MAT 1:1 ଇକା ଆଜିନାତ୍‍ ଜିସୁ କ୍ରିସ୍ତଦି ଡକ୍ରାଦାଦ୍‍ସିରି ଦର୍‌କା ଦାଡ଼ି; ୱାନ୍‌ ଦାଉଦଦି କୁଟୁମ୍‌ ମାର୍ହାନ୍‌, ଦାଉଦ ଅବ୍ରାହାମଦି କୁଟୁମ୍‌ ମାର୍ହାନ୍‌
MAT 1:2 ଅବ୍ରାହାମ ଇସ୍‍ହାକ୍‍ତି ବୁବାସି । ଇସ୍‌ହାକ୍‌ ଜାକୁବଦି ବୁବାସି । ଜାକୁବ, ଜିହୁଦା ନି ୱାନି ତଡ଼ାନ୍‌କା ବୁବାସି ।
MAT 1:3 ଜିହୁଦା, ପେରସ ନି ସେରହତି ବୁବାସି । ତାମର ୱାରି ଆଇସି । ପେରସ ହେବ୍ରଣତି ବୁବାସି । ହେବ୍ରଣ ଅରାମତି ବୁବାସି ।
MAT 1:4 ଅରାମ ଅମିନାଦବତି ବୁବାସି । ଅମିନାଦବ ନହସନତି ବୁବାସି । ନହସନ ସଲମନତି ବୁବାସି ।
MAT 1:5 ସଲମନ ବୟଜତି ବୁବାସି । ବୟଜକା ଆଇସି ଦରୁ ରାହବ୍, ବୟଜ ଅବେଦତି ବୁବାସି, ରୁତ ଅବେଦକା ଆଇସି ମାର୍ହାତ୍‌, ଅବେଦ ଜେସିଦି ବୁବାସି ।
MAT 1:6 ଜେସି ରାଜା ଦାଉଦତି ବୁବାସି । ଦାଉଦ ସଲମନ୍‍ତି ବୁବାସି, ସଲମନକା ଆଇସି ଆଗ୍‌ଡ଼ି ଉରିୟଦି ଆଡ଼ି ମାର୍ହାତ୍‌ ।
MAT 1:7 ସଲମନ୍‍ ରିୟବିୟାମତି ବୁବାସି । ରିୟବିୟାମ ଅବିୟଦି ବୁବାସି । ଅବିୟ ଆସାଦି ବୁବାସି ।
MAT 1:8 ଆସା ଜିହସାପଟତି ବୁବାସି । ଜିହସାପଟ ଜରାମତି ବୁବାସି । ଜରାମ ଉଜିୟଦି ବୁବାସି ।
MAT 1:9 ଉଜିୟ ଜତାମତି ବୁବାସି । ଜୋତମ ଆହାସତି ବୁବାସି । ଆହାସ ହିଜକିୟଦି ବୁବାସି ।
MAT 1:10 ହିଜକିୟ ମନସିଦି ବୁବାସି । ମନସି ଅମନତି ବୁବାସି । ଅମନ ଜସିୟଦି ବୁବାସି ।
MAT 1:11 ଜସିୟ, ଜିକନିୟ ମାରି ୱାନି ତଡ଼ାନ୍‌କା ବୁବାସି । ଇକା ଇସ୍ରାଏଲ୍‌ ଲୋକାଙ୍ଗ୍‌ ଗତିମୁରୁଲି କିଜି ବାବିଲନ୍‍ତୁ ଅନିୱାଲେରି ମାଟା ।
MAT 1:12 ୱାରିଙ୍ଗ୍‌ ବାବିଲନ୍‍ତୁ ଅତି ୱେନ୍‌କା । ଜିକନିୟଦି ମାରିସି ସଲ୍‌ଟିୟେଲ ଜନମ୍‍ଆତାନ୍‍ । ସଲ୍‌ଟିୟେଲ ଜିରୁବ୍‍ବାବେଲତିଙ୍ଗ୍‌ ଜନମ୍‌ କିତାନ୍‌,
MAT 1:13 ଜିରୁବ୍‍ବାବେଲ ଅବିହୁଦକା ବୁବାସି । ଅବିହୁଦ ଏଲିୟାକିମ୍‍କା ବୁବାସି । ଏଲିୟାକିମ୍‍ ଅଜ୍‍ଜୁରକା ବୁବାସି ।
MAT 1:14 ଅଜ୍‍ଜୁର ସାଦକକା ବୁବାସି । ସାଦକ ଆକିମ୍‍ତି ବୁବାସି । ଆକିମ୍‍ ଏଲିହୁଦକା ବୁବାସି ।
MAT 1:15 ଏଲିହୁଦ ଏଲାଜାରକା ବୁବାସି । ଏଲାଜାର ମତାନକା ବୁବାସି । ମତାନ ଜାକୁବରି ବୁବାସି ।
MAT 1:16 ଜାକୁବ ଜସେପ୍‌କା ବୁବାସି । ଜୋସେପ୍‌ ମରିୟମ୍‌ତି କନ୍‍ଲି । ମରିୟମତି ପଟାଦାନ୍‍ ଜିସୁ ଜନମ୍‍ଆତାନ୍‍ । ଜିସୁ ମସିହ ଦର୍‌ତାନ୍‌ ବା ୱେଙ୍ଗିଁନାନ୍‍ ।
MAT 1:17 ଇୟାୱାଜା ଅବ୍ରାହାମତି ମାଣାନ୍‌ ଦାଉଦଦି ସାନ୍ଦି ଆତାର୍‌ ପୁରା ସଉଦ କୁଟୁମ୍‌ । ଦାଉଦ ମାଣାନ୍‌ ଗତିମୁରୁଲି ୱାଜା ବାବିଲନ୍‍ତୁ ଇନି ସାନ୍ଦି ସଉଦ କୁଟୁମ୍‌, ମାରି ଗତିମୁରୁଲି ୱାଜା ବାବିଲନ୍‍ତୁ ଇତି ୱେନ୍‍କାରାନ୍‍ କ୍ରିସ୍ତଦି ଜନମ୍‌ ସାନ୍ଦି ଆତାର୍‌ ସଉଦ କୁଟୁମ୍‌ ।
MAT 1:18 ଇକା ଆଜିନାତ୍‍ ଜିସୁ କ୍ରିସ୍ତଦି ଜନମ୍‌ତି ମାଟା ଜିସୁ କ୍ରିସ୍ତଦି ଆଇସି ମାର୍ହାତ୍‌ ମରିୟମ୍‌ । ଜିସୁକ୍ରିସ୍ତଦି ଜନମ୍‌ ଇୟାୱାଜା ଆତାମାର୍ହାତ୍‍ । ମରିୟମ୍‍ତିଙ୍ଗ୍‍ ଜୋସେପ୍‌ତି ୱାଲେ ପେଡ଼ିଆଦେଙ୍ଗ୍‍ ଲସ୍‌ତା ମାର୍ହାର୍‌ । ମାତର୍‌ ପେଡ଼ିଆନି ଆଗ୍‌ଡ଼ି ୱେଙ୍ଗିଁତାତ୍‌ ଜେ ମରିୟମ୍‌ ପବିତ୍ର ଆତ୍ମାଦାନ୍‌ ଗାର୍ବୁଦୁତେବାତାମାନାତ୍‍ ।
MAT 1:19 ଜୋସେପ୍‌ ୱିଜୁୱାଲେ ଦାର୍ମୁଦି ପାଣିକିନିକାନ୍‍ ମାର୍‌ର୍ହାନ୍‍ । ମାରି ମରିୟମତିଙ୍ଗ୍‌ ଲୋକା ଆଗ୍‌ଡ଼ି ନିଦା କିଦେଙ୍ଗ୍‌ ୱାନ୍‌ ବଦା କିଏଜିମାର୍ହାନ୍‍ । ୱାନ୍‌ ଲସାତିତାନେଙ୍ଗ୍‍ ରୁକ୍‍ତେଙ୍ଗ୍‍ ନେସ୍‌ଇୱାଜା ଉପାୟ୍‌କିତାନ୍‍ ।
MAT 1:20 ୱାନ୍‌ ଇକା ଅଡ଼୍‍ବିନିୱାଲେ ଅରେନ୍‍ ପ୍ରବୁଦି ଦୁତ୍‍ ୱାନିଙ୍ଗ୍‌ ଲବେରୁ ତରାଇଆଜି ଇର୍ହାତ୍‌, “ଏ ଦାଉଦ କୁଟୁମ୍‌ତି ଜୋସେପ୍‌, ମରିୟମ୍‌ତିଙ୍ଗ୍‍ ନିଜେଦି ଆଡ଼ି ୱାଜା ଇଡ୍‌ଦେଙ୍ଗ୍‌ ତିଲାମା, ଇରିଙ୍ଗ୍‌ ପବିତ୍ର ଆତ୍ମାଦାନ୍‌ ୱାଦ୍‌ ପଟାଦୁ ଆତାମାନାତ୍‌ ।
MAT 1:21 ତାନିଙ୍ଗ୍‌ ଅରେନ୍‍ କଡ଼ ଜନମ୍‌ ଆନାନ୍‌ । ମିର୍‌ ୱାନି ଦରୁ ଜିସୁ ଇଡ୍‍ନିଦେର୍‍ । ଇରିଙ୍ଗ୍‌ ୱାନ୍‌ ୱାନି ଲୋକାଙ୍ଗ୍‌ ୱାରି ପାପ୍‌ତାନ୍‌ ରକିୟା କିନାନ୍‌ ।”
MAT 1:22 ବବିସତ୍‍ବକ୍ତାଦି ମାଣାନ୍‌ ପ୍ରବୁ ଆମାକା ଇର୍ହାମାର୍ହାନ୍‌, ଆକା ସତ୍‍ଆଦେଙ୍ଗ୍‍ ଇକା ଗଟାତାତ୍‌ ।
MAT 1:23 ଆୟା ବବିସତ୍‍ ମାଟା ଆଜିନାତ୍‍, “ଅରେତ୍‌ ରିପା ଗାର୍ବୁଦୁ ତେବାଜି କଡ଼ଦିଙ୍ଗ୍‌ ଜନମ୍‍ସିନାତ୍‍ । ମାରି ଲୋକୁ ଆୟା କଡ଼ଦିଙ୍ଗ୍‌ ଇମାନୁଏଲ ଦର୍‌ତାନ୍‌ ୱେଙ୍ଗ୍‌ଁନାନ୍‌ । ଇମାନୁଏଲଦି ଅର୍ତ ମାପୁରୁ ମା ୱାଲେ ମାନାନ୍‌ ।”
MAT 1:24 ଜୋସେପ୍‌ ସୁସ୍‍କାଣ୍‍କାଣ୍‍ ନିଙ୍ଗିଁଜି ପ୍ରବୁଦି ଦୁତ୍‍ ୱାନିଙ୍ଗ୍‌ ଏଣ୍ତେସ୍‌ ଆଦେସ୍‌ ସିତାତ୍‌, ଆୟାୱାଜା କିତାନ୍‌ । ୱାନ୍‌ ମରିୟମ୍‍ତିଙ୍ଗ୍‍ ପେଡ଼ିଆନାନ୍‌ ।
MAT 1:25 ମାତର୍‌ ମରିୟମ୍‌ କଡ଼ଦିଙ୍ଗ୍‌ ଜନମ୍‌ କିଇ ସାନ୍ଦି ୱାନ୍‌ ତାନି ୱାଲେ ଡର୍‍ଏତାମାର୍ହାନ୍‍ । ମାରି ଜୋସେପ୍‌ ଆୟା କଡ଼ଦି ଦରୁ ଜିସୁ ଇଟ୍‌ତାନ୍‌ ।
MAT 2:1 ହେରୋଦ୍‍ ରାଜା ସାସନ୍‍ ସମୟତୁ ଜିହୁଦା ରାଜିଦି ବେତଲିହିମ୍‍ ଗାଡ଼୍‌ତୁ ଜିସୁ ଜନମ୍‍ଆତାନ୍‍ । ତେନି ସାଣେକ୍‌ ସମୟ୍ ୱେନ୍‌କା ପୁର୍ବ ଦେସ୍‌ତି ଏସଲୋକ୍‌ ସୁକେଙ୍ଗ୍‍ ସୁଡ଼୍‌ଜି ୱେର୍‍ନିକାର୍‍ ଜିରୁସାଲମ୍‌ତୁ ୱାତାର୍‌ ।
MAT 2:2 ମାରି ୱାର୍‌ ୱେନ୍‌ବାତାର୍‌, “ଏମେ କଡ଼ ଜିହୁଦିର୍‌ ରାଜା ଆଦେଙ୍ଗ୍‌ ଜନମ୍‍ ଆତାମାନାନ୍‌, ୱାନ୍‌ ଏମେ ? ପୁର୍ବ ଦେସ୍‌ତୁ ୱାନି ସୁକା ସୁଡ଼୍‌ଜି ୱାନିଙ୍ଗ୍‌ ମାଡ଼ିସ୍‍କିଦେଙ୍ଗ୍‍ ମାପ୍‌ ୱାତାମାନାପ୍‌ ।”
MAT 2:3 ୱାରି ଇୟା ମାଟା ୱେନ୍‌ଞ୍ଜି ରାଜା ହେରୋଦ ମାରି ଜିରୁସାଲାମ୍‍ତି ୱିଜେରେ ଲୋକୁ ନାଣ୍ତ କାବାଆତାର୍‌ ।
MAT 2:4 ହେରୋଦ ୱିଜେରେ ପେରି ଜାଜକର୍‌ ମାରି ଦାର୍ମୁଗୁରୁରିଙ୍ଗ୍‍ କୁକ୍‌ସି ୱାରିଙ୍ଗ୍‌ ୱେନ୍‌ବାତାନ୍‌, “ମସିହ ଆମାକାନ୍‍କି କ୍ରିସ୍ତ ଆମାନ୍‍ ଜନମ୍‌ ଆନାନ୍‌ ?”
MAT 2:5 ୱାର୍‌ ଇର୍ହାର୍‌, ଜିହୁଦା ରାଜିଦି ବେତଲିହିମ୍‍ତୁ । ଇୟା ବିସୟ୍‌ତାନ୍‌ ଅରେନ୍‍ ବାବବାଦି ରାସ୍‌ତାମାନାନ୍‌ ।
MAT 2:6 ଜିହୁଦା ରାଜିଦି ବେତଲିହିମ୍‍, ଜିହୁଦାଦି ପେରି ଗାଡ଼ାକା ଲୋଇ ନିନ୍‌ ଇସ୍ରିକିନ୍ଦା ସିଲେ, ନିବାଣ୍‍କୁ ଅରେନ୍‍ ନେତା ୱାନାନ୍‌, ଇରିଙ୍ଗ୍‌ ନା ଇସ୍ରାଏଲ୍‌ ଲୋକାଙ୍ଗ୍‌ ସାଲାକିନାନ୍‍ ।
MAT 2:7 ଇକା ୱେନ୍‌ଞ୍ଜି ହେରୋଦ ପୁର୍ବଦେସ୍‍ତାନ୍‍ ୱାତି ମାର୍‍ଇୱାରିଙ୍ଗ୍‍ ଉଣ୍ତ୍ରି ମାର୍‍କ୍‍ସି ୱାର୍‍ଗିନିସାନି କୁଟୁମ୍‍ତୁ କୁକିସ୍‍ କିଜି ଟିକ୍‌ ଆମା ସମୟ୍‍ତୁ ସୁକା ସତାମାର୍ହାନ୍‍, ୱାରି ମାଣ୍‌କୁ ୱେନ୍‌ବାତାନ୍‌ ।
MAT 2:8 ୱେନ୍‌କା ୱାରିଙ୍ଗ୍‌ ବେତଲିହିମ୍‍ ଗାଡ଼୍‍କୁ ପୋକ୍‌ସି ଇର୍ହାନ୍‌, “ସାନ୍‍ଡ୍ରୁ, ଆୟା କଡ଼ଦିଙ୍ଗ୍‌ ନେଗେନ୍‍କିଜି ପୟ୍‌ଦୁ ମାରି ୱାନିଙ୍ଗ୍‌ ପୟ୍‌ତିଙ୍ଗ୍‌ ନାଙ୍ଗିଁ ୱେର୍‍ତୁ, ନାନ୍ ବା ସଲ୍‌ସି ୱାନିଙ୍ଗ୍‌ ମାଡ଼ିସ୍‍କିନା ।”
MAT 2:9 ସୁକେଙ୍ଗ୍‍ ସୁଣିକାର୍‍ ରାଜାଦି ମାଟା ୱେନ୍‌ଜି ଆୟା ବାଡି ଡ଼ିସ୍‌ସି ମାରିଡ଼େସି ୱାରି ସନି ସାରିଦୁ ସନିୱାଲେ, ୱେଡ଼ା ସନି ତରିଟି ବାଦଡ଼୍‍ତୁ ସୁଡ଼ୁତିମାର୍‍ଇ ଆୟା ସୁକା ମାରିଡ଼େସି ତରାତାତ୍‍ ।
MAT 2:10 ସୁକାଦିଙ୍ଗ୍‍ ସୁଡ଼୍‌ଜି ୱାରି ଏସା ୱେଡ଼ିକା ଏସା ୱେଡ଼ିକା ଆଜି ନିଙ୍ଗିଁତାର୍‍ ୱାର୍‌ ୱାରି ଆଗ୍‌ଡ଼ି ଆଗ୍‌ଡ଼ି ବୁଲାଜି ସୁକା କଡ଼ ମାର୍‍ଇ ଇଲୁ ମୁସ୍‌କୁ ତେବାତାତ୍‌ ।
MAT 2:11 ୱାର୍‌ ଆୟା ଇଲୁ ଲୋଇ ଡ଼ୁଗିତାର୍‍ ମାରି କଡ଼ଦିଙ୍ଗ୍‌ ଆଇସି ମରିୟମ୍‌ତି ୱାଲେ ସୁଡ଼୍‌ଜି ମେଣ୍ତେଙ୍ଗ୍‍ଗଟ୍‍କିଜି ୱାନିଙ୍ଗ୍‌ ମାଡ଼ିସ୍‍କିତାର୍‍ ମାରି ଅର୍‌ସେ ତାତିମାର୍‍ଇ ବାଙ୍ଗାଁରାମ୍‍, କୁନ୍ଦୁରୁ ନି ବାସ୍‌ନା ନିୟୁ ସପ୍‍ସି ୱାନିଙ୍ଗ୍‌ ଦାନ୍‍ ସିତାର୍‍ ।
MAT 2:12 ଇୟା ୱେନ୍‌କା ୱାର୍‌ ଆଇ ଉଣ୍ତ୍ରି ସାରି ସିଜି ନିଜେଦି ଦେସ୍‌ତୁ ସର୍ହାର୍‍ । ଇରିଙ୍ଗ୍‌ ହେରୋଦଦି ଲାକ୍‌ତୁ ଡ଼େସି ସଲ୍‍ଇ ଉଣ୍ତିଙ୍ଗ୍‌ ମାପୁରୁ ୱାରିଙ୍ଗ୍‌ ଲବେରୁ ଆଦେସ୍‌ ସିତାମାର୍ହାନ୍‍ ।
MAT 2:13 ସୁକେଙ୍ଗ୍‍ସୁଣିକାର୍‍ ସର୍‌ଇ ୱେନ୍‌କା ମାପୁରୁଦି ଦୁତ୍‍ ଜୋସେପତିଙ୍ଗ୍‍ ଲବେରୁ ତରାଇଆଜି ଇର୍ହାତ୍‌, “ହେରୋଦ କଡ଼ଦିଙ୍ଗ୍‌ କାତ୍‍ତେଙ୍ଗ୍‍ ପୟ୍‌ନାନ୍‌ । ଆଦେଙ୍ଗ୍‌ ନିଙ୍ଗିଁଆ, କଡ଼ଦିଙ୍ଗ୍‌ ନି ୱାନି ଆଇସିଙ୍ଗ୍‍ ଅସି ମିସର୍‍ ଦେସ୍‌ତୁ ଉରୁକ୍‍ତୁ । ଆୟା ବାଡି ନାନ୍ ଡ଼ିସ୍‍ତେଙ୍ଗ୍‍ଁ ଇନ୍‌ଇ ସାନ୍ଦି ଆବେ ତେବାଦୁ ।”
MAT 2:14 ଜୋସେପ୍‌ ନିଙ୍ଗିଁଜି କଡ଼ ନି ୱାନି ଆଇସିଙ୍ଗ୍‍ ଅସି ଆୟାନାଡ଼ା ମିସର୍‍ତୁ ସନ୍‌ଡ଼୍ରେଙ୍ଗ୍‌ ସତାର୍‍ ।
MAT 2:15 ହେରୋଦଦି ସାନି ସାନ୍ଦି ଆବେ ୱାର୍‌ ତେବାତାର୍‌ । ଇୟାୱିଜୁ ଗଟାନି ମାଣ୍‌କୁ ବାବବାଦିଦି ମାଣାନ୍‌ ପ୍ରବୁଦି ମାଟା ସତ୍‌ ଆତାତ୍‌ । ୱାନ୍‌ ଇର୍‌ଆ ମାର୍ହାନ୍‍, “ନା ମାରିନ୍‍ତିଙ୍ଗ୍‍ ନାନ୍ ମିସର୍‍ ଦେସ୍‍ତାନ୍‍ କୁକ୍‌ତା ତାତା ।”
MAT 2:16 ପୁର୍ବ ଦେସ୍‍ତାନ୍‍ ୱାତିମାନି ସୁକେଙ୍ଗ୍‍ସୁଣିକାର୍‍ ୱାନିଙ୍ଗ୍‌ ବାଣ୍ତିସ୍‍କିଜି ସର୍ହାମାନାର୍‍ ନେସ୍‌ସି, ହେରୋଦ ରିସାଆତାନ୍‍ ମାରି ବେତଲିହିମ୍‍ ନି ତାନି ଲାକ୍‌ତୁରି ରାଜିଆଙ୍ଗାଁ ମାନି ଦୁଇ ବାର୍ସୁ ନି ତାନେଙ୍ଗ୍‌ ଉଣା ବାର୍‍ସେକ୍‍ତି ୱିଜେରେ କଡ଼ରିଙ୍ଗ୍‌ କାତ୍‍ତେଙ୍ଗ୍‍ ଇଜି ଆଦେସ୍‌ ସିତାନ୍‌ । ସୁକା ସତିମାର୍‍ଇ ୱେଡ଼ା ବିସୟ୍‌ତାନ୍‌ ସୁକେଙ୍ଗ୍‍ସୁଣିୱାରିମାଣ୍‍କୁ ୱାନ୍‌ ଆମାକା ୱେର୍‍ହାମାର୍ହାନ୍‍, ଆୟା ଇସାବ୍‌ତାନ୍‌ ୱାନ୍‌ କଡ଼ରି ବାର୍ସୁଦି ଜଗ୍‌ ତିଆର୍‌ କିତାମାର୍ହାନ୍‌ ।
MAT 2:17 ନାସ୍ତିୱାଲେ ଜିରିମିୟ ବାବବାଦି ମାଣାନ୍‌ ରାସ୍‍ତିମାର୍‍ଇ ଇୟା ବାକ୍ୟ ସତ୍‌ ଆତାତ୍‌ ।
MAT 2:18 “ରାମା ଗାଡ଼୍‌ତୁ ଆଉଲି ୱାଜିନାତ୍‍, ତାନି ଦୁକ୍‍ତୁ ଆଡ଼୍‍ବାନି ବଲ୍ । ରାହେଲ୍ ତାନି କଡ଼ରି ଉଣ୍ତିଙ୍ଗ୍‌ ଆଡ୍‌ବାଜିନାତ୍‌; ତାନେଙ୍ଗ୍‌ ଏଣ୍ତେସ୍‌ ନାନି ବାସାଦାନ୍ ସୁକ୍‌ ସିଦେଙ୍ଗ୍‍ ଆଏଜିନାତ୍‍, ଇରିଙ୍ଗ୍‌ ୱାର୍‌ ୱିଜେରେ ସାତାର୍‌ ।”
MAT 2:19 ହେରୋଦଦି ସାତି ୱେନ୍‌କା ପ୍ରବୁଦି ଦୁତ୍‍ ମିସର୍‍ତୁ ଜୋସେପତିଙ୍ଗ୍‍ ଲବେରୁ ତରାଇଆଜି ଇର୍ହାତ୍‌,
MAT 2:20 “ନିଙ୍ଗିଁଆ, କଡ଼ଦିଙ୍ଗ୍‌ ନି ୱାନି ଆଇସିଙ୍ଗ୍‍ ଆସ୍‌ସି ଇସ୍ରାଏଲ୍‌ ଦେସ୍‌ତୁ ଡ଼େସି ସାଙ୍ଗ୍‍ଆ । ଇରିଙ୍ଗ୍‌ ଏର୍‌ ୱାନି ଜିବନ୍‌ ଅତେଙ୍ଗ୍‍ ବଦାକିଜିମାର୍ହାର୍‍, ୱାର୍‌ ସାତାର୍‌ ।”
MAT 2:21 ଆବେଟ୍‌ ଜୋସେପ୍‌ ନିଙ୍ଗିଁଜି କଡ଼ ନି ମରିୟମ୍‍ତିଙ୍ଗ୍‍ ଆସ୍‌ସି ଇସ୍ରାଏଲ୍‌ ଦେସ୍‌ତୁ ଡ଼େସି ସର୍ହାନ୍‍ ।
MAT 2:22 ମାତର୍‌ ହେରୋଦଦି ୱେନ୍‌କା ୱାନି ମାରିସି ଆର୍କିଲାୟ, ଜିହୁଦାଦି ରାଜା ଆତାମାନାନ୍‌ ୱେନ୍‌ଞ୍ଜି ୱାନ୍‌ ଗାଲିଲି ସନ୍‌ଡ଼୍ରେଙ୍ଗ୍‌ ତିଲାତାର୍‌ ।
MAT 2:23 ମାତର୍‌ ଲବେରୁ ମାଟା ୱେନ୍‌ଞ୍ଜି ୱାନ୍‌ ଗାଲିଲି ରାଜିଦୁ ସର୍ହାନ୍‍, ମାରି ନାଜରିତ ଦର୍‌ତି ଗାଡ଼୍‌ତୁ ଇଲୁ କିଜି ତେବାତାନ୍‌ । ଆବେଟ୍‌ ବାବବାଦିରି ମାଣାନ୍‌ ରାସାତି ଉଣ୍ତ୍ରିବାକ୍ୟ ସତ୍‌ ଆତାତ୍‌ । “ୱାନ୍‌ ନାଜରିୟତିୟ ଇଜି ୱେଙ୍ଗ୍‍ଁନାନ୍‍ ।”
MAT 3:1 ଆୟା କାଡ଼ାଦୁ ଡୁବନ୍‌ ସିନି ଜୋହନ ଜିହୁଦା ଦେସ୍‌ତି ବାଲିବୁମିଦୁ ୱାଜି ପ୍ରଚାର୍‌ କିଦେଙ୍ଗ୍‍ ଆସ୍‌ତାନ୍‌ ।
MAT 3:2 ୱାନ୍‌ ଇର୍ହାନ୍‌, “ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତୁ, ଇରିଙ୍ଗ୍‌ ମାପୁରୁଦି ରାଜି ଇଗା ୱାଜିନାତ୍‍ ।”
MAT 3:3 ବାବବାଦି ଜିସାୟ ଏମେୱାନି ବିସୟ୍‌ତାନ୍‌ ଇର୍ହାମାର୍‌ର୍ହାନ୍‌, ଯୋହନ ନେ ଆୟା ଲୋକୁ । “ବାଲି ବୁମିଦୁ ଏନ୍‌ ଅରେନ୍‍ ଆଉଲି ଆଜି ଇଜିନାନ୍‌, ପ୍ରବୁଦି ଉଣ୍ତିଙ୍ଗ୍‌ ସାରି ରସ୍‍ଆ; ୱାନି ଉଣ୍ତିଙ୍ଗ୍‌ ଉଣ୍ତ୍ରି ସାଡ଼ୁକୁ ରାସ୍ତା ତିଆର୍‌ କିଦୁ ।”
MAT 3:4 ଯୋହନତି ଆଙ୍ଗିଁଙ୍ଗ୍‌ ଉଟ୍‌ ବୁର୍‍ବୁସାଦାନ୍‍ ତିଆର୍‌ ଆତାମାର୍ହାତ୍‍ । ୱାନ୍‌ ୱାନି ଜୁକିଦୁ ଉଣ୍ତ୍ରି ତଲ୍‍ତି ନାସ୍‍ ତରାଜିମାର୍ହାନ୍‍ । ମାଡ଼ିମାଉ ନି ଗରନ୍‌ ପୁକି ୱାନି କାଦି ମାର୍ହାତ୍‌ ।
MAT 3:5 ଜିରୁସାଲାମ୍‍ ଗାଡ଼୍‌ତାନ୍‍, ୱିଜୁ ଜିହୁଦା ରାଜିଦାନ୍‍ ମାରି ଜର୍ଦନ ଗାଡା ଲାକ୍‌ତୁରି ୱିଜୁ ନାର୍‍କାଣ୍‍ ଲୋକୁ ୱାନି ଲାକ୍‌ତୁ ୱାଜିମାର୍ହାର୍‍ ।
MAT 3:6 ୱାର୍‌ ନିଜେ ନିଜେଦି ପାପ୍‌ ୱେର୍‌ସି ଯୋହନତି ମାଣାନ୍‌ ଜର୍ଦନ ଗାଡାଦୁ ଡୁବନ୍‌ ଅସିମାର୍ହାର୍‍ ।
MAT 3:7 ଏସ୍ତିୱାଲେ ଯୋହନ ସୁଡ଼ୁତାନ୍‌ ନାଣ୍ତ ପାରୁସିର୍‌ ନି ସାଦୁକିର୍ ଡୁବନ୍‌ ଅତେଙ୍ଗ୍‌ ୱାଜିନାର୍‍; ୱାନ୍‌ ୱାରିଙ୍ଗ୍‌ ଇର୍ହାନ୍‌, “ଏ ବିସ୍‌ମାନି ସାରାସ୍‍ତି କୁଟୁମ୍‌ ମାପୁରୁ ମିଙ୍ଗିଁ ଏମେ ଦଣ୍ଡ୍‌ ସିଦେଙ୍ଗ୍‍ସଲ୍‍ସିନାନ୍‍, ଆବେଣାନ୍‍ ରକିୟା ପଇଦେଙ୍ଗ୍‍ ଆଟ୍‍ନିଦେର୍‍ଇଜି ଏନ୍‌ ମିଙ୍ଗିଁ ଇର୍ହାନ୍‌ ?
MAT 3:8 ଜଦି ସତ୍‌ତାନ୍‌ ପାପ୍‌ ପାଣିଦାନ୍‌ ମନ୍‍ ଡ଼େପ୍‍ତି ମାନିଦେର୍‌, ଇକା ମି ନେଗି ପାଣିଦାନ୍‌ ତର୍‌ତୁ ।
MAT 3:9 ଅବ୍ରାହାମ ମା ବୁବା, ମୋନ୍‌ତୁ ମୋନ୍‌ତୁ ବା ଇୟାୱାଜା ଇନ୍‌ମାଟ୍‌ । ନାନ୍ ମିଙ୍ଗିଁ ଇଜିନା ଜେ ମାପୁରୁ ଇୟା କାଲ୍‍କାଙ୍ଗ୍‍ ଅସି ଅବ୍ରାହାମତି କୁଟୁମ୍‌ ତିଆର୍‌କିଦେଙ୍ଗ୍‌ ଆଟ୍‍ନାନ୍‍ ।
MAT 3:10 ମାରାକା ମଦଲ୍‍କୁ କାତ୍‍ତେଙ୍ଗ୍‍ ଇଜି ପାଡ଼ିସି ତିଆର୍‍କିତା ଇଟ୍‌ତାମାନାର୍‌ । ଏମେ ମାରାତୁ ନେଗି ପଲ୍‌ ରେଏତ୍‌, ଆକା କାତାଜି ସିସୁଦୁପକାନାତ୍‍ ।
MAT 3:11 ମିର୍‌ ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତିମାନିଦେର୍‍, ଇକା ୱେର୍‌ତେଙ୍ଗ୍‌ ନାନ୍ ମିଙ୍ଗିଁ ଏର୍‌ତୁ ଡୁବନ୍‌ ସିଜିନା । ମାତର୍‌ ନା ୱେନ୍‌କା ଏନ୍‌ ୱାଜିନାନ୍‍, ୱାନ୍‌ ମିଙ୍ଗିଁ ପବିତ୍ରଆତ୍ମା ନି ସିସୁଦୁ ଡୁବନ୍‌ ସିନାନ୍‍ । ୱାନ୍‌ ନାବାଣାନ୍‍ ପେରିକାନ୍‌ ୱାନି ଜୁତେଙ୍ଗ୍‌ ପିଣ୍ତ୍‍ଦେଙ୍ଗ୍‍ ବା ନାନ୍ ଜଗ୍‌ ସିଲେ ।
MAT 3:12 ପାସିଦାନ୍‍ ପଟୁ ୱିଜୁ ଟୁଟ୍‍ତେଙ୍ଗ୍‍ ଇଜି ୱାନି କିୟୁଦୁ ସେରିଇ ମାନାତ୍‌ । ୱାନ୍‌ ପାସି ୱିଜୁ ୱାନି କଲ୍‍କିଆଙ୍ଗ୍‍ଁ ଇଡ୍‌ନାନ୍‌ ମାରି କୁଲିଙ୍ଗ୍‌ ପଟୁ ୱିଜୁ ଏସାଙ୍ଗ୍‍ ନାମ୍‍ଇ ସିସୁଦୁ ଆଡ଼ାକ୍‌ନା ପକ୍‍ନାନ୍‍ ।”
MAT 3:13 ନାସ୍ତିୱାଲେ ଜିସୁ ଗାଲିଲିଦାନ୍‌ ୱାଜି ଡୁବନ୍‌ ଅତେଙ୍ଗ୍‌ ଜର୍ଦନ ଗାଡାଦୁ ଯୋହନତି ଲାକ୍‌ତୁ ଇଗା ୱାତାନ୍‌ ।
MAT 3:14 ମାତର୍‌ ଯୋହନ ଜିସୁଙ୍ଗୁଁ ମାନାକିଜି ଇର୍ହାନ୍‌, “ନାନ୍ ଗାଦେ ନି ମାଣ୍‌କୁ ଡୁବନ୍‌ ଅନିମାଟା ନିନ୍‌ ଆରିଙ୍ଗ୍‍ବା ନା ଲାକ୍‌ତୁ ୱାତିମାନି ?”
