﻿ଥେସଲନିୟ ବିଶ୍ୱାସୀଡ଼୍ ଗାର୍ରେ ପାଉଲ୍‌ତେ ଦ୍ୱିତିୟ ଚିଟି.
1.
ନାନ୍ ପାଉଲ୍, ସିଲେ ନୁ ତୀମତି ମାନ୍‍ ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନାଗେ ମାନ୍ଦାନ୍ ଥେସଲନିକୀ ମଣ୍ଡଲି ପାକେ ଚିଟି ଲେକ୍‍ତାନ୍ । 
ବାବାଲ୍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଅନୁଗ୍ରହ ନୁ ଶାନ୍ତି ଇୱିଣ୍ଡ୍ । 
ହୋ ଦାଦାନଡ଼ି ନୁ ଏଲାସ୍କ୍‍ ! ମିଇ ସେଙ୍ଗେ ଇଶ୍ୱର୍‌ତିଙ୍କ୍ ସାରେଦାମ୍ ଦନ୍ୟବାଦ୍ ଇଦାନ୍ ମାୟାଦ୍‌ ଲେକାମ୍, ମେଣ୍ଡେ ଆଦ୍ ଲେକାମ୍, ବାତେଙ୍କ୍ ଇତ୍‍କେ ମିୟାଦ୍ ବିଶ୍ୱାସ୍ ଲେକାମ୍ ନାର୍‍ଗେ ଆସମିନ୍ଦେ, ନିଜେ ନିଜେତ୍ ଲୋପେ ମୀଡ଼୍ ସାରେତଡ଼୍ ୱେରନ୍ ୱେର୍‍ର ପ୍ରେମ ଅଦିକ୍‌ ଆସ୍‍ମିନ୍ଦେ । 
ଇଦ୍‍ଲେକାମ୍ ମୀଡ଼୍ ବେନ୍‍ସାରେ ତାଡ଼ନା ନୁ କଷ୍ଟ ଆଦୁତିଡ଼୍, ଆଗେକ୍ ମିୟାଦ୍ ସାରେ ନୁ ବିଶ୍ୱାସ୍‍ତେ ସେଙ୍ଗେ ମାମ୍‍ମେ ନିଜେତ୍ ଇଶ୍ୱର୍‌ତେ ମଣ୍ଡଲି ମୁନେ ମିଇ ବିଷୟ୍‍ତେ କେତିତମ୍ । 
ଇଶ୍ୱର୍‌ତେ ବେନ୍ ରାଜ୍ୟ ସେଙ୍ଗେ ମୀଡ଼୍ ଦୁଃକା‍ମ୍ ମାଡ଼ୁତିଡ଼୍, ଆଗେତ୍ ଯୋଗ୍ୟ ଇଞ୍ଜ୍ ଆତ୍‍ତାଙ୍କ୍ ସେଙ୍ଗେ ଇଦ୍ ତ ଇଶ୍ୱର୍‌ତେ ଟିକ୍ ବିଚାର୍‍ତେ ସାରେତାଦ୍‍ ପ୍ରମାନ୍ । 
ବାତେଏ ଟିକ୍ ଆଦ୍ ଇଶ୍ୱର୍ ମାଡ଼ିତନ୍ । ବେନ ନାରୁଡ଼୍ ମିକିଂଙ୍କ୍ କଷ୍ଟ ଇତ୍‍ତଡ଼୍ ଇଶ୍ୱର୍ ଅଡ଼୍‌‍କିଂଙ୍କ୍ କଷ୍ଟ ଇଦ୍‍ତନ୍ । 
