୍ରବୁନ୍ କାୟ୍‍ଦେ ଦଣ୍ଡିତ୍ ଆଦ୍‍ତିନ୍‍ । ନିମ୍‍ କାନାଲ୍ ଆସ୍ ସୁଦୁଟ୍‍ ସମୟ୍‍ ଏୱୁନା ଦିନାମ୍‍ତେ ୱେସ୍ ଉଡ଼ାନଙ୍କ୍ ପାର୍‍ୱିନ୍ ।” ଆସୁଟେ ସାଙ୍ଗେ ସାଙ୍ଗେ ଏଲୀମାସ୍‍ତେ କଣ୍ଡା ଗାଟି ଗୁମାମ୍‍ତେ ମିଶାନ୍ ଲେକାମ୍ ଏର୍କା ମାଡ଼୍‍ତଣ୍ଡ୍ ନୁ ଅଣ୍ଡ୍‌ ତାନ୍ କାୟ୍ ପୟ୍‍ସ୍ ହାର୍ ତଅତାନ୍ ମାଇଦିଙ୍କ୍ ଅର୍‍ତୁଙ୍କ୍ ମେହେକ୍‍ତଣ୍ଡ୍ ।
ACT 13:12 ଇଦ୍ ଗଟ୍‍ନା ଉଡ଼ି ଶାସନ୍‍ କର୍ତ୍ତାଲ୍‍ ବିଶ୍ୱାସ୍ ମାଡ଼୍‍ତଣ୍ଡ୍‍, ବାତେଙ୍କ୍ଇତ୍‍କେ ଅଣ୍ଡ୍‌ ପ୍ରବୁନାଦ୍ ଶିକ୍ଷା କେଞ୍ଜି କାବା ଆସ୍‍ମାତ୍‍ତଣ୍ଡ୍ ।
ACT 13:13 ପାଉଲ୍ ନୁ ତାମ୍ ତଡ଼୍‍ଦେନଡ଼୍ ପାଫୋସ୍‍ ପେଦେର୍‍ତେ ଜାଗେତାଗାଙ୍କ୍ ଏର୍‍ଦାଗ୍ ଆଞ୍ଜ୍ ପଂଫୁଲିୟାତେ ପର୍ଗା ପେଦେର୍‍ତେ ଅଣ୍ଡୟ୍‌ ନାର୍‍ତାଗ୍ ହେୱୁତ୍‍ତଡ଼୍ । ଯୋହନ୍‌ ମାର୍କ ଅଡ଼୍‌‍କିଂଙ୍କ୍ ଇଗେ ୱିଡ଼୍‍ସି ଯିରୁଶାଲେମ୍‍ ମାଲ୍‍ସ୍ ଆତ୍‍ତଣ୍ଡ୍ ।
ACT 13:14 ଅଡ଼୍‌ ପର୍ଗାତାଗାଙ୍କ୍ ଆଞ୍ଜ୍ ପିସିଦିଆତେ ଅନ୍‌ଥିୟୋକ୍‍ତାଗ୍ ହେୱୁତ୍‍ତଡ଼୍ ନୁ ବିଶ୍ରାମ୍‍ଦିନେ ଦିନ୍ ଉପାସନା ଲତ୍‍ତାଗ୍ ଆଞ୍ଜ୍ କୁଦ୍‍ତଡ଼୍ ।
ACT 13:15 ମୋଶାନ୍‌‌ ନିୟମ୍‍ ନୁ ବାବବାଦୀଡ଼ାଦ୍ ଲେକ୍‍ତାଦ୍ କାର୍‍ତେ ପେର୍‍କେ, ଉପାସନା ଲୋତ୍‍ତେ କର୍ତ୍ତାଲଡ଼୍ ଅଡ଼୍‌‍କିଂଙ୍କ୍ ଇଦ୍ ଗଟ୍ କେସ୍ ରହତ୍‍ତଡ଼୍, “ଦାଦାଲଡ଼୍‍, ଯଦି ନାରୁଡ଼୍‍କିଂଙ୍କ୍ ସାର୍‍ଦେ ମାଡ଼୍‍ତେ ଲେକାମ୍ ମିୟାଦ୍ ବାତ୍ ଗଟ୍ ମିନ୍ଦେ, ଆଲେକେ କେଲାଟ୍ ।”
ACT 13:16 ପାଉଲ୍ ନିସ୍ ନାରୁଡ଼୍‍କିଂଙ୍କ୍ କଟମାନ୍ଦାନଙ୍କ୍ କାୟ୍‍ ଉହୁସ୍ କେତ୍‍ତଣ୍ଡ୍, “ଇଗେ ମାନ୍ଦାନଡ଼୍ ଇସ୍ରାଏଲୀୟ ଦାଦାଲଡ଼ି ନୁ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ମାନ୍ଦାନ୍ ଅଣଇହୁଦୀଡ଼୍, ନା ଗଟ୍ କେଞ୍ଜାଟ୍ !
ACT 13:17 ଇସ୍ରାଏଲ୍‍ ଜାତିତ୍ ଇଶ୍ୱର୍ ମାନ୍‍ ଆନିଦାଦିଡ଼୍‍କ୍ ଏଞ୍ଚିତଣ୍ଡ୍ ନୁ ମିସର୍‍ତାଗ୍ ଅଡ଼୍‌ ବେନ୍‍ ଦେଶ୍‍ ଲେକାମ୍ ବାସେମାଡ଼ାନ୍ ୱେଲେ ଅଣ୍ଡୟ୍‌ ବେଡ଼୍‍ୟାଦ୍‍ ଜାତି ମାଡ଼୍‍ତଣ୍ଡ୍ । ଇଶ୍ୱର୍ ତାନ୍ ଶକ୍ତିତଡ଼୍ ଅଡ଼୍‌‍କିଂଙ୍କ୍ ମିସର୍‍ତାଗାଙ୍କ୍ ପେସ୍‍ପିଇ ତାତ୍‍ତଣ୍ଡ୍,
ACT 13:18 ଚାଳିଶ୍ ହେଣ୍ଡ୍‍କ୍ ଯାକ ଉଚ୍‍କନେଲ୍‍ତାଗ୍ ଅଡ଼ାଦ୍‌ ଅତ୍ୟାଚାର୍ ସାରେ ସହ୍ୟ ମାଡ଼୍‍ତଣ୍ଡ୍ ।
ACT 13:19 ଅଣ୍ଡ୍‌ କିନାନ୍‍ତାଗ୍ ସାତ୍‍ଟାନ୍ ଗଷ୍ଟିତିଙ୍କ୍ ଦସଂ ମାଡ଼ି ତାନ୍ ହେଞ୍ଚ୍‍ତେ ଗଷ୍ଟିତିଙ୍କ୍ ଆଦ୍ ଦେଶ୍‍ ହିତ୍‍ତଣ୍ଡ୍ ।
ACT 13:20 ସାରେ ନାଲୁୱାନ୍ଦା ପାଚାଶ୍ ହେଣ୍ଡ୍‍କ୍ ଲୋପେ ଇୱୁସାରେ ଗଟନା ଗଟେମ୍ ଆତ୍‍ତେ । ଇଦିନ୍ ପେର୍‍କେ ଶାମୁୟେଲ୍‍ ବାବବାଦୀନ୍ ଦିନାମ୍ ଏୱୁନା ଇଶ୍ୱର୍ ଅଡ଼୍‌ ପର୍‍ର ବିଚାର୍ କର୍ତ୍ତାଲ୍ଡ଼୍‍କ୍ ହେଞ୍ଚ୍‍ତଣ୍ଡ୍ ।
ACT 13:21 ବେସୁଟ୍‌ ଅଡ଼୍‌ ୱେରଣ୍ଡ୍ ରାଜାଙ୍କ୍ ମେହେକ୍‍ତଡ଼୍, ଇଶ୍ୱର୍ ଅଡ଼୍‌ ପର୍‍ର ଚାଳିଶ୍ ହେଣ୍ଡ୍‍କ୍ ଯାକ ଶାସନ୍‍ ମାଡ଼ାନଙ୍କ୍ ବେଞ୍ଜାମିନ୍ ବଂଶତଣ୍ଡ୍ କୀଶତେ ମାର୍‍ ଶାଉଲ୍‍ତିଙ୍କ୍ ନିଯୁକ୍ତି ମାଡ଼୍‍ତଣ୍ଡ୍ ।
ACT 13:22 ତାନ୍‍ପେର୍କେ ଇଶ୍ୱର୍ ଅଂକିଙ୍କ୍‌ ପଦ ୱିଡ଼୍‍ସ୍ପି ଦାଉଦଙ୍କ୍ ତାମ୍‍ ରାଜାଲ୍ ମାଡ଼୍‍ତଣ୍ଡ୍ । ଇଶ୍ୱର୍ ଅନ୍‌ ବିଷୟ୍ ସାକ୍ଷ୍ୟ କେସ୍‍ମାତ୍‍ତଣ୍ଡ୍, ‘ନାନ୍ ବେସତ୍ ନାରୁଡ଼୍‍କିଂଙ୍କ୍ ବଲ୍‍ପାଏମ୍‍ ଆଦ୍‍ତାନ୍, ଯେଶୀତେ ମାର୍‍ ଦାଉଦ୍ ଆଦେପୁଟୁଙ୍କ୍ ୱେରଣ୍ଡ୍ ନାରୁଣ୍ଡ୍‍; ଅଣ୍ଡ୍‌ ନା ଇଚ୍ଛା ଲେକାମ୍ ପାଡ଼୍‍ୟି ମାଡ଼ିତନ୍ ।’
ACT 13:23 ଇଣ୍ଡ୍ ଦାଉଦ୍‍ତେ ବଂଶତଣ୍ଡ୍ ଜିସୁଙ୍କ୍ ଇଶ୍ୱର୍ ତାନ୍ ପ୍ରତିଜ୍ଞା ଲେକାମ୍ ଇସ୍ରାଏଲ୍‍ ଜାତିଡ଼୍ ତ୍ରାଣକର୍ତ୍ତାଲ୍ ମାଡ଼୍‍ତଣ୍ଡ୍ ।
ACT 13:24 ଜିସୁ ତାନ୍ ପାଡ଼୍‍ୟି ଆରାମ୍ ମାଡ଼ାନ୍ ମୁନେଙ୍କ୍ ଯୋହନ୍‌ ଇସ୍ରାଏଲ୍‍ତେ ସାରେ ନାରୁଡ଼୍‍ତେ ଗାର୍‍ରେ ପ୍ରଚାର୍ ମାଡ଼ି କେତ୍‍ତଣ୍ଡ୍, ଅଡ଼୍‌ ପାପ୍‍ତାଗାଙ୍କ୍ ଅନୁତାପ୍‍ ମାଡ଼ି ଏର୍‍ଦିକ୍ଷା ଆଦାନଙ୍କ୍ ୱେୟ୍‍ତିତ୍ ।
ACT 13:25 ମେଣ୍ଡେ ଯୋହନ୍‌ ଅନାଦ୍‌ ସେବା ପାଡ଼୍‍ୟି ତେର୍‍ସ୍ପାନ୍ ମୁନେଙ୍କ୍ ନାରୁଡ଼୍‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍, ‘ନା ବିଷୟ୍‍ତେ ମିଡ଼୍ ବାତ୍ ହାଲ୍‍ସୁତିଡ଼୍ ? ମିଡ଼୍ ବେନଙ୍କ୍ କେପ୍‍ତିଡ଼୍, ନାନ୍ ଅଣ୍ଡ୍‌ ଆୟନ୍ । ବାତେଙ୍କ୍ଇତ୍‍କେ କେଞ୍ଜାଟ୍ ! ନା ପେର୍‍କେ ବେନ ୱାଦୁତଣ୍ଡ୍, ନାନ୍ ଅନାଦ୍‌ ଡେକେତ୍ ହେର୍‍ପୁକ୍ ଲେଏତାନଙ୍କ୍ ମିକା ଯୋଗ୍ୟ ଆୟନ୍ ।’”
ACT 13:26 “ଅବ୍ରାହାମ୍ ବଂଶତଡ଼୍ ହୋ ଇଶ୍ରାଏଲୀୟ ଦାଦାଲଡ଼୍‍ ନୁ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାନଡ଼ି ଅଣଇହୁଦୀ ନାରୁଡ଼ି, ମାକିଂକେ ଇଦ୍ ମୁକ୍ତିତେ କାବୁର୍ ଇସ୍‌ ମିନ୍ଦେଡ଼୍ ।
ACT 13:27 ଇତ୍‍କେ ଅଣ୍ଡ୍‌ ଯେ ବିଚାର୍ କର୍ତ୍ତାଲ୍, ଯିରୁଶାଲେମ୍‍ ଆଦିବାସୀ ନୁ ଅଡ଼୍‌ ନେତାଲଡ଼୍ ଆଦ୍ ପୁନ୍‍ୱେ ମାତ୍‍ତଡ଼୍ । ଅଡ଼୍‌ ସାରେ ବିଶ୍ରାମ୍‍ବାର୍‍ଦାଗ୍ କାର୍‍ତାନ୍ ବାବବାଦୀଡ଼ାଦ୍ ଗଟ୍‍ତେ ଅର୍ତ ବୁଜେମ୍ ଆୟ୍‍ୱେ ମାତ୍‍ତଡ଼୍ । ଇତ୍‍କେ ଜିସୁଙ୍କ୍ ଦଷି ମାଡ଼ି ଅଡ଼୍‌ ବାବବାଦିଡ଼ାଦ୍ ଗଟ୍‍ତିଙ୍କ୍ ସଫଳ୍ ମାଡ଼୍‍ତଡ଼୍ ।
ACT 13:28 ଡଲାନ୍‌ଦଣ୍ଡ୍‍ତାଦ୍ ବାଆତେ କାରନ୍‍ ଦର୍‍କ୍‍ୱେ ମାତ୍‍କେ ଗାଲା ଅଂକିଙ୍କ୍‌ ଡଲାନ୍‍ଦଣ୍ଡ୍ ହିଦାନ୍ ସେଙ୍ଗେ ପିଲାତଙ୍କ୍ କେତ୍‍ତଡ଼୍ ।
ACT 13:29 ଅନ୍‌ ବିଷୟ୍‍ତେ ଦର୍ମଶାସ୍ତ୍ରତାଗ୍ ବେନ୍‍ସାରେ ବିଷୟ୍ ଲେକାମିନ୍ଦେ, ଆଦ୍ ଲେକାମ୍ ସାରେ ପାଡ଼୍‍ୟି ମାଡ଼୍‍ତେ ପେର୍‍କେ ଅଡ଼୍‌ ଅଂକିଙ୍କ୍‌ କ୍ରୁଶତାଗାଙ୍କ୍ ଡିପିତାସ୍ ଅଣ୍ଡୟ୍‌ ସମାଦିତାଗ୍ ୱାଟ୍‍ତଡ଼୍ ।
ACT 13:30 ଇତ୍‍କେ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ତେଏତଣ୍ଡ୍,
ACT 13:31 ନାର୍‍ଗେ ଦିନା ଯାକ ଅନ୍‌‍ତଡ଼୍ ଗାଲିଲୀତାଗାଙ୍କ୍ ଯିରୁଶାଲେମ୍‍ ଆଦାୱାଦା ମାଡ଼ମାନ୍ଦାନ୍ ନାରୁଡ଼୍‍କିଂଙ୍କ୍ ଅଣ୍ଡ୍‌ ତଅନ୍‌ଦ୍‍ତଣ୍ଡ୍ । ଇଞ୍ଜେ ଅଡ଼୍‌ ଇଶ୍ରାଏଲ୍‍ ନାରୁଡ଼୍ ଗାର୍‍ରେ ସାକ୍ଷି ଆଦ୍‍ତଡ଼୍ ।
ACT 13:32 ମାମ୍‍ମେ ଇଗେ ମିକିଂଙ୍କ୍ ଇଦ୍ ସୁସମାଚାର୍‍ କେତାଙ୍କ୍ ୱାତ୍‍ତମ୍ । ଇଶ୍ୱର୍ ମାନ୍‍ ଆନିଦାଦୀଡ଼୍‍କ୍ ବେନ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଅଣ୍ଡ୍‌ ଆଦ୍ ମାଡ଼୍‍ତଣ୍ଡ୍ ।
ACT 13:33 ଅଡ଼ାଦ୍‌ ବଂଶ ମାନ୍‍ ସେଙ୍ଗେ ଜିସୁଙ୍କ୍ ପୁନର୍ଜିବିତ୍‍ ମାଡ଼ାନ୍ ତଡ଼୍ ଅଣ୍ଡ୍‌ ଆଦ୍ ସାରେ ମାଡ଼୍‍ତଣ୍ଡ୍ । ଗୀତସଂହିତାତେ ଦ୍ୱିତିୟ ଗୀତତାଗ୍ ଇଦ୍ ଗଟ୍‍ତିଙ୍କ୍ ଉଡ଼ି ଲେକାମିନ୍ଦେ; ‘ନିମ୍‍ ନା ମାର୍‍, ନେଣ୍ଡ୍ ନାନ୍ ନି ବାବାଲ୍ ଆତ୍‍ତାନ୍,’
ACT 13:34 ଅଂକିଙ୍କ୍‌ ସମାଦିତାଗ୍ କାଡ଼୍‍ୟାନଙ୍କ୍ ୱିଡ଼୍‍ସଣ୍ଡ୍, ଡଲ୍‍ତାଗାଙ୍କ୍ ତେଏତାନ୍ ସେଙ୍ଗେ ଇଶ୍ୱର୍ ଇଦ୍ ଗଟ୍ କେସ୍‍ମାତ୍‍ତଣ୍ଡ୍; ‘ଦାଉଦଙ୍କ୍ ଇସ୍‌‍ମାନ୍ଦାନ୍ ପ୍ରତିଜ୍ଞା ଲେକେମ୍‍ ନାନ୍ ବିଶ୍ୱାସୀଡ଼୍‍କିଙ୍କ୍ ପବିତ୍ର ଆତ୍ମା ନୁ ନିଜାମ୍ ଆର୍ଶିବାଦ୍ ମାଡ଼ିତାନ୍ ।’
ACT 13:35 ଶାସ୍ତ୍ରତାଗ୍ ମେଣ୍ଡେଅନ୍‌ ପଡ଼୍‍ୟିତାଗ୍ ଲେକାମିନ୍ଦେ, ‘ନିମ୍‍ ନି ବିଶ୍ୱସ୍ତ ସେବକ୍‍ତିଙ୍କ୍ ସମାଦିତାଗ୍ କାଡ଼୍‍ୟି ଆଦାନଙ୍କ୍ ୱିଡ଼୍‍ସ୍‍ମା ।’
ACT 13:36 ଦାଉଦ୍ ତାନ୍ ଶାସନ୍‍ ମାଡ଼ାନ୍ ୱେଲେ ଇଶ୍ୱର୍‌ତେ ଉଦେଶ୍ୟ ପୁରା ମାଡ଼୍‍ତେ ପେର୍‍କେ ଡଲ୍‍ତଣ୍ଡ୍ ନୁ ଆନିଦାଦିଡ଼୍ ତଡ଼୍ ସମାଦି ପାଏମ୍ ଆତ୍‍ତଣ୍ଡ୍ । ଅନ୍‌ ମେନ୍ଦୁଲ୍ ସମାଦିତାଗ୍ କାଡ଼୍‍ୟି ଆତ୍‍ତେ ।
ACT 13:37 ଇତ୍‍କେ ଇଶ୍ୱର୍ ବେନଙ୍କ୍ ଡଲ୍‍ତାଗାଙ୍କ୍ ତେଏତଣ୍ଡ୍, ଅଣ୍ଡ୍‌ ନଷ୍ଟ ଆୟ୍‍ୟଣ୍ଡ୍ ।
ACT 13:38 ମୋଶାଲ୍‌ ହୋ ଦାଦାଲଡ଼୍‍ କେଞ୍ଜାଟ୍‍, ମାତର୍‍ ପ୍ରବୁ ଜିସୁନ୍ ତଡ଼୍ ମି ବକେତ୍‍ ପାପ୍‍ କ୍ଷମା ଗଟ୍‍ ପ୍ରଚାର୍‍ ଆତ୍‍ତେ ।
ACT 13:39 ମୋଶାନ୍‌‌ ନିୟମ୍‍ତଡ଼୍ ପାପ୍‍ କ୍ଷମା ପାଏମ୍ ଆୟ୍‍ୱେନଡ଼୍ ସାରେତଡ଼୍ ଆ ଜିସୁଙ୍କ୍ ବିଶ୍ୱାସ୍ ମାଡ଼୍‍କେନେ ପରିତ୍ରାଣ୍ ଦର୍‍କିତ୍, ଇଦ୍ ମିଡ଼୍‍ ବୁଜେମ୍ ଆଦାନ୍ ଦର୍‍କାର୍ ।
ACT 13:40 ଆଦିଙ୍କ୍ ସାବ୍‍ଦାନ୍ ଆସ୍ ମାନୁଟ୍, ବାତେଙ୍କ୍ଇତ୍‍କେ ବାବବାଦୀଡ଼ାଦ୍ ଶାସ୍ତ୍ରତାଗ୍ ବାତ୍ କେତ୍‍ତଡ଼୍, ଆଦ୍ ମିଇ ପର୍‍ର ବେଲା ୱାଡ଼୍‍ମାକି,
ACT 13:41 ‘ହୋ ବଲୁଡ଼୍‍ ନାରୁଡ଼ି ! ମିଡ଼୍ କଲ୍‍ବଲ୍‍ ଆସ୍ ଡଲାଟ୍, ବାତେଙ୍କ୍ଇତ୍‍କେ ନାନ୍ ନେଣ୍ଡ୍ ବେନ୍ ପାଡ଼୍‍ୟି ମାଡ଼ୁତାନ୍, ବେନ ମିକିଂଙ୍କ୍ ବୁଜାମାଡ଼ି କେତ୍‍କେ ମିକା ମିଡ଼୍ ବିଶ୍ୱାସୀ ଆୟ୍‍ୱିଡ଼୍ ।’”
ACT 13:42 ପାଉଲ୍‍ ନୁ ବର୍ଣ୍ଣବା ଉପାସନା ଲତ୍‍ତାଗାଙ୍କ୍ ପେଇସ୍‍ ୱାତ୍‍ତେ ୱେଲେ, ମେଣ୍ଡେଅନ୍‌ ବିଶ୍ରାମ୍‍ଦିନ୍ ଦିନ୍ ମାଲ୍‍ସ୍ ୱାସ୍ ଇୱୁ ସାରେ ଶିକ୍ଷା ବିଷୟ୍ ମେଣ୍ଡେ ଅଦିକ୍‌ ବୁଜାମାଡ଼ାନଙ୍କ୍ ଅଡ଼୍‌‍କିଂଙ୍କ୍ ଅନୁରଦ୍‌‍ ମାଡ଼୍‍ତଣ୍ଡ୍ ।
ACT 13:43 ନାରୁଡ଼୍ ଉପାସନା ଲନ୍‍ ମିଟିଙ୍ଗ୍‍ ୱିଡ଼୍‍ସି ଆତ୍‍ତେ ପେର୍‍କେ ନାର୍‍ଗେ ଇହୁଦୀ ନୁ ଅବିଶ୍ୱାସୀଡ଼୍ ଶାଉଲ୍‍ ନୁ ବର୍ଣ୍ଣବାନ୍‍ ପେର୍କେପେର୍କେ ଆତ୍‍ତଡ଼୍, ପ୍ରେରିତ୍‍ଶିଷ୍ୟଡ଼୍ ଅଡ଼୍‌‍ତଡ଼୍ ତିର୍‍ୟି ଇଶ୍ୱର୍‌ତେ ଅନୁଗ୍ରହତଡ଼୍ ବାଦ୍‍କାନଙ୍କ୍ ଅଡ଼୍‌‍କିଂଙ୍କ୍ ୱେଡ଼୍‌କେ ମାଡ଼୍‍ତଡ଼୍ ।
ACT 13:44 ମେଣ୍ଡେଅନ୍‌ ବିଶ୍ରାମ୍‍ଦିନ୍ ଦିନ୍ ଟାୱୁନ୍‍ତେ ସାରେତଡ଼୍ ପ୍ରବୁନାଦ୍ ଗଟ୍ କେଞ୍ଜାନ୍ ମାଇଦିଙ୍କ୍ ୱାତ୍‍ତଡ଼୍ ।
ACT 13:45 ନାରୁଡ଼୍ ଗହଲିତିଙ୍କ୍ ଉଡ଼ି ଇହୁଦୀଡ଼୍ ଇର୍ଷା ମାଡ଼୍‍ତଡ଼୍ ନୁ ପାଉଲ୍‍ତେ ଗଟ୍‍ତିଙ୍କ୍ ଅତ୍ୟାଚାର୍ ମାଡ଼ି ଅଡ଼୍‌‍କିଂଙ୍କ୍ ଅପମାନିତ ମାଡ଼୍‍ତଡ଼୍ ।
ACT 13:46 ଇତ୍‍କେ ପାଉଲ୍‍ ନୁ ବର୍ଣ୍ଣବା ସାହାସ୍ ତଡ଼୍ କେତ୍‍ତଡ଼୍, ମିଇ ବକେତ୍ ମୁନେନ୍ ଇଶ୍ୱର୍‌ତେ ଗଟ୍ ପ୍ରଚାର୍ ଆଦାନ୍ ମାତ୍‍ତେ । ବାତେଙ୍କ୍ଇତ୍‍କେ ମିଡ଼୍ ଅନନ୍ତ ଜିୱୁଣ୍ଡ୍ ପାଏମ୍ ଆଦାନଙ୍କ୍ ନିଜେତିଙ୍କ୍ ଅଯୋଗ୍ୟ ବିଚାର୍‍ ଇଦିଙ୍କ୍ ମନା ମାଡ଼୍‍ତାଙ୍କ୍, ମାମ୍‍ମେ ମିକିଂଙ୍କ୍ ୱିଡ଼୍‍ସି ଅଣଇହୁଦୀଡ଼୍ ବକେତ୍ ଆଦ୍‍ତାଡ଼୍ ।
ACT 13:47 ବାତେଙ୍କ୍ଇତ୍‍କେ ପ୍ରବୁ ମାକିଂଙ୍କ୍ ଇଦ୍ ଗଟ୍ ହିତ୍‍ତଣ୍ଡ୍; “ନାନ୍ ମିକିଂଙ୍କ୍ ଅଣଇହୁଦୀଡ଼୍ ସେଙ୍ଗେ ୱେସ୍ ଲେକେମ୍ ମାଡ଼୍‍ତାନ୍, ବେଲାକି ପୁରା ପୃତିବିତାଗ୍ ପରିତ୍ରାଣ୍ ପାଏମ୍ ଆଦ୍‍ତଡ଼୍ ।”
ACT 13:48 ଅଣଇହୁଦୀଡ଼୍ ଇଦ୍ କେଞ୍ଜି ୱେଡ଼୍‍କେ ଆତ୍‍ତଡ଼୍ ନୁ ପ୍ରବୁନ୍ ବାକ୍ୟ ସେଙ୍ଗେ ଦନ୍ୟବାଦ୍ ହିତ୍‍ତଡ଼୍ । ବେନଡ଼୍ ଅନନ୍ତ ଜିୱୁଣ୍ଡ୍ ମାଇଦିଙ୍କ୍ ହେଞ୍ଚିମାତ୍‍ତଡ଼୍, ଅଡ଼୍‌ ଆଦ୍ ଗଟ୍‍ତାଗ୍ ବିଶ୍ୱାସ୍ ମାଡ଼୍‍ତଡ଼୍ ।
ACT 13:49 ଆଦ୍ ପଡ଼୍‍ୟିତାଗ୍ ସାରେତାଗ୍ ପ୍ରବୁନ୍ ଗଟ୍ ଏକାମ୍‍ ଆତ୍‍ତେ ।
ACT 13:50 ଇତ୍‍କେ ଇହୁଦୀଡ଼୍ ନଗର୍‍ତେ ଉପାସନା ମାଡ଼ାନ୍‍ ନେତାଲଡ଼୍‍କ୍ ନୁ ନାଟାକିଂଙ୍କ୍‍ ପୁସ୍‍କାମାଡ଼ି ପାଉଲ୍ ନୁ ବର୍ଣ୍ଣବାନ୍ ପର୍‍ର ତାଡ଼ନା ମାଡ଼୍‍ତଡ଼୍ ନୁ ଆଦ୍ ପଡ଼ିୟେତାଗାଙ୍କ୍ ଅଡ଼୍‌‍କିଂଙ୍କ୍ ପେସ୍‍ସ୍ପିତ୍‍ତଡ଼୍ ।
ACT 13:51 ଆଗାଙ୍କ୍‍ ପ୍ରେରିତ ଶିଷ୍ୟଡ଼୍ ଆ ନାରୁଡ଼୍‍କ୍ ବିରୁଦ୍ ମାଡ଼ି ତାମ୍ ଡେକେତ୍ ଦୁମ୍ କାୟ୍‍ସ୍ ଇକନିୟାତାଗ୍ ଆଦ୍‍ତଡ଼୍ ।
ACT 13:52 ଅନ୍‌ଥିୟୋକ୍‌ତେ ବିଶ୍ୱାସୀ ଶିଷ୍ୟ ପବିତ୍ର ଆତ୍ମାତଡ଼୍ ପୁରାହାସ୍ ୱେଡ଼୍‍କେ ଆଦ୍‍ତଡ଼୍ ।
ACT 14:1 ଇକନିୟାତାଗ୍ ଆଦ୍ ଗଟନା ମେଣ୍ଡେଅଣ୍ଡ୍‌‍ଦାମ୍ କେତ୍‍ତଡ଼୍; ପାଉଲ୍ ନୁ ବର୍ଣ୍ଣବା ପ୍ରାର୍ତନା ଲତ୍‍ତାଗ୍ ଆଞ୍ଜ୍ ଇଦ୍‍ରକମ୍ ପ୍ରଚାର୍ ମାଡ଼୍‍ତଡ଼୍ ଯେ ନାର୍‍ଗେ ଇହୁଦୀ ନୁ ଗ୍ରୀକ୍‍ ଅଣଇହୁଦୀଡ଼୍ କ୍ରିଷ୍ଟଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।
ACT 14:2 ଇତ୍‍କେ ବେନ୍‍ ଇହୁଦୀ ଅବିଶ୍ୱାସୀଡ଼୍ ଦାଦାଲଡ଼୍‍ ନୁ ଅଣଇହୁଦୀଡ଼୍‍କ୍ କାରାପ୍ ଗଟ୍ କେସ୍ ଅଡ଼୍‌‍କିଂଙ୍କ୍ ବିଶ୍ୱାସୀଡ଼୍‍ ବିରୁଦ୍‍ତେ କେତ୍‍ତଡ଼୍ ।
ACT 14:3 ମିକା ପ୍ରେରିତ ଶିଷ୍ୟଡ଼୍ ପ୍ରବୁନ୍ ବିଷୟ୍ ସାହାସ୍‍ତଡ଼୍ ପ୍ରଚାର୍ ମାଡ଼ି ନାର୍‍ଗେ ଦିନା ଆଗେ ମାତ୍‍ତଡ଼୍ । ଆଦ୍‍ବୁତ୍‌ ପାଡ଼୍‍ୟି ନୁ ଆଶର୍ଯ୍ୟ ପାଡ଼୍‍ୟି ମାଡ଼ାନ୍ ତଡ଼୍ ପାଉଲ୍‍ ନୁ ବର୍ଣ୍ଣବା ପ୍ରମାଣ୍ ମାଡ଼୍‍ତଡ଼୍ ଯେ, ଇଶ୍ୱର୍‌ତେ ଅନୁଗ୍ରହ ବିଷୟ୍‍ତେ ପ୍ରଚାର୍ ମାଡ଼୍‍ତେ ଗଟ୍ ନିଜାମ୍ ।
ACT 14:4 ନଗର୍‍ତେ ନାରୁଡ଼୍ ରେଣ୍ଡ୍ ମାନ୍ଦେ ଆତ୍‍ତଡ଼୍ । ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଇହୁଦୀ ନାରୁଡ଼୍‍କ୍ ନୁ ମେଣ୍ଡେ ବେସ୍‍କ୍‍ତୁଡ଼୍‍ ପ୍ରେରିତ ଶିଷ୍ୟଡ଼୍‍କ୍ ସପଟ୍ ମାଡ଼୍‍ତଡ଼୍ ।
ACT 14:5 ତାନ୍‍ପେର୍କେ ବେସ୍‍କ୍‍ତୁଡ଼୍‍ ଅଣଇହୁଦୀ ନୁ ଇହୁଦୀ ନାରୁଡ଼୍ ତାମ୍ ନେତାଲଡ଼୍ ତଡ଼୍ କାଇଲି ପ୍ରେରିତ ଶିଷ୍ୟଡ଼୍‍କିଂଙ୍କ୍ କାରାପ୍ ବ୍ୟବହାର୍ ମାଡ଼ାନ୍ ସେଙ୍ଗେ ନୁ ଅଡ଼୍‌‍କିଂଙ୍କ୍ କାଲ୍‍କିନ୍ ତଡ଼୍ ରେହେସ୍ ଆୱ୍‍କାଂଙ୍କ୍ ଟିକ୍‍ ମାଡ଼୍‍ତଡ଼୍ ।
ACT 14:6 ପ୍ରେରିତ ଶିଷ୍ୟଡ଼୍ ଇଦ୍ ବିଷୟ୍ ପୁଞ୍ଜ୍ ଲୁକାନିଆତେ ଲୁସ୍ତ୍ରା ନୁ ଦର୍ବୀ ନାର୍ ନୁ ତାମ୍‌ ସାରେପାକ୍ ମାନ୍ଦାନ୍ ପଡ଼ିୟେତାଗ୍ ଆତ୍‌ତଡ଼୍,
ACT 14:7 ଆଗେ ଅଡ଼୍‌ ସୁସମାଚାର୍‍ ପ୍ରଚାର୍ ମାଡ଼୍‍ତଡ଼୍ ।
ACT 14:8 ଲୁସ୍ତ୍ରାତାଗ୍ ୱେରଣ୍ଡ୍ ଜନମ୍‍ତାଗାଙ୍କ୍ କୁଟାଲ୍ ମାତ୍‍ତଣ୍ଡ୍ । ଅଣ୍ଡ୍‌ ବିଲ୍‍କୁଲ୍ ତାକାଙ୍କ୍ ପାର୍‍ୱେମାତ୍‍ତଣ୍ଡ୍ ।
ACT 14:9 ଆଗେ କୁଦି ଅଣ୍ଡ୍‌ ପାଉଲ୍‍ତେ ଶିକ୍ଷା କେଞ୍ଜମାତ୍‍ତଣ୍ଡ୍ । ଅନ୍‌ ମନ୍‍ତାଗ୍ ବିଶ୍ୱାସ୍ ୱାତ୍‍ତେ ନୁ ଅଣ୍ଡ୍‌ ସୁସ୍ଥ ଆଦ୍‍ତନ୍ ଇଞ୍ଜ ପାଉଲ୍ ପୁତ୍‍ତଣ୍ଡ୍ । ଆଦିଙ୍କ୍ ଅନାକ୍ ଅଣ୍ଡୟ୍‌ କଣ୍ଡେତେ ଉଡ଼୍‍ତଣ୍ଡ୍ ।
ACT 14:10 ପାଉଲ୍ ଗାଟି ଲେଙ୍ଗ୍‍ତଡ଼୍ କେତ୍‍ତଣ୍ଡ୍, “ଡେକେତିଙ୍କ୍ ଗାଡ଼୍‍ସ୍ ମାଡ଼ି ତିନାଙ୍କ୍ ନିଲ୍‍ମ୍ !” ଆଗାଙ୍କ୍‍ ଆ ନାରୁଣ୍ଡ୍‍ ତୁଲିମିକା ସାରେପାକ୍ ତାକାନଙ୍କ୍ ପସ୍‍ସ୍ପତଣ୍ଡ୍ ।
ACT 14:11 ଲୁକାନିଆ ତାଗ୍ ମାନ୍ଦାନ୍ ନାରୁଡ଼୍ ପାଉଲ୍‍ତାଦ୍ ଇଦ୍ ପାଡ଼୍‍ୟି ଉଡ଼ି କିଡ଼୍‍କି କିଡ଼୍‍କି କେତାନଙ୍କ୍ ପସ୍‍ସ୍ପତଡ଼୍, “ଦେୟାକ୍‍ ନାରୁଡ଼୍ ରକମ୍ ଆସ୍ ମାୟାଗ୍‌ ୱାତ୍‍ତା ।”
ACT 14:12 ଅଡ଼୍‌ ବର୍ଣ୍ଣବାଙ୍କ୍ ଜିଆସ୍ ବା ବାଡ଼୍‍ୟେ ଦେୟାମ୍‍ ବା ବୃହସ୍ପତି ନୁ ପାଉଲ୍‍ ବେଡ଼ିୟି ବକ୍ତାଲ୍ ମାନ୍ଦାନ୍ ମାଇଦିଙ୍କ୍ ଅଂକିଙ୍କ୍‌ ହେରମିସ୍ ବା ଗାଟି ତିର୍‍ୟାନଣ୍ଡ୍‍ ଦେୟାମ୍‍ ବା ବୁଦ୍‌ ଇଞ୍ଜ କେତ୍‍ତଡ଼୍ ।
ACT 14:13 ଟାୱୁନ୍‍ତେ ବାୟିଦେ ମାନ୍ଦାନ୍ ଜିଆସ୍ ମନ୍ଦିର୍‍ତେ ଜାଜକୀଡ଼୍‍, ମାର୍ ବକେତ୍ ବେସ୍‌କ୍ କନ୍ଦା ନୁ ପୁଙ୍ଗାର୍ ତାତ୍‍ତଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ନୁ ଆଗେ ମାନ୍ଦାନ୍ ଗୁଡ଼ିମାନ୍ଦାନ୍ ନାରୁଡ଼୍ ପ୍ରେରିତ ଶିଷ୍ୟଡ଼୍ ଉଦ୍ଦେଶ୍ୟତେ ପୂଜାନ୍‌ ସେଙ୍ଗେ ଇଚ୍ଛା ମାଡ଼ମାତ୍‍ତଡ଼୍ ।
ACT 14:14 ଅଡ଼୍‌ ପ୍ରେରିତ ଶିଷ୍ୟଡ଼୍ ପାଡ଼୍‍ୟି ମାଡ଼ାନଙ୍କ୍ ଆଞ୍ଜ ମାତ୍‍ତଡ଼୍, ବର୍ଣ୍ଣବା ନୁ ପାଉଲ୍ ଆଦ୍ କେଞ୍ଜ୍‍ତେ ସାଙ୍ଗେ ସାଙ୍ଗେ ନିଜେତ୍ ଚକା କୁସ୍ପ୍‍ତଡ଼୍, ନାରୁଡ଼୍ ଲପେ ମିରିଆଞ୍ଜ୍ କିଡ଼୍‍କି ମିକା କେତ୍‍ତଡ଼୍,
ACT 14:15 “ମିଡ଼୍ ବାତେଙ୍କ୍ ଇଦ୍ ମାଡ଼ୁତିଡ଼୍ ? ମାମ୍‍ମେ ମିଇ ଲେକାମ୍ ନାରୁମ୍ । ମିଇ ବକେତ୍ ସୁସମାଚାର୍‍ ପ୍ରଚାର୍ ମାଡ଼ାନଙ୍କ୍ ନୁ ଇୱୁ ଦର୍‍କାର୍ ହିଲ୍‍ୱାଦ୍ ବିଷୟ୍‍ତିଙ୍କ୍ ୱିଡ଼୍‍ସି, ସ୍ୱର୍ଗ, ପୃତିବି ନୁ ତାନ୍ ଲୋପେ ମାନ୍ଦାନ୍ ସାରେ ଜିନିଷ୍‍ତିଙ୍କ୍ ସୃଷ୍ଟିମାଡ଼୍‍ତେ ଜିୱେତଣ୍ଡ୍ ଇଶ୍ୱର୍‌ତେ ପାକେ ମିକିଂଙ୍କ୍ ଆଦାନ୍ ସେଙ୍ଗେ ମାମ୍‍ମେ ଇଗେ ୱାତ୍‍ତମ୍ ।
ACT 14:16 ମୁନେନ୍ ନିଜର୍‍ ଇଚ୍ଛାତେ ନିଜର୍‍ ହାର୍‍ଦାଗ୍ ଆଦାନ୍ ମାଇଦିଙ୍କ୍ ଇଶ୍ୱର୍ ନାରୁଡ଼୍‍କିଂଙ୍କ୍ ଦେଶ୍‍ ତାଗ୍‍ ୱିଡ଼୍‍ସି ମାତ୍‍ତଣ୍ଡ୍ ।
ACT 14:17 ଇତ୍‍କେ ଅନାଦ୍‌ ସାରେ ସତ୍‍କାମ୍‍ ତଡ଼୍ ଅଣ୍ଡ୍‌ ସାରେଦାମ୍ ତାନ୍ ବିଷୟ୍‍ତେ ନିୟମ୍ ହିତ୍‍ତଣ୍ଡ୍; ଅଣ୍ଡ୍‌ ସ୍ୱର୍ଗତାଗାଙ୍କ୍ ୱାର୍‍ସାମ୍ ନୁ ଟିକ୍ ସମୟ୍‍ତେ ଫସଲ୍ ହିଦ୍‍ତଣ୍ଡ୍, କାଦି ଯୋଗାମାଡ଼ିତଣ୍ଡ୍ ନୁ ୱେଡ଼୍‍କେତେ ମିୟାଦ୍ ହୃଦୟ୍ ପୁରା ମାଡ଼ିତନ୍ ।”
ACT 14:18 ଇୱୁସାରେ ଗଟି କେସ୍ ପ୍ରେରିତ ଶିଷ୍ୟଡ଼୍ ଗାଟି ତିପାଲ୍‍ତେ ବେଲାମେଣ୍ଡେ ବଲି ଇଦାନାଦ୍ ବନ୍ଦ୍ ମାଡ଼୍‍ତଡ଼୍ ।
ACT 14:19 ପିସିଦିଆତେ ଅନ୍‌ଥିୟୋକ୍‍ ନୁ ଇକନିୟାତାଗାଙ୍କ୍ ବେସ୍‍କ୍‍ତୁଡ଼୍‍ ଇହୁଦୀ ୱାସ୍‍ମାତ୍‍ତଡ଼୍, ଅଡ଼୍‌ ନାରୁଡ଼୍‍କିଂଙ୍କ୍ ଉସ୍କା ମାଡ଼ି ପାଉଲ୍‍ତିଙ୍କ୍ କାଲ୍‍କିନ୍ ତଡ଼୍ ରେହେତ୍‍ତଡ଼୍ ନୁ ଅଂକିଙ୍କ୍‌ ଡଲ୍‍ତଣ୍ଡ୍ ଇଞ୍ଜ ହାଲ୍‍ସି ଟାୱୁନ୍‍ତେ ବାୟିଦେ ଇଡ଼୍‍ସି ଆତ୍‍ତଡ଼୍ ।
ACT 14:20 ଇତ୍‍କେ ଶିଷ୍ୟଡ଼୍ ୱାସ୍ ତାନ୍ ତିଡ଼୍‍ୟିପାକ୍ ଗେରାମାଡ଼ି ନିତ୍‍ତେ ପେର୍‍କେ ଅଣ୍ଡ୍‌ ତେଦି ଟାୱୁନ୍‍ତାଗ୍ ମାଲ୍‍ସ୍ ଆତ୍‍ତଣ୍ଡ୍ । ମେଣ୍ଡେଅନ୍‌ ଦିନ୍ ଅଣ୍ଡ୍‌ ନୁ ବର୍ଣ୍ଣବା ଦର୍ବୀତାଗ୍ ଆତ୍‍ତଡ଼୍ ।
ACT 14:21 ପାଉଲ୍ ନୁ ବର୍ଣ୍ଣବା ଦର୍ବୀତାଗ୍ ସୁସମାଚାର୍‍ ପ୍ରଚାର୍ ମାଡ଼ି ନାର୍‍ଗେ ଶିଷ୍ୟଡ଼୍‍କ୍ ଦର୍‍ସ୍କ୍‍ତଡ଼୍ । ତାନ୍‍ପେର୍କେ ଅଡ଼୍‌ ଲୁସ୍ତ୍ରା, ଇକନିୟା ନୁ ପିସିଦିଆତେ ଅନ୍‌ଥିୟୋକ୍‍ତାଗ୍ ମାଲ୍‍ସ୍‍ଆତ୍‍ତଡ଼୍ ।
ACT 14:22 ଅଡ଼୍‌ ବିଶ୍ୱାସୀଡ଼୍‍କ୍ ଶିଷ୍ୟ ନିଜେତ୍ ବିଶ୍ୱାସ୍‍ତାଗ୍ ଲେକେତ୍‌ ମାନ୍ଦାନଙ୍କ୍ ଅନୁରଦ୍‌‍ ମାଡ଼୍‍ତଡ଼୍ । ଅଡ଼୍‌ ଶିକ୍ଷା ଇସ୍‌ କେତ୍‍ତଡ଼୍, “ଇଶ୍ୱର୍‌ତେ ରାଜ୍ୟତାଗ୍ ହସାନ୍ ମାଇଦିଙ୍କ୍ ମାକିଂଙ୍କ୍ ଗାଟି ଦୁଃକକଷ୍ଟ ଇସ୍‌ ଆଦାଙ୍କ୍ ୱେୟ୍‍ତିତ୍ ।”
ACT 14:23 ସାରେ ମଣ୍ଡଲିନାଗ୍ ଅଡ଼୍‌ ଦାୟିତ୍ୱ ଇସ୍‌ ମଣ୍ଡଲିତେ ବୟସ୍କା ନାରୁଡ଼୍‍କିଂଙ୍କ୍ ନିଯୁକ୍ତି ମାଡ଼୍‍ତଡ଼୍ ନୁ ବେନ୍ ପ୍ରଭୁନାଗ୍ ଅଡ଼୍‌ ବିଶ୍ୱାସ୍ ମାଡ଼ିମାତ୍‍ତଡ଼୍, ପ୍ରାର୍ତନା ନୁ ଉପବାସ୍ ତଡ଼୍ ଅଡ଼୍‌‍କିଂଙ୍କ୍ ଆଦ୍ ପ୍ରବୁନ୍ ଗାର୍‍ରେ ସର୍ପା ମାଡ଼୍‍ତଡ଼୍ ।
ACT 14:24 ପିସିଦିଆ ଜାଗେ ଇସ୍‌ ଅଡ଼୍‌ ପଂଫୁଲିୟାତାଗ୍ ୱାତ୍‍ତଡ଼୍ ।
ACT 14:25 ଆଗେ ପର୍ଗାତାଗ୍ ପ୍ରଚାର୍ ମାଡ଼ି ଆତ୍ତେଲିଆତାଗ୍ ଆତ୍‍ତଡ଼୍ ।
ACT 14:26 ଆଗାଙ୍କ୍ ଅଡ଼୍‌ ଏର୍‍ ହାର୍‍ଦେଆଲା ଆନ୍ତିୟକିଆତାଗ୍ ମାଲ୍‍ସ୍ ୱାତ୍‍ତଡ଼୍ । ଇଦ୍ ଅନ୍‌ଥିୟୋକ୍‌ତାଗ୍ ଆସ୍ ମାନ୍ଦାନ୍ ପାଡ଼୍‍ୟି ସେଙ୍ଗେ ଇଶ୍ୱର୍‌ତେ ଅନୁଗ୍ରହତଡ଼୍ ଅଡ଼୍‌ ସର୍ପା ଆସ୍‍ମାତ୍‍ତଡ଼୍ ।
ACT 14:27 ଅଡ଼୍‌ ଅନ୍‌ଥିୟୋକ୍‌ତାଗ୍ ଏୱୁସ୍ ମଣ୍ଡଲିତେ ନାରୁଡ଼୍‍କ୍ ଅଣ୍ଡୟାଗେ ମାଡ଼୍‍ତଡ଼୍ । ଇଶ୍ୱର୍ ସେଙ୍ଗେ ଅଡ଼୍‌ ବାତ୍ ମାଡ଼ିମାତ୍‍ତଡ଼୍ ନୁ ଅଣଇହୁଦୀଡ଼୍ ବିଶ୍ୱାସ୍ ସେଙ୍ଗେ ବେଲା ହାର୍ ତଅସ୍‍ମାତ୍‍ତଡ଼୍‍, ଆୱ୍‍ଚାରେ ଅଡ଼୍‌‍କିଂଙ୍କ୍ କେତ୍‍ତଡ଼୍ ।
ACT 14:28 ଆଗେ ବିଶ୍ୱାସୀ ଶିଷ୍ୟ ତଡ଼୍ ଅଡ଼୍‌ ନାର୍‍ଗେ ଦିନା ମାତ୍‍ତଡ଼୍ ।
ACT 15:1 ଯିହୁଦାତାଗାଙ୍କ୍ ବେସ୍‍କ୍‍ତୁଡ଼୍‍ ଦାଦାଲଡ଼୍‍ ଅନ୍‌ଥିୟୋକ୍‌ତାଗ୍ ୱାସ୍, ମୋଶାନ୍‌‌ ନିୟମ୍ ଲେକାମ୍ ଅଡ଼୍‌ ସୁନ୍ନତ୍ ଆୟିୱକ୍ ପରିତ୍ରାଣ୍ ପାଏମ୍ ଆୟଡ଼୍ ଇଞ୍ଜ ବିଶ୍ୱାସୀଡ଼୍‍କ୍ ଶିକ୍ଷା ହିତ୍‍ତଡ଼୍ ।
ACT 15:2 ଇଦ୍ ବିଷୟ୍‍ତିଙ୍କ୍ ପାଉଲ୍ ନୁ ବର୍ଣ୍ଣବା ଅଡ଼୍‌ ତଡ଼୍ ଗାଟି ଯୁକ୍ତିତର୍କ ମାଡ଼୍‍ତାଙ୍କ୍ ଇଦ୍ ତିଆର୍ ମାଡ଼୍‍ତଡ଼୍ ଯେ, ପାଉଲ୍, ବର୍ଣ୍ଣବା ନୁ ଅନ୍‌ଥିୟୋକ୍‌ତେ ମେଣ୍ଡେ ବେସ୍‍କ୍‍ତୁଡ଼୍‍ ନାରୁଡ଼୍ ଯିରୁଶାଲେମ୍‍ତାଗ୍ ଆଞ୍ଜ୍ ପ୍ରେରିତ ଶିଷ୍ୟ ନୁ ମଣ୍ଡଲିତେ ବୟସ୍କା ନେତାଲଡ଼୍ ତଡ଼୍ ଇଦ୍ ବିଷୟ୍‍ତେ ପରାମର୍ଶ ମାଡ଼ିତଡ଼୍ ।
ACT 15:3 ମଣ୍ଡଲି ଅଡ଼୍‌‍କିଂଙ୍କ୍ ଆଦାନାଦ୍ ସୁବିଦା ମାଡ଼ି ରହତ୍‍ତେ ନୁ ଅଡ଼୍‌ ଫିନିସିଆ ନୁ ଶମିରୋ ଇସ୍‌ ଆଦାନ୍ ୱେଲେ ଅଣଇହୁଦୀଡ଼୍ ବେଲା ମନ୍ ପରିବର୍ତ୍ତନ୍ ମାଡ଼ି ଇଶ୍ୱର୍‌ତେ ପାକେ ଆଦ୍‍ତଡ଼୍, ଆଦ୍ ବିଷୟ୍ କେତ୍‍ତଡ଼୍; ଇଦ୍ ଗଟ୍ କେଞ୍ଜି ବିଶ୍ୱାସୀଡ଼୍ ଦାଦାଲଡ଼୍‍ ଗାଟି ୱେଡ଼୍‍କେ ଆତ୍‍ତଡ଼୍ ।
ACT 15:4 ଅଡ଼୍‌ ଯିରୁଶାଲେମ୍‍ତାଗ୍ ହେୱୁତ୍‍ତେ ୱେଲେ ମଣ୍ଡଲି, ପ୍ରେରିତ ଶିଷ୍ୟ ନୁ ମଣ୍ଡଲିତେ ନେତାଲଡ଼୍ ଅଡ଼୍‌‍କିଂଙ୍କ୍ ସ୍ୱାଗତ୍ ମାଡ଼୍‍ତଡ଼୍ । ଇଶ୍ୱର୍ ଅଡ଼୍‌ ତଡ଼୍ ମାଡ଼ିମାନ୍ଦାନ୍ ପାଡ଼୍‍ୟି ବିଷୟ୍‍ତେ ପାଉଲ୍ ନୁ ବର୍ଣ୍ଣବା ଅଡ଼୍‌‍କିଂଙ୍କ୍ କେତ୍‍ତଡ଼୍ ।
ACT 15:5 ଇତ୍‍କେ ପାରୂଶୀଡ଼୍ ପାକେଙ୍କ୍ ବେସ୍‍କ୍‍ତୁଡ଼୍‍ ବିଶ୍ୱାସୀଡ଼୍ ନିଶ୍‍ମିକା କେତ୍‍ତଡ଼୍, “ଅଣଇହୁଦୀଡ଼୍ ସୁନ୍ନତ୍ ଆଦାନାଦ୍ ତିଆର୍ ନୁ ମୋଶାନ୍‌‌ ନିୟମ୍‍ ପାଲନ୍ ମାଡ଼ାନଙ୍କ୍ ଅଡ଼୍‌‍କିଂଙ୍କ୍ କେତାନ୍ ଦର୍‍କାର୍ ।”
ACT 15:6 ଇଦ୍ ବିଷୟ୍‍ତିଙ୍କ୍ ମିଟିଙ୍କ୍ ମାଡ଼ାନ୍ ମାଇଦିଙ୍କ୍ ପ୍ରେରିତ ଶିଷ୍ୟଡ଼୍ ନୁ ମଣ୍ଡଲିତେ ବୟସ୍କା ନାରୁଡ଼୍ ଅଣ୍ଡୟ୍‌‍ତାଗ୍ ଗୁଡ଼୍‍ତଡ଼୍ ।
ACT 15:7 ନାର୍ଗେଜେଲ୍ ଆଲୋଚାନା ମାଡ଼୍‍ତେ ପେର୍‍କେ ପିତର୍ ନିଶ୍‍ମିକା କେତ୍‍ତଣ୍ଡ୍, “ଦାଦାଲଡ଼୍‍ ନୁ ଏଲାସ୍କ୍‍କି, ମିଡ଼୍ ପୁଞ୍ଜ୍‍ମାନୁଟ୍ ଯେ ନାର୍‍ଗେ ଦିନା ମୁନେଙ୍କ୍ ଇଶ୍ୱର୍ ଅଣଇହୁଦୀଡ଼୍ ଗାର୍‍ରେ ସୁସମାଚାର୍ ପ୍ରଚାର୍ ମାଡ଼ି ଆଦିନାଗ୍ ଅଡ଼୍‌‍କିଂଙ୍କ୍ ବିଶ୍ୱାସ୍ ମାଡ଼ାନଙ୍କ୍ ମିଇ ଲୋପେଙ୍କ୍ ନାକିଂଙ୍କ୍ ଏଞ୍ଚିମାତ୍‍ତଣ୍ଡ୍ ।
ACT 15:8 ମେଣ୍ଡେ ସାରେତଡ଼୍‍ତେ ହୃଦୟ୍‍ ପୁନ୍ଦାନ୍ ଇଶ୍ୱର୍ ମାକିଂଙ୍କ୍ ବେଲା ପବିତ୍ର ଆତ୍ମାତଡ଼୍‍ ସାକ୍ଷ୍ୟ ହିତ୍‍ତଣ୍ଡ୍, ଅଣଇହୁଦୀଡ଼୍‍କ୍ ମିକା ଟିକ୍ ଆଦେ ରକମ୍ ଇସ୍‌ ଅଡ଼୍‌‍କିଂଙ୍କ୍ ଗ୍ରହନ୍ ମାଡ଼୍‍ତଣ୍ଡ୍ ।
ACT 15:9 ଅଡ଼୍‌ ନୁ ମା ଲୋପେ ବାତ୍‍ମିକା ହାଲ୍‍ସାନାଦ୍‍ ଇଲେ, ଅଡ଼୍‌‍ ତାମ୍‍ ହୃଦୟ୍ ଶୁଚି ମାଡ଼୍‍ତଡ଼୍‍ । ଅଡ଼ାଦ୍‌ ବିଶ୍ୱାସ୍‍ତେ ସେଙ୍ଗେ ଅଣ୍ଡ୍‌ ଅଡ଼୍‌‍କିଂଙ୍କ୍ ପାପ୍ କ୍ଷମା ମାଡ଼୍‍ତଣ୍ଡ୍ ।
ACT 15:10 ଆଲେକେ ବେନ୍ ବୋଜ୍ କାଞ୍ଜାନାଦ୍ ଜୁଆଡ଼୍‌ ମାନ୍‍ ଆନିଦାଦିଡ଼୍ ନୁ ମାମ୍‍ମେ ପାର୍‍ୱମ୍, ମିଡ଼୍ ଇଞ୍ଜେ ଶକ୍ତି ବିଶ୍ୱାସୀ ଶିଷ୍ୟ ଆଟେତାଗ୍ ଆଦ୍ କାଞ୍ଜ୍‍ସ୍ପିମିକା ବାତେଙ୍କ୍ ଇଶ୍ୱର୍‌ତିଙ୍କ୍ ପରିକ୍ଷା ମାଡ଼ାନଙ୍କ୍ ହାଲ୍‍ସୁତିଡ଼୍ ?
ACT 15:11 ହିଲ୍‍ଲେ, ଇଦ୍ ଟିକ୍ ଆୟ୍‍ୟ । ଅଡ଼୍‌ ବେନ୍ ବିଶ୍ୱାସ୍ ମାଡ଼ି ପରିତ୍ରାଣ୍ ପାଏମ୍‍ଆତ୍‍ତଡ଼୍, ମାମ୍‍ମେ ଗାଲା ଟିକ୍ ଆଦେପୁଟୁଙ୍କ୍ ବିଶ୍ୱାସ୍ ମାଡ଼ି ପ୍ରବୁ ଜିସୁନ୍ ଅନୁଗ୍ରହତେ ପରିତ୍ରାଣ୍ ପାଏମ୍‍ଆତ୍‍ତାଡ଼୍ ।”
ACT 15:12 ପାଉଲ୍ ନୁ ବର୍ଣ୍ଣବାନ୍ ତଡ଼୍ ଅଣଇହୁଦୀଡ଼୍ ଲୋପେ ଇଶ୍ୱର୍ ବେନ୍‍ସାରେ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ମାଡ଼ିମାତ୍‍ତଣ୍ଡ୍, ଅଡ଼୍‌ଆଗାଙ୍କ୍‌ ଆଦିନାଦ୍ ଗଟ୍‍ କେଞ୍ଜି ମାନ୍ଦେତେ ସାରେତଡ଼୍ କଟ ମାତ୍‍ତଡ଼୍ ।
ACT 15:13 ଅଡ଼୍‌ କେସ୍ ତେର୍‍ତେ ପେର୍‍କେ ଯାକୁବ୍‍ କେତ୍‍ତଣ୍ଡ୍, “ହୋ ଦାଦାଲଡ଼୍‍ ନୁ ଏଲାସ୍କ୍‍କି ନା ଗଟି କେଞ୍ଜାଟ୍ !
ACT 15:14 ଇଶ୍ୱର୍ ବେଲା ଅନୁଗ୍ରହ ମାଡ଼ି ଅଣଇହୁଦୀଡ଼୍ ଲୋପେଙ୍କ୍ ବେସ୍କ୍‍ତୁଡ଼୍‍କ୍ ତାନ୍ ସେଙ୍ଗେ ପେଦେର୍‍ ହେଞ୍ଚ୍‍ତଣ୍ଡ୍, ଶିମୋନ୍ ଆଦ୍ ଗଟ୍ ବୁଜା ମାଡ଼ିତ୍‍ତଣ୍ଡ୍ ।
ACT 15:15 ବାବବାଦୀଡ଼ାଦ୍ ଗଟ୍ ଇଦିଙ୍କ୍ ପୁରାପୁରି ସମର୍ତନ୍ ମାଡ଼ୁତ୍‍ । ଶାସ୍ତ୍ରତାଗ୍ ଲେକାମିନ୍ଦେ;
ACT 15:16 ‘ପ୍ରବୁ କେତୁତଣ୍ଡ୍, ଇଦିନ୍‍ ପେର୍‍କେ ନାନ୍ ମାଲ୍‍ସ୍ ୱାଦ୍‍ତାନ୍ ନୁ ଦାଉଦନ୍ ରାଜ୍ୟତିଙ୍କ୍ ମେଣ୍ଡେଅଣ୍ଡ୍‌‍ଦାମ୍ ଉଦାର୍ ମାଡ଼ିତାନ୍ । ନାନ୍ ଆଦିନ୍ ଦଂସଆତ୍‌ତାଦ୍ ବିଷୟ୍ ମେଣ୍ଡେଅଣ୍ଡ୍‌‍ଦାମ୍ ତିଆର୍ ମାଡ଼ି ଆଦିଙ୍କ୍ ମେଣ୍ଡେଅଣ୍ଡ୍‌‍ଦାମ୍ ଡୁଟାଙ୍ଗ୍‍ ମାଡ଼ିତାନ୍ ।
ACT 15:17 ଜିସୁନାରୁନ୍ ଜାତି ନା ବକେତ୍ ୱାଦ୍‍ତଡ଼୍‍, ବେନ୍ ଅଣଇହୁଦୀଡ଼୍‍କ୍ ନାନ୍ ନା ନିଜର୍‍ ପ୍ରାର୍ତନାତାଗ୍ କାର୍‍ଙ୍ଗ୍‍ତାନ୍, ଅଡ଼୍‌ ସାରେତଡ଼୍ ନା ପେଦେର୍‍ ନିଜର୍‍ତଡ଼୍‍ ପ୍ରବୁ ଇଞ୍ଜ ସ୍ୱୀକାର୍ ମାଡ଼ିତଡ଼୍ ।
ACT 15:18 ପ୍ରବୁ ଇଦ୍ ଗଟ୍ କେତ୍‍ତଣ୍ଡ୍, ନାର୍‍ଗେ ଦିନା ମୁନେତ୍ କାଲାମ୍‍ତେ ଇଦ୍ ଗଟ୍ ଅଣ୍ଡ୍‌ କେସ୍‍ମାତ୍‍ତଣ୍ଡ୍ ।’”
ACT 15:19 ଯାକୁବ୍ ମେଣ୍ଡେ କେସ୍‍ମାତ୍‍ତଣ୍ଡ୍, ନା ବିଚାର୍‍ତେ, ବେନ୍ ଅଣଇହୁଦୀଡ଼୍ ଇଶ୍ୱର୍‌ତେ ପାକେ ମାଲ୍‍ତ୍‍ତଡ଼୍, ମାମ୍‍ମେ ଅଡ଼୍‌‍କିଂଙ୍କ୍ ମେଣ୍ଡେ ହଇରାଣ୍ ମାଡ଼ମ୍ ।
ACT 15:20 ଅଡ଼୍‌ ବେଲାକି ପୁତ୍‍ଲାମ୍‍ତିଙ୍କ୍ ଇଟ୍‌କେ କାଦି ତିନ୍‍ମାକିଡ଼୍, ଯୌନ ପାପ୍‍ତାଗାଙ୍କ୍ ପେଇସ୍ ୱାଡ଼ିଡ଼୍, ପାପେତିଙ୍କ୍ ପଇସ୍ ଦଂସମାଡ଼୍‍ତେ ଜୀୱାକ୍‍ତେ ହାୱୁଙ୍ଗ୍ ତିନ୍‍ମାକିଡ଼୍; ଇଦ୍ ସାରେ ବିଷୟ୍ କେସ୍‍ଇସ୍‌ ଅଡ଼୍‌ ବକେତ୍ ଅଣ୍ଡୟ୍‌ ଚିଟି ଲେକିକାଡ଼୍ ।
ACT 15:21 ବାତେଙ୍କ୍ଇତ୍‍କେ ନାର୍‍ଗେ ଦିନାକନ୍ସ୍ ବିଶ୍ରାମ୍‍ଦିନେ ଉପାସନା ଲଅକିନାଗ୍ ମୋଶାନ୍‌‌ ନିୟମ୍ କାର୍‍ତୁତଡ଼୍ ନୁ ସାରେ ଟାୱୁନ୍‍କିନାଗ୍ ଅନାଦ୍‌ ଗଟ୍ ପ୍ରଚାର୍ ଆଦୁତ୍‍ତେ ।
ACT 15:22 ପେର୍‍କେ ଦାଦାଲ୍‌ ପ୍ରେରିତ ଶିଷ୍ୟ ନୁ ମଣ୍ଡଲିତେ ବେଡ଼୍‍ୟେ ନେତାଲଡ଼୍, ମେଣ୍ଡେ ମଣ୍ଡଲିତେ ସାରେତଡ଼୍, ମାନ୍ଦେତେ ବେସ୍‍କ୍‍ତୁଡ଼୍‍ ନାରୁଡ଼୍‍କିଂଙ୍କ୍ ଏଞ୍ଚି ପାଉଲ୍ ନୁ ବର୍ଣ୍ଣବାନ୍ ତଡ଼୍ ଅଡ଼୍‌‍କିଂଙ୍କ୍‍ ଆନ୍ତିୟକିଆତାଗ୍ ରହତ୍‍ତାନଙ୍କ୍ ତିଆର୍ ମାଡ଼୍‍ତଡ଼୍ । ବର୍ଶବା ପେଦେର୍‍ତେ ପରିଚିତ ଯିହୁଦା ନୁ ଶୀଲା ବିଶ୍ୱାସୀଡ଼୍ ଲୋପେଙ୍କ୍ ଗାଟି ସମ୍ମାନିତ ମାତ୍‍ତଡ଼୍ ।
ACT 15:23 ବିଶ୍ୱାସୀଡ଼୍ ମଦଲ୍ ଲେକ୍‍ତାଦ୍ ଚିଟି‍ତିଙ୍କ୍ ଇଡ଼୍ ଇର୍‍ୱୁଡ଼୍ କାୟ୍‍ଦେ ରହତ୍‍ତଡ଼୍, “ଆଣ୍ଟିୟୋକ୍‍, ସିରିଆ ନୁ ସିଲିସିଆତେ ଅଣଇହୁଦୀଡ଼୍ ଲୋପେଙ୍କ୍ ୱାସ୍‍ମାନ୍ଦାନ୍ ଦାଦାଲଡ଼୍‍କିଙ୍କ୍ ପ୍ରେରିତ ଶିଷ୍ୟଡ଼୍ ନୁ ମଣ୍ଡଲିତେ ବୟସ୍କା ନେତାଲଡ଼୍ ନମସ୍କାର୍ ମାଡ଼ୁତଡ଼୍ ।
ACT 15:24 ମାମ୍‍ମେ କେଞ୍ଜୁତମ୍ ଯେ, ମା ମାନ୍ଦେତେ ବେସ୍‍କ୍‍ତୁଡ଼୍‍ ନାରୁଡ଼୍ ମିଇ ବକେତ୍ ଆଞ୍ଜ୍ ବାତ୍ କେତ୍‍ତଡ଼୍, ଆଦିଙ୍କ୍ ଅଡ଼୍‌ ମିକିଂଙ୍କ୍ ଗାଟିଦାନ୍ଦେ ମାଡ଼୍‍ତଡ଼୍ । ଇତ୍‍କେ ଇଦ୍ ବିଷୟ୍‍ତେ ମାମ୍‍ମେ ଅଡ଼୍‌‍କିଂଙ୍କ୍ ବାତ୍‍ମିକା ନିର୍ଦ୍ଦେଶ୍ ଇୱମ୍ ।
ACT 15:25 ଆଦିଙ୍କ୍ ମାମ୍‍ମେ ସାରେତମ୍ ଅଣ୍ଡୟ୍‌ ମନ୍ ହାସ୍ ବେସ୍‍କ୍‍ତୁଡ଼୍‍ ସମ୍ୱାଦ୍‍କାରୀଡ଼୍‍କ୍ ଏଞ୍ଚି ମିଇ ବକେତ୍ ରହତାନଙ୍କ୍ ତିଆର୍ ମାଡ଼୍‍ତମ୍ । ଅଡ଼୍‌ ମାନ୍‍ ସତ୍‍ସାହସୀ ପ୍ରିୟ ସାଙ୍ଗ ବର୍ଣ୍ଣବା ନୁ ପାଉଲ୍ ତଡ଼୍ ଆଦ୍‍ତଡ଼୍ ।
ACT 15:26 ଇ ପେଦେର୍‍ତେ ସାଙ୍ଗଡ଼୍ ପ୍ରବୁ ଜିସୁ କ୍ରିଷ୍ଟନ୍ ସେବା ମାଡ଼ାନଙ୍କ୍ ନିଜେତ୍ ଜିୱୁଣ୍ଡ୍‍ତିଙ୍କ୍ ଉତ୍ସର୍ଗ ମାଡ଼୍‍ତଡ଼୍ ।
ACT 15:27 ମାମ୍‍ମେ ଯିହୁଦା ନୁ ଶୀଲାଙ୍କ୍ ମିଇ ବକେତ୍ ରହତୁତମ୍ । ମାମ୍‍ମେ ବାତ୍ ଲେକୁତମ୍, ଅଡ଼୍‌ ବ୍ୟକ୍ତିଗତଭାବେ ଆଦ୍ ମିକିଂଙ୍କ୍ କେତିତଡ଼୍‍ ।
ACT 15:28 ବେସ୍‌କ୍ ଦର୍‍କାର୍ ଆଦାନ୍ ନିୟମ୍ ୱିଡ଼୍‍ସି ମିଇ ପର୍‍ର ମେଣ୍ଡେ ବଜ୍ ୱାଟମ୍ ମାକିଂଙ୍କ୍ ପବିତ୍ର ଆତ୍ମା ଇଦ୍ ନିର୍ଦ୍ଦେଶ୍ ହିତ୍‍ତଣ୍ଡ୍ ।
ACT 15:29 ଆୱୁ ନିୟମ୍ ଆତ୍‍ତା, ପୁତ୍‍ଲାମ୍‍ତିଙ୍କ୍ ଇଟ୍‌ତେ କାଦି ତିନ୍‍ମାଟ୍, ନେତୁର୍‍ ଉନ୍‍ମାଟ୍, ପାପେତିଙ୍କ୍ ପଇସ୍ ହାୱ୍‍କ୍‍ତେ ଜୀୱାକ୍‍ତେ ହାୱ୍‍ଙ୍ଗ୍ ତିନ୍‍ମାଟ୍ ନୁ ଯୌନ ପାପାମ୍‍ତିଙ୍କ୍ ୱିଡ଼୍‍ସାଟ୍ । ଇୱୁ ସାରେ ପାଡ଼୍‍ୟି ୱିଡ଼୍‍ସ୍‍କେ ମିୟାଦ୍ ଲେକେତ୍ ଆଦ୍‍ତେ । ମାୟାଦ୍‌ ଇଦ୍ ନମସ୍କାର୍‍ ଗ୍ରହନ୍ ମାଡ଼ାଟ୍ ।”
ACT 15:30 ବେନ୍ ସମ୍ୱାଦ୍‍କାରୀଡ଼୍‍କ୍ ରହସ୍‍ମାତ୍‍ତଡ଼୍, ଅଡ଼୍‌ ଅନ୍‌ଥିୟୋକ୍‍ତାଗ୍ ଆଞ୍ଜ୍ ବିଶ୍ୱାସୀଡ଼୍ ସାରେ ମାନ୍ଦେତିଙ୍କ୍ ଅଣ୍ଡୟାଗେ ମାଡ଼ି ଇଦ୍ ଚିଟି ହିତ୍‍ତଡ଼୍ ।
ACT 15:31 ଆଗେ ବିଶ୍ୱାସୀଡ଼୍ ଚିଠିତାଦ୍ ସାର୍‍ଦେ ସମ୍ୱାଦ୍ କାର୍‍ସ୍ ୱେଡ଼୍‌କେ ଆତ୍‍ତଡ଼୍ ।
ACT 15:32 ଯିହୁଦା ନୁ ଶୀଲା ନିଜେ ବାବବାଦୀ ମାତ୍‍ତଡ଼୍ । ଅଡ଼୍‌ ଆଣ୍ଟିୟୋକ୍‌ତେ ବିଶ୍ୱାସୀ ଦାଦାଲଡ଼୍‍କ୍ ନାର୍‍ଗେ ଦିନାମ୍ ୱେଡ଼୍‍କା ମାଡ଼ି ଅଡ଼ାଦ୍‌ ବିଶ୍ୱାସ୍‍ତିଙ୍କ୍ ଦୃଡ଼ ମାଡ଼୍‍ତଡ଼୍ ।
ACT 15:33 ଆଗେ ବେସ୍‍କେ ଦିନାମ୍ ମାତ୍‍ତେ ପେର୍‍କେ ବେନଡ଼୍ ଅଡ଼୍‌‍କିଂଙ୍କ୍ ରହସ୍‍ମାତ୍‍ଡ଼୍, ଅଡ଼୍‌ ବକେତ୍ ମାଲ୍‍ସ୍ ଆଦାନ୍ ମାଇଦିଙ୍କ୍ ବିଶ୍ୱାସୀଡ଼୍ ଦାଦାଲଡ଼୍‌ ଅଡ଼୍‌‍କିଂଙ୍କ୍ ଶାନ୍ତିତେ ବିଦାୟ୍ ହିତ୍‍ତଡ଼୍ ।
ACT 15:34 ଇତ୍‍କେ ଶିଲା ଆଗେ ମାନ୍ଦାନଙ୍କ୍ ସାୟେ ହେର୍କା ମାଡ଼୍‍ତଣ୍ଡ୍ ।
ACT 15:35 ପାଉଲ୍ ନୁ ବର୍ଣ୍ଣବା ଅନ୍‌ଥିୟୋକ୍‍ତାଗ୍ ବେସ୍‍କେ ଦିନାମ୍ ମାଞ୍ଜ୍‍ ନାର୍‍ଗେ ନାରୁଡ଼୍ ତଡ଼୍ କାଇଲି ପ୍ରବୁନ୍ ସୁସମାଚାର୍‍ ପ୍ରଚାର୍ ମାଡ଼୍‍ତଡ଼୍ ନୁ ଶିକ୍ଷା ହିତ୍‍ତଡ଼୍ ।
ACT 15:36 ବେସ୍‍କେ ଦିନା ପେର୍‍କେ ପାଉଲ୍ ବର୍ଣ୍ଣବାଙ୍କ୍ କେତ୍‍ତଣ୍ଡ୍, “ଦା, ମାନାଡ଼୍ ମାଲ୍‍ସ୍ ଆଦିକାଡ଼୍, ସାରେ ଟାୱୁନ୍‍କିନାଗ୍ ବିଶ୍ୱାସୀଡ଼୍‍କ୍‍ ବେନଡ଼୍‍କ୍ ପ୍ରବୁନ୍ ବାକ୍ୟ କେତ୍‍ତାଡ଼୍, ଅଡ଼୍‌‍କିଂଙ୍କ୍ କାଇଲିକାଡ଼୍ ନୁ ଅଡ଼୍‌ ବେଲା ମିନ୍ଦେଡ଼୍‍ ଉଡ଼ିକାଡ଼୍ ।
ACT 15:37 ବର୍ଣ୍ଣବା ଅଡ଼୍‌ ତଡ଼୍ ଯୋହନ୍‌ ମାର୍କଙ୍କ୍‍ ମିକା ତାନ୍‍ତଡ଼୍‍ ଆଦାନଙ୍କ୍ ଇଚ୍ଛା ମାଡ଼ିମାତ୍‍ତଣ୍ଡ୍;
ACT 15:38 ଇତ୍‍କେ ପାଉଲ୍ ଅଂକିଙ୍କ୍‌ ଆଦାନଙ୍କ୍ ଲେକାମ୍ ହେର୍କା ମାଡ଼ଣ୍ଡ୍; ବାତେଙ୍କ୍ଇତ୍‍କେ ଅଣ୍ଡ୍‌ ମୁନେଙ୍କ୍‍ଦାମ୍ ପାଡ଼୍‍ୟିତାଗ୍ ଆଦାନ୍‍ୱେଲେ ଅଡ଼୍‌‍କିଂଙ୍କ୍ ପଂଫୁଲିୟାତାଗ୍ ୱିଡ଼୍‍ସି ଆଞ୍ଜ୍ ମାତ୍‍ତଣ୍ଡ୍ ।
ACT 15:39 ଇଦ୍ ବିଷୟ୍‍ତେ ଗାଟି ଯୁକ୍ତିତର୍କ ଆତ୍‍ତଡ଼୍ ନୁ ସାଇପ୍ରସ୍ ଅଡ଼୍‌ ୱେର୍‍ଆତ୍‍ତଡ଼୍ । ବର୍ଣ୍ଣବା ମାର୍କଙ୍କ୍ ପଇସ୍ କୁପ୍ରତାଗ୍ ଏର୍‍ଦାଲା ୱାତ୍‍ତଣ୍ଡ୍ ।
ACT 15:40 ଇତ୍‍କେ ପାଉଲ୍ ଶୀଲାଙ୍କ୍ ହେଞ୍ଚ୍‍ତଣ୍ଡ୍ ନୁ ବିଶ୍ୱାସୀଡ଼୍ ତଡ଼୍ ପ୍ରବୁନାଗ୍ ଅନୁଗ୍ରହ ହାସ୍ ଦବ୍‍ ଆତ୍‍ତଣ୍ଡ୍ ।
ACT 15:41 ଅଣ୍ଡ୍‌ ମଣ୍ଡଲିକିଙ୍କ୍ ଡୁଟାଙ୍ଗ୍‍ ମାଡ଼ି ସିରିଆ ନୁ ସିଲିଷୀଆ ନାଡ଼୍‍ମେଙ୍କ୍ ଆତ୍‍ତଣ୍ଡ୍ ।”
ACT 16:1 ପାଉଲ୍‍ ଦର୍ବୀ ନୁ ଲୁସ୍ତ୍ରାତାଗ୍ ଆତ୍‍ତଣ୍ଡ୍ । ଆଗେ ତୀମତି ପେଦେର୍‍ତଣ୍ଡ୍ ୱେରଣ୍ଡ୍ କ୍ରିଷ୍ଟିୟାନ୍ ବାସେ ମାଡ଼ମାତ୍‍ତଣ୍ଡ୍ । ଅଣ୍ଡ୍‌ ୱେରଣ୍ଡ୍ କ୍ରିଷ୍ଟ ବିଶ୍ୱାସୀ ଶିଷ୍ୟ ଇହୁଦୀ ନାଟାଡ଼୍‍ତେ ମାର୍‍ । ଇତ୍‍କେ ତାମ୍ ବାବାଲ୍ ୱେରଣ୍ଡ୍ ଗ୍ରୀକ୍‍ ନାରୁଣ୍ଡ୍‍ ମାତ୍‍ତଣ୍ଡ୍ ।
ACT 16:2 ଲୁସ୍ତ୍ରା ନୁ ଇକନିୟାତାଗ୍ ମାନ୍ଦାନ୍ ବିଶ୍ୱାସୀଡ଼୍ ଲୋପେଙ୍କ୍ ତୀମତିଙ୍କ୍‍ ଗାଟି ସାୟେତଣ୍ଡ୍‍ ଇଞ୍ଜ ପୁଞ୍ଜ୍‍ ମାତ୍‍ତଡ଼୍‍ ।
ACT 16:3 ପାଉଲ୍ ତାନ୍ ତଡ଼୍ ତୀମତିଙ୍କ୍ ଆଦାନଙ୍କ୍ ଇଚ୍ଛା ମାଡ଼୍‍ତଣ୍ଡ୍, ଆଦିଙ୍କ୍ ଅଂକିଙ୍କ୍‌ ସୁନ୍ନତ୍ ମାଡ଼୍‍ତଣ୍ଡ୍ । ଇଲା ମାଡ଼ାନାଦ୍ କାରନ୍‍ ଆତ୍‍ତେ, ତୀମତିନ୍ ବାବାଲ୍ ଗ୍ରୀକ୍‍ ନାରୁଣ୍ଡ୍‍ ମାତ୍‍ତଣ୍ଡ୍ ଇଞ୍ଜ ଆଗେ ମାନ୍ଦାନଡ଼୍ ଇହୁଦୀଡ଼୍ ପୁଞ୍ଜ୍‍ମାତ୍‍ତଡ଼୍ ।
ACT 16:4 ନାର୍‍ଗେ ଟାୱୁନ୍‍କିନ୍ ଲୋପେଙ୍କ୍ ଇସ୍‌ ଆଦାନ୍ ୱେଲେ ବିଶ୍ୱାସୀଡ଼୍‍କ୍ ଯିରୁଶାଲେମ୍‍ତେ ପ୍ରେରିତ ଶିଷ୍ୟ ନୁ ବାଡ଼୍‍ୟେ ନେତାଲଡ଼୍ ହିତ୍‍ତେ ନିତିନିୟମ୍ ସାରେ ବୁଜାମାଡ଼ି, ଆୱିଙ୍କ୍ ପାଲନ୍ ମାଡ଼ାନଙ୍କ୍ କେସମାତ୍‍ତଡ଼୍ ।
ACT 16:5 ଆଗାଙ୍କ୍ ମଣ୍ଡଲିକି ବିଶ୍ୱାସ୍‍ତେ‍ ଶକ୍ତ ଆତ୍‍ତା ନୁ ନିତ୍‍ଦିନ୍ ଆୱିନ୍‍ ସଂଖ୍ୟା ନାର୍ଗେ ଆତ୍‍ତା ।
ACT 16:6 ପବିତ୍ର ଆତ୍ମା ଅଡ଼୍‌‍କିଂଙ୍କ୍ ଏସିଆ ପ୍ରଦେଶ୍‍ତାଗ୍ ପ୍ରଚାର୍ ମାଡ଼ାନଙ୍କ୍ ଗଟ୍ ହିୱାଙ୍କ୍ ଅଡ଼୍‌ ଫ୍ରୁଗିୟା ନୁ ଗାଲାତୀୟ ଜାଗେତାଗ୍ ଆତ୍‍ତଡ଼୍ ।
ACT 16:7 ମିଷୀଆତେ ସୀମାତାଗ୍ ହେୱୁସ୍ ବିଥିନିଆ ପ୍ରଦେଶ୍‍ତାଗ୍ ଆଦାଙ୍କ୍ ପେୟ୍‍ତେ ୱେଲେ ଜିସୁନାଦ୍ ଆତ୍ମା ଅଡ଼୍‌‍କିଂଙ୍କ୍ ଆନୁମତି ହିୱ ।
ACT 16:8 ଆଦିଙ୍କ୍ ଅଡ଼୍‌ ମିଷୀଆତେ ନାଡ଼୍‍ମେଙ୍କ୍ ଆଞ୍ଜ୍ ତ୍ରୋୟାତାଗ୍ ଆତ୍‍ତଡ଼୍ ।
ACT 16:9 ଆଦେନାଣ୍ଡ୍ ନାର୍‍କେ ପାଉଲ୍ ଅଣ୍ଡୟ୍‌ ଦର୍ଶନ୍ ଉଡ଼୍‍ତଣ୍ଡ୍ ଯେ, ମାସିଦୋନିଆତେ ୱେରଣ୍ଡ୍ ନାରୁଣ୍ଡ୍‍ ଅନୁରଦ୍‌‍ ମାଡ଼ି କେତୁତଣ୍ଡ୍, “ମାସିଦୋନିଆତାଗ୍ ୱାସ୍ ମାକିଂଙ୍କ୍ ସାହାଯ୍ୟ ମାଡ଼େ !”
ACT 16:10 ପାଉଲ୍ ଇଦ୍ ଦର୍ଶନ୍ ଉଡ଼୍‍ତେ ସାଙ୍ଗେ ସାଙ୍ଗେ ମାସିଦୋନିଆତାଗ୍ ଆଦାନଙ୍କ୍ ମାମ୍‍ମେ ତିଆର୍ ଆତ୍‍ତମ୍, ବାତେଙ୍କ୍ଇତ୍‍କେ ମାମ୍‍ମେ ନିଜାମ୍ ପୁତ୍‍ତମ୍ ଯେ, ଇଶ୍ୱର୍ ଆଗେତ୍ ନାରୁଡ଼୍ ଲୋପେ ସୁସମାଚାର୍‍ ପ୍ରଚାର୍ ମାଡ଼ାନଙ୍କ୍ ମାକିଂଙ୍କ୍ କାର୍‍ଙ୍ଗ୍‍ତଣ୍ଡ୍ ।
ACT 16:11 ମାମ୍‍ମେ ଏର୍‍ଜାହାଜ୍‍ ତଡ଼୍ ତ୍ରୋୟାତିଙ୍କ୍ ୱିଡ଼୍‍ସି ସାମତ୍ରାକିତାଗ୍ ଆତ୍‍ତମ୍ ନୁ ମେଣ୍ଡେଅଣ୍ଡ୍‌ ଦିନ୍ ନିଆପଲ୍ଲିତାଗ୍ ହେୱୁତ୍‍ତମ୍ ।
ACT 16:12 ଆଗାଙ୍କ୍ ମାମ୍‍ମେ ମାସିଦୋନିଆ ଜିଲ୍ଲାତେ ମୁକ୍ୟ ନଗରୀ ଫିଲିପ୍‍ପୀତାଗ୍ ଆତ୍‍ତମ୍ । ଇଦ୍ ନଗରୀ ଅଣ୍ଡୟ୍‌ ରୋମୀୟ କଲ୍‍ନୀ ମାତ୍‍ତେ । ମାମ୍‍ମେ ନାର୍‍ଗେ ଦିନା ଆଗେ ମାତ୍‍ତମ୍ ।
ACT 16:13 ବିଶ୍ରାମ୍‍ଦିନେ ନଗର୍‍ତେ ବାୟିଦେ ମାନ୍ଦାନ୍ ବେଡ଼େମ୍ ହାଞ୍ଚିନାଗ୍ ଆତ୍‍ତମ୍ । ମାମ୍‍ମେ ହାଲ୍‍ସି ମାତ୍‍ତମ୍, ଆଗେ ଇହୁଦୀଡ଼୍ ପ୍ରାର୍ତନା ମାଡ଼ାନ୍ ସେଙ୍ଗେ ଅଣ୍ଡୟ୍‌ ପଡ଼୍‍ୟି ମାନ୍‍ତେ । ମାମ୍‍ମେ ମଦଲ୍ କୁଦ୍‍ତମ୍ ନୁ ଆଗେ ଗୁଡ଼ିମାନ୍ଦାନ୍ ନାଟାକିନ୍ ତଡ଼୍ ଗଟି ତ୍ରିୟ୍‍ତମ୍ ।
ACT 16:14 ଆୱିନ୍‍ ଲୋପେଙ୍କ୍ ତୁୟଟୀରା ଟାୱୁନ୍‍ତେ ଆପାକଲର୍ ତାୱ୍ ସିଲେ ୱାମ ମାନ୍ଦାନ୍ ଲୁଦିଆ ପେଦେର୍‍ତେ ଅଣ୍ଡୟ୍‌ ନାଟାଡ଼୍ ମାତ୍‍ତେ । ଆଦ୍ ଇଶ୍ୱର୍‌ତିଙ୍କ୍ ଉପାସନା ମାଡ଼ମାତ୍‍ତେ ନୁ ପାଉଲ୍ ବାତ୍ କେସମାତ୍‍ତନ୍, ଆଦ୍ ମନ୍‍ଇସ୍‌‍ କେଞ୍ଜି ଗ୍ରହନ୍ ମାଡ଼ାନ୍ ସେଙ୍ଗେ ପ୍ରବୁ ଆଦିଙ୍କ୍ ହୃଦୟ୍‍ତାଗ୍‍ ସୁଯୋଗ୍ ହିତ୍‍ତଣ୍ଡ୍ ।
ACT 16:15 ଆଦ୍ ନୁ ତାମ୍ ପରିବାର୍‍ତେ ସାରେତଡ଼୍ ଏର୍‍ଦିକ୍ଷା ଆତ୍‍ତେ ପେର୍‍କେ ମାକିଂଙ୍କ୍ ଅନୁରଦ୍‌‍ ମାଡ଼ି କେତ୍‍ତଡ଼୍, “ପ୍ରବୁନାଗ୍ ନିଜାମ୍ ବିଶ୍ୱାସ୍ ମିନ୍ଦେ ଇଞ୍ଜ ଯଦି ଆଲ୍‍ସୁତି, ଆଲେକେ ମା ଲୋନ୍‌ ୱାସ୍ ମାନୁଟ୍ ।” ଆଦ୍ ଇଦ୍‍ରକମ୍ ମାକିଂଙ୍କ୍ ତାମ୍ ଲୋନ୍‌ ଆଦାନଙ୍କ୍ କେତ୍‍ତେ ।
ACT 16:16 ଅଣ୍ଡ୍‌‍ଦିନ୍ ମାମ୍‍ମେ ପ୍ରାର୍ତନା ପଡ଼୍‍ୟେତାଗ୍ ଆଦାନ୍ ୱେଲେ ଅଣ୍ଡୟ୍‌ କ୍ରୀତଦାସୀ ପିକିଡ଼୍‍ତିଙ୍କ୍ କାଇଲ୍‍ତମ୍ । ତାନ୍ ଲୋପେ ମାନ୍ଦାନ୍ ଦେୟାମ୍‍ତଡ଼୍ ଆଦ୍ ମୁନେଙ୍କ୍‌ତାୱୁ ଗଟି କେସମାତ୍‍ତେ । ଆଦ୍ ନାରୁଡ଼ାୱ୍ ବାଗ୍ୟ କେସ୍, ପ୍ରବୁନ୍‍ ସେଙ୍ଗେ ନାର୍‍ଗେ ଡାବ୍‍କ୍ ଗାଡ଼୍‍ସ ମାତ୍‍ତେ ।
ACT 16:17 ଆଦ୍ ପାଉଲ୍ ନୁ ମା ପେର୍‍କେ ପେର୍‍କେ ୱାସ୍ କିଡ଼୍‍କି କେତ୍‍ତେ, “ଇ ନାରୁଡ଼୍ ସାରେତିଙ୍କ୍ ବାଡ଼୍‍ୟଣ୍ଡ୍ ଇଶ୍ୱର୍‌ତେ ଦାସକୀନଡ଼୍‍ । ମିଡ଼୍ ବେଲା ପରିତ୍ରାଣ୍ ପାଏମ୍ ଆଦ୍‍ତିଡ଼୍, ଆଦ୍ ଗଟ୍ ଅଡ଼୍‌ କେତୁତଡ଼୍ ।”
ACT 16:18 ପିକିଡ଼୍ ନାର୍‍ଗେ ଦିନାଯାକ ଇଦ୍‍ରକମ୍ ମାଡ଼୍‍ତେ । ପେର୍‍କେ ପାଉଲ୍ କାଡ଼ାମ୍‍ହାସ୍ ପେର୍‍କେ ମାଲ୍‍ସ୍ ଦେୟାମ୍‍ତିଙ୍କ୍ ଦମକ୍ ଇସ୍‌ କେତ୍‍ତଣ୍ଡ୍, “ଜିସୁ କ୍ରିଷ୍ଟନ୍ ପେଦେର୍‍ତେ ନାନ୍‍ ଆଦେଶ୍‍ ଇଦୁତାନ୍, ତାନାଗାଙ୍କ୍ ପେଇସ୍ ଅନ୍‌,” ଆସୁଟେ ସାଙ୍ଗେ ସାଙ୍ଗେ ଦାୟାମ୍ ଆଦିନାଗାଙ୍କ୍ ପେଇସ୍ ଆତ୍‍ତେ ।
ACT 16:19 ବେସୁଟ୍‌ ତାନ୍ ପ୍ରବୁନ୍‍ ନିଜେତ୍ ଡାବ୍‍କ୍ ଗାଡ଼୍‍ସାନ୍ ଆଶେ ହରାମାଡ଼୍‍ତଡ଼୍ ଇଞ୍ଜ ପୁତ୍‍ତଡ଼୍, ପାଉଲ୍ ନୁ ଶୀଲାଙ୍କ୍ ପଇସ୍ ଟାୱୁନ୍‍ତେ ନାଡ଼୍‍ମେ ମାନ୍ଦାନ୍ ଶାସନ୍‍ କର୍ତ୍ତାନ୍‍ ମୁନ୍‍ନେ ତାତ୍‍ତଡ଼୍‍ ।
ACT 16:20 “ଅଡ଼୍‌‍ ରୋମୀୟ ଶାସନ୍‍ କର୍ତ୍ତାନ୍ ମୁନ୍‍ନେ ତାସ୍ କେତ୍‍ତଡ଼୍, ଇ ନାରୁଡ଼୍ ଇହୁଦୀ, ଅଡ଼୍‌ ମାନ୍‍ ଟାୱୁନ୍‍ତାଗ୍ ଗୋଲ୍‍କ୍ ମାଡ଼ୁତଡ଼୍ ।
ACT 16:21 ଅଡ଼୍‌ ମାନ୍‍ ନିୟମ୍‍ ବିରୁଦ୍ ରୀତିନୀତି ନାଡ଼୍‍ସ୍‍ପୁତଡ଼୍ । ମାମ୍‍ମେ ରୋମ୍‍ ନାଗରିକ, ଆଦିଙ୍କ୍ ଇଦ୍ ରୀତିନୀତି ଗ୍ରହନ୍ ମାଡ଼ାଙ୍କ୍ ପାର୍‍ୱମ୍ ଆୱିଙ୍କ୍ ମାମ୍‍ମେ ପାଲନ୍ ମାଡ଼ାଙ୍କ୍ ପାର୍‍ୱମ୍ ।
ACT 16:22 ମାଲିକିଡ଼୍ ଗଟ୍‍ତାଗ୍ କାଇଲି ଆଗେ ମାନ୍ଦାନ୍ ନାରୁଡ଼୍ ପାଉଲ୍ ନୁ ଶିଲାନ୍ ବିରୁଦ୍‍ତେ ତେଦ୍‍ତଡ଼୍ । ପାଉଲ୍ ନୁ ଶିଲାନ୍ ଚକା କୁସ୍‍ସ୍ପି ଅଡ଼୍‌‍କିଂଙ୍କ୍ ବେତଡୁଡ୍ ତଡ଼୍ ରେଏତାଙ୍କ୍ ଶାସନ୍‍ କର୍ତ୍ତାଲ୍ ଗଟ୍ ହିତ୍‍ତଣ୍ଡ୍ ।
ACT 16:23 ନାର୍‍ଗେ ଦେବ୍‍ ତିତ୍‍ତେ ପେର୍‍କେ ଅଡ଼୍‌‍କିଂଙ୍କ୍ ଜଇଲ୍‍ତାଗ୍ ୱାଟ୍‍ତଡ଼୍ ନୁ ଅଡ଼୍‌‍କିଂଙ୍କ୍ କୁସ୍‍ ୱାଟି ଉଡ଼ାନ୍ ସେଙ୍ଗେ ଜଇଲ୍‍ରକ୍ଷା ମାଡ଼ାନଙ୍କ୍ ନିର୍ଦ୍ଦେଶ୍ ହିତ୍‍ତଣ୍ଡ୍ ।
ACT 16:24 ଇଦ୍ ଗଟ୍ ପାଏମ୍ ଆସ୍ ଜଇଲ୍‍ରକ୍ଷକ୍ ଅଡ଼୍‌‍କିଂଙ୍କ୍ ଅଣ୍ଡୟ୍‌ ଲୋପେତ୍ ବାକ୍‍ଡ଼େତାଗ୍ ୱାଟ୍‍ତଣ୍ଡ୍, ପୁଃଉତେ ମଟଲ୍‍ତାଗ୍ ଅଡ଼ାୱୁ ଡେକାକିଙ୍କ୍ ତଅସିତ୍‍ତଡ଼୍ ।”
ACT 16:25 ନାଟ୍‍ନାର୍କେ ପାଉଲ୍ ନୁ ଶୀଲା ପ୍ରାର୍ତନା ମାଡ଼ମାତ୍‍ତଡ଼୍, ଇଶ୍ୱର୍ ଉଦ୍ଦେଶ୍ୟତେ ପାଟା ପାରମାତ୍‍ତଡ଼୍ ନୁ ବାଗାତ୍ ବନ୍ଦିଡ଼୍ ଇଦ୍ କେଞ୍ଜ ମାତ୍‍ତଡ଼୍ ।
ACT 16:26 ହଟାତ୍ ବୁମିକମ୍ପ ଆତ୍‍ତେ ନୁ ଜଇଲ୍‍ତେ ମୂଲଦୁଆତିଙ୍କ୍ ଉଃହୁତେ । ସାଙ୍ଗେ ସାଙ୍ଗେ ସାରେ ମାର୍‍ କୁଲେମ୍ ଆତ୍‍ତେ ନୁ ସାରେ ବନ୍ଦି ଆଦ୍‍ତନ୍ ଅଡ଼ାଦ୍‌‍ ଇକ୍‌ଲେମ୍‍ କୁସି ରାୟ୍‍ତା ।
ACT 16:27 ତାନେରକ୍ଷା ମାଡ଼ାନଣ୍ଡ୍ ଉଞ୍ଜି ତେଏଦ୍‍ତଣ୍ଡ୍ ନୁ ଜଇଲ୍‍ତେ ମାର୍‍ କୁଲେମ୍ ମାନ୍ଦାନାଦ୍ ଉଡ଼ି ହାଲ୍‍ସ୍‍ତଣ୍ଡ୍ ଯେ ବନ୍ଦିଡ଼୍ ମିର୍‍ତ୍‍ତଡ଼୍; ଆଦିଙ୍କ୍ ଅଣ୍ଡ୍‌ ତାନ୍ ସାକୁ ପେସ୍‍ପିଇ ଆୱ୍‍କାନଙ୍କ୍‌ ତିଆର୍ ଆତ୍‍ତଣ୍ଡ୍ ।
ACT 16:28 ଇତ୍‍କେ ପାଉଲ୍ ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, “ନିଜେ ବାତ୍ କ୍ଷତି ମାଡ଼୍‍ମା । ମାମ୍ ସାରେତମ୍ ଇଗେ ମିନ୍ଦେମ୍ !”
ACT 16:29 ତାନେରକ୍ଷା ମାଡ଼ାନଣ୍ଡ୍ ଡୁବିତାସ୍‍ ଉଡ଼୍‍ତଣ୍ଡ୍ ନୁ ଲୋପେ ମିରିୱାସ୍ ୱାଡ଼୍‍କି ୱାଡ଼୍‍କି ପାଉଲ୍ ନୁ ଶୀଲାନ୍ ଡେକେତ୍ ମଦଲ୍ ରାୟ୍‍ତଣ୍ଡ୍ ।
ACT 16:30 ତାନ୍ ପେର୍‍କେ ଅଡ଼୍‌‍କିଂଙ୍କ୍ ବାୟିଦେ ଆସ୍ ପାଚ୍ରା ମାଡ଼୍‍ତଣ୍ଡ୍, “ଆଜ୍ଞାଲଡ଼ି ! ପରିତ୍ରାଣ୍ ପାଏମ୍ ଆଦାନଙ୍କ୍ ନାକିଂଙ୍କ୍ ବାତ୍ ମାଡ଼େ ୱେୟ୍‍ତିତ୍ ?”
ACT 16:31 ଅଡ଼୍‌ ଉତ୍ତର୍ ହିତ୍‍ତଡ଼୍, “ପ୍ରବୁ ଜିସୁନାଗ୍ ବିଶ୍ୱାସ୍ ମାଡ଼୍‍କେ ମିଇ ପରିବାର୍‍ତେ ସାରେ ତଡ଼୍‌କିଙ୍କ୍‌ ପରିତ୍ରାଣ୍ ଦର୍‍କିତ୍ ।”
ACT 16:32 ତାନ୍‍ପେର୍କେ ଅଡ଼୍‌ ଅଂକିଙ୍କ୍‌ ନୁ ତାମ୍‍ ଲନ୍‍ ତେତାନଡ଼୍‍କିଙ୍କ୍ ସାରେତଡ଼୍‍କ୍ ପ୍ରବୁନ୍ ଗଟ୍ କେତ୍‍ତଡ଼୍ ।
ACT 16:33 ନାର୍‍କେତ୍ ଆଦେ ସାଙ୍ଗେ ସାଙ୍ଗେ ତାନେରକ୍ଷା ମାଡ଼ାନଣ୍ଡ୍ ଅଡ଼୍‌‍କିଂଙ୍କ୍ ଆସ୍ ଅଡ଼ାୱୁ ପୁଣ୍ଡ୍‍କ୍ ସାରେ ନର୍‍ସିତ୍‍ତଣ୍ଡ୍, ମେଣ୍ଡେ ପରିବାରତେ ସାରେତଡ଼୍ ସାଙ୍ଗେ ସାଙ୍ଗେ ଏର୍‍ଦିକ୍ଷା ଗ୍ରହନ୍ ମାଡ଼୍‍ତଡ଼୍ ।
ACT 16:34 ତାନ୍‍ପେର୍କେ ଅଣ୍ଡ୍‌ ପାଉଲ୍ ନୁ ଶିଲାଙ୍କ୍ ତାନ୍ ନିଜେତ୍ ଲୋନ୍‌ ଆସ୍ ତିନ୍ଦାନଙ୍କ୍ ହିତ୍‍ତଣ୍ଡ୍ । ଇଶ୍ୱର୍‌ତାଗ୍ ବିଶ୍ୱାସ୍ ମାଡ଼ିମାନ୍ଦାନ୍ ମାଇଦିଙ୍କ୍ ଅଣ୍ଡ୍‌ ନୁ ତାନ୍ ପରିବାର୍‍ତେ ସାରେତଡ଼୍ ୱେଡ଼୍‍କ୍‍ତଡ଼୍ ।
ACT 16:35 ମେଣ୍ଡେଅନ୍‌ ଦିନ୍ ନାର୍‍କକ୍ ରୋମୀୟ ଶାସନ୍‍ କର୍ତ୍ତାଲ୍ ସିପାହିଡ଼୍‍କ୍‍ ଇଦ୍ ଗଟ୍ ଇସ୍‌ ରହତ୍‍ତଣ୍ଡ୍, “ଆ ନାରୁଡ଼୍‍କିଂଙ୍କ୍ ୱିଡ଼୍‍ସିମୁଟ୍ ।”
ACT 16:36 ଆଦିଙ୍କ୍ ଜଇଲ୍‍ରକ୍ଷକ୍ ପାଉଲ୍‍ତିଙ୍କ୍ କେତ୍‍ତଣ୍ଡ୍, “ଶାସନ୍‍ କର୍ତ୍ତାଲ୍ ନିକିଂଙ୍କ୍ ନୁ ଶିଲାଙ୍କ୍ ମୁକ୍ତି ମାଡ଼ାନଙ୍କ୍ ଗଟ୍ ହିତ୍‍ତଣ୍ଡ୍ । ଇଞ୍ଜେ ମିଡ଼୍ ଇଗାଙ୍କ୍ ଶାନ୍ତିତେ ଆଦ୍‍ପାର୍‍ଦ୍‍ତିଡ଼୍ ।”
ACT 16:37 ଇତ୍‍କେ ପାଉଲ୍ ସିପାହିଡ଼୍‍କ୍ କେତ୍‍ତଣ୍ଡ୍, “ବାତ୍ ଅପରାଦି‍ତାଗ୍ ଦଷି ଆୟ୍‍ୱେ ମାତ୍‍କେ ଗାଲା ଅଡ଼୍‌ ମାକିଂଙ୍କ୍ ରେହେତ୍‍ତଡ଼୍ । ମାମ୍‍ମେ ରୋମୀୟ ନାଗରିକ, ଇତ୍‍କେବା ଅଡ଼୍‌ ମାକିଂଙ୍କ୍ ବନ୍ଦି ମାଡ଼୍‍ତଡ଼୍ । ଇଞ୍ଜେ ମାକିଂଙ୍କ୍ ମିଞ୍ଜ୍‍ସ୍ପି ୱିଡ଼୍‍ସିଦାଙ୍କ୍ ହାଲ୍‍ସୁତଡ଼୍ । ମାମ୍‍ମେ ଇଦ୍ ମାଡ଼ାନଙ୍କ୍ ଇୱମ୍ । ରୋମୀୟ ଶାସନ୍‍ କର୍ତ୍ତାଲ୍ ନିଜେ ଇଗେ ୱାସ୍ ମାକିଂଙ୍କ୍ ମୁକ୍ତ ମାଡ଼ିୱିଣ୍ଡ୍ ।”
ACT 16:38 ସିପାହୀଡ଼୍ ରୋମୀୟ ଶାସନ୍‍ କର୍ତ୍ତାଙ୍କ୍ ଇଦ୍ ଗଟି କେତ୍‍ତଡ଼୍ । ପାଉଲ୍ ନୁ ଶିଲା ରୋମିୟ ନାଗରିକ ଇଞ୍ଜ କେଞ୍ଜି ଅଡ଼୍‌ ୱେର୍‍ତ୍‍ତଡ଼୍ ।
ACT 16:39 ତାନ୍‍ପେର୍କେ ଅଡ଼୍‌ ଗାର୍‍ରେ କ୍ଷମା ପ୍ରାର୍ତନା ମାଡ଼୍‍ତଡ଼୍ ନୁ ଅଡ଼୍‌‍କିଂଙ୍କ୍ ଜଇଲ୍‍ତାଗାଙ୍କ୍ ମୁକ୍ତି ମାଡ଼ି ଟାୱୁନ୍‍ ୱିଡ଼୍‍ସି ଆଦାନଙ୍କ୍ ଅନୁରଦ୍‌‍ ମାଡ଼ି କେତ୍‍ତଣ୍ଡ୍ ।
ACT 16:40 ପାଉଲ୍ ନୁ ଶିଲା କାରାଗାର ୱିଡ଼୍‍ସି ଲୁଦିଆନ୍‌ ଲୋନ୍‌ ଆତ୍‍ତଡ଼୍ । ଆଗେ ଅଡ଼୍‌ ବିଶ୍ୱାସୀଡ଼୍‍କ୍‍ କାଇଲ୍‍ତଡ଼୍ ନୁ ଅଡ଼୍‌‍କିଂଙ୍କ୍ ୱେଡ଼୍‍କା ମାଡ଼ି ଆଦ୍ ପଡ଼୍‍ୟେ ୱିଡ଼୍‍ସ୍‍ତଡ଼୍ ।
ACT 17:1 ପାଉଲ୍ ନୁ ଶୀଲା ଆମ୍ପିପଲି ନୁ ଆପଲ୍ଲୋନିଆ ଇସ୍‌ ଥେସଲନିକୀତାଗ୍ ୱାତ୍‍ତଡ଼୍ । ଆଗେ ଅଣ୍ଡୟ୍‌ ଇହୁଦୀ ଉପାସନା ମାତ୍‍ତେ ।
ACT 17:2 ପାଉଲ୍ ତାନ୍ ଦର୍ମଶାସ୍ତ୍ର ଲେକାମ୍ ଗୁଡ଼୍‍ୟିତାଗ୍ ଆତ୍‍ତଣ୍ଡ୍ । ଆଗେ ମୁଣ୍ଡ୍ ବିଶ୍ରାମ୍‍ବାର୍‍ତେ ନାରୁଡ଼୍ ତଡ଼୍ ଅଣ୍ଡ୍‌ ଆଲୋଚନା ମାଡ଼୍‍ତଣ୍ଡ୍,
ACT 17:3 ଦର୍ମଶାସ୍ତ୍ର ଉଲ୍ଲେଖ ନୁ ବାକ୍ୟା ମାଡ଼ି ପ୍ରମାଣ୍ ମାଡ଼୍‍ତଣ୍ଡ୍ ଯେ, ମସୀହ ଦୁକାମ୍‍ ବୋଗ୍ ଆଦାନାଦ୍ ନୁ ଡଲ୍‍ତାଗାଙ୍କ୍ ତେଏଦାନାଦ୍ ଦର୍‍କାର୍ ମାତ୍‍ତେ । ପାଉଲ୍ କେତ୍‍ତଣ୍ଡ୍, “ବେନ୍ ଜିସୁନ୍ ବିଷୟ୍ ନାନ୍‍ନେ ଗଷନା ମାଡ଼୍‍ତାନ୍, ଅଣ୍ଡ୍‌ ଆ ମସିହ ।”
ACT 17:4 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଇଦ୍ ବିଶ୍ୱାସ୍‍ ପାଉଲ୍ ନୁ ଶୀଲା ତଡ଼୍ କାଇଲ୍‍ତଡ଼୍; ଆଦେପୁଟୁଙ୍କ୍ ନାର୍‍ଗେ ବାଡ଼୍‍ୟେ ନାଟାଙ୍କ୍ ନୁ ଇଶ୍ୱର୍‌ତିଙ୍କ୍ ଉପାସନା ମାଡ଼ାନ୍‍ ଗ୍ରୀକ୍‍ନାରୁଡ଼ାଦ୍‍ ଅଣ୍ଡୟ୍‌ ବେଡ଼୍‍ୟାଦ୍‍ ମାନ୍ଦେ ମିକା ଅଡ଼୍‌ ତଡ଼୍ କାଇଲ୍‍ତେ ।
ACT 17:5 ଇତ୍‍କେ ଇହୁଦୀଡ଼୍ ଇର୍ଷା ମାଡ଼୍‍ତଡ଼୍ ନୁ ବେସ୍‍କ୍‍ତୁଡ଼୍‍ କାରାପ୍ ନାରୁଡ଼୍‍କିଂଙ୍କ୍ ଅଣ୍ଡୟାଗେ ମାଡ଼ି ସାରେ ଟାୱୁନ୍‍ତାଗ୍ ଗୋଲ୍‍କ୍ ମାଡ଼୍‍ତଡ଼୍ । ଅଡ଼୍‌ ପାଉଲ୍ ନୁ ଶୀଲାଙ୍କ୍ ମେହେକି ନାରୁଡ଼୍ ମୁନ୍‍ନେ ତାତାନ୍ ମାଇଦିଙ୍କ୍ ଯେସନ୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁନ୍ ଲନ୍‍ ତିଙ୍କ୍ ଆଞ୍ଜ୍ ଚିଟିରମନ୍‍ ମାଡ଼୍‍ତଡ଼୍ ।
ACT 17:6 ଇତ୍‍କେ ଆଗେ ପାଉଲ୍ ନୁ ଶୀଲା ଦର୍‍କ୍‍ୱାଙ୍କ୍, ଅଡ଼୍‌ ଯେସନ୍ ନୁ ମେଣ୍ଡେ ବେସ୍‍କ୍‍ତୁଡ଼୍‍ ବିଶ୍ୱାସୀଡ଼୍‍କ୍ ନଗର୍‍ତେ ଶାସନ୍‍ କର୍ତ୍ତାନ୍ ବକେତ୍ ପିଡ଼୍‍ଙ୍ଗି ଆସ୍ ଗାଟି ଲେଙ୍ଗ୍‍ଦେ କେତ୍‍ତଡ଼୍, “ଇଡ଼୍ ନାରୁଡ଼୍ ଜଗତ୍‍ ସାରେଏକାମ୍ ଗୋଲ୍‍କ୍ ମାଡ଼ୁତଡ଼୍ ! ଇଞ୍ଜେ ଅଡ଼୍‌ ମାନ୍‍ ଟାୱୁନ୍‍ତାଗ୍ ୱାତ୍‍ତଡ଼୍,
ACT 17:7 ମେଣ୍ଡେ ଯେସନ୍ ଅଡ଼୍‌‍କିଂଙ୍କ୍ ତାମ୍ ଲୋନ୍‌ ନେଃଏତଣ୍ଡ୍ । ଜିସୁ ପେଦେର୍‍ତେ ମେଣ୍ଡେ ୱେରଣ୍ଡ୍ ରାଜାଲ୍ ମିନ୍ଦେଣ୍ଡ୍ ଇଞ୍ଜ କେସ୍ ଅଡ଼୍‌ କାଇସର୍‍ ମହାରାଜା ତେ ସାରେ ନିୟମ୍‍ତିଙ୍କ୍ ବିରୁଦ୍‍ ମାଡ଼ୁତଡ଼୍ ।”
ACT 17:8 ଇଦ୍ ଗଟ୍ କେସ୍ ଅଡ଼୍‌ ନାରୁଡ଼୍ ନୁ ଶାସନ୍‍ କର୍ତ୍ତାଲ୍ଡ଼୍‍ ଲୋପେ ଗାଟି କପାମ୍ ନୁ ଗଲ୍‍କ୍ ମାଡ଼୍‍ତଡ଼୍ ।
ACT 17:9 ଶାସନ୍‍ କର୍ତ୍ତାଲଡ଼୍ ଯେସନ୍ ନୁ ବିଶ୍ୱସୀଡ଼ାଗାଙ୍କ୍ ଡାବ୍‍କ୍ ଆସ୍ ଅଡ଼୍‌‍କିଂଙ୍କ୍ ଜାମିନ୍ ମାଡ଼ି ୱିଡ଼୍‍ସିତ୍‍ତଡ଼୍ ।
ACT 17:10 ନାର୍କା ଆତ୍‍ତାଙ୍କ୍ ବିଶ୍ୱାସୀଡ଼୍ ପାଉଲ୍ ନୁ ଶୀଲାଙ୍କ୍ ବେରିଆତାଗ୍ ରହସିତ୍‍ତଡ଼୍ । ଅଡ଼୍‌ ଆଗେ ହେୱୁସ୍ ଇହୁଦୀଡ଼୍‍ ପ୍ରାର୍ତନାତାଗ୍ ଆତ୍‍ତଡ଼୍ ।
ACT 17:11 ଥେସଲନିକୀତେ ନାରୁଡ଼ାଗାଙ୍କ୍ ଆଗେତ୍ ନାରୁଡ଼୍ ଅଦିକ୍‌ ଦୟାବାନ୍ ମାତ୍‍ତଡ଼୍ । ଅଡ଼୍‌ ଗାଟି ଆଗ୍ରହତଡ଼୍ ଶିଷ୍ୟଡ଼ାଦ୍ ଶିକ୍ଷା କେଞ୍ଜ୍‍ତଡ଼୍ ନୁ ପାଉଲ୍‍ତାଦ୍ ପାଚ୍ରାମାଡ଼ି ଗଟ୍‍ତେ ସତ୍ ପୁନ୍ଦାନ୍ ମାଇଦିଙ୍କ୍ ଅଡ଼୍‌ ନିତାଲ୍ ଦର୍ମଶାସ୍ତ୍ର କାର୍‍ତଡ଼୍ ।
ACT 17:12 ଅଡ଼୍‌ ଲୋପେଙ୍କ୍ ନାର୍‍ଗେ ନାରୁଡ଼୍ ବିଶ୍ୱାସ୍ ମାଡ଼୍‍ତଡ଼୍ । ନାର୍‍ଗେ ଗ୍ରୀକ୍ ନାଟାଙ୍କ୍ ନୁ ଗ୍ରୀକ୍ ନାରୁଡ଼୍ ବିଶ୍ୱାସ୍‍ତଡ଼୍ କାଇଲ୍‍ତଡ଼୍ ।
ACT 17:13 ଇତ୍‍କେ ବେସୁଟ୍‌ ଥେସଲନିକୀ ଇହୁଦୀଡ଼୍ କେଞ୍ଜ୍‍ତଡ଼୍ ଯେ ବେରିଆତାଗ୍ ମିକା ପାଉଲ୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ୁତଣ୍ଡ୍, ଅଡ଼୍‌ ଆଗେ ୱାସ୍ ଗଲ୍‍କ୍ ମାଡ଼ାନଙ୍କ୍ ନାରୁଡ଼୍‍କିଂଙ୍କ୍ କେତ୍‍ତଡ଼୍ ।
ACT 17:14 ସାଙ୍ଗେ ସାଙ୍ଗେ ବିଶ୍ୱାସୀଡ଼୍ ପାଉଲ୍‍ତିଙ୍କ୍ ଗଦାଡ଼୍‍ତେ ହାଞ୍ଚିନାଗ୍ ରହସିତ୍‍ତଡ଼୍; ଇତ୍‍କେ ଶୀଲା ନୁ ତୀମତି ଇର୍‍ୱୁଡ଼୍ ବେରିଆତାଗ୍ ମାତ୍‍ତଡ଼୍ ।
ACT 17:15 ପାଉଲ୍‍ତିଙ୍କ୍ ଅସିସ ମାନ୍ଦାନ୍ ନାରୁଡ଼୍ ଅନ୍‌ ତଡ଼୍ ଆଥେନ୍‍ସ୍ ହେୱୁନା ଆତ୍‍ତଡ଼୍ । ଆଗାଙ୍କ୍ ଅଡ଼୍‌ ବରିଆତାଗ୍ ମାଲ୍‍ସ୍ ଶୀଲା ନୁ ତୀମତିଙ୍କ୍ କେତ୍‍ତଡ଼୍, ଅଡ଼୍‌ ସିଟ୍‍ପାଟ୍ ପାଉଲ୍‍ତଡ଼୍ କାଇଲିଡ଼୍ ଇଞ୍ଜ ପାଉଲ୍ ନିର୍ଦ୍ଦେଶ୍ ହିତ୍‍ତଣ୍ଡ୍ ।
ACT 17:16 ଆଥେନ୍‍ସ୍‍ତାଗ୍ ଶୀଲା ନୁ ତୀମତିଙ୍କ୍ କେପିମାନ୍ଦାନ୍ ୱେଲେ ନଗରୀ ପୁତ୍‍ଲାମ୍‍ ଦେୟାକ୍ ଆତ୍ମାତେ ବର୍ତ୍ତି ଆସ୍ ମାନ୍ଦାନାଦ୍ ଉଡ଼ି ପାଉଲ୍ ଗାଟି କପାମ୍ ଆତ୍‍ତଣ୍ଡ୍ ।
ACT 17:17 ଆଦିଙ୍କ୍ ଅଣ୍ଡ୍‌ ସମାଜ୍ ଲୋତ୍‍ତାଗ୍ ଇହୁଦୀଡ଼୍ ତଡ଼୍ ଇଶ୍ୱର୍‌ତିଙ୍କ୍ ଉପାସନା ମାଡ଼ାନ୍ ଅଣଇହୁଦିଡ଼୍ ତଡ଼୍ ଇଦ୍ ବିଷୟ୍‍ତେ ନିତାଲ୍ ଆଲୋଚନା ମାଡ଼ାନଙ୍କ୍ ପସ୍ପ୍‍ତଣ୍ଡ୍ । ସହର୍‍ତେ ଚକକିନାଗ୍ ଆଦାୱାଦା ମାଡ଼ମାନ୍ଦାନ୍ ନାରୁଡ଼୍ ତଡ଼୍ ଆଦେ ବିଷୟ୍ ଆଲୋଚନା ମାଡ଼୍‍ତଣ୍ଡ୍ ।
ACT 17:18 ବେସ୍‍କ୍‍ତୁଡ଼୍‍ “ଏପିକ୍ୟୁରିଅନ୍‌ ନୁ ଷ୍ଟୋଇକ୍,” ଶିକ୍ଷା ଗୁରୁଡ଼୍‍ତଡ଼୍ ଅନାଦ୍‌ ଯୁକ୍ତିତର୍କ ଆତ୍‍ତେ । ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ କେତ୍‍ତଡ଼୍, “ଇଣ୍ଡ୍ ମୁର୍କ ବାତ୍ କେତାନଙ୍କ୍ ଆଲ୍‍ସୁତଣ୍ଡ୍ ?” ବାଗାତ୍ ନାରୁଡ଼୍ କେତ୍‍ତଡ଼୍, “ବିଦେଶୀ ଦେୟାକିଙ୍କ୍ ପ୍ରଚାର୍ ମାଡ଼ାନ୍ ଲେକାମ୍ ହେର୍କା ଆଦୁତ୍‍ତେ ।” ଜିସୁ ନୁ ମେଣ୍ଡନ୍‍ଦାମ୍ ପୁନରୁତାନ୍ ଆଦାନ୍‍ ବିଷୟ୍ ସୁସମାଚାର୍‍ ପ୍ରଚାର୍ ମାଡ଼ମାନ୍ଦାନାଦ୍ କେଞ୍ଜି ଅଡ଼୍‌ ଇଦ୍ କେତ୍‍ତଡ଼୍ ।
ACT 17:19 ଆଦିଙ୍କ୍ ଅଡ଼୍‌ ପାଉଲ୍‍ତିଙ୍କ୍ ପଇସ୍ ଆତ୍‍ତଡ଼୍ ନୁ ଅଂକିଙ୍କ୍‌ ଏରୀୟପାଗସ୍‍ ମିଟିଙ୍କ୍‍ତାଗ୍ ତାସ୍ କେତ୍‍ତଡ଼୍, “ନିମ୍‍ ବେନ୍ ପୁନାଦ୍ ଶିକ୍ଷା ବିଷୟ୍‍ତେ କେତୁତିନ୍, ଆଦ୍ ବିଷୟ୍ ମାମ୍‍ମେ ପୁନ୍ଦାନଙ୍କ୍ ଇଚ୍ଛା ମାଡ଼ୁତମ୍ ।
ACT 17:20 ନିମ୍‍ କେସମାନ୍ଦାନ୍ ବେସ୍‍କେ ଗଟି ମାକିଂଙ୍କ୍ ଆଦ୍‍ବୁତ୍‌ ମାଡ଼ୁତ୍ । ମାମ୍‍ମେ ଆଦିନ୍ ଇତ୍‍କେ ପୁନ୍ଦାନଙ୍କ୍ ଚାଏମ୍‍ ଅଦୁତମ୍ ।”
ACT 17:21 ଆଥେନୀୟତେ ନାରୁଡ଼୍ ନୁ ଆଗେ ବାସେ ମାଡ଼ମାନ୍ଦାନ୍ ବିଦେଶୀଡ଼୍ ପୁନାଦ୍ ବିଷୟ୍ କେଞ୍ଜାନଙ୍କ୍ ନୁ କେତାନଙ୍କ୍ ଗାଟି ପସନ୍ଦ୍ ମାଡ଼୍‍ତଡ଼୍ । ଇଗେ ଅଡ଼୍‌ ନାର୍‍ଗେ ଜେଲ୍‍ ମାତ୍‍ତଡ଼୍ ।
ACT 17:22 ପାଉଲ୍ ମିଟିଙ୍ଗ୍‍ତେ ମୁନ୍‍ନେ ନିସ୍ କେତ୍‍ତଣ୍ଡ୍, “ଆଥେନୀୟ ନାରୁଡ଼୍, ମିଡ଼୍ ସାରେତଡ଼୍ ଗାଟି ଦାର୍ମିକ୍ ଇଞ୍ଜ ହାଲ୍‍ସୁତାନ୍ ।
ACT 17:23 ନାନ୍ ମିୟାଦ୍ ନଗର୍‍ତାଗ୍ ଉଡାନ୍‍ୱେଲେ ମିୱାଦ୍ ପୂଜା ମାଡ଼ାନ୍ ଜାଗେତିଙ୍କ୍ ଉଡ଼୍‍ତାନ୍ । ଅଣ୍ଡୟ୍‌ ଜଜ୍ଞବେଦିତ୍ ପର୍‍ର ‘ଅଣ୍ଡୟ୍‌ ପୁନ୍‍ୱାଦ୍ ଇଶ୍ୱର୍‌ତେ ଉଦ୍ଦେଶ୍ୟତେ,’ ଲେକିମାନ୍ଦାନାଦ୍ ଗାଲା ଉଡ଼୍‍ତାନ୍ । ମିଡ଼୍ ପୁନ୍‍ୱେକନ୍‍ସ୍ ବେନଙ୍କ୍ ପୂଜା ମାଡ଼ୁତିଡ଼୍, ଇଞ୍ଜେ ଅନାଦ୍‌ ଗଟ୍ ମିକିଂଙ୍କ୍‍ କେତୁତାନ୍ ।
ACT 17:24 ଇଶ୍ୱର୍ ଜଗତ୍ ନୁ ଆଗେ ମାନ୍ଦାନ୍ ସାରେ ଜିନିଷ୍ ତିଆର୍ ମାଡ଼୍‍ତଣ୍ଡ୍ । ଅଣ୍ଡ୍‌ ସ୍ୱର୍ଗ ନୁ ପୃତିବିତେ ପ୍ରବୁ । ନାରୁଡ଼୍ କାୟ୍‍ଦେ ତିଆର୍ ମାଡ଼୍‍ତେ ମନ୍ଦିର୍‍ତାଗ୍ ଅଣ୍ଡ୍‌ ବାସେ ମାଡ଼ଣ୍ଡ୍ ।
ACT 17:25 ମାନାଡ଼୍ ପାଡ଼୍‍ୟି ମାଡ଼ି ଅଂକିଙ୍କ୍‌ ହିଦାନ୍ ଲେକାମ୍ ବାତ୍ ସୁସ୍ଥ ଆଦାଙ୍କ୍ ଅଣ୍ଡ୍‌ ଇଚ୍ଛା ମାଡ଼ଣ୍ଡ୍; ବାତେଙ୍କ୍ଇତ୍‍କେ ଅଣ୍ଡ୍‌ ସାରେତଡ଼୍‌କିଂଙ୍କ୍ ଜିୱୁଣ୍ଡ୍, ନେସ୍କାନାଲ୍‌ଦ୍ ନୁ ସାରେ ଦର୍‍କାର୍ ଜିନିଷ୍ ହିତ୍‍ତଣ୍ଡ୍ ।
ACT 17:26 ୱେରଣ୍ଡ୍ ନାରୁଣ୍ଡ୍‍ତାଗାଙ୍କ୍ ଅଣ୍ଡ୍‌ ସାରେ ନାରୁଡ଼୍ ଜାତ୍‍ତିଙ୍କ୍ ତିଆର୍ ମାଡ଼୍‍ତଣ୍ଡ୍ ନୁ ଅନାଦ୍‌ ନିର୍ଦ୍ଦେଶ୍‍ତେ ଅଡ଼୍‌ ପୃତିବିତାଗ୍ ୱେକ୍ ୱେକ୍ ନାର୍‍କିନାଗ୍ ବାସେ ମାଡ଼ୁତଡ଼୍ । ବେନ୍ ସମୟ୍‍ତେ, ବେନ ବେଗେ ବାସେ ମାଡ଼ିତନ୍, ମୁନେତ୍‍କେ ଇଶ୍ୱର୍ ଆଦ୍ ତିଆର୍ ମାଡ଼୍‍ତଣ୍ଡ୍ ।
ACT 17:27 ଅନ୍‌‍ୱାଦ୍ ଉଦେଶ୍ୟ ମାତ୍‍ତେ, ସାରେତଡ଼୍ ବେଲା ଅଂକିଙ୍କ୍‌ ମେହେକି ଅଂକିଙ୍କ୍‌ ଦର୍‍ସ୍କିତଡ଼୍‍ । ଇତ୍‍କେବା ଇଶ୍ୱର୍ ବେନନାଗାଙ୍କ୍ ଜେକେ ଇଲାଣ୍ଡ୍ ।”
ACT 17:28 ଇଦ୍ ବିଷୟ୍‍ତେ ବେନ ୱେରଣ୍ଡ୍ କେତୁତଣ୍ଡ୍, “ଅନାଗେ ମାୱାଦ୍ ଜିୱୁନ୍‍ତାଦ୍ ବାଦ୍‍କାନାଦ୍‍, ଉଡାନାଦ୍‍ ନୁ ମାନ୍ଦାନାଦ୍‍ ମିନ୍ଦେ ।” ମିଇ କବିଡ଼ାଗାଙ୍କ୍ ବେସ୍‍କ୍‍ତୁଡ଼୍‍ କେତୁତଡ଼୍, “ମାମ୍‍ମେ ଗାଲା ଅନ୍‌ ମାର୍‍କ୍ ।”
ACT 17:29 ମାମ୍‍ମେ ଇଶ୍ୱର୍‌ତେ ମାର୍‍କ୍ ଆସ୍ ମାନ୍ଦାନ୍ ମାଇଦିଙ୍କ୍ ନାରୁଡ଼୍ ତିଆର୍ ମାଡ଼୍‍ତେ ସୁନା, ରୁପା ବା କାଲ୍‍ତଡ଼୍ ତିଆର୍ ଆତ୍‍ତେ ପୁତ୍‍ଲାମ୍‍ ଲେକେମ୍ ଇଶ୍ୱର୍‌ତେ ପୁଟୁଙ୍କ୍ ହାଲ୍‍ସାଙ୍କ୍‍ ପାର୍‍ୱାଡ଼୍‍ ।
ACT 17:30 ନାରୁଡ଼୍ ଇଶ୍ୱର୍‌ତିଙ୍କ୍ ପୁନ୍‍ୱେ ୱେଲେ ଅଣ୍ଡ୍‌ ଦଷ୍ ପୟ୍‍ୱେ ମାତ୍‍ତଣ୍ଡ୍, ଇତ୍‍କେ ଇଞ୍ଜେ ସାରେତଡ଼୍‍ ଅନୁତାପ ମାଡ଼ି ଅଡ଼ାଦ୍‌ ପାପାମ୍‍ ହାର୍‍ତାଗାଙ୍କ୍ ମାଲ୍‍ଦାନ୍ ମାଇଦିଙ୍କ୍ ଗଟ୍ ଇଦୁତଣ୍ଡ୍ ।
ACT 17:31 ଅଣ୍ଡ୍‌ ଅଣ୍ଡୟ୍‌ ଦିନ୍ ହେଞ୍ଚ୍‍ତଣ୍ଡ୍ । ଆଦ୍ ଦିନ୍ ଅଣ୍ଡ୍‌ ତାନ୍ ହେଞ୍ଚ୍‍ତେ ନାରୁନ୍ ତଡ଼୍ ସାରେ ଜଗତ୍‍ ତାଦ୍ ନ୍ୟାୟ ବିଚାର୍ ମାଡ଼ିତନ୍ । ଆ ନାରୁଙ୍କ୍ ପୁନର୍ଜିବୀତ୍ ମାଡ଼ାନ୍ ତଡ଼୍ ଅଣ୍ଡ୍‌ ଇଦ୍ ଗଟ୍‍ତାଦ୍ ସତ୍‍ ସାରେତଡ଼୍‌କିଂଙ୍କ୍ କେସ୍‍ମିନ୍ଦେଣ୍ଡ୍ ।
ACT 17:32 ପାଉଲ୍‍ତାଗାଙ୍କ୍ ପୁନରୁତାନ୍ ବିଷୟ୍ କେଞ୍ଜି ଅଡ଼୍‌ ଲୋପେ ବେସ୍‍କ୍‍ତୁଡ଼୍‍ ଅଂକିଙ୍କ୍‌ ପାସ୍କ୍‍ତଡ଼୍, ବାତେଙ୍କ୍ଇତ୍‍କେ ବାଗାତ୍ ନାରୁଡ଼୍ କେତ୍‍ତଡ଼୍, “ନିୟାଗାଙ୍କ୍ ମାମ୍‍ମେ ଇଦ୍ ବିଷୟ୍ ମେଣ୍ଡନ୍‍ନ୍ଦାମ୍ କେଞ୍ଜାନଙ୍କ୍ ଇଚ୍ଛା ମାଡ଼ୁତମ୍ ।”
ACT 17:33 ଆଦ୍‍ନାଣ୍ଡ୍ ମିଟିଙ୍ଗ୍ ତେର୍‍ସ୍‍ପି ପାଉଲ୍ ଦବ୍‍ଆତ୍‍ତଣ୍ଡ୍ ।
ACT 17:34 ଡାୟୋନିସିଆସ୍ ପେଦେର୍‍ତେ ମିଟିଙ୍ଗ୍‍ତଣ୍ଡ୍ ୱେରଣ୍ଡ୍ ନାରୁଙ୍କ୍, ଦାମାରୀ ପେଦେର୍‍ତେ ଅଣ୍ଡୟ୍‌ ନାଟାଡ଼୍ ନୁ ମେଣ୍ଡେ ବେସ୍‍କ୍‍ତୁଡ଼୍‍ ନାରୁଡ଼୍ ବିଶ୍ୱାସ୍ ମାଡ଼୍‍ତଡ଼୍ ନୁ ଅନ୍‌ ତଡ଼୍ କାଇଲ୍‍ତଡ଼୍ ।
ACT 18:1 ଇଦିନ୍‍ପେର୍କେ ପାଉଲ୍ ଆଥେନ୍‍ସ୍ ୱିଡ଼୍‍ସି କରିନ୍ଥୀୟତାଗ୍ ଆତ୍‍ତଣ୍ଡ୍ ।
ACT 18:2 ଆଗେ ଅଣ୍ଡ୍‌ ପନ୍ତସ୍‍ତାଗ୍ ଜନମ୍ ମାଡ଼ିମାନ୍ଦାନ୍ ଆକ୍ୱିଲା ପେଦେର୍‍ତଣ୍ଡ୍ ୱେରଣ୍ଡ୍ ଇହୁଦୀଙ୍କ୍ କାଇଲ୍‍ତଣ୍ଡ୍ । ସମ୍ରାଟ୍ କ୍ଲଡିୟସ୍‍ ସାରେତଡ଼୍ ଇହୁଦୀଡ଼୍‍କ୍ ରୋମ୍ ୱିଡ଼୍‍ସାନଙ୍କ୍ ଗଟ୍ ହିତ୍‍ତାଙ୍କ୍, ଅଣ୍ଡ୍‌ ବେସ୍କ୍‍ଦିନା ମୁନେନ୍ ତାନ୍ ମୁତ୍‍ତେ ପ୍ରିସ୍କିଲାନ୍‍ ତଡ଼୍ ଇତାଲିଆକନ୍‌ସ୍‍ ୱାସ୍‍ମାତ୍‍ତଣ୍ଡ୍ ।
ACT 18:3 ପାଉଲ୍ ଅଂକିଙ୍କ୍‌ ଉଡ଼ାନଙ୍କ୍ ଆଞ୍ଜ୍ ଅଡ଼୍‌ ତଡ଼୍ ବାସେ ମାଡ଼୍‍ତଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ଗାଲା ଅଡ଼୍‌ ଲେକାମ୍ ତମ୍ବୁ ତିଆର୍ ମାଡ଼ି ବାଦ୍‍କମାତ୍‍ତଣ୍ଡ୍‍ ।
ACT 18:4 ଇହୁଦୀ ଇତ୍କେ ଗ୍ରୀକ୍‍ ନାରୁଡ଼୍‍ତେ ମନ୍‍ତାଗ୍ ପ୍ରବୁଙ୍କ୍ ବିଶ୍ୱାସ୍ ମାଡ଼ାନ୍ ମାଇଦିଙ୍କ୍ ସାରେ ବିଶ୍ରାମ୍‍ଦିନ୍ ଅଣ୍ଡ୍‌ ପ୍ରାର୍ତନା ଲୋତ୍‍ତାଗ୍ ଆଲୋଚନା ମାଡ଼ମାତ୍‍ତଣ୍ଡ୍ ।
ACT 18:5 ଶୀଲା ନୁ ତୀମତି ମାସିଦୋନିଆତାଗାଙ୍କ୍ ମାଲ୍‍ସ୍ ୱାତ୍‍ତେ ପେର୍‍କେ ପାଉଲ୍ ଇହୁଦୀଡ଼୍ ଗାର୍‍ରେ ଜିସୁନ୍ ସୁସମାଚାର୍ ପ୍ରଚାର୍ ମାଡ଼୍‍ତଣ୍ଡ୍ ନୁ ଜିସୁଙ୍କ୍ ମସୀହ ଇଞ୍ଜ କେତ୍‍ତାନ୍ ସେଙ୍ଗେ ସାକ୍ଷ୍ୟ ହିତ୍‍ତଣ୍ଡ୍ ।
ACT 18:6 ଇତ୍‍କେ ଅଡ଼୍‌ ଅଂକିଙ୍କ୍‌ ଅତ୍ୟାଚାର୍ ମାଡ଼ି ଅଂକିଙ୍କ୍‌ ନିନ୍ଦେ ମାଡ଼୍‍ତାଙ୍କ୍, ଇଦିନାଦ୍ ପ୍ରତିବାଦ୍ ମାଡ଼ି ଅଣ୍ଡ୍‌ ନିଜେତ୍ ସକେତାଦ୍ ଦୁମ୍ କାଇସ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଯଦି ମିଡ଼୍ ଦଂସଆଦ୍‌ତିଡ଼୍, ଆଲେକେ ମିଡ଼୍ ନିଜେ ଦାୟି ଆଦ୍‍ତିଡ଼୍ । ନାନ୍ ଇଦିନ୍ ମାଇଦିଙ୍କ୍ ଦାୟି ଆୟନ୍ । ଇଞ୍ଜେ ନାନ୍ ଅଣଇହୁଦୀଡ଼୍ ଗାର୍‍ରେ ଆଦ୍‍ତାନ୍ ।”
ACT 18:7 ଆଦିଙ୍କ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ୱିଡ଼୍‍ସି ଇଶ୍ୱର୍‌ତିଙ୍କ୍ ଉପାସନା ମାଡ଼ମାନ୍ଦାନ୍ ତିତସ୍ ଯୁସ୍ତ ପେଦେର୍‍ତେ ୱେରଣ୍ଡ୍ ଅଣଇହୁଦୀନ୍ ଲୋନ୍‌ ଆତ୍‍ତଣ୍ଡ୍ । ଯୁସ୍ତନ୍ ଲନ୍‍ ଗୁଡ଼୍‍ୟିତେ ବକେତ୍ ମାତ୍‍ତେ ।
ACT 18:8 ଗୁଡ଼୍‍ୟିତେ ବାଡ଼୍‍ୟଣ୍ଡ୍ କ୍ରିଷ୍ଟପସ୍ ନୁ ତାମ୍ ପରିବାର୍‍ତେ ସାରେତଡ଼୍ ପ୍ରବୁନାଗ୍ ବିଶ୍ୱାସ୍ ମାଡ଼୍‍ତଡ଼୍ ନୁ କରନ୍ଥିୟତେ ମେଣ୍ଡେ ନାର୍‍ଗେ ନାରୁଡ଼୍ ପାଉଲ୍‍ତେ ଶିକ୍ଷା କେଞ୍ଜି ବିଶ୍ୱାସ୍ ମାଡ଼୍‍ତଡ଼୍ ନୁ ବାତିସ୍ମ ଆତ୍‍ତଡ଼୍ ।
ACT 18:9 ଅଣ୍ଡୟ୍‌ ନାର୍‍କେ ପାଉଲ୍ ଅଣ୍ଡୟ୍‌ ଦର୍ଶନ୍ ଉଡ଼୍‍ତଣ୍ଡ୍, ଦର୍ଶନ୍‌ତାଗ୍ ପ୍ରବୁ ଅଂକିଙ୍କ୍‌ କେତ୍‍ତଣ୍ଡ୍, “ୱେର୍‍ମା, ପ୍ରଚାର୍ ମାଡ଼ମାନ୍, ଆଦିଙ୍କ୍ ୱିଡ଼୍‍ସ୍‍ମା,
ACT 18:10 ବାତେଙ୍କ୍ଇତ୍‍କେ ନାନ୍ ନି ତଡ଼୍ ତଡ଼୍ ମିନ୍ଦେନ୍ । ବେନ ନିୟାଦ୍ କ୍ଷତି ମାଡ଼ାଙ୍କ୍ ପାର୍‍ୱଣ୍ଡ୍, ବାତେଙ୍କ୍ଇତ୍‍କେ ଇଦ୍ ନଗର୍‍ତାଗ୍ ନାର୍‍ଗେ ନାରୁଡ଼୍ ନାୟାଗ୍ ମିନ୍ଦେଡ଼୍‍ ।”
ACT 18:11 ଆଦିଙ୍କ୍ ପାଉଲ୍ ଆଗେ ଇଶ୍ୱର୍‌ତେ ବାକ୍ୟ ବିଷୟ୍‍ତେ ଶିକ୍ଷା ଇସ୍‌ ଅଣ୍ଡୟ୍‌‍ ହେଣ୍ଡ୍‍ ଆରୁ ନେଲ୍‍ଞ୍ଜ୍‍କ୍‍ ମାତ୍‍ତଣ୍ଡ୍ ।
ACT 18:12 ଗାଲିୟୋ ଆକାୟାତେ ରୋମୀୟ ଶାସନ୍‍ ମାଡ଼ାନଣ୍ଡ୍‍ ମାନ୍ଦାନ୍ ୱେଲେ, ଇହୁଦୀଡ଼୍ ଅଣ୍ଡୟାଗେ ହାସ୍ ପାଉଲ୍‍ତିଙ୍କ୍ ପଇସ୍ ବିଚାର୍ ଲୋତ୍‍ତାଗ୍ ଆତ୍‍ତଡ଼୍ ।
ACT 18:13 ଅଡ଼୍‌ କେତ୍‍ତଡ଼୍, “ଇ ନାରୁଣ୍ଡ୍‍ ମୋଶାନ୍‌‌ ନିୟମ୍‍ ବିରୁଦ୍ ରୀତିତେ ଇଶ୍ୱର୍‌ତେ ଉପାସନା ମାଡ଼ାନଙ୍କ୍ ନାରୁଡ଼୍‍କିଂଙ୍କ୍ କେତୁତଣ୍ଡ୍ ।”
ACT 18:14 ପାଉଲ୍ ଉତ୍ତର୍ ହିଦାଙ୍କ୍ ତିଆର୍ ଆତ୍‍ତେ ୱେଲେ, ଗାଲିୟୋ ଇହୁଦୀଡ଼୍‍କ୍ କେତ୍‍ତଣ୍ଡ୍, “ଯଦି ଇଗେ ବାତ୍ ଦଷ୍ ବା ଅପରାଦ୍‌ ମାନ୍‍ତେ, ଆଲେକେ ମିକିଂଙ୍କ୍ ବିଶ୍ୱାସ୍ ମାଡ଼ି ମିଇ ଗଟି କେଞ୍ଜାନାଦ୍ ନାକିଂଙ୍କ୍ ଯୁକ୍ତିତର୍କ ଆଦ୍‍ତେ ।
ACT 18:15 ଇତ୍‍କେ ଇଦ୍ ମାମଲା ମାତର୍‍ ମିୟାଦ୍ ନିଜେତ୍ ନିତିନିୟମ୍‌, ବାକ୍ୟ ନୁ ପେଦେର୍‍ତେ ମାଇଦିଙ୍କ୍ ଆସ୍ ମାନ୍ଦାନ୍ ସେଙ୍ଗେ ମିଡ଼୍ ନିଜେ ଇଦିନାଦ୍ ବିଚାର୍ କର୍ତ୍ତାଲ୍ । ନାନ୍ ମୋଶାନ୍‌‌ ନିୟମ୍‍ ବିଷୟ୍, ବିଚାର୍ ମାଡ଼ନ୍ ।”
ACT 18:16 ଇଦ୍ କେସ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ବିଚାର୍ ଲୋତ୍‍ତାଗାଙ୍କ୍ ତଲ୍‍ତଣ୍ଡ୍ ।
ACT 18:17 ଅଡ଼୍‌ ଉସୁଲ୍‍ତେ ବାଡ଼୍‍ୟଣ୍ଡ୍ ସସ୍ଥନସ୍‍ତିଙ୍କ୍ ପଇସ୍ ବିଚାର୍ ଲୋତ୍‍ତେ ମୁନ୍‍ନେ ଦେବ୍‍ ରେହେତ୍‍ତଡ଼୍ । ଇତ୍‍କେ ଗାଲିୟୋ ଆଦ୍ ବିଷୟ୍‍ତିଙ୍କ୍ ଦ୍ୟାନ୍ ହିୱଣ୍ଡ୍ ।
ACT 18:18 ପାଉଲ୍ କରିନ୍ଥତାଗ୍ ବିଶ୍ୱାସୀଡ଼୍ ତଡ଼୍ ନାର୍‍ଗେ ଦିନା ବାସେ ମାଡ଼୍‍ତଣ୍ଡ୍ । ତାନ୍‍ପେର୍କେ ଅଡ଼୍‌‍କିଂଙ୍କ୍ ୱିଡ଼୍‍ସି ପ୍ରିସ୍କିଲା ନୁ ଆକ୍ୱିଲାନ୍ ତଡ଼୍ ସିରିଆତାକ୍ ଏର୍‍ଦାଗ୍ ଆତ୍‍ତଡ଼୍ । ସେଂକ୍ରିୟାତାଗାଙ୍କ୍ ଏର୍‍ଦାଲା ୱେୟିଦାନ୍ ମୁନେଙ୍କ୍ ଅନାଦ୍‌ ଅଣ୍ଡୟ୍‌ ବ୍ରତ ମାତ୍‍ତାଙ୍କ୍‍ ଅଣ୍ଡ୍‌ ତାନ୍ ତାଲ୍‍ତିଙ୍କ୍ ଟାଙ୍ଗ୍‍ରା ମାଡ଼୍‍ତଣ୍ଡ୍ ।
ACT 18:19 ଅଡ଼୍‌ ଏଫିସସ୍‌ତାଗ୍ ହେୱୁତ୍‍ତେ ପେର୍‍କେ ପାଉଲ୍ ପ୍ରିସ୍କିଲା ନୁ ଆକ୍ୱିଲାତିଙ୍କ୍ ବିଦାୟ୍ ହିତ୍‍ତଣ୍ଡ୍ । ଅଣ୍ଡ୍‌ ଆଗେ ପ୍ରାର୍ତନା ସବାତାଗ୍‍ ଆଞ୍ଜ୍ ଇହୁଦୀଡ଼୍‌ତଡ଼୍ ଆଲୋଚନା ମାଡ଼୍‍ତଣ୍ଡ୍ ।
ACT 18:20 ନାରୁଡ଼୍ ଅଂକିଙ୍କ୍‌ ମେଣ୍ଡେ ନାର୍‍ଗେ ଦିନା ମାନ୍ଦାନଙ୍କ୍ କେତ୍‍ତଣ୍ଡ୍, ଇତ୍‍କେ ଅଣ୍ଡ୍‌ ରାଜି ଆୟଣ୍ଡ୍ ।
ACT 18:21 ଆଦ୍‍ଦାନ୍ ୱେଲେ ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, “ଯଦି ଇଶ୍ୱର୍‌ତାଦ୍ ଇଚ୍ଛା ମାନ୍‍ତେ, ନାନ୍ ମିଇ ବକେତ୍ ମାଲ୍‍ସ୍ ୱାଦ୍‍ତାନ୍ ।” ତାନ୍‍ପେର୍କେ ଅଣ୍ଡ୍‌ ଏର୍‍ଜାହାଜ୍ ତଡ଼୍ ଏଫିସସ୍‌ ୱିଡ଼୍‍ସି ଦବ୍‍ଆତ୍‍ତଣ୍ଡ୍ ।
ACT 18:22 କାଇସରିଆ ହେୱୁସ୍ ଆଗାଙ୍କ୍ ଅଣ୍ଡ୍‌ ଯିରୁଶାଲେମ୍ ଆତ୍‍ତଣ୍ଡ୍ ନୁ ମଣ୍ଡଲିତିଙ୍କ୍ ନମସ୍କାର୍‍ ମାଡ଼ି ଆଗାଙ୍କ୍ ଅନ୍‌ଥିୟୋକ୍‍ ଆତ୍‍ତଣ୍ଡ୍ ।
ACT 18:23 ଆଗେ ବେସ୍କ୍‍ଦିନା ମାତ୍‍ତେ ପେର୍‍କେ ମେଣ୍ଡେ ତାଆକି ଆଞ୍ଜ୍‍ ଗାଲାତୀୟ ନୁ ଫ୍ରୁଗିୟା ପଡ଼ିୟେତ୍ ନାଡ଼୍‍ମେ ଇସ୍‌ ଆତ୍‍ତଣ୍ଡ୍ ନୁ ହାର୍‍ଦାଗ୍ ବିଶ୍ୱାସୀଡ଼୍‍କ୍ ଅଡ଼ାଦ୍‌ ବିଶ୍ୱାସ୍‍ ଶିଷ୍ୟ ଗାଡ଼୍‍ସ୍ ମାନ୍ଦାଙ୍କ୍ ଉତ୍ସାହ ମାଡ଼୍‍ତଣ୍ଡ୍ ।
ACT 18:24 ଆଦ୍ ସମୟ୍‍ତେ ଆଲେକ୍‍ଜାଣ୍ଡ୍ରିୟାଲ୍‍ତାଗ୍ ଜନମ୍ ଆତ୍‍ତେ ଆପୋଲ୍ଲୋ ପେଦେର୍‍ତଣ୍ଡ୍ ୱେରଣ୍ଡ୍ ଇହୁଦୀ ଏପିସସ୍‍ତାଗ୍ ୱାତ୍‍ତଣ୍ଡ୍ । ଅଣ୍ଡ୍‌ ୱେରଣ୍ଡ୍ ସାୟେତ୍ ନାରୁଣ୍ଡ୍‍ ନୁ ଦର୍ମଶାସ୍ତ୍ରତାଗ୍ ଅନାଦ୍‌ ନାର୍‍ଗେ ବୁଦ୍ ମାତ୍‍ତେ ।
ACT 18:25 ଅଣ୍ଡ୍‌ ପ୍ରବୁନ୍ ବିଦ୍ୟା ନୁ ଆତ୍ମା ବିଷୟ୍‍ତେ ଶିକ୍ଷା ପାଏମ୍ ଆସ୍ ମାତ୍‍ତଣ୍ଡ୍ ନୁ ଗାଟି ୱେଡ଼୍‌କେତଡ଼୍ ଜିସୁନ୍ ବିଷୟ୍ ଶିକ୍ଷା ହିସ ମାତ୍‍ତଣ୍ଡ୍ । ଇତ୍‍କେ ଇଦ୍ ବିଷୟ୍‍ତେ ଅଣ୍ଡ୍‌ ମାତର୍‍ ଯୋହନ୍‌‌ତେ ଏର୍‍ଦିକ୍ଷା ବିଷୟ୍ ପୁଞ୍ଜ୍ ମାତ୍‍ତଣ୍ଡ୍ ।
ACT 18:26 ପ୍ରାର୍ତନାତାଗ୍ ଅଣ୍ଡ୍‌ ସାହାସ୍ ତଡ଼୍ ଶିକ୍ଷା ହିଦାଙ୍କ୍ ପସ୍‍ସ୍ପ୍‍ତଣ୍ଡ୍ । ଅନାଦ୍‌ ଶିକ୍ଷା କେଞ୍ଜି ପ୍ରିସ୍କିଲା ନୁ ଆକ୍ୱିଲା ତାମ୍ ଲୋନ୍‌ ଆତ୍‍ତଡ଼୍ ନୁ ଆଗେ ଅଂକିଙ୍କ୍‌ ଇଶ୍ୱର୍‌ତେ ବିଦ୍ୟା ବିଷୟ୍ ସାୟେ ବୁଜାମାଡ଼୍‍ତଡ଼୍ ।
ACT 18:27 ତାନ୍‍ପେର୍କେ ଆପୋଲ୍ଲୋ ଆକାୟା ପ୍ରଦେଶ୍‍ତାଗ୍ ଆଦାନଙ୍କ୍ ତିଆର୍ ଆତ୍‍ତାଙ୍କ୍, ଏପିସସ୍‍ତେ ବିଶ୍ୱାସୀ ଶିଷ୍ୟ ଅଂକିଙ୍କ୍‌ ସାହାଯ୍ୟ ମାଡ଼୍‍ତଡ଼୍ ନୁ ଅଂକିଙ୍କ୍‌ ଗ୍ରହନ୍ ମାଡ଼ାନ୍ ମାଇଦିଙ୍କ୍ ଅନୁରଦ୍‌‍ ମାଡ଼ି ଆକାୟାତେ ବିଶ୍ୱାସୀଡ଼୍‍କିଙ୍କ୍ ଚିଟି ଲେକ୍‍ତଣ୍ଡ୍ । ଅଣ୍ଡ୍‌ ଆଗେ ଏୱୁସ୍ ଇଶ୍ୱର୍‌ତେ ଅନୁଗ୍ରହତଡ଼୍ ବିଶ୍ୱାସୀ ଆସ୍ ମାନ୍ଦାନ୍ ନାରୁଡ଼୍‍କିଂଙ୍କ୍ ନାର୍‍ଗେ ସାହାଯ୍ୟ ମାଡ଼୍‍ତଣ୍ଡ୍ ।
ACT 18:28 ଜିସୁ ଯେ ମସୀହ, ଅଣ୍ଡ୍‌ ସାହାସ୍‍ତଡ଼୍ ଯୁକ୍ତି ମାଡ଼ି ଦର୍ମଶାସ୍ତ୍ରତାଗ୍ ଇଦ୍ ପ୍ରମାନ୍‍ ମାଡ଼ି ବାଷନ୍‍ ହିଦାନ୍ ୱେଲେ ଅଣ୍ଡ୍‌ ଇହୁଦୀଡ଼୍‍କ୍ ହାରାମାଡ଼୍‍ତଣ୍ଡ୍ ।
ACT 19:1 ଆପୋଲ୍ଲୋ କରିନ୍ଥୀୟତାଗ୍ ମାନ୍ଦାନ୍ ୱେଲେ, ପାଉଲ୍ ଆଦ୍ ଦେଶ୍‍ତେ ନାଡ଼୍‍ମେଙ୍କ୍ ଆଞ୍ଜ୍‍ ଏପିସସ୍‍ତାଗ୍ ହେୱୁତ୍‍ତଣ୍ଡ୍ । ଆଗେ ଅଣ୍ଡ୍‌ ବେସ୍‍କ୍‍ତୁଡ଼୍‍ ଶିଷ୍ୟଡ଼୍ କାଇଲି ପାଚ୍ରାମାଡ଼୍‍ତଣ୍ଡ୍,
ACT 19:2 “ମିଡ଼୍ ବିଶ୍ୱାସୀ ଆତ୍‍ତେ ୱେଲେ ବାତ୍ ପବିତ୍ର ଆତ୍ମା ପାଏମ୍ ଆସ୍‍ମାତ୍‍ତିଡ଼୍ ?” ଅଡ଼୍‌ ଉତ୍ତର୍ ହିତ୍‍ତଡ଼୍, “ପବିତ୍ର ଆତ୍ମା ଇଞ୍ଜ ବେନ ମିନ୍ଦେଣ୍ଡ୍, ଇଦ୍ ଗଟ୍ ମାମ୍‍ମେ ବେସୁଟ୍‌ କେଞ୍ଜମ୍ ।”
ACT 19:3 ପାଉଲ୍ ପାଚ୍ରାମାଡ଼୍‍ତଣ୍ଡ୍, “ଆଲେକେ ମିଡ଼୍ ବେଦ୍‍ରକମ୍‍ ବାତିସ୍ମ ଗ୍ରହନ୍ ମାଡ଼୍‍ତିଡ଼୍ ?” ଅଡ଼୍‌ ଉତ୍ତର୍ ହିତ୍‍ତଡ଼୍; “ଯୋହନ୍‌‌ତେ ବାତିସ୍ମ ।”
ACT 19:4 ପାଉଲ୍ କେତ୍‍ତଣ୍ଡ୍, “ବେନଡ଼୍ ଅନୁତାପ୍‍ ମାଡ଼ି ପାପ୍‍ତାଗାଙ୍କ୍ ମାଲ୍‍ତଡ଼୍ ଯୋହନ୍‌‌ତେ ବାତିସ୍ମ ଅଡ଼୍‌‍କିଂଙ୍କ୍ ସାୟେ ମାତ୍‍ତେ । ଇତ୍‍କେ ଅନ୍‌ ପେର୍‍କେ ବେନ ୱାଦାନାଦ୍ ମାତ୍‍ତେ, ଅନାଗ୍‍ ଅର୍ତାତ୍‍ ଜିସୁନାଗ୍ ବିଶ୍ୱାସ୍ ମାଡ଼ାନଙ୍କ୍ ଯୋହନ୍‌ ଇଶ୍ରାଏଲତେ ନାରୁଡ଼୍‍କିଂଙ୍କ୍ କେସ୍‍ମାତ୍‍ତଣ୍ଡ୍ ।”
ACT 19:5 ଇଦ୍ କେଞ୍ଜି ଅଡ଼୍‌ ପ୍ରବୁ ଜିସୁନ୍ ପେଦେର୍‍ତେ ବାତିସ୍ମ ଗ୍ରହନ୍ ମାଡ଼୍‍ତଡ଼୍ ।
ACT 19:6 ପାଉଲ୍ ଅଡ଼୍‌ ପର୍‍ର କାୟ୍ ୱାଟ୍‍ତଣ୍ଡ୍ ନୁ ପବିତ୍ର ଆତ୍ମା ଅଡ଼୍‌ ପର୍‍ର ଡିଗ୍‍ତେ । ଅଡ଼୍‌ ସାରେ ବାଷାତଡ଼୍ ଗଟ୍ ତିର୍‍ୟ୍‍ତଡ଼୍ ନୁ ଇଶ୍ୱର୍‌ତେ ସୁସମାଚାର୍‍ ପ୍ରଚାର୍ ମାଡ଼୍‍ତଡ଼୍ ।
ACT 19:7 ଅଡ଼୍‌ ବାରଜାନ୍ ମାନେୟ୍‍ ମାତ୍‍ତଡ଼୍ ।
ACT 19:8 ତାନ୍‍ପେର୍କେ ମୁଣ୍ଡ୍ ନେଲ୍‍ଞ୍ଜ୍ ଯାକ ଯିହୁଦୀଡ଼ାଦ୍‍ ପ୍ରାର୍ତନା ଲନ୍‍ତାଗ୍ ସାହାସ୍ ତଡ଼୍ ଆଲୋଚାନା ମାଡ଼ି ଇଶ୍ୱର୍‌ତେ ରାଜ୍ୟ ବିଷୟ୍‍ତେ ଅଡ଼ାଦ୍‌ ମନ୍‍ତାଗ୍ ବିଶ୍ୱାସ୍ ମାଡ଼ାନଙ୍କ୍ ଚେଷ୍ଟା ମାଡ଼୍‍ତଣ୍ଡ୍ ।
ACT 19:9 ଇତ୍‍କେ ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଗାଡ଼୍‍ସ୍‍ ମନ୍‍ତଡ଼୍ ମାତ୍‍ତଡ଼୍, ଅଡ଼୍‌ ବିଶ୍ୱାସ୍ ଶିଷ୍ୟ ମାଡ଼ଡ଼୍‍ । ଅଡ଼୍‌ ମାନ୍ଦେତାଗ୍ ସାରେତଡ଼୍ ମୁନ୍‍ନେ ପ୍ରବୁନାଦ୍ ଆର୍‍ ବିଷୟ୍‍ତେ ବିବାଦ୍ ଗଟ୍ କେତ୍‍ତଡ଼୍ । ଆଦିଙ୍କ୍ ପାଉଲ୍ ଅଡ଼୍‌‍କିଂଙ୍କ୍ ୱିଡ଼୍‍ସି ବିଶ୍ୱାସୀଡ଼୍‍କ୍ ଆସ୍ ସାରେଦିନେ ଟିରାନସ୍ ବବନତାଗ୍ ମିଟିଙ୍କ୍ ମାଡ଼୍‍ତଣ୍ଡ୍ ।
ACT 19:10 ରେଣ୍ଡ୍ ହେଣ୍ଡ୍‍କ୍ ଇଦ୍ ଚାଲେମ୍‍ ଆତ୍‍ତେ । ରୋମ୍‍ତେ ଏସିଆ ଦେଶ୍‍ତାଗ୍ ବାସେ ମାଡ଼ମାନ୍ଦାନ୍ ନାର୍‍ଗେ ଇହୁଦୀ ନୁ ଅଣଇହୁଦୀ ପ୍ରବୁନ୍ ବାକ୍ୟ କେଞ୍ଜ୍‍ତଡ଼୍ ।
ACT 19:11 ଇଶ୍ୱର୍ ପାଉଲ୍ ତଡ଼୍ ବେପଡ଼୍‍ ମାଡ଼୍‍ୱାଦ୍ ଆଶର୍ଯ୍ୟ ପାଡ଼୍‍ୟି ମାଡ଼୍‍ତଣ୍ଡ୍ ।
ACT 19:12 ଇଦ୍ ରକମ୍ କି ପାଉଲ୍ ବେବାହାର୍ ମାଡ଼ମାନ୍ଦାନ୍ ରୁମାଲ୍ ନୁ ଚକା ରୋଗୀଡ଼୍ ବକେତ୍ ଆତ୍‍କେ ଅଡ଼୍‌ ସୁସ୍ଥ ଆସମାତ୍‍ତଡ଼୍ ନୁ ତାମ୍ ମେନ୍ଦୁଲ୍‍ତାଗାଙ୍କ୍ ଦେୟାକ୍ ପେଇସ୍ ଆଞ୍ଜମାତ୍‍ତା ।
ACT 19:13 ବେସ୍‍କ୍‍ତୁଡ଼୍‍ ଉଡାନଡ଼୍ ଇହୁଦୀ ୱାଡେଡ଼୍ ମିକା ପ୍ରବୁ ଜିସୁନ୍‍ ପେଦେର୍ ପଇସ୍ ଦେୟାକ୍ ୱିର୍‍ସ୍ପାନଙ୍କ୍ ଆଲ୍‍ସି ମାତ୍‌ତଡ଼୍ । ଅଡ଼୍‌ ଦେୟାକିଙ୍କ୍ କେସମାତ୍‍ତଡ଼୍, “ପାଉଲ୍ ପ୍ରଚାର୍ ମାଡ଼ାନ୍ ଜିସୁନ୍ ପେଦେର୍‍ତେ ନାନ୍ ନିକିଂଙ୍କ୍ ଗଟ୍ ଇଦୁତାନ୍ ।”
ACT 19:14 ସ୍କେବା ପେଦେର୍‍ତେ ଇହୁଦୀ ବେଡ଼ିୟି ଯାଜକ୍‍ତେ ସାତ୍‍ଜାନ୍‍ ମାର୍‍କ୍ ଇଦ୍‍ରକମ୍ ମାଡ଼ାନଙ୍କ୍ ଆଲ୍‍ସି ମାଡ଼ମାତ୍‍ତଡ଼୍ ।
ACT 19:15 ଇତ୍‍କେ ଦେୟାକ୍ ଅଡ଼୍‌‍କିଂଙ୍କ୍ କେତ୍‍ତା, “ନାନ୍ ଜିସୁଙ୍କ୍ ପୁତ୍‍ତାନ୍ ନୁ ପାଉଲ୍‍ତିଙ୍କ୍ ମିକା ପୁତ୍‍ତାନ୍; ଇତ୍‍କେ ମିଡ଼୍ ସାରେ ବେନଡ଼ି ?”
ACT 19:16 ଦେୟାକ୍ ପୟ୍‍ତେ ନାରୁଣ୍ଡ୍‍ ଅଡ଼୍‌‍କିଂଙ୍କ୍ ଗାଟି ଶକ୍ତି ଚିଟିରମଣ ମାଡ଼ି କାବା ମାଡ଼୍‍ତଣ୍ଡ୍‍ । ଅଡ଼ାୱୁ ଚକାସିଲେ ଇଙ୍ଗ୍‍ତା, ଅଡ଼୍‌ ବାଣ୍ଡାବାଣ୍ଡା ପୁଣ୍ଡ୍‍କ୍ ଆସ୍ ଅନ୍‌ ଲତ୍‍ତାଗାଙ୍କ୍ ମିର୍‍ତ୍‍ତଡ଼୍ ।
ACT 19:17 ଏପିସସ୍‍ ନିବାସୀ ଇହୁଦୀ ନୁ ଅଣଇହୁଦୀଡ଼୍ ଇଦ୍ ବିଷୟ୍ କେଞ୍ଜି ୱେର୍‍ତଡ଼୍ ନୁ ଆଗେ ପ୍ରବୁ ଜିସୁନ୍ ପେଦେର୍ ମେଣ୍ଡେ ଅଦିକ୍‌ ସମ୍ମାନ୍ ଆତ୍‍ତେ ।
ACT 19:18 ବିଶ୍ୱାସୀଡ଼ାଗାଙ୍କ୍ ନାର୍‍ଗେ ମୁଲ୍ ନିଜେତ୍ ସାରେ କାରାପ୍ ପାଡ଼୍‍ୟି ସ୍ୱୀକାର୍ ମାଡ଼୍‍ତଡ଼୍ ।
ACT 19:19 ୱାଡେ ବିଦ୍ୟା ନାଡ଼୍‍ସାନଡ଼୍ ନାର୍ଗେମୁଲ୍ ତାମ୍‍ୱା ବଇକିଂଙ୍କ୍ ତାସ୍ ନାରୁଡ଼୍ ମୁନ୍‍ନେ ଗୁଡ଼୍‍ପି ପଡ଼୍‍ସ୍‍ତଡ଼୍ । ଅଡ଼ାୱୁ ଆୱ୍ ବଇକିନ୍ ପୁରା ଦାମ୍‍ ମାତ୍‍ତେ ପାଚାଶ୍‍ ହଜାର୍‌ ରୁପା ଡାବ୍‍କ୍‍ ।
ACT 19:20 ଇଦ୍‍ରକମ୍ ପ୍ରବୁନ୍‍ ବାକ୍ୟ ସାରେଏକାମ୍ ଆତ୍‍ତେ ନୁ ଗାଟି ଶକ୍ତି ଆତ୍‍ତେ ।
ACT 19:21 ଇୱୁସାରେ ଗଟନା ଆତ୍‍ତେ ପେର୍‍କେ ପାଉଲ୍ ଆତ୍ମାତଡ଼୍‍ ମାସିଦୋନିଆ ନୁ ଆକାୟା ନାଡ଼୍‍ମେଙ୍କ୍ ଇସ୍‌ ଯିରୁଶାଲେମ୍‍ ଆଦାନଙ୍କ୍ ତିଆର୍ ଆତ୍‍ତଣ୍ଡ୍ । ଅଣ୍ଡ୍‌ କେତ୍‍ତଣ୍ଡ୍, “ଆଗେ ଆତ୍‍ତେ ପେର୍‍କେ ନାନ୍ ନିଜାମ୍ ରୋମ୍‍ତାଗ୍ ମିକା ଆଦ୍‍ତାନ୍ ।”
ACT 19:22 ଆଦିଙ୍କ୍ ଅଣ୍ଡ୍‌ ତାନ୍ ଇର୍‍ୱୁଡ଼୍ ସେବା ମାଡ଼ାନଡ଼୍‍କ୍ ତୀମତି ନୁ ଏରାଷ୍ଟତିଙ୍କ୍ ମାସିଦୋନିଆତାଗ୍ ରହତ୍‍ତଣ୍ଡ୍, ଇତ୍‍କେ ନିଜେ ରୋମ୍‍ତେ ଏସିଆ ଦେଶ୍‍ତାଗ୍ ମେଣ୍ଡେ ବେସ୍‍କେ ଦିନାମ୍ ମାତ୍‍ତଣ୍ଡ୍ ।
ACT 19:23 ଇଦିନ୍‍ ଲୋପେ ପ୍ରବୁ ତଅସ୍ ମାତ୍‍ତେ ଆର୍‍ ବିଷୟ୍ ଆସ୍ ଏପିସସ୍‍ତାଗ୍ ଗାଟି ଗଲ୍‍କ୍ ଆତ୍‍ତଡ଼୍ ।
ACT 19:24 ଦୀମିତ୍ରିୟ ପେଦେର୍‍ତଣ୍ଡ୍ ୱେରଣ୍ଡ୍ ରୁପାମାଡ଼ାନଣ୍ଡ୍ ଆର୍ତ୍ତେମୀ ଦେବୀନ୍ ମନ୍ଦିର୍‍ତାଗ୍ ରୁପା ମୂର୍ତ୍ତି ତିଆର୍ ମାଡ଼ମାତ୍‍ତଣ୍ଡ୍, ଇଦ୍ ବ୍ୟବସାୟତାଗାଙ୍କ୍ ଶିଳ୍ପ କାରିଗରିଡ଼୍ ନାର୍‍ଗେ ଲାବ୍ ମାଡ଼ମାତ୍‍ତଡ଼୍ ।
ACT 19:25 ଆଦିଙ୍କ୍ ଅଣ୍ଡ୍‌ ସାରେ ବ୍ୟବସାୟୀଡ଼୍‍କ୍ ଅଣ୍ଡୟାଗେ ମାଡ଼ି କେତ୍‍ତଣ୍ଡ୍, “ଆଜ୍ଞାଲଡ଼ି, ଇଦ୍ ବ୍ୟବସାୟ ମାକିଂଙ୍କ୍ ସାଉକାର୍ ମାଡ଼୍‍ତେ ଇଞ୍ଜ ସାରେତଡ଼୍ ପୁତ୍‍ତାଡ଼୍ ।
ACT 19:26 ଇଞ୍ଜେ ଇଣ୍ଡ୍ ପାଉଲ୍ ବାତ୍ ମାଡ଼ୁତଣ୍ଡ୍; ଆଦ୍ ମିଡ଼୍ ନିଜେ ଉଡ଼ୁତିଡ଼୍ ନୁ କେଞ୍ଜୁତିଡ଼୍‍ । ଅଣ୍ଡ୍‌ କେତୁତଣ୍ଡ୍, ନାରୁଡ଼୍ ତିଆର୍ ମାଡ଼୍‍ତେ ଦେୟାକ୍ ସାରେ ବେପଡ଼୍ ଦେୟାକ୍ ଆୟ୍‍ୟ, ମେଣ୍ଡେ ଅଣ୍ଡ୍‌ ଇଗେ ଏପିସସ୍‍ ନୁ ମାତ୍ରମ୍‍ ସାରେ ଏସିଆ ଦେଶ୍‍ତାଗ୍ ନାର୍‍ଗେ ନାରୁଡ଼୍‍କିଂଙ୍କ୍ ଇଦ୍ ବିଷୟ୍ ବୁସା ମାଡ଼ି କେତୁତଣ୍ଡ୍ ।
ACT 19:27 ଆଦିଙ୍କ୍ ମାନ୍‍ ବ୍ୟବସାୟ୍ ବଦ୍‍ନାମ୍ ଆଦାନ୍ ଆଶଙ୍କା ମିନ୍ଦେ । ମାତର୍‍ ଆସର୍ ଆୟ୍‍ୟ, ବେନ୍ ଦେବୀ ଏସିଆତାଗ୍ ନୁ ସାରେ ଜଗତ୍‍ ତାଗ୍ ପୂଜା ପାଏମ୍ ଆଦୁତ୍‍ତେ, ଆଦ୍ ବିକ୍ୟାତ୍ ଆର୍ତ୍ତେମୀ ଦେବୀତ୍ ମନ୍ଦିର୍‍ତେ ପେଦେର୍ ମେଣ୍ଡେ ମାନ୍‍ନ ନୁ ଆର୍ତ୍ତେମୀ ଦେବୀତ୍ ସମ୍ମାନ୍ ନଷ୍ଟ ଆଦ୍‍ତେ ।”
ACT 19:28 ନାରୁଡ଼୍ ଇଦ୍ ଗଟ୍ କେଞ୍ଜି କପାମ୍ ଆତ୍‍ତଡ଼୍ ନୁ ଗାଟି ଲେଙ୍ଗ୍‍ଦେ କେତ୍‍ତଡ଼୍, “ଏଫିସିୟତେ ଆର୍ତ୍ତେମୀ ମହାଦେବୀ ଜୟ୍ !”
ACT 19:29 ଇଦ୍ ଗଲ୍‍କ୍ ନଗର୍ ଏକାମ୍ ଆତ୍‍ତେ । କପାମ୍ ଆତ୍‍ତେ ନାରୁଡ଼୍ ପାଉଲ୍‍ତେ ତଡ଼୍ ୱାତ୍‍ତେନଡ଼୍‍ ମାସିଦୋନିଆତେ ଗାୟସ୍ ନୁ ଆରିଷ୍ଟାର୍କସ୍‍ତିଙ୍କ୍ ପଇସ୍ ତାମାଦ୍ ରଙ୍ଗ୍‍ବୁମ୍‌ତାଗ୍ ଲାଗି ଆତ୍‍ତଡ଼୍ ।
ACT 19:30 ପାଉଲ୍ ନିଜେ ନାରୁଡ଼୍‍କିଂଙ୍କ୍ ସାମ୍‍ନା ମାଡ଼ାନଙ୍କ୍ ତିଆର୍ ଆତ୍‍ତଣ୍ଡ୍, ଇତ୍‍କେ ବିଶ୍ୱାସୀଡ଼୍ ଶିଷ୍ୟ ଇଦ୍ ମାଡ଼ାନଙ୍କ୍ ଇୱଡ଼୍ ।
ACT 19:31 ବେସ୍‍କ୍‍ତୁଡ଼୍‍ କର୍ମଚାରୀ ସାଙ୍ଗଡ଼୍ ପାଉଲ୍‍ତିଙ୍କ୍ ରଙ୍ଗ୍‍ବୁମ୍‌ ଲୋପେ ଆନ୍‌‍ମାକିନ୍ ଇଞ୍ଜ ଅନୁରଦ୍‌‍ ମାଡ଼ି ଅଣ୍ଡୟ୍‌‍ କାବୁର୍‍ ରଅତଡ଼୍ ।
ACT 19:32 ଇଦ୍ ସମୟ୍‍ ଲୋପେ ପୁରାମାନ୍ଦେ ସାରେତଡ଼୍ କପାମ୍ ଆତ୍‍ତଡ଼୍ । ନାରୁଡ଼୍ ମାନ୍ଦାମାନ୍ଦା ଆସ୍ ନାର୍‍ଗେ କିଡ଼୍‍କ ମାତ୍‍ତଡ଼୍, ଇତ୍‍କେ ଅଡ଼୍‌ ଲୋପେ ନାର୍‍ଗେ ନାରୁଡ଼୍ ଅଡ଼୍‌ ଅଣ୍ଡୟାଗେ ଆତ୍‍ତେ କାରନ୍‍ ମିକା ପୁନ୍‍ୱେ ମାତ୍‍ତଡ଼୍ ।
ACT 19:33 ନାରୁଡ଼୍ ଲୋପେଙ୍କ୍ ବେସ୍‍କ୍‍ତୁଡ଼୍‍ କେତ୍‍ତଡ଼୍ ଯେ, ଆଲେକ୍‍ଜାଣ୍ଡର୍ ଇଦିନ୍ ସେଙ୍ଗେ ଦାୟୀ, ବାତେଙ୍କ୍ଇତ୍‍କେ ଇହୁଦୀଡ଼୍ ଅଂକିଙ୍କ୍‌ ମୁନ୍‍ନେ ନିସ୍ପି ମାତ୍‍ତଡ଼୍ । ଆଲେକ୍‍ଜାଣ୍ଡର୍ କାୟ୍‍ ତେଇସ୍ ନାରୁଡ଼୍‍କିଂଙ୍କ୍ କଟ ମାନ୍ଦାନଙ୍କ୍ ଚିନ୍ନେ ହିତ୍‍ତଣ୍ଡ୍ ନୁ ବିଶ୍ୱାସୀଡ଼୍ ଗାର୍ରେ ବାଷଣ ଇସ୍‌ ବୁଜାମାଡ଼ାଙ୍କ୍ ଚେଷ୍ଟା ମାଡ଼୍‍ତଣ୍ଡ୍ ।
ACT 19:34 ଏଫିସିୟ ଅଣ୍ଡ୍‌ ୱେରଣ୍ଡ୍ ଇହୁଦୀ, ଇଦ୍ ପୁଞ୍ଜ୍ ଅଡ଼୍‌ ସାରେତଡ଼୍ ଅଣ୍ଡୟ୍‌‍ଦାମ୍ କିଡ଼୍‍କ୍‌ତଡ଼୍, “ଆର୍ତ୍ତେମୀ ମହାଦେବୀନ୍ ଜୟ୍ !” ରେଣ୍ଡ୍ ଗାଣ୍ଟା ଇଦ୍‍ରକମ୍ ମର୍ ଆତ୍‍ତଡ଼୍ ।
ACT 19:35 ପେର୍‍କେ ନଗର୍‍ପାଳ ନାରୁଡ଼୍‍କିଂଙ୍କ୍ ଶାନ୍ତି ମାଡ଼ାନଙ୍କ୍ କେତ୍‍ତଣ୍ଡ୍, “ଏଫିସିୟତେ ଦାଦାଲଡ଼୍ ସାରେତଡ଼୍ ପୁତ୍‍ତଡ଼୍ ଯେ, ଏପିସସ୍‍ ନଗରୀତାଗ୍ ବେଡ଼୍‍ୟାଦ୍‍ ଦେବୀ ଆର୍ତ୍ତେମୀ ମନ୍ଦିର୍ ନୁ ମୟଲ୍‍ତାଗାଙ୍କ୍ ଦେଗି ୱାସ୍‍ମାନ୍ଦାନ୍ ପବିତ୍ର ମୂର୍ତ୍ତିତିଙ୍କ୍ ସୁରକ୍ଷା ହାସମିନ୍ଦେ ।
ACT 19:36 ବେନ ଇଦ୍ ଅସ୍ୱୀକାର୍ ମାଡ଼ାଙ୍କ୍ ପାର୍‍ୱଣ୍ଡ୍ । ଆଦିଙ୍କ୍ ମିଡ଼୍ ସାରେତଡ଼୍ ଶାନ୍ତି ଆୟ୍‍ମୁଟ୍ । ବାତ୍‍ମିକା ବୁଲ୍‍ ପାଡ଼୍‍ୟି ମାଡ଼୍‍ମାଟ୍ ।
ACT 19:37 ଇ ନାରୁଡ଼୍ ମନ୍ଦିର୍‍ତାଗାଙ୍କ୍ ବାତେଏ ଡଙ୍ଗଡ଼୍, କି ମାନ୍‍ ଦେବୀନ୍ ଅତ୍ୟାଚାର୍ ବାତ୍ କାରାପ୍ କେଲଡ଼୍, ଆଗେକ୍‍ବା ମିଡ଼୍ ଇଡ଼୍‍କିଙ୍କ୍ ପଇସ୍ ତାତ୍‍ତିଡ଼୍ ।
ACT 19:38 ଯଦି ଦୀମିତ୍ରିୟ ନୁ ଅନ୍‌ କାରିଗରୀଡ଼ାଦ୍ ବିରୁଦ୍‍ତେ ବେନନାଦ୍ ବାତ୍ ଅବିଯଗ୍ ମିନ୍ଦେ, ଆଦ୍ ବିଚାର୍ ମାଡ଼ାନଙ୍କ୍ ମାନ୍‍ କର୍ମଚାରୀଡ଼୍ ମିନ୍ଦେ ନୁ ବିଚାର୍‍ଳୟତାଗ୍ ନିର୍ଦ୍ଦିଷ୍ଟ ଦିନାମ୍ ମିନ୍ଦେ । ଆଗେ ଆଦ୍ ଅବିଯଗ୍ ତାସ୍ କେଲ୍‍ମୁଟ୍ ।
ACT 19:39 ଯଦି ଇଦିନାଗାଙ୍କ୍ ମେଣ୍ଡେ ଅଦିକ୍‌ ହାଲ୍‍ସୁତିଡ଼୍, ଆଲେକେ ନାଗରିକୀଡ଼୍ ତଡ଼୍ ଆଇନ୍‍ ମାଡ଼୍‍ତେ ମିଟିଙ୍କ୍‍ତାଗ୍ ଅନାଦ୍‌ ନିଷ୍ପତ୍ତି ଆୟି ।
ACT 19:40 ନେଣ୍ଡ୍ ବାତ୍ ଗଟେମ୍ ଆତ୍‍ତେ, ଆଗେ ମାନ୍‍ ବିରୁଦ୍‍ତେ ଇଂସାକାଣ୍ଡ ଆଦାନାଦ୍ ଆଶଙ୍କା ମିନ୍ଦେ; ମାମ୍‍ମେ ଇୱୁସାରେ ଗଲ୍‍କିନାଦ୍ ବାତ୍‍ବା ଟିକ୍ କାରନ୍‍ ତଅତାଙ୍କ୍ ପାର୍‍ୱମ୍ ।”
ACT 19:41 ଇୱୁସାରେ ଗଟି କେସ୍ ଅଣ୍ଡ୍‌ ନାରୁଡ଼୍‍କିଂଙ୍କ୍ ଶାନ୍ତି ମାଡ଼ି ମିଟିଙ୍ଗ୍‍ ବନ୍ଦ୍ ମାଡ଼୍‍ତଣ୍ଡ୍ ।
ACT 20:1 ଗଲ୍‍କ୍ ତେର୍‍ତେ ପେର୍‍କେ ପାଉଲ୍ ବିଶ୍ୱାସୀଡ଼୍‍ ଶିଷ୍ୟ ଅଣ୍ଡୟାଗେ ମାଡ଼ି ୱେଡ଼୍‍କାତାୱ୍ ଗଟି କେତ୍‍ତଣ୍ଡ୍ । ଅଡ଼୍‌ଆଗାଙ୍କ୍‌ ବିଦାୟ୍ ଅସ୍ ଅଣ୍ଡ୍‌ ମାସିଦୋନିଆତାଗ୍ ଆତ୍‍ତଣ୍ଡ୍ ।
ACT 20:2 ଅଣ୍ଡ୍‌ ସାରେ ପଡ଼୍‍ୟେ ଇସ୍‌ ଆତ୍‍ତଣ୍ଡ୍ ନୁ ନାର୍‍ଗେ ଉପଦେଶ୍‍ ଇସ୍‌ ନାରୁଡ଼୍‍କିଂଙ୍କ୍ ୱେଡ଼୍‍କା ମାଡ଼୍‍ତଣ୍ଡ୍ । ପେର୍କେ ଅଣ୍ଡ୍‌‍ ଗ୍ରୀସ୍‍ ଦେଶ୍‍ତାଗ୍‍ ଏୱୁତ୍‍ତଣ୍ଡ୍‍ ।
ACT 20:3 ତାନ୍‍ପେର୍କେ ଅଣ୍ଡ୍‌ ଆଗେ ମୁଣ୍ଡ୍ ନେଲ୍‍ଞ୍ଜ୍ ମାତ୍‍ତଣ୍ଡ୍ । ଅଣ୍ଡ୍‌ ସିରିଆତାଗ୍ ଆଦାନଙ୍କ୍ ତିଆର୍ ଆତ୍‍ତେ ୱେଲେ ଇହୁଦୀଡ଼୍ ଅନ୍‌ ପର୍‍ର କପାମ୍ ଆତ୍‍ତଡ଼୍ ଇଞ୍ଜ କେଞ୍ଜି ମାସିଦୋନିଆତାଲା ମାଲ୍‍ସ୍ ଆଦାନଙ୍କ୍ ତିଆର୍ ଆତ୍‍ତଣ୍ଡ୍ ।
ACT 20:4 ବେରିଆ ନିବାସୀ ପୁରନ୍ ମାର୍‍ ସୋପାତ୍ର, ଥେସଲନିକୀତେ ଆରିଷ୍ଟାରର୍କସ୍ ନୁ ସେକୁନ୍ଦ, ଦର୍ବୀତେ ଗାୟ, ଏସିଆ ଦେଶ୍‍ତେ ତୁକିକ ନୁ ତ୍ରଫିମ୍, ମେଣ୍ଡେ ତୀମତି ଅନ୍‌ ତଡ଼୍ ଆତ୍‍ତଡ଼୍ ।
ACT 20:5 ଅଡ଼୍‌ ମୁନେନ୍ ଆଞ୍ଜ୍ ତ୍ରୋୟାତାଗ୍ ମାକିଂଙ୍କ୍ କେପିମାତ୍‍ତଡ଼୍ ।
ACT 20:6 କମୀରଶୂନ୍ୟ ରୋଟି ପାଣ୍ଡୁମ୍‍ତେ ପେର୍‍କେ ମାମ୍‍ମେ ଫିଲିପ୍‍ପୀ ଟାୱୁନ୍‍ତାଗାଙ୍କ୍ ଏର୍‍ଦାଲା ୱେଇସ୍‍ ମିକା ଏଇଙ୍ଗ୍ ଦିନା ପେର୍‍କେ ତ୍ରୋୟାତାଗ୍ ଅଡ଼୍‌ ତଡ଼୍ କାଇଲ୍‍ତମ୍ ନୁ ଆଗେ ଅଣ୍ଡୟ୍‌ ଆଟ୍‌ ମାତ୍‍ତମ୍ ।
ACT 20:7 ଅଣ୍ଡୟ୍‌‍ ସପ୍ତାତେ ମୁନେତ୍‍ ଦିନେ ମୁଲ୍‍ପୁଟ୍ ମାମ୍‍ମେ ସାରେତମ୍ କାଇଲି ତିନ୍ଦାନଙ୍କ୍ ଅଣ୍ଡୟାଗେ ଗୁଡ଼୍‍ତମ୍ । ପାଉଲ୍ ନାରୁଡ଼୍‍କିଂଙ୍କ୍ ନାଟ୍‍ନାର୍‍କେ ଜାକ ଉପଦେଶ୍‍ ଇତ୍‌ତଣ୍ଡ୍‌‍, ବାତେଙ୍କ୍ ଇତ୍‍କେ ମେଣ୍ଡେଅନ୍‌ ଦିନ୍ ଅଣ୍ଡ୍‌ ଆଦ୍ ପଡ଼୍‍ୟେ ୱିଡ଼୍‍ସାନଙ୍କ୍ ଆଞ୍ଜମାତ୍‍ତଣ୍ଡ୍ ।
ACT 20:8 ବେନ୍ ପରତ୍‍ ବାକ୍‍ଡ଼େତାଗ୍ ମାମ୍‍ମେ ମିଟିଙ୍ଗ୍‍ ମାଡ଼ି ମାତ୍‍ତମ୍, ଆଗେ ନାର୍‍ଗେ କୁପି ନିଡ଼୍‍ସ ମାତ୍‍ତା ।
ACT 20:9 ଆଗେ ଇଉଟିକସ୍ ପେଦେର୍‍ତଣ୍ଡ୍ ୱେରଣ୍ଡ୍ ଲେୟଣ୍ଡ୍ ଜର୍‍କାତାଗ୍‍ କୁଦି ମାତ୍‍ତଣ୍ଡ୍, ପାଉଲ୍ ଗଟି କେତ୍‍ତାନ୍ ୱେଲେ ଅଂକିଙ୍କ୍‌ ଉସ୍କାଡ଼୍ ୱାତ୍‍ତେ । ଅଣ୍ଡ୍‌ ଉସ୍କାଡ଼୍‍ତେ ମୁଣ୍ଡ୍ ମହଲାତାଗାଙ୍କ୍ ମଦଲ୍ ରାୟ୍‍ତଣ୍ଡ୍ । ଅଡ଼୍‌ ଅଂକିଙ୍କ୍‌ ତେଏତାନ୍ ୱେଲେ ଅଣ୍ଡ୍‌ ଡଲିମାତ୍‍ତଣ୍ଡ୍ ।
ACT 20:10 ଇତ୍‍କେ ପାଉଲ୍ ମଦଲ୍ ଡିଗି ଅଂକିଙ୍କ୍‌ ଗାଡ଼୍‍ମ୍ଉର୍‍ଙ୍ଗି କେତ୍‍ତଣ୍ଡ୍, “ଦାନ୍ଦେ ଆୟ୍‍ମାଟ୍ । ଅଣ୍ଡ୍‌ ଜିୱୁଣ୍ଡ୍‍ ମିନ୍ଦେଣ୍ଡ୍ ।”
ACT 20:11 ତାନ୍‍ପେର୍କେ ଅଣ୍ଡ୍‌ ପର୍‍ର ମାଲ୍‍ସ୍ ଆଞ୍ଜ୍ ରୂଟି ଉହୁସ୍ ତିତ୍‍ତଣ୍ଡ୍ ନୁ ପଡ଼୍‍ଦ୍ ପେୟ୍‍ନା ଯାକ ଅଡ଼୍‌ ତଡ଼୍ ନାର୍‍ଗେ ଗଟି ତିର୍‍ୟି ଆଗାଙ୍କ୍ ଆତ୍‍ତଣ୍ଡ୍ ।
ACT 20:12 ନାରୁଡ଼୍ ପିଲାନ୍ ଜିୱେ ମାନ୍ଦାନାଦ୍ ଉଡ଼ି ତାମ୍ ଲୋନ୍‌ ଆତ୍‍ତଡ଼୍ ନୁ ନାର୍‍ଗେ ୱେଡ଼୍‍କା ପାଏମ୍ ଆତ୍‍ତଡ଼୍ ।
ACT 20:13 ମାମ୍‍ମେ ମୁନେନ୍ ଏର୍‍ ଜାହାଜ୍‍ତାଗ୍ ତାରି ଆସୋସ୍‍ତାଗ୍ ଆତ୍‍ତମ୍ । ଆଗାଙ୍କ୍ ମାମ୍‍ମେ ପାଉଲ୍‍ତିଙ୍କ୍ ଏର୍‍ଜାହାଜ୍‍ତାଗ୍ ତାର୍‍ସ୍ପି ଆଦାନାଦ୍ ମାତ୍‍ତେ, ବାତେଙ୍କ୍ଇତ୍‍କେ ଅଣ୍ଡ୍‌ ବୁମ୍‌ତାଗା ଆଞ୍ଜ୍ ଆଗେ ହେୱୁଦ୍‍ତାନ୍ ଇଞ୍ଜ କେସ୍‍ମାତ୍‍ତଣ୍ଡ୍ ।
ACT 20:14 ଅଣ୍ଡ୍‌ ବେସୁଟ୍‌ ମାକିଂଙ୍କ୍ ଆସୋସ୍‍ତାଗ୍ କାଇଲ୍‍ତଣ୍ଡ୍, ମାମ୍‍ମେ ଅଂକିଙ୍କ୍‌ ଏର୍‍ଜାହାଜ୍‍ତାଗ୍ ତାର୍‍ସ୍ପି ମିତିଲିନୀତାଗ୍ ଆତ୍‍ତମ୍ ।
ACT 20:15 ଆଗାଙ୍କ୍ ଆଞ୍ଜ୍ ମେଣ୍ଡନ୍‍ଦିନେ ସାମୋସ୍‍ତାଗ୍ ହେୱୁତ୍‍ତମ୍ । ମେଣ୍ଡନ୍‍ଦିନେ ମାମ୍‍ମେ କିଆସ୍‍ତାଗ୍ ହେୱୁତମ୍, ତାନ୍ ମେଣ୍ଡନ୍‍ଦିନେ ମିଲୀଟସ୍‍ତାଗ୍ ହେୱୁତମ୍ ।
ACT 20:16 ରୋମ୍‍ତେ ଏସିଆ ପ୍ରଦେଶ୍‍ତାଗ୍ ମେଣ୍ଡେ ନାର୍‍ଗେ ଦିନା ମାନକଟ୍ ଏପିସସ୍‍ ହାଞ୍ଚ୍‍ ହାଞ୍ଚ୍‍ ଏର୍‍ଜାହାଜ୍ ଚାଲାମାଡ଼ାଙ୍କ୍ ପାଉଲ୍ ମାନ୍‍ ମାଡ଼୍‍ତଣ୍ଡ୍ । ଯଦି ସମ୍ଭବ୍ ଆଦ୍‍ତେ, ପେଣ୍ଟିକଷ୍ଟ୍ ଦିନାତେ ଯିରୁଶାଲେମ୍‍ ହେୱୁଦାନଙ୍କ୍ ଅଣ୍ଡ୍‌ ଦାନ୍ଦେ ଆସମାତ୍‍ତଣ୍ଡ୍ ।
ACT 20:17 ଏପିସସ୍‍ ମଣ୍ଡଲିତେ ବୟସ୍କା ନେତାଲଡ଼୍‍କ୍ ମିଲୀଟସ୍‍ ତଡ଼୍ କାଇଲାନଙ୍କ୍ ପାଉଲ୍ କାର୍‍ଙ୍ଗ୍‍ତଣ୍ଡ୍ ।
ACT 20:18 ଅଡ଼୍‌ ୱାସ୍ ହେୱୁତ୍‍ତାଙ୍କ୍ ପାଉଲ୍ କେତ୍‍ତଣ୍ଡ୍, “ରୋମ୍‍ତେ ଏସିଆ ପ୍ରଦେଶ୍‍ତାଗ୍ ହେୱୁତ୍‍ତେ ଦିନାକନ୍ସ୍ ନାନ୍ ବେଲା ମିଇ ତଡ଼୍ ନାର୍‍ଗେ ଦିନାମ୍ ମିନ୍ଦେନ୍ ମିଡ଼୍ ପୁତ୍‍ତିଡ଼୍ ।
ACT 20:19 ଇହୁଦୀଡ଼୍ ଜୋଜନା ସେଙ୍ଗେ ନାନ୍ ବେନ୍‍ସାରେ ଦୁଃକକଷ୍ଟ ପାଏମ୍ ଆତ୍‍ତାନ୍, ଆଦିନ୍ ଲୋପେ ନାନ୍ ପ୍ରବୁନ୍‍ ଦାସତେ ଲେକାମ୍ କାଣ୍ଡେଡ଼ି ରାପି ନମ୍ରତଡ଼୍‍ ନାୱାଦ୍ ପାଡ଼୍‍ୟି ମାଡ଼୍‍ତାନ୍ ।
ACT 20:20 ମିଡ଼୍ ପୁତ୍‍ତିଡ଼୍ ଯେ, ନାନ୍ ନାରୁଡ଼୍ ବକେତ୍ ପ୍ରଚାର୍ ମାଡ଼ାନ୍ ୱେଲେ ନୁ ମିଇ ଲୋନ୍‌ ଉପଦେଶ୍‍ ହିଦାନ୍ ସମୟ୍‍ତେ ମିୟାଦ୍ ଉପକାର୍ ଆଦାନ୍ ରକମ୍ ବାତ୍ ବିଷୟ୍ କେତାନଙ୍କ୍ ସିଗ୍‍ ଆୟ୍‍ୱେ ମାତ୍‍ତାନ୍ ।
ACT 20:21 ଇହୁଦୀ ନୁ ଅଣଇହୁଦୀଡ଼୍ ସାରେତଡ଼୍‌କିଂଙ୍କ୍ ନାନ୍ ଗାଟି ସତର୍କ ଗଟ୍ କେତ୍‍ତାନ୍, ଅଡ଼୍‌ ଅନୁତାପ୍‍ ମାଡ଼ି ପାପାମ୍‍ତାଗାଙ୍କ୍ ମାଲ୍‍ସ୍‍ମିକା ଇଶ୍ୱର୍‌ତେ ପାକେ ମନ୍ ମାଡ଼ିତଡ଼୍ ନୁ ପ୍ରବୁ ଜିସୁନାଗ୍ ବିଶ୍ୱାସ୍ ମାଡ଼ିତଡ଼୍ ।
ACT 20:22 ଇଞ୍ଜେ ପବିତ୍ର ଆତ୍ମାତେ ନିର୍ଦ୍ଦଶ୍ ପାଲନ୍ ମାଡ଼ି ନାନ୍ ଯିରୁଶାଲେମ୍‍ ଆଦୁତାନ୍ । ନାନ୍ ପୁନନ୍ ଆଗେ ନାୟାଦ୍ ବାତ୍ ଆଦ୍‍ତେ ।
ACT 20:23 ପବିତ୍ର ଆତ୍ମା ନାକିଂଙ୍କ୍ କେସ୍‍ ସତର୍କ ମାଡ଼ିସ୍‍ ମିନ୍ଦେ ଯେ ନାନ୍‍ନେ ସାରେ ଟାୱୁନ୍‌କିନାଗ୍‌ ବନ୍ଦି ଆଦ୍‌ତାନ୍ ନୁ ଆଗେ ମାଞ୍ଜ୍ କଷ୍ଟ ପାଏମ୍ ଆଦ୍‍ତାନ୍ ।
ACT 20:24 ଇତ୍‍କେ ନା ସେଙ୍ଗେ ନାନ୍ ନାୟାଦ୍ ଜିୱୁଣ୍ଡ୍‍ତିଙ୍କ୍ ସୁଦୁର୍ ହେର୍କା ମାଡ଼ିତାନ୍ । ଇଶ୍ୱର୍‌ତେ ଅନୁଗ୍ରହ ବିଷୟ୍ ପ୍ରବୁ ଜିସୁ ବେନ୍ କବର୍ ସୁସମାଚାର୍ କେତ୍‍ତାନଙ୍କ୍ ନାକିଂଙ୍କ୍ ହିତ୍‍ତଣ୍ଡ୍, ଆଦ୍ ପୁରନ୍ ମାଡ଼ି ନାୟାଦ୍ ପ୍ରଚାର୍ ପାଡ଼୍‍ୟି ସାରେ ମାଡ଼ିତାନ୍; ଇସରେ ନାୟାଦ୍ ଇଚ୍ଛା ।”
ACT 20:25 “ଇଶ୍ୱର୍‌ତେ ରାଜ୍ୟ ବିଷୟ୍ ପ୍ରଚାର୍ ମାଡ଼ାନଙ୍କ୍ ନାନ୍ ମିଡ଼୍ ସାରେତଡ଼୍‍ତେ ବକେତ୍ ଆତ୍‍ତାନ୍ । ଇଞ୍ଜେ ଉଡ଼ାଟ୍‍, ନାନ୍ ପୁତ୍‍ତାନ୍ ଯେ, ମିଇ ଲୋପେଙ୍କ୍ ବେନ ନାକିଂଙ୍କ୍ ମେଣ୍ଡେ ଉଡ଼୍‍ୱିଡ଼୍ ।
ACT 20:26 ଆଦିଙ୍କ୍ ନାନ୍ ନେଣ୍ଡ୍ ଲେକେତ୍‍ ମିଇ ଗାର୍‍ରେ ପ୍ରଚାର୍ ମାଡ଼ୁତାନ୍ ଯେ, ଯଦି ମିଇ ଲୋପେଙ୍କ୍ ବେନ ଦଂସ ଆଦ୍‍ତନ୍, ଆଦିନ୍ ସେଙ୍ଗେ ନାନ୍ ଦାୟି ଆୟନ୍ ।
ACT 20:27 ବାତେଙ୍କ୍ଇତ୍‍କେ ଇଶ୍ୱର୍‌ତେ ସାରେ ଉଦେଶ୍ୟ ମିଇ ଗାର୍‍ରେ କେତାନଙ୍କ୍ ନାନ୍ ସିଗ୍‍ ମାଡ଼ନ୍ ।
ACT 20:28 ଆଦିଙ୍କ୍ ମିଡ଼୍ ନେତା ଲେକାମ୍ ନିଜର୍‍ ବିଷୟ୍‍ତେ ନୁ ପବିତ୍ର ଆତ୍ମା ବେନ୍ ବିଶ୍ୱାସୀଡ଼୍‍କ୍ ମିଇ ଦାୟିତ୍ୱତେ ୱିଡ଼୍‍ସ୍‍ତଣ୍ଡ୍, ଆ ସାରେତଡ଼୍‌କିଂଙ୍କ୍ ଯତନ୍ ଆୟ୍‍ମୁଟ୍ । ମେଣ୍ଢାପଡ଼୍‍ପାନଡ଼୍ ଲେକାମ୍ ଇଶ୍ୱର୍‌ତେ ମଣ୍ଡଲିତିଙ୍କ୍ ଯତନ୍ ଆୟ୍‍ମୁଟ୍ । ଆଦ୍ ମଣ୍ଡଲିତିଙ୍କ୍ ଅଣ୍ଡ୍‌ ତାନ୍ ମାର୍‍ ଦଂସ ଆତ୍‍ତାଙ୍କ୍ ନିଜର୍‍ ମାଡ଼୍‍ତଣ୍ଡ୍ ।
ACT 20:29 ନାନ୍ ପୁତ୍‍ତାନ୍, ନାନ୍ ଆତ୍‍ତେ ପେର୍‍କେ ମିୟାଗ୍ ବୟଙ୍କର୍ କୁକାଲି ୱାଦ୍‍ତା ନୁ ବିଶ୍ୱାସୀଡ଼୍‍କିଂଙ୍କ୍ ପୁଣ୍ଡ୍‍କ୍ ମାଡ଼ି ୱିଡ଼୍‍ସିତା ।
ACT 20:30 ଦିନାମ୍ ୱାଦ୍‍ତେ, ଆସୁଟେ ମିଇ ନିଜର୍‍ ମାନ୍ଦେତେ ବେସ୍‍କ୍‍ତୁଡ଼୍‍ ଶିଷ୍ୟଡ଼୍‌ ବୁସା ଗଟି କେସ୍ କାରାପ୍ ହାର୍‍ଦାଗ୍ ଆଦ୍‍ତଡ଼୍ ।
ACT 20:31 ଆସୁଟ୍‍ ସତର୍କ ମାନୁଟ୍, ନାନ୍ ଯେ ନାର୍‍କେ ପାୟାଲ୍ ନିଜର୍‍ କାଣ୍ଡେଡ଼ି ରାପି ମୁଣ୍ଡ୍ ହେଣ୍ଡ୍‍କ୍ ଯାକ ଶିକ୍ଷା ହିତ୍‍ତାନ୍, ଇଦ୍ ହେର୍କା ମାଡ଼ାଟ୍ ।”
ACT 20:32 “ଇଞ୍ଜେ ନାନ୍ ମିକିଂଙ୍କ୍ ଇଶ୍ୱର୍‌ତେ କାୟ୍‍ଦେ ପରିଷ୍କାର୍‍ ନୁ ଅନୁଗ୍ରହ ବାକ୍ୟ ଗାର୍‍ରେ ସମର୍‍ପନ୍ ମାଡ଼ୁତାନ୍; ଆଦ୍ ବାକ୍ୟ ମିକିଂଙ୍କ୍ ଡୁଟାଙ୍ଗ୍‍ ମାଡ଼ାନଙ୍କ୍ ନୁ ଇଶ୍ୱର୍‌ତେ ନାରୁଡ଼୍‍କିଂଙ୍କ୍ ଦର୍‍କାର୍ ସାରେ ଆର୍ଶିବାଦ୍ ମିକିଂଙ୍କ୍ ହିଦାନଙ୍କ୍ ପାର୍‍ଦ୍‍ତେ ।
ACT 20:33 ନାନ୍ ବେନନ୍ ରୁପା, ସୁନା ନୁ ବେନନ୍ ଚକା ପାଏମ୍ ଆଦାନଙ୍କ୍ ଆଶେ ମାଡ଼ନ୍ ।
ACT 20:34 ମିଡ଼୍ ପୁତ୍‍ତିଡ଼୍, ନାନ୍ ନା ଇୱୁ ରେଣ୍ଡ୍ କାୟ୍‍କିନ୍‍ ତଡ଼୍ ପାଡ଼୍‍ୟି ମାଡ଼ି ନିଜର୍‍ ନୁ ନା ତଡ଼୍ ପାଡ଼୍‍ୟି ମାଡ଼ାନଡ଼ାୱ୍ ସାରେ ଇଚ୍ଛା ସାଦନ୍ ମାଡ଼୍‍ତାନ୍ ।
ACT 20:35 ‘ପାଏମ୍ ଆଦ୍‍ଦାନ୍ ନାଗାଙ୍କ୍ ଦାନ ମାଡ଼ାନାଗ୍ ଅଦିକ୍‌ ୱେଡ଼୍‍କେ ମାନ୍‍ତେ,’ ନିଜେ ପ୍ରବୁ ଜିସୁନାଦ୍ ଇଦ୍ ବାକ୍ୟତିଙ୍କ୍ ହେର୍କା ମାଡ଼ି ଇଦ୍ ରକମ୍ କଷ୍ଟ ପାଡ଼୍‍ୟି ମାଡ଼ି ମାନାଡ଼୍ ଗରିବ୍ ନାରୁଡ଼୍‍କିଂଙ୍କ୍ ସାହାଯ୍ୟ ମାଡ଼ିକାଡ଼୍, ଇଦ୍ ବିଷୟ୍‍ତେ ନାନ୍ ସାରେଦାମ୍ ମିକିଂଙ୍କ୍ ଆଦର୍ଶ ତଅତ୍‍ତାନ୍ ।”
ACT 20:36 ଇଦ୍‍ ଗଟ୍‍ ତେର୍‍ତେ ପେର୍‍କେ ପାଉଲ୍ ଅଡ଼୍‌ ତଡ଼୍ ମର୍‍ମିଣ୍ଡା ଇସ୍‌ ପ୍ରାର୍ତନା ମାଡ଼୍‍ତଣ୍ଡ୍ ।
ACT 20:37 ସାରେତଡ଼୍ କେୟି କେୟି ପାଉଲ୍‍ତିଙ୍କ୍ ଗାଡ଼୍‍ମ୍ ଉର୍‍ଙ୍ଗି ନମସ୍କାର୍‍ ମାଡ଼ି ରହତ୍‍ତଡ଼୍ ।
ACT 20:38 ଅଡ଼୍‌ ମେଣ୍ଡେ ଅଂକିଙ୍କ୍‌ ଉଡ଼ାନଙ୍କ୍ ପାର୍‍ୱଡ଼୍ ଇଞ୍ଜ ଅଣ୍ଡ୍‌ କେତ୍‍ତାଙ୍କ୍ ଅଡ଼୍‌ ଗାଟି ଦୁଃକାମ୍ ଆସ୍ ମାତ୍‍ତଡ଼୍ । ଅଡ଼୍‌ ଅଂକିଙ୍କ୍‌ ବିଦାୟ୍ ହିଦାନଙ୍କ୍ ଜାହାଜ୍‍ତେ ବକେତ୍ ଆତ୍‍ତଡ଼୍ ।
ACT 21:1 ମାମ୍‍ମେ ଅଡ଼୍‌‍କିଂଙ୍କ୍ ରହସିସ୍ ଆଗାଙ୍କ୍ ମାଲ୍‍ସ୍ ଆତ୍‍ତମ୍ । ଏର୍‍ଦିଙ୍କ୍ ୱେଇସ୍ ମାମ୍‍ମେ କୋସ୍‍ ଦ୍ୱୀପତାଗ୍ ହେୱୁତ୍‍ତମ୍ । ମେଣ୍ଡେଅନ୍‌ ଦିନ୍ ରୋଡସ୍ ଆଞ୍ଚ୍ ଆଞ୍ଚ୍ ପାତାରାତାଗ୍ ଆତ୍‍ତମ୍ ।
ACT 21:2 ଆଗାଙ୍କ୍‍ ଫିନିସିଆତାକ୍ ଆଦାନ୍ ଜାହାଜ୍‍ ତାରି ଆତ୍‍ତମ୍ ।
ACT 21:3 ତାନ୍‍ପେର୍କେ ସାଇପ୍ରସ୍ ତଅନ୍‌ଦମାନ୍ଦାନ୍ ଅଣ୍ଡୟ୍‌ ପଡ଼୍‍ୟେତାଗ୍ ହେୱୁତ୍‍ତମ୍ । ଆଗାଙ୍କ୍ ଆଦିନ୍ ତିନ୍ଦେପାକ୍ ଇସ୍‌ ମାମ୍‍ମେ ସିରିଆତାଗ୍ ଆତ୍‍ତମ୍ । ମାମ୍‍ମେ ଟାୟର୍‍ ଟାୱୁନ୍‍ତାଗ୍ ଏର୍‍ଜାହାଜ୍‍ତାଗାଙ୍କ୍ ଡିଗ୍‍ତମ୍, ବାତେଙ୍କ୍ ଇତ୍‍କେ ଆଦ୍ ଏର୍‍ଜାହାଜ୍‍ତାଗାଙ୍କ୍ ଜିନିଷ୍‍ ଡିପାନ୍ ମାତ୍‍ତେ ।
ACT 21:4 ଆଗେ ମାମ୍‍ମେ ବେସ୍‍କ୍‍ତୁଡ଼୍‍ ବଶ୍ୱାସୀ ଶିଷ୍ୟ ତଡ଼୍ କାଇଲି ଅଣ୍ଡୟ୍‌ ଆଟ୍ ମାତ୍‍ତମ୍ । ପବିତ୍ର ଆତ୍ମାତେ ନିର୍ଦ୍ଦେଶ୍ ପାଏମ୍ ଆସ୍ ଅଡ଼୍‌ ପାଉଲ୍‍ତିଙ୍କ୍ ଯିରୁଶାଲେମ୍‍ ଆଦାନଙ୍କ୍ ମନା ମାଡ଼୍‍ତଡ଼୍ ।
ACT 21:5 ଇତ୍‍କେ ଅଡ଼୍‌ ତଡ଼୍ ଅଣ୍ଡୟ୍‌ ଆଟ୍ ମାତ୍‍ତେ ପେର୍‍କେ ମାମ୍‍ମେ ଅଡ଼୍‌‍କିଂଙ୍କ୍ ୱିଡ଼୍‍ସି ନିଜର୍‍ ହାର୍ ଆତ୍‍ତମ୍ । ମାକିଂଙ୍କ୍ ୱିଡ଼୍‍ସାନଙ୍କ୍ ଅଡ଼୍‌ ସାରେତଡ଼୍ ନିଜର୍‍ ମୁତ୍‍ତେ ନୁ ପିଲାଙ୍କ୍ ପଇସ୍ ନାର୍ ବାୟିଦେ ମାନ୍ଦାନ୍ ଗଦାଡ଼୍ ଆଞ୍ଚ୍ ଯାକ ୱାତ୍‍ତଡ଼୍ । ଆଗେ ମାମ୍‍ମେ ସାରେତମ୍ ମର୍‍ମିଣ୍ଡା ଉୱୁସ୍ ପ୍ରାର୍ତନା ମାଡ଼୍‍ତମ୍ ।
ACT 21:6 ତାନ୍‍ପେର୍କେ ମାମ୍‍ମେ ଅଡ଼୍‌‍କିଂଙ୍କ୍ ରହସିସ୍, ଏର୍‍ ଜାହାଜ୍‍ତାଗ୍ ୱାତ୍‍ତମ୍, ଅଡ଼୍‌ ଲୋନ୍‌ ମାଲ୍‍ସ୍ ଆତ୍‍ତଡ଼୍ ।
ACT 21:7 ଟାୟର୍‍ତାଗାଙ୍କ୍ ପାଲଟ୍‍ ୱାଟି ମାମ୍‍ମେ ଆଞ୍ଜ ଆଞ୍ଜ ତାଲମେଇତାଗ୍ ହେୱୁତମ୍, ଆଗେ ବିଶ୍ୱାସୀଡ଼୍ ତଡ଼୍ ନମସ୍କାର୍‍ ମାଡ଼ି ଅଡ଼୍‌ ତଡ଼୍ ଅଣ୍ଡୟ୍‌ ଦିନ୍ ମାତ୍‍ତମ୍ ।
ACT 21:8 ମେଣ୍ଡନ୍ ଦିନ୍ ମାମ୍‍ମେ ଆଦ୍ ପଡ଼୍‍ୟେ ୱିଡ଼୍‍ସି କାଇସରିଆତାଗ୍ ହେୱୁତମ୍ । ମାମ୍‍ମେ ଆଗେ ପ୍ରଚାର୍‍ମାଡ଼ାନ୍‍ ଫିଲିପ୍‍ପନ୍ ଲୋନ୍‌ ମାତ୍‍ତମ୍, ଜିରୁଶାଲମ୍‍ତାଗ୍ ସାତ୍‍ଜାନ୍ ହେଞ୍ଚିମାନ୍ଦାନ୍ ନାରୁଡ଼୍‍ ଲୋପେଙ୍କ୍ ଅଣ୍ଡ୍‌ ୱେରଣ୍ଡ୍ ମାତ୍‍ତଣ୍ଡ୍ ।
ACT 21:9 ଅନାୱୁ ନାଲୁ ପେଣ୍ଡୁଲ୍ଆୟ୍‍ୱା ମାୟାସ୍କ୍ ମାତ୍‍ତା ଆୱୁ ଇଶ୍ୱର୍‌ତେ ସୁସମାଚାର୍‍ ପ୍ରଚାର୍‍ ମାଡ଼ମାତ୍‍ତା ।
ACT 21:10 ମାମ୍‍ମେ ଆଗେ ନାର୍‍ଗେ ଦିନା ମାତ୍‍ତେ ପେର୍‍କେ, ଯିହୁଦା ଦେଶ୍‍ତାଗାଙ୍କ୍ ଆଗାବ୍ ପେଦେର୍‍ତଣ୍ଡ୍ ୱେରଣ୍ଡ୍ ବାବବାଦୀ ଆଗେ ୱାତ୍‍ତଣ୍ଡ୍ ।
ACT 21:11 ଅଣ୍ଡ୍‌ ମା ଗାର୍‍ରେ ୱାସ୍ ପାଉଲ୍‍ତେ ବେଲ୍‍ଟ୍‍ତିଙ୍କ୍ ଆତ୍‍ତଣ୍ଡ୍‍, ଆଦିନ୍ ତଡ଼୍ ଅଣ୍ଡ୍‌ ନିଜର୍‌ କାୟ୍‍କ୍ ନୁ ଡେକାଙ୍କ୍ ତଅସ୍ କେତ୍‍ତଣ୍ଡ୍, “ପବିତ୍ର ଆତ୍ମା ନାକିଂଙ୍କ୍ କେତୁତଣ୍ଡ୍ ଯେ, ଇଦ୍ ବେଲ୍‍ଟ୍‍ତେ ନାକିଂଙ୍କ୍ ଯିରୁଶାଲେମ୍‍ ଇହୁଦୀଡ଼୍ ଇଦ୍ ରକମ୍ ତଃଅସ୍ ଅଂକିଙ୍କ୍‌ ଅଣଇହୁଦୀଡ଼୍ କାୟ୍‍ଦାଗ୍ ପସ୍‍ପିତ୍‍ତଣ୍ଡ୍ ।”
ACT 21:12 ଇଦ୍ କେଞ୍ଜି ମାମ୍‍ମେ ନୁ ଆଦ୍ ପଡ଼୍‍ୟେତାଗ୍ ମାନ୍ଦାନ୍ ବାଗାତ୍ ନାରୁଡ଼୍ ପାଉଲ୍‍ତିଙ୍କ୍ ଅନୁରଦ୍‌‍ ମାଡ଼ି ଯିରୁଶାଲେମ୍‍ ଆଦାନଙ୍କ୍ ମନା ମାଡ଼୍‍ତଡ଼୍ ।
ACT 21:13 ପାଉଲ୍ ଉତ୍ତର୍ ହିତ୍‍ତଣ୍ଡ୍, “ମିଡ଼୍ ଇଦ୍ ବାତ୍ ମାଡ଼ୁତିଡ଼୍, ବାତେଙ୍କ୍ କେୟିମିକା ନା ହୃଦୟ୍‍ତିଙ୍କ୍ କେଇସ୍ପିଦୁତିଡ଼୍ ? ଯିରୁଶାଲେମ୍‍ତାଗ୍ ମାତର୍‍ ତଅତିତଡ଼୍ ଆଦିନ୍ ମାଇଦିଙ୍କ୍ ୱେର୍‍ୱନ୍, ଇତ୍‍କେ ପ୍ରବୁ ଜିସୁନ୍ ପେଦେର୍‍ତେ ସେଙ୍ଗେ ଡଲାନଙ୍କ୍ ମିକା ନାନ୍ ତିଆର୍ ମିନ୍ଦେନ୍ ।”
ACT 21:14 ମାମ୍‍ମେ ଅଂକିଙ୍କ୍‌ ବୁଜା ମାଡ଼ାନଙ୍କ୍ ପାର୍‍ୱମ୍ ଗାଲା କଟ ଆସ୍ ମାତ୍‍ତମ୍ ନୁ କେତ୍‍ତମ୍‍, “ପ୍ରବୁନାଦ୍ ଇଚ୍ଛା ସାରେ ପୁରା ଆୟି ।”
ACT 21:15 ଆଗେ ବେସ୍‍କେ ଦିନାମ୍ ମାଞ୍ଜ୍ ମାମ୍‍ମେ ମାୱା ଜିନିଷ୍ ପଇସ୍ ଯିରୁଶାଲେମ୍‍ତାକ୍ ଆତ୍‍ତମ୍ ।
ACT 21:16 କାଇସରିଆତେ ବେସ୍‍କ୍‍ତୁଡ଼୍‍ ଶିଷ୍ୟଡ଼୍ ନୁ ସାଇପ୍ରସ୍‍ତେ ମନାସୋନ ପେଦେର୍‍ତଣ୍ଡ୍ ୱେରଣ୍ଡ୍ ବିଶ୍ୱାସୀ ମିକା ମା ତଡ଼୍ ଆତ୍‍ତଣ୍ଡ୍ । ମନାସୋନତେ ଲୋନ୍‌ ମାମ୍‍ମେ ମାନ୍ଦାନାଦ୍ ବ୍ୟବସ୍ଥା ଆସ୍ ମାତ୍‍ତେ ।
ACT 21:17 ଯିରୁଶାଲେମ୍‍ତାଗ୍ ବିଶ୍ୱାସୀଡ଼୍ ମାକିଂଙ୍କ୍ ସାର୍‍ଦେତ୍ତେ ସ୍ୱାଗତ୍ ମାଡ଼୍‍ତଡ଼୍ ।
ACT 21:18 ମେଣ୍ଡେଅନ୍‌ ଦିନ୍ ପାଉଲ୍ ମା ଯାକୁବ୍‍ ଉଡ଼ାନଙ୍କ୍ ଆତ୍‍ତଣ୍ଡ୍; ମଣ୍ଡଲିତେ ସାରେତଡ଼୍ ନେତାଲଡ଼୍ ଆଗେ ୱାସ୍‍ମାତ୍‍ତଡ଼୍ ।
ACT 21:19 ପାଉଲ୍ ଅଡ଼୍‌‍କିଂଙ୍କ୍ ନମସ୍କାର୍ ମାଡ଼ି ତାନ୍ ସେବା ପାଡ଼୍‍ୟିତଡ଼୍ ଇଶ୍ୱର୍ ଅଣଇହୁଦୀଡ଼୍‌କିଂଙ୍କ୍ ବାତ୍ ମାଡ଼ିମାତ୍‍ତଣ୍ଡ୍; ଆଦିନାଦ୍ ସାରେ ବିଷୟ୍‍ କେତ୍‍ତଣ୍ଡ୍ ।
ACT 21:20 ଅନ୍‌ ଗଟ୍ କେଞ୍ଜ୍‍ତେ ପେର୍‍କେ ଅଡ଼୍‌ ସାରେତଡ଼୍ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼୍‍ତଡ଼୍ । ତାନ୍ ପେର୍‍କେ ଅଡ଼୍‌ କେତ୍‍ତଡ଼୍, “ହଁ ଦାଦା ପାଉଲ୍, ନିମ୍‍ ଉଡ଼ୁତିନ୍, ବେଲା ଇଞ୍ଜେ ହଜାର୍‌ ହଜାର୍‌ ଇହୁଦୀ ଦାଦାଲଡ଼୍‍ ପ୍ରବୁ ଜିସୁନାଗ୍ ବିଶ୍ୱାସ୍‍ ମାଡ଼ୁତଡ଼୍ ନୁ ମୋଶାନ୍‌‌ ନିୟମ୍‍ ମିକା ପାଲନ୍ ମାଡ଼ୁତଡ଼୍ ।
ACT 21:21 ଅଡ଼୍‌ କାବୁର୍ ପାଏମ୍ ଆତ୍‍ତଡ଼୍ ଯେ, ନିମ୍‍ ଅଣଇହୁଦୀଡ଼୍ ଦେଶ୍ ବାସେ ମାଡ଼ମାନ୍ଦାନ୍ ଇହୁଦୀଡ଼୍‍କ୍ ମୋଶାଲ୍‌‍ ନିୟମ୍ ୱିଡ଼୍‍ସାନଙ୍କ୍, ଅଡ଼ାୱୁ ପିଲାକିଙ୍କ୍ ସୁନ୍ନତ୍ ମାଡ଼୍‍ମାଟ୍ ଇଞ୍ଜ ନୁ ଇହୁଦୀଡ଼୍ ରୀତିନୀତି ପାଲନ୍ ମାଡ଼୍‍ମାଟ୍ ଇଞ୍ଜ ଶିକ୍ଷା ହିଦୁତିନ୍ ।
ACT 21:22 ନିମ୍‍ ଇଗେ ହେୱୁତ୍‍ତିନ୍ ଇଞ୍ଜ ଅଡ଼୍‌ ନିଜାମ୍ କେଞ୍ଜିତଡ଼୍ । ଆଲେକେ ବାତ୍ ମାଡ଼ାନଙ୍କ୍ ଆଦ୍‍ତେ ?
ACT 21:23 ମାମ୍‍ମେ ହାଲ୍‍ସୁତମ୍, ନିମ୍‍ ଅଣ୍ଡୟ୍‌‍ ପାଡ଼୍‍ୟି ମାଡ଼େ । ଇଗେ ମାନ୍ଦାନ୍ ନାଲୁଜାନ୍ ନାରୁଡ଼୍ ଅଣ୍ଡୟ୍‌ ମାନତ୍‍ ମାଡ଼୍‍ତଡ଼୍ ।
ACT 21:24 ଅଡ଼୍‌ ତଡ଼୍ ଅନ୍‌ । ଶୁଚିକରଣ ବିଦି ପାଲନ୍ ମାଡ଼ାନାଗ୍ ଅଡ଼୍‌ ତଡ଼୍ କାଇଲି ଅଡ଼ାୱୁ କର୍ଚ୍ଚ ହିମ୍ । ତାନ୍‍ପେର୍କେ ଅଡ଼୍‌ ନିଜର୍‍ ନିଜର୍‍ ତାଲାତିଙ୍କ୍ ଟାଙ୍ଗ୍‍ରୁ ମାଡ଼ିତଡ଼୍ । ଆଗାଙ୍କ୍ ପୁନ୍‍ତଡ଼୍ ଯେ, ନି ବିଷୟ୍‍ତେ ପେଇସ୍ ମାନ୍ଦାନ୍ ସାରେ କାବୁର୍ ସତ୍ ଆୟ୍‍ୟ, ମାତର୍ ନିମ୍‍ ମୋଶାନ୍‌‌ ନିୟମ୍‍ ଲେକାମ୍ ବାଦ୍‍କୁତିନ୍ ।
ACT 21:25 ଇତ୍‍କେ ବେନ୍ ଅଣଇହୁଦୀଡ଼୍ ବିଶ୍ୱାସୀ ଆତ୍‍ତଡ଼୍, ଅଡ଼୍‌ ଗାର୍‍ରେ ଅଣ୍ଡୟ୍‌ ଚିଟି ଲେକି କେତିତମ୍ ଯେ, ମାୱାଦ୍ ନିଷ୍ପତ୍ତି ଲେକାମ୍ ଅଡ଼୍‌ ପୁତ୍‍ଲାମ୍‍ତିଙ୍କ୍ ଇତ୍‍ତେ କାଦି ତିନଡ଼୍, ନେତୁର୍‍ ଉନଡ଼୍, ପାପେତିଙ୍କ୍ ପଇସ୍ ହାୱ୍‍କ୍‍ତେ ପଶୁତ୍ ଆୱୁଙ୍ଗ୍ ତିନଡ଼୍ ନୁ ଯୌନ ପାପ୍‍ତାଗାଙ୍କ୍ ୱେରେ ମାନ୍‍ତଡ଼୍ ।”
ACT 21:26 ମେଣ୍ଡନ୍ ଦିନ୍ ପାଉଲ୍ ଅଡ଼୍‌ ନାଲ୍‍ୱୁଡ଼୍ ତଡ଼୍ ଶୁଚିକରଣ ବିଦି ପାଲନ୍ ମାଡ଼୍‍ତଣ୍ଡ୍ । ତାନ୍ ପେର୍‍କେ ଅଣ୍ଡ୍‌ ମନ୍ଦିର୍‍ତାଗ୍ ଆଞ୍ଜ୍ ଶୁଚିକରଣ ପାଡ଼୍‍ୟି ବେସୁଟ୍‌ ପୁରା ଆଦ୍‍ତେ ନୁ ବେନ୍ ସମୟ୍‍ତେ ପୁଜିତଡ଼୍, ଆଦ୍ ଅଂକିଙ୍କ୍‌ କେସିତ୍‍ତଡ଼୍ ।
ACT 21:27 ଶୁଚିକରଣ୍ ପାଡ଼୍‍ୟି ସାତ୍ ଦିନ୍ ତେର୍‍ତେ ୱେଲେ ଏସିଆ ପ୍ରଦେଶ୍‍ତେ ବେସ୍‍କ୍‍ତୁଡ଼୍‍ ଇହୁଦୀଡ଼୍ ପାଉଲ୍‍ତିଙ୍କ୍ ମନ୍ଦିର୍‍ତାଗ୍ ଉଡ଼୍‍ତଡ଼୍ । ଅଡ଼୍‌ ଆଗେ ଗୁଡ଼ିମାନ୍ଦାନ୍ ନାରୁଡ଼୍‍କିଂଙ୍କ୍ ପୁସ୍‍କା ମାଡ଼ି ପାଉଲ୍‍ତିଙ୍କ୍ ପଇତ୍‍ତଡ଼୍ ।
ACT 21:28 ଅଡ଼୍‌ କିଡ଼୍‍କି କେତ୍‍ତଡ଼୍, “ହଁ ଇସ୍ରାଏଲୀୟ ଦାଦାଲଡ଼ି, ମାକିଂଙ୍କ୍ ସାହାଯ୍ୟ ମାଡ଼ାଟ୍ ! ଇ ନାରୁଣ୍ଡ୍‍ ସାରେପାକ୍ ଆଞ୍ଜ୍ ଇଶ୍ରାଏଲୀୟ ନାରୁଡ଼୍ ବିରୁଦ୍ଦ୍‍ତେ, ମୋଶାନ୍‌‌ ନିୟମ୍‍ ନୁ ଇଦ୍ ମନ୍ଦିର୍‍ ବିରୁଦ୍ଦ୍‍ତେ ଶିକ୍ଷା ଇଦୁତଣ୍ଡ୍ । ଇଞ୍ଜେ ଅଣ୍ଡ୍‌ ମେଣ୍ଡେ ବେସ୍କ୍‍ତୁଡ଼୍‍ ଅଣଇହୁଦୀଡ଼୍‍କ୍ ମନ୍ଦିର୍ ଲୋପେ ତାସ୍ ଇଦ୍ ପବିତ୍ର ପଡ଼୍‍ୟେତିଙ୍କ୍ ଶୁଚି ମାଡ଼୍‍ତଣ୍ଡ୍ ।”
ACT 21:29 ଅଡ଼୍‌ ନାର୍‍ତାଗ୍ ଏଫିସିୟତେ ତ୍ରଫିମ୍‍ତିଙ୍କ୍ ପାଉଲ୍ ତଡ଼୍ ଉଡ଼୍‍ତାଙ୍କ୍ ହାଲ୍‍ସ୍‍ତଡ଼୍ ଯେ, ପାଉଲ୍ ଅଂକିଙ୍କ୍‌ ମନ୍ଦିର୍‍ତାଗ୍ ଆତ୍‍ତଣ୍ଡ୍‍ ।
ACT 21:30 ନଗର୍‍ତେ ସାରେତଡ଼୍ କପାମ୍ ଆତ୍‍ତଡ଼୍ । ନାରୁଡ଼୍ ପାଉଲ୍‍ତିଙ୍କ୍ ମନ୍ଦିର୍‍ତାଗାଙ୍କ୍ ବାୟିଦେ ଲାଗି ତାତ୍‍ତଡ଼୍ । ମନ୍ଦିର୍‍ତେ ମାର୍‍ ସାରେ ବନ୍ଦ୍ ମାଡ଼୍‍ତଡ଼୍ ।
ACT 21:31 କପାମ୍ ଆତ୍‍ତେ ମାନେୟ୍‍ ପାଉଲ୍‍ତିଙ୍କ୍ ହାୱ୍‍କାଙ୍କ୍ ତିଆର୍ ଆଦ୍‍ତଡ଼୍, ଇତ୍‍କେ ଟିକ୍ ଆଦେ ସମୟ୍‍ତେ ଯିରୁଶାଲେମ୍‍ତାଗ୍ ଇଂସାକାଣ୍ଡ ଗଟେମ୍ ଆଦୁତ୍‍ତେ ଇଞ୍ଜ ପୁଞ୍ଜ୍ ରୋମୀୟ ସୈନ୍ୟଡ଼୍ ମୁକ୍ୟାଲ୍ କବର୍ ପାଏମ୍ ଆସ୍,
ACT 21:32 ଆଗାଙ୍କ୍‍ ବେସ୍‍କ୍‍ତୁଡ଼୍‍ ସେନାପତି ନୁ ସୈନ୍ୟଡ଼୍‍କ୍ ପଇସ୍ ଆଦ୍ ପଡ଼୍‍ୟେତାଗ୍ ୱାତ୍‍ତଣ୍ଡ୍ । ନାରୁଡ଼୍ ସୈନ୍ୟଡ଼୍ ମୁକ୍ୟାଙ୍କ୍ ନୁ ସୈନିକିଡ଼୍‍କ୍ ଉଡ଼ି ପାଉଲ୍‍ତିଙ୍କ୍ ମେଣ୍ଡେ ରେହେୱକଟ ୱିଡ଼୍‍ସ୍‍ତଡ଼୍ ।
ACT 21:33 ସୈନ୍ୟଡ଼୍ ମୁକ୍ୟାଲ୍ ପାଉଲ୍‍ତିଙ୍କ୍ ଗିରଫ୍ ମାଡ଼ି ଅଂକିଙ୍କ୍‌ ରେଣ୍ଡ୍ ଇକ୍‍ଲେମ୍ ତଡ଼୍ ତଅତ୍‍ତାନଙ୍କ୍ ଗଟ୍ ହିତ୍‍ତଣ୍ଡ୍ । ତାନ୍ ପେର୍‍କେ ଅଣ୍ଡ୍‌ ପାଚ୍ରାମାଡ଼୍‍ତଣ୍ଡ୍, “ଇଣ୍ଡ୍ ନାରୁଡ଼୍ ବେନ ନୁ ଅଣ୍ଡ୍‌ ବାତ୍ ମାଡ଼୍‍ତଣ୍ଡ୍ ?”
ACT 21:34 ନାରୁଡ଼୍ ଗହଲିତାଗ୍ ବେନ ବାତ୍‍ବାତା କେସ୍ କିଡ଼୍‍କ୍‌ତଡ଼୍ । ଇଦ୍ ରକମ୍ ରାମ୍‍କ୍ ଆତ୍‍ତଡ଼୍ ଯେ, ସୈନ୍ୟଡ଼୍ ମୁକ୍ୟାଲ୍ ବାତ୍ ଗଟେମ୍ ଆତ୍‍ତେ, ଆଦ୍ ପୁନ୍ଦାନଙ୍କ୍ ପାର୍‍ୱଣ୍ଡ୍ । ଆଦିଙ୍କ୍ ପାଉଲ୍‍ତିଙ୍କ୍ ଦୁର୍ଗତାଗ୍ ଲୋପେ ଆଦାନଙ୍କ୍ ସୈନିକିଡ଼୍‍କ୍ ଆଦେଶ୍ ହିତ୍‍ତଣ୍ଡ୍ ।
ACT 21:35 ଅଡ଼୍‌ ଅଂକିଙ୍କ୍‌ ଆସ୍ ଦୁର୍ଗତେ ପାହାଚ ଗାର୍‍ରେ ହେୱୁଦାନ୍ ୱେଲେ ଅନ୍‌ ସାରେପାକ୍ ମାନ୍ଦାନ୍ ନାରୁଡ଼୍ ଗାଟି ବିଶୃଙ୍କଲା ଆତ୍‍ତାଙ୍କ୍ ସୈନିକିଡ଼୍ ପାଉଲ୍‍ତିଙ୍କ୍ କାଞ୍ଜୀ ଆତ୍‍ତଡ଼୍ ।
ACT 21:36 ନାରୁଡ଼୍ ସାରେତଡ଼୍ ଅନ୍‌ ପେର୍‍କେ ପେର୍‍କେ ୱାସ୍ କିଡ଼୍‍କି କେସମାତ୍‍ତଡ଼୍, “ଅଂକିଙ୍କ୍‌ ହାୱ୍‍କାଟ୍ ।”
ACT 21:37 ସୈନିକିଡ଼୍ ପାଉଲ୍‍ତିଙ୍କ୍ ଦୁର୍ଗତାଗ୍ ଲୋପେ ଆଦାନ୍ ୱେଲେ ଅଣ୍ଡ୍‌ ସୈନିକିଡ଼୍ ମୁକ୍ୟାଙ୍କ୍ କେତ୍‍ତଣ୍ଡ୍‍, “ନାନ୍ ନି ତଡ଼୍ ତିର୍‍ୟାନଙ୍କ୍ ପାର୍‍ଦ୍‍ତାନ୍ କି ?” ସୈନିଡ଼୍ ମୁକ୍ୟାଲ୍ ପାଚ୍ରାମାଡ଼୍‍ତଣ୍ଡ୍, “ନିମ୍‍ ତ ଗ୍ରୀକ୍ ଗଟ୍‍ କେତୁତିନ୍ ।
ACT 21:38 ଆଲେକେ ବେସ୍‍କେ ଦିନାତ୍ ମୁନ୍‍ନେ ମିଶର୍‍ତାଗ୍ ରାମ୍‍କ୍ ମାଡ଼ି ନାଲୁ ହଜାର୍‌ ଗୁପାଲଡ଼୍‍କ୍ ତାସ୍ ଉସ୍କ ନେଲ୍‌ତାଗ୍ ହେୱୁସ୍ ମାତ୍‍ତଣ୍ଡ୍, ନିମ୍‍ ତ ଆ ନାରୁଣ୍ଡ୍‍ ଆୟ ?”
ACT 21:39 ପାଉଲ୍ ଉତ୍ତର୍ ହିତ୍‍ତଣ୍ଡ୍, “ସିଲିସିଆତେ ତାର୍ଷିସ୍‍ତାଗ୍ ଜନମ୍ ଆସ୍ ମାନ୍ଦାନ୍ ନାନ୍ ୱେରଣ୍ଡ୍ ଇହୁଦୀ, ଅଣ୍ଡୟ୍‌ ବାଡ଼୍‍ୟାଦ୍ ନଗର୍‍ତେ ନାଗରିକ । ଇ ନାରୁଡ଼୍‍କିଂଙ୍କ୍ ବୁଜାମାଡ଼ି କେତାନଙ୍କ୍ ନାକିଂଙ୍କ୍ ଆନୁମତି ହିମ୍ ।
ACT 21:40 ସେନାପତି ଅଂକିଙ୍କ୍‌ ଆନୁମତି ହିତ୍‍ତାଙ୍କ୍ ପାଉଲ୍ ପାହାଚତେ ପର୍‍ର ନିଶ୍‍ମିକା ନାରୁଡ଼୍‍କିଂଙ୍କ୍ କଟ ମାନ୍ଦାନଙ୍କ୍ କାୟ୍‍ତେଇସ୍ କେତ୍‍ତଣ୍ଡ୍ । ଅଡ଼୍‌ କଟ ଆତ୍‍ତେ ପେର୍‍କେ ପାଉଲ୍‍ ହୀବ୍ରୁ ଗଟ୍‍ତେ କେତ୍‍ତଣ୍ଡ୍ ।”
ACT 22:1 “ଦାଦାଲଡ଼୍‍ ନୁ ବାବାଲଡ଼ି, ନା ନିଜର୍‍ତାଗାଙ୍କ୍ ନାନ୍ ମିକିଂଙ୍କ୍ ବାତ୍ କେତୁତାନ୍, ଆଦ୍ କେଞ୍ଜାଟ୍ !”
ACT 22:2 ଅଡ଼୍‌ ତଡ଼୍ ଅଣ୍ଡ୍‌ ହୀବ୍ରୁ ଗଟ୍‍ତେ ତିର୍‍ୟାନାଦ୍ କେଞ୍ଜି ଅଡ଼୍‌ କଟ ଆତ୍‍ତଡ଼୍ ନୁ ମେଣ୍ଡେ ପାଉଲ୍ କେତାନଙ୍କ୍ ପସ୍‍ସ୍ପ୍‍ତଣ୍ଡ୍ ।
ACT 22:3 “ନାନ୍ ୱେରଣ୍ଡ୍ ଇହୁଦୀ, ସିଲିସିଆତେ ତାର୍ଷିସ୍‍ତାଗ୍ ନାୟାଦ୍ ଜନମ୍, ଇତ୍‍କେ ନାନ୍ ଜିରୁଶାଲମ୍‍ତାଗ୍ ପେର୍‍ସି ମାତ୍‍ତାନ୍ ନୁ ଗମଲୀୟେଲ୍‍ତେ ୱେରଣ୍ଡ୍ ପେକାଲ୍ ମାତ୍‍ତାନ୍ । ମା ଆନିଦାଦିଡ଼୍ ମୋଶାନ୍‌‌ ନିୟମ୍‍ ନାନ୍ କାର୍‍ସ୍ ମାତ୍‍ତାନ୍ ନୁ ମିଇ ଲେକାମ୍ ଇଶ୍ୱର୍‌ତେ ସେଙ୍ଗେ ନାନ୍ ଲେକେତ୍‍ ନାରୁନ୍ ପ୍ରସଂଶା ମାତ୍‍ତାନ୍ ।
ACT 22:4 ନାନ୍ ପ୍ରବୁନ୍‍ ଆର୍‍ ପଇସ୍‌ ଆଞ୍ଜମାନ୍ଦା ନାରୁଡ଼୍‍କିଂଙ୍କ୍ ଅତ୍ୟାଚାର୍ ମାଡ଼ି ଅଡ଼୍‌‍କିଂଙ୍କ୍ ଜିୱୁଣ୍ଡ୍‍ତେ ରେହେସ ମାତ୍‍ତାନ୍ । ନାଟାଙ୍କ୍ ମାନେୟ୍‍କ୍ ସାରେତଡ଼୍‌କିଂଙ୍କ୍ ବନ୍ଦି ମାଡ଼ି ଜଇଲ୍‍ତାଗ୍ ୱାଟ ମାତ୍‍ତାନ୍ ।
ACT 22:5 ନାୱାଦ୍ ଇଦ୍ ଗଟ୍ ନିଜାମ୍, ବେଡ଼ିୟି ଯାଜକ୍ ନୁ ବେଡ଼୍‍ୟାଦ୍‌ ମିଟିଙ୍ଗ୍‍ତେ ସାରେତଡ଼୍ ଇଦିନାଦ୍ ସାକ୍ଷ୍ୟ । ଇ ନାରୁଡ଼୍‍କିଂଙ୍କ୍ ବନ୍ଦି ମାଡ଼ି ନୁ ଇକ୍‍ଲେମ୍ ତଅସ୍ ଦଣ୍ଡ୍ ଇଦାନ୍ ମାଇଦିଙ୍କ୍ ଯିରୁଶାଲେମ୍‍ତାଗ୍ ତାତାନ୍ ସେଙ୍ଗେ ନାନ୍ ବେଡ଼ିୟି ଯାଜକ୍‍ତାଗାଙ୍କ୍ ଆଦେଶ୍‍ ଇସ୍‌ ଦାମାସ୍‍କସ୍‍ତାଗ୍ ମାନ୍ଦାନ୍ ବିଶ୍ୱାସୀ ଇହୁଦୀ ନାରୁଡ଼୍ ବକେତ୍ ଅତ୍‍ତାନ୍ ।”
ACT 22:6 “ନାନ୍ ଆଞ୍ଜ୍ ବେସୁଟ୍‌ ଦାମାସ୍‍କସ୍‍ତେ ବକେତ୍ ହେୱୁସ ମାତ୍‍ତାନ୍, ଆସୁଟେ ପାୟାଲ୍ ସ୍ୱର୍ଗତାଗାଙ୍କ୍ ଅଣ୍ଡୟ୍‌ ୱେଇସ୍ ହଟାତ୍ ନା ତିଡ଼୍‍ୟିପାକ୍ ନିତ୍‍ତେ ।
ACT 22:7 ନାନ୍ ବୂମ୍‌ତାଗା କାପ୍‍ମୁଡ଼୍‍ନ୍ଦି ରାୟ୍‍ତାନ୍ ନୁ ନା ମାଇଦିଙ୍କ୍ ଇଦ୍ ଗଟ୍ କେଞ୍ଜ୍‍ତାନ୍, ‘ଶାଉଲ୍, ଶାଉଲ୍ ! ନିମ୍‍ ବାତେଙ୍କ୍ ନାକିଂଙ୍କ୍ ଗାଟିତିପାଲ୍ ମାଡ଼ୁତିନ୍ ?’
ACT 22:8 ନାନ୍ ପାଚ୍ରାମାଡ଼୍‍ତାନ୍, ‘ପ୍ରବୁ, ନିମ୍‍ ବେନ ?’ ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ‘ନିମ୍‍ ବେନଙ୍କ୍ ଗାଟିତିପାଲ୍ ମାଡ଼ୁତିନ୍, ନାନ୍ ଅଣ୍ଡେ ନାଜରିତିୟ ଜିସୁ ।’
ACT 22:9 ନା ତଡ଼୍ ମାନ୍ଦାନ୍ ନାରୁଡ଼୍ ଆଦ୍ ୱେସ୍ ଉଡ଼୍‍ତଡ଼୍, ଇତ୍‍କେ ନା ତଡ଼୍ ଗଟ୍ ତିର୍‍ୟାନ୍ ନାରୁନ୍ ଗଟ୍ କେଞ୍ଜାଙ୍କ୍ ପାର୍‍ୱଡ଼୍ ।
ACT 22:10 ନାନ୍ ପାଚ୍ରା ମାଡ଼୍‍ତାନ୍, ‘ପ୍ରବୁ, ନାନ୍ ବାତ୍ ମାଡ଼ିତାନ୍ ?’ ପ୍ରବୁ ନାକିଂଙ୍କ୍ କେତ୍‍ତଣ୍ଡ୍, ‘ତେଦ୍‍ଦେ, ଦାମାସ୍‍କସ୍‍ତାଗ୍ ଅନ୍‌, ଇଶ୍ୱର୍ ନିକିଂଙ୍କ୍ ବେନ୍ ପାଡ଼୍‍ୟି ଟିକ୍ ମାଡ଼୍‍ତଣ୍ଡ୍, ଆଗେ ନିକିଂଙ୍କ୍ ଆଦ୍ କେସିଦ୍‍ତଡ଼୍ ।’
ACT 22:11 ଗୌରବମୟ ୱେଇସ୍‍ତେ ମାଇଦିଙ୍କ୍ ନାନ୍ କାନାଲ୍ ଆସ୍‍ମାତ୍‍ତାନ୍ । ଆଦିନ୍ ମାଇଦିଙ୍କ୍ ନା ତଡ଼୍ ମାନ୍ଦାନଡ଼୍ ନା କାୟ୍‍ଦିଙ୍କ୍ ପଇସ୍ ନାକିଂଙ୍କ୍ ଦାମାସ୍‍କସ୍‍ତାଗ୍ ଆତ୍‍ତଡ଼୍ ।”
ACT 22:12 “ଆଦ୍ ନଗର୍‍ତାଗ୍ ହନନୀୟ ପେଦେର୍‍ତଣ୍ଡ୍ ୱେରଣ୍ଡ୍ ଦାର୍ମିକ୍ ନାରୁଡ଼୍ ମାତ୍‍ତଣ୍ଡ୍ । ଅଣ୍ଡ୍‌ ମୋଶାନ୍‌‌ ନିୟମ୍‍ ପାଲନ୍ ମାଡ଼ମାତ୍‍ତଣ୍ଡ୍ ନୁ ଆଗେ ବାସେ ମାଡ଼ମାନ୍ଦାନ୍ ଇହୁଦୀଡ଼୍ ସାରେତଡ଼୍ ଅଂକିଙ୍କ୍‌ ଗାଟି ସମ୍ମାନ୍ ମାଡ଼ମାତ୍‍ତଡ଼୍ ।
ACT 22:13 ଦାଦାଲଡ଼୍‍ ନା ବକେତ୍ ୱାସ୍ ନା ସପେ ନିସ୍ କେତ୍‍ତଣ୍ଡ୍, ‘ଦାଦା ଶାଉଲ୍, ନିୟାଦ୍ ଉଡ଼ାନାଦ୍‍ଶକ୍ତି ମାଲ୍‍ସ୍ ୱାଡ଼ି ।’ ଟିକ୍ ଆଦେ ସମୟ୍‍ତେ ନାନ୍ ମେଣ୍ଡନ୍‍ନ୍ଦାମ୍ ଉଡ଼ାନାଦ୍‍ଶକ୍ତି ପାଏମ୍ ଆସ୍ ଅଂକିଙ୍କ୍‌ ଉଡ଼ାନଙ୍କ୍ ପାର୍‍ତ୍‍ତାନ୍ ।
ACT 22:14 ଅଣ୍ଡ୍‌ କେତ୍‍ତଣ୍ଡ୍, ‘ମାନ୍‍ ଆନିଦାଦିଡ଼୍ ଇଶ୍ୱର୍ ନିକିଂଙ୍କ୍ ଅନାଦ୍‌ ଇଚ୍ଛା ପୁନ୍ଦାନଙ୍କ୍, ଅନ୍‌ ଦାର୍ମିକ୍ ନାରୁଣ୍ଡ୍‍ ଉଡ଼ାନଙ୍କ୍ ନୁ ଅନାଦ୍‌ ଗଟ୍ କେଞ୍ଜାନ୍ ସେଙ୍ଗେ ହେଞ୍ଚ୍‍ତଣ୍ଡ୍ ।
ACT 22:15 ବାତେଙ୍କ୍ଇତ୍‍କେ ନିମ୍‍ ବାତ୍ ଉଡ଼୍‍ତିନ୍ ନୁ କେଞ୍ଜ୍‍ତିନ୍, ଆଦ୍ ସାରେତଡ଼୍ ଗାର୍‍ରେ କେତାନଙ୍କ୍ ନିମ୍‍ ଅନ୍‌ ସାକ୍ଷି ଆଦ୍‍ତିନ୍‍ ।
ACT 22:16 ମେଣ୍ଡେ ବାତେଙ୍କ୍ ଗମାଡ଼୍ ମାଡ଼ୁତିନ୍ ? ତେଏଦା ବାତିସ୍ମ ଗ୍ରହନ୍ ମାଡ଼େ ନୁ ଅଂକିଙ୍କ୍‌ ପ୍ରାର୍ତନା ମାଡ଼୍‍କେ ନିୟାଦ୍ ପେଦେର୍‍ତେ ପାପ୍ ସାରେ ନର୍‍ସ୍ ଆଦ୍‍ତେ ।’”
ACT 22:17 “ନାନ୍ ଯିରୁଶାଲେମ୍‍ ମାଲ୍‍ସ୍ ଆଞ୍ଜ୍ ଆଗେ ମନ୍ଦିର୍‍ତାଗ୍ ପ୍ରାର୍ତନା ମାଡ଼ମାନ୍ଦାନ୍ ୱେଲେ, ନାନ୍‍ ଅଣ୍ଡୟ୍‌‍ ଦର୍ଶନ୍ ପାଏମ୍ ଆତ୍‍ତାନ୍ ।
ACT 22:18 ଆଦ୍‍ ଦର୍ଶନ୍‍ତାଗ୍‍ ନାନ୍‍ ପ୍ରବୁଙ୍କ୍‍ ଉଡ଼୍‍ତାନ୍‍, ମେଣ୍ଡେ ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ‘ସିଟ୍‍ପାଟ୍ ଯିରୁଶାଲେମ୍‍ ୱିଡ଼୍‍ସେ, ବାତେଙ୍କ୍ଇତ୍‍କେ ଇଗେତ୍ ନାରୁଡ଼୍ ନା ବିଷୟ୍‍ତେ ନିୟାଦ୍ ସାକ୍ଷ୍ୟ ଗ୍ରହନ୍ ମାଡ଼ଡ଼୍‍ ।’
ACT 22:19 ନାନ୍ ଉତ୍ତର୍ ଇତ୍‍ତାନ୍, ‘ପ୍ରବୁ, ନାନ୍ ପ୍ରାର୍ତନା ଲଅକିନାଗ୍ ଆଞ୍ଜ୍ ନିକିଂଙ୍କ୍ ବିଶ୍ୱାସ୍ ମାଡ଼ମାନ୍ଦାନ୍ ନାରୁଡ଼୍‍କିଂଙ୍କ୍ ବେଲା ବନ୍ଦି ମାଡ଼ିମାତ୍‍ତାନ୍ ନୁ ରେହେସ୍ ମାତ୍‍ତାନ୍, ଇଦ୍ ଅଡ଼୍‌ ସାୟେ ପୁତ୍‍ତଡ଼୍ ।
ACT 22:20 ମେଣ୍ଡେ ବେସୁଟ୍‌ ନି ସାକ୍ଷିଙ୍କ୍‌ ସ୍ତିଫାନ୍‍ତିଙ୍କ୍ ହାୱକ୍‍ତଡ଼୍, ନାନ୍ ନିଜେ ଆଗେ ମାତ୍‍ତାନ୍; ଅଂକିଙ୍କ୍‌ ଜିୱୁଣ୍ଡ୍‍ତେ ରେହେତାନଙ୍କ୍ ସପଟ୍ ମାଡ଼ିମାତ୍‍ତାନ୍ ନୁ ଅଂକିଙ୍କ୍‌ ଦଂସମାଡ଼୍‍ଡ଼ାୱ୍ ଚକାସିଲେଙ୍କ୍ କେପିମାତ୍‍ତାନ୍ ।’
ACT 22:21 ପ୍ରବୁ ନାକିଂଙ୍କ୍ କେତ୍‍ତଣ୍ଡ୍, ‘ଅନ୍‌, ନାନ୍ ନିକିଂଙ୍କ୍ ଗାଟି ଜେକେ ଅଣଇହୁଦୀଡ଼୍ ବକେତ୍ ରହତିତାନ୍ ।’”
ACT 22:22 ପାଉଲ୍ ଇଦ୍ ଗଟ୍ କେତ୍‍ତାନ୍ ଯାକ ନାରୁଡ଼୍ ମନ୍ ଇସ୍‌ କେଞ୍ଜ ମାତ୍‍ତଡ଼୍, “ଇତ୍‍କେ ତାନ୍ ପେର୍‍କେ ଅଡ଼୍‌ ଗାଟି ଲେଙ୍ଗ୍‍ଦେ କିଡ଼୍‍କି କେତ୍‍ତଡ଼୍, ଅଂକିଙ୍କ୍‌ ପୃତିବି ତାଗାଙ୍କ୍‍ ପେସ୍‍ସ୍ପିମୁଟ୍ ! ଅଂକିଙ୍କ୍‌ ହାୱକିତମ୍‍ ! ଅଣ୍ଡ୍‌ ଜିୱେ ବାଦ୍‍କାନଙ୍କ୍ ଯୋଗ୍ୟ ଆୟଣ୍ଡ୍ !”
ACT 22:23 ଅଡ଼୍‌ କିଡ଼୍‍କ ମାତ୍‍ତଡ଼୍, ସିଲେଙ୍କ୍ ପାର୍‍ସ୍ପ ମାତ୍‍ତଡ଼୍ ନୁ ଦୁମ୍ ପର୍‍ର ହେସମାତ୍‍ତଡ଼୍ ।
ACT 22:24 ପାଉଲ୍‍ତିଙ୍କ୍ ଦୁର୍ଗତାଗ୍ ଲୋପେ ଆଦାନ୍ ସେଙ୍ଗେ ରୋମୀୟ ସେନାପତି ସୈନିକିଡ଼୍‍କ୍ ଗଟ୍ ହିତ୍‍ତଣ୍ଡ୍ ନୁ ଇହୁଦୀଡ଼୍ ବାତେଙ୍କ୍ ଅନ୍‌ ବିରୁଦ୍‍ତେ ଇଦ୍‍ରକମ୍ କିଡ଼୍‍କୁତଡ଼୍, ଆଦ୍ ପୁନ୍ଦାନଙ୍କ୍ ଅଂକିଙ୍କ୍‌ ଚାବୁକ୍‍ତେ ରେହେତାନଙ୍କ୍ ଆଦେଶ୍‍ ହିତ୍‍ତଣ୍ଡ୍ ।
ACT 22:25 ଇତ୍‍କେ ଅଡ଼୍‌ ଅଂକିଙ୍କ୍‌ ତଅତାନ୍ ୱେଲେ ପାଉଲ୍ ଆଗେ ମାନ୍ଦାନ୍ ୱେରଣ୍ଡ୍ କର୍ମଚାରୀଙ୍କ୍ କେତ୍‍ତଣ୍ଡ୍, “ବାତ୍‍ଆଇ କାରାପ୍‍ତେ ଇଞ୍ଜେକ୍‍ଆନା ବିଚାର୍ ଆୟିୱେନଣ୍ଡ୍ ୱେରଣ୍ଡ୍ ରୋମୀୟ ନାଗରିକ୍‍ତିଙ୍କ୍ ଚାବୁକ୍‍ତେ ରେହେତାନାଦ୍ ବାତ୍ ନିୟମ୍‍ ମିନ୍ଦେ ?”
ACT 22:26 ଇଦ୍ କେଞ୍ଜି କର୍ମଚାରୀ ଆଞ୍ଜ୍ ସୈନ୍ୟଡ଼୍ ମୁକ୍ୟଙ୍କ୍ କେତ୍‍ତଣ୍ଡ୍, “ନିମ୍‍ ବାତ୍ ମାଡ଼ୁତିନ୍ ? ଇଣ୍ଡ୍ ଯେ ୱେରଣ୍ଡ୍ ରୋମୀୟ ନାରୁଣ୍ଡ୍‍ !”
ACT 22:27 ସୈନ୍ୟଡ଼୍ ମୁକ୍ୟାଲ୍ ପାଉଲ୍‍ତେ ବକେତ୍ ଆଞ୍ଜ୍ କେତ୍‍ତଣ୍ଡ୍, “ନିମ୍‍ ବାତ୍ ୱେରଣ୍ଡ୍ ରୋମୀୟ ନାରୁନୀ ?” ପାଉଲ୍ ଉତ୍ତର୍ ହିତ୍‍ତଣ୍ଡ୍, “ହଁ ।”
ACT 22:28 ସେନାପତି କେତ୍‍ତଣ୍ଡ୍, “ନାର୍‍ଗେ ଡାବ୍‍କ୍ ଇସ୍‌ ନାନ୍ ୱେରଣ୍ଡ୍ ରୋମୀୟ ନାରୁଣ୍ଡ୍‍ ଆତ୍‍ତାନ୍ ।” ପାଉଲ୍ ଉତ୍ତର୍ ହିତ୍‍ତଣ୍ଡ୍, “ଇତ୍‍କେ ନାନ୍ ଜନମ୍ କନ୍‍ସ୍ ରୋମୀୟ ।”
ACT 22:29 ସାଙ୍ଗେ ସାଙ୍ଗେ ବେନ୍ ନାରୁଡ଼୍ ପାଉଲ୍‍ତିଙ୍କ୍ ପ୍ରଶ୍ନ ମାଡ଼ାନଙ୍କ୍ ଆଞ୍ଜ ମାତ୍‍ତଡ଼୍, ପେର୍‍କେ ହେର୍‍ତଡ଼୍ ନୁ ପାଉଲ୍ ୱେରଣ୍ଡ୍ ରୋମୀୟ ନାଗରିକ ଇଞ୍ଜ ପୁଞ୍ଜ୍ ନୁ ଅଣ୍ଡ୍‌ ଯେ ଅଂକିଙ୍କ୍‌ ଇକ୍‍ଲେମ୍ ତଡ଼୍ ତଅତାନଙ୍କ୍ ଆଦେଶ୍‍ ହିତ୍‍ତଣ୍ଡ୍, ଇଦ୍ ପୁଞ୍ଜ୍, ସୈନିକିଡ଼୍ ମୁକ୍ୟାଲ୍ ଗାଟି ୱେର୍‍ତଣ୍ଡ୍ ।
ACT 22:30 ଇହୁଦୀଡ଼୍ ପାଉଲ୍ ବିରୁଦ୍ଦ୍‍ତେ ବାତ୍ ଅବିଯୋଗ୍ ମାଡ଼୍‍ତଡ଼୍, ଆଦ୍ ଲେକାମ୍ ପୁନ୍ଦାନଙ୍କ୍ ସୈନିକିଡ଼୍ ମୁକ୍ୟାଲ୍ ମେଣ୍ଡନ୍‍ଦିନେ ପାଉଲ୍‍ତେ ବନ୍ଦନ୍ ସାରେ କୁସ୍‍ସ୍ପି ବେଡ଼୍‍ୟେ ମିଟିଙ୍ଗ୍ ମାଡ଼ାନ୍ ସେଙ୍ଗେ ଯାଜକିଡ଼୍‍କ୍ ଗଟ୍ ହିତ୍‍ତଣ୍ଡ୍ । ତାନ୍ ପେର୍‍କେ ଅଣ୍ଡ୍‌ ପାଉଲ୍‍ତିଙ୍କ୍ ଅସ୍ ଅଡ଼୍‌ ମୁନ୍‍ନେ ନିଲ୍‍ପ୍‍ତଡ଼୍ ।
ACT 23:1 ପାଉଲ୍ ବେଡ଼୍‍ୟେ ମିଟିଙ୍ଗ୍‍ତାକ୍ ଲେକେତ୍‍ ସତ୍‍କାମ୍ ଉଡ଼ି କେତ୍‍ତଣ୍ଡ୍, “ଏୟ୍‍ ଇଶ୍ରାଏଲୀୟ ଦାଦାଲଡ଼୍‍ ! ନେଣ୍ଡ୍ ଯାକ ଇଶ୍ୱର୍‌ତେ ମୁନ୍‍ନେ ନାନ୍‍ ବେଦ୍‍ରକମ୍‍ ଜିୱୁଣ୍ଡ୍ ବାଦ୍‍କ୍‍ତାନ୍, ଆଦ୍ ବିଷୟ୍‍ତେ ନାୟାଦ୍ ମନ୍ ସାରେ ସାୟେ ମିନ୍ଦେ ।”
ACT 23:2 ଇଦ୍ କେଞ୍ଜି ବେଡ଼୍‍ୟାଦ୍‍ ଯାଜକ୍ ଆନାନୀୟ ପାଉଲ୍‍ତେ ବୁକ୍‍ତାଗ୍ ଚାପ୍‍ଡ଼େ ରେହେତାନ୍ ସେଙ୍ଗେ ପାଉଲ୍‍ତେ ବକେତ୍ ନିସ୍ ମାନ୍ଦାନ୍ ନାରୁଡ଼୍‍କିଂଙ୍କ୍ ଆଦେଶ୍‍ ହିତ୍‍ତଣ୍ଡ୍ ।
ACT 23:3 ପାଉଲ୍ ଇଶ୍ୱର୍‌ତିଙ୍କ୍ କେତ୍‍ତଣ୍ଡ୍, “ଏୟ୍‍ ଚୁନ୍ ଅହକ୍‍ତେ ପାଣ୍ଡ୍ରି ନେଟ୍ଟେ, ପ୍ରବୁ ନିଜାମ୍ ନିକିଂଙ୍କ୍ ରେହେତିତନ୍ । ମୋଶାନ୍‌‌ ନିୟମ୍‍ ଲେକାମ୍‌ ବିଚାର୍ ମାଡ଼ାନଙ୍କ୍ ନିମ୍‍ ଆଗେ କୁଦ୍‍ତି, ଆଗେକ୍‍ବା ନାକିଂଙ୍କ୍ ରେହେତାନ୍ ସେଙ୍ଗେ ଆଦେଶ୍‍ ଇସ୍‌ ନିମ୍‍ ଆଇନ୍‍ ବାଙ୍ଗା ମାଡ଼ୁତିନ୍ !”
ACT 23:4 ପାଉଲ୍‍ତେ ବକେତ୍ ମାନ୍ଦାନ୍ ନାରୁଡ଼୍ ଅଂକିଙ୍କ୍‌ କେତ୍‍ତଡ଼୍, “ନିମ୍‍ ଇଶ୍ୱର୍‌ତେ ବେଡ଼ିୟି ଯାଜକ୍‍ତିଙ୍କ୍ ଅପ୍‍ମାନ୍ ମାଡ଼ୁତିନ୍ !”
ACT 23:5 ପାଉଲ୍ ଉତ୍ତର୍ ହିତ୍‍ତଣ୍ଡ୍, “ହୋ ଇଶ୍ରାଏଲୀୟ ଦାଦାଲଡ଼୍‍, ଅଣ୍ଡ୍‌ ବେଡ଼ିୟି ଯାଜକ୍ ଇଞ୍ଜ ନାନ୍ ପୁନ୍‍ୱେ ମାତ୍‍ତାନ୍ । ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ, ‘ମିଇ ନିଜେର୍‍ ଜାତିତ୍‍ ନେତାନ୍ ବିଷୟ୍‍ତେ କାରାପ୍ ଗଟ୍ କେଲ୍‍ମାଟ୍ ।’”
ACT 23:6 ଇହୁଦୀଡ଼୍ ମାନ୍ଦେତାଗ୍ ବେସ୍‍କ୍‍ତୁଡ଼୍‍ ପାରୂଶୀ ନୁ ମେଣ୍ଡେ ବେସ୍‍କ୍‍ତୁଡ଼୍‍ ସାଦୁକୀଡ଼୍‍ ମାନ୍ଦାନାଦ୍ ଉଡ଼ି ପାଉଲ୍ ବେଡ଼୍‍ୟେ ମିଟିଙ୍ଗ୍‍ତିଙ୍କ୍ କାର୍‍ଙ୍ଗି କେତ୍‍ତଣ୍ଡ୍, “ହଁ ଇଶ୍ରାଏଲୀୟତେ ଦାଦାଲଡ଼୍‍, ନାନ୍ ୱେରଣ୍ଡ୍ ପାରୂଶୀ, ପାରୂଶୀ ବଂଶତାଗ୍ ନାୟାଦ୍ ଜନମ୍ । ଡଲ୍‍ତେ ନାରୁଡ଼୍ ମେଣ୍ଡନ୍‍ନ୍ଦାମ୍ ପୁନରୁତାନ୍ ଆଦ୍‍ତଡ଼୍ ଇଞ୍ଜ ଆଶେ ମାଡ଼୍‍ତାଙ୍କ୍ ଇଗେ ନାୟାଦ୍ ବିଚାର୍ ମାଡ଼ୁତଡ଼୍ ।”
ACT 23:7 ଅଡ଼୍‌ ମାନ୍ଦେ ମାନ୍ଦେ ଆସ୍ ୱେକ୍‍ ୱେକ୍ ଆତ୍‍ତଡ଼୍ ନୁ ଅଣ୍ଡ୍‌ ଟିକ୍ ଇଦ୍ ଗଟ୍ କେତ୍‍ତେ ସାଙ୍ଗେ ସାଙ୍ଗେ ପାରୂଶୀ ନୁ ସାଦୁକୀଡ଼୍ ଲୋପେ ରାମ୍‍କ୍ ଆରାମ୍ ଆତ୍‍ତେ ।
ACT 23:8 ଇତ୍‍କେ ସାଦୁକୀଡ଼ାଗ୍ ଡଲ୍‍ତେନଡ଼୍ ମେଣ୍ଡନ୍‍ନ୍ଦାମ୍ ପୁନରୁତାନ୍, ସ୍ୱର୍ଗ ଦୂତ ବା ଆତ୍ମା ବାଆତେ ଇଲେ; ଇତ୍‍କେ ପାରୂଶୀଡ଼୍ ଇଦ୍ ମୁଣ୍ଡିଙ୍କ୍ ବିଶ୍ୱାସ୍ ମାଡ଼ିତଡ଼୍ ।
ACT 23:9 ଅଡ଼୍‌ ଲୋପେ ଗାଟି ଗଲ୍‍କ୍ ଆତ୍‍ତଡ଼୍ ନୁ ପାରୂଶୀ ମାନ୍ଦେତେ ବେସ୍‍କ୍‍ତୁଡ଼୍‍ ଦର୍ମଗୁରୁ ନିଶ୍‍ମିକା ଗାଟି ପ୍ରତିବାଦ୍ ମାଡ଼ି କେତ୍‍ତଡ଼୍, “ମାମ୍‍ମେ ଇଣ୍ଡ୍ ନାରୁଣ୍ଡ୍‍ତାଗ୍ ବାତ୍‍ମିକା ଦଷ୍ ଦର୍‍ସ୍କାଙ୍କ୍ ପାର୍‍ୱମ୍ ! ନିଜାମ୍ ଅନ୍‌ ତଡ଼୍ ସ୍ୱର୍ଗ ଦୂତ ବା ଆତ୍ମା ଗଟ୍ କେସ ମାନ୍‍ତେ ।”
ACT 23:10 ଯୁକ୍ତିତର୍କ ଗାଟି ବେଡ଼୍‍ୟାଦ୍‍ ପୁଟୁଙ୍କ୍ ଦାରଣ୍ ମାଡ଼୍‍ତେ ଯେ, ନାରୁଡ଼୍ ପାଉଲ୍‍ତିଙ୍କ୍ କଇସ୍ ଦୁଡ଼ା ଦୁଡ଼ା ମାଡ଼ିତଡ଼୍ ଇଞ୍ଜ ସୈନ୍ୟଡ଼୍ ମୁକ୍ୟାଲ୍ ୱେର୍‍ତଣ୍ଡ୍ । ଆଦିଙ୍କ୍ ଅଣ୍ଡ୍‌ ରାମ୍‍କ୍ ଆଦାନ୍ ଲୋପେଙ୍କ୍ ପାଉଲ୍‍ତିଙ୍କ୍ ରକ୍ଷା ମାଡ଼ି ଅଂକିଙ୍କ୍‌ ଦୁର୍ଗତାଗ୍ ଲୋପେ ଆଦାନଙ୍କ୍ ସୈନ୍ୟଡ଼୍‍କିଙ୍କ୍ ଗଟ୍ ହିତ୍‍ତଣ୍ଡ୍ ।
ACT 23:11 ଆଦେନାଣ୍ଡ୍‍ ନାର୍‍କେ ପ୍ରବୁ ପାଉଲ୍‍ତେ ବକେତ୍ ନିଶ୍‍ମିକା କେତ୍‍ତାନ୍, “ସାହାସ୍ ଆୟ୍‍ମ୍‍ ! ନିମ୍‍ ଇଗେ ଯିରୁଶାଲେମ୍‍ତାଗ୍ ନା ସେଙ୍ଗେ ସାକ୍ଷ୍ୟ ହିତ୍‍ତିନ୍ । ରୋମ୍‍ତାଗ୍ ମିକା ନିମ୍‍ ନିଜାମ୍ ସାକ୍ଷ୍ୟ ହିଦ୍‍ତିନ୍ ।”
ACT 23:12 ମେଣ୍ଡନ୍ ଦିନ୍ ନାର୍‍କା ବେସ୍‍କ୍‍ତୁଡ଼୍‍ ଇହୁଦୀଡ଼୍ ଅଣ୍ଡୟାଗେ ଆସ୍ ଚିନ୍ତେ ମାଡ଼୍‍ତଡ଼୍ । ପାଉଲ୍‍ତିଙ୍କ୍ ହାୱକ୍‍ୱେ ଯାକ ଅଡ଼୍‌ ତିନଡ଼୍ କି ନାକଡ଼୍ ଇଞ୍ଜ ପାର୍‍ମାନ୍ ମାଡ଼୍‍ତଡ଼୍ ।
ACT 23:13 ଚାଳିଶ୍‍ଜାନ୍ ଅଦିକ୍‌ ନାରୁଡ଼୍ ଇଦ୍ ଚିନ୍ତେ ମାଡ଼୍‍ତଡ଼୍ ।
ACT 23:14 ଅଡ଼୍‌ ଆଞ୍ଜ୍ ମୁକ୍ୟ ଯାଜକ୍ ନୁ ଇହୁଦୀ ନେତାଲଡ଼୍‍କ୍ କେତ୍‍ତଡ଼୍, “ପାଉଲ୍‍ତିଙ୍କ୍ ହାୱକ୍‍ୱେ ଯାକ ବାତ୍‍ମିକା ତିନମ୍ କି ନାକମ୍ ଇଞ୍ଜ ମାମ୍‍ମେ ଅଣ୍ଡୟ୍‌ ଶପତ୍‍ ଆତ୍‍ତମ୍ ।
ACT 23:15 ଆଦିଙ୍କ୍ ଅଣ୍ଡ୍‌ ବିଷୟ୍‍ତେ ମେଣ୍ଡେ ଅଦିକ୍‌ ତଥ୍ୟ ପୁନ୍ଦାନଙ୍କ୍ ଇଚ୍ଛା ମାଡ଼ି ବେଡ଼୍‍ୟେ ମିଟିଙ୍ଗ୍ ମୁନ୍‍ନେ ନୁ ମିଇ ବକେତ୍ ପାଉଲ୍‍ତିଙ୍କ୍ ମେଣ୍ଡନ୍‍ନ୍ଦାମ୍ ତାତାନ୍ ସେଙ୍ଗେ ରୋମୀୟ ସୈନ୍ୟଡ଼୍ ମାନ୍ଦେତିଙ୍କ୍ ଦନ୍ୟବାଦ୍ ମାଡ଼େ । ବାତେଙ୍କ୍ଇତ୍‍କେ ଅଣ୍ଡ୍‌ ଇଗେ ୱାଦାନ୍ ମୁନେନ୍ ହାର୍‍ଦାଗ୍ ମାମ୍‍ମେ ଅଂକିଙ୍କ୍‌ ହାୱ୍‍କାନଙ୍କ୍ ତିଆର୍ ଆସ୍ ମାନ୍‍ତମ୍ ।”
ACT 23:16 ଇତ୍‍କେ ପାଉଲ୍‍ତେ ବାଡ଼୍‍ଞ୍ଜାଲ୍ ଇଦ୍ ଚାଲାକି ଗଟ୍ କେଞ୍ଜି, ଦୁର୍ଗତାଗ୍ ଲୋପେ ଆଞ୍ଜ୍ ପାଉଲ୍‍ତିଙ୍କ୍ ଇଦ୍ କେତ୍‍ତଣ୍ଡ୍ ।
ACT 23:17 ପାଉଲ୍ ରୋମୀୟ୍ କର୍ମଚାରୀଡ଼୍ ଲୋପେଙ୍କ୍ ଅର୍‍ତୁଙ୍କ୍ କାର୍‍ଙ୍ଗି କେତ୍‍ତଣ୍ଡ୍, “ଇଣ୍ଡ୍ ଲେୟଙ୍କ୍ ସୈନିକିଡ଼୍ ମୁକ୍ୟାନାକ୍ ଆୟ୍‍ମ୍, ଅଂକିଙ୍କ୍‌ ଅନାଦ୍‌ ବାତ୍ କେତାନାଦ୍ ମିନ୍ଦେ ।”
ACT 23:18 କର୍ମଚାରୀ ଅଂକିଙ୍କ୍‌ ସୈନିକିଡ଼୍ ମୁକ୍ୟାନାକ୍ ଆସ୍ କେତ୍‍ତଣ୍ଡ୍, “ବନ୍ଦି ପାଉଲ୍ ନାକିଂଙ୍କ୍ କାର୍‍ଙ୍ଗି ଇଣ୍ଡ୍ ଲେୟଙ୍କ୍ ନି ବକେତ୍ ତାତାନଙ୍କ୍ କେତ୍‍ତଣ୍ଡ୍ । ନିକିଂଙ୍କ୍ ଅଣ୍ଡ୍‌ ବାତ୍ କେତାନାଦ୍ ମିନ୍ଦେ ।”
ACT 23:19 ସୈନିକିଡ଼୍ ମୁକ୍ୟାଲ୍ ଅନାଦ୍‌ କାୟ୍‍ଦିଙ୍କ୍ ପଇସ୍ ଲୋପେ ଆତ୍‍ତଣ୍ଡ୍‍ ନୁ ପାଚ୍ରାମାଡ଼୍‍ତଣ୍ଡ୍, “ବାତ୍ କେତାନାଦ୍ ମିନ୍ଦେ, କେଲ୍ !”
ACT 23:20 ଲେୟଣ୍ଡ୍ କେତ୍‍ତଣ୍ଡ୍, “ଇହୁଦୀ ନେତାଲଡ଼୍ ଚିନ୍ତେ ମାଡ଼୍‍ତଡ଼୍ ଯେ, ବେଡ଼୍‍ୟେ ମିଟିଙ୍ଗ୍‍ ପାଉଲ୍ ବିଷୟ୍‍ତେ ଅଦିକ୍‌ ତଥ୍ୟ ପୁନ୍ଦାନଙ୍କ୍ ଇଚ୍ଛା ମାଡ଼ୁତେ ଇଞ୍ଜ ବଲି ଅଂକିଙ୍କ୍‌ ବେଡ଼୍‍ୟେ ମିଟିଙ୍କ୍‍ତାଗ୍ ଆଦାନ୍ ସେଙ୍ଗେ ନିକିଂଙ୍କ୍ ଅନୁରଦ୍‌‍ ମାଡ଼ିତଡ଼୍ ।
ACT 23:21 ଇତ୍‍କେ ଅଡ଼ାଦ୍‌ ଗଟ୍ କେଞ୍ଜ୍‍ମା, ବାତେଙ୍କ୍ଇତ୍‍କେ ଚାଳିଶ୍‍ଜାନ୍ ଅଦିକ୍‌ ନାରୁଡ଼୍ ଅଂକିଙ୍କ୍‌ ହାୱକ୍‍ୱେ ଯାକ ତିନ୍ଦାନ୍ ଉନ୍ଦାନ୍ ମାଡ଼ଡ଼୍‍ ଇଞ୍ଜ ପ୍ରତିଜ୍ଞା ଆସ୍ ମିଞ୍ଜୀ ମିନ୍ଦେଡ଼୍‍ । ଇଞ୍ଜେ ଅଡ଼୍‌ ନିୟାଦ୍ ନିଷ୍ପତ୍ତିତିଙ୍କ୍ କେପି ମିକା ତିଆର୍ ଆସ୍‍ମିନ୍ଦେଡ଼୍ ।”
ACT 23:22 “ନିମ୍‍ ଇଦ୍ କେତ୍‍ତି ଇଞ୍ଜ ବେନଙ୍କ୍ କେଲ୍‍ମା ।” ସୈନିକିଡ଼୍ ମୁକ୍ୟାଲ୍ ଇଦ୍ କେସ୍ ଲେୟଙ୍କ୍ ରଅତଣ୍ଡ୍ ।
ACT 23:23 ସୈନିକିଡ଼୍ ମୁକ୍ୟାଲ୍‍ ଅଦିନ୍‌ତେ ମାନ୍ଦାନ୍ ଇର୍‍ୱୁଡ଼୍ କର୍ମଚାରୀଡ଼୍‍କ୍ କାର୍‍ଙ୍ଗି କେତ୍‍ତଣ୍ଡ୍, “ନେଣ୍ଡ୍ ନାର୍‍କେତ୍ ନଅଟା ଲୋପେ କାଇସରିଆତାଗ୍ ଆଦାନ୍ ସେଙ୍ଗେ ସତୁରିଜାନ୍‍ ଗୁରାକିନଡ଼୍ ନୁ ଦୁଇଶହ ବର୍ଚ୍ଛା ପୟ୍‍ତେନଡ଼୍ ତଡ଼୍ ଦୁଇଶହ ତାକି ଆଦାନ୍ ସୈନିକିଡ଼୍ ତିଆର୍ ମାଡ଼ାଟ୍ ।
ACT 23:24 ପାଉଲ୍ ଆଦାନ୍ ସେଙ୍ଗେ ବେସ୍‌କ୍ ଗୁରାକ୍ ହିମୁଟ୍ ନୁ ନିରାପଦ୍‍ତେ ଅଂକିଙ୍କ୍‌ ରାଜ୍ୟପାଳ ଗେଲ୍ପାନଙ୍କ୍ ମାଡ଼ାନଙ୍କ୍ ଫେଲିକ୍‍ସ୍‍ତେ ଗାର୍‍ରେ ଆୟ୍‍ମୁଟ୍ ।”
ACT 23:25 ସୈନିକିଡ଼୍ ମୁକ୍ୟାଲ୍ ଇଦ୍ ରକମ୍ ଅଣ୍ଡୟ୍‌ ଚିଟି ଲେକ୍‍ତଣ୍ଡ୍ ।
ACT 23:26 “ମାନ୍ୟବର୍ ରାଜ୍ୟପାଳ ଫେଲିକ୍‍ସ୍‍ତିଙ୍କ୍ କ୍ଲଡିଅସ୍ ଲିସିଆସ୍‍ତେ ନମସ୍କାର୍ ।
ACT 23:27 ଇହୁଦୀଡ଼୍ ଇଣ୍ଡ୍ ନାରୁଙ୍କ୍ ପଇସ୍ ଅଂକିଙ୍କ୍‌ ହାୱକାନ୍ ସେଙ୍ଗେ ତିଆର୍ ଆସ୍ ମାତ୍‍ତଡ଼୍ । ଅଣ୍ଡ୍‌ ୱେରଣ୍ଡ୍ ରୋମୀୟ ନାରୁଡ଼୍ ଇଞ୍ଜ ପୁତ୍‍ତାଙ୍କ୍ ନାନ୍ ନା ସୈନ୍ୟଡ଼୍ ତଡ଼୍ ଅଂକିଙ୍କ୍‌ ଉଦ୍ଦାର୍ ମାଡ଼୍‍ତାନ୍ ।
ACT 23:28 ଅଡ଼୍‌ ବିରୁଦ୍ଦ୍‍ତେ ଅଣ୍ଡ୍‌ ବାତ୍ ଦଷ୍ ମାଡ଼ିମାତ୍‍ତଣ୍ଡ୍, ପୁନ୍ଦାନ୍ ସେଙ୍ଗେ ନାନ୍ ଅଂକିଙ୍କ୍‌ ଅଡ଼ାଦ୍‌ ବେଡ଼୍‍ୟେ ମିଟିଙ୍କ୍‍ତାଗ୍ ଅତ୍‍ତାନ୍ ।
ACT 23:29 ବାତେଙ୍କ୍ଇତ୍‍କେ ଅଣ୍ଡ୍‌ ଡଲ୍‍ନାଦ୍ ଦଣ୍ଡ୍ ବା ବନ୍ଦି ଆଦ୍‍ତନ୍ କଷ୍ଟ ମାଡ଼ାନ୍ ଲେକେମ୍ ବାତ୍ ଦଷ୍ ମାଡ଼ଣ୍ଡ୍ ଇଞ୍ଜ ନାନ୍ ପୁତ୍‍ତାନ୍ । ମୋଶାନ୍‌‌ ନିୟମ୍‍ତେ ଆସ୍ ମାନ୍ଦାନ୍ ଅବିଯୋଗ୍ ସାରେ ତାମ୍ ଦର୍ମ ବିଷୟ୍‍ତେ ।
ACT 23:30 ମେଣ୍ଡେ ଅନ୍‌ ବିରୁଦ୍ଦ୍‍ତେ ଅଣ୍ଡୟ୍‌ ଚକ୍ରାନ୍ତ ଆତ୍‍ତେ ଇଞ୍ଜ କବର୍ ପାଏମ୍ ଆସ୍ ସାଙ୍ଗେ ସାଙ୍ଗେ ଅଂକିଙ୍କ୍‌ ନି ବକେତ୍ ରହତାନଙ୍କ୍ ହାଲ୍‍ସ୍‍ତାନ୍ । ଅନ୍‌ ବିରୁଦ୍ଦ୍‍ତେ ମାନ୍ଦାନ୍ ଅବିଯୋଗ୍ ସାରେ ନି ମୁନ୍‍ନେ କେତାନଙ୍କ୍ ନାନ୍ ଅଂକିଙ୍କ୍‌ ଅବିଯୋଗ୍ ମାଡ଼୍‍ତେନଡ଼୍‍କିଙ୍କ୍ କେତ୍‍ତାନ୍ ।”
ACT 23:31 ସୈନିକିଡ଼୍ ଆଦ୍ ଆଦେଶ୍‍ ଲେକାମ୍ ପାଉଲ୍‍ତିଙ୍କ୍ ଆଦେନାଣ୍ଡ୍‍ ନାର୍‍କେ ଅନ୍‌ତିପଟ୍ରିସ୍‍ତାଗ୍ ହେୱୁସିତ୍‍ତଡ଼୍ ।
ACT 23:32 ମେଣ୍ଡନ୍ ଦିନ୍ ତାକି ଆତ୍‍ତେ ସୈନିକିଡ଼୍ ଦୁର୍ଗତାଗ୍ ମାଲ୍‍ସ୍ ଆତ୍‍ତଡ଼୍‍ ନୁ ଗୁରାକିନ୍‍ ସୈନିକିଡ଼୍‍କ୍‍ ଅଂକିଙ୍କ୍‌ ଆଦାନଙ୍କ୍‍ କେତ୍‍ତଡ଼୍‍,
ACT 23:33 ଅଡ଼୍‌‍ ପାଉଲ୍‍ତିଙ୍କ୍ ଆସ୍ କାଇସରିଆତାଗ୍ ହେୱୁସିତ୍‍ତଡ଼୍ । ଆଗେ ସୈନିକିଡ଼୍ ମୁକ୍ୟାଙ୍କ୍ ଚିଟି ତଡ଼୍ ପାଉଲ୍‍ତିଙ୍କ୍ ହିତ୍‍ତଡ଼୍ ।
ACT 23:34 ରାଜ୍ୟପାଳ ଚିଟିତିଙ୍କ୍ କାର୍‍ସ୍ ବେନ୍ ଦେଶ୍ କନ୍‍ସ୍ ୱାତ୍‍ତିନ୍ ଇଞ୍ଜ ପାଚ୍ରାମାଡ଼୍‍ତଣ୍ଡ୍ । ପାଉଲ୍ ସିଲିସିଆତଣ୍ଡ୍ ଇଞ୍ଜ ପୁଞ୍ଜ୍,
ACT 23:35 ଅଣ୍ଡ୍‌ କେତ୍‍ତଣ୍ଡ୍, “ନି ବିରଦିଡ଼୍ ହେୱୁତ୍‍ତେ ପେର୍‍କେ ନାନ୍ ନି ଗଟ୍ କେଞ୍ଜୀତାନ୍ ।” ତାନ୍ ପେର୍‍କେ ପାଉଲ୍‍ତିଙ୍କ୍ ହେରଦ୍‍ତେ ରାଜ୍ ପ୍ରାସାଦ୍‍ତାଗ୍ ବନ୍ଦି ମାଡ଼ି ନେହେତାନ୍ ସେଙ୍ଗେ ଆଦେଶ୍‍ ହିତ୍‍ତଣ୍ଡ୍ ।
ACT 24:1 ଏୟ୍‍ଙ୍ଗ୍ ଦିନା ପେର୍‍କେ ବେଡ଼ିୟି ଯାଜକ୍ ଆନାନୀୟ ବେସ୍‍କ୍‍ତୁଡ଼୍‍ ଇହୁଦୀ ନେତା ନୁ ତର୍ତ୍ତୁଲସ୍ ପେଦେର୍‍ତଣ୍ଡ୍ ୱେରଣ୍ଡ୍ ଓକିଲ୍‍ ତଡ଼୍ ସିସେରିଆତାଗ୍ ଆତ୍‍ତଣ୍ଡ୍ । ଅଡ଼୍‌ ଫେଲିକ୍‍ସ୍‍ତେ ମୁନ୍‍ନେ ନିଶ୍‍ମିକା ପାଉଲ୍‍ ବିରୁଦ୍ଦ୍‍ତେ ତାମାଦ୍ ଅବିଯୋଗ୍ ପେଶ୍ ମାଡ଼୍‍ତଡ଼୍ ।
ACT 24:2 ତାନ୍‍ପେର୍କେ ପାଉଲ୍‍ତିଙ୍କ୍ ଆଗେ ତାତ୍‍ତଡ଼୍ ନୁ ତର୍ତ୍ତୁଲସ୍ ମଦଲ୍ ହିତ୍‍ତେ ତାନ୍ ଅବିଯୋଗ୍ ତଅତଣ୍ଡ୍, “ମହାଶୟ, ନିୟାଦ୍ ବୁଦ୍ଦ୍‍ତେ ଶାସନ୍‍ ତଡ଼୍ ମାମ୍‍ମେ ନାର୍‍ଗେ ଦିନା କନ୍‍ସ୍ ଶାନ୍ତିତଡ଼୍ ବାସେ ମାଡ଼ୁତମ୍ ନୁ ମାୟାଦ୍‌ ଦେଶ୍‍ତେ ଲେକେତ୍ ସେଙ୍ଗେ ନାର୍‍ଗେ ସଂସାର୍‌ ମାଡ଼୍‍ତଡ଼୍ ।
ACT 24:3 ସାରେ ପଡ଼ିୟେତାଗ୍ ନୁ ସାରେଦାମ୍ ମାମ୍‍ମେ ଇଦିଙ୍କ୍ ସ୍ୱାଗତ୍ ମାଡ଼୍‍ତମ୍, ମାମ୍‍ମେ ଫେଲିକ୍‍ସ୍‍ ଗାଟି ଋଣୀ ।
ACT 24:4 ଆଦ୍ ବାତ୍‍ଆଇ, ନାନ୍ ନିୟାଦ୍ ଅଦିକ୍‌ ସମୟ୍‍ ଆୟନ୍, ଆଦିଙ୍କ୍ ନିମ୍‍ ଦୟାମାଡ଼ି ମାୟାଦ୍‌ ସୁଦୁର୍ ଗଟ୍ କେଞ୍ଜାନ୍ ସେଙ୍ଗେ ନାନ୍ ଅନୁରଦ୍‌‍ ମାଡ଼ୁତାନ୍ ।
ACT 24:5 ଇଣ୍ଡ୍ ନାରୁଣ୍ଡ୍‍ ଗାଟି ଗଲ୍‍କିନଣ୍ଡ୍ ଇଞ୍ଜ ମାମ୍‍ମେ ପୁତ୍‍ତମ୍; ଅଣ୍ଡ୍‌ ଜଗତ୍‍ ତାଗ୍ ସାରେପାକ୍ ଉଡି ଇହୁଦୀଡ଼୍ ଶାନ୍ତି ନଷ୍ଟ ମାଡ଼ାନଙ୍କ୍ କେତୁତଣ୍ଡ୍ । ଅଣ୍ଡ୍‌ ନାଜରିତିୟ ମାନ୍ଦେତଣ୍ଡ୍ ୱେରଣ୍ଡ୍ ନେତାଲ୍ ।
ACT 24:6 ଅଣ୍ଡ୍‌ ମାୟାଦ୍‌ ମନ୍ଦିର୍‍ତିଙ୍କ୍ ଅପବିତ୍ର ମାଡ଼ାନଙ୍କ୍ ଚିନ୍ତେ ମାଡ଼୍‍ତେ ୱେଲେ ମାମ୍‍ମେ ଅଂକିଙ୍କ୍‌ ପୟ୍‍ତ୍‍ତମ୍‍ ।
ACT 24:7 ଇତ୍‍କେ ହଜାର୍‌ ହଜାର୍‌ ସେନାପତି ଲୂସିଆ ୱାସ୍ ଗାଟି ଜବର୍‍ଦସ୍ତି ମାଡ଼ି ଇଂକିଙ୍କ୍ ମା କାୟ୍‍ଦେ କନ୍‍ସ୍ ଉନ୍ଦି ଆତ୍‍ତଡ଼୍,
ACT 24:8 ମାମ୍‍ମେ ଇଣ୍ଡ୍ ବିରୁଦ୍ଦ୍‍ତେ ବେନ୍ ସାରେ ଅବିଯୋଗ୍ ମାଡ଼୍‍ତମ୍, ଆଦ୍ ନିମ୍‍ ନିଜେ ଇ ନାରୁଙ୍କ୍ ପାଚ୍ରାମାଡ଼ି ପୁନ୍ଦାନଙ୍କ୍ ପାର୍‍ଦ୍‍ତିନ୍ ।”
ACT 24:9 ଆଗେ ମାତ୍‍ତେ ଇହୁଦୀଡ଼୍ ଇଦ୍ ଅବିଯୋଗ୍ ସତ୍ ଇଞ୍ଜ ଗାଟି ସାହାସ୍ ତଡ଼୍ କେତ୍‍ତଡ଼୍ ।
ACT 24:10 ତାନ୍‍ପେର୍‍କେ ରାଜ୍ୟପାଳ ପାଉଲ୍‍ତିଙ୍କ୍ ଗଟ୍ କେତ୍‍ତାନ୍ ସେଙ୍ଗେ ଗଟ୍ ହିତ୍‍ତାଙ୍କ୍ ପାଉଲ୍ କେତ୍‍ତଣ୍ଡ୍, “ନାନ୍ ପୁତ୍‍ତାନ୍ ଯେ ନାର୍‍ଗେ ହେଣ୍ଡ୍‍କ୍ କନ୍‍ସ୍ ନିମ୍‍ ଇଦ୍ ଗଷ୍ଟିଡ଼୍ ବିଚାର୍‍ କର୍ତ୍ତାଲ୍ ଆତ୍‍ତିନ୍‍, ଆଦିଙ୍କ୍ ନି ମୁନ୍‍ନେ ଆତ୍ମସମର୍ତନ୍ ମାଡ଼ାନାଦ୍ ନାକିଂଙ୍କ୍ ସାୟେ ଆଦ୍‍ତେ ।
ACT 24:11 ନିମ୍‍ ନିଜେ ମେହେକି ପୁନ୍ଦାନଙ୍କ୍ ପାର୍‍ଦ୍‍ତି ଯେ, ବାର ଦିନ୍ ମୁନେନ୍ ନାନ୍ ଯିରୁଶାଲେମ୍‍ତାଗ୍ ପୁଜା ମାଡ଼ାନଙ୍କ୍ ଆଞ୍ଜ୍‍ମାତ୍‍ତାନ୍ ।
ACT 24:12 ମନ୍ଦିର୍‍ତାଗ୍ ବେନନ୍‌ ତଡ଼୍ ଯୁକ୍ତିତର୍କ ମାଡ଼ାନାଦ୍ ଇହୁଦୀଡ଼୍ ଉଡ଼୍‍ୱେ ମାତ୍‍ତଡ଼୍ ବା ପ୍ରାର୍ତନା ଲଅକିନାଗ୍ କି ସହର୍‍ତେ ମେଣ୍ଡେ ବେଗେ ନାକିଂଙ୍କ୍ ନାରୁଡ଼୍‍କିଂଙ୍କ୍ କେତାନାଦ୍ ଉଡ଼୍‍ୱେମାତ୍‍ତଡ଼୍ ।
ACT 24:13 ଆଦିଙ୍କ୍ ନା ବିରୁଦ୍ଦ୍‍ତେ ତାସ୍ ମାନ୍ଦାନ୍ ଅବିଯୋଗ୍‍ତେ ସେଙ୍ଗେ ଅଡ଼୍‌ ପ୍ରମାଣ୍ ହିଦାନଙ୍କ୍ ପାର୍‍ୱଡ଼୍ ।
ACT 24:14 ଆଗେକ୍‍ବା ନାନ୍ ନି ଆର୍‍ ଗାର୍‍ରେ ସ୍ୱୀକାର୍‍ ମାଡ଼ୁତାନ୍‍ ଯେ, ବେନ୍ ହିସାପ୍‍ତେ ଅଡ଼୍‌ ବୁସା ଇଞ୍ଜ କେତୁତଡ଼୍, ଆଦ୍ ହିସାପ୍‍ତେ ନାନ୍ ମା ଆନିଦାଦିଡ଼୍ ଇଶ୍ୱର୍‌ତିଙ୍କ୍ ଉପାସନା ମାଡ଼ୁତାନ୍ । ବାତେଙ୍କ୍ଇତ୍‍କେ ନାନ୍ ଗାଲା ମୋଶାନ୍‌‌ ନିୟମ୍‍ ନୁ ବାବବାଦୀଡ଼୍ ବଇତାଗ୍ କେତ୍‍ତାଦ୍ ସାରେ ବିଷୟ୍ ବିଶ୍ୱାସ୍ ମାଡ଼ୁତାନ୍ ।
ACT 24:15 ଇଡ଼୍ ଲେକାମ୍ ଇଶ୍ୱର୍‌ତାଗ୍ ନାୟାଦ୍ ଆଶେ ମିନ୍ଦେ; ସାୟେତ୍ ନାରୁଡ଼୍ ନୁ ଆଦାର୍ମିକ୍ ନାରୁଡ଼୍ ସାରେତଡ଼୍ ଡଲ୍‍ତାଗାଙ୍କ୍ ପୁନରୁତାନ୍‍ତଡ଼୍ ।
ACT 24:16 ଆଦିଙ୍କ୍ ଇଶ୍ୱର୍ ନୁ ନାରୁଡ଼୍‍ତେ ମୁନ୍‍ନେ ସାୟେତ୍ ମନ୍‍ମାଡ଼ି ଲେକେତ୍‍ କାମ୍ ମାଡ଼ାନ୍ ସେଙ୍ଗେ ନାନ୍ ସାରେଦାମ୍ ଆଲ୍‍ସି ମାଡ଼ୁତାନ୍ ।”
ACT 24:17 “ନାର୍‍ଗେ ହେଣ୍ଡ୍‍କ୍ ଯାକ ଯିରୁଶାଲମ୍‍ତାଗାଙ୍କ୍ ଜେକେ ମାତ୍‍ତାଙ୍କ୍, ନା ନିଜେତ୍ ନାରୁଡ଼୍‍ ସେଙ୍ଗେ ବେସର୍ ଡାବ୍‍କ୍ ଆଦାନଙ୍କ୍ ନୁ ପୁଜ୍‍ ହିଦାନ୍ ସେଙ୍ଗେ ନାନ୍ ଆଗେ ଆଞ୍ଜ୍ ମାତ୍‍ତାନ୍ ।
ACT 24:18 ନାନ୍ ଶୁଚିକରଣ୍‍ ବିଦି ମାଡ଼ି ତେର୍‍ସ୍ପାନ୍ ୱେଲେ ଅଡ଼୍‌ ନାକିଂଙ୍କ୍ ମନ୍ଦିର୍‍ତାଗ୍ ଉଡ଼୍‍ତଡ଼୍ । ଆସୁଟ୍‍ ନା ବକେତ୍ ନାରୁଡ଼୍ ହିଲ୍‍ୱେ ମାତ୍‍ତଡ଼୍ କି ବାତ୍ ଗଲ୍‍କ୍‍ ଆୟ୍‍ୱେ ମାତ୍‍ତେ ।
ACT 24:19 ଇତ୍‍କେ ଏସିଆ ଦେଶ୍‍ତେ ବେସ୍‍କ୍‍ତୁଡ଼୍‍ ଇହୁଦୀ ଆଗେ ମାତ୍‍ତଡ଼୍; ଯଦି ନା ବିଷୟ୍‍ତେ ଅଡ଼୍‌ ବାତ୍ କେତାନାଦ୍ ମିନ୍ଦେ, ଅଡ଼୍‌ ନିଜେ ନି ମୁନ୍‍ନେ ୱାସ୍ ଅବିଯୋଗ୍ ମାଡ଼୍ ପାର୍‍ୱେଡ଼୍ ।
ACT 24:20 ମେଣ୍ଡେ ନାନ୍ ବେସୁଟ୍‌ ବେଡ଼୍‍ୟେ ମିଟିଙ୍ଗ୍‍ତେ ମୁନ୍‍ନେ ନିଶ୍‍ମାତ୍‍ତାନ୍, ନାନ୍ ବେନ୍ ଅପରାଦ୍‌ତେ ଦଷି ଆତ୍‍ତାନ୍, ଆଦ୍ ଇଗେ ମାନ୍ଦାନ୍ ନାରୁଡ଼୍ କେଲିଡ଼୍ ।
ACT 24:21 ଆଗେକ୍‍ବା ନାନ୍ ଅଣ୍ଡୟ୍‌ ଗଟ୍ କେସ୍‍ମାତ୍‍ତାନ୍; ଅଡ଼୍‌ ମୁନ୍‍ନେ ନିଶ୍‍ମାନ୍ଦାନ୍ ୱେଲେ ନାନ୍ ଗାଡ଼୍‍ସ୍‍ଆସ୍ କେସ୍‍ମାତ୍‍ତାନ୍, ‘ଡଲ୍‍ତେନଡ଼୍ ମେଣ୍ଡନ୍‍ନ୍ଦାମ୍ ପୁନରୁତାନ୍ ଆଦ୍‍ତଡ଼୍ ଇଞ୍ଜ ବିଶ୍ୱାସ୍ ମାଡ଼୍‍ତାଙ୍କ୍ ନେଣ୍ଡ୍ ମିଇ ତଡ଼୍ ବିଚାର୍‍ ଆଦୁତାନ୍ ।’”
ACT 24:22 ଫେଲିକ୍‍ସ୍‍ ଆଦ୍ ଆର୍‍ ବିଷୟ୍‍ତେ ସାୟେ ପୁନ୍ଦାନଙ୍କ୍ ଇଚ୍ଛା ବନ୍ଦ୍ ମାଡ଼ି କେତ୍‍ତଣ୍ଡ୍, “ସେନାଲଡ଼୍ ମୁକ୍ୟାଲ୍ ଲିସିଆସ୍‍ ହେୱ୍‍ତେ ପେର୍‍କେ ନାନ୍ ମିୟାଦ୍‍ କେସ୍‍ତିଙ୍କ୍‍ ବିଚାର୍ ମାଡ଼ିତାନ୍ ।”
ACT 24:23 ପାଉଲ୍‍ତିଙ୍କ୍ ବନ୍ଦି ମାଡ଼ି ନେହେତାନଙ୍କ୍ ଅଣ୍ଡ୍‌ ସୈନିକିଡ଼୍‍କ୍ ଆଦେଶ୍‍ ହିତ୍‍ତଣ୍ଡ୍, ଇତ୍‍କେ ଅଂକିଙ୍କ୍‌ ନିଜର୍ ବନ୍ଦି ମାଡ଼ି ଅନ୍‌‍ୱାଦ୍ ସାଦନ୍ ଆଦାନ୍ ସେଙ୍ଗେ ତାନ୍ ସାଙ୍ଗଡ଼୍‍କ୍ ଆନୁମତି ହିଦାନଙ୍କ୍ ଅଣ୍ଡ୍‌ ଆଦେଶ୍‍ ହିତ୍‍ତଣ୍ଡ୍ ।
ACT 24:24 ବେସ୍କ୍‍ଦିନା ପେର୍‍କେ ଫେଲିକ୍‍ସ୍‍ ତାନ୍ ଇହୁଦୀୟା ମୁତ୍‍ତେ ଦ୍ରୁସିଲାନ୍ ତଡ଼୍ ୱାତ୍‍ତଣ୍ଡ୍, ଅଣ୍ଡ୍‌ ପାଉଲ୍‍ତିଙ୍କ୍ କାର୍‍ଙ୍ଗି ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ାନ୍ ବିଷୟ୍‍ତେ ଅନ୍‌ ଗଟ୍ କେଞ୍ଜ୍‍ତଣ୍ଡ୍ ।
ACT 24:25 ଇତ୍‍କେ ବେସୁଟ୍‌ ପାଉଲ୍ ଦାର୍ମାମ୍‌, ନିଜେତ୍ ବିଷୟ୍ ନୁ ୱାଦାନ୍ ଦିନେତ୍ ବିଚାର୍ ଗଟ୍ ମିଟିଙ୍କ୍ ମାଡ଼୍‍ତଡ଼୍, ଫେଲିକ୍‍ସ୍‍ ୱେର୍‍ସ୍‍ମିକା କେତ୍‍ତଣ୍ଡ୍, “ନିମ୍‍ ଇଞ୍ଜେ ଆଦ୍ ପାର୍‍ଦ୍‍ତି । ସୁଯୋଗ୍ ଦରକ୍‍କେ, ମେଣ୍ଡନ୍‍ନ୍ଦାମ୍ ନିକିଂଙ୍କ୍ କାର୍‍ଙ୍ଗିତାନ୍ ।”
ACT 24:26 ଆଦ୍ ସମୟ୍‍ତେ ପାଉଲ୍ ଅଂକିଙ୍କ୍‌ ବେସର୍ ଡାବ୍‍କ୍ ହିଦ୍‍ତଣ୍ଡ୍ ଇଞ୍ଜ ଅଣ୍ଡ୍‌ ଆଶେ ମାଡ଼ିମାତ୍‍ତଣ୍ଡ୍, ଆଦିଙ୍କ୍ ଅଣ୍ଡ୍‌ ଅଣ୍ଡ୍‌‍ ଅଣ୍ଡୟ୍‌ଦାମ୍ ଅଂକିଙ୍କ୍‌ କାର୍‍ଙ୍ଗି ଅନ୍‌ ତଡ଼୍ ତ୍ରିୟାନଙ୍କ୍ ପସ୍‍ସ୍ପ୍‍ତଣ୍ଡ୍‍ ।
ACT 24:27 ଇଦ୍ ରକମ୍ ରେଣ୍ଡ୍ ହେଣ୍ଡ୍‍କ୍ ଆତ୍‍ତେ ପେର୍‍କେ ପୋର୍କିୟସ୍ ଫେଷ୍ଟସ୍ ଫେଲିକ୍‍ସ୍‍ତେ ପଡ଼୍‍ୟେତାଗ୍ ରାଜ୍ୟପାଳ ଲେକାମ୍‍ ନିଯୁକ୍ତ ଆତ୍‍ତଣ୍ଡ୍ । ଫେଲିକ୍‍ସ୍ ଇହୁଦୀଡ଼୍ ପ୍ରିୟ ନାରୁଡ଼୍ ଆଦାନ୍ ସେଙ୍ଗେ ଆଶେ ମାଡ଼ି ପାଉଲ୍‍ତିଙ୍କ୍ ମୁକ୍ତି ମାଡ଼୍‍ୱେ କନ୍‍ସ୍ ଜଇଲ୍‍ତାଗ୍ ୱିଡ଼୍‍ସି ଆତ୍‍ତଣ୍ଡ୍ ।
ACT 25:1 ଫେଷ୍ଟସ୍ ଇଦ୍ ପ୍ରଦେଶ୍‍ତାଗ୍ ହେୱୁତେ ମୁଣ୍ଡ୍ ଦିନା ପେର୍‍କେ କାଇସରିଆ କନ୍‍ସ୍ ଯିରୁଶାଲେମ୍‍ ଆତ୍‍ତଣ୍ଡ୍ ।
ACT 25:2 ଆଗେ ମୁକ୍ୟ ଯାଜକ୍ ନୁ ଇହୁଦୀ ନେତାଲଡ଼୍ ମେଣ୍ଡନ୍‍ନ୍ଦାମ୍ ପାଉଲ୍ ବିରୁଦ୍ଦ୍‍ତେ ଅବିଯୋଗ୍ ଅନୁରଦ୍‌‍ ମାଡ଼୍‍ତଡ଼୍ ।
ACT 25:3 ପାଉଲ୍‍ତିଙ୍କ୍ ଯିରୁଶାଲେମ୍‍ତାଗ୍ ତାସ୍ ହେୱୁସାନ୍ ମାଇଦିଙ୍କ୍ ଅନୁଗ୍ରହ ମାଡ଼ିଣ୍ଡ୍‍ ଇଞ୍ଜ ଅଡ଼୍‌ ଫେଷ୍ଟସ୍‍ତିଙ୍କ୍ କେତ୍‍ତଡ଼୍, ଇତ୍‍କେ ଅଡ଼୍‌ ପାଉଲ୍‍ତିଙ୍କ୍ ଆର୍‍ଦାଗ୍ ହାୱକାଙ୍କ୍ ତିଆର୍ ଆସ୍ ମାତ୍‍ତଡ଼୍ ।
ACT 25:4 ଫେଷ୍ଟସ୍‍ କେତ୍‍ତଣ୍ଡ୍, “ପାଉଲ୍‍ତିଙ୍କ୍ ୱେରଣ୍ଡ୍ ବନ୍ଦି ଲେକାମ୍ କାଇସରିଆତାଗ୍ ନେହେତ୍‍ତଡ଼୍ ନୁ ସିଟ୍‍ପାଟ୍ ନାନ୍ ନିଜେ ଆଗେ ମାଲ୍‍ସ୍ ଆଦ୍‍ତାନ୍ ।
ACT 25:5 ଯଦି ଅଣ୍ଡ୍‌ ବାତ୍ ଦଷ୍ ମାଡ଼୍‍ତଣ୍ଡ୍, ଆଲେକେ ମିଇ ନେତାଲଡ଼୍ ନାତଡ଼୍ ସିସେରିଆତାଗ୍ ଆନିଡ଼୍ ନୁ ଅନ୍‌ ବିରୁଦ୍ଦ୍‍ତେ ଅଡ଼ାଦ୍‌ ଅବିଯୋଗ୍ କେଲିଡ଼୍ ।”
ACT 25:6 ଫେଷ୍ଟସ୍ ଅଡ଼୍‌ ତଡ଼୍ ଆଟ୍‌ ବା ଦଶ୍ ଦିନ୍ ପେର୍କେ ମାଞ୍ଜ୍ କାଇସରିଆ ମାଲ୍‍ତଣ୍ଡ୍ । ମେଣ୍ଡନ୍ ଦିନ୍ ଅଣ୍ଡ୍‌ ବିଚାର୍ ଲୋତ୍‍ତାଗ୍ କୁଦି ପାଉଲ୍‍ତିଙ୍କ୍ ତାତାନଙ୍କ୍ ଗଟ୍ ହିତ୍‍ତଣ୍ଡ୍ ।
ACT 25:7 ପାଉଲ୍ ୱାତ୍‍ତେ ସାଙ୍ଗେ ସାଙ୍ଗେ ଯିରୁଶାଲେମ୍‍ତେ ଇହୁଦୀଡ଼୍ ଅନ୍‌ ତିଡ଼୍‍ୟିପାକ୍ ଚୁଟ୍ ନିତ୍‍ତଡ଼୍ ନୁ ଅନ୍‌‍ ବିରୁଦ୍‍ତେ ନାର୍ଗେ ଅବିଯୋଗ୍ ମାଡ଼ାନାଦ୍‍ ଶକ୍ତି ମାଡ଼୍‍ତଡ଼୍‍ । ଇତ୍‍କେ ଅଡ଼୍‌ ଇୱୁସାରେ ପ୍ରମାଣ୍ ମାଡ଼ାନଙ୍କ୍ ପାର୍‍ୱଡ଼୍ ।
ACT 25:8 ଇତ୍‍କେ ପାଉଲ୍ ଆତ୍ମସମର୍ପଣ ମାଡ଼ି କେତ୍‍ତଣ୍ଡ୍, “ଇହୁଦୀ ନିୟମ୍‍ କି ମନ୍ଦିର୍‍ କି ରୋମ୍‍ତେ ମହାରାଜା, ମୋଶାନ୍‌‌ ନିୟମ୍‍ତେ ନାନ୍ ବାତ୍‍ମିକା ପାପାମ୍ ମାଡ଼ନ୍ ।”
ACT 25:9 ଇତ୍‍କେ ଫେଷ୍ଟସ୍ ଇହୁଦୀ ନାରୁଡ଼୍‍ତେ ଅନୁଗ୍ରହ ଆଦାନଙ୍କ୍ ଇଚ୍ଛା ମାଡ଼ି ପାଉଲ୍‍ତିଙ୍କ୍ ପାଚ୍ରାମାଡ଼୍‍ତଣ୍ଡ୍, “ଯିରୁଶାଲେମ୍‍ତାଗ୍ ଆଦାନଙ୍କ୍ ନୁ ଆଗେ ନା ମୁନ୍‍ନେ ଇୱୁସାରେ ଅବିଯୋଗ୍ ବିଚାର୍ ମାଡ଼ାନ୍ ସେଙ୍ଗେ ନିମ୍‍ ରାଜି ଆଦ୍‍ତି କି ?”
ACT 25:10 ପାଉଲ୍ କେତ୍‍ତଣ୍ଡ୍, “ନାନ୍ ମହାରାଜାନ୍‍ ନିଜେତ୍ ବିଚାର୍ ଲୋତ୍‍ତାଗ୍ ନିସ୍ ମିନ୍ଦେନ୍ । ଇଗେ ଆ ନାୟାଦ୍ ବିଚାର୍ ଆଦାନ୍ ଦର୍‍କାର୍ । ନିମ୍‍ ନିଜେ ସାୟେ ପୁତ୍‍ତିନ୍ ଯେ, ନାନ୍ ଇହୁଦୀଡ଼୍ ବିରୁଦ୍ଦ୍‍ତେ ବାତ୍ ଦଷ୍ ମାଡ଼ନ୍ ।
ACT 25:11 ଯଦି ନାନ୍ ଉପବାସ୍‍ତିଙ୍କ୍ ମାନେମ୍‍ ଆୟ୍‍ୟକଟ ଡଲାନ୍‍ଦଣ୍ଡ୍ ଆଦାନ୍ ଲେକାମ୍ ବାତ୍ ମାଡ଼୍‍ତାନ୍, ଆଲେକେ ନାନ୍ ରାଜି ମିନ୍ଦେନ୍ । ଇତ୍‍କେ ଅଡ଼୍‌ ନା ବିରୁଦ୍ଦ୍‍ତେ ତାସ୍ ମାନ୍ଦାନ୍ ପ୍ରତିଶଦ୍‍ ସତ୍ ଆୟ୍‍ୟକଟ ମାତ୍‍କେ, ଆଲେକେ ବେନ ନାକିଂଙ୍କ୍ ଅଡ଼୍‌ କାୟ୍‍ଦେ ୱିଡ଼୍‍ସିୱଣ୍ଡ୍ । ମହାରାଜାନାଗ୍‌ ନାନ୍ ଇଦ୍ କେତୁତାନ୍ ।”
ACT 25:12 ତାନ୍‍ପେର୍କେ ଫେଷ୍ଟସ୍‍ ତାମ୍ ଉପବାସ୍ ସବାତ୍ ମୁକ୍ୟାଲଡ଼୍ ତଡ଼୍ କାୟ୍‍ଲି ଉତ୍ତର୍ ହିତ୍‍ତଣ୍ଡ୍, “ନିମ୍‍ ମହାରାଜ୍‍ନାଗ୍‌ କେତ୍‍ତିନ୍, ଆଦିଙ୍କ୍ ନିମ୍‍ ମହାରାଜାତେ ବକେତ୍ ଆଦ୍‍ତି ।”
ACT 25:13 ବେସ୍‍କେ ଦିନା ପେର୍‍କେ ଆଗ୍ରୀପା ନୁ ବର୍ଣ୍ଣିସ୍ ଫେଷ୍ଟସ୍‍ତିଙ୍କ୍ କାଇଲାନଙ୍କ୍ କାଇସରିଆତାଗ୍ ୱାତ୍‍ତଡ଼୍ ।
ACT 25:14 ଆଗେ ଅଡ଼୍‌ ବେସ୍‍କେ ଦିନା ମାତ୍‍ତେ ପେର୍‍କେ ଫେଷ୍ଟସ୍ ରାଜାଙ୍କ୍ ପାଉଲ୍‍ତେ ବିଷୟ୍ କେତ୍‍ତଣ୍ଡ୍, “ଫେଲିକ୍‍ସ୍‍ ବନ୍ଦି ମାଡ଼ି ନେହେତ୍‍ତେ ୱେରଣ୍ଡ୍ ନାରୁଡ଼୍ ଇଗେ ମିନ୍ଦେଣ୍ଡ୍ ।
ACT 25:15 ନାନ୍ ବେସୁଟ୍‌ ଯିରୁଶାଲେମ୍‍ତାଗ୍ ଆଞ୍ଜ୍ ମାତ୍‍ତାନ୍, ଇହୁଦୀ ବେଡ଼ିୟି ଯାଜକ୍ ନୁ ଦର୍ମ ନେତାଲଡ଼୍ ଅନ୍‌ ବିରୁଦ୍ଦ୍‍ତେ ବେସର୍ ଅବିଯୋଗ୍ ତାତ୍‍ତଡ଼୍ ନୁ ନାକିଂଙ୍କ୍ ଅଂକିଙ୍କ୍‌ ଦଷି ମାଡ଼ାନଙ୍କ୍ କେତ୍‍ତଡ଼୍ ।
ACT 25:16 ଇତ୍‍କେ ନାନ୍ ଅଡ଼୍‌‍କିଂଙ୍କ୍ କେତ୍‍ତାନ୍ ଯେ, ୱେରଣ୍ଡ୍ ଦୋଷୀଙ୍କ୍ ବିଚାର୍‍ଳୟତାଗ୍ ଅଂକିଙ୍କ୍‌ ଅବିଯୋଗ୍ ମାଡ଼୍‍ତେନଡ଼୍ ମୁନ୍‍ନେ ସର୍ପା ମାଡ଼ାନ୍ ସେଙ୍ଗେ ସୁଯୋଗ୍ ହିଦାନ୍ ମୁନେଙ୍କ୍ ଅଂକିଙ୍କ୍‌ ଦଷି ମାଡ଼ାନାଦ୍ ମାନ୍‍ ରୋମୀୟଡ଼ାଦ୍ ନିୟମ୍ ଆୟ୍‍ୟ ।
ACT 25:17 ଅଡ଼୍‌ ଇଗେ ୱାତ୍‍ତେ ପେର୍‍କେ ନାନ୍ ଲେଟ୍ ମାଡ଼କଟ୍ ମେଣ୍ଡନ୍ ଦିନ୍ ବିଚାର୍ ଲୋତ୍‍ତାଗ୍ କୁଦ୍‍ତାନ୍ ନୁ ନାରୁଙ୍କ୍ ଲୋପେ ତାତାନଙ୍କ୍ ଆଦେଶ୍‍ ହିତ୍‍ତାନ୍ ।
ACT 25:18 ଅନ୍‌ ଅବିଯୋଗନଡ଼୍‌ ଅନ୍‌ ବିରୁଦ୍ଦ୍‍ତେ କେତାନଙ୍କ୍ ନିତ୍‍ତଡ଼୍, ଇତ୍‍କେ ଅଡ଼୍‌ ବେଦ୍‍ରକମ୍‍ ଅବିଯୋଗ୍ ତାତିତଡ଼୍ ଇଞ୍ଜ ନାନ୍ ହେର୍କା ମାଡ଼ି ମାତ୍‍ତାନ୍, ଆଦ୍ ରକମ୍ ଅଡ଼୍‌ କେଲଡ଼୍ ।
ACT 25:19 ଅଡ଼୍‌ ନିଜେର୍‍ ଦର୍ମ ବିଷୟ୍‍ତେ ନୁ ଜିସୁ ପେଦେର୍‍ତଣ୍ଡ୍ ଡଲ୍‍ତେ ନାରୁଙ୍କ୍ ପାଉଲ୍ ଜିୱୁନ୍‍ ମିନ୍ଦେଣ୍ଡ୍ ଇଞ୍ଜ ଦାବୀ ମାଡ଼ୁତଣ୍ଡ୍, ଆଦ୍ ବିଷୟ୍ ଆସ୍ ଯୁକ୍ତିତର୍କ ମାଡ଼୍‍ତଡ଼୍ ।
ACT 25:20 ଇୱୁସାରେ ବିଷୟ୍ ସାୟେ ପୁନ୍ଦାନ୍ ସେଙ୍ଗେ ବାତ୍ ମାଡ଼ାନଙ୍କ୍ ଆଦ୍‍ତେ, ବାତ୍‍ମିକା ଟିକ୍ ମାଡ଼େ ପାର୍‍ୱାଙ୍କ୍ ଇଦ୍ ଅବିଯୋଗ୍ ବିଚାର୍ ମାଡ଼ାନ୍ ସେଙ୍ଗେ ପାଉଲ୍ ଯିରୁଶାଲେମ୍‍ ଆଦ୍‍ତନ୍ କି ଇଞ୍ଜ ନାନ୍ ଅଂକିଙ୍କ୍‌ ପାଚ୍ରାମାଡ଼୍‍ତାନ୍ ।
ACT 25:21 ଇତ୍‍କେ ପାଉଲ୍, ନିଜେ ମହାରାଜାଲ୍ ଅନ୍‌ ନିଷ୍ପତି ବିଚାର୍‍ ମାଡ଼ିଣ୍ଡ୍ ଇଞ୍ଜ କେସ୍ କେପାନଡ଼୍ ତଡ଼୍ ପ୍ରାର୍ତନାତେ ସୁରକ୍ଷା ମାନ୍ଦାନଙ୍କ୍ ହାଲ୍‍ସ୍‍ତଣ୍ଡ୍ । ଆଦିଙ୍କ୍ ମହାରାଜାନ୍‍ ବକେତ୍ ରହତ୍‍ତାନ୍ ଯାକ ଅଂକିଙ୍କ୍‌ ବନ୍ଦି ମାଡ଼ି ନେହେତାନଙ୍କ୍ ନାନ୍ ଗଟ୍ ହିତ୍‍ତାନ୍ ।”
ACT 25:22 ଆଗ୍ରୀପା ଫେଷ୍ଟସ୍‍ତିଙ୍କ୍ କେତ୍‍ତଣ୍ଡ୍, “ନାନ୍ ନିଜେ ଇ ନାରୁନ୍ ଗଟ୍ କେଞ୍ଜାନଙ୍କ୍ ଇଚ୍ଛା ମାଡ଼ୁତାନ୍ ।” ଫେଷ୍ଟସ୍ ଉତ୍ତର୍ ହିତ୍‍ତଣ୍ଡ୍, “ନାଡ଼୍ ନିମ୍‍ ଅନାଦ୍‌ ଗଟ୍ କେଞ୍ଜୀତିନ୍ ।”
ACT 25:23 ମେଣ୍ଡନ୍ ଦିନ୍ ଆଗ୍ରୀପା ନୁ ବର୍ଣ୍ଣିସ୍ ସୈନ ବାହିନୀତେ ମୁକ୍ୟ ନୁ ନଗର୍‍ତେ ମୁକ୍ୟ ନାରୁଡ଼୍ ଗାଟି ୱେଡ଼୍‍କେତ୍ ୱାସ୍ ବିଚାର୍‍ଳୟତାଗ୍ ହସ୍‍ତଡ଼୍ । ଫେଷ୍ଟସ୍‍ତେ ଗଟ୍‍ତେ ପାଉଲ୍‍ତିଙ୍କ୍ ଲୋପେ ତାତ୍‍ତଡ଼୍ ।
ACT 25:24 ଫେଷ୍ଟସ୍ କେତ୍‍ତଣ୍ଡ୍, “ରାଜାଲ୍ ଆଗ୍ରୀପା ନୁ ମାନ୍ଦାନ୍ ବେଡ଼୍‍ୟେ ନାରୁଡ଼୍, ମିଡ଼୍ ଇ ବେନ୍ ନାରୁଙ୍କ୍ ଉଡ଼ୁତିଡ଼୍, ଅନ୍‌ ବିରୁଦ୍ଦ୍‍ତେ ଇଗେତଡ଼୍ ନୁ ଯିରୁଶାଲେମ୍‍ ମାନ୍ଦାନ୍ ଇହୁଦୀଡ଼୍ ନା ଗାର୍‍ରେ ଅବିଯୋଗ୍ ମାଡ଼୍‍ତଡ଼୍ । ଅଡ଼୍‌ ଅଂକିଙ୍କ୍‌ ଜିୱୁନ୍‍ ମାନ୍ଦାନ୍‍ ଦର୍‍କାର୍‍ ଆୟ ଇଞ୍ଜ ଦାବୀ ମାଡ଼ି ମର୍‍ପୟ୍‍ତଡ଼୍ ।
ACT 25:25 ଇତ୍‍କେ ଅଣ୍ଡ୍‌ ଡଲାନ୍‍ଦଣ୍ଡ୍ ପାଏମ୍ ଆଦାନ୍ ଲେକାମ୍ ମାଡ଼ିମାନ୍ଦାନ୍ ବାତ୍ ଅପରାଦ୍‌ ନାନ୍ ଉଡ଼ନ୍ । ଅଣ୍ଡ୍‌ ନିଜେ ସମ୍ରାଟ୍‍ତିଙ୍କ୍ କେତ୍‍ତାଙ୍କ୍, ନାନ୍ ଅଂକିଙ୍କ୍‌ ଆଗେ ଉପବାସ୍‍ତାଗ୍‍ ରହତାନଙ୍କ୍ ମାନ୍‍ ମାଡ଼୍‍ତାନ୍ ।
ACT 25:26 ଇତ୍‍କେ ପ୍ରବୁନ୍‍ ବିଷୟ୍‍ତେ ସାୟେ ଲେକାନ୍ ସେଙ୍ଗେ ନାୟାଗ୍ ବାତ୍ ହିଲ୍‍ଲେ । ଆଦିଙ୍କ୍ ଅଂକିଙ୍କ୍‌ ମିଇ ମୁନ୍‍ନେ ନୁ ଇ ରାଜାଲ୍ ଆଗ୍ରୀପା, ମିଇ ମୁନ୍‍ନେ ତାତ୍‍ତଣ୍ଡ୍, ବେଦ୍‍ପୁଟୁଙ୍କ୍ କି ଅନ୍‌ ବିଷୟ୍ ସାୟେ ମାଡ଼ି ପାଚ୍ରାମାଡ଼୍‍ତେ ପେର୍‍କେ ନାନ୍ ବାତ୍‍ଆୟି ଲେକ୍‌ ପାର୍‍ଦ୍‍ତାନ୍ ।
ACT 25:27 ଇତ୍‍କେ ୱେରଣ୍ଡ୍ ବନ୍ଦି ବିରୁଦ୍ଦ୍‍ତେ ମାନ୍ଦାନ୍ ଅବିଯୋଗ୍ ତାୱୁ ସାୟେ ଲେକକଟ୍‌ ଅଂକିଙ୍କ୍‌ ମହାରାଜାନ୍‍ ବକେତ୍ ରତାନାୱୁ ଟିକ୍ ଆୟ୍‍ୟ ଇଞ୍ଜ ନାନ୍ ହେର୍କା ମାଡ଼ୁତାନ୍ ।”
ACT 26:1 ଆଗ୍ରୀପା ପାଉଲ୍‍ତିଙ୍କ୍ କେତ୍‍ତଣ୍ଡ୍, “ନିକିଂଙ୍କ୍ ନି ବିଷୟ୍‍ତେ ବାତ୍ କେତାନଙ୍କ୍ ଆଦେଶ୍‍ ହିତ୍‍ତଡ଼୍ ପାଉଲ୍ କାୟ୍ ହାଆସ୍ ନିଜେ ସମର୍ତନ୍ ମାଡ଼ି କେତ୍‍ତଣ୍ଡ୍ ।”
ACT 26:2 “ରାଜା ଆଗ୍ରୀପା ! ଇହୁଦୀଡ଼୍ ନାକିଂଙ୍କ୍ ବେନ୍ ବିଷୟ୍‍ତେ ଅବିଯୋଗ୍ ମାଡ଼୍‍ତଡ଼୍, ଆଦିନ୍ ବିରୁଦ୍ଦ୍‍ତେ ନି ମୁନ୍‍ନେ ନାନ୍ ଆତ୍ମସମର୍ତନ୍ ମାଡ଼ାନଙ୍କ୍ ସୁଯୋଗ୍ ଦର୍‍କ୍‍ତାଙ୍କ୍ ଅଣ୍ଡ୍‌ ନିଜେତିଙ୍କ୍ ଲେକେତ୍‍ ଇଞ୍ଜ ହେର୍କା ମାଡ଼ୁତଣ୍ଡ୍‌,”
ACT 26:3 ବାତେଙ୍କ୍ଇତ୍‍କେ ଇହୁଦୀଡ଼୍ ରୀତିନୀତି ନୁ ମତାମତ ବିଷୟ୍ ନିମ୍‍ ସାୟେ ପୁତ୍‍ତିନ୍ । ଅନୁରଦ୍‌‍ ମାଡ଼ୁତାନ୍, ନିମ୍‍ ଗାଡ଼୍‍ସ୍ ଆସ୍ ନା ଗଟି କେଞ୍ଜେ ।
ACT 26:4 “ପିଲେ ଦିନା କନ୍‍ସ୍ ନାନ୍ ବେଦ୍‍ପୁଟୁଙ୍କ୍ ବାଦ୍‍କ୍‍ତାନ୍, ଆଦ୍ ଇହୁଦୀଡ଼୍ ପୁତ୍‍ତଡ଼୍ । ମୁନେନ୍ ନିଜେତ୍ ଦେଶ୍‍ତାଗ୍ ନୁ ତାନ୍‍ପେର୍କେ ଯିରୁଶାଲେମ୍‍ତାଗ୍ ନାନ୍ ବେଲା ବାଦ୍‍କ୍‍ତାନ୍, ଆଦ୍ ମିକା ଇହୁଦୀଡ଼୍ ପୁତ୍‍ତଡ଼୍ ।
ACT 26:5 ନାନ୍ ମୁନେନ୍ ପାରୂଶୀ ପେଦେର୍‍ତେ ମାନ୍‍ ଦର୍ମତାଦ୍ ସାରେତିଙ୍କ୍ ସୁଦୁର୍ ମାନ୍ଦେତାଗ୍ ସବ୍ୟ ଇନା ଜିୱୁନ୍‍ ବାଦ୍‍କ ମାତ୍‍ତାନ୍, ଅଡ଼୍‌ ଇଦ୍ ପୁତ୍‍ତଡ଼୍ ନୁ ଇଚ୍ଛା ମାଡ଼୍‍କେ, ଅଡ଼୍‌ ଇଦ୍ ବିଷୟ୍‍ତେ ସାକ୍ଷ୍ୟ ଇଦେ ପାର୍‍ଦ୍‍ତଡ଼୍ ।
ACT 26:6 ଇଶ୍ୱର୍ ମାନ୍‍ ଆନିଦାଦୀଡ଼୍‍କିଙ୍କ୍ ବେନ୍ ପ୍ରତିଜ୍ଞା କେସ୍‍ମାତ୍‍ତଣ୍ଡ୍, ଆଗେ ନାୟାଦ୍ ଆଶେ ମାନ୍ଦାନ୍ ସେଙ୍ଗେ ନାନ୍ ଇଗେ ବିଚାର୍ ଆଦାନଙ୍କ୍ ନିସ୍ ମିନ୍ଦେନ୍ ।
ACT 26:7 ମାନ୍‍ ନାରୁଡ଼୍‍ତେ ବାର ଗୋଷ୍ଠୀତଡ଼୍ ନାର୍‍କେ ପାୟାଲ୍ ପ୍ରବୁଙ୍କ୍ ଉପାସନା ମାଡ଼ି ଆଦ୍ ଅଣ୍ଡୟ୍‌ ବିଷୟ୍ ପାଏମ୍ ଆଦାନ୍ ସେଙ୍ଗେ ଆଶେ ମାଡ଼ିତଡ଼୍ । ହୋ ରାଜା, ନାୟାଦ୍ ଆଦ୍ ଆଶେ ମାଇଦିଙ୍କ୍ ଇହୁଦୀଡ଼୍ ନାକିଂଙ୍କ୍ ଦଷି ମାଡ଼ୁତଡ଼୍ ।
ACT 26:8 ଇଶ୍ୱର୍ ଯେ ଡଲ୍‍ତେନଡ଼୍‍କିଙ୍କ୍ ଡଲ୍‍ତାଗାଙ୍କ୍ ତେଏତିତଣ୍ଡ୍, ଇଦ୍ ବିଶ୍ୱାସ୍ ମାଡ଼ାନାଦ୍ ସମ୍ଭବ୍ ଆୟ୍‍ୟ ଇଞ୍ଜ ମିଡ଼୍ ବାତେଙ୍କ୍ ହାଲ୍‍ସୁତିଡ଼୍ ?”