MAT 3:15 ମାତର୍‌ ଜିସୁ ଇର୍ହାନ୍‌, “ଇଲେଇ ନା ମାଟାଦୁ ରାଜିଆଆ । ଇରିଙ୍ଗ୍‌ ଇୟାମାଣ୍‍କୁ ମାଡୁ ମାପୁରୁଦି ବଦାଦି ପାଣି କିଦେଙ୍ଗ୍‌ ଆଟ୍‍ନିକା ।” ଆବେଟ୍‌ ଯୋହନ ୱାନିଙ୍ଗ୍‌ ଡୁବନ୍‌ ସିଦେଙ୍ଗ୍‍ ରାଜିଆତାନ୍‍ ।
MAT 3:16 ଜିସୁ ଡୁବନ୍‌ ଅସି ଏର୍‍ତାନ୍‍ ନିଙ୍ଗିଁଜି ୱାତି ଦାପ୍ରେ ୱାନ୍‌ ସୁଡ଼ୁତାନ୍‌ ମୁସ୍‌କୁପୁର୍‌ ରେଆତାମାନାତ୍‍ ମାରି ପବିତ୍ର ଆତ୍ମା ପାର୍‍ୱାଦି ୱାଜା ରେତାଜି ୱାଜି ୱାନି ମୁସ୍‌କୁ ବାସ୍‌ତାତ୍‌ ।
MAT 3:17 ତାନିୱେନ୍‍କା ମୁସ୍‌କୁପୁର୍‌ତାନ୍‌ ବଲ୍ ୱାତାତ୍‍, “ଇକାନ୍‌ ନା ଲାଡ୍‍ତି ମାରିନ୍‌, ୱାନିମାନୁ ନାନ୍ ୱେଡ଼ିକା ।”
MAT 4:1 ଇୟା ୱେନ୍‌କା ପବିତ୍ରଆତ୍ମା ଜିସୁଙ୍ଗୁଁ ସିମ୍ରା ବାଡିଦୁ ଅତାତ୍‍ । ଆବେ ୱାନ୍‌ ସୟତାନ୍‍ତି ମାଣାନ୍‌ ପରିକା କିଆୟ୍‍ଆତାନ୍‍ ।
MAT 4:2 ସାଲିସ୍‍ ଦିନ୍‌ ନି ସାଲିସ୍‍ ନାଡ଼ା ଉପାସ୍‌ ତେବାତି ୱେନ୍‌କା ଜିସୁ ବାଙ୍ଗାଁ ସାତାନ୍ ।
MAT 4:3 ନାସ୍ତିୱାଲେ ସୟତାନ୍ ୱାନି ଲାକ୍‌ତୁ ୱାଜି ଇର୍ହାତ୍‌, “ନିନ୍‌ ଜଦି ମାପୁରୁଦି ମାରିନ୍‌, ଇୟା କାଲ୍‍କାଙ୍ଗ୍‍ ରୁଟିଙ୍ଗ୍‌ ଆଦେଙ୍ଗ୍‌ ଆଦେସ୍‌ ସିଆ ।”
MAT 4:4 ମାତର୍‌ ଜିସୁ ଇର୍ହାନ୍‌, “ଦାର୍ମୁସାସ୍ତ୍ରଦୁ ରାସାତାମାନାତ୍‌, ଲୋକୁ ଆବ୍‍କା ରୁଟିଦାନ୍‌ ଜିଏନ୍‍ । ମାତର୍‌ ମାପୁରୁଦି ୱେୟୁଦାନ୍‌ ସନି ୱିଜୁ ବାକ୍ୟ ୱାନି ଜିବନ୍‌ତି ଉଣ୍ତିଙ୍ଗ୍‌ ଦର୍‌କାର୍‌ ।”
MAT 4:5 ଇୟା ୱେନ୍‌କା ସୟତାନ୍ ଜିସୁଙ୍ଗୁଁ ପବିତ୍ର ଗାଡ଼୍‌ ଜିରୁସାଲାମ୍‍ତୁ ଅତାତ୍‍ । ଆବେ ୱାନିଙ୍ଗ୍‌ ମନ୍ଦିରତି ସାତ୍ ମୁସ୍‌କୁରି ଟିପୁଦୁ ନିଲ୍‌ପିସ୍‌କିଜି ୱାନିଙ୍ଗ୍‌ ୱେର୍‌ତାତ୍‌,
MAT 4:6 ନିନ୍‌ ଜଦି ମାପୁରୁଦି ମାରିସି, ଇବେଣ୍‌କୁ ଆଡ୍‍ଗି ଗାତ୍‍ଆ । ଦାର୍ମୁସାସ୍ତ୍ରଦୁ ରାସାତାମାନାତ୍‌, ମାପୁରୁ ନି ସାକା ଅତେଙ୍ଗ୍‌ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ଆଦେସ୍‌ ସିନାନ୍‍ । ୱାକ୍‍ ନିଙ୍ଗିଁ କିକାଣ୍‌କୁ ପେର୍‍ଜିଆସ୍‍ନେ । ଆବେଟ୍‌ ନି ପାଦାମ୍‍ଆଙ୍ଗ୍‍ଁ କାଲ୍‍କାଣି ସିନାଆଟ୍‍ଏତ୍‍ ।
MAT 4:7 ଜିସୁ ଇର୍ହାନ୍‌, “ଦାର୍ମୁସାସ୍ତ୍ରଦୁ ରାସାତାମାନାତ୍‌, ନିନ୍‌ ପ୍ରବୁ ନିଜେଦି ମାପୁରୁଙ୍ଗ୍‌ ପରିକା କିମା ।”
MAT 4:8 ୱେନ୍‌କା ସୟତାନ୍ ୱାନିଙ୍ଗ୍‌ ଉନ୍‍ଣ୍ତ୍ରି ନିର୍‍ଇ ଗରନ୍‍ତି ଟିପୁଦୁ ଅତାତ୍‍ ମାରି ୱାନିଙ୍ଗ୍‌ ସାରାଦୁନିଆଦି ୱିଜୁ ରାଜିଦି ଦନ୍‌ ସମ୍ପତ୍ତି ତର୍‌ସି ଇର୍ହାତ୍‌,
MAT 4:9 “ଜଦି ନିନ୍‌ ମେଣ୍ତେଙ୍ଗ୍‍ ଗଟ୍‌କିଜି ନାଙ୍ଗିଁ ମାଡ଼ିସ୍‌କିନି, ଇୟାୱିଜୁ ନିଙ୍ଗିଁ ନାନ୍ ସିନା ।”
MAT 4:10 ଜିସୁ ଇର୍ହାନ୍‌, “ଆକ ଆଆ ସୟତାନ୍ ! ଦାର୍ମୁସାସ୍ତ୍ରଦୁ ରାସାତାମାନାତ୍‌, କେବଲ୍‌ ନି ପ୍ରବୁ ମାପୁରୁଙ୍ଗ୍‍ଁ ମାଡ଼ିସ୍‌ କିଆ ମାରି ୱାନି ସେବା କିଆ ।”
MAT 4:11 ନାସ୍ତିୱାଲେ ସୟତାନ୍ ଜିସୁଙ୍ଗୁଁ ଡ଼ିସ୍‌ତା ସର୍ହାତ୍‌, ମୁସ୍‌କୁପୁର୍‌ତି ଦୁତ୍‌କୁ ୱାଜି ଜିସୁଦି ସେବାକିତେ ।
MAT 4:12 ଯୋହନତିଙ୍ଗ୍‌ ଜଇଲ୍‌ତୁ ଇଟ୍‌ତାମାନାର୍‌ ଇଜି ୱେନ୍‌ଞ୍ଜି ଜିସୁ ଗାଲିଲି ରାଜିଦୁ ସର୍ହାନ୍‍ ।
MAT 4:13 ମାତର୍‌ ନାଜରିତଦୁ ତେବାଏଣ୍ତା ସବୁଲୁନ ନି ନପ୍‍ତାଲି ରାଜିଦୁ ମାନି ଗାଲିଲି ଗାଡା ପାଡ଼ିଦୁ ମାନି କପର୍‍ନାହୁମ୍‍ତୁ ବାସାତାନ୍‍ ।
MAT 4:14 ଇୟାମାଣାନ୍‍ ଜିସାୟ ବାବବାଦିଦି ମାଟା ସତ୍‌ ଆତାତ୍‌, ୱାନ୍‌ ଇର୍ହାମାର୍‌ର୍ହାନ୍‌ ।
MAT 4:15 “ସବୁଲୁନ ଦେସ୍‌ ମାରି ନପ୍‍ତାଲି ଦେସ୍‌, ସାମ୍‌ଦୁର୍‌ ଲାକ୍‌ତୁରି, ନି ଜର୍ଦନ ଗାଡା ଆୟା ପାଡ଼ିଦି, ଅଣଜିହୁଦିରି ଗାଲିଲି !
MAT 4:16 ସିକାଟିଦି ନିଡ଼୍‍ଗାଦୁ ବାସାକିଜିମାନି ଲୋକୁ ଉନ୍‍ଣ୍ତ୍ରି ପେରି ଜାୟ୍‌ ସୁଣାର୍‍ ସାନି ସିକାଟିଦି ରାଜିଦୁ ମାନି ଲୋକା ମୁସ୍‌କୁ ଆୟା ଜାୟ୍‌ ତରାଇଆନାତ୍‍ ।”
MAT 4:17 ଆୟା ସମୟତାନ୍‍ ଜିସୁ ପ୍ରଚାର୍‌କିଜି ଇର୍ହାନ୍‌, “ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତୁ, ଇରିଙ୍ଗ୍‌ ମାପୁରୁଦି ରାଜି ଇଗା ୱାଜିନାତ୍‍ ।”
MAT 4:18 ଜିସୁ ଗାଲିଲିଦି ସାମ୍‌ଦୁର୍‌ ପାଡ଼ି ସିଜି ବୁଲାଜିମାନିୱାଲେ ସିମୋନ୍‌ ପିତର ମାରି ଆନ୍ଦ୍ରିୟ ଦର୍‌ତି ରିଏର୍‌ ମିନ୍‌କୁ ଆସ୍‍ନିୱାରିଙ୍ଗ୍‍ ବେଟ୍‌ବୁଡ଼ାତାନ୍‌ ! ଇୟା ରିଏର୍‌ ତଡ଼ାନ୍‌କୁ ଜାଡ଼ି ପକ୍‍ସି ଗାଡାଦୁ ମିନ୍‌କୁ ଆସ୍‍ସିମାର୍ହାର୍‍ ।
MAT 4:19 ଜିସୁ ୱାରିଙ୍ଗ୍‌ କୁକ୍‌ସି ଇର୍ହାନ୍‌, “ନା ୱାଲେ ରାଦୁ । ନାନ୍ ମିଙ୍ଗିଁ ଲୋକାଙ୍ଗ୍‌ ମାପୁରୁ ଲାକ୍‌ତୁ ତାନିକା ଅଜାକିନା ।”
MAT 4:20 ୱାର୍‌ ଆୟାଦାପ୍ରେ ୱାରି ଜାଡ଼ି ଡ଼ିସ୍‌ସି ଜିସୁୱାଲେ ୱାଲେ ସର୍ହାର୍‍ ।
MAT 4:21 ଜିସୁ ଅଡ଼ପ୍‍ ଆଗ୍‌ଡ଼ି ସଲ୍‌ସି ରିଏର୍‌ ତଡ଼ାନ୍‍ ଜାକୁବ ମାରି ଯୋହନ ଦର୍‌ତି ଜେବଦଦି ରିଏର୍‌ ମାରିସିରିଙ୍ଗ୍‌ ବେଟ୍‌ବୁଡ଼ାତାନ୍‌ । ଇୟା ତଡ଼୍‍ ରିଏର୍‌ ମାରି ୱାରି ବୁବାସି ଡଙ୍ଗାଁଦୁ ବାସ୍‌ସି ୱାରି ଜାଡ଼ି ମଦାକିଜିମାର୍ହାର୍‍ ।
MAT 4:22 ଜିସୁ ୱାରିଙ୍ଗ୍‌ ବା କୁକ୍‍ତାନ୍‍ ମାରି ୱାର୍‌ ଦାପେ ଦାପେ ଡଙ୍ଗାଁ ନି ବୁବାସିଙ୍ଗ୍‍ ଡ଼ିସ୍‌ସି ଜିସୁୱାଲେ ୱାଲେ ସର୍ହାର୍‍ ।
MAT 4:23 ଜିସୁ ୱିଜୁ ଗାଲିଲି ରାଜି ସୁଡ଼୍‌ଜି ୱିସ୍‍ସି ପାର୍‍ତନାକିନି ଇଲ୍‌କାଙ୍ଗ୍‌ ସିକିୟା ସିଦେଙ୍ଗ୍‍ଆସ୍‍ତାନ୍‍ । ମାପୁରୁଦି ରାଜିଦି ସୁସମାଚାର୍‌ ପ୍ରଚାର୍‌ କିତାନ୍‌ ମାରି ରକମ୍‌ ରକମ୍‌ତି ରଗ୍‌ ନି କାସ୍ଟୁଦୁକା ଆତି ଲୋକାଙ୍ଗ୍‌ ନେଗେନ୍‌କିତାନ୍‌ ।
MAT 4:24 ୱାନି ବିସୟ୍‌ତାନ୍‌ ସିରିଆ ଦେସ୍‌ ୱିଜୁ ତରିନ୍‌ ୱେଙ୍ଗିଁତା ସର୍ହାତ୍‍ ମାରି ଲୋକୁ ଦୁବାକାସ୍ତିୱାରିଙ୍ଗ୍‍, ମୁର୍ଚା ରୋଗ୍‌ ଆସ୍‍ତିକାର୍‍ ମାରି ପକିୟାଗାତ୍‍ ରଗ୍‌ ୱିଜୁ ରକମ୍‌ତି ରଗ୍‍ତୁ ମାନି ଲୋକାଙ୍ଗ୍‌ ମାରି ୱିସାମ୍‍ତୁ ମାନି ୱିଜୁ ଲୋକାଙ୍ଗ୍‌ ୱାନି ଲାକ୍‌ତୁ ତାତାର୍‌, ମାରି ୱାନ୍‌ ୱାରିଙ୍ଗ୍‌ ନେଗେନ୍‌କିତାନ୍‌ ।
MAT 4:25 ମାରି ଗାଲିଲି, ଦେକାପଲି ରାଜି, ଜିରୁସାଲାମ୍‍, ଜିହୁଦା ଦେସ୍‍ ମାରି ଜର୍ଦନ ଗାଡା ଆୟା ପାଡ଼ିଦାନ୍‍ ନାଣ୍ତ ଲୋକୁ ୱାଜି ୱାନି ୱାଲେ ସର୍ହାର୍‍ ।
MAT 5:1 ଜିସୁ ଲୋକୁ ଗହଲି ସୁଡ଼୍‌ଜି ଉନ୍‍ଣ୍ତ୍ରି ଗରନ୍‌ ମୁସ୍‌କୁ ସର୍ହା ବାସ୍‌ତାନ୍‌ । ସିସୁର୍‍ ୱାନି ସାରିବେଡ଼୍‍ତି ଉଣ୍ତାତାର୍‌ ।
MAT 5:2 ଲୋକାଙ୍ଗ୍‌ ଜିସୁ ସିକିୟା ସିଜି ଇର୍ହାନ୍‌ ।
MAT 5:3 ମାପୁରୁମାନୁ ଏମାକାର୍‌ ଆସା ଇଡ୍‌ନି, ଲୋକୁ ଦନ୍ୟ, ଇରିଙ୍ଗ୍‌ ମାପୁରୁଦି ରାଜି ୱାରିଦି ।
MAT 5:4 ଆଡ଼୍‍ବାଜି ମାନି ଲୋକୁ ଦନ୍ୟ, ଇରିଙ୍ଗ୍‌ ମାପୁରୁ ୱାରିଙ୍ଗ୍‌ ୱେଡ଼ିକା ସିନାନ୍‍ ।
MAT 5:5 ଦାର୍ମୁ ଲୋକୁ ଦନ୍ୟ, ଇରିଙ୍ଗ୍‌ ୱାର୍‌ ମାପୁରୁଦି ପାର୍‌ମାଣ୍‌ କିତିମାନି ବିସୟ୍‌ ଲାବ୍‍କିନାର୍‍ ।
MAT 5:6 ମାପୁରୁଦି ବଦାଦାନ୍ ପାଣି କିଦେଙ୍ଗ୍‌ ଏମେୱାରି ନାଣ୍ତ ଆସା, ୱାର୍‌ ଦନ୍ୟ, ଇରିଙ୍ଗ୍‌ ମାପୁରୁ ୱାରିଙ୍ଗ୍‌ ୱେଡ଼ିକାକିନାନ୍‍ ।
MAT 5:7 ଏମେକାର୍‌ ଆଇୱାରି ଉଣ୍ତିଙ୍ଗ୍‌ ଦୟା ତର୍‍ନାର୍‍ ୱାର୍‌ ଦନ୍ୟ, ଇରିଙ୍ଗ୍‌ ମାପୁରୁ ୱାରିଙ୍ଗ୍‌ ଦୟା କିନାନ୍‌ ।
MAT 5:8 ଏମେୱାରି ଜିବନ୍‌ ନେଗିକା ୱାର୍‌ ଦନ୍ୟ, ଇରିଙ୍ଗ୍‌ ୱାର୍‌ ମାପୁରୁଦି ଦର୍ସନ୍‍ ପଇନାର୍‌ ।
MAT 5:9 ଏମେକାର୍‌ ସାନ୍ତି କିଦେଙ୍ଗ୍‌ ଇଜି ପାଣିକିନାର୍‍ ୱାର୍‌ ଦନ୍ୟ, ଇରିଙ୍ଗ୍‌ ୱାର୍‌ ମାପୁରୁଦି କଡ଼ର୍‌ ଇଜି ୱେଙ୍ଗ୍‌ଁନାର୍‌ ।
MAT 5:10 ଏମେକାର୍‌ ମାପୁରୁଦି ବଦାଦାନ୍ ପାଣିକିଜି କାସ୍ଟୁ ପଇନାର୍‌, ୱାର୍‌ ଦନ୍ୟ, ଇରିଙ୍ଗ୍‌ ମୁସ୍‌କୁପୁର୍‌ ୱାରିଦି ।
MAT 5:11 ନାୱାଲେ ବୁଲାନିକାର୍‌ ଆତିମାନିଙ୍ଗ୍‌ ଲୋକୁ ଜଦି ମିଙ୍ଗିଁ ଅପମାନ୍‍ସିନାର୍‍, କାସ୍ଟୁ ସିନାର୍‍ ମାରି ମି ବିରଦ୍‌ତାନ୍‌ ତାଗ୍‌ଇ ବାଣ୍ତିସ୍‍ତି ମାଟେଙ୍ଗ୍‌ ଇନାର୍‌, ଆରିଙ୍ଗ୍‌ ମିର୍‌ ଦନ୍ୟ ।
MAT 5:12 ନାଣ୍ତ ୱେଡ଼ିକାଆଦୁ, ଇରିଙ୍ଗ୍‌ ମୁସ୍‌କୁପୁର୍‌ତୁ ମି ପୁରସ୍‌କାର୍‌ ନାଣ୍ତ; ଆୟାୱାଜାତ ୱାର୍‌ ମି ପୁର୍ବେଦି ଡକ୍ରାଦାଦାର୍‌ରି ବାବବାଦିରିଙ୍ଗ୍ କାସ୍ଟୁକିତାର୍‍ ।
MAT 5:13 ମିର୍‌ ୱିଜୁ ଲୋକା ଦୁନିଆଦି ସର୍‍ତି ୱାଜା । ମାତର୍‌ ସର୍‍ ଜଦି ସର୍‍ଦିସାୱି ଆରାକିନାତ୍‍, ଆରିଙ୍ଗ୍‌ ତାନିଙ୍ଗ୍‌ ମାରି ସର୍‍ଆଡ଼୍‍ନିୱାଜା କିଦେଙ୍ଗ୍‌ ଆଏତ୍‍ । ନାସ୍ତିୱାଲେ ଆକା ପୁରା ତାଗ୍‍ଇକାଆଜି ଆତ୍‌ରେ ପକାଇଆନାତ୍‍ । ଲୋକୁ ତାନିଙ୍ଗ୍‌ ମାଟ୍‍ସିସନାର୍‍ ।
MAT 5:14 ମିର୍‌ ସାରା ଦୁନିଆଦି ଜାୟ୍‌ ୱାଜା । ଏମେ ଗାଡ଼୍‍କି ଗରନ୍‌ ମୁସ୍‌କୁ ତିଆର୍‌ ଆନାମାନାତ୍‍, ଆକା ଏସାଙ୍ଗ୍‍ ମାର୍‍ଗିଜି ତେବାଦେଙ୍ଗ୍‍ ଆଟ୍‍ଏତ୍‍ ।
MAT 5:15 ଦିୱା କାସିସ୍‍କିଜି ଏନ୍‌ ଅଡି ଆଡ୍‍ଗି ପିଡ଼ିକ୍‍ସି ଇଡ୍‌ଏନ୍‌ । ତାନିଙ୍ଗ୍‌ ଦିୱା ଇଡ୍‌ନି ମୁସ୍‌କୁ ବାଡିଦୁ ଇଡ୍‌ନାନ୍‌ ମାରି ଆକା ଇଲୁଦୁ ମାନି ୱିଜେରିଙ୍ଗ୍‍ ଜାୟ୍‌ ସିନାତ୍‌ ।
MAT 5:16 ଆୟାୱାଜା ମି ଜାୟ୍‌ ଲାକ୍‌ତୁ ତରାଇଆପିତ୍‍ । ଆରିଙ୍ଗ୍‌ ମି ସତ୍‍ପାଣି ସୁଡ଼୍‌ଜି ୱାର୍‌ ମି ମୁସ୍‌କୁପୁର୍‌ତି ବୁବା ମାପୁରୁଦି ଦନ୍ୟବାଦ୍‌ କିନାର୍‍ ।
MAT 5:17 ଅଡ଼୍‍ବିମାଟ୍‍ ଜେ ନାନ୍ ମସା ସିତି ନିୟମ୍‌ ମାରି ବାବବାଦିରି ସିକିୟା ୱିଜୁ ଗୁସାକିଦେଙ୍ଗ୍‍ ୱାତାମାନା । ଆୟାୱିଜୁ ଗୁସାକିଦେଙ୍ଗ୍‍ ସିଲେ, ମାତର୍‌ ସତ୍‌ତାନ୍‌ ସତ୍‌ କିଦେଙ୍ଗ୍‌ ୱାତାମାନା ।
MAT 5:18 ମନ୍‌ତୁ ଇଡ୍‌ଦୁ, ବାଦଡ଼ ନି ଦୁନିଆ ତିର୍‍ଆଜି ତେବାନି ସାନ୍ଦି ନିୟମ୍‌ତି ଉନ୍‍ଣ୍ତ୍ରି ଇସ୍ରି ଠିକା ବା ନାମ୍‍ଏତ୍‍ । ୱିଜୁ ବିସୟ୍‌ତି ପୁରା ଆଇ ସାନ୍ଦି ଇକା ଗଟାଏତ୍‍ ।
MAT 5:19 ଆଦେଙ୍ଗ୍‌ ଏନ୍‌ଆପିନ୍‌ ନିୟମ୍‌ତି ୱିଜୁମାଣ୍‌କୁ ଇସ୍ରି ମାଟାଦିଙ୍ଗ୍‌ ଅମାନ୍ୟ କିନାନ୍ ମାରି ଆୟାୱାଜା କିଦେଙ୍ଗ୍‌ ଆଇୱାରିଙ୍ଗ୍‌ ସିକିୟା ସିନାନ୍‍, ୱାନ୍‌ ମୁସ୍‌କୁପୁର୍‌ତି ରାଜିଦୁ ୱିଜେରିମାଣ୍‌କୁ ଇସ୍ରିକାନ୍‌ ଇଜି ୱେଙ୍ଗ୍‌ଁନାନ୍‌ ।
MAT 5:20 ନାନ୍ ମିଙ୍ଗିଁ ଇଜିନା, ଦାର୍ମୁଗୁରୁ ମାରି ପାରୁସିର୍‌ ମାଣ୍‌କୁ ନାଣ୍ତ ବିସ୍‌ବାସ୍‌ତାନ୍‌ ମାପୁରୁଦି ବଦାଦି ପାଣି କିତିଙ୍ଗ୍‌ ମାତର୍‌ ମିର୍‌ ମୁସ୍‌କୁପୁର୍‌ତୁ ଡ଼ୁଗୁଦେଙ୍ଗ୍‍ ଆଟ୍‌ନିଦେର୍‌ ।
MAT 5:21 ମିର୍‌ ୱେର୍‌ଇମାନିଦେର୍‌; ପୁର୍ବେକାଡ଼ାଦାନ୍‍ ଲୋକାଙ୍ଗ୍‌ ଇର୍ହାମାନାର୍‌, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌ । ଏନ୍‌ ଆକା କିନାନ୍‌, ୱାନ୍‌ ବିସାର୍‍ଆନାନ୍‍ ।
MAT 5:22 ମାତର୍‌ ନାନ୍ ଇଜିନା, ଏନ୍‍ ଏମେ ତଡ଼ାନ୍‌ ମୁସ୍‌କୁ ରିସାଆନାନ୍‍, ୱାନ୍‌ ବା ବିସାର୍‍ଆନାନ୍‍ । ଏନ୍‌ ତଡ଼ାନ୍‌ତିଙ୍ଗ୍‌ ବାୟା ଇଜି କାଡ଼୍‍ନାନ୍‍, ୱାନ୍‌ ନାଣ୍ତ କୁଟୁମ୍‌ ଆଗ୍‌ଡ଼ି ଦଣ୍ଡ୍‌ ପଇନାନ୍‌ । ମାରି ଏନ୍‌ ତଡ଼ାନ୍‌ତିଙ୍ଗ୍‌ ପାଣିସିଇ ମୁର୍କୁ ଇଜି ଇନାନ୍‌, ୱାନ୍‌ ନରକ ସିସୁଦୁ ପକାନି ଦଣ୍ଡ୍‌ ମାନାତ୍‌ ।
MAT 5:23 ଆଦେଙ୍ଗ୍‌ ମାପୁରୁଦି ଉଦେସ୍‍ତାନ୍‍ ବେଦି ମୁସ୍‌କୁ ପୁଜାସିଦେଙ୍ଗ୍‍ ସନିୱାଲେ ଜଦି ମି ଏତ୍‌ ୱାନାତ୍‌ ଜେ ମି ଉଣ୍ତିଙ୍ଗ୍‌ ଆମା ତଡ଼ାନ୍‌ତି ମନ୍‌ତୁ ଏସ ଅସାନ୍ତିମାନାତ୍‍ ।
MAT 5:24 ବେଦି ଆଗ୍‌ଡ଼ି ଆୟା ପୁଜା ସିନିକା ଡ଼ିସ୍‌ସି ସିଜି ବେଗି ବେଗି ସାନ୍‍ଡ୍ରୁ, ତଡ଼ାନ୍‌ତି ୱାଲେ ଡ଼େସି ମିସାତି ୱେନ୍‌କା ଡ଼େସି ୱାଜି ମାପୁରୁଦିଙ୍ଗ୍‌ ଆକା ପୁଜା ସିଦୁ ।
MAT 5:25 ଜଦି ଏନ୍‌ ମି ବିରଦ୍‌ତାନ୍‌ ରାସ୍‌ସି କର୍ଟଦୁ ସନ୍‌ଡ଼୍ରେଙ୍ଗ୍‌ ଜାସେକିନାନ୍‍, କର୍ଟଦୁ ସନି ଆଗ୍‌ଡ଼ି ୱେଡ଼ା ମାନ୍‌ବୁ ମାନ୍‌ବୁ ୱାନି ୱାଲେ ନିଜେ ନିଜେମାନୁ ମିସାଦୁ । ଆଏତିଙ୍ଗ୍‍ କର୍ଟଦୁ ସରିଙ୍ଗ୍, ୱାନ୍‌ ମିଙ୍ଗିଁ ବିସାର୍‍କିନିୱାନି କିୟୁଦୁ ଆସ୍‍ପିସ୍‍କିନାନ୍‍ ମାରି ଆତିଙ୍ଗ୍‌ ନ୍ୟାୟ୍‌ କିନିକାନ୍‍ ମିଙ୍ଗିଁ ଜଇଲ୍‌ତୁ ଅତେଙ୍ଗ୍‍ ଇଜି ପଲିସ୍‍କା କିୟୁଦୁ ସର୍‍ପେ କିନାସିନାନ୍‌ ।
MAT 5:26 ନାନ୍ ମିଙ୍ଗିଁ ସତ୍‌ ଇଜିନା, ମି ମୁସ୍‌କୁ କିଆଇଆତିମାନି ୱାଡି ଡାବୁଙ୍ଗୁଁ ବା ଡ଼େସିସିଇ ସାନ୍ଦି ମିର୍‌ ଆବେଟ୍‌କୁ ସହସ ୱାଦେଙ୍ଗ୍‌ ଆଟ୍‍ଇଦେର୍‍ ।
MAT 5:27 ଦାରିପାଣି କିମାଟ୍‌, ଇୟା ଆଜ୍ଞା ମିର୍‌ ପୁର୍ବେକାଡ଼ାଦାନ୍‍ ୱେର୍‌ଇମାନିଦେର୍‌ ।
MAT 5:28 ମାତର୍‌ ଇଲେଇ ନାନ୍ ମିଙ୍ଗିଁ ଇଜିନା, ଜଦି ଏନ୍‌ ଆଇୱାନି ଆଇମାଦିଙ୍ଗ୍‍ ତାଗ୍‌ଇ କାଣ୍‌ଗାଦାନ୍‌ ସୁଣାନ୍‍, ୱାନ୍‌ ତାନି ୱାଲେ ମୋନ୍‌ତୁ ମୋନ୍‌ତୁ ଦାରିପାଣିକିତାମାନାନ୍‍ ।
MAT 5:29 ଜଦି ମି ଉଣେରି କାଣ୍‍ଗାଦି ଉଣ୍ତିଙ୍ଗ୍‌ ମିର୍‌ ପାପ୍‌ କିନିମାନିଦେର୍‍, ଆୟା କାଣ୍‍ଗାଦିଙ୍ଗ୍‍ ଉନ୍ଦ୍‍ଜ ପୋକ୍‌ତୁ । ମି ୱିଜୁ ମେନ୍ଧଲ୍‍ ନରକଦୁ ଆର୍‌ନି ବାଦ୍‌ଲୁ, ମେନ୍ଦଲ୍‌ତି ଉଣ୍ତ୍ରି ବାଗ୍ ନାସ୍ଟୁଆନିକା ନେଗେତ୍‌ ।
MAT 5:30 ଜଦି ମି ଡେବିରି କିୟୁ ମିଙ୍ଗିଁ ପାପ୍‍ତି ପାଣି କିବିସ୍‍କିଜିମାନାତ୍‍, ଆୟା କିୟୁଦିଙ୍ଗ୍‍ କୟଜ ପୋକ୍‌ତୁ । ମି ୱିଜୁ ମେନ୍ଧଲ୍‍ ନରକଦୁ ଆର୍‌ନି ବାଦ୍‌ଲୁ ଉଣ୍ତ୍ରି ବାଗ୍ ନାସ୍ଟୁଆନିକା ମି ଉଣ୍ତିଙ୍ଗ୍‌ ନେଗେତ୍‌ ।
MAT 5:31 ଜଦି ଏନ୍‌ ନିଜେଦି ଆଡ଼ିଙ୍ଗ୍‍ ଡ଼ିସ୍‍ତେଙ୍ଗ୍‍ଁ ବଦାକିନାନ୍‌, ୱାନ୍‌ ତାନିଙ୍ଗ୍‌ ରାସାତି ଇସାବ୍‌ତାନ୍‌ ଉଣ୍ତ୍ରି ଆଇମା ଡ଼ିସ୍‌ନି ଆକୁ ସିପିନ୍‍ ଇୟା ସିକିୟା ମିର୍‌ ଆଗ୍‍ଡ଼ିରାନ୍‍ ପୟ୍‌ତିମାନିଦେର୍‌ ।
MAT 5:32 ମାତର୍‌ ନାନ୍ ମିଙ୍ଗିଁ ଇଜିନା, ଦାରିପାଣି କିନିକା ଡ଼ିସ୍‌ତିଙ୍ଗ୍‌ ଆଇ ଇନି ପାଣିଦିଙ୍ଗ୍‌ ବାଦ୍‌ଲୁ ଅରେନ୍‍ ୱାନି ଆଡ଼ିସିଙ୍ଗ୍‍ ଡ଼ିସ୍‌ନି ଆକୁ ସିତିଙ୍ଗ୍‌, ୱାନ୍‌ ତାନିଙ୍ଗ୍‌ ଦାରିପାଣି କିନି ନିନ୍ଦାଦୁ ଦସ୍‌ କିଜିନାନ୍‍ ମାରି ଏମେ ମେମାରି ଆୟା ଆଇମାଦିଙ୍ଗ୍‍ ପେଡ଼ି ଆନାନ୍‌, ୱାନ୍‌ ବା ଦାରିପାଣି କିନାନ୍‌ ।
MAT 5:33 ପୁର୍ବେ କାଡ଼ାଦାନ୍‍ ଇୟା ସିକିୟା ୱେନ୍‌ଞ୍ଜି ୱାଜିନିଦେର୍‍, ପାର୍‌ମାଣ୍‌ ରୁକ୍‍ମାଟ୍‍ । ମାପୁରୁ ଆଗ୍‌ଡ଼ି ଏମେ ପାର୍‌ମାଣ୍‌ କିତିମାନିଦେର୍‌, ତାନିଙ୍ଗ୍‌ ପୁରାକିଦୁ ।
MAT 5:34 ମାତର୍‌ ନାନ୍ ମିଙ୍ଗିଁ ଇଜିନା, ପାର୍‌ମାଣ୍‌ କିନିୱାଲେ, ପାର୍‌ମାଣ୍‌ କିମାଟ୍‌ । ମୁସ୍‌କୁପୁର୍‌ତି ଦର୍‌ତାନ୍‌ କିମାଟ୍‌, ଇରିଙ୍ଗ୍‌ ଆକା ମାପୁରୁଦି ବାସ୍‌ନି ଗଦି ।
MAT 5:35 ଦୁନିଆଦି ଦର୍‌ତାନ୍‌ ପାର୍‌ମାଣ୍‌ କିମାଟ୍‌, ଇରିଙ୍ଗ୍‌ ଆକା ମାପୁରୁଦି କାଲ୍‌କୁ ଇଡ୍‌ନି ବାଡି । ଜିରୁସାଲାମ୍‍ ଗାଡ଼୍‌ ଦର୍‌ତାନ୍‌ ବା ପାର୍‌ମାଣ୍‌ କିମାଟ୍‌, ଇରିଙ୍ଗ୍‌ ଆକା ଆଜିନାତ୍‍ ରାଜାରିରାଜାଦି ଗାଡ଼୍‌ ।
MAT 5:36 ମି ତାଲାଦି ଆନାଦୁରିଆ କିମାଟ୍‌, ଇରିଙ୍ଗ୍‌ ଉନ୍‍ଣ୍ତ୍ରି କୁକୁଟି କାଡ଼ା ନି ଅଡ଼ିନିକା କିନି ସାକ୍ତି ମିଙ୍ଗିଁ ସିଲେତ୍‌ ।
MAT 5:37 ମିର୍‌ ପାର୍‌ମାଣ୍‌ ନିୟମ୍‌ କିଏଣ୍‍ଗା କେବଲ୍‌ “ହଁ” ମାଟା “ହଁ” ଆପିତ୍‌, “ସିଲେ” ମାଟା “ସିଲେଣ୍‌” ଆପିତ୍‌ । ତେନିମାଣାନ୍‍ ନାଣ୍ତ ମାଟା ଇଜି ପାର୍‌ମାଣ୍‌ କିନିକା ସୟତାନ୍‍ତି ପେରିସ୍‍କିନି ମାଣାନ୍‌ ୱାନାତ୍‌ ।
MAT 5:38 “କାଣ୍‌ଗା ବାଦ୍‌ଲୁ କାଣ୍‌ଗା,” ପାଲୁ ବାଦ୍‌ଲୁ ପାଲୁ । ଇୟା ବାଦ୍‌ଲୁ ଅନିମାଟା ମିର୍‌ ୱେର୍‌ଇମାନିଦେର୍‌ ।
MAT 5:39 ମାତର୍‌ ନାନ୍ ମିଙ୍ଗିଁ ଇଜିନା, ଏନ୍‌ ମି ଅନିସ୍ଟ କିତିଙ୍ଗ୍‌ ୱାନି ବାଦ୍‌ଲୁ ଅମାଟ୍‌ । ଜଦି ମି ଉଣେରି ବୁଗୁଲିଦୁ ଏନ୍‌ ସାପୁଡ଼ୁ ଡାକ୍‌ତାନ୍‌, ମାରି ଉନ୍‍ଣ୍ତ୍ରି ସାପୁଡ଼ୁ ଡାକ୍‌ତେଙ୍ଗ୍‍ଁ ମି ଡେବିରି ବୁଗୁଲି ବା ତର୍‌ସୋ ସିଦୁ ।