ଇଶ୍ୱର୍ ମିୟାଦ୍ ତିପାଲ୍‍ତିଙ୍କ୍ ଶେଷ୍ ମାଡ଼ିତନ୍, ମାନ୍‍ ଗାଲା ସାନ୍ତନା ମାଡ଼ିତନ୍ । ଇଶ୍ୱର୍ ଇଦ୍ ପାଡ଼୍‍ୟି ସାଦନ୍ ମାଡ଼ିତନ୍, ବେସୁଟ୍‌ ପ୍ରବୁ ଜିସୁ ତାନ୍ ବେଡ଼୍‍ୟାଦ୍‍ ପରାକ୍ରାନ୍ତ ଦୂତନ୍ ତଡ଼୍ ସ୍ୱର୍ଗତାଗାଙ୍କ୍ ଡିଗିତଣ୍ଡ୍ । 
ବେନଡ଼୍ ଇଶ୍ୱର୍‌ତିଙ୍ଗ୍ ପୁନଡ଼୍ ନୁ ମାନ୍‍ ପ୍ରବୁ ଜିସୁନ୍ ସୁସମାଚାର୍ ମାନେମ୍‍ ଆୟ୍‍ୟଡ଼୍, ଅଡ଼୍‌‍କିଂଙ୍କ୍ ଅଣ୍ଡ୍‌ ନିଡ଼୍‍ତାନାଦ୍ କିସ୍‍ତାଗ୍ ଦଣ୍ଡ୍ ହିଦ୍‍ତନ୍ । 
ଆଦ୍ ନାରୁଡ଼୍ ପ୍ରବୁନ୍ ଶାନ୍ତି, ପରାକ୍ରମ୍ ନୁ ଗୌରବ୍ ତାଗାଙ୍କ୍ ୱେରେ ଆସ୍ ସାରେଦିନାତ୍ ସେଙ୍ଗେ ବିନଷ୍ଟ ଆଦ୍‍ତଡ଼୍ । 
ବାତେଙ୍କ୍ ଇତ୍‍କେ ଆଦ୍ ଦିନ୍ ଅନ୍‌ ତାନ୍ ନାରିଡ଼୍ ଡ଼ାଗାଙ୍କ୍ ନୁ ସାରେ ବିଶ୍ୱାସି ନଡ଼୍‍ଗାଙ୍କ୍ ସମ୍ମାନ୍ ନୁ ଗୌରବ୍ ପାଏମ୍ ଆଦ୍‍ତଡ଼୍ । ଇଡ଼୍‍ ଲୋପେ ମିଡ଼୍‍ଆନ୍‌ନ୍ତେ କାଇଲିତିଡ଼୍, ବାତେଙ୍କ୍ ଇତ୍‍କେ ମାମ୍ ମିକିଂଙ୍କ୍ ବେନ୍‍ସାରେ କାବୁର୍ ଇସ୍ ମାତ୍‍ତମ୍, ଆଗେ ମିଡ଼୍ ବିଶ୍ୱାସ୍ ମାଡ଼୍‍ତିଡ଼୍ । 
ମାନ୍‍ ଇଶ୍ୱର୍ ବେଦ୍‍ଲେକାମ୍ ମିକିଂଙ୍କ୍ ନିଜେ କାର୍‍ଙ୍ଗ୍‍ତଣ୍ଡ୍ ଯୋଗ୍ୟ ହିଞ୍ଜ ଗଣନା ମାଡ଼ିତନ୍, ମେଣ୍ଡେ ସାରେ ସାୟେ ପାଡ଼୍‍ୟି ନୁ ବିଶ୍ୱାସତେ ପାଡ଼୍‍ୟି ଶକ୍ତିତେ ସିଦ୍ଦ ମାଡ଼ିତନ୍, ଆଦିନ୍ ସେଙ୍ଗେ ମାମ୍‍ମେ ସାରେଦାମ୍ ମିଇ ସେଙ୍ଗେ ପ୍ରାର୍ତନା ମାଡ଼ୁତମ୍ । 
ଆଲେକେ, ମାନ୍‍ ଇଶ୍ୱର୍ ନୁ ପ୍ରବୁ ଜିସୁ କ୍ରିଷ୍ଟନ୍ ଅନୁଗ୍ରହ ତାଗାଙ୍କ୍, ନିମ୍‍ ମା ପ୍ରବୁ ଜିସୁନ୍ ପେଦେର୍‍ତିଙ୍କ୍ ଗୌରବ୍ ମାଡ଼୍‍କେ ନୁ ମିକିଂଙ୍କ୍ ଆନ୍‌‍ତେ ଅଣ୍ଡ୍‌ ଗୌରବ୍ ମାଡ଼ିତନ୍ । 