ACT 26:9 “ନାଜରିତିୟ ଜିସୁନ୍ ପେଦେର୍‍ତେ ଅନ୍‌ମାନ୍ଦେତିଙ୍କ୍ ବନ୍ଦ୍ ମାଡ଼ାନ୍ ସେଙ୍ଗେ ନାନ୍ ପାର୍‍ତେଇସର୍ ଆଲ୍‍ସି ମାଡ଼ାନାଦ୍ ଟିକ୍ ଇଞ୍ଜ ହାଲ୍‍ସିମାତ୍‍ତାନ୍ ।
ACT 26:10 ଯିରୁଶାଲେମ୍‍ତାଗ୍ ନାନ୍ ଆଲେନେ ମାଡ଼୍‍ତାନ୍ । ବେଡ଼ିୟି ଯାଜକିଡ଼ାଗାଙ୍କ୍ ଅଦିକାର୍‌‍ ଚିଟି ଆସ୍ ଇଶ୍ୱର୍‌ତେ ପବିତ୍ର ବକ୍ତଡ଼୍ ଲୋପେଙ୍କ୍ ନାର୍‍ଗେ ନାରୁଡ଼୍‍କିଂଙ୍କ୍ ଜେଲ୍‍ତାଗ୍ ୱାଟ୍‍ତାନ୍ ନୁ ଅଡ଼୍‌‍କିଂଙ୍କ୍ ଡଲାନ୍‍ଦଣ୍ଡ୍ ହିଦାନ୍ ସେଙ୍ଗେ ନାନ୍ ଆଦିଙ୍କ୍ ସପଟ୍ ମାଡ଼୍‍ତାନ୍ ।
ACT 26:11 ନାର୍ଗେଦାମ୍ ପ୍ରାର୍ତନା ଲଅକିନାଗ୍ ନାନ୍ ଅଡ଼୍‌‍କିଂଙ୍କ୍ ଦଣ୍ଡ୍ ହିତ୍‍ତାନ୍ ନୁ ତାମ୍ ବିଶ୍ୱାସ୍‍ତାଗାଙ୍କ୍ ୱେରେ ମାଡ଼ାନ୍ ସେଙ୍ଗେ ଆଲ୍‍ସି ମାଡ଼୍‍ତାନ୍ । ନାନ୍ ଅଡ଼୍‌ ପର୍‍ର ହିସର୍ କପାମ୍ ଆତ୍‍ତାନ୍ ଯେ, ଅଡ଼୍‌ ପର୍‍ର ଅତ୍ୟାଚାର୍ ମାଡ଼ାନ୍ ସେଙ୍ଗେ ବିଦେଶ୍ ଟାୱୁନ୍‍କିନାଗ୍ ମିକା ଆଞ୍ଜ୍‍ମାତ୍‍ତାନ୍ ।”
ACT 26:12 “ଇଦିନ୍ ମାଇଦିଙ୍କ୍ ମୁକ୍ୟ ଯାଜକିଡ଼ାଗାଙ୍କ୍ ଅଦିକାର୍‌‍ ଚିଟି ନୁ ଗଟ୍ ଅସ୍ ନାନ୍ ଦାମାସ୍‍କସ୍‍ତାଗ୍ ଆଞ୍ଜ୍‍ମାତ୍‍ତାନ୍ ।
ACT 26:13 ହଁ ରାଜା ଆଗ୍ରିପା, ହଟାତ୍ ଅନ୍‌‍ଦିନେ ପାୟାଲ୍‍ତେ ୱେଲେ ମେନ୍ ରଟିନ୍ ପର୍‍ର ନାନ୍ ପଡ଼୍‍ଦ୍ ୱେସ୍‍ତାଗାଙ୍କ୍ ମେଣ୍ଡେ ଅଦିକ୍‌ ଅଣ୍ଡୟ୍‌ ୱେସ୍ ଉଡ଼୍‍ତାନ୍, ସ୍ୱର୍ଗତାଗାଙ୍କ୍ ଆଦ୍ ୱେସ୍ ୱାସ୍ ନାକିଂଙ୍କ୍ ନୁ ନା ତଡ଼୍ ମାନ୍ଦାନଡ଼୍‍ତେ ତିଡ଼୍‍ୟିପାକ୍ ନିତ୍‍ତେ ।
ACT 26:14 ମାମ୍‍ମେ ସାରେତମ୍ ବୂମ୍‌ତାଗ୍‌ ରାୟ୍‍ତମ୍ ନୁ ହୀବ୍ରୁ ଗଟ୍‍ତେ ନା ସେଙ୍ଗେ ଅଣ୍ଡୟ୍‌ ଗଟ୍ କେଞ୍ଜ୍‍ତାନ୍, ‘ଶାଉଲ୍, ଶାଉଲ୍ ! ନିମ୍‍ ବାତେଙ୍କ୍ ନାକିଂଙ୍କ୍ ତାଡ଼ନା ମାଡ଼ୁତିନ୍ ? ଉଡ଼୍‍ଦାନଣ୍ଡ୍ ମାନେୟ୍‍ତେ କୟେଡୁଡ୍‍ତିଙ୍କ୍ ଲାତ୍ ରେହେତାନ୍ କନ୍ଦ୍ ଲେକାମ୍ ନିମ୍‍ ନିଜେ ଦେବ୍‍ ତିନ୍‍ତି ।’
ACT 26:15 ନାନ୍ ପାଚ୍ରାମାଡ଼୍‍ତାନ୍, ‘ପ୍ରବୁ, ନିମ୍‍ ବେନ ?’ ପ୍ରବୁ ଉତ୍ତର୍ ହିତ୍‍ତଣ୍ଡ୍, ‘ନାନ୍ ଜିସୁ, ବେନଙ୍କ୍ ନିମ୍‍ ତାଡ଼ନା ମାଡ଼ୁତିନ୍ ।
ACT 26:16 ଇତ୍‍କେ ତେଦି ନିଲ୍‍ମ୍ । ନିକିଂଙ୍କ୍ ନା ଦାସ ଲେକାମ୍ ନେହେତାନଙ୍କ୍ ନାନ୍ ନିକିଂଙ୍କ୍ ଦର୍ଶନ୍ ହିତ୍‍ତାନ୍ । ନେଣ୍ଡ୍ ନା ବିଷୟ୍‍ତେ ବାତ୍ ଉଡ଼୍‍ତିନ୍ ନୁ ୱାଦାନ୍ ଦିନାତେ ନାନ୍ ନିକିଂଙ୍କ୍ ବାତ୍ ତଅତିତାନ୍, ଆଦ୍ ବିଷୟ୍ ନିମ୍‍ ୱେରେ ନାରୁଡ଼୍‍କ୍ ସାକ୍ଷି କେତିତିନ୍ ।
ACT 26:17 ନାନ୍ ନିକିଂଙ୍କ୍ ବେନ୍ ଇହୁଦୀ ନୁ ଅଣଇହୁଦୀ ନାରୁଡ଼ାଗ୍ ରହତିତାନ୍, ଅଡ଼୍‌ଆଗାଙ୍କ୍‌ ନାନ୍ ନିକିଂଙ୍କ୍ ଉଦ୍ଦାର୍ ମାଡ଼ିତାନ୍ ।
ACT 26:18 ନିମ୍‍ ଅଡ଼ାଦ୍‌ କଣ୍ଡାଙ୍କ୍ ପରିଷ୍କାର୍‍ ମାଡ଼ିମ୍ । ଅଡ଼୍‌‍କିଂଙ୍କ୍ ଇକାଡ଼୍‌ତାଗାଙ୍କ୍ ୱେସିନାଗ୍ ନୁ ଶୟ୍‍ତାନ୍‍ତାଗାଙ୍କ୍ ଇଶ୍ୱର୍‌ତେ ପାକେ ତାତାନଙ୍କ୍ ଆଦ୍‍ତେ, ବେଲାକି ଅଡ଼୍‌ ନାକିଂଙ୍କ୍ ବିଶ୍ୱାସ୍ ମାଡ଼୍‍କେ ଅଡ଼ାଦ୍‌ ପାପ୍ କ୍ଷମା ଆଦ୍‍ତେ ନୁ ପ୍ରବୁ ହେଞ୍ଚ୍‍ତେ ନାରୁଡ଼୍ ଲୋପେ ଅଡ଼୍‌‍କ୍ ଅଦିକାର୍‌‍ ଦର୍‍କିତ୍ ।’”
ACT 26:19 “ହଁ ରାଜା ଆଗ୍ରୀପା, ନାନ୍ ସ୍ୱର୍ଗତାଗାଙ୍କ୍ ବେନ୍ ଦର୍ଶନ୍ ଉଡ଼୍‍ତାନ୍, ଆଦିଙ୍କ୍ ଅପ୍‍ମାନ୍ ମାଡ଼ନ୍ ।
ACT 26:20 ନାନ୍ ମୁନେନ୍ ଦାମାସ୍‍କସ୍‍ ଯିରୁଶାଲେମ୍‍ତାଗ୍ ନୁ ତାନ୍‍ପେର୍କେ ଯିହୁଦା ପ୍ରଦେଶ୍‍ତେ ସାରେ ଏକାମ୍ ନୁ ଅଣଇହୁଦୀଡ଼୍ ଲୋପେ ପ୍ରଚାର୍ ମାଡ଼୍‍ତାନ୍, ବେଲାକି ଅଡ଼୍‌ ପାପାମ୍‍ତାଗାଙ୍କ୍ ମାଲ୍‍ସ୍ ଇଶ୍ୱର୍ ଗାର୍‍ରେ ୱାଦ୍‍ତଡ଼୍‍ ନୁ ଅଡ଼୍‌ ବାତ୍ ଅନୁତାପ୍ ମାଡ଼୍‍ତଡ଼୍, ଆଦ୍ ପାଡ଼୍‍ୟିତାଗ୍ ତଅତିତଡ଼୍ ।
ACT 26:21 ଇଦିନ୍‍ମାଇଦିଙ୍କ୍ ନାନ୍ ମନ୍ଦିର୍‍ତାଗ୍ ମାନ୍ଦାନ୍ ୱେଲେ ଇହୁଦୀଡ଼୍ ନାକିଂଙ୍କ୍ ପଇସ୍ ହାୱ୍‍କାନଙ୍କ୍ ଚେଷ୍ଟା ମାଡ଼୍‍ତଡ଼୍ ।
ACT 26:22 ଇତ୍‍କେ ନେଣ୍ଡ୍ ଯାକ ଇଶ୍ୱର୍ ନାକିଂଙ୍କ୍ ସାହାଯ୍ୟ ମାଡ଼୍‍ତଣ୍ଡ୍ ନୁ ଆଦିନ୍ ସେଙ୍ଗେ ନାନ୍ ନେଣ୍ଡ୍ ବେଡ଼୍‍ୟଡ଼୍ ସୁଦୁଲଡ଼୍ ସାରେତଡ଼୍ ବକେତ୍ ସାମାନ୍ ସାକ୍ଷ୍ୟ ହିଦାନ୍ ସେଙ୍ଗେ ଦାୟି ଆଦାନ୍ ସେଙ୍ଗେ ନିତ୍‍ତାନ୍ । ବାବବାଦୀଡ଼୍ ନୁ ମୋଶାଲ୍‌‍, ବାତ୍ ଗଟେମ୍ ଆଦ୍‍ତେ ଇଞ୍ଜ କେସ୍‍ମାତ୍‍ତଡ଼୍ ନାନ୍ ଟିକ୍ ଆଦେ ଗଟ୍ କେତୁତାନ୍ ।
ACT 26:23 ମସୀହ ଦୁଃକାମ୍‍କଷ୍ଟ ମାଡ଼ିତନ୍ ନୁ ଡଲ୍‍ତଡ଼୍ ଲୋପେ ସାରେତିଙ୍କ୍ ମୁନେନ୍ ପୁନରୁତାନ୍ ଆସ୍‍ ଇହୁଦୀ ନୁ ଅଣଇହୁଦୀଡ଼୍ ବକେତ୍ ପରିତ୍ରାଣତେ ୱେସ୍ ତଅତିତଣ୍ଡ୍ ।”
ACT 26:24 ଇଦ୍‍ରକମ୍ ପାଉଲ୍ ନିଜେ ରାଜି ଆସ୍ କେତ୍‍ତାନ୍ ୱେଲେ ଫେଷ୍ଟସ୍ କିଡ଼୍‍କି କେତ୍‍ତଣ୍ଡ୍, “ପାଉଲ୍, ନିମ୍‍ ବାୟାନି ! ନିୟାଦ୍ ନାର୍‍ଗେ ବୁଦ୍ଦ୍ ନିକିଂଙ୍କ୍ ବାୟେ ମାଡ଼୍‍ତେ !”
ACT 26:25 ପାଉଲ୍ ଉତ୍ତର୍ ହିତ୍‍ତଣ୍ଡ୍, “ନାନ୍ ବାୟେ ଆୟନ୍ ମଣିମା ! ଫେଷ୍ଟସ୍ ବାତ୍ କେତୁତାନ୍ ଆଦ୍ ନିଜାମ୍ ନୁ ପ୍ରାମାଣ୍‍ତାଦ୍‍ ଗଟ୍‍ ।
ACT 26:26 ରାଜା ଆଗ୍ରୀପା ! ନିମ୍‍ ଇୱୁସାରେ ବିଷୟ୍ ପୁତ୍‍ତାଙ୍କ୍ ନାନ୍ ନି ମୁନ୍‍ନେ ଇଦ୍ ଗଟ୍ କେତାନଙ୍କ୍ ସାହାସ୍ ମାଡ଼ୁତାନ୍ ! ନାନ୍ ନିଜାମ୍ ପୁତ୍‍ତାନ୍ ଯେ, ଇୱୁସାରେ ବିଷୟ୍ ନିକିଂଙ୍କ୍ ତଅନ୍‌ଦ, ବାତେଙ୍କ୍ଇତ୍‍କେ ପୁନ୍‍ୱାଦ୍ ପଡ଼୍‍ୟେତାଗ୍ ମିଞ୍ଜୀ ଇଦ୍ ବିଷୟ୍ ଗଟେମ୍ ଆୟ୍‍ୟ ।
ACT 26:27 ରାଜା ଆଗ୍ରୀପା, ନିମ୍‍ ବାବବାଦୀଡ଼୍‍କ୍ ବିଶ୍ୱାସ୍ ମାଡ଼ୁତିନ୍ ତ ! ନାନ୍ ପୁତ୍‍ତାନ୍ ନିମ୍‍ ବିଶ୍ୱାସ୍ ମାଡ଼ୁତିନ୍ !”
ACT 26:28 ଆଗ୍ରୀପା ପାଉଲ୍‍ତିଙ୍କ୍ ଉତ୍ତର୍ ହିତ୍‍ତଣ୍ଡ୍, “ଇଦ୍ ସୁଦୁଟ୍ ସମୟ୍‍ତେ ଲୋପେ ନିମ୍‍ ବାତ୍ ନାକିଂଙ୍କ୍ କ୍ରିଷ୍ଟିୟାନ୍ ବାଦ୍‍ଲା ମାଡ଼ିତାନ୍ ଇଞ୍ଜ ହାଲ୍‍ସୁତିନ୍ ?”
ACT 26:29 ପାଉଲ୍ ଉତ୍ତର୍ ହିତ୍‍ତଣ୍ଡ୍, “ସୁଦୁର୍ ଦିନାମ୍ ଆୟି ବା ଗାଟି ଦିନାମ୍ ଆୟି, ଇଶ୍ୱର୍‌ତାଗ୍ ନାନ୍ ପ୍ରାର୍ତନା ମାଡ଼ୁତାନ୍, ନିନ୍‍ ନୁ ନେଣ୍ଡ୍ ନା ଗଟି କେଞ୍ଜମାନ୍ଦାନ୍ ସାରେତଡ଼୍ ନା ଲେକାମ୍ ଆୟ୍‍ମୁଟ୍, ବେଲାବା ବନ୍ଦି ଆଦ୍‍ତନ୍ ଇଦ୍‍ରକମ୍ ଇକ୍‍ଲେମ୍‍ ତଡ଼୍ ତଅମୁଟ୍ ଇଞ୍ଜ ନାନ୍ କେଲନ୍ ।”
ACT 26:30 ତାନ୍‍ପେର୍କେ ରାଜା, ରାଜ୍ୟପାଳ, ବର୍ଣ୍ଣିସ୍ ନୁ ମେଣ୍ଡେବାଗାତଡ଼୍‍ ଆଦାନଙ୍କ୍ ତେଦ୍‍ତଡ଼୍ ।
ACT 26:31 ଅଡ଼୍‌ ଆଦାନ୍ ୱେଲେ ତାମ୍‍ତାମ୍ କେତ୍‍ତଡ଼୍, “ଇଣ୍ଡ୍ ନାରୁଣ୍ଡ୍‍ ଇଦ୍ ରକମ୍ ବାତ୍ ପାଡ଼୍‍ୟି ମାଡ଼ଣ୍ଡ୍, ବାତ୍ ସେଙ୍ଗେ ଅଣ୍ଡ୍‌ ଡଲାନ୍‍ଦଣ୍ଡ୍ ପାଏମ୍ ଆଦ୍‍ତଣ୍ଡ୍‍ ବା ବନ୍ଦି ଆଦ୍‍ତନ୍ ।”
ACT 26:32 ଆଗ୍ରୀପା ଫେଷ୍ଟସ୍‍ତିଙ୍କ୍ କେତ୍‍ତଣ୍ଡ୍, “ଉପବାସ୍‍ତାଗ୍ ଯଦି ଇଣ୍ଡ୍ ନାରୁଣ୍ଡ୍‍ ମହାରାଜାନାଗ୍ ଆବେଦନ୍ ମାଡ଼କଟ୍ ମାତ୍‍କେ, ମାମ୍‍ମେ ଅଂକିଙ୍କ୍‌ ମୁକ୍ତି ହିଦାଙ୍କ୍ ପାର୍‍ୱେମ୍ ।”
ACT 27:1 ମାମ୍‍ମେ ଇତାଲିଆତାକ୍ ଏର୍‍ଦାଲା ଆଦ୍‍ତମ୍ ଇଞ୍ଜ ମାନ୍‍ ମାଡ଼୍‍ତାଙ୍କ୍ ପାଉଲ୍ ନୁ ମେଣ୍ଡେ ବେସ୍‍କ୍‍ତୁଡ଼୍‍ ବନ୍ଦିଡ଼୍‍, “ମହାରାଜା ସେନାଦଳ,” ପେଦେର୍‍ତେ ଅଣ୍ଡୟ୍‌ ରୋମୀୟ ସୈନିଡ଼୍ ବାହିନୀତେ ସେନାପତି ଯୁଲିୟସ୍‍ତେ କାୟ୍‍ଦାଗ୍ ସମର୍ପିତ୍‍ ଆତ୍‍ତଡ଼୍ ।
ACT 27:2 ମାମ୍‍ମେ ରୋମ୍‍ତେ ଆସିଆ ଦେଶ୍‍ତେ ଆଞ୍ଚିନ୍ ଗାଟ୍‍କିନାଗ୍ ଆଦାନ୍ ସେଙ୍ଗେ ତିଆର୍ ଆତ୍‍ତେ ଆଦ୍ରମୁତିୟମ୍‍ତେ ଅଣ୍ଡୟ୍‌ ଏର୍‍ ଜାହାଜ୍‍ତାଗ୍ ଆତ୍‍ତମ୍ । ଆରିଷ୍ଟାର୍କସ୍ ପେଦେର୍‍ତେ ଥେସଲନିକୀ ସହର୍‍ତଣ୍ଡ୍ ୱେରଣ୍ଡ୍ ମାସିଦୋନିଆ ନାରୁଣ୍ଡ୍‍ ମାତଡ଼୍ ମାତ୍‍ତଣ୍ଡ୍ ।
ACT 27:3 ମେଣ୍ଡନ୍ ଦିନ୍ ମାମ୍‍ମେ ସିଦୋନ୍‍ତାଗ୍ ହେୱ୍‍ତମ୍ । ଯୁଲିୟସ୍‍ ପାଉଲ୍‍ତିଙ୍କ୍ ସାୟେ ଉଡ଼ ମାତ୍‍ତଣ୍ଡ୍ । ପାଉଲ୍‍ତେ ସାଙ୍ଗଡ଼ାଗାଙ୍କ୍ ଅଂକିଙ୍କ୍‌ ଦର୍‍କାର୍ ଜିନିଷ୍ ତାତାନ୍ ସେଙ୍ଗେ ଅଡ଼୍‌‍କିଂଙ୍କ୍ କାଇଲାନଙ୍କ୍ ଅଣ୍ଡ୍‌ ପାଉଲ୍‍ତିଙ୍କ୍ ଗଟ୍ ହିତ୍‍ତଣ୍ଡ୍ ।
ACT 27:4 ସାଇପ୍ରସ୍ କେତ୍‍ତନ୍‍ ମାମ୍‍ମେ ଆଗାଙ୍କ୍ ଆଦାନ୍ ୱେଲେ ଆଞ୍ଚିନାକାଙ୍କ୍ ଗାଲ୍ ୱାତ୍‍ତାଙ୍କ୍ କୁପ୍ର ଗପ୍‍ତେ ହାଞ୍ଚ୍ ହାଞ୍ଚ୍ ଆତ୍‍ତମ୍ ।
ACT 27:5 ସିଲିଷୀଆ ନୁ ପଂଫୁଲିୟା ଜିଡ଼ି ଲିସିଆତେ ମାଏରାତାଗ୍ ହେୱୁତମ୍ ।
ACT 27:6 ଆଗେ ସେନାପତି ଅଣ୍ଡୟ୍‌ ଆଲେକ୍‍ଜାଣ୍ଡ୍ରିଆତେ ଜାହାଜ୍‍ ଇତାଲିଆତାକ୍ ଆଦାନ୍ ସେଙ୍ଗେ ତିଆର୍ ଆଦାନାଦ୍ ଉଡ଼ି ମାକିଂଙ୍କ୍‍ ଆଗେ କୁସ୍ପ୍‍ତଣ୍ଡ୍‍ ।
ACT 27:7 ମାମ୍‍ମେ ନାର୍‍ଗେ ଦିନା ଯାକ ଜାମ୍ ଜାମ୍ ଆଞ୍ଜ୍ ଗାଟି ତିପାଲ୍‍ତେ କ୍ନୀଦର ଟାୱୁନ୍ ବକେତ୍ ହେୱ୍‍ତମ୍ । ଆଞ୍ଚିନାକାଙ୍କ୍ ଗାଲ୍ ୱାତ୍‍ତାଙ୍କ୍ ମାମ୍‍ମେ ମେଣ୍ଡେ ମୁନ୍‍ନେ ଆଦାନଙ୍କ୍ ପାର୍‍ୱମ୍, ଆଦିଙ୍କ୍ କ୍ରୀଟ ଗପ୍‍ତେ ତିନ୍ଦେପାକ୍ ହାଞ୍ଚ୍ ହାଞ୍ଚ୍ ଆଞ୍ଜ୍ ସାଲମୋନୀ ଗପିଙ୍କ୍ ଜିଡ଼୍‍ତମ୍ ।
ACT 27:8 ମାମ୍‍ମେ ହାଞ୍ଚ୍‍ ହାଞ୍ଚ୍ ଆଞ୍ଜ୍ ଗାଟି ତିପାଲ୍‍ତେ ଲାସିଆ ଟାଉନ୍‍ ବକେତ୍ ସୁନ୍ଦର୍‍ ଗାଟ୍ ପେଦେର୍‍ତେ ପଡ଼ିୟେତାଗ୍ ହେୱ୍‍ତମ୍ ।
ACT 27:9 ମାମ୍‍ମେ ନାର୍‍ଗେ ଦିନା ଆଗେ ମାତ୍‍ତମ୍ । ଇହୁଦୀଡ଼ାଦ୍ ଉପବାସ୍ ପାଣ୍ଡୁମ୍ ତେରିମାତ୍‍ତାଙ୍କ୍, ଆସୁଟେ ଗଦାଡ଼୍‍ତାଗ୍ ଆଦାନାଦ୍ ବିପଦ୍ ମାତ୍‍ତେ । ଆଦିଙ୍କ୍ ପାଉଲ୍ ଅଡ଼୍‌‍କିଂଙ୍କ୍ ଇଦ୍ ଉପଦେଶ୍‍ ହିତ୍‍ତଣ୍ଡ୍;
ACT 27:10 “ସାଙ୍ଗଡ଼ି, ନାନ୍ ପୁନ୍ଦାନଙ୍କ୍ ପାର୍‍ଦୁତାନ୍ ଯେ, ଯଦି ମାନାଡ଼୍ ଇଗାଙ୍କ୍ ମେଣ୍ଡେ ଏର୍‍ଦାଲା ଆଦ୍‍ତାଡ଼୍, ଆଲେକେ ବିପଦ୍ ଆଦ୍‍ତେ । ଇଦିନ୍ ତଡ଼୍ ମାତର୍‍ ଏର୍‍ଜାହାଜ୍‍ ନୁ ମାଲ୍ ନଷ୍ଟ ଆଦ୍‍ତେ ଆଦ୍ ଆୟ୍‍ୟ, ଇଗେ ମାନ୍ଦାନ୍ ନାରୁଡ଼୍‍ତେ ଜିୱୁଣ୍ଡ୍‍ତିଙ୍କ୍ ମିକା ବିପଦ୍ ମିନ୍ଦେ ।”
ACT 27:11 ଇତ୍‍କେ ସେନାପତି ପାଉଲ୍‍ତେ ଗଟ୍‍ତିଙ୍କ୍ ବିଶ୍ୱାସ୍ ମାଡ଼କଟ୍ ଏର୍‍ଜାହାଜ୍‍ତେ ମୁକ୍ୟାଲ୍ ନୁ ଏର୍‍ଜାହାଜ୍‍ତେ ମାଲିକ୍‍ତେ ଗଟ୍ କେଞ୍ଜ୍‍ତଣ୍ଡ୍ ।
ACT 27:12 ଶାଲ୍‍ଦିନେ ମାନ୍ଦାନ୍ ସେଙ୍ଗେ ଗାଟ୍‍ତାଗ୍ ସୁବିଦା ହିଲ୍‍ୱେ ମାତ୍‍ତେ, ଆଦିଙ୍କ୍ ଜାହାଜ୍‍ତାଗ୍ ମାନ୍ଦାନ୍ ନାରୁଡ଼୍ ଲୋପେଙ୍କ୍ ନାର୍‍ଗେ ଗଦାଡ଼୍‍ତାଗ୍ ଆଞ୍ଜ୍ ଯଦି ପାର୍‍ଦ୍‍ତଡ଼୍, ଫୀନିକ୍‍ସ୍‍ତାଗ୍ ଶାଲ୍ କାଲାମ୍ ମାନ୍ଦାନ୍ ସେଙ୍ଗେ ହାଲ୍‍ସ୍‍ତଡ଼୍ । ଫୀନିକ୍‍ସ୍ ତିନ୍ଦେପାକେତ୍‍ ପେର୍କେତ୍‍ପାକ୍ ନୁ ଡେବେପାକେତ୍‍ ପେର୍କେତ୍‍ପାକ୍‍ ତାକ୍ ମୁନ୍‍ନେ ମାଡ଼ି ମାନ୍ଦାନ୍ କ୍ରୀଟତେ ଅଣ୍ଡୟ୍‌ ଗାଟ୍ ।
ACT 27:13 ବେସୁଟ୍‌ ତିନ୍ଦେପାକ୍ କନ୍‍ସ୍ ସାୟେତ୍‍ ଗାଲ୍ ୱାତ୍‍ତେ, ନାରୁଡ଼୍ ଇଦିଙ୍କ୍ ଅଣ୍ଡୟ୍‌ ସାୟେତ୍ କାବୁର୍ ଇଞ୍ଜ ହାଲ୍‍ସ୍‍ତଡ଼୍ ନୁ ସିଲେତିଙ୍କ୍ ତେଇସ୍ କ୍ରୀଟତେ ହାଞ୍ଚ୍ ହାଞ୍ଚ୍ ଆତ୍‍ତଡ଼୍ ।
ACT 27:14 ଇତ୍‍କେ ସିଟ୍‍ପାଟ୍‍ ଗପ୍‍ତାକାଙ୍କ୍ ଡେବେପାକାଙ୍କ୍‍ ନୁ ମୁନେତ୍‍ ପାକାଙ୍କ୍‍ ଗାଲ୍ ଗାଟି ଉର୍‍ଗିଙ୍କ୍ ୱାତ୍‍ତେ,
ACT 27:15 ଏର୍‍ଜାହାଜ୍‍ତିଙ୍କ୍ ତାଲ୍‍ଗ୍‍ତେ । ଜାହାଜ୍‍ତିଙ୍କ୍ ଗାଲ୍ ୱାଦାନାକ୍ ମୁନ୍‍ନେ ମାଡ଼େ ପାର୍‍ୱାଙ୍କ୍ ମାମ୍‍ମେ ମେଣ୍ଡେ ଚେଷ୍ଟା ମାଡ଼କଟ୍ ଗାଲ୍ ବେକେ ଆଦୁତ୍‍ତେ ଜାହାଜ୍‍ତିଙ୍କ୍ ଆକେନେ ଆଦାନଙ୍କ୍ ୱିଡ଼୍‍ସିତ୍‍ତମ୍ ।
ACT 27:16 ଅଣ୍ଡୟ୍‌ ସୁଦୁରାଦ୍ ଗପ୍ କାଉଦାତେ ତିନ୍ଦେପାକ୍ ଇସ୍‌ ଆଦାନ୍ ୱେଲେ ଗାଲ୍‍ତାଗାଙ୍କ୍ ସୁଦୁର୍ ରକ୍ଷା ପାଏମ୍ ଆତ୍‍ତମ୍ । ଆଗେ ମାମେ ବେଲାଆୟି ଜାହାଜ୍‍ତାଗ୍ ମାନ୍ଦାନ୍ ଓଡେତିଙ୍କ୍ ନିରାପଦ୍ ମାଡ଼ାନାଦ୍‍ ଶକ୍ତି ନେହେତାନଙ୍କ୍ ପାର୍‍ତ୍‍ତମ୍ ।
ACT 27:17 ଓଡେ ଚାଲାମାଡ଼ାନଡ଼୍ ଆଦିଙ୍କ୍ ଜାହାଜ୍‍ତେ ପର୍‍ର ତେଇସ୍ ନଡ଼୍‌ତଡ଼୍ ଜାହାଜ୍‍ତାଗ୍ ଲେକେତ୍‍ ତଃସିତ୍‍ତଡ଼୍ । ଜାହାଜ୍ ଲିବିଆ ଆଞ୍ଚିନାକ୍ ଉସ୍କତ୍‍ ଲୋପେ ଆଦ୍‍ତେ ଇଞ୍ଜ ୱେର୍‍ସ୍‍ମିକା ଓଡେ ଚାଲାମାଡ଼ାନଡ଼୍ ମଙ୍ଗ ଲେଇସିତ୍‌ତଡ଼୍‌ ଜାହାଜ୍‍ତିଙ୍କ୍ ଗାଲ୍ ବେକେ ଆଦୁତ୍‍ତେ ଆକେନ୍ ଆଦାନଙ୍କ୍ ୱିଡ଼୍‍ସିତ୍‍ତଡ଼୍ ।
ACT 27:18 ରହମକଟ ଗାଲ୍ ୱାଦାନ୍ ସେଙ୍ଗେ ମେଣ୍ଡନ୍ ଦିନ୍ ଅଡ଼୍‌ ଜାହାଜ୍‍ତାଗାଙ୍କ୍ ଜିନିଷ୍‍ ଏର୍‍ଦାଗ୍ ଏସ୍‍ତଡ଼୍,
ACT 27:19 ମେଣ୍ଡନ୍ ଦିନ୍ ଜାହାଜ୍‍ତେ ବେସର୍ ସାମାନ୍‍ ଗଦାଡ଼୍‍ତାଗ୍ ଏସିତ୍‍ତଡ଼୍ ।
ACT 27:20 ଗାଟି ଗାଲ୍ ୱାସ୍ ମାନ୍ଦାନ୍ ସେଙ୍ଗେ ନାର୍‍ଗେ ଦିନା ମାମ୍‍ମେ ପଡ଼୍‍ଦ୍ ନୁ ଉକାକିଙ୍କ୍ ଉଡ଼ାନଙ୍କ୍ ପାର୍‍ୱମ୍ । ପେର୍‍କେ ମାମ୍‍ମେ ରକ୍ଷା ପାଏମ୍ ଆଦାନ୍ ସାରେ ଆଶେ ମାପ୍‍ତମ୍ ।
ACT 27:21 ସାରେତଡ଼୍ ନାର୍‍ଗେ ଜେଲ୍ କାର୍‍ୱିନ୍‍ ମାତ୍‍ତେ ପେର୍‍କେ, ପାଉଲ୍ ନାରୁଡ଼୍ ଲୋପେଙ୍କ୍ ନିସ୍ କେତ୍‍ତଣ୍ଡ୍, “ସାଙ୍ଗଡ଼ି, ମିଡ଼୍ ନା ଗଟି ଇସାପ୍‍ତେ କ୍ରୀଟତାଗାଙ୍କ୍ ଜାହାଜ୍‍ ୱିଡ଼୍‍ସ୍‍ୱିଡ଼୍, ମାୟାଦ୍‌ ଇଦ୍ ଅସୁବିଦା ଆୟ ଆୟେଡ଼୍ ।
ACT 27:22 ଇତ୍‍କେ ଇଞ୍ଜେ ନାନ୍ ମିକିଂଙ୍କ୍ ଅନୁରଦ୍‌‍ ମାଡ଼ୁତାନ୍, ମିଡ଼୍ ସାହାସ୍ ପୟ୍‍ମୁଟ୍ । ମିଇ ଲୋପେଙ୍କ୍ ବେନନାଦ୍ ମିକା ଜିୱୁଣ୍ଡ୍‍ ଆନ, ଆସାମ୍ ଏର୍‍ଜାହାଜ୍‍ ନଷ୍ଟ ଆଦ୍‍ତେ ।
ACT 27:23 ନାନ୍ ବେନ୍ ଇଶ୍ୱର୍‌ତିଙ୍କ୍ ଉପାସନା ମାଡ଼ୁତାନ୍, ନିନେ ନାର୍‍କେ ଅନାଦ୍‌ ସ୍ୱର୍ଗ ଦୂତ ନା ବକେତ୍ ୱାସ୍ କେତ୍‍ତଣ୍ଡ୍,
ACT 27:24 ‘ପାଉଲ୍ ନିମ୍‍ ୱେର୍‍ମା । ନିମ୍‍ ନିଜାମ୍ ମହାରାଜାନ୍‍ ବକେତ୍ ଆଦ୍‍ତିନ୍‍ । ନିକିଂଙ୍କ୍ ଇଶ୍ୱର୍ ଦୟା ମାଡ଼ିତନ୍, ନି ତଡ଼୍ ମାନ୍ଦାନ୍ ସାରେତଡ଼୍‌କିଂଙ୍କ୍ ଅଣ୍ଡ୍‌ ରକ୍ଷା ମାଡ଼ିତଣ୍ଡ୍‍ ।’
ACT 27:25 ଆଦିଙ୍କ୍ ଦାଦାଲଡ଼ି, ସାହାସ୍ ପଇମୁଟ୍ ! ବାତେଙ୍କ୍ଇତ୍‍କେ ନାନ୍ ଇଶ୍ୱର୍‌ତାଗ୍ ବିଶ୍ୱାସ୍ ମାଡ଼ୁତାନ୍, ନାକିଂଙ୍କ୍ ବାତ୍ କେତ୍‍ତଣ୍ଡ୍ ଆଦେପୁଟୁଙ୍କ୍ ଗଟେମ୍ ଆଦ୍‍ତେ ।
ACT 27:26 ଇତ୍‍କେ ମାନାଡ଼୍‍ ମୁନ୍‍ନେ ଆଞ୍ଜ୍ ଅଣ୍ଡୟ୍‌ ଗପିନାଗ୍ ନିତିତାଡ଼୍ ।”
ACT 27:27 ଇଗେ ଆଦାନ୍ ଚଉଦ୍ ଦିନ୍ ପେର୍‍କେ, ମାମ୍‍ମେ ବୁମଦ୍ୟ ସାୱ୍‍ଡ଼େତାଗ୍ ଗାଲ୍ ତଡ଼୍ ତୁର୍ସୀ ଆଦାନ୍ ୱେଲେ ନାଡ୍‍ନାର୍କେ ଓଡେ ଚାଲାମାଡ଼ାନଡ଼୍ ହେର୍କା ମାଡ଼୍‍ତଡ଼୍ ଯେ, ମାମ୍‍ମେ ଆଞ୍ଚିନ୍ ବକେତ୍ ହେୱ୍‍ଦୁତମ୍ ।
ACT 27:28 ଅଡ଼୍‌ କଲ୍‍ସି ପୁତ୍‍ତଡ଼୍, ଆଗେ ଏର୍‍ଦେ କୁଇଙ୍ଗ୍ ଚାଳିଶ୍ ମିଟର୍ । ମେଣ୍ଡେ ସୁଦୁର୍ ପେର୍‍କେ ଉଡ଼୍‍ତଡ଼୍, ଏର୍‍ଦେ କୁଇଙ୍ଗ୍ ତିରିଶ୍ ମିଟର୍ କମ୍‍ ଆତ୍‍ତେ ।
ACT 27:29 ଜାହାଜ୍ ବେନ୍ ଆୟି ମେଟେତାଗ୍ ତାଲ୍‍ଗିତ୍ ଇଞ୍ଜ ୱେର୍‍ସ୍‍ ଅଡ଼୍‌ ପେର୍କେତ୍ ପାକେଙ୍କ୍ ନାଲୁ ସିଲେ ଲଙ୍ଗର୍ ୱାଟ୍‍ତଡ଼୍ ନୁ ୱେଇସ୍ ଆଦାନ୍ ଯାକ ପ୍ରାର୍ତନା ମାଡ଼ି କେପିମାତ୍‍ତଡ଼୍ ।
ACT 27:30 ତାନ୍‍ପେର୍କେ ଅଡ଼୍‌ ଚାଲାମାଡ଼ାନଡ଼୍‍ ଜାହାଜ୍‍ତାଗାଙ୍କ୍ ଡିଗି ଆଦାନଙ୍କ୍ ଚେଷ୍ଟା ମାଡ଼୍‍ତଡ଼୍ । ଜାହାଜ୍‍ତେ ମୁନ୍‍ନେ ପାକ୍ ମେଣ୍ଡେ ବେସ୍‌କ୍ ଲଙ୍ଗର୍ ୱାଟାନଙ୍କ୍ ହାଲ୍‍ସି ଅଡ଼୍‌ ଜାହାଜ୍‍ତେ ପର୍‍ର ମାନ୍ଦାନ୍ ଓଡାକିଙ୍କ୍ ମଦଲ୍ ରାପ୍‍ତଡ଼୍ ।
ACT 27:31 ଇତ୍‍କେ ପାଉଲ୍, ସେନାପତି ନୁ ସୈନ୍ୟଡ଼୍ କେତ୍‍ତଡ଼୍, “ଓଡେ ଚାଲାମାଡ଼ାନଡ଼୍ ଜାହାଜ୍‍ତାଗ୍ ମାନକଟ୍ ମାତ୍‍କେ, ମିଡ଼୍ ରକ୍ଷା ପାଏମ୍ ଆଦାନାଦ୍ ଆଶେ ହିଲ୍‍ଲେ ।”
ACT 27:32 ଆଦିଙ୍କ୍ ସୈନ୍ୟଡ଼୍ ଅଡ଼୍‌କିଂଙ୍କ୍‌ ନଡ଼େ ଦେହେସ୍ ଏର୍‍ଦାଗ୍ ୱିଡ଼୍‍ସିତ୍‍ତଡ଼୍ ।
ACT 27:33 ୱିଇଦାନ୍ ମୁନେଙ୍କ୍ ପାଉଲ୍ ସାରେତଡ଼୍‌କିଂଙ୍କ୍ ତିନ୍ଦାନ୍ ସେଙ୍ଗେ କେତ୍‍ତଣ୍ଡ୍ । ଅଣ୍ଡ୍‌ ଅନୁରଦ୍‌‍ତଡ଼୍, “ଇ ଚଉଦ ଦିନ୍ ଆଦୁତ୍‍ତେ, ମିଡ଼୍ ବାଆତେ ତିନ୍‍ୱିଡ଼୍ ।
ACT 27:34 ଅନୁରଦ୍‌‍ ମାଡ଼ୁତାନ୍, ଇଞ୍ଜେ ବାତ୍ ସୁଦୁର୍ ତିନୁଟ୍; ଜିୱୁନ୍ ମାନ୍ଦାନ୍ ସେଙ୍ଗେ ଇଦ୍ ନିହାତି ଦର୍‍କାର୍ । ୱେର୍‍ମାଟ୍ । ମିୟାଦ୍ ପରିତ୍ରାଣ୍ ତାଲ୍‍ତାଗାଙ୍କ୍ ଅଣ୍ଡୟ୍‌ କେଲ୍ ଗାଲା ନଷ୍ଟ ଆୟ୍‍ୟ ।”
ACT 27:35 ଇଦ୍ କେସ୍ ପାଉଲ୍ ଇଶ୍ୱର୍‌ତିଙ୍କ୍‍ ଦନ୍ୟବାଦ୍ ଇସ୍‌ ରୂଟି ଉହୁସ୍ ତିତ୍‍ତଣ୍ଡ୍ ।
ACT 27:36 ଆଗାଙ୍କ୍ ସାରେତଡ଼୍ ସାର୍‍ଦେ ହାସ୍ ରୂଟି ତିତ୍‍ତଡ଼୍ ।
ACT 27:37 ଆସୁଟେ ଜାହାଜ୍‍ତାଗ୍ ୨୭୬ ଜାନ୍‍ ନାରୁଡ଼୍ ମାତ୍‍ତଡ଼୍ ।
ACT 27:38 ସାରେତଡ଼୍ ତିତ୍‍ତେ ପେର୍‍କେ ଜାହାଜ୍‍ତିଙ୍କ୍ ହାଲ୍‍କା ମାଡ଼ାନ୍ ସେଙ୍ଗେ ଆଗେ ମାନ୍ଦାନ୍ ସାରେ ଗହମ୍‍ତିଙ୍କ୍ ଗଦାଡ଼୍‍ତାଗ୍ ହେସିତ୍‍ତଡ଼୍ ।
ACT 27:39 ମେଣ୍ଡନ୍ ଦିନ୍ ନାର୍‍କା ଅଡ଼୍‌ ବେନ୍ ଦେଶ୍‍ତେ ଆଞ୍ଚିନାଗ୍ ୱାସ୍ ହେୱ୍‍ତଡ଼୍, ଆଦ୍ ଅଣ୍ଡୟ୍‌ ସୁଦୁର୍ ସାୱ୍‍ଡ଼େତେ ଉସ୍କ ନେଲ୍ । ଆଗେ ଜାହାଜ୍‍ତିଙ୍କ୍ ନିଲ୍‍ସ୍ପାନଙ୍କ୍ ଚେଷ୍ଟା ମାଡ଼୍‍ତଡ଼୍ ।
ACT 27:40 ଆଦିଙ୍କ୍ ଲଙ୍ଗର୍‍ତେ ସାରେ ନଡ଼େ କୟସ୍ ଗଦାଡ଼୍‍ ଏର୍‍ଦାଗ୍ ୱିଡ଼୍‍ସିତ୍‍ତଡ଼୍ । ମେଣ୍ଡେ ପର୍ଦାତେ ନଡ଼େକିଙ୍କ୍ ଲେଇସ୍ ମୁନ୍‍ନେ ତଅସ୍ ମାନ୍ଦାନ୍ ମଙ୍ଗତିଙ୍କ୍ ତେହେତଡ଼୍ । ଆଦିଙ୍କ୍ ଜାହାଜ୍ ଗାଲ୍‍ଦେ ତୁର୍ସୀ ଆଞ୍ଚିନାକ୍ ଆତ୍‍ତେ ।
ACT 27:41 ଇତ୍‍କେ ଉସ୍କତାଗ୍ ତାଲ୍‍ଗି ଜାହାଜ୍‍ତେ ମୁନେତ୍ ପାକ୍ ମଦଲ୍ ମୁଡ଼ୁନ୍ଦ୍‍ତେ ନୁ ଏର୍‍ ୱାସ୍ ଗାଟି ଜର୍‍ତେ ତାଲ୍‍ଗି ଜାହାଜ୍‍ତେ ପେର୍କେତ୍‍ ପାକ୍ ଲଙ୍ଗର୍ ଦୁଡ଼ା ଦୁଡ଼ା ଆତ୍‍ତେ ।
ACT 27:42 ବନ୍ଦିଡ଼୍ ଆଞ୍ଚିନାକ୍ ଇନ୍ତେ ଆଞ୍ଜ୍ ମିରିତଡ଼୍ ଇଞ୍ଜ ହାଲ୍‍ସି ଅଡ଼୍‌‍କିଂଙ୍କ୍ ଆୱୁକାନ୍‍ ସେଙ୍ଗେ ସୈନିକିଡ଼୍ ବିଚାର୍ ମାଡ଼୍‍ତଡ଼୍ ।
ACT 27:43 ଇତ୍‍କେ ସେନାପତି ପାଉଲ୍‍ତେ ଜିୱୁଣ୍ଡ୍ ଗେଲ୍ପାନଙ୍କ୍ ହାଲ୍‍ସ ମାତ୍‍ତଣ୍ଡ୍; ଆଦିଙ୍କ୍ ଅଣ୍ଡ୍‌ ସୈନିକିଡ଼୍‍କ୍ ଆଗାଙ୍କ୍ ମନା ମାଡ଼୍‍ତଣ୍ଡ୍ । ଇନ୍ତେ ଆଦ୍ ପାର୍‍ତେନଡ଼୍ ସାରେତଡ଼୍‍କ୍ ଇନ୍ତେ ଆଞ୍ଜ୍ ବୂମ୍‌ ଆଞ୍ଚିନାକ୍ ଆଦାନଙ୍କ୍ କେତ୍‍ତଣ୍ଡ୍,
ACT 27:44 ମେଣ୍ଡେ ମାଡ଼େତ୍‍ ପାଟା ବା ଜାହାଜ୍‍ତାଗ୍‍ ଉରୁଙ୍ଗ୍‍ତେ ଦୁଡ଼ାଙ୍କ୍ ପଇସ୍ ବୂମ୍‌ ଆଞ୍ଚିନାକ୍ ଆଦାନଙ୍କ୍ ମେଣ୍ଡେ ବାଗାତଡ଼୍‍କିଙ୍କ୍ କେତ୍‍ତଣ୍ଡ୍ । ଇଦ୍ ରକମ୍ ମାମ୍‍ମେ ସାରେତମ୍ ଗେଲ୍ପାନଙ୍କ୍ ଗପିନାଗ୍ ଆଞ୍ଜ୍ ଏୱୁତମ୍ ।
ACT 28:1 ବାତ୍ ଅସୁବିଦା ଆୟ୍‍ୟକଟ ଗେଲ୍ପାନଙ୍କ୍ ଆଞ୍ଚିନାଗ୍ ଏୱୁସ୍ ଉଡ଼୍‍ତମ୍ ଯେ, ମାମ୍‍ମେ ମାଲ୍‍ଟା ଗପ୍‍ତାଗ୍ ଏୱୁତମ୍ ।
ACT 28:2 ଆଗେତ୍ ଗ୍ରୀକ୍‍ ଗଟ୍‍ ପୁନ୍‍ୱେ ମୁନେତ୍‍ ନାରୁଡ଼୍ ମାକିଂଙ୍କ୍ ଲେକେତ୍ ଉଡ଼୍‍ତଡ଼୍ । ଆସୁଟେ ୱାର୍‍ସାମ୍ ୱାସ୍ ଶାଲ୍ କାଲାମ୍ ଆସ୍‍ସ ମାତ୍‍ତେ । ଆଦିଙ୍କ୍ ଅଡ଼୍‌ କିସ୍ ନିଡ଼୍‍ସ୍‍ପି ମାକିଂଙ୍କ୍ କାର୍‍ଙ୍ଗୁତଡ଼୍ ।
ACT 28:3 ପାଉଲ୍ ମପେନ୍ ୱେର୍‍କି ତେଇସ୍ କିସ୍‍ତାଗ୍ ୱାଟାନଙ୍କ୍ ଆଦାନ୍ ୱେଲେ ଆଗାକନ୍‍ସ୍ ଅଣ୍ଡୟ୍‌ ତାଡ଼ାମ୍ ପେୟ୍‍ତେ ନୁ କାମ୍‍କ୍‍ତାଗାଙ୍କ୍ ରକ୍ଷା ପାଏମ୍ ଆଦାନ୍ ସେଙ୍ଗେ ଅନ୍‌ କାୟ୍‍ଦେ ପର୍‍ର ତାର୍‍ରି ଆଗେ କାସି ଉତ୍‍ତି ମାତ୍‍ତେ ।
ACT 28:4 ଆଗେତ୍ ମୁନେତ୍‍ ନାରୁଡ଼୍ ପାଉଲ୍‍ତେ କାୟ୍‍ଦାଗ୍ ଉଙ୍ଗମାନ୍ଦାନ୍ ତାଡ଼ାତିଙ୍କ୍ ଉଡ଼ି ତାମ୍‍ତାମ୍ କେତ୍‍ତଡ଼୍, “ଇଣ୍ଡ୍ ନିଜାମ୍ ୱେରଣ୍ଡ୍ ମାନେୟ୍‍କ୍ ହାୱ୍‍କାନଣ୍ଡ୍, ବେଲାଆୟି ଅଣ୍ଡ୍‌ ଗଦାଡ଼୍‍ତାଗ୍ ସିନା ଗେଲ୍ପାନଙ୍କ୍ ପାଏମ୍ ଆତ୍‍ତଣ୍ଡ୍ ଇତ୍‍କେ ବାଗ୍‍ୱାନ୍‍ତାଗାଙ୍କ୍ ଅଣ୍ଡ୍‌ ଜିୱେ ବାଦ୍‍କାନଙ୍କ୍ ପାର୍‍ୱଣ୍ଡ୍ ।”
ACT 28:5 ଇତ୍‍କେ ପାଉଲ୍ ନିଜେ ପୁଣ୍ଡ୍ ଆୟ୍‍ୟକଟ, ତାଡ଼ାମ୍‌ ତିଙ୍କ୍‌ କିସ୍‍ତାଗ୍ କାୟ୍‍ସିତ୍‍ତଣ୍ଡ୍ ।
ACT 28:6 ପାଉଲ୍‍ତେ ମେନ୍ଦୁଲ୍ ତୟିତ୍ କି ଅଣ୍ଡ୍‌ ଡଲି ନେଲ୍ ରାୟିତଣ୍ଡ୍ ଇଞ୍ଜ ଆଲ୍‍ସି, ଅଡ଼୍‌ ସୁଦୁର୍ ସମୟ୍‍ କେପ୍‍ତଡ଼୍ । ଇତ୍‍କେ ନାର୍‍ଗେ ସମୟ୍‍ କେପି ଉଡ଼୍‍ତଡ଼୍ ଯେ, ପାଉଲ୍‍ତିଙ୍କ୍ ବାତ୍‍ମିକା ଆୟ୍‍ୟ, ଅଡ଼୍‌ ଗଟ୍‍ତିଙ୍କ୍ ବାଦ୍‍ଲା ମାଡ଼ି କେତ୍‍ତଡ଼୍, “ଇଣ୍ଡ୍ ୱେରଣ୍ଡ୍ ବାଗ୍‍ୱାନ୍ ଲେକେତ୍‍ ନାରୁଣ୍ଡ୍‍ !”
ACT 28:7 ଆଗାଙ୍କ୍ ସୁଦୁର୍ ଜେକେ ଆଦ୍ ଗପ୍‍ତେ ପେଦେର୍‍ ବେଡ଼ିୟି ରାଜ୍‍କର୍ମଚାରୀ ପବ୍ଲିୟସ୍‍ତେ ୱାୟେ ମାତ୍‍ତେ । ଅଣ୍ଡ୍‌ ମାକିଂଙ୍କ୍ ସ୍ୱାଗତ୍ ମାଡ଼୍‍ତଣ୍ଡ୍ ନୁ ମାମ୍‍ମେ ମୁଣ୍ଡ୍ ଦିନା ଯାକ କୁଟ୍‍ମାମ୍ ଲେକାମ୍ ତାମ୍ ଲୋନ୍‌ ମାତ୍‍ତମ୍ ।
ACT 28:8 ପବ୍ଲିୟସ୍‍ତେ ବାବାଙ୍କ୍ ହେଡ଼୍‍କ୍ ନୁ ଡଙ୍କେନପ୍‍ ଆସ୍ ମାତ୍‍ତାଙ୍କ୍ ଅଣ୍ଡ୍‌ କାଟୁଲ୍‍ତାଗ୍ ପାଟି ମାତ୍‍ତଣ୍ଡ୍ । ପାଉଲ୍ ଅନ୍‌ ରୁମ୍‍ତାଗ୍ ଆତ୍‍ତଣ୍ଡ୍, ଅନ୍‌ ସେଙ୍ଗେ ପ୍ରାର୍ତନା ମାଡ଼ି ଅନ୍‌ ପର୍‍ର କାୟ୍ ୱାଟି ଅଂକିଙ୍କ୍‌ ସାୟେ ମାଡ଼୍‍ତଣ୍ଡ୍ ।
ACT 28:9 ଇଦିନ୍ ପେର୍‍କେ ଆଦ୍ ଗପ୍‍ତେ ରୋଗୀଡ଼୍ ସାରେତଡ଼୍ ପାଉଲ୍‍ତେ ବକେତ୍ ୱାସ୍ ସୁସ୍ଥ ଆତ୍‍ତଡ଼୍ ।
ACT 28:10 ଅଡ଼୍‌ ମାକିଂଙ୍କ୍ ନାର୍‍ଗେ ଉପହାର୍ ହିତ୍‍ତଡ଼୍ ନୁ ମାମ୍‍ମେ ଆଗାଙ୍କ୍ ଜାହାଜ୍‍ତାଗ୍ କୁଦି ଆଦାନ୍ ୱେଲେ ମାକିଂଙ୍କ୍ ଦର୍‍କାର୍ ଜିନିଷ୍ ସାରେ ଅଡ଼୍‌ ତାସ୍ ଜାହାଜ୍‍ତାଗ୍ ୱାଟିତ୍‍ତଡ଼୍ ।
ACT 28:11 ଆଲେକ୍‍ଜାଣ୍ଡ୍ରିଆ ତାଗାଙ୍କ୍ ୱାସ୍‍ମାନ୍ଦାନ୍ “କାୱୁଲେ ଦେୟାକ୍,” ପେଦେର୍‍ତେ ଅଣ୍ଡୟ୍‌ ଜାହାଜ୍ ମାଲ୍‍ଟା ଗପ୍‍ତାଗ୍ ଶାଲ୍‍ କାଲାମ୍ ଜିଡ଼୍‍ନା ମାତ୍‍ତେ । ଗପ୍‍ତାଗ୍ ମୁଣ୍ଡ୍ ନେଲ୍‍ଞ୍ଜ୍ ମାତ୍‍ତେ ପେର୍‍କେ ମାମ୍‍ମେ ଆଦ୍ ଜାହାଜ୍‍ତାଗ୍ କୁଦି ଆତ୍‍ତମ୍ ।
ACT 28:12 ମୁନେନ୍ ସିରାକ୍ୟୁସ୍ ଟାୱୁନ୍‍ତାଗ୍ ଏୱୁସ୍ ଆଗେ ମୁଣ୍ଡ୍ ଦିନା ମାତ୍‍ତମ୍ ।
ACT 28:13 ଆଗାଙ୍କ୍ ମେଣ୍ଡେ ଆଞ୍ଜ୍ ମାମ୍‍ମେ ରିଜିୟମ୍ ଟାୱୁନ୍‍ତାଗ୍ ଏୱୁତମ୍ । ମେଣ୍ଡନ୍ ଦିନ୍ ତିନ୍ଦେପାକ୍ କନ୍‍ସ୍ ଗାଲ୍ ୱାତ୍‍ତେ ନୁ ମେଣ୍ଡେ ରେଣ୍ଡ୍ ଦିନା ପେର୍‍କେ ପୁତିଓଲି ଟାୱୁନ୍‍ତାଗ୍ ଏୱୁତମ୍ ।
ACT 28:14 ଆଗେ ବେସ୍‍କ୍‍ତୁଡ଼୍‍ କ୍ରିଷ୍ଟ ବିଶ୍ୱାସୀଡ଼୍ ତଡ଼୍ କାଇଲ୍‍ତମ୍ । ତାମ୍ ତଡ଼୍ ଅଣ୍ଡୟ୍‌ ଆଟ୍ ମାନ୍ଦାନ୍ ସେଙ୍ଗେ ଅଡ଼୍‌ ମାକିଂଙ୍କ୍ ଅନୁରଦ୍‌‍ ମାଡ଼୍‍ତଡ଼୍ । ପେର୍‍କେ ରୋମ୍‍ ଟାୱୁନ୍‍ତାଗ୍ ଆଞ୍ଜ୍ ଏୱୁତମ୍ ।
ACT 28:15 ମାୱାଦ୍ କବର୍ ପାଏମ୍ ଆସ୍ ରୋମ୍‍ତେ ବିଶ୍ୱାସୀ ଦାଦାଲଡ଼୍‍ ନୁ ଏଲାସ୍କି ମାକିଂଙ୍କ୍ କାଇଲାନ୍ ସେଙ୍ଗେ “ଆପୀୟ ହାଟ୍ ନୁ ମୁଣ୍ଡ୍ ଦୁକାନ୍,” ପେଦେର୍‍ତେ ଟାୱୁନ୍‍ତାଗ୍ ୱାତ୍‍ତଡ଼୍ । ଅଡ଼୍‌‍କିଂଙ୍କ୍ ଉଡ଼ି ପାଉଲ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତଣ୍ଡ୍ ନୁ ଗାଟି ୱେଡ଼୍‍କ୍‍ତଣ୍ଡ୍ ।
ACT 28:16 ମାମ୍‍ମେ ରୋମ୍‍ତାଗ୍ ଏୱୁତେ ପେର୍‍କେ, ପାଉଲ୍‍ତିଙ୍କ୍ ଆନୁମତି ଦର୍‍କ୍‍ତେ ଯେ, ଅଂକିଙ୍କ୍‌ କେପାନ୍ ସେଙ୍ଗେ ମାନ୍ଦାନ୍ ସୈନିକ୍ ତଡ଼୍ ଅଣ୍ଡ୍‌ ନିଜେତ୍ ଇଚ୍ଛାତେ ବେଗେଆୟି ମାନ୍ଦାନଙ୍କ୍ ପାର୍‍ଦ୍‍ତଣ୍ଡ୍ ।
ACT 28:17 ମୁଣ୍ଡ୍ ଦିନା ପେର୍‍କେ ପାଉଲ୍ ଆଗେତ୍ ଇହୁଦୀ ନେତାଲଡ଼୍‍କ୍ ଅଣ୍ଡୟ୍‌ ସବାତାଗ୍ କାର୍‍ଙ୍ଗ୍‍ତଣ୍ଡ୍ । ଅଡ଼୍‌ ଅଣ୍ଡୟାଗେ ଗୁଡ଼୍‍ତାଙ୍କ୍ ପାଉଲ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍; “ଇଶ୍ରାଏଲ୍‍ତେ ଦାଦାଲଡ଼୍‍, ମାନ୍‍ ନାରୁଡ଼୍ ବିରୁଦ୍ଦ୍‍ତେ କି ମାନ୍‍ ଆନିଦାଦିଡ଼୍ ନିୟମ୍‍ ବିରୁଦ୍ଦ୍‍ତେ ନାନ୍ ବାତ୍ ମାଡ଼କଟ୍ ମାତ୍‍କେ ମିକା, ଯିରୁଶାଲେମ୍‍ତାଗ୍ ବନ୍ଦି ଆସ୍ ରୋମୀୟ ନାରୁଡ଼୍ କାୟ୍‍ଦାଗ୍ ସର୍ପା ଆତ୍‍ତାନ୍ ।
ACT 28:18 ନାକିଂଙ୍କ୍ ପାଚ୍ରାମାଡ଼ି ଡଲାନ୍‍ଦଣ୍ଡ୍ ପାଏମ୍ ଆଦାନ୍ ଲେକାମ୍ ନାନ୍ ବାତ୍ ଅପରାଦି ମାଡ଼ନ୍ ଇଞ୍ଜ ପୁଞ୍ଜ୍ ରୋମୀୟ ନାରୁଡ଼୍ ନାକିଂଙ୍କ୍ ମୁକ୍ତି ହିଦାଙ୍କ୍ ହାଲ୍‍ସି ମାତ୍‍ତଡ଼୍ ।
ACT 28:19 ଇତ୍‍କେ ଇହୁଦୀଡ଼ ଉପବାସ୍ ଇଦିନ୍ ବିରୁଦ୍ ମାଡ଼୍‍ତାଙ୍କ୍, ନା ନିଜେତ୍ ଦେଶ୍‍ତେ ବିରୁଦ୍ଦ୍‍ତେ ନାୟାଦ୍ ବାତ୍‍ମିକା ଅବିଯୋଗ୍ ଇଲ୍‍ୱାଙ୍କ୍, ନାନ୍ ମହାରାଜାଙ୍କ୍ ଆବେଦନ୍‍ ମାଡ଼୍‌ନଙ୍କ୍‌ କେତ୍‍ତାନ୍ ।
ACT 28:20 ଆଦିନ୍ ସେଙ୍ଗେ ନାନ୍ ଇଦ୍ ବିଷୟ୍‍ତିଙ୍କ୍ ତିର୍‍ୟାନଙ୍କ୍ ମିକିଂଙ୍କ୍ କାର୍‍ଙ୍ଗି ଅନୁରଦ୍‌‍ ମାଡ଼୍‍ତନ୍‍ । ବେନନ୍ ପର‍ ଇସ୍ରାଏଲ୍‍ ନାରୁଡ଼୍ ଆଶେ ମାଡ଼ିମିନ୍ଦେଡ଼୍, ଅନ୍‌ ସେଙ୍ଗେ ନେଣ୍ଡ୍ ନାନ୍ ଇକ୍‍ଲେମ୍ ତଃହସ୍ ମିନ୍ଦେନ୍ ।”
ACT 28:21 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, “ମାମ୍‍ମେ ଯିହୁଦା ଦେଶ୍ କନ୍‍ସ୍ ନି ବିଷୟ୍‍ତେ ବାତ୍ ଚିଟି ଦର୍କ, କି ନିୟାଦ୍ କାବୁର୍ ଅସ୍ ନି ବିଷୟ୍‍ତେ ବାତ୍ ଅବିଯୋଗ୍ ମାଡ଼ି କେତ୍‍ତାନ୍ ସେଙ୍ଗେ ମା ଦାଦାଲଡ଼୍‍ ତାମୁଣ୍ଡ୍‍ ଲୋପେ ବେନ ଇଗେ ୱାଡ଼ଣ୍ଡ୍ ।
ACT 28:22 ଆଦ୍ ବାତ୍ଆୟି ମାମ୍‍ମେ ନିୟାଦ୍ ଗଟ୍ କେଞ୍ଜିତମ୍, ବାତେଙ୍କ୍ଇତ୍‍କେ ସାରେତାଗ୍ ନାରୁଡ଼୍ ନି ମାନ୍ଦେ ବିରୁଦ୍ଦ୍‍ତେ ଗଟ୍ କେତୁତଡ଼୍ ।”
ACT 28:23 ଅଡ଼୍‌ ଅଣ୍ଡୟ୍‌ ଦିନ୍‍ ଟିକ୍ ମାଡ଼୍‍ତଡ଼୍ ନୁ ଅଡ଼୍‌ଆଗାଙ୍କ୍‌ ନାର୍‍ଗେ ଆଦ୍ ନାଣ୍ଡ୍ ପାଉଲ୍ ମାନ୍ଦାନ୍ ପଡ଼୍‍ୟେତାଗ୍ ୱାତ୍‍ତଡ଼୍ । ନାର୍କ କନ୍‍ସ୍ ନାର୍‍କେତ୍ ଯାକ ପାଉଲ୍ ଅଡ଼୍‌‍କିଂଙ୍କ୍ ଇଶ୍ୱର୍‌ତେ ରାଜ୍ୟ ବିଷୟ୍ କେତ୍‍ତାନ୍ ନୁ ମୋଶାନ୍‌‌ ନିୟମ୍‍ ନୁ ବାବବାଦୀଡ଼୍ ଲେକାତାଗାଙ୍କ୍ ବାକ୍ୟ କେସ୍ ଜିସୁନାଗ୍ ଅଡ଼୍‌‍କିଂଙ୍କ୍‍ ବିଶ୍ୱାସ୍ ମାଡ଼ାନଙ୍କ୍‍ ଚେଷ୍ଟା ମାଡ଼୍‍ତଣ୍ଡ୍ ।
ACT 28:24 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ବିଶ୍ୱାସ୍ ମାଡ଼୍‍ତଡ଼୍, ଇତ୍‍କେ ମେଣ୍ଡେ ବାଗାତଡ଼୍ ବିଶ୍ୱାସ୍ ମାଡ଼ଡ଼୍‍ ।
ACT 28:25 ଇଦ୍ ବିଷୟ୍‍ତେ ଅଡ଼୍‌ ଗାଟି ରାମ୍‍କ୍ ଆଦ୍‍ତଡ଼୍ । ଅଡ଼୍‌ ଆଦାନ୍ ମୁନେନ୍ ପାଉଲ୍ ଅଣ୍ଡୟ୍‌ ଗଟ୍‍ କେତ୍‍ତଣ୍ଡ୍, “ପବିତ୍ର ଆତ୍ମା ମିୱଡ଼୍ ଆନିଦାଦୀଡ଼୍‍କ୍ ବାବବାଦୀ ଯିଶାଇୟନ୍ ପାୟୁର୍‍ତାଲା ନିଜାତେ ଗଟ୍ କେସ୍‍ମାତ୍‍ତଣ୍ଡ୍ !
ACT 28:26 ଅଣ୍ଡ୍‌ କେସ୍‍ମାତ୍‍ତଣ୍ଡ୍, ‘ଇଡ଼୍ ନାରୁଡ଼୍‍କିଂଙ୍କ୍ ଆଞ୍ଜ୍ କେଲ୍‍ମ୍, ମିଡ଼୍ କେଞ୍ଜିତିଡ଼୍, ଗାଟି କେଞ୍ଜିତିଡ଼୍ ଇତ୍‍କେ ବୁଜେମ୍ ଆୟ୍‍ୱିଡ଼୍ । ମିଡ଼୍ କଣ୍ଡା ନାଆକି ମାନ୍‍ତିଡ଼୍‍, ଇତ୍‍କେ ଉଡ଼ାନଙ୍କ୍ ପାର୍‍ୱିଡ଼୍ ।
ACT 28:27 ବାତେଙ୍କ୍ଇତ୍‍କେ ଇ ନାରୁଡ଼୍‍ତେ ହୃଦୟ୍ ଜାମ୍‍ ବୁଜେମ୍‍ ଆଦ୍‍ତଡ଼୍‍ ମେଣ୍ଡେ ଅଡ଼୍‌ ତାମ୍‍ୱା କଣ୍ଡା ନୁ କେୱ୍‍କ୍ ବନ୍ଦ୍ ମାଡ଼୍‍ତଡ଼୍, ଆଦ୍ ଆୟ୍‍ୟକଟ ମାତ୍‍କେ, ଅଡ଼୍‌ କଣ୍ଡା ତେର୍‍ସ୍ ଉଡ଼ାନଙ୍କ୍ ପାର୍‍ୱେଡ଼୍ । ଅଡ଼ାଦ୍‌ ତାଲ୍‍ତାଗ୍ ବୁଜେମ୍ ଆଦ୍‍ଦାନ୍ ଶକ୍ତି ମାନ୍‍ନେଡ଼୍; ଅଡ଼୍‌ ଇଶ୍ୱର୍‌ତେ ପାକେ ମାଲ୍‍ସ୍ ଆନେଡ଼୍ ନୁ ନାନ୍ ଅଡ଼୍‌‍କିଂଙ୍କ୍ ସାୟେ ମାଡ଼େନ୍ ।’”
ACT 28:28 ମାଡ଼େଙ୍ଗ୍‍ ପାଉଲ୍ କେତ୍‍ତଣ୍ଡ୍, “ମିଡ଼୍ ପୁଞ୍ଜ୍‍ମାନୁଟ୍, ମୁକ୍ତି ସେଙ୍ଗେ ଇଶ୍ୱର୍‌ତେ ସାୟେତ୍ କାବୁର୍ ଅଣଇହୁଦୀଡ଼୍‍ ବକେତ୍ ରଅତଡ଼୍ । ଅଡ଼୍‌ ଆଦ୍ କେଞ୍ଜିତଡ଼୍ ।”
ACT 28:29 ପାଉଲ୍‍ ଇୱୁସାରେ ଗଟି କେତ୍‍ତେ ପେର୍‍କେ, ଇହୁଦୀଡ଼୍ ତାମ୍‍ତାମ୍ ରାମ୍‍କ୍ ଆସ୍ ବେନନଣ୍ଡ୍ ଲୋନ୍‌ ମାଲ୍‍ସ୍ ଆତ୍‍ତଡ଼୍ ।
ACT 28:30 ପାଉଲ୍ ଅଣ୍ଡୟ୍‌ ଲୋନ୍‌ ବାଡ଼ା ଅସ୍ ରେଣ୍ଡ୍ ହେଣ୍ଡ୍‍କ୍ ଯାକ ମାତ୍‍ତଣ୍ଡ୍ ନୁ ଅଂକିଙ୍କ୍‌ ଉଡ଼ାନଙ୍କ୍ ୱାଦାନଡ଼୍ ସାରେତଡ଼୍‌କିଂଙ୍କ୍ ଅଣ୍ଡ୍‌ ସ୍ୱାଗତ୍ ମାଡ଼ମାତ୍‍ତଣ୍ଡ୍ ।
ACT 28:31 ଆରାମ୍‍ତେ ନୁ ସାହାସ୍ ତଡ଼୍ ଅଣ୍ଡ୍‌ ଇଶ୍ୱର୍‌ତେ ରାଜ୍ୟ ବିଷୟ୍ ପ୍ରଚାର୍ ମାଡ଼ି ପ୍ରବୁ ଜିସୁ କ୍ରିଷ୍ଟନ୍ ବିଷୟ୍ ଶିକ୍ଷା ହିସମାତ୍‍ତଣ୍ଡ୍ ।
ROM 1:1 ପାଉଲ୍, କ୍ରିଷ୍ଟ ଜିସୁନ୍ ଦାସ ନୁ କାର୍‍ଙ୍ଗି ୱାତ୍‍ତେନଣ୍ଡ୍ ୱେରଣ୍ଡ୍ ପ୍ରେରିତ୍, ମେଣ୍ଡେ ଇଶ୍ୱର୍ ତାନ୍ ମାର୍‌ ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ବିଷୟ୍‍ତେ ନିଜେତାଦ୍ ଆଦ୍ ସୁସମାଚାର୍ ମାୟ୍‍ଦିଙ୍କ୍ ଲେକ୍‍ତାଦ୍ ପାଉଲ୍‍ତେ ଚିଟି,
ROM 1:2 ପବିତ୍ର ଦର୍ମଶାସ୍ତ୍ରତାଗ୍ ଲେକ୍‍ତାଦ୍‍ ଲେକାମ୍‌ ଇଦ୍‍ ସୁସମାଚାର୍‍ ନାର୍ଗେ ଦିନାମ୍‍ ମୁନେତ୍‍କେ ତାନ୍ ବାବବାଦିଡ଼୍ ତଡ଼୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍ ।
ROM 1:3 ଇଦିନ୍‍ ନାଡ଼୍‍ମ୍‍ ଜାଗେ ଆଦୁତଣ୍ଡ୍‍, ଇଶ୍ୱର୍‌ତେ ମାର୍‍, ମାନ୍‍ ପ୍ରବୁ ଜିସୁ କ୍ରିଷ୍ଟ । ମାନେୟ୍‍ ରକମ୍‍ ଅଣ୍ଡ୍‌‍ ଦାଉଦ୍‍ନ୍ ବଂଶତଣ୍ଡ୍,
ROM 1:4 ଇତ୍‍କେ ଦର୍ମତାଦ୍ ଆତ୍ମା ବିଷୟ୍‍ତେ ଡଲ୍‍ତଡ଼୍ ଲୋପେଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ଆସ୍ ଇଶ୍ୱର୍‌ତେ ମାର୍‌ ଇଞ୍ଜ ଶକ୍ତିତଡ଼୍ ପେଦେର୍‍ ଆତ୍‍ତଣ୍ଡ୍;
ROM 1:5 କ୍ରିଷ୍ଟନ୍‍ ସେଙ୍ଗେ ଇଶ୍ୱର୍ ନାକିଙ୍କ୍‍ ପ୍ରେରିତ୍‍ ଶିଷ୍‍ ଲେକାମ୍‍ ଏଞ୍ଚି ସାର୍ରେ ଅଣଯିହୁଦୀଡ଼୍‍ ନାରୁଡ଼୍‍ ଲୋପେ ପ୍ରଚାର୍‍ ମାଡ଼ାନଷଙ୍କ୍‍ ସୁଯୋଗ୍‍ ଇତ୍‌ତଣ୍ଡ୍‌‍; ବେଲାକି ଅଡ଼୍‌‍ କ୍ରିଷ୍ଟ ଜିସୁନାଗ୍‍ ବିଶ୍ୱାସ୍‍ ମାଡ଼ି ଅନ୍‌‍ ଗଟି ମାନେମ୍‍ ଆଦ୍‍ତଡ଼୍‍ ।
ROM 1:6 ରୋମ୍‍ତେ ଆଦିବାସିଡ଼୍‍ ! ମିଡ଼୍‍ ଗାଲା ଜିସୁ କ୍ରିଷ୍ଟନାଗ୍‍ ୱାଦାନ୍‍ ମାୟ୍‍ଦିଙ୍କ୍‍ କାର୍ଙ୍ଗିଅସ୍‍ ମିନ୍ଦେଡ଼ି ।
ROM 1:7 ଆଦିଙ୍କ୍‍ ରୋମ୍‍ତେ ବେନଡ଼୍‍କିଂଙ୍କ୍ ଇଶ୍ୱର୍ ପ୍ରେମ ମାଡ଼ିତଣ୍ଡ୍‍ ମେଣ୍ଡେ ତାନ୍‍ ନିଜର୍‍ ନାରୁଣ୍ଡ୍‍ ଆଦାନଙ୍କ୍‍ କାର୍‍ଙ୍ଗ୍‍ତଣ୍ଡ୍‍, ଅଡ଼୍‌‍ ସାରେତଡ଼୍‍କିଙ୍କ୍‍ ନାନ୍‍ ଇଦ୍‍ ଚିଟି ଲେକୁତାନ୍‍ । ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍‍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍‍ ।
ROM 1:8 ମୁନେନ୍‍, ନାନ୍ ମିଡ଼୍ ସାର୍ରେତଡ଼୍‍ତେ ମାୟ୍‍ଦିଙ୍କ୍ ଜିସୁ କ୍ରିଷ୍ଟନ୍ ତଡ଼୍ ନା ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦୁତାନ୍, ବାତେଙ୍କ୍‍ ଇତ୍କେ ମିୟାଦ୍ ବିଶ୍ୱାସ୍‍ତାଦ୍ ସାୟେତ୍ କାବୁର୍ ଯେ ସାରେ ଜଗତ୍‍ତାଗ୍ କେଞ୍ଜାନଙ୍କ୍ ଆଦୁତ୍‍ତେ ।
ROM 1:9 ସାରେଦାମ୍‍ ନାନ୍‍ ବେନ୍‍ ଇଶ୍ୱର୍‌ତିଙ୍କ୍‍ ସେବା ମାଡ଼ୁତାନ୍‍ ନୁ ବେନ୍‍ ଇଶ୍ୱର୍‌ତେ ମାରିନ୍‍ ସାୟେତ୍‍ କାବୁର୍‍ ନାନ୍‍ ପ୍ରଚାର୍‍ ମାଡ଼ୁତାନ୍‍, ଆ ଇଶ୍ୱର୍ ନା ସାକ୍ଷି ।
ROM 1:10 ପ୍ରାର୍ତନା ମାଡ଼ାନ୍‍ୱେଲେ ନାନ୍‍ ସାରେଦାମ୍‍ ମିକିଂଙ୍କ୍‍ ଏର୍କେ ମାଡ଼ିତାନ୍‍ ନୁ ମି ବକେତ୍‍ ୱାଦାନ୍‍ ସେଙ୍ଗେ ନାକିଙ୍କ୍‍ ସୁଯୋଗ୍‍ ଇଦାନ୍‍ ମାୟ୍‍ଦିଙ୍କ୍‍ ଇଶ୍ୱର୍‌ତାଗ୍‍ ନିମେଦନ୍‍ ମାଡ଼ି ୱାଦୁତାନ୍‍ ।
ROM 1:11 ମି ବକେତ୍‍ ୱାସ୍‍ ନାନ୍‍ ଦର୍‍ସ୍କି ମାନ୍ଦାନ୍‍ ଆତ୍ମିକ୍‍ ଦାନ୍‍ ବିଷୟ୍‍ତେ ମିକିଂଙ୍କ୍‍ କର୍ତ୍ତାନ୍‌ ତଡ଼୍ ମିୟାଦ୍‍ ବିଶ୍ୱାସ୍‍ତିଙ୍କ୍‍ ଡୁଟାଙ୍ଗ୍‍ ମାଡ଼ିତାନ୍‍, ଇଦ୍‍ ନାୟାଦ୍‍ ଅଣ୍ଡୟ୍‌ ଇଚ୍ଛା ।
ROM 1:12 ଇଦିନ୍‍ ତଡ଼୍ ମାନାଡ଼୍‍ ନିଜର୍‍ନିଜର୍‍ ଲୋପେ ବିଶ୍ୱାସ୍‍ତିଙ୍କ୍‍ ଡୁଟାଙ୍ଗ୍‍ ମାଡ଼େପାର୍ଦ୍‍ତାଡ଼୍‍ ।
ROM 1:13 ହୋ ଦାଦାଲଡ଼ି ନୁ ଏଲାସ୍କ୍‍, ମି ବକେତ୍‍ ୱାଦାନଙ୍କ୍‍ ନାନ୍‍ ନାର୍ଗେଦାମ୍‍ ଇଚ୍ଛା ମାଡ଼୍‍ତାନ୍‍, ଇତ୍‍କେ ବାତ୍‍ଆୟି କାରନ୍‍ ମାୟ୍‍ଦିଙ୍କ୍‍, ଇଞ୍ଜେକ୍‍ଆନା ୱାଦାନଙ୍କ୍‍ ପାର୍‍ୱନ୍‍ । ଆନ୍‌ୱେ ଜାଗାକିନାଗ୍‍ ଅଣଯିହୁଦୀଡ଼୍‍ ଲୋପେ ପ୍ରଚାର୍‍ ମାଡ଼ି ବେଲା ସଫଲ୍‍ ଆତ୍‍ତାନ୍‍, ମି ଜାଗାକିନାଗ୍‍ ଗାଲା ଆଲା ମାଡ଼ାନଙ୍କ୍‍ ନାୟାଦ୍‍ ଇଚ୍ଛା ।
ROM 1:14 ଗ୍ରୀକ୍‍ ନାରୁଡ଼୍‍ ଆୟି କି ବର୍ବର୍ ନାରୁଡ଼୍‍ ଆୟି, କାର୍‍ତେନଣ୍ଡ୍ ଆୟି କି କାର୍‍ୱେନଣ୍ଡ୍ ଆୟି, ସାର୍ରେତଡ଼୍ ବକେତ୍ ନାନ୍ ଋଣୀ ।
ROM 1:15 ଆଦିଙ୍କ୍ ରୋମ୍‍ଦେଶ୍‍ତଡ଼ି ଆତ୍‍କେ ମିକା, ମିଇ ବକେତ୍ ଗାଲା ସୁସମାଚାର୍ ପ୍ରଚାର୍ ମାଡ଼ାନଙ୍କ୍ ନାୟାଦ୍ ଇଚ୍ଛା ମିନ୍ଦେ ।
ROM 1:16 ବାତେଙ୍କ୍ଇତ୍‍କେ ନାନ୍ ସୁସମାଚାର୍‍ତିଙ୍କ୍ ସିଗ୍ ମାଡ଼ନ୍, ଆଦ୍ ସାର୍‍ରେ ବିଶ୍ୱାସିଡ଼୍‍କିଂଙ୍କ୍ ପରିତ୍ରାଣ୍ ସେଙ୍ଗେ ଶାତ୍‍ୱାମ୍‍, ମୁନେନ୍ ଯିହୁଦୀଡ଼ାଗ୍, ମେଣ୍ଡେ ଗ୍ରୀକ୍‍ ନାରୁଡ଼ାଗ୍ ।
ROM 1:17 ଆଗେ ତ ଇଶ୍ୱର୍ ଇତ୍‍ତାଦ୍ ଦାର୍ମାମ୍ ମିନ୍ଦେ, ଆଦ୍ ବିଶ୍ୱାସ୍‍ତାଦ୍ ନୁ ବିଶ୍ୱାସ୍ ମାଡ଼ାନାଦ୍, ବେଦ୍‍ପୁଟୁଙ୍କ୍ ଲେକାମିନ୍ଦେ, “ଦର୍ମାମ୍ ନାରୁଡ଼୍ ବିଶ୍ୱାସ୍‍ତଡ଼୍ ବାଦ୍‍କିତଣ୍ଡ୍ ।”
ROM 1:18 ବାତେଙ୍କ୍ଇତ୍‍କେ ବେନ୍ ନାରୁଡ଼୍ ଅଦର୍ମତଡ଼୍ ସତ୍‍ତିଙ୍କ୍ ବିରୁଦ୍ ମାଡ଼ିତଡ଼୍, ଅଡ଼ାଦ୍‌ ସାର୍‍ରେ ଅପବିତ୍ର ନୁ ଅଦର୍ମ ବିରୁଦ୍‍ତେ ସ୍ୱର୍ଗତାଗ୍ ଇଶ୍ୱର୍ କପାମ୍ ଆଦୁତନ୍,
ROM 1:19 ଆଦିଙ୍କ୍ ଇଶ୍ୱର୍‌ତେ ବିଷୟ୍ ବାତ୍ ପୁତ୍‍ତଡ଼୍, ଆଦ୍ ତାମ୍ ଜିୱୁଣ୍ଡ୍‍ତାଗ୍ ପୁତ୍‍ତଡ଼୍; ଇଶ୍ୱର୍ ତ ତାମ୍ ବକେତ୍ ଆଦ୍ କେତ୍‍ତଣ୍ଡ୍ ।
ROM 1:20 ଜଗତ୍ ତିଆର୍ ଆତ୍‍ତେକନ୍‌ସ୍ ଅନାଦ୍‌ ଲୋପେ ମାନ୍ଦାନ୍ ଗୁନାମ୍ ସାର୍‍ରେ, ଇତ୍‍କେ ଅନାଦ୍‌ ନାର୍‍ଗେ ତେର୍‍ୱାଦ୍ ଶକ୍ତି ନୁ ଇଶ୍ୱର୍ ଗୁନାମ୍, ତିୟାର୍ ମାଡ଼୍‍ତେ ଜିନିଷ୍‍ତଡ଼୍ ଜ୍ଞାନି ଆସ୍ ସାୟେ ଲେକାମ୍ ତଅନ୍‌ଦୁତ୍, ବେଲାକି ଅଡ଼୍‌ ଉତ୍ତର୍ ଇଦାନଙ୍କ୍ ଆର୍ର୍ ଇଲ୍‍ଲେ ।
ROM 1:21 ବାତେଙ୍କ୍ଇତ୍‍କେ ଅଡ଼୍‌ ଇଶ୍ୱର୍‌ତିଙ୍କ୍ ପୁଞ୍ଜ୍ ଅଂକିଙ୍କ୍‌ ଇଶ୍ୱର୍ ଇଞ୍ଜ ଗୌରବ୍ ମାଡ଼ଡ଼୍‍ କି ଦନ୍ୟବାଦ୍ ଇୱଡ଼୍, ଅଡ଼୍‌ ତାମ୍‍ତାମ୍ ଯୁକ୍ତିତର୍କ ଆଦ୍‍ତଡ଼୍ ନୁ ଅଡ଼ାଦ୍‌ ବୁଦ୍‍ଇଲ୍‍ୱାଦ୍ ମନ୍ ଇକାଡ଼୍ ଆତ୍‍ତେ;
ROM 1:22 ଅଡ଼୍‌‍ ନିଜେ ନିଜେତିଙ୍କ୍ ଜ୍ଞାନି ଇଞ୍ଜ ମନେ ମାଡ଼ିତଡ଼୍‍, ଇତ୍‍କେ ଅଡ଼୍‌ ନିଜାମ୍‍ ମୁର୍କ ଆଦ୍‍ତଡ଼୍,
ROM 1:23 ଅନନ୍ତ ଇଶ୍ୱର୍‌ତିଙ୍କ୍‍ ଗୌରବ୍‍ ମାଡ଼୍‍ୱେକଟ ଅଡ଼୍‌‍ ନଷ୍ଟ ଆଦାନ୍ ନାରୁଡ଼୍, ପିଟ୍‍ଟେ, ପଶୁ, ତାଡ଼ାକ୍‍ ରକମ୍‍ ଜିୱାକ୍ ଲେକାମ୍ ମୁର୍ତ୍ତି ତିୟାର୍ ମାଡ଼ି ଆୱିଙ୍କ୍‍ ପୁଜା ମାଡ଼ୁତଡ଼୍ ।
ROM 1:24 ଆଦିଙ୍କ୍ ଇଶ୍ୱର୍ ଅଡ଼୍‌‍କିଂଙ୍କ୍‍ ୱିଡ଼୍‍ସ୍‍ତଣ୍ଡ୍‍ ନୁ ଅଡ଼୍‌‍ ନିଜର୍‍ନିଜର୍‍ ଲାଲସା ଲେକାମ୍‌ ଅଶୁଚି ପାଡ଼୍‍ୟି ମାଡ଼ିତଡ଼୍‍, ଅଡ଼୍‌‍ ନିଜର୍‍ନିଜର୍‍ ଲୋପେ ସିଗ୍‍ୱାଦାନ୍‍ ସମ୍ପର୍କ ନେଃତିତଡ଼୍‍ ।
ROM 1:25 ବାତେଙ୍କ୍ଇତ୍‍କେ ଅଡ଼୍‌ ଇଶ୍ୱର୍‌ତେ ସତ୍ ବଦଲ୍‍ତେ ମିଚ୍ ଗ୍ରହନ୍ ମାଡ଼୍‍ତଡ଼୍ ନୁ ତିୟାର୍ ମାଡ଼୍‍ତେନଣ୍ଡ୍ ବଦଲ୍‍ତେ ତିୟାର୍‍ ମାଡ଼୍‍ତେ ଜିନିଷ୍‍ତିଙ୍କ୍ ପୁଜା ମାଡ଼୍‍ତଡ଼୍ ନୁ ସେବା ମାଡ଼୍‍ତଡ଼୍; ଅଣ୍ଡ୍‌ ଯୁଗ୍‍ଯୁଗ୍ ଦନ୍ୟ । ଆମେନ୍ ।
ROM 1:26 ଇଦିନ୍ ସେଙ୍ଗେ ଇଶ୍ୱର୍ ଅଡ଼୍‌‍କିଂଙ୍କ୍ ଗୃନାତାଦ୍ ପାପ୍ ଇତ୍‍ତନ୍, ବାତେଙ୍କ୍ଇତ୍‍କେ ତାମ୍ ନାଟାଙ୍କ୍ ସାୟେତ୍ ବ୍ୟବହାର୍‌ ମାଡ଼ାନ୍ ବଦଲ୍‍ତେ କାରାପ୍ ବ୍ୟବହାର୍‌ ମାଡ଼୍‍ତା,
ROM 1:27 ଆଦେରକମ୍ ମାନେୟ୍‍ ଗାଲା ନିଜେତ୍ ମୁତେଙ୍କ୍ ୱିଡ଼୍‍ସି ମିକା ତାମ୍‍ତାମ୍ ଲାଲ୍‍ସା ମାଡ଼୍‍ତଡ଼୍, ମାନେୟ୍‍ ତଡ଼୍ ମାନେୟ୍‍ତେ କାରାପ୍ ପାଡ଼୍‍ୟି ମାଡ଼୍‍ତଡ଼୍, ମେଣ୍ଡେ ନିଜେ ନିଜେତାଦ୍ କାରାପ୍ ପାଡ଼୍‍ୟି ସେଙ୍ଗେ କଷ୍ଟ ପାଏମ୍ ଆଦ୍‍ତଡ଼୍ ।
ROM 1:28 ମେଣ୍ଡେ ଅଡ଼୍‌ ଇଶ୍ୱର୍‌ତେ ବିଷୟ୍‍ତାଦ୍ ବୁଦ୍‍ ଗ୍ରହଣ୍‍ ମାଡ଼ାନଙ୍କ୍ ପାର୍‍ୱଡ଼୍, ଆଦେରକମ୍ ଇଶ୍ୱର୍ କାରାପ୍ ପାଡ଼୍‍ୟି ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ କାରାପ୍ ବୁଦ୍‍ ଇତ୍‍ତନ୍ ।
ROM 1:29 ଅଡ଼୍‌ ସାର୍ରେପ୍ରକାର୍ ଦୁଷ୍ଟ, ଅଦର୍ମ, ଲବି, ଇଂସା, ଇର୍ଷା, ହାଉକାଙ୍କ୍, ଗଲ୍‍କ୍, ମିଚ୍, କାରାପ୍‍ ନୁ ନିନ୍ଦାତଡ଼୍ ବର୍ତ୍ତି ଆଦ୍‍ତଡ଼୍;
ROM 1:30 ଅଡ଼୍‌ ପେର୍‍ଲେ, ନିନ୍ଦ୍ ମାଡ଼ିତଡ଼୍‍, ଇଶ୍ୱର୍‌ତିଙ୍କ୍‍ ପାସ୍‍କିତଡ଼୍‍, ଅତ୍ୟାଚାର୍, ଅହଂକାରି, କାରାପ୍ ପାଡ଼୍‍ୟି ତିୟାର୍ ମାଡ଼ାନଡ଼ି, ୟାୟବାବାନ୍ ଗଟି କେଞ୍ଜଡ଼୍,
ROM 1:31 ଅଡ଼୍‌‍ ମୁର୍କ, ନିୟମ୍ ପାଲନ୍ ମାଡ଼ଡ଼୍‍, ସ୍ନେହ ମାଡ଼ଡ଼୍‍ ନୁ ନିଷ୍ଠୁର୍ ଆଦ୍‍ତଡ଼୍ ।
ROM 1:32 ଅଡ଼୍‌‍ ପୁତ୍‍ତଡ଼୍‍ ଯେ, ଇଶ୍ୱର୍ ବିଦାନ୍‍ ଲେକାମ୍‌ ବେନଡ଼୍ ଇଦ୍ ରକମ୍ ବ୍ୟବହାର୍‌ ମାଡ଼ିତଡ଼୍, ଅଡ଼୍‌ ଡଲିତଡ଼୍, ଇଶ୍ୱର୍‌ତାଦ୍ ଇଦ୍ ନିୟମ୍ ପୁତ୍‍କେ ଗାଲା ଅଡ଼୍‌ ଇଦ୍‍ରକମ୍ ବ୍ୟବହାର୍‌ ମାଡ଼ିତଡ଼୍ ଆଦ୍ ଆୟ୍‍ୟ, ମେଣ୍ଡେ ଇଦ୍ ରକମ୍ ମାଡ଼ାନ୍ ନାରୁଡ଼୍‍କିଂଙ୍କ୍ ୱେଡ଼୍‍କେତେ ସପଟ୍ ମାଡ଼ିତଡ଼୍ ।
ROM 2:1 ଆଦିଙ୍କ୍, ହୋ ଦାଦାଲ୍‍ ନୁ ଏଲାଡ଼୍‍, ମିଡ଼୍‍ ବାତ୍‍ ମେଣ୍ଡେଅଡ଼୍‌‍ତିଡ଼୍‍କ୍‍ ବିଚାର୍ ମାଡ଼ୁତିଡ଼୍‍, ନିମ୍‍ ବେନଆଇ ଆତ୍‍କେ ଗାଲା, ଇଲା ମାଡ଼ାନାଦ୍‍ ନିୟାଦ୍‍ ଟିକ୍‍ ଆୟ; ବାତେଙ୍କ୍ଇତ୍‍କେ ବେନ୍ ବିଷୟ୍‍ତେ ନିମ୍‍ ମେଣ୍ଡେଅଡ଼୍‌‍ତିଡ଼୍ ବିଚାର୍ ମାଡ଼ୁତିନ୍‍, ଆଦ୍ ବିଷୟ୍‍ତେ ନିମେ ନିଜେତିଙ୍କ୍ ଦଷି ମାଡ଼ୁତିନ୍‍, ଆଦିଙ୍କ୍ ନିମେ ବିଚାର୍ ମାଡ଼ମାନ୍‍, ନିମେ ନିଜେ ଆଦ୍‍ଲେକାମ୍ ପାଡ଼୍‍ୟି ମାଡ଼ୁତିନ୍‍ ।
ROM 2:2 ମେଣ୍ଡେ ବେନ ଇଦ୍ ରକମ୍ ପାଡ଼୍‍ୟି ମାଡ଼ିତଡ଼୍, ଅଡ଼୍‌ ବିରୁଦ୍‍ତେ ଇଶ୍ୱର୍ ସତ୍‍ ବିଚାର୍ ମାଡ଼ିତନ୍ ଇଦ୍ ମାମ୍‍ମେ ପୁତ୍‍ତମ୍ ।
ROM 2:3 ମେଣ୍ଡେ, ହୋ ଦାଦାଲ୍‍ ନୁ ଏଲାଡ଼୍‍, ବେନଡ଼୍ ଇଦ୍ ରକମ୍ ପାଡ଼୍‍ୟି ମାଡ଼ିତଡ଼୍, ଅଡ଼ାଦ୍‌ ବିଚାର୍ ମାଡ଼ି ନିମେ ନିଜେ ଆଦ୍ ରକମ୍ ପାଡ଼୍‍ୟି ମାଡ଼ମାନ୍‍ତିନ୍‍, ନିମେ ବାଆତେ ଇଶ୍ୱର୍ ବିଚାର୍ ମାଡ଼ାନ୍‍ୱେଲେ ମିରାନଙ୍କ୍ ଆଲ୍‍ସୁତିନ୍‍ ?
ROM 2:4 ଆଦ୍‍ପାର୍‍ଦ୍‍ତେ, ଇଶ୍ୱର୍‌ତେ କୃପା, ଗାଡ଼୍‍ସ୍ ନୁ ସାରେ ଲେକାମ୍ ଦନ୍‍ତିଙ୍କ୍ ଆଙ୍ଗ୍‍ଡ଼ାମ୍ ମାଡ଼ୁତିଡ଼୍ । ଆଗେକ୍‍ବା ମିଡ଼୍‍ ପୁତ୍‍ତିଡ଼୍‍ ଯେ ଇଶ୍ୱର୍ ଦୟାବାନ୍‍, ବାତେଙ୍କ୍‍ଇତ୍‍କେ ଅଣ୍ଡ୍‌‍ ମିକିଂଙ୍କ୍ ମନ୍ ବାଦ୍‍ଲା ମାଡ଼ାନଙ୍କ୍ ତିୟାର୍ ଆଦୁତନ୍ ।
ROM 2:5 ଇତ୍‍କେ ମିଡ଼୍ ନିଜର୍‍ ଗାଡ଼୍‍ସ୍ ନୁ ବାଦ୍‍ଲେମ୍ ଆୟ୍‍ୱାଦ୍ ଜିୱୁଣ୍ଡ୍ ଲେକାମ୍, ବେନ୍ ଦିନ୍ ଇଶ୍ୱର୍‌ତାଦ୍ ନ୍ୟାୟ ବିଚାର୍ ଆଦ୍‍ତେ, ଆଦ୍ କପାମ୍ ଦିନ୍ ସେଙ୍ଗେ ମିଡ଼୍ ନିଜେ କପାମ୍ ଗାଡ଼୍‍ସୁତିଡ଼୍;
ROM 2:6 ବାତେଙ୍କ୍‍ଇତ୍‍କେ ଅଣ୍ଡ୍‌ ସାର୍‍ରେ ନାରୁଡ଼୍‍କିଂଙ୍କ୍ ନିଜର୍‍ ନିଜର୍‍ ପାଡ଼୍‍ୟି ସେଙ୍ଗେ ଇନାମ୍‍ ଇଦ୍‍ତଣ୍ଡ୍;
ROM 2:7 ବେନଡ଼୍ ଗାଡ଼୍‍ସ୍ ଆସ୍ ସାୟେତ୍ ପାଡ଼୍‍ୟି ମାଡ଼ି ଗୌରବ୍, ସମ୍ମାନ୍ ନୁ ଅମର୍ ଆଦାନଙ୍କ୍ ଚାଏମ୍ ଆଦ୍‍ତଡ଼୍, ଅଡ଼୍‌‍କିଂଙ୍କ୍ ସାରେଦିନାତ୍ ଜିୱୁଣ୍ଡ୍ ଇଦ୍‍ତଣ୍ଡ୍,
ROM 2:8 ଇତ୍‍କେ ମେଣ୍ଡେଅଣ୍ଡ୍‌‍ ପାକେ ବେନଡ଼୍ ସ୍ୱାର୍ତପର, ମେଣ୍ଡେ ସତ୍‍ତିଙ୍କ୍ ପାଲନ୍ ମାଡ଼ଣ୍ଡ୍, ଅଦର୍ମ ପାଲନ୍ ମାଡ଼ିତନ୍, ଅଡ଼୍‌‍କିଂଙ୍କ୍ କପାମ୍ ନୁ ଦଂସ ଦର୍‍କିତ୍ ।
ROM 2:9 ସାର୍‍ରେ କାରାପ୍ ପାଡ଼୍‍ୟି ମାଡ଼ାନ୍ ନାରୁଡ଼୍ ଜିୱୁଣ୍ଡ୍ ପର୍‍ର ଦୁଃକା ନୁ କଷ୍ଟ ଆଦ୍‍ତେ, ମୁନେନ୍ ଯିହୁଦୀ ନାରୁଡ଼୍‍କ୍ ନୁ ଅଣଇହୁଦୀ ନାରୁଡ଼୍‍କ୍ ଆଦ୍‍ତେ ।
ROM 2:10 ଇତ୍‍କେ ସାର୍‍ରେ ସାୟେତ୍ ପାଡ଼୍‍ୟି ମାଡ଼ାନ୍ ନାରୁଡ଼୍‍କ୍‍ ଇଶ୍ୱର୍ ଅଡ଼୍‌‍କିଂଙ୍କ୍‍ ଗୌରବ୍, ସମ୍ମାନ୍ ନୁ ଶାନ୍ତି ଇଦ୍‍ତଣ୍ଡ୍‍ । ମୁନେନ୍ ଯିହୁଦୀ ନାରୁଡ଼୍‍କ୍‍ ତାନ୍‍ପେର୍କେ ଅଣଯିହୁଦୀ ନାରୁଡ଼୍‍କ୍ ।
ROM 2:11 ବାତେଙ୍କ୍ଇତ୍‍କେ ଇଶ୍ୱର୍ ସାର୍ରେତଡ଼୍‍କିଙ୍କ୍‍ ସାମାନ୍ ବିଚାର୍‍ ମାଡ଼ିତଣ୍ଡ୍ ।
ROM 2:12 ଆଦିଙ୍କ୍ ବେସର୍ ନାରୁଡ଼୍ ମୋଶାନ୍‌‌ ନିୟମ୍ ପାଲନ୍ ମାଡ଼କଟ୍ ପାପ୍ ମାଡ଼୍‍ତଡ଼୍, ଅଡ଼୍‌ ଗାଲା ବିନା ନିୟମ୍ ତଡ଼୍ ନଷ୍ଟ ଆଦ୍‍ତଡ଼୍; ମେଣ୍ଡେ ବେସର୍ ମୋଶାନ୍‌‌ ନିୟମ୍ ପାଏମ୍ ଆସ୍ ପାପ୍ ମାଡ଼୍‍ତଡ଼୍, ଅଡ଼୍‌ ଆଦ୍‍ ନିୟମ୍ ଲେକାମ୍ ବିଚାର୍ ଆଦ୍‍ତଡ଼୍,
ROM 2:13 ବାତେଙ୍କ୍ଇତ୍‍କେ ନିୟମ୍ ପୁତ୍‍ତଡ଼୍ ଇଶ୍ୱର୍‌ତେ ମୁନ୍‍ନେ ଦାର୍ମାମ୍ ଆୟ୍‍ୟଡ଼୍, ଇତ୍‍କେ ନିୟମ୍ ପାଲନ୍ ମାଡ଼ାନଡ଼୍‍ ଦାର୍ମାମ୍‌ ଆଦ୍‍ତଡ଼୍ ।
ROM 2:14 ଆଦିଙ୍କ୍ ଅଣଯିହୁଦୀଡ଼ାଦ୍ ଆଦ୍ ନିୟମ୍ ଇଲ୍‍ୱେମାତ୍‍କେ ମିକା, ବେସୁଟ୍‌ ଅଡ଼୍‌ ନିୟମ୍ ଲେକାମ୍ ପାଡ଼୍‍ୟି ମାଡ଼ିତଡ଼୍, ଆସୁଟେ ଅଡ଼୍‌‍କ୍ ନିୟମ୍ ଦର୍କକ୍ ଗାଲା ଆଦ୍‍ ଅଡ଼୍‌‍କିଂଙ୍କ୍ ନିୟମ୍ ଲେକାମ୍ ଆଦ୍‍ତେ;
ROM 2:15 ଅଡ଼ାଦ୍‌‍ ପାଡ଼୍‍ୟିତଡ଼୍‍ ଇଦ୍‍ ସାୟେ ପୁନ୍ଦାନଙ୍କ୍‍ ଆଦୁତ୍‍ ଯେ, ବ୍ୟବସ୍ଥାତାଦ୍‍ ନିୟମ୍‍ ଅଡ଼ାଦ୍‌‍ ହୃଦୟ୍‍ତାଗ୍‍ ଲେକା ଆସ୍‍ମିନ୍ଦେ । ଇଦ୍‍ ଗଟ୍‍ତାଦ୍‍ ସତ୍ୟ ଅଡ଼୍‌‍ୱାଦ୍‍ ବିବେକ୍‍ ତଡ଼୍‍ ପ୍ରାମାନ୍‍ ଆଦ୍‍ତେ, ସତ୍‍ ଚିନ୍ତେ ମାଡ଼୍‍କେ ବିବେକ୍‍ ଅଡ଼୍‌‍କିଂଙ୍କ୍ ସପଟ୍‍ ମାଡ଼ିତ୍, କାରାପ୍‍ ଚିନ୍ତେ ମାଡ଼୍‍କେ ଦୋଷି ମାଡ଼ିତ୍‍ ।
ROM 2:16 ବେନ୍ ଦିନ୍ ଇଶ୍ୱର୍ ନାୟାଦ୍ ସୁସମାଚାର୍ ଲେକାମ୍ ଜିସୁ କ୍ରିଷ୍ଟନ୍ ତଡ଼୍ ନାରୁଡ଼ାଦ୍ ମିଞ୍ଜିମାନ୍ଦାନ୍ ବିଷୟ୍‍ତିଙ୍କ୍ ବିଚାର୍ ମାଡ଼ିତନ୍, ଆଦ୍ ଦିନ୍ ଇଦ୍ ପେୟ୍‍ତିତ୍ ।
ROM 2:17 ଯଦି ମିଡ଼୍ ଯିହୁଦୀ ପେଦେର୍ ପୟ୍‍ସ୍ ମିକା ମୋଶାନ୍‌‌ ନିୟମ୍ ପର୍‍ର ଆଶେ ମାଡ଼ୁତିଡ଼୍ ନୁ ଇଶ୍ୱର୍‌ତଡ଼୍‍ ସମ୍ପର୍କ ମିନ୍ଦେ ଇଞ୍ଜ ଗର୍ବ ମାଡ଼ୁତିଡ଼୍,
ROM 2:18 ଇଶ୍ୱର୍ ମିୟାଗାଙ୍କ୍‍ ବାତେ ଇଚ୍ଛା ମାଡ଼ୁତଣ୍ଡ୍‍ ଆଦ୍‍ ପୁତ୍‍ତିଡ଼୍‍ ନୁ ନିୟମ୍‍ତାଗାଙ୍କ୍‍ ସତ୍‍ ନୁ ଆସତ୍ ଜ୍ଞାନ୍‍ ପାଏମ୍‍ ଆତ୍‍ତିଡ଼;
ROM 2:19 ମିଡ଼୍‍ ନିଜାମ୍‍ ପୁତ୍‍ତିଡ଼୍‍ ଯେ, ମିଡ଼୍‍ ଇକାଡ଼୍‌ତାଗ୍‍ ମାନ୍ଦାନ୍‍ ନାରୁଡ଼୍‍କିଙ୍କ୍‍ ୱେସ୍‍ ରକମ୍‍ ଆଦ୍‍ତିଡ଼୍‍,
ROM 2:20 ମୁର୍କ ନାରୁଡ଼୍‍ତେ ମେସ୍ତେରି, ଅଜ୍ଞାନ୍‍ ନାରୁଡ଼୍‍ତେ ଗୁରୁ । ମିୟାଦ୍‍ ବିଶ୍ୱାସ୍‍ ଯେ ନିୟମ୍‍ତାଗାଙ୍କ୍‍ ମିଡ଼୍‍ ପୁରା ସତ୍ୟ ନୁ ଜ୍ଞାନ୍‍ ପାଏମ୍‍ ଆତ୍‍ତିଡ଼୍‍ ।
ROM 2:21 ମିଡ଼୍ ଯଦି ମେଣ୍ଡେଅଡ଼୍‌‍ତିଡ଼୍‍କ୍‍ ଶିକ୍ଷା ଇଦୁତିଡ଼୍, ମିଡ଼୍ ବାଆତେ ନିଜେତିଙ୍କ୍ ଶିକ୍ଷା ଇୱିଡ଼୍ ? “ଡଙ୍ଗ୍‍ମାଟ୍ ଇଞ୍ଜ ପ୍ରଚାର୍ ମାଡ଼ି ମିଡ଼୍ କି ଡଙ୍ଗୁତିଡ଼୍ ?”
ROM 2:22 “ବେବିଚାର୍ ମାଡ଼୍‍ମାଟ୍ ଇଞ୍ଜ କେସ୍ ମିଡ଼୍ କି ବେବିଚାର୍ ମାଡ଼ୁତିଡ଼୍ ? ମିଡ଼୍ ମୁର୍ତ୍ତିତିଙ୍କ୍ ଗୃଣା ମାଡ଼ୁତିଡ଼୍, ମିଡ଼୍ କି ମନ୍ଦିର୍‍ତାଗ୍‍ ଇତ୍‍ତାୱୁ ଜିନିଷ୍‍ ଲୁଣ୍ଠନ୍ ମାଡ଼ୁତିଡ଼୍ ?”
ROM 2:23 ମିଡ଼୍ ଇଶ୍ୱର୍‌ତେ ନିୟମ୍ ତଡ଼୍ ଗର୍ବ ମାଡ଼ୁତିଡ଼୍, ନିୟମ୍ ଲଘଂନ୍ ମାଡ଼ି ମିଡ଼୍ ବାଆତେ ଇଶ୍ୱର୍‌ତିଙ୍କ୍ ହୀନ୍ ମାଡ଼୍‍ୱିଡ଼୍ ?
ROM 2:24 ବାତେଙ୍କ୍ଇତ୍‍କେ ବେଲା ଲେକାମିନ୍ଦେ, “ମିଇ ସେଙ୍ଗେ ଅଣଯିହୁଦୀ ନାରୁଡ଼୍ ଲୋପେ ଇଶ୍ୱର୍‌ତେ ପେଦେର୍ ନିନ୍ଦ୍ ଆଦୁତ୍‍ତେ ।”
ROM 2:25 ଯଦି ମିଡ଼୍ ନିୟମ୍ ପାଲନ୍ ମାଡ଼ୁତିଡ଼୍, ଆଲେକେ ନିଜାମ୍ ମିଡ଼୍ ସୁନ୍ନତ୍ ପାଏମ୍ ଆତ୍‍ତେ ନାରୁଡ଼୍‍ ଲେକାମ୍‍ ଆଦ୍‍ତିଡ଼୍, ଇତ୍‍କେ ମିଡ଼୍ ନିୟମ୍‍ତିଙ୍କ୍ ଲଘଂନ୍ ମାଡ଼ିତିଡ଼୍, ଆଲେକେ ମିଡ଼୍ ସୁନ୍ନତ୍ ଆୟ୍‍ୱେ ନାରୁଡ଼୍‍ ଲେକାମ୍‍ ଆଦ୍‍ତିଡ଼୍‍ ।
ROM 2:26 ଯଦି ସୁନ୍ନତ୍ ଆୟ୍‍ୱେ ନାରୁଡ଼୍ ଅଣଯିହୁଦୀ ନିୟମ୍‍ ପାଲନ୍ ମାଡ଼ିତନ୍, ଆଲେକେ ଅଣ୍ଡ୍‌ ସୁନ୍ନତ୍ ଆୟକ୍ ଗାଲା ବାଆତେ ଇଶ୍ୱର୍ ଅଂକିଙ୍କ୍‌ ସୁନ୍ନତ୍ ଇଞ୍ଜ କେଲଣ୍ଡ୍‍ କି ?
ROM 2:27 ଆଦିଙ୍କ୍‍ ମେନ୍ଦୁଲ୍‍ତଡ଼୍‍ ସୁନ୍ନତ ଆୟ୍‍ୱେ ନାରୁଡ଼୍‍ ନିୟମ୍‍ ପାଲନ୍‌ ମାଡ଼ିତଡ଼୍‍, ଆଲେକେ ଅଡ଼୍‌‍ ମିୟାଦ୍‍ ବିଚାର୍‍ ମାଡ଼ିତଡ଼୍‍, ମିଡ଼୍ ଲେକ୍‍ତାଦ୍‍ ନିୟମ୍ ନୁ ପାଲନ୍ ପାଏମ୍ ଆସ୍ ଗାଲା ନିୟମ୍ ଲଘଂନ୍ ମାଡ଼ୁତିଡ଼୍ ।
ROM 2:28 ଇତ୍‍କେ ବାୟିଦେ ବେନ ଯିହୁଦୀ, ଅଣ୍ଡ୍‌ ଯିହୁଦୀ ଆୟ୍‍ୟଣ୍ଡ୍, କି ବାୟିଦେ ମେନ୍ଦୁଲ୍ ତଡ଼୍ ବେନ ସୁନ୍ନତ୍, ଆଦ୍ ସୁନ୍ନତ୍ ଆୟ୍‍ୟ ।
ROM 2:29 ବେନ ହୃଦୟ୍‍ତାଗାଙ୍କ୍‍ ଯିହୁଦୀ ଅଣ୍ଡ୍‌‍ ନିଜାତଣ୍ଡ୍‍ ଯିହୁଦୀ, ମେଣ୍ଡେ ଲେକ୍‍ତାଦ୍ ଲେକାମ୍ ଆୟ୍‍ୟଣ୍ଡ୍, ମାତର୍ ଜିୱୁଣ୍ଡ୍ ଲୋପେକସ୍ ବେନ ସୁନ୍ନତ୍, ଆଦ୍ ନିଜାତାଦ୍ ସୁନ୍ନତ୍ । ଇଦ୍ ରକମ୍ ନାରୁଡ଼୍ ନାରୁଡ଼ାଗାଙ୍କ୍ ପ୍ରସଂଶା ପାଏମ୍ ଆୟ୍‍ୟଣ୍ଡ୍, ଇତ୍‍କେ ଇଶ୍ୱର୍‌ତାଗାଙ୍କ୍ ପାଏମ୍ ଆଦ୍‍ତନ୍ ।
ROM 3:1 ଆଲେକେ ଯିହୁଦୀ ନାରୁଣ୍ଡ୍‍ତାଦ୍ ମୁଲ୍ୟ ବାଆତେ ? ସୁନ୍ନତ୍ ବା ଉପକାର୍ ବାଆତେ ?
ROM 3:2 ସାର୍‍ରେ ଲେକାତ୍ ନାର୍‍ଗେ । ମୁନେନ୍‍, ଇଶ୍ୱର୍‍ ତାନ୍‍ କାବୁର୍‍ତେ ଦାୟିତ୍ୱ ଯିହୁଦୀଡ଼ାଗ୍‍ ସର୍ପା ମାଡ଼ିମାତ୍‍ତଣ୍ଡ୍‍ ।
ROM 3:3 ଆଲେକେ ବାଆତେ ? ଯଦି ବେନ ଅବିଶ୍ୱାସୀ ଆତ୍‍କେ, ଆଲେକେ ବାତ୍‍ ଅଡ଼ାଦ୍‌ ଅବିଶ୍ୱାସ୍ ଇଶ୍ୱର୍‌ତାଦ୍ ବିଶ୍ୱାସ୍‍ତିଙ୍କ୍ ନଷ୍ଟ ମାଡ଼ିତ୍ ?
ROM 3:4 ଆଦ୍‍ ବେସୁଟ୍‌ ଆୟ୍‍ମାକି, ଇତ୍‍କେ ସାର୍‍ରେ ନାରୁଡ଼୍ ମିଚ୍ ଆତ୍‍କେ ଆୟିଡ଼୍, ବାତେଙ୍କ୍ଇତ୍‍କେ ଇଶ୍ୱର୍ ନିଜାମ୍ ଇଞ୍ଜ ସ୍ୱୀକାର୍ ଆୟି, ଶାସ୍ତ୍ରତାଗ୍‍ ଲେକାମିନ୍ଦେ, “ମିଡ଼୍ ମିୟାଦ୍ ବାକ୍ୟ ତଡ଼୍ ଦାର୍ମାମ୍‌ ଆଦ୍‍ତିଡ଼୍, ମେଣ୍ଡେ ବିଚାର୍ ଆଦାନ୍‍ୱେଲେ ଜିଡ଼ିତିଡ଼୍ ।”
ROM 3:5 ଯଦି ମାନାଡ଼୍ ଦାର୍ମାମ୍‍ ଇଲ୍‍ୱେ ନାରୁଡ଼୍ ତଡ଼୍ ଇଶ୍ୱର୍‌ତାଦ୍ ଦାର୍ମାମ୍‌‍ତିଙ୍କ୍ ସାମାନ୍ ପ୍ରମାଣ୍ ମାଡ଼ିତାଡ଼୍, ଆଲେକେ ମାନାଡ଼୍ ବାଆତେ କେତିତାଡ଼୍‍ ? ବେନ୍ ଇଶ୍ୱର୍ କପାମ୍‍ତାଦ୍ ଦଣ୍ଡ୍‍ ଇଦ୍‍ତଣ୍ଡ୍, ଅଣ୍ଡ୍‌ ବାଆତେ ଦାର୍ମାମ୍‌ ଆୟ୍‍ୟଣ୍ଡ୍ ? ନାନ୍ ନାରୁଡ଼୍ ଇନା କେତୁତାନ୍ ।
ROM 3:6 ଆଦ୍ ବେସୁଟ୍‌ ଆୟ୍‍ମାକି; ଇଶ୍ୱର୍ ଯଦି ନ୍ୟାୟବାନ୍‍ ଆୟ୍‍ୱେମାତ୍କେ, ଆଲାଆତ୍‍କେ ଅଣ୍ଡ୍‌‍ ବେଲା ଜଗତ୍‍ତାଦ୍ ବିଚାର୍ ମାଡ଼ିତନ୍ ?
ROM 3:7 ଯଦି ନାୱାଦ୍ ମିଚ୍ ତଡ଼୍ ଇଶ୍ୱର୍‌ତାଦ୍ ସତ୍ ଅନ୍‌ ଗୌରବ୍ ସେଙ୍ଗେ ନାର୍‍ଗେ ଆତ୍‍କେ, ଆଲେକେ ନାନ୍ ଗାଲା ମେଣ୍ଡେ ବାତେଙ୍କ୍ ପାପି ଇଞ୍ଜ ବିଚାର୍ ଆଦ୍‍ତାନ୍ ?
ROM 3:8 ମାନାଡ଼୍‍ ବାତେଙ୍କ୍‍ କେଲ୍‍ୱାଡ଼୍‍, “ୱାଡ଼ାଟ୍‍ କାରାପ୍‍ ପାଡ଼୍‍ୟି ମାଡ଼ିକାଡ଼୍‍, ଇଗାଙ୍କ୍‍ ଲେକେତ୍‍ କାୟା ଦର୍‍କିତ୍‍,” ନାନ୍‍ ଇଦ୍‍ ରକମ୍‍ ଗଟି କେତୁତାନ୍ ଇଞ୍ଜ ବେସ୍‍କ୍‍ତୁଡ଼୍‍ ନିନ୍ଦେ ମାଡ଼ୁତଡ଼୍‍ । ଅଡ଼୍‌‍କିଂଙ୍କ୍‍ ବାତ୍‍ ଦଣ୍ଡ୍‍ ଦର୍‍କାନାଦ୍ ମାନ୍ତେ ଆଦ୍‍ ଦର୍କିତ୍‍ ।
ROM 3:9 ଆଲେକେ ବାଆତେ ? ମାନାଡ଼୍ କି ବାଗାତ୍ ନାରୁଡ଼ାଗାଙ୍କ୍ ମହାନ୍ ? ଇଲ୍‍ଲେ, ବେଲାବା ଆୟ୍‍ୟ; ବାତେଙ୍କ୍ଇତ୍‍କେ ଯିହୁଦୀ ନୁ ଅଣଯିହୁଦୀ ନାରୁଡ଼୍ ସାର୍‍ରେ ପାପ୍ ଅଦିନ୍‌ତାଗ୍ ମିନ୍ଦେଡ଼୍‍, ନାନ୍‍ ମୁନେନ୍‍ କେତ୍‍ତାନ୍‍ ଯେ ଇଡ଼୍‍ ରେଣ୍ଡ୍‍ ନାରୁଡ଼୍‍ ପାପ୍‍ ଅଦିନ୍‌ତାଗ୍‍ ମିନ୍ଦେଡ଼୍‍ ।
ROM 3:10 ଶାସ୍ତ୍ରତାଗ୍‍ ଲେକାମିନ୍ଦେ, “ଦାର୍ମାମ୍ ବେନବା ଇଲାଣ୍ଡ୍, ଇଲ୍‍ଲେ, ୱେରଣ୍ଡ୍ ବା ଇଲ୍‍ଲେଣ୍ଡ୍;
ROM 3:11 ବେନ ବୁଜେମ୍ ଆଦ୍‍ତନ୍, ଇଦ୍ ରକମ୍ ବେନ ଇଲ୍‍ଲାଣ୍ଡ୍; ବେନ ଇଶ୍ୱର୍‌ତିଙ୍କ୍ ମେଏକିତଣ୍ଡ୍, ଇଦ୍ ରକମ୍ ୱେରଣ୍ଡ୍‍ବା ଇଲ୍‍ଲାଣ୍ଡ୍;
ROM 3:12 ଅଡ଼୍‌ ସାର୍ରେତଡ଼୍ କାରାପ୍ ଆର୍ର୍‍ଦାଗ୍ ଅଦୁତ୍‍ତଡ଼୍‍, ଅଣ୍ଡୟ୍‌‍ତଡ଼୍ ବେକାର୍‍ ଆଦ୍‍ତଡ଼୍; ବେନ ସତ୍ ପାଡ଼୍‍ୟି ମାଡ଼ିତନ୍, ଇଦ୍ ରକମ୍ ବେନ ଇଲ୍‍ଲାଣ୍ଡ୍, ଇଲ୍‍ଲେ, ଇଦ୍ ରକମ୍ ୱେରଣ୍ଡ୍‍ବା ଇଲ୍‍ଲାଣ୍ଡ୍ ।
ROM 3:13 ଅଡ଼ାଦ୍‌ ପାୟୁର୍ କୁଲେମ୍ ଆତ୍‍ତେ ସମାଦି, ଅଡ଼୍‌ ନିଜେତ୍ ୱେଞ୍ଜେର୍‍ ତଡ଼୍ ଚଲନା ମାଡ଼ିମିନ୍ଦେଡ଼୍, ଅଡ଼ାଦ୍‌ ଇୱିଡ଼୍ ମଦଲ୍ ତାଡ଼ାମ୍‍ତାଦ୍ ୱିସାମ୍ ମିନ୍ଦେ;
ROM 3:14 ଅଡ଼ାଦ୍‌ ଗଟି କାୟ୍‍ତା ନୁ ଅବିଶାପ୍‌ ତଡ଼୍ ବର୍ତ୍ତି ଆତ୍‍ତେ;
ROM 3:15 ଅଡ଼୍‌‍ ରେଏତାନଙ୍କ୍‍ ନୁ ଆୱୁକାନଙ୍କ୍‍ ମୁନ୍‍ନେ ମିନ୍ଦେଡ଼୍‍;
ROM 3:16 ଅଡ଼ାଦ୍‌ ଆର୍‍ତାଗ୍ ଦସଂ ନୁ କଷ୍ଟ ମିନ୍ଦେ,
ROM 3:17 ମେଣ୍ଡେ ଶାନ୍ତିତାଦ୍ ଆର୍ର୍ ଅଡ଼୍‌ ପୁନଡ଼୍ ।
ROM 3:18 ଇଶ୍ୱର୍‌ତାଦ୍ ୱେର୍ରେ ଅଡ଼ାୱ୍ କଣ୍ଡାନାଗ୍ ବିଲ୍‍କୁଲ୍‍ ଇଲ୍‍ଲେ ।”
ROM 3:19 ମେଣ୍ଡେ, ମାନାଡ଼୍ ତ ପୁତ୍‍ତାଡ଼୍, ବେନଡ଼୍‍ ନିୟମ୍ ଅଦିନ୍‌ତେ ମିନ୍ଦେଡ଼୍‍, ଅଦିନ୍‌ ସାରେ ବିଦିବିଦାନ୍‍ ପାଲନ୍‍ ମାଡ଼ାନଙ୍କ୍ ବାଦ୍ୟ । ଇଶ୍ୱର୍ ବେସୁଟ୍‌ ସାରେତଡ଼୍‍ୱାଦ୍‍ ବିଚାର୍‍ ମାଡ଼ିତଣ୍ଡ୍‍, ନିୟମ୍‍ ମାନେମ୍‍ ଆୟ୍‍ୱଡ଼୍‍ ବାତ୍‍ଆୟି ବୁସାମାଡ଼ି ନିର୍ଦଷ୍‌ ଇଞ୍ଜ କେତାନଙ୍କ୍ ପାର୍‍ୱଡ଼୍‍ ।
ROM 3:20 ବାତେଙ୍କ୍ଇତ୍‍କେ ନିୟମ୍‍ତାଦ୍ ପାଡ଼୍‍ୟି ତଡ଼୍ ବେନବା ଅନ୍‌ ମୁନ୍‍ନେ ଦାର୍ମାମ୍ ଆୟ୍‍ୟଣ୍ଡ୍, ଇତ୍‍କେ ନିୟମ୍ ତଡ଼୍ ପାପ୍‍ତାଦ୍ ବୁଦ୍‍ ପୁଟିତ୍ ।
ROM 3:21 ଇତ୍‍ତ୍କେ ଇଶ୍ୱର୍ ମାନାଙ୍କ୍‍ ଦାର୍ମାମ୍‌ ମାଡ଼ାନ୍‍ ସେଙ୍ଗେ ନିୟମ୍ ବାୟ୍‍ଦେ ବାତ୍‍ ମାଡ଼ତଣ୍ଡ୍ ଆଦ୍‍ ଇଞ୍ଜେ ପ୍ରକାଶ୍ ଆତ୍‍ତେ, ମେଣ୍ଡେ ଆଦ୍ ବିଷୟ୍‍ତେ ନିୟମ୍ ନୁ ବାବବାଦିଡ଼୍‍ ସାକ୍ଷି ଇଦୁତଡ଼୍‍,
ROM 3:22 ମାତର୍‍ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ାନ୍‍ ତଡ଼୍‍ ମାନାଡ଼୍‍ ଇଶ୍ୱର୍‌ତାଗ୍‍ ଦାର୍ମାମ୍‌‍ ଆତ୍‍ତାଡ଼୍‍, ଇଶ୍ୱର୍‍ ବେନଙ୍କ୍‍ବା ସପଟ୍‍ ମାଡ଼କଟ କ୍ରିଷ୍ଟନାଗ୍‍ ବିଶ୍ୱାସ୍‍ ମାଡ଼ମାନ୍ଦାନ୍‍ ସାରେତଡ଼୍‍କ୍‍ ଇଦ୍‍ ସୁଯୋଗ୍‍ ଇଦ୍‍ତଣ୍ଡ୍‍ ।
ROM 3:23 ସାର୍ରେତଡ଼୍ ତ ପାପ୍ ମାଡ଼୍‍ତଡ଼୍, ମେଣ୍ଡେ ଇଶ୍ୱର୍‌ତେ ଗୌରବ୍ ତାଗାଙ୍କ୍‍ ଜେକେ ଆତ୍‍ତଡ଼୍‍,
ROM 3:24 ମେଣ୍ଡେ ଅଡ଼୍‌ ବିନାମୁଲ୍ୟତେ ଅନ୍‌ ଅନୁଗ୍ରମାମେ ଆୟମ୍‌, କ୍ରିଷ୍ଟ ଜିସୁନାଗ୍ ବେନ୍ ମୁକ୍ତି ମିନ୍ଦେ, ଅଦିନ୍‌ତଡ଼୍ ଦାର୍ମାମ୍ ଆଦ୍‍ତଡ଼୍ ।
ROM 3:25 ଇଶ୍ୱର୍ ଜିସୁଙ୍କ୍‍ ଦାନ ମାଡ଼୍‍ତଣ୍ଡ୍‍, ବେଲାକି ଅନ୍‌‍ ଡଲ୍‌ତନ୍‌, ଅନାଗ୍‍ ବିଶ୍ୱାସ୍‍ ମାଡ଼ମାନ୍ଦା ନାରୁଡ଼ାଦ୍‍ ପାପ୍‍ କ୍ଷମା ଉପାୟ୍‍ ଆଦ୍‍ତେ । ଇଶ୍ୱର୍ ନିଜର୍‍ ଦାର୍ମାମ୍‌ ତଅତାନଙ୍କ୍ ଇଲା ମାଡ଼୍‍ତଣ୍ଡ୍ । ଇଶ୍ୱର୍ ଗାଡ଼୍‍ସ୍‍ ଆସ୍‍ ନାରୁଡ଼ାଦ୍‍ ମୁନେନ୍‍ ମାଡ଼୍‍ତେ ପାପ୍‍ ପୟଣ୍ଡ୍‍ ।
ROM 3:26 ମେଣ୍ଡେ ଇଞ୍ଜେତ୍‍ ଯୁଗ୍‍ତାଗ୍ ନିଜେତ୍ ଦାର୍ମାମ୍ ତଅତାନ୍ ମାୟ୍‍ଦିଙ୍କ୍ ଅଣ୍ଡ୍‌ ପାପ୍‍ କ୍ଷମାତାଦ୍‍ ନିୟମ୍‍ ମାଡ଼୍‍ତଣ୍ଡ୍, ବେଲାକି ଅଣ୍ଡ୍‌ ନିଜେ ଦାର୍ମାମ୍ ନୁ ଜିସୁ କ୍ରିଷ୍ଟନାଗ୍ ବିଶ୍ୱାସ୍‍ ମାଡ଼ାନଡ଼୍‍କ୍‍ ଦାର୍ମ୍ ନାରୁଡ଼୍ ଇଞ୍ଜ କେତିତଡ଼୍‍ ।
ROM 3:27 ଆଲେକେ ଗର୍ବ ବେଗେ ? ଆଦ୍ ଜେଏକେ ଆତ୍‍ତେ । ବାତ୍ ରକମ୍ ନିୟମ୍‍ତଡ଼୍ ? ବାତ୍ କ୍ରିୟାକର୍ମ୍‍ତାଦ୍ ନିୟମ୍‍ତଡ଼୍ ? ଇଲ୍‍ଲେ, ବିଶ୍ୱାସ୍‍ତାଦ୍ ନିୟମ୍‍ତଡ଼୍ ।
ROM 3:28 ମାମ୍‍ ନିଜାମ୍‍ ବୁଜେମ୍‍ ଆତ୍‍ତମ୍‍ ଯେ, ନାରୁଡ଼୍ କ୍ରିୟାକର୍ମ୍ ନିୟମ୍ ୱିଡ଼୍‍ସି ବିଶ୍ୱାସ୍‍ ତଡ଼୍ ଦାର୍ମାମ୍ ଲେକା ଆଦ୍‍ତଡ଼୍‍ ।
ROM 3:29 ଇଶ୍ୱର୍ କି ମାତର୍‌ ଯିହୁଦିଡ଼୍ ଇଶ୍ୱର୍ ? ଅଣ୍ଡ୍‌ ବାତ୍ ଅଣଯିହୁଦୀଡ଼୍ ଇଶ୍ୱର୍ ଆୟ୍‍ୟଣ୍ଡ୍ ? ହୋ, ଅଣଯିହୁଦୀ ନାରୁଡ଼୍‍ତାଦ୍ ମିକା ଇଶ୍ୱର୍ ।
ROM 3:30 ବାତେଙ୍କ୍ଇତ୍‍କେ ଇଶ୍ୱର୍ ତ ୱେରଣ୍ଡେ, ମେଣ୍ଡେ ଅଣ୍ଡ୍‌ ବିଶ୍ୱାସ୍‍ ତଡ଼୍ ଯିହୁଦୀ ନାରୁଙ୍କ୍ ନୁ ବିଶ୍ୱାସ୍‍ ତଡ଼୍ ଅଣଯିହୁଦି ନାରୁଙ୍କ୍ ଦାର୍ମାମ୍ ମାଡ଼ିତନ୍ ।
ROM 3:31 ଆଲେକେ ମାମ୍‍ମେ ବାତ୍ ବିଶ୍ୱାସ୍ ତଡ଼୍ ନିୟମ୍‍ତିଙ୍କ୍ ଲପ୍ ମାଡ଼ୁତାଡ଼୍ ? ଆଦ୍ ବେସୁଟ୍‌ ବା ଆୟ୍‍ମାକି, ବିଶ୍ୱାସ୍‍ ତଡ଼୍‍ ମାନାଡ଼୍ ନିୟମ୍‍ତିଙ୍କ୍ ସାୟେ ତିଆର୍ ମାଡ଼ୁତାଡ଼୍ ।
ROM 4:1 ଆଲେକେ ମେନ୍ଦୁଲ୍ ଲେକାମ୍ ମାନ୍‍ ଆନିଦାଦି ଅବ୍ରାହାମ୍‌ ବାତ୍ ପାଏମ୍ ଆତ୍‍ତଣ୍ଡ୍ ଇଞ୍ଜ ମାନାଡ଼୍ କେତିତାଡ଼୍‍ ?
ROM 4:2 ବାତେଙ୍କ୍ଇତ୍‍କେ ଅବ୍ରାହାମ୍‌ ଯଦି ପାଡ଼୍‍ୟି ମାଡ଼ି ଦାର୍ମାମ୍ ଆତ୍‍ତଣ୍ଡ୍, ଆଲେକେ ଅଣ୍ଡ୍‌ ଗର୍ବ ମାଡ଼ାନାଦ୍ କାରନ୍‍ ମିନ୍ଦେ; ଇତ୍‍କେ ଇଶ୍ୱର୍‌ତାଗ୍ ଆୟ୍‍ୟ ।
ROM 4:3 ଶାସ୍ତ୍ରତାଗ୍‍ ଲେକା ମିନ୍ଦେ, “ଅବ୍ରାହାମ୍‌ ଇଶ୍ୱର୍‌ତାଗ୍ ବିଶ୍ୱାସ୍ ମାଡ଼୍‍ତଣ୍ଡ୍, ମେଣ୍ଡେ ଆଦ୍ ଅଂକିଙ୍କ୍‌ ଦାର୍ମାମ୍‌ ମାଡ଼୍‍ତେ ।”
ROM 4:4 ବେନ ପାଡ଼୍‍ୟି ମାଡ଼ିତନ୍, ଅଂକିଙ୍କ୍‌ ଆଦ୍ ଅନ୍‌ ବେତନ୍ ଇସାପ୍‍ତେ ଦର୍‍କିତ୍‍, ମାତର୍‌ ଆଦ୍‍ ଅଂକିଙ୍କ୍‌ ଉପହାର୍‍ ଇନା ଦର୍‍କ ।
ROM 4:5 ଇତ୍‍କେ ବେନ ନିଜର୍‍ ପର ବିଶ୍ୱାସ୍‍ ମାଡ଼କଟ ଇଶ୍ୱର୍‌ତାଗ୍‍ ବିଶ୍ୱାସ୍‍ ମାଡ଼ିତଣ୍ଡ୍‍, ଆଦ୍‍ ଅନ୍‌‍ ଅପରାଦି‍ତିଙ୍କ୍‍ ୱିଡ଼୍‍ସି ତାନ୍‍ ବିଶ୍ୱାସ୍‍ତେ ସେଙ୍ଗେ ଅଂକିଙ୍କ୍‌ ଦାର୍ମାମ୍ ମାଡ଼ିତ୍‍ ।
ROM 4:6 ଇଦ୍‍ରକମ୍ ବେନ୍ ନାରୁନାଗ୍ ଇଶ୍ୱର୍ ପାଡ଼୍‍ୟିତିଙ୍କ୍ ଉଡ଼କଟ ଦାର୍ମିକତା ମାଡ଼ିତନ୍, ଦାଉଦ୍‍ ଗାଲା ଅଂକିଙ୍କ୍‌ ଦନ୍ୟ ଇଞ୍ଜ କେତିତଣ୍ଡ୍,
ROM 4:7 “ବେନଡ଼ାଦ୍ ଅପରାଦ୍‌ ସାର୍‍ରେ କ୍ଷମା ଆତ୍‍ତେ, ମେଣ୍ଡେ ବେନଡ଼୍ ପାପ୍ ସାର୍‍ରେ କ୍ଷମା ଆତ୍‍ତେ, ଅଡ଼୍‌ କାଡ଼୍‍ମାମ୍‍ ମାନ୍ଦାନ୍‍ ନାରୁଡ଼୍‍ ।
ROM 4:8 ପ୍ରବୁ ବେନ୍ ନାରୁଣ୍ଡ୍‍ତାଦ୍ ପାପ୍ ଇସାପ୍ ମାଡ଼ଣ୍ଡ୍, ଅଣ୍ଡ୍‌ ଦନ୍ୟ ।”
ROM 4:9 ଆଲେକେ ସୁନ୍ନତ୍ ନାରୁଡ଼୍‍କ୍ ଇଦ୍‍ରକମ୍ ଦନ୍ୟ ଇଞ୍ଜ କେତିତଡ଼୍‍, ବା ଅସୁନ୍ନତ ନାରୁଡ଼୍‍କ୍ ମିକା କେତିତଡ଼୍‍ ? ଆଦିଙ୍କ୍ ମାନାଡ଼୍ କେତିତାଡ଼୍‍, ଅବ୍ରାହାମ୍‌ତାଦ୍ ବିଶ୍ୱାସ୍ ଅଂକିଙ୍କ୍‌ ଦାର୍ମିକତା ମାଡ଼୍‍ତେ ।
ROM 4:10 ଇଦ୍‍ ବେସୁଟ୍‌ ଆସ୍‍ମାତ୍‍ତେ ? ଅବ୍ରାହାମ୍‌ ସୁନ୍ନତ୍ ଆତ୍‍ତେ ୱେୟେ ନା ଅସୁନ୍ନତ ମାତ୍‍ତେୱେଲେ ? ସୁନ୍ନତ୍ ଆତ୍‍ତେ ପେର୍କେ ଆୟ୍‍ୟ, ଇତ୍‍କେ ଅସୁନ୍ନତ ମାନ୍ଦାନ୍‍ୱେଲେ ।
ROM 4:11 ମେଣ୍ଡେ ଅଣ୍ଡ୍‌ ଅସୁନ୍ନତ ମାନ୍ଦାନ୍‍ ୱେଲେ ବିଶ୍ୱାସ୍ ସେଙ୍ଗେ ଦାର୍ମାମ୍‌‍ ଆସ୍ ଆଗେତ୍ ମୁଦ୍ରାନ୍ ଲେକାମ୍ ସୁନ୍ନତ୍ ଚିଏନ୍ନେ ପାଏମ୍ ଆତ୍‍ତଣ୍ଡ୍, ବେଲାକି ଅସୁନ୍ନତ ମାନ୍ଦାନ୍ ସାର୍‍ରେ ବିଶ୍ୱାସୀଡ଼୍ ଦାର୍ମାମ୍ ଇଞ୍ଜ କେତ୍‍ତାନ୍ ସେଙ୍ଗେ ଅଣ୍ଡ୍‌ ଅଡ଼ାଦ୍‌ ବାବାଲ୍ ଆଦ୍‍ତନ୍,
ROM 4:12 ବାବାଲ୍‍ ଅବ୍ରାହାମ୍‌ ସୁନ୍ନତ ଆୟ୍‍ୱେୱେଲେ ବେନ୍‍ ବିଶ୍ୱାସ୍‍ ତଅସ୍‍ମାତ୍‍ତଣ୍ଡ୍‍, ଯଦି ସୁନ୍ନତ ଆୟ୍‍ୱେମାନ୍ଦାନ୍‍ ନାରୁଡ଼୍‍ ନିଜର୍‍ ଜିୱୁଣ୍ଡ୍‍ତାଗ୍‍ ଆଦ୍‍ ରକ୍‍ମ୍‍ ବିଶ୍ୱାସ୍‍ ତଅତାନଙ୍କ୍‍ ପାର୍‍ଦ୍‍ତଡ଼୍‍, ଅବ୍ରାହାମ୍‌ ଅଡ଼୍‌‍କିଂଙ୍କ୍‍ ଗାଲା ବାବାଲ୍‍ ଆଦ୍‍ତଣ୍ଡ୍‍ ।
ROM 4:13 ବାତେଙ୍କ୍ଇତ୍‍କେ ଅବ୍ରାହାମ୍‌ ତାନ୍ ବଂଶତିଙ୍କ୍ ଜଗତ୍‍ତେ ଅଦିକାରି ଆଦ୍‍ଦାନ୍ ସେଙ୍ଗେ ପ୍ରତିଜ୍ଞା ନିୟମ୍ ତଡ଼୍ ଇୱେମାତ୍‍ତଡ଼୍, ମାତର୍ ବିଶ୍ୱାସ୍‍ତାଦ୍ ଦାର୍ମାମ୍ ସେଙ୍ଗେ ଇସ୍‍ମାତ୍‍ତଡ଼୍ ।
ROM 4:14 ବେନଡ଼୍‍ ନିୟମ୍‍ ପାଲନ୍‍ ମାଡ଼ିତଡ଼୍‍ ଅଡ଼୍‌ ମାତର୍‍ ଦାନ ପାଏମ୍‍ ଆଦ୍‍ତଡ଼୍‍, ଆଲେକେ ବିଶ୍ୱାସ୍ ଆଙ୍ଗ୍‍ଡ଼ାମ୍ ଆଦ୍‍ତେ ନୁ ପ୍ରତିଜ୍ଞା ଆସାମ୍ ଆଦ୍‍ତେ ।
ROM 4:15 ନିୟମ୍ ଇଁ ଇଶ୍ୱର୍‌ତିଙ୍କ୍‍ କପାମ୍ ମାଡ଼ିତ୍, ଇତ୍‍କେ ବେଗେ ନିୟମ୍ ଇଲ୍‍ଲେ, ଆଗେ ନିୟମ୍ ମାନେମ୍‍ ଆଦାନାଦ୍‍ ଗାଲା ଇଲ୍‍ଲେ ।
ROM 4:16 ଆଦିଙ୍କ୍ ଇଶ୍ୱର୍‌ତାଦ୍ ପ୍ରତିଜ୍ଞା ବିଶ୍ୱାସ୍‍ତେ ପର୍‍ର ତିଆର୍ ଆତ୍‍ତେ । ବେନଡ଼୍ ନିୟମ୍ ପାଲନ୍ ମାଡ଼ିତଡ଼୍, ମାତର୍ ଅଡ଼୍‌ ସେଙ୍ଗେ ଇଶ୍ୱର୍‌ତାଦ୍ ପ୍ରତିଜ୍ଞା ତିୟାର୍ ଆୟ୍‍ୟ । ଅବ୍ରାହାମ୍‌ତେ ଲେକାମ୍ ବିଶ୍ୱାସ୍ ମାଡ଼ମାନ୍ଦାନ୍ ସାର୍‍ରେ ନାରୁଡ଼୍ ସେଙ୍ଗେ ତିୟାର୍ ଆତ୍‍ତେ, ବାତେଙ୍କ୍ଇତ୍‍କେ ଅବ୍ରାହାମ୍ ଅଡ଼୍‌ ଆତ୍ମିକ୍‍ ବାବାଲ୍ ।
ROM 4:17 ଇଦ୍ ବିଷୟ୍‍ତେ ଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ, “ନିକିଂଙ୍କ୍ ମାମ୍‍ମେ ନାର୍‍ଗେ ବଂଶତ୍‍ ବାବାଲ୍ ମାଡ଼ୁତମ୍ ।” ଇଶ୍ୱର୍‌ତେ କଣ୍ଡେତାଗ୍ ଇଦ୍ ପ୍ରତିଜ୍ଞା ଟିକ୍ ମାତ୍‍ତେ, ବାତେଙ୍କ୍ଇତ୍‍କେ ବେନ୍ ଇଶ୍ୱର୍‌ତିଙ୍କ୍ ଅବ୍ରାହାମ୍ ବିଶ୍ୱାସ୍ ମାଡ଼ମାତ୍‍ତଣ୍ଡ୍, ଆ ଇଶ୍ୱର୍ ବାକ୍ୟ ଡଲ୍‍ତଡ଼୍‍କିଂଙ୍କ୍ ଜିୱେ ମାଡ଼ିତ୍ ନୁ ବାତ୍‍ଇଲ୍‍ୱାଗ୍‍ ସାର୍‍ରେ ବିଷୟ୍ ତିୟାର୍ ମାଡ଼ିତ୍ ।
ROM 4:18 ଆଶେ ମାଡ଼ାନଙ୍କ୍ ବାତ୍ ଇଲ୍‍ୱେ ମାତ୍‍କେ ମିକା ଅବ୍ରାହାମ୍ ଆଶେ ମାଡ଼ି ବିଶ୍ୱାସ୍ ମାଡ଼ିମାତ୍‍ତଣ୍ଡ୍ । ଆଦିଙ୍କ୍ ଅଣ୍ଡ୍‌ ନାର୍‍ଗେ ବଂଶତ୍‍ ବାବାଲ୍ ଆତ୍‍ତଣ୍ଡ୍, ବାତେଙ୍କ୍ଇତ୍‍କେ ଶାସ୍ତ୍ର ଲେକାମ୍ ଅଂକିଙ୍କ୍‌ ପ୍ରତିଜ୍ଞା ଦର୍‍କି ମାତ୍‍ତେ; “ମିଇ ବଂଶତଡ଼୍ ମୟଲ୍‍ତାଗ୍ ମାନ୍ଦାନ୍ ଉକାକିନ୍ ଲେକାମ୍ ନାର୍‍ଗେ ଆଦ୍‍ତଡ଼୍ ।”
ROM 4:19 ଅଂକିଙ୍କ୍‌ ଆସୁଟେ ଶହେ ଏଣ୍ଡ୍‍କ୍ ଆସ୍ ମାତ୍‍ତେ । ବାତେଙ୍କ୍‍ଇତ୍କେ ତାନ୍ ମୁୟ୍‍ତେ ମେନ୍ଦୁଲ୍‍ତିଙ୍କ୍ ଉଡ଼ି, ସାରା ଯେ ମେଣ୍ଡେ ମାର୍‌ ଜନମ୍ ମାଡ଼ାଙ୍କ୍ ପାର୍‍ୱ, ଇଦ୍ ପୁଞ୍ଜ୍, ଅନାଦ୍‌ ବିଶ୍ୱାସ୍ ଦୁର୍ବଲ୍ ଆୟ୍‍ୟ ।
ROM 4:20 ଅଣ୍ଡ୍‌ ତାନ୍ ବିଶ୍ୱାସ୍‍ତାଗାଙ୍କ୍ ୱେରେ ଆୟ୍‍ୟଣ୍ଡ୍, କି ଇଶ୍ୱର୍‌ତାଦ୍ ପ୍ରତିଜ୍ଞାତିଙ୍କ୍ ଅବିଶ୍ୱାସୀ ମାଡ଼ଣ୍ଡ୍ । ବିଶ୍ୱାସ୍ ଅଂକିଙ୍କ୍‌ ଶକ୍ତି ଇତ୍‍ତେ ନୁ ଅଣ୍ଡ୍‌ ଇଶ୍ୱର୍‌ତାଦ୍ ପ୍ରଶଂସା ମାଡ଼୍‍ତଣ୍ଡ୍ ।
ROM 4:21 ଇଶ୍ୱର୍ ବେନ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଅଣ୍ଡ୍‌ ଆଦ୍ ପାଲନ୍ ମାଡ଼ିତନ୍ ଇଞ୍ଜ ଅନାଦ୍‌ ଗାଟି ବିଶ୍ୱାସ୍ ମାତ୍‍ତେ ।
ROM 4:22 ଆଦିନ୍ ସେଙ୍ଗେ ଅନାଦ୍‌ ବିଶ୍ୱାସ୍‍ତେ ମାୟ୍‍ଦିଂଙ୍କ୍ ଅବ୍ରାହାମ୍ ଇଶ୍ୱର୍‌ତେ ତଡ଼୍ ଦାର୍ମାମ୍ ଆସ୍ ଲେକାଆସ୍‍ ମାତ୍‍ତଣ୍ଡ୍ ।
ROM 4:23 “ଦାର୍ମାମ୍ ଆଦାନାଦ୍,” ଶାସ୍ତ୍ରତାଗ୍ ଗଟ୍ ମାତର୍ ଅବ୍ରାହାମ୍‌ତେ ସେଙ୍ଗେ ସାୟେ, ଆଦ୍ ଆୟ୍‍ୟ ।
ROM 4:24 ଇତ୍‍କେ ମାନାଡ଼୍ ଗାଲା ଇଶ୍ୱର୍‌ତିଙ୍କ୍ ବିଶ୍ୱାସ୍ ମାଡ଼୍‍କେ ଦାର୍ମାମ୍ ନାରୁଡ଼୍ ଲେକାମ୍ ଆଦ୍‍ତାଡ଼୍ । ଇଶ୍ୱର୍ ପ୍ରବୁ ଜିସୁ କ୍ରିଷ୍ଟଙ୍କ୍ ମେଣ୍ଡେଅନ୍‌‍ଦାମ୍‍ ଜିୱେ ମାଡ଼୍‍ତଣ୍ଡ୍ ।
ROM 4:25 ଅଣ୍ଡ୍‌ ପ୍ରବୁ ଜିସୁ ମାନ୍‍ ପାପ୍ ସେଙ୍ଗେ ଡଲିମାତ୍‍ତଣ୍ଡ୍ ନୁ ଇଶ୍ୱର୍‌ତାଗ୍ ମାକିଂଙ୍କ୍ ନିର୍ଦୋଷ୍‌ ମାଡ଼ାନଙ୍କ୍ ମେଣ୍ଡେଅନ୍‌ଦାମ୍‍ ଜିୱେ ଆସ୍‍ମାତ୍‍ତଣ୍ଡ୍ ।
ROM 5:1 ଇଞ୍ଜେ ବିଶ୍ୱାସ୍ ତଡ଼୍ ମାନାଡ଼୍ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆତ୍‍ତାଡ଼୍ ନୁ ପ୍ରବୁ ଜିସୁ କ୍ରିଷ୍ଟନ୍ ସେଙ୍ଗେ ଇଶ୍ୱର୍ ତଡ଼୍ ମାୟାଦ୍‌ ଶାନ୍ତି ତିଆର୍‍ ଆତ୍‍ତେ ।
ROM 5:2 ଅଣ୍ଡ୍‌ ଜିସୁ ମାନାଦ୍‍ ବିଶ୍ୱାସ୍‍ତେ ମାୟ୍‍ଦିଂଙ୍କ୍ ଇଞ୍ଜେ ମାନ୍‍ ଜିୱୁଣ୍ଡ୍‍ତାଗ୍ ଇଶ୍ୱର୍‌ତାଦ୍ ଅନୁଗ୍ରମାମେ ଆୟମ୍‌ ନେଙ୍ଗାନଙ୍କ୍‍ ପାର୍‍ତ୍‍ତମ୍‍ । ଆଦିଙ୍କ୍ ଇଶ୍ୱର୍‌ତେ ଗୌରବ୍‍ତାଗ୍ ବାଗ୍ ଆଦାନାଦ୍ ଆଶେ ମାନାଙ୍କ୍‍ ୱେଡ଼୍‍କ୍‍ ମାଡ଼ି ନେଃଏତେ ।
ROM 5:3 ମାତର୍‍ ଆଦେ ଆୟ, ସାର୍‍ରେ ପ୍ରକାର୍‍ ଦୁଃକା କଷ୍ଟ ଆତ୍‍କେ ଗାଲା ମାନାଡ଼୍ ୱେଡ଼୍‍କ୍‍ ଆଦୁତାଡ଼୍, ବାତେଙ୍କ୍ଇତ୍‍କେ ଦାନ୍ଦେ ଆୟ୍‍ୟକଟ କଷ୍ଟ ସହ୍ୟ ମାଡ଼୍‍କେ ମନ୍‍ତାଗ୍ ଗାଡ଼୍‍ସ୍ ୱାଦ୍‍ତେ ।
ROM 5:4 ଗାଡ଼୍‍ସ୍‍ତାଗାଙ୍କ୍ ସାୟେତାଦ୍ ଚାଲିଚଲନ୍ ନୁ ସାୟେତାଦ୍ ଚାଲିଚଲନ୍‍ ତାଗାଙ୍କ୍ ଆଶେ ପୁଟିତ୍ ।
ROM 5:5 ଆଶେ ମାନାଙ୍କ୍‍ ନିରାଶ୍‍ ଆଦାନଙ୍କ୍ ଇୱ, ବାତେଙ୍କ୍ଇତ୍‍କେ ଇଶ୍ୱର୍ ମାକିଂଙ୍କ୍ ପବିତ୍ର ଆତ୍ମା ଇସ୍ ମାନ୍‍ ଜିୱୁଣ୍ଡ୍‍ତିଙ୍କ୍ ତାନ୍ ପ୍ରେମତଡ଼୍ ବର୍ତ୍ତି ମାଡ଼୍‍ତଣ୍ଡ୍ ।
ROM 5:6 ମାନାଙ୍କ୍‍ ବେନ ସାହାଯ୍ୟମାଡ଼ାଙ୍କ୍‍ ଇଲ୍‍ୱେୱେଲେ ଇଶ୍ୱର୍ ଟିକ୍‍ମାଡ଼୍‍ତେ ସମୟ୍‍ତେ କ୍ରିଷ୍ଟ ପାପୀଡ଼୍ ସେଙ୍ଗେ ଡଲ୍‍ତଣ୍ଡ୍ ।
ROM 5:7 ଦାର୍ମ୍ ନାରୁଡ଼୍ ସେଙ୍ଗେ ମେଣ୍ଡେଅର୍‍ତୁଣ୍ଡ୍ ନିଜର୍‍ ଜିୱୁଣ୍ଡ୍ ଇଦାନାଦ୍‍ ଉଡ଼ାନଙ୍କ୍ ଆୟ୍‍ୟ । ଆତ୍‍କେ ସାୟେତ୍‍ ନାରୁଣ୍ଡ୍‍ ସେଙ୍ଗେ ବେନବା ଡଲାନଙ୍କ୍ ପାର୍‍ଦ୍‍ତଣ୍ଡ୍ ।
ROM 5:8 ଇତ୍‍କେ ମାନାଡ଼୍ ପାପି ମାତ୍‍ତେୱେଲେ ଜିସୁ ମାନ୍‍ ସେଙ୍ଗେ ନିଜର୍‍ ଜିୱୁଣ୍ଡ୍ ଇତ୍‍ତନ୍ । ଇଦିନ୍‍ ତଡ଼୍ ଇଶ୍ୱର୍ ମାନାଙ୍କ୍‍ ବେସର୍ ପ୍ରେମ ମାଡ଼ୁତଣ୍ଡ୍, ଆଦ୍ ଅଣ୍ଡ୍‌ ତଅତଣ୍ଡ୍ ।
ROM 5:9 କ୍ରିଷ୍ଟ ଜିୱୁଣ୍ଡ୍ ଇତ୍‍ତାଙ୍କ୍ ଇଶ୍ୱର୍ ମାନାଙ୍କ୍‍ ଦାର୍ମାମ୍ ନାରୁଡ଼୍ ଲେକାମ୍ ଗ୍ରହନ୍ ମାଡ଼୍‍ତଣ୍ଡ୍ । ଆଲେକେ ଇଶ୍ୱର୍‌ତେ କପାମ୍‍ତାଗାଙ୍କ୍ ମାନାଙ୍କ୍‍ ରକ୍ଷା ମାଡ଼ାନଙ୍କ୍ ବେସର୍ ନାର୍‍ଗେ ମନ୍ ମାଡ଼୍‍ତଣ୍ଡ୍ ।
ROM 5:10 ମାନାଡ଼୍ ଇଶ୍ୱର୍‌ତେ ଶତ୍ରୁଡ଼୍ ମାନ୍ଦାନ୍‍ୱେଲେ ଅନ୍‌ ମାର୍‌ ମାନ୍‍ ସେଙ୍ଗେ ଜିୱୁଣ୍ଡ୍ ଇତ୍‍ତନ୍, ଆଦିଙ୍କ୍ ଇଶ୍ୱର୍ ତଡ଼୍ ମାନାଡ଼୍ ମେଣ୍ଡଅନ୍‌‍ଦାମ୍ କାୟ୍‍ଲ୍‍ତାଡ଼୍ । ଇଶ୍ୱର୍ ତଡ଼୍ କାୟ୍‍ଲ୍‍ତେ ପେର୍‍କେ ଇଞ୍ଜେ କ୍ରିଷ୍ଟନ୍ ଜିୱୁଣ୍ଡ୍ ତଡ଼୍ ପରିତ୍ରାଣ୍ ପାଏମ୍ ଆଦ୍‍ଦାନ୍ ସେଙ୍ଗେ ମାନାଡ଼୍ ବେସର୍ ନାର୍‍ଗେ ସୁଯୋଗ୍ ପାଏମ୍ ଆୟ୍‍ୱାଡ଼୍ ?
ROM 5:11 ମାତର୍ ଆସରେ ଆୟ୍‍ୟ, ପ୍ରବୁ ଜିସୁ କ୍ରିଷ୍ଟନ୍‍ ତଡ଼୍ ଇଶ୍ୱର୍ ବେନ୍ ସାର୍‍ରେ ପାଡ଼୍‍ୟି ମାଡ଼୍‍ତଣ୍ଡ୍, ଆଦିନ୍ ସେଙ୍ଗେ ମାନ୍‍ ଜିୱୁଣ୍ଡ୍ ଗାଟି ୱେଡ଼୍‍କେତେ ବର୍ତ୍ତି ଆତ୍‍ତେ । ଅଣ୍ଡ୍‌ ଜିସୁ ମାନାଙ୍କ୍‍ ଇଶ୍ୱର୍ ତଡ଼୍ ମେଣ୍ଡଅନ୍‌‍ଦାମ୍ କାଲ୍‍ପ୍‍ତଣ୍ଡ୍ ।
ROM 5:12 ବେସୁଟ୍‌ ଆଦମ୍‍ ପାପ୍‍ ମାଡ଼୍‍ତଣ୍ଡ୍‍ ଜଗତ୍‍ତାଗ୍‍ ପାପ୍‍ ନେଙ୍ଗ୍‍ତେ, ଆଦମ୍‍ତେ ପାପ୍‍ ଡଲାନାଦ୍‍ ତାତ୍‍ତେ, ସାରେତଡ଼୍‍ ପାପ୍‍ ମାଡ଼୍‍ତାଙ୍କ୍‍ ଡଲାନାଦ୍‍ ସାର୍ରେ ନାରୁଣ୍ଡ୍‍ ଜାତ୍‍ତିଙ୍କ୍‍ ପୟ୍‍ତେ ।
ROM 5:13 ନିୟମ୍ ଇଦାନ୍ ମୁନେଙ୍କ୍ ଜଗତ୍‍ତାଗ୍ ପାପ୍ ମାତ୍‍ତେ; ଇତ୍‍କେ ନିୟମ୍ ଇଲ୍‍ୱେ ୱେଲେ ପାପ୍‍ତାଦ୍ ଇସାପ୍ ନେଃଏୱକଟ ମାତ୍‍ତଡ଼୍ ।
ROM 5:14 ଆଦମ୍‍ତାଗାଙ୍କ୍ ମୋଶାନ୍‌ ଦିନାମ୍ ଏୱୁନା ବେନ ନିୟମ୍‍ତିଙ୍କ୍‍ ତୁଲି ପାପ୍ ମାଡ଼କଟ୍ ମାତ୍‍କେ ମିକା, ସାର୍ରେତଡ଼୍ ଡଲ୍‍ତଡ଼୍ । ବେନନାଦ୍ ୱାଦାନାଦ୍ ମାତ୍‍ତେ, ଆଦମ୍ ଅନ୍‌‍ୱାଦ୍ ଅଣ୍ଡୟ୍‌‍ ମକମ୍‌ ଲେକାମ୍;
ROM 5:15 ଇତ୍‍କେ ଇଡ଼୍ ଇର୍‍ୱୁଡ଼୍ ଲୋପେ ନାର୍‍ଗେ ୱେକ୍‍ୱେକ୍‍ ମିନ୍ଦେ । ଆଦମ୍‍ତାଦ୍ ପାପ୍ ଇଶ୍ୱର୍‌ତାଦ୍ ମୂଲ୍ୟତେ ଇତ୍‍ତାଦ୍ ଶକ୍ତି ସାମାନ୍ ଆୟ୍‍ୟ । ୱେରଣ୍ଡ୍ ନାରୁଣ୍ଡ୍‍ତାଦ୍ ପାପ୍ ମାୟ୍‍ଦିଙ୍କ୍ ନାର୍‍ଗେ ନାରୁଡ଼୍ ଡଲ୍‍ତଡ଼୍ । ଇତ୍‍କେ ଇଶ୍ୱର୍ ତାନ୍ ବେଡ଼୍‍ୟାଦ୍‍ ଅନୁଗ୍ରହତେ, ମେଣ୍ଡେଅର୍‍ତୁଣ୍ଡ୍ ନାରୁଣ୍ଡ୍‍, ପ୍ରବୁ ଜିସୁ କ୍ରିଷ୍ଟନ୍‍ ତଡ଼୍ ନାରୁଡ଼୍ ସେଙ୍ଗେ ବେନ୍ ଦାନତାଦ୍ ନିୟମ୍ ମାଡ଼୍‍ତଣ୍ଡ୍, ଆଦ୍ ଗାଟି ଶକ୍ତି ।
ROM 5:16 ୱେରଣ୍ଡ୍ ନାରୁଣ୍ଡ୍‍ତେ ପାପାମ୍ ସେଙ୍ଗେ ନାରୁଡ଼୍ ବିଚାର୍ ଆସ୍ ଦଷି ଆତ୍‍ତଡ଼୍‍; ଇତ୍‍କେ ନାର୍‍ଗେ ନାରୁଡ଼୍‍ତେ ନାର୍‍ଗେ ପାପାମ୍‍ ସେଙ୍ଗେ ନୁ କ୍ଷମା ପାଏମ୍ ଆଦ୍‍ଦାନ୍ ସେଙ୍ଗେ ବାତ୍‍ବା ଯୋଗ୍ୟତା ଇଲ୍‍ୱେ ମାତ୍‍କେ ମିକା, ଇଶ୍ୱର୍‌ତାଦ୍ ଆଦ୍ ଦାନ ସେଙ୍ଗେ, ଇଞ୍ଜେ ନାରୁଡ଼୍ ନିର୍ଦୋଷ୍ ଆଦାନଙ୍କ୍ ପାର୍‍ଦ୍‍ତଡ଼୍ ।
ROM 5:17 ଆଗେକ୍‍ବା ୱେରଣ୍ଡ୍ ନାରୁଣ୍ଡ୍‍ତାଦ୍ ପାପ୍ ମାୟ୍‍ଦିଙ୍କ୍, ଡଲ୍‍ନାଦ୍ ନିୟମ୍ ତିୟାର୍ ଆତ୍‍ତେ; ଇତ୍‍କେ ମେଣ୍ଡେଅର୍‍ତୁଣ୍ଡ୍ ଇତ୍‍କେ ଜିସୁ କ୍ରିଷ୍ଟ ବାତ୍ ମାଡ଼୍‍ତଣ୍ଡ୍, ଆଦ୍ ବେସର୍ ମହାନ୍ । ବେନ୍ ସାର୍ରେତଡ଼୍ ଇଶ୍ୱର୍‌ତାଦ୍ ନାର୍‍ଗେ ଅନୁଗ୍ରହ ମାୟ୍‍ଦିଙ୍କ୍ ବିନା ମୂଲ୍ୟତେ ଇଶ୍ୱର୍‌ତେ ବକେତ୍ ଦାର୍ମାମ୍ ଆଦ୍‍ତନ୍, ଅଡ଼୍‌ କ୍ରିଷ୍ଟନ୍ ତଡ଼୍ ଜିଡ଼ି ଜିୱୁଣ୍ଡ୍ ବାଦ୍‍କିତଡ଼୍ ।
ROM 5:18 ୱେରନାଦ୍ ପାପାମ୍ ବେଲା ସାର୍‍ରେ ଜଗତ୍‍ତିଙ୍କ୍ ଦଣ୍ଡ୍ ତାତ୍‍ତେ, ଆଦେରକମ୍ ୱେରନାଦ୍ ଦାର୍ମାମ୍ ସାର୍‍ରେ ନାରୁଡ଼୍ ଜାତି ସେଙ୍ଗେ ମୁକ୍ତି ନୁ ପୁନାଦ୍‍ ଜିୱୁଣ୍ଡ୍‍ ତାସ୍‍ଇତ୍‍ତେ ।
ROM 5:19 ୱେରନାଦ୍ କାରାପ୍ ବେଲା ସାର୍ରେତଡ଼୍‍କିଂଙ୍କ୍ ପାପାମ୍ ମାଡ଼୍‍ତେ, ଆଦେରକମ୍ ୱେରନାଦ୍ ଦାର୍ମାମ୍‌ ସେଙ୍ଗେ ସାର୍ରେତଡ଼୍ ଇଶ୍ୱର୍‌ତାଗ୍ ଦାର୍ମାମ୍ ଆଦ୍‍ତଡ଼୍ ।
ROM 5:20 ନିୟମ୍ ମାଡ଼୍‍ତାଙ୍କ୍ ପାପ୍‍ ମାଡ଼୍‍ତାୱୁ ତଅନ୍‌ଦ୍‍ତେ । ଇତ୍‍କେ ପାପାମ୍‍ ପେର୍ସାନ୍‍ ସାଙ୍ଗେ ସାଙ୍ଗେ ଇଶ୍ୱର୍‌ତାଦ୍ ଅନୁଗ୍ରହ ଗାଲା ନାର୍‍ଗେ ଆତ୍‍ତେ ।
ROM 5:21 ପାପ୍ ବେଲା ଡଲ୍‍ନାଦ୍ ତଡ଼୍ ନିଜର୍‍ ଅଦିକାର୍‌ ତିୟାର୍‍ ମାଡ଼ିମାତ୍‍ତେ, ଆଦେରକମ୍ ଇଶ୍ୱର୍‌ତାଦ୍ ଅନୁଗ୍ରହ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ମାନାଙ୍କ୍‍ ଦାର୍ମାମ୍ ମାଡ଼ି ସାରେଦିନାତ୍ ଜିୱୁଣ୍ଡ୍ ଇଦ୍‍ତେ ।
ROM 6:1 ଆଲେକେ ବାତ୍ କେତିତାଡ଼୍‍ ? ଇଶ୍ୱର୍‌ତାଦ୍‍ ଅନୁଗ୍ରହ ମେଣ୍ଡେ ନାର୍‍ଗେ ଆଦ୍‍ତେ ଇଞ୍ଜ ମାନାଡ଼୍ ବାତ୍ ପାପ୍‍ତାଗ୍‍ ବାଦ୍‍କିତାଡ଼୍ ?
ROM 6:2 ବେସୁଟ୍‌ ଆୟ୍‍ମାକି । ପାପ୍‍ ସେଙ୍ଗେ ମାନାଡ଼୍ ଡଲ୍‍ତାଡ଼୍, ଆଗେ ମେଣ୍ଡେ ବେଲା ବାଦ୍‍କିତାଡ଼୍ ?
ROM 6:3 ମିଡ଼୍ ପୁତ୍‍ତିଡ଼୍, ଏର୍‍ ଦୀକ୍ଷା ଅସ୍ କ୍ରିଷ୍ଟ ଜିସୁନ୍ ତଡ଼୍ କାୟ୍‍ଲି ମାନାଡ଼୍ ଅନ୍‌ ଡଲ୍‍ତାଗ୍ ଗାଲା ପାଲ୍‍କ୍ ଆତ୍‍ତାଡ଼୍ ।
ROM 6:4 ଏର୍‍ ମୁଡ଼୍‍ନ୍ଦି ମାନାଡ଼୍ ଅନ୍‌ ଡଲ୍‍ତାଗ୍ ପାଲ୍‍କ୍ ଆସ୍ ଅନ୍‌ ତଡ଼୍ ସମାଦି ପାଏମ୍ଆତ୍‍ତାଡ଼୍ । ଅଣ୍ଡ୍‌ ବେଲା ବାବାନ୍ ଗୌରବ୍ ଶକ୍ତି ତଡ଼୍ ମେଣ୍ଡଅନ୍‌‍ଦାମ୍ ଜିୱେ ଆତ୍‍ତଣ୍ଡ୍, ମାନାଡ଼୍ ଗାଲା ଅନ୍‌ ସେଙ୍ଗେ ପୁନେ ଜିୱୁଣ୍ଡ୍ ବାଦ୍‍କାନଙ୍କ୍ ପାର୍‍ଦ୍‍ତାଡ଼୍ ।
ROM 6:5 ବେଲା ମାନାଡ଼୍ ଡଲ୍‍ତାଗ୍ ପାଲ୍‍କ୍ ଆସ୍ ଅନ୍‌ ତଡ଼୍ ୱେରଡ଼୍ ଆତ୍‍ତାଡ଼୍, ଅନାଦ୍‌ ମେଣ୍ଡେଅନ୍‌‍ଦାମ୍‍ ଜିୱେ ଆତ୍‍ତାଗ୍ ଗାଲା ଅଣ୍ଡୟ୍‌ ଆସ୍ ମେଣ୍ଡଅନ୍‌‍ଦାମ୍ ଜିୱୁଣ୍ଡ୍ ପାଏମ୍ ଆଦ୍‍ତାଡ଼୍ ।
ROM 6:6 ମାନାଡ଼୍ ପୁତ୍‍ତାଡ଼୍, କ୍ରିଷ୍ଟନ୍ ତଡ଼୍ କ୍ରୁଶତ୍ ପର୍‍ର ମାନ୍‍ୱାଦ୍ ପାଃନ୍ତେ ଅବ୍ୟାସ୍‍ ଡଲିଆତ୍‍ତେ । ଆଦିଙ୍କ୍ ମାନ୍‍ ପାପ୍‍ ନଷ୍ଟ ଆତ୍‍ତେ ନୁ ମାନାଡ଼୍ ପାପାମ୍‍ ଦାସତାଗାଙ୍କ୍ ମୁକ୍ତି ପାଏମ୍ ଆତ୍‍ତାଡ଼୍,
ROM 6:7 ବାତେଙ୍କ୍ଇତ୍‍କେ ନାରୁଡ଼୍ ଡଲ୍‍କେ, ପାପ୍‍ତାଗାଙ୍କ୍ ମୁକ୍ତି ପାଏମ୍ ଆଦ୍‍ତନ୍ ।
ROM 6:8 ମାନାଡ଼୍ ଜିସୁନ୍‍ ତଡ଼୍ ଡଲ୍‍ତାଙ୍କ୍, ଅନ୍‌ ତଡ଼୍ ଗାଲା ଜିୱୁଣ୍ଡ୍ ପାଏମ୍ ଆଦ୍‍ତମ୍ ଇଞ୍ଜ ବିଶ୍ୱାସ୍ ମାଡ଼ୁତାଡ଼୍ ।
ROM 6:9 ମାନାଡ଼୍ ପୁତ୍‍ତାଡ଼୍, କ୍ରିଷ୍ଟ ଡଲ୍‍ତାଗାଙ୍କ୍ ମେଣ୍ଡଅନ୍‌‍ଦାମ୍ ଜିୱୁଣ୍ଡ୍ ଆତ୍‍ତାଙ୍କ୍, ଅଣ୍ଡ୍‌ ମେଣ୍ଡେ ବେସୁଟ୍‌ ଡଲନ୍ । ଅନ୍‌ ପର୍‍ର ମେଣ୍ଡେ ଡଲ୍‍ନାଦ୍ ରାଜ୍ ମାଡ଼େ ପାର୍‍ୱ ।
ROM 6:10 ଅଣ୍ଡ୍‌ ବେଲା ଡଲ୍‍ତଣ୍ଡ୍, ଆଦିନ୍ ତଡ଼୍ ପାପ୍‍ତାଦ୍ ଶକ୍ତିତାଗାଙ୍କ୍ ଅଣ୍ଡୟ୍‌‍ଦାମ୍ ପେୟିସ୍ ଆତ୍‍ତଣ୍ଡ୍ । ଅଣ୍ଡ୍‌ ଇଞ୍ଜେ ବେନ୍ ଜିୱୁଣ୍ଡ୍ ବାଦ୍‍କୁତଣ୍ଡ୍, ଆଦ୍ ଇଶ୍ୱର୍ ତଡ଼୍ କାୟ୍‍ଲ୍‍ତେ ଜିୱୁଣ୍ଡ୍ ।
ROM 6:11 ଆଦେରକମ୍ ମିଡ଼୍ ଗାଲା ପାପ୍‍ତାଗ୍ ଡଲ୍‍ତିଡ଼୍ ଇଞ୍ଜ ମନେମାଡ଼ାଟ୍ । ଇଞ୍ଜେ ମିଡ଼୍ କ୍ରିଷ୍ଟ ଜିସୁନ୍ ତଡ଼୍ ଜିୱୁଣ୍ଡ୍‍ତାଗ୍ ଇଶ୍ୱର୍ ତଡ଼୍ କାୟ୍‍ଲ୍‍ତିଡ଼୍ ।
ROM 6:12 ଆଦିନ୍‌ମାୟ୍‍ଦିଙ୍କ୍‍ ମିୟାଦ୍ ଡଲ୍‍ତେ ମେନ୍ଦୁଲ୍ ପର୍‍ର ପାପ୍‍ ମେଣ୍ଡେ ରାଜ୍ ମାଡ଼୍‍ମାକି; ମେଣ୍ଡେ ମିଡ଼୍ ବାତ୍‍ବା ମେନ୍ଦୁଲ୍ ଲାଲ୍‍ସା ମାଡ଼୍‍ମାଟ୍ ।
ROM 6:13 ମିଡ଼୍ ନିଜେତିଙ୍କ୍ ବାତ୍‍ଆଇ ପାପ୍‌ ଗାର୍‍ରେ ସର୍ପା ଆସ୍ କାରାପ୍ ପାଡ଼୍‍ୟି ମାଡ଼ାନ୍ ନାରୁଣ୍ଡ୍‍ ଲେକାମ୍ ବ୍ୟବହାର୍‌ ଆୟ୍‍ମାଟ୍ । ବେଲାନ୍ ଡଲ୍‍ତାଗାଙ୍କ୍ ରକ୍ଷା ପାଏମ୍ ଆସ୍ ଜିୱୁଣ୍ଡ୍ ପାଏମ୍ ଆସ୍‍ ମାନ୍ଦାନ୍ ମାୟ୍‍ଦିଙ୍କ୍ ନିଜେ ନିଜେତିଙ୍କ୍ ସାରେ ଇଶ୍ୱର୍‌ତାଗ୍ ସର୍ପା ଆୟ୍‍ମୁଟ୍ ।
ROM 6:14 ବାତେଙ୍କ୍‍ଇତ୍‍କେ ପାପ୍‌ ମିଇ ପର୍‍ର ରାଜ୍ ମାଡ଼୍‍ମାକି । ମିଡ଼୍ ମେଣ୍ଡେ ନିୟମ୍ ଅଦିନ୍‌ତାଗ୍ ଇଲିଡ଼୍ । ଇତ୍‍କେ ଇଶ୍ୱର୍‌ତେ ଅନୁଗ୍ରମାମେ ଆୟମ୍‌ ମିନ୍ଦେଡ଼ି ।
ROM 6:15 ଆଲେକେ ମାନାଡ଼୍ ନିୟମ୍ ଆଦିନ୍ ଆୟ୍‍ୟକଟ ଇଶ୍ୱର୍‌ତାଦ୍ ଅନୁଗ୍ରହ ପାଏମ୍ ଆତ୍‍ତାଡ଼୍ ଇଞ୍ଜ ବାତ୍ ପାପାମ୍ ମାଡ଼ମାନ୍‍ତାଡ଼୍ ? ଆଦ୍‍ ବେସୁଟ୍‌ ଆୟ୍‍ମାକି !
ROM 6:16 ମିଡ଼୍ ନିଜାମ୍ ପୁତ୍‍ତିଡ଼୍, ଯଦି ମିଡ଼୍ ବେନନ୍ ବୁସାଗଟ୍‍ତାଗ୍‍ ମାନେମ୍‍ ଆସ୍ ଅନ୍‌‍ୱାଦ୍ ସାରେ ଗଟିଙ୍କ୍‍ ପାଳନ୍ ମାଡ଼ୁତିଡ଼୍, ଆଲେକେ ମିଡ଼୍ ଅନ୍‌ ଦାସ । ଯଦି ପାପ୍‌ତେ ଦାସ ଆଦ୍‍ତିଡ଼୍, ଇଦିନାଦ୍ ପରିଣାମ୍ ଡଲ୍‍ନାଦ୍; ଯଦି ଦାର୍ମାମ୍‌ତେ ଦାସ ଆଦ୍‍ତିଡ଼୍, ଆଲେକେ ଜିୱୁଣ୍ଡ୍ ପାଏମ୍ ଆଦ୍‍ତିଡ଼୍ ।
ROM 6:17 ଇତ୍‍କେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦୁତାନ୍, ଯଦି ମିଡ଼୍ ଅଣ୍ଡ୍‌‍ଦିନ୍ ପାପ୍‌ତେ ଦାସ ମାତ୍‍ତିଡ଼୍, ମିଡ଼୍ ଇଞ୍ଜେ ସୁସମାଚାର୍‍ତାଗାଙ୍କ୍ ନାଡ଼୍‍ସି ମାନ୍ଦାନ୍ ସତ୍‍ତିଙ୍କ୍ ହୃଦୟ୍‍ତଡ଼୍‍ ପାଲନ୍ ମାଡ଼ୁତିଡ଼୍ ।
ROM 6:18 ମିଡ଼୍ ପାପ୍‌ତାଗାଙ୍କ୍ ମୁକ୍ତି ଆସ୍ ଦାର୍ମାମ୍‌ତେ ଦାସ ଆତ୍‍ତିଡ଼୍ ।
ROM 6:19 ମିୟାଦ୍ ନିତ୍‍ଦିନେତ୍ ଦୁର୍ବଲ୍‍ ସେଙ୍ଗେ, ଇୱୁ ସାର୍‍ରେ ଗଟି ନାନ୍ ଚାଲେମ୍ ଆଦାନ୍ ଗଟିନ୍‍ତଡ଼୍ କେତୁତାନ୍ । ଅନ୍‌‍ଦିନେ ମିଡ଼୍ ଅଶୁଚି ନୁ ଅପରାଦ୍‌ ପାଡ଼୍‍ୟିତାଗ୍ ମୁଡ଼୍‍ନ୍ଦି ମାତ୍‍ତିଡ଼୍ । ଆଦେରକମ୍ ଇଞ୍ଜେ ପବିତ୍ର ଜିୱା ଆଦ୍‍ଦାନ୍ ସେଙ୍ଗେ ଦାର୍ମାମ୍ ଗାର୍‍ରେ ନିଜେତିଙ୍କ୍ ପୁରାପୁରି ସର୍ପା ଆୟ୍‍ମୁଟ୍ ।
ROM 6:20 ମିଡ଼୍ ପାପ୍‌ତେ ଦାସ ମାତ୍‍ତେୱେଲେ, ଦାର୍ମାମ୍‌ତାଗାଙ୍କ୍‍ ଜେକେ ମାତ୍‍ତିଡ଼୍ ।
ROM 6:21 ଇଞ୍ଜେ ମିକିଂଙ୍କ୍ ବେନ୍ ସାର୍‍ରେ ପାଡ଼୍‍ୟି ମାଡ଼ାନଙ୍କ୍ ସିଗ୍ ୱେସୁତ୍, ଆସୁଟ୍‍ ଆୱୁ ସାର୍‍ରେ ମାଡ଼ମାତ୍‍ତିଡ଼୍ । ଆଗାଙ୍କ୍ ବାତ୍ ଲାବ୍ ପାଏମ୍ ଆତ୍‍ତିଡ଼୍ ? ଆୱୁ ସାର୍‍ରେ ପାଡ଼୍‍ୟିତାଦ୍ ପରିଣାମ୍ ଡଲ୍‍ନାଦ୍ ।
ROM 6:22 ଇତ୍‍କେ ଇଞ୍ଜେ ମିଡ଼୍ ପାପ୍‌ତାଗାଙ୍କ୍ ମୁକ୍ତି ଆସ୍ ଇଶ୍ୱର୍‌ତେ ଦାସ ଆତ୍‍ତିଡ଼୍ । ଇଦିନାଦ୍ ଲାବ୍ ଆଦୁତ୍‍ତେ, ଇଶ୍ୱର୍‌ତାଗ୍ ପୁରାପୁରି ଆତ୍ମାତଡ଼୍ ସର୍ପା ଆଦାନାଦ୍ ନୁ ଇଦିନାଦ୍ ପରିଣାମ୍ ପବିତ୍ର ଜିୱା ପାଏମ୍ ଆଦାନାଦ୍ ।
ROM 6:23 ପାପ୍‌ତାଦ୍ ପରିଣାମ୍‍ ଡଲାନାଦ୍, ଇତ୍‍କେ ଇଶ୍ୱର୍‌ତାଦ୍ ଜସାମାଡ଼୍‌ୱେ ଦାନ ଆଦୁତ୍‍ତେ, ପ୍ରବୁ ଜିସୁ କ୍ରିଷ୍ଟନ୍‍ ତଡ଼୍ କାୟ୍‍ଲି ମିକା ସାରେଦିନାତ୍ ଜିୱୁଣ୍ଡ୍ ପାଏମ୍ ଆଦାନାଦ୍ ।
ROM 7:1 ହୋ ଦାଦାଲଡ଼ି ନୁ ଏଲାସ୍କ୍‍, ନାରୁଡ଼୍ ବେସୁଟ୍‌ ଆୟ୍‍ନା ଜିୱେ ମାନ୍‍ତଡ଼୍, ଆସୁଟ୍‍ ଆୟ୍‍ନା ନିୟମ୍ ଅଡ଼୍‌‍କିଂଙ୍କ୍ ଶାସନ୍‍ ମାଡ଼ିତ୍, ଇଦ୍ ମିଡ଼୍ ବାତ୍ ପୁନ୍‍ୱିଡ଼୍ ? ନାନ୍ ତ ନିୟମ୍ ପୁଞ୍ଜ୍‍ମାନ୍ଦାନ୍ ନାରୁଡ଼୍‍କିଂଙ୍କ୍ କେତୁତାନ୍ ।
ROM 7:2 ମୁଦ୍‍ପାଲ୍ ବେସୁଟ୍‌ ଆୟ୍‍ନା ଜିୱେ ମାନ୍‍ତଣ୍ଡ୍, ଆସୁଟ୍‍ ଆୟ୍‍ନା ମୁତ୍‍ତେ ମୁଦ୍‍ପାନ୍‍ ନିୟମ୍ ତଡ଼୍ ମାନ୍‍ତେ, ଇତ୍‍କେ ମୁଦ୍‍ପାଲ୍ ଡଲିଆତ୍‍କେ ମୁତ୍‍ତେ ମୁଦ୍‍ପାନ୍ ନିୟମ୍‍ତାଗାଙ୍କ୍ ମୁକ୍ତି ଆଦ୍‍ତେ ।
ROM 7:3 ଆଦିଙ୍କ୍ ମୁଦ୍‍ପାଲ୍ ଜିୱେ ମାନ୍‍ନା ମୁତ୍‍ତେ ମେଣ୍ଡେଅଡ଼୍‌‍ତୁଣ୍ଡ୍ ମାନେୟ୍‍ ତଡ଼୍ କାୟ୍‍ଲ୍‍କେ, ଆଲେକେ ତାଙ୍କ୍ ବେସ୍ୟା ଇଞ୍ଜ କେତିତଡ଼୍‍; ଇତ୍‍କେ ଯଦି ମୁଦ୍‍ପାଲ୍ ଡଲିଆତ୍‍କେ, ଆଲେକେ ମୁତ୍‍ତେ ନିୟମ୍‍ତାଗାଙ୍କ୍ ମୁକ୍ତି ଆଦ୍‍ତେ, ମେଣ୍ଡେ ଯଦି ଆଦ୍ ମେଣ୍ଡେଅଡ଼୍‌‍ତୁଣ୍ଡ୍ ମାନେୟ୍‍ ତଡ଼୍ କାୟ୍‍ଲ୍‍କେ, ଆଲେକେ ଆଦ୍ ବେସ୍ୟା ଆୟ୍‍ୟ ।
ROM 7:4 ଆଦିଙ୍କ୍ ହୋ ନା ଦାଦାଲଡ଼ି ନୁ ଏଲାସ୍କ୍‍, ମିୟାଦ୍‍ ଗାଲା ପରିସ୍ଥିତି ଟିକ୍‍ ଆଲେନେ, ମିଡ଼୍‍ କ୍ରିଷ୍ଟନ୍ ତଡ଼୍ ବାତିସ୍ମ ଆସ୍‍, ଅନ୍‌‍ ପୁନରୁତାନ୍‍ତାଗ୍‍ ବାଗ୍‍ ଆତ୍‍ତିଡ଼୍‍, ମିଡ଼୍ ନିୟମ୍ ସେଙ୍ଗେ ଡଲିମିନ୍ଦେଡ଼ି, ବେଲା ମିଡ଼୍ ମେଣ୍ଡେଅର୍‍ତୁଣ୍ଡ୍ ତଡ଼୍ କାୟ୍‍ଲିତିଡ଼୍, ଇତ୍‍କେ ମାନାଡ଼୍ ଇଶ୍ୱର୍‌ତେ ମାୟ୍‍ଦିଂଙ୍କ୍ କାୟା ଆଦ୍‍ସ୍ପାନ୍ ସେଙ୍ଗେ ଜେ ବେନ ଡଲିମାଞ୍ଜ୍ ତେଦିମିନ୍ଦେଣ୍ଡ୍, ଅନ୍‌ ତଡ଼୍ କାୟ୍‍ଲାଟ୍ ।
ROM 7:5 ବାତେଙ୍କ୍ଇତ୍‍କେ ବେସୁଟ୍‌ ମାନାଡ଼୍ ମେନ୍ଦୁଲ୍ ପୟ୍‍ସ୍ ମାତ୍‍ତାଡ଼୍, ଆସୁଟେ ନିୟମ୍ ତଡ଼୍ ପାପ୍‍ଲାଲସା ମାୟାଦ୍‌ ମେନ୍ଦୁଲ୍‍ତାଗ୍ ଡଲାନ୍ ସେଙ୍ଗେ କାୟା ଆଦ୍‍ସ୍ପାନଙ୍କ୍ ପାଡ଼୍‍ୟି ମାଡ଼ମାତ୍‍ତା,
ROM 7:6 ଇତ୍‍କେ ଆଦିଙ୍କ୍ ମାନାଡ଼୍ ବନ୍ଦନ୍ ଆସ୍ ମାତ୍‍ତାଡ଼୍, ଆଦିନ୍ ସେଙ୍ଗେ ଡଲିମାଞ୍ଜ୍ ମାନାଡ଼୍ ଇଞ୍ଜେ ନିୟମ୍‍ତାଗାଙ୍କ୍ ମୁକ୍ତି ଆତ୍‍ତାଡ଼୍; ଆଦିଙ୍କ୍ ମାନାଡ଼୍ ପାଃନ୍ତେ ଲେକ୍‍ତାଦ୍‍ ଇସାବ୍‍ତେ ଦାସନ୍ ପାଡ଼୍‍ୟି ମାଡ଼କଟ୍ ପବିତ୍ର ଆତ୍ମାତାଦ୍ ପୁନାଦ୍ ଇସାବ୍‍ତେ ଦାସନ୍ ପାଡ଼ୟି ମାଡ଼ୁତାଡ଼୍ ।
ROM 7:7 ଆଲେକେ ମାନାଡ଼୍ ବାତ୍ କେତିତାଡ଼୍‍ ? ମୋଶାନ୍‌ ନିୟମ୍ ବାତ୍ ପାପ୍‌ ? ଆଦ୍ ବେସୁଟ୍‌ ବା ଆୟ୍‍ମାକି । ଇତ୍କେ ପାପାମ୍ ବାତ୍, ଆଦ୍ ମୋଶାନ୍‌ ନିୟମ୍ ୱିଡ଼୍‌ସି ନାନ୍ ପୁନେ ପୁନ୍‌ୱେ ଆୟେନ୍; ବାତେଙ୍କ୍ ଇତ୍କେ ଲୋବ୍‌ ମାଡ଼୍‍ମାଟ୍, ମୋଶାନ୍‌ ନିୟମ୍ ଇଦ୍ କେଲକଟ ମାତ୍‍କେ, ଲୋବ୍‌ ବାତେଏ, ଆଦ୍ ନାନ୍ ପୁନନ୍ ଆୟେନ୍ ।
ROM 7:8 ଇତ୍‍କେ ପାପ୍‌ ସୁଜଗ୍ ପାଏମ୍‍ଆସ୍ ଗଟ୍ ତଡ଼୍ ନାୟାଗ୍ ସାର୍‍ରେ ଲେକାତ୍ ଲୋବ୍ ପୁଟ୍‍ସ୍ପତେ; ନିୟମ୍‍ ଇଲ୍‍ଉକ୍ ପାପାମ୍ ଡଲ୍‍ତେ ଲେକାମ୍‍ ।
ROM 7:9 ମେଣ୍ଡେ, ନାନ୍ ଅନ୍‌‍ଦାମ୍ ନିୟମ୍ ଇଲ୍‍ୱାଙ୍କ୍ ଜିୱୁଣ୍ଡ୍ ମାତ୍‍ତାନ୍, ଇତ୍‍କେ ଗଟ୍ ୱାତ୍‍ତାଙ୍କ୍ ପାପ୍‌ ଜିୱୁଣ୍ଡ୍ ଆତ୍‍ତେ, ମେଣ୍ଡେ ନାନ୍ ଡଲିଆତ୍‍ତାନ୍;
ROM 7:10 ଆଗାଙ୍କ୍ ଜିୱୁଣ୍ଡ୍‍ତାଦ୍ ବେନ୍ ଗଟ୍, ଆଦ୍ ନା ସେଙ୍ଗେ ଆତ୍ମିକ୍‍ ଡଲ୍‍ନାଦ୍ ଇଞ୍ଜ ପୁତ୍‍ତାନ୍ ।
ROM 7:11 ବାତେଙ୍କ୍ଇତ୍‍କେ ପାପ୍‌ ସୁଜଗ୍ ପାଏମ୍‍ଆସ୍ ଗଟ୍ ତଡ଼୍ ନାକିଂଙ୍କ୍ ତିପାଲ୍ ମାଡ଼୍‍ତେ, ମେଣ୍ଡେ ଆଦିନ୍ ତଡ଼୍ ନାକିଂଙ୍କ୍ ଆୱୁକ୍‍ତେ ।
ROM 7:12 ଆଦିଙ୍କ୍ ନିୟମ୍ ପବିତ୍ର ନୁ ମେଣ୍ଡେ ଅଦିନ୍‌ ଆଦେଶ୍‍ ପବିତ୍ର, ନ୍ୟାୟତାଦ୍ ନୁ ସାୟେତ୍ତାଦ୍ ।
ROM 7:13 ଆଲେକେ ବାତ୍ ଲେକେତ୍‍, ଆଦ୍ କି ନା ସେଙ୍ଗେ ଡଲ୍‍ନାଦ୍ ଆତ୍‍ତେ ? ଆଦ୍ ବେସୁଟ୍‌ ବା ଆୟ୍‍ମାକି । ଇତ୍‍କେ ପାପ୍‌ ଡଲ୍‍ନାଦ୍ ଆତ୍‍ତେ, ବେଲା ବାତ୍ ସାୟେ, ଆଦ୍ ଇସ୍ ନା ସେଙ୍ଗେ ଡଲ୍‍ନାଦ୍ ପାଡ଼୍‍ୟି ମାଡ଼୍‍କେ ପାପାମ୍, ପାପାମ୍ ଇଞ୍ଜ ତନ୍ଦିତ୍‌ ମେଣ୍ଡେ ବେଲା ନିୟମ୍‍ ତଡ଼୍ ପାପାମ୍ ଗାଟି ନାର୍‍ଗେ ଆତ୍‍ତେ ।
ROM 7:14 ଆଦିଙ୍କ୍ ନିୟମ୍ ଆଦୁତ୍‍ତେ ଆତ୍ମିକ, ଇଦ୍ ମାନାଡ଼୍ ପୁତ୍‍ତାଡ଼୍; ଇତ୍‍କେ ନାନ୍‍ନେ ମେନ୍ଦୁଲ୍‍ମାନ୍ଦାନଣ୍ଡ୍, ପାପ୍‌ତାଦ୍ କ୍ରୀତଦାସ ।
ROM 7:15 ବାତେଙ୍କ୍ଇତ୍‍କେ ନାନ୍ ବାତ୍ ମାଡ଼ିତାନ୍, ଆଦ୍ ପୁନନ୍; ଆଦିଙ୍କ୍ ନାନ୍ ବାତ୍ ଇଚ୍ଛା ମାଡ଼ିତାନ୍, ଆଦ୍ ମାଡ଼ନ୍, ଇତ୍‍କେ ନାନ୍ ପାସ୍କିତାନ୍, ଆଦିଂକେ ମାଡ଼ିତାନ୍ ।
ROM 7:16 ଇତ୍‍କେ ନାନ୍ ବାତ୍ ଇଚ୍ଛା ମାଡ଼ନ୍, ଆଦ୍ ଯଦି ମାଡ଼ିତାନ୍, ଆଲେକେ ନିୟମ୍ ଜେ ସାୟେ, ଆଦ୍ ନାନ୍ ସ୍ୱୀକାର୍ ମାଡ଼ିତାନ୍ ।
ROM 7:17 ଆଦିଙ୍କ୍ ନାନ୍ ମେଣ୍ଡେ ଆଦ୍ ମାଡ଼ନ୍, ଇତ୍‍କେ ନାୟାଗ୍ ବାସେ ମାଡ଼ିମାନ୍ଦାନ୍ ପାପ୍‌ ଆଦ୍ ମାଡ଼ୁତେ ।
ROM 7:18 ବାତେଙ୍କ୍ଇତ୍‍କେ ନାୟାଗ୍, ଇତ୍‍କେ ନା ମେନ୍ଦୁଲ୍‍ତାଗ୍ ବାତ୍ ଆୟି ସାୟେତ୍ ଜିନିଷ୍ ମାନ, ଇଦ୍ ନାନ୍ ପୁତ୍‍ତାନ୍, ଆଦିଙ୍କ୍ ନାନ୍ ଇଚ୍ଛା ମାଡ଼େ ପାର୍‍ଦୁତାନ୍, ଇତ୍‍କେ ବାତ୍ ସାୟେ, ଆଦ୍ ମାଡ଼ାନଙ୍କ୍ ନାୟାଗ୍ ଶକ୍ତି ଇଲ୍‍ଲେ ।
ROM 7:19 ବାତେଙ୍କ୍ଇତ୍‍କେ ବେନ୍ ସାୟେତ୍ ପାଡ଼୍‍ୟି ମାଡ଼ାନଙ୍କ୍ ନାନ୍ ଇଚ୍ଛା ମାଡ଼ିତାନ୍, ଆଦ୍ ମାଡ଼ନ୍, ଇତ୍‍କେ ବେନ୍ କାରାପ୍ ପାଡ଼୍‍ୟି ମାଡ଼ାନଙ୍କ୍ ନାନ୍ ଇଚ୍ଛା ମାଡ଼ନ୍, ଆଦ୍ ମାଡ଼ିତାନ୍ ।
ROM 7:20 ଇତ୍‍କେ ନାନ୍ ବାତ୍ ଇଚ୍ଛା ମାଡ଼ନ୍, ଆଦ୍ ଯଦି ମାଡ଼ିତାନ୍, ଆଲେକେ ନାନ୍ ନିଜେ ଆଦ୍ ମେଣ୍ଡେ ମାଡ଼ନ୍, ମାତର୍ ନାୟାଗ୍ ମାନ୍ଦାନ୍ ପାପ୍‌ ଆଦ୍ ମାଡ଼ିତ୍ ।
ROM 7:21 ଆଦିଙ୍କ୍ ସାୟେତ୍ ପାଡ଼୍‍ୟି ମାଡ଼ାନଙ୍କ୍ ଇଚ୍ଛା ମାତ୍‍କେ ଗାଲା ନାନ୍, ନା ଗାର୍ରେ ଜେ କାରାପ୍ ମିନ୍ଦେ, ଇଦ୍ ନିୟମ୍ ନାନ୍ ଉଡ଼ୁତାନ୍ ।
ROM 7:22 ବାତେଙ୍କ୍ଇତ୍‍କେ ଲୋପେତଣ୍ଡ୍ ମାନେୟ୍‍ତାଦ୍ ଆଲ୍‍ସାନାଦ୍ ଲେକାମ୍ ନାନ୍ ଇଶ୍ୱର୍‌ତାଦ୍ ନିୟମ୍‍ତାଗ୍ ୱେଡ଼୍‍କ୍‍ ମାଡ଼ିତାନ୍,
ROM 7:23 ଇତ୍‍କେ ନାନ୍ ନାୱାଦ୍ ମେନ୍ଦୁଲ୍‍ତାଗ୍ ଅଣ୍ଡୟ୍‌ ୱେର୍ରେ ନିୟମ୍ ଉଡ଼ିତାନ୍, ଆଦ୍ ନାୱାଦ୍ ମନ୍‍ତାଦ୍ ନିୟମ୍ ବିରୁଦ୍‍ତେ ଯୁଦ୍‌ ମାଡ଼ିତ୍, ମେଣ୍ଡେ ନାୱାଦ୍ ମେନ୍ଦୁଲ୍‍ତାଗ୍ ବେନ୍ ପାପ୍‌ ନିୟମ୍ ମିନ୍ଦେ, ନାକିଂଙ୍କ୍ ଆଗେତ୍ ବନ୍ଦି ମାଡ଼ିତେ ।
ROM 7:24 ଆୟୁ, କାଡ଼୍‍ମାମ୍‍ ଇଲ୍‍ୱଣ୍ଡ୍ ମାନେୟ୍‍ତେ ଜେ ନାନ୍, ନାକିଂଙ୍କ୍ ଇଦ୍ ଡଲ୍‍ନାଦ୍ ମେନ୍ଦୁଲ୍‍ତାଗାଙ୍କ୍ ବେନ ଗେଲ୍‍ସ୍ପିତଣ୍ଡ୍ ?
ROM 7:25 ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ଇଶ୍ୱର୍‌ତାଦ୍ ଦନ୍ୟବାଦ୍ ଆୟି । ତ ନାନ୍ ନିଜେ ମନ୍ ତଡ଼୍ ଇଶ୍ୱର୍‌ତେ ନିୟମ୍‍ତାଦ୍ ଦାସ, ଇତ୍‍କେ ମେନ୍ଦୁଲ୍ ତଡ଼୍ ପାପ୍‌ ନିୟମ୍‍ତାଦ୍ ଦାସ ।
ROM 8:1 ତ ବେନଡ଼୍ କ୍ରିଷ୍ଟ ଜିସୁନାଗ୍ ମିନ୍ଦେଡ଼୍‍, ଅଡ଼୍‌ ସେଙ୍ଗେ ବାତ୍ ତିପାଲ୍ ଇଲ୍‍ଲେ ।
ROM 8:2 ଇତ୍‍କେ ଜିୱୁଣ୍ଡ୍‍ତାଦ୍ ଆତ୍ମାତେ ନିୟମ୍ କ୍ରିଷ୍ଟ ଜିସୁନ୍ ପେଦେର୍‍ତେ ମିକିଂଙ୍କ୍ ପାପ୍‌ ନୁ ଡଲ୍‍ନାଦ୍ ନିୟମ୍‍ତାଗାଙ୍କ୍ ମୁକ୍ତି ମାଡ଼୍‍ତେ ।
ROM 8:3 ଆଦିଙ୍କ୍ ମେନ୍ଦୁଲ୍ ମାୟ୍‍ଦିଙ୍କ୍ ରୋଗାମ୍ ଆତ୍‍ତାଙ୍କ୍ ନିୟମ୍ ବାତ୍ ମାଡ଼ାନଙ୍କ୍ ପାର୍‍ୱ, ଆଦ୍ ଇଶ୍ୱର୍ ତାନ୍ ମାରିଙ୍କ୍ ପାପ୍‌ତାଦ୍ ମେନ୍ଦୁଲ୍ ଇସାପ୍‍ତେ ପାପାମ୍ ଦଂସ ମାଡ଼ାନଙ୍କ୍ ରହସ୍ ମେନ୍ଦୁଲ୍‍ତାଗ୍ ପାପାମ୍‍ତିଙ୍କ୍ ଦଣ୍ଡ୍ ଇଦାନ୍ ନିୟମ୍ ମାଡ଼୍‍ତଣ୍ଡ୍,
ROM 8:4 ବେଲାକି ମେନ୍ଦୁଲ୍ ଆଲ୍‍ସାନ୍‍ ଇସାପ୍‍ତେ ବ୍ୟବହାର୍‌ ମାଡ଼କଟ୍ ଆତ୍ମାତାଦ୍ ଆଲ୍‍ସାନ୍ ଇସାପ୍‍ତେ ମାନାଡ଼୍ ବ୍ୟବହାର୍‌ ମାଡ଼ିତାଡ଼୍, ମାୟାଗେନେ ନିୟମ୍‍ତାଦ୍ ଦାର୍ମାମ୍‌ନିତି ତିୟାର୍ ଆଦ୍‍ତେ ।
ROM 8:5 ବେନଡ଼୍ ମାନେୟ୍‍ତେ ଲେକାମ୍ ପାଡ଼୍‍ୟି ମାଡ଼ୁତଡ଼୍, ଅଡ଼ାଦ୍‌ ମାନ୍‍ ଆଦ୍ ଲେକାମ୍ ଆଦ୍‍ତେ । ଇତ୍‍କେ ବେନଡ଼୍ ପବିତ୍ର ଆତ୍ମାତେ କେତ୍‍ତାନ୍ ଲେକାମ୍ ପାଡ଼୍‍ୟି ମାଡ଼ିତଡ଼୍, ଅଡ଼ାଦ୍‌ ମାନ୍‍ ପବିତ୍ର ଆତ୍ମାତେ ତଡ଼୍ ଚାଲେମ୍ ଆଦ୍‍ତେ ।
ROM 8:6 ମାନେୟ୍‍ ଲେକାମ୍ ଆତ୍‍କେ, ଆଦିନାଦ୍ ପରିଣାମ୍ ଆଦ୍‍ତେ ଡଲ୍‍ନାଦ୍; ପବିତ୍ର ଆତ୍ମାନ୍‍ ତଡ଼୍ ଚାଲେମ୍ ଆତ୍‍କେ ଜିୱୁଣ୍ଡ୍ ନୁ ଶାନ୍ତି ଦର୍‍କିତ୍ ।
ROM 8:7 ମାନେୟ୍‍ତେ ଲେକାମ୍ ଆତ୍‍କେ ନାରୁଡ଼୍ ଇଶ୍ୱର୍‌ତାଦ୍ ଶତ୍ରୁଡ଼୍ ଆଦ୍‍ତନ୍; ବାତେଙ୍କ୍ଇତ୍‍କେ ଅଣ୍ଡ୍‌ ଇଶ୍ୱର୍‌ତାଦ୍ ନିୟମ୍ ପାଲନ୍ ମାଡ଼ଣ୍ଡ୍, ଅଣ୍ଡ୍‌ ଆଦ୍ ମାଡ଼ାନଙ୍କ୍ ପାର୍‍ୱଣ୍ଡ୍ ।
ROM 8:8 ବେନଡ଼୍ ମାନେୟ୍‍ତେ ଲେକାମ୍ ପାଡ଼୍‍ୟି ମାଡ଼ିତଡ଼୍, ଅଡ଼୍‌ ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନଙ୍କ୍ ପାର୍‍ୱଡ଼୍ ।
ROM 8:9 ଯଦି ନିଜାମ୍ ଇଶ୍ୱର୍‌ତାଦ୍ ପବିତ୍ର ଆତ୍ମା ମିୟାଗେ ମିନ୍ଦେ, ମିଡ଼୍ ମେଣ୍ଡେ ମାନେୟ୍‍ ଲେକାମ୍ ଜିୱୁଣ୍ଡ୍ ବାଦ୍‍କ୍‍ୱିଡ଼୍, ଇତ୍‍କେ ଜିୱୁଣ୍ଡ୍‍ତାଗ୍ ପବିତ୍ର ଆତ୍ମାତେ ଗଟ୍ ପାଲନ୍ ମାଡ଼ୁତିଡ଼୍ । କ୍ରିଷ୍ଟନାଦ୍ ଆତ୍ମା ବେନନ୍ ଗାର୍‍ରେ ଇଲ୍‍ଲେ, ଅଣ୍ଡ୍‌ ବେସୁଟ୍‌ ଅନ୍‌ ନାରୁଣ୍ଡ୍‍ ଆଦାନଙ୍କ୍ ପାର୍‍ୱଣ୍ଡ୍ ।
ROM 8:10 ଇତ୍‍କେ କ୍ରିଷ୍ଟ ଯଦି ମିଇ ଗାର୍‍ରେ ମିନ୍ଦେଣ୍ଡ୍, ମିୟାଦ୍ ମେନ୍ଦୁଲ୍ ପାପ୍‌ ତଡ଼୍ ନଷ୍ଟ ଆଦାନଙ୍କ୍ ଆଞ୍ଜମାତ୍‍କେ ଗାଲା, ପବିତ୍ର ଆତ୍ମା ମିକିଂଙ୍କ୍ ଜିୱୁଣ୍ଡ୍ ଇଦ୍‍ତେ, ବାତେଙ୍କ୍ଇତ୍‍କେ ଇଶ୍ୱର୍‌ତେ କଣ୍ଡେତାଗ୍ ମିଡ଼୍ ଦାର୍ମାମ୍ ଇଞ୍ଜ ଲେକା ଆତ୍‍ତିଡ଼୍ ।
ROM 8:11 ଯଦି କ୍ରିଷ୍ଟଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ମାଡ଼୍‍ତେ ଇଶ୍ୱର୍‌ତାଦ୍ ଆତ୍ମା ମିୟାଗ୍ ମିନ୍ଦେ, ଆଲେକେ ଆଦ୍ ଆତ୍ମାତେ ସାହାଯ୍ୟତେ ଇଶ୍ୱର୍ ମିୟାଦ୍ ଡଲ୍‍ତାଦ୍ ମେନ୍ଦୁଲ୍‍ତିଙ୍କ୍ ଗାଲା ଜିୱେ ମାଡ଼ିତନ୍ ।
ROM 8:12 ଆଦିଙ୍କ୍ ହୋ ଦାଦାଲଡ଼ି ନୁ ଏଲାସ୍କ୍‍, ମାନ୍‍ ଦାୟିତ୍ୱ ଆଦୁତ୍‍ତେ, ମାନେୟ୍‍ତେ ଲେକାମ୍ ଜିୱୁଣ୍ଡ୍ ବାଦ୍‍କାନଡ଼ାଦ୍ ଆୟ୍‍ୟ ।
ROM 8:13 ବାତେଙ୍କ୍ଇତ୍‍କେ ମିଡ଼୍‍ ମାନେୟ୍‍ ଲେକାମ୍‍ ଜିୱୁଣ୍ଡ୍‍ ବାଦ୍‍କିତିଡ଼୍‍, ଆଲେକେ ମିଡ଼୍‍ ଡଲିତିଡ଼୍‍, ଇତ୍‍କେ ଯଦି ପବିତ୍ର ଆତ୍ମାତେ ସାହାଯ୍ୟତେ ନିଜେତ୍ ପାପାମ୍‍ତିଙ୍କ୍ ଆୱ୍‍କି, ମେଣ୍ଡେ ପାପାମ୍ ପାଡ଼୍‍ୟି ମାଡ଼୍‍ୱେମାତ୍‍କେ, ଆଲେକେ ମିଡ଼୍ ଗେଲ୍‍ସିତିଡ଼୍ ।
ROM 8:14 ବେନଡ଼୍ ଇଶ୍ୱର୍‌ତେ ଆତ୍ମା ତଡ଼୍ ଚାଲେମ୍ ଆଦ୍‍ତଡ଼୍, ଅଡ଼୍‌ ଇଶ୍ୱର୍‌ତେ ମାର୍‍ ମାୟାସ୍କ୍ ।
ROM 8:15 ବାତେଙ୍କ୍ଇତ୍‍କେ ଇଶ୍ୱର୍ ଇତ୍‍ତେ ଆଦ୍ ଆତ୍ମା ମିକିଂଙ୍କ୍ ଦାସତାଗାଙ୍କ୍ ମୁକ୍ତି ମାଡ଼୍‍ତେ, ମିଡ଼୍ ମେଣ୍ଡେ ୱେର୍ର୍ ଆଦାନାଦ୍ ବାତ୍ ଇଲ୍‍ଲେ । ଇତ୍‍କେ ପବିତ୍ର ଆତ୍ମା ମିକିଂଙ୍କ୍ ଇଶ୍ୱର୍‌ତେ ମାର୍‌ ଆଦାନଙ୍କ୍ ସୁଜଗ୍ ଇତ୍‍ତନ୍ । ଅନ୍‌ ଶାତ୍‍ୱାମ୍ ପାଏମ୍ ଆସ୍ ମାନାଡ଼୍ ଇଞ୍ଜେ ଇଶ୍ୱର୍‌ତିଙ୍କ୍ “ବାବାଲ୍,” ଇଞ୍ଜ କେତୁତାଡ଼୍ ।
ROM 8:16 ଇଶ୍ୱର୍‌ତାଦ୍ ଆତ୍ମା ମାନ୍‍ ଲୋପେତ୍ ଆତ୍ମା ତଡ଼୍ କାୟ୍‍ଲି ମାନାଙ୍କ୍‍ ଇଶ୍ୱର୍‌ତେ ମାର୍‌ ଇଞ୍ଜ କେତୁତେ ।
ROM 8:17 ବେଲାବା ମାନାଡ଼୍ ଇଶ୍ୱର୍‌ତେ ମାର୍‍କ୍, ଅନ୍‌ ନାରୁଡ଼୍ ସେଙ୍ଗେ ଇଦାନ୍ ଆର୍ଶିବାଦ୍‍ତାଗ୍ ମାନାଡ଼୍ ବାଗିଦାର୍ ଆଦ୍‍ତାଡ଼୍ । ମେଣ୍ଡେ କ୍ରିଷ୍ଟନ୍ ସେଙ୍ଗେ ଇଶ୍ୱର୍ ବାତ୍ ନେଃଏସ୍ ମିନ୍ଦେଣ୍ଡ୍, ଆଗେ ଗାଲା ମାନାଦ୍‍ ବାଗ୍ ମିନ୍ଦେ । ଯଦି ମାନାଡ଼୍ ଜିସୁନାଦ୍ ଦୁଃକାମ୍‍ତାଗ୍ ବାଗିଦାର୍ ଆତ୍‍ତାଡ଼୍, ଆଲେକେ ଅନ୍‌ ଗୌରବ୍‍ତାଗ୍ ଗାଲା ବାଗିଦାର୍ ଆଦ୍‍ତାଡ଼୍ ।
ROM 8:18 ବେନ୍ ଗୌରବ୍‍ତାଦ୍ ବବିଷ୍ୟତ୍‌ତାଗ୍ ମାନାଡ଼୍ ଆସିତାଡ଼୍, ଆଦ୍ ଇସାପ୍‍ତେ ଇଞ୍ଜେ ଦୁଃକାମ୍‍ ଆଦାନାଦ୍ ବାତେବା ଆୟ୍‍ୟ । ଆଦ୍ ସମୟ୍‍ତେ ଇଶ୍ୱର୍ ତାନ୍ ମାର୍‍କିଡ଼୍‍କ୍ ତଅତିତଣ୍ଡ୍ ।
ROM 8:19 ସାର୍‍ରେ ସୃଷ୍ଟି ଆଦ୍ ଦିନାମ୍‍ତିଙ୍କ୍ ଆଗ୍ରହ ଆସ୍‍ କେପି ମିନ୍ଦେ,
ROM 8:20 ବାତେଙ୍କ୍ଇତ୍‍କେ ସାର୍‍ରେ ସୃଷ୍ଟି ଇଶ୍ୱର୍ ତଡ଼୍ ଅବିଶାପ୍‌ ଆସ୍ ତାନ୍ କାମ୍‌ତାଗାଙ୍କ୍ ୱେଏରେ ଆତ୍‍ତେ । ଇତ୍‍କେ ଆଗେକ୍‍ବା ଆଦିନାଦ୍ ଆଶେ ମିନ୍ଦେ,
ROM 8:21 ଅନ୍‌‍ଦିନେ ଇଶ୍ୱର୍‌ତେ ମାର୍‍କିଡ଼୍ ଗୌରବ୍‍ତାଗ୍ ବାଗିଦାର୍ ଆସ୍ ଆଦ୍ ଗାଲା ତାନ୍ ଦାସତ୍ୱ ନଷ୍ଟ ଆଦାନାଗାଙ୍କ୍ ମୁକ୍ତି ପାଏମ୍ ଆଦ୍‍ତେ ।
ROM 8:22 ଇତ୍‍କେ ଇଞ୍ଜେକ୍ ଗାଲା ସାର୍‍ରେ ସୃଷ୍ଟି ପିଲା ପୁଟ୍‍ସ୍ପାନ୍ ନପ୍ ଲେକାମ୍ କଷ୍ଟ ପାଏମ୍ ଆସ୍ ଦୁଃକାମ୍‍ତେ କିଡ଼୍‍କୁତେ ।
ROM 8:23 ମେଣ୍ଡେ ଆଦ୍‍ ମାତର୍‍ ଆୟ, ମାନାଡ଼୍ ଇଶ୍ୱର୍‌ତେ ମୁନେନ୍ ଇତ୍‍ତାଦ୍ ଦାନ ଲେକାମ୍ ପବିତ୍ର ଆତ୍ମାତିଙ୍କ୍ ପାଏମ୍ ଆତ୍‍ତାଡ଼୍; ଆଗେକ୍‍ବା ଇଶ୍ୱର୍‌ତେ କୁଟ୍‍ମାମ୍ ଆସ୍ ସାର୍ରେତଡ଼୍ ଲେକାମ୍ ମୁକ୍ତି ଆଦାନ୍ ସେଙ୍ଗେ ମାମ୍‍ମେ ଗାଲା କେପି ଜିୱୁଣ୍ଡ୍ ଲୋପେ ଦୁଃକା ମାଡ଼ୁତମ୍ ।
ROM 8:24 ବାତେଙ୍କ୍ଇତ୍‍କେ ଆଶା ମାଡ଼୍‍କେନେ କେ ମାନାଙ୍କ୍‍ ମୁକ୍ତି ଦର୍‍କିତ୍ । ଇତ୍‍କେ ବାତ୍ ତଅନ୍‌ଦିତ୍, ଆଦିନ୍ ସେଙ୍ଗେ ଆଶା ମାଡ଼ାନାଦ୍ ନିଜାତେ ଆଶା ଆୟ୍‍ୟ । ବେନ ବାତ୍ ତଅନ୍‌ଦାନାଦ୍ ଜିନିଷ୍ ସାର୍‍ରେ ସେଙ୍ଗେ ଆଶା ମାଡ଼ିତନ୍ ?
ROM 8:25 ଇତ୍‍କେ ମାନାଡ଼୍ ଯଦି ତଅନ୍‌ଦ୍‍ୱାଦ୍ ବିଷୟ୍ ସେଙ୍ଗେ ଆଶେ ମାଡ଼ିତାଡ଼୍, ଆଲେକେ ମାନାଙ୍କ୍‍ ଗାଡ଼୍‍ସ୍ ପୟ୍‍ସ୍ କେପି ମାନ୍ଦାନଙ୍କ୍ ୱେୟ୍‍ତିତ୍ ।
ROM 8:26 ଆଦେରକମ୍‍ ମାନାଙ୍କ୍‍ ଶାତ୍‍ୱାମ୍ ଇଲ୍‍ଲେ, ପବିତ୍ର ଆତ୍ମା ମାନାଙ୍କ୍‍ ସାଆଯ୍ୟ ମାଡ଼ିତନ୍ । ବେଲା ପ୍ରାର୍ତନା ମାଡ଼ାନଙ୍କ୍ ଆଦ୍‍ତେ, ଆଦ୍ ମାନାଡ଼୍ ପୁନ୍‍ୱାଡ଼୍ । ଆଦିଙ୍କ୍ ପବିତ୍ର ଆତ୍ମା ଲେଙ୍ଗ୍ ଇଲ୍‍ୱାଦ୍ ଗଟ୍ ତଡ଼୍ ମାନ୍‍ ସେଙ୍ଗେ ଇଶ୍ୱର୍‌ତିଙ୍କ୍ କେତିତ୍‍ ।
ROM 8:27 ଇଶ୍ୱର୍ ଆଦ୍ ବୁଜେମ୍ ଆଦ୍‍ତନ୍, ବାତେଙ୍କ୍ଇତ୍‍କେ ଅଣ୍ଡ୍‌ ଲୋପେତ୍ ଗଟ୍ ପୁତ୍‍ତଣ୍ଡ୍ ନୁ ପବିତ୍ର ଆତ୍ମା ଇଶ୍ୱର୍‌ତେ ଇଚ୍ଛା ଲେକାମ୍ ତାମ୍ ନାରୁଡ଼୍ ସେଙ୍ଗେ କେତିତଣ୍ଡ୍ ।
ROM 8:28 ମାନାଡ଼୍‍ ପୁତ୍‍ତାଡ଼୍‍ ଯେ, ବେନଡ଼୍ ଇଶ୍ୱର୍‌ତେ ଉଦ୍ଦେଶ୍ୟତିଙ୍କ୍ ତିୟାର୍ ମାଡ଼ାନଙ୍କ୍ ୱାଦ୍‍ତଣ୍ଡ୍ ନୁ ଇଶ୍ୱର୍‌ତିଙ୍କ୍ ପ୍ରେମ ମାଡ଼ିତଡ଼୍, ଅଡ଼୍‌ ସେଙ୍ଗେ ସାର୍‍ରେ ବିଷୟ୍ ଲେକେତ୍‍ ଆଦ୍‍ତେ ।
ROM 8:29 ବେନଡ଼୍‍କିଂଙ୍କ୍ ଇଶ୍ୱର୍ ଏଞ୍ଚିମିନ୍ଦେଣ୍ଡ୍, ଅଡ଼୍‌‍କିଂଙ୍କ୍ ତାମ୍ ମାର୍‍କିନ୍ ଲେକାମ୍ ଆଦାନଙ୍କ୍ ମୁନେତ୍‍କେ ତିୟାର୍ ମାଡ଼ିମିନ୍ଦେଣ୍ଡ୍ । ଆଲେକେ ଇଶ୍ୱର୍‌ତେ ମାର୍‍କ୍ ଅଡ଼୍‌‍କିଂଙ୍କ୍ ମୁନେଙ୍କ୍‍ ପୁଟ୍‍ତେନଡ଼୍‍ ଆଦ୍‍ତଡ଼୍‍ ।
ROM 8:30 ବେନଡ଼୍ ଇଦ୍‍ରକମ୍ ଏଞ୍ଚି ୱାସ୍‍ମିନ୍ଦେଡ଼୍, ଅଡ଼୍‌ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆସ୍ ଗୌରବ୍‍ ପାଏମ୍ ଆଦ୍‍ତଡ଼୍ ।
ROM 8:31 ଆଲେକେ ଇୱୁ ସାର୍‍ରେ ଉଡ଼୍‍କେ ମେଣ୍ଡେ ବାତ୍ କେତିତାଡ଼୍‍ ? ଇଶ୍ୱର୍ ଯଦି ମାନ୍‍ ସପଟ୍ ମାଡ଼ିତନ୍, ବେନ ମାନ୍‍ ବିରୁଦ୍ ଆଦ୍‍ପାର୍‍ଦ୍‍ତଣ୍ଡ୍ ?
ROM 8:32 ଇଶ୍ୱର୍ ବେସୁଟ୍‍ବା ମାନ୍‍ ବିରୁଦ୍ ଆୟ୍‍ୟଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ନିଜେତ୍ ମାରିଙ୍କ୍ ମିକା ରକ୍ଷା ମାଡ଼କଟ୍ ମାନ୍‍ ସେଙ୍ଗେ ଦାନ ମାଡ଼୍‍ତଣ୍ଡ୍ । ଆଲାଇତ୍‍କେ, ଅଣ୍ଡ୍‌ ବାତ୍ ମାନାଙ୍କ୍‍ ସାର୍‍ରେ ବିଷୟ୍ ଦାନ ମାଡ଼ଣ୍ଡ୍ ?
ROM 8:33 ଇଶ୍ୱର୍ ଏଞ୍ଚ୍‍ତେ ନାରୁଡ଼୍ ବିରୁଦ୍‍ତେ ବେନଡ଼୍ ଅବିଯଗ୍ ମାଡ଼୍‍ପାର୍‍ଦ୍‍ତଡ଼୍ ? ଇଶ୍ୱର୍ ନିଜେ ଅଡ଼୍‌‍କିଂଙ୍କ୍ ନିର୍ଦୋଷ୍ ଇଞ୍ଜ କେସ୍‍ମିନ୍ଦେଣ୍ଡ୍ ।
ROM 8:34 ଆଲେକେ ବେନ ଅଡ଼୍‌‍କିଂଙ୍କ୍ ମେଣ୍ଡେ ଦଷି ମାଡ଼େପାର୍‍ଦ୍‍ତଣ୍ଡ୍ ? କ୍ରିଷ୍ଟ ଜିସୁ ଆଦ୍ ବେସୁଟ୍‌ ମାଡ଼ଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ଡଲ୍‍ତାଗାଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ଆସ୍ ଇଶ୍ୱର୍‌ତେ ତିନ୍ଦେପାକ୍ କୁଦିମିନ୍ଦେଣ୍ଡ୍ । ଅଣ୍ଡ୍‌‍ ଆନ୍‌ତେ ମାନ୍‍ ସେଙ୍ଗେ ନାଡ଼୍‍ମେ ପ୍ରାର୍ତନା ମାଡ଼ୁତଣ୍ଡ୍‍ ।
ROM 8:35 ଆଲେକେ ବେନ ମାନାଙ୍କ୍‍ କ୍ରିଷ୍ଟନ୍ ପ୍ରେମତାଗାଙ୍କ୍ ୱେର୍ରେ ମାଡ଼େପାର୍‍ଦ୍‍ତଣ୍ଡ୍ ? ଦୁଃକାମ୍, ତିପାଲ୍, ନପ୍, ଗରିବ୍, କାର୍‍ୱ୍, ବିପଦ୍ ବା ଡଲ୍‍ନାଦ୍ ଆଶେ, ବାଆତେବା ଆଦ୍ ମାଡ଼ାନଙ୍କ୍ ପାର୍‍ୱ ।
ROM 8:36 ଶାସ୍ତ୍ରତାଗ୍ ଲେକାମିନ୍ଦେ, “ମିଇ ସେଙ୍ଗେ ମାକିଂଙ୍କ୍ ସାରେୱେଲେ ଡଲ୍‍ନାଦ୍ ବିପଦ୍ ୱାଦୁତ୍, ଆୱୁକାନଙ୍କ୍ ଆଦାନ୍ ମେଣ୍ଢା ଲେକାମ୍ ମାନାଡ଼୍ ଏଞ୍ଚିମିନ୍ଦେଡ଼୍ ।”
ROM 8:37 ବେନ ମାନାଙ୍କ୍‍ ପ୍ରେମ ମାଡ଼ୁତଣ୍ଡ୍, ଅନ୍‌ ସାଆଯ୍ୟତେ ମାନାଡ଼୍ ଇୱୁ ସାର୍ରେତିଙ୍କ୍ ଜିଡ଼୍‍ତାଡ଼୍ ।
ROM 8:38 ନାନ୍ ନିଜାମ୍ ପୁତ୍‍ତାନ୍ ଜେ ଅନ୍‌ ପ୍ରେମତାଗାଙ୍କ୍ ମାନାଡ଼୍ ବେସୁଟ୍‍ବା ୱେରେ ଆୟ୍‍ୱାଡ଼୍ । ଡଲ୍‍ନାଦ୍ ବା ଜିୱୁଣ୍ଡ୍, ଦୂତ ବା ମୟଲ୍‍ତାଗ୍‍ ମାନ୍ଦାନ୍ ବେନ୍ ରାଜାଲ୍ ବା ଶାତ୍‍ୱାମ୍‍, ଇଞ୍ଜେ ବା ୱାଦାନ୍ ଦିନାତେ,
ROM 8:39 ପରତାଦ୍ ଆୟି ବା ମଦଲ୍‍ତାଦ୍ ଆୟି ବାତ୍ ବିଷୟ୍, ସାର୍‍ରେ ସୃଷ୍ଟିତାଗ୍ ଇଦ୍‍ରକମ୍ ବାତ୍ ବିଷୟ୍ ଇଲ୍‍ଲେ, ବାତ୍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ତଅନ୍‌ଦ୍‍ତାଦ୍ ଇଶ୍ୱର୍‌ତେ ଆଦ୍ ପ୍ରେମ୍‍ତାଗାଙ୍କ୍ ମାନାଙ୍କ୍‍ ୱେରେ ମାଡ଼ାନଙ୍କ୍‍ ପାର୍‍ଦ୍‍ତେ ।
ROM 9:1 ନାନ୍ ନିଜାମ୍ କେତୁତାନ୍, କ୍ରିଷ୍ଟ ବିଶ୍ୱାସୀ ଆସ୍‍ମାନ୍ଦାନ୍ ମାୟ୍‍ଦିଂଙ୍କ୍ ନାନ୍ ମିଚ୍ କେଲନ୍ । ପବିତ୍ର ଆତ୍ମାତେ ଚାଲେମ୍ ନାୱାଦ୍ ବିବେକ୍ ଇଦିନାଦ୍ ସାକ୍ଷି ଇଦୁତେ ।
ROM 9:2 ନାନ୍ ଜେ ବେସର୍ ତିପାଲ୍ ନୁ ଗାଟି ଦୁଃକାମ୍‍ତେ ନା ଜିୱୁଣ୍ଡ୍‍ତାଗ୍‍ ବେସର୍ ପୁଃଉତେ, ଇଦ୍ ଗଟ୍ ନାନ୍ ବୁସା ମାଡ଼ି କେଲନ୍ ।
ROM 9:3 ନା ନିଜେତ୍ ଜାତିଡ଼୍ ଦାଦାଲଡ଼୍ ନୁ ଏଲାସ୍କ୍‍କିନ୍‍ ସେଙ୍ଗେ ନାନ୍ ନିଜେ କ୍ରିଷ୍ଟନାଗାଙ୍କ୍ ୱେରେ ଆସ୍ ଇଶ୍ୱର୍ ତଡ଼୍ ଅବିଶାପ୍‌ ପାଏମ୍‍ ଆଦାନଙ୍କ୍ ନାନ୍ ରାଜି,
ROM 9:4 ବାତେଙ୍କ୍ଇତ୍‍କେ ଅଡ଼୍‌ ଇଶ୍ୱର୍‌ତେ ନାରୁଡ଼୍ । ଇଶ୍ୱର୍ ଅଡ଼୍‌‍କିଂଙ୍କ୍ ନିଜେତ୍ ମାର୍‍ ଲେକାମ୍ ଗ୍ରହନ୍ ମାଡ଼ି ଅଡ଼୍‌ ବକେତ୍ ନିଜେତ୍ ମହିମା ତଅସ୍‍ମାତ୍‍ତଣ୍ଡ୍; ଅଡ଼୍‌ ତଡ଼୍ ଚୁକ୍ତିମାଡ଼ି ନିୟମ୍ ଇସ୍ ମାତ୍‍ତଣ୍ଡ୍, ଅଡ଼୍‌ ନିଜାମ୍ ଉପବାସ୍ ମାଡ଼ିତଡ଼୍; ଅଡ଼୍‌ ଇଶ୍ୱର୍‌ତାଗାଙ୍କ୍ ପ୍ରତିଶ୍ରୁତି ପାଏମ୍ ଆଦ୍‍ତଡ଼୍,
ROM 9:5 ଅଡ଼୍‌ ମାନ୍‍ ମୁନେତ୍‍ତେ ଇହୁଦୀ ଆନିଦାଦିଡ଼୍ ବଂଶତଡ଼୍ ନୁ ମାନେୟ୍‍ତେ ଲେକାମ୍ କ୍ରିଷ୍ଟ ଆଦ୍ ବଂଶତାଗ୍ ପୁଟ୍‍ତଣ୍ଡ୍ । ସାର୍ରେତିଙ୍କ୍ ବେଡ଼୍‍ୟେ ଶାସନ୍‍ କର୍ତାଲ୍ ଇଶ୍ୱର୍ ଯୁଗ୍‍ଯୁଗ୍ ଦନ୍ୟ ଆୟିଣ୍ଡ୍ । ଆମେନ୍‍ ।
ROM 9:6 ଇଶ୍ୱର୍‌ତେ ପ୍ରତିଜ୍ଞା ବିପଲ୍ ଆତ୍‍ତେ ଇଞ୍ଜ ନାନ୍ କେଲନ୍, ବାତେଙ୍କ୍ଇତ୍‍କେ ଇସ୍ରାଏଲ୍‍ ବଂଶତାଗ୍‍ ପୁଟ୍‍ତେ ସାର୍ରେତଡ଼୍ ନାରୁଡ଼୍ ଇଶ୍ୱର୍‌ତେ ନାରୁଡ଼୍ ଆୟଡ଼୍,
ROM 9:7 ମେଣ୍ଡେ ଅବ୍ରାହାମ୍‌ତେ ବଂଶତଡ଼୍ ସାର୍ରେତଡ଼୍ ଇଶ୍ୱର୍‌ତେ ମାର୍‍କ୍ ଆୟଡ଼୍ । ଇଶ୍ୱର୍ ଅବ୍ରାହାମ୍‌ତିଙ୍କ୍ କେସ୍‍ମାତ୍‍ତଣ୍ଡ୍, “ନିୟାଦ୍ ବେନ୍ ବଂଶଦର୍‌ଡ଼୍ ସେଙ୍ଗେ ମାମ୍‍ମେ ପ୍ରତିଜ୍ଞା ମାଡ଼ିମାତ୍‍ତମ୍, ଅଡ଼୍‌ ଇସାକ୍‍ତାଗାଙ୍କ୍ ପୁଟିତଡ଼୍ ।”
ROM 9:8 ଇଦିନ୍ ଅର୍ତ ଆଦୁତ୍‍ତେ, ମାନେୟ୍‍ ଆସ୍‍ମାନ୍ଦାନ୍‍ ମାୟ୍‍ଦିଙ୍କ୍‍ ଇଶ୍ୱର୍‌ତେ ମାର୍‍କ୍ ଆଦାନଙ୍କ୍ ପାର୍‍ୱଡ଼୍ । ଇଶ୍ୱର୍‌ତାଦ୍ ପ୍ରତିଜ୍ଞା ଲେକାମ୍‌ ପୁଟ୍‍ତେ ପିଲା ଇଶ୍ୱର୍‌ତେ କଣ୍ଡେତାଗ୍ ନିଜାତେ ମାର୍‍କ୍ ଲେକାମ୍ ଗନା ଆଦ୍‍ତଡ଼୍ ।
ROM 9:9 ଇଶ୍ୱର୍ ଇଦ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, “ଟିକ୍ ଇଦ୍ କାଲାମ୍‍ତେ ମାନାଡ଼୍ ମାଲ୍‍ଦିତାଡ଼୍, ଆସୁଟ୍‍ ସାରାଲ୍‌ ମାର୍‌ ଜନମ୍ ମାଡ଼ିମାନ୍‍ତେ ।”
ROM 9:10 ମେଣ୍ଡେ ଆସରେ ଆୟ୍‍ୟ । ଇଣ୍ଡ୍‍ ମାର୍‍ ମାନ୍‍ ଆନିଦାଦି ଇସ୍‍ହାକ୍‍ ମାତ୍‍ତଣ୍ଡ୍‍ । ରିବିକାନ୍ ଇର୍‍ୱୁଡ଼୍ ମାର୍‍କ୍ ଅଣ୍ଡୟ୍‌ ବାବାଲ୍‍ ଇସାକ୍‍ତାଗାଙ୍କ୍ ପୁଟିମାତ୍‍ତଡ଼୍‍,
ROM 9:11 ଅଡ଼୍‌ ଜନମ୍ ଆଦାନ୍ ମୁନେଙ୍କ୍, ବେନ ବାତ୍ଆୟି ନିଜାମ୍‍ ବା କାରାପ୍ ପାଡ଼୍‍ୟି ମାଡ଼ାନ୍ ମୁନେଙ୍କ୍ ଇଶ୍ୱର୍ ଇଦ୍ କେସ୍‍ମାତ୍‍ତଣ୍ଡ୍ । ଅଡ଼ାଦ୍‌ ପାଡ଼୍‍ୟି ଲେକେତ୍‍ ଆୟ୍‍ୟ, ଇଶ୍ୱର୍‌ତେ କାର୍‍ଙ୍ଗାନାଦ୍‍ ତଡ଼୍ ଅଡ଼୍‌ ହେଞ୍ଚିମାନ୍ଦାନ୍ ଆଦ୍‍ତଡ଼୍ ।
ROM 9:12 ଇଡ଼୍ ଲୋପେଙ୍କ୍ ୱେରଣ୍ଡ୍ ଇଶ୍ୱର୍‌ତେ ସେବା ପାଡ଼୍‍ୟି ସେଙ୍ଗେ ହେଞ୍ଚିଆତ୍‍ତଣ୍ଡ୍ । ରିବିକାତିଙ୍କ୍ ଇଶ୍ୱର୍ କେତ୍‍ତଣ୍ଡ୍, “ବାଡ଼୍‍ୟଣ୍ଡ୍ ଦାଦାଲ୍ ସୁଦୁନଣ୍ଡ୍‍ତେ ସେବା ମାଡ଼ିତନ୍ ।”
ROM 9:13 ଶାସ୍ତ୍ର ଗଟ୍ ଇସାବ୍‍ତେ, “ଯାକୁବ୍ ନାକିଂଙ୍କ୍ ପ୍ରେମ ନୁ ପସନ୍ଦ୍ ଆତ୍‍ତଣ୍ଡ୍, ସାୟେ ଆୟ୍‍ୟଣ୍ଡ୍ ।”
ROM 9:14 ଆଲେକେ ବାତ୍ କେତିତାଡ଼୍‍, “ଇଶ୍ୱର୍ ବାତ୍ ଅନ୍‌ୟାୟ୍ ମାଡ଼ିତନ୍ କି ?” ଇଦ୍‍ ବେସୁଟ୍‍ବା ଆୟ୍‍ମାକି ।
ROM 9:15 ବାତେଙ୍କ୍ଇତ୍‍କେ ଅଣ୍ଡ୍‌ ମୋଶାଙ୍କ୍ କେସ୍‍ମାତ୍‍ତଣ୍ଡ୍, “ମାମ୍‍ମେ ବେନଙ୍କ୍ ଇଚ୍ଛା, ଅଂକିଙ୍କ୍‌ ଅନୁଗ୍ରହ୍ ମାଡ଼ିତମ୍; ବେନଙ୍କ୍ ଇଚ୍ଛା, ଅଂକିଙ୍କ୍‌ ଦୟା ମାଡ଼ିତମ୍ ।”
ROM 9:16 ଆଦିଙ୍କ୍ ସାର୍‍ରେ ବିଷୟ୍ ଇଶ୍ୱର୍‌ତେ ଅନୁଗ୍ରହ୍ ପର୍‍ର ଆଶେ ମାଡ଼ିତ୍, ମାନେୟ୍‍ତେ ଇଚ୍ଛା ବା ପାଡ଼୍‍ୟି ପର୍‍ର ଆୟ୍‍ୟ ।
ROM 9:17 ଶାସ୍ତ୍ର ଇସାବ୍‍ତେ ଇଶ୍ୱର୍ ମିସର୍‍ତେ ରାଜାଲ୍‍ ଫାରୋଙ୍କ୍ କେସ୍‍ମାତ୍‍ତଣ୍ଡ୍, “ନି ତଡ଼୍ ମାମ୍‍ମେ ମାୟାଦ୍‌ ଶାତ୍‍ୱାମ୍‍ ତଅତାନ୍ ସେଙ୍ଗେ ନୁ ସାରେ ଜଗତ୍‍ତାଗ୍ ମାୟାଦ୍‌ ମହିମା ତଅତାନ୍ ସେଙ୍ଗେ ମାମ୍‍ମେ ନିକିଂଙ୍କ୍ ରାଜାଲ୍ ମାଡ଼୍‍ତମ୍ ।”
ROM 9:18 ଆଦିଙ୍କ୍ ଇଶ୍ୱର୍‌ତେ ଲେକାମ୍ ଅଣ୍ଡ୍‌ ବେନଙ୍କ୍ ଦୟା ମାଡ଼ିତନ୍ ନୁ ବେନଙ୍କ୍ ଡୁଟାଙ୍ଗ୍‍ ଆଦାନଙ୍କ୍ ୱିଡ଼୍‍ସିତଣ୍ଡ୍ ।
ROM 9:19 ମିଇ ଲୋପେଙ୍କ୍ ବେନ ନାକିଂଙ୍କ୍ କେତାନଙ୍କ୍ ପାର୍‍ଦ୍‍ତଣ୍ଡ୍, “ଆଲେକେ ଇଶ୍ୱର୍ ବାତେଙ୍କ୍ ବେନଙ୍କ୍ ଦଷି ମାଡ଼ିତନ୍ ? ବେନ ବାତ୍ ଇଶ୍ୱର୍‌ତେ ବିରୁଦ୍‍ତେ ବାତ୍ ମାଡ଼ାନଙ୍କ୍ ପାର୍‍ଦ୍‍ତଣ୍ଡ୍ ?”
ROM 9:20 ଇତ୍‍କେ ହୋ ସାଙ୍ଗନଡ଼ି, ଇଶ୍ୱର୍‌ତେ ଗଟ୍‍ତିଙ୍କ୍ ଆଡାମ୍ ଆଦାନଙ୍କ୍ ନିମ୍‍ ବେନ ? “ନାକିଂଙ୍କ୍ ଇଦ୍ ରକମ୍ ବାତେଙ୍କ୍ ତିୟାର୍ ମାଡ଼୍‍ତିନ୍,” ଇଞ୍ଜ କୁଣ୍ଡା ମାଡ଼୍‍ତେନଣ୍ଡ୍ କୁମାଙ୍କ୍ କେତାନଙ୍କ୍ ପାର୍‍ୱ ।
ROM 9:21 ମାଣ୍ଡୁଲ୍‍ତିଙ୍କ୍ ନିଜର୍‍ ଇଚ୍ଛାତେ ବ୍ୟବହାର୍‌ ମାଡ଼ି କୁଣ୍ଡା ତିୟାର୍ ମାଡ଼ାନ୍ ସେଙ୍ଗେ କୁମାନାଦ୍ ସାରେ ଅଦିକାର୍‌ ମିନ୍ଦେ । ୱେରଡ୍‌ ମାଣ୍ଡୁଲ୍‍ ଗଙ୍ଗେତାଗାଙ୍କ୍ ଅଣ୍ଡ୍‌ ରେଣ୍ଡ୍ ପ୍ରକାର୍‍ କୁଣ୍ଡା ତିୟାର୍ ମାଡ଼େ ପାର୍‍ଦ୍‍ତଣ୍ଡ୍, ଅଣ୍ଡୟ୍‌ ପାଣ୍ଡୁମ୍ ଦିନାମ୍‍ତେ ନୁ ମେଣ୍ଡେ ଅଣ୍ଡୟ୍‌ ଆସାମ୍ ପାଡ଼୍‍ୟିତାଗ୍ ବ୍ୟବହାର୍‌ ମାଡ଼ାନ୍ ସେଙ୍ଗେ ।
ROM 9:22 ଇଶ୍ୱର୍ ଗାଲା ଟିକ୍ ଆଦେପୁଟୁଙ୍କ୍ ମାଡ଼୍‍ତଣ୍ଡ୍ । ଅଣ୍ଡ୍‌ ଆଲ୍‍ସ ମାତ୍‍ତଣ୍ଡ୍ ତାନ୍ କପାମ୍ ତଅତାନଙ୍କ୍ ନୁ ଶାତ୍‍ୱାମ୍ ତଅତାନଙ୍କ୍ । ଇତ୍‍କେ ବେନଡ଼୍ ଅନ୍‌ କପାମ୍‍ତାଗ୍ ଦଂସ ଆଦାନାଦ୍ ମାତ୍‍ତେ, ଅଡ଼୍‌ ସେଙ୍ଗେ ଇଶ୍ୱର୍ ଗାଟି ଦୟା ଆତ୍‍ତଣ୍ଡ୍ ।
ROM 9:23 ମେଣ୍ଡେ ଅଣ୍ଡ୍‌ ତାନ୍ ଗୌରବ୍ ତଅତାନ୍ ସେଙ୍ଗେ ମାନାଙ୍କ୍‍ ଗାଟି ଅନୁଗ୍ରହ ତଡ଼୍ ମୁନେନ୍ ଏଞ୍ଚିମାତ୍‍ତଣ୍ଡ୍ ।
ROM 9:24 ଇହୁଦୀଡ଼୍ ଆୟି ବା ଅଣଇହୁଦୀଡ଼୍ ଲୋପେଙ୍କ୍ ଅଣ୍ଡ୍‌ ମାନାଙ୍କ୍‍ କାର୍‍ଙ୍ଗାନାଦ୍‍ ମାଡ଼୍‍ତଣ୍ଡ୍ ।
ROM 9:25 ଇଦ୍ ବିଷୟ୍‍ତେ ହୋଶେୟ ବଇତାଗ୍ ଇଶ୍ୱର୍ କେତ୍‍ତଣ୍ଡ୍, “ବେନଡ଼୍ ମାନ୍‍ ମାନେୟ୍‍ ଇଲ୍‍ୱେ ମାତ୍‍ତଡ଼୍; ଅଡ଼୍‌‍କିଂଙ୍କ୍ ‘ନିଜେତ୍ ନାରୁଡ଼୍’ ଇନା କାର୍‍ଙ୍ଗାନାଦ୍‍ ମାଡ଼ିତମ୍ । ବେନ୍ ଗୋଷ୍ଠୀତିଙ୍କ୍‍ ମାମ୍‍ମେ ପ୍ରେମ ମାଡ଼୍‍ୱେ ମାତ୍‍ତମ୍, ଆଦିଙ୍କ୍ ‘ମାନ୍‍ ନିଜର୍‍ ଗୋଷ୍ଠୀ’ ଇଞ୍ଜ କେତିତମ୍ ।
ROM 9:26 ବେନ୍ ପଡ଼୍‍ୟେତାଗ୍ ଅଡ଼୍‌‍କିଂଙ୍କ୍ କେସ୍‍ମାତ୍‍ତମ୍, ‘ମିଡ଼୍ ମା ମାନେୟ୍‍ ଆୟ୍‍ୱିଡ଼୍,’ ଆଗେ ଅଡ଼୍‌ ଜିୱେ ଇଶ୍ୱର୍‌ତେ ମାର୍‍କ୍ ଇଞ୍ଜ କେତିତଡ଼୍‍ ।”
ROM 9:27 ମେଣ୍ଡେ ଇସ୍ରାୟେଲ୍ ବିଷୟ୍‍ତେ ଯିଶାଇୟ କେତ୍‍ତଣ୍ଡ୍, “ଯଦି ଇସ୍ରାୟେଲୀୟ ନାରୁଡ଼୍ ସମୁଦ୍ରତେ ଉସ୍କ ଇନା ଲେକାନଙ୍କ୍ ଆୟ୍‍ୟଡ଼୍, ଅଡ଼୍‌ ଲୋପେଙ୍କ୍ ଗାଟି ସୁଦୁଟ୍ ନାରୁଡ଼୍ ପରିତ୍ରାଣ୍ ପାଏମ୍ ଆଦ୍‍ତଡ଼୍ ।
ROM 9:28 ବାତେଙ୍କ୍ଇତ୍‍କେ ପ୍ରବୁ ଜାପେ ଜଗତ୍‍ତାଦ୍ ସାରେ ନ୍ୟାୟ୍ ବିଚାର୍ ମାଡ଼ିତନ୍ ।”
ROM 9:29 ବେଦ୍‍ପୁଟୁଙ୍କ୍ ଯିଶାଇୟ ମେଣ୍ଡେ କେସ୍‍ମାତ୍‍ତଣ୍ଡ୍, “ସାର୍ରେତିଙ୍କ୍ ଶାତ୍‍ୱାମ୍ ପ୍ରବୁ ମାୱଡ଼୍ ବେସ୍‍କ୍‍ତୁଡ଼୍‍ ବଂଶଦର୍‍ତିଙ୍କ୍ ରକ୍ଷା ମାଡ଼କଟ୍ ମାତ୍‍କେ, ମାୱାଦ୍ ପରିସ୍ଥିତି ସଦୋମ୍‍ ନୁ ଗମୋରାତେ ନାରୁଡ଼୍ ଇନା ଆୟେଡ଼୍ ।”
ROM 9:30 ଆଦିଙ୍କ୍ ଅଣଇହୁଦୀଡ଼୍ ବିଷୟ୍‍ତେ ଇଦ୍ କେତ୍‍ତେ ପାର୍‍ଦ୍‍ତାଡ଼୍, ଅଡ଼୍‌ ଦାର୍ମାମ୍ ଆଦାନଙ୍କ୍ ଆଲ୍‍ସି ମାଡ଼୍‍ୱେମାତ୍‍ତଡ଼୍, ଇତ୍‍କେ ଅଡ଼ାଦ୍‌ ବିଶ୍ୱାସ୍‍ତେ ମାୟ୍‍ଦିଂଙ୍କ୍ ଦାର୍ମାମ୍ ଆତ୍‍ତଡ଼୍ ।
ROM 9:31 ଇତ୍‍କେ ଇହୁଦୀ ନାରୁଡ଼୍ ନିୟମ୍ ତଡ଼୍ ଦାର୍ମାମ୍ ଆଦାନଙ୍କ୍ ଆଲ୍‍ସି, ଅଡ଼୍‌‍ ଦାର୍ମାମ୍‌ ଆଦାନଙ୍କ୍ ପାର୍‍ୱଡ଼୍ ।
ROM 9:32 ଇଦିନାଦ୍ କାରନ୍‍ ଆଦୁତ୍‍ତେ, ଅଡ଼୍‌ ନିଜେତ୍ ଚେଷ୍ଟାତ୍ ପର୍‍ର ଆଶେ ମାଡ଼ମାତ୍‍ତଡ଼୍, ବିଶ୍ୱାସ୍‍ତେ ପର୍‍ର ଆୟ୍‍ୟ । ଆଦିନ୍‌ସେଙ୍ଗେ ଅଡ଼୍‌ ଆଡାମ୍ ଆଦାନ୍ “କାଲ୍‍ଦାଗ୍ ତାଲ୍‍ଗି ମଦଲ୍ ରାୟ୍‍ତଡ଼୍ ।”
ROM 9:33 ଶାସ୍ତ୍ରତାଗ୍ ବେଲା ଲେକ୍‍ତାଦ୍ ମିନ୍ଦେ, “ଉଡ଼ାଟ୍, ମାମ୍‍ମେ ସିୟନତାଗ୍ ଅଣ୍ଡୟ୍‌ କାଲ୍ ନୁ ଅଣ୍ଡୟ୍‌ ବାଡ଼୍‍ୟାଦ୍ ବାଣ୍ଡ୍‍କାଲ୍ ତିୟାର୍ ମାଡ଼୍‍ତମ୍ । ଆଗେ ତାଲ୍‍ଗି ନାରୁଡ଼୍ ମଦଲ୍ ରାୟିତଡ଼୍ । ଇତ୍‍କେ ବିଶ୍ୱାସୀଡ଼୍ ନିରାଶ୍‍ ଆୟ୍‍ୟଡ଼୍ ।”
ROM 10:1 ଦାଦାଲଡ଼ି ନୁ ଏଲାସ୍କ୍‍, ନା ନିଜେତ୍ ଗୋଷ୍ଠୀତ୍‍ ନାରୁଡ଼୍ ମୁକ୍ତି ପାଏମ୍ ଆୟିଡ଼୍, ଇଦ୍ ନାୟାଦ୍ ଲୋପେତ୍ ଇଚ୍ଛା ନୁ ଇଶ୍ୱର୍‌ତାଗ୍ ଇଦ୍ ନାୟାଦ୍ ସାରେଦାମ୍‍ ପ୍ରାର୍ତନା ।
ROM 10:2 ବାତେଙ୍କ୍‍ଇତ୍‍କେ ଇଶ୍ୱର୍ ସେଙ୍ଗେ ଅଡ଼ାଦ୍‌ ନାର୍‍ଗେ ବକ୍ତି ମିନ୍ଦେ, ଇତ୍‍କେ ଆଦ୍ ବକ୍ତି ନିଜାତାଦ୍ ବୁଦ୍ ତଡ଼୍ ଇଲ୍‍ଲେ ।
ROM 10:3 ନାରୁଡ଼୍‍କିଂଙ୍କ୍ ଦାର୍ମାମ୍ ଲେକାମ୍ ଗ୍ରହନ୍ ମାଡ଼ାନ୍ ସେଙ୍ଗେ ଇଶ୍ୱର୍ ତିୟାର୍ ମାଡ଼୍‍ତେ ଉପାୟ୍ ପୟକଟ ଅଡ଼୍‌ ଦାର୍ମାମ୍ ଆଦାନ୍ ସେଙ୍ଗେ ନିଜେତ୍ ଆର୍‍ଦାଲା ଆଦୁତଡ଼୍‍ । ଆଦିଙ୍କ୍ ଅଡ଼୍‌ ଇଶ୍ୱର୍‌ତେ ଆଦ୍ ଆର୍‍ଦିଙ୍କ୍ ୱିଡ଼୍‍ସ୍‍ତଡ଼୍ ।
ROM 10:4 କ୍ରିଷ୍ଟ କେ ନିୟମ୍‍ତେ ମାଡ଼େଙ୍ଗ୍‍ ମିନ୍ଦେଣ୍ଡ୍, ଅଂକିଙ୍କ୍‌ ବିଶ୍ୱାସ୍ ମାଡ଼୍‍କେ ନାରୁଡ଼୍ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆଦ୍‍ତଡ଼୍ ।
ROM 10:5 ନିୟମ୍ ପାଲନ୍ ମାଡ଼ାନ୍ ବିଷୟ୍‍ତେ ମୋଶାଲ୍‌ ଲେକ୍‍ତଣ୍ଡ୍, “ବେନଡ଼୍ ଇଶ୍ୱର୍‌ତେ ଗଟ୍ ପାଲନ୍ ମାଡ଼ିତଡ଼୍, ଅଡ଼୍‌ ଗେଲ୍‍ସିତଡ଼୍ ।”
ROM 10:6 ଇତ୍‍କେ ବିଶ୍ୱାସ୍ ତଡ଼୍ ଦାର୍ମାମ୍ ଆଦାନ୍ ବିଷୟ୍ ଶାସ୍ତ୍ରତାଗ୍ ଲେକାମିନ୍ଦେ, “ବେନ ସ୍ୱର୍ଗତାଗ୍ ଆଦ୍‍ତନ୍ ? କ୍ରିଷ୍ଟଙ୍କ୍ ଡିପି ତାତାନଙ୍କ୍, ମିଡ଼୍ ଇଦ୍ ପାଚ୍ରା ମାଡ଼ାନାଦ୍ ଦର୍‍କାର୍ ଇଲ୍‍ଲେ ।
ROM 10:7 ମେଣ୍ଡେ ବେନ ପାତାଲ୍‍ତାଗ୍ ଆଦ୍‍ତନ୍ ? କ୍ରିଷ୍ଟଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ମାଡ଼ି ତାତାନଙ୍କ୍, ଇଦ୍ ଗଟ୍ ଗାଲା ମିଡ଼୍ ପାଚ୍ରା ମାଡ଼ାନାଦ୍ ଦର୍‍କାର୍ ଇଲ୍‍ଲେ ।”
ROM 10:8 ବାତେଙ୍କ୍ଇତ୍‍କେ ଶାସ୍ତ୍ର ଇସାବ୍‍ତେ, “ଇଶ୍ୱର୍‌ତାଦ୍ କାବୁର୍ ମିଇ ବକେତ୍, ମିଇ ପାୟୁର୍ ନୁ ହୃଦୟ୍‍ତାଗ୍ ମିନ୍ଦେ ।” ବିଶ୍ୱାସ୍ ବିଷୟ୍‍ତେ ଇଦ୍ ଗଟ୍ ଇଁ ମାମ୍‍ମେ ପ୍ରଚାର୍ ମାଡ଼ୁତମ୍ ।
ROM 10:9 ଯଦି ଜିସୁଙ୍କ୍ ପ୍ରବୁ ଇଞ୍ଜ ପାୟୁର୍‍ତାଗ୍ କେତିତିଡ଼୍ ନୁ ଇଶ୍ୱର୍ ଅଂକିଙ୍କ୍‌ ଡଲ୍‍ତାଗାଙ୍କ୍ ତେଏତଣ୍ଡ୍ ଇଞ୍ଜ ଜିୱୁଣ୍ଡ୍‍ତାଗ୍ ବିଶ୍ୱାସ୍ ମାଡ଼ିତିଡ଼୍, ଆଲାଇତ୍‍କେ ମିଡ଼୍ ମୁକ୍ତି ପାଏମ୍ ଆଦ୍‍ତିଡ଼୍ ।
ROM 10:10 ହୃଦୟ୍‍ତାଗ୍‍ ବିଶ୍ୱାସ୍ ମାଡ଼ାନ୍‍ ତଡ଼୍ ମାନାଡ଼୍ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଇଞ୍ଜ ଗଣା ଆଦ୍‍ତାଡ଼୍ ନୁ ପାୟୁର୍‍ତାଗ୍ କେତ୍‍କେ ମାନାଡ଼୍ ମୁକ୍ତି ପାଏମ୍ ଆତ୍‍ତାଡ଼୍ ।
ROM 10:11 ଶାସ୍ତ୍ର ଲେକାମ୍, “ଅଂକିଙ୍କ୍‌ ବିଶ୍ୱାସ୍ ମାଡ଼ି ବେନ ସିଗ୍‍ ଆୟ୍‍ୟଡ଼୍ ।”
ROM 10:12 ବାତ୍‍ବା ବେଦ୍‍ବାବ୍ ଇଲ୍‍ୱେକଟ, ଇଦ୍ ଗଟ୍ ଇହୁଦୀ, ଅଣଇହୁଦୀ ସାର୍ରେତଡ଼୍ ସେଙ୍ଗେ ଦର୍‍କାର୍ । ଇଶ୍ୱର୍ ସାର୍ରେତଡ଼ାଦ୍ ପ୍ରବୁ । ବେନଡ଼୍ ଅନାଗ୍‍ ସାହାଯ୍ୟ ପ୍ରାର୍ତନା ମାଡ଼ିତଡ଼୍, ଅଡ଼୍‌‍କିଂଙ୍କ୍ ଅଣ୍ଡ୍‌ ନାର୍‍ଗେ ଆର୍ଶିବାଦ୍ ମାଡ଼ିତଣ୍ଡ୍ ।
ROM 10:13 “ବେନଆଇ ପ୍ରବୁନ୍ ପେଦେର୍‍ତେ ପ୍ରାର୍ତନା ମାଡ଼ିତନ୍, ଅଣ୍ଡ୍‌ ମୁକ୍ତି ପାଏମ୍ ଆଦ୍‍ତନ୍ ।”
ROM 10:14 ଇତ୍‍କେ ବେନଙ୍କ୍ ବିଶ୍ୱାସ୍ ମାଡ଼କଟ୍ ଅଡ଼୍‌ ବେଲା ଅଂକିଙ୍କ୍‌ ପ୍ରାର୍ତନା ମାଡ଼ିତଡ଼୍ ? ମେଣ୍ଡେ ଅନ୍‌ ବିଷୟ୍‍ତେ ସୁସମାଚାର୍ କେଞ୍ଜକଟ ଅଡ଼୍‌ ବେଲା ବିଶ୍ୱାସ୍ ମାଡ଼ିତଡ଼୍ ? ମେଣ୍ଡେ ପ୍ରଚାର୍ ମାଡ଼ାନଡ଼୍‍ ବିନା ଆଦ୍ କାବୁର୍ ଅଡ଼୍‌ ବେଲା କେଞ୍ଜିତଡ଼୍ ?
ROM 10:15 ମେଣ୍ଡେ ପ୍ରଚାର୍ ମାଡ଼ାନ୍ ସେଙ୍ଗେ ୱେରଣ୍ଡ୍ ପ୍ରେରିତ୍ ଆୟ୍‍ୱେ ମାତ୍‍କେ ୱେରଣ୍ଡ୍ ବେଲା ପ୍ରଚାର୍ ମାଡ଼ିତନ୍ ? ଇଦ୍ ବିଷୟ୍‍ତେ ଶାସ୍ତ୍ରତାଗ୍ ଲେକାମିନ୍ଦେ, “ଲେକେତ୍‍ କାବୁର୍‍ ପ୍ରଚାର୍ ମାଡ଼ାନଡ଼୍‍ ୱାଦାନାଦ୍ ବେସର୍ ୱେଡ଼୍‍କେ ଆଦ୍‍ତେ !”
ROM 10:16 ଇତ୍‍କେ ସାର୍ରେତଡ଼୍ ଆଦ୍ ସୁସମାଚାର୍ ଗ୍ରହନ୍ ମାଡ଼ଡ଼୍‍ । ଆଦିନ୍ ସେଙ୍ଗେ ଯିଶାଇୟ ଲେକ୍‍ତଣ୍ଡ୍, “ପ୍ରବୁ, ମାନ୍‍ କାବୁର୍ କେଞ୍ଜି ବେନ ବିଶ୍ୱାସ୍ ମାଡ଼୍‍ତଣ୍ଡ୍ ?”
ROM 10:17 ସୁସମାଚାର୍ କେଞ୍ଜ୍‍କେ ବିଶ୍ୱାସ୍ ତିୟାର୍ ଆଦ୍‍ତେ ନୁ କ୍ରିଷ୍ଟଙ୍କ୍ ପ୍ରଚାର୍ ମାଡ଼ାନାଦେ ଆଦୁତ୍‍ତେ ଆଦ୍ ସୁସମାଚାର୍ ।
ROM 10:18 ଇତ୍‍କେ ନାନ୍ ପାଚ୍ରା ମାଡ଼ିତାନ୍, ଅଡ଼୍‌ ବାଆତେ ଆଦ୍ କାବୁର୍ କେଞ୍ଜଡ଼୍ ? ନିଜାମ୍ କେଞ୍ଜ୍‍ତଡ଼୍, ବାତେଙ୍କ୍ଇତ୍‍କେ ଶାସ୍ତ୍ରତାଗ୍ ଲେକାମିନ୍ଦେ, “ଅଡ଼ାଦ୍‌ ଲେଙ୍ଗ୍ ସାରେ ଜଗତ୍‍ତାଗ୍ ଏକାମ୍ ଆତ୍‍ତେ, ଅଡ଼ାଦ୍‌ ଗଟ୍ ପୃତିବିତେ ସାର୍ରେଏକାମ୍ କେଞ୍ଜ୍‍ତଡ଼୍ ।”
ROM 10:19 ମେଣ୍ଡଅନ୍‌‍ଦାମ୍ ନାନ୍ ପାଚ୍ରା ମାଡ଼ିତାନ୍, ଇଶ୍ରାଏଲୀୟ ନାରୁଡ଼୍ ବାଆତେ ଆଦ୍ ବୁଜେମ୍ ଆୟ୍‍ୟଡ଼୍ ? ନିଜାମ୍‍ ବୁଜେମ୍‍ ଆତ୍‍ତଡ଼୍‍, ନାର୍‍ଗେ ଦିନାମ୍ ମୁନେଙ୍କ୍ ମୋଶାନ୍‌‌ ୱେଲେ ଇଶ୍ୱର୍ କେତ୍‍ତଣ୍ଡ୍‍, “ମାନ୍‍ ନାରୁଡ଼୍‍କିଂଙ୍କ୍ ଇର୍ଷା ମାଡ଼ାନ୍ ସେଙ୍ଗେ ଅଣ୍ଡୟ୍‌ ପୁନ୍‍ୱାଦ୍ ଗୋଷ୍ଠୀତିଙ୍କ୍ ବ୍ୟବହାର୍‌ ମାଡ଼ିତାନ୍‍ । ଆଦେରକମ୍ ଅଣ୍ଡୟ୍‌ ମୁର୍କ ଗୋଷ୍ଠୀତଡ଼୍ ନା ନାରୁଡ଼୍‍କିଙ୍କ୍‍ କପାମ୍ ମାଡ଼ିତାନ୍‍ ।”
ROM 10:20 ଯିଶାଇୟ ମେଣ୍ଡେ ଗାଡ଼୍‍ସ୍ ଆସ୍‍ କେତ୍‍ତଣ୍ଡ୍, “ମାନାଙ୍କ୍‍ ମେକ୍‍ୱେମାତ୍‍ତେ ନାରୁଡ଼୍ ମାନାଦ୍‍ କାବୁର୍ ପାଏମ୍ ଆତ୍‍ତଡ଼୍; ବେନଡ଼୍ ମାକିଂଙ୍କ୍ ଆନୁସନ୍ଦାନ୍‍ ମାଡ଼୍‍ୱେମାତ୍‍ତଡ଼୍, ଅଡ଼୍‌ ବକେତ୍ ମାନାଡ଼୍ ତଅନ୍‌ଦ୍‍ତାଡ଼୍ ।”
ROM 10:21 ଇତ୍‍କେ ଇଶ୍ୱର୍ ଇଶ୍ରାଏଲୀୟ ନାରୁଡ଼୍ ବିଷୟ୍‍ତେ କେତ୍‍ତଣ୍ଡ୍, “ୱେରଡ଼୍ ବିଶ୍ୱାସ୍ ଇଲ୍‍ୱେ ଗଲ୍‍କ୍ ଗୋଷ୍ଠୀତିଙ୍କ୍ ମାନାଡ଼୍ ସାର୍ରେଦାମ୍ କାୟ୍‍ଆସ୍ କାର୍‍ଙ୍ଗାନାଦ୍‍ ମାଡ଼ୁତାଡ଼୍ ।”
ROM 11:1 ନାନ୍ ମେଣ୍ଡେ ପାଚ୍ରା ମାଡ଼ିତାନ୍, “ଆଲେକେ ବାତ୍ ଇଶ୍ୱର୍ ତାନ୍ ନିଜେତ୍ ନାରୁଡ଼୍‍କିଂଙ୍କ୍ ପାସ୍‍କି ମିନ୍ଦେଣ୍ଡେ ? ବେସୁଟ୍‍ବା ଆୟ୍‍ୟ । ନାନ୍ ନିଜେ ୱେରଣ୍ଡ୍ ଇଶ୍ରାଏଲୀୟ, ଅବ୍ରାହାମ୍‌ତେ ବଂଶତନ୍ ନୁ ବେଞ୍ଜାମିନ୍ ଗୋଷ୍ଠୀତନ୍ ।”
ROM 11:2 ଇଶ୍ୱର୍ ମୁନେତ୍‍କନ୍ସ୍ ଏଞ୍ଚିମାନ୍ଦାନ୍ ତାନ୍ ନାରୁଡ଼୍‍କିଂଙ୍କ୍ ବେସୁଟ୍‍ବା ପାସ୍‍କଣ୍ଡ୍ । ମିଡ଼୍ ଶାସ୍ତ୍ରତାଗ୍ କାର୍‍ୟ୍‍ତିଡ଼୍, ବେଲା ଏଲୀୟ ଇଶ୍ୱର୍‌ତେ ଗାର୍‍ରେ ଇଶ୍ରାଏଲୀୟ ନାରୁଡ଼୍ ବିରୁଦ୍‍ତେ ଅବିଯୋଗ୍ ମାଡ଼ି କେସ୍‍ମାତ୍‍ତଣ୍ଡ୍,
ROM 11:3 “ପ୍ରବୁ, ଅଡ଼୍‌ ନି ବାବବାଦି ନାରୁଡ଼୍‍କିଂଙ୍କ୍ ଆୱୁକ୍‍ତଡ଼୍ ନୁ ନି ଯଜ୍ଞବେଦିକିଂଙ୍କ୍ ଉଃହୁସ୍‍ ଦଂସ ମାଡ଼୍‍ତଡ଼୍ । ନାନ୍ ୱେରନେ ଜିୱୁଣ୍ଡ୍ ରକ୍ଷା ପାଏମ୍‍ଆତ୍‍ତାନ୍‍; ନାକିଂଙ୍କ୍ ଗାଲା ଆୱୁକାନଙ୍କ୍ ଅଡ଼୍‌ ଆଲ୍‍ସୁତଡ଼୍ ।”
ROM 11:4 ଏଲୀୟଙ୍କ୍ ଇଶ୍ୱର୍ ବାତ୍ ଉତ୍ତର୍ ଇସ୍‍ମାତ୍‍ତଣ୍ଡ୍ ? “ବୁସା ଦେୟାମ୍ ବାଲ୍ ପୁତ୍‍ଲାମ୍‍ତିଙ୍କ୍ ବେନଡ଼୍ ପୁଜେ ମାଡ଼ଡ଼୍‍ ଅଡ଼୍‌ ସାତ୍ ହଜାର୍‌ ନାରୁଡ଼୍‍କିଂଙ୍କ୍ ମାନ୍‍ ସେଙ୍ଗେ ନେଏଃସ୍‍ମିନ୍ଦେନ୍‍ ।”
ROM 11:5 ଇଞ୍ଜେ ଟିକ୍ ଆଦେରକମ୍ ଗଟେମ୍‍ଆତ୍‍ତେ । ଇଶ୍ୱର୍ ଅନୁଗ୍ରହ୍ ମାଡ଼ି ବେନଡ଼୍‍କିଂଙ୍କ୍ ଏଞ୍ଚିମାତ୍‍ତଣ୍ଡ୍, ଅଡ଼୍‌ ଲୋପେଙ୍କ୍ ସୁକୁକ୍ ନାରୁଡ଼୍ ମାୟ୍‍ସ୍‍ ମିନ୍ଦେଡ଼୍‍ ।
ROM 11:6 ଇଶ୍ୱର୍ ଅଡ଼୍‌‍କିଂଙ୍କ୍ ନିଜେତ୍ ଅନୁଗ୍ରହ୍ ସେଙ୍ଗେ ଏଞ୍ଚ୍‍ତଣ୍ଡ୍ । ଯଦି ଅଡ଼ାଦ୍‌ ନିଜାତେ ପାଡ଼୍‍ୟି ମାୟ୍‍ଦିଂଙ୍କ୍ ଇଶ୍ୱର୍ ଅଡ଼୍‌‍କିଂଙ୍କ୍ ଏଞ୍ଚିମାନେଣ୍ଡ୍, ଅନାଦ୍‌ ଅନୁଗ୍ରହ୍ ନିଜାତେ ଅନୁଗ୍ରହ୍ ଆୟଆୟେଡ଼୍ ।
ROM 11:7 ଆଲେକେ ବାତ୍ ଆତ୍‍ତେ ? ଇଶ୍ରାଏଲୀୟଡ଼୍ ବାତ୍ ମେଏଃକମାତ୍‍ତଡ଼୍, ଆଦ୍ ପାଏମ୍ ଆୟ୍‍ୟଡ଼୍ । ଇଶ୍ୱର୍ ଏଞ୍ଚିମାନ୍ଦାନ୍ ଅଣ୍ଡୟ୍‌ ସୁଦୁର୍ ଗୋଷ୍ଠୀ ଆଦ୍ ଦର୍‍କ୍‍ତେ । ମେଣ୍ଡେ ବାଗାତଡ଼୍ ଇଶ୍ୱର୍‌ତେ ଆୱାନ୍‍ତିଙ୍କ୍ ମାନ୍‍ ଇୱଡ଼୍ ।
ROM 11:8 ଶାସ୍ତ୍ର ବାକ୍ୟ ଲେକାମ୍, “ନିଜାମ୍ ବେଦ୍‍ପୁଟୁଙ୍କ୍ ଇଶ୍ୱର୍ ଅଡ଼ାଦ୍‌ ମନ୍ ନୁ ଜିୱୁଣ୍ଡ୍‍ତିଙ୍କ୍ ବେକାର୍‍ ମାଡ଼ିମିନ୍ଦେଣ୍ଡ୍ । ଇଞ୍ଜେକ୍‍ଆନା ଅଡ଼୍‌ ବାତ୍ ନା ଉଡ଼ାନଙ୍କ୍ ପାର୍‍ଦୁତଡ଼୍, ନା କେଞ୍ଜାନଙ୍କ୍ ପାର୍‍ଦୁତଡ଼୍ ।”
ROM 11:9 ଅଡ଼୍‌ ବିଷୟ୍‍ତେ ଦାଉଦ୍‍ ଲେକ୍‍ତଣ୍ଡ୍, “ଅଡ଼୍‌ ପାଣ୍ଡୁମ୍ ମାଡ଼ାନ୍ ୱେଲେ ଉଡ଼୍‍ୟିତାଗ୍ ରାୟିଡ଼୍ । ମଦଲ୍ ରାଲି ଦଣ୍ଡ୍ ପାଏମ୍ ଆୟିଡ଼୍ ।
ROM 11:10 ଅଡ଼ାୱୁ କଣ୍ଡା କାନାଲ୍‌ ଆସ୍ ଉଡ଼ାନଙ୍କ୍ ପାର୍‍ମାକିଡ଼୍ । ସାର୍ରେଦାମ୍ ଦୁଃକାମ୍ ଆସ୍ ଅଡ଼ାୱୁ ଟିକିଡ଼୍ ମୁର୍ଗୁ ଆୟି ।”
ROM 11:11 ନାନ୍ ପାଚ୍ରା ମାଡ଼ିତାନ୍, ଇହୁଦୀଡ଼୍ ମଦଲ୍ ଆଡ଼୍‌‍କ୍‍ତାଙ୍କ୍ ବାତ୍ ଦଂସ ଆତ୍‍ତଡ଼୍ ? ବେସୁଟ୍‌ ଆୟ୍‍ୟ । ଅଡ଼୍‌ ପାପାମ୍ ମାଡ଼୍‍ତାଙ୍କ୍, ଅଡ଼୍‌‍କିଂଙ୍କ୍ ଇର୍ଷା ମାଡ଼ାନ୍ ସେଙ୍ଗେ ଅଣଇହୁଦୀଡ଼୍‍କ୍ ମୁକ୍ତିତେ ଅଦିକାରି ମାଡ଼୍‍ତଡ଼୍ ।
ROM 11:12 ଇହୁଦୀଡ଼ାଦ୍ ପାପାମ୍, ଜଗତ୍‍ତାଗ୍ ବାଗାତ୍ ସାର୍ରେତଡ଼୍‍ ସେଙ୍ଗେ ନାର୍‍ଗେ ଆର୍ଶିବାଦ୍ ତାତ୍‍ତେ । ଇହୁଦୀଡ଼ାଦ୍ ଆଦ୍ୟାତ୍ମିକ୍ ସୁଦୁର୍ ସେଙ୍ଗେ ଅଣଇହୁଦୀଡ଼୍ ଆର୍ଶିବାଦ୍‍ତାଦ୍ ସମ୍ପତି ପାଏମ୍ ଆତ୍‍ତଡ଼୍ । ଯଦି ସାର୍‍ରେ ଇହୁଦୀ ଗୋଷ୍ଠୀ ରକ୍ଷା ପାଏମ୍ ଆୟେଡ଼୍, ଆଲେକେ ତାନ୍‍ତଡ଼୍ ମେଣ୍ଡେ ବେସର୍ ନାର୍‍ଗେ ଆର୍ଶିବାଦ୍ ଦର୍‍କ ଆୟେଡ଼୍ ?
ROM 11:13 ଅଣଇହୁଦୀ ନାରୁଡ଼୍‍କିଂଙ୍କ୍ ନାନ୍ କେତୁତାନ୍, ମିଇ ସେଙ୍ଗେ ପ୍ରେରିତ ଶିଷ୍ୟ ଇନା ପାଡ଼୍‍ୟି ମାଡ଼ାନଙ୍କ୍ ନାନ୍ ଗର୍ବ ଏର୍କା ମାଡ଼ୁତାନ୍ ।
ROM 11:14 ଇଦିନ୍ ସେଙ୍ଗେ ନାନ୍ ନା ନିଜେତ୍ ଗୋଷ୍ଠୀତ୍‍ ନାରୁଡ଼୍‍କିଂଙ୍କ୍ ଇର୍ଷା ମାଡ଼େପାର୍‍ଦ୍‍ତାନ୍, ଆତ୍‍କେ ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍କିଂଙ୍କ୍ ରକ୍ଷା ମାଡ଼େପାର୍‍ଦ୍‍ତାନ୍ ।
ROM 11:15 ବାତେଙ୍କ୍ଇତ୍‍କେ ଅଡ଼୍‌‍କ୍ ପାସ୍‍କ୍‍ତାଙ୍କ୍ ଇଶ୍ୱର୍ ତଡ଼୍ ସାର୍‍ରେ ନାରୁଡ଼୍ ଗୋଷ୍ଠୀତ୍‍ ସାଙ୍ଗ ଆଦ୍‍ତଡ଼୍ । ଆଲେକେ, ଯଦି ଇଶ୍ୱର୍ ସାର୍‍ରେ ଇହୁଦୀ ଗୋଷ୍ଠୀତିଙ୍କ୍ ଗ୍ରହନ୍ ମାଡ଼ିତନ୍, ଆଲେକେ ବାତ୍ ଆଦ୍‍ତେ ? ଆଦ୍ ଆଦ୍‍ତେ ଡଲ୍‍ତେନଣ୍ଡ୍ ଜିୱେ ଆତ୍‍ତେ ଲେକାମ୍ ।
ROM 11:16 ଯଦି ରୂଟିନାଗାଙ୍କ୍ ସୁକୁକ୍ ଇଶ୍ୱର୍‌ତେ ମାୟ୍‍ଦିଙ୍କ୍ ସର୍ପା ଆସ୍‍ମାତ୍‍ତେ, ସାର୍‍ରେ ରୂଟି ସର୍ପା ଆତ୍‍ତେ ପୁଟୁଙ୍କ୍ ଆଲ୍‍ସେ ୱେୟ୍‍ତିତ୍ । ୱେରଡ଼୍ ମାଡ଼େତ୍ ମାଡେ ସର୍ପା ଆସ୍‍ମାତ୍‍କେ, ଆଦିନ୍ କମ୍‍ମା ଗାଲା ସର୍ପା ଆତ୍‍ତେ ଇଞ୍ଜ ଆଲ୍‍ସାନଙ୍କ୍ ଆଦ୍‍ତେ ।
ROM 11:17 ଗୁଡ଼େତାଗ୍ ଉର୍‍ସ୍କି ମାନ୍ଦାନ୍ ୱେରଡ଼୍ ଜୀତ ମାଡ଼େତ୍ ବେସ୍‌କ୍ କମ୍‍ମା ନାଡ଼୍‍କି, ଗୁପେତାଦ୍ ଜୀତ ମାଡ଼େତ୍ କମ୍‍ମା ଆଦ୍ ପଡ଼୍‍ୟେତାଗ୍ କଲମ୍ ମାଡ଼୍‍ତଡ଼୍ । ଅଣଇହୁଦୀଡ଼୍ ଆଦ୍ ଗୁପେତାଦ୍ ଜୀତ ମାଡ଼େ ଲେକାମ୍ । ମିଡ଼୍ ଇଞ୍ଜେ ଇହୁଦୀଡ଼୍ ଶାତ୍‍ୱାମ୍ ଆଦ୍ୟାତ୍ମିକ୍‍ ଜିୱୁଣ୍ଡ୍‍ତାଦ୍ ବାଗିଦାର୍ ଆତ୍‍ତିଡ଼୍ ।
ROM 11:18 ଆଦିଙ୍କ୍ ମିଡ଼୍ ନାଡ଼୍‍କ୍‍ତେ କମାଙ୍କ୍ ପାସ୍‍କ୍‍ମାଟ୍ । ମିଡ଼୍ ବାତେଙ୍କ୍ ଗର୍ବ ମାଡ଼ିତିଡ଼୍ ? ମିଡ଼୍ ତ ଆସାମ୍ କମ୍‍ମା, ମାଡ଼େତ୍ ମାଡେତିଙ୍କ୍ ମିଡ଼୍ ପଡ଼୍‍ପ୍‍ୱିଡ଼୍, ଇତ୍‍କେ ମାଡେ ମିକିଂଙ୍କ୍ ପଡ଼୍‍ପୁତ୍ ।
ROM 11:19 ଅଦିନ୍‌ ସେଙ୍ଗେ ମିଡ଼୍ କେତେ ପାର୍‍ଦ୍‍ତିଡ଼୍, “ଅଁ, ଇତ୍‍କେ ନାକିଂଙ୍କ୍ ପଡ଼୍‍ୟେ ଇଦାନ୍ ସେଙ୍ଗେ ସିନା ଆୱୁ କମାକିଙ୍କ୍ ନାଡ଼୍‍କି ମାତ୍‍ତଡ଼୍ ।”
ROM 11:20 ଆଦ୍ ନିଜାମ୍ । ଅଡ଼୍‌ ଅବିଶ୍ୱାସୀ ଆଇନାଙ୍କ୍ ୱେରେ ଆତ୍‍ତଡ଼୍ । ମିଡ଼୍ ଆସାମ୍ ବିଶ୍ୱାସ୍ ମାୟ୍‍ଦିଙ୍କ୍ ଆଦ୍ ପଡ଼୍‍ୟେତାଦ୍ ଅଦିକାରି ଆତ୍‍ତିଡ଼୍ । ଇତ୍‍କେ ଗର୍ବ ମାଡ଼କଟ୍ ୱେର୍‍ମୁଟ୍ ।
ROM 11:21 ଯଦି ମାଡ଼େତ୍ ତଡ଼୍ ପୁଟ୍‍ତେ କମ୍‍ମା ଲେକାମ୍ ଇହୁଦୀଡ଼୍‍କିଙ୍କ୍ ଇଶ୍ୱର୍ ଦଣ୍ଡ୍ ଇୱକଟ ୱିଡ଼୍‍ସଣ୍ଡ୍, ମିକିଂଙ୍କ୍ ବାତ୍ ଅଣ୍ଡ୍‌ ୱିଡ଼୍‍ସିତଣ୍ଡ୍ ?
ROM 11:22 ଇଗେ ଉଡ଼ାନଙ୍କ୍ ଆଦ୍‍ତେ, ଇଶ୍ୱର୍ ବେସର୍ ଦୟାବାନ୍ ନୁ ଗାଡ଼୍‍ସ୍ ମିକା । ବେନଡ଼୍ ଡେକା ନାଡ଼୍‍କ୍‍ତଡ଼୍, ଅଡ଼୍‌ ସେଙ୍ଗେ ଅଣ୍ଡ୍‌ ଗାଡ଼୍‍ସ୍; ଇତ୍‍କେ ମିଇ ସେଙ୍ଗେ ଅଣ୍ଡ୍‌ ଦୟାବାନ୍, ବେସୁଟ୍‌ ଅନ୍‌‍ପାକେ ମିଡ଼୍ ଅନ୍‌‍ୱାଦ୍ ଦୟା ଆସ୍ ମାନ୍‍ତିଡ଼୍ । ଅନ୍‌‍ୱାଦ୍ ଦୟା ଆରେମ୍ ଆତ୍‍କେ, ମିଡ଼୍ ଗାଲା ୱେରେ ଆଦ୍‍ତିଡ଼୍ ।
ROM 11:23 ଯଦି ଇହୁଦୀଡ଼୍ ଅଡ଼ାଦ୍‌ ଅବିଶ୍ୱାସୀ ଜେକେ ମାଡ଼ିତଡ଼୍, ଆଲେକେ ଅଡ଼୍‌ ନିଜେତ୍ ପଡ଼୍‍ୟେତାଗ୍ ମେଣ୍ଡଅନ୍‌‍ଦାମ୍ ମାନ୍‍ତଡ଼୍ । ଇଦ୍ ମାଡ଼ାନଙ୍କ୍ ଇଶ୍ୱର୍ ରାଜି ।
ROM 11:24 ଅଣଇହୁଦୀଡ଼୍ ଗୁପେତାଦ୍ ଜୀତ ମାଡ଼େତ୍‍ କମା ଲେକାମ୍ । ଆୱିଙ୍କ୍ ନାଡ଼୍‍କି ଗୁଡ଼େତାଗ୍ ସାୟେ ମାନ୍ଦାନ୍ ଜୀତ ମାଡ଼େ ତଡ଼୍ ଜଡ଼ା ମାଡ଼୍‍ତଡ଼୍ । ଇହୁଦୀ ବଂଶ ଗୁଡ଼େତାଗ୍ ମାନ୍ଦାନ୍ ଜୀତ ମାଡ଼େ ରକମ୍ । ଇଦ୍ ମାଡ଼େତ୍‍ ନାଡ଼୍‍କ୍‍ତେ କମାକିଙ୍କ୍ ମେଣ୍ଡଅନ୍‌‍ଦାମ୍ ମାଡ଼େ ତଡ଼୍ ଜଡ଼ା ମାଡ଼ାନାଦ୍ ଇଶ୍ୱର୍‌ତିଙ୍କ୍ ସହଜ୍ ।
ROM 11:25 ଦାଦାଲଡ଼ି ନୁ ଏଲାସ୍କ୍‍, ଇଦ୍ ବିଷୟ୍‍ତେ ଅଣ୍ଡୟ୍‌ ମିଞ୍ଜ୍‍ତାଦ୍ ନିଜାମ୍ କେତୁତାନ୍‍ । ଆଦ୍ କେଞ୍ଜ୍‍କେ, ମିଡ଼୍ ମେଣ୍ଡେ ନିଜେ ଜ୍ଞାନି ଇଞ୍ଜ ଆଲ୍‍ସ୍‍ୱିଡ଼୍ । ଇଶ୍ରାଏଲୀୟଡ଼୍ ମୁର୍କ ସାର୍ରେଦିନା ମାନ । ଅଣଇହୁଦୀଡ଼୍ ସାର୍‍ରେ ଇଶ୍ୱର୍‌ତେ ବକେତ୍ ୱାଦାନ୍ ଯାକ ଅଡ଼୍‌ ଆଲେକେ ମାନ୍‍ତଡ଼୍ ।
ROM 11:26 ତାନ୍‍ପେର୍କେ ଇଶ୍ରାଏଲୀୟଡ଼୍ ସାର୍‍ରେ ଇଦ୍ ଶାସ୍ତ୍ର ଲେକାମ୍ ରକ୍ଷା ଦର୍‍କିତ୍, “ମୁକ୍ତିଦାତାଲ୍ ସିୟନକନ୍ସ୍ ୱାଦ୍‍ତଣ୍ଡ୍; ଜାକୁବନ୍ ବଂଶତଡ଼୍‍କ୍‍ ସାର୍‍ରେତଡ଼୍‍କିଙ୍କ୍‍ ରକ୍ଷା ମାଡ଼ିତନ୍ ।
ROM 11:27 ଅଡ଼ାଦ୍‌ ପାପ୍‌ ଜେକେ ମାଡ଼ାନ୍‍ୱେଲେ ଅଡ଼୍‌ ତଡ଼୍ ଇଦ୍ ଚୁକ୍ତି ମାଡ଼ିତମ୍ ।”
ROM 11:28 ମିୟାଦ୍ ଲେକେତ୍‍ ସେଙ୍ଗେ ଇହୁଦୀଡ଼୍ ସୁସମାଚାର୍‍ତିଙ୍କ୍ ପାସ୍‍କି ଇଶ୍ୱର୍‌ତେ ଶତ୍ରୁ ଆତ୍‍ତଡ଼୍ । ଇତ୍‍କେ ଇଶ୍ୱର୍ ତଡ଼୍ ଏଞ୍ଚିମାନ୍ଦାନ୍‍ ସେଙ୍ଗେ ନୁ ତାମ୍ ଆନିଦାଦିଡ଼୍ ସେଙ୍ଗେ ଅଡ଼୍‌ ଇଶ୍ୱର୍‌ତେ ପ୍ରିୟ ଆସ୍‍ମିନ୍ଦେଡ଼୍ ।
ROM 11:29 ଇଶ୍ୱର୍ ବେନଡ଼୍‍କିଂଙ୍କ୍ ଏଞ୍ଚି ଆର୍ଶିବାଦ୍ ମାଡ଼୍‍ତନ୍, ଅଡ଼୍‌ ସେଙ୍ଗେ ତାନ୍ ଦାନ ଇଦାନାଗ୍ ଅଣ୍ଡ୍‌ ଗାଡ଼୍‍ସ୍ ମାନ୍‍ତଣ୍ଡ୍ ।
ROM 11:30 ଆଦିଙ୍କ୍‍ ଅଣଇହୁଦୀଡ଼୍ ମୁନେନ୍ ମୁର୍କ ମାତ୍‍ତଡ଼୍; ଇତ୍‍କେ ଇଞ୍ଜେ ଇହୁଦୀଡ଼୍ ମୁର୍କତ୍ ସେଙ୍ଗେ ଅଣଇହୁଦୀଡ଼୍ ଇଶ୍ୱର୍‌ତେ ଅନୁଗ୍ରହ୍ ପାଏମ୍ ଆତ୍‍ତଡ଼୍ ।
ROM 11:31 ଆଦିଙ୍କ୍‍ ଅଣଇହୁଦୀଡ଼୍ ମିକା ଅନୁଗ୍ରହ୍ ପାଏମ୍‍ଆତ୍‍ତଡ଼୍, ଇହୁଦିଡ଼୍ ଇଞ୍ଜେ ଜେକେ ଆଞ୍ଜ୍‍ମାତ୍‍କେ ଗାଲା, ଅନ୍‌‍ଦିନେ ଅଡ଼୍‌ ମାଲ୍‍ସ୍ ୱାସ୍ ଅନୁଗ୍ରହ ଦର୍‍କିତ୍ ।
ROM 11:32 ଇଶ୍ୱର୍ ସାର୍ରେତଡ଼୍‍କିଙ୍କ୍ ଅବିଶ୍ୱାସ୍ ଆଦାନଙ୍କ୍ ୱିଡ଼୍‍ସିତ୍‍ତଣ୍ଡ୍; ଆଦିଙ୍କ୍ ସାର୍ରେତଡ଼୍ ଇଶ୍ୱର୍‌ତେ ଦୟାତଡ଼୍ ଆଦେପାର୍‍ଦ୍‍ତଡ଼୍ ।
ROM 11:33 ଇଶ୍ୱର୍‍ ବେସର୍‍ ବେଡ଼୍‌ୟଣ୍ଡ୍‌ । ଅନ୍‌‍ୱାଦ୍ ଜ୍ଞାନ୍‍ ନୁ ବୁଦ୍ ବେସର୍ ନାର୍‍ଗେ । ଅନ୍‌‍ୱାଦ୍ ନିସ୍ପତିତାଦ୍ ଅର୍ତ ବେନ ବୁଜାମାଡ଼ିତଣ୍ଡ୍ ? ବେନ ଅନ୍‌‍ୱାଦ୍ ଉଡାନାଦ୍ ପୁନ୍ଦାନଙ୍କ୍ ପାର୍‍ଦ୍‍ତଣ୍ଡ୍ ?
ROM 11:34 ଶାସ୍ତ୍ର ଲେକାମ୍, “ବେନ ଇଶ୍ୱର୍‌ତେ ମନ୍‍ତେ ଆଲ୍‍ସାନାଦ୍ ପୁନ୍ଦେପାର୍‍ଦ୍‍ତଣ୍ଡ୍ ? ବେନ ବା ଅଂକିଙ୍କ୍‌ ପରାମର୍ଶ୍ ଇଦାନଙ୍କ୍ ପାର୍‍ଦ୍‍ତଣ୍ଡ୍ ?
ROM 11:35 ବେନ ବାତ୍ ଇଶ୍ୱର୍‌ତିଙ୍କ୍ ଇଦ୍ ରକମ୍ ବାତ୍ ଇତ୍‍ତନ୍, ବେଦିନାଦ୍ ମେଣ୍ଡଅନ୍‌‍ଦାମ୍ ଇଶ୍ୱର୍‌ତିଙ୍କ୍ ଦାନ ଇଦାନଙ୍କ୍‍ ୱେୟ୍‍ତେ ?”
ROM 11:36 ସାର୍‍ରେ ବିଷୟ୍ ଇଶ୍ୱର୍ ତିୟାର୍ ମାଡ଼୍‍ତଣ୍ଡ୍; ସାର୍‍ରେ ବିଷୟ୍‍ ଅନ୍‌ ସେଙ୍ଗେ ନୁ ଅନ୍‌‍ ଗୌରବ୍‍ ସେଙ୍ଗେ ଆସ୍‍ ମିନ୍ଦେ । ଯୁଗ୍‍ଯୁଗ୍ ଇଶ୍ୱର୍ ମହିମା ଆୟିଣ୍ଡ୍ । ଆମେନ୍‍ ।
ROM 12:1 ଆଦିଙ୍କ୍ ଦାଦାଲଡ଼ି ନୁ ଏଲାସ୍କ୍‍, ମାନ୍‍ ସେଙ୍ଗେ ଇଶ୍ୱର୍‌ତେ ଗାଟି ଅନୁଗ୍ରହ୍ ମାୟ୍‍ଦିଙ୍କ୍ ମିକିଂଙ୍କ୍ ନାନ୍ ଅନୁରଦ୍‌ ମାଡ଼ୁତାନ୍, ଇଶ୍ୱର୍‌ତାଗ୍ ନିଜେତିଙ୍କ୍ ପବିତ୍ର ଜିୱୁଣ୍ଡ୍ ପୁଜ୍‍ ଇମୁଟ୍ । ଅନ୍‌ ସେବା ମାଡ଼ି ମିଡ଼୍ ଅନାଗ୍ ଶାନ୍ତି ଆୟ୍‍ମୁଟ୍ । ଇଦ୍ ଇଶ୍ୱର୍‌ତାଗ୍ ନିଜାତାଦ୍ ଉପାସନା ।
ROM 12:2 ଇଦ୍ ଜଗତ୍‍ତାଦ୍ ନିତିନିୟମ୍‍ ଇସାପ୍‍ତେ ବ୍ୟବହାର୍‌ ମାଡ଼୍‍ମାଟ୍ । ଇଶ୍ୱର୍ ମିୟାଦ୍ ମନବାବନାତିଙ୍କ୍ ପୁରାପୁରି ବଦ୍‍ଲା ମାଡ଼ିଣ୍ଡ୍ ନୁ ମିୟାଦ୍ ଜିୱୁଣ୍ଡ୍ ସାରେ ଲେକେତ୍‍ ଆୟି । ଆଲାଇତ୍‍କେ, ଇଶ୍ୱର୍‌ତାଦ୍ ଇଚ୍ଛା ବାଆତେ, ଅନ୍‌ କଣ୍ଡେତାଗ୍ ବେନ୍‍ସାର୍ରେ ବିଷୟ୍ ନିଜାମ୍, ସାୟେ ନୁ ପୁରା ଟିକ୍, ଇଦ୍ ମିଡ଼୍ ପୁନ୍ଦାନଙ୍କ୍ ପାର୍‍ଦ୍‍ତିଡ଼୍‍ ।
ROM 12:3 ଇଶ୍ୱର୍ ନାକିଂଙ୍କ୍ ନାର୍‍ଗେ ଅନୁଗ୍ରହ୍ ଇତ୍‍ତାଙ୍କ୍ ମିଡ଼୍ ସାର୍ରେତଡ଼୍‍କିଙ୍କ୍ ନାନ୍ କେତୁତାନ୍, ବେନ ନିଜେତ୍ ଯଗ୍ୟତାତାଗାଙ୍କ୍ ନିଜେତିଙ୍କ୍‍ ବେଡ଼୍‍ୟେ ଇଞ୍ଜ ଆଲ୍‍ସ୍‍ମାଟ୍ । ଇଶ୍ୱର୍ ମିକିଂଙ୍କ୍ ଇତ୍‍ତେ ପରିମାଣ୍‍ତାଗ୍ ନମ୍ର ଆସ୍ ନିଜେତ୍ ବିଷୟ୍‍ତେ ବିଚାର୍ ମାଡ଼ାଟ୍ ।
ROM 12:4 ମାନ୍‍ ମେନ୍ଦୁଲ୍‍ତାଗ୍ ନାର୍‍ଗେ ଦୁଡ଼ା ମିନ୍ଦେ ମେଣ୍ଡେ ସାର୍ରେତାୱିନ୍ ପାଡ଼୍‍ୟି ଅଣ୍ଡୟ୍‌‍ ରକମ୍‍ ଆୟ ।
ROM 12:5 ଆଦେପୁଟୁଙ୍କ୍ ମାନାଡ଼୍ ପିନା, ଇତ୍‍କେ ସାର୍ରେତଡ଼୍ କ୍ରିଷ୍ଟନ୍‍ ତଡ଼୍ କାଇଲ୍‍ତାଙ୍କ୍, ମାନାଡ଼୍ ଅଣ୍ଡୟ୍‌ ମେନ୍ଦୁଲ୍ ନୁ ମେନ୍ଦୁଲ୍‍ତାଦ୍ ଦୁଡ଼ା ଲେକାମ୍ ମାନାଡ଼୍ ଅଣ୍ଡୟ୍‌‍ ଗାର୍‍ ଇନା କାଇଲ୍‍ତାଡ଼୍ ।
ROM 12:6 ଆଦିଙ୍କ୍ ମାନ୍‍ ସେଙ୍ଗେ ଇଶ୍ୱର୍‌ତାଦ୍ ଅନୁଗ୍ରହ୍ ଲେକାମ୍ ଅନାଗାଙ୍କ୍ ଦର୍‍କ୍‍ତେ ବାତ୍‍ବାତ୍ ଶକ୍ତିକିଙ୍କ୍ ମାନାଡ଼୍ ଟିକ୍ ବ୍ୟବହାର୍‌ ମାଡ଼ାନଙ୍କ୍ ଆଦ୍‍ତେ । ମାନାଡ଼୍ ଯଦି ଇଶ୍ୱର୍‌ତାଦ୍ ଗଟ୍ ପ୍ରଚାର୍ ମାଡ଼ାନ୍ ସେଙ୍ଗେ ଇଶ୍ୱର୍ ଇତ୍‍ତାଦ୍ ଶକ୍ତି ପାଏମ୍‍ଆତ୍‍ତାଡ଼୍, ମାନ୍‍ ବିଶ୍ୱାସ୍‍ତାଦ୍ ଗାଡ଼୍‍ସ୍ ଲେକାମ୍ ଆଦ୍ ପାଡ଼୍‍ୟି ମାଡ଼ାନଙ୍କ୍ ଆଦ୍‍ତେ ।
ROM 12:7 ଯଦି ସେବା ପାଡ଼୍‍ୟି ମାଡ଼ାନ୍ ସେଙ୍ଗେ ଆଦ୍ ଶକ୍ତି ପାଏମ୍‍ଆତ୍‍ତାଡ଼୍, ମାନାଡ଼୍ ସେବା ମାଡ଼ାନଙ୍କ୍ ଆଦ୍‍ତେ; ଶିକ୍ଷା ଇଦାନଙ୍କ୍ ଶକ୍ତି ପାଏମ୍‍ଆସ୍ ମାତ୍‍କେ, ଶିକ୍ଷା ଇଦାନଙ୍କ୍ ଆଦ୍‍ତେ ।
ROM 12:8 ୱେରେ ନାରୁଡ଼୍‍କିଂଙ୍କ୍ ୱେଡ଼୍‍କ୍‍ ମାଡ଼ାନ୍ ସେଙ୍ଗେ ଶକ୍ତି ପାଏମ୍ ଆସ୍‍ମାତ୍‍କେ, ଆଦ୍ ମାଡ଼ାନଙ୍କ୍ ଆଦ୍‍ତେ । ଦାନ ମାଡ଼ାନଙ୍କ୍ ଶକ୍ତି ପାଏମ୍‍ଆତ୍‍ତେ ନାରୁଡ଼୍ ସାୟେ ମନ୍‍ତେ ଦାନ ମାଡ଼ିଣ୍ଡ୍ । ୱେରେ ନାରୁଡ଼୍‍କିନ୍ ପାଡ଼୍‍ୟି ଉଡ଼ାନଙ୍କ୍ ଅଦିକାର୍‌ ପାଏମ୍ ଆସ୍‍ମାତ୍‍କେ ନିଜେ କଷ୍ଟ ପାଡ଼୍‍ୟି ମାଡ଼ାନଙ୍କ୍ ଆଦ୍‍ତେ । ଦୟା ମାଡ଼ାନଣ୍ଡ୍ ନାରୁଡ଼୍ ସାୟେତ୍‍ ମାନ୍‍ତେ ଦୟା ମାଡ଼ିଣ୍ଡ୍ ।
ROM 12:9 ପ୍ରେମ ଲୋପେକସ୍ ଆଦାନାଦ୍ ଲେକେତ୍‍ । ବାତ୍ ସାର୍‍ରେ ସତ୍ ଆୟ; ଆୱିଙ୍କ୍ ପାସ୍‍କାଟ୍, ସାର୍ରେତଡ଼୍ ସତ୍ ପାଡ଼୍‍ୟି ମାଡ଼ାଟ୍ ।
ROM 12:10 କ୍ରିଷ୍ଟ ବିଶ୍ୱାସୀ ତାମୁଣ୍ଡ୍ ଇନା ନିଜର୍‍ନିଜର୍‍ ଲୋପେ ପ୍ରେମ ମାଡ଼ାଟ୍ ନୁ ନିଜର୍‍ନିଜର୍‍ ଲୋପେ ସମ୍ମାନ୍ ଇଦାନଙ୍କ୍ ଇଚ୍ଛା ମାଡ଼ାଟ୍ ।
ROM 12:11 ପ୍ରବୁନ୍‍ ପାଡ଼୍‍ୟିତାଗ୍ କିଡ଼୍‍ଙ୍ଗ୍‍ତା ଆୟ୍‍ମାଟ୍, ଆତ୍ମାତଡ଼୍ ୱେସ୍‍ତିଙ୍କ୍ ଆଲ୍‍ସାଟ୍ । ବକ୍ତିତଡ଼୍ ଜିୱୁଣ୍ଡ୍‍ତାଗ୍ ପ୍ରବୁନ୍ ସେବା ମାଡ଼ାଟ୍ ।
ROM 12:12 ଗାଡ଼୍‍ସ୍ ଆଶେ ନେଏଃସ୍ ୱେଡ଼୍‍କ୍‍ ମାଡ଼ାଟ୍ । ଦୁଃକାମ୍ ତିପାଲ୍ ୱେଲେ ଗାଡ଼୍‍ସ୍‍ ପୟ୍‍ମୁଟ୍ । ସାର୍ରେଦାମ୍ ପ୍ରାର୍ତନା ମାଡ଼ମାନୁଟ୍ ।
ROM 12:13 କ୍ରିଷ୍ଟ ବିଶ୍ୱାସୀ ନାରୁଡ଼ାଦ୍ ଅବାବ୍ ପୁନ୍ଦାନଙ୍କ୍ ଆଲ୍‍ସାଟ୍ । କୁଟ୍‍ମାମ୍‍ତିଙ୍କ୍ ସେବା ମାଡ଼ାଟ୍ ।
ROM 12:14 ମିକିଂଙ୍କ୍ ବେନଡ଼୍ ତାଡ଼ନା ମାଡ଼ିତଡ଼୍, ଅଡ଼ାଦ୍‌ ଶାନ୍ତି ସେଙ୍ଗେ ଇଶ୍ୱର୍‌ତାଗ୍ ପ୍ରାର୍ତନା ମାଡ଼ାଟ୍ । ଅଡ଼୍‌‍କିଂଙ୍କ୍ ଆର୍ଶିବାଦ୍ ମାଡ଼ାଟ୍, ଅବିଶାପ୍‌ ଇମାଟ୍ ।
ROM 12:15 କୁସି ନାରୁଡ଼୍ ତଡ଼୍ ୱେଡ଼୍‍କ୍‍ ମାଡ଼ାଟ୍, ଦୁଃକାମ୍ ନାରୁଡ଼୍ ତଡ଼୍ ଦୁଃକି ଆୟ୍‍ମୁଟ୍ ।
ROM 12:16 ସାର୍ରେତଡ଼୍‍କିଙ୍କ୍‍ ସାମାନ୍ ଲେକାମ୍‍ ଉଡ଼ାଟ୍ । ଆଂକାର୍ ୱିଡ଼୍‍ସି ନମ୍ର ତଡ଼୍ ପାଡ଼୍‍ୟି ମାଡ଼ାଟ୍ । ନିଜେ ଜ୍ଞାନି ଇଞ୍ଜ ଆଲ୍‍ସ୍‍ମାଟ୍ ।
ROM 12:17 ବେନ ମିଇ ସେଙ୍ଗେ ଅନ୍‌ୟାୟ୍ ମାଡ଼୍‍କେ, ମିଡ଼୍ ଅଂକିଙ୍କ୍‌ ଅନ୍‌ୟାୟ୍ ମାଡ଼୍‍ମାଟ୍ । ୱେରେ ନାରୁଡ଼୍‍ତେ କଣ୍ଡେତାଗ୍ ବାତ୍ ସାୟେତ୍ ପାଡ଼୍‍ୟି, ଆଦେକେ ମାଡ଼ାଟ୍ ।
ROM 12:18 ସାର୍ରେତଡ଼୍ ତଡ଼୍ ଶାନ୍ତିତେ ବାଦ୍‍କାନଙ୍କ୍ ପାର୍‍ତେଇସର୍‍ ଆଲ୍‍ସି ମାଡ଼ାଟ୍ ।
ROM 12:19 ପ୍ରିୟ ସାଙ୍ଗନଡ଼ି, ମିଡ଼୍ ନିଜେ ବେନନ୍ ବିରୁଦ୍‍ତେ ବାଦ୍‍ଲା ଆୟ୍‍ମାଟ୍ । ଇଶ୍ୱର୍‌ତିଙ୍କ୍‍ ଅନ୍‌ ପର୍‍ର ବିଚାର୍‍ ମାଡ଼ାନଙ୍କ୍ ୱିଡ଼୍‍ସିମୁଟ୍ । ବାତେଙ୍କ୍ଇତ୍‍କେ ଶାସ୍ତ୍ରତାଗ୍ ଲେକାମିନ୍ଦେ, “ପ୍ରବୁ କେତୁତଣ୍ଡ୍, ମାନାଡ଼୍ ବାଦ୍‍ଲା ଆଦ୍‍ତାଡ଼୍ । ମାନାଡ଼୍ ଦଣ୍ଡ୍‍ ଇଦ୍‍ତାଡ଼୍ ।”
ROM 12:20 ଇତ୍‍କେ ଶାସ୍ତ୍ରତାଗ୍ ନିର୍ଦ୍ଦେଶ୍ ଇସାପ୍‍ତେ “ମିୱଡ଼୍‍ ଶତ୍ରୁଡ଼୍ କାର୍‍ୱିନ୍‍ ମାତ୍‍କେ, ଅଂକିଙ୍କ୍‌ ତିନ୍ଦାନଙ୍କ୍ ଇମୁଟ୍; ଉନ୍ଦେୱାସ୍‍ ମାତ୍‍କେ ଉସ୍‍ପାଟ୍ । ଇଲାମାଡ଼୍‍କେ ଅଣ୍ଡ୍‌ ସିଗ୍ଆସ୍ ନିଜେ ତାଲେ ମଦଲ୍‍ ମାଡ଼ିତଣ୍ଡ୍ ।”
ROM 12:21 ମିଚ୍ ତଡ଼୍ ଆରେମ୍ ଆୟ୍‍ମାଟ୍, ସାର୍‍ରେ ମିଚ୍ ବିଷୟ୍‍ତିଙ୍କ୍ ସାୟେତ୍ ବ୍ୟବହାର୍‌ ତଡ଼୍ ଜିଡ଼ାଟ୍ ।
ROM 13:1 ଶାସନ୍‍ ମାଡ଼ାନଡ଼୍‍ୱାଦ୍ ଗଟ୍ କେଞ୍ଜାନାଦ୍ ସାର୍ରେତଡ଼୍‍ୱାଦ୍ ଦାୟିତ୍, ବାତେଙ୍କ୍ଇତ୍‍କେ ଇଶ୍ୱର୍ ଗଟ୍ ଇଲ୍‍ୱେ ବେନ ଶାସନ୍‍ ମାଡ଼ାନଣ୍ଡ୍ ଆୟ୍‍ୟଣ୍ଡ୍ । କ୍ଷମତା ତଡ଼୍ ମାନ୍ଦାନ୍ ଶାସନ୍‍ ମାଡ଼ାନଡ଼୍‍କ୍ ଇଶ୍ୱର୍ ଏଞ୍ଚିମିନ୍ଦେଣ୍ଡ୍ ।
ROM 13:2 ଆଦିଙ୍କ୍ ବେନ କ୍ଷମତାତଡ଼୍ ଶାସନ୍‍ ମାଡ଼ାନଡ଼୍‍କିଙ୍କ୍ ବିରୁଦ୍ ମାଡ଼ିତଡ଼୍, ଅଣ୍ଡ୍‌ ଇଶ୍ୱର୍ ତଡ଼୍ ତିୟାର୍‍ ଆତ୍‍ତେ ଅନୁଷ୍ଟାନ୍‍ତାଦ୍ ବିରୁଦ୍ ମାଡ଼ିତନ୍ । ବେନ ଇଲା ମାଡ଼ିତନ୍ ଅଣ୍ଡ୍‌ ବିଚାର୍ ଆଦ୍‍ତନ୍ ।
ROM 13:3 ବେନଡ଼୍ ସାୟେତ୍ ପାଡ଼୍‍ୟି ମାଡ଼ିତଡ଼୍, ଅଡ଼୍‌‍ ଶାସନ୍‍ ମାଡ଼ାନଡ଼୍‍କିଙ୍କ୍ ୱେର୍‍ତାନାଦ୍ ବାତ୍ ଇଲ୍‍ଲେ, କାରାପ୍ ପାଡ଼୍‍ୟି ମାଡ଼ାନଡ଼ି ୱେର୍‍ତିତଡ଼୍ । ଶାସନ୍‍ ମାଡ଼ାନଡ଼୍‍କିଙ୍କ୍ ୱେର୍‍ତାନାଦ୍ ଆୟ୍‍ୟ ଇଞ୍ଜ ମିୟାଦ୍ ଇଚ୍ଛା କି ? ଆଲେକେ ସତ୍ ପାଡ଼୍‍ୟି ମାଡ଼ାଟ୍, ଅଣ୍ଡ୍‌ ମିୟାଦ୍ ପ୍ରସଂଶା ମାଡ଼ିତନ୍ ।
ROM 13:4 ମିୟାଦ୍ ଲେକେତ୍‍ ମାଡ଼ାନ୍ ସେଙ୍ଗେ ଅଣ୍ଡ୍‌ ଇଶ୍ୱର୍ ତଡ଼୍ ନିଯୁକ୍ତି ଆତ୍‍ତଣ୍ଡ୍ । ଇତ୍‍କେ ମିଡ଼୍ ଯଦି କାରାପ୍ ପାଡ଼୍‍ୟି ମାଡ଼ମାନ୍ତିଡ଼୍, ଆଲାଇତ୍‍କେ ଶାସନ୍‍ ମାଡ଼ାନଡ଼୍‍କିଙ୍କ୍ ୱେର୍‍ମୁଟ୍, ବାତେଙ୍କ୍ଇତ୍‍କେ ମିକିଂଙ୍କ୍ ଦଣ୍ଡ୍ ଇଦାନ୍ ସେଙ୍ଗେ ନିଜାମ୍ ଅଡ଼ାଦ୍‌ ଅଦିକାର୍ ମିନ୍ଦେ । ଅଣ୍ଡ୍‌ ଇଶ୍ୱର୍ ତଡ଼୍ ନିଯୁକ୍ତି କର୍ମଚାରୀ । କାରାପ୍ ପାଡ଼୍‍ୟି ମାଡ଼ାନଡ଼୍‍କିଙ୍କ୍ ଦଣ୍ଡ ଇଦାନ୍ ସେଙ୍ଗେ ଅଣ୍ଡ୍‌ ଇଶ୍ୱର୍‌ତେ ଗଟ୍ ପାଲନ୍ ମାଡ଼ିତନ୍ ।
ROM 13:5 ଆଦିଙ୍କ୍ ମିଡ଼୍ ଶାସନ୍‍ ମାଡ଼ାନଡ଼୍‍ୱାଦ୍ କେଞ୍ଜାନାଦ୍ ସାୟେ, ଆସାମ୍ ଇଶ୍ୱର୍‌ତେ ୱେର୍ରେତ୍ ସେଙ୍ଗେ ଆୟ୍‍ୟ, ମାତର୍ ନିଜେତ୍ ବିବେକ୍‍ତାଦ୍ ଦଂସତାଗାଙ୍କ୍ ରକ୍ଷା ପାଏମ୍ ଆଦ୍‍ଦାନ୍ ସେଙ୍ଗେ ।
ROM 13:6 ଆଦିନ୍ ସେଙ୍ଗେ ମିଡ଼୍ ସିସ୍ତୁ ଇଦୁତିଡ଼୍, ବାତେଙ୍କ୍ଇତ୍‍କେ ଶାସନ୍‍ ମାଡ଼ାନଡ଼ି ଦାୟିତ୍ ପାଲନ୍ ମାଡ଼ାନ୍‍ୱେଲେ ଇଶ୍ୱର୍‌ତେ ସେବା ମାଡ଼ୁତଡ଼୍ ।
ROM 13:7 ଆଦିଙ୍କ୍ ଅଡ଼୍‌‍କିଂଙ୍କ୍ ବାତ୍ ଦର୍‍କାଡ଼୍‍ ଆଦ୍ ଇଦୁତିଡ଼୍ । ସିସ୍ତୁ ବା ସିସ୍ତୁ ମିୟାଦ୍ ବାତ୍ ଇଦାନ୍ ମାନ୍‍ତେ, ଆଦ୍ ଇଦ୍‍ତିଡ଼୍ ମେଣ୍ଡେ ଅଡ଼୍‌‍କିଂଙ୍କ୍ ୱେଡ଼୍‍କ୍‍ ମାଡ଼ିତିଡ଼୍ ନୁ ସମ୍ମାନ୍ ତଅତିତିଡ଼୍ ।
ROM 13:8 ନିଜେତ୍ ନିଜେତ୍ ଲୋପେ ପ୍ରେମ ମାଡ଼ାନାଦ୍ ୱିଡ଼୍‍ସି ମେଣ୍ଡେ ବାତ୍ ବିଷୟ୍‍ତାଗ୍ ଉଦାର୍‍ ଆସ୍ ମାନ୍‍ମାଟ୍ । ବେନ ମେଣ୍ଡେ ଅର୍‍ତୁଙ୍କ୍ ପ୍ରେମ ମାଡ଼ିତନ୍, ଅଣ୍ଡ୍‌ ନିୟମ୍ ପାଲନ୍ ମାଡ଼ିତନ୍ ।
ROM 13:9 “ବେବିଚାର୍ ମାଡ଼୍‍ମାଟ୍, ନାରୁଡ଼୍‌କ୍‌ ଆୱୁକ୍‍ମାଟ୍, ଡଙ୍ଗ୍‍ମାଟ୍, ଲୋବ୍‌ ମାଡ଼୍‌ମାଟ୍‌, ମେଣ୍ଡେ ବେନେ ଗଟ୍‌ ମାନ୍‌ନ୍ତେ, ଆଦିଙ୍କ୍‌ ସାର୍‌ଲେକାମ୍‌ ଇଦ୍‌ ବାକ୍ୟତେ ଗାରେତାଦ୍‌ ଆଦ୍‌ତେ ମିଡ଼୍ ଗାର୍ରେତଡ଼୍‍କିଂଙ୍କ୍ ନିଜେତ୍ ନାରୁଡ଼୍ ଇନା ପ୍ରେମ ମାଡ଼ାଟ୍ ।”
ROM 13:10 ମିଡ଼୍ ଅଡ଼୍‌‍କିଂଙ୍କ୍ ପ୍ରେମ ମାଡ଼ମାତ୍‍କେ, ଅଂକିଙ୍କ୍‌ ବେସୁଟ୍‌ ଅନ୍‌ୟାୟ୍ ମାଡ଼୍‍ମାଟ୍ । ଆଦିଙ୍କ୍ ପ୍ରେମ୍ ମାଡ଼୍‍କେ କେ ସାର୍‍ରେ ନିୟମ୍ ପାଲନ୍ ମାଡ଼ାନାଦ୍ ଆଦ୍‍ତେ ।
ROM 13:11 ଇଞ୍ଜେ ଇୱୁ ସାର୍‍ରେ ମିକିଂଙ୍କ୍ ମାଡ଼ାନଙ୍କ୍ ଆଦ୍‍ତେ, ବାତେଙ୍କ୍ଇତ୍‍କେ ଉସ୍କାଡ଼୍‍ତାଗାଙ୍କ୍ ତେଦାନାଦ୍ ଦିନାମ୍ ଏୱୁତ୍‍ତେ । ପରିତ୍ରାଣ ପାଏମ୍ ଆଦାନ୍ ଦିନାମ୍ ମୁନେନ୍‍କନ୍ସ୍ ଇଞ୍ଜେ ଗାଟି ଗାର୍ରେ ଏୱୁତ୍‍ତେ ।
ROM 13:12 ନାର୍‍କେ ତେରିୱାଦୁତ୍, ଦିନାମ୍ ଆସଡ଼୍‍ୱାଦୁତ୍ । ୱାଡ଼ାଟ୍, ନାର୍କେତାଦ୍ ପାଡ଼୍‍ୟି ସାର୍‍ରେ ୱିଡ଼୍‍ସିକାଡ଼୍ ନୁ ୱେସିନାଗ୍ ସାୟେତ୍‍ ପାଡ଼୍‍ୟି ମାଡ଼ାନ୍‍ ସେଙ୍ଗେ ତିଆର୍‍ ଆଦ୍‍ତାଡ଼୍‍ ।
ROM 13:13 କାରାପ୍ ବଗ୍‍ବିଲାସ୍, କାଲ୍ ଉଞ୍ଜ୍ ଅସିମାନ୍ଦାନାଦ୍, ନିତିନିୟମ୍‍ ମାନେମ୍‍ ଆୟ୍‍ୱାଦ୍, କାରାପ୍ ବ୍ୟବହାର୍‌, ଇର୍ଷା, ଗଲ୍‍କ୍ ସାର୍ରେତାୱ୍ ମାଡ଼କଟ୍ ୱାଡ଼ାଟ୍, ୱେସିନାଗ୍ ସାୟେତ୍‍ ପାଡ଼୍‍ୟି ମାଡ଼ାନ୍ ନାରୁଡ଼୍ ଲେକାମ୍ ବଦ୍ର ଇନା ବ୍ୟବହାର୍‌ ମାଡ଼ିକାଡ଼୍ ।
ROM 13:14 କିନ୍ତୁ ପ୍ରବୁ ଜିସୁ କ୍ରିଷ୍ଟଙ୍କ୍‍ ଚରିତ୍ର ଲେକାମ୍‌ ବ୍ୟବହାର୍‌ ମାଡ଼ାଟ୍‍, ପାପ ନୁ ମେନ୍ଦୁଲ୍‍ତେ କାରାପ୍‍ ଇଚ୍ଛାତିଙ୍କ୍‍ ପୁରା ମାଡ଼ାନ୍‍ ସେଙ୍ଗେ ମନ୍‍ତାଗ୍‍ ତାଡ଼୍‍ମାଟ୍‍ ।
ROM 14:1 ବିଶ୍ୱାସ୍‍ତାଗ୍‍ ଦୁର୍ବଲ୍‍ମାନ୍ଦାନ୍‍ ନାରୁଣ୍ଡ୍‍ତିଙ୍କ୍ ମିକା ଗ୍ରହନ୍ ମାଡ଼ାଟ୍, ଇତ୍‍କେ ଅନାଦ୍‌ ନିଜେତ୍ ମତ ବିଷୟ୍‍ତିଙ୍କ୍ ଯୁକ୍ତି ମାଡ଼୍‍ମାଟ୍ ।
ROM 14:2 ୱେରଣ୍ଡ୍ ବିଶ୍ୱାସ୍ ମାଡ଼୍‍କେ ଅଣ୍ଡ୍‌ ଜେ ବାତ୍‍ଆଇ କାଦି ତିନ୍ଦେ ପାର୍‍ଦ୍‍ତଣ୍ଡ୍, ମେଣ୍ଡେ ୱେରଣ୍ଡ୍ ବିଶ୍ୱାସ୍‍ତାଗ୍‍ ଦୁର୍ବଲ୍‍ ଅଣ୍ଡ୍‌‍ ଆସାମ୍ ସାଦା କାଦି ତିନ୍‍ତଣ୍ଡ୍ ।
ROM 14:3 ବାତ୍‍ଆଇ କାଦି ତିନ୍ଦାନଙ୍କ୍ ବେନ ଆପତ୍ତି ମାଡ଼ଣ୍ଡ୍, ଅଣ୍ଡ୍‌ ସାଦା କାଦିତିଙ୍କ୍ ପାସ୍‍କ୍‍ମାକିଣ୍ଡ୍ । ମେଣ୍ଡେ ସାଦା ତିନ୍ଦାନଣ୍ଡ୍ ଆୱୁଙ୍ଗ୍‍ ତିନ୍ଦାନକିଂଙ୍କ୍ ଦଷି ମାଡ଼୍‍ମାକିଣ୍ଡ୍ । ବାତେଙ୍କ୍ଇତ୍‍କେ ଇଶ୍ୱର୍ ଅଂକିଙ୍କ୍‌ ଗାଲା ଗ୍ରହନ୍‍ ମାଡ଼୍‍ତଣ୍ଡ୍ ।
ROM 14:4 ମେଣ୍ଡେଅଡ଼୍‌‍ତିନ୍‍ ଦାସଙ୍କ୍ ବିଚାର୍ ମାଡ଼ାନଙ୍କ୍ ମିଡ଼୍ ବେନ ? ଅଣ୍ଡ୍‌ ତାନ୍ ପାଡ଼୍‍ୟିତାଗ୍ ବେସର୍ ଜେକେ ସାୟେ ବା କାରାପ୍ ମାଡ଼ୁତଣ୍ଡ୍, ଆଦ୍ ମାଲିକ୍ ବିଚାର୍ ମାଡ଼ିତନ୍ । ଅଣ୍ଡ୍‌ ନିଜାମ୍ ସାୟେ ଆଦ୍‍ତନ୍, ବାତେଙ୍କ୍‍ଇତ୍‍କେ ପ୍ରବୁ ଅଂକିଙ୍କ୍‌ ସାୟେ ମାଡ଼ାନ୍ ସେଙ୍ଗେ ବୁଦ୍ ଇଦ୍‍ତଣ୍ଡ୍ ।
ROM 14:5 ୱେରନାଦ୍ କେତ୍‍ତାନ୍ ଲେକାମ୍ ବାଗାତ୍ ଦିନାକିନ୍‍ନାଗାଙ୍କ୍ ୱେରଡ଼୍ ଦିନ୍ ଗାଟି ସାୟେ । ମେଣ୍ଡେ ମେଣ୍ଡ୍‍ଅର୍ତୁଣ୍ଡ୍ ଆଲ୍‍ସିତିଡ଼୍, ସାର୍‍ରେ ଦିନାମ୍ ସାମାନ୍ । ଇତ୍‍କେ ବେନ ଅନାଦ୍‌ ଆଲ୍‍ସାନ୍ ଲେକାମ୍ ଟିକ୍ ବିଚାର୍ ମାଡ଼ି ନିଷ୍ପତି ଆୟିଣ୍ଡ୍ ।
ROM 14:6 ବେନ ୱେରଡ଼୍ ଦିନାମ୍‍ତିଙ୍କ୍ ସାୟେ ଇଞ୍ଜ ଆଲ୍‍ସିତିଡ଼୍, ପ୍ରବୁନ୍ ଗୌରବ୍‍ତେ ସେଙ୍ଗେ ଅଣ୍ଡ୍‌ ଆଦ୍ ମାଡ଼ିଣ୍ଡ୍ । ବେନନାଦ୍ ବାତ୍‍ଆଇ କାଦି ତିନ୍ଦାନଙ୍କ୍ ଆପତ୍ତି ଇଲ୍‍ଲେ, ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସ୍ ଅଣ୍ଡ୍‌ ଆଦ୍ ତିନିଣ୍ଡ୍; ଅଦିନ୍‌ତଡ଼୍ ଇଶ୍ୱର୍ ଗୌରବ୍ ଆଦ୍‍ତନ୍ । ବେନ୍ ନାରୁଡ଼୍ ବାତ୍‍ଆଇ କାଦି ତିନଣ୍ଡ୍, ଅଣ୍ଡ୍‌ ଇଦ୍ ଇଶ୍ୱର୍‌ତେ ଗୌରବ୍ ସେଙ୍ଗେ ମାଡ଼ିଣ୍ଡ୍ ନୁ ଇଦିନ୍ ସେଙ୍ଗେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇୱିଣ୍ଡ୍ ।
ROM 14:7 ବେନ ନିଜେତ୍ ମାୟ୍‍ଦିଙ୍କ୍ ଗେଲ୍‍ସି ଆୟ୍‍ୟଣ୍ଡ୍, କି ନିଜେତ୍ ସେଙ୍ଗେ ଡଲନ୍ ।
ROM 14:8 ପ୍ରବୁନ୍ ପାଡ଼୍‍ୟି ମାଡ଼ାନ୍ ସେଙ୍ଗେ ମାନାଡ଼୍ ବାଦ୍‍କୁତାଡ଼୍ ନୁ ଡଲିତାଡ଼୍ । ଆଦିଙ୍କ୍ ବାଦ୍‍କାନାଗ୍ ନୁ ଡଲାନାଗ୍ ମାନାଡ଼୍ ପ୍ରବୁନାଗ୍ ।
ROM 14:9 ବାତେଙ୍କ୍‍ଇତ୍‍କେ କ୍ରିଷ୍ଟ ଡଲି ମେଣ୍ଡନ୍‍ନ୍ଦାମ୍ ତେଏଦ୍‍ତାଙ୍କ୍ ଇଡ଼୍‍ୱୁଡ଼୍ ଜିୱୁଣ୍ଡ୍ ମାନ୍ଦାନଡ଼୍ ନୁ ଡଲ୍‍ତଡ଼୍ ସାର୍ରେତଡ଼୍‍ୱାଦ୍ ଅଣ୍ଡ୍‌ ପ୍ରବୁ ଆତ୍‍ତଣ୍ଡ୍ ।
ROM 14:10 ଆଦିଙ୍କ୍ ମିଡ଼୍ ବାତେଙ୍କ୍ ନିଜେତ୍ ତାମୁଣ୍ଡ୍‍ତିଙ୍କ୍ ବିଚାର୍ ମାଡ଼ୁତିଡ଼୍ ? ବାତେଙ୍କ୍ ନିଜେତ୍ ତାମୁଣ୍ଡ୍‍ତିଙ୍କ୍ ପାସ୍‍କୁତିଡ଼୍ ? ମାନାଡ଼୍ ସାର୍ରେତଡ଼୍ ବିଚାର୍ ଆଦ୍‍ଦାନ୍ ସେଙ୍ଗେ ଇଶ୍ୱର୍‌ତେ ମୁନ୍‍ନେ ନିତାନଙ୍କ୍ ଆଦ୍‍ତେ ।
ROM 14:11 ବାତେଙ୍କ୍‍ଇତ୍‍କେ ବେଦ୍‍ପୁଟୁଙ୍କ୍ ଶାସ୍ତ୍ରତାଗ୍ ଲେକାମିନ୍ଦେ, “ପ୍ରବୁ କେତୁତଣ୍ଡ୍, ବେଲାବା ମାନାଡ଼୍ ଜିୱୁତେ ଇଶ୍ୱର୍, ସାର୍ରେତଡ଼୍ ମାନ୍‍ ମୁନ୍‍ନେ ମର୍‍ମିଣ୍ଡା ଉଃସିତଡ଼୍ । ମାନାଡ଼୍ ଇଶ୍ୱର୍ ଇଞ୍ଜ ସାର୍ରେତଡ଼୍ ସ୍ୱୀକାର୍ ମାଡ଼ିତଡ଼୍ ।”
ROM 14:12 ମାନାଡ଼୍ ସାର୍ରେତଡ଼୍‍କିଙ୍କ୍ ଇଶ୍ୱର୍‌ତେ ବକେତ୍ ନିଜେ ନିଜେତ୍ ପାଡ଼୍‍ୟିତେ ଇସାବ୍‍ ଇଦାନଙ୍କ୍ ଆଦ୍‍ତେ ।
ROM 14:13 ଆଦିଙ୍କ୍ ନିଜର୍‍ନିଜର୍ ଲୋପେ ବିଚାର୍ ମାଡ଼୍‍ମାଟ୍ । ଇଦ୍‍ରକମ୍ ମିକା ବାତ୍ ମାଡ଼୍‍ମାଟ୍, ବାତ୍‍ତିଙ୍କ୍ ମିଇ ତାମୁଣ୍ଡ୍ ମଦଲ୍ ରାଲି ପାପାମ୍ ମାଡ଼ିତନ୍ ।
ROM 14:14 ନାନ୍‍ ପୁନ୍ଦ୍‍ତାନ୍‍ ନୁ ପ୍ରବୁ ଜିସୁନାଗାଙ୍କ୍ ନିର୍ଦେଶ୍ ପାଏମ୍ ଆସ୍ କେତୁତାନ୍, ବାତ୍‍ବା କାଦି କାରାପ୍ ଆୟ୍‍ୟ । ଯଦି ବେନ ବାତ୍‍ଆଇ କାଦିତିଙ୍କ୍ କାରାପ୍ ଇଞ୍ଜ ବିଶ୍ୱାସ୍ ମାଡ଼ିତନ୍, ଅନ୍‌ ସେଙ୍ଗେ ଆଦ୍ କାରାପ୍ ଆଦ୍‍ତେ ।
ROM 14:15 ମିଡ଼୍ ବାତ୍‍ଆଇ କାଦି ତିନ୍ଦାନ୍‍ୱେଲେ ଯଦି ୱେରଣ୍ଡ୍ ତାମୁନ୍ ମନ୍‍ତାଗ୍ କଷ୍ଟ ଇଦ୍‍ତିଡ଼୍, ଆଲେକେ ଅଂକିଙ୍କ୍‌ ମିଡ଼୍ ପ୍ରେମ ମାଡ଼୍‍ୱିଡ଼୍ । ବେନ୍ ତାମୁନ୍ ସେଙ୍ଗେ କ୍ରିଷ୍ଟ ଡଲ୍‍ତଣ୍ଡ୍, ସୁଦୁର୍ କାଦିତ୍ ମାୟ୍‍ଦିଙ୍କ୍ ଅନାଦ୍‌ ଅନିଷ୍ଟ ମାଡ଼୍‍ମାଟ୍ ।
ROM 14:16 ମିଡ଼୍ ବେନଙ୍କ୍ ସାୟେ ଇଞ୍ଜ ହେର୍କା ମାଡ଼ୁତିଡ଼୍, ଆଦିନ୍ ତଡ଼୍ ମିୟାଦ୍ ଇଜତ୍‍ ଆୟ୍‍ମାକି ।
ROM 14:17 ଇଶ୍ୱର୍‌ତେ ରାଜ୍ୟତାଦ୍ ବିଷୟ୍ କାଦି ବା ଉନ୍ଦାନାଦ୍ ଆୟ୍‍ୟ । ଆଦ୍ ପବିତ୍ର ଆତ୍ମାତଡ଼୍ ଇତ୍‍ତାଦ୍ ଦାର୍ମାମ୍, ଶାନ୍ତି ନୁ ୱେଡ଼୍‍କ୍‍ ।
ROM 14:18 ବେନଆଇ ଇଦ୍‍ରକମ୍ କ୍ରିଷ୍ଟନ୍ ସେବା ମାଡ଼ିତନ୍; ଅଣ୍ଡ୍‌ ଇଶ୍ୱର୍‌ତେ ସାୟେ ମାଡ଼ିତନ୍, ନାରୁଡ଼୍ ଗାଲା ଅଂକିଙ୍କ୍‌ ଆଦର୍ ମାଡ଼ିତଡ଼୍ ।
ROM 14:19 ଆଦିଙ୍କ୍ ୱାଡ଼ାଟ୍, ନିଜର୍‍ନିଜର୍ ଲୋପେ ଶାନ୍ତି ତିୟାର୍ ମାଡ଼ାନଙ୍କ୍ ନୁ ନିଷ୍ଟା ତିୟାର୍ ମାଡ଼ାନ୍ ସେଙ୍ଗେ ବାତ୍ ସାର୍‍ରେ ଦର୍‍କାର୍, ଆଦିଙ୍କ୍ ଉଡ଼ିତାଡ଼୍ ।
ROM 14:20 ସୁଦୁର୍ କାଦିତ୍ ସେଙ୍ଗେ ଇଶ୍ୱର୍ ବାତ୍ ମାଡ଼୍‍ତଣ୍ଡ୍, ଆଦ୍ ନଷ୍ଟ ମାଡ଼୍‍ମାଟ୍ । ବେନେବା କାଦି ତିନ୍ଦେୱେୟ୍‍ତିତ୍ । ଇତ୍‍କେ ବେନେବା କାଦି ତିତ୍‍କେ ଯଦି ମିଡ଼୍ ମେଣ୍ଡେଅଡ଼୍‌‍ତିନ୍ ବାଦା ପାଏମ୍ ଆଦ୍‍ତିଡ଼୍, ଆଲାଇତ୍‍କେ ଆଦ୍ କାଦି ତିନ୍ଦାନାଦ୍ ସାୟେ ଆୟ୍‍ୟ ।
ROM 14:21 ମିୟାଦ୍ ଆୱୁଙ୍ଗ୍‍ ତିନ୍ଦାନାଦ୍, କାଲ୍ ଉନ୍ଦାନାଦ୍ ଯଦି ମିଇ ତାମୁନ୍‍ତିଙ୍କ୍ ସୁଦୁର୍ ଦୁର୍ବଲ୍ ମାଡ଼ିତ୍, ଆଲେକେ ଆୱୁ ସାର୍ରେତାଗାଙ୍କ୍ ୱେର୍ରେ ଆଦାନାଦ୍ ମିକିଂଙ୍କ୍ ସାୟେ ।
ROM 14:22 ଇଦ୍ ବିଷୟ୍‍ତେ ମିୟାଦ୍ ନିଜେତ୍ ବିଶ୍ୱାସ୍ ଇଶ୍ୱର୍ ପୁନିଣ୍ଡ୍ । ବେନ୍ ନାରୁଡ଼୍ ସାୟେ ମାନ୍‍ ମାଡ଼ି ବାତ୍‍ଆଇ ପାଡ଼୍‍ୟି ମାଡ଼ିତନ୍, ମେଣ୍ଡେ ଆଦିନ୍ ସେଙ୍ଗେ ପେର୍‍କେ ଅଂକିଙ୍କ୍‌ ତିପାଲ୍ ଆଦାନଙ୍କ୍ ୱେୟ୍, ଅଣ୍ଡ୍‌ ୱେଡ଼୍‌କେତେ ନାରୁଣ୍ଡ୍‍ ।
ROM 14:23 ଇତ୍‍କେ ବାତ୍‍ବା କାଦି ତିନ୍ଦାନାଦ୍ ଟିକ୍ କି ଆୟ୍‍ୟ, ମନ୍‍ତାଗ୍ ଆଲ୍‍ସି ବେନ ଆଦ୍ ତିନ୍‍ତଣ୍ଡ୍; ଇଶ୍ୱର୍‌ତେ ମୁନ୍‍ନେ ଅଣ୍ଡ୍‌ ଦଷି ଆଦ୍‍ତନ୍, ବାତେଙ୍କ୍‍ଇତ୍‍କେ ଅନ୍‌‍ୱାଦ୍ ବିଶ୍ୱାସ୍ ଆଦିନାଦ୍ ପାଡ଼୍‍ୟି ଆୟ୍‍ୟ । ବିଶ୍ୱାସ୍‍ତେ ପର୍‍ର ବାତ୍ ତିୟାର୍‍ ଆୟ୍‍ୟ, ଆଦ୍ ପାପ୍‌ ।
ROM 15:1 ବେନଡ଼୍ ବିଶ୍ୱାସ୍‍ତାଗ୍ ନାର୍ଗ୍, ଅଡ଼୍‌ ବିଶ୍ୱାସ୍‍ତାଗ୍‍ ଦୁର୍ବଲ୍‍ ମାନ୍ଦାନ୍‍ ତାମୁନ୍‍ତାଦ୍ ଦଷ୍ ସେଙ୍ଗେ ଶକ୍ତିତଡ଼୍ ଆୟ୍‍ମୁଟ୍ । ବେନ ନିଜେତିଙ୍କ୍ ୱେଡ଼୍‍କ୍‍ ମାଡ଼ାନ୍ ସେଙ୍ଗେ ଆଲ୍‍ସ୍‍ମାକିଣ୍ଡ୍ ।
ROM 15:2 ଇତ୍‍କେ ମେଣ୍ଡେଅଡ଼୍‌‍ତିଡ଼୍ ସାୟେତ୍‍ ସେଙ୍ଗେ ନୁ ଅଡ଼ାଦ୍‌ ବିଶ୍ୱାସ୍‍ତିଙ୍କ୍ ନାର୍ଗ୍ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ ୱେଡ଼୍‍କ୍‍ ମାଡ଼ାନାଦ୍ ମାନ୍‍ ଦାୟିତ୍ ।
ROM 15:3 କ୍ରିଷ୍ଟ ନିଜେତ୍ ସୁକାମ୍‍ତେ ସେଙ୍ଗେ ବାତ୍ ମାଡ଼୍‍ୱେ ମାତ୍‍ତଣ୍ଡ୍ । ଇତ୍‍କେ ଶାସ୍ତ୍ର ବାକ୍ୟ ଲେକାମ୍, “ଅଡ଼୍‌ ମିକିଂଙ୍କ୍ ଇସମାନ୍ଦାନ୍ ଅପ୍‍ମାନ୍ ନାନ୍ ସୟ ମାଡ଼ୁତାନ୍ ।”
ROM 15:4 ଶାସ୍ତ୍ରତାଗ୍ ଲେକାମାନ୍ଦାନ୍‍ ଶିକ୍ଷା ସାର୍‍ରେ ମାନାଦ୍‍ ଉପ୍‍କାର୍ ସେଙ୍ଗେ ମିନ୍ଦେ । ବର୍‍ସାତାଗ୍ ଗାଡ଼୍‍ସ୍ ମାନ୍ଦାନ୍ ସେଙ୍ଗେ ଶାସ୍ତ୍ର ମାନାକିଙ୍କ୍ ଗାଡ଼୍‍ସ୍ ନୁ ସାର୍‍ଦେ ଇଦ୍‍ତେ ।
ROM 15:5 କ୍ରିଷ୍ଟ ଜିସୁନ୍ ଆଦର୍ଶତାଗ୍ ମାନ୍ଦାନଡ଼୍ ଲେକାମ୍ ସାର୍ରେତଡ଼୍‍ୱାଦ୍ ଆଦେ ରକମ୍ ମନ୍‍ବାବ୍ ଆଦ୍‍ଦାନ୍ ସେଙ୍ଗେ ଗାଡ଼୍‍ସ୍ ନୁ ୱେଡ଼୍‍କେତଣ୍ଡ୍ ଇଶ୍ୱର୍ ମିକିଂଙ୍କ୍ ଯୋଗ୍ୟ ମାଡ଼ିଣ୍ଡ୍ ।
ROM 15:6 ସାର୍ରେତଡ଼୍ କାୟ୍‍ଲିମେଣ୍ଡେ ୱେରଡ଼୍ ଲେଙ୍ଗ୍‍ଦେ ପ୍ରବୁ ଜିସୁ କ୍ରିଷ୍ଟ ବାବାଲ୍ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ାଟ୍ ।
ROM 15:7 ଆଦିଙ୍କ୍‍ କ୍ରିଷ୍ଟ ବେଲା ମିକିଂଙ୍କ୍ ଗ୍ରହନ୍ ମାଡ଼୍‍ତଣ୍ଡ୍, ଇଶ୍ୱର୍‌ତେ ମହିମା ସେଙ୍ଗେ ମିଡ଼୍ ଆଦେରକମ୍ ମିଇ ମିଲୋପେ ଗ୍ରହନ୍ ମାଡ଼ାଟ୍ ।
ROM 15:8 ବାତେଙ୍କ୍‍ଇତ୍‍କେ କ୍ରିଷ୍ଟନ୍ ସେବାତାଦ୍ ଜିୱୁଣ୍ଡ୍ ଇହୁଦୀଡ଼୍ ସେଙ୍ଗେ ତିୟାର୍ ଆସ୍‍ମାତ୍‍ତେ । ଅଡ଼୍‌‍କିଂଙ୍କ୍ ଅଣ୍ଡ୍‌ ତଅତାଙ୍କ୍ ଆଲ୍‍ସମାତ୍‍ତଣ୍ଡ୍ ଜେ ଇଶ୍ୱର୍ ବିଶ୍ୱାସ୍‍ତଣ୍ଡ୍‍, ଇହୁଦୀ ଗୋଷ୍ଠୀତ୍‍ ଆନିଦାଦିଡ଼୍‍କିଙ୍କ୍ ଇସ୍‍ମାନ୍ଦାନ୍ ସତ୍‍ ପ୍ରତିଜ୍ଞା ସାର୍‍ରେ ଅଣ୍ଡ୍‌ ପାଲନ୍ ମାଡ଼ିତନ୍ ।
ROM 15:9 ଅନ୍‌‍ୱାଦ୍ ଅନୁଗ୍ରହ ସେଙ୍ଗେ ଅଣଇହୁଦୀଡ଼୍ ଗାଲା ଅନ୍‌‍ୱାଦ୍ ପ୍ରସଂଶା ମାଡ଼ିତଡ଼୍ । ଇଦ୍ ବିଷୟ୍‍ତେ ଶାସ୍ତ୍ରତାଗ୍ ଲେକାମିନ୍ଦେ, “ଅଣଇହୁଦୀଡ଼୍ ଲୋପେ ମିୟାଦ୍ ପ୍ରସଂଶା ମାଡ଼ିତାନ୍, ସାର୍ରେଦାମ୍ ମିୟାଦ୍ ସ୍ତୁତିଗାନ୍ ମାଡ଼ିତାନ୍ ।”
ROM 15:10 ମେଣ୍ଡେ ମିକା ଲେକାମିନ୍ଦେ, “ଅଣଇହୁଦୀଡ଼୍ ଇଶ୍ୱର୍‌ତେ ନାରୁଡ଼୍‍ତଡ଼୍ ୱେଡ଼୍‍କ୍‍ ମାଡ଼ିଡ଼୍ !”