MAT 5:40 ଜଦି ଏନ୍‌ ମି ଆଙ୍ଗିଁ ଅତେଙ୍ଗ୍‍ ଇଜି ମି ବିରଦ୍‌ତାନ୍‌ ମାଟା ଇଜି ମିଙ୍ଗିଁ ବିସାର୍‌ ବାଡିଦୁ ଅନାନ୍‍, ୱାନିଙ୍ଗ୍‌ ମି ସୁଟେର୍‍ ବା ଦାନ୍‌ ସିଦୁ ।
MAT 5:41 ଜଦି ଏମେ ସୈନ୍ୟ ମିଙ୍ଗିଁ ୱାନି ବଜୁ ପିଣ୍ତ୍‍ଜ ୱାନି ୱାଲେ ଉଣ୍ତ୍ରି କିଲୋମିଟର ସନ୍‌ଡ଼୍ରେଙ୍ଗ୍‌ ଇଜି ଜାସେକିନାନ୍‍, ମିର୍‌ ଇନିକା ଅଡ଼୍‍ବିଏଣ୍ତା ୱାନି ୱାଲେ ରୁଣ୍ତି କିଲୋମିଟର ସାନ୍‍ଡ୍ରୁ ।
MAT 5:42 ଜଦି ଏନ୍‌ ମିଙ୍ଗିଁ ଇନି ଜିନିସ୍‌ ଲୋସ୍‍ନାନ୍‍, ମାନା କିଏନ୍‍ଣ୍ତା ୱାନିଙ୍ଗ୍‌ ସିଦୁ । ଏନ୍‌ ଇନିକା ଉଦାର୍‌ ଲୋସ୍‍ତିଙ୍ଗ୍‍, ୱାନିଙ୍ଗ୍‌ ଆକା ସିଦୁ ।
MAT 5:43 “ଜିବନ୍‍ନୋଦୁ ମି ସଙ୍ଗ୍‍ଁରିଙ୍ଗ୍‍, କାଡ଼୍‍ଦୁ ମି ସାତ୍ରୁରିଙ୍ଗ୍ ଇୟା ସିକିୟା ଆଗ୍‍ଡ଼ିରାନ୍‍ ୱେର୍‌ଇମାନିଦେର୍‌ ।”
MAT 5:44 ମାତର୍‌ ନାନ୍ ମିଙ୍ଗିଁ ଇଜିନା, ଜିବନ୍‍ନୋଦୁ ମି ସାତ୍ରୁରିଙ୍ଗ୍ । ଏମେକାର୍‌ ମିଙ୍ଗିଁ ତାଡ଼ନାକିନାର୍‍, ୱାରି ଉଣ୍ତିଙ୍ଗ୍‌ ପାର୍‌ତନା କିଦୁ ।
MAT 5:45 ଇୟାୱାଜା କିତିଙ୍ଗ୍‌ ମୁସ୍‌କୁପୁର୍‌ତି ବୁବା ମାପୁରୁଦି କଡ଼ର୍‌ ଇଜି ୱେଙ୍ଗିଁନିଦେର୍‍ । ଇରିଙ୍ଗ୍‌ ମାପୁରୁ ନେଗିୱାରି ନି ତାଗ୍‍ଇୱାରି ଲୋକାମୁସ୍‍କୁ ୱାନି ୱେଡ଼ା ଜାୟ୍‌ ସିନାନ୍‍, ମାରି ସତ୍‍ପାଣି ନି ତାଗ୍‌ଇପାଣି କିନି ୱିଜେରିଙ୍ଗ୍‍ ପିର୍‍ରୁ ସିନାନ୍‍ ।
MAT 5:46 କେବଲ୍‌ ମିଙ୍ଗିଁ ଜିବନ୍‍ନୋଜି ମାନି ଲୋକାଙ୍ଗ୍‌ ଜିବନ୍‍ନତିଙ୍ଗ୍‍, ମାପୁରୁ ଏନ୍ଦା ମିଙ୍ଗିଁ ପୁରସ୍‌କାର୍‌ ସିନାନ୍‍ ? ସିସ୍‍ଟୁ ଲୋସ୍‌ନିକାର୍‌ ବା ଆକା କିନାର୍‌ ।
MAT 5:47 ଜଦି କେବଲ୍‌ ମି ତଡ଼ାନ୍‌କାଙ୍ଗ୍‌ ୱାର୍‍ଗିନିଦେର୍‍, ଆରିଙ୍ଗ୍‌ ମିର୍‌ ନେ ଉପ୍‍କାପାଣି କିଜିନିଦେର୍‌ ? ଅବିସ୍‍ବାସ୍‍ରି ବା ଆକା କିନାର୍‌ ।
MAT 5:48 ମି ମୁସ୍‌କୁପୁର୍‌ତି ବୁବା ଏଣ୍ତେସ୍‌ ପବିତ୍ର, ମିର୍‌ ଆୟାୱାଜା ପବିତ୍ର ଆନିକାମାନାତ୍‌ ।
MAT 6:1 “ଲୋକାଙ୍ଗ୍‌ ତର୍‍ତେଙ୍ଗ୍‍ଇଜି ପୁଲାପୁଲିଦାନ୍‍ ନେଗିପାଣି କିମାଟ୍‌ । ଆକାକିତିଙ୍ଗ୍‍ ମୁସ୍‌କୁପୁର୍‌ତି ବୁବା ମାଣ୍‌କୁ ମିର୍‌ ପୁରସ୍‌କାର୍‌ ପୟ୍‌ଇଦେର୍‌ ।”
MAT 6:2 “ଅରେନ୍‍ କାକୁର୍ତି ଲୋକ୍‌ତିଙ୍ଗ୍‌ ଇନି ଦାନ୍‌ ସନିୱାଲେ ପୁଲାପୁଲି ଲୋକ୍‌ତି ୱାଜା ମୋରି ଉକୁସି ତର୍‍ଆଇଆମାଟ୍‍ । ୱାର୍‌ ପାର୍‍ତନାକିନି ଇଲ୍‌କାଙ୍ଗ୍‌ ନି ସାକ୍‌ଡ଼ି ମଜାୟ୍‍ ନିଜେଦି ଦାନ୍‍ଦାର୍ମୁଦି ପାଣି କିନାର୍‌ । ଲୋକାମାଣ୍‌କୁ ଦନ୍ୟବାଦ୍‌ ପୟ୍‌ଦେଙ୍ଗ୍‌ ୱାର୍‌ ଇକା କିନାର୍‌ । ନାନ୍ ସତେନେ ଇଜିନା ଜେ ୱାର୍‌ ଇୟାମାଣାନ୍‍ ୱାରି ପୟ୍‌ନିକା ପୁରାଦାନ୍‌ ପୟ୍‍ତାୱିସ୍‍ତାମାନାର୍‍ ।”
MAT 6:3 ମାତର୍‌ ମିର୍‌ ଅରେନ୍‍ କାକୁର୍ତି ଲୋକ୍‌ତିଙ୍ଗ୍‌ ସାକାକିନିୱାଲେ, ଇୟାୱାଜା କିଦୁ, ଏଣ୍ତେସ୍‌ ମି ଲାକ୍‌ତୁରି ସଙ୍ଗ୍‍ ବା ଇୟା ମାଟା ନେସ୍‍ତେଙ୍ଗ୍‍ ଆଟ୍‍ଏନ୍‍ ।
MAT 6:4 ଇୟାୱାଜା ମି ଇୟା ଦାନ୍‌ ମାର୍‍କ୍‍ସି ଆତିମାରିଙ୍ଗ୍‍ ବା ମି ୱିଜୁ ସୁଣି ବୁବା ମାର୍‍ଗିଜି ଆକା ସୁଡ଼୍‌ଜି ମିଙ୍ଗିଁ ପୁରସ୍‌କାର୍‌ ସିନାନ୍‍ ।
MAT 6:5 “ପାର୍‌ତନା କିନିୱାଲେ ପୁଲାପୁଲି ଦାର୍ମୁ ଲୋକା ୱାଜା ଆମାଟ୍‌ । ୱିଜେରେ ଏଣ୍ତେସ୍‌ ସୁଡ଼୍‍ଦେଙ୍ଗ୍‍ ଆଟ୍‍ନାର୍‍, ଆୟାଉଣ୍ତିଙ୍ଗ୍‌ ପାର୍‍ତନାକିନି ଇଲ୍‌କାଙ୍ଗ୍‌ ମାରି ରାସ୍ତା ଡେଣେଆଙ୍ଗ୍‍ ନିଲ୍‍ଜି ୱାର୍‌ ପାର୍‌ତନା କିଦେଙ୍ଗ୍‌ ବଦାକିନାର୍‍ । ନାନ୍ ମିଙ୍ଗିଁ ସତେନେ ଇଜିନା ଜେ ୱାର୍‌ ନିଜେ ନିଜେଦି କିତିମାନିପାଣିଦି ପୁରସ୍‌କାର୍‌ ପୟ୍‍ତାୱିସ୍‍ତାମାନାର୍‍ ।”
MAT 6:6 ମାତର୍‌ ଏସ୍ତିୱାଲେ ମିର୍‌ ପାର୍‌ତନା କିନିଦେର୍‍, ନିଜେଦି ବାକ୍‍ରା ଲୋଇ ସାନ୍‍ଡ୍ରୁ, ସେର୍‍ଲା କେର୍‍ତୁ ମାରି ମି ତରାଇଆଇ ବୁବେଙ୍ଗ୍‌ ପାର୍‌ତନା କିଦୁ । ମିର୍‌ ମାର୍‍କ୍‍ସି ଆମାକା କିନିଦେର୍‍, ୱିଜୁସୁଣି ମୁସ୍‌କୁପୁର୍‌ତି ବୁବା ଆକା ସୁଡ଼୍‌ଜି ମିଙ୍ଗିଁ ପୁରସ୍‌କାର୍‌ ସିନାନ୍‍ ।
MAT 6:7 “ମି ପାର୍‍ତନାଦୁ ଅବିସ୍‍ବାସ୍‍ରି ୱାଜା ନାଣ୍ତ ଅର୍ତସିଲି ମାଟେଙ୍ଗ୍‌ କିମାଟ୍‌ । ୱାର୍‌ ଅଡ଼୍‍ବିନାର୍‍, ୱାରି ପାର୍‌ତନା ନିର୍‍ଇକା ଆତିଙ୍ଗ୍‌ ମାପୁରୁ ୱେନାନ୍‌ ।
MAT 6:8 ୱାରି ୱାଜା ଆମାଟ୍‌ । ମିର୍‌ ଲୋସ୍‍ନି ଆଗ୍‌ଡ଼ି ମି ଆମାକା ଦର୍‌କାର୍‌, ମି ମୁସ୍‌କୁପୁର୍‌ତି ବୁବା ଆକା ୱିଜୁ ନେସ୍‌ନାନ୍‌ ।”
MAT 6:9 ଆଦେଙ୍ଗ୍‌ ଇୟାୱାଜା ପାର୍‌ତନା କିନିକା ମି ନେଗେତ୍‌ । ମା ମୁସ୍‌କୁପୁର୍‌ତି ବୁବା, ନି ପବିତ୍ର ଦରୁ ପେରିକାଆପିତ୍‍ ।
MAT 6:10 ନି ରାଜି ରାପିତ୍‍ । ନି ବଦା ମୁସ୍‌କୁପୁର୍‌ତୁ ଏଣ୍ତେସ୍‌, ଇୟା ଦୁନିଆଦୁ ବା ଆୟାୱାଜା ପୁରାଆପିତ୍‍ ।
MAT 6:11 ନେର୍‌ ମାଙ୍ଗିଁ ଦର୍‍କାର୍‍ମାନି କାଦି ସିଦା ।
MAT 6:12 ମା ବିରଦ୍‌ତାନ୍‌ ଦୋସ୍‍ କିତିମାନି ଲୋକାଙ୍ଗ୍‌ ମାପ୍‌ ଏଣ୍ତେସ୍‌ କେମାକିନାପ୍‍, ଆୟାୱାଜା ମା ଦସ୍‌ ୱିଜୁ କେମା କିଆ ।
MAT 6:13 ମାଙ୍ଗିଁ ଆଟ୍‌ୱା ପରିକାଦୁ ଆର୍‌ଦେଙ୍ଗ୍‌ ସିମା । ତାଗ୍‌ଇ ମାଣାନ୍‌ ମାଙ୍ଗିଁ ରକିୟାକିୟା । ଇରିଙ୍ଗ୍‌ ସାସନକିନିକା, ପେରିସାକ୍ତି, ଗୌରବ୍‍ ଜୁଗ୍‌ ଜୁଗ୍‌ ନିଦିଆପିତ୍‍, ଆମେନ୍‍ ।
MAT 6:14 ମି ବିରଦ୍‌ତାନ୍‌ ଦସ୍‌ କିତିମାନି ଆଇୱାରିଙ୍ଗ୍‌ ଜଦି ମିର୍‌ କେମାକିନିଦେର୍‍, ମି ମୁସ୍‌କୁପୁର୍‌ତି ବୁବା ବା ମିଙ୍ଗିଁ କେମାକିନାନ୍‍ ।
MAT 6:15 ମାତର୍‌ ମିର୍‌ ଜଦି ଆଇୱାରିଙ୍ଗ୍‌ କେମାକିଇଦେର୍‌, ମି ମୁସ୍‌କୁପୁର୍‌ତି ବୁବା ବା ମିର୍‌ କିତିମାନି ଦସ୍‍ୱିଜୁ କେମାକିଏନ୍‍ ।
MAT 6:16 ଉପାସ୍‌ କିନିୱାଲେ ପୁଲାପୁଲି ଦାର୍ମୁଦି ଲୋକା ୱାଜା ମକମ୍‌ ରେପ୍‍ମାଟ୍‍ । ୱାର୍‌ ଉପାସ୍‍କିଜିନାର୍‍ଇଜି ଆଇୱାରିଙ୍ଗ୍‌ ତର୍‌ତେଙ୍ଗ୍‍ଁ ଇଜି ନିଜେଦି ମକମ୍‍ତିଙ୍ଗ୍‍ ଜାତୁନ୍‍କିଏନ୍‍ଣ୍ତା ଇଡ୍‍ନାର୍‍ । ଇକା ସତେନେ ଜେ ଆୟାୱାଜା କିନି ମାଣାନ୍‌ ୱାର୍‌ ନିଜେଦି ୱିଜୁ ପୟ୍‌ନିକା ପୟ୍‍ତାୱିସ୍‍ତାମାନାର୍‍ ।
MAT 6:17 ମାତର୍‌ ମିର୍‌ ଉପାସ୍‌ କିନିୱାଲେ ମକମ୍‌ ଉର୍‍ପାଜି, ତାଲାଦୁ ନିୟୁ ଉସାଜି ତେବାଦୁ,
MAT 6:18 ଏଣ୍ତେସ୍‌ ଉପାସ୍‌କିଜିନିଦେର୍‍ ଇଜି ଆଇକାର୍‌ ନେସ୍‌ତେଙ୍ଗ୍‌ ଆଟ୍‍ଏର୍‍, ମାତର୍‌ ମି ତରାଇଆଇ ବୁବାନେ ୱିଜୁ ମାଟା ନେସ୍‌ନାନ୍‌ । ମିର୍‌ ମାର୍‍ଗ୍‍ଜି ଆମାକା କିଜିନିଦେର୍‌, ଆକା ସୁଡ଼୍‌ଜି, ୱାନ୍‌ ମିଙ୍ଗିଁ ପୁରସ୍‌କାର୍‌ ସିନାନ୍‍ ।
MAT 6:19 ଇୟା ଦୁନିଆଦୁ ନିଜେଦି ଉଣ୍ତିଙ୍ଗ୍‌ ଦନ୍‌ ଉଣ୍ତା କିମାଟ୍‌ । ଏମେମାନୁ ସେଦା ନି କିଟିଙ୍ଗ୍‍ ତିନେ, ମାରି ଡଙ୍ଗାଁର୍‌ଉଁ ରୁକ୍‍ସି ଡଙ୍ଗାଁକିନା ଅନାର୍‍ ।
MAT 6:20 ମାତର୍‌ ଇୟାୱାଜା ମୁସ୍‌କୁପୁର୍‌ତୁ ମି ଉଣ୍ତିଙ୍ଗ୍‌ ଦନ୍‌ ଉଣ୍ତା କିଦୁ । ଏମେମାନୁ ପିଡ଼୍‍କୁ ନି କିଟିଙ୍ଗ୍‍ ତିନ୍‍ଉ ମାରି ଡଙ୍ଗାଁର୍‌ଉଁ ଡଙ୍ଗାଁକିଏର୍‍ ।
MAT 6:21 ଇରିଙ୍ଗ୍‌ ଏମେମାନୁ ମି ଦନ୍‌, ଆବେ ମି ମନ୍‍ ।
MAT 6:22 କାଣ୍‌ଗା ମେନ୍ଦଲ୍‌ତି ଦିୱା ୱାଜା । କାଣ୍‌ଗା ନେଗିକାମାର୍‍ରିଙ୍ଗ୍‍, ମେନ୍ଧଲ୍‍ ଜାୟ୍‍ତୁ ପୁରାଆଜି ନିଙ୍ଗ୍‍ଁନାତ୍‍ ।
MAT 6:23 ମାତର୍‌ ମି କାଣ୍‌ଗା ଜଦି ତାଗ୍‌ଇକା ମାନାତ୍‌, ମେନ୍ଧଲ୍‍ ସିକାଟି ଆନାତ୍‌ । ମି ଜିବନ୍‌ତି ଜାୟ୍‌ ଜଦି ସିକାଟି ଆନାତ୍‌, ଆୟା ସିକାଟି ଏସା ବୟ୍‍ଙ୍କାର୍‍ ସିକାଟି ଆଏତ୍‍ ନୋ !
MAT 6:24 ଅରେନ୍‍ ଲୋକୁ ରିଏରି ମାଲିକ୍‌କା ସାକର୍‌ ଆଦେଙ୍ଗ୍‌ ଆଟ୍‍ଏନ୍‍ । ୱାନ୍‌ ଅରେନ୍‍ୱାନିଙ୍ଗ୍‍ କାଡ଼୍‍ନାନ୍‍ ମାରି ଆଇୱାନିଙ୍ଗ୍‍ ଜିବନ୍‍ନୋନାନ୍‍, ମାରି ଅରେନ୍‍ୱାନିଙ୍ଗ୍‍ ମାନାନାନ୍‍ ମାରି ଅରେନ୍‍ୱାନିଙ୍ଗ୍‍ ମାନାଏନ୍‌ । ମିର୍‌ ମାପୁରୁ ନି ଡାବୁକାସୁଦି ସାକର୍‌ ଆଦେଙ୍ଗ୍‌ ଆଟ୍‍ଇଦେର୍‍ ।
MAT 6:25 ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇଜିନା, ଜିବନ୍‍ତି ଜିନି ଉଣ୍ତିଙ୍ଗ୍‌ ଦର୍‍କାର୍‍ମାନି କାଦି ମାରି ଏର୍‌ ମାରି ଆରାନି ଉଣ୍ତିଙ୍ଗ୍‌ ଦର୍‍କାର୍‍ମାନି ଆଙ୍ଗିଁପାସିୟା ଉଣ୍ତିଙ୍ଗ୍‌ ବେମ୍‍ରି ଆମାଟ୍‌ । କାଦିଦି ମାଣ୍‌କୁ ଜିବନ୍‌ ଇନିକା ନାଣ୍ତ ଦାରା ସିଲେ ? ଆଙ୍ଗିଁପାସିୟା ମାଣ୍‌କୁ ମେନ୍ଧଲ୍‍ ଇନିକା ନାଣ୍ତ ଦାରା ସିଲେ ?
MAT 6:26 ପଟିଆଙ୍ଗ୍‍ଁ ସୁଡ଼୍‍ଦୁ । ୱାକ୍‍ ୱିତୁ ୱିତ୍‍ଉ । ପାସି ଉଣ୍ତା କିଜି କଲ୍‍କିଦୁ ଉଣ୍ତାକିଉ । ଆରିଙ୍ଗ୍‍ବା ମି ମୁସ୍‌କୁପୁର୍‌ତି ବୁବା ୱାନିକାଙ୍ଗ୍‌ ତିନ୍‌ଡ୍ରେଙ୍ଗ୍‌ କାଦି ସିନାନ୍‍ । ମିର୍‌ ଇନିକା ପଟିଙ୍ଗାଁ ମାଣ୍‌କୁ ନାଣ୍ତ ଦାରା ସିଲେ ?
MAT 6:27 ମି ଲୋଇ ଏନ୍‌ ସିନ୍ତା କିଜି କିଜି ନିଜେଦି ଜିନି ବାର୍ସୁ ପିରିସ୍‍ କିଦେଙ୍ଗ୍‍ ଆଟ୍‍ନାନ୍‍ ?
MAT 6:28 “ଆଙ୍ଗିଁପାସିୟା ଉଣ୍ତିଙ୍ଗ୍‌ ଏନ୍ଦା ଦାନ୍ଦା ଆଜିନିଦେର୍‍ ? ସୁଡ଼୍‍ଦୁ, ବନ୍‍ତି ପୁଙ୍ଗୁଁକାଙ୍ଗ୍‍ ଏଣ୍ତେସ୍‌ ପିର୍‍ନେ । ୱାକ୍‍ ପାଣିକିଉ କି ନିଜେଦି ଉଣ୍ତିଙ୍ଗ୍‌ ଆଙ୍ଗିଁଙ୍ଗ୍‌ ରସ୍‍ଉ ।”
MAT 6:29 ମାତର୍‌ ନାନ୍ ମିଙ୍ଗିଁ ଇଜିନା, ରାଜା ସଲମନ୍‍ ୱାନି ୱିଜୁ ଦନ୍‍ ମାରିଙ୍ଗ୍‌ ବା, ଇୟା ପୁଙ୍ଗୁଁକା ୱାଜା ସୁନ୍ଦର୍‌ ଆଙ୍ଗିଁ ଏସାଙ୍ଗ୍‍ ଆରାଏନ୍‍ମାର୍ହାନ୍‍ ।
MAT 6:30 ମାତର୍‌ ନେର୍‌ ଆମା ଲାଟା କିଡ଼ିଇଦୁ ମାନାତ୍‌, ୱିଗେରିଙ୍ଗ୍‌ ତେବାଏତ୍‍ କୟାୟ୍‍ଆଜି ସିସୁଗୁଟାଦୁ ପୋକ୍‌ନାର୍‌ । ମାତର୍‌ ଆୟାୱିଜୁ ବା ମାପୁରୁ ଏସା ସୁନ୍ଦର୍‌ ଆଙ୍ଗିଁଆଣ୍‍ ରସ୍‍ତାମାନାନ୍‍ । ମିଙ୍ଗିଁ ଆଙ୍ଗିଁପାସିୟା ସିଦେଙ୍ଗ୍‍ ଇଜି ୱାନ୍‌ ଇନିକା ନାଣ୍ତ ସୁଡ଼ୁଏନ୍‌ ? ମି ବିସ୍‌ବାସ୍‌ ସତେ ଏସା ଉଣା !
MAT 6:31 “ଆରିଙ୍ଗ୍‌, ନା କାଦି ଏମେଣ୍‌କୁ ୱାନାତ୍‌, ମାରି ନା ଉଣିକା ? ମାରି ଆଙ୍ଗିଁ ? ଇୟା ବିସୟ୍‌ତାନ୍‌ ସିନ୍ତା କିମାଟ୍‌ ।”
MAT 6:32 ଏମେକାର୍‌ ମାପୁରୁଙ୍ଗ୍‍ଁ ନେସ୍‌ଇମାନି ଅଣଜିହୁଦି ଲୋକୁ ଇୟାୱିଜୁ ବିସୟ୍‌ ପୟ୍‌ଜି ଅନାର୍‍ । ମାରି ଇୟାୱିଜୁ ବିସୟ୍‌ ଜେ ମି ଦର୍‌କାର୍‌ମାନାତ୍‌, ଆକା ମି ମୁସ୍‌କୁପୁର୍‌ତି ବୁବା ନେସ୍‌ନାନ୍‌ ।
MAT 6:33 ମାରି ମାପୁରୁଦି ରାଜି ବିସୟ୍‌ ମାରି ମାପୁରୁ ମି ମାଣ୍‌କୁ ଇନିକା ବଦାକିନାନ୍‌, ଇୟା ମାଟା ମି ମନ୍‌ତୁ ଆଗ୍‌ଡ଼ି ବାଡି ସିଦୁ । ଆରିଙ୍ଗ୍‌ ୱାନ୍‌ ମିଙ୍ଗିଁ ଆଇ ୱିଜୁ ବିସୟ୍‌ ଉଣ୍ତାକିନାସିନାନ୍‍ ।
MAT 6:34 ମାରି ୱିଗେରି ଉଣ୍ତିଙ୍ଗ୍‌ ସିନ୍ତା କିମାଟ୍‌ । ୱିଗେରି ସିନ୍ତା ୱିଗେ କିନିଦେର୍‍ । ୱିଗେରି ବିସୟ୍‌ତାନ୍‌ ସିନ୍ତା କିଜି ନେର୍‍ଇ ଦାନ୍ଦାଦିଙ୍ଗ୍‍ ପିରିସ୍‍ କିମାଟ୍‌ ।
MAT 7:1 “ଆଇୱାରି ଦସ୍‌ ପୟ୍‍ଜିବୁଲାମାଟ୍‍ । ଆରିଙ୍ଗ୍‌ ମାପୁରୁ ବା ମି ଦସ୍‌ ଆସ୍‍ଏନ୍‍ ।”
MAT 7:2 ଆଇୱାରି ଦସ୍‌ ବିସୟ୍‌ତାନ୍‌ ମିର୍‌ ଏଣ୍ତେସ୍‌ ବିସାର୍‌ କିଜିମାନିଦେର୍‍, ମାପୁରୁ ଆୟାୱାଜା ମି ବିସାର୍‌ କିନାନ୍‌ । ମିର୍‌ ଆଇୱାରି ଉଣ୍ତିଙ୍ଗ୍‌ ଏମେ ନିୟମ୍‌ କିନିଦେର୍‍, ଆୟା ନିୟମ୍‌ ମାପୁରୁ ମି ଉଣ୍ତିଙ୍ଗ୍‌ ବା କିନାନ୍‌ ।
MAT 7:3 ମି କାଣ୍‍ଗାଦୁ କାଣ୍ତିପିଲା ମାନିୱାଲେ ଏନ୍ଧା ମି ତଡ଼ାନ୍‌ତି କାଣ୍‌ଗାଦୁ ମାନି ଇସ୍ରିକାସ୍ରାଦି ଉଣ୍ତିଙ୍ଗ୍‌ ମିର୍‌ ଏନ୍ଦା ମନ୍‍ସିଜିନିଦେର୍‍ ?
MAT 7:4 ନିଜେଦି କାଣ୍‍ଗାଦୁ କାଣ୍ତିପିଲା ମାନ୍‌ବୁ ମାନ୍‌ବୁ ମିର୍‌ ଆମା ସାହାସ୍‍ତାନ୍‍ ମି ତଡ଼ାନ୍‌ତି କାଣ୍‌ଗାଦାନ୍‌ ଇସ୍ରିକାସ୍ରା କାଣ୍ତିଦିଙ୍ଗ୍‍ କୁତ୍‌ନା ପୋକ୍‌ନାପ୍‌ ଇଜି ଇଜିନିଦେର୍‌ ?
MAT 7:5 ଏ ପୁଲାପୁଲି କିନିକିନ୍ଦେର୍‍ ! ମି କାଣ୍‌ଗାଦାନ୍‌ କାଣ୍ତିପିଲାଦିଙ୍ଗ୍‍ ଆଗ୍‌ଡ଼ି ସପ୍‍ସ ପକ୍‍ତୁ । ଆରିଙ୍ଗ୍‌ ମି ତଡ଼ାନ୍‌ତି କାଣ୍‍ଗାଦୁ ମାନି ଇସ୍ରିକାସ୍ରା କାଣ୍ତିଦିଙ୍ଗ୍‍ ମିର୍‌ ଉସାସ୍‍ତାନ୍‍ ସୁଡ଼୍‌ଜି କୁତ୍‍ତେଙ୍ଗ୍‍ ଆଟ୍‌ନିଦେର୍‌ ।
MAT 7:6 ନୁକୁଡ଼ିଆଙ୍ଗ୍‍ଁ ପବିତ୍ର କାଦି ସିମାଟ୍‍ । ଇରିଙ୍ଗ୍‌ ୱାକ୍‍ ମାର୍‍ଜି ମିଙ୍ଗିଁ କାଟ୍‍ନେପକ୍‍ନେ । ପାନ୍‍ଣ୍ତ୍ରିଙ୍ଗାଁ ଆଗ୍‌ଡ଼ି ୱେଣ୍ତି ପକ୍‍ମାଟ୍‍ । ତାନି ଦାରା ବୁଜାଏଣ୍ତା ତାନିଙ୍ଗ୍‌ ୱାକ୍‍ କେବଲ୍‌ ପାଦାମ୍‍ତୁ ମାଟ୍‍ନାପକ୍‍ନାତ୍‍ ।
MAT 7:7 ଲୋସ୍‍ତୁ, ଆରିଙ୍ଗ୍‌ ମିଙ୍ଗିଁ ସିଆଇଆନାତ୍‍; ପୟ୍‌ଦୁ ମିର୍‌ ପୟ୍‌ନିଦେର୍‌; ସେର୍‌ଲାଦୁ କତ୍‍ତୁ, ଆବେଟ୍‌କୁ ମି ଉଣ୍ତିଙ୍ଗ୍‌ ସେର୍‍ଲା ରେନାସିନାନ୍‍ ।
MAT 7:8 ଏନ୍‌ ଲୋସ୍‍ନାନ୍‍, ୱାନିଙ୍ଗ୍‌ ସିଆଇଆନାତ୍‍; ଏନ୍‌ ପୟ୍‌ନାନ୍‌, ୱାନ୍‌ ପୟ୍‌ନାନ୍‌; ଏନ୍‌ ସେର୍‍ଲାଦୁ କତ୍‍ନାନ୍‍, ୱାନି ଉଣ୍ତିଙ୍ଗ୍‌ ସେର୍‍ଲା ରେଆଇଆନାତ୍‍ ।
MAT 7:9 ମି ଲୋଇ ଇୟାୱାଜା ଏମେ ବୁବା ମାନାନ୍‌, ଏନ୍‌ ନିଜେଦି କଡ଼ ରୁଟି ଲୋସ୍‍ତିଙ୍ଗ୍‍ ୱାନିଙ୍ଗ୍‌ କାଲୁ ସିନାନ୍‍ ?
MAT 7:10 ମାରି ୱାନ୍‌ ମିନି ଲୋସ୍‍ତିଙ୍ଗ୍‍ ୱାନିଙ୍ଗ୍‌ ଇନିକା ସାରାସ୍‍ ସିନାନ୍‍ ?
MAT 7:11 ମିର୍‌ ତାଗ୍‌ଇ ଲୋକୁ ଆତିଙ୍ଗ୍‌ବା ଏସ୍ତିୱାଲେ ନିଜେଦି ନିଜେଦି କଡ଼ରିଙ୍ଗ୍‌ ନେଗି ନେଗି ଜିନିସ୍‌ ସିଦେଙ୍ଗ୍‍ ନେସ୍‌ନିଦେର୍‌, ଆରିଙ୍ଗ୍‌ ମି ମୁସ୍‌କୁପୁର୍‌ତି ବୁବା ୱାନି ମାନୁ ଲୋସ୍‍ନି ଲୋକାଙ୍ଗ୍‌ ଏସ ନାଣ୍ତ ନେଗି ନେଗି ଜିନିସ୍‌ ସିଏନ୍‍ନ !
MAT 7:12 ମି ଉଣ୍ତିଙ୍ଗ୍‌ ଆଇକାର୍‌ ଆମାକା କିପିର୍‍ ଇଜି ମିର୍‌ ବଦା କିନିଦେର୍‌, ମିର୍‌ ଆଇୱାରି ଉଣ୍ତିଙ୍ଗ୍‌ ଆୟାୱାଜା କିଦୁ । ଇରିଙ୍ଗ୍‌ ମସା ସିତିମାନି ନିୟମ୍‌ ନି ବାବବାଦିରି ଦାର୍ମୁସାସ୍ତ୍ରଦି ସିକିୟା ଆଜିନାତ୍‍, ତେନି ସତ୍‌ ମାଟା ।
MAT 7:13 ସିପଡ଼ି ସେର୍‍ଲା ସିଜି ସାନ୍‍ଡ୍ରୁ । ଇରିଙ୍ଗ୍‌ ସାନି ସାରିଦୁ ଅନି ନରକଦି ସାରି ଅସାର୍ ନି ପେରିକା । ନାଣ୍ତ ଲୋକୁ ଆୟା ସାରି ସିଜି ସନାର୍‌ ।
MAT 7:14 ମାତର୍‌ ଏସାଙ୍ଗ୍‍ ୱିଜ୍‌ଇ ଜିବନ୍‌ତୁ ସନି ରାସ୍ତା ଆଟ୍‌ୱା ମାରି ତାନି ସେର୍‍ଲା ସିପଡ଼ି ମାରି ବେସିଉଣା ଲୋକୁ ଇୟା ସାରି ପୟ୍‌ଜି ପୟ୍‌ନାର୍‌ ।
MAT 7:15 ବଣ୍ତ ବାବବାଦିରି ମାଣ୍‌କୁ ସାବ୍‍ଦାନ୍‍ ! ୱାର୍‌ ଆତ୍‌ରେ ମେଣ୍ତାଦିରୁପ୍‌ ୱାଜା ତରାନାର୍‍, ମାତର୍‌ ୱାର୍‌ ମନ୍‌ତୁ ଉଣ୍ତ୍ରି ଉଣ୍ତ୍ରି ବେନ୍‍ଡ୍ର ୱାଜା ।
MAT 7:16 ୱାରି ପାଣିସୁଣିଦାନ୍‍ ମିର୍‌ ୱାରିଙ୍ଗ୍‌ ସିନିସ୍‍କିନିଦେର୍‍ । ସାମ୍‌ ଦୁପାଦୁ ଅଙ୍ଗୁର୍‍ ଆସ୍‌ଏତ୍‌ ମାରି କଡ଼ି ମାରାତୁ ତଗା ପଲ୍‌ ଆସ୍‌ଏତ୍‌ ।
MAT 7:17 ନେଗି ମାରାତୁ ନେଗି ପଲ୍‌ ଆସ୍‌ନାତ୍‌ । ତାଗ୍‌ଇ ମାରାତୁ ତାଗ୍‌ଇ ପଲ୍‌ ଆସ୍‌ନାତ୍‌ ।
MAT 7:18 ନେଗି ମାରାତୁ ତାଗ୍‌ଇ ପଲ୍‌ ଆସ୍‌ଏତ୍‌ ବା ତାଗ୍‌ଇ ମାରାତୁ ନେଗି ପଲ୍‌ ଆସ୍‌ଏତ୍‌ ।
MAT 7:19 ନେଗି ପଲ୍‌ ଆସ୍‌ଏତିଙ୍ଗ୍‌ ମାରାନ୍‌ କାତାଇଆଜି ସିସୁଦୁ ପକାୟ୍‍ ଆନାତ୍‌ ।
MAT 7:20 ଆୟାୱାଜା ବଣ୍ତ ବାବବାଦିରି ପାଣିସାଣିଦାନ୍‍ ୱାରିଙ୍ଗ୍‌ ମିର୍‌ ସିନିସ୍‌କିଦେଙ୍ଗ୍‌ ଆଟ୍‌ନିଦେର୍‌ ।
MAT 7:21 ଏମେକାର୍‌ ନାଙ୍ଗିଁ ପ୍ରବୁ, ପ୍ରବୁ, ଇଜି କୁକ୍‍ନାର୍‍, ୱାରି ମାଣ୍‌କୁ ୱିଜେରେ ମୁସ୍‌କୁପୁର୍‌ତୁ ଡ଼ୁଗୁଦେଙ୍ଗ୍‍ ଆଟ୍‍ଏର୍‍ । ଏମେକାର୍‌ ନା ମୁସ୍‌କୁପୁର୍‌ତି ବୁବାଦି ବଦାଦାନ୍ ପାଣି କିନାର୍‌, କେବଲ୍‌ ୱାର୍‌ ମୁସ୍‌କୁପୁର୍‌ତୁ ଡ଼ୁଗୁଦେଙ୍ଗ୍‍ ଆଟ୍‍ନାର୍‍ ।
MAT 7:22 ମାପୁରୁଦି ବିସାର୍‌ ଦିନ୍‌ ଇଗା ୱାତିଙ୍ଗ୍‍ ୱିଜେରେ ନାଙ୍ଗିଁ ଇନାର୍‌, ପ୍ରବୁ, ପ୍ରବୁ, ନି ଦର୍‌ତାନ୍‌ ମାପ୍‌ ଇନିକା ବାବବାଦିର୍ ମାପୁରୁଦି ନେଗିକାବୁର୍‌ ୱେର୍‍ଏପ୍‍ମାର୍ହାପ୍‍, ପ୍ରବୁ, ନି ଦର୍‌ତାନ୍‌ ଦୁବେଙ୍ଗ୍‍ ଡ଼ିସିସ୍‍ତାମାର୍ହାପ୍‍ ମାରି ନାଣ୍ତ କାବାଆନି ପାଣି କିତାମାର୍ହାପ୍‍ ।
MAT 7:23 ନାସ୍ତିୱାଲେ ୱାରିଙ୍ଗ୍‌ ନାନ୍ ଇନା, ମିଙ୍ଗିଁ ନାନ୍ ଏସାଙ୍ଗ୍‍ ନେସେଏ । ଏ ତାଗ୍‌ଇ ପାଣିକିନି ୱିଜେରେ ନା ଲାକ୍‌ତୁରାନ୍‌ ଆକ ଆଦୁ !
MAT 7:24 “ଏନ୍‌ ନା ମାଟା ୱେନ୍‌ଞ୍ଜି ମାନାନାନ୍‍, ୱାନ୍‌ ପିଡ଼ିପି ମୁସ୍‌କୁ ଇଲୁ ତର୍‌ତିମାନି ବୁଦିମାନି ଲୋକୁ ୱାଜା ।
MAT 7:25 ନାଣ୍ତ ପିରୁ ୱାତାତ୍‍, ଗାଡାଦି ଏର୍‌ ପୁରୁଣ୍‍ ଆଜିସର୍ହାତ୍‍ ମାରି ଆୟା ଇଲୁ ମୁସ୍‌କୁ ନାଣ୍ତ ଡାକ୍‌ତାତ୍‌ ଗାଲି ୱାତାତ୍‍, ମାତର୍‌ ଆୟା ଇଲୁଦି ମୁଲ୍‌କୁନାଦି ୱିର୍‍ଜ୍ଏତାତ୍‍ ।
MAT 7:26 “ମାତର୍‌ ଏମେକାର୍‌ ନା ମାଟା ୱେନ୍‌ଞ୍ଜି ମାନାଏନ୍‌, ୱାର୍‌ ବାଲିବୁମି ମୁସ୍‌କୁ ଇଲୁ ରସ୍‍ତିମାନି ମୁର୍କୁ ୱାଜା ।
MAT 7:27 ନାଣ୍ତ ପିରୁ ୱାତାତ୍‍, ଗାଡା ଏରୁ ପାଡ଼ି ସତେ । ନାଣ୍ତ ଗାଲି ୱାତାତ୍‍ ମାରି ଇଲୁ ୱିର୍‌ଜିତାତ୍‌ । ଆକା ଏସା ବୟ୍‍ଙ୍କାର୍‍ ସତେ ।”
MAT 7:28 ଜିସୁ ଇୟାୱିଜୁ ମାଟା ଇର୍‍ଇୱିସ୍‌ତି ୱେନ୍‌କା, ଲୋକ୍‌ ୱିଜେରେ ୱାନି ସିକିୟାଦିଙ୍ଗ୍‍ କାବାଆତାର୍‌ ।
MAT 7:29 ଜିସୁ ଆଇ ଦାର୍ମୁଗୁରୁରି ୱାଜା ସିକିୟା ସିଏନ୍‍ଣ୍ତା ଅଦିକାର୍‌ ପୟ୍‍ତିମାନି ଲୋକ୍‌ତି ୱାଜା ସିକିୟା ସିଜିମାର୍ହାନ୍‍ ।
MAT 8:1 ଜିସୁ ଗରନ୍‌ ମୁସ୍‌କୁରାନ୍‌ ରେତାତି ୱେନ୍‌କା ନାଣ୍ତ ଲୋକୁ ୱାନି ୱେନ୍‌କା ବୁଲାଦେଙ୍ଗ୍‍ ଆସ୍‍ତାର୍‍ ।
MAT 8:2 ନାସ୍ତିୱାଲେ ଅରେନ୍‍ କୁସ୍ଟରୋଗ୍‌ତି ଲୋକ୍‌ ୱାନି ଲାକ୍‌ତୁ ୱାଜି ମାଡ଼ିସ୍‌ କିଜି ଇର୍ହାନ୍‌, “ଏ ପ୍ରବୁ, ନିନ୍‌ ଜଦି ବଦା କିନି, ନାଙ୍ଗିଁ ନେଗେଣ୍ତ୍‌ କିଦେଙ୍ଗ୍‌ ଆଟ୍‌ନି ।”
MAT 8:3 ଜିସୁ କିୟୁ ପେର୍‌ଜି ୱାନିଙ୍ଗ୍‌ ମୁଟ୍‌ସି ଇର୍ହାନ୍‌, “ନାନ୍ ବଦା କିଜିନା, ନେଗେଣ୍ତ୍‌ ଆଆ ।” ଦାପେ ଦାପେ ଆୟା ଲୋକ୍‌ତି କୁସ୍ଟରୋଗ୍‌ ନେଗେନ୍‍ଆତାତ୍‍ ।
MAT 8:4 ଜିସୁ ୱାନିଙ୍ଗ୍‌ ଇର୍ହାନ୍‌, “ୱେନ୍‍ଆ, ଜାଗାର୍‌ତା, ନିନ୍‌ ଏଣ୍ତେସ୍‌ ନେଗେନ୍‍ଆତି, ଏଙ୍ଗ୍‌ବା ଇନିକା ଇନ୍‍ମା; ମାତର୍‌ ସିଦା ଜାଜକରି ମାନୁ ସଲ୍‌ସି ନିଜେଦିଙ୍ଗ୍‍ ତରାଇଆଆ ମାରି ମୋସା ନେଗେନ୍‌ ଆତିମାନି ଇଜି ୱିଜେରିଙ୍ଗ୍‍ ସାକି ସିଦେଙ୍ଗ୍‍ ଇଜି ମୋସାଦି ଆଦେସ୍‌ ସିତିମାନି ପୁଜା ସିଆ ।”
MAT 8:5 ଜିସୁ କପର୍‍ନାହୁମ୍‍ ଗାଡ଼୍‌ତୁ ଡ଼ୁଗିତି ଦାପ୍ରେ ଅରେନ୍‍ ରମିୟ ନେତା ୱାନିଙ୍ଗ୍‌ ବେଟ୍‍ବୁଡ଼ାଜି ମାଡ଼ିସ୍‍କିଜି ଇର୍ହାନ୍‌,
MAT 8:6 “ପ୍ରବୁ, ନା ଅରେନ୍‍ ପାଣିକିନିକାନ୍‌ ନବ୍‍ତି ଉଣ୍ତିଙ୍ଗ୍‌ ଡରିତାମାନାନ୍‍ । ୱାନ୍‌ ବୁଲାସାଲାଦେଙ୍ଗ୍‍ ଆଟ୍‌ଏଜିନାନ୍‌, ନାଣ୍ତ ବାଦାଜି ଇଲୁଦୁ ଡରିତାମାନା ।”
MAT 8:7 ଜିସୁ ଇର୍ହାନ୍‌, “ନାନ୍ ୱାଜି ୱାନିଙ୍ଗ୍‌ ନେଗେନ୍‍କିନା ।”
MAT 8:8 ନେତା ଇର୍ହାନ୍‌, “ସିଲେ ପ୍ରବୁ” ନିନ୍‌ ଜେ ନା ଇଣ୍ତ୍ର ପାଦାମ୍‌ ଇଡ୍‌ନି ନାନ୍‌ ଇୟାୱାଜା ଜୋଗ୍‍ ସିଲେ । ନିନ୍‌ କେବଲ୍‌ ଉନ୍‌ଡ୍ରି ପଦ୍‍ମାଟାଦି ଆଦେସ୍‌ ଇନ୍‌ଆଁ, ନା ପାଣିକିନିକାନ୍‌ ନେଗେନ୍‍ ଆନାସନାନ୍‍ ।
MAT 8:9 “ନା ପେରିୱାନି ଆଡ୍‍ଗିମାନ୍‍ଞ୍ଜି ନାନ୍ ପାଣି କିତିଙ୍ଗ୍‌ବା ନା ଆଡ୍‍ଗି ନାଣ୍ତ ସନ୍ୟ ଦଲ ମାନାର୍‌ । ୱାରି ଲୋଇ ଅରେନ୍‍ ୱାନିଙ୍ଗ୍‌ ଜଦି ନାନ୍ ସାଙ୍ଗ୍‍ଆ ଇଜି ଆଦେସ୍‌ ସିତିଙ୍ଗ୍‌, ୱାନ୍‌ ସନାନ୍‌ । ଆଇୱାନିଙ୍ଗ୍‍ ରାଆ, ଇଜି ଇରିଙ୍ଗ୍‌, ୱାନ୍‌ ୱାନାନ୍‌ । ନା ସାକର୍‌ତିଙ୍ଗ୍‌ ଇକା କିଆ, ଇଜି ଇନି ଦାପ୍ରେ ୱାନ୍‌ ଆକା କିନାନ୍‌ ।”
MAT 8:10 ଜିସୁ ଇକା ୱେନ୍‌ଞ୍ଜି କାବାଆତାନ୍ ମାରି ୱାନି ୱେନ୍‌କା ୱାଜିମାରି ଲୋକାଙ୍ଗ୍‌ ଇର୍ହାନ୍‌, “ନାନ୍ ମିଙ୍ଗିଁ ସତ୍‍ଇଜିନା, ଇସ୍ରାଏଲ୍‌ତୁ ବା ଏମେ ଲୋକାମାନୁ ଇୟା ଲୋକ୍‌ତି ୱାଜା ବିସ୍‌ବାସ୍‌ ନାନ୍‍ ତଏ ।
MAT 8:11 ନାନ୍ ସତ୍‌ ଇଜିନା, ୱେଡ଼ାସନି ତରିଟି ଦେସ୍‍ତାନ୍‍ ମାରି ୱେଡ଼ାଆର୍‌ନି ତରିଟି ଦେସ୍‍ତାନ୍‍ ନାଣ୍ତ ଲୋକୁ ୱାଜି ଅବ୍ରାହାମ, ଇସ୍‌ହାକ୍‌ ମାରି ଜାକୁବଦି ୱାଲେ ମୁସ୍‌କୁପୁର୍‌ତି ରାଜିଦୁ ଅର୍‌ସେ ବଜିଦୁ ଉଣ୍ତେଙ୍ଗ୍‌ ବାସ୍‍ନାର୍‍ ।
MAT 8:12 ମାତର୍‌ ଏମେକାର୍‌ ଇୟା ମାପୁରୁଦି ରାଜିଦୁ ମାନି ମାଟା, ୱାରିଙ୍ଗ୍‌ ଆତ୍‌ରେ ସିକାଟିଦୁ ପକ୍‍ନାର୍‍ । ଆବେ ୱାର୍‌ ଆଡ଼୍‍ବାଜି ପାଲ୍‍କୁ କାତ୍ରେ କିନାର୍‌ ।”
MAT 8:13 ଜିସୁ ନେତେଙ୍ଗ୍‍ ଇର୍ହାନ୍‌, “ଇନ୍‌ଡ୍ର ସାଙ୍ଗ୍‍ଆ । ନିନ୍‌ ଆମାକା ବିସ୍‌ବାସ୍‌ କିଜିନି, ଆକାନେ ଗଟାନାତ୍‌ ।” ଟିକ୍‌ ଆୟା ସମୟତୁ ନେତାଦି ପାଣିକିନିକାନ୍‌ ନେଗେନ୍‌ଆତାନ୍‌ ।
MAT 8:14 ତାନେ ୱେନ୍‌କା ଜିସୁ ପିତରକା ଇନ୍‌ଡ୍ର ସଲ୍‌ସି ସୁଡ଼ୁତାନ୍‌, ପିତରତି ମିମ୍‍ସି ନବ୍‍ଆଜି କାଟେଲ୍‍ତୁ ଡରିତାମାନାତ୍‍ ।
MAT 8:15 ଜିସୁ ତାନି କିୟୁଦିଙ୍ଗ୍‍ ମୁଟ୍‍ତି ଦାପ୍ରେ ତାନିଙ୍ଗ୍‌ ନବ୍‌ ଡ଼ିସ୍‌ତାତ୍‌ ମାରି ୱାଦ୍‌ ନିଙ୍ଗ୍‍ଜି ୱାରିଙ୍ଗ୍‌ ସେବା କିଦେଙ୍ଗ୍‍ ଆସ୍‌ତାତ୍‌ ।
MAT 8:16 ମିଲ୍‌ମିଲିକା ଆତାତ୍‌ଆକା ଲୋକୁ ନାଣ୍ତ ଦୁବେଙ୍ଗ୍‌ ଆସ୍‍ତି ଲୋକାଙ୍ଗ୍‌ ଜିସୁ ଲାକ୍‌ତୁ ତାତାର୍‌ । ଉଣ୍ତ୍ରି ପଦ୍‌ ମାତର୍‌ ମାଟାଦାନ୍‌ ୱାନ୍‌ ତାଗ୍‌ଇ ଆତ୍ମେଆଙ୍ଗ୍‍ଁ ପେରିତାନ୍‍ ମାରି ରଗ୍‌ ଲୋକାଙ୍ଗ୍‌ ନେଗେଣ୍ତ୍‌ କିତାନ୍‌ ।
MAT 8:17 ଇୟାୱାଜା ୱାନ୍‌ ବାବବାଦି ଜିସାୟଦି ବବିସତ୍‍ବାଣି ସତ୍‌ କିତାନ୍‌ । ଜିସାୟ ଇର୍ହାମାର୍ହାନ୍‌, “ୱାନ୍‌ ମା ଦୁକୁକାସ୍ଟୁ ୱିଜୁ ଅତାନ୍‍ ମାରି ମା ରଗ୍‌ ନେଗେନ୍‌କିତାନ୍‌ ।”
MAT 8:18 ୱାନି ସାରିବେଡ଼୍‍ତି ଲୋକୁ ୱିଜେରେ ଉଣ୍ତାନିକା ସୁଡ଼୍‌ଜି, ଜିସୁ ୱାନି ସିସୁରିଙ୍ଗ୍‌ ଗାଡାଦି ଆୟା ପାଡ଼ି ସନ୍‌ଡ଼୍ରେଙ୍ଗ୍‌ ଇର୍ହାନ୍‌ ।
MAT 8:19 ଅରେନ୍‍ ଦାର୍ମୁଗୁରୁ ୱାଜି ଜିସୁଙ୍ଗୁଁ ଇର୍ହାନ୍‌, “ଗୁରୁ, ନିନ୍‌ ଏମେ ବାଡିଦୁ ସନି, ଆବେ ସନ୍‍ଡ୍ରେଙ୍ଗ୍‍ ଇଜି ନାନ୍ ତିଆର୍‍ଆତାମାନା ।”
MAT 8:20 ଜିସୁ ୱାନିଙ୍ଗ୍‌ ଇର୍ହାନ୍‌, “ଗଲୁଦିଙ୍ଗ୍‍ ତେବାଦେଙ୍ଗ୍‍ ସାରାଆ ମାନାତ୍‌, ବାଦଡ଼୍‍ତି ପଟିଦିଙ୍ଗ୍‍ ତେବାଦେଙ୍ଗ୍‍ ଜାଲୁ ମାନାତ୍‌ । ମାତର୍‌ ଗୁର୍‍ଦେଙ୍ଗ୍‍ ନି ରମ୍‍ଦେଙ୍ଗ୍‍ ଇଜି ମନୁସ୍ୟପୁତ୍ରଦିଙ୍ଗ୍ ବାଡି ସିଲେତ୍‌ ।”
MAT 8:21 ଜିସୁଦି ମାରି ଅରେନ୍‌ ସିସୁ ଇର୍ହାନ୍‌, “ପ୍ରବୁ, ଆଗ୍‌ଡ଼ି ଡ଼େସି ସଲ୍‌ସି ନା ବୁବେଙ୍ଗ୍‌ ମୁସ୍‍ତେଙ୍ଗ୍‍ ଇଜି ନାଙ୍ଗିଁ ସାରି ସିଦା ।”
MAT 8:22 ଜିସୁ ୱାନିଙ୍ଗ୍‌ ଇର୍ହାନ୍‌, “ନା ୱେନ୍‌କା ୱେନ୍‌କା ରାଆ, ସାତି ୱାରିଙ୍ଗ୍‌ ନିଜେ ନିଜେଦି ସାତି ଲୋକାଙ୍ଗ୍‌ ମୁସ୍‍ତେଙ୍ଗ୍‍ ଇଜି ଡ଼ିସ୍‍ତୁ ।”
MAT 8:23 ଅର୍‍ଲେନ୍‍ ଜିସୁ ଡଙ୍ଗାଁଦୁ ଏକ୍‍ତି ୱେନ୍‌କା ୱାନି ସିସୁର୍‍ ୱାନି ୱେନ୍‌କା ୱେନ୍‌କା ସର୍ହାର୍‍ ।
MAT 8:24 ଦାପ୍ରେ ଗାଡାଦୁ ଉଣ୍ତ୍ରି ପେରି ଗାଲିପିର୍‍ରୁ ନିଙ୍ଗିଁତାତ୍‍ ମାରି ଡଙ୍ଗାଁ ଉଲ୍‍କାଏର୍‍ତୁ ମୁଡ଼ୁଗ୍‍ଦେଙ୍ଗ୍‍ ଆସ୍‌ତାତ୍‌ । ମାତର୍‌ ନାସ୍ତିୱାଲେ ଜିସୁ ସୁଜିତାମାର୍ହାନ୍‍ ।
MAT 8:25 ସିସୁର୍‍ ଜିସୁଙ୍ଗୁଁ ନିକ୍‍ସି ଇର୍ହାର୍‌, “ଏ ପ୍ରବୁ, ମାଙ୍ଗିଁ ରକିୟାକିଆ । ଆଏତିଙ୍ଗ୍‍ ମାପ୍‌ ମୁଡ଼ୁଗିନା ସାନାପ୍‍ ।”
MAT 8:26 ଜିସୁ ୱାରିଙ୍ଗ୍‌ ଇର୍ହାନ୍‌, “ଏନ୍ଦା ମିର୍‌ ନିସ ତିଲାଜିନିଦେର୍‌ ?” ମିର୍‌ ଇନିକା ନିସ ଅଡ଼ପ୍‍ ବିସ୍‍ବାସିର୍‍ ? “ତାନିୱେନ୍‍କା ୱାନ୍‌ ନିଙ୍ଗ୍‍ଜି ଗାଲି ନି ଉଲକାଏର୍‍ତିଙ୍ଗ୍‍ ତିର୍‍ ଆଦେଙ୍ଗ୍‍ ଇଜି ଆଦେସ୍‌ ସିତାନ୍‌ ।” ଦାପେ ଦାପେ ୱିଜୁ ତିର୍‌ ଆତାସର୍ହାତ୍‍ ।
MAT 8:27 ଆବେଟ୍‌ ୱିଜେରେ କାବା ଆତାର୍‌ । ୱାର୍‌ ନିଜେ ନିଜେମାନୁ ୱାର୍‍ଗି ସତାର୍‍, “ଇକାନ୍‌ ଏଣ୍ତେସ୍‌ ନାନି ଲୋକୁ ? ଗାଲି ନି ଉଲ୍‍କା ବା ୱାନି ଆଦେସ୍‌ ମାନାଜିନେ ।”
MAT 8:28 ୱେନ୍‌କା ଜିସୁ ଗାଡା ଆୟା ପାଡ଼ିଦି ଗାଦରିୟରି ରାଜିଦୁ ଇତି ଦାପ୍ରେ ରିଏର୍‌ ଲୋକାଙ୍ଗ୍‌ ବେଟ୍‌ବୁଡ଼ାତାନ୍‌ । ୱାର୍‌ ଆବେ ମାନି ଦୁକିଗୁଟାଦୁ ତେବାଜିମାର୍ହାର୍‍ । ୱାର୍‌ ଦୁବେଙ୍ଗ୍‍ କାସ୍ତିକାର୍‍ ମାରି ନିସ ତିୟେଲ୍‍ଜେ ଆୟା ସାରିସିଜି ସନିୱାନିକା କିଦେଙ୍ଗ୍‌ ଏନ୍‌ ସାସ୍‌ କିଏଜିମାର୍ହାର୍‍ ।
MAT 8:29 ୱାର୍‌ ଜିସୁଙ୍ଗୁଁ ସୁଡ଼୍‍ତି ଦାପ୍ରେ ଆଉଲି ଆଜି ଇର୍ହାନ୍‌, “ଏ ମାପୁରୁଦି ମାରିସି ! ମାବାଣ୍‍କୁ ନିନ୍‌ ଇନିକା ବଦାକିନି ? ମା ବେଡ଼ା ଆଏନ୍‍ଣ୍ତା ମାଙ୍ଗିଁ ଇନିକା ଦଣ୍ଡ୍‌ ସିଦେଙ୍ଗ୍‍ ୱାତିମାନି ?”
MAT 8:30 ଆବେଣ୍‌କୁ ଏସ ଆକଉଣ୍ତ୍ରି ପେରି ପାନ୍‍ଣ୍ତ୍ରିଙ୍ଗ୍‍ ମାନ୍ଦା ସାରାଜିମାର୍‌ଏ ।
MAT 8:31 ଆୟା ଲୋକାମାନୁ ମାନି ତାଗ୍‌ଇ ଆତ୍‍ମେଙ୍ଗ୍‍ ଜିସୁଙ୍ଗୁଁ ମାଡ଼ିସ୍‍ କିଜି ଇର୍‌ଏ, “ମାଙ୍ଗିଁ ଜଦି ପେର୍‍ଦେଙ୍ଗ୍‍ ବଦାକିଜିନି, ଆୟା ପାନ୍‍ଡ୍ରି ମାନ୍ଦା ଲୋଇ ମାଙ୍ଗିଁ ପକ୍‍ଆ ।”
MAT 8:32 ଜିସୁ ଇର୍ହାନ୍‌, “ସାନ୍‍ଡ୍ରୁ” ଦୁବେଙ୍ଗ୍‍ ଦାପେ ଦାପେ ଲୋକାଙ୍ଗ୍‌ ଡ଼ିସ୍‌ସି ପାନ୍‍ଡ୍ରି ମାନ୍ଦା ଲୋଇ ଡ଼ୁଗିତେ । ପାନ୍‍ଡ୍ରି ମାନ୍ଦା ଉରୁକ୍‍ସି ସର୍ହେ ମାରି ଗରନ୍‌ ଟିପୁଦାନ୍‍ ଉରୁକ୍‌ସି ସଲ୍‌ସି ସାମ୍‌ଦୁର୍‌ତୁ ଆର୍‌ଜି ମୁଡ଼ୁଗିତେ ସାତେ ।
MAT 8:33 ପାନ୍‍ଡ୍ରିଆଙ୍ଗ୍‍ ସାଆରା କିନି ଲୋକୁ ଲାକ୍‌ତୁରି ଗାଡ଼୍‌କାଙ୍ଗ୍‌ ନି ନାର୍‍କାଙ୍ଗ୍‍ଁ ସଲ୍‌ସି ଦୁବେଙ୍ଗ୍‍ ଆସ୍‍ତି ଲୋକାଙ୍ଗ୍‌ ଇନିକା ଗଟାତାମାର୍ହାତ୍‍ ମାରି ଆଇ ୱିଜୁ ମାଟା ଆବେ ୱେର୍‌ତାର୍‌ ।
MAT 8:34 ଆଦେଙ୍ଗ୍‌ ଆୟା ଗାଡ଼୍‌ତି ୱିଜେରେ ଜିସୁଙ୍ଗୁଁ ବେଟ୍‍ବୁଡ଼ାଦେଙ୍ଗ୍‍ ସହସି ୱାତାର୍‌ ମାରି ୱାନିଙ୍ଗ୍‌ ସୁଡ଼୍‍ତି ୱେନ୍‌କା ଆୟା ରାଜିଦାନ୍‍ ଡ଼ିସ୍‌ସି ସନ୍‌ଡ଼୍ରେଙ୍ଗ୍‌ ଜିସୁଙ୍ଗୁଁ ମାଡ଼ିସ୍‍କିତାର୍‍ ।
MAT 9:1 ଜିସୁ ଡଙ୍ଗାଁଦୁ ବାସ୍‌ସି ଗାଡାଦି ଆୟାପାଡ଼ି ମାନି ୱାନି ଗାଡ଼୍‌ତୁ ଡ଼େସିସର୍ହାନ୍‍ ।
MAT 9:2 ଆବେ ଅରେନ୍‍ ଲୋକ୍‌ ପକିୟାଗାତି ରୋଗ୍‌ ଲୋକ୍‌ତିଙ୍ଗ୍‌ ଲୋକୁ ୱାନି ଲାକ୍‌ତୁ ତାତାର୍‌ । ରଗ୍‍ତିକାନ୍‍ ୱାନି ଖାଟେଲ୍‍ତୁ ଡରିତାମାର୍ହାନ୍‍ । ୱାରି ନିସ ବିସ୍‌ବାସ୍‌ ସୁଡ଼୍‌ଜି ଜିସୁ ପକିୟାଗାତି ରୋଗ୍‌ ଲୋକ୍‌ତିଙ୍ଗ୍‌ ଇର୍ହାନ୍‌, “ଏ ମାରିନ୍‌, ସାହାସ୍‍ ଆସ୍‍ଆ । ନି ପାପ୍‌ୱିଜୁ କେମା ଆତାମାନାତ୍‌ ।”
MAT 9:3 ଏସ ସାସ୍ତ୍ରିର୍‍ ଇୟା ମାଟା ୱେନ୍‌ଞ୍ଜି ୱାରି ୱାରି ଲୋଇ ୱାର୍‍ଗିଦେଙ୍ଗ୍‍ ଆସ୍‌ତାର୍‌, “ଇୟା ଲୋକୁ ମାପୁରୁଙ୍ଗ୍‌ ନିନ୍ଦା କିଜିନାନ୍‌ ।”
MAT 9:4 ୱାରି ମୋନ୍‌ତୁ ମାଟା ନେସ୍‌ସି ଜିସୁ ଇର୍ହାନ୍‌, ମିର୍‌ ଏନ୍ଦା ନିଜେ ନିଜେଦି ମନ୍‌ତୁ ଇୟାୱାଜା ତାଗ୍‌ଇ ମାଟା ଅଡ଼୍‍ବିଜିନିଦେର୍‍ ?
MAT 9:5 ଇନିକା ଉସାସ୍‌ ? ନି ପାପ୍‌ୱିଜୁ କେମା ଆତାତ୍‌ ଇଜି ଇନିକା, ମାରି, ନିଙ୍ଗିଁଆ, ବୁଲାଆ ଇଜି ଇନିକା ?
MAT 9:6 ମାତର୍‌ ପାପ୍‌କେମା କିନି ଉଣ୍ତିଙ୍ଗ୍‌ ବା ଦୁନିଆଦୁ ମନୁସ୍ୟପୁତ୍ରଦି ଅଦିକାର୍‍ ମାନାତ୍‍, “ଇୟା ମାଟା ମି ଆଗ୍‌ଡ଼ି ପାର୍‍ମାଣ୍‍କିନା ।” ତାନିୱେନ୍‍କା ଜିସୁ ପକିୟାରଗିଙ୍ଗ୍‍ ଇର୍ହାନ୍‌, “ନିଙ୍ଗିଁଆ, ନିଜେଦି ଟାଟି ଆସ୍‌ସି ମି ଇଣ୍ତ୍ରସାଙ୍ଗ୍‍ଆ ।”
MAT 9:7 ରଗ୍‌ ଲୋକୁ ନିଙ୍ଗ୍‍ଜି ଇନ୍‌ଡ୍ର ସର୍ହାନ୍‍ ।
MAT 9:8 ଲୋକୁ ଇକା ସୁଡ଼୍‌ଜି ତିଲାତାର୍‍ । ମାତର୍‌ ଲୋକ୍‌ତିଙ୍ଗ୍‌ ଇୟାୱାଜା ଅଦିକାର୍‌ ସିତାମାନାନ୍‍ଆକା ୱାର୍‌ ମାପୁରୁଦି ଦନ୍ୟବାଦ୍‍ କିତାର୍‍ ।
MAT 9:9 ଜିସୁ ଆବେଟ୍‌କୁ ବୁଲାଜିସନିୱାଲେ ମାତିଉ ଦର୍‌ତି ଅରେନ୍‍ ସିସ୍‍ଟୁ ଲୋସ୍‍ନିୱାନିଙ୍ଗ୍‍ ନିଜେଦି ପାଣିକିନି ବାଡିଦୁ ବାସ୍‍ନିମାନିକା ସୁଡ଼ୁତାନ୍‍ ମାରି ୱାନିଙ୍ଗ୍‌ କୁକ୍‌ସି ଇର୍ହାନ୍‌, “ନା ୱେନ୍‌କା ୱେନ୍‌କା ରାଆ ।” ମାତିଉ ନିଙ୍ଗ୍‍ଜି ୱାନି ୱେନ୍‌କା ସର୍ହାନ୍‍ ।
MAT 9:10 ଜିସୁ ମାତିଉରି ଇଲ୍‌ତୁ ଉଣିୱାଲେ ନାଣ୍ତ ସିସ୍‍ଟୁ ଲୋସ୍‌ନିକାର୍‌ ମାରି ପାପି ଲୋକୁ ୱାନି ୱାଲେ ମାରି ୱାନି ସିସୁରି ୱାଲେ ଉଣ୍ତେଙ୍ଗ୍‌ ବାସ୍‌ତାର୍‌ ।
MAT 9:11 ଏସଲୋକ୍‌ ପାରୁସିର୍‌ ଆକା ସୁଡ଼୍‌ଜି ଜିସୁଦି ସିସୁରିଙ୍ଗ୍‌ ୱେନ୍‌ବାତାର୍‌, “ମି ଗୁରୁ ସିସ୍‍ଟୁ ଲସ୍‍ନିୱାରିୱାଲେ ନି ପାପିଲୋକା ୱାଲେ ଏନ୍ଦା ଅର୍‌ସେ ବାସ୍‌ସି ଉଣୁଜିନାନ୍‍ ।”
MAT 9:12 ଜିସୁ ୱାରି ମାଟା ୱେନ୍‌ଞ୍ଜି ଇର୍ହାନ୍‌, “ନେଗି ଲୋକା ଉଣ୍ତିଙ୍ଗ୍‌ ଡାକ୍‌ତର୍‌ତି ଲୋଡ଼ା ସିଲେତ୍‌ । କେବଲ୍‌ ରଗ୍‌ ଲୋକୁ ଡାକ୍‌ତର୍‌ତି ଲୋଡ଼ାକିନାର୍‍ ।
MAT 9:13 ସାସ୍ତ୍ରଦୁ ରାସାତାମାନାତ୍‌, ନାନ୍ ବଦାକିନା ଦୟା, ପୁଜାସିନିକା ସିଲେ ଇୟା ମାଟାଦି ଅର୍ତ ଇନିକା, ସଲ୍‍ସ ବୁଜାଦେଙ୍ଗ୍‌ ବଦାକିଦୁ । ନାନ୍ ଦାର୍ମୁ ଲୋକାଙ୍ଗ୍‌ କୁକ୍‍ତେଙ୍ଗ୍‍ ରେଏ; ମାତର୍‌ ପାପି ଲୋକାଙ୍ଗ୍‌ କୁକ୍‍ତେଙ୍ଗ୍‍ ଇଜି ୱାତାମାନା ।”
MAT 9:14 ତେନିୱେନ୍‍କା ଡୁବନ୍‌ ସିନି ଯୋହନତି ସିସୁର୍‍ ଜିସୁ ଲାକ୍‌ତୁ ୱାଜି ୱେନ୍‌ବାତାର୍‌, “ମାପ୍‌ ନି ପାରୁସିର୍‌ ନିସ ଦେବେଙ୍ଗ୍‌ ଉପାସ୍‌କିଜିନାପ୍‍, ନି ସିସୁର୍‍ ଏନ୍ଦା ଏସାଙ୍ଗ୍‍ ବା ଉପାସ୍‍କିଏଜିନାର୍‍ ?”