ROM 15:11 ମେଣ୍ଡେଅନ୍‌‍ନ୍ଦାମ୍, “ସାର୍‍ରେ ଅଣଇହୁଦୀଡ଼୍‍ ନାରୁଡ଼୍ ଅନ୍‌‍ୱାଦ୍ ସ୍ତୁତିଗାନ୍ ମାଡ଼ିଡ଼୍ !”
ROM 15:12 ମେଣ୍ଡେ ଯିଶାଇୟ କେତ୍‍ତଣ୍ଡ୍, “ଯେଶୀନ୍ ବଂଶତଣ୍ଡ୍ ୱେରଣ୍ଡ୍ ପୁଟିତଣ୍ଡ୍, ଅଣ୍ଡ୍‌ ଅଣଇହୁଦୀଡ଼୍‌କିଂଙ୍କ୍ ଶାସନ୍‍ ମାଡ଼ିତନ୍ ନୁ ଅଡ଼୍‌ ଅନାଗେ ବରସା ମାଡ଼ିତଡ଼୍ ।”
ROM 15:13 ସାର୍‍ରେ ବରସାତଣ୍ଡ୍, ଇଶ୍ୱର୍ ମିକିଂଙ୍କ୍ ବିଶ୍ୱାସ୍‍ତେ ମାୟ୍‍ଦିଙ୍କ୍ ମିକିଂଙ୍କ୍ ୱେଡ଼୍‍କ୍‍ ନୁ ଶାନ୍ତିତଡ଼୍ ସାରେ ମାଡ଼ିଣ୍ଡ୍ । ପବିତ୍ର ଆତ୍ମାତେ ଶକ୍ତିତଡ଼୍ ମିୟାଦ୍ ବରସା ନାର୍ଗେ ଆୟି ।
ROM 15:14 ଦାଦାଲଡ଼ି ନୁ ଏଲାସ୍କ୍‍, ନାୟାଦ୍ ବିଶ୍ୱାସ୍, ମିଡ଼୍ ସାର୍‍ରେ ସାୟେତ୍ ଗୁନାମ୍ ବା ଜ୍ଞାନ୍‍ତଡ଼୍ ନିଣ୍ଡିମେଣ୍ଡେ ନୁ ମି ମିଲୋପେ ଶିକ୍ଷା ଇଦାନଙ୍କ୍ ପାର୍‍ଦ୍‍ତିନ୍ ।
ROM 15:15 ଇଦ୍ ଚିଟିତାଗ୍ ମିକିଂଙ୍କ୍ ବେସ୍‍କେ ବିଷୟ୍ ସଚେତନ୍ ମାଡ଼ାନ୍ ସେଙ୍ଗେ ଇଶ୍ୱର୍‌ତେ ତଡ଼୍‍ ନାନ୍ ଗାଡ଼୍‍ସ୍ ଆତ୍‍ତାନ୍,
ROM 15:16 ବାତେଙ୍କ୍ଇତ୍‍କେ କ୍ରିଷ୍ଟ ଜିସୁନ୍ ଦାସ୍ ଇସାପ୍‍ତେ ଅଣଇହୁଦୀଡ଼୍ ସେଙ୍ଗେ ପାଡ଼୍‍ୟି ମାଡ଼ାନ୍ ମାୟ୍‍ଦିଙ୍କ୍ ଇଶ୍ୱର୍ ନାକିଂଙ୍କ୍ ସୁଯୋଗ୍ ଇତ୍‍ତନ୍ । ଇଶ୍ୱର୍‌ତାଦ୍ ସାୟେତ୍ କାବୁର୍ ପ୍ରଚାର୍ ମାଡ଼ାନ୍ ସେଙ୍ଗେ ନାନ୍ ୱେରଣ୍ଡ୍ ଦର୍ମଗୁରୁ ଲେକାମ୍ ପାଡ଼୍‍ୟି ମାଡ଼ୁତାନ୍ । ଅଣଇହୁଦିଡ଼୍ ପବିତ୍ର ଆତ୍ମା ତଡ଼୍ ଇତ୍‍ତାୱୁ ଜିନିଷ୍ ଲେକାମ୍ ଇଶ୍ୱର୍‌ତେ ବକେତ୍ ଗ୍ରହନ୍ ଆୟିଡ଼୍, ଇଦ୍ ନାୟାଦ୍ ଉଦେଶ୍ୟ ।
ROM 15:17 କ୍ରିଷ୍ଟ ଜିସୁନ୍ ତଡ଼୍ କାୟ୍‍ଲି ଇଶ୍ୱର୍‌ତେ ସେଙ୍ଗେ ଇଦ୍ ସେବା ପାଡ଼୍‍ୟି ମାଡ଼ମାନ୍ଦାନ୍ ମାୟ୍‍ଦିଙ୍କ୍ ନାନ୍ ଗର୍ବ ମାଡ଼ୁତାନ୍ ।
ROM 15:18 ଅଣଇହୁଦୀଡ଼୍‌କିଂଙ୍କ୍ ଇଶ୍ୱର୍‌ତାଦ୍ ନିୟମ୍ ପାଲନ୍ ମାଡ଼ାନ୍ ସେଙ୍ଗେ କ୍ରିଷ୍ଟ ନା ତଡ଼୍ ବାତ୍ ପାଡ଼୍‍ୟି ମାଡ଼୍‍ତଣ୍ଡ୍, ଇଦ୍‍ଏ ଗଟ୍ କେତ୍‍ତାନ୍ ସେଙ୍ଗେ ନାନ୍ ଗାଡ଼୍‍ସ୍ ଆତ୍‍ତାନ୍ ।
ROM 15:19 ଇଦ୍ ଅଣ୍ଡ୍‌ ମାଡ଼୍‍ତଣ୍ଡ୍, ବାକ୍ୟ ନୁ ପାଡ଼୍‍ୟି ତଡ଼୍ ନୁ ଇଶ୍ୱର୍‌ତେ ଆତ୍ମାତେ ଶକ୍ତିତେ । ଆଦିଙ୍କ୍ ନାନ୍ ଯିରୁଶାଲମ୍‍ତାଗାଙ୍କ୍ ଇଲିରିକମତାଗ୍ ଆଦାନ୍ ୱେଲେ ଆର୍ର୍‍ଦାଗ୍ କ୍ରିଷ୍ଟନାଦ୍ ସାୟେତ୍ କାବୁର୍ ସାୟେ ପ୍ରଚାର୍ ମାଡ଼୍‍ତାନ୍ ।
ROM 15:20 ବେନ୍ ପଡ଼୍‍ୟେତାଗ୍ ନାରୁଡ଼୍ କ୍ରିଷ୍ଟନାଦ୍ ବିଷୟ୍ କେଞ୍ଜଡ଼୍, ଆଗେ ଅନ୍‌‍ୱାଦ୍ କାବୁର୍ କେତାନାଦ୍ ନାୟାଦ୍ ଇଚ୍ଛା, ବାତେଙ୍କ୍‍ଇତ୍‍କେ ମେଣ୍ଡେଅଡ଼୍‌‍ତିଡ଼୍ ୱାଟିମାନ୍ଦାନ୍ ପାଉଣ୍ଡେସନ୍ ପର୍‍ର ଲୋନ୍‌ ମାଡ଼ାନଙ୍କ୍ ନାନ୍ ଚାଏମ୍ ଆୟନ୍ ।
ROM 15:21 ଶାସ୍ତ୍ରତାଗ୍ ବେଲା ଲେକାମିନ୍ଦେ, “ବେନଡ଼୍ ଅନ୍‌‍ୱାଦ୍ କାବୁର୍ ପାଏମ୍ ଆୟ୍‍ୟଡ଼୍, ଅଡ଼୍‌ ଉଡ଼ିତଡ଼୍; ବେନଡ଼୍ କେଞ୍ଜଡ଼୍, ଅଡ଼୍‌ ବୁଜେମ୍ ଆଦ୍‍ତଡ଼୍ ।”
ROM 15:22 ନାର୍ଗେଦାମ୍ ମିଇ ବକେତ୍ ୱାଦାନ୍ ସେଙ୍ଗେ ନାୟାଦ୍ ଯୋଜନା ଆଙ୍ଗ୍‍ଡ଼ାମ୍ ଆତ୍‍ତେ ।
ROM 15:23 ଇତ୍‍କେ ଇଦ୍ ପଡ଼ିୟେତାଗ୍ ନାୟାଦ୍ ପାଡ଼୍‍ୟି ତେରିଆତ୍‍ତେ ନୁ ନାୟାଦ୍ ଆଶେ, ମିକିଂଙ୍କ୍ ଉଡ଼ାନ୍ ସେଙ୍ଗେ ନାୟାଦ୍ ନାର୍‍ଗେ ଏଣ୍ଡ୍‍ତାଦ୍ ଇଚ୍ଛା ଇଞ୍ଜେ ସାରେ ପୁରା ଆଦ୍‍ତେ ।
ROM 15:24 ନାନ୍‍ ସ୍ପେନ୍ ଆଦାନ୍ ଆର୍‍ଦାଗ୍ ମିକିଂଙ୍କ୍ ଉଡ଼ି ୱାଦ୍‍ତାନ୍ ଇଞ୍ଜ ଆଲ୍‍ସ୍‍ତାନ୍ । ମିଇ ଗାର୍ରେ ବେସ୍‍କେ ଦିନାମ୍ ମାତ୍‍ତେ ପେର୍‍କେ ମିୟାଦ୍ ସାହାଯ୍ୟତେ ସ୍ପେନ୍ ଆଦ୍‍ତାନ୍ ।
ROM 15:25 ଇଞ୍ଜେନେ ଇଶ୍ୱର୍‌ତେ ନାରୁଡ଼ାଦ୍ ସେବା ମାଡ଼ାନଙ୍କ୍ ନାନ୍ ଯିରୁଶାଲେମ୍ ଆଦୁତାନ୍ ।
ROM 15:26 ଯିରୁଶାଲେମ୍‍ତାଗ୍ ଇଶ୍ୱର୍‌ତେ ବେନ୍ ନାରୁଡ଼୍ ଅବାବ୍ ମିନ୍ଦେଡ଼୍‍, ଅଡ଼୍‌ ସେଙ୍ଗେ ବେସର୍ ଡାବ୍‍କ୍ ରଅତାନ୍ ମାୟ୍‍ଦିଙ୍କ୍ ମାସିଦୋନିଆ ନୁ ଆକାୟତେ ମଣ୍ଡଲି ପବିତ୍ର ମାଡ଼୍‍ତଡ଼୍ ।
ROM 15:27 ଇଦ୍ ଅଡ଼ାଦ୍‌ ନିଜର୍‍ ଇଚ୍ଛାତାଦ୍ ନିଷ୍ପତି; ନିଜାମ୍ ଇଲା ମାଡ଼ାନାଦ୍ ଅଡ଼ାଦ୍‌ କାମ୍‌ । ଇହୁଦି ନାରୁଡ଼୍ ନିଜେତ୍ ଆଦ୍ୟାତ୍ମିକ୍ ଆର୍ଶିବାଦ୍‍ତଡ଼୍ ଅଣଇହୁଦୀଡ଼୍‌କିଂଙ୍କ୍ ଅଂଶୀଦାର୍ ମାଡ଼୍‍ତାଙ୍କ୍, ଇହୁଦୀଡ଼୍‍କିଙ୍କ୍ ନିଜେତ୍ ଡାବ୍‍କିନ୍ ଆର୍ଶିବାଦ୍‍ତଡ଼୍ କାଲ୍‌ପି ଅଡ଼୍‌‍କିଂଙ୍କ୍ ସାହାଯ୍ୟ ମାଡ଼ାନାଦ୍ ଅଣଇହୁଦିଡ଼ାଦ୍ କାମ୍‌ ।
ROM 15:28 ଯିରୁଶାଲେମ୍‍ତାଗ୍ ଆୱୁ ଡାବ୍‍କ୍ ଇସ୍ ନାୟାଦ୍ ପାଡ଼୍‍ୟି ତେର୍‍ସ୍ପ୍‍ତେ ପେର୍କେ, ନାନ୍ ସ୍ପେନ୍ ଦେଶ୍‍ ଆଦ୍‍ତାନ୍ ନୁ ଆର୍‍ଦାଗ୍ ମିକିଂଙ୍କ୍ ଉଡ଼ି ୱାଦ୍‍ତାନ୍ ।
ROM 15:29 ନାନ୍ ପୁତ୍‍ତାନ୍, କ୍ରିଷ୍ଟନାଗାଙ୍କ୍ ସାରେ ଆର୍ଶିବାଦ୍ ପୟ୍‍ସ୍ ନାନ୍ ମିଇ ବକେତ୍ ୱାଦ୍‍ତାନ୍ ।
ROM 15:30 ପ୍ରିୟ ଦାଦାଲଡ଼୍‍ ନୁ ଏଲାସ୍କ୍‍ ପ୍ରବୁ ଜିସୁ କ୍ରିଷ୍ଟନ୍ ପେଦେର୍‍ତେ ନୁ ପବିତ୍ର ଆତ୍ମା ଇତ୍‍ତେ ପ୍ରେମ ସେଙ୍ଗେ ନାନ୍ ମିକିଂଙ୍କ୍ ଅନୁରଦ୍‌‍ ମାଡ଼ୁତାନ୍, ନା ସେଙ୍ଗେ ବିଶ୍ୱାସ୍‌ତେ ପ୍ରାର୍ତନା ମାଡ଼ାଟ୍ ।
ROM 15:31 ଅବିଶ୍ୱାସୀ ନାରୁଡ଼ାଗାଙ୍କ୍ ନାନ୍ ବେଲା ପବିତ୍ରଆସ୍‌ ସାୟେ ମାନ୍‍ତାନ୍ ନୁ ଯିରୁଶାଲେମ୍‍ତାଗ୍ ନାୟାଦ୍ ପାଡ଼୍‍ୟି ବେଲା ଆଗେ ଇଶ୍ୱର୍‌ତେ ନାରୁଡ଼୍ ପସନ୍ଦ୍ ମାଡ଼ିତଡ଼୍, ଆଦିନ୍‌ସେଙ୍ଗେ ପ୍ରାର୍ତନା ମାଡ଼ମାନୁଟ୍ ।
ROM 15:32 ଇଶ୍ୱର୍‌ତେ ଇଚ୍ଛା ଆତ୍‍କେ, ନାନ୍ ମିଇ ବକେତ୍ ୱେଡ଼୍‍କେତଡ଼୍ ୱାଦ୍‍ତାନ୍ ନୁ ମିଇ ତଡ଼୍ ବେସ୍‍କେ ଦିନା ମାଞ୍ଜ୍ ନା ମନ୍‍ତାଗ୍ ସାର୍‍ଦେ ଆଦ୍‍ତାନ୍ ।
ROM 15:33 ସାର୍‍ରେ ଶାନ୍ତିତଣ୍ଡ୍ ଇଶ୍ୱର୍ ମିଇ ତଡ଼୍ ମାନିଣ୍ଡ୍ । ଆମେନ୍‍ ।
ROM 16:1 କେଙ୍କ୍ରେତ୍ ମଣ୍ଡଲିତାଦ୍ ୱେରଡ଼୍ ସେବିକା ଏଲାଡ଼୍‍ତିଙ୍କ୍‍ ଫିବେଙ୍କ୍ ମି ଗାରେ ରଅତୁତାନ୍ ।
ROM 16:2 ପ୍ରବୁନ୍ ପବିତ୍ର ପେଦେର୍‍ତେ ଆଦିଙ୍କ୍ ଗ୍ରହନ୍ ମାଡ଼ି ଇଶ୍ୱର୍‌ତେ ନାରୁଡ଼୍ ଲେକାମ୍ ବ୍ୟବହାର୍‌ ମାଡ଼ାଟ୍ । ଆଦିନ୍ ଦର୍‍କାର୍ ଲେକାମ୍ ସାହାଯ୍ୟ ମାଡ଼ାଟ୍ । ନାୟାଦ୍ ନୁ ନାର୍‍ଗେ ନାରୁଡ଼ାଦ୍ ଆଦ୍ ୱେରଡ଼୍ ଉପ୍‍କାରି ସାଙ୍ଗ ଆଦ୍‍ତେ ।
ROM 16:3 କ୍ରିଷ୍ଟ ଜିସୁନ୍ ସେବାତାଗ୍ ନା ତଡ଼୍ ପାଡ଼୍‍ୟି ମାଡ଼ାନଣ୍ଡ୍ ପ୍ରିସ୍କିଲା ନୁ ଆକ୍ୱିଲାଙ୍କ୍ ନାୟାଦ୍ ନମସ୍କାର୍ କେଲାଟ୍ ।
ROM 16:4 ଅଡ଼୍‌ ନା ସେଙ୍ଗେ ନିଜେତ୍ ଜିୱୁଣ୍ଡ୍‍ତିଙ୍କ୍ ବିପଦ୍ ମାଡ଼୍‍ତଡ଼୍ । ମାତର୍‌ ନାନେକେ ଆୟନ୍, ସାର୍‍ରେ ଅଣଇହୁଦୀ ମଣ୍ଡଲି ଅଂକିଙ୍କ୍‌ ଦନ୍ୟବାଦ୍‍ ଇଦ୍‍ତା ।
ROM 16:5 ତାମ୍‍ ଲୋନ୍‌ ଗୁଡ଼ମାନ୍ଦାନ୍ ଉପବାସ୍‍ତେ ମଣ୍ଡଲିତିଙ୍କ୍ ମିକା ନାୟାଦ୍ ନମସ୍କାର୍‍ କେତୁତାନ୍ । ନା ପ୍ରିୟ ସାଙ୍ଗ୍ ଏପାଇନେତତିଙ୍କ୍ ନାୟାଦ୍ ନମସ୍କାର୍ କେତିତିଡ଼୍ । ଆସିଆ ପ୍ରଦେଶ୍‍ତାଗ୍ ଅଣ୍ଡ୍‌ ଆଦୁତନ୍ ମୁନେତ୍ କ୍ରିଷ୍ଟ ବିଶ୍ୱାସୀ ।
ROM 16:6 ମିୟାଦ୍ ଲେକେତ୍‍ ସେଙ୍ଗେ ରମକଟ ପାଡ଼୍‍ୟି ମାଡ଼ିମାନ୍ଦାନ୍ ମରୀୟମ୍‍ତିଙ୍କ୍ ନାନ୍ ନମସ୍କାର୍ ମାଡ଼ୁତାନ୍ ।
ROM 16:7 ଆନ୍ଦ୍ରନିକସ୍‌ ନୁ ୟୁନିୟାତିଙ୍କ୍ ନାୟାଦ୍ ନମସ୍କାର୍‍ । ଇଡ଼୍ ଇର୍‍ୱୁଡ଼୍ ଇହୁଦୀଡ଼୍ ନା ତଡ଼୍ ଜେଲ୍‍ଦାଗ୍ ମାତ୍‍ତଡ଼୍ । ନା ମୁନେଙ୍କ୍ ଅଡ଼୍‌ କ୍ରିଷ୍ଟ ଦର୍ମ ଗ୍ରହନ୍ ମାଡ଼ିମାତ୍‍ତଡ଼୍ ନୁ ପ୍ରେରିତ୍ ଶିଷ୍ୟଡ଼ାଗ୍ ଅଡ଼୍‌ ପରିଚିତ୍ ଆସ୍‍ମାତ୍‍ତଡ଼୍ ।
ROM 16:8 ନା ତଡ଼୍ ପ୍ରବୁନ୍ ସାହାଯ୍ୟ ପାଏମ୍ ଆଦାନଣ୍ଡ୍ ନା ପ୍ରିୟ ସାଙ୍ଗ ଆମ୍ପ୍ଲିୟାତ୍‍ତିଙ୍କ୍ ନାୟାଦ୍ ନମସ୍କାର୍‍ ।
ROM 16:9 କ୍ରିଷ୍ଟନ୍ ପାଡ଼୍‍ୟିତାଗ୍ ନା ତଡ଼୍ ପାଡ଼୍‍ୟିମାଡ଼ାନଣ୍ଡ୍ ଉର୍ବାନୋ ନୁ ନା ପ୍ରିୟ ସାଙ୍ଗ ସ୍ତାକିୟତିଙ୍କ୍ ମିକା ନାୟାଦ୍ ନମସ୍କାର୍ କେଲାଟ୍‍ ।
ROM 16:10 କ୍ରିଷ୍ଟନ୍ ବିଶ୍ୱାସ୍‍ତେ ଦାସ ଆପେଲା ନୁ ଆରିସ୍ତବୁଲନ୍ ଲୋତ୍‍ତେ ସାର୍ରେତଡ଼୍‍କିଙ୍କ୍ ନାୟାଦ୍ ନମସ୍କାର୍‍ କେତିତିଡ଼୍‍ ।
ROM 16:11 ନା ନିଜେତ୍ ଗୋଷ୍ଠୀତଣ୍ଡ୍ ହେରୋଦିୟନ୍ ନୁ ନାରସିସନ୍ ପରିବାର୍‍ତେ କ୍ରିଷ୍ଟିୟାନ୍ ଦାଦାଲଡ଼୍‍କିଙ୍କ୍ ମିକା ନାୟାଦ୍ ନମସ୍କାର୍‍ ।
ROM 16:12 ପ୍ରବୁନ୍ ସେବା ମାଡ଼ାନଣ୍ଡ୍ ତ୍ରିଫେନା ନୁ ତ୍ରିଫୋସାଙ୍କ୍ ନୁ ପ୍ରବୁନ୍ ସେଙ୍ଗେ ଗାଟି ପାଡ଼୍‍ୟି ମାଡ଼ିମାନ୍ଦାନ୍ ପ୍ରିୟ ପର୍ଶିସତିଙ୍କ୍ ନାୟାଦ୍ ନମସ୍କାର୍ କେଲାଟ୍‍ ।
ROM 16:13 ପ୍ରବୁନ୍ ଦାସ୍ ରୁଫସ୍ ନୁ ନା ୟାୟ୍‍ ଲେକାମ୍ ତାମ୍ ୟାୟାଙ୍କ୍ ମିକା ନାୟାଦ୍ ନମସ୍କାର୍ କେଲାଟ୍‍ ।
ROM 16:14 ଆସୁଙ୍କ୍ରି, ଫ୍ଲେଗୋନ୍, ହର୍ମୀସ୍, ପାତ୍ରବା, ହର୍‍ମାସ୍ ନୁ ଅଡ଼୍‌ ତଡ଼୍ ମାନ୍ଦାନ୍ କ୍ରିଷ୍ଟିୟାନ୍‍ ଦାଦାଲଡ଼୍ ଏଲାଡ଼୍‍କିଙ୍କ୍ ନାୟାଦ୍‍ ନମସ୍କାର୍‍ କେଲାଟ୍‍,
ROM 16:15 ଫିଲଲୋଗ ନୁ ଯୁଲିୟା, ନୀରୁସ୍ ନୁ ତାନ୍ ଏଲାଡ଼୍‍ ନୁ ଆଲୁମ୍ପା ମେଣ୍ଡେ ତାମ୍‍ତଡ଼୍‍ ମାନ୍ଦାନ୍‍ ସାର୍ରେ ସାଦୁ ନାରୁଡ଼୍‍କିଙ୍କ୍ ନାୟାଦ୍ ପବିତ୍ର ନମସ୍କାର୍‍ କେତିତିଡ଼୍ ।
ROM 16:16 ମିଇ ମି ଲୋପେ ଦାଦାଲ୍‍ତାମୁଣ୍ଡ୍ କ୍ରିଷ୍ଟିୟାନ୍‍ ପବିତ୍ର ପ୍ରେମ୍‍ତଡ଼୍‍ ନମସ୍କାର୍‍ ମାଡ଼ାଟ୍ । କ୍ରିଷ୍ଟନ୍ ସାର୍‍ରେ ମଣ୍ଡଲି ମିକିଂଙ୍କ୍ ନମସ୍କାର୍ ମାଡ଼ୁତା ।
ROM 16:17 ଦାଦାଲଡ଼ି ନୁ ଏଲାସ୍କ୍‍, ବିନତି ମାଡ଼ୁତାନ୍, ମିଡ଼୍ ଗ୍ରହନ୍ ମାଡ଼୍‍ତେ ଶିକ୍ଷାତିଙ୍କ୍‍ ବିରଦ୍ ମାଡ଼ି ବେନଡ଼୍ ମିଇ ଲୋପେ ଗଲ୍‍କ୍ ତିୟାର୍ ମାଡ଼ାନଙ୍କ୍ ଆଲ୍‍ସି ମାଡ଼ିତନ୍, ଅଡ଼୍‌ଆଗାଙ୍କ୍‌ ଜେକେ ମାନୁଟ୍ ।
ROM 16:18 ବେନଡ଼୍ ଇଦ୍ ରକମ୍ ପାଡ଼୍‍ୟିତାଗ୍ ଦାନ୍ଦେ ମାନ୍‍ତଡ଼୍, ଅଡ଼୍‌ ପ୍ରବୁ ଜିସୁ କ୍ରିଷ୍ଟନ୍ ସେବା ମାଡ଼ଡ଼୍‍, ଅଡ଼୍‌ ତାମ୍ ନିଜେତ୍ ଲାଲସା ମେନ୍ଦୁଲ୍ ଲେକାମ୍ ମାଡ଼ାନଙ୍କ୍ ମାନ୍‍ତଡ଼୍ । ଚାଲାକ୍ ଗଟ୍‍ତଡ଼୍ ନୁ ମିଚ୍ ଗଟ୍‍ତଡ଼୍ ଅଡ଼୍‌ ନିରୀହ ନାରୁଡ଼୍‍କିଂଙ୍କ୍ ତିପାଲ୍ ମାଡ଼ିତଡ଼୍ ।
ROM 16:19 ସାୟେତାଦ୍‍ କାବୁର୍ ସେଙ୍ଗେ ମିୟାଦ୍ ବିଶ୍ୱାସ୍ ସାର୍ରେତଡ଼୍ କେଞ୍ଜ୍‍ତଡ଼୍, ଆଦିନ୍ ସେଙ୍ଗେ ନାନ୍ ସାର୍‍ଦେ ମିନ୍ଦେନ୍ । ନାନ୍ ଚାଏମ୍ ଆଦୁତାନ୍, ମିଡ଼୍ ନିଜାମ୍ ବିଷୟ୍‍ତେ ଜ୍ଞାନି ଆୟ୍‍ମୁଟ୍ ନୁ ମିଚ୍ ବିଷୟ୍‍ତାଗ୍ ମାନ୍‍ମାଟ୍ ।
ROM 16:20 ଆଲାଇତ୍କେ, ଶାନ୍ତିତଣ୍ଡ୍ ଇଶ୍ୱର୍ ସିଟ୍‍ପାଟ୍ ଶୟ୍‍ତାନ୍‍ତିଙ୍କ୍ ମିୟାଦ୍ ଡେକେତ୍ ମଦଲ୍ ମାଡ଼ିତନ୍ । ପ୍ରବୁନ୍ ଅନୁଗ୍ରହ୍ ମିଇ ତଡ଼୍ ମାନି । ଆମେନ୍‌ ।
ROM 16:21 ନା ତଡ଼୍ ପାଡ଼୍‍ୟି ମାଡ଼ାନଣ୍ଡ୍ ତିମତୀ ନୁ ମାନ୍‍ ଇହୁଦୀ ଦାଦାଲଡ଼୍ ଲୁକିୟ, ଯାସୋନ ନୁ ସୋସିପାତ୍ର ମିକିଂଙ୍କ୍ ନମସ୍କାର୍ ମାଡ଼ୁତଡ଼୍ ।
ROM 16:22 ନାନ୍‍ ତର୍ତ୍ତିୟ ପାଉଲ୍‍ତେ ସେଙ୍ଗେ ଇଦ୍ ଚିଟିତେ ଲେକ୍‍ତେନନ୍‌ ପ୍ରବୁନ୍ ପେଦେର୍‍ତେ ମିକିଂଙ୍କ୍ ନମସ୍କାର୍ ମାଡ଼ୁତଣ୍ଡ୍ ।
ROM 16:23 ନା କୁଟ୍‍ମାମ୍‍ତଣ୍ଡ୍‍ ଗାୟସ୍‍, ବେନନ୍ ଲୋନ୍‌ ଉପାସକଡ଼୍ ଗୁଡ଼ିତଡ଼୍ ମେଣ୍ଡେ ଇଦ୍ ନଗରୀତଣ୍ଡ୍ ଗୁଦାମ୍‍ ଅଦକ୍ଷ ଏରାଷ୍ଟ ନୁ ତାମୁଣ୍ଡ୍ କ୍ୱାର୍ତ୍ତ ମିକା ମିକିଂଙ୍କ୍ ନମସ୍କାର୍‍ ମାଡ଼ୁତଡ଼୍ ।
ROM 16:24 ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ୍ ମିଇ ସାର୍ରେତଡ଼୍‍କିଙ୍କ୍ ଆୟି ।
ROM 16:25 ୱାଡ଼ାଟ୍, ଇଶ୍ୱର୍‌ତିଙ୍କ୍ ଗୌରବ୍ ମାଡ଼ିତାଡ଼୍ । ନାନ୍ ପ୍ରଚାର୍ ମାଡ଼ମାନ୍ଦାନ୍ ଜିସୁ କ୍ରିଷ୍ଟନ୍ ବିଷୟ୍‍ତେ ସାୟେତ୍ କାବୁର୍ ନୁ ଯୁଗ୍‍ଯୁଗ୍ ପୟ୍‍ସ୍ ମିଞ୍ଜିମାନ୍ଦାନ୍ ଲୋପେତ୍ ତଥ୍ୟ ଲେକାମ୍ ମିୟାଦ୍ ବିଶ୍ୱାସ୍‍ତିଙ୍କ୍ ଗାଡ଼୍‍ସ୍ ନେଃଏସ୍ ମାନ୍ଦାନ୍ ସେଙ୍ଗେ ଇଶ୍ୱର୍ ପାର୍‍ଦ୍‍ତଣ୍ଡ୍ ।
ROM 16:26 ଆଦିଙ୍କ୍‍ ଆୱୁ ଲୋପେତ୍ ବିଷୟ ସାର୍ରେ ବାବବାଦିଡ଼୍ ଶାସ୍ତ୍ରତାଗ୍ ତଅନ୍‌ଦିମିନ୍ଦେ ମେଣ୍ଡେ ଆଦ୍ ଇଞ୍ଜେ ସାରେଦିନାତ୍ ପ୍ରବୁ ଇଶ୍ୱର୍‌ତଡ଼୍ ସାର୍‍ରେ ନାରୁଡ଼୍‍ ଲପେ ପ୍ରଚାର୍ ଆଦୁତ୍‍ତେ । ଇଦିନ୍‍ତଡ଼୍ ସାର୍ରେତଡ଼୍ ବିଶ୍ୱାସ୍ ମାଡ଼ି ଇଶ୍ୱର୍‌ତେ ନିୟମ୍ ପାଲନ୍ ମାଡ଼େ ପାର୍‍ଦ୍‍ତଡ଼୍ ।
ROM 16:27 ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ସାର୍‍ରେ ପୁତ୍‍ତେନଣ୍ଡ୍ ୱେରଣ୍ଡେ ଇଶ୍ୱର୍ ଯୁଗ୍‍ଯୁଗ୍ ଗୌରବ୍ ଆୟିଣ୍ଡ୍ । ଆମେନ୍‍ ।
1CO 1:1 ନାନ୍ ପାଉଲ୍ ନୁ ମାନ୍‍ ବିଶ୍ୱାସୀ ସୋସ୍ଥିନା ମିକିଂଙ୍କ୍ ନମସ୍କାର୍ ମାଡ଼ୁତମ୍ । ଇଶ୍ୱର୍‌ତେ ମାନ୍‌ତାଦ୍‌ ଇସାବ୍‌ତେ କ୍ରିଷ୍ଟ ଜିସୁନ୍ କାବୁର୍ ପ୍ରେରିତ ଶିଷ୍ୟ ଲେକେତ୍‍ ଏଞ୍ଚ୍‌ତେନଣ୍ଡ୍ ପାଉଲ୍‌ ନୁ ମାନ୍‍ ଦାଦାଲ୍ ସୋସ୍ଥିନା ।
1CO 1:2 କରନ୍ତି ଟାୱୁନ୍‍କିନ୍ ଇଶ୍ୱରତେ ମଣ୍ଡଲିକିଙ୍କ୍ ଇଦ୍ ଚିଟି ଲେକୁତଡ଼୍, ବେନ୍‌ମାନେ ଇଶ୍ୱରନ୍ ପବିତ୍ର ନାରୁନ୍ ଆଦାନ୍ ମାଇଦିଙ୍କ୍‌ ଏଞ୍ଚ୍‌ତଡ଼୍‌ ମେଣ୍ଡେ ଜିସୁ କ୍ରିଷ୍ଟନ୍‌ ସାଙ୍ଗ୍‌ କାଇଲ୍‍ତା ସେଙ୍ଗେ ଇଶ୍ୱର୍‌ନଡ଼୍‌ ଆସ୍‌ ମିନ୍ଦେଡ଼୍‌ ନୁ ସାର୍ରେତାଗ୍ ମାନ୍‍ ଜିସୁ କ୍ରିଷ୍ଟନାଦ୍ ପୁଜା କିସମିନ୍ଦେଡ଼୍ ।
1CO 1:3 ଅଣ୍ଡ୍‌ ମିକିଂଙ୍କ୍ ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ସାୟେ ନୁ ସୁକାମ୍‍ତେ ଇୱିଣ୍ଡ୍ ।
1CO 1:4 ବାତେଙ୍କ୍‍ ଇତ୍କେ କ୍ରିଷ୍ଟନ୍‍ତଡ଼୍ କାୟ୍‍ଲ୍‍ତେ ସେଙ୍ଗେ ଇଶ୍ୱର୍ ମିକିଂଙ୍କ୍ ଆଦ୍ ଅନୁଗ୍ରହ ଇସ୍‌ମିନ୍ଦେଣ୍ଡ୍, ଆଦିନ୍‌ ମାଇଦିଙ୍କ୍‌ ନାନ୍ ଇଶ୍ୱର୍‌ତିନ୍ ସାରେଦାମ୍‌ ଦନ୍ୟବାଦ୍‌ ଇଦୁତାନ୍,
1CO 1:5 ବାତାଙ୍କ୍ଇତ୍‌କେ ଇଶ୍ୱରତେ ସାଙ୍ଗ୍‌ କାଇଲି ମାନ୍ଦାନ୍‌ ମାଇଦିଙ୍କ୍ ମିଡ଼୍ ସାର୍‍ରେ ବିଷୟ୍‍ତେ ବେଲାକି କେତାନ୍‍ ଶକ୍ତି ନୁ ବୁଦ୍‍ତେ ଗାଲା ସାଉକାର୍ ଆସ୍‌ମିନ୍ଦେ ।
1CO 1:6 କ୍ରିଷ୍ଟନ୍ ଜଡ଼୍‌ତାଦ୍‌ କାବୁର୍‍ ମିୟାଗା ଡାଟୁମ୍‌ତେ ତିଆର୍‌ ଆସ୍‌ମିନ୍ଦେ ।
1CO 1:7 ଆଦିନ୍‌ମାଇଦିଙ୍କ୍ ପ୍ରବୁ ଜିସୁ କ୍ରିଷ୍ଟନାଦ୍‌ ଉଡ଼ାନ୍ ସେଙ୍ଗେ କେପିମାନ୍ଦାନ୍ ୱେଲା ମିୟାଦ୍‌ ବାତା ବା ଜିୱତ୍‌ ଆର୍ଶିବାଦ୍‌ତାଦ୍‌ ଅବାବ୍ ଆୟ୍‍ୟ ।
1CO 1:8 ଅଣ୍ଡ୍‌‌ ମିକା ମିକିଂଙ୍କ୍ ମାଡ଼େଙ୍ଗ୍‌ ଅନ୍‌‍ପାକେ ଗେଲ୍‌ସ୍ପିତଣ୍ଡ୍‌ । ବେଲାକି ପ୍ରବୁ ଜିସୁ କ୍ରିଷ୍ଟ ୱାଦାନ୍ ଦିନାମ୍‌ତେ ମିଡ଼୍ ନିର୍ଦୋଷ୍‍ ଆଦ୍‍ତିଡ଼୍ ।
1CO 1:9 ବେନ୍‍ ଇଶ୍ୱର୍ ତାନା ମାର୍‌ ମାନ୍‍ ପ୍ରବୁ ଜିସୁ କ୍ରିଷ୍ଟନ୍‌ ବପୁ ଦର୍କାନ୍ ମାଇଦିଙ୍କ୍ ମିକିନ୍‌ କାର୍ଙ୍ଗିମିନ୍ଦେଣ୍ଡ୍, ଅଣ୍ଡ୍‌ ସାରେଦାମ୍‌ ବିଶ୍ୱାସ୍‌ତଣ୍ଡ୍‌ ।
1CO 1:10 ହୋ ଦାଦାଲଡ଼ି ନୁ ଏଲାସ୍କ୍ ପ୍ରବୁ ଜିସୁ କ୍ରିଷ୍ଟନ୍‌ ଅଦିକାର୍‌‌ଦେ ସେଙ୍ଗେ ନାନ୍‌ ମିକିଙ୍କ୍‌ ଅନୁରଦ୍‌‍ ମାଡ଼ମିନ୍ଦେଣ୍ଡ୍, ଆଲ୍‍ସାନ୍ ମାଡ଼ାନ୍‍ୱେଲେ ୱେରଡ଼୍ ଆଇମୁଟ୍‌ । ଆଲାଇତ୍‌କେ ମିଇ ଲୋପେ ବାତାବା ୱେକ୍‍ୱେକ୍‍ ଆୟ୍‍ୟ ।
1CO 1:11 ୱେରଡ଼୍ ଚିନ୍ତେ ନୁ ୱେରଡ଼୍ ଏଦେ ଅସ୍ ୱେରଡ଼୍ ଆଇମୁଟ୍‌ । ଦାଦାଲଡ଼ି ନୁ ଏଲାସ୍କ୍, ମିଇ ଲୋପେ ଗଲ୍‍କ୍ ମିନ୍ଦେ ଇଞ୍ଜ କ୍ଲୟିନ୍‌ତାଦ୍‌ ପରିବାର୍‌ତଡ଼୍‌ ବେସ୍‌ୱୁଡ଼୍‌ ନାକିନ୍‌ କେତ୍‌ତଡ଼୍‌ ।
1CO 1:12 ନାକ୍ ଏର୍କା ମିନ୍ଦା, ମିଡ଼୍ ସାର୍ରେତଡ଼୍‌ ୱେରେୱେରେ ଗଟି କେତୁତିଡ଼୍‌ । ବେନ କେତୁତଣ୍ଡ୍‌, “ନାନ୍ ପାଉଲିନ୍ ପେର୍‍କେ ଆଦ୍‍ତାନ୍, ମେଣ୍ଡ୍‌ ବେନ କେତୁତଣ୍ଡ୍, ନାନ୍ ଆପୋଲ୍ଲୋ ପେର୍‍କେ ଆଦ୍‍ତାନ୍, ବେନ କେତୁତଣ୍ଡ୍ ନାନ୍ ପିତର୍‌ତେ ପେର୍‍କେ ଆଦ୍‍ତାନ୍, ମେଣ୍ଡେ ବେନ କେତୁତଣ୍ଡ୍ ନାନ୍ କ୍ରିଷ୍ଟନ୍ ପେର୍‍କେ ଆତ୍‌ତାନ୍‌ ।”
1CO 1:13 କ୍ରିଷ୍ଟ ବାତା ୱେରେ ଆସ୍‌ମିନ୍ଦେଣ୍ଡ୍ ? ପାଉଲ ବାତା ମିଇ ମାଇଦିଙ୍କ୍‌ କ୍ରୁଶତାଗ୍‌ ଡଲିଆସ୍‌ମାତ୍‌ତଣ୍ଡ୍ ? ମିଡ଼୍ ବାତା ପାଉଲନ୍ ପେଦେର୍‍ତେ ଏର୍‌ ମୁଡ଼୍‌ନ୍ଦି ମାତ୍‌ତିଡ଼୍ ?
1CO 1:14 ଇଶ୍ୱରଙ୍କ୍‌ ଦନ୍ୟବାଦ୍ ଇଦୁତାନ୍ କି କ୍ରିଷ୍ପ ନୁ ଗାୟଙ୍କ ୱିଡ଼୍‌ସ୍‌କେ ମିଇ ଲୋପେ ନାନ୍ ବେନଙ୍କ୍ ବା ଏର୍‌ ମୁଡ଼୍‌ନ୍ଦନ୍‌ ।
1CO 1:15 ଆଦିଙ୍କ୍‌ ନା ପେଦେର୍‍ତେ ଏର୍‌ ମୁଡ଼୍‌ନ୍ଦିତଡ଼୍‌ ଇଞ୍ଜ ମିୟାଗାଙ୍କ୍‌ ବେନ ବା କେତାପାର୍ୱଡ଼୍‍ ।
1CO 1:16 ହଁ, ନାନ୍ ସ୍ତିଫାନ୍ ନୁ ତାନ୍‌ ଲତ୍‌ତେ ନଡ଼୍‌କିଙ୍ଗ୍‌ ଏର୍‌ ମୁହୁସ୍‌ ମାତ୍‌ତାନ୍ । ମେଣ୍ଡେ ବେନଙ୍କ୍‌ ଏର୍‌ ମୁଡ଼୍‌ହ୍‌ତାନ୍‌ ଇଞ୍ଜ ନାକିନ୍‌ ଏର୍କା ୱାଦିଲ୍ଲେ ।
1CO 1:17 ଏର୍‌ ମୁଡ଼୍‌ତାନ୍ ମାଇଦିଙ୍କ୍ କ୍ରିଷ୍ଟ ନାକିନ୍ ରଅତିଲେ । ଅଣ୍ଡ୍‌ ନାକିନ୍ ସାୟେ କାବୁର୍‌ କେତାନଙ୍କ୍ ରହ୍‌ସ୍‌ମିନ୍ଦେଣ୍ଡ୍; ଆଦ୍‍ମିକା ମେଣ୍ଡେ ବାକ୍ୟଲେକେତ୍ ଇଲ୍‍ଲେ, କ୍ରୁଶତ୍ ପର୍‍ର କ୍ରିଷ୍ଟନାଦ୍ ଡଲ୍‍ତାଦ୍ ବେକାର୍‍ ଆଦ୍‍ତେ ।
1CO 1:18 ପେଦ୍‍ ଆଦାନ୍ ନାରୁଡ଼୍ ମାଇଦିଙ୍କ୍ କ୍ରୁଶତ୍‌ ପର୍‍ର କ୍ରିଷ୍ଟନାଦ୍ ଡଲ୍‍ତାଦ୍ କାବୁର୍ ବେକାର୍‍ । ମାତର୍ ମା ଲେକାମ୍ ଗେଲ୍‍ସି ମାନ୍ଦାନ୍ ନାରୁଡ଼୍ ମାଇଦିଙ୍କ୍ ଇଦ୍‌ ଆଦୁତେ ଇଶ୍ୱର୍‌ତେ ଲାୱୁ ।
1CO 1:19 ବେଲାକି ବାଇବଲ୍‍ତାଗ୍‌ ଲେକାମିନ୍ଦେ, “ନାନ୍ ଜ୍ଞାନି ନାରୁଡ଼ାୱୁ ବୁଦ୍ ପେଏଦ୍ ମାଡ଼ିତାନ୍, ବୁଦ୍‍ ନାରୁଡ଼୍ ବୁଜେମ୍ ଆଦାନାଦିଙ୍କ୍ ବେକାର୍‍ ମାଡ଼ିତାନ୍ ।”
1CO 1:20 ଆଦିଙ୍କ୍ ଇ ଜୁଗାତ୍‌ ଜ୍ଞାନିଡ଼୍‌, ବୁଦ୍ଦିଡ଼୍‌ ଗାଟି ଗାଇଦେ ନାରିଡ଼୍ ପଡ଼ିୟେ ବେଗା ? ଇଦ୍‌ ବୁଦ୍‍ତାଦ୍‌ ବୁଦ୍‍ତିନ୍ ମୁର୍କତା ଇଞ୍ଜ ଇଶ୍ୱର୍ କେତ୍‌ଇଲେ କି ?
1CO 1:21 ଇଶ୍ୱର୍ ତାନାଦ୍‌ ବେଡ଼ିୟଡ଼୍ ବୁଦ୍‍ତେ ଆଲ୍‌ସି ମାତ୍‌ତଣ୍ଡ୍ ଯେ ନାରୁଡ଼୍ ତାମ୍ ବୁଦ୍ ତଡ଼୍ ଇଶ୍ୱରତିଙ୍କ୍ ପୁନ୍ଦେପାର୍ୱଡ଼୍ । ମେଣ୍ଡେଅଣ୍ଡ୍‌‍ପାକା, ମାମ୍‍ମେ ପ୍ରଚାର୍ ମାଡ଼ାନାଦ୍ ଗଟ୍‍ତାଗ୍ ମାନ୍ଦାନ୍ ପିନ୍ଦ କାବୁର୍‌ତିଙ୍କ୍ ବିଶ୍ୱାସ୍ ମାଡ଼ାନ୍‌ ନାରୁଡ଼୍‌କିଙ୍ଗ୍ ଗେଲ୍‌ସ୍ପାନ୍‌ ମାଇଦିଙ୍କ୍ ଇଶ୍ୱର୍ ଆଲ୍‌ସି ମିନ୍ଦେଣ୍ଡ୍ ।
1CO 1:22 ଇହୁଦୀ ନାରୁଡ଼୍ ଚିଃନେ ମେହ୍‌କିତଡ଼୍, ଗ୍ରୀକ୍‍ ନାରୁଡ଼୍‌ ବୁଦ୍‍ତିଙ୍କ୍ ମେହ୍‌କିତଡ଼୍‌ ।
1CO 1:23 ମାତର୍ ମାମ୍‍ମେ କ୍ରୁଶତାଗ୍ ଡଲ୍‍ତେ କ୍ରିଷ୍ଟନାଦ୍‌ ଗଟ୍ କେତୁତମ୍ । ଇଦୁ ଇହୁଦୀ ନାରୁଡ଼୍‌କ୍‌ ମାଇଦିଙ୍କ୍‌ ତିପାଲ୍ ଲେକାମ୍ ନୁ ଅଣଇହୁଦୀ ନାରୁଡ଼୍ କଣ୍ଡେତାଗ୍ ପିନ୍ଦ ଆସ୍‌ମାନ୍‌ତା;
1CO 1:24 ମାତର୍ ଇହୁଦୀ ଆୟିଡ଼୍ ବା ଅଣଇହୁଦୀ ଆୟିଡ଼୍ ଏଞ୍ଚ୍‍ତେ ସାର୍ରେତଡ଼୍‌କ୍ ମାଇଦି କ୍ରିଷ୍ଟ ଆଦୁତନ୍ ଇଶ୍ୱର୍‌ତେ ଶକ୍ତି ନୁ ଜ୍ଞାନ୍‌ତେ ଅବିବ୍ୟକ୍ତି ।
1CO 1:25 ବାତେଙ୍କ୍ ଇତ୍‍କେ ବାତ୍ ଇଶ୍ୱରତାଦ୍ ମୁର୍କତା ଇଞ୍ଜ ଏର୍କେ ଆତ୍‍କେ, ଆଦ୍‌ ନାରୁଡ଼୍‌ ବୁଦ୍‍ତେ ନୁଞ୍ଚ୍‌ ନାର୍‍ଗେ ବେଡ଼ିୟଡ଼୍ । ମେଣ୍ଡେ ବାତା ଇଶ୍ୱରନାଦ୍‌ ଦୁର୍ବଲତା ଇଞ୍ଜ ଏର୍କେ ଆତ୍‍କେ, ଆଦ୍‌ ନାରୁଡ଼୍ ଲାୱୁ ନୁଞ୍ଚ୍‌ ନାର୍‍ଗେ ଲାୱୁ ।
1CO 1:26 ହୋ ଦାଦାଲଡି ନୁ ଏଲାସ୍କ୍, ଇଶ୍ୱର୍ କାର୍ଙ୍ଗାନ୍‌ ୱେଲା ମିଡ଼୍‌ ବେଲା ମାତ୍‍ତିଡ଼୍‌, ଆଦ୍‌ ଆଲ୍‌ସୁଡାଟ୍‌ । ବୁମ୍‌ତା ଇସାପ୍‌ତେ ମିୟାଗା ନୁଞ୍ଚ୍ ମାତର୍ ବେସ୍‌ୱୁଡ଼୍ ବୁଦିଡ଼୍, କ୍ଷମତାପନ୍‍ କି ବେଡ଼ିୟଡ଼୍ ଲୋତ୍‍ତେନଡ଼ି ମାତ୍‌ତିଡ଼୍‌ ।
1CO 1:27 ଇଶ୍ୱର୍ ବୁଦିଡ଼୍‌କ୍ ସିଗ୍‌ ମାଡ଼ାନଙ୍କ୍ ବୁମ୍‌ତା ନୁଞ୍ଚ୍ ବିବେଚିତ ମୁର୍କନାରୁଡ଼୍‌କିନ୍ ଏଞ୍ଚିମିନ୍ଦେଣ୍ଡ୍ ମେଣ୍ଡେ ଲାୱ୍‌ଦଡ଼୍‌କିନ୍‌ ସିଗ୍‌ ମାଡ଼ନ୍‌ ମାଇଦିଙ୍କ୍ ବୁମ୍‌ତା ନୁଞ୍ଚ୍ ବିବେଚିତ ଦୁର୍ବଲ ନାରୁଡ଼୍‌କ୍‌ ଏଞ୍ଚିମିନ୍ଦେଣ୍ଡ୍ ।
1CO 1:28 ବୁମ୍‍ତେ କଣ୍ଡ୍‍ତେ ବାତେସାର୍ରେ ମେଲ୍‍ତାୱୁ, ଆୱ୍‌ ସାର୍‍ରେ ମାଇସ୍‌ପାନ୍ ମାଇଦିଙ୍କ୍; ସୁଦୁଲଡ଼୍, ପାସ୍କ୍‍ତଡ଼୍ ନୁ ନଗନ୍ୟ ନାରୁଡ଼୍‍କ୍ ଅଣ୍ଡ୍‌‌ ଏଞ୍ଚିମିନ୍ଦେଣ୍ଡ୍ ।
1CO 1:29 ପରମେଶ୍ୱରତାଦ୍‌ ଇଲାମାଡ଼ାନାଦ୍‌ ବାତେଙ୍କ୍ ଇତ୍‍କେ ଯେ, ବେନ ବା ନାରୁଡ଼୍ ବେଲାକି ଅନା ମୁନ୍‍ନେ ଗାଇ କିଦ୍‍ପାର୍‍ୱଣ୍ଡ୍ ।
1CO 1:30 ଇତ୍‍କେ ଇଶ୍ୱର୍ ମିକିଂଙ୍କ୍ କ୍ରିଷ୍ଟ ଜିସୁନ୍‌ ତଡ଼୍ କାଲ୍‌ପି ମିନ୍ଦେଣ୍ଡ୍‌ ନୁ ଆଦ୍ କ୍ରିଷ୍ଟଙ୍କ୍ କେ ମାନ୍‍ ମାଇଦିଙ୍କ୍‌ ବୁଦ୍‍ତେ ଲେକାମ୍ ମାଡ଼ିମିନ୍ଦେଣ୍ଡ୍ । ଅନ୍‌ ତଡ଼୍ ଇଶ୍ୱର୍‌ତେ ତଡ଼୍ ମାୟାଦ୍‌ ସାୟେତ୍ ସମ୍ପର୍କ ତିୟାର୍ ଆତ୍‍ତେ, ମାନାଡ଼୍ ଦାର୍ମାମ୍‌ ନୁ ପବିତ୍ର ଜିୱାତେ ନାରୁଡ଼୍ ଆସ୍ ମୁକ୍ତି ପାଏମ୍ ଆତ୍‍ତାଡ଼୍ ।
1CO 1:31 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ଯଦି ବେନନାଦ୍ ଗର୍ବ ମାଡ଼ାନାଦ୍‌ ମିନ୍ଦେ । ପ୍ରବୁ ବାତ୍ ମାଡ଼ିମିନ୍ଦେଣ୍ଡ୍, ଆଦିନ୍ ସେଙ୍ଗେ ଅଣ୍ଡ୍‌ ଗର୍ବ ମାଡ଼ିଣ୍ଡ୍‌ ।”
1CO 2:1 ଦାଦାଲରି ନୁ ଏଲାସ୍କ୍‍, ନାନ୍ ମିୟାଗା ଇଶ୍ୱରନ୍‌ ସାୟେ କାବୁର୍ କେତାଙ୍କ୍ ମାଇଦିଙ୍କ୍ ଆଞ୍ଜମାନ୍ଦାନ୍‌ୱେଲେ ବାକ୍ୟନମ୍ବର ବା ପାଣ୍ଡିତ୍ୟ ତୱେ ମାତ୍‌ତାନ୍‌ ।
1CO 2:2 ମିଇ ସାଙ୍ଗ୍‌ ମାନ୍ଦାନ୍‌ୱେଲେ ମାତର୍ ଜିସୁ କ୍ରିଷ୍ଟ ନୁ କ୍ରୁଶତ୍ ପର୍‍ର ଅନ୍‌‍ୱାଦ୍ ଡଲ୍‍ନାଦ୍ ୱିଡ଼୍‍ସ୍‍କେ ମେଣ୍ଡେ ବାତା ବିଷୟ ବା ପୁନ୍ଦାନ୍‌ ମାଇଦିଙ୍କ୍‌ ଇଷ୍ଟାମ୍‌ ଇଲ୍‌ୱାମାତ୍‌ତା ।
1CO 2:3 ଆସୁଟ୍‌ ନାନ୍ ଲାୱୁ ଇଲ୍‌ୱା ମାତ୍‌ତାନ୍, ଆମ୍‌ତେ ୱେର୍‌ସ ମାତ୍‌ତାନ୍ ।
1CO 2:4 ନାୟାଦ୍‌ ଶିକ୍ଷା ନୁ କାବୁର୍, ନାରୁଡ଼୍‌ ବୁଦ୍‍ତେ ଗଟିନ୍‍ ଚାଲାକ୍‍ତେ ଆୟାୱା ମାତ୍‌ତା । ଆଦ୍‌ ଇଶ୍ୱରନ୍ ଆତ୍ମାତ୍‌ ଶାତ୍‍ୱାମ୍‍ତଡ଼୍ ନିଞ୍ଜାମ୍‌ ପ୍ରମାନ୍‌ ତଡ଼୍ ପ୍ରଚାର୍ ଆସ୍‌ମାତ୍‌ତା ।
1CO 2:5 ଆଦିନ୍‌ ମାଇଦିଙ୍କ୍‌ ମିୟାଦ୍‌ ବିଶ୍ୱାସ୍ ନାରୁଡ଼୍‌ ବୁଦ୍‍ତେ ପର୍ର ଆଦାରିତ୍‌ ଆୟ୍‍ୟ, ଆଦ୍‌ ଇଶ୍ୱରନ୍‌ ବପୁତେ ଆସ୍‍ମାତ୍‍ତା ।
1CO 2:6 ଇତ୍‍କେ ବାଡ଼େ ମାମ୍‍ମେ ବେଡ଼ିୟଡ଼୍ ନାରୁଡ଼୍‌ ନାଡ଼୍‌ମେ ବୁଦ୍‍ତାଦ୍‌ ଗଟ୍‌ କେତୁତମ୍, ବାତେଙ୍କ୍ ଇତ୍‍କେ ଆଦ୍‌ ଇଦ୍‌ ଜୁଗ୍‌ତାଦ୍‌ ବୁଦ୍ ଇଲ୍ଲା ବା ଇଦ୍‌ ଜୁଗ୍‌ତାଦ୍‌ ନଷ୍ଟାମ୍‌ ଆଦାନ୍ ନେତାନଡ଼ାଦ୍‌ ବୁଦ୍‍ ଇଲ୍ଲା,
1CO 2:7 ମାତର୍ ମାମ୍‍ମେ ବିଶ୍ୱାସ୍‌ତେ ଲେକାମ୍‌ ଇଶ୍ୱରତେ ବୁଦ୍‍ତାଦ୍‌ ଗଟି କେତୁତମ୍‌; ଆଦ୍‌ ବୁଦ୍‍ ନାରୁଡ଼ାଗାଙ୍କ୍ ମିସି ନେଃଏତଡ଼୍, ଇଶ୍ୱର୍ ମାନାକିନ୍‌ ଗୌରବ୍ ମାଇଦିଙ୍କ୍‌ ବୁମ୍ ତିୟାର୍‍ ଆତ୍‍ତେ ମୁନେଙ୍କ୍ ଏଞ୍ଚିମାତ୍‍ତଣ୍ଡ୍‌ ।
1CO 2:8 ଇ ଜୁଗ୍‌ତଡ଼୍‌ ନେତା ନାରୁଡ଼୍‌ ଲୋପେ ବେନ ଆଦ୍‌ ପୁନଣ୍ଡ୍‌, ବାତେଙ୍କ୍ଇତ୍କେ ଅଡ଼୍‌‌ ଆଦ୍ ପୁଞ୍ଜ୍‌ ମାତ୍‌କେ ଗୌରବମୟ ପ୍ରବୁଙ୍କ୍ କ୍ରୁଶତାଗ୍‌ ରେହ୍‌ୱେ ମାନେଡ଼୍‌;
1CO 2:9 ବେଲାକି ବାଇବଲ୍‍ତାଗ ଲେକ୍‍ତାଦ୍ ମିନ୍ଦେ, “ବାତା ବେନ ବେସୁଙ୍କ୍‍ ଉଡ଼୍‌ଇଲେଣ୍ଡ୍ ବା କେଞ୍ଜ୍‌ ଇଲେଣ୍ଡ୍, ବାତା ଗଟେମ୍‌ ଆଦାନାଦ୍ ବେନନ୍ ଆଲ୍‌ସଣ୍ଡ୍‌, ଅନ୍‌‌ ପ୍ରେମ୍‌ ମାଡ଼ାନ୍‌ ନାରୁଡ଼୍‌କ୍‌ ମାଇଦିଙ୍କ୍ ଇଶ୍ୱର୍ ଆୱ୍‌ ସାର୍‍ରେ ତିଆର୍ କିସ୍‌ମିନ୍ଦେଣ୍ଡ୍ ।”
1CO 2:10 ବାତେଙ୍କ୍ ଇତ୍‍କେ ଇଶ୍ୱର୍ ତାନ୍ ଆତ୍ମାତେ ତଡ଼୍ ଆଦ୍ ମିଞ୍ଜ୍‍ତାୱ୍ ବିଷୟ ମାକିଂଙ୍କ୍ କେସ୍‌ମିନ୍ଦେଣ୍ଡ୍ । ଆଦ୍‌ ପରମଆତ୍ମା କେ ଇଶ୍ୱରତାଦ୍ ଲୋପେତ୍ ଏର୍କାତିଙ୍କ୍ ମେଦ୍‌କି ମିନ୍ଦେଣ୍ଡ୍ ।
1CO 2:11 ନାରୁଡ଼୍‌ତାଦ୍‌ ସାର୍‍ରେକିଚି ଅରଟ୍‌ ତାମାଦ୍‌ ଲପାତ୍‌ ଆତ୍ମା ପୁନ୍‌ତା । ଆଲେନେ ମାତର୍‍ ଇଶ୍ୱରନ୍‌ ଆତ୍ମା ଇଶ୍ୱର୍‌ତେ ବିଷୟ୍‍ତେ ସାର୍‍ରେକିଚି ପୁନ୍‌ତା ।
1CO 2:12 ମାମ୍‍ମେ ବୁଦ୍‍ତାଦ୍‌ ଆତ୍ମାତ୍‌ ଦର୍କାକିୱମ୍‌ । ବାତେଙ୍କ୍ ଇତ୍‍କେ ଇଶ୍ୱର୍ ଇତ୍‌ତାଦ୍‌ ସାର୍‍ରେ ବିଷୟ ପୁନ୍ଦାନ୍‌ ମାଇଦିଙ୍କ୍ ଇଶ୍ୱର୍ ରହ୍‌ତାଦ୍‌ ଆତ୍ମା ଆସ୍‌ମିନ୍ଦେମ୍ ।
1CO 2:13 ଆଦିଙ୍କ୍ ଦାର୍ମାମ୍ ନାରୁଡ଼୍ ବକେତ୍ ନିଜାତାଦ୍ ଦାର୍ମାମ୍ କେତ୍‍ତାନ୍ ୱେଲେ ମାମ୍‍ମେ ବୁମ୍‍ତାୱୁ ବୁଦ୍ ଗଟି କେଲମ୍; ପବିତ୍ର ଆତ୍ମାତେ ଶିକ୍ଷା ଲେକାମ୍ ଆୱ୍‌ ସାର୍‍ରେ ନିଜାତାୱୁ କେତିତମ୍ ।
1CO 2:14 ବେନ୍‍ ନାରୁଡ଼୍ ମେଲ୍‍ତେ ଇସାପ୍‍ତେ ଇଲଣ୍ଡ୍‌, ଅଣ୍ଡ୍‌ ପରମେଶ୍ୱରତାଦ୍‌ ଆତ୍ମିକ ସାୟାତାୱ୍‌ ଆଦା ପାର୍‍ୱଣ୍ଡ୍ । ଅଣ୍ଡ୍‌ ଆତ୍ମାତ୍ ସାତ୍ ସାର୍‍ରେ ବୁଜେମ୍ ଆୟା ପାର୍ୱଣ୍ଡ୍‌ । ଆୱୁସାର୍ରେ ଅନ୍‌ ସେଙ୍ଗେ ପୁନ୍‍ୱାଦ୍; ବାତେଙ୍କ୍ ଇତ୍‍କେ ଆୱ୍‌ ସାର୍‍ରେ ଆଦ୍ୟାତ୍ମିକ ଇସାବ୍‌ତେ ବିଚାର୍‌ କିଦାନଙ୍କ୍‌ ଆତା ।
1CO 2:15 ବାତେଙ୍କ୍ ଇତ୍‍କେ ୱେରଣ୍ଡ୍‌ ଇଶ୍ୱର୍ ଆତ୍ମାମାନ୍ଦାନ୍ ନାରୁଣ୍ଡ୍‌ ସାର୍‍ରେ ବିଷୟ୍‍ତେ ନେଲ୍ଲା ବୁଜେମ୍ ଆଦ୍ ପାର୍ଦାତଣ୍ଡ୍; ମାତର୍ ଅଣ୍ଡ୍‌ ନିଜେ ମେଣ୍ଡେଆର୍‍ତୁନ୍‌ ତଡ଼୍ ବିଚାର୍‌ ଆଦ୍‍ଦା ପାର୍ୱଣ୍ଡ୍‌ ।
1CO 2:16 ଦର୍ମଶାସ୍ତ୍ରତାଗ୍ ଲେକା ମିନ୍ଦେ, “ବେନଣ୍ଡ୍ ଇଶ୍ୱର ଆଲ୍‍ସାନାଦ୍‌ ବୁଜେମ୍ ଆଦ୍‍ଦା ପାର୍ଦାତଣ୍ଡ୍ ? ବେନଣ୍ଡ୍ ଅଂକିଙ୍କ୍‌ କେତାପାର୍ଦ୍‍ତଣ୍ଡ୍‌ ?” ଆଦ୍‌ ବେଲାଆୟି, ମାମ୍‍ମେ କ୍ରିଷ୍ଟନ୍‌ ମାନ୍‍ଦିଙ୍କ୍ ଦର୍ସିକି ଆତ୍‍ତମ୍ ।
1CO 3:1 ଦାଦାଲଡ଼ି ନୁ ଏଲାସ୍କ୍, ଆଦ୍ୟାତ୍ମିକ ନାରୁଡ଼୍‌ ସାଙ୍ଗ୍ ଗଟି ତିରିଆନ୍‌‌ ଲେକେତ୍‍ ନାନ୍‌ ମିତଡ଼୍‌ ଗଟି ତିରିୟ୍‌ଇଲେନ୍ । ମାତର୍ ନାନ୍‌ ମିକିନ୍‌ ଇ ବୁମ୍‌ତା ନାରୁଡ଼୍ ନୁ କ୍ରିଷ୍ଟନ୍‌ ବିଶ୍ୱାସ୍‌ତାଗ୍ ପିଲା ଏର୍କା କିସ୍‌ ଗଟି କେତ୍‌ତାନ୍ ।
1CO 3:2 ମିକିଂଙ୍କ୍ ଅଲ୍‍ଗାତାଦ୍ କାଦି ଇୱକଟ ପାୟାଲ୍ ଉନ୍ଦାନଙ୍କ୍ ଇସ୍‍ମାତ୍‍ତାନ୍, ବାତେଙ୍କ୍ ଇତ୍‍କେ ମିଡ଼୍ ଆଦ୍ ତିନ୍ଦାନଙ୍କ୍ ପାର୍‍ୱେମାତ୍‌ତିଡ଼୍‌, ଇଞ୍ଜେ ଗାଲା ତିନ୍ଦାନଙ୍କ୍ ମାଡ଼୍‌ୱିର୍‌,
1CO 3:3 ଇଞ୍ଜେ ମିକା ମିଡ଼୍ ଜଗତ୍‍ତେ ନାରୁଡ଼୍ ଲେକାମ୍ ବାଦ୍‍କୁତିଡ଼୍ । ମିଇ ଲୋପେ କପାମ୍ ନୁ ମିଇ ଲୋପେ ଗଲ୍‍କ୍ ମିନ୍ଦେ; ଇଗାଙ୍କ୍ ବାତ୍ ମିଡ଼୍ ମେନ୍ଦୁଲ୍ ନୁ ଜଗତ୍‍ତଡ଼ି ଇଞ୍ଜ ପ୍ରାମାନ୍ ଆୟ୍‍ୱିଡ଼୍ ?
1CO 3:4 ବେଲାକି ବେସୁଙ୍କ୍‍ ୱେର୍‍ଣ୍ଡ୍ କେତୁତଣ୍ଡ୍, ନାନ୍ ଆପୋଲ୍ଲୋତନ୍, ମେଣ୍ଡେ ୱେର୍‍ଣ୍ଡ୍ କେତୁତଣ୍ଡ୍, ନାନ୍ ଆପଲ୍ଲତନ୍, ଆସୁଟ୍‌ ମିଡ଼୍‌ ବେଲା ମେନ୍ଦୁଲ୍‌ତେ ଇଲ୍‌ୱିଡ଼୍‌ କି ?
1CO 3:5 ଆପୋଲ୍ଲୋ ବେନଣ୍ଡ୍ ? ପାଉଲ୍‌ ମେଣ୍ଡେ ବେନଣ୍ଡ୍ ? ଅଡ଼୍‌‌ ତ ସେବକିଡ଼୍ । ମିକିଂଙ୍କ୍ ବିଶ୍ୱାସ୍ ମାଡ଼ାନ୍ ସେଙ୍ଗେ ମାମ୍‍ମେ ଆଦ୍ ପାଡ଼୍‍ୟି ମାଡ଼ୁତମ୍ । ଇଶ୍ୱର୍ ମାନ୍‍ ଲୋପେଙ୍କ୍ ସାର୍ରେତଡ଼୍‍କିଙ୍କ୍ ପାଡ଼୍‍ୟିତାଗ୍ ନିଯୁକ୍ତି ମାଡ଼୍‍ତମ୍, ମାମ୍‍ମେ ଆଦ୍ ପାଡ଼୍‍ୟି ମାଡ଼ୁତମ୍ ।
1CO 3:6 ନାନ୍ ଉର୍‍ସ୍କି ମିନ୍ଦେନ୍, ଆପୋଲ୍ଲୋ ଏର୍‌ ଇତ୍‌ତଣ୍ଡ୍, ବାତେଙ୍କ୍ ଇତ୍‍କେ ଇଶ୍ୱର୍ ପେଡ଼୍‌ସ୍‌ପି ମିନ୍ଦେଣ୍ଡ୍ ।
1CO 3:7 ଇତ୍‌କେ, ବେନ ଉର୍‍ସ୍କ୍‍ତଣ୍ଡ୍ ବା ଏର୍‌ ଇଦ୍‍ତଣ୍ଡ୍‌, ଅଣ୍ଡ୍‌ ବାତେଏ ବା ଇଲଣ୍ଡ୍‌ ମାତର୍ ପେଡ଼୍‌ସ୍‌ପାନଣ୍ଡ୍ ଇଶ୍ୱର୍, ଅଣ୍ଡ୍‌ ବାଡ଼୍‍ୟଣ୍ଡ୍ ।
1CO 3:8 ବେନଣ୍ଡ୍ ଉର୍‍ସ୍କ୍‍ତଣ୍ଡ୍ ନୁ ବେନଣ୍ଡ୍ ଏର୍‌ ଇଦ୍‍ତଣ୍ଡ୍ ଅଡ଼୍‌ ଇର୍‌ୱୁର୍‌ ୱେର୍‍ଟେ, ବାତେଙ୍କ୍‍ଇତ୍‍କେ ଇଶ୍ୱର୍ ସାର୍‍ରେ ନାରୁଡ଼୍ ତାମାଦ୍‌ ପାଡ଼୍‍ୟି ଇସାବତେ ପୁରସ୍କାର୍ ଇଦ୍‍ତଣ୍ଡ୍ ।
1CO 3:9 ବାତେଙ୍କ୍‍ଇତ୍‍କେ ମାମ୍‍ମେ ଇଶ୍ୱର୍‌ତେ ତଡ଼୍ ପାଡ଼୍‍ୟିମାଡ଼ାନମ୍; ମିଡ଼୍‌ ଇଶ୍ୱରନ୍‌ ୱାୟା ନୁ ଇଶ୍ୱରନ୍ ଲୋନ୍‌ ।
1CO 3:10 ନାକିନ୍‌ ଇତ୍‌ତାଦ୍‌ ଇଶ୍ୱରନ୍ ଅନୁଗ୍ରହ ଇସାବ୍‌ତେ ନାନ୍ ୱେରନ୍ ବୁଦ୍ଦ୍‌ତନ୍ ଲୋନ୍‌ ମାଡ଼ାନ୍ ଲେକାମ୍ ବିତ୍ତିମୁଲ ତିଆର୍‌ କିତ୍‍ତାନ୍‌, ମେଣ୍ଡେ ୱେରଣ୍ଡ୍ ତାନ୍‌ପର୍ର ମାଡ଼ିମିନ୍ଦେଣ୍ଡ୍ । ବାତେଙ୍କ୍ ଇତ୍‍କେ ସାର୍ରେତଡ଼୍‌ ତାନ୍‌ପର୍ର ମାଡ଼ିମିନ୍ଦେଡ଼୍, ଆଦିନ୍‌ ସେଙ୍ଗେ ଜତନ୍‌ତେ ମାନ୍ଦାନାଦ୍‌ ।
1CO 3:11 ବାତେଙ୍କ୍‍ଇତ୍‍କେ ଇଶ୍ୱର୍ ଜିସୁ କ୍ରିଷ୍ଟଙ୍କ୍ ତିଆର୍ ଆତ୍‌ତାଦ୍ ଦୁଡ଼ା ୱେରଟ୍ ଗଞ୍ଜ୍‌ ଇନା ନିଲ୍‍ସ୍ପ୍‍ତଣ୍ଡ୍ । ଅଂକିଙ୍କ୍‌ ୱିଡ଼୍‍ସ୍‍କେ ମେଣ୍ଡେ ବେନ୍ ଦୁଡ଼େ ତିୟାର୍ ଆଦେପାର୍‍ୱ ।
1CO 3:12 ଜିସୁ ନିଜେ ଇଦିନ୍ ଦୁଡ଼େ । ୱେର୍‍ଣ୍ଡ୍ ନାରୁଡ଼୍ ଆଦ୍ ମୁଲଦୁଆତ୍ ପର୍ର ସୁନା, ରୁପା, ନାର୍ଗେଦାମିନାୱ୍ କାଲ୍‌କ୍‌, ୱେର୍‌କି, ୱେଦୁର୍ ଇଲକ୍‌ ଗାଡ୍‌ଡୁ, ବାତା ବା ଆସ୍ ମାଡ଼ା ପାର୍ଦାତଡ଼୍‌ ।
1CO 3:13 ବାତେଙ୍କ୍ ଇତ୍‍କେ କ୍ରିଷ୍ଟ ମେଣ୍ଡଅନ୍‌‍ଦାମ୍ ୱାଦାନ୍ ୱେଲେ ସାର୍ରେତଡ଼ାଦ୍ ପାଡ଼୍‍ୟି ପରିକ୍ଷା ମାଡ଼ିତନ୍ । କିସ୍‌ତେ ଲେକେତ୍‍ ଆଦ୍‌ ଦିନାମ୍ ୱାଦ୍‍ତା, ନୁ ଆଦ୍‌ କିସ୍ ସାର୍‍ରେ ନାରୁଡ଼୍ କାମ୍‌ତିନ୍ ପରିକ୍ଷା ମାଡ଼ିତା ଦାମ୍ ଇଦ୍‍ତେ ।
1CO 3:14 ଯଦି ଆଦ୍ ଦୁଡ଼େତ୍‌ ପର୍ର ମାଡ଼୍‌ତା ନାରୁନ୍ ଲୋନ୍‌ ନିସ୍‌ ମାନ୍‌ତା । ଆଲେ ଇତ୍‌କେ ଅଣ୍ଡ୍‌ ତାନ୍‌ ପୁରସ୍କାର୍ ଆତ୍‍ତଣ୍ଡ୍ ।
1CO 3:15 ବେନନାଦ୍ ପାଡ଼ିୟ୍ ଦଂସ ଆଦ୍‍ତେ, ଅଣ୍ଡ୍‌ ଆଗାଙ୍କ୍ ଗେଲ୍‍ସିତଣ୍ଡ୍, ବାତେଙ୍କ୍ ଇତ୍‍କେ ପରିକ୍ଷା ତାଗାଙ୍କ୍ ଉଦାର୍ ପାଏମ୍ ଆତ୍‍ତେ ନାରୁଡ଼୍ ଲେକାମ୍ ଅଣ୍ଡ୍‌ ନିଜେ ଗେଲ୍‍ସିତଣ୍ଡ୍ ।
1CO 3:16 ମିଡ଼୍‌ ପୁନ୍ଦାନ୍ ୱାଇତିତା ଯେ, ମିଡ଼୍‌ ପର୍‌ମେଶ୍ୱରନ୍‌ ଗୁଡ଼ିୟ୍‌, ମେଣ୍ଡେ ପରମେଶ୍ୱରନ୍‌ ଆତ୍ମା ମିୟାଦ୍ ଜିୱୁଣ୍ଡ୍‍ତାଗ୍ ମାନ୍‌ତା ।
1CO 3:17 ଯଦି ବେନ୍‌ନାରୁନ୍‌ ପରମେଶ୍ୱରନ୍‌ ଗୁଡ଼ିୟଦିନ୍‌ ନଷ୍ଟାମ୍‌ ମାଡ଼ାତଣ୍ଡ୍, ଆଲାଇତ୍‌କେ ପରମେଶ୍ୱର୍ ଅଂକିଙ୍କ୍‌ ନାଷ୍ଟାମ୍‌ ମାଡ଼ିତନ୍ । ପରମେଶ୍ୱରନ୍‌ ଗୁଡ଼ିୟ୍‌ ଆଦୁତେ ପବିତ୍ର । ଆଦ୍‌ ପବିତ୍ର ଗୁଡ଼ିୟ୍‌ ମିଡ଼୍ ।
1CO 3:18 ମିଡ଼୍‌ ନିଜେ ବୁସା ମାଡ଼୍‌ମାଟ୍‌, ଯଦି ବେନ୍‍ ନାରୁନ୍‌ ଆଲ୍‌ସିତଣ୍ଡ୍‌ ଯେ, ଅଣ୍ଡ୍‌ ଇଦ୍‌ ଜୁଗ୍‌ ଇସାବ୍‌ତେ ଜ୍ଞାନ୍‌ତନ୍‌ ଇଞ୍ଜ, ଆଲାଇତ୍‌କେ ଅଂକିଙ୍କ୍‌ ମୁର୍କ ଆଦୁୱାଇତିତ୍‌,
1CO 3:19 ବାତାଙ୍କ୍ ଇତ୍କେ ପରମେଶ୍ୱରନ୍‌ କଣ୍ଡେତେ ବୁଦ୍‍ତାଦ୍‌ ଜ୍ଞାନ୍‌ ନିଜାମ୍‌ ମୁର୍କତ୍‌ ଲେକେତ୍‍ । ଦର୍ମଶାସ୍ତ୍ର କେତିତ୍‌; “ବେସୁଙ୍କ୍‍ କି ଜ୍ଞାନିନାରୁଡ଼୍ ତାମ୍‌ ଚାଲାକ୍‌କେ ମାନ୍‌ତଡ଼୍‌, ପରମେଶ୍ୱର୍ ଆସୁଙ୍କ୍ ଅଡ଼୍‌‌କିଂଙ୍କ୍‌ ପଇତିତଣ୍ଡ୍‍ ।”
1CO 3:20 ଶାସ୍ତ୍ରତାଗ୍‌ ଇଦ୍‌ ମେଣ୍ଡେ ଲେକାମିନ୍ଦେ, “ପ୍ରବୁ ଜ୍ଞାନିନାରୁଡ଼୍‌ ଆଲ୍‌ସାନାଦ୍‌ ପୁନ୍‍ତଣ୍ଡ୍ । ଅଡ଼ାଦ୍‌‌ ସାର୍‍ରେ ଏଡ଼୍‌କାମାଡ଼ାନାଦ୍‌ ଯେ ବେକାର୍‍ ଆଦ୍‌ମେଣ୍ଡେ ଅଣ୍ଡ୍‌ ପୁନ୍‌ତଣ୍ଡ୍ ।”
1CO 3:21 ଆଦିନ୍‌ମାଇଦିଙ୍କ୍‌ ନାରୁଡ଼୍‌ ମାଡ଼୍‍ତେ ବିଷୟତାଗ୍ ବେନ ଗର୍ବ ମାଡ଼ାନାଦ୍‌ ଇଲ୍‌ଲେ । ନିଜାମ୍ ସାର୍‍ରେ ବିଷୟ ମିୟାଦେ ।
1CO 3:22 ପାଉଲ୍‌, ପିତର୍‌ ନୁ ଆପୋଲ୍ଲୋ ଇଦ୍ ବୁମ୍, ଜିୱୁ ବା ଡଲ୍‍ନାଦ୍; ଇଞ୍ଜେ ବା ୱାଦାନାଦ୍ ସାର୍‍ରେ ମିୟାଦେ ।
1CO 3:23 ବାତେଙ୍କ୍ ଇତ୍‍କେ ମିଡ଼୍‌ କ୍ରିଷ୍ଟନ୍‍ତଡ଼୍ ନୁ କ୍ରିଷ୍ଟ ପରମେଶ୍ୱରତଣ୍ଡ୍ ।
1CO 4:1 ମା ବିଷୟ୍‍ତେ ନାରୁଡ଼୍‌ ଆଲ୍‌ସାନ୍‌ ୱେଇତିତ୍‍ ଯେ, ମାନାଲ୍‌ କ୍ରିଷ୍ଟନ୍‌ ଦାସ । ପରମେଶ୍ୱର୍ ତାନ୍ ମିଞ୍ଜ୍‍ତାଦ୍‌ ସତ୍‌ସାର୍ରେ ମାୟାଗ୍‌ ଆଶେ ୱାଟି କେସ୍‌ ମିନ୍ଦେଣ୍ଡ୍ ।
1CO 4:2 ବେନ୍ ନାରୁଡ଼୍‌କିନ୍‌ ଇଦ୍‌ ଦାୟୀତ୍ୱ ଇସ୍‌ମିନ୍ଦେଡ଼୍‌ ଅଡ଼୍‌‌ ବେଲାକି ଇଦିନାଦ୍‌ ଯଗ୍ୟ ଆଦାପାର୍ଦାତଡ଼୍ ।
1CO 4:3 ମିଡ଼୍‌ ଯଦି ନାୟାଦ୍‌ ବିଚାର୍‌ କିତ୍‍ତିଡ଼୍ ଇଲକ୍‌ ବେନ୍‍ ବା ଅଦାଲତ୍, ଯଦି ନାୟାଦ୍‌ ବିଚାର୍ ମାଡ଼ିତେ, ଆଲାଇତ୍‌କେ ନାନ୍ ବେନନ୍‌ବା ଏଡ଼୍‌କା ମାଡ଼ନ୍ । ବେଲାକି ନାନ୍‌ ନାୟାଦ୍‌ ବିଚାର୍‌ ମେଣ୍ଡେ ମାଡ଼ଣ୍ଡ୍ ।
1CO 4:4 ନା ବିରୁଦ୍‍ତେ ବାତେବା ବିଷୟ୍ ମାନ୍ଦାନ୍ ଗଟ୍ ନାନ୍‌ ପୁନନ୍ । ନିଜାମ୍ ଇଦିନାଦ୍ ଇତ୍‍କେ ଆୟ୍‍ୟ ଯେ ନାନ୍ ସାରେ ନିର୍ଦୋଷ୍ । ବାତେଙ୍କ୍ ଇତ୍‍କେ ପ୍ରବୁ ନିଜେ ନାୟାଦ୍ ବିଚାର୍ କର୍ତାଲ୍ ।
1CO 4:5 ସାୟେ ଦିନାମ୍ ୱାଦ୍‌ଇଲ୍‌ୱା ଆସୁଙ୍କ୍ ଇତ୍‌କେ ନେଲା ୱାଦାନ୍ ଆସୁଙ୍କ୍‌ ଆନା, ବାତା ବା ଗଟିନ୍‌ ବିଚାର୍‌ କିୟାନାଦ୍‌ ଆୟ୍‌ । ପ୍ରବୁ ବିଚାର୍ ମାଡ଼ାନଙ୍କ୍ ୱାଦାନ୍ ଯାକ କେପାଟ୍ । ଅଣ୍ଡ୍‌‌ ଇକାଡ଼୍‌ତେ ମାନ୍ଦାନାୱ୍‌ ବିଷୟ୍ ସାର୍‍ରେ ନାରୁଡ଼୍‌ ମୁନ୍‍ନେ ତାତ୍‍ତଣ୍ଡ୍ । ଅଣ୍ଡ୍‌‌ ନାରୁଡ଼୍‌ ଗୁଣ୍ଡେତେ ଲପା ମିଞ୍ଜ୍‍ତାୱ୍ ସାର୍‍ରେ ପେସ୍‌ପାତଣ୍ଡ୍ । ଆସୁଙ୍କ୍‌ ପରମେଶ୍ୱର୍ ସାର୍ରେତଡ଼୍‌କିଙ୍କ୍‌ ବେନାଦ୍‌ ବାତା ଦର୍କିତ୍‌ ଆଦ୍‌ ଇଦ୍‍ତଣ୍ଡ୍ ।
1CO 4:6 ଦାଦାଲଡ଼ି ନୁ ଏଲାସ୍କ୍‍, ମିୟାଦ୍‌ ସାୟେତ୍‌ ମାଇଦିଙ୍କ୍‌ ନାନ୍‌ ଆପୋଲ୍ଲୋ ନୁ ନାୟାଦ୍‌ ବିସୟତେ ଇୱୁ ସାର୍‍ରେ ମାଟା କେତ୍‌ତାନ୍‌ । ମାକ୍‌ ଇଡ଼୍‌ୱୁକିଙ୍ଗ୍‌ ୱେଷଡ଼୍ ଲେକାମ୍ ଏର୍କା ମାଡ଼ି ମିଡ଼୍ କାର୍‍ତେ ୱାଇତିତ୍ ଯେ, ଶାସ୍ତ୍ରତାଗ୍ ବାତା ଲେକ୍‍ତାଦ୍ ମିନ୍ଦେ, ଆଦିନ୍‌ ଲେକେତ୍‍ ଆଦାନାଦ୍‌ ନିୟମ୍ ଇଲ୍‌ଲେ । ମିଇ ଲୋପେଙ୍କ୍ ବେନଙ୍କ୍ ଆସ୍ ବା ଆଶେ ମାଡ଼୍‌ମାଟ୍, ମେଣ୍ଡେ ବେନଙ୍କ୍ କେପ୍‌ମାଟ୍ ।
1CO 4:7 ଅର୍ତୁନୁଞ୍ଚ୍‌ ନିକିଂଙ୍କ୍ ବେନ ଲେକେତ୍ ମାଡ଼ତଣ୍ଡ୍ ? ମିୟାଦ୍‌ ସାର୍‍ରେ ବାତେଏ ଇଶ୍ୱରନ୍‌ ଦାନାମ୍ ଆୟ୍‍ୟ କି ? ଇତ୍‍କେ ଆଦ୍‌ ଯଦି ମିକିଂଙ୍କ୍ ଦାନାମ୍ ଲେକେତ୍‍ ଦର୍‌କ୍ତା, ଆଲା ଇତ୍‌କେ ବାତାଙ୍କ୍ ମିଡ଼୍ ଦାନାମ୍ ଦର୍କିଲ୍ଲା ଲେକାମ୍ ଗର୍ବ ମାଡ଼ୁତିଡ଼୍ ?
1CO 4:8 ମିକିଂଙ୍କ୍ ଦର୍‍କାର୍ ସାର୍‍ରେ ଜିନିଷ୍ ପାଏମ୍ ଆଦ୍‍ତିଡ଼୍ କି ? ମିଡ଼୍ ବାତା ସାଉକାର୍ ଆତ୍‌ତିଡ଼୍ କି ? ମିଡ଼୍ ବାତା ରାଜା ଆଦ୍‌ତିଡ଼ି ? ଯଦି ମାମ୍‍ମେ ଆୟକ୍ ଗାଲା । ନିଜାମ୍, ମିଡ଼୍ ରାଜା ଆୟେଡ଼ି କି ? ଆଲାଇତ୍‍କେ, ମାମ୍‍ମେ ମିୟାଦ୍ ଆଦ୍ ରାଜ୍‍ପଦ୍‍ତାଗ୍ ପାଲ୍‍କ୍ ଆୟେମ୍ ।
1CO 4:9 ନିଜାମ୍ ନାକିଂଙ୍କ୍ ଏର୍କା ମିନ୍ଦେ, ମାନ୍‍ ଲେକାମ୍ ପ୍ରେରିତ୍ ଶିଷ୍ୟଡ଼୍‍କ୍ ଇଶ୍ୱର୍ ସାର୍ରେତଡ଼୍ ପେର୍‍କେ ନେଃଏତଣ୍ଡ୍ । ତଅନ୍‌ଦାନ୍ ଲେକାମ୍ ଡଲିମାଞ୍ଜ୍ ସାର୍‍ରେ ବୁମ୍‍ତେ ନାରୁଡ଼୍ ନୁ ଦେୟାମ୍‍ ଦୂତଡ଼୍ ଗାର୍ରେ ପାସ୍କ୍‍ତେ ନାରୁଡ଼୍ ଇନା ମାକିଂଙ୍କ୍ ଅଣ୍ଡ୍‌ ପୟସ୍‍ମିନ୍ଦେଣ୍ଡ୍ ।
1CO 4:10 କ୍ରିଷ୍ଟନ୍‌ ମାଇଦିଙ୍କ୍‌ ମାନାଡ଼୍ ମୁର୍କ ଇଞ୍ଜ ପୁତ୍‍ତଡ଼୍ । ବାତେଙ୍କ୍ ଇତ୍‍କେ ମିଡ଼୍ କ୍ରିଷ୍ଟନ୍ ତଡ଼୍ କାୟ୍‍ଲ୍‍ତାଙ୍କ୍ ମିଡ଼୍ ଜ୍ଞାନି । ମାମ୍ ଲାୱୁ ଇଲ୍‌ୱାନମ୍‌; ମାତି ମିଡ଼୍ ଲାୱ୍‌ଦନର୍‌ । ମିଡ଼୍ ସମ୍ମାନ୍ ଦର୍‍କ୍‍ତେନଡ଼୍‌, ମାତି ମାମ୍‍ମେ ଅନାଦ୍‌‌ ଇନତେ ନାରୁମ୍ ।
1CO 4:11 ଇଞ୍ଜେ ଅନ୍‌‍ପାକେ ମାମ୍ କାର୍ର୍‌ୱିନମ୍‌ ନୁ ଉନ୍ଦ୍‌ ୱାତ୍‌ତେନମ୍‌, ଇଙ୍କ୍‍ତେ ସିଲେ କେର୍‍ତମ୍ ନୁ ଦେବ୍‌ବା ତିଞ୍ଜ୍‌ ମାନ୍ଦାନମ୍ ନୁ ପଡ୍‌ୟା ଇଲ୍‌ୱେନମ୍ ।
1CO 4:12 ଗାଟି ପାଡ଼୍‍ୟି ମାଡ଼ି ମାମ୍‍ମେ ୱାସିଆଦୁତମ୍ । ବେନ ମାକିଂଙ୍କ୍ ଅବିଶାପ୍‌ ଇତ୍‍କେ, ମାମ୍‍ମେ ଅଡ଼୍‌‍କିଂଙ୍କ୍ ଆର୍ଶିବାଦ୍ ମାଡ଼ିତମ୍ । ନିନ୍ଦ୍ ଆତ୍‍କେବା, ମାମ୍‍ମେ ସହେମ୍ ଆଦ୍‍ତମ୍ ।
1CO 4:13 ଅପ୍‌ୱାଦ୍‌ ଆସ୍‌ ବାରେ କାଲ୍‌ୟାନାଦ୍‌ ଗଟ୍‌ କେସ୍‌ ମିନ୍ଦେମ୍‌ । ଇଞ୍ଜେ ଅନ୍‌‍ପାକେ ବା ମାମ୍‍ମେ ବୁମ୍‌ତାଗା ତଗୁ ଇନା ଆସ୍ ମିନ୍ଦେମ୍; ସାର୍ରେତଡ଼୍ ମାକିଂଙ୍କ୍ ପାସ୍‍କ୍‍ତଡ଼୍ ।
1CO 4:14 ନାନେ ନିକିଙ୍କ୍‌ ସିଗ୍‌ ଇଦାନ୍‌ ମାଇଦିଙ୍କ୍‌ ଇୱୁ ସାର୍‍ରେ ଗଟି ଲେକ୍‌କିଲେନ୍‌ ପ୍ରେମତେ ପିଲ୍ଲା ଇଞ୍ଜ୍‌ ଆଲ୍‌ସି ଏର୍କା ଇଦାନ୍ ମାଇଦିଙ୍କ୍ ଇଞ୍ଜ ସାର୍‍ରେ ଲେକ୍‌କିମିନ୍ଦେନ୍‌ ।
1CO 4:15 କ୍ରିଷ୍ଟିୟାନ୍ ଜିୱୁଣ୍ଡ୍‍ତାଗ୍ ମିକିଂଙ୍କ୍ ନାର୍‍ଗେ ଦର୍ମଗୁରୁ ମାନ୍‍ତଡ଼୍ । ଇତ୍‍କେ ମିଇ ବାବାଲ୍ ୱେରଣ୍ଡ୍ । ମିଇ ଗାର୍ରେ ନେଲା କାବୁର୍ ପ୍ରଚାର୍ ମାଡ଼୍‍କେ କ୍ରିଷ୍ଟିୟାନ୍ ଜିୱୁଣ୍ଡ୍‍ତାଗ୍ ନାନ୍ ମିଇ ବାବାନ୍ ଲେକେ ।
1CO 4:16 ଆଦିଙ୍କ୍, ନାୟାଦ୍ ଆଦର୍ଶ୍ ପେର୍‍କେ ମାଡ଼ାନଙ୍କ୍ ନାନ୍‌ ମିକିଙ୍କ୍‌ ଅନୁରଦ୍‌‌ ମାଡ଼ମିନ୍ଦେନ୍ ।
1CO 4:17 ଇଦିନ୍‌ ମାଇଦିଙ୍କ୍‌ ନାନ୍ ମିଇ ଗାର୍ରେ ତିମତିଙ୍କ୍‌ ରଅତାନ୍, ଅଣ୍ଡ୍‌ ଦେଉଡ଼୍‌ତାଗ୍ ନାୟାଗ୍‌ ପ୍ରେମ୍‌ତେ ନୁ ବିଶ୍ୱାସ୍‌ତେ ମାର୍‍ ! ବେଲାକି ନାନ୍‌ ସାର୍‍ରେ ଗୁଡ଼ିୟ୍‌ ନାଗ୍‌ ଶିକ୍ଷା ଇଦୁତାନ୍‌, ଆଲେକେ, ଅଣ୍ଡ୍‌‌ ନିକିଂଙ୍କ୍ ନାୟାଗ୍‌ କ୍ରିଷ୍ଟିଅନ୍‌‌ ଆଚରନ୍‌ ଆର୍ର୍ ଏଡ଼୍‌କା ମାଡ଼ିତନ୍ ।
1CO 4:18 ନାନ୍ ମିଇ ଗାର୍ରେ ୱାଡ଼େନ୍‌ ଇଞ୍ଜ ଏର୍କା ମାଡ଼ି ବେନ ଗର୍ବ ମାଡ଼୍‌ତଡ଼୍ ।
1CO 4:19 ଇଶ୍ୱର୍ ଇଚ୍ଛା ମାଡ଼୍‍କେ, ନାନ୍ ସିଟ୍‍ପାଟ୍ ମିଇ ଗାର୍ରେ ଆଦ୍‍ତାନ୍ । ଆସୁଟେ ଇଡ଼୍ ଗର୍ବି ନାରୁଡ଼ାଦ୍ ଗଟି ମାତର୍ କେଞ୍ଜନ୍ ନିଜାମ୍ ଅଡ଼ାଦ୍‌ ବେସର୍ ଶାତ୍‍ୱାମ୍‍ ମିନ୍ଦେ, ଆଦ୍ ନାନ୍ ଉଡ଼ିତାନ୍ ।
1CO 4:20 ବାତେଙ୍କ୍ ଇତ୍‍କେ ଇଶ୍ୱରତେ ରାଜ୍ୟ ବାକ୍ୟତେ ଆୟ୍‍ୟ । ମାତି ଲାୱ୍‌ଦେ ତଅନ୍‌ଦାନ୍ ବିଷୟ୍ ।
1CO 4:21 ମିଡ଼୍ ବାତ୍ ଚାଏମ୍ ଆଦୁତିଡ଼୍ ? ନାନ୍ ବାତ୍ ମିକିଂଙ୍କ୍ ଶାସନ୍‍ ମାଡ଼ାନ୍ ମାୟ୍‍ଦିଙ୍କ୍ କଅଡ଼ା ପୟ୍‍ସ୍ ୱାଦ୍‍ତାନ୍ ? କି, ପ୍ରେମ ନୁ ଲେକାମ୍ ମାନ୍‍ ଆସ୍ ୱାଦ୍‍ତାନ୍ ?
1CO 5:1 ନିଜାମେ କେଞ୍ଜମିନ୍ଦେମ୍ ଯେ, ମିଇ ଲପେ ବ୍ୟବିଚାର୍ ମିନ୍ଦେ, ଇଦ୍‌ଲେକାତ୍ ବ୍ୟବିଚାର୍, ବାତାକି ୱେର୍‌ ଜାତିନଡ଼୍‌ ଲୋପେ ବା ତଅନ୍‌ଦ, ଇଦ୍‌ଲେକେମ୍‌ କି ୱେରନ୍ ତାମ୍ ବାବାନ୍ ପାୟେତ୍ ମୁତେଙ୍କ୍ ନେଃଏସ୍ ମିନ୍‌ନ୍ଦେନ୍ ।
1CO 5:2 ମେଣ୍ଡେ, ବେନ ଇଦ୍ ପାଡିୟ୍‌ ମାଡ଼ମିନ୍ଦେନ୍, ଅଣ୍ଡ୍‌ ବେଲାକି ମିଇ ଲୋପେଙ୍କ୍‌ ନୁଞ୍ଚ୍ ଦୁରାମ୍‌ ମାଡ଼୍‍ତର୍‌, ଇଦିନ୍ ମାଇଦିଙ୍କ୍‌ ଆଲ୍‌ସକଟ୍‌ ଅୟ୍‌ୱେ ବେଲାନ୍ କି ଗର୍ବ ମାଡ଼ମିନ୍ଦେଡ଼ି ?
1CO 5:3 ବାତେଙ୍କ୍ ଇତ୍‍କେ ନାନେ ମେନ୍ଦୁଲ୍‌ତେ କାଇଲକେ ବା ଆତ୍ମାତେ କାଇଲି ମାଞ୍ଜ୍, ବେନଣ୍ଡ୍ ଇଦିନ୍‌ ଲେକାମ୍ ପାଡିୟ୍‌ ମାଡ଼ିମିନ୍ଦେନ୍, କାଇଲି ମାନ୍ଦାନ୍ ଲେକେମ୍ ନାନ୍ ଅନାଦ୍‌ ବିଚାର୍ କିସ୍‌ ତେର୍‌ସ୍ପି ମିନ୍ଦେନ୍,
1CO 5:4 ମିଡ଼୍‌ ନୁ ନାୟାଦ୍‌ ଆତ୍ମା ମାନାଦ୍‌ ପ୍ରବୁ ଜିସୁନ୍ ପେଦେର୍‍ତେ ଅଣ୍ଡୟାଗେ ଆଦାନ୍ ୱେଲେ, ଶକ୍ତିତଡ଼୍‌ ଇଦ୍‌ ସ୍ଥିର୍‌ ମାଡ଼ମିନ୍ଦେନ୍ ଯେ,
1CO 5:5 ଇଦ୍ ଲେକେତ୍‍ ନାରୁଙ୍କ୍ ମେନ୍ଦୁଲ୍‌ତାଦ୍ ନାଷ୍ଟାମ୍‌ତ ମାଇଦିଙ୍କ୍ ଶୟ୍‍ତାନ୍‍ତେ କାଇଦେ ୱିସଡ୍‌ସିନାଦ୍ ମିନ୍ଦେ, ବେଲାକି ପ୍ରବୁ ଜିସୁନ୍ ଦିନାମ୍‌ତେ ଅନାଦ୍‌ ଆତ୍ମା ଗେଲ୍‌ସେ ପାର୍ଦିତ୍‌ ।
1CO 5:6 ମିୟାଦ୍‌ ଇଦ୍‌ଲେକେତ୍‌ ଗର୍ବ ମାଡ଼ାନାଦ୍‌ ସାୟେ ଇଲ୍‌ଲେ । ମିଡ଼୍ କି ପୁନିର୍‌ ଯେ ସୁଡୁଟ୍‌ ଇଞ୍ଜ କମିର୍‌ ସାର୍‍ରେ ମଇଦା ପିଣ୍ଡୁଲାତିଙ୍କ୍‌ କମିରମୟ ମାଡ଼ିତା ?
1CO 5:7 ମିଡ଼୍ ତ କମିର ଇଲ୍‌ୱା ନାରୁଡ଼୍‌, ବେଲାକି ମିଡ଼୍ ପୁନାଦ୍ ପେଣ୍ଡୁଲ୍ ଆଦ୍‍ଦେ ପାର୍ଦାତିଡ଼୍‌, ଆଦିଙ୍କ୍‌ ମାଇଦିଙ୍କ୍‌ ପାନ୍‌ତାଦ୍‌ କମିର ବାଇଦେ ପେସ୍‌ପିମୁଟ୍‌, ବାତାଙ୍କ୍‌ ଇତ୍‌କେ ମାୟାଦ୍‌ ନିସ୍ତାର୍‌ ପାଣ୍ଡୁମ୍‌ତାଦ୍‌ ତିଆର୍ ତେର୍‍ତେ । ମାନ୍‍ ସେଙ୍ଗେ କ୍ରିଷ୍ଟ, ମେଣ୍ଢା ପିଲା ଲେକାମ୍ ବଲିକୃତ ଆତ୍‍ତଣ୍ଡ୍ ।
1CO 5:8 ଅତଏବ ୱାରାଟ୍‌, ମାନାଲ୍ ପାନ୍‌ତାଦ୍‌ କମିର ବା କାରାପ୍‌ ନୁ ପିନ୍ଦ୍‌ୱାଦ୍ ପାଡିୟ୍‌ ଲେକେତ୍‍ କମିରତେ ପାଣ୍ଡୁମ୍ କିୱାକଟେ ସରଲତା ନୁ ନିଜାମ୍‌ ଲେକେତ୍‍ କମିର ଇଲ୍‌ୱା ରୂଟିତେ ପାଣ୍ଡୁମ୍‌ ମାଡ଼ିକାଲ୍ ।
1CO 5:9 ବ୍ୟବିଚାରି ତଡ଼୍‌ କାଇଲ୍‌ମାଟ୍ ଇଞ୍ଜ ନାନ୍‌ ମିକିଙ୍କ୍‍ ନା ଚିଟି‌ ଲେକି ମାତ୍‌ତାନ୍‌ ।
1CO 5:10 ଇ ବୁମ୍‌ତର୍‌ ବ୍ୟବିଚାରି କି ଦନ୍‍ଲୋଭିଡ଼୍ କି ଡଙ୍ଗାଲଡ଼୍ ନୁ ପୁତ୍‍ଲାମ୍‌ ପୁଜା ମାଡ଼ାନର୍‌ ତଡ଼୍ ଇଚୁର୍‌ ବା କାଇଲ୍‍ମାଟ୍ । ଆଲେଆତ୍‍କେ, ମିକିଂଙ୍କ୍ ଜଗତ୍‍ତାଗାଙ୍କ୍ ଅଣ୍ଡୟ୍‌‍ଦାମ୍ ପେୟିସ୍ ଆଦେୱେୟ୍‍ତିତ୍ ।
1CO 5:11 ବାତେଙ୍କ୍ ଇତ୍‍କେ ନାୟାଦ୍‌ ଲେକାନାଦ୍‌ ନୁ ଆଲ୍‌ସାନାଦ୍‌ ଇଲା ମାତ୍‍ତେ ଯେ, ଯଦି ବେନଆଇ ନାରୁଣ୍ଡ୍‌ ତାମୁଣ୍ଡ୍‌ ଇଞ୍ଜ୍‌ ପୁଞ୍ଜ୍ ବ୍ୟବିଚାର୍‌ କି ସାୱ୍‌କାର୍‌ ଆଦାନଙ୍କ୍ କି ମାତ୍‍ୱାରିଡ଼୍‍ କି ପୁତ୍‍ଲାମ୍‌ ପୂଜା ମାଡ଼ାନର୍‌ କି ପେର୍‌ଲାନର୍‌ ମାତ୍‍ୱାରି କି ଅର୍‌ତୁନାଦ୍‌ ଜିନିଷ୍ ଡଙ୍ଗାଲ୍ ମାଡ଼ାନଣ୍ଡ୍‌ ଆତଣ୍ଡ୍‌ ଇତ୍‌କେ ଇସତ୍ ନାରୁଡ଼୍‌ ତଡ଼୍ କାଇଲ୍‌ମାଟ୍‌, ବେଲା ଅଣ୍ଡ୍‌‌ ତଡ଼୍‌ ଦଡା ବା ତିନ୍‌ମାଟ୍‌ ।
1CO 5:12 ବାୟ୍‍ଦେତ୍ ନାରୁଡ଼ାଦ୍ ବିଚାର୍ ମାଡ଼ାନ୍ ମାୟ୍‍ଦିଙ୍କ୍ ନାନ୍ ବେନ ? ଇତ୍‍କେ ମାନ୍‍ ମଣ୍ଡଲିତେ ଲୋପେ ମାନ୍ଦାନ୍ ନାରୁଡ଼୍‍କିଂଙ୍କ୍ ବିଚାର୍ ମାଡ଼ାନାଦ୍ ଦାୟିତ୍‌ ବାତ୍ ମାନାଦ୍‍ ଇଲ୍‍ଲେ ?
1CO 5:13 ଇଶ୍ୱର୍ ଅଡ଼ାଦ୍‌ ବିଚାର୍ ମାଡ଼ିତନ୍, ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦା କାରାପ୍ ନାରୁଡ଼୍‍କିଂଙ୍କ୍ ପେସ୍ପିମୁଟ୍ ।
1CO 6:1 ମିଇ ଲୋପେ ବେନଡ଼୍ ୱେରତର୍ ପର୍‌ର କପାମ୍ ମାଡ଼ ମାତ୍‌କେ ଉନ୍‌ କି ବିଚାର୍‌ ମାଇଦିଙ୍କ୍ ପବିତ୍ର ସାଦୁନାରୁଡ଼୍‌ ଗାର୍‌ରେ ଆନକଟ ଅଦାର୍ମିକ୍ ନାରୁଡ୍‌ ଗାର୍‌ରେ ଆନ୍‌ଦାନଙ୍କ୍‌ ଦମ୍ କିୱେଣ୍ଡ୍‌ ?
1CO 6:2 ଆଦ୍ ସାଦୁନାରୁଡ଼୍‌ ଯେ ପବିତ୍ର ବୁମ୍‌ତାଦ୍‌ ବିଚାର୍‌ କିତ୍‍ତଡ୍‌, ଇ ଗଟି କି ମିଡ଼୍‌ ବେଲା ପୁନ୍‌ୱିନ୍‌ ? ମେଣ୍ଡେ ଯଦି ବୁମ୍ ମିଇ ତଡ଼୍ ବିଚାରିତ ଆତ୍‍ତା, ବାତା ମିଡ଼୍ କି ସୁଡୁ ସୁଡୁ ବିଷୟ୍ ବିଚାର୍‌ କିଦାନଙ୍କ୍ ବେସୁଙ୍କ୍‌ ଆୟ ?
1CO 6:3 ମାନାଲ୍‌ ଯେ ଦୂତକିଙ୍କ୍‌ ବିଚାର୍‌ କିତ୍‍ତାଲ୍ ଇଦ୍‌ ବେଲା ମିଡ଼୍‌ ପୁନ୍‌ୱିଡ଼୍‌ ? ଆଲେକେ ଜଗତ୍‍ତାଦ୍ ବିଚାର୍ ମାଡ଼ାନାଦ୍ ମାକିଂଙ୍କ୍ ଗାଟି ସହଜ୍ ଆୟ୍‍ୟ କି ?
1CO 6:4 ଆଲେକ୍ ଇନ୍‌ଜେତ୍‌ ଜିୱୁତ୍‌ ମାଟ୍ଟା ବା ବାତା ? ଆଦିନ୍‌ମାଇଦିଙ୍କ୍, ଯଦି ବିଚାର୍‌ ମାଇଦିଙ୍କ୍‌ ମିୟାଦ୍‌ ଇଞ୍ଜେତ୍‌ ଜିୱୁଲେକାତ୍‌ ବାତାଆୟି ବିଷୟ୍ ମାନ୍‍ତା, ଆଲେକ୍ ମଣ୍ଡଲିତେ ବେନଡ଼୍ ନଗଣ୍ୟ, ଅଡ଼୍‌‍କିଂଙ୍କ୍ ବାତା ବିଚାର୍‌ କିଦାନ୍‌ ମାଇଦିଙ୍କ୍ ତିଆର୍‌ ମାଡ଼୍‍ୱିଡ଼୍ ?
1CO 6:5 ନାନ୍‌ ମିକିଙ୍କ୍‌ ସିଗ୍‌ ଇଦାନ୍‌ ମାଇଦିଙ୍କ୍ କେସ୍ ମିନ୍ଦେନ୍ । ଦାଦାଲ୍ ତାମୁଣ୍ଡ୍‍ ଲୋପେ ମୀମାଂସା ମାଡ଼ାନଙ୍କ୍‌ ଇଚ୍ଛା, ଇଦ୍‍ଲେକାମ୍ ବାତା ୱେରଣ୍ଡ୍‌ ଜ୍ଞାନି ନାରୁଡ଼୍ ନିଜାମ୍ ମିୟାଗ୍ ଇଲେର୍ ?
1CO 6:6 ମାତର୍ ଦାଦାଲ୍‌ ତାମୁଣ୍ଡ୍‍ ବିରୁଦ୍‍ତେ ବିଚାରଳୟତାଗ୍‌ ଅବିଯୋଗ ମାଡ଼ୁତିର୍‌, ଆଦ୍‌ମେଣ୍ଡେ ଅବିଶ୍ୱାସୀ ନାରୁରାଗ୍‌ !
1CO 6:7 ମିଡ଼୍ ଯେ ମିଇ ମିଇ ଲୋପେ ବିରୁଦ୍ଦ୍‍ ବିଚାରଳୟତାଗ୍‌ ଅବିଯୋଗ ମାଡ଼ୁତିର୍‌, ଆଗା ମିଡ଼୍ ନିଜାମେ ଦଷ୍‌ ଆତ୍‌ତିର୍‌ । ମେଣ୍ଡେ ବାତ୍‌ତେ ଗଟି କେଞ୍ଜି ମାନ୍ଦାଙ୍କ୍‌ ପାର୍ୱିଡ଼୍‌ ? ବେଲା ବାତାଙ୍କ୍ ନାଷ୍ଟ ଆଦାନାଦିନ୍‌ ୱିଡ଼୍‌ସ୍‌ୱିଡ଼୍‌ ?
1CO 6:8 ବାତେଙ୍କ୍ ଇତ୍‍କେ ମିଡ଼୍ ନିଜେ ନିଜେ ଅନ୍‌ୟାୟ୍ ନୁ କ୍ଷତି ମାଡ଼ୁତିର୍‌, ଆଦ୍‌ ମେଣ୍ଡେ କ୍ରିଷ୍ଟ ବିଶ୍ୱାସୀ ଦାଦାଲର୍‌ ବା ଏଲାସ୍କ୍ ପର୍ର ମାଡ଼ୁତିଡ଼୍ ।
1CO 6:9 ମିଡ଼୍ ପୁତ୍‍ତିଡ଼୍ ଯେ ବେନ ଅଦାର୍ମିକ୍‌ ନାରୁଡ଼୍‌ ଇଶ୍ୱରନ୍‌ ରାଜ୍ୟମ୍‌ତାଗ୍‌ ଆଦା ପାର୍ୱଡ଼୍‌ । ଇଦ୍‌ ବିଷୟ୍‍ତେ ମିୟାଦ୍ ବାତେବା ପୁନ୍‍ୱେଲେକେ ମାନ୍‍ମାକି । ପଟ୍‍କାରୀ, ପୁତ୍‍ଲାମ୍ ପୁଜାମାଡ଼ାନଡ଼୍, ବ୍ୟବିଚାରୀଡ଼୍‍, ପେକାଲ୍ ପେକାନ୍‍ତଡ଼୍ ନୁ ପିକିଡ଼୍ ପିକିନ୍‍ତଡ଼୍ ଲିନ୍ଦେ ଆସ୍‍ମାନ୍ଦାନଡ଼୍,
1CO 6:10 ଡଙ୍ଗାଲ୍‌, ଦନ୍‌ଆସେତଣ୍ଡ୍, ମାତ୍‍ୱାରି, ନିନ୍ଦ୍ ମାଡ଼ନଣ୍ଡ୍ ନୁ ଗୁଣ୍ଡାଲଡ଼୍, ଇଡ଼୍‌ ଇଶ୍ୱରନ୍ ରାଜ୍ୟତାଗ୍ ଆଦେ ପାର୍‌ୱଡ଼୍ ।
1CO 6:11 ମେଣ୍ଡେ, ମିଇ ଲୋପେ ବେନବେନ ଇଲା ମାତ୍‌ତିର୍‌ । ବାତେଙ୍କ୍ ଇତ୍‍କେ ଇଞ୍ଜେ ମିଡ଼୍ ପାପାମ୍‍ତାଗାଙ୍କ୍ ଏଡ୍‍ଡି, ଇଶ୍ୱର୍‌ତେ ଗଟ୍‍ତେ ଉତ୍ସର୍ଗ ଆତ୍‌ତିର୍‌ । ମେଣ୍ଡେ ପ୍ରବୁ ଜିସୁ କ୍ରିଷ୍ଟ ନୁ ପବିତ୍ର ଆତ୍ମାତଡ଼୍ ମିଡ଼୍ ଦାର୍ମାମ୍ ଇଞ୍ଜ ଲେକ୍‍ତାଦ୍ ଆସ୍‌ମିନ୍ଦେଡ଼ି ।
1CO 6:12 “ସାର୍‍ରେ ବିଷୟ ସାଦନ୍‍ ମାଡ଼ାନଙ୍କ୍‌ ନାକିଂଙ୍କ୍ ଅଦିକାର୍‌‍ ଇତ୍‍ତଡ଼୍ ।” ବାତେଙ୍କ୍ ଇତ୍‍କେ ମିକିଂଙ୍କ୍ ସାର୍‍ରେ ବିଷୟ ସାୟେ ଆୟ୍‍ୟ । ସାର୍‍ରେ ବିଷୟ ସାଦନ୍‍ ମାଡ଼ାନଙ୍କ୍‌ ନାକ୍‌ ସ୍ୱାଦିନତା ମିନ୍ଦେ, ବାତେଙ୍କ୍ ଇତ୍‍କେ ନାନ୍ ବାତା ବା ବିଷୟତିଙ୍କ୍‌ ରାଜି ଆୟନ୍ ।
1CO 6:13 ମେଣ୍ଡେ ବେନ କେତେ ପାର୍‍ଦ୍‍ତଣ୍ଡ୍, “କାଦି ପଟାତ୍ ମାଇଦିଙ୍କ୍‌, ମେଣ୍ଡେ ପଟା ବା କାଦି ମାଇଦିଙ୍କ୍‌,” ବାତେଙ୍କ୍ ଇତ୍‍କେ ଇଶ୍ୱର୍ ରେଣ୍ଡିଙ୍କ୍ ନଷ୍ଟାମ୍‌ ମାଡ଼ିତନ୍ । ମେନ୍ଦୁଲ୍‌ ବ୍ୟବିଚାର୍‌ ମାଇଦିଙ୍କ୍‌ ବ୍ୟବହାର୍‌ ଆୟକଟେ, ବାତେଙ୍କ୍ ଇତ୍‍କେ ପ୍ରବୁନ୍‌ ମାଇଦିଙ୍କ୍‌ ବ୍ୟବହାର୍‌ ଆୟି, ବାତେଙ୍କ୍‍ଇତ୍‍କେ ଇଶ୍ୱର୍ ମେନ୍ଦୁଲ୍‍ତାଦ୍ ଦର୍‍କାର୍ ସାରେ ମାଡ଼ିତନ୍ ।
1CO 6:14 ଇଶ୍ୱର୍ ପ୍ରବୁଙ୍କ୍ ଡଲ୍‍ତାଗାଙ୍କ୍ ତେଃଏତଣ୍ଡ୍, ମେଣ୍ଡେ ତାନ୍‌ ଲାୱ୍‌ତେ ମାନାକିନ୍‌ ମେଣ୍ଡେ ତେଏତିତଣ୍ଡ୍ ।
1CO 6:15 ମିୟାଦ୍‌ ମେନ୍ଦୁଲ୍‌ ଯେ କ୍ରିଷ୍ଟନ୍‌ ମେନ୍ଦୁଲ୍‍ତେ ଅଂକିଙ୍କ୍‌ ଲେକାମ୍, ଇଦ୍‌ ବାତା ମିଡ଼୍ ପୁନ୍‌ୱିର୍‌ କି ? ଇତ୍‌କେ ନାନ୍‌ ବାତା କ୍ରିଷ୍ଟନ୍‌ ୱେରଡ଼୍ ଅଂକିଙ୍କ୍‌ ଆସ୍‌ ମେଣ୍ଡେ ବେଶ୍ୟାତାଦ୍ ଅଂକିଙ୍କ୍‌ ମାଡ଼ତାନ୍ କି ? ଆଦ୍‌ ବେସୁଟ୍‌ ବା ଆୟ୍‌ମା କି ।
1CO 6:16 ମେଣ୍ଡେ ବେନ ବେଶ୍ୟାନତଡ଼୍‌ କାଇଲିତଣ୍ଡ୍, ଅଣ୍ଡ୍‌‌ ଆଦିନ୍‌ ସାଙ୍ଗ୍‌ ଅରଟ୍‌ ମେନ୍ଦୁଲ୍‌ ଆଦ୍‍ତେ, ଇଦ୍‌ ମିଡ଼୍ ବେଲା ପୁନ୍‌ୱିର୍‌ କି ? ବାତେଙ୍କ୍ ଇତ୍କେ ଇଲା ଲେକ୍‍ତାଦ୍ ମିନ୍ଦେ, “ଆୱ୍‌ ରେଣ୍ଡ୍‌ ଅରଟ୍‌ ଆଦ୍‌ତା ।”
1CO 6:17 ବାତେଙ୍କ୍ ଇତ୍‍କେ ବେନନ୍ ପ୍ରବୁନ୍‌ତଡ଼୍‌ କାଇଲି ମାନ୍‌ତଣ୍ଡ୍‌, ଅଣ୍ଡ୍‌‌ ଆନା ଆତ୍ମାତଡ଼୍‌ ଅରଟ୍‌ ଆତ୍ମା ଆଦ୍‍ତେ ।
1CO 6:18 ବ୍ୟବିଚାର୍‍ ନୁଞ୍ଚ୍‌ ଜେକେ ଆନୁଟ୍ । ନାରୁଡ଼୍‌ ବାତାବା ପାପ୍‌ କିତ୍‌କେ, ଆଦ୍‌ ମେନ୍ଦୁଲ୍‌ତେ ସେଙ୍ଗେ କାରାପ୍‌; ବାତେଙ୍କ୍ ଇତ୍‍କେ ବେନ ବ୍ୟବିଚାର୍‌ ମାଡ଼ିତଣ୍ଡ୍‌, ଅଣ୍ଡ୍‌‌ ତାନ୍ ମେନ୍ଦୁଲ୍ ବିରୁଦ୍‍ତେ ପାପ୍‌ ମାଡ଼ିତନ୍ ।
1CO 6:19 ମିଡ଼୍ ବାତ୍ ପୁନ୍‍ୱିଡ଼୍ ଯେ ମିୟାଦ୍ ମେନ୍ଦୁଲ୍ ପବିତ୍ର ଆତ୍ମାତେ ମନ୍ଦିର୍‌ ? ବେନ୍ ଆତ୍ମା ମିଡ଼୍ ଇଶ୍ୱର୍ ତାଗାଙ୍କ୍ ପାଏମ୍ ଆଦ୍‍ତିଡ଼୍ ।
1CO 6:20 ଅଣ୍ଡ୍‌ ମିକିଂଙ୍କ୍ ଗାଟି ଦାମ୍‌ତେ ଆସ୍‍ତଣ୍ଡ୍; ଆଦିଙ୍କ୍‌ ମିଇ ମେନ୍ଦୁଲ୍‌ତେ ଇଶ୍ୱରନ୍‌ ମୁକ୍ତି ନୁ ଗୌରବ୍‍ ତିଆର୍ ମାଡ଼ାଟ୍ ।
1CO 7:1 ମିଡ଼୍‌ ବାତ୍ ସାର୍‍ରେ ବିଷୟ୍ ଲେକ୍‌ତିଡ଼୍‌, ଆୱ୍‌ ସାର୍ରେତାୱିନ୍ ଉତର୍‌ ଇଦ୍‌, ନାରୁଡ୍‌ ଇୱୁ ନାଟାକିଙ୍ଗ୍‌ ପେଣ୍ଡୁଲ୍ ଆୟ୍‍ୱେ ମାତ୍‌କେ ସାୟେ;
1CO 7:2 ବାତେଙ୍କ୍ ଇତ୍‍କେ ସାର୍ରେତଡ଼୍‌କ୍ ଯୌନ ଲାଲସା ମାନ୍ଦାନ୍ ମାଇଦିଙ୍କ୍‌ ସାର୍‍ରେ ମୁଦ୍‌ପାଲଡ଼୍‍କ୍‌ ତାମ୍‌ ମୁତ୍‍ତେ ମାନି, ମେଣ୍ଡେ ସାର୍‍ରେ ମୁତେକିଙ୍କ୍ ତାମ୍‌ ମୁଜାଲର୍‌ ମାନିର୍‌ ।
1CO 7:3 ମୁଜାଲ୍‌ ମୁତେନ୍‌ ତାନାଦ୍‌ ପ୍ରାପ୍ୟ ଇୱିଣ୍ଡ୍, ମେଣ୍ଡେ, ଆଦେଲେକାମ୍ ମୁତ୍‍ତେ ମୁଜାନ୍ ତାନାଦ୍‌ ପ୍ରାପ୍ୟ ଇୱୁ ।
1CO 7:4 ମୁତେନ୍ ନିଜେତ୍ ମେନ୍ଦୁଲ୍‌ତେ ପର୍ର ଅଦିକାର୍‌‌ ଇଲ୍ଲା, ବାତେଙ୍କ୍ ଇତ୍‍କେ ମୁଦ୍‌ପାନାଦ୍ ମିନ୍ଦେ; ଆଦେଲେକାମ୍‌ ମେଣ୍ଡେ ମୁଦ୍‌ପାନ୍ ନିଜେତ୍ ମେନ୍ଦୁଲ୍‌ତେ ପର୍ର ଅଦିକାର୍‌‍ ଇଲ୍ଲା, ବାତେଙ୍କ୍ ଇତ୍‍କେ ମୁତେନାଦ୍‌ ମିନ୍ଦେ ।
1CO 7:5 ଅଡ଼୍‌ ତାମ୍‍ତାମ୍ ଲୋପେ ୱେରେ ଆୟ୍‍ମାକିଡ଼୍ । ଇତ୍‍କେ ପ୍ରାତ୍‌ନା ମାଡ଼ାନ୍ ମାଇଦିଙ୍କ୍‌ ସୁଦୁଟ୍ ଦିନାମ୍ ସେଙ୍ଗେ ଇର୍‌ୱୁର୍‌ ୱେର୍‌ ଆସ୍‌ ମାନ୍ଦ୍‌ପାର୍ଦିତିଡ୍‌; ମେଣ୍ଡେ ମିୟାଦ୍ ଆତ୍ମସଂଯୋମ୍ ଅବାବ୍ ସେଙ୍ଗାତ୍‌ ଶୟିତାନ୍‌ ବେଲାକି ମିକିଂଙ୍କ୍ ପରିକ୍ଷା ମାଡ଼୍‌ ମା କି ଆଦିନ୍ ସେଙ୍ଗେ ମିଡ଼୍‌ ମେଣ୍ଡେ କାୟ୍‍ଲାଟ୍‌ ।
1CO 7:6 ବାତେଙ୍କ୍ ଇତ୍‍କେ ଇଗେ ବାତ୍ ସାର୍‍ରେ କେତୁତାନ୍ ଆଦ୍ ନାନ୍‌ ଗଟ୍ ଇତ୍‌ତାଲେକେତ୍ କେଲ୍‌ୱାକଟ୍ ପରାମର୍ଶ ଇତ୍‌ତେଲେକେତ୍‌ କେତାମୁନ୍‍ତାନ୍ ।
1CO 7:7 ମିକା, ବେଲାକି ସାର୍‍ରେ ନାରୁଡ୍‌ ନା ଲେକେତ୍‍ ଆଦ୍‌ତଡ୍‌, ଇଦ୍‌ ନାୟାଦ୍‌ ଇଷ୍ଟାମ୍ । ମାତର୍ ବେନ ଇଦେଲେକାମ୍, ବେନ ଆଦ୍‌ଲେକାମ୍, ସାର୍ରେତର୍ ଇଶ୍ୱରନ୍‌ନୁଞ୍ଚ୍ ଦାନାମ୍ ଦର୍କ୍‌ତାନର୍ ।
1CO 7:8 ବାତେଙ୍କ୍ ଇତ୍‍କେ ନାନ୍‌ ପେଣ୍ଡୁଲ୍ ଆୟ୍‍ୱେରଡ଼୍‌ ନୁ ରାଣ୍ଡ୍‌ ଆତେରଡ୍‌କ୍ କେତୁତାନ୍, ଅଡ଼୍‌‌ ନା ଲେକେତ୍‍ ୱେରଣ୍ଡ୍ ମାତ୍‌କେ ତାମାକିଙ୍କ୍‌ ସାୟେ ଆୟେର୍ ।
1CO 7:9 ଯଦି ଅଡ଼୍‌‌ ମାନ୍ଦେ ପାର୍‌ୱକ୍, ଆଲା ଇତ୍‌କେ ପେଣ୍ଡୁଲ୍‌ ଆୟ୍‌ୱିଡ଼୍‌; ବାତେଙ୍କ୍‍ଇତ୍‍କେ ମେନ୍ଦୁଲ୍ ଲାଲସାତାଗ୍ କାଡ଼୍‍ୱାନ୍‌ ୱିଡ଼୍‍ସି ପେଣ୍ଡୁଲ୍ ଆଦାନାଦ୍ ସାୟେ ।
1CO 7:10 ବାତେଙ୍କ୍ ଇତ୍‍କେ ପେଣ୍ଡୁଲ୍ ଆତ୍‌ତେ ନଡ୍‌କିନ୍‌ ଇଦ୍ ନାୟାଦ୍ ଗଟ୍ ଆୟ୍‍ୟ, ଇଶ୍ୱର୍‌ତାଦ୍ ଗଟ୍, ମୁତ୍‍ତେ ମୁଦ୍‍ପାଙ୍କ୍ ବେସୁଟ୍‍ବା ୱିଡ଼୍‍ସ୍‍ମାକି,
1CO 7:11 ଯଦି ମାଡ଼ିତ୍ ଆଲେକେ ଆଦ୍ ୱେରଡ଼୍ ମାନୀ, ମୁଦ୍‍ପାନ୍‍ ତଡ଼୍ କାୟ୍‍ଲି । ମେଣ୍ଡେ ମୁଦ୍‍ପାଲ୍ ମୁତେଙ୍କ୍ ବେସୁଟ୍‍ବା ୱିଡ଼୍‍ସ୍‌ମାକିଣ୍ଡ୍ ।
1CO 7:12 ବାତେଙ୍କ୍ ଇତ୍‍କେ ଇଦ୍‍ରକମ୍‍ ସାର୍ରେତଡ୍‌କ୍ ନାନ୍‌ କେତୁତାନ୍‌ ପ୍ରବୁ କେତ୍ଇଲେ, ଯଦି ବେନ୍‍ ଦାଦାନ୍ ଅବିଶ୍ୱାସ୍‌ତାଦ୍‌ ମୁତ୍‍ତେ ମାନ୍‌ତା, ମେଣ୍ଡେ ଆଦ୍ ଅନ୍‌‍ସାଙ୍ଗ୍ ମାନ୍ଦାନଙ୍କ୍ ରାଜି ଆତା, ଆଲା ଇତ୍‌କେ ଅଣ୍ଡ୍‌ ତାଙ୍କ୍ ୱିଡ଼୍‍ସ୍‌ମାକି ।
1CO 7:13 ମେଣ୍ଡେ ବେଦ୍ ମୁତେନ୍‌ ବିସ୍‌ୱାସ୍‌ କିୱାନଣ୍ଡ୍ ମୁଜାଲ୍ ମାନ୍‌ତଣ୍ଡ୍, ମେଣ୍ଡେ ଅଣ୍ଡ୍‌‌ ତାନ୍ ସାଙ୍ଗ୍‌ ମାନ୍ଦାନିକ୍‌ ରାଜି ଆତଣ୍ଡ୍, ଆଦ୍‌ ତାନ୍‌ ମୁଜାନ୍ ୱିଡ଼୍‍ସ୍‌ମାକି ।
1CO 7:14 ବାତାଇତ୍‌କେ ଅବିଶ୍ୱାସ୍‌ତର୍‌ ମୁଜାଲ୍‌ ମୁତେନ୍‌ ସେଙ୍ଗେ ପବିତ୍ର, ମେଣ୍ଡେ ଅବିଶ୍ୱାସ୍‌ ମୁତ୍‍ତେ ମୁଜାନ୍‌ ସେଙ୍ଗେ ପବିତ୍ର; ଆଲା ଆଇୱାମାତ୍‌କେ ମିଇ ପିଲାଜିଲା ଅପବିତ୍ର ମାନେ, ବାତେଙ୍କ୍ ଇତ୍‍କେ ନିଜାମ୍ ଇଞ୍ଜେ ଇଶ୍ୱର୍‌ତେ ଗ୍ରହନ୍ ଯୋଗ୍ୟ ଆଦ୍‍ତଡ଼୍ ।
1CO 7:15 ଆଦ୍ ବାତ୍ ଆୟି, ଯଦି ୱେରଡ଼୍ ଅବିଶ୍ୱାସି ଏଲାଡ଼୍‍, ଆଦିନ୍‌ କ୍ରିଷ୍ଟ ବିଶ୍ୱାସୀ ମୁଦ୍‍ପାଲ୍ ବାତେ ତାନାଗାଙ୍କ୍ ୱେରେ ଆଦାନକ୍‌ ଇଚ୍ଛା ମାଡ଼ୁତଡ଼୍, ଆଲାଇତ୍‌କେ ୱେରେ ଆଇୱିଡ୍‌, କ୍ରିଷ୍ଟ ବିଶ୍ୱାସ୍‌ତାଗ୍‌ ମୁଦ୍‌ପାଲ୍‌ ବା ମୁତେ ବେନେ ନିୟମ୍‌ତେ କାଇୱେ ମାନ୍‌ତଡ଼୍‌; ଇତ୍କେ ଇଶ୍ୱର୍ ମିକିନ୍‌ ସୁକାମ୍‌ତେ ବାଦ୍‌କାନଙ୍କ୍‌ କାର୍‌ଙ୍ଗିମିନ୍ଦେ ।
1CO 7:16 ହୋ ନାଟାଡ୍‌, ନିମ୍‌ ଯେ ନି ମୁଜାନ୍‌ ପରିତ୍ରାଣ୍ ମାଇଦିଙ୍କ୍ ଆତ୍‍ତି, ଇଦ୍‌ ବାତା ପୁନ୍‌ଦିଇଲେନ୍‌ ? ହୋ ମୁଜାଲ୍‌, ନିମ୍‌ ଯେ ନି ମୁତେନ୍ ପରିତ୍ରାଣତ୍‌ ବାତେଙ୍କ୍ ଇତ୍‍କେ ଆତିନ୍ ଇଦ୍‌ ବାତା ପୁନ୍‌ଦିଲିନ୍‌ ?
1CO 7:17 ଇଶ୍ୱର୍ ବେନଙ୍କ୍ ବେଲା ଅନୁଗ୍ରହ ମାଡ଼ିମିନ୍ଦେଣ୍ଡ୍ ନୁ ବେନଙ୍କ୍ ବେନ୍‍ଲେକାମ୍ କାର୍‍ଙ୍ଗାନାଦ୍‍ ମାଡ଼ିମିନ୍ଦେଣ୍ଡ୍, ଅନ୍‌ ଆଦେଲେକାମ୍ ବାଦ୍‍କିଣ୍ଡ୍ ।
1CO 7:18 ସୁନ୍ନତ୍ ଆତ୍‍ତେ ପେର୍‍କେ ବେନ ଯଦି ଇଶ୍ୱର୍‌ତେ ତଡ଼୍ ଆହ୍ୱାନ୍‍ ଜିୱେଦର୍‍କିତ୍, ଅଣ୍ଡ୍‌ ସୁନ୍ନତ୍ ଚିଏନ୍ନେତିଙ୍କ୍ ଲୋପ୍ ମାଡ଼ାନଙ୍କ୍ ଆଲ୍‍ସି ମାଡ଼୍‍ମାକିଣ୍ଡ୍ ।
1CO 7:19 ସୁନ୍ନତ୍ ଆଦାନାଦ୍ କି ଅସୁନ୍ନତ ଆଦାନାଦ୍ ମୁକ୍ୟ ବିଷୟ୍ ଆୟ୍‍ୟ, ମାତର୍ ମୁକ୍ୟ ବିଷୟ୍ ଆଦୁତ୍‍ତେ ଇଶ୍ୱରନ୍‌ ଗଟ୍ କେଞ୍ଜାନାଦ୍ ।
1CO 7:20 ଇଶ୍ୱର୍‌ତେ କାର୍‍ଙ୍ଗାନାଦ୍‍ ଗ୍ରହନ୍ ମାଡ଼୍‍ତେ ୱେଲେ ଅଣ୍ଡ୍‌ ବେନ୍ ଅବସ୍ଥାତେ ମାତ୍‍ତଣ୍ଡ୍, ଅଣ୍ଡ୍‌ ଆଲେନେ ମାନିଣ୍ଡ୍ ।
1CO 7:21 ନିମ୍‌ ବାତା କ୍ରୀତଦାସ ଆସ୍‌ ୱାସ୍‌ମିନ୍ଦେନି କି ? ଆଲ୍‌ସ୍‌ମାଟ୍; ଯଦି ବେଲାବା ମୁକ୍ତି ଆଦ୍‌ପାର୍ଦିତିଡ୍‌ ଆଲା ଇତ୍‌କେ ସୁଜଗ୍ ମେଦ୍‌କାଟ୍ ।
1CO 7:22 ବାତେଙ୍କ୍‍ଇତ୍‍କେ ବେନ ପ୍ରବୁନ୍ କାର୍‍ଙ୍ଗାନାଦ୍‍ ଦର୍‍କି କ୍ରୀତଦାସ ଆସ୍‌ ପ୍ରବୁନାଗ୍‌ ୱାସ୍‍ମିନ୍ଦେନ୍‍, ଅଣ୍ଡ୍‌‌ ପ୍ରବୁନ୍‌ ମୁକ୍ତ ନାରୁଣ୍ଡ୍‌, ଆଦେଲେକେମ୍‌ ବେନ ମୁକ୍ତିଆସ୍‌ ୱାସ୍‍ମିନ୍ଦେନ୍‍, ଅଣ୍ଡ୍‌‌ କ୍ରିଷ୍ଟନ୍‌ କ୍ରୀତଦାସ ।
1CO 7:23 ମିଡ଼୍ ସାରେ ଦାମ୍‌ତେ ମୁକ୍ତି ଆସ୍‌ ୱାସ୍‌ମିନ୍ଦେଡି ନାରୁଡ୍‌ ଦାସ୍‌ ଆଇମାଟ୍‌ ।
1CO 7:24 ହୋ ଦାଦାଲଡି ନୁ ଏଲାସ୍କ୍, ଇଶ୍ୱର୍ ମିକିଂଙ୍କ୍ ଆହ୍ୱାନ ମାଡ଼ାନ୍ ୱେଲେ ମିଡ଼୍ ବେନ୍‍ ଅବସ୍ଥାତେ ମାତ୍‍ତିଡ଼୍ ଆଦ୍ ଅବସ୍ଥାତେ ଇଶ୍ୱରନ୍‌ ତଡ଼୍ ମାନ୍ଦାନାଦ୍ ସାୟେ ।
1CO 7:25 ମିଡ଼୍ ପେଣ୍ଡୁଲ୍ ଆୟ୍‍ୱା ବିସୟତେ ପୁନ୍ଦାନଙ୍କ୍ ଆଲ୍‍ସ୍‍ତିଡ଼୍, ଇଦ୍ ନାକିନ୍‌ ପ୍ରବୁନୁଞ୍ଚ୍‌ ବାତା ବା ଗଟ୍ ଦର୍କିଲେ; ବାତେଙ୍କ୍ ଇତ୍‍କେ ପ୍ରବୁଙ୍କ୍ ଅନୁଗ୍ରହତେ ବିସ୍‌ୱାସ୍‌ ଆସ୍‌ ନାନ୍‌ କେତୁତାନ୍‌ ।
1CO 7:26 ଇଞ୍ଜେତ୍ ତିପାଲ୍‍ତାଗାଙ୍କ ନାନ୍‌ ଆଲ୍‌ସୁତାନ୍‌ ଯେ, ନାରୁଡ଼୍ ବେଲା ମିନ୍ଦେଡ଼୍‍, କଷ୍ଟ ୱାତ୍‍କେ ବାର୍‌ ଆଲାମାନ୍ଦାୱାଲ୍‌ ସାୟେ ।
1CO 7:27 ନିମ୍‌ ବାତା ମୁତେନ୍‌ ସାଙ୍ଗ୍‌ ଆବଦ୍ଦ ? ଆଲାଇତ୍‌କେ ମୁକ୍ତ ଆଦାଙ୍କ୍‌ ସେଙ୍ଗେ ଚେଷ୍ଟା ମାଡ଼୍‌ମା । ନିମ୍‌ ବାତା ମୁତେନାଗାଙ୍କ୍‌ ମୁକ୍ତ କି ? ଆଲାଇତ୍‌କେ ମୁତ୍‍ତେ ତାତାନଙ୍କ୍‌ ଆଲ୍‌ସ୍‌ମା ।
1CO 7:28 ବାତେଙ୍କ୍ ଇତ୍‍କେ ଯଦି ନିମ୍‌ ପେଣ୍ଡୁଲ୍‌ ଆତ୍‌ତିନ୍‌, ଆଲାଇତ୍‌କେ ପାପ୍‌ କିୱିନ୍‌; ମେଣ୍ଡେ ଯଦି ଲେୟିୱେ ପିକ୍‌ ପେଣ୍ଡୁଲ୍‌ ଆତ୍‌ତା, ଆଲାଇତ୍‌କେ ଆଦ୍‌ ପାପ୍‌ କିୱ । ମିକା ଇସତର୍‌ ନାରୁଡ୍‌ ମେନ୍ଦୁଲ୍‌ତେ କଷ୍ଟ ପାଏମ୍‌ଆତର୍‌; ମେଣ୍ଡେ ମିଡ଼୍ ଆଗାନୁଞ୍ଚ୍‌ ଗେଲ୍‌ସାଟ୍‌, ଆଦ୍‌ ନାୟାଦ୍‌ ଇଚ୍ଛା ।
1CO 7:29 ବାତେଙ୍କ୍ ଇତ୍‍କେ ଓ ଦାଦାଲଡି ନୁ ଏଲାସ୍କ୍, ନାନ୍‌ କେତାନାଦ୍‌ ଇଦ୍‌, ସମୟ୍‌ ସୁଡୁଟ୍‌, ଆଦିଙ୍କ୍ ବେନଡ଼୍‍କ୍‌ ମୁତ୍‍ତେ ମିନ୍ଦେ, ଅଡ୍‌ ମୁତ୍‍ତେ ଇଲ୍‌ୱାଲେକେତ୍‌ ମାନିଡ୍‌ ।
1CO 7:30 ମେଣ୍ଡେ ବେନ କେୟୁତଣ୍ଡ୍‌, ଅଡ୍‌ କେୟ୍‌ଇଲ୍‌ୱା ଲେକେତ୍‍ ମାନିଡ୍‌, ବେନ ୱେଡ଼୍‍କା ମାଡ଼ୁତଣ୍ଡ୍‌, ଅଡ୍‌ ୱେଡ଼୍‍କା ଇଲୱାନାରୁଡ୍‌ ଲେକେତ୍‍ ମାନିଡ୍‌; ବେନଡ଼୍ ୱାମାତଡ୍‌, ଅଡ୍‌ ଅଦିକାର୍ ଇଲ୍‌ୱା ନାରୁଡ୍‌ ଲେକେତ୍‍ ମାନିଡ୍‌;
1CO 7:31 ମେଣ୍ଡେ, ବେନ୍‍ ନାରୁଡ଼୍ ସଂସାର୍‍ତେ ବିଷୟ୍‍ତାଗ୍ ମୁଡ଼୍‍ନ୍ଦି ମାନ୍ଦାନ୍ ଲେକାମ୍ ମାନିଡ଼୍, ଅଡ୍‌ ପଇତ୍‌ ଇଲ୍‌ୱେ ନାରୁଡ୍‌ ଲେକେତ୍‍ ମାନିଡ୍‌; ବାତେଙ୍କ୍‍ଇତ୍‍କେ ଇଦ୍‌ ବୁଦ୍‍ତାଦ୍‌ ରୁପ ବାଦ୍‌ଲେମ୍‌ ଆସମିନ୍ଦେ ।
1CO 7:32 ବାତେଙ୍କ୍ ଇତ୍‍କେ ମିଡ଼୍ ବେଲା ଆଲ୍‌ସ୍‌ୱିଡ୍‌, ନାନ୍‌ ଇଲା ଆଲ୍‌ସୁତାନ, ଇଦ୍‌ ନାୟାଦ୍‌ ଇଚ୍ଛା । ବେନ ପେଣ୍ଡୁଲ୍‌ ଆଇୱାନନ୍‌, ଅଣ୍ଡ୍‌‌ ବେଲା ପ୍ରବୁନାଗ୍‌ ନେଲ୍ଲାତଣ୍ଡ୍‌ ଆତଣ୍ଡ୍, ଆଦିନ୍‌ମାଇଦିଙ୍କ୍‌ ପ୍ରବୁନ୍‌ ବିଷୟ ଆସ୍‌ ଆଲସାଟ୍;
1CO 7:33 ବାତେଙ୍କ୍ ଇତ୍‍କେ ବେନନ୍ ପେଣ୍ଡୁଲ୍ ଆତ୍‍ତେନନ୍‌, ଅଣ୍ଡ୍‌ ବେଲା ତାନ୍‌ ମୁତେନାଗ୍‌ ନେଲ୍ଲାତଣ୍ଡ୍‌ ଆତଣ୍ଡ୍‌, ଆଦିନ୍‌ ଅଣ୍ଡ୍‌‌ ବୁମ୍‍ତେ ବିଷୟ୍ ଆସ୍‌ ଆଲସାତଣ୍ଡ୍‌,
1CO 7:34 ମେଣ୍ଡେ ଅନ୍‌‌ ମାନ୍‍ ବାଗ୍‌ ଆଦ୍‍ତେ । ପେଣ୍ଡୁଲ୍‍ଆୟ୍‌ୱା ନାଟାଙ୍କ୍ ନୁ ପିକି ପ୍ରବୁନ୍ ପବିତ୍ର ପାଡ଼ୟିତାଗ୍ ମାନ୍‍ ଇଦ୍‍ତା, ବାତେଙ୍କ୍ ଇତ୍‍କେ ମେନ୍ଦୁଲ୍‍ତେ ନୁ ଆତ୍ମାତେ ଲେକାମ୍ ଆଦ୍ ନିଜେତିଙ୍କ୍ ଇଶ୍ୱର୍‌ତେ ଗାର୍ରେ ଉତ୍ସର୍ଗ ମାଡ଼ାନଙ୍କ୍ ଆଲ୍‍ସିତ୍ । ବାତେଙ୍କ୍ ଇତ୍‍କେ ବେଦ୍ ପେଣ୍ଡୁଲ୍‌ ଆତ୍‌ତା, ଆଦ୍‌ ବେଲେ ତାନ୍‌ ମୁଜାନ୍‌ ମାଇଦିଙ୍କ୍‌ ନେଲ୍ଲା ମାନ୍‌ତା, ଆଦିନ୍‌ ମାଇଦିଙ୍କ୍‌ ବୁମ୍‍ତେ ବିଷୟ ଆସ୍‌ ଆଲ୍‌ସାଟ୍‌ ।
1CO 7:35 ମୀଇୟାଦ୍ ଲେକେତାଦ୍ ସେଙ୍ଗେ କେତୁତାନ୍ । ମିଇ ଲୋପେ ବାତେବା ନିଷେଦାଜ୍ଞା ଜାରି ନେହେତେନାଦ୍‍ ନାୟାଦ୍ ଅବିପ୍ରାୟ ଆୟ୍‍ୟ । ମେଣ୍ଡନ୍ ପାକେ ମିଡ଼୍ ବାତ୍ ବାତେଏ ଆଚରଣ ମାଡ଼ି ନିଜେ ନିଜେତିଙ୍କ୍ ଆସାମ୍ ଦ୍ୱିଦାର୍‍ତେ ପ୍ରବୁନ୍ ସେବାତେ ସମର୍‍ପନ୍ ମାଡ଼ାଟ୍, ଇଦ୍ ନାୟାଦ୍ ଇଚ୍ଛା ।
1CO 7:36 ପେଣ୍ଡୁଲ୍ ନିର୍ବନ୍ଦ ଆଦ୍‍ଦାନ୍ ୱେଲେ, ମାନେଇ ଯଦି ଏର୍କା ମାଡ଼ିତନ୍ ଯେ ଅନାଦ୍‌ ବାଗ୍‍ଦତାତେ ନାଟାଡ଼୍ ସେଙ୍ଗେ ଆଦ୍ ଲେକାମ୍ ଆଚର୍‍ଣ ମାଡ଼େପାର୍‍ୱନ୍, ଯଦି ତାନାଦ୍ କାମାବିଲାଷ ନାର୍‍ଗେ ଆଦ୍‍ତେ ନୁ ତାନ୍ ପାକେ ପେଣ୍ଡୁଲ୍ ମାଡ଼୍‍ଡ଼େ ପାର୍‍ତନ୍, ଆଲେକେ ତାନାଦ୍ ଇଚ୍ଛା ଲେକାମ୍ ଆୱୁ ପେଣ୍ଡୁଲ୍ ମାଡ଼ି । ଇଗେ ବାତେବା ପାପ୍ ଇଲ୍‍ଲେ ।
1CO 7:37 ବାତେଙ୍କ୍ ଇତ୍‍କେ ବେନନ୍ ହୃଦୟ୍‍ତେ ତିଆର୍ ମାନ୍‌ତଣ୍ଡ୍‌, ବେଲା ଆବଶ୍ୟକତିନ୍‌ ଆୱ୍‌କକଟ୍‌, ମେଣ୍ଡେ ବେନନ୍ ତାନ୍ ଇଷ୍ଟାମ୍‌ତେ ମାଡ଼ାନଙ୍କ୍‌ ଅଦିକାର୍‌‌ ମାନ୍‌ତା, ମେଣ୍ଡେ ବେନ ତାନ୍ ମୁତେନ୍ ପିକିଡ଼୍ ଲେକାମ୍ ନେଃତାନଙ୍କ୍‌ ତାନ୍ ହୃଦୟ୍‍ତାଗ୍ ତିଆର୍ ମାଡ଼ିତଣ୍ଡ୍, ଅଣ୍ଡ୍‌ ସାୟେ କିତ୍‌ତଣ୍ଡ୍ ।
1CO 7:38 ଆଦିଙ୍କ୍ ବେନନ୍ ତାନ୍‌ ଲେୟା ପେଣ୍ଡୁଲ୍ କିସିତ୍‍ତଣ୍ଡ୍‌, ଅଣ୍ଡ୍‌‌ ସାୟେ କିତ୍‌ତଣ୍ଡ୍‌, ମେଣ୍ଡେ ବେନନ୍ ପେଣ୍ଡୁଲ୍ କିସିୱନ୍, ଅଣ୍ଡ୍‌‌ ଗାଟି ସାୟେ ମାଡ଼୍‌ତଣ୍ଡ୍ ।
1CO 7:39 ମୁଜାଲ୍‌ ଜିୱୁ ମାନ୍ଦାନ୍ ଯାକ ମୁତ୍‍ତେ ତଃତେଲେକାମ୍‌ ମାନ୍‌ତା; ବାତେଙ୍କ୍ ଇତ୍‍କେ ମୁଜାଲ୍ ଡଲ୍‌କେ, ଆଲେକ୍ ମୁତ୍‍ତେ ପ୍ରବୁନାଗ୍ ବିଶ୍ୱାସି ବେନଙ୍କ୍ ଇଷ୍ଟାମ୍ ଅଂକିଙ୍କ୍‌ ପେଣ୍ଡୁଲ୍ ଆଦ୍‍ଦା ପାର୍ଦିତ୍ ।
1CO 7:40 ନା ଇସାବ୍‍ତେ ଅଣ୍ଡ୍‌ ତାନ୍ ପେଣ୍ଡୁଲ୍‍ଆୟ୍‍ୱାନଣ୍ଡ୍ ଲେକାମ୍ ମାତ୍‌କେ ନେକା ୱେଡ଼୍‍କିତଣ୍ଡ୍, ଇଦ୍‌ ନାୟାଦ୍‌ କେତାନାଦ୍‌, ମେଣ୍ଡେ ନାନ୍ ମେନ୍ ଇଶ୍ୱରନ୍ ଆତ୍ମା ପାଏମ୍‌ ଆତ୍‌ତାନ୍‌ ଇଞ୍ଜ ଆଲସାତାନ୍ ।
1CO 8:1 ଦେବପ୍ରସାଦ୍ ବିସୟତେ ନାୟାଦ୍‌ ସାୟେତ୍‌ ଇଦୁ, ମାନ୍‍ ସାର୍ରେତଡ଼୍‍କ୍ ବୁଦ୍‍ତେ ମିନ୍ଦେ ଇଞ୍ଜ ମିଡ଼୍ କେତୁତିଡ଼୍, ମାମ୍ ଆଦ୍‌ ପୁତ୍‍ତମ୍ । ଜ୍ଞାନ୍‌ ନାରୁଡ଼୍‍କ୍ ଆଂକାର୍ ମାଡ଼ିତ୍, ବାତେଙ୍କ୍ ଇତ୍‍କେ ପ୍ରେମ୍‌ନୁଞ୍ଚ୍ ନିଷ୍ଟା ପୁଟିତ୍ ।
1CO 8:2 ଯଦି ବେନ କେତିତଣ୍ଡ୍ ଅଣ୍ଡ୍‌ ସୁଦୁର୍ ପୁତ୍‍ତଣ୍ଡ୍ । ନିଜାମ୍‍ତେ ବାତ୍ ପୁନ୍ଦାନାଦ୍ ମାନ୍‍ତେ ଆଦ୍ ପୁନଣ୍ଡ୍‍ । ବେନନ୍ ବାତା ବା ବିସୟତେ ଜ୍ଞାନ୍‌ତନ୍ ଇଞ୍ଜ ଆଲ୍‌ସାତଣ୍ଡ୍, ଆଲାଇତ୍‌କେ ଅନାଦ୍‌ ବେଲା ପୁନ୍ଦାନ୍‌ମିନ୍ଦେ, ଅଣ୍ଡ୍‌ ଇଞ୍ଜେକଞ୍ଚ୍ ଆଲା ପୁନ୍ଦ୍‌ଇଲେନ୍‌ ।
1CO 8:3 ଯଦି ବେନନ୍ ଇଶ୍ୱରଙ୍କ୍ ପ୍ରେମ୍‌ ମାଡ଼ିତଣ୍ଡ୍‌, ଅଣ୍ଡ୍‌‌ ନାରୁଡ଼୍ ତାନାକ୍‌ ପୁତ୍‌ ବେନ ଆୟି ଇଶ୍ୱର୍‌ତିଙ୍କ୍ ପ୍ରେମ୍ ମାଡ଼ିତନ୍ ଅଂକିଙ୍କ୍‌ ଇଶ୍ୱର୍ ପୁନ୍‍ତଣ୍ଡ୍ ।
1CO 8:4 ଆଦିଙ୍କ୍ ଦେବପ୍ରସାଦ ତିନ୍ଦାନ୍‌ ବିସୟତେ ମାମ୍ ପୁତ୍‍ତମ୍ ଯେ ବୁମ୍‍ତାଗ୍‍ ଦେୟାକ୍‌ ଇଞ୍ଜ ବାତେବା ଇଲ୍‌ଲେ, ଅରଟ୍‌ ଇଶ୍ୱରନ୍‌ ୱିଡ଼୍‍ସି ମେଣ୍ଡେ ଇଲ୍‌ଲେ ।
1CO 8:5 ବାତେଙ୍କ୍‍ଇତ୍‍କେ ସ୍ୱର୍ଗ କି ବୁମ୍‌ତାଗା ଆୟି ବେନଡ଼୍‍କ୍‌ ଦେୟାକ୍‌ ଇଞ୍ଜ କେତୁତଡ଼୍‍, ଯଦି ମିନ୍ଦେଡ୍‌ ଆଲାଇତ୍‌କେତ ନାର୍‍ଗେ ଦେୟାକ୍‌ ନୁ ନାର୍‍ଗେ ପ୍ରବୁ ମିନ୍ଦେ,
1CO 8:6 ମାନାକିନ୍ ଅଣ୍ଡୟ୍‌‌ ଇଶ୍ୱର୍, ଇତ୍‌କେ ବେନ୍‍ ବାବାନାଗାଙ୍କ୍‌ ସାର୍‍ରେ ବିଷୟ୍ ତିୟାର୍ ଆତ୍‌ତା, ମେଣ୍ଡେ ମାନାଲ୍‌ ଅନ୍ ମାଇଦିଙ୍କ୍‌ ମିନ୍ଦେଲ୍‌, ମେଣ୍ଡେ ଅଣ୍ଡୟ୍‌‌ ପ୍ରବୁ, ଇତ୍‌କେ ଜିସୁ କ୍ରିଷ୍ଟ, ଅନାଗ୍‍କଞ୍ଚ୍ ସାର୍‍ରେ ବିଷୟ୍ ତିୟାର୍ ଆତ୍‌ତା, ମେଣ୍ଡେ ଅନାଗ୍‍କଞ୍ଚ୍ ମାନାଲ୍‌ ତିୟାର୍ ଆତ୍‌ତାଡ଼୍‍ ।
1CO 8:7 ସାର୍ରେତଡ଼୍‌କ୍ ଇଦ୍‌ ସାତ୍ ପୁନଡ଼୍; ବାତେଙ୍କ୍ ଇତ୍‍କେ ବେସ୍‍କ୍‍ତୁଡ଼୍‍ ନାରୁଡ଼୍ ଇଞ୍ଜେକ୍‌ଆନା ଦେୟାକ୍‌ ମିନ୍ଦେ ଇଞ୍ଜ ଆଲ୍‌ସି ଦେୟାକିନ୍‌ ପାର୍‍ସାଦ୍‌ ତିନ୍ଦୁତଡ୍, ମେଣ୍ଡେ ତାମାୱ୍‌ ବିବେକ୍‍ ଦୁର୍ବଲ୍ ମାନ୍ଦାନ୍‌କେ ଅପବିତ୍ର ଆତା ।
1CO 8:8 ବାତେଙ୍କ୍ ଇତ୍‍କେ କାଦି ମାନାକିନ୍‌ ଇଶ୍ୱରନାଗ୍‌ ଗ୍ରାହ୍ୟ କି ଆଗ୍ରାହ୍ୟ କିୱ; ବା ଆସୁନ୍ ମାନାକିନ୍ କ୍ଷତି ଆୟ୍‍ୟ, କି ତିତ୍‌କେ ମାନାକିନ୍ ଲାବ୍‌ ଆୟ୍‍ୟ ।
1CO 8:9 ବାତେଙ୍କ୍ ଇତ୍‍କେ ସାବ୍‌ଦାନ୍‌, ଇତ୍‍କେ ମିୟାଦ୍‌ ଇଦ୍‌ ସ୍ୱାଦିନତା କାମ୍‌ଜୁର୍‌ ନାରୁଡ୍‌କ୍‌ ରାଲାନାଦ୍‌ ବାତେଙ୍କ୍ ଇତ୍‍କେ ଆତା ।
1CO 8:10 ବାତେଙ୍କ୍‍ଇତ୍‍କେ ଜ୍ଞାନି ଯେ ମିଡ଼୍, ମିକିନ୍‌ ଯଦି ବେନ ଗୁଡିୟ୍‌ଦାଗ୍‌ ତିନ୍ଦାନାଗ୍‌ କୁଦିମାନ୍ଦାନାଗ୍‌ ଉଡ଼ିତଣ୍ଡ୍‌, ଆଲେକ୍ ଅଣ୍ଡ୍‌‌ ଦୁର୍ବଲ ବିଶ୍ୱାସୀ ଆସ୍‌ମାତ୍‌କେ ଅଣ୍ଡ୍‌ ବାତା ମନ୍ଦିର୍‌ତାଦ୍‌ ବଗ୍‌ ତିନ୍ଦାନଙ୍କ୍ ସାହାସ୍‌ କିୱଣ୍ଡ୍ କି ?
1CO 8:11 ଆଦିଙ୍କ୍ ବେନ୍‍ ଦୁର୍ବଲ ଦାଦାଲ୍ ମାଇଦିଙ୍କ୍‌ କ୍ରିଷ୍ଟ ଡଲ୍‌ଲିଆତ୍‌ତଣ୍ଡ୍, ଅଣ୍ଡ୍‌‌ ମିଇ ଜ୍ଞାନ୍‌ ତଡ଼୍ ନଷ୍ଟ ଆଦୁତନ୍ ।
1CO 8:12 ଇଦେଲେକାମ୍ ଦାଦାଲଡ୍ ବିରୁଦ୍‍ତେ ପାପ୍‌ କିସ୍ ନୁ ଅଡ଼ାଦ୍‌ ଦୁର୍ବଲ ବିବେକ୍‌ତିନ୍‌ ରେସ୍‌ମିକା ମିଡ଼୍ କ୍ରିଷ୍ଟନ୍‌ ବିରୁଦ୍‍ତେ ପାପ୍‌ ମାଡ଼ୁତିଡ଼୍ ।
1CO 8:13 ମେଣ୍ଡେ ଯଦି କାଦ୍ୟଦ୍ରବ୍ୟ ନା ଦାଦାନ୍‌ କାରାପ୍‌ ମାଡ଼ୁତା, ଆଲେକେ ମା ଦାଦାଲ୍‌ ବେଲା ନା ତଡ଼୍ କାରାପ୍‌ ଆୟ୍‍ୱାକି, ଇଦିନ୍‌ମାଇଦେ ନାନ୍‌ ବେସୁଙ୍କ୍‌ବା ଆୱୁଙ୍ଗ୍‌ ତିନନ୍‌ ।
1CO 9:1 ନାନ୍‌ ବାତା ସ୍ୱାଦିନତା ଆୟନ୍‌ ? ନାନ୍‌ ବାତା ଅରନ୍‌ ପ୍ରେରିତ ଆୟନ୍‌ ? ନାନ୍‌ ବାତା ମାନ୍‍ ପ୍ରବୁଙ୍କ୍ ଉଡ଼ିଲେନ୍‌ ? ମିଡ଼୍ ବାତା ପ୍ରବୁନାଗା ମାଡ଼୍‍ତେ ପାଡିୟ୍‌ ଆୟ୍‍ୟ ?
1CO 9:2 ଯଦ୍ୟପି ନାନେ ପ୍ରେରିତ ନଡ଼ାଗାଙ୍କ୍‍ ଆରନ୍‌ ରଅତେନନ୍‌ ଆୟନ୍‌, ମିକା ମିୟାଗ୍‌ ନିଜାମ୍‌ ରଅତେନନ୍‌, ବାତେଙ୍କ୍‍ଇତ୍‍କେ ପ୍ରବୁନାଗ୍ ମିଡ଼୍ ନାୟାଦ୍‌ ରଅତାନଣ୍ଡ୍ ଇଞ୍ଜ ଗ୍ରହନ୍ ମାଡ଼ାଟ୍ ।
1CO 9:3 ନା ସମାଲୋଚକ ନାରୁଡ୍‌କ୍ ନାୟାଦ୍‌ ଇଦ୍ ଉତ୍ତର୍‌ ।
1CO 9:4 ତିନ୍ଦାଙ୍କ୍‍ ଉନ୍ଦାଙ୍କ୍ ବାତା ମାୟାଦ୍‌ ଅଦିକାର୍‌‌ ଇଲ୍‌ଲେ ?
1CO 9:5 ବାଗାତ୍ ସାର୍‍ରେ ପ୍ରେରିତନଡ୍‌, ପ୍ରବୁନ୍‌ ଦାଦାଲର୍‌ ନୁ ଏଲାସ୍କ୍‌ କୈଫାନ୍ ଲେକେତ୍‍ ବିଶ୍ୱାସ୍‌ତାଦ୍‌ ମୁତ୍‍ତେ ପେଣ୍ଡୁଲ୍ ଆସ୍‌ ସାଙ୍ଗେ ପଇସ୍‌ ଉଡ଼ାନଙ୍କ୍‌ ବାତା ମାକିନ୍‌ ଅଦିକାର୍‌‌ ଇଲ୍ଲା ?
1CO 9:6 କି ବାଦ୍‍କାନଡ଼ାଦ୍ ପାଡ଼ିୟ୍‌ ୱିଡ଼୍‍ସାନଙ୍କ୍ ବାତା ନାୟାଦ୍‌ ନୁ ବର୍ଣ୍ଣବ୍‌ବାନାଦ୍‌ ଅଦିକାର୍‌‌ ଇଲ୍ଲା ?
1CO 9:7 ବେନନ୍ ନିଜେ କର୍ସତେ ବେସୁଙ୍କ୍‍ ସୈନିକ ବୃତ୍ତି ଇଦ୍‍ତଣ୍ଡ୍‌ ? ବେନନ୍ ଦ୍ରାକ୍ଷାକ୍ଷେତ୍ର ମାଡ଼ି ଆଗାତାୱ୍‌ ପାଣ୍ଡି ତିନନ୍‌ ? ବା ବେନ ପଶୁମାନ୍ଦା ପଡ୍‌ପି ପଶୁନାଦ୍‌ ପାଲ୍‌ ଉନନ୍‌ ?
1CO 9:8 ନାନ୍‌ ନାରୁନ୍‌ତ୍‌ ଇସାବ୍‌ତେ ବାତା ଇୱ୍‌ସାର୍ରେ ମାଟ୍ଟା କେତୁତାନ୍ ? ବ୍ୟବସ୍ଥା ମେଣ୍ଡେ ବାତା ଇୱ୍‌ସାର୍ରେ ମାଟ୍ଟା କେଲ କି ?
1CO 9:9 ବାତେଙ୍କ୍‍ ଇତ୍କେ ମୋଶାନ୍‌‌ ବ୍ୟବସ୍ଥାତେ ଇଲ୍‍ଲେ ଲେକାମିନ୍ଦେ, କଟାମ୍‍ତାଗ୍‌ ଉଡାନ୍ କନ୍ଦେତ୍‌ ମୁଟ୍‌ତାଗ୍‌ ମୁର୍‌ସୁଲ୍‌ ତଅମାଟ୍‌ । ଇଶ୍ୱର୍ ବାତା କନ୍ଦା ବିଷୟ୍‌ତେ ଆଲ୍‌ସିତଣ୍ଡ୍ ?
1CO 9:10 ଅଣ୍ଡ୍‌‌ ବାତା ମାନ୍‍ ମାଇଦିଙ୍କ୍‌ ଇଦ୍‌ କେଲୋନ୍‌ କି ? ହଁ ମାନ୍‍ ମାଇଦିଙ୍କ୍‌ ଇଦ୍‌ ଲେକ୍‍ତାଦ୍ ମିନ୍ଦେ, ବେଲାକି ବେନନ୍ ଉଡ଼୍‍ଦିତଣ୍ଡ୍, ଆସା କିସ୍‌ ଅର୍‌ ଉଡ଼୍‍ଦା ୱେଇତିତ୍, ମେଣ୍ଡେ ବେନଣ୍ଡ୍ କଟାମ୍ ୱାଟାତଣ୍ଡ୍, ବାଗ୍‌ ଦର୍କାନ୍ ଆଶାତେ ଅନାଦ୍‌ କଟାମ୍ ୱାଟାନ୍ ମିନ୍ଦେ ।
1CO 9:11 ଯଦି ମାମ୍ ନି ମାଇଦିଙ୍କ୍ ପାରମାର୍ତିକ ୱିଜେ ୱିତି ମିନ୍ଦେମ୍‌, ଆଲେକ୍ ମିୟାଦ୍‌ ଐହିକ କେଡ଼୍ ବାତା ଗୁରୁତ୍‌ ବିଷୟ ?
1CO 9:12 ଯଦି ଅର୍‌ତୁଡ଼ାଗାଙ୍କ୍‍ ମିଡ଼୍‌ କାଇଲ୍‌ତେନଡ଼୍‌ ଆଦ୍‌ତିଡ଼୍‌, ଆଲେକ୍ ମାମ୍ ବାତା ନେକାନାଲ୍‌ର୍ଗେ ଆୟମ୍‌ ? ମିକା ମାମ୍‍ମେ ଆଦ୍‌ ଅଦିକାର୍‌ ବ୍ୟବହାର୍‌ କିଦ୍‌ଇଲେମ୍‌; ବାତେଙ୍କ୍ ଇତ୍‍କେ ବେଲାକି ମାମ୍‍ମେ କ୍ରିଷ୍ଟନ୍‌ ନେଲ୍ଲା କାବୁର୍‌ତାଗ୍‌ ବେଲେବା ଆଡାମ୍‌ ଆୟମ୍‌, ଇଦିନ୍‌ ମାଇଦିଙ୍କ୍‌ ସାର୍‍ରେ ସାରେ ମାଡ଼ୁତମ୍ ।
1CO 9:13 ବେନଡ଼୍ ମନ୍ଦିର୍‌ତାଗ୍ ସେବା ମାଡ଼ୁତଡ଼୍, ଅଡ଼୍‌‌ ଯେ ମନ୍ଦିର୍‌ନୁଞ୍ଚ୍‌ କାଦି ଦର୍କିତା, ମେଣ୍ଡେ ବେନଡ଼୍ ବେଦିନାଗ୍‌ ସେବା ମାଡ଼ାନଙ୍କ୍ ମାନ୍‌ତଡ଼୍‌, ଅଡ଼୍‌‌ ଯେ ବେଦିନାଗ୍‌ କାଇଲିତଡ଼୍‌, ଇଦ୍‌ ବାତା ପୁନ୍‌ୱିଡ଼୍‌ କି ?
1CO 9:14 ଆଦେଲେକାମ୍‌ ବେନଣ୍ଡ୍ ସାୟେ କାବୁର୍‌ କେତିତଣ୍ଡ୍, ଅଡ଼୍‌‌ ଯେ ସାୟେ କାବୁର୍‌ ତଡ଼୍ ବାଦ୍‌କାତଡ଼୍‌, ଇଦ୍‌ ପ୍ରବୁ କେସ୍‌ମିନ୍ଦେ ।
1CO 9:15 ବାତେଙ୍କ୍‍ଇତ୍କେ ନାନ୍ ଇୱୁ ସାର୍‍ରେ ବିଷୟ୍ ବ୍ୟବହାର୍‌ ମାଡ଼ନ୍, ମେଣ୍ଡେ ନା ସେଙ୍ଗେ ଯେ କିତ୍‍ତଡ଼୍‌, ଇଦିନ୍‌ ମାଇଦିଙ୍କ୍‌ ନାନ୍ ଇୱ୍‌ସାର୍ରେ ଲେକନ୍‌; ବାତେଙ୍କ୍‍ଇତ୍‍କେ ବେନ ନାୟାଦ୍‌ ଇଦ୍‌ ଦର୍ପ ମାଡ଼ାନ୍‌ ୱିଡ଼୍‍ସି ବେଲାନ୍ ନାୟାଦ୍‌ ଡଲାନାଦ୍‌ ସାୟେ ।
1CO 9:16 ସୁସମାଚାର୍ ପ୍ରଚାର୍ ମାଡ଼ୁତାନ୍ ଇଞ୍ଜ ନାୟାଦ୍ ପ୍ରସଂଶା ମାଡ଼ାନାଦ୍ ବାତ୍ ବାତେଙ୍କ୍ ଇତ୍‍କେ ଇଲ୍‍ଲେ । ଇଦ୍ ଦାୟିତ୍ୱ ପାଲନ୍ ମାଡ଼ାନ୍ ସେଙ୍ଗେ ନାନ୍ ଗଟ୍ ପାଏମ୍ ଆତ୍‍ତାନ୍ । ଆଦିଙ୍କ୍ ସୁସମାଚାର୍ ପ୍ରଚାର୍ ମାଡ଼୍‍ୱେ ମାତ୍‍କେ ନାକିଂଙ୍କ୍ ଦଣ୍ଡ୍‍ଆଦ୍‍ତେ ।
1CO 9:17 ନିଜେତ୍ ମାନ୍‍ତେ ଇଦ୍ ପାଡ଼୍‍ୟି ମାଡ଼୍‍କେ, ନାନ୍ ପୁରସ୍କାର୍‍ତିଙ୍କ୍ କେପି ମାନେନ୍, ଇତ୍‍କେ ଇଶ୍ୱର୍ ନା ପର୍‍ର ଇଦ୍ ଦାୟିତ୍ୱ ଇସ୍‍ମାନ୍ଦାନ୍ ମାୟ୍‍ଦିଙ୍କ୍ ଇଦ୍ ମାଡ଼ାନାଦ୍ ନାୟାଦ୍ ପାଡ଼୍‍ୟି ।
1CO 9:18 ଆଲେକେ ନାନ୍ କି ପୁରସ୍କାର୍ ପାଏମ୍ ଆଦ୍‍ତାନ୍ ? ସାର୍ରେତଡ଼୍ ଗାର୍‍ରେ ୱିଡ଼୍‍ସି ମୁଲ୍ୟବାନ୍‍ ସୁସମାଚାର୍ ପ୍ରଚାର୍ ସେଙ୍ଗେ, ଇଦ୍ ନାୟାଦ୍ ପୁରସ୍କାର୍ । ଆଦିନ୍ ସେଙ୍ଗେ ସୁସମାଚାର୍ ପ୍ରଚାର୍ ମାୟ୍‍ଦିଙ୍କ୍ ନାନ୍ ବାତ୍‍ମିକା ସୁଯୋଗ୍ ସୁବିଦା ପାଏମ୍ ଆତ୍‍ତାଙ୍କ୍ ମାଇଦିଙ୍କ୍ ନାନ୍ ବାତେବା ଆଶେ ମାଡ଼ନ୍ ।
1CO 9:19 ନାନ୍ ୱେରଣ୍ଡ୍ ସ୍ୱାଦିନ୍ ନାରୁନ୍‌, ବେନ ଆସ୍‍ତେ ଦାସ ଆୟନ୍, ଆଗେକ୍‍ବା କ୍ରିଷ୍ଟନାଗ୍ ସାର୍ରେତଡ଼୍ ଲାବ୍ ପାଏମ୍ ଆଦାନ୍ ସେଙ୍ଗେ ନାନ୍ ସାର୍ରେତଡ଼୍‍ୱାଦ୍ ଦାସ ଆତ୍‍ତାନ୍ ।
1CO 9:20 ଇହୁଦୀନଡ଼୍ କ୍ରିଷ୍ଟନ୍‍ନାଗେ ଲାବ୍ ପାଏମ୍ ଆଦାନ୍ ସେଙ୍ଗେ ନାନ୍ ଅଡ଼୍‌ ତଡ଼୍ ଇହୁଦୀ ଲେକାମ୍ ବ୍ୟବହାର୍‌ ମାଡ଼ୁତାନ୍ । ମୋଶାନ୍‌ ନିୟମ୍ ପାଲନ୍ ମାଡ଼ାନଡ଼୍‍କିଙ୍କ୍ ପାଏମ୍ ଆଦାନ୍ ସେଙ୍ଗେ ନାନ୍ ବାତ୍‍ଆଇ ନିୟମ୍ ପୟ୍‍ୱେକଟ ନିୟମ୍‍ତାଗ୍ ମାନ୍ଦାନ୍ ଲେକାମ୍ ବ୍ୟବହାର୍‌ ମାଡ଼ୁତାନ୍ ।
1CO 9:21 ଆଦେରକମ୍ ଅଣଇହୁଦୀଡ଼୍ ପାଏମ୍ ଆଦାନ୍ ସେଙ୍ଗେ ନାନ୍ ଅଡ଼୍‌ ଲୋପେ ପାଡ଼୍‍ୟି ମାଡ଼ାନ୍‍ୱେଲେ ଅଣଇହୁଦୀଡ଼୍ ଲେକାମ୍ ନିୟମ୍‍ତେ ବାୟିଦେ ବ୍ୟବହାର୍‌ ମାଡ଼ୁତାନ୍ । ଇଦିନାଦ୍ ଇତ୍‍କେ ଆୟ୍‍ୟ ଜେ, ନାନ୍ ଇଶ୍ୱର୍‌ତେ ନିତୀନିୟମ୍ ପାଲନ୍ ମାଡ଼ନ୍ । ନିଜାମ୍‍ତେ ନାନ୍ କ୍ରିଷ୍ଟନ୍ ନିୟମ୍‍ତାଗ୍ ମିନ୍ଦେନ୍ ।
1CO 9:22 ବେନଡ଼୍ ବିଶ୍ୱାସ୍‍ତାଗ୍ ଶାତ୍‍ୱାମ୍ ଇଲ୍‍ଲେ, ଅଡ଼୍‌‍କିଂଙ୍କ୍ ପାଏମ୍ ଆଦାନ୍ ସେଙ୍ଗେ ନାନ୍ ଅଡ଼୍‌ ଲେକାମ୍ ଆତ୍‍ତାନ୍ । ବେଲାମେଣ୍ଡେ ଆୟି ଅଡ଼୍‌‍କିଂଙ୍କ୍ ଗେଲ୍‍ସ୍ପାନ୍ ମାୟ୍‍ଦିଙ୍କ୍ ନାନ୍ ସାରେ ୱେରେ ଲେକାମ୍ ବ୍ୟବହାର୍‌ ଆଚରଣ ମାଡ଼୍‍ତାନ୍ ।
1CO 9:23 ନାନ୍ ସୁସମାଚାର୍ ପ୍ରଚାର୍ ମାଡ଼ି, ଇଦିନାଗାଙ୍କ୍ ଆର୍ଶିବାଦ୍ ପାଏମ୍ ଆଦ୍‍ଦାନ୍ ଅଂଶି ଆଦାନ୍‍ ସେଙ୍ଗେ ଇୱୁ ସାର୍‍ରେ ମାଡ଼ିତାନ୍ ।
1CO 9:24 ମିଡ଼୍ ବାତ୍ ପୁନ୍‍ୱିଡ଼୍ ଜେ, କାର୍‍ସାନାଗ୍ ନାର୍‍ଗେ ମୁଲ୍ ବାଗ୍‍ ଆଦ୍‍ତଡ଼୍, ଇତ୍‍କେ ୱେରଣ୍ଡେ ପୁରସ୍କାର୍ ପାଏମ୍ ଆଦ୍‍ତନ୍ ? ମିଡ଼୍ ଇଦ୍‍ରକମ୍ ମିରାଟ୍, ବେଲାକି ପୁରସ୍କାର୍ ପାଏମ୍ ଆଦ୍‍ତିଡ଼୍ ।
1CO 9:25 କାର୍‍ସାନଡ଼୍ ଟ୍ରେନିଂ ୱେଲେ ସାର୍‍ରେ ବିଷୟ୍ ସାୟେ ବ୍ୟବହାର୍‌ ମାଡ଼ିତଡ଼୍ । ଅଡ଼୍‌ ନଷ୍ଟଆଦାନାଦ୍ ସହଜ୍‍ ପାଏମ୍ ଆଦାନ୍ ସେଙ୍ଗେ ଇଦ୍‍ରକମ୍ ମାଡ଼ିତଡ଼୍ । ଇତ୍‍କେ ମାନାଡ଼୍ ତେର୍‍ୱାଦ୍ ସହଜ୍‍ ପାଏମ୍ ଆଦାନ୍ ସେଙ୍ଗେ ଇଦ୍‍ରକମ୍ ମାଡ଼ିତାଡ଼୍ ।
1CO 9:26 ଆଦିନ୍ ସେଙ୍ଗେ ନାନ୍ ସିଦା ଏୱୁଦାନ୍ ବକେତ୍ ମିରିତାନ୍, ନାନ୍‍ ୱେରଣ୍ଡ୍ ମୁଷ୍ଟି ବୀର ଲେକାମ୍ ନାନ୍ ନିଜେତ୍ ମୁଟେତେ ରେଏତାନଙ୍କ୍ ଆସାମ୍ ୱିଡ଼୍‍ସାନଙ୍କ୍ ମାନ୍‍ ମାଡ଼ନ୍ ।
1CO 9:27 ୱେରେ ନାରୁଡ଼ାଗ୍ ସୁସମାଚାର୍ ପ୍ରଚାର୍ ମାଡ଼ିମାତ୍‍କେ ଗାଲା ନାନ୍ ନିଜେ ବେଲାକି ପିନ୍ଦ ଆୟନ୍, ନାନ୍ ତିପାଲ୍ ମାଡ଼ି ମେନ୍ଦୁଲ୍‍ତିଙ୍କ୍ ଡୁଟାଙ୍ଗ୍‌ ମାଡ଼୍‍ତାନ୍ ନୁ ନିଜେତ୍ ଗଟ୍‍ତେ ମାଡ଼ି ନେଃଏତାନ୍ । ବାତେଙ୍କ୍‍ଇତ୍କେ ବାଗାତଡ଼୍ ପାକେ ସୁସମାଚାର୍ ପ୍ରଚାର୍ ମାଡ଼ିମାତ୍‍କେ ମିକା ନାନ୍ ନିଜେ ଆଗ୍ରାହ୍ୟ ଆୟନ୍ ।
1CO 10:1 ଦାଦାଲଡ଼ି ନୁ ଏଲାସ୍କ୍‍ ନଡ଼ି ମୋଶାନ୍‌ ପେର୍‍କେ ଆଞ୍ଜ ମାନ୍‍ ଆନିଦାଦିଡ଼୍ ବାତ୍ ଗଟେମ୍ ଆସ୍‍ମାତ୍‍ତଡ଼୍‌, ମିଡ଼୍ ଆଦ୍ ଏର୍କା ମାଡ଼ାଟ୍, ଇଦ୍ ନାୟାଦ୍ ଇଚ୍ଛା । ଅଡ଼୍‌ ସାର୍ରେତଡ଼୍ ମାବ୍ ତଡ଼୍ ଲେକାମ୍ ମାତ୍‍ତଡ଼୍, ନେତୁର୍ ବେଡ଼େଡ଼୍‍ତିଙ୍କ୍ ତିପାଲ୍ ଆୟ୍‍ୱେ ଜିଡ଼୍‍ତଡ଼୍ ।
1CO 10:2 ମୋଶାନ୍‌ ପେର୍‍କେ ଆଦାନଡ଼୍ ଲେକାମ୍ ଅଡ଼୍‌ ସାର୍ରେତଡ଼୍ ମାବ୍ ନୁ ବେଡ଼େଡ଼୍‍ତାଗ୍‍ ଏର୍‍ଦିକ୍ୟା ପାଏମ୍ ଆସ୍‍ମାତ୍‍ତଡ଼୍ ।
1CO 10:3 ଅଡ଼୍‌ ସାର୍ରେତଡ଼୍ ଅଣ୍ଡୟ୍‌ ଆତ୍ମାତେ କାଦି ନୁ ଉନ୍ଦାନାଦ୍ ଗ୍ରହନ୍ ମାଡ଼ିମାତ୍‍ତଡ଼୍,
1CO 10:4 ବାତେଙ୍କ୍‍ଇତ୍‍କେ ଅଡ଼୍‌ ତଡ଼୍ ଚାଲେମ୍‍ ଆଦାନ୍ ଦାର୍ମାମ୍‌ ଉପାୟ୍‍ତଡ଼୍ ଅଡ଼୍‌ କାଲ୍ ଉଞ୍ଜ ମାତ୍‍ତଡ଼୍, ମେଣ୍ଡେ ଆଦ୍ କାଲ୍ ଆଦୁତନ୍ ନିଜେ କ୍ରିଷ୍ଟ ।
1CO 10:5 ଆଗେକ୍‍ବା ଇଶ୍ୱର୍ ଅଡ଼୍‌ ସାର୍ରେତଡ଼୍ ସେଙ୍ଗେ ଶାନ୍ତି ଇଲ୍‍ୱେମାତ୍‍ତଣ୍ଡ୍ । ଆଦିଙ୍କ୍ ଅଡ଼ାଦ୍‌ ଡଲ୍‍ତେ ମେନ୍ଦୁଲ୍ ଉଚ୍‍କନେଲ୍‍ତାଗ୍ ଏକାମ୍ ଆସ୍ ରାୟିମାତ୍‍ତା ।
1CO 10:6 ଅଡ଼୍‌ ଲେକାମ୍ କାରାପ୍ ଚିନ୍ତେ ମାଡ଼ାନାଦ୍ ଆୟ୍‍ୟ କି ଇୱୁ ସାର୍‍ରେ ୱେଷଡ଼୍ ଇନା ଆସ୍ ମାନ୍‍ ଏର୍କା ଇଦୁତ୍ ।
1CO 10:7 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ପୁତ୍‍ଲାମ୍ ପୂଜେ ମାଡ଼ାନାଦ୍ ଆୟ୍‍ୟ, ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ, “ନାରୁଡ଼୍ ତିନ୍ଦାନଙ୍କ୍ କୁଦ୍‍ତଡ଼୍ ନୁ ତାନ୍‍ପେର୍କେ ତେଦି ମୂର୍ତ୍ତି ପୂଜା ପାଡ଼୍‍ୟି ମାଡ଼ାନଙ୍କ୍ ପସ୍ପ୍‍ତ୍‍ତଡ଼୍ ।”
1CO 10:8 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ବେବିଚାର୍ ମାଡ଼୍‍ତାଙ୍କ୍ ୱେରଡ଼୍ ଦିନେତେ ତେଇସ୍ ହଜାର୍‌ ନାରୁଡ଼୍ ଡଲ୍‍ତଡ଼୍ । ଆଦ୍ ରକମ୍ ପାପାମ୍ ମାଡ଼୍‍ୱାଡ଼୍ ।
1CO 10:9 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ପ୍ରବୁନ୍ ପରିକ୍ଷା ମାଡ଼ି ତାଡ଼ାମ୍ କାସି ଡଲ୍‍ତଡ଼୍ । ମାନାଡ଼୍ ଆଦ୍‍ଲେକାମ୍ ପ୍ରବୁଙ୍କ୍ ପରିକ୍ଷା ମାଡ଼ାନାଦ୍ ଆୟ୍‍ୟ ।
1CO 10:10 ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଇଶ୍ୱର୍‌ତିଙ୍କ୍ ବିରୁଦ୍ ମାଡ଼ି ଆୱୁକାନାଦ୍ ଦୂତ୍‍ତଡ଼୍ ଦଂସ ଆଦ୍‍ତଡ଼୍ । ମିଡ଼୍ ଆଦ୍‍ଲେକାମ୍ କପାମ୍ ଗଟି କେଲ୍‍ମାଟ୍ ।
1CO 10:11 ଅଡ଼୍‌ ସେଙ୍ଗେ ଇଦ୍ ସାର୍‍ରେ ଗଟ୍‍ନା ୱେରେନାରୁଡ଼ାଦ୍ ୱେଷଡ଼୍ ଇନା ଆତ୍‍ତେ ନୁ ମାନ୍‍ ସତର୍କ ମାଡ଼ାନ୍ ସେଙ୍ଗେ ଆୱୁ ଲେକାଆତ୍‍ତା । ବାତେଙ୍କ୍‍ଇତ୍‍କେ ମାନାଡ଼୍ ଯୁଗ୍ ତେରାନ୍‍ୱେଲେ ବାଦ୍‍କୁତାଡ଼୍ ।
1CO 10:12 ବେନ ଗାଡ଼୍‍ସ୍ ଇଞ୍ଜ ଆଲ୍‍ସିତିଡ଼୍, ଅଣ୍ଡ୍‌ ସାବ୍‍ଦାନ୍ ମାନୁଟ୍ । ଅନାଦ୍‌ ବେଲା ରାଲି ଆନ୍‌‍ମାକିଣ୍ଡ୍ ।
1CO 10:13 ମିଡ଼୍ ବେନ୍ ପରିକ୍ଷା ଇତ୍‍ତିଡ଼୍, ନାରୁଡ଼୍ ଗାଲା ଆଦେରକମ୍ ପରିକ୍ଷା ଇସ୍‍ମାନ୍‍ତଡ଼୍, ଇତ୍‍କେ ଇଶ୍ୱର୍ ତାନ୍ ପ୍ରତିଜ୍ଞାତାଗ୍ ବିଶ୍ୱାସ୍ ମିନ୍ଦେଣ୍ଡ୍ । ଅଣ୍ଡ୍‌ ମିକିଂଙ୍କ୍ ମିୟାଦ୍ ଶାତ୍‍ୱାମ୍‍ତେ ବାୟିଦେ ପରିକ୍ଷା ଇଦାନଙ୍କ୍ ଇୱଣ୍ଡ୍ । ମିଡ଼୍ ପରିକ୍ଷା ଇଦାନ୍‍ୱେଲେ, ଗାଡ଼୍‍ସ୍‍ ଆଦାନଙ୍କ୍ ଇଶ୍ୱର୍ ମିକିଂଙ୍କ୍ ଶାତ୍‍ୱାମ୍ ଇଦ୍‍ତଣ୍ଡ୍ ନୁ ମୁକ୍ତିତେ ଆର୍ର୍ ତଅସିଦ୍‍ତଣ୍ଡ୍ ।
1CO 10:14 ଆଦିଙ୍କ୍ ହୋ ପ୍ରିୟ ସାଙ୍ଗଡ଼ି, ମିଡ଼୍ ପୁତ୍‍ଲାମ୍ ପୁଜା ବନ୍ଦ୍‍ ମାଡ଼ାଟ୍ ।
1CO 10:15 ମିକିଂଙ୍କ୍ ବୁଦ୍‍ନାରୁଣ୍ଡ୍ ଇଞ୍ଜ ନାନ୍ ଇଦ୍ କେତୁତାନ୍, ନାନ୍ ବାତ୍ କେତୁତାନ୍, ଆଦିଙ୍କ୍ ଆଲ୍‍ସାଟ୍ ।
1CO 10:16 ପ୍ରବୁବୋଜ୍‍ତାଗ୍ ମାନାଡ଼୍ ବେନ୍ ଉନ୍ଦାନାଦ୍‍ ଗିନେ ବ୍ୟବହାର୍‌ ମାଡ଼ିତାଡ଼୍, ଆଦିନ୍ ସେଙ୍ଗେ ମାନାଡ଼୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତାଡ଼୍ । ଇଦ୍ ଉନ୍ଦାନ୍‍ ଗିନେତାଗାଙ୍କ୍ ଉନ୍ଦାନ୍ ୱେଲେ ମାନାଡ଼୍ କ୍ରିଷ୍ଟନ୍ ନେତୁର୍‍ତାଗ୍ ବାଗି ଆଦ୍‍ତାଡ଼୍ । ମେଣ୍ଡେ ରୂଟି ଉହୁସ୍ ତିତ୍‍କେ କ୍ରିଷ୍ଟନ୍‍ ମେନ୍ଦୁଲ୍‍ତାଗ୍ ବାଗି ଆଦ୍‍ତାଡ଼୍ ।
1CO 10:17 ମାନାଡ଼୍ ନାର୍‍ଗେ ଆତ୍‍କେ ଗାଲା ରୂଟି ଅଣ୍ଡୟ୍‌ ଆତ୍‍ତାଙ୍କ୍ ମାନାଡ଼୍ ୱେରଡ଼୍ ମେନ୍ଦୁଲ୍ ଆଦ୍‍ତାଡ଼୍, ବାତେଙ୍କ୍‍ଇତ୍‍କେ ମାନାଡ଼୍ ସାର୍ରେତଡ଼୍ ଆଦ୍ ଅଣ୍ଡୟ୍‌ ରୂଟିତାଗ୍ ପାଲ୍‍କିନ୍‌ ସେଙ୍ଗେ ଆଦ୍‍ତାଡ଼୍ ।
1CO 10:18 ଇସ୍ରାୟେଲ୍ ନାରୁଡ଼୍‍ତେ ଗଟ୍ ଆଲ୍‍ସାଟ୍ । ଅଡ଼୍‌ ଲୋପେଙ୍କ୍ ବେନଡ଼୍ ପୁଜ୍‍ତାୱୁ ଆଉଙ୍ଗ୍ ତିନ୍‍ତଡ଼୍, ଅଡ଼୍‌ ବାତ୍ ବେଦିତ୍ ଉପାସନାତାଗ୍ ପାଲ୍‍କ୍ ଆୟଡ଼୍ କି ?
1CO 10:19 ଆଲେକେ ନାନ୍ ବାତ୍ କେତୁତାନ୍ ଜେ, ପୁତ୍‍ଲାମ୍ ନୁ ତାଙ୍କ୍ ଇତ୍‍ତେ ପୁଜ୍‌ତାଦ୍ ବାତ୍ ମୁଲ୍ୟ ମିନ୍ଦେ ?
1CO 10:20 ଇଲ୍‍ଲେ, ବେସୁଟ୍‌ ଆୟ୍‍ୟ । ନାୟାଦ୍ କେତାନାଦ୍ ଇତ୍‍କେ ଆଦୁତ୍‍ତେ ଜେ, ପୁତ୍‍ଲାମ୍ ପୁଜାମାଡ଼ାନଡ଼୍ ଇତ୍‍ତେ ବଲି ଇଶ୍ୱର୍‌ତେ ମାୟ୍‍ଦିଙ୍କ୍ ଆୟ୍‍ୟ, ଆଦ୍ ଶୟ୍‍ତାନ୍‍ତେ ମାୟ୍‍ଦିଙ୍କ୍ ଇତ୍‍ତାଦ୍ । ଶୟ୍‍ତାନ୍‍ ତଡ଼୍ ମିୟାଦ୍ ବାତ୍‍ଆଇ ସମ୍ବନ୍ଦ୍ ମାନୀ ଇଞ୍ଜ ନାନ୍ ଇଚ୍ଛା ମାଡ଼ନ୍ ।
1CO 10:21 ପ୍ରବୁ ନୁ ବୁତ୍, ଇର୍‍ୱୁଡ଼ାଦ୍ ଉନ୍ଦାନ୍ ଗିନେତାଗାଙ୍କ୍ ମିଡ଼୍ ଉନ୍ଦାନଙ୍କ୍ ପାର୍‍ୱିଡ଼୍ । ପ୍ରବୁ ନୁ ବୁତ୍, ଇର୍‍ୱୁଡ଼ାଦ୍ ଟେବୁଲ୍‍ତାଗ୍ ମିଡ଼୍ ବାଗ୍‍ ଆଦାନଙ୍କ୍ ପାର୍‍ୱିଡ଼୍ ।
1CO 10:22 ମାନାଡ଼୍ ବାତ୍ ପ୍ରବୁନ୍ ମନ୍‍ତାଗ୍ ଇର୍ଷା ପୁଟ୍‍ସ୍ପିତାଡ଼୍ ? ମାନାଡ଼୍ ବାତ୍ ଇଶ୍ୱର୍‌ତାଗାଙ୍କ୍ ନାର୍‍ଗେ ଶାତ୍‍ୱାମ୍‍ତଡ଼୍ ?
1CO 10:23 ଅଡ଼୍‌ କେତୁତଡ଼୍, “ସାର୍‍ରେ ମାଡ଼ାନ୍ ସେଙ୍ଗେ ମାନ୍‍ ଅଦିକାର୍‌ ମିନ୍ଦେ ।” ନିଜାମ୍ ଗଟ୍, ଇତ୍‍କେ ସାର୍‍ରେ ବିଷୟ୍ ଲେକେତାୱୁ ଆୟ୍‍ୟ । ମାନାଡ଼୍ ସାର୍‍ରେ ମାଡ଼ାଙ୍କ୍ ପାର୍‍ଦ୍‍ତାଡ଼୍, ଇତ୍‍କେ ସାର୍‍ରେ ବିଷୟ୍ ସାୟେ ଆୟ୍‍ୟ ।
1CO 10:24 ମାତର୍ ନିଜେତ୍ ସ୍ୱାର୍ତତ୍ ସେଙ୍ଗେ ମାନ୍‍ ଇୱକନ୍ସ୍, ସାର୍ରେତଡ଼୍ ଅନ୍‌ନାରୁଡ଼୍‍ତେ ସ୍ୱାର୍ତତ୍ ସେଙ୍ଗେ ମାଡ଼ାନାଦ୍ ସାୟେ ।
1CO 10:25 ବିବେକ୍‍ତିଙ୍କ୍ ସାୟେ ନେଃଏତାନ୍ ସେଙ୍ଗେ ବାତ୍‍ବା ପାଚ୍ରା ମାଡ଼୍‍ୱେ ଆଟିନାଗ୍ ୱାମାନ୍ ଆଉଙ୍ଗ୍ ମିଡ଼୍ ନିଜେତ୍ ଇଚ୍ଛାତେ ତିନ୍ଦାନଙ୍କ୍ ପାର୍‍ଦ୍‍ତିନ୍,
1CO 10:26 ବାତେଙ୍କ୍‍ ଇତ୍କେ ଶାସ୍ତ୍ରବାକ୍ୟ ଇସାବ୍‍ତେ, “ପୃତିବି ନୁ ତାନାଦ୍ ସାର୍‍ରେ ବିଷୟ୍ ପ୍ରବୁନାଦ୍ ।”
1CO 10:27 ଅବିଶ୍ୱାସୀ ନାରୁଡ଼୍ ଲୋପେଙ୍କ୍ ବେନ ଯଦି ମିକିଂଙ୍କ୍ କାର୍‍ଙ୍ଗିତଣ୍ଡ୍ ନୁ ମିଡ଼୍ ଆଦ୍ କେଞ୍ଜିତିଡ଼୍, ଆଲେକେ ମିୟାଦ୍ ମନ୍‍ତିଙ୍କ୍ ବାତ୍‍ବା ପାଚ୍ରା ମାଡ଼୍‍ୱେକନ୍ସ୍, ବାତ୍ ତୁଃସିତ୍‍ତଡ଼୍, ଆଦ୍ ତିନ୍‍ତିଡ଼୍ ।
1CO 10:28 ଇତ୍‍କେ ଆଦ୍ ଦେୟାମ୍‍ ପ୍ରାସାଦ୍‍ତେ ଇଞ୍ଜ ଯଦି ବେନ କେତିତଣ୍ଡ୍, ଅନାଦ୍‌ ଲେକେତ୍‍ ସେଙ୍ଗେ ନୁ ବିବେକ୍‍ ସେଙ୍ଗେ ଆଦ୍ ତିନ୍‍ମାଟ୍ ।
1CO 10:29 ଇଗେ ନାନ୍ ମିୟାଦ୍ ମନ୍‍ତାଦ୍ ଗଟ୍ ଇଞ୍ଜ ନାନ୍ କେଲନ୍, ଅନାଦ୍‌ ମାନ୍‍ତେ ସେଙ୍ଗେ ଇଦ୍ ଗଟ୍ କେତୁତାନ୍ । ମିଡ଼୍ ଆତ୍‍କେ ପାଚ୍ରା ମାଡ଼େ ପାର୍‍ଦ୍‍ତିନ୍, “ମାନ୍‍ ସ୍ୱାଦୀନତା ବାତେଙ୍କ୍ ମେଣ୍ଡେଅର୍‍ତୁନ୍ ବିବେକ୍‍ ତଡ଼୍ ବିଚାର୍ ଆଦ୍‍ତେ ?
1CO 10:30 ଯଦି ନାନ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସ୍ ବେନ୍ କାଦି ତିନ୍ଦୁତାନ୍, ଆଦିଙ୍କ୍ ଦନ୍ୟବାଦ୍ ଇତ୍‍ତେ ବିଷୟ୍ ସେଙ୍ଗେ ନାକିଂଙ୍କ୍ ବାତେଙ୍କ୍ ବେନ ମିଟିଙ୍କ୍ ମାଡ଼ିତନ୍ ?”
1CO 10:31 ଆଦିନ୍‌ସେଙ୍ଗେ ମିଡ଼୍ ତିନ୍ଦାନ୍ ଉନ୍ଦାନ୍ କି ବାତ୍‍ମେଣ୍ଡେ ମାଡ଼ିତିଡ଼୍, ଆଦ୍ ଇଶ୍ୱର୍‌ତେ ଗୌରବ୍‍ତେ ସେଙ୍ଗେ ମାଡ଼ାଟ୍ ।
1CO 10:32 ମିଡ଼୍ ମେଣ୍ଡେଅନ୍‌ ଦେଶ୍‍ତଡ଼ି, ଇହୁଦୀ ବା ଅଣଇହୁଦୀ, ଇଶ୍ୱର୍‌ତେ ମଣ୍ଡଲି, ବେନ ତିପାଲ୍ ଲେକାମ୍ ଆୟ୍‍ମାଟ୍ ।
1CO 10:33 ମିଡ଼୍ ନା ଲେକାମ୍ ବ୍ୟବହାର୍‌ ମାଡ଼ାଟ୍ । ନାନ୍ ସାର୍‍ରେ ବିଷୟ୍‍ତେ ସାର୍ରେତଡ଼୍‍କିଙ୍କ୍ ଶାନ୍ତି ମାଡ଼ାନଙ୍କ୍ ଆଲ୍‍ସି ମାଡ଼ୁତାନ୍ । ନିଜେତାଦ୍ ଚିନ୍ତେ ମାଡ଼୍‍ୱେକନ୍ସ୍, ମେଣ୍ଡେଅଡ଼୍‌‍ତିଡ଼୍ ପରିତ୍ରାଣ୍ ସେଙ୍ଗେ ସାର୍ରେତଡ଼୍‍ୱାଦ୍ ଲେକେତ୍‍ ମାଡ଼ୁତାନ୍ ।
1CO 11:1 ନାନ୍ କ୍ରିଷ୍ଟଙ୍କ୍ ବିଶ୍ୱାସ୍ ମାଡ଼୍‍ତେ ଲେକାମ୍ ମିଡ଼୍ ନାକିଂଙ୍କ୍ ବିଶ୍ୱାସ୍ ମାଡ଼ାଟ୍ ।
1CO 11:2 ନାନ୍ ମିକିଂଙ୍କ୍ ପ୍ରସଂଶା ମାଡ଼ୁତାନ୍, ବାତେଙ୍କ୍‍ଇତ୍‍କେ ମିଡ଼୍ ସାର୍ରେଦାମ୍‌ ନାକିଂଙ୍କ୍ ଏର୍କା ମାଡ଼ୁତିଡ଼୍ ନୁ ନାନ୍ ମିକିଂଙ୍କ୍ ଇତ୍‍ତେ ଶିକ୍ଷା ସାର୍‍ରେ ପାଲନ୍ ମାଡ଼ୁତିଡ଼୍ ।
1CO 11:3 ନାନ୍ ମିକିଂଙ୍କ୍ ବୁଜାମାଡ଼ାନଙ୍କ୍ ଆଲ୍‍ସୁତାନ୍ ଜେ, କ୍ରିଷ୍ଟ ସାର୍‍ରେ ମାନେୟ୍‍ତାଦ୍ ତାଲ୍‍ଲେ ଲେକାମ୍, ମୁଦ୍‍ପାଲ୍ ମୁତ୍‍ତେନ୍ ତାଲ୍‍ଲେ ଲେକାମ୍ ନୁ ଇଶ୍ୱର୍ କ୍ରିଷ୍ଟନ୍ ତାଲ୍‍ଲେ ଲେକାମ୍ ।
1CO 11:4 ଆଦିଙ୍କ୍ ବେନ୍ ମାନେୟ୍‍ତେ ତାଲ୍‍ଲେ ମୁସି ପ୍ରାର୍ତନା ମାଡ଼ିତନ୍ କି ଇଶ୍ୱର୍‌ତାଦ୍ ବାକ୍ୟ ତୁଃସିତଣ୍ଡ୍, ଅଣ୍ଡ୍‌ ନିଜେତ୍ ତାଲ୍‌ଲେ ଯେ କ୍ରିଷ୍ଟ ଅଂକିଙ୍କ୍‌ ମାନେମ୍‍ ଆୟ୍‍ୟଣ୍ଡ୍ ।
1CO 11:5 ମେଣ୍ଡେଅଣ୍ଡ୍‌‍ପାକ୍ ବେନ୍ ନାଟାଡ଼୍ ତାଲ୍‍ଲେ ମୁସି ପ୍ରାର୍ତନା ମାଡ଼ିତେ କି ଇଶ୍ୱର୍‌ତେ ବାକ୍ୟ କେତିତ୍‍, ଆଦ୍ ତାନ୍ ମୁଦ୍‍ପାଙ୍କ୍ ମାନେମ୍‍ ଆୟ୍‍ୟ । ଆଦେରକମ୍ ନାଟାଡ଼୍, କେଲ୍‍କ୍ କୟ୍‍ତେ ଟାକନାଟାଡ଼୍ ଲେକାମ୍ ।
1CO 11:6 ବେନ୍‌ଆଇ ନାଟାଡ଼୍ ଯଦି ତାନ୍ ତାଲ୍‌ଲେତିଙ୍କ୍ ମୁସାନଙ୍କ୍ ଆଲ୍‍ସ, ଆଲେକେ ତାନ୍ ତାଲ୍‌ଲେତ୍ କେଲ୍‍କ୍‍ କୟ୍‍ସିୱିଡ଼୍ । ଇତ୍‍କେ କେଲ୍‍କ୍ କୟ୍‍ସିତ୍‍କେ କି ମୁଣ୍ଡ୍‍ରି ଆତ୍‍କେ, ନାଟାକିଙ୍କ୍ ସିଗ୍ ଆସମାନ୍ଦାଙ୍କ୍, ଆଦ୍ ତାଲ୍‍ଲେ ମୁସାନାଦ୍ ସାୟେ ।
1CO 11:7 ମାନେୟ୍‍ତାଦ୍ ତାଲ୍‍ଲେ ମୁସାନାଦ୍ ଦର୍‍କାର୍ ଇଲ୍‍ଲେ, ଇତ୍‍କେ ଇଶ୍ୱର୍‌ତେ ଲେକାମ୍ ନୁ ମହିମା ଅନାଗ୍ ତଅନ୍‌ଦୁତ୍ । ଇତ୍‍କେ ନାଟାଡ଼୍‍ତାଗ୍ ମାନେୟ୍‍ତାଦ୍ ମହିମା ତଅନ୍‌ଦିତ୍ ।
1CO 11:8 ନାଟାଡ଼୍ ମାନେୟ୍‍ତାଗାଙ୍କ୍ ପୁଟ୍‍ତେ; ଇତ୍‍କେ ମାନେୟ୍‍ ନାଟାଡ଼୍‍ତାଗାଙ୍କ୍ ପୁଟତଣ୍ଡ୍ ।
1CO 11:9 ମେଣ୍ଡେ ମାନେୟ୍‍ତାଦ୍ ତିଆର୍ ନାଟାଡ଼୍ ସେଙ୍ଗେ ଆୟ୍‍ୟ ମାତର୍ ନାଟାଡ଼୍‍ତାଦ୍ ତିଆର୍ ମାନେୟ୍‍ ସେଙ୍ଗେ ଆତ୍‍ତେ । ଆଦିନ୍ ସେଙ୍ଗେ ମାନେୟ୍‍ତାଦ୍ ଅଦିକାର୍‌ ନାଟାଡ଼୍‍ତେ ପର୍‍ର ମିନ୍ଦେ ।
1CO 11:10 ଇଦିନ୍‍ସେଙ୍ଗେ ଦୂତନ୍ ମାୟ୍‍ଦିଙ୍କ୍ ନାଟାଙ୍କ୍ ନିଜେତ୍ ମୁଦ୍‍ପାନ୍ ଅଦିକାର୍‌ତାଗ୍‍ ମାନ୍ଦାନ୍ ନିଦର୍ଶନ୍ ଲେକାମ୍ ତାମ୍ ତାଲ୍‌ଲେତାଗ୍ କକଡ଼୍ ୱାଟାନାଦ୍ ସାୟେ ।
1CO 11:11 ଆଦ୍ ବାତ୍‍ଆଇ, ପ୍ରବୁନ୍ ଗାର୍ରେ ମାନେୟ୍‍ତେ, ନାଟାନାଗାଙ୍କ୍ ୱେର୍ରେ ଆୟ୍‍ୟ, କି ନାଟାଙ୍କ୍, ମାନେୟ୍‍କିନାଗାଙ୍କ୍ ୱେର୍ରେ ଆୟ୍‍ୟ ।
1CO 11:12 ବାତେଙ୍କ୍‍ଇତ୍‍କେ ନାଟାଡ଼୍, ମାନେୟ୍‍ତାଗାଙ୍କ୍ ପୁଟ୍‍ତା, ନୁ ମାନେୟ୍‍ ନାଟାଡ଼୍‍ତାଗାଙ୍କ୍ ଜନମ୍ ଆତ୍‍ତଣ୍ଡ୍ । ମାତର୍ ସାର୍ରେତଡ଼୍‍ୱାଦ୍ ସୃଷ୍ଟି କର୍‌ତ୍ତାଲ୍‌ ଇଶ୍ୱର୍ ।
1CO 11:13 ମିଡ଼୍ ନିଜେ ଆଲ୍‍ସାଟ୍ । ସାର୍ରେତଡ଼୍ ମୁନ୍‍ନେ ପ୍ରାର୍ତନାତାଗ୍ କକଡ଼୍ ୱାଟ୍‍ୱେକନ୍ସ୍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାନାଦ୍, ବାତ୍ ନାଟାଡ଼୍ ସେଙ୍ଗେ ସବାତନ୍ଦିତ୍ ?
1CO 11:14 ଇଦ୍‌ରକମ୍‌ ବାତ୍ ମିକିଂଙ୍କ୍ ଶିକ୍ଷା ଇୱ ଯେ, ଲାଟି କେଲ୍‍କ୍ ମାନେୟ୍‍ତେ ସିଗିନଣ୍ଡ୍,
1CO 11:15 ଇତ୍‍କେ ନାଟାଡ଼୍‍ତିଙ୍କ୍ ଇଦ୍ ୱେଡ଼୍‍କେତାଦ୍ ଗଟ୍ ? ଆୱୁ ଲାଟି କେଲ୍‍କ୍ ତାଙ୍କ୍ ତାଲ୍‌ଲେ ମୁସାନ୍ ସେଙ୍ଗେ ଇତ୍‍ତେ ।
1CO 11:16 ଯଦି ଇଦ୍ ବିଷୟ୍‍ତିଙ୍କ୍ ବେନ ଯୁକ୍ତିତର୍କ ମାଡ଼ାନଙ୍କ୍ ଆଲ୍‍ସିତିଡ଼୍, ଆଲେକେ ଅଂକିଙ୍କ୍‌ ନାୟାଦ୍ ଇସରେ କେତାନାଦ୍, ମାନ୍‍ ଲୋପେ କି ଇଶ୍ୱର୍‌ତେ ଉପବାସ୍ ମଣ୍ଡଲିନାଗ୍ ଉପବାସ୍ ବିଷୟ୍‍ତେ ୱେରେ ବାତ୍ତେ ୱିଡ଼୍‍ସ୍‍କେ ମେଣ୍ଡେ ବାତ୍ ବିଷୟ ଇଲ୍‍ଲେ ।
1CO 11:17 ମଦଲ୍ ମିକିଂଙ୍କ୍ ମେଣ୍ଡେ ବେସ୍‌କ୍ ନିର୍ଦେଶ୍ ଇଦାନ୍‍ୱେଲେ ନାନ୍ ମିକିଂଙ୍କ୍ ପ୍ରସଂଶା ମାଡ଼ି ବାତ୍ କେତାନଙ୍କ୍ ପାର୍‍ୱନ୍ । ମିଡ଼୍ ଉପବାସ୍ ସେଙ୍ଗେ ଅଣ୍ଡୟାଗେ ଆଦାନ୍‍ୱେଲେ, ଇଦ୍ ମିକିଂଙ୍କ୍ ସାୟେ ଆୟ୍‍ୟକଟ ଅନିଷ୍ଟ ଆଦୁତ୍‍ତେ ।
1CO 11:18 ମୁନ୍ନେନେ, କାବୁର୍ ପାଏମ୍ ଆତ୍‍ତାନ୍ ଜେ, ଉପବାସ୍ ଲୋନ୍‌ ଅଣ୍ଡୟାଗେ ଆତ୍‍ତେୱେଲେ ମିଇ ଲୋପେ ୱେଏକ୍‍ ୱେଏକ୍ ମାନ୍ଦେ ତିୟାର୍ ଆଦୁତ୍‍ତେ । ଇଦ୍ ସୁଦୁର୍ ଇନା ସତ୍ ଇଞ୍ଜ ନାୟାଦ୍ ବିଶ୍ୱାସ୍ ।
1CO 11:19 ଆଗେକ୍‍ବା ମିୟାଗ୍ ୱେକ୍ ୱେକ୍ ମାନ୍ଦେ ଆଦ୍‍ତେ ନୁ ଇଦ୍ ରାମ୍‍କିନାଗ୍ ଇଶ୍ୱର୍‌ତେ ମୁନ୍‍ନେ ବେନଡ଼ାଦ୍ ଗଟ୍ ନିଜାମ୍, ପୁନ୍ଦାନଙ୍କ୍ ଆଦ୍‍ତେ ।
1CO 11:20 ମିଡ଼୍ ୱେରଡ଼୍ ମାନ୍ଦେ ଲେକାମ୍ ଅଣ୍ଡୟାଗେ ଆସ୍ ବେନ୍ ତିନ୍ଦାନାଗ୍ ପାଲ୍‍କ୍ ଆଦୁତିଡ଼୍, ଆଦ୍ “ପ୍ରବୁବଜ୍ ଇଞ୍ଜ ଆଲ୍‍ସୁତିଡ଼୍ ମାତର୍ ଆୟ୍‍ୟ,”
1CO 11:21 ବାତେଙ୍କ୍‍ଇତ୍‍କେ ଆସୁଟେ ମିଡ଼୍ ସାର୍ରେତଡ଼ି ନିଜେତ୍ ନିଜେତ୍ କାଦି ତିନ୍ଦାନାଗ୍ ଦାନ୍ଦେ ଆସ୍ ମାନ୍‍ତିଡ଼୍ । ଆଦିଙ୍କ୍ ୱେରଣ୍ଡ୍ କାର୍‍ୱିନ୍ ମାନ୍ଦାନ୍‍ୱେଲେ ମେଣ୍ଡେଆର୍‍ତୁଣ୍ଡ୍ ଆସି ମାନ୍‍ତଣ୍ଡ୍ ।
1CO 11:22 ତିନ୍ଦାନ୍ ଉନ୍ଦାନ୍ ସେଙ୍ଗେ ବାତ୍ ମିୟାଦ୍ ନିଜେତ୍ ଲୋନ୍‌ ଇଲ୍‍ଲେ ? ବା ଇଶ୍ୱର୍‌ତେ ମଣ୍ଡଲିତିଙ୍କ୍ ବୁସା ବୁଦ୍‍ତେ ମାଡ଼ାନାଦ୍ ନୁ ଅବାବ୍‍ତଡ଼୍ ନାରୁଡ଼୍‍କିଂଙ୍କ୍ ଅପ୍‍ମାନ୍ ଇଦାନ୍, ବାତ୍ ମିୟାଦ୍ ଉଦେଶ୍ୟ ? ନାନ୍ ମିକିଂଙ୍କ୍ ଇଦ୍ ବିଷୟ୍‍ତେ ବାତ୍ କେତିତାନ୍ ? ବାତ୍ ମିକିଂଙ୍କ୍ ପ୍ରସଂଶା ମାଡ଼ିତାନ୍ ? ଇଲ୍‍ଲା, ଇଦ୍ ବିଷୟ୍‍ତେ ନାନ୍ ମିକିଂଙ୍କ୍ ପ୍ରସଂଶା ମାଡ଼ାନଙ୍କ୍ ପାର୍‍ୱନ୍ ।
1CO 11:23 ଇଦ୍ ବିଷୟ୍‍ତେ ନାନ୍ ପ୍ରବୁନାଗାଙ୍କ୍ ବେନ୍ ଶିକ୍ଷା ପାଏମ୍ ଆତ୍‍ତାନ୍, ମିକିଂଙ୍କ୍ କେତୁତାନ୍ । ପ୍ରବୁ ଜିସୁ ଶତ୍ରୁଡ଼୍ କାୟ୍‍ଦେ ସର୍ପା ଆତ୍‍ତେ ନାର୍‍କେତ୍ ରୂଟି ଅସ୍,
1CO 11:24 ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସ୍, ଆଦ୍ ଉହୁସ୍ କେତ୍‍ତଣ୍ଡ୍, “ଇଦ୍ ଆଦୁତ୍‍ତେ ମିଇ ସେଙ୍ଗେ ନାୟାଦ୍ ମେନ୍ଦୁଲ୍ । ନାକିଂଙ୍କ୍ ଏର୍କା ମାଡ଼ାନ୍ ସେଙ୍ଗେ ଇଦ୍‍ରକମ୍ ମାଡ଼ାଟ୍ ।”
1CO 11:25 ତିତ୍‍ତେ ପେର୍‍କେ ଆଦେପୁଟୁଙ୍କ୍ ଉନ୍ଦାନ୍‍ ଗିନେ ତେଏସ୍ ଅଣ୍ଡ୍‌ କେତ୍‍ତଣ୍ଡ୍, “ଇଦ୍ ଉନ୍ଦାନ୍‍ ଗିନେ ନାୟାଦ୍ ନେତୁର୍‍ତେ ତିୟାର୍‍ ଆତ୍‍ତେ ଇଶ୍ୱର୍‌ତାଦ୍ ପୁଃନେ ନିୟମ୍ । ମିଡ଼୍ ବେସର୍ ଦାମ୍ ଇଦ୍ ଗିନେତାଗାଙ୍କ୍ ଉନ୍‍ତିଡ଼୍, ଆସର୍ ଦାମ୍ ନାକିଂଙ୍କ୍ ଏର୍କା ମାଡ଼ାନଙ୍କ୍ ଇଲା ମାଡ଼ିତିଡ଼୍ ।”
1CO 11:26 ଇଗାଙ୍କ୍ ଇଦ୍ ପୁନ୍ଦାନଙ୍କ୍ ଆଦୁତ୍‍ତେ ଜେ, ମିଡ଼୍ ବେସର୍ ଦାମ୍ ଇଦ୍ ରୂଟି ତିନ୍‍ତିଡ଼୍ ନୁ ଇଦ୍ ଉନ୍ଦାନ୍‍ ଗିନେତାଗାଙ୍କ୍ ଉନ୍‍ତିଡ଼୍, ଆସର୍ ଦାମ୍ ପ୍ରବୁ ୱାଦାନ୍ ଦିନାମ୍ ଯାକ ଅନାଦ୍‌ ଡଲ୍‍ତାଦ୍ କାବୁର୍ କେତିତିଡ଼୍ ।
1CO 11:27 ଇତ୍‍କେ ବେନ ଅଯୋଗ୍ୟ ଇନା ପ୍ରବୁନ୍ ଏର୍କେ ମାଡ଼ାନ୍ ରୂଟି ତିନ୍‍ତଣ୍ଡ୍ ନୁ ଉନ୍ଦାନ୍‍ ଗିନେତାଗାଙ୍କ୍ ଉନ୍‍ତଣ୍ଡ୍, ଅଣ୍ଡ୍‌ ପ୍ରବୁନ୍ ମେନ୍ଦୁଲ୍ ନୁ ନେତୁର୍ ବିରୁଦ୍‍ତେ ପାପ୍ ମାଡ଼ିତନ୍ ।
1CO 11:28 ଆଦିଙ୍କ୍ ଇଦ୍ ରୂଟି ତିନ୍ଦାନ୍ ମୁନେଙ୍କ୍ ନୁ ଉନ୍ଦାନ୍‍ ଗିନେତାଗାଙ୍କ୍ ଉନ୍ଦାନ୍ ମୁନେଙ୍କ୍ ସାର୍ରେତଡ଼୍ ନିଜେତ୍ ଆତ୍ମା ପରିକ୍ଷା ମାଡ଼ାଟ୍ ।
1CO 11:29 ବାତେଙ୍କ୍‍ଇତ୍‍କେ ବେନ୍ ନାରୁଡ଼୍ ପ୍ରବୁନ୍ ମେନ୍ଦୁଲ୍‍ତେ ନିଜାତେ ଇତ୍‍କେ ପୁନ୍‍ୱେକନ୍‍ସ୍ ତିନ୍‍ତଣ୍ଡ୍ ନୁ ଉନ୍‍ତଣ୍ଡ୍, ଅଣ୍ଡ୍‌ ନିଜାମ୍ ଦଣ୍ଡ୍ ପାଏମ୍ ଆଦ୍‍ତନ୍ ।
1CO 11:30 ଆଦିନ୍ ସେଙ୍ଗେ ମିଇ ଲୋପେଙ୍କ୍ ନେଣ୍ଡ୍ ନାର୍‍ଗେ ଶାତ୍‍ୱାମ୍ ଇଲ୍‍ୱେ ନାରୁଡ଼୍, ରୋଗିନାରୁଡ଼୍ ନୁ ଡଲାନଣ୍ଡ୍ ଲେକାମ୍ ଆଦ୍‍ତଡ଼୍ ।
1CO 11:31 ବାତେଙ୍କ୍ ଇତ୍‍କେ ମୁନେନ୍‍କନ୍ସ୍ ନିଜେତ୍ ନିଜେତ୍ ଆତ୍ମା ସାୟେ ମାଡ଼ି ପାଡ଼୍‍ୟି ମାଡ଼୍‍କେ, ମାନାଡ଼୍ ଇଶ୍ୱର୍‌ତେ ଦଣ୍ଡ୍ ପାଏମ୍ ଆୟ୍‍ୱାଡ଼୍,
1CO 11:32 ଇତ୍‍କେ ଜଗତ୍‍ତାଦ୍ ତେରାନାଦ୍ ଦଣ୍ଡ୍‍ତାଗାଙ୍କ୍ ମାନ୍‍ ରକ୍ଷା ମାଡ଼ାନ୍ ସେଙ୍ଗେ ଇଶ୍ୱର୍ ମାନ୍‍ ତିପାଲ୍ ଇସ୍ ସମାଦାନ୍ ମାଡ଼ୁତଣ୍ଡ୍ ।
1CO 11:33 ଆଦିଙ୍କ୍ ସାଙ୍ଗଡ଼ି, ମିଡ଼୍ ପ୍ରବୁବଜ୍ ସେଙ୍ଗେ ଅଣ୍ଡୟାଗେ ଆଦାନ୍‍ୱେଲେ ମିଡ଼୍ ମିଇ ସେଙ୍ଗେ କେପାଟ୍ ।
1CO 11:34 ମିୟାଦ୍ ଅଣ୍ଡୟାଗେ ଆତ୍‍ତାଦ୍ ବେଲା ଇଶ୍ୱର୍‌ତେ ଦଣ୍ଡ୍‍ତାଦ୍ ବାତେଙ୍କ୍ ଇତ୍‍କେ ଆୟ୍‍ମାକି, ଆଦିନ୍ ସେଙ୍ଗେ ବେନ ଯଦି କାର୍‍ୱିଡ଼୍ ମିନ୍ଦେଣ୍ଡ୍, ଆଲେକେ ଅଣ୍ଡ୍‌ ଲୋନ୍‌ ତିଞ୍ଜ୍ ୱାଡ଼ିଣ୍ଡ୍ । ମେଣ୍ଡେବାଗାତ୍ ବିଷୟ୍ ନାନ୍ ଆତ୍‍କେ ବୁଜାମାଡ଼ିତାନ୍ ।
1CO 12:1 ଦାଦାଲଡ଼ି ନୁ ଏଲାସ୍କ୍‍, ପବିତ୍ର ଆତ୍ମାତେ ଦାନ ବିଷୟ୍‍ତେ ନାନ୍ ମିକିଂଙ୍କ୍ ନିଜାତାଦ୍ ସତ୍ କେତାନଙ୍କ୍ ଆଲ୍‍ସୁତାନ୍ ।
1CO 12:2 ମିଡ଼୍ ପୁତ୍‍ତିଡ଼୍ ଜେ, ଅଣଇହୁଦୀ ମାତ୍‍ତେ ୱେଲେ, ଜିୱୁଣ୍ଡ୍ ଇଲ୍‍ୱା ପୁତ୍‍ଲାକିଙ୍କ୍ ପୁଜାମାଡ଼ି ଆର୍‌ ବୁଲ୍‍କା ଆସ୍‍ମାତ୍‍ତିଡ଼୍ ।
1CO 12:3 ଆଦିନ୍ ସେଙ୍ଗେ ମିଡ଼୍ ପୁନ୍ଦାନାଦ୍ ଦର୍‍କାର୍ ଜେ, ଇଶ୍ୱର୍‌ତେ ଆତ୍ମାତଡ଼୍ ଚାଲେମ୍ ଆସ୍ ବେନ କେତାନଙ୍କ୍ ପାର୍‍ୱଣ୍ଡ୍, “ଜିସୁ ଅବିଶାପ୍‌” ମେଣ୍ଡେ ପବିତ୍ର ଆତ୍ମାତଡ଼୍ ଚାଲେମ୍ ଆୟକ୍, ବେନ ଜିସୁଙ୍କ୍ ପ୍ରବୁ ଇଞ୍ଜ ସ୍ୱୀକାର୍ ମାଡ଼ାନଙ୍କ୍ ପାର୍‍ୱଣ୍ଡ୍ ।
1CO 12:4 ପବିତ୍ର ଆତ୍ମାତାଦ୍ ଦାନ ନାର୍‍ଗେ ଲେକାତ୍, ଇତ୍‍କେ ଆଦ୍ ଅଣ୍ଡୟ୍‌ ପବିତ୍ର ଆତ୍ମା ଆୱୁ ସାର୍‍ରେ ଇଦ୍‍ତେ ।
1CO 12:5 ନାର୍‍ଗେ ଲେକାତ୍ ସେବା ପାଡ଼୍‍ୟି ମାଡ଼ମାତ୍‍କେ ଗାଲା ଅଣ୍ଡୟ୍‌ ପ୍ରବୁନାଦ୍ ସେବା ଆଦ୍‍ତେ ।
1CO 12:6 ପାଡ଼୍‍ୟି ମାଡ଼ାନ୍ ଶାତ୍‍ୱାମ୍ ନାର୍‍ଗେ ଲେକାତ୍, ଇତ୍‍କେ ଅଣ୍ଡୟ୍‌ ଇଶ୍ୱର୍ ଆୱୁ ସାର୍‍ରେ ଶାତ୍‍ୱାମ୍ ଇଦ୍‍ତେ ।
1CO 12:7 ସାର୍ରେତଡ଼୍‍ୱାଦ୍ ଲେକେତ୍‍ ମାଡ଼ାନ୍ ସେଙ୍ଗେ ସାର୍‍ରେ ନାରୁଣ୍ଡ୍‍ ଲୋପେ ପବିତ୍ର ଆତ୍ମାତେ ଶାତ୍‍ୱାମ୍ ନାର୍‍ଗେ ରକମ୍ ତଅନ୍‌ଦିତ୍ ।
1CO 12:8 ପବିତ୍ର ଆତ୍ମାତ୍ ଅନୁଗ୍ରହତେ ବେନ ବୁଦ୍ ନାରୁଡ଼୍ ଆଦ୍‍ତନ୍ ନୁ ମେଣ୍ଡେ ବେନ ଜ୍ଞାନି ଆଦ୍‍ତନ୍ ।
1CO 12:9 ଆଦ୍ ୱେରଡ଼୍ ପବିତ୍ର ଆତ୍ମା ବେନଙ୍କ୍ ଇଦ୍‍ତେ ବିଶ୍ୱାସ୍ ନୁ ବେନଙ୍କ୍ ଇଦ୍‍ତେ ସୁସ୍ଥ ମାଡ଼ାନାଦ୍ ଶାତ୍‍ୱାମ୍;
1CO 12:10 ବେନଙ୍କ୍ ଇଦ୍‍ତେ ଆଶ୍ଚର୍ଯ୍ୟ ପାଡ଼୍‍ୟି ମାଡ଼ାନ୍ ଶାତ୍‍ୱାମ୍, ବେନଙ୍କ୍ ଇଦ୍‍ତେ ଇଶ୍ୱର୍‌ତେ ବାକ୍ୟ କେତାନଙ୍କ୍ ଶକ୍ତି ନୁ ବେନଙ୍କ୍ ବାତ୍‍ବାତ୍ ପବିତ୍ର ଆତ୍ମା ନୁ କାରାପ୍ ଆତ୍ମା ଏଞ୍ଚାନ୍ ଶକ୍ତି; ମେଣ୍ଡେ ଅଣ୍ଡ୍‌ ବେନଙ୍କ୍ ଇଦ୍‍ତଣ୍ଡ୍ ବାତ୍‍ବାତ୍ ଗଟିନେ ତିର୍‍ୟାନାଦ୍ ଶକ୍ତି ନୁ ମେଣ୍ଡେ ବେନଙ୍କ୍ ଇଦ୍‍ତଣ୍ଡ୍ ଆଦ୍ ଗଟ୍‍ତାଦ୍ ଇତ୍‍କେ ବୁଜାମାଡ଼ାନାଦ୍ ଶକ୍ତି ।
1CO 12:11 ଇତ୍‍କେ ଇୱୁସାର୍ରେ ଆଦ୍ ୱେରଡ଼୍ ଆତ୍ମା କେ ମାଡ଼ିତ୍ । ଅଣ୍ଡ୍‌ ନିଜେତ୍ ଇଚ୍ଛା ଲେକାମ୍ ସାର୍‍ରେ ନାରୁଙ୍କ୍ ୱେକ୍ ୱେକ୍ ବିଷୟ୍ ଦାନ ମାଡ଼ିତନ୍ ।
1CO 12:12 କ୍ରିଷ୍ଟ ନାର୍‍ଗେ ଦୁଡ଼ା କାୟ୍‍ଲ୍‍ତେ ଅଣ୍ଡୟ୍‌ ମେନ୍ଦୁଲ୍ ଲେକାମ୍ । ନାର୍‍ଗେ ଅଂକିଙ୍କ୍‌ ତଡ଼୍ କାୟ୍‍ଲିମାତ୍‍କେ ଗାଲା, ମେନ୍ଦୁଲ୍ ଅଣ୍ଡୟ୍‌ ।
1CO 12:13 ଆଦେରକମ୍ ଇହୁଦୀ, ଅଣଇହୁଦୀ, କ୍ରୀତଦାସ ନୁ ସ୍ୱାଦିନ୍ ନାରୁଡ଼୍ ସାର୍ରେପେର୍କେ ମାନାଡ଼୍ ସାର୍ରେତଡ଼୍ ଅଣ୍ଡୟ୍‌ ଆତ୍ମାତେ ତଡ଼୍ ଏର୍‍ଦିକ୍ଷାତାଗ୍ ବାପ୍ତିସ୍ମ ଅସ୍ ଆଦ୍ ଅଣ୍ଡୟ୍‌ ମେନ୍ଦୁଲ୍‍ତାଗ୍ କାୟ୍‍ଲ୍‍ତମ୍, ଅଣ୍ଡୟ୍‌ ଆତ୍ମାତିଙ୍କ୍ ଉନ୍ଦୁତାଡ଼୍ ।
1CO 12:14 ମେନ୍ଦୁଲ୍ ଅଣ୍ଡୟ୍‌ ଦୁଡ଼େ ତଡ଼୍ ତିୟାର୍ ଆୟ୍‍ୟ । ମାତର୍ ଇଦ୍ ନାର୍‍ଗେ ଦୁଡ଼େ ତଡ଼୍ ତିୟାର୍ ଆତ୍‍ତେ ।
1CO 12:15 ଡେକେ ଯଦି କେତିତ୍‍, “ନାନ୍ କାୟ୍ ଆୟନ୍, ଆଦିଙ୍କ୍ ମେନ୍ଦୁଲ୍‍ତେ ଦୁଡ଼େ ଆୟନ୍,” ଆଲେକେ ଇଦ୍ କାରନ୍‍ତେ ମାୟ୍‍ଦିଙ୍କ୍ ଆଦ୍ ମେନ୍ଦୁଲ୍‍ତଡ଼୍ କାୟ୍‍ଲ୍‍ୱେକଞ୍ଚ୍‍ ମାନ୍ଦାନଙ୍କ୍ ପାର୍‍ୱ ।
1CO 12:16 କେୱୁ ଯଦି କେତିତ୍‍, “ନାନ୍ କଣ୍ଡା ଆୟନ୍, ଆଦିଙ୍କ୍ ମେନ୍ଦୁଲ୍‍ତେ ଦୁଡ଼େ ଆୟନ୍,” ଆଲେକେ ଇଦ୍ ବାତେଙ୍କ୍ ଇତ୍‍କେ ମାୟ୍‍ଦିଙ୍କ୍ ଆଦ୍ ମିକା ମେନ୍ଦୁଲ୍‍ତାଗାଙ୍କ୍ ୱେର୍ରେ ଆସ୍ ମାନ୍ଦାନଙ୍କ୍ ପାର୍‍ୱ ।
1CO 12:17 ସାର୍‍ରେ ମେନ୍ଦୁଲ୍ ଯଦି ଆସାମ୍ କଣ୍ଡା ଆଦ୍‍ତେ, ଆଲେକେ ବେଲା କେଞ୍ଜାନଙ୍କ୍ ଆଦ୍‍ତେ ? ମେଣ୍ଡେ ଆଦ୍ ଯଦି ଆସାମ୍ କେୱୁକ୍‍ ଆଦ୍‍ତେ, ଆଲେକେ ବେଲା ନେସ୍କାନଙ୍କ୍ ଆଦ୍‍ତେ ?
1CO 12:18 ନିଜାମ୍, ଇଶ୍ୱର୍ ୱେର୍ରେ ୱେର୍ରେ ଦୁଡ଼େ ମେନ୍ଦୁଲ୍‍ତେ ୱେକ୍‍ୱେକ୍ ପଡ଼୍‍ୟେତାଗ୍ ନିଜେତ୍ ଇଚ୍ଛାତେ ଉର୍‍ସ୍କିତ୍‍ତଣ୍ଡ୍ ।
1CO 12:19 ଆୱୁସାର୍ରେ ମାତର୍ ଅଣ୍ଡୟ୍‌ ମେନ୍ଦୁଲ୍ ଆସ୍‍ମାତ୍‍କେ, ମେନ୍ଦୁଲ୍ ବେଲା ତିୟାର୍ ଆୟେଡ଼୍ ?
1CO 12:20 ଆଦିଙ୍କ୍ ନାର୍‍ଗେ ଦୁଡ଼ା ଆତ୍‍କେ ମିକା ମେନ୍ଦୁଲ୍ ଅଣ୍ଡୟ୍‌ ।
1CO 12:21 ଆଦିଙ୍କ୍ କଣ୍ଡା କାୟ୍‍ଦିଙ୍କ୍ କେତାନଙ୍କ୍ ପାର୍‍ୱ, “ନାନ୍ ନିକିଂଙ୍କ୍ ଦର୍‍କାର୍ ଆୟନ୍ ।” କି ତାଲ୍‍ଲେ ରେଣ୍ଡ୍ ଡେକାଙ୍କ୍ କେତାନଙ୍କ୍ ପାର୍‍ୱ, “ନିୟାଗ୍ ନାୟାଦ୍ ବାତ୍ ଦର୍‍କାର୍ ଆୟ୍‍ୟ ।”
1CO 12:22 ମେଣ୍ଡେଅଣ୍ଡ୍‌ ରକମ୍, ମେନ୍ଦୁଲ୍‍ତାଗ୍ ବେନ୍ ଦୁଡ଼ା ଶକ୍ତି ଇଲ୍‍ଲେ ଇଞ୍ଜ ଆଲ୍‍ସ୍‍କେ, ଆୱୁ ଦର୍‍କାର୍ ଆୟ୍‍ୟ ।
1CO 12:23 ମେନ୍ଦୁଲ୍‍ତାଗ୍ ବେନ୍ ଦୁଡ଼ା ମାନାଡ଼୍ ଗାଟି ଦର୍‍କାର୍ ଆୟ୍‍ୟ ଇଞ୍ଜ ଆଲ୍‍ସିତାଡ଼୍, ଆୱିଙ୍କ୍ ମାନାଡ଼୍ ଗାଟି ଜତନ୍ ଆଦ୍‍ତାଡ଼୍ । ମେଣ୍ଡେ ମେନ୍ଦୁଲ୍‍ତାଗ୍ ମିଞ୍ଜିମାନ୍ଦାନ୍ ଦୁଡ଼ା ସେଙ୍ଗେ ମାନାଡ଼୍ ଗାଟି ମାନ୍‍ ଇଦ୍‍ତାଡ଼୍,
1CO 12:24 ମେନ୍ଦୁଲ୍‍ତାଗ୍ ସୁନ୍ଦର୍ ଦୁଡ଼ା ସେଙ୍ଗେ ମାନାଡ଼୍ ଆସର୍ ମାନ୍‍ ଇୱାଡ଼୍ । ଇଶ୍ୱର୍ ନିଜେ ମେନ୍ଦୁଲ୍‍ତିଙ୍କ୍ ଇଦ୍ ରକମ୍ ତିୟାର୍ ମାଡ଼୍‍ତଣ୍ଡ୍ ଜେ, ବେନ୍ ଦୁଡ଼ାକିଙ୍କ୍‌ ଯତନ୍ ଦର୍‍କାର୍, ନିଜାମ୍ ଆୱିଙ୍କ୍ ଗାଟି ସାର୍‍ଦେ ଦର୍‍କିତ୍ ।
1CO 12:25 ଆଦିଙ୍କ୍ ମେନ୍ଦୁଲ୍ ଲୋପେ ବାତ୍‍ବା ଗଲ୍‍କ୍ ତିୟାର୍ ଆୟ୍‍ୟ, ଇତ୍‍କେ ୱେକ୍ ୱେକ୍ ଦୁଡ଼ା ତାମ୍‍ତାମ୍ ଲୋପେ ଦର୍‍କାର୍ ବୁଜେମ୍ ଆଦ୍‍ତେ ।
1CO 12:26 ମେନ୍ଦୁଲ୍‍ତେ ଅଣ୍ଡୟ୍‌ ଦୁଡ଼େତାଗ୍ କଷ୍ଟ ଆତ୍‍କେ, ମେଣ୍ଡେ ସାର୍‍ରେ ଦୁଡ଼ା ଆଦ୍ କଷ୍ଟ ପାଏମ୍ ଆଦ୍‍ତେ । ୱେରଡ଼୍ ଦୁଡ଼ା ଗୌରବ୍‍ ଆତ୍‍କେ, ମେଣ୍ଡେ ସାର୍‍ରେ ଦୁଡ଼ା ଆଦ୍ ୱେଡ଼୍‍କେତାଗ୍ ପାଲ୍‍କ୍ ଆଦ୍‍ତା ।
1CO 12:27 ମିଡ଼୍ କ୍ରିଷ୍ଟନ୍ ମେନ୍ଦୁଲ୍ । ମିଡ଼୍ ସାର୍ରେତଡ଼୍ ଆଦ୍ ମେନ୍ଦୁଲ୍‍ତେ ଅଣ୍ଡୟ୍‌ ଦୁଡ଼ା ।
1CO 12:28 ମଣ୍ଡଲିତାଗ୍ ଇଶ୍ୱର୍ ମୁନେନ୍ ପ୍ରେରିତ୍ ଶିଷ୍ୟଡ଼୍‍କିଂଙ୍କ୍, ଦ୍ୱିତୀୟଦାମ୍ ବବିଷ୍ୟତ୍‍ ବକ୍ତାଲଡ଼୍‍କିଙ୍କ୍, ତୃତୀୟଦାମ୍ ଶିକ୍ଷା ଗୁରୁଡ଼୍‍କ୍, ତାନ୍‍ପେର୍କେ ଆଶ୍ଚର୍ଯ୍ୟ ପାଡ଼୍‍ୟି ମାଡ଼ାନଡ଼୍‍କ୍, ରୋଗ୍ ସାୟେ ମାଡ଼ାନଡ଼୍‍କ୍, ସାହାଯ୍ୟ ମାଡ଼ାନଡ଼୍‍କ୍, ଶାସନ୍‍ ମାଡ଼ାନଡ଼୍‍କ୍ ନୁ ନାର୍ଗେପ୍ରକାର୍ ଗଟି ତିର୍‍ୟାନଡ଼୍‍କ୍ ନିଯୁକ୍ତି ମାଡ଼୍‍ତଣ୍ଡ୍ ।
1CO 12:29 ଅଡ଼୍‌ ସାର୍ରେତଡ଼୍ ପ୍ରେରିତ୍ ଶିଷ୍ୟ, ବବିଷ୍ୟତ୍‍ବକ୍ତା କି ମେସ୍ତେରିଡ଼୍ ଆୟ୍‍ୟଡ଼୍ । ଆଶ୍ଚର୍ଯ୍ୟ ପାଡ଼୍‍ୟି ମାଡ଼ାନ୍ ଶକ୍ତି ସାର୍ରେତଡ଼ାଗ୍ ଇଲ୍‍ଲେ ।
1CO 12:30 ସାର୍ରେତଡ଼୍ ରୋଗ୍ ସାୟେ ମାଡ଼ାନଙ୍କ୍, ୱେକ୍‍ୱେକ୍ ଗଟି ତିର୍‍ୟାନଙ୍କ୍ ନୁ ଆୱୁ ସାର୍ରେତାୱିନ୍ ଇତ୍‍କେ ବୁଜାମାଡ଼ାନଙ୍କ୍ ପାର୍‍ୱଡ଼୍ ।
1CO 12:31 ମିଡ଼୍ ସାୟେତ୍ ଦାନ ପାଏମ୍ ଆଦ୍‍ଦାନ୍ ସେଙ୍ଗେ ତିୟାର୍‍ ଆୟି ମାନୁଟ୍ । ନାନ୍‍ନେ ମିକିଂଙ୍କ୍ ଇଦିନାଗାଙ୍କ୍ ସାୟେତ୍ ଅଣ୍ଡୟ୍‌ ଉପାୟ୍ ତଅତିତାନ୍ ।
1CO 13:1 ନାନ୍ ନାରୁଡ଼ାଦ୍ ଗଟ୍ ଦୂତନ୍ ଗଟ୍‍ତେ କେତ୍‍ ପାର୍‍କେ ମିକା, ନା ଜିୱୁଣ୍ଡ୍‍ତାଗ୍ ପ୍ରେମ ଇଲୁକ୍, ନାନ୍ ମାତର୍ ଅଣ୍ଡୟ୍‌ ଲେଙ୍ଗ୍‍ଦେ ନେକାନ୍ ଗାଣ୍ଟା, ଇଲୁକ୍ ଅଣ୍ଡୟ୍‌‍ତଡ଼୍ ପେଞ୍ଚାନ୍ କାୟ୍‍କ୍ ଲେଙ୍ଗ୍ ।
1CO 13:2 ସାୟେ ଗଟ୍‍ତେ ଇଶ୍ୱର୍‌ତେ କାବୁର୍‍ କେତାନଙ୍କ୍ ନାୟାଗ୍ ଶାତ୍‍ୱାମ୍ ମାତ୍‍କେମିକା । ସାର୍‍ରେ ବିଷୟ୍‍ତେ ବୁଦ୍ ମାତ୍‍କେମିକା, ସାର୍‍ରେ ଲୋପେତ୍ ବିଷୟ୍ ବୁଜେମ୍ ଆଦାନଙ୍କ୍ ଶାତ୍‍ୱାମ୍ ମାତ୍‍କେମିକା, ବିଶ୍ୱାସ୍ ତଡ଼୍ ମେଟେତିଙ୍କ୍ ଗୁସ୍‍ପାନଙ୍କ୍ ବପୁ ମାତ୍‍କେମିକା; ଆଗେକ୍‍ବା ନାୟାଦ୍ ପ୍ରେମ୍ ଇଲୁକ୍, ନାନ୍ ବାତ୍ ଆୟନ୍ ।
1CO 13:3 ଯଦି ନାନ୍ ଗରିବ୍ ନାରୁଡ଼୍‍କ୍ ନାର୍‍ଗେ ଦାନ ମାଡ଼େପାର୍‍ଦ୍‍ତାନ୍ ବା କିସ୍‍ତାଗ୍ କାର୍‍ୱାନଙ୍କ୍ ନା ମେନ୍ଦୁଲ୍‍ତିଙ୍କ୍ ଇଦେପାର୍‍ଦ୍‍ତାନ୍, ଆଗେକ୍‍ବା ନା ଜିୱୁଣ୍ଡ୍‍ତାଗ୍ ପ୍ରେମ୍ ଇଲ୍‍ଲେ, ଆୱୁସାର୍ରେ ନା ସେଙ୍ଗେ ଆଙ୍ଗ୍‍ଡ଼ାମ୍ ।
1CO 13:4 ପ୍ରେମ ଗାଡ଼୍‍ସ୍ ନୁ ସାୟେ । ପ୍ରେମ୍ କପାମ୍ ବା ଅବିମାନ୍ ବା ଅହଙ୍କାରୀ ଆୟ୍‍ୟ ।
1CO 13:5 ପ୍ରେମ୍ ରୁକ୍ଷ ବା ସ୍ୱାର୍ତପର୍ ଆୟ୍‍ୟ, ଆଙ୍ଗ୍‍ଡ଼ାମ୍ କପାମ୍ ଆୟ୍‍ୟ । ପ୍ରେମ ତାନ୍ ସେଙ୍ଗେ ମାଡ଼୍‍ତେ ଅନ୍‌ୟାୟ୍‍ତାଦ୍ ଇସାପ୍ ନେଃଏୱ ।
1CO 13:6 ପ୍ରେମ ଅଦର୍ମତଡ଼୍ ୱେଡ଼୍‍କ୍‍ ମାଡ଼, ସତ୍ ତଡ଼୍ ଆଦିନାଦ୍ ୱେଡ଼୍‍କ୍‍ ।
1CO 13:7 ପ୍ରେମ ସାର୍‍ରେ ସାରେ ମାଡ଼ିତ୍ । ଆଦିନାଦ୍ ସାର୍‍ରେ ବିଶ୍ୱାସ୍ ମାଡ଼ିତ୍, ସାର୍‍ରେ ଆଶେ ମାଡ଼ିତ୍; ବାତ୍‍ଆଇ ତିପାଲ୍‍ୱେଲେ ଗାଡ଼୍‍ସ୍‍ ଆରେମ୍ ଆୟ୍‍ୟ ।
1CO 13:8 ପ୍ରେମ ବେସୁଟ୍‌ ତେର । ଇଶ୍ୱର୍‌ତାଗାଙ୍କ୍ କାବୁର୍‍ ମାଇ ଆଦ୍‍ତେ । ଆଶ୍ଚର୍ଯ୍ୟ ଗଟ୍‍ତେ ତିର୍‍ୟାନାଦ୍ ଶକ୍ତି ଦଂସ ଆଦ୍‍ତେ, ନାରୁଡ଼ାୱୁ ବୁଦ୍‍ତେ ମାୟିଆଦ୍‍ତେ ।
1CO 13:9 ବାତେଙ୍କ୍‍ଇତ୍‍କେ ମାନ୍‍ ବୁଦ୍‍ତେ ଦାନାମ୍ ନୁ ଇଶ୍ୱର୍‌ତାଗାଙ୍କ୍ କାବୁର୍ କେତାନାଦ୍ ଦାନ ମାତର୍ ସୁଦୁଟ୍ ସମୟ୍‍ତିଙ୍କ୍ ।
1CO 13:10 ଇତ୍‍କେ ସାର୍‍ରେ ବିଷୟ୍‍ତାଦ୍ ସାରେ ଆତ୍‍କେ, ଇୱୁ ସୁଦୁଲାୱୁ ବିଷୟ୍ ସାର୍‍ରେ ମାୟିଆଦ୍‍ତା ।
1CO 13:11 ନାନ୍ ସୁଦୁର୍ ମାନ୍ଦାନ୍‍ୱେଲେ ନାୟାୱୁ ଗଟି, ଆଲ୍‍ସାନାଦ୍ ନୁ ଚିନ୍ତେ ପିଲାନ୍ ଲେକାମ୍ ମାତ୍‍ତା । ଇତ୍‍କେ ବୟସ୍‍ ଆତ୍‍ତେ ପେର୍‍କେ ଇଞ୍ଜେ ନାନ୍ ମେଣ୍ଡେ ପିଲେ ଲେକେମ୍ ବ୍ୟବହାର୍‌ ମାଡ଼ନ୍ ।
1CO 13:12 ଇଞ୍ଜେ ମାମ୍‍ମେ ବାତ୍ ଉଡ଼ୁତମ୍, ଆଦ୍ ଦର୍ପନ୍‍ତାଗ୍ ତନ୍ଦାନ୍ ମକମ୍ ଲେକାମ୍ । ଇତ୍‍କେ ଦିନାମ୍ ୱାଦ୍‍ତେ, ଆସୁଟେ ଆଦ୍ ମାନାଡ଼୍ ମୁନ୍‍ନେ ଉଡ଼ିତାଡ଼୍ । ଇଞ୍ଜେ ନାନ୍ ବାତ୍ ପୁନ୍ଦ୍‍ତାନ୍, ଆୱୁସାର୍ରେ ମାୟା । ଇଶ୍ୱର୍ ନାକିଂଙ୍କ୍ ସାରେ ପୁତ୍‍ତେ ଲେକାମ୍ ଆସୁଟେ ନାୟାଦ୍ ବୁଦ୍‍ତେ ଗାଲା ସାରେ ଆଦ୍‍ତେ ।
1CO 13:13 ବିଶ୍ୱାସ୍, ଆଶେ ନୁ ପ୍ରେମ ଇୱୁ ମୁଣ୍ଡ୍ ସାର୍ରେଦିନା ମାନ୍ଦାନ୍ ବିଷୟ୍ ଲୋପେଙ୍କ୍ ପ୍ରେମ କେ ବେଡ଼ିୟାଦ୍‌।
1CO 14:1 ଆଦିଙ୍କ୍ ପ୍ରେମ ସେଙ୍ଗେ ମିଡ଼୍ ତିଆର୍‍ତେ ଆୟ୍‍ମୁଟ୍ । ମେଣ୍ଡେବାଗାତ୍ ଆତ୍ମାତାଦ୍ ଦାନ ପାଏମ୍ ଆଦାନଙ୍କ୍, ବିଶେଷ୍‍ମାଡ଼ି ଇଶ୍ୱର୍‌ତାଦ୍ ବାକ୍ୟ ପ୍ରଚାର୍ ମାଡ଼ାନଙ୍କ୍, ମିୟାଦ୍ ଲୋପେତ୍ ଇଚ୍ଛା ଆୟି ।
1CO 14:2 ବେନ ୱେରେ ଗଟ୍‍ତେ ତିର୍‍ୟିତଣ୍ଡ୍, ଅଣ୍ଡ୍‌ ନାରୁଡ଼୍ ତଡ଼୍ ଗଟି ତିର୍‍ୟଣ୍ଡ୍, ଇଶ୍ୱର୍‌ତେ ଉଦେଶ୍ୟ କେତିତଣ୍ଡ୍ । ଅନ୍‌ ଗଟି ବେନ ବୁଜେମ୍ ଆୟ୍‍ୟଣ୍ଡ୍ । ଅଣ୍ଡ୍‌ ଆତ୍ମାତେ ଶକ୍ତିତେ ଲୋପେତ୍ ଜିନିଷ୍ କେତିତଣ୍ଡ୍ ।
1CO 14:3 ଇତ୍‍କେ ବେନ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ିତନ୍, ଅଣ୍ଡ୍‌ ଆଦ୍ ନାରୁଡ଼୍‍କିଂଙ୍କ୍ କବର୍ କେତିତଣ୍ଡ୍, ଆଦିନ୍ ତଡ଼୍ ଅଡ଼୍‌‍କିଂଙ୍କ୍ ସାହାଯ୍ୟ, ୱେଡ଼୍‍କ୍‍ ନୁ ସାନ୍ତନା ଇଦ୍‍ତେ ।
1CO 14:4 ବେନ ୱେରେ ଗଟ୍‍ତେ ଗଟି ତିର୍‍ୟିତଣ୍ଡ୍, ଅଣ୍ଡ୍‌ ମାତର୍ ନିଜେତ୍ ସେଙ୍ଗେ ଆଦ୍ ମାଡ଼ିତନ୍; ଇତ୍‍କେ ବେନ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ିତନ୍, ଅଣ୍ଡ୍‌ ସାର୍ରେତାୱୁ ମଣ୍ଡଲିକିଙ୍କ୍ ସାହାଯ୍ୟ ମାଡ଼ିତନ୍ ।
1CO 14:5 ମିଡ଼୍ ସାର୍ରେତଡ଼ି ୱେରେ ଗଟ୍‍ତେ ତିର୍‍ୟିକେ, ନାନ୍ ୱେଡ଼୍‍କ୍‍ ଆଦ୍‍ତନ୍, ଇତ୍‍କେ ନାନ୍ ଆଲ୍‍ସୁତାନ୍, ମିଡ଼୍ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ାନଙ୍କ୍ ଶକ୍ତି ପାଏମ୍ ଆୟ୍‍ମୁଟ୍ । ୱେରେ ଗଟ୍‍ତେ ଗଟି ତିର୍‍ୟାନାଦ୍, ମଣ୍ଡଲିତିଙ୍କ୍ ଟିକ୍ ଆୟ୍‍ୟ; ଯଦି ବେନ ଆଦିନ୍ ଇତ୍‍କେ କେସ୍ ବୁଜାମାଡ଼ିତଣ୍ଡ୍, ଇଲୁକ୍ ୱେରେ ଗଟ୍‍ତେ ଗଟି ତିର୍‍ୟାନାଗାକନ୍ସ୍ ଇଶ୍ୱର୍‌ତେ କବର୍ ପ୍ରଚାର୍ ମାଡ଼ାନାଦ୍ ସାୟେ ।
1CO 14:6 ଦାଦାଲଡ଼ି ନୁ ଏଲାସ୍କ୍, ନାନ୍ ଯଦି ମିଇ ବକେତ୍ ୱାସ୍ ୱେରେ ଗଟ୍‍ତେ ଗଟି କେତିତାନ୍, ବା ଇଶ୍ୱର୍‌ତାଗାଙ୍କ୍ ବାତ୍‍ଆଇ ଗଟ୍ କି ବାକ୍ୟ କି ବାତ୍‍ଆଇ ନାଡ଼୍‍ସାନାଦ୍ ବିଷୟ୍ କେଲନ୍, ଆଲେକେ ମିୟାଦ୍ ବାତ୍ ଉପ୍‍କାର୍ ଆଦ୍‍ତେ ?
1CO 14:7 ହସଡ଼୍ ବା ବୀଣା ଲେକାମ୍ ଜିୱେଇଲ୍‍ୱାଦ୍ ପେଞ୍ଚାନାଦ୍ ବିବେଚନା ମାଡ଼ାଟ୍, ଯଦି ଟିକ୍ ଲେଙ୍ଗ୍‌ଦେ ନେକକ୍, ଆଲେକେ ଆଗେ ବାତ୍ ନେକୁତ୍, ବେନ ବାତ୍ ପୁନ୍ଦାନଙ୍କ୍ ପାର୍‍ଦ୍‍ତଣ୍ଡ୍ ?
1CO 14:8 ତୁରୀ ନେକାନାଲ୍‌ଦ୍ ସାୟେ ୱାଡ଼କ୍, ବେନ ବାତେଙ୍କ୍ ଯୁଦ୍‌ ମାଡ଼ାନଙ୍କ୍ ତିୟାର୍ ଆଦ୍‍ତନ୍ ?
1CO 14:9 ଆଦେପୁଟୁଙ୍କ୍, ଯଦି ପୁନ୍‍ୱାଦ୍ ଗଟ୍‍ତେ ଗଟି କେତ୍‍କେ, ଆଲେକେ ଆଦିଙ୍କ୍ ବେନ ବୁଜେମ୍ ଆଦ୍‍ତନ୍ ? ଇଦ୍ ଗାଲ୍‍ଦିଙ୍କ୍ କେତ୍‍ତାନ୍ ଲେକାମ୍ ଆଦ୍‍ତେ ।
1CO 14:10 ଜଗତ୍‍ତାଗ୍ ନାର୍‍ଗେ ଗଟି ମିନ୍ଦେ, ଇତ୍‍କେ ଆୱୁସାର୍ରେ ଲୋପେଙ୍କ୍ ୱେରଡ଼୍ ମିକା ଇତ୍‍କେ ଇଲ୍‍ୱାଦ୍ ଆୟ୍‍ୟ ।
1CO 14:11 ଯଦି ନା ତଡ଼୍ ତିର୍‍ୟମାନ୍ଦାନ୍ ନାରୁନାଦ୍ ଗଟି ନାନ୍ ବୁଜେମ୍ ଆଦାନଙ୍କ୍ ପାର୍‍ୱନ୍, ଆଲେକେ ଆଦ୍ ନାରୁଡ଼୍ ନା ବକେତ୍ ପୁନ୍‍ୱେନଣ୍ଡ୍ ଆଦ୍‍ତନ୍, ନାନ୍ ମିକା ଅନ୍‌ ବକେତ୍ ପୁନ୍‍ୱେ ନାରୁଡ଼୍ ଲେକାମ୍ ଆଦ୍‍ତନ୍ ।
1CO 14:12 ମିଡ଼୍ ବାତ୍‍ବାତ୍ ପବିତ୍ର ଆତ୍ମାନ୍‍ ଦାନ ପାଏମ୍ ଆଦାନ୍ ସେଙ୍ଗେ ଇଚ୍ଛା ମାଡ଼ିମାନ୍ଦାଙ୍କ୍, ଆୱୁ ଲୋପେଙ୍କ୍ ବେନାସାର୍ରେ ମଣ୍ଡଲିତେ ସାୟେ ସେଙ୍ଗେ ଲେକାମ୍ ମାଡ଼େ ପାର୍‍ଦ୍‍ତା, ଆୱିଙ୍କ୍ ଗାଟି ବ୍ୟବହାର୍‌ ମାଡ଼ାନଙ୍କ୍ ଆଲ୍‍ସି ମାଡ଼ାଟ୍ ।
1CO 14:13 ଆଦିଙ୍କ୍ ବେନ ୱେରେ ଗଟ୍‍ତେ ଗଟି ତିର୍‍ୟିତଣ୍ଡ୍, ଅଣ୍ଡ୍‌ ଆଦିନାଦ୍ ଇତ୍‍କେ ବୁଜା ମାଡ଼ାନଙ୍କ୍ ଦାନ ପାଏମ୍ ଆଦାନଙ୍କ୍ ପ୍ରାର୍ତନା ମାଡ଼ିଣ୍ଡ୍ ।
1CO 14:14 ଯଦି ନାନ୍ ୱେରେ ଗଟ୍‍ତେ ପ୍ରାର୍ତନା ମାଡ଼ିତାନ୍, ମାତର୍ ନାୟାଦ୍ ଲୋପେତ୍ ଆତ୍ମା ଆଦ୍ ମାଡ଼ିତ୍, ନାୟାଦ୍ ମାନ୍‍ ଆଗେ ଇଲ୍‍ୱେ ମାନ୍‍ତେ ।
1CO 14:15 ଆଲେକେ ନାନ୍ ବାତ୍ ମାଡ଼ିତାନ୍ ? ନାନ୍ ନା ଆତ୍ମାତେ ଇଚ୍ଛାତେ ପ୍ରାର୍ତନା ମାଡ଼ିତାନ୍, ଇତ୍‍କେ ସାଙ୍ଗେ ସାଙ୍ଗେ ନାୟାଦ୍ ବୁଦ୍ ଆଲ୍‍ସି ମିକା ପ୍ରାର୍ତନା ମାଡ଼ିତାନ୍ । ନାନ୍ ନା ଆତ୍ମାତେ ଲେକାମ୍ ପାଟା ପାରିତାନ୍, ଇତ୍‍କେ ଆଦିନ୍ ତଡ଼୍ ମାନ୍‍ ଇସ୍ ପାଟା ପାରିତାନ୍ ।
1CO 14:16 ଆଲା ଆୟକ୍ ଇଶ୍ୱର୍‌ତିଙ୍କ୍ ମିୟାଦ୍ ଆତ୍ମାତେ ଇଚ୍ଛାତେ ଦନ୍ୟବାଦ୍ ଇଦାନ୍‍ୱେଲେ, ଆଗେ ମାନ୍ଦାନ୍ ୱେରଣ୍ଡ୍ ନାରୁଡ଼୍ ବେଲା ମିଇ ତଡ଼୍ “ଆମେନ୍‍” କେତିତଣ୍ଡ୍ ? ବାତେଙ୍କ୍‍ଇତ୍‍କେ ମିଡ଼୍ ବାତ୍ କେତୁତିଡ଼୍, ଆଦ୍ ଅଣ୍ଡ୍‌ ପୁନ୍ଦାନଙ୍କ୍ ପାର୍‍ୱଣ୍ଡ୍ ।
1CO 14:17 ମିଡ଼୍ ସାୟେ ଲେକାମ୍ ଦନ୍ୟବାଦ୍ ଇସ୍ ମାତ୍‍କେ ଗାଲା, ଆଦିନ୍ ତଡ଼୍ ଆଦ୍ ନାରୁଡ଼୍ ବେଲାମେଣ୍ଡେ ଉପ୍‍କାର୍ ଅଦାନଙ୍କ୍ ପାର୍‍ୱଣ୍ଡ୍ ।
1CO 14:18 ନାନ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦୁତାନ୍, ବାତେଙ୍କ୍‍ଇତ୍‍କେ ନାନ୍ ମିଇ ସାର୍ରେତଡ଼୍ ତାଗାଙ୍କ୍ ଗାଟି ୱେରେ ଗଟି କେତ୍‍ପାର୍‍ଦ୍‍ତାନ୍ ।
1CO 14:19 ଇତ୍‍କେ ମଣ୍ଡଲିତାଗ୍ ଉପାସନାତାଗ୍ ୱେରେ ଗଟ୍‍ତେ ହଜାର୍‌ ହଜାର୍‌ ଶଦ୍ଦ ବ୍ୟବହାର୍‌ ମାଡ଼୍‍ୱେକନ୍ସ୍ ସାର୍ରେତଡ଼୍ ବୁଜେମ୍ ଆଦାନ୍ ରକମ୍ ଏଇଙ୍ଗ୍ ଶଦ୍ଦ କେତାନାଦ୍ ସାୟେ ।
1CO 14:20 ଦାଦାଲଡ଼ି ନୁ ଏଲାସ୍କ୍, ଚିନ୍ତେତାଗ୍ ପିଲାନ୍ ଲେକାମ୍ ଆୟ୍‍ମାଟ୍ । କାରାପ୍ ବିଷୟ୍ ସେଙ୍ଗେ ପିଲାନ୍ ଲେକାମ୍ ଆୟ୍‍ମୁଟ୍; ଇତ୍‍କେ ବୁଦ୍ ବିଚାର୍‍ତାଗ୍ ମିଡ଼୍ ସାରେ ବୟସ୍‍ତଡ଼୍ ଆଦାନାଦ୍ ସାୟେ ।
1CO 14:21 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ପ୍ରବୁ କେତୁତଣ୍ଡ୍, ପୁନ୍‍ୱାଦ୍ ଗଟ୍ କେସମାନ୍ଦାନ୍ ବିଦେଶୀ ନାରୁଡ଼୍‍କିନ୍ ପାୟୁର୍‍ତାଗ୍ ନାନ୍ ଇଦ୍ ଜାତି ତଡ଼୍ ଗଟି କେତିତାନ୍ । ଆଗେକ୍‍ବା ଅଡ଼୍‌ ନା ଗଟି କେଞ୍ଜଡ଼୍ ।”
1CO 14:22 ଇତ୍‍କେ ୱେରେ ଗଟ୍ କେତ୍‍ତାନ୍ ଶକ୍ତି ବିଶ୍ୱାସୀଡ଼୍ ସେଙ୍ଗେ ବାତ୍‍ବା ବିଷୟ୍‍ତାଦ୍ ନିର୍ଦେଶ୍ ଇନା ଆୟ୍‍ୟ । ଆଦ୍ ଆସାମ୍ ଅବିଶ୍ୱାସୀଡ଼ାଗ୍ ଆଶ୍ଚର୍ଯ୍ୟ ଶକ୍ତିତାଦ୍‍ ନିର୍ଦେଶ୍ । ମେଣ୍ଡେଅନ୍‌ ରକମ୍, ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ାନାଦ୍ ଶକ୍ତି ବିଶ୍ୱାସ୍ ଇଲ୍‍ୱେ ସେଙ୍ଗେ ଆୟ୍‍ୟ, ମାତର୍ ବିଶ୍ୱାସୀଡ଼୍ ସେଙ୍ଗେ ଇଦ୍ ଆଶ୍ଚର୍ଯ୍ୟ ଶକ୍ତି ଆଦ୍‍ତେ ।
1CO 14:23 ମଣ୍ଡଲିତାଗ୍ ସାର୍ରେତଡ଼୍ ଗୁଡ଼ାନ୍ ୱେଲେ ଯଦି ସାର୍ରେତଡ଼୍ ପୁନ୍‍ୱାଦ୍ ଗଟ୍‍ତେ ଗଟି ତିର୍‍ୟିତଡ଼୍ ନୁ ଆଗେ ନାରୁଡ଼୍ ବା ୱେରେ ଦର୍ମତଡ଼୍ ୱାଦ୍‍ତଣ୍ଡ୍, ଅଡ଼୍‌ ବାତେଏ ମଣ୍ଡଲିତେ ସାର୍ରେତଡ଼୍‍କିଙ୍କ୍ ବାୟାଲଡ଼୍ ଇଞ୍ଜ ଆଲ୍‍ସଡ଼୍ ?
1CO 14:24 ଇତ୍‍କେ ଅଡ଼୍‌ ଯଦି ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ିତଡ଼୍ ନୁ ୱେରଣ୍ଡ୍ ମେଣ୍ଡେଅର୍‍ତୁନ୍ ବୁଜେମ୍ଆଦ୍‍ତଡ଼୍ ବା ନାରୁଡ଼୍ ଆଗେ ୱାତ୍‍କେ, ଅଣ୍ଡ୍‌ ବାତ୍ କେଞ୍ଜିତଣ୍ଡ୍,
1CO 14:25 ଆଦିନ୍ ତଡ଼୍ ଅଣ୍ଡ୍‌ ତାନ୍ ପାପାମ୍‍ତିଙ୍କ୍ ଆଲ୍‍ସ୍‍ ପାର୍‍ଦ୍‍ତଣ୍ଡ୍; ଅନ୍‌ ଜିୱୁଣ୍ଡ୍‍ତାଗ୍ ମାନ୍ଦାନ୍ ମିଞ୍ଜ୍‍ତାଦ୍ ବିଷୟ୍‍ସାର୍ରେ ପେୟ୍‍ତିତ୍; ଅଣ୍ଡ୍‌ ଇଶ୍ୱର୍‌ତେ ବକେତ୍ ସର୍ପା ଆସ୍ ଅଡ଼ାଦ୍‌ ଆରାଦାନା ମାଡ଼ିତନ୍ ନୁ ପ୍ରଚାର୍ ମାଡ଼ିତନ୍, “ନିଜାତେ ଇଶ୍ୱର୍ ମିଇ ଲୋପେ ମିନ୍ଦେଣ୍ଡ୍ !”
1CO 14:26 ଦାଦାଲଡ଼ି ନୁ ଏଲାସ୍କ୍‍, ମିକିଂଙ୍କ୍ ନାନ୍ କେତ୍‍ତାନ୍ ଲେକାମ୍‌; ଉପବାସ୍ ମାଡ଼ାନ୍ ସେଙ୍ଗେ ଗୁଡ଼ାନ୍‍ ୱେଲେ ବେନ ୱେରଣ୍ଡ୍ ପାଟା ପାରିଣ୍ଡ୍, ମେଣ୍ଡେ ୱେରଣ୍ଡ୍ ଶିକ୍ଷା ଇୱିଣ୍ଡ୍, ବେନ ୱେରଣ୍ଡ୍ ଇଶ୍ୱର୍‌ତେ ଗଟ୍ କେଲିଣ୍ଡ୍, ମେଣ୍ଡେଅର୍‍ତୁଣ୍ଡ୍ ୱେରେ ଗଟ୍‍ତେ ଗଟି କେଲିଣ୍ଡ୍ ନୁ ମେଣ୍ଡେ ବେନ ୱେରଣ୍ଡ୍ ପୁନ୍‍ୱାଦ୍ ଗଟ୍‍ତେ ଇତ୍‍କେ ବୁଜା ମାଡ଼ିଣ୍ଡ୍ । ଇୱୁସାର୍ରେ ମଣ୍ଡଲିତେ ସାୟେତ୍ ସେଙ୍ଗେ ମାଡ଼ାନାଦ୍ ଦର୍‍କାର୍ ।
1CO 14:27 ଯଦି ବେସ୍‍କ୍‍ତୁଡ଼୍‍ ୱେରେ ଗଟ୍‍ତେ ଗଟି କେତ୍‍ତାନ୍ ସେଙ୍ଗେ ଆଲ୍‍ସିତଡ଼୍, ଆଲେକେ ୱେରଣ୍ଡ୍ ପେର୍‍କେ ୱେରଣ୍ଡ୍ ଇଦ୍‍ରକମ୍ ରେଣ୍ଡ୍ ବା ଗାଟି ନାର୍‍ଗେ ଆତ୍‍କେ, ମୁୱୁଡ଼୍ କେଲିଡ଼୍ ନୁ ବେନ ୱେରଣ୍ଡ୍ ନିଜାମ୍ ଆଦିନ୍ ଇତ୍‍କେ ବୁଜା ମାଡ଼ିୱିଣ୍ଡ୍ ।
1CO 14:28 ଇତ୍‍କେ ବୁଜାମାଡ଼ାନଙ୍କ୍ ବେନ ଇଲ୍‍ଉକ୍, ୱେରେ ଗଟ୍‍ତେ କେତାନଙ୍କ୍ ଆଲ୍‍ସମାନ୍ଦାନ୍ ନାରୁଡ଼୍ ଉପାସନାତାଗ୍ କଟ ମାନିଣ୍ଡ୍ । ଅଣ୍ଡ୍‌ ମାତର୍ ହେର୍କାତେ ଇଶ୍ୱର୍‌ତଡ଼୍ ଆଲା କେଲିଣ୍ଡ୍ ।
1CO 14:29 ଇର୍‍ୱୁଡ଼୍ ବା ମୁୱୁଡ଼୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ିଡ଼୍, ମେଣ୍ଡେବାଗାତଡ଼୍ ଆଦ୍ ବିଚାର୍ ମାଡ଼ି ଉଡ଼ାଟ୍ ।
1CO 14:30 ଇତକେ ଉପାସନାତାଗ୍ ମାନ୍ଦାନ୍ ବେନ ଯଦି ହଟାତ୍ ଇଶ୍ୱର୍‌ତାଗାଙ୍କ୍ ସୁସମାଚାର୍ ପାଏମ୍ ଆଦ୍‍ତନ୍, ଆଲେକେ ବାଷନ୍ ଇସମାନ୍ଦାନ୍ ନାରୁଡ଼୍ ତାନ୍ ଗଟି ବନ୍ଦ୍ ମାଡ଼ିଣ୍ଡ୍ ।
1CO 14:31 ସାର୍ରେତଡ଼୍‍ୱାଦ୍ ଶିକ୍ଷା ନୁ ୱାଦାନ୍ ସେଙ୍ଗେ ସାର୍ରେତଡ଼୍ ୱେରଣ୍ଡ୍ ପେର୍‍କେ ୱେରଣ୍ଡ୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼େ ପାର୍‍ଦ୍‍ତଡ଼୍ ।
1CO 14:32 ଇତ୍‍କେ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ାନ୍ ଦାନ ପ୍ରଚାର୍ ମାଡ଼ାନଣ୍ଡ୍‍ତେ ଆଦିନ୍ ଆଦାନ୍ ସାୟେ ।
1CO 14:33 ବାତେଙ୍କ୍‍ଇତ୍‍କେ ଇଶ୍ୱର୍ ବିଶୃଙ୍କଲା ମାଡ଼ାନଣ୍ଡ୍ ଆୟ୍‍ୟଣ୍ଡ୍, ମାତର୍ ଅଣ୍ଡ୍‌ ଶାନ୍ତିତେ ଇଶ୍ୱର୍ । ଇଶ୍ୱର୍‌ତେ ମେଣ୍ଡେବାଗାତ୍ ଉପବାସ୍ ପବିତ୍ର ମଣ୍ଡଲି ବେଲା,
1CO 14:34 ମିଇ ମଣ୍ଡଲିତେ ସବାକିନାଗ୍ ମିକା ଆଦେରକମ୍ ନାଟାଙ୍କ୍ କଟ ମାନୀ । ଆଗେ ଗଟି ତିର୍‍ୟାନ୍ ସେଙ୍ଗେ ଆୱିଙ୍କ୍ ଗଟ୍ ଦର୍‍କ । ଇହୁଦୀ ନିୟମ୍ ଲେକାମ୍ ଆୱୁ ମାନେୟ୍‍ତାଗ୍ ବଶୀଭୂତ ଆସ୍ ମାନୀ ।
1CO 14:35 ଆୱୁ ବାତ୍ ବିଷୟ୍ ବୁଜେମ୍ ଆଦାନଙ୍କ୍ ଆଲ୍‍ସ୍‍କେ, ଲୋନ୍‌ ମାଲ୍‍ସ୍ ନିଜେତ୍ ମୁଦ୍‍ପାଙ୍କ୍ ପାଚ୍ରା ମାଡ଼ି । ବାତେଙ୍କ୍‍ଇତ୍‍କେ ମଣ୍ଡଲିତାଗ୍ ଗଟି କେତ୍‍କେ, ନାଟାକିଙ୍କ୍ ସିଗ୍‍ଆଦ୍‍ତେ ।
1CO 14:36 ଇଶ୍ୱର୍‌ତେ ବାକ୍ୟ ବାତ୍ ମିୟାଗାଙ୍କ୍ ପୁଟି ମାତ୍‍ତେ ? ବା ଇଦ୍ ବାତ୍ ମାତର୍ ମିଇ ବକେତ୍ ୱାସ୍‍ମାତ୍‍ତେ ?
1CO 14:37 ମିଇ ଲୋପେଙ୍କ୍ ବେନ ଯଦି ନିଜେ ୱେରଣ୍ଡ୍ ବାବବାଦୀ ବା ଆତ୍ମିକ ଦାନ ପାଏମ୍ ଆତ୍‍ତେ ନାରୁଡ଼୍ ଇଞ୍ଜ ଆଲ୍‍ସିତିଡ଼୍, ଅଣ୍ଡ୍‌ ପୁଞ୍ଜ୍‍ମାନିଣ୍ଡ୍ ଜେ, ଇଗେ ନାନ୍ ବାତ୍‍ସାର୍ରେ ଲେକ୍‍ତାନ୍, ଆଦ୍ ପ୍ରବୁନ୍ ଗଟ୍ ।
1CO 14:38 ଇତ୍‍କେ ଯଦି ଅଣ୍ଡ୍‌ ଇୱୁସାର୍ରେ ଗଟିକିଙ୍କ୍ ପାସ୍‍କିତଣ୍ଡ୍, ମିଡ଼୍ ଅଂକିଙ୍କ୍‌ ପାସ୍‍କାଟ୍ ।
1CO 14:39 ଆଦିଙ୍କ୍ ଦାଦାଲଡ଼ି ନୁ ଏଲାସ୍କ୍‍, ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ାନ୍ ସେଙ୍ଗେ ମାନ୍‍ ମାଡ଼ାଟ୍ । ଇତ୍‍କେ ୱେରେ ଗଟ୍‍ତେ ଗଟି କେତ୍‍ତାନ୍ ସେଙ୍ଗେ ବେନଙ୍କ୍ ମାନ୍‍ନା ମାଡ଼୍‍ମାଟ୍ ।
1CO 14:40 ସାର୍‍ରେ ପାଡ଼୍‍ୟି ଟିକ୍ ଲେକାମ୍ ନୁ ଶାନ୍ତି ତଡ଼୍ ମାଡ଼ାନ୍ ଦର୍‍କାର୍ ।
1CO 15:1 ଦାଦାଲଡ଼ି ନୁ ଏଲାସ୍କ୍, ନାନ୍ ବେନ୍ ସାୟେତ୍ କାବୁର୍ ମିଇ ବକେତ୍ ପ୍ରଚାର୍ ମାଡ଼୍‍ତାନ୍, ବାତ୍ ମିଡ଼୍ ଗ୍ରହନ୍ ମାଡ଼୍‍ତିଡ଼୍ ନୁ ବେଦିନାଗ୍ ମିୟାଦ୍ ବିଶ୍ୱାସ୍ ମିନ୍ଦେ, ଆଦ୍ ବିଷୟ୍ ମିକିଂଙ୍କ୍ ଏର୍କା ମାଡ଼ିଦାନ୍ ସେଙ୍ଗେ ନାନ୍ ଇଚ୍ଛା ମାଡ଼ୁତାନ୍ ।
1CO 15:2 ନାନ୍ ମିଇ ବକେତ୍ ପ୍ରଚାର୍ ମାଡ଼ିମାନ୍ଦାନ୍ ଆଦ୍ ସାୟେତ୍ କାବୁର୍ କେ ସୁସମାଚାର୍ । ମିଡ଼୍ ଆଦ୍ ସୁସମାଚାର୍‍ତାଗ୍ ଗାଡ଼୍‍ସ୍ ବିଶ୍ୱାସୀ ଆଶେ ମାତ୍‍କେ, ପରିତ୍ରାଣ୍ ପାଏମ୍ ଆଦ୍‍ତିଡ଼୍ । ଇଲୁକ୍ ମିୟାଦ୍ ବିଶ୍ୱାସ୍ ଆଙ୍ଗ୍‍ଡ଼ାମ୍ ।
1CO 15:3 ନାନ୍ ପାଏମ୍ ଆତ୍‍ତେ ୱେରଡ଼୍ ଶିକ୍ଷା ମିକିଂଙ୍କ୍ କେତ୍‍ତାନ୍ । ଆଦ୍ ସାର୍ରେତିଙ୍କ୍ ଗାଟି ଦର୍‍କାର୍ । ଆଦ୍ ଆଦୁତ୍‍ତେ, ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ଆତ୍‍ତେ ଲେକାମ୍, କ୍ରିଷ୍ଟ ମାନ୍‍ ପାପ୍‌ ସେଙ୍ଗେ ଡଲ୍‍ତଣ୍ଡ୍,
1CO 15:4 ସମାଦି ପାଏମ୍ ଆତ୍‍ତଣ୍ଡ୍ ନୁ ମୁଣ୍ଡ୍ ଦିନେତେ ତେଏଦ୍‍ତଣ୍ଡ୍ ।
1CO 15:5 ଅଣ୍ଡ୍‌ ପିତର୍ ନୁ ପେର୍‍କେ ତାନ୍ ବାରଜାନ୍ ଶିଷ୍ୟଡ଼୍‍କ୍ ତଅନ୍‌ଦିମାତ୍‍ଣ୍ଡ୍ ।
1CO 15:6 ତାନ୍ ପେର୍‍କେ ଅଣ୍ଡ୍‌ ଅଣ୍ଡୟ୍‌‍ଦାମ୍ ତାନ୍ ପାଞ୍ଚ୍‍ଶହ ନାର୍‍ଗେ ତାନ୍ ବିଶ୍ୱାସୀଡ଼୍‍କ୍ ତଅନ୍‌ଦିମାତ୍‍ତଣ୍ଡ୍ । ଅଡ଼୍‌ ଲୋପେଙ୍କ୍ ଇଞ୍ଜେ ବେସ୍‍କ୍‍ତୁଡ଼୍‍ ଜଗତ୍‍ତାଗ୍ ଇଲେଡ଼୍, ଇତ୍‍କେ ନାର୍‍ଗେ ମୁଲ୍ ଜିୱୁଣ୍ଡ୍ ମିନ୍ଦେଡ଼୍‌ ।
1CO 15:7 ଇଦିନ୍ ପେର୍‍କେ ଅଣ୍ଡ୍‌ ଜାକୁବ୍ ନୁ ସାର୍‍ରେ ପ୍ରେରିତ୍ ଶିଷ୍ୟଡ଼୍‍କ୍ ତଅନ୍‌ଦିମାତ୍‍ତଣ୍ଡ୍ ।
1CO 15:8 ସାର୍‌ତିଙ୍କ୍‌ ପେର୍କେ ଅଣ୍ଡ୍‌ ନା ରକମ୍ ୱେରଣ୍ଡ୍ ଆକାଲ୍‌ଜାତଙ୍କ୍ ମିକା ତଅନ୍‌ଦ୍‍ତଣ୍ଡ୍ ।
1CO 15:9 ପ୍ରେରିତ୍ ଶିଷ୍ୟଡ଼୍ ଲୋପେଙ୍କ୍ ନାନ୍ ସାର୍ରେତିଙ୍କ୍ କାରାପ୍, ଇଦ୍‍ରକମ୍ କି ପ୍ରେରିତ୍ ପେଦେର୍‍ତିଙ୍କ୍ ଯୋଗ୍ୟ ଆୟନ୍, ବାତେଙ୍କ୍‍ଇତ୍‍କେ ନାନ୍ ଇଶ୍ୱର୍‌ତେ ମଣ୍ଡଲିତିଙ୍କ୍ ଗାଟିତିପାଲ୍ ମାଡ଼୍‍ତାନ୍ ।
1CO 15:10 ଇତ୍‍କେ ଇଞ୍ଜେ ନାନ୍ ବାତ୍ ଆତ୍‍ତାନ୍, ଆଦ୍ ଇଶ୍ୱର୍‌ତେ ଅନୁଗ୍ରହ୍ ମାୟ୍‍ଦିଙ୍କ୍ ଆତ୍‍ତେ ନୁ ନା ସେଙ୍ଗେ ଅନାଦ୍‌ ଅନୁଗ୍ରହ୍ ଆସାମ୍ ଆୟ୍‍ୟ । ଇତ୍‍କେ ମେଣ୍ଡେବାଗାତ୍ ପ୍ରେରିତ୍ ଶିଷ୍ୟଡ଼ାଗାଙ୍କ୍ ନାନ୍ ଗାଟି ପାଡ଼୍‍ୟି ମାଡ଼୍‍ତାନ୍ । ନିଜାତେ ଇୱୁସାର୍ରେ ନାନ୍ ମାଡ଼ନ୍, ଇତ୍‍କେ ନା ସେଙ୍ଗେ ଇଶ୍ୱର୍‌ତାଦ୍ ଅନୁଗ୍ରହ୍ ମାନ୍ଦାନ୍ ମାୟ୍‍ଦିଙ୍କ୍ ଇଦ୍ ସମ୍ଭବ୍ ଆତ୍‍ତେ ।
1CO 15:11 ଆଦିଙ୍କ୍ ନାନ୍ ଆୟି ବା ଅଡ଼୍‌ ଆୟି, ମାମ୍‍ମେ ସାର୍ରେତମ୍ ଆଦ୍ ଅଣ୍ଡୟ୍‌ ଗଟ୍ ପ୍ରଚାର୍ ମାଡ଼ୁତମ୍ ନୁ ମିଡ଼୍ ଆଗେ ବିଶ୍ୱାସ୍ ମାଡ଼୍‍ତିଡ଼୍ ।
1CO 15:12 କ୍ରିଷ୍ଟ, ଡଲ୍‍ତାଗାଙ୍କ୍ ତେଏଦିମିନ୍ଦେଣ୍ଡ୍, ଇଦ୍ କେ ମାନ୍‍ ପ୍ରଚାର୍‍ତାଦ୍ ବିଷୟ୍ । ଆଗେକ୍‍ବା ଇଞ୍ଜେ ମିଇ ଲୋପେଙ୍କ୍ ବେନ ଡଲ୍‍ତଡ଼ାଦ୍ ପୁନରୁତ୍‍ତାନ୍ ଇଲ୍‍ଲେ ଇଞ୍ଜ ବେଲା କେତୁତିଡ଼୍ ?
1CO 15:13 ଯଦି ନାରୁଡ଼୍ ଡଲ୍‍ତାଗାଙ୍କ୍ ପୁନରୁତ୍‍ତାନ୍ ଆୟକ୍, କ୍ରିଷ୍ଟ ମିକା ଡଲ୍‍ତାଗାଙ୍କ୍ ଜିୱୁଣ୍ଡ୍ ଆୟ୍‍ୟଣ୍ଡ୍ ।
1CO 15:14 ଯଦି କ୍ରିଷ୍ଟ ଡଲ୍‍ତାଗାଙ୍କ୍ ତେଏଦଣ୍ଡ୍, ଆଲେକେ ମାନାଦ୍‍ ପ୍ରଚାର୍ ଆଙ୍ଗ୍‍ଡ଼ାମ୍ ନୁ ମିୟାଦ୍ ବିଶ୍ୱାସ୍ ମିକା ଆଙ୍ଗ୍‍ଡ଼ାମ୍ ।
1CO 15:15 ନାର୍‍ଗେ ମାନାଡ଼୍ ଇଶ୍ୱର୍ ବିଷୟ୍‍ତେ ମିଚ୍ କେତ୍‍ତାନ୍ ଲେକାମ୍ ଆଦ୍‍ତେ, ବାତେଙ୍କ୍‍ଇତ୍‍କେ ମାନାଡ଼୍ କେତୁତାଡ଼୍ ଜେ, ଅଣ୍ଡ୍‌ କ୍ରିଷ୍ଟଙ୍କ୍ ପୁନର୍ଜୀବିତ୍ ମାଡ଼୍‍ତଣ୍ଡ୍ । ଇତ୍‍କେ ଯଦି ନିଜାମ୍ ଡଲ୍‍ତଡ଼ାଦ୍ ପୁନରୁତ୍‍ତାନ୍ ଇଲ୍‍ଲେ, ଆଲେକେ ଇଶ୍ୱର୍ କ୍ରିଷ୍ଟଙ୍କ୍ ପୁନରୁତ୍‍ତିତ୍ ମାଡ଼ଣ୍ଡ୍ ।
1CO 15:16 ଯଦି ଡଲ୍‍ତଡ଼୍ ପୁନରୁତ୍‍ତିତ୍ ଆଦେ ପାର୍‍ୱକ୍, କ୍ରିଷ୍ଟ ବେଲା ପୁନରୁତ୍‍ତିତ୍ ଆୟେଣ୍ଡ୍ ?
1CO 15:17 ଯଦି କ୍ରିଷ୍ଟ ଡଲ୍‍ତାଗାଙ୍କ୍ ପୁନରୁତ୍‍ତିତ୍ ଆୟ୍‍ୟଣ୍ଡ୍, ଆଲେକେ ମିୟାଦ୍ ବିଶ୍ୱାସ୍ ମିଚ୍ ନୁ ମିଡ଼୍ ଇଞ୍ଜେ ପାପ୍‌ତାଗ୍ ମୁଡ଼୍‍ନ୍ଦି ମିନ୍ଦେଡ଼ି ।
1CO 15:18 ମେଣ୍ଡେ ଇଦିନାଦ୍ ଇତ୍‍କେ ଆଦ୍‍ତେ ଜେ, ଡଲିମାନ୍ଦାନ୍ କ୍ରିଷ୍ଟ ବିଶ୍ୱାସୀଡ଼୍ ମିକା ନଷ୍ଟ ଆଦ୍‍ତଡ଼୍ ।
1CO 15:19 ଯଦି କ୍ରିଷ୍ଟନାଗ୍ ମାୟାଦ୍‌ ଆଶେ ମାତର୍ ଇଦ୍ ଜିୱୁଣ୍ଡ୍‍ତେ ମାୟ୍‍ଦିଙ୍କ୍ ଆତ୍‍ତେ, ଆଲେକେ ମେଣ୍ଡେ ବାଗାତଡ଼ାଗାଙ୍କ୍ ମାୟାଦ୍‌ ଅବସ୍ଥାତେ ଗାଟି ତିପାଲ୍ ।
1CO 15:20 ଇତ୍‍କେ ନିଜାମ୍ କ୍ରିଷ୍ଟ ଡଲିମାନ୍ଦାନ୍ ନାରୁଡ଼ାଦ୍ ପୁନରୁତ୍‍ତାନ୍ ନିଜାମ୍ ତଅତାନ୍ ସେଙ୍ଗେ ଅଡ଼୍‌ ଲୋପେଙ୍କ୍ ନିଜେ ମୁନେନ୍ ତେଏଦି ମିନ୍ଦେ ।
1CO 15:21 ୱେରଣ୍ଡ୍ ମାୟ୍‍ଦିଙ୍କ୍ ଡଲ୍‍ନାଦ୍ ଜଗତ୍‍ତାଗ୍ ଆସ୍‍ତେ । ଆଦେରକମ୍ ୱେରଣ୍ଡ୍ ମାୟ୍‍ଦିଙ୍କ୍ ଡଲ୍‍ତଡ଼ାଦ୍ ପୁନରୁତ୍‍ତାନ୍ ସମ୍ଭବ୍ ଆତ୍‍ତେ ।
1CO 15:22 ଆଦମ୍ ତଡ଼୍ କାୟ୍‍ଲିମାନ୍ଦାନ୍ ମାୟ୍‍ଦିଙ୍କ୍ ସାର୍‍ରେ ନାରୁଡ଼୍ ଡଲ୍‍ତଡ଼୍ । ଆଦେରକମ୍ କ୍ରିଷ୍ଟନ୍ ତଡ଼୍ କାୟ୍‍ଲାନ୍ ତଡ଼୍ ସାର୍ରେତଡ଼୍ ପୁନର୍ଜିୱୁଣ୍ଡ୍ ପାଏମ୍ ଆଦ୍‍ତଡ଼୍ ।
1CO 15:23 ଇତ୍‍କେ ସାର୍‍ରେ ଟିକ୍ ଆତ୍‍ତେ ସମୟ୍‍ତେ ପୁନରୁତ୍‍ତିତ୍ ଆଦ୍‍ତେ । ସାର୍ରେତିଙ୍କ୍ ମୁନେନ୍ କ୍ରିଷ୍ଟ ପୁନରୁତ୍‍ତିତ୍ ଆତ୍‍ତଣ୍ଡ୍ । ଆଦିଙ୍କ୍ ଅଣ୍ଡ୍‌ ୱାଦାନ୍ ସମୟ୍‍ତେ ବେନଡ଼୍ ତାମ୍ ନାରୁଡ଼୍ ଅଡ଼୍‌ ମୁନେନ୍ ଜିୱୁଣ୍ଡ୍ ଆଦ୍‍ତଡ଼୍ ।
1CO 15:24 ତାନ୍‍ପେର୍କେ ଯୁଗ୍ ତେରିତ୍ । କ୍ରିଷ୍ଟ ସାର୍‍ରେ କାରାପ୍ ଆତ୍ମା ବେନନାଦ୍ ଶାସନ୍‍, ଅଦିକାର୍‌ ନୁ ଶାତ୍‍ୱାମ୍‍ତିଙ୍କ୍ ତେର୍‍ସ୍‍ପି ବାବାଲ୍ ଇଶ୍ୱର୍‌ତିଙ୍କ୍ ରାଜ୍ୟ ସର୍ପା ମାଡ଼ିତନ୍ ।
1CO 15:25 ଇଶ୍ୱର୍ ସାର୍‍ରେ ଶତ୍ରୁଡ଼୍‍କ୍ ଆରେମ୍ ମାଡ଼ି କ୍ରିଷ୍ଟନ୍ ଡେକେତ୍ ମଦଲ୍ ଆଦ୍‍ମାନ୍ ଯାକ, କ୍ରିଷ୍ଟ ଶାସନ୍‍ ମାଡ଼ିତନ୍ ।
1CO 15:26 ତେର୍‍ତେପେର୍କେ ମାଡ଼େଙ୍ଗ୍ ଶତ୍ରୁଡ଼୍ ଡଲ୍‍ତାଦ୍, ଆଦ୍ ମିକା ଆରେମ୍ ଆଦ୍‍ତେ ।
1CO 15:27 ବାତେଙ୍କ୍‍ ଇତ୍କେ ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ଇଶ୍ୱର୍ ସାର୍‍ରେ ବିଷୟ୍ କ୍ରିଷ୍ଟନ୍ ଅଦିନ୍ ମାଡ଼ିତନ୍ ।” ଆଗେକ୍‍ବା ଇଶ୍ୱର୍ ଇୱୁ ସାର୍‍ରେ ବିଷୟ୍ ଲୋପେ ଇଲାଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ସାର୍‍ରେ ବିଷୟ୍‍ତିଙ୍କ୍ କ୍ରିଷ୍ଟନ୍ ଅଦିନ୍ ମାଡ଼ିତନ୍ ।
1CO 15:28 ସାର୍‍ରେ ବିଷୟ୍ କ୍ରିଷ୍ଟନ୍ ଶାସନ୍‍ ଅଦିନ୍ ଆତ୍‍ତେ ପେର୍‍କେ, ଅଣ୍ଡ୍‌ ନିଜେତ୍ ବାବାଲ୍ ଇଶ୍ୱର୍‌ତେ ଅଦିନ୍ ଆଦ୍‍ତନ୍ ନୁ ସାର୍‍ରେ ବିଷୟ୍‍ତେ ପର୍‍ର ଇଶ୍ୱର୍‌ତେ ରାଜ୍ ସାରେ ଆଦ୍‍ତେ ।
1CO 15:29 ଡଲ୍‍ତଡ଼୍ ସେଙ୍ଗେ ବେନଡ଼୍ ଏର୍‍ଦିକ୍ଷା ଗ୍ରହନ୍ ମାଡ଼ିତଡ଼୍, ଅଡ଼୍‌ ବିଷୟ୍‍ତେ ମିଡ଼୍ ବାତ୍ ଲେକ୍‍ତାଡ଼୍ ? ବେସ୍କ୍‍ତୁଡ଼ାଦ୍ ମତ ଇସାବ୍‍ତେ, ଯଦି ଡଲ୍‍ତଡ଼୍ ପୁନରୁତ୍‍ତିତ୍ ଆୟ୍‍ୱିଡ଼୍, ଅଡ଼୍‌ ସେଙ୍ଗେ ମେଣ୍ଡେ ବାଗାତଡ଼୍‍କ୍ ବାତେଙ୍କ୍ ଏର୍‍ଦିକ୍ଷା ଇଦ୍‍ତଡ଼୍ ?
1CO 15:30 ମେଣ୍ଡେ ମାନାଡ଼୍ ବା ବାତେଙ୍କ୍ ସେନେକ୍‍ ସେନେକ୍‍ତିଙ୍କ୍ ବିପଦ୍‍ତେ ମୁନ୍‍ନେ ଆଦୁତାଡ଼୍ ?
1CO 15:31 ଦାଦାଲଡ଼ି ନୁ ଏଲାସ୍କ୍‍ନଡ଼ି, ମାନାଦ୍‍ ଜିୱୁଣ୍ଡ୍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ କାୟ୍‍ଲି ମାନ୍ଦାନ୍ ମାୟ୍‍ଦିଙ୍କ୍, ମିଇ ସେଙ୍ଗେ ନାୟାଦ୍ ବେନ୍ ଗର୍ବ, ଆଦିନ୍ ତଅସ୍ କେତୁତାନ୍, ନାନ୍ ସାର୍ରେଦିନା ଡଲାନ୍ ମକମ୍‍ତାଗ୍ ମିଶି ଆଦୁତାନ୍ ।
1CO 15:32 ଯଦି ନାନ୍ ମାତର୍ ନାରୁଡ଼୍ ଲକ୍ଷ ଅସ୍ ଏଫିସିୟତାଗ୍ ଇଂସା ଜୀୱାକିନ୍ ଲେକାମ୍ ନାରୁଡ଼୍‍ତଡ଼୍ ଲଡ଼େମ୍ ଆସ୍ ମାତ୍‍ତାନ୍, ଆଲେକେ ନାୟାଦ୍ ବାତ୍ ଲାବ୍ ଆତ୍‍ତେ ? ଯଦି ଡଲ୍‍ତଡ଼୍ ପୁନରୁତ୍‍ତିତ୍ ଆୟ୍‍ୟଡ଼୍, ଆଲେକେ ଶିକ୍ଷା ଲେକାମ୍, “ୱାଡ଼ାଟ୍, ତିଞ୍ଜ୍ଉଞ୍ଜ୍ ଦିନାମ୍ ତେର୍‍ସ୍ପିତାଡ଼୍, ବାତେଙ୍କ୍‍ଇତ୍‍କେ ନାଡ଼୍ ତ ମାନ୍‍ ଡଲାନଙ୍କ୍ ଆଦ୍‍ତେ ।”
1CO 15:33 ମିଡ଼୍ ପ୍ରତାରିତ୍ ଆୟ୍‍ମାଟ୍, “କାରାପ୍ ସାଙ୍ଗେ ନିଜାତ୍‍ଚରିତ୍ରତିଙ୍କ୍ ନଷ୍ଟ ମାଡ଼ିତେ ।”
1CO 15:34 ଆଦିଙ୍କ୍ ସାୟେତ୍‍ ବୁଦ୍‍ତେ ମାନୁଟ୍, ପାପାମ୍ ମାଡ଼୍‍ମାଟ୍ । ମିକିଂଙ୍କ୍ ସିଗିଙ୍କ୍ ସେଙ୍ଗେ ନାନ୍‍ନେ ଇଦ୍ କେତୁତାନ୍, ମିଇ ଲୋପେଙ୍କ୍ ବେସ୍‍କ୍‍ତୁଡ଼୍‍ ଇଶ୍ୱର୍‌ତିଙ୍କ୍ ପୁନଡ଼୍ !
1CO 15:35 ବେନ ପାଚ୍ରା ମାଡ଼େ ପାର୍‍ଦ୍‍ତଣ୍ଡ୍, “ମିଡ଼୍ ବେଲା ପୁନରୁତ୍‍ତିତ୍ ଆଦ୍‍ତିଡ଼୍ ?” ଅଡ଼୍‌ ବେଦ୍‍ପୁଟୁଙ୍କ୍ ମେନ୍ଦୁଲ୍ ପୟ୍‍ସ୍ ମାନ୍‍ତଡ଼୍ ?
1CO 15:36 ମିଡ଼୍ ବେସର୍ ବାକ୍‍ୱା । ଇସୁର୍‍ବା ବାତ୍ ପୁନ୍‍ୱିଡ଼୍, ବେନ୍ ୱିଜ୍ ୱିତିତଡ଼୍, ଆଦ୍ ଡଲକ୍‌କେ ଗାଜ୍‍ଜେ ଆୟ୍‍ୟ ?
1CO 15:37 ବେନ୍ ମାଡ଼େ ତିୟାର୍ ଆଦ୍‍ତେ, ମିଡ଼୍ ଆଦିଙ୍କ୍ ୱିତ୍‍ୱିଡ଼୍ । ମିଡ଼୍ ଗହମ୍ ୱିତିମାନ୍‍ତିଡ଼୍ କି ମେଣ୍ଡେଅନ୍‌ ୱିଜେତ୍ ଅଣ୍ଡୟ୍‌ ପେଡ଼େମ୍ ।
1CO 15:38 ଇତ୍‍କେ ଇଶ୍ୱର୍ ନିଜେତ୍ ଇଚ୍ଛା ଲେକାମ୍ ତାନ୍ ମେନ୍ଦୁଲ୍ ତିୟାର୍ ମାଡ଼ିତନ୍ । ସାର୍‍ରେ ୱିଜେତିଙ୍କ୍ ଅଣ୍ଡ୍‌ ତାନ୍ ନିଜେତ୍ ପୁଟୁଙ୍କ୍ ଇଦ୍‍ତଣ୍ଡ୍ ।
1CO 15:39 ସାର୍‍ରେ ଜୀୱାକିନାୱୁ ମେନ୍ଦୁଲ୍ ଅଣ୍ଡୟ୍‌ ଲେକାମ୍ ଆୟ୍‍ୟ । ନାରୁଡ଼ାଦ୍ ମେନ୍ଦୁଲ୍ ଅଣ୍ଡୟ୍‌ ରକମ୍, ଜିୱୁକିନାୱୁ ମେନ୍ଦୁଲ୍ ମେଣ୍ଡେଅନ୍‌ ରକମ୍ । ପିଟ୍‍ଟେ ନୁ କିକେ ମେନ୍ଦୁଲ୍ ୱେରେ ।
1CO 15:40 ସ୍ୱର୍ଗତଡ଼୍ ନୁ ପୃତିବିତଡ଼୍ ଇର୍‍ୱୁଡ଼୍ ରେଣ୍ଡ୍ ପ୍ରକାର୍‍ତେ ମେନ୍ଦୁଲ୍ ମିନ୍ଦେ । ସ୍ୱର୍ଗତଡ଼ାଦ୍ ମେନ୍ଦୁଲ୍ ଅଣ୍ଡ୍‌ ରକମ୍ ସୁନ୍ଦର୍ ନୁ ପୃତିବିତଡ଼ାଦ୍ ମେନ୍ଦୁଲ୍ ମେଣ୍ଡେଅନ୍‌ ରକମ୍ ସୁନ୍ଦର୍ ।
1CO 15:41 ପଡ଼୍‍ଦ୍‍ତାଦ୍ ସୁନ୍ଦର୍ ଅଣ୍ଡ୍‌ ଲେକାତ୍, ନେଲ୍‍ଞ୍ଜ୍‍ତାଦ୍ ମେଣ୍ଡେଅନ୍‌ ରକମ୍ ନୁ ଉକାକିନାଦ୍ ସୁନ୍ଦର୍ ୱେରେ ଲେକାତ୍ । ଇଦ୍ ରକମ୍ କି ୱେରଡ଼୍ ଉକାମ୍‍ତେ ସୁନ୍ଦର୍, ମେଣ୍ଡେଅନ୍‌ ଉକାମ୍‍ତେ ତଡ଼୍ ୱେରେ ।
1CO 15:42 ଡଲ୍‍ତଡ଼ାଦ୍ ପୁନରୁତ୍‍ତାନ୍ ବିଷୟ୍‍ତେ ମିକା ଇଦ୍ ଗଟ୍ ଦର୍‍କାର୍ । ସମାଦି ଇସମାନ୍ଦାନ୍ ମେନ୍ଦୁଲ୍ ମିକା ଦଂସ ଆଦ୍‍ତେ । ଇତ୍‍କେ ପୁନରୁତ୍‍ତିତ୍ ମେନ୍ଦୁଲ୍ ନଷ୍ଟ ଆୟ୍‍ୟ ।
1CO 15:43 ସମାଦି ଇଦାନ୍ ମେନ୍ଦୁଲ୍ ସୁନ୍ଦର୍ ଆୟ୍‍ୟ ନୁ ଶାତ୍‍ୱାମ୍‍ ଇଲ୍‍ୱାଦ୍ । ଇତ୍‍କେ ପୁନରୁତ୍‍ତିତ୍ ମେନ୍ଦୁଲ୍ ସୁନ୍ଦର୍ ନୁ ଶାତ୍‍ୱାମ୍‍ତାଦ୍ ।
1CO 15:44 ସମାଦି ଇଦାନ୍ ୱେଲେ ମେନ୍ଦୁଲ୍ ଲେକାମ୍ ମାନ୍‍ତେ; ଇତ୍‍କେ ପୁନର୍ଜୀବିତ୍ ଆଦାନ୍‍ୱେଲେ, ଆଦ୍ ଆଦ୍‍ତେ ଆତ୍ମିକ ମେନ୍ଦୁଲ୍ । ଲେକାମ୍ ମେନ୍ଦୁଲ୍‍ତାଦ୍ ଆତ୍ମିକ୍‌ ମାନ୍ଦାନ୍ ମାୟ୍‍ଦିଙ୍କ୍, ଆତ୍ମିକ ଆଦୁତ୍‍ତେ ।
1CO 15:45 ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ, “ମୁନେନ୍ ଆଦମ୍ ଅଣ୍ଡୟ୍‌ ଜିୱେ ପଶୁ ଲେକାମ୍ ତିଆର୍ ଆସ୍ ମାତ୍‍ତଣ୍ଡ୍ ।” ପେର୍କେତ୍‌ ଆଦମ୍ ମାତ୍‍ତଣ୍ଡ୍, ଜିୱେମାନ୍ଦାନ୍‌ ଆତ୍ମା ଆତ୍‌ତନ୍‌।
1CO 15:46 ମୁନେନ୍‍କନ୍ସ୍ ଆତ୍ମିକ ବିଷୟ୍ ଇଲ୍‍ୱେମାତ୍‍ତେ । ମୁନେନ୍ ବାତ୍ ମାତ୍‍ତେ ଆଦ୍ ପ୍ରାକୃତିକ୍, ତାନ୍‍ପେର୍କେ ୱାତ୍‍ତେ ଆତ୍ମିକ ବିଷୟ୍ ।
1CO 15:47 ମୁନେତ୍ ନାରୁଡ଼୍ ଆଦମ୍ ମାତ୍‍ତଣ୍ଡ୍ ପୃତିବିତଣ୍ଡ୍, ମାଣ୍ଡୁଲ୍‍ତଡ଼୍ ତିୟାର୍‍ ଆତ୍‍ତଣ୍ଡ୍; ଇତ୍‍କେ ଦ୍ୱିତୀୟ୍ ଆଦମ୍ ସ୍ୱର୍ଗତାଗାଙ୍କ୍ ଡିଗ୍‍ତଣ୍ଡ୍ ।
1CO 15:48 ପୃତିବିତେ ନାରୁଡ଼୍ ସାରେତଡ଼୍ ଆଦ୍ ମାଣ୍ଡୁଲ୍‍ତଡ଼୍ ତିୟାର୍‍ ଆତ୍‍ତେ ନାରୁଡ଼୍ ଲେକାମ୍ । ଇତ୍‍କେ ସ୍ୱର୍ଗତଡ଼୍ ସ୍ୱବାବ୍‍ତେ ନାରୁଡ଼୍ ଆଦ୍ ସ୍ୱର୍ଗତଣ୍ଡ୍ ନାରୁଡ଼୍ ଲେକାମ୍ ।
1CO 15:49 ମାନାଡ଼୍ ଇଞ୍ଜେ ମାଣ୍ଡୁଲ୍‍ତଡ଼୍ ତିୟାର୍ ଆତ୍‍ତେ ନାରୁଡ଼୍ ଲେକାମ୍ ପୁଟୁଙ୍କ୍ ପୟ୍‍ସ୍ ମିନ୍ଦେ, ଇତ୍‍କେ ଅନ୍‌‍ଦିନେ ଆଦ୍ ସ୍ୱର୍ଗତଣ୍ଡ୍ ମାନେୟ୍‍ତେ ଲେକାମ୍ ପୁଟୁଙ୍କ୍ ଆଦ୍‍ତାଡ଼୍ ।
1CO 15:50 ଆଦିଙ୍କ୍ ଦାଦାଲଡ଼ି ନୁ ଏଲାସ୍କ୍, ନାନ୍ ମିକିଂଙ୍କ୍ କେତାନଙ୍କ୍ ଆଲ୍‍ସୁତାନ୍ ଜେ, ନେତୁର୍ ଆଉଙ୍ଗ୍ ମେନ୍ଦୁଲ୍ ପୟ୍‍ସ୍ ମାନାଡ଼୍ ଇଶ୍ୱର୍‌ତେ ରାଜ୍ୟତ୍ ଅଦିକାରି ଆଦାନଙ୍କ୍ ପାର୍‍ୱାଦ୍, ବାତେଙ୍କ୍ ଇତ୍‍କେ ଦଂସ ଆଦାନ୍ ଜିନିଷ୍ ନଷ୍ଟ ଆୟ୍‍ୱାଦ୍ ଆଦାନଙ୍କ୍ ପାର୍‍ୱ ।
1CO 15:51 କେଞ୍ଜାଟ୍ ନାନ୍ ମିକିଂଙ୍କ୍ ଅଣ୍ଡୟ୍‌ ନିଜାତାଦ୍ ସତ୍ ଗଟ୍ କେତୁତାନ୍ । ମାନାଡ଼୍ ସାର୍ରେତଡ଼୍ ଡଲ୍‍ୱାଡ଼୍ ନୁ ମାନାଡ଼୍ ସାର୍ରେତଡ଼୍ ପରିବର୍ତ୍ତିତ୍ ଆଦ୍‍ତାଡ଼୍ ।
1CO 15:52 ଇତ୍‍କେ ମାଡ଼େଙ୍କ୍‌ତାଦ୍ ତୂରି ଲେଙ୍ଗ୍ ଆଦାନ୍‍ୱେଲେ, ଅଣ୍ଡୟ୍‌ ମୁହୁର୍ତ୍ତ୍‍ତେ, କଣ୍ଡେ ମିଟ୍‍କେତେ ମାନାଡ଼୍ ସାର୍ରେତଡ଼୍ ବଦ୍‍ଲେମ୍ ଆଦ୍‍ତାଡ଼୍ । ଆସୁଟେ ଡଲ୍‍ତଡ଼୍ ଅମର୍ ଆସ୍ ତେଏଦିତଡ଼୍ ।
1CO 15:53 ବାତେଙ୍କ୍ ଇତ୍‍କେ ବାତ୍ ନଷ୍ଟ ଆଦ୍‍ତେ, ଆଦିଙ୍କ୍ ନଷ୍ଟ ଆୟ୍‍ୱାଦ୍ ବଦ୍‍ଲେମ୍ ମାଡ଼ାନଙ୍କ୍ ଆଦ୍‍ତେ; ବେନ୍ ପୃତିବିତାନ୍ ମେନ୍ଦୁଲ୍ ଡଲିଆଦ୍‍ତେ, ଆଦିଙ୍କ୍ ଅମର୍ ଚକାସିଲେ କେର୍‍ସ୍ପାନଙ୍କ୍ ଆଦ୍‍ତେ ।
1CO 15:54 ଆଲାଆତ୍‍କେ ନୁ ଇଦ୍ ନାୟାଦ୍ ମେନ୍ଦୁଲ୍ ଅମର୍ ଆତ୍‍କେ, ଦର୍ମଶାସ୍ତ୍ରତାଦ୍ ଇଦ୍ ଗଟ୍ ସାରେ ଆଦ୍‍ତେ, “ଡଲ୍‍ନାଦ୍ ଡଲିଆତ୍‍ତେ, ସାରେ ଜିଡ଼୍‍ତେ ।
1CO 15:55 ରେ ଡଲ୍‍ନାଦ୍ ! ବେଗେ ନିୟାଦ୍ ଜିଡ଼୍‍ତାଦ୍ ? ରେ ଡଲ୍‍ନାଦ୍ ! ବେଗେ ନିୟାଦ୍ ରେହେତାନାଦ୍ ଶାତ୍‍ୱାମ୍ ?”