MAT 9:15 ଜିସୁ ଇର୍ହାନ୍‌, ପେଡ଼ିଦୁ ମୁରୁଲି ମାନିସାନ୍ଦି କୁଡ଼ାଙ୍ଗାଁ ଇନିକା ଦୁକ୍‍କିନାର୍‍ ? ଏସାଙ୍ଗ୍‍ ସିଲେ । ମାତର୍‌ ଦିନ୍‌ ୱାନାତ୍‌, ଏସ୍ତିୱାଲେ ମୁରୁଲି ସନାନ୍‌; ନାସ୍ତିୱାଲେ ୱାର୍‌ ଉପାସ୍‌ କିନାର୍‌ ।
MAT 9:16 “ଏନ୍‌ ପାଡ଼ିଇ ୱାତିଦୁ ପୁନି କନାଦି ଜାଲି ଗୁତ୍‍ଏନ୍‍ । ଇରିଙ୍ଗ୍‌ ପୁନି କନାଦି ଜାଲି ରେଲାଇଆଜି କିଜିତି ବାଡିଦିଙ୍ଗ୍‍ ନାଣ୍ତ କିଜିସ୍‍କିନାତ୍‍ ।”
MAT 9:17 “ଏନ୍‌ ପାଡ଼ିଇ ତଲ୍‍ ମଣିଦୁ ପୁନି ଅଙ୍ଗୁର୍‍ରସ୍‍ ବର୍ତିକିଜି ଇଡ୍‌ଏନ୍‌ । ଇରିଙ୍ଗ୍‌ ଆବେଟ୍‌କୁ ମଣି ପାଡ୍‍ଜିସଲ୍‍ସି ସେଏଣ୍ତ୍‍ଆନାତ୍‍ ମାରି ଅଙ୍ଗୁର୍‍ରସ୍‍ ସହସି ଆଡ୍‍ଗିୱାଙ୍ଗ୍‍ଁନେ । ଅଙ୍ଗୁର୍‍ ରସ୍‌ତିଙ୍ଗ୍‌ ପୁନି ତଲ୍‍ ମଣିଦୁ ଇଟ୍‌ତିଙ୍ଗ୍‌, ରୁଣ୍ତି ଅଙ୍ଗୁର୍‍ରସ୍‍ ନି ତଲ୍‍ମଣି ନେଗେଣ୍ତ୍‍ତେବାନେ ।”
MAT 9:18 ଜିସୁ ଇୟାୱିଜୁ ସିକିୟା ସିନିୱାଲେ ଅରେନ୍‍ ଜିହୁଦି ପେରି ପାଣିକିନିକାନ୍‌ ୱାନି ଲାକ୍‌ତୁ ୱାଜି ମେଣ୍ତେଙ୍ଗ୍‍ ଗଟ୍‌କିଜି ଇର୍ହାନ୍‌, “ଇୟାଦାପ୍ରେ ନା ଗାଡ଼ି ସାତାମାନାତ୍‍ । ମାତର୍‌ ନିନ୍‌ ୱାଜ ତାନି ମୁସ୍‌କୁ କିୟୁ ଇଟ୍‌ତିଙ୍ଗ୍‌, ୱାଦ୍‌ ସତେନେ ଜିନାତ୍‌ ।”
MAT 9:19 ଦାପେ ଦାପେ ଜିସୁ ନିଙ୍ଗିଁତାନ୍‍ ମାରି ୱାନ୍‌ ନି ୱାନି ସିସୁର୍‍ ଆୟା ପାଣିକିନିୱାନି ୱେନ୍‌କା ୱେନ୍‌କା ସର୍ହାର୍‍ ।
MAT 9:20 ୱେନ୍‌କା ଅରେତ୍‌ ଆଇମାଲୋକ୍‍ ୱାନି ୱେନ୍‌କା ତରିଟାନ୍‍ ୱାଜି ୱାନି ୱାତି ଜାଲିଦିଙ୍ଗ୍‌ ମୁଟ୍‍ତାତ୍‍ । ୱାଦ୍‌ ବାର ବାର୍‍ସେକ୍‍ ସାନ୍ଦି ସୁତୁକ୍‍ ଆନି ରୋଗ୍‌ ଦଣ୍ତ୍‌ବଗାଜି ମାର୍ହାତ୍‌ ।
MAT 9:21 ୱାଦ୍‌ ମୋନ୍‌ତୁ ମୋନ୍‌ତୁ ଅଡ଼୍‍ବିତାତ୍‍, “କେବଲ୍‌ ୱାନି ୱାତିଦିଙ୍ଗ୍‌ ମୁଟ୍‌ତେଙ୍ଗ୍‌ ଆଟ୍‌ତିଙ୍ଗ୍‌, ନାନ୍ ନେଗେନ୍‍ ଆନାସନା ।”
MAT 9:22 ଜିସୁ ମାର୍‍ଜି ବେସ୍‍ସି ତାନିଙ୍ଗ୍‌ ସୁଡ଼ୁତାନ୍‌ ମାରି ଇର୍ହାନ୍‌, “ଆଇଲି, ସାହାସ୍‍ ଆସ୍‌ଆ । ନି ବିସ୍‌ବାସ୍‌ ନିଙ୍ଗିଁ ନେଗେନ୍‌ କିତାମାନାତ୍‌ ।” ଆୟା ଦାପ୍ରେ ଆୟା ଆଇମା ନେଗେନ୍‍ ଆତାସର୍ହାତ୍‍ ।
MAT 9:23 ତାନି ୱେନ୍‍କା ଜିସୁ ଆୟା ଜିହୁଦିରି ପେରି ପାଣିକିନିୱାନି ଇଲ୍‌ତୁ ଇତାନ୍‌ । ଆବେଟ୍‌ ମୁସ୍‍ନିୱାଲେ ପିରଡ଼ି ଉକୁତେଙ୍ଗ୍‍ ଇଜି କୁକ୍‍ତିମାର୍‍ଇ ଲୋକ୍ ନି ଆଇ ଲୋକୁ ଆଉଲିଆଜିମାନିକା ସୁଡ଼୍‌ଜି,
MAT 9:24 ଜିସୁ ଇର୍ହାନ୍‌, “ୱିଜେରେ ଇବେଟ୍‌କୁ ସହସ ସାନ୍‍ଡ୍ରୁ ! ଆଇଲି ସାଏତ୍‌ । କେବଲ୍‌ ୱାଦ୍‌ ସୁସ୍‍ତାମାନାତ୍‍ !” ୱାନି ମାଟା ୱେନ୍‌ଜି ୱିଜେରେ ବାସେ କିତାର୍‌ ।
MAT 9:25 ମାତର୍‌ ୱାର୍‌ ସତି ସର୍‍ରି ୱେନ୍‌କା ଜିସୁ ଆଇଲିଦି ବାକ୍‍ରାଦୁ ସଲ୍‌ସି ତାନି କିୟୁ ଆସ୍‌ସି ନିକ୍‍ତାନ୍‍ ମାରି ୱାଦ୍‌ ନିଙ୍ଗିଁତାତ୍‍ ।
MAT 9:26 ଇୟା ଗଟ୍‌ନାଦି କାବୁର୍‌ ଆୟା ରାଜି ୱିଜୁ ତରିନ୍‌ ୱେଙ୍ଗିଁତା ସର୍ହାତ୍‍ ।
MAT 9:27 ଜିସୁ ଆବେଟ୍‌କୁ ସନିୱାଲେ ରିଏର୍‌ କାଣାର୍‌ ୱାନି ୱାଲେସର୍ହାର୍‍ । ୱାର୍‌ ଆଉଲିଇଜି ଇର୍ହାର୍‌, “ଏ ଦାଉଦତି ମାରିନ୍‌, ମାଙ୍ଗିଁ ଦୟା କିଆ ।”
MAT 9:28 ଜିସୁ ଉଣ୍ତ୍ରି ଇନ୍‌ଡ୍ର ଡ଼ୁଗିତାନ୍‍ । ମାରି ୱାନ୍‌ ବା ସଲ୍‌ସି ଆୟା ଇନ୍‌ଡ୍ର ଡ଼ୁଗିତାର୍‍ । ଆବେ ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, “ନାନ୍ ମିଙ୍ଗିଁ ନେଗେନ୍‌ କିଦେଙ୍ଗ୍‌ ଆଟ୍‍ନାଇଜି ବିସ୍‌ବାସ୍‌ କିଜିନିଦେର୍‍ନୋ ?” ୱାର୍‌ ଇର୍ହାର୍‌, “ହୁଁ ପ୍ରବୁ ।”
MAT 9:29 ନାସ୍ତିୱାଲେ ଜିସୁ ୱାରି କାଣ୍‌କାଙ୍ଗ୍‌ ମୁଟ୍‍ସି ଇର୍ହାନ୍‌, “ମି ବିସ୍‌ବାସ୍‌ ଇସାବ୍‌ତାନ୍‌ ଆକା ଆପିତ୍‌ ।”
MAT 9:30 ଆୟାଦାପ୍ରେ ୱାର୍‌ କାଣୁକୁ ସୁଡ଼୍‍ଦେଙ୍ଗ୍‍ ଆଟ୍‌ତାର୍‌ । ଜିସୁ ୱାରିଙ୍ଗ୍‌ ନାଣ୍ତ ଆଟ୍‌ୱା ଆଦେସ୍‌ ସିଜି ଇର୍ହାନ୍‌, “ଜାଗାର୍‌ତା ! ଏନ୍‌ ଏଣ୍ତେସ୍‌ ଇୟା ମାଟା ନେସ୍‌ଏନ୍‌ ।”
MAT 9:31 ମାତର୍‌ ୱାର୍‌ ଆବେଟ୍‌କୁ ସହସି ସଲ୍‌ସି ଜିସୁଦି ଇୟା ମାଟା ୱିଜୁ ରାଜି ତରିନ୍‌ ୱେର୍‌ତାର୍‌ ।
MAT 9:32 ୱାର୍‌ ସନିୱାଲେ ଏସ ଲୋକୁ ଅରେନ୍‍ ଗୁଲେଙ୍ଗ୍‍ ଜିସୁ ଲାକ୍‌ତୁ ତାତାର୍‌ । ୱାନିଙ୍ଗ୍‌ ଦୁବା ଆସ୍‍ତାମାର୍ହାତ୍‍ ଆକା ୱାନ୍‌ ଗୁଲା ଆତାସର୍ହାମାର୍ହାନ୍‍ ।
MAT 9:33 ଜିସୁ ୱାନି ମେନ୍ଦଲ୍‌ତାନ୍‌ ଦୁବାଦିଙ୍ଗ୍‌ ସପ୍‌ତି ଦାପ୍ରେ ୱାନ୍‌ ମାଟା ୱାର୍‍ଗିଦେଙ୍ଗ୍‍ ଆସ୍‍ତାନ୍‍ । ୱିଜେରେ କାବାଆଜି ଇର୍ହାର୍‌, “ଇସ୍ରାଏଲ୍‌ ଦେସ୍‌ତୁ ମାପ୍‌ ଇୟାୱାଜା ପାଣି ଏସାଙ୍ଗ୍‍ ସୁଡ଼ୁଏପ୍‍ମାର୍ହାପ୍‍ ।”
MAT 9:34 ମାତର୍‌ ପାରୁସିର୍‌ ଇର୍ହାର୍‌, “ଇୟା ଲୋକୁ ଦୁବେଙ୍ଗାଁ ପେରିକାତ୍‍ ବାଲ୍‍ଜିବୁଲ୍‍ ସାକ୍ତିଦାନ୍‌ ଦୁବେଙ୍ଗ୍‍ଁ ଡ଼ିସିସ୍‍ନାନ୍‍ ।”
MAT 9:35 ଜିସୁ ବୁଲାଜି ବୁଲାଜି ନାଣ୍ତ ଗାଡ଼୍‌କାଙ୍ଗ୍‌ ନି ନାର୍‍କାଙ୍ଗ୍‍ଁ ସର୍ହାନ୍‍ । ୱିଜୁ ବାଡିଆଙ୍ଗ୍‍ ୱାନ୍‌ ପାର୍‍ତନାକିନି ଇଲ୍‌କାଙ୍ଗ୍‌ ସିକିୟା ସିତାନ୍‌, ମାପୁରୁଦି ରାଜିଦି ନେଗିକାବୁର୍‌ ପ୍ରଚାର୍‌ କିତାନ୍‌ ମାରି ନବ୍‍ଆତିୱାରିଙ୍ଗ୍‍ ନି ରଗ୍‌ ଲୋକାଙ୍ଗ୍‌ ନେଗେନ୍‌କିତାନ୍‌ ।
MAT 9:36 ଲୋକାଙ୍ଗ୍‌ ସୁଡ଼୍‌ଜି ୱାନ୍‌ ୱାରି ଉଣ୍ତିଙ୍ଗ୍‌ ଦୁଃକ୍‌‍ କିତାନ୍‌, ଇରିଙ୍ଗ୍‌ ଗାଉଡ଼ୁ ସିଲି ମେଣ୍ତେଙ୍ଗାଁ ମାନ୍ଦା ୱାଜା ୱାର୍‌ ସାକାସିଲିକା ନି ସିନ୍ତା ଆଜିମାର୍ହାର୍‍ ।
MAT 9:37 ଆଦେଙ୍ଗ୍‌ ୱାନ୍‌ ସିସୁରିଙ୍ଗ୍‌ ଇର୍ହାନ୍‌, “ପାସିନାଣ୍ତ ଆତାମାନାତ୍‌, ମାତର୍‌ ତାନିଙ୍ଗ୍‌ ଉଣ୍ତାକିଦେଙ୍ଗ୍‌ ଇଜି ନାଣ୍ତଲୋକ୍‍ କୁଲିକିନିକାର୍‍ ସିଲେର୍‌ ।
MAT 9:38 ନାଣ୍ତଲୋକ୍‍ କୁଲିକିନିୱାରିଙ୍ଗ୍‍ ପକ୍‍ସି ପାସିଉଣ୍ତାକିଜି ଅତେଙ୍ଗ୍‌ ଇଜି ପାସି ମାଲିକ୍‍ତିମାନୁ ପାର୍‌ତନା କିଦୁ ।”
MAT 10:1 ଜିସୁ ୱାନି ବାରଲୋକ୍ ସିସୁରିଙ୍ଗ୍‌ କୁକ୍‌ସି ଦୁବେଙ୍ଗ୍‍ ଡ଼ିସିସ୍‍କିଦେଙ୍ଗ୍ ଇଜି ମାରି ୱିଜୁ ରକମ୍‌ତି ରଗ୍‌ କାସ୍ଟୁ ନେଗେନ୍‌ କିଦେଙ୍ଗ୍‍ ଇଜି ଅଦିକାର୍‌ ସିତାନ୍‌ ।
MAT 10:2 ଆୟା ବାର ଲୋକ୍ ପ୍ରେରିତ ସିସୁରି ଦର୍‌ ଆତାତ୍‌ ସିମୋନ ପିତର୍‌ ଦର୍‌ତାନ୍‌ ବା ୱେଙ୍ଗ୍‌ଁନାତ୍‌ ମାରି ୱାନି ତଡ଼ାନ୍‌ ଆନ୍ଦ୍ରିୟ; ଜେବଦଦି ରିଏର୍‌ ମାରିସିର୍‌ ଜାକୁବ ନି ଯୋହନ;
MAT 10:3 ପିଲିପ୍‌, ବାର୍ତଲମି, ଥୋମା, ମାରି ସିସ୍‍ଟୁ ଲୋସ୍‍ନି ମାତିଉ, ଆଲପିଦି ମାରିସି ଜାକୁବ, ଥଦ୍ଦୀୟ;
MAT 10:4 କିଣାନିୟ ସିମୋନ ଏନ୍‌ କି ଇସ୍ରାଏଲ୍‌ ଦେସ୍‍ତିଙ୍ଗ୍‍ ରକିୟା କିଦେଙ୍ଗ୍‌ ବଦା କିଜିମାର୍ହାନ୍‍ ମାରି ଜିସୁଙ୍ଗୁଁ ସାତ୍ରୁରି କିୟୁଦୁ ସର୍ପେ କିତିସିତି ଇସ୍କାରିୟୋତିୟ ଜିହୁଦା ।
MAT 10:5 ଜିସୁ ଇୟା ବାରଲୋକ୍‌ ସିସୁରିଙ୍ଗ୍‌ ପକ୍‍ନିୱାଲେ ଆଦେସ୍‌ ସିଜିଇର୍ହାନ୍‍, “ମିର୍‌ ଅଣଜିହୁଦିରି ରାଜିଦୁ ସଲ୍‍ମାଟ୍‍ । ମାରି ଆମା ସମିରୋଣ ଗାଡ଼୍‌ତୁ ବା ସଲ୍‍ମାଟ୍‍ ।
MAT 10:6 ମାତର୍‌ ମୁର୍‍ତିମାନି ମେଣ୍ତେଙ୍ଗାଁ ୱାଜା ଇସ୍ରାଏଲ୍‌ତି ଲୋକା ଲାକ୍‌ତୁ ସାନ୍‍ଡ୍ରୁ ।
MAT 10:7 ୱାରିମାନୁ ପ୍ରଚାର୍‌ କିଜି ଇନ୍‍ଡ୍ରୁ, ମୁସ୍‌କୁପୁର୍‌ ଇଗା ୱାତାତ୍‍ !
MAT 10:8 ରଗ୍‍ତୁ ମାନି ଲୋକାଙ୍ଗ୍‌ ନେଗେନ୍‍କିଦୁ, ସାତି ଲୋକାଙ୍ଗ୍‌ ଡ଼େସି ନିକ୍‍ତୁ, କୁସ୍ଟରୋଗ୍‌ତି ଲୋକାଙ୍ଗ୍‌ ନେଗେନ୍‍କିଦୁ, ଦୁବେଙ୍ଗ୍‍ ଡ଼ିସିସ୍‍ କିଦୁ । ଆମାକା ଆର୍‍ଏ ପୟ୍‌ତିମାନିଦେର୍‌, ଆକା ଆଇୱାରିଙ୍ଗ୍‌ ଆର୍‍ଏ ସିଦୁ ।
MAT 10:9 ଅର୍‌ସେ ବାଙ୍ଗାଁରାମ୍‍ ନି ୱେଣ୍ତି ବା ଡାବୁଙ୍ଗୁଁ ଇଡ୍‌ନି ମଣି ଅମାଟ୍‌,
MAT 10:10 ମାରି ଡ଼ଆନି ମଣି ଆସ୍‌ସି ବୁଲାମାଟ୍‍ । ନାଣ୍ତ ଆଙ୍ଗିଁଙ୍ଗ୍‌, ଜୁତେଙ୍ଗ୍‌ ମାରି ବାଡିଗା ବା ଅମାଟ୍‌ । ପାଣିକିନିକାର୍‌ ନିଜେଦି କୁଲି ଡାବୁଙ୍ଗ୍‌ଁ ପୟ୍‌ଦେଙ୍ଗ୍‌ ଜଗ୍‌ ମାନାତ୍‌ ।
MAT 10:11 “ଉନ୍‌ଡ୍ରି ଗାଡ଼୍‌ ବା ନାର୍‍ତୁ ଇତି ୱେନ୍‌କା ଆବେ ଏନ୍‌ ମି ସେବାକିନାନ୍‍, ଆୟା ମାଟା ମିର୍‌ ପୟ୍‌ଦୁ, ଆଇମାନୁ ସନି ସାନ୍ଦି ତାମେ ଇଲ୍‌ତୁ ମାନ୍‌ଡ଼୍ରୁ ।
MAT 10:12 ଉନ୍‌ଡ୍ରି ଇନ୍‌ଡ୍ର ଡ଼ୁଗୁନି ୱାଲେ ଆବେମାନି ଲୋକାଙ୍ଗ୍‌ ମାଡ଼ିସ୍‍କିଜି ଇନ୍‍ଡ୍ରୁ, ମି ସାନ୍ତି ଆପିତ୍‌ ।
MAT 10:13 ଇଲ୍‌ତି ଲୋକୁ ଜଦି ମିଙ୍ଗିଁ ସେବାକିନାର୍‍, ୱାରି ଉଣ୍ତିଙ୍ଗ୍‌ ମାଡ଼ିସ୍‌ କିତିକା ସାନ୍ତି ଆନାତ୍‌ । ମାତର୍‌ ଜଦି ୱାର୍‌ ମିଙ୍ଗିଁ ସେବା କିଏର୍‌, ମି ମାଡ଼ିସ୍‍କିନିକା ଡ଼େପ୍‍ସ ଅତୁ ।
MAT 10:14 ଜଦି ଏମେ ଇନ୍‌ଡ୍ର ମାରି ଗାଡ଼୍‌ତୁ ମିଙ୍ଗିଁ ଲୋକୁ ମାନାଏର୍‌, ଆତିଙ୍ଗ୍‌ ୱାରିଙ୍ଗ୍‌ ଡ଼ିସ୍‌ତିଙ୍ଗ୍‌ ଇଜି ସିନାଦି ୱାଜା ପାଦାମ୍‍ତି ଦୁଡ଼ି ସାଡ଼୍‍ସି ସିଜି ଆୟା ବାଡି ଡ଼ିସ୍‌ସୋ ସିଦୁ ।
MAT 10:15 ନାନ୍ ମିଙ୍ଗିଁ ସତ୍‌ ଇଜିନା, ବିସାର୍‍ ଦିନ୍‍ତୁ ୱେରି ମାଣ୍‌କୁ ସଦମ୍‍ ଗମୋରାଦି ଲୋକା ଉଣ୍ତିଙ୍ଗ୍‌ ମାପୁରୁ ନାଣ୍ତ ଦୟା ତର୍‍ନାନ୍‍ ।
MAT 10:16 “ୱେନ୍‌ଡ୍ରୁ ! ନୋରେସ୍‍କା ଲାକ୍‌ତୁ ମେଣ୍ତେଙ୍ଗାଁ ୱାଜା ନାନ୍ ମିଙ୍ଗିଁ ପୋକ୍‍ସିନା, ମାରି ସାରାସ୍‌ତି ୱାଜା ଜାଗାର୍‌ତା ମାରି ପାର୍‍ୱାଦି ୱାଜା ସାନ୍ତି ଆଦୁ ।
MAT 10:17 ଜାଗାର୍‌ତା ମାନ୍‌ଡ଼୍ରୁ, ଇରିଙ୍ଗ୍‌ ଲୋକୁ ମିଙ୍ଗିଁ ତର୍‌ସି ବିସାର୍‌ କିନି ସଭାଦୁ ଅନାର୍‍ର ସର୍ପେ କିନାର୍‌ । ପାର୍‍ତନାକିନି ଇଲ୍‌କାଙ୍ଗ୍‌ ୱାର୍‌ ମିଙ୍ଗିଁ କର୍‍ଡା ଡାକ୍‌ନାର୍‌ ।
MAT 10:18 ନା ଉଣ୍ତିଙ୍ଗ୍‌ ମିର୍‌ ରାଜା ନି ସାସନ୍‍କିନିୱାରି ଆଗ୍‌ଡ଼ି ତାଆୟ୍‌ଆଜି ବିସାର୍‍ଆନିଦେର୍‍ । ଇୟାଉଣ୍ତିଙ୍ଗ୍‌ ୱାରିଙ୍ଗ୍‌ ନି ଅଣଜିହୁଦି ଲୋକାଙ୍ଗ୍‌ ନେଗିକାବୁର୍‌ ସାକି ସିଦେଙ୍ଗ୍‍ ଇଜି ସାରି ପୟ୍‌ନିଦେର୍‌ ।
MAT 10:19 ମି ବିସାର୍‌ ଆନିୱାଲେ ଇନିକା ଇନିଦେର୍‌, ମାରି ଏଣ୍ତେସ୍‌ ଇନିଦେର୍‌, ଆୟା ବିସୟ୍‌ତାନ୍‌ ସିନ୍ତା କିମାଟ୍‌ । ଟିକ୍‌ ଆୟା ସମୟ୍‍ତୁ ଆକା ମିଙ୍ଗିଁ ୱେର୍‍ଆଇଆଜି ସିଆନାତ୍‍ ।
MAT 10:20 ଇରିଙ୍ଗ୍‌ ମିଙ୍ଗିଁ ନିଜେ ଇନିକା ଇନ୍‌ଡ୍ରେଙ୍ଗ୍‌ ଆଏତ୍‍ । ମି ବୁବା ମାପୁରୁଦି ପବିତ୍ର ଆତ୍ମା ମି ୱେୟୁ ସିଜି ମାଟା ଇନାନ୍‌ ।
MAT 10:21 “ଆୟା ସମୟତୁ ଲୋକୁ ତଡ଼ାନ୍‍ ତଡ଼ାନ୍‍ତିଙ୍ଗ୍‍ ମାରି ବୁବା ମାରିନ୍‍ତିଙ୍ଗ୍‍ ସାପିସ୍‍ତେଙ୍ଗ୍‍ ଇଜି ସର୍‍ପେ କିଜି ସିନାର୍‍ । ବୁବାସି ବା ନିଜେଦି କଡ଼କକ୍ରାରିଙ୍ଗ୍‌ ଉଣ୍ତିଙ୍ଗ୍‌ ଆୟାୱାଜା କିନାନ୍‌ । କଡ଼କକ୍‌ରା ବୁବାସି ଆଇସି ବିରୁଦ୍‍ତାନ୍‍ ନିଙ୍ଗ୍‍ନାରୋ ୱାରିଙ୍ଗ୍‌ ସାୟାମାର୍‌ଗା ଡାକ୍‌ନାର୍‌ ।
MAT 10:22 ନା ଉଣ୍ତିଙ୍ଗ୍‌ ୱିଜେରେ ମିଙ୍ଗିଁ କାଡ଼୍‍ନାର୍‍; ମାତର୍‌ ଏନ୍‌ ସାରାସାରି ସାନ୍ଦି ବିସ୍‌ବାସ୍‌ତୁ ତିର୍‍ଆଜିତେବାନାନ୍‍, ୱାନ୍‌ ରକିୟା ପୟ୍‍ନାନ୍‍ ।
MAT 10:23 ଉନ୍‌ଡ୍ରି ଗାଡ଼୍‌ତୁ ମିର୍‌ କାସ୍ଟୁ ପୟ୍‌ତିଙ୍ଗ୍‌ ଆଇ ଗାଡ଼୍‌ତୁ ଉର୍‍କ୍‍ତୁ । ନାନ୍ ମିଙ୍ଗିଁ ସତ୍‌ତାନ୍‌ ଇଜିନା, ମିର୍‌ ଇସ୍ରାଏଲ୍‌ତି ୱିଜୁ ଗାଡ଼୍‌କାଙ୍ଗ୍‌ ପାଣି ସେସ୍‍କିନି ଆଗ୍‌ଡ଼ି ମନୁସ୍ୟପୁତ୍ର ଡ଼େସି ୱାନାମାନାନ୍‍ ।
MAT 10:24 “ଏମେ ସିସୁ ୱାନି ଗୁରୁମାଣାନ୍‍ ସିସୁ ପେରିକାନ୍‌ ଆଏନ୍‍, ମାଲିକ୍‍ତି ମାଣାନ୍‌ ସାକର୍‌ ପେରିକାନ୍‌ ସିଲେ ।
MAT 10:25 ସିସୁ ଗୁରୁ ୱାଜା ମାରି ସାକର୍‌ ମାଲିକ୍‍ତି ୱାଜା ଆଦେଙ୍ଗ୍‌ ଆଟ୍‌ତିଙ୍ଗ୍‌ ନାସଦୁନେ ୱେଡ଼ିକା ଆନିକାମାନାତ୍‌ । ଉନ୍‌ଡ୍ରି ଇଲ୍‍ତି ମେମାରିଙ୍ଗ୍‍ ଜଦି ଲୋକୁ ବାଲ୍‍ଜିବୁଲ୍‍ ଇଜି କୁକ୍‍ନାର୍‍, ଇଲ୍‍ତି ଆଇୱାରିଙ୍ଗ୍‌ ମାରି ଏସ ତାଗ୍‌ଇ ଦର୍‌ ସିଏର୍‍ ?
MAT 10:26 “ଆୟାଉଣ୍ତିଙ୍ଗ୍‌ ଲୋକାଙ୍ଗ୍‌ ତିଲାମାଟ୍‌ । ଆମାକା ଇଲେଇ ପିଡ଼ିଗାଇ ଆତାମାନାତ୍‍, ଆକା ତରାଇଆନାତ୍‍ ମାରି ୱିଜୁ ମାର୍‍ଗିତି ମାଟା ୱେଙ୍ଗ୍‌ଁନାତ୍‌ ।
MAT 10:27 ନାନ୍ ମିଙ୍ଗିଁ ଆମାକା ସିକାଟି ସମୟ୍‍ତୁ ଇଜିନା, ଆକା ତାଲାୱେଡ଼ାଦି ସମୟତୁ ୱେକ୍‍ତୁ ମାରି ଆମାକା ମାର୍‍ଗିଜି ୱେର୍‌ଇମାନିଦେର୍‌, ଆକା ଇଲୁ ସାତ୍ ମୁସ୍‌କୁରାନ୍‌ ପ୍ରଚାର୍‌ କିଦୁ ।
MAT 10:28 ଏମେକାର୍‌ କେବଲ୍‌ ମି ମେନ୍ଦଲ୍‌ତିଙ୍ଗ୍‌ ନାସ୍ଟୁକିନାନ୍‍, ମାତର୍‌ ମି ଆତ୍ମାଦିଙ୍ଗ୍‌ ଇନି କେତି କିଦେଙ୍ଗ୍‌ ଆଟ୍‍ଏନ୍‍, ୱାରିଙ୍ଗ୍‌ ତିଲାମାଟ୍‌ । ମାତର୍‌ ଏମେ ମାପୁରୁ ମି ମେନ୍ଧଲ୍‍ ନି ଆତ୍ମା ରୁଣ୍ତିୱାନିକାଙ୍ଗ୍‍ ନରକଦୁ ଦଂସ କିଦେଙ୍ଗ୍‌ ଆଟ୍‍ନାନ୍‍, ୱାନିଙ୍ଗ୍‌ ତିଲାଦୁ ।
MAT 10:29 ଡାବୁଙ୍ଗୁଁ ସିଜି ରୁଣ୍ତି ସାଡ଼ାପୋଟିଙ୍ଗ୍‌ କଣ୍ତେଙ୍ଗ୍‌ ଆଟ୍‌ନିଦେର୍‌, ମାତର୍‌ ମି ବୁବାଦି ସାରି ପୁଟ୍‍ଏତିଙ୍ଗ୍‍ ଉନ୍‌ଡ୍ରି ସାଡ଼ା ପଟି ଆଡ୍‍ଗି ଆର୍‍ଏତ୍‍ ।
MAT 10:30 ମାରି ମି ତାଲାଦି କୁକୁଟି ବା ୱିଜୁ ଲେକିସ୍‌ କିଆୟ୍‍ଆତାମାନାତ୍‍ ।
MAT 10:31 ତିଲାମାଟ୍‌, ନାଣ୍ତ ସାଡ଼ାପୋଟିଙ୍ଗାଁ ମାଣ୍‌କୁ ମି ଦାରା ନାଣ୍ତ ।
MAT 10:32 “ଏନ୍‌ଆପିନ୍‌ ଲୋକା ଆଗିଡ଼ି ନାଙ୍ଗିଁ ମାନାନାର୍‌, ନାନ୍ ବା ମୁସ୍‌କୁପୁର୍‌ତି ବୁବା ଆଗ୍‌ଡ଼ି ୱାରିଙ୍ଗ୍‌ ନାଦି ଇଜି ନାନ୍ ମାନାନା ।
MAT 10:33 ମାତର୍‌ ଏନ୍‌ ଆତ୍‌ରେ ନାଙ୍ଗିଁ ମାନାଏନ୍‌, ୱାନିଙ୍ଗ୍‌ ନାନ୍ ବା ନା ମୁସ୍‌କୁପୁର୍‌ତି ବୁବା ଆଗ୍‌ଡ଼ି ମାନାଏ ।
MAT 10:34 “ନାନ୍ ଦୁନିଆଦୁ ସାନ୍ତି ସିଦେଙ୍ଗ୍‍ ୱାତାମାନା ଇଜି ଅଡ଼୍‍ବିମାଟ୍‍ । ସିଲେ, ନାନ୍ ସାନ୍ତି ତାତେଙ୍ଗ୍‌ ରେଏ, ମାତର୍‌ କୁଡ଼ାମ୍‍ ଆସ୍‌ସି ୱାତାମାନା ।
MAT 10:35 ଇରିଙ୍ଗ୍‌ ନାନ୍ ମାରିସି ବିରଦ୍‌ତାନ୍‌ ବୁବାସି, ବୁବାସି ବିରଦ୍‌ତାନ୍‌ ମାରିସି ମାରି ଗାଡ଼୍‌ସି ବିରୁଦ୍‍ତାନ୍‍ ଆଇସି, ଆଇସି ବିରଦ୍‌ତାନ୍‌ ଗାଡ଼୍‌ସି, ମାରି ମିମ୍‍ସି ୱାଲେ କଡ଼େସିଦି ବିରୁଦ୍‌ ଗଟେକିଦେଙ୍ଗ୍‍ ୱାତାମାନା ।
MAT 10:36 ନିଜେଦି ଇଲ୍‍ତି ଲୋକୁ ନିଜେଦି ସାତ୍ରୁଆନାର୍‍ ।
MAT 10:37 “ଏନ୍‌ ବୁବାସି ନି ଆଇସିଙ୍ଗ୍‍ ନା ମାଣ୍‌କୁ ନାଣ୍ତ ଜିବନ୍‍ନୋନାନ୍‍, ୱାନ୍‌ ନା ସିସୁ ଆଦେଙ୍ଗ୍‌ ଜଗ୍‌ ସିଲେନ୍‌, ମାରି ଏନ୍‌ କଡ଼ଦିଙ୍ଗ୍‌ ନି ଆଇଲିଦିଙ୍ଗ୍‍ ନା ମାଣ୍‌କୁ ନାଣ୍ତ ଜିବନ୍‍ନୋନାନ୍‍, ୱାନ୍‌ ନା ସିସୁ ଆଦେଙ୍ଗ୍‌ ଜଗ୍‌ ସିଲେନ୍‌ ।
MAT 10:38 ଏନ୍‌ ନା ଉଣ୍ତିଙ୍ଗ୍‌ ଦୁକ୍‍ ନି ସାନିକା ବଦା କିଜିନା ୱେନ୍‌କା ରେଏନ୍‌, ୱାନ୍‌ ନା ସିସୁ ଆଦେଙ୍ଗ୍‌ ଜଗ୍‌ ସିଲେନ୍‌ ।
MAT 10:39 ଏନ୍‌ ନିଜେଦି ଜିବନ୍‌ତିଙ୍ଗ୍‌ ରକିୟା କିଦେଙ୍ଗ୍‌ ବଦାକିନାନ୍‌, ୱାନ୍‌ ଆକା ଆରାକିନାନ୍‌, ମାତର୍‌ ଏନ୍‌ ନା ଉଣ୍ତିଙ୍ଗ୍‌ ନିଜେଦି ଜିବନ୍‌ ସିନାନ୍‍, ୱାନ୍‌ ସତେଦାନ୍‍ ଆକା ରକିୟା କିନାନ୍‍ ।
MAT 10:40 “ଏନ୍‌ ମିଙ୍ଗିଁ ମାନାନାନ୍‍, ୱାନ୍‌ ନାଙ୍ଗିଁ ମାନାନାନ୍‍, ମାରି ନାଙ୍ଗିଁ ଏନ୍‌ ମାନାନାନ୍‍, ୱାନ୍‌ ନାନ୍‌ ପକ୍‍ତିୱାନିଙ୍ଗ୍‍ ମାନାନାନ୍‍ ।
MAT 10:41 ଏନ୍‌ ବାବବାଦିରିଙ୍ଗ୍ ମାପୁରୁଦି କାବୁର୍‌ ସିନିକାନ୍‍ ଇଜି ମାନାନାନ୍‍, ୱାନ୍‌ ଆୟା ବାବବାଦିରି ପୁରସ୍‌କାର୍‌ ପୟ୍‌ନାନ୍‌ । ମାରି ଏନ୍‌ ଦାର୍ମୁ ଲୋକାଙ୍ଗ୍‌ ଦାର୍ମୁଦିକାନ୍‌ ଇଜି ମାନାନାନ୍‍, ୱାନ୍‌ ଦାର୍ମୁ ଲୋକ୍‌ତି ପୁରସ୍‌କାର୍‌ ପୟ୍‌ନାନ୍‌ ।
MAT 10:42 ମାରି ଏନ୍‌ ଇୟା ଇସ୍ରି ଲୋକ୍ ମାଣ୍‌କୁ ଅରେନ୍‍ୱାନିଙ୍ଗ୍‍ ନା ସିସୁ ଇଜି କେବଲ୍‌ ଗିନା ଏର୍‌ ଉଣ୍ତେଙ୍ଗ୍‌ ସିନାନ୍‍, ନାନ୍ ମିଙ୍ଗିଁ ସତ୍‌ ଇଜିନା, ଆୟାଉଣ୍ତିଙ୍ଗ୍‌ ୱାନ୍‌ ନା ସିସୁ, ସତେନେ ପୁରସ୍‌କାର୍‌ ପୟ୍‌ନାନ୍‌ ।”
MAT 11:1 ଜିସୁ ୱାନି ବାରଲୋକ୍ ସିସୁରିଙ୍ଗ୍‌ ଇୟାୱିଜୁ ମାଟା ସିତି ୱେନ୍‌କା ଆୟା ବାଡି ଡ଼ିସ୍‌ସି ଲାକ୍‌ତୁରି ଗାଡ଼୍‌କାଙ୍ଗ୍‌ ସଲ୍‌ସି ପ୍ରଚାର୍‌ କିଦେଙ୍ଗ୍‍ ଆସ୍‌ତାନ୍‌ ।
MAT 11:2 ନାସ୍ତିୱାଲେ ଡୁବନ୍‌ ସିନି ଯୋହନ ଜଇଲ୍‍ତୁ ମାର୍ହାନ୍‍ । କ୍ରିସ୍ତ ଏମେ ୱିଜୁ ପାଣି କିଜିମାର୍ହାନ୍‍, ତାନି କାବୁର୍‌ ପୟ୍‌ଜି ୱାନ୍‌ ନିଜେଦି ସିସୁରିଙ୍ଗ୍‌ କ୍ରିସ୍ତଦି ଲାକ୍‌ତୁ ପକ୍‌ତାନ୍‌ ।
MAT 11:3 ୱାର୍‌ ସଲ୍‌ସି ଜିସୁଙ୍ଗୁଁ ୱେନ୍‌ବାତାର୍‌, “ଏମେ ଲୋକୁ ୱାନାନ୍‍ଇଜି ଯୋହନ ଇର୍ହାମାର୍ହାନ୍‌, ନିନ୍‌ ଇନିକା ଆକାନ୍‍ ନେ, ମାପ୍‌ ଆଇୱାନିଙ୍ଗ୍‍ କାପ୍‌କିଜି ତେବାନାପ୍‍ ?”
MAT 11:4 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ଡ଼େସି ସଲ୍‌ସି ଆମାକା ୱିଜୁ ୱେନ୍‌ଜିନିଦେର୍‌ ମାରି ସୁଡ଼୍‍ଜିନିଦେର୍‍, ଆୟାକାୱିଜୁ ଯୋହନତିଙ୍ଗ୍‍ ୱେର୍‌ତୁ ।
MAT 11:5 କାଣାର୍‌ ସୁଡ଼୍‍ଦେଙ୍ଗ୍‍ ଆଟ୍‌ସିନାର୍‌, ସଟାର୍‍ ବୁଲାଜିନାର୍‌, କୁସ୍ଟରୋଗ୍‌ତି ଲୋକୁ ନେଗେନ୍‍ଆଜିନାର୍‍, ବଇରା ଲୋକ୍‌ ୱେନ୍‌ଡ୍ରେଙ୍ଗ୍‌ ଆଟ୍‌ସିନାର୍‌, ସାତି ଲୋକୁ ଡ଼େସି ନିଙ୍ଗିଁଜିନାର୍‍ ମାରି କାକୁର୍ତି ଲୋକାମାନୁ ବା ନେଗି କାବୁର୍‌ ପ୍ରଚାର୍‌ କିଆଇଆଜିନାତ୍‍ ।
MAT 11:6 ନା ବିସୟ୍‌ତାନ୍‌ ଏମେୱାରି ଇନିକା ନାମ୍‍ଇକା ସିଲେତ୍‌, ୱାନ୍‌ ଦନ୍ୟ ।”
MAT 11:7 ଯୋହନତି ସିସୁର୍‍ ଡ଼େସିସର୍‍ରିୱାଲେ ଜିସୁ ଲୋକାଙ୍ଗ୍‌ ଯୋହନତି ବିସୟ୍‌ତାନ୍‌ ଇର୍ହାନ୍‌, ମିର୍‌ ଯୋହନତିଙ୍ଗ୍‌ ସୁଡ଼ୁଦେଙ୍ଗ୍‍ଇଜି ଏସ୍ତିୱାଲେ ବାଲିବୁମିଦୁ ସର୍‍ରିମାର୍‍ଇଦେର୍, “ଇନିକା ସୁଡ଼୍‍ଦେଙ୍ଗ୍‍ ଆସା କିତିମାର୍ହିଦେର୍‍ ? ଇନିକା ଗାଲିଦାନ୍‍ ଦୁଙ୍ଗ୍‍ଁଜିମାନି ଉଣ୍ତ୍ରି ଦେର୍‍ ନାଡ଼ା ?
MAT 11:8 ମିର୍‌ ଇନିକା ସୁଡ଼୍‍ଦେଙ୍ଗ୍‍ ସତିସର୍‍ଇ ମାର୍‍ଇଦେର୍‍ ? ପାତଲ୍‌ ଆଙ୍ଗିଁ ଆରାତିମାନି ଅରେନ୍‍ ଲୋକ୍‌ତିଙ୍ଗ୍‌ ? ସୁଡ଼୍‌ଦୁ, ଆମାକାର୍‌ ଆୟାୱାଜା ପାତଲ୍‌ ଆଙ୍ଗିଁ ଆରାତି ଲୋକୁ ରାଜାଦି ମେଡ଼୍‍ତୁ ତେବାନାର୍‌ ।
MAT 11:9 ନାଙ୍ଗିଁ ଇନ୍‍ଡ୍ରୁ, ଇନିକା ସୁଡ଼୍‍ଦେଙ୍ଗ୍‍ ସର୍ହିମାର୍ହିଦେର୍‍ ? ଇନିକା ଅରେନ୍‍ ବାବବାଦିଙ୍ଗ୍‍ନୋ ? ନାନ୍ ମିଙ୍ଗିଁ ସତ୍‌ ଇଜିନା, ମାତର୍‌ ବାବବାଦି ମାଣ୍‌କୁ ଅରେନ୍‍ ନାଣ୍ତପେରି ଲୋକ୍‌ତିଙ୍ଗ୍‌ ସୁଡ଼ୁତିମାନିଦେର୍‍ ।
MAT 11:10 ଇରିଙ୍ଗ୍‌ ଇୟା ଯୋହନତି ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, ମାପୁରୁ ଇର୍ହାନ୍‌, ମି ଉଣ୍ତିଙ୍ଗ୍‌ ସାରି ରସ୍‍ତେଙ୍ଗ୍‍ ନାନ୍ ଆଗ୍‌ଡ଼ି ନା ଦୁତ୍‍ତିଙ୍ଗ୍‍ ପକ୍‍ନା ।
MAT 11:11 ନାନ୍ ମିଙ୍ଗିଁ ସତ୍‌ ଇଜିନା, ପୁର୍ବେଦାନ୍‍ ନେର୍‌ ସାନ୍ଦି ଇୟା ଦୁନିଆଦୁ ଏସ ଲୋକୁ ଜନମ୍‍ଆତାମାନାର୍‍, ଆୟା ୱିଜେରି ମାଣ୍‌କୁ ଡୁବନ୍‌ ସିନି ଯୋହନ ପେରିକାନ୍‌ । ମାତର୍‌ ମୁସ୍‌କୁପୁର୍‌ତି ରାଜିଦୁ ଏନ୍‌ ୱିଜେରି ମାଣ୍‌କୁ ଇସ୍ରିକାନ୍‌, ୱାନ୍‌ ଯୋହନତି ମାଣାନ୍‌ ପେରିକାନ୍‌ ।
MAT 11:12 ଡୁବନ୍‌ ସିନି ଯୋହନ ୱାନି ସୁସମାଚାର୍‍ ପ୍ରଚାର୍‌ କିନି ଦିନ୍‍ତାନ୍‍ ନେର୍‌ ସାନ୍ଦି ମୁସ୍‌କୁପୁର୍‌ତି ରାଜିଦୁ ମୁସ୍‌କୁ ନାଣ୍ତ ରେଲ୍‍ନିଅନିକା ସାଲାଜିନାତ୍‍ । ରେନିଅନିକାର୍‍ ବପୁଦାନ୍‍ ଅଦିକାର୍‌ କିଦେଙ୍ଗ୍‌ ସେସ୍ଟା କିଜିନାର୍‍ ।
MAT 11:13 ଯୋହନ ୱାନିସାନ୍ଦି ମସାଦି ନିୟମ୍‌ ନି ବାବବାଦିରି ମାଟାଦାନ୍‌ ଆୟା ରାଜି ବିସୟ୍‌ତାନ୍‌ ଇନାଜିମାର୍ହାତ୍‍ ।
MAT 11:14 ଜଦି ୱାରି ମାଟା ମିର୍‌ ବିସ୍‌ବାସ୍‌ କିନିଦେର୍‍, ଆରିଙ୍ଗ୍‌ ଯୋହନ ଆଜିନାନ୍‍ ଏଲିୟ୍‌, ଆମାକାନ୍‍ ଆଗ୍‌ଡ଼ି ୱାନିକାମାର୍ହାତ୍‍ ।
MAT 11:15 ଏମେୱାନିଙ୍ଗ୍‌ ଗିତଣିମାନାତ୍‌, ୱାନ୍‌ ୱେନିନ୍‌ !
MAT 11:16 “ଇୟା ଆଜିକାଲ୍‍ତି ଲୋକାଙ୍ଗ୍‌ ଏମେତାନିୱାଲେ ତୁସ୍‍ନା ? ୱାର୍‌ ସାତା ନାଡ଼୍‍ମି ବାସ୍‌ସି କାର୍‍ଜିଜିମାନି କଡ଼ରି ୱାଜା । ଉନ୍‌ଡ୍ରି ଦଲତୀ କଡ଼ର୍‌ ଆଇ ଦଲ୍‍ତିଙ୍ଗ୍‍ ଇନାର୍‌,
MAT 11:17 ମାପ୍‌ ପେଡ଼ିଦି ବାଜା ଏସ୍‍ତାପ୍‍, ମାତର୍‌ ମିର୍‌ ଗାତ୍‍ଇତିଦେର୍‍ । ମାପ୍‌ ଦୁକ୍‍ତି ପାଟା ପାରିତାପ୍‍, ମାତର୍‌ ମିର୍‌ ଆଡ଼ାବାଇତିଦେର୍‍ ।
MAT 11:18 ଯୋହନ ୱାଜି ଉପାସ୍‌ କିଜିମାର୍ହାନ୍‍, ମାରି ଅଙ୍ଗୁର୍‍ରସ୍‍ ଉଣୁଏଜିମାର୍ହାନ୍‍ । ୱିଜେରେ ଇର୍ହାର୍‌, ୱାନ୍‌ ଦୁବାକାସ୍ତିକାନ୍‍ !
MAT 11:19 ଏସ୍ତିୱାଲେ ମନୁଷ୍ୟପୁତ୍ର ୱାଜି ଉଣାନ୍‌ ତିନାନ୍‍, ୱିଜେରେ ଇର୍ହାର୍‌, ଇୟା ଲୋକ୍‌ତିଙ୍ଗ୍‌ ସୁଡ଼୍‍ଦୁ ! ୱାନ୍‌ ଅରେନ୍‍ ପେଟୁ ନି ମଦୁଆ, ସିସ୍‍ଟୁ ଲୋସ୍‍ନି ଲୋକା ମାରି ପାପି ଲୋକା ସଙ୍ଗ୍‍ । ମାତର୍‌ ମାପୁରୁ ବୁଦି ନିଜେଦି ପାଣିଦାନ୍‌ ସତ୍‍ଇଜି ପାର୍‍ମାଣ୍‍ଆତାନ୍‍ ।”
MAT 11:20 ଏମେ ଗାଡ଼୍‌କାଙ୍ଗ୍‌ ଜିସୁ ୱାନି ନାଣ୍ତ କାବାଆନି ପାଣି କିତାମାର୍ହାନ୍, ଆୟା ରାଜିତି ଲୋକୁ ୱାରି ପାପ୍‍ତି ଉଣ୍ତିଙ୍ଗ୍‌ ମନ୍‍ତିଙ୍ଗ୍‍ ଡ଼େପ୍‍ଇକା ସୁଡ଼୍‌ଜି, ଜିସୁ ଆୟା ଗାଡ଼୍‌କାଙ୍ଗ୍‌ ବାସେକିଦେଙ୍ଗ୍‍ଆସ୍‍ତାନ୍‍ ।
MAT 11:21 ଏ କୋରାଜିନ୍‌, ଏସା ନାଣ୍ତ ନିନ୍ଦାଦି ଦୁକ୍‍ ପୟ୍‌ନିଦେର୍‌ ! ବେତ୍‍ସାଇଦା, ନି ଦସ୍‍ବା ଆୟାୱାଜା ! ନିବାନ୍‍ ଏମେ କାବାଆନି ପାଣିୱିଜୁ କିଆଇଆତାମାନାତ୍‍, ଆୟାୱିଜୁ ଜଦି ସୋର ନି ସିଦନ୍‍ତୁ କିଆଇଆତାତ୍‍ମାନ୍ଦି, ଆବେଣି ଲୋକୁ ମେନ୍ଦଲ୍‌ତୁ ନିରୁ ଉସାଜି ବାସ୍‌ତେଙ୍ଗ୍‌ ଆରାଜି ମନ୍‍ତିଙ୍ଗ୍‍ ଡ଼େପ୍‍ତାର୍‍ ମାନ୍ଦି ।
MAT 11:22 ନାନ୍ ସତେ ଇଜିନା, ମାପୁରୁ ବିସାର୍‍କିନି ଦିନ୍‍ତୁ ମି ବାଦ୍‌ଲୁ ସୋର ନି ସିଦନ୍‍ତି ଲୋକାଙ୍ଗ୍‌ ନାଣ୍ତ ଦୟା ତର୍‍ନାନ୍‍ ।
MAT 11:23 ମାରି କପର୍‍ନାହୁମ୍‍ତୁ ବାସାନିକିନ୍ଦା ! ନିନ୍‌ ଇନିକା ନିଜେ ମୁସ୍‌କୁପୁର୍‌ ସନ୍‌ଡ଼୍ରେଙ୍ଗ୍‌ ବଦାକିଜିନି ? ନିନ୍‌ ନର୍କଦୁ ପକାଇଆନି । ନି ବାନୁ ଏମେ କାବାଆନି ପାଣି କିଆଇଆତାମାନାତ୍‍, ଆକା ଜଦି ସଦମ୍‍ତୁ କିଆଇଆତାତ୍‍ମାନ୍ଦି, ଆୟା ଗାଡ଼୍‌ ନେର୍‌ ସାନ୍ଦି ତେବାଦେଙ୍ଗ୍‍ ଆଟ୍‍ତାତ୍‍ମାନ୍ଦି ।
MAT 11:24 ନାନ୍ ମିଙ୍ଗିଁ ସତ୍‌ ଇଜିନା “ମାପୁରୁ ବିସାର୍‍ ଦିନ୍‍ତୁ ମି ମାଣ୍‌କୁ ସଦମ୍‍ତୁମାନି ଲୋକା ଉଣ୍ତିଙ୍ଗ୍‌ ନାଣ୍ତ ଦୟା ତର୍‍ନାନ୍‍ ।”
MAT 11:25 ଆୟା ସମୟ୍‍ତୁ ଜିସୁ ପାର୍‍ତନାକିଜି ଇର୍ହାନ୍‌, “ଏ ବୁବା, ମୁସ୍‌କୁପୁର୍‌ ମାରି ଦୁନିଆଦି ପ୍ରବୁ, ଇୟାୱିଜୁ ମାଟା ନିନ୍‌ ବୁଦିମାନି ମାରି ପଡ଼ାତି ଲୋକାମାଣ୍‌କୁ ମାର୍‍କ୍‍ସି ଇଡ୍‌ଜି ପଡ଼ାଇ ଲୋକାମାନୁ ୱେକ୍‍ତିମାନି ଆକା ନାନ୍ ନିଙ୍ଗିଁ ଦନ୍ୟବାଦ୍‌ ସିଜିନା ।
MAT 11:26 ହୁଁ ବୁବା, ନି ବଦାଦାନ୍ ଇୟାୱିଜୁ ଗଟାଜି ସଲ୍‍ସିନାତ୍‍ ।
MAT 11:27 “ନା ବୁବା ନାଙ୍ଗିଁ ୱିଜୁ ବିସୟ୍‌ ସିତାମାନ୍‍, ବୁବେଙ୍ଗ୍‌ ଡ଼ିସ୍‌ତିଙ୍ଗ୍‌ ମାରିସିଙ୍ଗ୍‌ ମାରି ଏନ୍‌ ନେସ୍‌ଏର୍‌, ମାରି ମାରିସିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ନେସ୍‌ଏର୍‌ । ମାରିସି ଏମେୱାରି ଲାକ୍‌ତୁ ବୁବେଙ୍ଗ୍‌ ୱେଙ୍ଗିଁସ୍‍କିନାନ୍‍, କେବଲ୍‌ ଆକାର୍‍ନେ ବୁବେଙ୍ଗ୍‌ ନେସ୍‌ତେଙ୍ଗ୍‌ ଆଟ୍‍ନାର୍‍ ।
MAT 11:28 “ଏ ୱାନ୍ଦିତି ୱିଜେରେ ନି ବଜ୍‍ତୁ ମାନି ଲୋକୁ ୱିଜେରେ, ନା ଲାକ୍‌ତୁ ରାଦୁ, ନାନ୍ ମିଙ୍ଗିଁ ରମିସ୍‍କିନା ।
MAT 11:29 ନା ପୁନ୍ଦି ନିଜେଦି ମୁସ୍‌କୁ ପିଣ୍ତ୍‍ଦୁ, ମାରି ନାବାଣ୍‍କୁ ଅଜାଦୁ, ଇରିଙ୍ଗ୍‌ ନାନ୍ ନିଜେ ସାଦୁ ନି ଜିବନ୍‌ତୁ କାର୍ମୁ ସୁଣିକିନ୍ଦାଆକା । ଆବେଟ୍‌ ମିର୍‌ ରମ୍‍ନିଦେର୍‍ ।”
MAT 11:30 ନାନ୍ ମି ମୁସ୍‌କୁ ଏମେ ପୁନ୍ଦି ଲାଦେକିନା, ଆକା ପିଣ୍ଡ୍‌ଦେଙ୍ଗ୍‌ କାସ୍ଟୁସିଲେ । ମାରି ମିଙ୍ଗିଁ ଏମେ ବଜ୍‌ ସିନା, ଆକାବା ନାଣ୍ତ ଉସାସ୍‌ ।
MAT 12:1 ତେନି ଏସ ଦିନ୍‌ ୱେନ୍‌କା ଉଣ୍ତ୍ରି ରମ୍‍ନିଦିନ୍‍ତୁ ଜିସୁ ପାସି କିଡ଼ିଇ ସିଜି ସଲ୍‍ସିମାର୍ହାନ୍‍ । ୱାନି ସିସୁର୍‌ ବାଙ୍ଗାଁଆତାର୍‍ଆକା ୱାର୍‌ ସେରେନ୍‍କୁ ତେଉସି ତିନ୍‌ଡ୍ରେଙ୍ଗ୍‌ ଆସ୍‌ତାର୍‌ ।
MAT 12:2 ପାରୁସିର୍‌ ଇକା ସୁଡ଼ୁଜି ଜିସୁଙ୍ଗୁଁ ଇର୍ହାର୍‌, “ସୁଡ଼ୁଦୁ, ରମ୍‌ନିଦିନ୍‍ତୁ ମି ସିସୁର୍‍ ଏଣ୍ତେସ୍‌ ନିୟମ୍‌ ସିଲି ପାଣି କିଜିନାର୍‍ ।”
MAT 12:3 ଜିସୁ ୱାରିଙ୍ଗ୍‌ ଇର୍ହାନ୍‌, “ଅର୍‍ଲେନ୍‍ ଦାଉଦ ନି ୱାନି ତଡ଼୍‍କୁ ବାଙ୍ଗାଁ ଆନିୱାଲେ ୱାନ୍‌ ଇନିକା କିତାମାର୍‌ଆନ୍‌, ଆକା ମିର୍‌ ପଡ଼ାଇଦେର୍‌ ନୋ ?
MAT 12:4 ୱାନ୍‌ ମାପୁରୁଦି ଇଲ୍‌ତୁ ସଲ୍‌ସି ମାପୁରୁ ଉଦେସ୍‍ତାନ୍‍ ପୁଜାସିତିମାର୍ହି ରୁଟି ୱାନ୍‌ ନି ୱାନି ତଡ଼୍‍କୁ ତିର୍ହାର୍‍ । ନିୟମ୍‌ ଇସାବ୍‌ତାନ୍‌ ଜାଜକଦିଙ୍ଗ୍‍ ଡ଼ିସ୍‌ତିଙ୍ଗ୍‌ ଆୟା ରୁଟି ତିନ୍‌ଡ୍ରେଙ୍ଗ୍‌ ଇଜି ଆଇ ଏଙ୍ଗ୍‌ବା ଅଦିକାର୍‌ ସିଲେତାତ୍‍ ।
MAT 12:5 ମିର୍‌ ଇନିକା ପଡ଼ାଇଦେର୍‌ ନୋ ? ମସାଦି ନିୟମ୍‌ ଇସାବ୍‌ତାନ୍‌ ଜାଜକର୍‌ ରମ୍‌ନି ଦିନ୍‍ତୁ ମନ୍ଦିର୍‌ ଲୋଇ ଜାଜକତି ପାଣିକିନି ମାଣାନ୍‌ ରମ୍‌ନି ଦିନ୍‍ତି ନିୟମ୍‌ ଅମାନ୍ୟ କିଜିମାରିଙ୍ଗ୍‌ବା ଆୟାଉଣ୍ତିଙ୍ଗ୍‌ ୱାର୍‌ ଦସି ଆଏଜିମାର୍ହାର୍‍ ?
MAT 12:6 ନାନ୍ ମିଙ୍ଗିଁ ଇଜିନା, ମନ୍ଦିର୍‌ ମାଣାନ୍‌ ପେରି ବିସୟ୍‌ ଇବେମାନାତ୍‍ ।
MAT 12:7 ସାସ୍ତ୍ର ଇନାତ୍‍, ନାନ୍ ବଦାକିନା ଦୟା, ପୁଜାସିନିକା ସିଲେ; ଇୟା ମାଟାଦି ଅର୍ତ ଜଦି ସତ୍‌ତାନ୍‌ ବୁଜାତିଦେର୍‍ମାନ୍ଦି, ଇୟା ଦସ୍‌ କିଇ ଲୋକାଙ୍ଗ୍‌ ମିର୍‌ ଦସିକିଇତିଦେର୍‍ମାନ୍ଦି ।
MAT 12:8 ଇରିଙ୍ଗ୍‌ ମନୁସ୍ୟପୁତ୍ର ରମ୍‌ନିଦିନ୍‍ତି ପ୍ରବୁ ।”
MAT 12:9 ଜିସୁ ଆୟା ବାଡିଦାନ୍‍ ଡ଼ିସ୍‌ସି ପାର୍‍ତନାକିନି ଇଲ୍‌ତୁ ଡ଼ୁଗିତାନ୍‍ ।
MAT 12:10 ୱାନି ଉନ୍‌ଡ୍ରି କିୟୁ ୱାର୍‍ତିସର୍‍ରି ଅରେନ୍‍ ଲୋକୁ ଆବେ ମାର୍ହାନ୍‍ । ଜିସୁଦି ଦସ୍‌ ଆସ୍‌ତେଙ୍ଗ୍‌ ଏସ ଲୋକୁ ଆବେ କାପ୍‍କିଜି ମାର୍ହାର୍‍ । ଆୟା ଉଣ୍ତିଙ୍ଗ୍‌ ୱାର୍‌ ଜିସୁଙ୍ଗୁଁ ୱେନ୍‌ବାତାର୍‌, “ରମ୍‌ନି ଦିନ୍‍ତୁ ନେଗେନ୍‍ କିନିକା ମା ନିୟମ୍‌ ବିରୁଦ୍‌ ସିଲେନୋ ?”
MAT 12:11 ଜିସୁ ଇର୍ହାନ୍‌, “ଜଦି ମି ଲୋଇରାନ୍‌ ଏ ୱାନି ମେଣ୍ତା ରମ୍‌ନିନାଣ୍ତିଙ୍ଗ୍‌ ଉନ୍‌ଡ୍ରି ପେରି ଗୁଟାଦୁ ଆର୍‍ନାତ୍‍, ମିର୍‌ ତାନିଙ୍ଗ୍‌ ନିକ୍‍ସି ତେଇଦେର୍‍ନୋ ?
MAT 12:12 ଅରେନ୍‍ ଲୋକ୍‌ତି ଦାରା ଉନ୍‌ଡ୍ରି ମେଣ୍ତାଦି ବାଦ୍‌ଲୁ ନାଣ୍ତ । ମାରି ରମ୍‌ନି ନାଣ୍ଡିଙ୍ଗ୍ ଆଇୱାନିଙ୍ଗ୍‍ ସାକାକିନିକା ମା ନିୟମ୍‌ ଇସାବ୍‌ତାନ୍‌ ନେଗି ପାଣି ।”
MAT 12:13 ଇକା ଇଜି ୱାନ୍‌ କିୟୁ ୱାର୍‍ତିମାର୍‍ରି ଲୋକ୍‌ତିଙ୍ଗ୍‌ ଇର୍ହାନ୍‌, “ନି କିୟୁ ପେର୍‌ଆ ।” ୱାନ୍‌ ୱାନି କିୟୁ ପେର୍‍ତି ଦାପ୍ରେ ଆୟା କିୟୁ ଆଇ କିୟୁ ୱାଜା ନେଗେନ୍‍ ଆତାସର୍ହାତ୍‍ ।
MAT 12:14 ଇୟା ୱେନ୍‌କା ପାରୁସିର୍‌ ଆୟା ବାଡିଦାନ୍‍ ସହସି ସଲ୍‌ସି ଜିସୁଙ୍ଗୁଁ ଡାକ୍‍ତେଙ୍ଗ୍‍ ଇଜି ଉପାୟ୍‍କିତାର୍‍ ।
MAT 12:15 ୱାନି ବିରଦ୍‌ତାନ୍‌ ଆତିମାନି ଉପାୟ୍‍ତି ମାଟା ୱେନ୍‌ଜି ଜିସୁ ଆୟା ରାଜି ଡ଼ିସ୍‌ସି ଆଇତରିନ୍‍ ସର୍ହାନ୍‍ । ନାଣ୍ତ ଲୋକୁ ୱାନି ୱେନ୍‌କା ୱେନ୍‌କା ସର୍ହାର୍‍ । ମାରି ୱାନ୍‌ ୱିଜୁ ରଗ୍‌ ଲୋକାଙ୍ଗ୍‌ ନେଗେନ୍‌ କିତାନ୍‌ ।
MAT 12:16 ମାତର୍‌ ୱାନି ବିସୟ୍‌ତାନ୍‌ ଆଇୱାରିଙ୍ଗ୍‌ ଇନିକା ଇନ୍‌ଇ ଉଣ୍ତିଙ୍ଗ୍‌ ଆଦେସ୍‌ ସିତାନ୍‌ ।
MAT 12:17 ଇୟାବାଣାନ୍‍ ବାବବାଦି ଜିସାୟଦି ମାଣାନ୍‌ ମାପୁରୁ ଏମେ ମାଟା ଇର୍ହାମାର୍ହାନ୍‌, ଆକା ସତ୍‌ ଆଦେଙ୍ଗ୍‌ ଇକା ଇର୍ହାନ୍‌ ।
MAT 12:18 “ଇକାନ୍‌ ନା ଦାସ୍‌, ଏମେୱାନିଙ୍ଗ୍‌ ନାନ୍ ବାସେକିତାମାନା, ୱାନିଙ୍ଗ୍‌ ନାନ୍ ଲାଡ୍‍କିନା, ୱାନି ଉଣ୍ତିଙ୍ଗ୍‌ ନାନ୍ ୱେଡ଼ିକା । ନା ଆତ୍ମା ୱାନି ମୁସ୍‌କୁ ରେତାନାତ୍‍; ୱିଜୁ ଅଣଜିହୁଦି ଲୋକାମାନୁ ୱାନ୍‌ ନା ବିସାର୍‌କିନି ବିସୟ୍‌ ୱେର୍‌ନାନ୍‌ ।
MAT 12:19 ୱାନ୍‌ ଜାଟିଜଗଡ଼ା କିଏନ୍‌ କି ଆଉଲି ଆଏନ୍‍, ରାସ୍ତା ମଜାୟ୍‍ ନିଲ୍‍ଜି ନାଣ୍ତ ଆଉଲି ଆଜି ମାଟା ଇନ୍‌ଏନ୍‌ ।
MAT 12:20 ୱାନ୍‌ ୱାଙ୍ଗିଁତି ନାଡ଼ାଦିଙ୍ଗ୍‍ ରୁକ୍‍ଏନ୍‍, ମାରି କାସ୍‍ନିସାଲିତାଦିଙ୍ଗ୍ ନାପ୍‍ଏନ୍‍ । ୱାନ୍‌ ସାକିସିଲିୱାରିଙ୍ଗ୍‍ ନି ସିଲିସାତିକାର୍‍ ନ୍ୟାୟ୍‌ ବିସାର୍‌ ପୟ୍‍ନିସାନ୍ଦି ୱାନ୍‌ ୱାନି କିନିମାଣାନ୍‍ ସୁପ୍‍ ଆଏନ୍‍ ।
MAT 12:21 ୱାନି ମୁସ୍‌କୁ ଦେସ୍‌ତି ୱିଜୁ ଅଣଜିହୁଦି ଲୋକୁ ଆସା ଇଡ୍‍ନାର୍‍ ।”
MAT 12:22 ତାନି ୱେନ୍‌କା ଅର୍‍ଲେନ୍‍ ଲୋକୁ ଅରେନ୍‍ କାଣା ନି ଗୁଲେଙ୍ଗ୍‍ ତାସିୱାତାର୍‍ । ୱାନ୍‌ ଦୁବା କାସ୍ତାମାର୍‌ର୍ହାତ୍‌ ଆକା ମାଟା ଇନ୍‌ଡ୍ରେଙ୍ଗ୍‌ ଆଟ୍‍ଏଜି ମାର୍‌ର୍ହାନ୍‌ । ଜିସୁ ୱାନିଙ୍ଗ୍‌ ନେଗେନ୍‌କିତାନ୍‌ । ୱାନ୍‌ ସୁଡ଼ୁଦେଙ୍ଗ୍‍ଆଟ୍‍ତାନ୍‍ । ମାରି ମାଟା ଇନ୍‍ଡ୍ରେଙ୍ଗ୍‍ ଆଟ୍‍ତାନ୍‍ ।
MAT 12:23 ଜିସୁଦି ଇୟା ପାଣିଦୁ ୱିଜୁ ଲୋକୁ କାବାଆଜି ଇର୍ହାର୍‌, “ଇକାନ୍‌ ଇନିକା ଆୟା ଦାଉଦ ମାରିନ୍‌ ଆଏନ୍‍ ନୋ ?”
MAT 12:24 ପାରୁସିର୍‌ ଇକା ୱେନ୍‌ଜି ଇର୍ହାର୍‌, “ୱାନ୍‌ ଦୁବେଙ୍ଗାଁ ପେରିକାନ୍‌ ବାଲ୍‍ଜିବୁଲ୍‍ ସାକ୍ତି ପୟ୍‌ଜି ଦୁବେଙ୍ଗ୍‍ ଡ଼ିସିସ୍‍କିଜିନାନ୍‍ ।”
MAT 12:25 ୱାର୍‌ ଇନିକା ଏତ୍‌ କିଜିନାର୍‍ ଜିସୁ ନେସ୍‍ତେଙ୍ଗ୍‍ଆଟ୍‍ସି ଇର୍ହାନ୍‌, ଉନ୍‌ଡ୍ରି ଦେସ୍‌ତି ଲୋକୁ ୱେର୍‌ଏ ୱେର୍‌ଏ ଦଲ୍‌ ବାଗ୍‍ଆଜି ନିଜେ ନିଜେଦି ଲୋଇ ଜୁଦ୍‍ କିତିଙ୍ଗ୍‌, “ଆୟା ଦେସ୍‌ ନାଣ୍ତ୍‍ ଦିନ୍‌ ତେବାଏତ୍‍ । ଏମେ ଗାଡ଼୍‌ ବା ଇଲୁ ଲୋଇ ଆଇ ଆଇ ଦଲ୍‍ଆଜି ଜାଟିଜଗଡ଼ା କିତିଙ୍ଗ୍‌, ୱାର୍‌ ବେଗି ନାସ୍ଟୁଆନାସନାର୍‍ ।
MAT 12:26 ଆରିଙ୍ଗ୍‌, ସୟତାନ୍ ରାଜିଦୁ ଜଦି ଉନ୍‌ଡ୍ରି ଦଲ୍‌ ଆଇ ଦଲ୍‌ ବିରଦ୍‌ତାନ୍‌ ଜୁଦ୍‌କିନାତ୍‍, ନେସ୍‍ତେଙ୍ଗ୍‍ ଆନାତ୍‍ଜେ ଆକା କଣ୍ତ୍‌ କଣ୍ତ୍‍ଆଜି ଦଂସ ଆନାସନାତ୍‍ ।
MAT 12:27 ମିର୍‌ ଇଜିନିଦେର୍‌, ନାନ୍ ଜଦି ବାଲ୍‍ଜିବୁଲ୍‍ତି ସାକ୍ତିଦାନ୍ ତାଗ୍‌ଇ ଦୁବେଆଙ୍ଗ୍‍ଁ ପେର୍‍ଜିନା । ଆରିଙ୍ଗ୍‌ ୱାନିକାଙ୍ଗ୍‌ ପେର୍‍ଦେଙ୍ଗ୍‍ ଇଜି ମି ସିସୁରିଙ୍ଗ୍‌ ଏନ୍‌ ସାକ୍ତି ସିଜିନାନ୍‌ ? ମି ସିସୁରି ଇୟା ପାଣିଦାନ୍‌ ମି ଦସ୍‍କିନିକା ମିସ୍‌ ଇଜି ପାର୍‍ମାଣ୍‍ଆଜିନାତ୍‍ ।
MAT 12:28 ଦୁବେଙ୍ଗ୍‍ ଡ଼ିସିସ୍‍କିନି ସାକ୍ତି ନାନ୍ ବାଆଲ୍‍ଜିବୁଲ୍‍ତି ମାଣାନ୍‌ ପୟ୍‍ଏ । ମାପୁରୁଦି ଆତ୍ମାଦାନ୍‌ ଆକା ନାନ୍ ପୟ୍‌ତାମାନା । ଇୟାମାଣ୍‍କୁ ମାରି ଉନ୍‌ଡ୍ରି ବିସୟ୍‌ ପାର୍‍ମାଣ୍‍ଆଜିନାତ୍‍ ମାପୁରୁଦି ରାଜି ମି ଲାକ୍‌ତୁ ୱାତାତ୍‌ନି ।
MAT 12:29 “ଅରେନ୍‍ ବପୁମାନି ଲୋକ୍‌ତିଙ୍ଗ୍‌ ଆଗ୍‌ଡ଼ି ତର୍‍ଏତିଙ୍ଗ୍‍, ଏନ୍‌ ୱାନି ଇଲୁତୁ ଡ଼ୁଗୁଜି ୱାନି ଦନ୍‌ ରେଲ୍‍ଜ ଅତେଙ୍ଗ୍‍ ଆଟ୍‌ଏନ୍‍ ।
MAT 12:30 “ଏନ୍‌ ନା ତରିନ୍‌ ସିଲେନ୍‌, ୱାନ୍‌ ସତ୍‍ନେ ନା ବିରୁଦ୍‍ତାନ୍‍ ମାନାନାର୍ । ଏନ୍‌ ନା ୱାଲେ ମିସାଜି ଉଣ୍ତାକିଏଜିନାନ୍‍, ୱାନ୍‌ ଇନ୍‍ଙ୍ଗାଁ ଆନିଙ୍ଗାଁ କିନା ପୋକ୍‌ନାନ୍‌ ।
MAT 12:31 ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ସତ୍‌ ଇଜିନା, ଲୋକୁ ଏମେ ପାପ୍‌ କିପିନ୍‌ ବା ନିନ୍ଧା ମାଟା ଇନିନ୍‍, ଆୟାଉଣ୍ତିଙ୍ଗ୍‌ ୱାନିଙ୍ଗ୍‌ କେମାସିଆଇ ଆଦେଙ୍ଗ୍‌ ଆଟ୍‍ନାତ୍‍ । ମାତର୍‌ ଜଦି ଏନ୍‌ ପବିତ୍ରଆତ୍ମାଦି ବିରଦ୍‌ତାନ୍‌ ନିନ୍ଦା ମାଟା ଇନାନ୍‌, ୱାନି କେମାଆଏତ୍‍ ।
MAT 12:32 ଏମେକାନ୍‍ ମନୁସ୍ୟପୁତ୍ରଦି ବିରଦ୍‌ତାନ୍‌ ଇନିକା ଇରିଙ୍ଗ୍‌, ୱାନ୍‌ କେମା ପୟ୍‌ନାନ୍‌ । ମାତର୍‌ ଏନ୍‌ ପବିତ୍ରଆତ୍ମାଦି ବିରଦ୍‌ତାନ୍‌ ନିନ୍ଧା ମାଟା ଇନାନ୍‌, ୱାନ୍‌ ଇଲେଇ ମାରି ୱାନିଦିନ୍‍ତୁ ଏସାଙ୍ଗ୍‍ବା କେମାପୟ୍‍ଏନ୍‍ ।
MAT 12:33 “ନେଗି ପଲ୍‌ ଆସ୍‌ତେଙ୍ଗ୍‌ ଇଜି ମାରାନ୍‌ ମଟା ଆନିଦରକାର୍‍ । ତାଗ୍‌ଇ ମାରାତୁ ତାଗ୍‌ଇ ପଲ୍‌ ଆସ୍‌ନାତ୍‌ । ମାରାନ୍‌ ଏଣ୍ତେସ୍‌ନାନିକା, ପଲ୍‍ତାନ୍‍ ନେସ୍‍ତେଙ୍ଗ୍‍ଆନାତ୍‍ ।
MAT 12:34 ମିର୍‌ ସାରାସ୍‍ତି ୱାଜା ତାଗ୍‌ଇ ଲୋକୁ, ମିର୍‌ ନେଗି ମାଟା ଏଣ୍ତେସ୍‌ ଇନ୍‌ଡ୍ରେଙ୍ଗ୍‌ ଆଟ୍‌ନିଦେର୍‌ ? ଅରେନ୍‍ୱାନି ମନ୍‍ ଲୋଇ ଆମାକା ଅଡ଼୍‍ବିଜିମାନାନ୍, ଆକା ୱେୟୁଦାନ୍‌ ସପ୍‍ନାନ୍‍ ।
MAT 12:35 ଅରେନ୍‍ ନେଗି ଲୋକୁ ନେଗି ସାମାନ୍‍ତୁ ବର୍ତିଆତିମାନି ୱାନି ଜିବନ୍‌ତାନ୍‌ ନେଗି ମାଟା ସପ୍‍ସି ତାନାନ୍‍ । ଅରେନ୍‍ ତାଗ୍‌ଇ ଗୁଣୁତି ଲୋକୁ ତାଗ୍‌ଇ ସାମାନ୍‍ତୁ ବର୍ତିଆତିମାନି ୱାନି ଜିବନ୍‌ତାନ୍‌ ତାଗ୍‌ଇ ମାଟା ସପ୍‍ସି ତାନାନ୍‍ ।
MAT 12:36 “ମିର୍‌ ଇର୍ହିମାନି ୱିଜୁ ଉପ୍‍କା ମାଟେଙ୍ଗାଁ ଉଣ୍ତିଙ୍ଗ୍‌ ବିସାର୍‌ ଦିନ୍‍ତୁ ମିଙ୍ଗିଁ ଇସାବ୍‌ ସିଦେଙ୍ଗ୍‍ଆନାତ୍‍ ।
MAT 12:37 ମି ମାଟାଦାନ୍‌ ମିର୍‌ ବିସାର୍‍ଆଜି ନିର୍ଦସ୍‍ ନୋ ଦସି ଇଜି ଆସାଇଆନିଦେର୍‍ ।”
MAT 12:38 ଅର୍‍ଲେନ୍‍ ଏସ ପାରୁସିର୍‌ ନି ଦାର୍ମୁ ଗୁରୁର୍‍ ଜିସୁଙ୍ଗୁଁ ଇର୍ହାର୍‌, “ଗୁରୁ, ନି ଉଣ୍ତ୍ରି କାବାଆନି ପାଣି ସୁଡ଼୍‍ଦେଙ୍ଗ୍‍ ବଦା କିଜିନାପ୍‍ ।”
MAT 12:39 ଜିସୁ ୱାରିଙ୍ଗ୍‌ ଇର୍ହାନ୍‌, “ଇୟା ଜଗ୍‍ତି ଲୋକୁ ଏସା ଦୁସ୍ଟ ନି ମାପୁରୁଙ୍ଗ୍‌ଁ ମାନାଇକାର୍‍ ।” ମିର୍‌ ନାଙ୍ଗିଁ ଉଣ୍ତ୍ରି କାବାଆନି ପାଣି ତର୍‌ତେଙ୍ଗ୍‍ଁ ଇଜିନିଦେର୍‌ ? କେବଲ୍‌ ବାବବାଦି ଜୁନସ୍‍ତି ଜିବନ୍‌ତୁ ଗଟେଆତିମାନି କାବାଆନି ପାଣି ନେ ମିଙ୍ଗିଁ ତର୍‌ସି ସିଆଇଆନାତ୍‍ ।
MAT 12:40 ଜୁନସ୍‍ ଏଣ୍ତେସ୍‌ ମିନି ପଟାଦୁ ମୁଣ୍ତ୍ରି ଦିନ୍ ମୁଣ୍ତ୍ରି ନାଡ଼ା ତେବାତାମାର୍ହାନ୍‍, ଆୟାୱାଜା ମନୁସ୍ୟପୁତ୍ର ବୁମି ଲୋଇ ମୁଣ୍ତ୍ରି ଦିନ୍ ମୁଣ୍ତ୍ରି ନାଡ଼ା ତେବାନାନ୍‌ ।
MAT 12:41 ଆମା ନାଣ୍ତିଙ୍ଗ୍‌ ମାପୁରୁ ବିସାର୍‌କିନାନ୍‌ ନିନିବିତି ଲୋକୁ ମି ବିରଦ୍‌ତାନ୍‌ ଇନ୍‌ଡ୍ରେଙ୍ଗ୍‌ ଇଜି ନିନାର୍‍, ଇରିଙ୍ଗ୍‌ ଜୁନସ୍‍ତି ପ୍ରଚାର୍‌ ୱେନ୍‌ଜି ୱାର୍‌ ପାପ୍‌ ସାରିଦାନ୍‍ ଡ଼େସିୱାତାର୍‍ । ମାରି ସୁଡ଼୍‍ଦୁ, ନାନ୍ ମିଙ୍ଗିଁ ଇଜିନା, ଜୁନସ୍‍ତି ମାଣ୍‌କୁ ପେରିକାନ୍‌ ଅରେନ୍‍ ଇବେନୁ ମାନାନ୍‌ ।
MAT 12:42 ମାପୁରୁଦି ବିସାର୍‌ ଦିନ୍‍ତୁ ସିବାଦି ରାଣି ମି ଦସ୍‌ ତର୍‌ତେଙ୍ଗ୍‍ଁ ଇଜି ନିନାତ୍‍, ଇରିଙ୍ଗ୍‌ ସଲମନ୍‍ତି ବୁଦିଦି ମାଟା ୱେନ୍‌ଡ୍ରେଙ୍ଗ୍‌ ଇଜି ଦୁନିଆଦି ଆକ ଦେସ୍‍ତାନ୍‍ ୱାଦ୍‌ ୱାତା ମାର୍ହାତ୍‌; ମାତର୍‌ ନାନ୍ ସତେନେ ଇଜିନା, ସଲମନତି ମାଣ୍‌କୁ ଇବେ ପେରିକାନ୍‌ ଅରେନ୍‍ ଇବେ ମାନାନ୍‌ ।
MAT 12:43 “ଉଣ୍ତ୍ରି ତାଗ୍‍ଇଦୁବା ଅରେନ୍‍ ଲୋକୁ ମାଣାନ୍‌ ସତିସର୍‌ଇ ୱେନ୍‌କା ୱାର୍‌ତି ବାଡି ସୁଡ଼୍‌ଜି ମାରି ଉନ୍‌ଡ୍ରି ରମ୍‌ନି ବାଡି ପୟ୍‌ନାତ୍‌ । ଜଦି ଆୟା ନାନି ବାଡି ତାନେଙ୍ଗ୍‌ ପୁଟ୍‌ଏତ୍‌ ।
MAT 12:44 ନାସ୍ତିୱାଲେ ୱାଦ୍‌ ଇନାତ୍‍, ନାନ୍ ଏମେ ଇନ୍‍ଡ୍ରଣାନ୍‍ ସତା ୱାତାମାର୍‍ଆ, ନା ଆୟା ଇନ୍‌ଡ୍ର ମାରିଡ଼େସି ସନା, ୱାଦ୍‌ ଡ଼େସି ସଲ୍‌ସି ସୁଣାତ୍‍, ଆୟା ଇଲୁ ମାରି ସିପାଇଆଜି ମେଲା ତେବାତାମାନାତ୍‌ ।
MAT 12:45 ନାସ୍ତିୱାଲେ ୱାଦ୍‌ ସଲ୍‌ସି ତାନେମାଣାନ୍‍ ନାଣ୍ତ ତାଗ୍‌ଇ ମାରି ସାତ୍‍ଗୋଟା ଆତ୍‍ମେଙ୍ଗ୍‍ ଅର୍‌ସେ ଆସ୍‍ନା ୱାନାତ୍‌ । ମାରି ୱାକ୍‍ ୱାଜି ଆୟା ଇଲୁ ଲୋଇ ସଲ୍‌ସି ବାସାନେ । ନାସ୍ତିୱାଲେ ଲୋକ୍‌ତି ଅବସ୍ତା ଆଗ୍‍ଡ଼ିରି ବାଦ୍‌ଲୁ ନାଣ୍ତ ତାଗ୍‌ଇକା ଆନାତ୍‌ । ଇଲେଇ ଜିବନ୍‌ମାନି ତାଗ୍‌ଇ ଲୋକା ଉଣ୍ତିଙ୍ଗ୍‌ ଆୟାୱାଜା ଗଟାନାତ୍‌ ।”
MAT 12:46 ଜିସୁ ଲୋକା ୱାଲେ ୱାର୍‍ଗିଜିସାନିୱାଲେ ୱାନି ଆଇସି ନି ତଡ଼ାନ୍‌କୁ ଆୟା ବାଡିଦୁ ୱାଜି ୱାନିଙ୍ଗ୍‌ ଇନିକା ଇନ୍‌ଡ୍ରେଙ୍ଗ୍‌ ଇଜି ଆତ୍‌ରେ କାପ୍‌କିଜି ୱାନିଙ୍ଗ୍‌ କୁକିସ୍‍କିତାର୍‍ ।
MAT 12:47 ଅରେନ୍‍ ଲୋକୁ ୱାଜି ଜିସୁଙ୍ଗୁଁ ଇର୍ହାନ୍‌, “ସୁଡ଼ୁଆ, ମି ୟାୟା ନି ତଡ଼ାନ୍‌କୁ ନି ଉଣ୍ତିଙ୍ଗ୍‌ ଆତ୍‌ରେ କାପ୍‍କିଜିନାର୍‍ ।”
MAT 12:48 ଜିସୁ ଇର୍ହାନ୍‌, “ଏଦ୍‌ ନା ୟାୟା ? ମାରି ଏର୍‌ ନା ତଡ଼ାନ୍‌କୁ ?”