1CO 15:56 ରେହେତାନ୍‍ ଶାତ୍‍ୱାମ୍ ଡଲ୍‍ନାଦ୍ ପାପ୍ ତାଗାଙ୍କ୍ ଦର୍ସିକି ଆଦ୍‍ତେ, ପାପାମ୍‍ତେ ଶାତ୍‍ୱାମ୍‍ ନିୟମ୍ ।
1CO 15:57 ଇତ୍‍କେ ମାନାଡ଼୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ କେତିତାଡ଼୍‍, ବାତେଙ୍କ୍‍ଇତ୍‍କେ ଅଣ୍ଡ୍‌ ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ମାନାଡ଼୍‍କିଙ୍କ୍ ଜିଡ଼୍‍ପ୍‍ତଣ୍ଡ୍ ।
1CO 15:58 ଆଦିଙ୍କ୍ ପ୍ରିୟ ଦାଦାଲଡ଼ି ନୁ ଏଲାସ୍କ୍, ଗାଡ଼୍‍ସ୍ ନୁ ମେୟ୍‍ଲକନ୍‌ସ୍ ମାନୁଟ୍ । ପ୍ରବୁନ୍ ପାଡ଼୍‍ୟିତାଗ୍ ସାର୍ରେୱେଲେ ତିୟାର୍ ଆସ୍ ମାନୁଟ୍ । ବାତେଙ୍କ୍‍ଇତ୍‍କେ ମିଡ଼୍ ପୁତ୍‍ତିଡ଼୍ ଜେ, ପ୍ରବୁନ୍ ସେଙ୍ଗେ ମିୟାଦ୍ ପାଡ଼୍‍ୟି ବେସୁଟ୍‍ବା ଆଙ୍ଗ୍‍ଡ଼ାମ୍ ଆୟ୍‍ୟ ।
1CO 16:1 ଯିହୁଦାତାଗ୍ ମାନ୍ଦାନ୍ ପବିତ୍ର ମଣ୍ଡଲିତେ ବିଶ୍ୱାସୀଡ଼୍ ସେଙ୍ଗେ ଡାବ୍‍କ୍ ସାହାଯ୍ୟ ଇଦାନ୍ ବିଷୟ୍‍ତେ ନାୟାଦ୍ ମତାମତ୍, ନାନ୍ ଗାଲାତୀୟ ଆଞ୍ଚିନାଗ୍ ମାନ୍ଦାନ୍ ମଣ୍ଡଲିତିଙ୍କ୍ ବାତ୍ ମାଡ଼ାନଙ୍କ୍ ନିର୍ଦେଶ୍ ଇତ୍‍ତାନ୍, ଆଦ୍ ଲେକାମ୍ ପାଲନ୍ ମାଡ଼ାଟ୍ ।
1CO 16:2 ମିୟାଦ୍ ନିଜେତ୍ ରଜ୍‍ଗାର୍ ଲେକାମ୍ ସାର୍‍ରେ ରବ୍‌ବାର୍‌ ଦିନ୍ ସେଙ୍ଗେ ବେସ୍‌କ୍‌ ଡାବ୍‍କ୍ ୱେରେ ନେଃଏସ୍ ମାନୁଟ୍ । ଆଲାଆତ୍‍କେ, ନାନ୍ ଆତ୍‍ତେୱେଲେ ମିକିଂଙ୍କ୍ ମେଣ୍ଡେ ଡାବ୍‍କ୍ ତାଲ୍‍କାନଙ୍କ୍ ୱେୟ୍ ।
1CO 16:3 ନାନ୍ ୱାସ୍ ସାୟେ ହେର୍କା ମାଡ଼ମାନ୍ଦାନ୍ ନାରୁଡ଼୍‍କିଂଙ୍କ୍ ପରିଚୟ୍ ଚିଟି ଇଦ୍‍ତାନ୍ ନୁ ଅଡ଼୍‌ ମିୟାଦ୍ ଦାନ ତଡ଼୍ ଯିରୁଶାଲେମ୍ ଆଦ୍‍ତଡ଼୍ ।
1CO 16:4 ଇତ୍‍କେ ନାୟାଦ୍ ଆଦାନାଦ୍ ଦର୍‍କାର୍ ଆତ୍‍କେ, ଅଡ଼୍‌ ନା ତଡ଼୍ ଆଦେପାର୍‍ଦ୍‍ତଡ଼୍ ।
1CO 16:5 ନାନ୍ ମାସିଦୋନିଆତା ଆଞ୍ଜମିନ୍ଦେନ୍ । ଆଞ୍ଜ୍ ୱାଦାନାଦ୍ ତେର୍‍ସ୍‍ପି ନାନ୍‍ନେ ମିଇ ବକେତ୍ ମାଲ୍‍ସ୍ ୱାଦ୍‍ତାନ୍ ।
1CO 16:6 ନାନ୍ ଆତ୍‍କେ, ମିଇ ତଡ଼୍ ବେସ୍‍କେ ଦିନା ମାନ୍‍ତାନ୍, ଆତ୍‍କେ ଶାଲ୍‍ କାଲାମ୍ ମାନ୍‍ତାନ୍ । ତାନ୍‍ପେର୍କେ ବେଗେ ଆଦାନ୍ ସେଙ୍ଗେ ଆଲ୍‍ସିତାନ୍, ମିଡ଼୍ ନାକିଂଙ୍କ୍ ଆଗେ ଆଦାନ୍ ସେଙ୍ଗେ ସାହାଯ୍ୟ ମାଡ଼ିତିଡ଼୍ ।
1CO 16:7 ବାତେଙ୍କ୍‍ଇତ୍‍କେ ଆଦାନ୍ ଆର୍ର୍‍ଦାଗ୍ ମିଇ ତଡ଼୍ ମାତର୍ ନାର୍ଗେଦିନା କାୟ୍‍ଲାନାଦ୍ ନାୟାଦ୍ ଇଚ୍ଛା ଆୟ୍‍ୟ । ନାନ୍ ଆଶେ ମାଡ଼ୁତାନ୍, ପ୍ରବୁନାଦ୍ ଇଚ୍ଛା ଆତ୍‍କେ, ନାନ୍ ମିଇ ତଡ଼୍ ଇଦାମ୍ ଗାଟି ଜେଲ୍ ମାନ୍‍ତାନ୍ ।
1CO 16:8 ଇତ୍‍କେ ପେଣ୍ଟିକଷ୍ଟ୍ ପାଣ୍ଡୁମ୍‍ଦିନେ ଏୱୁନା ନାନ୍ ଇଗେ ଏପିସୀତାଗ୍ ମାନ୍‍ତାନ୍ ।
1CO 16:9 ଇଗେ ନା ବିରୁଦ୍‍ତେ ନାର୍‍ଗେ ନାରୁଡ଼୍ ମାତ୍‍କେ ଗାଲା, ସାୟେତାୱୁ ପାଡ଼୍‍ୟି ମାଡ଼ାନ୍ ସେଙ୍ଗେ ନାକିଂଙ୍କ୍ ଆସର୍ ଆର୍‍ଙ୍ଗ ମିନ୍ଦେ ।
1CO 16:10 ତୀମତି ମିଇ ବକେତ୍ ୱାତ୍‍କେ, ଅଂକିଙ୍କ୍‌ ସ୍ୱାଗତ୍ ମାଡ଼ାଟ୍ । ବାତେଙ୍କ୍‍ଇତ୍‍କେ ଅଣ୍ଡ୍‌ ମିକା ନା ଲେକାମ୍ ପ୍ରବୁନ୍ ପାଡ଼୍‍ୟି ମାଡ଼ୁତଣ୍ଡ୍ ।
1CO 16:11 ବେନ ଅଂକିଙ୍କ୍‌ ତୁଚ୍ଛ ବୁଦ୍‍ତେ ମାଡ଼୍‍ମାକିଡ଼୍ । ଶାନ୍ତିତଡ଼୍ ଆଦାନ୍ ସେଙ୍ଗେ ମିଡ଼୍ ଅଂକିଙ୍କ୍‌ ନିଜାମ୍ ସାହାଯ୍ୟ ମାଡ଼ିତିଡ଼୍ । ଆଲାଇତ୍‍କେ, ଅଣ୍ଡ୍‌ ଦାଦାଲଡ଼୍ ତଡ଼୍ ନା ବକେତ୍ ମାଲ୍‍ସ୍ ୱାଦ୍‍ତଣ୍ଡ୍ । ଅଡ଼୍‌‍କିଂଙ୍କ୍ ନାନ୍ କେପି ମାନ୍‍ତାନ୍ ।
1CO 16:12 ଦାଦାଲ୍ ଆପୋଲ୍ଲୋନ୍ ବିଷୟ୍‍ତେ କେତୁତାନ୍ ଜେ, ବାଗାତ୍ ଦାଦାଲଡ଼୍ ତଡ଼୍ ମିଇ ବକେତ୍ ଆଦାନ୍ ସେଙ୍ଗେ ନାନ୍ ଅଂକିଙ୍କ୍‌ ନାର୍‍ଗେ ଦାମ୍ କେତ୍‍ତାନ୍ । ଇତ୍‍କେ ଇଞ୍ଜେ ଆଦାନ୍ ସେଙ୍ଗେ ବେଲାମେଣ୍ଡେ ରାଜି ଇଲେଣ୍ଡ୍ । ପେର୍‍କେ ସୁଯୋଗ୍ ଦର୍‍କେ, ଅଣ୍ଡ୍‌ ନିଜାମ୍ ମିଇ ବକେତ୍ ଆଦ୍‍ତନ୍ ।
1CO 16:13 ମିଡ଼୍ ନାଆକି କେପି ମାନୁଟ୍, ବିଶ୍ୱାସ୍‍ତାଗ୍ ଗାଡ଼୍‍ସ୍‍ ଆୟ୍‍ମୁଟ୍, ସାହାସ୍ ନୁ ବଲ୍‍ବାନ୍ ଆୟ୍‍ମୁଟ୍ ।
1CO 16:14 ମିୟାଦ୍ ସାର୍‍ରେ ପାଡ଼୍‍ୟି ପ୍ରେମତଡ଼୍ ଆୟି ।
1CO 16:15 ମିଡ଼୍ ସ୍ତିଫାନ୍ ନୁ ତାନ୍ ପରିବାର୍‍ ବିଷୟ୍ ପୁତ୍‍ତିଡ଼୍ । ଅଡ଼୍‌ ଆକାୟାତେ ପ୍ରର୍‍ତୁମ୍ ପବିତ୍ର କ୍ରିଷ୍ଟିୟାନ୍ । ଅଡ଼୍‌ ଇଶ୍ୱର୍‌ତେ ନାରୁଡ଼୍ ସେବା ପାଡ଼୍‍ୟିତାଗ୍ ନିଜେତିଙ୍କ୍ ସମର୍ପଣ୍‍ ମାଡ଼୍‍ତଡ଼୍ । ଦାଦାଲଡ଼ି ନୁ ଏଲାସ୍କ୍‍; ନାନ୍ ମିକିଂଙ୍କ୍ ଅନୁରୋଦ୍ ମାଡ଼ୁତାନ୍,
1CO 16:16 ମିଡ଼୍ ଇଡ଼ାଦ୍ ନୁ ଇଡ଼୍‍ତଡ଼୍ ପାଡ଼୍‍ୟି ନୁ ସେବା ମାଡ଼ମାନ୍ଦାନ୍ ନାରୁଡ଼୍‍ତେ ଗଟି କେଞ୍ଜାଟ୍ ।
1CO 16:17 ସ୍ତିଫାନ୍, ଫର୍ତୁନାତ ନୁ ଆକାୟିକ ଇଗେ ୱାତ୍‍ତାଙ୍କ୍ ନାନ୍ ଗାଟି ୱେଡ଼୍‍କ୍ ଆତ୍‍ତାନ୍ । ମିଡ଼୍ ଇଲ୍‍ୱାଙ୍କ୍ ଅଡ଼୍‌ ମିୟାଦ୍ ପଡ଼୍‍ୟେ ସାରେ ମାଡ଼୍‍ତଡ଼୍ ।
1CO 16:18 ଅଡ଼୍‌ ମିକିଂଙ୍କ୍ ନୁ ନାକିଂଙ୍କ୍ ୱେଡ଼୍‍କ୍‍ ମାଡ଼୍‍ତଡ଼୍ । ଇଦ୍‍ରକମ୍ ନାରୁଡ଼୍ ସମ୍ମାନ୍‍ ପାଏମ୍ ଆଦ୍‍ତଡ଼୍ ।
1CO 16:19 ଏସିଆ ଆଞ୍ଚିନ୍‍ ମଣ୍ଡଲି ମିକିଂଙ୍କ୍ ଅବିନନ୍ଦନ୍ ମାଡ଼ୁତା । ଆକ୍ୱିଲା, ପ୍ରିସ୍କିଲା ନୁ ଅଡ଼ାଦ୍‌ ଲୋନ୍‌ ଉପବାସ୍ ମାଡ଼ମାନ୍ଦାନ୍ ମଣ୍ଡଲି, ପ୍ରବୁନ୍ ପେଦେର୍‍ତେ ମିକିଂଙ୍କ୍ ଲୋପେକନ୍‍ସ୍ ନମସ୍କାର୍‌ ମାଡ଼ୁତା ।
1CO 16:20 ଇଗେତଡ଼୍ ଦାଦାଲଡ଼୍ ନୁ ଏଲାସ୍କ୍ ମିକିଂଙ୍କ୍ ସାର୍ରେତଡ଼୍ ନମସ୍କାର୍ କେତୁତଡ଼୍ । ମିଡ଼୍ ପବିତ୍ର କ୍ରିଷ୍ଟନ୍ ପ୍ରେମ ତଡ଼୍ ମିଡ଼୍ ମିଇ ଲୋପେ ନମସ୍କାର୍‌ ମାଡ଼ାଟ୍ ।
1CO 16:21 ନାନ୍ ପାଉଲ୍ ନିଜେତ୍ କାୟ୍‍ଦେ ଇୱୁସାର୍ରେ ଶୁଭେଚ୍ଛା ଲେକୁତାନ୍ ।
1CO 16:22 ବେନ ପ୍ରବୁଙ୍କ୍ ପ୍ରେମ ମାଡ଼ଣ୍ଡ୍, ଅଣ୍ଡ୍‌ ଅବିଶାପ୍‌ ଆୟିଣ୍ଡ୍, “ମାରାନାତା,” ମାନ୍‍ ପ୍ରବୁ ୱାଡ଼ିଣ୍ଡ୍ ।
1CO 16:23 ପ୍ରବୁ ଜିସୁନ୍ ଅନୁଗ୍ରହ୍ ମିଇ ଲୋପେ ବିରାଜ୍‍ମାନ୍ ଆୟି ।
1CO 16:24 କ୍ରିଷ୍ଟ ଜିସୁନ୍ ତଡ଼୍ କାୟ୍‍ଲିମାନ୍ଦାନଡ଼ି ମିଡ଼୍ ସାର୍ରେତଡ଼୍ ନା ଜିୱୁତେ ପ୍ରେମ ଗ୍ରହନ୍ ମାଡ଼ାଟ୍ ।
2CO 1:1 ନାନ୍ ପାଉଲ୍, ଇଶ୍ୱର୍‌ତେ ଇଚ୍ଛା ଲେକାମ୍ ଜିସୁ କ୍ରିଷ୍ଟନ୍ ପ୍ରେରିତ୍ ନୁ ମାନ୍‍ ଦାଦାଲ୍‌ ତୀମତି, କରିନ୍ଥ ମଣ୍ଡଲିତାଗ୍ ଲେକୁତାନ୍ ନୁ ଆଖାୟା ଦେଶ୍‍ତେ ସାରେ ବିଶ୍ୱାସୀ ପାକେ ଇଦ୍ ଚିଟି ଲେକମିନ୍ତେନ୍ ।
2CO 1:2 ମାନ୍‍ ବାବାଲ୍ ଇଶ୍ୱର୍‌ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
2CO 1:3 ୱାଡ଼ାଟ୍, ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଦନ୍ୟ ନାରୁଣ୍ଡ୍‌, ଦୟାକାରି ନୁ ସାରେତଡ଼୍ ସାହାଯ୍ୟତେ ଉତ୍ସ, ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦିକାଡ଼୍ ।
2CO 1:4 ମାନ୍‍ ଦୁଃକାମ୍ କଷ୍ଟ ୱେଲେ ଇଶ୍ୱର୍‌ ମାନ୍‍ ବେନ୍ ସାନ୍ୱନା ଇଦ୍‍ତନ୍, ଆଦ୍ ସାନ୍ୱନା ତଡ଼୍ ମାନାଡ଼୍ ଦୁଃକାମ୍ କଷ୍ଟ ମାଡ଼ମାନ୍ତାନ୍ ବାଗାତଡ଼୍‍କ୍ ସାନ୍ୱନା ଇଦ୍‍ଦେ ପାର୍ଦତାଡ଼୍ ।
2CO 1:5 ମାନାଡ଼୍ କ୍ରିଷ୍ଟନ୍ ଗାଟି ଦୁଃକାମ୍ କଷ୍ଟତାଗ୍ ‍କାଇଲ୍‍ତାଙ୍କ୍ କ୍ରିଷ୍ଟନ୍ ତଡ଼୍ ଇଶ୍ୱର୍‌ତେ ମହାସାନ୍ତନାତେ ମିକା ତଡ଼୍ ଆଦେ ପାର୍ଦତାଡ଼୍ ।
2CO 1:6 ମାନାଡ଼୍ ଯଦି ଦୁଃକାମ୍ କଷ୍ଟ ମାଡ଼ିତାଡ଼୍, ଆଦ୍ ମିକିଂଙ୍କ୍ ଉପକାର୍ ନୁ ପରିତ୍ରାଣ ସେଙ୍ଗେ । ମାନ୍‍ ସାନ୍ୱନା ଦର୍କେ, ମିଡ଼୍ ମିକା ଆଦେଲେକାମ୍ ଗାଡ଼୍‍ସ୍‍ତେ ଦୁଃକାମ୍ କଷ୍ଟ ମାଡ଼ାନ୍ ସେଙ୍ଗେ ସାନ୍ୱନା ନୁ ଶକ୍ତି ଦର୍‍କିତ୍ ।
2CO 1:7 ମିୟାଗ୍ ମାୱାଦ୍ ଆଶେ ମିନ୍ତେ । ମାମ୍‍ମେ ପୁତ୍‍ତମ୍, ମିଡ଼୍ ମାୟାଦ୍‌ ଦୁଃକାମ୍ ତିପାଲ୍‍ତେ ବେଲାନ୍ ତଡ଼୍ ଆସ୍‍ମିନ୍ତେମ୍, ଆଦ୍‍ଲେକାମ୍ ମା ସାନ୍ତ୍ୱନାତାଗ୍ ମିକା ତଡ଼୍ ଆଦ୍‍ତିଡ଼୍ ।
2CO 1:8 ହୋ ଦାଦାଲଡ଼ି ନୁ ଏଲାସ୍କ୍, ମାମ୍‍ମେ ଏସିଆ ପ୍ରଦେଶ୍‍ତେ ମା ପରୁ ଗଟେମ୍ ଆସ୍‍ମାନ୍ଦାନ୍ କଷ୍ଟ ବିଷୟ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତମ୍ । ଆଦ୍ କଷ୍ଟ ସହେମ୍‍ ଆଦେପାର୍ନାଙ୍କ୍ ମାମ୍‍ମେ ଜୀୱୁନ୍‌ତେ ଆଶେ ୱିଡ଼୍‍ସିତ୍‍ତମ୍ ।
2CO 1:9 ମାକିଂଙ୍କ୍ ଡଲାନ୍ ଗଟ୍‌ ଇସ୍‍ମିନ୍ତେଡ଼୍ ଇଞ୍ଜ ଆଲ୍‍ସମାତ୍‍ତମ୍ । ବାତେଙ୍କ୍ ଇତ୍‍କେ ଇଦ୍ ଗଟେମ୍ ଆତ୍‍ତେ, ଆଦିଙ୍କ୍ ନିଜେତ୍ ପରୁ ଆଶେ ମାଡ଼କଟ୍ ଡଲାନଙ୍କ୍ ଜୀୱୁନ୍‌ ଇସ୍‍ମାନ୍ଦାନ୍ ଇଶ୍ୱର୍‌ତେ ପରୁ ଆଶେ ୱାଟ୍‍ତମ୍ ।
2CO 1:10 ଅଣ୍ଡ୍‌ ମାକିଂଙ୍କ୍ ବୟାନକ୍ ଡଲ୍‍ତାଗାଙ୍କ୍ ଉଦ୍ଦାର୍ ମାଡ଼୍‍ତଣ୍ଡ୍ ନୁ ଉଦ୍ଦାର୍ ମାଡ଼ିତନ୍, ମେଣ୍ଡେ ଅଣ୍ଡ୍‌ ଯେ ବବିଷ୍ୟତ୍‍ତେ ମିକା ଉଦ୍ଦାର୍ ମାଡ଼ିତନ୍, ଅନାଗେ ମାୟାଦ୍‌ ଇଦ୍ ଆଶେ ମିନ୍ଦେ ।
2CO 1:11 ମିଡ଼୍ ପ୍ରାର୍ତନା ତଡ଼୍ ମାକିଂଙ୍କ୍ ସାହାଯ୍ୟ ମାଡ଼ାଟ୍ । ଆଲାକେ, ମା ସେଙ୍ଗେ ମାଡ଼ମାନ୍ଦାନ୍ ନାର୍‍ଗେ ପ୍ରାର୍ତନାତାଦ୍‍ ଉତ୍ତର୍ ଦର୍‍କିତ୍ ନୁ ଇଶ୍ୱର୍ ମାକିଂଙ୍କ୍ ଆର୍ଶିବାଦ୍ ମାଡ଼ିତନ୍ । ମା ସେଙ୍ଗେ ନାର୍‍ଗେ ନାରୁଡ଼୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତଡ଼୍ ।
2CO 1:12 ଜଗତ୍‌ତେ ଜିୱୁନ୍ ନୁ ବିଶେସ୍‍ତେ ମିଇ ତଡ଼୍ ମାୟାଦ୍‌ ସମ୍ପର୍କ ଇଶ୍ୱର୍‌ତେ ପବିତ୍ରତା ନୁ ବିଶ୍ୱସ୍ତତା ତଡ଼୍ ପରିଚାଲିତ୍‍ ଇଞ୍ଜ ମାନ୍‍ ମୋନ୍‍ତାଦ୍‍ ସାକ୍ଷ୍ୟ । ଇଦିନ୍ ସେଙ୍ଗେ ମାନ୍‍ ମନ୍‍ତାଗ୍ ଗର୍ବ ଆଦ୍‍ତେ । ମାନବିକ୍‍ ବୁଦ୍‍ତେ ଆୟ୍‍ୟ, ମାତର୍ ଇଶ୍ୱର୍‌ତେ ଅନୁଗ୍ରହ୍‍ତଡ଼୍ ଆଦ୍ ମାଡ଼ାନଙ୍କ୍ ମାମ୍‍ମେ ତିଆର୍ ଆସ୍‍ମିନ୍ଦେମ୍ ।
2CO 1:13 ବାତ୍ କାର୍‍ସ୍ ମିଡ଼୍ ବୁଜେମ୍ ଆଦ୍‍ତିଡ଼୍, ମୀଇପାକେ ମାମ୍‍ମେ ମାତର୍ ଆସରେ ଲେକୁତମ୍ ।
2CO 1:14 ନାନ୍ ଆଶେ ମାଡ଼ୁତାନ୍, ଇଞ୍ଜେ ବାତ୍ ଇସୁର୍ ବୁଜେମ୍ ଆଦୁତିଡ଼୍, ଆଦ୍ ଆସୁଟେ ପ୍ରବୁ ଜିସୁନ୍ ୱାଦାନ୍ ଦିନାମ୍‍ତେ ସାରେ ବୁଜେମ୍ ଆଦ୍‍ତିଡ଼୍ । ଆଲେକେ, ମିଡ଼୍ ମା ସେଙ୍ଗେ ଗର୍ବ ମାଡ଼ିତିଡ଼୍ ନୁ ମାମ୍‍ମେ ମିକା ମିଇ ସେଙ୍ଗେ ଗର୍ବ ମାଡ଼ିତମ୍ ।
2CO 1:15 ଇଦ୍ ବିଷୟ୍‍ତେ ନାନ୍ ନିଜାମ୍ ଲେକାମ୍ ପୁଞ୍ଜ୍‍ମାତ୍‍ତାଙ୍କ୍ ମୁନେନ୍ ମିଇ ଗାର୍ରେ ଆଦ୍‍ଦାନ୍ ସେଙ୍ଗେ ନାୟାଦ୍ ଇଚ୍ଛା ମାତ୍‍ତେ । ଆଲେକେ, ମିଡ଼୍ ରେଣ୍ଡ୍‍ଦାମ୍ ନାକିଂଙ୍କ୍ ଉଡ଼ି ୱେଡ଼୍‍କ୍‍ ମାଡ଼େ ପାର୍‍ୱେଡ଼ି ।
2CO 1:16 ମାସିଦୋନିଆ ଆଦାନ୍ ୱେଲେ ନୁ ଆଗାଙ୍କ୍ ମାଲ୍‍ଦାନ୍ ୱେଲେ ମିଇ ପାକେ ବସ୍‍ ଦିନା ମାନ୍ଦାନ୍‍ଙ୍କ୍ ନାୟାଦ୍ ଇଚ୍ଛା ମାତ୍‍ତେ, ବାତେଙ୍କ୍ ଇତ୍‍କେ ଯିହୁଦା ପ୍ରଦେଶ୍‍ତାଗ୍ ଆଦାନ୍ ସେଙ୍ଗେ ନାନ୍ ମିୟାଦ୍ ସାଆଯ୍ୟ ଦର୍‍କାର୍ ମାତ୍‍ତେ ।
2CO 1:17 ନାନ୍ ବାତ୍ ନିଜାମ୍ ଆୟ୍‍ୱେକଟେ ଇଦ୍ ପାଡ଼୍‍ୟି ତାଲିକା ତିଆର୍ ମାଡ଼ିମାତ୍‍ତାନ୍ ? ବେନଡ଼୍ ଅଣ୍ଡୟ୍‌ ତଡ଼େକ୍ “ଅଁ, ନୁ ଇଲ୍‍ଲେ, ଇଲ୍‍ଲେ,” ମାଡ଼ିତଡ଼୍, ଅଡ଼୍‌‍ଲେକାମ୍ ବାତେଏ ନାନ୍ ଜିନେତ୍ ସ୍ୱାର୍ତସିଦ୍ଦି ସେଙ୍ଗେ ନାୟାଦ୍ ପାଡ଼୍‍ୟି ମାଡ଼ିତାନ୍ ?
2CO 1:18 ନିଜାମ୍ ଇଶ୍ୱର୍‌ ବିଶ୍ୱାସ୍‌ତେ ତଣ୍ଡ୍, ବେନ୍ କବର୍ ନାନ୍ ଇଦ୍‍ତାନ୍ ଆଦ୍ “ଅଁ ବା ନା,” ଆୟ୍‍ୟ ।
2CO 1:19 ସିଲେ, ତୀମତି ନୁ ନାନ୍ ମିଇ ଗାର୍ରେ ପ୍ରଚାର୍ ମାଡ଼ମାନ୍ଦାନ୍ ଇଶ୍ୱର୍‌ତେ ମାର୍‍ ଜିସୁ କ୍ରିଷ୍ଟ, ବେସୁଙ୍କ୍‍ ୱେରଡ଼୍ ତଡ଼େକ୍ “ଅଁ ନୁ ଇଲ୍‌ଲେ,” କେଲଣ୍ଡ୍ । ମେଣ୍ଡେଅଣ୍ଡ୍‌ ରକମ୍, ଅଣ୍ଡ୍‌ ଆଦୁତନ୍ ଇଶ୍ୱର୍‌ତେ “ଅଁ ।”
2CO 1:20 ଆଦିଙ୍କ୍ ଇଶ୍ୱର୍‌ତେ ସାର୍‍ରେ ପ୍ରତିଜ୍ଞା ସାରେ ସତ୍‍ ଆତ୍‍ତେ, ଆୱୁ ସାରେ ଅଁ ଅଡ଼ାଗେ ମିନ୍ଦେ; ଇଦିନ୍ ସେଙ୍ଗେ ଜିସୁ କ୍ରିଷ୍ଟନ୍‍ ତଡ଼୍ ଇଶ୍ୱର୍‌ତେ ଗୌରବ୍ ସେଙ୍ଗେ ମାମ୍ ଆମେନ୍ ମାଡ଼ିତମ୍ ।
2CO 1:21 ଇଗେ ନିଜେ ଇଶ୍ୱର୍‌ ଜିସୁ କ୍ରିଷ୍ଟନାଗ୍ ମିୟାଦ୍ ନୁ ମାନ୍‍ ଜିୱୁଣ୍ଡ୍‍ତିଙ୍କ୍ ଅଣ୍ଡୟ୍‌ ମାଡ଼ି ସୁରକ୍ଷା ମାଡ଼୍‍ତଣ୍ଡ୍ ।
2CO 1:22 ଅଣ୍ଡ୍‌ ମାନ୍‍ ୱେରେ ମାଡ଼ି ମିନ୍ଦେନ୍ ନୁ ମାନ୍‍ ହୃଦୟତାଗ୍ ତାନ୍ ପବିତ୍ର ଆତ୍ମାତିଙ୍କ୍ ନେଃଏତାଙ୍କ୍ ମାନ୍‍ ପରୁ ମାଲିକ୍ ଆତ୍‍ତଣ୍ଡ୍ । ପବିତ୍ର ଆତ୍ମା ଆଦୁତ୍‍ତେ, ମାନ୍‍ ପରୁ ଇଶ୍ୱର୍‌ତେ ଅଦିକାର୍‌‍ତେ ଚିଃଏନେ ନୁ ବବିଷ୍ୟତ୍‍ତେ ମାନ୍‍ ବାତ୍ ଦର୍‍କିତ୍, ଆଦିନ୍ ଗେରେଣ୍ଟି ଲେକାମ୍ ।
2CO 1:23 ଇଶ୍ୱର୍‌ ଆଦୁତନ୍ ନା ସାକି । ଅଣ୍ଡ୍‌ ନା ଜିୱୁଣ୍ଡ୍‍ତିଙ୍କ୍ ପୁତ୍‍ତଣ୍ଡ୍ । ମିକିଂଙ୍କ୍ ନାନ୍‍ନେ ମେଣ୍ଡେ ବେଲାନ୍ ତିପାଲ୍ ଇୱନ୍, ଆଦିନ୍‌ସେଙ୍ଗେ ନାନ୍ କରିନ୍ଥ ଆଦାନଙ୍କ୍ ମାନ୍‍ ମାଡ଼ନ୍ ।
2CO 1:24 ମିଡ଼୍ ବେନ୍ ଗଟ୍‍ତିଙ୍ଗ୍ ବିଶ୍ୱାସ୍‌ ମାଡ଼ିତିଡ଼୍, ଇଦ୍ ବିଷୟ୍‍ତେ ମିଇ ପରୁ ଶାସନ୍‍ ମାଡ଼ାନଙ୍କ୍ ମାମ୍‍ମେ ଆଲ୍‍ସି ମାଡ଼ମ୍, ବାତେଙ୍କ୍ ଇତ୍‍କେ ମିଡ଼୍ ବିଶ୍ୱାସ୍‍ତାଗ୍ ଲେକାମ୍ ଗାଡ଼୍‍ସ୍ ମିନ୍ଦେଡ଼ି । ଇତ୍‍କେ ମିଇକିଂଙ୍କ୍ ମାତର୍ ୱେଡ଼୍‍କ୍‍ ମାଡ଼ାନ୍ ସେଙ୍ଗେ ମିଇ ତଡ଼୍ ଅଣ୍ଡୟାଗ୍‍ କାଇଲି ମାମ୍‍ମେ ପାଡ଼୍‍ୟି ମାଡ଼ୁତମ୍ ।
2CO 2:1 ଯଦି ନାୟାଦ୍ ମିଇ ବକେତ୍ ଆଦାନାଦ୍ ମିଇ ସେଙ୍ଗେ ଦୁଃକାମ୍‍ ଆଦ୍‍ତେ, ମିଇ ପାକେ ମେଣ୍ଡେ ବେସୁଙ୍କ୍‍ ଆନନ୍ ଇଞ୍ଜ ନାନ୍ ମାନ୍‍ ମାଡ଼୍‍ତାନ୍ ।
2CO 2:2 ମିକିଂଙ୍କ୍ ଦୁଃକାମ୍ ଇତ୍‍କେ, ନାକିଂଙ୍କ୍ ବେନ ୱେଡ଼୍‍କ୍‍ ଇଦ୍‍ତନ୍ ? ମିକିଂଙ୍କ୍ ୱିଡ଼୍‍ସ୍‍କେ ମେଣ୍ଡେ ବେନ ଆଦ୍‍ଲେକାମ୍ ଇଲାଣ୍ଡ୍ ।
2CO 2:3 ଆଦିନ୍ ସେଙ୍ଗେ ନାନ୍ ମିକିଂଙ୍କ୍ ଚିଟି ଲେକ୍‍ତାନ୍, ନାନ୍ ଆଗେ ଆତ୍‍କେ; ବେନଡ଼୍ ସେଙ୍ଗେ ନାୟାଦ୍ ୱେଡ଼୍‍କ୍‍ ଆୟେଡ଼୍, ଅଡ଼୍‌ ତଡ଼୍ ବେଲାନ୍ ନାନ୍ ଦୁଃକାମ୍ ଆୟନ୍ । ନିଜାମ୍ ନାୟାଦ୍ ଗାଡ଼୍‍ସ୍ ବିଶ୍ୱାସ୍ ଯେ, ନାୟାଦ୍ ୱେଡ଼୍‍କେତାଗ୍ ମିୟାଦ୍ ୱେଡ଼୍‍କ୍‍ ।
2CO 2:4 ଗାଟି ଦୁଃକାମ୍ ନୁ କଷ୍ଟ ଜିୱୁଣ୍ଡ୍‍ତେ କେୟି କେୟି ନାନ୍ ବେନ୍ ଚିଟି ଲେକିମାତ୍‍ତାନ୍, ମିକିଂଙ୍କ୍ ଦୁଃକାମ୍ ଇଦାଙ୍କ୍ ଆୟ୍‍ୟ, ମାତର୍ ମିକିଂଙ୍କ୍ ନାନ୍ ବେସର୍ ପ୍ରେମ ମାଡ଼ୁତାନ୍, ଇଦ୍ କେତାନାଦ୍ ମାତ୍‍ତେ ଆଦ୍ ଚିଟିତେ ଲେକାମ୍‌ ।
2CO 2:5 ଯଦି ବେନ ବେନଙ୍କ୍ ଦୁଃକାମ୍ ଇସ୍‍ମାନ୍‍ତନ୍, ଅଣ୍ଡ୍‌ ମାତର୍ ନା ମୋନ୍‍ତାଗ୍ ଦୁଃକାମ୍ ଇୱଣ୍ଡ୍, ଇସୁର୍ ବା ନାର୍‍ଗେ ମିକିଂଙ୍କ୍ ଆନ୍‌‍ତେ ଦୁଃକା‍ମ୍ ଇତ୍‍ତନ୍ । ଇଦ୍ ବିଷୟ୍‍ତେ ନାନ୍ ଅଦିକ୍‌ ତିପାଲ୍ ପାଡ଼୍‍ୟି ଇଦାନ୍ ସେଙ୍ଗେ ଇଚ୍ଛା ମାଡ଼ନ୍ ।
2CO 2:6 ମିଇ ଲୋପେଙ୍କ୍ ନାର୍‍ଗେ ମତ ଇସାବ୍‍ତେ ଆଦ୍ ନାରୁଙ୍କ୍ ବେନ୍ ଦଣ୍ଡ୍ ଇତ୍‍ତଡ଼୍, ଆଦ୍ ଅନ୍‌ ମାୟ୍‍ଦିଙ୍କ୍ ନାର୍‍ଗେ ।
2CO 2:7 ଆଦିଙ୍କ୍ ଅଣ୍ଡ୍‌ ବେଲା ପିନା ଦୁଃକାମ୍‍ ଆୟ୍‍ୟଣ୍ଡ୍, ଆଦିନ୍‌ସେଙ୍ଗେ ମିଡ଼୍ ଅଂକିଙ୍କ୍‌ ଇଞ୍ଜେ କ୍ଷମା ମାଡ଼ାଟ୍ ନୁ ସ୍ୱାନ୍ତନା ଇମୁଟ୍ ।
2CO 2:8 ମିକିଂଙ୍କ୍ ନାୟାଦ୍ ଅନୁରୋଦ୍, ମିଡ଼୍ ଅଂକିଙ୍କ୍‌ ପ୍ରେମ ନୁ ସାର୍‍ଦେ ମାଡ଼ୁତିଡ଼୍ ଇଞ୍ଜ କେସିମୁଟ୍ ।
2CO 2:9 ମିଡ଼୍ ସାର୍ରେୱେଲେ ନାୟାଦ୍ ନିର୍ଦ୍ଦେଶ୍ ନୁ ଶିକ୍ଷା ପାଲନ୍ ମାଡ଼ାନଙ୍କ୍ ପୁନ୍ଦାନ୍ ସେଙ୍ଗେ ନାନ୍ ଆଦ୍ ଚିଟି ଲେକିମାତ୍‍ତାନ୍ ।
2CO 2:10 ବେସୁଟ୍‌ ଅଡ଼୍‌‍କିଂଙ୍କ୍ କ୍ଷମା ମାଡ଼ିତିଡ଼୍, ନାନ୍ ମିକା ଅଂକିଙ୍କ୍‌ କ୍ଷମା ମାଡ଼ିତାନ୍ । ନାନ୍ ଯଦି ବାତେବା ବିଷୟ୍‍ତେ ଅଂକିଙ୍କ୍‌ କ୍ଷମା ମାଡ଼ିମାନ୍ତାନ୍, ଆଦ୍ କ୍ରିଷ୍ଟଙ୍କ୍‌ କାଇଲି ମିଇ ସେଙ୍ଗେ ମାଡ଼ିମାନ୍ତେ ।
2CO 2:11 ଆଦିଙ୍କ୍ ଶୟ୍‍ତାନ୍‍ତିଙ୍କ୍ ମାନ୍‍ ବିରୁଦ୍ଦ୍‍ତେ ବାତେବା ପାଡ଼୍‍ୟି ମାଡ଼ାନଙ୍କ୍ ସୁଯଗ୍ ଦର୍କ; ତାନ୍ ସାର୍‍ରେ ଯୋଜନା ମାନାଡ଼୍ ପୁତ୍‍ତାଡ଼୍ ।
2CO 2:12 କ୍ରିଷ୍ଟନ୍ ସୁସମାଚାର୍‌ ପ୍ରଚାର୍ ମାଡ଼ାନଙ୍କ୍ ତ୍ରୋୟା ଦୀପ୍‍ତାଗ୍ ହେଉସ୍ ନାନ୍ ଉଡ଼୍‍ତାନ୍, ଇଦ୍ ପାଡ଼ିୟିଦେ ସେଙ୍ଗେ ପ୍ରବୁ ଆର୍ ଟେଣ୍ଡିତ୍‍ତନ୍ ।
2CO 2:13 ବାତେଙ୍କଇତ୍କେ ମାନ୍‍ ଦାଦାଲ୍ ତୀତସ୍‍ତିଙ୍କ୍ ଆଗେ ଉଡ଼କଟ୍ ନାନ୍ ଦାନ୍ଦେ ଆତ୍‍ତାନ୍ । ଆଦିଙ୍କ୍ ଆଗେ ନାରିଡ଼ାଗାଙ୍କ୍‍ ଆଞ୍ଜ୍ ନାନ୍ ମାସିଦୋନିଆତା ଆତ୍‍ତାନ୍ ।
2CO 2:14 ଇଶ୍ୱର୍‌ତେ ଦନ୍ୟବାଦ୍ ଆୟି । ବାତେଙ୍କ୍ ଇତ୍‍କେ ଅଣ୍ଡ୍‌ ଜିସୁ କ୍ରିଷ୍ଟନ୍ ତଡ଼୍ ସାରେଦାମ୍ ମାକିଂଙ୍କ୍ ଜିଡ଼ାନ୍ ଆର୍‍ଦାଗ୍ ମୁନ୍‍ନେ ଆଦ୍‍ତନ୍ । ମେଣ୍ଡେ ଲେକେତ୍‍ ଗାବ୍‍ ଚାରେପାକ୍ ଲିକ୍‍ତେ ଲେକାମ୍ କ୍ରିଷ୍ଟନ୍ ବୁଦ୍‍ତେ ବାଗାତଡ଼୍‍କ୍ ଇଦାନଙ୍କ୍ ଇଶ୍ୱର୍‍ ମାକିଙ୍କ୍ ବ୍ୟବହାର୍‌ ମାଡ଼ିତନ୍ ।
2CO 2:15 ମାନାଡ଼୍ ଆଦୁତାଡ଼୍ ଇଶ୍ୱର୍‌ତେ ଗଟ୍‍ତେ ନିବେଦିତ କ୍ରିଷ୍ଟନ୍ ସାୟେ ଗାବ୍‍ତେ ଦୁପାମ୍ ଲେକାମ୍ । ବାତ୍ ବେନଡ଼୍ ପରିତ୍ରାନ୍ ପାଏମ୍ ଆଦ୍‍ତଡ଼୍ ନୁ ବେନଡ଼୍ ନଷ୍ଟ ଆର୍‍ଦେ ନାରୁଡ଼୍, ଅଡ଼୍‌ ବକେତ୍ ନିସ୍ତାର୍ ଲାଭ୍‍ତଡ଼୍ ।
2CO 2:16 ବେନଡ଼୍ ଡଲାନ୍ ଆର୍‍ଦାଗ୍ ଆଦ୍‍ତନ୍; ଅଡ଼୍‌ ସେଙ୍ଗେ ଇଦ୍ ଡଲ୍‍ନାଦ୍ ଲେକାମ୍, ବେନଡ଼୍ ପରିତ୍ରାନ୍ ପାଏମ୍ ଆତ୍‍ତଣ୍ଡ୍, ଅଡ଼୍‌ ସେଙ୍ଗେ ଇଦ୍ ସାରେଦିନାତ୍ ଜିୱେମାନ୍ଦାନାଦ୍ । ବାତେଙ୍କ୍‌ଇତ୍କେ ଇତ୍‍କେ ଇଦ୍ ପାଡ଼୍‍ୟି ମାଡ଼ାନ୍ ସେଙ୍ଗେ ବେନ ପାର୍‍ଦ୍‍ତଣ୍ଡ୍ ?
2CO 2:17 ନାର୍‍ଗେ ନିଜେ ଲାବ୍‍ଆଦାନ୍‍ ଆଦାନ୍ ସେଙ୍ଗେ ଇଶ୍ୱର୍‌ତେ ବାକ୍ୟ ବ୍ୟବହାର୍‌ ମାଡ଼ିତଡ଼୍ । ଇତ୍‍କେ ମାନାଡ଼୍ ଆଦ୍‍ଲେକାମ୍ ଆୟ୍‍ୟ । ମାନ୍‍ ଇଶ୍ୱର୍ ରସିସ୍‍ମାନାଙ୍କ୍ ମାନାଡ଼୍ ବିଶ୍ୱାସ୍‍ତେ ତଡ଼୍ ଅନ୍‌ ନିର୍ଦେଶ୍ ପାଲନ୍ ମାଡ଼ୁତାଡ଼୍ ନୁ ଇଶ୍ୱର୍‌ତେ ମୁନ୍‍ନେ କ୍ରିଷ୍ଟନ୍‌ ଦାସ ଲେକାମ୍ ପ୍ରଚାର୍ ମାଡ଼ିକାଡ଼୍ ।
2CO 3:1 ମାନାଡ଼୍ ବାତେଏ ମେଣ୍ଡନ୍ ‍ଦାମ୍ ଆତ୍ମପ୍ରଶଂସା ମାଡ଼ାନଙ୍କ୍ ଆରାମ୍ ମାଡ଼ୁତାଡ଼୍ ? ବା ବେନ୍‍ ବେନଡ଼୍ ଲେକାମ୍ ବାତେଏ ମିଇ ପାକେ ବା ମିଇ ପାକାଙ୍କ୍ ମାୟାଦ୍‌ ପ୍ରସଂଶା ଚିଟି ଦର୍‍କାଡ଼୍ ?
2CO 3:2 ମିଇଡ଼େକେ ମା ପୁତ୍‍ତେନଡ଼ି ଚିଟି, ମାମ୍‍ମେ ଜିୱୁଣ୍ଡ୍‍ତାଗ୍ କେତ୍‍ତାଦ୍ ଲିପି, ବେଦିଙ୍କ୍ ସାରେତଡ଼୍ ପୁତ୍‍ତଡ଼୍ ନୁ କାର୍‍ତେ ପାର୍‍ତଡ଼୍ ।
2CO 3:3 ଇଦ୍ ପରିଚୟ ଚିଟି କ୍ରିଷ୍ଟନ୍‍ ତଡ଼୍ କେତ୍‍ତାଦ୍ ନୁ ମାନ୍‍ ତଡ଼୍ ଅନାଦ୍‌ ବିଷୟ୍‍ତେ ମାଡ଼୍‍ତାଦ୍ । ଇଦ୍ କାରିଲାଦିନ୍‍ ତଡ଼୍ କେତ୍‍ତାଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଜୀୱେମାନ୍ତାନ୍‌ ଇଶ୍ୱର୍‌ତେ ଆତ୍ମା ତଡ଼୍ ନାରିଡ଼୍ ଜିୱୁଣ୍ଡ୍‍ତାଗ୍ ଲେକାତ୍‍ତେ ।
2CO 3:4 କ୍ରିଷ୍ଟନ୍ ଇସ୍ ଇଶ୍ୱର୍‌ତେ ପରୁ ଆଶେ ମାନ୍‍ନାଙ୍କ୍ ମାମ୍‍ମେ ଇୱୁସାରେ ମାଡ଼ୁତମ୍,
2CO 3:5 ମାମ୍‍ମେ ଯେ ନିଜେତାଦାଙ୍କ୍ ବାତେଏ ଉଦ୍‍ବାବନ୍ ମାଡ଼ାନଙ୍କ୍ ଇଚ୍ଛା, ଇଦ୍‍ଲେକାମ୍ ଆୟ୍‍ୟ, ମାତର୍ ମାୟାଦ୍‌ ଇଚ୍ଛା ଇଶ୍ୱର୍‌ତାଗେ;
2CO 3:6 ନୂତନ୍ ନିୟମ୍‌ତିଙ୍କ୍ ମେଣ୍ଡେଅଡ଼୍‌‍ତିଡ଼ାଗ୍ ମାନ୍‍ତଡ଼୍ ପ୍ରକାଶ୍ ମାଡ଼ାନ୍ ସେଙ୍ଗେ ଶକ୍ତି ଇତ୍‍ତନ୍ । ଇଦ୍ ନିୟମ୍ କେତ୍‍ତାଦ୍ ଆୟ୍‍ୟ, ମାତର୍ ଆତ୍ମାତଡ଼୍ ଲେକ୍‍ତାଦ୍‍; ବାତେଙ୍କ୍ ଇତ୍‍କେ କେତ୍‍ତାଦ୍ ନିୟମ୍ ଡଲାଙ୍କ୍ ମାଡ଼ିତ୍, ବାତେଙ୍କ୍ ଇତ୍‍କେ ଆତ୍ମାତେ ନିୟମ୍ ଜିୱୁନ୍ ସଂସାର୍‍ ମାଡ଼ିତ୍ ।
2CO 3:7 ମୋଶାନ୍‌ ନିୟମ୍ ସେବା ପାଡ଼୍‍ୟି ଅକର୍‍ତଡ଼୍‍ କାଲ୍‍ଦେ ପରୁ ଲେକ୍‍ତାଦ୍‍ ନିୟମ୍ ତିୟାର୍ ଆତ୍‍ତେୱେଲେ ଇଶ୍ୱର୍‌ତେ ଗୌରବ୍‌ ପେୟ୍‍ସ୍‍ମାତ୍‍ତେ । ଆଦ୍ ଗୌରବ୍‌ ୱେଇସ୍ ଇକାଡ଼୍ ଆସ୍‍ମାତ୍‍କେବା ମୋଶାନ୍‌ ୱେଇସ୍‍ତେ ପାକ୍ ଇସ୍ରାଏଲ୍‌ ନାରୁଡ଼୍ ଆଲ୍‍ସେପାର୍‍ୱେ ମାତ୍‍ତଡ଼୍ । ଡଲ୍‍ନାଦ୍ ନିୟମ୍ ଯଦି ଇଲା ଗୌରବ୍ ପାଏମ୍ ଆତ୍‍ତେ,
2CO 3:8 ଆଲେକେ ପବିତ୍ର ଆତ୍ମାତେ ପାଡ଼୍‍ୟି ସାର୍‍ରେ ଅନାଗାଙ୍କ୍ ବେସର୍ ଅଦିକ୍‌ ଗୌରବ୍‍ତେ ତିଆର୍ ଆଦ୍‍ତେ !
2CO 3:9 ଦଣ୍ଡ୍‌ ଇଦାନ୍‌ ନିୟମ୍‌ ସେବା ପାଡ଼୍‍ୟି ଯଦି ଇସର୍ ଗୌରବ୍ ଆତ୍‍ତେ, ଆଲେକେ ଇଶ୍ୱର୍‌ତେ ପରିତ୍ରାଣ୍ ନିୟମ୍ ପ୍ରତିଷ୍ଠା ମେଣ୍ଡେ ବେସର୍ ଗୌରବ୍ ଆୟ୍‍ୟ !
2CO 3:10 ପାଃନ୍ତେ ନିୟମ୍‍ତାଦ୍ ମହିମା ପୁନାଦ୍ ନିୟମ୍‍ତାଗାଙ୍କ୍ ସୁଦୁର୍ ଆତ୍‍ତେ ।
2CO 3:11 ଯଦି ଆଦାନ୍‍ ବିଷୟ ଇସର୍ ଗୌରବ୍ ଆତ୍‍ତେ, ସାରେଦିନାଦ୍ ବିଷୟ ଇଦିନାଗାଙ୍ଗ୍ ବେସର୍ ଗୁନ୍‍ତେ ଗୌରବ୍ କାଇଲି ଆଦ୍‍ତେ !
2CO 3:12 ଆଦ୍‍ ଆଶେ ମାନ୍‍ନାଙ୍କ୍ ମାମ୍‍ମେ ଅଦିକ୍‌ ସାହାସ୍ ।
2CO 3:13 ମାମ୍‍ମେ ମୋଶାନ୍ ଲେକାମ୍ ଇଲାମ୍ । ଅଣ୍ଡ୍‌ ତାନ୍ ମକମ୍‍ତିଙ୍କ୍ ମୁସିମାତ୍‍ତନ୍, ବେଲାନ୍ ମୁର୍‍କ୍ ଆସ୍ ରାଲିମାନ୍ଦାନ୍ ଆଦ୍ ୱେସ୍‍ତେ ଅବସାନତେ ଇସ୍ରାଏଲ୍‌ତେ ନାରୁଡ଼୍ ଉଡ଼େ ପାର୍‍ୱଡ଼୍ ।
2CO 3:14 ମୁନେଙ୍କ୍ ଅଡ଼ାଦ୍‌ ଆୱୁକାନ୍‍ ଶକ୍ତି ମାଇମାତ୍‍ତେ । ଇଞ୍ଜେ ମିକା ପାଃନ୍ତେ ନିୟମ୍‌ କାର୍‍ତାନ୍‍ ସମୟ୍‍ତେ ଅଡ଼୍‌‍ମୁନେ ଆଦ୍ ମୁସି ଆସ୍‍ ମାତ୍‍ତେ । ଜିସୁ କ୍ରିଷ୍ଟନ୍ ତଡ଼୍ କାଇଲି ମାନ୍‍ନାଙ୍କ୍ ମାତର୍ ଆଦ୍ ଆବରନ୍ ଉନ୍ମୋଚିତ୍ ଆଦ୍‍ତେ ।
2CO 3:15 ନେଣ୍ଡ୍ ମିକା ମୋଶାନ୍‌ ବ୍ୟବସ୍ଥା କାର୍‍ସମାନ୍ଦାନ୍ ୱେଲେ ଅଡ଼ାଦ୍‌ ମନ୍ ପରୁ ମାନ୍‍ତେ ୱେରଡ଼୍ ଆବରନ୍ ।
2CO 3:16 ବାତେଙ୍କ୍ ଇତ୍‍କେ ଦର୍ମଶାସ୍ତ୍ର କେତିତ୍‍, “ବେନଡ଼୍ ଇଶ୍ୱର୍‌ତେ ପାକେ ମାଲ୍‍ଦ୍‍ତଡ଼୍, ଅଡ଼ାଦ୍‌ ଲେକେତାଦ୍ ସିଲ୍‍ ମୁସିତ୍‌ତାଦ୍ ତନ୍ଦ୍‍ୱେ ପାର୍‍ତେ ।”
2CO 3:17 ଇଦ୍ ଶାସ୍ତ୍ରାଂଶତାଗ୍ ଲେକାମିନ୍ତେ, “ପ୍ରବୁ,” ଆଦୁତନ୍ “ଆତ୍ମା ।” ବେଗେ ପ୍ରବୁନ୍ ଆତ୍ମା, ଆଗେ ମାନ୍‍ତେ ସ୍ୱାଦିନ୍‍ତା ।
2CO 3:18 ମାନାଡ଼୍ ସାରେତଡ଼୍ ମକମ୍‍ତେ ଦାର୍ପୁନ୍‍ତାଗ୍ ଉଡ଼ାନ୍ ଲେକାମ୍ ପ୍ରବୁନ୍ ଗୌରବ୍ ତଅନ୍‌ଦୁତ୍ ନୁ ପ୍ରବୁନାଗାଙ୍କ୍ ପେୟ୍‍ତାଦ୍ ଆଦ୍ ମାଇମାତେ ତଡ଼୍ ମାନାଡ଼୍ କାମ୍‍କେ ଲେକାମ୍ ଅନ୍‌ ରକମ୍‌ ବାଦ୍‍ଲେମ୍ ଆଦୁତ୍‍ତେ ।
2CO 4:1 ଇଶ୍ୱର୍ ଅନୁଗ୍ରହ ମାଡ଼ି ମାନ୍‍ ଇଦ୍ ସେବା ପାଡ଼୍‍ୟି ଇସ୍‍ମାନାଙ୍କ୍ ମାନାଡ଼୍ ଆୟ ୱାଡ଼୍ ।
2CO 4:2 ମାତର୍ ମାମ୍‍ମେ ସିଗ୍‍ଆଦାନାଦ୍ ନୁ ମିଞ୍ଜିମାନ୍ଦାନ୍ ବିଷୟସାରେ ୱିଡ଼୍‍ସ୍‍ତମ୍; ମାମ୍‍ମେ ଚଲନା ମାଡ଼ମ୍ କି ଇଶ୍ୱର୍‌ତେ ବାକ୍ୟତେ ବିକୃତ୍ ଅର୍ତ ମାଡ଼ମ୍ । ବାତେଙ୍କ୍ ଇତ୍‍କେ ସାରେତଡ଼୍ ନିଜମ୍‍ ସତ୍‍ କେଞ୍ଜ୍‍ତେ ଲେକାମ୍ ଇଶ୍ୱର୍‌ତେ ମୁନେ ନାରିଡ଼୍ ମନ୍ ପାକେ ମାମ୍‍ମେ ନିଜେ ନିଜେତେ ଯୋଗ୍ୟତା ପ୍ରନାମ୍ ମାଡ଼ାନ୍ ସେଙ୍ଗେ ଆଲ୍‍ସି ମାଡ଼ୁତମ୍;
2CO 4:3 ବାତେଙ୍କ୍‍ଇତ୍କେ ମାନ୍‍ ତଡ଼୍ କେସମାନ୍ଦାନ୍ ସୁସମାଚାର୍‌ ଯଦି ରହସ୍ୟାବୃତ, ଆଲେକେ ମାତର୍ ତଡ଼୍ ଆଦାନଡ଼୍‍କ୍ ସେଙ୍ଗେ ଆଦ୍ ରହସ୍ୟାବୃତ ।
2CO 4:4 ଅଡ଼୍‌ ବିଶ୍ୱାସ୍ ମାଡ଼ଡ଼୍‍, ବାତେଙ୍କ୍‍ଇତ୍କେ ଅଡ଼୍‌ ମନ୍‍ତିଙ୍କ୍‌ ଇଦ୍ ଜଗତ୍‌ ନାରୁଡ଼୍‍କିଂଙ୍କ୍ ଶୟ୍‍ତାନ୍‍ କାନାଲ୍‌ ମାଡ଼ିତ୍‍ତେ । ମେଣ୍ଡେ ଇଶ୍ୱର୍‌ତେ ସାରେ ବିଷୟ କ୍ରିଷ୍ଟନ୍ ମାହିମାନିତ ସୁସମାଚାର୍‌ତେ ୱେସ୍ ଅଡ଼୍‌ ପାକ୍ ୱେସ୍ଆୟ ।
2CO 4:5 ମାମ୍‍ମେ ମା ବିଷୟ୍‍ତେ ପ୍ରଚାର୍ ମାଡ଼ମ୍, ବାତେଙ୍କ୍ ଇତ୍‍କେ ମାମ୍‍ମେ ଜିସୁ କ୍ରିଷ୍ଟଙ୍କ୍ ପ୍ରବୁ ଇଞ୍ଜ ପ୍ରଚାର୍ ମାଡ଼ୁତମ୍ ନୁ ଜିସୁନ୍ ସେଙ୍ଗେ ମାମ୍‍ମେ ନି ଦାସ ଆତ୍‍ତମ୍,
2CO 4:6 ବାତେଙ୍କ୍ ଇତ୍‍କେ ବେନ୍ ଇଶ୍ୱର୍‌ କେସ୍‍ମାତ୍‍ତନ୍, “ଇକାଡ଼୍ ତାଗ୍ ୱେସ୍ ସାରେପାକ୍ ଆୟି,” ଆଦ୍ ଇଶ୍ୱର୍ ଜିସୁନ୍‌ ମକତାଗ୍ ସାରେପାକ୍ ଐଶ୍ୱରିକ୍ ମାହିମା ଉଡ଼ାନ୍ ସେଙ୍ଗେ ମା ହୃଦୟତିଙ୍ଗ୍ ୱେସ୍ ମାଡ଼୍‍ତଣ୍ଡ୍ ।
2CO 4:7 ମାମ୍‍ମେ ମାତର୍ ମାୟାଦ୍‌ ସାଦାରନ୍ ପେଣ୍ଡୁଲ୍ କୁଣ୍ଡେତାଗ୍ ଇଦ୍ ସର୍ଗତେ ସମ୍ପଦ୍ ଦର୍‍କୁତ୍ । ଆଗାଙ୍କ୍ ପ୍ରମାନ୍‍ ଆତ୍‍ତେ ଯେ, ଇଦ୍‍ଲେକାମ୍ ୱେସ୍‍ତେ ଶକ୍ତି ମାୟାଦ୍‌ ଆୟ୍‍ୟ, ମାତର୍ ଇଶ୍ୱର୍‌ତାଦ୍ ।
2CO 4:8 ମାମ୍‍ମେ ସାରେ ଲେକାତ୍ କଷ୍ଟ ପାଏମ୍ ଅଦୁତମ୍, ବାତେଙ୍କ୍ ଇତ୍‍କେ ମୁର୍‍ମୁରା ଆୟମ୍ । ବେସୁଙ୍କ୍‍ ବିଚଲିତ୍ ଅଦୁତମ୍ ବାତେଙ୍କ୍ ଇତ୍‍କେ ମାମେ ଆୟମ୍ ।
2CO 4:9 ମାମ୍‍ମେ ତାଡ଼ନା ପାଏମ୍ ଆତ୍‍ତମ୍, ବାତେଙ୍କ୍ ଇତ୍‍କେ ଇଶ୍ୱର୍ ମାକିଂଙ୍କ୍ ବେସୁଙ୍କ୍‍ ୱିଡ଼୍‍ସଣ୍ଡ୍ । ନାର୍‍ଗେ ଦାମ୍ ମାମ୍‍ମେ ଦେବ୍‍ ତିତ୍‍ତମ୍, ବାତେଙ୍କ୍ ଇତ୍‍କେ ଦ୍ୱଂସ ଆୟମ୍ ।
2CO 4:10 ମାମ୍‍ମେ ସାରେଦାମ୍ ମାନ୍‍ ମେନ୍ଦୁଲ୍‌ତାଗ୍ ଜିସୁନ୍ ଡଲ୍‍ତାଦ୍ ହେର୍କା ମାଡ଼ୁତମ୍ । ଜିସୁନ୍ ଜୀୱୁନ୍‌ ବେଲାନ୍ ମାୟାଗେ ପ୍ରକାଶିତ୍‍ ଆଦ୍‍ତେ,
2CO 4:11 ଅନ୍‌ ଜୀୱେତିଙ୍ଗ୍ ଇଦ୍ ନାୟାଦ୍ ମେ‍ନ୍ଦୁଲ୍‍ତାଗ୍ ପ୍ରକାଶ୍ ମାଡ଼ାନ୍ ସେଙ୍ଗେ ଜିସୁନ୍‌ ସେଙ୍ଗେ ସାରେ ଜୀୱୁଣ୍ଡ୍‌ ମାମ୍‍ମେ ଡଲ୍‍ତେ ଲେକାମ୍ ଅଦୁତମ୍ ।
2CO 4:12 ଇଦ୍‍ଲେକାମ୍ ମାୟାଗେ ଡଲ୍‍ତାଦ୍ ନୁ ମିଇ ପାକେ ଜିୱୁଣ୍ଡ୍ ପାଡ଼୍‍ୟି ମାଡ଼୍‍ଡ଼ ଆଦୁତ୍‍ତେ ।
2CO 4:13 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ନାନ୍ ବିଶ୍ୱାସ୍‌ ମାଡ଼୍‍ତାଙ୍କ୍ ଗଟି ତିର୍‍ୟୁତାନ୍ ।” ମାମ୍‍ମେ ଆଦ୍ ବିଶ୍ୱାସ୍‌ତେ ଆତ୍ମା ଦର୍‍ସ୍‍ତମ୍ । ମାମ୍‍ମେ ବିଶ୍ୱାସ୍‌ ମାଡ଼ୁତମ୍, ଆଦିଙ୍କ୍ ମାମ୍‍ମେ କେତୁତମ୍ ।
2CO 4:14 ମାମ୍‍ମେ ପୁତ୍‍ତମ୍, ଇଶ୍ୱର୍ ପ୍ରବୁ ଜିସୁଙ୍କ୍ ଡଲ୍‍ତାଗାଙ୍କ୍ ତେସ୍‍ମିନ୍ଦେନ୍ । ଆଦ୍ ଇଶ୍ୱର୍, ଜିସୁନ୍ ତଡ଼୍ ମାକିଂଙ୍କ୍ ମିକା ଜିୱୁନ୍ ମାଡ଼ିତନ୍ ନୁ ମିଇ ତଡ଼୍ ମାକିଂଙ୍କ୍ ତାନ୍ ମୁନେ ନିଲ୍‍ପିତନ୍ ।
2CO 4:15 ମିୟାଦ୍ ସାୟେତ୍ ସେଙ୍ଗେ ଇଦ୍‍ସାରେ ଆଦୁତ୍‍ତେ । ଆଦିଙ୍କ୍ ଇଶ୍ୱର୍‌ତେ ଅନୁଗ୍ରହ ମେଣ୍ଡେ ପେର୍କେତାଗାଙ୍କ୍ ଅଦିକ୍‌ ନାର୍ଗେଆଦାନ୍ ସଙ୍ଗେ ନାରୁଡ଼୍‍କ୍ ଇଟ୍‍ତଣ୍ଡ୍, ମେଣ୍ଡେ ନାର୍‍ଗେ ଦନ୍ୟବାଦ୍ ଲେକାମ୍ ଇଶ୍ୱର୍‌ତେ ଗୌରବ୍ ମାଡ଼ିତଡ଼୍ ।
2CO 4:16 ଆଦିନ୍ ସେଙ୍ଗେ ମାମ୍‍ମେ ବେସୁଙ୍କ୍‍ ବା ଦୁଃକାମ୍ ଆୟମ୍ । ମାନ୍‍ ମେନ୍ଦୁଲ୍ ଜାମ୍‍ଜାମ୍ ଲପ୍ ଆଦୁତାଡ଼୍ । ବାତେଙ୍କ୍ ଇତ୍‍କେ ମାୟାଦ୍‌ ଲୋପେତ୍ ଆତ୍ମା ଦିନାଲ୍‍ ଦିନାଲ୍ ଲେକାମ୍ ଆଦୁତ୍‍ତେ ।
2CO 4:17 ଇଦ୍ ସାମାନ୍ୟ ନୁ ସେନେକ୍‍ତାଦ୍ ଦୁଃକାମ୍ କଷ୍ଟ ମାନ୍‍ ସେଙ୍ଗେ ତାତୁତ୍ ସାରେଦିନାତାଦ୍ ଗୌରବତାଦ୍ ସମ୍ପତି ।
2CO 4:18 ମାନ୍‍ ଉଡ଼ାନ୍ କଣ୍ଡେତେ ବାତେବା ବସ୍ତୁ ପରୁ ଆୟ୍‍ୟ, ମାତର୍ ସାୟେତ୍‌ ଜିନିଷ୍‌ତେ ପରୁ ମଣ୍ଡି, ବାତେଙ୍କ୍ ଇତ୍‍କେ ଉଡ଼ାନାଉ ସାରେ ବାତା ଦୁଡ଼ା, ବାତେଙ୍କ୍ ଇତ୍‍କେ ବାତ୍ ଉଡ଼ାନାଦ୍, ଆଦ୍ ଚିରସ୍ଥାୟୀ ।
2CO 5:1 ମାନାଡ଼୍ ପୁତ୍‍ତାଡ଼୍ ଯେ, ବେନ୍ ପାର୍ତିବ୍ ମେନ୍ଦୁଲ୍ ଲେକାମ୍ ତମ୍ୱୁତେ ମାନାଡ଼୍ ଇଞ୍ଜେ ମିନ୍ଦେ, ଆଦ୍ ଦ୍ୱଂସ ଆତ୍‍କେ, ମାନ୍‍ ଇଶ୍ୱର୍‌ ସ୍ୱର୍ଗତାଗ୍ ୱେରଡ଼୍ ସାରେଦିନାତ୍ ଡ଼ାଦ୍ ଲନ୍‌ ନେହେଚିସ୍ ମିନ୍ଦେନ୍ ।
2CO 5:2 ମାନାଡ଼୍ ପୃତିବିତାଗ୍ ମାଞ୍ଜ୍ ସର୍ଗତାଗ୍ ମାନ୍ଦାନ୍ ଲୋନ୍‌ ଲେକାତ୍ ଚକାସିଲେ କେର୍‍ଦାନଙ୍କ୍ ତିପାଲ୍ ଆଦୁତାଡ଼୍ ।
2CO 5:3 ବାତେଙ୍କ୍ ଇତ୍‍କେ ଆଦ୍ ସ୍ୱର୍ଗତେ ଲୋତ୍‍ତାଗ୍ ନେଙ୍ଗ୍‍କେ, ମାନାଡ଼୍ ବାଣ୍ଡା ତନ୍ଦୱାଡ଼୍ ।
2CO 5:4 ମାନାଡ଼୍ ଇଦ୍ ପୃତିବି କୁଣ୍ଡେତାଗ୍ ମାନ୍ଦାନ୍‍ୱେଲେ ଗାଟି ତିପାଲ୍‍ତେ ଜିୱୁଣ୍ଡ୍‍ତଡ଼୍ କେୟମାତ୍‍ତମ୍ । ପୃତିବି ମେନ୍ଦୁଲ୍ ନିଡ଼୍‍ତାନାଦ୍ ମାନ୍‍ ଇଚ୍ଛା ଆୟ୍‍ୟ, ମାତର୍ ମାନ୍‍ ଆଲ୍‍ସୁତମ୍, ସ୍ୱର୍ଗତାଉ ଚକାସିଲେ କେର୍‍କେ ମାୟାଦ୍‌ ଇଦ୍ ଡଲାନ୍ ମେନ୍ଦୁଲ୍ ବେଲାନ୍ ଅମର୍‌ ଆଦ୍‍ତେ ।
2CO 5:5 ଇଶ୍ୱର୍‌ ମାକିଂଙ୍କ୍ ଇଦ୍ ପରିବର୍ତ୍ତନ୍ ସେଙ୍ଗେ ତିଆର୍ ମାଡ଼୍‍ତଣ୍ଡ୍ । ମେଣ୍ଡେ ଇଦିନ୍ ସାରେ ଲେକାମ୍ ତାନ୍ ପବିତ୍ର ଆତ୍ମାତିଙ୍କ୍ ଅଣ୍ଡ୍‌ ମାନ୍‍ ଦାନ ମାଡ଼୍‍ତଣ୍ଡ୍ ।
2CO 5:6 ଆଦିନ୍ ସେଙ୍ଗେ ମାମ୍‍ମେ ସାରେଦାମ୍ ସାହାସ୍ ପଇତ୍‍ତମ୍ । ମାମ୍‍ମେ ପୁତ୍‍ତମ୍, ବେସ୍ ଦିନା ମାମ୍‍ମେ ଇଦ୍ ମେନ୍ଦୁଲ୍‌ତେ ମାନ୍‍ତମ୍, ଆସର୍ ଦିନା ପ୍ରବୁନାଗେ ଜାକେମାଞ୍ଜ୍ ବାଦ୍‍କ୍‍ତମ୍,
2CO 5:7 ବାତେଙ୍କ୍‍ଇତ୍କେ ମାନାଡ଼୍ ଉଡ଼ାନ୍ ଲେକାମ୍ ଜିୱୁଣ୍ଡ୍ ବାଦ୍‍କମ୍, ମାତର୍ ବିଶ୍ୱାତଡ଼୍ ଜିୱୁନ୍ ବାଦାକୁତମ୍ ।
2CO 5:8 ଆଦିଙ୍କ୍ ମାମ୍‍ମେ ସାହାସ୍‍ତଡ଼୍‍, ମେଣ୍ଡେ ଇଦ୍ ମେନ୍ଦୁଲ୍‌ ୱିଡ଼୍‍ସି ମିକା ପ୍ରବୁନ୍ ତଡ଼୍ ମାନ୍ଦାନ୍ ସେଙ୍ଗେ ମାମ୍‍ମେ ଅଦିକ୍‌ ସାର୍‍ଦେ ।
2CO 5:9 ଆଦିନ୍ ସେଙ୍ଗେ ଇଗେ ନିଜେର୍‍ ଲୋନ୍‌ ମାନିଣ୍ଡ୍ ବା ମେଣ୍ଡନ୍‍ଲନ୍‍ ମାନିଣ୍ଡ୍, ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନାଦ୍ କେ ମାୟାଦ୍‌ ୱେରଡ଼୍ ଇଚ୍ଛା ।
2CO 5:10 ବାତେଙ୍କ୍‍ଇତ୍କେ ମାକିଂଙ୍କ୍ ସାରେତଡ଼୍‍କ୍ ଅନ୍‌ ତଡ଼୍ ବିଚାର୍ ଆଦାନ୍ ସେଙ୍ଗେ ନିଜାମ୍ କ୍ରିଷ୍ଟନ୍ ମୁନେ ଉପସ୍ଥିତ୍ ଆଦାନଙ୍କ୍ ୱେଇତିତ୍ । ଆସୁଙ୍କ୍ ଡଲାନ୍ ମେନ୍ଦୁଲ୍‌ ମାନାଡ଼୍ ମାଡ଼ିମାନ୍ଦାନ୍ ସାୟେତାଦ୍‍ ବା ପିନ୍ଦଲାଦ୍ ମେନ୍ଦୁଲ୍‌ତେ, ସାରେ ପାଡ଼ିୟିଦେ ଲେକାତ୍ ମାନାଡ଼୍ କାୟେ ଦର୍ସିକି ଆଦ୍‍ତାଡ଼୍‍ ।
2CO 5:11 ପ୍ରବୁଙ୍କ୍ ୱେର୍‍ଦାନାଦ୍ ଇତ୍‍କେ ବାତ୍‍ତେ, ମାନାଡ଼୍ ପୁତ୍‍ତାଡ଼୍ ନୁ ଇଦ୍ ମାଡ଼ାନ୍ ସେଙ୍ଗେ ମାନାଡ଼୍ ସାରେତଡ଼କିଂଙ୍କ୍ କେତୁତାଡ଼୍ । ଇଶ୍ୱର୍‌ ମାନ୍‍ ସାରେତଡ଼୍ ଲେକେତ୍‍ତେ ପୁତ୍‍ତଣ୍ଡ୍ । ନାନ୍ ଆଶେ ମାଡ଼ୁତାନ୍, ମିୟାଦ୍‍ ମନ୍‍ତାଗ୍‍ ମିଡ଼୍ ନାକିଂଙ୍କ୍ ଲେକେତ୍‍ତେ ପୁତ୍‍ତିଡ଼୍ ।
2CO 5:12 ମାମ୍‍ମେ ମେଣ୍ଡନ୍ ଦାମ୍ ମିଇପାକେ ଗର୍ବ ମାଡ଼ାନଙ୍କ୍ ଇଚ୍ଛା ମାଡ଼ମ୍ । ଇତ୍‍କେ ମା ବିଷୟ୍‍ତେ ନିଜାତାଦ୍ ଦର୍ପ ମାଡ଼ାନ୍ ସେଙ୍ଗେ ମିକିଂଙ୍କ୍ ସୁଯୋଗ୍ ଇଦାନ୍ ମାୱାଦ୍ ପାଡ଼୍‍ୟି । ଆଲେକେ ଲୋପେତ୍ ଗୁନାମ୍‍ତିଙ୍କ୍ ଉଡ଼କଟ୍ ମାତର୍ ବାଇଦେ ଉଡ଼ିମିକା ବେନଡ଼୍ ଦର୍ପ ମାଡ଼ିତଡ଼୍, ଅଡ଼୍‌‍କିଂଙ୍କ୍ ସାୟେତ୍ ଉତ୍ତର୍ ଇଦାଙ୍କ୍ ପାର୍‍ଦ୍‍ତିନ୍ ।
2CO 5:13 ମାମ୍‍ମେ ମଣ୍ଡିମ୍, ଆଦ୍ ଇଶ୍ୱର୍‌ତେ ସେଙ୍ଗେ; ସସୁବୋଦ, ଆଲେକେ ମିଇ ସେଙ୍ଗେ ।
2CO 5:14 କ୍ରିଷ୍ଟନ୍ ପ୍ରେମ ତଡ଼୍ ମାମ୍‍ମେ ମିନ୍ଦେମ୍ । ମାମ୍‍ମେ ବୁଜେମ୍ ଆତ୍‍ତମ୍ ଯେ, ୱେରଣ୍ଡ୍ ସାରେତଡ଼୍ ସେଙ୍ଗେ ଡଲିମାନ୍‍ନାଙ୍କ୍ ସାରେତଡ଼୍ ଅନାଦ୍‌ ଡଲ୍‍ତାଗ୍ କାଇଲ୍‍ତଡ଼୍ ।
2CO 5:15 ଅଣ୍ଡ୍‌ ସାରେତଡ଼୍ ସେଙ୍ଗେ ଡଲିମାନାଙ୍କ୍ ବେନଡ଼୍ ଜୀୱୁନ୍‌ ମିନ୍ଦେ, ଅଡ଼୍‌ ମେଣ୍ଡେ ନିଜେତ୍ ସେଙ୍ଗେ ଜୀୱୁନ୍‌ ଆୟ୍‍ୱେ ଅନ୍‌ ସେଙ୍ଗେ ଗେଲ୍‍ସିତଡ଼୍, ବାତେଙ୍କ୍‍ଇତ୍କେ ଅଡ଼୍‌ ସେଙ୍ଗେ ଅଣ୍ଡ୍‌ ଡଲି ମେଣ୍ଡେ ଜିୱେ ଆସ୍ ମିନ୍ଦେନ୍‌ ।
2CO 5:16 ମାମ୍‍ମେ ମେଣ୍ଡେ ବେନଙ୍କ୍ ନାରୁଡ଼୍ ଲେକାମ୍ ବିଚାର୍ ମାଡ଼ମ୍ । ଦିନାମ୍ ମାତ୍‍ତେ, ବେସୁଙ୍କ୍‍ ମାମ୍‍ମେ କ୍ରିଷ୍ଟଙ୍କ୍ ମିକା ନାରୁଡ଼୍ ଲେଲାମ୍ ବିଚାର୍ ମାଡ଼ମାତ୍‍ତମ୍ । ବାତେଙ୍କ୍ ଇତ୍‍କେ ଇଞ୍ଜେ ମେଣ୍ଡେ ମାମ୍‍ମେ ଆଲାନ୍ ମାଡ଼ମ୍ ।
2CO 5:17 କ୍ରିଷ୍ଟନ୍‍ ତଡ଼୍ କାଇଲ୍‍କେ, ନାରୁନାଦ୍ ପୁନେ ତିଆର୍ ଆଦ୍‍ତେ । ପାଃନ୍ତେ ବିଷୟସାରେ ମାଇ ଆଦ୍‍ତେ, ପୁନେତାଉ ତିଆର୍ ଆଦ୍‍ତେ ।
2CO 5:18 ଇୱୁସାରେ ଇଶ୍ୱର୍‌ତେ ପାଡ଼୍‍ୟି । ଅଣ୍ଡ୍‌ କ୍ରିଷ୍ଟନ୍‍ ତଡ଼୍ ମାନ୍‍ ଅନ୍‌ ତଡ଼୍ ମେଣ୍ଡନ୍‍ନ୍ଦାମ୍ କାୟ୍‍ଲ୍‍ତମ୍ ନୁ ଅନ୍‌ ତଡ଼୍ ବାଗାତଡ଼୍‍ତ ମେଣ୍ଡନ୍‍ନ୍ଦାମ୍ କାଲ୍‌ପାନ୍‌ ସେଙ୍ଗେ ଅଣ୍ଡ୍‌ ମାକିଂଙ୍କ୍ ମେଣ୍ଡେ ବାଗାତଡ଼୍‍କିଙ୍କ୍ ସାଙ୍ଗ ମାଡ଼ାନଙ୍କ୍ ଦାୟିତ୍ୱ ଇତ୍‍ତନ୍ ।
2CO 5:19 ଆଦିଙ୍କ୍ ମାୟାଦ୍‌ କାବୁର୍ ଆଦୁତ୍‍ତେ, ଇଶ୍ୱର୍‌ କ୍ରିଷ୍ଟନ୍ ତଡ଼୍ ସାରେ ମାନବ୍ ଜାତିତିଙ୍କ୍ ଅନ୍‌ ତଡ଼୍ କାଲ୍‍ପାନଙ୍କ୍ ତିଆର୍ ମାଡ଼ିମିନ୍ଦେଣ୍ଡ୍ । ତାନ୍ ବିରୁଦ୍‌ତେ ଅଡ଼ାଦ୍‌ ଅପରାଦ୍‍ତିଙ୍କ୍ ଅଣ୍ଡ୍‌ ମେଣ୍ଡେ ତାନ୍ ହିସାବ୍‍ତେ ନେୱଣ୍ଡ୍ । ମେଣ୍ଡେ, ଇଦ୍ ମେଣ୍ଡେ କାଇଲାନାଦ୍ କାବୁର୍ କେତାନାଦ୍ ଦାୟିତ୍‌ ମା ପରୁ ଇସ୍ ମିନ୍ଦେଣ୍ଡ୍ ।
2CO 5:20 ମାମ୍‍ମେ କ୍ରିଷ୍ଟନ୍ ପାକେଙ୍କ୍ ଇଦ୍ ଗଟ୍ କେତୁତମ୍ । ସ୍ୱୟଂ ଇଶ୍ୱର୍‌ ମା ତଡ଼୍ ଇଦ୍ ଗଟ୍ ଇତ୍‍ତନ୍ ଇଞ୍ଜ ଏର୍କା ମାଡ଼ଙ୍କ୍ ଆଦ୍‍ତେ । କ୍ରିଷ୍ଟନ୍ ପାକେଙ୍କ୍ ମାମ୍‍ମେ ବିନତି ମାଡ଼ୁତମ୍, ଶତ୍ରୁତାଗାଙ୍କ୍ ସାଙ୍ଗ ଆୟ୍‍ମୁଟ୍ ।
2CO 5:21 ବାତେଙ୍କ୍ ଇତ୍‍କେ ବେନନାଗେ ପାପ୍‌ ଇସୁର୍‍ ମିକା ଇଲ୍‍ୱେ ମାତ୍‍କେ, ଅଂକିଙ୍କ୍‌ ଅଣ୍ଡ୍‌ ମାନ୍‍ ସେଙ୍ଗେ ପାପ୍‌ ବଲି ଲେକାମ୍ ମାଡ଼୍‍ତଣ୍ଡ୍, ବେଲାନ୍ ମାନାଡ଼୍ ଅନ୍‌‍ତଡ଼୍ ଇଶ୍ୱର୍‌ତେ ଦାର୍ମାମ୍ ଲେକାମ୍ ଆଦିକାଡ଼୍‍ ।
2CO 6:1 ଇଶ୍ୱର୍‌ତେ ସେଙ୍ଗେ ଅଣ୍ଡୟାଗେ ପାଡ଼୍‍ୟି ମାଡ଼ମାନାଙ୍କ୍ ମାମ୍‍ମେ ମିକିଂଙ୍କ୍ ବିନତି ମାଡ଼ୁତମ୍, ମିଇ ଜିୱୁଣ୍ଡ୍‍ତାଗ୍ ଇଶ୍ୱର୍‌ତେ ଅନୁଗ୍ରହ ଆଙ୍ଗ୍‌ଡ଼ାମ୍ ମାଡ଼୍‍ମାଟ୍ ।
2CO 6:2 ବାତେଙ୍କ୍ ଇତ୍‍କେ ଅଣ୍ଡ୍‌ କେତ୍‍ତାନ୍, “ଇଶ୍ୱର୍ ବାତ୍ କେତିତଣ୍ଡ୍ ଆଦ୍ କେଞ୍ଜାଟ୍, ମାମ୍‍ମେ ଅନୁଗ୍ରହ ସମୟ୍‍ତେ ମିୟାଦ୍ ପ୍ରାର୍ତନା କେଞ୍ଜ୍‍ତମ୍, ମେଣ୍ଡେ ପରିତ୍ରାଣତେ ଦିନାତେ ମାମ୍‍ମେ ମିକିଂଙ୍କ୍ ସାହାଯ୍ୟ ମାଡ଼୍‍ତମ୍ ।” କେଞ୍ଜାଟ୍, ଇଞ୍ଜେ ମହା ଅନୁଗ୍ରହତେ ଦିନାମ୍; କେଞ୍ଜାଟ୍, ଇଞ୍ଜେ ପରିତ୍ରାନ୍‍ତେ ଦିନାମ୍ ।
2CO 6:3 ବେଲାନ୍ ମାନ୍‍ ପାଡ଼୍‍ୟିତାଗ୍ ମେଣ୍ଡେବାଗାତଡ଼୍ ବେନଗାଲା ଦଷି ଆୟ୍‍ମାକିଣ୍ଡ୍, ଆଦିନ୍ ସେଙ୍ଗେ ମାମ୍‍ମେ ବାତେଏ ବିଷୟ୍‍ତେ ବାଦା ଆୟମ୍,
2CO 6:4 ମାତର୍, ମାମ୍‍ମେ ସାରେ ଦିନାମ୍ ନିଜେତିଙ୍ଗ୍ ଇଶ୍ୱର୍‌ତେ ଦାସ ଲେକାମ୍ କେସମିନ୍ଦେମ୍ । ନାର୍‍ଗେ ଦୈର୍ଯ୍ୟତଡ଼୍ ମାମ୍‍ମେ ସାରେପ୍ରକାର୍ ଦୁଃକାମ୍, ଅବାବ୍ ନୁ ତିପାଲ୍ ସାରେ ମାଡ଼ୁତମ୍;
2CO 6:5 ମାମ୍‍ମେ ଦେବ୍‍ ତିତ୍‍ତମ୍, ଜେଲ୍‌ଦଣ୍ଡ ଆତ୍‍ତମ୍, ନାରୁଡ଼୍ ମୁନେ ନିନ୍ଦ୍ ଆତ୍‍ତମ୍; ନାର୍‍କେତ୍ ପାୟାଲ୍ ତିପାଲ୍ ଆତ୍‍ତମ୍, ଉସ୍‍କାଡ଼୍ ଉଞ୍ଜକଟ ମାତ୍‍ତମ୍ ନୁ ଉପାସ୍‌ତେ କାଟେମ୍ ଆତ୍‍ତମ୍ ।
2CO 6:6 ମାୟାଦ୍‌ ପବିତ୍ରତା, ବୁଦ୍‍ତେ, ଗାଡ଼୍‍ସ୍, ଦୟା, ସାୟେତାଦ୍ ପ୍ରେମ ନୁ ସତ୍ୟତେ କାବୁର୍ ସେଙ୍ଗେ ପବିତ୍ର ଇଶ୍ୱର୍‌ତେ ଶକ୍ତି ତଡ଼୍ । ମାମ୍‍ମେ ଇଶ୍ୱର୍‌ତେ ଦାସ ଇଞ୍ଜ ପରିଚୟ ଇତ୍‍ତମ୍,
2CO 6:7 ଶତ୍ରୁନଡ଼୍ ବିରୁଦ୍ଦ୍‌ତେ ଲଡ଼େମ୍ ଆଦାଙ୍କ୍‍ ନିଜାମ୍‍ ସତ୍‍ ମାୟାଦ୍‌ ବେଡ଼ିୟି ଅସ୍ତ୍ର ।
2CO 6:8 ମାମ୍‍ମେ ସମ୍ମାନିତ୍ ନୁ ଅପମାନିତ୍ ଅଦୁତମ୍, ପ୍ରଶଂସିତ୍ ନୁ ସିଗ୍ ଆତ୍‍ତମ୍, ମାକିଂଙ୍କ୍ ମିଚ୍ ଇଞ୍ଜ କେତ୍‍ତଡ଼୍, ଯଦି ମାନାଡ଼୍ ନିଜାମ୍ କେତୁତଡ଼୍ ।
2CO 6:9 ମାମ୍‍ମେ ପୁତ୍‍ତେନମ୍ ଆତ୍‍କେ ମିକା ପୁନ୍‍ୱେନମ୍, ଜୀୱେମାଞ୍ଜ୍‍ ମିକା, ଡଲ୍‍ତମ୍ ଇଞ୍ଜ୍ କେତିତଡ଼୍‍ । ମାମ୍‍ମେ ଦଣ୍ଡ୍ ଆତ୍‍ତମ୍, ବାତେଙ୍କ୍ ଇତ୍‍କେ ଡଲମ୍ ।
2CO 6:10 ମାମ୍‍ମେ ଦୁଃକାମ୍ ତଡ଼୍ ମାତ୍‍କେ ମିକା ସାରେଦାମ୍ ୱେଡ଼୍‍କିତମ୍ । ମାମ୍‍ମେ ଗରିବ୍‍ ଲେକାମ୍ ତନ୍ଦୁତମ୍, ବାତେଙ୍କ୍ ଇତ୍‍କେ ନାର୍‍ଗେ ନାରୁଡ଼୍‍କ୍ ସାଉକାର୍ ମାଡ଼୍‍ତମ୍ । ମାୟାଦ୍‌ ବାତେଏ ଇଲ୍‍ୱେ ଲେକାମ୍ ଏର୍କେ ଆଦ୍‍ତେ, ବାତେଙ୍କ୍ ଇତ୍‍କେ ବାସ୍ତବତେ ମାମ୍‍ମେ ସାରେତାୱିନ୍ ଅଦିକାରିମ୍ ।
2CO 6:11 ହୋ କରନ୍ତିୟ ସାଙ୍ଗନଡ଼ି, ମାମ୍‍ମେ କପାମ୍ ଇଲ୍‍ୱେ ଲେକାମ୍ ମିକିଂଙ୍କ୍ ସାରେ କେସ୍‍ମିନ୍ଦେମ୍ । ମିଇ ଗାର୍ରେ ମାୟାଦ୍‌ ହୃଦୟ୍ ତେର୍‍ସିତ୍‍ତମ୍ ।
2CO 6:12 ମାମ୍‍ମେ ମିଇ ସେଙ୍ଗେ କଷ୍ଟ ହୃଦୟ୍ ଆୟମ୍, ଇତ୍‍କେ ମିୟାଦ୍ ହୃଦୟ୍ ମା ସେଙ୍ଗେ କଷ୍ଟ ଆତ୍‍ତେ ।
2CO 6:13 ମିକିଂଙ୍କ୍ ନା ପିଲା ଇନା ଏର୍କାମାଡ଼ି ଇୱୁସାରେ କେତୁତାନ୍ । ମାମ୍‍ମେ ଉଦାର୍ ମାଲ୍‍ପିଦାନ୍ ଲେକାମ୍ ମିୟାଦ୍ ହୃଦୟ୍ ତେର୍ସ୍ ଆୟି ।
2CO 6:14 ବେନଡ଼୍ କ୍ରିଷ୍ଟଙ୍କ୍ ବିଶ୍ୱାସ୍ ମାଡ଼ଡ଼୍‍ ମିଡ଼୍ ତଡ଼୍ କାଇଲି ପାଡ଼୍‍ୟି ମାଡ଼ାନଙ୍କ୍ ଆଲ୍‍ସି ମାଡ଼୍‍ମାଟ୍ । ଇଦ୍ ବେସୁଙ୍କ୍‍ ବା ଆଦେପାର୍ୱ । ସାୟେ ନୁ ଅପରାଦ୍‌ ବେଗେ କାଇଲାନାଦ୍‌ ? ୱେସ୍ ନୁ ଇକାଡ଼୍ ବେଲାନ୍ ଅଣ୍ଡୟାଗେ ମାନ୍‍ନ୍ତା ?
2CO 6:15 କ୍ରିଷ୍ଟ ନୁ ଶୟ୍‍ତାନ୍‍ ବେଲା ୱେରଡ଼୍ ମାନ୍‍ ଆଦ୍‍ତେ ? ବିଶ୍ୱାସୀ ତଡ଼୍ ଅବିଶ୍ୱାସି ବେନ୍ ବିଷୟ୍‍ତେ ୱେରଡ଼୍ ମନ୍ ଆଦ୍‍ଦେ ପାର୍‍ତଡ଼୍ ?
2CO 6:16 ଇଶ୍ୱର୍‌ତେ ମନ୍ଦିର୍‍ତାଗ୍ ବେଲାନ୍ ପୁତ୍‌ଲାମ୍‌ ପ୍ରତିଷ୍ଠା ଆଦ୍‍ଦେ ପାର୍ଦେତେ ? ମାନାଡ଼୍ ତ ଜୀୱେମାନ୍ଦାନ୍‌ ଇଶ୍ୱର୍‌ତେ ମନ୍ଦିର୍, ବାତେଙ୍କ୍ ଇତ୍‍କେ ଇଶ୍ୱର୍ ନିଜେ କେତ୍‍ତାନ୍, “ନା ନାରିଡ଼୍‍ତ ନାନ୍ ବାଦ୍‍କିତାନ୍ ନୁ ଅଡ଼୍‌‍ତଡ଼୍ ଉଡିତାନ୍; ନାନ୍ ଅଡ଼୍‌ ଇଶ୍ୱର୍ ଆଦ୍‍ତନ୍ ନୁ ଅଡ଼୍‌ ନା ନିଜେତ୍ ନାରୁଡ଼୍ ଆଦ୍‍ତଡ଼୍ ।”
2CO 6:17 ଆଦିଙ୍କ୍ ପ୍ରବୁ କେତିତଣ୍ଡ୍, “ଅଡ଼୍‌ଆଗାଙ୍କ୍‌ ମିଡ଼୍ ପେଇସ୍ ୱାଡ଼ାଟ୍, ଅଡ଼୍‌ଆଗାଙ୍କ୍‌ ମିଡ଼୍ ୱେରେ ଆୟ୍‍ମୁଟ୍ । ଅଶୁଚି ବିଷୟ ତଡ଼୍ ସମ୍ପର୍କ ନେହେମାଟ୍, ଆଲେକେ ନାନ୍ ମିକିଂଙ୍କ୍ ନେଃଏତିତାନ୍,
2CO 6:18 ନାନ୍ ମିଇ ବାବାନ୍ ଆଦ୍‍ତନ୍, ମେଣ୍ଡେ ମିଡ଼୍ ନା ମାର୍‍କ୍‍ ଆଦ୍‍ତିଡ଼୍ ନୁ ମାୟାସ୍କ୍, ସାରେତିଙ୍କ୍ ଶକ୍ତିନଡ଼୍ ପ୍ରବୁ ଇଦ୍ ଗଟ୍ କେତ୍‍ତଣ୍ଡ୍ ।”
2CO 7:1 ପ୍ରିୟ ଦାଦାଲଡ଼ି ନୁ ଏଲାସ୍କ୍‍, ଇୱୁସାରେ ପ୍ରତିଜ୍ଞା ମାନାଡ଼୍ ଇଶ୍ୱର୍‌ତାଗାଙ୍କ୍ ଦର୍‍କ୍‍ତେ । ଆଦିଙ୍କ୍ ୱାଡ଼ାଟ୍, ମେନ୍ଦୁଲ୍ ନୁ ଆତ୍ମାତିଙ୍କ୍ କାରାପ୍ ମାଡ଼ମାନ୍ଦାନ୍ ସାରେ ବିଷୟତାଗାଙ୍କ୍ ନିଜେ ନିଜେତିଙ୍କ୍ ଲେକାମ୍ ମାଡ଼ିକାଡ଼୍ । ମେଣ୍ଡେ ଇଶ୍ୱର୍‌ତିଙ୍ଗ୍ ୱେର୍‍ସ୍ ମିକା ସାରେ ପବିତ୍ରତଡ଼୍ ମାନ୍ଦିକାଡ଼୍ ।
2CO 7:2 ମିଇ ହୃଦୟ୍‍ତାଗ୍ ମାକିଂଙ୍କ୍ ପଡ଼ିୟେ ଇମୁଟ୍ । ମାମ୍‍ମେ ବେନଙ୍କ୍ ଅନ୍‌ୟାୟ୍ ମାଡ଼ମ୍, ବେନଙ୍କ୍ ବାତେଏ ଲସ୍‍ ମାଡ଼ମ୍ କି ବେନନାଗାଙ୍କ୍ ବାତ୍‍ତେ ଫାଇଦା ମାଡ଼୍‍ନଙ୍କ୍ ଆଲ୍‍ସି ମାଡ଼ମ୍ ।
2CO 7:3 ମିକିଂଙ୍କ୍ ଦଷ୍ ଇଦାନଙ୍କ୍ ନାନ୍ ଇଦ୍ ଗଟ୍ କେଲନ୍ । ନାନ୍ ମୁନେଙ୍କ୍‍କଞ୍ଜ୍ କେତୁତାନ୍, ମିଡ଼୍ ମା ଇସର୍ ସାୟେ ଯେ, ମାମ୍‍ମେ ମାତ୍‍କେ ଅଣ୍ଡୟାଗେ ମାନ୍ଦିକାଡ଼୍ ନୁ ଡଲ୍‍କେ ଅଣ୍ଡୟାଗେ ଡଲିକାଡ଼୍ ।
2CO 7:4 ମିଇ ପରୁ ନାୟାଦ୍ ଗାଟି ବିଶ୍ୱାସ୍ ମିନ୍ଦେ । ମିଇ ସେଙ୍ଗେ ନାୟାଦ୍ ଗର୍ବ ମିକା ଆଦ୍‍ତେ । ଦୁଃକାମ୍ କଷ୍ଟ ସମୟ୍‍ତେ ନାନ୍ ମୁନେଙ୍କ୍ ତାଦ୍ ଶକ୍ତି ତଅତାନ୍ । ୱେଡ଼୍‍କେତେ ସାର୍‍ଦେ ଆତ୍‍ତାନ୍ ।
2CO 7:5 ଇଦ୍‍ଲେକାମ୍ କି ମାସିଦୋନିଆତାଗ୍ ୱେଉସ୍ ମିକା ମାମ୍‍ମେ ରୱମ୍‍ । ସାରେତାଗେ ଅଶାନ୍ତି ନୁ ଗଲ୍‍କ୍ ଆସ୍‍ସ ମାତ୍‍ତେ, ଆଦିଙ୍କ୍ ମା ଜିୱୁଣ୍ଡ୍‍ତାଗେ ଶାନ୍ତି ଇଲ୍‍ୱେ ମାତ୍‍ତେ ।
2CO 7:6 ବାତେଙ୍କ୍ ଇତ୍‍କେ ଚିନ୍ତାତେ ମାନ୍ଦାନ୍ ନାରୁଡ଼୍‍କ୍ ସାନ୍ୱନା ଇସମାନ୍ଦାନ୍ ଇଶ୍ୱର୍‌ ତିତସ୍‍ତିଙ୍କ୍ ରସ୍ ମାକିଂଙ୍କ୍ ସାର୍‍ଦେ ଇତ୍‍ତନ୍ ।
2CO 7:7 ଅନ୍‌‍ୱାଦ୍ ଆଗମନ୍‍ ଆତ୍‍ତାଙ୍କ୍ ଆୟ୍‍ୟ, ମାତର୍ ଅଣ୍ଡ୍‌ ମିଇ ପାକେ ଆଞ୍ଜ୍ ବେନ୍ ସାର୍‍ଦେ ପାଏମ୍‍ଆତ୍‍ତଣ୍ଡ୍, ଆଦିନ୍‌ସେଙ୍ଗେ ମାମ୍‍ମେ ୱେଡ଼୍‍କ୍‍ ଆତ୍‍ତମ୍ । ନାକିଂଙ୍କ୍ ଉଡ଼ାନଙ୍କ୍ ମିୟାଦ୍ ବେସର୍ ଇଚ୍ଛା, ନା ସେଙ୍ଗେ ମିୟାଦ୍ ବେସର୍ ଦୁଃକାମ୍, ନାକିଂଙ୍କ୍ ସମର୍ତନ୍ ମାଡ଼ାନଙ୍କ୍ ମିଡ଼୍ ବେସର୍ ଇଚ୍ଛା, ଇଦ୍ ସାରେ ବିଷୟ ଅଣ୍ଡ୍‌ ନାକିଂଙ୍କ୍ କେତ୍‍ତାନ୍ । ଆଦିଙ୍କ୍ ନାନ୍ ଗାଟି ୱେଡ଼୍‍କ୍‍ତାନ୍ ।
2CO 7:8 ନାୟଦ୍ ଚିଟି କାର୍‍ସ୍ ମିଡ଼୍ ଦୁଃକାମ୍ ଆତ୍‍କେ ମିକା, ଆଦ୍ ଚିଟି ଲେକିମାନାଙ୍କ୍ ନା ମନ୍‍ତାଗ୍ ବାତେଏ ଦୁଃକାମ୍ ଇଲ୍‍ଲେ । ଚିଟି ମିକିଂଙ୍କ୍ ସେନେକ୍‍ତିଙ୍କ୍‍ ମାଇଦିଙ୍କ୍ ଦୁଃକାମ୍ ଇତ୍‍ତାଙ୍କ୍ ନାନ୍ ଦୁଃକାମ୍‍ ଆସ୍ ମାନେନ୍ ।
2CO 7:9 ବାତେଙ୍କ୍ ଇତ୍‍କେ ମିଇ ମନ୍‍ଦାଗ୍ ଦୁଃକାମ୍ ଇସ୍ ମାନ୍‍ ଆୟ୍‍ୟ, ମାତର୍ ଇଦ୍ ଦୁଃକାମ୍ ମିଇ ଜିୱୁଣ୍ଡ୍‍ତାଦ୍ ଗତିପତ୍‌ ବାଦ୍‍ଲେମ୍‍ ମାଡ଼୍‍ତାଙ୍କ୍ ଇଞ୍ଜେ ନାନ୍ ୱେଡ଼୍‍କ୍‍ ପାଏମ୍‍ଆତ୍‍ତାନ୍ । ଇଶ୍ୱର୍‌ତେ ଇଚ୍ଛା ଲେକାମ୍ ମିଡ଼୍ ଇଦ୍ ଦୁଃକାମ୍ ସାରେ ମାଡ଼୍‍ତିଡ଼୍ । ଆଦିଙ୍କ୍ ମା ତଡ଼୍ ମିଡ଼୍ ବେଦ୍‍ଲେକାମ୍ ମିକା ଲସ୍‍ ଆୟ୍‍ୱିଡ଼୍ ।
2CO 7:10 ବାତେଙ୍କ୍ ଇତ୍‍କେ ଇଦ୍‍ଲେକାତ୍ ଦୁଃକାମ୍ ଇଶ୍ୱର୍‌ତଡ଼୍ ବ୍ୟବହାର୍‌ ଆସ୍ ଅଦିନ୍‌ତଡ଼୍ ହୃଦୟ୍ ବାଦ୍‍ଲେମ୍ ଆତ୍‍କେ ପରିତ୍ରାଣ ଦର୍‍କିତ୍ । ଇଗେ ଅନୁତାପ୍ ଆଦାନାଦ୍ ବାତ୍ ଇଲ୍‍ଲେ । ବାତେଙ୍କ୍ ଇତ୍‍କେ ମାତର୍ ଜଗତ୍‍ତାଦ୍ ଦୁଃକାମ୍ ଡଲ୍‍ନାଦ୍ ଗଟେମ୍‍ମାଡ଼ିତ୍ ।
2CO 7:11 ଉଡ଼ାଟ୍, ଇଶ୍ୱର୍‌ତେ ଲେକାମ୍ ଇଦ୍ ଦୁଃକାମ୍ ମିଇ ମନ୍‍ତାଗ୍ ବେସର୍ ଇଚ୍ଛା, ବେସର୍ ୱେରେ, ବେସର୍ କପାମ୍, ଆତ୍ମସଂଶୋଦନ ସେଙ୍ଗେ ବେସର୍ ୱାଦାନ୍, କାରାପ୍ ପାଡ଼ିୟିଦେ ନାରୁଡ଼୍‍କ୍ ଦଣ୍ଡ ଇଦାନଙ୍କ୍ ବେସର୍ ତର୍ପରତା ସଂଚାରିତ୍ ମାଡ଼୍‍ତେ । ଇଦ୍‍ସାରେ ବିଷୟ୍‍ତେ ମିଡ଼୍ ନିର୍ଦ୍ଦୋଷ ଇଞ୍ଜ ପ୍ରାମାନ୍ ଆଦ୍‍ତିଡ଼୍ ।
2CO 7:12 ଆଦିଙ୍କ୍ ଯଦି ନାନ୍ ମିଇବକେତ୍ ଚିଟି ଲେକିତାନ୍, ଆଗେକ୍ ବା ବେନ ଅନ୍‌ୟାୟ୍ ମାଡ଼୍‍ତଣ୍ଡ୍ ବା ବେନ ଅନ୍‌ୟାୟ୍ ସୟେମ୍‍ ଆତ୍‍ତନ୍, ତାନ୍ ଉଦ୍ଦେଶ୍ୟତେ ଆଦ୍ ଆୟ୍‍ୟ । ଇଶ୍ୱର୍‌ତେ କଣ୍ଡେତେ ମା ସେଙ୍ଗେ ମିୟାଦ୍ ବକ୍ତି ବେସର୍ ଲେକାମ୍ ନୁ
2CO 7:13 ଆଦିନ୍ ସେଙ୍ଗେ ମାମ୍‍ମେ ବେସର୍ ସାର୍‍ଦେ, ଆଦ୍ କେଞ୍ଜ୍‍ପାଙ୍କ୍ ନାନ୍ ଆଦ୍ ଚିଟି ଲେକ୍‍ତାନ୍ । ମାମ୍‍ମେ ବେସର୍ ସାର୍‍ଦେ ଆୟମ୍ । ମିଇଡ଼୍ ତିତସ୍‍ତିଙ୍କ୍ ସାରେ ଲେକାମ୍ ସାହାଯ୍ୟ ମାଡ଼ି ବେଲାନ୍ ସାର୍‍ଦେ ମାଡ଼୍‍ତିଡ଼୍ । ଆଦ୍ ମାକିଂଙ୍କ୍ ନାର୍‍ଗେ ୱେଡ଼୍‍କ୍‍ ଇତ୍‍ତେ ।
2CO 7:14 ତାମ୍ ପାକେ ମିଇ ସେଙ୍ଗେ ନାନ୍ କେସ୍‍ମିନ୍ଦେନ୍ । ମେଣ୍ଡେ ଆଦିନ୍ ସେଙ୍ଗେ ନା ତାଲେ ମଦଲ୍ ଆୟ୍‍ୟ । ବେଲାନ୍ ମିଇ ପାକେ ମାମ୍‍ମେ ସାରେଦିନା ସତ୍ କେସ ୱାଦୁତମ୍‍, ଆଦେଲେକାମ୍ ତିତସ୍‍ତେ ପାକେ ମାମ୍‍ମେ ମାଡ଼ିମାନ୍ଦାନ୍ ଗର୍ବି, ବୁସା ଇଞ୍ଜ ପ୍ରମାନ୍ ଆୟ୍‍ୟ ।
2CO 7:15 ମିଡ଼୍ ସାରେତଡ଼୍ ବେଲାନ୍ ଅନ୍‌‍ୱାଦ୍ ଗଟ୍‍ତାଗ୍ ମାତ୍‍ତିଡ଼୍ ମେଣ୍ଡେ ୱେରେ ନୁ ଜିୱୁନ୍ ୱାଡ଼୍‍କି ଅଂକିଙ୍କ୍‌ ସ୍ୱାଗତ୍ ମାଡ଼ିମାତ୍‍ତିଡ଼୍‍, ଇଦ୍ ଗଟ୍ ଏର୍କା ମାଡ଼ି ମିଇ ସେଙ୍ଗେ ଅନାଦ୍‌ ପ୍ରେମ ମେଣ୍ଡେ ଅଦିକ୍‌ ନାର୍‍ଗେ ଆସମିନ୍ଦେ ।
2CO 7:16 ନାନ୍ ସାରେ ବିଷୟ୍‍ତେ ମିଇ ପରୁ ସାରେ ବିଶ୍ୱାସ୍ ମାଡ଼୍‍ତାଙ୍କ୍ ନାନ୍ ବେସର୍ ସୁକାମ୍‍ତେ ।
2CO 8:1 ଦାଦାନଡ଼ି ନୁ ଏଲାସ୍କ୍‍, ମାସିଦୋନିଆତେ ମଣ୍ଡଲିକିନାଗ୍ ବେଲାନ୍ ଇଶ୍ୱର୍‌ତେ ଅନୁଗ୍ରହ ଲାବ୍ ମାଡ଼୍‍ତଡ଼୍, ଆଦ୍ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତାନ୍ ।
2CO 8:2 ଅଡ଼୍‌ ଗାଟି ତିପାଲ୍ ଇସ୍ ପରିକ୍ଷିତ୍ ଆଦ୍‍ତଡ଼୍ ନୁ ଅଡ଼୍‌ ଗାଟି ଗରିବ୍ ଆତ୍‍କେ ମିକା, ନାର୍‍ଗେ ଦାନ୍‍ ଇସ୍ ନିଜେର୍‍ ମାନ୍‍ତାଦ୍‍ ୱାସମିନ୍ଦେନ୍ ୱେଡ଼୍‍କ୍‍ କେସ୍ ମିନ୍ଦେ ।
2CO 8:3 ନାନ୍ ନିଜାମ୍‍ତେ କେତୁତାନ୍ ଯେ, ଅଡ଼୍‌ ନିଜେତ୍ ଇଚ୍ଛାତେ ବେସର୍ ପାର୍‍ତ ଆସର୍ ଇତ୍‍ତଡ଼୍ ନୁ ମେଣ୍ଡେ ଅଦିକ୍‌ ମିକା ଦାନ ମାଡ଼ିମିନ୍ଦେଡ଼୍ ।
2CO 8:4 ଯିହୁଦାତାଗ୍ ମାନ୍ଦାନ୍ ଇଶ୍ୱର୍‌ତେ ନାରୁଡ୍‍କିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ ସୁଯୋଗ୍ ଇୱିଡ଼୍ ଇଞ୍ଜ୍ ଅଡ଼୍‌ ମାକିଂଙ୍କ୍ ଅନୁରୋଦ୍‍ ମାଡ଼ି କେସ୍‍ମାତ୍‍ତଡ଼୍ ।
2CO 8:5 ଅଡ଼୍‌ଆଗାଙ୍କ୍‌ ମାମ୍‍ମେ ଇସର୍ ଆଶେ ମାଡ଼ି ମାନମ୍ । ମୁନେ ଅଡ଼୍‌ ନିଜେ ନିଜେତିଙ୍କ୍ ପ୍ରବୁନ୍ ପାକେ ଉତ୍ସର୍ଗ ମାତ୍‍ତଡ଼୍ ନୁ ପେର୍‍କେ ଇଶ୍ୱର୍‌ତେ ଇଚ୍ଛା ଲେକାମ୍‍ତେ ନିଜେ ନିଜେତିଙ୍କ୍ ମାନ୍‍ ଉଦ୍ଦେଶ୍ୟତେ ଉତ୍ସର୍ଗ ମାଡ଼୍‍ତଡ଼୍ ।
2CO 8:6 ତିତସ୍‍ତଡ଼୍ ଇଦ୍ ପାଡ଼୍‍ୟି ଆରାମ୍ ଆସ୍‍ମାତେ । ଇଦିଙ୍କ୍ ଚାଲାମାଡ଼ି ନେହେତାନ୍ ସେଙ୍ଗେ ନୁ ଇଦ୍ ପ୍ରେମାତାଦ୍‍ ସେବା ପାଡ଼ିୟିଦାଗ୍ ମିକିଂଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ତିତସ୍‍ତିଙ୍କ୍ ଅନୁରଦ୍‌ ମାଡ଼୍‍ତମ୍ ।
2CO 8:7 ମିଡ଼୍ ମିୟାଗ୍ ବାତ୍ ସାର୍‍ରେ ମିନ୍ଦେ ଆଗେ ସାଉକାର୍ ଆଦ୍‍ତିଡ଼୍, ବିଶ୍ୱାସ୍, ସାୟେ ଗଟି କେତାନଡ଼୍, ବୁଦ୍‍ତେ, ସାହାଯ୍ୟ ମାଡ଼ାନଙ୍କ୍ ତିଆର୍ ନୁ ମା ସେଙ୍ଗେ ପ୍ରେମ ତଅତାନଙ୍କ୍ ନାର୍‍ଗେ ପରିଚୟ ଇମୁଟ୍, ଇଦ୍ ନାୟାଦ୍ ଇଚ୍ଛା ।
2CO 8:8 ଇଦ୍ ବିଷୟ୍‍ତେ ମିଇ ସେଙ୍ଗେ ନାନ୍ ବାତେବା ମିଚ୍‌ ତିଆର୍ ମାଡ଼ନ୍ । ମାତର୍ ସେବାକାମ୍‍ଦାଗ୍ ବାଗାତଡ଼୍ ଇଚ୍ଛାତେ ୱେଷଡ଼୍‍ଇସ୍ ମିଇ ପ୍ରେମତେ ପାଡ଼୍‍ୟି ପୁନ୍ଦାନଙ୍କ୍ ନାନ୍ ଆଲ୍‍ସି ମାଡ଼ୁତାନ୍ ।
2CO 8:9 ମୀଡ଼୍ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ବିଷୟ ପୁନୁଟ୍ । ଅଣ୍ଡ୍‌ ସାଉକାର୍ ଆସ୍‍ମିକା ମିଇ ସେଙ୍ଗେ ଗରିବ୍ ଆତ୍‍ତଣ୍ଡ୍, ଅନ୍‌ ଗରିବ୍ ତଡ଼୍ ମିଡ଼୍ ଗାଲା ବେଲା ସାଉକାର୍ ଆଦ୍ ପାର୍‍ଦ୍‍ତିନ୍ ।
2CO 8:10 ଇଦ୍ ବିଷୟ୍‍ତେ ମିକିଂଙ୍କ୍ ନାୟଦ୍ ଇଦ୍ ଗଟ୍ ଆତ୍‍ତେ ୱେଷଡ଼୍‌ ମିଡ଼୍ ବାତେଏ ଆରାମ୍ ମାଡ଼ି ମାତ୍‍ତିଡ଼୍, ଆଦ୍ ଇଞ୍ଜେ ତେର୍‍ସ୍ପାନାଦ୍ ମିୟାଦ୍ ସାୟେ । ମାତର୍ ପାଡ଼୍‍ୟି ମାଡ଼ାନନ୍ ଆୟ୍‍ୟ, ମାତର୍ ପାଡ଼୍‍ୟି ମାଡ଼ାନଙ୍କ୍ ଯୋଜନା ମାଡ଼ାନାଗ୍ କେତାନାଦ୍ ମିଡ଼୍ ଆଦ୍‍ତିଡ଼୍ ମୁନ୍‍ନେତଡ଼ି ।
2CO 8:11 ଆଦିଙ୍କ୍ ପାଡିୟ୍‌ ମାଡ଼ ମାନୁଟ୍ ନୁ ମିଇ ସୁଯଗ୍‍ତେ ଉଡ଼ି ଆଦ୍ ତେର୍ସ୍ପାଟ୍ । ଯୋଜନା ମାଡ଼ାନ୍ ୱେଲେ ମିୟାଦ୍ ବେନ୍ ଲେକାମ୍ ଇଚ୍ଛା ମାତ୍‍ତେ, ପାଡ଼୍‍ୟି ତେର୍‍ନା ଯାକ ଆଦିଙ୍କ୍ ଲେକେତ୍‌ ଆଦ୍‍ପି ୱାଟାଟ୍ ।
2CO 8:12 ବାତେଙ୍କ୍ ଇତ୍‍କେ ଦାନ ମାଡ଼ାନାଦ୍ ଇଚ୍ଛା ମାତ୍‍ତେ, ନାରୁନ୍ ତାନ୍ ପାର୍‍ତେ ଆସର୍ ବାତ୍ ଦାନ ମାଡ଼ିତନ୍, ଇଶ୍ୱର୍ ଗ୍ରହନ୍ ମାଡ଼ିତନ୍ । ତାନ୍ ସମ୍ପତିତ୍‍ତେ ତାନ୍ ବାଇଦେ ଅଣ୍ଡ୍‌ ବାତେଏ ଇୱିଣ୍ଡ୍ ଇଞ୍ଜ ଇଶ୍ୱର୍ ଇଚ୍ଛା ମାଡ଼ଣ୍ଡ୍ ।
2CO 8:13 ମିଇ ପରୁ ଇଦ୍ ବଜ୍‍ତିଙ୍ଗ୍ ଲଦାମାଡ଼ି ବାଗାତଡ଼୍‍କ୍ ୱେଡ଼୍‍କ୍‍ ଇଦା‍ନ୍‍ ସେଙ୍ଗେ ନାନ୍‍ନେ ଆଲ୍‍ସି ମାଡ଼ନ୍,
2CO 8:14 ବାତେଙ୍କ୍ ଇତ୍‍କେ ଇଞ୍ଜେ ମିୟାଦ୍ ନାର୍‍ଗେ ମାନ୍‍ନାଙ୍କ୍ ଅବାବ୍‍ତେ ମାନ୍ଦାନ୍ ନାରୁଡ଼୍‍କ୍ ସାହାଯ୍ୟ ମାଡ଼ାନାଦ୍ ମୀୟାଦ୍ ପାଡ଼୍‍ୟି । ଦିନାମ୍ ୱାଦ୍‍ତେ, ମିଡ଼୍ ଅବାବ୍‍ତେ ମାନ୍ଦାନ୍ ୱେଲେ, ଅଡ଼ାଦ୍‌ ସମ୍ପତି ମିୟାଦ୍ ଅବାବ୍ ପୁରନ୍‍ମାଡ଼ାନ୍ ସେଙ୍ଗେ ସାହାଯ୍ୟ ମାଡ଼ିତିଡ଼୍ । ଇଦ୍‍ଲେକାମ୍ ମିଡ଼୍ ଆନ୍‌‍ତେ ସାମାନ୍ ଲେକେମ୍ ଗେଲ୍‍ସାନଙ୍କ୍ ‍ପାର୍‍ଦ୍‍ତିଡ଼୍ ।
2CO 8:15 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ବେନ ନାର୍‍ଗେ ଗୁଡ଼୍‍ପିତଣ୍ଡ୍, ଅନାଦ୍‌ ବାତେଏ ମାୟ୍‍ୟ । ବେନ ସୁକୁକ୍ ଗୁଡ଼୍‍ପିତଣ୍ଡ୍, ଅନାଦ୍‌ ମେଣ୍ଡେ ଅବାବ୍ ଆୟ୍‍ୟ ।”
2CO 8:16 ଇଶ୍ୱର୍‌ତେ ଦନ୍ୟବାଦ୍ ଆୟି । ବାତେଙ୍କ୍ ଇତ୍‍କେ ମାନ୍‍ଲେକାମ୍ ତିତସ୍‍ ମିକା ମିକିଂଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ତିଆର୍ ମିନ୍ତେନ୍ ।
2CO 8:17 ଅଣ୍ଡ୍‌ ମାତର୍ ମାନ୍‍ ଅନୁରଦ୍‌ତିଙ୍କ୍‌ ସ୍ୱାଗତ୍ ମାଡ଼ଡ଼୍‍, ମାତର୍ ମିକିଂଙ୍କ୍ ସାହାଯ୍ୟ ମାଡ଼ାନଙ୍କ୍ ଇସର୍ ତିଆର୍‍ତେ ମିନ୍ଦେନ୍ ଯେ, ନିଜେତ୍ ଇଚ୍ଛାତେ ମୀଇପାକେ ଆଦାନ୍ ସେଙ୍ଗେ ଅନ୍‌ ମାନ୍‍ ମାଡ଼ିମିନ୍ଦେଣ୍ଡ୍ ।
2CO 8:18 ଅନ୍‌ ତଡ଼୍ ମେଣ୍ଡେଅର୍‍ତୁନ୍ ଦାଦାଙ୍କ୍ ରତୁତମ୍ । ସୁସମାଚାର୍‌ ଗଟ୍ ପ୍ରଚାର୍ ମାଡ଼ାନଙ୍କ୍ ସାରେ ମଣ୍ଡଲିନାଗ୍ ଅଣ୍ଡ୍‌ ବିଶେଷ୍ କ୍ୟାତିଲାବ୍ ମାଡ଼୍‍ତଣ୍ଡ୍ ।
2CO 8:19 ମାତର୍ ଆସର୍ ଆୟ୍‍ୟ, ପ୍ରବୁନ୍ ଗୈରବ୍ ନୁ ମାନାଦ୍‍ ନମସ୍କାର୍ କେତ୍‍ତାନ୍ ସେଙ୍ଗେ ବେନ୍ ସେବା ପାଡ଼୍‍ୟି ମାନାଡ଼୍ ପାଏମ୍ ଆତ୍‍ତାଡ଼୍, ଆଗେ ମାନାଦ୍‍ ସାରେତାଗ୍‍ତଡ଼୍ ଆଦାନ୍ ସେଙ୍ଗେ ବେନାବେନା ମଣ୍ଡଲି ଅଂକିଙ୍କ୍‌ ଏଞ୍ଚି ମିନ୍ତେ ।
2CO 8:20 ଉଦାର୍‍ତେ ଇସ୍‍ମାନ୍ଦାନ୍ ଇଦ୍ ଦାନତିଙ୍କ୍ ଗାଟି ସାବ୍‍ଦାନ୍‍ତେ ମାମ୍‍ମେ ସେବା କାମ୍‍ତାଗ୍‍ ବ୍ୟବହାର୍‌ ମାଡ଼ୁତମ୍, ନେଲାନ୍ ମା ପରୁ ବେନ ଦୋଷ୍‍ମାଡ଼େ ପାର୍‍ୱନ୍ ।
2CO 8:21 ବାତେଙ୍କ୍ ଇତ୍‍କେ ମାତର୍ ପ୍ରବୁନ୍ ସାକ୍ଷାତ୍‍ତେ ଆୟ୍‍ୟ, ମାତର୍ ନାରୁନ୍ ସାକ୍ଷାତ୍ ମିକା ସତ୍ ମାନ୍ଦାନ୍ ମାନାଦ୍‍ ଲକ୍ଷ ।
2CO 8:22 ଆଦିଙ୍କ୍ ଅଡ଼୍‌‍ତଡ଼୍ ଇଣ୍ଡ୍ ଦାଦାଙ୍କ୍ ମାମ୍‍ମେ ରତ୍‍ତମ୍ । ଅଂକିଙ୍କ୍‌ ନାର୍ଗେଦାମ୍ ପରିକ୍ଷା ମାଡ଼ି ଅନ୍‌ ବିଶ୍ୱାସ୍‍ତେ ପରିଚୟ ଦର୍‍ସ୍କ୍‍ତମ୍ । ମିଇ ପରୁ ଅନାଦ୍‌ ଗାଟି ଆଶେ ମାନ୍‍ନାଙ୍କ୍ ଅଣ୍ଡ୍‌ ମିକିଂଙ୍କ୍ ସାହାଯ୍ୟ ମାଡ଼ାଙ୍କ୍ ସେଙ୍ଗେ ଅଦିକ୍‌ ଆଗ୍ରହ ଆତ୍‍ତନ୍ ।
2CO 8:23 ତିତସ୍‍ତେ ପରିଚୟ ଇଦ୍, ଅଣ୍ଡ୍‌ ନା ତଡ଼୍‍ଦେ ନଣ୍ଡ୍ ନୁ ମିକିଂଙ୍କ୍ ସାହାଯ୍ୟ ମାଡ଼୍‍ନାଙ୍କ୍ ନା ତଡ଼୍ ପାଡ଼୍‍ୟି ମାଡ଼ାନଣ୍ଡ୍ । ମେଣ୍ଡେ ଅନ୍‌‍ତଡ଼୍‍ ଆଞ୍ଜମାନ୍ତାନ୍ ବାଗାତଡ଼୍ ପ୍ରେରିତ ବିଶ୍ୱାସୀ ଦାଦାନଡ଼୍ ପରିଚୟ, ଅଡ଼୍‌ ମଣ୍ଡଲି ସାରେତାୱିନ୍ ପ୍ରତିନିଦି ନୁ କ୍ରିଷ୍ଟନ୍‍ ଗୌରବ୍ ଲେକାମ୍ ।
2CO 8:24 ଅଡ଼୍‌‍କିଂଙ୍କ୍ ମିୟାଦ୍ ପ୍ରେମ ତମୁଟ୍ । ଆଲାଆତ୍‍କେ ସାରେ ମଣ୍ଡଲି ଇଦ୍ ବିଷୟ୍‍ତେ ନିଜାମ୍ ଆଦ୍‍ତେ ନୁ ମିଇ ସେଙ୍ଗେ ମାମ୍‍ମେ ମାଡ଼ମାନ୍ଦାନ୍ ଗର୍ବ ସତ୍ ଇଞ୍ଜ ବୁଜେମ୍ ଆଦ୍‍ପାର୍‍ଦ୍‍ତଡ଼୍ ।
2CO 9:1 ଯିହୁଦାତାଗ୍ ମାନ୍ଦାନ୍ ଇଶ୍ୱର୍‌ତେ ନାରୁଡ଼୍‍ତେ ପାକେ ସାହାଯ୍ୟ ରତାନ୍ ସେଙ୍ଗେ ମିକିଂଙ୍କ୍ ଲେକାନାଲ୍‌ଦ୍ ବାତେଏ ଆବଶ୍ୟକତା ଇଲ୍‍ଲେ ।
2CO 9:2 ନାନ୍ ପୁତ୍‍ତାନ୍, ମୀଇଡ଼୍ ସାରେଦାମ୍ ସାହାଯ୍ୟ ମାଡ଼ାନଙ୍କ୍ ତିଆର୍ ନୁ ମାସିଦୋନିଆତେ ନାରିଡ଼୍ ପାକେ ମିୟାଦ୍ ବିଷୟ୍‍ତେ ନାନ୍ ଗର୍ବ ମାଡ଼୍‍ତାନ୍ । ନାନ୍ କେସ୍‍ମାତ୍‍ତାନ୍, “ଆକାୟାତେ ଦାଦାନଡ଼ି ସାହାଯ୍ୟ ମାଡ଼ାନ୍ ସେଙ୍ଗେ ଆତ୍‍ତେ ୱାଡ଼୍‍ଷା କନ୍‍ସ୍ ତିଆର୍ ଆସ୍ ମିନ୍ଦେ ।” ମିୟାଦ୍ ଆଗ୍ରହ ଅଡ଼୍‌ ତାଗାଙ୍କ୍ ନାର୍‍ଗେ ନାରିଡ଼୍‍କିଙ୍କ୍ ତିଆର୍‍ତେ ମାଡ଼୍‍ତେ ।
2CO 9:3 ଇଞ୍ଜେ ନାନ୍ ଇ ଦାଦାନଡ଼୍‍କ୍ ମିଇ ପାକେ ରହସମିନ୍ଦେନ୍ । ଉଡ଼େ, ଇଦ୍ ସମୟ୍‍ତେ ବେଲାନ୍ ମିୟାଦ୍ ବିଷୟ୍‍ତେ ମାୟାଦ୍‌ ଗର୍ବ ଆଙ୍ଗ୍‍ଡ଼ାମ୍‍ ଆୟ୍‍ମାକି । ନାନ୍‍ନେ କେତ୍‍ତାନ୍ ଲେକାମ୍ ମିଡ଼୍ ଦାନତଡ଼୍ ତିଆର୍ ଆ‍ସ୍‍ ମାନୁଟ୍ ।
2CO 9:4 ମାସିଦୋନିଆତେ ନାରୁଡ଼୍ ନା ତଡ଼୍ ଆଞ୍ଜ୍ ଯଦି ମିକିଂଙ୍କ୍ ତିଆର୍ ଆତ୍‍ତାଦ୍ ଉଡ଼ିତଡ଼୍; ଆଲେକେ ମିଇ ପରୁ ଗାଟି ଆଶେ ମାନ୍‍ ମାମ୍‍ମେ ସିଗ୍ ଆଦ୍‍ତମ୍, ନିଜାମ୍ କେତାନଙ୍କ୍ ଆତ୍‍କେ, ଆଦ୍ ମିଇ ପାକେ ମିକା ସିଗ୍‍ତାଦ୍ ଆଦ୍‍ତେ ।
2CO 9:5 ମିଡ଼୍ ପ୍ରତିଶ୍ରୁତି ଇସ୍ ମାନ୍ଦା‍ନ୍ ଦାନ ନେହେତାନ୍ ସେଙ୍ଗେ ଇ ଦାଦାନଡ଼୍‍କ୍ ନାନ୍ ଆଦାନ୍ ମୁନେଙ୍କ୍ ମିଇ ପାକେ ରଅତାନ୍‍ ସେଙ୍ଗେ ମାନ୍‍ ମାଡ଼୍‍ତାନ୍ । ଆଲେକେ, ନାନ୍ ମିଇ ପାକେ ହେୱୁଦାନ୍ ୱେଲେ ଇଦ୍ ଦାନ ଗୁଡ଼୍‍ପି ନେହେସ୍ ମାନ୍ଦାନ୍ ମିନ୍ଦେ । ଇଦିନ୍‍ତଡ଼୍ ମିଡ଼୍ ବାଦ୍ୟତଡ଼୍ ଇୱେକଟ ନିଜେତ୍ ଇଚ୍ଛାତେ ଇଦୁତିଡ଼୍ ଇଞ୍ଜ ପ୍ରକାଶ୍ ଆଦ୍‍ତେ ।
2CO 9:6 ହେର୍କା ନେହେମୁଟ୍, ବେନ ସୁକୁକ୍ ୱିଜ୍ ୱିତିତନ୍, ଅଣ୍ଡ୍‌ ସୁକୁକ୍ ପାଣ୍ଡ୍‍ପ୍ସିତନ୍; ବେନ ନାର୍‍ଗେ ୱିଜ୍ ୱିତିତନ୍, ଅଣ୍ଡ୍‌ ନାର୍‍ଗେ ପାଣ୍ଡ୍‍ପ୍ସିତନ୍‍ ।
2CO 9:7 ବେନ ବେଲା ନିଜେତ୍ ଜିୱୁଣ୍ଡ୍‍ତାଗ୍ ଆଲ୍‍ସିତିଡ଼୍, ଅଣ୍ଡ୍‌ ଆଲାନ୍ ଦାନ ମାଡ଼ିଣ୍ଡ୍ ନୁ ଆଦ୍ ଦାନ ଦୁଃକାମ୍‌ ଆସ୍ ବା ମାତର୍ ଉର୍‌ଗାଡ଼୍‌ ଆୟ୍‍ମାକି । ବାତେଙ୍କ୍ ଇତ୍‍କେ ୱେଡ଼୍‍କେତେ ଇଦାନଙ୍କ୍ ଇଶ୍ୱର୍‌ ପ୍ରେମ ମାଡ଼ିତନ୍ ।
2CO 9:8 ସାରେଲେକାତ୍ ଦାନ୍‍ତେ ମିକିଂଙ୍କ୍ ଉନ୍ନତି ମାଡ଼ାନ୍ ସେଙ୍ଗେ ଇଶ୍ୱର୍‌ ପାର୍‍ଦ୍‍ତଣ୍ଡ୍; ପେର୍‍କେ ମିଡ଼୍ ସାରେଦାମ୍ ସମ୍ପତିତାଗେ ବାଦ୍‍କେ ପାର୍‍ତିଡ଼୍ ନୁ ସାରେ ଲେକାତ୍ ଲେକେତ୍‍ ପାଡ଼୍‍ୟି ସେଙ୍ଗେ ବେସର୍ ଦର୍‍କାର୍ ଆସର୍ ଦାନ ଇଦ୍‍ଏ ପାର୍‍ତିଡ଼୍ ।
2CO 9:9 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ଅବାବ୍‍ତେ ନାରିଡ଼୍‍କ୍ ଅଣ୍ଡ୍‌ ଉଦାର୍‍ତଡ଼୍ ଦାନ ମାଡ଼ିତନ୍‍; ତାନ୍ କୃପା ସାରେଦିନାତ୍‍ ମାଇଦିଙ୍କ୍ ।”
2CO 9:10 ବେନଡ଼୍ ବାଦ୍‍କାନଡ଼୍‍କ୍ ଇଶ୍ୱର୍ ୱିତାନ୍ ସେଙ୍ଗେ ୱିଜ୍ ନୁ ତିନ୍ଦାନ୍ ସେଙ୍ଗେ କାଦି କେପ୍‌ସିତନ୍, ଅଣ୍ଡ୍‌ ମିୟାଦ୍ କାମ୍‍ମାଡ଼ାନ୍ ଲେକାମ୍‍ତେ ୱିଜ୍ ନେହେଚିଦ୍‍ତନ୍ ନୁ ମିଇୟାଦ୍ ଉଦାର୍‍ତେ କାୟେ ଲେକାମ୍ ମିଡ଼୍ ଆନ୍‌ତେ ନାର୍‍ଗେ ଫସଲ୍ ପାଣ୍ଡ୍‍ସ୍ପିତିଡ଼୍ ।
2CO 9:11 ମିଇଡ଼୍ ସାରେଦାମ୍ ବେଲାନ୍ ଉଦାର୍ ଲେକାମ୍ ଦାନ ମାଡ଼େ ପାର୍‍ତିଡ଼୍, ଇଦିନ୍‍ ସେଙ୍ଗେ ଇଶ୍ୱର୍ ମିକିଂଙ୍କ୍ ସାରେ ବିଷୟ୍‍ତେ ଉନ୍ନତି ମାଡ଼ିତନ୍ ନୁ ମାନ୍‍ ତଡ଼୍ ମିଡ଼୍ ରଅସ୍‍ମାନ୍ଦାନ୍ ଦାନ ସେଙ୍ଗେ ନାର୍‍ଗେ ଇଶ୍ୱର୍‌ତିଙ୍କ୍ ୱେଡ଼୍‌କେତେ ଦନ୍ୟବାଦ୍ ଇଦ୍‍ତଡ଼୍ ।
2CO 9:12 ମିୟାଦ୍ ଦାନ ଲେକ୍‌ତାଦ୍‌ ସେବା ପାଡ଼୍‍ୟିତଡ଼୍ ମାତର୍ ବେନ ଇଶ୍ୱର୍‌ତେ ନାରୁଡ଼୍‍ତେ ଅବାବ୍ ଯେକା ଆଦ୍‍ତେ, ଆଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଇଦିନ୍‍ ତଡ଼୍ ଇଶ୍ୱର୍‌ତେ ସେଙ୍ଗେ ନାର୍ଗେ ନାରୁଡ଼୍‍ ହୃଦୟ୍‍ତାଗ୍ କୃତଜ୍ଞତା ମିଡ଼୍‍ ଆଦ୍‍ତେ ।
2CO 9:13 ଇଦ୍‍ ସେବା ପାଡ଼୍‍ୟି ତଡ଼୍ କ୍ରିଷ୍ଟନ୍ ସୁସମାଚାର୍‌ତେ ସେଙ୍ଗେ ମିୟାଦ୍ ବିଶ୍ୱାସ୍ତେ ସେଙ୍ଗେ ନୁ ସାରେତଡ଼୍ ତଡ଼୍ କାଇଲି ମିକା ମିଡ଼୍ ବେନ୍ ପ୍ରସଂଶା ମାଡ଼୍‍ତିଡ଼୍, ଆଦିନ୍ ସେଙ୍ଗେ ଅଡ଼୍‌ ଇଶ୍ୱର୍‌ତିଙ୍କ୍ ଗୌରବ୍ ମାଡ଼ିତଡ଼୍ ।
2CO 9:14 ମିଇ ମାୟ୍‍ଦିଙ୍କ୍ ଇଶ୍ୱର୍‌ତେ ନାର୍‍ଗେ ଅନୁଗ୍ରହ ସେଙ୍ଗେ ଅଡ଼୍‌ ବିଶ୍ୱାସ୍‍ତାଗ୍ ନାର୍‍ଗେ ପ୍ରେମତଡ଼୍ ପ୍ରାର୍ତନାତାଗ୍ ମିକିଂଙ୍କ୍ ହେର୍କା ମାଡ଼ିତଡ଼୍ ।
2CO 9:15 ୱାଡ଼ାଟ୍, ଇଶ୍ୱର୍‌ତେ ବାକ୍‍ୱା ନୁ ମୁଲ୍ୟହିନ ଦାନ ସେଙ୍ଗେ ଅନ୍‌ ସେଙ୍ଗେ କୃତଜ୍ଞତା ମାଡ଼ିକାଡ଼୍ !
2CO 10:1 ନାନ୍ ପାଉଲ୍, ମିକିଂଙ୍କ୍ ନାୟାଦ୍ ଇଦ୍ ବ୍ୟାକ୍ତିଗତ ଦନ୍ୟବାଦ୍ ବେନ କେତିତଡ଼୍‍, “ନାନ୍ ମିଇ ପାକେ ମାନ୍ଦାନ୍ ୱେଲେ ଗାଟି ନମ୍ର ନୁ ଶାନ୍ତି, ବାତେଙ୍କ୍ ଇତ୍‍କେ ଯେକା ଆତ୍‍କେ ଅଦିକ୍‌ ସାହାସୀ ।” କ୍ରିଷ୍ଟନ୍ ନମ୍ରତା ନୁ କମଲ ନାନ୍ ମିକିଂଙ୍କ୍ ଦନ୍ୟବାଦ୍ ମାଡ଼ି କେତୁତାନ୍,
2CO 10:2 ମିଇ ତଡ଼୍ କାଇଲ୍‍ତେ ୱେଲେ ନାକିଂଙ୍କ୍ ବେଲାନ୍ କାରାପ୍‌ ବ୍ୟବହାର୍ ମାଡ଼ାନଙ୍କ୍ ଆୟ୍‍ୟ । ବାତେଙ୍କ୍ ଇତ୍‍କେ ବେନଡ଼୍ ହେର୍କା ମାଡ଼ିତଡ଼୍ ଯେ, ମାମ୍‍ମେ ଜାଗତିକ ରୀତିନୀତି ଲେକାମ୍ ମାନ୍‍ନ୍ତମ୍, ଅଡ଼୍‌ ବିରୁଦ୍ଦ୍‌ତେ ଦୃଡ଼ ପଦକ୍ଷେପ ଆଦାନାଦ୍ ନାର୍‍ଗେ ସାହାସ ନାୟାଦ୍ ମିନ୍ଦେ ।
2CO 10:3 ମାମ୍‍ମେ ଇଦ୍ ଜଗତ୍‍ତାଗ୍ ବାଦ୍‍କୁତମ୍ ଇଦ୍ ସତ୍, ବାତେଙ୍କ୍ ଇତ୍‍କେ ବାତେବା ଜାଗତିକ୍ ଲେକାମ୍ ନେହେସ୍ ଯୁଦ୍‌ ମାଡ଼ମ୍,
2CO 10:4 ମାତର୍ ଇଶ୍ୱର୍‌ତେ ଶକ୍ତିତାୱୁ ସୁରୀଟେଙ୍ଗା ବ୍ୟବହାର୍ ମାଡ଼ି ଶତ୍ରୁଡ଼ାୱୁ ଦୃଡ଼ ଦୁର୍ଗସାରେ ଦ୍ୱଂସ ମାଡ଼ିତମ୍, ବ୍ରାନ୍ତ ଯୁକ୍ତିସାରେ କଣ୍ଡନ୍‌ ମାଡ଼ିତମ୍ ।
2CO 10:5 ଇଶ୍ୱର୍‌ତେ ଜ୍ଞାନ୍‍ତିଙ୍କ୍ ବିରୁଦ୍ ମାଡ଼ମାନ୍ଦାନ୍ ସାରେତଡ଼୍ ଆଡାମ୍‍ ଆଦାନଡ଼୍‍କ୍ ମାମ୍‍ମେ ଉୱୁତିତମ୍ ନୁ ନାରୁଡ଼୍‍ତେ ସାରେ ଚିନ୍ତେ ଆୟତ୍ ମାଡ଼ି କ୍ରିଷ୍ଟନ୍ କାହିଲି ମାଡ଼ିକାଡ଼୍ ।
2CO 10:6 ମିଡ଼୍ ପୁରାପୁରି ଲେକାମ୍ କ୍ରିଷ୍ଟନ୍‍ ଅନୁଗତ ସ୍ୱିକାର୍ ମାଡ଼ାନ୍ ପେର୍‍କେ ମିଇ ଲୋପେ ମେଣ୍ଡେ ବାତେବା ଅବାଦ୍ୟତା ତଅନ୍‌ଦ୍‍କେ, ତାନାଦ୍ ପ୍ରତିକାର୍ ମାଡ଼ାନଙ୍କ୍ ମାମ୍‍ମେ ତିଆର୍ ।
2CO 10:7 ମିଇ ସାରେପାକେ ବାତେଏ ସାରେ ଗଟେମ୍ ଆଦୁତ୍‍ତେ, ଉଡ଼ାଟ୍ । ମିଇୟାଗେ ବେନ କ୍ରିଷ୍ଟନ୍‍ ପେର୍‍କେ ଆଦାନଣ୍ଡ୍ ମିନ୍ଦେଣ୍ଡ୍ କି ? ଯଦି ମିନ୍ଦେନ୍, ଆଲେକେ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଇଦ୍ ଚିନ୍ତେ ମାଡ଼ୁଡ଼ିଣ୍ଡ୍ । ବାତେଙ୍କ୍ ଇତ୍‍କେ ଅନ୍‌ ଲେକାମ୍ ମାମ୍‍ମେ ମିକା କ୍ରିଷ୍ଟନ୍ ପେର୍‍କେ ଆଦାନମ୍ ।
2CO 10:8 ମିଇକିଙ୍କ୍ ଦ୍ୱଂସ ମାଡ଼ାନଙ୍କ୍ ଆୟ୍‍ୟ, ମାତର୍ ଗଠନ୍ ମାଡ଼ାନ୍ ସେଙ୍ଗେ ଇଶ୍ୱର୍ ମାନ୍‍ ବେନ୍ ଅଦିକାର୍‌ ଇତ୍‍ତନ୍, ଆଦିନ୍ ସେଙ୍ଗେ ଯଦି ନାନ୍ ନାର୍‍ଗେ ଦର୍ପ ମାଡ଼ିମାନ୍‍ତାନ୍, ଆଲେକେ ସିଗ୍ ଆୟନ୍ ।
2CO 10:9 ନାୟାଦ୍ ଚିଟି ତଡ଼୍ ମିକିଂଙ୍କ୍ ୱେର୍‍ସ୍ପାନଙ୍କ୍ ଆଲ୍‍ସି ମାଡ଼ାନାଦ୍ ନାୟାଦ୍ ଇଚ୍ଛା ଆୟ୍‍ୟ ।
2CO 10:10 ବେନ କେତିତଡ଼୍‍, “ପାଉଲ୍‍ତେ ଚିଟି କି ଗାଟି ବାଦେମ୍‍ ଆତ୍‍ତେ ଲେକାମ୍ ବା ୱାୟ୍‍ୟେ ମାନ୍ଦାନ୍ ଲେକାମ୍ ବାତେଙ୍କ୍ ଇତ୍‍କେ ମା ତଡ଼୍ ମାନ୍ଦାନ୍ ୱେଲେ ଅଣ୍ଡ୍‌ ଦୁର୍ବଲ ଲେକାମ୍ ତନ୍ଦାନଣ୍ଡ୍ ନୁ ଅନ୍‌ ଗଟି ମୁଲ୍ୟ ଆୟ୍‍ୱେ ଲେକାମ୍ ହେର୍କା ଆୟ୍‍ନୁ ।”
2CO 10:11 ଆଦ୍ ନାରୁଡ଼୍ ବୁଜେମ୍ ଆଦାନାଦ୍ ଲେକାମ୍ ଯେ, ମାମ୍‍ମେ ଯେକାଙ୍କ୍ ଚିଟିତେ ବାତ୍ ଲେକିତମ୍, ସାକ୍ଷାତେ ଆଦିଙ୍କ୍ ପାଡ଼ିୟିଦାଗ୍ ସାୟେ ମାଡ଼ିତମ୍ ।
2CO 10:12 ନିଜାମ୍ ନିଜେତିଙ୍ଗ୍ ଇଦ୍‍ଲେକାମ୍ ବେଡ଼ି ହେର୍କା ମାଡ଼ମାନ୍ଦାନ୍ ନାରୁଡ଼୍‍ତଡ଼୍ କାୟ୍‍ଲାନ୍‍ ସେଙ୍ଗେ ବା ଅଡ଼୍‌‍ତଡ଼୍ ନିଜେତିଙ୍କ୍ ସାମାନ୍ ମାଡ଼ାନାଦ୍ ସାହାସ୍ ମାୟାଦ୍‌ ଇଲ୍‍ଲେ । ଅଡ଼୍‌ ବେସର୍ ବକୁୱାଲଡ଼୍, ବାତେଙ୍କ୍ ଇତ୍‍କେ ଅଡ଼୍‌ ନିଜେତିଙ୍ଗ୍ ନିଜେ କଲ୍‍ସିତଡ଼୍, ନିଜେତ୍ ମାନଦଣ୍ଡତେ ନିଜେ ନିଜେତ୍ ବିଚାର୍ ମାଡ଼ିତଡ଼୍ ।
2CO 10:13 ବାତେଙ୍କ୍ ଇତ୍‍କେ ମାୟାଦ୍‌ ଦର୍ପ ସୀମିତ । ଇଶ୍ୱର୍‌ ମା ସେଙ୍ଗେ ବେନ୍ କାମ୍‍ୱାୟେ ତିଆର୍ ମାଡ଼୍‍ତଣ୍ଡ୍, ତାନ୍ ଲୋପେନେ ମାମ୍‍ମେ ଦର୍ପ ମାଡ଼ିତାଡ଼୍ । ଆଦ୍ ପାଡ଼୍‍ୟି ୱାୟେତାଗ୍ ୱେଲୁମ୍‍ ଲେକାମ୍ ମୀଇଡ଼୍ ମାନ୍‍ତିଡ଼୍‍ ।
2CO 10:14 ଆଦିନ୍ ସେଙ୍ଗେ ମାମ୍‍ମେ ମୁନେ କ୍ରିଷ୍ଟନ୍ ସୁସମାଚାର୍‌ ମିଇ ପାକେ ଆସ୍‍ମାନ୍ଦାନ୍ ସମୟ୍‍ତେ ବାତେବା ସୀମା ବାୟ୍‍ଦେତ୍‍ ପାଡ଼୍‍ୟି ମାଡ଼ମ୍ ।
2CO 10:15 ଇଶ୍ୱର୍ ମାଡ଼ିମାନ୍ଦାନ୍ ମା କାମ୍‍ୱାୟେତେ ପରିସର ବାଇଦେ ବାଗାତଡ଼୍ ପାଡ଼ିୟିଦେ ସୁଯଗ୍ ଆସ୍ ଦର୍ପ ମାଡ଼ମ୍ । ମାମ୍‍ମେ ଆଶେ ମାଡ଼ୁତମ୍ ଯେ, ମିଡ଼୍ ବିଶ୍ୱାସ୍‍ତେ ଉନ୍ନତି ମାଡ଼ାନ୍ ସାଙ୍ଗେ ସାଙ୍ଗେ ମିୟାଗାଙ୍କ୍ ମିକା ମାୟାଦ୍‌ ପାଡ଼୍‍ୟି ୱାୟେ ମେଣ୍ଡେ ପ୍ରସାରିତ୍ ଆଦ୍‍ତେ । ବାତେଙ୍କ୍ ଇତ୍‍କେ ଇଦ୍ ଇଶ୍ୱର୍ ମାଡ଼ିମାନ୍ଦାନ୍ ସୀମାତ୍‍ ବାୟିଦେ ଆଦାନାଦ୍ ଆୟ୍‍ୟ ।
2CO 10:16 ଆଲେକେ, ବାଗାତଡ଼୍ ପାଡ଼୍‍ୟି ୱାୟେତାଗ୍ ଆସ୍‍ମାନ୍ଦାନ୍ ପାଡ଼୍‍ୟି ସେଙ୍ଗେ ଗର୍ବ ମାଡ଼କଟ୍ ମିୟାଦ୍ ସୀମା ବାଇଦେ ମେଣ୍ଡନ୍ ଦେଶ୍‍ତାଗ୍ ମିକା ମାମ୍‍ମେ ସୁସମାଚାର୍ ପ୍ରଚାର୍ ମାଡ଼େ ପାର୍‍ଦ୍‍ତାଡ଼୍ ।
2CO 10:17 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ବେନ ଗାଇ ମାଡ଼ାନଙ୍କ୍ ଇଚ୍ଛା ମାଡ଼ିତନ୍, ଅଣ୍ଡ୍‌ ପ୍ରବୁନ୍ ପାଡ଼୍‍ୟି ସେଙ୍ଗେ ଗର୍ବ ମାଡ଼ିଣ୍ଡ୍ ।”
2CO 10:18 ନିଜେତ୍ ପ୍ରସଂଶା ତଡ଼୍ ବେନ ସ୍ୱୀକୃତି ଦର୍ସିକି ଆୟ୍‍ୟଣ୍ଡ୍, ବେନ ପ୍ରବୁନ୍ କଣ୍ଡେତେ ଲେକାମ୍, ଅଣ୍ଡେକେ ମାତର୍‍ ତାନ୍ ଗ୍ରହନ୍‍ଯୋଗ୍ୟ ।
2CO 11:1 ନାନ୍ ଇଚ୍ଛା ମାଡ଼ୁତାନ୍, ବାତେବା ବିଷୟ୍‍ତେ ସୁଦୁର୍‌ ମଣ୍ଡି ଆତ୍‍କେ ମିକା ମିଇଡ଼୍ ନାକିଂଙ୍କ୍ ସାରେ ମାଡ଼ିତିଡ଼୍ ।
2CO 11:2 ମିଇ ମୁନ୍‍ନେ ୱେରଡ଼୍ ଐଶ୍ୱରିକ୍ ଇର୍ଷାତେ ନା ହୃଦୟ୍‍ତାଗ୍ ମିନ୍ଦେ । ବାତେଙ୍କ୍‍ଇତ୍‍କେ ମିଇଡ଼୍ ପବିତ୍ର କୁମାରି ପିକ୍‍ତେ ଲେକାମ୍ । ୱେରଡ଼୍ ମାତର୍ କ୍ରିଷ୍ଟନ୍‍ ତଡ଼୍ ମିୟାଦ୍ କାଲ୍‍ପିଦାନ୍‍ ସେଙ୍ଗେ ନାନ୍‍ନେ ପ୍ରତିଜ୍ଞା ମାଡ଼୍‍ତାନ୍ ।
2CO 11:3 ନାକିଂଙ୍କ୍ ୱେର୍‌ ୱେସୁତ୍, ତାଡ଼ାମ୍‍ତେ ଚାଲାକ୍ ତଡ଼୍ ପ୍ରତାରିତ ଆଦ୍‍ଦାନ୍ ଲେକାମ୍ ମିଡ଼୍ ବେସୁଙ୍କ୍‍ କ୍ରିଷ୍ଟନ୍‍ ସେଙ୍ଗେ ମିୟାଦ୍ ସାରେ ସରଲ୍‍ ବିଶ୍ୱାସ୍‍ତେ ମାର୍‌ଙ୍ଗି ଆଦ୍‍ତିଡ଼୍ ।
2CO 11:4 ବାତେଙ୍କ୍‍ଇତ୍କେ ବେନ ଯଦି ୱାସ୍ ମାମ୍‍ମେ ପ୍ରଚାର୍ ମାଡ଼ିମାନ୍ଦାନ୍ ଜିସୁଙ୍କ୍ ୱିଡ଼୍‍ସି ମେଣ୍ଡେ ବେନନ୍ ଜିସୁନ୍ ଗଟ୍ ପ୍ରଚାର୍ ମାଡ଼ିତନ୍ ବା ମିଇଡ଼୍ ଦର୍‍ସ୍‍କି ମାନ୍ଦାନ୍ ପବିତ୍ରଆତ୍ମା ୱିଡ଼୍‍ସି ମେଣ୍ଡନ୍ ବେନ୍ ଆତ୍ମାତେ ଗଟି କେତିତଡ଼୍‍ ବା ମିଡ଼୍ ଗ୍ରହନ୍ ମାଡ଼ିମାନ୍ଦାନ୍ ସୁସମାଚାର୍ ୱିଡ଼୍‍ସି ବେନେବା ସୁସମାଚାର୍‌ ପ୍ରଚାର୍ ମାଡ଼ିତଡ଼୍, ମିଡ଼୍ ଆଦ୍ ଗ୍ରହନ୍ ମାଡ଼ିମାନୁଟ୍ ।
2CO 11:5 ମିୟାଦ୍ ଆଦ୍ ବିଶିଷ୍ଟ ପ୍ରେରିତ ଶିଷ୍ୟଡ଼ାଗାଙ୍କ୍ ନାନ୍‍ନେ ବେନ୍ ବା ଗୁଣତେ ନିକୃଷ୍ଟ ଇଞ୍ଜ ଆଲ୍‍ସନ୍ ।
2CO 11:6 ନାନ୍ ଅଡ଼୍‌‍ଲେକାମ୍ ବାକ୍‍ପଟୁ ଆଦେ ପାର୍ୱନ୍, ବାତେଙ୍କ୍ ଇତ୍‍କେ ନାନ୍ ବୁଦ୍‍ତେ ନିସ୍‌ଟୁର୍‌ ଆୟନ୍ । ମିକିଂଙ୍କ୍ ଇଦ୍ ଗଟ୍ ମାମ୍‍ମେ ସାରେଦାମ୍ ନୁ ସାରେ ସମୟ୍‍ତେ କେସ ୱାଦୁତମ୍‍ ।
2CO 11:7 ଇଶ୍ୱର୍‌ତେ ସୁସମାଚାର୍‌ ପ୍ରଚାର୍ ମାଡ଼ାନ୍ ୱେଲେ ନାନ୍ ମିଇୟାଗାଙ୍କ୍ ଇଦିନ୍ ମୁଲ୍ୟ ଦାବୀ ମାଡ଼ନ୍ । ମୀଇୟାଦ୍ ଉନ୍ନତି ସେଙ୍ଗେ ନାନ୍ ନିଜେତିଙ୍ଗ୍ ଅବନତ୍ ମାଡ଼୍‍ତାନ୍ । ଇଦ୍ ବାତେଏ ନାୟାଦ୍ ପାପ୍‌ ?
2CO 11:8 ମିଇୟାଗେ ପାଡ଼୍‍ୟି ମାଡ଼ାନ୍ ୱେଲେ ନାନ୍ ବାଗାତ୍ ମଣ୍ଡଲିନାଗାଙ୍କ୍ ଆର୍ତିକ ସାହାଯ୍ୟ ପାଏମ୍ ଆତ୍‍ତାନ୍ । କେତାଙ୍କ୍ ଆତ୍‍କେ, ମିୟାଦ୍ ଉପକାର୍ ସେଙ୍ଗେ ନାନ୍ ଅଡ଼୍‌‍କିଂଙ୍କ୍ ଲୁଣ୍ଠନ୍ ମାଡ଼୍‍ତାନ୍ ।
2CO 11:9 ମୀଇତଡ଼୍ ମାନ୍ଦାନ୍ ୱେଲେ ନାୟାଦ୍ ସାରେ ଅବାବ୍ ସେଙ୍ଗେ ନାନ୍ ବେନଙ୍କ୍ ବାରଗ୍ରସ୍ତ ମାଡ଼ନ୍ । ବାତେଙ୍କ୍‍ଇତ୍କେ ମାସିଦୋନିଆତାଗାଙ୍କ୍ ୱାସ୍‍ମାନ୍ଦାନ୍ ଦାଦାନଡ଼୍ ନାୟାଦ୍ ସାରେ ଅବାବ୍ ମେଣ୍ଟାଇ ଇସ୍‍ମାତ୍‍ତଡ଼୍ । ଅତିତି ଲେକାମ୍ ବବିଷ୍ୟତ୍‍ତେ ମିକା ନାନ୍ ବେସୁଙ୍କ୍‌ବା ମିକିଂଙ୍କ୍ ବାରଗ୍ରସ୍ତ ମାଡ଼ନ୍ ।
2CO 11:10 ନା ହୃଦୟ୍‍ତାଗ୍ ମାନ୍ଦାନ୍ କ୍ରିଷ୍ଟନାଦ୍ ସତ୍ୟତେ ନର୍‍ସ୍‍ ମିକା ନାନ୍ ପ୍ରତିଜ୍ଞା ମାଡ଼ି କେତୁତାନ୍ ଯେ, ଆକାୟା ଦେଶ୍‍ତେ ବେନେବା ନାର୍‍ଦାଗ୍ ନାୟାଦ୍ ଇଦ୍ ଗର୍ବତିଙ୍କ୍ ବେନ କଣ୍ଡନ୍‌ ମାଡ଼େ ପାର୍‍ୱଡ଼୍ ।
2CO 11:11 ନାନ୍ ବାତେଙ୍କ୍ ଇଦ୍‍ଲେକାମ୍ କେତୁତାନ୍ ? ନାନ୍ ବାତେଏ ମିଇକିଙ୍କ୍ ପ୍ରେମ ମାଡ଼ନ୍ ? ଇଶ୍ୱର୍ ପୁତ୍‍ତନ୍, ମିଇକିଙ୍କ୍ ନାନ୍ ବେସର୍ ପ୍ରେମ ମାଡ଼ୁତାନ୍ ।
2CO 11:12 ବାତେଙ୍କ୍ ଇତ୍‍କେ ଇଞ୍ଜେ ନାନ୍ ବାତେ ମାଡ଼ୁତାନ୍, ଆଦ୍ ମାଡ଼ ମାନ୍‍ତାନ୍ । ଆଲେକେ, ମାନ୍‍ ଲେକାମ୍ ପାଡ଼୍‍ୟି ମାଡ଼ୁତଡ଼୍ ଇଞ୍ଜ ବେନଡ଼୍ ଗର୍ବ ମାଡ଼ିତଡ଼୍, ଅଡ଼୍‌ ମେଣ୍ଡେ ଆଦ୍ ମେଣ୍ଡେ ମାଡ଼େପାର୍‍ୱଡ଼୍ ।
2CO 11:13 ଅଡ଼୍‌ ମୁନେଙ୍କ୍ କଞ୍ଜ୍ ଶିଷ୍ୟ ଆୟ୍‍ୟଡ଼୍, ଅଡ଼୍‌ ସାରେତଡ଼୍ ଟକୁୱାନଡ଼୍‌ । ଅଡ଼୍‌ ନିଜେତ୍ ପାଡ଼୍‍ୟି ବିଷୟ୍‍ତେ ମିଚ୍‍ କେତିତଡ଼୍‍ ନୁ କ୍ରିଷ୍ଟଙ୍କ୍ ପ୍ରେରିତ୍ ଶିଷ୍ୟ ଲେକାମ୍ ଉଡ଼ାନ୍ ସେଙ୍ଗେ ସଦ୍ମଦାନ୍ କେର୍‍ତଡ଼୍ ।
2CO 11:14 ଇଗେ ବାକ୍‍ୱା ଆଦାନାଦ୍ ବାତେଏ ଆୟ୍‍ୟ, ବାତେଙ୍କ୍ ଇତ୍‍କେ ଶୟ୍‍ତାନ୍‍ ମିକା ୱେସ୍‍ତେ ଜତିର୍ମୟ ସ୍ୱର୍ଗଦୂତନ୍ ଲେକାମ୍ ତନ୍ଦାନ୍ ସେଙ୍ଗେ ସଦ୍ମବେଶ ଲେକାମ୍ ୱାଦ୍‍ତା ।
2CO 11:15 ଆଦିଙ୍କ୍ ତାନ୍ ପେର୍‍କେ ଆଦାନଡ଼୍ ଦାର୍ମିକ୍ ସେବାନଡ଼୍ ସଦ୍ମବେଶ ୱାତ୍‍କେ, ଆଶ୍ୱର୍ଯ୍ୟ ଆଦାନାଦ୍ ବାତେଏ ଆୟ୍‍ୟ, ବାତେଙ୍କ୍ ଇତ୍‍କେ ପେର୍‍କେ କାମ୍‍ତେ ଯୋଗ୍ୟତେ ଦଣ୍ଡ୍ ଅଡ଼୍‌ ଆଦ୍‍ତଡ଼୍ ।
2CO 11:16 ନାନ୍ ମେଣ୍ଡନ୍‍ନ୍ଦାମ୍ କେତୁତାନ୍, ବେନ ବେଲାନ୍ ନାକିଂଙ୍କ୍ ମଣ୍ଡି ଇଞ୍ଜ ହେର୍କା ମାଡ଼ଣ୍ଡ୍ । ଯଦି ଆଦ୍‍ଲେକାମ୍ ଏର୍କା ମାଡ଼ାଟ୍, ଆଲେକେ ନାକିଂଙ୍କ୍ ମଣ୍ଡି ଲେକାମ୍ ଗ୍ରହନ୍‍ ମାଡ଼ାଟ୍, ଆଲେକେ ନାନ୍ ଦର୍ପ ମାଡ଼ାନଙ୍କ୍ ସାମାନ୍ୟ ସୁଯୋଗ୍ ପାଏମ୍ ଆଦ୍‍ତନ୍ ।
2CO 11:17 ନିଜାମ୍ ଇଞ୍ଜେ ନାନ୍ ବାତ୍‍କେତୁତାନ୍, ଆଦିନ୍ ସେଙ୍ଗେ ପ୍ରବୁ ନାକିଂଙ୍କ୍ ଗଟ୍ ଇୱଣ୍ଡ୍ । ବାତେଙ୍କ୍‍ଇତ୍କେ ଗର୍ବ ମାଡ଼ାନ୍ ବିଷୟ୍‍ତେ ନାନ୍ ପ୍ରକୃତ୍‍ତେ ମୁର୍କ ନାରିନ୍‍ ଲେକାମ୍ ଗଟି କେତୁତାନ୍ ।
2CO 11:18 ବାତେଙ୍କ୍ ଇତ୍‍କେ ଜାଗତିକ୍ ବିଷୟ୍‍ତେ ନାର୍‍ଗେ ବେଲାନ୍ ଗର୍ବ ମାଡ଼ିତଡ଼୍, ନାନ୍ ମିକା ଆଦେଲେକାମ୍ ମାଡ଼େ ପାର୍‍ଦ୍‍ତାନ୍ ।
2CO 11:19 ମୀଇଡ଼୍ ଜ୍ଞାନି ଆସ୍ ମିକା ୱେଡ଼୍‍କେତେ ମୁର୍କନଡ଼କ୍‍ ସାରେ ମାଡ଼ୁତିଡ଼୍ ।
2CO 11:20 ବେନ୍ ମିଇ ପରୁ ଦାସ ଲେକାମ୍ ପ୍ରବୁତ୍ୱ ବିସ୍ତାର୍‍ ମାଡ଼୍‍କେ, ମୀଇୟାଦ୍ ସାରେପାକ୍ ଆଦ୍‍ପ୍ତା ମାଡ଼୍‍କେ, ମିକିଂଙ୍କ୍ ଉଡ଼ୀଇଦାଗ୍ ୱାଟ୍‍କେ, ମିକିଂଙ୍କ୍ ଗୃଣାମାଡ଼୍‍କେ, ଇଦ୍‍ଲେକାମ୍ କି ମିଇ ବୁକ୍‍ତାଗ୍ ଚାପୁଡ଼ା ରେହେକେ ମିକା ମିଡ଼୍ ଅଂକିଙ୍କ୍‌ ବର୍‍ଦାସ୍ ମାଡ଼ିତିଡ଼୍ ।
2CO 11:21 ନାନ୍ ସିଗ୍‍ତଡ଼୍ ସ୍ୱୀକାର୍ ମାଡ଼୍‍ତାନ୍ ଯେ, ଇଦ୍‍ସାରେ ବିଷୟ୍‍ତେ ନାନ୍ ଅଦିକ୍‌ ଦୁର୍ବଲ୍‍ । ବାତେଙ୍କ୍ ଇତ୍‍କେ ମେଣ୍ଡେ ବେନ୍ ବିଷୟ୍‍ତେ ବେନ ଯଦି ଦର୍ପ ମାଡ଼ାଙ୍କ୍ ଶକ୍ତି ମାଡ଼ିତନ୍, ଆଲେକେ ମଣ୍ଡିନ୍‍ ଲେକାମ୍ ନାନ୍ କେତୁତାନ୍ ନାୟାଦ୍ ଆଦ୍‍ଲେକାମ୍ ଶକ୍ତିମିନ୍ଦେ ।
2CO 11:22 ଅଡ଼୍‌ ବାତେଏ ଏବ୍ରିୟ ? ନାନ୍ ମିକା ଏବ୍ରିୟ । ଅଡ଼୍‌ ବାତେଏ ଇସ୍ରାଏଲିୟ ? ନାନ୍ ମିକା ଇସ୍ରାଏଲିୟ । ଅଡ଼୍‌ ବାତେଏ ଅବ୍ରାହାମ୍‍ତେ ବଂଶତଡ଼୍ ? ନାନ୍ ମିକା ଅବ୍ରାହାମ୍‍ତେ ବଂଶତନ୍ ।
2CO 11:23 ଅଡ଼୍‌ ବାତେଏ କ୍ରିଷ୍ଟନ୍‍ ସେବାତଡ଼୍ ? ନାନ୍ ବାୟାନ୍ ଲେକାମ୍ କେତୁତାନ୍, ନାନ୍ ଅଡ଼୍‌‍ଆଗାଙ୍କ୍ ଲେକେତ୍ ଦାସ । ନାନ୍ ଅଡ଼୍‌‍ଆଗାଙ୍କ୍ ଅଦିକ୍‌ କଷ୍ଟ ମାଡ଼୍‍ତାନ୍, ଅଦିକ୍‌ ଜେଲ୍‍ଦାଗ୍ ମାତ୍‍ତାନ୍ ନୁ ବେତଦେବେ ତିତ୍‍ତାନ୍ ନୁ ନାର୍ଗେଦାମ୍ ଡଲାନ୍ ଲେକାମ୍ ଆସ୍‍ମାତାନ୍ ।
2CO 11:24 ଏଇଙ୍ଗ୍ ଦାମ୍ ନାନ୍ ଯିହୁଦିଡ଼ାଗାଙ୍କ୍ ତିରିଶ୍‍ ନଅଟାନ୍ ବେତଦେବ୍ ତିତ୍‍ତାନ୍ ।
2CO 11:25 ରୋମିୟ ନାରୁଡ଼ାଗାଙ୍କ୍ ମୁଣ୍ଡ୍‍ଦାମ୍ ଚାବୁକ୍‍ତେ ଦେବ୍‍ତିତ୍‍ତାନ୍ । ଅଣ୍ଡ୍‌ ଦାମ୍ କାଲ୍‍କିନ୍ ତୋଡ଼୍‍ ଦେବା ତିତ୍‍ତାନ୍ । ମୁଣ୍ଡ୍ ଦାମ୍ ଜାହାଜ୍ ଦୁର୍ଗଟନାତେ ମୁନେ ଆତ୍‍ତାନ୍ ନୁ ଅଣ୍ଡ୍‌ ଦାମ୍ ସମୁଦ୍ର ଏର୍‍ଦାଗ୍ ନାର୍‍କେତ୍ ପାୟାଲ୍ ବା ଚବିଶ୍‍ ଗାଣ୍ଟା କାଟେମ୍ ଆତ୍‍ତାନ୍ ।
2CO 11:26 ନାର୍‍ଗେ ଦାମ୍ ଆଦାନ୍ ୱେଲେ ସମୁଦ୍ର ନାଡ଼୍‍ମେ, ଦସ୍ୟୁନଡ଼୍ କାଇଦେ, ସ୍ୱଜାତି ଇହୁଦି ନୁ ବିଜାତିନଡ଼୍ କାଇଦେ, ନାର୍‍ଦାଗ୍ ନୁ ପ୍ରାନ୍ତର୍‍ତାଗ୍, ସମୁଦ୍ରତାଗ୍‍, ପଟ୍‍କାର୍ ବନ୍ଦୁନଡ଼୍‍ ତ ବିପଦ୍‍ତାଗ୍‍ ମୁନେ ଆତ୍‍ତାନ୍ ।
2CO 11:27 ଗାଟି ତିପାଲ୍ ଆତ୍‍ତାନ୍ ନୁ ଦୁଃକାମ୍ କଷ୍ଟ ଆତ୍‍ତାନ୍, ଉସ୍କାଡ଼୍‍ତେ ନୁ କାର୍‍ୱିନ୍ ଏର୍‍ ଉନ୍‍ୱେ ନାର୍‍ଗେ ଦିନା କଟେମ୍‍ ଆତ୍‍ତାନ୍, ଲେକେତ୍‍ କାଦି, ଚକା ନୁ ମାନ୍ଦାନ୍ ପଡ଼ିୟେ ଅବାବ୍‍ତେ ନାର୍‍ଗେ କଷ୍ଟ ଆତ୍‍ତାନ୍ ।
2CO 11:28 ଆଦେଲେକାମ୍ ସାରେ ମଣ୍ଡଲି ସେଙ୍ଗେ ନ୍ନାୟାଦ୍ ଦାୟିତ୍ୱ ସାରେଦିନ୍ ବହନ୍ ମାଡ଼ି ଚାଲେମ୍ ଆତ୍‍ତେ ।
2CO 11:29 ବେନ ଯଦି ଦୁର୍ବଲ୍ ଆସ୍‍ମାନ୍‍ନ୍ତନ୍, ନାନ୍ ମିକା ଅନ୍‌‍ତଡ଼୍ ଦୁର୍ବଲ୍‍ ଲେକାମ୍ ଏର୍କା ମାଡ଼ିତାନ୍ । ବେନ ପାପ୍ ମାଡ଼୍‍କେ, ନାନ୍ ଜିୱେତାଗ୍ ଦୁଃକାମ୍ ଏର୍କା ମାଡ଼ିତାନ୍ ।
2CO 11:30 ଯଦି ଦର୍ପ ମାଡ଼ାଙ୍କ୍ ଆତ୍‍କେ, ଆଲେକେ ନା ଇୱୁସାରେ ଦୁର୍ବଲ୍‍ତେ ସେଙ୍ଗେ ନାକିଂଙ୍କ୍ ଦର୍ପ ମାଡ଼ାଙ୍କ୍ ଆଦ୍‍ତେ ।
2CO 11:31 ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ ଯୁଗ୍‌ଯୁଗ୍‌ ଦନ୍ୟ ଆଇନା । ଅଣ୍ଡ୍‌ ପୁତ୍‍ତନ୍ ଯେ, ନାନ୍ ମିଚ୍‌ କେଲନ୍ ।
2CO 11:32 ନାନ୍ ଦାମାସ୍‍କସ୍‍ ତାଗେ ମାନ୍ଦାନ୍ ୱେଲେ ରାଜା ଆରେଟସ୍‍ତେ ଗଟ୍‍ତେ ଶାସନ୍‍କର୍ତ୍ତାଲ୍ ନାକିଂଙ୍କ୍ ଗିରାପ୍ ମାଡ଼ାନ୍ ସେଙ୍ଗେ ନଗର୍‍ତେ ସାରେପାକେ କେପାନଡ଼୍‍କିଙ୍କ୍ ଏଞ୍ଚି ମାତ୍‍ତନ୍ ।
2CO 11:33 ବାତେଙ୍କ୍ ଇତ୍କେ ନାକିଂଙ୍କ୍ ଜୁଡ଼ି ସାହାଯ୍ୟତେ ନଗର୍‍ତେ ନେଟେତ୍‌ ଜର୍‍କା ବାଇଦେ ୱେହେସ୍‍ ମାତ୍‍ତଡ଼୍ । ଇଦ୍ ଲେକାମ୍‍ତେ ନାନ୍ ଆଦ୍ ଶାସନ୍‍କର୍ତ୍ତାନ୍ କାଇଦାଗାଙ୍କ୍ ରକ୍ଷା ପାଏମ୍ ଆତ୍‍ତାନ୍ ।
2CO 12:1 ବାତେଏ ଲାବ୍ ଆୟକ୍‍ ମିକା ନାକିଂଙ୍କ୍ ନିଜାମ୍ ଦର୍ପ ମାଡ଼ାଙ୍କ୍ ଆଦ୍‍ତେ । ବାତେଙ୍କ୍ ଇତ୍‍କେ ପ୍ରବୁ ନାକିଂଙ୍କ୍ ବେନ୍‍ସାରେ ବିଦ୍ୟା ଇତ୍‍ତନ୍ ନୁ ପ୍ରତ୍ୟାଦେଶ୍‍ ଇତ୍‍ତନ୍, ହାଉସାରେ ଇଞ୍ଜେ ନାନ୍ ଲେକିତାନ୍ ।
2CO 12:2 କ୍ରିଷ୍ଟନ୍‍ ୱେରଣ୍ଡ୍ ନାରୁଡ଼୍ ଚଉଦ ୱାଡ଼୍‍ଷା ମୁନେଙ୍କ୍ ତୃତୀୟସ୍ୱର୍ଗ ଯାକ ଆଞ୍ଜ୍‍ମାତ୍‍ତନ୍ ଅଣ୍ଡ୍‌ ମେନ୍ଦୁଲ୍‍ତେ ଆଞ୍ଜମାତ୍‍ତଣ୍ଡ୍ ବାତେଙ୍କ୍ ଇତ୍‍କେ ଦର୍ଶନ୍ ଉଡ଼ିମାତ୍‍ତଣ୍ଡ୍, ନାନ୍ ପୁନନ୍, ଆଦ୍ ମାତର୍ ଇଶ୍ୱର୍ ପୁତ୍‍ତନ୍ ।
2CO 12:3 ହଁ ନାନ୍ ପୁତ୍‍ତାନ୍, ଅଣ୍ଡ୍‌ ଅଂକିଙ୍କ୍‌ ସ୍ୱର୍ଗତାଗେ ଆସ୍‍ମାତ୍‍ତନ୍ ଇଦ୍ ମୁନେଙ୍କ୍ ପୁତ୍‍ତାନ୍ ଅଣ୍ଡ୍‌ ଗଟେମ୍ ଆସ୍‍ମାତ୍‍ତେ ଆଦ୍ ଦର୍ଶନ୍ ଉଡ଼ିମାତ୍‍ତନ୍, ନାନ୍ ପୁନନ୍, ମାତର୍ ଇଶ୍ୱର୍ ପୁତ୍‍ତନ୍ ।
2CO 12:4 ଆଗେ ଅଣ୍ଡ୍‌ ଗଟି କେତ୍‍ତେ ପାର୍‍ୱାଦ୍ ନୁ ଲେଙ୍ଗ୍ ମାଡ଼୍‍ୱେ ପାର୍‍ୱାଦ୍ ଲେକାମ୍ କେଞ୍ଜାଙ୍କ୍‍ ପାର୍‍ତନ୍ ।
2CO 12:5 ଇ ନାରିନ୍ ସେଙ୍ଗେ ନାନ୍ ଗର୍ବ ମାଡ଼ିତାନ୍ । ବାତେଙ୍କ୍ ଇତ୍‍କେ ନିଜେତ୍ ଦୁର୍ବଲ୍‍ତେ ସେଙ୍ଗେ ମେଣ୍ଡେ ବାତେଏ ବିଷୟ୍‍ତେ ନାନ୍ ଗର୍ବ ମାଡ଼ନ୍ ।
2CO 12:6 ଗର୍ବ ମାଡ଼ାନାଦ୍ ନା ପାକେ ମୁର୍କ ଆୟନ୍‍ଣ୍ଡ୍‍, ବାତେଙ୍କ୍ ଇତ୍‍କେ ନାନ୍ ସତ୍‍ଗଟ୍ କେତିତାନ୍ । ବାତେଙ୍କ୍ ଇତ୍‍କେ ନାନ୍ ଗର୍ବ ମାଡ଼ନ୍, ବାତେଙ୍କ୍‍ଇତ୍କେ ନାନ୍ ଆଲ୍‍ସୁତାନ୍, ନାରୁଡ଼୍ ନାକିଂଙ୍କ୍ ବେଲାନ୍ ପାଡ଼୍‍ୟି ମାଡ଼ାନାଦ୍ ଉଡ଼ିତଡ଼୍ ବା ନାୟାଗ୍ କଞ୍ଜ୍ ବେଲାନ୍ ଗଟ୍ କେଞ୍ଜିତଡ଼୍, ଆଗେଙ୍କ୍ ନାକିଂଙ୍କ୍ ବେଡ଼୍‍ୟନ୍ ଇଞ୍ଜ ଏର୍କା ମାଡ଼୍‍ମାକିଡ଼୍‍ ।
2CO 12:7 ଇଦ୍ ବାଗାତ୍ ମାନ୍ଦାନ୍ ଦେଶ୍‍କିନାଗ୍ ଲାବ୍ ମାଡ଼ି ନାନ୍ ବେଲାନ୍ ଆଂକାର୍ ଆଦାଙ୍କ୍‍ ଆୟ୍‍ୟ, ଆଦିନ୍ ସେଙ୍ଗେ ନା ମେନ୍ଦୁଲ୍‍ତାଗ୍ ୱେରଡ଼୍ ଯନ୍ତ୍ରନାଲେକାତ୍ ବ୍ୟାଦି ଇତ୍‍ତଡ଼୍, ଇଦ୍ ନାକିଂଙ୍କ୍ ଆଶେ ଆୟ୍‍ୱାଙ୍କ୍ ଶୟତାନ୍‍ତେ ଦୂତ୍‍ତିଙ୍କ୍ ରତ୍‍ତତେ ।
2CO 12:8 ଆଦିଙ୍କ୍ ନାନ୍ ଅନାଗାଙ୍କ୍ ଯେକେ ଆଦାନ୍ ସେଙ୍ଗେ ନାନ୍‍ନେ ପ୍ରବୁନାଗେ ଆଦ୍ ବିଷୟ୍‍ତେ ମୁଣ୍ଡ୍‍ଦାମ୍ ପ୍ରାର୍ତନା ମାଡ଼ିତାନ୍,
2CO 12:9 ବାତେଙ୍କ୍ ଇତ୍‍କେ ଅଣ୍ଡ୍‌ ନାକିଂଙ୍କ୍ କେତ୍‍କେ, “ନାୟାଦ୍ ଅନୁଗ୍ରହ ମିଇ ସେଙ୍ଗେ ଆଦ୍‍ତେ, ବାତ୍‍ତିଙ୍କ୍‍ଇତ୍କେ ମିୟାଦ୍ ଦୁର୍ବଲତାତେ ମାୟାଦ୍‌ ଶକ୍ତି ସିଦ୍ଦ ଆଦ୍‍ତେ ।” ଆଦିଙ୍କ୍ କ୍ରିଷ୍ଟନ୍ ଶକ୍ତି ନାୟାଗେ ଅଦିଷ୍ଟାନ୍ ମାଡ଼ାନ୍ ସେଙ୍ଗେ ନାନ୍ ନାୟାଦ୍ ଦୁର୍ବଲ୍‍ତାଦ୍ ସେଙ୍ଗେ ଅଦିକ୍‌ ଗର୍ବ ମାଡ଼ିତାନ୍ ନୁ ୱେଡ଼େକେ ମାଡ଼ିତାନ୍ ।
2CO 12:10 କ୍ରିଷ୍ଟନ୍‍ ସେଙ୍ଗେ ସାରେଲେକାମ୍ ଦୁର୍ବଲ୍‍ତେ, ଅପ୍‍ମାନ୍, କଷ୍ଟ, ଗାଟିତିପାଲ୍ ନୁ ଆପଦ୍ ବିପଦ୍ ନାନ୍ ସୁକାମ୍‍ତେ ମାନ୍‍ତାନ୍, ବାତେଙ୍କ୍‍ଇତ୍କେ ବେସୁଙ୍କ୍‍ ନାନ୍ ଦୁର୍ବଲ୍‍, ଆସୁଙ୍କ୍ ନାନ୍‍ନେ ଶକ୍ତିନଡ଼୍ ।
2CO 12:11 ନାନ୍‍ନେ ମଣ୍ଡିନ୍‍ ଲେକାମ୍ ଆଚରନ୍ ମାଡ଼୍‍ତାନ୍ । ଇଦ୍ ମାଡ଼ାନ୍ ସେଙ୍ଗେ ମିଡ଼୍ ନାକିଂଙ୍କ୍ ଦାନ୍ଦେ ମାଡ଼୍‍ତିଡ଼୍, ବାତେଙ୍କ୍‍ଇତ୍‍କେ ନାୟାଦ୍ ପ୍ରସଂଶା ମାଡ଼ାନାଦ୍ ମିୟାଦ୍ ନିୟମ୍ ମାତ୍‍ତେ । ନାନ୍‍ନେ ବାତେଏ ଆୟକ୍‍ ମିକା ମିୟାଦ୍ ଆଦ୍ ମାନ୍ଦାନ୍ “ପ୍ରେରିତ୍ ଶିଷ୍ୟନଡ଼ାଗାଙ୍କ୍,” ବାତେଏ ବା ଗୁନତେ ନିକୃଷ୍ଟ ଆୟ୍‍ୟ ।
2CO 12:12 ମିୟାଗ୍‍ ମାନ୍ଦାନ୍ ଦର୍‍ଯ୍ୟତେ ନାର୍‍ଗେ ବାକ୍‍ୱା ଆଦାନ୍ ପାଡ଼୍‍ୟି ତିଆର୍ ମାଡ଼ି ନାର୍‍ଗେ ଆଦ୍‍ବୁତ୍‌ ବିଷୟ ତଡ଼୍ ନାନ୍ ଯେ ମୁନେତ୍‍କଞ୍ଜ୍ ପ୍ରେରିତ୍ ଶିଷ୍ୟ, ଇଦିନ୍ ନିଦର୍ଶନ ଇତ୍‍ତନ୍ ।
2CO 12:13 ମାତର୍ ୱେରଡ଼୍ ବିଷୟ୍‍ତେ ବାଗାତଡ଼୍ ମଣ୍ଡଲିନାଗାଙ୍କ୍ ମିଇ ତଡ଼୍ ନାୟାଦ୍ ବ୍ୟବହାର୍ ୱେରେ ଆତ୍‍ତେ । ଯଦି ଇଦ୍ ମିଇ ସେଙ୍ଗେ ନାୟାଦ୍ ଜିୱୁତେ ବ୍ୟବହାର୍, ଆଲେକେ ଆଦିନ୍ ସେଙ୍ଗେ ନାକିଂଙ୍କ୍ ଦୟା ମାଡ଼ି କ୍ଷମା ମାଡ଼େ । ନାନ୍ ମିକିଂଙ୍କ୍ ଡାବ୍‍କ୍ ସାହାଯ୍ୟ ତାଲାକାନ୍ ସେଙ୍ଗେ ନାନ୍ ମିଇ ପରୁ ବୋଜ୍ ଇୱନ୍ ।
2CO 12:14 ତୃତିୟ ଦାମ୍ ମିଇ ପାକେ ଆଦାନ୍ ସେଙ୍ଗେ ନାନ୍‍ନେ ତିଆର୍ ଆସମିନ୍‍ନ୍ଦେନ୍‍ । ନାନ୍ ମିୟାଗାଙ୍କ୍ ବାତେବା ବିଷୟ ଦାବୀ ମାଡ଼ନ୍ । ନାନ୍ ମିକିଂଙ୍କ୍ ଇଚ୍ଛା ମାଡ଼ୁତାନ୍ । ମିୟାଦ୍ ବୁମ୍‍ନେଲ୍ ଆୟ୍‍ୟ । ବାତେଙ୍କ୍‍ଇତ୍‍କେ ୟାୟ୍‍ ବାବାନ୍ ସେଙ୍ଗେ ପିଲାପିସ୍‍କା ଗୁଡ଼୍‍ପନ୍‍, ୟାୟ୍‍ ବାବାଲ୍ ପିଲାପିସ୍‍କାନ୍ ସେଙ୍ଗେ ଗୁଡ଼୍‍ପି ମାନ୍‍ତଡ଼୍ ।
2CO 12:15 ମିଇକିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ନାୟାଦ୍ ସର୍ବସ୍ୱ, ଇଦ୍‍ଲେକାମ୍ କି ନିଜେତିଙ୍ଗ୍ ୱେଡ଼୍‍କେତେ ଉସ୍ୱର୍ଗ ମାଡ଼ିଇଦାନ୍ ସେଙ୍ଗେ ନାନ୍ ତିଆର୍ । ନାନ୍ ମିକିଂଙ୍କ୍ ଇସର୍ ଅଦିକ୍‌ ପ୍ରେମ ମାଡ଼ୁତାନ୍ ଇଞ୍ଜ ମିଇଡ଼୍ ବାତେଏ ନାକିଂଙ୍କ୍ ଇସର୍ ସୁଦୁଟ୍ ପ୍ରେମ ମାଡ଼ିତିଡ଼୍ ?
2CO 12:16 ନାନ୍ ମିଇ ପରୁ ମପ୍‍ ଲେକାମ୍ ଆୟନ୍ । ଇଦ୍ ଗଟ୍ ମିଡ଼୍ ନିଜାମ୍ ସ୍ୱିକାର୍ ମାଡ଼ିତିଡ଼୍ । ବାତେଙ୍କ୍ ଇତ୍‍କେ ମିୟାଗାଙ୍କ୍ ବେନ କେତ୍‍ତେ ପାର୍‍ତଡ଼୍, ନାନ୍ ଦୂର୍ତ୍ତ ଆସ୍‍ମାନ୍‍ନାଙ୍କ୍ ୱିଶାମ୍ କେସ୍ ମିକିଂଙ୍କ୍ ଉଡ଼ିଇଦାଗ୍ ୱାଟ୍‍ତାନ୍ ।
2CO 12:17 ମିଇ ପାକେ ବେନଡ଼୍ ରତ୍‍ତାନ୍, ଅଡ଼୍‌ ତାଗାଙ୍କ୍ ବେନନ୍‍ତଡ଼୍ ନାନ୍‍ନେ ବାତେଏ ମିୟାଗାଙ୍କ୍ ବାତେଏ ସୁବିଦା ହାସଲ୍‍ ମାଡ଼୍‍ତାନ୍ ?
2CO 12:18 ମିଇ ପାକେ ଆଦାନ୍ ସେଙ୍ଗେ ନାନ୍ ତିତସ୍‍ତିଙ୍କ୍ ଅନୁରଦ୍‌ ମାଡ଼୍‍ତାନ୍ ନୁ ଅନ୍‌ ତଡ଼୍ ବାଗାତଡ଼୍‍କ୍ ରତ୍‍ତାନ୍ । ତିତସ୍ ମିଇୟାଗାଙ୍କ୍ ବାତେଏ ସୁବିଦା ମାଡ଼୍‍ତଣ୍ଡ୍ ଇଞ୍ଜ ବେନ କେତ୍‍ତେ ପାର୍‍ଦ୍‍ତିନ୍ ? ଅଣ୍ଡ୍‌ ନୁ ନାନ୍ ସାମାନ୍‌ କାମ୍‌ ଆସ୍ ମିଇ ତଡ଼୍ ସାୟେ ବ୍ୟବହାର୍ ମାଡ଼ମ୍ ?
2CO 12:19 ବାତେଙ୍କ୍ ଇତ୍‍କେ ମିଡ଼୍ ଆଲ୍‍ସୁତିଡ଼୍, ଇଞ୍ଜେକ୍ ଆଇନା ମାମ୍‍ମେ ମାତର୍ ନିଜେତ୍ ଆଦ୍‍ମି ମିକା ୱାତ୍‍ତମ୍‍ ନା ! ଇଶ୍ୱର୍ ମାନ୍ଦାନ୍‍ୱେଲେ କ୍ରିଷ୍ଟନ୍ ଦାସ ଲେକାମ୍ ମାମ୍‍ମେ ମିକିଂଙ୍କ୍ କେତୁତମ୍ । ପ୍ରିୟ ସାଙ୍ଗନଡ଼ି, ମାମ୍‍ମେ ବାତ୍ ମାଡ଼ୁତମ୍ ଆଦ୍ ମାତର୍ ମିୟାଦ୍ ଉପକାର୍‍ଦେ ସେଙ୍ଗେ ମାଡ଼ୁତମ୍ ।
2CO 12:20 ବାତେଙ୍କ୍‍ଇତ୍କେ ନାୟାଦ୍ ୱେରେ ଆଦୁତ୍‍ତେ, ନାନ୍ ମି ପାକେ ଆଞ୍ଜ୍ ମିକିଂଙ୍କ୍ ବେଲାନ୍ ଉଡାଙ୍କ୍ ଇଚ୍ଛା ମାଡ଼ୁତାନ୍, ଆଦ୍ ଲେକାମ୍ ଉଡ଼ାନଙ୍କ୍ ଦର୍‍କ ନୁ ମିଇଡ଼୍ ନାକିଂଙ୍କ୍ ବେଲା ଉଡ଼ାନଙ୍କ୍ ଇଚ୍ଛା ମାଡ଼୍‍ୱିଡ଼୍, ଆଦ୍‍ଲେକାମ୍ ଆଦ୍ ଉଡ଼ାନଙ୍କ୍ ଆଦ୍‍ତେ । ଆଲେନ୍ ତ ଆଗେଆଞ୍ଜ୍ ନାନ୍ ବେସ୍‍ ବେସତାଉ ବିବାଦ୍, ଇର୍ଷା, କପାମ୍, ସ୍ୱାର୍ତପରତା, ଅପବାଦ୍‌, ଗର୍ବ, ନୁ ବିଶୃକଲା ଉଡ଼ାନଙ୍କ୍ ପାଏମ୍ ଆଦ୍‍ତାନ୍ ।
2CO 12:21 ଇଞ୍ଜେ ମିଇ ପାକେ ଆଦାନ୍ ୱେଲେ ଆଲେନ୍ ଇଶ୍ୱର୍ ମିଇ ସାକ୍ଷାତ୍‍ତେ ନାକିଂଙ୍କ୍ ଅୟିରାଣ ମାଡ଼ିତଡ଼୍, ବେନଡ଼୍ ମୁନେଙ୍କ୍‍କଞ୍ଜ ପାପ୍ ମାଡ଼୍‍ତଡ଼୍, ବାତେଙ୍କ୍ ଇତ୍‍କେ ଅଡ଼ାଦ୍‌ ଅଶୁଚି ପାଡ଼୍‍ୟି ମାଡ଼୍‍ତାଦ୍‍, ବାଣ୍ଡା ନୁ ବ୍ରଷ୍ଟାଚାର୍ ସେଙ୍ଗେ ଅନୁତାପ୍ ଆୟ୍‍ୟଡ଼୍, ଇଦ୍‍ଲେକାମ୍ ନାର୍‍ଗେ ନାରୁଡ଼୍ ସେଙ୍ଗେ ନାକିଂଙ୍କ୍ ଦୁଃକାମ୍ ମାଡ଼ାନଙ୍କ୍ ଆଦ୍‍ତେ ।
2CO 13:1 ଇଦିନ୍ ତଡ଼୍ କାଲ୍‍ପି ତୃତୀୟଦାମ୍ ନାନ୍ ମିଇ ପାକେ ୱାଦ୍‍ତାନ୍ । ଦର୍ମଶାସ୍ତ୍ର ଲେକାମ୍, ଇର୍‍ୱୁ ବା ମୁୱୁଡ଼୍ ସାକିଙ୍କ୍ ପ୍ରମାନ୍ ତଡ଼୍ ସାରେ ଗଟି କେତାନଙ୍କ୍‍ ଆଦ୍‍ତେ ।
2CO 13:2 ମୁନେଙ୍କ୍ ପାପ୍ ମାଡ଼ିମାନ୍ଦାନ୍ ନାରିଡ଼୍‍କ୍ ନୁ ବାଗାତଡ଼୍‍କ୍ ନାନ୍ ରେଣ୍ଡେ ଦାମ୍ ଆଗେ ଆଞ୍ଜ୍ କେସ୍‍ମାତ୍‍ତାନ୍ ନୁ ଇଞ୍ଜେ ଯେକା ମାଞ୍ଜ୍ ମିକା କେତୁତାନ୍ ଯେ, ନାନ୍‍ନେ ଇଞ୍ଜେ ଆତ୍‍କେ, ବେନ ଦଣ୍ଡତାଗାଙ୍କ୍ ୱିଡ଼୍‍ସ୍‍ ପାର୍‍ୱଡ଼୍ ।
2CO 13:3 କ୍ରିଷ୍ଟ ଯେ ନା ଇସ୍ ଗଟ୍ କେତୁତନ୍, ଇଦ୍ ବିଷୟ୍‍ତେ ମିଡ଼୍ ଆଲ୍‍ସମାନ୍ଦାନ୍ ସାରେ ପ୍ରମାନ୍ ଦର୍‍କିତ୍ । ନୁ ମିଇ ପାକେ ଅଣ୍ଡ୍‌ ତାନ୍ ଶକ୍ତିତେ ପରିଚୟ ଇସ୍‍ମିନ୍ଦେନ୍ । ମିଇ ସେଙ୍ଗେ ଅଣ୍ଡ୍‌ ବେସୁଙ୍କ୍‍ ବା ଦୁର୍ବଲ୍ ଆୟ୍‍ୟଣ୍ଡ୍ ।
2CO 13:4 ଅଣ୍ଡ୍‌ ଦୁର୍ବଲ୍ ଆସ୍ କ୍ରୁଶତାଗ୍ ଡଲ୍‍କେ ମିକା ଇଶ୍ୱର୍‌ତେ ପରାକ୍ରମତେ ସେଙ୍ଗେ ଇଞ୍ଜେ ଜୀୱୁନ୍‌ ମିନ୍ଦେନ୍ । ଅନ୍‌ ତଡ଼୍ କାଇଲି ମିକା ଦୁର୍ବଲ୍‍ ଆତ୍‍ତମ୍, ବାତେଙ୍କ୍ ଇତ୍‍କେ ମିଇ ତଡ଼୍ ମାୟାଦ୍‌ ସମ୍ପର୍କତେ ଇଶ୍ୱର୍‌ତେ ପରାକ୍ରମତାଗ୍ ଅଂଶି ଆସ୍ କ୍ରିଷ୍ଟନ୍‍ତଡ଼୍ ମାମ୍‍ମେ ଜିୱୁନ୍ ମାନ୍‍ତମ୍ ।
2CO 13:5 ନିମ୍‍ ବିଶ୍ୱାସ୍‍ତେ ମିନ୍ଦେନି କି ଇଲ୍‍ଲେ, ଆତ୍ମ ପରିକ୍ଷା ମାଡ଼ି ଉଡ଼େ । ନି ହୃଦୟ୍‍ତାଗ୍ ଜିସୁ କ୍ରିଷ୍ଟ ମିନ୍ଦେନ୍, ଇଦ୍ ଗଟ୍ ବାତେଏ ପୁନ୍‍ୱିନ୍ ଯଦି ଇଲା ଆୟ୍‍ୟ, ଆଲେକେ ମିଡ଼୍ ଇଗେ ଅଣ୍ଡୟ୍‌‍ଦାମ୍ ବିପଲ୍ ଆଦ୍‍ତିଡ଼୍ ?
2CO 13:6 ନାନ୍ ଆଶେ ମାଡ଼ୁତାନ୍, ମିଡ଼୍ ବୁଜେମ୍ ଆଦ୍‍ତିଡ଼୍ ଯେ, ମାମ୍‍ମେ ବିପଲ୍ ଆୟମ୍ ।
2CO 13:7 ମିଡ଼୍ ବାତେବା ଅନ୍‌ୟାୟ୍ ପାଡ଼ିୟିଦାଗ୍ ମାଇ ମାନ୍‍ମାଟ୍, ଆଦିନ୍ ସେଙ୍ଗେ ମାମ୍‍ମେ ଇଶ୍ୱର୍‌ତାଗେ ପ୍ରାତନା ମାଡ଼ୁତମ୍ । ମାମ୍‍ମେ ଯେ ଇଗେ ନାର୍ଗେ ଲାବ୍ ମାଡ଼୍‍ତମ୍, ଇଦ୍ ମାମ୍‍ମେ ଉଡ଼ାନଙ୍କ୍ ଆନମ୍, ବାତେଙ୍କ୍ ଇତ୍‍କେ ମାମ୍‍ମେ ବ୍ୟର୍ତ ଲେକାମ୍ ଆସ୍‍ମାତ୍‍କେ ମିକା ମିଡ଼୍ ବେଲାନ୍ କି ସତ୍‍କାମ୍ ମାଡ଼ିତିଡ଼୍, ଆଦିନ୍ ସେଙ୍ଗେ ପ୍ରାର୍ତନା ମାଡ଼ୁତମ୍‍ ।
2CO 13:8 ସତ୍‍ତେ ବିରୁଦ୍ଦ୍‍ ଆଚରଣ ମାଡ଼ାନ୍ କ୍ଷମତା ମାୟାଦ୍‌ ଇଲ୍‍ଲେ, ମାମ୍‍ମେ ମାତର୍ ସତ୍‍ତେ ପାକେ ପାଡ଼୍‍ୟି ମାଡ଼୍‍ଡ଼େ ପାର୍‍ତମ୍ ।
2CO 13:9 ମାମ୍‍ମେ ଦୁର୍ବଲ୍ ମାନ୍ଦାନ୍‍ୱେଲେ ମିଡ଼୍ ଡାଟୁମ୍‍ ମାନ୍‍ନାଙ୍କ୍ ମାମ୍‍ମେ ୱେଡ଼୍‍କ୍‍ ଆତ୍‍ତମ୍‍ । ଆଦିଙ୍କ୍ ମିୟାଦ୍ ମେନ୍ଦୁଲ୍‍ତେ ଉନ୍ନତି ସେଙ୍ଗେ ମାମ୍‍ମେ ପ୍ରାତନା ମାଡ଼ୁତମ୍ ।
2CO 13:10 ଆଦିନ୍ ସେଙ୍ଗେ ଯେକ୍‌ ମାଞ୍ଜ୍ ନାନ୍ ମିଇ ପାକେ ଇୱୁ ଚିଟି ଲେକୁତାନ୍, ମିଇ ପାକେ ୱାଦାନ୍ ୱେଲେ ବେଲାନ୍ ଦୁଃକାମ୍‍ତେ ନାକିଂଙ୍କ୍ ଅଦିକାର୍‌ ପ୍ରୟଗୋ ମାଡ଼ାନଙ୍କ୍ ଆୟ୍‍ୟ । ବାତେଙ୍କ୍‍ଇତ୍କେ ମିକିଂଙ୍କ୍ ଉଃତାନଙ୍କ୍ ଆୟ୍‍ୟ, ମାତର୍ ତିଆର୍ ମାଡ଼ାନଙ୍କ୍ ପ୍ରବୁ ନାକିଂଙ୍କ୍ କ୍ଷମତା ଇତ୍‍ତନ୍ ।
2CO 13:11 ଦାଦାନଡ଼ି ନୁ ଏଲାସ୍କ୍‍, ନାୟାଦ୍ ଶେଷଗଟ୍ ଇଦ୍ ନିଜେତିଙ୍କ୍‍ ସଂଶୋଦନ୍ ମାଡ଼ାଟ୍, ନାୟାଦ୍ ପରାମର୍ଶ ଗ୍ରହନ୍‍ ମାଡ଼ାଟ୍, ସାରେତଡ଼୍ ୱେରଡ଼୍ ମନ୍ ଆୟ୍‍ମୁଟ୍ ନୁ ଶାନ୍ତିତେ ମାନୁଟ୍ । ପ୍ରେମ ନୁ ଶାନ୍ତିତେ ଇଶ୍ୱର୍ ମିଇ ତଡ଼୍ ମାନିଣ୍ଡ୍ ।
2CO 13:12 କ୍ରିଷ୍ଟିୟ ପବିତ୍ର ପ୍ରେମତଡ଼୍ ନିଜେ ନିଜେତିଙ୍କ୍ ନମସ୍କାର୍ ମାଡ଼ାଟ୍ । ଇଶ୍ୱର୍‌ତେ ନାରୁଡ଼୍ ମିକିଂଙ୍କ୍ ନମସ୍କାର୍ ମାଡ଼ୁତଡ଼୍ ।
2CO 13:13 ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ, ଇଶ୍ୱର୍‌ତେ ପ୍ରେମ ନୁ ପବିତ୍ରଆତ୍ମାତେ ସାହାଯ୍ୟ ମିଇ ସାରେତଡ଼୍ ତ ମାନୀ ।
2CO 13:14 ପ୍ରବୁ ଜିସୁକ୍ରିଷ୍ଟନ୍ ଅନୁଗ୍ରହ, ଇଶ୍ୱର୍‌ତେ ପ୍ରେମ ନୁ ପବିତ୍ର ଆତ୍ମାନ୍‍ ସହଯୋଗ୍‍ ମି ସାରେ ନାରୁଡ଼୍‍ ତଡ଼୍‍ ମାନି ।
GAL 1:1 ନାନ୍ ପାଉଲ୍ ପ୍ରେରିତ୍‍ ଶିଷ୍ୟ ଆଦାନ୍ ସେଙ୍ଗେ ନାନ୍ ନାରୁଡ଼ାଗାଙ୍କ୍ କି ନାରୁଡ଼୍‍କିନ୍ ଲୋପେଙ୍କ୍ କାର୍ଙ୍ଗାନାଦ୍ କେଞ୍ଜି ୱାଡ଼ନ୍‍, ଇଦ୍ କାର୍ଙ୍ଗାନାଦ୍ ନିଜେ ଇଶ୍ୱର୍‌ତାଗାଙ୍କ୍ ନୁ ଅଣ୍ଡ୍‌ ବେନଙ୍କ୍ ଡଲ୍‍ତାଗାଙ୍କ୍ ତେଏତ୍‍ତଣ୍ଡ୍, ଆ ଜିସୁ କ୍ରିଷ୍ଟ ନାଗାଙ୍କ୍ ପାଏମ୍‍ ଆତ୍‍ତାନ୍‍ ।
GAL 1:2 ମେଣ୍ଡେ ଇଗେ ନାତଡ଼୍ ମାନ୍ଦାନ୍ ସାରେ ବିଶ୍ୱାସୀ ଦାଦାନଡ଼୍ ନୁ ହେଲାସ୍କ୍‍ନଡ଼ି ଗାଲାତିୟ ମଣ୍ଡଲିକିଙ୍କ୍ ଚିଟି ଲେକି ନମସ୍କାର୍‍ ମାଡ଼ୁତମ୍ ।
GAL 1:3 ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
GAL 1:4 ଇଞ୍ଜେ ଇଦ୍ ପାପ୍ ଜଗତ୍‍ତାଗାଙ୍କ୍ ମାକିଙ୍କ୍ ଉଦ୍ଦାର୍ ମାଡ଼ାନ୍ ସେଙ୍ଗେ, ମାନ୍‍ ଇଶ୍ୱର୍‌ତେ ଇଚ୍ଛା ପାଲନ୍ ମାଡ଼ି, କ୍ରିଷ୍ଟ ମାନ୍‍ ପାପ୍ ସେଙ୍ଗେ ଅଣ୍ଡ୍‌ ତାନ୍ ନିଜର୍‍ ଜିୱୁନ୍ ଇତ୍‍ତନ୍ ।
GAL 1:5 ଯୁଗ୍‍ଯୁଗ୍ ଇଶ୍ୱର୍ ଗୌରବ୍ ପାଏମ୍ ଆୟିଣ୍ଡ୍ । ଆମେନ୍‍ ।
GAL 1:6 କ୍ରିଷ୍ଟନ୍‍ ମେଲ୍‍ତା କାବୁର୍ ତଡ଼୍ ବେନ ମିକିଙ୍କ୍ କାର୍‍ଙ୍ଗି ମାତ୍‍ତଣ୍ଡ୍, ଇସର୍ ସିଟ୍‍ପାଟ୍ ମିଡ଼୍ ଅଂକିଙ୍କ୍‌ ୱିଡ଼୍‍ସି ମେଣ୍ଡ୍‍ଅଣ୍ଡ୍‌ ମେଲ୍‍ତା କାବୁର୍‍ତିଙ୍କ୍ ଚାୟେମ୍ ଆତ୍‍ତିଡ଼୍, ଆଦିଙ୍କ୍ ନାନ୍ ଗାଟି ଆଶର୍ଯ୍ୟ ଅଦୁତାନ୍‍ ।
GAL 1:7 ନିଜାତାଦ୍ “ମେଣ୍ଡ୍‍ଅଣ୍ଡ୍‌ ମେଲ୍‍ତା କାବୁର୍,” ଇଲ୍‌ଲେ । ବାତେଙ୍କ୍ଇତ୍‍କେ ନାନ୍ ଇଦ୍‍ରକମ୍ କେତୁତାନ୍, ବେସ୍‍କ୍‍ତୁଡ଼୍‍ କ୍ରିଷ୍ଟଟନ୍ ମେଲ୍‍ତା କାବୁର୍‍ତିଙ୍କ୍ “ମେଣ୍ଡ୍‍ଅଣ୍ଡ୍‌ ଲେକାମ୍ ଇସ୍, ମିକିଙ୍କ୍ କାବା ମାଡ଼ାନଙ୍କ୍ ଚାଏମ୍ ଅଦୁତଡ଼୍ ।”
GAL 1:8 ଇତ୍‍କେ ମାମ୍ ମି ବକେତ୍ ବେନ୍ ମେଲ୍‍ତା କାବୁର୍ ପ୍ରଚାର୍ ମାଡ଼ି ମାତ୍‍ତମ୍, ଯଦି ଆଦିନାଗାଙ୍କ୍ ୱେରେ ଅଣ୍ଡୟ୍‌ ମେଲ୍‍ତା କାବୁର୍ ମାମ୍ ନିଜେ କି ସ୍ୱର୍ଗଦୂତ ପ୍ରଚାର୍ ମାଡ଼୍‍କେ, ଆଲେକେ ଅଣ୍ଡ୍‌ ଅବିଶାପ୍‌‍ ପାଏମ୍‍ ଆୟିଣ୍ଡ୍ ।
GAL 1:9 ମାମ୍ ମୁନେନ୍ ଇଦ୍ କେସ୍ ମାତ୍‍ତମ୍ ନୁ ଇଞ୍ଜେ ନାନ୍ ମେଣ୍ଡ୍‍ଅଣ୍ଡ୍‌‍ଦାମ୍ କେତୁତାନ୍, ମିଡ଼୍ ବେନ୍ ମେଲ୍‍ତା କାବୁର୍ କେଞ୍ଜ୍‍ତିଡ଼୍, ଆଦିନାଗାଙ୍କ୍ ୱେରେ ମେଲ୍‍ତା କାବୁର୍ ଯଦି ବେନ ପ୍ରଚାର୍ ମାଡ଼ିତଣ୍ଡ୍, ଆଲେକେ ଅଣ୍ଡ୍‌ ଅବିଶାପ୍‌‍ ପାଏମ୍‍ ଆୟିଣ୍ଡ୍ ।
GAL 1:10 ଇଦ୍ କେଞ୍ଜି ମିଡ଼୍ ବାତ୍ ଆଲ୍‍ସୁତିଡ଼୍, ନାନ୍ ବାତ୍ ନାରୁଡ଼ାଦ୍ ସପଟ୍ ପାଏମ୍ ଆଦାନଙ୍କ୍ ଚାଏମ୍ ଆଦୁତାନ୍ ? ଇଲ୍‌ଲେ, ବେସୁଟ୍‌ ଆୟ । ନାନ୍ ଇଶ୍ୱର୍‌ତିଙ୍କେ ସପଟ୍ ମାଡ଼ୁତାନ୍ । ନାନ୍‍ ବାତ୍ ନାରୁଡ଼୍ ଲୋପେଙ୍କ୍ ସାୟେ ଆଦାନଙ୍କ୍ ଚାଏମ୍ ଆଦୁତାନ୍ ? ନାନ୍ ଯଦି ନେଣ୍ଡ୍‍ଜାକ ସାୟେ ଆଦାନଙ୍କ୍ ଚାଏମ୍ ଆୟେନ୍, ଆଲେକେ ନାନ୍ ନେଣ୍ଡ୍ କ୍ରିଷ୍ଟଟନ୍ ସେବକ୍ ଆୟନ୍ ଆୟେନ୍ ।
GAL 1:11 ଆ, ଦାଦାଲଡ଼ି ନୁ ଏଲାସ୍କିନଡ଼ି, ମିକିଙ୍କ୍ କେସ୍ ନେଏତୁତାନ୍, ନାନ୍ ବେନ୍ ମେଲ୍‍ତା କାବୁର୍ ପ୍ରଚାର୍ ମାଡ଼ିତାନ୍, ଆଦ୍ ନାରୁଡ଼ାଗାଙ୍କ୍ ତିଆର୍ ଆୟ ।
GAL 1:12 ନାନ୍ ବେନେ ନାରୁନାଗାଙ୍କ୍ ଆଦ୍ ପାଏମ୍ ଆୟନ୍, କି ବେନ ନାକିଙ୍କ୍ ଆଦ୍ ଶିକ୍ଷା ଇୱଣ୍ଡ୍ । ଜିସୁ କ୍ରିଷ୍ଟ ନିଜେ ଆଦ୍ ନା ବକେତ୍ କେତ୍‍ତଣ୍ଡ୍ ।
GAL 1:13 ଇଉଦି ଦର୍ମତିଙ୍କ୍ ପାସ୍‍କାନ୍ ୱେଲେ ନାନ୍ ବେଦ୍‍ରକମ୍‍ ବାଦ୍‍କ ମାତ୍‍ତାନ୍, ବେଦ୍‍ପୁଟୁଙ୍କ୍ ଉର୍ଦୟ୍ ଇଲ୍‍ୱେ ନାରୁଣ୍ଡ୍ ଲେକାମ୍ ଇଶ୍ୱର୍‌ତିଙ୍କ୍ ପୁଜେ ମାଡ଼ାନ୍ ମଣ୍ଡଲିତିଙ୍କ୍ ତାଡ଼ନା ମାଡ଼ମାତ୍‍ତାନ୍ ନୁ ଆଦିଙ୍କ୍ ଦଂସ ମାଡ଼ାନ୍ ସେଙ୍ଗେ ବେଦ୍‍ପୁଟୁଙ୍କ୍ ପାର୍‍ତେ ଇସର୍ ଚାଏମ୍ ଆସ ମାତ୍‍ତାନ୍, ଇୱୁ ସାରେ ବିଷୟ୍ ମିକିଙ୍କ୍ କେସିତ୍‍ତଡ଼୍ ।
GAL 1:14 ଇଉଦି ଦର୍ମ ପାଲନ୍ ମାଡ଼ାନାଗ୍ ବସ୍‍ ବେସୁଟ୍‌ ଇଉଦିଡ଼୍ ଲୋପେଙ୍କ୍ ନାନ୍ ମୁନ୍‍ନେ ମାତ୍‍ତାନ୍ ମେଣ୍ଡେ ମାନ୍‍ ଆନିଦାଦିଡ଼୍ ପରମ୍ପରାତାଗ୍ ଗାଟି ପେର୍କେ ମାତ୍‍ତାନ୍ ।
GAL 1:15 ଇତ୍‍କେ ଇଶ୍ୱର୍ ନାକିଙ୍କ୍ ଅନୁଗ୍ରହ ମାଡ଼ି ନାୱାଦ୍‍ ଜନମ୍ ଆଦାନ୍‍ ମୁନେନ୍ ଏଞ୍ଚିମାତ୍‍ତଣ୍ଡ୍ ନୁ ଅନ୍‌ ସେୱା ମାଡ଼ାନ୍ ସେଙ୍ଗେ ନାକିଙ୍କ୍ କାର୍ଙ୍ଗି ମାତ୍‍ତଣ୍ଡ୍ ।
GAL 1:16 ଅଣଇହୁଦୀଡ଼୍ ବକେତ୍ ମେଲ୍‍ତା କାବୁର୍ ପ୍ରଚାର୍ ମାଡ଼ାନ୍ ସେଙ୍ଗେ ବେସୁଟ୍‌ ନା ବକେତ୍ ଅଣ୍ଡ୍‌ ତାନ୍ ମାର୍‍ଦିଙ୍କ୍ କେତ୍‍ତଣ୍ଡ୍, ଇଦ୍ ବିଷୟ୍ କେତାନ୍ ସେଙ୍ଗେ ନାନ୍ ମେଣ୍ଡେ ବେନନ୍ ବକେତ୍ ଅନ୍‌‍ୱେ ମାତ୍‍ତାନ୍ ।
GAL 1:17 ଇଦ୍‍ରକମ୍ କି ନା ମୁନେନ୍ ବେନ ପାଡ଼ିୟ୍‍ମାଡ଼ାନ୍ ପ୍ରେରିତଶିଷ୍ୟ ଆସ୍‍ମାତ୍‍ତଡ଼୍, ଅଡ଼୍‌ ତଡ଼୍ କାୟ୍‍ଲାନଙ୍କ୍ ମିକା ନାନ୍ ଯିରୁଶାଲେମ୍‍ତାଗ୍ ଆନ୍‌‍ୱେ ମାତ୍‍ତାନ୍ । ନାନ୍ ସାଙ୍ଗେ ସାଙ୍ଗେ ଆରବ୍ ଦେଶ୍‌ତାଗ୍ ଆତ୍‍ତାନ୍ ମେଣ୍ଡେ ତାନ୍ ପେର୍କେ ଦାମାସ୍‍କସ୍‍ ତାଗ୍‍ ମାଲ୍‍ସ୍ ୱାସ୍‍ମାତ୍‍ତାନ୍ ।
GAL 1:18 ଇଦିନ୍ ମୁଣ୍ଡ୍ ହେଣ୍ଡ୍ ପେର୍କେ ନାନ୍ ପିତର୍ ତଡ଼୍ କାୟ୍‍ଲାନ୍ ସେଙ୍ଗେ ଯିରୁଶାଲେମ୍‍ତାଗ୍ ଆତ୍‍ତାନ୍ ନୁ ଅନ୍‌ ତଡ଼୍ ପନ୍ଦର୍‍ ଦିନ୍‍ ମାତ୍‍ତାନ୍ ।
GAL 1:19 ପ୍ରବୁନ୍ ତାମୁଣ୍ଡ୍ ଯାକୁବଙ୍କ୍ ୱିଡ଼୍‍ସ୍‍କେ ନାନ୍ ମେଣ୍ଡେ ବେନନ୍ ପ୍ରେରିତ୍‍ ଶିଷ୍ୟ ତଡ଼୍ କାୟ୍‍ଲ୍‍ୱେ ମାତ୍‍ତାନ୍ ।
GAL 1:20 ନାନ୍ ବାତ୍ ଲେକୁତାନ୍, ଆଦ୍ ନିଜାମ୍; ଇଶ୍ୱର୍ ପୁତ୍‍ତଣ୍ଡ୍, ନାନ୍ ମିଚ୍ କେଲନ୍ !
GAL 1:21 ଇଦିନ୍ ପେର୍କେ ନାନ୍ ସିରିଆ ନୁ ସିଲିସିଆତେ ନାର୍ଗେ ଜାଗେତାଗ୍ ଆଞ୍ଜ୍‍ ମାତ୍‍ତାନ୍ ।
GAL 1:22 ଆଦ୍ ସମୟ୍‍ତେ ଯିଉଦା ପ୍ରଦେଶ୍‍ତାଗ୍ ମାନ୍ଦାନ୍ କ୍ରିଷ୍ଟିୟାନ୍ ମଣ୍ଡଲିତେ ନାରୁଡ଼୍ ନାକିଙ୍କ୍ ଲେକେତ୍‍ ପୁନ୍‍ୱେ ମାତ୍‍ତଡ଼୍ ।
GAL 1:23 ନା ବିଷୟ୍‍ତେ ବାଗାତ୍ ନାରୁଡ଼୍ ବାତ୍ କେସ୍‍ମାତ୍‍ତଡ଼୍, ଅଡ଼୍‌ ଆସର୍‍କେ ପୁଞ୍ଜ୍ ମାତ୍‍ତଡ଼୍ । ଅଡ଼୍‌‍ତିର୍ୟାନାଦ୍‌ ଅଡ଼୍‌ କେଞ୍ଜି ମାତ୍‍ତଡ଼୍, “ବେନ୍ ନାରୁଣ୍ଡ୍ ମାକିଙ୍କ୍ ତାଡ଼ନା ମାଡ଼ମାତ୍‍ତଣ୍ଡ୍ ନୁ ଅଣ୍ଡ୍‌‍ଦାମ୍ ମାନ୍‍ ଦର୍ମତିଙ୍କ୍ ଦଂସ ମାଡ଼ାନଙ୍କ୍ ଚାଏମ୍ ଆସମାତ୍‍ତଣ୍ଡ୍, ଇଞ୍ଜେ ଅଣ୍ଡ୍‌ ଆଦେ ଦର୍ମତିଙ୍କ୍ ପ୍ରଚାର୍ ମାଡ଼ୁତଣ୍ଡ୍ !”
GAL 1:24 ଆଦିନ୍ ମାୟ୍‍ଦିଙ୍କ୍ ଅଡ଼୍‌ ନା ସେଙ୍ଗେ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ିମାତ୍‍ତଡ଼୍ ।
GAL 2:1 ଚୁଉଦ ହେଣ୍ଡ୍ ପେର୍କେ ନାନ୍ ବର୍ଣ୍ଣବାନ୍ ତଡ଼୍ ଯିରୁଶାଲେମ୍‍ତାଗ୍ ମାଲ୍‍ତ୍‍ତାନ୍; ନା ତଡ଼୍ ତିତସ୍‍ତିଙ୍କ୍ ମିକା ଆସ୍ ମାତ୍‍ତାନ୍ ।
GAL 2:2 ଆଗ୍ ଆଦାନଙ୍କ୍ ଆଦ୍‍ତେ ଇଞ୍ଜ ଇଶ୍ୱର୍‌ତାଦ୍‍ ଆଦେଶ୍‍ ସେଙ୍ଗେ ନାନ୍ ଆଞ୍ଜ୍‍ ମାତ୍‍ତାନ୍ । ଅଣଇହୁଦୀଡ଼୍ ବକେତ୍ ନାନ୍ ବେନ୍ କାବୁର୍ ପ୍ରଚାର୍ ମାଡ଼୍‍ତାନ୍, ଯିରୁଶାଲେମ୍‍ତେ ନେତାଲଡ଼୍‍କ୍ ଅଣ୍ଡୟ୍‌ ପ୍ରାଇବେଟ୍ ମିଟିଙ୍ଗ୍ ମାଡ଼ି ବୁଜା ମାଡ଼୍‍ତାନ୍ । ନାୟାଦ୍‍ ମୁନେତାଦ୍ ନୁ ଇଞ୍ଜେତାଦ୍ ପାଡ଼୍‍ୟି ବେଲା ଆସାମ୍ ଆନ୍‌‍ମାକି ଆଦିନ୍‌ମାଇଦିଙ୍କ୍ ନାନ୍ ଉଡ଼ମାତ୍‍ତାନ୍ ।
GAL 2:3 ନା ସାଙ୍ଗ ତିତସ୍ ୱେରଣ୍ଡ୍ ଗ୍ରୀକ୍‍ ନାରୁଣ୍ଡ୍ ଆତ୍କେ ମିକା, ଅଂକିଙ୍କ୍‌ ସୁନ୍ନତ ଆଦାନଙ୍କ୍ କେଲ୍‍ୱେ ମାତ୍‍ତଡ଼୍ ।
GAL 2:4 ଆଗେକ୍‍ବା ବେସ୍‍କ୍‍ତୁଡ଼୍‍ ଅଂକିଙ୍କ୍‌ ସୁନ୍ନତ ମାଡ଼ାନଙ୍କ୍ ଚାଏମ୍ ଆସମାତ୍‍ତଡ଼୍ । ଅଡ଼୍‌ ବିଶ୍ୱାସି ଦାଦାଲଡ଼୍ ଇଞ୍ଜ ବୁସାମାଡ଼ି ଡଙ୍ଗାଲଡ଼୍‍ ଲେକାମ୍‍ ମାୟାଗ୍‌ କାୟ୍‍ଲି ମାତ୍‍ତଡ଼୍ । କ୍ରିଷ୍ଟ ଜିସୁନ୍ ତଡ଼୍ କାୟ୍‍ଲି ମାମ୍ ବେନ୍‍ ସ୍ୱାଦିନତା ପାଏମ୍ ଆତ୍‍ତମ୍, ଆଦି ବିଷୟ୍ ପୁନ୍ଦାନଙ୍କ୍ ଅଡ଼୍‌ ଆଲ୍‍ସମାତ୍‍ତଡ଼୍ । ମାକିଙ୍କ୍ ମେଣ୍ଡଅନ୍‌‍ଦାମ୍ ନିୟମ୍‍ତେ ଚାକର୍ ମାଡ଼ାନଙ୍କ୍ ଅଡ଼୍‌ ଚାଏମ୍ ଆସ୍‍ମାତ୍‍ତଡ଼୍ ।
GAL 2:5 ଇତ୍‍କେ ମି ସେଙ୍ଗେ ମେଲ୍‍ତା କାବୁର୍‍ତାଗ୍ ମାନ୍ଦାନ୍ ସତ୍‍ତିଙ୍କ୍ ନେଃଏତାନ୍ ସେଙ୍ଗେ ମାମ୍ ଆ ନାରୁଡ଼୍‍କିଙ୍କ୍ ସେନେକ୍‍ତିଙ୍କ୍ ମିକା ପଡ଼ିୟେ ଇୱେମାତ୍‍ତମ୍ ।
GAL 2:6 ବେନଡ଼୍ ନେତାଲଡ଼୍ ଇଞ୍ଜ ଏଞ୍ଚି ମାତ୍‍ତଡ଼୍, ଅଡ଼୍‌ ବେନ ଆୟି ଆୟିଣ୍ଡ୍, ଆଗେ ନାୟାଦ୍ ବାତ୍ ଆନ; ବାତେଙ୍କ୍‍ଇତ୍‍କେ ବ୍ୟବହାର୍‌ ଉଡ଼ି ଇଶ୍ୱର୍ ବେନଡ଼୍‍କ୍ ବିଚାର୍ ମାଡ଼ଣ୍ଡ୍, ଆ ନେତାଲଡ଼୍ ନାକିଙ୍କ୍ ବାତ୍ ପୁନାଦ୍ ଶିକ୍ଷା ଇୱଡ଼୍ ।
GAL 2:7 ମେଣ୍ଡନ୍‍ ରକମ୍‍ ଅଡ଼୍‌ ଉଡ଼ି ମାତ୍‍ତଡ଼୍ ଯେ, ଇଶ୍ୱର୍ ବେଦ୍ ପୁଟୁଙ୍ଗ୍ ଇଉଦୀଡ଼୍ ବକେତ୍ ମେଲ୍‍ତା କାବୁର୍ ପ୍ରଚାର୍ ମାଡ଼ାନ୍ ଦାୟିତ୍ୱ ପିତର୍‍ତିଙ୍କ୍ ଇସ୍ ମାତ୍‍ତଣ୍ଡ୍, ଆଦେ ପୁଟୁଙ୍ଗ୍ ଅଣଯିହୁଦିଡ଼୍‍ ବକେତ୍ ମେଲ୍‍ତା କାବୁର୍ ପ୍ରଚାର୍ ମାଡ଼ାନ୍ ଦାୟିତ୍ୱ ନାକିଙ୍କ୍ ଇତ୍‌ତଣ୍ଡ୍‌ ।
GAL 2:8 ବାତେଙ୍କ୍‍ଇତ୍‍କେ ପିତର୍ ବେଦ୍‍ରକମ୍‍ ଇଶ୍ୱର୍‌ତେ ଶକ୍ତିତଡ଼୍‍ ଇଉଦିଡ଼୍ ସେଙ୍ଗେ ପ୍ରେରିତ୍‍ ଶିଷ୍ୟଡ଼୍‍ ଲେକାମ୍ ନିଯୁକ୍ତି ଆସ୍‍ମାତ୍‍ତଣ୍ଡ୍, ନାନ୍ ମିକା ଟିକ୍ ଆଦେ ପୁଟୁଙ୍ଗ୍ ଇଶ୍ୱର୍‌ତେ ଶକ୍ତିତଡ଼୍ ଅଣଇହୁଦୀଡ଼୍ ସେଙ୍ଗେ ପ୍ରେରିତ୍‍ ଶିଷ୍ୟଡ଼୍ ଲେକାମ୍ ନିଯୁକ୍ତି ଆତ୍‍ତାନ୍ ।
GAL 2:9 ଗୁଞ୍ଜେ ଇନା ପୁଞ୍ଜ୍‍ମାନ୍ଦାନ୍ ଯାକୁବ, ପିତର୍ ନୁ ଯୋହନ୍‌ ସ୍ୱୀକାର୍ ମାଡ଼୍‍ତଡ଼୍ ଯେ, ଇଶ୍ୱର୍ ନାକିଙ୍କ୍ ଇଦ୍ ପାଡ଼୍‍ୟି ମାଡ଼ାନଙ୍କ୍ ଦାୟିତ୍ୱ ଇସ୍‍ମିନ୍ଦେଣ୍ଡ୍ । ଆଦିଙ୍କ୍ ଅଡ଼୍‌ ନାକିଙ୍କ୍ ନୁ ବର୍ଣ୍ଣବାଙ୍କ୍ ସାହାଯ୍ୟ ମାଡ଼ାନଡ଼୍ ଇଞ୍ଜ ପ୍ରେମତେ ଗ୍ରହନ୍‍ ମାଡ଼ିମାତଡ଼୍ । ବର୍ଣ୍ଣବା ନୁ ନାନ୍ ଅଣଇହୁଦିଡ଼୍ ଲୋପେ ମେଣ୍ଡେ ଅଡ଼୍‌ ଇଉଦିଡ଼୍ ଲୋପେ ପାଡ଼୍‍ୟି ମାଡ଼ିତଡ଼୍ ଇଞ୍ଜ ମାମ୍ ରାଜି ଆସ୍‍ମାତ୍‍ତମ୍ ।
GAL 2:10 ଅଡ଼୍‌ ଇସରେ ଅନୁରୋଦ୍ ମାଡ଼ିମାତ୍‍ତଡ଼୍ ଯେ, ତାମ୍ ମାନ୍ଦେତାଗ୍ ମାନ୍ଦାନ୍ ଅବାବ୍‍ତେ ମାନ୍ଦାନ୍‍ ନାରୁଡ଼୍‍କିଙ୍କ୍ ଏର୍କେ ମାଡ଼ିତମ୍ । ଆଦ୍ ବିଷୟ୍‍ ନାକିଙ୍କ୍ ଗାଟି ଇଚ୍ଛା ମାତ୍‍ତେ ।
GAL 2:11 ପିତର୍ ଆଣ୍ଟିୟୋକିତାଗ୍ ୱାସ୍‍ମାନ୍ଦାନ୍ ୱେଲେ ନାନ୍ ଅଂକିଙ୍କ୍‌ ମାନା ମାଡ଼ିମାତ୍‍ତାନ୍, ବାତେଙ୍କ୍‍ଇତ୍‍କେ ନିଜାମ୍‍ ବୁଲ୍‍ ପାଡ଼୍‍ୟି ମାଡ଼ମାତ୍‍ତଣ୍ଡ୍ ।
GAL 2:12 ଯାକୁବ ରଅତେ ବେସ୍‍କ୍‍ତୁଡ଼୍‍ ନାରୁଡ଼୍ ଆଗେ ୱାଦାନ୍ ମୁନେନ୍, ପିତର୍ ଅଣଇହୁଦି ଦାଦାଲଡ଼୍ ନୁ ଏଲାସ୍କିନ୍‍ ତଡ଼୍ ତିଞ୍ଜ ମାତ୍‍ତଣ୍ଡ୍ । ଇତ୍‍କେ ଆ ନାରୁଡ଼୍ ୱାତ୍‍ତେ ପେର୍କେ, ଅଣ୍ଡ୍‌ ଆଗାଙ୍କ୍ ତେଦି ମାତ୍‍ତଣ୍ଡ୍ । ଅଡ଼୍‌ ତଡ଼୍ ମେଣ୍ଡେ ଅଣ୍ଡ୍‌ ତିନଣ୍ଡ୍, କାରନ୍‍ ଅଣଇଉଦିଡ଼୍ ସୁନ୍ନତ ଆଦାନାଦ୍ ଦର୍‍କାର୍ ଇଞ୍ଜ ବେନ କେସମାତ୍‍ତଡ଼୍, ଅଣ୍ଡ୍‌ ଅଡ଼୍‌‍କିଂଙ୍କ୍ ୱେର୍‍ସ ମାତ୍‍ତଣ୍ଡ୍ ।
GAL 2:13 ମେଣ୍ଡେ ବାଗାତଡ଼୍ ଇଉଦିଡ଼୍ ଦାଦାଲଡ଼୍ ପିତର୍ ତଡ଼୍ କାୟ୍‍ଲି କାରାପ୍ ବ୍ୟବହାର୍‌ ମାଡ଼ିମାତ୍‍ତଡ଼୍, ଇଦ୍ ରକମ୍ କି ବର୍ଣ୍ଣବା ମିକା ଅଡ଼୍‌ ଗଟ୍‍ତାଗ୍ ରାୟ୍‍ତଣ୍ଡ୍ ।
GAL 2:14 ନାନ୍ ଉଡ଼୍‍ତାନ୍ ଯେ ମେଲ୍‍ତା କାବୁର୍‍ତେ ସତ୍‍ ଲେକାମ୍ ଅଡ଼୍‌ ସାୟେ ବ୍ୟବହାର୍‌ ମାଡ଼ଡ଼୍, ନାନ୍ ଅଡ଼୍‌ ମୁନ୍‍ନେ ପିତର୍‍ତିଙ୍କ୍ କେତ୍‍ତାନ୍, “ଯଦି ନିମେ ଇଉଦି ଆସ୍ ଅଣଇହୁଦି ଲେକାମ୍ ବାଦ୍‍କୁତିନ୍, ତ ଇହୁଦିଡ଼୍ ଲେକାମ୍ ବାଦ୍‍କାନଙ୍କ୍ ନିମେ ଅଣଇହୁଦିଡ଼୍‍କ୍ ବେଲା କେତିତିନ୍‍ ?”
GAL 2:15 ନିଜାମ୍‍ ମାମ୍ ଜନମ୍ କଞ୍ଚ୍‍ ଇହୁଦି; କେତାନ୍ ଇସାବ୍‍ତେ “ପାପି ଅଣଇହୁଦି,” ଆୟମ୍ ।
GAL 2:16 ମାମ୍ ପୁତ୍‍ତମ୍ ନିୟମ୍‍ତାଦ୍ ଦାବିସାରେ ପୁରା ମାଡ଼୍‍କେ ଆୟ, ମାତର୍‌ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼୍‍କେ ଅର୍ତୁଣ୍ଡ୍ ଇଶ୍ୱର୍‌ତେ କଣ୍ଡେତାଗ୍ ନିର୍ଦୋଷ୍ ଆଦ୍‍ତଣ୍ଡ୍ । ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆଦାନ୍ ସେଙ୍ଗେ ମାମ୍ ନିୟମ୍‍ତିଙ୍କ୍ ପୟକଟ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ୁତମ୍, ବାତେଙ୍କ୍‍ଇତ୍‍କେ ଆସାମ୍‍ ନିୟମ୍ ପାଲନ୍ ମାଡ଼୍‍କେ ବେନ ଇଶ୍ୱର୍‌ତେ ମୁନ୍‍ନେ ଦାର୍ମାମ୍ ଆୟଣ୍ଡ୍ ।
GAL 2:17 ଇତ୍‍କେ ଜିସୁ କ୍ରିଷ୍ଟଟନ୍ ତଡ଼୍ କାୟ୍‍ଲି ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆଦାନଙ୍କ୍ ତିଆର୍‍ ଆତ୍‍ତେ ୱେଲେ, ଯଦି ମାମ୍ ଗାଲା ଅଣଇହୁଦି ଲେକାମ୍ “ପାପ୍‌,” ଆସ୍ ମିନ୍ଦେମ୍‍, ଇଦିନ୍ ସେଙ୍ଗେ ବାତ୍ କ୍ରିଷ୍ଟ ଦାୟି ? ଇଲ୍‌ଲେ, ଇଦ୍‍ ବେସୁଟ୍‌ ଆୟ ।
GAL 2:18 ବେନ୍ ନିୟମ୍‍ତାଦ୍ ବନ୍ଦନ୍‍ତିଙ୍କ୍ ନାନ୍ ୱିଡ଼୍‍ସ୍‍ତାନ୍, ଆଦିଙ୍କ୍ ମେଣ୍ଡେ ତିଆର୍ ମାଡ଼୍‍କେ ନାନ୍ ଦୋଷୀ ଆଦ୍‍ତାନ୍ ।
GAL 2:19 ନିୟମ୍‍ତାଗ୍ ନାନ୍ ପୁରା ଡଲ୍‍ତାନ୍, ଆଦ୍ ନିୟମ୍‍ତେ ସେଙ୍ଗେ ନାନ୍ ଡଲିଆତାନ୍ । ଇତ୍‍କେ ନାନ୍ ଇଶ୍ୱର୍‌ତେ ମାଇଦିଙ୍କ୍ ଜିୱେ ଆତ୍‍ତାନ୍ । କ୍ରିଷ୍ଟନ୍‍ ତଡ଼୍ ଅନ୍‌ କ୍ରୁଶତାଗ୍ ନାନ୍ ମିକା ଡଲ୍‍ତାନ୍ ।
GAL 2:20 ଆଦିଙ୍କ୍ ଇଞ୍ଜେ ନାନ୍ ନିଜାମ୍ ଜିୱେ ଇଲେନ୍, ନାୟାଗ୍ କ୍ରିଷ୍ଟ କେ ଜିୱୁଣ୍ଡ୍ । ନାନ୍ ଇଞ୍ଜେ ବେନ୍ ଜିୱୁଣ୍ଡ୍ ବାଦ୍‍କୁତାନ୍, ଆଦ୍ ଇଶ୍ୱର୍‌ତେ ମାର୍‍ଦିଙ୍କ୍ ନାୟାଦ୍ ବିଶ୍ୱାସ୍ ମାନ୍ଦାନ୍ ସେଙ୍ଗେ ସମ୍ଭବ୍ ଆତ୍‍ତେ ବେନ ନାକିଙ୍କ୍ ପ୍ରେମ ମାଡ଼ି ତାନ୍ ଜିୱୁଣ୍ଡ୍ ଇତ୍‌ତଣ୍ଡ୍‌ ।
GAL 2:21 ତିନ୍‍ସେଙ୍ଗେ ଇଶ୍ୱର୍‌ତେ ଅନୁଗ୍ରହତିଙ୍କ୍ ନାନ୍ ବେସୁଟ୍‌ ଅସ୍ୱିକାର୍ ମାଡ଼ନ୍ । ବାତେଙ୍କ୍‍ଇତ୍‍କେ ନିୟମ୍ ପାଲନ୍ ମାଡ଼ି ଯଦି ବେନ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆଦ୍‍ତଣ୍ଡ୍, ଆଲେକେ କ୍ରିଷ୍ଟ ଡଲ୍‍ତାଦ୍ ଆଙ୍ଗ୍‍ଡ଼ାମ୍ ଇଞ୍ଜ କେତାନଙ୍କ୍ ଆଦ୍‍ତେ ।
GAL 3:1 ଆ ବୁଦ୍‍ ଇଲ୍‍ୱେ ଗାଲାତିୟଡ଼ି ! ବେନ ମିକିଙ୍କ୍ ଇଦ୍ ମନ୍ତ୍ର କାର୍‍ସ୍‍ପୁତଣ୍ଡ୍ ? କ୍ରୁଶ ପର ଜିସୁ କ୍ରିଷ୍ଟ ଡଲ୍‍ତାଦ୍ ଗଟ୍ ମି ଗାରେ ଗାଟି ସାୟେ କେତୁତମ୍ ।
GAL 3:2 ଅଣ୍ଡୟ୍‌ ଗଟ୍ ନାକିଙ୍କ୍‍ କେଲାଟ୍, ନିୟମ୍ ପାଲନ୍ ମାଡ଼ି ମିଡ଼୍ ପବିତ୍ର ଆତ୍ମା ପାଏମ୍ ଆତ୍‍ତିଡ଼୍, ନା ମେଲ୍‍ତା କାବୁର୍ କେଞ୍ଜି ଆଦିଙ୍କ୍ ବିଶ୍ୱାସ୍ ମାଡ଼ି ?
GAL 3:3 ମିଡ଼୍ ଇଦ୍‍ରକମ୍ ବିଚାର୍ ବାତେଙ୍କ୍ ମାଡ଼ୁତିଡ଼୍ ? ପରମ୍‍ଆତ୍ମାନ୍ ଶକ୍ତିତଡ଼୍ ମିଡ଼୍ ବେନ୍ ଜିୱୁଣ୍ଡ୍ ଆରାମ୍ ମାଡ଼୍‍ତିଡ଼୍, ନିଜର୍ ଶକ୍ତିତଡ଼୍ ଆଦିଙ୍କ୍ ପୁରା ମାଡ଼ାନଙ୍କ୍ ବାତେଙ୍କ୍ ଆଲ୍‍ସୁତିଡ଼୍ ?
GAL 3:4 ଅଦିନ୍‌ ସେଙ୍ଗେ ମିୟାଦ୍ ସାରେ ପାଡ଼୍‍ୟି ବାତେ ଆଙ୍ଗ୍‍ଡ଼ାମ୍ ? ଆଗାଙ୍କ୍ ବାତ୍ ଶିକ୍ଷା ପାଏମ୍ ଆୟ୍‍ୱିଡ଼୍ କି ?
GAL 3:5 ମିକିଙ୍କ୍ ନିୟମ୍ ବିଶ୍ୱାସ୍ ମାଡ଼୍‍ତାଙ୍କ୍ ଇଶ୍ୱର୍ ବାତ୍ ତାନ୍ ଆତ୍ମା ଇତ୍‌ତଣ୍ଡ୍‌ ନୁ ମି ଲୋପେ ଆଶର୍ଯ୍ୟ ପାଡ଼୍‍ୟି ସାରେ ମାଡ଼୍‍ତଣ୍ଡ୍, ନା ମିଡ଼୍ ମେଲ୍‍ତା କାବୁର୍ କେଞ୍ଜି ଆଗେ ବିଶ୍ୱାସ୍ ମାଡ଼ୁତିଡ଼୍ ଇଞ୍ଜ ?
GAL 3:6 ଅବ୍ରାହାମ୍‌ତେ ଗଟ୍ ଏର୍କେ ମାଡ଼ାଟ୍ । ଶାସ୍ତ୍ରତାଗ୍ ଲେକା ମିନ୍ଦେ, “ଅଣ୍ଡ୍‌ ଇଶ୍ୱର୍‌ତିଙ୍କ୍ ବିଶ୍ୱାସ୍ ମାଡ଼୍‍ତଣ୍ଡ୍ ନୁ ତାନ୍ ବିଶ୍ୱାସ୍‍ତେ ମାଇଦିଙ୍କ୍ ଇଶ୍ୱର୍ ଅଂକିଙ୍କ୍‌ ଦାର୍ମ୍ ନାରୁଣ୍ଡ୍ ଇଞ୍ଜ ଏଞ୍ଚ୍‍ତଣ୍ଡ୍ ।”
GAL 3:7 ବେନଡ଼୍ ବିଶ୍ୱାସ୍ ମାଡ଼ିତଡ଼୍, ଅଡ଼୍‌ ଅବ୍ରାହାମ୍‌ତେ ନିଜାମ୍‍ ବଂଶତଡ଼୍, ଇଦ୍ ମିଡ଼୍ ପୁନୁଟ୍‍ ।
GAL 3:8 ମୁନେତ୍‍ କଞ୍ଚ୍‍ ଦର୍ମଶାସ୍ତ୍ରତାଗ୍‍ ଲେକା ମିନ୍ଦେ ଯେ, ବିଶ୍ୱାସ୍ ତଡ଼୍ ଇଶ୍ୱର୍ ଅଣଇହୁଦିଡ଼୍‍କ୍ ମିକା ଦାର୍ମାମ୍ ନାରୁଣ୍ଡ୍ ଇଞ୍ଜ କେତିତଣ୍ଡ୍ । ଇଦ୍ ଗଟ୍ ମୁନେନ୍ ଅବ୍ରାହାମ୍‍ତିଙ୍କ୍ କେସ୍‍ମାତ୍‍ତଣ୍ଡ୍, “ମି ତଡ଼୍ ଇଶ୍ୱର୍ ପୃତିବୀତେ ସାରେ ନାରୁଡ଼୍‍କିଙ୍କ୍ ଆର୍ଶିବାଦ୍‌ ମାଡ଼ିତଣ୍ଡ୍ ।”
GAL 3:9 ଅବ୍ରାହାମ୍‍ ବିଶ୍ୱାସ୍ ମାଡ଼ି ଆର୍ଶିବାଦ୍‌ ପାଏମ୍ ଆସ୍ ମାତ୍‍ତଣ୍ଡ୍; ଆଦିଙ୍କ୍ ବେନଡ଼୍ ବିଶ୍ୱାସ୍ ମାଡ଼ିତଡ଼୍, ଅଡ଼୍‌ ସାରେତଡ଼୍ ଅନ୍‌ ଲେକେମ୍ ଆର୍ଶିବାଦ୍‌ ପାଏମ୍ ଆଦ୍‍ତଡ଼୍ ।
GAL 3:10 ବେନଡ଼୍ ନିୟମ୍ ପାଲନ୍ ମାଡ଼ାନାଗ୍‍ ଆଶେ ୱାଟିତଡ଼୍, ଅଡ଼୍‌ ଅବିସାପ୍ ପାଏମ୍ ଆଦାନ୍ ଜିୱୁଣ୍ଡ୍ ବାଦ୍‍କିତଡ଼୍ । ବାତେଙ୍କ୍‍ଇତ୍‍କେ ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ମୋଶାନ୍ ନିୟମ୍ ବଇତାଗ୍ ବାତ୍ ସାରେ ଲେକା ମିନ୍ଦେ, ଯଦି ବେନ ଆଦ୍ ପୁରା ମାଡ଼ଣ୍ଡ୍, ଅଂକିଙ୍କ୍‌ ଇଶ୍ୱର୍ ଅବିସାପ୍ ଇଦ୍‍ତଣ୍ଡ୍ ।”
GAL 3:11 ଆଦିଙ୍କ୍ ଇଗାଙ୍କ୍ ପୁନ୍ଦାନଙ୍କ୍ ଅଦୁତ୍, ନିୟମ୍ ତଡ଼୍ ବେନ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ନାରୁଣ୍ଡ୍ ଆୟଣ୍ଡ୍, ବାତେଙ୍କ୍‍ଇତ୍‍କେ ଦର୍ମଶାସ୍ତ୍ରତାଗ୍ ଲେକା ମିନ୍ଦେ, “ବିଶ୍ୱାସ୍ ତଡ଼୍ ଇଶ୍ୱର୍‌ତେ ଗାରେ ନିର୍ଦଷ୍ ମାନ୍ଦାନ୍‍ ନାରୁଣ୍ଡ୍ ଇଁ ବାଦ୍‍କିତଣ୍ଡ୍ ।”
GAL 3:12 ମାତର୍‌ ନିୟମ୍ ତଡ଼୍ ବିଶ୍ୱାସ୍‍ତାଦ୍ ବାତ୍ ସମ୍ପର୍କ ଇଲ୍‍ଲେ । ଦର୍ମଶାସ୍ତ୍ରତାଗ୍ ଲେକା ମିନ୍ଦେ, “ବେନ୍ ନାରୁଣ୍ଡ୍ ନିୟମ୍‍ତାଦ୍ ଦାବୀ ଲେକେତ୍‍ ପାଡ଼୍‍ୟି ମାଡ଼ିତଣ୍ଡ୍, ଅଣ୍ଡ୍‌ ବାଦ୍‍କିତଣ୍ଡ୍ ।”
GAL 3:13 ମାତର୍‌ କ୍ରିଷ୍ଟ ମାନ୍‍ ସେଙ୍ଗେ ଆବିସାପ୍ ପାଏମ୍ ଆସ୍ ନିୟମ୍‍ତାଗ୍ ଲେକା ମାନ୍ଦାନ୍ ଅବିସାପ୍‍ ତାଗାଙ୍କ୍ ମାକିଙ୍କ୍ ମୁକ୍ତି ମାଡ଼୍‍ତଣ୍ଡ୍ । ଦର୍ମଶାସ୍ତ୍ରତାଗ୍ ଲେକା ମିନ୍ଦେ, “ବେନ୍ ମାଡ଼େତାଗ୍ ଗୁସ୍କ୍‍ୱିଡ଼ି ଡଲିତଣ୍ଡ୍, ଅଣ୍ଡ୍‌‍ ଇଶ୍ୱର୍ ତଡ଼୍‍ ଅବିସାପ୍ ପାଏମ୍‍ ଆତ୍‍ତଣ୍ଡ୍ !”
GAL 3:14 ଇଶ୍ୱର୍ ଅବ୍ରାହାମ୍‍ତିଙ୍କ୍ ବେନ୍ ଆର୍ଶିବାଦ୍‌ ଇଦାନଙ୍କ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଅଣଇହୁଦୀଡ଼୍ ଗାଲା ବେଲା ଆଦ୍ ପାଏମ୍ ଆଦ୍‍ତଡ଼୍, ଆଦିନ୍ ସେଙ୍ଗେ କ୍ରିଷ୍ଟ ଇଦ୍ ପାଡ଼୍‍ୟି ମାଡ଼୍‍ତଣ୍ଡ୍ । ଆଦିଙ୍କ୍ ବିଶ୍ୱାସ୍ ମାଡ଼୍‍କେ ମାମ୍ ଗାଲା ଇଶ୍ୱର୍ କେତାନ୍ ଲେକାମ୍ ପବିତ୍ର ଆତ୍ମା ପାଏମ୍ ଆଦ୍‍ତମ୍ ।
GAL 3:15 ଦାଦାଲଡ଼ି ନୁ ହେଲାସ୍କ୍ ! ନାନ୍ ଅଣ୍ଡୟ୍‌ ଉଦାରନ୍‍ ଇଦୁତାନ୍, ବେସୁଟ୍‌ ଇର୍‍ୱୁଡ଼୍ ବାତ୍‍ଆୟି ବିଷୟ୍‍ତେ ଅଣ୍ଡୟ୍‌ ଚୁକ୍ତି ମାଡ଼ିତଡ଼୍, ବେନ ଆଦ୍ ଚୁକ୍ତିତିଙ୍କ୍ ୱେରେ ମାଡ଼ାନଙ୍କ୍ ପାର୍‍ୱଣ୍ଡ୍ ବା ଆଗେ ବାତ୍ କାଲ୍‍ପାନଙ୍କ୍ ପାର୍‍ୱଣ୍ଡ୍ ।
GAL 3:16 ଅବ୍ରାହାମ୍‍ ନୁ ତାନ୍ ବଂଶତଡ଼୍ ଗାରେ ଇଶ୍ୱର୍ ତାନ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍ । ଇତ୍‍କେ ଇଦ୍ ବିଷୟ୍ “ମି ବଂଶତଡ଼୍ ସେଙ୍ଗେ,” ବା ନାର୍ଗେ ନାରୁଡ଼୍ ସେଙ୍ଗେ ଇଞ୍ଜ ଶାସ୍ତ୍ରତାଗ୍ ଲେକା ଇଲ୍‍ଲେ, “ମି ବଂଶତଡ଼୍ ସେଙ୍ଗେ,” କେ ଇଞ୍ଜ ଇଦ୍ ଗଟ୍ ମୁନେନ୍ ଅବ୍ରାହାମ୍‍ତିଙ୍କ୍ କେସ୍‍ମାତ୍‍ତଣ୍ଡ୍ ଲେକା ମିନ୍ଦେ । ଆଦିଙ୍କ୍ ଆଦ୍ ଶାସ୍ତ୍ର ଅର୍ତୁଣ୍ଡ୍ ନାରୁଣ୍ଡ୍, ବା କ୍ରିଷ୍ଟଟନ୍ ସେଙ୍ଗେ ଟିକ୍‌ ।
GAL 3:17 ନାୟାଦ୍ କେତାନ୍ ଅର୍ତ ଆଦୁତ୍, ଇଶ୍ୱର୍ ଅବ୍ରାହାମ୍‍ ତଡ଼୍ ଅଣ୍ଡୟ୍‌ ଚୁକ୍ତି ମାଡ଼ିମାତ୍‍ତଣ୍ଡ୍ ନୁ ଆଦ୍ ରକ୍ଷା ମାଡ଼ାନଙ୍କ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍ । ବେନ୍ ନିୟମ୍ ଚାରିଶହ ତିରିଶ୍ ଏଣ୍ଡ୍ ପେର୍କେ ତିଆର୍ ଆତ୍‍ତେ, ଆଦ୍ ଆ ଚୁକ୍ତିତିଙ୍କ୍ ୱେରେ ମାଡ଼ି ଇଶ୍ୱର୍‌ତେ ପ୍ରତିଜ୍ଞାତିଙ୍କ୍ ବନ୍ଦ୍ ମାଡ଼େ ପାର୍‍ୱ ।
GAL 3:18 ଇଶ୍ୱର୍‌ତେ ପ୍ରତିଜ୍ଞା ଆର୍ଶିବାଦ୍‌ ଯଦି ନିୟମ୍‍ ପାଳନ୍ ମାଡ଼ାନ୍ ତଡ଼୍ ସାମାନ୍, ଆଲେକେ ଆଦ୍ ଅନାଦ୍‌ ପ୍ରତିଜ୍ଞା ଇଞ୍ଜ କେତାନଙ୍କ୍ ଆୟ । ଆଦିଙ୍କ୍ ଇଶ୍ୱର୍ ଅନାଦ୍‌ ପ୍ରତିଜ୍ଞା ଲେକାମ୍ ଆଦ୍ ଆର୍ଶିବାଦ୍‌ ଅବ୍ରାହାମ୍‍ତିଙ୍କ୍ ଇତ୍‌ତଣ୍ଡ୍‌ ।
GAL 3:19 ଆଲେକେ ନିୟମ୍ ବାତେଙ୍କ୍ ତିଆର୍ ଆତ୍‍ତେ ? ନାରୁଡ଼ାଦ୍ ସାରେ କାରାପ୍ କାମ୍ ତଅସିଦାଙ୍କ୍ ଆଦିନାଦ୍ କାମ୍‌ ମାତ୍‍ତେ ମେଣ୍ଡେ ଅବ୍ରାହାମ୍‍ତେ ବେନ୍ ବଂଶତଡ଼୍‍କିଙ୍କ୍ ଉଡ଼ି ଇଶ୍ୱର୍ ଆଦ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଆ ନାରୁଣ୍ଡ୍ ୱାନା ଯାକ ନିୟମ୍ ଦର୍‍କାର୍ ମାତ୍‍ତେ । ଅର୍ତୁଣ୍ଡ୍ ନାରୁଙ୍କ୍ ନାଡ଼୍‍ମେ ମାଡ଼ି ଦୂତକିନ୍ ତଡ଼୍ ନିୟମ୍ ତିଆର୍‍ ଆସ୍‍ମାତ୍‍ତେ ।
GAL 3:20 ଇତ୍‍କେ ପ୍ରତିଜ୍ଞା ତଡ଼୍ ମାତର୍‌ ୱେରଣ୍ଡ୍ ନାରୁଣ୍ଡ୍ କାଇଲି ମାତ୍‍ତଣ୍ଡ୍ । ଅଣ୍ଡ୍‌ ଅଦୁତଣ୍ଡ୍ ନିଜେ ଇଶ୍ୱର୍ ।
GAL 3:21 ନିୟମ୍ ବାତ୍ ଇଶ୍ୱର୍‌ତେ ପ୍ରତିଜ୍ଞାତିଙ୍କ୍ ବିରୁଦ୍‍ ମାଡ଼ୁତେ ? ଇଲ୍‍ଲେ, ବେସୁଟ୍‌ ଆୟ୍‍ୟ ! ବାତେଙ୍କ୍‍ଇତ୍‍କେ ନାରୁଣ୍ଡ୍‍ତିଙ୍କ୍ ଜିୱୁଣ୍ଡ୍ ଇଦାନ୍ ରକମ୍ ଯଦି ଅଣ୍ଡୟ୍‌ ନିୟମ୍ ତିଆର୍ ଆସ୍‍ମାନେଡ଼୍, ଆଲେକେ ଆଦ୍ ପାଲନ୍ ମାଡ଼ି ନାରୁଡ଼୍ ଇଶ୍ୱର୍‌ତେ କଣ୍ଡେତାଗାଙ୍କ୍ ନିର୍ଦୋଷ୍ ଆୟେଡ଼୍ ।
GAL 3:22 ଇତ୍‍କେ ଦର୍ମଶାସ୍ତ୍ରତାଗ୍ ଲେକା ମିନ୍ଦେ, ସାରେ ନାରୁଣ୍ଡ୍ ପାପ୍ ଅଦିନ୍‌ତେ ମିନ୍ଦେଡ଼୍, ଆଦିଙ୍କ୍ ବେଲା ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ି ପ୍ରତିଜ୍ଞା ଆର୍ଶିବାଦ୍‌ କ୍ରିଷ୍ଟ ବିଶ୍ୱାସୀଡ଼୍ ପାଏମ୍ ଆଦ୍‍ତଡ଼୍ ।
GAL 3:23 ବିଶ୍ୱାସ୍‍ତେ ଯୁଗ୍ ୱାଦାନ୍ ମୁନେନ୍ ନୁ ପ୍ରଚାର୍ ଆଦାନ୍ ଯାକ ନିୟମ୍ ମାନ୍‍ ସାରେତଡ଼୍‍କିଙ୍କ୍ ତହସ୍ ନେଃଏସ୍‍ ମାତ୍‍ତେ ।
GAL 3:24 କ୍ରିଷ୍ଟ ୱାଦାନ୍ ଯାକ ନିୟମ୍ ମାନ୍‍ ମେସ୍ତେର୍ ଇନା ମାତ୍‍ତେ; ଇତ୍‍କେ ତାନ୍ ପେର୍କେ, ମାତର୍‌ ବିଶ୍ୱାସ୍ ତଡ଼୍ ମାମ୍ ଇଶ୍ୱର୍‌ତେ ମୁନ୍‍ନେ ଦାର୍ମାମ୍ ଆଦ୍‍ତମ୍ ।
GAL 3:25 ଇଞ୍ଜେ ବିଶ୍ୱାସ୍‍ତାଦ୍ ଯୁଗ୍ ଏୱୁତେ, ମାମ୍ ମେଣ୍ଡେ ନିୟମ୍‍ତେ ଆଦିନ୍ ଇଲେମ୍ ।
GAL 3:26 ବିଶ୍ୱାସ୍‍ ତଡ଼୍ ଜିସୁ କ୍ରିଷ୍ଟନାଗ୍ କାୟ୍‍ଲି ମିଡ଼୍ ସାରେତଡ଼୍ ଇଶ୍ୱର୍‌ତେ ମାର୍‍ମାୟାସ୍କ୍ ଆତ୍‍ତିଡ଼୍ ।
GAL 3:27 ଏର୍‍ଦିକ୍ଷା ତଡ଼୍ ମିଡ଼୍ ସାରେତଡ଼ି କ୍ରିଷ୍ଟନ୍‍ ତଡ଼୍‍ ଅଣ୍ଡୟ୍‌ ଆତ୍‍ତିଡ଼୍ ନୁ ଇଞ୍ଜେ ଜିସୁ କ୍ରିଷ୍ଟଟନ୍ ଜିୱୁଣ୍ଡ୍ ଲେକାମ୍ ଚକା କେର୍‍ଦୁତିଡ଼୍ ।
GAL 3:28 ଆଦିଙ୍କ୍ ଯିହୁଦି ନୁ ଅଣଇହୁଦି, କ୍ରିତଦାସ ନୁ ସ୍ୱାଦିନ୍ ନାରୁଡ଼୍, ମାନେୟ୍ ଆୟି କି ନାଟାଡ଼୍ ଆୟି ତାମ୍ ଲୋପେ ବାତେ ୱେରେ ଇଲ୍‍ଲେ । ମିଡ଼୍ ସାରେତଡ଼ି ଜିସୁ କ୍ରିଷ୍ଟଟନ୍ ତଡ଼୍ କାୟ୍‍ଲି ଅଣ୍ଡୟ୍‌ ଆତ୍‍ତିଡ଼୍ ।
GAL 3:29 ଯଦି ମିଡ଼୍ କ୍ରିଷ୍ଟନ୍‍ ନାରୁଡ଼ି, ଆଲେକେ ମିଡ଼୍‍ ଗାଲା ଅବ୍ରାହାମ୍‍ତେ ବଂଶତଡ଼ି ନୁ ଇଶ୍ୱର୍ ବାତ୍ ପ୍ରତିଜ୍ଞା ମାଡ଼୍‍ତଣ୍ଡ୍, ଆଦ୍ ପାଏମ୍ ଆଦ୍‍ତିଡ଼୍ ।
GAL 4:1 ଇତ୍କେ ନାନେ ମିକିଙ୍କ୍ କେତୁତାନ୍ ମାର୍‍ ବାବାନ୍ ସାରେ ସମ୍ପତ୍ତିତ୍ ଅଦିକାରି, କିନ୍ତୁ ସାରେ ବିଷୟ୍‍ତେ ଅଦିକାରି ଆତ୍‍କେ ଗାଲା ବୟସ୍‍ ଆୟ୍‍ୱେ ଯାକ ଅଣ୍ଡ୍‌ ଦାସ ଇନା ମାନ୍ତଣ୍ଡ୍ ।
GAL 4:2 ପିଲେ ମାନ୍ଦାନ୍ ୱେଲେ, ତାମ୍ ବାବାଲ୍‍ ଟିକ୍‍ ମାଡ଼୍‍ତେ ଆଦ୍‍ ସମୟ୍ ୱାନା ଯାକ ୱେରେ ନାରୁଡ଼୍ ଯତନ୍ ଆଦ୍‍ତଡ଼୍ ନୁ ସାରେ ବିଷୟ୍ ମାଡ଼ିତଡ଼୍ ।
GAL 4:3 ଟିକ୍ ଆଦେ ରକମ୍ ମାମ୍ ଗାଲା ଦର୍ମତାଗ୍ ପିଲେ ମାନ୍ଦାନ୍ ୱେଲେ, ଆସୁଟ୍‍ ଜଗତ୍‍ତାଗ୍‍ ପ୍ରାଥମିକ ବିଷୟ୍‍ତେ ଦାସ ମାତ୍‍ତମ୍ ।
GAL 4:4 ପେର୍କେ ବେସୁଟ୍‌ ଆଦ୍ ସମୟ୍ ୱାତ୍‍ତେ, ଇଶ୍ୱର୍ ତାନ୍ ନିଜର୍ ମାରିଙ୍କ୍ ରଅତଣ୍ଡ୍ । ଅଣ୍ଡୟ୍‌ ନାଟାଡ଼୍‍ତାଗାଙ୍କ୍ ଅଣ୍ଡ୍‌ ଜନମ୍ ଆସ୍ ଇହୁଦୀଡ଼୍ ନିୟମ୍ ଅଦିନ୍‌ତାଗ୍ ବାଦ୍‍କ୍‍ତଣ୍ଡ୍ ।
GAL 4:5 ବେଲାକି ଅଣ୍ଡ୍‌‍ ଦର୍‍କାର୍ ଇସର୍ ଦାମ୍ ଇସ୍ ଆଦ୍ ନିୟମ୍‍ତେ ବନ୍ଦନ୍‍ତାଗାଙ୍କ୍ ୱେରେ ନାରୁଡ଼୍‍କ୍ ମୁକ୍ତି ମାଡ଼ାନଙ୍କ୍ ନୁ ଅଡ଼୍‌‍କିଂଙ୍କ୍ ଇଶ୍ୱର୍‌ତେ ମାର୍‍ମାୟାସ୍କ୍ ଆଦାନ୍ ସୁଯୋଗ୍ ଇଦାନଙ୍କ୍ ଅନ୍‌ ଜିୱୁଣ୍ଡ୍‍ତାଗ୍ କାମ୍‌ ମାତ୍‍ତେ ।
GAL 4:6 ମିଡ଼୍ ଇଶ୍ୱର୍‌ତେ ମାର୍‍ମାୟାସ୍କ୍‍ ଇଦ୍ ପ୍ରାମାଣ୍ ମାଡ଼ାନ୍ ସେଙ୍ଗେ, ଇଶ୍ୱର୍ ତାନ୍ ମାରିନ୍‍ ମେଲ୍‍ତେ ଜିୱୁତିଙ୍କ୍ ମାନ୍‍ ଜିୱୁଣ୍ଡ୍ ଲୋପେ ରଅତଣ୍ଡ୍ । ଆଦ୍ ପବିତ୍ର ଜିୱୁ ଗାଟି ଲେଙ୍ଗ୍‍ଦେ କେତୁତ୍, “ବାବା ! ଆ ନା ବାବା !”
GAL 4:7 ଆଦିଙ୍କ୍ ମିଡ଼୍ ମେଣ୍ଡେ କ୍ରୀତଦାସ ଆୟ୍‍ୱିଡ଼୍, ମାର୍‍ମାୟାସ୍କ୍‍ ଆତ୍‍ତିଡ଼୍ । ମିଡ଼୍ ଅନ୍‌ ମାର୍‍ମାୟାସ୍କ୍‍ ଆତ୍‍ତାଙ୍କ୍, ଇଶ୍ୱର୍ ତାମ୍ ମାର୍‍ମାୟାସ୍କିନ୍ ସେଙ୍ଗେ ବାତ୍ ନେଃଏତଣ୍ଡ୍, ଆୱୁ ସାରେ ମିକିଙ୍କ୍ ଇଦ୍‍ତଣ୍ଡ୍ ।
GAL 4:8 ମୁନେନ୍ ମିଡ଼୍ ଇଶ୍ୱର୍‌ତିଙ୍କ୍ ପୁନ୍‍ୱେ ମାତ୍‍ତିଡ଼୍, ଆଦିଙ୍କ୍ ବେନ ନିଜାତ୍ ଇଶ୍ୱର୍ ଆୟଣ୍ଡ୍, ଆଦ୍‍ରକମ୍ ମିଚ୍ ଦେୟାକିଙ୍କ୍ ପୁଜେ ମାଡ଼ମାତ୍‍ତିଡ଼୍ ।
GAL 4:9 ଇତ୍‍କେ ମିଡ଼୍ ଇଞ୍ଜେ ଇଶ୍ୱର୍‌ତିଙ୍କ୍ ପୁତ୍‍ତିଡ଼୍, ଆଦିଙ୍କ୍ ନାନ୍ କେତିତାନ୍, ଇଞ୍ଜେ ଇଶ୍ୱର୍ ମିକିଙ୍କ୍ ପୁତ୍‍ତଣ୍ଡ୍ । ଆଲେକେ ଇଦ୍ ବେଲା ଆଦ୍‍ତେ ଯେ, ମିଡ଼୍ ମେଣ୍ଡେ ଆୱୁ ଶକ୍ତି ଇଲ୍‍ୱେ ନୁ ମୁନେତ୍‍ ବିଷୟ୍‍କିନାକ୍ ମାଲ୍‍ସ୍ ଆଦାନଙ୍କ୍ ଆଲ୍‍ସୁତିଡ଼୍ ? ମିଡ଼୍ ବାତେଙ୍କ୍ ମେଣ୍ଡନ୍‍ଦାମ୍ ଅଡ଼୍‌ ଦାସ ଆଦାଙ୍କ୍ ଆଲ୍‍ସୁତିଡ଼୍ ?
GAL 4:10 ବିଶେଷ୍‍ ଗଟ୍ ମିଡ଼୍ ବେସ୍‌କ୍ ଦିନାମ୍, ନେଲ୍‍ଞ୍ଜ୍, କାଲାମ୍ ନୁ ୱାଡ଼୍‍ଷା ସେଙ୍ଗେ ଗାଟି ମାନ୍‍ ଇଦୁତିଡ଼୍ ।
GAL 4:11 ନାନ୍ ମି ସେଙ୍ଗେ ଗାଟି ଚିନ୍ତେ ମାଡ଼ୁତାନ୍ । ମି ସେଙ୍ଗେ ନାୟାଦ୍ ସାରେ ପାଡ଼ିୟ୍ ବାତ୍ ଆଙ୍ଗ୍‍ଡ଼ାମ୍ ଆଦ୍‍ତେ ?
GAL 4:12 ଦାଦାଲଡ଼ି ନୁ ହେଲାସ୍କ୍, ମିକିଂଙ୍କ୍ ନିବେଦନ୍ ମାଡ଼ୁତାନ୍, ନା ଲେକେମ୍ ଆୟ୍‍ମୁଟ୍ । ନାନ୍ ମି ଲେକେମ୍ ଆତ୍‍ତାନ୍ ନୁ ମିଡ଼୍ ନାକିଂଙ୍କ୍ କାରାପ୍ ବ୍ୟବହାର୍‌ ମାଡ଼୍‍ୱିଡ଼୍ ।
GAL 4:13 ନାନ୍ ମୁନେତ୍‍ଦାମ୍ ବାତେଙ୍କ୍ ମେଲ୍‍ତା କାବୁର୍ ପ୍ରଚାର୍ ମାଡ଼ିମାତ୍‍ତାନ୍, ଆଦିଙ୍କ୍ ଏର୍କେ ମାଡ଼ାଟ୍ । ଆସୁଟ୍ ନାନ୍ ଦୁଃକାମ୍‍ତେ ମାତ୍‍ତେ ସେଙ୍ଗେ ନାନ୍ ଇଦ୍ କେସ୍‍ମାତ୍‍ତାନ୍ ।
GAL 4:14 ଇତ୍‍କେ ନା ମେନ୍ଦୁଲ୍ ସାୟେ ଇଲ୍‍ୱେମାତ୍‍କେ ମିକା, ମିଡ଼୍‍ ନାକିଂଙ୍କ୍ ପାସ୍କ୍‍ୱିଡ଼୍ ଆଗେକ୍‍ବା ନାକିଂଙ୍କ୍ ୱେରଡ଼୍‌ ସ୍ୱର୍ଗଦୂତ ଲେକାମ୍ ଗ୍ରହନ୍‍ ମାଡ଼୍‍ତିଡ଼୍ । କ୍ରିଷ୍ଟ ଜିସୁଙ୍କ୍ ମିଡ଼୍ ବେଦ୍‍ପୁଟୁଙ୍କ୍ ଗ୍ରହନ୍‍ ମାଡ଼େଡ଼ି ଆଦେପୁଟୁଙ୍ଗ୍ ନାକିଂଙ୍କ୍ ମିକା ଗ୍ରହନ୍‍ ମାଡ଼ିମାତ୍‍ତିଡ଼୍ ।
GAL 4:15 ମିଡ଼୍ ବେସର୍ ୱେଡ଼୍‍କେ ଆସ୍‍ମାତ୍‍ତିଡ଼୍ ! ଇତ୍‍କେ ଇଞ୍ଜେ ବାତ୍ ଆତ୍‍ତେ ? ମି ବିଷୟ୍‍ତେ ନାନ୍ ଇଦ୍ ଗାଡ଼୍‍ସ୍ ଆସ୍ ଦାର୍ମିକ୍‌ତାଦ୍‍ ଗଟ୍‍ କେତାଙ୍କ୍ ପାର୍‍ୱେନ୍ ଯେ, ଦର୍‍କାର୍ ଆତ୍‍କେ, ମିଡ଼୍ ନିଜେ ନିଜର୍‍ତାୱ୍ କଣ୍ଡା ଟେଣ୍ଡି ତାସ୍ ନାକିଂଙ୍କ୍ ଇୱେଡ଼ି ।
GAL 4:16 ଇତ୍‍କେ ଇଞ୍ଜେ ନାନ୍ ନିଜାମ୍ କେତ୍‍ତାଙ୍କ୍ ବାତ୍ ମି ଶତ୍ରୁ ଆତ୍‍ତାନ୍ ?
GAL 4:17 ଆ ୱେରେ ନାରୁଡ଼୍ ମିୟାଦ୍ ମଙ୍ଗଲ୍ ସେଙ୍ଗେ ଗାଟି ଇଚ୍ଚା ମିନ୍ଦେ ଇଞ୍ଜ ତଅତିତଡ଼୍ । କିନ୍ତୁ ଇଗେ ଅଡ଼୍‌‍ୱାଦ୍ ନିଜାତ୍ ଉଦ୍ଦେଶ୍ୟ ଇଲ୍‍ଲେ । ଅଡ଼୍‌‍ୱାଦ୍ ଆଣ୍ଡୟେ ଇଚ୍ଚା, ବେଲା ମିଡ଼୍ ନାକିଂଙ୍କ୍ ପାସ୍କି ଅଡ଼୍‌‍କିଂଙ୍କ୍ ମାନ୍‍ ମାଡ଼ିତିଡ଼୍ ।
GAL 4:18 ସତ୍ ଉଦ୍ଦେଶ୍ୟ ଆସ୍ ଇଚ୍ଚା ମାଡ଼ାନାଦ୍ ସାୟେ । ନାନ୍‍ନେ ମି ତଡ଼୍ ମାନ୍ଦାନ୍ ୱେଲେ ଆୟ, ସାରେଦାମ୍ ମିଡ଼୍ ଇଦିନାଦ୍ ସତ୍ ପୁଞ୍ଜ୍‍ ପାର୍‍ଦ୍‍ତିଡ଼୍ ।
GAL 4:19 ଆ ନା ପିଲାନଡ଼ି, ମିକିଂଙ୍କ୍ କ୍ରିଷ୍ଟଟନ୍ ଲେକେମ୍ ମାଡ଼ି ତିଆର୍ ମାଡ଼ାନ୍ ସେଙ୍ଗେ ନାନ୍ ମେଣ୍ଡନ୍‍ଦାମ୍ ଜନମ୍ ମାଡ଼ାନ୍ ନପ୍ ପୁନ୍ଦ୍‍ତାନ୍ ।
GAL 4:20 ନାନ୍ ଇଞ୍ଜେ ମି ବକେତ୍ ମାନ୍ତାନ୍ ଇଞ୍ଜ ମାନ୍‍ ମିନ୍ଦେ, ଆଲେକେ ମି ବିଷୟ୍‍ତେ ନାନ୍ ମେଣ୍ଡନ୍ ଲେକାମ୍ ଆଲ୍‍ସେନ୍ । ନିଜାମ୍ ମି ସେଙ୍ଗେ ନାନ୍ ଗାଟି ଚିନ୍ତେ ମାଡ଼ୁତାନ୍ ।
GAL 4:21 ବେନଡ଼୍ ନିୟମ୍‍ତିଙ୍କ୍ ପୟ୍‍ସ୍ ମାନ୍ଦାଙ୍କ୍ ଆଲ୍‍ସିତଡ଼୍, ନାନ୍ ଅଡ଼୍‌‍କିଂଙ୍କ୍ ପାଚ୍ରା ମାଡ଼ିତାନ୍, ନିୟମ୍‍ତାଗ୍ ବାଆତେ ଲେକା ମିନ୍ଦେ, ଆଦ୍ ମିଡ଼୍ ପୁନ୍‍ୱିଡ଼୍ ?
GAL 4:22 ଆଗେ ଲେକା ମିନ୍ଦେ, ଅବ୍ରାହାମ୍‌ତିଙ୍କ୍ ଇର୍‍ୱୁଡ଼୍ ମାର୍‍କ୍ ମାତ୍‍ତଡ଼୍, ୱେରଣ୍ଡ୍ କ୍ରିତଦାସିନ୍ ମାର୍‍ ନୁ ମେଣ୍ଡେ ଅର୍ତୁଣ୍ଡ୍ ତାନ୍ ମୁତେନ୍ ମାର୍‍ ।
GAL 4:23 କ୍ରିତଦାସିନ୍ ମାର୍‍ ଆସାମ୍ ଜନମ୍ ଆସ୍ ମାତ୍‍ତଣ୍ଡ୍ କିନ୍ତୁ ତାନ୍ ପେଣ୍ଡୁଲ୍ ଆତ୍‍ତେ ମୁତେନ୍ ମାର୍‍ ଇଶ୍ୱର୍‌ତେ ପ୍ରତିଜ୍ଞା ଇସାପ୍‍ତେ ଜନମ୍ ଆସ୍ ମାତ୍‍ତଣ୍ଡ୍ ।
GAL 4:24 ଇୱୁ ସାରେ ଗଟିନାୱ୍ ଅର୍ତ ମିନ୍ଦେ, ଇତ୍‍କେ ଇୱୁ ନାଟା ରେଣ୍ଡ୍ ନିୟମ୍ ଲେକାମ୍; ଅଣ୍ଡୟ୍‌ ନିୟମ୍ ସିନୟ ମେଟେତାଗାଙ୍କ୍ ୱାସ୍‍ ମାନ୍ଦାନ୍ ଚିହ୍ନେ, ଆଦ୍ ଦାସନ୍ ସେଙ୍ଗେ ମାର୍‍ ଜନମ୍ ମାଡ଼ାନାଦ୍, ଆଗାର ଆଦୁତ୍ ଆଦିନାଦ୍ ଉଦାରନ୍ ।
GAL 4:25 ଆଗାର, ଇଦ୍ ଗଟ୍‍ ଆରବ ଦେଶ୍‌ତାଗ୍ ସିନୟ ମେଟେତିଙ୍କ୍ କେତିତଡ଼୍, ମେଣ୍ଡେ ଆଦ୍ ଇଞ୍ଜେତ୍‍ ଯିରୁଶାଲେମ୍ ତଡ଼୍ ସାମାନ୍, ବାତେଙ୍କ୍ଇତ୍‍କେ ଆଗାର ଲେକେମ୍‍ ଯିରୁଶାଲେମ୍ ନୁ ଆଗେ ମାନ୍ଦାନ୍‍ ଆଦିବାସୀ ନାରୁଡ଼୍‍ ଇଞ୍ଜେ ଦାସ ଇନା ମିନ୍ଦେଡ଼୍‍ ।
GAL 4:26 କିନ୍ତୁ ପରତ୍ ଯିରୁଶାଲେମ୍‍ ସ୍ୱାଦିନ୍, ଆଦ୍ ମାନ୍‍ ୟାୟ;
GAL 4:27 ଆଦିଙ୍କ୍ ଲେକାମିନ୍ଦେ, “ଆ ୱାଞ୍ଜ ନାଟାନଡ଼ି, ପିଲା ଇଲ୍‍ୱେ ନାଟାନଡ଼ି, ୱେଡ଼୍‍କେ ଆୟ୍‍ମୁଟ୍, ବେସୁଟ୍‌ ଡଙ୍କେ ନପ୍ ଆୟ୍‍ୱେ ମାତ୍‍କେ ଗାଲା, ଗାଟି ଲେଙ୍ଗ୍‍ଦେ ଜୟ୍‍ଜୟ୍ ମାଡ଼ାଟ୍; ବାତେଙ୍କ୍ଇତ୍‍କେ ମୁଦ୍‍ପାନ୍ ତଡ଼୍ ମାନ୍ଦାନ୍ ନାଟାଡ଼୍ କଞ୍ଚ୍ ୱେରଡ୍ ୱିଡ଼୍‍ସ୍ତେ ନାଟାଡ଼୍‍ତେ ମାର୍‍କ୍ ନାର୍ଗେ ।”
GAL 4:28 ଆ ଦାଦାଲଡ଼ି ନୁ ହେଲାସ୍କ୍‍, ଅନ୍‌‍ ପ୍ରତିଜ୍ଞା ଲେକାମ୍‌ ମିଡ଼୍ ଇଞ୍ଜେ ଇଶ୍ୱର୍‌ତେ ଚିଟି‍ ଲେକାମ୍ ମାର୍‍କିଡ଼୍‍ ।
GAL 4:29 ବାତେଙ୍କ୍ ଇତ୍କେ ମେନ୍ଦୁଲ୍‍ ପୟ୍‍ସ୍ ବେନ ପୁଟ୍‍ତଣ୍ଡ୍, ଅଣ୍ଡ୍‌ ବେଲା ଆଦ୍‍ ସମୟ୍‍ତେ ଇଶ୍ୱର୍‌ତେ ନିୟମ୍ ଇସାପ୍‍ତେ ପୁଟ୍‍ତେ, ଅଡ଼୍‌‍କିଂଙ୍କ୍ ତାଡ଼ନା ମାଡ଼ମାତ୍‍ତଡ଼୍, ଆଦେରକମ୍ ଇଞ୍ଜେ ଗାଲା ଆଦୁତ୍ ।
GAL 4:30 ମାତର୍‌ ଶାସ୍ତ୍ର ବାତ୍ କେତୁତେ ? ଦାସିଙ୍କ୍ ନୁ ତାନ୍ ମାରିଙ୍କ୍ ପେସ୍ପିମୁଟ୍; ବାତେଙ୍କ୍‍ ଇତ୍କେ ଦାସିନ୍ ମାର୍‍ ସ୍ୱାଦିନ୍ ନାଟାଡ଼୍‍ତେ ମାର୍‍ ତଡ଼୍ ଉତ୍ତରାଦିକାରୀ ଆୟଣ୍ଡ୍ ।
GAL 4:31 ଆଦିଙ୍କ୍ ଦାଦାଲଡ଼ି ନୁ ହେଲାସ୍କ୍‍, ମାନାଡ଼୍ ଦାସିନ୍ ମାର୍‍କ୍ ଆୟମ୍, ଇତ୍‍କେ ପେଣ୍ଡୁଲ୍‍ ଆତ୍‍ତେ ନାଟାଡ଼୍‍ତେ ମାର୍‍କ୍ ।
GAL 5:1 ମାନାଡ଼୍‍ ସ୍ୱାଦିନ୍‍, ସ୍ୱାଦିନତା ମାଇଦିଙ୍କ୍ କ୍ରିଷ୍ଟ ମାନାଙ୍କ୍ ମୁକ୍ତି ମାଡ଼ିମିନ୍ଦେଣ୍ଡ୍; ଆଦିଙ୍କ୍ ଗାଡ଼୍‍ସ୍‍ ଆସ୍ ମାନୁଟ୍ ନୁ ଦାସ ଯୁଆଡ଼ିତାଗ୍ ମେଣ୍ଡେ ଯଡ଼େମ୍ ଆୟ୍‍ମାଟ୍ ।
GAL 5:2 କେଞ୍ଜାଟ୍, ନାନ୍ ପାଉଲ୍ ମିକିଙ୍କ୍ କେତୁତାନ୍, ଯଦି ମିଡ଼୍ ସୁନ୍ନତ ଆଦ୍‍ତିଡ଼୍, ଆଲେକେ କ୍ରିଷ୍ଟଟନ୍ ତଡ଼୍ ମିୟାଦ୍ ବାତ୍ ଲାବ୍ ଆୟ ।
GAL 5:3 ନାନ୍ ସୁନ୍ନତ ପାଏମ୍ ଆଦାନଡ଼୍ ସାରେ ତଡ଼୍‍କିଙ୍କ୍ ମେଣ୍ଡନ୍‍ଦାମ୍ କେତୁତାନ୍ ଯେ, ମୋଶାନ୍‌‌ ନିୟମ୍ ସାରେ ପାଲନ୍ ମାଡ଼ାନ୍ ସେଙ୍ଗେ ଅଡ଼ାଦ୍‌‍ ଦାୟିତ୍ୱ ।
GAL 5:4 ମିଇ ଲୋପେଙ୍କ୍‍ ବେସ୍‍କ୍‍ତୁଡ଼୍‍ ନିୟମ୍ ତଡ଼୍ ଦାର୍ମାମ୍ ଆଦାନଙ୍କ୍ ଆଲ୍‍ସୁତିଡ଼୍, ମିଡ଼୍ କ୍ରିଷ୍ଟନାଗାଙ୍କ୍ ୱେରେ ଆତ୍‍ତିଡ଼୍, ମିଡ଼୍ ଇଶ୍ୱରତେ ଅନୁଗ୍ରହ ତାଗାଙ୍କ୍ ୱେରେ ଆତ୍‍ତିଡ଼୍ ।
GAL 5:5 ଇତ୍‍କେ ମାନାଡ଼୍ ଆଶେ ନେଃଏସ୍‍ ମିନ୍ଦେଡ଼୍‍ ଯେ, ଇଶ୍ୱର୍ ମାନାଙ୍କ୍‍ ନିର୍ଦୋଷ୍‍ ମାଡ଼ିତଣ୍ଡ୍‍, ମାନ୍‍ୱାଦ୍‍ ବିଶ୍ୱାସ୍‍ ଲେକାମ୍‍, ମାନ୍‍ ଲୋପେ ପାଡ଼୍‍ୟି ମାଡ଼ମାନ୍ଦାନ୍‍ ପବିତ୍ର ଆତ୍ମାନ୍ ଶକ୍ତିତଡ଼୍ ବିଶ୍ୱାସ୍ ମାଡ଼ ମାନ୍ଦାନ୍ ସେଙ୍ଗେ ଦାର୍ମାମ୍ ପାଏମ୍ ଆଦାନ୍ ଆସେତିଙ୍କ୍ କେପମିନ୍ଦେମ୍ ।
GAL 5:6 ଆଦିଙ୍କ୍ କ୍ରିଷ୍ଟ ଜିସୁନ୍ ତଡ଼୍ ଜିୱୁଣ୍ଡ୍ ବାଦ୍‍କେ ସୁନ୍ନତ କି ଅସୁନ୍ନତ ବାତେବା ୱେରେ ମାନ, ଇତ୍‍କେ ବିଶ୍ୱାସ୍‍ତାଗ୍ ଗାଡ଼୍‍ସ୍ ମାଞ୍ଜ୍ ପ୍ରେମତଡ଼୍ ପାଡ଼୍‍ୟି ମାଡ଼ାନାଦ୍ ସାୟେ ।
GAL 5:7 ମିଡ଼୍ ସାୟେ ଲେକାମ୍ ପାଡ଼ିୟି ମାଡ଼ମାତ୍‍ତିଡ଼୍, ସତ୍‍ ଆର୍‍ତାଗ୍‍ ଆଦାନ୍‍ୱେଲେ ବେନ ମିକିଙ୍କ୍ ମନାମାଡ଼୍‍ତଣ୍ଡ୍ ? ଅଣ୍ଡ୍‌‍ ବେଲା ସତ୍ ଆର୍‍ଦାଗ୍ ଆନ୍‌‍ମାଟ୍ ଇଞ୍ଜ କେତ୍‍ତଣ୍ଡ୍‍ ?
GAL 5:8 ମିକିଙ୍କ୍ କାର୍‍ଙ୍ଗ୍‍ତେ ଇଶ୍ୱର୍‌ତାଗାଙ୍କ୍ ଇଦ୍ ଗଟ୍ ୱାଡ଼ ।
GAL 5:9 ଗଟ୍‍ତାଗ୍ ମିନ୍ଦେ, “ପିସ୍‍କ୍‍ତେ ମଇଦାତିଙ୍କ୍ ତୟ୍‍ସ୍ପାନ୍ ମାଇଦିଙ୍କ୍ ସୁଦୁଟ୍ ଇନା କମିର ଦର୍‍କାର୍ ।”
GAL 5:10 ଆଦ୍‍ ବାତ୍‍ ଆୟି, ଇଞ୍ଜେକ୍‍ଆନା ମୀଇ ମିଡ଼୍ ଯେ ମେଣ୍ଡନ୍‍ରକମ୍ ବିଚାର୍ ମାଡ଼୍‍ୱିଡ଼୍, ଇଦ୍ ନାୟାଦ୍ ମି ବିଷୟ୍‍ତେ ପ୍ରବୁନାଗ୍ ଗାଟି ବିଶ୍ୱାସ୍ ମିନ୍ଦେ; ଇତ୍‍କେ ମିଡ଼୍ ଗାଟି ଦାନ୍ଦେ ଆଦୁତିଡ଼୍, ଅଣ୍ଡ୍‌ ବେନବା ଆୟିଣ୍ଡ୍, ତାନ୍ ଦଣ୍ଡ୍ ପାଏମ୍ ଆଦ୍‍ତଣ୍ଡ୍ ।
GAL 5:11 ଆଦିଙ୍କ୍ ଆ ଦାଦାଲଡ଼ି ନୁ ହେଲାସ୍କ୍ ନଡ଼ି, ଯଦି ନାନ୍ ଇଞ୍ଜେ ଗାଲା ସୁନ୍ନତବିଦି ପ୍ରଚାର୍ ମାଡ଼ୁତାନ୍, ଆଲେକେ ବାତେଙ୍କ୍ ନାନ୍ ଇଞ୍ଜେ ଗାଲା ତାଡ଼ନା ପାଏମ୍ ଆଦୁତାନ୍ ? ଆଲେକେ କ୍ରିଷ୍ଟନ୍‍ କ୍ରୁଶ ତ ଇଞ୍ଜେ ଅସୁବିଦାତେ ବିଷୟ ଆୟ ।
GAL 5:12 ବେନଡ଼୍ ମିକିଙ୍କ୍ ଇଞ୍ଜେ ଗାଲା ଦାନ୍ଦେ ମାଡ଼ୁତଡ଼୍, ଅଡ଼୍‌‍କିଂଙ୍କ୍‍ ମଦଲ୍ କଞ୍ଚ୍ ଯୌନଆଙ୍ଗ କୟ୍‍କେ, ସାୟେ ଆୟେଡ଼୍ ।
GAL 5:13 ଆ ଦାଦାଲଡ଼ି ନୁ ହେଲାସ୍କ୍‍ ନଡ଼ି, ମିଡ଼୍ ସ୍ୱାଦିନତା ସେଙ୍ଗେ ୱାତ୍‍ତିଡ଼୍; ଆଦିଙ୍କ୍ ମେନ୍ଦୁଲ୍‍ତେ ଆଶେ ପୁରା ମାଡ଼ାନ୍ ସେଙ୍ଗେ ମଜା ମାଡ଼୍‍ମାଟ୍, ମିଡ଼୍ ମି ଲୋପେ ପ୍ରେମତେ ଦାସ ଆୟ୍‍ମୁଟ୍ ।
GAL 5:14 ବାତେଙ୍କ୍ଇତ୍‍କେ ସାରେ ନିୟମ୍ ଇଦ୍ ଅଣ୍ଡୟ୍‌ ବାକ୍ୟତଡ଼୍ ପୁରା ଆତ୍‍ତେ, “ମିଡ଼୍ ମିୱଡ଼୍ ଗାରେତଡ଼୍‍କିଂଙ୍କ୍ ଜିୱୁଣ୍ଡ୍ ଲେକାମ୍ ପ୍ରେମ ମାଡ଼ାଟ୍ ।”
GAL 5:15 ମିଡ଼୍ ଯଦି କାସାକାଚି ଆସ୍ ମି ମିଲୋପେ ପୟ୍‍ତିତିଡ଼୍, ଆଲେକେ ସତର୍କ ଆୟ୍‍ମୁଟ୍, ବେଲାକି ମିଡ଼୍‍ ମି ଲୋପେ ନସ୍‍ଟ ଆୟ୍‍ୱିଡ଼୍ ।
GAL 5:16 ନାନ୍ କେତାନାଦ୍ ଗଟ୍ ଅଦୁତ୍, ପବିତ୍ର ଆତ୍ମା ମିୟାଦ୍‍ ଆତ୍ମାତିଙ୍କ୍‍ ଚାଲେମ୍ ମାଡ଼ି, ଆଲେକେ ମିଡ଼୍ ନାରୁଡ଼ାଦ୍‍ ମେନ୍ଦୁଲ୍ ଲାଲ୍‍ସାତିଙ୍କ୍ ମେଣ୍ଡେପୁରା ମାଡ଼୍‍ୱିଡ଼୍ ।
GAL 5:17 ବାତେଙ୍କ୍ଇତ୍‍କେ ମେନ୍ଦୁଲ୍ ଲାଲ୍‍ସା ଜିୱୁଣ୍ଡ୍‍ତିଙ୍କ୍ ବିରୁଦ୍ ମାଡ଼ିତ୍, ମେଣ୍ଡେ ଜିୱୁଣ୍ଡ୍‍ତାଦ୍ ଲାଲ୍‍ସା ମେନ୍ଦୁଲ୍‍ତିଙ୍କ୍ ବିରୁଦ୍ ମାଡ଼ିତ୍, ଆଦିଙ୍କ୍ ଇୱୁ ରେଣ୍ଡ୍ ଇପାକ୍ ନୁ ଆପାକ୍; ଆଦିଙ୍କ୍ ମିଡ଼୍ ବାତ୍ ବାତ୍ ଇଚ୍ଚା ମାଡ଼ିତିଡ଼୍, ଆୱୁ ସାରେ ମାଡ଼ାନଙ୍କ୍ ପାର୍‍ୱିଡ଼୍ ।
GAL 5:18 ମିଡ଼୍ ଯଦି ପବିତ୍ର ଆତ୍ମା ତଡ଼୍ ଚାଲେମ୍ ଆଦ୍‍ତିଡ଼୍, ଆଲେକ୍ ନିୟମ୍‍ ଅଦିନ୍‌ତେ ଆୟ୍‍ୱିଡ଼୍‍ ।
GAL 5:19 ମେନ୍ଦୁଲ୍‍ତାୱୁ ପାଡ଼୍‍ୟି ସାରେ ତ ସାୟେ ପୁତ୍‍ତାଡ଼୍, ଦାରି ପାଡ଼୍‍ୟି, ଅଶୁଚି, କାମନା ବା କାରାପ୍‍ ପାଡ଼୍‍ୟି,
GAL 5:20 ପୁତ୍‍ଲାମ୍‍ପୁଜା, ୱାଡେ ବିଦ୍ୟା, ଶତ୍ରୁତା, ଗଲ୍‍କ୍, ଆଂକାର୍‍, କପାମ୍‍, ସ୍ୱାର୍ତପର, ମାନ୍ଦେବିରୁଦ୍, ଗଟ୍‍ବିରୁଦ୍,
GAL 5:21 ଇର୍ସା, ମାତ୍‍ୱାରି, ରଙ୍ଗରସ, ଇଦ୍‍ଲେକେତ୍ କାମ୍‍ସାରେ; ନାନ୍‍ ମୁନେଙ୍କ୍ ବେଲାନ୍ କେସ୍‍ମାତ୍‍ତାନ୍, ଆଦେଲେକାମ୍ ମୁନେନ୍ କେତୁତାନ୍ ଯେ, ବେନଡ଼୍ ଇୱୁ ସାରେ କାମ୍‍ ମାଡ଼ିତନ୍, ଅଡ଼୍‌ ଇଶ୍ୱର୍‌ତେ ରାଜ୍ୟତାଗ୍ ଅଦିକାରି ଆୟଡ଼୍ ।
GAL 5:22 ଇତ୍‍କେ ପବିତ୍ର ଆତ୍ମାନ୍‍ ଦାନ ଆଦୁତ୍‍ ପ୍ରେମ, ୱେଡ଼୍‍କେ, ଶାନ୍ତି, ଦର୍ଯ୍ୟ, ଉପକାର୍, ସାୟେତଣ୍ଡ୍‍, ବିଶ୍ୱାସ୍‍ତଣ୍ଡ୍‍
GAL 5:23 ନମ୍ର ନୁ ଆତ୍ମସଂଯମ୍; ଇୱୁ ସାରେ ବିରୁଦ୍‍ତେ ବାତେ ନିୟମ୍ ଇଲ୍‍ଲେ ।
GAL 5:24 ବେନଡ଼୍ କ୍ରିଷ୍ଟ ଜିସୁନ୍ ନାରୁଡ଼୍, ଅଡ଼୍‌ ମେନ୍ଦୁଲ୍‍ତିଙ୍କ୍ ଆଦିନ୍ ଇଚ୍ଚା ନୁ ଆଶେ ତଡ଼୍ କ୍ରୁଶତାଗ୍ ଆୱୁକ୍‍ତଡ଼୍ ।
GAL 5:25 ଯଦି ମାନାଡ଼୍ ପବିତ୍ର ଆତ୍ମାତଡ଼୍ ଜିୱୁଣ୍ଡ୍ ପାଏମ୍ ଆତ୍‍ତାଡ଼୍, ଆଲେକେ ଅଣ୍ଡ୍‌‍ ମାନ୍‍ ଜିୱେତିଙ୍କ୍‍ ମିକା ଚାଲା ମାଡ଼ିଣ୍ଡ୍‍ ।
GAL 5:26 ମାନାଡ଼୍ ଆଙ୍ଗ୍‍ଡ଼ାମ୍ ଗର୍ବ ତଅସ୍ ମାନ୍‍ ମାନ୍‍ଲୋପେ କପାମ୍ ଆୟ୍‍ୱାଡ଼୍ ନୁ ମାନ୍‍ ମାନ୍‍ଲୋପେ ଇର୍ସା ଆୟ୍‍ୱାଡ଼୍ ।
GAL 6:1 ଅ ଦାଦାଲଡ଼ି ନୁ ହେଲାସ୍କ୍ ନଡ଼ି ଯଦି ବେନ ଅପରାଦ୍ ମାଡ଼ି ଦରାପଡ଼େମ୍ ଆଦ୍‍ତଣ୍ଡ୍, ପବିତ୍ର ଆତ୍ମା ଜିୱୁତଡ଼୍ ନିଜେ, ମିଡ଼୍ ନମ୍ର ଆସ୍ ଆସତ୍ ନାରୁଙ୍କ୍ ବୁଜା ମାଡ଼ାଟ୍, ଆମ୍ଭ ନିଜେକଟ ପରିକ୍ଷାତାଗ୍ ରାୟାନଙ୍କ୍ ଆଦ୍‍ତେ, ଆଦିନ୍ ସେଙ୍ଗେ ନିଜେ ସତର୍କ ଆୟ୍‍ମୁଟ୍ ।
GAL 6:2 ନିଜେ ନିଜର୍ ଦାୟିତ୍ୱ ଆୟ୍‍ମୁଟ୍; ଇଦ୍ ରକମ୍ ମିଡ଼୍ କ୍ରିଷ୍ଟଟନ୍ ନିୟମ୍ ପୁରା ମାଡ଼ିତିଡ଼୍ ।
GAL 6:3 ଯଦି ବେନ ଆୟି ସୁଦୁନଣ୍ଡ୍ ଆସ୍‍ ଗାଲା ନିଜେତିଙ୍କ୍ ବାଡ଼୍‍ୟଣ୍ଡ୍ ଇଞ୍ଜ ଆଲ୍‍ସିତଣ୍ଡ୍, ଆଲେକେ ଅଣ୍ଡ୍‌ ନିଜେତିଙ୍କ୍ ବୁସାମାଡ଼ିତଣ୍ଡ୍ ।
GAL 6:4 ବାତେଙ୍କ୍ଇତ୍‍କେ ସାରେତଡ଼୍ ତାମ୍ ପାଡ଼ିୟି ପରିକ୍ଷା ମାଡ଼ିଡ଼୍, ଆଲେକେ ଅଣ୍ଡ୍‌ ମେଣ୍ଡେଅଡ଼୍‌‍ତିନ୍ ତଡ଼୍ ତୁଲନା ମାଡ଼୍‍କେ ଗର୍ବ ମାଡ଼କଟ ନିଜର୍ ଗର୍ବ ବିଷୟ୍‍ତେ ପୁନ୍ଦ୍‍ତଣ୍ଡ୍;
GAL 6:5 ବାତେଙ୍କ୍ଇତ୍‍କେ ସାରେତଡ଼୍ ନିଜର୍ ଦାୟିତ୍ୱ କାଞ୍ଜାନଙ୍କ୍‍ ଆଦ୍‍ତେ ।
GAL 6:6 ବେନ ଇଶ୍ୱର୍‌ତେ ବାକ୍ୟତଡ଼୍ ଶିକ୍ଷା ପାଏମ୍ ଆଦ୍‍ତଣ୍ଡ୍, ଅଣ୍ଡ୍‌ ଶିକ୍ଷା ଇଦାନଡ଼୍‍କିଂଙ୍କ୍ ସାରେ ସାୟେତ୍ ବିଷୟ କେଲିଣ୍ଡ୍ ।
GAL 6:7 ବୁଲ୍‍କା ଆୟ୍‍ମାଟ୍; ଇଶ୍ୱର୍ ବାକ୍‍ୱା ନାରୁଣ୍ଡ୍ ଆୟଣ୍ଡ୍; ବାତେଙ୍କ୍ଇତ୍‍କେ ନାରୁଣ୍ଡ୍ ବାତ୍ ୱିତିତଣ୍ଡ୍, ଆଦିଂକେ କୟ୍‍ଦ୍‍ତଣ୍ଡ୍ ।
GAL 6:8 ଆଦିଙ୍କ୍ ବେନ ନିଜର୍ ମେନ୍ଦୁଲ୍ ଇସାପ୍‍ତେ ୱିତିତଣ୍ଡ୍, ଅନ୍‌ ମେନ୍ଦୁଲ୍‍ତାଗାଙ୍କ୍ ତିଆର୍‍ ଆତ୍‍ତେ ତେରାନ୍ ସସ୍ୟତିଙ୍କ୍ କୟ୍‍ଦ୍‍ତଣ୍ଡ୍; ବେନ ଜିୱୁ ଇସାପ୍‍ତେ ୱିତିତଣ୍ଡ୍, ଅଣ୍ଡ୍‌ ଜିୱୁତାଗାଙ୍କ୍ ତିଆର୍‍ ଆତ୍‍ତେ ଅନନ୍ତ ଜିୱୁଣ୍ଡ୍ ଲେକାମ୍ ସସ୍ୟ କୟ୍‍ଦ୍‍ତଣ୍ଡ୍ ।
GAL 6:9 ମାନାଡ଼୍ ସାୟେତ୍ ପାଡ଼୍‍ୟି ମାଡ଼ାନାଗ୍ ଆୟ୍‍ୱାନାଦ୍ ଆୟ; ବାତେଙ୍କ୍ଇତ୍‍କେ ଆୟ୍‍ୱେ କଞ୍ଚ୍ ମାତ୍‍କେ ଲେକେତ୍ ସମୟ୍‍ତେ ପେଡ଼େକ୍ କୟ୍‍ଦିତାଡ଼୍ ।
GAL 6:10 ଆଦିଙ୍କ୍ ମାନାଡ଼୍ ସୁଯୋଗ୍ ଇସାପ୍‍ତେ ସାରେତଡ଼ାୱୁ, ଅଣ୍ଡୟ୍‌‍ ଲନ୍‍ତେ ବିଶ୍ୱାସି ସାରେତଡ଼ାଦ୍ ସାୟେ ମାଡ଼ିକାଡ଼୍ ।
GAL 6:11 ଉଡ଼ାଟ୍, ବେଲା ବେଡ଼୍‍ୟା ଅକର୍‍ତେ ନାୱେ ନିଜର୍‍ କାୟ୍‍ତଡ଼୍ ନାନ୍ ମି ବକେତ୍ ଲେକିମିନ୍ଦେନ୍ ।
GAL 6:12 ବେନଡ଼୍ ବାୟ୍‍ଦେ କ୍ରିୟାକର୍ମ୍ ମାଡ଼ି କ୍ୟାତି ଆଦାନଙ୍କ୍ ଇଚ୍ଚା ମାଡ଼ିତଡ଼୍, ଅଡ଼୍‌ ମିକିଙ୍କ୍ ସୁନ୍ନତ ଆଦାନଙ୍କ୍ ବାଦ୍ୟ ମାଡ଼ିତଡ଼୍, କ୍ରିଷ୍ଟଟନ୍ କ୍ରୁଶତ୍ ସେଙ୍ଗେ ଅଡ଼୍‌ ବେଲା ତାଡ଼ନା ପାଏମ୍ ଆୟଡ଼୍, ଆଦିଙ୍କ୍ ଅଡ଼୍‌ ଆଲା ମାଡ଼ିତଡ଼୍ ।
GAL 6:13 ବାତେଙ୍କ୍ଇତ୍‍କେ ବେନଡ଼୍ ସୁନ୍ନତ ନିୟମ୍‍ତିଙ୍କ୍ ସପଟ୍ ମାଡ଼ିତଡ଼୍, ଅଡ଼୍‌ ନିଜେ ମୋଶାନ୍‌ ନିୟମ୍‍ତିଙ୍କ୍ ପାଲନ୍ ମାଡ଼ଡ଼୍, ଆଦିଙ୍କ୍ ଅଡ଼୍‌ ବେଲା ମି ମେନ୍ଦୁଲ୍ ବିଷୟ୍‍ତେ ଗର୍ବ ମାଡ଼ିତଡ଼୍, ଆଦିଙ୍କ୍ ଅଡ଼୍‌ ମିକିଙ୍କ୍ ସୁନ୍ନତ ମାଡ଼ାନଙ୍କ୍ ଇଚ୍ଚା ମାଡ଼ିତଡ଼୍ ।
GAL 6:14 ଆଦିଙ୍କ୍ ମାନାଡ଼୍ ପ୍ରବୁ ଜିସୁ କ୍ରିଷ୍ଟଟନ୍ କ୍ରୁଶତିଙ୍କ୍ ୱିଡ଼୍‍ସି ମେଣ୍ଡେ ବେଗେ ଗର୍ବ ମାଡ଼ାନାଦ୍ ନାୟାଗାଙ୍କ୍ ଜେକେ ମାନି; ଅନ୍‌ ତଡ଼୍ ନାନ୍‍ ଜଗତ୍ ସେଙ୍ଗେ ନୁ ଜଗତ୍ ନା ସେଙ୍ଗେ କ୍ରୁଶତାଗ୍ ଡଲିମିନ୍ଦେ ।
GAL 6:15 ବାତେଙ୍କ୍ ଇତ୍କେ ସୁନ୍ନତ କି ଅସୁନ୍ନତ ବାତେ ମିକା ଆୟ, ଆଦିଙ୍କ୍ ପୁଃନାଦ୍ ତିଆର୍‍ ଆତ୍‍କେ ସାୟେ ।
GAL 6:16 ମେଣ୍ଡେ ବେସ୍‍କ୍‍ତୁଡ଼୍‍ ନାରୁଡ଼୍ ଇଦ୍ ନିୟମ୍ ଇସାପ୍‍ତେ ଚାଲେମ୍ ଆଦ୍‍ତଡ଼୍, ଅଡ଼୍‌ ପର ନୁ ଇଶ୍ୱର୍‌ତେ ଇସ୍ରାଏଲ୍ ପର ଶାନ୍ତି ନୁ ଦୟା ଆୟି ।
GAL 6:17 ନେଟ୍‍ଟେ କଞ୍ଚ୍ ମେଣ୍ଡେ ବେନ ନାକିଂଙ୍କ୍ ତିପାଲ୍ ଆୟ୍‍ମାକି, ବାତେଙ୍କ୍ଇତ୍‍କେ ନାନ୍ ନା ମେନ୍ଦୁଲ୍‍ତାଗ୍ ଜିସୁନ୍ ଦେବ୍‍ ଚିହ୍ନେ ପୟ୍‍ସ୍‍ମିନ୍ଦେନ୍‍, ଆଗାଙ୍କ୍ ତନ୍ଦୁତ୍‍ ଯେ, ନାନ୍ ଜିସୁନ୍ କ୍ରିତଦାସ ।
GAL 6:18 ଆ ଦାଦାଲଡ଼ି ନୁ ହେଲାସ୍କ୍ ନଡ଼ି, ମାନ୍‍ ପ୍ରବୁ ଜିସୁ କ୍ରିଷ୍ଟଟନ୍ ଅନୁଗ୍ରହ ମିୟାଦ୍ ଜିୱେତ୍ ତଡ଼୍ ମାନି । ଆମେନ୍‍ ।
EPH 1:1 ଇଶ୍ୱର୍‌ତେ ଇଚ୍ଛା ଲେକାମ୍ କ୍ରିଷ୍ଟ ଜିସୁନ୍ ୱେରଣ୍ଡ୍ ପ୍ରେରିତ୍ ଶିଷ୍ୟ ଲେକାମ୍ ନିଯୁକ୍ତି ଆସ୍‍ମାନ୍ଦାନ୍ ପାଉଲ୍, ଜିସୁ କ୍ରିଷ୍ଟନ୍ ତଡ଼୍ କାଇଲି ମିକା ବିଶ୍ୱାସ୍‍ତେ ବାଦ୍‍କମାନ୍ଦାନ୍ ଏଫିସିତେ ଇଶ୍ୱର୍‌ତେ ନାରୁଡ଼୍ ପାକେ ଲେକିମାନ୍ଦାନ୍ ଇଦ୍ ଚିଟି,
EPH 1:2 ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
EPH 1:3 ଦନ୍ୟ ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ । ବାତେଙ୍କ୍‍ଇତ୍କେ ଅଣ୍ଡ୍‌ ମାନ୍‍ କ୍ରିଷ୍ଟନ୍‍ତଡ଼୍ କାଲ୍‍ପି ସ୍ୱର୍ଗ ନାରିନ୍ ସାରେ ଆତ୍ମିକ୍ ଆର୍ଶିବାଦ୍ ମାଡ଼୍‍ତନ୍ ।
EPH 1:4 କ୍ରିଷ୍ଟନାଗ୍‍ କାୟ୍‍ଲି ମାନାଡ଼୍‍ ବେଲା ଇଶ୍ୱର୍‌ତେ ନାରୁଡ଼୍‍ ଆଦ୍‍ତାଡ଼୍‍, ଅଦିନ୍‌ ସେଙ୍ଗେ ଜଗତ୍‍ ସୃଷ୍ଟି ଆଦାନ୍‍ ମୁନେଙ୍କ୍‍ ଅଣ୍ଡ୍‌‍ ମାନାଙ୍କ୍‍ ଏଞ୍ଚି ମିନ୍ଦେଣ୍ଡ୍‍ । ଆଦିଙ୍କ୍‍ ଅନ୍‌‍ ପ୍ରେମତେ ମାନାଡ଼୍‍ ଅନ୍‌‍ ମୁନ୍ନେ ପବିତ୍ର ନୁ ନିର୍ଦୋଷ୍‍ ଆତ୍‍ତାଡ଼୍‍ ।
EPH 1:5 ଜିସୁ କ୍ରିଷ୍ଟନ୍ ତଡ଼୍‍ ଅଣ୍ଡ୍‌ ମାନାଙ୍କ୍‍ ତାନ୍ ପିଲାନ୍ ଲେକାମ୍ ଗ୍ରହନ୍ ମାଡ଼ାନଙ୍କ୍ ଆଲ୍‍ସି ମାତ୍‍ତଣ୍ଡ୍‍; ଇଦେକେ ମାତ୍‍ତେ ଅନାଦ୍‌ ୱେଡ଼୍‍କ୍‍ ନୁ ଇଚ୍ଛା ।
EPH 1:6 ଇଶ୍ୱର୍‌ତେ ପ୍ରେମତାଦ୍ ଅନୁଗ୍ରହ ସେଙ୍ଗେ ନୁ ତାନ୍ ପ୍ରିୟ ମାର୍‍ଦିଙ୍କ୍ ବିନା ମୁଲ୍ୟବାନ୍‍ ଦାନ ଲେକାମ୍ ପାଏମ୍ ଆସ୍‍ମାନ୍ଦାନ୍ ମାୟ୍‍ଦିଙ୍କ୍‍, ମାମ୍‍ମେ ଇଶ୍ୱର୍‌ତିଙ୍କ୍‍ ଦନ୍ୟବାଦ୍ ମାଡ଼ୁତମ୍ ।
EPH 1:7 କ୍ରିଷ୍ଟ ଡଲ୍‍ତାଙ୍କ୍ ମାନାଡ଼୍‍ ମୁକ୍ତି ପାଏମ୍‍ଆତ୍‍ତାଡ଼୍, ଅର୍ତାତ୍‍ ମାନ୍‍ୱାଦ୍‍ ସାର୍ରେ ପାପ୍ କ୍ଷମା ଆତ୍‍ତେ । ଇଶ୍ୱର୍‌ତେ ଅନୁଗ୍ରହ ବେସର୍‍ ମହାନ୍ !
EPH 1:8 ଆଦ୍ ଅଣ୍ଡ୍‌ ମାନାଙ୍କ୍‍ ନାର୍ଗେ ଇତ୍‌ତଣ୍ଡ୍‌‍ ।
EPH 1:9 ଇଶ୍ୱର୍ ତା‍ନ୍ ବୁଦ୍‍ତେ ନୁ ଜିୱୁନ୍‍ତେ ପୁନ୍ଦାନାଦିନ୍ ତଡ଼୍‍ ବାତ୍‍ ଆଲ୍‍ସି ମାଡ଼ିମାତ୍‍ତନ୍, ଆଦ୍ ପୁରା ମାଡ଼୍‍ତଣ୍ଡ୍, ମେଣ୍ଡେ ଆଦ୍ କ୍ରିଷ୍ଟନ୍‍ ସାହାଯ୍ୟତେ ବେନେ ମିଞ୍ଜ୍‍ତାଦ୍‍ ଆଲ୍‍ସି ମାତ୍‍ତଣ୍ଡ୍‍ ଆଦ୍‍ ମାନ୍‍ ଗାର୍ରେ କେସ୍‍ମିନ୍ଦେନ୍ ।
EPH 1:10 ଆଦ୍ ଆଲ୍‍ସ୍‍ତାଦ୍‍ ଲେକାମ୍ ସ୍ୱର୍ଗ ନୁ ପୃତିବିତେ ସାରେ ତିଆର୍ ବିଷୟ ଅଣ୍ଡୟ୍‌‍ ଆଦ୍‍ତେ ନୁ କ୍ରିଷ୍ଟ ଆୱୁ ସାରେତଡ଼୍ ତାଲେ ଲେକାମ୍ ମାନ୍‍ତା ଇଦ୍ ଆଲ୍‍ସାନାଦ୍ ଇଶ୍ୱର୍ ଲେକାମ୍ ସମୟ୍‍ତେ ପୁରା ମାଡ଼ିତନ୍ ।
EPH 1:11 ସାରେ ବିଷୟ ଇଶ୍ୱର୍‌ତେ ଯୋଜନା ନୁ ନିଷ୍ପତ୍ତି ଲେକାମ୍ ତିଆର୍ ଆଦ୍‍ତେ; ମୁନେକଞ୍ଜ୍ ତିଆର୍ ନିଜେତ୍ ଉଦ୍ଦେଶ୍ୟତେ ସାଦନ୍‍ ସେଙ୍ଗେ, କ୍ରିଷ୍ଟନ୍ ତଡ଼୍ ଅନାଦ୍‌ ନିଜେତ୍ ନାରୁଡ଼୍ ଆଦାନ୍ ସେଙ୍ଗେ ଇଶ୍ୱର୍ ମାନାଙ୍କ୍‍ ହେଞ୍ଚିମିନ୍ଦେନ୍ ।
EPH 1:12 ୱାଡ଼ାଟ୍, ବେନଡ଼୍ ସାରେତିଙ୍କ୍ ମୁନେ କ୍ରିଷ୍ଟନାଗେ ଆଶେ ନେହେସ୍ ମାତ୍‍ତମ୍, ସାରେତଡ଼୍ ଇଶ୍ୱର୍‌ତେ ମହିମା କିର୍ତ୍ତନ୍ ମାଡ଼ିକା ।
EPH 1:13 ମିଡ଼୍ ଆନ୍‌‍ତେ ବେସୁଙ୍କ୍‍ ପରିତ୍ରାଣ୍ ଦର୍ସିକି ଆତ୍‍କେ ଇଦ୍ ସୁସମାଚାର୍‍ତେ ସତ୍‍ଗଟ୍ କେଞ୍ଜ୍‍ତିଡ଼୍, ଆଦ୍ ସମୟ୍‍ତେ ଇଶ୍ୱର୍‍ତଡ଼ି ଆଦ୍‍ତିଡ଼୍ । ମିଡ଼୍ କ୍ରିଷ୍ଟଙ୍କ୍ ବିଶ୍ୱାସ୍ ମାଡ଼୍‍ନାଙ୍କ୍, ଇଶ୍ୱର୍ ତାନ୍ ପ୍ରତିଜ୍ଞା ଲେକାମ୍ ପବିତ୍ରଆତ୍ମାନ୍ ଦାନ ମାଡ଼ି ମିଇ ପରୁ ଅନାଦ୍‌ ସତ୍‍ ଚିଃନେ ମାଡ଼ି ନିଜର୍‍ ମାଡ଼୍‍ତଣ୍ଡ୍ ।
EPH 1:14 ଇଶ୍ୱର୍ ତାନ୍ ନାରୁଡ଼୍‍କିଂଙ୍କ୍ ବେନ୍ ସାରେ ବିଷୟ ଇଦାନ୍ ସେଙ୍ଗେ ପ୍ରତିଜ୍ଞା ମାଡ଼୍‍ତଣ୍ଡ୍, ଆଦ୍ ସାରେ ଯେ ମାନାଡ଼୍ ଦର୍ସିକିତାଡ଼୍, ପବିତ୍ରଆତ୍ମା ଆଦିନାଦ୍ ନିଜାମ୍‍ ମାଡ଼ିତାନ୍‍ ଇଞ୍ଜ କେତ୍‍ତଣ୍ଡ୍‍ । ଇଶ୍ୱର୍ ତାନ୍ ନାରୁଡ଼୍‍କିଂଙ୍କ୍ ସ୍ୱାଦିନତା ଇଦ୍‍ତଣ୍ଡ୍‍, ଇଦ୍ ନିଜାତେ ଆୱୁକାନ୍ ସେଙ୍ଗେ, ୱାଡ଼ାଟ୍ ଇଶ୍ୱର୍‌ତେ ମହିମା କିର୍ତ୍ତନ୍ ମାଡ଼ିକାଡ଼ାଟ୍ ।
EPH 1:15 ଇଦ୍ କାରନ ସେଙ୍ଗେ ପ୍ରବୁ ଜିସୁନାଗାଙ୍କ୍ ମିୟାଦ୍ ବିଶ୍ୱାସ୍ ନୁ ଇଶ୍ୱର୍‌ତେ ନାରୁଡ଼୍ ସେଙ୍ଗେ ମିୟାଦ୍ ପ୍ରେମ ମିନ୍ଦେ ଇଞ୍ଜ କେଞ୍ଜ୍‍ତେ ପେର୍କେ,
EPH 1:16 ମିଇ ସେଙ୍ଗେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସ ୱାଦୁତାନ୍ । ନାନ୍‍ ଗାଲା ନାୟାଦ୍‍ ପ୍ରାର୍ତନାତାଗ୍ ମିକିଙ୍କ୍ ସାରେଦାମ୍‍ ଏର୍କେ ମାଡ଼ୁତାନ୍‍ ।
EPH 1:17 ମେଣ୍ଡେ ଗୌରବ୍‍ତନ୍ ବାବାଲ୍, ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ିତାନ୍, ବେଲା ଅଣ୍ଡ୍‌ ମିକିଂଙ୍କ୍ ପବିତ୍ର ଆତ୍ମା ଇଦ୍‍ତନ୍ । ଆଦ୍ ଆତ୍ମା ମିକିଂଙ୍କ୍ ଜ୍ଞାନ୍‍ବାନ୍ ମାଡ଼ିତେ ନୁ ଇଶ୍ୱର୍‌ତିଙ୍କ୍ ମିଇ ଗାର୍ରେ କେତିତନ୍ । ଆଲାଇତ୍‍କେ, ମିଡ଼୍ ଅଙ୍କ୍‌ ପୁନ୍ଦେ ପାର୍‍ଦ୍‍ତିଡ଼୍ ।
EPH 1:18 ନାନ୍‍ନେ ଦନ୍ୟବାଦ୍ ମାଡ଼ିତାନ୍, ବେଲାନ୍ ଅନାଦ୍‌ ୱେସ୍ ଉଡ଼ାନ୍ ସେଙ୍ଗେ ମିୟାଦ୍‍ ଲୋପେତ୍‍ ଇଚ୍ଛା ଦାନ୍ଦେ ଆଦ୍‍ତେ । ଆଦିଙ୍କ୍‍ ବେନ୍ ଆଶେତ୍ ମାୟ୍‍ଦିଙ୍କ୍‍ ମିଡ଼୍ ଅନ୍‌‍ ତଡ଼୍ କାର୍‍ଙ୍ଗିଆସ୍‍ ୱାତ୍‍ତିଡ଼୍ ।
EPH 1:19 ଅନ୍‌ ନାରୁନ୍ ସେଙ୍ଗେ ଅନାଦ୍‌ ପ୍ରତିଜ୍ଞାତ ମହତ୍ ଆର୍ଶିବାଦ୍‍ତଡ଼୍ ଯେ ବେସର୍ ନାର୍‍ଗେ ନୁ ମା ଲେକାମ୍ ବିଶ୍ୱାସୀନଡ଼୍ ପାକେ ଅନାଦ୍‌ ସକ୍ରିୟ ଶକ୍ତି ଯେ ବେସର୍ ମହାନ୍, ଆଦ୍ ମିଡ଼୍ ପୁନ୍‍ତିଡ଼୍ ।
EPH 1:20 ଇଞ୍ଜେ, ମାନାଗେ ଇସ୍ ମାନ୍ଦାନ୍ ଆଦ୍‍ ଶକ୍ତି ତଡ଼୍ କେ ଇଶ୍ୱର୍ କ୍ରିଷ୍ଟଙ୍କ୍ ଡଲ୍‍ତାଗାଙ୍କ୍ ତେସ୍ ମିକା ଅଂକିଙ୍କ୍‌ ସ୍ୱର୍ଗିୟ ନାରୁଡ଼୍‍ତେ ନିଜର୍‍ ତିନ୍ଦେପାକେ କୁସ୍‍ପି ମିନ୍ଦେନ୍ ।
EPH 1:21 କ୍ରିଷ୍ଟ ସାରେତଡ଼୍ ସ୍ୱର୍ଗତେ ଶାସକ, କ୍ଷମତା ଅଦିକାରି, ଶକ୍ତିତଡ଼୍ ନୁ ଅଦିପତିନଡ଼୍ ପରୁ ଶାସନ୍‍ ମାଡ଼ିତନ୍, ଆଦ୍ ନାରୁଡ଼୍ ନୁ ୱେରେ ନାରୁଡ଼୍‍ତେ କ୍ଷମତା ଇଦାନ୍ ସାରେତଡ଼୍ ପାଡ଼୍‍ୟି ୱିଡ଼୍‍ସି ଅନାଦ୍‌ ପାଡ଼୍‍ୟି ସାରେତିଙ୍କ୍‍ ବେଡ଼୍‍ୟେ ।
EPH 1:22 ଇଶ୍ୱର୍ ସାରେ ବିଷୟ କ୍ରିଷ୍ଟନ୍ ଡେକେତ୍ ମଦଲ୍ ନେହେତ୍‍ତନ୍ ନୁ ସାରେ ବିଷୟ ପରୁ ଅଂକିଙ୍କ୍‌ ସାରେତିଙ୍କ୍‍ ବେଡ଼୍‍ୟେ ପ୍ରବୁ ଲେକାମ୍ ମଣ୍ଡଲିତାଗ୍ ଇତ୍‍ତନ୍ ।
EPH 1:23 ମଣ୍ଡଲି କ୍ରିଷ୍ଟନ୍ ମେନ୍ଦୁଲ୍; ମଣ୍ଡଲି ତଡ଼୍ କ୍ରିଷ୍ଟନ୍ କାମ୍‍ତେ ସାରେ ପୁରା ଆଦ୍‍ତେ; ମେଣ୍ଡେ କ୍ରିଷ୍ଟ ସାରେ ବିଷୟ ପୁରା ମାଡ଼ିତନ୍ ।
EPH 2:1 ମିୟାଦ୍ କେଞ୍ଜ୍‍ୱାଦ୍ ନୁ ପାପ୍ ସେଙ୍ଗେ ମୁନେଙ୍କ୍ ଦିନାମ୍‍ତେ ଡଲାନାଦ୍ ମାତ୍‍ତେ ।
EPH 2:2 ଆଦ୍ ସମୟ୍‍ତେ ମିଡ଼୍, ବେନ୍ ଆତ୍ମା ଇଞ୍ଜେ ମିକା ବୁଦ୍‍ଇଲ୍‍ୱେ ପିଲାନାଗ୍ ପାଡ଼୍‍ୟି ମାଡ଼୍‍ତଣ୍ଡ୍, ଆଦିନ୍ ଇଚ୍ଛାଲେକାମ୍ ମିଡ଼୍‍ଆନ୍‌ନ୍ତେ ମୁନେଙ୍କ୍‍କଞ୍ଜ୍ ପାଲନ୍ ମାଡ଼ଡ଼୍‍ ଅପରାଦ୍‌ତେ ନୁ ପାପତେ ଡଲିମାତ୍‍ତିଡ଼୍ ।
EPH 2:3 ଆଦ୍‍ଲେକାମ୍ ମାମ୍‍ମେ ସାରେତମ୍ ଅଡ଼୍‌‍ପୁଟୁଙ୍କ୍ ମାତ୍‍ତମ୍ ନୁ ମେନ୍ଦୁଲ୍ ନୁ ମନ୍‍ଦେ ଅବିଲାଷତିଙ୍କ୍ ବ୍ୟବହାର୍‌ ମାଡ଼ି ବାଦ୍‍କମାତ୍‍ତମ୍ । ସମ୍ଭବତଃ, ବାଗାତଡ଼୍ ଲେକାମ୍ ମାମ୍‍ମେ ମିକା ଇଶ୍ୱର୍‌ତେ କପାମ୍‍ତେ ପରିମାଣ ବୋଗ୍ ମାଡ଼ାନଙ୍କ୍ ଆଞ୍ଜମାତ୍‍ତମ୍ ।
EPH 2:4 ଇତ୍‍କେ ଇଦ୍‍ଲେକାମ୍ କାରାପ୍‍ତେ ଡଲ୍‍କେ କେ ଦୟାତଣ୍ଡ୍‍ ଯେ ଇଶ୍ୱର୍, ଅଣ୍ଡ୍‌ ମାନ୍‍ ବେନ୍ ନାର୍‍ଗେ ପ୍ରେମତଡ଼୍‍ ପ୍ରେମ ମାଡ଼୍‍ତଣ୍ଡ୍ ।
EPH 2:5 ଆଦିନ୍ ସେଙ୍ଗେ ମିକିଂଙ୍କ୍ କ୍ରିଷ୍ଟନ୍ ତଡ଼୍ ଜିୱେ ମାଡ଼୍‍ତନ୍, ଅନୁଗ୍ରହ ତଡ଼୍‍ ମିକିଂଙ୍କ୍‍ ପରିତ୍ରାଣ୍ ପାଏମ୍‍ ଆତ୍‍ତିଡ଼୍ ।
EPH 2:6 କ୍ରିଷ୍ଟ ଜିସୁନ୍‍ତଡ଼୍ ୱେରଡ଼୍ ଆତ୍‍ତେ ପେର୍‍କେ ଅନ୍‌‍ତଡ଼୍ ସ୍ୱର୍ଗତାଗ୍ ରାଜ୍‍ମାଡ଼ାନ୍ ସେଙ୍ଗେ ଅଣ୍ଡ୍‌ ମାନାଙ୍କ୍‍ ମିକା ତେଏସ୍ ମିନ୍ଦେନ୍ ।
EPH 2:7 ଜିସୁ କ୍ରିଷ୍ଟନାଗେ ଇସ୍‍ମାନ୍ଦାନ୍ ପ୍ରେମତେ ଅନାଦ୍‌ ଅନୁଗ୍ରହତେ ଶାନ୍ତି ମହତ୍ୱ ଯୁଗ୍‍ଯୁଗ୍ ସାରେଦିନା ମାଡ଼ାନ୍ ସେଙ୍ଗେ ଇଶ୍ୱର୍ ଇଦ୍‍ ମାଡ଼୍‍ତଣ୍ଡ୍ ।
EPH 2:8 ବାତେଙ୍କ୍‍ଇତ୍କେ ଅନୁଗ୍ରହତେ ବିଶ୍ୱାସ୍ ତଡ଼୍ ମିଡ଼୍ ପରିତ୍ରାଣ୍ ଦର୍ସିକି ଆସ୍ ମିନ୍ଦେଡ଼ି; ଆଦ୍ ମିୟାଗାଙ୍କ୍ ନିଜେତ୍ ଲୋପେଙ୍କ୍ ଆୟ୍‍ୟ, ଆଦ୍ ଇଶ୍ୱର୍‌ତେ ଦାନ ।
EPH 2:9 ଆଦିଙ୍କ୍‍ ଇଦ୍‍ ବିଷୟ୍‍ତେ ବେନ ଗର୍ବ ମାଡ଼୍‍ମାକିଣ୍ଡ୍ ।
EPH 2:10 ମାମ୍‍ମେ ବାତେଏ ଆଦ୍‍ପାର୍‍ୱମ୍, ମାତର୍ ଇଶ୍ୱର୍‍କେ ଆଦ୍‍ ମାଡ଼୍‍ତେ; ବେନ୍ ସାରେ ସାୟେ ପାଡ଼୍‍ୟି ମାମ୍‍ମେ ମାଡ଼ିତମ୍ ଇଞ୍ଜ ଇଶ୍ୱର୍ ମୁନେଙ୍କ୍ ତିଆର୍ କିସ୍ ମାତ୍‍ତନ୍, ମାମ୍‍ମେ କ୍ରିଷ୍ଟ ଜିସୁନ୍ ତଡ଼୍ କାଇଲି ମାନ୍ଦାନ୍ ସେଙ୍ଗେ ମା ଜିୱେତାଗ୍ ଆଦ୍ ସାରେ ଆତ୍‍ତେ ।
EPH 2:11 ନିଜର୍‍ ମୁନେଙ୍କ୍‍ତେ ଦିନାମ୍‍ ଏର୍କା ମାଡ଼ାଟ୍, ଜାତିତାଗ୍ ମିଡ଼୍ ଅଣଇହୁଦି ମାତ୍‍ତିଡ଼୍, ନିଜେତିଙ୍କ୍ “ସୁନ୍ନତ୍,” କେସ୍‍ମାନ୍ଦାନ୍ ଇହୁଦିଡ଼୍ ମିକିଂଙ୍କ୍ “ଅସୁନ୍ନତ,” କେତିତଡ଼୍‍ । ଇଦ୍ ମାତର୍‌ ୱେରଡ଼୍ ମେନ୍ଦୁଲ୍‍ତେ ଅବସ୍ଥାତିଙ୍କ୍ ପୁନ୍ଦାଙ୍କ୍ଆଦ୍‍ତେ ।
EPH 2:12 ମୁନେ ମିଡ଼୍ କ୍ରିଷ୍ଟନାଗାଙ୍କ୍ ଯେକା ମାତ୍‍ତିଡ଼୍, ମିଡ଼୍ ବିଦେଶି ମାତ୍‍ତିଡ଼୍ ନୁ ଇଶ୍ୱର୍‌ତେ ହେଞ୍ଚ୍‍ତେ ଜାତିତାଗ୍ କାଇଲ୍‍ୱେ ମାତ୍‍ତିଡ଼୍ । ଇଶ୍ୱର୍ ତାନ୍ ନାରୁଡ଼୍ ସେଙ୍ଗେ ମାଡ଼ିମାନ୍ଦାନ୍ ପ୍ରତିଜ୍ଞା ପରୁ ତିଆର୍ ନିୟମ୍‍ତେ ମିୟାଦ୍ ବେନେବା କାଇଲ୍‍ୱେ ମାତ୍‍ତେ । ଆଶେ ଶୁନ୍ୟ ନୁ ଇଶ୍ୱର୍ ବିହିନ ଆସ୍ ମିଡ଼୍ ଜଗତ୍‍ତାଗ୍ ମାଞ୍ଜମାତ୍‍ତିଡ଼୍ ।
EPH 2:13 ଆଦେଲେକାମ୍ ଯେକା ମାତ୍‌ତିଡ଼୍; ଇଞ୍ଜେ ଜିସୁନ୍‍ତଡ଼୍ ଅଣ୍ଡୟ୍‌‍ ଆସ୍ କ୍ରିଷ୍ଟନ୍ ଡଲ୍‍ତାଦ୍ ସେଙ୍ଗେ ଗାର୍‍ରେ ହେଉସ୍ ମିନ୍ଦେ ।
EPH 2:14 ବାତେଙ୍କ୍‍ଇତ୍କେ ଇହୁଦି ନୁ ଅଣଇହୁଦିଡ଼୍ ୱେରଡ଼୍ ମାଡ଼ି କ୍ରିଷ୍ଟ ନିଜେ ମାନାଙ୍କ୍‍ ଶାନ୍ତି ଇସ୍‍ମିନ୍ତେନ୍ । ଅଡ଼୍‌‍କିଂଙ୍କ୍ ଡୁଟାଙ୍କ୍ ମାଡ଼ି ନିଜେ ନିଜେ ଶତ୍ରୁଡ଼୍ ଲେକାମ୍ ନେହେସ୍ ମାନ୍ଦାନ୍ ନେଟେତିଙ୍କ୍ ଅଣ୍ଡ୍‌ ତାନ୍ ନିଜେତ୍ ମେନ୍ଦୁଲ୍ ତଡ଼୍ ଉୱୁତନ୍ ।
EPH 2:15 ଅଡ଼୍‌ ଇହୁଦିନଡ଼୍ ସାରେ ବିଦିବିଦାନ୍ ସାର୍‌ରେ ବ୍ୟବସ୍ଥାତିଙ୍କ୍‍ ଉଚ୍ଛେଦ ମାଡ଼ି ଇହୁଦିଡ଼୍ ନୁ ଅଣଇହୁଦିଡ଼୍ ଆଗାଙ୍କ୍ ଅଡ଼ାଦ୍‌ ସାହାଯ୍ୟ ମାଡ଼ମାନ୍ଦାନ୍ ୱେରଡ଼୍ ପୁଃନେ ମାନବ୍ ଜାତି ତିଆର୍ ମାଡ଼୍‍ତଣ୍ଡ୍ । ଆଗେ ପୃତିବିତାଗ୍ ଶାନ୍ତି ତିଆର୍ ଆଦ୍‍ତେ ।
EPH 2:16 କ୍ରୁଶତାଗ୍ ଅନାଦ୍‌ ଡଲ୍‍ତେ ସେଙ୍ଗେ କ୍ରିଷ୍ଟ ଆ ଯିହୁଦିଡ଼୍‍ ନୁ ଯିହୁଦିଡ଼ାଗ୍‍ ମାନ୍ଦାନାଦ୍ ଶତ୍ରୁତିଙ୍କ୍ ମାପିମିନ୍ଦେନ୍; କ୍ରୁଶତଡ଼୍ ଅଣ୍ଡ୍‌ ୱେରେ ଜାତିତିଙ୍କ୍ ସମ୍ମିଲତ ମାଡ଼ି, ୱେରଡ଼୍ ମେନ୍ଦୁଲ୍ ଲେକାମ୍ ମାଡ଼୍‍ତଣ୍ଡ୍ ନୁ ଇଶ୍ୱର୍‌ତେ ପାକେ ଅଡ଼୍‌‍କିଂଙ୍କ୍ ମାଲ୍‍ପି ତାତ୍‍ତନ୍ ।
EPH 2:17 ଆଦିନ୍ ସେଙ୍ଗେ କ୍ରିଷ୍ଟ ୱାସ୍‍ମାତ୍‍ତନ୍ ନୁ ଇଶ୍ୱର୍‌ତାଗାଙ୍କ୍ ଯେକା ଆଞ୍ଜ୍‍ମାନ୍ଦାନ୍ ଅଣଇହୁଦୀଡ଼୍ ନୁ ଅନ୍‌ ଗାର୍‍ରେ ତଡ଼୍ ଇହୁଦିଡ଼୍ ପାକେ ସୁସମାଚାର୍ କେସ୍‍ମାତ୍‍ତନ୍ ।
EPH 2:18 କ୍ରିଷ୍ଟନ୍ ତଡ଼୍ କେ ଇହୁଦି ନୁ ଅଣଇହୁଦିଡ଼୍ ସାରେତଡ଼୍ ଅଣ୍ଡୟ୍‌ ଆତ୍ମାତେ ବାବାନ୍ ମୁନେ ୱାଦାନ୍ ସେଙ୍ଗେ ସାହାସ୍‍ ଆତ୍‍ତମ୍ ।
EPH 2:19 ଆଦିନ୍ ସେଙ୍ଗେ ହୋ ଇହୁଦିନଡ଼ି, ମିଡ଼୍ ମେଣ୍ଡେ ବିଦେଶି ବା ନାରୁଡ଼୍‌ ଆୟ୍‍ୟ, ଇଞ୍ଜେ ଇଶ୍ୱର୍‌ତେ ନାରୁଡ଼୍‍ତଡ଼୍ କାଇଲି ମିଡ଼୍ ଆନ୍‌‍ତେ ତାନ୍ ରାଜ୍ୟତେ ନାରୁଡ଼ି ନୁ ତାନ୍ ପରିବାର୍‍ତେନଡ଼ି ଆତ୍‍ତିଡ଼୍‍ ।
EPH 2:20 ମିଡ଼୍ ଆନ୍‌‍ତେ ପ୍ରେରିତ୍ ଶିଷ୍ୟ ନୁ ବାବବାଦିନଡ଼୍ ତଡ଼୍ ତିଆର୍ ଆଶେ ମାନ୍ଦାନ୍ ବିତ୍ତିମୁଲ ପରୁ ତିଆର୍‍ତେ ଲେକାମ୍ । ଆଦ୍ ଲୋତେ ମୁଲେତ୍‍ କାଲ୍‍ ନିଜେ ଜିସୁ କ୍ରିଷ୍ଟ ।
EPH 2:21 ଅଣ୍ଡେକେ ମାତର୍ ଇଦ୍ ଲତ୍‌ତିଙ୍କ୍ କାଲ୍‌ପି ନେହେତିତନ୍ ନୁ ପ୍ରବୁନ୍ ସେଙ୍ଗେ ୱେରଡ଼୍ ଉତ୍ସର୍ଗିତ ପବିତ୍ର ମନ୍ଦିର୍ ଲେକାମ୍ ଡୁଟାଙ୍ଗ୍‍ ମାଡ଼ିତନ୍ ।
EPH 2:22 ଅନାଦ୍‌ ଶକ୍ତିତଡ଼୍ ମିଡ଼୍‍ ଆନ୍‌ତେ ବାଗାତ୍ ସାରେତଡ଼ାଦ୍‍ ତଡ଼୍‍ ଆତ୍ମା ଲେକାମ୍ ଇଶ୍ୱର୍‌ତେ ମାନ୍ଦାନ୍‍ ସେଙ୍ଗେ ୱେରଡ଼୍ ଲନ୍‍ ଲେକାମ୍ ତିଆର୍ ଆତ୍‍ତେ ।
EPH 3:1 ଇଦ୍‍ କାରନ୍‍ ମାଇଦିଙ୍କ୍ କ୍ରିଷ୍ଟ ଜିସୁନ୍‍ ମାଇଦିଙ୍କ୍ ବନ୍ଦି ଆସ୍‍ମାନ୍ଦାନ୍ ନାନ୍‍ ପାଉଲ୍‍, ମି ଲେକାମ୍‍ ଅଣଯିହୁଦୀଡ଼୍‍ ସେଙ୍ଗେ ଇଶ୍ୱର୍‌ତେ ଗାର୍‍ରେ ପ୍ରାର୍ତନା ମାଡ଼ୁତାନ୍ ।
EPH 3:2 ମିୟାଦ୍‍ ସାୟେତ୍‍ ମାଇଦିଙ୍କ୍ ଇଶ୍ୱର୍ ଅନାଦ୍‌ ଅନୁଗ୍ରହତେ ନାକିଂଙ୍କ୍ ଯେ ଇଦ୍‌ ପାଡ଼୍‍ୟି ମାଡ଼ାଙ୍କ୍‍ ଇସ୍‍ମିନ୍ଦେଣ୍ଡ୍‍, ଇଦ୍ ନିଜାମ୍ କେଞ୍ଜ୍‍ତିଡ଼୍‍ ।
EPH 3:3 ଇଶ୍ୱର୍ ଅନାଦ୍‌ ମିଞ୍ଜିମାନ୍ଦାନ୍‍ ଯଜନାତିଙ୍କ୍‍ କେସ୍‍ ନାକିଂଙ୍କ୍ କେସ୍‍ମିନ୍ଦେନ୍‌ ଇ ବିଷୟ୍‍ତେ ନାନ୍‍ନେ ସୁଦୁର୍‍ଇନା ଲେକୁତାନ୍‍ ।
EPH 3:4 ଆଦ୍ କାର୍‍କେ, କ୍ରିଷ୍ଟନ୍‍ ଲୋପେତ୍‌ ବିଷୟ୍‍ତେ ନାନ୍‍ନେ ବାତେଏ ବୁଜେମ୍ ଆତ୍‍ତାନ୍‍, ଆଦ୍ ମିଡ଼୍ ପୁନ୍ଦ୍‍ତିଡ଼୍ ।
EPH 3:5 ମୁନେଙ୍କ୍ ନାରୁନ୍ ଗଷ୍ଠିତିଙ୍କ୍‍ ଇ ଲୋପେତ୍‌ ବିଷୟ୍‍ତେ ଲେକକଟ ମାତ୍‍ତଣ୍ଡ୍ । ଇତ୍‍କେ ଇଶ୍ୱର୍ ଇଞ୍ଜେ ଅନାଦ୍‌ ପବିତ୍ର ପ୍ରେରିତ ଶିଷ୍ୟ ନୁ ବାବବାଦିଡ଼୍‍ ଆତ୍ମାତେ ଇଦ୍ ତହଃସ୍‍ ମିନ୍ଦେଣ୍ଡ୍ ।
EPH 3:6 ଆଦ୍ ନିଗୂଡ଼ ତତ୍ତ୍ୱ ଆଦୁତ୍‍ତେ, ସୁସମାଚାର୍‍ତେ ସେଙ୍ଗେ ଯିହୁଦିଡ଼୍ ତଡ଼୍ ଅଣଯିହୁଦୀଡ଼୍ ଆନ୍‌‍ତେ ଇଶ୍ୱର୍‌ତେ ଆର୍ଶିବାଦ୍‍ ପାଏମ୍‍ଆସ୍‍ମିନ୍ଦେଡ଼୍ । ଅଡ଼୍‌ ଆଦ୍ ୱେରଡ଼୍ ମେନ୍ଦୁଲ୍‍ତେ କାଇକ୍‌ ଡ଼େକା ନୁ ଜିସୁ କ୍ରିଷ୍ଟନ୍ ସାହାଯ୍ୟତେ ଇଶ୍ୱର୍ ଇସ୍‍ମାନ୍ଦାନ୍ ପ୍ରତିଜ୍ଞାତେ ପାଏମ୍‍ଆସ୍‍ମାନ୍ଦାନଡ଼୍ ।
EPH 3:7 ଇଶ୍ୱର୍ ଅନାଦ୍‌ ଶକ୍ତି ବ୍ୟବହାର୍‌ ମାଡ଼ି ନାକିଂଙ୍କ୍ ବେନ୍ ବିଶେଷ୍ ଦାନ ଇସ୍‍ମିନ୍ଦେଣ୍ଡ୍, ଆଦିନ୍ ମାୟ୍‍ଦିଙ୍କ୍ ନା ସୁସମାଚାର୍‍ତେ ପାଷ୍ଟରି ଆସ୍‍ମିନ୍ଦେନ୍ ।
EPH 3:8 ନାନ୍ ଇଶ୍ୱର୍‌ତେ ନାରୁଡ଼୍ ଲୋପେଙ୍କ୍ ସାରେତଡ଼୍‌କିଂଙ୍କ୍ ସୁଦୁନଣ୍ଡ୍, ଆଗେକ୍‍ବା ଅଣଯିହୁଦିଡ଼୍ ଗାର୍‍ରେ କ୍ରିଷ୍ଟନ୍ ନାର୍‍ଗେ ସମ୍ପଦ୍‍ତେ ଗଟ୍ ପୟ୍‍ସ୍ ଆଦାନ୍ ମାୟ୍‍ଦିଙ୍କ୍ ନାକିଂଙ୍କ୍ ଇଶ୍ୱର୍ ସୁଯୋଗ୍ ଇସ୍‍ମିନ୍ଦେଣ୍ଡ୍ ।
EPH 3:9 ଇଶ୍ୱର୍‌ତେ ଆଦ୍ ମିଞ୍ଜିମାନ୍ଦାନ୍ ଯୋଜନା ବେଦ୍‍ପୁଟୁଙ୍କ୍ ପାଡ଼୍‍ୟି ଆଦେପାର୍‍ଦ୍‍ତେ, ଆଦ୍ ସାର୍ରେତଡ଼୍‍କିଙ୍କ୍ କେତ୍‍ତାନ୍ ମାୟ୍‍ଦିଙ୍କ୍ ସବାଗ୍ୟ ପାଏମ୍ ଆତ୍‍ତାନ୍ । ସାର୍‍ରେ ବିଷୟ୍‍ତେ ତିଆର୍ କର୍ତ୍ତାଲ୍ ଇଶ୍ୱର୍ ମୁନେଙ୍କ୍ ସାର୍‍ରେ ଯୁଗ୍‍ତେ ଅନାଦ୍‌ ମିଞ୍ଜିମାନ୍ଦାନ୍‍ ସତ୍‍ତିଙ୍କ୍ ମିଞ୍ଜ୍‍ସ୍ପି ନେଃଏସ୍‍ ମାତ୍‍ତଣ୍ଡ୍,
EPH 3:10 ବେଦ୍‍ପୁଟୁଙ୍କ୍ ଇଞ୍ଜେତ୍ ସମୟ୍‍ତେ କ୍ରିଷ୍ଟିୟ ମଣ୍ଡଲିତେ ପାଡ଼୍‍ୟିଦେ ସ୍ୱର୍ଗତେ ଅଦିପତି ନୁ ଶକ୍ତିନଡ଼୍ ଇଶ୍ୱର୍‌ତେ ନାର୍‍ଗେ ବୁଦ୍‍ତେ ବିଷୟ୍‍ତେ ପୁରାପୁରି ବୁଜେମ୍ ଆଦ୍‍ପାର୍‍ଦ୍‍ତଡ଼୍ ।
EPH 3:11 ଇଶ୍ୱର୍ ଅନାଦ୍‌ ସାରେଦିନାତ୍ କାଲାମ୍‍ଦେ ଇଚ୍ଛା ଲେକେମ୍‍ ମାନ୍‍ ପ୍ରବୁ କ୍ରିଷ୍ଟ ଜିସୁନ୍ ତଡ଼୍ ଇଦ୍ ପୁରା ମାଡ଼ିମିନ୍ଦେଣ୍ଡ୍ ।
EPH 3:12 କ୍ରିଷ୍ଟନ୍ ତଡ଼୍ କାୟ୍‍ଲିମାନ୍ଦାନ୍ ମାୟ୍‍ଦିଙ୍କ୍ ନୁ ଅଂକିଙ୍କ୍‌ ବିଶ୍ୱାସ୍ ମାଡ଼ି ମାନ୍ଦାନ୍ ମାୟ୍‍ଦିଙ୍କ୍ ଆଶେତ୍‍ ଇଶ୍ୱର୍‌ତେ ମୁନ୍‍ନେ ଆଦାନ୍ ମାୟ୍‍ଦିଙ୍କ୍ ମାନାଙ୍କ୍‍ ଇଞ୍ଜେ ସାହାସ୍‍ ମିନ୍ଦେ ।
EPH 3:13 ଆଦିନ୍ ମାୟ୍‍ଦିଙ୍କ୍ ନାୟାଦ୍ ଅନୁରଦ୍‌, ମିଇ ମାୟ୍‍ଦିଙ୍କ୍ ନା ଦୁଃକାତ୍ ମାୟ୍‍ଦିଙ୍କ୍ ମୁର୍‍ମୁରା ଆୟ୍‍ମାଟ୍, ବାତେଙ୍କ୍‍ଇତ୍‍କେ ଇୱୁସାର୍ରେ ମିଇ ସାୟେତ୍ ମାୟ୍‍ଦିଙ୍କ୍ ଆସ୍‍ମିନ୍ଦେ ।
EPH 3:14 ଅଦିନ୍‌ ସେଙ୍ଗେ ବାବାଲ୍‍ ଇଶ୍ୱର୍‌ତେ ମୁନ୍‍ନେ ନାନ୍‍ନେ ବଟ୍‍ମିଣ୍ଡା ଉୱୁସ୍ ପ୍ରାର୍ତନା ମାଡ଼ୁତାନ୍,
EPH 3:15 ଆଦିନ୍ ସେଙ୍ଗେ ବେନ୍ ନାଗାଙ୍କ୍ ସ୍ୱର୍ଗ ନୁ ପୃତିବିତେ ସାର୍‍ରେ ଆନିଦାଦିଡ଼୍ ପେଦେର୍ ପାଏମ୍ ଆଦ୍‍ତଡ଼୍,
EPH 3:16 ନାନ୍ ପ୍ରାର୍ତନା ମାଡ଼ୁତାନ୍ ଅଣ୍ଡ୍‌ ଅନାଦ୍‌ ଆତ୍ମାତେ ଶାସକ, ଅନାଦ୍‌ ଗୌରବ୍‍ତେ ଗୁଦାମ୍‍ତାଗାଙ୍କ୍ ମିଇ ହୃଦୟତାଗାଙ୍କ୍ ପୁଜାନ୍ ମାୟ୍‍ଦିଙ୍କ୍ ଶକ୍ତି ଇଦ୍‍ତଣ୍ଡ୍ ।
EPH 3:17 ନାନ୍ ପ୍ରାର୍ତନା ମାଡ଼ିତାନ୍ ବେଦ୍‍ପୁଟୁଙ୍କ୍ ମିଇ ବିଶ୍ୱାସ୍‍ତେ ଶକ୍ତିତେ କ୍ରିଷ୍ଟ ମିଇ ହୃଦୟ୍‍ତାଗ୍ ମାନ୍‍ତଣ୍ଡ୍ । ନାନ୍ ପ୍ରାର୍ତନା ମାଡ଼ିତାନ୍, ବେଦ୍‍ପୁଟୁଙ୍କ୍ ମିୟାଦ୍ ପାଣ୍ଡେସନ୍‌ ପ୍ରେମତେ ତିୟାର୍ ନୁ ଡୁଟାଙ୍ଗ୍ ଆଦ୍‍ତେ ।
EPH 3:18 ଆଲାଇତ୍‍କେ, କ୍ରିଷ୍ଟନ୍ ପ୍ରେମ ଯେ ବେସର୍ ଲାଆଟି ନୁ ଗାଲ୍, ବେସର୍ ଡେଙ୍ଗ୍‍ ନୁ କୁଇଙ୍ଗ୍, ମିଡ଼୍ ଇଶ୍ୱର୍‌ତେ ୱେରେୱେରେ ନାରୁଡ଼୍ ତଡ଼୍ ଇଦ୍ ବୁଜେମ୍‍ ଆଦାନ୍‍ ମାୟ୍‍ଦିଙ୍କ୍ ପାର୍‍ଦ୍‍ତିନ୍ ।
EPH 3:19 ହଁ ମିଡ଼୍ ଅନ୍‌ ପ୍ରେମତେ ଅର୍ତ ପୁନ୍ଦେପାର୍‍ଦ୍‍ତିଡ଼୍, ବେଲାମେଣ୍ଡେ ଇଦିଙ୍କ୍ ବେସୁଟ୍‍ବା ସାରେ ପୁନ୍ଦାନଙ୍କ୍ ଆୟ୍‍ୟ । ଇଦ୍ ପୁଟୁଙ୍କ୍ ମିଡ଼୍ ଇଶ୍ୱର୍‌ତେ ଇଚ୍ଛା ସାରେ ପୁନ୍ଦେପାର୍‍ଦ୍‍ତିଡ଼୍ ।
EPH 3:20 ଇଶ୍ୱର୍ ମାନ୍‍ ଲପେ ଅନ୍‌‍ୱାଦ୍ ଚାଲେମ୍‍ ଆସମାନ୍ଦାନ୍ ଶକ୍ତି ତଡ଼୍‍ ମାନାଡ଼୍‍ ତାଲ୍‍କାନାଗାଙ୍କ୍ ନାର୍ଗେ ଇଦ୍‍ପୁଟୁଙ୍ଗ୍ କି ମାନାଦ୍‍ ଆଲ୍‍ସାନ୍ ବିଷୟ୍‍ ଇଦାନ୍ ମାୟ୍‍ଦିଙ୍କ୍ ପାର୍‍ଦ୍‍ତଣ୍ଡ୍‍,
EPH 3:21 ମଣ୍ଡଲି ତଡ଼୍‍ ନୁ କ୍ରିଷ୍ଟ ଜିସୁନ୍‍ ତଡ଼୍‍ ଯୁଗ୍ ଯୁଗ୍‍ତେ ସାରେଦିନାତ୍ କାଲାମ୍‍ ଯାକ ଆଦ୍ ଇଶ୍ୱର୍‌ତେ ଗୌରବ୍ ଆୟି । ଆମେନ୍‍ ।
EPH 4:1 ପ୍ରବୁନ୍ ସେବା ମାଡ଼ାନ୍ ମାୟ୍‍ଦିଙ୍କ୍ ବନ୍ଦି ଆସ୍‍ମାନ୍ଦାନ୍ ନାନ୍‍ନେ ପାଉଲ ମିକିଂଙ୍କ୍ ଅନୁରୋଦ୍ ମାଡ଼ୁତାନ୍, ବେଦ୍‍ପୁଟୁଙ୍କ୍ ବାଦ୍‍କାନ୍ ମାୟ୍‍ଦିଙ୍କ୍ ଇଶ୍ୱର୍ କାର୍‍ଙ୍ଗି ମିନ୍ଦେଣ୍ଡ୍ ଆଦେ ଲେକାମ୍ ବ୍ୟବହାର୍‌ ମାଡ଼ାଟ୍ ।
EPH 4:2 ସାରେଦାମ୍ ନମ୍ର, ଡୁଟାଙ୍ଗ୍ ନୁ ଗାଡ଼୍‍ସ୍‍ ଆୟ୍‍ମୁଟ୍ । ନିଜର୍‍ ନିଜର୍ ଲପେ ପ୍ରେମ ତଡ଼୍‍ କାହିଲି ମାନୁଟ୍‍ ।
EPH 4:3 ପବିତ୍ର ଆତ୍ମା ସାହାଯ୍ୟତେ ଶାନ୍ତିତେ ମାନ୍ଦାନ୍ ସେଙ୍ଗେ ମିଇ ଲପେ ବେନ୍ ଏକତା ତିୟାର୍‍ ଆସ୍‍ମିନ୍ଦେ, ଆଦିଙ୍କ୍ ଜିୱୁଣ୍ଡ୍‍ତାଗ୍ ସାୟେ ଅସ୍‍ରେଞ୍ଚାଟ୍‍ ।
EPH 4:4 ମାନାଦ୍‍ ମେନ୍ଦୁଲ୍ ଅଣ୍ଡୟ୍‌, ଆତ୍ମା ଆନ୍‌‍ତେ ଅଣ୍ଡୟ୍‌ । ମେଣ୍ଡେ ଅଣ୍ଡୟ୍‌‍ ଆଶେ ଇସ୍‍ ଇଶ୍ୱର୍ ମାନାଙ୍କ୍‍ କାର୍‍ଙ୍ଗିମିନ୍ଦେଣ୍ଡ୍ ।
EPH 4:5 ଅଣ୍ଡୟ୍‌ ପ୍ରବୁ, ଅଣ୍ଡୟ୍‌ ବିଶ୍ୱାସ୍, ଅଣ୍ଡୟ୍‌ ବାପ୍ତିସ୍ମ ।
EPH 4:6 ସାରେତଡ଼୍ ନାରୁନ୍ ଜାତିତ୍‍ ଇଶ୍ୱର୍ ନୁ ବାବାଲ୍ ୱେରଣ୍ଡେ; ଅଣ୍ଡ୍‌ ସାର୍ରେତଡ଼୍‍ତେ ପ୍ରବୁ, ସାର୍ରେତଡ଼୍ ଲପେ ନୁ ସାର୍ରେତଡ଼୍ ଜିୱୁଣ୍ଡ୍‍ତାଗ୍ ମାନ୍‍ତଣ୍ଡ୍ ।
EPH 4:7 କ୍ରିଷ୍ଟ ଇସ୍‍ମାନ୍ଦାନ୍ ପରିମାଣ ଲେକାମ୍ ମାମ୍‍ମେ ସାରେତମ୍ ୱେରୱେର ବିଶେଷ୍‍ ଦାନ ପାଏମ୍ ଆତ୍‍ତମ୍ ।
EPH 4:8 ଦର୍ମଶାସ୍ତ୍ରତାଗ୍ ଇ ବିଷୟ୍‍ତେ ଲେକାମିନ୍ଦେ: “ବେସୁଙ୍କ୍‍ ଅଣ୍ଡ୍‌ ପର୍‍ର ଆତ୍‍ତଣ୍ଡ୍, ଅନ୍‌‍ତଡ଼୍ ନାର୍‍ଗେ ବନ୍ଦିଡ଼୍‍କିଂଙ୍କ୍ ଅଣ୍ଡ୍‌ ଆତ୍‍ତଣ୍ଡ୍‍, ମେଣ୍ଡେ ନାରୁନ୍ ଜାତିତିଙ୍କ୍ ନାର୍‍ଗେ ବରଦାନ୍ ମାଡ଼୍‍ତଣ୍ଡ୍ ।”
EPH 4:9 “ଅଣ୍ଡ୍‌ ପର୍‍ର ଆତ୍‍ତଣ୍ଡ୍,” ଇଦିନ୍ ଇତ୍‍କେ ବାଆତେ ? ଇଦିନ୍ ଇତ୍‍କେ, ମୁନେଙ୍କ୍ ଅଣ୍ଡ୍‌ ପୃତିବିତେ ମଦଲ୍ ପଡ଼ିୟେତାଗ୍ ୱାସ୍‍ମାତ୍‍ତଣ୍ଡ୍ ।
EPH 4:10 ଆଦିଙ୍କ୍ ବେନ ମଦଲ୍ ଡିଗିମାତ୍‍ତଣ୍ଡ୍, ଅଣ୍ଡ୍‌‍ ବେଲା ପୁରା ପୃତିବିତିଙ୍କ୍‍ ଅନ୍‌ ଉପସ୍ଥିତିତାଗ୍ ସାରେ ମାଡ଼ାନ୍ ମାୟ୍‍ଦିଙ୍କ୍ ଅଣ୍ଡ୍‌ ମେଣ୍ଡେ ସ୍ୱର୍ଗ ନାରୁଡ଼୍‍ତେ ଗାଟି ପର୍‍ର ଆତ୍‍ତଣ୍ଡ୍ ।
EPH 4:11 ଅଣ୍ଡେ ନାରୁନ୍ ଜାତିତିଙ୍କ୍ ନାର୍‍ଗେ ବରଦାନ ମାଡ଼ି ଆଞ୍ଜ୍‍ମିନ୍ଦେଣ୍ଡ୍ । ବେସ୍କ୍‌ତୁଡ଼୍‍କିଙ୍କ୍ ପ୍ରେରିତ୍ ଶିଷ୍ୟ, ମେଣ୍ଡେ ବାଗାତଡ଼୍‍କିଙ୍କ୍ ବାବବାଦି, ବେସ୍କ୍‌ତୁଡ଼୍‍କିଙ୍କ୍ ସୁସମାଚାର୍ ପ୍ରଚାର୍ ମାଡ଼ାଙ୍କ୍, ପାଷ୍ଟେର୍ ନୁ ମେସ୍ତେରିନ୍‍ ମକମ୍‌ତେ ଏଞ୍ଚିମିନ୍ଦେଣ୍ଡ୍ ।
EPH 4:12 କ୍ରିଷ୍ଟନ୍ ଆଦ୍ ମେନ୍ଦୁଲ୍‍ତିଙ୍କ୍ ତିୟାର୍ ମାଡ଼ାନ୍ ଲେକାମ୍‌ କ୍ରିଷ୍ଟିୟ ସେବା ପାଡ଼୍‍ୟିଦେ ମାୟ୍‍ଦିଙ୍କ୍ ଇଶ୍ୱର୍‌ତେ ନାରୁଡ଼୍‍କିଂଙ୍କ୍ ତିୟାର୍ ମାଡ଼ାନ୍ ମାୟ୍‍ଦିଙ୍କ୍ ଅଣ୍ଡ୍‌ ଇଲା ମାଡ଼ିମିନ୍ଦେଣ୍ଡ୍ ।
EPH 4:13 ଅଦିନ୍‌ମାୟ୍‍ଦିଙ୍କ୍ ମାମ୍‍ମେ ସାର୍ରେତମ୍ ମା ବିଶ୍ୱାସ୍‍ତେ ନୁ ଇଶ୍ୱର୍‌ତେ ମାର୍‍ ବୁଦ୍‍ତେ ଅଣ୍ଡୟ୍‌‍ ଆଦ୍‍ତମ୍, କ୍ରିଷ୍ଟନ୍ ଇସାବ୍‍ତେ ମାମ୍‍ମେ ସାରେ ବୟସ୍କା ଆଦ୍‍ତମ୍ ।
EPH 4:14 ଗାଟି ଗାଲ୍‍ତେ ନୁ ଗାଟି ଗାଙ୍କୁଡ଼୍‍ତେ ଇକାଆକା ଆସମାନ୍ଦାନ୍ ପିଲାନ୍ ଲେକାମ୍ ମାନାଡ଼୍ ମେଣ୍ଡେ ଦାନ୍ଦେ ଆୟ୍‍ୱାଡ଼୍ । ୱେରେତଡ଼୍‍କିଙ୍କ୍‍ ମେଣ୍ଡେଅନ୍‌ ଆର୍ର୍ ବୁଲ୍‍କା ମାଡ଼ମାନ୍ଦାନ୍ ତିପାଲ୍‍ ମାଡ଼ାନଡ଼୍‍ୱାଦ୍‍ ଚାଲାକ୍‍ ଶିକ୍ଷାତାଗ୍‍ ମାନାଡ଼୍ ଦାନ୍ଦେ ଆୟ୍‍ୱାଡ଼୍ ।
EPH 4:15 ପ୍ରେମ ତଡ଼୍‍ ସତ୍ କେସ୍ ସାର୍ରେତଡ଼୍‍ୱାଦ୍‍ ତାଲେତ୍‍ ରକମ୍ କ୍ରିଷ୍ଟନ୍ ଲେକାମ୍ ଆଦ୍‍ତାଡ଼୍ ।
EPH 4:16 ଅନାଦ୍‌ ନିୟନ୍ତ୍ରଣ ତଡ଼୍‍ ମେନ୍ଦୁଲ୍‍ତେ ୱେର୍‍ୱେର୍‍ତେ କାଇକ୍‌ଡେକା ଅଣ୍ଡୟାଗେ ମଦ୍‍ଦା ଆଦ୍‍ତା ନୁ ଆଗେ ମାନ୍ଦାନ୍‍ ଗାଟିନ୍‍ ତଡ଼୍‍ ପୁରା ମେନ୍ଦୁଲ୍ ତିୟାର୍ ଆଦ୍‍ତେ । ଆଦିଙ୍କ୍ ସାର୍ରେତଡ଼୍ ସାରେୱେଲେ ନିଜେତ୍ ପାଡ଼୍‍ୟି ଟିକ୍‍ଟାକ୍ ଲେକାମ୍ ଚାଲା ମାଡ଼୍‍କେ ପୁରା ମେନ୍ଦୁଲ୍ ପ୍ରେମତେ ପେର୍ସିମିକା ସାୟେ ତିୟାର୍ ଆଦ୍‍ତା ।
EPH 4:17 ଆଦ୍‍ଦିଙ୍କ୍ ପ୍ରବୁନ୍ ପେଦେର୍‍ତେ ନାନ୍ ମିକିଂଙ୍କ୍ ସତର୍କ ମାଡ଼ୁତାନ୍ । ଅଣଯିହୁଦି ନାରୁଡ଼୍ ଲେକାମ୍ ମେଣ୍ଡେ ବାଦ୍‍କ୍‍ମାଟ୍ । ଅଡ଼ାଦ୍‌ ଚିନ୍ତେ ବୁସାତାଗ୍
EPH 4:18 ନୁ ଅଡ଼ାଦ୍‌ ମନ୍ ଇକାଡ଼୍ । ଇଶ୍ୱର୍ ଇତ୍‍ତେ ଜିୱୁଣ୍ଡ୍‍ତେ ଅଡ଼ାଦ୍‌ ବାତ୍‍ବା ପାଲ୍‍କ୍ ଇଲ୍‍ଲେ । ବାତେଙ୍କ୍‍ଇତ୍‍କେ ଅଡ଼୍‌ ସାରେ ମୁର୍କ ନୁ ଜିଦି ନାରୁଡ଼୍‍ ।
EPH 4:19 ଅଡ଼୍‌ ସିଗ୍‍ ଇଲ୍‍ୱେନଡ଼୍, ବ୍ରଷ୍ଟାଚାରୀଡ଼୍ ନୁ ସାରେୱେଲେ ସାର୍‍ରେ ପ୍ରକାର୍‍ତେ ଅଶୁଚି ପାଡ଼୍‍ୟିତାଗ୍ ମୁଡ଼୍‍ନ୍ଦିମାନ୍ଦାନଡ଼୍ ।
EPH 4:20 ଇ ସାର୍‍ରେ ମିଡ଼୍ କ୍ରିଷ୍ଟନ୍‍ ବିଷୟ୍‍ତେ ଶିକ୍ଷା ମାଡ଼ିମାନ୍ଦାନ୍ ବିଷୟ୍ ଆୟ୍‍ୟ ।
EPH 4:21 ମିଡ଼୍ ନିଜାମ୍ ଅନ୍‌ ବିଷୟ୍‍ତେ କେଞ୍ଜ୍‍ତିଡ଼୍ ନୁ ଅନ୍‌ ପେର୍କେ ଆଦାନଡ଼୍‍ ଲେକାମ୍‍ ଜିସୁନ୍ ବିଷୟ୍‍ତେ ସତ୍ ଶିକ୍ଷା ପାଏମ୍ ଆତ୍‍ତିଡ଼୍ ।
EPH 4:22 ଆଦିଙ୍କ୍ ବେନ୍ ପାଃନ୍ତେ ଜବାବ୍ ଆସ୍ ମିଡ଼୍ ଜିୱୁଣ୍ଡ୍ ବାଦ୍‍କ ମାତ୍‍ତିଡ଼୍, ଆୱୁ ୱିଡ଼୍‍ସାଟ୍, ବାତେଙ୍କ୍ ଇତ୍କେ ଆଦିନ୍ ବୁଚା ଲାଲସା ତଡ଼୍ ମିୟାଦ୍ ଆତ୍ମା ନଷ୍ଟ ଆସମାତ୍‍ତେ ।
EPH 4:23 ମିୟାଦ୍‍ ହୃଦୟ୍ ନୁ ମନ୍‍ ପୁରା ପୁନାଦ୍‍ ଆଦାନ୍ ଦର୍‍କାର୍ ।
EPH 4:24 ଇଶ୍ୱର୍‌ତେ ଲେକାମ୍ ତିୟାର୍‍ ଆତ୍‍ତେ ପୁନାଦ୍ ନିଜାମ୍‍ ସତ୍‍ ଆତ୍ମା ପୟ୍‍ମୁଟ୍ । ଆଦ୍ ମିୟାଦ୍‍ ପବିତ୍ର ନୁ ସାୟେତାଦ୍ ଜିୱୁଣ୍ଡ୍‍ ତଅନ୍‌ଦି ।
EPH 4:25 ମେଣ୍ଡେ ବୋଲ୍‍ମାଟ୍ । କ୍ରିଷ୍ଟ ବିଶ୍ୱାସୀଡ଼୍ ନିଜେନିଜର୍‍ତିଙ୍କ୍ ସତ୍ କେତ୍‍ତାନ୍ ମିନ୍ଦେ; ବାତେଙ୍କ୍‍ଇତ୍‍କେ ମାନାଡ଼୍ କ୍ରିଷ୍ଟନ୍ ମେନ୍ଦୁଲ୍‍ତେ କାୟ୍‍କ୍‍ ଡେକା ।
EPH 4:26 ମିଡ଼୍ କପାମ୍ ଆସ୍ ପାପାମ୍‍ ମାଡ଼୍‍ମାଟ୍ । ପଡ଼୍‍ଦ୍ ଅନ୍‌‍ୱେ ମୁନେଙ୍କ୍ ମିୟାଦ୍ କପାମ୍ କଟ ଆୟି ।
EPH 4:27 ଶୟ୍‍ତାନ୍‍ତିଙ୍କ୍ ପଡ଼୍‍ୟେ ଇମାଟ୍ ।
EPH 4:28 ଡଙ୍ଗାଲ୍ ମେଣ୍ଡେ ଡଙ୍ଗ୍‍ମାକିଣ୍ଡ୍ । ସାୟେତ୍ ଉପାୟ୍‍ତେ ନିଜେତ୍ ଜିବିକା ଗାଡ଼୍‍ସାନ୍ ସେଙ୍ଗେ ନୁ ଗରିବୀଡ଼୍‍କିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ଅଣ୍ଡ୍‌ ପାଡ଼୍‍ୟି ମାଡ଼ିଣ୍ଡ୍ ।
EPH 4:29 ମିଇ ପାୟୁର୍ କନ୍‍ସ୍ କାରାପ୍ ଗଟି ପେୟ୍‍ମାକି । ମିଇ ଗଟି ସାୟେଆୟି, ଗଟିନାଗ୍ ନୁ ପାଡ଼୍‍ୟିଦାଗ୍ ବ୍ୟବହାର୍‌ ଆୟି । ଆଲାଇତ୍‍କେ ବେନଡ଼୍ ମିଇ ଗଟି କେଞ୍ଜିତଡ଼୍, ଅଡ଼୍‌ ସେଙ୍ଗେ ଆୱୁ ସାୟେ ଆଦ୍‍ତେ ।
EPH 4:30 ଇଶ୍ୱର୍‌ତେ ପବିତ୍ର ଆତ୍ମାତିଙ୍କ୍ ଦୁଃକାମ୍‍ ଇମାଟ୍ । ବାତେଙ୍କ୍‍ଇତ୍‍କେ ପବିତ୍ର ଆତ୍ମା ମିଇ ପର୍‍ର ଇଶ୍ୱର୍‌ତେ ନିଜର୍‍ ଅଦିକାର୍‌ ଚିଃଏନେ ରକମ୍ ନୁ ଇଶ୍ୱର୍ ଯେ ଅନ୍‌‍ଦିନେ ମିକିଂଙ୍କ୍ ମୁକ୍ତି ମାଡ଼ିତନ୍, ଇଦିନ୍ ରକମ୍ ।
EPH 4:31 ସାର୍ରେ କାୟ୍‍ତାଦ୍‍, ଉତ୍ତେଜନା ନୁ କପାମ୍ ୱିଡ଼୍‍ସାଟ୍ । ପାସ୍କ୍‍ମାଟ୍‍ ବା ନିନ୍ଦେ ମାଡ଼୍‍ମାଟ୍ । ମେଣ୍ଡେ ସାରେଲେକାତ୍‌ ହିଂସା ମିୟାଗାଙ୍କ୍‌ ଜେକା ଆଇ ।
EPH 4:32 ଇତ୍‍କେ ନିଜେନିଜର୍‍ ସେଙ୍ଗେ ସଦୟ ନୁ ଲେଏତା ରକମ୍ ଆୟ୍‍ମୁଟ୍ ନୁ କ୍ରିଷ୍ଟନ୍ ସେଙ୍ଗେ ଇଶ୍ୱର୍ ବେଦ୍‍ପୁଟୁଙ୍କ୍ ମିକିଂଙ୍କ୍ କ୍ଷେମା ମାଡ଼ିମିନ୍ଦେଣ୍ଡ୍, ମିଡ଼୍ ଆନ୍‌‍ତେ ଆଦେପୁଟୁଙ୍ଗ୍‍ ନିଜେନିଜର୍‍ତିଙ୍କ୍ କ୍ଷେମା ଇମୁଟ୍ ।
EPH 5:1 ମିଡ଼୍ ଇଶ୍ୱର୍‌ତେ ପ୍ରିୟ ମାର୍‍କିନଡ଼ି, ଆଦିଙ୍କ୍‍ ଅନ୍‌ ଲେକାମ୍ ଆଦାନଙ୍କ୍ ଚାଏମ୍‍ ଆୟ୍‍ମୁଟ୍ ।
EPH 5:2 କ୍ରିଷ୍ଟ ବେଲା ମାନାଙ୍କ୍‍ ପ୍ରେମ ମାଡ଼୍‍ତଣ୍ଡ୍ ନୁ ଇଶ୍ୱର୍‌ତେ ସାୟେତ୍ ସେଙ୍ଗେ ନିଜେତ୍ ଜିୱୁଣ୍ଡ୍‍ତିଙ୍କ୍ ମାନ୍‍ ମାୟ୍‍ଦିଙ୍କ୍ ସାୟେ ଗାବ୍‍ତାୱୁ ପୁଜାସାମାନ୍ ନୁ ବଲି ଉତ୍ସର୍ଗ ମାଡ଼୍‍ତଣ୍ଡ୍, ମିଇ ଜିୱୁଣ୍ଡ୍ ମିକା ଆଦେଲେକାମ୍ ଚାଲେମ୍ ଆୟି ।
EPH 5:3 ଇଶ୍ୱର୍‌ତେ ନାରୁଡ଼୍ ଆତ୍‍ତାଙ୍କ୍ ମିୟାଗ୍ ବେବିଚାର୍, କାରାପ୍, ଅଶୁଚିତା ନୁ ଲାଲସା ମାନ୍‍ମାକି ।
EPH 5:4 ମିୟାଗ୍‍ କାରାପ୍ ଗଟି, କାରାପ୍ ୱେଷଡ଼୍ ନୁ ମିଚ୍ ଗଟି କେତାନାଦ୍ ଟିକ୍ ଆୟ୍‍ୟ । ବାତେଙ୍କ୍‍ଇତ୍‍କେ ମିଡ଼୍‍ ଗଟି ତିର୍‍ୟାନାଗ୍‍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇସମାନୁଟ୍‍ ।
EPH 5:5 ଇଦ୍ ନିଜାମ୍ ଇଞ୍ଜ ପୁନୁଟ୍, ବେନ୍ ଅଶୁଚି ନାରୁଡ଼୍ ନିତାଲ୍, ଶିଷ୍ଟାଚାର୍ ଇଲ୍‍ୱେ ନାରୁଣ୍ଡ୍‍ ନୁ ଲବି ନାରୁଣ୍ଡ୍‍ ଗାଟି ଲବି ପୁତ୍‍ଲାମ୍‍ ପୁଜା ରକମ୍‍ ଅଣ୍ଡ୍‌ ବେସୁଟ୍‍ବା କ୍ରିଷ୍ଟ ନୁ ଇଶ୍ୱର୍‌ତେ ରାଜ୍ୟତାଗ୍ ଆଦେ ପାର୍‍ୱଣ୍ଡ୍ ।
EPH 5:6 ମୁଲ୍ୟ ଇଲ୍‍ୱେ ଗଟି କେସ୍ ମିକିଂଙ୍କ୍ ବେନ ତିପାଲ୍ ମାଡ଼୍‍ମାକିଡ଼୍ । ଇୱୁ ସାର୍‍ରେ କାରାପ୍ ପାଡ଼୍‍ୟି ବେନଡ଼୍‍ ଇଶ୍ୱର୍‌ତେ ଗଟ୍ ମାନେମ୍‍ ଆୟ୍‍ୟଡ଼୍ ଅଡ଼୍‌ ମାୟ୍‍ଦିଙ୍କ୍ ଅନ୍‌ କପାମ୍ ପେୟ୍‍ତିତ୍ ।
EPH 5:7 ଇସତ୍ ନାରୁଡ଼୍ ତଡ଼୍ ବାତ୍‍ବା ସମ୍ପର୍କ ନେଃଏମାଟ୍ ।
EPH 5:8 ମିଡ଼୍ ନିଜେ ଅନ୍‌‍ଦିନେ ଇକାଡ଼୍‌ତାଗ୍ ମାତ୍‍ତିଡ଼୍, ଇତ୍‍କେ ମିଡ଼୍ ଇଞ୍ଜେ ପ୍ରବୁନ୍ ନାରୁଡ଼୍ ଆସ୍‍ମାନାଙ୍କ୍ ମିଡ଼୍ ୱେସ୍‍ତାଗ୍ ମିନ୍ଦେଡ଼ି । ଆଦିଙ୍କ୍ ମିଡ଼୍ ୱେସ୍‍ତେ ପିଲାନ୍ ଲେକାମ୍ ବ୍ୟବହାର୍‌ ମାଡ଼ାଟ୍ ।
EPH 5:9 ବାତେଙ୍କ୍‍ଇତ୍‍କେ ୱେସ୍ ସାର୍‍ରେ ପ୍ରକାର୍‍ ସାୟେତ୍ ଗୁନାମ୍, ଦାର୍ମାମ୍ ନୁ ସତ୍ ପେସ୍ପିତ୍ ।
EPH 5:10 ପ୍ରବୁ ସନ୍ତୋଷ୍ ଆଦ୍‍ଦାନ୍ ମାୟ୍‍ଦିଙ୍କ୍ ଶିକ୍ଷା ନାଡ଼୍‍ସାଟ୍ ।
EPH 5:11 ନାରୁଡ଼୍ ଇକାଡ଼୍‌ତାଗେ ବେନ୍ ସାର୍‍ରେ କାରାପ୍ ପାଡ଼୍‍ୟି ମାଡ଼ୁତଡ଼୍, ଅଡ଼୍‌‍ସାଙ୍ଗ୍‍ ତଡ଼୍‍ ଆୟ୍‍ମାଟ୍‍ । ଅଡ଼୍‌ ପାଡ଼୍‍ୟି ସାର୍‍ରେ ପେସ୍‍ପି ତଅସିମୁଟ୍ ।
EPH 5:12 ବାସ୍ତବିକ୍, ଅଡ଼୍‌ ମିଞ୍ଜ୍‍ସ୍ପି ବାତ୍‍ ସାର୍‍ରେ ମାଡ଼ିତଡ଼୍, ଆଦ୍ ବିଷୟ୍ କେତାନାଦ୍ ସିଗୁଲ୍‍ମାଲାମ୍ ।
EPH 5:13 ବେସୁଟ୍‌ ସାର୍‍ରେ ବିଷୟ୍ ୱେସିନାଗ୍ ତଅନ୍‌ଦିତା ଆସୁଟେ ଆୱୁ ସାର୍‍ରେ ନିଜାମ୍‍ତାୱୁ ପେୟ୍‍ତିତା ।
EPH 5:14 ବାତେଙ୍କ୍‍ଇତ୍‍କେ ୱେସ୍ ସାର୍‍ରେ ବିଷୟ୍ ପେସ୍ପିତା । ଆଦିନ୍ ମାୟ୍‍ଦିଙ୍କ୍ ଇଲା ଲେକ୍‍ତାଦ୍ ମିନ୍ଦେ, “ହୋ ଉଞ୍ଜ୍‍ତେନଡ଼ି, ତିଆର୍‍ତେ ଆୟ୍‍ମୁଟ୍ ନୁ ଡଲ୍‍ତେନଡ଼ାଗାଙ୍କ୍ ତେଏଦାଟ୍ ! କ୍ରିଷ୍ଟନ୍ ୱେସ୍‍ତାଗ୍ ପେୟ୍‍ମୁଟ୍ ।”
EPH 5:15 ଆଦିଙ୍କ୍ ମିଡ଼୍ ବେଲା ବେବ୍ୟହାର୍‌ ମାଡ଼ିତିଡ଼୍, ଆଦ୍ ବିଷୟ୍‍ତେ ସାବ୍‍ଦାନ୍ ଆୟ୍‍ମୁଟ୍ । ମୁର୍କ ଇନା ଆୟ୍‍ୟକଟ ଜ୍ଞାନି ଇନା ଆୟ୍‍ମୁଟ୍ ।
EPH 5:16 ସାର୍‍ରେ ସୁଯୋଗ୍‍ତାଗାଙ୍କ୍ ସାୟେ ବ୍ୟବହାର୍‌ ମାଡ଼ାଟ୍, ବାତେଙ୍କ୍‍ ଇତ୍କେ କାରାପ୍ ଦିନାମ୍ ଏୱୁତେ ।
EPH 5:17 ମୁର୍କ ନାରୁଡ଼୍ ଇନା ଆୟ୍‍ୟକଟ, ଇତ୍‍କେ ପ୍ରବୁନ୍ ଗଟି ବୁଜେମ୍ ଆଦାଙ୍କ୍ ଆଲ୍‍ସି ମାଡ଼ାଟ୍ ।
EPH 5:18 କାଲ୍‍ ଉନ୍ଦାନାଗ୍ ଆନ୍‌‍ମାଟ୍, ଆଦ୍ ମିକିଂଙ୍କ୍ ସର୍ବନାସ୍ ମାଡ଼ିତ୍, ବାତେଙ୍କ୍‍ଇତ୍‍କେ ପବିତ୍ର ଆତ୍ମା ତଡ଼୍‍ ପୁରା ଆୟ୍‍ମୁଟ୍ ।
EPH 5:19 ପାଟ୍‍, ଆରାଦନା ନୁ ବକ୍ତିତଡ଼୍ ପାଟ୍ ପାରାଟ୍ ନୁ ନିଜେ ନିଜର୍‌ଲପେ ସାର୍‍ଦେ ଆୟ୍‍ମୁଟ୍ । ହୃଦୟ୍‍ତେ ଲପେଙ୍କ୍ ପ୍ରବୁନ୍ ପେଦେର୍‌ତେ ପାଟ୍ ପାରାଟ୍ ।
EPH 5:20 ସାର୍ରେୱେଲେ ସାର୍‍ରେ ବିଷୟ୍ ପ୍ରବୁ ଜିସୁ କ୍ରିଷ୍ଟନ୍ ପେଦେର୍‍ତେ ନୁ ବାବାଲ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇମୁଟ୍ ।
EPH 5:21 କ୍ରିଷ୍ଟନ୍ ପର୍‍ର ନିୟାଦ୍ ବକ୍ତି ମାନ୍‍ନାଙ୍କ୍ ମିଡ଼୍ ମିମିଲପେ କାୟ୍‍ଲି ମାନୁଟ୍ ।
EPH 5:22 ଆ ନାଟାନଡ଼ି ! ମିଡ଼୍ ବେଲା ପ୍ରବୁନାଗ୍ ମିନ୍ଦେଡ଼ି ଆଲେନେ ନିଜର୍‍ନିଜର୍ ମୁଦ୍‍ପାଲଡ଼୍‍ ତଡ଼୍ ମାନୁଟ୍ ।
EPH 5:23 ମଣ୍ଡଲିତେ ପର୍‍ର କ୍ରିଷ୍ଟନାଦ୍ ଅଦିକାର୍‌ ବେଲା ମିନ୍ଦେ ଆଲେନେ ନାଟାଡ଼୍‍ତେ ପର୍‍ର ମାନେୟ୍‍ତେ ଅଦିକାର୍‌ ମିନ୍ଦେ; ମେଣ୍ଡେ କ୍ରିଷ୍ଟ କେ ତାମ୍ ମେନ୍ଦୁଲ୍ ଇନା ମଣ୍ଡଲିତେ ତ୍ରାଣକର୍ତ୍ତାଲ୍ ।
EPH 5:24 ମଣ୍ଡଲିତାଗ୍‍ ବେଲା କ୍ରିଷ୍ଟନ୍ ଅଦିକାର୍‌ ମିନ୍ଦେ, ନାଟାକି ବେଲା ନିଜର୍‍ନିଜର୍ ମୁଦ୍‍ପାଲଡ଼୍‍ ଗାର୍‍ରେ ସାରେୱେଲେ ମାନି ।
EPH 5:25 ମୁଦ୍‍ପାଲଡ଼ି, କ୍ରିଷ୍ଟ ବେଲା ମଣ୍ଡଲିତିଙ୍କ୍ ପ୍ରେମ ମାଡ଼ି, ତାନ୍ ଜିୱୁଣ୍ଡ୍ ଇତ୍‍ତନ୍, ମିଡ଼୍ ଟିକ୍ ଆଲେନେ ନିଜର୍‍ନିଜର୍ ମୁତେକିଙ୍କ୍ ପ୍ରେମ ମାଡ଼ାଟ୍ ।
EPH 5:26 କ୍ରିଷ୍ଟ ମଣ୍ଡଲିତିଙ୍କ୍ ଏର୍‍ ତଡ଼୍ ପରିଷ୍କାର୍ ମାଡ଼ି ଇଶ୍ୱର୍‌ତେ ଗଟ୍‍ ମାଇଦିଙ୍କ୍‍ ଉତ୍ସର୍ଗ ମାଡ଼୍‍ତଣ୍ଡ୍,
EPH 5:27 ମେଣ୍ଡେ ଆଦ୍ ପବିତ୍ର, ନିର୍ଦୋଷ୍‍, ନିଷ୍କଳଙ୍କ୍ ନୁ ସାର୍‍ରେ ସାୟେ ସୁନ୍ଦର୍ ମାଡ଼ି ନିଜେ ନେଃଏତଣ୍ଡ୍ ।
EPH 5:28 ମାନେୟ୍‍ନଡ଼ି ନିଜେତ୍ ମେନ୍ଦୁଲ୍ ଇଞ୍ଜ ଆଲ୍‍ସି ନିଜେତ୍ ନାଟାକିଙ୍କ୍ ପ୍ରେମ ମାଡ଼ାନାଦ୍ ସାୟେ । ବେନ ନିଜେତ୍ ନାଟାକିଙ୍କ୍ ପ୍ରେମ ମାଡ଼ିତନ୍, ଅଣ୍ଡ୍‌ ନିଜେତିଙ୍କ୍ ପ୍ରେମ ମାଡ଼ୁତଣ୍ଡ୍ ।
EPH 5:29 ବେନ ବେସୁଟ୍‌ ନିଜେତ୍ ମେନ୍ଦୁଲ୍‍ତିଙ୍କ୍ ପାସ୍‍କଣ୍ଡ୍ । ମେଣ୍ଡେ ମେନ୍ଦୁଲ୍‍ତିଙ୍କ୍ ତିନ୍ଦାନ୍ ଉନ୍ଦାନ୍ ମାଡ଼ିତନ୍ ନୁ ଜତନ୍ ଆଦ୍‍ତନ୍ ଆଲେନେ କ୍ରିଷ୍ଟ ମଣ୍ଡଲିତେ ଜତନ୍ ଆଦ୍‍ତନ୍,
EPH 5:30 ବାତେଙ୍କ୍‍ଇତ୍‍କେ ମାନାଡ଼୍ ଅନ୍‌ ମେନ୍ଦୁଲ୍‍ତେ ଡେକା କାୟ୍‍କ୍ ।
EPH 5:31 ଦର୍ମଶାସ୍ତ୍ରତାଗ୍ କେତ୍‍ତେ ଲେକାମ୍, “ଇଦିନ୍‍ ମାଇଦିଙ୍କ୍‍ ମାନେୟ୍‍ତେ ୟାୟବାବାଙ୍କ୍ ୱିଡ଼୍‍ସି ନିଜେତ୍ ମୁତେନ୍ ତଡ଼୍ ମାନ୍‍ତଣ୍ଡ୍ ଅଡ଼୍‌ ଇର୍‍ୱୁଡ଼୍ କାୟ୍‍ଲି ୱେରଡ଼୍ ଆଦ୍‍ତଡ଼୍ ।”
EPH 5:32 ଶାସ୍ତ୍ରତାଗ୍ ଇଦ୍ ବିଷୟ୍‍ତେ ପେସ୍ପିମିନ୍ଦେ, ଇଦ୍ କ୍ରିଷ୍ଟ ନୁ ମଣ୍ଡଲି ସେଙ୍ଗେ ସାୟେ ଇଞ୍ଜ ନାନ୍ ବୁଜେମ୍‌ ଆଦୁତାନ୍ ।
EPH 5:33 ଇତ୍‍କେ ଇଦ୍ ମିଇ ସେଙ୍ଗେବା ସାୟେ । ସାର୍‍ରେ ମୁଦ୍‍ପାଲଡ଼୍ ମୁତେଙ୍କ୍ ଜିୱେଇସ୍‍ ପ୍ରେମ ମାଡ଼ାଟ୍‍ ନୁ ସାର୍‍ରେ ମୁତ୍‍ତେ ନିଜେତ୍ ମୁଦ୍‍ପାଲଡ଼୍‍କିଙ୍କ୍ ସମ୍ମାନ୍ ଇୱି ।
EPH 6:1 ପିଲାନଡ଼ି, ୟାୟବାବନ୍ ଗଟି କେଞ୍ଜାନାଦ୍ ମିୟାଦ୍ କ୍ରିଷ୍ଟିୟାନ୍ ପାଡ଼୍‍ୟି, ବାତେଙ୍କ୍‍ ଇତ୍କେ ଇଦ୍‍ଏ ସାୟେତ୍ ବ୍ୟବହାର୍‌ ।
EPH 6:2 “ମିୟାୱୁ ୟାୟବାବାଙ୍କ୍‍ ସମ୍ମାନ୍ ମାଡ଼ାଟ୍ ।” ଇଦ୍‍ଏ ଗଟ୍‍ତାଗ୍‍ ଅଣ୍ଡୟ୍‌ ପ୍ରତିଜ୍ଞା କାଲ୍‍ପି କେତ୍‍ତଡ଼୍,
EPH 6:3 “ବେଲାକି ମିୟାଦ୍ ସାୟେ ଆଦ୍‍ତେ ନୁ ମିଡ଼୍ ପୃତିବିତାଗ୍ ନାର୍ଗେଜେଲ୍ ମାନ୍‍ତିଡ଼୍ ।”
EPH 6:4 ୟାୟବାବଡ଼୍, ପିଲାକିଙ୍କ୍ କପାମ୍ ମାଡ଼ାନ୍ ଲେକାମ୍ ବାତ୍ ବ୍ୟବହାର୍‌ ମାଡ଼୍‍ମାଟ୍, ଇତ୍‍କେ ପ୍ରବୁନ୍ ବ୍ୟବହାର୍‌ ନୁ ଶିକ୍ଷାତଡ଼୍ ଅଡ଼୍‌‍କିଂଙ୍କ୍ ପୋଡ଼୍‍ପାଟ୍ ।
EPH 6:5 ଗତିନଡ଼ି, ମିଡ଼୍ କ୍ରିଷ୍ଟନ୍ ସେବା ମାଡ଼ୁତିଡ଼୍ ଇଞ୍ଜ ଆଲ୍‍ସି ହୃଦୟତାଗ୍‍ ୱେର୍ରେତଡ଼୍ ୱାଡ଼୍‍କି ଜଗତ୍‍ତେ ସାଉକାରୀଡ଼୍‍ ଗଟ୍ ପାଲନ୍ ମାଡ଼ାଟ୍‍ ।
EPH 6:6 ମାଲିକ୍ ମିକିଂଙ୍କ୍ ଉଡ଼ାନ୍ ୱେଲେ ଅନାଗ୍ ସାୟେ ଆଦାନଙ୍କ୍ ଆଦ୍ ମାଡ଼୍‍ୱେକନ୍ସ୍‌, କ୍ରିଷ୍ଟନ୍ କ୍ରିତଦାସ ଲେକାମ୍ ମିୟାଦ୍ ସରଲ୍‌ ହୃଦୟ୍ ଇସ୍ ଇଶ୍ୱର୍‌ତେ ଇଚ୍ଛା ଲେକାମ୍‍ ମାଡ଼ାଟ୍ ।
EPH 6:7 ଆସାମ୍ ମାନେୟ୍‍ତାଦ୍ ସେବା ମାଡ଼ୁତିଡ଼୍ ଆଲ୍‍ସ୍‍ୱେ ପ୍ରବୁନ୍ ସେବା ମାଡ଼ାନ୍ ଲେକାମ୍ ୱେଡ଼୍‍କେତେ ଆଦ୍ ମାଡ଼ାଟ୍ ।
EPH 6:8 ଏର୍କା ନେଃଏମୁଟ୍, ଅଣ୍ଡ୍‌ କ୍ରୀତଦାସ୍ ଆୟିଣ୍ଡ୍ ବା ସ୍ୱାଦିନ୍ ଆୟିଣ୍ଡ୍ ପ୍ରବୁ ସାର୍‍ରେ ନାରୁଡ଼୍‍କିଂଙ୍କ୍ ଅନାଦ୍‌ ସାୟେତ୍ ପାଡ଼୍‍ୟି ସେଙ୍ଗେ ପୁରଷ୍କାର୍ ଇଦ୍‍ତଣ୍ଡ୍ ।
EPH 6:9 ମାଲିକିନଡ଼ି, ମିଇ କ୍ରିତଦାସିଡ଼୍ ସେଙ୍ଗେ ଆଦେଲେକାମ୍ ବ୍ୟବହାର୍‌ ମାଡ଼ାଟ୍ ନୁ ଅଡ଼୍‌‍କିଂଙ୍କ୍ ଦମ୍‍କା ମାଡ଼୍‍ମାଟ୍ । ଏର୍କା ନେଃଏମୁଟ୍, ମିଡ଼୍ ନୁ ମିଇ କ୍ରିତଦାସଡ଼୍ ସାର୍ରେତଡ଼୍ ସ୍ୱର୍ଗତଣ୍ଡ୍ ପ୍ରବୁନ୍ ଅଦିନ୍ । ଅଣ୍ଡ୍‌ ସାର୍ରେତଡ଼୍‍କିଙ୍କ୍ ସାମାନ୍ ବିଚାର୍ ମାଡ଼ିତନ୍ ।
EPH 6:10 ସାର୍ରେତିଙ୍କ୍ ପେର୍‍କେ, ପ୍ରବୁନ୍ ତଡ଼୍ କାୟ୍‍ଲି ଅନ୍‌ ମହାଶକ୍ତିତାଗ୍ ଶକ୍ତିମାନ୍‍ ଆୟ୍‍ମୁଟ୍ ।
EPH 6:11 ଇଶ୍ୱର୍ ଇତ୍‍ତାଦ୍ ସାର୍‍ରେ ଆତ୍ମିକ୍‍ ଯୁଦ୍‍ଜଗ୍‍ଡ଼ାମ୍‍ ତଡ଼୍ ତିଆର୍‌ ଆୟ୍‍ମୁଟ୍, ବେଲାକି ଶୟ୍‍ତାନ୍‍ତେ କାରାପ୍ ଚିନ୍ତେତିଙ୍କ୍ ସାମ୍‍ନା ମାଡ଼ାଙ୍କ୍‍ ପାର୍‍ଦ୍‍ତିଡ଼୍ ।
EPH 6:12 ବାତେଙ୍କ୍‍ଇତ୍‍କେ ମାନାଡ଼୍ ସ୍ୱର୍ଗତେ ନାରୁଡ଼୍ ବିରୁଦ୍‍ତେ ଯୁଦ୍‌ ମାଡ଼୍‍ୱାଡ଼୍; ମାନାଡ଼୍ ଶୂନ୍ୟତେ ଶୟ୍‍ତାନ୍‍ ଶକ୍ତି ନୁ ଇଦ୍ ଯୁଗ୍‍ତେ ଶାସନ୍‍ମାଡ଼ାନଡ଼୍, ରାଜାଲଡ଼୍‍ ନୁ ସାର୍‍ରେ ବିଶ୍ୱଶକ୍ତି ବିରୁଦ୍‍ତେ ଯୁଦ୍‌ ମାଡ଼ୁତମ୍ ।
EPH 6:13 ଆଦିଙ୍କ୍ ଇଞ୍ଜେ ଇଶ୍ୱର୍ ଇତ୍‍ତେ ଆତ୍ମିକ୍‍ ଯୁଦ୍‍ ଜଗ୍‍ଡ଼ାମ୍ କେର୍‍ମୁଟ୍; ଆଲେକେ କାରାପ୍ ସମୟ୍‍ତେ ମିଡ଼୍ ଶତ୍ରୁଡ଼୍ ଚିଟିରମଣତିଙ୍କ୍ ଅଟ୍‍କା ମାଡ଼େପାର୍‍ଦ୍‍ତିଡ଼୍ ନୁ ଶେଷ୍ ଆୟ୍‍ନା ଯୁଦ୍‌ ମାଡ଼ିମିକା ଡୁଟାଙ୍ଗ୍‍ ମାନ୍‍ତିଡ଼୍ ।
EPH 6:14 ଆଦିଙ୍କ୍ ସତ୍ୟତାଦ୍ ବେଲ୍‍ଟ୍, ଦାର୍ମାମ୍‌ତେ ଗୁଣ୍ଡେତାଗ୍ କେର୍‍ଦାନାଦ୍‍ ନୁ
EPH 6:15 ଡେକେତାଗ୍ ଶାନ୍ତିତେ ସୁସମାଚାର୍ ଲେକେତ୍‍ ଏର୍‍ପୁକ୍‍ କେର୍‍ସ୍ ଗାଡ଼୍‍ସ୍‍ଆସ୍‍ ନିଲ୍‍ମୁଟ୍ ।
EPH 6:16 ସାରେଦାମ୍ ବିଶ୍ୱାସ୍‍ତାଦ୍‍ ମୁନ୍ତା କାଞ୍ଜିମାନୁଟ୍, ଇଦିନ୍‍ ସାହାଯ୍ୟତେ ଶୟ୍‍ତାନ୍‍ ଏସ୍‍ତେ ସାର୍‍ରେ କିସ୍‍ତାୱୁ କାଡ଼୍‍କିଙ୍କ୍ ବାୟିଦେ ଏସାଙ୍କ୍ ମିଡ଼୍ ପାର୍‍ଦ୍‍ତିଡ଼୍‍ ।
EPH 6:17 ପରିତ୍ରାଣ୍ ରକତାତ୍ ତାଲ୍‌ଲେତାଗ୍ କେର୍‍ଦାନାଦ୍ ନୁ ପବିତ୍ର ଆତ୍ମା ଇତ୍‍ତେ ଇଶ୍ୱର୍‌ତେ ବାକ୍ୟ ରକମ୍ ଚୁର୍ ପୟ୍‍ମୁଟ୍ ।
EPH 6:18 ଇଶ୍ୱର୍‌ତେ ସାହାଯ୍ୟ ବିକ୍ୟାତାଲ୍‍କି ପ୍ରାର୍ତନା ତଡ଼୍ ଇୱୁସାର୍ରେ ମାଡ଼ାଟ୍ । ସାର୍‍ରେ ଅସୁବିଦା ୱେଲେ ପବିତ୍ର ଆତ୍ମାତେ ଚାଲାମାଡ଼ାନ୍‍ ଲେକାମ୍ ପ୍ରାର୍ତନା ମାଡ଼ାଟ୍ । ତିଆର୍‍ତେ ମାନୁଟ୍; ବେସୁଟ୍‌ ଆୟ୍‍ୱିମାଟ୍ । ଇଶ୍ୱର୍‌ତେ ନାରୁଡ଼୍ ସେଙ୍ଗେ ସାରେଦାମ୍ ପ୍ରାର୍ତନାତାଗ୍ ମନ୍ ଇସ୍‍ମାନୁଟ୍ ।
EPH 6:19 ନା ସେଙ୍ଗେ ମିକା ପ୍ରାର୍ତନା ମାଡ଼ାଟ୍, ବେଲାକି ସୁସମାଚାର୍‍ଦେ ଲୋପେତ୍ ବିଷୟ୍ କେତାନଙ୍କ୍ ନୁ ୱେର୍ରେଇଲ୍‍ୱେ ଆଦ୍ କେତାନଙ୍କ୍‌ ଇଶ୍ୱର୍ ନା ପାୟୁର୍‍ତାଗ୍ ଟିକ୍ କବର୍ ଇଦ୍‍ତଣ୍ଡ୍ ।
EPH 6:20 ଇଞ୍ଜେ ଇକ୍‍ଲେମ୍‍ତଡ଼୍‍ ବନ୍ଦିତାଗ୍ ମାତ୍‍କେମିକା ନାନ୍ ସୁସମାଚାର୍ ସେଙ୍ଗେ ୱେରଣ୍ଡ୍ ରାଜଦୂତ୍ । ପ୍ରାର୍ତନା ମାଡ଼ାଟ୍, ବେଲାକି ନାନ୍ ସାହାସ୍‍ ତଡ଼୍ ମନ୍‍ଇସ୍‍ ସୁସମାଚାର୍ ପ୍ରଚାର୍ ମାଡ଼ାନଙ୍କ୍ ପାର୍‍ଦ୍‍ତାନ୍ ।
EPH 6:21 ନାୟାଦ୍ ଅବସ୍ଥା ବିଷୟ୍‍ତେ ମିଡ଼୍ ବେଲାକି ପୁନ୍ଦେପାର୍‍ଦ୍‍ତିଡ଼୍, ଆଦିନ୍ ସେଙ୍ଗେ ମାନ୍‍ ପ୍ରିୟ ଦାଦାଲ୍ ନୁ ପ୍ରବୁନ୍ ପାଡ଼୍‍ୟି ମାଡ଼ମାନ୍ଦାନ୍ ବିଶ୍ୱାସ୍‌ତେ ଦାସ ତୁକିକ ନା ବିଷୟ୍‍ତେ ମିକିଂଙ୍କ୍ ସାର୍‍ରେ ଗଟି କେତିତଡ଼୍‍ ।
EPH 6:22 ମାମ୍ ସାର୍ରେତମ୍ ବେଲା ମିନ୍ଦେମ୍, ଆଦ୍ ବିଷୟ୍‍ତେ କେସ୍ ମିକିଂଙ୍କ୍ ସାର୍‍ଦେ ମାଡ଼ାନ୍ ସେଙ୍ଗେ ନାନ୍ ଅଂକିଙ୍କ୍‌ ମିଇ ଗାର୍‍ରେ ରଅତୁତାନ୍ ।
EPH 6:23 ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ବିଶ୍ୱାସି ଦାଦାଲଡ଼୍‍ ନୁ ଏଲାସ୍କିଙ୍କ୍ ଶାନ୍ତି, ପ୍ରେମ ନୁ ବିଶ୍ୱାସ୍ ଇୱିଣ୍ଡ୍ ।
EPH 6:24 ମାନ୍‍ ପ୍ରବୁ ଜିସୁ କ୍ରିଷ୍ଟନ୍‍ ସେଙ୍ଗେ ବେନଡ଼ାଦ୍ ପ୍ରେମ ଅମର୍, ଅଡ଼୍‌‍ ସାର୍ରେତଡ଼୍‍କିଂଙ୍କ୍ ଅନୁଗ୍ରହ ଆୟି ।
PHI 1:1 ଫିଲିପୀ ମଣ୍ଡଲିତେ ଦର୍ମଗୁରୁ, ସେବକିଡ଼୍ ନୁ କ୍ରିଷ୍ଟ ବିଶ୍ୱାସି ସାରେତଡ଼୍‍କ୍, କ୍ରିଷ୍ଟ ଜିସୁନ୍ ଦାସ ପାଉଲ୍ ନୁ ତିମତିନ୍ ଚିଟି,
PHI 1:2 ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍‍ ।
PHI 1:3 ବେସ୍‍ଦାମ୍ ନାନ୍ ମିକିଂଙ୍କ୍ ଏର୍କା ମାଡ଼ିତାନ୍, ନା ଇଶ୍ୱର୍‌ତିଙ୍ଗ୍ ଦନ୍ୟବାଦ୍ ଇଦ୍‍ତାନ୍,
PHI 1:4 ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ାନ୍ ୱେଲେ ୱେଡ଼୍‍କେତେ ପ୍ରାର୍ତନା ମାଡ଼ାଟ୍;
PHI 1:5 ବାତେଙ୍କ୍ ମିୟାଦ୍ ବିଶ୍ୱାସ୍ ପ୍ରାୟ ଦିନାକିନେ କେ ନାନ୍ ମିକିଙ୍କ୍ ସୁସମାଚାର୍‍ତାଗ୍ କାମ୍ ମାଡ଼ିତାନ୍ ।
PHI 1:6 ଆଦିଙ୍କ୍ ନାନ୍ ଇଦ୍ ବିଷୟ୍‍ତେ ନିଜାମ୍‍ ଯେ, ବେନ୍ ପ୍ରବୁ ମିୟାଗେ ଇଦ୍ ସାୟେ ପାଡ଼୍‍ୟି ଆରାମ୍ ମାଡ଼୍‍ତଣ୍ଡ୍, କ୍ରିଷ୍ଟ ଜିସୁନ୍ ୱାଦାନ୍ ଦିନାତେ ଇଦ୍ ତେରାନ୍ ଯାକ ଅଣ୍ଡ୍‌ ଆଦ୍ ମାଡ଼ିତନ୍ ।
PHI 1:7 ମୀଇଡ଼୍ ସାରେଦାମ୍ ନା ହୃଦୟ୍‍ତାଗ୍ ମିନ୍ଦେଡ଼ି; ଆଦିଙ୍କ୍ ମିୟାଦ୍ ବିଷୟ୍‍ତେ ଇଦ୍‍ଲେକାମ୍ ଏର୍କା ମାଡ଼ାନାଦ୍ ନାକିଙ୍କ୍‍ ଟିକ୍ ଆଦ୍‍ତେ । ନାନ୍‍ନେ ସ୍ୱାଦିନ୍ ମାନ୍ଦାନ୍ ୱେଲେ ନୁ ଇଞ୍ଜେ ଇଦ୍ ବନ୍ଦି ଅବସ୍ଥାତେ ସୁସମାଚାର୍ତେ ପ୍ରତିଷ୍ଠା ନୁ ସୁରକ୍ଷା ସେଙ୍ଗେ ପାଡ଼୍‍ୟି ମାଡ଼ାନଙ୍କ୍ ଇଶ୍ୱର୍ ନାକିଂଙ୍କ୍ ବେନ୍ ସୁଯଗ୍ ଇତ୍‍ତନ୍, ମୀଇଡ଼୍ ସାରେତଡ଼୍ ଇଦ୍‍ନ୍ ଅଂଶି ଆସ୍‍ମିନ୍ଦେ ।
PHI 1:8 ମିଇ ସାରେତଡ଼୍ ସେଙ୍ଗେ ନାୟାଦ୍ ନାର୍‍ଗେ ସ୍ନେହ ସ୍ୱୟଂ ଜିସୁ କ୍ରିଷ୍ଟନାଗାଙ୍କ୍ ନାନ୍ ପାଏମ୍ ଆତ୍‍ତାନ୍ ଇଞ୍ଜ୍‍ ବେସୁଙ୍କ୍‍ ନାନ୍ କେତିତାନ୍, ଇଦ୍ ନିଜାମ୍ ସତ୍ । ଇଶ୍ୱର୍ ଇଦିନ୍ ସାକ୍ଷି ଆତ୍‍ତେ ।
PHI 1:9 ନାନ୍ ପ୍ରାର୍ତନା ମାଡ଼ିତାନ୍, ବେଦ୍‍ଲେକାମ୍ ମୁନେଙ୍କ୍‍ତାଦ୍ ବୁଦ୍‍ତେ ନୁ ନ୍ୟାୟ ବିଚାର୍‍ତେ ମିୟାଦ୍ ପ୍ରେମ ନାର୍ଗେ ତାଗାଙ୍କ୍ ନାର୍‍ଗେ ଆଦ୍‌ତେ
PHI 1:10 ନୁ ମୀଇଡ଼୍ ବେଲାନ୍ ଲେକେତ୍ ଶିକ୍ଷା ସାରେ ଏଞ୍ଚ୍‍ ପାର୍‍ଦ୍‍ତିନ୍ । ଆଲେକେ, ମିଡ଼୍ କ୍ରିଷ୍ଟନାଦ୍ ୱାଦାନାଦ୍ ଦିନାତେ ପବିତ୍ର ନୁ ନିନ୍ଦ୍‍ ଇଲ୍‍ୱେନନି ମାନ୍‍ତିଡ଼୍‍
PHI 1:11 ଇଶ୍ୱର୍‌ତାଦ୍ ଗୌରବ୍ ନୁ ପ୍ରସଂଶା ସେଙ୍ଗେ ମିୟାଦ୍ ଜିୱୁଣ୍ଡ୍ ଜିସୁ କ୍ରିଷ୍ଟ ଇସ୍‍ମାନ୍ଦାନ୍ ସାରେଗୁଣତଡ଼୍ ବର୍ତ୍ତି ଆଦ୍‍ତେ ।
PHI 1:12 ହୋ ଦାଦାନଡ଼ି ନୁ ଏଲାସ୍କିନଡ଼ି ! ନାନ୍ ମିଇକିଂଙ୍କ୍ କେଞ୍ଜ୍‍ପାନଙ୍କ୍ ଇଚ୍ଛା ଯେ, ନା ସେଙ୍ଗେ ବାତେଏ ଗଟେମ୍ ଆତ୍‍ତେ, ଆଦ୍ ସୁସମାଚାର୍‍ତିଙ୍କ୍ ସାରେପାକା ସାହାଯ୍ୟ ମାଡ଼୍‍ତେ ।
PHI 1:13 ପେର୍‍କେ, ଇଗେତ୍‍ ସାରେ ପ୍ରାସାଦ୍‌ତଡ଼୍‌ ନୁ ବାଗାତ୍ ସାରେତଡ଼୍ ପୁତ୍‍ତଡ଼୍ ଯେ, କ୍ରିଷ୍ଟନାଦ୍ ଦାସ ଆସ୍‍ମାନ୍‍ନାଙ୍କ୍ ନାନ୍ ଇଞ୍ଜେ ବନ୍ଦି ଲତ୍‍ତାଗେ ମିନ୍ଦେନ୍ ।
PHI 1:14 ବାତେଙ୍କ୍ ଇତ୍‍କେ ନାନ୍ ବନ୍ଦି ଆତ୍‍ତାଙ୍କ୍ ନାର୍‍ଗେ ଦାଦାନଡ଼ି ନୁ ହେଲାସ୍କ୍ ପ୍ରବୁନ୍ ସେଙ୍ଗେ ନାର୍‍ଗେ ବିଶ୍ୱାସ୍ ଆତ୍‍ତେ, ମେଣ୍ଡେ ଇଦ୍ ପେର୍‍କେ ଜାମ୍‍ମେ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ାନଙ୍କ୍ ଅଡ଼ାଦ୍‌ ସାହସ ନାର୍‍ଗେ ଆତ୍‍ତେ ।
PHI 1:15 ଆଦ୍‍ଲେକାମ୍ ଅଡ଼୍‌ଆଗାଙ୍କ୍‌ ବେସ୍‍ତୁଡ଼୍ ଗଲ୍‍କିନଡ଼୍ କପାମ୍ ଆସ୍ ପ୍ରଚାର୍ କାମ୍‍ତାଗେ ଇଞ୍ଜେ କାଇଲ୍‍ତଡ଼୍ । ନୁ ବାଗାତଡ଼୍ ହୃଦୟତାଗ୍ ଆଦ୍ ମାଡ଼ୁତଡ଼୍ ।
PHI 1:16 ପ୍ରେମତେ ମାୟ୍‍ଦିଙ୍କ୍‍ ଅଡ଼୍‌‍କ୍ ଆଦ୍‍ ମାଡ଼ାନଙ୍କ୍‍ ସାୟେଲାଗିତ୍ । ବାତେଙ୍କ୍‍ଇତ୍‍କେ ଅଡ଼୍‌ ପୁତ୍‍ତଡ଼୍‍ ଯେ, ଇଶ୍ୱର୍ ନାକିଂଙ୍କ୍ ସୁସମାଚାର୍‍ତେ ସୁରକ୍ଷା ଦାୟିତ୍ୱ ଇତ୍‍ତନ୍ ।
PHI 1:17 ବାଗାତଡ଼୍ ବିଶ୍ୱସ୍ତତେ କ୍ରିଷ୍ଟନ୍ ଗଟ୍ ପ୍ରଚାର୍ ମାଡ଼କଟ୍ ଆଙ୍ଗାଡ଼ାତାଦ୍ ଲେକାମ୍ ଆସ୍ ଆଦ୍ ମାଡ଼ୁତଡ଼୍ । ନାନ୍‍ନେ ବନ୍ଦିଲୋତ୍‍ତାଗେ ମାନ୍ଦାନ୍ ୱେଲେ ନା ମାନ୍‍ତାଗେ ଅଦିକ୍‌ କଷ୍ଟ ଇଦାନଙ୍କ୍ ଅଡ଼୍‌ ଆଦ୍ ମାଡ଼ୁତଡ଼୍ ।
PHI 1:18 ଆଗେ ବାତେମିକା ଆଞ୍ଜ୍ ଆୟ୍‍ୟ । ସତ୍‍ଉଦେଶ୍ୟ ଆୟି ବା ଆସତ୍ ସାରେ ଆସ୍ ଆୟି, ବେନ୍ ମିକା ଉପାୟ୍‍ତେ କ୍ରିଷ୍ଟନ୍ ଗଟ୍ ପ୍ରଚାର୍ ଆତ୍‍କେ, ଆଗେ ନାୟାଦ୍ ୱେଡ଼୍‍କ୍‍ । ନାନ୍ ୱେଡ଼୍‍କା ମାଡ଼ମାନ୍‍ତାନ୍,
PHI 1:19 ବାତେଙ୍କ୍ଇତ୍କେ, ନାନ୍ ପୁତ୍‍ତାନ୍ ମିୟାଦ୍ ପ୍ରାର୍ତନା ନୁ ଜିସୁ କ୍ରିଷ୍ଟନ୍ ଆତ୍ମାତେ ସାହାଯ୍ୟ ତଡ଼୍ ନାନ୍ ମୁକ୍ତି ଲାବ୍ ମାଡ଼ିତାନ୍ ।
PHI 1:20 ଜିୱେତାଗ୍ ବା ଡଲାନାଗ୍, ନାୟାଦ୍ ପାଡ଼ିୟିଦାଗ୍ ଗମାଡ଼୍ ମାଡକଟ୍ ସାରେ ସମୟ୍‍ତେ ନୁ ବିଶେଷତେ ଇଦ୍ ଦୁର୍ଦ୍ଦିନତେ ଶକ୍ତିତନ୍ ଆସ୍ ସାରେଲେକାମ୍ ବେଲାନ୍ ନାନ୍‍ନେ କ୍ରିଷ୍ଟଙ୍କ୍ ଗୌରବ୍‍ତେ ମାଡ଼ିତାନ୍, ଇଦ୍ କେ ନାୟାଦ୍ ଅଣ୍ଡୟ୍‌‍କେ ଆଶେ ନୁ ଆକାଂକ୍ଷା ।
PHI 1:21 ବାସ୍ତବିକ, ନା ଜିୱେତାଗ୍ କ୍ରିଷ୍ଟକେ ସାର୍‍ରେ । ଆଦିଙ୍କ୍ ନା ପାକେ ଡଲ୍‍ନାଦ୍ ଅଦିକ୍‌ ଲାବ୍ ଆଦ୍‍ତେ ।
PHI 1:22 ଯଦି ଗେଲ୍‍ସି ମାଞ୍ଜ୍ ନାନ୍ ଅଦିକ୍‌ ସାୟେତ୍ ପାଡ଼୍‍ୟି ମାଡ଼େ ପାର୍‍ଦ୍‍ତାନ୍‍, ଆଲେକେ ଜିୱୁନ୍ ବା ଡଲ୍‍ନାଦ୍ ବାତ୍‍ତିଙ୍କ୍ ହେଞ୍ଚିତାନ୍, ନାନ୍ ଟିକ୍ ମାଡ଼େ ପାର୍‍ୱନ୍ ।
PHI 1:23 ନାନ୍ ରେଣ୍ଡ୍‍ପାକେ ରେଣ୍ଡ୍ ଆକର୍ଷଣତେ ମିନ୍ଦେ । ଇଦ୍ ଜିୱୁନ୍ ୱିଡ଼୍‍ସି କ୍ରିଷ୍ଟନ୍ ତଡ଼୍ ମାନ୍ଦାନଙ୍କ୍ ନାୟାଦ୍ ଗାଟି ଇଚ୍ଛା । ଆଲେକେ ଇଦ୍ ଲେକାମ୍ ।
PHI 1:24 ମିଇ ସେଙ୍ଗେ ନାୟାଦ୍ ଗେଲ୍‍ସି ମାନ୍ଦାନ୍ ଅଦିକ୍‌ ଦର୍‍କାଡ଼୍ ।
PHI 1:25 ନାନ୍ ଇଦ୍ ବିଷୟ୍‍ତେ ନିଜାମ୍, ଆଦିଙ୍କ୍ ନାନ୍ ପୁତ୍‍ତାନ୍, ନାନ୍ ଜିୱୁନ୍ ମାନ୍‍ତାନ୍ । ମିୟାଦ୍ ବିଶ୍ୱାସ୍ତେ ଅଦିକ୍‌ ନୁ ୱେଡ଼୍‍କ୍‍ ସେଙ୍ଗେ ନାନ୍ ମିଇ ସାରେତଡ଼୍ ସାଙ୍ଗେ ମାନ୍‍ତାନ ।
PHI 1:26 ଆଲେକେ, ମୀଇଡ଼୍ ଜିୱେତାଗ୍ କ୍ରିଷ୍ଟନ୍‍ତଡ଼୍ କାଇଲି ମିକା ନା ତଡ଼୍ ଅଦିକ୍‌ ଗର୍ବ ଆଲ୍‍ସେ ପାର୍‍ଦ୍‍ତିଡ଼୍ ।
PHI 1:27 ନାନ୍ ମିଇକିଙ୍କ୍ ଉଡ଼ାନ୍ ସେଙ୍ଗେ ଆଦାନଙ୍କ୍ ସମର୍ତନ୍ ଆଦ୍‍ତେ ବା ଆୟ୍‍ୟ, ଇଞ୍ଜେ ବେଡ଼୍‍ୟାଦ୍‍ ବିଷୟ ଆଦୁତ୍‍ତେ, ମିୟାଦ୍ ଜିୱୁନ୍ ପ୍ରଣାଲି ବେଲାନ୍ କ୍ରିଷ୍ଟନାଦ୍ ସୁସମାଚାର୍ ଲେକାମ୍ ଆଦ୍‍ତେ ନାନ୍ ବେଲାନ୍‍କି କେଞ୍ଜ୍‍ ପାର୍‍ତାନ୍, ମିଡ଼୍ ଇଦ୍ ଲେକାମ୍ ଆସ୍ ଦୃଡ଼ତେ ନିତ୍‍ତିଡ଼୍ ନୁ ୱେରଡ଼୍ ଆକାଂକ୍ଷା ଆସ୍ ସୁସମାଚାର୍ ବିଶ୍ୱାସ୍ ସେଙ୍ଗେ ୱେରଡ଼୍ ସଂଗ୍ରାମ୍ ମାଡ଼ୁତିଡ଼୍ ।
PHI 1:28 ଶତ୍ରୁଡ଼୍ ନଡ଼କ୍ ୱେର୍‍ମାଟ୍, ସାହାସ୍‍ତେ ଡୁଟ୍‍ଟାଙ୍କ୍ ମାନୁଟ୍ । ଆଲେକେ, ଅଡ଼୍‌ ପୁନ୍ଦେପାର୍‍ତଡ଼୍ ଯେ, ଅଡ଼୍‌‍ ନିଜାମ୍ ହାରେମ୍‍ ଆଦ୍‍ତଡ଼୍‍ ନୁ ମିଡ଼୍ ଜିଡ଼ିତିଡ଼୍, ବାତେଙ୍କ୍ ଇତ୍‍କେ ଇଶ୍ୱର୍‍କେ ମିକିଂଙ୍କ୍ ପରିତ୍ରାଣ ମାଡ଼ିତଣ୍ଡ୍ ।
PHI 1:29 ମାତର୍ କ୍ରିଷ୍ଟନାଗେ ବିଶ୍ୱାସ୍ ମାଡ଼ାନାଦ୍ ଆୟ୍‍ୟ, ଅନ୍‌ ସେଙ୍ଗେ ଦୁଃକାମ୍ କଷ୍ଟ ମାଡ଼ାନ୍ ସେଙ୍ଗେ ମିକିଂଙ୍କ୍ କ୍ରିଷ୍ଟନାଦ୍ ସେବା ମାଡ଼ାନ୍ ସେଙ୍ଗେ ସୁଜଗ୍ ଇତ୍‍ତଣ୍ଡ ।
PHI 1:30 ଇଞ୍ଜେ ଇଦ୍ ଯୁଦ୍‌ ମିଡ଼୍ ନାୟାଦ୍ ପାଡ଼୍‍ୟି ଗ୍ରହନ୍ ମାଡ଼୍‍ଡ଼େ ପାର୍‍ଦ୍‍ତିଡ଼୍ । ମୁନେଙ୍କ୍ ମିଇଡ଼୍ ନାକିଂଙ୍କ୍ ବେନ୍ ଯୁଦ୍‌ ମାଡ଼ାନାଦ୍ ଉଡ଼ିମାତ୍‍ତିଡ଼୍, ଇଞ୍ଜେ ମିକା ନାନ୍ ଆଦ୍ ଯୁଦ୍‍ତାଗ୍ ମିକା ମିନ୍ଦେନ୍ ଇନା ମିଇଡ଼୍ କେଞ୍ଜିତିଡ଼୍ ।
PHI 2:1 କ୍ରିଷ୍ଟନ୍‍ତଡ଼୍ କାଇଲି ମାନ୍ଦାନ୍ ନଡ଼୍‍ ମିଇ ଜିୱେତାଗ୍ ଡାଟାମ୍‍ ଆଦ୍‍ତିଡ଼୍, ମେଣ୍ଡେ ଅନାଦ୍‌ ପ୍ରେମ ମିକିଂଙ୍କ୍ ସାନ୍ତନା ଇଦୁତ୍ । ମିଡ଼୍ ପବିତ୍ର ଆତ୍ମାତଡ଼୍ ସାହାସ୍‍ତେ କଷ୍ଟ ମାଡ଼ୁତିଡ଼୍ ନୁ ନିଜେ ନିଜେ ଲୋପେ ମିୟାଦ୍ ପ୍ରେମ ନୁ ଦୟା ମିନ୍ଦେ ।
PHI 2:2 ଆଦିଙ୍କ୍ ନାନ୍ ମିକିଂଙ୍କ୍ ଅନୁରଦ୍‌‍ ମାଡ଼ୁତାନ୍, ୱେରଡ଼୍ ଚିନ୍ତାତଡ଼୍ ଆଲ୍‍ସି ମିକା, ୱେରଡ଼୍ ପ୍ରେମତେ କାଇଲି ମିକା ମନ୍ ନୁ ଆତ୍ମାତେ ଅଣ୍ଡୟ୍‌ ଆସ୍ ମିଡ଼୍ ନାକିଂଙ୍କ୍ ଆଦ୍‍ଲେକାମ୍ ସୁକାମ୍‍ତେ କାଟେମ୍ ଆୟ୍‍ମୁଟ୍ ।
PHI 2:3 ନିଜେତ୍ ଉର୍‍ଗାଡ଼୍ ସେଙ୍ଗେ ବା ଶକ୍ତି ତଅତାନ୍ ସେଙ୍ଗେ ବେନେମିକା ପାଡ଼୍‍ୟି ମାଡ଼୍‍ମାଟ୍ । ବାତ୍‍ଇତ୍କେ ବାଗାତଡ଼୍‍କ୍ ନିଜେତଣ୍ଡ୍ ଲେକାମ୍ ଆଲ୍‍ସି ନିଜେ ନିଜେ ସେଙ୍ଗେ ନମ୍ର ବ୍ୟବହାର୍ ମାଡ଼ାଟ୍ ।
PHI 2:4 ମାତର୍ ନିଜେତ୍ ଉର୍‍ଗାଡ଼୍ ସେଙ୍ଗେ ମାନେମ୍‍ ଆୟ୍‍ୟକଟ ବାଗାତଡ଼୍ ସେଙ୍ଗେ ମନ୍ ଆୟ୍‍ମୁଟ୍ ।
PHI 2:5 କ୍ରିଷ୍ଟ ଜିସୁନାଦ୍ ମାନ୍‍ହେର୍କା ବେଦ୍‍ଲେକାମ୍ ମାତ୍‍ତେ, ମିୟାଦ୍ ଆଦ୍‍ଲେକାମ୍ ଆୟି ।
PHI 2:6 ଅନାଗେ ସାରେଏକାମ୍ ଐଶର୍ଯ୍ୟ ଲେକାମ୍ ମାଇମାତ୍‍କେ ମିକା, ଅଣ୍ଡ୍‌ ଆଦ୍ ଅଦିକାର୍‌‍ତେ ଇଶ୍ୱର୍‌ତଡ଼୍ ସାମାନ୍ ଆସ୍ ମାନ୍ଦାନଙ୍କ୍ ଆଲ୍‍ସି ମାଡ଼୍‍ୱେ ମାତ୍‍ତଡ଼୍ ।
PHI 2:7 ଆଲେକେ ନିଜେତ୍ ଇଚ୍ଛାତେ ଅନାଦ୍‌ ସାରେ ୱିଡ଼୍‍ସି ମିକା ଦାସଲେକାମ୍ ଆତ୍‍କେ । ନାରୁନ୍ ଲେକାମ୍ ଆସ୍ ନାରୁନ୍ ଲେକାମ୍ ତିଆର୍ ଆତ୍‍ତେ ।
PHI 2:8 ଅଣ୍ଡ୍‌ ବିନୟ ନୁ ନମ୍ର ଆସ୍ ଡଲାନ୍ ଯାକ, କ୍ରୁଶତାଗ୍ ଡଲାନ୍ ଯାକ ଗଟ୍ ପାଲନ୍ ମାଡ଼୍‍ତଣ୍ଡ୍ ।
PHI 2:9 ଆଦିନ୍ ସେଙ୍ଗେ ଇଶ୍ୱର୍ ଅଂକିଙ୍କ୍‌ ସାରେତିଙ୍ଗ୍ ଡେଙ୍ଗ୍ ପଡ଼ିୟେତାଗ୍ ପରୁ ତେତ୍‍ତଣ୍ଡ୍ ନୁ ବାଗାତ୍ ସାରେତଡ଼ାଦ୍ ପେଦେର୍‍କିନାଗାଙ୍କ୍ ଲେକେତ୍‍ ପେଦେର୍ ଅଂକିଙ୍କ୍‌ ଇତ୍‍ତନ୍ ।
PHI 2:10 ଆଦିଙ୍କ୍ ସ୍ୱର୍ଗ, ମର୍ତ୍ତ୍ୟ ନୁ ପାତାଲ୍‍ତେ ସାରେ ନାରୁଡ଼୍‍ ଅନ୍‌ ମୁନେ ଜିସୁନାଦ୍ ପେଦେର୍‍ତେ ମର୍‍ମିଣ୍ଡା ଉୱୁସିତା ।
PHI 2:11 ମେଣ୍ଡେ ସାରେ ଜିୱାକ୍ ଜିସୁ କ୍ରିଷ୍ଟକେ ପ୍ରବୁ ଇଞ୍ଜ କେସ୍ ମିକା ବାବାଲ୍ ଇଶ୍ୱର୍‌ତିଙ୍ଗ୍ ଗୌରବ୍ ମାଡ଼ିତିଡ଼୍ ।
PHI 2:12 ଆଦିଙ୍କ୍ ପ୍ରିୟ ସାଙ୍ଗନଡ଼ି, ନାନ୍ ମିଇତଡ଼୍ ମାନ୍ଦାନ୍ ୱେଲେ ମିଇଡ଼୍‍ ବେଲାନ୍ ସାରେଦାମ୍ ନାୟାଦ୍ ଆଜ୍ଞାଦିନାମ୍ ମାଡ଼ିତିଡ଼୍, ଇଞ୍ଜେ ନାନ୍ ମିୟାଗାଙ୍କ୍ ଯେକା ମା‍ନ୍ଦାନ୍ ୱେଲେ ଅଦିକ୍‌ ବିଶ୍ୱାସ୍ତେ ନାୟାଦ୍ ବାଦ୍ୟ ଆଦାନାଦ୍ ମିୟାଦ୍ ପାଡ଼୍‍ୟି । ମିୟାଦ୍ ମୁକ୍ତି ବେଲା ସାରେ ଆଦ୍‍ତେ, ଆଦିନ୍ ସେଙ୍ଗେ ୱେର୍‍ସ୍‍ ନୁ ୱାଡ଼୍‍କାନ୍ ପାଡ଼୍‍ୟି ମାଡ଼ଡ଼୍‍ ଆନୁଟ୍ ।
PHI 2:13 ବାତେଙ୍କ୍ ମିୟାଦ୍ ନୁ ଅନ୍‌‍ଲେକାମ୍ ପାଲନ୍ ମାଡ଼ାନ୍ ସେଙ୍ଗେ ତିଆର୍ ନୁ ସମର୍ତନ୍ ମାଡ଼ାନଙ୍କ୍ ସ୍ୱୟଂ ଇଶ୍ୱର୍ ମିୟାଗେ ସାରେଦାମ୍ ପାଡ଼୍‍ୟି ମାଡ଼ୁତଣ୍ଡ୍ ।
PHI 2:14 ଆପତ୍ତି ବା ଗଲକ୍‍ ମାଡ଼କଟ୍ ସାରେ କାମ୍ ମାଡ଼ାଟ୍ ।
PHI 2:15 ଆଲେକେ, ଇଦ୍ ଦୁର୍ନିତି ପେଇତାନାଦ୍ ନୁ ପାପ୍ ସାରେ ଜଗତ୍‍ତାଗ୍ ମିଡ଼୍ ଇଶ୍ୱର୍‌ତେ ପବିତ୍ର ମାର୍‍ ମାୟାକ୍ସ୍‍ ଲେକାମ୍ ନିର୍ଦୋଷ୍‍ ନୁ ପବିତ୍ର ଲେକାମ୍ ବାଦ୍‍କେ ପାର୍‍ତିଡ଼୍ ।
PHI 2:16 ବାଗାତଡ଼୍ ପାକେ ଜିୱେଇଦାନ୍ ଗଟି ପ୍ରଚାର୍ ମାଡ଼ାନ୍‍ୱେଲେ ମିଇ ବାଗାତାଗ୍ ୱେସ୍‍ଇଦାନ୍ ଉକାକିନ୍ ଲେକାମ୍ ୱେସ୍‍ ଆଦାନାଦ୍ ସାୟେ । ମିଡ଼୍ ଯଦି ଇଦ୍‍ଲେକାମ୍ ଆଦ୍‍ତିଡ଼୍, “କ୍ରିଷ୍ଟନ୍‍ ଦିନାତେ,” ମିଇ ବିଷୟ୍‍ତେ ନାନ୍ ଗର୍ବ ମାଡ଼ିତା‍ନ୍, ବାତେଙ୍କ୍ ଇତ୍‍କେ ଇଗାଙ୍କ୍ ପ୍ରମାଣ୍ ଆଦିକାଡ଼୍ ଯେ, ନାୟାଦ୍ ତାଲେ ଉଦ୍ୟାମ ନୁ ପାଡ଼୍‍ୟି ଆଙ୍ଗ୍‌ଡ଼ାମ୍ ଆୟ୍‍ୟ ।
PHI 2:17 ଇଶ୍ୱର୍‌ତେ ଗଟ୍‍ତେ ମିୟାଦ୍ ବିଶ୍ୱାସ୍ ଲେକାମ୍ ବଲିଦାନତାଗ୍ ଆଲେକେ ବା ନାୟାଦ୍ ଜିୱୁନ୍ ନେତୁର୍‍ଇସ୍ ତସିଦାଙ୍କ୍‍ ଆଦ୍‍ତେ । ଆଦିନ୍ ସେଙ୍ଗେ ନାନ୍ ୱେଡ଼େକେ ନୁ ନାୟାଦ୍ ଇଦ୍ ୱେଡ଼୍‍କେତେ ମିଇ ତଡ଼୍ ମାଡ଼ାନଙ୍କ୍ ନାନ୍ ଇଚ୍ଛାମାଡ଼ୁତାନ୍ ।
PHI 2:18 ମିଇଡ଼୍ ‍ମିକା ଆଦ୍‍ଲେକାମ୍ ୱେଡ଼୍‍କ୍‍ ମାଡ଼ାନାଦ୍ ସାରେ ନୁ ଆଦ୍ ୱେଡ଼୍‍କେତେ ନାକିଂଙ୍କ୍ ମିକା ତଡ଼୍ ମାଡ଼ାଟ୍ ।
PHI 2:19 ପ୍ରବୁନାଦ୍ ଇଚ୍ଛା ମାଡ଼୍‍ତେ, ମିଇପାକେ ତିମତିଙ୍କ୍ ଯାପେ ରହତେ ପାର୍‍ତାନ୍ ଇଞ୍ଜ ନାନ୍ ଆଶେ ମାଡ଼୍‍ତାନ୍ । ଆଲେକେ, ମିୟାଦ୍ କବର୍ ସେଙ୍ଗେ ନାନ୍ ଉତ୍ସାହିତ ଆଦ୍‍ତନ୍ ।
PHI 2:20 ମାତର୍ ଅନାଦ୍‌ ନା ଲେକାମ୍ ମାନ୍‍ ଏର୍କା ନୁ ଅଣ୍ଡ୍‌ ନିଜାମ୍‍ ମିଇ ସେଙ୍ଗେ ମାନ୍‍ଦେ ମିନ୍ଦେନ୍ ।
PHI 2:21 ବାଗାତ୍ ସାରେତଡ଼୍ ଜିସୁ କ୍ରିଷ୍ଟନ୍ ସେଙ୍ଗେ ମନ୍‍ଇୱକଟ ମାତର୍ ନିଜେତ୍ ଉର୍‍ଗାଡ଼୍ ସେଙ୍ଗେ ଦାନ୍ଦେ ।
PHI 2:22 ମିଡ଼୍ ପୁତ୍‍ତିଡ଼୍, ତିମତି ବେଲାନ୍ ଅନାଦ୍‌ ଯୋଗ୍ୟତା ପ୍ରମାଣ ମାଡ଼୍‍ତଣ୍ଡ୍, ବେଲାନ୍ ଅଣ୍ଡ୍‌ ମେଣ୍ଡେ ନାନ୍ ମାର୍‍ ନୁ ବାବାନ୍ ଲେକାମ୍ ସୁସମାଚାର୍ ପ୍ରଚାର୍ ପାଡ଼ିୟିଦାଗ୍ କାଇଲିମିକା ସେବା କାମ୍ ମାଡ଼ୁତମ୍ ।
PHI 2:23 ନା ସେଙ୍ଗେ ବାତ୍ ଗଟେମ୍ ଆଦାଙ୍କ୍ ଆଦୁତ୍‍, ପୁନ୍ଦାନ୍ ୱେଲେ ନାନ୍ ଅଂକିଙ୍କ୍‌ ମିଇ ପାକେ ରତିତାନ୍ ଇଞ୍ଜ ଆଶେ ମାଡ଼ୁତାନ୍ ।
PHI 2:24 ଆଦେଲେକାମ୍ ପ୍ରବୁନାଗେ ନାନ୍ ବିଶ୍ୱାସ୍ ମାଡ଼ୁତାନ୍ ଯେ, ନାନ୍ ନିଜେ ଯାପେ ମୀଇପାକେ ୱାଦେ ପାର୍‍ତାନ୍ ।
PHI 2:25 ନାୟାଦ୍ ପ୍ରେରିତ ପାଡ଼୍‍ୟି ନୁ ଯୁଦ୍‌ତାଗେ ଜିଡ଼ାନାଦ୍ ନୁ ମିୟାଦ୍ କେତ୍‍ତାନ୍ ଲେକାମ୍ ନାକିଂଙ୍କ୍ ତଡ଼୍ ଆସ ୱାସମାନ୍ଦାନ୍ ଏପାପ୍ରଦିତଙ୍କ୍ ମିକା ମିଇ ପାକେ ରଅତାନଙ୍କ୍ ମାନ୍‍ ମାଡ଼ୁତାନ୍ ।
PHI 2:26 ଅଣ୍ଡ୍‌ ମିକ୍ ସାରେତଡ଼୍‍କ୍ ଉଡ଼ାନ୍ ସେଙ୍ଗେ ସୁକାମ୍‍ତେ ନୁ ମିଡ଼୍ ଅନାଦ୍‌ ରଗାମ୍ ଗଟ୍ କେଞ୍ଜି ମାନ୍‍ନାଙ୍କ୍ ଅଣ୍ଡ୍‌ ଦୁଃକାମ୍ ।
PHI 2:27 ମୁନେଙ୍କ୍ କଞ୍ଜ୍ ଅଣ୍ଡ୍‌ ରଗାମ୍ ଆସ୍ ଡଲାନ୍ ଲେକାମ୍ ଆସ୍ ମାତ୍‍ତଣ୍ଡ୍ । ବାତେଙ୍କ୍‍ଇତ୍କେ ଅଂକିଙ୍କ୍‌ ଇଶ୍ୱର୍ ଆର୍ଶିବାଦ୍ ମାଡ଼୍‍ତଣ୍ଡ୍ । ମାତର୍ ଅନ୍‌ ସେଙ୍ଗେ ଆୟ୍‍ୟ, ନା ସେଙ୍ଗେ ମିକା ଅନାଦ୍‌ ଆର୍ଶିବାଦ୍ ମାଡ଼ାନଙ୍କ୍ ନାକିଂଙ୍କ୍ ଦୁଃକାମ୍ ତିପାଲ୍ ଆତ୍‍ତାଙ୍କ୍ ଇୱଣ୍ଡ୍ ।
PHI 2:28 ନାନ୍ ଅଂକିଙ୍କ୍‌ ମୀଇପାକେ ରତ୍‍ତାନ୍ ସେଙ୍ଗେ ତିଆର୍, ବାତେଙ୍କ୍‍ଇତ୍କେ ଅଂକିଙ୍କ୍‌ ଉଡ଼୍‍କେ, ମିଡ଼୍ ମେଣ୍ଡନ୍‍ନ୍ଦାମ୍ ୱେଡ଼୍‍କା ଆଦ୍‍ତିଡ଼୍ ନୁ ନାୟାଦ୍ ଦୁଃକାମ୍ ମିକା କମ୍ ଆଦ୍‍ତେ ।
PHI 2:29 ଆଦିଙ୍କ୍ ୱେରଣ୍ଡ୍ କ୍ରିଷ୍ଟ ବିଶ୍ୱାସ୍ ଦାଦାନ୍ ଲେକାମ୍ ମିଡ଼୍ ଅଂକିଙ୍କ୍‌ ୱେଡ଼୍‍କେତେ ଗ୍ରହନ୍ ମାଡ଼ାଟ୍ ନୁ ଇଦ୍‍ ଲେକାମ୍ ସାରେ ଗୁଣତଡ଼୍ ନାରୁଡ଼୍‍କ୍ ବକ୍ତି ମାଡ଼ାଟ୍,
PHI 2:30 ବାତେଙ୍କ୍‍ଇତ୍କେ ମିଡ଼୍ ନାକିଂଙ୍କ୍ ବେନ୍ ସାହାଯ୍ୟ ଇଦେପାର୍‍ୱିଡ଼୍, କ୍ରିଷ୍ଟନାଦ୍ ପାଡ଼୍‍ୟି ସିଦ୍ଦ ସେଙ୍ଗେ ଅଣ୍ଡ୍‌ ଆଦ୍ ନା ସେଙ୍ଗେ ମାଡ଼ାନଙ୍କ୍ ଆଞ୍ଜ୍ ନିଜେତ୍ ଜିୱୁଣ୍ଡ୍‍ତିଙ୍କ୍ ଇତ୍‍ତନ୍ ନୁ ଡଲାନ୍ ଦିନ୍‍ତେ ମୁନେଆସ୍ ମାତ୍‍ତନ୍ ।
PHI 3:1 ପେର୍‍କେ ଦାଦାନଡ଼ି ନୁ ଏଲାସ୍କ୍‍କି, ପ୍ରବୁନ୍ ତଡ଼୍ କାଇଲି ମାନ୍‍ନାଙ୍କ୍ ମିଡ଼୍ ୱେଡ଼୍‍କା ମାଡ଼ାଟ୍ । ମୁନେଙ୍କ୍‍କଞ୍ଜ୍ ବାତେଏ ଲେକ୍‍ତାଦ୍ ମିନ୍ଦେ, ଆଦ୍ ମେଣ୍ଡନ୍‍ନ୍ଦାମ୍ ମାଡ଼ାନଙ୍କ୍ ନାନ୍ ମେଣ୍ଡ୍ ଆଦାନ୍ ମନ୍ ମାଡ଼ନ୍, ବାତେଙ୍କ୍‍ଇତ୍କେ ମିୟାଦ୍ ସୁରକ୍ଷା ସେଙ୍ଗେ ଇଦ୍ ସାହାଯ୍ୟ ମାଡ଼ିତେ ।
PHI 3:2 ବେନଡ଼୍ ସତ୍ ପାଡ଼ିୟିଦାଗ୍ ମାଇମିନ୍ଦେଡ଼୍, ବେନଡ଼୍ ସୁନ୍ନତ ମାଡ଼ାନ୍ ସେଙ୍ଗେ ଜିଦ୍ ମାଡ଼ିତଡ଼୍, ଆୱୁ ନେୟ୍‍କିନ୍ ମାଇଦିଙ୍କ୍ ସାବ୍‍ଦାନ୍ ।
PHI 3:3 ମାମ୍‍ମେ ମୁନେଙ୍କ୍ କଞ୍ଜ୍ ହେଞ୍ଚ୍‍ତେ ଲେକାମ୍; ଅଡ଼୍‌ ଆୟ୍‍ୟଡ଼୍ । ମାମ୍‍ମେ ପବିତ୍ର ଆତ୍ମାନ୍ ସାହାଯ୍ୟତେ ଇଶ୍ୱର୍‌ତେ ଉପବାସ୍ ମାଡ଼ୁତମ୍ ନୁ କ୍ରିଷ୍ଟ ଜିସୁନ୍ ତଡ଼୍ କାଇଲି ମିକା ୱେଡ଼୍‍କା ଆନନ୍ଦ ମାଡ଼ୁତମ୍ । ବାୟ୍‍ଦେତ୍‍ ରିତିନିତି ପରୁ ମାୟାଦ୍‌ ଆଶେ ଇଲା ।
PHI 3:4 ଆଦ୍‍ଲେକାମ୍ ଆଦ୍ ସାରେ ପରୁ ଆଶେ ନେହେତାନାଦ୍ ନା ପାକେ ମାନ୍‍ନେଡ଼୍ । ଯଦି ବେନ ବାହିଦେ ରିତିନିତିତେ ଆଶେ ପରୁ ଗୁରୁତ୍ୱ ଇଦେପାର୍‍ତନ୍, ଆଦ୍‍ଲେକାମ୍ ମାଡ଼ାନଙ୍କ୍ ନାୟାଦ୍ ଆସର୍ କାରନ ମିନ୍ଦେ ।
PHI 3:5 ନା ଜନମ୍‍ତେ ଆଟ୍‍ଦିନେତ୍ ପେର୍‍କେ ନାକିଂଙ୍କ୍ ସୁନ୍ନତ୍ ଆସ୍‍ମାତ୍‍ତେ । ଜାତିତାଗ୍ ନାନ୍ ୱେରନ୍ ଇଶ୍ରାଏଲିୟ, ବେଞ୍ଜାମିନ୍ ବଂଶତେ ଏବ୍ରିୟ । ଇହୁଦିନଡ଼୍ ବ୍ୟବସ୍ଥା ପାଲନ୍ ତାଗାଙ୍କ୍ ନାନ୍ ୱେରନ୍ ପାରୂଶି ମାତ୍‍ତାନ୍
PHI 3:6 ନାୟାଦ୍ ଇର୍ଷାତ୍‍ ସେଙ୍ଗେ ନାନ୍‍ କ୍ରିଷ୍ଟିୟାନ୍‍ ମଣ୍ଡଲିତିଙ୍କ୍‍ ତାଡ଼ନା ମାଡ଼୍‍ତାନ୍‍ । ନିୟମ୍‍ତାଦ୍‍ ଆଜ୍ଞା ପାଲନ୍‍ ମାଡ଼୍‍କେ ଯଦି ନାରୁଣ୍ଡ୍‍ ଦାର୍ମାମ୍‌ ଆଦେ ପାର୍‍ଦ୍‍ତଣ୍ଡ୍‍, ଆଲେକେ ନାନ୍‍ ନିର୍ଦୋଷ୍‍ ମାତ୍‍ତାନ୍‍ ।
PHI 3:7 ବାତେଙ୍କ୍ଇତ୍କେ ବେନ୍ ସାରେ ବିଷୟ ଲାବ୍‍ତେ ଇଞ୍ଜ ନାନ୍ ହେର୍କା ମାଡ଼ମାତ୍‍ତାନ୍, ଆଦିଙ୍କ୍ ଇଞ୍ଜେ କ୍ରିଷ୍ଟନ୍ ସେଙ୍ଗେ ନାନ୍ କ୍ଷତିତେ ଏର୍କା ମାଡ଼ୁତାନ୍ ।
PHI 3:8 ମାତର୍ ଆସର୍ ଆୟ୍‍ୟ; ନାୟାଦ୍ ପ୍ରବୁ ଜିସୁ କ୍ରିଷ୍ଟଙ୍କ୍ ପୁନ୍ଦାନ୍ ସେଙ୍ଗେ ବେନ୍ ସାରେ ଐଶର୍ଯ୍ୟ ଲାବ୍ ମାଡ଼ୁତାନ୍, ଆଦିନ୍ ଲେକାମ୍ ବାଗାତ୍ ସାରେ ବିଷୟତିଙ୍କ୍ ନାନ୍ ଇଞ୍ଜେ ଆସର୍ ମାନେମ୍‍ ଆଦୁତାନ୍ । ଅନ୍‌ ସେଙ୍ଗେ ନାନ୍ ସାରେ ମିକା ୱିଡ଼୍‍ସ୍‍ତାନ୍ । କ୍ରିଷ୍ଟଙ୍କ୍ ଦର୍ସିକି ଆତ୍‍ତାଙ୍କ୍ ।
PHI 3:9 ନୁ ଅନ୍‌ ତଡ଼୍ ସାରେଲେକାମ୍ କାୟ୍‍ଲାନ୍ ସେଙ୍ଗେ, ବାଗାତ୍ ସାରେ ବିଷୟତିଙ୍କ୍ ତଗ୍ ଇଞ୍ଜ ହେର୍କା ମାଡ଼ମାତ୍‍ତାନ୍ । ବେନ୍ ଦାର୍ମିକ୍‍ତାଦ୍ ବ୍ୟବସ୍ଥା ପାଲନ୍ ତଡ଼୍ ଲାବ୍ ମାଡ଼ାଙ୍କ୍ ଆଦ୍‍ତେ, ଆଦ୍ ଲେକାମ୍ ବାତେବା ନିଜେତ୍ ଦାର୍ମିକ୍ ନାୟାଦ୍ ଇଲ୍‍ଲେ । ଇଞ୍ଜେ ନାୟାଦ୍ ଦାର୍ମିକ୍ ମିନ୍ଦେ, ଆଦ୍ କ୍ରିଷ୍ଟନାଗେ ବିଶ୍ୱାସ୍ ମାଡ଼ାନାଦିନ୍ ତଡ଼୍ ଦର୍‍କିତ୍; ଆଦ୍ ଇଶ୍ୱର୍‌ତାଗାଙ୍କ୍ ୱାଦ୍‍ତେ ନୁ ଆଦ୍ ବିଶ୍ୱାସ୍ ପରୁ ମିନ୍ଦେ ।
PHI 3:10 ଇଞ୍ଜେ ନାୟାଦ୍ ଅଣ୍ଡ୍‌‍ଦାମ୍ ଇଚ୍ଛା ନାନ୍ ବେଲାନ୍ କ୍ରିଷ୍ଟଙ୍କ୍ ପୁନ୍ଦ୍‍ତାନ୍ ନୁ ଅନ୍‌ ମେଣ୍ଡେ ୱାଦାନ୍ ଶକ୍ତି ଏର୍କେ ମାଡ଼ିତାନ୍; ତାଙ୍କ୍ ତିପାଲ୍ ବାରେତେ ସାମାନ୍‌ବେଦନା ଏର୍କାମାଡ଼ି ଡଲ୍‍ତାଗେ ମିକା ଅନ୍‌‍ଲେକାମ୍ ଆଦ୍‍ତଣ୍ଡ୍
PHI 3:11 ନୁ ଡଲ୍‍ତାଗାଙ୍କ୍ ମେଣ୍ଡେ ଜିୱେ ଆଦାନ୍ ବରସା ଲାବ୍ ମାଡ଼ିତାନ୍ ।
PHI 3:12 ନିୟାଦ୍ ପରିତ୍ରାଣ ବେଲାନ୍ ପୁରା ଆସ୍‍ ଅଦିନ୍‌ ତଡ଼୍ ୱାଡ଼୍‍କି ମିକା କାମ୍ ମାଡ଼ ଆନୁଟ୍, ନାନ୍ କୃତକାମ୍ ବା ସିଦ୍ଦ ଆଦ୍‍ପାର୍‍ତେ ଇଞ୍ଜ କେଲଡ଼୍ । ପୁରସ୍କାର୍ ଦର୍ସିକି ଆଦାନଙ୍କ୍ ମିରାନାଗେ ଲାଗେମ୍ । ସ୍ୱୟଂ କ୍ରିଷ୍ଟ ନାକିଂଙ୍କ୍ ପଇସ୍ ତାସ୍ ଇଗେ ୱାଟିତ୍‍ତନ୍ ।
PHI 3:13 ହୋ ଦାଦାନଡ଼ି ନୁ ହେଲାସ୍କ୍ ନାନ୍ ଇଞ୍ଜେ ଆଇନା ଆଦ୍ ପଡ଼ିୟେତାଗ୍ ଏୱନ୍ । ବାତେଙ୍କ୍ଇତ୍କେ ୱେରଡ଼୍ ପାଡ଼ିୟିଦାଗ୍ ନାନ୍ ବିନଷ୍ଟ ମାତ୍‍ତାନ୍; ପେର୍‍କେ ୱିଡ଼୍‍ସି ୱାସ୍‍ମାନ୍ଦାନ୍ ବିଷୟକିଙ୍କ୍ ମାର୍‍ଙ୍ଗି, ମୁନେମାନ୍ଦାନ୍ ବିଷୟକିଙ୍କ୍ ଦର୍ସିକି ଆଦାନ୍ ସେଙ୍ଗେ ସେନେକ୍‌ ମାନକଟ୍ ଆଲ୍‍ସି ମାଡ଼ୁତାନ୍ ।
PHI 3:14 ଆଦିଙ୍କ୍ କ୍ରିଷ୍ଟ ଜିସୁନ୍ ତୋଡ଼୍‍ତନ୍ ବେନ୍ ସ୍ୱର୍ଗିୟ ଜିୱୁନ୍ ଲାବ୍ ମାଡ଼ାନ୍ ସେଙ୍ଗେ ଇଶ୍ୱର୍ ନାକିଂଙ୍କ୍ କାର୍‍ଙ୍କ୍‍ ତନ୍ ଆଦ୍ ପୁରସ୍କାର୍ ସେଙ୍ଗେ କଣ୍ଡେ ୱାଟି ନାନ୍ ମେଲ୍‍ତା ପଡ଼ିୟେତାଗ୍ ମିର୍‍ତାନ୍ ।
PHI 3:15 ମାନାଗେ ବେନଡ଼୍ ଆଦ୍ୟାମିକ ଲେକାମ୍ ପରିପକ୍ୱ, ଅଡ଼ାଦ୍‌ ଇଦ୍‍ଲେକାମ୍ ମାନ୍‍ଏର୍କେ ମାନ୍ଦାନାଦ୍ ଲେକାମ୍ । ଯଦି ମିୟାଗେ ବେନନାଦ୍ ୱେରେ ଏର୍କେ ମାନ୍‍ତେ, ଇଶ୍ୱର୍ ମିକିଂଙ୍କ୍ ସାରେ ଗଟି ସ୍ପଷ୍ଟତେ କେସ୍‌ସିଦ୍‌ତନ୍ ।
PHI 3:16 ଆଦ୍ ବାତ୍ ଆୟି, ନେଣ୍ଡ୍‍ଆଇନା ମାନାଡ଼୍ ବେନ୍ ନିୟମ୍ ମାନେମ୍‍ ଆସ୍‍ସ ୱାଦୁତାଡ଼୍, ଆଦ୍ ଲେକାମ୍ ଇଞ୍ଜେ ମୁନେ ଆଦାନାଦ୍ ଲେକେତ୍‍ ।
PHI 3:17 ହୋ ଦାଦାନଡ଼ି ନୁ ଏଲାସ୍କ୍‍, ନା ଲେକାମ୍ ମାଡ଼ାଟ୍ । ମାମ୍‍ମେ ନେହେସ୍ ମାନ୍ଦାନ୍ ଆଦର୍ଶ ଲେକାମ୍ ବେନଡ଼୍ ଆଚରଣ ମାଡ଼ୁତଡ଼୍, ଅଡ଼୍‌‍କିଂଙ୍କ୍ ଉଡ଼ାଟ୍ ।
PHI 3:18 ମୁନେଙ୍କ୍ କଞ୍ଜ୍ ନାର୍‍ଗେ ଦାମ୍ ନାନ୍ ମିକିଂଙ୍କ୍ ଇଦ୍ ଗଟ୍ କେତ୍‍ତାନ୍, ମେଣ୍ଡେ ଇଞ୍ଜେ ମିକା ସାରେଲେକାମ୍ ଲୋଚନତେ ଆଦିନ୍ ଲେକାମ୍ ମାଡ଼ୁତାନ୍; ନାର୍‍ଗେ ନିଜେ ନିଜେ ଜିୱେତାଗ୍ କ୍ରିଷ୍ଟନ୍ କ୍ରୁଶତେ ଶତ୍ରୁନଡ଼୍‍ ଆଚରଣ ମାଡ଼ୁତଡ଼୍ ।
PHI 3:19 ନରକତାଗ୍ ଅଡ଼ାଦ୍‌ ଜିୱୁନ୍‍ତେ ସାରେ ଗଟେମ୍ ଆତ୍‍ତାଙ୍କ୍ ଆଦୁତ୍‍ତେ, ବାତେଙ୍କ୍ ଇତ୍‍କେ ମେନ୍ଦୁଲ୍‍ତେ ଆସେତଡ଼୍ କେ ଅଡ଼ାୱୁ ଦେୟାକ୍‌ । ବାତେଏ ସିଗ୍‍ତାଉ, ଅଡ଼୍‌ ଆଦିନ୍ ସେଙ୍ଗେ ଗର୍ବ ମାଡ଼ିତଡ଼୍; ମାତର୍ ସଂସାର୍‍ ବିଷୟତେ ସେଙ୍ଗେ ଅଡ଼୍‌ ଚିନ୍ତେ ମାଡ଼ିତଡ଼୍ ।
PHI 3:20 ଅଣ୍ଡ୍‌ ବାତ୍‍ଆଇ, ମାନାଡ଼୍ ସ୍ୱର୍ଗ ରାଜ୍ୟତେ ନାରୁଡ଼୍ । ସ୍ୱର୍ଗତାଗାଙ୍କ୍ ମାନାଡ଼୍ ତ୍ରାଣକର୍ତ୍ତାଲ୍ ପ୍ରବୁ ଜିସୁଙ୍କ୍ କ୍ରିଷ୍ଟନାଦ୍ ୱାଦାନାଦିଙ୍କ୍ ମାନାଡ଼୍ ଆଗ୍ରତେ ପ୍ରତିକ୍ଷା ମାଡ଼ୁତମ୍ ।
PHI 3:21 ବେନ୍ ଶକ୍ତି ଅଣ୍ଡ୍‌ ସାରେ ବିଷୟତିଙ୍କ୍ ନିଜେତ୍ ବଶିବୂତ ମାଡ଼େ ପାର୍‍ତନ୍, ଆଦ୍ ଶକ୍ତି ଗ୍ରହନ୍ ମାଡ଼ି ଅଣ୍ଡ୍‌ ମାନ୍‍ ଦୁର୍ବଲ୍ ନାୟାଦ୍ ମେନ୍ଦୁଲ୍‌ତିଙ୍କ୍ ଅନାଦ୍‌ ଗୌରବ୍‍ମୟ ମେନ୍ଦୁଲ୍ ଲେକାମ୍ ମାଡ଼ିତନ୍ ।
PHI 4:1 ପ୍ରିୟ ଦାଦାନଡ଼ି ନୁ ଏଲାସ୍କ୍, ମିକିଂଙ୍କ୍ ଉଡ଼ାନ୍ ସେଙ୍ଗେ ନାନ୍ ବେସର୍ ୱେଡ଼୍‌କେ । ମିକିଂଙ୍କ୍‍ ଆସ୍ ନାୟାଦ୍ ବେସର୍ ୱେଡ଼କେ । ମିଇ ସେଙ୍ଗେ ନାୟାଦ୍ ବେସର୍ ଆଶେ । ସହଜ୍‍ ରକମ୍‍ ଦାଦାନଡ଼ି ନୁ ଏଲାସ୍କ୍‍, ନାୟାଦ୍ ଶିକ୍ଷା ଲେକାମ୍ ପ୍ରବୁନାଗେ ମାଞ୍ଜ୍‍ମିକା ବାଦ୍‍କାଟ୍ ।
PHI 4:2 ଇୟଦିଆ ନୁ ସୁନ୍ତକିଙ୍କ୍ ନାୟାଦ୍ ଅନୁରଦ୍‌, ଆୱୁ ଇଶ୍ୱର୍‌ତେ କଣ୍ଡେତେ ହେଲାଡ଼୍ ଲେକାମ୍ କାୟ୍‍ଲି ମାନି ।
PHI 4:3 ହୋ ନା ବିଶ୍ୱାସ୍‌ତେ ପାଡ଼୍‍ୟିମାଡ଼ାନଡ଼ି ! ମିକିଂଙ୍କ୍ ମିକା ନାୟାଦ୍ ନିବେଦନ୍‍, ଇ ହେଲାସ୍‍କିଙ୍କ୍ ସାହାଯ୍ୟ ମାଡ଼ାଟ୍, ବାତେଙ୍କ୍ଇତ୍‍କେ ଇଡ଼୍‍ କ୍ଲେମେନ୍‌ସ୍‌ ନୁ ନା ମେଣ୍ଡେବାଗାତ୍ ତଡ଼୍‍ଦେନଡ଼୍ ତଡ଼୍ ସୁସମାଚାର୍ ପ୍ରଚାର୍ ପାଡ଼ିୟିଦାଗ୍ ଗାଟି ତିପାଲ୍ ମାଡ଼ି ନାକିଂଙ୍କ୍ ସାହାଯ୍ୟ ମାଡ଼୍‍ତଡ଼୍ । ଇଡ଼ାୱୁ ପେଦେରି ଇଶ୍ୱର୍‌ତେ; “ଜୀୱେ ବଇତାଗ୍,” ଲେକାମିନ୍ଦେ ।
PHI 4:4 ପ୍ରବୁନ୍ ତଡ଼୍ କାଇଲି ମାନ୍‍ନାଙ୍କ୍ ସାରେଦାମ୍ ୱେଡ଼୍‍କ୍‍ ମାଡ଼ାଟ୍ । ମେଣ୍ଡନ୍‍ନ୍ଦାମ୍ କେତୁତାନ୍, “ୱେଡ଼୍‍କ୍‍ ମାଡ଼ାଟ୍ ।”
PHI 4:5 ସାରେତଡ଼୍ ତଡ଼୍‍ ସାଏତେ ବ୍ୟବହାର୍ ମାଡ଼ାଟ୍ । ପ୍ରବୁନାଦ୍ ୱାଦାନ୍ ଦିନା ଗାର୍‍ରେ ୱାସ୍‍ ହେଉଦୁତ୍ ।
PHI 4:6 ବାତେବା ବିଷୟ୍‍ତେ ଚିନ୍ତେ ଆୟ୍‍ମାଟ୍ ! ବାତେଙ୍କ୍‍ଇତ୍କେ ମିକିଂଙ୍କ୍‍ ବାତ୍ ଦର୍‍କାଡ଼୍, ଆଦ୍ ପ୍ରାର୍ତନାତାଗ୍ ଇଶ୍ୱର୍‌ତିଙ୍କ୍ ତାଲ୍‍କାଟ୍ । ମେଣ୍ଡେ ପ୍ରାର୍ତନା ମାଡ଼ାନ୍ ୱେଲେ ସାରେଦାମ୍ ହୃଦୟ୍‍ତେ ଦନ୍ୟବାଦ୍ ତଡ଼୍‍ ମିୟାଦ୍‍ ସାର୍ରେ ନିବେଦନ୍‍ ଇଶ୍ୱର୍‌ତିଙ୍କ୍‍ କେଲାଟ୍‍;
PHI 4:7 ଆଲେକେ ନାରୁନାଦ୍ ଡଲାନାଦ୍ ଅଗମ୍ୟ ଇଶ୍ୱର୍‌ତେ ଶାନ୍ତି କ୍ରିଷ୍ଟ ଜିସୁନାଦ୍ ସାହାଚର୍ଯ୍ୟତେ ମିୟାଦ୍ ହୃଦୟ୍ ନୁ ମାନ୍‍ଦିଙ୍କ୍ ସୁରକ୍ଷା ମାଡ଼ିତେ ।
PHI 4:8 ତାନ୍‍ପେର୍କେ, ଦାଦାନଡ଼ି ନୁ ଏଲାସ୍କ୍‍, ବେନ୍ ସାରେ ବିଷୟ ସାୟେ ନୁ ପ୍ରଶଂସ୍ୟ, ବାତ୍ ସାରେ ସତ୍ ନୁ ମହତ୍, ବାତ୍ ଟିକ୍‍, ବିଶୁଦ୍ଦ, ପ୍ରୀତିକର ନୁ ସମ୍ମାନ୍‍ତଡ଼୍, ଆଦ୍ ସାରେ ମିୟାଦ୍ ଚିନ୍ତେତେ ବିଷୟ ଆୟି ।
PHI 4:9 ମିଡ଼୍‍ ବେନ୍‍ ସାର୍ରେ ବିଷୟ୍‍ ନାୟାଗାଙ୍କ୍‍ ଶିକ୍ଷା ମାଡ଼୍‍ତିଡ଼୍‍, ପାଏମ୍‍ ଆତ୍‍ତିଡ଼୍‍ ନୁ କେଞ୍ଜ୍‍ତିଡ଼୍‍ ନୁ ନାୟାଗ୍‍ ଉଡ଼୍‍ତିଡ଼୍‍ ଆୱୁସାର୍ରେ ମାଡ଼ାଟ୍‍, ଆଗେ ଶାନ୍ତିଦାତାଲ୍ ଇଶ୍ୱର୍ ମିୟାଦ୍‍ ତଡ଼୍‍ ଆଦ୍‍ତଣ୍ଡ୍‍ ।
PHI 4:10 ପ୍ରବୁନ୍‍ ତଡ଼୍ କାଇଲି ମାନ୍ଦାନ୍ ଜିୱୁନ୍ ଯାପନ୍ ମାଡ଼ାନ୍ ୱେଲେ, ନାୟାଦ୍ ୱେଡ଼୍‍କ୍‍ ଯେ, ମିଡ଼୍ ନା ସେଙ୍ଗେ ମାନ୍‍ ମାଡ଼୍‍ତିଡ଼୍‍ । ନାର୍‍ଗେ ଦିନାମ୍ ପେର୍‍କେ ମେଣ୍ଡନ୍‍ଦାମ୍‍ ଇଦ୍ ନିର୍ଦଶନ ତଅତ୍‍ତିଡ଼୍ । ନାନ୍ କେଲନ୍‍ ଯେ, ମିଡ଼୍ ଇଗେମିକା ନା ସେଙ୍ଗେ ମେଣ୍ଡେ ମାନ୍‍ ଆୟ୍‍ୱେ ମାତ୍‍ତିଡ଼୍, ମାତର୍ ଆଦ୍ କେତାନଙ୍କ୍‍ ସୁଯଗ୍‍ ପାଏମ୍‍ ଆୟ୍‍ୱେ ମାତ୍‍ତିଡ଼୍ ।
PHI 4:11 ନାନ୍ ନିଜେତିଙ୍କ୍ ଅବହେଲିତ ଆଲ୍‍ସି ଇଦ୍ ଗଟ୍ କେଲନ୍, ବାତେଙ୍କ୍ଇତ୍‍କେ ନାୟାୱୁ ବାତା ମିନ୍ଦେ, ଆସର୍‍ତିଙ୍କ୍ ସନ୍ତୁଷ୍ଟ ଆଦାନଙ୍କ୍‍ ନାନ୍ ଶିକ୍ଷା ମାଡ଼ୁତାନ୍ ।
PHI 4:12 ଅବାବ୍‍ ଆୟି, ନାର୍‍ଗେ ଆୟି, ବେଲାମେଣ୍ଡେ ଆଦ୍ ମୁନେ ମାଡ଼ାଙ୍କ୍ ଆଦ୍‍ତେ, ଆଦ୍ ନାନ୍ ପୁତ୍‍ତାନ୍ । ଆଦିଙ୍କ୍ ବେଦ୍ ସମୟ୍‍ତେ, ବେଦ୍ ଲେକାମ୍ ପରିସ୍ଥିତିତେ, କାର୍‍ୱିନ୍‍ ୱେଲେ ବେଲାନ୍, ଡଙ୍କେ ନିଣ୍ଡ୍‍ତେ ୱେଲେ ମିକା ଆଦେଲେକାମ୍, ଅବାବ୍‍ ୱେଲେ ମିକା, ମେଣ୍ଡେ ନାର୍‍ଗେ ମାନ୍ଦାନ୍‍ ୱେଲେ ନାନେ ସାରେଦାମ୍ ସନ୍ତୁଷ୍ଟ ।
PHI 4:13 ନା ଶକ୍ତିଦାତା କ୍ରିଷ୍ଟନ୍ ସହାୟତାତେ ନାନ୍ ସାରେକିଚି ମାଡ଼େ ପାର୍‍ତାନ୍ ।
PHI 4:14 ଆଗେକ୍ ମିକା ନାୟାଦ୍ ତିପାଲ୍ ସମୟ୍‍ତେ ନାକିଂଙ୍କ୍ ତଡ଼୍‍ ଆସ୍‍ ମିଡ଼୍ ମହତ୍ ପାଡ଼୍‍ୟି ମାଡ଼୍‍ତିଡ଼୍ ।
PHI 4:15 ହୋ ପିଲିପିୟ ଦାଦାନଡ଼ି ନୁ ଏଲାସ୍କ୍‍, ମିୟାଦ୍‍ ସାୟେ ଏର୍କା ମାନ୍‍ତେ, ବେଲାନ୍ ସୁସମାଚାର୍ ପ୍ରଚାର୍ ଆରାମ୍ ମାଡ଼ାନ୍‍ ୱେଲେ, ନାନ୍ ବେସୁଙ୍କ୍‍ ମାସିଦୋନିଆ ୱିଡ଼୍‍ସ୍‍ତାନ୍, ମାତର୍ ମିୟାଦ୍ ମଣ୍ଡଲି ନାକିଂଙ୍କ୍ ସାହାଯ୍ୟ ମାଡ଼ିମାତ୍‍ତେ, ମାତର୍ ମିଡ଼୍ ନାୟାଦ୍ ଲାବ୍ ନୁ କ୍ଷତିତେ ବାଗିଦାର୍‍ ଆସ୍‍ମାତ୍‍ତିଡ଼୍ ।
PHI 4:16 ନାନ୍ ଥେସଲନିକୀତାଗ୍ ମାନ୍ଦାନ୍ ୱେଲେ ମିଡ଼୍ ନାର୍‍ଗେଦାମ୍ ନା ଗାର୍ରେ ଦର୍‍କାର୍‍ ଆସ୍‍ମାନ୍ଦାନ୍ ସାହାଯ୍ୟ ରହସ୍‍ ମାତ୍‍ତିନ୍ ।
PHI 4:17 ଇତ୍କେ ମିୟାଗାଙ୍କ୍ ମାତର୍ ଦାନ ଗ୍ରହନ୍ ମାଡ଼ାନଙ୍କ୍ ନାନ୍ ଇଚ୍ଛା ମାଡ଼ନ୍; ଇଦିନ୍ ସେଙ୍ଗେ ମିଡ଼୍ ବେଲାନ୍ ଗାଟି ନାର୍ଗେ ଲାବ୍‍ତଡ଼ି ଆୟ୍‍ମୁଟ୍, ଇଦ୍ ନାୟାଦ୍ ଇଚ୍ଛା ।
PHI 4:18 ମିୟାଗାଙ୍କ୍‍ ନାନ୍ ପାଏମ୍‍ଆସ୍‍ ମାନ୍ଦାନ୍‍ ସାରେ ଦାନ ସେଙ୍ଗେ ପ୍ରାପ୍ତି ସ୍ୱୀକାର୍ ମାଡ଼ୁତାନ୍ । ଏପାପ୍ରଦିତ୍‍ତେ କାୟ୍‍ଦାଗ୍ ମିଡ଼୍ ରହସ୍ ମାନ୍ଦାନ୍ ଦାନ ନାୟାଦ୍ ସାରେ ଅବାବ୍ ପୁରା ମାଡ଼୍‍ତାନ୍ । ଆଦ୍ ଇଶ୍ୱର୍‌ତେ ଉଦ୍ଦେଶ୍ୟତେ ଇତ୍‍ତେ ସାୟେତ୍‍ ଗାବ୍‍ ପୁଜା ସାମାନ୍‍ ନୁ ଅଣ୍ଡ୍‌‍ ଗ୍ରହଣ ମାଡ଼ାନାଦ୍‍ ବା ସାୟେତାଦ୍‍ ବଲିଦାନ୍ ଲେକାମ୍ ।
PHI 4:19 କ୍ରିଷ୍ଟନ୍ ତଡ଼୍ ନା ଇଶ୍ୱର୍ ଅନାଦ୍‌ ନାର୍ଗେ ଆର୍ଶିବାଦ୍‌ତେ ମିୟାଦ୍ ସାରେ ଆଦାନାଦ୍‌ କେପ୍‌ସିଦ୍‌ତଣ୍ଡ୍‍ ।
PHI 4:20 ଯୁଗ୍‍ଯୁଗ୍ ବାବାଲ୍ ଇଶ୍ୱର୍‌ତେ ଗୌରବ୍ ଆୟି । ଆମେନ୍‍ ।
PHI 4:21 କ୍ରିଷ୍ଟ ଜିସୁନ୍ ପେଦେର୍‍ତେ ଆଗେ ମାନ୍ଦାନ୍ ସାରେତଡ଼୍ ସାଦୁନଡ଼୍ ନମସ୍କାର୍‍ ମାଡ଼ୁତାନ୍ । ନା ସାଙ୍ଗେତେ ମାନ୍ଦାନ୍ ଇଦ୍ ପଡ଼ିୟେତେ ଦାଦାନଡ଼୍ ନୁ ଏଲାସ୍କ୍‍ ମିଡ଼୍‍ ସାରେତଡ଼୍‍କ୍ ନମସ୍କାର୍‍ ମାଡ଼ୁତାନ୍‍ ।
PHI 4:22 ଇଗେ ମାନ୍ଦାନ୍ ଇଶ୍ୱର୍‌ତେ ନାରୁଡ଼୍, ବେନଡ଼୍‍ ସମ୍ରାଟ୍‍ କାଇସର୍‍ତେ ପ୍ରାସାଦ୍‍ତାଗ୍‍ ମାନ୍ଦାନ୍ ସାଦୁନଡ଼୍ ମିକିଂଙ୍କ୍ ନମସ୍କାର୍‍ ମାଡ଼ୁତଡ଼୍ ।
PHI 4:23 ପ୍ରବୁ ଜିସୁ କ୍ରିଷ୍ଟନାଦ୍ ଅନୁଗ୍ରହ ମିଇ ସାରେତଡ଼୍ ପରୁ ଆୟି । ଆମେନ୍‌ ।
COL 1:1 ପାଉଲ୍, ଇଶ୍ୱର୍‌ତେ ଇଚ୍ଛା ଲେକାମ୍‍ କ୍ରିଷ୍ଟ ଜିସୁନ୍‍ ୱେରଣ୍ଡ୍ ପ୍ରେରିତ, ମେଣ୍ଡେ ମାନ୍‍ ଦାଦାଲ୍ ତିମତି
COL 1:2 କଲସିୟତାଗ୍ ମାନ୍ଦାନ୍ ସାଦୁ ନୁ କ୍ରିଷ୍ଟ ବିଶ୍ୱାସି ଦାଦାଲଡ଼୍ ନୁ ଏଲାସ୍କ୍‍ ଗାରେ ଇଦ୍ ଚିଟି ଲେକିମିନ୍ଦେନ୍ । ମାନ୍‍ ବାବାଲ୍ ଇଶ୍ୱର୍‌ତାଗାଙ୍କ୍, ଦୟା ନୁ ଶାନ୍ତି ମୀଇ ସେଙ୍ଗେ ଆୟି ।
COL 1:3 ମାମେ ମିଇ ସେଙ୍ଗେ ପ୍ରାର୍ତନା ମାଡ଼ାନ୍ ସମୟତେ ମାନ୍‍ ପ୍ରବୁ କ୍ରିଷ୍ଟ ଜିସୁନ୍ ବାବାଲ୍ ଇଶ୍ୱର୍‌ତିଙ୍କ୍ ସାରେଦାମ୍ ଦନ୍ୟବାଦ୍ ଇଦୁତମ୍ ।
COL 1:4 ବାତେଙ୍କ୍‍ଇତ୍କେ ମାମେ କ୍ରିଷ୍ଟ ଜିସୁନାଗେ ମିୟାଦ୍ ବିଶ୍ୱାସ୍ ନୁ ଇଶ୍ୱର୍‌ତେ ସାରେ ନାରୁଡ଼୍ ସେଙ୍ଗେ ମିୟାଦ୍ ପ୍ରେମ ବିଷୟ କେଞ୍ଜ୍‍ତମ୍ ।
COL 1:5 ବେସୁଙ୍କ୍‍ ସୁସମାଚାର୍‍ତେ ନିଜାମ୍‍ତାଦ୍‍ କାବୁର୍ ମିଇପାକେ ମୁନେଙ୍କ୍ ୱାତ୍‍ତେ, ମିଡ଼୍‍ ଆଦିନ୍ ତଡ଼୍ ଇତ୍‍ତାୱୁ ବର୍‍ସାତାଉ ଗଟି କେଞ୍ଜିମାତ୍‍ତିଡ଼୍ । ମିଡ଼୍ ବାତ୍‍ ବର୍‍ସା ମାଡ଼ିତିଡ଼୍, ବାତ୍‍ ମିଇ ସେଙ୍ଗେ ସ୍ୱର୍ଗତାଗ୍‍ ସୁରକ୍ଷିତ୍, ଆଦିନ୍ ପରୁ ମିଇୟାଦ୍ ବିଶ୍ୱାସ୍ ନୁ ପ୍ରେମ ମିନ୍ଦେ ।
COL 1:6 ବେନ୍ ସୁସମାଚାର୍ ପ୍ରଚାର୍‍ତେ ସେଙ୍ଗେ ମିଡ଼୍ ମୁନେ ଇଶ୍ୱର୍‌ତେ ଅନୁଗ୍ରହ ବିଷୟ କେଞ୍ଜ୍‍ତିଡ଼୍ ନୁ ଇଦିନ୍ ସତ୍‍ ଏର୍କା ମାଡ଼୍‍ତିଡ଼୍, ଆଦ୍ ସୁସମାଚାର୍ ଇଞ୍ଜେ ସାରେ ଜଗତ୍‍ତାଗ୍ ଏକାମ୍‍ ଆଦୁତ୍‍ ନୁ ଆର୍ଶିବାଦ୍‌ ତାତୁତେ ।
COL 1:7 ମାନ୍‍ ପାକାଙ୍କ୍ କ୍ରିଷ୍ଟନ୍ ବିଶ୍ୱାସ୍ତେ ସେବକ୍‍ ନୁ ମାନ୍‍ ଗାଟି ପ୍ରିୟ ଏପାପ୍ରା ନାଗାଙ୍କ୍ ମିଡ଼୍ ଇଶ୍ୱର୍‌ତେ ଇଦ୍ ଅନୁଗ୍ରହ ବିଷୟ ପୁଞ୍ଜ୍ ମିନ୍ଦେଡ଼ି ।
COL 1:8 ପବିତ୍ରଆତ୍ମା ମିକିଙ୍କ୍ ଇସ୍‍ମାନ୍ଦାନ୍ ପ୍ରେମ ବିଷୟ୍ ଅଣ୍ଡ୍‌‍ ମାନାଙ୍କ୍ କେସ୍‍ମିନ୍ଦେନ୍ ।
COL 1:9 ଇଦିନ୍‍ ମାୟ୍‍ଦିଙ୍କ୍‍ ମୀଇ ବିଷୟତେ କେଞ୍ଜାନ୍ ୱେଲେକନ୍ସ୍ ମାମେ ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ୁତମ୍ । ପବିତ୍ରଆତ୍ମାତଡ଼୍ ଇସ୍‍ମାନ୍ଦାନ୍ ସାରେ ଜ୍ଞାନ୍ ନୁ ପୁନ୍ଦାନ୍ ଶକ୍ତି ତଡ଼୍ ଇଶ୍ୱର୍‌ତେ ଇଚ୍ଛା ପୁରା ମିଡ଼୍‍ ବେଲାନ୍ ପୁନ୍ଦେ ପାର୍‍ଦ୍‍ତିଡ଼୍, ଆଦିନ୍ ମାୟ୍‍ଦିଙ୍କ୍‍ ମିଇ ସେଙ୍ଗେ ମାମେ ପ୍ରାର୍ତନା ମାଡ଼ୁତମ୍ ।
COL 1:10 ଆଲେକେ, ମିଡ଼୍ ପ୍ରବୁନ୍‍ ଇଚ୍ଛା ଲେକାମ୍ ବାଦ୍‍କେ ପାର୍‍ଦ୍‍ତିଡ଼୍ ନୁ ଅନାଦ୍‌ ପସନ୍ଦ୍‍ ଲେକେତ୍ କାମ୍ ମାଡ଼େ ପାର୍‍ଦ୍‍ତିଡ଼୍ । ମୀୟାଦ୍ ଜିୱେତାଗ୍ ସାରେ ଲେକାତ୍ ସାୟେତ୍ କାମ୍ ମାଡ଼େ ପାର୍‍ଦ୍‍ତିଡ଼୍ ନୁ ଇଶ୍ୱର୍‌ତେ ବିଷୟତେ ମିୟାଦ୍ ଜ୍ଞାନ୍ ନାର୍ଗେ ଆଦ୍‍ତେ ।
COL 1:11 ଗାଡ଼୍‍ସ୍‍ଆସ୍‍ ମିଇଡ଼୍ ବେଲାନ୍ କି ସାରେ ବିଷୟ ସୟେମ୍‍ ମାଡ଼ିତିଡ଼୍, ଅଦିନ୍‌ ସେଙ୍ଗେ ଅନାଦ୍‌ ଗୌରବ୍‍ମୟ ଶକ୍ତିତଡ଼୍ ମିଡ଼୍‍ ଶକ୍ତି ଆୟ୍‍ମୁଟ୍‍ ।
COL 1:12 ବାବାଲ୍ ଇଶ୍ୱର ୱେସିନ୍‍ ରାଜ୍ୟତାଗ୍ ତାନ୍‍ ନାରୁଡ଼୍‍ ସେଙ୍ଗେ ବାତ୍‍ ଲେକେତ୍ ନେଃଏତଣ୍ଡ୍, ଆଦିନ୍ ବାଗିଦାର୍‍ ଆଦାନ୍ ସେଙ୍ଗେ ଅଣ୍ଡ୍‌ ଯେ ମିକିଙ୍କ୍ ଯୋଗ୍ୟ ମାଡ଼୍‍ତନ୍, ଅଦିନ୍‌ ସେଙ୍ଗେ ୱେଡ଼୍‍କେତେ ଅଙ୍କ୍‌ ଦନ୍ୟବାଦ୍ ଇମୁଟ୍ ।
COL 1:13 ଅଣ୍ଡ୍‌ ଇକାଡ଼୍‍ ଶକ୍ତିତାଗାଙ୍କ୍ ମାନାଙ୍କ୍ ରକ୍ଷା ମାଡ଼୍‍ତନ୍ ନୁ ବିପଦ୍ ଇଲ୍‍ୱେ ଜାଗେତାଗ୍ ମାନାଙ୍କ୍ ତାନ୍ ପ୍ରିୟ ପ୍ରେମ ମାରିନ୍ ରାଜ୍ୟତାଗେ ତାତ୍‍ତନ୍ ।
COL 1:14 ଆ ମାରିନ୍‍ ତଡ଼୍ ମାନାଡ଼୍ ମୁକ୍ତି ଆତ୍‍ତାଡ଼୍, ଇତ୍‍କେ ମାନାଦ୍‍ ପାପ୍‌ କ୍ଷମା ଆତ୍‍ତେ ।
COL 1:15 କ୍ରିଷ୍ଟ, ତନ୍ଦ୍‍ଇଲ୍‍ୱେ ଇଶ୍ୱର୍‌ତେ ତନ୍ଦାନ୍ ରୁପ ଲେକାମ୍ । ଅଣ୍ଡ୍‌ ମୁନେଙ୍କ୍ ପୁଟ୍‍ତେ ମାର୍‍ ନୁ ସାରେ ସୃଷ୍ଟିତାଗାଙ୍କ୍ ଅଣ୍ଡ୍‌ ବାଡ଼୍‍ୟଣ୍ଡ୍ ।
COL 1:16 ବାତେଙ୍କ୍ଇତ୍କେ ଅନ୍‌‍ତଡ଼୍ ଇଶ୍ୱର୍‍ ସ୍ୱର୍ଗତାଗ୍ ନୁ ପୃତିବିତାଗ୍ ସାରେ ଦୃଶ୍ୟ ନୁ ଆଦୃଶ୍ୟ ଜିନିଷ୍, ତେର୍‍ୱେ ଲେକାତ୍ ନାର୍ଗେଶକ୍ତି, କର୍ତ୍ତାଲଡ଼୍, ଶାସନ୍‍ ମାଡ଼ାନଡ଼୍ ନୁ ସାରେତଡ଼୍ ଅଦିକାରିଡ଼୍‍କ୍ ତିଆର୍ ମାଡ଼୍‍ତନ୍ । ଅନ୍‌‍ ତଡ଼୍ ନୁ ଅନ୍‌ ସେଙ୍ଗେ ଇଶ୍ୱର୍‍ ସାରେ ବିଶ୍ୱତିଙ୍କ୍ ତିଆର୍ ମାଡ଼୍‍ତନ୍ ।
COL 1:17 ସାରେ ବିଷୟ ତିଆର୍‍ତେ ମୁନେଙ୍କେ ଅନାଦ୍‌ ଅସ୍ତିତ୍ୱ ମାତ୍‍ତେ ନୁ ଅନ୍‌‍ ତଡ଼୍ କାଇଲାନ୍ ପେର୍କେ ସାରେ ବିଷୟ ନିଜର୍ ତିଆର୍‍ତେ ଜାଗାନାଗ୍ ବେଗେତାୱୁ ଆଗେ ମାତ୍‍ତା ।
COL 1:18 ଅଣ୍ଡ୍‌‍ ତାନ୍ ଉପାସନା ମଣ୍ଡଲି ଲେକାମ୍‍ତେ ମେନ୍ଦୁଲ୍‍ତେ ତାଲ୍‍ଲେ ଲେକାମ୍‍; ଆଦ୍ ମେନ୍ଦୁଲ୍‍ତେ ଅଣ୍ଡ୍‌ ଜିୱୁନ୍‍ ଶକ୍ତି, ଡଲ୍‍ତାଗାଙ୍କ୍‍ ତେଏଦ୍‍ତେନଣ୍ଡ୍‍ ଅଣ୍ଡ୍‌‍ ମୁନେନ୍‍ ପୁଟ୍‍ତେ ମାର୍‍ । ଆଦିଙ୍କ୍‍ ସାରେ ବିଷୟତେ ପ୍ରତମ୍‍ତେ ପଡ଼ିୟେ ଦର୍‍କାନ୍ ସେଙ୍ଗେ ଅଣ୍ଡ୍‌ ଯୋଗ୍ୟ ଆତ୍‍ତନ୍ ।
COL 1:19 ବାତେଙ୍କ୍‍ଇତ୍କେ ଇଶ୍ୱର୍‌ତେ ଇଚ୍ଛାତେ ମାର୍‍ ନିଜେ ଇଶ୍ୱର୍‌ତେ ପୁରା ରୁପ୍ ପୟ୍‍ତଣ୍ଡ୍‍ ।
COL 1:20 ମାରିନ୍‍ ତଡ଼୍ ଇଶ୍ୱର୍‍ ସାରେ ବିଶ୍ୱତିଙ୍କ୍ ନିଜର୍‍ ଗାରେ ମାଲ୍‍ପି ତାତାନଙ୍କ୍ ଇଚ୍ଛା ମାଡ଼୍‍ତନ୍ । କ୍ରୁଶତାଗ୍ ତାନ୍ ମାରିନାଦ୍ ଡଲ୍‍ତାଦିନ୍ ତଡ଼୍ ଇଶ୍ୱର୍ ଶାନ୍ତି ମାଡ଼୍‍ତନ୍ ମେଣ୍ଡେ ପୃତିବି ନୁ ସ୍ୱର୍ଗତାଗ୍ ମାନ୍ଦାନ୍ ସାରେ ବିଷୟତିଙ୍କ୍ ନିଜର୍‍ ଗାରେ ମାଲ୍‍ପି ତାତ୍‍ତନ୍ ।
COL 1:21 ଅଣ୍ଡୟ୍‌‍ ସମୟତେ କାରାପ୍ ଚିନ୍ତା ନୁ କାରାପ୍ କାମ୍ ମାଡ଼ମାନ୍‍ନାକ୍ ମିଡ଼୍ ଇଶ୍ୱର୍‌ତାଗାଙ୍କ୍ ଯେକା ମାତ୍‍ତିଡ଼୍ ନୁ ଅନ୍‌ ଶତ୍ରୁ ମାତ୍‍ତିଡ଼୍ ।
COL 1:22 ଇତ୍କେ ଇଞ୍ଜେ ଇଶ୍ୱର୍‍ ମିକିଙ୍କ୍ ପବିତ୍ର, ସିଦ୍ଦ ନୁ ନିର୍ଦୋଷ୍‍ ଲେକାମ୍ ଅନ୍‌ ମୁନେ ତାତାନ୍‍ ସେଙ୍ଗେ ତାନ୍ ମାରିନ୍ ମେନ୍ଦୁଲ୍‍ ଡଲ୍‍ତାଦିନ୍ ତଡ଼୍ ମିକିଙ୍କ୍ ନିଜର୍‍ ତଡ଼୍ ମେଣ୍ଡନ୍‍ଦାମ୍‍ କାଲ୍‍ପି ମିନ୍ଦେଣ୍ଡ୍ ।
COL 1:23 ମିଡ଼୍ ଅଣ୍ଡୟ୍‌ ଡ଼ୁଟାଙ୍ଗ୍ ନୁ ନିଜାମ୍ ମୂଲଦୁଆ ପରୁ ତିଆତ୍‍ଆସ୍ ମାନୁଟ୍ ନୁ ସୁସମାଚାର୍ କେଞ୍ଜାନ୍ ୱେଲେ ବେନେ ଆଶେ ଦର୍‍କି ମାତ୍‍ତେ, ଆଗେଙ୍କ୍‍ ଦାନ୍ଦେ ଆଦାନଙ୍କ୍ ନିଜେତିଙ୍କ୍ ପଡ଼୍‍ୟି ଇମାଟ୍ । ଆଦ୍ ସୁସମାଚାର୍ କେ ପୃତିବିତେ ସାରେତଡ଼୍ ଗାରେ ପ୍ରଚାର୍ ଅଦୁତ୍ ନୁ ନାନ୍ ପାଉଲ୍, ଅନ୍‌‍ୱାଦ୍ ୱେରନ୍ ବିଶ୍ୱାସ୍ତେ ଦାସନ୍ ।
COL 1:24 ଇଞ୍ଜେ ମି ସେଙ୍ଗେ ବେନ୍ ଦୁଃକାମ୍ କଷ୍ଟ ସେଙ୍ଗେ ନାନ୍ ୱେଡ଼୍‍କ୍‍ତାନ୍ । ବାତେଙ୍କ୍‍ଇତ୍କେ ନାୟାଦ୍ ମେନ୍ଦୁଲ୍‍ ଦୁଃକାମ୍‍ ତଡ଼୍ ନାନ୍ କ୍ରିଷ୍ଟନ୍ ମେନ୍ଦୁଲ୍ ଲେକାମ୍ ମଣ୍ଡଲି ପାକାଙ୍କ୍ କ୍ରିଷ୍ଟନ୍ ଦୁଃକାମ୍‍ତେ ବାକି ଦୁଃକାମ୍‍ତିଙ୍କ୍ ପୁରା ମାଡ଼ାନ୍‍ ସେଙ୍ଗେ ନାନ୍ ସାହାଯ୍ୟ ମାଡ଼ୁତାନ୍ ।
COL 1:25 ମୀଇ ସାୟେତ୍ ସେଙ୍ଗେ ଇଦ୍ କାମ୍ ମାଡ଼ାନ୍ ସେଙ୍ଗେ ନାନ୍‍ ଇଶ୍ୱର୍‌ତଡ଼୍ ମଣ୍ଡଲିତେ ୱେରନ୍ ଦାସ ଲେକାମ୍ ହେଞ୍ଚି ମିନ୍ଦେନ୍ । ଅନାଦ୍‌ ସୁସମାଚାର୍ ପୁରାପୁରି କେତାନାଦ୍ ନାୟାଦ୍ କାମ୍ ।
COL 1:26 ଆଦ୍ ସୁସମାଚାର୍ ୱେରଡ଼୍ ଲେକେତ୍ ବିଷୟ୍ । ଯୁଗ୍‍ଯୁଗ୍ ପଇସ୍ ଇଶ୍ୱର୍ ସାରେତଡ଼ାଗାଙ୍କ୍ ଇଦ୍ ମିଞ୍ଜିସ୍ପି ନେହେସ୍ ମାତ୍‍ତନ୍, ବାତେଙ୍କ୍‍ଇତ୍କେ ଇଞ୍ଜେ ତାନ୍ ନାରୁଡ଼୍ ପାକେ କେସ୍‍ ମିନ୍ଦେନ୍ ।
COL 1:27 ତାନ୍ ନାରୁଡ଼୍‍କିଙ୍କ୍ ଆଦ୍ ମିଞ୍ଜ୍‍ତେ ଗଟ୍ କେଞ୍ଜ୍‍ପାନଙ୍କ୍ ଇଶ୍ୱର୍‌ତେ ଇଚ୍ଛା ମାତ୍‍ତେ । ଅନାଦ୍‌ ଇଦ୍ ନାର୍ଗେ ମୁଲ୍ୟ ନୁ ଗୌରବ୍ ଲେକେତ୍ ଗଟ୍ ସାରେ ନାରୁଡ଼୍ ଜାତିତେ ସେଙ୍ଗେ ଦର୍‍କାର୍ । ଇଦ୍ ଗଟ୍ ଅଦୁତ୍, କ୍ରିଷ୍ଟ ମୀଇ ଲୋପେ ମିକା ମିନ୍ଦେନ୍ । ଇଦିନ୍ ଅର୍ତ, ମିଡ଼୍ ଇଶ୍ୱର୍‌ତେ ଗୌରବ୍‍ତଡ଼ି ।
COL 1:28 ଆଦିନ୍ ସେଙ୍ଗେ ମାନାଡ଼୍ ସାରେତଡ଼୍ ପାକେ କ୍ରିଷ୍ଟଙ୍କ୍ ପ୍ରଚାର୍ ମାଡ଼ୁତାଡ଼୍ । ସାରେତଡ଼୍‍କ୍ କ୍ରିଷ୍ଟନ୍‍ତଡ଼୍ କାଲ୍‍ପି ମିକା ଅଣ୍ଡୟ୍‌‍ ଲେକେତ୍ ନାରୁଣ୍ଡ୍ ଲେକାମ୍ ଇଶ୍ୱର୍‌ତେ ମୁନେ ନିଲ୍‍ସ୍ପିତାଡ଼୍, ମାନାଦ୍‍ ସାରେ ବୁଦ୍‍ଜ୍ଞାନ୍ ବ୍ୟବହାର୍‌ ମାଡ଼ି, ସାରେତଡ଼୍‍କ୍ ଚେତନା ନୁ ଶିକ୍ଷା ଇସମିନ୍ଦେମ୍ ।
COL 1:29 ଇଦିଙ୍କ୍ ପୁରା ମାଡ଼ାନ୍‍ ମାୟ୍‍ଦିଙ୍କ୍ ନାୟାଗେ ମାନ୍ଦାନ୍ କ୍ରିଷ୍ଟ ଇତ୍‍ତେ ମହାନ୍ ଶକ୍ତିତିଙ୍କ୍ ବ୍ୟବହାର୍ ମାଡ଼ି ନାନ୍ ଜିୱେ ଅପି ଚେଷ୍ଟା ମାଡ଼ୁତାନ୍‍ ନୁ ପାଡ଼୍‍ୟି ମାଡ଼ୁତାନ୍ ।
COL 2:1 ମିଇ ସେଙ୍ଗେ, ଲାଉଦିକିଆତଡ଼୍ ନାରୁଡ଼୍‍ ନୁ ନାକିଙ୍କ୍ ବ୍ୟକ୍ତିଗତ ଲେକାମ୍‌ ପୁନ୍‍ୱେ ମାନ୍ଦାନ୍ ସାରେତଡ଼୍ ନାରୁଡ଼୍ ସେଙ୍ଗେ ନାନେ ଯେ ବେସର୍ ନାର୍ଗେ ତିପାଲ୍ ପାଡ଼୍‍ୟି ମାଡ଼ୁତାନ୍, ଆଦ୍ ମିଡ଼୍ ପୁନୁଟ୍ ଇଞ୍ଜ ନାନ୍ ଚାହେମ୍ ଆଦୁତାନ୍ ।
COL 2:2 ମିଡ଼୍ ସାରେତଡ଼ି ବେଲାକି ସାର୍‍ଦେ ଆଦ୍‍ତିଡ଼୍, ନିଜେନିଜର୍ ଲପେ ପ୍ରେମତେ ଆବଦ୍ଦ ଆଦ୍‍ତିଡ଼୍ ନୁ ସତ୍ ଜ୍ଞାନ୍ ଲାବ୍ ମାଡ଼ି ନିଜାମ୍ ଆଶେ ଲେକାତ୍ ସମ୍ପତିତେ ପୁରା ଅଦିକାରି ଆଦ୍‍ତିଡ଼୍, ଇଦ୍ ନାୟାଦ୍ ଇଚ୍ଛା । ଇଦିନ୍ ତଡ଼୍ ମିଡ଼୍ ସାରେତଡ଼୍ ପୁନ୍‍ତିଡ଼୍ ଯେ, ଜିସୁ କ୍ରିଷ୍ଟକେ ଇଶ୍ୱର୍‌ତେ ମିଞ୍ଜି ମାନ୍ଦାନ୍‍ ସତ୍ ବିଷୟ୍ ।
COL 2:3 ଜିସୁ କ୍ରିଷ୍ଟ ଆଦୁତନ୍ ଆଦ୍ କୁସ୍‍କାୟ୍, ବାତେ ଇଶ୍ୱର୍‌ତେ ବୁଦ୍ ନୁ ଜ୍ଞାନ୍‍ତେ ଲେକାତ୍ ସାରେ ମିଞ୍ଜିମାନ୍ଦାନ୍ ସମ୍ପତିତେ ଗୋଦାମ୍‍ତିଙ୍କ୍‍ କୁଲାମାଡ଼ିଦ୍‍ତେ ।
COL 2:4 ବେନ ମିକିଙ୍କ୍ ବେଲାନ୍ କି ଗଟିନ୍‍ତଡ଼୍ ବୁଲ୍‍କାମାଡ଼ି ତିପାଲ୍ ମାଡ଼୍‍ମାକିଡ଼୍, ଅଦିନ୍‌ ସେଙ୍ଗେ ନାନେ ଇଦ୍‍ କେସ୍ ନେଃଏତୁତାନ୍ ।
COL 2:5 ଯଦି ମେନ୍ଦୁଲ୍‍ତେ ଇଲ୍‍ୱେ ମାତ୍‍କେ ମିକା, ଆତ୍ମିକତେ ନାନେ ମିଇ ତଡ଼୍ ମିନ୍ଦେନ୍ । କ୍ରିଷ୍ଟନ୍‍ ପରୁ ନାର୍ଗେ ବିଶ୍ୱାସ ନେହେସ୍ ମିଇଡ଼୍ ବେଲାନ୍ ସାୟେତ୍‍ବୁଦ୍ ଆତ୍‍ତିଡ଼୍‍, ଆଦ୍‍ ଉଡ଼ି ନାନେ ୱେଡ଼୍‍କୁତାନ୍ ।
COL 2:6 ବେଲା ମିଡ଼୍ କ୍ରିଷ୍ଟ ଜିସୁଙ୍କ୍ ପ୍ରବୁ ଲେକାମ୍ ଗ୍ରହନ୍‍ ମାଡ଼୍‍ତିଡ଼୍, ଅନ୍‌‍ ତଡ଼୍ କାଇଲି ଜିୱୁଣ୍ଡ୍‍ ବାଦ୍‍କାଟ୍ ।
COL 2:7 ମିୟାଦ୍ ସାରେ ଆଶେ ଅନ୍‌ ପରୁ ଗାଡ଼୍‍ସ୍‍ତଡ଼୍‍ ନେଃଏସ୍‍ମିକା ଜିୱୁଣ୍ଡ୍ ବାଦ୍‍କାଟ୍ ନୁ ମିଡ଼୍ ପାଏମ୍‍ ଆତ୍‍ତେ ଶିକ୍ଷା ଲେକାମ୍ ବିଶ୍ୱାସ୍‍ତେ ଗାଟି ସାତ୍‍ୱାମ୍ ଆୟ୍‍ମୁଟ୍ । ମିୟାଦ୍ ହୃଦୟ ଦନ୍ୟବାଦ୍‍ ତଡ଼୍ ନିଣ୍ଡିଆନି ।
COL 2:8 ସାବ୍‍ଦାନ୍, ବେନ ବେଲାନ୍ ମିକିଙ୍କ୍ ନାରୁଡ଼ାଦ୍ ବୁସାତାୱୁ ଆଙ୍ଗ୍‍ଡ଼ାତ୍‍ ଜ୍ଞାନ୍ ତଡ଼୍ ବୁସା ମାଡ଼୍‍ମାକିଡ଼୍ । ଆଦ୍ ସାରେ ଜ୍ଞାନ୍ କ୍ରିଷ୍ଟନ୍ ଶିକ୍ଷାତାଗାଙ୍କ୍ ୱାଡ଼୍‍ୱେ ମାନ୍‍ନ୍ତେ । ଆଦ୍ ନାରୁଡ଼୍‍ ସମାଜ୍‍ତାଦ୍‍ ପରମ୍ପରା ଶିକ୍ଷା ନୁ ବିଶ୍ୱତେ ପରୁ ଶାସନ୍‍ ମାଡ଼ ମାନ୍ଦାନ୍ ମେନ୍ଦୁଲ୍‍ ଇଲ୍‍ୱେ ଶକ୍ତିକିନ୍ ଶିକ୍ଷାତାଦ୍‍ କାୟେ ।
COL 2:9 ମାତର୍‌ ନାରୁଣ୍ଡ୍ ଲେକାମ୍ କ୍ରିଷ୍ଟନାଗେ ସ୍ୱର୍ଗୀୟସମ୍ପତି ଲେକାତ୍ ଗୁନାମ୍ ନାର୍ଗେ ନିଣ୍ଡି ମିନ୍ଦେ ।
COL 2:10 ଅନ୍‌‍ ତଡ଼୍ କାଇଲି ମାନ୍ଦାନ୍ ମାୟ୍‍ଦିଙ୍କ୍ ମୀଡ଼୍ ଜିୱେତାଦ୍ ପୁରା ଲାବ୍ ମାଡ଼୍‍ତିଡ଼୍‍ । ବାଗାତ୍ ସାରେ ଶକ୍ତି ନୁ ଶାସନ୍‍ ପରୁ କ୍ରିଷ୍ଟନାଦ୍ ଶାସନ୍‍ କେ ସାରେତିଙ୍କ୍ ବାଡ଼୍‍ୟେ ।
COL 2:11 କ୍ରିଷ୍ଟନ୍‍ତଡ଼୍ କାଇଲି ମାନ୍ଦାନ୍ ଜିୱୁଣ୍ଡ୍‍ କେ ମିୟାଦ୍ ସୁନ୍ନତ ଲେକାମ୍ । ଇଦ୍ ସୁନ୍ନତ ନାରୁଡ଼୍ ମାଡ଼୍‍ତାଦ୍ ଆୟ, ଆଦ୍ କ୍ରିଷ୍ଟନ୍ ତଡ଼୍ ମିନ୍ଦେ । ଆଦ୍ ନାରୁଡ଼୍‍କ୍ ପାପାମ୍‍ ମେନ୍ଦୁଲ୍‍ ତାଗାଙ୍କ୍ ମୁକ୍ତି ଇଦ୍‍ତେ ।
COL 2:12 ବାତେଙ୍କ୍ଇତ୍କେ ଏର୍‍ମୁଡ଼୍‍ନ୍ଦ୍‍କେ ମିଡ଼୍ କ୍ରିଷ୍ଟନ୍‍ ତଡ଼୍ ସମାଦି ପାଏମ୍ ଆସ୍‍ମାତ୍‍ତିଡ଼୍ ନୁ ଜିସୁ କ୍ରିଷ୍ଟଙ୍କ୍ ତେଏସ୍ ‍ମାନ୍ଦାନ୍ ଇଶ୍ୱର୍‌ତେ ଶକ୍ତିତାଦ୍‍ ବିଶ୍ୱାସ୍ ମାଡ଼ାନ୍ ତଡ଼୍ କ୍ରିଷ୍ଟନ୍ ତଡ଼୍ ମିଡ଼୍‍ମିକା ତେଏଦ୍‍ତିଡ଼୍ ।
COL 2:13 ମିୟାଦ୍ ପାପାମ୍‍ ସେଙ୍ଗେ ନୁ ମିଡ଼୍ ନିୟମ୍ ଇଲ୍‍ୱେ ଅଣଇହୁଦୀ ମାତ୍‍ତାଙ୍କ୍ ଅଣ୍ଡୟ୍‌‍ ଦାମ୍ ମିଡ଼୍ ଆଦ୍ୟାତ୍ମିକ ଲେକାମ୍ ଡଲି ମାତ୍‍ତିଡ଼୍; ଇତ୍କେ ଇଶ୍ୱର୍‍ ଇଞ୍ଜେ କ୍ରିଷ୍ଟନ୍ ତଡ଼୍ ମିକିଙ୍କ୍ ଜିୱେ ମାଡ଼୍‍ତନ୍ । ଇଶ୍ୱର୍ ମାନାଙ୍କ୍ ସାରେ ପାପାମ୍‍ କ୍ଷମା ମାଡ଼୍‍ତନ୍ ।
COL 2:14 ଅଣ୍ଡ୍‌ ମାନ୍‍ ବିରୁଦ୍ଦତେ ମାନ୍ଦାନ୍ ନିୟମ୍‍ତେ ଦଲିଲ୍ ନୁ ଇଦିନ୍ ବିଦିବିଦାନ୍‍ତିଙ୍କ୍ କ୍ରୁଶତାଗ୍ ନଷ୍ଟ ମାଡ଼୍‍ତଣ୍ଡ୍‍ ।
COL 2:15 ମେଣ୍ଡ୍ ଆଦ୍ କ୍ରୁଶ ପରୁ କ୍ରିଷ୍ଟ ସାରେଲେକାମ୍ ଶକ୍ତି ନୁ ଅଦିକାର୍‌‍ ତାଗାଙ୍କ୍ ନିଜେତିଙ୍କ୍ ମୁକ୍ତି ମାଡ଼୍‍ତନ୍ ନୁ ଅଡ଼୍‌‍କିଂଙ୍କ୍ ବନ୍ଦି ମାଡ଼ି ନିଜେ ଜିଡ଼ି ଆଦାନ୍‍ୱେଲେ ସାରେତଡ଼୍ ମୁନେ ଅଡ଼୍‌‍କିଂଙ୍କ୍ ସିଗ୍ ୱେର୍‍ସ୍ପ୍‍ତଣ୍ଡ୍‍ ।
COL 2:16 ଆଦିଙ୍କ୍ ବେନ ମିୟାଦ୍ ତିନ୍ଦାନାଦ୍, ଉନ୍ଦାନାଦ୍, ପବିତ୍ର ଦିନାମ୍‍ ବା ଆମାସ୍ ପାଣ୍ଡୁମ୍‍, କି ରମାନ୍‍ ଦିନେ ବିଷୟତେ ବାତ୍‍ବା ନିୟମ୍ ତିଆର୍ ମାଡ଼୍‍ମାକିଡ଼୍ ।
COL 2:17 ଆୱୁ ସାରେ ମାତର୍‌ ବବିଷ୍ୟତ୍‍ତେ ଗଟେମ୍‍ ଆଦାନଙ୍କ୍ ଆଦାନାଦ୍ ବିଷୟତେ ନିଡ଼୍‍କେ ଲେକାମ୍ । କ୍ରିଷ୍ଟକେ ସାରେତିଙ୍କ୍ ସତ୍‍ ।
COL 2:18 ବେନଡ଼୍ ବିଶେଷ୍‍ ଦର୍ଶନ୍, ବାୟ୍‍ଦେ ସାୟେତଣ୍ଡ୍‍ ନୁ ଦୂତ ପୂଜା ପରୁ ଗୁରୁତ୍ୱ ଇସ୍ ଗର୍ବ ମାଡ଼ିତଡ଼୍, ଅଡ଼୍‌‍କିଂଙ୍କ୍ ଉଡ଼ି ମିଡ଼୍ ନିଜେତିଙ୍କ୍ ସୁଦୁର୍‍ ଏର୍କା ମାଡ଼୍‍ମାଟ୍ । ଇଦ୍‍ଲେକାମ୍ ନାରୁଡ଼୍ ନିଜେତିଙ୍କ୍‍ ନାରୁଡ଼୍‍ ଚିନ୍ତାତଡ଼୍ ଆଙ୍ଗ୍‍ଡ଼ାତ୍‍ ଗର୍ବତାଗ୍‍ ଗର୍ବୀଆସ୍‍ ମାନ୍‍ତଡ଼୍‍ ।
COL 2:19 ମେନ୍ଦୁଲ୍‍ତେ ତାଲେ ଇନା କ୍ରିଷ୍ଟନାଗାଙ୍କ୍‍ ଅଡ଼୍‌ ୱେରେ ଆତ୍‍ତଡ଼୍ । ଅନ୍‌‍ ନିୟନ୍ତ୍ରଣତେ କାଇକ୍ ଡ଼େକା କାୟ୍‍ଲି ନୁ ନାରାସ୍ ତଡ଼୍ ତାମ୍‍ତାମ୍ ଲୋପେ କାୟ୍‍ଲି ଲେକେତ୍‍ ଆଦ୍‍ତା ମେଣ୍ଡେ ମେନ୍ଦୁଲ୍ ଇଶ୍ୱର୍‌ତେ ଇଚ୍ଛାତେ ପେର୍‍ସିତ୍ ।
COL 2:20 ମିଡ଼୍ କ୍ରିଷ୍ଟନ୍ ତଡ଼୍ ଡଲ୍‍ତିଡ଼୍ ନୁ ଇଦ୍ ପୃତିବି ପରୁ ଶାସନ୍‍ ମାଡ଼ମାନ୍ଦାନ୍ ଶକ୍ତିକିନ୍‍ଗାଙ୍କ୍ ମୁକ୍ତି ଲାବ୍ ମାଡ଼୍‍ତିଡ଼୍ । ଆଲେକ୍ ବାତ୍‍ତିଙ୍କ୍ ମିଡ଼୍ ଜଗତ୍‍ତେ ନାରୁଡ଼୍‍କିନ୍‍ ଲେକାମ୍ ଜିୱେ କାଟେମ୍ ଆଦୁତିଡ଼୍ ? ବାତ୍‍ତିଙ୍କ୍ ମିଡ଼୍ ଇଦ୍‍ଲେକାତ୍ ନିୟାମ୍ ସାରେ ପାଲନ୍ ମାଡ଼ୁତିଡ଼୍,
COL 2:21 ଇତ୍‍କେ “ଇଦ୍ ପୟ୍‍ମାଟ୍, ଆଦ୍ ତିନ୍‍ମାଟ୍, ଆଦ୍ ଇଟ୍‍ମାଟ୍ ?”
COL 2:22 ଇୱୁସାରେ ବିଷୟ ସେନେକ୍‍ତିଙ୍କ୍ । ଇଦ୍‍ ବ୍ୟବହାର୍‌ ଆଦାନ୍ ସାଙ୍ଗେ ସାଙ୍ଗେ ମୁଲ୍ୟହିନ୍ ଆଦ୍‍ତା । ଇୱୁ ସାରେ ନାରୁଡ଼୍‍ ତିୟାର୍‍ ମାଡ଼୍‍ତାୱୁ ନିୟମ୍ ନୁ ଶିକ୍ଷା ।
COL 2:23 ଆଲେନ୍ ସ୍ୱର୍ଗଦୂତନ୍ ପୁଜା, ବାୟ୍‍ଦେ ସାୟେତଣ୍ଡ୍‍ ନୁ ଆତ୍ମାତିଙ୍କ୍ କଷ୍ଟ ଇଲ୍‍ୱେ ପାଡ଼୍‍ୟି ସେଙ୍ଗେ କେସମାନ୍ଦାନ୍ ଇୱୁ ସାରେ ନିୟମ୍ ନାର୍ଗେ ଜ୍ଞାନ୍ ମିନ୍ଦେ ଇଞ୍ଜ ମନେ ଆଦ୍‍ତେ, ଇତ୍‍କେ ମେନ୍ଦୁଲ୍‍ତେ ଲାଲସା ପାଡ଼୍‍ୟି ତଲାନ୍‍ ସେଙ୍ଗେ ଇୱୁ ପାର୍‍ୱ ।
COL 3:1 ମିଡ଼୍‍ କ୍ରିଷ୍ଟନ୍ ତଡ଼୍ ଡଲ୍‍ତାଗାଙ୍କ୍ ତେଏଦ୍‍ତିଡ଼୍ । ଆଦିଙ୍କ୍ ସ୍ୱର୍ଗତେ ବିଷୟ ସେଙ୍ଗେ ମାନ୍‍ମାଡ଼ାଟ୍, ବାତେଙ୍କ୍ଇତ୍କେ କ୍ରିଷ୍ଟ ସ୍ୱର୍ଗତାଗେ ଇଶ୍ୱର୍‌ତେ ତିନ୍ଦେ ପାକେ କୁଦି ମିନ୍ଦେନ୍ ।
COL 3:2 ପୃତିବି ବିଷୟ ସେଙ୍ଗେ ମନ୍ ଇୱକଟ ସ୍ୱର୍ଗତେ ବିଷୟ ସେଙ୍ଗେ ମନ୍ ଇମୁଟ୍,
COL 3:3 ବାତେଙ୍କ୍ଇତ୍‍କେ ମିଡ଼୍ ଡଲ୍‍ତିଡ଼୍ ନୁ କ୍ରିଷ୍ଟନ୍ ତଡ଼୍ ମିୟାଦ୍ ଜିୱେ ଇଶ୍ୱର୍‌ତାଗେ ମିଞ୍ଜି ମିନ୍ଦେ ।
COL 3:4 କ୍ରିଷ୍ଟକେ ମିଇ ଜିୱୁଣ୍ଡ୍ ନୁ ଅଣ୍ଡ୍‌ ବେସୁଙ୍କ୍‍ ତନ୍ଦିତଣ୍ଡ୍, ଆସୁଙ୍ଗ୍ ମିଡ଼୍‍ ମିକା ଅନାଦ୍‌ ଗୌରବ୍‍ ତଡ଼୍ ତନ୍ଦିତିଡ଼୍ ।
COL 3:5 ମିଇ ଜିୱେତ୍‍ ଲୋପେ ପାଙ୍ଗ୍‍ ମାଡ଼ାନ୍ ଜଗତ୍‍ତେ ପାଡ଼୍‍ୟି ଆତ୍‍ତେ-ଲାଲସା, ପିନ୍ଦଲାଦ୍, ଇନ୍ଦ୍ରିୟଶକ୍ତି, କୁଆବିଲାଷ ନୁ ଲୋତ୍‍ତିଙ୍କ୍ ମିଡ଼୍ ବିନାଶ୍ ମାଡ଼ାଟ୍ । ଲୋବ୍ ପୁତ୍‍ଲାମ୍‍ ପୁଜାତେ ୱେରଡ଼୍ ରୁପ୍ ।
COL 3:6 ଇୱୁସାରେ ନାଗେ ମାୟିମାଞ୍ଜ୍ ବେନଡ଼୍ ଇଶ୍ୱର୍‌ତିଙ୍କ୍ ମାନେମ୍‍ ଆୟଡ଼୍, ଅଡ଼୍‌ ପରୁ ଇଶ୍ୱର୍‌ତେ କପାମ୍ ନାର୍ଗେ ଆଦ୍‍ତେ ।
COL 3:7 ଅଣ୍ଡ୍‌‍ଦିନେ ମିଇଡ଼୍ ଇୱୁ ସାରେ କାରାପ୍‍ ପାଙ୍ଗାନାଗ୍ ମାଞ୍ଜ୍ ଜିୱୁଣ୍ଡ୍ ବାଦ୍‍କ ମାତ୍‍ତିଡ଼୍ ।
COL 3:8 ଇତ୍‍କେ ଇଞ୍ଜେ ମିକିଙ୍କ୍ କପାମ୍, ହିଂସା, ପାସ୍‍କାନାଦ୍, ଇସତାୱୁ ୱିଡ଼୍‍ସାନଙ୍କ୍ ଆଦ୍‍ତେ । ମିଡ଼୍ ଅପମାନ୍‍ ଗଟି ବା କାରାପ୍‍ ଗଟି ବେସୁଙ୍କ୍‍ କେଲ୍‍ମାଟ୍ ।
COL 3:9 ନିଜେ ନିଜର୍‍ ଲପେ ମିଚ୍ କେଲ୍‍ମାଟ୍, ବାତେଙ୍କ୍ ଇତ୍କେ ମିଡ଼୍ ପାଃନ୍ତେ ଅବ୍ୟାସ୍‍ ନୁ ବ୍ୟବହାର୍‌ ୱିଡ଼୍‍ସ୍‍ତିଡ଼୍,
COL 3:10 ମେଣ୍ଡେ ପୁଃନେ ଅବ୍ୟାସ୍‍ ପୟ୍‍ତ୍‍ତିଡ଼୍ । ନାରୁଡ଼ାୱୁ ଇୱୁ ପୁନାୱୁ, ସୃଷ୍ଟିକର୍ତାଲ୍ ଇଶ୍ୱର୍‍ ନିଜେ ନିଜର୍‍ ଲେକାମ୍ ବାରମ୍ବାର୍ ତିୟାର୍ ମାଡ଼ୁତନ୍ । ଇଦିନ୍ ସେଙ୍ଗେ ମିଡ଼୍ ଅନ୍‌ ବିଷୟତେ ସାରେଲେକାତ୍ ଜ୍ଞାନ୍ ପାଏମ୍ ଆଦୁତିଡ଼୍ ।
COL 3:11 ପେର୍କେ, ଇହୁଦିଡ଼୍, ଅଣଇହୁଦୀଡ଼୍, ସୁନ୍ନତ ନୁ ଅସୁନ୍ନତ, ନିଷ୍ଠୁର୍, ବୟଙ୍କକାର୍, କ୍ରିତଦାସ ବା ସ୍ୱାଦିନ୍ ନାରୁଣ୍ଡ୍ ଲପେ ମେଣ୍ଡେ ବାତ୍‍ବା ୱେରେ ଇଲେ । ଇତ୍‍କେ କ୍ରିଷ୍ଟ ସାରେତଡ଼ାଗେ ମିନ୍ଦେନ୍ ନୁ ଅଣ୍ଡ୍‌ ଆଦୁତନ୍ ସାର୍ରେ ।
COL 3:12 ମିଡ଼୍ ଇଶ୍ୱର୍‌ତେ ନାରୁଡ଼ି । ଅଣ୍ଡ୍‌ ମିକିଙ୍କ୍ ପ୍ରେମ ମାଡ଼ି ନିଜେତ୍ ସେଙ୍ଗେ ଏଞ୍ଚି ମିନ୍ଦେନ୍ । ଆଦିଙ୍କ୍ ମିଡ଼୍ କରୁଣା, ଦୟା, ନମ୍ରତା, ଲେକେତ୍‍ ଜିୱେତଣ୍ଡ୍ ନୁ ଗାଡ଼୍‍ସ୍‍ତାୱୁ ଚକା କେର୍‍ମୁଟ୍ ।
COL 3:13 ନିଜର୍‍ ନିଜର୍‍ ଲପେ ଦୟା ମାଡ଼ାଟ୍ ନୁ ଯଦି ବେନନ୍ ମେଣ୍ଡେ ଅର୍‍ତୁନ୍ ବିରୁଦ୍ଦତେ କେତାନାଦ୍ ମାନ୍‍ନ୍ତେ, ଆଲେକେ ନିଜର୍‍ନିଜର୍ ଲପେ କ୍ଷମା ମାଡ଼ାଟ୍ ।
COL 3:14 ମେଣ୍ଡେ ଇୱୁ ସାରେ ଗୁଣାମ୍‍ ତଡ଼୍ ପ୍ରେମତିଙ୍କ୍ କାଲ୍‍ପାଟ୍ । ପ୍ରେମ ସାରେ ବିଷୟତିଙ୍କ୍ ପୁରା ମାଡ଼ି ଅଣ୍ଡୟ୍‌‍ତାଗ୍ ମାଡ଼ିତ୍ ।
COL 3:15 କ୍ରିଷ୍ଟ ଇତ୍‍ତେ ଶାନ୍ତି ମିୟାଦ୍ ଆଲ୍‍ସାନାଦିଙ୍କ୍ ଚାଲା ମାଡ଼ି; ବାତେଙ୍କ୍ଇତ୍କେ ଇଦ୍ ଶାନ୍ତି ସେଙ୍ଗେ ଇଶ୍ୱର୍‍ ମିକିଙ୍କ୍ ଅଣ୍ଡୟ୍‌‍ତାଗ୍ ଅଣ୍ଡୟ୍‌ ମେନ୍ଦୁଲ୍ ଆଦାନ୍ ସେଙ୍ଗେ କାର୍‍ଙ୍ଗିମିନ୍ଦେନ୍ । ସାରେଦାମ୍ ଦୟା ଆୟ୍‍ମୁଟ୍ ।
COL 3:16 କ୍ରିଷ୍ଟନ୍ ଗଟିନେ ନାର୍ଗେ ତେର୍‍ୱେ ଲେକେତ୍ ଗଟି ମିଇ ହୃଦୟତାଗେ ମାନି । ଜ୍ଞାନ୍‍ତଡ଼୍ ନିଜର୍‍ନିଜର୍‍ ଲୋପେ ଶିକ୍ଷା ନୁ ପରାମର୍ଶ ଇମୁଟ୍ । ପାଟେ, ସ୍ତୁତି ନୁ କୀର୍ତ୍ତନ୍ ମାଡ଼ାଟ୍ । ହୃଦୟତେ ଦୟା ତଡ଼୍ ଇଶ୍ୱର୍‌ତେ ସେଙ୍ଗେ ପାଟେ, ପାରାଟ୍ ।
COL 3:17 ମିଡ଼୍ ବାକ୍ୟ ବା କାମ୍‍ତାଗ୍ ବାତେ ବା ମାଡ଼୍‍ତିଡ଼୍, ଆଦ୍ ସାରେ ପ୍ରବୁ ଜିସୁନ୍ ପେଦେର୍‍ତେ ମାଡ଼ି ବାବାଲ୍‍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇମୁଟ୍ ।
COL 3:18 ଅ ନାଟାନଡ଼ି, ମିଇ ମୁଦ୍‍ପାଲଡ଼୍‍ ତଡ଼୍‍ କାୟ୍‍ଲି ମାନୁଟ୍, ବାତେଙ୍କ୍‍ ଇତ୍କେ ପ୍ରବୁ ଜିସୁ କ୍ରିଷ୍ଟନ୍ ନାରୁଣ୍ଡ୍ ଇନା ଇଦ୍ ମିୟାଦ୍ ପାଡ଼୍‍ୟି ।
COL 3:19 ଅ ମୁଦ୍‍ପାଲଡ଼ି, ମିୟାୱ୍‍ ମୁତେକିଙ୍କ୍ ପ୍ରେମ ମାଡ଼ାଟ୍ । ଆୱିଙ୍କ୍ କାରାପ୍ ବ୍ୟବହାର୍‌ ମାଡ଼୍‍ମାଟ୍ !
COL 3:20 ପିଲାନଡ଼ି, ସାରେଦାମ୍ ମିଡ଼୍ ମିଇ ୟାୟବାବଡ଼୍ ଗଟି କେଞ୍ଜାଟ୍ । ଇଦ୍ ମିୟାଦ୍ କ୍ରିଷ୍ଟିୟାନ୍ ପାଡ଼୍‌ୟି, ବାତେଙ୍କ୍ ଇତ୍କେ ଇଗେ ଇଶ୍ୱର୍ ୱେଡ଼୍‍କେ ଆଦ୍‍ତନ୍ ।
COL 3:21 ଅ ୟାୟବାବାନଡ଼ି, ମିୟାୱୁ ପିଲାକିଙ୍କ୍ କିଜ୍ରା ମାଡ଼୍‍ମାଟ୍ । ବାତେଙ୍କ୍ଇତ୍କେ ଇଦିନ୍ ମାୟ୍‍ଦିଙ୍କ୍ ଅଡ଼୍‌ ସାର୍‍ଦେ ଆୟଡ଼୍ ।
COL 3:22 ଅ ଗତିନଡ଼ି, ସାରେ ବିଷୟତାଗେ ମୀଇ ମାଲିକିଡ଼୍ ଗଟି କେଞ୍ଜାଟ୍ । ମାତର୍‌ ଅଡ଼୍‌‍ ମିଇ ପର କଣ୍ଡେ ୱାଟିମାନ୍ଦାନ୍ ୱେଲେ ଅଡ଼୍‌‍କିଂଙ୍କ୍ ସାର୍‍ଦେ ମାଡ଼ାନ୍ ସେଙ୍ଗେ ଆୟ, ମାତର୍‌ ପ୍ରବୁନ୍ ସେଙ୍ଗେ ମିୟାଦ୍ ବକ୍ତି ସେଙ୍ଗେ ସରଲ୍‍ ହୃଦୟତେ ଇଦ୍ ମାଡ଼ାଟ୍ ।
COL 3:23 ମିଡ଼୍‍ ବାତେ ମାଡ଼ିତିଡ଼୍, ଆଦ୍ ନାରୁଡ଼୍ ସେଙ୍ଗେ ମାଡ଼କଟ ଇଶ୍ୱର୍‌ତେ ସେଙ୍ଗେ ମାଡ଼ୁତିଡ଼୍ ଇଞ୍ଜ ଏର୍କେ ମାଡ଼ି ପୁରା ଜିୱୁଣ୍ଡ୍ ଅପି ମାଡ଼ାଟ୍ ।
COL 3:24 ଏର୍କେ ନେହେମୁଟ୍, ଇଶ୍ୱର୍‍ ତାନ୍ ନାରୁଡ଼୍ ସେଙ୍ଗେ ବାତେ ନେଃଏତଣ୍ଡ୍, ଆଦ୍ ଅଣ୍ଡ୍‌ ମିକିଙ୍କ୍ ପୁରସ୍କାର୍ ଲେକାମ୍ ଇଦ୍‍ତଣ୍ଡ୍‍ । ବାତେଙ୍କ୍ଇତ୍କେ କ୍ରିଷ୍ଟକେ ମିୟାଦ୍ ନିଜାତଣ୍ଡ୍ ପ୍ରବୁ, ବେନନାଦ୍ ସେବା ମିଡ଼୍‍ ମାଡ଼ୁତିଡ଼୍ ।
COL 3:25 ମେଣ୍ଡେ ସାରେ କାରାପ୍‍ ନାରୁଡ଼୍ ଅନାଦ୍‌ ଅପ୍‍ୱାଦ୍‍ ପାଡ଼୍‍ୟି ସେଙ୍ଗେ ଦଣ୍ଡ୍‍ ଦର୍‍କିତ୍, ବାତେଙ୍କ୍ଇତ୍କେ ଇଶ୍ୱର୍ ବେନନ୍ ପାକେ ଆୟ୍‍ୱେ ସାରେତଡ଼୍‍କିଙ୍କ୍ ବିଚାର୍ ମାଡ଼ିତଣ୍ଡ୍ ।
COL 4:1 ମାଲିକିଡ଼୍, ମୀଇ ଦାସନଡ଼୍‍ ସେଙ୍ଗେ ଟିକ୍‍ ନୁ ନ୍ୟାୟ ବ୍ୟବହାର୍‌ ମାଡ଼ାଟ୍ । ଏର୍କେ ନେହେମୁଟ୍, ସ୍ୱର୍ଗତାଗ୍ ମିୟାଦ୍ ମିକା ୱେରଣ୍ଡ୍ ପ୍ରବୁ ମିନ୍ଦେଣ୍ଡ୍ ।
COL 4:2 ସାରେଦାମ୍ ପ୍ରାର୍ତନାତଡ଼୍ ବାଦ୍‍କାଟ୍ ନୁ ଇଶ୍ୱର୍‌ତେ ଦନ୍ୟବାଦ୍ ଲେକାମ୍ ପ୍ରାର୍ତନାତାଗ୍ ତିଆର୍ ଆସ୍‍ ମାନୁଟ୍ ।
COL 4:3 କ୍ରିଷ୍ଟନାଦ୍ ସାରେ ବାକ୍ୟ ପ୍ରଚାର୍ ମାଡ଼ାନଙ୍କ୍ ବେଲାନ୍ ଇଶ୍ୱର୍ ମାନାଙ୍କ୍ ସୁଯଗ୍ ଇଦ୍‍ତନ୍, ଅଦିନ୍‌ ସେଙ୍ଗେ ମିକା ପ୍ରାର୍ତନା ମାଡ଼ାଟ୍ । ବେନ୍ ଗଟ୍ ପ୍ରଚାର୍ ମାଡ଼୍‍ତାଙ୍କ୍‍ ନାନେ ଇଞ୍ଜେ ବନ୍ଦିଲୋତ୍‍ତାଗ୍‍ ମିନ୍ଦେନ୍,
COL 4:4 ମେଣ୍ଡେ ପ୍ରାର୍ତନା ମାଡ଼ାଟ୍, ବେଲାନ୍ ନାନେ ଲେକେତ୍‍ ନୁ ଟିକ୍‍ ଆଦ୍ ପ୍ରଚାର୍ ମାଡ଼େ ପାର୍‍ଦ୍‍ତାନ୍ ।
COL 4:5 ସାରେ ସୁଯୋଗ୍‍ ଲେକେତ୍‍ ବ୍ୟବହାର୍‌ ମାଡ଼ି ଅବିଶ୍ୱାସୀନଡ଼୍‍ ଗାରେ ବୁଦ୍‍ତଡ଼୍‍ ତିର୍‍ୟାଟ୍ ।
COL 4:6 ମିୟାୱୁ ଗୋଟି ସାରେଦାମ୍ ଲେକେତ୍ ମିଙ୍ଗ୍‍ତାୱୁ ନୁ ମାନ୍‍ୱାତ୍‍ତେ ଲେକେତ୍ ଗଟି ଆୟି । ସାରେତଡ଼୍‍କିଙ୍କ୍ ବେଲାନ୍ ଟିକ୍ ଉତ୍ତର୍ ଇଦେ ପାର୍‍ଦ୍‍ତିଡ଼୍, ଇୱୁ ଗୋଟି ମିଡ଼୍ ପୁନ୍ଦାନ୍ ଦର୍‍କାଡ଼୍ ।
COL 4:7 ପ୍ରବୁନ୍ କାମ୍‍ତେ ବିଶ୍ୱସ୍ତେ ମାନ୍ଦାନଡ଼୍ ସେବକ୍‍ ନୁ ନା ତଡ଼୍‍ଦେନଡ଼୍ ପ୍ରିୟ ଦାଦାଲ୍‍ ତୁକିକ ନା ବିଷୟ୍‍ତେ ମିକିଙ୍କ୍ ସାରେ ବିଷୟ କେଞ୍ଜ୍‍ପିତଡ଼୍ ।
COL 4:8 ମାମେ ବେଲାନ୍ ମିନ୍ଦେମ୍, ସାରେ ବିଷୟ କେସ୍ ମିକିଙ୍କ୍ ସାର୍‍ଦେ ଇଦାନ୍ ସେଙ୍ଗେ ନାନେ ଅଡ଼୍‌‍କିଂଙ୍କ୍ ମୀଇ ଗାରେ ରଅତୁତାନ୍ ।
COL 4:9 ଅନ୍‌‍ ତଡ଼୍ ମୀଇ ମାନ୍ଦେ ମିନ୍ଦେ ପ୍ରିୟ ବିଶ୍ୱାସି ଦାଦାଲ୍‍ ଅନିସିମସ୍‍ ମିକା ଆଦୁତନ୍ । ଅଡ଼୍‌ ମିକିଙ୍କ୍ ଇଗେ ଗଟେମ୍ ଆସମାନ୍ଦାନ୍ ସାରେ ଗଟି କେଞ୍ଜ୍‍ପିତଡ଼୍ ।
COL 4:10 ନା ତଡ଼୍ ବନ୍ଦି ଆସ୍‍ମାନ୍ଦାନ୍ ଆରିସ୍ତାର୍କ ନୁ ଅନ୍‌ ତଡ଼୍ ବର୍ଣ୍ଣବାନ୍‍ କୁଟ୍‍ମାମ୍‍ ମାର୍କ ମିକା ମିକିଙ୍କ୍ ନମସ୍କାର୍ ଜଣାମାଡ଼ୁତନ୍ । ମାର୍କ ମୀଇ ଗାରେ ଆତ୍‍କେ ଅଙ୍କ୍‌ ସ୍ୱାଗତ୍ ମାଡ଼ାଟ୍ । ଇଦ୍ ନିର୍ଦ୍ଦେଶ ମିକିଙ୍କ୍ ମୁନେଙ୍କ୍‍କଞ୍ଜ୍ ଇତ୍‍ତଡ଼୍ ।
COL 4:11 ଯୁସ୍ତ ପେଦେର୍‍ତେ ପୁଞ୍ଜ୍‍ମାନ୍ଦାନ୍ ଯିହୋଶୂୟ ମିକା ନମସ୍କାର୍ କେଞ୍ଜ୍‍ପୁତନ୍ । କ୍ରିଷ୍ଟ ଦର୍ମ ଗ୍ରହଣ ମାଡ଼ିମାନ୍ଦାନ୍ ମାତର୍‌ ଇଡ଼୍ ମୁୱୁଡ଼୍ ଇହୁଦୀ ଇଶ୍ୱର୍‌ତେ ରାଜ୍ୟ ସେଙ୍ଗେ ନା ତଡ଼ିନଡ଼୍‍ ଆସ୍ ନାକିଙ୍କ୍ ଗାଟି ସାହାଯ୍ୟ ମାଡ଼୍‍ତଡ଼୍ ।
COL 4:12 ମୀଇ ମାନ୍ଦେତେ ମେଣ୍ଡେ ଅର୍‍ତୁଣ୍ଡ୍ ସବ୍ୟ ନୁ କ୍ରିଷ୍ଟ ଜିସୁନ୍ ସେବକ ଏପାପ୍ରା ନମସ୍କାର୍ କେଞ୍ଜ୍‍ପୁତନ୍ । ଇଶ୍ୱର୍‌ତେ ଇଚ୍ଛାତେ ସାରେ କେଞ୍ଜି ମୀଇଡ଼୍ ବେଲାନ୍ ବୟସ୍କା ନୁ ଗାଡ଼୍‍ସ୍‍ କ୍ରିଷ୍ଟ ବିଶ୍ୱାସିଡ଼୍‍ ଲେକାମ୍ ଡାଟାମ୍‍ ଲେକାମ୍ ନିତେ ପାର୍‍ଦ୍‍ତେ, ଆଦିନ୍ ସେଙ୍ଗେ ଅଣ୍ଡ୍‌ ସାରେଦାମ୍ ଇଶ୍ୱର୍‌ତେ ଗାରେ କେୟିକେୟି ପ୍ରାର୍ତନା ମାଡ଼ିମିନ୍ଦେଡ଼୍ ।
COL 4:13 ମୀଇ ସେଙ୍ଗେ, ଲାଉଦିକିଆ ନୁ ହିଏରାପଲିତେ ନାରୁଡ଼୍ ସେଙ୍ଗେ ଅଣ୍ଡ୍‌ ମାଡ଼ିମାନ୍ଦାନ୍ ଗାଟି ତିପାଲ୍ ପାଡ଼୍‍ୟି ବିଷୟ୍‍ତେ ନାନ୍‍ ନିଜେ ସାକ୍ଷ୍ୟ ଇସମିନ୍ଦେନ୍ ।
COL 4:14 ପ୍ରିୟ ଡାକ୍ଟର୍‍ ଲୁକ ନୁ ଦୀମା ମିକିଙ୍କ୍ ନମସ୍କାର କେଞ୍ଜ୍‍ପୁତଡ଼୍ ।
COL 4:15 ଲାଉଦିକିଆତେ ଦାଦାଲଡ଼୍‍କ୍ ନୁ ଏଲାସ୍କ୍‍, ଏଲାଡ଼୍ ନୁମପା ନୁ ତାନ୍ ଲନ୍ ଅଣ୍ଡୟାଗ୍ ଆସମାନ୍ଦାନ୍ ମଣ୍ଡିଲିତେ ସାରେତଡ଼୍‍କ୍ ମାୟାଦ୍‌ ନମସ୍କାର୍‍ କେଞ୍ଜ୍‍ପାଟ୍ ।
COL 4:16 ମିଡ଼୍ ଇଦ୍ ଚିଟି କାର୍‌ସ୍‌ ତେର୍ପାନ୍ ୱେଲେ ଲାଉଦିକିଆତେ ମଣ୍ଡଲିତାଗ୍ ମିକା ବେଲାନ୍ କି ଇଦ୍ କାର୍‍ତେ ପାର୍‍ଦ୍‍ତଡ଼୍, ଆଦ୍ ବେଲା ଇତ୍‍କେ ବା ମାଡ଼ାଟ୍ । ଲାଉଦିକିଆ ମଣ୍ଡଲିତେ ଦାଦାନଡ଼୍ ମୀଇ ଗାରେ ବେନ୍ ଚିଟି ରଅତିତଡ଼୍, ଆଦ୍ ମିକା କାର୍ମୁଟ୍ ।
COL 4:17 ମେଣ୍ଡେ ଆର୍କିପ୍‍ପଙ୍କ୍ କେତିତିଡ଼୍, “ପ୍ରବୁନ୍ ସେବା ପାଡ଼୍‍ୟି ମାଡ଼ାନ୍ ସେଙ୍ଗେ ମିକିଙ୍କ୍ ବେନ୍ ଦାୟିତ୍ୱ ଇସ୍‍ମାତ୍‍ତଡ଼୍, ଆଦ୍ ବେଲାନ୍ ଇତ୍କେବା ପୁରା ମାଡ଼ାଟ୍ ।”
COL 4:18 ନାନେ ପାଉଲ୍ ନିଜର୍‍ କାୟ୍‍ଦେ ଚିଟି ଲେକି, ନାୟାଦ୍ ନମସ୍କାର୍‍ କେଞ୍ଜ୍‍ପୁତାନ୍ । ନାୟାଦ୍ ବନ୍ଦି ଅବସ୍ଥାତିଙ୍କ୍ ମାର୍‍ଙ୍ଗ୍‍ମାଟ୍ । ଇଶ୍ୱର୍‌ତେ ଅନୁଗ୍ରହ ମୀଇ ସାରେତଡ଼ ପାକେ ମାନ୍‍ନି ।
1TH 1:1 ନାନ୍ ପାଉଲ୍, ସିଲାନ୍ ନୁ ତୀମତିନ୍ ପାକେ ଥେସଲନିକୀ ତାଗ୍ ମାନ୍ଦାନ୍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ବିଶ୍ୱାସୀ ମଣ୍ଡଲିତା ଇଦ୍ ଚିଟି । ବାବାଲ୍ ଇଶ୍ୱର୍ ନୁ ପ୍ରବୁ କ୍ରିଷ୍ଟନ୍ ସୁକାମ୍‍ତେ ନୁ ସାୟେ ମିଇ ପର୍‍ର ଆୟି ।
1TH 1:2 ମାମ୍‍ମେ ସାରେଦିନା ମିଇ ସାରେତଡ଼୍ ସେଙ୍ଗେ ଇଶ୍ୱର୍‌ତିଙ୍ଗ୍ ଦନ୍ୟବାଦ୍ ଇସମାନ୍‍ତମ୍ ନୁ ମାମ୍‍ମେ ପ୍ରାର୍ତନାତାଗ୍ ମିଇ ବିଷୟ୍‍ତେ ସାରେଦାମ୍ କେସମାନ୍‍ତମ୍ ।
1TH 1:3 ମାମ୍‍ମେ ବାବାନ୍ ଇଶ୍ୱର୍‌ତେ ପାକେ ଏର୍କା ମାଡ଼ମାନ୍‍ତମ୍, ବେଲାନ୍ ମିଡ଼୍ ନିଜେତ୍ ବିଶ୍ୱାସ୍‍ତିଙ୍କ୍ ପାଡ଼ିୟିଦାଗ୍ ମାଡ଼ୁତମ୍, ପ୍ରେମତେ ମାଡ଼ି ବେଲାନ୍ ତିପାଲ୍‍ତେ ମାଡ଼ୁତିଡ଼୍ ନୁ ମାମ୍‍ମେ ବେଲାନ୍ ଡ଼ାଟ୍‍ଟୁମ୍ ।
1TH 1:4 ଦାଦାନଡ଼ି ନୁ ଏଲାସ୍କ୍ ! ମାମ୍‍ମେ ପୁତ୍‍ତମ୍ ଯେ, ଇଶ୍ୱର୍ ମିକିଂଙ୍କ୍ ପ୍ରେମ ମାଡ଼ୁତ୍ ନୁ ତାନ୍ ନାରୁନ୍ ଆଦାନ୍ ସେଙ୍ଗେ ମିକିଂଙ୍କ୍ ହେଞ୍ଜିମିନ୍ଦେନ୍ ।
1TH 1:5 ମାତର୍ ବାକ୍ୟତେ ଆୟ୍‍ୟ, ପବିତ୍ରଆତ୍ମା ଲାୱୁ ତଡ଼୍, ସୁସମାଚାର୍‍ତେ ସତ୍ୟତେ ଲେକେତ୍‍ ମାଡ଼ି ମାମ୍‍ମେ ଆଦ୍ ମିଇ ପାକେ କେତୁତମ୍ । ମିଡ଼୍ ପୁତ୍‍ତିଡ଼୍, ମିଇ ତଡ଼୍ ମାନ୍ଦାନ୍ ୱେଲେ ମାମ୍‍ମେ ବେଦ୍‍ଲେକାମ୍ ଲେକେତ୍‍ ଜିୱୁନ୍‍ତେ ମାଡ଼୍‍ତମ୍; ବେଦ୍‍ଲେକାମ୍ ମିୟାଦ୍ ସାୟେ ମା ଜିୱୁନ୍‍ତେ ଆଶେ ମାତ୍‍ତେ ।
1TH 1:6 ମିଡ଼୍ ମାକିଂଙ୍କ୍ ନୁ ମାମ୍‍ମେ ପ୍ରବୁଙ୍କ୍ ପେର୍‍କେ ଆଦ୍‍ତିଡ଼୍ ନୁ ଗାଟି ତିପାଲ୍ ଆଦାନ୍ ଗାଲେ ପବିତ୍ରଆତ୍ମା ତାଗାଙ୍କ୍ ଲେକେତ୍‍ ୱେଡ଼୍‍କେତେ ଆଦ୍ ସୁସମାଚାର୍ କେତାନାଦ୍ କେଞ୍ଜ୍‍ତିଡ଼୍‍ ।
1TH 1:7 ଇଦ୍‍ଲେକାମ୍ ମିଡ଼୍ ମାସିଦୋନିଆ ନୁ ଆକାୟା ତାଗ୍ ମାନ୍ଦେନଡ଼୍ ସାରେ ବିଶ୍ୱାସିଡ଼୍‍ ସେଙ୍ଗେ ଲେକେତ୍‍ତୋଡ଼ି ଆସ୍‍ମାତିଡ଼୍ ।
1TH 1:8 ମିୟାଗାଙ୍କ୍ ଯେ ମାତର୍ ପ୍ରବୁନ୍ କେତ୍‍ତେ ଗଟ୍ ମାସିଦୋନିଆ ନୁ ଆକାୟାତେ ସାରେପାକେ ଆସ୍‍ମାତ୍‍ତେ, ଆଦ୍ ଆୟ୍‍ୟ, ମାତର୍ ଇଶ୍ୱର୍‌ତେ ସେଙ୍ଗେ ମିୟାଦ୍ ବିଶ୍ୱାସ୍‍ତେ ବିଷୟ ସାରେପାକେ ଇଦ୍‍ଲେକାମ୍ ଆସ୍‍ମିନ୍ଦେ, ତାନ୍ ମୁନେ ବାତ୍ କେତାନାଦ୍ ଇଲ୍‍ଲେ ।
1TH 1:9 ମାମ୍‍ମେ ମିଇ ପାକେ ୱାଦାନ୍ ୱେଲେ ମିଡ଼୍ ବେଲାନ୍ ମାକିଂଙ୍କ୍ ସାର୍‍ଦେତେ ଆସ୍ ମାତ୍‍ତିଡ଼୍ ନୁ ସାରେ ପୁତ୍‍ଲାମ୍‍ ପୁଜେ ୱିଡ଼୍‍ସି ସତ୍ ନୁ ଜିୱେମାନ୍ଦାନ୍ ଇଶ୍ୱର୍‌ତେ ଉପବାସ୍ ମାଡ଼ାଙ୍କ୍ ମୁନେ ୱାତ୍‍ତିଡ଼୍;
1TH 1:10 ମେଣ୍ଡେ ବେଲାନ୍ ଇଶ୍ୱର୍‌ତେ କପାମ୍‍ତାଗାଙ୍କ୍ ମାନ୍‍ନାଅଙ୍କ୍‌ ଗେଲ୍‍ସ୍ପା ସେଙ୍ଗେ, ଡଲ୍‍ତାଗାଙ୍କ୍ ପୁନରୁତ୍‍ତାନ୍ ଅନାଦ୍‌ ମାର୍‍ ଜିସୁ ସ୍ୱର୍ଗତାଗାଙ୍କ୍ ୱାଦାନ୍ ୱେଲେ କେପି ମାନୁଟ୍, ଇୱୁସାରେ ବିଷୟ୍‍ତେ ଆଗେତ୍‍ ନାରୁଡ଼୍ ଗଟି ତିର୍‍ୟମିନ୍ଦେଡ଼୍ ।
1TH 2:1 ହୋ ଦାଦାନଡ଼ି ନୁ ଏଲାସ୍କ୍‍ ! ମିଡ଼୍ ନିଜେ ପୁତ୍‍ତିଡ଼୍ ଯେ, ମିଇ ପାକେ ମାୟାଦ୍‌ ୱାଦାନାଦ୍ ବ୍ୟର୍ତ ଆୟ୍‍ୟ ।
1TH 2:2 ଥେସଲନିତାଗ୍ ମିଇ ପାକେ ୱାଦାନ୍ ମୁନେ ଫିଲିପୀତାଗ୍ ମା ସେଙ୍ଗେ ବେଦ୍‍ଲେକାମ୍ ତିପାଲ୍ ନୁ କାରାପ୍ ପାଡ଼୍‍ୟି ମାଡ଼ମାତ୍‍ତଡ଼୍, ଆଦ୍ ମିଡ଼୍ ପୁତ୍‍ତିଡ଼୍ । ଇଶ୍ୱର୍‌ତାଗାଙ୍କ୍ ଦର୍କିମାନ୍ଦାନ୍ ସୁସମାଚାର୍ ମିକିଂଙ୍କ୍ କେଞ୍ଜ୍‍ପାଙ୍କ୍ ସେଙ୍ଗେ ଅଣ୍ଡ୍‌ ମାନ୍‍ନାଙ୍କ୍‍ ଶକ୍ତି ଇସ୍‍ମାତ୍‍ତନ୍ ।
1TH 2:3 ବାତେବା କାରାପ୍ ବା ପିନ୍ଦ ଲେକାମ୍ ଆସ୍ ମାମ୍‍ମେ ମିଇ ପାକେ ମାୟାଦ୍‌ ମାଟେ କେଲ୍‍ୱେ ମାତ୍‍ତମ୍, ମିକିଂଙ୍କ୍ ଟକାମାଡ଼ାଙ୍କ୍ ବାତେବା କାରାପ୍ ଚିନ୍ତେ ମାଡ଼ମ୍ ।
1TH 2:4 ବାତେଙ୍କ୍‍ଇତ୍କେ ଇଶ୍ୱର୍‌ତେ ଇଚ୍ଛା ଲେକାମ୍ ଗଟ୍ ମାମ୍‍ମେ ସାରେଦାମ୍ କେତିତମ୍; ଅଣ୍ଡ୍‌ ମାକିଂଙ୍କ୍ ସାୟେ ଏର୍କା ମାଡ଼ି ମା ପର୍‍ର ସୁସମାଚାର୍ ପ୍ରଚାର୍‍ତେ ଦାୟିତ୍ୱ ୱିଡ଼୍‍ସିତ୍‍ତନ୍ । ନାରୁଡ଼୍‍କିଂଙ୍କ୍ ଶାନ୍ତି ମାଡ଼ାନାଦ୍ ମାୟାଦ୍‌ ପାଡ଼୍‍ୟି ଆୟ୍‍ୟ । ବେନ୍ ଇଶ୍ୱର୍ ମାନ୍‍ ମନ୍‍ତେ ସାରେ ପରିକ୍ଷା ମାଡ଼ି ଉଡ଼ିତନ୍, ମାତର୍ ଅଂକିଙ୍କ୍‌ ଶାନ୍ତି ମାଡ଼ାନ୍ ସେଙ୍ଗେ ମାୟାଦ୍‌ ଇଚ୍ଛା ।
1TH 2:5 ମିଡ଼୍ ସାୟେ ପୁତ୍‍ତିଡ଼୍ ଯେ, ମାମ୍‍ମେ କାରାପ୍ ଗଟି କେସ୍ ମିଇ ବକେତ୍ ୱାଡ଼ମ୍ ବା ଆଶେତଡ଼୍‍ ମିଇ ପାକେଙ୍କ୍ ଚଲ ବ୍ୟବହାର୍‌ ମାଡ଼୍‍ୱେ ମାତ୍‍ତମ୍, ଇଦ୍ ବିଷୟ୍‍ତେ ଇଶ୍ୱର୍ ମା ସାକ୍ଷି ।
1TH 2:6 ମାମ୍‍ମେ ବେନଡ଼ାଗାଙ୍କ୍ ସମ୍ମାନ୍ ପାଏମ୍ ଆଦ୍‍ଦାନ୍ ସେଙ୍ଗେ ଇଚ୍ଛା ମାଡ଼୍‍ୱେ ମାତ୍‍ତମ୍ । ମିୟାଗାଙ୍କ୍ ବା ବାଗାତ୍ ନାରୁଡ଼ାଗାଙ୍କ୍ ମାମ୍‍ମେ ଆଶେ ମାଡ଼୍‍ୱେ ମାତ୍‍ତମ୍,
1TH 2:7 ଯଦି କ୍ରିଷ୍ଟନ୍ ପ୍ରେରିତ୍ ଶିଷ୍ୟଡ଼୍ ଲେକାମ୍ ମାମ୍‍ମେ ମିୟାଗାଙ୍କ୍ ଆଦ୍ ଦାବୀ ମାଡ଼େ ପାର୍‍ୱେମ୍, ବାତେଙ୍କ୍ ଇତ୍‍କେ ୟାୟ୍‍ ବେଦ୍‍ଲେକାମ୍ ନିଜେତ୍ ପିଲାଙ୍କ୍ ଯତନ୍ ଆଦ୍‍ତେ, ମିଇ ପାକେ ମାନ୍ଦାନ୍ ୱେଲେ ମାମ୍‍ମେ ମିଇ ସେଙ୍ଗେ ଆଦେଲେକାମ୍ ଲେକେତ୍‍ ବ୍ୟବହାର୍ ମାଡ଼ିମାତ୍‍ତମ୍ ।
1TH 2:8 ମିଇ ସେଙ୍ଗେ ମାୟାଦ୍‌ ପ୍ରେମ ମାନ୍‍ନାଙ୍କ୍ ମାମ୍‍ମେ ଆଦ୍‍ଲେକାମ୍ ମିକିଂଙ୍କ୍ ଇଶ୍ୱର୍‌ତେ ସୁସମାଚାର୍ କାଲ୍‍ପ୍‍ୱେ ମାତ୍‍ତମ୍, ନିଜେତ୍ ନିଜେତ୍ ଜିୱୁନ୍ ହିଦାଙ୍କ୍ ତିୟାର୍ ମାତ୍‍ତମ୍ । ମିଡ଼୍ ମା ଲେକେତ୍‍ ସାଙ୍ଗ ମାତ୍‍ତିଡ଼୍ ।
1TH 2:9 ହୋ ଦାଦାନଡ଼ି ନୁ ଏଲାସ୍କ୍‍, ମିୟାଦ୍ ନିଜାମ୍ ହେର୍କା ମାନ୍‍ତେ; ମାନାଡ଼୍ ବେଲାନ୍ ଗାଟି ତିପାଲ୍‍ତେ ସ୍ୱୀକାର୍ ମାଡ଼ି ପାଡ଼୍‍ୟି ମାଡ଼ମାତ୍‍ତମ୍; ବେଲାନ୍ ମିଇ ପାକେ ଇଶ୍ୱର୍‌ତେ ସୁସମାଚାର୍ ପ୍ରଚାର୍ ମାଡ଼ାନ୍ ୱେଲେ ମିଇ ପର୍‍ର ବୋଜ୍ ଆୟ୍‍ମାକି ହିଞ୍ଜ ମାମ୍‍ମେ ନାର୍‍କେତ୍ ପାୟାଲ୍ ତିପାଲ୍ ମାଡ଼ିମାତ୍‍ତମ୍ ।
1TH 2:10 ମିଡ଼୍ ନୁ ନିଜେ ଇଶ୍ୱର୍ ମାନ୍‍ ସାକ୍ଷି ମିଇ ଲେକାମ୍ ବିଶ୍ୱାସିନଡ଼୍‍ ପାକେ ମାୟାଦ୍‌ ବ୍ୟବହାର୍‌‌ ନିର୍ମଲ୍‍, ନ୍ୟାୟସଙ୍ଗାତେ ନୁ ନିର୍ଦୋଷ୍‍ ମାତ୍‍ତା ।
1TH 2:11 ମିଡ଼୍ ପୁତ୍‍ତିଡ଼୍, ବାବାଲ୍ ବେଲାନ୍ ନିଜେତ୍ ପିଲାନ୍ ସେଙ୍ଗେ ବ୍ୟବହାର୍‌ ମାଡ଼ାନ୍ ମାତ୍‍ତେ, ମାମ୍‍ମେ ମିଇସେଙ୍ଗେ ଟିକ୍ ଆଦେଲେକାମ୍ ବ୍ୟବହାର୍‌ ମାଡ଼ିମାତ୍‍ତମ୍ ।
1TH 2:12 ମାମ୍‍ମେ ମିକିଂଙ୍କ୍ ଉତ୍ସାହିତ ମାଡ଼ିମାତ୍‍ତମ୍, ସାନ୍ୱନା ଇସ୍ ମାତ୍‍ତମ୍, ମେଣ୍ଡେ ମୀଇଡ଼୍ ବେଲାନ୍ ଇଶ୍ୱର୍‌ତେ ଯୋଗ୍ୟ ଆଚରନ୍ ମାଡ଼ାନ୍ ମାୟ୍‍ଦିଙ୍କ୍ କେସ୍ ମାତ୍‍ତଣ୍ଡ୍ ।
1TH 2:13 ମାନାଡ଼୍ ବାତ୍‍ତିଙ୍କ୍ ସାରେଦାମ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିସମାନ୍‍ତାଡ଼୍ ଆଦିନ୍ ମେଣ୍ଡନ୍ କାରନ୍ ମିନ୍ତେ । ମାମ୍‍ମେ ବେସୁଙ୍କ୍‍ ମିଇ ପାକେ ଇଶ୍ୱର୍‌ତେ ସତ୍‍ କାବୁର୍ ତାସ୍‍ମାତ୍‍ତମ୍, ମିଡ଼୍ ଆଦ୍ ନାରୁନ କାବୁର୍ ହିଞ୍ଜ ହେର୍କା ମାଡ଼କଟ୍, ଇଶ୍ୱର୍‌ତେ କାବୁର୍ ହିନା କେଞ୍ଜ୍‍ତିଡ଼୍ ନୁ ଗ୍ରହନ୍ ମାଡ଼୍‍ତିଡ଼୍ । ମୁନେଙ୍କ୍ କଞ୍ଜ୍ ଆଦ୍ ଇଶ୍ୱର୍‌ତେ କାବୁର୍ ନୁ ମିଇ ଲେକାମ୍ ବିଶ୍ୱାସୀନଡ଼୍ ମନ୍‍ଦାଗ୍ ଆଦ୍ ଗେଲ୍‍ସି ମାନ୍‍ତେ ।
1TH 2:14 ହୋ ଦାଦାନଡ଼ି ନୁ ଏଲାସ୍କ୍‍, ମିଡ଼୍ ଯିହୂଦା ଦେଶ୍‍ତାଗ୍ ମାନ୍ଦାନ୍ କ୍ରିଷ୍ଟ ଜିସୁନାଗ୍ ପରମେଶ୍ୱର୍‌ ମଣ୍ଡଲିତେ ନାରୁଡ଼୍ ସେଙ୍ଗେ ବାତ୍ ଗଟେମ୍ ହାସ୍‍ମିନ୍ତେ । ଯିହୂଦା ପରମେଶ୍ୱର୍‍ତେ ନାରୁଡ଼୍ ବାଗାତ୍ ଯିହୁଦିନଡ଼ାଗ୍ ଦୁଃକାମ୍ କଷ୍ଟ ଆସ୍‍ମିନ୍ତେ । ମିଡ଼୍ ନିଜେତ୍ ଦେଶ୍‍ତେ ନାରୁଡ଼ାଗାଙ୍କ୍ ମିକା ଆଦେଲେକାମ୍ ଦୁଃକାମ୍ କଷ୍ଟ ଦର୍‍କିତ୍ ।
1TH 2:15 ଆଦ୍ ଯିହୁଦିନଡ଼୍ ପ୍ରବୁ ଜିସୁଙ୍କ୍ ନୁ ବାବବାଦୀନଡ଼୍‍କ୍ ଆୱୁକି ମାତ୍‍ତଡ଼୍ ନୁ ମାନ୍‍ ମିକା ଆଦେଲେକାମ୍ ତାଡ଼୍‍ନା ମାଡ଼ିତଡ଼୍ । ଅଡ଼୍‌ ସେଙ୍ଗେ ଇଶ୍ୱର୍ ବେସର୍ ଅସନ୍ତୁଷ୍ଟ ! ସାରେ ନାରୁଡ଼୍‍ତେ ଅଡ଼୍‌ ଶତ୍ରୁଡ଼୍ ।
1TH 2:16 ଇଦ୍ ରକମ୍ କି ବେନ୍ ସୁସମାଚାର୍ ପ୍ରଚାର୍ ତଡ଼୍ ଅଣଯିହୁଦୀଡ଼ାଦ୍ ପରିତ୍ରାଣ୍ ଆଦ୍‍ପାର୍‍ତେ, ଆଗାଙ୍କ୍ ଅଡ଼୍‌ ମାନ୍‍ ନିବୃତ ମାଡ଼ାନଙ୍କ୍ ଆଲ୍‍ସି ମାଡ଼ୁତଡ଼୍ । ଇଦ୍ ରକମ୍ ଅଡ଼୍‌ ଅନବରତ ମାଡ଼ମାନ୍ଦାନ୍ ପାପ୍‌ ମାତର୍‌ ଚରମ୍ ସୀମାତାଗ୍ ୱାସ୍ ଏୱୁତ୍‍ତେ । ସାରେ ମାଡ଼େଙ୍ଗ୍ ଅଡ଼୍‌ ବିରୁଦ୍‍ତେ ଇଶ୍ୱର୍‌ତେ କପାମ୍ ନାର୍‍ଗେ ଆତ୍‍ତେ ।
1TH 2:17 ହୋ ଦାଦାନଡ଼ି ନୁ ଏଲାସ୍କ୍, ମାମ୍‍ମେ ହୃଦୟ୍‍ତାଗ୍ ଆୟ୍‍ୟ, ମାତର୍ ମେନ୍ଦୁଲ୍ ତାଗାଙ୍କ୍ ସୁଦୁଟ୍ ଦିନାମ୍ ସେଙ୍ଗେ ମିୟାଗାଙ୍କ୍ ଯେକା ମାତ୍‍ତମ୍, ମିଇ ମୋକମ୍ ଉଡ଼ାନ୍ ସେଙ୍ଗେ ଅଦିକ୍‌ ଇଚ୍ଛା ମାଡ଼ୁତମ୍ ।
1TH 2:18 ଆଦିଙ୍କ୍ ମିୟାଗାଙ୍କ୍ ମାଲ୍‍ସ୍ ଆଦାନ୍ ସେଙ୍ଗେ ଅଣ୍ଡୟ୍‌‍ଦାମ୍ ଆଲ୍‍ସି ମାଡ଼୍‍ତାନ୍, ନାନ୍ ନିଜେ ପାଉଲ୍ ମାଲ୍‍ସ୍ ଆଦାନ୍ ସେଙ୍ଗେ ନାର୍ଗେଦାମ୍ ଆଲ୍‍ସି ମାଡ଼ମାତ୍‍ତାନ୍, ବାତେଙ୍କ୍ ଇତ୍‍କେ ଶୟ୍‍ତାନ୍‍ ମାନ୍‍ ଇଗାଙ୍କ୍ ଆଡ଼ାମ୍ ଆତ୍‍ତେ ।
1TH 2:19 ଆଦ୍ ବାତ୍‍ଆଇ, ନାୟାଦ୍ ବିଶ୍ୱାସ୍, ମାନ୍‍ ପ୍ରବୁ ଜିସୁ ୱାଦାନ୍ ୱେଲେ ଅନ୍‌ ମୁନେ ବାଗାତଡ଼୍ ଲେକାମ୍ ମୀଇଡ଼୍ ମିକା ମାୟାଦ୍‌ ଆଶେ, ୱେଡ଼୍‍କ୍‍ ନୁ ଗର୍ବ ମାଡ଼ାନାଦ୍ ସହଜ୍‍ ବାତେଙ୍କ୍ ଆଦ୍‍ତେ ।
1TH 2:20 ନିଜାମ୍ ମିଡ଼୍ ମାନ୍‍ ଗୌରବ୍ ନୁ ୱେଡ଼୍‍କା ।
1TH 3:1 ତେର୍‍ତେ ପେର୍‍କେ ମାମ୍‍ମେ ମେଣ୍ଡେ ସାରେ ମାଡ଼୍‍ୱେ ପାର୍‍ୱକଟ ତିଆର୍ ମାଡ଼୍‍ତମ୍ ଯେ, ମାମ୍‍ମେ ପେର୍‍କେ ଆଥେନ୍‍ସ୍‍ତାଗ୍ ୱେରୱେର ବାଦ୍‍କିତମ୍,
1TH 3:2 ବାତେଙ୍କ୍ ଇତ୍‍କେ ନିକିଂଙ୍କ୍ ଡୁଟାଙ୍ଗ୍ ମାଡ଼ାନଙ୍କ୍ ନୁ ନିୟାଦ୍ ବିଶ୍ୱାସ୍ ଡ଼ୁଟାଙ୍କ୍ ମାଡ଼ାନ୍ ସେଙ୍ଗେ ମିଇ ପାକେ ନା ତାମୁଙ୍କ୍ ତୀମତିଙ୍କ୍ ରହତିତାନ୍ । ଅଣ୍ଡ୍‌ ମା ତଡ଼୍ କ୍ରିଷ୍ଟନ୍‍ତଡ଼୍ ଲେକେତ୍‍ କାବୁର୍ ପ୍ରଚାର୍ ମାଡ଼ି ଇଶ୍ୱର୍‌ତେ ସେବା ମାଡ଼ୁତାନ୍ ।
1TH 3:3 ମିଇ ପର୍‍ର ଆସମାନ୍ଦାନ୍ ତାଡ଼ନା ସେଙ୍ଗେ ବେନ ବେଲା ଆର୍‍ବୁଲ୍‍କା ଆୟ୍‍ମାକିଣ୍ଡ୍, ଆଦିନ୍ ସେଙ୍ଗେ ମିକିଂଙ୍କ୍ ସାହାଯ୍ୟ ମାଡ଼ିତନ୍ । ନିଜାମ୍ ମିଡ଼୍ ପୁତ୍‍ତିଡ଼୍ ମାମ୍‍ମେ ଇଦ୍ ରକମ୍ ଆଦିତାଡ଼୍, ଇଦ୍ ଇଶ୍ୱର୍‌ତେ ଇଚ୍ଛା ।
1TH 3:4 ମିଇ ତଡ଼୍ ମାନ୍ଦାନ୍ ୱେଲେ, ମାମ୍‍ମେ ନାର୍‍ଗେ ମୁନେଙ୍କ୍ କେସ୍‍ମାତ୍‍ତମ୍, ମାନ୍‍ ଗାଟି କଷ୍ଟ ଆଦାଙ୍କ୍ ଆଦ୍‍ତେ, ହିଞ୍ଜେ ମିଡ଼୍ ପୁନ୍ଦୁତିଡ଼୍ ଟିକ୍ ଆଦେ କେ ଗଟେମ୍ ଆଦ୍‍ତେ ।
1TH 3:5 ଆଦିଙ୍କ୍ ତୀମତିଙ୍କ୍ ରତ୍‍ତାନ୍ । ନାନ୍ ମେଣ୍ଡେ ସତ୍ ଆସ୍‍ମାନ୍ଦେ ପାର୍ୱନ୍ । ମିଡ଼୍ ନିଜେ ବିଶ୍ୱାସ୍‍ତେ ମିନ୍ଦେଡ଼ି କି ଇଲେ, ପୁନ୍ଦାନ୍ ସେଙ୍ଗେ ନାନ୍ ଅଂକିଙ୍କ୍‌ ରତ୍‍ତାନ୍ । ଶୟ୍‍ତାନ୍‍ ମିକିଂଙ୍କ୍ ପ୍ରଲୋବିତ୍ ମାଡ଼ିମାନ୍ତେ ନୁ ମାନାଦ୍‍ ସାରେ ପାଡ଼୍‍ୟି ଆଙ୍ଗ୍‌ଡ଼ାମ୍ ଆସ୍‍ମାନ୍ତେ ? ଇଲେ ହିଦ୍ ବେସୁଙ୍କ୍‍ ନିଜାମ୍ ଆୟ୍‍ୟ ।
1TH 3:6 ବାତେଙ୍କ୍ ଇତ୍‍କେ ହିଞ୍ଜେ ତୀମତି ମିୟାଗାଙ୍କ୍ ମାଲ୍‍ସ୍ ମା ପାକେ ୱାସ୍, ମିୟାଦ୍ ବିଶ୍ୱାସ୍ ନୁ ପ୍ରେମ ବିଷୟ୍‍ତେ କେସ୍‍ମିନ୍ଦେନ୍, ମାମ୍‍ମେ ବେଦ୍‍ଲେକାମ୍ ମିକିଂଙ୍କ୍ ଉଡ଼ାନଙ୍କ୍ ଇଚ୍ଛା ମାଡ଼ୁତମ୍, ଆଦେଲେକାମ୍ ମିଡ଼୍ ମାକିଂଙ୍କ୍ ସାରେଦିନା ହେର୍କାତାଗ୍ ନେହେସ୍ ମାକିଂଙ୍କ୍ ଉଡାଙ୍କ୍ ଇଚ୍ଛା ମାଡ଼ାଟ୍, ହିଦ୍ ବିଷୟ୍‍ତେ ମାକିଂଙ୍କ୍ ଲେକେତ୍‍ କାବୁର୍ ଇସ୍‌‍ମିନ୍ଦେନ୍;
1TH 3:7 ଆଦିଙ୍କ୍ ଦାଦାନଡ଼ି ନୁ ଏଲାସ୍କ୍‍, ମାୟାଦ୍‌ ସାରେ ଅସୁବିଦା ନୁ ତିପାଲ୍ ଆଦାନ୍ ୱେଲେ ମାମ୍‍ମେ ମିଇ ସେଙ୍ଗେ ଉତ୍ସାହିତ ଅଦୁତମ୍ । ମିୟାଦ୍ ଗାଡ଼୍‍ସ୍‍ ବିଶ୍ୱାସିକେ ମାକିଂଙ୍କ୍ ପ୍ରକୃତ୍‍ତେ ଜିୱେମାଡ଼ି ନେହେତ୍‍ତେ ।
1TH 3:8 ଇଞ୍ଜେ ମାମ୍‍ମେ ପୁତ୍‍ତମ୍ ଯେ, ମିଡ଼୍ ଡୁଟାଙ୍ଗ୍‍ତେ ପ୍ରବୁନ୍‍ତଡ଼୍ କାଇଲି ମିକା ବାଦ୍‍କୁତାଡ଼୍ ।
1TH 3:9 ଇଞ୍ଜେ ମିଇ ସେଙ୍ଗେ ମାମ୍‍ମେ ବେନ୍ ଲେକେତ୍‍ ନାର୍‍ଗେ ୱେଡ଼୍‍କ୍‍ ମାଡ଼ୁତମ୍, ଆଦିନ୍ ସାରେଦାନ୍ ଲେକାମ୍ ଇଶ୍ୱର୍‌ତିଙ୍ଗ୍ ବେଲାନ୍ ଦନ୍ୟବାଦ୍ ହିଦ୍‍ତମ୍, ଆଦ୍ ପୁନ୍ଦାନଙ୍କ୍ ପାର୍‍ୱମ୍ ।
1TH 3:10 ମିକିଂଙ୍କ୍ କାୟ୍‍ଲି ମିଇ ବିଶ୍ୱାସ୍‍ତାଗ୍ ବାତେଏ ଅବାବ୍ ମିନ୍ଦେ, ଆଦ୍ ସାରେ ମାଡ଼ାନ୍ ସେଙ୍ଗେ ମାକିଂଙ୍କ୍ ସୁଯୋଗ୍ ଇଦାନଙ୍କ୍ ନାର୍କେପାୟାଲ୍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ୁତମ୍ ।
1TH 3:11 ମିଇ ପାକେ ୱାଦାନ୍ ସେଙ୍ଗେ ମା ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ ମାନ୍‍ ଆର୍ ତିଆର୍ ମାଡ଼ିୱିନ୍ ।
1TH 3:12 ମିଇ ସେଙ୍ଗେ ମାୟାଦ୍‌ ପ୍ରେମ ବେଲା ଗାଟି ମିନ୍ଦେ, ଆଦ୍ ଲେକାମ୍ ନିଜର୍‍ନିଜର୍ ଲୋପେ ନୁ ବାଗାତ୍ ନାରୁଡ଼୍ ସେଙ୍ଗେ ପ୍ରବୁ ମିୟାଦ୍ ପ୍ରେମ ପେର୍‍ସ୍ପି ନାର୍‍ଗେ ମାଡ଼ିଣ୍ଡ୍ ।
1TH 3:13 ଇଦ୍ ଲେକାମ୍ ଅଣ୍ଡ୍‌ ମିକିଂଙ୍କ୍ ଡୁଟ୍‍ଟାଙ୍କ୍ ମାଡ଼ିତନ୍ । ଆଲେକେ, ମାନ୍‍ ପ୍ରବୁ ଜିସୁ ବେସୁଙ୍କ୍‍ ଦାର୍ମାମ୍ ନାରୁଡ଼୍ ଲୋପେ ମାଲ୍‍ସ୍ ୱାଦ୍‍ତଣ୍ଡ୍, ଆସୁଙ୍କ୍ ମିଡ଼୍ ବାବାଲ୍ ଇଶ୍ୱର୍‌ତେ ମୁନେ ସତ୍‍ ନୁ ପବିତ୍ର ଆସ୍‍ ନିର୍ଦୋଷ୍‍ ମାତ୍‍ତିଡ଼୍‍ ।
1TH 4:1 ଆଦେଲେକାମ୍ ଦାଦାନଡ଼ି ନୁ ଏଲାସ୍କ୍‍, ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନ୍ ସେଙ୍ଗେ ବେଦ୍‍ଲେକାମ୍ ବାଦ୍‍କାନଙ୍କ୍ ଆଦ୍‍ତେ, ଆଦ୍ ମାୟାଗାଙ୍କ୍ ଶିକ୍ଷା ମାଡ଼ିମିନ୍ଦେଣ୍ଡ୍ । ଆଦେଲେକାମ୍ ମୀଡ଼୍ ବାଦ୍‍କ ୱାଦୁତିଡ଼୍, ବାତେଙ୍କ୍ ଇତ୍‍କେ ହିଗାଙ୍କ୍ ବାତେଏ ଅଦିକ୍‌ ମାଡ଼ାନଙ୍କ୍ ମିକିଂଙ୍କ୍ ମାମ୍‍ମେ ହିଞ୍ଜେ ପ୍ରବୁ ଜିସୁନ୍ ପେଦେର୍‍ତେ ବିନତି ବା ସାରେଦା ମାଡ଼ୁତମ୍ ।
1TH 4:2 ବାତେଙ୍କ୍ ଇତ୍‍କେ ପ୍ରବୁ ଜିସୁନାଗାଙ୍କ୍ ଅଦିକାର୍‌ ପାଏମ୍ ଆସ୍ ମିକିଂଙ୍କ୍ ବେନ୍‍ସାରେ ଆଦେଶ୍ କେସ୍‍ମାତ୍‍ତମ୍, ଆଦ୍ ମିଡ଼୍ ପୁତ୍‍ତିଡ଼୍ ।
1TH 4:3 ମିଡ଼୍ ବେଲାବା ପବିତ୍ର ଜିୱା ଆୟ୍‍ମୁଟ୍, ଇଶ୍ୱର୍‌ତେ ଇଚ୍ଛା, ମିଡ଼୍ ବେଲାନ୍ ବା ଯୌନ ଲାଲସା ତାଗାଙ୍କ୍ ଦୁରାମ୍ ମାନୁଟ୍ ।
1TH 4:4 ବେନଡ଼୍ ପର୍‍ମେଶ୍ୱର୍‍ତିଙ୍କ୍ ପୁନଡ଼୍, ଅଡ଼୍‌ ନିଜେତ୍ ମେନ୍ଦୁଲ୍‍ତିଙ୍କ୍ ହିଦ୍‍ଲେକାମ୍ ବ୍ୟବହାର୍ ମାଡ଼ିତଡ଼୍ ।
1TH 4:5 ଇଶ୍ୱର୍‌ତିଙ୍କ୍ ପୁନ୍‍ୱେମାନ୍ଦାନ୍ ଅଣଯିହୁଦୀ ନାରୁଡ଼୍ ଲେକାମ୍ ସାରେତଡ଼୍ ନିଜେ ନିଜେତ୍ ମୁତେନ୍ ତଡ଼୍ ବେଲାନ୍ ଯୌନ ଲାଲସା ଆୟ୍‍ୟକଟ ପବିତ୍ର ନୁ ସମ୍ମାନ୍‍ତଡ଼୍ ବାଦ୍‍କାନଡ଼ାଦ୍ ସାୟେ, ଆଦ୍ ମିକିଂଙ୍କ୍ ପୁନ୍‍ନ୍ଦେ ୱେଇତିତ୍ ।
1TH 4:6 ବେନ୍ କ୍ରିଷ୍ଟିୟାନ୍ ବିଶ୍ୱାସୀ ଦାଦାନ୍ ସେଙ୍ଗେ କାରାପ୍ କାମ୍ ମାଡ଼୍‍ମାଟ୍, ବା ଅଂକିଙ୍କ୍‌ ପାସ୍କ୍‍ମାଟ୍, ଇଦ୍ ଗଟ୍ ମାମ୍‍ମେ ମୁନେଙ୍କ୍ କେସ୍‍ମିନ୍ତେମ୍ ନୁ ଡୁଟାଙ୍ଗ୍‍ତେ ସାବ୍‍ଦାନ୍ ମାଡ଼ିତ୍‍ତମ୍ ଜେ, ବେନଡ଼୍ ଆଦ୍‍ଲେକାମ୍ ମାଡ଼ିତଡ଼୍, ପ୍ରବୁ ଅଡ଼୍‌‍କିଂଙ୍କ୍ ଦଣ୍ଡ ହିଦ୍‍ତନ୍ ।
1TH 4:7 ଇଶ୍ୱର୍ ମାନ୍‍ ଅଶୁଚି ବାଦ୍‍କାନ୍ ସେଙ୍ଗେ କାର୍‍ଙ୍ଗାନାଦ୍‍ ମାଡ଼ନ୍, ବାତେଙ୍କ୍ ଇତ୍‍କେ ପବିତ୍ର ଜିୱାତେ ଆଶେ ମାନ୍ଦାନ୍ ସେଙ୍ଗେ ମାନାଡ଼୍ ୱାତ୍‍ତାଡ଼୍ ।
1TH 4:8 ଆଦିଙ୍କ୍ ବେନ୍ ମାୟାଦ୍‌ ଇଦ୍ ଶିକ୍ଷାତିଙ୍କ୍‍ ଗ୍ରହନ୍ ମାଡ଼ନ୍, ଅଣ୍ଡ୍‌ ନାରୁଙ୍କ୍ ପବିତ୍ରଆତ୍ମା ଦାନ ମାଡ଼ିମାନ୍ଦାନ୍ ଇଶ୍ୱର୍‌ତିଙ୍କ୍ ଅବମାନନା ମାଡ଼ିତନ୍ ।
1TH 4:9 ସାର୍‍ରେ କ୍ରିଷ୍ଟ ବିଶ୍ୱାସୀଡ଼୍ ମିୟାଦ୍ ପ୍ରେମ ମାଡ଼ାନ୍ ବିଷୟ୍‍ତେ ମାମ୍‍ମେ ମେଣ୍ଡେ ଅଦିକ୍‌ ଲେକାନଙ୍କ୍ ଦର୍‍କାର୍ ଇଲ୍‍ଲେ । ନିଜେ ନିଜେତ୍ ଲୋପେ ବେଲାନ୍ ପ୍ରେମ ମାଡ଼ାନାଦ୍ ସାୟେ, ଆଦ୍ ନିଜେ ଇଶ୍ୱର୍ ତାଗାଙ୍କ୍ ଶିକ୍ଷା ମାଡ଼ିମିନ୍ଦେମ୍‍ ।
1TH 4:10 ସାରେ ମାସିଦୋନିଆତେ ବିଶ୍ୱାସୀଡ଼୍ ସେଙ୍ଗେ ମିଡ଼୍ ଆଦେଲେକାମ୍ ବ୍ୟବହାର୍‌ ମାଡ଼୍‍ତିଡ଼୍ । ଆଦିଙ୍କ୍ ଅଦିକ୍‌ ମାତ୍‌ତେ ମାଡ଼ାଟ୍, ମିକିଂଙ୍କ୍ ମାତର୍ ଇସରେ ବିନତି ମାଡ଼ୁତମ୍ ।
1TH 4:11 ମୁନେନ୍ ବେଲା କେସ୍‍ମାତ୍‍ତମ୍, ଶାନ୍ତିତେ ଜିୱୁଣ୍ଡ୍ ବାଦ୍‍କିତାଡ଼୍, ନିଜେତ୍ ପାଡ଼୍‍ୟିତାଗ୍ ମାନ୍‍ ଇଦ୍‍ତାଡ଼୍ ନୁ ନିଜେତ୍ ନିଜେତ୍ ଜିବିକା ଉପାର୍ଜନା ମାଡ଼ାନାଦ୍ ମିୟାଦ୍ ଲକ୍ଷ ଆୟି ।
1TH 4:12 ବେଦ୍‍ଲେକାମ୍ ବାଇଦେତ୍‍ ନାରୁଡ଼୍ ସେଙ୍ଗେ ମିଡ଼୍ ସାୟେ ଆୟ୍‍ମୁଟ୍, ମେଣ୍ଡେ ମିୟାଦ୍ ବାତ୍‍ତେବା ଅବାବ୍ ଆୟ୍‍ୟ ।
1TH 4:13 ହୋ ଦାଦାନଡ଼ି ନୁ ଏଲାସ୍କ୍, ୱେରେ ନାରିଡ଼୍‍ତେ ବିଷୟ୍‍ତେ ଅଣ୍ଡୟ୍‌ ନିଜାତେ ଗଟ୍ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତମ୍ । ଆଲେକେ, ମିଡ଼୍ ବାଗାତଡ଼୍ ଲେକାମ୍ ଆସ୍‍ତେ ନାରିଡ଼୍ ଲେକାମ୍ ଶୋକାକୁଲ ଆୟ୍‍ମାଟ୍ ।
1TH 4:14 ବେଲାନ୍ କି ମାମ୍‍ମେ ବିଶ୍ୱାସ୍ ମାଡ଼ିକାଡ଼୍ ଯେ ଜିସୁ ଡଲିମିକା ମେଣ୍ଡେ ତେଦ୍‍ତନ୍, ଆଦିଙ୍କ୍ ମାନାଡ଼୍ ଲେକାମ୍ ଗାଟି ବିଶ୍ୱାସତେ, ଜିସୁନାଗ୍ ବିଶ୍ୱାସ୍ ମାଡ଼ି ବେନଡ଼୍ ଡଲିତଡ଼୍, ଜିସୁ ମେଣ୍ଡେ ୱାଦାନ୍ ୱେଲେ ଇଶ୍ୱର୍ ଅଡ଼୍‌‍କିଂଙ୍କ୍ ଜିସୁନ୍ ତଡ଼୍ ଆଦ୍‍ତଡ଼୍ ।
1TH 4:15 ମାମ୍‍ମେ ଇଞ୍ଜେ ମିକିଂଙ୍କ୍ ବେନ୍ ଶିକ୍ଷା ଇଦୁତମ୍, ଆଦ୍ ପ୍ରବୁନ୍ ଶିକ୍ଷା । ପ୍ରବୁନ୍ ୱାଦାନ୍ ସମୟ୍‍ତେ ମାମ୍‍ମେ ବେନଡ଼୍ ଜିୱୁନ୍ ମାନ୍‍ତମ୍, ମୁନେଙ୍କ୍ କଞ୍ଜ୍ ୱେରେନାରୁଡ଼୍ ପାକ୍ ଆସ୍‍ମାନ୍ଦାନ୍ ନାରୁଡ଼୍‍ଆଗାଙ୍କ୍ ମୁନେ ଆସ୍ ଆନ୍‌‍ମା ।
1TH 4:16 ଆସୁଙ୍କ୍ ପ୍ରବୁ ଗଟ୍ ହିଦ୍‍ତନ୍ ମୁକ୍ୟଦୂତ୍‍ତେ ଲେଙ୍ଗ୍ ନୁ ଇଶ୍ୱର୍‌ତେ ମୟିର୍ ଲେଙ୍ଗ୍‍ତେ ଆଦ୍ ସ୍ୱର୍ଗଦୂତ ଡିଗିତା, ବେନଡ଼୍ କ୍ରିଷ୍ଟନାଗେ ମାଞ୍ଜ୍ ଡଲିମାନ୍‍ତଡ଼୍, ଅଡ଼୍‌ ମୁନେ ତେଦିତଡ଼୍ ।
1TH 4:17 ତାନ୍ ପେର୍‍କେ ବେନଡ଼୍ ଆଦ୍ ସମୟ୍‍ତେ ଜିୱୁନ୍ ମାନ୍‍ତମ୍, ମାବ୍‍ତାଗ୍ ଅଡ଼୍‌‍ତଡ଼୍ ଉତ୍‍ତାପିତ ଆସ୍ ମୟଲ୍‍ତାଗ୍ ପ୍ରବୁନ୍‍ତଡ଼୍ ସାକ୍ଷାତ୍ ମାଡ଼ିତମ୍ । ତାନ୍ ପେର୍‍କେ ମାମ୍‍ମେ ସାରେଦିନାମ୍ ପ୍ରବୁନ୍‍ତଡ଼୍ ମାନ୍‍ତମ୍ ।
1TH 4:18 ଇୱୁ ସାରେ ଗଟି କେଞ୍ଜ୍‍ସ୍ପି ମିଡ଼୍ ଆନ୍‌‍ତେ ନିଜେ ନିଜେତିଙ୍ଗ୍ ସାର୍‍ଦେ ଆୟ୍‍ମୁଟ୍ ।
1TH 5:1 ହୋ ଦାଦାନଡ଼ି ନୁ ଏଲାସ୍କ୍‍, ଇଦ୍ ମିଇ ବିଷୟ ବେସୁଙ୍କ୍‍ ନୁ ବେନ୍ ପରିସ୍ଥିତେ ଗଟେମ୍ ଆଦ୍‍ତେ, ଆଦ୍ ବିଷୟ୍‍ତେ ମିଇ ପାକେ ବାତେଏ ଚିଟି ଲେକାନାଲ୍‌ଦ୍ ଦର୍‍କାଡ଼୍ ଇଲ୍‍ଲେ,
1TH 5:2 ବାତେଙ୍କ୍‍ଇତ୍‍କେ ନାର୍‍କେତେ ନାନେ ଡଙ୍ଗାଲ୍ ୱାଦାନ୍ ଲେକାମ୍ ପ୍ରବୁନ୍ ଦିନାମ୍ ୱାଦ୍‍ତେ, ହିଦ୍ ମିଡ଼୍ ଲେକେତ୍‍ ପୁତ୍‍ତିଡ୍ ।
1TH 5:3 “ବେସୁଙ୍କ୍‍ ନାରୁଡ଼୍ ଶାନ୍ତି ନୁ ନିରାପଦ୍,” ଇଞ୍ଜ କେସମାନ୍‍ତଡ଼୍, ଆସୁଙ୍କ୍ ଡଙ୍କେତ୍‍ତେ ମାନ୍ଦାନ୍‌ ନାଟାଡ଼୍ ନପ୍‍ତେ ୱେଲେ ହଟାତ୍ ଆୱ ତେରାନାଦ୍ ମାନ୍‍ତେ, ମେଣ୍ଡେ ଆୱ୍ ବେନ୍‍ଲେକାମ୍ ମିକା ଗେଲ୍‍ସ୍ପାନଙ୍କ୍ ଆୟ୍‍ୟ ।
1TH 5:4 ଦାଦାନଡ଼ି ନୁ ଏଲାସ୍କ୍, ମିଡ଼୍ ଇକାଡ଼୍ ତାଗ୍ ମାନ୍‍ୱିଡ଼୍‍, ଆଦ୍ ଦିନାମ୍ ମିଇୟାଗେ ଦାଦ୍‍ରେଲାନ୍ ଲେକାମ୍ ନାନେ ଡଙ୍ଗାନ୍ ଲେକାମ୍ ୱାସ୍ ଏୱ ।
1TH 5:5 ମିଡ଼୍ ସାରେ ୱେସ୍ ନୁ ୱେସ୍‍ତେ ପିଲାନଡ଼ି । ମାମ୍‍ମେ ନାର୍‍କେତ୍ ବା ହିକାଡ଼୍‍ତାଗ୍ ମାନ୍‍ୱମ୍ ।
1TH 5:6 ଆଦିଙ୍କ୍ ମାନାଡ଼୍ ବାଗାତଡ଼୍ ଲେକାମ୍ ଉସ୍‍କାତେ ମାନ୍‍ୱେ କେପି ନୁ ସେତ୍‍ତେ ମାନ୍ଦିକାଡ଼ାଡ଼୍ ।
1TH 5:7 ନାରୁଡ଼୍ ନାର୍‍କେତ୍ ଉସ୍‍କାଡ଼୍ ଉଞ୍ଜିତଡ଼୍; ନାର୍‍କେତ୍ ଅଡ଼୍‌ କାଲ୍ ଉଞ୍ଜ୍ ମାତ୍‍ୱାରି ଆଦ୍‍ତଡ଼୍ ।
1TH 5:8 ବାତେଙ୍କ୍ ଇତ୍‍କେ ମାନାଡ଼୍ ୱେସ୍‍ତେ ପିଲା ହାଇନାଙ୍କ୍ ସାରେଦାମ୍ ସେତେ ମାନ୍‍ତାଡ଼୍ । ୱାଡ଼ାଟ୍, ବିଶ୍ୱାସ୍ ନୁ ପ୍ରେମତେ ଚକାସିଲେ କେର୍‍ଦିକାଡ଼୍‍ ନୁ ପରିତ୍ରାଣତେ ଆଶେ ଲେକାମ୍‍ ସହଜ୍‍ ତାଲେତାଗ୍ ୱାଟିକାଡ଼ାଟ୍ ।
1TH 5:9 ଇଶ୍ୱର୍ ମାନ୍‍ ଅନ୍‌ କପାମ୍‍ତେ ନାରୁଡ଼୍ ଆଦାନଙ୍କ୍ ହେଞ୍ଜନ୍; ପ୍ରବୁ ଜିସୁ କ୍ରିଷ୍ଟନ୍ ନାଡ଼୍‍ମେ ମାନ୍‍ ପରିତ୍ରାଣ୍ ମାଡ଼୍‍ତନ୍‍ ସେଙ୍ଗେ ତିଆର୍ ମାଡ଼୍‍ତଣ୍ଡ୍ ।
1TH 5:10 କ୍ରିଷ୍ଟନାଦ୍ ମେଣ୍ଡନ୍‍ଦାମ୍ ୱାଦାନ୍ ସମୟ୍‍ତେ ମାମ୍‍ମେ ଇଦ୍ ଜିୱୁତେ ମାନ୍‍ତମ୍ ବା ମାନମ୍, ଅନ୍‌ ତଡ଼୍ ବେଲାନ୍ କାୟ୍‍ଲି ମିକା ମାନ୍‍ତମ୍, ଆଦିନ୍ ସେଙ୍ଗେ ଅଣ୍ଡ୍‌ ମାନ୍‍ ସେଙ୍ଗେ ଡଲ୍‍ତଣ୍ଡ୍ ।
1TH 5:11 ଆଦିଙ୍କ୍ ଇଞ୍ଜେ ବେଦ୍‍ଲେକାମ୍ ମାଡ଼ୁତିଡ଼୍, ଟିକ୍ ଆଦେଲେକାମ୍ ନିଜେ ନିଜେ ଲୋପେ ଉତ୍ସାଇତ୍ ମାଡ଼ାଟ୍, ମେଣ୍ଡେ ନାରୁଡ଼୍‍କିଂଙ୍କ୍ ସାହାଯ୍ୟ ମାଡ଼ାଟ୍ ।
1TH 5:12 ହୋ ଦାଦାନଡ଼ି ନୁ ଏଲାସ୍କ୍, ମାମ୍‍ମେ ମିକିଂଙ୍କ୍ ଅନୁରଦ୍‌ ମାଡ଼ୁତମ୍, ବେନଡ଼ ମିଇ ସେଙ୍ଗେ କଷ୍ଟ ଅଦୁତଡ଼୍ ନୁ ପ୍ରବୁନ୍ ସେବାତେ ମିଇ ନେତାନ୍ ଲେକାମ୍ ଆସ୍ ମିକିଂଙ୍କ୍ ଚେତନା ହିଦ୍‍ତନ୍, ଅଡ଼୍‌‍କିଂଙ୍କ୍ ମିଡ଼୍ ସମ୍ମାନ୍ ମାଡ଼ାଟ୍ ।
1TH 5:13 ଅଡ଼ାଦ୍‌ ପାଡ଼ିୟିଦେ ସେଙ୍ଗେ ମିଡ଼୍ ପ୍ରେମତେ ଲେକାମ୍ ଆଦର୍ ମାଡ଼ାଟ୍ । ନିଜେ ନିଜେତ୍ ସାଙ୍ଗତେ ଲେକେତ୍‍ ମାନୁଟ୍ ।
1TH 5:14 ଦାଦାନଡ଼ି ନୁ ଏଲାସ୍କ୍, ମିକିଂଙ୍କ୍ ମାୟାଦ୍‌ ଅନୁରଦ୍‌; ଦୁଷ୍ଟନଡ଼କ୍ ସତର୍କ ମାଡ଼ାଟ୍, ୱେର୍‍ତେ ନଡ଼୍‍କ୍ ଉତ୍ସାଇତ୍ ମାଡ଼ାଟ୍, ଦୁର୍ବଲ ନାରୁଡ଼୍‍କ୍ ସାହାଯ୍ୟ ମାଡ଼ାଟ୍ ନୁ ସାରେତଡ଼୍ ସେଙ୍ଗେ ଗାଡ଼୍‍ସ୍ ଆୟ୍‍ମୁଟ୍ ।
1TH 5:15 ବେନ ବେନନାଦ୍ କାରାପ୍ ସେଙ୍ଗେ କାରାପ୍ ମାଡ଼୍‍ମାଟ୍, ମାତର୍ ମିଡ଼୍ ସାରେଦାମ୍ ନିଜେ ନିଜେତ୍ ନୁ ସାରେତଡ଼୍ ସେଙ୍ଗେ ସାୟେ ପାଡ଼୍‍ୟି ଆୟ୍‍ମୁଟ୍ ।
1TH 5:16 ସାରେଦାମ୍ ୱେଡ଼୍‍କ୍‍ ମାଡ଼ାଟ୍ ।
1TH 5:17 ବେସୁଙ୍କ୍‍ ବା ପ୍ରାର୍ତନା ମାଡ଼ାନାଦ୍ ୱିଡ଼୍‍ସ୍‍ମାଟ୍ ।
1TH 5:18 ସାରେ ସମୟ୍‍ତେ ଦନ୍ୟବାଦ୍ ହିମୁଟ୍ ମେଣ୍ଡେ ସାର୍‍ରେ ବିଷୟ୍‍ତେ ଦନ୍ୟବାଦ୍ ଇମୁଟ୍ । ଇଦ୍ ଇଶ୍ୱର୍ ଇଚ୍ଛା ଜେ କ୍ରିଷ୍ଟ ଜିସୁନ୍‍ତଡ଼୍ ବାଦ୍‍କାଟ୍ ।
1TH 5:19 ବେସୁଙ୍କ୍‌ବା ପବିତ୍ର ଆତ୍ମାତେ ବିରୁଦ୍‍ତେ ବାଦା ମାଡ଼୍‍ମାଟ୍ ।
1TH 5:20 ଇଶ୍ୱର୍‌ତେ କାବୁର୍‍ତିଙ୍କ୍ ଆଙ୍ଗ୍‍ଡ଼ାମ୍ ହିଞ୍ଜ ଆଲ୍‍ସ୍‍ମାଟ୍ ।
1TH 5:21 ସାରେତଡ଼୍ ଗୋଟିଙ୍କ୍ ପରିକ୍ଷା ମାଡ଼ାଟ୍, ବାତ୍ ସତ୍, ଆଦିଙ୍କ୍ ହେର୍କାନେହେସ୍‍ ମାନୁଟ୍,
1TH 5:22 ସାରେ ଲେକେତ୍‍ କାରାପ୍ ପାଡ଼ିୟିତାଗାଙ୍କ୍ ଯେକାମାନୁଟ୍ ।
1TH 5:23 ବେନ୍ ଇଶ୍ୱର୍ ମାନ୍‍ ଶାନ୍ତିତେ ନେହେତିତ୍, ଅଣ୍ଡ୍‌ ମାନ୍‍ ସାରେଦିନାତ୍ ସେଙ୍ଗେ ପବିତ୍ର ମାଡ଼ିତନ୍ ନୁ ସାରେଦିନାମ୍ ମାନାଡ଼୍ ଅନ୍‌ ତଡ଼୍ ମାନ୍‍ତାଡ଼୍, ମାନାଡ଼୍ ପ୍ରାର୍ତନା ମାଡ଼ିକାଡ଼୍ ଯେ, ପ୍ରବୁ ଜିସୁ କ୍ରିଷ୍ଟ ୱାଦାନ୍ ଦିନ୍ ମିୟାଦ୍ ଆତ୍ମା, ଜିୱୁନ୍, ମେନ୍ଦୁଲ୍ ସାରେତିଙ୍କ୍ ନିର୍ଦୋଷ୍‍ ମାଡ଼ି ନେଃଏମୁଟ୍ ।
1TH 5:24 ବେନ ମିକିଂଙ୍କ୍ କାର୍‍ଙ୍ଗିତଣ୍ଡ୍ ବା ହେଞ୍ଚିମିନ୍ଦେଣ୍ଡ୍, ଅଣ୍ଡ୍‌ ବିଶ୍ୱାସ୍ତ; ଅଣ୍ଡ୍‌ ଆଦ୍‍ମିକା ସାରେ ମାଡ଼ିତନ୍ ।
1TH 5:25 ହୋ ଦାଦାନଡ଼ି ନୁ ଏଲାସ୍କ୍‍, ମା ସେଙ୍ଗେ ମିକା ପ୍ରାର୍ତନା ମାଡ଼ାଟ୍ ।
1TH 5:26 ସାରେତଡ଼୍ ଦାଦାନଡ଼ି କ୍ରିଷ୍ଟିୟାନ୍ ପ୍ରେମତଡ଼୍ ନମସ୍କାର୍ ମାଡ଼ାଟ୍ ।
1TH 5:27 ସାରେତଡ଼୍ ଦାଦାନଡ଼୍ ପାକେ ହିଦ୍ ଚିଟି କାର୍‍ତାନଙ୍କ୍ ସେଙ୍ଗେ ନାନ୍ ପ୍ରବୁନ୍ ଅଦିକାର୍‌‍ତେ ମିକିଂଙ୍କ୍ ଅନୁରଦ୍‌ ମାଡ଼ୁତାନ୍ ।
1TH 5:28 ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ସାରେତଡ଼୍ ସେଙ୍ଗେ ସହବର୍ତି ଆୟି । ଆମେନ୍‌ ।
2TH 1:1 ନାନ୍ ପାଉଲ୍, ସିଲେ ନୁ ତୀମତି ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନାଗେ ମାନ୍ଦାନ୍ ଥେସଲନିକୀ ମଣ୍ଡଲି ପାକେ ଚିଟି ଲେକ୍‍ତାନ୍ ।
2TH 1:2 ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
2TH 1:3 ହୋ ଦାଦାନଡ଼ି ନୁ ଏଲାସ୍କ୍‍ ! ମିଇ ସେଙ୍ଗେ ଇଶ୍ୱର୍‌ତିଙ୍କ୍ ସାରେଦାମ୍ ଦନ୍ୟବାଦ୍ ଇଦାନ୍ ମାୟାଦ୍‌ ଲେକାମ୍, ମେଣ୍ଡେ ଆଦ୍ ଲେକାମ୍, ବାତେଙ୍କ୍ ଇତ୍‍କେ ମିୟାଦ୍ ବିଶ୍ୱାସ୍ ଲେକାମ୍ ନାର୍‍ଗେ ଆସମିନ୍ଦେ, ନିଜେ ନିଜେତ୍ ଲୋପେ ମୀଡ଼୍ ସାରେତଡ଼୍ ୱେରନ୍ ୱେର୍‍ର ପ୍ରେମ ଅଦିକ୍‌ ଆସ୍‍ମିନ୍ଦେ ।
2TH 1:4 ଇଦ୍‍ଲେକାମ୍ ମୀଡ଼୍ ବେନ୍‍ସାରେ ତାଡ଼ନା ନୁ କଷ୍ଟ ଆଦୁତିଡ଼୍, ଆଗେକ୍ ମିୟାଦ୍ ସାରେ ନୁ ବିଶ୍ୱାସ୍‍ତେ ସେଙ୍ଗେ ମାମ୍‍ମେ ନିଜେତ୍ ଇଶ୍ୱର୍‌ତେ ମଣ୍ଡଲି ମୁନେ ମିଇ ବିଷୟ୍‍ତେ କେତିତମ୍ ।
2TH 1:5 ଇଶ୍ୱର୍‌ତେ ବେନ୍ ରାଜ୍ୟ ସେଙ୍ଗେ ମୀଡ଼୍ ଦୁଃକା‍ମ୍ ମାଡ଼ୁତିଡ଼୍, ଆଗେତ୍ ଯୋଗ୍ୟ ଇଞ୍ଜ୍ ଆତ୍‍ତାଙ୍କ୍ ସେଙ୍ଗେ ଇଦ୍ ତ ଇଶ୍ୱର୍‌ତେ ଟିକ୍ ବିଚାର୍‍ତେ ସାରେତାଦ୍‍ ପ୍ରମାନ୍ ।
2TH 1:6 ବାତେଏ ଟିକ୍ ଆଦ୍ ଇଶ୍ୱର୍ ମାଡ଼ିତନ୍ । ବେନ ନାରୁଡ଼୍ ମିକିଂଙ୍କ୍ କଷ୍ଟ ଇତ୍‍ତଡ଼୍ ଇଶ୍ୱର୍ ଅଡ଼୍‌‍କିଂଙ୍କ୍ କଷ୍ଟ ଇଦ୍‍ତନ୍ ।
2TH 1:7 ଇଶ୍ୱର୍ ମିୟାଦ୍ ତିପାଲ୍‍ତିଙ୍କ୍ ଶେଷ୍ ମାଡ଼ିତନ୍, ମାନ୍‍ ଗାଲା ସାନ୍ତନା ମାଡ଼ିତନ୍ । ଇଶ୍ୱର୍ ଇଦ୍ ପାଡ଼୍‍ୟି ସାଦନ୍ ମାଡ଼ିତନ୍, ବେସୁଟ୍‌ ପ୍ରବୁ ଜିସୁ ତାନ୍ ବେଡ଼୍‍ୟାଦ୍‍ ପରାକ୍ରାନ୍ତ ଦୂତନ୍ ତଡ଼୍ ସ୍ୱର୍ଗତାଗାଙ୍କ୍ ଡିଗିତଣ୍ଡ୍ ।
2TH 1:8 ବେନଡ଼୍ ଇଶ୍ୱର୍‌ତିଙ୍ଗ୍ ପୁନଡ଼୍ ନୁ ମାନ୍‍ ପ୍ରବୁ ଜିସୁନ୍ ସୁସମାଚାର୍ ମାନେମ୍‍ ଆୟ୍‍ୟଡ଼୍, ଅଡ଼୍‌‍କିଂଙ୍କ୍ ଅଣ୍ଡ୍‌ ନିଡ଼୍‍ତାନାଦ୍ କିସ୍‍ତାଗ୍ ଦଣ୍ଡ୍ ହିଦ୍‍ତନ୍ ।
2TH 1:9 ଆଦ୍ ନାରୁଡ଼୍ ପ୍ରବୁନ୍ ଶାନ୍ତି, ପରାକ୍ରମ୍ ନୁ ଗୌରବ୍ ତାଗାଙ୍କ୍ ୱେରେ ଆସ୍ ସାରେଦିନାତ୍ ସେଙ୍ଗେ ବିନଷ୍ଟ ଆଦ୍‍ତଡ଼୍ ।
2TH 1:10 ବାତେଙ୍କ୍ ଇତ୍‍କେ ଆଦ୍ ଦିନ୍ ଅନ୍‌ ତାନ୍ ନାରିଡ଼୍ ଡ଼ାଗାଙ୍କ୍ ନୁ ସାରେ ବିଶ୍ୱାସି ନଡ଼୍‍ଗାଙ୍କ୍ ସମ୍ମାନ୍ ନୁ ଗୌରବ୍ ପାଏମ୍ ଆଦ୍‍ତଡ଼୍ । ଇଡ଼୍‍ ଲୋପେ ମିଡ଼୍‍ଆନ୍‌ନ୍ତେ କାଇଲିତିଡ଼୍, ବାତେଙ୍କ୍ ଇତ୍‍କେ ମାମ୍ ମିକିଂଙ୍କ୍ ବେନ୍‍ସାରେ କାବୁର୍ ଇସ୍ ମାତ୍‍ତମ୍, ଆଗେ ମିଡ଼୍ ବିଶ୍ୱାସ୍ ମାଡ଼୍‍ତିଡ଼୍ ।
2TH 1:11 ମାନ୍‍ ଇଶ୍ୱର୍ ବେଦ୍‍ଲେକାମ୍ ମିକିଂଙ୍କ୍ ନିଜେ କାର୍‍ଙ୍ଗ୍‍ତଣ୍ଡ୍ ଯୋଗ୍ୟ ହିଞ୍ଜ ଗଣନା ମାଡ଼ିତନ୍, ମେଣ୍ଡେ ସାରେ ସାୟେ ପାଡ଼୍‍ୟି ନୁ ବିଶ୍ୱାସତେ ପାଡ଼୍‍ୟି ଶକ୍ତିତେ ସିଦ୍ଦ ମାଡ଼ିତନ୍, ଆଦିନ୍ ସେଙ୍ଗେ ମାମ୍‍ମେ ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ୁତମ୍ ।
2TH 1:12 ଆଲେକେ, ମାନ୍‍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ତାଗାଙ୍କ୍, ନିମ୍‍ ମା ପ୍ରବୁ ଜିସୁନ୍ ପେଦେର୍‍ତିଙ୍କ୍ ଗୌରବ୍ ମାଡ଼୍‍କେ ନୁ ମିକିଂଙ୍କ୍ ଆନ୍‌‍ତେ ଅଣ୍ଡ୍‌ ଗୌରବ୍ ମାଡ଼ିତନ୍ ।
2TH 2:1 ଦାଦାନଡ଼ି ନୁ ଏଲାସ୍କ୍, ପ୍ରବୁ ଜିସୁ କ୍ରିଷ୍ଟ‍ନ୍ ୱାଦାନାଦ୍ ବିଷୟ୍‍ତେ ନୁ ଅନ୍‌ ପାକେ ମାନାଡ଼୍ ସାରେତଡ଼୍ ଅଣ୍ଡୟାଗେ ଆଦାନ୍ ମୁନେଙ୍କ୍ ମିକିଂଙ୍କ୍ ଅନୁରଦ୍‌ ମାଡ଼ୁତମ୍ ।
2TH 2:2 ପ୍ରବୁନାଦ୍ ଦିନାମ୍ ୱାସ୍‍ହେଉତେ ଇଞ୍ଜ ବେନନାଗାଙ୍କ୍ କେଞ୍ଜି ମିଡ଼୍ ଦାନ୍ଦେ ଆୟ୍‍ମାଟ୍ । ମାମ୍‍ମେ ପ୍ରଚାର୍ ମାଡ଼ାନ୍ ୱେଲେ ଇଦ୍‍ଲେକାମ୍ ବାତେଏ ଗଟ୍ କେତ୍‍ତମ୍, ବା ଇଦ୍ ବିଷୟ୍‍ତେ ବାତେଏ ଲେକି କେଞ୍ଜ୍‍ପ୍‍ତମ୍ ଇଞ୍ଜ୍ ବେସ୍କ୍‌ତୁଡ଼ାଦ୍ ମନ୍‍ଦାଗ୍ ମିନ୍ଦେ ।
2TH 2:3 ଇଦ୍‍ଲେକାମ୍ କେସ୍ ମିକିଂଙ୍କ୍ ବେନ ବେଲାବାଆୟି ପ୍ରତାରନା ମାଡ଼୍‍ମାକି । ଇଶ୍ୱର୍‌ତେ ବିରୁଦ୍ଦ୍‍ତେ ଅନ୍‌ତିମ ଯୁଦ୍‌ ଗଟେମ୍ ଆୟୱେ ଯାକ ନୁ ଆଦ୍ ନର୍‍କ ଆଦାନାଦ୍ “ଆଦାର୍ମି ଆତ୍ମା,” ନର୍‍କତାଗ୍‍ ଅନ୍‌‍ୱେ ଯାକ ଆଦ୍ ଦିନ୍ ୱାଡ଼୍ ।
2TH 2:4 ଆଦ୍ କାରାପ୍ ଆତ୍ମା ନାରୁଡ଼ାଦ୍ କେତାନାଦ୍ ସାର୍‍ରେ ପୁଜାମାଡ଼ାନ୍ ଦେୟାମ୍ ନୁ ଉପାସ୍ୟ ବସ୍ତୁତାଦ୍ ବିରୁଦ୍‍ ଆଚରନ୍ ମାଡ଼ିତ୍ ନୁ ନିଜେତିଙ୍କ୍ ସାର୍ରେତ୍ ପର୍‍ର ନେଃତାନଙ୍କ୍ ପାର୍‍ଦ୍‍ତେ । ଇଦ୍ ରକମ୍ କି ଅଣ୍ଡ୍‌ ଇଶ୍ୱର୍‌ତେ ମନ୍ଦିର୍‌‍ତାଗ୍ କୁଦି ନିଜେ ଇଶ୍ୱର୍ ଇଞ୍ଜ ଦାବୀ ମାଡ଼ିତ୍ ।
2TH 2:5 ମିକିଂଙ୍କ୍ ବାତେଏ ଏର୍କା ଇଲେ ? ନାନ୍ ମିଇ ତଡ଼୍ ମାନ୍ଦାନ୍ ୱେଲେ ମିକିଂଙ୍କ୍ ଇ ସାରେ ବିଷୟ କେସ୍‍ମାତ୍‍ତାନ୍ ?
2TH 2:6 ଆଦ୍ ବିପଦ୍ ଇଞ୍ଜେ ଗଟେମ୍ ଆୟ୍‍ୟ, ବାତେଙ୍କ୍ ଇତ୍‍କେ ଆଦିନ୍ ପ୍ରତିରଦ୍ ମାଡ଼ାନଙ୍କ୍ ଇଞ୍ଜ ୱେରଡ଼୍ ଶକ୍ତି ମିନ୍ଦେ, ଆଦ୍ ବାତେଏ ମିଡ଼୍ ପୁତ୍‍ତିଡ଼୍ ! ବାତେଙ୍କ୍ ଇତ୍‍କେ ଟିକ୍ ସମୟ୍‍ତେ ଆଦ୍ ଦୁଷ୍ଟଆତ୍ମା ତଅନ୍‌ଦିତ୍ ।
2TH 2:7 ବାତେଙ୍କ୍ ଇତ୍‍କେ ଅଦାର୍ମିତାଗ୍ ଆତ୍ମା ଇଞ୍ଜେ ଗାଲା ପାଡ଼୍‍ୟି ମାଡ଼ୁତ୍ । ମାତର୍ ଅନାଦ୍‌ ବାଦା ଇଦାନ୍‍ ନାରୁନ୍ ଦୁରାମ୍ ଆୟୱେ ଯାକ ଆଦ୍ ପାଡ଼୍‍ୟି ମାଡ଼ମାନ୍‌ତେ ।
2TH 2:8 ତାନ୍ ପେର୍‍କେ ପାପଆତ୍ମା ହେକାମ୍ ଆଦ୍‍ତେ; ବାତେଙ୍କ୍ ଇତ୍‍କେ ବେସୁଙ୍କ୍‍ ପ୍ରବୁ ଜିସୁ ୱାଦ୍‍ତନ୍, ଅନ୍‌ ତାନ୍ ମକମ୍‍ତେ ନେହେସ୍‍କାନାଲ୍‌ଦ୍‍ ତଡ଼୍ ଦଂସ ମାଡ଼ିତନ୍, ନୁ ଅନ୍‌ ଜାଜଲ୍‌ଲ୍ୟମାନ୍ ଦିନ୍ ଏୱୁକେ ୱିଡ଼୍‍ସି ଆଦ୍‍ତନ୍ ।
2TH 2:9 ଆଦ୍ ଦୁରଆତ୍ମା ଶୟ୍‍ତାନ୍‍ ଲାୱ୍‌ଦେ ଡାଟୁମ୍‌ ଆସ୍ ୱାଦ୍‍ତନ୍ ନୁ ନାର୍‍ଗେ ଲେକ୍‍ତାଉ ଦାଦ୍‌ରେଲାନ୍ ପାଡ଼୍‍ୟି ମାଡ଼ାନଙ୍କ୍ ବୁସା ମାଡ଼ିତନ୍ ।
2TH 2:10 ନାର୍ଗେମୁଲ୍ ତାନ୍ ପ୍ରତାରଣାତାଗ୍ ବ୍ରାନ୍ତ ଆସ୍ ବିନଷ୍ଟ ଆଦ୍‍ତଡ଼୍ । ବେନ୍ ସତ୍‍ତିଙ୍କ୍ ଗ୍ରହନ୍ ମାଡ଼ି ତାନ୍ ସେଙ୍ଗେ ଆଶ୍ୱକ୍ତ ଆଦ୍‍ଦାନ୍ ତଡ଼୍ ବେନ୍ ନାରିଡ଼୍ ମାଇ ମିନ୍ଦେ, ଅଡ଼୍‌‍କିଂଙ୍କ୍ ପ୍ରତାରନ୍ ମାଡ଼ାନଙ୍କ୍ ଇଦ୍ କାରାପ୍ ନାରିଡ଼୍ ସାରେତ୍‍ଲେକେତ୍ କାରାପ୍ ପାଡ଼୍‍ୟି ସୃଷ୍ଟିମାଡ଼ିତଡ଼୍ । ଅଡ଼୍‌ ସତ୍‍ତିଙ୍ଗ୍ ପ୍ରେମ ଆଦିଲ୍‌ୱେ ସେଙ୍ଗେ ଅସ୍ୱୀକାର୍ ମାଡ଼୍‍ତଡ଼୍, ବେଦ୍‍ଲେକାମ୍ ଅଡ଼୍‌ ଉଦ୍ଦାର୍‍ ଦର୍ସିକି ଆୟେଡ଼୍ ।
2TH 2:11 ବାତେଏ ସତ୍, ଇଦିନ୍ ସେଙ୍ଗେ ଅଡ଼୍‌ ବେନ ମିଚ୍‌ତିଙ୍କ୍‌ ବିଶ୍ୱାସ୍ ମାଡ଼ିତଡ଼୍, ଆଦିନ୍ ସେଙ୍ଗେ ଇଶ୍ୱର୍ ଅଡ଼୍‌ ପାକେ ନଷ୍ଟ ଉତ୍ପାଦକ ଶକ୍ତିଡ୍‌ କାୟ୍‍ଦେ ୱିଡ୍‌ସିଦ୍‌ତନ୍‌ ।
2TH 2:12 ବେନଡ଼୍ ସତ୍‍ତିଙ୍କ୍ ବିଶ୍ୱାସ୍ ମାଡ଼କଟ୍ ମାନ୍‍ନ୍ତନ୍, ମାତର୍ ପାପାମ୍‍ତାଗ୍ ୱେଡ଼୍‍କ୍‍ ମାଡ଼ିତଡ଼୍, ଅଡ଼୍‌ ସାର୍ରେତଡ଼୍ ହିଦ୍‍ଲେକାମ୍ ଦଣ୍ଡ୍ ପାଏମ୍ ଆଦ୍‍ତଡ଼୍ ।
2TH 2:13 ହୋ ଦାଦାନଡ଼ି ନୁ ଏଲାସ୍କ୍, ମିଇ ସେଙ୍ଗେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିଦାନାଦ୍ ଲେକାମ୍ । ବାତେଙ୍କ୍ ଇତ୍‍କେ ପ୍ରବୁ ମିକିଂଙ୍କ୍ ପ୍ରେମମାଡ଼ୁତ୍ । ସତ୍‍ତେ ମିୟାଦ୍ ବିଶ୍ୱାସ୍‍ତେ ସେଙ୍ଗେ ଇଶ୍ୱର୍ ମିକିଂଙ୍କ୍ ପରିତ୍ରାଣ ମାଡ଼ିମିନ୍ଦେଣ୍ଡ୍, ବେଦ୍‍ଲେକାମ୍ ପବିତ୍ର ଆତ୍ମା ଶକ୍ତିତେ ମୀଡ଼୍ ପରିତ୍ରାନ୍ ଆଦ୍‍ତିଡ଼୍ ନୁ ୱେରଡ଼୍ ପବିତ୍ର ଜିୱାତେ ଗୋଷ୍ଟି ଆଦ୍‍ତିଡ଼୍ ।
2TH 2:14 ମିଇ ପାକେ ମାମ୍‍ମେ ବେନ୍ ନେଲା କାବୁର୍ କେତ୍‍ତଣ୍ଡ୍, ଆଦିନ୍ ସେଙ୍ଗେ ଇଶ୍ୱର୍ ମିକିଂଙ୍କ୍ କାର୍‍ଙ୍ଗିମିନ୍ଦେନ୍ । ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ମାଇମାତେ ଗୌରବ୍‍ତେ କାଇଲାନ୍ ସେଙ୍ଗେ ଅଣ୍ଡ୍‌ ମିକିଂଙ୍କ୍ କାର୍‍ଙ୍ଗିମିନ୍ଦେନ୍ ।
2TH 2:15 ହୋ ଦାଦାନଡ଼ି ନୁ ଏଲାସ୍କ୍‍, ମାୟାଦ୍‌ କେତାନାଦ୍ ନୁ ଚିଟିତେ ବେନ୍‍ସାରେ ଶିକ୍ଷାଲେକାମ୍ ବେନ୍‍ସାରେ ସତ୍ କେସ୍‍ମିନ୍ଦେମ୍, ଆଦିଙ୍କ୍ ଡାଟୁମ୍ ପଇସ୍‌ ମାନୁଟ୍; ବିଶ୍ୱାସ୍‍ତେ ମାନୁଟ୍ ।
2TH 2:16 ମାନ୍‍ ପ୍ରବୁ ଜିସୁ କ୍ରିଷ୍ଟ ନିଜେ, ମାନ୍‍ ବେନ୍ ବାବାଲ୍ ଇଶ୍ୱର୍ ମାନ୍‍ ପ୍ରେମ ମାଡ଼ି ମାନ୍‍ ଅନୁଗ୍ରହତେ ମାନ୍‍ ସାରେଦିନାତ୍ ସାନ୍ୱନା ନୁ ଲେକେତ୍‍ ଆଶେ ଇସ୍‍ମିନ୍ଦେନ୍ ।
2TH 2:17 ଅଣ୍ଡ୍‌ ମାନ୍‍ ସାରେଦିନାମ୍ ସାୟେ ପାଡ଼୍‍ୟି ମାଡ଼ାନ୍ ସେଙ୍ଗେ ନୁ ସତ୍‍ ବାକ୍ୟ କେତାନଙ୍କ୍ ରହତନ୍ ନୁ ଶକ୍ତି ଇୱିଣ୍ଡ୍ ।
2TH 3:1 ଦାଦାନଡ଼ି ନୁ ଏଲାସ୍କ୍, ମାଡ଼େଙ୍ଗ୍‍ ନାନ୍ ମିକିଂଙ୍କ୍ କେତୁତାନ୍, ମା ସେଙ୍ଗେ ପ୍ରାର୍ତନା ମାଡ଼ାଟ୍ । ଯେ ପ୍ରବୁନ୍ ବାକ୍ୟ ନୁ ଶିକ୍ଷା ଯାପେ ସାରେପାକେ ଆଦ୍‍ତେ ଆଦ୍‍ଦିଙ୍କ୍ ମିକା ପ୍ରାର୍ତନା ମାଡ଼ାଟ୍, ମିଡ଼୍ ବେଲାନ୍ କି ଆଉ ଶିକ୍ଷାତିଙ୍କ୍‍ ସମ୍ମାନ୍ ଇଦ୍‍ତିଡ଼୍ । ଟିକ୍ ଆଦେଲେକାମ୍ ନାରୁଡ଼୍ ଆନ୍‌‍ତେ ସମ୍ମାନ୍ ହିଦ୍‍ତଡ଼୍ ।
2TH 3:2 ମେଣ୍ଡେ ମିକା ପ୍ରାର୍ତନା ମାଡ଼ାଟ୍, ଇଶ୍ୱର୍ ବେଲାନ୍ କି ମାନ୍‍ ଦୁଷ୍ଟ ନୁ ଗଲ୍‍କ୍ ନାରିଡ଼୍ କାୟ୍‍ଦାଗାଙ୍କ୍ ଗେଲ୍‍ସ୍ପିତଣ୍ଡ୍, ବାତେଙ୍କ୍‍ଇତ୍କେ ସାରେତଡ଼୍ ସୁସମାଚାର୍‍ଦେ ବିଶ୍ୱାସିଡ଼୍ ଆୟ୍‍ୟଡ଼୍ ।
2TH 3:3 ଇତ୍‍କେ ପ୍ରବୁ ବିଶ୍ୱାସ୍‍ତଣ୍ଡ୍ ! ଅଣ୍ଡ୍‌ ମିକିଂଙ୍କ୍ ଶକ୍ତିନଡ଼୍ ମାଡ଼ିତନ୍ ନୁ ଶୟ୍‍ତାନ୍‍ ନାରୁଡ଼୍ ତାଗାଙ୍କ୍ ଗେଲ୍‍ସ୍ପିତଣ୍ଡ୍ ।
2TH 3:4 ମିଇ ପର୍‍ର ଆଶେ ନେଃତାନ୍ ସେଙ୍ଗେ ପ୍ରବୁ ମାନ୍‍ ଆଶେ ଇତ୍‍ତନ୍ ନୁ ମାମ୍‍ମେ କେତୁତମ୍, ଆଦ୍ ମିଡ଼୍ ଯେ ମାଡ଼ୁତିଡ଼୍ ନୁ ମାଡ଼ମାନ୍ତିଡ଼୍, ଇଦ୍ ବିଷୟ୍‍ତେ ମାମ୍‍ମେ ନିଜାମ୍ ।
2TH 3:5 କ୍ରିଷ୍ଟନାଦ୍ ଶକ୍ତି ନୁ ପର୍‍ମେଶ୍ୱର୍‍ତାଦ୍ ପ୍ରେମ ଆର୍‍ଦାଗ୍ ମିୟାଦ୍ ହୃଦୟ୍ ବିଶ୍ୱାସ୍‍ତେ ମାନ୍‍ନାଙ୍କ୍ ଅଣ୍ଡ୍‌ ମିକିଂଙ୍କ୍ ବ୍ୟବହାର୍‌ ମାଡ଼ିତନ୍ ହିଞ୍ଜ ମାମ୍‍ମେ ପ୍ରାର୍ତନା ମାଡ଼ୁତମ୍ ।
2TH 3:6 ହୋ ଦାଦାନଡ଼ି ନୁ ଏଲାସ୍କ୍‍, ବେନଡ଼୍ ମଣ୍ଡି ଲେକାମ୍ ବାଦ୍‍କ ମାନ୍‍ତଡ଼୍ ନୁ ମାୟାଗାଙ୍କ୍ ସାରେ ଶିକ୍ଷା ଲେକାମ୍ ଆଚରଣ ମାଡ଼ଡ଼୍‍; ପ୍ରବୁ ଜିସୁନ୍ ପେଦେର୍‍ତେ ମିକିଂଙ୍କ୍ ଗଟ୍ ଇଦୁତମ୍, ଆଦ୍ ଦାଦାନଡ଼ାଗାଙ୍କ୍ ଜେକେ ମାନୁଟ୍ ।
2TH 3:7 ମିଡ଼୍ ପୁତ୍‍ତିଡ଼୍ ଯେ, ମିୟାଦ୍ ପାଡ଼୍‍ୟିତାଗ୍ ମା ଲେକାମ୍‌ ମାଡ଼ାନାଦ୍ ସାୟେ । ମିଇ ତଡ଼୍ ମାନ୍ଦାନ୍ ୱେଲେ ମାମ୍‍ମେ ବେସୁଙ୍କ୍‍ ବା ପାଡ଼୍‍ୟି ମାଡ଼ାନଙ୍କ୍ ମଣ୍ଡି ଆୟ୍‍ୱେ ମାତ୍‍ତମ୍ ।
2TH 3:8 ୱିଡ଼୍‍ସି ପଇସାତେ ବେନନାଗାଙ୍କ୍ କାଦି ତିନ୍‍ୱେ ମାତ୍‍ତମ୍ । ବା ବେନ ପୋର ବଜ୍ ଆୟ୍‍ୱେ ସେଙ୍ଗେ ମାମ୍‍ମେ ନାର୍‍କେତ୍ ପାୟାଲ୍ ତିପାଲ୍ ମାଡ଼ିମାତ୍‍ତମ୍ ।
2TH 3:9 ମିୟାଗାଙ୍କ୍ ବାତେଏ ତାତ୍‍ନଙ୍କ୍ ମାୟାଦ୍‌ ଯେ ଅଦିକାର୍‌ ଇଲେ, ଆଦ୍ ଆୟ୍‍ୟ, ବାତେଙ୍କ୍ ଇତ୍‍କେ ବେଦ୍‍ଲେକାମ୍ ମିଡ଼୍ ମାକିଂଙ୍କ୍ ଅନୁକରନ୍ ମାଡ଼ିତିଡ଼୍, ଆଦିନ୍ ସେଙ୍ଗେ ମାମ୍‍ମେ ମିଇ ପାକେ ନିଜେ ନିଜେତ୍ ଆଦର୍ଶ ଲେକାମ୍ ତଅତାନ୍ ସେଙ୍ଗେ ଆଦ୍‍ଲେକାମ୍ ମାଡ଼୍‍ତମ୍ ।
2TH 3:10 ମିଇ ତଡ଼୍ ମାନ୍ଦାନ୍ ୱେଲେ ମାମ୍‍ମେ କେସ୍‍ମାତ୍‍ତମ୍, “ବେନ୍ ନାରୁନ୍ ପାଡ଼୍‍ୟି ମାଡ଼ନ୍, ଅଣ୍ଡ୍‌ ତିନଣ୍ଡ୍ ।”
2TH 3:11 ଇଦ୍ ଗଟ୍ ମେଣ୍ଡେ କେତୁତମ୍, ମାମ୍‍ମେ କେଞ୍ଜ୍‍ତମ୍ ଯେ । ମିୟାଗାଙ୍କ୍ ବେସ୍‍ତୁଡ଼୍ ମଣ୍ଡ୍‍ଦେ ବାଦ୍‍କୁତଡ଼୍, ବାଗାତଡ଼୍ ପାଡ଼ିୟିଦାଗ୍ ଆଙ୍ଗ୍‍ଡ଼ାମ୍ କାୟ୍‍ ଇଟି ବାତ୍ ମିକା ମାଡ଼ଡ଼୍‍ ।
2TH 3:12 ହିଦ୍‍ଲେକାମ୍ ନାରିଡ଼୍‍କ୍ ଶାନ୍ତିତେ ପାଡ଼୍‍ୟି ମାଡ଼ି ନିଜେ ନିଜେତ୍ ଲେକାମ୍ ବାଦ୍‍କିଡ଼୍, ମାମ୍‍ମେ ପ୍ରବୁ ଜିସୁ କ୍ରିଷ୍ଟନ୍ ପେଦେର୍‍ତେ ଗଟ୍ ଇଦୁତମ୍, ଅଡ଼୍‌ ଜିୱୁଣ୍ଡ୍‍ତାଗ୍ ମେଣ୍ଡେସୁଦୁର୍ ସତର୍କ ଆସ୍ ନିଜେତ୍ ଜୀବିକା ଉପାର୍ଜନା ମାଡ଼ିତଡ଼୍ ।
2TH 3:13 ଦାଦାନଡ଼ି ନୁ ଏଲାସ୍କ୍‍, ମିଡ଼୍ ସତ୍ ପାଡ଼୍‍ୟି ମାଡ଼ାନଙ୍କ୍ ଆୟ୍‍ୱେମାଟ୍ ।
2TH 3:14 ହିଦ୍ ଚିଟିତେ ମିକିଂଙ୍କ୍ ବେନ୍ କାବୁର୍ ରତ୍‌ତମ୍, ମିୟାଗାଙ୍କ୍ ବେନ ଆଦ୍ ପାଲନ୍ ମାଡ଼ାଙ୍କ୍ ଇଚ୍ଛା ମାଡ଼ନ୍ । ଆସତ୍‍ ନାରିଙ୍କ୍ ଚିଏହ୍ନା ନେହେମୁଟ୍ ନୁ ଅନ୍‌ ତୋଡ଼ ମିୟାଦ୍ ସମ୍ପର୍କ୍ ୱିଡ଼୍‍ସିମୁଟ୍ ।
2TH 3:15 ଆଗେକ୍‍ ବା ଅଂକିଙ୍କ୍‌ ଶତ୍ରୁହିଞ୍ଜ୍ ହେର୍କା ମାଡ଼ାମାଟ୍, ଅଂକିଙ୍କ୍‌ ତାମୁଣ୍ଡ୍ ହିଞ୍ଜ ହେର୍କା ମାଡ଼ି ଅଂକିଙ୍କ୍‌ ବୁଦ୍‍ହିମୁଟ୍ ।
2TH 3:16 ଶାନ୍ତିଦାତା ପ୍ରବୁ ଇଶ୍ୱର୍ ମିକିଂଙ୍କ୍ ସାରେଦାମ୍ ବା ସାରେୱେଲେ ଶାନ୍ତି ଇୱିଣ୍ଡ୍ । ପ୍ରବୁ ସାରେଦିନାତ୍ ସେଙ୍ଗେ ମିଇ ତୋଡ଼ମାନିଣ୍ଡ୍ ।
2TH 3:17 “ନାନ୍ ପାଉଲ୍, ନାୟାଦ୍ ନିଜେତ୍ କାଇଦେ ଲେକି ନମସ୍କାର୍ ମାଡ଼ୁତାନ୍,” ସାରେ ଚିଟିନାଗ୍ ହିଦ୍ ଚିହ୍ନଲେକାମ୍ ନାନ୍ ଲେକ୍‍ତାନ୍ ।
2TH 3:18 ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ମିଇ ସାରେତଡ଼୍ ତ ମାନି । ଆମେନ୍‌ ।
1TI 1:1 ନାନ୍‍ ପାଉଲ୍‍, ମାନ୍‍ ମୁକ୍ତିଦାତାଲ୍‍ ନିଜେ ଇଶ୍ୱର ନୁ ମାନାଙ୍କ୍ ଆଶେତେ କ୍ରିଷ୍ଟ ଜିସୁନ୍‍ ଗଟ୍‍ ଲେକାମ୍‌ ଏଞ୍ଚ୍‍ତଣ୍ଡ୍ ପ୍ରେରିତ ପାଉଲ୍‍ ।
1TI 1:2 ଅନ୍‌‍ ଦର୍ମମାର୍‍ ତୀମତିନ୍‍ ଗାରେ ଲେକିମାନ୍ଦାନ୍ ଚିଟି, ବାବାଲ୍‍ ଇଶ୍ୱର୍‍ ନୁ ମାନ୍‍ ପ୍ରବୁ କ୍ରିଷ୍ଟ ଜିସୁ ମିକିଂଙ୍କ୍‍ ଅନୁଗ୍ରହ, କୃପା ନୁ ଶାନ୍ତି ଇଦ୍‍ତଣ୍ଡ୍ ।
1TI 1:3 ନାନ୍‍ ମାସିଦୋନିଆତା ଆଦାନ୍‍ୱେୟ୍ ମିକିଙ୍କ୍ କେସ୍‍ମାନ୍ଦାନ୍‍ ଲେକାମ୍‌ ମିଡ଼୍‍ ଏଫିସିତାଗ୍ ମାନୁଟ୍‍ । ଆଗେ ବେସ୍କ୍‍ତୁଡ଼୍‍ ବୁଲ୍‍ ଶିକ୍ଷାସାରେ ଇଦୁତଡ଼୍‍, ଅଡ଼୍‌‍କିଂଙ୍କ୍ ଆଗାଙ୍କ୍ ବନ୍ଦ୍‍ ମାଡ଼ାନଙ୍କ୍ ଆଦେଶ୍‍ ଇମୁଟ୍‍ ।
1TI 1:4 ଅଡ଼୍‌‍ ଲେକେତ୍‍ ୱେଷଡ଼୍‍ ନୁ ଆନିଦାଦିଡ଼ାଦ୍‍ ବଂଶତଡ଼୍‍କିଙ୍କ୍ ତିଆର୍‍ ମାଡ଼ାଙ୍କ୍‍ ଆତ୍‍ତଡ଼୍‍ । ଆୱ୍‍ସାରେ ୱିଡ଼୍‍ସାଙ୍କ୍ ଅଡ଼୍‌‍କିଂଙ୍କ୍ ଶିକ୍ଷାହିମୁଟ୍‍, ବାତେଙ୍କ୍‍ଇତ୍‍କେ ଆଦ୍‍ ମାତର୍‍ ଆଙ୍ଗ୍‍ଡ଼ାମ୍‍ ଗଲକ୍‍ ସୃଷ୍ଟି ମାଡ଼ିତ୍‍ । ବେନ୍‍ ସରଳ ବିଶ୍ୱାସ୍‍ତେ ଇଶ୍ୱର୍‌ତେ ଇଚ୍ଛା ପୁନ୍ଦାଙ୍କ୍ ଆଦ୍‍ତେ, ଇୱ୍‍ସାରେ ତାଙ୍କ୍‍କିଙ୍କ୍ ବାଦା ଇଦ୍‍ତା ।
1TI 1:5 ସାୟେତ୍‍ ହୃଦୟ୍‍, ନିର୍ମଲ ବିବେକ୍‍ ନୁ ପ୍ରକୃତ ବିଶ୍ୱାସ୍‍ତେ ବେନ୍‍ ପ୍ରେମ ଡାଟୁମ୍‍ ଆଦ୍‍ତେ, ଆଦିଙ୍କ୍‍ ଜାଗ୍ରତ୍‍ ମାଡ଼ାନ୍‍ ମାଇଦିଙ୍କ୍ ନେଣ୍ଡ୍‍ ନାନ୍‍ ଇଦ୍‍ ଆଦେଶ୍‍ ଇଦୁତାନ୍‍ ।
1TI 1:6 ବେସ୍କ୍‍ତୁଡ଼୍‍ ନାରୁଡ଼୍‍ ଇ ବେଡ଼ିୟି ବିଷୟ୍‍ତିଙ୍କ୍ ମାର୍ଙ୍ଗି ଆଙ୍ଗ୍‍ଡ଼ାମ୍‍ ଯୁକ୍ତିତର୍କତେ ଆର୍‍ବୁଲ୍‍କା ଆସ୍‍ମିନ୍ଦେଡ଼୍‍ ।
1TI 1:7 ଦର୍ମ ଗୁରୁ ଆସ୍‍ ଇଶ୍ୱର୍‌ତେ ବିଦି ବ୍ୟବସ୍ଥାତେ ବ୍ୟାକ୍ୟା ମାଡ଼ାଙ୍କ୍ ଅଡ଼୍‌‍ ଇଚ୍ଛା ମାଡ଼ିତଡ଼୍‍, କିନ୍ତୁ ବେନ୍‍ ବିଷୟ୍‍ତେ ଦୃଡ଼ ଶିକ୍ଷା ଇଦ୍‍ତଡ଼୍‍ ଆଦ୍‍ ଅଡ଼୍‌‍ ନିଜେ ବୁଜେମ୍‍ ଆୟଡ଼୍‍, ବେନ୍‍ସାରେ ବିଷୟ୍‍ତେ ନିଜାମ୍‍ତେ ମତ ପ୍ରକାଶ୍‍ ମାଡ଼ିତଣ୍ଡ୍, ଆଦ୍‍ ପ୍ରକୃତତେ ବାତେ, ଅଡ଼୍‌‍ ପୁନ୍‍ନଡ଼୍‍ ।
1TI 1:8 ମାମ୍‍ ପୁତ୍‍ମ୍‍ ଯେ, ବ୍ୟବସ୍ଥାତିଙ୍କ୍ ସାୟେ ବ୍ୟବହାର୍‌ ମାଡ଼୍‍କେ, ଆଦ୍‍ ସାୟ୍‍ ।
1TI 1:9 କିନ୍ତୁ ହେର୍କେ ନେହ୍‍ତ୍‍ ୱେୟ୍‍ତିତ୍‍, ଇ ବ୍ୟବସ୍ଥା ଦାର୍ମିକ ନାରୁଡ଼୍‍ତେ ମାଇଦିଙ୍କ୍ ଆୟ । ନିୟମ୍‍ତିଙ୍କ୍ ବାଙ୍ଗାମାଡ଼ାନ୍‍ ନାରୁଡ଼୍‍ ଆଦାର୍ମିକିଡ଼୍‍ତେ ମାଇଦିଙ୍କ୍ ଆଦ୍‍ ତିଆର୍‍ ଆସ୍‍ମିନ୍ଦେ । ବେନଡ଼୍‍ ସ୍ୱେଚ୍ଛାଚାରୀ, ବେନଡ଼୍‍ ଇଶ୍ୱର୍‌ତିଙ୍କ୍ ୱେର୍‍ୱଡ଼୍‍, ବେନଡ଼୍‍ ପାପ୍‍ ଅପକର୍ମତେ ବେନଡ଼୍‍ ଦର୍ମବାବ ବା ଆଦ୍ୟାମିବଦ ଇଲେ, ବେନଡ଼୍‍ ୟାୟ୍‍ବାବାଙ୍କ୍ ଆୱ୍‍କାଙ୍କ୍ ହେର୍କେ ମାଡ଼ାନଡ଼୍‍; ନାରୁଙ୍କ୍‍ ଆୱ୍‍କାନଡ଼୍‍,
1TI 1:10 ବେବିଚାରି, ଅସ୍ୱାବାବିକ କାମୁକତା, ନାରୁନ୍‍ ଡଙ୍ଗାନଡ଼୍‍ ନୁ ମିଚ୍‍ ସାକ୍ଷ୍ୟ ଇଦାନଡ଼୍‍, ବିଶ୍ୱାସ୍‍ ଇଲ୍‍ୱଡ଼୍‍ ନୁ ବେନଡ଼୍‍ ସତ୍‍ ଶିକ୍ଷାତେ ବିରୁଦ୍‍ ମାଡ଼ିତଡ଼୍‍ ଅଡ଼୍‌‍ ସେଙ୍ଗେ ବ୍ୟବସ୍ଥା ତିଆର୍‍ ଆତ୍‍ତେ ।
1TI 1:11 ଇଦ୍‍ ଉପଦେଶ୍‍ ଇଶ୍ୱର୍‌ତେ ଗୌରବ୍‍ ପ୍ରସଂଶା ସେଙ୍ଗେ ଆୟି । ଇଦ୍‍ ସାୟେତ୍‍ ଗଟ୍‍ ପ୍ରଚାର୍‍ ମାଡ଼ାନଙ୍କ୍‍ ଦାୟିତ୍ୱ ନାକିଙ୍କ୍‍ ଇତ୍‍ତଡ଼୍‍ ।
1TI 1:12 ନା ପର ବରସା ୱାଟି ଇଦ୍‍ ସେବା ପାଡ଼୍‍ୟି ନିଯୁକ୍ତି ମାଡ଼୍‍ତାଙ୍କ୍‍ ନାନ୍‍ ମାନ୍‍ ପ୍ରବୁ ଜିସୁଙ୍କ୍‍ ଦନ୍ୟବାଦ୍‍ ଇଦ୍‍ତାନ୍‍, ଅଣ୍ଡ୍‌ ନାକିଙ୍କ୍ ବିଶ୍ୱସ୍ତ ମନେ ମାଡ଼ି ସେବକ୍‍ ପଡ଼ିୟେତାଗ୍‍ ନିଯୁକ୍ତ ମାଡ଼ିମିନ୍ଦେଣ୍ଡ୍,
1TI 1:13 ମୁନେନ୍‍ ନାନ୍‍ ଜିସୁ କ୍ରିଷ୍ଟଙ୍କ୍‍ ନିନ୍ଦା ମାଡ଼ମାତ୍‍ତାନ୍‍, ଆଗେକ୍‍ବା ଅଣ୍ଡ୍‌‍ ନାକିଙ୍କ୍‍ ଯୋଗ୍ୟ ମନେ ମାଡ଼ି ନିଯୁକ୍ତ ମାଡ଼୍‍ତଣ୍ଡ୍‍ କିନ୍ତୁ ନାନ୍‍ ବାତ୍‍ ମାଡ଼ୁତାନ୍‍ ଇଞ୍ଜ ପୁନ୍‍ୱାଙ୍କ୍‍ ଇଶ୍ୱର୍ ନାକିଙ୍କ୍‍ ଦୟା ମାଡ଼୍‍ତଣ୍ଡ୍‍‍, ଅବିଶ୍ୱାସୀ ମାନ୍ଦାନ୍‍ ୱେଲେ ନାନ୍‍ ଆଲା ମାଡ଼ମାତ୍‍ତାନ୍‍ ।
1TI 1:14 ମା ପ୍ରବୁନ୍‍ ନାର୍ଗେ ଅନୁଗ୍ରହ ନୁ ଅନାଗ୍‍ ବିଶ୍ୱାସ୍‍ ମେଣ୍ଡେ ପ୍ରେମତେ ଆସ୍‍ମିନ୍ଦେନ୍‍ ।
1TI 1:15 ପାପିଡ଼୍‍କ୍‍ ଉଦାର୍‍ ମାଡ଼ାନ୍‍ ମାଇଦିଙ୍କ୍ କ୍ରିଷ୍ଟ ଜିସୁ ପୃତିବିତାଗ୍‍ ୱାସ୍‍ମାତ୍‍ତଣ୍ଡ୍‍, ହିଦ୍‍ ଅଣ୍ଡୟ୍‌‍ ନିଜାମ୍ ସତ୍‍ ସାରେତଡ଼୍‍ ହିଦିଙ୍କ୍ ପୁନ୍ଦାନ୍‍ ଦର୍‍କାର୍‍ । ଆ ପାପୀଡ଼ି ଲୋପେ ନାନ୍‍ ସାରେତଡ଼୍‍କିଙ୍କ୍ ଅନ୍‌‍ ବାଡ଼୍‍ୟଣ୍ଡ୍ ।
1TI 1:16 କିନ୍ତୁ ନା ଲେକାମ୍‍ ଅର୍‍ତୁଣ୍ଡ୍ ବେଡ଼୍‍ୟେ ପାପୀ ପ୍ରତି ଆନ୍‌ତେ ଇଶ୍ୱର୍‌ତେ କୃପା ନୁ କ୍ରିଷ୍ଟ ଜିସୁନ୍‍ ସହନଶିଳତା ନାକିଙ୍କ୍ ଅଣ୍ଡୟ୍‌ ୱେଷଡ଼୍‍ ମାଡ଼ି ନେହ୍‍ତଣ୍ଡ୍‍, ଆନ୍‌ୱେ ନାରୁଡ଼୍‍ ବେଲା ଜିସୁନାଗ୍‍ ବିଶ୍ୱାସ୍‍ ମାଡ଼ି ଅନନ୍ତ ଜିୱୁନ୍‍ ଲାବ୍ ମାଡ଼ିତଡ଼୍ ।
1TI 1:17 ସାରେ ବିଶ୍ୱ ଜଗତ୍‍ତେ ତନ୍ଦ୍‍ୱାଦ୍‍, ୱେରଣ୍ଡେ ଇଶ୍ୱର୍‌, ସାରେଦିନାତ୍‍ ରାଜାଲ୍‍, ଅଣ୍ଡୟ୍‌‍ମାତର୍ ଇଶ୍ୱର ଯୁଗ୍‍ଯୁଗ୍‍ ସମ୍ମାନିତ ନୁ ମହିମାନ୍ନିତ ଆଇଣ୍ଡ୍‍ । ଆମେନ୍‍ ।
1TI 1:18 ନା ମାର୍‍ ତୀମତି, ନି ବିଷୟ୍‍ତେ ମୁନେକଙ୍କ୍ ପ୍ରକାଶ ପାହେମ୍‍ ଆତ୍‍ତେ ବାବବାଣି ଲେକାମ୍‌ ନାନ୍‍ ନିକିଙ୍କ୍ ହି ଆଜ୍ଞା ହିଦୁତାନ୍‍ । ଆ ବାବବାଣିତିଙ୍କ୍ ଅମଗ ଅସ୍ତ୍ର ଲେକାମ୍‍ ବ୍ୟବହାର ମାଡ଼ି ନିମେ ଜିୱୁନ୍‍ ସଂଗ୍ରାମ୍‍ତେ ଜିଡ଼ି ଲାବ୍ ମାଡ଼ା ।
1TI 1:19 ବିବେକ୍‍ତିଙ୍କ୍ ସାୟେ ନେହ୍‍ସ୍‍, ନି ଦର୍ମ ବିଶ୍ୱାସତେ ଡ଼ୁଟାଙ୍କ୍‍ ମାନ୍‍ । ବେନ୍‍ ବେନ୍‍ଡ଼୍‍ ବିବେକ୍‍ତେ ଚେତାବନୀତିଙ୍କ୍ ୱିଡ଼୍‌ସି ମାଡ଼ି ନିଜର୍‍ ଦର୍ମବିଶ୍ୱାସ୍‍ତିଙ୍କ୍ ନଷ୍ଟ ମାଡ଼ିସ୍‍ ମିନ୍ଦେଡ଼୍‍ ।
1TI 1:20 ଇଡ଼୍‍ ଲୋପେଙ୍କ୍ ହୁମନାୟ ନୁ ଆଲେକ୍‍ଜାଣ୍ଡାର ମାତ୍‍ତଡ଼୍‍ । ହି ଇର୍‍ୱୁଡ଼୍‍କିଙ୍କ୍ ନାନ୍‍ ଶୟ୍‍ତାନ୍‍ତେ କାଇଦାଗ୍‍ ୱିଡ଼୍‍ସିସ୍‍ ଉପଯୁକ୍ତ ଦଣ୍ଡ ବିଦାନ ମାଡ଼୍‍ତାନ୍‍, ଉଏତ ଇଦିନ୍‍ ୱାରା ଅଡ଼୍‌‍ ଇଶ୍ୱର୍‌ତେ ନିନ୍ଦାତାଗାଙ୍କ୍‍ ୱେରେ ଆଦାନଙ୍କ୍‍ ଶିକ୍ଷା ପାଏମ୍‍ ଆଦ୍‍ତଡ଼୍‍ ।
1TI 2:1 ନାନ୍‍ ମୁନେନ୍‍ ଅନୁରଦ୍‍ ମାଡ଼ିତାନ୍‍, ଉପାସନା ମାଡ଼ାନ୍‍ ୱେଲେ ସାର୍ରେତଡ଼୍‍ ସେଙ୍ଗେ ଇଶ୍ୱର୍‌ତାଗ୍‍ ପ୍ରାର୍ତନା, ନିବେଦନ୍‍ ନୁ ଦନ୍ୟବାଦ୍‍ କେଲାଟ୍‍ ।
1TI 2:2 ଇଦେଲେକାମ୍‍ ଅନ୍‌ୟାୟ୍‌ତେ ଶାସନ୍‍ ମାଡ଼ାନଡ଼୍‍ ନୁ ରାଜାଲଡ଼୍‍ ସେଙ୍ଗେ ପ୍ରାର୍ତନା ମାଡ଼ାଟ୍‍, ବେଲାକି ଇଶ୍ୱର୍‌ତେ ବକ୍ତିତେ ଶାନ୍ତିତେ ମାନ୍‍ତାଡ଼୍‍ ନୁ ଆନ୍‌ୱେ ନାରୁଡ଼୍‍ ପ୍ରତି ସାୟେତ୍‍ ବ୍ୟବହାର୍‌ ମାଡ଼ି ସୁକାମ୍‍ ଶାନ୍ତିତେ ଜିୱୁଣ୍ଡ୍‍ ବାଦ୍‍କେ ପାର୍‍ଦ୍‍ତାଡ଼୍‍ ।
1TI 2:3 ଇଦ୍ ଲେକାମ୍ ପ୍ରାର୍ତନା ତ୍ରାଣକର୍ତ୍ତାଲ୍ ଇଶ୍ୱର୍‌ତେ କଣ୍ଡେତେ ଯଥାର୍ତ ନୁ ଗ୍ରହନ୍ ଯୋଗ୍ୟ ।
1TI 2:4 ସାରେତଡ଼୍ ପାପତାଗାଙ୍କ୍ ଉଦ୍ଦାର୍ ଆସ୍ ସତ୍‍ତିଙ୍କ୍‍ ପୁନିଡ଼୍‍, ଇଦ୍ ଅନ୍‌ ଇଚ୍ଛା ।
1TI 2:5 ୱେରନ୍ ମାତର୍ ଇଶ୍ୱର୍ ମିନ୍ତେନ୍, ମେଣ୍ଡେ ଇଶ୍ୱର୍ ନୁ ନାରିଡ଼ାଗ୍‍ ୱେରନ୍ ନାଡ଼୍‍ମେ ମିନ୍ଦେନ୍, ଅଣ୍ଡ୍‌‍ ଆଦୁତନ୍ କ୍ରିଷ୍ଟ ଜିସୁ, ୱେରନ୍ ନାରୁନ୍ ।
1TI 2:6 ଅଣ୍ଡ୍‌ ନାରୁଡ଼ାଦ୍‍ ମୁକ୍ତି ସେଙ୍ଗେ ନିଜେତିଙ୍ଗ୍ ଉସର୍ଗ ମାଡ଼୍‍ତନ୍ ଆଦିନ୍ ସୁଦୁଟ୍ ସମୟତେ ପ୍ରମାନିତ ଆସ୍‍ମିନ୍ଦେ ଯେ, ଇଶ୍ୱର୍ ସାରେ ନାରୁଡ଼୍‍କିଙ୍କ୍ ପରିତ୍ରାନ୍ ମାଡ଼ାଙ୍କ୍‍ ଇଚ୍ଛା ମାଡ଼ୁତନ୍, ଇଦିନାଦ୍‍ ସାକ୍ଷ୍ୟ ଇସ୍‍ମିନ୍ଦେଣ୍ଡ୍‍ ।
1TI 2:7 ଆଦ୍ ସତ୍ୟ ନୁ ବିଶ୍ୱାସ୍‍ ଗଟ୍ ଅଣଯିହୁଦୀଡ଼୍‍ ପାକେ ଗୋଷନା ମାଡ଼ାନ୍ ସେଙ୍ଗେ ନାନେ ୱେରନ୍ ପ୍ରେରିତଶିଷ୍ୟ ନୁ ଗୁରୁ ଲେକାମ୍ ୱାସ୍‍ମିନ୍ଦେନ୍, ନାନେ ମିତ୍ୟା କେଲନ୍ ବାତ୍‍ କେତୁତାନ୍, ଆଦ୍‍ ସାରେ ସତ୍ ।
1TI 2:8 ନାନ୍‍ ଚାଏମ୍‍ ଅଦୁତାନ୍‍ ଉପାସନାତାଗ୍ ପବିତ୍ର କାୟ୍‍ ତେଇସ୍‍ ସାରେତଡ଼୍‍ ପ୍ରାର୍ତନା ମାଡ଼ିଡ଼୍‍ । ମନ୍‍ତାଦ୍‍ ସାରେ ପ୍ରକାର୍‍ କପାମ୍‍ ନୁ ଇର୍ଷା ୱିଡ଼୍‍ସିୱିଡ଼୍‍ ।
1TI 2:9 ନାଟାକିଙ୍କ୍ ନାୟାଦ୍ ଅନୁରଦ୍‌, ଆୱୁ ନମ୍ର ନୁ ଯତ୍ନବାନ୍‍ ଆୟି । ମୂଲ୍ୟବାନ୍ ସିଲେ, କେଲ୍‍କିଙ୍କ୍‍ ସାୟେ ସଜାମାଡ଼ି ନୁ ସୁନା ରତ୍ନା ନେଡ଼େକ୍‌ କେର୍‍ୱକଟ,
1TI 2:10 ମୁତେକି ସାୟେ କାମ୍ ସେଙ୍ଗେ ନିଜେତ୍ ଦର୍ମପରାୟନ୍‍ତେ ପରିଚୟ ହିୱି ।
1TI 2:11 ମୁତେକି ନିରବ୍‍ତେ ନମ୍ର ଲେକାମ୍ ମାଞ୍ଜ୍ ଶିକ୍ଷା ହିଦାନାଦ୍ ଉଚିତ୍ ।
1TI 2:12 ଉପଦେଶ ହିଦାନାଦ୍ ବା ମାନେଇ ପୋର୍ ରାଜ୍‍ ମାଡ଼ାନ୍ ଅଦିକାର୍‌ ନାନେ ମୁତେକିଙ୍ଗ୍ ହିୱନ୍ । କିନ୍ତୁ ଆୱୁ କଟଆସ୍‍ କେଞ୍ଜି ।
1TI 2:13 ବାତେଙ୍କ୍‍ଇତ୍କେ ଇଶ୍ୱର୍ ମୁନେନ୍‍ ଆଦମତିଙ୍କ୍‍ ସୃଷ୍ଟି ମାଡ଼୍‍ତନ୍; ତାନ୍‍ପେର୍କେ ଅବାଙ୍କ୍‍ ସୃଷ୍ଟି ମାଡ଼୍‍ତଣ୍ଡ୍‍ ।
1TI 2:14 ଆଦମ୍ ମୁନେ ପ୍ରତାରିତ ଆୟନ୍, ମୁତେ କେ ପ୍ରତାରିତ ଆସ୍ ଇଶ୍ୱର୍‌ତେ ନିୟମ୍‍ ପାଲନ୍ ମାଡ଼ିମାତ୍‍ତେ ।
1TI 2:15 କିନ୍ତୁ ନାଟା ବୁଦ୍‍ତଡ଼୍‍ ବିଶ୍ୱାସ୍‍, ପ୍ରେମ ନୁ ପବିତ୍ର ଜିୱା କଟ ମାତ୍‍କେ, ଆଦ୍ ପିଲା ଜନମ୍‍ ମାଡ଼୍‍କେନେ ପରିତ୍ରାନ ଦର୍କ୍‍ତେ ।
1TI 3:1 ଉପାସକ ମଣ୍ଡଲିତିଙ୍କ୍ ଦାୟିତ୍ୱ ଆଦାନ୍ ସେଙ୍ଗେ ବେନ୍ ନାରୁଣ୍ଡ୍ ଇଚ୍ଛା ମାଡ଼ିତଣ୍ଡ୍‍, ଅଣ୍ଡ୍‌ ନିଜାମ୍ ୱେରଡ଼୍ ସାୟେତ୍ କାମ୍ ମାଡ଼ାନଙ୍କ୍ ଇଚ୍ଛା ମାଡ଼ିତଣ୍ଡ୍‍, ଇଦ୍ ଗଟ୍ ସତ୍ ।
1TI 3:2 ମଣ୍ଡଲିତେ ଇକାପାକାନଣ୍ଡ ନିର୍ଦୋଷ୍‍ ଚରିତ୍ର, ୱେରଡ଼୍ ମୁତେନ୍ ମୁଦ୍‍ପାଲ୍, ସତ୍ୟବାଦୀ, ଯତ୍ନବାନ୍‍ ନୁ ନାରୁଡ଼୍‍ ମୁନେ ସମ୍ମାନ୍‍ ଆଦେୟେତିତ୍ । ଅଣ୍ଡ୍‌‍ ଅତିତିପରାୟନ୍ ଆଦାନ୍ ମିନ୍ତେ ନୁ ସିକ୍ଷିତ୍ ଇଦାନ୍ ମାୟ୍‍ଦିଙ୍କ୍‍ ଦକ୍ୟତା ମାନ୍‍ତେ ।
1TI 3:3 ଅଣ୍ଡ୍‌ କାଲ୍ ଉନ୍ଦାନଣ୍ଡ୍ ବା ଗଲ୍‍କ୍‍ ଆସମାନ୍ଦାନ୍ ନାରୁନ୍ ଆୟକଟ, କୋମଳ ନୁ ଶାନ୍ତିତେ ମାନ୍ତନ୍ । ଅଣ୍ଡ୍‌‍ ଦନ୍‍ ଲୋବି ଆୟ୍‍ୱେ ମାନ୍‍ନ୍ତେ ।
1TI 3:4 ନିଜେତ୍ ପରିବାର୍‍ତିଙ୍କ୍ ଅଣ୍ଡ୍‌ ସାୟେ ଚାଲେମ୍‍ ମାଡ଼େ ପାର୍‍ଦାନ୍ ମିନ୍ଦେ ନୁ ଅଙ୍କ୍‌ ସମ୍ମାନ୍ ଇସ୍ ଅନ୍‌ ବାଦ୍ୟ ଆଦାନ୍ ସେଙ୍ଗେ ତାନ୍ ପିଲାକି ଶିକିତ୍ ଆସ୍‍ମାନ୍ଦାନ୍ ମିନ୍ଦେ ।
1TI 3:5 ବେନ୍‍ ନାରୁନ୍ ନିଜେତ୍‍ ପରିବାର୍‍ତିଙ୍କ୍ ଚାଲେମ୍‍ ମାଡ଼ାଙ୍କ୍ ପାର୍‍ୱଣ୍ଡ୍‍, ଅଣ୍ଡ୍‌ ଇଶ୍ୱର୍‌ତେ ଉପାସକ ମଣ୍ଡଲିତେ ଯତନ୍ ଆଦ୍‍ତନ୍ ବେଲା ?