MAT 12:49 ସିସୁରି ତରିନ୍‌ କିୟୁ ଜୁଟ୍‍ସି ଇର୍ହାନ୍‌, “ସୁଡ଼୍‍ଦୁ, ଇୟାକାର୍‌ ଆଜିନାର୍‌ ନା ୟାୟା ନି ତଡ଼ାନ୍‌କୁ ।
MAT 12:50 ଏନ୍‌ ନା ମୁସ୍‌କୁପୁର୍‌ତି ବୁବାଦି ବଦାଦିଙ୍ଗ୍‍ ମାନାନାନ୍‍, ୱାନ୍‌ ନା ତଡ଼ାନ୍‌, ନା ତାଙ୍ଗିଁ ମାରି ନା ୟାୟା ।”
MAT 13:1 ଆୟାନାଣ୍ତିଙ୍ଗ୍‌ ଜିସୁ ଇଲ୍‌ତାନ୍‌ ସହସି ଗାଡା ପାଡ଼ି ସର୍ହାନ୍‍ । ଆବେ ୱାନ୍‌ ସିକିୟା ସିଦେଙ୍ଗ୍‍ ବାସ୍‌ତାନ୍‌ ।
MAT 13:2 ୱାନି ସାରିବେଡ଼୍‍ତି ନାଣ୍ତ ଲୋକୁ ଉଣ୍ତାତା ମାର୍ହାର୍‌ ଜେ ୱାନ୍‌ ଉନ୍‌ଡ୍ରି ଡଙ୍ଗାଁଦୁ ସଲ୍‌ସି ବାସ୍‌ତାନ୍‌ । ଲୋକୁ ୱିଜେରେ ସାମ୍‌ଦୁର୍‌ ପାଡ଼ି ତେବାତାର୍‍ ମାରି ୱାନି ମାଟା ୱେର୍‌ଆର୍‌ ।
MAT 13:3 ୱାନ୍‌ କାତାଦାନ୍‍ ୱାରିଙ୍ଗ୍‌ ନାଣ୍ତ ମାଟେଙ୍ଗ୍‌ ସିକିୟା ସିତାନ୍‌ । ୱାନ୍‌ ଇର୍ହାନ୍‌, “ଅର୍‍ଲେନ୍‍ ଅରେନ୍‍ ଲୋକୁ ୱିତୁ ୱିତ୍‌ତେଙ୍ଗ୍‌ ସତାନ୍‌ ।
MAT 13:4 ୱାନ୍‌ କିଡ଼ିଇଦୁ ୱିତୁ ୱିତ୍‍ନିୱାଲେ ଏସ ୱିତୁ ସାରି ପାଡ଼୍‌କାଦୁ ଆର୍‌ତେ ଆକା ପଟିଙ୍ଗ୍‌ ୱାଜି ଆୟାୱିଜୁ ୱିତୁ ତିର୍‍ଏ ।
MAT 13:5 ମାରି ଏସ ୱିତୁ ଉଣା ସିକାଲାମାନି ପିଡ଼ିପି ବୁମିଦୁ ଆର୍‌ତାତ୍‌ । ମାରି ନାଣ୍ତ ସିକାଲା ସିଲେତାତ୍‌ ଆକା ୱିତୁ ଦାପ୍ରେ ନେରିତାତ୍‍ ।
MAT 13:6 ମାତର୍‌ ତାନି ୱେଲା ଆଡ୍‍ଗି ସଲ୍‍ଏତ୍‍ ମାର୍ହାତ୍‍ଆକା ୱେଡ଼ା ତେର୍‍ୱେଲ୍‍ତାନ୍‍ ୱେତାତ୍‍ ମାରି ସାତା ସର୍ହାତ୍‍ ।
MAT 13:7 ଏସ ୱିତୁ ସାମ୍‍କା ଦୁପା ଲୋଇ ଆର୍‌ତାତ୍‌ । ଇୟା ସାମ୍‌ ମାରାକ୍‍ ୱିଜୁ ପିର୍‌ଜି ପାଡ଼ାୱିଜୁଦିଙ୍ଗ୍‍ ତିଗିତେ ପକ୍‍ତେ ।
MAT 13:8 ମାତର୍‌ ମାରି ଏସ ୱିତୁ ନେଗି ବୁମିଦୁ ଆର୍‍ଜି ମାରାକ୍‍ଆଜି ପଲ୍‌ ଆସ୍‌ତାତ୍‌ । ଏସ ସହେ ଗୁଣୁ, ଏସ ସାଟେ ଗୁଣୁ, ମାରି ଏସ ତିରିସ୍‌ ଗୁଣୁ ପଲ୍‌ ଆସ୍‌ତାତ୍‌ ।”
MAT 13:9 ଜିସୁ କାତା ୱିସ୍‍ସି ଇର୍ହାନ୍‌, “ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ, ୱାନ୍‌ ୱେନିନ୍‌ ।”
MAT 13:10 ୱେନ୍‌କା ସିସୁର୍‍ ଜିସୁଦି ଲାକ୍‌ତୁ ୱାଜି ୱେନ୍‌ବାତାର୍‌, “ଲୋକାଙ୍ଗ୍‌ ସିକିୟା ସିନିୱାଲେ ନିନ୍‌ ଏନ୍ଦା କାତାଦାନ୍‍ ୱେର୍‌ସିନି ?”
MAT 13:11 ଜିସୁ ଇର୍ହାନ୍‌, ମୁସ୍‌କୁପୁର୍‌ତି ମାର୍‍ଗିତିମାନି ବିସୟ୍‌ ନେସ୍‌ତେଙ୍ଗ୍‌ ଇଜି ମିଙ୍ଗିଁ ବୁଦି ସିଆଇ ଆତାମାନାତ୍‌, ମାତର୍‌ ୱାରିଙ୍ଗ୍‌ ସିଆଇ ଆଏତ୍‍ ।
MAT 13:12 ଆମାୱାନିଙ୍ଗ୍‌ ମାନାତ୍‌, ୱାନିଙ୍ଗ୍‌ ନାଣ୍ତ ସିଆଇ ଆନାତ୍‌ ମାରି ଆବେଟ୍‌ ୱାନ୍‌ ନାଣ୍ତ ଲାବ୍‍ କିନାନ୍‌ । ମାତର୍‌ ଆମାୱାନିଙ୍ଗ୍‌ ସିଲେତ୍‌, ୱାନିଦି ଆମାକା ମାନାତ୍‌, ଆକାବା କୁତ୍‍ସି ଅଆୟ୍‌ଆନାତ୍‌ ।
MAT 13:13 ୱାରିଙ୍ଗ୍‌ ନାନ୍ କାତାଦାନ୍‍ ସିକିୟା ସିଜିନା, ଇରିଙ୍ଗ୍‌ ୱାର୍‌ ସୁଡ଼୍‍ବୁ ସୁଡ଼୍‍ବୁ ସୁଡ଼୍‍ଦେଙ୍ଗ୍‍ ଆଟ୍‍ଏର୍‍ ମାରି ୱେନ୍‌ବୁ ୱେନ୍‌ବୁ ବୁଜାଏର୍ ।
MAT 13:14 ବାବବାଦି ଜିସାୟ୍‍ଦି ବବିସତ୍‍ ମାଟା ୱାରି ଉଣ୍ତିଙ୍ଗ୍‌ ସତ୍‌ ଆଜିନାତ୍‍ । ଇୟା ଲୋକୁ ୱେନ୍‌ଜି ୱେନ୍‌ଜି ଇନିକା ବୁଜାଏର୍‍ । ସୁଡ଼୍‌ଜି ସୁଡ଼୍‌ଜି ଇନିକା ସୁଡ଼୍‍ଦେଙ୍ଗ୍‍ ଆଟ୍‍ଏର୍‍ ।
MAT 13:15 ଇରିଙ୍ଗ୍‌ ୱାରି ମୋନ୍‌ ପିଲା ବୁଦି, ୱାର୍‌ ଗିତଣିଙ୍ଗ୍‍ଁ କେର୍‍ପାତାମାନାର୍‍ ମାରି କାଣୁକୁ ମୁକ୍‍ତାମାନାର୍‍ । ଆକା ଆଏତିମାରିଙ୍ଗ୍‍ ୱାର୍‌ କାଣ୍‍କାଣୁକୁ ସୁଡ଼ୁଦେଙ୍ଗ୍‍ ଆଟ୍‍ତାର୍‍ମାନ୍ଦି ମାରି ୱାର୍‌ ଗିତଣିଦାନ୍‍ ୱେନ୍‍ଡ୍ରେଙ୍ଗ୍‍ ଆଟ୍‍ତାର୍‍ମାନ୍ଦି ମାରି ବୁଜାଜିୱାଜି ନା ଲାକ୍‌ତୁ ଡ଼େସିୱାତାର୍‍ମାନ୍ଦି ମାରି ୱାରିଙ୍ଗ୍‌ ନାନ୍ ନେଗେନ୍‍କିତାମାନ୍ଦି ।
MAT 13:16 “ମିର୍‌ ଏସା ବାଗ୍ୟଦି ଲୋକୁ ! ମିର୍‌ ସୁଡ଼୍‍ଦେଙ୍ଗ୍‍ ଆଟ୍‍ସିନିଦେର୍‍ ମାରି ୱେନ୍‌ଡ୍ରେଙ୍ଗ୍‌ ଆଟ୍‍ସିନିଦେର୍‍ ।
MAT 13:17 ଇୟା ମାଟା ନାନ୍‌ ମିଙ୍ଗିଁ ସତ୍‌ ଇଜିନା, ଏସ ବାବବାଦିର୍ ନି ଏସ ମାପୁରୁଦି ଲୋକୁ, ମିର୍‌ ଆମାକା ସୁଡ଼୍‍ଜିନିଦେର୍‍; ଆକା ସୁଡ଼୍‍ଦେଙ୍ଗ୍‍ ଇଜି ମାରି ୱେନ୍‌ଜିନିଦେର୍‌; ଆୟାୱିଜୁ ୱାର୍‌ ୱେନ୍‌ଡ୍ରେଙ୍ଗ୍‌ ବଦାକିତାର୍‌, ମାତର୍‌ ୱେନ୍‍ଏତାର୍‍ ।
MAT 13:18 “ଆରିଙ୍ଗ୍‌ ୱେନ୍‌ଡ୍ରୁ, ୱିତୁ ୱିତ୍‍ନିକାନ୍‍ କାତାଦି ଅର୍ତ ଇଜିନାନ୍‌ । ବୁଜାଦେଙ୍ଗ୍‌ ତେରେପେତେ ଆଦୁ ।
MAT 13:19 ଏର୍‌ ମୁସ୍‌କୁପୁର୍‌ତି ନେଗି କାବୁର୍‌ ୱେନାର୍‌, ମାତର୍‌ ବୁଜାଏର୍‍ । ୱାନ୍‌ ୱିତାତିମାନି ସାରି ଲାକ୍‌ତୁରି ବୁମିଦି ୱାଜା । ସୟତାନ୍‍ ୱାନି ଜିବନ୍‌ତୁ ୱିତାତିମାନି ଆୟା ବାକ୍ୟ ଡ଼ିବିସ୍‍କିନାଅନାତ୍‍ । ସାରି ଲାକ୍‌ତୁ ଆର୍‍ତିମାନି ୱିତୁଦି ଅର୍ତ ।
MAT 13:20 ଏମେକାର୍‌ ବାକ୍ୟ ୱେର୍‍ଇଦାପ୍ରେ ୱେଡ଼ିକାଦାନ୍‌ ଆସ୍‍ନାନ୍‍, ୱାର୍‌ ପିଡ଼ିପି ବୁମିଦୁ ଆର୍‍ତିମାନି ୱିତୁଦି ସାମାନ୍‍ ।
MAT 13:21 ୱାରି ମନ୍‍ତି ଲୋଇ ଇକା ସଲ୍‍ଏତ୍‍ ଆକା ୱାର୍‌ ତାନିଙ୍ଗ୍‌ ନାଣ୍ତ ସମୟ୍ ଆସ୍‌ସି ଇଡ୍‌ଦେଙ୍ଗ୍‌ ଆଟ୍‍ଏର୍‍ । ଇୟା ମାଟା ଉଣ୍ତିଙ୍ଗ୍‌ ଏସ୍ତିୱାଲେ କାସ୍ଟୁ ନି କାସ୍ଟୁ ୱାନାତ୍‌, ୱାର୍‌ ଦାପ୍ରେ ତାନିଙ୍ଗ୍‌ ଡ଼ିସ୍‍ନାର୍‍ ।
MAT 13:22 ଏନ୍‌ ବାକ୍ୟ ୱେନାନ୍‌, ମାରି, ଦୁନିଆଦି ସିନ୍ତା ମାରି ଦନ୍‌ତି ଆସା ୱାନିଙ୍ଗ୍‌ ତିଗ୍‍ନା ପକ୍‍ନାତ୍‍, ମାରି ୱାର୍‌ ପସଲ୍‍ ଆସ୍‍ଏର୍‍, ଆୟା ଲୋକ୍‌ ସାମ୍‌କା ଦୁପାଦୁ ୱିତାତିମାନି ବୁମିଦି ୱାଜା ।
MAT 13:23 ମାତର୍‌ ଏନ୍‌ ବାକ୍ୟ ୱେନ୍‌ଜି ବୁଜାନାନ୍‍, ଆୟାକାର୍‍ ୱିତାତିମାନି ନେଗି ବୁମିଦି ୱାଜା । ୱାର୍‌ ନାଣ୍ତ ପସଲ୍‍ ଆସ୍‌ନାର୍‌, ଏନ୍‌ ସହେ ଗୁଣୁ, ଏନ୍‌ ସାଟେ ଗୁଣୁ ଏନ୍‌ ତିରିସ୍‌ ଗୁଣୁ ।”
MAT 13:24 ଜିସୁ ମାରିଉଣ୍ତ୍ରି କାତା ଇଜି ଇର୍ହାନ୍‌ । ମୁସ୍‌କୁପୁର୍‌ ଇୟାୱାଜା ଅରେନ୍‍ ଲୋକୁ ୱାନି କିଡ଼ିଇଦୁ ନେଗି ଗଦ୍‍ମୁ ୱିତୁ ୱିତ୍‍ତାନ୍‍ ।
MAT 13:25 ଅର୍‍ଲେନ୍‍ ନାଡ଼ା ୱାର୍‌ ୱିଜେରେ ଡରିତିମାର୍‍ଇୱାଲେ ଅରେନ୍‍ ସାତ୍ରୁ ୱାଜି ଆୟା ଗଦ୍‍ମୁ ଲୋଇ ଏସ ଗଲୁତକା ଲାଟା ୱିତୁ ୱିତ୍‍ତାସର୍ହାତ୍‍ ।
MAT 13:26 ଏସ୍ତିୱାଲେ ମାରାକ୍‍ ୱିଜୁ ପିର୍‌ଜି ସେରେନ୍‍ ସତାତ୍‌, ନାଡ଼୍‍ମି ନାଡ଼୍‍ମି ଗଲୁତକା ଲାଟା ତରିତାତ୍‌ ।
MAT 13:27 ଆୟା ଲୋକ୍‌ତି ସାକର୍‌କୁ ୱାଜି ଇର୍ହାର୍‌, ଆଜ୍ଞା, ନିନ୍‍ତୋ କିଡ଼ିଇଦୁ ନେଗି ୱିତୁ ୱିତ୍‍ତିମାର୍‍ହି, ଗଲୁତକାଲାଟେଙ୍ଗ୍‌ ଏମେଣ୍‌କୁ ୱାତେ ?
MAT 13:28 ୱାନ୍‌ ୱାରିଙ୍ଗ୍‌ ଇର୍ହାନ୍‌, ଅରେନ୍‍ ସାତ୍ରୁ ଇକା କିତାମାନାନ୍‌ । ମାରି, ସାକର୍‌କୁ ୱାନିଙ୍ଗ୍‌ ଇର୍ହାର୍‌, ଆରିଙ୍ଗ୍‌ ମାପ୍‌ ସଲ୍‌ସି ଆକେଙ୍ଗ୍‍ ରେଲ୍‌ଜି ଉଣ୍ତ୍ରେମାନୁ କିନାପ୍‍, ଇକା ଇନିକା ନିନ୍‌ ବଦାକିନି ?
MAT 13:29 ମାତର୍‌ ୱାନ୍‌ ଇର୍ହାନ୍‌, “ସିଲେ, ଏସ୍ତିୱାଲେ ମିର୍‌ ଗଲୁତକା ଲାଟା ଉଣ୍ତା କିବୁ କିବୁ ଆୟାୱିଜୁଦି ୱାଲେ ଗଦ୍‍ମୁ ରେନି ପକ୍‍ନିଦେର୍‍ ।
MAT 13:30 ପାସି କୟ୍‍ଇ ସାନ୍ଦି ରୁଣ୍ତିୱାନିକାଙ୍ଗ୍‍ଁ ଅର୍‌ସେ ପିର୍‌ଦେଙ୍ଗ୍‌ ଡ଼ିସ୍‌ସୋ ସିଦୁ, ମାରି ପାସି କୟ୍‍ନିୱାଲେ ନାନ୍ କୟ୍‌ନି ୱାରିଙ୍ଗ୍‌ ଇନା, ଆଡ଼େକ୍‍ତେଙ୍ଗ୍‍ ଇଜି ଆଗ୍‌ଡ଼ି ଗଲୁତକା ଲାଟା ଉନ୍‌ଡ୍ରେମାନୁ କିଜି କାଟେଙ୍ଗ୍‍ ତର୍‌ଆ, ମାତର୍‌ ଗଦ୍‍ମୁ ନା କଲ୍‍କିଦୁ ଉଣ୍ତା କିଜିଇଡିଆ ।”
MAT 13:31 ଜିସୁ ୱାରିଙ୍ଗ୍‌ ମାରିଉନ୍‍ଡ୍ରି କାତା ୱେର୍‌ସି ଇର୍ହାନ୍‌, “ମୁସ୍‌କୁପୁର୍‌ ଇୟାୱାଜା ଉନ୍‌ଡ୍ରି ସାର୍‍ସୁ ପାଡ଼ୁଦି ୱାଜା, ଆମାକା ଅସି ଅରେନ୍‍ ଲୋକୁ ନିଜେଦି କିଡ଼ିଇଦୁ ୱିତ୍‍ତାନ୍‍
MAT 13:32 ଆକା ତୋ ୱିଜୁ ୱିତୁ ପାଡ଼୍‌କା ମାଣାନ୍‌ ଇସ୍ରିକାତ୍‍, ମାତର୍‌ ଆକା ପିରିତିଙ୍ଗ୍‍ ୱିଜୁ କୁସାଦି ମାଣ୍‌କୁ ପେରିକା ଆଜି ଇୟାୱାଜା ମାରାନ୍‌ ଆନାତ୍‌ ଜେ, ବାଦଡ଼୍‌ତି ପଟିଙ୍ଗ୍‌ ୱାଜି ତାନି କମେଆଙ୍ଗ୍‍ଁ ଜାଲୁ ତର୍‌ସି ବାସାନେ ।”
MAT 13:33 ଜିସୁ ୱାରିଙ୍ଗ୍‌ ମାରିଉନ୍‍ଡ୍ରି କାତା ୱେର୍‌ସି ଇର୍ହାନ୍‌, “ମୁସ୍‌କୁପୁର୍‌ ଇୟାୱାଜା । ଅରେତ୍‌ ଆଇମା କାଣ୍ତେକ୍‍ କମିର୍‌ ଅସି ଆଡା ଅଟା ଗୁଣ୍ତାଦୁ ମିସାକିଜି ପିଡ଼ିକ୍‍ସି ଇଟ୍‍ତାତ୍‍ । ଟିକ୍‌ ସମୟ୍‍ତୁ ୱିଜୁ ଦୁର୍‍ ଗୁଣ୍ତା ଆବେ ମିସାଜି ଉଦ୍‍ଜି ନିଙ୍ଗିଁତାତ୍‍ ।”
MAT 13:34 ଜିସୁ ଇୟାୱିଜୁ ମାଟା କାତାଦାନ୍‍ ଲୋକାଙ୍ଗ୍‌ ୱେର୍‍ସିମାର୍ହାନ୍‍, ମାରି କାତା ୱେର୍‍ଏଣ୍ତା ୱାନ୍‌ ୱାରିଙ୍ଗ୍‌ ଇନିକା ଇନ୍‍ଏଜିମାର୍ହାନ୍‍,
MAT 13:35 ଏଣ୍ତେସ୍‌ ବାବବାଦି ମାଣାନ୍‌ ରାସାତି ଇୟା ବାକ୍ୟ ସତ୍‌ ଆନାତ୍‌, “ନାନ୍ କାତାଦାନ୍‍ ୱାରି ୱାଲେ ମାଟା ୱାର୍‍ଗିନା । ଦୁନିଆ ତିଆର୍‌ଆତି ଆଗ୍‍ଡ଼ିରି ନେସ୍‍ଇମାନି ୱିଜୁ ମାଟା ଇୟାୱାଜା ନାନ୍ ୱାରିଙ୍ଗ୍‌ ବୁଜାକିନା ।”
MAT 13:36 ଲୋକା ଗଲିଦାନ୍‍ ସହସି ୱାଜି ଜିସୁ ଏସ୍ତିୱାଲେ ଇଲୁ ଲୋଇ ସର୍ହାନ୍‍, ୱାନି ସିସୁର୍‍ ୱାଜି ୱେନ୍‌ବାତାର୍‌, “କିଡ଼ିଇଦି ଗଲୁତକାଲାଟାଦି କାତାଦି ଅର୍ତ ମାଙ୍ଗିଁ ବୁଜାକିଆ ।”
MAT 13:37 ଜିସୁ ଇର୍ହାନ୍‌, ଏମେ ଲୋକୁ ନେଗି ୱିତୁ ୱିତ୍‍ତାନ୍‍, ୱାନ୍‌ ମନୁସ୍ୟପୁତ୍ର ।
MAT 13:38 ଇୟା ଦୁନିଆ ଆଜିନାତ୍‍ କିଡ଼ିଇ । ଏମେକାର୍‌ ମୁସ୍‌କୁପୁର୍‌ତି ଅଦିକାରି, ୱାର୍‌ ନେଗି ୱିତୁ । ଗଲୁତକାଲାଟେଙ୍ଗ୍‌ ସୟତାନ୍‍ତି ୱାଲେ ବୁଲାନିକାର୍‍ ।
MAT 13:39 ଏମେ ସାତ୍ରୁ ଗଲୁତକା ଲାଟା ୱିତ୍‍ତାନ୍‍, ୱାନ୍‌ ସୟତାନ୍ । ପାସି ଉଣ୍ତାକିନି ସମୟ୍ ଆଜିନାତ୍‍ ୱିଜ୍‍ନି ଜୁଗ୍‌ । ପାସି କୟ୍‍ନିକାର୍‍ ଆଜିନାର୍‌ ମୁସ୍‌କୁପୁର୍‌ତି ଦୁତ୍‌କୁ ।
MAT 13:40 ଗଲୁତକା ଲାଟେଙ୍ଗ୍‌ ଏଣ୍ତେସ୍‌ ଉଡ୍ରେମାନୁ କିଜି ଆଡ଼୍‍କାଇଆତେ, ଜୁଗ୍‌ ୱିଜ୍‍ନିୱାଲେ ଆୟାୱାଜା ଆନାତ୍‌ ।
MAT 13:41 ମନୁସ୍ୟପୁତ୍ର ୱାନି ରାଜିଦାନ୍‍ ୱିଜୁ ତାଗ୍‌ଇ ପାଣିକିନିୱାରିଙ୍ଗ୍‌ ନି ଏମେକାର୍‌ ଆଇୱାରିଙ୍ଗ୍‌ ପାପ୍‌ କିବିସ୍‍ କିଦେଙ୍ଗ୍‌ ଉତ୍‍ନାର୍‍, ୱାରିଙ୍ଗ୍‌ ଉଣ୍ତାକିଦେଙ୍ଗ୍‌ ଇଜି ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ପକ୍‍ନାନ୍‍ ।
MAT 13:42 ୱାର୍‌ ଇୟା ୱିଜେରିଙ୍ଗ୍‌ କାସ୍‍ନି ସିସୁଦୁ ପକ୍‍ନେ । ଆବେ ଇୟା ଲୋକୁ ଆଡ଼୍‍ବାନାର୍‍ ମାରି ପାଲ୍‍କୁ କାତ୍ରେ କିନାର୍‌ ।
MAT 13:43 ନାସ୍ତିୱାଲେ ମାପୁରୁଦି ଲୋକୁ ମୁସ୍‌କୁପୁର୍‌ତି ବୁବାମାନୁ ୱେଡ଼ାଦି ୱାଜା ଜାୟ୍‌ ଆନାର୍‌ । ଏମେୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ, ୱାନ୍‌ ୱେନିନ୍‌ ।
MAT 13:44 ମୁସ୍‌କୁପୁର୍‌ କିଡ଼ିଇଦୁ ମାର୍‍ଗିତିମାନି ଦନ୍‌ତି ୱାଜା । ଅରେନ୍‍ ଲୋକୁ ଆକା ସୁଡ଼୍‌ଜି ମାର୍‍କ୍‍ସି ଇଟ୍‌ତାନ୍‌ ମାରି ୱେଡ଼ିକାଦାନ୍‌ ସଲ୍‌ସି ନିଜେଦି ୱିଜୁ ପର୍‌ଜି ଆୟା କିଡ଼ିଇଦିଙ୍ଗ୍‍ କଟାନ୍‍ ।
MAT 13:45 ମାରି, ମୁସ୍‌କୁପୁର୍‌ ଇୟାୱାଜା । ଅରେନ୍‍ ବେପାରି ନାଣ୍ତଦାରାଦି ମୁକ୍ତା ପୟ୍‍ଜିମାର୍ହାନ୍‍ ।
MAT 13:46 ଉଣ୍ତ୍ରି ନାଣ୍ତଦାରାଦି ମୁକ୍ତା ପୟ୍‌ଜି ୱାନ୍‌ ୱାନି ୱିଜୁ ଦନ୍‌ ପର୍‌ଜି ତାନିଙ୍ଗ୍‌ କଟାନ୍‍ ।
MAT 13:47 ମାରି, ମୁସ୍‌କୁପୁର୍‌ ଉଣ୍ତ୍ରି ମିନ୍‌କୁ ଆସ୍‌ନି ଜାଡ଼ିଦି ୱାଜା । ମିନ୍‌କୁ ଆସ୍‍ନିକାର୍‍ ଗାଡାଦୁ ଜାଡ଼ି ପକ୍‍ସି ରକମ୍‌ ରକମ୍‌ ଜାତିଦି ମିନ୍‌କୁ ଆସ୍‌ନାର୍‌ ।
MAT 13:48 ଜାଡ଼ି ପୁରୁନ୍ଆତିଙ୍ଗ୍‍ ଲୋକୁ ଗାଡା ପାଡ଼ି ରେଲ୍‌ଜି ତାତାର, ମାରି ବାସ୍‌ସି ନେଗି ନେଗି ମିନ୍‌କୁ ଆସ୍‍କିଜି ସାଟ୍‌ନାଦୁ ଇଡ୍‍ନାର୍‍ ମାରି ତାଗ୍‌ଇ ମିନ୍‌କୁ ପକ୍‍ନାର୍‍ ।
MAT 13:49 ଜୁଗ୍‌ ୱିଜ୍‍ନି ୱାଲେ ଇୟାୱାଜା ଆନାତ୍‌ । ଦୁତ୍‌କୁ ସହସିୱାଜି ଦାର୍ମୁଦିଲୋକା ମାଣ୍‌କୁ ତାଗ୍‌ଇ ଲୋକାଙ୍ଗ୍‌ ୱେର୍‍ଏକିନେ ।
MAT 13:50 ମାରି ୱାରିଙ୍ଗ୍‌ ସିସୁ କାସ୍‍ନିମାନୁ ପକ୍‍ନାର୍‍; ଆବେ ଆଡ଼୍‍ବାନାର୍‍ ମାରି ପାଲ୍‍କୁ କାତ୍‌ରେକିନାର୍‌ ।
MAT 13:51 ଜିସୁ ସିସୁରିଙ୍ଗ୍‌ ୱେନ୍‌ବାତାନ୍‌, “ଇୟାୱିଜୁ ବିସୟ୍‌ ବୁଜାଦେଙ୍ଗ୍‌ ଆଟ୍‍ସିନିଦେର୍‍ ?” ୱାର୍‌ ଇର୍ହାର୍‌, “ହୁଁ ପ୍ରବୁ ।”
MAT 13:52 ଜିସୁ ୱାରିଙ୍ଗ୍‌ ଇର୍ହାନ୍‌, “ଏମେ ଇଲୁଦି ମାଲିକ୍‌ ନିଜେଦି ଗୁଦାମ୍‍ତାନ୍‍ ପୁନିକା ନି ପାଡ଼ିଇ ଜିନିସ୍‌ ସପ୍‍ନାନ୍‍, ଦାର୍ମୁଗୁରୁ ଏନ୍‌ ମୁସ୍‌କୁପୁର୍‌ତୁ ସିସୁଆତାମାନାନ୍‍ ୱାନ୍‌ ଇୟାୱାଜା ।”
MAT 13:53 ଜିସୁ ଇୟାୱିଜୁ କାତା ୱିସ୍‌ତି ୱେନ୍‌କା ଆୟା ବାଡିଦାନ୍‍ ସର୍ହାନ୍‍ ।
MAT 13:54 ମାରି, ଜିସୁ ନିଜେଦି ବୁବାସି ଗାଡ଼୍‌ତୁ ୱାଜି ଲୋକାଙ୍ଗ୍‌ ୱାରି ପାର୍‍ତନା କିନି ଇଲୁଦୁ ଇୟାୱାଜା ସିକିୟା ସିତାନ୍‌ ଜେ, ୱାର୍‌ କାବାଆଜି ଇର୍ହାର୍‌, “ଇୟାୱାଜା ବୁଦି ମାରି ସାକ୍ତିଦି ପାଣି ଏମେଣ୍‌କୁ ପୟ୍‌ତାନ୍‌ ?” ୱାର୍‌ ୱେନ୍‌ବାତାର୍‌, “ଇୟା କାବାଆନିପାଣିଦି ବିସୟ୍‌ତାନ୍‌ ଇନିକା ?”