1TI 3:6 ଅଣ୍ଡ୍‌ ବିଶ୍ୱାସ୍‍ତାଗ୍‍ ସିଦ୍ଦ ଆସ୍‍ ମାନ୍ଦାନ୍ ମିନ୍ଦେ; ଇଲୁକ୍‍ ଶୟତାନ୍ ଆଶେତେ ତୟି ଦଣ୍ଡନିୟ ଆଦାନ୍ ସମ୍ଭାବନା ମିନ୍ଦେ ।
1TI 3:7 ମଣ୍ଡଲିତେ ବାଇଦେତ୍ ନାରିଡ଼୍‍ ମିକା ଅଣ୍ଡ୍‌ ୱେରଣ୍ଡ୍ ସମ୍ମାନ୍‍ତେ ନାରିନ୍ ମାନ୍‍ତନ୍, ଇଲୁକ୍‍ ସହଜତେ ଶୟତାନ୍‍ତେ ଉଡ଼ିୟି ଦାଗ୍ ଆରାସ୍‍ ଅଣ୍ଡ୍‌ ବେଲାନ୍ କି ଅପମାନିତ ଆୟିମା କି ।
1TI 3:8 ଆଦ୍‍ ଲେକମ୍ ସେବକ୍‍ନଡ଼୍ ମିକା ଉଦ୍ଦାର୍ ମନ୍‍, ବିଶ୍ୱାସ୍‍ତେ ଗାଡ଼୍‍ସ୍‍ ଆଦାନ୍ ଦର୍‍କାର୍‍ । ଅଡ଼୍‌ କାଲ୍ ବା ଦନ୍‍ ଲବିଡ଼୍ ଆୟୱେ ମାନ୍‍ତଡ଼୍‍ ।
1TI 3:9 ମାନ୍‍ ଦର୍ମବିଶ୍ୱାତେ ପ୍ରକାଶିତ୍ ସତ୍ୟ ଅଡ଼୍‌‍ ନିର୍ମଲ ମନ୍‍ତେ ଗାଡ଼୍‍ସ୍‍ ଆସ୍‍ ବିଶ୍ୱାସ୍ ମାଡ଼ମାନ୍‍ତଡ଼୍‍ ।
1TI 3:10 ମଣ୍ଡଲିତେ ସେବା କାମ୍ ମାଡ଼ାଙ୍କ୍ ଅଦିକାର୍‌ ଆଦାନ୍ ମୁନେଙ୍କ୍ ଅଡ଼୍‌‍କିଂଙ୍କ୍ ମିକା ପରିକ୍ଷା ମାଡ଼େ ୱେଇତିତ୍ । ଇଦ୍ ପରିକ୍ୟାତାଗ୍‍ ପାସ୍‍ ଆତ୍‍କେ ଅଡ଼୍‌‍ ସେବାକାମ୍‍ଦାଗ୍ ମାନ୍‍ତଡ଼୍‍ ।
1TI 3:11 ଆଦ୍ ଲେକାମ୍ ତାମ୍‍ ନାଟାକି ମିକା ବାଗାତଡ଼୍‍କ୍‍ ନିନ୍ଦାମାଡ଼କଟ ମାନୁଟ୍, ସତ୍ୟବାଦୀ ନୁ ସାରେ ବିଷୟ ବିଶ୍ୱାସ୍‍ତେ ମାଡ଼ାନ୍ ଦର୍‍କାର୍‍ ।
1TI 3:12 ଅଡ଼୍‌‍ ଅଣ୍ଡୟ୍‌‍ ମୁତେନ୍‍ ମୁଦ୍‍ପାଲ୍‍ ଆସ୍‍ମାନ୍‍ତଡ଼୍‍, ମେଣ୍ଡେ ନିଜେତ୍ ନିଜେତ୍ ପିଲାକିଙ୍କ୍ ନୁ ପରିବାର୍‍ତିଙ୍କ୍‌ ଲେକେତ୍‍ ଚାଲା ମାଡ଼ମାନ୍‍ତଡ଼୍‍ ।
1TI 3:13 ବେନଡ଼୍ ଲେକେତ୍ ସେବା କାମ୍ ମାଡ଼ ୱାଦୁତଡ଼୍‍, ଅଡ଼୍‌ ନିଜେ ନିଜେତ୍ ସେଙ୍ଗେ ସୁକ୍ୟାତି ନୁ କ୍ରିଷ୍ଟ ଜିସୁନାଗେ ବିଶ୍ୱାସିଡ଼୍ ଲେକେତ୍‍ତେ ସାହାସ୍‍ ଲାବ୍‍ ମାଡ଼ିତଡ଼୍ ।
1TI 3:14 ଇଦ୍‍ ଚିଟି ଲେକାନ୍ ୱେଲେ, ଯାପେ ମି ଗାରେ ଆଦାନ୍‍ ସେଙ୍ଗେ ନାନେ ଇଚ୍ଛା ମାଡ଼ୁତାନ୍ ।
1TI 3:15 ନାୟାଦ୍ ଯଦି ୱାଦାନାଦ୍ ଡେରି ଆଦ୍‍ତେ, ଜିୱେତ୍ ଇଶ୍ୱର୍‌ତେ ପରିବାର୍ ଲେକାମ୍ ଇଦ୍ ଉପାସକ ମଣ୍ଡଲିତାଗ୍ ମାକିଙ୍କ୍‍ ବେଲାନ୍ ବ୍ୟବହାର୍‌ ମାଡ଼ାଙ୍କ୍ ଆଦ୍‍ତେ, ଇଦ୍ ଚିଟିତେ ଆଦ୍ ମିଡ଼୍ ପୁନ୍ଦ୍‍ତିଡ଼୍ । ଇଦ୍ ମଣ୍ଡଲିତେ ସତ୍ୟତାଦ୍‍ ଗୁଞ୍ଜେ ନୁ ବିତ୍ତିମୂଲ ।
1TI 3:16 ମାନ୍‍ ଦର୍ମବିଶ୍ୱାସତେ ଇଦ୍ ଗୁରୁତ୍ୱ ବିଷୟ୍‍ତିଙ୍କ୍‍ ବେନ ଅସ୍ୱିକାର୍ ମାଡ଼େ ପାର୍‍ୱଡ଼୍, ନାରୁନ୍ ମେନ୍ଦୁଲ୍ ପୟ୍‍ସ୍ ୱାସ୍‍ମାନ୍ଦାନ୍‍ କ୍ରିଷ୍ଟ, ସ୍ୱର୍ଗଦୂତକିନ୍ ତଡ଼୍‌ କାଇଲି ତଣ୍ଡ୍, ସାରେ ଜାତିକିନାଗ୍‍ ଅନ୍‌ ଦାର୍ମାମ୍‌ ଆତ୍‍ତଣ୍ଡ୍‍, ପୁରା ଜଗତ୍‍ତେ ନାରୁଡ଼୍‍ ଅଂକିଙ୍କ୍‌ ବିଶ୍ୱାସ୍‍ ମାଡ଼୍‍ତଡ଼୍‍, ଅଣ୍ଡ୍‌‍ ଗୌରବ୍‍ତେ ସ୍ୱର୍ଗତା ଆତ୍‍ତନ୍ ।
1TI 4:1 ପବିତ୍ର ଆତ୍ମା ବୁଜେମ୍ ଆତ୍‍ତେ ଲେକାମ୍‍ କେତୁତ୍‍ ଯେ, ପ୍ରତାରକ ପାପାତ୍ମାକିନ୍‍ କାରାପ୍‍ ଶିକ୍ଷାତାଗ୍‍ ରାୟି ଅଣ୍ଡୟ୍‌‍ଦିନେ ବେନ କ୍ରିଷ୍ଟ ବିଶ୍ୱାସତାଗାଙ୍କ୍ ୱେରେ ଆଦ୍‍ତଡ଼୍ ।
1TI 4:2 ଇଡ଼୍‍ ବେସ୍‍କ୍‍ତୁଡ଼୍‍ ବୁସା ନୁ ମିତ୍ୟାବାଦୀଡ଼୍‍ ଆଦ୍‍ତଡ଼୍‍, ଅଡ଼୍‌‍ୱାଦ୍‍ ବିବେକ୍‍ ଡଲ୍‍ତେ ।
1TI 4:3 ପେଣ୍ଡୁଲ୍ ମାଡ଼ାନାଦ୍ ନୁ ବେନା କାଦି ତିନ୍ଦାନାଦ୍ ଆୟ ଇଞ୍ଜ୍ ଅଡ଼୍‌ କେତୁତଡ଼୍ । କିନ୍ତୁ ବେନ୍ କ୍ରିଷ୍ଟବିଶ୍ୱାସୀଡ଼୍ ସତ୍ ସାରେ ମାଡ଼ିମିନ୍ଦେଡ଼୍, ଅଡ଼୍‌ ଇଶ୍ୱର୍‌ତେ ତିଆର୍ ମାଡ଼୍‍ତେ ସାର୍ରେ କାଦି ମାଇଦିଙ୍ଗ୍ ଅଂକିଙ୍କ୍‌ ଦନ୍ୟବାଦ୍ କେସ୍ ଆଦ୍ ନିଜାମ୍ ମନ୍‍ତେ ତିନ୍ଦେପାର୍‍ତନ୍ ।
1TI 4:4 ଇଶ୍ୱର୍ ବାତେ ତିଆର୍‍ ମାଡ଼ିମିନ୍ଦେନ୍, ଆଦ୍ ସାରେ ସାୟେ, ଆଗାଙ୍କ୍ ବେଦିଙ୍କ୍‍ବା ପାସ୍‍କାଙ୍କ୍‍ ପାର୍‍ଦାଙ୍କ୍ ଆୟ । ଅଂକିଙ୍କ୍‌ ଦନ୍ୟବାଦ୍ ମାଡ଼ି ଅନାଦ୍‌ ସାରେ ଦାନତିଙ୍କ୍ ସାରେ କୃତଜ୍ଞା ତଡ଼୍ ଗ୍ରହନ୍ ମାଡ଼ାନ୍ ଉଚିତ୍ ।
1TI 4:5 ଇଶ୍ୱର୍‌ତେ ବାକ୍ୟ ଏର୍କେ ମାଡ଼ି ଅଂକିଙ୍କ୍‌ ପ୍ରାର୍ତନା ମାଡ଼ାନ୍ ଦ୍ୱାରା ସାର୍ରେ ବିଷୟ ପବିତ୍ର ଆଦ୍‍ତେ ।
1TI 4:6 ସତ୍‍ତେ ପର ପ୍ରତିଷ୍ଟିତ ମାନ୍‍ ଦର୍ମବିଶ୍ୱାସ ନୁ ତତ୍ତ୍ୱେତେ ଅନୁପ୍ରନିତ ଆସ୍ ତୀମତି ନିମ୍ ଯଦି ମଣ୍ଡଲିତେ ଦାଦାଲଡ଼୍‍ ନୁ ଏଲାସ୍କିଙ୍କ୍ ହିୱୁ ସାରେ ଶିକ୍ଷା ଇତ୍‍କେ, କ୍ରିଷ୍ଟ ଜିସୁନ୍‍ ଅର୍‍ତୁନ୍ ସାୟେତ୍‍ ସେବକ ଆଦ୍‍ତିନ୍‍ ।
1TI 4:7 ଇଶ୍ୱର୍‌ତିଙ୍କ୍ ଅପମାନ୍ ମାଡ଼ମାନ୍ଦାନ୍ ମୁଲ୍ୟହିନ କିମ୍ୱଦନ୍ତିକିଙ୍କ୍ ପରିହାର ମାଡ଼ି, ମି ଦର୍ମଜିୱୁଣ୍ଡ୍‍ତେ ଶକ୍ତି ମାଡ଼ାଙ୍କ୍ ଅବ୍ୟାସ୍ ମାଡ଼ାଟ୍ ।
1TI 4:8 ମେନ୍ଦୁଲ୍‍ତେ ବ୍ୟାୟାମ୍ ଦର୍‍କାର୍ ମିନ୍ଦେ । କିନ୍ତୁ ଆଦ୍ୟାତ୍ମିକ୍ ସାଦନା ସାରେତ୍‍ ଲେକାମ୍ ଉପାୟ, ବାତେଙ୍କ୍‍ଇତ୍କେ ହିଦିନ୍ ମାର୍‍ଦିଙ୍କ୍ ନାରୁଡ଼୍ ଇରିଉଡ଼ୁ ଇଞ୍ଜେତ୍‍ ନାରିଡ଼୍ ନୁ ବବିଷ୍ୟତ୍‍ତେ ନାରୁଡ଼୍ ଜିୱୁନ୍ ଆସ୍ ମାନ୍ତଡ଼୍, ଇଞ୍ଜ୍ ପ୍ରତିଜ୍ଞା ପାହେମ୍ ଆଦ୍‍ତଡ଼୍ ।
1TI 4:9 ହିଦ୍ ନିଜାମ୍ ସତ୍ ନୁ ସାରେତଡ଼୍ ଇଦ୍ ସାରେ ମାଡ଼ି ପୂର୍ଣ୍ଣପ୍ରାନ୍‍ତେ ବିଶ୍ୱାସ୍ ମାଡ଼ନ୍ ଦର୍‍କାର୍‍ ।
1TI 4:10 ବେନ୍ ମୁକ୍ତିଦାତାନାଗ୍ ବିଶ୍ୱାସ୍ ମାଡ଼ାକେ ସାରେତଡ଼୍ ପରିତ୍ରାନ୍ ଲାବ୍ ମାଡ଼େପାର୍‍ତନ୍, ଆ ଜିୱୁନ୍ ତେ ଇଶ୍ୱର୍‌ତାଗେ ବର୍‍ସା ୱାଟି, ମାନାଡ଼୍ ଇସର୍ କଷ୍ଟ ସୀକାର୍ ମାଡ଼ି ହି କାମ୍ ମାଡ଼ି ଅଦୁତମ୍ ।
1TI 4:11 ହି ସାରେ ଶିକ୍ଷା ନୁ ନିର୍ଦ୍ଦେଶ ଅଡ଼୍‌‍କିଂଙ୍କ୍ ବୁଜାମାଡ଼ିମୁଟ୍ ।
1TI 4:12 ମିଡ଼୍ ନିଜର୍ ଗଟ୍ ତିର୍‍ୟାନାଦ୍, ଆଚରନ୍, ପ୍ରେମ୍, ବିଶ୍ୱାସ୍‍ ନୁ ଚରିତ୍ର ନିର୍ମଲତାରେ ଆଦର୍ଶ ତଅତେ ପାର୍‍ତଡ଼୍, ସୁଦୁର୍ ବୟସ୍‍ ଆସ୍‍ମାତ୍‍କେ ବା ମିକିଙ୍କ୍ ମଣ୍ଡଲିତାଗ୍ ବେନ ଅବଜ୍ଞା ମାଡ଼େପାର୍‍ୱଡ଼୍ ।
1TI 4:13 ନାନ୍ ମି ଗାରେ ୱାନା ଯାକ ମିଡ଼୍ ଦର୍ମଶାସ୍ତ୍ର କାର୍‍ତାନାଦ୍, ଉପଦେଶ ନୁ ଶିକ୍ଷା ହିଦାନ୍‌ କାମ୍ ମାଡ଼ମାନୁଟ୍ ।
1TI 4:14 ମଣ୍ଡଲିତେ ବୟସ୍‍ତେ ବେଡ଼୍‍ୟଡ଼୍ ନେତାଲଡ଼୍ ନିକିଙ୍କ୍ ଇଶ୍ୱର୍‌ତେ ବାନୀ କେଞ୍ଜ୍‍ପି ମି ପର୍ କାୟ୍‍ୱାଟି ମାଡ଼ାନ୍ ୱେୟ ମିଡ଼୍ ବେନ୍ ଆତ୍ମାତେ ଦାନ୍‍ ଲାବ୍ ମାଡ଼ିମାତ୍‍ ତିଡ଼୍, ଆଦିଙ୍କ୍ ପାସ୍କ୍‍ୱାଡ଼୍‍ ମାଡ଼୍‍ମାଟ୍ ।
1TI 4:15 ନାନ୍ ମାଡ଼ିମାନ୍ଦାନ୍ ସାରେ ବିଷୟ୍‍ ହୃଦୟ ତଡ଼୍ ପାଲନ୍ ମାଡ଼ାନ୍ ଅବ୍ୟାସ୍ ମାଡ଼ାଟ୍, ଫଲତେ ମି କାମ୍‍ ମାଡ଼୍‍ତାଦ୍ ସାର୍ରେତଡ଼୍‍ ଗାର୍ରେ ତଅନ୍‌ଦିତ୍‍ ।
1TI 4:16 ଆଲାହିକେ, ମିଡ଼୍ ନିଜେ ପରିତ୍ରାନ ପାହେମ୍ ଆଦ୍‍ତିଡ଼୍ ନୁ ୱେର୍ ଅର୍‍ତୁଡ଼୍ ପରିତ୍ରାନ୍ ପ୍ରାପ୍ତିତେ ସହାୟକ ଆଦ୍‍ତିଡ଼୍ ।
1TI 5:1 ବୟସ୍‍ତେ ବେଡ଼୍‍ୟକିଙ୍ଗ୍ ନିଜର୍‍ ବାବାଲ୍‍ ଇନା ହେର୍କା ମାଡ଼ାଟ୍ । ଅଡ଼୍‌‍କିଂଙ୍କ୍ ବର୍ସନା ମାଡ଼କଟ ନମ୍ରତେ ଆନୁଯୋଗ୍ ମାଡ଼ାଟ୍ । ସୁଦୁନଡ଼୍ ପ୍ରତି ତାମୁଡ଼୍‍ ଲେକାମ୍‍ ବ୍ୟବହାର୍ ମାଡ଼ାଟ୍ ।
1TI 5:2 ବୟସ୍‍ତେ ବେଡ଼୍‍ୟା ନାଟାକିଙ୍କ୍ ୟାୟା ନୁ ସୁଦୁର୍ ରାୱିଙ୍କ୍ ଏଲାସ୍କ୍‌ ଇଞ୍ଜ ମନେ ମାଡ଼ି ଆୱିନ୍ ମାର୍‍କିଙ୍କ୍ ପବିତ୍ର ଆଚରନ୍ ମାଡ଼ାଟ୍ ।
1TI 5:3 ୱେରଡ଼୍ ଆସ୍ ନିଃସହାୟ ଲେକାମ୍ ତାକମାନ୍ଦାନ୍ ରାଣ୍ଡିକିଙ୍କ୍ ମାନେମ୍‍ ମାଡ଼ାଟ୍ ।
1TI 5:4 ଯଦି ବେନ୍‌ଆଇ ରାଣ୍ଡିନ୍ ମାର୍‍ ପୌତ୍ରାଦି ମିନ୍ଦେଣ୍ଡେ, ଆୱୁ ମିନେଙ୍କ୍ ନିଜର୍ ପରିବାର୍‍ଦାଗ୍ ୟାୟବାବାଲ୍, ବାବାମହ ବା ୟାୟମାହୀଙ୍କ୍ ପ୍ରତି ଦର୍ମତଃ ନିଜର୍ କର୍ତ୍ତବ୍ୟ ପାଲନ୍ ମାଡ଼ି ଇଶ୍ୱର୍‌ତେ ପସନ୍ଦ୍‍ ଆୟ୍‍ମୁଟ୍‍ ।
1TI 5:5 ବେନ୍ ରାଣ୍ଡିଲ୍ ନିଜାମ୍ ତେ ୱେରଡ଼୍ ନୁ ଆଶ୍ରୟ ଇଲେ, ଆଦ୍‍ ଇଶ୍ୱର୍‌ତେ ପର ଆଶେ ୱାଟି, ଦିବାନିଶି ତାନ୍‍ ସାହାଯ୍ୟ ବିକ୍ୟା ମାଡ଼ମାନ୍ତେ ।
1TI 5:6 କିନ୍ତୁ ବେନ୍ ରାଣ୍ଡି ଆସ୍‍ବା ବୋଗବିଲାସ୍‍ତେ ଦିନାତିପାତ ମାଡ଼ିତ୍, ଆଦିଙ୍କ୍ ଜିୱୁନ୍‍ ମାଞ୍ଜ୍‍ବା ଡଲ୍‍ତେ ଇଞ୍ଜ ମନେ ମାଡ଼୍ ୱେୟତିତ୍ ।
1TI 5:7 ରାଣ୍ଡିକିଙ୍କ୍ ହି ବିଷୟତେ ସତର୍କ ମାଡ଼ିମୁଟ୍, ବେନ ବା ଆୱିନ୍ ବିରୁଦ୍ଦତେ ବାତ୍‍ ଅବିଯୋଗ୍‍ ମାଡ଼ାଙ୍କ୍ ସୁଯୋଗ୍ ପାଏମ୍ ଆୟମାକି ?
1TI 5:8 ବେନ୍ ନାରୁଣ୍ଡ୍ ତାନ୍ ନିଜର୍‍ ସ୍ୱଜନ ତଥା ନିଜର୍ କୁଟ୍‍ମାତେ ଯତ୍ନ ଆୟଣ୍ଡ୍, ଅଣ୍ଡ୍‌ ମା ଦର୍ମବିଶ୍ୱାସୀଡ଼ାଗାଙ୍କ୍ ଅଣ୍ଡ୍‌‍ ଅଦିକ୍‌ ନିନ୍ଦନିୟ ।
1TI 5:9 ମଦଲ୍ ଲେକ୍‍ତେ ଯୋଗ୍ୟତା ମାନ୍ଦାନ୍ ରାଣ୍ଡିକିଙ୍କ୍ ଅଣ୍ଡୟ୍‌ ତାଲିକା ମାଡ଼ାଟ୍ ବେନଡ଼୍ ବୟସ ଷାଟିଏ ବର୍ଷତ୍ ପର, ବେନଡ଼୍ ଅଣ୍ଡୟ୍‌‍ଦାମ୍ ମାତର୍ ପେଣ୍ଡୁଲ୍ ଆସ୍‍ମାନ୍‍ତା,
1TI 5:10 ପିଲାକିଙ୍କ୍ ଲେକେତ୍ ଯତନ୍ ଆୟନା, ଅବଗତକିଡ଼୍ ଆତିତ୍ୟ ମାଡ଼ିକାଡ଼୍ କ୍ରିଷ୍ଟିୟାନ୍ ଦାଦାଲ୍, ହେଲାସ୍‍କିଙ୍କ୍ ସେଙ୍ଗେ ନମ୍ର ଆଚରନ୍ ମାଡ଼ିକାଡ଼୍, ଗରିବ୍‍ ନାରୁଡ଼୍‍କିଙ୍ଗ୍ ସାହାଯ୍ୟ ମାଡ଼ିକାଡ଼୍ ହିସାରେ ସାୟେକମ୍ ସେଙ୍ଗେ ବେନଡ଼୍ ସମାଜ୍‍ତାଗ୍ କାତି ଲାବ୍ ମାଡ଼ିତଡ଼୍ ।
1TI 5:11 ସୁଦୁର୍ ବୟସତେ ରାଣ୍ଡିକିଙ୍କ୍ ତାଲିକାତାଗ୍ ନେହେମାଟ୍ । ଆୱୁ ମେଣ୍ଡନ୍‍ଦା‍ମ୍ ପେଣ୍ଡୁଲ୍‍ଆଦାନ୍ ଲାଲାସା ପୋଷନ୍ ମାଡ଼ାନ୍ ଦ୍ୱାରା ପ୍ରବୁ ଜିସୁନାଗେ ନେହେସ୍‍ମାନ୍ଦାନ୍ ପ୍ରତିଜ୍ଞା ନଷ୍ଟମାଡ଼ି ଅନ୍‌‍ଆଗାଙ୍କ୍ ଦୁରାମ୍ ଆଦାନାଦ୍ ଆଶଙ୍କା ମିନ୍ଦେ ।
1TI 5:12 ଅଡ଼୍‌‍ ତାମ୍‍ ମୁନେତ୍‍ ପ୍ରତିଜ୍ଞା ଲଘଂନ୍‍ ମାଡ଼ାନ୍‍ ମାୟଦିଙ୍କ୍‍ ଦଣ୍ଡ୍‍ ପାଏମ୍‍ ଆଦ୍‍ତା ।
1TI 5:13 ଇଡ଼୍ ଲକ୍ ଲକ୍‍ ଉଡି ସମୟ ଅପସୟ ମାଡ଼ିତଡ଼୍‍, ନାର୍ଗେ ନାରୁଡ଼୍‍ ବୁସା ୱେଷଡ଼୍ ନୁ ୱେରଣ୍ଡ୍‌ ଚର୍ଚା ମାଡ଼ି କେଲ୍‍ୱେ ଗଟି ସାରେ କେତିତଡ଼୍‍ ।
1TI 5:14 ସୁତରଂ ନାୟାଦ୍ ମନ୍‍ଦେ ଆଦୁତେ, ସୁଦୁର୍‍ ବୟସତାୱ ରାଣ୍ଡିକି ମେଣ୍ଡନ୍‍ଦାମ୍ ପେଣ୍ଡୁଲ୍‍ଆସ୍ ମାର୍‍ଦେ ମାୟାଡ଼୍‍ଦେ ୟାୟାସ୍ ୱେରଡ଼୍ ୱେର ଲେକେତ୍ ପୁନାଦ୍ ସଂସାର୍ ତିଆର୍‍ମାଡ଼ି । ଆଲାହିକେ, ମା ବିରୁଦ୍ଦ୍‍ତେ ମାନ୍ଦନ୍ ନାରୁଡ଼୍ ଇୱିଙ୍କ୍ ଆସ୍ ସମ୍ପ୍ରଦାୟତେ କାର୍‍ପ ମାଡ଼ାଙ୍କ୍ ଅବକାଶ ପାହେମ୍ ଆୟଡ଼୍ ।
1TI 5:15 ବେସ୍‌କ୍ ସୁନ୍ଦର୍ ବୟସ୍‍ତେ ରାଣ୍ଡିକି ଶୟତାନ୍‍ତେ ଚକ୍ରାନ୍ତତାଗେ ରାଲି ଆର୍ ମାର୍ଙ୍ଗି ଆଦୁତେ ।
1TI 5:16 ମେଣ୍ଡନ୍ ଦାମେ କେସ୍ ନେହେତୁତାନ୍, କ୍ରିଷ୍ଟବିଶ୍ୱାସୀ ହେଲାକିଙ୍କ୍ ନିଜର୍ ପରିବାର୍‍ତାଗ୍ ମାନ୍ଦାନ୍ ରାଣ୍ଡିକିଙ୍କ୍ ପଡ଼୍‌ପାନ୍‌ ବାର ନିଜେ କାଞ୍ଜାଟ୍ । ବେଦ୍‍ପୁଟୁଙ୍କ୍ ମଣ୍ଡଲି ହିୱିନ୍ ସେଙ୍ଗେ ବାରଗ୍ରସ୍ତ ଆୟକଟ, ନିରାଶ୍ରୟ ରାଣ୍ଡିକିଙ୍କ୍ ଯତ୍ନ ଆଦାଙ୍କ୍ ସମର୍ତ ଆଦ୍‍ତେ ।
1TI 5:17 ମଣ୍ଡଲିତେ ବେନଡ଼୍ ନେତାଲଡ଼୍ ଅଡ଼୍‌ ପଡ଼ିୟେତାଗାଙ୍କ୍ କୃତିତ୍ୱ ତଅତିତଡ଼୍, ବିଶ୍ୱଷତଃ ବେନଡ଼୍, କଷ୍ଟ ସୀକାର୍ ମାଡ଼ି ଶିକ୍ଷା ନୁ ପ୍ରଚାର୍ କାମ୍ ମାଡ଼ମାନ୍‍ତଡ଼୍, ଅଡ଼୍‌ ରେଣ୍ଡ୍‍ଗୁନ୍ ହାର୍‍ତେ ପରିଶ୍ରମିକ ଦର୍‍କାନ୍ ଉଚିତ୍,
1TI 5:18 ବାତେଙ୍କ୍‍ ଇତ୍କେ ଶାସ୍ତ୍ରତାଗ୍ ଲେକାମିନ୍ଦେ; ଶସ୍ୟ ପାଣ୍ଡ୍‌ସ୍ପମାନ୍ଦାନ୍ ୱେଲେ କନ୍ଦେତ୍ ମୁଟ୍‍ତାଗ୍ ମୁର୍‌ସୁଲ୍‌ ତଅମାଟ୍ । ମେଣ୍ଡେ “କାମ୍‍ମାଡ଼ାନଡ଼୍ ମିନ୍ଦେଡ଼୍‌ ତିପାଲ୍‌ତେ କାୟେ ପାହେମ୍‍ଆଦାଙ୍କ୍ ହକ୍‍ଦାର୍ ।”
1TI 5:19 ଇର୍‍ୱୁଡ଼୍ ବା ମୁନୁଡ଼୍ ସାକ୍ଷି ଇଲକଟ ମଣ୍ଡଲିତେ ଅର୍‍ତୁଣ୍ଡ୍ ବେଡ଼୍‍ବୟସ୍‍ତେ ନେତାନ୍ ବିରୁଦ୍ଦ୍‍ତେ ବାତେବା ଅବିଯୋଗ୍‍ ବିଚାର୍ ମାଡ଼ାନାଗ୍ ଆୟମାଟ୍ ।
1TI 5:20 କିନ୍ତୁ ବେନଡ଼୍ ପ୍ରକୃତେ ପାପ୍ କାମ୍‍ତାଗ୍ ମାନ୍ତ୍‍ତଡ଼୍, ୱେର୍‍ଅର୍‍ତୁଡ଼୍‍କ୍ ସତର୍କ ମାଡ଼ାନ୍ ମାଇଦିଙ୍କ୍, ଅଡ଼୍‌‍କିଂଙ୍କ୍, ପ୍ରକାଶ୍ୟତେ ବର୍ତ୍ସନା ମାଡ଼ାଟ୍ ।
1TI 5:21 ପ୍ରବୁ ଜିସୁ କ୍ରିଷ୍ଟ, ଦୂତ ନୁ ସ୍ୱୟଂ ଇଶ୍ୱର୍‌ତିଙ୍କ୍ ସାକ୍ଷି ୱାଟି, ହିସାରେ ନିର୍ଦ୍ଦେଶ ପାଲନ୍ ମାଡ଼ାଙ୍କ୍ ନାନେ ମିକିଙ୍କ୍ ଏକାନ୍ତ ଅନୁରଦ୍‌ ମାଡ଼ୁତାନ୍ । ବେନନ୍ ବିରୁଦ୍ଦ୍‍ତେ ପକ୍ୟପାତିତା ଲେକାମ୍ ବେନ୍‌ଆଇ କାମ୍ ମାଡ଼୍‍ମାଟ୍ ।
1TI 5:22 ତରବର ଆସ୍ କାଇଦେର୍ପନ୍ ହାର୍ର୍ ଇଶ୍ୱର୍‌ତେ କାମ୍‍ତେ ମାଇଦିଙ୍କ୍ ବେନଙ୍କ୍‍ବା ନିଯୁକ୍ତ ମାଡ଼୍‍ମାଟ୍ । ୱେର୍‍ଅର୍‍ତୁନ୍ ପାପ୍‍ତେ ନିଜ୍‍ତିଙ୍କ୍ ଲିପ୍ତ ମାଡ଼ାମା । ମିଡ଼୍ ନିଜ୍‍ତିଙ୍କ୍ ପୁରା ପବିତ୍ର ନେହେମୁଟ୍ ।
1TI 5:23 ମାତର୍ ଏର୍‍ହୁନକଟ, ମିୟାଦ୍ କାର୍‍ପହିତାନ୍ ଶକ୍ତି ଅଦିକ୍‌ ମାଡ଼ାଙ୍କ୍ ସୁଦୁର୍ ଇନା ଅଙ୍ଗୁର୍‌ କାଲ୍‍ ଉନୁଟ୍, ବାତେଙ୍କ୍‍ଇତ୍କେ ମିଡ଼୍ ବାରମ୍ୱାର୍ ଅସୁସ୍ଥ ଆଦୁତିଡ଼୍ ।
1TI 5:24 ବେସ୍‍କ୍‍ତଡ଼ାଦ୍ ଦୁଷ୍କର୍ମ ସର୍ବସାରନ୍‍ତେ ପ୍ରକାଶ୍ ପାହେମ୍ ଆଦ୍‍ତେ, ଅଡ଼୍‌ ଆଦିନ୍‌ମାଇଦିଙ୍କ୍ ଗାଟି ସିଟ୍‍ପାଟ୍ ବିଚାର୍‍ଲୟତେ ସମ୍ମୁକିନ ଆଦେୱେଇତିତ୍ । ମେଣ୍ଡେ ବେସ୍‍କ୍‍ତଡ଼୍ ପାପ୍‌ ନାର୍ଗେ ମାନ୍ଦେତେ ଦରା ପଡ଼େମ୍ ଆଦ୍‍ତଡ଼୍ ।
1TI 5:25 ଆଦେପୁଟୁଙ୍କ୍ ବେସ୍‍କ୍‍ତଡ଼କ୍ ଦର୍ମକର୍ମ ସହଜତେ ସାରେତଡ଼୍ ଉଡ଼୍ ପାର୍‍ତଡ଼୍ । କିନ୍ତୁ ମେଣ୍ଡେ ବେସ୍‍କ୍‍ତଡ଼୍ ସତ୍‍କର୍ମ ଆଦେପୁଟୁଙ୍କ୍ ପ୍ରକାଶ୍ ପାହେମ୍, ଆୟକଟ ମାତ୍‍କେ ସାରେଦିନା ମିଞ୍ଜି ମାନ୍ଦେପାର୍‍ୱଡ଼୍ ।
1TI 6:1 କ୍ରିଷ୍ଟବିଶ୍ୱାସି କ୍ରୀତଦାସନଡ଼୍ କର୍ତ୍ତାଲଡ଼୍‍କ୍ ସାରେକିଚବିଦି ସମ୍ମାନ୍ ଇଦ୍‍ତଡ଼୍ । ଆଲେକ୍, ଇଶ୍ୱର୍‌ତେ ବିରୁଦ୍ଦତେ ବା ମାନ୍‍ ଶିକ୍ଷା ସମ୍ପର୍କତେ ବେନ ବାତେ କାରାପ୍‍ ମାଡ଼େପାର୍‍ୱଡ଼୍ ।
1TI 6:2 ବେନଡ଼୍‍ଉ କର୍ତ୍ତାନଡ଼୍ “ଦାଦା,” ହେର୍କା ମାଡ଼ି ଅଡ଼୍‌‍କିଂଙ୍କ୍ ଯୋଥସିତ ସମ୍ମାନ୍ ଇଦାନ୍ ଲେଟ୍ ମାଡ଼୍‍ମାଟ୍, ବରଂ ଅଦିକ୍‌ ନିଷ୍ଟାପର୍ ଲେକାମ୍ ଅଡ଼୍‌ ସେବା ମାଡ଼ାଟ୍, ବାତେଙ୍କ୍‍ଇତ୍କେ ଅଡ଼୍‌‍ ମିକା କ୍ରିଷ୍ଟବିଶ୍ୱାସି ନୁ ଗାଟି ପ୍ରିୟ ନାରୁଡ଼୍‍ । ଇଦ୍ ସାରେ ବିଷୟ ମୀଇ ଶିକ୍ଷା ଇସ୍ ପ୍ରଚାର୍ ମାଡ଼ିତିଡ଼୍ ।
1TI 6:3 ବେନଡ଼୍ ପ୍ରବୁ ଜିସୁକ୍ରିଷ୍ଟଙ୍କ୍ ଶିକ୍ଷାତଡ଼୍ ସାନଞ୍ଜସ୍ୟ ମାନକଟ ନୁ ମାନ୍‍ ଦର୍ମ ଶିକ୍ଷାତେ ବିରୋଦ୍ ମାଡ଼ମାନ୍ଦା‍ନ୍ ମେଣ୍ଡନ୍ ଲେକାମ୍ ପ୍ରଚାର୍ ମାଡ଼ିତଡ଼୍,
1TI 6:4 ଅଡ଼୍‌ ମାତର୍ ଆଶେତେ ସ୍ପୀତ ୱିଡ଼୍‍ସି ମେଣ୍ଡେ ବାତ୍‍ ଆୟ । ଅଡ଼୍‌ ଶାସ୍ତ୍ରତେ ଅର୍ତ ଆସ୍ ରାମ୍‍କ୍ ମାଡ଼ିତଡ଼୍; ହିଗାଙ୍କ୍ ମାତର୍ କପାମ୍ ସନ୍ଦେହ, କୁତ୍ସାରଟନା ନୁ ଗଣ୍ଡଗଲ୍‍ ଆଦ୍‍ତେ ।
1TI 6:5 ଅଡ଼୍‌ ବିଚାର୍ ଲେକାମ୍ ଆସ୍ ଆସାମ୍ ଯୁକ୍ତିତର୍କ ତଡ଼୍ ସତ୍ୟତାଦ୍ ଅପଲାପ ମାଡ଼ିତଡ଼୍ । ଦର୍ମବିଶ୍ୱାସ୍‍ତିଙ୍କ୍ ମାତର୍ ସାଉକାର୍ ଆଦାନ୍ ଅଣ୍ଡୟ୍‌ ଆର୍ର୍ ଇଞ୍ଜ ଅଡ଼୍‌ ହେର୍କା ମାଡ଼ିତଡ଼୍ ।
1TI 6:6 ଦର୍ମପରାୟନ୍ ନାରୁଡ଼୍ ମୁନେଙ୍କ୍ କଞ୍ଜ୍ ସାଉକାର୍, ବାତେଙ୍କ୍‍ଇତ୍କେ ଅନାଦ୍‌, ବେସର୍ ମିନ୍ଦେ, ଆଚର୍‍ତିଙ୍କ୍ ଅଣ୍ଡ୍‌ ସନ୍ତୁଷ୍ଟ ।
1TI 6:7 ମାମେ ଇଦ୍ ଜଗତ୍‍ତିଙ୍କ୍ ବାତେ ଆସ୍ ତାତ୍‍ତମ୍ ? ବାତେ ତ ଆୟ । ମେଣ୍ଡେ ହିଗାଙ୍ଗ୍ ସାଙ୍ଗେତେ ଆସ୍ ମାଲ୍‍ସ୍ ଆଦାନାଦ୍ ? ବାତେ ଆୟ ।
1TI 6:8 ଆଲାହିତ୍‍କେ, ମାୟାୱ ଅନ୍‌ନ ବସ୍ତ୍ରତେ ସଂସ୍ଥାର୍ ଆଦେ ପାର୍‍ତମ୍, ଇଦ୍ ମା ସେଙ୍ଗେ ଯଥେଷ୍ଟ ଆୟ କି ?
1TI 6:9 ଦନ୍ ସମ୍ପତ୍ତିତେ ଲୋବ୍ ନାରିନାଗେ ପରିକ୍ଷା ନୁ ଚକ୍ରାନ୍ତ ଲୋପେଙ୍କ୍ ଲାଗିଆଦ୍‍ତେ; ଅନ୍‌ ମନ୍‍ଦାଗ୍ ଗାଟି ତୁଚ୍ଚ ଅନିଷ୍ଟ ଲାଳସା ଜାଗ୍ରତ ମାଡ଼ି ଆଦାଙ୍କ୍ ଦ୍ୱସଂ ନୁ ସର୍ବନାଶ ପାକେ ଲାଗିଆଦ୍‍ତେ ।
1TI 6:10 ଅର୍ତଲୋବ୍ ସାରେତଡ଼୍ ଅନର୍ତତେ ମୁଲ । ବେନଡ଼୍ ସାରେଦାମ୍ ମାତର୍ ଅର୍ତାଗମନ୍ ପନ୍ଥା ମେହେକ ମାନ୍‍ତଡ଼୍, ଅଡ଼୍‌ ଦର୍ମବିଶ୍ୱାସ୍‍ତିଙ୍କ୍ ଆରାମାଡ଼ିତଡ଼୍, ମରିମାନତେ ମାତର୍ ନୁ ଦୁଃକାମ୍‍ତେ ଅଡ଼୍‌ ହୃଦୟ କଷ୍ଟ ଆଦ୍‍ତେ ।
1TI 6:11 କିନ୍ତୁ ଆ ତୀମତି ନିମେ ୱେରଣ୍ଡ୍‍ ଇଶ୍ୱର୍‌ତେ ନାରୁନି ଆଦିଙ୍କ୍‍ ହି ସାରେତାଗାଙ୍କ୍ ନିମେ ଦୂରାମ୍ ମାନୁଟ୍ । ଦର୍ମତେ ନୁ ଇଶ୍ୱର୍‌ତେ ପାକେ ବିଶ୍ୱାସ୍, ପ୍ରେମ, ସହିଷ୍ଣତା ନୁ ସୌଜନ୍ୟ ଲେକାମ୍ ସଦ୍‍ଗୁତାୱ ପରିପୂର୍ଣ୍ଣ ଆଦାଙ୍କ୍ ଚେଷ୍ଟା ମାଡ଼ାଟ୍ ।
1TI 6:12 ବିଶ୍ୱାସ୍‌ତେ ସାୟେ ଯୁଦ୍‌ତାଗେ ପ୍ରାନପନ ମାଡ଼ାଟ୍, ଅନନ୍ତ ଜିୱୁନ୍ ପଇସ୍‌ ନେହେମୁଟ୍; ଆଦିନ୍ ସେଙ୍ଗେ ତ ମୀଡ଼୍ ଜିୱେ ଆସ୍‍ମିନ୍ଦେଡ଼ି ନୁ ନାର୍‍ଗେ ସାକ୍ଷିଙ୍କ୍ ସାକ୍ଷାତ୍‍ତେ ଲେକେତ୍‍ ସାକ୍ଷ୍ୟ ଇସ୍‍ମିନ୍ଦେଡ଼ି ।
1TI 6:13 ସାରେ ପଶୁକିନ୍ ଜିୱେ ଦାତାଲ୍ ଇଶ୍ୱର୍‌ତେ ମୁନେ ନୁ ପନ୍ତିଆସ୍ ପିଲାତନ୍ ମୁନେ ଦୃଡ଼ ବିଶ୍ୱାସ୍‍ତେ ପରିଚୟ ଇସ୍‍ମାନ୍ଦାନ୍ ପ୍ରବୁ ଜିସୁ କ୍ରିଷ୍ଟନ୍ ପେଦେର୍ତେ ମିକିଙ୍କ୍ ଆଦେଶ୍‍ ଇସ୍ କେତୁତାନ୍,
1TI 6:14 ପ୍ରବୁ ଜିସୁ କ୍ରିଷ୍ଟ ୱାଦାନ୍ ଦିନାଯାକ ମିକିଙ୍କ୍ ଇସ୍‍ମାନ୍ଦାନ୍ ଦର୍ମବିଦି ବିଶ୍ୱାସ୍‍ତେ ପାଲନ୍ ମାଡ଼ି ନିର୍ମଲ ନୁ ନିନ୍ଦେ ଆୟକଟ ମାନୁଟ୍‍ ।
1TI 6:15 ଅନାଦ୍‌ ମେଣ୍ଡେ ୱାଦାନାଦ୍ ଦିନାମ୍ ହେଉଦାନ୍ ଦିନାମ୍ ମାଡ଼ିତନ୍ ସ୍ୱୟଂ ଇଶ୍ୱର୍‍ କେନେସାୟ୍‍, ରାଜାଦିରାଜ, ପ୍ରବୁନଡ଼୍ ପ୍ରବୁ, ଅଦ୍ୱୀତିୟ ଅଦିପତି;
1TI 6:16 ଇଶ୍ୱର୍ ଅମର୍‍, ଅଣ୍ଡ୍‌ ମାତର୍ ମାନାଦ୍‍, ନାରିଡ଼୍‍ତେ ଏୱୁଦାଙ୍କ୍‍ ପାର୍‍ୱେ ୱେସ୍ ରାଜ୍ୟତେ ଅଣ୍ଡ୍‌ ଆଗେ ମାନ୍‍ତନ୍; ବେନ ଅଙ୍କ୍‌ ବେସୁଙ୍କ୍‍ ଉଡ଼ନ୍; ବେନ ବା ବେସୁଙ୍କ୍‍ ୱୁଡ଼େ ପାର୍‍ୱଣ୍ଡ୍ । ଅନ୍‌ ଗୌରବ୍ ନୁ ସ୍ୱର୍ଗ ରାଜ୍ୟ ଯୁଗ୍‍ଯୁଗ୍‍ ମାନି । ଆମେନ୍‍ ।
1TI 6:17 ବେନଡ଼୍ ମୁନେଙ୍କ୍‍କଞ୍ଜ୍ ସାଉକାର୍, ଅଡ଼୍‌‍ ବେଲାନ୍ କି ଆଙ୍କାରିଡ଼୍ ଆୟଡ଼୍ ନୁ ସାରେତ୍ ଦନ୍‍ଦେ ପର ଆସେ ମାଡ଼ଡ଼୍, ବରଞ୍ଚ ବୋଗ୍‍ଦେ ସେଙ୍ଗେ ସାରେତ୍‍ ବିଷୟ ନାର୍ଗେ ଲେକାମ୍ ମାକିଙ୍କ୍ ଦାନ ମାଡ଼ିତଡ଼୍ ବେନ୍ ଇଶ୍ୱର୍, ଅନ୍‌ ପର ଆଶେ ମାଡ଼ିତ୍,
1TI 6:18 ମେଣ୍ଡେ ଅର୍‍ତୁଡ଼୍ ସାହାଯ୍ୟତେ ସାରେତଡ଼୍ ସତ୍‍କାମ୍‍ଦେ ସାଉକାର୍ ଆଦ୍‍ତଡ଼୍; ମେଣ୍ଡେ ମୁକ୍ତ କାଇଦେ ନୁ ଉଦାର୍‍ତେ ଦାନ ମାଡ଼ିତନ୍, ଅଦିନ୍‌ ସେଙ୍ଗେ ଅଡ଼୍‌‍କିଂଙ୍କ୍ ଆଜ୍ଞା ଇମୁଟ୍;
1TI 6:19 ଇଦ୍ ଲେକେତ୍‍ ନାରିଡ଼୍ ଅଡ଼୍‌‍ ଆଲ୍‍ସି ଜିୱେତ୍‍ ସେଙ୍ଗେ ଲେକେତ୍ ଦନ୍ ନିଜେ ନିଜେ ସେଙ୍ଗେ ଦର୍‍କାଟ୍, ବେଦ୍‍ଲେକାମ୍ ପ୍ରକୃତେ ଜିୱୁନ୍ ପ୍ରାପ୍ତ ଆଦ୍‍ତଡ଼୍ ।
1TI 6:20 ହୋ ତିମତି, ନିୟାଗ୍ ବେନ୍‍ ଦାୟିତ୍ୱ ସମର୍ପିତ ଆସ୍‍ମିନ୍ଦେ, ଆଦ୍ ରକ୍ଷା ମାଡ଼େ; ଆସର୍ ବକୁଆତନ୍ ନୁ କେତାକେତି ଜ୍ଞାନ୍‍ତେ ଯୁକ୍ତିତର୍କତାଗାଙ୍କ୍ ୱେର୍‌ମାଟ୍‌;
1TI 6:21 ବେନ ଆଦ୍ ପାଲନ୍‍ ମାଡ଼୍‍ୱେ ବିଶ୍ୱାସ୍‍ତେ ମୁନେ ଆର୍ ବୁଲ୍‍କା ଆସ୍‍ମିନ୍ଦେଡ଼୍ । ଇଶ୍ୱର୍‌ତେ ଅନୁଗ୍ରହ ମୀଇ ଗାରେ ସାରେଦିନାମ୍ ମାନି ।
2TI 1:1 ନାନ୍‍ ପାଉଲ୍, କ୍ରିଷ୍ଟ ଜିସୁନ୍‍ନାଗେ ମାନ୍ଦାନ୍ ଜିୱେ ସମ୍ବଦୀୟ ପ୍ରତିଜ୍ଞା, ଲେକାମ୍ ଇଶ୍ୱର୍‌ତେ ଇଚ୍ଛା ତଡ଼୍ କ୍ରିଷ୍ଟ ଜିସୁନାଗେ ନାନେ ୱେରନ୍ ପ୍ରେରିତ ।
2TI 1:2 ନା ପ୍ରିୟ ମାର୍‍ ତୀମତିଙ୍କ୍ ନାନେ ଇଦ୍ ଚିଟି ଲେକ୍‍ତାନ୍ । ବାବାଲ୍ ଇଶ୍ୱର୍‍ ନୁ ପ୍ରବୁ ଜିସୁ କ୍ରିଷ୍ଟ ନିକିଙ୍କ୍ ଅନୁଗ୍ରହ, କୃପା ନୁ ଶାନ୍ତି ରହସିୱିନ୍ ।
2TI 1:3 ନା ଆନିଦାଦିଡ଼୍ ଲେକାମ୍ ନାନେ ବେନ୍ ଇଶ୍ୱର୍‌ତିଙ୍ଗ୍ ଲେକାତ୍ ହୃଦୟତେ ସେବା ମାଡ଼ ୱାସମିନ୍ଦେନ୍, ଅଙ୍କ୍‌ ଦନ୍ୟବାଦ୍ ଇସ୍ କେତୁତାନ୍ । ନାୟାଦ୍ ପ୍ରାର୍ତନା ତାଗ୍ ସାରେଦିନା ନାର୍କେପାୟାଲ୍‍ ନିକିଙ୍କ୍ ହେର୍କା ମାଡ଼ାନ୍ ୱେଲେ ନାନେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତାନ୍ ।
2TI 1:4 ନାନେ ବେଦ୍‍ଲେକାମ୍ ୱେଡ଼୍‍କେତେ ପରିପୂର୍ଣ୍ଣ ଆଦ୍‍ତାନ୍, ହିଦିନ୍ ସେଙ୍ଗେ ମିୟାଦ୍ କାଣ୍ଡେଡ଼୍‍ ନାକିଙ୍କ୍ ହେର୍କା ମାଡ଼ି ମିକିଙ୍କ୍ ଉଡ଼ାନ୍ ସେଙ୍ଗେ ଅଣ୍ଡୟ୍‌‍ ଦାମ୍ ଇଚ୍ଛା ମାଡ଼ୁତାନ୍ ।
2TI 1:5 ମିୟାଦ୍ କାକବାୟି ଲୋୟୀ ନୁ ମାତ୍‍ତା ଇଉନିସୀ ବେଦ୍‍ଲେକାମ୍ ବିଶ୍ୱାସ୍‍ ମାଡ଼ମାତ୍‍ତେ, ମିୟାଦ୍ ମିକା ଆ ହୃଦୟତେ ବିଶ୍ୱାସ୍‍ ମିନ୍ଦେ । ଇଦ୍ ଗଟ୍‍ ନାନେ ହେର୍କା ମାଡ଼ୁତାନ୍ । ମିୟାଦ୍ ଆଦ୍‍ ବିଶ୍ୱାସ୍‍ ମିନ୍ଦେ ଇଞ୍ଜ ନିଜାମ୍ ନାନେ ପୁତ୍‍ତାନ୍ ।
2TI 1:6 ନାନେ ନି ପରୁ କାୟ୍‍ ୱାଟ୍‍ଟେ ପେର୍କେ ମିଡ଼୍ ଇଶ୍ୱର୍‌ତାଗାଙ୍କ୍ ବେନ୍ ଶକ୍ତି ଦର୍‍ସ୍କି ମାତ୍‍ତିଡ଼୍, ଆଦିଙ୍କ୍ ଜିୱେ ମାଡ଼ି ନେହେତାନ୍ ସେଙ୍ଗେ ନାନେ ମିକିଙ୍କ୍ ହେର୍କା ୱାଟିସ ମାନ୍ତାନ୍ ।
2TI 1:7 ବାତେଙ୍କ୍‍ଇତ୍କେ ଇଶ୍ୱର୍‍ ମାନାଙ୍କ୍ ବିରୁତେ ଆତ୍ମା ଇୱଣ୍ଡ୍‍, ମାତର୍ ଶକ୍ତି, ପ୍ରେମ ନୁ ବୁଦ୍‌ ଇଲ୍‍ୱେ ଆତ୍ମା ଇସ୍‌‍ମିନ୍ଦେଣ୍ଡ୍ ।
2TI 1:8 ଆଦିଙ୍କ୍ ପ୍ରବୁ ଜିସୁନ୍ ବିଷୟତେ ଶାକ୍ଷ୍ୟ ଇଦାଙ୍କ୍ ସିଗ୍ ଆୟ୍‍ମାଟ୍; ଅନ୍‌ ସେଙ୍ଗେ ନାନେ ବନ୍ଦି ନା ସେଙ୍ଗେ ମିକା ସିଗ୍ ଆୟ୍‍ମାଟ୍ । ମାତର୍ ଇଶ୍ୱର୍‍ ଇସ୍‍ମାନ୍ଦାନ୍ ଶକ୍ତି ଲେକାମ୍ ମୀଇ କ୍ରିଷ୍ଟ ଜିସୁନ୍ ସୁସମାଚାର୍ ସେଙ୍ଗେ ଦୁଃକା‍ମ୍ ମାଡ଼ାଙ୍କ୍ ତିଆର୍ ଆୟ୍‍ମୁଟ୍ ।
2TI 1:9 ଅଣ୍ଡ୍‌ ମାନ୍‍ ସତ୍ କାମ୍‍ଦେ ପୁରସ୍କାର୍ ଲେକାମ୍ ଅଣ୍ଡ୍‌ ମାନାଙ୍କ୍ ଆହ୍ୱାନ୍ ମାଡ଼ଣ୍ଡ୍ ମାତର୍ ଅନ୍‌ ଅନୁଗ୍ରହତେ ଅନ୍‌ ହେର୍କେତେ ତିଆର୍‌ ମାଡ଼ାଙ୍କ୍‌ ମାନାଙ୍କ୍ ତାନ୍ ପ୍ରିୟଦାସ ଆଦାନ୍ ସେଙ୍ଗେ ହେଞ୍ଚିମିନ୍ଦେନ୍ । କ୍ରିଷ୍ଟ ଜିସୁନ୍ ଶାସନ୍‍ ନାର୍ଗ ୱାଡ଼୍‍ଷାତାଗାଙ୍କ୍ ଇଶ୍ୱର୍ ମାନାଙ୍କ୍ ଇଦ୍ ଅନୁଗ୍ରହତେ ପାତ୍ର ଇନା ମାଡ଼ି ନେହେସ୍‍ମିନ୍ଦେନ୍;
2TI 1:10 ଇଞ୍ଜେ ଇଦ୍ ଦାରାଦାମତେ ତଅନ୍‌ଦି ଆସ୍ ତ୍ରାଣକର୍ତ୍ତାଲ୍ କ୍ରିଷ୍ଟ ଜିସୁ ଇଦ୍ ସାରେ ବିଷୟତିଙ୍କ୍ କେସ୍‍ ମାଡ଼ିମିନ୍ଦେନ୍ । ଅଣ୍ଡ୍‌ ଡଲାନ୍ ଶକ୍ତିତିଙ୍କ୍ ମାପିତ୍‍ତନ୍ ନୁ ଅନ୍‌ ସୁସମାଚାର୍ ତୋଡ଼୍ ଅନନ୍ତ ଜିୱେତ୍ ଆର୍ ତିଆର୍ ମାଡ଼୍‍ତନ୍ ।
2TI 1:11 ଇଦ୍ ସୁସମାଚାର୍ ତେ ନାନେ ୱେରନ୍ ପ୍ରଚାର୍‍ତନ୍, ପ୍ରେରିତ ଶିଷ୍ୟ ନୁ ମେସ୍ତେରିନ୍ ଲେକାମ୍ ନିଯୁକ୍ତି ମାଡ଼ିମିନ୍ଦେନ୍ ।
2TI 1:12 ଅଦିନ୍‌ ସେଙ୍ଗେ ନାନେ ଇଉସାରେ ଦୁଃକାମ୍ ମାଡ଼ୁତାନ୍ । ବେନଙ୍କ୍ ନାନେ ବିଶ୍ୱାସ୍ ମାଡ଼ୁତାନ୍, ନାନେ ଅନ୍‌ ସୁଦୁଟ୍ ପରିସୟ ଦର୍ସକ୍‍ତାନ୍ ନୁ ଅଣ୍ଡ୍‌ ନାକିଙ୍କ୍ ବେନ୍ ଦାୟିତ୍ୱ ଇସ୍‍ମିନ୍ତେଣ୍ଡ୍, ଆଦ୍ ମାଡ଼ାଙ୍କ୍ ସାରେ ଦିନ୍ ଯାକ ଅଣ୍ଡ୍‌ ନାକିଙ୍କ୍ ସିମ୍ ଚାମ୍ ତାଗ୍ ନେହେତିତନ୍, ଆଦ୍ ନିଜାମ୍‍ତେ ପୁଞ୍ଜ୍ ନାନେ ଇଞ୍ଜେକ୍‍ ଯାକ ପୁରାପୁରି ଆଶେତନ୍ ଆସ୍‍ମିନ୍ତେନ୍ ।
2TI 1:13 ନାୟାଗାଙ୍କ୍ ବେନ୍‍ସାରେ ବାକ୍ୟ କେଞ୍ଜିମିନ୍ଦେଡ଼ି, କ୍ରିଷ୍ଟ ଜିସୁନ୍ ମୁନେଙ୍କ୍ ବିଶ୍ୱାସ୍‍ତେ ବା ପ୍ରେମତେ ଆଦ୍ ଆଦର୍ଶଲେକାମ୍ ପଇସ୍‍ ମାନୁଟ୍ ।
2TI 1:14 ମୀଇ କାଇଦେ ବାତେ ସମପ୍ତିତ୍ ବେନ୍ ସାୟେ ବିଷୟ, ଆଦ୍ ମିୟାଗ୍ ମାନ୍ତାନ୍ ପବିତ୍ର ଆତ୍ମାତେ ଲେକେତ୍‍ ନେହେସ୍‍ ମାନୁଟ୍ ।
2TI 1:15 ମିଡ଼୍ ପୁତ୍‍ତିଡ଼୍ ଫୁଗେଲ୍ ନୁ ହର୍ମଗେନା ତଡ଼୍ ମୁନେ ଏସିଆ ପ୍ରଦେଶ୍‍ତେ ସାରେତଡ଼୍ ନାକିଙ୍କ୍ ୱିଡ଼୍‍ସି ମିନ୍ଦେଡ଼୍‍ ।
2TI 1:16 ଅନିସ୍‌ଫରତେ ପରିବାର୍ତିଙ୍କ୍ ପ୍ରବୁ ଦୟା ମାଡ଼ିଣ୍ଡ୍, ବାତେଙ୍କ୍‍ଇତ୍କେ ଅଣ୍ଡ୍‌ ବାରମ୍ବାର୍ ନାକିଙ୍କ୍ ସ୍ୱାନ୍ତନା ମାଡ଼ିମିନ୍ଦେନ୍, ମେଣ୍ଡେ ନାନେ ବନ୍ଦି ଇଞ୍ଜ ଅଣ୍ଡ୍‌ ସିଗ୍ ଆୟଣ୍ଡ୍‍ ।
2TI 1:17 ରୋମ୍ ନଗର୍‍ତାଗ୍ ହେୱଦାନ୍ ସାଙ୍ଗେ ସାଙ୍ଗେ ଅଣ୍ଡ୍‌ ନାକିଙ୍କ୍ ମେହେକୁଡ଼ି ମିକା ନା ପାକେ ୱାସ୍‍ମାତ୍‍ତନ୍ ।
2TI 1:18 ମହାବିଚାର୍ ଦିନେତ୍‍ତେ ପ୍ରବୁ ଅନ୍‌ ସେଙ୍ଗେ ଦୟା ଆଇଣ୍ଡ୍ । ଏପିସୀତାଗ୍ ଅଣ୍ଡ୍‌ ନାକିଙ୍କ୍ ବେସର୍ ସେବା ମାଡ଼ିମାତ୍‍ତନ୍, ମିଡ଼୍ ଆୱୁ ସାରେ ଗଟ ପୁତ୍‍ତିଡ଼୍ ।
2TI 2:1 ନା ପ୍ରିୟ ମାର୍‍, କ୍ରିଷ୍ଟ ଜିସୁନ୍ ତୋଡ଼ କାୟ୍‍ଲାନ୍ ସେଙ୍ଗେ ଅନୁଗ୍ରମାମେ ଅନ୍‌ୟାୟ ବେନ୍ ଶକ୍ତି ଦରକିତ୍, ଆଗାଙ୍କ୍ ମିଡ଼୍ ଡାଟାମ୍‍ ଆୟମୁଟ୍ ।
2TI 2:2 ନାର୍ଗେ ସାକ୍ଷିଙ୍କ୍ ନାଗାଙ୍କ୍ ନାନେ ପ୍ରଚାର୍ ମାଡ଼ିମାନ୍ଦାନ୍ ବିଷୟତିଙ୍କ୍ ମିଡ଼୍ କେଞ୍ଜ୍‍ତିଡ଼୍ । ବାଗାତଡ଼କ୍ ଶିକ୍ଷା ହିଦାନ୍ ସେଙ୍ଗେ ପାର୍‍ଦାନ୍‍ ବିଷୟ୍‍ ନୁ ବିଶ୍ୱାସ୍‍ସେଙ୍ଗେ ନାରିକିଙ୍କ୍ ଇଉ ସାରେ ବିଷୟ ପାଲନ୍ ମାଡ଼ାଟ୍ ।
2TI 2:3 କ୍ରିଷ୍ଟ ଜିସୁନ୍ ୱେରଣ୍ଡ୍ ବିଶ୍ୱସ୍ତ ସୌନିକ୍ ଲେକାମ୍ ମିଡ଼୍ ଅନ୍‌‍ ସେଙ୍ଗେ ଦୁଃକା‍ମ୍ ମାଡ଼ାଟ୍ ।
2TI 2:4 ଯୁଦ୍‌ତାଗ୍‍ କାଇଲି ମାନ୍ଦାନ୍ ୱେଲେ ସୌନିକ୍ ମାତର୍ ତାନ୍ ସେନାପତିଡ଼୍‍କ୍ ସନ୍ତୁଷ୍ଟ ମାଡ଼ାନ୍ ସେଙ୍ଗେ ଆଗ୍ରହ ମାନ୍‍ନ୍ତେ । ଆସୁଙ୍ଗ୍ ଅଣ୍ଡ୍‌ ବାତେଆଇ ଯୁଦ୍‍ ପାଡ଼୍‍ୟି ୱିଡ଼୍‍ସି ମେଣ୍ଡେଅଣ୍ଡ୍‌‍ କାମ୍‍ତାଗ୍ ମନ୍ ଇୱନ୍ ।
2TI 2:5 ମିରାନ୍ ପ୍ରତିଯଗିତାଗ୍ କାଇଲିମାନ୍ଦାନ୍ କାର୍‍ସାନଡ଼୍ ପ୍ରତିଯଗିତାଗ୍ ନିୟମ୍‍ ଲେକାମ୍ ପାଲନ୍ ମାଡ଼୍‍ୱେ ମାତ୍‍କେ, ଆଗାଙ୍ଗ୍ ଅଣ୍ଡ୍‌ ଜିଡ଼୍‍ତେ କାମ୍ ଦାଗ୍ ପୁରସ୍କାର୍ ଲାବ୍ ମାଡ଼େପାର୍‍ୱନ୍ ।
2TI 2:6 ଗାଟି କଷ୍ଟ ମାଡ଼ି ଚାଷି ପାଣ୍ଡ୍‌ସ୍ପିମାନ୍ଦାନ୍ ଫସଲ୍‍ତେ ସାରେଦିନାତ୍‌ ତିପାଲ୍‌ ଦର୍‌କାନ୍ ଉଚିତ୍ ।
2TI 2:7 ନାନେ ବାତ୍‍ କେତୁତାନ୍, ମନ୍ଇସ୍ ଚିନ୍ତା ମାଡ଼ାଟ୍; ଆଲେକ୍ ହିଉସାରେ ବିଷୟତେ ଅର୍ତ ବୁଜେମ୍‍ ଆଦାଙ୍କ୍ ପ୍ରବୁ ମିକିଙ୍କ୍ ଶକ୍ତି ହିଦ୍‍ତନ୍ ।
2TI 2:8 ନାନେ ପ୍ରଚାର୍ ମାଡ଼ମାନ୍ଦାନ୍ ସୁସମାଚାର୍ ଲେକାମ୍ ବେନ୍ ଡଲିମାନ୍ଦାନ୍ ଜିସୁ କ୍ରିଷ୍ଟ ଦାଉଦ୍‍ ରାଜାନ୍ ବଂଶତେ, ଅଙ୍କ୍‌ ହେର୍କା ମାଡ଼ାଟ୍ ।
2TI 2:9 ହିଦ୍ ସୁସମାଚାର୍ ପ୍ରଚାର୍ ମାଡ଼୍‍ନାଙ୍କ୍ ନାନେ ଅପରାଦି ଲେକାମ୍ ଶୃଙ୍ଖଲାବଦ୍ଦ ଆସ୍ କଷ୍ଟ ବଗେମ୍ ଆଦୁତାନ୍ । କିନ୍ତୁ ଇଶ୍ୱର୍‌ତେ ବାଣୀତିଙ୍କ୍ ବେନ ବନ୍ଦି ମାଡ଼େପାର୍‍ୱଡ଼୍ ।
2TI 2:10 ଇଶ୍ୱର୍‌ତେ ହେଞ୍ଚିମାନ୍ଦାନ୍ ନାରିଡ଼୍ କ୍ରିଷ୍ଟ ଜିସୁନାଗେ ନାର୍ଗେ ପରିତ୍ରାଣ ନୁ ଅନନ୍ତ ଗୌରବ୍ ଲାବ୍ ମାଡ଼ାଟ୍, ଇଦ୍ ଲେକାମ୍ ନାନେ ସାରେ କଷ୍ଟ ମାଡ଼ୁତାନ୍ ।
2TI 2:11 ହିଦ୍ ଗଟ୍ ଅଣ୍ଡ୍‌ ନିଜାମ୍ ସତ୍, “ଅନ୍‌ ତଡ଼୍ ମାମେ ଯଦି ଡଲ୍‍ତମ୍, ଅନ୍‌‍ ତଡ଼୍ ମିକା ଜିୱେ ଆସ୍ ମାନ୍ଦତମ୍ ।
2TI 2:12 ଯଦି ମାନାଡ଼୍ ଦର୍ଯ୍ୟପଇସ୍ ମାନ୍ତାଡ଼୍, ଆଲେକ୍ ଅନ୍‌‍ତଡ଼୍ ରାଜ୍‍ ମାଡ଼ିକାଡ଼୍; ଯଦି ମାନାଡ଼୍ ଅଙ୍କ୍‌ ଅସ୍ୱିକାର୍ ମାଡ଼୍‍ୱାଲ୍, ଆଲେକ୍ ଅଣ୍ଡ୍‌ ମିକା ମାନାଙ୍କ୍ ଅସ୍ୱିକାର୍ ମାଡ଼ଣ୍ଡ୍;
2TI 2:13 କିନ୍ତୁ ଅନ୍‌ ସେଙ୍ଗେ ମାନାଡ଼୍, ଅବିଶ୍ୱସ୍ତ ଆତ୍‍କେ ମିକା, ଅଣ୍ଡ୍‌ ସାରେଦାମ୍ ବିଶ୍ୱସ୍ତ ମାନ୍‍ତନ୍, ବାତେଙ୍କ୍‍ଇତ୍କେ ଅଣ୍ଡ୍‌ ନିଜର୍ ବିରୁଦ୍ଦତେ କାରାପ୍‍ ବ୍ୟବହାର୍‌ ମାଡ଼େ ପାର୍‍ୱନ୍ ।”
2TI 2:14 ଇୱୁସାରେ ଗଟି ହେର୍କା ମାଡ଼ି ନାରିଡ଼୍‍କ୍‍ କାରାପ୍‍ ନୁ ଦସ୍‍ ଇଲ୍‍ୱେ ଗଲ୍‍କ୍‍ ମାଡ଼ାନଙ୍କ୍ ଅଡ଼୍‌‍କିଂଙ୍କ୍ ପ୍ରବୁନାଦ୍ ଲେକାଆତ୍‍ତେ ସାକ୍ଷ୍ୟ ଇମୁଟ୍ ।
2TI 2:15 ମିଡ଼୍ ସିଗ୍‍ ଆୟକଟ୍ ନିର୍ବୁଲ୍‍ ଲେକାତ୍ ଇଶ୍ୱର୍‌ତେ ସତ୍ ବାକ୍ୟ କେଲାଟ୍; ଆଲେକେ, ୱେରନ୍ ବିଶ୍ୱାସ୍ତେ ନାରୁନ୍‍ ଲେକାମ୍ ନିମେ ଇଶ୍ୱର୍‌ତେ ସାରେ ଶକ୍ତି ଲାବ୍ ମାଡ଼ିତିନ୍ ।
2TI 2:16 ବେନ୍ ଦର୍ମବାବଶୂନ୍ୟ ମଣ୍ଡି ବାକ୍ୟକେତାନ୍ ନାରିଙ୍କ୍ ଇଶ୍ୱର୍‌ତାଗାଙ୍କ୍ ହେକାମ୍ ମାଡ଼ିତ୍, ଅଣ୍ଡ୍‌ ସାରେତାଗାଙ୍କ୍ ମିଡ଼୍ ଯେକା ମାନୁଟ୍ ।
2TI 2:17 ବେନଡ଼୍ ଇଦ୍‍ଲେକାମ୍ ବାକ୍ୟ କେତିତଡ଼୍‍, ଅଡ଼୍‌ ଶିକ୍ଷା କାଡ଼୍‍ୟ ଆଦାନ୍ ପୁଣ୍ଡ୍ ଲେକାମ୍ ତେରାନଡ଼୍‍ ଅଡ଼୍‌ ଆଗାଙ୍କ୍ ମିନ୍ଦେଡ଼୍‍ ହୁମନାୟ ନୁ ଫିଲିତ ।
2TI 2:18 ଅଡ଼ାଦ୍‌ ପୁନରୁତ୍‍ତାନ୍ ଆତ୍‍ତେ ଇଞ୍ଜ କେସ୍ ସତ୍‍ ଆର୍‍ତାଗାଙ୍କ୍‍ ଜେକେ ଅଦୁତଡ଼୍, ମେଣ୍ଡେ ବେସ୍କ୍‌ତୁଡ଼ାଦ୍ ବିଶ୍ୱାସ୍ ୱୁଲ୍‍ଟା ମାଡ଼ିଇଦୁତଡ଼୍ ।
2TI 2:19 କିନ୍ତୁ ଇଶ୍ୱର୍ ବେନ୍ ଡୁଟାଙ୍ଗ୍‍ତେ ବିତ୍ତିବୂମି ମାଡ଼ିସ୍‍ ମିନ୍ତେନ୍, ଆଦିଙ୍କ୍ ବେନ ଉୱୁତେ ପାର୍‍ୱଡ଼୍ । ଆଦ୍ ବିତ୍ତିପ୍ରସ୍ତର ପରୁ ଲେକା ଆତ୍‍ତେ; “ଇଶ୍ୱର୍ ତାନ୍ ନିଜେତ୍ ନାରିଡ଼୍‍ ପୁନ୍ତନ୍ ବେନ ନିଜେତିଙ୍କ୍ ଇଶ୍ୱର୍‌ତେ ନାରୁନ୍ ଇନା ପରିଚୟ ଇଦ୍‍ତନ୍, ଅଣ୍ଡ୍‌ ସାରେ ଦୁଷ୍କର୍ମତାଗାଙ୍କ୍ ୱେରେ ଆଇନ୍ ।”
2TI 2:20 ୱେରନ୍ ସାଉକାର୍ ନାରିନ୍ ଲୋନ୍‌ ନାର୍ଗେ ଲେକେତ୍‌ କୁଣ୍ଡା ମାନ୍ତା । ଆଗେଙ୍କ୍ ବେସ୍‌କ୍ ମୂଲ୍ୟବାନ୍ ସୁନା ରୂପାତେ ତିଆର୍; ମେଣ୍ଡେ ବେସ୍‌କ୍ ସାସ୍ତେତେ ଦର୍କତାଉ ମାଣ୍ଡୁଲ୍‍ତେ ବା ୱେର୍‍କ୍‍ତେ ତିଆର୍ । ବେସ୍‌କ୍ ପାତ୍ର ପାଣ୍ଡୁକିନାଗ୍ ଉତ୍ସବ୍‍ତେ ଦର୍‍କାଡ଼୍‍ ଆଦ୍‍ତା; ବାଗାତାୱୁ ଦୈନନ୍ଦିନ କାମ୍‍କିନାଗ୍ ଲାଗେମ୍ ଆଦ୍‍ତା ।
2TI 2:21 ବେନଆଇ ସାରେ ପାପ କାରାପ୍ ତାଗାଙ୍କ୍ ନିଜେତିଙ୍ଗ୍ ଶୁଚି ନେହେତିତନ୍, ଅଣ୍ଡ୍‌ ପ୍ରବୁନ୍ କାମ୍‍ଦାଗ୍ ବ୍ୟବହୃତ୍ ଆଦ୍‍ତେ, ଅଣ୍ଡ୍‌ ପ୍ରବୁନାଗେ ଅନୁରକ୍ତ, ଅନ୍‌ ସେଙ୍ଗେ ଆଦ୍ ଦର୍‍କାର୍ । ବେନ ବାତେଆଇ ଲେକେତ୍‍ କାମ୍‍ତାଗ୍ ବିନିଯୁକ୍ତ ଆଦାନ୍ ଅଣ୍ଡ୍‌ ତିଆର୍‍ ।
2TI 2:22 ବେନଡ଼୍ ନିର୍ମଲ୍ ହୃଦୟତେ ଇଶ୍ୱର୍‌ତିଙ୍କ୍ ସାହାର୍ଯ୍ୟ ପ୍ରାର୍ତନା ମାଡ଼ମାନ୍ତନ୍, ଅଡ଼୍‌‍ ସଂସ୍ପର୍ଶତେ ମାଞ୍ଜ୍ ମିଡ଼୍ ଲେଇୟଡ଼୍‍ ଉତ୍ତେଜନାତିଙ୍କ୍ ଆୟତ୍ ମାଡ଼ିତଡ଼୍ ମେଣ୍ଡେ ଦାର୍ମିକ୍‍ତେ, ବିଶ୍ୱାସ୍ତେ, ପ୍ରେମ ନୁ ଶାନ୍ତି ଇଦାନ୍‍ ସେଙ୍ଗେ କାମ୍ ମାଡ଼ାଟ୍ ।
2TI 2:23 ମୁର୍କ ନୁ ବୁଦ୍‌ଇଲ୍‍ୱେ ଯୁକ୍ତିତର୍କ ନାରୁଡ଼ାଙ୍କ୍‍ ଯେକା ମାନୁଟ୍ । ମିଡ଼୍‍ ପୁତ୍‍ତିଡ଼୍, ଇୱୁସାରେତେ ପରିଣତି ସାରେ ଗଲ୍‍କ୍‍ ।
2TI 2:24 ପ୍ରବୁନ୍ ଦାସ ବିରଦ୍ ମାଡ଼ାନାଦ୍ ସାୟେ ଆୟ, ମାତର୍ ସାରେତଡ଼୍ ସେଙ୍ଗେ ଲେକେତ୍‍, ଶିକ୍ଷା ଇଦାନାଦ୍‍ ଲେକେତ୍‍ ।
2TI 2:25 ଅଙ୍କ୍‌ ବିରଦ୍ ମାଡ଼ମାନ୍ଦାନ୍ ନାରୁଡ଼୍‍କିଙ୍କ୍‍ ଦୋଷତୃଟି ଅଣ୍ଡ୍‌ ମୃଦୁ ଲେକାମ୍ ଦର୍ଶାମାଡ଼ମାନ୍ଦନ୍, ଅନୁତାପ୍ ମାଡ଼ି ସତ୍ ଉପଲବ୍ଦ ମାଡ଼ାନଙ୍କ୍ ଆୟି ତ ଅଣ୍ଡ୍‌‍ଦିନେ ଇଶ୍ୱର୍ ଅଡ଼୍‌‍କିଂଙ୍କ୍ ସୁଜଗ୍‍ ଇଦ୍‍ତନ୍ ।
2TI 2:26 ମେଣ୍ଡେ ବେନ୍ ଶୟତାନ୍ ଅଡ଼୍‌କିଂଙ୍କ୍ ତାନ୍ ଇଚ୍ଛା ସାଦନ୍ ମାଡ଼ାନ୍ ସେଙ୍ଗେ ବନ୍ଦି ମାଡ଼ିମିନ୍ତେ, ସଚେତନ୍ ଆସ୍ ତାନ୍ ଉଡ଼ୀଇ ଦାଗାଙ୍କ୍ ମୁକ୍ତ ଆଦ୍‍ତଡ଼୍ ।
2TI 3:1 ଇଦ୍ ପୁଞ୍ଜ୍‍ମାନୁଟ୍ ଯେ, ଶେଷଦିନାମ୍‍ତେ ବିପଦ୍ ୱାସ୍‍ ହେଉଦ୍‍ତେ ।
2TI 3:2 ନାରିଡ଼୍ ସ୍ୱର୍ତପର୍, ଲୋବି, ଆଂକାରୀ ନୁ ଆତ୍ମାବିମାନୀ ଆଦ୍‍ତଡ଼୍; ଅଡ଼୍‌ ୟାୟ ବାବାଙ୍କ୍ ଅପମାନ୍ ଇଦ୍‍ତଡ଼୍; ଅଡ଼୍‌ ମାନ୍‍ତାଗ୍ କୃତଜ୍ଞତା ନୁ ଅଦର୍ମତେ ମାୟି ଆଦ୍‍ତଡ଼୍,
2TI 3:3 ଅଡ଼୍‌ ଆଦ୍‍ତଡ଼୍ ନିର୍ଦ୍ଦୟ, ନିନ୍ଦେତଡ଼୍ ଇଂସାତଡ଼୍, ନୁ ବୟଙ୍କାର୍; ସାରେତଡ଼୍ ସାୟେତ୍‍ ବିଷୟତିଙ୍କ୍ ପାସ୍‍କିତଡ଼୍ ।
2TI 3:4 ଅଡ଼୍‌ ଆଶେତେ ସ୍ପୀତ ଆସ୍ ବିଶ୍ୱାସଗାତକ ନୁ ବିଚାର୍‌ ଆଦ୍‍ତଡ଼୍; ଅଡ଼୍‌‍ ଇଶ୍ୱର୍‌ତେ ବକ୍ତିତାଗାଙ୍କ୍ ଆମଦ୍ ପ୍ରମଦ୍‍ତିଙ୍ଗ୍ ସାରେଦାମ୍ ହେର୍କା ମାଡ଼ିତଡ଼୍ ।
2TI 3:5 ଅଡ଼୍‌ ବକ୍ତନଡ଼୍ ବଣ୍ଡ୍‍କ୍‍ତିଙ୍ଗ୍ ପଇଦ୍‍ତଡ଼୍, କିନ୍ତୁ ଆଗେତ୍‍ ଶକ୍ତିତିଙ୍କ୍ ଅସ୍ୱିକାର୍ ମାଡ଼ିତଡ଼୍; ଇଦ୍‍ଲେକାମ୍ ନାରିଡ଼ାଗାଙ୍କ୍ ଯେକା ମାନୁଟ୍ ।
2TI 3:6 ଇଡ଼ାଗାଙ୍କ୍‍ ବେସ୍‍ତୁଡ଼୍ ଜିଦ୍‍ଲେକାମ୍ ନାରିଡ଼୍ ମିନ୍ଦେଡ଼୍, ବେନଡ଼୍ ଲକ୍ ଲକ୍ ନେଙ୍ଗି ପାପତେ ବାରାକ୍ରାନ୍ତ ନୁ ବାତ୍‍ବାତା କାରାପ୍‍ ଅବ୍ୟାସ୍‍ତେ ଚାଲିତ୍ ମୁର୍କ ନାଟାକିଙ୍କ୍ ନିଜେତ୍ ବଶୀଭୁତ ମାଡ଼ିତଡ଼୍ ।
2TI 3:7 ବେନଡ଼୍ ସାରେଦାମ୍ ସତ୍ ପୁନ୍ଦାନ୍ ସେଙ୍ଗେ ଚେଷ୍ଟା ମାଡ଼ମାନ୍ତନ୍, କିନ୍ତୁ ତାନ୍ ସନ୍ଦାନ୍ ପାହେମ୍ ଆୟନ୍, ଇଦ୍‍ଲେକାମ୍ ନାଟାକିଂଙ୍କ୍ ଆୱୁ ନିଜେତିଙ୍ଗ୍ ବଶୀଭୁତ ମାଡ଼ିତା ।
2TI 3:8 ଯନ୍ନୀସ ନୁ ଯମ୍ୱ୍ରୀସ୍ ବେଲାନ୍ କି ମୋଶାନ୍‌ ବିରୁଦ୍ଦାଚରନ୍ ମାଡ଼ମାତ୍‍ତଡ଼୍, ଆଦେଲେକାମ୍ ମୁନେତ୍‍ ଦିନାମ୍‍ତେ ହି ଦୁରାଚାରୀଡ଼୍ ସତ୍‍ତେ ବିରୋଦ୍ ମାଡ଼ିତଡ଼୍ ଅଡ଼୍‌ ମସ୍ତିଷ୍କ ବିକୃତି ଗଟେମ୍ ଆଦ୍‍ତେ ନୁ ଅଡ଼୍‌ ଦର୍ମବିଶ୍ୱାସ୍ ବିଲପ୍ ଆତ୍‍ତେ ।
2TI 3:9 କିନ୍ତୁ ଅଡ଼୍‌ ଗାଟି ମୁନେ ଆଦେପାର୍‍ୱଡ଼୍ । ଅଣ୍ଡ୍‌‍ଦିନେ ସାରେତଡ଼୍‍ ପୁନ୍ଦ୍‍ତଡ଼୍, ଅଡ଼୍‌ ବେସର୍ ନିର୍ବୋଦ । ଯନ୍ନୀସ ନୁ ଯମ୍ୱ୍ରୀସ୍‍ତେ ଜିୱେତେ ବାତେ ଗଟେମ୍ ଆସ୍‍ମାତେ, ଅଡ଼୍‌ ଜିୱେତେ ମିକା ଆଲେକେ ଆଦ୍‍ତେ ।
2TI 3:10 ମିଡ଼୍ ନା ଶିକ୍ଷା, ନା ଆଚରନ୍ ନୁ ନା ଜିୱେତେ କାମ୍‌ ପେର୍କେ ମାଡ଼୍‍ତିଡ଼୍ । ନାୟାଦ୍ ବିଶ୍ୱାସ୍, ଶକ୍ତି, ପ୍ରେମ, ସହନଶୀଲତା ।
2TI 3:11 ନାୟାଦ୍ କଷ୍ଟ ନୁ ଦୁଃକାମ୍ ମିଡ଼୍ ଆଦାଙ୍କ୍‌ ଆଦ୍‌ତିଡ଼୍ ଆଣ୍ଟିୟୋକ୍‌, ଇକନିୟା ନୁ ଲୁସ୍ତ୍ରା ତେ ନା ସେଙ୍ଗେ ଆଦେଲେକାମ୍ ତାଡ଼ନା ଗଟେମ୍ ଆସ୍‍ମାତେ; ନାନେ ଆଦ୍ ସହ୍ୟ ମାଡ଼ିମାତ୍‍ତାନ୍, ମେଣ୍ଡେ ପ୍ରବୁ ନାକିଙ୍କ୍ ଆଉସାରେତାଗାଙ୍କ୍ ଉଦାର୍ ମାଡ଼ିମାତ୍‍ତନ୍ ।
2TI 3:12 ବେନ୍ ସାରେତଡ଼୍ କ୍ରିଷ୍ଟ ଜିସୁନ୍ ତଡ଼୍ ଦର୍ମଜିବନ୍ ଯାପନ୍ ମାଡ଼ାନଙ୍କ୍ ଇଚ୍ଛା ମାଡ଼ିତନ୍, ଅଡ଼୍‌ ତାଡ଼ନାତେ କଷ୍ଟ ଆତ୍‍ତନ୍ ।
2TI 3:13 କିନ୍ତୁ କପଟି ନୁ ପ୍ରବଞ୍ଚକନଡ଼୍ ପେର୍କେ ସର୍ବନାଶ ପାକେ ଅଡ଼୍‌ ବାଗାତଡ଼କ୍ ଟକାମାଡ଼ି ପେର୍କେ ନିଜେ ଟକେମ୍ ଆଦ୍‍ତଡ଼୍ ।
2TI 3:14 କିନ୍ତୁ ବେନ୍‍ ସାରେ ସତ୍‍ ଶିକ୍ଷା ମାଡ଼ି ଡାଟୁମ୍‍ତେ ବିଶ୍ୱାସ୍‍ ମାଡ଼ୁତିଡ଼୍‍, ଆଦ୍ ସାରେତାଗ୍ ମିଡ଼୍ ଡୁଟାଙ୍କ୍ ମାନୁଟ୍ । ମୀଇ ମେସ୍ତେରିଡ଼୍ ବେନଡ଼୍‍, ମିଡ଼୍ ପୁତ୍‍ତିଡ଼୍ ।
2TI 3:15 କ୍ରିଷ୍ଟ ଜିସୁନାଗେ ବିଶ୍ୱାସ୍‍ ମାଡ଼ି ପରିତ୍ରାଣ ଲାବ୍ ମାଡ଼ାନ୍ ବୁଦ୍ ବେନ୍ ପବିତ୍ର ଦର୍ମଶାସ୍ତ୍ରତାଗ୍ ଲେକାଆସ୍‍, ମିଡ଼୍ ପିଲେକଞ୍ଜ୍ ଆୱୁ ସାରେ ଶାସ୍ତ୍ର କାର୍‌ସ୍‌ ବୁଜେମ୍ ଆଦୁତିଡ଼୍ ।
2TI 3:16 ସାରେ ଶାସ୍ତ୍ର ଇଶ୍ୱର୍‍ ବିଦ୍ୟା ଇତ୍‍ତେ ପ୍ରନୀତ ସତ୍‍ ଡିଗିୱାସ୍‌ ନୁ ମିଚ୍‌ତେ ପ୍ରତିରଦ୍ ମାଡ଼ି ନୁ ବ୍ରମ କାଲ୍‍ପି ମାଡ଼ାନ୍ ସେଙ୍ଗେ ପରାମର୍ଶ ଇସ୍, ସତ୍‍ଜିୱୁ ବାଦ୍‍କାନଙ୍କ୍ ଦର୍ମଶାସ୍ତ୍ର ସାହାଯ୍ୟ ମାଡ଼ିତ୍,
2TI 3:17 ବେଲାନ୍ କି ଇଶ୍ୱର୍‍ ନାରୁଡ଼୍, ସିଦ୍ଦ ଆସ୍ ସାରେତ୍ ସାୟେ କାମ୍ ସେଙ୍ଗେ ତିଆର୍‍ ଆଦ୍‍ତେ ।
2TI 4:1 ଇଶ୍ୱର୍‌ତେ ମୁନେ ନୁ ସାରେତଡ଼୍ ଜିୱେ ଡଲ୍‍ତେ ନାରିଡ଼୍ ବିଚାର୍ ମାଡ଼ାନଙ୍କ୍ ନୁ ରାଜ୍‍ ମାଡ଼ାନଙ୍କ୍ ୱାସମାନ୍ଦାନ୍ କ୍ରିଷ୍ଟ ଜିସୁ ୱାଦାନ୍ ଦିନେ, ତାନ୍ ରାଜ୍ୟତିଙ୍କ୍ ଲେକେତ୍‍ ମାଡ଼ନ୍ ସେଙ୍ଗେ ନାନେ ମିକିଙ୍କ୍ ଇଦ୍ ଦୃଡ଼ ଆହ୍ୱାନ୍ ଇଦୁତାନ୍ ।
2TI 4:2 ସମୟ ବା ଅସମୟ ବିଚାର୍ ମାଡ଼କଟ୍, ମିଡ଼୍ ସାରେଦିନା ଆଦ୍ ବାକ୍ୟ ପରୁ ଗଟି ଇସ୍ ବୁଜାମାଡ଼ିତିଡ଼୍; ଦୌର୍ଯ୍ୟତେ ଶିକ୍ଷା ଇସ୍, ବେସୁଙ୍କ୍‍ ବର୍ତ୍ସନା ମାଡ଼ି, ବେସୁଙ୍କ୍‍ ବା ୱେଡ଼୍‍କେ ଇସ୍ ବାଗାତଡ଼୍‍ ମନ୍‍ତାଗ୍ ଅଦିନ୍‌ ସେଙ୍ଗେ ପ୍ରତ୍ୟୟ ଜନମ୍ ମାଡ଼ିତେ ।
2TI 4:3 ଅନ୍‌‍ଦିନେ ୱାଦ୍‍ତେ, ବେସୁଙ୍କ୍‍ ନାରୁଡ଼୍ ସତ୍‍ ଶିକ୍ଷାତିଙ୍କ୍‍ କେଞ୍ଜକଟ ମାନ୍ତଡ଼୍, ଅଡ଼୍‌ ମାତର୍ ନିଜେ ନିଜେତ୍ ଅବିଲାଷ ଚରିତାର୍ତ ମାଡ଼ାନ୍ ସେଙ୍ଗେ ଦାନ୍ଦେ ଆଦ୍‍ତଡ଼୍ ନୁ ଇ ଯୁଗ୍‍ତେ ଅଡ଼୍‌‍କିଂଙ୍କ୍ ସମର୍ତନ୍ ମାଡ଼ମାନ୍ଦାନ୍ ବଣ୍ଡ ଶିକ୍ଷାନଡ଼୍‍କ୍ ଅଡ଼୍‌ କାର୍ଙ୍ଗିତଡ଼୍ ।
2TI 4:4 ମେଣ୍ଡେ ସତ୍ ବାକ୍ୟତାଗ୍ କେଞ୍ଜକଟ୍ ୱେଷଡ଼ିନାଗ୍ ମନ୍ ଇସ୍ କେଞ୍ଜିତଡ଼୍ ।
2TI 4:5 ମିଡ଼୍ ସାରେତ୍‍ ବିଷୟତାଗାଙ୍କ୍ ସଚେତନ୍ ଆୟମୁଟ୍, କଷ୍ଟତେ ପାଡ଼୍‍ୟି ମାଡ଼ାଟ୍, ସୁସମାଚାର୍ ପ୍ରଚାର୍‍ତଡ଼୍‍କ୍ କାମ୍ ସାରେ ମାଡ଼ାଟ୍, ମୀଇ ସେବାତେ କାମ୍‍ ସାରେ ମାଡ଼ାଟ୍ ।
2TI 4:6 ନା ଜିୱୁନ୍‍ତିଙ୍ଗ୍ ବଲି ମାଡ଼ି ହିଦ୍ ଜଗତ୍‍ତିଙ୍କ୍ ୱିଡ଼୍‍ସି ମାଡ଼ାନ୍ ଦିନାମ୍ ୱାସ୍‍ହେଉତେ ।
2TI 4:7 ନାନେ ସାୟେ ଯୁଦ୍‌ତାଗେ ପ୍ରାଣପନ୍ ମାଡ଼୍‍ତାନ୍ । ଜିୱେତ୍ ମିରାନାଗ୍ ନାନେ ନିରୂପିତ ଆର୍ ଅଦିକ୍‌ ଲେକେତ୍‍ ମାଡ଼ିମିନ୍ଦେନ୍; ନାୟାଦ୍ ବିଶ୍ୱାସ୍‍ତେ ନାନେ ଦୃଡ଼ ମାତ୍‍ତାନ୍ ।
2TI 4:8 ଇଞ୍ଜେ ନାୟାଦ୍ ଦର୍ମପରାୟନ୍‍ତେ ସେଙ୍ଗେ ଜିଡ଼୍‍ତାଦ୍ ପୁରସ୍କାର୍ ନେହେତାଦ୍ ମିନ୍ତେ । ଅଣ୍ଡୟ୍‌ ଦିନେତେ ନ୍ୟାୟବାନ୍ ବିଚାର୍‍ ମାଡ଼ାନଣ୍ଡ୍ ପ୍ରବୁ ନିଜେ ନାକିଂଙ୍କ୍ ଆଦ୍ ପୁରସ୍କାର୍ ହିଦ୍‍ତନ୍ ମାତର୍ ନା ୱେରଙ୍କ୍ ଆୟ; ପ୍ରେମ ବକ୍ତି ତଡ଼୍ ବେନଡ଼୍ ଅନ୍‌ ୱାଦାନ୍‍ ଦିନାତିଙ୍କ୍ କେପିମିନ୍ଦେଡ଼୍, ସାରେତଡ଼୍ ଆଦ୍ ପୁରସ୍କାର୍ ଲାବ୍ ମାଡ଼ିତଡ଼୍ ।
2TI 4:9 ନା ପାକେ ୱାଦାନ୍ ସେଙ୍ଗେ ସିଷ୍ଟ୍‍ପାଟ୍ ଚେଷ୍ଟା ମାଡ଼ାଟ୍ ।
2TI 4:10 ଦୀମା ସାଂସାର୍‍ ତିଙ୍କ୍ ପ୍ରେମ ମାଡ଼ି ନାକିଂଙ୍କ୍ ୱିଡ଼୍‍ସିତ୍‍ତେ । ଆଦ୍ ଇଞ୍ଜେ ଥେସଲନିକୀତାଗ୍ ଆତ୍‍ତନ୍ । କ୍ରେସ୍‍କେନ୍‍ସ ଗାଲୀତିଆତାଗ୍ ନୁ ତୀତସ୍ ଡଲମାତିଆତାଗ୍ ଆତ୍‍ତଡ଼୍‍ ।
2TI 4:11 ମାତର୍ ଲୁକ ନା ପାକେ ମିନ୍ଦେନ୍ । ନୀଇ ସାଙ୍ଗେତେ ମାର୍କତିଙ୍ଗ୍ ତାତିତିନ୍; ଅଣ୍ଡ୍‌ ନାକିଙ୍କ୍ ନା କାମ୍‍ତାଦ୍ ସାହାଯ୍ୟ ମାଡ଼େପାର୍‍ତନ୍ ।
2TI 4:12 ତୁର୍‌କିକଞ୍ଜ୍‌ ନାନେ ଏଫିସସ୍‍ତା ରତ୍‌ତାନ୍‌ ।
2TI 4:13 ତ୍ରୋୟାତାଗ୍ କାର୍ପନ୍ ପାକେ ନାନେ ବେନ୍ ଚକାସିଲେ ୱିଡ଼୍‍ସି ୱାତ୍‍ତାନ୍, ନିମେ ୱାଦାନ୍ ୱେଲେ ଆଦିଙ୍କ୍ ସାଙ୍ଗେତେ ତାତିତିନ୍ । ନାୟାଉ ବଇ ନୁ ତଲ୍‍କେ ଲେକ୍‍ତାଦ୍‍ ବଇ ମିକା ତାତିତିନ୍ ।
2TI 4:14 କଂସାରି ଆଲେକ୍‍ଜାଣ୍ଡାର ନାୟାଦ୍ ନାର୍ଗେ ନଷ୍ଟ ମାଡ଼୍‍ତନ୍; ପ୍ରବୁ ତାନ୍ କାମ୍ ଲେକାମ୍‌ ଅଂକିଙ୍କ୍‌ ସାରେନାଗାଙ୍କ୍ ଦଣ୍ଡ ଇଦ୍‍ତନ୍ ।
2TI 4:15 ଲେକେତ୍‍ ଗଟି ପ୍ରଚାର୍‍ତିଙ୍ଗ୍ ଅଣ୍ଡ୍‌ ଲୋତ୍‍ତେକଞ୍ଜ୍ ବିରଦ୍ ମାଡ଼ମାତ୍‍ତନ୍, ଆଦିଙ୍କ୍ ଅନ୍‌ ପାକେ ନିମେ ସତର୍କତେ ଚଲେମ୍ ଆଦ୍‍ତିନ୍ ।
2TI 4:16 ପ୍ରତମ୍‌ ଦାମ୍ ବେସୁଙ୍କ୍‍ ନାକିଙ୍କ୍ ନିଜେତ୍‍ ପାକେ ସାହାଯ୍ୟ ମାଡ଼ଡ଼୍‍ ଆତ୍‍ତଡ଼୍, ବେନ ନା ପାକେ ମାନ୍‍ୱେ ମାତ୍‍ତଡ଼୍, ସାରେତଡ଼୍ ନାକିଂଙ୍କ୍ ୱିଡ଼୍‍ସି ଆତ୍‍ତଡ଼୍ । ଇଶ୍ୱର୍ ଅଡ଼ାଦ୍‌ ଇଦ୍ ଦୋଷ ପୟ୍‍ମା କି ।
2TI 4:17 ପ୍ରବୁ ନା ପାକେ ଆସ୍ ନାକିଙ୍କ୍ ଶକ୍ତିତନ୍ ମାଡ଼୍‍ତନ୍, ମେଣ୍ଡେ ନାନେ ଗଣ୍ଡ୍ରାସ୍‍ ମକତାଗାଙ୍କ୍ ନାନେ ରକ୍ଷା ଆତ୍‍ତାନ୍, ବେଲାନ୍ ନା ଦ୍ୱାରା ସୁସମାଚାର୍ ସମ୍ପୂର୍ଣ୍ଣତେ ପ୍ରଚାରିତ୍ ଆଦେପାର୍ଦେ ନୁ ଅଣଯିହୁଦୀଡ଼୍‍ ସାରେ ଆଦ୍ ଗ୍ରହନ୍ ମାଡ଼େ ପାର୍‍ତଡ଼୍ ।
2TI 4:18 ପ୍ରବୁ ନାକଂଙ୍କ୍ ସାରେ କାରାପ୍ କାମ୍‍ତାଗାଙ୍କ୍ ରକ୍ଷା ମାଡ଼୍‍ତନ୍ ନୁ ନାକିଂଙ୍କ୍ ରକ୍ଷା ମାଡ଼ି ତାନ୍ ସ୍ୱର୍ଗରାଜ୍ୟତା ଆଦ୍‍ତନ୍; ଯୁଗ୍‍ଯୁଗ୍ ଅନ୍‌ ମହିମା ଆୟି ଆମେନ୍‍ ।
2TI 4:19 ପ୍ରିସ୍କିଲା, ଆକ୍ୱିଲା ନୁ ଅନିସ୍‍ପର୍‍ତେ ପରିବାର୍‍ତିଙ୍କ୍ ନାୟାଦ୍ ନମସ୍କାର୍ କେଞ୍ଜ୍‍ପାଟ୍ ।
2TI 4:20 ଏରାଷ୍ଟ କରିନ୍ଥତତାଗ୍ ମିନ୍ଦେନ୍ । ଟ୍ରୋପିମସ୍‍ତିଙ୍କ୍ ଅଙ୍କ୍‌ ଅସୁସ୍ଥତା ସେଙ୍ଗେ ନାନେ ମିଲୀଟସ୍‍ତାଗ୍ ୱିଡ଼୍‍ସୀ ୱାତ୍‍ତାନ୍ ।
2TI 4:21 ଚାଲ୍ କାଲାମ୍ ତେ ମୁନେଙ୍କ୍ ହିଗେ ୱାଦନ୍ ସେଙ୍ଗେ ଚେଷ୍ଟା ମାଡ଼ାଟ୍ । ଇଉବୁଲସ୍, ପୁଦେନସ୍, ଲିନସ୍, କ୍ଲାଦିଆ ନୁ ଇଗେତ୍ ବାଗାତ୍ ସାରେ କ୍ରିଷ୍ଟବିଶ୍ୱାସି ଦାଦାନଡ଼୍‍ ମିକିଙ୍କ୍ ନମସ୍କାର୍ କେଞ୍ଜ୍‌ପୁତମ୍‌ ।
2TI 4:22 ପ୍ରବୁ ମୀଇ ହୃଦୟତାଗ୍ ସାରେଦାମ୍ ମାନିଣ୍ଡ୍ । ଇଶ୍ୱର୍‌ତେ ଅନୁଗ୍ରହ ମୀଇ ସାରେତଡ଼୍‍ ପରୁ ମାନି ।
TIT 1:1 ନାନ୍ ପାଉଲ୍, ଇଶ୍ୱର୍‌ତେ ଦାସ ନୁ ଜିସୁ କ୍ରିଷ୍ଟନ୍ ରହତେନଣ୍ଡ୍ ପ୍ରେରିତଶିଷ୍ୟ, ତୀତସ୍‍ତେ ବକେତ୍ ଲେକୁତାନ୍ । ଇଶ୍ୱର୍ ଏଞ୍ଚ୍‍ତେ ନାରୁଡ଼ାଦ୍ ବିଶ୍ୱାସ୍‍ତିଙ୍କ୍ ନାର୍ଗ୍ ମାଡ଼ାନଙ୍କ୍ ନୁ ମାନ୍‍ ଦର୍ମବିଶ୍ୱାସ୍‍ତାଦ୍ ସତ୍‍ତିଙ୍କ୍ ଅଡ଼୍‌‍କିଂଙ୍କ୍ ସଚେତନ୍ ମାଡ଼ାନଙ୍କ୍ ନାନ୍ ହେଞ୍ଚିମାନ୍ଦାନ୍ ଆସ୍‍ମିନ୍ଦେନ୍ ।
TIT 1:2 ବେଦ୍ ସାରେଦିନାତ୍ ଜିୱୁଣ୍ଡ୍ ପାଏମ୍ ଆଦ୍‍ଦାନ୍ ଆଶେତ୍ ପର୍‍ର ଆଦାରିତ୍ । ଇଶ୍ୱର୍ ମିତ୍ୟାବାଦୀ ଆୟ୍‍ୟଣ୍ଡ୍ ।
TIT 1:3 ଟିକ୍ ସମୟ୍‍ତେ ଅଣ୍ଡ୍‌ ଇଦ୍ ଗଟ୍ କେତ୍‍ତଣ୍ଡ୍ । ମାନ୍‍ ମୁକ୍ତିଦାତାଲ୍ ଇଶ୍ୱର୍‌ତେ ଆଦେଶ୍‌ତଡ଼୍ ଇଦ୍ କେତାନଙ୍କ୍ ନାକିଂଙ୍କ୍ ଦାୟିତ ଇତ୍‍ତଡ଼୍ ।
TIT 1:4 ତୀତସ ନା ସାମାନ୍‍ ବିଶ୍ୱାସତେ ମାର୍‍, ବାବାଲ୍ ଇଶ୍ୱର୍ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନ୍ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ ।
TIT 1:5 ସାରେ ଆୟ୍‍ୱେ ପାଡ଼୍‍ୟି ସାରେ ମାଡ଼ାନଙ୍କ୍, ମେଣ୍ଡେ ନାୱାଦ୍ ଗଟ୍ ଲେକାମ୍‍ତେ ସାରେ ଟାୱୁନ୍‍କିନାଗ୍ ମଣ୍ଡଲି ମୁକ୍ୟାଲଡ଼୍‍କିଂଙ୍କ୍ ଏଞ୍ଚାନଙ୍କ୍ ନାନ୍ ନିକିଂଙ୍କ୍ କ୍ରୀଟତାଗ୍ ୱିଡ଼୍‍ସି ୱାତ୍‍ତାନ୍; ନାୟାଦ୍ ଶିକ୍ଷାତିଙ୍କ୍‍ ଏର୍କା ମାଡ଼ାଟ୍;
TIT 1:6 ୱେରଣ୍ଡ୍ ମଣ୍ଡଲିତ୍ ନେତାଲ୍ ଆଦାନ୍ ସେଙ୍ଗେ ନିର୍ଦୋଷ୍‍, ବେନ୍ ନାରୁଡ଼୍ ଦଷି ଆୟ୍‍ୟଣ୍ଡ୍ ନୁ ୱେରଡ଼୍ ମୁତେନ୍ ମୁଦ୍‍ପାଲ୍, ବେନ ମାର୍‍କ୍ ବିଶ୍ୱାସି ମାନ୍‍ତଡ଼୍ ନୁ ବେସୁଟ୍‌ ବା କାରାପ୍ ବ୍ୟବହାର୍‌ ମାଡ଼ଡ଼୍‍ କି ମୁର୍କ ଆୟ୍‍ୟଡ଼୍, ଅଡ଼୍‌‍କିଂଙ୍କ୍ ଏଞ୍ଚାଟ୍ ।
TIT 1:7 ବାତେଙ୍କ୍ ଇତ୍‍କେ ଦର୍ମଗୁରୁ, ଇଶ୍ୱର୍‌ତେ ନିୟମ୍ ଲେକାମ୍‍ତେ ନିର୍ଦୋଷ୍‍ ଆସ୍ ମାନ୍ଦାନ୍ ଦର୍‍କାର୍; ଅଣ୍ଡ୍‌ ନିଜେତ୍ ଇଚ୍ଛାତେ ପାଡ଼୍‍ୟି ମାଡ଼ମାନ୍‍ତଣ୍ଡ୍ କି କପାମ୍ କି କାଲ୍ ଉନ୍ଦାନଣ୍ଡ୍ କି ଗଲ୍‍କିନଣ୍ଡ୍ କି ଦନ୍ ଲବି ଆୟୱେ ମାନ୍‍ତଣ୍ଡ୍ ।
TIT 1:8 ବାତେଙ୍କ୍ ଇତ୍‍କେ ଅଣ୍ଡ୍‌ ଅତିତିପ୍ରିୟ ଆସ୍ ମାନ୍‍ତଣ୍ଡ୍, ସାୟେତ୍ ବିଷୟ୍‍ତେ ଅନ୍‌ରଗ୍‌, ସାୟେତ୍ ବୁଦି, ନ୍ୟାୟ ଚିନ୍ତେତଣ୍ଡ୍, ସାଦୁ ନାରୁଡ଼୍ ନୁ ଲେକାମ୍ ବ୍ୟବହାର୍‌ ମାଡ଼ାନଣ୍ଡ୍ ଆୟିଣ୍ଡ୍,
TIT 1:9 ମେଣ୍ଡେ ଅଣ୍ଡ୍‌ ବେଲା ସାୟେତ୍ ଶିକ୍ଷା ଇସ୍ ସାର୍‍ଦେ ମାଡ଼ିତନ୍ ନୁ ବିରୁଦ୍ ମାଡ଼ାନଡ଼୍‍କିଂଙ୍କ୍ ବୁଜା ମାଡ଼ିତନ୍, ଇଦିନ୍ ସେଙ୍ଗେ ଦର୍‍କ୍‍ତେ ଶିକ୍ଷା ଲେକାମ୍‍ତେ ବିଶ୍ୱାସ୍‍ତେ ଗଟ୍‍ତିଙ୍କ୍ ଗାଡ଼୍‍ସ୍ ଆସ୍ ପୟ୍‍ମୁଟ୍ ।
TIT 1:10 ବାତେଙ୍କ୍ ଇତ୍‍କେ ନାର୍‍ଗେ ନିଜାମ୍ କ୍ରିଷ୍ଟ ଦର୍ମ ଗ୍ରହନ୍ ମାଡ଼୍‍ତେ ନାରୁଡ଼୍ ଲୋପେଙ୍କ୍ ମୁର୍କ ନାରୁଡ଼୍, ବୁସାଗଟି କେତାନଡ଼୍ ନୁ ଚାଲାକି ମାଡ଼ାନଡ଼ି ମିନ୍ଦେ, ଅଡ଼୍‌ ସୁନ୍ନତ୍ ଆତ୍‍ତେ ନାରୁଡ଼୍ ଲୋପେ ନାର୍‍ଗେ ମିନ୍ଦେ । ଅଡ଼୍‌ ତାମ୍ ଗଟିନ୍‍ ତଡ଼୍ ବାଗାତଡ଼୍‍କିଙ୍କ୍ ନାର୍‍ଗେ ପ୍ରତାରଣା ମାଡ଼ୁତଡ଼୍ ।
TIT 1:11 ଅଡ଼ାଦ୍‌ ପାୟୁର୍‍ତିଙ୍କ୍ ବନ୍ଦ୍ ମାଡ଼ାନ୍ ଦର୍‍କାର୍ । ଅଡ଼୍‌ ଦନ୍ ପାଏମ୍ ଆଦାନ୍ ସେଙ୍ଗେ ମିଚ୍ ଶିକ୍ଷା ଇସ୍ ଅଣ୍ଡୟ୍‌ ପରିବାର୍‍ତିଙ୍କ୍ ଆର୍ର୍ ପୁରାପୁରି ବୁଲ୍‍କା ମାଡ଼ିତଡ଼୍ ।
TIT 1:12 ଅଡ଼୍‌ ଲୋପେତ୍ ୱେରଣ୍ଡ୍, ଅଡ଼୍‌ ଜାତିତଣ୍ଡ୍ ୱେରଣ୍ଡ୍ ବାବବାଦି କେତ୍‍ତଣ୍ଡ୍, କ୍ରିତି ନାଆର୍‍ଦେନଡ଼୍ ସାରେଦାମ୍ ମିଚ୍ ଗଟିନଡ଼୍, ଇଂସା ଜିୱାକ୍‍ ଲେକାମ୍ ନୁ ମଣ୍ଡି ଡରାଲଡ଼୍ ।
TIT 1:13 ଅଡ଼ାଦ୍‌ ଇଦ୍ ସାକ୍ଷ୍ୟ ନିଜାମ୍ । ଆଦିଙ୍କ୍ ଅଡ଼୍‌‍କିଂଙ୍କ୍ ଗଲ୍ ଇମୁଟ୍ ବେଲାକି ଅଡ଼୍‌ ବେଲା ଲେକାମ୍ ବିଶ୍ୱାସୀଡ଼୍ ଆଦ୍‍ତଡ଼୍ । ଇଉଦି ନାରୁଡ଼୍ କେତ୍‍ତେ ୱେଷଡ଼୍ ମେଣ୍ଡେ ସତ୍ୟତାଗାଙ୍କ୍ ମାଲ୍‍ସ୍ ମାନ୍ଦାନ୍ ନାରୁଡ଼୍ ଆଦ୍‍ତଡ଼୍ ।
TIT 1:14 ମିଇ ଲୋପେଙ୍କ୍ ବେନ୍‍ବେନ ଇହୁଦୀଡ଼୍ ଶିକ୍ଷାତିଙ୍କ୍‍ ନିଜାମ୍‍ ସତ୍‍ ଗ୍ରହନ୍ ମାଡ଼୍‍ମାଟ୍ । ଆଦେଶ୍‍ତିଙ୍କ୍ ମାନ୍‍ ଇୱକଟ ବିଶ୍ୱାସ୍‍ତାଗ୍ ଗାଡ଼୍‍ସ୍ ଆଦ୍‍ତଡ଼୍, ଆଦିନ୍ ସେଙ୍ଗେ ଅଡ଼୍‌‍କିଂଙ୍କ୍ ଗାଡ଼୍‍ସ୍ ମାଡ଼ାଟ୍ ।
TIT 1:15 ପବିତ୍ର ନାରୁଡ଼୍ ସେଙ୍ଗେ ସାର୍‍ରେ ସାୟେ; ବାତେଙ୍କ୍ ଇତ୍‍କେ କୁଲାଙ୍ଗାର୍ ନୁ ଅବିଶ୍ୱାସୀ ନାରୁଡ଼୍ ସେଙ୍ଗେ ବାଆତେବା ବିଷୟ୍ ସାୟେ ଆୟ୍‍ୟ, ଆଦିଙ୍କ୍ ଅଡ଼ାଦ୍‌ ମନ୍ ନୁ ଚିନ୍ତେ ରେଣ୍ଡ୍ ଆସ୍‍ସ କୁଲାଙ୍ଗାର୍ ।
TIT 1:16 ଅଡ଼୍‌ ଇଶ୍ୱର୍‌ତିଙ୍କ୍ ପୁତ୍‍ତଡ଼୍ ଇଞ୍ଜ ସ୍ୱୀକାର୍ ମାଡ଼ିତଡ଼୍, ବାତେଙ୍କ୍ ଇତ୍‍କେ ଅଡ଼୍‌ ପାଡ଼୍‍ୟିତଡ଼୍ ଅଂକିଙ୍କ୍‌ ଅସ୍ୱୀକାର୍ ମାଡ଼ିତଡ଼୍; ଅଡ଼୍‌ ପାସ୍କାନଡ଼୍ ନୁ ମୁର୍କ ମେଣ୍ଡେ ସାର୍‍ରେ ସାୟେ ପାଡ଼୍‍ୟିତିଙ୍କ୍ ଯୋଗ୍ୟ ଆୟ୍‍ୟଡ଼୍ ।
TIT 2:1 ବାତେଙ୍କ୍ ଇତ୍‍କେ ମିଡ଼୍ ସାୟେତ୍ ଶିକ୍ଷାତାଗ୍ ଲେକାମ୍ ଗଟ୍ କେଲ୍‍ମୁଟ୍ ।
TIT 2:2 ଗାଟି ବୟସ୍‍ ନାରୁଡ଼୍‍କିଂଙ୍କ୍ ଲେକାମ୍ ବ୍ୟବହାର୍‌, ଲେକାମ୍ ବିଚାର୍ ନୁ ନିଜେତ୍ ପର୍‍ର ବିଶ୍ୱାସ୍ ନେଃଏତାନଙ୍କ୍ ଅନୁରୋଦ୍ ମାଡ଼ାଟ୍; ଅଡ଼୍‌ ତାମ୍ ବିଶ୍ୱାସ୍, ପ୍ରେମ ନୁ ଗାଡ଼୍‍ସ୍‍ତାଗ୍ ଗାଡ଼୍‍ସ୍ ଆୟିଡ଼୍ ।
TIT 2:3 ଇଦ୍‍ରକମ୍ ଗାଟି ବୟଷ୍ ନାଟାକିଂଙ୍କ୍ ଲେକାମ୍ ଜିୱୁଣ୍ଡ୍ ବାଦ୍‍କାନଙ୍କ୍ ଶିକ୍ଷା ଇମୁଟ୍ । ଆୱୁ ମେଣ୍ଡେ ଅଡ଼୍‌‍କିଂଙ୍କ୍‌ ନିନ୍ଦେ ମାଡ଼୍‍ମାକି ନୁ କାଲ୍ ଉନ୍‍ମାକି, ସାୟେ ନୁ ସାୟେତ୍ ଶିକ୍ଷା ଇଦାନଙ୍କ୍ ଅନୁରୋଦ୍ ମାଡ଼ାଟ୍ ।
TIT 2:4 ଆଲେକେ, ଇଶ୍ୱର୍‌ତେ ବାକ୍ୟ ବେଲା ନିନ୍ଦେ ଆୟ୍‍ୟ, ଆଦିଙ୍କ୍ ଆୱୁ ପିକିଙ୍କ୍ ଲେକାମ୍ ଜିୱୁଣ୍ଡ୍ ନୁ ମୁଦ୍‍ପାଲଡ଼୍‍କ୍ ପ୍ରେମ ମାଡ଼ାନଙ୍କ୍ ଶିକ୍ଷା ଇମୁଟ୍,
TIT 2:5 ଲେକାମ୍ ମାର୍‍ମାୟାସ୍କ୍ ପୁଟ୍‍ସ୍ପାନଙ୍କ୍, ଲେକାମ୍ ବୁଦି, ସତି, ଲେକାମ୍ କଡ଼୍‍ୟାଡ଼୍, ନିଜେତ୍ ପର୍‍ର ବିଶ୍ୱାସ୍ ନୁ ତାନ୍ ମୁଦ୍‍ପାନ୍‍ତଡ଼୍ ସାୟେ ମାନ୍ଦାନଙ୍କ୍ ଶିକ୍ଷା ଇମୁଟ୍ । ଆଲେକେ, ବେନବା ଇଶ୍ୱର୍‌ତେ ବାକ୍ୟ ବାଗାତ୍ ନାରୁଡ଼୍ ତଡ଼୍ ନିନ୍ଦ୍ ମାଡ଼ାନଙ୍କ୍ ପାର୍‍ୱଡ଼୍ ।
TIT 2:6 ଆଦେ ରକମ୍ ପେକାଲ୍‌ଡ଼୍‍କିଂଙ୍କ୍ ସାର୍‍ରେ ବିଷୟ୍‍ତାଗ୍ ସାୟେ ବୁଦ୍ ମାନ୍ଦାନଙ୍କ୍ ସାର୍‍ଦେ ମାଡ଼ାଟ୍ ।
TIT 2:7 ମିଡ଼୍ ନିଜେ ନିଜେତ୍ ବ୍ୟବହାର୍‌ ତଡ଼୍ ସାୟେତ୍ ପାଡ଼୍‍ୟି ତଅମୁଟ୍, ଶିକ୍ଷାତାଗ୍ ନିଜାତାଦ୍ ନୁ ଲୋପେତ୍ ଇଚ୍ଛା ନୁ ଲେକାମ୍ ବାକ୍ୟ କେଲ୍‍ମୁଟ୍ ।
TIT 2:8 ବେଲାକି ବିରୁଦ୍ ନାରୁଡ଼୍ ମାନ୍‍ ବିଷୟ୍‍ତେ ବାତ୍‍ମିକା କାରାପ୍ ଗଟି କେତାନଙ୍କ୍ ପାର୍‍ୱେ କନ୍‍ସ୍ ସିଗ୍ ଆଦ୍‍ତଡ଼୍ ।
TIT 2:9 ଦାସଡ଼୍ ତାମ୍ ମାଲିକ୍ ତଡ଼୍ ଲେକାମ୍ ମାନ୍‍ତଡ଼୍, ସାର୍‍ରେ ବିଷୟ୍‍ତାଗ୍ ଅଡ଼୍‌ ଶାନ୍ତି ଆୟିଡ଼୍, ମାଲିକିଡ଼୍ ତଡ଼୍ ଗଲକ୍ ଆୟ୍‍ମାକିଡ଼୍ ।
TIT 2:10 ଅଡ଼୍‌ ବିରୁଦ୍ ମାଡ଼୍‍ମାକିଡ଼୍, ଡଙ୍ଗାଲଡ଼୍ ଆୟ୍‍ୟକଟ ବିଶ୍ୱାସିଡ଼୍ ଆୟିଡ଼୍, ବେଲାକି ଅଡ଼୍‌ ସାର୍‍ରେ ସାୟେତ୍‍ ବିଷୟ୍‍ତାଗ୍ ମାନ୍‍ ମୁକ୍ତିଦାତାଲ୍ ଇଶ୍ୱର୍‌ତେ ଶିକ୍ଷାତାଗ୍ ନେଡ଼େମ୍ ଲେକାମ୍ ଆୟିଡ଼୍ ।
TIT 2:11 ବାତେଙ୍କ୍ ଇତ୍‍କେ ସାର୍‍ରେ ନାରୁଡ଼ାଦ୍ ମୁକ୍ତି ସେଙ୍ଗେ ଇଶ୍ୱର୍‌ତେ ଅନୁଗ୍ରହ ଆସ୍ ମିନ୍ଦେ,
TIT 2:12 ମେଣ୍ଡେ, ମାମ୍‍ମେ ବେଲା ଅଦର୍‌ମ ନୁ ସଂସାର୍ ଆଶେ ୱିଡ଼୍‍ସି ଇଦ୍ ଇଞ୍ଜେତ୍ ଯୁଗ୍‍ତେ ଆତ୍ମ ସଂଯମ, ଦାର୍ମାମ୍ ନୁ ଇଶ୍ୱର୍ ପରାୟଣ ଲେକାମ୍ ଜିୱୁଣ୍ଡ୍ ବାଦ୍‍କିକାଡ଼୍,
TIT 2:13 ମହାନ୍ ଇଶ୍ୱର୍ ନୁ ମାନ୍‍ ମୁକ୍ତିଦାତାଲ୍ କ୍ରିଷ୍ଟ ଜିସୁନ୍ ଗୌରବ୍ ଆଦାନ୍ ସେଙ୍ଗେ ପ୍ରକାଶ୍ ଆଦାନଙ୍କ୍ ଆଦୁତ୍‍ତେ, ଆଦ୍ ଦିନେତାଦ୍ କେପି ମାମ୍‍ମେ ମିନ୍ଦେମ୍ ।
TIT 2:14 ଆଦ୍ କ୍ରିଷ୍ଟ ଜିସୁ ମାନାଡ଼୍ ସାର୍ରେତଡ଼୍‍କିଂଙ୍କ୍ ଆଦାର୍ମିକନ୍‌ସ ମୁକ୍ତି ମାଡ଼ାନଙ୍କ୍ ନୁ ନିଜେତ୍ ନିଜେତ୍ ସାୟେତ୍ ପାଡ଼୍‍ୟିତାଗ୍ ସାର୍‍ଦେ ମାଡ଼ି ନିଜେତ୍ ନାରୁଡ଼୍ ଲେକାମ୍ ସାୟେ ମାଡ଼ାନ୍ ସେଙ୍ଗେ ନିଜେତ୍ ଜିୱୁଣ୍ଡ୍ ଇତ୍‍ତନ୍ ।
TIT 2:15 ଇୱୁ ସାର୍‍ରେ ଗଟି କେସ୍ ସାରେ କ୍ଷମତାତଡ଼୍ ସାର୍‍ଦେ ଇମୁଟ୍ ନୁ ବିଶ୍ୱାସି ମାଡ଼ାଟ୍ । ବେନ ମିକିଂଙ୍କ୍ ତୁଚ୍ଛ ମାଡ଼୍‍ମାକିଣ୍ଡ୍ ।
TIT 3:1 ଶାସନ୍‍ କର୍ତ୍ତାଲ୍ ନୁ ଦାୟିତ୍ୱବାନ୍ ନାରୁଡ଼୍‍କିଂଙ୍କ୍ ମାନେମ୍‍ ଆଦାନାଦ୍, ମେଣ୍ଡେ ସାର୍‍ରେ ରକମ୍ ସାୟେତ୍ ପାଡ଼୍‍ୟି ମାଡ଼ାନଙ୍କ୍ ତିଆର୍ ଆଦାନଙ୍କ୍, ତିଆର୍ ଆସ୍ ମାନ୍ଦାନଙ୍କ୍ ସବ୍ୟଡ଼୍‍କିଙ୍କ୍ ଏର୍କା ମାଡ଼ିମୁଟ୍ ।
TIT 3:2 ବେନଙ୍କ୍ ନିନ୍ଦେ ମାଡ଼ାନାଦ୍ ଆୟ୍‍ୟ, ବେନ ବିରୁଦ୍ ଆଦାନାଦ୍ ଆୟ୍‍ୟ, ନମ୍ର ଆଦାନାଦ୍, ମେଣ୍ଡେ ସାର୍‍ରେ ନାରୁଡ଼୍‍କିଂଙ୍କ୍ ସାର୍‍ରେ ରକମ୍ ନମ୍ର ବ୍ୟବହାର୍‌ ତଅତାନଙ୍କ୍ ଅଡ଼୍‌‍କିଂଙ୍କ୍ କେତାନାଦ୍ ଇମୁଟ୍ ।
TIT 3:3 ବାତେଙ୍କ୍ ଇତ୍‍କେ ମୁନେଙ୍କ୍ ମାନାଡ଼୍ ବା ମୁର୍କ, ବାକ୍‍ୱା ମେଣ୍ଡେ ନାର୍‍ଗେ ରକମ୍ କାରାପ୍ ଚିନ୍ତେ ନୁ ସୁକାମ୍‍ତେ ଦାସ ମାତ୍‍ତମ୍, ଇଂସା ନୁ ଇର୍ଷାତଡ଼୍ ବାଦ୍‍କ ମାତ୍‍ତମ୍, ମେଣ୍ଡେ ପାସ୍‍କାନ୍ ନାରୁଡ଼୍ ଆସ୍ ନିଜେତ୍ ନିଜେତ୍ ଲୋପେ ପାସ୍‍କ ମାତ୍‍ତମ୍ ।
TIT 3:4 ଇତ୍‍କେ ବେସୁଟ୍‌ ମାନ୍‍ ମୁକ୍ତିଦାତାଲ୍ ଇଶ୍ୱର୍ ନିଜେ ଦୟା ନୁ ନାରୁଡ଼୍ ଜାତି ସେଙ୍ଗେ ପ୍ରେମ ତଅତଣ୍ଡ୍,
TIT 3:5 ଆସୁଟେ ଅଣ୍ଡ୍‌ ମାମ୍ ମାଡ଼୍‍ତେ ସାୟେତ୍ ପାଡ଼୍‍ୟି ସେଙ୍ଗେ ଆୟ୍‍ୟ, ମାତ୍ର ତାନ୍ ଦୟା ଲେକାମ୍ ମେଣ୍ଡନ୍‍ ଜନମ୍‍ତେ ସେଙ୍ଗେ ବାପ୍ତିସ୍ମ ନୁ ପବିତ୍ର ଆତ୍ମାତେ ନେଲେତାଦ୍ ଜିୱୁଣ୍ଡ୍ ତଡ଼୍ ମାନ୍‍ ମୁକ୍ତି ମାଡ଼ିମିନ୍ଦେଣ୍ଡ୍;
TIT 3:6 ମାନ୍‍ ତ୍ରାଣକର୍ତ୍ତାଲ୍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ଇଶ୍ୱର୍ ପବିତ୍ର ଆତ୍ମାତିଙ୍କ୍ ଦାନ ମାଡ଼୍‍ତଣ୍ଡ୍ ।
TIT 3:7 ବେଲାକି ମାନାଡ଼୍ ଅନ୍‌ ଅନୁଗ୍ରହତେ ଦାର୍ମାମ୍ ଆସ୍ ଆଦେ ଲେକାମ୍‍ତେ ତେର୍‍ୱାଦ୍ ଜିୱୁଣ୍ଡ୍ ପାଏମ୍ ଆଦ୍‍ତମ୍ ।
TIT 3:8 ଇଦ୍ ୱେରଡ଼୍ ନିଜାମ୍ ଗଟ୍, ମେଣ୍ଡେ ବେଲା ଇଶ୍ୱର୍‌ତିଙ୍କ୍ ବିଶ୍ୱାସ୍ ମାଡ଼ାନଡ଼ି ସାର୍ରେତଡ଼୍ ସାୟେତ୍ ପାଡ଼୍‍ୟି ମାଡ଼ାନଙ୍କ୍ ମାନ୍‍ ମାଡ଼ିତଡ଼୍, ଇଦିନ୍ ସେଙ୍ଗେ ଇଦ୍ ସାର୍‍ରେ ବିଷୟ୍‍ତେ ଗାଡ଼୍‍ସ୍ ଆସ୍ ଶିକ୍ଷା ଇମୁଟ୍ ଇଞ୍ଜ ନାୟାଦ୍ ଇଚ୍ଛା । ଇଦ୍ ସାର୍‍ରେ ନାରୁଡ଼୍‍କିଂଙ୍କ୍ ପାଡ଼ିୟିଦାଗ୍ ଆଦ୍‍ତେ ।
TIT 3:9 ଇତ୍‍କେ ଗଲ୍‍କ୍, ବଂଶତଡ଼୍, ବିରୁଦି ନୁ ନିୟମ୍ ବିଷୟ୍‍ତେ ଯୁଦ୍‌ ଆତ୍‍କେ, ବାତେଙ୍କ୍ ଇତ୍‍କେ ଆୱୁ ସାର୍‍ରେ କ୍ଷତିଆଦ୍‍ତେ ନୁ ବାତ୍ ମୁଲ୍ୟ ଆୟ୍‍ୟ ।
TIT 3:10 ବେନ ଗଲ୍‍କ୍ ମାଡ଼ିତନ୍, ଅଂକିଙ୍କ୍‌ ଇଲୁକ୍ ଅଣ୍ଡୟ୍‌‍ଦାମ୍, ବା ରେଣ୍ଡ୍‍ଦାମ୍ କେତ୍‍ତେ ପେର୍‍କେ ଅନାଗାଙ୍କ୍ ୱେରେ ମାନୁଟ୍;
TIT 3:11 ଇଦ୍ ରକମ୍ ନାରୁଡ଼୍ ହାର୍ ବୁଲ୍‍କା ଆତ୍‍ତଣ୍ଡ୍ ନୁ ପାପ୍ ମାଡ଼ି ନିଜେତିଙ୍କ୍ ନିଜେ ଦଷି ମାଡ଼ିତନ୍, ଇଦ୍ ତ ମିଡ଼୍ ପୁତ୍‍ତିଡ଼୍ ।
TIT 3:12 ବେସୁଟ୍‌ ନାନ୍ ମିଇ ବକେତ୍ ଆର୍ତ୍ତେମା ଇଲୁକ୍ ତୁକିକଙ୍କ୍ ରଃଅତିତାନ୍, ଆସୁଟେ ନୀକପଲ୍ଲିତାଗ୍ ନା ବକେତ୍ ୱାଦାନ୍ ସେଙ୍ଗେ ତିୟାର୍ ଆୟ୍‍ମୁଟ୍, ବାତେଙ୍କ୍ ଇତ୍‍କେ ଆଗେ ଶାଲ୍ କାଲାମ୍ ମାନ୍ଦାନଙ୍କ୍ ନାନ୍ ମାନ୍‍ ମାଡ଼୍‍ତାନ୍ ।
TIT 3:13 ଓକିଲ୍ ଜୀନା ନୁ ଅପୋଲ୍ଲୋତିଙ୍କ୍ ସାୟେହାର୍ ତଅସିମୁଟ୍, ବେଲାକି ଅଡ଼୍‌‍କିଂଙ୍କ୍ ବାତ୍ ବା ଅବାବ୍ ଆୟ୍‍ୟ ।
TIT 3:14 ମାନ୍‍ ନାରୁଡ଼୍ ଗାଲା ଦର୍‍କାର୍ ସେଙ୍ଗେତ୍ ଉପ୍‍କାର୍ ମାୟ୍‍ଦିଙ୍କ୍ ସାୟେତ୍ ପାଡ଼୍‍ୟି ମାଡ଼ାନଙ୍କ୍ ନାଡ଼୍‍ସିଡ଼୍, ବେଲାକି ଅଡ଼୍‌ ମୁଲ୍ୟହିନ୍ ଆୟ୍‍ମାକିଡ଼୍ ।
TIT 3:15 ନା ତଡ଼୍ ମାନ୍ଦାନ୍ ସାର୍ରେତଡ଼୍ ମିକିଂଙ୍କ୍ ନମସ୍କାର୍ କେଞ୍ଜ୍‍ସ୍ପୁତଡ଼୍ । ବିଶ୍ୱାସ୍‍ତେ ମାୟ୍‍ଦିଙ୍କ୍ ବେନଡ଼୍ ମାକିଂଙ୍କ୍ ପ୍ରେମ ମାଡ଼ିତଡ଼୍, ଅଡ଼୍‌‍କିଂଙ୍କ୍ ନମସ୍କାର୍ କେଞ୍ଜ୍‍ସ୍ପାଟ୍ । ମିଡ଼୍ ସାର୍ରେତଡ଼୍‍କିଂଙ୍କ୍ ଅନୁଗ୍ରହ ଆୟି ।
PHM 1:1 ଜିସୁ କ୍ରିଷ୍ଟଟନ୍ ସେଙ୍ଗେ କାୟିଦ୍ ଆସ୍‍ମାନ୍ଦାନ୍ ନାନ୍ ପାଉଲ୍, ନୁ ମାନ୍‍ ଦାଦାଲ୍ ତିମତିନାଗାଙ୍କ୍, ତାନ୍ ପ୍ରିୟ ସାଙ୍ଗ ନୁ ଅନ୍‌‍ ତଡ଼୍ ପାଡ଼୍‍ୟି ମାଡ଼ାନଣ୍ଡ୍ ପିଲିମନ୍‍,
PHM 1:2 ତାମ୍ ଲୋନ୍‌ ଗୁଡ଼ମାନ୍ଦାନ୍ ମଣ୍ଡଲିତେ ନାରୁଡ଼୍, ଏଲାଡ଼୍‍ ଅପ୍‍ପିୟା ନୁ ସହ ସୈନିକ ଅକିପ୍‍ପନ୍ ଗାର୍‍ରେ ଚିଟି ।
PHM 1:3 ବାବାଲ୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଦୟା ନୁ ଶାନ୍ତି ଇୱିଣ୍ଡ୍ ।
PHM 1:4 ଦାଦାଲ୍ ଫିଲିମନ୍, ସାରେଦାମ୍ ନାନ୍ ପ୍ରାର୍ତନା ମାଡ଼ାନ୍ ୱେଲେ ନିକିଂଙ୍କ୍ ଏର୍କା ମାଡ଼ି ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତାନ୍,
PHM 1:5 ବାତେଙ୍କ୍ ଇତ୍‍କେ ନାନ୍ କେଞ୍ଜ୍‍ତାନ୍, ପ୍ରବୁ ଜିସୁନାଗ୍ ନିୟାଦ୍ ବିଶ୍ୱାସ୍ ନୁ ଇଶ୍ୱର୍ ବକ୍ତି ନାରୁଡ଼୍‍କିଂଙ୍କ୍ ନିୟାଦ୍ ବେସର୍ ପ୍ରେମ ମିନ୍ଦେ !
PHM 1:6 କ୍ରିଷ୍ଟଟନ୍ ତଡ଼୍ କାୟ୍‍ଲି ମାମ୍‍ମେ ଜିୱୁଣ୍ଡ୍‍ତାଗ୍ ବେନ୍ ସାରେ ଆର୍ଶିବାଦ୍‌ ପାଏମ୍ ଆତ୍‍ତମ୍, କ୍ରିଷ୍ଟ ବିଶ୍ୱାସି ଲେକାମ୍ ନିତଡ଼୍ ମାୟାଦ୍‌ କାଇଲାନାଦ୍‍ ଲୋପେତ୍‌ ବିଷୟ ସାୟେ ବୁଜେମ୍ ଆଦାନ୍ ସେଙ୍ଗେ ନିକିଂଙ୍କ୍ ସାହାଯ୍ୟ ମାଡ଼ି, ଇଦ୍ ନାନ୍ ପ୍ରାର୍ତନା ମାଡ଼ୁତାନ୍ ।
PHM 1:7 ହୋ ଦାଦା, ନିୟାଦ୍ ପ୍ରେମ ନାକିଂଙ୍କ୍ ଗାଟି ୱେଡ଼୍‍କ୍‍ ମାଡ଼୍‍ତେ ନୁ ଉତ୍ସାଇତ୍ ମିକା ମାଡ଼୍‍ତେ; ବାତେଙ୍କ୍ ଇତ୍‍କେ ନିମ୍‍ ଇଶ୍ୱର୍‌ତେ ନାରୁଡ଼୍‍ତେ ହୃର୍ଦୟ୍‌ତିଙ୍କ୍ ୱେଡ଼୍‍କ୍‍ ମାଡ଼୍‍ତି ।
PHM 1:8 ଆଦିଙ୍କ୍ କ୍ରିଷ୍ଟ ବିଶ୍ୱାସି ତାମୁଣ୍ଡ୍ ଇନା ନିୟାଦ୍ କର୍ତବ୍ୟ ବିଷୟ ନିର୍ଦ୍ଦେଶ୍‌ ଇଦାନଙ୍କ୍ ନାୟାଦ୍ ସାଆସ୍ ମିନ୍ଦେ ।
PHM 1:9 ଇତ୍‍କେ ନି ପର୍‍ର ନାୟାଦ୍ ପ୍ରେମ ମାନ୍ଦାନ୍ ମାୟ୍‍ଦିଙ୍କ୍ ଅନୁରଦ୍‌ କେ ମାଡ଼ିତାନ୍ । ଯଦିବା ନାନ୍ ପାଉଲ୍, ୱେରଣ୍ଡ୍ ପେଦ୍‍ୱାଲ୍, ଜିସୁ କ୍ରିଷ୍ଟଟନ୍ ସେଙ୍ଗେ ଇଞ୍ଜେ ବନ୍ଦି ଆତ୍‍ତାନ୍ ।
PHM 1:10 ନାନ୍ କେତୁତାନ୍, ଇଗେ ବନ୍ଦି ମାନ୍ଦାନ୍ ୱେଲେ ନାନ୍ ବେନଙ୍କ୍ କ୍ରିଷ୍ଟଟନ୍ ସେଙ୍ଗେ ନିଜେତ୍ ମାର୍‍ ଇନା ପାଏମ୍ ଆତ୍‍ତାନ୍, ନୁ ନାନ୍ ଅନ୍‌ ଆତ୍ମାତେ ବାବାଲ୍ ଲେକାମ୍ ଆତ୍‍ତାନ୍, ଆଦ୍ ଅନିସିମସ୍ ମାୟ୍‍ଦିଙ୍କ୍ ନାନ୍ ଇଦ୍ ଅନୁରଦ୍‌ ମାଡ଼ୁତାନ୍ ।
PHM 1:11 ଅନ୍‌‍ଦିନେ ଅନିସିମସ୍ ନିକିଂଙ୍କ୍ ଦର୍‍କାର୍ ଇଲ୍‍ୱେ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଇଞ୍ଜେ ଅଣ୍ଡ୍‌ ନିକିଂଙ୍କ୍ ନୁ ନାକିଂଙ୍କ୍ ଗାଟି ଦର୍‍କାର୍ ଆଦ୍‍ତନ୍ ।
PHM 1:12 ଅଣ୍ଡ୍‌ ନା ଜିୱୁଣ୍ଡ୍ ଲେକାମ୍ ନାନ୍ ଅଂକିଙ୍କ୍‌ ମିଇ ବକେତ୍ ନୁ ମାଲ୍‍ପି ରଅତୁତାନ୍ ।
PHM 1:13 ସୁସମାଚାର୍ ସେଙ୍ଗେ ବନ୍ଦି ଇସାବ୍‍ତେ ଅଂକିଙ୍କ୍‌ ନା ସେବା ମାଡ଼ାନଙ୍କ୍ ଗାର୍ରେ ନେଃଏତାନଙ୍କ୍ ମାନ୍‍ ଆସ୍‍ସ ମାତ୍‍ତେ ।
PHM 1:14 ଇଦ୍ ଲେକେତ୍‍ ବିଷୟ୍‍ତିଙ୍କ୍ ରାଜି ମାଡ଼ାନ୍ ସେଙ୍ଗେ ନାନ୍ ନିକିଂଙ୍କ୍ କେଲନ୍ ଯଦି ନିୟାଦ୍ ମାନ୍‍ ମିନ୍ଦେ ଆଲେକେ ନିମ୍‍ ରାଜି ଆୟ୍‍ମା । ଆଦ୍ ବାତ୍‍ଆଇ ନି ଗଟ୍ ୱିଡ଼୍‍ସି ନାନ୍ ବାତ୍ ମାଡ଼ନ୍ ।
PHM 1:15 ସାରେ ଦିନା ନିୟାଗ୍ ମାନ୍‍ତଣ୍ଡ୍ ଇଞ୍ଜ, ଅନିସିମସ୍ ବେସ୍‌କ୍ ଦିନାତ୍ ମାୟ୍‍ଦିଙ୍କ୍ ନିକିଂଙ୍କ୍ ୱିଡ଼୍‍ସି ଆଞ୍ଜ୍ ମାତ୍‍ତଣ୍ଡ୍ ।
PHM 1:16 ଏର୍କା ମାଡ଼େ, ଅଣ୍ଡ୍‌ ଇଞ୍ଜେ କ୍ରିତଦାସ୍ ଆୟ୍‍ୟଣ୍ଡ୍ । କ୍ରିଷ୍ଟଟନ୍ ବିଶ୍ୱାସି ଲେକାମ୍ ଅଣ୍ଡ୍‌ ଇଞ୍ଜେ ମାନ୍‍ ପ୍ରିୟ ତାମୁଣ୍ଡ୍ । ନା କଣ୍ଡେତାଗ୍ ଅଣ୍ଡ୍‌ ବେସର୍ ଉପ୍‍କାର୍ ! ନିକିଂଙ୍କ୍ ଅର୍‍ତୁଣ୍ଡ୍ ଦାସ ନୁ କ୍ରିଷ୍ଟ ବିଶ୍ୱାସି ତାମୁଣ୍ଡ୍ ଇନା ଅଣ୍ଡ୍‌ ନି ସେଙ୍ଗେ ମେଣ୍ଡେ ବେସର୍ ଉପ୍‍କାର୍ ଆୟ୍‍ୟଣ୍ଡ୍ !
PHM 1:17 ଯଦି ନିମ୍‍ ନାକିଂଙ୍କ୍ ନି ତଡ଼୍ ମାନ୍ଦାନଣ୍ଡ୍ ଇଞ୍ଜ ଆଲ୍‍ସୁତିନ୍, ନାକିଂଙ୍କ୍ ବେଲା ସ୍ୱାଗତ୍ ମାଡ଼େନି, ଅଂକିଙ୍କ୍‌ ଆଦେ ପୁଟୁଙ୍କ୍ ମାଡ଼େ ।
PHM 1:18 ଅଣ୍ଡ୍‌ ଯଦି ନିକିଂଙ୍କ୍ ବାତ୍ କ୍ଷତି ମାଡ଼ିମାନ୍‍ତଣ୍ଡ୍ କି ନିକିଂଙ୍କ୍ ଅଣ୍ଡ୍‌ ବାତ୍ ଇଦାନ୍ ମାନ୍‍ତେ, ଆଲେକେ ଆଦ୍ ନା ଇସାବ୍‍ତାଗ୍ ଲେକିଇମ୍ ।
PHM 1:19 ଇଦ୍ ଉଡ଼େ, ନାନ୍ ନିଜେତ୍ କାୟ୍‍ଦେ ଲେକୁତାନ୍; ନାନ୍, ପାଉଲ୍, ନିଜାମ୍ ଆଦ୍ କାର୍ରେ ଦେଃତିତାନ୍ । ଆଲେକ୍‍ବା ନିକିଂଙ୍କ୍ ନାନ୍ ଏର୍କା ମାଡ଼ାନାଦ୍ ଇଲ୍‍ୱେମାତ୍‍ତେ, ନିୟାଦ୍ ଲୋପେତ୍‍ ଆତ୍ମା ସେଙ୍ଗେ ମିକା ନିମ୍‍ ନାୟାଗ୍ ଋଣ୍‍ ।
PHM 1:20 ଆଦିଙ୍କ୍ ତାମୁ ! ନା ଲେକେ ୱେରଣ୍ଡ୍ କ୍ରିଷ୍ଟ ବିଶ୍ୱାସି ତାମୁଙ୍କ୍ ପ୍ରବୁନ୍ ସେଙ୍ଗେ ଅନୁଗ୍ରହ ମାଡ଼େ, ଇଲା ମାଡ଼୍‍କେ ନାନ୍ ଗାଟି ୱେଡ଼୍‍କିତାନ୍ ।
PHM 1:21 ନିମ୍‍ ନାୟାଦ୍ ଅନୁରଦ୍‌ ନେଃତିତି ଇଞ୍ଜ ପୁଞ୍ଜ୍, ନାନ୍ ଇଦ୍ ଚିଟି ଲେକୁତାନ୍ । ନାନ୍ ପୁତ୍‍ତାନ୍, ନିୟାଗାଙ୍କ୍ ନାନ୍ ବେସର୍ ଆଶେ ମାଡ଼ୁତାନ୍, ନିମ୍‍ ନାୟାଗାଙ୍କ୍ ମେଣ୍ଡେ ଅଦିକ୍‌ ଆଶେ ମାଡ଼ିତିନ୍ ।
PHM 1:22 ଇଦିନ୍ ତଡ଼୍ ନାୟାଦ୍ ମେଣ୍ଡେ ଅଣ୍ଡୟ୍‌ ଅନୁରଦ୍‌, ଆଗେ ନା ମାୟ୍‍ଦିଙ୍କ୍ ଅଣ୍ଡୟ୍‌ ବାକ୍‍ଡ଼େ ତିଆର୍ ମାଡ଼ି ନେଃମ୍ । ନାୟାଦ୍ ଆଶେ ମିନ୍ଦେ, ମିଡ଼୍ ପ୍ରାର୍ତନା ମାଡ଼୍‍କେ ନାନ୍ ମିଇ ବକେତ୍ ମାଲ୍‍ସ୍ ୱାଦ୍‍ତାନ୍ ।
PHM 1:23 କ୍ରିଷ୍ଟଟନ୍ ସେଙ୍ଗେ ନା ତଡ଼୍ କାୟ୍‍ଦି ମାନ୍ଦାନଣ୍ଡ୍ ଏପାପ୍ରା ମିକିଂଙ୍କ୍ ନମସ୍କାର୍ ମାଡ଼ୁତଣ୍ଡ୍ ।
PHM 1:24 ମେଣ୍ଡେ ନା ତଡ଼୍ ପାଡ଼୍‍ୟି ମାଡ଼ାନଡ଼ି ମାର୍କ, ଆରିସ୍ତାର୍କ, ଦୀମା ନୁ ଲୁକ ମିକା ମିକିଂଙ୍କ୍ ନସ୍କାର୍ ମାଡ଼ୁତଡ଼୍ ।
PHM 1:25 ପ୍ରବୁ ଜିସୁ କ୍ରିଷ୍ଟଟନ୍ ଅନୁଗ୍ରହ ମିଇ ସାରେତଡ଼୍ ତଡ଼୍ ମାନି । ଆମେନ୍‌ ।
HEB 1:1 ମୁନେତ୍‌କାଲାତେ ଇଶ୍ୱର ଆମ୍‍ତି ନୁ ବେସୁଙ୍କ୍‍ ବେସୁଙ୍କ୍‍ ବବିଷ୍ୟତ୍‌ ବକ୍ତାଲଡ଼୍‌ ତଡ଼୍‍ ମାନ୍‍ ଆନିଦାଦିଡ୍‌କ୍‌ ଗଟ୍‌‍ କେସ୍‍ମାତ୍‍ତଣ୍ଡ୍‍ ।
HEB 1:2 ଇତ୍‍କେ ଇଦ୍‌ ତେରାନ୍‌ ଦିନାମ୍‌ତେ ଅନ୍‌‌ ତାନ୍‌ ମାରିନ୍‍ ତ ମାନ୍‌ସାଙ୍ଗ୍ ଗଟ୍‌ ତିରିୟ୍‌ତଣ୍ଡ୍‍ । ଆ ମାରିନ୍‍ ତ ଇଶ୍ୱର ବୁମ୍‌ତିଙ୍କ୍‍ ତିଆର୍‌ ମାଡ଼୍‍ତଣ୍ଡ୍‍ ମେଣ୍ଡେ ଆ ପେର୍କେ ସାର୍ରେ ବିଷୟ୍‍ତେ ଅଦିକାର୍‌‌ ଆଦାନଙ୍କ୍‌ ଅଣ୍ଡ୍‌‌ ଅଂକିଙ୍କ୍‌ ଏଞ୍ଚ୍‌ତଣ୍ଡ୍‌ ।
HEB 1:3 ଅନାଗା ଇଶ୍ୱରନ୍‌ ମହିମାତାଦ୍‌ ୱେସ୍‌ ପତିତ୍‌ ନୁ ସ୍ୱର୍ଗତାଦ୍‍ ସମ୍ପତି ସାର୍ରେ ମିନ୍ଦେ । ମେଣ୍ଡେ ଅଣ୍ଡ୍‌ ତାନ୍ ଗଟ୍‌ତଡ଼୍‍ ସାର୍ରେ ଜଗତ୍‍ତିଙ୍କ୍‍ ପଇସ୍‌ ମିନ୍ଦେଣ୍ଡ୍‌ । ଅଣ୍ଡ୍‌‌ ନାରୁଡ଼୍‍ ଜାତ୍‌ତେ ମାଇଦିଙ୍କ୍‌ ପାପ୍ କ୍ଷମା ମାଡ଼ି ସ୍ୱର୍ଗତଣ୍ଡ୍‍ ବାଗ୍‌ୱାନ୍‌ତାଗ୍‌ ଲାୱ୍‌ଦେ ଇଶ୍ୱରନ୍‌ ତିନ୍ଦେ ପାକା କୁଦି ମିନ୍ଦେଣ୍ଡ୍ ।
HEB 1:4 ଅଣ୍ଡ୍‌ ସ୍ୱର୍ଗ ଦୂତକିନ୍‌ନାଗାଙ୍କ୍‍ ବେଲା ବେଡ଼ିୟଣ୍ଡ୍, ଅନ୍‌‍ୱାଦ୍‍ ପେଦେର୍‌ ଆନ୍‌ତେ ଆଦେରକମ୍‍ ଅଡ଼୍‌ଡ଼ାଦ୍‌ ପେଦେର୍‌ତାଗାଙ୍କ୍‍ ମହାନ୍‍,
HEB 1:5 ବାତାଙ୍କ୍ ଇତ୍କେ ବେସୁଙ୍କ୍‌ବା ଇଶ୍ୱର ବେନ୍ ଦୂତତିଙ୍କ୍‍ କେତ୍‌ଇଲେ, “ନିମେ ନା ମାର୍‍, ନେଟ୍‌ତେନୁଞ୍ଚ୍‌ ନାନ୍ ନି ବାବାଲ୍ ଆତ୍‌ତାନ୍;” ଇଶ୍ୱର ଗାଲା କେତ୍‍ତଣ୍ଡ୍‍, “ନାନ୍‌ ଅନ୍‌‍ ବାବାଲ୍ ମେଣ୍ଡେ ଅଣ୍ଡ୍‌ ନା ମାର୍‍ ।”
HEB 1:6 ଇତ୍‍କେ ଇଶ୍ୱର ଅନ୍‌ ମୁନେନ୍‍ ଜାନୁମ୍‌ଆତ୍‌ତା ମାରିଙ୍କ୍‍ ଇ ବୁମ୍‍ତାଗ୍‍ ରହତେୱେଲେ ଇଦ୍‍ କେସ୍‌ମାତ୍‌ତଣ୍ଡ୍‌, “ଇଶ୍ୱରନ୍‌ ଦୂତ ସାର୍ରେ ଅଙ୍କ୍‌‌ ଆରାଦନା ମାଡ଼ିତା ।”
HEB 1:7 ଇତ୍‍କେ ଦୂତକିନ୍‍ ବିସୟତେ ଇଶ୍ୱର ଇଦ୍‌ ଗଟ୍‌ କେତ୍‌ତଣ୍ଡ୍‍; “ଇଶ୍ୱର ତାନ୍‍ ଦୂତକିଙ୍କ୍‍ ଗାଲ୍‍ଦେ ଲେକାମ୍‍ ମେଣ୍ଡେ ତାନ୍ ଯତନ୍‌ ମାଡ଼ାନଡ଼୍‍କିଙ୍କ୍‌ ପତାନ୍ କିସ୍‌ତେ ଲେକାମ୍‍ ମାଡ଼ିତଣ୍ଡ୍‌ ।”
HEB 1:8 ଅଣ୍ଡ୍‌‌ ମାରିନ୍‌ ବିଷୟତେ ଅଣ୍ଡ୍‌‌ କେସ୍‌ମାତ୍‌ତଣ୍ଡ୍, “ଆ ଇଶ୍ୱର, ନିୟାଦ୍‍ ରାଜ୍ୟ ସାରେଦିନାମ୍‍ ମାନି ! ନିମା ନ୍ୟାୟତେ ନି ନାରୁଡ଼୍‍କ୍ ଶାସନ୍‍ ମାଡ଼ୁତିନ୍‍ ।
HEB 1:9 ନିମ୍‌ ଦର୍ମାମ୍‌ତିଙ୍କ୍‍ ସାୟେ କେତିତି ନୁ ଅଦାର୍ମିକ୍‍ ଇଲ୍‌ୱାଦ୍ ନିକିଙ୍କ୍‍ ଅପ । ଆଦିଙ୍କ୍‍ ଇଶ୍ୱର୍ ନି ଇଶ୍ୱର ନିକିଙ୍କ୍‍ ନିୟ୍‍ ଆକି ଏଞ୍ଚିମିନ୍ଦେଣ୍ଡ୍‍ ମେଣ୍ଡେ ମିୱଡ଼୍‍ ସାଙ୍ଗଡ଼୍‍ ଲୋପେଙ୍କ୍‍ ନିକିଙ୍କ୍‍ ଗାଟି ପ୍ରେମ ଇସ୍‍ ୱେଡ଼୍‍କେ ମାଡ଼୍‍ତଣ୍ଡ୍‍ ।”
HEB 1:10 ଅଣ୍ଡ୍‌‌ ମେଣ୍ଡେ କେତ୍‍ତଣ୍ଡ୍, “ଅ ପ୍ରବୁ ନିମା ମୁନେନ୍ ବୂମ୍‌ତିଙ୍କ୍‍ ସୃଷ୍ଟି ମାଡ଼୍‌ତିନ୍‌, ମେଣ୍ଡେ ନି କାଇଦେ ମୟଲ୍‍ତିଙ୍କ୍‍ ସୃଷ୍ଟି ମାଡ଼୍‌ତିନ୍‌ ।”
HEB 1:11 ଆୱୁ ସାର୍ରେ ଅଣ୍ଡ୍‌‌ ଦିନା ତେରିତା । ଇତ୍‌କେ ନିମା ଆଲେକେ ମାନ୍‌ତିନ୍‌ । ଆୱୁ ପାନ୍‌ତା ସିଲେକ୍‌ ଲେକାମ୍ ନଷ୍ଟ ଆଦ୍‍ତା ।
HEB 1:12 ଚକାସିଲେ ସଜା ମାଡ଼୍‍ତେ ଲେକାମ୍‍ ନିମେ ଆୱୁ ସାର୍ରେ ସଜାମାଡ଼ି ନେଃଏତିତି ମେଣ୍ଡେ ଚକାସିଲେ ବଦ୍‍ଲା ମାଡ଼ାନ୍‍ ଲେକାମ୍‍ ବାଦ୍‍ଲେମ୍‍ ମାଡ଼ିତିଡ଼୍‍ କିନ୍ତୁ ନିଜେ ନିମେ ବାଦ୍‍ଲେମ୍‍ ଆୟ୍‍ୱେ ଲେକାମ୍‍ ମାନ୍‍ତି ମେଣ୍ଡେ ନିମା ସାରେଦିନା ମାନ୍‍ତାନ୍ ।
HEB 1:13 ମେଣ୍ଡେ ଇଶ୍ୱର ତାନ୍‌ ବେନ୍‌ଆଇ ଦୂତଙ୍କ୍‍ ବେସୁଟ୍‌ କେତ୍‌ଇଲେ; “ନାନ୍‍ ମି ଶତ୍ରୁଡ଼୍‍କିଙ୍କ୍‍ ବେସୁଟ୍‌ ଆୟ୍‍ନା ମି ଡେକା ମଦଲ୍‌ ୱାଟନ୍ ଆସୁଟ୍‌ ଆୟ୍‍ନା ନା ତିନ୍ଦା ପାକ୍‍ କୁଦିମାନ୍‌ ।”
HEB 1:14 ଆଲେକେ ସ୍ୱର୍ଗଦୂତଡ଼୍‍ ବେନ ? ଅଡ଼୍‌‍ ଆଦୁତଡ଼୍‍ ଇଶ୍ୱର୍‌ତେ ସେବକିଡ଼୍‍, ପରିତ୍ରାଣ୍‍ ପାଏମ୍‍ ଆଦାନ୍‍ ନାରୁଡ଼୍‍ତେ ସାହାଯ୍ୟ ସେଙ୍ଗେ ଇଶ୍ୱର୍ ରଅତେ ଆତ୍ମାକି ।
HEB 2:1 ମାନାଲ୍‌ ବେଲାକି ସାତ୍‌ତାନୁଞ୍ଚ୍‌ ୱେରେ ଆଇୱାଲ୍‌, ଆଦିନ୍‌ ମାଇଦେ ମାନାଲ୍‌ କେଞ୍ଚ୍‌ତା ଗଟିକିଙ୍କ୍‍ ଡାଟୁମ୍‌ତେ ପଇସ୍‌ ମାନ୍ଦାନ୍‌ ମିନ୍ଦେ ।
HEB 2:2 ବାତେଙ୍କ୍‍ଇତ୍‍କେ ମୁନେଙ୍କ୍‍ ଇଶ୍ୱର୍ ଦୂତକିନ୍‍ ତଡ଼୍‍ ବାତା କାବୁର୍‍ କେସ୍‌ମାତ୍‍ତା, ଆଦ୍‌ ସତ୍‍ ଆସ୍‌ମିନ୍ଦେ, ବେନଡ଼୍‍ ଆଦିନ୍‌ ପିନ୍ଦ ଇଞ୍ଜ ପାଲନ୍‍ ମାଡ଼ଡ଼୍‍, ଅଡ଼୍‌‍ ଆଦ୍‍ ଦଣ୍ଡ ପାଏମ୍‍ ଆତ୍‍ତଡ଼୍‍ ।
HEB 2:3 ଆଲେଇତ୍‌କେ, ଇଦ୍‌ ବାଡ଼୍‍ୟେ ପରିତ୍ରାଣତିଙ୍କ୍‍ କେପ୍‍ତଡ଼୍‍, ମାନାଡ଼୍‍ ବେଲା ଗେଲ୍‌ସିତାଡ଼୍‍ ? ଇଦ୍‌ ପରିତ୍ରାଣ ପ୍ରବୁ ନିଜେ ମୁନେନ୍ କେତ୍‌ତଣ୍ଡ୍‌ ମେଣ୍ଡେ ଅନାଗ୍‍କଞ୍ଚ୍ କେଞ୍ଜୀମାତ୍‌ତେ ନାରୁଡ୍‌ ଅନାଦ୍‌‌ ବେଡ଼ିୟାଦ୍ ସତ୍‌ ମାୟାଗ୍‌ ନିଜାମ୍‌ ଇଞ୍ଜ କେସ୍‌ମିନ୍ଦେଡ଼୍‍ ।
HEB 2:4 ମେଣ୍ଡେ ଗାଲେୟ୍‌, ଇଶ୍ୱର ଚିଏଃନେ ନୁ ନାର୍ଗେ ବେପଡ଼୍‍ ଆୟ୍‍ୱାଦ୍ ପାଡିୟ୍ ମେଣ୍ଡେ ଆଶର୍ଯ୍ୟ ପାଡ଼୍‍ୟି ନୁ ପବିତ୍ର ଆତ୍ମାନ୍ ୱେରେୱେରେ ଦାନାମ୍ ତଡ଼୍‍ ସାକ୍ଷି ଇସ୍‌ ମିନ୍ଦେ ।
HEB 2:5 ଇଶ୍ୱର ବେନ୍ ପୁନା ବୁମ୍ ତିଆର୍ ମାଡ଼ିତଣ୍ଡ୍‍ ନୁ ବେନ୍‍ ବୁମ୍‌ତା ମାଟା ମାନାଡ଼୍‍ କେତୁତାଡ଼୍‍, ତାଙ୍କ୍‍ ଶାସନ୍‍ ମାଡ଼ାନ୍‍ ସେଙ୍ଗେ ଅଣ୍ଡ୍‌‌ ସ୍ୱର୍ଗ ଦୂତକିଙ୍କ୍‍ ଏଞ୍ଚଣ୍ଡ୍‌ ।
HEB 2:6 ବାତେଙ୍କ୍‍ ଇତ୍କେ ଦର୍ମଶାସ୍ତ୍ରତାଗ୍‍ ଲେକା ମିନ୍ଦେ, “ଆ ଇଶ୍ୱର, ନାରୁଡ଼୍‍ ବେନଡ଼୍‍ ଜେ, ନିମ୍ ଆଦିନ୍‌ ମାଇଦିଙ୍କ୍ ଆଲ୍‌ସୁତି ମେଣ୍ଡେ ନାରୁଡ୍‌ ଇଚ ସୁଡୁଟ୍‌ ମାତ୍‌କେ ଗାଲେୟ୍‌ ନିମେ ଅଡ଼୍‌‍ ମାଇଦିଙ୍କେ ଆଲ୍‌ସିତି ?
HEB 2:7 ନିମା ଅଡ଼୍‌କିଂଙ୍କ୍‌ ଦୂତକିନୁଞ୍ଚ୍ ସୁଡୁଟ୍‌ କମ୍ ମାଡ଼ିମିନ୍ଦେନ୍, ନିମେ ଅଙ୍କ୍‌ ଗୌରବ୍‍ତାଦ୍ ନୁ ଗାଟି ସନ୍‌ମାନ୍‌ତାଦ୍ ସହଜ୍‍ ନେହ୍‌ତଣ୍ଡ୍‍,
HEB 2:8 ସାର୍ରେ ବିଷୟ୍‍ତେ ପର ଶାସନ୍‍ ମାଡ଼ାଙ୍କ୍‍ ଅଦିକାର୍‌ ଇତ୍‌ତେ ।” ମେଣ୍ଡେ “ସାର୍ରେ ବିଷୟ୍‌ତେ,” ଇଦିନ୍‍ ଅର୍ତ ବାତେବା ବିଷୟ୍‍ ୱିଡ଼୍‍ସ୍‍ୱେ ସାର୍ରେ ବିଷୟ୍‍ତେ ପର୍ର ଅଦିକାର୍‌‌ ଇସ୍‌ମିନ୍ଦେଣ୍ଡ୍‍ । ଇଗାଙ୍କ୍‍ ସାୟେ ପୁନ୍ଦାନଙ୍କ୍‍ ଆଦୁତ୍‍ ଯେ, ସାର୍ରେ ବିଷୟ୍ ତାନ୍‌ ଅଦିକାର୍‌‌ତେ ଲୋପେ ମିନ୍ଦେ । ଆଗେବା ମାମ୍ ପୁତ୍‌ତମ୍, ନାରୁଡ୍‌ ଇଞ୍ଜେ ସାର୍ରେ ବିଷୟ୍‌ତେ ପର ଅଦିକାର୍‌‌ ମାଡ଼ଡ଼୍‍ ।
HEB 2:9 ମାମ୍ ଉଡୁତମ୍‌, ବେଲାକି ଜିସୁ ସ୍ୱର୍ଗ ଦୂତନୁଞ୍ଚ୍‌ ସୁଦୁଲଣ୍ଡ୍‌ ମାଡ଼ିମାତ୍‌ତଡ଼୍‍, ବେଲାକି ଇଶ୍ୱରନ୍‌ ଅନୁଗ୍ରହନୁଞ୍ଚ୍‌ ସାର୍ରେତଡ୍‌ ମାଇଦିଙ୍କ୍ ଡଲିତଣ୍ଡ୍‌ । ତାନାଦ୍‍ ଆ ଡଲ୍‌ତେ ମାଇଦିଙ୍କ୍ ମାନାଲ୍ ଇଞ୍ଜେ ଅଙ୍କ୍‌‌ ଗୌରବ୍‍ତେ ନୁ ନେକ୍‌କା ସାନ୍‌ମାନ୍‌ତାଦ୍‌ ସହଜ୍‍ କେର୍‍ତାଦ୍‌ ଉଡୁତାଲ୍‌ ।
HEB 2:10 ସାର୍ରେତଡ଼୍‌କ୍ ତିଆର୍‌ ମାଡ଼ାନଣ୍ଡ୍‌ ନୁ ଗେଲ୍‌ସ୍ପାନଣ୍ଡ୍‌ ଇଶ୍ୱର ତାନ୍ ନାର୍ଗେ ମାର୍‌ ମାୟାସ୍କ୍‍କିଙ୍କ୍‍ ଜିସୁନ୍‌ ଗୌରବତେ କାଇଲ୍‍ପାନ୍‍ ମାଇଦିଙ୍କ୍, ଡଲାନାଗାଙ୍କ୍‌ ଜିସୁଙ୍କ୍‍ ସିଦ୍ଦ ମାଡି ସାୟେ ପାଡିୟ୍‌ ମାଡ଼୍‍ତଣ୍ଡ୍‍ । ଇତ୍‌କେ ଜିସୁ ଆଦୁତଣ୍ଡ୍‌ ପରିତ୍ରାଣ ଆର୍‌ଦେ ଅଡ଼୍‌‍କିଂଙ୍କ୍‌ ଅଦାନଣ୍ଡ୍‍ ।
HEB 2:11 ଆଦିଙ୍କ୍‍ ଜିସୁ ନୁ ବେନଡ଼୍‍କ୍‌ ଅଣ୍ଡ୍‌‍ ପବିତ୍ର ମାଡ଼ିତଣ୍ଡ୍‍, ଅଡ଼୍‌‍ ସାର୍ରେତଡ଼୍‍ ଅଣ୍ଡୟ୍‌‍ ବାବାନ୍ ମାର୍‍କ୍‍ । ଆଦିନ୍‌ ମାଇଦେ ଜିସୁ ଅଡ଼୍‌‍କିଂଙ୍କ୍‍ ଏଲାଡ଼୍‍ତାମୁଣ୍ଡ୍‍ ଇଞ୍ଜ କେତାନଙ୍କ୍‌ ସିଗ୍‌ ଆୟଣ୍ଡ୍‍ ।
HEB 2:12 ଅଣ୍ଡ୍‌ ଇଶ୍ୱରତିଙ୍କ୍‍ କେତ୍‍ତଣ୍ଡ୍, “ନାନ୍ ନିୟାଦ୍‌ ସାର୍ରେ ପାଡ଼୍‍ୟି ନା ଏଲାଡ଼୍‍ତାମୁଡ଼୍‍କିନ୍‌ କେତିତାନ୍‌ । ନାନ୍‌ ଆଡ୍‌କ୍‍ ଗୁଡ଼ିମାନ୍ଦାନାଗେ ନିୟାଦ୍‍ ପ୍ରସଂଶା ପାଟା ପାରିତାନ୍‌ ।”
HEB 2:13 ଅଣ୍ଡ୍‌‌ ଇଦ୍‌ ମିକା କେତ୍‌ତଣ୍ଡ୍‌, “ନାନ୍‌ ଇଶ୍ୱରନାଗେ ବିଶ୍ୱାସ୍ ୱାଟିତାନ୍ ନୁ ଇଶ୍ୱର ନାକିଙ୍କ୍‍ ବେନ୍‍ ପିଲାକିଙ୍କ୍‍ ଇସ୍‌ମିନ୍ଦେଣ୍ଡ୍‍ ଅଡ଼୍‌‍ ନା ତଡ୍‌ ମିନ୍ଦେଡ଼୍‍ ।”
HEB 2:14 ଅଣ୍ଡ୍‌‌ ବେନଡ଼୍‍କ୍‌ ମାର୍‌କ୍‌ ଇଞ୍ଜ କେସ୍‌ମିନ୍ଦେଣ୍ଡ୍‍, ଅଡ଼୍‌‍ ନେତୁର୍‌ ମେନ୍ଦୁଲ୍‌ ପୟ୍‍ତେ ନାରୁଡ଼୍‍ ଆସ୍‌ମାନ୍ଦାନ୍‌ ମାଇଦିଙ୍କ୍‌ ଜିସୁ ମେଣ୍ଡେ ନିଜେ ଅଡ଼୍‌‍ ଲେକାମ୍ ନାରୁଣ୍ଡ୍‌ ଆସ୍‌ ଜନମ୍‌ ଆସ୍‍ମାତ୍‌ତଣ୍ଡ୍‌ । ଅଣ୍ଡ୍‌‌ ଇଲା କେତାନାଦ୍‍ ଉଦେଶ୍ୟ ଆଦୁତ୍‍, ଅଣ୍ଡ୍‌‌ ବେଲାକି ନିଜେ ଡଲିମାଞ୍ଜ୍‌ ଶଇତାନ୍‌ତିନ୍‌ ଆୱ୍‌କା ପାର୍ଦିତଣ୍ଡ୍‌, ଡଲାନାଦ୍‌ ପର୍ର୍‌ ଶଇତାନ୍‌ତାଦ୍‌ ଅଦିକାର୍‌‌ ମାତ୍‌ତା ।
HEB 2:15 ଇଦିନ୍‌ସେଙ୍ଗା ସାର୍ରେଦିନା ଡଲାନ୍‌ ୱେର୍‌ୟି ଲେକାମ୍‍ ଦାସତ୍ୱ ବନ୍ଦନ୍‍ତାଗ୍‍ ମାନ୍ଦାନ୍‌ ନାରୁଡ଼୍‍କିନ୍‌ ଅଣ୍ଡ୍‌‌ ଗେଲ୍‌ସ୍ପି ମିନ୍ଦେଣ୍ଡ୍‌ ।
HEB 2:16 ଇଗାଙ୍କ୍‍ ପୁନ୍ଦାନଙ୍କ୍‍ ଆଦ୍‍ତେ ଜେ, ଅଣ୍ଡ୍‌‌ ଦୂତକିନ୍‌ ସାହାଯ୍ୟ ମାଡ଼ଣ୍ଡ୍‌, “ଅଣ୍ଡ୍‌‌ ଅବ୍ରାହାମ୍‌ତେ ବଂଶତଡ଼୍‍କ୍‍ ସାହାଯ୍ୟ ମାଡ଼ିତଣ୍ଡ୍‌ ।”
HEB 2:17 ଆଦିଙ୍କ୍‍, ସାରେ ବିଷୟତେ ତାନ୍‌ ଏଲାଡ଼୍‍ତାମୁଣ୍ଡ୍‍ ଲେକେମ୍‍ ଆଦାନଙ୍କ୍‌ ଅଙ୍କ୍‌ ଦାର୍‌କାର୍‌ ମାତ୍‌ତା, ବେଲାକି ଅଣ୍ଡ୍‌‌ ଅଡ଼ାଦ୍‌‌ ବିଶ୍ୱସ୍ତ ନୁ ଦୟାବାନ୍ ମାଡ଼ାନଣ୍ଡ୍‍ ବେଡ଼୍‍ୟା ପୁଜାରି ଆସ୍‌ ଇଶ୍ୱରନ୍‌ ସେବା ମାଡ଼େପାର୍ଦିତଡ଼୍‍ ମେଣ୍ଡେ ନାରୁଡ଼୍‍ ପାପାମ୍‌ନୁଞ୍ଚ୍‌ କ୍ଷମା ଆଦ୍‌ତଡ଼୍‍ ।
HEB 2:18 ଆଦିଙ୍କ୍‍ ଅଣ୍ଡ୍‌‌ ନିଜେ ପରିକ୍ୟା ଆସ୍ ଦୁଃକାମ୍‌ତେ ମାତ୍‌ତଣ୍ଡ୍‌, ପରିକ୍ୟାତାଗ୍‌ ମାନ୍ଦାନ୍ ନାରୁଡ଼୍‍କିଙ୍କ୍‍ ଗେଲ୍‌ସ୍ପାନ୍ ମାଇଦିଙ୍କ୍ ପାର୍‍ଦ୍‍ତଣ୍ଡ୍‍ ।
HEB 3:1 କ୍ରିଷ୍ଟ ବିଶ୍ୱାସି ଏଲାଡ଼୍‍ତାମୁଣ୍ଡ୍‍, ମିକିଂଙ୍କ୍‍ ଗାଲା ଇଶ୍ୱର କାର୍‍ଙ୍ଗ୍‍ତଣ୍ଡ୍, ମିଡ଼୍‍ ଜିସୁନ୍‌ ବିଷୟ୍‌ତେ ଆଲ୍‌ସାଟ୍ ! ଅଙ୍କ୍‌ ମାନ୍‍ ବିଶ୍ୱାସିଡ଼୍‍ ବାଡ଼ିୟା ପୁଜାରି ଆଦାନଙ୍କ୍‌ ଇଶ୍ୱର ପ୍ରେରିତ ମାଡ଼ିମିନ୍ଦେଣ୍ଡ୍‌ ।
HEB 3:2 ମଶାଲ୍‌ ବେଲା ଇଶ୍ୱରତେ ଲନ୍‍ ବିଶ୍ୱାସ୍‌ତେ ପାଡ଼ିୟ୍‌ ମାଡ଼ିମାତ୍‌ତଣ୍ଡ୍, ଇଶ୍ୱର ଏଞ୍ଚ୍‌ତେ ଜିସୁ ମେଣ୍ଡେ ଆଲେକେ ଇଶ୍ୱରନ୍‌ ସେଙ୍ଗେ ବିଶ୍ୱାସ୍‌ତେ ପାଡ଼ିୟ୍‌ ମାଡ଼ମାତ୍‌ତଣ୍ଡ୍‌ ।
HEB 3:3 ଇତ୍‌କେ ଲୋନ୍‌ତାଗାଙ୍କ୍‍ ଲୋନ୍‌ ମାଡ଼୍‍ତେନଙ୍କ୍‌ ନାର୍ଗେ ସମ୍ମାନ୍ ଦର୍କିତା । ଆଲେକେ ମଶାନାଗାଙ୍କ୍‍ ଜିସୁ ନାର୍ଗେ ସାମ୍ମାନ୍‌ ପାଏମ୍‍ ଆଦାନଙ୍କ୍‍ ଯୋଗ୍ୟ ।
HEB 3:4 ସାର୍ରେ ଲକ୍‌ ବେନ ବା ବେନ ମାଡ୍‌ତାୱ୍‌, ଇତ୍‌କେ ଇଶ୍ୱର ସାର୍ରେ ବିଷୟ୍‍ ତିଆର୍‍ ମାଡ଼ାନଣ୍ଡ୍ ।
HEB 3:5 ସେବକ୍‍ ଇସାବ୍‌ତେ ମଶାଲ୍ ଇଶ୍ୱରନ୍ ଲନ୍ ବିଶ୍ୱାସ୍‌ତେ ପାଡିୟ୍‌ ମାଡ଼ିମାତ୍‍ତଣ୍ଡ୍ ମେଣ୍ଡେ ଅନ୍‌‍ ପାଡ଼୍‍ୟି ଇଶ୍ୱର୍ ବବିଷ୍ୟତ୍‍ତେ କେତାନଙ୍କ୍‍ ମାନ୍ଦାନ୍‍ ଇଚ୍ଛା ମାଡ଼ିମାନ୍ଦାନ୍‍ ଆଦେ ବିଷୟ୍‌ତେ ଉଦାରନ୍‍ ଲେକାମ୍‍ ।
HEB 3:6 ଇତ୍‌କେ କ୍ରିଷ୍ଟ ମାର୍‌ ଲେକାମ୍‍ ଇଶ୍ୱରନ୍ ପୁରାଲୋତ୍‍ତେ ଦାୟିତ୍ୱତାଗ୍‍ ବିଶ୍ୱସ୍ତ ମିନ୍ଦେଣ୍ଡ୍‌ । ମାନାଡ଼୍‍ ଯଦି ଡାଟୁମ୍‌ତେ କେତ୍‌ତାୱ୍‌ ବିଷୟ୍ ଦର୍କିତା ଇଞ୍ଜ ମାନ୍‍ ବିଶ୍ୱାସ୍‌ତେ ଡୁଟାଙ୍ଗ୍‍ ମାନ୍‌ତାଡ଼୍‍, ଆଲାଇତ୍‌କେ ମାନାଡ଼୍‍ ଗାଲା ଅନ୍‌‌ ଲୋନ୍‌ ଆଦେପାର୍‍ଦ୍‍ତାଡ଼୍‍ ।
HEB 3:7 ଆଦିଙ୍କ୍‍ ପବିତ୍ର ଆତ୍ମା ବେଲା କେତୁତଣ୍ଡ୍‍, “ନେଣ୍ଡ୍‌ ଯଦି ମିଡ଼୍‍ ଇଶ୍ୱରନ୍‌ ଗଟ୍‌ କେଞ୍ଜିତିଡ଼୍‍,
HEB 3:8 ଆଲାଇତ୍‌କେ ମି ଆନିଦାଦିଡ଼୍‍ ଲେକାମ୍‍ ହୃଦୟ୍‌ତିଙ୍କ୍‍ କଟିନ୍‍ ମାଡ଼୍‍ମାଟ୍, ଉସ୍କନେଲ୍‌ଦାଗ୍‌ ଅଡ଼୍‌‍ ଆଦ୍‍ ଦିନେ ଇଶ୍ୱରଙ୍କ୍‍ ପରିକ୍ୟା ମାଡ଼ି ଅନ୍‌‍ ବିରୁଦ୍ଦ୍‌ତେ ନିସ୍‍ମାତ୍‍ତଡ଼୍‍ ।
HEB 3:9 ଇଶ୍ୱର କେତୁତଣ୍ଡ୍‍, ଆଗା ଅଡ଼୍‌‍ ନାୟାଦ୍‌ ଲାୱ୍‌ଦିଙ୍କ୍‍ ନୁ ଡାଟୁମ୍‌ତିଙ୍କ୍‍ ପରିକ୍ୟା ମାଡ଼୍‍ତଡ଼୍‍, ନାନ୍‍ ଚାଲିଶ୍ ଏଣ୍ଡ୍‌କ୍‌ ଯାକ ନାନ୍‌ ବେନାସାର୍ରେ ପାଡ଼ିୟ୍‌ ମାଡ଼ିମାତ୍‌ତାନ୍, ଆଦ୍‌ ଅଡ଼୍‌‍ ଉଡ଼ିମାତ୍‍ତଡ଼୍‍ ।
HEB 3:10 ଆଦିଙ୍କ୍‍ ନାନ୍‌ ଅଡ଼୍‌‍ ପର୍ର ନେକ୍‌କା କପାମ୍ ଆସ୍‌ କେତ୍‌ତାନ୍‌, ଅଡ଼୍‌‍ ସାରେଦାମ୍‌ ବିଶ୍ୱାସ୍‍ ଇଲ୍‍ୱେନଡ଼୍‍ ମେଣ୍ଡେ ନା ଗଟ୍‌ କେଞ୍ଜନଙ୍କ୍‌ ଇଷ୍ଟାମ୍‌ ଇଲ୍‌ୱାନଡ୍‌ ।
HEB 3:11 ନାନ୍‌ କପାମ୍‌ ଆସ୍‍ ଶପତ୍‍ ମାଡ଼୍‍ତାନ୍, ‘ନାନ୍ ବେନ୍‍ ଦେଶ୍‌ତାଗ୍‌ ରମାନଙ୍କ୍‌ ଇୱେନ୍‍, ଆ ଦେଶ୍‌ତାଗ୍‌ ଅଡ଼୍‌‍ ବେସୁଟ୍‍ବା ନେଙ୍ଗା ପାର୍ୱଡ଼୍‍ ।’”
HEB 3:12 ଅବିଶ୍ୱାସୀ ଦାଦାଲଡ଼ି ନୁ ଏଲାସ୍କ୍‍, ସାବ୍‍ଦାନ୍‍ ମାନୁଟ୍‌, ମିୟାଗାଙ୍କ୍‌ ବେନନ୍ ହୃଦୟ୍‌ ବେଲାକି ପାପ୍ ନୁ ବିଶ୍ୱାସ୍ ଇଲ୍‌ୱା ମାଞ୍ଜ୍‌ ଜିୱୁ ମାନ୍ଦାନ୍ ଇଶ୍ୱରନୁଞ୍ଚ୍‌ ୱେରେ ଆୟ୍‌ମାକି ।
HEB 3:13 ଇତ୍‍କେ ବେସୁଙ୍କ୍‌ବା ପାପ୍‌ତେ ଆଶେତ୍ ଟକେମ୍‍ ଆସ୍‍ ମିୟାଗାଙ୍କ୍‌ ବେନନ୍ ମନ୍‌ ଡୁଟାଙ୍ଗ୍‍ ଆୟ୍‍ମାକି, ଆଦିନ୍‌ ମାଇଦିଙ୍କ୍‌ ନେଣ୍ଡ୍ ସମୟ୍‌ ମାଞ୍ଜ୍ ମାଞ୍ଜ୍‌ ୱେରଣ୍ଡ୍‌ ମେଣ୍ଡ୍‌ୱେରଙ୍କ୍ ୱେଡ଼୍‍କେ ମାଡ଼ାଟ୍ । ମେଣ୍ଡେ ଦର୍ମଶାସ୍ତ୍ରତାଗ୍‍ ଲେକ୍‍ତାଦ୍‍, “ନେଣ୍ଡ୍‍” ଲେଙ୍ଗ୍‌ ବେସୁଟ୍‌ ଆନା ମାନ୍‍ ସେଙ୍ଗେ ଦର୍‍କାର୍‍, ଆସୁଟ୍‍ ଆଦ୍‍ ମାଡ଼ମାନୁଟ୍‍,
HEB 3:14 ଯଦି ମାନାଡ଼୍‍ ମାଡେଙ୍ଗ୍‌ ଆୟ୍‌ନା ସାୟେ ବିଶ୍ୱାସ୍‌ତେ ମାନ୍‌ତାଡ଼୍‍, ଆଲାଇତ୍‌କେ ମାନାଡ଼୍‍ ସାର୍ରେତଡ଼୍‍ କ୍ରିଷ୍ଟନ୍‌ତଡ଼୍‍ ଆଂଶିଦାର୍‍ ଆଦେ ପାର୍‍ଦ୍‍ତାଡ଼୍‍ ।
HEB 3:15 ଦର୍ମଶାସ୍ତ୍ରତାଗ୍‌ ଲେକ୍‍ତାଦ୍ ମିନ୍ଦେ, ନେଣ୍ଡ୍‌ ଯଦି ମିଡ଼୍‍ ଇଶ୍ୱରନ୍‌ ଗଟ୍‍ କେଞ୍ଜିତିଡ଼୍‍, ଆଲେକେ ନି ଆନିଦାଦିଡ଼୍‍ ହୃଦୟ୍‌ ତିପାଲ୍‌ ମାଡ଼ି ଇଶ୍ୱରନ୍ ପର୍ର ବେଲା ବିରୁଦ୍ଦ୍‌ ମାଡ଼ିମାତ୍‌ତଡ଼୍‍, ଆଲା ମାଡ଼୍‍ମାଟ୍ ।
HEB 3:16 ଇଶ୍ୱରନ୍‌ ଗଟ୍‍ କେଞ୍ଜି ଗାଲେୟ୍‌ ବେନଡ଼୍‍ କି ଅନ୍‌ ପର୍ର ବିରୁଦ୍‍ ମାଡ଼୍‍ତଡ଼୍‍, ଅଡ଼୍‌‍ ବେନଡ଼୍‍ ? ବେନ୍‍ ନାରୁଡ୍‌କିଙ୍କ୍‍ ମଶାଲ୍ ମିସର୍ ଦେଶ୍‌ନୁଞ୍ଚ୍‌ କାର୍‍ଙ୍ଗି ତାସ୍‌ମାତ୍‍ତଣ୍ଡ୍, ଅଡ଼୍‌‍ ଆୟଡ଼୍‍ କି ।
HEB 3:17 ଚାଲିଶ୍ ଏଣ୍ଡ୍‌ ପଇସ୍‌ ବେନ ଇଶ୍ୱର୍‌ତିଙ୍କ୍‍ କପାମ୍ ମାଡ଼ିମାତ୍‍ତଡ଼୍‍, ଅଡ଼୍‌‍ ବେନଡ଼୍‍ ? ବେନଡ଼୍‍ ପାପ୍‌ ପାଡ଼୍‍ୟି ମାଡ଼ି ଉସ୍କନେଲ୍‌ଦାଗ୍‌ ଡଲିମାତ୍‍ତଡ଼୍‍, ଅଡ଼୍‌‍ ଆୟଡ଼୍‍ କି ।
HEB 3:18 ଇଶ୍ୱର ବେସୁଙ୍କ୍‍ ଶପତ୍‌ ମାଡ଼ି କେସ୍‌ମାତ୍‍ତଣ୍ଡ୍‍ ଯେ, ଅଡ଼୍‌‍ ମାନ୍‍ୱାଦ୍ ରମାନାଗ୍‌ ବେସୁଟ୍‍ବା ନେଙ୍ଗେ ପାର୍ୱଡ଼୍‍, ଆସୁଙ୍କ୍‌ ଅଣ୍ଡ୍‌‌ ବେନ୍‍ ନାରୁଡ଼୍‍ ବିଷୟ୍‌ତେ ଆଦ୍‍ କେସ୍‌ମାତ୍‌ତଣ୍ଡ୍‌ ? ବେନଡ଼୍‍ ବିରୁଦ୍ଦ୍‌ ମାଡ଼ିମାତ୍‌ତଡ଼୍‍, ଅଡ଼୍‌‍ ବିଷୟତେ ଅଣ୍ଡ୍‌‌ ଆଦ୍ କେସ୍‌ମାତ୍‌ତଣ୍ଡ୍‌ ।
HEB 3:19 ଆଦିଙ୍କ୍‍ ମାମେ ଉଡ଼ମିନ୍ଦେମ୍‌ ଯେ, ତାମାଦ୍ ଅବିଶ୍ୱାସୀତେ ମାଇଦିଙ୍କ୍‌ ଅଡ଼୍‌‍ ଆ ପ୍ରତିଜ୍ଞା କିଣାନ ଦେଶ୍‍ତାଗ୍‍ ନେଙ୍ଗେ ପାର୍ୱଡ଼୍‍ ।
HEB 4:1 ମାନାଙ୍କ୍‍ ବେନ୍‍ ପ୍ରତିଜ୍ଞାତ କିଣାନ ଦେଶ୍‍ ଇଦ୍‍ତାନ୍ ଇଞ୍ଜ ଇଶ୍ୱର କେସ୍‌ମାତ୍‌ତଣ୍ଡ୍‍, ଆଦ୍‌ ଇଞ୍ଜେ ଗାଲା ପ୍ରତିଜ୍ଞାତ ମିନ୍ଦେ । ଆ ପ୍ରତିଜ୍ଞା ରମାନ୍ ଦିନେ ବେନନ୍ ବେଲାକି ବାତ୍‌ ଆୟ୍‍ମାକିଣ୍ଡ୍‍, ଆଦିନ୍ ମାଇଦିଙ୍କ୍ କେପିମାନୁଟ୍‌ ।
HEB 4:2 ବାତାଙ୍କ୍‌ଇତ୍‌କେ ଅଡ଼୍‌‍ ଲେକେମ୍‍ ମାମ୍ ଗାଲା ସୁସମାଚାର୍‍ କେଞ୍ଜ୍‌ତମ୍‌ । ଅଡ଼୍‌‍ ଆଦ୍‌ କେଞ୍ଜି ଗାଲେୟ୍‌ ବିଶ୍ୱାସ୍ ମାଡ଼ଡ଼୍‍ । ଆଦିଙ୍କ୍‍ ଅଡ଼୍‌‍ ସାଙ୍ଗ୍ ଆଦ୍‌ ସାୟେତାଦ୍‌ ଆୟ୍‌ୱାମାତ୍‌ତେ ।
HEB 4:3 ଇତ୍‌କେ ବେନଡ଼୍‍ ମାୟାଗାନୁଞ୍ଚ୍ ବିଶ୍ୱାସ୍ ମାଡ଼ିତଡ଼୍‍, ଅଡ୍‌ ଯେ ଇଶ୍ୱର କେସ୍‌ମାତ୍‌ତାଦ୍‌ ରମାନାଦ୍‍ ଦର୍ସ୍କେ ପାର୍ଦିତଡ଼୍‍, ବାତେଙ୍କ୍‍ ଇତ୍କେ ଇଶ୍ୱର କେତ୍‍ତଣ୍ଡ୍‍, “ନାନ୍‌ କପାମ୍ ଆସ୍ ଶପତ୍‌ ମାଡ଼୍‍ତାନ୍, ‘ଅଡ଼୍‌‍ ନା ରମାନାଗ୍‌ ନେଙ୍ଗେ ପାର୍ୱଡ୍‌ ।’” ଯଦିବା ଇଦ୍‍ ବିଶ୍ରାମ୍ ଜଗତ୍‍ ସୃଷ୍ଟିତାଗାଙ୍କ୍‍ ତିଆର୍‍ ଆସ୍‍ମିନ୍ଦେ ।
HEB 4:4 ଅଣ୍ଡାଗ୍‌ ଦର୍ମଶାସ୍ତ୍ରତାଗ୍ “ସାତ୍‌ ଦିନେତେ,” ବିଷୟ୍‌ତେ ଇଲା ଲେକ୍‍ତାଦ୍ ମିନ୍ଦେ, “ଇଶ୍ୱର ତାନ୍ ସାର୍ରେ ପାଡ଼୍‍ୟି ତେର୍‌ସ୍‌ପିସ୍‌ ସାତ୍ ଦିନାମ୍‌ତେ ରମ୍‌ତଣ୍ଡ୍‍ ।”
HEB 4:5 ମେଣ୍ଡେ ଇଦିନ୍‌ ବିଷୟ୍‌ତେ ମେଣ୍ଡ୍‌ଅଣ୍ଡାଗ୍‌ ଲେକ୍‍ତାଦ୍ ମିନ୍ଦେ, “ଇଶ୍ୱର୍ କେତ୍‍ତଣ୍ଡ୍‍, ଅଡ଼୍‌‍ ନା ରମାନାଗ୍ ବେସୁଙ୍କ୍‌ବା ନେଙ୍ଗେ ପାର୍ୱଡ଼୍‍ ।”
HEB 4:6 ବେନଡ଼୍‍ ମୁନେଙ୍କ୍‌ ସୁସମାଚାର୍‍ କେଞ୍ଜିମାତ୍‌ତଡ଼୍‍, ନିଜର୍‍ ଅବିଶ୍ୱାସ୍‌ତେ ମାଇଦିଙ୍କ୍‌ ଆ ରମାନାଗ୍‌ ନେଙ୍ଗାନଙ୍କ୍‍ ପାର୍ୱେମାତ୍‌ତଡ଼୍‍ । ଇଞ୍ଜେ ୱେରେତଡ଼୍‍କ୍‌ ଆ ରମାନାଗ୍ ଆଦାନଙ୍କ୍ ସୁଯଗ୍‌ ପାଏମ୍‍ଆତ୍‍ତଡ଼୍‍;
HEB 4:7 ବାତାଙ୍କ୍‌ଇତ୍‌କେ ଅଡ଼୍‌‍ ମାଇଦିଙ୍କ୍‌ ଇଶ୍ୱର ମେଣ୍ଡ୍‍ଅରଟ୍‌ ଦିନାମ୍ ଟିକ୍‍ ମାଡ଼ିମିନ୍ଦେଣ୍ଡ୍‍ ମେଣ୍ଡେ ଆ ଦିନାମ୍‌ ଆଦୁତ୍‍, “ନେଣ୍ଡ୍‌ ।” ନାର୍ଗେ ଏଣ୍ଡ୍‌କ୍‌ ପେର୍କେ ଦାଉଦ୍‍ତାଦ୍ ଶାସ୍ତ୍ର କେତୁତେ, ବେଲାକି ମୁନେଙ୍କ୍‌ କେସ୍‌ମାତ୍‌ତାଦ୍‌ ମିନ୍ଦେ, “ନେଣ୍ଡ୍‌ ଯଦି ମିଡ଼୍‍ ଅନ୍‌‌ ଗଟ୍‌ କେଞ୍ଜୁତିଡ଼୍‍, ମି ହୃଦୟ୍‌ତିଙ୍କ୍‍ ଡୁଟାଙ୍ଗ୍‍ ମାଡ଼୍‍ମାଟ୍‌ ।”
HEB 4:8 ଯଦି ଯିହଶୁୟ ନାରୁଡ଼୍‍କିଙ୍କ୍‍ ଇଶ୍ୱର୍ କେତ୍‍ତାଦ୍‍ ରମାନାଦ୍‍ ଇୱେଣ୍ଡ୍‌, ଆଲେକେ ଇଶ୍ୱର୍ ପେର୍କେ ମେଣ୍ଡ୍‌ଅରଟ୍‌ ରମାନାଦ୍‍ ଗଟ୍ କେଲଣ୍ଡ୍‌ ଆୟେଣ୍ଡ୍‌ ।
HEB 4:9 ଆଦିଙ୍କ୍‍ ଇଦ୍‍ ସ୍ପଷ୍ଟ ଜେ ଇଶ୍ୱରତେ ନାରୁଡ଼୍‍ ମାଇଦିଙ୍କ୍‌ ଅରଟ୍‌ ବିଶେଷ୍‍ ରମାନାଦ୍‌ କେପି ମିନ୍ଦେ ।
HEB 4:10 ଇଶ୍ୱର ବେଲା ତାନ୍ ପାଡ଼୍‍ୟିନୁଞ୍ଚ୍‌ ରମ୍‌ତଣ୍ଡ୍‍, ବେନଆୟି ଇଶ୍ୱର୍‌ତେ ରମାନାଗ୍‍ ନେଙ୍ଗ୍‍ତଣ୍ଡ୍‍, ଅଣ୍ଡ୍‌‍ ଗାଲା ନିଜର୍‍ ପାଡ଼୍‍ୟିତେ ଆୟ୍‍ତାଗାଙ୍କ୍‍ ରମାନାଦ୍‍ ପାଏମ୍‍ଆତ୍‍ତଣ୍ଡ୍‍ ।
HEB 4:11 ଆଦିନ୍‌ସେଙ୍ଗେ ମାନାଗାନୁଞ୍ଚ୍‌ ବେନ ବେଲାକି ନିଜର୍‍ ଅବିଶ୍ୱାସ୍‌ତେ ମାଇଦିଙ୍କ୍‌ ଆ ନାରୁଡ଼୍‍ଲେକେମ୍‍ ଆଦ୍‍ ରମାନାଗାନାଙ୍କ୍‌ ବଞ୍ଚିତ ଆୟଣ୍ଡ୍‍, ଆଦିନ୍‌ ସାଙ୍ଗ୍ ପାର୍‍ତେଆସର୍‍ ଚେଷ୍ଟା ମାଡ଼ିତାଡ଼୍‍ ।
HEB 4:12 ଇଶ୍ୱରତେ ଗଟ୍‌ ଜିୱୁତାଦ୍‌ ନୁ ଆଦ୍‍ ବିଶ୍ୱାତେ ମିନ୍ଦେ । ଆଦ୍‌ ରେଣ୍ଡ୍‌ ୱାୟେ ସୁର୍‌କେସେର୍‌ ତାଗାଙ୍କ୍‍ ଗାଟି ଅଲ୍‌ତେ; ଆତ୍ମା ନୁ ଜିୱେ ମେଣ୍ଡେ ବୁଲା ନୁ ମେଦୁର୍‍ ୱେରେ ମାଡ଼ିତେ, ମେଣ୍ଡେ ନାରୁଡ଼୍‍ତେ ମନ୍‌ତାଗ୍‌ ଆଲ୍‌ସାନାଦ୍‌ ନୁ ଚିନ୍ତେ ମାଡ଼ାନାଦ୍‍ ବିଚାର୍‍ ମାଡ଼ିତ୍‍ ।
HEB 4:13 ଇଶ୍ୱରତାଗ୍‌ ବାତେବା ମିଞ୍ଜିମାନ୍ଦେପାର୍ୱ; ସାରେ ବୁମ୍‍ତେ ସାର୍ରେ ବିଷୟ୍ ତାନ୍‌ ଏକାମ୍ ଉଡ଼ାନ୍‍ କଣ୍ଡାନ୍‌ ମୁନେ ମୁସ୍‍ତେ ଲେକାମ୍‍ ଇଲ୍‍ଲେ ନୁ ତେର୍‌ୟ୍‌ତେ ଲେକାମ୍‍ ମିନ୍ଦେ । ଆ ଇଶ୍ୱରନ୍‌ ମୁନେ ମାନାଡ଼୍‍ ଇସାବ୍‌ ଇଦାନଙ୍କ୍‌ ଆଦ୍‌ତେ ।
HEB 4:14 ବାତେଙ୍କ୍‌ଇତ୍କେ ଇଶ୍ୱରନ୍‌ ମାର୍‌ ଜିସୁ, ସ୍ୱର୍ଗତାଗ୍‍ ଆଞ୍ଜ୍‌ମିନ୍ଦେଣ୍ଡ୍‌, ଅଣ୍ଡ୍‌‌ ମାନ୍‍ ବେଡ଼୍‍ୟେ ପୁଜାରି ଆତ୍‌ତାଙ୍କ୍‍କେ ୱାରାଟ୍‌, ମାନାଡ଼୍‍ ମାନ୍‍ ବିଶ୍ୱାସ୍‍ତିଙ୍କ୍‍ ଡାଟୁମ୍‌ତେ ପଇସ୍‌ ମାନ୍ଦାଙ୍କ୍‍ ୱେୟ୍‌ତିତ୍ ।
HEB 4:15 ବେନ ମାନାଦ୍‌ ଦୋଷ୍‌ତିଙ୍କ୍‍ ଉଡ଼ାନଙ୍କ୍‍ ପାର୍ୱଣ୍ଡ୍, ଇଦ୍‌ଲେକାମ୍‌ ବେଡ଼୍‍ୟେ ପୁଜାରି ଅଣ୍ଡ୍‌‌ ଆୟଣ୍ଡ୍‌ । ଅଣ୍ଡ୍‌‌ ତ ମାନ୍‍ ବେଡ଼୍‍ୟେ ପୁଜାରି, ମାନ୍‍ ଲେକାମ୍ ସାର୍ରେ ପରିକ୍ୟା ଆସ୍‌ମାତ୍‌କେ ମିକା ଅଣ୍ଡ୍‌‌ ପାପାମ୍‍ କିୱେ ମାତ୍‌ତଣ୍ଡ୍‌;
HEB 4:16 ଆଦିଙ୍କ୍‍ ମାନାଡ଼୍‍ ୱେର୍‌ୟ୍‌ୱେକଟ୍‌ ଇଶ୍ୱରନ୍ ଦୟା ସିଂହାସନ୍‌ତାଗ୍‌ ଆଦେପାର୍ଦିତାଡ଼୍‍ । ଆଗେ ମାନାଙ୍କ୍‌ ବେସୁଙ୍କ୍‍ ବାତେ କାୱାଲ୍‌ ଆସୁଙ୍କ୍‌ ମାନାଦ୍‌ ସାୟେତ୍‌ ମାଇଦିଙ୍କ୍‌ ଦୟା ନୁ ସୁକାମ୍‌ ଦର୍କିତା ।
HEB 5:1 ସାର୍ରେ ବେଡ଼୍‍ୟେ ପୁଜାରିଡ଼୍‍ ତାମ୍ ଜାତିନ୍‌ ନାରୁଡ଼ାଗାଙ୍କ୍‌ ଏଞ୍ଚିଆସ୍ ନିତିତଡ଼୍‍ । ଅଣ୍ଡ୍‌‌ ଅଡ଼୍‌‍ପାକାଙ୍କ୍‌ ପାପାମ୍‍ ମାୟି ଇଞ୍ଜ ପୁଜେ ଇଦ୍‍ତଣ୍ଡ୍ ନୁ ଦାନ୍‍ ଇସ୍‌ମାଞ୍ଜ୍‌ ଇଶ୍ୱରନ୍‌ ସେବା ମାଡ଼ିତଣ୍ଡ୍‍ ।
HEB 5:2 ଅଣ୍ଡ୍‌ ନିଜେ ନାର୍ଗେ ପ୍ରକାର୍‍ ଦଷ୍‌ ଦୁର୍ବଲ ତଡ଼୍‍ ନିଣ୍ଡିମାନ୍ଦାନ୍‍ ମାଇଦିଙ୍କ୍‍ ଦଷତୃଟି ମାଡ଼ମାନ୍ଦାନ୍‌ ମୁର୍କ ନାରୁଡ଼୍‍କ୍‌ ସାୟେ ଆଲ୍‌ସିତଣ୍ଡ୍‍ ।
HEB 5:3 ଆଦିନ୍‌ସେଙ୍ଗା ଆନ୍‌ୱେ ନାରୁଡ଼୍‍ ପାପାମ୍‍ତେ ମାଇଦିଙ୍କ୍‌ ବଲି ମାଡ଼ିତଣ୍ଡ୍‍; ଆଦ୍‍ ଆୟ, ଅଣ୍ଡ୍‌ ତାନ୍‌ ମାଡ଼୍‍ତେ ପାପାମ୍‍ତେ ମାଇଦିଙ୍କ୍‌ ମିକା ବଲି ଇଦାନଙ୍କ୍‍ ଆଦ୍‍ତେ ।
HEB 5:4 ବେନ ତାମ୍‌ ମାନ୍‌ତେ ବାଡ଼୍‍ୟେ ପୁଜାରି ଆୟେପାର୍‍ୱଡ଼୍‍, ହାରୋଣତିଙ୍କ୍‍ ବେଲା ପରମେଶ୍ୱର ନିତାକିତ୍‌ତଣ୍ଡ୍‍; ଅଣ୍ଡ୍‌‌ ପୁଜାରି ଆତ୍‌ତଣ୍ଡ୍‌ ।
HEB 5:5 ଆଦେଲେକାମ୍ ଜିସୁ ଗୌରବ୍‍ତେ ବେଡ଼୍‍ୟେ ପୁଜାରି ଆଦାନଙ୍କ୍‍ ଅଂକିଙ୍କ୍‌ ଏଞ୍ଚଣ୍ଡ୍‌; “ନିମା ନା ମାର୍‍, ନେଟ୍‌ତେନୁଞ୍ଚ୍‌ ନାନ୍‌ ନି ବାବାଲ୍ ଆତ୍‌ତାନ୍‌ ଇଞ୍ଜ ଇଶ୍ୱର ଅଂକିଙ୍କ୍‌ କେତ୍‌ତଣ୍ଡ୍‍ ।”
HEB 5:6 “ନିମେ ପୁଜାରି ପଦ୍‍ତାଗ୍‌ ମଲ୍‌କିସେଦକ ଲେକେନ୍ ଉତ୍ତରାଦିକାରୀ ସାରେଦିନାତ୍‍ ପୁଜାରି ଆଦ୍‍ତିନ୍‌, ଇଞ୍ଜ ପରମେଶ୍ୱର କେତ୍‍ତଣ୍ଡ୍ ।”
HEB 5:7 ବେନ୍‍ ଇଶ୍ୱର୍ ଅଙ୍କ୍‌ ଡଲାନାଗାଙ୍କ୍‍ ରକ୍ଷା ମାଡ଼େପାର୍‍ଦ୍‍ତଣ୍ଡ୍‍, ଅନ୍‌‍ ଗାରେ ଜିସୁ ପୁରା ଜିୱୁଣ୍ଡ୍‍ କେୟି କେୟି କାଣ୍ଡେଡ଼ି ରାପି ବିନତି ପ୍ରାର୍ତନା ମାଡ଼୍‍ତଣ୍ଡ୍‍ । ଅଣ୍ଡ୍‌ ନମ୍ର ନୁ ସାୟେ ଆସ୍‍ ମାନ୍ଦାନ୍‍ ମାଇଦିଙ୍କ୍‍, ଇଶ୍ୱର୍ ଅନ୍‌‍ ପ୍ରାର୍ତନା କେଞ୍ଜ୍‍ତଣ୍ଡ୍‍ ।
HEB 5:8 ଯଦି ଅଣ୍ଡ୍‌‍ ଇଶ୍ୱର୍‌ତେ ମାର୍‍ ଆତ୍‍କେ ଗାଲା, ଅଣ୍ଡ୍‌‍ ଦୁକାମ୍‍ କଷ୍ଟତଡ଼୍‍ ନିୟମ୍‍ ପାଲନ୍‍ ମାଡ଼ାନଙ୍କ୍‍ ନାଡ଼୍‍ସ୍‍ତଣ୍ଡ୍‍ ।
HEB 5:9 ଇଦ୍‍ରକମ୍‍ ଇଶ୍ୱର୍ ଅଂକିଙ୍କ୍‌ ୱେରଣ୍ଡ୍‍ ସିଦ୍ଦ ବେଡ଼୍‍ୟେ ପୁଜାରି ଇଞ୍ଜ ଯୋଗ୍ୟ ବିବେଚିତ୍‍ ମାଡ଼୍‍ତଣ୍ଡ୍‍, ଅଣ୍ଡ୍‌ ତାନ୍ ଗଟି କେଞ୍ଜାନ୍ ନାରୁଡ଼୍‍ ମାଇଦିଙ୍କ୍‌ ସାରେ ଦିନାମ୍‍ତେ ମାଇଦିଙ୍କ୍‍ ପରିତ୍ରାଣତେ ଗୁଦାମ୍‍ ଆତ୍‍ତଣ୍ଡ୍‌ ।
HEB 5:10 ମେଣ୍ଡେ ଅଙ୍କ୍‌ ମଲ୍‌କିସେଦକ ଲେକାମ୍‍ ଉତ୍ତରାଦିକାରୀ ବେଡ଼୍‍ୟେ ପୁଜାରି ଆତ୍‍ତଣ୍ଡ୍‍ ଇଞ୍ଜ ପରମେଶ୍ୱର ଅଙ୍କ୍‌‌ ଗୋଷଣା ମାଡ଼୍‍ତଣ୍ଡ୍‍ ।
HEB 5:11 ଇଦ୍‌ ବିଷୟ୍‍ତେ ମାମ୍ ନାର୍ଗେ ଗଟି କେତାନଙ୍କ୍‍ ଇଚ୍ଛା ମାଡ଼ୁତମ୍‍, ଇତ୍‍କେ ମିକିଂଙ୍କ୍‍ ବୁଜାମାଡ଼ାନାଦ୍ କଷ୍ଟ ଆଦୁତ୍‍, ବାତେଙ୍କ୍‍ଇତ୍‍କେ ମିଡ଼୍‍ ଆତ୍ମିକ୍‍ ଜିୱୁଣ୍ଡ୍‍ ନୁ ମନ୍‍ତାଗ୍‍ ବୁଜେମ୍‍ ଆଦାନଙ୍କ୍‍ ଜାମ୍‍ ବୁଜେମ୍‍ ଆଦ୍‍ତିଡ଼୍‍ ।
HEB 5:12 ମିଡ଼୍ ଅର୍‌ତୁଙ୍କ୍‌ କାର୍‌ସ୍‌ପାନାଦ୍‌ ସମୟ ୱାତ୍‍ତେ, ଇସୁଟ୍ ଆୟ୍‍ନା ଇଶ୍ୱର୍‌ତେ ମୁନେନ୍‍ ନାଡ଼୍‍ସାନ୍‍ ଶିକ୍ଷା ସେଙ୍ଗେ ମେସ୍ତେରି ଦର୍‍କାର୍‍ ଆଦୁତେ । ମିଡ଼୍‍ ବେଡ଼୍‍ୟଡ଼୍ ତିନ୍ଦାନ୍‍ କାଦି ୱିଡ଼୍‍ସି ଇଞ୍ଜେକ୍‍ ଆନା ପିଲାନ୍‍ ଲେକାମ୍‍ ପାଲ୍‍ ଉନ୍ଦୂତିଡ଼୍‍ ।
HEB 5:13 ବେନ ଆସାମ୍ ପାଲ୍ ଉନ୍‍ତଣ୍ଡ୍, ଅଣ୍ଡ୍‌‌ ପିଲାତ୍‌ ଲେକେତ୍‍ ମାନ୍‍ତଣ୍ଡ୍‌, ଆଦିଙ୍କ୍‍ ଅଣ୍ଡ୍‌‍ ସାୟେ କି କାରାପ୍‍ ପୁନ୍ଦାନଙ୍କ୍‍ ବୁଦ୍‍ ଇଲ୍‍ଲା ।
HEB 5:14 ମେଣ୍ଡନ୍‍ରକମ୍‍ କଟିନ୍‍ କାଦି ବୟସ୍ତେ ନାରୁଡ଼୍‍ ସେଙ୍ଗେ; ଅଡ଼୍‌‍ ଜିୱୁଣ୍ଡ୍‍ତାଗ୍‍ ଚିନ୍ତେ ମାଡ଼ି ସାୟେ ନୁ କାରାପ୍‍ ପୁନ୍ଦାନଙ୍କ୍‍ ପାର୍‍ଦ୍‍ତଡ଼୍‍ ।
HEB 6:1 ଆଦିଙ୍କ୍‍ ମାନାଡ଼୍‍ କ୍ରିଷ୍ଟ ଦର୍ମତାଦ୍‍ ମୁନେନ୍‍ତାୱୁ ତଥ୍ୟ ୱିଡ଼୍‍ସି, ନିଗୁଡ଼ ତଥ୍ୟ ଶିକ୍ଷା ମାଡ଼ାନ୍‍ ଦର୍‍କାର୍‍, ଇୱୁ ବଲାନ୍‌ କାମ୍‌ନୁଞ୍ଚ୍‌ ମାଲସ୍‌ ଇଶ୍ୱର୍‌ତାଗ୍‍ ବିଶ୍ୱାସ୍ ମାଡ଼ିତାଡ଼୍‍,
HEB 6:2 ଏର୍‌ ଦୀକ୍ଷା ବିସୟତେ ଶିକ୍ଷା, କାୟ୍ ୱାଟି ପ୍ରାର୍ତନା ମାଡ଼ାନାଦ୍‌, ବାଡ଼ିୟା ବିଚାର୍‌, ଡଲତେରଡ଼୍‍ ତେଦାନାଦ୍‌ ନୁ ସାରେଦିନାତ୍‍ ଦଣ୍ଡ୍‌ ଇଦ୍‍ ବିଷୟ୍‍କିନାକ୍ ମିକିଂଙ୍କ୍‍ ମେଣ୍ଡନ୍‍ଦାମ୍‍ ଶିକ୍ଷା ଇଦାନ୍‍ ଦର୍‍କାର୍‍ ଇଲ୍‍ଲେ ।
HEB 6:3 ମାନଡ଼୍‍ ଇଞ୍ଜେ ମୁନେ ଆଦା ୱାୟ୍‍ତିତ୍, ଇଶ୍ୱରନ୍‌ ପର୍ର ଆଶେମାଡ଼ି ଇଦେ ମାନାଡ଼୍‍ ମାଡ଼ିକାଡ଼୍‍ ।
HEB 6:4 ବେନଡ଼୍‍ ବିଶ୍ୱାସ୍ ୱିଡ଼୍‍ସ୍‍ତଡ଼୍‍ ଅଡ଼୍‌‍ ଏର୍କାମାଡ଼ି ମେଣ୍ଡେ ୱାଦା ପାର୍ଦିତଡ଼୍‍ କି ? ଅଡ଼୍‌‍ ଆସୁଙ୍କ୍ ଇଶ୍ୱରନ୍‌ ୱେସ୍‌ତେ ବାଦ୍‌କ ମାତ୍‍ତଡ଼୍‍, ସ୍ୱର୍ଗତାଦ୍ ଦାନାମ୍‌ ନାକି, ପବିତ୍ର ଆତ୍ମା ଦର୍ସ୍କିମାତ୍‍ତଡ଼୍‍ ।
HEB 6:5 ପରମେଶ୍ୱରତା ଗଟି ମେଲ୍‌ତାୱ୍ ଇଞ୍ଜ ପୁତ୍‍ତଡ଼୍‍, ୱାଇନାଦ୍ ଯୁଗାତେ ପରମେଶ୍ୱର ତଅସିତେ ଶକ୍ତିତିଙ୍କ୍‍ ନେକା ନେଲା ପୁତ୍‍ତଡ଼୍‍ ।
HEB 6:6 ଆଗେକ୍‍ବା ଅଡ଼୍‌‍ ବିଶ୍ୱାସ୍‍ ଆରାମାଡ଼୍‍ତଡ଼୍‍, ଆଦିଙ୍କ୍‍ ଅଡ଼୍‌‍ ମେଣ୍ଡନ୍‍ଦାମ୍‍ ଅନୁତାପ୍‍ ମାଡ଼ାନ୍‍ ସେଙ୍ଗେ ଅଡ଼୍‌‍କିଂଙ୍କ୍‍ କେତେ ପାର୍‍ନାୟ । ବାତାଙ୍କ୍‌ଇତ୍‌କେ ଅଡ଼୍‌‍ ମାନ୍‍ ପରମେଶ୍ୱରନ୍‌ ମାରିଙ୍କ୍‍ ମେଣ୍ଡେ କୃଶତାଗ୍‌ କୁଟି କଟି ଅଂକିଙ୍କ୍‌ ପରିହାସ୍‍ ମାଡ଼ୁତଡ଼୍‍ ।
HEB 6:7 ବେନା ବୂମ୍‌ ମୁସୁର୍‌ ଏର୍‌ ଗ୍ରହନ୍‍ ମାଡ଼ି ଚାଷୀନ୍‍ ସେଙ୍ଗେ ସାୟେ ପାଣ୍ଡି ଆଦ୍‍ସ୍ପିତା, ଆ ବୂମ୍‌ତିଙ୍କ୍‍ ଇଶ୍ୱର ଆର୍ଶିବାଦ୍‌ ମାଡ଼ିତଣ୍ଡ୍‌ ।
HEB 6:8 ଇତ୍‍କେ ଆ ବୁମ୍ ଯଦି କୟେ ପଦ୍‌ଲା ନୁ ଟଣ୍ଡା ପଦ୍‌ଲା ପେୟ୍‍ତିତା ଆଲାଇତ୍‌କେ ଆଦିନାଦ୍‍ ବାତେ ମୁଲ୍ୟ ଇଲେ । ଆଦ୍‍ ଇଶ୍ୱର୍‌ତେ ଅବିସାପ୍‍ ପାଏମ୍‍ଆଦ୍‍ତେ ନୁ କିସ୍‍ତାଗ୍‍ ଦଂସ୍‍ ପାଏମ୍‍ଆଦ୍‍ତେ ।
HEB 6:9 ଆ ନା ପ୍ରିୟ ଏଲାଡ଼୍‍ତାମୁଣ୍ଡ୍‍, ମାନାଡ଼୍‍ ଇଦ୍‌ଲେକାମ୍ ଗଟି କେତକେ ଗାଲେୟ୍‍ ମି ପର ମାୱାଦ୍‍ ଆଶେ ମିନ୍ଦେ; ମିଡ଼୍‍ ପରିତ୍ରାଣ ପାଏମ୍‍ ଆଦାନ୍‍ ସେଙ୍ଗେ ଆର୍ଶିବାଦ୍‌ ପାତ୍ର ଆତ୍‍ତିଡ଼୍‍ ।
HEB 6:10 ଇଶ୍ୱର କାରାପ୍ ମାଡ଼ଣ୍ଡ୍‍, ମିୟାଦ୍‌ ପାଡ଼୍‍ୟି, ବିଶେଷ୍‍ ମାଡ଼ି ଆନ୍‌ୱେ ନାରୁଡ୍‌କିଙ୍କ୍‍ ସାହାଯ୍ୟ ମାଡ଼ି ଇଶ୍ୱରନ୍ ପର୍ର ମିଡ଼୍‍ ବେନ୍‍ ପ୍ରେମାମ୍ ତଅସ୍‌ ମିନ୍ଦେଡ଼ି, ଆଦ୍‌ ଅଣ୍ଡ୍‌ ମାର୍ଗଣ୍ଡ୍ ।
HEB 6:11 କିନ୍ତୁ ମାନ୍‍ ଅଣ୍ଡୟ୍‌‍ ଇଚ୍ଛା ମାଡ଼େଙ୍ଗ୍ ଆୟନା ଆନ୍‌ୱେ ନାରୁଡ଼୍‍ ପ୍ରତି ନିୟାଦ୍‌ ୱେଡ଼୍‍କା ମାନି, ଆଲେକେ ମିଡ଼୍‍ ବାତ୍‍ ଆଶେ ମାଡ଼୍‍ତିଡ଼୍‍ ଆଦ୍‍ ପୁରା ଆଦ୍‍ତେ ।
HEB 6:12 ଆଲାଇତ୍‍କେ ମିଡ଼୍ ବେସୁଟ୍‍ବା ରମୱାକଟ୍‌ ଦୃଡ଼ ବିଶ୍ୱାସୀ ନୁ ଶକ୍ତି ନାରୁଡ୍ ପେର୍କେ ଆନୁଟ୍, ମେଣ୍ଡେ ଇଶ୍ୱର ପ୍ରତିଜ୍ଞା ମାଡ଼ିମାନ୍ଦାନ୍‍ ସାର୍ରେ ବିଷୟ୍ ପାଏମ୍‍ ଆୟ୍‍ମୁଟ୍‍ ।
HEB 6:13 ଅବ୍ରାହାମ୍‌ତିଙ୍କ୍‍ ପରମେଶ୍ୱର ବେସୁଟ୍‌ ପ୍ରତିଶୃତି ଇତ୍‌ତଣ୍ଡ୍‌‍, ଆସୁଟ୍‍ ଅଣ୍ଡ୍‌‍ ପ୍ରତିଶୃତି ରକ୍ଷା ମାଡ଼ିତଣ୍ଡ୍ ଇଞ୍ଜ ଶପତ୍‍ ମାଡ଼ିମାତ୍‍ତଣ୍ଡ୍‍ । ଅନାଗାଙ୍କ୍‍ ଶ୍ରେଷ୍ଠ ବେନ ଇଲ୍‍ୱାଙ୍କ୍‍ ଅଣ୍ଡ୍‌ ନିଜର୍‍ ପେଦେର୍‍ତେ ଶପତ୍‍ ମାଡ଼ିମାତ୍‍ତଣ୍ଡ୍‍ ।
HEB 6:14 ଅଣ୍ଡ୍‌‍ କେତ୍‍ତଣ୍ଡ୍‍, “ନାନ୍‌ ନିକିନ୍‌ ନିଜାମ୍ ଆର୍ଶିବାଦ୍‌ ମାଡ଼ିତାନ୍ ମେଣ୍ଡେ ନି ବଂଶତିଙ୍କ୍‍ ନାର୍ଗେ ପିଲୁଡ଼୍‍ ଇଦ୍‍ତାନ୍ ।”
HEB 6:15 ଅବ୍ରାହାମ୍ ଗାଡ଼୍‍ସ୍‍ ଆସ୍‍ କେପିମାତ୍‍ତଣ୍ଡ୍‍ ।
HEB 6:16 ନାରୁଡ଼୍‍ ଶପତ୍‍ ମାଡ଼୍‍ତେୱେଲେ ନିଜର୍‍ତାଗାଙ୍କ୍‍ ମହାନ୍‍ ନାରୁଣ୍ଡ୍‍ତେ ପେଦେର୍‍ତେ ଶପତ୍‍ ମାଡ଼ିତଡ଼୍‍, ଇଦ୍‍ ରକମ୍‍ ଶପତ୍‍ ମାଡ଼ାନ୍‍ ଦ୍ୱାରା ସାର୍ରେ ତିପାଲ୍‌ ତେରିଆଦ୍‍ତେ ।
HEB 6:17 ଇଶ୍ୱର୍ ବେନଡ଼୍‍କିଂଙ୍କ୍ ଆୱୁସାର୍ରେ ବିଷୟ୍‍ ଦାନ ମାଡ଼ିତଣ୍ଡ୍‍ ଇଞ୍ଜ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍‍, ଆଦ୍‍ ପ୍ରତିଜ୍ଞାତାଗ୍‍ ଅଣ୍ଡ୍‌ କଟମାନ୍‍ତଣ୍ଡ୍‍ ଇଞ୍ଜ ଅଡ଼୍‌‍କିଂଙ୍କ୍ ଲେକେତ୍‌ ବାବେ କେତାନଙ୍କ୍‍ ଅଣ୍ଡ୍‌‍ ତାନ୍‍ ପ୍ରତିଜ୍ଞା ତଡ଼୍‍ ଶପତ୍‍ କାଲ୍‍ପିମାତ୍‍ତଣ୍ଡ୍‍ ।
HEB 6:18 ଅନ୍‌ ପ୍ରତିଜ୍ଞା ନୁ ଶପତ ବାଦ୍‍ଲେମ୍ ଆୟ, ଆଦ୍‍ ଉହୁସ୍‌ ଇଶ୍ୱର୍ ବୁସାତାଦ୍‌ ଆୟଣ୍ଡ୍‍ । ଇତ୍କେ ଅନ୍‌ ଅଶ୍ରିତ ମାନାଡ଼୍‍, ମୁନେ ମାନ୍ଦାନ୍‍ ଆଶେତିଙ୍କ୍ ଡାଟୁମ୍‍ ପଇସ୍ ମାନ୍ଦାନ୍ ମାଇଦିଙ୍କ୍‌ ନେକେ ୱେଡ଼୍‍କେ ଆଦୁତମ୍‍ ।
HEB 6:19 ଇଦ୍‍ ଆଶେ ମାନ୍‍ ଜିୱୁଣ୍ଡ୍‍ତାଗ୍‍ ଲଙ୍ଗର୍‍ ଲେକାମ୍‍ । ଇଦ୍‍ ଆଶେ ମାଡ଼ାନାଦ୍‍ ନୁ ବିପଦ୍ ଇଲ୍‍ୱାଦ୍‍ ମେଣ୍ଡେ ସ୍ୱର୍ଗତ୍‍ ମନ୍ଦିର୍‍ତେ ପର୍ଦା ତେର୍‍ସ୍‍ ମହା ପବିତ୍ର ପଡ଼୍‍ୟେତାଗ୍‍ ଏୱୁତେ ।
HEB 6:20 ମାନ୍‍ ପ୍ରତିନିଦି ଲେକାମ୍‍ ଜିସୁ ମୁନେନ୍‍ ଆଗେ ଆତ୍‍ତଣ୍ଡ୍‍ । ଅଣ୍ଡ୍‌‍ ମଲ୍‌କିସେଦକନ୍‍ ଉତ୍ତରାଦିକାରୀ ଲେକାମ୍‍ ସାରେଦିନାତ୍‍ ସେଙ୍ଗେ ବେଡ଼୍‍ୟେ ପୁଜାରି ଆତ୍‍ତଣ୍ଡ୍ ।
HEB 7:1 ଇଣ୍ଡ୍‌ ମଲ୍‌କିସେଦକ ସାଲେମତେ ରାଜାଲ୍‌ ମେଣ୍ଡେ ବେଡ଼୍‍ୟେ ଇଶ୍ୱରନ୍‌ ପୁଜାରି ମାତ୍‍ତଣ୍ଡ୍‌ । ଅବ୍ରାହାମ୍‌ ନୁ ତାମ୍‍ ସାଙ୍ଗଡ଼୍‍ ବେସୁଙ୍କ୍‍ ନାଲ୍‌ୱୁଡ଼୍‍ ରାଜାଲଡ଼୍‍କିନ୍ ଆରାମାଡ଼ି ଜୁଦନୁଞ୍ଚ୍‌ ମାଲ୍‌ସମାତ୍‍ତଣ୍ଡ୍‌, ଆସୁଙ୍କ୍‌ ମଲିକିସେଦକ ଅଙ୍କ୍‌‌ କାଇଲି ଆର୍ଶିବାଦ୍‌ ମାଡ଼୍‍ତଣ୍ଡ୍‌ ।
HEB 7:2 ମେଣ୍ଡେ ଅବ୍ରାହାମ୍‌ ଅଙ୍କ୍‌‌ ଯୁଦ୍‍ମାଡ଼ି ପାଏମ୍‍ଆତ୍‍ତେ ସମ୍ପତିତେ ଅଣ୍ଡୟ୍‌‍ ଦଶମାଂଶ ଦାନ ଇସ୍‌ମାତ୍‍ତଣ୍ଡ୍‍ । ମଲକିସେଦକନାଦ୍‌ ପେଦେର୍‍ତାଦ୍‌ ମେଣ୍ଡ୍‍ଅଣ୍ଡ୍‌‍ ଅର୍ତ ଆଦୁତ୍‍, “ଦାର୍ମାମ୍‌ ରାଜାଲ୍‌,” ଅଣ୍ଡ୍‌‌ ସାଲେମତେ ରାଜାଲ୍‌ ଆସ୍‌ମାନ୍ଦାନ୍‌ ମାଇଦିଙ୍କ୍‌ ଅନ୍‌‍ ପେଦେର୍‍ତେ ମେଣ୍ଡନ୍‌ ଅର୍ତ “ଶାନ୍ତି ରାଜାଲ୍‌ ।”
HEB 7:3 ମଲକିସେଦକତେ ୟାୟବାବ ବା ଆନିଦାଦିଡ଼୍‍ କି ଅନ୍‌‍ ଜନମ୍‍ ନୁ ଡଲ୍‍ତେ ବିଷୟ୍‍ତେ ବାତ୍‍ ବିବରଣୀ ଇଲ୍‍ଲେ । ଅଣ୍ଡ୍‌‍ ଇଶ୍ୱର୍‌ତେ ମାର୍‍ ଇନା; ଅନ୍‌‍ୱାଦ୍‍ ପୁଜାରି ପାଡ଼୍‍ୟି ସାରେଦିନା ମାନ୍‍ତେ ।
HEB 7:4 ଆଦିଙ୍କ୍ ଚିନ୍ତେ ମାଡ଼ାଟ୍‍, ଅବ୍ରାହାମ୍‌ ବେସର୍‍ ମହାନ୍‍ । ମାନ୍‍ ବିକ୍ୟାତ୍‍ ଆନିଦାଦି ଯୁଦ୍‍ମାଡ଼ି ପାଏମ୍‍ଆତ୍‍ତେ ସମ୍ପତିତାଗାଙ୍କ୍‍ ଅଣ୍ଡୟ୍‌‍ ଦଶମାଂସ ଦାନ ମାଡ଼ିମାତ୍‍ତଣ୍ଡ୍‍ ।
HEB 7:5 ଲେବିନାଦ୍‌ ବେନ୍‍ ବଂଶଦର୍‍ ପୁଜାରି ପାଡ଼୍‍ୟି ମାଡ଼ିତଡ଼୍‍, ଅଡ଼୍‌‍ ମୋଶାନ୍‌‌ କାନୁନ୍‌ତାଗ୍‌ ମାନ୍ଦାନ୍‌ ନିର୍ଦ୍ଦେଶ୍‍ ଲେକାମ୍‌ ଇସ୍ରାଏଲ ନାରୁଡ଼ାଗାଙ୍କ ଦଶମାଂଶ ଦାନ ମାଡ଼ିତଡ଼୍‍ । ଇସ୍ରାଏଲିୟଡ଼୍‍ ଅବ୍ରାହାମ୍‌ତେ ବଂଶତଡ଼୍‍ ନୁ ଲେବିୟଡ଼୍‍ ନିଜର୍‍ଜାତି ଆତକେବା ଅଡ଼୍‌ଆଗାଙ୍କ୍‌‌ ଇଦ୍‌ ଦଶମାଂଶ ଆଦାୟ୍‍ ମାଡ଼ମାତ୍‍ତଡ଼୍‍ ।
HEB 7:6 ମଲକିସେଦକ୍‍ ଲେବିୟ ବଂଶତଣ୍ଡ୍‍ ଆୟକ୍‍ବା ଅଣ୍ଡ୍‌‍ ଇଶ୍ୱର୍‌ତାଗାଙ୍କ୍‌ ପ୍ରତିଜ୍ଞା ପାଏମ୍‍ଆତ୍‍ତେ ଅବ୍ରାହାମ୍‌ତାଗାଙ୍କ୍‌ ଅଣ୍ଡୟ୍‌‍ ଦଶମାଂଶ ଦାନ ଗ୍ରହନ୍‌ମାଡ଼ି ଅଙ୍କ୍‌‌ ଆର୍ଶିବାଦ୍‌ ମାଡ଼ିମାତ୍‍ତଣ୍ଡ୍‌ ।
HEB 7:7 ଆର୍ଶିବାଦ୍‌ ମାଡ଼ାନ୍‍ ନାରୁଣ୍ଡ୍‌ ଆର୍ଶିବାଦ୍‌ ପାଏମ୍‍ଆଦାନ୍‍ ନାରୁଣ୍ଡ୍‌କଞ୍ଚ୍‍ ବେଡ଼ିୟଣ୍ଡ୍ ଇଗେ ହେର୍କେ ଇଲ୍‍ଲେ ।
HEB 7:8 ଅଣ୍ଡୟ୍‌ ଦଶମାଂଶ ଦାନ ଗ୍ରହନକାରୀ ପୁଜାରିଡ଼୍‍ ଡଲାନ୍‍ ଲେକେତ୍‍ ନାରୁଡ଼୍‍ ଇତ୍‍କେ ମଲ୍‍କିସେଦକ୍‍ ଅଡ଼୍‌ଆଗାଙ୍କ୍‌ ମହାନ୍‍ ବାତେଙ୍କ୍‍ଇତ୍‍କେ ଶାସ୍ତ୍ର ଲେକାମ୍‌ ଅଣ୍ଡ୍‌‍ ଇଞ୍ଜେ ଗାଲା ଜିୱେମିନ୍ଦେଣ୍ଡ୍‍ ବା ଅଣ୍ଡ୍‌‍ ଅମର୍‍ ।
HEB 7:9 ଆଦିଙ୍କ୍‍ ଅବ୍ରାହାମ୍‌ ମଲିକିସେଦକଙ୍କ୍‍ ଦଶମାଂଶ ଦାନ ଇଦାନାସୁଟ୍, ବେନ୍‍ ଲେବିୟ ବଂଶତଡ଼୍‍ ପୁଜାରିଡ଼୍‍ ଇଞ୍ଜେ ଦଶମାଂଶ ଦାନ ଗ୍ରହନ୍‍ ମାଡ଼ୁତଡ଼୍‍, ଆ ଲେବୀ ବା ମଲକିସେଦକଙ୍କ୍ ଆଦ୍‍ ଦାନ୍ ଇସ୍‌ମାତ୍‍ତଣ୍ଡ୍‍ ଇଞ୍ଜ କେତାପାର୍ଦିତାଡ଼୍‍ ।
HEB 7:10 ଲେବି ଆସୁଟ୍‌ ପୁଟ୍‌ୱେ ମାତ୍‍ତଣ୍ଡ୍ ନିଜାମ୍ କିନ୍ତୁ ଅବ୍ରାହାମ୍ ମଲ୍‌କିସେଦକଙ୍କ୍‍ କାୟ୍‍ଲ୍‍ତେୱେଲେ ଆନିଦାଦି ଅବ୍ରାହାମ୍‌ତେ ବଂଶତଣ୍ଡ୍‍ ଲେବି ଅନ୍‌‍ ମେନ୍ଦୁଲ୍‍ତେ ମାତ୍‍ତଣ୍ଡ୍ ଇଞ୍ଜ କେତ୍‍କେ ମେଣ୍ଡେ ବାଲାୟ ।
HEB 7:11 ଇ ଲେବିୟଡ଼୍‍ ପୁଜାରି ନିୟମ୍‍ତିଙ୍କ୍‍ ପୟ୍‍ସ୍‍ ଇସ୍ରାଏଲ୍‌ ଜାତିତିଙ୍କ୍‌ ତାନାଦ୍‌ ବ୍ୟବସ୍ଥା ଇସ୍‍ମାତ୍‍ତଡ଼୍‍ । ଲେବିୟଡ଼ାଦ୍‌ ପାଡ଼୍‍ୟି ସଫଳ ଆତ୍‍କେ, ଆଲେକେ ହାରୋଣତେ ଉତ୍ତରାଦିକାରୀ ଇ ଲେବିୟ ପୁଜାରିଡ଼୍‍କିଙ୍କ୍‍ ୱିଡ଼୍‍ସିତ୍‍କେ, ମଲ୍‌କିସେଦକନ୍‌ ଉତ୍ତରାଦିକାରୀ ଇସାବ୍‌ତେ ମେଣ୍ଡେ ଅର୍‌ତୁନ୍‌ ପୁଜାରି ଗୋଷ୍ଠୀ ଦରକାର୍‍ ଇଲ୍‌ୱାମାତ୍‍ତା ।
HEB 7:12 ପୁଜିରିଡ଼୍‌ ବଂଶ ବାଦ୍‌ଲେମ୍‌ ଆତ୍‌କେ, କାନୁନ୍‌ତାଦ୍‌ ବା ବାଦ୍‌ଲେମ୍‌ ଆଦାନ୍‌ ମିନ୍ଦେ ।
HEB 7:13 ବେନନ୍ ବିସୟତେ ମାମ୍ ଇୱ ସାର୍ରେ ମାଟ୍ଟା କେତୁତମ୍‌, ମାନ୍‍ ପ୍ରବୁ ଜିସୁ ମେଣ୍ଡେ ଅରଟ ବଂଶତଣ୍ଡ୍‍ ମାତ୍‍ତଣ୍ଡ୍‍, ଆ ବଂଶତଡ୍‌ ବେସୁଙ୍କ୍‌ବା ପୁଜାରି କାମ୍ କିୱେମାତଡ୍‌ ।
HEB 7:14 ଇଦ ନେକା ସାୟେ ଯେ, ଅଣ୍ଡ୍‌ ଯିହୁଦା ବଂଶତାଗ୍‍ ଜନମ୍‌ ଆସ୍‌ମାତ୍ତଣ୍ଡ୍ ମେଣ୍ଡେ ପୁଜାରି ଆଦାନ୍‌ ମାଇଦିଙ୍କ୍‌ ମଶାଲ୍‌ ଇ ବଂଶତାଦ୍‌ ପେଦେର୍‌ ୱାଟିଇଲେଣ୍ଡ୍‌ ।
HEB 7:15 ଇଗାନୁଞ୍ଚ ସାୟେ ପୁନ୍ଦାନ୍‌ ଆତ୍‍ତେ ଯେ, ମଲ୍‌କିସେଦକ ଲେକେନ ମେଣ୍ଡେୱେରନ୍‍ ପୁଜାରି ୱାତ୍‍ତଣ୍ଡ୍ ।
HEB 7:16 ଅଣ୍ଡ୍‌‌ ନାରୁଡ୍‌ତାଦ୍‌ ନିୟମ କାନୁନ୍‌ ତଡ଼୍‍ ପୁଜାରି ଆଇୱା ମାତ୍‍ତଣ୍ଡ୍‌; ଇତ୍‍କେ ତେର୍‍ୱେ ଜିୱୁତାଦ୍‌ ଲାୱଦେ ସାଙ୍ଗ୍ ପୁଜାରି ଆସ୍‌ମାତ୍ତଣ୍ଡ୍‌ ।
HEB 7:17 ଇତ୍‌କେ ଦର୍ମଶାସ୍ତ୍ରତାଗ୍‌ ଲେକା ମିନ୍ଦେ, “ନିମେ ମଲ୍‌କିସେଦକନ୍‌ ଇତ୍ତରଦିକାରୀ ଲେକାନ୍‍ ସାରେଦିନାତ୍‍ ପୁଜାର୍ ଆଦ୍‍ତି ।”
HEB 7:18 ଇତ୍‌କେ ପାନ୍‌ତା ନିୟମ୍‌ ଲାୱୁ ଇଲ୍‍ୱାଙ୍କ୍‍ ମେଣ୍ଡେ ଦର୍‍କାର୍‍ ଆୟ୍‍ୱାଙ୍କ୍‍ ଆଦିଙ୍କ୍‍ ବାନ୍ଦ୍‌ କିତ୍ତଡ୍‌ ।
HEB 7:19 ବାତେଙ୍କ୍‍ଇତ୍‍କେ ମଶାଲ୍‌ ଇତ୍ତାଦ୍‌ ନିୟମ୍‌ତେ ବାତେବା ଗଟ୍‌ ଲାବ୍‌ ଆଦାପାର୍ୱ । ଇଞ୍ଜେ ମାନାଙ୍କ୍‌ ଅଣ୍ଡୟ୍‌ ଶାତୱାମ୍‌ ମାନ୍ଦାନ୍ ଆଶେ ଇତ୍ତଣ୍ଡ୍‌; ଆଦିନ୍‌ତେ ମାନାଲ୍ ଦେଉଡ୍‌ତେ ଗାରେ ଆଦାନଙ୍କ୍‌ ପାର୍ଦିତାଲ୍ ।
HEB 7:20 ନାର୍ଗେମିକା ମାନ୍‍ ସେଙ୍ଗେ ଇଶ୍ୱର୍‌ତେ ଶପତ୍‍ ମିନ୍ଦେ । ଆନ୍‌ୱେ ନାରୁଡ଼୍‍ ପୁଜାରି ପଦ୍‍ତାଗ୍‍ ନିଯୁକ୍ତ ଆଦାନ୍‍ୱେଲେ ଇଦ୍‍ ରକମ୍‍ ବାତ୍‍ ଶପତ୍‍ ଇୱେମାତ୍‍ତଡ଼୍‍ ।
HEB 7:21 ଇତ୍‍କେ କ୍ରିଷ୍ଟ ପୁଜାରି ଆଦାନ୍‍ ଆସୁଙ୍କ୍‌ ଇଶ୍ୱର ଶପତ୍‌ ମାଡି ଅଙ୍କ୍‌ କେସ୍‌ମାତ୍‍ତନ୍‌, “ପ୍ରବୁ ଅରଟ୍‌ ଶପତ୍‌ ମାଡ଼୍‌ତନ୍ ଅଣ୍ଡ୍‌‌ ତାନାଦ୍‌ ମାଟ୍ଟା ବେସୁଙ୍କ୍‍ ବା ମିହ୍‌ୱଣ୍ଡ୍‌, ‘ନିମେ ସାରେଦିନାତ୍‍ ପୁଜାର୍ ଆଦ୍‍ତ୍ତିନ୍ ।’”
HEB 7:22 ଇଦ୍‍ ପାର୍ତକ୍ୟ ସେଙ୍ଗେ ଜିସୁ ଅଣ୍ଡୟ୍‌‍ ମହତ୍ୱ ଚୁକ୍ତିତେ ନିଜାମ୍‌ ଇଦ୍‍ତଣ୍ଡ୍‍ ।
HEB 7:23 ପଅନ୍‌ତେ ଶୈଲିତେ ୱେରେ ପୁଜାରିଡ଼୍‍ ଡଲାନ୍‍ ଇନା ଆସ୍‍ମାନ୍ଦାନ୍‍ ମାଇଦିଙ୍କ୍‍ ୱେରେ ନାରୁଡ଼୍‍ ପୁଜାରି ନିଯୁକ୍ତ ଆଦ୍‍ତଡ଼୍‍; ଆଦିଙ୍କ୍‍ ଅଡ଼୍‌‍ ନାର୍ଗେ ଆତ୍‍ତଡ଼୍‍ ।
HEB 7:24 ଇତ୍‍କେ ଜିସୁ ସାରେଦିନେ ଜିୱୁ ମାନ୍‌ତଣ୍ଡ୍‍ । ଅନାଦ୍‌‌ ପୁଜାରି ପାଡ଼୍‍ୟି ଗାଲା ସାରେଦିନା ମାନ୍‍ତେ ।
HEB 7:25 ଆଦିନ୍ ବେନଡ଼୍‍ ଅଙ୍କ୍‌‌ ଆସ୍‌ ଇଶ୍ୱରନ୍‌ ଗାର୍ରେ ଅନ୍‌ତଡ୍, ଅଡ଼୍‌କିଂଙ୍କ୍‌ ଅଣ୍ଡ୍‌‌ ଇଞ୍ଜେ ମେଣ୍ଡେ ସାର୍ରେଦିନା ଗେଲ୍‌ସ୍ପା ପାର୍ଦେତଣ୍ଡ୍, ବାତାଙ୍କ୍‌ଇତ୍‌କେ ଅଡ୍‌ ମାଇଦିଙ୍କ୍ ଇଶ୍ୱରନ୍‌ ମୁନେ କେତାନଙ୍କ୍‌ ଅଣ୍ଡ୍‌‌ ସାରେଦିନେ ଜିୱୁ ମିନ୍ଦେଣ୍ଡ୍‌ ।
HEB 7:26 ଆଦିନ୍ ମାନାଙ୍କ୍ ବାତେ କାୱାଲ୍‌ ଆଦ୍ ସାର୍ରେ ଇଦାନଙ୍କ୍ ବାଡ଼ିୟା ପୁଜାରି ଜିସୁ ଆରଣ୍ଡେ ମିନ୍ଦେଣ୍ଡ୍‌ । ଅଣ୍ଡ୍‌‌ ପବିତ୍ର, ପାପ୍‌ କିୱେନଣ୍ଡ୍‌, ପାପି ନାରୁଡୁଞ୍ଚ୍‌ ୱେରେ ମାନ୍ଦାନଣ୍ଡ୍‌, ପର୍ର ସ୍ୱର୍ଗତାଗ୍‌ ଆତଣ୍ଡ୍‌ ।
HEB 7:27 ଅଣ୍ଡ୍‌‌ ଇଲା ଆଲା ପୁଜାରିଡ଼୍ ଲେକେତ୍‍ ଆୟଣ୍ଡ୍; ଅଡ଼୍‌ ଲେକାମ୍‍ ବେଲାକି ମୁନେନ ତାମ୍‌ ପାପ୍‌ତେ ମାଇଦିଙ୍କ୍‌ ପୁଜି ପେର୍କେ ୱେରେତଡାଦ୍‌ ପାପାମ୍‌ତେ ମାଇଦିଙ୍କ୍‌ ସାରେଦାମ୍‌ ପୁଜାନଙ୍କ୍‌ ଦାର୍‌କାର୍‌ ଇଲ୍‌ଲେ । ଅଣ୍ଡ୍‌ ୱେରଟ୍‌ଦାମ୍ ୱେରଣ୍ଡ୍‌ ନୁ ସାର୍ରେତ୍ ମାଇଦିଙ୍କ୍‌ ତାନାକେ ପଜିଆତ୍ତନ୍ ।
HEB 7:28 ମୋଶାନ୍‌‌ କାନୁନ୍‌ତେ ଇସାବ୍‌ତେ, ବାତେ ପୁନୱରଡ୍ ମିକା ପୁଜାରିଡ଼୍ ଆୟନୁଡ୍; ମାତି ପରମେଶ୍ୱର ଶପତ୍‌ ମାଡ଼୍‍ତାଦ୍ ଇସାବତେ ତାନା ମାର୍‍ ପୁଜାରି ଆତ୍ତୋର, ଅଣ୍ଡ୍‌‌ ସାରେଦିନା କିୟାପାର୍ଦତଣ୍ଡ୍ ।
HEB 8:1 ମାନ୍‍ ଗଟ୍‍ତାଦ୍‍ ମୁକ୍ୟ ବିଷୟ୍‍ ଇଦ୍‍, ମାମ୍‍ ବେନ୍‍ ବେଡ଼୍‍ୟେ ପୁଜାରିଙ୍କ୍‍ ପାଏମ୍‍ଆତ୍‍ତମ୍‍, ଅଣ୍ଡ୍‌‍ ସ୍ୱର୍ଗତାଗ୍‍ ସାରେତିଙ୍କ୍‍ ବାଡ଼୍‍ୟଣ୍ଡ୍ ସିଂହାସନତାଗ୍‌ ତିନ୍ଦେ ପାକେ କୁଦି ମିନ୍ଦେଣ୍ଡ୍‍ ।
HEB 8:2 ଅଣ୍ଡ୍‌ ବେଦ୍ ବେଡ଼୍‍ୟେ ପବିତ୍ର ପଡ଼୍‍ୟେତାଗ୍ ମାଡ଼୍‍ତେ ନିଜାତାଦ୍‍ ତମ୍ବୁତ୍‌ ମଦଲ୍‌ ବେଡ଼୍‍ୟେ ପୁଜାରି ଲେକେମ୍‍ ପାଡ଼୍‍ୟି ମାଡ଼ିତଣ୍ଡ୍, ଆଦ୍‍ ନାରୁଡ଼୍‍ ତିଆର ମାଡ଼୍‍ତାଦ୍‌ ଆୟ, ଆଦିଙ୍କ୍‍ ଇଶ୍ୱର ତିଆର୍‍ ମାଡ଼୍‍ତଣ୍ଡ୍ ।
HEB 8:3 ସାର୍ରେ ବାଡ଼୍‍ୟେ ପୁଜାରିଡ଼୍‍ ଇଶ୍ୱର୍‌ତେ ଲେକାମ୍‌ ପୁଜ୍‍ ସାମାନ୍‍ ନୁ ପଶୁ ପଜ୍‍ ଇଦାନଙ୍କ୍‍ ନିଯୁକ୍ତ ଆତ୍‍ତଡ଼୍‍ । ଆଦିଙ୍କ୍‍ ମାନ୍‍ ବାଡ଼୍‍ୟେ ପୁଜାରି ଗାଲେୟ୍‍ ଆଲେକେନ୍ ସୁଡୁଟ୍‍ ପୁଜା ଜିନିଷ୍‍ ଇଦାନଙ୍କ୍‍ ଦର୍‍କାର୍‍ ।
HEB 8:4 ଅଣ୍ଡ୍‌‌ ଯଦି ଇ ବୂମ୍‌ତାଗ୍‌ ମାନେଣ୍ଡ୍ ଆଲେକେ, ଅଣ୍ଡ୍‌‌ ବେସୁଟ୍‍ବା ପୁଜାରି ଆୟୱାମାନେଣ୍ଡ୍‌, ବାତାଙ୍କ୍ଇତକେ ଯିହୁଦିଡ଼୍‌ ନିୟମ ଇସାବ୍‍ତେ ପୁଜ୍ ଇଦାନ୍‌ ମାଇଦିଙ୍କ୍ ପୁଜାରି ଆସ୍‍ମିନ୍ଦେଣ୍ଡ୍‍ ।
HEB 8:5 ଅଡ଼୍‌‍ୱାଦ୍ ପୁଜାରି ପାଡିୟ୍ ବସ୍ତୁତ୍ୱ ସ୍ୱର୍ଗତ୍‍ ବିଷୟ୍‍ ଲେକାମ୍‍ ନୁ ଅଣ୍ଡୟ୍‌‍ ନିଡ଼୍‍କେ । ମଶାନାଗ୍‌ ଇଲା ଆସ୍ ୱାଦୁତା । ମଶାଲ୍‌ ବେସୁଙ୍କ୍‍ ଉପାସନା ମାଇଦିଙ୍କ୍ ଅଣ୍ଡୟ୍‌ କୁଡ଼ୁମା ମାଡ଼ାଙ୍କ୍‍ ଆଦାନ୍‍ୱେଲେ, ଇଶ୍ୱର ଅଙ୍କ୍‌‌ କେତ୍ତଣ୍ଡ୍, “ଉଡ଼ା, ମେଟେତ୍‍ ପର ନିକିଙ୍କ୍‍ ବେନ୍‍ ନକ୍ସା ତଅସିତ୍‍ତାନ୍‌ ଆଲେନେ ସାର୍ରେ ବିଷୟ୍‍ ତିଆର୍‍ ମାଡ଼େ ।”
HEB 8:6 କିନ୍ତୁ ଇଞ୍ଜେ ଜିସୁଙ୍କ୍‌ ବେନ୍ ପୁଜାରି ପାଡିୟ୍‌ ଇସ୍‌ ମିନ୍ଦେଡ଼୍‍, ଆଦ୍‌ ୱେରେ ପୁଜାରି ପାଡିୟନୁଞ୍ଚ ବାଡ଼ିୟା । ଆଲେକେନ୍‌ ଇଶ୍ୱର ନୁ ନାରୁଡ୍ ନାଡ୍‌ମେ ଅଣ୍ଡ୍‌‌ ବେଦ୍ ନିୟମ୍‌ ଇସ୍‌ମିନ୍ଦେଣ୍ଡ୍, ଆଦ୍ ବେଡ଼ିୟାଦ୍, ବାତାଙ୍କ୍‌ଇତ୍‌କେ ଇଦ୍‌ ନିୟମତାଗ୍‍ ବାଡ଼ିୟା ବିଷୟ ଇଦାନ୍‍ ମାଇଦିଙ୍କ୍‌ ପ୍ରତିଜ୍ଞା ମାଡ଼୍‍ତଣ୍ଡ୍‍ ।
HEB 8:7 ମୁନେତ୍ ନିୟମତାଗ୍‍ ଯଦି ବାତେବା ନିର୍ଦୋଷ୍‍ ମାତ୍କେ, ଆଲେକେ ରେଣ୍ଡ୍‍ ନିୟମ୍‌ ଦରକାର ଇଲୱା ମାତ୍‍ତା ।
HEB 8:8 କିନ୍ତୁ ଇଶ୍ୱର ତାନ୍ ନାରୁଡ୍‌ ଦୋଷତିନ୍‌ ତହସ୍‌ କେତ୍‍ତଣ୍ଡ୍‍, “ପ୍ରବୁ କେତୁତଣ୍ଡ୍‍, ସମୟ ୱାଦୁତା, ନାନ୍‌ ବେସୁଙ୍କ୍‍ ଇସ୍ରାଏଲ ବା ସାର୍ରେ ଯିହୁଦା ନାରୁଡ୍‌ ସାଙ୍ଗ୍‌ ଅରଟ୍‌ ପୁନାଦ୍‍ ନିୟମ୍‌ ତିଆର୍‍ ମାଡ଼ିତାନ୍ ।
HEB 8:9 ନାନ୍‌ ତାମ୍ ଆନିଦାଦଡ୍‌କ୍ କାୟ୍ ପଇସ୍ ମିସର୍ ଦେଶନୁଞ୍ଚ ପେସ୍‌ପି ତାତାନ୍‍ୱେଲେ ବେନ୍‍ ନିୟମ୍‌ ମାଡ଼ିମାତ୍‍ତାନ୍, ଇଦ୍‌ ନିୟମ୍‌ ଆଦ୍‌ ଲେକାମ୍‍ ଆୟ । ନାନ୍ ଅଡ଼୍‌‍ ସାଙ୍ଗ୍‌ ବେନ୍‍ ନିୟମ୍‌ ମାଡ଼ିମାତ୍‍ତନ୍, ଆଗେ ଅଡ୍‌ ବିଶ୍ୱାସ୍‍ତେ ମାନଡ଼୍‍; ଆଦିଙ୍କ୍‍ ନାନ୍‌ ଅଡ଼୍‌‍ ପର ମନ୍‍ ଇୱନ୍‌ ।
HEB 8:10 ପ୍ରବୁ କେତ୍‌ତଣ୍ଡ୍‍, ନାନ୍ ୱାଇନାଦ୍‌ କାଲାତେ ଇସ୍ରାଏଲ ନାରୁଡ୍‌ ସାଙ୍ଗ୍ ଇଦ୍‌ ନିୟମ୍‌ ମାଡ଼ିତାନ୍ । ନାନ୍‍ ନାୟାଦ୍‌ ନିୟମ ଅଡ଼୍‌‍ ଏରକେତେ ୱାଟିତାନ୍ ନୁ ତାମ୍ ଜିୱୁନ୍‌ତାଗ୍‌ ଲେକିତ୍‌ତାନ୍, ନାନ୍‌ ତାମ୍‌ ଇଶ୍ୱର୍ ଆଦ୍‍ତାନ୍, ମେଣ୍ଡେ ଅଡ୍‌ ନା ନାରୁଡ୍‌ ଆଦ୍‍ତଡ୍‌ ।
HEB 8:11 ଆସୁଟ୍‍ ଅଡ଼୍‌‍ ଗାରେତଡ଼୍‍କ୍‍ ଶିକ୍ଷା ଇଦାନଙ୍କ୍ ଦର୍‍କାର୍‍ ଆୟ, ବା ଦେଶ୍‍ତେ ନାରୁଡ଼୍‍କ୍‍ ‘ପ୍ରବୁଙ୍କ୍‍ ପୁନୁଟ୍,’ ଇଦ୍‍ ଗଟ୍‍ କେତାନଙ୍କ୍ ଦର୍‍କାର୍‍ ଆୟ, ବାତେଙ୍କ୍‍ଇତ୍‍କେ ସୁଦୁଲଡ଼୍‍ନୁଞ୍ଚ୍‍ ବେଡ଼ିୟଡ଼୍‍ ଏୱୁନା ସାର୍ରେତଡ୍‌ ନାକିଙ୍କ୍‍ ପୁଞ୍ଜ୍‌ମାନ୍‌ତଡ୍‌ ।
HEB 8:12 ନାନ୍‌ ତାମ୍ ସାର୍ରେ ପାପାମ୍‍ତିଙ୍କ୍‍ ୱିଡ଼୍‍ସି ମାଞ୍ଜ୍‍ ନୁ ତାମାଦ୍‌ ବାତେବା ବୁଲ୍‍ତିଙ୍କ୍‍ ଏର୍କେ ନେୱନ୍‌ ।”
HEB 8:13 ଇଦିଙ୍କ୍‍ ପୁନା ନିୟମ୍‌ ଇଞ୍ଜ କେତାନ୍‌ ସାଙ୍ଗ୍ ଇଶ୍ୱର ମୁନେତାଦିଙ୍କ୍‍ ପାଃନ୍‌ତାଦ୍‌ ନିୟମ୍‌ ଇଞ୍ଜ କେସ୍‍ମିନ୍ଦେନ୍‍ ମେଣ୍ଡେ ବାତେ ପାଃନ୍‌ତାଦ୍‌ ନୁ ପାଡ଼୍‍ୟିଦେ ଆଇୱାଦ୍‌, ଆଦ୍‌ ଜାପେ ମାୟିଆତ୍‌ତେ ।
HEB 9:1 ମୁନେତ୍ ନିୟମତାଗ୍ ସେୱାକିନାଦ ନୁ ନାରୁଡ୍‌ ମାଡ଼୍‍ତାଦ୍ ଅରଟ୍ ସେୱା ମାଡ଼ାନ୍ ପଡ଼୍‍ୟେ ବିଷୟତେ ମିନ୍ଦେ ।
HEB 9:2 ଆଦେଲେକାମ୍‌ ଅରଟ୍‌ ସେୱା ମାଡ଼ାନ୍ ବାକ୍‍ଡ଼ା ମାତ୍‍ତେ । ଆଦିଙ୍କ୍‍ ପବିତ୍ର ବାକ୍‍ଡ଼ା ଇଞ୍ଜ କେତ୍‍ତଡ଼୍‍ । ଇଗା କୁପି ୱାଟାନ୍ ପଡିୟା, ଅରଟ୍‌ ଟେବୁଲ୍‌ ନୁ ଟେବୁଲ୍‌ତେ ପର୍ର ଇଶ୍ୱରନ୍‌ ମାଇଦିଙ୍କ୍‌ ମାନାଡ଼୍‍ ଇତ୍ତାୱ ରୂଟି ମାତ୍‍ତା ।
HEB 9:3 ସିଲେତ୍‌ ପେର୍କେ ମେଣ୍ଡେୱେରଟ୍ ବାକ୍‍ଡ଼େ ମାତ୍‍ତା ଆଦିନ୍‌ ବାଡ଼ିୟା ପବିତ୍ର ପଡ଼୍‍ୟେ ଇଞ୍ଜ କେତିତଡ୍ ।
HEB 9:4 ଆଗା ସୁନାତାଦ୍‍ ଦୁପାମ୍ ଇଦାନାଦ୍ ପଡ଼୍‍ୟେ ମାତ୍‍ତେ, ମେଣ୍ଡେ ସନ୍‌ତେ ତିଆର୍‌ ମାଡ଼୍‌ତାଦ୍‌ “ନିୟମ ବାକ୍‍ସ,” ମାତ୍‍ତେ, ଇଦ୍‌ ବାକ୍‍ସତେ ଲୋପେ “ମାନ୍ନା,” ମାନ୍ଦାନାଦ୍ ଅରଟ୍‌ ସୁନାତାଦ୍‍ କାସ୍‌ଲା ମାତ୍‍ତା, ହାରୋଣତାଦ୍‌ ଡୁଡ୍‌ କଡ଼୍‍ସି ମାତ୍‍ତେ ମେଣ୍ଡେ ଇଶ୍ୱର୍‌ତେ ଆଜ୍ଞା ଏକିଇତାୱ ରେଣ୍ଡ୍‌ ଚାପେ କାଲକ ମାତ୍‍ତା ।
HEB 9:5 ଆ ବାକ୍‍ସତେ ପର୍ର ଇଶ୍ୱରନ୍‌ ମାଟା ନିଦର୍ଶନ୍‍ ଲେକାମ୍‍ ରେକା ପେୟତାୱ୍‌ ରେଣ୍ଡ୍‌ ଜନ୍ତୁତ୍‍ ପୁତ୍‍ଲାମ୍‍ ମାତ୍‍ତା । ଇୱୁ ପାପ୍‍ କ୍ଷମା ପଡ଼୍‍ୟେ ପରୁ ତାମ୍‌ ରେକା ଓଡ଼ି ମାତ୍‍ତା, ଇତ୍‍କେ ଇଞ୍ଜେ ଇୱୁସାରେତାୱୁ ବାକ୍ୟା ମାଡ଼ାନ୍‍ ଦର୍‍କାର୍‍ ଆୟ ।
HEB 9:6 ଆଗେ ଇଦ୍‍ରକମ୍‍ ନିୟମ୍‍ ମିନ୍ଦେ, ପୁଜାରିଡ଼୍‍ ସାରେଦିନେ ତମ୍ବତେ ମୁନେତ୍‍ ବାକ୍‍ଡ଼େତାଗ୍‍ ନେଙ୍ଗି ଅଡ଼୍‌‍ୱାଦ୍‍ କର୍ତବ୍ୟ ସାଦନ୍‍ ମାଡ଼ିତଡ଼୍‍ ।
HEB 9:7 ଲୋପେତ୍‍ ମେଣ୍ଡେୱେରଟ୍‍ ବାକରାତାଗ୍ ବେଡ଼ିୟଡ଼୍ ପୁଜାରି ଆଦେପାର୍ଦାତଣ୍ଡ୍, ଅଣ୍ଡ୍‌ ଇଗା ଏଣ୍ଡତେ ଅରଟ୍‌ଦାମ୍‍ ନେଙ୍ଗିତଣ୍ଡ୍‌, ଅଣ୍ଡ୍‌ ତାନ୍‌ ମାଇଦିଙ୍କ୍‌ ନୁ ନାରୁଡ୍‌ ପୁନୱାକଟ୍ ମାଡ଼୍‍ତାଦ୍‌ ପାପ୍‌ତେ ମାଇଦିଙ୍କ୍‌ କାୟ୍‍ତାଗ୍‍ ନେତୁର୍‌ ପୋଇସ୍‌ ଇଶ୍ୱରନ୍‌ ସାଙ୍ଗ୍ ପୁଜାନଙ୍କ୍ ଆନତ୍ତଣ୍ଡ୍ ।
HEB 9:8 ଇ ସାର୍ରେ ବିଷୟତିଞ୍ଚ ପବିତ୍ର ଆତ୍ମା ଇଦ ଗଟ୍‌ ଗାଟି ଲେକେତ୍‌ ନାଡ଼୍‌ସ୍ପିମିନ୍ଦେ ଯେ, ମୁନେତ୍‌ ବେଦି ମାନ୍ଦାନ୍ ଯାକ, ବାଡ଼ିୟା ପବିତ୍ର ଡ଼େଡାତାଗ୍ ଆଦାନ୍ ଆର୍ ତନ୍ଦିଲେ ।
HEB 9:9 ଇଞ୍ଜେତ୍‌ କାଲାତିନ୍‌ ଉଡ୍‌କେ ଇଦ୍‌ ଅରଟ୍‌ ୱେଷଡ଼୍‍ତେ ଲେକେତ୍‍ । ଇତ୍‌କେ, ଇଶ୍ୱରନ୍‍ ସାଙ୍ଗ୍ ଇତ୍‍ତାଦ୍‍ ପୁଜାସାମାନ୍ ନୁ ପଶୁ ପୁଜକେ ଉପାସନ୍‍ ମାଡ଼ାନ୍‍ ନାରୁନ୍‍ ହୃଦୟ୍‍ତିନ୍ ସାୟେ ମାଡ଼େପାର୍ୱ ।
HEB 9:10 ଇୱୁ ସାର୍ରେ ତିନ୍ଦାନାୱ୍‌, ଉଣ୍ଡନାୱ୍, ପବିତ୍ର ଆଦାନ୍‍ ସେଙ୍ଗେ ବାୟ୍‍ଦେତ୍‍ କ୍ରିୟାକର୍ମ୍; ଇଶ୍ୱର୍‌ତେ ପୁନାଦ୍‍ ନିୟମ୍‍ତାଦ୍‍ ପ୍ରତିଷ୍ଟା ଯାକ ଇୱୁ ସାରେତାୱିନ୍‍ ଦର୍‍କାର୍‍ ମାତ୍‍ତେ ।
HEB 9:11 ଇତ୍‍କେ ଇଞ୍ଜେ ମାମ୍ ବେନ୍ ସାୟେ ବିଷୟ ଦର୍‌କସ୍‌ତମ୍‌, କ୍ରିଷ୍ଟ ଆୱସାର୍ରେତାୱିନ୍‍ ବାଡ଼ିୟା ପୁଜାରି ଇନା ୱାସ୍‍ମିନ୍ଦେନ୍‍ । ଅଣ୍ଡ୍‌‌ ବେନ୍‍ ଉପାସନା ତମ୍ବୁତାଗ୍‍ ପାଡ଼୍‍ୟି ମାଡ଼ୁତଣ୍ଡ୍‍, ଆଦ୍‍ ଶ୍ରେଷ୍ଟ ନୁ ଗାଟି ପବିତ୍ର । ଆଦ୍‌ ନାରୁଡ୍‌ ମାଡ଼୍‍ତାଦ୍‌ ଆୟ । ଆଦ୍‌ ଇଦ୍‍ ବୁମ୍‍ତାଗ୍‍ ଅରଟ୍‌ ଦୁଡ଼େ ଆୟ ।
HEB 9:12 କ୍ରିଷ୍ଟ ଆ ତମ୍ବୁତାଲେ ଆ ବେଡ଼ିୟଡ଼୍ ପବିତ୍ର ବେଦିତାଗ୍‌ ଅଣ୍ଡୟ୍‌‍ଦାମ୍‍ ନେଙ୍ଗାନ୍‍ୱେଲେ ଆଗା ବଲି ଇଦାନ୍‌ ମାଇଦିଙ୍କ୍‌ ମେକା ନୁ ପେୟେ ନେତୁର ଆସ୍‌ ଆନୱେ ମାତ୍‍ତଣ୍ଡ୍ । ଅଣ୍ଡ୍‌‌ ମାନାଙ୍ଗ୍‌ ତାନ୍‌ ନିଜର୍‍ ନେତୁର ଇସ୍‌ ସାରେଦିନେତ୍‍ ମାଇଦିଙ୍କ୍‍ ଗେଲ୍‌ସ୍ପିତଣ୍ଡ୍‌ ।
HEB 9:13 ପଅନ୍‌ତେ ପଦତି ତଡ଼୍‍ ବେନଡ଼୍ ପୁଜ୍‍ ମାଡ଼୍‍ୱାଙ୍କ୍‍ ସାୟେ ଇଲେଡ଼୍‍, ଅଡ଼୍‌‍ ପର୍ର ମେକା ନୁ କଅନ୍ଦାତାଦ୍‍ ନେତୁର୍‌ ମେଣ୍ଡେ ଗଡ୍‌ ପଡିସ୍‌ତାଦ୍‌ ନିର୍‌ ଇସ୍‍କେ, ଅଡ଼୍‌‍ ପବିତ୍ର ଆଦ୍‍ତଡ଼୍‍ ।
HEB 9:14 ଇଦ୍‌ ଯଦି ନିଜାମ୍‌ ଆସ୍‌ମାନ୍‌ତ୍ତା, ଆଲେଇତ୍‌କେ କ୍ରିଷ୍ଟନାଦ୍‌ ନେତୁର୍‌ ମେଣ୍ଡେ ବେସର୍‍ ପେର୍କେ ଦର୍‍କାର୍‍ ଆୟ ? ଆଚୟ ତେର୍‌ୱାଦ୍ ଜିୱୁତ୍ ତଡ୍‌ଦେ ଅଣ୍ଡ୍‌‌ ତାନାକ୍ ଇଶ୍ୱରନ୍ ମାଇଦେ ଅଣ୍ଡ୍‌ ନିର୍ଦୋଷ୍‍ ପୁଜ୍‌ତାଗ୍‌ ମନ୍‌ ଇଦୁତଣ୍ଡ୍ । ତାନାଦ୍ ଆଦ୍ ନେତୁର୍‌ତେ ସାଙ୍ଗ୍ କାରାପ୍‌ ପାଡିୟନୁଞ୍ଚ ୱେରେ ଆସ୍ ମାୟାଦ୍‌ ଜିୱୁ ନେଲ୍ଲା ମାନ୍‌ତା ନୁ ମାମ୍ ଜିୱୁ ମାନ୍ଦାନ୍ ଇଶ୍ୱରନ୍‌ ସେୱା ମାଡା ପାର୍ଦାତମ୍ ।
HEB 9:15 ଆଦେନ୍‌ ସାଙ୍ଗ୍ କ୍ରିଷ୍ଟ ପୁନା ନିୟମ୍‌ ମାଡ଼୍‍ତଣ୍ଡ୍‍, ବେଲାକି ବେନଡ଼୍‍କ୍‌ ଇଶ୍ୱର କାର୍‍ଙ୍ଗ୍‍ତଣ୍ଡ୍‍, ଓଡେ ଇଶ୍ୱର ପ୍ରତିଜ୍ଞା ମାଡ଼୍‍ତାଦ୍‍ ଅନନ୍ତ ଆର୍ଶିବାଦ୍‌ ଦର୍କାକିଦ୍‍ତଡ୍ । ମୁନେତ୍ ନିୟମ୍‌ ପାଡ଼୍‍ୟି ମାଡ଼ାନାସୁଟ, ନାରୁଡ୍ ବେନ୍‍ସାରେ ପାପ୍ ମାଡ଼୍‍ମାତ୍‍ତଡ଼୍‍, ଅଡ୍‌ ସାର୍ରେ କ୍ରିଷ୍ଟ ଡଲ୍‌ତା ସେଙ୍ଗେ ଗେଲ୍‌ସି ମିନ୍ଦେଡ଼୍ ।
HEB 9:16 ଅଣ୍ଡୟ୍‌‍ ଚୁକ୍ତି ନିୟମ୍‍ ଲେକାମ୍‌ ଆଦ୍‍ ପାଡ଼୍‍ୟି ମାଡ଼ାନ୍‍ ସେଙ୍ଗେ ଚୁକ୍ତି ମାଡ଼ିମାନ୍ଦାନ୍‍ ନାରୁନାଦ୍‍ ଡଲାନାଦ୍‍ ଦର୍‍କାର୍‍ । ବେନଡ଼୍ ନାରୁଡ୍ ତାନାକ୍ ଡଲ୍‌ତା ପାୟ୍‌ ତାନ୍‌ ବୁମ୍ ନେଲ୍‌ ବେନନ୍ ଅଦ୍‌ତଡ଼୍‌ ଇଞ୍ଜ ଲେକା ମାଡି ତାତିତଡ୍; ଆର୍‌ ଡଲ୍‌କେ; ଆସ୍‌କେ ଆଦ୍‌ ଚାଲେମ୍‌ ଆତା ।
HEB 9:17 ଆର୍‌ ଡଲ୍‌ତାପାୟ୍‌ ଆଦ୍‌ କାଗଜ୍‌ ଚାଲେମ୍‌ ଆତା । ଆର୍‌ ଜିୱୁ ମାନ୍ଦାନ୍‌ୱେଲେ ଆଦ୍‌ ଚାଲେମ୍‌ ଆୟ୍‌ ।
HEB 9:18 ଆଦେନ୍‌ମାଇଦେ ମୁନେତ୍‌ ନିୟମ୍‌ ଗାଲା ନେତୁର୍‌ତେନ୍ ଚାଲେମ୍‌ ଆସମାତ୍ତା ।
HEB 9:19 ବାତେଙ୍କ୍‍ଇତ୍‍କେ ମୁନେନ୍‍ ମୋଶାନ୍‌‌ ନିୟମ୍‌ତେ କାନୁନ୍‌ତାଗ୍‍ ମାନ୍ଦାନ୍‍ ନାରୁଡାଗ୍ କେତ୍ତଣ୍ଡ୍‍ । ତାନ୍‍ପେର୍କେ ଅଣ୍ଡ୍‌ ପେୟେ ନୁ ମେକା ନେତୁର୍‌ତିନ୍ ଏର୍‌ଦାଗ୍‌ କାଲ୍‌ପି ଏର୍‍ରେ ରଙ୍ଗ୍‌ତାଦ୍ ମେଣ୍ଢେ କେଲ୍‌କ୍‌ ନୁ ଜୁପା କାରାତା ରଟ୍‌ଟତେ କାନୁନ୍ ଲେକେମ୍‍ ଆସ୍‌ ମାନ୍ଦାନ୍ ବଇତ୍‍ ପର୍ର, ମେଣ୍ଡେ ନାରୁଡ୍ ପର୍ର ସାଚନ୍‌ ମାଡ଼୍‌ତନ୍‌ ।
HEB 9:20 ଅଣ୍ଡ୍‌‌ କେତ୍ତଣ୍ଡ୍, “ବେନ୍‍ ନିୟମ୍‌ ପାଲନ୍‍ ମାଡ଼ାନଙ୍କ୍‍ ଇଶ୍ୱର୍ କେସ୍‌ମିନ୍ଦେଣ୍ଡ୍‍, ଇଦ୍‌ ନେତୁର୍‌ ଆଦ୍‍ ନିୟମ୍‍ ବିଷୟ୍‍ କେତିତ୍‍ ।”
HEB 9:21 ମଶାଲ୍‌ ଆଦ୍‍ ଲେକେମ୍‍ ନେତୁର୍‍ ଆସ୍‍ ତମ୍ବୁ ମନ୍ଦିର୍‍ ନୁ ଉପାସନାତାଗ୍‍ ବ୍ୟବହାର୍‌ ଆଦ୍‍ନ୍‍ ସାର୍ରେ ଜିନିଷ୍‍ତେ ପର ଇସ୍କ୍‍ତଣ୍ଡ୍‍ ।
HEB 9:22 ମେଣ୍ଡେ ମୋଶାନ୍‌‌ ନିୟମ୍‍ ଲେକାମ୍‌ ସାର୍ରେ ବିଷୟ୍‍ ନେତୁର୍‍ତଡ଼୍‍ ପବିତ୍ର ଆଦ୍‍ତା ନୁ ନେତୁର୍‍ ତଡ଼୍‍କେ କ୍ଷମା ପାଏମ୍‍ ଆଦ୍‍ତେ ।
HEB 9:23 ବେନ୍‍ ବିଷୟ୍‍ ସ୍ୱର୍ଗତେ ମୂଲ ବିଷୟ୍‍ ଲେକେମ୍‍, ଆୱୁସାରେ ନେତୁର୍‍ ତଡ଼୍‍ ପବିତ୍ର ଆଦାନ୍‍ ଦର୍‍କାର୍‍ ମାତ୍‍ତେ, କିନ୍ତୁ ସ୍ୱର୍ଗୀୟ ବିଷୟ୍‍କି ସେଙ୍ଗେ ବେଡ଼୍‍ୟେ ବଲିଦାନ୍‍ ଦର୍‍କାର୍‍ ।
HEB 9:24 ବାତ୍‍ ନାରୁଡ଼୍‍ ତିଆର୍‍ ମାଡ଼ଡ଼୍‍, ଇଦ୍‍ରକମ୍‍ ଅଣ୍ଡୟ୍‌‍ ପବିତ୍ର ପଡ଼୍‍ୟେତାଗ୍‍ କ୍ରିଷ୍ଟ ଆତ୍‍ତଣ୍ଡ୍‍ । ଆଦ୍‍ ବାତ୍‍ବା ନିଜାତାଦ୍‍ ବିଷୟ୍‍ତେ ଅନୁରୁପ୍‍ ଆୟ । ଅଣ୍ଡ୍‌‍ ସ୍ୱର୍ଗତାଗ୍‍ ଆତ୍‍ତଣ୍ଡ୍‍ । ଆଗେ ଅଣ୍ଡ୍‌ ମାନ୍‍ ପାକେ ଇଞ୍ଜେ ଇଶ୍ୱର୍‌ତେ ମୁନେ ମିନ୍ଦେଣ୍ଡ୍‍ ।
HEB 9:25 ଇହୁଦିଡ୍‌ ବାଡ଼ିୟା ପୁଜାରିଡ଼୍ ବେଦ୍‍ଲେକାମ୍ ୱାଡ଼୍‍ଷାତେ ୱେରଟ୍‌ଦାମ୍ ପଶୁ ନେତୁର୍‌ ଆସ୍ ବାଡ଼ିୟା ପବିତ୍ର ଜାଗାତାଗ୍ ଅନ୍‌ତଡ୍‌ । ଆଦେରକମ୍‍ କ୍ରିଷ୍ଟ ନିଜେତିଙ୍କ୍ ସେନେମାନ୍‍ ଉତ୍ସର୍ଗ ମାଡ଼ାଙ୍କ୍‍ ଆନନ୍‍ ।
HEB 9:26 ଆଲେଇତ୍‌କେ, ଅଙ୍କ୍‌‌ ବୁମ୍ ମାଡ୍‌ତାଗାନୁଞ୍ଚ୍‌ ନାର୍ଗେଦାମ୍ ଦୁଃକକଷ୍ଟ ମାଡ଼ାନାଦ୍ ମାତ୍‍ତା । ମାତି ଅଣ୍ଡ୍‌ ଯୁଗାନ୍ତ ସମୟତେ ତାନାକେ ପୁଜିଆତ୍‌ତେ ମାଇଦିଙ୍କ୍‌ ସାରେଦିନେତ୍‍ ମାଇଦିଙ୍କ୍‍ ଅଣ୍ଡୟ୍‌‍ଦାମ୍ ପାପ୍‌ତାଦ୍‌ ଲାୱଦିନ୍‌ ଲୋପ୍‍ମାଡ଼ାନଙ୍କ୍ ୱାସ୍‌ମାତଣ୍ଡ୍ ।
HEB 9:27 ସାର୍ରେତଡ୍‌ ଅରଟ୍‌ଦାମ୍‍ ଡଲିତଡ଼୍‍ ମେଣ୍ଡେ ତାନ୍‍ ପେର୍କେ ଇଶ୍ୱରନ୍‌ ବିଚାରତା ମୁନେ ଆଦାଙ୍କ୍‍ ଆଦ୍‍ତେ ।
HEB 9:28 ଆଦେଲେକାମ୍‌ ନାର୍ଗେମୁଲ୍‌ଦାଦ୍‌ ପାପ୍‌ ଦୁରାମ୍ ମାଡ଼ାନଙ୍କ୍ କ୍ରିଷ୍ଟ ଅରଟଦାମ୍ ପୁଜିଆତ୍ତଣ୍ଡ୍‍ । ଅଣ୍ଡ୍‌ ମେଣ୍ଡେ ୱାଦ୍‍ତଣ୍ଡ୍ । ଆସୁଙ୍ଗ୍‌ ମେଣ୍ଡେ ପାପ୍‌ତେ ସାଙ୍ଗ୍‌ କାଇଲାନ୍‌ ମାଇଦିଙ୍କ୍ ଅଣ୍ଡ୍‌‌ ୱାୱଣ୍ଡ୍ । ଅଣ୍ଡ୍‌‍ ୱାଦ୍‍ତଣ୍ଡ୍, ଅନ୍‌‍ ସେଙ୍ଗେ କେପିମାନ୍ଦାନ୍‍ ନାରୁଡ଼୍‍କିଙ୍କ୍‍ ପରିତ୍ରାଣ ମାଡ଼ାନ୍‍ ସେଙ୍ଗେ ।
HEB 10:1 ଇହୁଦୀ ବ୍ୟବସ୍ଥା ବାସ୍ତବ୍‍ ବିଷୟ୍‍ତେ ପୁରା ନୁ ଟିକ୍‍ ଚିତ୍ର ଆୟ, ଇଦ୍‍ ୱାଦାନାଦ୍‍ ସାୟେତାଦ୍‍ ବିଷୟ୍‍ତେ ଅଣ୍ଡୟ୍‌‍ ସାୟେତ୍‍ ସୂଚନା ଆୟ । ସାର୍ରେଦାମ୍‍ ବାତାଙ୍କ୍‌ଇତ୍‌କେ କାନୁନ୍‌ ପେର୍କେ ସାୟେ ବିଷୟତାଦ୍‌ ଦାଡ୍‌ମ୍‌ ଲେକାମ୍‍ ଆସ୍‌ ଆୱୁ ସାର୍ରେ ବିଷୟତାଦ୍‌ ଟିକ୍‌ ଆଦ୍‌ଲେକେନ୍‌ ଆୟ୍‌ୱା ପୁଜାରିଡ଼୍‌କିଙ୍କ୍‌ ଏଣ୍ଡେକ୍‍ତିଙ୍କ୍‍ ଆମ୍‌ତେ ଆଲେ ଅରଟ୍‍ ଲେକାମ୍‍ ପୁଜାନ୍‌ ଲେକାମ୍‌ ଉପାସଡ୍‌କ୍‌ ବେସୁଙ୍କ୍‍ ବା ନାର୍‌ଦେ ପାର୍‌ୱ ।
HEB 10:2 ଯଦି ପାର୍ଦିତା, ଆଲାଇତ୍‌କେ ଉପାସକଡ୍‌ ୱେରଟ୍‌ଦାମ୍ ଜାତ୍‌ଆସ୍‌ ପୁନ୍‌ନେଡ୍‌ ମେଣ୍ଡେ ଅଡ଼୍‌‍ ମନ୍‍ତାଗ୍‍ ପାପ୍‌ ମାଡ଼୍‍ୱାଲ୍‌ ଇଞ୍ଜ ଆୱୁ ସାର୍ରେ ପୁଜାନାଦ୍ ତେରି ମାନ୍ଦାନ୍‌ ଆୟ କି ?
HEB 10:3 କିନ୍ତୁ ଆଦ୍‍ଲେକାମ୍‍ ଆୟକଟ ହେଣ୍ଡ୍‌କିଙ୍କ୍‌ ହେଣ୍ଡ୍‌କ୍‌ ବଲିଦାନ୍‍ ଇତ୍ସର୍ଗ ମାଡ଼ାନ୍‍ ଦ୍ୱାରା ନାରୁଡ଼୍‍ ମାତର୍‍ ତାମ୍‍ ପାପାମ୍‍ ବିଷୟ୍‍ ଏର୍କା ମାଡ଼ାଙ୍କ୍ ଆଦ୍‌ତେ ।
HEB 10:4 ବାତେଙ୍କ୍‍ଇତ୍କେ କଅନ୍ଦା ନୁ ମେକେତ୍‌ ନେତୁର୍‌ତେ ପାପ୍‌ ମାୟିତା, ଆଲେ ବେସୁଙ୍କ୍‌ବା ଆୟ ।
HEB 10:5 ଆଦିନ୍‌ମାଇଦିଙ୍କ୍‌ କ୍ରିଷ୍ଟ ବୁମ୍‍ତାଗ୍‍ ୱାଦାନ୍‍ ମୁନେଙ୍କ୍‍ ଇଶ୍ୱର୍‌ତିଙ୍କ୍‍ କେତ୍‌ତଣ୍ଡ୍‍, “ପଶୁ ପୁଜାନାଦ୍‌ ନୁ ନୈବେଦ୍‍ ଇଦାନାଗ୍‍ ମିଡ଼୍‍ ସନ୍ତୁଷ୍ଟ ଆୟ୍‍ୱିଡ଼୍‍, କିନ୍ତୁ ମିଡ଼୍‍ ନା ସେଙ୍ଗେ ଅଣ୍ଡୟ୍‌‍ ମେନ୍ଦୁଲ୍‍ ତିଆର୍‍ ମାଡ଼୍‍ତିଡ଼୍‍ ।
HEB 10:6 ପାପାମ୍‍ ନର୍‍ଦାନ୍‍ ସେଙ୍ଗେ ମିଡ଼୍‍ ବେଦିତ୍ ପର ହମବଲିତେ ବା ଜିୱାକ୍‌ ପୁଜାନ୍‌ ଆସୁଟ୍‌ ସନ୍ତୁଷ୍ଟ ଆୟ୍‍ୱିଡ଼୍‍ ।
HEB 10:7 ଆଦିଙ୍କ୍‍ ନାନ୍‍ କେତ୍‍ତାନ୍‍, ‘ଆ ଇଶ୍ୱର, ନା ବିଷୟ୍‍ତେ ନିୟମ୍‍ ବଇତାଗ୍‍ ବେଲା ଲେକା ମିନ୍ଦେ, ନାନ୍‍ ଆଦ୍‍ ରକମ୍ ନିୟାଦ୍‍ ଇଚ୍ଛା ସାଦନ୍‍ ମାଡ଼ାନଙ୍କ୍ ତିଆର୍‍ଆସ୍‍ ମିନ୍ଦେନ୍‍ ।’”
HEB 10:8 ମୁନେଙ୍କ୍‌ ଅଣ୍ଡ୍‌‌ କେସ୍‌ମାତ୍‌ତଣ୍ଡ୍‌, “ନିମା ନାରୁଡ୍‌ତା ପାପ୍‌ ନର୍ଦାନ୍‌ ମାଇଦିଙ୍କ୍‌ ପୁଜାନାଦ୍‌ ମେଣ୍ଡେ ନୈବେଦ୍ୟ ମେଣ୍ଡେ ହମବଲି ନିକିନ୍‌ ଅପ । ଆୱୁ ସାର୍ରେ ନିକିନ୍‌ ସନ୍ତୁଷ୍ଟ ମାଡ଼େ ପାର୍‍ୱ ।” ଇୱସାର୍ରେ ପୁଜାନାଦ୍‌ କାନୁନ୍‌ତେ ଇସାବ୍‌ତେ ମାଡ଼ିମାତ୍‍କେ ଗାଲେୟ ଅଣ୍ଡ୍‌‌ ଇଲା କେସ୍‍ମାତ୍‍ତଣ୍ଡ୍ ।
HEB 10:9 ତାନ୍‌ପେର୍କେ ଅଣ୍ଡ୍‌ କେସ୍‍ମାତ୍‍ତଣ୍ଡ୍, “ଆ ଇଶ୍ୱର, ନାନ୍ ନି ଇଚ୍ଛା ସାଦନ୍‍ ମାଡ଼ାନଙ୍କ୍ ତିଆର୍‍ ।” ଇତ୍‌କେ ଇଶ୍ୱର ଇୱସାର୍ରେ ପୁଜ୍‌ତାୱୁ ୱିଡ଼୍‍ସି ମେଣ୍ଡେ ତାନ୍‌ ବାଦ୍‌ଲେମ୍‌ତେ କ୍ରିଷ୍ଟନାଦ୍‌ ପୁଜ୍‌ତାଦ୍ ଗ୍ରହନ୍‍ ମାଡ଼୍‍ତଣ୍ଡ୍‍ । ମେଣ୍ଡେଅଣ୍ଡ୍‌‍ ନିୟମ୍‍ ତିଆର୍‍ ମାଡ଼ାନ୍‍ ସେଙ୍ଗେ ମୁନେତାଦ୍ ନିୟମ୍‍ତିଙ୍କ୍‍ ଲପ୍‍ ମାଡ଼୍‍ତଣ୍ଡ୍‍ ।
HEB 10:10 ଆଦିଙ୍କ୍‍ ଇଶ୍ୱର୍ ଇୱୁସାରେ ବଲିଦାନ୍‍ ଗ୍ରହନ୍‍ ମାଡ଼କଟ ଆଦ୍‍ନ୍‍ ବାଦୁଲ୍‍ତେ କ୍ରିଷ୍ଟନ୍‍ ବଲିଦାନ୍‍ ଗ୍ରହନ୍‍ ମାଡ଼୍‍ତଣ୍ଡ୍‍ । ଜିସୁ କ୍ରିଷ୍ଟ ଅରଟ୍‌ଦାମ୍‌ ନୁ ସାର୍ରେଦିନାତ୍ ମାଇଦିଙ୍କ୍ ତାନ୍ ମେନ୍ଦୁଲ୍‌ତିନ୍ ପୁଜି ଇଶ୍ୱରନ୍‌ ଇଚ୍ଛା ସାଦନ୍‍ ମାଡ଼ିମାନ୍ଦାନ୍‍ ମାୟ୍‍ଦିଙ୍କ୍‍ ଅନାଦ୍‌‍ ଇଦ୍‍ ବଲି ସେଙ୍ଗେ ମାନାଡ଼୍‍ ସାରେତଡ଼୍‍ ପାପାମ୍‍ ତାଗାଙ୍କ୍ ପରିଷ୍କାର୍‍ ଆତ୍‍ତାଡ଼୍‍ ।
HEB 10:11 ଇହୁଦୀ ପୁଜାରିଡ଼୍‍ ସାରେଦାମ୍‌ ତାମାଦ୍ କାମ୍ ମାଡି ଆଦେ ଅରଟ୍‌ ପ୍ରକାର୍‌ ମେଣ୍ଡେ ପୁଜା ଇଦୁତଡ୍‌, କିନ୍ତୁ ଇୱସାର୍ରେ ପୁଜ୍‍କେବାର୍ ବେସୁଙ୍କ୍‍ ବା ପାପ୍‌ ମାୟି ଆନ ।
HEB 10:12 କିନ୍ତୁ କ୍ରିଷ୍ଟ ପାପ୍‌ ତେରି ଇଞ୍ଜ ସାର୍ରେଦିନା ମାଇଦିଙ୍କ୍‌ ଆଣ୍ଡୟେ ପୁଜ୍‌ତଣ୍ଡ୍‌ । ଆ ପେର୍କେ ଅଣ୍ଡ୍‌‌ ଆଞ୍ଜମାଞ୍ଜ ଇଶ୍ୱରନ୍‌ ତିନ୍ଦେ ପାକେ କୁଦି ମିନ୍ଦେଣ୍ଡ୍‌ ।
HEB 10:13 ଇଶ୍ୱର ତାନ୍ ଶତ୍ରୁନାରୁଡ୍‌କିନ୍‌ ଡେକେ ୱିକାନାଦ୍‍ କୁତୁଲ୍‍ ଆୟ୍‍ନା, ଅଣ୍ଡ୍‌ ଆଗା କେପି ମାନ୍‌ତଣ୍ଡ୍‌ ।
HEB 10:14 ବେନଡ଼୍ ପାପ୍ ୱିଡ଼୍‍ସି ସାୟେ ଆସ୍‌ ମିନ୍ଦେଡ଼୍, ଆଦ୍‌ ଅଣ୍ଡୟ୍‌‍ଦାମ୍ ପୁଜାନ୍ ଦ୍ୱାରା ଅଡ଼୍‌କିଂଙ୍କ୍‍ ଅଣ୍ଡ୍‌ ସାର୍ରେଦିନା ମାଇଦିଙ୍କ୍‌ ପବିତ୍ର ମାଡ଼ି ମିନ୍ଦେଣ୍ଡ୍ ।
HEB 10:15 ପବିତ୍ର ଆତ୍ମା ମେଣ୍ଡେ ତାନାଦ୍ ସାକ୍ଷି ଇସ୍‍ କେତୁତଣ୍ଡ୍‍ ।
HEB 10:16 ପ୍ରବୁ କେତ୍‍ତଣ୍ଡ୍‍, “ୱାୟାନ୍‍ କାଲାମ୍‌ତେ ନାନ୍ ଅଡ଼୍‌‍ସାଙ୍ଗ୍ ଇଦ୍‌ ମାଟ୍ଟା ୱିଡ଼୍‍ସି ମାନ୍‌ତାନ୍ । ନାନ୍‌ ନା ପୁନାଦ୍‍ କାନୁନ୍‌ତା ମାଟ୍ଟାନ୍ ଅଡ଼୍‌ ଜିୱୁତାଗ୍‌ ୱାଟିତାନ୍, ଅଡ଼୍‌ ଏର୍କାତାଗ୍ ଲେକା କିଦ୍‍ତାନ୍ ।”
HEB 10:17 ମେଣ୍ଡେ ଅଣ୍ଡ୍‌‍ କେତିତଣ୍ଡ୍‍, “ନାନ୍‍ ମେଣ୍ଡେ ଅଡ଼୍‌ ପାପ୍‌ ନୁ ଅପରାଦ୍‌ ପାଡିୟ୍‌ଦିନ୍‌ ବେସୁଙ୍କ୍‌ବା ଏର୍କା ମାଡ଼ନ୍ ।”
HEB 10:18 ଆଦିନ୍ ଅଡ଼୍‌‍ ଯଦି କ୍ଷମା ଆସ୍ ମିନ୍ଦେଡ଼୍, ଇତ୍‌କେ ପାପ୍ ନର୍ଦାନ୍ ମାଇଦିଙ୍କ୍ ମେଣ୍ଡେ ପୁଜାନଙ୍କ୍‍ ଦର୍‌କାର୍ ଇଲା ।
HEB 10:19 ଆଦିନ୍ ଆ ଦାଦାଲଡି ନୁ ଏଲାସ୍କ୍‍, ଜିସୁ ଡଲ୍‌ତା ସାଙ୍ଗ୍ ମାନାଙ୍କ୍‌ ବାଡ଼ିୟା ପବିତ୍ର ଜାଗାତାଗ୍ ଆଦାନଙ୍କ୍ ସାର୍ରେ ଅଦିକାର୍ ଦର୍କ୍‌ତା ।
HEB 10:20 ଅଣ୍ଡ୍‌‌ ତାନ୍ ମେନ୍ଦୁଲ୍ ଇସ୍ ମାନ୍‍ ମାଇଦିଙ୍କ୍ ଅରଟ୍‌ ପୁନା ଜିୱୁତ୍ ଆର୍ ତହ୍‌ସିସ୍‌ ମିନ୍ଦେଣ୍ଡ୍ ।
HEB 10:21 ଇଶ୍ୱରନ୍‌ ଲୋନ୍‌ ଇଞ୍ଜେ ମାନ୍‍ ବାଡ଼ିୟା ପୁଜାରିଡ଼୍ କାଇଦେ ମିନ୍ଦେ ।
HEB 10:22 ସାର୍ରେତର୍ ୱାରାଟ୍‌, ମାନାଡ଼୍‍ ନେଲା ଜିୱୁତେ ନୁ ନେକା ବିଶ୍ୱାସତେ ଇଶ୍ୱର ଗାରେ ଆଦିକାଡ଼୍‍; ବାତାଙ୍କ୍‌ଇତ୍‌କେ ମାନାଡ଼୍‍ ଇଞ୍ଜେ ମାନ୍ଦାନ୍ କାରାପ୍‍ ଜିୱୁ ନୁଞ୍ଚ୍‍ କ୍ରିଷ୍ଟନ୍‍ ନେତୁର୍‍ ତଡ଼୍‍ ଜାତ୍‌ ଆସ୍ ମିନ୍ଦେଡ଼୍‍ ନୁ ମାନ୍‍ ହୃଦୟ୍‍ ୱେଡ୍‌ତା ଏର୍‌ଦେ ନର୍‌ସ୍‌ ମିନ୍ଦେଡ଼୍‍ ।
HEB 10:23 ବେନ୍‍ ଆଶା ମାନାଙ୍କ୍‌ ମିନ୍ଦେ ଇଞ୍ଜ ସ୍ୱୀକାର୍‍ ମାଡ଼୍‍ତଡ଼୍‍, ଆଦିନ୍‌ ଡାଟୁମ୍ ପୋଇସ୍‌ ମାନ୍ଦାନ୍ ୱେଇତିତ୍, ବାତାଙ୍କ୍ଇତ୍‌କେ ମାନାଡ଼୍‍ ଇଶ୍ୱର କେତ୍‍ତା ମାଟ୍ଟାତାଗ୍‌ ଆସା ମାଡୁତାଲ୍‌ ।
HEB 10:24 ୱାରାଟ୍‌, ମାନାଡ଼୍‍ ୱେରେତଡ଼୍‍କିଙ୍କ୍‍ ଏର୍କା ମାଡି ଅଡ଼୍‌‍କ୍ ସାହାଯ୍ୟ ମାଡ଼ିକାଲ୍; ଇଦେଲେକାମ୍ ପ୍ରେମ୍‌ତେନେ ସତ୍ କାମ୍ ମାଡ଼ିକାଲ୍ ।
HEB 10:25 ମେଣ୍ଡେ ବେନବେନ ମାନ୍‍ ମଣ୍ଡଲିତାଗ୍‍ ଉପାସନା ମାଡ଼ାନଙ୍କ୍‌ ଆନଡ୍‌, ମାନାଲ୍‌ ଆଲା ମାଡ଼୍‍ୱାଲ୍‌; ମେଣ୍ଡେ ପରସ୍ପର ଉତ୍ସାହ ମାଡ଼ିକାଲ୍‌, ବାତାଙ୍କ୍ଇତକେ ପ୍ରବୁନାଦ୍‌ ଦିନାମ୍ ଜାପେ ୱାଦୁତା ।
HEB 10:26 ବାତେଙ୍କ୍‍ଇତ୍‍କେ ମାନାଲ୍‌ ନିଜାମ୍ ସତ୍‍ ପୁତ୍‍ତା ପେର୍କେ ଗାଲେୟ ମାନାଲ୍ ଯଦି ପୁଞ୍ଜ୍‍ପୁଞ୍ଜ୍‍ ମେଣ୍ଡେ ପାପ୍‌ ମାଡ଼ିତାଲ୍, ଆଲାଇତ୍‌କେ ମେଣ୍ଡେ ବାତାବା ପୁଜ୍‌ସ୍‌କେ ଗାଲେୟ ମାନାକିନ୍ ପାପ୍‌ ତିଞ୍ଚ ଗେଲ୍‌ସ୍ପା ପାର୍ୱ ।
HEB 10:27 ଇତ୍‌କେ ବିଚାର୍‍ତାଗ୍ ମେଣ୍ଡନ୍‌ ପାକା ନେକା ବେଡ଼ିୟଡ଼୍ ପରିକ୍ୟା ନୁ ଇଶ୍ୱର୍‌ତେ ବିରଦ୍ଦ୍‌ନାରୁଡ୍ ନେକା ପତାନ୍ କିସ୍‌ତାଗ୍‌ କାର୍‌ୱାତଡ୍ ।
HEB 10:28 ବେନ ଯଦି ମୋଶାନ୍‌‌ ନିୟମ୍‍ତିଙ୍କ୍‍ ମାନେମ୍‍ ଆୟଣ୍ଡ୍‌, ଅଙ୍କ୍‌‌ ଦୟା ମାଡ଼୍‍ୱା ଇର୍‌ୱୁଡ୍‌ କି ନାର୍ଗେ ନାରୁଡ୍‌ ସାକ୍ଷି ମାଇଦିଙ୍କ୍‌ ଡଲାନ୍‌ ୱେଇତିତ୍ ।
HEB 10:29 ଆଲାଇତ୍‌କେ, ବେନଣ୍ଡ୍ ଇଶ୍ୱରନ୍‌ ମାରିନ୍‌ ବେକାର୍‍ ଇନ୍‌ତଣ୍ଡ୍, ଇଶ୍ୱରନ୍‌ ପୁନା ନିୟମ୍‌ତାଦ୍‌ ନେତୁର୍‌ ତଡ଼୍ ପାପ୍‌ସାର୍ରେ ନର୍‌ସ୍‌ ଆତ୍‌କେ ମେଣ୍ଡେ ଅନ୍‌ ପାପ ଇନ୍‌ତଣ୍ଡ୍‌ ମେଣ୍ଡେ ଜିୱୁମାଡାନ୍ ପବିତ୍ର ଆତ୍ମାନ୍ ଦୁସାତଣ୍ଡ୍, ଅଙ୍କ୍‌‌ ବେଲା ବେସବେଡିଆଦ୍‌ ଦଣ୍ଡ୍‌ ଦର୍କିତା ? ଆଲ୍‌ସୁଡାଟ୍, ଅଣ୍ଡ୍‌‌ ବେସର୍‌ ଦଣ୍ଡ୍‌ ପାଏମ୍‍ ଆଦ୍‍ତଣ୍ଡ୍ ।
HEB 10:30 “ନାନ୍ ବାଦ୍‍ଲା ଆଦ୍‍ତାନ୍, ନାନ୍‌ ଦଣ୍ଡ୍‌ ଇଦାନନ୍‌,” ଇଦ୍‌ ମାଟ୍ଟା ବେନ କେତଣ୍ଡ୍, ଅଙ୍କ୍‌‌ ମାମ୍ ପୁତମ୍ । ଅଣ୍ଡ୍‌‌ ମେଣ୍ଡେ କେତଣ୍ଡ୍ ଯେ, “ପ୍ରବୁ ତାନ୍‌ ନାରୁଡ୍‌କିନ୍‌ ନ୍ୟାୟ ମାଡ଼ିତଣ୍ଡ୍‍ ।”
HEB 10:31 ଜିୱୁ ମାନ୍ଦାନ୍ ଇଶ୍ୱରନ୍ ବିଚାର୍‍ ମୁନେ ଆଦାନାଦ୍ ନେକା ୱେର୍‌ୟାନାଦ୍‌ ବିଷୟ୍‍ ।
HEB 10:32 ମିଡ଼୍ ମୁନେଙ୍କ୍ ବେଲା ମାତ୍‍ତିଡ୍ ଏରକା ମାଡୁତାଲ୍‌, ଇଶ୍ୱରନ୍‌ ୱେସ୍‌ ୱାତ୍ତା ପେର୍କେ ମିଡ଼୍ ନେକା ଦୁକାମ୍ କଷ୍ଟତେ ବାଦ୍‌କ୍‌ତିଡ଼୍‌, କିନ୍ତୁ ଆରେମ୍‍ ଆଇୱା ମାତ୍‍ତିଡ୍‌ ।
HEB 10:33 ବସ୍‍ ବେସୁଙ୍କ୍‍ ମିକିଙ୍କ୍‌ ଲିନ୍ଦା ମାଡ୍‌ନୁଡ୍‌ ନୁ ରେତାନଙ୍କ୍‌ ଆସମାତଡ୍ । ମେଣ୍ଡେ ବସ୍‍ ବେସୁଙ୍କ୍‍ ମିଡ଼୍ ୱେରଣ୍ଡ୍‌ ଦୁକାମ୍‌ କଷ୍ଟତେ ଆଞ୍ଜ୍‍ମେଣ୍ଡେ କାଇଲ୍‌ନିଡ଼୍‍ ।
HEB 10:34 ମିଡ଼୍ ତାନାତାଗ୍ ମାନ୍ଦାନଡ୍‌ ଦୁକାମ୍‌ କଷ୍ଟତେ ତଡ୍‌ କାୟିଲ୍‍ନିଡ଼୍‍ ମେଣ୍ଡେ ବେସୁଙ୍କ୍‍ ମିୟାଦ୍ ସାର୍ରେ ଦାନ୍‌ତିଙ୍କ୍‍ ଆତ୍‍ତଡ୍‌, ଆସୁଟ୍‌ ମିଡ଼୍ ୱେଡ଼୍‍କାତେ ମାଞ୍ଜ ବାତେବା ତିରୟ୍‌ୱିଡ୍, ବାତାଙ୍କ୍‌ଇତ୍‌କେ ମିୟାଦ୍‌ ସାର୍ରେଦିନାତ୍‌ ଦାନ୍‌ ସମ୍ପତି ମିନ୍ଦେ, ଆଦ୍ ମିଡ଼୍ ପୁଞ୍ଜ୍‌ମାତିଡ୍ ।
HEB 10:35 ଆଦିନ୍ ମିୟାଦ୍ ସାହାସ୍‌ତିନ୍‌ ଆରାମାଡ଼୍‍ମାଟ୍‌, ବାତେଙ୍କ୍‍ଇତ୍‍କେ ଆଗା ବାଡ଼ିୟା ଇନାମ୍‍ ମିନ୍ଦେ ।
HEB 10:36 ମିଡ଼୍ ଆରେମ୍ ଆୟୱା ମାନ୍ଦାନାଦ୍ ଆସ୍‌କେ ପରମେଶ୍ୱର କେତ୍‍ତାଦିଙ୍କ୍‍ ମିଡ଼୍ ମାଡ଼ି, ପରମେଶ୍ୱର ମିକିଙ୍କ୍‌ ପ୍ରତିଜ୍ଞା ମାଡ଼ି ମାତ୍‍ତାଦିନ୍‌ ଦର୍କାକିତିଡ୍ ।
HEB 10:37 ଦର୍ମଶାସ୍ତ୍ରତାଗ୍‍ ଲେକାମିନ୍ଦେ, “ସୁଡୁଟ୍‌ ସମୟ ମିନ୍ଦେ, ଅଣ୍ଡ୍‌‌ ୱାଦାନାଦ୍ ଏୱତା, ଅଣ୍ଡ୍‌‌ ନିଜାମେ ୱାଦ୍‍ତଣ୍ଡ୍, ଅଣ୍ଡ୍‌ ଲେଟ୍ ମାଡ଼ଣ୍ଡ୍ ।”
HEB 10:38 ମାନ୍‍ ଦାର୍ମିକନାରୁଡ୍‌ ବିଶ୍ୱାସ୍‌ତେ ଗେଲ୍‌ସିତଡ୍‌, କିନ୍ତୁ ବେନ ପେର୍କେ ମାଲ୍‌ସ୍‌ ଅନ୍‌‌ତଣ୍ଡ୍, ଆଲାଇତ୍‌କେ ମା ଆତ୍ମା ଅନାଗ ସନ୍ତୁଷ୍ଟ ଆୟ ।
HEB 10:39 ମାତି ବେନଡ଼୍ ଡଲାନ୍‌ ମାଇଦିଙ୍କ୍ ପେର୍କେ ମାଲ୍‌ସ୍‌ ଅନ୍‌ତଡ୍‌, ମାମ୍ ତାମ୍‌ ମାନ୍ଦେତ୍‌ ନାରୁଡ୍‌ ଆୟମ୍, ବେନଡ଼୍ କି ମାନ୍‍ ପରିତ୍ରାଣ ବିଷୟତେ ବିଶ୍ୱାସ୍ ମାଡ଼ିତଡ଼୍, ମାମ୍ ଆ ମାନ୍ଦେତ୍ ନାରୁମ୍ ।
HEB 11:1 ବିଶ୍ୱାସ୍ ଇତ୍‌କେ ବାତା ? ବିଶ୍ୱାସ୍ ଇତ୍‌କେ ମାନାଲ୍‌ ଆଶା କିୟାନାଦ୍‌ ମାଟ୍ଟା ନିଜାମ୍‌ ଆତ୍‍ତେ ଇଞ୍ଜ ଅଣ୍ଡୟ୍‌ ଏର୍କାତେ ମାନ୍ଦାନାଦ୍‌; ମେଣ୍ଡେ ମାନାଲ୍ ଉଡ଼୍‍ୱାଦ୍‌ ମାଟା ନିଜାମ୍‌ ମିନ୍ଦେଣ୍ଡେ ଇଞ୍ଜ ନିଜାମ୍‌ ପୁନ୍ଦାନାଦ୍ ।
HEB 11:2 ମୁନେତ୍‌ କାଲାମ୍‌ତେ ନାରୁଡ୍ ଇଦେ ବିଶ୍ୱାସ୍‍ତେ ମାତ୍‍ତାଙ୍କ୍‍କେ ସାର୍ରେତଡ୍‌ ଇଶ୍ୱର୍‌ତେ ସାୟେତ୍‍ ନାରୁଡ଼୍‍ ଆସ୍‍ମାତ୍‍ତଡ୍‌ ।
HEB 11:3 ବିଶ୍ୱାସ୍‌ତେ ମାମ୍ ପୁନ୍‌ତମ୍‌ ଯେ ଇଶ୍ୱର କେତ୍‍ତେ ମାଟାତେନେ ବୁମ୍ ତିଆର୍‌ ଆତ୍ତା, ଆଦିଙ୍କ୍‌ ତନ୍ଦ୍‌ୱାଗା ନୁଞ୍ଚ ସାର୍ରେ ତନ୍ଦାନାୱ ତିଆର୍‌ ଆତ୍ତା ।
HEB 11:4 ବିଶ୍ୱାସ୍‌ତେ ତଡ଼୍‍ ହେବଲ୍‍ କୟିନ ନୁଞ୍ଚ୍‍ ନାର୍ଗେ ପୁଜା ଇସ୍‌ ମାତ୍‍ତଣ୍ଡ୍ । ତାନ୍‌ ବିଶ୍ୱସ୍‌ତେ ମାଇଦିଙ୍କ୍‌ ଇଶ୍ୱର ଅନାଦ୍‌‌ ନୈବେଦ୍ୟ ଗ୍ରହଣ ମାଡ଼୍‌ତଣ୍ଡ୍ ମେଣ୍ଡେ ଅଣ୍ଡ୍‌‌ ନେକା ନେଲେତଣ୍ଡ୍‌ ଇଞ୍ଜ କେତ୍‍ତା, ଡଲ୍‌କେମେଣ୍ଡେ ବିଶ୍ୱାସତେ ମାଇଦିଙ୍କ୍ ହେବଲ୍‌ ନେଣ୍ଡ୍‌ଆଇନା ଗଟି ତିର୍‌ୱୁତଣ୍ଡ୍‌ ।
HEB 11:5 ବିଶ୍ୱାସ୍ ଦ୍ୱାରା ଆନୋକ ଡଲ୍‌ୱାମାଞ୍ଜ ମେନ୍ଦୁଲ୍‌ତେ ପର୍ର ଆତ୍ତଣ୍ଡ୍‌ । ଅଣ୍ଡ୍‌ ତୋନ୍ଦିଲେଣ୍ଡ୍‌, ବାତାଙ୍କ୍‌ଇତ୍‌କେ ପରମେଶ୍ୱର ଅଙ୍କ୍‌‌ ଆତ୍‍ତା । ଅଣ୍ଡ୍‌‌ ୱେରଣ୍ଡ୍‌ ସାୟେ ନାରୁଣ୍ଡ୍‌ ମାତ୍‍ତଣ୍ଡ୍, ଆଦାନ୍‌ ମୁନେ ଅଙ୍କ୍‌‌ ନେଲାତଣ୍ଡ୍‌ ଇଞ୍ଜ ପୁଞ୍ଜ୍‌ମାତଡ୍‌ ।
HEB 11:6 ବିଶ୍ୱାସ୍ କିୱା ଇଶ୍ୱରନ୍‌ ସନ୍ତୁଷ୍ଟ ମାଡ଼ାଙ୍କ୍ ଆୟ, ବାତାଙ୍କ୍‌ଇତ୍‌କେ ଅଣ୍ଡ୍‌‌ ଅଙ୍କ୍‌ ମେହେକାନଡ୍‌କିଙ୍କ୍‌ ଇନାମ୍‍ ଇତଣ୍ଡ୍‌ ଇଞ୍ଜ ତାନ୍‌ ଗାର୍ରେ ୱାଦାନ୍ ନାରୁଡ୍‌ ବିଶ୍ୱାସ୍ ମାଡ଼ାଙ୍କ୍ ୱେଇତିତ୍ ।
HEB 11:7 ବିଶ୍ୱାସ୍‌ତେ ମାଇଦିଙ୍କ୍ ନୋହ ପୁନ୍‌ୱାମାତା ବିଷୟ୍‌ତେ ଇଶ୍ୱରନ୍‌ ସତର୍କ ବାଣୀ କେଞ୍ଜିମାତଣ୍ଡ୍‌ । ଅଣ୍ଡ୍‌‌ ଇଶ୍ୱରନ୍‌ ଗଟ୍‌ତେ ମାଞ୍ଜ୍‌ମେଣ୍ଡେ ଅରଟ୍‌ ଜାହାଜ୍‌ ତିଆର୍‌ ମାଡ଼୍‌ତଣ୍ଡ୍ । ଆଗା ଅଣ୍ଡ୍‌‌ ନୁ ତାନ୍‌ ଲୋତ୍‍ତେ ମୁଲ୍‌ସାର୍ରେତଡ୍‌ ଗେଲ୍‍ସି ମାତ୍‍ତଡ୍, ବୁମ୍‍ତାଗ୍‍ ମାନ୍ଦାନଡ୍‌ ସାର୍ରେ ଦଣ୍ଡ୍‌ ପାଏମ୍‌ ଆତ୍‍ତଡ୍‌, କିନ୍ତୁ ନୋହ ବିଶ୍ୱାସ୍‌ତେ ମାଇଦିଙ୍କ୍ ସାୟେତ୍‌ ପୁରସ୍କାର୍ ଦର୍‌କ୍‌ସ୍‌ତଣ୍ଡ୍‌ ।
HEB 11:8 ଇଶ୍ୱର ଅବ୍ରାହାମ୍‌ତିଙ୍କ୍‍ ଅରଟ୍ ଦେଶ୍‌ ଇତାନ୍‌ଇଞ୍ଜ ଅରଟ୍‌ ମାଟା ୱିଡ୍‌ସିମାତେ, ଆ ଦେଶତାଗ୍‌ ଆଦାନଙ୍କ୍‌ ମାଇଦିଙ୍କ ଅଣ୍ଡ୍‌‌ ଆସୁଙ୍କ ଅଙ୍କ୍‌‌ କାର୍‌ଙ୍ଗ୍‌ତଣ୍ଡ୍‌, ଆସୁଙ୍କ୍‌ ଅବ୍ରାହାମ୍‌ ବିଶ୍ୱାସ୍‌ତେ ଇଶ୍ୱରନ୍ ମାଟାତିନ୍‌ ମାନେମ୍‌ ଆସ୍‌ମାତଣ୍ଡ୍, ଅଣ୍ଡ୍‌‌ ବେ ଆଦୁତଣ୍ଡ୍‌ ଆଦ୍‌ ପୁନ୍‌ୱା କଞ୍ଚ୍ ମେଣ୍ଡେ ତାନାଦ୍‌ ଦେଶ ୱିଡ଼୍‍ସି ଆତଣ୍ଡ୍‌ ।
HEB 11:9 ଅଣ୍ଡ୍‌‌ ବିଶ୍ୱାସ୍‌ତେ ଇଶ୍ୱର କେତ୍‍ତା ଦେଶାମ୍‍ତାଗ୍ ବିଦେଶୀ ଲେକାମ୍ ବାସେ ମାଡ଼୍‍ତଣ୍ଡ୍ । ଅଣ୍ଡ୍‌ ତମ୍ବୁତାଗ୍ ବାସେ ମାଡ଼୍‍ତଣ୍ଡ୍ ନୁ ଅନ୍‌ ଲେକାମ୍ ଇଶ୍ୱର୍‌ତାଗାଙ୍କ୍ ପ୍ରତିଜ୍ଞା ପାଏମ୍ ଆସ୍ ଇସ୍‍ହାକ୍ ନୁ ଜାକୁବ୍ ମିକା ଆଦ୍‍ଲେକେନ୍ ତମ୍ବୁତାଗ୍‍ ବାସେ ମାଡ଼ିମାତ୍‍ତଡ଼୍ ।
HEB 11:10 ବେନ୍ ସାର୍ରେଦିନାମ୍ ମାନ୍ଦାନ୍ ନଗର୍ ଇଶ୍ୱର୍ ଚିନ୍ତେ ମାଡ଼୍‍ତଣ୍ଡ୍ ନୁ ତିୟାର୍ ମାଡ଼୍‍ତଣ୍ଡ୍, ଅବ୍ରାହାମ୍ ଆଦ୍ ନଗର୍‍ତିଙ୍କ୍ କେପି ମାତ୍‍ତଣ୍ଡ୍ ।
HEB 11:11 ସାରା ଡଙ୍କେତ୍ ଆଦାନଙ୍କ୍ ପାର୍‍ୱକ୍ ଗାଲା, ବିଶ୍ୱାସ୍‍ତେ ମାୟ୍‍ଦିଙ୍କ୍ ଅବ୍ରାହାମ୍ ପେଦ୍‍ୱାଲ୍ ଆତ୍‍ତେୱେଲେ ମିକା ବାବାଲ୍ ଆଦାନଙ୍କ୍ ପାର୍‍ତଣ୍ଡ୍ । ଇଶ୍ୱର୍ ତାନ୍ ଗଟ୍ ନେଃଏତିତଣ୍ଡ୍ ଇଞ୍ଜ ଅବ୍ରାହାମ୍‌ତାଦ୍ ବିଶ୍ୱାସ୍ ମାତ୍‍ତେ ।
HEB 11:12 ଆବ୍ରାହାମ୍ ଡଲାନ୍‍ ଲେକେମ୍‍ ଆସ୍ ମାତ୍‍କେ ଗାଲା ଅନାଗାଙ୍କ୍ ମୟଲ୍‍ତାଗ୍ ଉକାକ୍ ନୁ ସମୁଦ୍ରତେ ଉସ୍କ ଇନା ଲେକାପାର୍‍ୱା ବଂଶଦର୍ ପୁଟ୍‍ତଡ଼୍ ।
HEB 11:13 ପରତଡ଼୍‍ ନାରୁଡ଼୍ ନିଜର୍ ବିଶ୍ୱାସ୍‍ତାଗ୍ ଗାଡ଼୍‍ସ୍ ମାଞ୍ଜ୍ ଡଲ୍‍ତଡ଼୍ । ଇଶ୍ୱର୍ ପ୍ରତିଜ୍ଞା ମାଡ଼ିମାନ୍ଦାନ୍ ବିଷୟ୍ ସାର୍ରେ ଅଡ଼୍‌‍କିଂଙ୍କ୍ ଦର୍‍କକ୍ ଗାଲା ସୁଦୁର୍ ଜେକେ କଞ୍ଚ୍ ଉଡ଼ି ଅଡ଼୍‌‍ ସ୍ୱାଗତ୍ ମାଡ଼ିମାତ୍‍ତଡ଼୍ ନୁ ଇଦ୍ ଜଗତ୍‍ତାଗ୍ ଅଡ଼୍‌ ମାତର୍ ବିଦେଶୀ ନୁ ଦେଶୀ ନାରୁଡ଼୍ ଇଞ୍ଜ ସ୍ୱୀକାର୍ ମାଡ଼୍‍ତଡ଼୍ ।
HEB 11:14 ବେନ୍‍ ନାରୁଣ୍ଡ୍‌ ଇଲା ତିର୍‌ୟୁତଣ୍ଡ୍‌, ଅଡ୍‌ ମେଣ୍ଡ୍‌ଅରଟ୍‌ ବାଦ୍‌କାନ୍‌ ମାଇଦିଙ୍କ୍‌ ମେଦ୍‌କ ମିନ୍ଦେଡ଼ି ଇଞ୍ଜ ପୁନ୍ଦାଙ୍କ୍‌ ଆଦ୍‌ତା ।
HEB 11:15 ଅଡ୍‌ ବେନ୍‍ ଦେଶ ୱିଡ଼୍‍ସି ୱାସ୍‌ମାତଡ୍‍, ଆଦ୍‌ ଦେଶତିନ୍‌ ମେଣ୍ଡେ ଏର୍କା ମାଡ୍‌ୱେ ମାତ୍‍ତଡ଼୍‍ । ଯଦି ଏର୍କା ମାଡ଼େଡ଼୍, ଆଲାଇତ୍‌କେ ଆଗା ଅଡ଼୍‌‍ ମାଲ୍‌ସ୍ ଆନେଡ୍ ।
HEB 11:16 ଇତ୍‌କେ ଅଡ୍‌ ଅରଟ୍‌ ବାଡ଼ିୟା ଦେଶତାଗ୍, ଆ ସ୍ୱର୍ଗତା ଦେଶତାଗ୍ ଆଦାନ୍ ମାଇଦିଙ୍କ୍‌ ଆଶେମାଡିମାତଡ୍ । ଆଦିଙ୍କ୍‌ ଅଡ଼୍‌‍ ଇଶ୍ୱରଙ୍କ୍‌ ନିଜର ଇଶ୍ୱର ଇଞ୍ଜ କେତାନ୍ ଦ୍ୱାରା ଅଣ୍ଡ୍‌ ସିଗ୍‌ ଆଇୱା ମାତ୍‍ତଣ୍ଡ୍ । ଇଞ୍ଜେ, ଇଶ୍ୱର ତାମ୍‌ ମାଇଦିଙ୍କ୍ ଅରଟ୍‌ ନଗର୍‍ ତିଆର୍ ମାଡି ମାତ୍‍ତେ ।
HEB 11:17 ଇଶ୍ୱର ଅବ୍ରାହାମ୍‌ତାଦ୍ ବିଶ୍ୱାସ ପରିକ୍ଷା ମାଡ଼ାନ୍‍ୱେଲେ ଆବ୍ରାହାମ୍‌ ତାନ୍‌ ମାର୍‌ ଇ ସାକ୍ଷିନ୍‌ ପୁଜାନଙ୍କ୍‌ ତିଆର୍‌ ଆସ୍‌ମାତଣ୍ଡ୍ । ଇଶ୍ୱର ଅବ୍ରାହାମ୍‌ତିଙ୍କେ ତାନ୍‌ ପ୍ରତିଜ୍ଞା ଇସ୍‌ମାତଣ୍ଡ୍‍, ଅବ୍ରାହାମ୍‌ ତାନ୍ ୱେରଣ୍ଡେ ମାରିଙ୍କ୍‍ ପୁଜାନଙ୍କ୍ ତିଆର୍‌ ଆସ୍‌ମାତଣ୍ଡ୍ ।
HEB 11:18 ଇଶ୍ୱର ଅଙ୍କ୍‌‌ କେସ୍‌ମାତ୍‍ତଣ୍ଡ୍‍, “ନାନ୍‌ ନିକିଙ୍କ୍‌ ବେନ୍‍ ବଂଶ ଇଦ୍‍ତାନ୍‌ ଇଞ୍ଜ କେସ୍‌ମାତ୍‍ତଣ୍ଡ୍‌, ଆଦ୍‌ ଇସାକନୁଞ୍ଚ୍‍ ଜନମ୍‍ ଆତ୍‍ତେ ।”
HEB 11:19 ଇଶ୍ୱର ଇଦ୍‌ସାକ୍ଷତିଙ୍କ୍ ଡଲାନାଗାନୁଞ୍ଚ ଜିୱୁ ଇଦାନଙ୍କ୍‌ ପାର୍ଦେତଣ୍ଡ୍‍, ଇଲା ବିଶ୍ୱାସ ଅବ୍ରାହାମ୍‌ତିଙ୍କ୍‌ ମାତ୍‍ତେ । ଇଞ୍ଜେ, ଅବ୍ରାହାମ୍‌ ଇ ସାକ୍ଷିନ୍‌ ଡଲାନାଗାନୁଞ୍ଚ ଦରକ୍‌ସ୍‌ତଣ୍ଡ୍‌ ଇଞ୍ଜ କେତ୍‌କେ ବାରେ ବୁଲ୍‍ ଆୟ ।
HEB 11:20 ଇସାକ୍‌ ତାନ୍ ବିଶ୍ୱାସତେ ମାଇଦିଙ୍କ୍ ଯାକୁବନ୍‌ ନୁ ଏଷୌ ସାର୍ରେ ସୁକାମ୍‍ତେ ବାଦକାନ୍‌ ମାଇଦିଙ୍କ୍‌ ଆର୍ଶିବାଦ୍‌ ମାଡିମାତଣ୍ଡ୍ ।
HEB 11:21 ବିଶ୍ୱାସତେ ମାଇଦିଙ୍କ୍‌ ଯାକୁବ ଡଲାନ୍ ମୁନେଙ୍କ୍‌ ଯୋସେଫତେ ଇରୱୁର୍‌ ମାରିଡ଼୍‍କ୍‌ ଆର୍ଶିବାଦ୍‌ ମାଡ଼ିମାତ୍‍ତଣ୍ଡ୍‍ । ଅଣ୍ଡ୍‌‌ ତାନାଦ୍ ଡୁଡ୍‌ତେ ପର୍ର ରୟି ଇଶ୍ୱରନ୍‌ ସେୱେ ମାଡ଼ମାତ୍‍ତଣ୍ଡ୍ ।
HEB 11:22 ଯୋସେଫ ଡଲାନ୍‌ୱେଲେ ତାନ୍‌ ବିଶ୍ୱାସତେ ମାଇଦିଙ୍କ୍ ଇସ୍ରାଏଲତ୍‌ ନାରୁଡ୍‌ ମିଶର ଦେଶନୁଞ୍ଚ ଆଦାନ୍‌ ବିଷୟତେ ବବିଷ୍ୟତବାଣୀ ମାଡ଼ିମାତ୍‍ତଣ୍ଡ୍‍ ମେଣ୍ଡେ ତାନ୍‌ ଡଲ୍‌ତା ମେନ୍ଦୁଲ୍‌ତିଙ୍କ୍‌ ବେଲା ୱାଟାଙ୍କ୍ ଆଦ୍‍ତେ, ଆଦ୍‌ ମେଣ୍ଡେ କେସ୍‌ମାତ୍‍ତଣ୍ଡ୍ ।
HEB 11:23 ବିଶ୍ୱାସତେ ମାଇଦିଙ୍କ୍‌ ମୋଶାନ୍‌‌ ୟାୟ ବାବଡ୍‌ ପୁଟ୍‌ତେ ପେର୍କେ ମୁଣ୍ଡ୍‌ ନେଲ୍‌ଞ୍ଜ୍‌ଆନା ମିଞ୍ଜ୍‍ସ୍ପିମାତ୍‍ତଡ୍ । ପିଲାତ୍ ସୁନ୍ଦର୍‌ ଉଡି ଅଡ୍‌ ରାଜାନ୍ ଆଦେଶତିନ୍‌ ମାନେମ୍‌ ଆୟମ୍‌ ଇଞ୍ଜ ୱେର୍‌ୱେ ମାତ୍‍ତଡ୍ ।
HEB 11:24 ମଶାଲ୍‌ ପେର୍ସ୍ତେ ପେର୍କେ ବିଶ୍ୱାସତେ ମାଇଦିଙ୍କ୍‌ ଫାରୋ ରାଜାନ୍‌ ମାୟାଡ଼୍‍ତେ ମାର୍‌ ଇଞ୍ଜ କେତାନଙ୍କ୍‌ ମନାମାଡ଼୍‍ତଣ୍ଡ୍ ।
HEB 11:25 ପାପାମ୍‌ତାଗ୍ ମାଞ୍ଜ୍ ସେନେକ୍‌ ବାଦ୍‌କାନ୍‌ ୱିଡ଼୍‌ସି ଇଶ୍ୱରନ୍‌ ନାରୁଡ୍‌ ସାଙ୍ଗ୍ ଦୁକାମ୍‌ତେ ମାନ୍ଦାନଙ୍କ୍‌ ଇଷ୍ଟାମ୍ ମାଡିମାତଣ୍ଡ୍ ।
HEB 11:26 ଅଣ୍ଡ୍‌‌ ମିସର୍ ଦେଶତ୍‌ ସାର୍ରେ ଦନ ୱିଡ଼୍‌ସି ଜିସୁଙ୍କ୍‌ ମାଇଦିଙ୍କ୍‌ ପାସ୍କାନଙ୍କ୍‍ ଆଦାଙ୍କ୍‌ ସାୟେ ଇଞ୍ଜ ଆଲ୍‌ସିମାତଣ୍ଡ୍‌, ଇତ୍‌କେ ଦର୍କାନ୍‌ ପୁରସ୍କାର୍‌ତେ ସେଙ୍ଗେ ଅନ୍‌‌ ଲକ୍ଷ ମାତ୍‍ତା ।
HEB 11:27 ମଶାଲ୍‌ ତାନ୍ ବିଶ୍ୱାସ୍‌ତେ ରାଜାନ୍ କପାମ୍‌ତିନ୍‌ ୱେର୍‌ୟେକଟ୍‌ ମିସର୍ ଦେଶ ୱିଡ଼୍‍ସି ମାତ୍‍ତଣ୍ଡ୍ । ଆଦିଙ୍କ୍ ମାଲ୍‌ସ୍‌ ଆଦାନଙ୍କ୍ ମନା ଆସ୍‌ମାତଣ୍ଡ୍ ।
HEB 11:28 ବିଶ୍ୱାସାମ୍‌ତେ ଅଣ୍ଡ୍‌ ନିସ୍ତାର ପାଣ୍ଡୁମ୍‌ ତିଆର୍‌ ମାଡିମାତଣ୍ଡ୍ ନୁ ଆୱକାନ୍ ଦୂତ ବେଲାକି ଇସ୍ରାଏଲ୍‌ ନାରୁଡ୍ ବାଡ଼ିୟା ମାର୍‌କିନ୍‌ ଆୱକକଟ୍‌ ମାନ୍ତା, ଆଦିନ୍‌ମାଇଦିଙ୍କ୍‌ କାପାଟ୍‍ତାଗ୍ ନେତୁର୍‌ ଅକାନଙ୍କ୍‌ ଆଦେଶ୍‍ ଇସ୍‌ମାତଣ୍ଡ୍‌ ।
HEB 11:29 ବିଶ୍ୱାସ୍‌ତେ ଇଶ୍ରାଏଲ୍‍ତ ନାରୁର୍ ୱାସ୍‌ତେ ନେଲ୍‍ଦ୍‌ ପର୍‌ର ତାକାନ୍‌ ଲେକାମ୍‍ ନେତ୍ତୁର୍‌ ଗଦାର୍‌ତିଙ୍ଗ୍‌ ୱେଇସ୍ ଆଞ୍ଜ୍‌ମାତ୍ତର୍‌, ମିସରୀୟନାରୁଡ଼୍‌ ଆଦ୍‌ରକମ୍‍ ୱେୟ୍‍ଦାନଙ୍କ୍‍ ଚେଷ୍ଟାମାଡି ମୁଡ୍‌ନ୍ଦି ଡଲ୍‌ତର୍‌ ।
HEB 11:30 ଇଶ୍ରାଏଲ୍‌ ନାରୁର୍‌ ଯିରୀୟ ନଗର ନେଟେତ୍‍ ତିଡ଼୍‍ୟି ପାକା ବିଶ୍ୱାସ୍‌ତେ ସାତ୍‍ ଦିନାମ ଉଡ୍‌ତେ ପେର୍‌କେ, ଆଦ୍‌ ମାଣ୍ଡୁଲ୍‌ ତାଗ୍ କାଇଲି ଆତ୍ତା ।
HEB 11:31 ବେଶ୍ୟା ରାହାବ ତାନ୍ ବିଶ୍ୱାସ୍‌ତେ ମାଇଦିଙ୍କ୍‌ ଇସ୍ରାଏଲଦ୍‌ ମିଞ୍ଜିମାନ୍ଦାନ୍‍ ଡଙ୍ଗାଲଡ଼କ୍‍ ପଡିୟା ଇତ୍ତା । ମେଣ୍ଡେ ଦେଉଡ୍‌ତ୍‌ ବିରୁଦ୍ଦ୍‍ ପାଡ଼ୟି ମାଡ଼ାନ୍‍ ନାରୁଡ୍‌ ସାଙ୍ଗ୍‌ ଡଲକଟ ରକ୍ଷା ପାଏମ୍‍ ଆତ୍‍ତଣ୍ଡ୍‍ ।
HEB 11:32 ନାନ୍‌ ମେଣ୍ଡେ ବେସ୍‌କ୍ ମାଟା କେତିତାନ୍‌ ? ଗିଦିୟ, ବାରାକ୍‌, ସାମ୍‌ସନ୍‌, ଜିପ୍‌ଥାହ, ଦାଉଦ୍‍, ସାମୁଏଲ, ମେଣ୍ଡେ ବାବବାଦୀଡ଼୍‍ ବିଷୟ କେତାନଙ୍କ୍‌ ଆତ୍‌କେ ସମୟ ଆଲ ।
HEB 11:33 ବିଶ୍ୱାସ୍ତେ ଇରୁ ୱେରେ ଦେଶେମତ୍‌ ବିରୁଦ୍ଦତେ ଯୁଦାମ୍ ମାଡି ସାଦନ୍ କିତ୍ତର୍, ଦେଉଡ ପ୍ରତିଜ୍ଞା ମାଡ଼ି ମାତ୍‌ତା ବିଷୟ ସାର୍ରେ ପ୍ରାପ୍ତ ଆତ୍ତର, ଇଶ୍ୱର୍ ଗଣ୍ଡ୍ରାସ୍‍ତ ପାୟୁର ବନ୍ଦ କିତ୍ତର୍‌ ।
HEB 11:34 କିସ୍‌ତାଗାଙ୍କ୍‍ ବଞ୍ଚାକିତର୍‍ ମେଣ୍ଡେ ବାଡ଼୍‍ୟେ ଚୁର୍‌ ୱାୟେତାଗାଙ୍କ୍ ଗେଲ୍‍ସ୍ପତଡ଼୍‍ । ଇର୍‌ ସାତ୍‌ୱାମ୍ ଇଲକଟେ ମାତ୍‍ତର୍‍, ଇତ୍‍କେ ଗାଟି ଲାୱଦାନଣ୍ଡ୍ ଆତର୍‌, ଯୁଦ୍‍ତାଗ୍ ପରାକ୍ରମି ଆସ୍‌ ୱେରେ ଦେଶେତ୍ କପାମ୍ ମାନ୍ଦାନ୍ ସୈନ ନାରୁଡ୍‌କ୍‌ ଆରା ମାଡ଼୍‍ତଡ୍‌ ।
HEB 11:35 ବିଶ୍ୱାସତେ ନାଟୱା ତାମ୍‌ ଡଲ୍‌ତା ନିଜ ନାରୁଙ୍କ୍ ଜିୱେତେ ଦରକ୍‌ସ୍‌ତା । ୱେରେତାୱ ଅଣ୍ଡୟ୍‌ ମାନ୍ତେ ଜିୱୁ ଦର୍କାନ୍ ଆଶେତେ ତାମ୍‌ ସ୍ୱାଦିନତିନ୍ ନିଜର୍‍ ଇଚ୍ଛାତେ ଇସ୍‌ ତିପାଲ୍‌ତେ ଡଲ୍‌ତଡ଼୍‍ ।
HEB 11:36 ବେନ ପରିଆସ୍‍ ଆତ୍ତର୍‌, ଦେବା ତିତ୍ତର୍ ନୁ ଇକ୍‌ଲେମ୍‍ତେ ତଃସ୍‌ମେଣ୍ଡ୍‌ କାରାଗାର୍‌ତାଗ୍‌ ବିତାମ୍‌ ମାଡ଼୍‍ତର୍‌ ।
HEB 11:37 ଅଡ୍‌ କାଲ୍‌କିନେ ଦେବା ତିତର୍‌, କରତ୍‍ତେ ରେଣ୍ଡ୍‌ ଦୁଙ୍କା ଆତର୍ ମେଣ୍ଡେ ବାଡ଼୍‍ୟେ ଚୁର୍‌ତେ ନାର୍‍କିତର୍ । ବେନ ମେଣ୍ଢା ନୁ ମେକାତ୍‍ ତଲ୍‌କା କେରସ୍‍, ବିକାରିଡ୍‌ ଗାଟି ରଗାମ୍‌ ନୁ ଅତ୍ୟାଚାର ଉଡାନଡ୍‌ ଲେକାମ୍‍ ଆସ୍‌ ଉଡ୍‌ତଡ୍‌ ।
HEB 11:38 ଇଦ୍‍ରକମ୍‍ ନାରୁଡ଼୍‍ ସେଙ୍ଗେ ଜଗତ୍‍ତାଗ୍‍ ପଡ଼୍‍ୟେ ଇଲା । ଅଡ଼୍‌‍ ଗୁପା ଏକାମ୍‍ ଉଡ, ମେଟା, ପାଆଡ଼୍‌‍କ୍‌, ମେଣ୍ଡେ ଦରାନାଗ୍‍ ମାତ୍‍ତର୍‍ ବୁମ୍ ଅଡ଼୍‌‍ ମାଇଦିଙ୍କ୍‌ ଇଲେକଟ୍‌ ମାତ୍‍ତେ ।
HEB 11:39 ଇୱୁ ସାର୍ରେତଡ଼୍‍ ତାମ୍‌ ତାମାଦ୍‌ ବିଶ୍ୱାସ୍‌ତେ ଚିହ୍‌ନ୍ନେ ନେହ୍‌ସ ଆତର୍‌ । ମେଣ୍ଡେବାଡ୍‌ ଅଡ୍‌ ଦେଉଡ୍‌ ପ୍ରତିଜ୍ଞା ମାଟ୍ଟା ଲେକେତ୍‍ ବିଷୟ ଦର୍‌ସ୍‌କ କଟେମ୍‌ ମାତର୍‌,
HEB 11:40 ବାତିଙ୍କ୍ଇତ୍‌କେ ଦେଉଡ୍‌ ମାନ୍‍ ମାଇଦିଙ୍କ୍‌ ସାୟେତ୍‌ ବିଷୟ ଆଲ୍‌ସି ମାତ୍‍ତଣ୍ଡ୍‌ । ଅଡ୍‌ ମାନ୍‍ ସାଙ୍ଗ୍‌ ବେଲା ସିଦ୍ଦ ଆତଡ୍‌, ଆଦେ ଆଦୁତେ ଦେଉଡ୍‌ତାଦ୍‌ ଇସ୍‌ଟାମ୍ ମାତ୍‍ତା ।
HEB 12:1 ଇଦ୍‌ଲେକେନ୍‌ ସାକ୍ଷିନଡ୍ ଅଣ୍ଡୟ୍‌ ବାଡ଼ିୟା ମାନ୍ଦେ ମାନ୍‍ ନାଲୁପାକା କେପିମିନ୍‌ତେର୍ । ଆଦିନ୍‌ମାଇଦିଙ୍କ୍ ୱାଡାଟୁ, ବେନ୍‍ ସାର୍ରେ ବିଷୟ ମାନାଲ୍ ଆଦାନ୍‌ ଆର୍ଦିନ୍ ବାନ୍ଦ୍‌ ମାଡ଼ ମିନ୍ଦେ ମେଣ୍ଡେ ବେନ୍ ସାର୍ରେ ପାପାମ୍‌ ମାନାଙ୍କ୍ ଲାଗି ପଇସ୍‌ ମିନ୍ଦେ, ଆୱ୍‌ ସାର୍ରେ ୱିଡ଼୍‍ସି ମେଣ୍ଡ୍ ଗାଡ଼୍‍ସ୍‍ ଆସ୍‌ ମାନ୍‍ ମାଇଦିଙ୍କ୍ ତିଆର୍‌ ଆଦାନାଦିନ୍‌ ମୁନେ ମିରି ଆନ୍‌ଦିକାଲ୍‌ ।
HEB 12:2 ବେନନ୍ ପର୍ର ମାନାଦ୍‌ ଆରାମ୍‍ ନୁଞ୍ଚ୍‍ ତେରାନ୍‍ ବିଶ୍ୱାସ୍ ଆଶା ମାଡ଼ମିନ୍ଦେ, ଆରାମ୍‌ ନୁଞ୍ଚ ମାଡେଙ୍ଗ୍‌ ଆନା ବେନଙ୍କ୍ ମାନାଲ୍‌ ବିଶ୍ୱାସ ୱାଟିତାଲ୍‌ ଆ ଜିସୁନ୍‌ ପର୍ର ମାନ୍‍ କାଣ୍ଡ୍‌କ୍‌ ୱାଟିକାଡ୍, ଅଣ୍ଡ୍‌‌ କ୍ରୁଶତେ ୱେରେତେ ତାନାଦ୍‌ ପାଡିୟନୁଞ୍ଚ୍‌ ୱେର୍‍ୟ କଟେମ୍‌ ମାତ୍‍ତଣ୍ଡ୍‌, ବଂର ୱାଦାନ୍ ଦିନାମ୍‌ ଅଣ୍ଡ୍‌‌ ମାଇଦିଙ୍କ୍‌ ନେହ୍‌ସିସ୍‌ ମାନ୍ଦାନ୍‌ ସୁକାମ୍‌ ମାଇଦିଙ୍କ୍‌, ସିଲ୍‌ୱାତାଦ୍‌ ଡଲାନ୍‌ ସିଗ୍‌ତିଙ୍କ୍‌ ଅଣ୍ଡ୍‌‌ ତୁଛଜ୍ଞାନ ମାଡ଼୍‌ତଣ୍ଡ୍; ଇଞ୍ଜ ଅଣ୍ଡ୍‌‌ ଦେଉଡ୍‌ତ୍‌ ସିଂହାସନତ୍‌ ତିନ୍ଦା ପାକା ମିନ୍ଦେଣ୍ଡ୍‌ ।
HEB 12:3 ଆଲ୍‌ସୁଡାଟ୍‌, ଅଙ୍କ୍‌ ବେସର୍ ଦୁକାମ୍‌ ଆସ୍‌ମାନ୍‌ତା; ଅଣ୍ଡ୍‌‌ ପାପାମ୍‌ ନାରୁନାଗାଙ୍କ୍ ବେସର୍‌ ପିନ୍ଦ୍‌ଆୟୱା ମାନ୍‍ତଣ୍ଡ୍‌ । ଆଦିନ୍‌ମାଇଦିଙ୍କ୍‌ ମିଡ଼୍ କଟଆସ୍‌ ମାନ୍‌ମାଟ୍‌ ।
HEB 12:4 ବାତିଙ୍ଗ୍‌ଇତ୍‌କେ ମିକିଂଙ୍କ୍ ଇଞ୍ଜେ ଆ ପାପାମ୍‌ ବିରୁଦ୍ଦତେ ଡଲାନ୍‍ ସାମାନ୍‍ତାଦ ଯୁଦୁ କିଦାନଙ୍କ୍‌ ୱେୟ ।
HEB 12:5 ଦେଉଡ ତାନ ପିଲାନ୍‌ ଲେକେନ ମିକିଂଙ୍କ୍ ବେନା ୱେଡ଼୍‍କେତାୱ୍‍ ଗଟ କେଞ୍ଜ୍‍ସ୍ପିମିନ୍ଦେଣ୍ଡ ଆଦ୍ ବେଲା ମିର ମାର୍‍ଙ୍କ୍‍ ଆତ୍ତିର୍ ? “ହେ ନା ମାରିଡ଼୍‍, ଦେଉଡ ନିକିଙ୍କ ଶାସନ୍‍ ମାଡ଼ାନାସୁଟ କେଞ୍ଜାଟ୍ । ଅଣ୍ଡ୍‌‍ ନିକିଙ୍କ ପାସ୍କାନାସୁଟ୍ ଦୁଃକାମ୍‍ ଆଇମାଟ୍ ।
HEB 12:6 ବାତିଙ୍କଇତକେ ଦେଉଡ ବେନଙ୍କ୍ ସାୟେ ଇନ୍‍ତଣ୍ଡ୍‍, ଅଙ୍କ୍‌ ଶାସାନ କିତଣ୍ଡ ମେଣ୍ଡ ବେନଙ୍କ୍ ମାର୍‍ ଇଞ୍ଜ କେତିତଣ୍ଡ ଅଙ୍କ୍‌‌ ତିପାଲ୍‍ ଇଦ୍‍ତଣ୍ଡ୍ ।”
HEB 12:7 ନିୟାଦ୍‌ ଦୁକାମ୍ କାଷ୍ଟାମ୍‌ତିଙ୍କ୍ ବାବାଲ୍ ଇଦାନ୍‌ ତିପାଲ୍ ଇଞ୍ଜ ଏର୍କା ମାଡି କଟ ମାନୁଟ୍‌, ଇଦିନ୍‌ ଦ୍ୱାରା ଅଣ୍ଡ୍‌ ମି ସାଙ୍ଗ୍‌ ମାରିନ୍‌ ଲେକାମ୍‍ ବ୍ୟବହାର ମାଡ଼ିମିନ୍ଦେଣ୍ଡ୍ ଇଞ୍ଜ ପୁନ୍ଦାଙ୍କ୍‌ ଆଦୁତ୍‍ । ବାବାନାଗାଙ୍କ୍ ବେପଡ଼୍‍ ତିପାଲ୍‌ ଦର୍‌କ, ଆଦ୍‍ ଲେକେତ୍‍ ବେନ ମାର୍‌ ମିନ୍ଦେନ୍‌ କି ?
HEB 12:8 ତାନ୍‌ ୱେରେ ମାର୍‌କିନ୍‌ ଲେକାମ୍‍ ମିକିନ୍‌ ଯଦି ମି ବାବାଲ୍ ଶାସନ୍‍ କେଞ୍ଜକଟେ ମାନ୍‌ତଣ୍ଡ୍‌, ଆଲେଇତ୍‌ଏ ମିଡ଼୍ ନିଜାମ୍‌ ମାର୍‌ ଆୟୱିଡ୍‌ । ମିଡ଼୍ ଦାରି ମୁତେନ୍‍ ମାରିଡ଼୍‍ ।
HEB 12:9 ମାନା ଇଦୁନିଆତ ବାବାଲ୍ ମାନାଙ୍କ୍ ତିପାଲ ଇତ୍‌କେବା ମାନାଲ୍ ଉକିଙ୍କ୍ ପ୍ରେମ୍‍ ମାଡ଼ିତାଲ୍ । ଆଲେକିତ୍‌କେ ମାନ ସ୍ୱର୍ଗତେ ବାବାଲ୍ ଶାସନ୍‌ତା ମାନେମ୍‍ ଆସ ମାନ୍ଦାନାଦ୍ ବେଚର୍ ନାରଗେ ସାୟାତାଦ ଜୀୱାଦରକିତା !
HEB 12:10 ମାନ ଦୁନିଆତା ବାବାଲଡ଼୍ କାଣ୍ଡକିନେ ବାତା ସାୟେତାଦ୍‍, ଆଦିନସାରେ ମାନାଙ୍କ୍ ଚୁଦୁର କାଲାମ ମାଇଦିଙ୍କ ଶାସନ ମାଡ଼ିତେ; କିନ୍ତୁ ମାନାଲ୍ ବେଲା ତାନ ପବିତ୍ରତାତେ କାୟିଲି ପାରଦିତାଲ, ଇଦ୍‌ ବିଷୟଦ୍‌ ମାୟିଦୀଙ୍କ ଦେଉଡ ମାନ ମଙ୍ଗଲତିଙ୍ଗ୍ ମାନାଙ୍କ୍ ଶାସନ କିତଣ୍ଡ୍‍ ।
HEB 12:11 ତିପାଲ ଦରକାନ୍ ଆସୁଟ ମାନ୍‍ନାଙ୍କ୍ ଆଦ୍ କାଷ୍ଟାମ୍ ଆଦାନ୍‍ ଲେକେମ୍ ମନେ ଆତା, ଆସ୍‌କେ ବା ସୁକାମତାଦ୍ ଆୟ କିନ୍ତୁ ଶାସ୍ତି ମାୟିଦୀଙ୍କ ଅଡ଼ାଦ୍‌ ଜୀୱା ସାୟେ ଆତ୍‍ତା, ଅଡ଼୍‌‍କ୍‍ ପେର୍‌କେ ଦରକାନ୍ ଦାର୍ମିକ୍‌ ଜୀୱାତ୍ ଲେକେତ୍ ପୁରସ୍କାର୍ ଦରକୀତର ।
HEB 12:12 ଆଦିଙ୍କ୍‌ ମାୟାଦ୍‌ ସାତ୍‌ୱାମ୍‌ ଇଲ୍‌ୱା କାୟି ତେଏମୁଟ୍‌ ମେଣ୍ଡେ ୱାଡ଼୍‍କମାନ୍ଦାନ୍‍ ବଟ୍‍ମିଣ୍ଡା ସାତ୍‌ୱାମ୍‌ ମାଡ଼ାଟ୍ ।
HEB 12:13 ତିନାଙ୍ଗ୍‍ ଆର୍‌ଦାଗ୍‌ ତାକାଟ୍‌; ଆଲେଆତ୍‌କେ, ମିୟାଦ୍‌ ତାକପାର୍‌ୱ କଟ ମାନ୍ଦାନ୍‌ କୁଟଡେକା ସାୟ୍ ଆଦ୍‍ତା ।
HEB 12:14 ସାର୍ରେତର୍ ସାଙ୍ଗ୍‌ ଶାନ୍ତିତେ ବାଦ୍‌କାନଙ୍କ୍‌ ନୁ ପବିତ୍ର ଜିୱା ବାଦ୍‌କାନଙ୍କ୍‌ ଉଦ୍ୟମ୍‌ ମାଡ଼ାଟ୍, ବାତାଙ୍କ୍‌ଇତ୍‌କେ ଆଦିଙ୍କ୍‌ ୱିଡ୍‌ସିତ୍‌କେ ବେନବା ପ୍ରବୁଙ୍କ୍‍ ଉଡ଼େପାର୍‌ଣ୍ଡ୍‌ ।
HEB 12:15 ସାବ୍‌ଦାନ୍‌, ବେଲାକି ଦେଉଡ୍‌ ଅନୁଗ୍ରମାମେ ଅନ୍‌ୟାୟ୍‌ତେ ବଞ୍ଚେମ୍ ଆୟ୍‍ମାଟ୍ । କାୟ୍‍ତେ ମାଡ଼େ ଲେକାମ୍ ଆୟ୍‍ମାଟ୍ । କାୟ୍‍ତେ ମାଡ଼େ ପେର୍‍ସ୍‍କେ, ତାନ୍ ୱିସାମ୍‍ତେ ନାର୍ଗେ କାରାପ୍ ଆଦ୍‍ତା ।
HEB 12:16 ଏଷୌ ଲେକେ ବେନ କାରାପ୍ ବା ଅଦର୍ମ ନାରୁଣ୍ଡ୍ ଇନା ଆୟ୍‍ମାଟ୍; ଅଣ୍ଡ୍‌ ତ ଅଣ୍ଡୟ୍‌‍ ଅଲ୍‍ତେ କାଦି ସେଙ୍ଗେ ବେଡ଼୍‍ୟ୍‍ ଦାଦାନ୍ ଅଦିକାର୍‌‍ଦିଙ୍କ୍ ୱାମି ମାତ୍‍ତଣ୍ଡ୍ ।
HEB 12:17 ତାନ୍‍ପେର୍କେ ଅଣ୍ଡ୍‌ ବାବାନ୍ ଆର୍ଶିବାଦ୍ ପାଏମ୍ ଆଦାନଙ୍କ୍ ଇଚ୍ଛା ମାଡ଼୍‍ତଣ୍ଡ୍, ଇତ୍‍କେ ପାଏମ୍‍ ଆଦେ ପାର୍‍ୱଣ୍ଡ୍ । ନାର୍ଗେ କାଣ୍ଡେଡ଼୍ ରାପି ଅଣ୍ଡ୍‌ ନିଜର୍ ମାଡ଼୍‍ତେ ପାଡ଼୍‍ୟିଦିଙ୍କ୍ ବଦ୍‍ଲା ମାଡ଼େ ପାର୍‍ୱମାତ୍‍ତଣ୍ଡ୍ ।
HEB 12:18 ଇସ୍ରାଏଲୀୟଡ଼୍ ଲେକେ ମିଡ଼୍ ସିନାଇ ମେଟେତ୍ ପର ନିଡ଼୍‍ତାନ୍ କିସ୍, ଗାଟି ଇକାଡ଼୍, ଗାଲ୍‍ୱାର୍‍ସାମ୍,
HEB 12:19 ମଇର୍ ନେକାନାଲ୍‌ଦ୍ ଲେଙ୍ଗ୍ ନୁ ପାୟୁର୍‍ତେ ଲେଙ୍ଗ୍ ଏୱୟେ । ଇଶ୍ରାଏଲୀୟଡ଼୍ ଆଦ୍ ଲେଙ୍ଗ୍ କେଞ୍ଜୀ କେସ୍ ମାତ୍‍ତଡ଼୍, ବେଲାକି ଅଡ଼୍‌ ମେଣ୍ଡେ ଆଗାକନ୍ସ୍ ଅଣ୍ଡ୍‌‍ପଦ୍ ଗଟ୍‍ବା କେଞ୍ଜଡ଼୍,
HEB 12:20 ବାତେଙ୍କ୍‍ ଇତ୍କେ “ପଶୁ ଗାଲା ଆଦ୍ ମେଟେତିଙ୍କ୍ ଇଟ୍‍କେ, ଆଦିଙ୍କ୍ କାଲ୍‍କିନ୍ ତଡ଼୍ ଆୱୁକିତଡ଼୍,” ଇଦ୍ କଷ୍ଟ ଆଦେଶ୍ ଅଡ଼୍‌ ଇଚ୍ଛା ମାଡ଼େ ପାର୍‍ୱମାତ୍‍ତଡ଼୍ ।
HEB 12:21 ଆଦ୍ ଦୃଶ୍ୟ ଉଡ଼ାନଙ୍କ୍ ଗାଟି ୱେର୍ରେ ମାତ୍‍ତେ, ମଶାଲ୍‌ କେତ୍‍ତଣ୍ଡ୍, “ନାନ୍ ୱେର୍ରେତେ ୱାଡ଼୍‍କୁତାନ୍ ।”
HEB 12:22 ଇତ୍‍କେ ମିଡ଼୍ ୱାତ୍‍ତିଡ଼୍ ସିୟୋନ୍ ମେଟେତାଗ୍, ଜିୱେତାଦ୍ ଇଶ୍ୱର୍‌ତେ ନଗରୀ ସ୍ୱର୍ଗତାଦ୍ ଯିରୁଶାଲେମ୍‍ତାଗ୍, ବେଗେ ହଜାର୍‌ ହଜାର୍‌ ସ୍ୱର୍ଗଦୂତଡ଼ାଦ୍ ମାନ୍ଦ୍‍ ଗୁଡ଼ିତଡ଼୍‍ ।
HEB 12:23 ଇଶ୍ୱର୍‌ତାଦ୍ ମୁନେନ୍ ପୁଟ୍‍ତେ ପିଲାନ୍ ପେଦେର୍ ସ୍ୱର୍ଗତାଗ୍ ଲେକାଆତ୍‍ତେ, ମିଡ଼୍ ଅଡ଼୍‌‍ୱାଦ୍ ୱେଡ଼୍‍କେ ମାଡ଼ାନାଗ୍ ୱାତ୍‍ତିଡ଼୍ । ସାର୍ରେ ମାନେୟ୍‍ ଜାତିତ୍ ବିଚାର୍ ଇଶ୍ୱର୍‌ତେ ଗାର୍ରେ ନୁ ସାୟେ ଦାର୍ମାମ୍‌ ନାରୁଡ଼ାଦ୍ ଆତ୍ମାକିନ୍ ଗାର୍ରେ ମିଡ଼୍ ୱାତ୍‍ତିଡ଼୍ ।
HEB 12:24 ମେଣ୍ଡେ, ପୁନା ନିୟମ୍ ତିୟାର୍ ମାଡ଼୍‍ତେ ଜିସୁନ୍ ଗାର୍ରେ ନୁ ବେନନ୍ ନେତୁର୍ ହେବଲ୍‍ତେ ନେତୁର୍ ତାଗାଙ୍କ୍ ବାଡ଼୍‍ୟେ ବିଷୟ୍ ଇଦ୍‍ତଣ୍ଡ୍ ଇଞ୍ଜ ଆଶେ ମାଡ଼ୁତମ୍, ଆଦ୍ ନେତୁର୍‍ତେ ଗାର୍ରେ ୱାସ୍‍ମିନ୍ଦେଡ଼ି ।
HEB 12:25 ଉଡ଼ାଟ୍ ସାବ୍‍ଦାନ୍, ଅନ୍‌ ଗଟ୍‍ତିଙ୍କ୍ ଆସାମ୍ ଇଞ୍ଜ ଆଲ୍‍ସ୍‍ମାଟ୍ । ସ୍ୱର୍ଗତାଗାଙ୍କ୍ କାବୁର୍ ଆସ୍ ୱାସ୍‍ ପୃତିବିତାଗ୍ କେତ୍‍ତେନଣ୍ଡ୍ ନାରୁଣ୍ଡ୍‍ତିଙ୍କ୍ ବେନଡ଼୍ କେଞ୍ଜଡ଼୍, ଅଡ଼୍‌ ବେନଡ଼୍ ବା ରକ୍ଷା ପାଏମ୍ ଆୟଡ଼୍ । ଆଲାଇତ୍‍କେ, ଇଞ୍ଜେ ବେନ ସ୍ୱର୍ଗତାଗ୍ ମାଞ୍ଜ୍ ଗଟି କେତୁତଣ୍ଡ୍, ଅଂକିଙ୍କ୍‌ ପାସ୍‍କେ ମାନାଡ଼୍ ବାତ୍ ରକ୍ଷା ପାଏମ୍‍ ଆଦ୍‍ତାଡ଼୍ ?
HEB 12:26 ଆସୁଟ୍ ଅନ୍‌ ଲେଙ୍ଗ୍ ପୃତିବିତିଙ୍କ୍ ୱାଡ଼୍‍ସ୍କିସ୍ ମାତ୍‍ତେ । ଇଞ୍ଜେ ଅଣ୍ଡ୍‌ ପ୍ରତିଜ୍ଞା ମାଡ଼ି ମିନ୍ଦେଣ୍ଡ୍, “ନାନ୍ ମେଣ୍ଡଅନ୍‌‍ଦାମ୍ ପୃତିବିତିଙ୍କ୍‍ ଆୟ, ମୟଲ୍‍ତିଙ୍କ୍ ଗାଲା ୱାଡ଼୍‍ସ୍କି‍ଦ୍‍ତାନ୍ ।”
HEB 12:27 ଇଗାଙ୍କ୍ ନିଜାମ୍ ଯେ, ଅଣ୍ଡ୍‌ “ମେଣ୍ଡଅନ୍‌‍ଦାମ୍,” ବାତ୍ ମାଡ଼ିତଣ୍ଡ୍, ଅଦିନ୍‌ତଡ଼୍ ସୃଷ୍ଟିତାଦ୍ ସାର୍ରେ ବିଷୟ୍ ୱାଡ଼୍‍କି ଦଂସ ଆଦ୍‍ତା । ବେନ୍‍ସାର୍ରେ ବିଷୟ୍ ୱାଡ଼୍‍ସ୍କାନଙ୍କ୍ ଆୟ, ଆୱୁ ଗାଡ଼୍‍ସ୍ ଆସ୍ ମାନ୍‍ତା ।
HEB 12:28 ଆଦିଙ୍କ୍ ୱାଡ଼ାଟ୍, ମାନାଡ଼୍ ରାଜି ଆଦିତାଡ଼୍, ବାତେଙ୍କ୍‍ଇତ୍‍କେ ମାନାଡ଼୍ ସାର୍ରେଦିନାତାଦ୍ ରାଜ୍ୟ ପାଏମ୍‍ ଆଦ୍‍ତାଡ଼୍ । ୱାଡ଼ାଟ୍, ମାନାଡ଼୍ ଦନ୍ୟବାଦ୍ ଇଦ୍‍ତାଡ଼୍ ମେଣ୍ଡେ ବକ୍ତି ନୁ ୱେର୍‍ସ୍ ଇଶ୍ୱର୍‌ତିଙ୍କ୍ ୱେଡ଼୍‍କେ ଆସ୍ ପୁଜେ ମାଡ଼ିତାଡ଼୍ ।
HEB 12:29 ବାତେଙ୍କ୍‍ଇତ୍‍କେ ନିଜାମ୍ ମାନ୍‍ ଇଶ୍ୱର୍ ଅଣ୍ଡୟ୍‌ ଦଂସମାଡ଼ାନ୍ କିସ୍‍ ଲେକେତଣ୍ଡ୍ ।
HEB 13:1 କ୍ରିଷ୍ଟବିଶ୍ୱାସି ଦାଦାଲଡ଼୍‍ ନୁ ଏଲାସ୍କିନଡ଼୍‍ ନିଜେ ନିଜର୍‍ ଲୋପେ ପ୍ରେମ ମାଡ଼ମାନୁଟ୍ ।
HEB 13:2 ୱାସମାନ୍ଦାନ୍ ନାରୁଡ଼୍‍କିଙ୍କ୍ ମୀଇ ଲୋତ୍‍ତାଗେ ସେବା ମାଡ଼ାଟ୍ । ଆଦ୍‍ ମାଡ଼ାନ୍‍ୱେଲେ ବେନ ଦୂତକିଙ୍କ୍ ସେବା ମାଡ଼୍‍ତଡ଼୍ ।
HEB 13:3 କାରାଗାର୍‍ତାଗେ ମାନ୍ଦାନ୍ ନାରୁଡ଼୍‍ ତଡ଼୍ ମିଡ଼୍ ନିଜେ କାରାଗାରତାଗ୍‍ କଷ୍ଟ ମାଡ଼ମାନ୍ଦାନ୍ ଲେକାମ୍ ଆଲ୍‍ସି ଅଡ଼୍‌‍କିଂଙ୍କ୍ ଏର୍କା ମାଡ଼ାଟ୍ । ଦୁଃକାମ୍ କଷ୍ଟ ଆସମାନ୍ଦାନ୍ ନାରୁଡ଼୍‍ତଡ଼୍ ସାରେଦୁଃକାମ୍ ଆଲ୍‍ସି ଅଡ଼୍‌‍କିଂଙ୍କ୍ ଏର୍କା ମାଡ଼ାଟ୍ ।
HEB 13:4 ପେଣ୍ଡୁଲ୍‍ ସାରେତଡ଼୍ କଣ୍ଡେତେ ସାରେ ପୁରା ଆୟି, ମୁଦ୍‍ପାନଡ଼୍ ନୁ ମୁତେ ନିଜେ ନିଜେଲୋପେ ପାପ୍‍ ମାଡ଼୍‍ୱେ ମାନୁଟ୍ । ଇଶ୍ୱର୍‍ ଲାଲସା ନୁ ବେବିଚାର୍‍ଡ଼୍‍ ବିଚାର୍ ମାଡ଼ିତଣ୍ଡ୍ ।
HEB 13:5 ଦନ୍ ଆସେତାଗାଙ୍କ୍‍ ପେୟ୍‍ସ୍‍ ୱାଡ଼ାଟ୍ ନୁ ମିୟାଦ୍ ବାତେ ମିନ୍ଦେ, ଆଗେ ସନ୍ତୁଷ୍ଟ ମାନୁଟ୍ । ବାତେଙ୍କ୍‍ଇତ୍କେ ଇଶ୍ୱର୍‍ କେତ୍‍ତନ୍, “ନାନ୍‍ ମିକିଙ୍କ୍ ୱିଡ଼୍‍ସିୱନ୍, ନାନ୍‍ ମିକିଙ୍କ୍ ବେସୁଙ୍କ୍‍ ବର୍ଜନ୍ ମାଡ଼ନ୍ ।”
HEB 13:6 ଆଦିଙ୍କ୍ ମାମେ ସାହାସ୍‍ତେ କେତେ ପାର୍‍ତାଡ଼୍, “ପ୍ରବୁ ନାୟାଦ୍ ସାହାସ୍‍ତେ । ନାନ୍‍ ୱେର୍‍ୟନ୍, ବେନ ନା ଅନିଷ୍ଟ ମାଡ଼େପାର୍‍ୱଡ଼୍ ?”
HEB 13:7 ବେନ୍ ନେତାଲଡ଼୍ ମୁନେଙ୍କ୍ ମିକିଙ୍କ୍ ଇଶ୍ୱର୍‌ତେ ଗଟି କେଞ୍ଜ୍‍ପି ମାତ୍‍ତଡ଼୍, ଅଡ଼୍‌‍କିଂଙ୍କ୍ ଏର୍କାମାଡ଼ାଟ୍ । ଅଡ଼ାଦ୍ ଜିୱେ ବା ଡଲ୍‍ତାଦ୍ ବେଦ୍ ଲେକାମ୍ ମାତ୍‍ତେ, ଆଦ୍ ଏର୍କା ମାଡ଼ି ଅଡ଼ାଦ୍‌ ବିଶ୍ୱାସ୍‍ତିଙ୍କ୍ ନିଜେତ୍ ଜିୱେତେ କାମ୍‌ ମାଡ଼ାଟ୍ ।
HEB 13:8 ଜିସୁ କ୍ରିଷ୍ଟ ନିନେ, ନେଣ୍ଡ୍ ନୁ ସାରେଦିନାମ୍ ସାମାନ୍‍ ମାନ୍‍ତଣ୍ଡ୍ ।
HEB 13:9 ବେସ୍‍ବେସତାୱୁ ବୁସାତାୱୁ ଦର୍ମଶିକ୍ଷା ମିକିଙ୍କ୍ ସତ୍‍ ଆର୍ଦାଗାଙ୍କ୍ ୱେରେ ମାଡ଼୍‍ମାକି । ଇଶ୍ୱର୍‌ତେ ଅନୁଗ୍ରମାମେ ଅନ୍‌ୟାୟ୍‌ତେ ଲୋପେତ୍‍ଆତ୍ମା ସେଙ୍ଗେ ଶକ୍ତି ତାତାନାଦ୍‍ ସାୟେ, ତିନ୍ଦାନ୍‍ କାଦି ନିୟମ୍ ପାଲନ୍ ମାଡ଼ମାନ୍ଦାନ୍ ତଡ଼୍‍ ଇଦ୍‍ ଆଦାନଙ୍କ୍‍ ପାର୍‍ୱ । ଆୱୁ ବାୟ୍‍ଦେତ୍‍ ନୀତିନିୟମ୍‍ ପାଲନ୍‍ ମାଡ଼ମାନ୍ଦାନ୍‍ ନାରୁଡ଼୍ ଆଗେ ବାତ୍‍ ଉପକାର୍‍ ପାଏମ୍‍ ଆୟଡ଼୍‍ ।
HEB 13:10 ମାନାୱୁ ବେନ୍ ଦିବ୍ୟ ବେଦୀ ମିନ୍ଦେ, ଆଗେ ମାନ୍ଦାନ୍ ନୈବେଦ୍ୟ ତିଞ୍ଜମାନ୍ଦାନ୍ ଇହୁଦୀ ଯାଜକିଡ଼ାୱୁ ଅଦିକାର୍‌ ଇଲେ ।
HEB 13:11 ଇହୁଦୀ ବେଡ଼୍‍ୟ୍ ଯାଜକ୍‍ ଲେକାମ୍ ଇସ୍‍ମାନ୍ଦାନ୍ ପଶୁତେ ନେତୁର୍ ପାପତେ ପ୍ରାୟଶ୍ଚିତ୍ ଲେକାମ୍ ଉତ୍ସର୍ଗ ମାଡ଼ାନଙ୍କ୍ ମହାପବିତ୍ର ପଡ଼ିୟେତାଗ୍ ଆଦ୍‍ତଡ଼୍; କିନ୍ତୁ ବେଡ଼୍‍ୟି ପଶୁତେ ମେନ୍ଦୁଲ୍ ମାନ୍ଦାନ୍‍ ପଡ଼୍‍ୟେତାଗାଙ୍କ୍‍ ବାଇଦେ ଆସ୍‍ ପଡ଼୍‍ସ୍‍ନୁଡ଼୍‍ ।
HEB 13:12 ଆଦେଲେକାମ୍ ଜିସୁ ମିକା ନିଜେତ୍ ନେତୁର୍‍ତେ ନାରୁଡ଼୍‍କିଙ୍କ୍ ପାପତାଗାଙ୍କ୍ ପରିଷ୍କାର୍‍ ମାଡ଼ାନ୍ ସେଙ୍ଗେ ନାର୍‍ଦେ ବାଇଦେ ଡଲ୍‍ତନ୍ ।
HEB 13:13 ଆଦିଙ୍କ୍ ଦାଟିଟ୍, ମାନାଡ଼୍ ମିକା ନାର୍ଦେ ବାଇଦେ ଅନ୍‌ ପାକେ ଆଦିକାଡ଼୍‍ ନୁ ଅନ୍‌‍ତଡ଼୍ ନିନ୍ଦା, ଅପମାନ୍ ସହ୍ୟ ମାଡ଼ିକାଡ଼୍ ।
HEB 13:14 ବାତେଇତ୍କେ ମାନ୍‍ସେଙ୍ଗେ ଇଦ୍ ଜଗତ୍‍ତାଗେ ବାତେମିକା ଲେକେତ୍ ନଗର୍ ଇଲେ; ବେନ୍ ନଗର୍ ବବିଷ୍ୟତ୍‍ତେ ତିଆର୍ ଆଦ୍‍ତେ, ମାନାଡ଼୍ ଆଦ୍ ନଗର୍‍ତିଙ୍କ୍ କେପିମାନ୍ଦିକାଡ଼୍ ।
HEB 13:15 ଇତ୍‍କେ ୱାରାଟ୍‌, ମାନାଡ଼୍ ଜିସୁଙ୍କ୍ ପୟ୍‍ସ୍ ଇଶ୍ୱର୍‌ତିଙ୍କ୍ ମାନ୍‍ୱାଦ୍ ପ୍ରଶଂସା ଲେକେମ୍‍ ପୁଜ୍ ଇଦ୍‍ତାଡ଼୍ । ଇଦ୍ ପୁଜ୍ ଜିସୁଙ୍କ୍ “ପ୍ରବୁ,” କେତାନାଦ୍ ମାନ୍‍ ପାୟୁର୍‍ତାଲା ପେୟ୍‍ତିତ୍ ।
HEB 13:16 ଅନ୍‌ୟାଇ ନାରୁଡ଼୍‍କ୍ ଉପ୍‍କାର୍ ମାଡ଼ାନାଦ୍ ନୁ ଅଡ଼୍‌‍କିଂଙ୍କ୍ ସାହାଯ୍ୟ ମାଡ଼ାନାଦ୍ ମାର୍‍ଙ୍ଗ୍‍ମାଟ୍, ଇୱୁସାର୍ରେକେ ଇଶ୍ୱର୍‌ତେ ଲେକେତ୍ ବଲି ଲେକାମ୍‍ ।
HEB 13:17 ମି ନେତାଲଡ଼୍ ଗଟି ମାନେମ୍‍ ଆୟ୍‍ମୁଟ୍, ଅଡ଼୍‌ କେତାନାଦ୍ କେଞ୍ଜାଟ୍ । ଅଡ଼୍‌ କେପାନ୍ ନାରୁଡ଼୍ ଲେକାମ୍ ମି ଆତ୍ମାତିଙ୍କ୍ ସୁରକ୍ଷାମାଡ଼ି କେପିତଡ଼୍, ବାତ୍‍ଙ୍କ୍‍ଇତ୍କେ ଅଡ଼୍‌ ଇଶ୍ୱର୍‌ତେ ଗାର୍ରେ ନିଜର୍ ପାଡ଼୍‍ୟିଦେ ଇସାପ୍ ଇଦ୍‍ୱେୟ୍‍ତିତ୍ । ମିଡ଼୍ ଅଡ଼୍‌ ଗଟିଙ୍କ୍ କେଞ୍ଜାଟ୍, ଆଲେକେ ଅଡ଼୍‌ ସାର୍‍ଦେ ମାନ୍‍ଦେ ନିଜର୍ ପାଡ଼୍‍ୟି ୱିଡ଼୍‍ସିତଡ଼୍, ଇତ୍‍କେ ଯଦି ଆଲା ମାଡ଼୍‍ୱିଡ଼୍, ଆଲେକେ ଅଡ଼୍‌ କପାମ୍‍ ଆସ୍ ମାଡ଼ିତଡ଼୍ ନୁ ଆଦ୍ ମିକିଙ୍କ୍ ସାୟେ ଆୟ ।
HEB 13:18 ମାନ୍‍ ମାୟ୍‍ଦିଙ୍କ୍ ପ୍ରାର୍ତନା ମାଡ଼ମାନୁଟ୍ । ମା ମନ୍ ବେଲା ସାୟେ, ଇଗେ ବାତ୍ କେତାନାଦ୍ ଇଲ୍‍ଲେ, ବାତେଙ୍କ୍‍ଇତ୍‍କେ ସାର୍ରେୱେଲେ ନ୍ୟାୟତାଦ୍ ପାଡ଼୍‍ୟି ମାଡ଼ାନାଦ୍ ମାୟାଦ୍‌ ଇଚ୍ଛା ।
HEB 13:19 ମେଣ୍ଡେ ଇଶ୍ୱର୍ ନାକିଙ୍କ୍ ମି ଗାର୍ରେ ଯାପେ ରହସିଦ୍‍ତଣ୍ଡ୍, ମିଡ଼୍ ନା ମାୟ୍‍ଦିଙ୍କ୍ ଇଦ୍ ପ୍ରାର୍ତନା ମାଡ଼ମାନୁଟ୍ । ଇଦ୍ ମି ଗାର୍ରେ ନାୟାଦ୍ ଲୋପେକସ୍ ନିବେଦନ୍ ମାଡ଼ୁତାନ୍‍ ।
HEB 13:20 ବେନ ନିଜର୍ ଜିୱୁଣ୍ଡ୍ ଇସ୍ ମେଣ୍ଢାକିନ୍ ବାଡ଼୍‍ୟଣ୍ଡ୍ ପଡ଼୍‍ପାନଣ୍ଡ୍ ଆତ୍‍ତଣ୍ଡ୍, ମାନ୍‍ ଅଣ୍ଡ୍‌ ପ୍ରବୁ ଜିସୁଙ୍କ୍ ଇଶ୍ୱର୍ ଡଲ୍‍ତାଗାଙ୍କ୍ ତେଏତଣ୍ଡ୍ । ଆ ଜିସୁନ୍ ଜିୱୁଣ୍ଡ୍ ଇତ୍‍ତେ ନେତୁର୍‍କନ୍ସ୍ ଅଣ୍ଡୟ୍‌ ସାର୍ରେଦିନାତାଦ୍ ଚିଃନେ ଆତ୍‍ତେ ।
HEB 13:21 ଶାନ୍ତିଦାତାଲ୍ ଇଶ୍ୱର୍ ତାନ୍ ଇଚ୍ଛା ପାଲନ୍ ମାଡ଼ାନ୍ ସେଙ୍ଗେ ମିୟାଦ୍ ଦର୍‍କାର୍‍ ଇସାବ୍‍ ସାର୍ରେ ଲେକେତ୍ ବିଷୟ ଇୱିଣ୍ଡ୍ ନୁ ଜିସୁ କ୍ରିଷ୍ଟନ୍ ତଡ଼୍ ମାନ୍‍ ଜିୱୁଣ୍ଡ୍‍ତାଗ୍ ଅନାଦ୍‌ ସାୟେ ପାଡ଼୍‍ୟି ମାଡ଼ୁତଣ୍ଡ୍ । ଯୁଗ୍‍ଯୁଗ୍ କ୍ରିଷ୍ଟ ମହିମା ଆୟିଣ୍ଡ୍ । ଆମେନ୍‍ ।
HEB 13:22 ଆ ଦାଦାଲଡ଼ି ନୁ ଏଲାସ୍କ୍‍, ନାନ୍ ମିକିଙ୍କ୍ କେତୁତାନ୍, ନାୟାଦ୍ ଇଦ୍ ସୁଦୁର୍‍ ଲେକ୍‍ତାଦ୍‍ ଚିଟିତେ କାବୁର୍ ସେଙ୍ଗେ ଗାଡ଼୍‍ସ୍ ଆସ୍ ମାନ୍‍ ଇମୁଟ୍ । ମିକିଙ୍କ୍ ସାର୍‍ଦେ ମାଡ଼ାନ୍ ସେଙ୍ଗେ ଇଦ୍ ନାନ୍ ଲେକିମିନ୍ଦେନ୍ ।
HEB 13:23 ମାନ୍‍ ଦାଦାଲ୍‍ ତିମତି ଜେଲ୍‍ତାଗାଙ୍କ୍ ମୁକ୍ତି ପାଏମ୍‍ ଆତ୍‍ତଣ୍ଡ୍ ପୁନ୍ଦିତାଡ଼୍ । ଅଣ୍ଡ୍‌ ଯଦି ସିଟ୍‍ପାଟ୍ ୱାଦୁତଣ୍ଡ୍, ଆଲେକେ ନାନ୍ ଅଂକିଙ୍କ୍‌ ନା ତଡ଼୍ ମି ଗାର୍ରେ ତାତିତାନ୍ ।
HEB 13:24 ମିୱଡ଼୍ କ୍ରିଷ୍ଟ ବିଶ୍ୱାସୀଡ଼୍‍କ୍ ମାୟାଦ୍‌ ନମସ୍କାର୍ କେତିତିଡ଼୍ । ଇଟାଲି ଦେଶ୍‍ତାଗାଙ୍କ୍‍ ୱାଦାନ୍ ଦାଦାଲଡ଼୍ ମିକିଙ୍କ୍ ନମସ୍କାର୍ ମାଡ଼ୁତଡ଼୍ ।
HEB 13:25 ମି ସାର୍ରେତଡ଼୍ ଗାର୍ରେ ଇଶ୍ୱର୍‌ତେ ଅନୁଗ୍ରହ୍ ସାରେଦାମ୍‍ ମାନି ।
JAM 1:1 ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ଦାସ ଯାକୁବନ୍ ୱେଏକ୍‍ ୱେଏକ୍ ଆତ୍‍ତେ ଇଶ୍ୱର୍‌ତେ ନାରୁଡ଼୍‍କିଙ୍କ୍ ନମସ୍କାର୍ ।
JAM 1:2 ହୋ ନା ଦାଦାଲଡ଼ି ନୁ ଏଲାସ୍କ୍‍, ମିଡ଼୍ ବେସୁଟ୍‌ ନାର୍‍ଗେ ପରିକ୍ଷାତାଗ୍ ପରିକ୍ଷା ଇଦ୍‍ତିଡ଼୍, ଆସୁଟେ ଆଦ୍ ୱେଡ଼୍‍କେତ୍ ବିଷୟ୍ ଇଞ୍ଜ ଏର୍କା ମାଡ଼ାଟ୍;
JAM 1:3 ପରିକ୍ଷା ଇତ୍‍ତେ ବିଶ୍ୱାସ୍ ଇ ଶକ୍ତିତଡ଼୍ ମାଡ଼ିତ୍, ଇଦ୍ ତ ପୁତ୍‍ତିଡ଼୍ ।
JAM 1:4 ମେଣ୍ଡେ, ମିଡ଼୍ ବେଲାକି ବାତ୍ ଗାଲା ବିଷୟ୍‍ତାଗ୍ କମ୍‍ ଆୟ୍‍ୟକଟ ସାୟେ ନୁ ସାରେ ମାଡ଼ିତିଡ଼୍, ଆଦିନ୍ ସେଙ୍ଗେ ଶକ୍ତିତଡ଼୍ ପାଡ଼୍‍ୟିଦିଙ୍କ୍ ସାରେ ମାଡ଼ିତିଡ଼୍‍ ।
JAM 1:5 ଇତ୍‍କେ ମିଇ ଲୋପେଙ୍କ୍ ବେସୁଟ୍‌ ବେନ ବୁଦ୍ ଅବାବ୍ ଆତ୍‍କେ, ଆସୁଟେ ବେନ୍ ଇଶ୍ୱର୍ ଦଷ୍ ପୟକଟ କମ୍‍ଟି ଆୟକଟ୍ କାୟ୍‍ଦେ ସାରେତଡ଼୍‌କିଂଙ୍କ୍ ଇଦ୍‍ତଣ୍ଡ୍, ଅନ୍‌ ମୁନ୍‍ନେ ଅଣ୍ଡ୍‌ ପ୍ରାର୍ତନା ମାଡ଼ିଣ୍ଡ୍, ଆସୁଟେ ଅଂକିଙ୍କ୍‌ ଇଦ୍‍ତଡ଼୍ ।
JAM 1:6 ବାତେଙ୍କ୍ ଇତ୍କେ ଅଣ୍ଡ୍‌ ଆଦ୍‍ତେ କି ଆୟ ଇଞ୍ଜ ଏର୍କା ମାଡ଼କଟ୍ ପ୍ରାର୍ତନା ମାଡ଼ାଟ୍‍, ଆଦ୍‍ ରକମ୍‍ ନାରୁଣ୍ଡ୍, ଅଣ୍ଡ୍‌ ଗାଆଲ୍‍ଦ ଚାଲେମ୍ ଆଦାନ୍ ସମୁଦ୍ରତେ ତଲ୍‍କଡ଼୍ ଲେକାମ୍ ।
JAM 1:7 ଆଦ୍ ରକମ୍ ନାରୁଡ଼୍ ପ୍ରବୁନାଗାଙ୍କ୍ ବାତ୍ ପାଏମ୍ ଆଦ୍‍ତନ୍ ଇଞ୍ଜ ଆଲ୍‍ସ୍‍ମାକିଣ୍ଡ୍;
JAM 1:8 ଅଣ୍ଡ୍‌ ତ ରେଣ୍ଡ୍ ମନ୍‍ଦେ ନାରୁଡ଼୍, ନିଜେତାଦ୍ ସାର୍‍ରେ ବିଷୟ୍‍ତାଗ୍ ଇକ୍‍ ଚିଟି‍କେ ଆଦ୍‍ତଣ୍ଡ୍ ।
JAM 1:9 ଗରିବ୍‍ତେ ମାନ୍ଦାନ୍ କ୍ରିଷ୍ଟିୟାନ୍ ନାରୁଡ଼୍ ଉନ୍ନତି ଆତ୍କେ ୱେଡ଼୍‍କେ ଆୟିଣ୍ଡ୍,
JAM 1:10 ସାଉକାର୍ କ୍ରିଷ୍ଟିୟାନ୍ ବିଶ୍ୱାସି ନିଜେ ଗରିବ୍ ଆଦାନଙ୍କ୍ ଆଲ୍‍ସିଣ୍ଡ୍, ବାତେଙ୍କ୍ଇତ୍କେ ଅଣ୍ଡ୍‌ ଗାଡ୍‍ତେ ପୁଙ୍ଗାର୍‍ ଲେକାମ୍ ଦୁଲ୍‍ଲିତଣ୍ଡ୍ ।
JAM 1:11 ପଡ଼୍‍ଦ୍ କାମ୍‍କେତେ ପେୟ୍‍କେ, ଗାଡ୍‍ ବେଲା ୱାସି ଆଦ୍‍ତେ ନୁ ତାନ୍ ପୁଙ୍ଗାର୍‍ ଦୁଲ୍‍ଲି ରାଲିତ୍ ମେଣ୍ଡେ ତାନାଦ୍ ସୁନ୍ଦର୍ ମାୟି ଆଦ୍‍ତେ, ଆଦେରକମ୍ ସାଉକାର୍ ନାରୁଡ଼୍ ତାନ୍ ସାର୍‍ରେ ବିଷୟ୍‍ତାଗ୍ ୱାସି ଆଦ୍‍ତନ୍ ।
JAM 1:12 ବେନ ନାରୁଣ୍ଡ୍ ପରିକ୍ଷାତାଗ୍ ଜିଡ଼ିତଣ୍ଡ୍, ଅଣ୍ଡ୍‌ ବାଗ୍ୟବାନ୍‍, ବାତେଙ୍କେଇତ୍କେ ପ୍ରବୁ ତାନ୍ ପ୍ରିୟ ନାରୁଡ଼୍‍କ୍ ବେନ୍ ଜିୱେତାଦ୍ ସହଜ୍‍ ଇଦାନଙ୍କ୍ ଗଟ୍ ଇତ୍‍ତନ୍, ପରିକ୍ଷା ଇତ୍‍ତେ ପେର୍‍କେ ଆ ନାରୁଡ଼୍ ଜିୱେତାଦ୍ ସାୟେ ପ୍ରେମତେ ସହଜ୍ ପାଏମ୍ ଆଦ୍‍ତନ୍ ।
JAM 1:13 ବେନଙ୍କ୍ ପରିକ୍ଷା ଆତ୍‍କେ, ଅଣ୍ଡ୍‌ ଇଦ୍ ପରିକ୍ଷା ଇଶ୍ୱର୍‌ତାଗାଙ୍କ୍ ଆଦୁତ୍‍ତେ ଇଞ୍ଜ କେଲ୍‍ମାଟ୍, ବାତେଙ୍କ୍ଇତ୍କେ ଇଶ୍ୱର୍ କାରାପ୍‍ତାଗ୍ ପରିକ୍ଷା ଆୟ୍‍ୟଣ୍ଡ୍, ମେଣ୍ଡେ ଅଣ୍ଡ୍‌ ନିଜେ ବେନଙ୍କ୍ ପରିକ୍ଷା ମାଡ଼ଣ୍ଡ୍ ।
JAM 1:14 ଇତ୍‍କେ ସାର୍‍ରେ ନାରୁଡ଼୍ ନିଜେତ୍ କାରାପ୍ ପାଡ଼୍‍ୟି ଆଲ୍‍ସି ନୁ କାରାପ୍ ଚିନ୍ତେ ମାଡ଼ି ପରିକ୍ଷା ଆଦ୍‍ତନ୍;
JAM 1:15 ତାନ୍ ପେର୍‍କେ କାରାପ୍ କାମ୍‍ତେ ଡଙ୍କେତ୍ ଆସ୍ ପାପତିଙ୍କ୍ ଜନମ୍ ମାଡ଼ିତ୍, ମେଣ୍ଡେ ପାପ୍ ସାରେ ପେର୍‍ସି ଡଲାନାଦିଙ୍କ୍ ଜନମ୍ ଇଦ୍‍ତେ ।
JAM 1:16 ହୋ ନା ପ୍ରିୟ ଦାଦାଲଡ଼ି ନୁ ଏଲାସ୍କ୍‍, ମିଡ଼୍‍ ଦାନ୍ଦେ ଆୟ୍‍ମାଟ୍ ।
JAM 1:17 ସାର୍‍ରେ ସାୟେତ୍ ଦାନ ନୁ ସାର୍‍ରେ ସାୟେତ୍ ଉପହାର୍ ସ୍ୱର୍ଗତେ ବାବାନାଗାଙ୍କ୍ ୱାଦ୍‍ତେ, ଅଣ୍ଡ୍‌ ସାରେ ୱେସ୍‍ତେ ମାବିନ୍‍ କର୍ତ୍ତାଲ୍‌ । ଅନ୍‌ ୱେରେନାରୁଡ଼୍ ଲେକାମ୍ ଆୟନ୍; ମାବ୍ ନିଡ଼୍‍କେ ମାଡ଼ି ବେସୁଙ୍କ୍‍ ଇକାଡ଼୍ ସୃଷ୍ଟି ମାଡ଼ଣ୍ଡ୍ ।
JAM 1:18 ମାନାଡ଼୍ ବେଲା ଅନ୍‌ ନିଜାମ୍‍ ସତ୍‍ ତିୟାର୍ ମାଡ଼୍‍ତେ ଜିୱାକ୍‍ ଲୋପେଙ୍କ୍ ଅଣ୍ଡୟ୍‌ ମୁନେନ୍ ଆଦ୍‍ତେ କାୟେ ରକମ୍ ଆଦ୍‍ତାଡ଼୍, ଆଦିନ୍ ସେଙ୍ଗେ ଅଣ୍ଡ୍‌ ତାନ୍ ଇଚ୍ଛାତେ ନିଜାତେ ଗଟ୍ ତଡ଼୍ ମାନାଙ୍କ୍‍ ସୃଷ୍ଟି ଇତ୍‍ତନ୍ ।
JAM 1:19 ହୋ ନା ପ୍ରିୟ ଦାଦାଲଡ଼ି ନୁ ଏଲାସ୍କ୍‍, ମିଡ଼୍ ଇଦ୍ ପୁତ୍‍ତିଡ଼୍ । ସାର୍‍ରେ ନାରୁଡ଼୍ କେଞ୍ଜାନଙ୍କ୍ ସିଟ୍‍ପାଟ୍ ଆୟ୍‍ମୁଟ୍, କେତାନାଗ୍ ଜାମ୍, ମେଣ୍ଡେ କପାମ୍ ଆଦାନଙ୍କ୍ ଜାମ୍ ଆୟିଣ୍ଡ୍,
JAM 1:20 ବାତେଙ୍କ୍ଇତ୍କେ ନାରୁଡ଼ାଦ୍ କପାମ୍ ଇଶ୍ୱର୍‌ତେ ଇଚ୍ଛା ଦାର୍ମାମ୍ କାମ୍‍ ମାଡ଼ାନଙ୍କ୍ ପାର୍‍ୱ ।
JAM 1:21 ଆଦିଙ୍କ୍ ମିଡ଼୍ ସାର୍‍ରେ କାରାପ୍ ବିଷୟ୍ ନୁ ସାର୍‍ରେ କାରାପ୍ ପାଡ଼୍‍ୟି ୱିଡ଼୍‍ସି, ଇଶ୍ୱର୍‌ତେ ପାକେ ନିଜେତିଙ୍କ୍ ସମର୍ପଣ ମାଡ଼ାଟ୍ ନୁ ମୀଇ ହୃଦୟତାଗ୍ ଅଣ୍ଡ୍‌‍ ବେନା ବାକ୍ୟ ଉର୍‍ସ୍କ୍‍ତଣ୍ଡ୍ ନୁ ବାତ୍‍ ମିକିଙ୍କ୍ ରକ୍ଷା ମାଡ଼ାନଙ୍କ୍ ପାର୍‍ତନ୍, ଆଦ୍ ଗ୍ରହନ୍‍ ମାଡ଼ାଟ୍ ।
JAM 1:22 ବାତେଙ୍କ୍ଇତ୍କେ ଆସାମ୍ କେଞ୍ଜି ନିଜେ ନିଜେତିଙ୍କ୍ ବୁସା ମାଡ଼୍‍ୱେ କଞ୍ଚ୍ ବାକ୍ୟତାଦ୍ ପାଡ଼୍‍ୟି ମାଡ଼ାଟ୍ ।
JAM 1:23 ବାତେଙ୍କ୍ଇତ୍କେ ଯଦି ବେନ ବାକ୍ୟତାଦ୍ ପାଡ଼୍‍ୟି ମାଡ଼୍‍ୱେ କନ୍‍ସ୍ ଆସାମ୍ କେଞ୍ଜିତଣ୍ଡ୍, ଅଣ୍ଡ୍‌ ଦର୍ପନ୍‍ତାଗ୍ ନିଜେତ୍ ମକମ୍ ଉଡ଼ାନ୍ ନାରୁନ୍ ଲେକାମ୍,
JAM 1:24 ଆଦିଙ୍କ୍ ଅଣ୍ଡ୍‌ ନିଜେତିଙ୍କ୍ ଉଡ଼ି ଆତ୍‍ତେ ପେର୍‍କେ, ଅଣ୍ଡ୍‌ ବେସତ୍ ନାରୁଡ଼୍, ଆଦ୍ ଆସୁଟେ ମାର୍ଙ୍ଗିତଣ୍ଡ୍ ।
JAM 1:25 ଇତ୍‍କେ ବେନ ନିଜାମ୍, ସ୍ୱାଦିନ୍‍ତାଦ୍ ନିୟମ୍‍ତିଙ୍କ୍ ଉଡ଼ି ଅଦିନ୍‌ତଡ଼୍ ଗାଡ଼୍‍ସ୍ ମାନ୍‍ତଣ୍ଡ୍, ମେଣ୍ଡେ ବିସ୍ମରଣଡ଼୍ ଲେକାମ୍ ଆୟକଟ୍ ବରଂ କାମ୍‍ମାଡ଼ାନଣ୍ଡ୍ ଆଦ୍‍ତନ୍, ଅଣ୍ଡ୍‌ ତାନ୍ ପାଡ଼ୟିତାଗ୍ ଦନ୍ୟ ।
JAM 1:26 ଯଦି ବେନ ନିଜେତିଙ୍କ୍ ଦାର୍ମାମ୍ ନାରୁଡ଼୍ ଇଞ୍ଜ ଏର୍କା ମାଡ଼ି, ମେଣ୍ଡେ ନିଜେତ୍ ୱାଞ୍ଜେର୍‍ତିଙ୍କ୍ ଆୟତ୍ ମାଡ଼ାନଙ୍କ୍ ପାର୍‍ୱ କନ୍‍ସ୍ ନିଜେତ୍ ଜିୱୁଣ୍ଡ୍‍ତିଙ୍କ୍ ଦଷ୍ ମାଡ଼ିତନ୍, ଅନ୍‌‍ୱାଦ୍ ଦାର୍ମାମ୍ ସାରେ ଆସାମ୍ ।
JAM 1:27 ବେନ୍ ଦାର୍ମାମ୍‌ କାର୍ମାମ୍ ବାବାଲ୍‍ ଇଶ୍ୱର୍‌ତେ କଣ୍ଡେତେ ବିଶୁଦ୍ଦ ନୁ ଉତାର୍ତ, ଆଦ୍ ଅଦୁତ୍ ଦୁର୍ଦ୍ଦଶା ଲେକାମ୍ ଅନର୍ତ ନୁ ରାଣ୍ଡିକିନ୍ ଯତନ୍ ଆଦାନ୍ ସେଙ୍ଗେ ଜଗତ୍ କଷ୍ଟ ତାଗାଙ୍କ୍ ନିଜେତିଙ୍କ୍ ମୁକ୍ତ ନେହେତିକାଡ଼୍ ।
JAM 2:1 ଆ ନା ଦାଦାଲଡ଼ି ନୁ ଏଲାସ୍କ୍‍, ମାନ୍‍ ଗୌରବ୍‍ତଣ୍ଡ୍ ପ୍ରବୁ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ିମାନାଙ୍କ୍ ନାରୁଡ଼୍‍କିଂଙ୍କ୍ ଆଦ୍‍ଲେକାମ୍‍ କେଲ୍‍ମାଟ୍ ।
JAM 2:2 ବାତେଙ୍କ୍ଇତ୍କେ ସୁନାତାଦ୍ ମୁଦ୍‍ ନୁ ସାୟେତ୍ ଚକେ କେର୍‍ସ୍ ବେନ ମିୟାଦ୍ ମିଟିଙ୍ଗ୍‍ତାଗ୍ ୱାଦ୍‍ତଣ୍ଡ୍, ମେଣ୍ଡେ ୱେରଣ୍ଡ୍ ଗରିବ୍ ନାରୁଡ଼୍ ମୁର୍କ୍ ଆତ୍‍ତାଦ୍ ଚକେ କେର୍‍ସ୍ ୱାଦ୍‍ତଣ୍ଡ୍,
JAM 2:3 ମେଣ୍ଡେ ମିଡ଼୍ ସାୟେତ୍ ଚକେ କେର୍‍ତେନଙ୍କ୍ କେତିତିଡ଼୍, ଇଗେ ସାୟେତ୍ ପଡ଼୍‍ୟେତାଗ୍ କୁଦ୍‍ଦା, ମେଣ୍ଡେ ଗରିବ୍ ନାରୁଙ୍କ୍ କେଲାଟ୍, ଆଗେ ନିଲ୍‍ମ୍, ବା ନେଲ୍ କୁଦେ ।
JAM 2:4 ଆଲେକେ ମିଡ଼୍ ବାତ୍ ନିଜେତ୍ ନିଜେତ୍ ଲୋପେ ୱେଏକ୍ ଆସ୍ ମେଣ୍ଡନ୍ ରକମ୍ ବ୍ୟବହାର୍‌ ନୁ କାରାପ୍ ବିଚାର୍ ମାଡ଼ୁତିଡ଼୍ ?
JAM 2:5 ଆ ନା ଦାଦାଲଡ଼ି ନୁ ଏଲାସ୍କ୍‍, କେଞ୍ଜାଟ୍, ଇଶ୍ୱର୍ ବାତ୍ ଇଦ୍ ଜଗତ୍‍ତେ ଗରିବ୍ ନାରୁଡ଼୍‍କିଂଙ୍କ୍ ବିଶ୍ୱାସ୍‍ତାଦ୍ ଦନ୍‍ତାଗ୍ ସାଉକାର୍ ଆଦାନଙ୍କ୍, ମେଣ୍ଡେ ନିଜେ ପ୍ରେମ ମାଡ଼ାନକିଂଙ୍କ୍ ବେନ୍ ରାଜ୍ୟ ଇଦାନଙ୍କ୍ ଶପତ୍ ମାଡ଼୍‍ତଣ୍ଡ୍, ଆଗେତ୍ ଅଦିକାରି ଆଦାନଙ୍କ୍ ଏଞ୍ଚଣ୍ଡ୍ କି ?
JAM 2:6 ଇତ୍‍କେ ମିଡ଼୍ ଗରିବ୍ ନାରୁଡ଼୍‍କିଂଙ୍କ୍ ପାସ୍କ୍‍ତିଡ଼୍ । ସାଉକାର୍ ନାରୁଡ଼୍ ବାତ୍ ମିଇ ପର୍‍ର ଅତ୍ୟାଚାର୍ ମାଡ଼ଡ଼୍‍ କି ମେଣ୍ଡେ ମିକିଂଙ୍କ୍ ବିଚାର୍ ମାଡ଼ାନାଗ୍ ଲାଗି ଆୟ୍‍ୱିଡ଼୍ କି ?
JAM 2:7 ବେନ୍ ଜିସୁକ୍ରିଷ୍ଟନ୍ ପେଦେର୍ତେ ମିଡ଼୍ ପାଏମ୍ ଆତ୍‍ତିଡ଼୍, ଆଦ୍ ପେଦେର୍‍ତେ ବାତ୍ ଅଡ଼୍‌ ନିନ୍ଦ୍ ମାଡ଼ଡ଼୍‍ ?
JAM 2:8 ମିଡ଼୍ ମିଇ ଗାରେତଡ଼୍‍କିଂଙ୍କ୍ ଜିୱୁତଡ଼୍‍ ପ୍ରେମ ମାଡ଼ାଟ୍, ଶାସ୍ତ୍ରତାଗ୍ ଇଦ୍ ଇଶ୍ୱର୍‌ତେ ନିୟମ୍ ଯଦି ନିଜାମ୍ ପାଲନ୍ ମାଡ଼୍‍କେ, ଆଲେକେ ସାୟେତ୍‍ କାମ୍ ମାଡ଼୍‍ତିଡ଼୍,
JAM 2:9 ଯଦି ନାରୁଡ଼୍‍କ୍ ପକ୍ଷପାତ ବ୍ୟବହାର୍‌ ମାଡ଼ୁତିଡ଼୍, ଆଲେକେ ମିଡ଼୍ ପାପ୍ ମାଡ଼ୁତିଡ଼୍, ମେଣ୍ଡେ ଇଦ୍ ମୋଶାନ୍‌‍ ନିୟମ୍‍ ଲେକାମ୍‍ ଦଷି ଆଦ୍‍ତିଡ଼୍ ।
JAM 2:10 ବାତେଙ୍କ୍ଇତ୍କେ ବେନ ସାର୍‍ରେ ନିୟମ୍ ପାଲନ୍ ମାଡ଼ି ଅଣ୍ଡୟ୍‌ ନିୟମ୍‍ତିଙ୍କ୍ ପାଲନ୍‍ ମାଡ଼ନ୍, ଆଲେକେ ଅଣ୍ଡ୍‌ ଆଦ୍ ସାର୍‍ରେ ନିୟମ୍‍ତିଙ୍କ୍ ପାଲନ୍‍ ମାଡ଼ଣ୍ଡ୍ ଇଞ୍ଜ ଦଣ୍ଡ୍ ପାଏମ୍ ଆଦ୍‍ତନ୍ ।
JAM 2:11 ଆଦିଙ୍କ୍ ବେନ ଇଶ୍ୱର୍‍ ବେବିଚାର୍ ମାଡ଼୍‍ମାଟ୍ ଇଞ୍ଜ କେସ୍‍ମାତ୍‍ତଣ୍ଡ୍, ଅଣ୍ଡ୍‌ ଗାଲା ଆୱୁକ୍‍ମାଟ୍ ଇଞ୍ଜ କେସ୍‍ମାତ୍‍ତଣ୍ଡ୍, ଆଦିଙ୍କ୍ ମିଡ଼୍ ଯଦି ବେବିଚାର୍ ମାଡ଼କଟ୍ ନାରୁଡ଼୍‍କ୍ ଆୱୁକିତିଡ଼୍, ଆଲେକେ ନିୟମ୍‍ତିଙ୍କ୍ ପାଲନ୍ ମାଡ଼୍‍ୱିଡ଼୍ ।
JAM 2:12 ବେନ୍ ସ୍ୱାଦିନ୍‍ତେ ନିୟମ୍ ତଡ଼୍ ମିଡ଼୍ ଯେ ବିଚାର୍ ଆଦ୍‍ତିଡ଼୍, ଇଦ୍ ପୁଞ୍ଜ୍ ଆଦେରକମ୍ କେଲାଟ୍ ନୁ ପାଡ଼୍‍ୟି ମାଡ଼ାଟ୍ ।
JAM 2:13 ବାତେଙ୍କ୍ଇତ୍କେ ବେନ ୱେରେ ତଡ଼୍‍କିଙ୍କ୍ ଦୟା ମାଡ଼ଣ୍ଡ୍, ବିଚାର୍ ସମୟ୍‍ତେ ଇଶ୍ୱର୍‍ ଅଡ଼୍‌‍କିଂଙ୍କ୍ ଦୟା ତତିତନ୍ ।
JAM 2:14 ଆ ନା ଦାଦାଲଡ଼ି ନୁ ଏଲାସ୍କ୍‍, ଯଦି ବେନ ନାୟାଦ୍ ବିଶ୍ୱାସ୍ ମିନ୍ଦେ ଇଞ୍ଜ କେତିତଣ୍ଡ୍, ଇତ୍‍କେ ଅନ୍‌ ପାଡ଼୍‍ୟି ଇଲ୍‍ୱେମାନ୍ତେ, ଆଲେକେ ଆଦ୍ ବାତ୍ ଲାବ୍ ? ଇଦ୍ ରକମ୍ ବିଶ୍ୱାସ୍ ବାତ୍ ବେନଙ୍କ୍ ମୁକ୍ତି ଇଦ୍ ପାର୍‍ଦ୍‍ତେ କି ?
JAM 2:15 ହେର୍କେ ମାଡ଼ାଟ୍ ଯଦି ବେନ ତାମୁଣ୍ଡ୍ ଆୟି ବା ଏଲାଡ଼୍‍ ଆୟି, ଚକାସିଲେ ନୁ ତିନ୍ଦାନାଦ୍‍ କାଦି ଦର୍‍କ,
JAM 2:16 ଇଶ୍ୱର୍‍ ମିକିଙ୍କ୍ ଆର୍ଶିବାଦ୍ ମାଡ଼ିତ୍ ତିଞ୍ଜ୍ ଉଞ୍ଜ୍‍ ଶାନ୍ତିତେ ମାନୁଟ୍ ନିଯାତ୍‍ ଗଟ୍ ଆଙ୍ଗ୍‍ଡ଼ାମ୍ ଆୟକି ?
JAM 2:17 ଆଦେ ରକମ୍ ବିଶ୍ୱାସ୍ ନୁ ପାଡ଼୍‍ୟି ଇଲକଟ୍ ମାତ୍‍ତ୍କେ ବିଶ୍ୱାସ୍ ଡଲ୍‍ତେ ।
JAM 2:18 ଇତ୍‍କେ ବେନ ବା କେତିତଣ୍ଡ୍, ୱେରନାଦ୍ ବିଶ୍ୱାସ୍ ମିନ୍ଦେ, ମେଣ୍ଡେ ଅର୍ତିନାଦ୍ ପାଡ଼୍‍ୟି ମିନ୍ଦେ, କିନ୍ତୁ ନାନେ କେତୁତାନ୍ ପାଡ଼୍‍ୟି ୱିଡ଼୍‍ସି ମିୟାଦ୍ ବିଶ୍ୱାସ୍ ନାକିଂଙ୍କ୍ ତଅମ୍, ମେଣ୍ଡେ ନାନ୍ ପାଡ଼୍‍ୟିତଡ଼୍ ନିକିଂଙ୍କ୍ ମିକିଂଙ୍କ୍‍ ନାୟାଦ୍ ବିଶ୍ୱାସ୍ ତଅତିତାନ୍ ।
JAM 2:19 ଇଶ୍ୱର୍ ଯେ ୱେରଣ୍ଡ୍, ଇଦ୍ ମିଡ଼୍ ବିଶ୍ୱାସ୍ ମାଡ଼ୁତିଡ଼୍; ସାୟେତ୍ ଗଟ୍, ବୁତ୍‌କ୍ ଗାଲା ବିଶ୍ୱାସ୍ ମାଡ଼ି ୱେର୍‍ଦେ ୱାଡ଼୍‍କିତା ।
JAM 2:20 ଇତ୍‍କେ ଆ ମୁର୍କ ନାରୁଡ଼ି, ପାଡ଼୍‍ୟି ୱିଡ଼୍‍ସି ବିଶ୍ୱାସ୍ ବାତେଏ ବା ଆୟ୍‍ୟ, ଇଦ୍ ବାତ୍ ପୁନ୍‍ୱିଡ଼୍‍ ?
JAM 2:21 ମାନ୍‍ ମୁନେତ୍‍ ବାବାଲ୍ ଅବ୍ରାହାମ୍‌ ବେଦି ପର୍‍ର ନିଜେତ୍ ମାର୍‌ ଇସ୍‍ହାକ୍‍ତିଙ୍କ୍ ବଲି ମାଡ଼ାନ୍ ୱେଲେ ବାତ୍ ପାଡ଼୍‍ୟିତଡ଼୍ ଦାର୍ମାମ୍ ଆସ୍ ମାନଣ୍ଡ୍ ?
JAM 2:22 ମିଡ଼୍ ଉଡ଼ୁତିଡ଼୍ ଯେ ବିଶ୍ୱାସ୍ ଅନ୍‌ ତଡ଼୍ ମାତ୍‍ତେ, ମେଣ୍ଡେ ଆଦ୍ ପାଡ଼୍‍ୟିତଡ଼୍ ବିଶ୍ୱାସ୍ ନିଜାମ୍ ଆତ୍‍ତେ;
JAM 2:23 ଆଗାଙ୍କ୍ ଶାସ୍ତ୍ରତାଗ୍ ଇଦ୍ ଲେକ୍‍ତେ ବାକ୍ୟ ସାରେ ଆତ୍‍ତେ, ଅବ୍ରାହାମ୍‌ ଇଶ୍ୱର୍‌ତାଗ୍ ବିଶ୍ୱାସ୍ ମାଡ଼୍‍ତଣ୍ଡ୍, ମେଣ୍ଡେ ଆଦ୍ ଅଂକିଙ୍କ୍‌ ଦାର୍ମାମ୍ ମାଡ଼୍‍ତେ, ମେଣ୍ଡେ ଅଣ୍ଡ୍‌ ଇଶ୍ୱର୍‌ତେ ସାଙ୍ଗ ଇଞ୍ଜ ପେଦେର୍ ଆତ୍‍ତେ ।
JAM 2:24 ଆସାମ୍ ବିଶ୍ୱାସ୍ ମାଡ଼୍‍କେ ଯେ ଦାର୍ମାମ୍ ଆୟ୍‍ୟଣ୍ଡ୍ ପାଡ଼୍‍ୟି ମାଡ଼୍‍କେ ଦାର୍ମାମ୍ ଆଦ୍‍ତନ୍, ଇଦ୍ ମିଡ଼୍ ଉଡ଼ୁତିଡ଼୍ ।
JAM 2:25 ଆଦେ ରକମ୍ ଦାରି ରାହାବ ଦୂତ୍‍କିଂଙ୍କ୍ ନିଜେତ୍ ମାଡ଼ି ମେଣ୍ଡେ ଅଣ୍ଡ୍‌ ହାର୍ ଇସ୍ ଆୱିଙ୍କ୍ ରହସିତ୍‍ତାଙ୍କ୍ ବାତ୍ ପାଡ଼ୟିତଡ଼୍ ଦାର୍ମାମ୍ ଆୟ୍‍ୟଣ୍ଡ୍ ?
JAM 2:26 ବାତେଙ୍କ୍ଇତ୍‍କେ ଆତ୍ମା ୱିଡ଼୍‍ସି ବେଲା ମେନ୍ଦୁଲ୍ ଡଲିତ୍, ଆଦେ ରକମ୍ ପାଡ଼୍‍ୟି ୱିଡ଼୍‍ସି ବିଶ୍ୱାସ୍ ଡଲିତ୍ ।
JAM 3:1 ଆ ନା ଦାଦାଲଡ଼ି ନୁ ଏଲାସ୍କ୍‍, ମିଡ଼୍ ନାର୍‍ଗେ ମେସ୍ତେରିଡ଼୍ ଆୟ୍‍ମାଟ୍; ମେସ୍ତେରି ଯେ ମାନାଡ଼୍, ମାନାଡ଼୍ ନାର୍‍ଗେ ଦଣ୍ଡ୍ ପାଏମ୍ ଆଦ୍‍ତାଡ଼୍, ଇଦ୍ ପୁଞ୍ଜ୍‍ମାନୁଟ୍ ।
JAM 3:2 ଆଦିଙ୍କ୍ ମାନାଡ଼୍ ନାର୍‍ଗେ ବିଷୟ୍‍ତାଗ୍ ମଦଲ୍ ଆଦ୍‍ତାଡ଼୍ । ଯଦି ବେନ ବାକ୍ୟତାଗ୍ ମଦଲ୍ ଆନଣ୍ଡ୍, ଆଲେକେ ଅଣ୍ଡ୍‌ ନିଜାତେ ନାରୁଡ଼୍, ସାର୍‍ରେ ମେନ୍ଦୁଲ୍‍ତିଙ୍କ୍ ଗାଲା ନିଜେତ୍ ଆଦିନ୍ ମାଡ଼େ ପାର୍‍ଦ୍‍ତଣ୍ଡ୍ ।
JAM 3:3 ମାନାଡ଼୍ ଗୁରାକିଂଙ୍କ୍ ନିଜେତ୍ ଆଦିନ୍ ମାଡ଼ାନ୍ ସେଙ୍ଗେ ଆ ପାୟୁର୍‍ତାଗ୍ ଲଗାମ୍ ଇତ୍‍କେ, ତାନ୍ ପେର୍‍କେ ଆୱୁ ସାର୍‍ରେ ମେନ୍ଦୁଲ୍‍ତିଙ୍କ୍ ଗାଲା ଉଡ଼୍‍ସ୍ପ ପାର୍‍ତାଡ଼୍ ।
JAM 3:4 ଉଡ଼ାଟ୍, ଏର୍‍ ଜାହାଜ୍ ଇସର୍ ବାଡ଼୍‍ୟାଦ୍ ଆସ୍ ଗାଟି ଗାଲ୍ ତଡ଼୍ ଆତ୍‍କେ ଗାଲା ଅଣ୍ଡୟ୍‌ ସୁଦୁରାଦ୍ ମଙ୍ଗ କଅତାନ୍‍ ଉକୁଡ଼୍‍ ତଡ଼୍ ଉକୁଡ଼୍‍ତିଙ୍କ୍ ପୟ୍‍ତେନଣ୍ଡ୍‍ତେ ଇଚ୍ଛାତେ ଆଦ୍‍ତେ ।
JAM 3:5 ଆଦେ ରକମ୍ ୱାଞ୍ଜେର୍ ଗାଲା ଅଣ୍ଡୟ୍‌ ସୁଦୁରାଦ୍ ଆୱୁଙ୍ଗ୍, ଇତ୍‍କେ ବାଡ଼୍‍ୟା ଗଟି କେତିତ୍‍ । ଉଡ଼ାଟ୍, ବେସର୍ ସୁଦୁର୍ କିସ୍ ତାଡ଼୍‍ମି ତଡ଼୍ ଗାଟି ବେଡ଼୍‍ୟାଦ୍‍ ଗୁପ୍‍ପେତାଗ୍ କିସ୍ ନିଡ଼୍‍ତିତ୍ ।
JAM 3:6 ୱାଞ୍ଜେର୍ ଗାଲା କିସ୍ ଲେକାମ୍; ନାର୍ଗେ କାରାପ୍ କାମ୍‍ଦେ ନିଣ୍ଡିମିନ୍ଦେ; ମେଣ୍ଡେ ଆଦ୍ ମାନ୍‍ ମେନ୍ଦୁଲ୍‍ ତାଗେ ମାନ୍‍ନାଙ୍କ୍ ଆସତ୍ ପ୍ରବାବ ହେକାମ୍ ମାଡ଼ି ମାନାଦ୍‍ ସାରେ ବିଶ୍ୱାତିଙ୍କ୍ କଲୁଷିତ ମାଡ଼ିତେ । ୱାଞ୍ଜେର୍‍ତେ ନର୍‍କ କିସ୍‍ ମାନାଦ୍‍ ସାରେ ଜିୱେତିଙ୍କ୍ ନିଡ଼୍‍ସ୍ପିଦେ ।
JAM 3:7 ଇତ୍‍କେ ସାର୍‍ରେ ଲେକାତ୍ ଜିୱାକ୍, ପିଟେ, ଚିଟି‍କ ଆଦାନ୍‍ ଜୀୱାକ୍‍ ନୁ ଏର୍‍ଦାଗ୍‍ ମାନ୍ଦାନ୍ ଜିୱୁକିଂଙ୍କ୍ ନାରୁଡ଼୍ ତଡ଼୍ ଆଦିନ୍ ମାଡ଼ାନଙ୍କ୍ ଆଦ୍‍ତେ, ମେଣ୍ଡେ ଅଦିନ୍‌ତାଗ୍ ନେଃଏସ୍ ମିନ୍ଦେ;
JAM 3:8 ଇତ୍‍କେ ୱାଞ୍ଜେର୍‍ତିଙ୍କ୍ ବେନ ଅଦିନ୍‌ତାଗ୍ ନେଃଏତାନଙ୍କ୍ ପାର୍‍ୱଣ୍ଡ୍, କାରାପ୍ ଗଟି କେତାନଙ୍କ୍ ଆଦ୍ ନିତ୍‍ତ, ଗାଟି ବୟଙ୍କାର୍ ୱିସାମ୍ ତଡ଼୍ ଆଦ୍ ବର୍ତ୍ତି ଆତ୍‍ତେ ।
JAM 3:9 ମାନାଡ଼୍ ୱାଞ୍ଜେର୍‍ ତଡ଼୍ ପ୍ରବୁ ନୁ ବାବାଙ୍କ୍ ଦନ୍ୟବାଦ୍ ମାଡ଼ିତାଡ଼୍, ମେଣ୍ଡେ ଇଶ୍ୱର୍ ଲେକାମ୍ ତିୟାର୍ ଆତ୍‍ତେ ନାରୁଡ଼୍‍କିଂଙ୍କ୍ ଅବିଶାପ୍‌ ଇଦ୍‍ତାଡ଼୍;
JAM 3:10 ଅଣ୍ଡୟ୍‌ ପାୟୁର୍‍ତେ ଆଲା ଦନ୍ୟବାଦ୍ ନୁ ଅବିଶାପ୍‌ ପେୟ୍‍ତିତ୍ । ଆ ନା ଦାଦାଲଡ଼ି ନୁ ଏଲାସ୍କ୍‍, ଇଦ୍ ରକମ୍ ଆଦାନାଦ୍ ଟିକ୍ ଆୟ୍‍ୟ ।
JAM 3:11 ବେଡ଼େମ୍ ବାତ୍ ଅଣ୍ଡୟ୍‌ ଦନ୍ଦ୍‍ ଇସ୍ ମିଙ୍ଗ୍‍ତାଦ୍ ନୁ କାୟ୍‍ତାଦ୍ ରେଣ୍ଡ୍ ଲେକାତ୍ ଏର୍‍ ପେସ୍ପିତ୍ ?
JAM 3:12 ଆ ନା ଦାଦାଲଡ଼ି ନୁ ଏଲାସ୍କ୍‍, ତୟେ ମାଡ଼େତାଗ୍ ବାତ୍ ଜୀତ କାୟା ଆଦିତା, କି ଅଙ୍ଗୁର୍‌ ଟଣ୍ଡେତାଗ୍ ବାତ୍ ତୟେ କାୟା ଆଦାନଙ୍କ୍ ପାର୍‍ଦ୍‍ତେ ? ଅୱଡ଼୍‌ ବେଡ଼େଡ଼୍ ମିକା ମିଙ୍ଗ୍‍ତାଦ୍ ଏର୍‍ ଇଦାନଙ୍କ୍ ପାର୍‍ୱ ।
JAM 3:13 ମିଇ ଲୋପେ ଜ୍ଞାନି ନୁ ବୁଦ୍ଦିମାନ୍ ବେନ ମିନ୍ଦେଣ୍ଡ୍ ? ଅଣ୍ଡ୍‌ ତାନ୍ ବୁଦ୍ଦ୍ ତଡ଼୍ ସାୟେ ବ୍ୟବହାର୍‌ ମାଡ଼ି ନିଜେତ୍ ପାଡ଼୍‍ୟି ମାଡ଼ିଣ୍ଡ୍ ।
JAM 3:14 ଇତ୍‍କେ ଯଦି ମିଇ ଜିୱୁଣ୍ଡ୍ ଲୋପେ ଗାଟି ଇର୍ଷା ମିନ୍ଦେ ନୁ ସ୍ୱାର୍ତପର ମିନ୍ଦେ, ଆଲେକେ ନିଜାମ୍ ବିରୁଦ୍‍ତେ ଗର୍ବ ମାଡ଼୍‍ମାଟ୍ ନୁ ମିଚ୍ କେଲ୍‍ମାଟ୍ ।
JAM 3:15 ଇଦ୍ ରକମ୍ ବୁଦ୍ଦ୍‌ ଇଶ୍ୱର୍‍ କନ୍‍ସ୍ ୱାଡ଼, ମାତର୍ ଆଦ୍ ପୃତିବିତାଦ୍, ମେନ୍ଦୁଲ୍‍ତାଦ୍ ନୁ ବୁତିକ ପାଡ଼୍‍ୟି;
JAM 3:16 ବାତେଙ୍କ୍ଇତ୍କେ ବେନ୍ ପଡ଼୍‍ୟେତାଗ୍ ଆଙ୍କାର୍ ନୁ ସ୍ୱାର୍ତପର ମାନ୍‍ତେ, ଆଦ୍ ପଡ଼୍‍ୟେତାଗ୍ ବିଶୃକଲା ନୁ ସାର୍‍ରେ ରକମ୍ କାରାପ୍ ପାଡ଼୍‍ୟି ମାନ୍‍ତେ ।
JAM 3:17 ଇତ୍‍କେ ପର୍‍ର କନ୍‍ସ୍ ୱାତ୍‍ତେ ବୁଦ୍ଦ୍‌ ପବିତ୍ର, ଶାନ୍ତି, ସାୟେ, ମାଡ଼ାଙ୍କ୍‍ ୱେୟ୍‍ତିତ୍‍, ଦୟା ନୁ ଲେକେତ୍‍ ଆସ୍‍ମାନ୍‍ତେ, ଡାୱୁଟ୍‍ ଇଲ୍‍ଲେ ନୁ ଆଦ୍ ଚଲନା ଇଲ୍‍ଲେ ।
JAM 3:18 ମେଣ୍ଡେ ଆଦ୍ ଶାନ୍ତି ଇଦାନ୍ ନାରୁଡ଼୍ ତଡ଼୍ ଦାର୍ମାମ୍ ଲେକାମ୍ କାୟେତ୍ ପେଡ଼େମ୍ ୱିତାନଙ୍କ୍ ଆଦ୍‍ତେ ଦାର୍ମାମ୍‌ ୱିଜେ କୟ୍‍ତିତଡ଼୍‍ ।
JAM 4:1 ମିଇ ଲୋପେ ଗଲ୍‍କ୍ ନୁ ଯୁଦ୍‌ ବେଗାକନ୍‍ସ୍ ଆଦୁତ୍‍ତେ ? ବାତ୍ ମିଡ଼୍ ଡେକା କାୟ୍‍କିନ୍ ତଡ଼୍ ଯୁଦ୍‌ ମାଡ଼ମାନ୍ଦାନ୍ ୱାସ୍‍ତେ ଆଶେତାଗାଙ୍କ୍ ଆୟ୍‍ୟ ?
JAM 4:2 ମିଡ଼୍ ଆସିତିଡ଼୍; ବାତେଙ୍କ୍‍ଇତ୍କେ ପାହେମ୍ ଆୟ୍‍ୱିଡ଼୍‍; ମିଡ଼୍ ଆୱୁକିତିଡ଼୍ ନୁ ଇର୍ଷା ମାଡ଼ିତିଡ଼୍, ଇତ୍କେ ପାହେମ୍ ଆୟ୍‍ୱିଡ଼୍; ମିଡ଼୍ ଗଲକ୍ ନୁ ଯୁଦ୍‌ ମାଡ଼ିତିଡ଼୍, ମିଡ଼୍ ପାହେମ୍ ଆୟ୍‍ୱିଡ଼୍, ବାତେଙ୍କ୍‍ଇତ୍କେ ମିଡ଼୍ ଇଶ୍ୱର୍‌ତିଙ୍କ୍ ତାଲ୍‍ୱିଡ଼୍ ।
JAM 4:3 ମିଡ଼୍ ତାଆଲ୍‍କ୍‍ତିଡ଼୍, ଇତ୍‍କେ ମିକିଂଙ୍କ୍ ଦର୍‍କ, ବାତେଙ୍କ୍ଇତ୍କେ ନିଜେତ୍ ନିଜେତ୍ ସୁକାମ୍‍ତେ ମାୟ୍‍ଦିଙ୍କ୍ ବ୍ୟବହାର୍‌ ମାଡ଼ାନ୍ ସେଙ୍ଗେ କାରାପ୍ ଚିନ୍ତେ ତଡ଼୍ ତାଆଲ୍‍କ୍‍ତିଡ଼୍ ।
JAM 4:4 ବିଶ୍ୱାସ୍‍ତିଙ୍କ୍‍ ଉଃତାନଡ଼ି, ଜଗତ୍‍ତିଙ୍କ୍ ସାଙ୍ଗ ମାଡ଼୍‍କେ ଇଶ୍ୱର୍‌ତେ ଶତ୍ରୁଡ଼୍ ଆଦ୍‍ତିଡ଼୍, ଇଦ୍ ବାତ୍ ପୁନ୍‍ୱିଡ଼୍ ? ଆଦିଙ୍କ୍ ବେନ ଜଗତ୍‍ତିଙ୍କ୍ ସାଙ୍ଗ ମାଡ଼ାନଙ୍କ୍ ଆଲ୍‍ସିତିଡ଼୍; ଅଣ୍ଡ୍‌ ଇଶ୍ୱର୍‌ତେ ବିରୁଦ୍ଦି ଆଦ୍‍ତନ୍ ।
JAM 4:5 ଆୟକ୍‍ ମିଡ଼୍ ବାତ୍ ଇଦ୍ ଦର୍ମଶାସ୍ତ୍ରତାଦ୍ ବାକ୍ୟତିଙ୍କ୍ ମିଚ୍ ଇଞ୍ଜ ଆଲ୍‍ସୁତିଡ଼୍; ଇଶ୍ୱର୍‍ ମାନାଗାଙ୍କ୍ ବେନ୍ ଆତ୍ମାତିଙ୍କ୍ ଅଣ୍ଡ୍‌ ମାନ୍‍ ଲୋପେ ବାଦ୍‍କାନଙ୍କ୍ ପଡ଼୍‍ୟେ ଇସ୍ ମିନ୍ଦେଣ୍ଡ୍, ଅଣ୍ଡ୍‌ ମାନ୍‍ ସାରେ ଅଦିକାର୍‌ ମାଡ଼ାନ୍ ସେଙ୍ଗେ ବେଲାବା ଚିନ୍ତେ ମାଡ଼ିତନ୍ ?
JAM 4:6 ଇତ୍‍କେ ଅଣ୍ଡ୍‌ ଗାଲା ନାର୍ଗେ ଅନୁଗ୍ରହ ହିଦ୍‍ତଣ୍ଡ୍; ଆଦିଙ୍କ୍ ଶାସ୍ତ୍ରତାଗ୍‍ ଲେକ୍‍ତାଦ୍ ମିନ୍ଦେ, “ଇଶ୍ୱର୍ ଆଂକାର୍ ନାରୁଡ଼୍‍କିଂଙ୍କ୍ ବିରୁଦ୍ ମାଡ଼ିତନ୍, ଇତ୍‍କେ ନମ୍ର ନାରୁଡ଼୍‍କିଂଙ୍କ୍ ଅନୁଗ୍ରହ ହିଦ୍‍ତଣ୍ଡ୍ ।”
JAM 4:7 ଆଦିଙ୍କ୍ ମିଡ଼୍ ଇଶ୍ୱର୍‌ତାଗ୍ ମାନୁଟ୍; ଶୟ୍‍ତାନ୍‍ତିଙ୍କ୍ ଦମକ୍ ଇମୁଟ୍, ଆଲେକେ ଆଦ୍ ମିୟାଗାଙ୍କ୍ ମିରିଆଦ୍‍ତେ ।
JAM 4:8 ଇଶ୍ୱର୍‌ତେ ଗାର୍‍ରେ ଆୟମୁଟ୍, ଆଲେକେ ଅଣ୍ଡ୍‌ ମିଇ ବକେତ୍ ମାନ୍‍ତଣ୍ଡ୍ । ଆ ପାପିଲଡ଼ି, ମିଡ଼୍ କାୟ୍‍କିଂଙ୍କ୍ ଲେକେତ୍ ମାଡ଼ାଟ୍, ମେଣ୍ଡେ ଆ ରେଣ୍ଡ୍ ମାନ୍‍ତଡ଼ି, ମିଡ଼୍ ମିୟାଦ୍ ହୃଦୟ୍‍ତିଙ୍କ୍ ଲେକେତ୍ ମାଡ଼ାଟ୍ ।
JAM 4:9 ମିୟାଦ୍ ୱେଡ଼୍‍କେ ୱିସାମ୍ ଆୟି । ମିୟାଦ୍ ୱେଡ଼୍‍କେ ଆୟିୱେ ଲେକାତ୍ ୱେଡ଼୍‍କେ ଆୟି ।
JAM 4:10 ପ୍ରବୁନ୍ ମୁନ୍‍ନେ ମିଡ଼୍ ମଡ଼୍‍କାଟ୍, ଆଲେକେ ଅଣ୍ଡ୍‌ ମିକିଂଙ୍କ୍ ପର୍‍ର ତେଏତିତଣ୍ଡ୍ ।
JAM 4:11 ଆ ଦାଦାଲଡ଼ି ନୁ ଏଲାସ୍କ୍‍, ମିଡ଼୍ ନିଜେତ୍ ନିଜେତ୍ ଲୋପେ ନିନ୍ଦେ ମାଡ଼୍‍ମାଟ୍ । ବେନ ତାମୁଣ୍ଡ୍‍ତେ ନିନ୍ଦେ ମାଡ଼ିତନ୍ କି ତାମୁଣ୍ଡ୍‍ତାଗ୍ ବିଚାର୍ ମାଡ଼ିତନ୍, ଅଣ୍ଡ୍‌ ନିୟମ୍‍ତିଙ୍କ୍ ନିନ୍ଦେ ମାଡ଼ିତନ୍ ନୁ ଆଦିଙ୍କ୍ ବିଚାର୍ ମାଡ଼ିତନ୍; ଇତ୍‍କେ ମିଡ଼୍ ଯଦି ନିୟମ୍‍ତାଦ୍ ବିଚାର୍ ମାଡ଼ିତିଡ଼୍, ଆଲେକେ ମିଡ଼୍ ଆଦିନ୍ ପାଲନ୍ ମାଡ଼ାନଡ଼ି ଆୟ୍‍ୱିଡ଼୍ ମିଡ଼୍ ଆଦିନ୍ ବିଚାର୍ ମାଡ଼ାନଡ଼ି ।
JAM 4:12 ନିୟମ୍ ମାଡ଼ାନଣ୍ଡ୍ ନୁ ବିଚାର୍ ମାଡ଼ାନଣ୍ଡ୍ ମାତର୍ ୱେରଣ୍ଡେ, ଅଣ୍ଡ୍‌ ରକ୍ଷା ମାଡ଼ାନଙ୍କ୍ ନୁ ଆୱୁକାନଙ୍କ୍ ପାର୍‍ଦ୍‍ତଣ୍ଡ୍; ଇତ୍‍କେ ଗାରେତଡ଼୍‍କିଂଙ୍କ୍ ବିଚାର୍ ମାଡ଼ୁତିଡ଼୍ ଯେ, ମିଡ଼୍ ବେନ ?
JAM 4:13 ଇଞ୍ଜେ ଉଡ଼ାଟ୍, ବେନଡ଼୍ କେତୁତିଡ଼୍, ନେଣ୍ଡ୍ କି ନାଡ଼୍ ମାନାଡ଼୍ ଅଣ୍ଡୟ୍‌ ଟାଉନ୍‍ତାଗ୍ ଆଦ୍‍ତାଡ଼୍ ନୁ ଆଗେ ଅଣ୍ଡୟ୍‌ ଏଣ୍ଡ୍ ମାଞ୍ଜ୍ ବେପାର୍ ମାଡ଼ି ଗାଟି ଲାବ୍ ମାଡ଼ିତାଡ଼୍;
JAM 4:14 ଇତ୍‍କେ ନାଡ଼୍ ବାତ୍ ଗଟେମ୍ ଆଦ୍‍ତେ, ଆଦ୍ ମିଡ଼୍ ପୁନ୍‍ୱିଡ଼୍ । ମିୟାଦ୍ ଜିୱୁଣ୍ଡ୍ ବାତ୍ ? ସେନେକ୍‍ତିଙ୍କ୍ ତନ୍ଦି ମେଣ୍ଡେ ତନ୍ଦି ଆସତ୍ ଗୁମାମ୍‍, ମିଡ଼୍ ତ ଆଦେଲେକେତଡ଼ି ।
JAM 4:15 ଆଦିଙ୍କ୍ ପ୍ରବୁନ୍ ମାନ୍‍ ଆତ୍‍କେ ମାନାଡ଼୍ ଜିୱେ ମାଞ୍ଜ୍ ଇଦ୍ ମାଡ଼ିତାଡ଼୍ ବା ଆଦ୍ ମାଡ଼ିତାଡ଼୍, ଇଦ୍ ରକମ୍ କେତାନାଦ୍ ମିକିଂଙ୍କ୍ ସାୟ୍‍ ।
JAM 4:16 ଇତ୍‍କେ ମିଡ଼୍ ଇଞ୍ଜେ ନିଜେତ୍ ଆଂକାର୍ ମାୟ୍‍ଦିଙ୍କ୍ ଗର୍ବ ମାଡ଼ୁତିଡ଼୍; ଇଦ୍ ରକମ୍ ଗର୍ବ ମାଡ଼ାନାଦ୍ ସାୟେ ଆୟ୍‍ୟ ।
JAM 4:17 ହେର୍କେ ମାଡ଼ାଟ୍ ବେନ ନାରୁଣ୍ଡ୍ ନିଜାତେ ପାଡ଼୍‍ୟି ମାଡ଼ାନଙ୍କ୍ ନାଡ଼୍‍ସି ଆଦ୍ ମାଡ଼କ୍, ଅଂକିଙ୍କ୍‌ ପାପ୍ ତାଲ୍‍ଗିତ୍ ।
JAM 5:1 ହୋ ସାଉକାର୍ ନାରୁଡ଼ି, ନା ଗଟି କେଞ୍ଜାଟ୍ । ମିୟାଦ୍ ୱାଦାନ୍ ବିପଦ୍ ସେଙ୍ଗେ କେୟାଟ୍ ନୁ ଦୁଃକାମ୍ ଆୟ୍‍ମୁଟ୍ ।
JAM 5:2 ମିୟାଦ୍ ସମ୍ପତି ମାୟି ଆଦୁତ୍‍ତେ, ମିୟାଦ୍ ଚକାସିଲେଙ୍କ୍ ହେଲୁମ୍ ତିନ୍ଦୁତ୍,
JAM 5:3 ମେଣ୍ଡେ ମିୟାଦ୍ ସୁନା ନୁ ରୁପାତାଗ୍ କାର୍‍କେ ପୟ୍‍ଦୁତ୍; ଆଗେତାଦ୍ କାର୍‍କେ ମିୟାଦ୍ ସାକ୍ଷି ଆଦ୍‍ତେ ନୁ କିସ୍ ଲେକାମ୍ ମିୟାଦ୍ ମେନ୍ଦୁଲ୍‍ତିଙ୍କ୍ ପୟ୍‍ତିତ୍ । ଇଦ୍ ତେରାନ୍ ଦିନାତେ ମିଡ଼୍ ଦନ୍ ନେଃଏସ୍ ମିନ୍ଦେଡ଼ି !
JAM 5:4 କେଞ୍ଜାଟ୍, ମିୟାଦ୍ ୱାୟାନାଗ୍ ପାଡ଼୍‍ୟି ମାଡ଼ାନଡ଼୍‍କିଂଙ୍କ୍ ବୁସା ମାଡ଼ି ମିଡ଼୍ ଅଡ଼୍‌‍କିଂଙ୍କ୍ ଦାମ୍ ଇୱିଡ଼୍, ଆଦ୍ କିଡ଼୍‍କୁତ୍, ମେଣ୍ଡେ ପାଡ଼୍‍ୟି ମାଡ଼ାନଡ଼୍‍ତେ ପ୍ରବୁନ୍ କେୱୁଦାଗ୍ ଇଦ୍ ଗଟ୍ ଏୱୁତ୍‍ତେ ।
JAM 5:5 ମିଡ଼୍ ଜଗତ୍‍ତାଦ୍ ସୁକାମ୍‍ତେ ନୁ ବଗ୍‍ବିଲାସ୍‍ ତଡ଼୍ ବାଦ୍‍କ୍‍ତିଡ଼୍, ଆୱୁକି ତିନ୍ଦାନ୍‍ ଲେକାମ୍‍ ମେନ୍ଦୁଲ୍‍ ଆସ୍‍ ମିନ୍ଦେଡ଼ି । ଡଲାନ୍ ଦିନେତେ ନିଜେ ନିଜେ ମାନ୍‍ଦିଙ୍କ୍ ଶାନ୍ତି ମାଡ଼୍‍ତିଡ଼ ।
JAM 5:6 ମିଡ଼୍ ଦାର୍ମାମ୍ ନାରୁଡ଼୍‍କିଂଙ୍କ୍ ଦଷି ମାଡ଼ି ଆୱୁକ୍‍ତିଡ଼୍; ଅଣ୍ଡ୍‌ ମିକିଂଙ୍କ୍ ବିରଦ୍ ମାଡ଼େ ପାର୍‍ୱଣ୍ଡ୍ ।
JAM 5:7 ଆଦିଙ୍କ୍ ଆ ଦାଦାଲଡ଼ି ନୁ ଏଲାସ୍କ୍‍, ପ୍ରବୁ ୱାଦାନ୍ ଯାକ ମିଡ଼୍ ଦର୍ଯ୍ୟ ପୟ୍‍ସ୍ ମାନୁଟ୍ । ଉଡ଼ାଟ୍, ଉଡ଼୍‍ଦାନ୍ ୱାୟେତାଗାଙ୍କ୍ ଗାଟି ଦାମ୍ କାୟା ଦର୍‍କ୍ନା ଯାକ ଦର୍ଯ୍ୟ ପୟ୍‍ସ୍ ମୁନେତ୍ ନୁ ତେରାନ୍ ୱାର୍‍ସାମ୍ ୱାଦାନ୍ ଯାକ କେପିତଡ଼୍ ।
JAM 5:8 ମିଡ଼୍ ଗାଲା ଶକ୍ତିତଡ଼୍ ପୟ୍‍ସ୍ ନିଜେତ୍ ନିଜେତ୍ ଜିୱୁଣ୍ଡ୍‍ତିଙ୍କ୍ କଟ ମାଡ଼ାଟ୍, ବାତେଙ୍କ୍ଇତ୍‍କେ ପ୍ରବୁ ୱାଦାନାଦ୍ ଦିନାମ୍ ଗାର୍ରେ ଏୱୁତ୍‍ତେ ।
JAM 5:9 ଆ ଦାଦାଲଡ଼ି ନୁ ଏଲାସ୍କ୍‍, ମିଡ଼୍ ବେଲା ବିଚାର୍ ଆୟ୍‍ୱିଡ଼୍, ଆଦିନ୍ ସେଙ୍ଗେ ନିଜେତ୍ ନିଜେତ୍ ଲୋପେ ପେର୍‍ଲ୍‍ମାଟ୍, ଉଡ଼ାଟ୍, ବିଚାର୍ କର୍ତ୍ତାଲ୍ ମାର୍ ଗାରେ ନିସ୍ ମିନ୍ଦେଣ୍ଡ୍ ।
JAM 5:10 ଆ ଦାଦାଲଡ଼ି ନୁ ଏଲାସ୍କ୍‍, ବେନ୍ ବାବବାଦିଡ଼୍ ପ୍ରବୁନ୍ ପେଦେର୍‍ତେ ଗଟି କେସ୍ ମାତ୍‍ତଡ଼୍, ଅଡ଼୍‌‍କିଂଙ୍କ୍ ଦୁଃକାମ୍ ନୁ ଦର୍ଯ୍ୟତାଦ୍ ୱେଷଡ଼୍ ଇନା ପୟ୍‍ମୁଟ୍ ।
JAM 5:11 ଉଡ଼ାଟ୍, ବେନଡ଼୍ ଗାଡ଼୍‍ସ୍ ଆସ୍ ମାତ୍‍ତଡ଼୍ ଅଡ଼୍‌‍କିଂଙ୍କ୍ ମାମ୍‍ମେ ଦନ୍ୟ ଇଞ୍ଜ କେତିତମ୍ । ମିଡ଼୍ ଆୟୁବନ୍ ଗାଡ଼୍‍ସ୍ ଗଟି କେଞ୍ଜି ମାତ୍‍ତିଡ଼୍, ମେଣ୍ଡେ ପ୍ରବୁନ୍ ତେରାନ୍ ପାଡ଼୍‍ୟି ଉଡ଼ି ପୁତ୍‍ତିଡ଼୍ ଯେ, ଅଣ୍ଡ୍‌ ଦୟାତଣ୍ଡ୍ ନୁ କୃପା ମାଡ଼ାନଣ୍ଡ୍ ।
JAM 5:12 ଆଦିଙ୍କ୍ ହୋ ନା ଦାଦାଲଡ଼ି ନୁ ଏଲାସ୍କ୍‍, ଶପତ୍ ମାଡ଼୍‍ମାଟ୍, ସ୍ୱର୍ଗତାଦ୍ ଆୟି ବା ପୃତିବିତାଦ୍ ଆୟି କି ମେଣ୍ଡେ ବାତ୍ ବିଷୟ ଅସ୍ ଶପତ୍ ମାଡ଼୍‍ମାଟ୍; ଆଦିଙ୍କ୍ ମିଇ ଗଟି ହଁ ତାଦ୍ ହଁ ଆୟି, ଇଲ୍‍ଲେ ତାଦ୍ ଇଲ୍‍ଲେ ଆୟି, ବେଲାକି ମିଡ଼୍ ବିଚାର୍ ମାଡ଼ାନାଗ୍ ଦଣ୍ଡ୍ ଆୟ୍‍ୱିଡ଼୍ ।
JAM 5:13 ମିଇ ଲୋପେ ବାତ୍ ବେନ ଦୁଃକାମ୍ ପାଏମ୍ ଆଦୁତନ୍ ? ଅଣ୍ଡ୍‌ ପ୍ରାର୍ତନା ମାଡ଼ିଣ୍ଡ୍ । ବେନବା ୱେଡ଼୍‍କ୍‍ ମିନ୍ଦେଣ୍ଡ୍ ? ଅଣ୍ଡ୍‌ ପାଟା ପାରି ପ୍ରଶଂସା ମାଡ଼ିଣ୍ଡ୍‍ ।
JAM 5:14 ମିଇ ଲୋପେ ବାତ୍ ବେନ ରୋଗି ମିନ୍ଦେଣ୍ଡ୍ ? ଅଣ୍ଡ୍‌ ମଣ୍ଡଲିତେ ନେତା ନଡ଼୍‍କିଂଙ୍କ୍ କାର୍‍ଙ୍ଗିଣ୍ଡ୍; ଅଡ଼୍‌ ପ୍ରବୁନ୍ ପେଦେର୍‍ତେ ନିୟ୍‍ ଉଃସି ଅନ୍‌ ସେଙ୍ଗେ ପ୍ରାର୍ତନା ମାଡ଼ିଣ୍ଡ୍ ।
JAM 5:15 ବିଶ୍ୱାସ୍‍ତାଦ୍ ପ୍ରାର୍ତନା ଆଦ୍ ରୋଗିଙ୍କ୍ ରକ୍ଷା ମାଡ଼ିତ୍, ମେଣ୍ଡେ ପ୍ରବୁ ଅଂକିଙ୍କ୍‌ ତେଏତିତଣ୍ଡ୍; ମେଣ୍ଡେ ଯଦି ଅଣ୍ଡ୍‌ ପାପ୍ ମାଡ଼ିମାନ୍‍ତଣ୍ଡ୍, ଆଲେକେ ଅଂକିଙ୍କ୍‌ କ୍ଷମା ହିଦ୍‍ତଣ୍ଡ୍ ।
JAM 5:16 ଆଦିଙ୍କ୍ ନିଜେତ୍ ନିଜେତ୍ ଲୋପେ ପାପ୍ ସ୍ୱୀକାର୍ ମାଡ଼ାଟ୍, ମେଣ୍ଡେ ସାୟେ ଆଦାନ୍ ସେଙ୍ଗେ ନିଜେତ୍ ନିଜେତ୍ ଲୋପେ ପ୍ରାର୍ତନା ମାଡ଼ାଟ୍ । ଦାର୍ମାମ୍ ନାରୁଣ୍ଡ୍‍ତେ ପ୍ରାର୍ତନା ନାର୍‍ଗେ ପାଡ଼୍‍ୟି ମାଡ଼ାନଙ୍କ୍ ପାର୍‍ଦ୍‍ତେ ।
JAM 5:17 ଏଲୀୟ ମାନ୍‍ ରକମ୍ ନାରୁନ୍ ମାତ୍‍ତଣ୍ଡ୍, ୱାର୍ସାମ୍ ୱାଡ଼୍‍ମାକି ଇଞ୍ଜ ଅଣ୍ଡ୍‌ ଅଣ୍ଡୟ୍‌ ମାନ୍‍ତେ ପ୍ରାର୍ତନା ମାଡ଼୍‍ତଣ୍ଡ୍, ମେଣ୍ଡେ ମୁଣ୍ଡ୍ ଏଣ୍ଡ୍‍କ୍ ନୁ ଆରୁ ନେଲ୍‍ଞ୍ଜ୍ ଯାକ ଦେଶ୍‍ତାଗ୍‍ ୱାର୍ସାମ୍ ୱାଡ଼;
JAM 5:18 ଅଣ୍ଡ୍‌ ମେଣ୍ଡନ୍‍ନ୍ଦାମ୍ ପ୍ରାର୍ତନା ମାଡ଼୍‍ତାଙ୍କ୍ ମୟଲ୍‍ତାଗାଙ୍କ୍ ୱାର୍ସାମ୍ ୱାତ୍‍ତେ, ମେଣ୍ଡେ ବୁମ୍‌ତାଗା ପସଲ୍‍ ଆଦ୍‍ତା ।
JAM 5:19 ଆ ନା ଦାଦାଲଡ଼ି ନୁ ଏଲାସ୍କ୍‍, ମିଇ ଲୋପେ ବେନ ଯଦି ସତ୍ ହାର୍‍ଦିଙ୍କ୍ ବୁଲ୍‍କା ଆଦ୍‍ତନ୍, ମେଣ୍ଡେ ବେନ୍ ଅଂକିଙ୍କ୍‌ ସତ୍‍ ହାର୍‍ଦାଗ୍ ମାଲ୍‍ପି ତାତିତଣ୍ଡ୍,
JAM 5:20 ଆଲେକେ ଅଣ୍ଡ୍‌ ପାପି ନାରୁଙ୍କ୍ ବୁଲ୍‍କା ହାର୍‍ଦାଗାଙ୍କ୍ ମାଲ୍‍ପି ତାତ୍‍ତଣ୍ଡ୍, ଅଣ୍ଡ୍‌ ଯେ ତାନ୍ ଆତ୍ମାତିଙ୍କ୍ ଡଲାନାଗାଙ୍କ୍ ରକ୍ଷା ମାଡ଼୍‍ତଣ୍ଡ୍ ନୁ ନାର୍‍ଗେ ପାପ୍‍ତିଙ୍କ୍ ୱିଡ଼୍‍ସିଦ୍‍ତଣ୍ଡ୍, ଇଦ୍ ପୁତ୍‍ତିଡ଼୍ ।
1PE 1:1 ନାନ୍‍ ପିତର୍‍, ଜିସୁ କ୍ରିଷ୍ଟନ୍‍ ୱେରଣ୍ଡ୍‍ ପ୍ରେରିତ୍‍ ଶିଷ୍ୟ । ଏକାମ୍ ଆସ୍ ମାନ୍ଦାନ୍ ପନ୍ତ, ଗାଲାତୀୟା, କାପାଦକିଆ, ଏସିଆ ନୁ ବିତୁନିଆ ଦେଶ୍‍କିନାଗ୍ ଚିନ୍‍ବିନ୍‍ ଆସ୍‍ମାନ୍ଦାନ୍ ଇଶ୍ୱର୍‌ତେ ଏଞ୍ଚିମାନ୍ଦାନ୍ ନାରୁଡ଼୍‍ ଗାରେ ଇଦ୍‍ ଚିଟି ଲେକ୍‍ତାନ୍‍ ।
1PE 1:2 ମୀଇଡ଼୍ ବାବାଲ୍ ଇଶ୍ୱର୍‌ତେ ଆଲ୍‍ସାନ୍ ମନ୍‍ଦେ ଏଞ୍ଚ୍‍ତେନଡ଼୍ । ଜିସୁ କ୍ରିଷ୍ଟନ୍ ଗଟ୍ ପାଲନ୍ ମାଡ଼ି ଅନ୍‌‍ ନେତୁର୍‍ତେ ସୁସ୍ଥ ଆଦାନ୍ ସେଙ୍ଗେ ମୀଇଡ଼୍ ପରମାଆତ୍ମା ତଡ଼୍ ୱେରଡ଼୍ ପବିତ୍ର ଜିୱା ଆସ୍‍ମିନ୍ଦେଡ଼ି । ଇଶ୍ୱର୍‌ତେ ଅନୁଗ୍ରହ ନୁ ଶାନ୍ତି ନାର୍ଗେଆସ ମୀଇ ପରୁ ଆୟି ।
1PE 1:3 ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ତିଙ୍କ୍ ଦନ୍ୟବାଦ୍‍ ଇଦ୍‍ତମ୍, ବାତେଙ୍କ୍ଇତ୍କେ ଅଣ୍ଡ୍‌ ତାନ୍ ନାର୍ଗେ ଦୟାତେ ଜିସୁ କ୍ରିଷ୍ଟଙ୍କ୍ ଡଲ୍‍ତାଗାଙ୍କ୍ ତେସ୍‍ମିକା ମାନାଙ୍କ୍ ପୁନେଃ ଜିୱେ ଇତ୍‍ତନ୍ । ଇଦ୍ ମାନାଦ୍‍ ଜିୱେ ଆସେ ସାରେମାଡ଼୍‍ତନ୍ ।
1PE 1:4 ଆଦିଙ୍କ୍ ଇଶ୍ୱର୍‍ ତାନ୍ ନାରୁଡ଼୍‍ ସେଙ୍ଗେ ବେନ୍ ନାର୍ଗେ ମୁଲ୍ୟ ଆର୍ଶିବାଦ୍ ନେଃତ୍‍ତନ୍, ଆଦ୍ ପାଏମ୍ ଆଦାନ୍ ସେଙ୍ଗେ କେପିମିନ୍ଦେମ୍‍ । ଆଦ୍‍ ଅଣ୍ଡ୍‌‍ ସ୍ୱର୍ଗତାଗ୍‍ ସାୟେମାଡ଼ି ନେଃତଣ୍ଡ୍‍, ଆଗେ ଆଦ୍ ବେସୁଙ୍କ୍‍ ତେର୍‍ର, ନଷ୍ଟ ବା କାର୍‍କ୍‍ ପୟ ।
1PE 1:5 ତେରାନ୍ ଦିନେତେ ବେନ୍ ପରିତ୍ରାଣ ସାରେ ଆଦ୍‍ତେ, ଆଦ୍ ପାଏମ୍ ଆଦାନ୍ ସେଙ୍ଗେ ମିଡ଼୍ ବିଶ୍ୱାସ୍‍ ତଡ଼୍‍ ଇଶ୍ୱର୍‌ତେ ଶକ୍ତିତେ ସୁରକ୍ଷିତ୍‍ ଆତ୍‍ତିଡ଼୍ ।
1PE 1:6 ଆଦିଙ୍କ୍ ମିଡ଼୍ ୱେଡ଼୍‍କାଟ୍, ଯଦି ବା ବସ୍‍ ବେସତ୍‍ ଦୁଃକାମ୍ ସେଙ୍ଗେ ମିକିଂଙ୍କ୍ ଇଞ୍ଜେ ସୁଦୁଟ୍ ସମୟ ସେଙ୍ଗେ ଦୁଃକାମ୍ ଆଦାଙ୍କ୍ ଆଦ୍‍ପାର୍‍ଦ୍‍ତେ ।
1PE 1:7 ମିୟାଦ୍ ବିଶ୍ୱାସ୍‍ତେ ପରିସ୍କାର୍‍ତେ ପରିକ୍ଷା ମାଡ଼ାନଙ୍କ୍ ଇଦ୍ ସାରେତାଦ୍‍ ଉଦ୍ଦେଶ୍ୟ । ତେରାନ୍‍ ସୁନାତିଙ୍କ୍‍ କିସ୍‍ତାଗ୍ ପରିକ୍ଷା ମାଡ଼ିତନ୍ । ମିୟାଦ୍ ବିଶ୍ୱାସ୍ ସୁନାତାଗାଙ୍କ୍‍ ଅଦିକ୍‌ ମୁଲ୍ୟବାନ୍ ଆଇନାଙ୍କ୍ ପରିକ୍ଷାତେ ଆଦିଙ୍କ୍ ସାୟେ ମାଡ଼ାନାଦ୍‍ ଦର୍କାର୍ । ଆଦ୍ ଆଦ୍‍ଦେ ପାର୍କେ, ଜିସୁ କ୍ରିଷ୍ଟ ପ୍ରକାଶ୍‍ ଆଦାନ୍ ୱେଲେ, ମିକିଂଙ୍କ୍‍ ପ୍ରଶଂସା, ଗୌରବ୍ ନୁ ସମ୍ମାନ୍ ଦର୍କିତେ ।
1PE 1:8 ଇଞ୍ଜେ ମିଡ଼୍ ଅଙ୍କ୍‌ ଉଡ଼କଟ୍ ମାତ୍‍କେ ମିକା ପ୍ରେମ ମାଡ଼ୁତିଡ଼୍ ନୁ ଅନାଗେ ବିଶ୍ୱାସ୍ ମାଡ଼ୁତିଡ଼୍ ମେଣ୍ଡେ କେତାନଙ୍କ୍ ଆଇୱାଦ୍ ନୁ ଗୌରବ୍‍ ତଡ଼୍‍ ମିଡ଼୍‍ ସାର୍ଦେ ଆସ ମିନ୍ଦେଡ଼ି ।
1PE 1:9 ମେଣ୍ଡେ, ଆଦ୍ ବିଶ୍ୱାସ୍ତେ କାୟେ ଲେକାମ୍ ଆତ୍ମାନ୍‍ ପରିତ୍ରାଣ ଦର୍‍କ୍‍ତେ ।
1PE 1:10 ଇଦ୍ ପରିତ୍ରାଣ ବିଷୟ୍‍ତେ ବାବବାଦୀନଡ଼୍ ମନ୍ ଇସ୍ ମେହେକି ନୁ ଆନୁସନ୍ଦାନ୍‌ ମାଡ଼ି, ଇଶ୍ୱର୍‍ ମାଡ଼୍‍ତେ ଦାନ ବିଷୟତେ ବବିଷ୍ୟତ୍ ଗଟ୍ କେସ୍‍ମାତ୍‍ତଡ଼୍ ।
1PE 1:11 ଆଦ୍ ଦାନ ମିଡ଼୍ ବେସୁଙ୍କ୍‍ ନୁ ବେଲାନ୍ ପାଏମ୍ ଆଦ୍‍ତିଡ଼୍, ପୁନ୍ଦାନ୍ ସେଙ୍ଗେ ଅଡ଼୍‌ ଚେଷ୍ଟା ମାଡ଼ିମାତ୍ତଡ଼୍ । ଇଦ୍ ସମ୍ପର୍କତେ ପବିତ୍ରଆତ୍ମା ସାହାଯ୍ୟତେ ଅଡ଼୍‌ କ୍ରିଷ୍ଟଙ୍କ୍ ଦୁଃକାମ୍ ନୁ ମେଣ୍ଡନ୍‍ ଲେକେତ୍ ଗୌରବ୍‍ ବିଷୟତେ ସୂଚନା ଇସ୍‍ ମାତ୍‍ତଡ଼୍ ।
1PE 1:12 ଇଶ୍ୱର୍‍ ଆ ବାବବାଦୀଡ଼୍ ପାକେ କେତ୍‍ତନ୍ ଯେ, ଅଡ଼୍‌ ନିଜେତ୍‍ ସେବା ମାଡ଼୍‍ୱେ ମାତ୍‍ତଡ଼୍ । ଅଡ଼୍‌‍ ବାତେ କେସମାତ୍‍ତଡ଼୍, ଆଦ୍ ମୀଇ ସେଙ୍ଗେ ଟିକ୍‍ ମାତ୍‍ତେ । ସ୍ୱର୍ଗତାଗାଙ୍କ୍ ୱାଦାନ୍ ପବିତ୍ରଆତ୍ମାନ୍ ଶକ୍ତିତେ ଇଞ୍ଜେ ବେନ୍ ଗଟି କେତ୍‍ତାନ୍‍ଡ଼୍ ସୁସମାଚାର୍ ପ୍ରଚାର୍ ମାଡ଼ୁତଡ଼୍, ମିଇଡ଼୍ ଇଞ୍ଜେ ଅଡ଼୍‌‍ଆଗାଙ୍କ୍ ଆୱୁସାରେ ଗଟି କେଞ୍ଜୁତିଡ଼୍ ଇଦ୍ ସାରେ ବିଷୟତେ ଅର୍ତ ବୁଜେମ୍ ଆଦାନ୍ ସେଙ୍ଗେ ସ୍ୱର୍ଗଦୂତକି ମିକା ତିଆର୍ ।
1PE 1:13 କାମ୍‍ ମାଡ଼ାନଙ୍କ୍ ତିଆର୍ ଆୟମୁଟ୍ । ତିଆର୍‍ତେ ମାଞ୍ଜ୍ ଜିସୁ କ୍ରିଷ୍ଟ ୱାଦାନ୍ ସମୟତେ ବେନ୍ ଆର୍ଶିବାଦ୍ ମିକିଙ୍କ୍ ଇଦ୍‍ତନ୍, ଆଦିନ୍ ପରୁ ନିଜାମ୍‍ତେ ଆଶେ ନେଏମୁଟ୍ ।
1PE 1:14 ଇଶ୍ୱର୍‌ତେ ଗଟି ପାଲନ୍ ମାଡ଼ାଟ୍ । ପୁନ୍‍ୱେ ୱେଲେ ମୁନେଙ୍କ୍ ବେନ୍ କାରାପ୍ ଅବ୍ୟାସ୍ ତଡ଼୍ ମାତ୍‍ତିଡ଼୍, ଆୱୁସାରେ ତଡ଼୍ ମୀଇ ଜିୱେତାଗ୍ ମେଣ୍ଡେ ଚାଲେମ୍‍ ଆୟମାକି ।
1PE 1:15 କିନ୍ତୁ ମିକିଂଙ୍କ୍‍ କାର୍‍ଙ୍ଗାନଣ୍ଡ୍‍ ଇଶ୍ୱର୍‍ ବେଲାନ୍ ପବିତ୍ର, ମୀଇଡ଼୍ ନିଜେ ନିଜେତ୍‍ ବ୍ୟବହାର୍‌ ତଡ଼୍‍ ଆଦ୍ ଲେକାମ୍ ପବିତ୍ର ଆୟମୁଟ୍,
1PE 1:16 ଶାସ୍ତ୍ରତାଗ୍ ଲେକାମିନ୍ଦେ, “ମିଡ଼୍ ପବିତ୍ର ଆୟମୁଟ୍, ବାତେଙ୍କ୍ଇତ୍କେ ମାମ୍‍ ପବିତ୍ର ।”
1PE 1:17 ଇଶ୍ୱର୍ ସାରେତଡ଼୍‍ୱାଦ୍‍ କାମ୍‍ମାଡ଼୍‍ତେ ଲେକାମ୍ ଚିମ୍‍ସାମ୍‍ତେ ସାରେତଡ଼୍ ବିଚାର୍ ମାଡ଼ିତନ୍ । ମୀଇଡ଼୍ ଅନ୍‌ ପାକେ ପ୍ରାର୍ତନା ମାଡ଼ାନ୍‍ୱେଲେ ଅଙ୍କ୍‌ ବାବାଲ୍ ଇଞ୍ଜ ପ୍ରମାନ୍ ମାଡ଼ି ମାନୁଟ୍ । ଆଲେଇତ୍କେ, ଇଦ୍ ଜଗତ୍‍ତାଗ୍ ମୀଇ ଜିୱେତାଗ୍ ଆ ସମୟତେ ଅଙ୍କ୍‌ ବେସର୍‍ ବକ୍ତି ମାଡ଼୍‍ତିଡ଼୍ ଆଦେଲେକାମ୍ ମାଡ଼ାଟ୍ ।
1PE 1:18 ମୀଇଡ଼୍ ପୁତ୍‍ତିଡ଼୍ ମୀଇ ମୁନେଙ୍କ୍‍ତେ ନାରୁଡ଼୍‍ଡ଼ାଗାଙ୍କ୍ ସାରେ ପରମ୍ପରା ଆଙ୍ଗ୍‍ଡ଼ାତାଦ୍‍ ଜିୱେତାଗାଙ୍କ୍ ମିକିଙ୍କ୍ ମୁକ୍ତ ମାଡ଼ାନ୍ ସେଙ୍ଗେ ଇଶ୍ୱର୍‌ତିଙ୍କ୍‍ ବେସର୍ ମୁଲ୍ୟ ଇଦାଙ୍କ୍ ଆସ୍‍ମାତ୍‍ତେ । ଆଦ୍ ନଷ୍ଟ ଆଦାନ୍‍ ରୁପା କି ସୁନା ଆୟ,
1PE 1:19 କିନ୍ତୁ ଆଦ୍ ନିର୍ଦୋଷ୍‍, କାରାପ୍‍ ଆୟ୍‍ୱାଦ୍‍ ମେଣ୍ଢାପିଲେ ଲେକାମ୍ କ୍ରିଷ୍ଟନ୍ ଆତ୍ମବଲିତେ ଗାଟି ଦାମ୍‍ଦେ ନେତୁର୍ ।
1PE 1:20 ଅଣ୍ଡ୍‌ ଜଗତ୍‍ତେ ସୃଷ୍ଟି ମୁନେଙ୍କ୍ ଇଶ୍ୱର୍‍ ତଡ଼୍ ଏଞ୍ଚିଆତ୍‍ତନ୍ ନୁ ମୀଇ ସେଙ୍ଗେ ଇଦ୍ ମାଡ଼େଙ୍କ୍ ଦିନାତେ ତଅନ୍‌ଦ୍‍ତଣ୍ଡ୍‍ ।
1PE 1:21 ଅନ୍‌ ସେଙ୍ଗେ ମୀଇଡ଼୍ ଇଶ୍ୱର୍‌ତେ ବିଶ୍ୱାସି ଆତ୍‍ତିଡ଼୍ । ଅନ୍‌ ମହିମା ସେଙ୍ଗେ ଡଲ୍‍ତାଗାଙ୍କ୍ ତେସ୍‍ ମିକା ଏଞ୍ଚିମାନ୍ଦାନ୍ ଇଶ୍ୱର୍‌ତେ ପରୁ ମୀୟାଦ୍ ବିଶ୍ୱାସ୍ ନୁ ଆସେ ଡୁଟାଙ୍ଗ୍‍ ଆତ୍‍ତେ ।
1PE 1:22 ଇଞ୍ଜେ ମିଡ଼୍ ସତ୍‍ତେ ପେର୍କେ ଆନ୍‌‍ନାଙ୍କ୍ ନିଜେ ନିଜେତିଙ୍କ୍ ଶୁଚି ମାଡ଼୍‍ତିଡ଼୍ ନୁ ବିଶ୍ୱାସ୍‍ତେ ଦାଦାନଡ଼କ୍ ପ୍ରେମ ମାଡ଼ାନଙ୍କ୍ ତିଆର୍ତେ ମିନ୍ଦେଡ଼ି । ନିଜେ ନିଜେତିଙ୍କ୍ ହୃଦୟତେ ପ୍ରେମ ମାଡ଼ାଟ୍ ।
1PE 1:23 ବାତେଙ୍କ୍ଇତ୍କେ ଇଶ୍ୱର୍‌ତେ ଜିୱେତାଦ୍ ନୁ ସାରେଦିନାଦ୍ ବାକ୍ୟ ତଡ଼୍ ମୀଇଡ଼୍ ବାତେମିକା ଡଲାନ୍ ବାବାନ୍ ପିଲାନ୍ ଲେକାମ୍ ଆୟ, ମାତର୍ ଜିୱେମାନ୍ଦାନ୍ ବାବାନ୍ ପିଲାନ୍ ଲେକାମ୍ ପୁଃନେ ଜନମ୍ ଲାବ୍ ମାଡ଼୍‍ତିଡ଼୍ ।
1PE 1:24 ଶାସ୍ତ୍ରତାଗ୍ ଲେକାମିନ୍ତେ, “ନାରୁନ୍‍ ଜାତି ଗାଡ୍ ଲେକାମ୍, ତାମ୍‍ୱାଦ୍ ସୁନ୍ଦର୍‍ ମେଟେତେ ପୁଙ୍ଗାର୍‍ ଲେକାମ୍ । ଗାଡ୍ ୱାରି ଆଦ୍‍ତେ, ପୁଙ୍ଗାର୍ ଦୁଲି ରାଲିତେ,
1PE 1:25 କିନ୍ତୁ ଇଶ୍ୱର୍‌ତେ ବାକ୍ୟ ସାରେଦିନାତାଦ୍ ।” ଇଦ୍ ଆ ସୁସମାଚାର୍‍ତେ ବାକ୍ୟ ବେଦ୍ ମୀଇପାକେ ପ୍ରଚାର୍ ଆସ୍‍ମାତ୍‍ତେ ।
1PE 2:1 ସାରେଲେକେତ୍ କାରାପ୍ ବିଷୟ ତାଗାଙ୍କ୍ ପେଇମୁଟ୍ । ମିଚ୍‌ ନୁ ଦୁଷ୍ଟ, ଇର୍ଷା ନୁ ଅର୍‌ତୁଙ୍କ୍ ନିନ୍ଦା ମାଡ଼ାନାଦ୍ ୱିଡ଼୍‍ସାଟ୍ ।
1PE 2:2 କେହେମୁଲ୍‍ ପିଲାନ୍ ଲେକାମ୍ ଆୟମୁଟ୍ । ସାରେଦାମ୍ ସାୟେତାଦ୍ ପାଲ୍‍ ଉନ୍ଦାନ୍ ସେଙ୍ଗେ କାର୍‍ୱିଙ୍କ୍ ଆୟମୁଟ୍ । ଆଲେକେକ୍ ମୀଇଡ଼୍ ପେର୍ସାନ୍ ସେଙ୍ଗେ ପରିତ୍ରାଣ ପାହେମ୍ ଆଦ୍‍ତିଡ଼୍ ।
1PE 2:3 ଶାସ୍ତ୍ରତାଗ୍ ଲେକାମିନ୍ଦେ, “ଇଶ୍ୱର୍‍ ଯେ ବେଲାନ୍ କୃପାବାନ, ଆଦ୍ ମିଡ଼୍ ନିଜେ ଏର୍କେତେ ପୁତ୍‍ତିଡ଼୍ ।”
1PE 2:4 ନାରୁଡ଼୍ ବେନ୍ ଜିୱେମାନ୍ଦାନ୍‍ ବାଡ଼ିୟାଦ୍‍ କାଲ୍ ଲେକାମ୍ ପ୍ରବୁନାଦ୍ ଦାମ୍‍ଇଲେ ଇଞ୍ଜ ଆଲ୍‍ସି ପାସ୍‍କେ, ଅନ୍‌ ଗାରେ ୱାଡ଼ାଟ୍, ବାତେଙ୍କ୍ଇତ୍କେ ଅଣ୍ଡ୍‌ ଇଶ୍ୱର୍‍ ତଡ଼୍ ନାର୍ଗେ ଦାମ୍ ଆସ୍ ଏଞ୍ଚିଆତ୍‍ତଣ୍ଡ୍‍ ।
1PE 2:5 ମୀଇଡ଼୍ ଅଣ୍ଡୟ୍‌ ଆଦ୍ୟାତ୍ମିକ୍‍ ମନ୍ଦିର୍ ତିଆର୍‍ ମାଡ଼ାନାଗ୍‍ ଜିୱେମାନ୍ଦାନ୍‍ ବାଡ଼ିୟାଦ୍ କାଲ୍‍ ଲେକାମ୍ ବ୍ୟବହାର୍‌ ଆଦାନ୍‍ ସେଙ୍ଗେ ୱାଡ଼ାଟ୍‍ । ଆଦ୍ ମନ୍ଦିର୍‍ତାଗ୍ ମୀଇଡ଼୍ ଜିସୁ କ୍ରିଷ୍ଟଙ୍କ୍ ତଡ଼୍‍ ଇଶ୍ୱର୍‌ତେ ଗ୍ରହଣଯୋଗ୍ୟ ଆଦ୍ୟାମିକ୍ ବଲି ଉତ୍ସର୍ଗ ମାଡ଼୍‍ନ୍ ସେଙ୍ଗେ ପବିତ୍ର ଜାଜକ୍‍ତେ କାମ୍ ମାଡ଼ିତିଡ଼୍‍ ।
1PE 2:6 ଶାସ୍ତ୍ରତାଗ୍ ଇଲାନ୍ ଲେକାମିନ୍ଦେ, “ମାମେ ଅଣ୍ଡୟ୍‌ ଗାଟିଦାମ୍‍ତାଦ୍‍ ବାଡ଼ିୟାଦ୍‍କାଲ୍ ଏଞ୍ଚ୍‍ତମ୍; ଆଦ୍ ମାମେ ସିୟନତେ ମୁଲେତ୍‍ କାଲ୍ ଲେକାମ୍ ନିଲ୍‍ସ୍ପ୍‍ତମ୍ । ବେନ ଆୟି ଅନାଗେ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ବେସୁଙ୍କ୍‌ବା ନିରାଶ୍‍ ଆୟଣ୍ଡ୍‍ ।”
1PE 2:7 ମିଡ଼୍ ବିଶ୍ୱାସ୍ ଆସ୍‍ମାନ୍ଦାନ୍‍ ମାୟ୍‍ଦିଙ୍କ୍‍ ମୀଇ ସେଙ୍ଗେ ଇଦ୍ କାଲ୍ ଗାଟି ଦାମ୍‍ଦାଦ୍ । କିନ୍ତୁ ଅବିଶ୍ୱାସିନଡ଼୍ ସେଙ୍ଗେ, “ଲୋନ୍‌‍ ତିୟାର୍‍ମାଡ଼ାନଡ଼୍‍ ବେନ୍ କାଲ୍‍ତିଙ୍କ୍ ପାସ୍କ୍‍ତଡ଼୍, ଆଦ୍ ସାରେତିଙ୍କ୍ ବାଡ଼ିୟାଦ୍ କାଲ୍ ଆତ୍‍ତେ ।”
1PE 2:8 ପବିତ୍ର ଶାସ୍ତ୍ରତାଗ୍ ମେଣ୍ଡନ୍ ୱେରଡ଼୍ ପଡ଼ିୟେତାଗ୍ ଲେକା ଆତ୍‍ତେ, “ଇଦ୍‍ କାଲ୍‍ଦେ ପରୁ ନାର୍ଗେ ନାରୁଡ଼୍ ତାଲ୍‍ଗି ରାଲିତଡ଼୍, ଆଦ୍ ବାଣ୍ଡ୍‍କାଲ୍ ଅଡ଼୍‌ ଦଂସ ଆଦାନ୍ ଆର୍ ଆଦ୍‍ତେ ।” ଅଡ଼୍‌ ଇଶ୍ୱର୍‌ତେ ବାକ୍ୟତେ ବିଶ୍ୱାସ ମାଡ଼ଡ଼୍‍ ଆତ୍‍ତଡ଼୍, ଆଦିଙ୍କ୍ ଅଡ଼୍‌ ତାଲ୍‍ଗି ରାଲ୍‍ତଡ଼୍ । ଇଦ୍ ମାତ୍‍ତେ ଅଡ଼୍‌‍ ସେଙ୍ଗେ ଇଶ୍ୱର୍‌ତେ ଇଚ୍ଛା ।
1PE 2:9 ମୀଇଡ଼୍ ଅଣ୍ଡୟ୍‌ ହେଞ୍ଚିମାନ୍ଦାନ୍ ଜାମେ, ରାଜାଲଡ଼୍‍ତେ ଯାଜକ୍‍ ପରିବାର୍‍, ଅଣ୍ଡୟ୍‌ ପବିତ୍ର ଜାତି ନୁ ଇଶ୍ୱର୍‌ତେ ନିଜର୍ ନାରୁଡ଼୍‍ ଆସ୍‍ମିନ୍ଦେଡ଼ି । ଇଶ୍ୱର୍‍ ମିକିଙ୍କ୍ ଇକାଡ଼୍‍ ତାଗାଙ୍କ୍ ତାନ୍ ଗାଟି ୱେସ୍‍ତାଗ୍ କାର୍‍ଙ୍ଗ୍‍ତନ୍ । ମୀଇଡ଼୍ ଅନ୍‌ ବେପ୍‍ପଡ଼୍‍ ଆଇୱାଦ୍ କାମ୍ ସାରେ ମାଡ଼ାନ୍‍ ସେଙ୍ଗେ ଏଞ୍ଚିମିନ୍ଦେଡ଼ି ।
1PE 2:10 ମୁନେଙ୍କ୍ ମୀଇଡ଼୍ ଇଶ୍ୱର୍‌ତେ ନାରୁଡ଼୍ ଆୟିୱେ ମାତ୍‍ତିଡ଼୍, ଇଞ୍ଜେ ଆତ୍‍ତିଡ଼୍ । ମୁନେଙ୍କ୍ ମୀଇଡ଼୍ ଇଶ୍ୱର୍‌ତେ ଦୟା ବିଷୟତେ ଦର୍‍କ୍‍ୱେ ମାତ୍‍ତିଡ଼୍, ଇଞ୍ଜେ ଅନ୍‌ ଦୟାତେ ନାରୁଡ଼ି ଆତ୍‍ତିଡ଼୍‍ ।
1PE 2:11 ପ୍ରିୟ ସାଙ୍ଗନଡ଼ି, ମୀଇଡ଼୍ ଇଦ୍ ଜଗତ୍‍ତାଗ୍ ୱେରେ ଦେଶ୍‍ତଡ଼ି ନୁ ଇଗେତଡ଼ି ଲେକାମ୍ । ଆଦିଙ୍କ୍ ଅନୁରଦ୍‌ ମାଡ଼ୁତାନ୍, ମୀଇଡ଼୍ ସାରେ ଦାମ୍ ଆତ୍ମା ବିରୁଦ୍ଦତେ ଯୁଦ୍‌ ମାଡ଼ମାନ୍ଦାନ୍‍ ମେନ୍ଦୁଲ୍‍ ଲାଲସାତାଗାଙ୍କ୍‍ ପେୟିସ୍‍ ୱାଡ଼ାଟ୍‍ ।
1PE 2:12 ଅଣଯିହୁଦୀଡ଼ାଗାଙ୍କ୍ ମିୟାଦ୍ ସାୟେତ୍‍ ବ୍ୟବହାର୍‌ ସାରେଦାମ୍ ପ୍ରାକଶ୍ ଆୟି; ଆଲେକେ, ଅଡ଼୍‌ ମିକିଙ୍କ୍ କାରାପ୍‍ ପାଡ଼୍‍ୟି ମାଡ଼ାନଡ଼୍‍ ଇଞ୍ଜ୍ ଅପ୍‍ମାନ୍ ଇସ ମାତ୍‍ତେ ମିକା, ମିୟାଦ୍ ସତ୍‍କାମ୍ ଉଡ଼ି କ୍ରିଷ୍ଟନ୍ ୱାଦାନ୍ ଦିନାତେ ଇଶ୍ୱର୍‌ତିଙ୍କ୍‍ ପ୍ରସଂଶା ମାଡ଼ିତଡ଼୍ ।
1PE 2:13 ପ୍ରବୁନ୍‍ ପେଦେର୍‍ତେ ଅନୁରଦ୍‌ ମାଡ଼ୁତାନ୍, ଶାସନ୍‍ ମାଡ଼ାନଡ଼୍‍ୱାଦ୍‍ ଶାସନ୍‍ ଅଦିନ୍‌ ମାନୁଟ୍ ।
1PE 2:14 ଦେଶ୍‍ତେ ସାରେତିଙ୍କ୍‍ ବେଡ଼୍‍ୟେ ସମ୍ରାଟ୍ ନୁ ମେଣ୍ଡେବାଗାତ୍‍ ଶାସନ୍‍ ମାଡ଼ାନଡ଼୍‍କ୍ ସମ୍ମାନ୍‍ ମାଡ଼ାଟ୍‍ । ଶାସନ୍‍ ମାଡ଼ାନଡ଼୍ ଅପରାଦିନଡ଼କ୍ ତିପାଲ୍‍ ଇଦାନ୍ ସେଙ୍ଗେ ନୁ ସାୟେତ୍‍ କାମ୍‍ ମାଡ଼ମାନ୍ଦାନ୍ ନାରୁଡ଼୍‍ ପ୍ରଶଂସା ମାଡ଼ାନଙ୍କ୍ ବେଡ଼୍‍ୟେ ସମ୍ରାଟ୍‍ ତଡ଼୍ ଏଞ୍ଚିମିନ୍ଦେଡ଼୍‍ ।
1PE 2:15 ଇଶ୍ୱର୍‍ ଇଚ୍ଛା ମାଡ଼ୁତନ୍, ମିୟାଦ୍‍ ସତ୍‍କାମ୍‍ତେ ତଡ଼୍‍ ବୁସା ଗଟି କେସମାନ୍ଦାନ୍ ବୁଦ୍‍ ଇଲ୍‍ୱେ ନାରୁଡ଼୍‍କ୍ ଉତର୍‍ ଇଦେ ପାର୍‍ୱେ ରକମ୍‍ ମାଡ଼ାଟ୍ ।
1PE 2:16 ସ୍ୱାଦିନ୍‍ତେ ନାରୁଡ଼୍‍ ଲେକାମ୍ ଜିୱୁଣ୍ଡ୍‍ ବାଦ୍‍କାଟ୍ । କିନ୍ତୁ ସ୍ୱାଦିନ୍‍ତେ କାରାପ୍ ବେବହାର୍ ମାଡ଼ି କାରାପ୍‍ କାମ୍ ମାଡ଼୍‍ମାଟ୍ । ଇଶ୍ୱର୍‌ତେ କ୍ରୀତଦାସ ଲେକାମ୍ ଜିବନ୍ ଯାପନ୍ ମାଡ଼ାଟ୍ ।
1PE 2:17 ସାରେତଡ଼୍‍କ୍‍ ସମ୍ମାନ୍ ଇମୁଟ୍ । ସାରେତଡ଼୍‍ କ୍ରିଷ୍ଟବିଶ୍ୱାସି ଏଲାଡ଼୍‍ତାମୁଙ୍କ୍‍ ପ୍ରେମ ମାଡ଼ାଟ୍ । ଇଶ୍ୱର୍‌ତିଙ୍କ୍ ୱେର୍‍ମୁଟ୍, ସମ୍ରାଟ୍‍ତିଙ୍କ୍ ସମ୍ମାନ୍ ଇମୁଟ୍ ।
1PE 2:18 ଆ ଦାସନଡ଼ି, ମିଡ଼୍ ମାଲିକିଡ଼୍‍କ୍‍ ୱେର୍‍ସ୍‍ ଅଡ଼ାଦ୍‌‍ ଗଟି କେଞ୍ଜାଟ୍‍, ଇତ୍କେ ସାୟେ ନୁ ଦୟାବାନ୍‍ କର୍ତ୍ତାଲଡ଼ାଦ୍‍ ଆୟ ମାତର୍‌ ହୃଦୟ ଇଲ୍‍ୱେନଡ଼୍‍କିଙ୍କ୍‍ ମିକା ମାନେମ୍‍ ଆୟ୍‍ମୁଟ୍‍ ।
1PE 2:19 ମିଡ଼୍‍ ଇଶ୍ୱର୍‌ତେ ଇଚ୍ଛା ପୁଞ୍ଜ୍‍ ମାନ୍‍ନାଙ୍କ୍, ଯଦି ଅନ୍ୟାୟ୍‌ ତିପାଲ୍‍ ଆସ୍ କଷ୍ଟ ଆତ୍‍କେ, ଆଲେକ୍‍ ଇଶ୍ୱର୍‍ ମିକିଙ୍କ୍ ଆର୍ଶିବାଦ୍ ମାଡ଼ିତଣ୍ଡ୍‍ ।
1PE 2:20 ମିଡ଼୍ ଦଷ ମାଡ଼ି ଦଣ୍ଡପାହେମ୍ ଆତ୍‍କେ, ଆଗେ ପ୍ରଶଂସା ଆଦାନାଦ୍‍ ବାତ୍ କାରନ୍‍ ମିନ୍ତେ ? ନ୍ୟାୟତାଦ୍‍ କାମ୍ ମାଡ଼ି ଯଦି ତିପାଲ୍‍ କଷ୍ଟ ଆତ୍‍କେ, ଆଲେକ୍ ଇଶ୍ୱର୍‍ ମିକିଙ୍କ୍ ଆର୍ଶିବାଦ୍ ମାଡ଼ିତେ ।
1PE 2:21 ଇଶ୍ୱର୍ ଇଦ୍ ଉଦ୍ଦେଶ୍ୟତେ ମିକିଙ୍କ୍ କାର୍ଙ୍ଗି ମିନ୍ଦେନ୍ । କ୍ରିଷ୍ଟ ନିଜେକେ ମିଇ ସେଙ୍ଗେ କଷ୍ଟ ଆସ୍ ଆଦର୍ଶ ତୋତ୍‍ତନ୍, ବେଲାନ୍ ମିଡ଼୍ ଅଣ୍ଡ୍‌‍ ତାକାନ୍‌ ପେର୍କେ ଆଦ୍‌ତିଡ଼୍ ।
1PE 2:22 ଅଣ୍ଡ୍‌ ବାତେବା ପାପ୍‍ ମାଡ଼୍‍ୱେ ମାତ୍‍ତନ୍ । ଅନ୍‌ ପାୟୁର୍‍ତାଗାଙ୍କ୍ ମିଚ୍ ଗଟି ପେଇତାନୱୁ ବେନ ବେସୁଙ୍କ୍‍ କେଞ୍ଜ୍‍ୱେ ମାତ୍‍ତନ୍ ।
1PE 2:23 ଅଣ୍ଡ୍‌ ଅପ୍‍ମାନ୍ ଆଦାନ୍ ସମୟତେ ଅପମାନ୍‍ତାଦ୍‍ ମେଣ୍ଡେଅନ୍‌‍ଦାମ୍‍ ଉତର୍‍ ଇୱେ ମାତ୍‍ତନ୍ । ଅଣ୍ଡ୍‌ ଦୁଃକାମ୍ ମାଡ଼ାନ୍ ୱେଲେ ପ୍ରତିଶୋଦ୍ ଆଦାନଙ୍କ୍ ୱେର୍‍ ତଅୱେ ମାତ୍‍ତନ୍; ମାତର୍ ନ୍ୟାୟ ବିଚାର୍‍କର୍ତ୍ତା ଇଶ୍ୱର୍‌ତେ ପରୁ ସାରେ ବର୍‍ସା ନେହେସ୍‍ ମାତ୍‍ତନ୍ ।
1PE 2:24 ମାମେ ବେଲା ପାପାମ୍‍ ସେଙ୍ଗେ ଡଲିତାଡ଼୍‍ ନୁ ଦାର୍ମାମ୍‌ ଜିୱୁଣ୍ଡ୍‍ ବାଦ୍‍କିତାଡ଼୍‍, ଆଦିନ୍ ସେଙ୍ଗେ କ୍ରିଷ୍ଟ କ୍ରୁଶ ପରୁ ନିଜେତ୍ ମେନ୍ଦୁଲ୍‍ତେ ମା ପାପାମ୍‍ତେ ବୋଜ୍‍ କାଞ୍ଜ୍‍ତନ୍ । ଅନ୍‌ ମେନ୍ଦୁଲ୍‍ତାଗେ ଆଦ୍ ପୁଣ୍ଡ୍‍ତଡ଼୍‍ ମିଡ଼୍ ସୁସ୍ଥ ଆତ୍‍ତିଡ଼୍ ।
1PE 2:25 ମେଣ୍ଢାକିନ୍ ଲେକାମ୍ ମିଡ଼୍ ୱେରେ ଆର୍‍ଦାଗ୍‍ ଆଞ୍ଜ୍‍ ମାତ୍‍ତିଡ଼୍ । ଇଞ୍ଜେ ମିୟାଦ୍ ମେକାଗଲାଲ୍ ନୁ ଆତ୍ମାତେ ରକ୍ଷାତିଙ୍କ୍ ପେର୍କେ ଆଦାନ୍‌ ସେଙ୍ଗେ ମାଲ୍‍ସ୍ ୱାତ୍‍ତିଡ଼୍ ।
1PE 3:1 ଆ ମୁତେନଡ଼ି ! ମିଡ଼୍ ମୁଦ୍‍ପାନଡ଼୍ ସନ୍ତୁଷ୍ଟ ଆୟମୁଟ୍ । ଆଲେକେ, ଯଦି ବେନ୍‍ ଆୟି ମୁଦ୍‍ପାଲ୍ ଇଶ୍ୱର୍‌ତେ ବାକ୍ୟତେ ବିଶ୍ୱାସ୍‍ ମାଡ଼୍‍ୱେ ମାତ୍‍କେ, ଆଲେକ୍ ମିୟାଦ୍ ସାୟେତ୍‍ ବ୍ୟବହାର୍‌ ତଡ଼୍‍ ଆଦ୍ ବାକ୍ୟ ସେଙ୍ଗେ ଅନାଦ୍‌ ବିଶ୍ୱାସ୍ ଆଦ୍‍ତେ । ମିଡ଼୍ ସୁଦୁଟ୍ ମିକା କେତାନଙ୍କ୍ ଦର୍କାଡ଼୍ ଆୟ ।
1PE 3:2 ବାତେଙ୍କ୍ଇତ୍କେ ମିୟାଦ୍ ପବିତ୍ର ବ୍ୟବହାର୍‌ ନୁ ବକ୍ତି ବାବ୍‍ ଅଡ଼୍‌ ଉଡ଼ିତଡ଼୍ ।
1PE 3:3 ମିଇଆଦ୍ କେଲ୍‍କ୍ ସଜା, ସଜ୍‍ବାଜ୍‍, ସୁନାବାନା କେର୍‍ସ୍‍ ବାୟେଦେ ତଅତାନାଦ୍‍ ନିଜର୍‍ ସଜ୍‍ବାଜ୍‍ ମାଡ଼ାନାଦ୍‍ ଉଚିତ୍‍ ଆୟ ।
1PE 3:4 ନିଜାତାଦ୍‍ ସୁନ୍ଦୁର୍‍ ଆଦୁତ୍‍, ମୀଇ ଜିୱୁନ୍‌ଲୋପେତ୍‍ ସାୟେତ୍‍ ନମ୍ରମନ୍‍ । ମିୟାଦ୍ ଆଦ୍ ନଷ୍ଟ ଆୟ୍‍ୱାଦ୍‍ ସଜ୍‍ବାଜ୍‍ ଇଶ୍ୱର୍‌ତେ କଣ୍ଡେତେ ସାରେତିଙ୍କ୍ ମୁଲ୍ୟବାନ୍ ।
1PE 3:5 ମୁନେଙ୍କ୍‍ତେ ବେନ୍ ପବିତ୍ର ମୁତେକି ଇଶ୍ୱର୍‍ ତାଗେ ବର୍‍ସା ନେଃଏସ୍‍ମାତ୍‍ତା, ଆୱୁ ମୁଦ୍‍ପାନଡ଼୍‍ ସନ୍ତୁଷ୍ଟ ଆଦାନ୍ ସେଙ୍ଗେ ନିଜେତିଙ୍କ୍ ପବିତ୍ରତଡ଼୍‍ ସଜ୍‍ବାଜ୍‍ ମାଡ଼ମାତ୍‍ତା ।
1PE 3:6 ସାରା ଆସତ୍‍ଲେକାତ୍ ୱେରଡ଼୍‍ ମୁତେ ମାତ୍‍ତେ । ଆଦ୍ ଅବ୍ରାହାମ୍‌ତେ ଆଦେଶ୍‍ ପାଲନ୍‍ ମାଡ଼ି ଅଙ୍କ୍‌ ପ୍ରବୁ ଇଞ୍ଜ ମାନେମ୍‍ ଆସମାତ୍‍ତେ । ମିଡ଼୍ ଇଞ୍ଜେ ଅଦିନ୍‌ ମାୟାସ୍କ୍‍ । ଯଦି ସାୟେତ୍‍ ବ୍ୟବହାର୍‌ ମାଡ଼୍‍ତିନ୍, ଆଲେକେ, ବାତେବା ବିଷୟ ମିକିଙ୍କ୍ ମେଣ୍ଡେ ୱେର୍ରେସ୍ପେ ପାର୍‍ୱ ।
1PE 3:7 ଆ ମୁଦ୍‍ପାନଡ଼ି, ଆଦ୍‍ ଲେକାମ୍ ମୀଇ ମୁତେକିଙ୍କ୍ ଶାତ୍‍ୱାମ୍‍ ଇଲ୍‍ଲେ ଇଞ୍ଜ ପୁଞ୍ଜ୍ ଆୱିନ୍ ସେଙ୍ଗେ ପସନ୍ଦ୍‍ ଆସ୍ ମାନ୍‍ନୁଟ୍ । ଆୱିଙ୍କ୍ ସମ୍ମାନ୍ ଇମୁଟ୍ । ଆୱୁମିକା ମିଇତଡ଼୍ ଇଶ୍ୱର୍‌ତାଗେ ଜିୱେତ୍‍ ଲେକାମ୍ ଦାନ ପାଏମ୍ ଆଦ୍‍ତା । ମିଇଡ଼୍ ଆୱିନ୍ ସେଙ୍ଗେ ସାୟେତ୍‍ ବ୍ୟବହାର୍‌ ମାଡ଼୍‍କେ, ମିୟାଦ୍ ପ୍ରାର୍ତନା ଅଟ୍‍କେମ୍‍ ଆୟ ।
1PE 3:8 ପେର୍କେ, ମିଡ଼୍‍ ସାରେତଡ଼୍‍ ଅଣ୍ଡୟ୍‌‍ ମନ୍‍ ଆସ୍‍ ମାନୁଟ୍ । ନିଜେ ନିଜେତିଙ୍କ୍ ଏଲାଡ଼୍‍ତାମୁଣ୍ଡ୍‍ ଲେକାମ୍ ପ୍ରେମ ମାଡ଼ି ନିଜେ ନିଜେ ଲୋପେ ଦୟା ନୁ ନମ୍ର ଆୟ୍‍ମୁଟ୍ ।
1PE 3:9 ଅନିଷ୍ଟ ବଦଲ୍‍ତେ ଅନିଷ୍ଟ ମାଡ଼୍‍ମାଟ୍, ଅବିଶାପ୍‌ ବାଦୁଲ୍‍ତେ ଅବିଶାପ୍‌ ମାଡ଼୍‍ମାଟ୍; ତାନ୍ ପେର୍କେ ଆର୍ଶିବାଦ୍‌ ମାଡ଼ାଟ୍, ବାତେଙ୍କ୍ଇତ୍କେ ଇଦିନ୍ ସେଙ୍ଗେ ଇଶ୍ୱର୍‍ ମିକିଙ୍କ୍ କାର୍‍ଙ୍ଗି ମାତ୍‍ତନ୍ ନୁ ଆଦ୍‍ ମାଡ଼ାନ୍ ପେର୍କେ ମିଡ଼୍ ଆର୍ଶିବାଦ୍ ପାଏମ୍ ଆଦ୍‍ତିଡ଼୍,
1PE 3:10 ଶାସ୍ତ୍ରତାଗ୍ ଲେକାମିନ୍ଦେ, “ବେନ ଜିୱେତାଗ୍ ପ୍ରେମ ମାଡ଼ାନଙ୍କ୍ ନୁ ସୁକାମ୍‍ତେ ଦିନାମ୍ ଉଡ଼ାନଙ୍କ୍ ଇଚ୍ଛା ମାଡ଼ିତଣ୍ଡ୍, ଅଣ୍ଡ୍‌ କାରାପ୍‍ ଗଟ୍ କେଲ୍‍ମାକିଣ୍ଡ୍‍ ନୁ ମିଚ୍‍ ଗଟିନାଗାଙ୍କ୍ ପେୟ୍‍ସ୍‍ ୱାଡ଼ିଣ୍ଡ୍ ।
1PE 3:11 ଅଣ୍ଡ୍‌ କାରାପ୍‍ତାଗାଙ୍କ୍ ମାଲ୍‍ସ୍‍ ୱାସ୍ ସାୟେକାମ୍ ମାଡ଼ିଣ୍ଡ୍ ନୁ ମନ୍‍ଇସ୍‍ ଶାନ୍ତି କାମ୍ ମାଡ଼ିଣ୍ଡ୍ ।
1PE 3:12 ଇଶ୍ୱର୍ ଦାର୍ମିକ୍‍ ନାରୁଡ଼୍ ସେଙ୍ଗେ ମନ୍‍ ଇଦ୍‍ତଣ୍ଡ୍‍ ନୁ ଅଡ଼୍‌ ପ୍ରାର୍ତନା କେଞ୍ଜିତଣ୍ଡ୍‍; ଇତ୍‍କେ ଅଣ୍ଡ୍‌‍ କାରାପ୍‍ ନାରୁଡ଼୍ ସେଙ୍ଗେ ମନ୍‍ ଇୱଣ୍ଡ୍ ।”
1PE 3:13 ସାୟେ କାମ୍‍ ମାଡ଼ାନଙ୍କ୍ ମିଡ଼୍ ତିଆର୍ ମାତ୍‍କେ, ବେନ ମିୟାଦ୍ ଅନିଷ୍ଟ ମାଡ଼ିତନ୍ ?
1PE 3:14 ସତ୍‍ କାମ୍ ମାଡ଼୍‍ନ୍‍ ସେଙ୍ଗେ ମିଡ଼୍ ଦୁଃକାମ୍ କଷ୍ଟ ମାଡ଼୍‍କେ ମିକା ମିଡ଼୍ ନିଜାମ୍‍ ସୁକାମ୍‍ତେ ମିନ୍ଦେଡ଼ି । ବେନଙ୍କ୍ ୱେର୍‍ମାଟ୍; ବେସୁଙ୍କ୍‌ବା ଚିନ୍ତାତେ ମାନ୍‍ମାଟ୍ ।
1PE 3:15 ମାନ୍‍ କ୍ରିଷ୍ଟଙ୍କ୍ ବକ୍ତି ମାଡ଼ି, ଅଙ୍କ୍‌ ପ୍ରବୁ ଇଞ୍ଜ କେତ୍‍କେ । ଯଦି ବେନ ମି ଲୋପେତ୍‍ ହୃଦୟ୍‍ତାଗ୍‍ ବାଆତେ ମିନ୍ଦେ ଇଞ୍ଜ ପୁନ୍ଦାନଙ୍କ୍‍ ଇଚ୍ଛା ମାଡ଼୍‍କେ, ଅନ୍‌ ପ୍ରଶ୍ନତେ ଟିକ୍‍ ଉତ୍ତର୍ ଇଦାନଙ୍କ୍ ସାରେଦାମ୍ ତିଆର୍‍ତେ ମାନୁଟ୍ ।
1PE 3:16 ଇତ୍‍କେ ବିନୀତ୍‍ତେ ନୁ ଲେକେତ୍‍ ନାରୁନ୍ ଲେକାମ୍ ଉତ୍ତର୍ ଇମୁଟ୍ । ମିୟାଦ୍ ମନ୍‍ତିଙ୍କ୍ ନିର୍ମଲ୍‍ତେ ନେଏମୁଟ୍ । ଆଲେଇତ୍‍କେ, ମିଡ଼୍ କ୍ରିଷ୍ଟନ୍‍ ପେର୍କେ ଆଦାନ୍ ଲେକାମ୍ ସାୟେତ୍‍ ବ୍ୟବହାର୍‌ ମାଡ଼ମାନ୍ଦାନ୍ ୱେଲେ, ବେନଡ଼୍ ମିୟାଦ୍ ମିଚ୍ ଅବିଯୋଗ୍‍ ମାଡ଼ିତଡ଼୍, ଅଡ଼୍‌ ସିଗ୍‍ ଆଦ୍‍ତଡ଼୍ ।
1PE 3:17 କାରାପ୍ କାମ୍ ମାଡ଼ି କଷ୍ଟ ଆଦାନ୍‍ ନାଗାଙ୍କ୍‍, ଇଶ୍ୱର୍‌ତେ ଇଚ୍ଛାଲେକାମ୍ ସତ୍‍କାମ୍ ମାଡ଼ି ଦୁଃକାମ୍ ମାଡ଼ାନାଦ୍ ଲେକେତ୍ ।
1PE 3:18 ମିକିଂଙ୍କ୍ ଇଶ୍ୱର୍‌ତେ ପାକେ ତାତାନ୍‍ ସେଙ୍ଗେ କ୍ରିଷ୍ଟ ନିଜେ ଦାର୍ମିକ୍ ଆସ୍ ଅଦାର୍ମିନାରୁଡ଼୍‍ ପାପତେ ପ୍ରାୟଚିତ୍‍ତେ ସେଙ୍ଗେ ନିଜେତ୍ ଜିୱେ ଇତ୍‍ତନ୍ । ଇଦ୍ ପ୍ରାୟଚିତ୍‍ତେ ଅଣ୍ଡ୍‌ ଅଣ୍ଡୟ୍‌‍ଦାମ୍ ସାରେଦିନାତ୍ ସେଙ୍ଗେ ସାଦନ୍ ମାଡ଼୍‍ତନ୍ । ଅଣ୍ଡ୍‌ ମେନ୍ଦୁଲ୍‍ ଇସାପ୍‍ତେ ଡଲ୍‍ତନ୍, ଇତ୍‍କେ ଆତ୍ମାତେ ଜିୱେ ଆତ୍‍ତନ୍,
1PE 3:19 ନୁ ଆଦ୍ ଆତ୍ମାତେ ସ୍ଥିତିତଡ଼୍‍ ବନ୍ଦିଆତ୍‍ତେ ଆତ୍ମାକିନ୍ ପାକେ ଆଞ୍ଜ୍ ପ୍ରଚାର୍ ମାଡ଼୍‍ତନ୍ ।
1PE 3:20 ନୋହ ଜାହାଜ୍ ମାଡ଼ାନ୍ ସମୟତେ ଇଶ୍ୱର୍ ଦୈର୍ଯ୍ୟତେ କେପିମାତ୍‍ତନ୍ । ଆସୁଙ୍କ୍ ବେନ୍‍ ନାରୁଡ଼୍ ଇଶ୍ୱର୍‌ତଡ଼୍‍ ଉର୍‍ଗାଡ଼୍ ଆତ୍‍ତଡ଼୍, ଆ ପରୁତେ ଆତ୍ମା ଆଦୁତଡ଼୍‍ ଅଡ଼୍‌‍ଲେକେମ୍‍ । ବେନ୍ ସୁକୁକ୍ ବେସ୍କ୍‍ତୁଡ଼୍‍ ସାରେ କାଇଲି ଆଟ୍‍ଜାନ୍ ମାତର୍‌ ଗାଟି ୱାର୍‍ସାମ୍‍ତାଗାଙ୍କ୍ ରକ୍ଷା ପାଏମ୍‍ ଆତ୍‍ତଡ଼୍,
1PE 3:21 ଅଡ଼୍‌ ମିକିଙ୍କ୍ ପରିତ୍ରାଣ ସାଦନ୍ ମାଡ଼ିମାନ୍ଦାନ୍ ବାପ୍ତିସ୍‍ମ ଲେକାମ୍ । ଇଦ୍ ବାପ୍ତିସ୍‍ମ ମୀଇ ମେନ୍ଦୁଲ୍‍ତେ ମୁର୍କ୍‍ତିଙ୍କ୍‍ ଯେକା ମାଡ଼, ଆଦ୍ କ୍ରିଷ୍ଟନ୍ ତେଦାନ୍‍ ଦିନ୍‍ତଡ଼୍ ମିୟାଦ୍ ମନ୍‍ତିଙ୍କ୍ ଲେକେତ୍‍ ମାଡ଼ାନ୍ ସେଙ୍ଗେ ଇଶ୍ୱର୍‌ତେ ପାକେ ଆବେଦନ୍ ।
1PE 3:22 ଅଣ୍ଡ୍‌ କ୍ରିଷ୍ଟ ଇଞ୍ଜେ ସ୍ୱର୍ଗତାଗ୍ ଇଶ୍ୱର୍‌ତେ ତିନ୍ଦେ ପାକେ କୁଦିମିକା ଦୂତ ନୁ ସାରେ ସ୍ୱର୍ଗତାଉ ଅଦିପତି ନୁ ସାରେ ଶକ୍ତିତିଙ୍କ୍‍ ଶାସନ୍‍ ମାଡ଼ୁତଣ୍ଡ୍‍ ।
1PE 4:1 କ୍ରିଷ୍ଟ ନିଜେତ୍ ମେନ୍ଦୁଲ୍‍ତେ ମାନ୍ଦାନ୍ ୱେଲେ କଷ୍ଟ ମାଡ଼୍‍ତାଙ୍କ୍, ମିଡ଼୍‍ ମିକା ଅନ୍‌ ଲେକାମ୍ ମନ୍‍ ମାଡ଼ି ନିଶ୍ଚିତ୍‍ ଆୟମୁଟ୍ ଯେ, ବେନ୍ ନାରୁଣ୍ଡ୍ ଜିୱୁନ୍‍ ମେନ୍ଦୁଲ୍‍ତେ ତିପାଲ୍‍ ଆଦ୍‍ତନ୍, ଅଣ୍ଡ୍‌ ମେଣ୍ଡେ ପାପାମ୍‍ତାଗ୍ ମୁଡ଼ୁନ୍ଦି ମାନଣ୍ଡ୍‍ ।
1PE 4:2 ମୀଇଡ଼୍ ଇଞ୍ଜେକଞ୍ଜ୍ ଜିୱୁଣ୍ଡ୍‍ତାଗ୍‍ ମାନ୍ଦାନ୍‍ ବେସ୍‌କ୍ ଦିନା ଲୋପେ ନିଜେତ୍ ମେନ୍ଦୁଲ୍ ଅବିଲାଷତେ ଜିୱୁଣ୍ଡ୍‍ ବାଦ୍‍କ ଆୟକଟ୍ ଇଶ୍ୱର୍‌ତେ ଇଚ୍ଛାଦିନାମ୍ ଆୟ୍‍ମୁଟ୍ ।
1PE 4:3 ମୁନେଙ୍କ୍‍ ମିଡ଼୍ ଅଣଯିହୁଦୀଡ଼୍‍ ଲେକାମ୍ କାମ୍ ମାଡ଼ି ନାର୍ଗେ ସମୟ କାଟେମ୍ ଆତ୍‍ତିଡ଼୍‍ । ମିୟାଦ୍ ଜିୱେ ସାର୍ରେ କାରାପ୍‍ ପାଡ଼୍‍ୟି, କାମୁକତା, କାଲ୍‍ଉନ୍ଦାନ୍, ଲାଲସା, ମାତାଲ୍‍ ନୁ ପାସ୍କାନ୍‍ ପୁତ୍‍ଲାମ୍‍ ପୁଜାନାଗ୍‍ କାଟେମ୍ ଆତ୍‍ତେ ।
1PE 4:4 ମିଡ଼୍ ଇଞ୍ଜେ ଇଦ୍ ଲେକାମ୍ କାରାପ୍‍ କାମ୍‍ତାଗ୍‍ ଅଡ଼୍‌‍ତଡ଼୍ କାଇଲ୍‍ୱାଙ୍କ୍ ଅଡ଼୍‌ ଆଶର୍ଯ୍ୟ ଆସ୍ ମିକିଂଙ୍କ୍ ଗାଟି ନାର୍ଗେ ଲିନ୍ଦେ ମାଡ଼ୁତଡ଼୍ ।
1PE 4:5 କିନ୍ତୁ ବେନ୍ ଇଶ୍ୱର୍‍ ଜିୱେ ନୁ ଡଲ୍‍ତେନଡ଼୍ ବିଚାର୍ ମାଡ଼ିତଣ୍ଡ୍‍, ଅନ୍‌‍ ଗାରେ ଅଡ଼୍‌‍କିଂଙ୍କ୍ ଇସାବ୍‍ ଇଦାନଙ୍କ୍ ଆଦ୍‍ତେ ।
1PE 4:6 ଅଦିନ୍‌ ସେଙ୍ଗେ ଡଲ୍‍ତେନଡ଼୍‍ ଗାରେମିକା ସୁସମାଚାର୍ ପ୍ରଚାର୍ ମାଡ଼ିମାତ୍‍ତଡ଼୍, ବେଲାନ୍ ଅଡ଼୍‌ ନାରୁଡ଼୍‍ ଲେକାମ୍ ମେନ୍ଦୁଲ୍‍ତେ ବିଚାର୍‍ରିତ ଆସ୍‍ମାତ୍‍କେ ମିକା, ଇଶ୍ୱର୍‌ତେ ଆତ୍ମାତ୍‍ରକମ୍‍ ଆତ୍ମାତଡ଼୍‍ ଜିୱେ ଆଦ୍‍ତଡ଼୍ ।
1PE 4:7 ସାରେ ବିଷୟତାଦ୍‍ ତେରାନ୍‍ ଦିନାମ୍‍ ଏୱୁତେ । ମିଡ଼୍ ପ୍ରାର୍ତନା ତାଗ୍ ମାନ୍‍ଇସ୍‍ ମାନ୍ଦାନ୍ ସେଙ୍ଗେ ନିଜର୍‍ ପର ଆଶେ ୱାଟି ତିଆର୍‍ଆସ୍‍ ମାନୁଟ୍ ।
1PE 4:8 ନାର୍ଗେ ପ୍ରେମତଡ଼୍‍ ନିଜର୍‍ ନିଜର୍‍ ଲୋପେ ପ୍ରେମ ମାଡ଼ାଟ୍, ବାତେଙ୍କ୍ଇତ୍କେ ପ୍ରେମ ନାର୍ଗେ ପାପାମ୍‍ତିଙ୍କ୍‍ ମୁସିତେ ।
1PE 4:9 ସାୟେତ୍‍ ମନ୍‍ତଡ଼୍‍ ନିଜର୍‍ କୁଟ୍‍ମାମ୍‍ତିଙ୍କ୍‍ ସେବା ମାଡ଼ାଟ୍‍ ।
1PE 4:10 ଇଶ୍ୱର୍‍ ମିଡ଼୍‍ ସାରେତଡ଼୍‍କ୍ ସାୟେତ୍‍ ଦାନ ଇତ୍‍ତନ୍ । ବେନ ବେନ୍ ଦାନ ପାଏମ୍ ଆତ୍‍ତନ୍, ଆଦିନାଦ୍ ସାୟେତ୍‍ ବ୍ୟବହାର୍‌ ଇସାପ୍‍ତେ ମେଣ୍ଡେବାଗାତଡ଼ାଦ୍‍ ସେବା ସେଙ୍ଗେ ଆଦ୍ ଦାନତାଦ୍‍ ସତ୍ ବ୍ୟବହାର୍‌ ମାଡ଼ାନାଦ୍ ସାୟେ ।
1PE 4:11 ବେନ ପ୍ରଚାର୍ ମାଡ଼ିତନ୍, ଅଣ୍ଡ୍‌ ଇଶ୍ୱର୍‌ତେ ଗଟି ପ୍ରଚାର୍ ମାଡ଼ିଣ୍ଡ୍ । ବେନ ସେବା ମାଡ଼ିତନ୍, ଇଶ୍ୱର୍ ଅଙ୍କ୍‌ ଇସ୍‍ମାନ୍ଦାନ୍ ଶକ୍ତି ଲେକାମ୍ ଅଣ୍ଡ୍‌ ସେବା ମାଡ଼ିଣ୍ଡ୍ । ଆଲେଇତ୍‍କେ, ଇଶ୍ୱର୍ ସାରେ ବିଷୟତେ ଜିସୁ କ୍ରିଷ୍ଟନ୍ ତଡ଼୍ ଗୌରବ୍ ପାଏମ୍‍ ଆଦ୍‍ତନ୍ । ଯୁଗ୍‍ଯୁଗ୍ ମହିମା ନୁ ପରାକ୍ରମ୍ ଅନାଦ୍‌ । ଆମେନ୍‍ ।
1PE 4:12 ପ୍ରିୟ ସାଙ୍ଗନଡ଼ି, ବେନ୍ କିସ୍ ପରିକ୍ଷାତାଗ୍ ମିଡ଼୍ ଦୁଃକାମ୍ କଷ୍ଟ ଆଦୁତିଡ଼୍, ଆଦ୍ ୱେରଡ଼୍ ଆସାମ୍‍ତେ ଗଟ୍‍ଣା ଆଲ୍‍ସି ବକୁୱା ଆୟ୍‍ମାଟ୍ ।
1PE 4:13 ମେଣ୍ଡେ ୱେଡ଼୍‍କାଟ୍, ବାତେଙ୍କ୍ଇତ୍କେ ମିଡ଼୍ କ୍ରିଷ୍ଟନ୍ ଦୁଃକାମ୍ କଷ୍ଟତେ ଅଂଶି ଆୟ୍‍ନାଦ୍ ଅନାଦ୍‌ ମୟିମା ପ୍ରକାଶ୍‍ ଆଦାନ୍ ୱେଲେ ମିଡ଼୍ ୱେଡ଼୍‍କେତେ ସାର୍‍ଦେ ଆଦ୍‍ତିଡ଼୍ ।
1PE 4:14 କ୍ରିଷ୍ଟନ୍ ପେର୍କେ ଆନ୍‌‍ନାଙ୍କ୍ ଅପମାନିତ୍ ଆତ୍‍କେ, ମିଡ଼୍ ପ୍ରକୃତ୍‍ତେ ଦନ୍ୟ, ବାତେଙ୍କ୍ଇତ୍କେ ଇଶ୍ୱର୍‌ତେ ଗୌରବ୍‍ମୟ ଆତ୍ମା ମିୟାଗେ ବାସେ ମାଡ଼ିମିନ୍ଦେ ।
1PE 4:15 ମିୟାଗାଙ୍କ୍ ବେନ ନରଅନ୍‌ତା, ଦସ୍ୟୁ ବା ଦୁରାଚାରି, ବା ଗଲ୍‍କ୍‍ ସୃଷ୍ଟି ମାଡ଼ାନ୍ ସେଙ୍ଗେ ଦୁଃକାମ୍ କଷ୍ଟ ମାଡ଼୍‍ମାକିଣ୍ଡ୍‍ ।
1PE 4:16 କିନ୍ତୁ ମିଡ଼୍ ଯଦି କ୍ରିଷ୍ଟିୟାନ୍‍ ଆୟିନାଙ୍କ୍ ଦୁଃକାମ୍ ମାଡ଼ୁତିଡ଼୍, ଆଲେକ୍ ସିଗ୍‍ ଆୟ୍‍ମାଟ୍ । ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇମୁଟ୍, ବାତେଙ୍କ୍ଇତ୍କେ ମିଡ଼୍ କ୍ରିଷ୍ଟନ୍ ପେଦେର୍ ପୟ୍‍ତିଡ଼୍ ।
1PE 4:17 ଇଞ୍ଜେ ବିଚାର୍ ଦିନାମ୍ ଏୱୁତ୍‍ତେ ନୁ ଇଶ୍ୱର୍‌ତେ ନାରୁଡ଼୍ ମୁନେଙ୍କ୍ ବିଚାର୍‍ ଆଦ୍‍ତଡ଼୍ । ଯଦି ମାନାଗାଙ୍କ୍ ଆଦ୍ ଆରାମ୍ ଆତ୍‍କେ, ଆଲେକ୍ ବେନଡ଼୍ ଇଶ୍ୱର୍‌ତେ ସୁସମାଚାର୍‍ତାଗ୍‍ ବିଶ୍ୱାସ୍‍ ମାଡ଼ଡ଼୍, ଅଡ଼ାଦ୍‌ ମାଡ଼େଙ୍କ୍‌ତାଦ୍‍ ଦଶା ବାଆତେ ଆଦ୍‍ତେ ?
1PE 4:18 ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ଯଦି ଦାର୍ମିକ୍‍ନଡ଼୍ ପରିତ୍ରାନ୍ ପାଏମ୍ ଆଦାନାଦ୍ ଇସର୍ କଷ୍ଟ, ଆଲେକ୍ ଆଦାର୍ମିକ୍ ନୁ ପାପିନଡ଼୍ ଦଶା ବାଆତେ ଆଦ୍‍ତେ ?”
1PE 4:19 ଆଲେକ୍ ବେନଡ଼୍ ଇଶ୍ୱର୍‌ତେ ଇଚ୍ଛା ଲେକାମ୍ ଦୁଃକାମ୍ ମାଡ଼ିତଡ଼୍, ଅଡ଼୍‌ ସାରେ ସତ୍‍କାମ୍ ମାଡ଼ି ଅନାଗେ ପୁରାପୁରି ବର୍‍ସା ନେଏମୁଟ୍ । ଅଡ଼ାଦ୍‌ ସୃଷ୍ଟିକର୍ତ୍ତାଲ୍‍ ଇଶ୍ୱର୍‍ ସାରେଦାମ୍ ତାନ୍‍ ପ୍ରତିଜ୍ଞା ରକ୍ଷା ମାଡ଼ିତନ୍ ।
1PE 5:1 ନାନେ ୱେରନ୍‍ ବୟସ୍ତେ ନାରୁଣ୍ଡ୍‍ ଇସାବ୍‍ତେ ମିୟାଦ୍ ମଣ୍ଡଲିତେ ବାଡ଼୍‍ୟେ ନେତାଲଡ଼୍‍କ୍ ବିନତି ମାଡ଼ି କେତୁତାନ୍ । କ୍ରିଷ୍ଟନ୍ ଦୁଃକାମ୍ କଷ୍ଟତାଗ୍‍ ନାନେ ୱେରନ୍ ସାକ୍ଷି ନୁ ଅନାଦ୍‌ ଗୌରବ୍ ପ୍ରକାଶ୍ ଆଦାନ୍ ସମୟତେ ନାନେ ଆଗେ ପାଲ୍‍କ୍‍ ଆଦ୍‍ତାନ୍ ।
1PE 5:2 ଇଶ୍ୱର୍‍ ମୀଇ କାୟ୍‍ଦାଗ୍ ବେନ୍ ମାନ୍ଦ୍‍ ମେଣ୍ଢାନ୍‍ ଦ୍ୱାୟିତ୍ୱ ଇତ୍‍ତନ୍, ନାନ୍‍ ଅନୁରଦ୍‌ ମାଡ଼ୁତାନ୍, ମିଡ଼୍ ଇଚ୍ଛା ଇଲ୍‍ୱେ ଆଦ୍ ମାଡ଼କଟ୍ ସାର୍‍ଦେତେ ଅଡ଼୍‌‍କିଂଙ୍କ୍ ପଡ଼୍‍ପାଟ୍‍ । ଦନ୍ ଆଶାତେ ଆଦ୍‍ ମାଡ଼କଟ୍, ସାରେଦାମ୍ ସେବା ମନ୍ ତଡ଼୍‍ ମିୟାଦ୍ ଆଦ୍ ଦ୍ୱାୟିତ ମାଡ଼ାଟ୍‍ ।
1PE 5:3 ମିଡ଼୍ ବେନଡ଼ାଦ୍ ଦ୍ୱାୟିତ ଆତ୍‍ତିଡ଼୍, ଅଡ଼୍‌ ପରୁ ଶାସନ୍‍ ମାଡ଼କଟ୍ ଅଡ଼୍‌ ସେଙ୍ଗେ ନିଜର୍‍ ଜିୱୁଣ୍ଡ୍‍ତାଗ୍ ଆଦର୍ଶ ତଅମୁଟ୍ ।
1PE 5:4 ବେସୁଙ୍କ୍‍ “ଲେକେତ୍ ମେକାଗଲାଲ୍,” ୱାଦ୍‍ତନ୍, ମିଡ଼୍ ଗୌରବ୍‍ତେ ମୁକୁଟ୍‍ ପାଏମ୍ ଆଦ୍‍ତିଡ଼୍ । ଆଦିନାଦ୍ ୱେସ୍ ବେସୁଙ୍କ୍‍ ମୁର୍‍କ୍‍ ଆୟ ।
1PE 5:5 ଆ ଲେୟଡ଼ି, ମିଡ଼୍ ବୟସ୍ତେ ନାରୁଡ଼୍‍କ୍ ମାନେମ୍‍ ଆୟ୍‍ମୁଟ୍ । ମିଡ଼୍‍ ସାରେତଡ଼୍ ନିଜେ ନିଜେ ସେବାମାଡ଼ାନ୍ ସେଙ୍ଗେ ନମ୍ରତାଉ ଚକା କେର୍‍ମୁଟ୍ । ଶାସ୍ତ୍ରତାଗ୍ ଲେକାମିନ୍ଦେ, “ଇଶ୍ୱର୍ ଆଂକାର୍‍ ନାରୁଡ଼୍‍କ୍ ବିରୁଦ୍‍ ମାଡ଼ିତନ୍, ଇତ୍‍କେ ନମ୍ର ନାରୁଡ଼୍‍କ୍‍ ଅନୁଗ୍ରହ ମାଡ଼ିତନ୍ ।”
1PE 5:6 ଆଲେକେ, ଇଶ୍ୱର୍‌ତେ ଶକ୍ତିତେ କାୟ୍‍ଦେ ମଦଲ୍ ମଦଲ୍‍ ଆଡ଼୍‌‍କାଟ୍; ଅଣ୍ଡ୍‌ ତାନ୍ ଟିକ୍‍ ମାଡ଼୍‍ତେ ସମୟ୍‍ତେୱେଲେ ମିକିଙ୍କ୍ ଉନ୍ନତ ମାଡ଼ିତନ୍ ।
1PE 5:7 ମିୟାଦ୍ ସାରେ ଚିନ୍ତାତିଙ୍କ୍ ଇଶ୍ୱର୍ ଗାରେ ସମର୍ପଣ ମାଡ଼ାଟ୍, ବାତେଙ୍କଇତ୍କେ ଅଣ୍ଡ୍‌ ମିୟାଦ୍ ଯତ୍ନ ଆଦ୍‍ତନ୍ ।
1PE 5:8 ସତର୍କ ଆୟ୍‍ମୁଟ୍, ତିଆର୍‍ ଆସ୍‍ ମାନୁଟ୍ । ମୀଇ ଶତ୍ରୁ ଶୟତାନ୍‍ କେୟାନ୍ ଗଣ୍ଡ୍ରାସ୍‍ ଲେକାମ୍ ବେନଙ୍କ୍ କାସାନ୍‍ ସେଙ୍ଗେ ମେଃଏକ ଉଡୁତେ ।
1PE 5:9 ମିଡ଼୍‍ ବିଶ୍ୱାସ୍‍ତେ ଡୁଟାଙ୍କ୍ ମାଞ୍ଜ୍, ଆଦିଙ୍କ୍‍ ଅଟ୍‍କା ମାଡ଼ାଟ୍ । ମିଡ଼୍ ପୁତ୍‍ତିଡ଼୍, ଇଦ୍ ଜଗତ୍‍ତାଗ୍ ମୀଇ ବିଶ୍ୱାସି ଏଲାଡ଼୍‍ତାମୁଡ଼୍‍କ୍‍ ଇଦ୍‍ ଲେକାମ୍ ଦୁଃକାମ୍‍କଷ୍ଟ ତାଲାନ୍ ଅଦୁତଡ଼୍ ।
1PE 5:10 କ୍ରିଷ୍ଟନ୍‍ ତଡ଼୍ କାଇଲି ମିକା ଅନାଦ୍‌ ସାରେଦିନାତାଦ୍ ଗୌରବ୍‍ତେ ବାଗିଦାର୍‍ ଆଦାନଙ୍କ୍, ଦୟାତଣ୍ଡ୍‍ ଇଶ୍ୱର୍ ମିକିଙ୍କ୍ ଆହ୍ୱାନ୍ ମାଡ଼୍‍ତଣ୍ଡ୍‍ । ମିୟାଦ୍ ଇସୁର୍ ଦୁଃକାମ୍ ଆତ୍‍ତେ ପେର୍କେ ଅଣ୍ଡ୍‌ ନିଜେ ମିକିଙ୍କ୍ ସାକ୍‍ସାକା, ଗାଡ଼୍‍ସ୍‍, ଡୁଟାଙ୍ଗ୍‍ ନୁ ମଜ୍‍ବୁତ୍‌ ମାଡ଼ିତନ୍ ।
1PE 5:11 ଅନ୍‌‍ୱାଦ୍ ଶାସନ୍‍ ଯୁଗ୍‍ଯୁଗ୍ ଆୟି । ଆମେନ୍‍ ।
1PE 5:12 ଶୀଲାଙ୍କ୍ ବିଶ୍ୱାସ୍ତେ କ୍ରିଷ୍ଟିୟାନ୍‍ ଦାଦାଲ୍‍ ଲେକାମ୍ ନାନେ ସମ୍ମାନ୍‍ ମାଡ଼ିତାନ୍ । ଅନ୍‌ ତଡ଼୍ ନାନେ ଇଦ୍ ସୁଦୁରାଦ୍‍ ଚିଟି ଲେକ୍‍ତାନ୍ । ଇଶ୍ୱର୍‌ତେ ନିଜାତାଦ୍‍ ଅନୁଗ୍ରହ ମୁନେ ସାକ୍ଷ୍ୟ ଇସ୍ ମିକିଙ୍କ୍ ସାର୍‍ଦେ ମାଡ଼ାନଙ୍କ୍‍ ନାୟାଦ୍ ଇଚ୍ଛା । ଆଦ୍ ଅନୁଗ୍ରହତାଗ୍‍ ମିଡ଼୍ ଗାଡ଼୍‍ସ୍‍ ଆସ୍‍ ମାନୁଟ୍ ।
1PE 5:13 ଇଶ୍ୱର୍‌ତଡ଼୍ ଏଞ୍ଚିମାନ୍ଦାନ୍ ବାବିଲୋନ୍‌‍ତାଗ୍‍ ମାନ୍ଦାନ୍‍ ମଣ୍ଡଲି ନୁ ନା ଦାର୍ମାମ୍‌ ମାର୍‍ ମାର୍କ ମିକା ମିକିଙ୍କ୍ ନମସ୍କାର୍‍ ମାଡ଼ୁତନ୍‍ ।
1PE 5:14 କ୍ରିଷ୍ଟିୟ ପବିତ୍ର ପ୍ରେମ୍‌ ତଡ଼୍‍ ନିଜର୍‍ ନିଜର୍‍ ଲୋପେ ନମସ୍କାର୍‍ ମାଡ଼ାଟ୍‍ । ଜିସୁ କ୍ରିଷ୍ଟନ୍‍ ତଡ଼୍‍ ମିଡ଼୍‍ ସାରେତଡ଼୍‍କିଙ୍କ୍‍ ଶାନ୍ତି ଆୟି ।
2PE 1:1 ଶିମୋନ୍‍ ପିତର୍‍ତେ ଚିଟି; ଜିସୁ କ୍ରିଷ୍ଟନ୍‍ ୱେରଣ୍ଡ୍‍ ଦାସ ନୁ ପ୍ରେରିତ, ବେନଡ଼୍ ମାନ୍‍ ଇଶ୍ୱର୍‍ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନ୍ ଦାର୍ମାମ୍‌ତେ ସେଙ୍ଗେ ବିଶ୍ୱାସ୍ ଲେକାମ୍ ନାର୍ଗେ ଦାନାମ୍ ଦାନ ପାଏମ୍‍ ଆତ୍‍ତଡ଼୍, ଅଡ଼୍‌ ଗାରେ ଇଦ୍‍ ଚିଟି ଲେକୁତଣ୍ଡ୍‍ ।
2PE 1:2 ଇଶ୍ୱର୍ ନୁ ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ବିଷୟ୍‍ତେ ମିୟାଦ୍ ଜ୍ଞାନ୍‍ ତଡ଼୍‍, ପୁରାପୁରି ମିକିଂଙ୍କ୍‍ ଅନୁଗ୍ରହ ନୁ ଶାନ୍ତି ଆୟି ।
2PE 1:3 ଲେକେତ୍‍ ଦାର୍ମାମ୍‌ ଜିୱେ ବାଦ୍‍କାନ୍‍ ସେଙ୍ଗେ ମାନାଙ୍କ୍‍ ବାତ୍‍ସାରେ ଦର୍କାଡ଼୍, ଆଦ୍ ଇଶ୍ୱର୍ ନିଜର୍‍ ସ୍ୱର୍ଗୀୟ ଶକ୍ତିତେ ମାନାଙ୍କ୍ ଦାନ ମାଡ଼୍‍ତନ୍ । ବେନ ନିଜର୍‍ ମୟିମା ନୁ ଦାର୍ମାମ୍‌ତାଗ୍‍ ବାଗିଦାର୍‍ ଆଦାନ୍ ସେଙ୍ଗେ ମାନାଙ୍କ୍ ଆହ୍ୱାନ୍ ମାଡ଼୍‍ତନ୍, ଅଙ୍କ୍‌ ପୁତ୍‍ତାଙ୍କ୍‍ ମାମେ ଇଦ୍ ଦାନ ପାଏମ୍ ଆତ୍‍ତମ୍ ।
2PE 1:4 ଇଦ୍‍ଲେକାମ୍ ଅଣ୍ଡ୍‌ ମାନାଙ୍କ୍ ଅନ୍‌ ଇଚ୍ଛାଲେକାମ୍ ଲେକେତ୍ ମହାନ୍‍ ନୁ ମୁଲ୍ୟବାନ୍ ଦାନ ଇତ୍‍ତନ୍ । ଇଦ୍‍ ସାରେ ଦାନ ତଡ଼୍ ମିଡ଼୍ ଇଦ୍ ଜଗତ୍‍ତେ ଦଂଚକାରି କାମ୍‍ତାଗାଙ୍କ୍ ଉଦ୍ଦାର୍ ଆସ୍ ସ୍ୱର୍ଗତାଦ୍‍ ସ୍ୱଭାବ୍‍ତାଗ୍‍ ଅଂଶି ଆଦେ ପାର୍‍ଦ୍‍ତିଡ଼୍ ।
2PE 1:5 ଆଦିନ୍ ସେଙ୍ଗେ ମିୟାଦ୍ ବିଶ୍ୱାସ୍ ତଡ଼୍ ସାୟେତ୍‍ ଗୁନାମ୍‍; ସାୟେତ୍‍ ଗୁନାମ୍‍ ତଡ଼୍ ଜ୍ଞାନ୍;
2PE 1:6 ଜ୍ଞାନ୍ ତଡ଼୍ ନିଜର୍‍ ଗାଡ଼୍‍ସ୍‍; ନିଜର୍‍ ଗାଡ଼୍‍ସ୍‍ ତଡ଼୍ ସୟେମ୍‍ ଆଦାନାଦ୍‍; ସୟେମ୍‍ ଆଦାନାଦ୍‍ ତଡ଼୍ ଇଶ୍ୱର୍‍ପରାୟଣ;
2PE 1:7 ଇଶ୍ୱର୍‍ପରାୟଣ ତଡ଼୍ ଦାଦାଲ୍‍ତାମୁଣ୍ଡ୍ ସ୍ନେହ ନୁ ଦାଦାଲ୍‍ତାମୁଣ୍ଡ୍ ସ୍ନେହ ତଡ଼୍ ପ୍ରେମ କାଲ୍‍ପାନଙ୍କ୍ ଜିୱୁଣ୍ଡ୍‍ ଇସ୍‍ ଚେଷ୍ଟା ମାଡ଼ାଟ୍ ।
2PE 1:8 ଇୱୁ ସାୟେତ୍‍ ଗୁନାମ୍‍ ମିକିଂଙ୍କ୍‍ ଦର୍‍କାର୍‍ ଆଦ୍‍ତେ; ଇୱୁସାରେ ମିୟାଗ୍‍ ମାତ୍‍କେ, ମିଡ଼୍ ପାଏମ୍‍ ଆତ୍‍ତେ ପ୍ରବୁ ଜିସୁ କ୍ରିଷ୍ଟନ୍ ଜ୍ଞାନ୍ ମିକିଙ୍କ୍ ସକ୍ରିୟ ନୁ ସଫଳ ମାଡ଼ି ନେଃଏତିତନ୍ ।
2PE 1:9 ଇତ୍‍କେ ଇୱୁସାରେ ଗୁନାମ୍‍ ବେନନାଗ୍‍ ଇଲ୍‍ଲେ, ଅଣ୍ଡ୍‌ କାନାଲ୍‌ ନୁ ଗାଟି ଜେକେ ଉଡ଼ାନଙ୍କ୍‍ ପାର୍‍ୱଣ୍ଡ୍; ଅଦିନ୍‌ ମୁନେଙ୍କ୍‍ ମାଡ଼୍‍ତେ ସାରେ ପାପ୍‍ତାଗାଙ୍କ୍ ପରିଷ୍କାର୍ ଆତ୍‍ତେ ଇଞ୍ଜ ଅଣ୍ଡ୍‌ ମାର୍‍ଙ୍ଗ୍‍ତନ୍ ।
2PE 1:10 ଆଦିନ୍‌ସେଙ୍ଗେ, ଆ ଦାଦାନଡ଼ି ନୁ ଏଲାସ୍କ୍‍, ଇଶ୍ୱର୍‍ ଯେ ମିକିଙ୍କ୍ ଏଞ୍ଚିମିକା କାର୍ଙ୍ଗ୍‍ତଣ୍ଡ୍‍; ଇଦ୍ ଆନୁବୁତିତିଙ୍କ୍ ସାରେଦିନା ମାଡ଼୍‍ନ୍ ସେଙ୍ଗେ ଅଦିକ୍‌ ଯତ୍ନବାନ୍‍ ଆୟ୍‍ମୁଟ୍ । ଇଦ୍‍ଲେକାମ୍ ମାଡ଼୍‍କେ, ମିଡ଼୍ ବେସୁଙ୍କ୍‍ ମୀଇ ବିଶ୍ୱାସ୍‍ତାଗାଙ୍କ୍ ୱେରେ ଆୟ୍‍ୱିଡ଼୍‍ ।
2PE 1:11 ଇଦ୍‍ ଉପାୟତେ ମାନ୍‍ ପ୍ରବୁ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନ୍ ଅନନ୍ତ ରାଜ୍ୟତାଗ୍‍ ନେଙ୍ଗାନ୍‍ ସେଙ୍ଗେ ମିଡ଼୍‍ ପୁରା ଅଦିକାର୍‌ ପାଏମ୍ ଆଦ୍‍ତିଡ଼୍ ।
2PE 1:12 ଯଦିବା ମିଡ଼୍ ଇଦ୍ ସାରେ ବିଷୟ ପୁତ୍‍ତିଡ଼୍ ନୁ ମିୟାଦ୍ ପାଏମ୍‍ ଆସ୍‍ମାନ୍ଦାନ୍ ସତ୍‍ତେ ଡୁଟାଙ୍ଗ୍‍ ତିଆର୍ ଆତ୍‍ତିଡ଼୍, ଇୱୁସାରେ ଗଟି ନାନେ ସାରେଦାମ୍ ମିକିଙ୍କ୍ ଏର୍କା ୱାଟିଦାନଙ୍କ୍ ଇଚ୍ଛା ମାଡ଼ୁତାନ୍‍ ।
2PE 1:13 ନାନେ ଜିୱେ ମାନ୍‍ନା ଯାକ ଇୱୁସାରେ ବିଷୟ ସେଙ୍ଗେ ମିକିଙ୍କ୍ ଚେତନା ମାଡ଼ାନାଦ୍ ନା ସେଙ୍ଗେ ଟିକ୍ ଆଦ୍‍ତେ ଇଞ୍ଜ ନାନେ ଆଲ୍‍ସିତାନ୍ ।
2PE 1:14 ମା ପ୍ରବୁ ଜିସୁ କ୍ରିଷ୍ଟନାଗାଙ୍କ୍ ଗାଟିସାୟେ ସୁଚନା ପାହେମ୍ ଆସ୍‍ମାନ୍ଦାନ୍ ଲେକାମ୍‌ ସିଟ୍‍ପାଟ୍‍ ଡଲାନ୍‍ ମେନ୍ଦୁଲ୍ ୱିଡ଼୍‍ସିତାନ୍ ଇଞ୍ଜ ନାନ୍‍ ପୁତ୍‍ତାନ୍ ।
2PE 1:15 ନାୟାଦ୍ ଡଲ୍‍ତେ ପେର୍କେ ମିକା ମିଡ଼୍‍ ବେଲା ଇୱୁସାରେ ବିଷୟ ସାରେଦିନା ଏର୍କା ନେଃଏତିତିଡ଼୍, ଇଦିନ୍ ନିୟମ୍‍ ମାଡ଼ାନଙ୍କ୍ ନାନେ ପାର୍‍ତେ ଆସର୍‍ ଚେଷ୍ଟା ମାଡ଼ୁତାନ୍ ।
2PE 1:16 ପ୍ରବୁ ଜିସୁ କ୍ରିଷ୍ଟଙ୍କ୍ ଗୌରବ୍‍ମୟ ମେଣ୍ଡନ୍‍ଦାମ୍ ୱାଦାନ୍‍ ବିଷୟ୍‍ତେ ମିକିଙ୍କ୍ କେଞ୍ଜ୍‍ପାନଙ୍କ୍ ମାମେ ଆଲ୍‍ସ୍‍ତେ ୱେଷଡ଼୍‍ ପର ଆସେ ନେଏୱମ୍ । ମାମେ ନିଜର୍‍ କଣ୍ଡେତାଗ୍ ଅନ୍‌ ମଇମା ଉଡ଼୍‍ତମ୍‍ ।
2PE 1:17 ବାବାଲ୍ ଇଶ୍ୱର୍‍ ତଡ଼୍‍ ଅଣ୍ଡ୍‌ ସମ୍ମାନିତ ନୁ ଗୌରବାନ୍ୱିତ ଆଦାନ୍ ୱେଲେ ମାମେ ଆଗେ ମାତ୍‍ତମ୍ । ମହାମହିମାତାଗାଙ୍କ୍ ଅନ୍‌ ବିଷୟ୍‍ତେ କେସ୍‍ ମାନ୍ଦାନ୍ ଇଦ୍ ଗଟ୍‍ ମାମେ କେଞ୍ଜ୍‍ତମ୍, “ଇଣ୍ଡ୍‍ ମାନ୍‍ ପ୍ରିୟ ମାର୍‍, ଇଣ୍ଡ୍‍ ସେଙ୍ଗେ ମାମେ ସନ୍ତୁଷ୍ଟ ।”
2PE 1:18 ମାମେ ଅନ୍‌‍ ତଡ଼୍ ଆଦ୍ ପବିତ୍ର ମେଟେତାଗ୍ ପରୁ ମାନ୍ଦାନ୍ ୱେଲେ ମାମେ ନିଜେ ଇଦ୍ ସ୍ୱର୍ଗତେ ଗଟ୍‍ କେଞ୍ଜ୍‍ତମ୍ ।
2PE 1:19 ଆଦିଙ୍କ୍ ବାବବାଦିନଡ଼୍‍ତଡ଼୍ ପ୍ରଚାର୍‍ ମାଡ଼୍‍ତେ ଗଟ୍‍ତଡ଼୍‍ ମାୟାଦ୍‌ ବିଶ୍ୱାସ୍ ଅଦିକ୍‌ ଡୁଟାଙ୍ଗ୍‍ ଆତ୍‍ତେ । ଅଦିନ୍‌ ସେଙ୍ଗେ ମିଡ଼୍ ମିକା ମନ୍‍ ଇଦାନ୍‍ ଦର୍‍କାଡ଼୍, ବାତେଙ୍କ୍ଇତ୍କେ ଆଦ୍ ଇକାଡ଼୍‌ତାଗ୍ ୱେରଡ଼୍ କୁପି ୱେସ୍ ଲେକାମ୍ । ବାଲ୍‍ୱିୟ୍‍ତେ ୱେଲେପେୟ୍‍ତାନ୍‍ ଉକାକିନ୍ ୱେସ୍ ମୀଇ ହୃଦୟତାଗ୍ ପେଇନା ଯାକ ଇଦ୍ ନିଡ଼୍‍ସ ମାନ୍‍ତେ ।
2PE 1:20 ମିଡ଼୍ ଇଦ୍‍ ଇସର୍ ପୁଞ୍ଜ୍ ମାନୁଟ୍ ଯେ, ଦର୍ମଶାସ୍ତ୍ରତାଗ୍ ଲେକାମାନ୍ଦାନ୍‍ ବେନେବା ବାବବାଣୀ ବେନ ନିଜର୍‍ ଜ୍ଞାନ୍‍ତେ ବୁଜେମ୍‍ ଆଦାନଙ୍କ୍ ପାର୍‍ୱଣ୍ଡ୍‍ ।
2PE 1:21 ବାବବାଣୀ ମାତର୍ ନାରୁନ୍ ଆଲ୍‍ସାନ୍‍ ଲେକାମ୍ ଆୟ । ଇଶ୍ୱର୍‌ତେ ବକ୍ତ ଦାସନଡ଼୍ ପବିତ୍ରଆତ୍ମା ତଡ଼୍‍ ପରିଚାଲିତ୍ ଆସ୍ ଇଶ୍ୱର୍‌ତାଗାଙ୍କ୍ ପାଏମ୍ ଆସ୍‍ମାନ୍ଦାନ୍ କାବୁର୍‍ ପ୍ରକାଶ୍ ମାଡ଼୍‍ତଡ଼୍ ।
2PE 2:1 ମୁନେଙ୍କ୍ ବେଲାନ୍ ନାରୁଡ଼ାଗେ ମିକା ବଣ୍ଡବାବବାଦିଡ଼୍ ତଅନ୍‌ଦି ମାତ୍‍ତଡ଼୍, ଟିକ୍ ଆଦେଲେକାମ୍ ମିୟାଗେ ବୁସାମାଡ଼ାନ୍‍ ମେସ୍ତେରିଡ଼୍ ପେଇତିତଡ଼୍ । ଅଡ଼୍‌ ସାରେ ବିନଷ୍ଟକାରିଡ଼୍ ଅଡ଼୍‌‍ ଆଲାନ୍ ବୁସା ଶିକ୍ଷା ଇଦ୍‍ତଡ଼୍ ନୁ ବେନ୍ ପ୍ରବୁ ଅଡ଼୍‌‍କିଂଙ୍କ୍ ମୁକ୍ତି ଇସ୍‍ମିନ୍ଦେନ୍‍, ଅଙ୍କ୍‌ ସ୍ୱୀକାର୍ ମାଡ଼ଡ଼୍ । ଆଦିଙ୍କ୍ ସେନେକ୍‍ତିଙ୍କ୍‍ ଅଡ଼୍‌‍ୱାଦ୍‍ ବିନାଶ ଗଟେମ୍ ଆଦ୍‍ତେ ।
2PE 2:2 ଆଗେକ୍‍ବା ନାର୍ଗେ ଅଡ଼ାଦ୍‌ ଅଦର୍ମ ମାର୍ଗ ଲେକାମ୍‌ ନିଜାମ୍‍ ସତ୍‍ ମାଡ଼ିତଡ଼୍ । ବାଗାତଡ଼୍ ଅଡ଼ାଦ୍‌ କାମ୍‍ମାଡ଼ାନାଦ୍ ଉଡ଼ି ଦର୍ମ ଆର୍‍ଦେ ବିରୁଦ୍ଦତେ ଗଟି କେତିତଡ଼୍ ।
2PE 2:3 ଇଡ଼୍ ବୁସା ମାଡ଼ାନ୍‍ ମେସ୍ତେରିଡ଼୍ ଦନ୍‍ଆସେତିଙ୍କ୍ ମାନ୍‍ମାୟିସ୍‍ ଗଟି କେସ୍ ଲାବ୍ ତେଃତିତଡ଼୍ । ଇତ୍‍କେ ନାର୍ଗେ ଦିନାକଞ୍ଚ୍‍ ଇଶ୍ୱର୍ ଇଡ଼ାଦ୍‍ ବିଚାର୍‍ ମାଡ଼ ୱାଦୁତଣ୍ଡ୍‍ ନୁ ଇଡ଼ାଦ୍ ଡଲାନ୍‍ ଦିନାମ୍ ଗାରେ ଆସ ୱାଦୁତ୍ ।
2PE 2:4 ଇଶ୍ୱର୍ ପାପାମ୍‍ ଦୂତକିଙ୍କ୍ କ୍ଷମା ଇୱକଟ୍ ନର୍କତାଗ୍ ହେସ୍‍ସି ମାତ୍‍ତନ୍ । ଆଗେ ଆୱୁ ମହାବିଚାର୍ ଦିନ୍ ଯାକ ଇକାଡ଼୍‍ତେ ଗୁୟିନ୍ଦେତାଗ୍‍ ମିନ୍ଦେ ।
2PE 2:5 ଇଶ୍ୱର୍‍ ପୁରାତନ୍ ଜଗତ୍‍ତିଙ୍କ୍ ଦଣ୍ଡ ଇୱକଟ୍ ୱିଡ଼୍‍ସିୱେ ମାତ୍‍ତନ୍; ଆଦାର୍ମିକ୍ ଜଗତ୍‍ତେ ନାରୁଡ଼୍‍ ପରୁ ଗାଟିଏର୍‍ ତଡ଼୍‍ ମୁଃଉସ୍‍ ଦଂସ ମାଡ଼ିମାତ୍‍ତନ୍ । ଆଦ୍ ମାତର୍ ଦର୍ମ ପ୍ରଚାର୍ ମାଡ଼ମାନ୍ଦାନ୍ ନୋହ ନୁ ବାଗାତ୍ ସାତ୍‍ଜାନ୍ ନାରୁଡ଼୍‍କ୍ ରକ୍ଷା ମାଡ଼୍‍ତଣ୍ଡ୍‍ ।
2PE 2:6 ତାନ୍‍ପେର୍କେ ଇଶ୍ୱର୍ ସଦୋମ୍‍ ନୁ ଗମୋରା ନଗର୍‍ ରେଣ୍ଡିଙ୍କ୍ ଦଣ୍ଡଇସ୍‍ କିସ୍‍ତେ ଦଂସ ମାଡ଼୍‍ତନ୍ ନୁ ଦାର୍ମାମ୍‌ ଇଲ୍‍ୱେ ନାରୁଡ଼୍‍ ସେଙ୍ଗେ ବାତେ ଗଟେମ୍‍ ଆଦ୍‍ତେ, ଇୱୁ ରେଣ୍ଡ୍ ନାର୍‍କିଙ୍କ୍ ଅନାଦ୍‌ ୱେଷଡ଼୍ ଲେକାମ୍ ନେଃଏତଣ୍ଡ୍‍ ।
2PE 2:7 ଦାର୍ମାମ୍‌ ଇଲ୍‍ୱେ ନାରୁଡ଼୍‍ତେ କାରାପ୍‍ ବ୍ୟବହାର୍‌ ସେଙ୍ଗେ କଷ୍ଟ ଆସ୍‍ମାନ୍ଦାନ୍‍ ଦାର୍ମାମ୍‌ତଣ୍ଡ୍‍ ଲୋଟଙ୍କ୍‍ ଇଶ୍ୱର୍ ରକ୍ଷା ମାଡ଼୍‍ତଣ୍ଡ୍ ।
2PE 2:8 ଆଦିଙ୍କ୍‍ ସାୟେତଣ୍ଡ୍‍ ଲୋଟ ଅଡ଼୍‌‍ତଡ଼୍ ତଡ଼୍ ମାନ୍ଦାନ୍ ୱେଲେ ସାରେଦାମ୍ ଅଡ଼ାଦ୍‌ କାରାପ୍‍ କାମ୍ ଉଡ଼ି ନୁ କେଞ୍ଜି ସାରେଦିନାମ୍‍ ମନ୍‍ତାଗ୍ ନାର୍ଗେ ଦୁଃକାମ୍ କଷ୍ଟ ଆଲ୍‍ସି ମାତ୍‍ତଣ୍ଡ୍‍ ।
2PE 2:9 ପ୍ରବୁ ପୁତ୍‍ତନ୍, ବେଲାନ୍ ଦାର୍ମିକ୍ ନାରୁଡ଼୍‍କିଙ୍କ୍‍ ଅଡ଼୍‌‍କିଂଙ୍କ୍‍ ପରିକ୍ଷାତାଗାଙ୍କ୍ ରକ୍ଷା ମାଡ଼ାନଙ୍କ୍‍ ଆଦ୍‍ତେ । ମେଣ୍ଡେ ଦୁଷ୍କର୍ମକାରିଡ଼୍‍କ୍,
2PE 2:10 ବିଶେଷତଃ ବେନଡ଼୍‍ ଇଶ୍ୱର୍‌ତେ କ୍ଷମତାତିଙ୍କ୍ ପେର୍କେ ୱାଟ୍‍ଟି ନିଜେତ୍ ମେନ୍ଦୁଲ୍‍ତେ ଆସେ ଚରିତାର୍ତ ମାଡ଼ମାନ୍‍ତଡ଼୍, ଅଡ଼୍‌‍କିଂଙ୍କ୍ ମହାବିଚାର୍ତେ ଦିନାମ୍ ଯାକ ବେଲାନ୍ ଦଣ୍ଡିତ୍ ମାଡ଼ି ୱାଟ୍‍ଟିତଡ଼୍, ଆଦ୍ ଅଣ୍ଡ୍‌ ପୁତ୍‍ତନ୍ । ଆ ବୁସା ମେସ୍ତେରିଡ଼୍ ବେନଙ୍କ୍ ୱେର୍‍ୱଡ଼୍‍ ମନ୍‍ଇଚ୍ଛାତେ କାମ୍ ମାଡ଼ିତଡ଼୍ ନୁ ନିଜର୍‍ ବିଷୟତେ ଆଶେତାୱୁ ଗଟି କେତିତଡ଼୍ । ଅଡ଼୍‌ ସ୍ୱର୍ଗଦୂତକିନ୍ ବିରୁଦ୍ଦତେ କାରାପ୍ ଗଟି କେତାନଙ୍କ୍ ୱେର୍‍ୱଡ଼୍ ।
2PE 2:11 ଅଡ଼୍‌‍କ୍‍ ୱିଡ଼୍‍ସି ଗାଟି ଶକ୍ତି ନୁ ସାହାସୀ ଦୂତକି ମିକା ଇଶ୍ୱର୍‌ତେ ମୁନେ ଗାଟି ଗୌରବ୍‍ମୟତେ ଜିୱାକିଂଙ୍କ୍‍ ନିନ୍ଦା ମାଡ଼ି ଆୱିଙ୍କ୍ ଦୋଷି ମାଡ଼ଡ଼୍ ।
2PE 2:12 କିନ୍ତୁ ଇ ବୁସା ମେସ୍ତେରିଡ଼୍‍ ମୁର୍କ ପଶୁ ଲେକାମ୍‍ ସ୍ୱବାବ୍‍ ଲେକାମ୍‌ ସିଟ୍‍ପାଟ୍‍ ନାଡ଼୍‍କାନଙ୍କ୍‍ ପୁଟ୍‍ତା । ବେନ୍‍ ବିଷୟ୍‍ ବୁଜେମ୍‍ ଆୟଡ଼୍‍ ଆଦିଙ୍କ୍‍ ଅଡ଼୍‌‍ ଗଲକ୍‍ ମାଡ଼ିତଡ଼୍‍ କିନ୍ତୁ ଅଡ଼୍‌‍ ବନ୍‍ ପଶୁ ଲେକାମ୍‍ ଦଂସ ଆଦ୍‍ତଡ଼୍‍ ।
2PE 2:13 ମେଣ୍ଡେବାଗାତଡ଼୍‍କ୍ ବେଲାନ୍ ତିପାଲ୍ ଇତ୍‍ତଡ଼୍, ନିଜେ ଆଦ୍‍ଲେକାମ୍ ଦୁଃକାମ୍ କଷ୍ଟ ଆଦ୍‍ତଡ଼୍ । ବାତ୍ ଆୟି ଅଡ଼୍‌‍ୱାଦ୍‍ ମେନ୍ଦୁଲ୍‍ତେ ସାରେ ଲାଲସା ପୁରା ମାଡ଼ିତ୍‍, ଆଦ୍ ଅଡ଼୍‌ ପାୟାଲ୍‍ ୱେସିନାଗ୍‍ ନାରୁଡ଼୍‍ଡ଼ାଗ୍ ୱେଡ଼୍‍କେ ପାହେମ୍ ଆଦ୍‍ତଡ଼୍ । ଅଡ଼୍‌ ନିଜେତ୍ ଚଲ୍‍ନାତେ ବର୍ତି କାମ୍‍ତାଗ୍ ୱେଡ଼୍‍କେ ଆସଡ଼୍‍ ମିଡ଼୍ ତଡ଼୍ କାଇଲି ମିକା ତିନ୍‍ତଡ଼୍ ।
2PE 2:14 ଅଡ଼୍‌ ମିକିଙ୍କ୍ ସିଗ୍ ନୁ କାର୍‍କେ ପୟ୍‍ତେ ଲେକାମ୍ । ଅଡ଼ାୱୁ କଣ୍ଡା କାରାପ୍ କାମ୍‍ତେ ନିଣ୍ଡ୍‍ତେ । ଅଡ଼ାଦ୍‌ ପାପ୍ ବେସୁଙ୍କ୍‍ ପୁରା ଆୟ୍‍ୟ । ଅଡ଼ାଦ୍‌ ଦୁର୍ବଲ୍‍ତେ ମନ୍‍ତେ ନାରୁଡ଼୍‍କ୍ ଉଡ଼ିଇଦାଗ୍ ୱାଟିତଡ଼୍ । ଲବି ଆଦାନଙ୍କ୍‍ ଅଡ଼୍‌‍ୱାଦ୍‍ ଅବ୍ୟାସ୍ । ଅଡ଼୍‌ ଇଶ୍ୱର୍‌ତେ ଅବିଶାପ୍‌‍ତେ ନାରୁଡ଼୍‍ ଆଦ୍‍ତଡ଼୍‍ ।
2PE 2:15 ଅଡ଼୍‌ ଲେକେତ୍ ପ୍ରେମଆର୍ ୱିଡ଼୍‍ସିମିକା ୱେରେ ଆର୍‍ତାଗ୍‍ ଆଞ୍ଜ୍‍ମିନ୍ଦେଡ଼୍ । ବିଓର୍‍ତେ ମାର୍‍ ବାଲାମତେ ଆର୍ ଅଡ଼୍‌ ପୟ୍‍ତ୍‍ତଡ଼୍ । ଅଣ୍ଡ୍‌ ଅନ୍‌ୟାୟ୍‍ କାମ୍ ମାଡ଼ି ସାୟେତ୍‌ ଦନ୍‍ ଲାବ୍ ମାଡ଼ନଙ୍କ୍ ପସନ୍ଦ୍‍ ଆଇନାଙ୍କ୍,
2PE 2:16 ଇଦ୍ ପାପ ସେଙ୍ଗେ ଆସ୍‍ମାତ୍‍ତଣ୍ଡ୍‍ । ନାରୁନ୍ ଲେଙ୍ଗ୍‍ଦେ ଅନାଦ୍‌ ଗଦ୍‍ତେ ଗଟ୍ କେସ୍‍ ବେନ ବାବବାଦୀଙ୍କ୍ ବାୟେ ପାଡ଼୍‍ୟିତାଗାଙ୍କ୍ ଆୟ୍‍ସ୍ପ୍‍ତନ୍ ।
2PE 2:17 ଇଡ଼୍‍ ବୁସା ମେସ୍ତେରିଡ଼୍ ୱାସ୍‍ତେ ଇଲ୍‍କେ ଲେକାମ୍ ନୁ ଗାଲ୍‍ଦେ ଚାଲେମ୍‍ ଆଦାନ୍ ମାବ୍‍ ଲେକାମ୍ । ଇଶ୍ୱର୍‍ ଇଡ଼୍‍ ସେଙ୍ଗେ ଗାଟି ଇକାଡ଼୍‍ ତାଗ୍ ଗୁଇନ୍ଦେତାଗ୍ ପଡ଼ିୟେ ତିଆର୍ ମାଡ଼୍‍ତଡ଼୍ ।
2PE 2:18 ଅଡ଼୍‌ ଆଂକାର୍‍ତେ ନିଣ୍ଡ୍‍ତଡ଼୍ କାରାପ୍ ଗଟି କେସମାନ୍‍ନ୍ତଡ଼୍; ଦସଂକାରୀଡ଼ାଗାଙ୍କ୍ ରକ୍ଷା ଆସ୍ ମିରି ୱାସମାନ୍ଦାନ୍ ନାରୁଡ଼୍‍କିଙ୍କ୍ ନିଚ୍‌ ଶାରିରିକ କାମ୍‍ତେ ମାୟା ତଅସ୍ ଉଡ଼୍‍ୟିତାଗ୍ ୱାଟିତଡ଼୍ ।
2PE 2:19 ଇଡ଼୍‍କିଙ୍କ୍ ଅଡ଼୍‌ ବୁସା ମାଡ଼ାନ୍‍ ମେସ୍ତେରିଡ଼୍‍ ସ୍ୱାଦିନ୍‍ତେ ମାଡ଼ାନନ୍ ସେଙ୍ଗେ ନିଜେତ୍ ମନ୍ ଇଦ୍‍ତଡ଼୍, ଆଗେକ୍ ବା ଅଡ଼୍‌‍ ନିଜେ ଦ୍ୱଂସକାରିଡ଼୍‍ ସାରେ ଲେକେତ୍ କ୍ରିତଦାସ; ବାତେଙ୍କ୍ଇତ୍କେ ନାରୁଣ୍ଡ୍ ବେନ୍ ବିଷୟତେ ମିନ୍ଦେଣ୍ଡ୍, ଅନାଦ୍‌ ଅଣ୍ଡ୍‌ କ୍ରୀତଦାସ ।
2PE 2:20 ମାନ୍‍ ପ୍ରବୁ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନାଗାଙ୍କ୍ ଜ୍ଞାନ୍ ଆସ୍ ବେନଡ଼୍ ସଂସାର୍‍ତେ ବିନାଶ ଆଦାନଡ଼୍ ଶକ୍ତି ନାଗାଙ୍କ୍ ରକ୍ଷା ଆଦାନ୍ ପେର୍କେ ମେଣ୍ଡନ୍‍ ଦାମ୍ ଆୱୁ ସାରେ ଆୟେ, ଅଡ଼୍‌‍ୱାଦ୍ ମାଡ଼େଙ୍କ୍‌ତେ ଦଶା ମୁନେତ୍ ଦଶାତାଗାଙ୍କ୍‍ ଗାଟି ଅଦିକ୍‌ ଶୋଚନିୟ ଆଦ୍‍ତେ ।
2PE 2:21 ଦାର୍ମାମ୍‌ ଆର୍‍ ପୁଞ୍ଜ୍‍ ଆଗେ ଇତ୍‍ତେ ପବିତ୍ର ଶିକ୍ଷାତାଗାଙ୍କ୍‍ ୱେରେ ଆଦାନ୍‍ ୱିଡ଼୍‌ସି, ଯଦି ଅଡ଼୍‌ ମୁନେଙ୍କ୍ କଞ୍ଜ୍ ଟିକ୍ ଆର୍ ପୁନ୍‍ୱେ ମାନ୍‍ନେଡ଼୍, ଅଡ଼୍‌ ପାକେ ଲେକେତ୍ ଆୟେଡ଼୍ । ଲେକେତ୍ କାମ୍ ପୁଞ୍ଜ୍, ପବିତ୍ର ଶାସ୍ତ୍ରତେ ଶିକ୍ଷାତାଗାଙ୍କ୍ ୱେର୍‍ ଆଦାନ୍ ୱିଡ଼୍‍ସି ଆଦ୍ ପୁନ୍‍ୱେ ମାନ୍ଦାନ୍ ଇକ୍‍କେ, ଅଦିକ୍‌ ଲେକେତ୍ ଆୟେଡ଼୍ ।
2PE 2:22 ଅଡ଼୍‌ ସେଙ୍ଗେ ବାତ୍ ଗଟେମ୍ ଆତ୍‍ତେ, ଆଗାଙ୍କ୍ ଇଦ୍ ନାରୁଡ଼୍‍ କେତାନ୍ ସତ୍‍ତାଗାଙ୍କ୍ ନିଜାମ୍ ଅଦୁତ୍, “ନେୟ୍‍ ବାତେ କାକିତ୍‍ ଆଦିଙ୍କ୍‍ ମେଣ୍ଡେ ତିନ୍ଦିତେ, ପାଦ୍‍ତିଙ୍କ୍ ନର୍‍ସିତେ ପେର୍କେ ମେଣ୍ଡେ ବୁର୍‍ଦେତାଗ୍ ତଡ଼୍‍ଞ୍ଜାଙ୍କ୍ ଆଦ୍‍ତେ ।”
2PE 3:1 ପ୍ରିୟ ସାଙ୍ଗଡ଼ି, ମୀଇ ଗାରେ ଲେକାନାଲ୍‌ଦ୍ ଇଦ୍ ନାୟାଦ୍ ଦ୍ୱିତିୟ ଚିଟି । ରେଣ୍ଡ୍‍ଆସ ଚିଟିତାଗ୍ ଇୱୁସାରେ ବିଷୟ ଏର୍କା ମାଡ଼ିସ୍‍ ମୀଇ ମନ୍‍ତାଗ୍ ପବିତ୍ର ଚିନ୍ତା ପୁଟ୍‍ସ୍ପାନଙ୍କ୍‍ ଚେଷ୍ଟା ମାଡ଼୍‍ତାନ୍ ।
2PE 3:2 ନାର୍ଗେ ମୁନେଙ୍କ୍ ପବିତ୍ର ବାବଦାଦିନଡ଼୍ ବେନ୍ ସାରେ ବାବବାଣି କେସ୍‍ ମାତ୍‍ତଡ଼୍ ନୁ ତ୍ରାଣକର୍ତ୍ତାଲ୍ ପ୍ରବୁନାଦ୍ ବେନ୍ ସାରେ ଆଜ୍ଞା ମିକିଙ୍କ୍ ପ୍ରେରିତ ଶିଷ୍ୟଡ଼୍ ରହସ୍‍ ମିନ୍ଦେଡ଼୍, ଆଦ୍ ମିକିଙ୍କ୍ ଏର୍କା ମାଡ଼ିଦାନଙ୍କ୍ ନାୟାଦ୍ ଇଚ୍ଛା ।
2PE 3:3 ସାରେତିଙ୍କ୍ ମୁନେ ମିଡ଼୍ ପୁଞ୍ଜ୍‍ ନେଏତାନାଦ୍ ଲେକେତ୍‍ ଯେ, ଇଦ୍ ତେରାନ୍ ଦିନାକିନେ ବେସ୍କ୍‍ତୁଡ଼୍‍ ସତ୍‍ତିଙ୍କ୍‍ ପରିଆସ୍‍ ମାଡ଼ି ନିଜର୍‍ କାରାପ୍‍ ବୁଦ୍‍ତେ ଚାଲେମ୍ ଆଦ୍‍ତଡ଼୍;
2PE 3:4 ମେଣ୍ଡେ ଅଡ଼୍‌‍ ମିକିଙ୍କ୍ ପରିହାସ୍‍ ମାଡ଼ି କେତିତଡ଼୍‍, “ଜିସୁ ୱାଦ୍‍ତନ୍ ଇଞ୍ଜ ପ୍ରତିଜ୍ଞା ମାଡ଼ିମାତ୍‍ତନ୍, ଆୟ କି ? ଅଣ୍ଡ୍‌ ଇଞ୍ଜେ ବେଗା ? ମାନ୍‍ ଆନିଦାଦିଡ଼୍ ଡଲି ମିନ୍ଦେଡ଼୍, କିନ୍ତୁ ସୃଷ୍ଟତେ ଆରାମ୍‍ ତାଗାଙ୍କ୍ ବାତ୍ ବେଲାନ୍ ମାତ୍‍ତେ, ଇଞ୍ଜେ ମିକା ସାରେ ତ ଆଦ୍‍ରକମ୍ ମିନ୍ଦେ !”
2PE 3:5 ଅଡ଼୍‌ ପୁଞ୍ଜ୍‍ପୁଞ୍ଜ୍‍ ମାର୍ଙ୍ଗିତଡ଼୍ ଯେ, ମୁନେଙ୍କ୍ ଇଶ୍ୱର୍‍ ଆଜ୍ଞା ମାଡ଼୍‍ତନ୍ ମେଣ୍ଡେ ମୟଲ୍ ନୁ ପୃତିବି ସୃଷ୍ଟି ଆତ୍‍ତେ ! ପୃତିବି ଏର୍‍ଦାଗାଙ୍କ୍ ପେୟ୍‍ସ୍‍ ଏର୍‍ଦେ ପର ତିଆର୍ ଆତ୍‍ତା;
2PE 3:6 ମେଣ୍ଡେ, ଅନ୍‌‍ ତଡ଼୍‍ ଆଦ୍ ପୁରାତନ୍ ପୃତିବି ଦିନେ ଗାଟି ଏର୍‍ ୱାସ୍‍ ବିନଷ୍ଟ ଆତ୍‍ତେ ।
2PE 3:7 କିନ୍ତୁ ଇଞ୍ଜେ ବେନ୍ ମୟଲ୍ ନୁ ପୃତିବି ମିନ୍ତେ, ଆଦ୍ ଇଶ୍ୱର୍‌ତେ ଆଜ୍ଞା ତଡ଼୍‍ କିସ୍‍ତେ ଦ୍ୱଂସ ଆଦାନ୍ ସେଙ୍ଗେ ନେଃଏତଣ୍ଡ୍‍ । ବେନ୍‍ ଦିନେ ଆଦାର୍ମିକ୍ ନାରୁଡ଼୍ ବିଚାର୍ ଆସ୍ ବିନଷ୍ଟ ଆଦ୍‍ତଡ଼୍, ଆଦ୍ ଦିନାମ୍ ଯାକ ଆଦ୍ ସୁରକ୍ଷା ଆସ୍ ମାନ୍‍ତେ ।
2PE 3:8 ଇତ୍‍କେ ଆ ପ୍ରିୟ ସାଙ୍ଗନଡ଼ି, ୱେରଡ଼୍‍ ବିଷୟ ମାର୍‍ଙ୍ଗ୍‍ମାଟ୍ । ଇଶ୍ୱର୍‌ତେ କଣ୍ଡେତେ ଅଣ୍ଡୟ୍‌ ଦିନ୍‍ ନୁ ହଜାର୍ ଏଣ୍ଡ୍‍କ୍‍ତାଗାଙ୍କ୍ ବାତେ ୱେରେ ଇଲେ । ଅନ୍‌‍ ଗାରେ ଇୱୁ ରେଣ୍ଡ୍ ସାମାନ୍ ।
2PE 3:9 ପ୍ରବୁ ତାନ୍ ପ୍ରତିଜ୍ଞା ପୁରା ମାଡ଼ାନଙ୍କ୍ ଲେଟ୍ ମାଡ଼ଣ୍ଡ୍, ଯଦି ବା ବେସ୍‍କ୍‍ତୁଡ଼୍‍ ଇଦିଙ୍କ୍ ଲେଟ୍ ଇଞ୍ଜ ଏର୍କା ମାଡ଼ିତଡ଼୍ ମାତର୍‌ ପ୍ରବୁ ମି ସେଙ୍ଗେ ଗାଟି ସହନଶିଳ । ଅଣ୍ଡ୍‌ ଇଚ୍ଛା ମାଡ଼ନ୍‍, ବେନ ୱେରଣ୍ଡ୍ ବିନଷ୍ଟ ଆଇଣ୍ଡ୍ । ସାରେତଡ଼୍ ନିଜର୍‍ ନିଜର୍‍ ପାପତାଗାଙ୍କ୍ ମାଲ୍‍ୱିଡ଼୍, ଇଦ୍ ଅନାଦ୍‌ ଇଚ୍ଛା ।
2PE 3:10 ଇତ୍‍କେ ପ୍ରବୁନ୍ ଦିନାମ୍ ଡଙ୍ଗାଲ୍ ଲେକାମ୍ ୱାଦ୍‍ତେ । ଆଦ୍‍ ଦିନେ ଅଣ୍ଡୟ୍‌ ଗାଟି ଲେଙ୍ଗ୍‍ଦେ ଲୋପେ ମୟଲ୍ ମାୟିଆଦ୍‍ତେ । ମୟଲ୍‍ତାଗ୍‍ ମାନ୍ଦାନ୍‍ ଗ୍ରହ ନୁ ଉକାକ୍‍ କାର୍‍ୱି ଦ୍ୱଂସ ଆଦ୍‍ତା । ପୃତିବିତଡ଼୍‍ ତାନାଗ୍‍ ମାନ୍ଦାନ୍‍ ସାରେ ବିଷୟ୍‍ତଡ଼୍‍ ବିନଷ୍ଟ ଆଦ୍‍ତେ ।
2PE 3:11 ଯଦି ଇଦ୍‍ଲେକାମ୍ ସାରେ ବିଷୟ ଦସଂ ଆଦ୍‍ତା, ଆଲେକ୍ ଆଲ୍‍ସୁଡ଼ାଟ୍, ମିୟାଦ୍ ବେସତ୍‍ ଜିୱୁଣ୍ଡ୍ ଆଦାନ୍‍ ଦର୍‍କାର୍‍ । ଆଦ୍ ପବିତ୍ର ନୁ ଇଶ୍ୱର୍‌ତେ ମୁନେ ଉତ୍ସର୍ଗ ଆଦାନାଦ୍ ନିୟାତି ଦର୍‍କାର୍‍ ।
2PE 3:12 ମିଡ଼୍ ପ୍ରବୁନ୍ ଦିନାମ୍‍ତିଙ୍କ୍‍ କେପି ମାନ୍ଦାନ୍ ୱେଲେ, ଆଦ୍ ବେଲାନ୍ ଜାପେ ୱାଦ୍‍ତେ, ଆଦିନ୍ ସେଙ୍ଗେ ନିଜେତିଙ୍ଗ୍ ତିଆର୍ ମାଡ଼ାଟ୍ । ଆଦ୍ ଦିନେ ମୟଲ୍ କାର୍‍ୱି ଦ୍ୱଂସ ଆଦ୍‍ତା । ମୟଲ୍‍ତେ ଗ୍ରହ ଉକାକ୍‍ ଗାଟି କାମ୍‍କେତେ ଉଡ଼୍‍ୟି ଆଦ୍‍ତା ।
2PE 3:13 କିନ୍ତୁ ମାମେ ଇଶ୍ୱର୍‌ତେ ତିଆର୍ ମାଡ଼ିମାନ୍ଦାନ୍ ୱେରଡ଼୍ ପୁନେ ମୟଲ୍ ନୁ ପୁନେ ପୃତିବିତାଗ୍ ମିନ୍ଦେଡ଼୍ । ଆଗେ ଦାର୍ମାମ୍‌ ନାରୁଡ଼୍ ମାନ୍ଦାନ୍‍ ପଡ଼୍‍ୟେ ଆଦ୍‍ତେ ।
2PE 3:14 ଆ ପ୍ରିୟ ସାଙ୍ଗନଡ଼ି, ଆଦ୍ ଦିନାତେ କେପାନ୍‍ ସମୟତେ ମିଡ଼୍ ଇଶ୍ୱର୍‌ତେ କଣ୍ଡେତେ ପବିତ୍ର ନୁ ନିର୍ଦଷ୍‌ ଆସ୍ ଶାନ୍ତିତେ ମାନ୍ଦାନଙ୍କ୍ ଜିୱେତାଗେ ଚେଷ୍ଟା ମାଡ଼ାଟ୍ ।
2PE 3:15 ଏର୍କେ ମାଡ଼ାଟ୍, ପ୍ରବୁ ବେସର୍ ଲେକେତ୍ । ମିୟାଦ୍ ପରିତ୍ରାଣ ସେଙ୍ଗେ ଅଣ୍ଡ୍‌‍ ବେସର୍ ସୁଯଗ୍ ଇଦୁତନ୍ । ମାନ୍‍ ପ୍ରିୟ ଦାଦାଲ୍‍ ପାଉଲ୍ ଇଶ୍ୱର୍‌ତାଗାଙ୍କ୍ ପାଏମ୍‍ଆତ୍‍ତେ ଜ୍ଞାନ୍‍ତଡ଼୍ ମୀଇ ଗାରେ ଇଦ୍ ଲେକାମ୍ ଚିଟି ଲେକ୍‍ତଣ୍ଡ୍‍ ।
2PE 3:16 ଅଡ଼୍‌ ଲେକ୍‍ତେ ଚିଟିନାଗ୍ ଇଦ୍ ବିଷୟତେ ଅଣ୍ଡ୍‌ ଲେକ୍‍ତଣ୍ଡ୍‍ । ଆଲେକ୍‍ତ ଅନ୍‌ ଚିଟିନାଗ୍ ବେସର୍ ବିଷୟ ବୁଜେମ୍ ଆଦାଙ୍କ୍ କଷ୍ଟ ଆଦ୍‍ତେ । କିନ୍ତୁ ମୁର୍କ ନୁ ଦାନ୍ଦେ ଲେକେତ୍ ନାରୁଡ଼୍ ଶାସ୍ତ୍ରତାଦ୍‍ ବାଗାତ୍ ଦୁଡ଼େ ଲେକାମ୍ ପାଉଲ୍‍ତେ ଚିଟିନାଗ୍‍ ମିକା କାରାପ୍‍ ଅର୍ତ ମାଡ଼ିତଡ଼୍‍ । ଇଦିନ୍‍ ତଡ଼୍ ଅଡ଼୍‌ ନିଜେ ନିଜର୍‍ ବିନାଶ୍‍ ସାଦନ୍ ମାଡ଼ୁତଡ଼୍ ।
2PE 3:17 କିନ୍ତୁ ପ୍ରିୟ ସାଙ୍ଗନଡ଼ି, ମିଡ଼୍ ଇୱୁସାରେ ମୁନେକଞ୍ଜ୍‍ ପୁତ୍‍ତିଡ଼୍ । ଆଦିଙ୍କ୍ ସାବ୍‍ଦାନ୍‍ତେ ମାନୁଟ୍‍, ବେଲାକି ଆ କାରାପ୍ ନାରୁଡ଼୍‍ତେ ବୁସା ଶିକ୍ଷାତଡ଼୍‍ ଚାଲେମ୍‍ ଆସ୍‍ ନିଜର୍‍ ଦୃଡ଼ ବିଶ୍ୱାସ୍‍ତାଗାଙ୍କ୍‍ ଜେକେ ଆନ୍‌‍ମାଟ୍‍ ।
2PE 3:18 କିନ୍ତୁ ମାନ୍‍ ପ୍ରବୁ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନ୍ ଜ୍ଞାନ୍ ନୁ ଅନୁଗ୍ରହତେ ମିଡ଼୍‍ ପେର୍‍ସାଟ୍‍ । ଇଞ୍ଜେ ନୁ ସାରେଦିନା ଅନାଦ୍‌‍ ଗୌରବ୍‍ ଆୟି, ଆମେନ୍‍ ।
1JO 1:1 ନାର୍ଗେ କାଲାକଞ୍ଜ ବେନ୍‍ ମିନ୍ଦେ, ଆଦ୍ ଜିୱେତେ ବାକ୍ୟ ବିଷୟତେ ମାମେ ଲେକାନଙ୍କ୍ ଅଦୁତମ୍ । ଅନ୍‌ ଗଟି ମାମେ କେଞ୍ଜ୍‍ତମ୍, ଅଙ୍କ୍‌ ମାମେ ଉଡ଼୍‍ତମ୍ ଇଦ୍ ନିଜାମ୍, ନିଜେତ୍ କଣ୍ଡେତେ ଉଡ଼୍‍ତମ୍ ନୁ ଅଙ୍କ୍‌ ଇଟ୍‍ତମ୍ ।
1JO 1:2 ଜିୱେତେ ଆଦ୍ ବାକ୍ୟ ବେସୁଙ୍କ୍‍ ତଅନ୍‌ଦ୍‍ତେ, ମାମେ ଆଦିଙ୍କ୍ ଉଡ଼୍‍ତମ୍; ଆଦିଙ୍କ୍ ଅଦିନ୍‌ ବିଷୟତେ ମାମେ ଇଦ୍ ଗଟି ସାକ୍ଷ୍ୟ ଇସ୍ କେସମିନ୍ଦେମ୍ ଯେ, ଅନନ୍ତ ଜିୱୁଣ୍ଡ୍‍ ଲେକାମ୍ ଆ ବାବାଲ୍ ଇଶ୍ୱର୍ ତଡ଼୍ ସାରେଦାମ୍ ମାନ୍‍ତେ ନୁ ଅଣ୍ଡ୍‌ ମାନ୍‍ ଗାରେ ତଅନ୍‌ଦିମିନ୍ଦେଣ୍ଡ୍‍ ।
1JO 1:3 ବାତେ ମାନାଡ଼୍ ନିଜାମ୍‍ତେ ଉଡ଼ୁତାଡ଼୍ ନୁ କେଞ୍ଜୁତାଡ଼୍, ମାତର୍ ଆଦ୍ ଗଟ୍ ମିଇ ଗାରେ କେତୁତମ୍ । ଇଦ୍ କେଞ୍ଜି ବାବାଲ୍ ଇଶ୍ୱର୍ ନୁ ତାନ୍ ମାର୍‍ ଜିସୁ କ୍ରିଷ୍ଟନ୍ ତଡ଼୍ ମାମେ ବେନ୍ ସାରେ ବିଷୟ ମିନ୍ଦେ, ଆଗେ ମିଡ଼୍ ବାଗିଦାର୍‍ ଆଦ୍‍ତିଡ଼୍ ।
1JO 1:4 ମାନ୍‍ୱାଦ୍‍ ୱେଡ଼୍‍କେ ବେଲାକି ପୁରା ଆଦ୍‍ତେ ଅଦିନ୍‌ ସେଙ୍ଗେ ମାନାଡ଼୍‍ ଇୱୁସାରେ ଲେକୁତାଡ଼୍‍ ।
1JO 1:5 ଇଶ୍ୱର୍‌ତେ ମାର୍‍ ଜିସୁ କ୍ରିଷ୍ଟନାଗାଙ୍କ୍ ମାମେ ବେନ୍ ଗଟି କେଞ୍ଜି କେତୁତମ୍, ଆଦ୍ ଅଦୁତ୍, ଇଶ୍ୱର୍ ଆଦୁତଣ୍ଡ୍‍ ୱେସ୍‍ ଅନାଗେ ଅଣ୍ଡୟ୍‌ ବିନ୍ଦୁ ମିକା ଇକାଡ଼୍ ଇଲେ ।
1JO 1:6 ଅନ୍‌ ତଡ଼୍‍ ମାୟାଦ୍‌ ନିଜମ୍‍ ସତ୍‍ ସମ୍ପର୍କ ମିନ୍ଦେ ଇଞ୍ଜ କେସ୍, ଯଦି ଇକାଡ଼୍‌ତାଗ୍ ମାନ୍‍ତାଡ଼୍, ଗଟ୍‍ତେ ନୁ କାମ୍‍ତେ ମାନାଡ଼୍ ମିତ୍ୟାବାଦିଡ଼୍ ଆଦ୍‍ତାଡ଼୍ ।
1JO 1:7 ବାତେଙ୍କ୍‍ଇତ୍କେ ଇଶ୍ୱର୍‌ତେ ଲେକାମ୍ ମାନାଡ଼୍ ଯଦି ୱେସିନାଗ୍ ମାନ୍‍ତାଡ଼୍, ମାନାଡ଼୍ ନିଜେ ନିଜର୍‍ ଲୋପେ ସାହାଯ୍ୟ ଦର୍କିତ୍ ନୁ ତାନ୍ ମାର୍‍ ଜିସୁନ୍ ନେତୁର୍ ମାନଙ୍କ୍ ସାରେତ୍ ପାପତାଗାଙ୍କ୍ ପରିଷ୍କାର୍ ମାଡ଼ିତେ ।
1JO 1:8 ମାନାଡ଼୍‍ ଯଦି ନିଜେତିଙ୍କ୍ ପାପିଆୟ ଇଞ୍ଜ ଏର୍କେ ମାଡ଼୍‍କେ, ଆଲେକ୍ ନିଜେ ନିଜର୍‍ ଲୋପେ ମିଚ୍‍ କେତୁତାଡ଼୍ ମାନାଗେ ସୁଦୁର୍‍ ବା ସତ୍‍ ଇଲେ ।
1JO 1:9 ବାତେଙ୍କ୍ଇତ୍କେ ଇଶ୍ୱର୍‌ତେ ଗାରେ ଯଦି ମାନାଦ୍‍ ପାପ୍ ସ୍ୱୀକାର୍ ମାଡ଼ିତାଡ଼୍, ଇଶ୍ୱର୍ ତାନ୍ ଅନ୍‌‍ ଆଦେଶ୍‌ତେ ମାନ୍‍ ପରୁ ନ୍ୟାୟତେ ବ୍ୟବହାର୍‌ ମାଡ଼ିତନ୍ ଅଣ୍ଡ୍‌ ମାନ୍‍ ପାପ କ୍ଷମା ମାଡ଼ି ସାରେ ଅଦର୍ମତେ ମାନାଙ୍କ୍ ପରିଷ୍କାର୍ ମାଡ଼ାନଙ୍କ୍‍ ବିଶ୍ୱସ୍ତ ବା ନ୍ୟାୟବାନ୍‍ ଆଦ୍‍ତଣ୍ଡ୍‍ ।
1JO 1:10 ମାନାଡ଼୍ ପାପ୍ ମାଡ଼ାୱାଡ଼୍ ଇଞ୍ଜ ଯଦି କେତିତାଡ଼୍, ଇଶ୍ୱର୍‌ତିଙ୍ଗ୍ ମିତ୍ୟାବାଦି ଇଞ୍ଜ ଲିନ୍ଦେ ମାଡ଼ୁତାଡ଼୍ ମେଣ୍ଡେ ଅନ୍‌ ବାକ୍ୟ ମାନ୍‍ ହୃଦୟତାଗ୍ ଇଲେ ।
1JO 2:1 ଆ ନା ପିଲାନଡ଼ି, ମିକିଙ୍କ୍ ନାୟାଦ୍ ଇଦ୍ ଚିଟି ଲେକେନାଦ୍ କାମ୍, ଇଦ୍ କାର୍‍ସ୍ ବେଲାନ୍ କି ମେଣ୍ଡେ ପାପ୍ ମାଡ଼୍‍ମାଟ୍ । ମେଣ୍ଡେ ମିଡ଼୍ ବେଲାନ୍ ପୁନ୍‍ତିଡ଼୍, ବେନ ଯଦି ପାପ୍‍ ମାଡ଼ିତନ୍, ମାନ୍‍ ସେଙ୍ଗେ ବାବାଲ୍ ଇଶ୍ୱର୍‌ତାଗେ କୃପାବିକ୍ଷା ମାଡ଼ାନଙ୍କ୍ ୱେରଣ୍ଡ୍ ଗାଟି ଦାର୍ମାମ୍‌ ନାରୁଣ୍ଡ୍ ମିନ୍ଦେଣ୍ଡ୍ ଅଣ୍ଡ୍‌‍ ପ୍ରବୁ ଜିସୁକ୍ରିଷ୍ଟ ।
1JO 2:2 ଅଣ୍ଡ୍‌ କ୍ରିଷ୍ଟ ନିଜେ ମାନାଦ୍‍ ବା ପୁରା ନାରୁଣ୍ଡ୍‍ ଜାତିତେ ପାପ୍ କ୍ଷମା ସେଙ୍ଗେ ଅଣ୍ଡ୍‌ ନିଜେ ବଲି ଆସ୍‍ ମିନ୍ଦେଣ୍ଡ୍‍ ।
1JO 2:3 ଇଶ୍ୱର୍‍ ଗଟ୍‍ତେ ଲେକାମ୍ ଆଦାନ୍ ସେଙ୍ଗେ ମାମେ ନିଜାମ୍ ଅଙ୍କ୍‌ ପୁନ୍‍ତମ୍‍ ।
1JO 2:4 ଯଦି ବେନ କେତିତନ୍ ଯେ, ଅଣ୍ଡ୍‌ ଇଶ୍ୱର୍‌ତିଙ୍କ୍ ପୁନ୍‍ତନ୍, ଆଗେକ୍‍ ବା ଅଣ୍ଡ୍‌ ଅଙ୍କ୍‌ ଗଟି ପାଲନ୍ ମାଡ଼ଣ୍ଡ୍, ଅଣ୍ଡ୍‌ ୱେରଣ୍ଡ୍ ମିତ୍ୟାବାଦି; ଆଦ୍ ସାରେଦାମ୍ ସତ୍‍ତେ ପଡ଼ିୟେ ଇଲା ।
1JO 2:5 କିନ୍ତୁ ବେନ ଅନ୍‌‍ ବାକ୍ୟ ପାଳନ୍ ମାଡ଼ିତଣ୍ଡ୍‍ ଇଶ୍ୱର୍‌ତାଗ୍‍ ଅନ୍‌‍ୱାଦ୍‍ ଗଟ୍‍ତେ ପାଲନ୍ ମାଡ଼ିତନ୍; ଇଶ୍ୱର୍‌ତେ ସେଙ୍ଗେ ଅନାଦ୍‌ ପ୍ରେମ ପାଏମ୍ ଆସ୍‍ମାନ୍ତନ୍ । ଜିୱେ ଇଶ୍ୱର୍‌ତେ ସତ୍‍ତା ମାନାଡ଼୍ ଯେ ଏର୍କାମାଡ଼ୁତାଡ଼୍; ଇଦ୍ ନିଜାମ୍‍ତେ ବେଲାନ୍ ପୁନ୍ଦେ ପାର୍‍ତାଡ଼୍ ?
1JO 2:6 ବେନ ଇଶ୍ୱର୍‌ତାଗ୍‍ ମିନ୍ଦେନ୍‍ ଇଞ୍ଜ କେତିତଣ୍ଡ୍‍, ଅଣ୍ଡ୍‌ କ୍ରିଷ୍ଟ ଜିସୁନ୍ ଲେକାମ୍ ଜୀବନ୍ ଯାପନ୍ ମାଡ଼ିଣ୍ଡ୍‍ ।
1JO 2:7 ପ୍ରିୟ ସାଙ୍ଗନଡ଼ି ! ବେନ୍ ଗଟ୍ ବିଷୟତେ ଲେକାନଙ୍କ୍ ଆଦୁତାନ୍, ଆଦ୍ ମୁନେଙ୍କ୍ କଞ୍ଜ୍ ପୁନାଦ୍‍ ଆୟ । ନାର୍ଗେ ଦିନାକଞ୍ଚ୍‍ ମିଡ଼୍ ଆଦ୍ କେଞ୍ଜ ୱାଦୁତିଡ଼୍, ମାମେ ପ୍ରଚାର୍ ମାଡ଼ାନ୍ ଗଟିନେ ଆୱୁ ଆଦେଶ୍‍ ମିଡ଼୍ କେଞ୍ଜ୍‍ତିଡ଼୍ ।
1JO 2:8 ଇତ୍କେ ଇଦିଙ୍କ୍ ଅଣ୍ଡୟ୍‌‍ ପୁନାଦ୍‍ ଆଦେଶ୍‍ ଲେକାମ୍ ଇଗେ ନାନ୍‍ ଲେକ୍‍ତାନ୍, ବାତେଙ୍କ୍‍ଇତ୍କେ ଇଦିନାଦ୍ ନିଜାମ୍ ମାତର୍‍ କ୍ରିଷ୍ଟନାଗେ କାମ୍‌ ଆତ୍‍ତେ ନୁ ମିଡ଼୍ ମିକା ନିଜେତ୍ ଜିୱେତାଗ୍ ଅନାଦ୍‌ ନିଜାତାଦ୍ ଏର୍କା ମାଡ଼େ ପାର୍‍ଦୁତିଡ଼୍‍; ବାତେଙ୍କ୍ଇତ୍କେ ଇକାଡ଼୍ ମାୟିଆଦୁତ୍ ନୁ ନିଜାତାଦ୍‍ ୱେସ୍ ଇଞ୍ଜେ ଆସମିନ୍ଦେ ।
1JO 2:9 ଯଦି ବେନ କେତ୍‍କେ, ଇଦ୍ ୱେସ୍‍ତାଗ୍‍ ଅଣ୍ଡ୍‌‍ ମିନ୍ଦେଣ୍ଡ୍‍, ବା ଅଣ୍ଡ୍‌‍ ତାନ୍ ତାମୁଙ୍କ୍ ପାସ୍‍କ ମାତ୍‍କେ, ଅଣ୍ଡ୍‌ ସାରେଦାମ୍ ଇକାଡ଼୍‌ତାଗ୍‍ ମାନ୍ଦାନନ୍ ।
1JO 2:10 ବେନ ଆୟି ନିଜେତ୍ ତାମୁଙ୍ଗ୍ ପ୍ରେମ ମାଡ଼ିତନ୍, ଅଣ୍ଡ୍‌‍ ୱେସିନାଗ୍‍ ମିନ୍ଦେଣ୍ଡ୍‍; ଅଣ୍ଡ୍‌ ଆସାମ୍‌ ତାଲ୍‍ଗି ରାଲନ୍ ।
1JO 2:11 ଇତ୍କେ ବେନ୍ ନାରୁଣ୍ଡ୍ ତାନ୍ ତାମୁଙ୍କ୍ ଗୃଣା ମାଡ଼ିତନ୍, ଅନ୍‌ ଇକାଡ଼୍‌ତାଗ୍ ମିନ୍ଦେଣ୍ଡ୍‍, ଅଣ୍ଡ୍‌ ଇକାଡ଼୍‍ ତାଗେ ବିଚରଣ ମାଡ଼ିତନ୍, ତାନ୍ ଆଦାନାଦ୍‍ ଆର୍ ଅଣ୍ଡ୍‌ ପୁନ୍ଦାଙ୍କ୍‍ ପାର୍‍ୱଣ୍ଡ୍, ଆମାସ୍‍ ଇକାଡ଼ା ଅଂକିଙ୍କ୍‌ କାନାଲ୍‌ ମାଡ଼ି ନେଃଏତିତ୍‍ ।
1JO 2:12 ପିଲାନଡ଼ି ! ମିକିଙ୍କ୍ ନାନେ ଇଦ୍ ଚିଟି ଲେକ୍‍ତାନ୍, ବାତେଙ୍କ୍ଇତ୍କେ କ୍ରିଷ୍ଟନ୍ ପେଦେର୍ ସେଙ୍ଗେ ମିୟାଦ୍ ପାପ୍ କ୍ଷମା ଆତ୍‍ତେ ।
1JO 2:13 ଆନିଦାଦିଡ଼୍, ମିକିଙ୍କ୍ ଇଦ୍ ଚିଟି ଲେକ୍‍ତାନ୍; ବାତ୍‍ତେଙ୍କ୍ଇତ୍କେ, ନାର୍ଗେ ଦିନାକଞ୍ଜ୍ ବେନ ମିନ୍ଦେଣ୍ଡ୍‍; ଅଙ୍କ୍‌ ମିଡ଼୍ ପୁତ୍‍ତିଡ଼୍ । ଲେୟେ ସମାଜ୍, ମିକିଙ୍କ୍ ମିକା ଇଦ୍ ଚିଟି ଲେକୁତାନ୍, ବାତେଙ୍କ୍‍ଇତ୍କେ ମିଡ଼୍ ପାପ୍‍ଆତ୍ମାତିଙ୍କ୍ ଆରେମ୍‍ ମାଡ଼େ ପାର୍‍ତିଡ଼୍‍ ।
1JO 2:14 ଆ ପିଲାନଡ଼ି ! ଇଦ୍ ଚିଟି ମିଇ ସେଙ୍ଗେ ଲେକୁତାନ୍, ବାତେଙ୍କ୍ଇତ୍କେ ପରମ୍ ବାବାଙ୍କ୍ ମିଡ଼୍ ପୁତ୍‍ତିଡ଼୍ । ବାବାଲଡ଼ି ! ମିକିଙ୍କ୍ ଇଦ୍ ଚିଟି ଲେକୁତାନ୍, ବାତେଙ୍କ୍ଇତ୍କେ ବେନ ନାର୍ଗେ ଦିନାକଞ୍ଚ୍‍ ମିନ୍ଦେଣ୍ଡ୍‍, ମିଡ଼୍ ଅଙ୍କ୍‌ ପୁତ୍‍ତିଡ଼୍ । ଲେୟେ ସମାଜ୍ ! ମିକିଙ୍କ୍ ଆନ୍‌ତେ ଇଦ୍ ଚିଟି ଲେକ୍‍ତାନ୍, ବାତେଙ୍କ୍ଇତ୍କେ ମିଡ଼୍‍ ଶକ୍ତି ମାନ୍ଦାନଡ଼ି, କ୍ରିଷ୍ଟନ୍‍ ବାକ୍ୟ ମିୟାଗ୍‍ ହୃଦୟତାଗ୍‍ ମିନ୍ଦେ ନୁ ମିଡ଼୍ ପାପ୍‍ଆତ୍ମାକିଙ୍କ୍ ଆରା ମାଡ଼୍‍ତିଡ଼୍‍ ।
1JO 2:15 ମିଡ଼୍ ଜଗତ୍‍ତିଙ୍କ୍‍ ବା ଆଗେ ମାନ୍ଦାନ୍‍ ବିଷୟ୍‍ ସାରେତିଙ୍କ୍‍ ପ୍ରେମ ମାଡ଼୍‍ମାଟ୍‍ । ଯଦି ବେନ ସଂସାର୍‍ତିଙ୍କ୍‍ ପ୍ରେମ ମାଡ଼ିତଣ୍ଡ୍‍, ଆଲେକେ ଅନାଗ୍‍ ବାବାନ୍ ପ୍ରେମ ଇଲେ ।
1JO 2:16 ବାତେଙ୍କ୍‍ଇତ୍‍କେ ମେନ୍ଦୁଲ୍‍ ଅବିଲାଷ, କଣ୍ଡେତାଦ୍‍ ଅବିଲାଷ ନୁ ଜାଗତିକ ଗର୍ବ, ସଂସାରତାଗ୍‍ ମାନ୍ଦାନ୍‍ ଇୱୁସାରେ ବିଷୟ୍‍ ବାବାନାଗାଙ୍କ୍ ଆୟ, ମାତର୍‌ ସଂସାର୍‍ତାଙ୍କ୍‍ ତିଆର୍‍ ଆତ୍‍ତେ ।
1JO 2:17 ନାରୁନ୍ ଜଗତ୍‍ ନୁ ତାନ୍ ବେନ୍ ସାରେ ବିଷୟ୍‍ କାମନା ମାଡ଼ିତଡ଼୍, ଆଦ୍ ସାରେ ବିନଷ୍ଟ ଗଟେମ୍ ଆଦ୍‍ତେ, ବାତେଙ୍କ୍‍ଇତ୍କେ ବେନଆଇ ଇଶ୍ୱର୍‌ତେ ଇଚ୍ଛା ପାଲନ୍ ମାଡ଼ିତନ୍, ଅଣ୍ଡ୍‌ ବେସୁଙ୍କ୍‌ବା ଡଲଣ୍ଡ୍‍ ।
1JO 2:18 ପିଲାନଡ଼ି ! ମାଡ଼େଙ୍ଗ୍‍ ଦିନାମ୍‍ ଗାରେ ଏୱୁତେ । କ୍ରିଷ୍ଟନ୍ ଶତ୍ରୁଡ଼୍ ୱାଦାନାଦ୍ ସମୟ ଆତ୍‍ତେ ଇଞ୍ଜ୍ କେଞ୍ଜ୍‍ତିଡ଼୍, କ୍ରିଷ୍ଟନ୍ ନାର୍ଗେ ଶତ୍ରୁଡ଼୍ ଇଞ୍ଜେ ତନ୍ଦୁତଡ଼୍; ଆସୁଙ୍ଗ୍ ମାଡ଼େଙ୍ଗ୍‍ ଦିନାମ୍‍ ଗାରେ ଏୱୁତା ଇଞ୍ଜ୍ ମାମେ ପୁତ୍‍ତମ୍ ।
1JO 2:19 ଇଡ଼୍‍ ମୁନେଙ୍କ୍‍ କଞ୍ଜ୍ ମାନ୍‍ ମାନ୍ଦେତେ ନାରୁଡ଼୍ ଆୟଡ଼୍, ଅଦିନ୍‌ ସେଙ୍ଗେ ଇଡ଼୍ ମାନାଙ୍କ୍ ୱିଡ଼୍‍ସ୍‍ତଡ଼୍, ମାନ୍‍ ମାନ୍ଦେ ଆସ୍‍ମାନ୍ଦାନ୍ ଇତ୍‍କେ, ଅଡ଼୍‌ ମାନ୍‍ତଡ଼୍ ମାନେଡ଼୍; ମାନାଗାଙ୍କ୍ ଯେକା ଆଦାନ୍‍ତଡ଼୍ ଅଡ଼୍‌ ମାନ୍‍ ମାନ୍ଦେତଡ଼୍ ଆୟଡ଼୍ ଇଞ୍ଜ ଟିକ୍‍ ପ୍ରମାନ୍ ଆସ୍‍ମିନ୍ଦେ ।
1JO 2:20 ଇତ୍କେ ମିଡ଼୍ କ୍ରିଷ୍ଟନ୍ ଅନୁଗ୍ରହ ତାଗାଙ୍କ୍ ପବିତ୍ରଆତ୍ମାନ୍‍ତଡ଼୍ ଅବିଷିକ୍ତ ଆସ୍‍ମିନ୍ଦେଡ଼ି; ମିଡ଼୍ ସାରେତଡ଼୍ ସତ୍‍ ବାତେ ପୁତ୍‍ତିଡ଼୍ ।
1JO 2:21 ମିଡ଼୍‍ ସତ୍‍ ପୁନ୍‍ୱାଙ୍କ୍ ନାନ୍‍ ମିକିଙ୍କ୍ ଇଦ୍ ଚିଟି‍ ଲେକ୍‍ତନନ୍, ଆଦ୍ ଆୟ; ମାତର୍‌ ସ୍ପଷ୍ଟତେ ପୁତ୍‍ତିଡ଼୍ ଇଞ୍ଜ ଲେକୁତାନ୍, ସତ୍‍ ତାଗାଙ୍କ୍ ବେନେଆଇ ମିତ୍ୟା ତିଆର୍‍ ଆଦ୍‍ଦେ ପାର୍‍ୱ ଇଞ୍ଜ ପୁତ୍‍ତିଡ଼୍ ।
1JO 2:22 ଆଲେକ୍ ମିତ୍ୟାବାଦି ବେନ ? ଜିସୁଙ୍କ୍ ତ୍ରାଣକର୍ତାଲ୍‍ କ୍ରିଷ୍ଟ ଇଞ୍ଜ ବେନ ସ୍ୱୀକାର୍ ମାଡ଼ଣ୍ଡ୍, ଅଣ୍ଡ୍‌ ମିତ୍ୟାବାଦି । ମେଣ୍ଡେ ଅଣ୍ଡ୍‌‍ କ୍ରିଷ୍ଟନ୍ ଶତ୍ରୁ ନାରୁଣ୍ଡ୍‍, ବାବାଲ୍ ଇଶ୍ୱର୍ ନୁ ତାନ୍ ମାର୍‍ ଜିସୁ, ଇର୍‍ୱୁଡ଼୍‍କ୍‍ ଆସ ଅଣ୍ଡ୍‌‍ ଗୃନା ମାଡ଼ିତଣ୍ଡ୍‍ ।
1JO 2:23 ମାତର୍‌ ବେନ ମାରିଙ୍କ୍ ଗୃନା ମାଡ଼ିତନ୍, ଅଣ୍ଡ୍‌ ବାବାଙ୍କ୍ ମିକା ଗୃନା ମାଡ଼ିତନ୍; ବେନ ମାରିଙ୍କ୍ ଗ୍ରହନ୍‌ ମାଡ଼ିତନ୍, ଅଣ୍ଡ୍‌ ତାନ୍ ଜିୱେତେ ବାବାନ୍ ସତ୍ତା ମିକା ଏର୍କେ ମାଡ଼ିତନ୍ ।
1JO 2:24 ମୁନେଙ୍କ୍‍କଞ୍ଜ୍ ବେନ୍ ଗଟ୍‍ କେଞ୍ଜ ୱାତ୍‍ତିଡ଼୍, ଆଦିନ୍ ସେଙ୍ଗେ ବିଶ୍ୱସ୍ତ ଆସ୍ ମାନୁଟ୍ । ମୁନେଙ୍କ୍ କଞ୍ଜ୍ ବାତେ କେଞ୍ଜ୍‍ତିଡ଼୍, ଅଙ୍କ୍‌ ଯଦି ଲେକେତ୍‍ ନେଏତେ ପାର୍‍ତିଡ଼୍, ଆଲେକେ, ମିଡ଼୍ ବାବାଙ୍କ୍ ଇଶ୍ୱର୍ ନୁ ତାନ୍ ମାରିନ୍‍ ତୋଡ଼୍ ସାରେଦିନାତ୍ ସେଙ୍ଗ୍ କାଇଲି ମାନ୍‍ତିଡ଼୍ ।
1JO 2:25 ମାକିଂଙ୍କ୍ ଇଦ୍ ଦାନ ମାଡ଼ାନ୍ ସେଙ୍ଗେ ସ୍ୱଂୟ କ୍ରିଷ୍ଟ ପ୍ରତିଜ୍ଞା ମାଡ଼ି ମିନ୍ଦେନ୍ ଇଦ୍‍ଏକେ ଅନନ୍ତ ଜିୱୁନ୍ ।
1JO 2:26 ବେନଡ଼୍ ମିକିଂଙ୍କ୍ ତିପାଲ୍‍ ମାଡ଼ାନଙ୍କ୍ ଚେଷ୍ଟା ମାଡ଼ୁତଡ଼୍, ଅଡ଼୍‌‍ ବିଷୟ୍‍ତେ ମିକିଂଙ୍କ୍ ସତର୍କ ମାଡ଼ିଦୁତେ ।
1JO 2:27 ମିକିଂଙ୍କ୍ କ୍ରିଷ୍ଟ ଜିସୁ ତାନ୍ ପବିତ୍ରଆତ୍ମାତେ ପରିପୂର୍ଣ୍ଣ ମାଡ଼ିମିନ୍ଦେନ୍ । ବେସୁଙ୍କ୍‍ ଆୟ୍‍ନା ଆଦ୍ ଆତ୍ମା ମୀଇ ହୃଦୟତାଗ୍ ବିରାଜ୍‍ମାନ୍, ୱେରେ ନାରୁଡ଼ାଗାଙ୍କ୍ ଶିକ୍ଷା ଗ୍ରହନ୍‌ ମାଡ଼ାନାଦ୍ ମିୟାଦ୍ ଦର୍‍କାର୍‍ ଇଲେ । ପବିତ୍ରତ୍ମା ମିକିଂଙ୍କ୍ ସାରେ ବିଷୟତେ ସତ୍‍ ଶିକ୍ଷା ଇଦ୍‍ତନ୍ ତାନ୍ ଶିକ୍ଷା ମିଚ୍‍ ଆୟ । ଆଦ୍ ଆତ୍ମାତେ ଶିକ୍ଷା ପାଲନ୍ ମାଡ଼ି କ୍ରିଷ୍ଟନ୍ ତଡ଼୍ କାଇଲି ମାନୁଟ୍ ।
1JO 2:28 ଆ ପିଲାନଡ଼ି ! କ୍ରିଷ୍ଟନ୍‍ତଡ଼୍ କାଇଲି ମାନ୍‍ନୁଟ୍, ଆଲେକେ ଅନ୍‌‍ୱାଦ୍‍ ବେସୁଙ୍କ୍‍ ଆବିର୍ବାବ ଆଦ୍‍ତେ, ମାନାଡ଼୍ ୱେର୍ରେ ଇଲ୍‍ୱେ ଅନ୍‌ ମୁନେ ଆଦେ ପାର୍‍ତାଡ଼୍, ଆୱୁ ଦିନାକିନେ ମାନାଙ୍କ୍ ସିଗ୍‍ତଡ଼୍‍ ମିଞ୍ଜାନଙ୍କ୍ ଆୟ ।
1JO 2:29 ମାନାଡ଼୍‍ ପୁତ୍‍ତାଡ଼୍‍ ଯେ, କ୍ରିଷ୍ଟ ପୁରାପୁରି ନ୍ୟାୟବାନ୍ । ଆଗେକ୍‍ବା ମାନାଡ଼୍‍ ପୁତ୍‍ତାଡ଼୍‍ ଯେ, ବେନଡ଼୍‍ ସତ୍‍ କାମ୍‍ ମାଡ଼ିତଡ଼୍‍ ଅଡ଼୍‌‍ ଇଶ୍ୱର୍‌ତେ ମାର୍‍କ୍‍ ।
1JO 3:1 ଇଶ୍ୱର୍‍ ମାନାଙ୍କ୍ ବେସର୍ ପ୍ରେମ ମାଡ଼ୁତନ୍, ସୁଦୁର୍ ଚିନ୍ତା ମାଡ଼ୁଡ଼ାଟ୍ । ମାନ୍‍ ସେଙ୍ଗେ ଅନାଦ୍‌ ପ୍ରେମ ଇସର୍ ନାର୍ଗେ ଯେ, ମାନାଡ଼୍ ଅନ୍‌ ପିଲା ଲେକାମ୍ ଲେକା ଆତ୍‍ତାଡ଼୍ । ନିଜାମ୍ ମାନାଡ଼୍ ଅନ୍‌ ପିଲାନଡ଼୍ ଆଦିନ୍ ସେଙ୍ଗେ ଜଗତ୍ ଇଶ୍ୱର୍‍ ତିଙ୍କ୍ ପୁନ୍‍ୱାଙ୍କ୍, ମାନାଙ୍କ୍ ମିକା ଏଞ୍ଚେପାର୍‍ୱ ।
1JO 3:2 ଆ ନା ପ୍ରିୟ ସାଙ୍ଗନଡ଼ି, ଇଞ୍ଜେ ମାନାଡ଼୍ ଇଶ୍ୱର୍‌ତେ ପିଲାନଡ଼୍, ବାତେଙ୍କ୍ଇତ୍କେ ବବିଷ୍ୟତ୍‍ତେ ବାତେ ଆଦ୍‍ତାଡ଼୍, ଇଦ୍‍ ଗଟ୍ ମେଣ୍ଡେ ପ୍ରକାଶ୍ ଆୟକେ । ଇସର୍ ମାତର୍‌ ମାନାଡ଼୍ ପୁତ୍‍ତାଡ଼୍, ବେସୁଙ୍କ୍‍ କ୍ରିଷ୍ଟ ମେଣ୍ଡନ୍‍ଦାମ୍ ୱାଦ୍‍ତନ୍, ମାନାଡ଼୍ ଅନ୍‌‍ୱାଦ୍‍ ନିଜାତାଦ୍‍ ମକମ୍‌ ଉଡ଼ି ଅନ୍‌‍ ଲେକାମ୍ ଆଦ୍‍ତାଡ଼୍ ।
1JO 3:3 ବେନଡ଼୍ କ୍ରିଷ୍ଟନାଗେ ଇଦ୍ ଆଶେ ମାଡ଼ିମିନ୍ଦେଡ଼୍‍, ଅଡ଼୍‌ କ୍ରିଷ୍ଟନ୍ ଲେକାମ୍ ନିଜେତିଙ୍କ୍ ପବିତ୍ର ମାଡ଼ି ନେଃଏତିତଡ଼୍‍ ।
1JO 3:4 ବେନ ଆୟି ପାପ ମାଡ଼ିତନ୍, ଅଣ୍ଡ୍‌ ଇଶ୍ୱର୍‌ତେ ଆଜ୍ଞା ପାଲନ୍ ମାଡ଼ଣ୍ଡ୍, ବାତେଙ୍କ୍ଇତ୍କେ ଅପରାଦ୍‌ ଅର୍ତ ଅଦୁତ୍ ନିୟମ୍‍ ପାଲନ୍ ମାଡ଼୍‍ୱାଦ୍‍ ।
1JO 3:5 ମାନାଦ୍‍ ପାପାମ୍‍ କାଞ୍ଜୀ ଆଦାନ୍‍ ସେଙ୍ଗେ କ୍ରିଷ୍ଟ ୱାସ୍‍ମାତ୍‍ତନ୍ ମେଣ୍ଡେ ଅନାଗେ ପାପାମ୍‍ ଇଞ୍ଜ ବାତ୍‍ ଇଲ୍‍ୱେ ମାତ୍‍ତେ ।
1JO 3:6 ବେନ କ୍ରିଷ୍ଟନ୍‍ ତଡ଼୍ କାଇଲି ମାନ୍‍ତଣ୍ଡ୍‍, ଅଣ୍ଡ୍‌ ମେଣ୍ଡେ ପାପିନାରୁଣ୍ଡ୍ ଆଦେ ପାର୍‍ୱଣ୍ଡ୍ । ଇତ୍କେ ବେନ ପାପାମ୍‍ତାଗ୍ ମାନ୍‍ତଣ୍ଡ୍‍, ଅଣ୍ଡ୍‌ କ୍ରିଷ୍ଟଙ୍କ୍ ବେସୁଙ୍କ୍‍ ଉଡ଼ଣ୍ଡ୍, ବେସୁଟ୍‌ ଅଂକିଙ୍କ୍‌ ପୁନ୍‍ଣ୍ଡ୍‍ ।
1JO 3:7 ଆ ପିଲାନଡ଼ି ! ବେନ ମିକିଙ୍କ୍ ପ୍ରତାରିତ ମାଡ଼୍‍ମାକିଣ୍ଡ୍‍ । ବେନ ଆୟି ସତ୍‍କାମ୍ ମାଡ଼ିତନ୍, ଅଣ୍ଡେକେ ମାତର୍‌ କ୍ରିଷ୍ଟନ୍ ଲେକାମ୍ ନିଜାତଣ୍ଡ୍‍ ଦାର୍ମିକ୍ ନାରୁଣ୍ଡ୍‍ ।
1JO 3:8 ବେନ ପାପାମ୍‍ ମାଡ଼ିତଣ୍ଡ୍, ଅଣ୍ଡ୍‌ ସୃଷ୍ଟିତେ ମୁନେଙ୍କ୍ କଞ୍ଜ୍ ପାପାମ୍‍ ମାଡ଼ଡ଼୍‍ ୱାସମାନ୍ଦାନ୍ ଶୟତାନ୍‍ତେ ପେର୍କେ ଆଦାନଣ୍ଡ୍‍ । ଆ ଶୟତାନ୍‍ତେ କାମ୍‍ତିଙ୍ଗ୍ ଦ୍ୱଂସ ମାଡ଼ାନ୍ ସେଙ୍ଗେ ଇଶ୍ୱର୍‌ତେ ମାର୍‍ ୱାସ୍‍ ମାତ୍‍ତଣ୍ଡ୍‍ ।
1JO 3:9 ବେନ ପ୍ରକୃତତେ ଇଶ୍ୱର୍‌ତେ ମାର୍‍; ଅଣ୍ଡ୍‌ ପାପାମ୍‍ ମାଡ଼୍‍ୱେ ମାନ୍‍ତଣ୍ଡ୍‍, ବାତେଙ୍କ୍ଇତ୍କେ ଇଶ୍ୱର୍‌ତେ ପ୍ରକୃତି ଅନାଗ୍‍ ମିନ୍ଦେ । ଇଶ୍ୱର୍ ତାମ୍‍ ବାବାଲ୍, ଅଣ୍ଡ୍‌ ପାପିଆସ୍ ମାନ୍ଦେ ପାର୍ୱଣ୍ଡ୍‍ ।
1JO 3:10 ଇଗେ ବେନ ଇଶ୍ୱର୍‌ତେ ପିଲା ନୁ ଶୟତାନ୍ ପିଲା ଇଦ୍ ପ୍ରକାଶ୍‍ ଆଦ୍‍ତେ, ବେନ୍ ସତ୍‍କାମ୍ ମାଡ଼ଣ୍ଡ୍ ବା ନିଜର୍‍ ବିଶ୍ୱାସୀ ଏଲାଡ଼୍‍ତାମୁଙ୍କ୍ ପ୍ରେମ ମାଡ଼ଣ୍ଡ୍, ଅଣ୍ଡ୍‌ ଇଶ୍ୱର୍‌ତେ ପିଲେ ଆୟଣ୍ଡ୍ ।
1JO 3:11 ୱେରଣ୍ଡ୍ ମେଣ୍ଡେ ଅର୍‍ତୁଙ୍କ୍ ପ୍ରେମ ମାଡ଼ାନଙ୍କ୍ ଆଦ୍‍ତେ, ଇଦ୍ ଗଟ୍ ମୁନେଙ୍କ୍‍ କଞ୍ଜ୍ କେଞ୍ଜ୍‍ତିଡ଼୍ ।
1JO 3:12 ମାନାଡ଼୍ କୟିନ ଲେକାମ୍ ଆୟ୍‍ୱାଡ଼୍ । କୟିନ ଶୟତାନ୍‍ ତଡ଼୍ କାଇଲି ନିଜର୍‍ ତାମୁଙ୍କ୍ ଆୱୁକ୍‍ତଣ୍ଡ୍‍ । ତାନ୍ ତାମୁଙ୍କ୍ ଅଣ୍ଡ୍‌ ବାତ୍‍ତିଙ୍କ୍ ଆୱୁକ୍‍ତଣ୍ଡ୍‍ ? ଅନ୍‌‍ ନିଜର୍‍ କାମ୍ ସତ୍‍ ଇଲ୍‍ୱେ ମାତ୍‍ତେ; କିନ୍ତୁ ତାନ୍ ତାମୁଣ୍ଡ୍ ସାରେଦାମ୍ ନେଲେକାମ୍ ମାଡ଼ମାତ୍‍ଣ୍ଡ୍‍ ।
1JO 3:13 ଆ ନା ଏଲାଡ଼୍‍ତାମୁଣ୍ଡ୍‍ ଇଦ୍ ଜଗତ୍‍ତେ ନାରୁଡ଼୍‍ ଯେ ମିକିଙ୍କ୍ ବେନ ଗୃଣା ମାଡ଼ିତଡ଼୍, ଆଦିଙ୍କ୍ ଆଶର୍ଯ୍ୟ ଆୟ୍‍ମାଟ୍ ।
1JO 3:14 ଯଦି ମାମ୍‍ କ୍ରିଷ୍ଟିୟାନ୍‍ ଏଲାଡ଼୍‍ତାମୁଙ୍କ୍‍ ପ୍ରେମ ମାଡ଼ୁତାଡ଼୍‍ ମାମେ ପୁତ୍‍ତମ୍ ଯେ, ଇଞ୍ଜେ ମାନାଡ଼୍ ଡଲାନାଦିଙ୍କ୍ ଅତିକ୍ରମ୍ ମାଡ଼ି ଜିୱେ ପାଏମ୍‍ ଆତ୍‍ତାଡ଼୍ । ବେନ ପ୍ରେମ ମାଡ଼ଣ୍ଡ୍, ଅଣ୍ଡ୍‌ ଇଞ୍ଜେ ଗାଲା ଡଲାନାଗେ ମିନ୍ଦେଣ୍ଡ୍‍ ।
1JO 3:15 ବେନଆୟି ଆନ୍‌ୱେ କ୍ରିଷ୍ଟିୟାନ୍‍ ଏଲାଡ଼୍‍ତାମୁଙ୍କ୍ ଗୃଣା ମାଡ଼ିତନ୍, ଅଣ୍ଡ୍‌ ୱେରଣ୍ଡ୍ ହତ୍ୟାକାରୀ । ହତ୍ୟାକାରୀଙ୍କ୍‍ ଅନନ୍ତ ଜିୱେତାଗ୍ ଅଦିକାର୍‌ ଇଲେ ଇଞ୍ଜ ମିଡ଼୍ ପୁତ୍‍ତିଡ଼୍ ।
1JO 3:16 ମାନ୍‍ ସେଙ୍ଗେ କ୍ରିଷ୍ଟନାଦ୍ ଜିୱୁଣ୍ଡ୍ ଇତ୍‍ତାଗାଙ୍କ୍ ମାନାଡ଼୍ ପ୍ରେମ ଶିକ୍ଷା ମାଡ଼ୁତମ୍ । କ୍ରିଷ୍ଟିୟାନ୍‍ ଏଲାଡ଼୍‍ତାମୁଙ୍କ୍ ସେଙ୍ଗେ ଜିୱୁଣ୍ଡ୍‍ ଇଦାନଙ୍କ୍ ମାନାଡ଼୍ ମିକା ତିଆର୍ ଆସ୍ ମାନ୍ଦାନାଦ୍ ସାୟେ ।
1JO 3:17 ଯଦି ୱେରଣ୍ଡ୍ ସାଉକାର୍ ନାରୁଣ୍ଡ୍‍ କ୍ରିଷ୍ଟିୟାନ୍‍ ଏଲାଡ଼୍‍ତାମୁଣ୍ଡ୍‍ତେ ଅବାବ୍‍ ଉଡ଼ି ମିକା ଅନ୍‌ ସେଙ୍ଗେ ଦୟା ମାଡ଼ଣ୍ଡ୍, ଅନ୍‌ ହୃଦୟତାଗ୍ ଇଶ୍ୱର୍‌ତେ ପ୍ରେମ ମିନ୍ତେ ଇଞ୍ଜ ଅଣ୍ଡ୍‌ ବେଲାନ୍ କେତେ ପାର୍‍ତନ୍ ?
1JO 3:18 ପିଲାନଡ଼ି, ମାନାଦ୍‍ ନିଜାମ୍‍ ସତ୍‍ ପ୍ରେମ ଗଟିତିର୍‍ୟାନାଗ୍‍ ନୁ ବାକ୍ୟ କେତାନାଦ୍ କେଞ୍ଜ୍‍କେ ଆସରେ ଆୟ; ଆଦିଙ୍କ୍ କାମ୍‍ଦାଗ୍ ତଅତାନଙ୍କ୍ ଆଦ୍‍ତେ ।
1JO 3:19 ମାନ୍‍ୱାଦ୍‍ ପାଡ଼୍‍ୟି ତଡ଼୍‍ ମାନାଡ଼୍‍ ସତ୍‍ତେ ପିଲା ଇଞ୍ଜ ପୁନ୍‍ତାଡ଼୍‍ ।
1JO 3:20 ଯଦି ମାନ୍‍ ମନ୍ ମାନାଙ୍କ୍ ଦୋଷୀ ମାଡ଼ିତ୍, ମାନାଦ୍‍ ମନେ ନେଏତାନାଦ୍ ଉଚିତ୍ ଯେ, ଇଶ୍ୱର୍ ମାନ୍‍ ମାନ୍‍ତାଗାଙ୍କ୍ ଗାଟି ପରୁ ନୁ ଅଣ୍ଡ୍‌‍ ସାରେ ଗଟି ପୁତ୍‍ତଣ୍ଡ୍‍ ।
1JO 3:21 ଆଦିଙ୍କ୍ ନା ପ୍ରିୟ ନାରୁଡ଼ି ଯଦି ନିଜେତ୍ ମନ୍ ମାନାଙ୍କ୍ ଦୋଷୀ ମାଡ଼, ଇଶ୍ୱର୍‌ତେ ମୁନେ ମାନାଡ଼୍ ସତ୍‍ସାହସୀ ଆଦେ ପାର୍‍ତାଡ଼୍‍ ।
1JO 3:22 ମେଣ୍ଡେ ଅଙ୍କ୍‌ ବାତେ ତାଲ୍‍କିତାଡ଼୍, ଅଣ୍ଡ୍‌ ଆଦ୍‍ ଦାନ ମାଡ଼ିତନ୍, ବାତେଙ୍କ୍ଇତ୍କେ ମାନାଡ଼୍ ଅନ୍‌‍ ଆଦେଶ୍‍ ମାନେମ୍‍ ଅଦୁତାଡ଼୍‍; ମାନାଡ଼୍‍ କାମ୍‍ତଡ଼୍‍ ଅଂକିଙ୍କ୍‌ ସନ୍ତୁଷ୍ଟ ମାଡ଼ୁତାଡ଼୍ ।
1JO 3:23 ମାନ୍‍ ସେଙ୍ଗେ ଅନାଦ୍‌ ଆଜ୍ଞା ଅଦୁତ୍, ତାନ୍‍ ମାର୍‍ ଜିସୁ କ୍ରିଷ୍ଟନାଗେ ବିଶ୍ୱାସ୍ ମାଡ଼ିକାଡ଼୍ ନୁ କ୍ରିଷ୍ଟନ୍ ଆଦେଶ୍ ଲେକାମ୍ ୱେରଣ୍ଡ୍ ମେଣ୍ଡେ ଆର୍‍ତିଙ୍କ୍ ପ୍ରେମ ମାଡ଼ିକାଡ଼୍ ।
1JO 3:24 ବେନ ଆୟି ଇଶ୍ୱର୍‌ତେ ଆଜ୍ଞା ପାଲନ୍ ମାଡ଼ିତନ୍, ଅଣ୍ଡ୍‌ ଇଶ୍ୱର୍‍ ମାନ୍ଦାନାଦ୍‍ ପୁନ୍ଦେପାର୍‍ଦ୍‍ତଣ୍ଡ୍‍, ଅନ୍‌ ହୃଦୟତାଗ୍ ଇଶ୍ୱର୍‍ ମାନ୍‍ତଣ୍ଡ୍‍ । ଇଶ୍ୱର୍ ମାନ୍‍ ହୃଦୟତାଗ୍ ମାନ୍‍ତଣ୍ଡ୍‍, ଇଦ୍ ଗଟ୍ ମାନାଙ୍କ୍ ଇତ୍‍ତେ ଅନାଦ୍‌ ଆତ୍ମା ସାହାଯ୍ୟତେ ମାନାଡ଼୍ ପୁନ୍ଦାନଙ୍କ୍‍ ପାର୍‍ଦୁତାଡ଼୍ ।
1JO 4:1 ପ୍ରିୟ ସାଙ୍ଗନଡ଼ି ! ଇଶ୍ୱର୍‌ତେ ଆତ୍ମା ପାହେମ୍‍ ଆସ୍‍ମିନ୍ତେ ଇଞ୍ଜ୍ ବେନଡ଼୍ କେତୁତଡ଼୍, ଅଡ଼୍‌‍ ସାରେତଡ଼୍‍କ୍ ବିଶ୍ୱାସ୍‍ ମାଡ଼୍‍ମାଟ୍; ଅଡ଼୍‌‍ ପାଃଏମ୍ ଆସ୍‍ମାନ୍ଦାନ୍‍ ଆତ୍ମା, ସତ୍‍ତେ ଇଶ୍ୱର୍‌ତାଗେ ଆଗାତ୍ କି ଆୟ, ମୁନେ ପରିକ୍ଷା ମାଡ଼ି ଉଡ଼ାଟ୍‍ । ବାତେଙ୍କ୍‍ ଇତ୍କେ ଇଞ୍ଜେ ନାର୍ଗେ ବଣ୍ଡବାବବାଦିଡ଼୍‍ ସାରେତାକ୍ ବିଚରଣ୍ ମାଡ଼ୁତଡ଼୍ ।
1JO 4:2 ଅଡ଼୍‌ ଇଶ୍ୱର୍‌ତେ ଆତ୍ମା ପାହେମ୍‍ ଆସ୍‍ମିନ୍ଦେଡ଼୍ କି ଇଲେ, ତାନାଦ୍ ପୁନ୍ଦାନାଦ୍ ଉପାୟ ଅଦୁତ୍, ବେନ୍ ନାରୁନାଗେ ଇଶ୍ୱର୍‌ତେ ଆତ୍ମା ଅଦିଷ୍ଠତ, ଅଣ୍ଡ୍‌ କୁଲେମ୍‍ ଲେଙ୍ଗ୍‍ଦେ ସ୍ୱୀକାର୍ ମାଡ଼ିତନ୍ ଯେ, ଜିସୁ କ୍ରିଷ୍ଟ ନାରୁନ୍ ଲେକାମ୍ ୱାସ୍‍ମାତ୍‍ତଣ୍ଡ୍‍ ।
1JO 4:3 କିନ୍ତୁ ବେନ୍ ଜିସୁନ୍ ବିଷୟତେ ଇଦ୍ ଗଟ୍ ସ୍ୱୀକାର୍ ମାଡ଼ଣ୍ଡ୍, ଅଣ୍ଡ୍‌ ବେସୁଙ୍କ୍‍ ମିକା ଇଶ୍ୱର୍‌ତେ ଆତ୍ମା ଲାବ୍ ମାଡ଼ଣ୍ଡ୍, କ୍ରିଷ୍ଟନ୍ ଶତ୍ରୁନାଗାଙ୍କ୍ ଅଣ୍ଡ୍‌ ଆଦ୍‍ ଆତ୍ମା ପାଏମ୍‍ ଆତ୍‍ତଣ୍ଡ୍‍, ଇଦ୍ ଆତ୍ମାତେ ଆଗମନ୍ ବିଷୟତେ ମିଡ଼୍ କେଞ୍ଜ୍‍ତିଡ଼୍ ଆଦ୍ ଇଞ୍ଜେ ଇଦ୍ ଜଗତ୍‍ତାଗେ ମିନ୍ଦେ ।
1JO 4:4 କିନ୍ତୁ ପିଲାନଡ଼ି ! ମିଡ଼୍ ଇଶ୍ୱର୍‌ତେ ପିଲା । ଆ ବୁସା ମାଡ଼ାନ୍‍ ବାବବାଦୀଡ଼୍‍କ୍‍ ମିଡ଼୍ ଆରା ମାଡ଼୍‍ତିଡ଼୍, ବାତେଙ୍କ୍‍ଇତ୍କ ମୀଇ ହୃଦୟତାଗ୍ ବାସେ ମାଡ଼ମାନ୍ଦାନ୍ ଇଶ୍ୱର୍‌ତେ ଆତ୍ମା, ସଂସାର୍‍ତେ ନାରୁଡ଼୍‍ ଆତ୍ମାତାଗାଙ୍କ୍ ଅଦିକ୍‌ ଶକ୍ତିଶାଳି ।
1JO 4:5 ବୁସା ମାଡ଼ାନ୍‍ ବାବବାଦୀଡ଼୍ ସଂସାର୍‍ତେ ଗଟି କେସ ଉଡୁତଡ଼୍‍ ନୁ ସାଂସାରିକ୍‍ ନାରୁଡ଼୍ ଅଡ଼୍‌‍ ଗଟି କେଞ୍ଜୁତଡ଼୍ ।
1JO 4:6 କିନ୍ତୁ ମାନାଡ଼୍ ଇଶ୍ୱର୍‌ତେ ନାରୁଡ଼୍‍ । ବେନ ଆୟି ଇଶ୍ୱର୍‌ତିଙ୍କ୍ ପୁତ୍‍ତଣ୍ଡ୍‍, ଅଣ୍ଡ୍‌ ମାନ୍‍ ସେଙ୍ଗେ କେଞ୍ଜିତନ୍ । ବେନଡ଼୍ ଇଶ୍ୱର୍‌ତଡ଼୍ ଆୟଡ଼୍, ଅଡ଼୍‌ ମାନ୍‍ ଗଟି କେଞ୍ଜଡ଼୍ । ସତ୍ ଆତ୍ମା ନୁ ମିଚ୍‍ ଆତ୍ମା ଲୋପେ ଇଦ୍ ୱେରେ ମାନାଡ଼୍ ଉଡ଼େ ପାର୍‍ତାଡ଼୍ ।
1JO 4:7 ଆ ନା ପ୍ରିୟ ସାଙ୍ଗନଡ଼ି ! ନିଜର୍‍ ନିଜର୍‍ ଲୋପେ ପ୍ରେମ ମାଡ଼ାଟ୍, ବାତେଙ୍କ୍ଇତ୍କେ ପ୍ରେମ ଇଶ୍ୱର୍‌ତାଗାଙ୍କ୍ ୱାତ୍‍ତେ । ବେନନ୍ ହୃଦୟତାଗ୍ ପ୍ରେମ ମିନ୍ଦେ, ଅଣ୍ଡ୍‌ ଇଶ୍ୱର୍‌ତେ ପିଲା, ଅଣ୍ଡ୍‌ ଇଶ୍ୱର୍‌ତିଙ୍ଗ୍ ପୁତ୍‍ତଣ୍ଡ୍‍ ।
1JO 4:8 ବେନ ପ୍ରେମ ମାଡ଼ଣ୍ଡ୍, ଅଣ୍ଡ୍‌ ଇଶ୍ୱର୍‌ତିଙ୍କ୍ ପୁନଣ୍ଡ୍‍, ବାତେଙ୍କ୍ଇତ୍କେ ଇଶ୍ୱର୍‍ ପ୍ରେମମୟ ।
1JO 4:9 ଇଶ୍ୱର୍ ତାନ୍ ୱେରଣ୍ଡେ ଇଞ୍ଜ ମାର୍‍ ଜିସୁଙ୍କ୍ ଜଗତ୍‍ତାଗ୍ ରସ୍‍ମିକା ମାନ୍‍ ସେଙ୍ଗ୍ ଅନାଦ୍‌ ପ୍ରେମ କେସ୍‍ ମିନ୍ତେନ୍, ଆ ଜିସୁନ୍ ତଡ଼୍ ମାନ୍ଡ଼୍ ଅନନ୍ତ ଜିୱେ ପାଏମ୍‍ ଆଦ୍‍ତାଡ଼୍ ।
1JO 4:10 ଇଦ୍‍ କେ ନିଜାତାଦ୍‍ ପ୍ରେମ, ମାନାଡ଼୍ ଇଶ୍ୱର୍‌ତିଙ୍କ୍ ପ୍ରେମ ମାଡ଼୍‍ୱାଡ଼୍‍, ଅଣ୍ଡ୍‌ ମାନାଙ୍କ୍ ପ୍ରେମ ମାଡ଼ି, ମାନ୍‍ ପାପାମ୍‍ କାଞ୍ଜି ଆଦାନ୍ ସେଙ୍ଗେ ତାନ୍ ମାରିଙ୍କ୍‍ ରଅତଣ୍ଡ୍‍ ।
1JO 4:11 ଆ ନା ପ୍ରିୟ ସାଙ୍ଗନଡ଼ି, ଯଦି ଇଶ୍ୱର୍ ମାନାଙ୍କ୍ ଇଦ୍‍ଲେକାମ୍ ପ୍ରେମ ମାଡ଼୍‍ତନ୍, ମାନାଡ଼୍ ମିକା ନିଜେ ନିଜେତିଙ୍ଗ୍ ପ୍ରେମ ମାଡ଼ାନ୍‍ ଦର୍‍କାର୍‍ ।
1JO 4:12 ବେନ ବେସୁଙ୍କ୍‍ ଇଶ୍ୱର୍‌ତିଙ୍କ୍‍ ଉଡ଼ଣ୍ଡ୍, କିନ୍ତୁ ମାନାଡ଼୍ ଯଦି ନିଜେ ନିଜେତିଙ୍ଗ୍ ପ୍ରେମ ମାଡ଼ିତାଡ଼୍, ଇଶ୍ୱର୍ ମାନାଗେ ମାନ୍‍ତଣ୍ଡ୍‍ ନୁ ମାନାଗେ ଅନାଦ୍‌ ପ୍ରେମ ପୁରାପୁରି ଲାବ୍ ମାଡ଼ିତଣ୍ଡ୍‍ ।
1JO 4:13 ମାନାଡ଼୍ ଯେ ଇଶ୍ୱର୍‍ ତଡ଼୍ କାଇଲି ନୁ ଇଶ୍ୱର୍ ମାନ୍‍ ହୃଦୟତାଗ୍ ମାନ୍‍ତନ୍, ଇଦିନ୍ ନିଦର୍ଶନ୍ ଅଦୁତ୍, ଅଣ୍ଡ୍‌ ପବିତ୍ରଆତ୍ମାଙ୍କ୍ ମାନାଙ୍କ୍ ଇତ୍‍ତନ୍ ।
1JO 4:14 ଜଗତ୍‍ତେ ତ୍ରାଣକର୍ତ୍ତାଲ୍ ଲେକାମ୍ ଇଶ୍ୱର୍ ରସ୍‍ମାନ୍ଦାନ୍ ତାନ୍ ମାରିଙ୍କ୍ ନିଜର୍‍ କଣ୍ଡେତେ ଉଡ଼ି ଅନ୍‌‍ ବିଷୟ୍‍ତେ ମାମେ ୱେରେତଡ଼୍‍କିଙ୍କ୍‍ କେତୁତମ୍ ।
1JO 4:15 ବେନାୟି ଜିସୁଙ୍କ୍ ଇଶ୍ୱର୍‌ତେ ମାର୍‍ ଇଞ୍ଜ ବେନ ସ୍ୱୀକାର୍ ମାଡ଼ିତନ୍, ଇଶ୍ୱର୍ ଅନ୍‌ ହୃଦୟତାଗ୍ ମାନ୍‍ତନ୍ ନୁ ଅଣ୍ଡ୍‌ ଇଶ୍ୱର୍‌ତାଗ୍‍ ମିନ୍ଦେଣ୍ଡ୍‍ ।
1JO 4:16 ମାନ୍‍ ସେଙ୍ଗେ ଇଶ୍ୱର୍‌ତେ ପ୍ରେମତାଦ୍‍ ନିଜାମ୍ ମାମେ ପୁତ୍‍ତମ୍, ଇଗେ ମାୟାଦ୍‌ ପୁରା ବିଶ୍ୱାସ୍ ମିନ୍ଦେ । ଇଶ୍ୱର୍ ପ୍ରେମମୟ । ବେନନ୍ ଜିୱେତାଗ୍ ପ୍ରେମ ବର୍ତ୍ତି ଆସ୍‍ ମିନ୍ଦେ, ଅଣ୍ଡ୍‌ ଇଶ୍ୱର୍‍ ତଡ଼୍ କାୟ୍‍ଲ୍‍ତଣ୍ଡ୍‍ ନୁ ଇଶ୍ୱର୍ ଅନାଗ୍‍ ମିନ୍ଦେଣ୍ଡ୍‍ ।
1JO 4:17 ଇଶ୍ୱର୍‌ତେ ପାକେ ଜିୱୁଣ୍ଡ୍‍ ବାଦ୍‍କାନ୍‍ ତଡ଼୍‍ ମାନ୍‍ ଜିୱେତାଗ୍ ଇଦ୍ ପ୍ରେମ ସିଦ୍ଦ ଆତ୍‍କେ, ମାମେ ୱେର୍‍ୱେକଞ୍ଚ୍ ବିଚାର୍ ଦିନେ ମୁନେ ୱାଦେପାର୍‍ଦ୍‍ତାଡ଼୍‍, ବାତେଙ୍କ୍‍ଇତ୍କେ ଇଦ୍ ଜଗତ୍‍ତେ ମାଞ୍ଜ ମାମେ କ୍ରିଷ୍ଟନ୍ ଲେକାମ୍ ଜିବନ୍ ଜାପନ୍ ମାଡ଼ୁତମ୍ ।
1JO 4:18 ବେଗେ ପ୍ରେମ ମାନ୍‍ତେ, ଆଗେ ୱେର୍ରେ ମାନ । ସାୟେ ପ୍ରେମ ସାରେ ୱେର୍ରେ ଦୂରାମ୍ ମାଡ଼ିତ୍‍ । ବେନ ୱେର୍‍ତଣ୍ଡ୍‍, ଅନାଗେ ପ୍ରେମ ସଫଳ ଆୟ; ବାତେଙ୍କ୍‍ଇତ୍କେ ଦଣ୍ଡ୍‍ ଦର୍‍କାନାଦ୍ ୱେର୍ରେ ଅନାଦ୍‌ ମେଣ୍ଡେ ମିନ୍ତେ ।
1JO 4:19 ଅଣ୍ଡ୍‌‍ ମୁନେନ୍‍ ମାନାଙ୍କ୍‍ ପ୍ରେମ ମାଡ଼୍‍ତାଙ୍କ୍‍ ମାନାଡ଼୍‍ ପ୍ରେମ ମାଡ଼ାନଙ୍କ୍ ନାଡ଼୍‍ସ୍‍ତମ୍ ।
1JO 4:20 ଯଦି ବେନ କେତିତନ୍ ଯେ, ଅଣ୍ଡ୍‌ ଇଶ୍ୱର୍‌ତିଙ୍କ୍ ପ୍ରେମ ମାଡ଼ୁତଣ୍ଡ୍‍, ଆଲେକ୍ ଅଣ୍ଡ୍‌ ତାନ୍ ବିଶ୍ୱାସୀ ଏଲାଡ଼୍‍ତାମୁଙ୍କ୍ ଗୃଣା ମାଡ଼ିତଣ୍ଡ୍‍, ଅଣ୍ଡ୍‌ ମିତ୍ୟାବାଦି । ବାତେଙ୍କ୍‍ଇତ୍‍କେ ନିଜାମ୍‍ ଉଡ଼ ମାନ୍ଦାନ୍ ୱେରଣ୍ଡ୍ ତାମୁଙ୍କ୍ ବେନ ଆୟି ସ୍ନେହ ମାଡ଼େ ପାର୍‍ୱନ୍, ଅଣ୍ଡ୍‌ ତନ୍ଦ୍‍ୱେ ଇଶ୍ୱର୍‌ତିଙ୍କ୍ ବେସୁଙ୍କ୍‍ ପ୍ରେମ ମାଡ଼େ ପାର୍‍ୱନ୍ ।
1JO 4:21 ଇଦ୍ ଆଦେଶ୍ କ୍ରିଷ୍ଟ ମାକିଙ୍କ୍ ଇତ୍‍ତନ୍, ବେନ ଇଶ୍ୱର୍‌ତିଙ୍ଗ୍ ପ୍ରେମ ମାଡ଼ିତନ୍, ଅଣ୍ଡ୍‌ ନିଜାମ୍ ତାନ୍ ବିଶ୍ୱାସୀ ଏଲାଡ଼୍‍ତାମୁଙ୍କ୍‍ ପ୍ରେମ ମାଡ଼ିତନ୍ ।
1JO 5:1 ବେନ ଜିସୁଙ୍କ୍ କ୍ରିଷ୍ଟ ଇଞ୍ଜ ବିଶ୍ୱାସ୍ ମାଡ଼ିତଣ୍ଡ୍‍, ଅଣ୍ଡ୍‌ ଇଶ୍ୱର୍‌ତେ ମାର୍‍ । ବେନ ଆୟି ୱେରନ୍ ବାବାଙ୍କ୍ ପ୍ରେମ୍‌ ମାଡ଼ିତନ୍, ଆ ବାବାନ୍ ମାରିଙ୍କ୍ ମିକା ଅଣ୍ଡ୍‌ ସ୍ନେହ ମାଡ଼ିତନ୍ ।
1JO 5:2 ଯଦି ମାମେ ଇଶ୍ୱର୍‌ତିଙ୍କ୍ ପ୍ରେମ ମାଡ଼ି ଅନାଦ୍‌ ଆଜ୍ଞା ପାଲନ୍‍ ମାଡ଼ିତାଡ଼୍‍ ଇଶ୍ୱର୍‌ତେ ପିଲାନ୍‍ ସେଙ୍ଗେ ମାୟାଦ୍ ପ୍ରେମ ମିନ୍ଦେ ଇଞ୍ଜ ପୁନ୍ଦାଙ୍କ୍ ଆଦ୍‍ତେ ।
1JO 5:3 ଇଶ୍ୱର୍‌ତେ ସେଙ୍ଗେ ମାନାଦ୍‍ ପ୍ରେମ ମିନ୍ଦେ, ଇଦିନ୍ ଅର୍ତ, ମାନାଡ଼୍ ଅନ୍‌ ଆଜ୍ଞା ପାଲନ୍ ମାଡ଼ିତାଡ଼୍ । ଅନ୍‌ ଆଜ୍ଞା ପାଲନ୍ ମାଡ଼ାନାଦ୍ ଗାଟି କଷ୍ଟ ଇଲେ,
1JO 5:4 ବାତେଙ୍କ୍‍ଇତ୍କେ ଅନ୍‌‍ ପିଲା ଇଦ୍ ଜଗତ୍‍ତିଙ୍କ୍ ଆରା ମାଡ଼ାନଙ୍କ୍ ଶକ୍ତି ପାଏମ୍ ଆତ୍‍ତଡ଼୍‍ । ବିଶ୍ୱାସ୍ ଶକ୍ତିତେ ମାମେ ଜଗତ୍‍ତେ ପରୁ ଜିଡ଼ାନାଦ୍ ଲାବ୍ ମାଡ଼େ ପାର୍‍ତାଡ଼୍ ।
1JO 5:5 ଇଦ୍ ଜଗତିଙ୍କ୍‍ ବେନ ଆରା ମାଡ଼େ ପାର୍‍ତଣ୍ଡ୍‍ ? ଜିସୁ ଇଶ୍ୱର୍‌ତେ ମାର୍‍ ଇଞ୍ଜ ବେନ ବିଶ୍ୱାସ୍ ମାଡ଼ିତନ୍, ଅଣ୍ଡେକେ ଜଗତ୍‍ତିଙ୍କ୍‍ ଜିଡ଼େ ପାର୍‍ଦ୍‍ତଣ୍ଡ୍‍ ।
1JO 5:6 ଜିସୁ କ୍ରିଷ୍ଟ ଇଶ୍ୱର୍‌ତେ ମାର୍‍ ଇଞ୍ଜ ବାପ୍ତିସ୍ମ ତଡ଼୍ ନୁ ନିଜର୍‍ ନେତୁର୍‍ ତଡ଼୍‍ ନାରୁଡ଼ାଦ୍‍ ପରିତ୍ରାଣ ସାଦନ୍‍ ମାଡ଼୍‍ତଣ୍ଡ୍ । ମାତର୍‍ ଏର୍‍ତଡ଼୍‍ ଆୟ ମାତର୍‌ ରେଣ୍ଡ୍‍ଆସ ଏର୍‍ ନୁ ନେତୁର୍‍ ଇସ୍‍ ୱାସ୍‍ମାତ୍‍ତଣ୍ଡ୍‍ । ଆତ୍ମା ଆନ୍‌ତେ ଇଦିନାଦ୍‍ ସାକ୍ଷୀ ଇଦୁତା । ବାତ୍‍ତିଙ୍କ୍ଇତ୍କେ ପରମାଆତ୍ମା କେ ସତ୍ ।
1JO 5:7 ମେଣ୍ଡେ ଇୱୁ ମୁଣ୍ଡିନ୍‍ ସାକ୍ଷ୍ୟ ଅଣ୍ଡୟ୍‌‍ ସମାନ୍‍ ।
1JO 5:8 ଆତ୍ମା, ଏର୍‍ ନୁ ନେତୁର୍‍, ଇୱୁ ମୁଣ୍ଡିନ୍‍ ସାକ୍ଷ୍ୟ ଅଣ୍ଡୟ୍‌‍ ।
1JO 5:9 ମାମେ ଯଦି ନାରୁନ୍‍ ସାକ୍ଷ୍ୟ ଗ୍ରହନ୍‍ମାଡ଼୍‍କେ ଆଲେକ୍ ଇଶ୍ୱର୍‌ତେ ସାକ୍ଷ୍ୟ ଆଦିନାଗାଙ୍କ୍ ଶ୍ରେଷ୍ଠ, ମେଣ୍ଡେ ଇଶ୍ୱର୍‌ତେ ସାକ୍ଷ୍ୟ ଇଦ୍ ‍ଯେ ଅଣ୍ଡ୍‌ ତାନ୍ ମାରିନ୍ ବିଷୟତେ ସାକ୍ଷ୍ୟ ଇତ୍‍ତନ୍ ।
1JO 5:10 ବେନ ଇଶ୍ୱର୍‌ତେ ମାରିନାଗ୍‍ ବିଶ୍ୱାସ୍‍ ମାଡ଼ିତଣ୍ଡ୍‍, ଅଣ୍ଡ୍‌‍ ନିଜର୍‍ ହୃଦୟତାଗ୍‍ ଇଦ୍‍ ସାକ୍ଷ୍ୟ ପାଏମ୍‍ ଆତ୍‍ତଣ୍ଡ୍‍, ବେନ ଇଶ୍ୱର୍‌ତେ ସାକ୍ଷ ବିଶ୍ୱାସ୍‍ ମାଡ଼ଣ୍ଡ୍‍, ଅଣ୍ଡ୍‌‍ ଅଂକିଙ୍କ୍‌ ମିଚ୍‍ ଇଞ୍ଜ କେତ୍‍ତଣ୍ଡ୍‍, ବାତେଙ୍କ୍ଇତ୍କେ ଇଶ୍ୱର୍‍ ନିଜେ ମାରିନ୍ ବିଷୟତେ ବେନ୍ ସାକ୍ଷ୍ୟ ଇସ୍‍ମିନ୍ଦେଣ୍ଡ୍, ଆଗେ ଅଣ୍ଡ୍‌ ବିଶ୍ୱାସ୍‍ ମାଡ଼ଣ୍ଡ୍ ।
1JO 5:11 ଆଦ୍ ସାକ୍ଷ୍ୟ ଆତ୍‍ତେ, ଇଶ୍ୱର୍‍ ମାନାଙ୍କ୍ ଅନନ୍ତ ଜିୱୁନ୍ ଇତ୍‍ତନ୍; ମେଣ୍ଡେ ଆଦ୍‍ ଜିୱୁଣ୍ଡ୍ ତାନ୍ ମାରିନାଗେ ମିନ୍ଦେ ।
1JO 5:12 ବେନ ମାରିଙ୍କ୍ ପାହେମ୍ ଆତ୍‍ତନ୍, ଅଣ୍ଡ୍‌ ଜିୱୁଣ୍ଡ୍ ପାହେମ୍ ଆତ୍‍ତନ୍; ବେନ ଇଶ୍ୱର୍‌ତେ ମାରିଙ୍କ୍ ପାହେମ୍ ଆୟନ୍, ଅଣ୍ଡ୍‌ ଜିୱୁଣ୍ଡ୍ ପାହେମ୍‍ ଆୟଣ୍ଡ୍ ।
1JO 5:13 ମିକିଙ୍କ୍ ଇଦ୍ ଚିଟି ଲେକୁତାନ୍, ସାରେଦିନତ୍ ଜିୱେତେ ଅଦିକାର୍‌ ଇଞ୍ଜ ମିଡ଼୍ ବେଲାନ୍ ପୁନ୍‍ତିଡ଼୍, ବାତେଙ୍କ୍‍ଇତ୍କେ ଇଶ୍ୱର୍‌ତେ ମାରିନାଗେ ମୀଇ ବିଶ୍ୱାସ ମିନ୍ଦେ ।
1JO 5:14 ମେଣ୍ଡେ ମାନାଡ଼୍ ବେସୁଟ୍‌ ଅନାଦ୍‌ ଇଚ୍ଛା ଲେକାମ୍‌ ବାତ୍‍ଆଇ ପ୍ରାର୍ତନା ମାଡ଼ିତାଡ଼୍, ଆସୁଟ୍ ଅଣ୍ଡ୍‌ ମାନାଦ୍‍ ଆଦ୍ ପ୍ରାର୍ତନା କେଞ୍ଜିତନ୍, ଅନ୍‌ ମୁନେ ମାନାଦ୍‍ ଇଦ୍ ସାହାସ୍ ମିନ୍ଦେ ।
1JO 5:15 ମେଣ୍ଡେ ମାନାଡ଼୍ ଅନ୍‌ ଗାରେ ବାତ୍‍ଆୟି ପ୍ରାର୍ତନା ମାଡ଼୍‍କେ, ଆଦ୍ ଅଣ୍ଡ୍‌ କେଞ୍ଜିତନ୍ ଇଞ୍ଜ୍ ଯଦି ମାନାଡ଼୍ ପୁତ୍‍ତାଡ଼୍‍, ଆଲେକ୍ ଅନ୍‌‍ ମିନେ ବାତ୍‍ ପ୍ରାର୍ତନା ମାଡ଼୍‍ତାଡ଼୍, ଆୱୁ ସାରେ ପାହେମ୍ ଆତ୍‌ତାଡ଼୍, ଇଦ୍ ମିକା ପୁତ୍‍ତାଡ଼୍ ।
1JO 5:16 ଯଦି ମୀଇ ୱେରଣ୍ଡ୍ ବିଶ୍ୱାସୀ ଏଲାଡ଼୍‍ତାମୁଣ୍ଡ୍ ପାପ ମାଡ଼ମାନ୍ଦାନ୍ ଉଡ଼ିତିଡ଼୍‍, ମେଣ୍ଡେ ଆଦ୍‍ ପାପ୍ ଡଲାନାଦ୍ ଆୟ, ଅନ୍‌ ସେଙ୍ଗେ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାଟ୍ ମେଣ୍ଡେ ଇଶ୍ୱର୍ ଅଂକିଙ୍କ୍‌ କ୍ଷମା ଇସ୍ ରକ୍ଷା ମାଡ଼ିତଣ୍ଡ୍‍ । ବେନଡ଼ାୱୁ ପାପାମ୍‍ ଡଲାନ୍‍ ଲେକାମ୍‍, ଆଦ୍‍ ବିଷୟ୍‍ତେ ନାନ୍‍ ଇଶ୍ୱର୍‌ତିଙ୍କ୍‍ ପ୍ରାର୍ତନା ମାଡ଼ାନଙ୍କ୍‍ କେଲନ୍‍ ।
1JO 5:17 ସାରେ ଅଦର୍ମ ପାପାମ୍‍ ଆଦ୍‍ତେ, କିନ୍ତୁ ସାରେ ପାପାମ୍‍ ଡଲାନାଦ୍‍ ଆୟ ।
1JO 5:18 ବେନ ଆୟି ଇଶ୍ୱର୍‍ତାଗାଙ୍କ୍‍ ପୁଟ୍‍ତଣ୍ଡ୍‍ ଅଣ୍ଡ୍‌‍ ପାପାମ୍‍ତାଗ୍‍ ମାନଣ୍ଡ୍‍ । ବାତେଙ୍କ୍ଇତ୍କେ ଇଶ୍ୱର୍‌ତେ ମାର୍‍ ଅଙ୍କ୍‌ ରକ୍ଷା ମାଡ଼ିତଣ୍ଡ୍ ଶୟତାନ୍ ଅନାଦ୍‌ କ୍ଷତି ମାଡ଼େ ପାର୍‍ୱ ।
1JO 5:19 ମାନାଡ଼୍ ଇଶ୍ୱର୍‌ତାଗଙ୍କ୍‍ ପୁଟ୍‍ତାଡ଼୍ ନୁ ସାରେ ଜଗତ୍‍ ପାପାମ୍‍ତେ ଅଦିନ୍‌ତାଗ୍ ମିନ୍ଦେ, ଇଦ୍‍ ମାନାଡ଼୍‍ ପୁତ୍‍ତାଡ଼୍ ।
1JO 5:20 ମାମେ ପୁତ୍‍ତମ୍, ଇଶ୍ୱର୍‌ତେ ମାର୍‍ ଇଗେ ୱାସ୍ ସତ୍‍ ଇଶ୍ୱର୍‌ତେ ସତ୍‌ ଏର୍କେ ମାଡ଼ାନଙ୍କ୍ ମାନାଙ୍କ୍ ଜ୍ଞାନ୍ ଇସ୍‍ମିନ୍ତେନ୍ । ମାନାଡ଼୍ ସତ୍‍ ଇଶ୍ୱର୍ ନୁ ଅନ୍‌‍ମାର୍ ଜିସୁ କ୍ରିଷ୍ଟନ୍‍ ତଡ଼୍ କାଇଲି ମାନ୍ଦାନ୍ ଜିୱେ ବାଦ୍‍କୁତାଡ଼୍ । ଅଣ୍ଡେ କେ ସତ୍ ଇଶ୍ୱର୍ ନୁ ଅଣ୍ଡେ କେ ସାରେଦିନାତ୍ ଜିୱେ ।
1JO 5:21 ଆ ପିଲାନଡ଼ି, ଆସତ୍ ଦେୟାକିନାଗାଙ୍କ୍ ଯେକା ମାନୁଟ୍ ।
2JO 1:1 ପ୍ରାଚିନ୍‍ ଯୋହନ୍‌‌ ଯେ ନାନ୍‍ ୱେରଡ୍‍ ହେଞ୍ଚ୍‍ତାଦ୍ ବଦ୍ର ନାଟାଡ଼୍ ନୁ ତାନ୍ ପିଲାନ୍‍ ଗାରେ ଇଦ୍‍ଚିଟି ଲେକୁତାନ୍ । ମିକିଙ୍କ୍ ନାୟାଦ୍ ପ୍ରେମ କେତୁତାନ୍ । ମାତର୍‌ ନାନେ ଆୟନ୍, ବେନଡ଼୍ ସତ୍ୟତାଗ୍ ସନ୍ଦାନ୍ ପାଏମ୍ ଆତ୍‍ତଡ଼୍, ସାରେତଡ଼୍ ମିକିଙ୍କ୍ ପ୍ରେମ ମାଡ଼ିତଡ଼୍ ।
2JO 1:2 ମାନାଗ୍ ଆଦ୍ ସତ୍ୟ ମିନ୍ଦେ ନୁ ସାରେଦିନାମ୍ ମାନ୍‍ତେ ।
2JO 1:3 ବାବାଲ୍ ଇଶ୍ୱର୍ ନୁ ତାନ୍‍ ମାର୍‍ ଜିସୁ କ୍ରିଷ୍ଟ ମାକିଙ୍କ୍ ଅନୁଗ୍ରହ, କୃପା ନୁ ଶାନ୍ତି ଇସ୍‍ମିକା ସତ୍‍ ନୁ ପ୍ରେମତେ ଆର୍ଶିବାଦ୍‌ ମାଡ଼ିଣ୍ଡ୍ ।
2JO 1:4 ଇଶ୍ୱର୍‌ତେ ଆଜ୍ଞା ଲେକାମ୍‌ ମିୱଡ଼୍‍ ବେସ୍କ୍‍ତୁଡ଼୍‍ ପିଲା ଯେ ସତ୍‍ତେ ପର ଜିୱେତିଙ୍ଗ୍ ଆଦାରିତ ମାଡ଼୍‍ତଡ଼୍, ଇଦ୍ ଗଟ୍ ପୁଞ୍ଜ୍ ନାନେ ଗାଟି ୱେଡ଼୍‍କେ ଆତ୍‍ତାନ୍‍ ।
2JO 1:5 ପ୍ରିୟ ନାଟାଡ଼୍‍, ନିକିଙ୍କ୍ ନାୟାଦ୍ କେତାନାଦ୍ ଗଟ୍, ମାମେ ନିଜେନିଜର୍‍ ଲୋପେ ପ୍ରେମ ମାଡ଼ାନ୍‍ ଦର୍‍କାର୍‍ । ଇଦ୍‍ ଅଣ୍ଡୟ୍‌‍ ପୁନେ ଗଟ୍ ଆୟ, ମୁନେଙ୍କ୍‍କଞ୍ଜ ମାମେ ଇଦ୍ ଆଦେଶ୍ ପାଏମ୍‍ଆତ୍‍ତମ୍ ।
2JO 1:6 ବେନ୍ ପ୍ରେମ ଗଟ୍ ଇଗେ ଲେକ୍‍ତାନ୍, ଆଦିନ୍ ଅର୍ତ ଆତ୍‍ତେ, ଜିୱେତାଗ୍ ଇଶ୍ୱର୍‌ତେ ଗଟ୍ ପାଲନ୍ ମାଡ଼ିକାଡ଼୍ । ଆଦ୍ ଗଟ୍ ବାତେ, ମିଡ଼୍ ମୁନେଙ୍କ୍‍କଞ୍ଜ୍ କେଞ୍ଜ୍‍ତିଡ଼୍, ଆଦ୍ ଆତ୍‍ତେ, ମାମେ ସାରେତମ୍ ନିଜେ ନିଜର୍‍ ଲୋପେ ପ୍ରେମତେ କାଇଲି ମାନ୍ଦାନାଦ୍ ସାୟେ ।
2JO 1:7 ନାନ୍‍ ଇଦ୍‍ କେତୁତାନ୍‍ ବାତେଙ୍କ୍‍ଇତ୍‍କେ ନାର୍ଗେ ବୁସାକେତାନଡ଼୍‍ ଇଞ୍ଜେ ଜଗତ୍‍ତାଗ୍ ଉଡୁତଡ଼୍‍ । ଜିସୁ କ୍ରିଷ୍ଟ ନାରୁନ୍ ମେନ୍ଦୁଲ୍‍ ପୟସ୍‍ ୱାସ୍‍ମାତ୍‍ତନ୍ ଇଞ୍ଜ ଅଡ଼୍‌ ସ୍ୱୀକାର୍ ମାଡ଼ଡ଼୍ । ଇଦ୍‍ଲେକେତ୍ ନାରୁଣ୍ଡ୍‍ ନିଜାମ୍ ବୁସାକେତାନଣ୍ଡ୍‍, ଅଣ୍ଡ୍‌‍ ନିଜାମ୍ କ୍ରିଷ୍ଟନ୍ ଶତ୍ରୁ !
2JO 1:8 ଆଦିଙ୍କ୍ ସାବ୍‍ଦାନ୍ ମାନୁଟ୍, ମାମେ ମୀଇ ସେଙ୍ଗେ ବାତେ ମାଡ଼୍‍ତମ୍, ଆଦ୍ ସାରେ ୱିଡ଼୍‍ସକଟ୍ ବେଲାକି ପୁରା ପୁରସ୍କାର୍‍ ପାଏମ୍‍ ଆଦ୍‍ତିଡ଼୍‍ ।
2JO 1:9 ବେନ ଆୟି କ୍ରିଷ୍ଟନ୍ ଶିକ୍ଷାତେ ଲୋପେ ମାନକଟ୍ ବାୟ୍‍ଦେ ପେଇସ୍ ଆଞ୍ଜ୍‍, ଅଣ୍ଡ୍‌ ଇଶ୍ୱର୍‍ ତାଗାଙ୍କ୍ ୱେରେ ଆତ୍‍ତନ୍ । ବେନ ଆୟି କ୍ରିଷ୍ଟନ୍ ଶିକ୍ଷାତାଗ୍‍ ଡୁଟାଙ୍କ୍ ମାନ୍‍ତଣ୍ଡ୍‍, ଅଣ୍ଡ୍‌ ଇଶ୍ୱର୍ ନୁ ତାନ୍ ମାର୍‍ ଇର୍‍ୱୁଡ଼୍‍ ତଡ଼୍ କାଇଲିମିନ୍ଦେନ୍ ।
2JO 1:10 ବେନ ଯଦି ଇଦ୍ ଶିକ୍ଷା ଆସ୍ ମୀଇ ଗାରେ ୱାଡ଼୍‍କଟ୍ ମାତ୍‍କେ, ଅଙ୍କ୍‌ ମୀଇ ଲନ୍ କାର୍‍ଙ୍ଗ୍‍ମାଟ୍, “ମିୟାଦ୍ ଶାନ୍ତି ଆୟି,” ଇଞ୍ଜ ବେନ ଅଙ୍କ୍‌ ନମସ୍କାର୍ କେଲ୍‍ମାଟ୍ ।
2JO 1:11 ବେନ ଆୟି ଅନ୍‌‍ୱାଦ୍‍ ଶାନ୍ତି କାମନା ମାଡ଼ିତଣ୍ଡ୍‍, ଅଣ୍ଡ୍‌‍ ତାନ୍ କାରାପ୍‍ କାମ୍‍ତାଗ୍‍ ଅଂଶି ଆଦ୍‍ତନ୍ ।
2JO 1:12 ନାନ୍‍ ମିକିଙ୍କ୍ ନାର୍ଗେ ଗଟ୍ କେତାନାଦ୍ ମିନ୍ଦେ, କିନ୍ତୁ କାଗଜ୍ ନୁ କଲମ୍‍ତଡ଼୍‍ ଆୱୁସାରେ ଇଞ୍ଜେ ନାନ୍‍ କେତାନଙ୍କ୍ ଇଚ୍ଛା ମାଡ଼ନ୍ । ମୀଇ ଗାରେ ୱାସ୍‍ ନିଜେ ଗଟିତିର୍‍ୟାନଙ୍କ୍‍ ଆଶେ ନାନ୍‍ ନେଃଏତାନ୍‍ । ଆଦ୍ ମାଡ଼େ ପାର୍‍କେ, ମାନାଡ଼୍ ପୁରା କୁସ୍‍ ଆଦ୍‍ତାଡ଼୍ ।
2JO 1:13 ଇଶ୍ୱର୍ ଏଞ୍ଚିମାନ୍ଦାନ୍‍ ଏଲାଡ଼୍‍ତେ ପିଲା ମିକିଂଙ୍କ୍‍ ନମସ୍କାର୍‍ ମାଡ଼ୁତଡ଼୍‍ ।
3JO 1:1 ପ୍ରାଚିନ୍‍ ଯୋହନ୍‌‌ ଯେ ନାନ୍‍ ନା ପ୍ରିୟ ସାଙ୍ଗ ଗାୟସ୍‍ତେ ଗାରେ ନାନ୍‍ ଚିଟି ଲେକୁତାନ୍‍ । ବେନଙ୍କ୍ ସତ୍ୟତେ ପ୍ରେମ ମାଡ଼ୁତାନ୍‍ ।
3JO 1:2 ପ୍ରିୟ ସାଙ୍ଗ, ନିୟାଦ୍ ସାସ୍ଥ୍ୟ ନୁ ସାରେ ଲେକେତ୍ କାମନା ମାଡ଼ି ନାନ୍‍ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ୁତାନ୍, ନାନ୍‍ ପୁତ୍‍ତାନ୍, ଆଦ୍ୟାମିକ ଜିୱେତାଗ୍ ନିମେ ଗାଟି ସୁସ୍ଥ ମିନ୍ଦେନି ।
3JO 1:3 ନିମେ ବେଲା ସତ୍ ପରୁ ବିଶ୍ୱସ୍ତ ମିନ୍ଦେନି ନୁ ବେଲା ଜିୱେତାଗ୍ ସାରେଦାମ୍ ସତ୍ ବ୍ୟବହାର୍‌ ମାଡ଼ୁତିନ୍, ଇଦ୍ ଗଟ୍ ବେସ୍‍କ୍‍ତୁଡ଼୍‍ କ୍ରିଷ୍ଟିୟ ବିଶ୍ୱାସୀ ଦାଦାଲଡ଼୍‍ଆଗାଙ୍କ୍ କେଞ୍ଜି ୱେଡ଼୍‍କେ ଆତ୍‍ତାନ୍ ।
3JO 1:4 ନା ପିଲାକି ସତ୍‍ତିଙ୍କ୍‍ ପୟ୍‍ସ୍‍ମାଞ୍ଜ୍ ଜିୱୁନ୍‍ ବାଦ୍‍କୁତଡ଼୍‍ ଇଞ୍ଜ କେଞ୍ଜ୍‍କେ, ନାୟାଦ୍ ସାରେତିଙ୍ଗ୍ ପେର୍କେ ୱେଡ଼୍‍କେ ଆଦ୍‍ତେ ।
3JO 1:5 ପ୍ରିୟ ସାଙ୍ଗ, ବିଦେଶୀ କ୍ରିଷ୍ଟିୟ ମେସ୍ତେରିଡ଼୍‍ ସେଙ୍ଗେ, ଇଦ୍‍ଲେକାମ୍ କି ଅଡ଼୍‌ ପୁନ୍‍ୱେମାତ୍‍କେ ମିକା, ଅଡ଼୍‌‍ ସେଙ୍ଗେ ନିମେ ନାର୍ଗେ ବିଶ୍ୱସ୍ତ ବ୍ୟବହାର୍‌ ମାଡ଼ୁତିନ୍ ।
3JO 1:6 ମିୟାଦ୍ ପ୍ରେମ ବ୍ୟବହାର୍‌ ବିଷୟତେ ଅଡ଼୍‌‍ ଇଗେତ୍ ମଣ୍ଡଲିତାଗ୍ କେତ୍‍ତଡ଼୍ । ନାୟାଦ୍ ଅନୁରଦ୍‌, ମିଡ଼୍ ଅଡ଼୍‌‍କିଂଙ୍କ୍‍ ଆଦାନ୍‍ ସେଙ୍ଗେ ସାହାଯ୍ୟ ଇମୁଟ୍ । ଇଦିନ୍ ତଡ଼୍ ଇଶ୍ୱର୍ ଆନନ୍ଦ ଆଦ୍‍ତଣ୍ଡ୍‍,
3JO 1:7 ବାତେଙ୍କ୍‍ଇତ୍କେ ଅଡ଼୍‌ ବିଶ୍ୱାସ୍‍ ଇଲ୍‍ୱେନଡ଼ାଗାଙ୍କ୍‍ ବାତେ ମିକା ସାହାଯ୍ୟ ଆୟକଟ୍ କ୍ରିଷ୍ଟନ୍‍ ସେବା ସେଙ୍ଗେ ଇଦ୍ ଆଦାନାଗ୍ ପେୟ୍‍ତ୍‍ତଡ଼୍ ।
3JO 1:8 ମାନାଡ଼୍ କ୍ରିଷ୍ଟ ବିଶ୍ୱାସ୍‍ସିଡ଼୍ ଅଡ଼୍‌‍କିଂଙ୍କ୍ ସାହାଯ୍ୟ ମାଡ଼ି ସତ୍ୟତେ ତଅତାନ୍‍ ସେଙ୍ଗେ ଅଡ଼୍‌‍ କାମ୍‍ଦାଗ୍ ତଡ଼୍ ଆଦାନାଦ୍ ସାୟେ ।
3JO 1:9 ନାନ୍‍ ମୀଇ ମଣ୍ଡଲିତିଙ୍କ୍‍ ସୁଦୁରାଦ୍ ଚିଟି ଲେକ୍‍ତାନ୍, କିନ୍ତୁ ମଣ୍ଡଲିତେ ନେତା ଆଦାନଙ୍କ୍ ଇଚ୍ଛା ମାଡ଼ମାନ୍ଦାନ୍ ଡାୟୋଟ୍ରେପିସ୍ ନାୟାଦ୍ ଗଟ୍‍ତିଙ୍କ୍ କେଞ୍ଜଣ୍ଡ୍‍ ।
3JO 1:10 ନାନ୍‍ ଆଗେ ୱାତ୍କେ, ଅଣ୍ଡ୍‌ ବାତେ ମାଡ଼ୁତନ୍, ସାରେ ପ୍ରକାଶ୍‍ ମାଡ଼ିଦ୍‍ତାନ୍, ମାନ୍‍ ବିଷୟତେ ଅଣ୍ଡ୍‌ ବେସର୍ ବୟଙ୍କାର୍ କେତୁତଣ୍ଡ୍‍ ନୁ ବେସର୍ ମିସ୍‍ଗଟ୍ କେତୁତନ୍, ଆୱୁ ସାରେ ବାୟ୍‍ଦେ ପେୟ୍‍ତିତା । ଆସରେ ଆୟ, ଅଣ୍ଡ୍‌ କ୍ରିଷ୍ଟ ବିଶ୍ୱାସି ଦାଦାଲଡ଼୍‍କ୍‍ ଆତିତ୍ୟ ମାଡ଼ଣ୍ଡ୍‍ ବା ଆଦ୍‍ ମାଡ଼ାନଙ୍କ୍ ବାଗାତଙ୍କ୍ ୱିଡ଼୍‍ସଣ୍ଡ୍‍ ନୁ ବେନଡ଼୍ ଆଦ୍‍ ମାଡ଼ାନଙ୍କ୍ ଅଦୁତଡ଼୍, ଅଡ଼୍‌‍କିଂଙ୍କ୍ ମଣ୍ଡଲିତାଗାଙ୍କ୍ ବଇଷ୍କାର୍ ମାଡ଼ାନଙ୍କ୍ ଚେଷ୍ଟା ମାଡ଼ୁତଣ୍ଡ୍‍ ।
3JO 1:11 ପ୍ରିୟ ସାଙ୍ଗନଡ଼ି, କୁଆଦର୍ଶତିଙ୍କ୍ ପେର୍କେ ଆନ୍‌ମାଟ୍, ମାତର୍ ସାୟେ ଆଦର୍ଶତିଙ୍ଗ୍ ଗ୍ରହନ୍ ମାଡ଼ାଟ୍ । ବେନ ସତ୍‍ କାମ୍‍ ମାଡ଼ିତନ୍, ଅଣ୍ଡ୍‌ ଇଶ୍ୱର୍‌ତେ ନାରୁଣ୍ଡ୍; ବେନ ଆସତ୍ କାମ୍‍ ମାଡ଼ିତନ୍, ଅଣ୍ଡ୍‌ ଇଶ୍ୱର୍‌ତିଙ୍କ୍ ପୁନନ୍ ।
3JO 1:12 ସାରେ ଡିମିଟ୍ରିଅସ୍‍ଙ୍କ୍ ପ୍ରଶଂସା ମାଡ଼ୁତଡ଼୍; ସତ୍‍ କଲ୍‍ସାନ୍ ଡୁଡ୍‍ତେ ଅଣ୍ଡ୍‌ ପ୍ରଶଂସା ଆତ୍‍ତନ୍ । ମାମେ ମିକିଂଙ୍କ୍ ସମର୍ତନ୍ ମାଡ଼ୁତମ୍ । ମିଡ଼୍ ପୁତ୍‍ତିଡ଼୍, ମାମେ ବାତ୍‍ କେତିତମ୍, ଆଦ୍‍ ସାରେ ସାରେଦିନାତ୍‍ ସେଙ୍ଗେ ସତ୍ ।
3JO 1:13 ମିକିଙ୍କ୍ ନାୟାଦ୍ ନାର୍ଗେ ଗଟି କେତାନଦ୍ ମିନ୍ଦେ, କିନ୍ତୁ ଆୱୁ ସାରେ ନାନ୍‍ ଇଞ୍ଜେ ଲେକାନଙ୍କ୍ ଇଚ୍ଛା ମାଡ଼ନ୍ ।
3JO 1:14 ମୀଇ ତଡ଼୍ କାୟ୍‍ଲିତାନ୍‍ ଇଞ୍ଜ୍ ନାୟାଦ୍ ଆଶେ । ଆସୁଙ୍ଗ୍ ବ୍ୟକ୍ତିଗତ ବାବେ ଗଟି ଆଦିକାଡ଼୍‍ ।
3JO 1:15 ମିଡ଼୍ ଶାନ୍ତିତେ ମାନୁଟ୍, ମୀଇ ସାଙ୍ଗଡ଼୍ ସାରେତଡ଼୍ ମିକିଙ୍କ୍ ଶୁବେଚ୍ଛା ଜଣାମାଡ଼ୁତଡ଼୍ । ମାନ୍‍ ସାରେ ସାଙ୍ଗଡ଼୍‍କ୍ ବ୍ୟକ୍ତିଗତ ବାବେ ନମସ୍କାର୍ ଜଣାମାଡ଼ିତିଡ଼୍ ।
JUD 1:1 ନାନ୍‍ ଯିହୁଦା, ଜିସୁ କ୍ରିଷ୍ଟଟନ୍ ଦାସ ନୁ ଜାକୁବନ୍ ଦାଦାଲ୍, ବେନଡ଼୍‍କିଂଙ୍କ୍ ବାବାଲ୍‍ ଇଶ୍ୱର୍ କାର୍‍ଙ୍ଗ୍‍ତଣ୍ଡ୍ ନୁ ଅନ୍‌ ପ୍ରେମତଡ଼୍ ବାଦ୍‍କୁତଡ଼୍ ମେଣ୍ଡେ ଜିସୁ କ୍ରିଷ୍ଟଟନ୍ ସେଙ୍ଗେ ସାୟେ ମିନ୍ଦେ, ଅଡ଼୍‌ ବକେତ୍ ଚିଟି ଲେକୁତାନ୍ ।
JUD 1:2 ମିକିଂଙ୍କ୍ ନାର୍‍ଗେ ଇଶ୍ୱର୍‌ତେ ଦୟା, ଶାନ୍ତି ନୁ ପ୍ରେମ ଦର୍‍କି ।
JUD 1:3 ଆ ପ୍ରିୟ ସାଙ୍ଗଡ଼ି, ନାନ୍ ମାନାଦ୍‍ ପରିତ୍ରାଣ ବିଷୟ ମିଇ ବକେତ୍ ସୁଦୁଟ୍ ଲେକାନଙ୍କ୍ ମାନ୍‍ ମାଡ଼ିମାତ୍‍ତାନ୍ । ଇତ୍‍କେ ତିନ୍ ଲୋପେ ଇଶ୍ୱର୍ ତାମ୍ ନାରୁଡ଼୍‍କିଂଙ୍କ୍ ସାରେ ଦିନେତ୍ ମାୟ୍‍ଦିଂଙ୍କ୍ ଇସ୍ ମାନ୍ଦାନ୍ ବିଶ୍ୱାସ୍‍ତଡ଼୍ ଯୁଦ୍ ମାଡ଼ାନ୍ ସେଙ୍ଗେ ମିକିଂଙ୍କ୍ ସାର୍ଦେ ମାଡ଼ାନ୍ ଦର୍‍କାର୍ ଇଞ୍ଜ ମାନ୍‍ ମାଡ଼୍‍ତାନ୍ ।
JUD 1:4 ବେସ୍‍କ୍‍ତୁଡ଼୍‍ କାରାପ୍ ନାରୁଡ଼୍ ମିଞ୍ଜି ମେଣ୍ଡେ ମିଇ ଲୋପେ ନେଙ୍ଗି ମିନ୍ଦେଡ଼୍‍ । ଅଡ଼୍‌ ତାମ୍ କାରାପ୍ ପାଡ଼୍‍ୟିଦିଙ୍କ୍ ସମର୍ତନ୍ ମାଡ଼ାନ୍ ସେଙ୍ଗେ ଇଶ୍ୱର୍‌ତେ “ଅନୁଗ୍ରହ,” ବିଷୟ୍‍ତେ ଗଟ୍‍ତିଙ୍କ୍ କାରାପ୍ ବ୍ୟବହାର୍‌ ମାଡ଼ୁତଡ଼୍ । ମାୱଣ୍ଡ୍ ୱେରଣ୍ଡେ ଗୁରୁ ନୁ ପ୍ରବୁ ଜିସୁ କ୍ରିଷ୍ଟଙ୍କ୍ ଅଡ଼୍‌ ଅସ୍ୱୀକାର୍ ମାଡ଼ୁତଡ଼୍ । ଅଡ଼୍‌ ସେଙ୍ଗେ ତିଆର୍ ଆସ୍ ମାନ୍ଦାନ୍ ଦଣ୍ଡ୍ ବିଦାନ୍ ବିଷୟ୍‍ତେ ମୁନେତ୍ କନ୍‍ସ୍ ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ ।
JUD 1:5 ଅଣ୍ଡୟ୍‌‍ଦାମ୍ ଇସ୍ରାଏଲିୟ ନାରୁଡ଼୍‍କିଂଙ୍କ୍ ଇଶ୍ୱର୍ ବେଲା ମିସର୍ ଦେଶ୍‌ତାଗାଙ୍କ୍ ରକ୍ଷା ମାଡ଼ି ତାସ୍‍ମାତ୍‍ତଣ୍ଡ୍, ମେଣ୍ଡେ ଅଡ଼୍‌ ଲୋପେ ମାନ୍ଦାନ୍ ଅବିଶ୍ୱାସି ନାରୁଡ଼୍‍କିଂଙ୍କ୍ ଉସ୍କ ନେଲ୍‍ତାଗ୍‍ ଦଂସ ମାଡ଼ିମାତ୍‍ତଣ୍ଡ୍, ମିଡ଼୍ ଇୱୁ ସାରେ ଗଟି ପୁଞ୍ଜ୍ ମାତ୍‍କେ ମିକା; ଆଦ୍ ନାନ୍ ମିକିଂଙ୍କ୍ ଏର୍କା ମାଡ଼ିଦାନଙ୍କ୍ ଆଲ୍‍ସୁତାନ୍ ।
JUD 1:6 ମେଣ୍ଡେ ବେନ୍ ଦୂତଡ଼୍ ନିଜେତ୍ ପଦତାଗ୍ ମାନ୍‍ୱେକଟ ତାମାଦ୍ ପଡ଼୍‍ୟେ ୱିଡ଼୍‍ସ୍‍ତଡ଼୍, ଅଡ଼୍‌‍କିଂଙ୍କ୍ ଇଶ୍ୱର୍ ବେଡ଼୍‍ୟାଦ୍‍ ବିଚାର୍ ଦିନ୍ ଏୱୁନା ସାରେଦିନାତ୍ ମାୟ୍‍ଦିଂକ୍ ବନ୍ଦି ମାଡ଼ି ଇକାଡ଼୍ ମାନ୍ଦାନ୍ ପଡ଼୍‍ୟେତାଗ୍ ନେଃଏତଣ୍ଡ୍ । ଇୱୁ ସାରେ ମନେମାଡ଼ାଟ୍‍ ।
JUD 1:7 ସଦୋମ୍‍ ନୁ ଗମୋରା ମେଣ୍ଡେ ତାନ୍ ବକେତ୍ ମାନ୍ଦାନ୍ ନଗରିକିନ୍ ଦସା ଏର୍କା ମାଡ଼ାଟ୍ । ଅଡ଼୍‌ ଆୱୁ ଦୂତକିନ୍ ରକମ୍ ବ୍ୟବହାର୍‌ ମାଡ଼ି ଇନ୍ଦ୍ରିୟ ଲାଲସା ନୁ କାରାପ୍ ପାଡ଼୍‍ୟିତାଗ୍ ମୁଡ଼ୁନ୍ଦି ଆଦ୍‍ତଡ଼୍ । ମେଣ୍ଡେବାଗାତଡ଼୍‍କିଂକ୍ ସତର୍କ ମାଡ଼ାନ୍ ସେଙ୍ଗେ ଅଡ଼୍‌ ସାରେଦିନେ ନିଡ଼୍‍ତାନାଦ୍ କିସ୍‍ତାଗ୍ ଦଣ୍ଡ୍ ପାଏମ୍ ଆଦୁତଡ଼୍‍ ।
JUD 1:8 ଆଦେ ରକମ୍ ଇଡ଼୍ ନାରୁଡ଼୍ ସପ୍ନ ଉଡ଼୍‍ତମ୍ ଇଞ୍ଜ ନିଜେତ୍ ମେନ୍ଦୁଲ୍ ବିରୁଦ୍‍ତେ ପାପ୍ ମାଡ଼ିତଡ଼୍ । ଅଡ଼୍‌ ଇଶ୍ୱର୍‌ତେ ଆଦେଶ୍‌ତିଙ୍କ୍ ପାଲନ୍ ମାଡ଼ଡ଼୍‍ ନୁ ସ୍ୱର୍ଗ ଦୂତକିଂଙ୍କ୍‌ ଅପ୍‍ମାନ୍ ମାଡ଼ିତଡ଼୍ ।
JUD 1:9 କିନ୍ତୁ ମୁକ୍ୟ ସ୍ୱର୍ଗଦୂତ ମିକାଏଲ୍ ମିକା ଇଦ୍ ରକମ୍ ବ୍ୟବହାର୍‌ ମାଡ଼୍‍ୱେ ମାତ୍‍ତଣ୍ଡ୍ । ମୋଶାନ୍‌ ସମାଦି ଆ ଶୟ୍‍ତାନ୍ ତଡ଼୍ ଯୁକ୍ତିତର୍କ ମାଡ଼ାନ୍ ୱେଲେ ମିକାଏଲ୍ ଅପ୍‍ମାନ୍ ଗଟ୍ କେସ୍ ସୟ୍‍ତାନ୍‍ତିଙ୍କ୍ ବିଚାର୍ ମାଡ଼୍‍ୱେ ମାତ୍‍ତଣ୍ଡ୍ । ଅଣ୍ଡ୍‌ ଆସାମ୍ କେସ୍ ମାତ୍‍ତଣ୍ଡ୍, “ପ୍ରବୁ ନିକିଂଙ୍କ୍ ପାସ୍‍କିଣ୍ଡ୍ ।”
JUD 1:10 ଇତ୍‍କେ ଇଡ଼୍ ନାରୁଡ଼୍ ବାତ୍ ବୁଜେମ୍ ଆୟଡ଼୍, ପରିଆସ୍ ମାଡ଼ି ଆଦିଙ୍କ୍ ବିରୁଦ୍ ମାଡ଼ିତଡ଼୍ । ମେଣ୍ଡେ ଗୁପେତାଗ୍ ମାନ୍ଦାନ୍ ଜିୱାକିନ୍ ତଡ଼୍ ବାତ୍ ପୁନ୍‍ତଡ଼୍, ଆୱୁ ସାରେକିନ୍ ତଡ଼୍ ଅଡ଼୍‌ ଦଂସ ଆଦ୍‍ତଡ଼୍ ।
JUD 1:11 ଇଦ୍ ଅଡ଼୍‌ ସେଙ୍ଗେ ବେସର୍ ୱେର୍ରେ । ଅଡ଼୍‌ କୟିନନ୍‌ କାରାପ୍ ଆର୍ର୍‍ଦାଗ୍ ଆଞ୍ଜ୍ ମିନ୍ଦେଡ଼୍‍ । ବାଲାମ୍ ଇତ୍‍କେ ଲୋବିଆସ୍ ବେନ୍ ବୁଲ୍‍ ମାଡ଼୍‍ତଣ୍ଡ୍‍, ଅଡ଼୍‌ ଆଦ୍ ବୁସାତାଗ୍ ରାୟ୍‍ତଡ଼୍ । କୋରଅ ଲେକାମ୍ ଗଲ୍‍କ୍ ମାଡ଼ି ଅଡ଼୍‌ ଦଂସ ଆତ୍‍ତଡ଼୍‍ ।
JUD 1:12 ଅଡ଼୍‌ ସିଗ୍ ଆୟ୍‍ୟକଟ କାଲ୍‍ ଉଞ୍ଜ୍, ମିୱାଦ୍ ସାୟେତ୍ ବଜିତାଗ୍ ଗଲ୍‍କ୍ ମାଡ଼ାନ୍ ନାରୁଡ଼୍ ଲେକାମ୍ ଆଦୁତଡ଼୍‍ । ଅଡ଼୍‌ ତାମ୍ ସେଙ୍ଗେକେ ଡଙ୍କେ ନିଃଇତିତଡ଼୍ । ଅଡ଼୍‌ ଗାଲ୍‍ତଡ଼୍ ଚାଲେମ୍ ଆଦାନ୍ ୱାର୍ସାମ୍ ଇଲ୍‍ୱେ ମାବ୍ ଲେକାମ୍ । ଅଡ଼୍‌ ଶରତ୍ କାଲାମ୍‍ତେ କାୟା ଆଦ୍‍ୱେ ମାଡ଼େ ନୁ ମାଡେତଡ଼୍ ତାଃଆକି ଆତ୍‍ତେ ୱାସ୍‍ତେ ମାଡ଼େ ଲେକାମ୍ ।
JUD 1:13 ଅଡ଼୍‌ ଗଦାଡ଼୍‍ତାଗ୍ ତେଏଦ୍‍ତେ ତଲ୍‍କଡ଼୍ ଲେକାମ୍ । ଅଡ଼ାଦ୍‌ ସିଗ୍ ଇଲ୍‍ୱାଦ୍ ପାଡ଼୍‍ୟି ବୟୁଲ୍ ଲେକାମ୍ ପର୍‍ର ତଅନ୍‌ଦିତ୍ । ଅଡ଼୍‌ ମାୟିଆତ୍‍ତେ ଉକାମ୍ ଲେକାମ୍ । ଇଶ୍ୱର୍ ଅଡ଼୍‌ ସେଙ୍ଗେ ସାରେଦିନାମ୍‍ ଇକାଡ଼୍ ମାନ୍ଦାନ୍ ପଡ଼୍‍ୟେ ଏଞ୍ଚିମିନ୍ଦେଣ୍ଡ୍ ।
JUD 1:14 ଆଦମ୍‍ତେ ସାତ୍‍ ପିଡ଼ିତେ ବଂଶତଣ୍ଡ୍ ହନୋକ ନାର୍‍ଗେ ଦିନା ମୁନେଙ୍କ୍ ଇଡ଼୍ ବିଷୟ୍‍ତେ ବବିଷ୍ୟତ୍‌ ଗଟ୍ କେସ୍‍ମାତ୍‍ତଣ୍ଡ୍, “ପ୍ରବୁ ନାର୍ଗେ ହଜାର୍‌ ସ୍ୱର୍ଗଦୂତକିନ୍ ତଡ଼୍
JUD 1:15 ସାର୍‍ରେ ତଡ଼୍‍ୱାଦ୍ ବିଚାର୍ ମାଡ଼ାନଙ୍କ୍ ୱାଦ୍‍ତଣ୍ଡ୍ । ଅଡ଼ାଦ୍‌ ସାର୍‍ରେ ପାପ୍ ପାଡ଼୍‍ୟି ସେଙ୍ଗେ ନୁ କାରାପ୍ ନାରୁଡ଼୍ ଇଶ୍ୱର୍ ନିନ୍ଦ୍ ମାଡ଼ାନ୍ ସେଙ୍ଗେ ଅଡ଼୍‌‍ ଜିୱୁଣ୍ଡ୍‍ତିଙ୍କ୍‍ ଦଣ୍ଡ୍ ଇଦ୍‍ତଣ୍ଡ୍ ।”
JUD 1:16 ଇ ନାରୁଡ଼୍ ସାରେଦାମ୍ ସନ୍ତୁଷ୍ଟ ଆୟ୍‍ୟଡ଼୍ ନୁ ମେଣ୍ଡେବାଗାତଡ଼୍ ନାରୁଡ଼୍‍କ୍ ଦସି ମାଡ଼ିତଡ଼୍ । ଅଡ଼୍‌ ନିଜେତ୍ କାରାପ୍ ଅବ୍ୟାସ୍ ତଡ଼୍ ଚାଲେମ୍ ଆଦ୍‍ତଡ଼୍; ନିଜେ ବେଡ଼୍‍ୟା ଗଟି କେତିତଡ଼୍‍ ନୁ ନିଜେତ୍ ମାୟ୍‍ଦିଂକ୍ ମେଣ୍ଡେ ଅର୍‌ତୁଡ଼୍‍କ୍ ମିଚ୍ କେତିତଡ଼୍‍ ।
JUD 1:17 ହୋ ପ୍ରିୟ ସାଙ୍ଗନଡ଼ି, ପ୍ରବୁ ଜିସୁ କ୍ରିଷ୍ଟଟନ୍ ପ୍ରେରିତ ଶିଷ୍ୟଡ଼୍ ମିକିଂଙ୍କ୍ ବାତ୍ କେସ୍ ଆତ୍‍ତଡ଼୍, ଆଦ୍ ସାରେ ଏର୍କା ମାଡ଼ାଟ୍ ।
JUD 1:18 ଅଡ଼୍‌ ମିକିଂଙ୍କ୍ କେସ୍‍ମାତ୍‍ତଡ଼୍, “ତେରାନ୍ ଦିନାତେ କାରାପ୍ ଅବ୍ୟାସ୍ ଇଶ୍ୱର୍ ବିରୁଦ୍ ନାରୁଡ଼୍ ପେୟିସ୍ ମିକିଂଙ୍କ୍ ପରିଆସ୍ ମାଡ଼ିତଡ଼୍ ।”
JUD 1:19 ଇ ନାରୁଡ଼୍ ଇଁ ଦଲ୍‍ତିଙ୍କ୍ ୱେଏକ୍ ମାଡ଼ିତଡ଼୍ । ଅଡ଼୍‌ ଆସାମ୍ ମେନ୍ଦୁଲ୍‍ତଡ଼୍ ଚାଲେମ୍ ଆଦ୍‍ତଡ଼୍ । ଅଡ଼ାଗ୍ ଇଶ୍ୱର୍‌ତେ ଆସାମ୍‍ ଇଲ୍‍ଲେ ।
JUD 1:20 ଆଦିଙ୍କ୍ ପ୍ରିୟ ସାଙ୍ଗଡ଼ି, ମିଡ଼୍ ପବିତ୍ର ଦର୍ମଶାସ୍ତ୍ରତେ ନିତିତଡ଼୍ ନିଜର୍‍ ଜିୱୁଣ୍ଡ୍ ତିଆର୍ ମାଡ଼ାନଙ୍କ୍ ଲାଗେମ୍ ଆସ୍ ମାନୁଟ୍; ପବିତ୍ର ଆତ୍ମାନ୍ ଶକ୍ତିତଡ଼୍ ପ୍ରାର୍ତନା ମାଡ଼ମାନୁଟ୍ ।
JUD 1:21 ପ୍ରବୁ ଜିସୁ କ୍ରିଷ୍ଟଟନ୍ ଅନୁଗ୍ରମାମେ ଆୟମ୍‌ ସାର୍ରେଦିନେତ୍ ଜିୱୁଣ୍ଡ୍ ପାଏମ୍ ଆଦାନ୍ ସେଙ୍ଗେ କେପି ଇଶ୍ୱର୍‌ତେ ପ୍ରେମତାଗ୍ କଟ ଆସ୍ ମାନୁଟ୍ ।
JUD 1:22 ହେର୍କେ ମାଡ଼ମାନ୍ଦାନ୍‍ ନାରୁଡ଼୍‍କିଂଙ୍କ୍ ବିଶ୍ୱାସ୍ ମାଡ଼ାନଙ୍କ୍ କେଲ୍‍ମୁଟ୍ ।
JUD 1:23 ମାୟାତାଗ୍ ରାଲି ଡଲାନ୍ ନାରୁଡ଼୍‍କିଂଙ୍କ୍ କିସ୍‍ତାଗାଙ୍କ୍ ରକ୍ଷା ମାଡ଼ାଟ୍ । ମେଣ୍ଡେ ବେସ୍କ୍‍ତୁଡ଼ାଦ୍ ପାପାମ୍ କାର୍‍କେ ପୟ୍‍ତେ ସିଲେତିଙ୍କ୍ ମିକା ପାସ୍‍କାଟ୍, ଇତ୍‍କେ ୱେର୍ରେତଡ଼୍ ଅଡ଼୍‌‍କିଂଙ୍କ୍ ଦୟା ତଅମୁଟ୍ ।
JUD 1:24 ବେନ ମିକିଂଙ୍କ୍ ଡଲାନାଗାଙ୍କ୍ ରକ୍ଷା ମାଡ଼ାନଙ୍କ୍ ନୁ ତାନ୍ ଗୌରବମୟ ନିଡ଼୍‍କେତାଗ୍ ନିର୍ଦୋଷ୍‍ ନୁ ୱେଡ଼୍‍କ୍‍ ମାଡ଼ି ନିଲ୍‍ସ୍ପାନଙ୍କ୍ ପାର୍‍ଦ୍‍ତଣ୍ଡ୍,
JUD 1:25 ମାୱଣ୍ଡ୍ ଅଣ୍ଡେ ୱେରଣ୍ଡେ ତ୍ରାଣକର୍ତ୍ତାଲ୍ ଇଶ୍ୱର୍‌ତେ ଗୌରବ୍, ପରାକ୍ରମ୍ ନୁ ଶାସନ୍‍; ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ମୁନେତ୍ କନ୍‍ସ୍ ନେଣ୍ଡ୍ ଯାକ ନୁ ଯୁଗ୍‍ଯୁଗ୍ ବିରାଜମାନ୍ ଆୟି । ଆମେନ୍‍ ।
REV 1:1 ବାତ୍‍ସାରେ ଯାପେ ଗଟେମ୍‍ ଆଦାଙ୍କ୍ ଅଦୁତ୍, ଇଶ୍ୱର୍ ଜିସୁ କ୍ରିଷ୍ଟନ୍ ପାକେ କେସ୍‍ମାନ୍ଦାନ୍ ଅନାଦ୍‌ ୱେରଡ଼୍ ବିବରଣି ଇଦ୍ ବଇତାଗ୍ ଲେକାଆତ୍‍ତେ । ଆଦ୍‍ ସାରେ ବିଷୟ ତାନ୍ ଦାସନଡ଼୍‍କ୍ କେତାନ୍ ସେଙ୍ଗେ କ୍ରିଷ୍ଟ ୱେରଣ୍ଡ୍ ସ୍ୱର୍ଗଦୂତଙ୍କ୍ ରସ୍‍ମିକା ତାନ୍ ଦାସ ଯୋହନ୍‌‌ତିଙ୍କ୍‌ ଆଦ୍ କେତ୍‍ତଡ଼୍‍ ।
REV 1:2 ମେଣ୍ଡେ ଯୋହନ୍‌‌ ନିଜେ ବାତ୍ ସାରେ ଉଡ଼୍‍ତନ୍, ଆଦ୍ ଇଗେ କେସ୍‍ମିନ୍ଦେନ୍ । ଇଦ୍ ବଇତାଗ୍ ଇଶ୍ୱର୍‌ତେ ଗଟ୍ ନୁ ଜିସୁ କ୍ରିଷ୍ଟଟନ୍ ତଡ଼୍ ପ୍ରକାସିତ୍ ସତ୍ୟ ବାକ୍ୟ ଲେକା ଆତ୍‍ତେ ।
REV 1:3 ବେନ୍ ନାରୁଣ୍ଡ୍ ଇଦ୍ ବଇ କାର୍‍ତିତନ୍ ନୁ ବେନଡ଼୍ ଇଗେ ପ୍ରକାସିତ୍ ବବିଷ୍ୟତ୍‌ ଗଟି କେଞ୍ଜି ଆଦ୍ କେତ୍‍ତେ ଲେକାମ୍ ପାଲନ୍ ମାଡ଼ିତନ୍, ଅଡ଼୍‌ ବାସ୍ତବିକ୍ ବାଗ୍ୟବାନ, ଇତ୍କେ ଆଦ୍‍ ସାରେ ଗଟେମ୍ଆଦାନ୍ ସମୟ ଏୱୁତେ ।
REV 1:4 ଯୋହନ୍‌ ଏସିଆ ପ୍ରଦେଶ୍‌ତାଗ୍ ମାନ୍ଦାନ୍ ସାତ୍‍ଟାନ୍ ମଣ୍ଡଲିକିଙ୍କ୍ ନମସ୍କାର୍‍ କେତୁତଣ୍ଡ୍‍ । ବବିଷ୍ୟତ୍‌, ମୁନେତ୍ ନୁ ଇଞ୍ଜେତାଦ୍ ଜିୱେମାନ୍ଦାନ୍ ଇଶ୍ୱର୍‍, ତାନ୍ ସିଂହାସନ୍ ମୁନେ ସାତ୍‍ଟାନ୍ ଆତ୍ମା,
REV 1:5 ଡଲ୍‍ତାଗାଙ୍କ୍ ମେଣ୍ଡେ ପୁନରୁତ୍‍ତିତ୍ ସାରେଦାମ୍ ମୁନେ, ବିଶ୍ୱାସ୍ତେ ସାକ୍ଷଦାତାଲ୍‌ ନୁ ପୃତିବିତେ ରାଜାଦିରାଜା ଜିସୁ କ୍ରିଷ୍ଟଟନ୍ ଅନୁଗ୍ରହ ନୁ ଶାନ୍ତି ମିଇ ପରୁ ଆୟି । ଅଣ୍ଡ୍‌ ମାନାଙ୍କ୍ ପ୍ରେମ ମାଡ଼ୁତନ୍ ନୁ ଅନ୍‌ ଡଲ୍‍ତାଦିନ୍‍ତ ମାନାଙ୍କ୍ ପାପ ତାଗାଙ୍ଗ୍ ପରିତ୍ରାନ୍ ମାଡ଼୍‍ତନ୍ ।
REV 1:6 ତାମ୍ ବାବାଲ୍ ଇଶ୍ୱର୍‌ତେ ସେବା ମାଡ଼ାନ୍ ସେଙ୍ଗେ ମାନାଙ୍କ୍ ଅଣ୍ଡୟ୍‌ ଯାଜକ ବଂଶ ମାଡ଼୍‍ତନ୍ । ସାରେ ଗଉରବ୍ ନୁ ପରାକ୍ରମ୍ ସାରେଦିନାମ୍ ଜିସୁ କ୍ରିଷ୍ଟନାଦ୍ ଆୟି ଆମେନ୍‍ ।
REV 1:7 ଉଡ଼ାଟ୍, ଅଣ୍ଡ୍‌ ମୟଲ୍‍ତାଗେ ୱାସମିନ୍ଦେନ୍ ପୃତିବିତେ ସାରେତଡ଼୍ ଅଙ୍କ୍‌ ଉଡ଼ିତଡ଼୍; ଇଦ୍‍ଲେକାମ୍ ଯେ ବେନଡ଼୍ ଅଙ୍କ୍‌ ୱିଡ଼୍‍ସି ମାତ୍‍ତଡ଼୍, ଅଡ଼୍‌‍ଆନ୍ତେ ଅଙ୍କ୍‌ ଉଡ଼ି ୱେର୍‍ସ୍‍ ମିକା କେୟିତଡ଼୍‍ । ଇଦ୍‍ଚାରେ ନିଜାମ୍ ଗଟେମ୍ ଆଦ୍‍ତେ । ଆମେନ୍‍ ।
REV 1:8 ପ୍ରବୁ ସାରେତିଙ୍ଗ୍ ଶକ୍ତିମାନ୍ ଇଶ୍ୱର୍ କେତିତନ୍, “ନାନେ ଆରାମ୍‍ ନୁ ମାଡ଼େଙ୍ଗ୍‍,” ଅଣ୍ଡ୍‌ ମୁନେଙ୍କ୍ ମାତ୍‍ତନ୍, ମେଣ୍ଡେ ଇଞ୍ଜେବା ମିନ୍ଦେନ୍, ମେଣ୍ଡେ ବବିଷ୍ୟତ୍‌ତେ ୱାଦ୍‍ତନ୍ ।
REV 1:9 ନାନେ ଯୋହନ୍‌, ମିଇ ୱେରନ୍ ଦାଦାନ୍, ଜିସୁନ୍ ଶିଷ୍ୟ ଲେକାମ୍ ତାନ୍ ରାଜ୍ୟତେ ନାରିଡ଼୍ ପରୁ ଆସମାନ୍ଦାନ୍ ଦରାତ୍ମ୍ୟ ଦର୍ଯ୍ୟତେ ସହ୍ୟ ମାଡ଼୍‍ନଙ୍କ୍ ନାନେ ମିୟାଦ୍ ୱେରନ୍ ବାଗିଦାର୍‍ । ଜିସୁ କେସ୍‍ମାନ୍ଦାନ୍ ସତ୍‍ ନୁ ଇଶ୍ୱର୍‌ତେ ବାକ୍ୟ କେତାନ୍‍ ସେଙ୍ଗେ ନାନେ ପାତ୍‍ମସ୍ ଗପ୍‍ତାଗ୍‍ ବନ୍ଦିଆସ୍‍ ଆଞ୍ଜ୍‍ମାତ୍‍ତାନ୍‍ ।
REV 1:10 ପ୍ରବୁନ୍ ଦିନାମ୍‍ତେ ପବିତ୍ରଆତ୍ମା ନାୟାଗ୍ ୱାତ୍‍ତେ ନୁ ନା ପେର୍କେତ୍‍ପାକ୍ ତୁରି ଲେଙ୍ଗ୍‍ ଇନା ଗାଟିଲେଙ୍ଗ୍ କେଞ୍ଜ୍‍ତାନ୍ ।
REV 1:11 ବେନମାତି ନାକ୍ କେତ୍‍ତନ୍, “ମିଡ଼୍ ବାତ୍ ଉଡ଼ୁତିଡ଼୍, ଆଦ୍ ୱେରଡ଼୍ ବଇତାଗ୍ ଲେକିୱାଟେ ନୁ ଏପିସସ୍‍, ସ୍ମର୍ଣ୍ଣା, ପର୍ଗାମମ୍‍, ତୁୟଟୀରା, ସାର୍ଦ୍ଦିସ୍‍, ପିଲାଦେଲ୍‍ଫିଆ ନୁ ଲାଉଦିକିଆତାଗ୍ ମାନ୍ଦାନ୍ ମଣ୍ଡଲିକିଙ୍କ୍ ବଇତିଙ୍କ୍‍ ରହସିମୁଟ୍ ।”
REV 1:12 ବେନ ନା ତଡ଼୍ ଗଟି କେତ୍‍ତନ୍, ଉଡ଼ାନଙ୍କ୍ ନାନେ ପେର୍କେ ମାଲ୍‍ସ୍‍ ଉଡ଼୍‍ତାନ୍, ସାତ୍‍ଟାନ୍ ସୁନାତାୱୁ କୁପି,
REV 1:13 ନୁ କୁପିତ୍‍ ନାଡ଼୍‍ମେ ନାରିନ୍ ପିଲେ ଲେକାମ୍ ୱେରଣ୍ଡ୍ । ଅନ୍‌ ଚକା ଡେକେ ଏୱୁନା ମାନ୍ଦାନ୍‍ ଲାଟିଲାଦ୍‍ ସକେ ନୁ ଅନ୍‌ ଗୁଣ୍ଡେତାଗ୍‍ ଅଣ୍ଡୟ୍‌‍ ସୁନାତାଦ୍‍ ଗୁଣ୍ଡେତାଗ୍‍ କେର୍‍ଦାନାଦ୍‍ ।
REV 1:14 ଅନ୍‌ ତାଲେତ୍ କେଲ୍‍କ୍ ନୁଲ୍‍ ନୁ ବରପ୍‍ ଲେକାମ୍ ପାଣ୍ଡ୍ରି ମାତ୍‍ତା ନୁ ଅନ୍‌ କଣ୍ଡା କିସ୍‍ ଲେକାମ୍ ନିଡ଼୍‍ସ ମାତ୍‍ତା ।
REV 1:15 ଅନ୍‌ ଡେକା ରେଣ୍ଡ୍ କିସ୍‍ତାଗ୍‍ କାଣ୍ଟି ପିତଳ ଲେକାମ୍ ଜିଗ୍‍ଜାଗ୍ ତଅନ୍‌ଦମାତ୍‍ତା ନୁ ଅନ୍‌ କେତାନ୍ ଲେଙ୍ଗ୍ ପରକଞ୍ଚ୍‍ ରାଲାନାଦ୍‍ ଏର୍‍ ଲେକାମ୍ ଲେଙ୍ଗ୍‍ ଆସମାତ୍‍ତେ ।
REV 1:16 ଅଣ୍ଡ୍‌ ତାନ୍ ତିନ୍ଦେକାଇଦେ ପାକେ ସାତ୍‍ଟାନ୍ ଉକାମ୍‍ ପଇସ୍‍ ମାତ୍‍ତନ୍ ନୁ ୱେରଡ଼୍ ଗାଟି ୱାୟେ ମାନ୍ଦାନ୍ ଚୁର୍‌ ଅନ୍‌ ମକତାଗାଙ୍କ୍ ପେୟ୍‍ତେ । ଅନ୍‌ ମକମ୍, ପାୟାଲ୍‍ତାଦ୍‍ ପଡ଼୍‍ଦ୍ ଲେକାମ୍ ଗାଟିୱେସ୍‍ ମାତ୍‍ତେ ।
REV 1:17 ଅଙ୍କ୍‌ ଉଡ଼୍‍ତେ ସାଙ୍ଗେ ସାଙ୍ଗେ ନାନେ ଚିମ୍‍କାସ୍‍ ଅନ୍‌ ଡ଼େକାନ୍ ମଦଲ୍ ରାଲ୍‍ତାନ୍ । ଅଣ୍ଡ୍‌ ତାନ୍ ଡ଼େବେକାଇ ନା ପରୁ ୱାଟି କେତ୍‍ତନ୍, “ୱେର୍‍ମା, ନାନେ ଆରାମ୍ ନୁ ମାଡ଼େଙ୍ଗ୍‍ ।”
REV 1:18 ନାନେ ଜିୱୁଣ୍ଡ୍‍ ମାନ୍ଦାନଣ୍ଡ୍‍; ଡଲିମାତ୍‍ତାନ୍, ଇତ୍‍କେ ନାନେ ଇଞ୍ଜେ ଜିୱେ ମିନ୍ଦେନ୍‍, ଅନନ୍ତ କାଲ ଜିୱେ ମାନ୍‍ତାନ୍ । ଡଲାନାଦ୍ ନୁ ନର୍କତାଦ୍‍ କୁଚ୍‍କାଇ ନା କାୟ୍‍ଦାଗ୍‍ ମିନ୍ଦେ ।
REV 1:19 ଆଦିଙ୍କ୍ ନିମେ ବେନ୍‍ସାରେ ବିଷୟ ଉଡ଼ୁତିନ୍, ବେନ୍ ସାରେ ବିଷୟ ଇଞ୍ଜେ ଗଟେମ୍ ଆଦ୍‍ତା ନୁ ବାତ୍‍ ସାରେ ବବିଷ୍ୟତ୍‌ତେ ଗଟେମ୍‍ ଆଦ୍‍ତା, ଆଦ୍ ଲେକି ୱାଟାଟ୍‍ ।
REV 1:20 ନାୟାଦ୍ ଡେବେକାଇଦାଗ୍ ମାନ୍ଦାନାୱ୍ ସାତ୍‍ଟାନ୍ ଉକାମ୍‍ ନୁ ସାତ୍‍ଟାନ୍ ସୁନାତାୱୁ ଦୀପନ୍‍ ଅର୍ତ ଆଦୁତ୍‍, ସାତ୍‍ଟାନ୍ ଉକାକ୍‍ ମଣ୍ଡଲିତେ ଦୂତ ନୁ ସାତ୍‍ଟାନ୍ କୁପି ଆଦୁତେ ମଣ୍ଡଲି ।
REV 2:1 “ଏପିସସ୍ ମଣ୍ଡଲିତେ ଦୂତନ୍ ପାକେ ଲେକାଟ୍; ବେନନ୍ ତିନ୍ଦେକାଇଦେ ପାକେ ସାତ୍‍ଟାନ୍ ଉକାକ୍‍ ନୁ ବେନ ସାତ୍‍ଟାନ୍ ସୁନାତାୱୁ କୁପି ନାଗେ ଆଦାୱାଦ୍‍ ମାଡ଼ିତନ୍, ଅନାଦ୍‌ ଇଦ୍ ଗଟ୍ ।”
REV 2:2 ମିୟାଦ୍ କାମ୍‍ ମାଡ଼୍‍ତାଦ୍, କଷ୍ଟ ଆତ୍‍ତେ ପରିଶ୍ରମ୍ ନୁ ଦର୍ଯ୍ୟ ବିଷୟ ନାନେ ପୁତ୍‍ତାନ୍ । ନାନେ ମିକା ପୁତ୍‍ତାନ୍ ଯେ, ମିଇ କାରାପ୍‍ ପାଡ଼୍‍ୟି ମାଡ଼ାନଡ଼୍‍କିଙ୍କ୍ ସହ୍ୟ ମାଡ଼୍‍ପାର୍‍ୱିଡ଼୍ । ବେନଡ଼୍ ପ୍ରେରିତ ଶିଷ୍ୟଡ଼୍ ଇଞ୍ଜ ନିଜେତ୍ ପରିଚୟ ଇଦ୍‍ତଡ଼୍‍, ଅଡ଼୍‌‍ ନିଜାମ୍‍ ଶିଷ୍ୟ ଆୟଡ଼୍‍, ପରିକ୍ଷା ମାଡ଼ି ଅଡ଼୍‌‍କିଂଙ୍କ୍ ମିତ୍ୟାବାଦିଡ଼ି ଇଞ୍ଜ ମିଡ଼୍ ପ୍ରମାନିତ ମାଡ଼୍‍ତିଡ଼୍ ।
REV 2:3 ମିଡ଼୍ ଗାଟି ଗାଡ଼୍‍ସ୍‍ । ନା ସେଙ୍ଗେ ଦୁଃକାମ୍ ମାଡ଼ି ମିକା ଆୟ୍‍ୱିଡ଼୍ ।
REV 2:4 ଇତ୍କେ ମିଇ ବିରୁଦ୍ଦତେ ନାୟାଦ୍ ଇଦ୍ ଅବିଯୋଗ୍‍; ମିଡ଼୍ ମୁନେଙ୍କ୍ ନାକିଙ୍କ୍ ବେଲାନ୍ ପ୍ରେମ ମାଡ଼ମାତ୍‍ତିଡ଼୍, ଇଞ୍ଜେ ଆଦେଲେକାମ୍ ମେଣ୍ଡେ ମାଡ଼୍‍ୱିଡ଼୍‍ ।
REV 2:5 ମିଡ଼୍ ବେସର୍ ମଦଲ୍‍ ଆତ୍‍ତିଡ଼୍, ଚିନ୍ତା ମାଡ଼ାଟ୍ । ପାପ ତାଗାଙ୍କ୍ ମାଲ୍‍ସ୍ ମୁନେତ୍‍ ଲେକାମ୍ ସତ୍‍କାମ୍ ମାଡ଼ାଟ୍ । ଯଦି ପାପ ତାଗାଙ୍କ୍ ମାଲ୍‍ସ୍ ୱାଡ଼୍‍ୱିଡ଼୍, ଆଲେକ୍ ନାନେ ମିଇ କୁପିତିଙ୍ଗ୍ ମେଣ୍ଡେଅଣ୍ଡାଗ୍‍ ୱାଟିଦ୍‍ତାନ୍ ।
REV 2:6 ମାତର୍ ମିଇ ସପଟ୍‍ତେ ୱେରଡ଼୍ ବିଷୟ ମିନ୍ଦେ । ଆଦ୍ ଅଦୁତ୍, ନା ଲେକାମ୍ ମିଡ଼୍ ଆନ୍‌ତେ ନିକଲାଇତିୟ ନାରୁଡ଼୍‍ଦେ କାମ୍‍ଦିଙ୍କ୍ ଗୃଣା ମାଡ଼ୁତିନ୍ ।
REV 2:7 “କେଞ୍ଜାନଙ୍କ୍ କେୱୁ ମାତ୍‍କେ, ମଣ୍ଡଲିକିଙ୍କ୍ ପବିତ୍ରଆତ୍ମା ବାତେ କେତୁତା, କେଞ୍ଜାଟ୍ ! ବେନଡ଼୍ ଜିଡ଼ିତଡ଼୍‍, ନାନେ ଅଡ଼୍‌‍କିଂଙ୍କ୍ ଇଶ୍ୱର୍‌ତେ ବଗିଚାତାଗେ ଆଦ ମାନ୍ଦାନ୍ ଜିୱେମାନ୍ଦାନ୍ ମାଡ଼ାତାଦ୍ କାୟେ ତିନ୍ଦାନ୍ ସେଙ୍ଗେ ଅଦିକାର୍‌ ଇଦ୍‍ତାନ୍ ।”
REV 2:8 “ସ୍ମର୍ଣ୍ଣାତାଗ୍ ମାନ୍ଦାନ୍ ମଣ୍ଡଲିତେ ଦୂତନ୍ ପାକେ ଲେକାଟ୍, ବେନ୍ ଆରାମ୍ ନୁ ଶେଷ ମେଣ୍ଡେ ବେନ ଡଲିମିକା ମେଣ୍ଡେ ଜିୱେଆତ୍‍ତନ୍, ଅନ୍‌‍ ଗାର୍ରେ ଇଦ୍ ଗଟ୍;”
REV 2:9 ନିୟାଦ୍ ଅସୁବିଦା ସାରେ ନାନ୍‍ ପୁତ୍‍ତାନ୍‍; ନାନେ ମିକା ପୁତ୍‍ତାନ୍‍ ଯେ, ନିମେ ଦରିଦ୍ର; ଇତ୍‍କେ ନିଜାମ୍‍ ନିମେ ସାଉକାର୍ । ବେନଡ଼୍ ନିଜେତିଙ୍ଗ୍ ଇଉଦି ଇଞ୍ଜ କେତିତଡ଼୍‍, ଇତ୍‍କେ ନିଜାତ୍‍ ଇଉଦି ଆୟଡ଼୍‍ ନୁ ବେନଡ଼୍ ଶୟତାନ୍‍ତିଙ୍କ୍‍ ଉପାସନା ମାଡ଼ିତଡ଼୍‍, ଅଡ଼୍‌ ବେଲାନ୍ ନିୟାଦ୍ ଦୋଷ ମାଡ଼ି ଗଟ୍ କେତ୍‍ତଡ଼୍, ଆଦ୍ ନାନେ ପୁତ୍‍ତାନ୍ ।
REV 2:10 ମିଡ଼୍ ବାତ୍‍ସାରେ ଦୁଃକାମ୍‍ ଆଦାଙ୍କ୍ ଆଦୁତିଡ଼୍, ଅଦିନ୍‌ ସେଙ୍ଗେ ୱେର୍‍ମାଟ୍ । କେଞ୍ଜା ! ମିଇ ଲୋପେଙ୍କ୍ ବେସ୍‍ତୁଡ଼୍‍କ୍ ଜଇଲ୍‍ତାଗ୍ ୱାଟି ଶୟତାନ୍ ପରିକ୍ଷା ମାଡ଼ିତ୍ । ଇତ୍‍କେ ମିୟାଦ୍ ଇଦ୍ ଦୁର୍ଦ୍ଦଶା ମାତର୍ ବେସ୍‍କେ ଦିନ୍ ସାରେପାକ୍ ଆଦ୍‍ତେ । ଇଗେ ଡଲାନାଦ୍ ୱେର୍‍ ମାତ୍‍କେ ମିକା, ନା ପରୁ ବିଶ୍ୱାସ୍ ମାତ୍‍କେ, ନାନେ ମିକିଙ୍କ୍ ଜିୱୁଣ୍ଡ୍‍ ଲେକେତାଦ୍ ମୁକୁଟ୍‍ ଇଦ୍‍ତାନ୍ ।
REV 2:11 “କେଞ୍ଜାନଙ୍କ୍ କେଉ ମାତ୍‍କେ, ମଣ୍ଡଲିକିଙ୍କ୍‍ ଇଶ୍ୱର୍‌ତେ ଆତ୍ମା ବାତେ କେତୁତା, କେଞ୍ଜାଟ୍ ! ବେନଡ଼୍ ଜିଡ଼ି ମାନ୍‍ନ୍ତଡ଼୍‍, ମେଣ୍ଡେଅଣ୍ଡ୍‌‍ ଡଲାନାଦ୍ ଅଡ଼୍‌‍କ୍ ଇଟେ ପାର୍‍ୱ ।”
REV 2:12 “ପର୍ଗାମମ୍ ମଣ୍ଡଲିତେ ଦୂତନ୍ ପାକେ ଲେକାଟ୍, ବେନନ୍ ଗାର୍ରେ ଗାଟି ରେଣ୍ଡ୍‍ପାକା ୱାୟେମାନ୍ଦାନ୍‍ ଚୁର୍‌ ମିନ୍ଦେ, ଅନାଦ୍‌‍ ଇଦ୍ ଗଟ୍ ।”
REV 2:13 ନାନେ ପୁତ୍‍ତାନ୍, ମିଇ ଶୟତାନ୍‍ତେ ସିଂହାସନ୍ ଗାର୍ରେ ମିନ୍ଦେଡ଼ି । ଇତ୍‍କେ ମିଡ଼୍ ନା ପରୁ ବିଶ୍ୱସ୍ତ, ଇଦ୍‍ଲେକାମ୍ କି ଶୟତାନ୍‍ ମାନ୍ଦାନ୍ ପଡ଼ିୟେତାଗ୍ ବେସୁଙ୍କ୍‍ ନାୟାଦ୍ ୱେରଣ୍ଡ୍ ବିଶ୍ୱସ୍ତ ଦାସ ଆଣ୍ଟିପାସ୍‍ଙ୍କ୍ ଆୱୁକ୍‍ତନ୍, ଆସୁଙ୍ଗ୍‍ ମିକା ମିୟାଦ୍ ବିଶ୍ୱାସ୍ ୱିଡ଼୍‍ସ୍‍ୱେ ମାତ୍‍ତିଡ଼୍ ।
REV 2:14 ଇତ୍କେ ମିଇ ବିରୁଦ୍ଦତେ ନାୟାଦ୍ ବେସର୍ ବିଷୟ କେତାନାଦ୍ ମିନ୍ତେ । ଆଗେ ମିଇ ତଡ଼୍ ମାନ୍ଦାନ୍ ବେସ୍‍କ୍‍ତଡ଼୍, ବାଲାମ ଦେୟାମ୍‍ତେ ଶିକ୍ଷା ତଡ଼୍‍ ଚାଲେମ୍‍ ଆଦୁତଡ଼୍‍ । ବାଲାମ୍ ଦେୟାମ୍‍ତେ ପ୍ରସାଦ୍ ତିନ୍ଦାନାଦ୍ ନୁ ମିଚ୍ ବ୍ୟବହାର୍‌ ମାଡ଼ନ୍ ସେଙ୍ଗେ ଇଶ୍ରାଏଲ୍‍ତଡ଼୍‍କିଙ୍କ୍ କେତାନ୍ ସେଙ୍ଗେ ବାଲାକତିଙ୍କ୍‍ ଶିକ୍ଷା ଇସ୍‍ମାତ୍‍ତେ ।
REV 2:15 ଟିକ୍‌ ଆଦେଲେକାମ୍ ନିକଲାଇତିୟନଡ଼୍‍କ୍ ଗଟ୍‍ତିଙ୍କ୍‍ ପୟ୍‍ସ୍‍ ମାନ୍ଦାନ୍ ନାରିଡ଼୍‍ ମି ଲୋପେ ମିନ୍ଦେଡ଼୍ ।
REV 2:16 ମିୟାଦ୍ ପାପ ୱିଡ଼୍‍ସାଟ୍; ଇଲୁକ୍ ନାନେ ଯାପେ ମିଇ ଗାର୍ରେ ୱାସ୍ ନା ମକତାଗ୍‍ ପେୟ୍‍ତେ ଚୁର୍‌ ଲେକେତ୍‍ ଗଟ୍‍ତଡ଼୍ ଆଦ୍ କାରାପ୍‍ ବ୍ୟବହାର୍‌ ମାଡ଼ମାନ୍ଦାନ୍‍ ନାରୁଡ଼୍‍ ବିରୁଦ୍ଦତେ ଯୁଦ୍‌ ମାଡ଼ିତାନ୍ ।
REV 2:17 ବେନଡ଼ାୱୁ କେଞ୍ଜାନଙ୍କ୍ କେୱୁ ମିନ୍ଦେ, ମଣ୍ଡଲିକିଙ୍କ୍‍ ଇଶ୍ୱର୍‌ତେ ଆତ୍ମା ବାତେ କେସମିନ୍ତେ, ଆଦ୍ କେଞ୍ଜାଟ୍, “ବେନଡ଼୍ ଜିଡ଼ିତଡ଼୍, ନାନେ ଅଡ଼୍‌‍କିଂଙ୍କ୍ ନେଏସ୍‍ ମାନ୍ଦାନ୍ ମାନ୍ଦେତାଗାଙ୍କ୍ ସୁକୁକ୍ ଇଦ୍‍ତାନ୍ । ଅଡ଼୍‌ ଲୋପେଙ୍କ୍‍ ୱେରଙ୍କ୍ ପୁନେ ପେଦେର୍ ଲେକା ଆସ୍‍ମାନ୍ଦାନ୍ ୱେରଡ଼୍ ପାଣ୍ଡ୍ରି କାଲ୍‍ ଇଦ୍‍ତାନ୍ । ଆଦ୍ ପୁନେ ପେଦେର୍ ବାତେ, କାଲ୍‍ ଗ୍ରହନ୍‍ ମାଡ଼ାନଣ୍ଡ୍‍ ୱିଡ଼୍‍ସି ବାଗାତଡ଼୍ ବେନ ଆଦ୍ ପୁନ୍ଦେ ପାର୍‍ୱନ୍ ।”
REV 2:18 “ତୁୟଟୀରାତାଗ୍ ମାନ୍ଦାନ୍ ମଣ୍ଡଲିତେ ଦୂତନ୍ ପାକେ ଲେକାଟ୍; ଇଦ୍ ଗଟ୍ ଇଶ୍ୱର୍‌ତେ ମାର୍‍ଦାଗାଙ୍କ୍ ୱାସ୍‍ମିନ୍ଦେ । ଅନ୍‌ କଣ୍ଡା ନିଡ଼୍‍ତାନ୍ କିସ୍ ଇନା ନୁ ତାନ୍ ରେଣ୍ଡ୍‍ ପାଦାକ୍ ନିଇମ୍‍ ପିତଲ୍ ଇନା ୱେସ୍ ।”
REV 2:19 ମିୟାଦ୍ କାମ୍‍ ମାଡ଼୍‍ତାଦ୍, ମିୟାଦ୍ ପ୍ରେମ, ବିଶ୍ୱାସ୍ତତା, ମିୟାଦ୍ ସେବା କାମ୍ ନୁ ଦର୍ଯ୍ୟ ନାନେ ପୁତ୍‍ତାନ୍ ! ନାନେ ମିକା ପୁତ୍‍ତାନ୍ ଯେ, ମିଡ଼୍ ମୁନେଙ୍କ୍ ବାତ୍ ମାଡ଼ମାତ୍‍ତିଡ଼୍, ଇଞ୍ଜେ ଆଗାଙ୍କ୍ ଅଦିକ୍‌ ମାଡ଼ୁତିଡ଼୍ ।
REV 2:20 ଇତ୍କେ ମିଇ ବିରୁଦ୍ଦତେ ନାୟାଦ୍ ମାତର୍ ଇସର୍ କେତାନାଦ୍ ମିନ୍ଦେ, ଇଶ୍ୱର୍‌ତେ କେତାନ୍ ଗଟ୍ ଲେକାମ୍ ନିଜେତ୍ ପରିଚୟ ଇସମାନ୍ଦାନ୍ ଯେଜେବଲ୍ ପେଦେର୍‍ତେ ନାଟାଡ଼୍‍ତିଙ୍କ୍ ନିମେ ପଡ଼୍‍ୟେ ଇତ୍‍ତିନ୍ । ଆଦ୍ ନା ଦାସଡ଼୍‍କ୍ କାରାପ୍‍ ବ୍ୟବହାର୍‌ ମାଡ଼ାନଙ୍କ୍ ନୁ ଦେବଦେବି ନଡ଼୍‍ପାକେ ଉତ୍ସର୍ଗ ମାଡ଼ିମାନ୍ଦାନ୍ କାଦି ତିନ୍ଦାନଙ୍କ୍ ଶିକ୍ଷା ଇସ୍ ଅଡ଼୍‌‍କିଂଙ୍କ୍ କାରାପ୍‍ ଆର୍‍ଦାଗ୍‍ ଆଦୁତେ ।
REV 2:21 ପାପତାଗାଙ୍କ୍ ମାଲ୍‍ସ୍‍ ୱାଦାନ୍ ସେଙ୍ଗେ ନାନେ ଆଦିଙ୍କ୍ ସମୟ ଇସ୍‍ମିନ୍ଦେନ୍, ଇତ୍କେ ଆଦ୍ ନିଜେତ୍ ଦୁଷ୍କର୍ମ କାମ୍ ୱିଡ଼୍‍ସାନ୍ ସେଙ୍ଗେ ଇଚ୍ଛା ମାଡ଼ ।
REV 2:22 ଆଦିଙ୍କ୍ ନାନେ ତାଙ୍କ୍ ମେଣ୍ଡେ ତାନ୍‍ ତଡ଼୍ ବ୍ୟବିଚାର୍‍ତାଗ୍ ମାଇମାନ୍ଦାନଡ଼୍‍ ସାରେତଡ଼୍‍କ୍ ରୋଗାମ୍‍ ମାଡ଼ିତାନ୍‍ ମେଣ୍ଡେ ଅଡ଼୍‌‍ ଗାଟି କଷ୍ଟ ଆଦ୍‍ତଡ଼୍‍ । ଅଡ଼୍‌‍ ଅଦିନ୍‌ ତଡ଼୍ ମାଡ଼ିମାନ୍ଦାନ୍ ଦୁଷ୍କୃତି ସେଙ୍ଗେ ଏର୍କା ମାଡ଼କ୍‍, ଆଲେକ୍ ନାନେ ଇଦ୍‍ ନିଶ୍ଚୟ୍‍ ମାଡ଼ିତାନ୍ ।
REV 2:23 ତାନ୍ ପେର୍କେ ଆଦାନଡ଼୍‍କ୍ ମିକା ଆୱୁକିତାନ୍ । ଆଲାଆତ୍‍କେ, ମଣ୍ଡଲିକି ସାରେ ପୁନ୍‌ତା ଯେ; ନାନେ ଅନ୍‌ତର୍ଯ୍ୟମି, ନାରିଡ଼୍ ସାରେ ଚିନ୍ତା ନୁ ଲାଲସା ନାନେ ପୁନ୍‍ନ୍ତାନ୍ । ମିଡ଼୍ ସାରେତଡ଼୍‍ ବାତ୍‍ତେ ମାଡ଼୍‍ତିଡ଼୍, ଆଦ୍ ଲେକାମ୍‌ ନାନେ ମିକିଙ୍କ୍ ସାରେ କାମ୍‍ତେ ଦଣ୍ଡ୍‍ ଇଦ୍‍ତାନ୍ ।
REV 2:24 “ଇତ୍କେ ତୁୟଟୀରାତାଗ୍ ମିଇୟାଗାଙ୍କ୍ ବେନଡ଼୍ ଇଦ୍‍ ଶିକ୍ଷାତିଙ୍କ୍‍ ଗ୍ରହନ୍ ମାଡ଼ଣ୍ଡ୍ ନୁ ତତାକତିତ ‘ଶୟତାନ୍‍ତେ ନିଗୂଡ଼ ରହସ୍‍’ ସାରେ ଶିକ୍ଷା ମାଡ଼ନ୍, ନାନେ ଅଡ଼୍‌‍ପରୁ ମେଣ୍ଡେ ବାତେ ମପ୍ କାଞ୍ଜ୍‍ପନ୍ ।
REV 2:25 ମାତର୍ ନାନେ ୱାଡ଼୍‍ୱେ ଯାକ ମିୟାଦ୍ ବାତ୍‍ ମାତ୍‍ତେ ଆଦ୍‍ ମିନ୍ଦେ, ଆଦ୍ ଗାଡ଼୍‍ତଡ଼୍‍ ପଇସ୍‍ ମାନୁଟ୍ ।
REV 2:26 ବେନଡ଼୍ ଜିଡ଼ିତନ୍ ନୁ ତେର୍‍ନା ଯାକ ନାୟାଦ୍ ଇଚ୍ଛା ଲେକାମ୍ କାମ୍‍ ମାଡ଼୍‍କେ, ନାନେ ବାବାନ୍ ପାକେଙ୍କ୍ ବେନ୍ କ୍ଷମତା ଦର୍‍ସ୍କ୍‍ତାନ୍ ଆଦ୍ ଅଡ଼୍‌‍କିଂଙ୍କ୍ ଇଦ୍‍ତାନ୍ ।
REV 2:27 ପୃତିବିତେ ୱେରେ ଜାତିଙ୍କ୍ ଲୁହା ଦୁଡ଼େତେ ଶାସନ୍‍ ମାଡ଼ାନଙ୍କ୍ ନୁ ମାଣ୍ଡୁଲ୍ କୁଣ୍ଡେ ଲେକାମ୍ ଦୁଡ଼ା ଦୁଡ଼ା ମାଡ଼ାନଙ୍କ୍ ନାନେ ଅଡ଼୍‌‍କିଂଙ୍କ୍ କ୍ଷମତା ଇଦ୍‍ତାନ୍ ।
REV 2:28 ନାନେ ଅଡ଼୍‌‍କ୍ ‘ୱିୟ୍‍ ଉକାମ୍‍’ ମିକା ଦାନ ମାଡ଼ିତାନ୍ ।”
REV 2:29 “କେଞ୍ଜାନଙ୍କ୍ ଶକ୍ତି ମାତ୍‍କେ, ମଣ୍ଡଲିକିଙ୍କ୍‍ ଇଶ୍ୱର୍‌ତେ ଆତ୍ମା ବାତେ କେତୁତା, କେଞ୍ଜାଟ୍ !”
REV 3:1 “ସାର୍ଦ୍ଦିତାଗ୍ ମାନ୍ଦାନ୍ ମଣ୍ଡଲିତିତେ ଦୂତନ୍ ପାକେ ଲେକାଟ୍ । ଇଶ୍ୱର୍‌ତେ ସାତ୍‍ଟାନ୍ ଆତ୍ମା ନୁ ସାତ୍‍ଟାନ୍ ଉକାମ୍‍ ପୟ୍‍ସ୍‍ମାନ୍ଦାନ୍ ନାରୁନାଗାଙ୍କ୍ ଇଦ୍ ଗଟ୍ । ନାନେ ମିୟାଦ୍ କାମ୍‍ ମାଡ଼୍‍ତାଦ୍ ପୁତ୍‍ତାନ୍; ମିଡ଼୍ ଡଲିମାତ୍‍କେ ମିକା ଜିୱେମିନ୍ଦେନ୍ ଇଞ୍ଜ କ୍ୟାତି ଲାବ୍ ମାଡ଼୍‍ତିନ୍ ।”
REV 3:2 ଆଦିଙ୍କ୍ ଜାଗ୍ରତ୍‍ ଆୟମୁଟ୍ ନୁ ମୀଇ ପାକେ ବାତ୍ ମିନ୍ଦେ, ଆଦ୍‍ ପୁରା ଦଂସ ଆଦାନ୍ ମୁନେ ଆଦିଙ୍କ୍ ଶକ୍ତି ମାଡ଼ାଟ୍ । ବାତେଙ୍କ୍‍ଇତ୍କେ ନାନେ ପୁତ୍‍ତାନ୍, ମିୟାଦ୍ କାମ୍ ସାରେ ଇଶ୍ୱର୍‌ତେ କଣ୍ଡେତେ ଇଞ୍ଜେକ୍‍ ଯାକ ସିଦ୍ଦ ଆୟକେ ।
REV 3:3 ମିକିଙ୍କ୍ ବେନ୍ ଶିକ୍ଷା ଇସ୍‍ମାତ୍‍ତନ୍ ନୁ ମିଡ଼୍ ବାତେ କେଞ୍ଜି ମାତ୍‍ତିଡ଼୍, ଆଦ୍ ଏର୍କା ମାଡ଼ି ପାଲନ୍ ମାଡ଼ାଟ୍ ନୁ ମିଇ ପାପ ତାଗାଙ୍କ୍ ମାଲ୍‍ମୁଟ୍ । ଜାଗ୍ରତ୍‍ ଆୟକ୍, ନାନେ ଡଙ୍ଗାଲ୍ ଲେକାମ୍ ପୁନ୍‍ୱେଲେକାମ୍ ମିଇ ପାକେ ୱାଦ୍‍ତାନ୍ । ବେନ୍ ସମୟତେ ୱାଦ୍‍ତାନ୍, ଆଦ୍ ମିଡ଼୍ ପୁନ୍‍ୱିଡ଼୍ ।
REV 3:4 ମାତର୍ ସାର୍ଦ୍ଦିସ୍‍ତାଗ୍‍ ମିୟାଗାଙ୍କ୍ ବେସ୍‍କ୍‍ତଡ଼୍ ଅଡ଼ାୱୁ ସିଲେଙ୍କ୍ ପରିଷ୍କାର୍‍ତେ ନେଃଏତଡ଼୍ । ଅଡ଼୍‌‍ ପାଣ୍ଡ୍ରିଲାଉ ଚକା କେର୍‍ସ୍‍ ନା ତଡ଼୍ ଆଦାୱାଦା ଆଦ୍‍ତଡ଼୍, ବାତେଙ୍କ୍‍ଇତ୍କେ ଇଦିନ୍‍ ସେଙ୍ଗେ ଅଡ଼ାଦ୍‌ ଯଗ୍ୟତା ମିନ୍ତେ ।
REV 3:5 ବେନଡ଼୍ ଜିଡ଼ିତଡ଼୍, ଅଡ଼୍‌ ଇଦ୍‍ଲେକାମ୍ ପାଣ୍ଡ୍ରିଲାଉ ସିଲେ କେର୍‍ଦ୍‍ତଡ଼୍ । ଜୀୱେ ବଇତାଗାଙ୍କ୍ ଅଡ଼ାଦ୍‌ ପେଦେର୍ ବେସୁଙ୍କ୍‌ବା ମାୟ ମେଣ୍ଡେ ନା ବାବାଲ୍ ନୁ ତାନ୍ ଦୂତକିନ୍ ମୁନେ ଅଡ଼୍‌‍କିଂଙ୍କ୍ ନା ପେର୍କେୱାଦ୍‍ନଡ଼୍‍ ଇଞ୍ଜ ନାନେ ସ୍ୱିକାର୍ ମାଡ଼ିତାନ୍ ।
REV 3:6 “କେଞ୍ଜାନଙ୍କ୍ କେୱୁ ମାତ୍‍କେ, ମଣ୍ଡଲିକି ପବିତ୍ରଆତ୍ମା ବାତ୍‍ତା କେତୁତା, ମନ୍‍ ଇସ୍ କେଞ୍ଜାଟ୍ ।”
REV 3:7 “ଫିଲାଦେଲ୍‍ଫିଆତାଗ୍ ମାନ୍ଦାନ୍ ମଣ୍ଡଲିତେ ଦୂତନ୍ ପାକେ ଲେକାଟ୍, ବେନ ସର୍ବତେ ପବିତ୍ର ନୁ ସତ୍ ଲେକାମ୍, ଅନାଗାଙ୍କ୍ ଇଦ୍ ଗଟ୍ କେଞ୍ଜାଟ୍ । ଅନ୍‌ ଗାର୍ରେ ଦାଉଦ୍‍ତେ କୁଚ୍‍କାଇ ମିନ୍ଦେ, ଅଣ୍ଡ୍‌ ବେନ୍ ମାର୍‍ ଟେଣ୍ଡିତନ୍, ବାଗାତଡ଼୍ ମେଣ୍ଡେ ବେନ ଆଦ୍ ବନ୍ଦ ମାଡ଼େପାର୍‍ୱଡ଼୍‍ ନୁ ଅଣ୍ଡ୍‌ ବାତ୍‍ ବନ୍ଦ ମାଡ଼ିତନ୍, ବାଗାତଡ଼୍‍ ବେନ୍ ଆଦ୍ ତେର୍‍ତାଙ୍କ୍ ପାର୍‍ୱଡ଼୍‍ ।”
REV 3:8 ମିୟାଦ୍ କାମ୍ ସାରେ ନାନେ ପୁତ୍‍ତାନ୍; ଇଞ୍ଜେକ୍ ଆନା ନିୟାଦ୍ ବେସର୍‍ ଶକ୍ତି ମିନ୍ଦେ, ଇଦ୍ ମିକା ପୁତ୍‍ତାନ୍; ନିମେ ନା ଶିକ୍ଷା ପାଲନ୍ ମାଡ଼ଡ଼୍‍ ୱାସମିନ୍ଦେନି ନୁ ନା ସେଙ୍ଗେ ବିଶ୍ୱସ୍ତ ମିନ୍ଦେନି । ଆଦିଙ୍କ୍ ନାନେ ନିଇ ମୁନେ ୱେରଡ଼୍ ମାର୍ ‍ଟେଣ୍ଡ୍‍ତାନ୍ । ଆଦ୍ ବେନ ବନ୍ଦ ମାଡ଼େ ପାର୍‍ୱାଣ୍ଡ୍‍ ।
REV 3:9 କେଞ୍ଜା ! ବେନ୍ ସୁକୁକ୍‍ ମିତ୍ୟାବାଦିଡ଼୍ ନିଜେ ନିଜେତିଙ୍ଗ୍ ଇଉଦି ଇଞ୍ଜ ଦାବି ମାଡ଼ିତଡ଼୍, ଇତ୍କେ ନିଜାମ୍‍ ଇଉଦି ଆୟଡ଼୍‍, ଶୟତାନ୍‍ତିଙ୍କ୍‍ ଉପାସନା ମାଡ଼ାନ୍‍ ଆ ନାରିଡ଼୍‍କ୍ ନାନେ ମିଇ ଡେକେତ୍‍ ମଦଲ୍‍ ମାଡ଼ିତାନ୍ । ନାନେ ନିକିଙ୍କ୍ ପ୍ରେମ ମାଡ଼ୁତାନ୍ ଇଞ୍ଜ ଅଡ଼୍‌ ସାରେତଡ଼୍ ପୁନ୍‍ତଡ଼୍ ।
REV 3:10 ନାୟାଦ୍ ଆଦେଶ୍‍ ଲେକାମ୍ ମିଡ଼୍ ଦର୍ଯ୍ୟତେ ମିନ୍ଦେଡ଼ି, ଆଦିଙ୍କ୍ ପୃତିବିତେ ନାରୁଡ଼୍ ପରିକ୍ଷା ମାଡ଼ାନଙ୍କ୍ ପୁରା ଜଗତ୍‍ତାଗ୍‍ ବେନ୍ ଦୁର୍ଦ୍ଦଶା ଆଦାନଙ୍କ୍ ଅଦୁତ୍, ଆଗାଙ୍କ୍ ନାନେ ମିକିଙ୍କ୍ ନିରାପଦ୍‍ ନେଃଏତିତାନ୍‍ ।
REV 3:11 ନାନେ ଯାପେ ୱାଦୁତାନ୍, ମିୟାଦ୍ ବାତେ ମିନ୍ଦେ, ଆଦ୍ ସୁରକ୍ଷା ମାଡ଼ାଟ୍, ବେଲାନ୍ ବେନ ମିୟାଗାଙ୍କ୍, ମିୟାଦ୍ ଜିଡ଼୍‍ତେ ପୁରସ୍କାର୍ ଡଙ୍ଗି ଅୟ୍‍ମାକିଡ଼୍‍ ।
REV 3:12 ଜିଡ଼୍‍ତେ ନାରୁଡ଼୍‍କ୍ ନାନେ ନା ଇଶ୍ୱର୍‌ତେ ମନ୍ଦିର୍‍ତାଗ୍ ଗୁଞ୍ଜେ ଲେକାମ୍ ତିଆର୍ ମାଡ଼ିତାନ୍ ନୁ ଅଣ୍ଡ୍‌ ବେସୁବା ଆଗାଙ୍କ୍ ସ୍ଥାନାନ୍ତରିତ୍‍ ଆୟଣ୍ଡ୍ । ନାନେ ଅନ୍‌ ପରୁ ନା ଇଶ୍ୱର୍‌ତେ ପେଦେର୍ ଲେକିତାନ୍ । ନା ଇଶ୍ୱର୍‌ତାଗାଙ୍କ୍ ସ୍ୱର୍ଗତାଗାଙ୍କ୍ ୱାଦାନ୍ ଇଶ୍ୱର୍‌ତେ ନଗର୍, ପୁନେ ଯିରୁଶାଲେମ୍‍ତେ ପେଦେର୍‍ ନୁ ନାୟାଦ୍ ପୁନେ ପେଦେର୍ ମିକା ତାନ୍‍ ପରୁ ଲେକିତାନ୍ ।
REV 3:13 “ବେନନାୱୁ କେଞ୍ଜାନଙ୍କ୍ କେୱୁକ୍‍ ମିନ୍ତେ, ଅଣ୍ଡ୍‌ ମଣ୍ଡଲିକିଙ୍କ୍‍ ଇଶ୍ୱର୍‌ତେ ଆତ୍ମା ବାତେ କେତୁତା, ମନ୍ ଇସ୍ କେଞ୍ଜାଟ୍ ।”
REV 3:14 “ଲାଉଦିକିଆତାଗ୍ ମାନ୍ଦାନ୍ ମଣ୍ଡଲିତେ ଦୂତନ୍ ପାକେ ଲେକାଟ୍, ବିଶ୍ୱାସ୍‍ ନୁ ସତ୍ ସାକ୍ଷି ମେଣ୍ଡେ ଇଶ୍ୱର୍‌ତେ ସାରେ ସୃଷ୍ଟିତେ ଆରାମ୍‍ ଅଣ୍ଡ୍‌‍ ‘ଆମେନ୍‍ତେ’ ଇଦ୍ ଗଟ୍,”
REV 3:15 ନାନେ ମିୟାଦ୍ କାମ୍‍ତିଙ୍କ୍ ପୁତ୍‍ତାନ୍; ମିଡ଼୍ କିଡ଼୍‍ଙ୍ଗ୍‍ତା ଆୟ୍‍ୱିଡ଼୍‍, କି କାମ୍‍କେ ଆୟ, ଇଦ୍ ନାନେ ପୁତ୍‍ତାନ୍ । ମିଡ଼୍ କିଡ଼୍‍ଙ୍ଗ୍‍ତା ବା କାମ୍‍କେ ଆସ୍‍ମାତ୍‍କେ, ଲେକେତ୍ ଆୟେଡ଼୍ ।
REV 3:16 ଇତ୍କେ ମିଡ଼୍ କିଡ଼୍‍ଙ୍ଗ୍‍ତା ବା କାମ୍‍କେ ଆୟକଟ୍ କିଡ଼୍‍ଙ୍ଗ୍‍ତା କାମ୍‍କେ ସାମାନ୍‍ ଆସ୍‍ମାନ୍‍ନାଙ୍କ୍, ନାନେ ମିକିଙ୍କ୍ ନା ମକତାଗାଙ୍କ୍ ବାୟ୍‍ଦେ ପେସ୍ପିତାନ୍‍ !
REV 3:17 ମିଡ଼୍ କେତୁତିଡ଼୍; ନାନେ ସାଉକାର୍ ନୁ ସମୃଦ୍ଦିଶାଲି, ନାୟାଦ୍ ବାତେ ଦର୍‍କାର୍‍, ସାରେ ମିନ୍ଦେ; ଆଗେକ୍‍ବା ନିମେ ବେସର୍ ଦୁର୍ଦ୍ଦଶାପନ୍ନ ନୁ ଦୟନୀୟ, ଇଦ୍ ପୁନ୍‍ୱିନ୍ । ନିମେ ଦରିଦ୍ର, ବାଣ୍ଡାନି ବା କାନାନି !
REV 3:18 ଆଦିଙ୍କ୍ ନାନେ ନିକିଙ୍କ୍ ଆଦେଶ୍‍ ଇଦୁତାନ୍, ସାଉକାର୍ ଆଦାନ୍ ସେଙ୍ଗେ ନାୟାଗାକଞ୍ଚ୍‍ କାଣ୍ଟି ସୁନା ଆସେ, ମିୟାଦ୍ ସିଗ୍ ବାଣ୍ଡାଙ୍କ୍ କେର୍‍ଦାନ୍ ସେଙ୍ଗେ ନାୟାଗ୍‍କଞ୍ଜ୍ ପାଲ୍‍ସେଲାଦ୍ ସିଲେ ଆସେ । ମେଣ୍ଡେ ଉଡ଼ାନ୍‍ ଶକ୍ତି କିଲେର୍ ମାଡ଼ାନଙ୍କ୍ ବେସ୍‍କେ ଆଞ୍ଜନ୍ ଆସି କଣ୍ଡାନାଗେ ୱାଟେ ।
REV 3:19 ନାନେ ବେନଡ଼୍‍କ୍‌ ପ୍ରେମ ମାଡ଼ୁତାନ୍, ଅଡ଼୍‌‍କିଂଙ୍କ୍ ପାସ୍କିତାନ୍‍ ନୁ ଶାସ୍ତି ଇଦ୍‍ତାନ୍ । ଆଦିଙ୍କ୍ ହୃଦୟ ତଡ଼୍‍ ପାପ ଆର୍‍ଦାଗାଙ୍କ୍ ମାଲ୍‍ସ୍‍ ୱାଡ଼େ ।
REV 3:20 ଉଡ଼େ ! ନାନେ ବାଇଦେ ନିସ୍ ଦ୍ୱାରତାଗ୍ ତାଲ୍‍ସୁତାନ୍; ଯଦି ବେନ ନାୟାଦ୍ ଲେଙ୍ଗ୍ କେଞ୍ଜି ମାର୍‍ ଟେଣ୍ଡିଦ୍‍ତନ୍, ନାନେ ତାନ୍ ଲୋତ୍‍ତେ ଲୋପେ ୱାସ୍ ଅନ୍‌‍ତଡ଼୍ ତିନ୍ଦାଙ୍କ୍ କୁଦିତାନ୍ ନୁ ଅଣ୍ଡ୍‌ ନା ତଡ଼୍ ତିନ୍‍ତନ୍ ।
REV 3:21 ନାନେ ବେଲାନ୍ ଜିଡ଼ି ମିକା ନା ବାବାନ୍ ତଡ଼୍ ତାନ୍ ସିଂହାସନ୍‌ତାଗେ କୁଦିମିନ୍ଦେନ୍, ବେନଡ଼୍ ୱେର୍‍ତଡ଼୍, ଅଣ୍ଡ୍‌ ସାରେତଡ଼୍‍କ୍ ନାନେ ଟିକ୍‌ ଆଦେଲେକାମ୍ ନାୟାଦ୍ ସିଂହାସନ୍‌ତାଗ୍ ନା ଗାରେ କୁଦାନଙ୍କ୍ ଅଦିକାର୍‌ ଇଦ୍‍ତାନ୍ ।
REV 3:22 “କେଞ୍ଜାନଙ୍କ୍ କେୱୁକ୍‍ ମାତ୍‍କେ, ଇଶ୍ୱର୍‌ତେ ଆତ୍ମା ମଣ୍ଡଲିକିଙ୍କ୍ ବାତେ କେତୁତା, କେଞ୍ଜା !”
REV 4:1 ଇଦ୍ ସମୟତେ ନାନେ ୱେରଡ଼୍ ଦୃଶ୍ୟ ଉଡ଼୍‍ତାନ୍ । ସ୍ୱର୍ଗତାଗେ ୱେରଡ଼୍ ଦ୍ୱାର୍ କୁଲେମ୍ ଆସ୍‍ମାନ୍‍ନୁଡ଼୍ ନୁ ତୂରି ଲେଙ୍ଗ୍ ଇନା ୱେରଡ଼୍ କଣ୍ଠଲେଙ୍ଗ୍‍ ଦାଗାଙ୍କ୍ ନାକିଙ୍କ୍ ନିର୍ଦ୍ଦେଶ୍ ଦର୍‍କ୍‍ତେ; “ଇଗେ ତେଦି ୱାଡ଼େ । ଇଦିନ୍‍ ପେର୍କେ ବାତ୍‍ସାରେ ଗଟେମ୍ ଆଦାଙ୍କ୍ ଅଦୁତ୍, ଆଦ୍ ନାନେ ନିକିଙ୍କ୍ ତଅତିତାନ୍ ।”
REV 4:2 ସାଙ୍ଗେ ସାଙ୍ଗେ ପବିତ୍ରଆତ୍ମାତେ ଚାଲେମ୍‍ ଆସ୍‍ ନାନେ ଉଡ଼୍‍ତାନ୍, ସ୍ୱର୍ଗତାଗେ ୱେରଡ଼୍ ସିଂହାସନ୍‌ତାଗେ ବେନ ୱେରନ୍ କୁଦ୍‍ତନ୍ ।
REV 4:3 ଅନ୍‌ ମକମ୍ ଇରା ନୁ ମାନିକ୍ୟ ଲେକାମ୍ ଜିଗ୍‍ଜାଗ୍ ଆସମାନ୍‍ନୁଡ଼୍ ନୁ ସିଂହାସନ୍‌ତିଙ୍କ୍ ମର୍କତ୍‍ ମଣି ଲେକାମ୍ ୱେରଡ଼୍ ବିମିନ୍‍ ୱିଲ୍ ପରୁଙ୍କ୍ ମାନ୍‍ନୁଡ଼୍ ।
REV 4:4 ମେଣ୍ଡେ ସିଂହାସନ୍‌ତାଗେ ସାରେପାକା ତିଡ଼୍‍ଆସ୍‍ ମାନ୍ଦାନ୍ ମେଣ୍ଡନ୍ ଚବିଶ୍‍ଟାନ୍ ସିଂହାସନ୍‌ତାଗେ‍ ଚବିଶ୍ ଜାନ୍ ବୟସ୍‍ତେ ମଣ୍ଡଲିତେ ନେତା ଆଗେ ମାତ୍‍ତଡ଼୍ । ଅଡ଼୍‌ ପାଣ୍ଡେଲାଉ ସିଲେ କେର୍‍ସ୍‍ ମାନ୍‍ନୁଡ଼୍ ନୁ ଅଡ଼୍‌‍ ତାଲ୍‍ତ୍‍ ପରୁ ସୁବର୍ଣ୍ଣ ମୁକୁଟ୍‍ ।
REV 4:5 ସିଂହାସନ୍‌ତାଗାଙ୍କ୍ ୱାନେ ମେର୍ଷାନ୍ ୱେସ୍, ଗୁରୁଗମ୍ଭିର୍‍ତେ ମରେ ନୁ ବଜ୍ର ସାଉଣ୍ଡ୍ ଆସ ମାନ୍‍ନୁଡ଼୍ । ସିଂହାସନ୍ ମୁନେ ଇଶ୍ୱର୍‌ତେ ସାତ୍‍ଟାନ୍ ଆତ୍ମାତେ ଲେକାମ୍‍ ସାତ୍‍ଟାନ୍ ମଶାଲ୍ ନିଡ଼୍‍ସ ମାତ୍‍ତେ ।
REV 4:6 ମେଣ୍ଡେ ସିଂହାସନ୍ ମୁନେ ସ୍ପଟିକ୍ ଲେକାମ୍ ସ୍ୱଚ୍ଛ ସମୁଦ୍ର ତନ୍ଦ ମାତ୍‍ତେ । ସିଂହାସନ୍‌ତିଙ୍କ୍ ରେଣ୍ଡ୍‍ ପାକା ତିଡ଼୍‍ୟ୍‍ପାକେ ନାଲୁ ପଶୁ; ତାମ୍ ମେନ୍ଦୁଲ୍‍ତାଗେ ମୁନେ ନୁ ପେର୍କେ କଣ୍ଡାନ୍‍ ତଡ଼୍‍ ପୁରା ଆସ୍‍ମାତ୍‍ତେ ।
REV 4:7 ପ୍ରତମ୍‌ ତାଦ୍ ଗଣ୍ଡ୍ରାସ୍‍ ଲେକାମ୍ ତନ୍ଦମାତ୍‍ତେ; ଦ୍ୱିତିୟତାଦ୍ ଗଡ୍‍ ଲେକାମ୍ ତନ୍ଦ ମାତ୍‍ତା । ତୃତିୟତାଦ୍ ମକମ୍ ନାରୁନ୍‍ ମକମ୍ ଲେକାମ୍ ମାତ୍‍ତେ ନୁ ଚତୁର୍ତତାଦ୍ ପାର୍‍ତାନ୍ ଗିଦ୍‍ ପିଟେ ଲେକାମ୍ ତନ୍ଦ ମାତ୍‍ତେ ।
REV 4:8 ସାରେ ପ୍ରାଣୀନ୍ ଆରୁଲାକା ରେକା ମାତ୍‍ତା ଆୱୁ ବାଇଦେ ନୁ ଲୋପେ ମିକା କଣ୍ଡା ମାତ୍‍ତା । ଆୱୁ ନାର୍କା ପାୟାଲ୍, ରମକଟ୍ ପାଟେ ପାରମାତ୍‍ତା, “ପବିତ୍ର, ପବିତ୍ର, ପବିତ୍ର, ସାରେତିଙ୍କ୍ ଶକ୍ତିମାନ୍ ପ୍ରବୁ ଇଶ୍ୱର୍‍ ! ମୁନେକଞ୍ଜ୍ ଇଞ୍ଜେଆନା ବେନ ସାରେଦାମ୍‍ ବିଦ୍ୟାମାନ୍ ନୁ ମେଣ୍ଡନ୍ ଦାମ୍ ବେନ ୱାଦ୍‍ତନ୍ ।”
REV 4:9 ପଶୁକି ସିଂହାସନ୍‌ତାଗେ ଅଣ୍ଡ୍‌ ସାରେଦିନାମ୍‍ ନାରିଙ୍କ୍ ଗୌରବ୍, ସମ୍ଭମ ନୁ ଦନ୍ୟବାଦ୍ ଇସ ତାନାଦ୍ ସ୍ତୁତିପାଟେ ପାରାନ୍ ସମୟତେ,
REV 4:10 ମୁନେଙ୍କ୍ ତାଉ ଚବିଶ୍‍ ଜାନ୍ ବୟସ୍ତେନେତାଲଡ଼୍ ଚିରଞ୍ଜିବି ନାରୁଡ଼୍‍ତେ ସିଂହାସନ୍ ମୁନେ ପ୍ରାଣିପାତ ମାଡ଼ି ତାମାଦ୍ ଆରାଦାନା ମାଡ଼ାନଙ୍କ୍ ପସ୍ପତଡ଼୍ । ମେଣ୍ଡେ ସିଂହାସନ୍ ମଦଲ୍ ନିଜେ ନିଜେତ୍ ମୁକୁଟ୍‍ ୱାଟି ମିକା କେତ୍‍ତଡ଼୍‍,
REV 4:11 “ଆ ମାନ୍‍ ପ୍ରବୁ ଇଶ୍ୱର୍‍ ! ନିମେ କେ ଗୌରବ୍, ସମ୍ଭମ ନୁ ପରାକ୍ରମ୍ ବାଜନ୍, କାରନ୍‍, ନିମେ ସାରେ ବିଷୟତେ ସୃଷ୍ଟି ମାଡ଼୍‍ତିନ୍ । ନିଜେତ୍‍ ଇଚ୍ଛାତେ ଆଦ୍‍ ସାରେତିଙ୍କ୍ ଅସ୍ତିତ୍ୱ ତାତ୍‍ତିନ୍, ପଶୁକିଙ୍କ୍ ଜିୱେ ମାଡ଼୍‍ତିନ୍ ।”
REV 5:1 ସିଂହାସନ୍‌ତାଗ୍ ମାନ୍ଦାନ୍ ନାରୁଣ୍ଡ୍‍ତେ ତିନ୍ଦେ କାୟ୍‍ଦାଗ୍‍ ନାନେ ୱେରଡ଼୍ ବଇ ଉଡ଼୍‍ତାନ୍; ତାନ୍ ରେଣ୍ଡ୍ ପାକା ଲେକା ଆଶ୍‍ମାତ୍‍ତେ ନୁ ସାତ୍‍ଟାନ୍‍ ସିଲ୍‍ତଡ଼୍‍ ଆଦ୍ ଲେକା ଆସ୍‍ମାତ୍‍ତେ ।
REV 5:2 ମେଣ୍ଡେ ନାନେ ଉଡ଼୍‍ତାନ୍, ୱେରଣ୍ଡ୍ ମହାପରାକ୍ରାନ୍ତ ସ୍ୱର୍ଗଦୂତ ଗାଟି ଲେଙ୍ଗ୍‍ତେ କେସ ମାନ୍‍ନୁଣ୍ଡ୍‍, “ସିଲ୍‍କିଙ୍କ୍ ଉୱୁସ୍‍ ଇଦ୍ ବଇତିଙ୍କ୍ ଟେଣ୍ଡାନଙ୍କ୍ ବେନ ଯୋଗ୍ୟ ନାରୁଣ୍ଡ୍‍ ମାତ୍‍କେ, ପେଇସ୍‍ ୱାଡ଼ିଣ୍ଡ୍ ।”
REV 5:3 ଇତ୍କେ ଆଦ୍ ବଇତିଙ୍କ୍ ଟେଣ୍ଡି ଆଗେ ବାତ୍‍ ଲେକାମିନ୍ଦେ, କାର୍‍ତାନଙ୍କ୍ ସ୍ୱର୍ଗତାଗ୍, ପୃତିବିତାଗ୍ ବା ପାତାଲ୍‍ତାଗ୍ ବେନ ପେୟଣ୍ଡ୍ ।
REV 5:4 ବଇ ଟେଣ୍ଡି ଆଗେ ବାତ୍‍ତେ ଲେକାମିନ୍ଦେ, କାର୍‍ତାନ୍‍ ସେଙ୍ଗେ ବେନ ୱେରଣ୍ଡ୍‍ମିକା ଯୋଗ୍ୟ ନାରୁଣ୍ଡ୍ ଦର୍‍କ୍‍ୱାଙ୍କ୍, ନାନେ ଦୁଃକାମ୍‍ ଆସ୍‍ କେୟାନଙ୍କ୍ ପସ୍ପ୍‍ତାନ୍ ।
REV 5:5 ତାନ୍‍ପେର୍କେ ବୟସ୍‍ତେ ନେତାଲଡ଼୍‍ ଲୋପେଙ୍କ୍ ୱେରଣ୍ଡ୍ ନାକ୍ ବୁଲ୍‌ସ୍‌ପି କେତ୍‍ତନ୍, “କେୟ୍‍ମା, ଉଡ଼େ ! ଦାଉଦ୍‍ତେ ବେଡ଼୍‍ୟେ ପରିବାର୍‍ତାଗାଙ୍କ୍, ଯିହୁଦା ଗୋଷ୍ଟୀତଣ୍ଡ୍‍ ଗଣ୍ଡ୍ରାସ୍‍ ଦାଗାଙ୍କ୍ ଜିଡ଼ି ୱାସ୍‍ମିନ୍ତେନ୍; ଅଣ୍ଡ୍‌ ଇଦ୍ ସାତ୍‍ଟାନ୍ ଯାକ ସିଲ୍‍ ଉୱୁସ୍‍ ବଇ ଟେଣ୍ଡାନଙ୍କ୍ ପାର୍‍ତନ୍ ।”
REV 5:6 ତାନ୍‍ପେର୍କେ ସିଂହାସନ୍‌ତେ ନାଡ଼୍‍ମେ ମୁନେଙ୍କ୍‍ତାୱୁ ନାଲୁଟାନ୍ ପଶୁ ନୁ ବୟସ୍ତେ ନେତାଲଡ଼୍ଆଗାଙ୍କ୍ ୱେରଣ୍ଡ୍ ମେଣ୍ଡେ ନିସ୍‍ ମାନ୍ଦାନାଦ୍ ଉଡ଼୍‍ତାନ୍ । ମେଣ୍ଡେ ଡଲ୍‍ତେ ଲେକାମ୍ ଏର୍କେ ଆୟ୍‍ନୁଡ଼୍ । ଆଦିନାୱୁ ସାତ୍‍ଟାନ୍ କଅକ୍‌ ନୁ ସାତ୍‍ଟାନ୍ କଣ୍ଡା ମାତ୍‍ତା । ଆୱୁ କଣ୍ଡା ପୁରା ପୃତିବିତାଗ୍‍ ରହସ୍‍ ମାନ୍ଦାନ୍ ଇଶ୍ୱର୍‌ତେ ସାତ୍‍ଟାନ୍ ଆତ୍ମା
REV 5:7 ମେଣ୍ଡେ ସିଂହାସନ୍‌ ତାଗ୍ ମାନ୍ଦାନଣ୍ଡ୍‍ ଗାରେ ଆଞ୍ଜ୍ ତାନ୍ ତିନ୍ଦେ କାଇଦାଗାଙ୍କ୍ ବଇ ଆତ୍‍ତେ ।
REV 5:8 ଅଣ୍ଡ୍‌ ଆଦ୍‍ ମାଡ଼ାନ୍ ପେର୍କେ ନାଲୁଲାକା ପଶୁ ନୁ ଚବିଶ୍‍ ଜାନ୍ ବୟସ୍ତେ ନେତାଲଡ଼୍ ମେକାଗଲାନ୍ ମୁନେ ପ୍ରଣାମ୍ ମାଡ଼୍‍ତଡ଼୍ । ସାରେତଡ଼୍ କାଇକିନାଗ୍ ୱେର ବିଣା ନୁ ଇଶ୍ୱର୍‌ତେ ବକ୍ତନଡ଼୍‍ ପ୍ରାର୍ତନା ଲେକାମ୍ ଦୁପତାଗ୍ ନିଣ୍ଡୁ ୱେରଡ଼୍ ସୁବର୍ଣ୍ଣ ପାତ୍ର ମାତ୍‍ତେ ।
REV 5:9 ଅଡ଼୍‌‍ ୱେରଡ଼୍ ପୁନେ ପାଟେ ପାର ମାତ୍‍ତଡ଼୍, “ବଇ ଆସ୍ ମିକା ଆଦ୍ ମାଆର୍‌ ଟେଣ୍ଡାନଙ୍କ୍ ନିମେ କେ ଯୋଗ୍ୟ, ବାତେଙ୍କ୍‍ଇତ୍କେ ନିମେ ଆୱୁକି ଆସ୍‍ମାତ୍‍ତିନ୍ ନୁ ନିୟାଦ୍ ତଡ଼୍, ସାରେତେ ନାର୍, ବାଷାବାଦିଡ଼୍‍, ରାଷ୍ଟ ନୁ ଜାତିନାଗାଙ୍କ୍ ଇଶ୍ୱର୍‌ତେ ସେଙ୍ଗେ ନାରୁଡ଼୍‍କିଙ୍କ୍ ମୁକ୍ତି ଆସ୍‌ ମିନ୍ଦେନି ।
REV 5:10 ମେଣ୍ଢା ଇଶ୍ୱର୍‌ତେ ସେବା ମାଡ଼ାନ୍‍ ସେଙ୍ଗେ ଅଡ଼୍‌‍କିଂଙ୍କ୍ ୱେରଡ଼୍ ଯାଜକ୍ ନାର୍‍ଦାଗ୍ ପରିଣତ୍‍ ମାଡ଼ିମିନ୍ଦେନି ଅଡ଼୍‌ ପୃତିବିତେ ପରୁ ରାଜତ୍ୱ ମାଡ଼ିତଡ଼୍ ।”
REV 5:11 ନାନେ ମେଣ୍ଡେ ମାଲ୍‍ସ୍ ଉଡ଼୍‍ତାନ୍, ନାର୍ଗେ ହଜାର୍‌ ନୁ ନାର୍ଗେ ଲକ୍ଷ ସ୍ୱର୍ଗଦୂତ ସିଂହାସନ୍‌ତାଗ୍, ନାଲୁଲାକା ପଶୁ ନୁ ବୟସ୍ତେ ନେତାଲଡ଼୍ ତିଡ଼୍‍ପାକା ନିସ୍‍ମିନ୍ତେ ।
REV 5:12 ଅଡ଼୍‌‍ ଗାଟି ଲେଙ୍ଗ୍‍ଦେ ପାଟ୍ ମାନ୍‍ନୁଡ଼୍, “ଆୱୁକି ମାନ୍ଦାନ୍ ଆ ମେଣ୍ଢା କ୍ଷମତା, ଏଶ୍ଚର୍ଯ୍ୟ, ଜ୍ଞାନ୍ ନୁ ଶକ୍ତି ସମ୍ଭ୍ରମ, ଗଉରବ୍ ନୁ ପ୍ରଶଂସାତେ ବାଜନ୍ !”
REV 5:13 ଆସୁଙ୍ଗ୍ ସ୍ୱର୍ଗ, ପୃତିବି, ପାତାଲ ନୁ ସମୁଦ୍ରତେ ସାରେ ପଶୁ ନୁ ବିଶ୍ୱତେ ସାରେ ପ୍ରାଣିଙ୍କ୍ ପାଟେ ପାରାନାଦ୍ ନାନେ କେଞ୍ଜ୍‍ତାନ୍ । ଅଡ଼୍‌ ପାରମାତ୍‍ତଡ଼୍, “ସିଂହାସନ୍‌ତାଗ୍ ପରୁ ମାନ୍ଦାନ୍ ନାରିନ୍ ନୁ ତାନ୍ ମେଣ୍ଢାତ୍‍ ପ୍ରସଂଶା ମାଡ଼ାଟ୍ । ତାମ୍ ସମ୍ମାନ୍‍, ଗଉରବ୍ ନୁ ସାତ୍‍ୱାମ୍‍ ସାରେ ଦିନା ମାନ୍‍ତେ !”
REV 5:14 ନାଲୁଲାକା ଜିୱାକ୍‌ ଅଣ୍ଡୟ୍‌‍ତଡ଼୍‍ କେସମାନ୍‍ନୁ, “ଆମେନ୍‍” ନେତାଲଡ଼୍ ପ୍ରଣିପାତ ମାଡ଼ଡ଼୍‍ ତାମାଦ୍ ଆରାଦାନା ମାଡ଼୍‍ତଡ଼୍ ।
REV 6:1 ତାନ୍‍ ପେର୍କେ ନାନେ ଉଡ଼୍‍ତାନ୍‍, ମେକା ଗଲାଲ୍ ସାତ୍‍ଟାନ୍ ମୁଦ୍ରାନାଗାଙ୍କ୍ ୱେରଡ଼୍‍ ଟେଣ୍ଡ୍‍ତନ୍ ନୁ ନାଲୁ ପଶୁନ୍ ନାଗାଙ୍କ୍ ୱେରଡ଼୍‍ ନାକିଙ୍କ୍ ଗାଟି ଲେଙ୍ଗ୍‍ଦେ କେତ୍‍ତନ୍, “ୱାଡ଼େ !”
REV 6:2 ନାନେ ମାଲ୍‍ସ୍‍ ଉଡ଼୍‍ତାନ୍, ୱେରଡ଼୍ ପାଣ୍ଡେଲାଦ୍ ଗୁରାମ୍‍, ଗୁରାତଣ୍ଡ୍‍ କାଇଦାଗ୍ ୱିଲ୍‍ ପୟ୍‍ସ୍‍ ମାତ୍‍ତନ୍ । ଅଙ୍କ୍‌ ୱେରଡ଼୍ ମୁକୁଟ୍‍ ଇତ୍‍ତଡ଼୍ ନୁ ଅଣ୍ଡ୍‌ ଯୁଦ୍‍ତାଗ୍ ଜିଡ଼ାନଙ୍କ୍ ସେଙ୍ଗେ ପେଇତ୍‍ତନ୍ ।
REV 6:3 ତାନ୍‍ପେର୍କେ ମେକା ମେଇତାନନ୍‍ ରେଣ୍ଡ୍ ଟେଣ୍ଡ୍‍ତଣ୍ଡ୍ ନୁ ରେଣ୍ଡ୍ ପଶୁ ନାକିଙ୍କ୍ କେତ୍‍ତା, “ୱାଡ଼ାଟ୍‍ ।”
REV 6:4 ନାନେ ଉଡ଼୍‍ତାନ୍, ଏର୍‍ରେ କଲର୍‍ତାଦ୍ ମେଣ୍ଡନ୍ ଗୁରାମ୍‍ । ପୃତିବିତାଗ୍ ଅଶାନ୍ତି ମାଡ଼ାନ୍ ସେଙ୍ଗେ ତାନ୍ ଚାଲାମାଡ଼ାନଙ୍କ୍‍ ଆଦେଶ୍ ଇତ୍‍ତନ୍, ନାରୁଡ଼୍ ବେଲାନ୍ ଯୁଦ୍‌ମାଡ଼ି ନିଜେ ନିଜେତିଗ୍ ଆୱୁକିତଡ଼୍ । ଅନ୍‌ କାଇଦାଗ୍ ୱେରଡ଼୍‍ ବେଡ଼ିୟାଦ୍ କଡ଼୍‍ଗ ତିଆର୍‍ ଆତ୍‍ତେ ।
REV 6:5 ତାନ୍‍ପେର୍କେ ମେକାଗଲାଲ୍ ମୁଣ୍ଡ୍ ମୁଦ୍ରା ଉତ୍‍ତେ ପେର୍କେ ମୁଣ୍ଡ୍ ମେଣ୍ଢା ନାକିଙ୍କ୍ କେତ୍‍ତା, “ୱାସ୍‍ ଉଡ଼ା ।” ନାନେ ଉଡ଼୍‍ତାନ୍, ୱେରଡ଼୍ ଗୁଡି କଲର୍‍ତେ ଗୁରାମ୍; ଆଦ୍ ଗୁରାତଣ୍ଡ୍‍ତେ କାଇଦାଗ୍ କେଜି ମାତ୍‍ତେ;
REV 6:6 ନୁ ନାୟାଦ୍ ଏର୍କେ ଆତ୍‍ତେ ନାଲୁଜାକ ପଶୁ ଅଣ୍ଡୟ୍‌ ଲେଙ୍ଗ୍‍ତେ କେତୁତା, “ଅନ୍‌‍ଦିନାତ୍ କୁଲ୍‍ଦେ ଅଣ୍ଡ୍‌‍ କେଜି ଗଅମ୍ ନୁ ମୁଣ୍ଡ୍ କେଜି ଯବ ଦର୍‍କିତ୍ । ଇତ୍କେ ଜିତ ନିୟ୍‍ ମାଡ଼େ ନୁ ଅଙ୍ଗୁର୍‌ ବଗିଚାତିଙ୍ଗ୍ ନଷ୍ଟ ମାଡ଼୍‍ମାଟ୍ ।”
REV 6:7 ତାନ୍‍ ପେର୍କେ, ମେକା ମେଇତାନନ୍ ନାଲୁଯାକ ଉସ୍‍ମିକା କେତ୍‍ତନ୍ ନୁ ନାଲୁ ପଶୁ ନାକିଙ୍କ୍ କେତ୍‍ତା, “ୱାଡ଼େ !”
REV 6:8 ନାନେ ଉଡ଼୍‍ତାନ୍, ୱେରଡ଼୍ ନିର୍‍ କଲର୍ ଗୁରାମ୍‍ । ତାନ୍ ଚାଲାମାଡ଼ାନ୍‍ତେ ପେଦେର୍ ଡଲାନାଦ୍; ପାତାଲ୍‍ ତାନ୍ ପେର୍କେ ଆଞ୍ଜ ମାନ୍‍ନୁ । ଯୁଦ୍‌, ଦୁବିକ୍ଷ, ରୋଗ୍, ବ୍ୟାଦି ନୁ ମେଟେତା ମାନ୍ଦାନ୍ ଉପଦ୍ରବ୍ୟ ଲେକାମ୍ ପୃତିବିତେ ଅଣ୍ଡୟ୍‌ ନାଲୁପାକା ଆଦିବାସିଡ଼୍‍କ୍ ବିନଷ୍ଟ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ କ୍ଷମତା ଇତ୍‍ତଡ଼୍ ।
REV 6:9 ତାନ୍‍ପେର୍କେ, ମେକାଗଲାଲ୍ ଏଇଙ୍ଗ୍ ମଆର୍ ଉତ୍‍ତନ୍ ନୁ ନାନେ ଉଡ଼୍‍ତାନ୍, ୱେରଡ଼୍ ବେଦୀ । ଇଶ୍ୱର୍‌ତେ ବାକ୍ୟ କେସ୍‍ମିକା ସାକ୍ଷ୍ୟତାଗ୍ ବିଶ୍ୱାସ୍‍ତେ ମାନ୍ଦାନ୍ ସେଙ୍ଗେ ଡଲିମାନ୍ଦାନ୍ ନାରୁଡ଼୍‍କିଙ୍କ୍ ଆତ୍ମାକିନ୍ ଆୱୁ ବେଦୀ ମଦଲ୍ ସୁରକିତ୍ ଆସ୍‍ମାତ୍‍ତା ।
REV 6:10 ଅଡ଼୍‌‍ ଗାଟିଲେଙ୍ଗ୍‍ଦେ କେତ୍‍ତା, “ସାରେଦାମ୍ ପବିତ୍ର ନୁ ସତ୍ୟତେ ପ୍ରବୁ ଇଶ୍ୱର୍ ! ପୃତିବିତାଗ୍ ବେନଡ଼୍ ମାନାଙ୍କ୍ ଆଉକି ମାତ୍‍ତଡ଼୍, ଅଡ଼୍‌‍କିଂଙ୍କ୍ ବିଚାର୍ ମାଡ଼ି ଶାସ୍ତି ଇଦାନଙ୍କ୍ ମେଣ୍ଡେ ବେସ୍‍କେ କାଲାମ୍ ଲେଟ୍‍ ମିନ୍ଦେ ?”
REV 6:11 ଅଡ଼୍‌ଆଗାଙ୍କ୍ ସାରେତଡ଼୍‍କିଙ୍କ୍ ୱେରଲାକା ପାଲ୍‍ସେ ଲାୱୁ ଚକାସିଲେ ଇତ୍‍ତଡ଼୍‍ । ମେଣ୍ଡେ ଅଡ଼୍‌‍ୱାଦ୍‌ ସାଙ୍ଗ ଦାଦାନଡ଼୍ ନୁ ସେବକ୍‍ ନଡ଼୍ ନାର୍ଗେ ସଂକ୍ୟାତେ ଡଲୱେ ଯାକ ଅଡ଼୍‌‍କିଂଙ୍କ୍ ମେଣ୍ଡେ ବେସ୍‍କେ ଦିନା କେପାନଙ୍କ୍ କେତ୍‍ତଡ଼୍ ।
REV 6:12 ତାନ୍‍ପେର୍କେ, ନାନେ ଉଡ଼୍‍ତାନ୍, ମେକାଗଲାଲ୍ ଚଅଟାନ୍‍ ସିଲ୍‍ ଉତ୍‍ତନ୍; ସାଙ୍ଗେ ସାଙ୍ଗେ ନାର୍ଗେ ବୁମିକମ୍ଫ ଆତ୍‍ତା । ପଡ଼୍‍ଦ୍ କୃଷ୍ଣ କଲର୍‍ତେ କମ୍ୱଲ୍‍ ଲେକାମ୍ ଇକାଡ଼୍‍ ଆତ୍‍ତେ ନୁ ନେଲ୍‍ଞ୍ଜ୍ ପୁରା ନେତୁର୍ କଲର୍ ଆତ୍‍ତେ ।
REV 6:13 ନାର୍ଗେ ଗାଲ୍‍ଦେ ଆଗାତ୍‍ତେ ତୟା ମାଡ଼େତାଗାଙ୍କ୍ କାୟା ସାରେ ରାଲାନ୍ ଲେକାମ୍, ଉକାକ୍‍ ସାରେ ମୟଲ୍‍ତାଗାଙ୍କ୍ ପୃତିବିତେ ପରୁ ରାଲ୍‍ତା ।
REV 6:14 ୱେରଡ଼୍ କାଗଜ୍ ପର୍ଦ୍ଦା ମାଡ଼୍‍ପି ଆଦାନ୍ ଲେକାମ୍ ମାବ୍ ମାଡ଼୍‍ପି ଆସ୍ ମାଇ ଆତ୍‍ତେ । ମେଟା ନୁ ଗପ୍‍ ମେଣ୍ଡେଅଣ୍ଡାଗ୍‍ ଆତ୍‍ତା ।
REV 6:15 ଆଦ୍ ସମୟତେ ପୃତିବିତେ ସାରେ, ରାଜା, ଶାସନଡ଼୍ ବା ସେନାନାୟକ୍, ଦନି ନୁ ପରାକ୍ରନ୍ତ, କ୍ରୀତଦାସ ବା ସାଦାରନ୍ ନାଗରିକ୍ ସାରେତଡ଼୍ ପାଡ଼୍‍କିନାଗ୍ ନୁ ମେଟେତ୍‍ କାଲ୍‍ ଦରାନାଗ୍‍ ମଦଲ୍‍ ଆଞ୍ଜ୍ ମିଞ୍ଜ୍‍ତଡ଼୍ ।
REV 6:16 ଅଡ଼୍‌ ମେଟାକିଂଙ୍କ୍‌ ନୁ କାଲ୍‍କିଙ୍କ୍ କାର୍‍ଙ୍ଗି କେସମାନ୍‍ନୁଡ଼୍, “ମା ପରୁରାଲା, ସିଂହାସନତାଗେ କୁଦିମାନ୍ଦାନ୍‍ ଆ ନାରିନ୍ କଣ୍ଡେତାଗାଙ୍କ୍ ନୁ ମେକା ଗଲାନ୍‍ କପାମ୍‍ତାଗାଙ୍କ୍‍ ମାକିଙ୍କ୍ ମିଞ୍ଜ୍‍ପି ନେଏମ୍ ।
REV 6:17 ଅଡ଼ାଦ୍‌ କପାମ୍‍ତେ ବୟଙ୍କାର୍ ଦିନାମ୍ ୱାସ୍‍ ଏୱୁସ୍‍ମିନ୍ଦେ । ବେନ ଆଦ୍ ପ୍ରତିରଦ୍ ମାଡ଼େପାର୍‍ତନ୍ ?”
REV 7:1 ତାନ୍‍ ପେର୍କେ ନାନେ ଉଡ଼୍‍ତାନ୍, ପୃତିବିତେ ନାଲୁ ମୁଲାନାଗ୍ ନାଲ୍‍ୱୁଡ଼୍ ଦୂତ ନିସ୍ ମିନ୍ଦେଡ଼୍‍ ନୁ ବୁମ୍‌ତେ ନାଲୁ ପାକାଙ୍କ୍ ଗାଲ୍ ୱାଦାନ୍ ଅଟ୍‍କା ମାଡ଼ିମିନ୍ଦେଡ଼୍ । ତାନ୍‍ପେର୍କେ ପୃତିବି, ସମୁଦ୍ର ବା ବେନେବା ମାଡ଼େମେଟେ ପରୁ ଇସୁର୍ ମିକା ଗାଲ୍ ୱାଡ଼୍‍ୱେ ମାତ୍‍ତେ ।
REV 7:2 ମେଣ୍ଡେ ନାନେ ଉଡ଼୍‍ତାନ୍, ମେଣ୍ଡନ୍ ୱେରଡ଼୍ ଦୂତ ଚିରଞ୍ଜିବି ଇଶ୍ୱର୍‌ତେ ସିଲ୍‍ ଆସ୍ ପୁର୍ବ ଦିଗ୍‍ତାକାଙ୍କ୍ ୱାସମିନ୍ଦେନ୍ । ଆଦ୍ ଦୂତ ବୂମ୍‌ ନୁ ସମୁଦ୍ରତିଙ୍ଗ୍ ବିନଷ୍ଟ ମାଡ଼ାନ୍ ସେଙ୍ଗେ ଇଶ୍ୱର୍ ବେନ୍ ନାଲୁ ଦୂତଙ୍କ୍ କ୍ଷମତା ଇସ୍‍ମାତ୍‍ତନ୍, ଅଡ଼୍‌‍କିଂଙ୍କ୍ ଗାଟି ଲେଙ୍ଗ୍‍ଦେ କେତ୍‍ତଡ଼୍,
REV 7:3 “ମାମେ ବେସୁଙ୍କ୍‍ ଯାକ ଇଶ୍ୱର୍‌ତେ ଦାସଡ଼୍‍ ତାଲେତ୍‍ ମୁଞ୍ଜ୍‍ତାଗ୍ ସିଲ୍‍ ରେହେୱମ୍, ଆସୁଙ୍କ୍ ଯାକ ବୂମ୍‌, ସମୁଦ୍ର ବା ମାଡ଼ାକିନାୱୁ ବାତେମିକା କ୍ଷତି ମାଡ଼୍‍ମାଟ୍‍ ।”
REV 7:4 ବେନଡ଼୍ ତାଲେତାଗ୍ ଇଶ୍ୱର୍‌ତେ ମଆର୍ ରେହେତ୍‍ତଡ଼୍, ଅଡ଼ାଦ୍‌ ଅଣ୍ଡୟ୍‌‍ ଲକ୍ଷ ଚରାଳିଶ୍‍ ହଜାର୍‍ ସଂକ୍ୟା ମାତ୍‍ତେ ଇଞ୍ଜ କେଞ୍ଜ୍‍ତାନ୍ । ଅଡ଼୍‌ ମାତର୍ ଇଶ୍ରାଏଲିୟ ବାରଟାନ୍ ଗୋଷ୍ଟୀତ୍‍ ନାରୁଡ଼୍ ।
REV 7:5 ଯିହୁଦା ବଂଶତାଗାଙ୍କ୍ ବାରହଜାର୍‌ ନାରୁଡ଼୍, ରୁବେନ୍ ବଂଶତାଗାଙ୍କ୍ ବାରହଜାର୍‌ ନାରୁଡ଼୍, ଗାଦ୍‍ ବଂଶତାଗାଙ୍କ୍ ବାରହଜାର୍‌ ନାରୁଡ଼୍,
REV 7:6 ଆଶେର୍ ବଂଶତାଗାଙ୍କ୍ ବାରହଜାର୍‌, ନପ୍ତାଲି ବଂଶତାଗାଙ୍କ୍ ବାରହଜାର୍‌, ମନଶେହ ବଂଶତାଗାଙ୍କ୍ ବାରହଜାର୍‌,
REV 7:7 ଶିମୀୟୋନ ବଂଶତାଗାଙ୍କ୍ ବାରହଜାର୍‌, ଲେବୀ ବଂଶତାଗଙ୍କ୍ ବାରହଜାର୍‌, ଇଷାକାର୍‍ତେ ବଂଶତାଗାଙ୍କ୍ ବାରହଜାର୍‌,
REV 7:8 ଜେବୁଲନ୍ ବଂଶତାଗାଙ୍କ୍ ବାରହଜାର୍‌, ଯୋଷେଫ୍‍ ବଂଶତାଗାଙ୍କ୍ ବାରହଜାର୍‌, ବେଞ୍ଜାମିନ୍‍ ବଂଶତାଗାଙ୍କ୍ ବାରହଜାର୍‌ ।
REV 7:9 ତାନ୍‍ପେର୍କେ ନାନେ ମାଲ୍‍ସ୍‍ ଉଡ଼୍‍ତାନ୍, ୱେରଡ଼୍‍ ବେଡ଼୍‍ୟାଦ୍ ମାନ୍ଦେ; ଆଦିନ୍ ସଂକ୍ୟା ଲେକାନଙ୍କ୍ ଆୟ । ସାରେଜାତି, ନାର୍‍, ରାଷ୍ଟ ବା ବାଷାବାଦି ନଡ଼ାଗାଙ୍କ୍ ୱାସ୍‍ମାତ୍‍ତଡ଼୍ । ଅଡ଼୍‌ ପାଲ୍‍ସେ ଚକାସିଲା କେର୍‍ସ୍‍ ମିକା ନୁ କାଇକିନାଗ୍ ଏତେଲ୍‍ ମେଟା ପଇସ୍, ସିଂହାସନ୍ ନୁ ମେକାଗଲାଲ୍ ମୁନେ ନିସ୍‍ ମାତ୍‍ତଡ଼୍ ।
REV 7:10 ଅଡ଼୍‌‍ ଗାଟି ଲେଙ୍ଗ୍‍ଦେ କେସ ମାନ୍‍ନୁଡ଼୍, “ମାତର୍ ସିଂହାସନ୍‌ତାଗେ ମାନ୍ଦାନ୍ ଇଶ୍ୱର୍‍ ନୁ ମେକାଗଲା ମାନ୍‍ ପରିତ୍ରାଣକର୍ତାଲ୍‍ ।”
REV 7:11 ସିଂହାସନ୍‌ତିଙ୍କ୍, ବୟସ୍ତେ ମାନ୍ଦାନ୍ ନେତାନଡ଼୍‍କ୍ ନୁ ନାଲୁ ପ୍ରାଣିଙ୍କ୍ ତୁଡ଼ୀଇ ଆସ୍ ଦୂତକି ନିସ୍ ମାତ୍‍ତଡ଼୍ । ଅଡ଼୍‌ ସିଂହାସନ୍ ମୁନେ ମଡ଼୍‍କ୍‍ତଡ଼୍ ନୁ ଇଶ୍ୱର୍‌ତେ ଆରାଦାନା ମାଡ଼ି
REV 7:12 କେତ୍‍ତଡ଼୍, “ଆମେନ୍‍ ! ପ୍ରଶଂସା, ଗୌରବ୍‌, ଜ୍ଞାନ୍‍, ଦନ୍ୟବାଦ୍, ସମ୍ଭ୍ରମ, କ୍ଷମତା ନୁ ପରାକ୍ରମ୍ ଯୁଗ୍‍ଯୁଗ୍‍ ଇଶ୍ୱର୍‍ ପାଏମ୍‍ ଆୟିଣ୍ଡ୍‍, ଆମେନ୍ !”
REV 7:13 ବୟସ୍ତେ ମାନ୍ଦାନ୍ ନଡ଼ାଗାଙ୍କ୍ ୱେରଣ୍ଡ୍ ନାକିଙ୍କ୍ କେତ୍‍ତନ୍, “ପାଣ୍ଡେଲାଦ୍ ଚକାସିଲେ ଉଡ଼୍‍ସି ମାନ୍ଦାନ୍ ଆ ନାରୁଡ଼୍ ବେନଡ଼୍‍ ? ଅଡ଼୍‌ ବେଗାଙ୍କ୍ ୱାତ୍‍ତଡ଼୍ ?”
REV 7:14 ନାନେ ଉତ୍ତର୍ ଇତ୍‍ତନ୍, “ଆଜ୍ଞା ! ନାନେ ପୁନ୍‍ନନ୍ । ନିମେ ପୁଞ୍ଜ୍‍ମାନ୍‍ନ୍ତି ।” ଅଣ୍ଡ୍‌ ନାକିଙ୍କ୍ କେତ୍‍ତନ୍, “ଇ ନାରୁଡ଼୍ ବୟଙ୍କାର୍ କଷ୍ଟତାଗାଙ୍କ୍ ୱାତ୍‍ତଡ଼୍ । ଅଡ଼୍‌‍ ସାରେତଡ଼୍ ମେକାଗାଲାନ୍‍ ନେତୁର୍‍ତେ ନିଜେ ନିଜେତ୍ ଚକା ନର୍‍ସ ପାଣ୍ଡ୍ରି ମାଡ଼୍‍ତଡ଼୍‍ ।
REV 7:15 ଆଦିନ୍ ସେଙ୍ଗେ ଅଡ଼୍‌ ଇଶ୍ୱର୍‌ତେ ମନ୍ଦିର୍‍ତାଗ୍ ତାନ୍ ସିଂହାସନ୍‌ତେ ମୁନେ ନିସ୍‍ମିକା ନାର୍କା ପାୟାଲ୍ ଅନାଦ୍‌ ଆରାଦାନା ମାଡ଼ୁତଡ଼୍ । ସିଂହାସନ୍‌ତାଗ୍ ମାନ୍ଦାନ୍ ନାରୁଡ଼୍ ଅଡ଼୍‌‍କିଂଙ୍କ୍ ରମାନଙ୍କ୍‍ ଇଦ୍‍ତଡ଼୍ ।
REV 7:16 ଅଡ଼୍‌ ମେଣ୍ଡେ ବେସୁଙ୍କ୍‍ମିକା କାର୍‍ୱିନ୍ ବା ଏର୍‍ ଉନ୍ଦେୱାୱ; ପଡ଼ଦ୍‍ତେ ଏଦ୍ ବା ମେଣ୍ଡେ ବେନେ କାମ୍‍କେ ଅଡ଼୍‌‍କିଂଙ୍କ୍ ନିଡ଼୍‍ସ୍ପେ ପାର୍‍ୱ ।
REV 7:17 ବାତେଙ୍କ୍‍ଇତ୍କେ, ସିଂହାସନ୍ ନାଡ଼୍‍ମେ ମାନ୍ଦାନ୍ ମେକାଗଲାଲ୍‍ ଆୱିନ୍ ଗଲାଲ୍‍ ଆଦ୍‍ତଡ଼୍ । ଆଦ୍ ଜିୱେମାନ୍ଦାନ୍ ଏର୍‍ଦେ ଗାର୍ରେ ଅଡ଼୍‌‍କିଂଙ୍କ୍ ଆର୍ ତଅସଡ଼୍ ଆଦ୍‍ତନ୍ ନୁ ଇଶ୍ୱର୍‍ ଅଡ଼୍‌‍କିଂଙ୍କ୍ କଣ୍ଡାନାଗାଙ୍କ୍ ସାରେ କାଣ୍ଡେଡ଼୍ ଉଞ୍ଜ୍‍ପିଦ୍‍ତଣ୍ଡ୍‍ ।”
REV 8:1 ମେକାଗଲାଲ୍ ସାତ୍‍ଟାନ୍ ସିଲ୍‍ ଟେଣ୍ଡାନ୍ ସାଙ୍ଗେ ସାଙ୍ଗେ ସ୍ୱର୍ଗତାଗ୍ ମାତର୍ ଅଦାଗାଣ୍ଟା ଯାକ ସାରେ ଲେଙ୍ଗ୍‍ ଆୟକଟ କଟମାତ୍‍ତଡ଼୍‍ ।
REV 8:2 ତାନ୍‍ପେର୍କେ ଇଶ୍ୱର୍‌ତେ ମୁନେ ନିସ୍‍ମାନ୍ଦାନ୍ ସାତ୍‍ଟାନ୍ ଦୂତଙ୍କ୍ ନାନେ ଉଡ଼୍‍ତାନ୍; ଅଡ଼୍‌‍କିଂଙ୍କ୍ ସାତ୍‍ଟାନ୍ ତୁରି ଇତ୍‍ତଡ଼୍ ।
REV 8:3 ମେଣ୍ଡେ ଅର୍‍ତୁନ୍ ଦୂତ ୱେରଡ଼୍ ସୁବର୍ଣ୍ଣ ଦୁପାମ୍ ଆସ୍ ବେଦି ମୁନେ ୱାସ୍ ନିତ୍‍ତେ । ସିଂହାସନ୍ ମୁନେମାନ୍ଦାନ୍ ସୁନ୍ନତ୍‍ ବେଦି ପରୁ, ଇଶ୍ୱର୍‌ତେ ବକ୍ତନଡ଼ାଦ୍ ପ୍ରାର୍ତନା ଲେକାମ୍ ଦୁପାମ୍‍ ତଡ଼୍‍ କାଲ୍‍ପି ଉସ୍ୱର୍ଗ ମାଡ଼ାନ୍ ସେଙ୍ଗେ, ଅଙ୍କ୍‌ ନାର୍ଗେମାଡ଼ି ଦୁପାମ୍ ଇତ୍‍ତଡ଼୍ ।
REV 8:4 ଆୱୁ ଦୂତନ୍ କାଇକିନାଗ୍ ନିଡ଼୍‍ସ ମାନ୍ଦାନ୍ ଦୁପାମ୍ ଉମେ ତଡ଼୍ ଇଶ୍ୱର୍‌ତେ ବକ୍ତନଡ଼ାଦ୍ ପ୍ରାର୍ତନା କାଇଲି ମିକା ପରୁ ତେଦିଆତ୍‍ତେ ।
REV 8:5 ତାନ୍‍ପେର୍କେ ଦୂତ, ଦୁପାମ୍ ପଇତେ ବେଦିତେ କିସ୍ ବର୍ତିମାଡ଼ି ଆଦ୍ ବୁମ୍‌ତେ ପରୁ ହେସିତ୍‍ତଡ଼୍ । ଅଦିନ୍‌ ପେର୍କେ ଜିଗ୍‍ଜାଗ୍‍ ଲେଙ୍ଗେ ଆତ୍‍ତେ, ୱାନେ ମେର୍ସତେ ନୁ ବୂମିକମ୍ପ ଆତ୍‍ତେ ।
REV 8:6 ତାନ୍‍ପେର୍କେ ପରୁତେ ସାତ୍‍ଜାନ୍ ଦୂତ ତୁରି ଉଦାନଙ୍କ୍ ତିଆର୍‍ ଆତ୍‍ତା ।
REV 8:7 ମୁନେତାଦ୍‍ ଦୂତ ତୁରି ଉଦାନ୍ ସାଙ୍ଗେ ଆଦୁର୍‍ଗାଡା, କିସ୍‍ ନୁ ନେତୁର୍ ପୃତିବିତେ ପରୁ ରାଲ୍‍ତା । ତାନ୍‍ପେର୍କେ ସାରେ ମାଡ଼ାକ୍ ପଦ୍‍ଲା, ସାରେ ଇସୁରାଦ୍ ମିକା ପୃତିବିତେ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ନିଡ଼୍‍ସ୍‍ ଆତ୍‍ତେ ।
REV 8:8 ତାନ୍‍ପେର୍କେ ଦ୍ୱିତିୟ ଦୂତ ତାନ୍ ତୁରି ଉଦାନ୍ ସାଙ୍ଗେ ମେଟେଲେକାମ୍ ଅଣ୍ଡୟ୍‌ ବେଡ଼ିୟାଦ୍ ମେଟେ ସମୁଦ୍ରତାଗ୍ ଏସ୍‍ତଣ୍ଡ୍‍ ନୁ ସମୁଦ୍ରତେ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ନେତୁର୍‍ତେ ବର୍ତି ଆତ୍‍ତେ,
REV 8:9 ସମୁଦ୍ର ପଶୁନାଗାଙ୍କ୍ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ଡଲିଆତ୍‍ତା ନୁ ସମୁଦ୍ରତାଗ୍ ମାନ୍ଦାନ୍ ଜାହାଜ୍‍କିନାୱୁ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ଦ୍ୱଂସ ଆତ୍‍ତା ।
REV 8:10 ତାନ୍‍ପେର୍କେ ତୃତିୟ ଦୂତ ତାନ୍ ତୁରି ଉଦ୍‍ତା । ସାଙ୍ଗେ ସାଙ୍ଗେ ମାବ୍‍ତାଗାଙ୍କ୍ ମଶାଲ୍ ଲେକାମ୍ ଅଣ୍ଡୟ୍‌ ବେଡ଼ିୟାଦ୍ ନିଡ଼୍‍ତାନ୍ ଉକାମ୍‍ ସାରେ ନଦିନ୍ ନୁ ଇଲ୍‍କାନାଗ୍ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ପରୁ ରାଲ୍‍ତା ।
REV 8:11 ଆୱୁ ନକ୍ଷତ୍ରତେ ପେଦେର୍ “ତିକ୍ତ ।” ତାନ୍‍ପେର୍କେ ପାନିୟ ଏର୍‍ଦେ ଅଣ୍ଡ୍‌‍ପାକେ ସାରେପାକା ଆତ୍‍ତେ ନୁ ଆଦ୍‍ ଏର୍ ଉଞ୍ଜ୍ ନାର୍ଗେ ନାରୁଡ଼୍‍ ଡଲ୍‍ତଡ଼୍ ।
REV 8:12 ତାନ୍‍ପେର୍କେ ଚତୁର୍ତ ଦୂତ ତାନ୍ ତୁରି ଉଦାନ୍ ପେର୍କେ, ପଡ଼ଦ୍‍ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍, ନେଞ୍ଜ୍‍ତେ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ନୁ ନକ୍ଷତ୍ରକି ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ କାୟ୍‍ତା ଆତ୍‍ତା । ଆଦିଙ୍କ୍ ୱେସିନ୍ ଅଣ୍ଡୟ୍‌ ତୃତିୟାଶଂ ୱେସ୍ ଡଲିଆତ୍‍ତେ । ତାନ୍‍ପେର୍କେ ଦିନାମ୍‍ତେ ଅଣ୍ଡୟ୍‌ ତୃତିୟାଶଂ ନୁ ନର୍କାତ୍ ଅଣ୍ଡୟ୍‌ ତୃତିୟାଶଂ ୱେସ୍‍ କମ୍‍ ଆତ୍‍ତେ ।
REV 8:13 ତାନ୍‍ପେର୍କେ ନାନେ ମାଲ୍‍ସ୍‍ ଉଡ଼୍‍ତାନ୍, ମୟଲ୍‍ତେ ନାର୍ଗେ ପରୁ ୱେରଡ଼୍ ଗିଦ୍‍ ପିଟେ ପାର୍ସ ଗାଟିଲେଙ୍ଗ୍‍ଦେ କେତୁତ୍, “ଆୟ ! କି ବୟଙ୍କାର୍ ! ମେଣ୍ଡେ ବାଗାତାଉ ଦୂତକି ତୁରି ଉଦାନ୍ ୱେଲେ ପୃତିବିତେ ଅବସ୍ଥା ବେସର୍ ସାଙ୍ଗାତିକ୍ ଆୟ !”
REV 9:1 ତାନ୍‌ପେର୍କେ ଏଇଙ୍ଗ୍ ଦୂତ ତୁରି ଉଦ୍‍ତା ନୁ ନାନେ ଉଡ଼୍‍ତାନ୍, ସାଙ୍ଗେ ସାଙ୍ଗେ ମାବ୍‍ତାଗାଙ୍କ୍ ୱେରଡ଼୍ ନକ୍ଷତ୍ର ପୃତିବିତେ ପରୁ ରାଲ୍‍ତେ । ଆଦିଙ୍କ୍ ପାତାଲ୍‍ପୁର୍‍ତେ କୁଚ୍‍କାଇ ଇଞ୍ଜ ଇସ୍‍ମାତ୍‍ତଡ଼୍ ।
REV 9:2 ଅଣ୍ଡ୍‌‍ ୱାସ୍ ପାତାଲ୍‍ତେ ଆର୍ ଟେଣ୍ଡିଦାନ୍ ସାଙ୍ଗେ ୱେରଡ଼୍ ପାତାଲ୍‍ ବାଟିତାଗାଙ୍କ୍ ପେଇସମାନ୍ଦାନ୍ ଉମା ଲେକାମ୍ ପାତାଲ୍ କୁଣ୍ଡତାଗାଙ୍କ୍ ଗନଦୁମ ତିଆର୍ ଆତ୍‍ତେ ନୁ ଆଦ୍‍ ଉମେ ସେଙ୍ଗେ ପଡ଼ଦ୍ ନୁ ମୟଲ୍‍ ଇକାଡ଼୍‍ ତାତ୍‍ତେ ।
REV 9:3 ମେଣ୍ଡେ ଆଦ୍ ଉମେତାଗାଙ୍ଗ୍ ଇଟେକ୍‍ ପେଇସ ପୃତିବିତାଗ୍ ସାରେଏକାମ୍ ଆତ୍‍ତା । ଅଡ଼୍‌ ଏଟ୍‍ଗଡେଲ୍‍ ଲେକାମ୍ ଗାଟି ୱିସାମ୍‍ ମାତ୍‍ତା ।
REV 9:4 ପୃତିବିତେ ସୁଦୁରାୱୁ, ପଦ୍‍ଲା ବା ବାତେବା ମାଡ଼େ କ୍ଷତି ମାଡ଼କଟ୍ ବେନଡ଼ ତାଲେତାଗ୍ ଇଶ୍ୱର୍‌ତେ ସିଲ୍‍ତଡ଼୍‍ ଚିହ୍ନେ ଇଲକଟ୍ ମାତ୍‍ତେ, ମାତର୍ ଅଡ଼୍‌‍କିଂଙ୍କ୍ କଷ୍ଟ ଇଦାନ୍ ମାଇଦିନ୍ ଆୱୁ ପଙ୍ଗପାଲକି ଅନିଷ୍ଠ ଅସ୍‍ମାତ୍‌ତା ।
REV 9:5 ମେଣ୍ଡେ ଅଡ଼୍‌‍କିଂଙ୍କ୍ ଆୱୁକକଟ୍ ଏଇଙ୍ଗ୍ ନେଞ୍ଜ୍‍ଯାକ ମାତର୍ ୱିସାମ୍ ମାଡ଼ାନଙ୍କ୍ ପଙ୍ଗପାଲକି କ୍ଷମତା ଦର୍ସକ୍‍ତା । ଆୱୁ ତିପାଲ୍‍, ଏଟ୍‍ଗଡେଲ୍‍ କାସ୍‍ତେ ୱିସାମ୍ ଇନା ମାତ୍‍ତେ ।
REV 9:6 ଆଦ୍ ସମୟତେ ଲୋପେ ୱିସାମ୍‍ତେ ନାରୁଡ଼୍ ଡଲାନଙ୍କ ମେହେକ୍‍ତଡ଼୍, ଇତ୍‍କେ ଦର୍ସକଡ଼୍ । ଅଡ଼୍‌ ଡଲ୍‍ନାଦ୍ ଉଡ଼ଡ଼୍‍, ମାତର୍ ଡଲାନାଦ୍ ଅଡ଼୍‌‍ଆଗାଙ୍କ୍ ମିର୍‍ତେ ।
REV 9:7 ଇଟେକ୍‍କି ଯୁଦ୍‌ତିଙ୍କ୍‌ ସୁସଜ୍ଜିତ ଗୁରାମ୍‍ ଲେକାମ୍ ତନ୍ଦମାନ୍‍ନୁଡ଼୍ । ଅଡ଼୍‌‍ ତାଲେତାଗ୍ ଲେକେତାଦ୍ ମୁକୁଟ୍‍ ଇନା ତନ୍ଦମାନ୍‍ନୁଡ଼୍ । ଅଡ଼୍‌‍ ମକମ୍ ନାରୁଡ଼୍ ମକମ୍‍ ଇନା,
REV 9:8 କେଲ୍‍କ୍ ନାଟାଡ଼୍‍ତେ କେଲ୍‍କିନ୍ ଲେକାମ୍ ନୁ ଗଣ୍ଡ୍ରାସ୍‍ତେ ପାଲ୍‍କ୍ ସୂଉଜେ ପାଲ୍‍କ୍ ଇନା ମାନ୍‍ନୁ ।
REV 9:9 ଅଡ଼୍‌ ଗୁଣ୍ଡେତାଗ୍ ଲୁଆତେ ସାଞ୍ଜୁ କେର୍‍ତେ ଲେକାମ୍ ତନ୍ଦମାନ୍‍ନୁଡ଼୍ । ଅଡ଼୍‌ ରେକା ଯୁଦ୍‍ତାଗ୍ ମିରମାନ୍ଦାନ୍ ଗୁରାକ୍‍ ବା ଲାଗମାନ୍ଦାନ୍ ରତ୍‍ତେ ଲେକାମ୍ ।
REV 9:10 ଏଟ୍‍ଗଡେଲ୍‍ ଇନା ଅଡ଼ାଦ୍‌ ତକା ନୁ ନାଉଡ଼୍‍ ମାତ୍‍ତେ । ଆଦ୍ ତକେତେ ଏଇଙ୍ଗ୍ ନେଲ୍‍ଞ୍ଜ୍‍ ଆୟ୍‍ନା ନାରୁଡ଼୍‍ ରେହେତାନ୍ ସେଙ୍ଗେ ଆୱୁ ଶକ୍ତି ଦର୍ସକ୍‍ତା ।
REV 9:11 ଆୱିନ୍ ପରୁ ୱେରଣ୍ଡ୍ ରାଜାଲ୍ ଶାସନ୍‍ ମାଡ଼ୁତନ୍ । ଅଣ୍ଡ୍‌ ପାତାଲ୍‍ତେ ଦାୟିତ୍ୱତେ ମାନ୍ଦାନ୍ ୱେରଡ଼୍ ଦାୟାତ୍ ଦୂତ । ଏବ୍ରି ଗଟ୍‍ତେ ତାନାଦ୍ ପେଦେର୍ ଆବାଦନ୍; ଗ୍ରୀକ୍ ଗଟ୍‍ତେ ଆଦିନ୍ ପେଦେର୍ ଅଦୁତ୍, ଆପୋଲ୍ଲୀୟନ୍ ଇତ୍‍କେ “ସଂହାରକ୍ ।”
REV 9:12 ଉଡ଼େ, ମୁନେତ୍ ବିପର୍ଯ୍ୟୟତେ ଅବସ୍ତା ଆତ୍‍ତେ । ଇଦିନ୍ ପେର୍କେ ମେଣ୍ଡେ ରେଣ୍ଡ୍ ବୟାନକ୍‌ ବିପଦ୍ ୱାସ୍ ଏୱୁଦ୍‍ତେ ।
REV 9:13 ତାନ୍‍ପେର୍କେ ଷଷ୍ଟ ଦୂତ ତାନ୍‍ ତୁରି ଉଦାନ୍ ପେର୍କେ ଇଶ୍ୱର୍‌ତେ ମୁନେ ମାନ୍ଦାନ୍ ସୁବର୍ଣ୍ଣ ବେଦୀତେ ନାଲୁ ମୁଲେତାଗାଙ୍କ୍ ନାନେ ୱେରଡ଼୍ ଲେଙ୍ଗ୍‍ କେଞ୍ଜ୍‍ତା‍ନ୍ ।
REV 9:14 ଆଦ୍ ଲେଙ୍ଗ୍ ଷଷ୍ଟ ଦୂତଙ୍କ୍ ଆଦେଶ୍ ଇତ୍‍ତେ, “ୟୁପ୍ରେଟିସ୍ ବାଡ଼ିୟ୍‍ ନଦିତେ ପାକେ ବନ୍ଦି ଆସ୍‍ମାନ୍ଦାନ୍ ନାଲୁ ଦୂତଙ୍କ୍ ୱିଡ଼୍‍ସିମୁଟ୍ ।”
REV 9:15 ଆଦିଙ୍କ୍ ଇଦ୍ ୱେରଡ଼୍ ୱାଡ଼୍‍ଷା, ନେଲ୍‍ଞ୍ଜ୍‍, ଦିନାମ୍ ନୁ ଦଣ୍ଡ୍‍ତେ ସାରେ ନାରିଡ଼୍ ଜାତିତ୍‍ ଅଣ୍ଡୟ୍‌ ତୃତିୟାସଂ ନାରୁଡ଼୍‍କ୍ ଆୱୁକାଙ୍କ୍ ସେଙ୍ଗେ ତିଆର୍ ଆସ୍ ମାନ୍ଦାନ୍ ଆୱୁ ନାଲୁ ଦୂତଙ୍କ୍ ୱୁଡ଼୍‍ସିତ୍‍ତଡ଼୍ ।
REV 9:16 ମେଣ୍ଡେ ନାନେ ଉଡ଼୍‍ତାନ୍, ୱେରଡ଼୍ ବେଡ଼ିୟାଦ୍ ଗୁରାତାଗ୍ କୁଦି ଆଞ୍ଜମାନ୍ଦାନ୍ । ଅଡ଼ାୱୁ ସଂକ୍ୟା ରେଣ୍ଡ୍‍ କୋଟି ଇଞ୍ଜ ନାକିଙ୍କ୍ କେସ୍‍ସିତ୍‍ତଡ଼୍ ।
REV 9:17 ନାନେ ଉଡ଼୍‍ତାନ୍, ଅଡ଼ାଦ୍‌ ଉରସ୍ତ୍ରାଣ କିସ୍‍ ଲେକାମ୍ କଲର୍, ନିଲି କଲର୍‍ତେ ମଣି ଲେକାମ୍ ନିଲି ନୁ ଗନ୍ଦକ୍‌ ଇନ୍‍ ପିତଲ୍‍ କଲର୍‍ତେ ଲେକାମ୍ ମାତ୍‍ତେ । ଗୁରାକିନାଦ୍ ଗଣ୍ଡ୍ରାସ୍‍ ଇନା ତାଲେ ମାତ୍‍ତେ;
REV 9:18 ମେଣ୍ଡେ ଅଡ଼୍‌ ମକତାଗାଙ୍କ୍ କିସ୍, ଉମେ ନୁ ଗନ୍ଦକ୍‍ ଲେକାମ୍ ମୁଣ୍ଡ୍ ମହାମାରି ପେୟ୍‍ତା । ଇୱୁ ମହାମାରିକି ଗାଟି ଗାବ୍‍ତେ ନାରୁଡ଼୍‍ ଜାତିତେ ଅଣ୍ଡ୍‌ ମୁଣ୍ଡୁଦାମ୍‌ ଡଲାନ୍ ଲେକାମ୍ ଆତ୍‍ତଡ଼୍ ।
REV 9:19 ଗୁରାକିନାୱୁ ଶକ୍ତି ଅଡ଼ାଦ୍‌ ମକମ୍ ନୁ ତକେ ମାତ୍‍ତେ । ଅଡ଼ାଦ୍‌ ତକା, ତାଲେ ମିକା ତାଡ଼ାମ୍ ଇନା ନୁ ଆଗେ ଅଡ଼୍‌ ନାରୁଡ଼୍‍କ୍ ତିପାଲ୍ ମାଡ଼ମାତ୍‍ତଡ଼୍ ।
REV 9:20 ମହାମାରିତାଗ୍‍ ବିନଷ୍ଟ ଆୟ୍‍ୱ ନାରୁଡ଼୍‍ ଜାତି ଆଗେବା ବେସୁଟ୍‌ ମିକା ପରିବର୍ତନ୍ ଆୟଡ଼୍ । ଅଡ଼୍‌‍ ବୁତ୍‌କିନ୍ ପୂଜାକିଙ୍କ୍ ୱିଡ଼୍‍ସଡ଼୍ । ଉଡ଼ାନାଦ୍, କେଞ୍ଜାନାଦ୍ ନୁ ତାକାନ୍‍ ଶକ୍ତି, ସୁନା, ରୁପା, ପିତଲ୍ ମିକା ୱେର୍କି କାଲ୍‍କିନ୍ ପ୍ରତିମା ପୂଜା ୱିଡ଼୍‍ସଡ଼୍‍ ।
REV 9:21 ଅଡ଼୍‌‍ ମନ୍‍ପରିବର୍ତନ୍ ମାଡ଼କଟ୍ ନାରୁଙ୍କ୍ ଆୱୁକ୍‍ତଡ଼୍, ଏୱ୍‍ତାନାଦ୍, ଆଙ୍କର୍‍ଗଟି ନୁ ଆସତ୍‍ ଗୁନାକ୍ ମାଡ଼ାନଡ଼୍ ମାତ୍‍ତଡ଼୍ ।
REV 10:1 ତାନ୍‍ପେର୍କ ନାନେ ଉଡ଼୍‍ତାନ୍, ମେଣ୍ଡ୍‍ ଅର୍‍ତୁନ୍ ପରାକ୍ରାନ୍ତ ଦୂତ ସ୍ୱର୍ଗତାଗାଙ୍କ୍ ଡ଼ିଗ୍‍ଗି ୱାଦୁତନ୍ । ଅଣ୍ଡ୍‌ ମାବ୍‍ତାଗ୍ ଲେକେତ୍‍ ଆସ୍‍ମାନ୍‍ନୁନ୍ ନୁ ମାବ୍‍ତେ ବିମିନ୍‍ ୱିଲ୍ ତାନ୍ ତାଲେତିଙ୍ଗ୍ ତିଡ଼ିଇ ମାନ୍‍ନୁଡ଼୍ । ଅନ୍‌ ମକମ୍ ପଡ଼ଦ୍‍ ଲେକାମ୍ ନୁ ଡ଼େକା କିସ୍‍ ଗୁଞ୍ଜେ ଇନା ତନ୍ଦମାନ୍‍ନୁ ।
REV 10:2 ତାନ୍ କାଇତାଗ୍ ୱେରଡ଼୍ ସୁଦୁରାଦ୍ କୁଲେମ୍ ଆସ୍‍ମାନ୍ଦାନ୍ ବଇ ମାତ୍‍ତେ । ଅଣ୍ଡ୍‌ ତାନ୍ ତିନ୍ଦେ ଡ଼େକେ ସମୁଦ୍ର ପରୁ ନୁ ତିନ୍ଦେ ଡ଼େକେ ବୁମ୍‌ଦେ ପରୁ ୱାଟିମାତ୍‍ତନ୍ ।
REV 10:3 ଗଣ୍ଡ୍ରାସ୍‍ କିଡ଼୍‍କ୍‍ତେ ଲେକମ୍ ଉଙ୍କାର୍ ମାଡ଼ି ଅଡ଼୍‌‍ କେତ୍‍ତନ୍, ଟିକ୍ ଆଦେଲେକାମ୍ ଉଙ୍କାର୍ ମାଡ଼ି ସାତ୍‍ଟାନ୍ ମାବ୍‍ ଇଦ୍ କାର୍‍ଙ୍କତେ ଉତ୍ତର୍‍ ଇତ୍‍ତା ।
REV 10:4 ଅଡ଼୍‌‍ ବାତେ କେତା କେତି ଆତ୍‍ତଡ଼୍, ଆଦ୍ ନାନେ ଲେକାନଙ୍କ୍ ଆଞ୍ଜମାତ୍‍ତାନ୍, କିନ୍ତୁ ସ୍ୱର୍ଗତାଗାଙ୍କ୍‍ ୱେରଡ଼୍ ଲେଙ୍ଗ୍‍ କେଞ୍ଜ୍‍ତାନ୍ । ଆଦ୍ ଲେଙ୍ଗ୍ ନ୍ନାକିଙ୍କ୍ କେତ୍‍ତେ, “ମାବ୍ ନେକ୍‍ତେ ୱେଲେ ବାତ୍‍କେଞ୍ଜୁତିନ୍, ଆଦ୍ ମାନ୍‍ଦାଗ୍ ନେଏମୁଟ୍; ଲେକ୍‍ମାଟ୍ ।”
REV 10:5 ତାନ୍‍ପେର୍କେ ବେନ୍ ଦୂତଙ୍କ୍ ସମୁଦ୍ର ନୁ ବୁମ୍‌ଦେ ପରୁ ନିସ୍‍ମାନ୍ଦାନାଦ୍ ନାନେ ଉଡ଼୍‍ତାନ୍, ଅଣ୍ଡ୍‌ ତାନ୍ ତିନ୍ଦେକାଇ ସ୍ୱର୍ଗତାକେ ତେତ୍‍ତନ୍,
REV 10:6 ସସାଗରା, ବୂମ୍‌, ସ୍ୱର୍ଗ ନୁ ଇଡ଼୍ ସାରେତଡ଼୍ ବିଷୟତେ ସୃଷ୍ଟିକର୍ତାଲ୍ ଚିରଜିବି ଇଶ୍ୱର୍‌ତେ ପେର୍‍ଦେତେ ଶପତ୍ ମାଡ଼ି କେତ୍‍ତଡ଼୍, “ମେଣ୍ଡେ ୱାଡ଼୍‍ଷା ଲେଟ୍ ଆୟ ।
REV 10:7 ବେସୁଙ୍କ୍‍ ସପ୍ତମ୍ ଦୂତ ତୁରି ଉଦିତା, ଇଶ୍ୱର୍‍ ତାନ୍ ସେବକ୍‍ ବାବବାଦିନ୍ ପାକେ ବେନ୍ ମିଞ୍ଜ୍‍ପି ସଂକଲ୍ପ ତିଆର୍ ମାଡ଼ିମାତ୍‍ତନ୍, ଆଦ୍ ସମ୍ପାଦନା ମାଡ଼ିତଡ଼୍ ।”
REV 10:8 ତାନ୍‍ପେର୍କେ ସ୍ୱର୍ଗତେ ଆଦ୍ ଲେଙ୍ଗ୍ ନାକିଙ୍କ୍ ମେଣ୍ଡେ କେତ୍‍ତେ, “ଅନ୍‌, ସମୁଦ୍ର ନୁ ବୁମ୍‌ଦେ ପରୁ ନିସ୍‍ମାନ୍ଦାନ୍ ଦୂତନ୍ କାଇଦାଗାଙ୍କ୍ କୁଲେମ୍ ଆସ୍‍ମାନ୍ଦାନ୍ ବଇ ଆୟମ୍ ।”
REV 10:9 ନାନେ ଦୂତନ୍ ପାକେ ଆଞ୍ଜ୍ ଆଦ୍ ବଇତିଙ୍କ୍‌ ତାଲ୍‍କ୍‍ତାନ୍ । ଅଣ୍ଡ୍‌‍ ନାକିଙ୍କ୍ କେତ୍‍ତନ୍, “ଆସ୍ ତିନ୍ । ନି ଉଦର୍‍ ସେଙ୍ଗେ ଇଦ୍ ତିକ୍ତ, ଇତ୍କେ ନି ମକତାଗ୍ ଇଦ୍ ଉର୍‍ୱେ ଲେକାମ୍ ମିଙ୍ଗିତେ ।”
REV 10:10 ନାନେ ଆଦ୍ ସୁଦୁରାଦ୍ ବଇତିଙ୍କ୍ ଦୂତନ୍ କାଇଦାଗାଙ୍କ୍ ଆସ୍ ତିତ୍‍ତାନ୍ । ଆଦ୍ ନା ପାୟୁତାଗ୍ ତେନା ଲେକାମ୍ ମିଙ୍ଗିମାତ୍‍ତେ, ମାତର୍ ଲୋପ୍‍ତେ ପେର୍କେ ଡଙ୍କକେତ୍‍ ଲୋପେ କାଇସ୍ ଆତ୍‍ତେ ।
REV 10:11 ତାନ୍‍ପେର୍କେ ବେନ ନାକ୍‍ କେତ୍‍ତନ୍, “ନାର୍ଗେ ଦେଶ୍‍କ୍, ଜାତି, ବାଷାବାଦି ନୁ ରାଜାନଡ଼୍ ସମ୍ପର୍କତେ ଇଶ୍ୱର୍‌ତେ ଗଟି ମିଡ଼୍ ଆଞ୍ଜ୍ ମେଣ୍ଡନ୍‍ଦାମ୍ କେଲ୍‍ମୁଟ୍ ।”
REV 11:1 ତାନ୍‍ପେର୍କେ ବେନ ୱେରଣ୍ଡ୍ କଲ୍‍ସାନ୍ ସେଙ୍ଗେ ଡୁଡ୍‌ ଇସ୍ ନାକିଙ୍କ୍ କେତ୍‍ତନ୍, “ଅନ୍‌‍, ଇଶ୍ୱର୍‌ତେ ମନ୍ଦିର୍‍ ନୁ ବେଦି କଲ୍‍ସେ ନୁ ମନ୍ଦିର୍‍ତାଗ୍ ଉପାସନା ମାଡ଼ାନଡ଼ାୱୁ ସଂକ୍ୟା ଲେକା ।
REV 11:2 କିନ୍ତୁ ମନ୍ଦିର୍‍ତେ ବାଇଦେ ମାନ୍ଦାନ୍ ଗଡେତିଙ୍ଗ୍ କଲ୍‍ସ୍‍ମା । ବାତ୍‍ତିଙ୍କ୍‍ଇତ୍‍କେ, ଆଦ୍ ଅଣଇହୁଦୀଡ଼୍‍କ୍‍ ଦାନ ମାଡ଼୍‍ତଡ଼୍ । ଅଡ଼୍‌ ୪୨ ନେଲ୍‍ଞ୍ଜ୍ ଆୟ୍‍ନା ଇଦ୍ ପବିତ୍ର ନାର୍‍ଦିଙ୍କ୍ ଡ଼େକେତ୍‍ ତୁର୍‍ସ୍ତେ ଲେକାମ୍ ମାଡ଼ି ନେଏତିତଡ଼୍ ।
REV 11:3 ବାସ୍ତା ସିଲେ କେର୍‍ସ୍‍ମାନ୍ଦାନ୍ ନାୟାଦ୍ ଇର୍‍ୱୁଡ଼୍ ସାକ୍ଷିକିଡ଼୍‍କ୍ ନାନେ ରତିତାନ୍ । ଅଡ଼୍‌‍ ଆଦ୍ ୱେରଡ଼୍ ୧, ୨୬୦ ଦିନ୍ ଯାକ ଇଶ୍ୱର୍‌ତେ ଗଟ୍ କେତିତଡ଼୍ ।”
REV 11:4 ଅଡ଼୍‌ ପୃତିବିତେ ଇର୍‍ୱୁଡ଼୍ ସାକ୍ଷି ପ୍ରବୁନ୍ ମୁନେ ନିସ୍‍ମାନ୍ଦାନ୍ ରେଣ୍ଡ୍ ଜିତ ମାଡ଼େ ନୁ ରେଣ୍ଡ୍ କୁପି ଲେକାମ୍ ।
REV 11:5 ଯଦି ବେନ ଅଡ଼୍‌‍କିଂଙ୍କ୍ କ୍ଷତି ମାଡ଼ାନଙ୍କ୍ ଚେଷ୍ଟା ମାଡ଼ିତନ୍, ଆଲେକ୍ ଅଡ଼୍‌‍କିଂଙ୍କ୍ ମକତାଗାଙ୍କ୍ କିସ୍ ପେଇସ୍ ଶତ୍ରୁଡ଼୍‍ ଦଂସ ମାଡ଼ିତନ୍ । ଇଦ୍‍ଲେକାମ୍ ଯେ ବେନ ଅଡ଼୍‌‍କିଂଙ୍କ୍‍ କ୍ଷତି ମାଡ଼ାନଙ୍କ୍ ପେଇତିତନ୍, ଅଣ୍ଡ୍‌ ବିନଷ୍ଟ ଆଦ୍‍ତନ୍ ।
REV 11:6 ଇଶ୍ୱର୍‌ତେ ଗଟ୍ କେତାନ୍ ୱେଲେ ମାବ୍‍ତିଙ୍କ୍ ଆଡାମ୍‍ ମାଡ଼ି ବୃଷ୍ଟିତିଙ୍କ୍ ବନ୍ଦ ମାଡ଼ାନ୍ ଆଦେଶ୍ ଅଡ଼୍‌‍କିଂଙ୍କ୍ ଇତ୍‍ତଡ଼୍ । ଏର୍ ପଙ୍ଗାନ୍‍ ଇଲ୍‍କାକିଙ୍କ୍ ନେତୁର୍‍ତେ କାଲ୍‍ପାନ୍‍ ସେଙ୍ଗେ ନୁ ନିଜେ ଇଚ୍ଛାତ୍‍ଲେକାମ୍ ପୃତିବିତାଗ୍ ସେନ୍‍ନେକ୍ ସେନ୍‍ନେକ୍ ମହାମାରି ମାଡ଼ାନ୍‍ ସେଙ୍ଗେ ଅଡ଼ାଦ୍‌ ଅଦିକାର୍‌ ମିନ୍ଦେ ।
REV 11:7 ଅଡ଼୍‌‍ ଗଟି କେତାନାଦ୍ ତେର୍‍ସ୍ପାନ୍ ପେର୍କେ ପାତାଲ୍‍ ପୁର୍‍ତାଗାଙ୍କ୍ ୱେରଡ଼୍ ପଶୁ ତେଦି ୱାସ୍ ଅଡ଼୍‌‍ ବିରୁଦ୍ଦତେ ଯୁଦ୍‍ମାଡ଼ିତେ ।
REV 11:8 ଆଦ୍ ଅଡ଼୍‌‍କିଂଙ୍କ୍ ପାରାଜିତ୍ ମାଡ଼ି ଆୱୁକିତ୍‍ତେ ନୁ ବେନ୍ ବେଡ଼ୀଇ ନାର୍‍ଦାଗ୍, ରାଜ୍‍ ଆର୍‍ଦାଗ୍ ପ୍ରବୁ କ୍ରୁଶବିଦ୍ଦ ଆସ୍‍ମାତ୍‍ତନ୍, ଆଗେ ଅଡ଼ାଦ୍‌ ମଡ଼୍‍ ରାଲି ମାନ୍ଦାନ୍ତେ । ଆଦ୍ ଶହର୍‍ତିଙ୍କ୍ ସଦୋମ୍‍ ବା ମିସର୍ ଇଞ୍ଜ୍ କେତାଙ୍କ୍ ଆଦ୍‍ତେ ।
REV 11:9 ସାରେ ଦେଶ୍, ନାର୍‍କ୍‍, ବାଷାବାଦି ନୁ ଜାତିତେ ନାରୁଡ଼୍ ମୁଣ୍ଡ୍ ଦିନା ଆଦା ଯାକ ଆୱୁ ମଡ଼୍‍କିଙ୍କ୍ ଉଡ଼ିତଡ଼୍ ନୁ ଆୱିଙ୍କ୍ ସମାଦି ଇଦାନଙ୍କ୍ ୱିଡ଼୍‍ସିୱଡ଼୍‍ ।
REV 11:10 ଇଡ଼୍ ଇର୍‍ୱୁଡ଼୍ ଡଲାନ୍ ସେଙ୍ଗେ ପୃତିବିତେ ନାରୁଡ଼୍‍ ୱେଡ଼୍‍କିତଡ଼୍, ଆଲେନ୍ ବେଲା ମାଡ଼ି ନିଜେ ନିଜେତା ଉପାହାର୍ ରତିତଡ଼୍; ବାତେଙ୍କ୍ଇତ୍‍କେ, ଆ ବାବବାଦିଡ଼୍ ସେଙ୍ଗେ ପୃତିବିତେ ନାରୁଡ଼୍ ଗାଟି ଅୟିରାନ୍ ଆସମାତ୍‍ତଡ଼୍‍ ।
REV 11:11 ଇତ୍କେ ମୁଣ୍ଡ୍‍ ଦିନାମ୍ ପେର୍କେ ଇଶ୍ୱର୍‌ତାଗାଙ୍କ୍ ଡଲାନ୍ ଗାଲ୍‍ୱାସ୍ ଅଡ଼୍‌ ‍ମେନ୍ଦୁଲ୍‍ତାଗ୍ ନେଙ୍ଗ୍‍ତେ ନୁ ଅଡ଼୍‌‍ ତେଦି ନିତ୍‍ତଡ଼୍ । ବେନଡ଼୍‍ ଇଦ୍ ଗଟନା ଉଡ଼୍‍ତଡ଼୍, ଅଡ଼୍‌ ଦାଦ୍‍ରେଲ୍‍ତଡ଼୍‍ ।
REV 11:12 ମେଣ୍ଡେ, ଅଡ଼୍‌ ଇର୍‍ୱୁଡ଼୍ ବାବବାଦି ଅଡ଼୍‌‍କିଂଙ୍କ୍ ସ୍ୱର୍ଗତାଗାଙ୍କ୍ ଗାଟିଲେଙ୍ଗ୍‍ଦେ ଇଦ୍ ଗଟ୍ କେସମାନ୍ଦାନ୍ ୱେରଡ଼୍ ଲେଙ୍ଗ୍‍ କେଞ୍ଜ୍‍ତଡ଼୍‍, “ଇଗେ ୱାଡ଼ାଟ୍ !” ଅଡ଼୍‌‍ ଶତ୍ରୁନଡ଼୍ ଉଡ଼ଉଡ଼, ଅଡ଼୍‌‍କିଂଙ୍କ୍‍ ମାବ୍‍ନେକି ମିକା ସ୍ୱର୍ଗତା ଆତ୍‍ତେ ।
REV 11:13 ଟିକ୍‍ ଆଦ୍‍ ସମୟତେ ଗାଟି ବୁମିକମ୍ପ ଆତ୍‍ତେ, ନାର୍ଦେ ୱେରଡ଼୍ ଦଶମାଂଶ ଦଂସ ଆତ୍‌ତେ ନୁ ବୁମିକମ୍ପତେ ସାତ୍‍ ହଜାର୍‍ ନାରୁଡ଼୍ ଡଲ୍‍ତଡ଼୍ । ଗେଲ୍‍ସି ମାନ୍ଦାନ୍ ନାରୁଡ଼୍ ୱେରସ୍‍ମିକା ସ୍ୱର୍ଗତାଗ୍ ମାନ୍ଦାନ୍ ଇଶ୍ୱର୍‌ତିଙ୍କ୍ ମନ୍‍ଦେ ସ୍ତୁତିବାଦ୍ ମାଡ଼୍‍ତଡ଼୍ ।
REV 11:14 ଦ୍ୱିତିୟ ବିପଦ୍ ତେର୍‍ତେ; ତୃତିୟ ବିପଦ୍ ଯାପେ ୱାଦୁତ୍ ।
REV 11:15 ତାନ୍‍ପେର୍କେ ସପ୍ତମ୍ ଦୂତ ତାମାୱୁ ତୁରି ଉଦ୍‍ତା ନୁ ସ୍ୱର୍ଗତାଗ୍ ନାର୍ଗେଲେଙ୍ଗ୍‍ଦେ ଇଦ୍ ବାନି କେଞ୍ଜାଙ୍କ୍‍ ଆତ୍‍ତେ ! “ମା ପ୍ରବୁ ନୁ ତାମ୍‍ ମସୀହ ପୃତିବିତେ ପରୁ ରାଜତ୍ୱ ମାଡ଼ାନ୍ ଅଦିକାର୍‌ ଇଞ୍ଜେ ନିଜେତ୍ କାଇଦାଗ୍ ଆସ୍‍ମିନ୍ଦେନ୍ । ଅଣ୍ଡ୍‌ ଇଞ୍ଜେ ସାରେଦିନା ରାଜତ୍ୱ ମାଡ଼ିତଣ୍ଡ୍ ।”
REV 11:16 ଇଦିନ୍‍ ପେର୍କେ ଇଶ୍ୱର୍‌ତେ ମୁନେ ନିଜେ ନିଜେ ସିଂହାସନ୍‌ତାଗ୍ କୁଦିମାନ୍ଦାନ୍ ୨୪ ଜାନ୍ ବୟସ୍ତେ ନେତାଲଡ଼୍ ନମସ୍କାର୍‍ ମାଡ଼ି ଇଶ୍ୱର୍‌ତେ ଆରାଦନା ମାଡ଼ି,
REV 11:17 କେତ୍‍ତଡ଼୍, “ଆ ସର୍ବଶକ୍ତିମାନ୍ ପ୍ରବୁ ଇଶ୍ୱର୍‍, ନିମେ ଅତିତ୍‍ ନୁ ବର୍ତମାନ୍ ! ମାମେ ନିକିଙ୍କ୍ ଦନ୍ୟବାଦ୍ ଇଦୁତମ୍; ବାତିଙ୍କ୍ ନିମେ ମହାଶକ୍ତିତେ ରାଜ୍ୟତେ ଦାୟିତ୍ୱ ଗ୍ରହନ୍‌ ମାଡ଼୍‍ତିନ୍ ।
REV 11:18 ଅଣଇହୁଦୀଡ଼୍‍ କାର୍‌ୱିନ୍‌ ଆତ୍‍ତଡ଼୍; ବାତେଙ୍କ୍ଇତ୍‍କେ ନିୟାଦ୍ କପାମ୍‍ତେ ସମୟ ଏୱୁତେ, ଡଲ୍‍ତେନଡ଼୍ ଇଞ୍ଜେ ବିଚାର୍‍ ଆଦ୍‍ତଡ଼୍ । ନି ସେବକ୍‍ ବାବବାଦିନଡ଼୍ ନୁ ବେନଡ଼୍ ନିକିଙ୍କ୍ ୱେର୍‍ଦୁତଡ଼୍, ମାନ୍ୟଗଣ୍ୟ ବା ନଗଣ୍ୟ ସାରେତଡ଼୍ ପୁରସ୍କାର୍‍ ପାଏମ୍‍ ଆଦ୍‍ତଡ଼୍ ମେଣ୍ଡେ ବେନଡ଼୍ ପୃତିବିତିଙ୍କ୍ ଦଂସ ମାଡ଼ିତନ୍, ଅଡ଼୍‌‍ ମିକା ଦଂସ ଆଦ୍‍ତଡ଼୍ ।”
REV 11:19 ସ୍ୱର୍ଗତାଗ୍ ମାନ୍ଦାନ୍ ଇଶ୍ୱର୍‌ତେ ମନ୍ଦିର୍‍ତେ ଦ୍ୱାର୍ କୁଲେମ୍ ଆତ୍‍ତେ ନୁ ମନ୍ଦିର୍‍ତାଗ୍ ନିୟମ୍ ସିନ୍ଦୁକ୍ ମାନ୍ଦାନାଦ୍ ତନ୍ଦତେ । ତାନ୍‍ପେର୍କେ ୱାନ୍‍ନେ ମେର୍ସତେ, ବଜ୍ରନାଦ, ବୁମିକମ୍ପ ନୁ ଗାଟି ଆଦୁର୍ ଗାଡା ରାଲ୍‍ତା ।
REV 12:1 ନାର୍ଗେ ମାବ୍‍ତାଗ୍ ଅଣ୍ଡୟ୍‌ ଅବୁଦ୍ ଦୃଶ୍ୟ ତନ୍ତ୍‍ତେ । ୱେରଡ଼୍ ନଟାଡ଼୍ ନେଲେଞ୍ଜ୍‍ତେ ପରୁ ନିସ୍‍ମାନ୍‍ନୁଡ଼୍ ନୁ ପଦଡ଼୍‍ତେ ଏଦ୍ ସାରେଏକାମ୍ ଆସ୍‍ମାନୁଡ଼୍ । ତନ୍ ତାଲେତାଗ୍ ୧୨ ଟାନ୍ ଉକାକ୍‍ ମାନ୍ଦାନ୍‍ ସହଜ୍‍ ମାତ୍‍ତେ ।
REV 12:2 ଆଦ୍ ଜନମ୍‌ ମାଡ଼ାନ୍‌ ୱେଲେ ରେଙ୍ଗାନ୍‌ ନପ୍‌ ମାତ୍‍ତେ ନୁ ଗାଟି ତିପାଲ୍‌ତେ କେୟ୍‌ତେ ।
REV 12:3 ମାବ୍‍ତାଗ୍ ମେଣ୍ଡନ୍ ୱେରଡ଼୍ ଅବୁଦ୍ ଦୃଶ୍ୟ ତନ୍‍ନ୍ତେ । ଲୋଇତ କଲର୍‍ତେ ତାଡ଼ାମ୍ ଇନା ୱେରଡ଼୍ ବିକଲାଟ ପଶୁ, ତାନଦ୍ ସାତ୍‍ଟାନ୍ ତାଲା, ଦଶ୍‍ଟାନ୍ କଅକ୍‌ ନୁ ସାରେ ତାଲାନାଗ୍ ୱେର ସହଜ୍‍ ମାନ୍‍ନୁ ।
REV 12:4 ଆଦ୍ ତାନ୍ ତକେତେ ମାବ୍‍ତାଗାଙ୍କ୍ ୱେରଡ଼୍ ତୃତିୟାଂଶ ଉକାମ୍‍ ଲାଗିତାସ୍ ପୃତିବିତେ ପରୁ ଏସ୍‍ତେ । ପିଲେ ଜନମ୍ ଆଦାନ୍ ସାଙ୍ଗେ ସାଙ୍ଗେ ଆଦିଙ୍କ୍ ତିଞ୍ଜୀନ୍ଦାନ୍ ଲେକାମ୍ ତାଡ଼ାମ୍ ଉକ୍ତ ନାଟାଡ଼୍‍ତେ ଗାରେ ୱାସ୍ ନିତ୍‍ତେ ।
REV 12:5 ଟିକ୍‍ ସମୟତେ ନାଟାଡ଼୍ ୱେରଡ଼୍ ପେକାଲ୍ ଜନମ୍ ମାଡ଼୍‍ତେ । କିନ୍ତୁ ଲୌଆ ଦଣ୍ଡତଡ଼୍ ସାରେ ଜାତି ପରୁ ରାଜତ୍ୱ ମାଡ଼ାନଙ୍କ୍ ଜନମ୍ ଆସ୍‍ମାନ୍ଦାନ୍ ପେକାଲ୍ ସାହାସ୍‍ ଉତ୍‌ତେଲିତ ଆସ୍ ଇଶ୍ୱର୍‌ତେ ସିଂହାସନ୍ ପାକେ ଆତ୍‍ତଡ଼୍,
REV 12:6 ଆଦ୍ ନାଟାଡ଼୍ ଉସ୍କ ପ୍ରାନ୍ତର୍‍ ପାକେ ମିର୍‍ତେ । ଆଗେ ୱେରଟ୍ ଆଗେ ଅଣ୍ଡ୍‌ ୨୬୦ ଦିନାମ୍ ଯାକ ଆଦ୍‍ ମାନ୍ଦାନ୍ ସେଙ୍ଗେ ଇଶ୍ୱର୍ ବ୍ୟବସ୍ଥା ମାଡ଼ିତ୍‍ତନ୍ ।
REV 12:7 ତାନ୍‍ପେର୍କେ ସ୍ୱର୍ଗତାଗ୍ ଯୁଦ୍‌ ଆରାମ୍ ଆତ୍‍ତେ । ମିକାଏଲ୍ ନୁ ତାନ୍ ଦୂତକି ଆଦ୍ ତାଡ଼ାମ୍ ନୁ ତାନ୍ ପେର୍କେ ଆଦାନଡ଼୍‍ତ ଯୁଦ୍‌ ମାଡ଼୍‍ତଡ଼୍‍ ।
REV 12:8 ଯୁଦ୍‍ତାଗ୍ ତାଡ଼ାମ୍‍ ନୁ ତାନ୍ ପେର୍କେଆଦାନଡ଼୍ ପରାସ୍ତ ଆତ୍‌ତଡ଼୍ ନୁ ଅଡ଼୍‌‍ ମେଣ୍ଡେ ସ୍ୱର୍ଗତାଗ୍ ପଡ଼ିୟେ ଦର୍କ ।
REV 12:9 ଆଦ୍ ତାଡ଼ାମ୍ ଆଦୁତ୍, ସାରେ ଜଗତ୍‍ତିଙ୍କ୍ ତିପାଲ୍‌ ମାଡ଼ିମାନ୍ଦାନ୍ ଗାଟି ସାତ୍‍ୱାମ୍‍ ମାନ୍ଦାନ୍‍ ପାଃନ୍ତେ ତାଡ଼ାମ୍, ଶୟତାନ୍‍; ତାନ୍ ଦୂତନ୍‍ତଡ଼୍ ସ୍ୱର୍ଗତାଗାଙ୍କ୍ ରାଲି ପୃତିବିତାଗ୍ ୱାସ୍ ରାଲ୍‍ତେ ।
REV 12:10 ତାନ୍‍ପେର୍କେ ନାନେ ସ୍ୱର୍ଗତାଗ୍‍ ଗାଟି ଲେଙ୍ଗ୍ କେତାନାଦ୍ ନେରଡ଼୍ ବାନି ଲେଞ୍ଜ୍‍ତାନ୍, “ଇଞ୍ଜେ ଇଶ୍ୱର୍‌ତେ ପରିତ୍ରାଣ ମିନ୍ଦେ । ତାନ୍ ଶକ୍ତି ପରାକ୍ରମ୍ ନୁ ତାନ୍ ମସିହନ୍‍ କ୍ଷମତା ପ୍ରଦର୍ଶିତ ଆସ୍‍ମିନ୍ଦେ, ବେନ୍ କୁଚକ୍ରି ନାର୍କା ପାୟାଲ୍ ଇଶ୍ୱର୍‌ତେ ମୁନେ ନିସ୍‍ମିକା, ମା ଦାଦାନଡ଼୍ ବିରୁଦ୍ଦତେ ମିତ୍ୟା ଅବିଯୋଗ୍‍ ମାଡ଼ମାତ୍‍ତଡ଼୍, ଅଣ୍ଡ୍‌ ନେଣ୍ଡ୍ ସ୍ୱର୍ଗତାଗାଙ୍କ୍ ବିତାଡ଼ିତ ଆତ୍‍ତନ୍ ।
REV 12:11 ମେକାଗଲାନ୍‍ ନେତୁର୍‍ତେ ଶକ୍ତିତେ ନୁ ଅଡ଼୍‌ କେସମନ୍ଦାନ୍ ସତ୍‍ତିଙ୍ଗ୍ ପ୍ରେମତାଦ୍‌ ଆତ୍ମା ନୁ ଜିୱୁନ୍‍ ଇଦାଙ୍କ୍‍ ତିଆର୍‍ ମାଡ଼ମାନ୍ଦାନ୍ ମା ପ୍ରିୟ ଦାଦାଲଡ଼୍ ନୁ ଏଲାସ୍କ୍‍ ଜିଡ଼୍‍ତଡ଼୍‍ ।
REV 12:12 ଆଦିଙ୍କ୍ ସ୍ୱର୍ଗ ନୁ ସ୍ୱର୍ଗତାଗ୍‍ ମାନ୍ଦାନ୍ ସାରେତଡ଼୍ ଆନନ୍ଦ ଉଲ୍ଲାସ୍‍ ମାଡ଼ାଟ୍ । କିନ୍ତୁ ଆୟ ! ବୁମ୍‌ତେ ଏର୍ ବୁମ୍ ସାରେ ! ମିୟାଦ୍‍ ଦଶା ଗାଟି ବୟଙ୍କାର୍‍ ! ଇଞ୍ଜେ ଶୟତାନ୍ ମୀଇ ପାକେ ନୁ ଆଦ୍ ଗାଟି କପାମ୍‍, ବାତେଙ୍କ୍ଇତ୍‍କେ ଅଣ୍ଡ୍‌ ପୁତ୍‍ତନ୍, ତାନ୍ ଦିନାମ୍ ପୁରା ଅଦୁତ୍ ।”
REV 12:13 ପୃତିବିତାଗାଙ୍କ୍ ଏସିମାନ୍ଦାନ୍ ଉଡ଼ି ତାଡ଼ାମ୍ ଉପରକ୍ତ ମାରିନ୍ ଜନନୀ ଆଦ୍ ନାଟାଡ଼୍‍ତିଙ୍ଗ୍ ତଲ୍‍ତେ ।
REV 12:14 ତାନ୍ ଚିଟିରମନ୍‍ତାଗ୍ ରକ୍ଷା ଆଦାନ୍‍ ସେଙ୍ଗେ ନାଟାଡ଼୍ ତିଙ୍କ୍ ରେଣ୍ଡ୍ ଗାଦ୍‍ ପିଟେତ୍‍ ରେକା ପେଇତା । ତାନ୍ ସାଆଯ୍ୟତେ ଆଦ୍ ଉସ୍କ ନେଲ୍‍ଦାଗ୍ ନିଜେତ୍‍ ମାନ୍ଦାନ୍ ପଡ଼ିୟେତାଗ୍ ପାର୍‍ସ୍‍ ଆଞ୍ଜ୍, ଆଗେ ମୁଣ୍ଡ୍ ୱାଡ଼୍‍ଷା ଯାକ ସିମ୍‍ଚାମ୍‍ତାଗ୍ ମାନ୍ଦନଙ୍କ୍ ସମର୍ତନ୍ ଆତ୍‍ତେ ।
REV 12:15 ତାନ୍‍ପେର୍କେ ନାଟାଡ଼୍‍ତିଙ୍କ୍ ଏର୍‍ଦାଗ୍ କୁସ୍ପି ଆଦାନ୍‍ ସେଙ୍ଗେ ତାଡ଼ାମ୍‌ ନିଜେତ୍ ମକତାଗାଙ୍କ୍ ତାନ୍ ପେର୍କେ ୱେରଡ଼୍ ବନ୍ୟା ସ୍ରୋତ ୱିଡ଼୍‍ସିତ୍‍ତନ୍ ।
REV 12:16 କିନ୍ତୁ ତାଙ୍କ୍ ରକ୍ଷା ମାଡ଼ାନ୍ ସେଙ୍ଗେ ପୃତିବି ନିଜେତ୍ ମକମ୍ ୱିଡ଼୍‍ସି ତାଡ଼ାମ୍ ମକତାଗାଙ୍କ୍ ପେଇସମାନ୍ଦାନ୍ ସାରେ ଏର୍‍ଦିଙ୍କ୍ ଉତ୍‍ତେ ।
REV 12:17 ଆଗାଙ୍କ୍ ତାଡ଼ାମ୍ ନାଟାକିଙ୍କ୍ ପରୁ ଗାଟି କପାମ୍ ଆସ୍, ଆଦ୍‍ ନାଟାଡ଼୍‍ ପର ପ୍ରତିଶୋଦ୍‍ ଆଦାନ୍‍ ସେଙ୍ଗେ ତାନ୍ ଜାମେତ୍ ବେନ୍‍ ନାରୁଡ଼୍‍ ଇଶ୍ୱର୍‌ତେ ଗଟ୍ ପାଲନ୍ ମାଡ଼ିତଡ଼୍ ନୁ ଜିସୁନ୍ ବିଷୟତେ ସାକ୍ଷ୍ୟ ଦାନ ମାଡ଼ିତଡ଼୍, ଅଡ଼୍‌‍ତଡ଼୍ ଯୁଦ୍‌ ମାଡ଼ାନଙ୍କ୍ ଆତ୍‍ତନ୍ ।
REV 12:18 ମେଣ୍ଡେ ଅଣ୍ଡ୍‌ ସମୁଦ୍ରତେ ଉସ୍କତ୍‍ ପରୁ ନିତ୍‍ତେ ।
REV 13:1 ତାନ୍‍ପେର୍କେ ନାନେ ଉଡ଼୍‍ତାନ୍, ୱରଡ଼୍ ଜନ୍ତୁ ସମୁଦ୍ରତାଗାଙ୍କ୍ ତେଦି ୱାଦୁତ୍ । ତାନାୱୁ ଦଶ୍‌ଟାନ୍ କଅକ୍ ନୁ ସାତ୍‍ଟାନ୍ ତାଲା । ସାରେ କଅକ୍‌କିନାଗ୍ ୱେର ସହଜ୍‍ ମାତ୍‍ତା ନୁ ସାରେ ତାଲାନାଗ୍ ୱେର ଇଶ୍ୱର୍‌ତେ ନିନ୍ଦାଆତ୍‍ନଡ଼୍ ପେଦେରି ଲେକା ଆସ୍‍ମାନ୍‍ନୁ ।
REV 13:2 ଆଦ୍‍ ଜନ୍ତୁ ଅଣ୍ଡୟ୍‌‍ ଚିତା ଡୁୱୁ ଇନା ତଅନ୍‌ଦ ମାତ୍‍ତେ । ଅଦିନ୍‌ ଡେକା ଏଡ଼୍‍ଜ୍‍ତେ ଡେକା ଲେକାମ୍‍ ମେଣ୍ଡେ ପାୟୁର୍‍ ଗଣ୍ଡ୍ରାସ୍‍ ପାୟୁର୍‍ ଲେକାମ୍‍ । ମୁନେଙ୍କ୍ ଲେକାଆତ୍‍ତାଦ୍ ନେତୁର୍‍ ଲେକ୍‍ତାଦ୍ ପାଃନ୍ତେ ତାଡ଼ାମ୍ ଆଦ୍ ଜନ୍ତୁତିଙ୍କ୍ ନିଜେତ୍ ଶକ୍ତି, ସିଂହାସନ ନୁ ନାର୍ଗେକ୍ଷମତା ଇତ୍‍ତେ ।
REV 13:3 ପେର୍କେ ତାଦ୍ ୱେରଡ଼୍ ତାଲେ ଗୁରୁତ୍ୱ ଦେବ୍‍ ଆସ୍‍ମାନ୍ଦାନ୍ ଲେକାମ୍ ଏର୍କେ ଆସମାନ୍‍ନୁ । ଇତ୍‍କେ ପୁଣ୍ଡ୍‌ ପଡ଼ିୟେତାଗ୍ ଲେକେତ୍ ଆସ୍‍ମାନ୍‍ନୁଡ଼୍ ନୁ ପୃତିବିତେ ନାରୁଡ଼୍ ସାରେତଡ଼୍ ବକୁୱାଆସ୍ ଜନ୍ତୁତେ ପେର୍କେଆତ୍‍ତଡ଼୍ ।
REV 13:4 ମେଣ୍ଡେ, ସାରେତଡ଼୍ ପେର୍କେ କ୍ଷମତାପନ୍‍ ମାଡ଼ିମାନ୍ଦାନ୍ ତାଡ଼ାମ୍ ତେ ପୂଜା ମାଡ଼୍‍ତଡ଼୍ । ଅଡ଼୍‌ ପେର୍କେ ମିକା ପୂଜା ମାଡ଼ି କେତ୍‍ତଡ଼୍‍, “ବେନ ଇଦ୍‍ ଜନ୍ତୁତେ ତଡ଼୍‍ ସାମାନ୍‍ ଆଦ୍‍ତନ୍ ? ବେନ ତାନ୍‍ତଡ଼୍ କାଇଲି ଯୁଦ୍‌ ମାଡ଼ିତନ୍ ?”
REV 13:5 ଜନ୍ତୁ ଅଦିକ୍‌ ମାଡ଼ି ଗଟି କେସମାତ୍‍ତେ ନୁ ଇଶ୍ୱର୍ ନିନ୍ଦାମାଡ଼ମାତ୍‍ତେ, ଆଗେବା ୪୨ ନେଲ୍‍ଞ୍ଜ୍‍ ଆୟ୍‍ନା ମୁନେକଞ୍ଜ୍‌ ମାଡ଼ାନ୍ ସେଙ୍ଗେ ଆଦିଙ୍କ୍ ଆନୁମତି ଦର୍‍କ୍‍ତେ ।
REV 13:6 ଇଶ୍ୱର୍‌ତିଙ୍କ୍, ତାନ୍ ପେଦେର୍ ନୁ ତାନାଦ୍ ମାନ୍ଦାନ୍ ପଡ଼ିୟେ ନୁ ସ୍ୱର୍ଗବାସି ସାରେତଡ଼୍‍କ୍ ଅଣ୍ଡ୍‌ ଅବିଶାପ୍‌ ଇଦାଙ୍କ୍ ଆତ୍‍ତେ ।
REV 13:7 ଇଶ୍ୱର୍‌ତେ ନାରୁଡ଼୍ ବିରୁଦ୍ଦତେ ଯୁଦ୍‌ ମାଡ଼ି ଅଡ଼୍‌‍କିଂଙ୍କ୍ ଆରା ମାଡ଼ାନଙ୍କ୍ ଅଣ୍ଡ୍‌ ଆନୁମତି ଦର୍‍ସ୍ତନ୍ ନୁ ସାରେ ନାକିନ୍, ରାଷ୍ଟ ନୁ ବାଷାବାସି ନୁ ଜାତିତ୍‍ ପରୁ ଅଙ୍କ୍‌ କ୍ଷମତା ଇତ୍‍ତଡ଼ ।
REV 13:8 ପୃତିବିତେ ତିୟାର୍ ଆତ୍‍ତେ ମୁନେନ୍‍ ବେନଡ଼୍ ପେଦେର୍‍ତେ ଯୁଦ୍‌ ଆସ୍‍ମାତେ ମେକାଗଲାନଡ଼୍‍ ଜୀୱେ ବଇତାଗ୍ ଲେକା ଆସ୍‍ମାତେ, ଅଡ଼୍‌‍କିଂଙ୍କ୍‍ ୱିଡ଼୍‍ସି ପୃତିବି ତାଗ୍‍ ମେଣ୍ଡ ବେନଡ଼୍‍ ସାର୍‍ତଡ୍ ପଶୁନ୍‍ ପୁଜା ମାଡ଼ିତଡ଼୍ ।
REV 13:9 କେଞ୍ଜାନଙ୍କ୍‍ କେୱୁକ୍‍ ମାତ୍‍କେ, କେଞ୍ଜାଟ୍‍ !
REV 13:10 ଇଶ୍ୱର୍‌ତେ ଇଚ୍ଛା ଲେକାମ୍‌ ବେନ ବନ୍ଦି ଆଦାନ୍‍ ମିନ୍ଦେ, ଅଣ୍ଡ୍‌‍ ନିଶ୍ଚିତ୍‍ ବନ୍ଦି ଆଦ୍‍ତଣ୍ଡ୍‍ । ବେନ ମେଣ୍ଡେ ୱେରେତଙ୍କ୍‌ କଡ୍‌ଗତଡ଼୍‌ ଆୱୁକିତଣ୍ଡ୍‍, ଅଣ୍ଡ୍‌‍ ନିଜେ ଚୁର୍‌ ତଡ଼୍‍ ଡଲିତଣ୍ଡ୍‍ । ଇଶ୍ୱର୍‌ତେ ନାରୁଡ଼୍ ସେଙ୍ଗେ ଦୈର୍ଯ୍ୟ ନୁ ବିଶ୍ୱାସ୍ ଅଣ୍ଡୟ୍‌‍ତାଗ୍ ମାନ୍ଦ୍‍ତେ ।
REV 13:11 ତାନ୍‍ପେର୍କେ ନାନେ ଉଡ଼୍‍ତାନ୍, ମେଣ୍ଡେ ୱେରଡ଼୍ ଜନ୍ତୁ ବୁମ୍‌ତାଗାଙ୍କ୍‍ ତେଦି ୱାଦୁତେ । ମେଣ୍ଢା ଲେକାମ୍ ତାନାୱୁ ରେଣ୍ଡ୍‍ କଅକ୍‌ ମାତ୍‍ତା ନୁ ଆଦ୍ ମୁନେତ୍‍ ତାଡ଼ାମ୍ ଇନା ଗଟି କେସମାତ୍‍ତା ।
REV 13:12 ଇଦ୍ ଦ୍ୱିତିୟ ଜନ୍ତୁ ମୁନେତ୍‍ ଜନ୍ତୁ ପରୁ ତାନାଦ୍ କ୍ଷମତା ପ୍ରୟୋଗ୍ ମାଡ଼ି ପ୍ରତମ୍ ଜନ୍ତୁ ବେଦିନାଦ୍ ପୁଣ୍ଡ୍‍ ସାୟେ ଆସ୍‍ମାତ୍‍ତେ, ଅଦିନ୍‌ ପୁଜା ମାଡ଼ାନ୍‍ ସେଙ୍ଗେ ପୃତିବିତେ ନାରୁଡ଼୍‍ ସାରେତଡ଼୍‍କ୍ ବାଦ୍ୟ ମାଡ଼୍‍ତେ ।
REV 13:13 ଦ୍ୱିତିୟ ଜନ୍ତୁ ନାର୍ଗେ ଆଶର୍ଯ୍ୟ କାମ୍‍ସାରେ ମାଡ଼୍‍ତେ । ସାରେତଡ଼୍ ମୁନେ ସ୍ୱର୍ଗତାଗାଙ୍କ୍ ପୃତିବିତେ ପରୁ କିସ୍‍ ୱାନେ ମାଡ଼୍‍ତେ,
REV 13:14 ପ୍ରତମ୍ ଜନ୍ତୁତ୍‍ ଗାରେ ଇଦ୍‍ଲେକାମ୍ ନାର୍ଗେ ଆଶର୍ଯ୍ୟ କାମ୍ ମାଡ଼ି ପୃତିବିତେ ସାରେତଡ଼୍‍ ନାରୁଡ଼୍‍କ୍‍ ପ୍ରତାରନ୍ ମାଡ଼୍‍ତେ । କଡ଼୍‍ଗତଡ଼୍ ଆଗାତ୍ ଆସ୍ ଆରୋଗ୍ୟ ଆସ୍‍ ମାନ୍ଦାନ୍ ପ୍ରତମ୍ ଜନ୍ତୁ ସମ୍ମାନ ସେଙ୍ଗେ ତାନ୍ ଲେକାତ୍ ୱେରଡ଼୍ ମୁର୍ତି ତିଆର୍‍ ମାଡ଼ାନ୍ ସେଙ୍ଗେ ଦ୍ୱିତିୟ ଜନ୍ତୁ ନାରୁଡ଼୍‍କିଙ୍କ୍ ଆଦେଶ୍‍ ଇତ୍‍ତେ ।
REV 13:15 ପ୍ରତମ୍ ଜନ୍ତୁତେ ମୁର୍ତି ଲେକାମ୍‍ ଜିୱୁଣ୍ଡ୍‍ ଇସ୍ ଉଦ୍‍ତଣ୍ଡ୍‍ ଆଦିଙ୍କ୍ ଜିୱେ ମାଡ଼ାନାଦ୍ ଉପାୟ୍‍ ଦ୍ୱିତିୟ ଜନ୍ତୁ ପୁଞ୍ଜ୍‍ମାତ୍‍ତେ । ସାରେଦିନାତ୍‍ ମୁର୍ତି ଗଟି କେତ୍‍ତେ ନୁ ବେନଡ଼୍‍ ତାଂଙ୍କ୍ ପୁଜା ମାଡ଼ଡ଼୍‍, ଅଡ଼୍‌‍କିଂଙ୍କ୍ ସଂହାର୍‍ ମାଡ଼ାନଙ୍କ୍ ପାର୍‍ଦ୍‍ତେ ।
REV 13:16 ବେଡ଼ିୟନ୍ ସୁଦୁନନ୍ କ୍ରୀତଦାସ ବା ସ୍ୱାଦିନ୍, ସାଉକାର୍ ଗରିବ୍‍ ସାରେତ୍‍ତେ ପେର୍କେ ସାରେତଡ଼୍ ତିନ୍ଦେକାଇଦେ ପାକେ ବା ମୁଞ୍ଜିନାଗ୍ ୱେରଡ଼୍ ସଙ୍କେତ୍‍ ମାଡ଼ାନଙ୍କ୍ ଆଦ୍ ନାରୁଡ଼୍‍ ବାଦ୍ୟ ମାଡ଼୍‍ତେ ।
REV 13:17 ଜନ୍ତୁତେ ପେଦେର୍ ବା ଅଦିନ୍‌ ପେଦେର୍‍ତେ ସାରେତିଙ୍କ୍ ଅଣ୍ଡ୍‌‍ ସଂକ୍ୟା ଦାରନା ମାଡ଼୍‍ୱେ ମାନ୍ଦାନ୍ ବେନ ୱାମାନ୍ ଆସାନ୍ ମାଡ଼େ ପାର୍‍ୱଡ଼୍ ଇଞ୍ଜ ଜନ୍ତୁ ଆଦେଶ୍‍ ଇତ୍‍ତେ ।
REV 13:18 ଇଦିନ୍ ସଂକ୍ୟାତେ ତାତ୍ପର୍ଯ୍ୟ ବୁଜେମ୍‍ ଆଦାଙ୍କ୍ ଜ୍ଞାନ ପ୍ରୟୋଜନ୍ । ବୁଦ୍ଦ୍‍ତେ ନାରୁଡ଼୍ ଆଦ୍ ବୁଜେମ୍ ଆଦ୍‍ତଡ଼୍‍ । ଆଦ୍ ୱେରଡ଼୍ ନାରିନ୍ ପେଦେର୍ ଲେକାମ୍ । ଆଦ୍‍ ସଂକ୍ୟା ଆଦୁତ୍‍, ୬୬୬ ।
REV 14:1 ତାନ୍‍ପେର୍କେ ନାନେ ଉଡ଼୍‍ତାନ୍, ମେଣ୍ଢା ସିୟୋନ୍ ମେଟେତ୍ ପରୁ ନିସ୍‍ମିନ୍ଦେ । ଆୱିନ୍‍ତଡ଼୍ ଅଣ୍ଡୟ୍‌‍ ଲକ୍ଷ ଚରାଳିଶ୍‍ ହଜାର୍‍ ଜାନ୍ ନାରୁଡ଼୍ ମାତ୍‍ତଡ଼୍ । ଅଡ଼୍‌‍ ମୁଞ୍ଜିନାଗ୍ ମେଣ୍ଢା ନୁ ତାମ୍ ବାବାନ୍ ପେଦେର୍ ଲେକିମାତ୍‍ତଡ଼୍ ।
REV 14:2 ତାନ୍‍ପେର୍କେ ନାନେ କେଞ୍ଜ୍‍ତାନ୍, ଏର୍ ପ୍ରପାତ୍ ନୁ ବଜ୍ରନାଦ୍ ଲେକାମ୍ ସ୍ୱର୍ଗତାଗାଙ୍କ୍ ୱେରଡ଼୍ ଲେଙ୍ଗ୍ । ଡ଼ଲା ପେଞ୍ଚ ମାନ୍ଦାନ୍ ବିଣା ଜଙ୍କାର୍ ଲେକାମ୍ ମିକା ଆଗ୍‍ କେଞ୍ଜାନଙ୍କ୍ ଆୟନୁଡ଼୍ ।
REV 14:3 ପୃତିବିତେ ଆ ଅଣ୍ଡୟ୍‌‍ ଲକ୍ଷ ଚରାଳିଶ୍‍ ହଜାର୍‍ ଜାନ୍‍ ସ୍ୱର୍ଗସିଂହାସନ୍‌, ନାଆଲୁ ପଶୁ ନୁ ମଣ୍ଡଲିତେ ବୟସ୍ତେ ନେତାଲଡ଼୍ ମୁନେ ନିତ୍‍ତଡ଼୍‍ । ଅଡ଼୍‌‍ ପୁନେ ପାଟେ ପାରାନଙ୍କ୍ ପାର୍‍ୱେ ମାତ୍‍ତଡ଼୍ । ସାରେ ମାନବ୍ ଜାତି ନାଗାଙ୍କ୍ ମାତର୍ ଅଡ଼୍‌‍କେ ମୁକ୍ତି ପାଏମ୍ ଆତ୍‍ତଡ଼୍ ।
REV 14:4 ଅଡ଼୍‌‍ ମୁତେନ୍ ସଂସର୍ଗ ତଡ଼୍ ନିଜେତିଙ୍ଗ୍ ବେସୁଙ୍କ୍‍ କଲୁସିତ ମାଡ଼୍‍ୱେ ମାତ୍‍ତଡ଼୍ ଅଡ଼୍‌‍ ପବିତ୍ର ମାତ୍‍ତଡ଼୍ । ଅଡ଼୍‌‍ ସାରେଦାମ୍ ମେଣ୍ଢାକିନ୍ ପେର୍କେ ଆଞ୍ଜମାତ୍‍ତଡ଼୍ । ଅଡ଼୍‌ ନାରୁଡ଼୍‍ ଆଗାଙ୍କ୍ ମୁନେ ମୁକ୍ତି ସେଙ୍ଗେ ଇଶ୍ୱର୍‍ ନୁ ମେଣ୍ଢାକିନ୍ ପାକେ ଉତ୍ସର୍ଗିତ ଆସ୍ ମିନ୍ଦେଡ଼୍‍ ।
REV 14:5 ଅଡ଼୍‌‍ ବେସୁଙ୍କ୍‍ ମିଚ୍ କେତାନାଦ୍ ତନ୍‍ନ୍ଦ, ଅଡ଼୍‌ ସମ୍ପର୍ଣ୍ଣତେ ନିର୍ଦୋଷ୍‍ ।
REV 14:6 ତାନ୍‍ପେର୍କେ ନାନେ ମେଣ୍ଡେ ଉଡ଼୍‍ତାନ୍, ମେଣ୍ଡେ ୱେରଡ଼୍ ଦୂତ ମାବ୍‍ତାଗ୍ ଗାଟି ଲେଙ୍ଗ୍‍ଦେ ପାର୍ସ ପାର୍ସ, ପୃତିବିତେ ସାରେ ଜାତିନାକ୍‍, ବାଷାବାସି ନୁ ରାଷ୍ଟତେ ନାରୁଡ଼୍‍ତେ ପାକେ ଇଶ୍ୱର୍‌ତେ ଆଦ୍ ସାରେଦିନାତ୍‍ ସୁସମାଚାର୍ ଗଟ୍ କେସମିନ୍ଦେ ।
REV 14:7 ଆଦ୍ ଗାଟି ଲେଙ୍ଗ୍‍ଦେ କେସମାନ୍‍ନୁଡ଼୍, “ଇଶ୍ୱର୍‌ତିଙ୍କ୍ ୱେର୍‍ମୁଟ୍, ତାନ୍ ଆତ୍ମାତେ ପ୍ରସଂଶା ମାଡ଼ାଟ୍, ବାତିଙ୍କ୍ ଇତ୍‍କେ ନାରୁଡ଼୍‍ତେ ବିଚାର୍ ୱାସ୍ ଏୱୁତେ । ସ୍ୱର୍ଗ, ପୃତିବି, ସମୁଦ୍ର ନୁ ସାରେ ଏର୍‍ଦିଙ୍କ୍‍ ତିଆର୍‍ ମାଡ଼୍‍ତେ ସୃଷ୍ଟି କର୍‌ତାଙ୍କ୍‌ ପୁଜା ମାଡ଼ାଟ୍‍ ।”
REV 14:8 ଆଦ୍ ମୁନେତ୍‍ ଦୂତତେ ପେର୍କେ ମେଣ୍ଡନ୍ ଦୂତ ୱାସ୍ କେତ୍‍ତେ, “ତାନାଦ୍ ପତନ୍ ଗଟେମ୍‍ଆତ୍‍ତେ । ମହାନ୍‌ ବାବିଲନ୍ ଦଂସ ଆତ୍‍ତେ । ଅଣ୍ଡ୍‌ ତାନ୍ ମାଡ଼ମାନ୍ଦାନ୍ କାମ୍‍ ଲେକାମ୍ କାଲ୍ ଉସ୍‍ପିମିକା ସାରେତଡ଼୍‍କ୍ ମାତ୍‍ୱାର୍ ମାଡ଼ିମାତ୍‍ତେ ।”
REV 14:9 ଆୱୁ ରେଣ୍ଡ୍ ଦୂତନ୍ ପେର୍କେ ମେଣ୍ଡେ ୱେରଡ଼୍ ଦୂତ ୱାସ୍ ଗାଟିଲେଙ୍ଗ୍‍ଦେ କେତାନଙ୍କ ପସ୍ପ୍‍ତେ, “ବେନବା ପଶୁ ନୁ ତାନ୍ ସାରେମୁର୍ତ୍ତିଙ୍କ୍ ପୁଜାମାଡ଼ିତନ୍ ନୁ ନିଜେତ୍ ମୁଞ୍ଜ୍ ବା କାଇଦାଗ୍ ଅନ୍‌ ତଡ଼୍ ଦାରଣା ମାଡ଼ିତନ୍,
REV 14:10 ଅଣ୍ଡ୍‌ ଇଶ୍ୱର୍‌ତେ କପାମ୍‍ ଲେକା କୁଣ୍ଡେତାଗ୍ ତସିମାନ୍ଦାନ୍ ତାନ୍ ଗାଟି କପାମ୍‍ତେ ସୁରାମ୍‍ ଉନ୍‍ନ୍ତନ୍ । ବେନଡ଼୍ ଇଦ୍‍କାମ୍ ମାଡ଼ିତଡ଼୍, ଅଡ଼୍‌‍ସାରେତଡ଼୍, ମେଣ୍ଢାଗଲାଲ୍‌ ନୁ ପବିତ୍ର ଦୂତକିନ୍ ମୁନେ କିସ୍‍ ନୁ ତାଡ଼୍‍ମିନାଗ୍ କାର୍‍ୱିତଡ଼୍ ।
REV 14:11 ନିଡ଼୍‍ତାନ୍ କିସ୍‍ ଉମେ ଯୁଗ୍‍ଯୁଗ୍ ନିଡ଼୍‍ସ ମାନ୍‍ନ୍ତେ । ବେନଡ଼୍ ପଶୁ ନୁ ଆୱିନ୍ ସାରେ ମୁର୍ତ୍ତିକିଙ୍କ୍ ପୁଜା ମାଡ଼ିତଣ୍ଡ୍, ବା ଆୱିନ୍ ତଡ଼୍‍ ଆଦ୍‍ତନ୍, ଅଡ଼୍‌‍ ନାର୍କା ପାୟାଲ୍ ସାରେଦାମ୍ ଅଶାନ୍ତି କଷ୍ଟ ଆସମାନ୍‍ନ୍ତଡ଼୍ ।”
REV 14:12 ବେନଡ଼୍ ଇଶ୍ୱର୍‌ତେ ଆଦେଶ୍‍ ପାଲନ୍‍ ମାଡ଼ୁତନ୍ ନୁ ଜିସୁନ୍ ପରୁ ବିଶ୍ୱାସ୍‍ତଣ୍ଡ୍, ଇଶ୍ୱର୍‌ତେ ଆ ନାରିଡ଼୍‍ ପାକେ ସହିଷ୍ଣତା ନିଜାମ୍‌ ଦର୍‍କାର୍‍ ।
REV 14:13 ତାନ୍‍ ପେର୍କେ ନାନେ କେଞ୍ଜ୍‍ତାନ୍, ସ୍ୱର୍ଗତାଗାଙ୍କ୍ ୱେରଡ଼୍ ଗଟ୍ କେସମିନ୍ଦେଡ଼୍‍; “ଇଦ୍‍ଗଟ୍ ଲେକାଟ୍, ବେନଡ଼୍ ଇଗେ ପ୍ରବୁନ୍ ସେବା ମାଡ଼ି ଡଲିତଡ଼୍‍, ଅଡ଼୍‌ ଦନ୍ୟ ।” ମେଣ୍ଡେ ନାନେ କେଞ୍ଜ୍‍ତାନ୍, ପରଆତ୍ମାକେତୁତେ, “ଇଦ୍ ନିଜାମ୍ ଗଟେମ୍‍ ଆଦ୍‍ତେ । ଗାଟି କଷ୍ଟ ତଡ଼୍ ସେବାତେ କାୟେ ଲେକାମ୍, ଅଡ଼୍‌ ବିଶ୍ରାମ ଆଦ୍‍ତଡ଼୍ ।”
REV 14:14 ତାନ୍‍ପେର୍କେ ନାନେ ଉଡ଼୍‍ତାନ୍, ସୁଦୁଟ୍ ପାଣ୍ଡେ ମାବ୍ ନୁ ତାନ୍‍ପରୁ କୁଦ୍‍ତଡ଼୍ ନାରୁନ୍‍ ପିଲେ ଲେକାମ୍ ୱେରଣ୍ଡ୍; ତାନ୍ ତାଲେତାଗ୍ ଲେକେତାଦ୍ ମୁକୁଟ୍‍ ନୁ କାଇଦାଗ୍ ସୁଦୁଟ୍ ସୂଜେଲାଦ୍ ଏଟାକେସେର୍ ।
REV 14:15 ୱେରଣ୍ଡ୍‍ ଦୂତ ମନ୍ଦିର୍‍ତାଗାଙ୍କ୍ ପେଇସ୍‍ ମାବ୍‍ତେ ପରୁ କୁଦ୍‍ତେ ନାରୁଙ୍କ୍ ଗାଟି ଲେଙ୍ଗ୍‍ଦେ କେତ୍‍ତନ୍, “‍ନିୟାଦ୍ ଏଟାକେସେର୍ ୱାୟେ ମାଡ଼ି ପସଲ୍ କଇମ୍ । ପୃତିବିତେ ପସଲ୍ ପାଣ୍ଡାନ୍ ସେଙ୍ଗେ ଲେକେତ୍‍ ସମୟ ୱାସ୍‍ ଏୱୁତେ ।”
REV 14:16 ଆଦ୍ କେଞ୍ଜି ମାବ୍‍ତାଗ୍ କୁଦିମାନ୍ଦାନ୍ ନାରୁଣ୍ଡ୍‍ ଅନାଦ୍‌ ଏଟାକେସେର୍ ଚାଲାମାଡ଼୍‍ତନ୍ ନୁ ପୃତିବିତେ ପସଲ୍ ସାରେ ଅଣ୍ଡୟ୍‌‍ତାଗ୍ ଦିବେ ଆତ୍‍ତେ ।
REV 14:17 ତାନ୍‍ପେର୍କେ ନାନେ ଉଡ଼୍‍ତାନ୍, ମେଣ୍ଡେ ୱେରର୍‍ଡ଼୍‍ ଦୂତ ସ୍ୱର୍ଗତେ ମନ୍ଦିର୍‍ତାଗାଙ୍କ୍ ୱାସମିନ୍ଦେ; ତାନ୍ କାଇଦାଗ୍ ମିକା ୱେରଡ଼୍ ଲାଟିଲାଦ୍ ଏଟାକେସେର୍ ।
REV 14:18 ତାନ୍‍ପେର୍କେ ବେଦୀତେ କିସ୍‍ତେ ମାନ୍ଦାନ୍ ୱେରଡ଼୍ ଦୂତ କେସେର୍ ପଇସ୍‍ ମାନ୍ଦାନ୍ ଦ୍ୱିତିୟ ଦୂତତିଙ୍କ୍ ମର୍‍ତେ କେତ୍‍ତେ, “ଏଟାକେସେର୍ ତଡ଼୍‍ ପୃତିବିତେ ଅଙ୍ଗୁର୍‌ ୱାୟେତାଗାଙ୍କ୍ ପସଲ୍ ସାରେ କୟ୍‍ମ୍‍; ଆୱୁସାରେ ପାଣ୍ଡ୍‍ତା ।”
REV 14:19 ଆଦିଙ୍କ୍ ଦୂତ ପୃତିବିତାଗ୍‍ ତାନ୍ ଏଟାକେସେର୍ ଚାଲାମାଡ଼ି ପସଲ୍‍ତାଗାଙ୍କ୍ କଇତ୍‍ତନ୍ ନୁ ଆୱିଙ୍କ୍ ଇଶ୍ୱର୍‌ତେ ଗାଟିକପାମ୍‍ତେ ଅଙ୍ଗୁର୍‌ ପସଲ୍‍ ୱାଟାନ୍ କୁଣ୍ଡତାଗ୍ ୱାଟିତ୍‍ତେ ।
REV 14:20 ନାର୍ଦେ ବାଇଦେ ମାନ୍ଦାନ୍ ଆଦ୍ କୁଣ୍ଡତାଗ୍ ଦ୍ରାକ୍ଷାକିଙ୍କ୍ ଆଦ୍‍ମିତ୍‍ତଡ଼୍ ନୁ ଆଗାଙ୍କ୍ ୩୦୦ କିଲମିଟର୍ ଯେକା ନୁ ରେଣ୍ଡ୍ ମିଟର୍ ପର୍‍ରକଞ୍ଜ ନେତୁର୍ ୱାତ୍‍ତେ ।
REV 15:1 ତାନ୍‍ପେର୍କେ ନାନେ ମୟଲତାଗ୍ ମେଣ୍ଡନ୍ ଅରଟ୍ ରଅସ୍ୟ ଉଡ଼୍‍ତାନ୍‍ । ସାତ୍‍ଟାନ୍ ସ୍ୱର୍ଗ ଦୂତକ୍‍ ସାରେ ଅଣ୍ଡ୍‌ ଅଣ୍ଡ୍‌‍ ମଆମାରି ପଇସ୍‍ ୱାତା । ଇଦ୍‍ମଆମାରି ମାତ୍‍ତା, ଇଶ୍ୱରତେ କପାମ୍‍ତେ ମାଡ଼େଙ୍କ୍‌ତାଦ୍‍ ପ୍ରକାଶନ ।
REV 15:2 ତାନ୍‍ ପେର୍କେ ନାନ୍ ଉଡ଼୍‍ତାନ୍‍, କିସ୍‍ କାଇଲ୍‍ତେ କଞ୍ଚ୍‍ ସମୁଦ୍ରଇନା ଅଣ୍ଡ୍‌ ଦୁସ୍ୟ । ଆଦ୍‍ ସମୁଦ୍ରଗାରେ ନିସ୍‍ମାତଡ଼୍ ଜିଡ଼୍‍ତ୍‍ନଡ଼୍ ଇଡ଼୍ ପଶୁ, ପଶୁତେ ତାନ୍‍ଲେକାମ୍ ନୁ ମୁନେତ୍‍ ସଂକ୍ୟା ତଡ଼ ଏଞ୍ଜ୍‍ତେ ଆଦ୍ ଦୁରାତ୍ମା ପରୁ ଜିଡ଼ିମାତ୍‍ତଡ଼୍ ।
REV 15:3 ଅଡ଼୍‌‍ ଇଶ୍ୱର୍‍ ରଅସ୍‍ମାନ୍ଦାନ୍ ବୀଣା ପେଏଞ୍ଚି ଇଶ୍ୱର୍‌ତେ ସେବକ୍‍ ମୋଶାନ୍‌ ପାଟେ ନୁ ମେକାଗଲାନ୍ ପାଟେ ପାର୍‍ର ମାତ୍‍ତଡ଼୍; “ଆ ପରାପରାକ୍ରାନ୍ତ ଇଶ୍ୱର୍‍ ! ନିୟାଦ୍ କାମ୍‍ସାରେ ବେସର୍ ମାହାନ୍ ନୁ ବିଚିତ୍ର, ସାରେଜାତିତ୍‍ ରାଜାଦିରାଜା ! ନିୟାଦ୍ କାମ୍‍ପନ୍ଥା ବେସର୍ ନ୍ୟାୟସଙ୍ଗାତ ନୁ ସତ୍‍ !
REV 15:4 ପ୍ରବୁ ! ବେନବା ନିକିଙ୍କ୍ ୱେରୟନ୍ ? ନିୟାଦ୍ ଗୌରବ୍‍ କେତାନଙ୍କ୍ ବେନବା ଅସ୍ୱିକାର୍ ମାଡ଼ିତନ୍ ? ମାତର୍ ନିମେକେ ପବିତ୍ର, ସାରେ ଜାତି ୱାସ୍‍ ନିୟାଦ୍ ପୁଜା ମାଡ଼ିତଡ଼୍ । ବାତ୍‍ତିଙ୍କ୍‍ଇତ୍‍କେ ନିୟାଦ୍ ନ୍ୟାୟଲେକେତ୍ କାମ୍ ସାରେତଡ଼୍ ଉଡ଼୍‍ତଡ଼୍ ।”
REV 15:5 ତାନ୍‍ ପେର୍କେ ସ୍ୱର୍ଗଦ୍ୱାର୍‍ କୁଲା ଆଦାନାଦ୍ ନାନେ ଉଡ଼୍‍ତାନ୍ । ଆଗେ ଇଶ୍ୱର୍‌ତେ ମାନ୍ଦାନ୍ ସୂଚକ୍ ତମ୍ୱୁ ମାତ୍‍ତେ ।
REV 15:6 ସାତ୍‍ଟାନ୍ ମଆମାରି ପଇସ୍‍ମାନ୍ଦାନ୍‍ ସାତ୍‍ଟାନ୍ ଦୂତ ସ୍ୱର୍ଗ ମନ୍ଦିର୍‍ତେ ଲୋପେଙ୍କ୍ ପେଇସ୍‍ ୱାତ୍‍ତା; ଆୱୁ ନିର୍ମଲ୍ ପାଣ୍ଡେଲାୱୁ ସିଲେ କେର୍‍ସ୍‍ ମାତ୍‍ତା ନୁ ଗୁଣ୍ଡେତାଗ୍‍ ସୁନା ପଟୁକା ତହଃସ୍‍ ମାତ୍‍ତା ।
REV 15:7 ମୁନେଙ୍କ୍ ତାୱୁ ନାଲୁ ପଶୁନାଗାଙ୍କ୍ ୱେରଡ଼୍ ଚିରଜୀବି ଇଶ୍ୱର୍‌ତେ କପାମ୍‍ ନିଣ୍ଡ୍‍ତାୱୁ ସାତ୍‍ଟାନ୍ ସୁବର୍ଣ୍ଣ ପାତ୍ର ଆ ସାତ୍‍ଟାନ୍ ଦୂତଙ୍କ୍ ଇତ୍‍ତନ୍ । ବେନ ସାରେଦିନାତ୍‍ ସେଙ୍ଗେ ଜିୱେ ମାନ୍‍ତଣ୍ଡ୍‍ ।
REV 15:8 ଇଶ୍ୱର୍‌ତେ ଗୌରବ୍ ନୁ ପରାକ୍ରମ୍ ତାଗାଙ୍କ୍ ପେଇସ ମାନ୍ଦାନ୍ ଉମେତେ ମନ୍ଦିର୍ ଏକାମ୍ ଆତ୍‍ତେ; ସାତ୍‍ଟାନ୍ ଦୂତ ପେଇସ୍‍ ୱାସମାନ୍ଦାନ୍ ସାତ୍‍ଟାନ୍ ମଆମାରିତେ ଅବସ୍ତାନ୍ ଗଟେମ୍ ଆୟୱେ ଯାକ ଇଦ୍ ମନ୍ଦିର୍ ତାଗେ ମେଣ୍ଡେ ବେନ ନେଙ୍ଗେ ପାର୍‍ୱେ ମାତ୍‍ତଣ୍ଡ୍‍ ।
REV 16:1 ତାନ୍‍ ପେର୍କେ ନାନେ କେଞ୍ଜ୍‍ତେ, ମନ୍ଦିର୍‍ତାଗାଙ୍କ୍ ବେନ ୱେରଣ୍ଡ୍ ଗାଟି ମର୍‍ତେ ଆୱୁ ସାତ୍‍ଟାନ୍ ଦୂତଙ୍କ୍ କେତୁତନ୍, “ଅନ୍‌, ସାତାଟ୍ ପାତ୍ରନାଗ୍ ମାନ୍ଦାନ୍ ଇଶ୍ୱର୍‌ତେ କପାମ୍ ପୃତିବିତେ ପରୁ ତସ୍‍ସିମ୍ ।”
REV 16:2 ଆଦ୍ କେଞ୍ଜି ପ୍ରତମ୍ ଦୂତ ଆଞ୍ଜ୍ ତାନ୍ ପାତ୍ରତାଗ୍ ବାତ୍‍ ମାତ୍‍ତେ, ପୃତିବିତେ ପରୁ ତସ୍‍ସିତେ । ସାଙ୍ଗେ ସାଙ୍ଗେ ବେନଡ଼୍ ପସିତେ ଚିହ୍‌ନ୍ନେ ମାଡ଼ିମାତ୍‍ତଡ଼୍‍ ନୁ ତାନ୍ ଲେକାତାଦିଙ୍କ୍ ପୁଜା ମାଡ଼ମାତ୍‍ତଡ଼୍, ଆୱିନ୍ ମେନ୍ଦୁଲ୍‍ତାଗ୍ ଗାଟି ଯନ୍ତ୍ରଣାତେ ବିସ୍ପୋଟକ୍ ପେଇତ୍‍ତା ।
REV 16:3 ତାନ୍‍ପେର୍କେ ଦ୍ୱିତିୟ ଦୂତ ତାନ୍ ପାତ୍ରତିଙ୍କ୍ ସମୁଦ୍ର ପରୁ ତସ୍‍ସିତେ । ସମୁଦ୍ରତେ ଏର୍ ଡଲ୍‍ତେ ନାରିନ୍ ନେତୁର୍ ଲେକାମ୍ ଆତ୍‍ତେ ନୁ ସମୁଦ୍ର ସାରେ ଜନ୍ତୁ ଡଲ୍‍ତା ।
REV 16:4 ତାନ୍‍ପେର୍କେ ତୃତିୟ ଦୂତନ୍ ପାତ୍ରତାଗ୍ ବାତେ ମାତ୍‍ତେ, ଆଦ୍ ଆ ବେଡ଼େମ୍‌ ବା ଇଲ୍‍କାନାଗ୍ ତସ୍‍ସିତ୍‍ତନ୍ ନୁ ଆଦିନ୍ ସାରେତେ ଏର୍ ନେତୁର୍‍ତେ ପରିଣତ ଆତ୍‍ତେ ।
REV 16:5 ଆସୁଙ୍ଗ୍ ନାନେ କେଞ୍ଜ୍‍ତାନ୍, ଏର୍‍ଦେ ଦାୟିତତେ ମାନ୍ଦାନ୍ ଦୂତ କେତୁତେ, “ନିମେ ପବିତ୍ର, ନିମେ ଇଞ୍ଜେ ନୁ ସାରେଦିନାତ୍‍ତନ୍; ନିମେ ଟିକ୍ ବିଚାର୍ ମାଡ଼୍‍ତିନ୍ ।
REV 16:6 ଅଡ଼୍‌ ସାଦୁନଡ଼୍ ନୁ ବାବବାଦିନଡ଼୍ ବେନ୍‍ ନେତୁର୍‌ ଆସ୍‌ମାତ୍‍ତଡ଼୍, ଆଦ୍ ମିଡ଼୍ ଅଡ଼୍‌‍କିଂଙ୍କ୍ ଉସ୍‍ପିତ୍‍ତିଡ଼୍, ତାମ୍‍ୱା ପାଏମ୍‍ ଆଦାନାୱୁ ଅଡ଼୍‌‍ ପାଏମ୍‍ ଆତ୍‍ତଡ଼୍‍ ।”
REV 16:7 ତାନ୍‍ପେର୍କେ, ନାନେ ବେଦିତାଗାଙ୍କ୍ ୱେରଡ଼୍ ଲେଙ୍ଗ୍‍ କେଞ୍ଜ୍‍ତାନ୍‍, “ପ୍ରବୁ ସର୍ବଶକ୍ତିମାନ୍ ଇଶ୍ୱର୍‍ ! ମିୟାଦ୍ ବିଚାର୍ ନେଲା ନୁ ନ୍ୟାୟସଙ୍ଗାତେ ।”
REV 16:8 ତାନ୍‍ପେର୍କେ ଚତୁର୍ତ ଦୂତ ତାନ୍ ପାତ୍ରତାଗ୍ ମାନ୍ଦାନ୍ ଦ୍ରବ୍ୟତିଙ୍କ୍ ପଡ଼ଦ୍‍ତେ ପରୁ ତସ୍‍ସିତେ । ତାନ୍‍ପେର୍କେ ପଡ଼୍‍ତେ ଏଦ୍‍ ଗାଟି ଆସ୍ ନାରୁଡ଼୍‍କ୍ କାର୍‍ୱି ଆତ୍‍ତଡ଼୍ ।
REV 16:9 ଆଗାଙ୍କ୍ ଅଡ଼୍‌ ଉତ୍ତ୍ୟକ୍ତ ଆସ୍ ତିପାଲ୍‍ତେ ପର ଅଦିକାର୍‌‍ ମାନ୍ଦାନ୍‍ ଇଶ୍ୱର୍‌ତିଙ୍କ୍ ଅବିଶାପ୍‌ ଇତ୍‍ତଡ଼୍; କିନ୍ତୁ ମନ୍ ପରିବର୍ତନ୍ ମାଡ଼ି ତାମ୍ ମହିମା ସ୍ୱିକାର୍ ମାଡ଼ଡ଼୍‍ ।
REV 16:10 ତାନ୍‍ପେର୍କେ ପଞ୍ଚମ୍‍ ଦୂତ ତାନ୍ ପାତ୍ରତିଙ୍କ୍ ପଶୁତେ ସିଂହାସନ୍‌ ପରୁ ତସ୍‍ସିତେ । ପଶୁତେ ରାଜ୍ୟ ପରୁ ଇକାଡ଼୍ ଆତ୍‍ତେ ନୁ ନାରୁଡ଼୍ ଯନ୍ତ୍ରଣାତାଗ୍ ଅଡ଼୍‌ ୱାଞ୍ଜ୍‍ଜେର୍ କାସ୍‍ତଡ଼୍ ।
REV 16:11 ଅଡ଼୍‌‍ ମେନ୍ଦୁଲ୍ ପୁଣ୍ଡ୍‍କ୍‍ ଲାଗି ନୁ ନଦାନାଦ୍‍ ନପ୍‍ ସେଙ୍ଗେ ଇଶ୍ୱର୍‌ତିଙ୍କ୍ ଅବିଶାପ୍‌ ଇତ୍‍ତଡ଼୍ । କିନ୍ତୁ ନିଜେତ୍ ଆର୍‍ଦାଗାଙ୍କ୍ ମାଲ୍‍ସ ୱାଡ଼ଡ଼୍‍ ।
REV 16:12 ସାରେଦିନାତ୍ ଷଷ୍ଠ ଦୂତ ବେଡ଼ିୟାଦ୍ ୟୁପ୍ରେଟିସ୍‍ତେ ପରୁ ତାନ୍ ପାତ୍ରତେ ଦୁଡ଼େ ତସ୍‍ସିତେ । ସାଙ୍ଗେ ସାଙ୍ଗେ ମଦି ୱାସିଆତ୍‍ତେ ନୁ ପୁର୍ବତାକାଙ୍କ୍ ଶତ୍ରୁ ରାଜାନଡ଼୍ ୱାଦାନ୍ ସେଙ୍ଗେ ଆଦ୍ ଆର୍ କୁଲା ଆତ୍‍ତେ ।
REV 16:13 ତାନ୍‍ପେର୍କେ ନାନେ ପାଣ୍ଡେ ଲେକେତାୱୁ ମୁଣ୍ଡ୍ ପେତ୍‍ତାତ୍ମାକିଙ୍କ୍ ଉଡ଼୍‍ତାନ୍ । ଆୱୁ ମୁନେଙ୍କ୍‍ତାୱୁ ତାଡ଼ାକ୍, ପଶୁ ନୁ ବଣ୍ଡବାବବାଦିନ୍ ମକତାଗାଙ୍କ୍ ପେଇସ୍‍ମାନ୍‍ନୁ ।
REV 16:14 ଆୱୁ ପାପାତ୍ମାକି ବାକ୍‌ୱା କାମ୍ ମାଡ଼୍‍ନୁ । ଆୱୁ ସର୍ବଶକ୍ତିମାନ୍ ଇଶ୍ୱର୍‌ତେ ଦିବସ୍‍ତେ ଯୁଦ୍‌ ମାଡ଼ାନ୍ ସେଙ୍ଗେ ପୃତିବିତେ ରାଜାନଡ଼୍‍କ୍ ଅଣ୍ଡୟ୍‌‍ତାଗ୍ ଦିବ୍‍ ଆଦାଙ୍କ୍‍ ପେଇତ୍‍ତା ।
REV 16:15 “କେଞ୍ଜା ! ନାନେ ଡଙ୍ଗାଲ୍ ଲେକାମ୍ ୱାଦ୍‍ତାନ୍ । ବେନ୍ ନାରୁଣ୍ଡ୍ ଜାଗ୍ରତ୍‍ତେ ମାଞ୍ଜ୍ ଡଙ୍ଗାନାଗାଙ୍କ୍ ନିଜେତ୍‍ ସିଲେ ଚକା ରକ୍ଷା ମାଡ଼ିତଣ୍ଡ୍, ଅଣ୍ଡ୍‌ ବାଗ୍ୟବାନ୍ । ଆଲେକ୍ ଅଣ୍ଡ୍‌ ବାଣ୍ଡାଲ୍‍ ଆସ୍ ବିଚରଣ ମାଡ଼ାନ୍ ସେଙ୍ଗେ ଅଙ୍କ୍‌ ସିଗ୍‍ ଆଦେ ୱେଇୟ ।”
REV 16:16 ପ୍ରେତାତ୍‍ତ୍ମାକି ସୁଦୁଟ୍ ସମୟତେ ପୃତିବିତେ ରାଜାନଡ଼୍ ବେନ୍ ରଙ୍ଗାନତେ ଅଣ୍ଡୟ୍‌‍ତାଗ୍ ମାଡ଼ି, ଏବ୍ରି ଗଟ୍‍ତେ ତାନ୍ ‍ପେଦେର୍ ଆର୍ମାଗେଡ୍‍ଡନ୍ ।
REV 16:17 ତାନ୍‍ପେର୍କେ ସପ୍ତମ୍ ଦୂତ ତାନ୍ ପାତ୍ରତେ ସାମଗିତିଙ୍କ୍ ଗାଲ୍‍ଦେ ମଣ୍ଡଲ୍‍ତାଗ୍ ଏସିତ୍‍ତେ । ଆଗାଙ୍କ୍ ମନ୍ଦିର୍‍ତାଗ୍ ମାନ୍ଦନ୍ ସିଂହାସନ୍‌ତାଗାଙ୍କ୍ ଗାଟି ଲେଙ୍ଗ୍‍ଦେ ୱେରଡ଼୍ ବାଣି କେଞ୍ଜ୍‍ତାନ୍, “କାମ୍ ତେର୍‍ତ୍‍ତେ ।”
REV 16:18 ଆସୁଙ୍ଗ୍ ଜାପେ ମାବ୍‍ ମେର୍‍ସ୍ତେ, ପିଡ଼୍‌ଗ୍‌ ନୁ ୱେରଡ଼୍ ବେଡ଼୍‍ୟାଦ୍ ବୂମିକମ୍ପ ଆତ୍‍ତେ । ନାରୁଡ଼୍ ସୃଷ୍ଟିତେ ମୁନେଙ୍କ୍ ଇଦ୍‍ଲେକାମ୍ ବୂମିକମ୍ପ ବେସୁଙ୍କ୍‍ ଆୟ୍‍ୟ; ଇଦ୍‍ ମାତ୍‍ତେ ସାରେତିଙ୍ଗ୍ ବୟଙ୍କାର୍ ବୂମିକମ୍ପ ।
REV 16:19 ବେଡ଼୍‍ୟା ନାର୍‍କ୍ ମୁଣ୍ଡ୍‍ଦୁଡ଼ା ଲାକା ୱେକ୍‍ ଆତ୍‍ତା, ପୃତିବି ସାରେ ନାର୍‍କ୍ ଦଂସ ଆତ୍‍ତା । ଇଶ୍ୱର୍‍ ବେଡ଼୍‍ନାର୍ ବାବିଲନ୍‍ତିଙ୍କ୍ ମାର୍‍ଙ୍ଗ୍‍ୱେ ମାତ୍‍ତନ୍ । ଅଣ୍ଡ୍‌ ତାନ୍ ପାନପାତ୍ର ତାଗାଙ୍କ୍ ତାନ୍ ଗାଟି କପାମ୍‍ତେ ସୁରାମ୍‍ ଅଙ୍କ୍‌ ଉସ୍‍ପ୍‌ତଡ଼୍ ।
REV 16:20 ଗପ୍‍ ସାରେ ଅଦୃଶ୍ୟ ଆତ୍‍ତା, ମେଟା ଗୁବାଲ୍‍ ସାରେ ନୀଇମ୍‍ ଆତ୍‍ତା ।
REV 16:21 ପଚାଶ୍‍ କିଲଗ୍ରାମ୍ ପୁୱୁତ୍‍ତେ ବେଡ଼୍‍ୟାଦ୍ କରକାମାନ ମାବ୍‍ତାଗାଙ୍କ୍ ନାରୁଡ଼୍‍ ପରୁ ରାଲ୍‍ତେ, ନାରୁଡ଼୍ ଆଦ୍ ବାଡ଼ିୟ୍‍ ବିପଦ୍‍ତେ ସେଙ୍ଗେ ଇଶ୍ୱର୍‌ତିଙ୍ଗ୍ ଅବିଶାପ୍‌ ଇତ୍‍ତଡ଼୍ ।
REV 17:1 ତାନ୍‍ପେର୍କେ ସାତ୍‍ଟାନ୍ ଗିନା ପଇତ୍‍ତେ ସାତ୍‍ଟାନ୍ ଦୂତନାଗାଙ୍କ୍ ୱେରଣ୍ଡ୍ ନାୟାଗ୍‍ ୱାସ୍ କେତ୍‍ତନ୍, “ୱାଡ଼େ ! ନାର୍ଗେ ଇଲ୍‍କେ ଗାର୍ରେ ତିଆର୍‍ ଆତ୍‍ତେ ବେସ୍ୟା ଲେକାମ୍ ଆଦ୍ ବାଡ଼୍‍ୟେ ନଗର୍‍ତିଙ୍କ୍ ବେଲା ଶାସ୍ତି ଆଦ୍‍ତେ, ଆଦ୍ ତଅତିତାନ୍ ।
REV 17:2 ପୃତିବିତେ ରାଜାନଡ଼୍ ଆ ବେସ୍ୟାନ୍‍ତଡ଼୍ ବ୍ୟବିଚାର୍ ମାଡ଼୍‍ତଡ଼୍ ନୁ ପୃତିବିତେ ନାରୁଡ଼୍‍ ମାନ୍ଦେ ତାନାଦ୍ ବ୍ୟବିଚାର୍‍ତେ ସୁରାମ୍‍ ଉଞ୍ଜ୍ ମାତ୍‍ୱାର୍ ଆତ୍‍ତଡ଼୍ ।”
REV 17:3 ଆସୁଙ୍ଗ୍ ପବିତ୍ରଆତ୍ମା ନାୟାଗ୍‍ ଅଦିଷ୍ଟାନ୍ ମାଡ଼୍‍ତେ ନୁ ଆଦ୍ ଦୂତ ନାକିଙ୍କ୍ ୱେରଡ଼୍ ଉସ୍କ ନେଲ୍‍ଦାଗ୍ ଆତ୍‍ତେ । ଆଗେ ନାନେ ଉଡ଼୍‍ତାନ୍, ୱେରଡ଼୍ ନାଟାଡ଼୍ ୱେରଡ଼୍ ଏର୍‍ରେ ରଙ୍ଗ୍‍ତେ ପଶୁତ୍‍ ପରୁ କୁଦ୍‍ତେ । ପଶୁତେ ସାରେପାକ୍ ମେନ୍ଦୁଲ୍‍ତାଗ୍ ଇଶ୍ୱର୍‌ତେ ନିନ୍ଦ୍‍ତଡ଼୍ ପେଦେର୍‍ରି ଲେକା ଆସ୍‍ମାନ୍‍ନୁଡ଼୍ । ନୁ ତାନ୍‍ଉ ସାତ୍‍ଟାନ୍ ତାଲ୍‍ଲା ନୁ ଦଶ୍‍ଟାନ୍ କଅକ୍‌ମିନ୍ଦେ ।
REV 17:4 ନାଟାଡ଼୍ ଆପେ କଲର୍ ନୁ ଏର୍‍ରେ ରଙ୍ଗ୍‍ଦେ ସିଲେ କେର୍‍ସ୍‍ ମାନ୍‍ନୁଡ଼୍ ନୁ ଆଦ୍ କେର୍‍ସ୍‍ ମାନ୍ଦାନ୍ ସୁନା, ନାର୍ଗେ ଦାମ୍‍ତାଉ ନେଡ଼େକ୍ ମୁକ୍ତାତେ ଜିଗ୍‍ଜାଗ୍ ତନ୍ଦମାନ୍‍ନୁଡ଼୍ । ତାନାଦ୍ କାଇଦାଗ୍ ୱେରଡ଼୍ ସୁବର୍ଣ୍ଣ ପାତ୍ର ମାତ୍‍ତା । ତାନ୍‍ ବ୍ରଷ୍ଟାଚାର୍‍ତେ କାୟା ଲେକାମ୍‍ ଅଶ୍ଲୀଲ ନୁ ଅଶୁଚି ପୁର୍ଣ୍ଣ ଅଣ୍ଡୟ୍‌‍ ସୁନ୍ନତ୍‍ ଗିନେ ପୟସ୍‍ ମାତ୍‍ତେ
REV 17:5 ତାନ୍‍ ମୁଞ୍ଜିନାଗ୍ ୱେରଡ଼୍ ରଅସ୍ୟତେ ମିଞ୍ଜିମାନ୍ଦାନ୍‍ ପେଦେର୍‍ ଲେକା ଆସ୍‍ମାନ୍‍ନୁଡ଼୍; “ମହାନ୍ ବାବିଲନ୍, ପୃତିବିତେ ସାରେତଡ଼୍ ବେସ୍ୟା ନୁ ବ୍ରଷ୍ଟାସାର୍‍ତେ ଜନିନି ।”
REV 17:6 ନାନେ ମେଣ୍ଡେ ଉଡ଼୍‍ତାନ୍, ଆଦ୍ ନାଟାଡ଼୍ ସାଦୁନଡ଼୍ ନୁ ଜିସୁନ୍‍ ସେଙ୍ଗେ ବିଶ୍ୱାସ୍ତେ ମାଞ୍ଜ୍‍ ଡଲିମାନ୍ଦାନ୍ ନାରୁଡ଼୍‍ତେ ନେତୁର୍ ଉଞ୍ଜ୍ ମାତ୍‍ୱାରି ଆସ୍‍ମାତ୍‍ତନ୍ । ଅଙ୍କ୍‌ ଉଡ଼ି ନାନେ କାବାଆସ୍ ନାୟାଦ୍‍ ବୁଦ୍‍ ମାୟି ଆତ୍‍ତେ ।
REV 17:7 ଦୂତ କେତ୍‍ତେ, “ବାତ୍‍ତିଙ୍କ୍ କାବା ଅଦୁତିନ୍ ?” ଆଦ୍ ନାଟାଡ଼୍ ମେଣ୍ଡେ ସାତ୍‍ଟାନ୍ ତାଲା ନୁ ଦସ୍‍ଟାନ୍ କଅକ୍‌ ସାରେ ତାନ୍ ୱାଦାନ୍ ପଶୁତେ ମିଞ୍ଜ୍‍ତେ ରଅସ୍ୟ ନାନେ ମିକିଙ୍କ୍ କେତୁତାନ୍, କେଞ୍ଜା !
REV 17:8 ପଶୁ ଅନ୍‌‍ଦିନେ ଗେଲ୍‍ସି ମାତ୍‍ତେ; ଇଞ୍ଜେ ମେଣ୍ଡେ ଗେଲ୍‍ସ, କିନ୍ତୁ ଗାଟି ଜାପେ ପାତାଲ୍‍ପୁରିତାଗାଙ୍କ୍ ତେଦି ୱାଦ୍‍ତେ ନୁ ମେଣ୍ଡନ୍‍ ଦାମ୍ ବିନଷ୍ଟ ଆଦ୍‍ତେ । ସୃଷ୍ଟିତ୍‍ ମୁନେଙ୍କ୍‍ ବେନଡ଼ାଉ ପେଦେର୍ ଜୀୱେ ବଇତାଗ୍ ଲେକା ଆୟ, ପୃତିବିତେ ନାରୁଡ଼୍ ଆଦ୍ ସାରେ ପଶୁତିଙ୍କ୍ ଉଡ଼ି ବକୁୱା ଆଦ୍‍ତଡ଼୍ । ଆଦ୍ ଦିନେ ଜିୱେ ମାତ୍‍ତେ, ଇଞ୍ଜେ ମେଣ୍ଡେ ଇଲା, କିନ୍ତୁ ମେଣ୍ଡନ୍‌ଦାମ୍ ତଅନ୍‌ଦିତେ ।
REV 17:9 “ଇଦ୍‍ ସାରେ ବିଷୟ ବୁଜେମ୍ ଆଦାଙ୍କ୍ ଜ୍ଞାନ୍‍ ଦର୍‍କାଡ଼୍ । ପଶୁତେ ସାତ୍‍ଟାନ୍ ତାଲା ନିଜାମ୍ ସାତ୍‍ଟାନ୍ ମେଟା, ବେନିନ୍ ପରୁ ନାଟାଡ଼୍ କୁଦିମିନ୍ଦେ । ଆୱୁମିକା ସାତ୍‍ଟାନ୍ ରାଜାନ୍ ପ୍ରତିକ ।
REV 17:10 ଅଡ଼୍‌‍ ଆଗାଙ୍କ୍ ଏୟ୍‍ୱୁଡ଼୍‍ ମଦଲ୍‍ ରାଲ୍‍ତଡ଼୍‍ । ଇଞ୍ଜେ ୱେରଣ୍ଡ୍ ରାଜତ୍ୱ ମାଡ଼୍‍ତନ୍, ବାଗାତଡ଼୍ ଇଞ୍ଜେ ଆୟ୍‍ନା ୱାଡ଼ଣ୍ଡ୍ । ଅଣ୍ଡ୍‌ ୱାସ୍ ମାତର୍ ସୁଦୁଟ୍ ସମୟ ଯାକ ରାଜତ୍ୱ ମାଡ଼ିତନ୍,
REV 17:11 ବେନ୍ ପଶୁ ଅନ୍‌‍ଦିନ୍ ଜିୱେ ମାତ୍‍ତେ, କିନ୍ତୁ ଇଞ୍ଜେ ମେଣ୍ଡେ ଇଲା, ଆଦ୍ ଅଦୁତ୍ ଅଷ୍ଟମ୍‍ ରାଜା; ଆୱୁ ସାତ୍‍ଟାନ୍ ରାଜାନଡ଼୍‍ ଆଗାଙ୍କ୍ ୱେରଣ୍ଡ୍ ନୁ ଅଣ୍ଡ୍‌ ମିକା ଯାପେ ବିନଷ୍ଟ ଆଦ୍‍ତନ୍ ।”
REV 17:12 “ମିଡ଼୍ ଉଡ଼ିମାନ୍ଦାନ୍ ଦଶ୍‍ଟାନ୍ କଅକ୍, ଦଶ୍‍ଟାନ୍ ରାଜାନଡ଼୍ ପ୍ରତିକ୍, ଅଡ଼୍‌‍ ଇଞ୍ଜେ ଆୟ୍‍ନା ରାଜତ୍ୱ ମାଡ଼ଡ଼୍‍ । କିନ୍ତୁ ପଶୁତଡ଼୍ ରାଜତ୍ୱ ମାଡ଼ାନ୍‍ ସେଙ୍ଗେ ଅଣ୍ଡୟ୍‌ ଗଣ୍ଟା ସେଙ୍ଗେ ଅଡ଼୍‌‍କିଂଙ୍କ୍ କ୍ଷମତା ଇଦ୍‍ତନ୍ ।
REV 17:13 ଅଡ଼୍‌ ଦଶ୍‍ଜାନ୍ ରାଜାନ୍ ଇଚ୍ଛା ଅଣ୍ଡୟ୍‌ । ଅଡ଼୍‌ ନିଜେତ୍ ସାରେ ଶକ୍ତି ନୁ କ୍ଷମତା ପଶୁତିଙ୍କ୍ ସର୍ପଣ ମାଡ଼ିତଡ଼୍ ।
REV 17:14 ଅଡ଼୍‌ ମେଣ୍ଢାଗଲାଲ୍‍ ବିରୁଦ୍ଦତେ ଯୁଦ୍‌ ମାଡ଼ିତଡ଼୍; କିନ୍ତୁ ମେଣ୍ଢାଗଲାଲ୍‍ ତାମାଦ୍ ଆଉତ, ଏଞ୍ଚିମାନ୍ଦାନ୍, ପେର୍କେୱାଦାନ୍‌ ନୁ ବିଶ୍ୱାସ୍‌ସ୍ତେ ନାରୁଡ଼୍‍ ସାଆଯ୍ୟତେ ଅଡ଼୍‌‍କିଂଙ୍କ୍ ଜିଡ଼ିତଡ଼୍ । ବାତ୍‍ତିଙ୍କ୍ ଇତ୍‍କେ ରାଜାନଡ଼୍ ରାଜାଲ୍ ନୁ ଅଣ୍ଡ୍‌‍ ପ୍ରବୁନଡ଼୍‌ ପ୍ରବୁ ।”
REV 17:15 ଦୂତ ନାକିଙ୍କ୍ ମେଣ୍ଡେ କେତ୍‍ତେ, “ନିମେ ବେନ୍ ଜଲରାଶି ଉଡ଼ିତିନ୍, ବେନିନ୍ ପରୁ ଆ ବେସ୍ୟା କୁଦ୍‍ତେ, ଆଦ୍ ଅଦୁତ୍ ବେନ୍‍ ରାଷ୍ଟ, ଜାତି, ନାଚିଟି ନୁ ବାଷାବାଦିନଡ଼୍ ସମାବେସ ।
REV 17:16 ମିଡ଼୍ ଉଡ଼ିମାନ୍ଦାନ୍ ସାତ୍‍ଟାନ୍ କଅକ୍ ନୁ ଆଦ୍ ପଶୁ, ବ୍ୟାସାଙ୍କ୍ ଗୃଣା ମାଡ଼ିତେ; ଅଡ଼୍‌‍ ତାନାଗାଙ୍କ୍ ତାନାୱୁ ସାରେ ୱିର୍‍ପ୍ତି ଆସ୍ ଆଦିଙ୍କ୍ ବାଣ୍ଡି ମାଡ଼ି ୱିଡ଼୍‍ସିଦ୍‍ତଡ଼୍ । ଅଡ଼୍‌‍ ତାନ୍‍ ଆୱୁଙ୍ଗ୍‍ ତିନ୍‍ତଡ଼୍‍, ମେଣ୍ଡେ ଆଦିଙ୍କ୍‍ କିସ୍‍ତାଗ୍‍ ୱାଟି ଦଂସ ମାଡ଼ିତଡ଼୍‍ ।
REV 17:17 ବାତ୍‍ତେଙ୍କ୍ଇତ୍କେ, ଇଶ୍ୱର୍‍ ନିଜେତ୍ ଉଦ୍ଦେଶ୍ୟତେ ସାଦନ୍ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ ଇଦ୍ ପ୍ରେରଣା ଇତ୍‍ତନ୍ । ଅଡ଼୍‌‍ ଅଣ୍ଡୟ୍‌ ମାନ୍‍ଆସ୍ କାମ୍ ମାଡ଼ିତଡ଼୍ ନୁ ଇଶ୍ୱର୍‌ତେ ବାକ୍ୟ ବେସୁଙ୍କ୍‍ ମିକା ପରିଣତ ଆୟ୍‍ୱେ ଯାକ ରାଜ୍ୟତେ ଶାସନ୍‍ ମପ୍ ଆଦ୍ ପଶୁତ୍ କାଇଦାଗ୍ ୱିଡ଼୍‍ସିଦ୍‍ତଡ଼୍ ।”
REV 17:18 “ମିଡ଼୍ ବେନ୍ ନାଟାଡ଼୍‍ତିଙ୍କ୍ ଉଡ଼୍‍ତିଡ଼୍, ଆଦ୍ ଅଦୁତ୍, ପୃତିବିତେ ରାଜାନଡ଼୍ ପରୁ ଶାସନ୍‍ ମାଡ଼ମାନ୍ଦାନ୍ ଆଦ୍ ବେଡ଼ିୟ୍ ନଗର୍ ।”
REV 18:1 ତାନ୍‍ପେର୍କେ ନାନେ ମେଣ୍ଡ୍‍ ୱେରଡ଼୍ ଦୂତତିଙ୍କ୍ ସ୍ୱର୍ଗତାଗାଙ୍କ୍ ଡ଼ିଗିୱାଦାନାଦ୍ ଉଡ଼୍‍ତାନ୍ । ଆଦ୍ ମହାକ୍ଷମତାପନ୍ ମାତ୍‍ତେ ନୁ ତାନ୍ କାନ୍ତି ସାରେ ପୃତିବିତିଙ୍କ୍ ୱେସ୍‍ ମାଡ଼ମାନ୍‍ନୁଡ଼୍ ।
REV 18:2 ଆଦ୍ ଗାଟି ଲେଙ୍ଗ୍‍ଦେ କେତ୍‍ତେ, “ତାନାଦ୍‌ ପତନ୍‍ ଗଟେମ୍‍ ଆତ୍‍ତେ । ମହାନ୍ ବାବିଲନ୍ ଦଂସ ଆସ୍‍ମିନ୍ଦେ ! ଆଦ୍ ଇଞ୍ଜେ ଅଶୁଚି ପ୍ରେତାତ୍ମାକି ମାନ୍ଦାନ୍ ପଡ଼ିୟେ ଆସ୍‍ମିନ୍ଦେ । ସାରେଲେକାମ୍ ଅଶୁଚି ନୁ ପିଟେ ତୁଉକା ମାଡ଼ି ଆଗ୍‍ଗେ ମିନ୍ଦେ ।
REV 18:3 ବାତ୍‍ତେଙ୍କ୍ଇତ୍କେ ସାରେ ମାନବ୍ ଜାତିତିଙ୍କ୍‍ ତାନ୍ ବେସ୍ୟାଲେକାତ୍‍ ସୁରାମ୍‍ ଉଞ୍ଜ୍‍ ମିନ୍ଦେ, ପୃତିବିତେ ରାଜାନଡ଼୍‍କ୍ ତାନ୍ ତଡ଼୍ ବ୍ୟାବିଚାର୍ ପାପତାଗ୍ ମାପିମିନ୍ଦେ, ଜଗତ୍‍ତେ ବ୍ୟାବସାୟିନଡ଼୍ ତାନ୍ ବିଲାସବ୍ୟସନ୍ ସେଙ୍ଗେ ସାଉକାର୍ ଆସ୍‍ମିନ୍ତେ ।”
REV 18:4 ଇଦିନ୍‍ପେର୍କେ ନାନେ କେଞ୍ଜ୍‍ତାନ୍, ସ୍ୱର୍ଗତାଗାଙ୍କ୍ ମେଣ୍ଡ୍‍ନ୍ ୱେରଡ଼୍ ବାଣି କେତାନାଦ୍ କେଞ୍ଜ୍‍ତାନ୍, “ନା ନାରୁଡ଼ି ସାରେତଡ଼୍ ପେଇସ୍‍ ୱାଡ଼ାଟ୍ ! ତାନ୍ ପାକେଙ୍କ୍ ୱାଡ଼ାଟ୍ ! ମିଡ଼୍ ତନ୍ ପାପତାଗ୍ ମେଣ୍ଡେ ମାଇ ମାନ୍‍ମାଟ୍; ଆଦ୍ ବେନ୍ ଶାସ୍ତି ପାଏମ୍ ଆଦ୍‍ତେ, ଆଦିନ୍ ତଡ଼୍‍ ଆୟ୍‍ମାଟ୍ !
REV 18:5 ତାନାଦ୍ ପାପସାରେ ନୂୟ୍‍ ଲେକାମ୍‍ ଆସ୍ ମାବ୍‍ତାଗ୍ ତେଦ୍‍ତେ । ତାନ୍ ପାପଚାରଣ ସାରେ ଇଶ୍ୱର୍‍ ମାନ୍‍ ନେଏସ୍‍ ମିନ୍ଦେଣ୍ଡ୍ ।
REV 18:6 ଅଣ୍ଡ୍‌ ବେଲାନ୍ ମିୟାଦ୍ ସେଙ୍ଗେ ବ୍ୟବହାର୍ ମାଡ଼ିମାନ୍ଦେଣ୍ଡ୍, ମିଡ଼୍‍ ଆଦିନ୍ ସେଙ୍ଗେ ଟିକ୍ ଆଦେଲେକାମ୍ ବ୍ୟବହାର୍ ମାଡ଼ାଟ୍ । ଅଣ୍ଡ୍‌ ବାତ୍‍ତେ ମାଡ଼ିମିନ୍ଦେନ୍, ଆଦିଙ୍କ୍ ତାନ୍ ରେଣ୍ଡ୍ ଗୁନ୍‍ଦେ ସେଙ୍ଗେ ଦଣ୍ଡ୍‍ ଇମୁଟ୍ । ମିକିଙ୍କ୍ ଉସ୍‍ପାନ୍ ସେଙ୍ଗେ ଅଣ୍ଡ୍‌ ବେନ୍ ଏର୍ ତିଆର୍ ମାଡ଼ିମାତ୍‍ତନ୍, ଆଦିନ୍ ରେଣ୍ଡ୍ ଗୁନା କାଡ଼ାମ୍‍ ମାଡ଼ାଙ୍କ୍ ତାନ୍ ଗିନେତାଗ୍ ପୁର୍ଣ୍ଣ ମାଡ଼ାଟ୍ ।
REV 18:7 ଅଣ୍ଡ୍‌ ନିଜେତିଙ୍କ୍ ବେସର୍ ଗର୍ବ ଆସମାତ୍‍ତନ୍ ନୁ ନାର୍ଗେ ଗାବ୍‍ତାଗ୍ ମୁଡ଼୍‍ନ୍ଦି ମାତ୍‍ତନ୍, ଆଦ୍ ପରିମାନ୍‍ତେ ଅଙ୍କ୍‌ ଦୁଃକାମ୍ କଷ୍ଟ ଇମୁଟ୍ । ବାତ୍‍ତିଙ୍କ୍ ଇତ୍‍କେ ଅଣ୍ଡ୍‌ ନିଜେତିଙ୍ଗ୍ ନାର୍ଗେ ମାଡ଼ି କେତୁତନ୍, ‘ନାନେ ଇଗେ ରାଣିନ୍‌ ଲେକାମ୍ କୁଦ୍‍ତାନ୍ ! ନାନେ ରାଣ୍ଡିନ୍ ଆୟନ୍, ନାୟଦ୍ ବେସୁଙ୍କ୍‍ ଦୁଃକାମ୍ ଆୟ୍‍ୟ ।’
REV 18:8 ତାନ୍ ଇୱୁସାରେ ପାପତ୍ ସେଙ୍ଗେ ରୋଗ୍, ଦୁକାମ୍‍, ଦୁର୍ବିକ୍ଷ, ମଆମାରି ଦିନାମ୍‍ତେ ଆଦିଙ୍କ୍ ଅଣ୍ଡୟ୍‌‍ଦାମ୍ ଆଗାତ୍ ମାଡ଼ିତେ । ମେଣ୍ଡେ ଆଦ୍ କିସ୍‍ତାଗ୍ ସାରେଦିନାତ୍ ସେଙ୍ଗେ ଦଂସ ଆଦ୍‍ତେ । ବାତ୍‍ତେଙ୍କ୍ଇତ୍କେ ତାନ୍ ବେନ ବିଚାର୍ ମାଡ଼ୁତେ, ଆଦ୍ ପ୍ରବୁ ଇଶ୍ୱର୍ ମହାପରାକ୍ରାମ ।”
REV 18:9 ପୃତିବିତେ ବେନ୍ ରାଜାମଆରାଜନଡ଼୍ ତାନ୍ ତଡ଼୍ ବ୍ୟବିଚାର୍ ନୁ ପାପ ଆଚରନ୍ ମାଡ଼ିମାତ୍‍ତଡ଼୍, ଅଡ଼୍‌‍ ତାନ୍ ଦଗ୍‍ଦ ଆସମାନ୍ଦାନ୍ ମେନ୍ଦୁଲ୍‍ତାଗାଙ୍କ୍ ପେଇତାନ୍ ଉମେ ଉଡ଼ି କେୟିତଡ଼୍ ।
REV 18:10 ତାନ୍ ଦୁଃକାମ୍ କଷ୍ଟତେ କାଇଲାନଙ୍କ୍ ୱେର୍‍ସ୍‍ମିକା ଅଡ଼୍‌‍ ତାନାଗାଙ୍କ୍ ନାର୍ଗେ ଯେକାନିସ୍ ମାନ୍‍ନ୍ତଡ଼୍ ନୁ ଆୟୁ, ଆୟୁ ଇଞ୍ଜ୍ କେତିତଡ଼୍, କି ବୟଙ୍କାର୍ ! କି ବୟଙ୍କର୍‍ ! ନିମେ ବାତେ ଆ ପରାକ୍ରାନ୍ତ ବେଡ଼୍‍ଇ ନାର୍ଦେ ବାବିଲନ୍ ! ମାତର୍ ଅଣ୍ଡୟ୍‌ ଗାଣ୍ଟା ଲୋପେ ଇଦ୍‍ଲେକାମ୍ ଶାସ୍ତି ପାଏମ୍ ଆତ୍‍ତିନ୍ !
REV 18:11 ମେଣ୍ଡେ ପୃତିବିତାଗ୍ ବଣିକନଡ଼୍ ଆଦିନ୍ ସେଙ୍ଗେ କେଇତଡ଼୍ ନୁ ଦୁକାମ୍‍ ମାଡ଼ିତଡ଼୍, ବାତ୍‍ତିଙ୍କ୍ ବେନ ଅଡ଼୍‌‍କିଂଙ୍କ୍ ବାଣିଜ୍ୟ ଦ୍ରବ୍ୟ ମେଣ୍ଡେ ୱାମ୍‍ୱଡ଼୍,
REV 18:12 ସୁବର୍ଣ୍ଣ, ରୌପ୍ୟ, ପାଇସା, ମୁକ୍ତା, ପାଲ୍‍ସେଲାଦ୍ ସିଲେସ, କୃଷ୍ଣରଙ୍ଗ୍‌ଦେ ସିଲେ, ପଟସିଲେ ସିନ୍ଦୁର୍ ରଙ୍ଗ୍‌ଦେ ସିଲେ, ସାରେ ଲେକାମ୍ ଚନ୍ଦନ୍‍କାଟ, ଏନେ ପାଲ୍‍କିନ୍ ସାରେଲେକାମ୍ ବସ୍ତୁ, ଗାଟି ଲେକାମ୍ କଷ୍ଟ ପିତଲ୍ ଲୌଉଆ ନୁ ମର୍ମତେ ପେଇତାନ୍ ସେଙ୍ଗେ ସାରେଲେକାମ୍ ବସ୍ତୁ ।
REV 18:13 ଦାରୁଚିଇନେ, ଲେକେତ୍‌ ଗାବ୍‌ମାନ୍ଦାନ୍‌ ଦ୍ରବ୍ୟ, ଦୁପାମ୍‌, ସୁଗନ୍ଦି ଲେପ୍ୟଦ୍ରବ୍ୟ, ସୁନା, ମଦ୍ୟ, ନିୟ୍, ମଇଦା, ଗଅମ୍, ଗଡ଼୍‍କ୍, ମେକା, ପିଟେ, ରତେ, କ୍ରିତଦାସ ନୁ ନାରୁଡ଼ାଦ୍ ଜିୱେ ।
REV 18:14 ବ୍ୟବସାୟିଡ଼୍ ଅଙ୍କ୍‌ କେତ୍‌ତଡ଼୍, “ମିୟାଦ୍ ଅବିଲାଷତେ ସାରେତଡ଼୍ ସାୟେ ଦ୍ରବ୍ୟ ସାରେ ଆଞ୍ଜ୍ ନୁ ମିୟାଦ୍ ଦନ୍‍ ସମ୍ପତିତେ ଉଡ଼୍‍ଦାନାଣ୍ଡ୍‍ ମେଣ୍ଡେ ଇଲାଣ୍ଡ୍‍ । ମିଡ଼୍‍ ଆଉସାରେ ମେଣ୍ଡେ ବେସୁଙ୍କ୍‍ ମାଲ୍‍ସ୍ ଦର୍କେପାର୍‍ୱିଡ଼୍ !”
REV 18:15 ବେନ୍ ବ୍ୟବସ୍ତାୟିଡ଼୍ ଆଦ୍ ନାର୍ଦାଗ୍ ବାଣିଜ୍ୟ ମାଡ଼ି ସାଉକାର୍ ଆସ୍‍ମାତ୍‍ତଡ଼୍, ଅଡ଼୍‌ ତାନ୍ ଦୁଃକାମ୍‍ତେ କାଇଲାନଙ୍କ୍ ୱେର୍‍ସ୍ ମିକା ନାର୍ଗେ ଯେକା ନିସ୍‍ ମାନ୍‍ତଡ଼୍ । ଅଡ଼୍‌‍ କେୟି ନୁ ଦୁଃକାମ୍‍ ମାଡ଼ି,
REV 18:16 କେତିତଡ଼୍, “ଆୟୁ ! ମହାନଗର୍‍ତେ ଅବସ୍ତା ଇଞ୍ଜେ ବେସର୍ ବୟଙ୍କାର୍, ବେସର୍ ! ଅଣ୍ଡ୍‌ ସାକ୍‌ସାକା ପାଲ୍‍ସେଲାଦ୍ ସିଲେ, କୃଷ୍ଣ କଲର୍‍ତେ ନୁ ସିନ୍ଦୁର୍ କଲର୍‍ତେ ସିଲେ କେର୍‍ସ୍‍ ମାତ୍‍ତାଦ୍ ମାତ୍‍ତେ, ମେଣ୍ଡେ ସୁବର୍ଣ୍ଣ, ମଣି ନୁ ମୁକ୍ତାତେ ବୁଷିତ ମାତ୍‍ତେ ।
REV 18:17 କିନ୍ତୁ ୱେରଡ଼୍ ଗାଣ୍ଟା ଲୋପେ ଅଣ୍ଡେକେ ସାରେ ସମ୍ପତି ୱାମ୍‍ତନ୍ !” ଜାହାଜ୍‍ତେ ମୁକ୍ୟାଲ୍‍, ନାରୁଡ଼୍, ଓଡେ ଚାଲାମାଡ଼ାନଡ଼୍‍ ନୁ ସମୁଦ୍ର ବ୍ୟବହାର୍ ମାଡ଼ାନଡ଼୍ ନାର୍ଗେ ଯେକା ନିତ୍‍ତଡ଼୍,
REV 18:18 ନୁ ଦଗ୍‍ଦ ଆଦାନ୍ ନାକିନାଗ୍ ଉମେ ଉଡ଼ି ଗାଟି ଲେଙ୍ଗ୍‍ଦେ କେତ୍‍ତଡ଼୍, “ଇଦ୍ ମହାନଗର୍‍ତେ ଲେକାମ୍ ମେଣ୍ଡେ ବେନେ ନଗର୍ ଇଲ୍‍ୱେ ମାତ୍‍ତେ ।”
REV 18:19 ଅଡ଼୍‌ ତାଲେତ୍‍ ପରୁ ମାଣ୍ଡୁଲ୍ ୱାଟି ବିଲପ୍ ମାଡ଼ି କେତ୍‍ତଡ଼୍, “ବେସର୍ ବୟଙ୍କାର୍ ! ନଗର୍‍ତେ ଇଦ୍‍ ବାତ୍ ଦାରୁଣ ଦୁର୍ଦ୍ଦଶା ! ସମୁଦ୍ରତାଗ୍ ଉଡାନ୍ ଜାହାଜ୍‍କି ଆୱିନ୍ ୱାୟାନେ ସମୁଦ୍ର ଆସ୍‍ମାତ୍‍ତେ ! କିନ୍ତୁ ଅଣ୍ଡୟ୍‌‍ ଗଣ୍ଟା ଲୋପେ ଆଦ୍ ଦଂସ ଆତ୍‍ତେ !”
REV 18:20 ଆ ସ୍ୱର୍ଗତେ ନାରୁଡ଼ି ! ଆଦ୍ ଦଂସ ଆତ୍‍ତାଙ୍କ୍ ଆନନ୍ଦ ଉଲ୍ଲାସ୍ ମାଡ଼ାଟ୍ । ଆ ସାଦୁ ନାରୁଡ଼ି; ପ୍ରେରିତ୍‍ ଶିଷ୍ୟ ନୁ ବାବବାଦିନଡ଼୍ ! ୱେଡ଼୍‍କେ ମାଡ଼ାଟ୍, ବାତ୍‍ତେଙ୍କ୍ଇତ୍କେ ମୀଇ ସେଙ୍ଗେ ଅଣ୍ଡ୍‌ ବାତ୍‍ତେ ମାଡ଼ି ମାତ୍‍ତନ୍, ଅଦିନ୍‌ ସେଙ୍ଗେ ଇଶ୍ୱର୍‍ ଆଦିଙ୍କ୍ ଶାସ୍ତି ଇତ୍‍ତନ୍ ।
REV 18:21 ତାନ୍‍ପେର୍କେ ୱେରଣ୍ଡ୍ ଗାଟି ପ୍ରତାପି ଦୂତ ଜାତେକାଲ୍ ଲେକାମ୍ ୱରଡ଼୍ ବେଡ଼୍‍ୟାଦ୍ ବାଣ୍ଡ୍‍କାଲ୍ ଆସ୍ ସମୁଦ୍ରତାଗ୍ ଏସ୍‍ତନ୍ ନୁ କେତ୍‍ତନ୍, “ମହାନ୍‍ ନଗର୍‍ତେ ବାବିଲନ୍ ଇଦ୍‍ଲେକାମ୍ ଏସ୍‍ତେ ଆଦ୍‍ତନ୍ ନୁ ଆଦିଙ୍କ୍ ମେଣ୍ଡେ ବେନ ବେସୁଙ୍କ୍‍ ଉଡ଼େ ପାର୍‍ୱଡ଼୍ ।
REV 18:22 ବାତ୍ ବିଣା, କେନ୍‍ସାୟେତ୍ ଲେଙ୍ଗ୍‍ଦେ ପାଟେ, ଆସଡ଼୍‍ ବା ମୟିର୍‍ତେ ଲେଙ୍ଗ୍, ବେସୁଙ୍କ୍‍ ମେଣ୍ଡେ କେଞ୍ଜାଙ୍କ୍ ଆୟ । ବାତେବା ସାମାନ୍‌ ବା କାରିଗର୍ ନିୟାଗେ ମେଣ୍ଡେ ତନ୍ଦ; ପେଞ୍ଜ୍‌ସାନାୱୁ ଉଡ଼୍‍ସ୍ପାନ୍ ମର୍‍ରେ କେଞ୍ଜାଙ୍କ୍ ଆୟ ।
REV 18:23 ନିୟାଗେ ମେଣ୍ଡେ ବେସୁଙ୍କ୍‍ ମିକା କୁପି ନିଡ଼୍‍ୱ; ବା ବର କନ୍ୟାତେ ମର୍‍ରେ କେଞ୍ଜାଙ୍କ୍ ଆୟ । ବାତ୍‍ତିଙ୍କ୍ଇତ୍କେ ନି ତଡ଼ିଡ଼୍‍ ପୃତିବିତେ ଗାଟି ଶକ୍ତି ଆସ୍ ମାତ୍‍ତଡ଼୍, ନିୟାଦ୍ କୁଉକ୍ ତୋଡ଼୍ ନିମେ ପୃତିବିତେ ସାରେତଡ଼୍‍କ୍ ମଦ୍‌ ମାଡ଼ି ନେଏସ୍‍ ମାତ୍‍ତିନ୍ ।”
REV 18:24 ମେଣ୍ଡେ ଇଦ୍ ନାର୍ଦାଗ୍ ପୃତିବିତେ ନାର୍ଗେ ବାବବାଦିଡ଼୍ ନୁ ସାଦୁନଡ଼୍ ନେତୁର୍‍ ଇସ୍‍ମାତ୍‍ତଡ଼୍ । ଇୱୁସାରେ ପାପତ୍‍ ସେଙ୍ଗେ ଅଣ୍ଡ୍‌ ସମାନ୍‍ ଦଣ୍ଡ୍‍ ପାଏମା ଆତ୍‍ତନ୍ ।
REV 19:1 ଇଦିନ୍‍ ପେର୍କେ ନାନେ ବାତ୍‍ କେଞ୍ଜ୍‍ତାନ୍, ଆଦ୍ ସ୍ୱର୍ଗତାଗ୍ ୱେରଡ଼୍ ବେଡ଼୍‍ୟାଦ୍ ମାନ୍ଦେତାଦ୍ ମର୍‍ ଲେକାମ୍ ଏର୍କେ ଆସମାତ୍‍ତେ । ଅଡ଼୍‌ କେସମାନ୍‍ନୁଡ଼୍, “ଇଶ୍ୱର୍‌ତେ ସ୍ତୁତି ମାଡ଼ାଟ୍ । ମାନ୍‍ ଇଶ୍ୱର୍‍ ପରିତ୍ରାଣ୍, ଗୌରବ୍ ନୁ ପରାକ୍ରମତେ ଅଦିକାର୍‌ ।
REV 19:2 ତାନ୍ ବିଚାର୍ ନିଜାମ୍ ନୁ ନ୍ୟାୟଚିତ୍ । ବ୍ରଷ୍ଟାଚାର୍ତେ ପୃତିବିତିଙ୍କ୍ କାରାପ୍‌ କାମ୍‌ ମାଡ଼ମାନ୍ଦାନ୍ ଦାର୍‍ୟାନଡ଼୍‍, ଅଣ୍ଡ୍‌ ନାର୍ଗେ ଦଣ୍ଡ୍ କଷ୍ଟ ମାଡ଼୍‍ତନ୍ । ଇଶ୍ୱର୍‌ତେ ଦାସନଡ଼୍‍କ୍ ଆୱୁକି ମାନ୍‍ନାଙ୍କ୍ ଅଙ୍କ୍‌ ଅଣ୍ଡ୍‌ ଶାସ୍ତି ଇତ୍‍ତନ୍ ।”
REV 19:3 ନାନେ କେଞ୍ଜ୍‍ତାନ୍, ଅଡ଼୍‌‍ ମେଣ୍ଡେ ଗାଟି ଲେଙ୍ଗ୍‍ଦେ କେତୁତନ୍, “ଇଶ୍ୱର୍‌ତେ ସ୍ତୁତି ଗାନ ମାଡ଼ାଟ୍ । ଆଦ୍ ମାନ୍‌‍ନାର୍ଦିଙ୍କ୍ ଦଂସ ମାଡ଼ ମାନ୍ଦାନ୍ କିସ୍‍ତେ ଉମେ ସାରେଦିନାମ୍‍ ପରୁ ତେଦମାନ୍‍ତେ ।”
REV 19:4 ସିଂହାସନ୍‌ତାଗ୍ ମାନ୍ଦାନ୍ ଇଶ୍ୱର୍‌ତେ ମୁନେ ୨୪ ଜାନ୍ ବୟସ୍ତେ ନେତାଲଡ଼୍ ନୁ ଆୱୁ ନାଲୁ ପଶୁ ମଡ଼୍‍କି ମିକା ଇଶ୍ୱର୍‌ତିଙ୍କ୍ ଆରାଦାନା ମାଡ଼୍‍ତା । ଅଡ଼୍‌ କେତ୍‍ତଡ଼୍, “ଆମେନ୍‍ ! ଇଶ୍ୱର୍‌ତେ ପ୍ରଶଂସା ମାଡ଼ାଟ୍ ।”
REV 19:5 ତାନ୍‍ପେର୍କେ ସିଂହାସନ୍‌ତାଗାଙ୍କ୍ ୱେରଡ଼୍ ଲେଙ୍ଗ୍ କେଞ୍ଜ୍‍ତାନ୍, “ଇଶ୍ୱର୍‌ତେ ସ୍ତୁତି ମାଡ଼ାଟ୍ । କି ମହାନ୍, କି ନଗ୍ୟଣ୍ୟ, ଇଶ୍ୱର୍‌ତେ ସେବକ୍ ନୁ ଉପାସକ୍‍ ନାରୁଡ଼୍, ସାରେତଡ଼୍ ଅନ୍‌‍ ପ୍ରସଂସା ମାଡ଼ାଟ୍ ।”
REV 19:6 ଆଦ୍ ସମୟତ୍‍ ନାନେ କେଞ୍ଜ୍‍ତାନ୍, ସମୁଦ୍ର ସାଉଣ୍ଡ୍ ନୁ ବିଜୁଳି ସାୱୁଣ୍ଡ୍‍ ତଡ଼୍‍ ନାରିନ୍ ମର୍‍ଲେଙ୍ଗ୍‍ ପଙ୍ଗି ୱାଦୁତ୍ । ନାରୁଡ଼୍ ମେଣ୍ଡେ ସ୍ତୁତି ମାଡ଼ୁତଡ଼୍; “ଇଶ୍ୱର୍‌ତେ ପ୍ରଂସସା ମାଡ଼ାଟ୍, ବାତ୍‍ତିଙ୍କ୍ଇତ୍କେ ମାନ୍‍ ପ୍ରବୁ ମହାପରାକ୍ରାନ୍ତ ଇଶ୍ୱର୍, ଅଣ୍ଡେ ମାତର୍ ମାନ୍‍ ରାଜାଲ୍ ।
REV 19:7 ୱାଡ଼ାଟ୍, ଆନନ୍ଦ ନୁ ଉଲ୍ଲାସ୍ ମାଡ଼ୁକାଡ଼୍‍, ଅନ୍‌ ବେଡ଼ିୟାଦ୍‌ନିୟମ୍‌ ପ୍ରସସ୍ତି ମାଡ଼ିକାଡ଼ାଟ୍ । ମେଣ୍ଢାଗଲାନ୍ ପେଣ୍ଡୁଲ୍ ଗାରେ ଏୱୁଦୁତ୍, ଅନ୍‌ ପିକିଡ଼୍‍ ଅଦିନ୍‌ ସେଙ୍ଗ୍ ନିଜେତିଙ୍କ୍ ତିଆର୍‍ ମାଡ଼୍‍ତେ ।
REV 19:8 ଆଦ୍ କେର୍‍ଦାନ୍ ସେଙ୍ଗେ ଆଦ୍ ଲେକେତାଦ୍ ନୁ ପରିଷ୍କୃତ ନାୱୁ ନାୱାଲାଦ୍‌ ସିଲେ ଦର୍‍ସ୍‍ତଡ଼୍ ।” ସାଦୁନଡ଼୍ ସାରେ କାମ୍ ଅଦୁତ୍, ଆଦ୍ ନାୱୁ ନାୱାଲାଦ୍‌ ସିଲେ ।
REV 19:9 ଅନନ୍ତତେ ସ୍ୱର୍ଗଦୂତ ନାକିଙ୍କ୍ କେତ୍‍ତା, “ଲେକି ୱାଟେ, ବେନଡ଼୍ ମେକାଗଲାନ୍ ପେଣ୍ଡୁଲ୍‍ତେ ବଜିତାଗ୍ ତିଆର୍ ମାଡ଼୍‍ତେନଡ଼୍, ଅଡ଼୍‌ ବାଗ୍ୟବାନ୍ ।” ଅଣ୍ଡ୍‌ ମେଣ୍ଡେ କେତ୍‍ତନ୍, “ଇଦ୍ ଇଶ୍ୱର୍‌ତେ ଗଟ୍ ସାରେ ସତ୍ ।”
REV 19:10 ଆଦ୍ ଦୂତତିଙ୍କ୍ ପୁଜା ମାଡ଼ାନ୍‍ ସେଙ୍ଗେ ନାନେ ତାନ୍ ଡେକାନ୍‍ ମଦଲ୍ ରାଲ୍‍ତାନ୍ । କିନ୍ତୁ ଆଦ୍ ନାକିଙ୍କ୍ କେତ୍‍ତେ, “ଆଦ୍‍ଲେକାମ୍ ନେଏମା । ନି ଲେକାମ୍ ନୁ ମୀଇ ତାମୁଡ଼୍‍ ଲେକାମ୍ ନାନେ ୱେରନ୍ ଜିସୁନ୍ ୱେରନ୍ ସେବକ୍‍ ମାତର୍ । ମୀଇ ଲେକାମ୍ ନାନେ ମିକା ଜିସୁନ୍‍ କେସ୍‍ମାନ୍ଦାନ୍ ସତ୍ତିଙ୍କ୍ ଗ୍ରହନ୍‌ ମାତ୍‍ତାନ୍ । ମାତର୍ ଇଶ୍ୱର୍‌ତେ ପୁଜା ମାଡ଼ାଟ୍ । ମାତର୍ ଜିସୁନ୍‍ କେସ୍‍ ମାନ୍ଦାନ୍ ସତ୍‍, ବାବବାଦିନଡ଼କ୍ ପ୍ରେରଣା ଇମୁଟ୍ ।”
REV 19:11 ତାନ୍‍ପେର୍କ ନାନେ ଉଡ଼୍‍ତାନ୍, ସ୍ୱର୍ଗତାଦ୍ ଆର୍ କୁଲେମ୍‍ ଆତ୍‍ତେ ନୁ ଆଗେ ୱେରଟ୍ ଶ୍ୱେତ ବର୍ଣ୍ଣତେ ଗୁରାମ୍‍ । ତାନ୍ ଚାଲାମାଡ଼ାନଣ୍ଡ୍‍ ବିଶ୍ୱାସ୍ତ ନୁ ସତ୍ ପେଦେର୍ତେ ଏଞ୍ଜ୍‍ତଣ୍ଡ୍ । ଅନ୍‌ ବିଚାର୍ ନ୍ୟାୟତାଦ୍‍ ନୁ ଅଣ୍ଡ୍‌ ଦର୍ମଯୁଦ୍‌ତାଗ୍ ନିୟଜିତ ।
REV 19:12 ତାନ୍ କଣ୍ଡା କିସ୍ ତାଡ଼ାମ୍ ଲେକାମ୍ ନୁ ତାନ୍ ତାଲେତାଗ୍ ନାର୍ଗେ ସହଜ୍‍ ମାତ୍‍ତା । ଅନ୍‌ ପରୁ ୱେରଡ଼୍ ପେଦେର୍ ଲେକା ଆସ୍‍ମାତ୍‍, ଇତ୍‍କେ ଆଦ୍‍ ବାତେ, ଅନ୍‌ ୱିଡ଼୍‍ସି ମେଣ୍ଡେ ବେନ ପୁନଡ଼୍ ।
REV 19:13 ଅଣ୍ଡ୍‌‍ କେର୍‍ସ୍‍ମାନ୍ଦାନ୍ ଚକା ନେତୁର୍ଜିତ ଆସ୍‍ ମାତ୍‍ତେ । ଅଣ୍ଡ୍‌ “ଇଶ୍ୱର୍‌ତେ ବାକ୍ୟ,” ଇଞ୍ଜ୍ ପୁତ୍‍ତାନ୍ ।
REV 19:14 ସ୍ୱର୍ଗତଡ଼୍ ସାରେତଡ଼ି ସୈନ୍ୟନଡ଼୍, ପରିଷ୍କାର୍, ପାଲ୍‍ସେ, ପାଲ୍‍ସେଲାଦ୍‍, ସିଲେ କେର୍‍ସ୍, ଶ୍ୱେତ ଗୁରାକିନ୍‍ ପରୁଙ୍କ୍‌ ଡିକିମିକା ତାନ୍ ପେର୍କେ ଆଞ୍ଜ୍‍ମାନ୍‍ନୁ ।
REV 19:15 ତାନ୍ ମକତାଗାଙ୍କ୍ ୱେରଡ଼୍ ଲାଟିଲାଦ୍ କଡ଼୍‍ଗ ୱାୟେତେ ମାନ୍‍ନୁଡ଼୍ । ତାନ୍ ସାଆଯ୍ୟତେ ଆଦ୍ ପୃତିବିତେ ସାରେ ଜାତିଙ୍କ୍ ପରାସ୍ତ ମାଡ଼ିତେ । ମେଣ୍ଡେ ଅଡ଼୍‌‍କିଂଙ୍କ୍ ଅଣ୍ଡ୍‌ ଲୁଆ ଦଣ୍ଡତାଗ୍ ସାଲା ମାଡ଼ିତନ୍ ନୁ ସାରେତିଙ୍କ୍ ଶକ୍ତି ମାନ୍‍ ଇଶ୍ୱର୍‌ତେ ଗାଟି କପାମ୍‍ତେ ପସଲ୍‍ତିଙ୍ଗ୍ ଅଣ୍ଡ୍‌ ପେଷଣ କୁଣ୍ଡତାଗ୍ ନିଜେତ୍ ପିସ୍କି କାଲ୍ ପେସ୍ପିତଣ୍ଡ୍ ।
REV 19:16 ଅନ୍‌ ସକେତ୍ ପରୁ ନୁ ଉରୁ ଦେଶ୍‌ତେ ଲେକା ଆସ୍‍ମାନ୍‍ନୁଡ଼୍, “ରାଜାନଡ଼୍ ରାଜା ନୁ ପ୍ରବୁନଡ଼୍ ପ୍ରବୁ ।”
REV 19:17 ସାରେଦାମ୍ ତାଦ୍ ନାନେ ଉଡ଼୍‍ତାନ୍, ମେଣ୍ଡେ ୱେରଡ଼୍ ଦୂତ ପଡ଼ଦ୍‍ ପରୁ ଦଣ୍ଡତାଦ୍ । ମାବ୍‍ତାଗ୍ ଉଡ ମାନ୍ଦାନ୍ ସାରେ ପିଟେଙ୍କ୍ ସାରେତାୱିଙ୍କ୍ ଆଦ୍ ଗାଟି ଲେଙ୍ଗ୍‍ତେ କେତ୍‍ତେ, “ୱାଡ଼େ, ଇଶ୍ୱର୍‌ତେ ବାଡ଼ିୟ୍‍ ବଜିତାଗ୍ କାଇଲାନ୍ ସେଙ୍ଗେ ଅଣ୍ଡୟ୍‌‍ତାଗ୍ ଆୟ୍‍ମୁଟ୍ ।
REV 19:18 ରାଜା, ପ୍ରଜା, ସୈନ୍ୟଡ଼୍, ସୈନ୍ୟାଦକ୍ଷ, ଗୁରାମ୍‍, ଗୁରାତଡ଼୍‍, କ୍ରୀତଦାସ, ସ୍ୱାଦିନ୍ ମହାନ୍ ବା ସାରେତଡ଼ାଦ୍‍ ଆୱୁଙ୍ଗ୍ ୱାସ୍ ତିନୁଟ୍ ।”
REV 19:19 ତାନ୍‍ପେର୍କେ ନାନେ ଉଡ଼୍‍ତାନ୍, ଆଦ୍ ଗୁରାତଡ଼୍‍ ନୁ ତାନ୍ ସୈନ୍ୟନଡ଼୍ ବିରୁଦ୍ଦତେ ଯୁଦ୍‌ ମାଡ଼ାନ୍ ସେଙ୍ଗେ ସାରେ ପଶୁ ନୁ ପୃତିବିତେ ସାରେତଡ଼୍ ରାଜା ନୁ ଅଡ଼୍‌ ସୈନ୍ୟନଡ଼୍ ଅଣ୍ଡୟ୍‌‍ତାଗ୍ ଆତ୍‍ତଡ଼୍ ।
REV 19:20 ଆଦ୍ ଯୁଦ୍‍ତାଗ୍ ପଶୁ ନୁ ତାନ୍ ମୁନେ ଆଶର୍ଯ୍ୟ କାମ୍‍ ମାଡ଼ିମାନ୍ଦାନ୍ ଅଡ଼୍‌ ବଣ୍ଡବାବବାଦିଡ଼୍ ଦର୍‍କି ମିକା ବନ୍ଦି ଆତ୍‍ତଡ଼୍ । ବେନଡ଼ାଗ୍ ପଶୁ ଚିଇନେ ମାତ୍‍ତେ ନୁ ବେନଡ଼୍ ତାନ୍ ଆଶର୍ଯ୍ୟ କାମ୍ ତଡ଼୍ ଅଡ଼୍‌‍କିଂଙ୍କ୍ ପ୍ରେରିତ ମାଡ଼ିମାତ୍‍ତେ । ପଶୁ ନୁ ଆ ବଣ୍ଡବାବବାଦିଡ଼୍ ଗନ୍ଦକ ନିଡ଼୍‍ତାନ୍ କିସ୍ ସାୱୁଡ଼େତାଗ୍‍ ଜିୱେ ଏସିତ୍‍ତଡ଼୍ ।
REV 19:21 ମେଣ୍ଡେ ଅଡ଼୍‌ ସୈନ୍ୟଡ଼୍ ଗୁରାମ୍‍ ତାରି ଉଡାନଡ଼୍‍ ମକମ୍ ବନ୍ଦ ମାଡ଼ି କଡ଼୍‍ଗତେ ଡଲ୍‍ତଡ଼୍; ମାବ୍‍ତେ ପିଟେକି ମାନ୍‍ ଇଚ୍ଛାତେ ଅଡ଼୍‌ ଆୱୁଙ୍ଗ୍‍ ତିତ୍‍ତା ।
REV 20:1 ତାନ୍‍ପେର୍କେ ନାନେ ମେଣ୍ଡେ ଅର୍‍ତୁନ୍ ଦୂତଙ୍କ୍ ସ୍ୱର୍ଗତାଗାଙ୍କ୍ ଡିଗିୱାଦାନ୍ ନାଦ୍ ଉଡ଼୍‍ତାନ୍ । ତାନ୍‍ କାଇଦାଗ୍ ପାତାଲ୍‍ପୁର୍‍ତେ କୁଚ୍‍କାଇ ନୁ ୱେରଡ଼୍ ପୁଉତେ ଇକ୍‍ଲେମ୍‍ ମାତ୍‍ତେ ।
REV 20:2 ଅଣ୍ଡ୍‌‍ ଆଦ୍ ପ୍ରାଚିନ୍‍ ତାଡ଼ାମ୍, ଆଦ୍ ପିଶାସ୍ ଶୟ୍‍ତାନ୍‍ତିଙ୍କ୍ ପଇସ୍ ୱେରଡ଼୍ ନାର୍ଗେ ୱାଡ଼୍‍ଷା ଜାକ ଜଞ୍ଜିର୍‍ତାଗ୍ ତହଃସ୍‍ ମାତ୍‍ତଡ଼୍,
REV 20:3 ନୁ ପାତାଲ୍‍କୁଣ୍ଡତାଗ୍ ଏସ୍‍ସି ମିକା ଆଦିନ୍ ତଡ଼୍‌ ରୁଦ୍‌ ମାଡ଼୍‍ତଡ଼୍ ନୁ ଦ୍ୱାର୍ ଦେଶ୍‌ତିଙ୍କ୍ ମୁଦ୍ରିତ ମାଡ଼୍‍ତଡ଼୍ । ହଜାର୍‍ ୱାଡ଼୍‍ଷା କାଟେମ୍ ଆୟେ ମାନ୍‍ୱେ ଯାକ ଆଦ୍ ମେଣ୍ଡେ ବେନେ ବା ଦେଶ୍‌ତେ ନାରୁଡ଼୍‍ ପ୍ରତାରଣା ମାଡ଼େ ପାର୍‍ୱ । ସାରେ ୱାଡ଼୍‍ଷା ଆଦ୍‍କେ, ଆଦିଙ୍କ୍ ସୁଦୁଟ୍ ସମୟ ସେଙ୍ଗେ ମେଣ୍ଡନ୍‍ଦାମ୍ ୱିଡ଼୍‍ସିଦ୍‍ତଡ଼୍ ।
REV 20:4 ତାନ୍‍ପେର୍କେ ନାନେ ଉଡ଼୍‍ତାନ୍, ବେସ୍‌କ୍ ସିଂହାସନ୍‌କିନା ନୁ ଆୱିନାଗ୍ ମାନ୍ଦାନ୍ ନାରୁଡ଼୍‍କ୍ ବିଚାର୍ ମାଡ଼ାନ୍ ଆଦେଶ୍ ଇତ୍‍ତନ୍ । ମେଣ୍ଡେ ମିକା ନାନେ ଉଡ଼୍‍ତାନ୍, ବେସ୍‍କ୍‍ତଡ଼୍ ଡଲ୍‍ତେନଡ଼୍ ଆତ୍ମା । ଜିସୁ କେସ୍‍ମାନ୍ଦାନ୍ ସତ୍ ନୁ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ିମାନ୍ଦାନ୍ ଅଡ଼୍‌ ନାରୁଡ଼୍ ଡଲାନ୍ ଦଣ୍ଡତ୍‍ ସେଙ୍ଗେ । ଅଡ଼୍‌ ପଶୁ କିମ୍ୱା ଆ ମୁର୍ତି ପୁଜାମାଡ଼୍‍ମାତଡ଼୍, ନୁ ମୁଞ୍ଜ୍‌ଜିନାଗ୍‍ ନୁ କାଇଦାଗ୍‍ ପଶୁକିନ୍‍ ଚିନ୍ନେ ୱାଟମାତଡ଼୍ । କ୍ରିଷ୍ଟନ୍ ତଡ଼୍ ହଜାର୍‍ ଏଣ୍ଡ୍‍କ୍ ରାଜତ୍ୱ ମାଡ଼ାନ୍‍ ମାଇଦିଙ୍କ୍‍ ଅଣ୍ଡ୍‌ ପୁନେ ଜନମ୍‌ ଆସମାତଣ୍ଡ୍ ।
REV 20:5 ଆୱୁ ହଜାର୍‍ ଏଣ୍ଡ୍‍କ୍ ପୁରା ଆୟୁୱାକେ ବେନବା ଡ଼ଲତନଣ୍ଡ୍ ପୁନାର୍ରାଉତାନ୍‍ ପାଏମ୍‌ ଆୟମାତଣ୍ଡ୍ । ଇଦେ ମୁନେତ୍‍ ପୁନାର୍ରାଉତାନ୍‍ ।
REV 20:6 ଡ଼ଲତେ ନାରୁଡୁ ଇ ମୁନେତେ ପୁନାର୍ରାଉତାତେ ବେନଡ଼୍ ମିନ୍ଦେଡ଼୍‌ ଅଡ଼୍‌‍ ବେସର୍‍ ସାୟେ । ଅଡ଼୍‌‍ ବେସର୍‍ ୱେଡ଼େକେ; ଅଡ଼୍‌‍କ୍ ମେଣ୍ଡେ ମେଣ୍ଡଦାମ୍ ଡ଼ଲେୱେୟ୍ । ଅଡ଼୍‌‍ ଇଶ୍ୱର୍ ନୁ କ୍ରିଷ୍ଟନ୍ ଯାଜକ ଆସ୍ କ୍ରିଷ୍ଟନ୍ ତୋଡ୍ ଅଡ଼୍‌ ହଜାର୍‍ ଏଣ୍ଡ୍‍କ୍‍ ରାଜତ୍ୱ ମାଡିତଣ୍ଡ୍ ।
REV 20:7 ହଜାର୍‍ ଏଣ୍ଡ୍‍ ପୁରାଆତେ ପେର୍କେ ଶୟତାନ୍‍ତିଙ୍କି ଜଇଲ୍‍ଦାଗ୍‍ ମୁକ୍ତି ଇତଡ଼୍ ।
REV 20:8 କିନ୍ତୁ ଗୋଗ୍‍ ନୁ ମାଗୋଗ୍ ଇନା ପୃତିବିତେ ଏକାମ୍‍ ସାୱୁଡ଼େତେ ଉସ୍କ ଇନା ମାନ୍ଦାନ୍‍ ନାରୁଡ଼ୁକିଙ୍କ୍ ଲେକ୍ଆୟେଲେକେ ନାରୁକିଙ୍କି ସୟତାନ୍‍ ଗୁଡ଼ୁପିଇ ଯୁଦ୍‌ ମାଡ଼ିତେ ।
REV 20:9 ଅଡ଼୍‌ ପୃତିବିତେ ସାର୍ ୱିକି ଆଞ୍ଜ୍ ପ୍ରବୁବକ୍ତ ନାରୁଡ଼ାୱା ପଡ଼୍‍ୟେ ସାର୍‍ତାୱାଇଙ୍କି ନୁ ଇଶ୍ୱର୍ ସାୟେ ଟାଉନ୍‍ତିଙ୍କି ସୁଟ୍‍ଆର୍ରତଡ଼୍ । ମାତର୍‌ ସ୍ୱର୍ଗତେ କିସ୍ ରାଲି ଅଡ଼୍‌‍କିଂଙ୍କ୍ ଦସ୍ୱଂ ମାଡ଼ିତେ
REV 20:10 ବେନ୍‍ ଦାଡ୍‍ମିନି କିସ୍ ନିଡ଼୍‍ସମାତେ ଆ ଇକେତାଗେ ପଶୁ ନୁ ବଣ୍ଡବାବବାଦି ରାଲିମାତଡ଼୍, ଅଇରାନ୍‍ ମାଡ଼ାନ୍‍ ସୟତାନ୍ତିଙ୍କି ଆଗେ ରାପିତଡ଼୍ । ଆଗେ ନାକ୍ରାପାୟଲ୍‍ ସାର୍ ଦିନା ଦାଡ଼ମିନି କିସ୍‍ତାଗେ ଦଣ୍ଡପାଏମ୍ ଆତଡ୍ ।
REV 20:11 ତାନ୍‍ପେର୍କେ ନାନେ ଉଡ଼୍‍ତାନ୍, ଶ୍ୱେତବର୍ଣ୍ଣତେ ୱେରଡ଼୍ ବେଡ଼୍‍ୟାଦ୍ ସିଂହାସନ୍‌ ନୁ ତାନ୍ ପରୁ ୱେରଣ୍ଡ୍ ନାରୁଙ୍କ୍‍ ଉପବିଷ୍ଟ ମାନ୍ଦାନ୍‍ ଉଡ଼୍‍ତାନ୍‍ । ତାନ୍ ମୁନେଙ୍କ୍ ପୃତିବି ନୁ ମାବ୍ ମିର୍‍ତା ନୁ ଅଡ଼୍‌‍ ମେଣ୍ଡେ ଉଡ଼େପାର୍ୱଡ଼୍ ।
REV 20:12 ତାନ୍‍ପେର୍କେ ନାନେ ଉଡ଼୍‍ତାନ୍, ବାତ୍ ମହାନ୍, କି ନଗଣ୍ୟ ଡଲ୍‍ତେ ନାରୁଡ଼୍ ସାରେତଡ଼୍ ସିଂହାସନ୍‌ ମୁନେ ଦଣ୍ଡତେ ନଡ଼୍ । ବଇସାରେ କୁଲା ମାଡ଼୍‍ତଡ଼୍; ଆୱିନାଗାଙ୍କ୍ ଜୀୱେ ବଇ ପେଦେର୍‍ ୱେରଡ଼୍ ବଇ ମାତ୍‍ତେ । ଆଦ୍ ଜିୱେତ୍ ବଇ ତାଗ୍ ନାରୁଡ଼ଦ୍ କାମ୍‍ମାଡ଼୍‍ତେ ବିଷୟତେ ବାତ୍‍ସାରେ ଲେକାମାତ୍‍ତେ, ଆଦ୍ ଲେକାମ୍ ଅଡ଼୍‌‍କିଂଙ୍କ୍ ବିଚାର୍ ମାଡ଼୍‍ତଣ୍ଡ୍ ।
REV 20:13 ଆଦ୍‍ ସମୟତେ ସମୁଦ୍ର ଆଶେତେ ଡଲ୍‍ମାନ୍ଦାନ୍ ନାରୁଡ଼୍ ତେଦି ୱାତ୍‍ତଡ଼୍ । ପାତାଲ୍‍ ପୁରିତାଗ୍ ମାନ୍ଦାନ୍ ଡଲ୍‍ତେ ନଡ଼୍ ମିକା ପେଇସ୍‍ ୱାତ୍‍ତଡ଼୍ । ଅଡ଼୍‌‍ ସାରେତଡ଼୍ ନିଜେ ନିଜତ୍‍ ମାଡ଼୍‍ତେ କାମ୍‍ ଲେକାମ୍ ବିଚାର୍ ଆତ୍‍ତେ ।
REV 20:14 ତାନ୍‍ପେର୍କେ ଡଲାନାଦ୍ ନୁ ପାତାଲ ପୁରିତାଗ୍ କିସ୍‍ ସାୱୁଡ଼େତାଗ୍‍ ଏସାଙ୍କ୍ କେତ୍‍ତେ । ଇଦ୍‍ ଡଲାନାଦ୍ ଇତ୍କେ କିସ୍‍ତାଦ୍ ସାୱୁଡ଼େ, ଦ୍ୱିତିୟ ଡଲାନାଦ୍ ।
REV 20:15 ବେନଡ଼ାଉ ପେଦେରି ଜୀୱେ ବଇତାଗ୍ ଲେକାଇଲ୍‍ୱେ ମାତ୍‍ତେ, ଅଡ଼୍‌‍ମିକା ସାରେତଡ଼୍ କିସ୍‍ତେ ସାୱୁଡ଼େତାଗ୍‍ ରାଲ୍‍ତଡ଼୍ ।
REV 21:1 ମାଡ଼େଙ୍ଗ୍‍ ନାନେ ୱେରଡ଼୍ ପୁଃନେ ମାବ୍, ପୁଃନେ ମୟଲ୍ ନୁ ପୁଃନେ ପୃତିବି ଉଡ଼୍‍ତାନ୍ । ପାଃନ୍ତେ ମୟଲ୍‍, ମାନ୍ତେ ପୃତିବି ନୁ ସମୁଦ୍ର ସାରେ ଆତ୍‍ତା ।
REV 21:2 ମେଣ୍ଡେ ୱେରଡ଼୍‍ ପବିତ୍ର ନାର୍, ପୁଃନାଦ୍ ଯିରୁଶାଲେମ୍‍, ପିକିଡ଼୍‍ ଲେକାମ୍ ତିଆର୍ ଆସ୍ ସ୍ୱର୍ଗତାଗାଙ୍କ୍ ଇଶ୍ୱର୍‌ତାଗାଙ୍କ୍ ପୃତିବିତେ ପରୁଙ୍କ୍ ଡ଼ିଇଗ୍‍ନାଦ୍‍ ଉଡ଼୍‍ତାନ୍‍ ।
REV 21:3 ମେଣ୍ଡେ ସ୍ୱର୍ଗସିଂହାସନ୍‌ ତାଗାଙ୍କ୍ ୱେରଡ଼୍ ଗଟ୍ କେତ୍‍ତଡ଼୍, “ଇଞ୍ଜେ ଇଶ୍ୱର୍‌ତାଗ୍‍ ମାନ୍ଦାନ୍ ନାରୁଡ଼୍ ଲୋପେ; ଅଣ୍ଡ୍‌ ଅଡ଼୍‌‍ ତୋଡ଼୍ ମାନ୍‍ତନ୍ ନୁ ଅଡ଼୍‌‍ ତାନ୍ ନିଜେତେ ନାରୁଡ଼୍ ଆଦ୍‍ତଡ଼୍ । ଇଶ୍ୱର୍ ଅଡ଼୍‌‍ତଡ଼୍ ମାନ୍‍ତନ୍ ନୁ ଅଡ଼୍‌‍ ଇଶ୍ୱର୍‍ ଆଦ୍‍ତନ୍ ।
REV 21:4 ଅଣ୍ଡ୍‌ ଅଡ଼୍‌ କଣ୍ଡାନ୍ କାଣ୍ଡେଡ଼୍ ସାରେ ଉଞ୍ଜ୍‍ପିତ୍‍ତନ୍ । ଡଲାନାଦ୍, ଦୁକାମ୍‍, କେୟାନାଦ୍ ବା କଷ୍ଟ, ମେଣ୍ଡେ ନଦାନାଦ୍‍ ମାନ୍‍ନ । ସାରେ ପାଃନ୍ତେଲାଦ୍ ବିଷୟ ମାଇଆତ୍‍ତେ ।”
REV 21:5 ସିଂହାସନ୍‌ତାଗ୍ ମାନ୍ଦାନ୍ ନାରୁଣ୍ଡ୍ କେତ୍‍ତନ୍, ଅଁ, ନାନେ ସାରେ ବିଷୟ ପୁଃନେ ମାଡ଼୍‍ତାନ୍ । ମେଣ୍ଡେ ଅଣ୍ଡ୍‌ ନାକିଙ୍କ୍ ଆଦେଶ୍‍ ଇତ୍‍ତନ୍, “ଇୱୁସାରେ ଗଟି ଲେକି ୱାଟାଟ୍, ବାତ୍‍ତେଙ୍କ୍ଇତ୍କେ ଇଦ୍ ସତ୍ ନୁ ଆଶେତାୱୁ ।”
REV 21:6 ମେଣ୍ଡେ ମିକା ଅଣ୍ଡ୍‌‍ କେତ୍‍ତନ୍, “କାମ୍‍ ସାରେ ମାଇଆତ୍‍ତେ । ନାନେ ଆରାମ୍‍ ନୁ ମାଡ଼େଙ୍ଗ୍‍, ଆଦି ନୁ ଅନନ୍ତ । ବେନଙ୍କ୍ ଏର୍‍ ଉନ୍ଦେୱାକ୍‍କେ, ଜିୱେତ୍‍ ଲେକେତାଦ୍ ଏର୍ ନିର୍ଜର୍‍ତାଗାଙ୍କ୍ ନାନେ ଅଙ୍କ୍‌ ଆସାମ୍ ଉନ୍ଦାନଙ୍କ୍ ଇଦ୍‍ତାନ୍ ।
REV 21:7 ବେନ ବିଜୟ ଆସ୍‍ ମାନ୍‍ତନ୍, ନାନେ ଅଙ୍କ୍‌ ଇଦ୍‍ ପୁରସ୍କାର୍ ଇଦ୍‍ତାନ୍ ନାନେ ଅନ୍‌ ଇଶ୍ୱର୍ ଆଦ୍‍ତାନ୍ ନୁ ଅଣ୍ଡ୍‌ ନା ପିଲା ଆଦ୍‍ତନ୍ ।
REV 21:8 କିନ୍ତୁ କାପୁରୁଷ, ବିଶ୍ୱାସ୍‍ଗାତତନ୍, ବିକୃତଚିରିତ୍ର, ନରଅନ୍‌ତା, ଲମ୍ପର, ତନ୍ତ୍ରମନ୍ତ୍ରସାବକ୍, ମୁର୍ତ୍ତିକିଙ୍କ୍ ପୁଜାନଡ଼୍‍ ନୁ ମିତ୍ୟାବାଦିଡ଼୍ ଅଡ଼୍‌ ସାରେତଡ଼୍ ବ୍ରଷ୍ଟାଚାରିଡ଼୍‍ନଡ଼୍ ତିଆର୍‍ ଆସ୍‍ମାନ୍ଦାନ୍ ପଡ଼ିୟେ ଅଦୁତ୍, ଗନ୍ଦକ କିସ୍ ନିଡ଼୍‍ସ ମାନ୍ଦାନ୍ ସାୱୁଡ଼େ ଆଗେ ଅଡ଼୍‌ ତୃତିୟଦାମ୍ ଡଲିତଡ଼୍ ।”
REV 21:9 ସାତ୍‍ଟାନ୍ ଅନ୍‌ତିମ୍ ମଆମାରି ପୁର୍ଣ୍ଣ ସାତ୍‍ଟାନ୍ ପାତ୍ର ପଇସ୍‍ ମାନ୍ଦାନ୍ ସାତ୍‍ଟାନ୍ ଦୂତନ୍, ନାଗାଙ୍କ୍ ୱେରଣ୍ଡ୍ ନା ପାକେ ୱାସ୍‍ କେତ୍‍ତନ୍, “ୱାଡ଼ା, ମେଣ୍ଢାଗଲାନ୍ ମୁତେଙ୍କ୍ ନବବଦୁଙ୍କ୍ ଉଡ଼ିତିନ୍ ।”
REV 21:10 ପବିତ୍ର ଆତ୍ମା ନା ପର ୱାତ୍‍ତେ ମେଣ୍ଡେ ଦୂତ ନାକିଙ୍କ୍‍ ଅଣ୍ଡୟ୍‌‍ ବେଡ଼୍‍ୟାଦ୍‍ ମେଟେତାଗ୍‍ ଆତ୍‍ତଣ୍ଡ୍‍ । ଆଗାଙ୍କ୍‍ ନାନ୍‍ ଉଡ଼୍‍ତାନ୍‍, ଇଶ୍ୱର୍‌ତେ ଗାରେ କଞ୍ଚ୍‍ ସ୍ୱର୍ଗତାଗାଙ୍କ୍‍ ଡିଗି ମାନ୍ଦାନ୍‍ ଗୌରବ୍‍ ୱେସିନାଦ୍‍ ପବିତ୍ର ନଗରୀ ଯିରୁଶାଲେମ୍‍ ।
REV 21:11 ମେଣ୍ଡେ ଆଦ୍‍ ଅନ୍‌‍ ଗୌରବ୍‍ତେ ଜିକ୍‌ମିକ୍‌ ମାତ୍‍ତେ ଅଦିନ୍‌ ୱେସ୍‍ ଗାଟି ଦାମ୍‍ତୱୁ ମଣି ନୁ ପଡ଼୍‍ତେ ଦର୍ପନ ଲେକାମ୍‍ ।
REV 21:12 ଇଦିନ୍ ୱେରଡ଼୍ ବେଡ଼୍‍ୟାଦ୍ ପ୍ରାଚିର୍ ମାତ୍‍ତେ । ଆଦ୍ ପ୍ରାଚିର୍‍ତାଗ୍ ବାରହଜାର୍‌ ଦୂତନ୍ ଦ୍ୱାର୍ ମାତ୍‍ତା ବାରହଜାର୍‌ ଦ୍ୱାର୍ ମାତ୍‍ତା ନୁ ଆୱୁ ଦ୍ୱାର୍‍କିନ୍ ପରୁ ଇଶ୍ରାଏଲ୍‍ ଜାତିତେ ବାରହଜାର୍‌ ନାକିନ୍ ପେଦେରି ଲେକାମ୍‍ତେ ।
REV 21:13 ପ୍ରାଚିର୍‍ତେ ସାରେ ମୁଲାନ୍ ମୁଣ୍ଡ୍ ଆର୍ର୍ ମାତ୍‍ତା ପୂର୍ବତା ମୁଣ୍ଡ୍, ଦକ୍ଷିଣ୍‍ତ ମୁଣ୍ଡ୍, ଉତ୍ତର୍‍ତା ମୁଣ୍ଡ୍, ନୁ ପଶ୍ଚିମ୍‍ତା ମୁଣ୍ଡ୍ ।
REV 21:14 ନାର୍ଦେ ଇଦ୍ ପ୍ରାଚିର୍, ବାରଟାନ୍‍ ପ୍ରସ୍ତର୍‍ ବିତ୍ତିମୁଲକ୍‍ ପରୁ ମେକାଗଲାନ୍ ବାରଟାନ୍ ପ୍ରେରିତ ଶିଷ୍ୟନଡ଼୍ ପେଦେରି ଲେକା ଆସ୍‍ମାତ୍‍ତା ।
REV 21:15 ନା ତୋଡ଼୍ କେସମାନ୍ଦାନ୍ ଦୂତନ୍ କାଇଦାଗ୍ ନଗର୍‍କି, ପ୍ରାଚିର୍ ନୁ ଆର୍ରଙ୍ଗ୍‍ କଲ୍‍ସାନ୍ ସେଙ୍ଗେ ୱେରଡ଼୍ ସୁବର୍ଣ୍ଣ କଲ୍‍ସାନ୍ ଡୁଡ୍‌ ମାତ୍‍ତେ ।
REV 21:16 ନଗର୍‍କି ବର୍ଗକ୍ଷେତ୍ରଲେକାମ୍ ମାତ୍‍ତା; ଆୱିନ୍ ଲାଟି ନୁ ଆସର୍ ସାମାନ୍ ମାତ୍‍ତା । ଦୂତ ତାନ୍ କଲ୍‍ସାନ୍ ଡୁଡ୍‌ତେ ନଗର୍‍କିଙ୍କ୍ କଲ୍‍ସ୍‍ତନ୍ । ଆୱିନ୍ ଲାଟି ମାତ୍‍ତା ରେଣ୍ଡ୍ ହଜାର୍‍ ଚାର୍‍ଶହ କିଲୋମିଟର୍ ନୁ ଆସର୍ ନୁ ଡେଙ୍ଗ୍ ଲାଟିତଡ଼୍ ସାମାନ୍ ମାତ୍‍ତେ ।
REV 21:17 ଦୂତ ପ୍ରାଚିର୍‍ତେ ଡେଙ୍ଗ୍‍ ମିକା କଲ୍‍ସ୍‍ତନ୍ । ତାନାଦ୍ ୬୦ ମିଟର୍ ମାତ୍‍ତେ ।
REV 21:18 ସୁନା ରଙ୍ଗ୍‌ଦେ, ତିଆର୍‍ ଆସ୍‍ମାନ୍ଦାନ୍ ନୁ ନଗର୍ ତିଆର୍ ଆସ୍‍ମାତ୍‍ତେ, କାଞ୍ଚ୍‍ ଲେକାମ୍ ସ୍ୱଚ୍ଛ ବିରୁଦ୍ଦ ସ୍ୱବର୍ଣ୍ଣତେ ।
REV 21:19 ନାର୍‍ଦେ ସାରେପାକା ମାନ୍ଦାନ୍ ପ୍ରାଚିର୍‍ତେ ନେଟ୍ ତାଗେ ମଣିମାଣିକ୍ୟ ବର୍ତି ଆସ୍ ମାତ୍‍ତା, ପ୍ରତ୍‍ମ ଲାଇନ୍‍ତାଗ୍‍ ମାତ୍‍ତା ଇରା, ଦୂତିୟତାଗ୍‍ ଲାଇନ୍‍ତାଗ୍‍ ମାତ୍‍ତା ନିଲକାନ୍ତ ମଣି, ତୁତିୟ ଲାଇନ୍‍ତାଗ୍ ମାତ୍‍ତା ବୈଦୁର୍ଯ୍ୟ ମଣି, ଚତୁର୍ତ ଲାଇନ୍‍ତାଗ୍ ମାତ୍‍ତା ମକରତ ମଣି,
REV 21:20 ପଞ୍ଚମ୍ ଲାଇନ୍‍ତାଗ୍ ପୁଲକ ମଣି, ଷଷ୍ଠ ଲାଇନ୍‍ତାଗ୍ ମାଣିକ୍ୟ ସପ୍ତମ୍ ଲାଇନ୍‍ତାଗ୍ ପୁସ୍ପରାଗ ମଣି, ଅଷ୍ଟମ୍‍ ଲାଇନ୍‍ତାଗ୍‍ ପିରୋଜ ମଣି, ନବମ୍‍ ଲାଇନ୍‍ତାଗ୍‍ ଗୋମେଦକ ମଣି, ଦଶମ୍‍ ଲାଇନ୍‍ତାଗ୍‍ ଲଶୁନିୟ ମଣି, ଏଗାର୍ ଲାଇନ୍‍ତାଗ୍‍ ଇନ୍ଦ୍ର ମଣି ନୁ ବାର ଲାଇନ୍‍ତାଗ୍‍ ଲେକେତ୍ ଗାବ୍‍ ମାନ୍ଦାନ୍‍ ମଣି ମାତ୍‍ତା ।
REV 21:21 ବାରଟାନ୍‍ ଆର୍‍ଙ୍ଗ୍‍ ମାତ୍‍ତା, ବାରଟାନ୍‍ ମୁକ୍ତା ସାର୍ରେ ଆର୍‍ଙ୍ଗିନାଗ୍‍ ୱେର ମୁକ୍ତାତେ ତିଆର୍‍ ଆସ୍‍ମାତ୍‍ତା । ନାର୍‍ଦେ ବାଡ଼୍‍ୟେ ଆର୍ର୍ କଞ୍ଚ୍ ଇନା ସୁନାତଡ଼୍ ତିଆର୍‍ ଆସ୍‍ମାତ୍‍ତେ ।
REV 21:22 ନାନେ ନାର୍‍ଦାଗ୍‍ ବାତ୍‍ ମନ୍ଦିର୍ ବା ଉଡ଼ନ୍‍, କିନ୍ତୁ ସ୍ୱୟଂ ସାରେତିଙ୍କ୍‍ ଶକ୍ତିମାନ୍‍ ଇଶ୍ୱର୍ ନୁ ମେଣ୍ଢା ମେୟ୍‍ତାନଣ୍ଡ୍ ଅଦୁତଣ୍ଡ୍ ଆଦ୍‍ ନାର୍‍ଦେ ମନ୍ଦିର୍‍ ।
REV 21:23 ନାର୍‍ଦିଙ୍କ୍ ୱେସ୍ ମାଡ଼ାନଙ୍କ୍ ପଡ଼୍‍ଦ୍‍ ବା ନେଲ୍‍ଞ୍ଜ୍‍ ଇଲ୍‍ଲେ, ବାତେଙ୍କ୍ଇତ୍କେ ଇଶ୍ୱରତେ ଗୌରବ୍‍ତେ ୱେସ୍‍ ଆଦ୍‍ତେ ମେଣ୍ଡେ ମେଣ୍ଢାମେୟ୍‍ତାନଣ୍ଡ୍ ଆଦୁତଣ୍ଡ୍‍ ଆଦ୍ ନାର୍‍ଦେ କୁପି ।
REV 21:24 ପୃତିବି ସାର୍ରେ ନାରୁଡ଼୍ ଅନ୍‌ ୱେସ୍‍ତେ ଆଦାୱାଦା ଆଦ୍‍ତଡ଼୍ । ପୃତିବିତେ ରାଜାଲଡ଼୍ ଅଡ଼୍‌‍ୱାଦ୍ ଦନ୍‍ ସମ୍ପତି ଉତ୍ସର୍ଗ ମାଡ଼ିତଡ଼୍ ।
REV 21:25 ନାର୍‍ଦେ ଆର୍ରଙ୍ଗ୍ ସାର୍ରେୱେଲେ କୁଲାଆସ୍‍ମାନ୍ତେ । ଆୱିଙ୍କ୍ ବେସୁଙ୍କ୍‌ବା କେଃୱଡ଼୍; ବାତେଙ୍କ୍ଇତ୍‍କେ ଆଗେ ବେସୁଙ୍କ୍‍ ବା ଇକାଡ଼୍ ଆୟ ।
REV 21:26 ସାର୍ରେ ଦେଶ୍‌ତେ ସମ୍ପତି ନୁ ମଇମା ଇଦ୍‍ ନାର୍‍ଦାଗ୍ ୱାସ୍‍ ଗୁଡ଼ିତା ।
REV 21:27 ବାତ୍‍ ବା କାରାପ୍‍ ଜିନିସ୍‍ ଇଗେ ୱାଡ଼୍ । କାରାପ୍‍ କାମ୍‍ ମାଡ଼ାନ୍‍ ନାରୁଡ଼୍ ନୁ ମିଚ୍ କେତାନ୍ ନାରୁଡ଼୍ ଇଦ୍‍ ନାର୍‍ଦାଗ୍ ଅସାନଙ୍କ୍ ପାର୍‍ୱଡ଼୍ । ବେନଡ଼ାୱୁ ପେଦେର୍ ମେଣ୍ଢା ମେୟ୍‍ତାନଣ୍ଡ୍‍ତେ ଜିୱୁଣ୍ଡ୍ ବଇତାଗ୍‍ ଲେକା ଆସ୍‍ମାନ୍‍ତେ, ଅଡ଼୍‌ ଇଦ୍ ନାର୍‍ଦାଗ୍‍ ଅସାଙ୍କ୍‍ ପାର୍‍ଦ୍‍ତଡ଼୍ ।
REV 22:1 ପୁନେ ପୁର୍ତିବିତେ ଲେକେତ୍‍ ସାଡ୍‍ସାଡ଼ା ଜିୱେତ୍‍ ଏର୍‍ ଅଣ୍ଡ୍‌ ଇଲ୍‍କେ ଦୂତ ନ୍ନାକିଙ୍କ୍ ତତେ । ଇଦ୍ ଇଲିକେ ଇଶ୍ୱର୍ ନୁ ମେଣ୍ଢେ ମେୟ୍‍ତାନଣ୍ଡ୍ ସିଂହାସନ୍‌ ତାଗାଙ୍କ୍ ପେଇସ୍‍
REV 22:2 ନାର୍‍ଦେ ରାଜ୍‍ଆର୍ରଦାଲନ୍‍ ପେଇସ୍‍ ଆତ୍‍ତେ । ନଦୀତ୍‍ ରେଣ୍ଡପାକା ଜିୱେତେ ମାଡ଼େ ମାତ୍‍ତା । ଆୱୁ ଏଣ୍ଡ୍‍କିଙ୍କ୍‍ ସାରେ ନେଲ୍‍ଞ୍ଜ୍‍ଜିନ୍, ଇତ୍‍କେ ୱାଡ଼୍‍ଷାତିଙ୍କ୍ ୧୨ ନେଲ୍‍ଞ୍ଜ୍‍ କାୟା ଆଦିତା ନୁ ଇଦିନ୍ ଆକି ଆରୋଗ୍ୟ ଦାୟକ ।
REV 22:3 ଇଶ୍ୱର୍‌ତେ ଅବିଶାପତେ ପାତ୍ର ବାତେବା ବିଷୟ ଆଦ୍ ନଗର୍‍ତାଗେ ଉଡ଼ାନଙ୍କ୍ ଦର୍‍କ । ଇଶ୍ୱର ନୁ ମେଣ୍ଢାଗଲାନ୍‍ ସିଂହାସନ୍ ଆଦ୍ ନାର୍ଦାଗେ ମିକା ମାନ୍ତେ ନୁ ଆଗେ ତାନ୍ ସେବକ୍‍ନଡ଼୍ ତାନ୍ ଆରାଦନା ମାଡ଼ିତଡ଼୍ !
REV 22:4 ଅଡ଼୍‌‍ ତାନ୍ ମକମ୍ ଉଡ଼ିତଡ଼୍ ନୁ ଅଡ଼୍‌‍ ମୁଞ୍ଜିନାଗ୍ ଅଡ଼୍‌ ପେଦେରି ଲେକା ଆଦ୍‍ତେ ।
REV 22:5 ଆଗେ ମେଣ୍ଡେ ନାର୍କା ଆୟ ନୁ କୁପିୱେସ୍ ବା ପଡଦ୍‍ତେ ଏଦ୍ ଅଡ଼୍‌‍କିଂଙ୍କ୍ ମେଣ୍ଡେ ତାର୍‍ୱ, ବାତ୍‍ତେଙ୍କ୍ଇତ୍କେ ପ୍ରବୁ ଇଶ୍ୱର୍ ଅଡ଼୍‌‍ୱାଦ୍‌ ନାରୁଡ଼୍ ଆଦ୍‍ତଡ଼୍ ନୁ ଅଡ଼୍‌ ସାରେଦିନ୍‍ ରାଜାଲ୍‍ ଲେକେମ୍‍ ରାଜତ୍ୱ ମାଡ଼ିତଡ଼୍ ।
REV 22:6 ଦୂତ ନାକିଙ୍କ୍ କେତ୍‍ତେ, “ଇୱୁସାରେ ଗଟି ନିଜାମ୍ ନୁ ନିର୍ବରଯୋଗ୍ୟ । ବାତା ଚିଟ୍‍ପାଟ୍ ଗଟେମ୍ ଆଦ୍‍ତେ, ଆଦ୍ ତାନ୍ ସେବକ୍‍ନଡ଼୍‍କ୍ କେତାନ୍ ସେଙ୍ଗେ ବାବବାଦିଡ଼୍‍ ଆତ୍ମାତେ ଜ୍ଞାନ୍ ଇସମାନ୍ଦାନ୍ ଇଶ୍ୱର ତାନ୍ ଦୂତଙ୍କ୍ ରସ୍‍ମିନ୍ତେଣ୍ଡ୍ ।”
REV 22:7 ଜିସୁ କେତିତନ୍, “କେଞ୍ଜାଟ୍ ! ନାନେ ଜାପ୍‍ପେ ୱାଦ୍‍ତାନ୍ ! ବେନଡ଼୍ ଇଦ୍‍ ବଇତଡ଼୍ କେସ୍‍ମାନ୍ଦାନ୍ ବାବବାଣି ସେଙ୍ଗେ ମନ୍ ଇସ୍‍ମିକା ଗଟି କେଞ୍ଜିତନ୍, ଅଡ଼୍‌‍ ବାଗ୍ୟବାନ୍ !”
REV 22:8 ନାନେ ଯୋହନ୍‌, ଇୱୁସାରେ ବିଷୟ ନିଜେ କେଞ୍ଜ୍‍ତା‍ନ୍ ନୁ ଉଡ଼୍‍ତାନ୍ । ସାରେ କେଞ୍ଜି ନୁ ଉଡ଼ି ତେର୍‍ତେ ପେର୍କେ, ବେନ୍ ଦୂତ ନାୟାଗେ ୱାସ୍ କେତ୍‍ତା, ନାନେ ଆୱିନ୍ ଡେକାନ୍ ମଦଲ୍ ରାଲି ଆୱିଙ୍କ୍ ଆରାଦାନା ମାଡ଼ାଙ୍କ୍ ଆଞ୍ଜମାତ୍‍ତାନ୍ ।
REV 22:9 କିନ୍ତୁ ଆଦ୍ ନାକିଙ୍କ୍ କେତ୍‍ତେ, “ଆଦ୍‍ ଲେକାମ୍ ମାଡ଼ାମାଟ୍, ବାତେଙ୍କ୍‍ଇତ୍‍କେ ନାନେ ମିକା ମିଇ ଲେକାମ୍ ୱେରନ୍ । ମିୟାଦ୍ ବେନ୍ ବାବବାଦି ଦାଦାନଡ଼୍ ନୁ ବେନ୍‍ ସାରେତଡ଼୍ ଇଦ୍‍ ବଇ ଲେକାମ୍ ପାଲନ୍ ମାଡ଼ିତନ୍, ଅଡ଼୍‌‍ଲେକାମ୍ ନାନେ ମିକା ୱେରନ୍ ସେବକ୍‍ ଲେକାମ୍ । ଇଶ୍ୱର୍‌ତେ ଆରାଦାନା ମାଡ଼ାଟ୍ ।”
REV 22:10 ଅଣ୍ଡ୍‌ ମେଣ୍ଡେ ନାକିଙ୍କ୍ କେତ୍‍ତନ୍, “ହିଦ୍‍ ବଇକି ବବିଷ୍ୟଦ୍‍ ଗଟୀକି ମିଞ୍ଜିପି ନେହେମାଟ୍, ବାତ୍‍ତେଙ୍କ୍ଇତ୍କେ ଇୱ ଗାରେ ଗଟେମ୍‍ ଆଦାନାଦ୍ ସମୟ ଆରେ ୱାସ୍‍ଏଉଦୁତ୍ ।
REV 22:11 ଆଦିଙ୍କ୍ ଇୱୁ ଗଟି ପୁଞ୍ଜ୍ ବେନନାଦ୍ ବାତ୍‍ଇଚ୍ଛା, ଆଦ୍‍ ମାଡ଼ିଣ୍ଡ୍ । ଅଦର୍ମଚାରି ଯଦି ଇଚ୍ଛାମାଡ଼ିତଣ୍ଡ୍, ମେଣ୍ଡେ ଅଦର୍ମଚାରଣ ମାଡ଼ିଣ୍ଡ୍; ଅଶୁଚି ନାରୁଣ୍ଡ୍ ଅଶୁଚି ଆସ୍ ମାନୁଟ୍; କିନ୍ତୁ ବେନ ସାୟେତଣ୍ଡ୍‍, ଅଣ୍ଡ୍‌ ସତ୍‍କାମ୍‍ତେ ନିବିଷ୍ଟ ଆୟି; ବେନ ପବିତ୍ର, ଅଣ୍ଡ୍‌ ପବିତ୍ର ଆସ୍‍ ମାନିଣ୍ଡ୍ ।”
REV 22:12 ଜିସୁ କେତୁତନ୍, “କେଞ୍ଜାଟ୍ ! ନାନେ ଜାପେ ୱାଦୁତାନ୍ ! ସାରେତଡ଼୍‍କିଙ୍କ୍ ନିଜେ ନିଜେତ୍‍ କାମ୍‍ ଲେକାମ୍ ଶାସ୍ତି ଇଦାନ୍ ସେଙ୍ଗେ ନାନେ ପୁରସ୍କାର୍ ତାତିତାନ୍ ।
REV 22:13 ନାନେ ଆରାମ୍‌ ନୁ ମାଡ଼େଙ୍ଗ୍‍, ଆରାମ୍ ନୁ ଶେଷ ।”
REV 22:14 ବେନଡ଼୍ ନିଜେ ନିଜେତ୍‍ ଚକା ନର୍‍ସ୍ ୱେଡ଼୍‍ସ୍ପିତନ୍, ଅଡ଼୍‌‍ ବାଗ୍ୟବାନ୍ । ଜିୱେ ମାଡ଼େତ୍ କାୟା ତିନ୍ଦାନଙ୍କ୍ ନୁ ଦ୍ୱାର୍ ଇସ୍‍ ନାର୍‍ଦାଗ୍ ମିକା ଆଦାନଙ୍କ୍ ଅଡ଼ାଦ୍‌ ଅଦିକାର୍‌ ମିନ୍ଦେ ।
REV 22:15 କିନ୍ତୁ ବିକୃତଚରିତ୍ର, ତନ୍ତ୍ରମନ୍ତ୍ର ମାଡ଼ାନଣ୍ଡ୍, ନରହନ୍ତା, ମୁର୍ତ୍ତିପୂଜାକି, ମିତ୍ୟାବାଦିଡ଼୍, ପ୍ରାତାରକ୍ ସାରେ ବ୍ରାଷ୍ଟାଚାରୀଡ଼୍ ସାରେତଡ଼୍ ନାର୍‍ ବାଇଦେ ମାନ୍‍ତଡ଼୍ ।
REV 22:16 “ନାନେ ଜିସୁ । ମଣ୍ଡଲିନାଗେ ମିୟାଦ୍ ଉପକାର୍‍ତେ ଇୱୁସାରେ ବିଷୟ କେତାନ୍ ସେଙ୍ଗେ ନାୟାଦ୍ ଦୂତତିଙ୍କ୍ ରତ୍‍ତାନ୍ । ନାନେ ଦାଉଦ୍‍ତେ ବଂଶତନ୍ । ନାନେ ଆଦ୍ ୱିୟ୍‍ ଉକାମ୍ ।”
REV 22:17 ପବିତ୍ରଆତ୍ମା ନୁ ଆଦ୍ ନବବଦୂ କେତୁତନ୍, “ୱାଡ଼େ !” ଶ୍ରବଣକାରି ସାରେତଡ଼୍ ମିକା କେତିତଡ଼୍, “ୱାଡ଼େ !” ଯେ ବେନ ଉନ୍ଦେୱାତେନଣ୍ଡ୍‍, ଅଣ୍ଡ୍‌ ୱାଡ଼ିଣ୍ଡ୍ । ଜିୱେତେ ଏର୍ ଉନ୍ଦାନଙ୍କ୍ ବେନଙ୍କ୍ ଇଚ୍ଛାମାତ୍‍କେ, ଅଣ୍ଡ୍‌ ୱାସ୍ ବିନାମୁଲ୍ୟତେ ଆଦ୍ ଗ୍ରହନ୍‌ ମାଡ଼ିଣ୍ଡ୍ ।
REV 22:18 ନାନେ ଯୋହନ । ବେନଡ଼୍ ଇଦ୍‍ ବଇତେ ବବିଷ୍ୟତ୍‍ବାଣି ସାରେ କେଞ୍ଜିତଡ଼୍, ଅଡ଼୍‌‍କିଂଙ୍କ୍ ନାନେ ସତର୍କ ମାଡ଼ିଦୁତାନ୍, ଯଦି ଇଗେ ବେନ ବାତେ କାଇଲ୍‍କେ, ଆଲେକ୍ ଇଦ୍‍ ବଇତାଗ୍ ଲେକ୍‍ତାଉ ମଆମାରିତେ ଇଶ୍ୱର ଅଙ୍କ୍‌ ଶାସ୍ତି ଇଦ୍‍ତନ୍,
REV 22:19 ଇଦ୍ ବଇତେ ବବିଷ୍ୟଦ୍‍ବାଣି ତାଗାଙ୍କ୍ ବେନ ଯଦି ବାତେ ବୁଦ୍ ଇଦ୍‍ତନ୍, ଆଲେକ୍ ଇଶ୍ୱର୍ ଅଙ୍କ୍‌ ଇଦ୍ ବଇତାଗ୍ ଲେକ୍‍ତାୱୁ ଜିୱେତେ ମାଡ଼େତ୍ କାୟାନାଗାଙ୍କ୍ ନୁ ପବିତ୍ର ନାର୍‍ତାଗାଙ୍କ୍‍ ଗେଲ୍‍ସ୍ପିତନ୍ ।
REV 22:20 ବେନ ଇଦ୍ ସାରେ ବିଷୟତେ ସାକ୍ଷ୍ୟ ଇଦୁତନ୍, ଅଣ୍ଡ୍‌ କେତୁତନ୍, “ଇଦ୍ ନିଜାମ୍‍ । ନାନେ ଜାପେ ୱାଦୁତାନ୍ ।” ଆଲେକେ ଆୟି । ପ୍ରବୁ ଜିସୁ ୱାଡ଼ିଣ୍ଡ୍‍ !
REV 22:21 ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ସାରେତଡ଼୍ ଏର୍କେ ମାଡ଼ିଡ଼୍ । ଆମେନ୍‍ ।