MAT 13:55 ଇକାନ୍‌ ଇନିକା ଆୟା ବାଡ଼େଇତି ମାରିନ୍‌ ଆଏନ୍‍ ? ମରିୟମ୍‌ ଇନିକା ତାମେ ଆଇସି ଆଏତ୍‍ ? ଜାକୁବ, ଜସେପ୍‍, ସିମୋନ୍‌ ନି ଜିହୁଦା ଇନିକା ୱାନି ତଡ଼ାନ୍‌କୁ ଆଏର୍‌ ?
MAT 13:56 ୱାନି ତାଙ୍ଗିଁକ୍‍ ଇନିକା ଇବେ ବାସାଉ ? ଇୟାୱିଜୁ ବୁଦି ନି ସାକ୍ତି ୱାନ୍‌ ପୟ୍‌ତାନ୍‌ ଏମେଣ୍‌କୁ ?
MAT 13:57 ଇକା ଇଜି ୱାର୍‌ ଜିସୁଙ୍ଗୁଁ ମାନାଏତାର୍‍ । ଜିସୁ ୱାରିଙ୍ଗ୍‌ ଇର୍ହାନ୍‌, “ଅରେନ୍‍ ବାବବାଦି ନିଜେଦି ଇଲୁ ନି ନାର୍‍ତିଙ୍ଗ୍‍ ଡ଼ିସ୍‌ତିଙ୍ଗ୍‌ ଆଇ ୱିଜୁମାନୁ ସନ୍‍ମାନ୍‍ ପୟ୍‌ନାନ୍‌ ।”
MAT 13:58 ୱାର୍‌ ୱାନିଙ୍ଗ୍‌ ବିସ୍‍ବାସ୍‍ କିଏତାର୍‍ଆକା ୱାନ୍‌ ଆବେ ୱାନି କାବାଆନି ପାଣି ମାରି ନାଣ୍ତ କିଏତାନ୍‌ ।
MAT 14:1 ଆୟା ସମୟ୍‍ତୁ ଗାଲିଲିଦି ସାସନ୍‌କିନି ସାମନ୍ତରାଜା ହେରୋଦ ଜିସୁଦି ବିସୟ୍‌ତାନ୍‌ ୱେର୍‌ଆନ୍‌ ।
MAT 14:2 ୱାନ୍‌ ୱାନି ପାଣିକିନିୱାରିଙ୍ଗ୍‌ ଇର୍ହାନ୍‌, “ଇକାନ୍‌ ସତେନେ ଡୁବନ୍‌ସିନି ଯୋହନ ଡ଼େସି ଜିବନ୍‌ ପୟ୍‌ଜି ୱାତାମାନାନ୍‍ । ଆୟା ଉଣ୍ତିଙ୍ଗ୍‌ ୱାନି କାବାଆନି ପାଣିକିଦେଙ୍ଗ୍‌ ସାକ୍ତି ମାନାତ୍‌ ।”
MAT 14:3 ତେନି ଆଗ୍‌ଡ଼ି ହେରୋଦ ଯୋହନତିଙ୍ଗ୍‌ ତର୍‍ସିସ୍‍କିଦେଙ୍ଗ୍‍ ଆଦେସ୍‌ ସିତାମାର୍ହାନ୍‍, ମାରି ୱାନିଙ୍ଗ୍‌ ସିକିଣିଦାନ୍‍ ତର୍‌ସି ଜଇଲ୍‌ତୁ ଇଡିସ୍‍କିତାମାର୍ହାନ୍‍ । ୱାନି ତଡ଼ାନ୍‌ ପିଲିପ୍‍ତି ଆଡ଼୍‌ସି ହେରଦିଆଦି ଉଣ୍ତିଙ୍ଗ୍‌ ୱାନ୍‌ ଇକା କିତାମାର୍ହାନ୍ ।
MAT 14:4 ଡୁବନ୍‌ସିନି ଯୋହନ ହେରଦତିଙ୍ଗ୍‍ ଇଜିମାର୍‍ଆନ୍‍, “ହେରଦିଏଙ୍ଗ୍‍ଁ ପେଡ଼ି କିନିକା ନି ଟିକ୍‌ ସିଲେତ୍‌ ।”
MAT 14:5 ଆୟାଉଣ୍ତିଙ୍ଗ୍‌ ହେରଦ ଯୋହନତିଙ୍ଗ୍‌ ସାୟାମାର୍‌ଗା ଡାକ୍‌ତେଙ୍ଗ୍‌ ବଦାକିଜିମାର୍ହାନ୍‍, ମାତର୍‌ ଜିହୁଦି ଲୋକାଙ୍ଗ୍‌ ୱାନ୍‌ ତିଲାଜିମାର୍ହାନ୍‍ । ଇରିଙ୍ଗ୍‌ ୱାର୍‌ ଯୋହନତିଙ୍ଗ୍‌ ଅରେନ୍‍ ବାବବାଦି ଇଜି ମାନାଜିମାର୍ହାର୍‍ ।
MAT 14:6 ହେରୋଦ୍‍ତି ଜନମ୍‍ଦିନ୍ ନାଣ୍ଡିଙ୍ଗ୍ ହେରଦିଆଦି ଗାଡ଼୍‌ସି କୁଡ଼ାଙ୍ଗାଁ ଆଗ୍‌ଡ଼ି ଗାତ୍‍ସି ହେରଦତିଙ୍ଗ୍‍ ୱେଡ଼ିକା କିବିସ୍‍କିତାତ୍‍ ।
MAT 14:7 ଆବେଟ୍‌ ୱାନ୍‌ ତାନିଙ୍ଗ୍‌ ପାର୍‍ମାଣ୍‍କିଜି ଇର୍ହାନ୍‌, “ନାନ୍ ପାର୍‌ମାଣ୍‌ କିଜି ଇଜିନା, ନିନ୍‌ ଆମାକା ଲସ୍‌ନି, ନାନ୍ ନିଙ୍ଗିଁ ଆକା ସିନା ।”
MAT 14:8 ତାନି ଆଇସିଦି ମାଟା ଆସ୍‌ସି ଆଇଲି ଇର୍ହାତ୍‌, “ଡୁବନ୍‌ସିନି ଯୋହନତି ତାଲା ଇବେ, ଇୟାଦାପ୍ରେ ଉଣ୍ତ୍ରି ସାଡ଼୍‍ୱାଦୁ ଇଡ୍‌ଜି ନାଙ୍ଗିଁ ସିଦା ।”
MAT 14:9 ଇକା ୱେନ୍‌ଜି ରାଜା ନାଣ୍ତ ଦୁଃଖ କିତାନ୍‌ । ମାତର୍‌ କୁଡ଼ାଙ୍ଗାଁ ଆଗ୍‌ଡ଼ି ପାର୍‌ମାଣ୍‌ କିତାମାର୍ହାନ୍‍ଆକା ଆଇଲିଦି ଆସାଦିଙ୍ଗ୍‍ ପୁରା କିଦେଙ୍ଗ୍‌ ଆଦେସ୍‌ ସିତାନ୍‌ ।
MAT 14:10 ଆବେଟ୍‌ ଜଇଲ୍‌ତୁ ଯୋହନତି ତାଲାଦିଙ୍ଗ୍‍ ଲୋକାଙ୍ଗ୍‌ ପକ୍‍ସି କଇସ୍‍କିତାନ୍‍ ।
MAT 14:11 ମାରି ଉଣ୍ତ୍ରି ସାଡ଼୍‍ୱାଦୁ ୱାନି ତାଲା ଇଡ୍‌ଜି ଆୟା ଆଇଲିଦିଙ୍ଗ୍‍ ସିତାର୍‍ । ୱାଦ୍‌ ତାନିଙ୍ଗ୍‌ ଅସି ତାନି ଆଇସିଙ୍ଗ୍‍ ସିତାତ୍‌ ।
MAT 14:12 ତାନିୱେନ୍‍କା ଯୋହନତି ସିସୁର୍‍ ୱାଜି ମୁସ୍‍ତେଙ୍ଗ୍‍ ଇଜି ୱାନି ସାତି ମାଡ଼ାଦିଙ୍ଗ୍‍ ଅତାର୍‌ । ୱାର୍‌ ସଲ୍‌ସି ଜିସୁଙ୍ଗୁଁ ଇୟା ଦୁକ୍‍ତି କାବୁର୍‌ ୱେର୍‌ତାର୍‌ ।
MAT 14:13 ଯୋହନତି କାବୁର୍‌ ୱେର୍‍ଇଦାପ୍ରେ ଜିସୁ ଡଙ୍ଗାଁଦୁ ଏକ୍‌ସି ଉଣ୍ତ୍ରି ସିମ୍ରା ବାଡିଦୁ ସର୍ହାନ୍‍ । ଜିସୁ ଆବେ ସଲ୍‌ସି ମାନିକା ନେସ୍‌ସି ଲାକ୍‌ତୁରି ଗାଡ଼ାକାଣ୍‍କୁ ନାଣ୍ତ ଲୋକୁ ବୁଲାଜି ବୁଲାଜି ଜିସୁୱାଲେ ସର୍ହାର୍‍ ।
MAT 14:14 ମାରି, ଜିସୁ ଡଙ୍ଗାଁଦାନ୍‍ ସତାନ୍‍ନୋ ନାଣ୍ତ ଲୋକାଙ୍ଗ୍‌ ସୁଡ଼ୁଜି ୱାରି ଉଣ୍ତିଙ୍ଗ୍‌ ଦୁଃକ୍‌ କିତାନ୍‌, ୱାନି ଜିବନ୍‌ ଦୟାଦୁ ଆଡ଼୍‍ବାତାସର୍ହାତ୍‍ । ନାଣ୍ତ ରଗ୍‌ ଲୋକାଙ୍ଗ୍‌ ୱାନ୍‌ ନେଗେନ୍‌କିତାନ୍‌ ।
MAT 14:15 ଆୟା ନାଣ୍ଡିଙ୍ଗ୍ ମିଲ୍‌ମିଲିକା ସିସୁର୍‍ ୱାଜି ଇର୍ହାର୍‌, “ନାଣ୍ତ ୱେଡ଼ା ଆତାତ୍‌ନି, ମାରି ଇୟା ବାଡି ସିମ୍ରା, ଲୋକାଙ୍ଗ୍‌ ପକ୍‍ଆ । ୱାର୍‌ ନାର୍‍କାଙ୍ଗ୍‍ଁ ସଲ୍‌ସି ନିଜେଦି ଉଣ୍ତିଙ୍ଗ୍‌ କାଦି କଡ଼ିରି ।”
MAT 14:16 ଜିସୁ ୱାରିଙ୍ଗ୍‌ ଇର୍ହାନ୍‌, “ୱାର୍‌ ଇବେଟ୍‌କୁ ସନି ଦର୍‌କାର୍‌ ସିଲେ । ମିର୍‌ ୱାରିଙ୍ଗ୍‌ ଇନିକା ଉଣ୍ତେଙ୍ଗ୍‌ ସିଦୁ ।”
MAT 14:17 ସିସୁର୍‍ ଇର୍ହାର୍‌, “ଇବେ ମା ଲାକ୍‌ତୁ କେବଲ୍‌ ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ମାନେ ।”
MAT 14:18 ଜିସୁ ଇର୍ହାନ୍‌, “ଆକେଙ୍ଗ୍‍ ଇବେ ନା ଲାକ୍‌ତୁ ତାଗାଟ୍‌ ।”
MAT 14:19 ଲୋକାଙ୍ଗ୍‌ ଲାଟା ମୁସ୍‌କୁ ବାସ୍‌ତେଙ୍ଗ୍‌ ଇଜି ଜିସୁ ଆୟା ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ଅତାନ୍‌ ମାରି ସ୍ୱର୍ଗ ତରିନ୍‌ ସୁଡ଼୍‌ଜି ମାପୁରୁଙ୍ଗ୍‍ଁ ଦନ୍ୟବାଦ୍‌ ସିତାନ୍‌ । ମାରି ୱାନ୍‌ ରୁଟିଆଙ୍ଗ୍‍ଁ ରୁକ୍‍ସି ରୁକ୍‍ସି ସିସୁରି କିୟୁଦୁ ସିତାନ୍‌ । ସିସୁର୍‍ ଆୟାୱିଜୁ ଅସି ଲୋକା ଲୋଇ ବାଟାକିତାସିତାର୍‍ ।
MAT 14:20 ୱିଜେରେ ତିର୍‌ଆରୋ ପଟାପାଜିତାର୍‍ । ତାନିୱେନ୍‍କା ସିସୁର୍‍ ଆମା ମକା ରୁଟିଙ୍ଗ୍‌ ଏଜିତେ, ଆକେଙ୍ଗ୍‍ ଉଣ୍ତା କିଜି ବାରଗୋଟା ଡାଡ଼ିଆଙ୍ଗ୍‍ଁ ବର୍ତି କିତାର୍‌ ।
MAT 14:21 ଆଇମେକ୍‍ ନି କଡ଼ରିଙ୍ଗ୍‌ ଡ଼ିସ୍‌ସି ୫,୦୦୦ ହାଜାର୍‌ ମେମାର୍‍ଙ୍ଗୁଁ ଇୟା କାଦି ଉଟାମାର୍ହାର୍‍ ।
MAT 14:22 ଇୟା ୱେନ୍‌କା ଜିସୁ ସିସୁରିଙ୍ଗ୍‌ ଡଙ୍ଗାଁଦୁ ଏକ୍‌ସି ୱାନି ଆଗ୍‌ଡ଼ି ଗାଡା ଆୟା ପାଡ଼ି ସନ୍‍ଡ୍ରେଙ୍ଗ୍‍ ଇଜି ଇର୍ହାନ୍‌, ମାରି ୱାନ୍‌ ୱେନ୍‌କା ତେବାଜି ଲୋକାଙ୍ଗ୍‌ ପକ୍‌ତାନ୍‌ ।
MAT 14:23 ଜିସୁ ଲୋକାଙ୍ଗ୍‌ ପୋକ୍‍ତି ୱେନ୍‌କା ୱାନ୍‌ ପାର୍‌ତନା କିଦେଙ୍ଗ୍‍ ଇଜି ଗରନ୍‌ ମୁସ୍‌କୁ ସର୍ହାନ୍‍, ମାରି ମିଲ୍‌ମିଲ୍‌କା ଆତି ୱେନ୍‌କା ୱାନ୍‌ ଆବେ ଅରେନ୍‍ ତେବାତାନ୍‌ ।
MAT 14:24 ମାତର୍‌ ଡଙ୍ଗାଁ ନାସ୍ତିୱାଲେ ଗାଡା ପାଡ଼ିଦାନ୍‍ ନାଣ୍ତ ଆକ ମାର୍ହାତ୍‌ ମାରି ନାଣ୍ତ ଗାଲି ଆଜିମାର୍ହାତ୍‍ଆକା ଉଲ୍‍କା ଦକାଦାନ୍‍ ଦୁଙ୍ଗ୍‍ଁଜିମାର୍ହାତ୍‍ ।
MAT 14:25 ସାଲ୍‍ଦି କର୍‌ରୁ କେଡ଼େପି ଜିସୁ ସାମ୍‌ଦୁର୍‌ ମୁସ୍‌କୁ ବୁଲାଜି ସିସୁରି ଲାକ୍‌ତୁ ୱାତାନ୍‌ ।
MAT 14:26 ମାରି ସିସୁର୍‌ ୱାନିଙ୍ଗ୍‌ ସାମ୍‌ଦୁର୍‌ ମୁସ୍‌କୁ ବୁଲାନିକା ସୁଡ଼ୁତାରୋ ତିଲାଜି ଇର୍ହାର୍‌, “ଇକା ତୋ ଦୁବା !” ମାରି, ୱାର୍‌ ତିଲାଜି ଆଉଲି ଆତାର୍‌ ।
MAT 14:27 ଜିସୁ ଆୟାଦାପ୍ରେ ୱାରି ୱାଲେ ୱାର୍‌ଗିଜି ଇର୍ହାନ୍‌, “ସାସ୍‌ ଆସ୍‌ତୁ, ଇକାନ୍‌ ତୋ ନାନ୍, ତିଲାମାଟ୍‌ !”
MAT 14:28 ଇକା ୱେନ୍‌ଜି ପିତର୍‌ ଇର୍ହାନ୍‌, “ପ୍ରବୁ, ଜଦି ସତ୍‌ତାନ୍‌ ନିନ୍‍ଆନିମାନି, ଏରୁ ମୁସ୍‌କୁ ବୁଲାଜି ନି ଲାକ୍‌ତୁ ୱାଦେଙ୍ଗ୍ ଇଜି ନାଙ୍ଗିଁ ଆଦେସ୍‌ ସିଦା ।”
MAT 14:29 ଜିସୁ ଇର୍ହାନ୍‌, “ରାଆ ।” ପିତର୍‌ ଡଙ୍ଗାଁଦାନ୍‍ ରେତାଜି ଜିସୁଦି ତରିନ୍‌ ଏରୁ ମୁସ୍‌କୁ ବୁଲାଦେଙ୍ଗ୍‍ ଆସ୍‌ତାନ୍‌ ।
MAT 14:30 ମାତର୍‌ ଗାଲି ନାଣ୍ତ ଆନିକା ସୁଡ଼୍‌ଜି ତିଲାତାନ୍‍ ମାରି ଏରୁତୁ ମୁଡ଼ୁଗିଜି ସନ୍‍ଡ୍ରେଙ୍ଗ୍‍ଆସ୍‍ତାନ୍‍ । ଆବେଟ୍‌ ୱାନ୍‌ ଆଉଲି ଆଜି କୁକ୍‍ତାନ୍‍, “ପ୍ରବୁ, ନାଙ୍ଗିଁ ରକିୟାକିଆ ।”
MAT 14:31 ଜିସୁ ଆୟାଦାପ୍ରେ କିୟୁ ସପ୍‍ସି ୱାନିଙ୍ଗ୍‌ ଆସ୍‌ସି ଇର୍ହାନ୍‌, “ଏ ଅଡ଼ପ୍‍ ବିସ୍‍ବାସି ! ଏନ୍ଦା ନିନ୍‌ ଆନ୍‍ମାନ୍‍କିତି ?”
MAT 14:32 ୱାର୍‌ ରିଏର୍‌ ଡଙ୍ଗାଁଦୁ ଏକ୍‍ତାର୍‍ ମାରି ଆୟାଦାପ୍ରେ ଗାଲି ତିର୍‌ ଆତାତ୍‌ ।
MAT 14:33 ଆବେଟ୍‌ ଡଙ୍ଗାଁଦୁମାନି ସିସୁର୍‍ କାବାଆଜି ଜିସୁଙ୍ଗୁଁ ମାଡ଼ିସ୍‍କିଜି ଇର୍ହାର୍‌, “ନିନ୍‌ ସତେନେ ମାପୁରୁଦି ମାରିସି ।”
MAT 14:34 ୱାର୍‌ ନାସି ଗିନେସରତ ଗାଡ଼୍‌ତୁ ୱାତାର୍‌ ।
MAT 14:35 ଆବେଣି ଲୋକୁ ଜିସୁଙ୍ଗୁଁ ସିନିସ୍‌କିଦେଙ୍ଗ୍‌ ଆଟ୍‍ସି ଲାକ୍‌ତୁରି ନାର୍‍କାଙ୍ଗ୍‍ଁ ମାନି ରଗ୍‌ ଲୋକାଙ୍ଗ୍‌ ଜିସୁ ଲାକ୍‌ତୁ ତାତାର୍‌ ।
MAT 14:36 ରଗ୍‌ଲୋକାଙ୍ଗ୍‍ ଆବ୍‍କା ନି ୱାତି ଜାଲି ମୁଟ୍‌ତେଙ୍ଗ୍‌ ସାରି ସିଦା ଇଜି ୱାର୍‌ ଜିସୁଙ୍ଗୁଁ ମାଡ଼ିସ୍‍କିତାର୍‍ । ଏମେକାର୍‌ ମୁଟ୍‍ତାର୍‍, ୱାର୍‌ ନେଗେନ୍‍ ଆତାର୍‌ ।
MAT 15:1 ଅର୍‍ଲେନ୍‍ ଏସ ଲୋକୁ ପାରୁସିର୍‌ ମାରି ସାସ୍ତ୍ରିର୍‌ ଜିରୁସାଲମ୍‌ତାନ୍‌ ୱାଜି ଜିସୁଙ୍ଗୁଁ ୱେନ୍‌ବାତାର୍‌,
MAT 15:2 “ମା ପୁର୍ବେଦିଡକ୍‌ରାଦାଦାର୍‌ ଆମାୱିଜୁ ନିତିନିୟମ୍ ସିତା ସର୍‌ଆମାନାର୍‌, ନି ସିସୁର୍‍ ଏନ୍ଧା ଆୟାୱିଜୁ ମାନାଏଜିନାର୍‌ ? ଉଣି ଆଗ୍‍ଡ଼ିନେ ମା ନିତିନିୟମ୍ ନେଗେନ୍‍କିଜି କିକୁ ନର୍‌ବାଏଣ୍ତା ଏନ୍ଦା ଉଣୁଜିନାର୍‌ ।”
MAT 15:3 ଜିସୁ ୱାରିଙ୍ଗ୍‌ ଇର୍ହାନ୍‌, ମିର୍‌ ଏନ୍ଧା ମାପୁରୁଦି ମାଟା ମାନାଏଜି ନିଜେଦି ନିତିନିୟମ୍ ଇସାବ୍‌ତାନ୍‌ ପାଣି କିଜିନିଦେର୍‌ ?
MAT 15:4 ମାପୁରୁ ତୋ ୱେର୍‌ତାମାନାନ୍‌, ବୁବା ୟାୟାଏଙ୍ଗ୍‍ ମାନାଦୁ, ଏନ୍‌ ନିଜେଦି ବୁବା ନି ୟାୟାଙ୍ଗ୍‌ ଆନାଦୁରିଆ ସିନାନ୍‌, ୱାନ୍‌ ସାନି ଦଣ୍ଡ୍‌ ପୟ୍‌ନାନ୍‌ ।
MAT 15:5 ମାତର୍‌ ମିର୍‌ ଇଜିନିଦେର୍‌, ଆମା ଲୋକୁ ବୁବା ନି ୟାୟାଙ୍ଗ୍‌ ଇନାନ୍‌, ନା ମାଣ୍‌କୁ ଆମାକା ମି ଉଣ୍ତିଙ୍ଗ୍‌ ଆତାମାନାତ୍‌, ଆକା ପ୍ରବୁଦି ଉଦେସ୍‍ତାନ୍‍ ପୁଜା ସିଆତାମାନାତ୍‌ ।
MAT 15:6 ୱାନ୍‌ ମାରି ନିଜେଦି ବୁବା ନି ୟାୟାରିଙ୍ଗ୍‌ ସମ୍ମାନ୍‌ କିଏନ୍‌ । ଇୟାୱାଜା ଇସାବ୍‌ତାନ୍‌ କିଜି ୱାଜି ମିର୍‌ ମାପୁରୁଦି ମାଟା ମାନାଏଜି ନିଜେଦି ସିକିୟା ଇସାବ୍‌ତାନ୍‌ ବୁଲାଜିନି ।
MAT 15:7 ଏ ସାଲାକିଦି ଦାର୍ମୁ ଦଲ୍‌, ଜିସାଇୟ ମି ବିସୟ୍‌ତାନ୍‌ ଜତାର୍ତ ୱାଜା ଇୟା ବାବବାଣି ୱେର୍‌ତାମାନାନ୍‌ ।
MAT 15:8 ମାପୁରୁ ଇଜିନାନ୍‌, ଇୟା ଲୋକୁ କେବଲ୍‌ ମାଟାଦାନ୍‌ ନାଙ୍ଗିଁ ସମ୍ମାନ୍‌ କିନାର୍‌, ମାତର୍‌ ୱାରି ଜିବନ୍‌ ନା ମାଣାନ୍‌ ନାଣ୍ତ ଆକ ।
MAT 15:9 ନାଙ୍ଗିଁ ୱାର୍‌ ଆମା ଆରାଦନା କିନାର୍‌, ଆକା ପାଣିସିଇକା, ଇରିଙ୍ଗ୍‌ ୱାର୍‌ ଲୋକୁ ତିଆର୍‌ କିତି ନିୟମ୍‌କୁ ନା ମାଟା ଇଜି ୱେର୍‌ସିନାର୍‌ ।
MAT 15:10 ତାନେୱେନ୍‌କା ଜିସୁ ଲୋକାଙ୍ଗ୍‌ ଲାକ୍‌ତୁ କୁକ୍‌ସି ୱାରିଙ୍ଗ୍‌ ଇର୍ହାନ୍‌, “ୱେନ୍‌ଡ୍ରୁ ମାରି ବୁଜାଦୁ;
MAT 15:11 ଲୋକା ୱେୟୁ ସିଜି ଆମାକା ଲୋଇ ଡ଼ୁଗୁନାତ୍‌, ଆକା ୱାନିଙ୍ଗ୍‌ ଅପବିତ୍ର କିଏତ୍‌; ମାତର୍‌ ୱେୟୁଦାନ୍‌ ଆମାକା ସନାତ୍‌, ଆକା ୱାନିଙ୍ଗ୍‌ ଅପବିତ୍ର କିନାତ୍‌ ।”
MAT 15:12 ନାସ୍ତିୱାଲେ ସିସୁର୍‍ ଜିସୁଦି ଲାକ୍‌ତୁ ୱାଜି ଇର୍ହାର୍‌, “ନି ମାଟା ୱେନ୍‌ଞ୍ଜି ପାରୁସିର୍‌ ରିସା ଆତାମାନାର୍‌, ଇକା ଇନିକା ନିନ୍‌ ନେସେଇ ?”
MAT 15:13 ଜିସୁ ଇର୍ହାନ୍‌, “ଏମେ ମାରାକ୍‌ ୱିଜୁ ନା ମୁସ୍‌କୁପୁର୍‌ତି ବୁବା ଉର୍‍ଏନ୍‌, ଆୟାୱିଜୁ ମାଗ୍‌ନେ ସନେ ।
MAT 15:14 ୱାରିଙ୍ଗ୍‌ ଡ଼ିସ୍‌ସୋ ସିଦୁ, ୱାର୍‌ କାଣାର୍‌, ଆଇ କାଣାରି ସାରିତର୍‌ନିକାର୍‍; ମାରି, ଅରେନ୍‍ କାଣା ମାରି ଅରେନ୍‍ କାଣାଦିଙ୍ଗ୍‌ ସାରି ତର୍‌ନା ସିନାନ୍‌, ଆର୍‌ତିଙ୍ଗ୍‌ ରିଏର୍‌ବା ଗୁଟାଦୁ ଆର୍‌ନାର୍‌ ।”
MAT 15:15 ଆବେଟ୍‌ ପିତର୍‌ ୱାନିଙ୍ଗ୍‌ ଇର୍ହାନ୍‌, “ଇୟା କାତା ମାଙ୍ଗିଁ ନେସ୍‌ନିୱାଜା ବୁଜାକିଜ ସିଦା ।”
MAT 15:16 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ବା ଇନିକା ଇୟାସାନ୍ଦି ବୁଜାଦେଙ୍ଗ୍‌ ଆଟ୍‍ଏଜିନିଦେର୍‍ ।
MAT 15:17 ନିସବା ବୁଜାଦେଙ୍ଗ୍‌ ଆଟ୍‍ଏଜିନିଦେର୍‍ ? ଆମାକା ଇନିକା ୱେୟୁଦୁ ଡ଼ୁଗୁନାତ୍‌, ଆକା ପଟା ଲୋଇ ସନାତ୍‌ ମାରି ମେନ୍ଦଲ୍‌ତାନ୍‌ ସନା ସନାତ୍‌ ।
MAT 15:18 ମାତର୍‌ ଆମାୱିଜୁ ବିସୟ୍‌କୁ ୱାନି ୱେୟୁଦାନ୍‌ ଆତେରେ ୱାନାତ୍‌, ଆକା ୱାନି ଜିବନ୍‌ତାନ୍‌ ସନାତ୍‌, ଆକାନେ ଲୋକତିଙ୍ଗ୍‌ ଅପବିତ୍ର କିନାତ୍‌ ।
MAT 15:19 ଇରିଙ୍ଗ୍‌ ୱାନି ଜିବନ୍‌ତାନ୍‌ ତାଗ୍‌ଇସିନ୍ତା, ସାୟାମାର୍‌ଗାଡାକ୍‌ନିକା, ଦାରିପାଣି, ତାଗ୍‌ଇପାଣି, ଡଙ୍ଗାଁ, ମିସ୍‌ମାଟା ୱେର୍‌ନିକା ମାରି ନିନ୍ଦାକିନିକା ନାଣ୍ତ ରକମ୍‌ତି ନିୟମ୍‌ ସିଲି ପାଣି କିନାନ୍‌ ।
MAT 15:20 ଇୟାୱିଜୁ ବିସୟ୍‌ ଲୋକତିଙ୍ଗ୍‌ ଅପବିତ୍ର କିନାତ୍‌ । ମାତର୍‌ ନିତିନିୟ୍‍ତାନ୍‍ କିୟୁ ନର୍‌ବାଏଣ୍‌ଗା ଉଣିକା ଆକା ଲୋକ୍‌ତିଙ୍ଗ୍‌ ଅପବିତ୍ର କିଏତ୍‌ ।”
MAT 15:21 ଜିସୁ ଆୟା ବାଡି ଡ଼ିସ୍‌ତାନ୍‌ନୋ ସୋର ନି ସିଦନ୍‍ ରାଜିଦି ଗାଡ଼୍‌କାଙ୍ଗ୍‌ ସୋର୍ହାନ୍‌ ।
MAT 15:22 ଆବେନୁ ତେବାଜି ମାନି ଅରେତ୍‌ କିଣାନିୟା ଆଇମା ଜିସୁଦି ଲାକ୍‌ତୁ ୱାଜି ଇର୍ହାତ୍‌, “ଏ ପ୍ରବୁ, ଦାଉଦତି ମାରିନ୍‌, ନାଙ୍ଗିଁ ଦୟା କିଆ । ନା ଗାଡ଼ିଙ୍ଗ୍‌ ଦୁବା ଆସ୍‌ତାମାନାତ୍‌ ମାରି ୱାଦ୍‌ ନାଣ୍ତ କାସ୍ଟୁ ବଗାଜିନାତ୍‌ ।”
MAT 15:23 ମାତର୍‌ ଜିସୁ ତାନେଙ୍ଗ୍‌ ପଦେକ୍‌ ମାଟାବା ଇନ୍‌ଏତାନ୍‌ । ମାରି ୱାନି ସିସୁର୍‍ ୱାଜି ୱାନିଙ୍ଗ୍‌ ମାଡ଼ିସ୍‌କିଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ତାନେଙ୍ଗ୍‌ ବେଗି ସନ୍‌ଡ଼୍ରେଙ୍ଗ୍‌ ଇନିଆ, ସୁଡୁଆ ୱାଦ୍‌ ଏଣ୍ତେସ୍‌ ଆଉଲି ଆଜି ମା ୱେନ୍‌କା ୱେନ୍‌କା ୱାଜିନାତ୍‍ ।”
MAT 15:24 ଜିସୁ ଇର୍ହାନ୍‌, “ନାନ୍ ଇସ୍ରାଏଲ୍‌ କୁଟୁମ୍‌ତି ମୁରିତିମାନି ମେଣ୍ତେଆଙ୍ଗାଁ ଡ଼ିସ୍‌ତିଙ୍ଗ୍‌ ମାରି ଏ ଲାକ୍‌ତୁ ରେଏ ।”
MAT 15:25 ଆଇମା ୱାଜି ଜିସୁଦି କାଲ୍‌କା ଆଡ୍‍ଗି ମେଣ୍ତେଙ୍ଗ୍‍ ଗଟ୍‌କିଜି ଇର୍ହାତ୍‌, “ଏ ପ୍ରବୁ, ନାଙ୍ଗିଁ ଦୟା କିଆ ।”
MAT 15:26 ଜିସୁ ଇର୍ହାନ୍‌ । “ଇରିଙ୍ଗ୍‌ କଡ଼ରି ବାଟା ଖାଦି ଅସି ନୁକୁଡ଼ିଆଙ୍ଗାଁ ମାନୁ ପୋକ୍‍ନିକା ନେଗେତ୍‌ ସିଲେ ।”
MAT 15:27 ଆଇମା ଇର୍ହାତ୍‌, “ଆକା ସତ୍‌ ପ୍ରବୁ, ମାତର୍‌ ନୁକୁଡ଼ିଙ୍ଗ୍‌ ବା ଟେବୁଲ୍‌ ଆଡ୍‍ଗି ଆର୍‌ନି ମାଲିକ୍‌କା ସକ୍‌ଡ଼ି ଉନ୍‌ଣ୍ତେ ପଇନେ ।”
MAT 15:28 ଜିସୁ ତାନିଙ୍ଗ୍‌ ଇର୍ହାନ୍‌, “ନିନୁ ଅରେତ୍‌ ଡାଟ୍‌ତି ବିସ୍‌ବାସ୍‌ତି । ନି ବଦା ପୁରା ଆନାତ୍‌ ।” ଆୟା ଦ୍ରାପେନେ ତାନି ଗାଡ଼୍‌ସି ନେଗେନ୍‌ ଆତାତ୍‌ ।
MAT 15:29 ଜିସୁ ଆବେଟ୍‌ତାନ୍‌ ଡ଼ିସ୍‌ତାନ୍‌ନୋ ଗାଲିଲି ଗାଡା ଲାକ୍‌ତୁ ୱାତାନ୍‌, ମାରି ଗରନ୍‌ ମୁସ୍‌କୁ ସୋର୍ହାନ୍‌ନୋ ଆବେନ୍‌ ବାସ୍‌ତାନ୍‌ ।
MAT 15:30 ନାଣ୍ତ ଲୋକୁ ୱାଜି ୱାନି ଲାକ୍‌ତୁ ଉଣ୍ତାତାର୍‌ । ୱାର୍‌ ଚଟା, ଗୁଲା, କାଣା, ବୁଲାଦେଙ୍ଗ୍‌ ଆଟ୍‍ଇକାର୍‍ ମାରି ନାଣ୍ତ ନବ୍‌ଆତି ଲୋକାଙ୍ଗ୍‌ ତାସି ଜିସୁଦି ପାଦାମ୍‌ ଆଡ୍‍ଗି ଇଟ୍‌ତାର୍‌ ମାରି ଜିସୁ ଆୟା ୱିଜେରିଙ୍ଗ୍‌ ନେଗେନ୍‌ କିତାନ୍‌ ।
MAT 15:31 ଗୁଲାର୍‌ ଜେ ୱାର୍‌ଗିଜିନାର୍‌, କିକୁକାଲ୍‌କୁୱାର୍‌ତିକାର୍‌ବା ନେଗେନ୍‌ ଆତାର୍‌, ଚଟାର୍‌ ବୁଲାଜିନାର୍‌ ମାରି କାଣାର୍‌ ସୁଡ଼୍‌ଦେଙ୍ଗ୍‌ ଆଟ୍‌ସିନାର୍‌, ଇକା ସୁଡ଼ୁଜି ଲୋକୁୱିଜେର୍‌ କାବା ଆତାର୍‌, ମାରି ଇସ୍ରାଏଲ୍‌ତି ମାପୁରୁଙ୍ଗୁଁ ଦନ୍ୟବାଦ୍‌ କିତାର୍‌ ।
MAT 15:32 ଜିସୁ ନିଜେଦି ସିସୁରିଙ୍ଗ୍‌ ଲାକ୍‌ତୁ କୁକ୍‌ସି ଇର୍ହାନ୍‌, “ଇୟା ଲୋକା ଉଣ୍ତିଙ୍ଗ୍‌ ନା ଜିବନ୍‌ ଆଡ୍‌ବାଜିନାତ୍‌, ଇରିଙ୍ଗ୍‌ ଇୟାକାର୍‌ ମୁନେନ୍‌ ଆତାତ୍‌ନି ନା ୱାଲେ ମାନାର୍‌ ମାରି ଇୟାୱାରି ମାନୁ ଇନିକା ଉନ୍‌ଣ୍ତେଙ୍ଗ୍‌ ସିଲେତ୍‌ । ୱାର୍‌ ଉଣୁଏଣ୍‌ଗା ଇବେଟ୍‌କୁ ସୋଲିର୍‌, ଇୟା ମାଟା ନାନ୍ ଅଡ଼୍‌ବିଏ; ଇରିଙ୍ଗ୍‌ ଡ଼େସିସୋନିୱାଲେ ସାରିଦୁ ୱାର୍‌ ୱାନ୍ଦ୍‍ନା ସନାର୍‌ ।”
MAT 15:33 ସିସୁର୍‍ ୱାନିଙ୍ଗ୍‌ ୱେନ୍‌ବାତାର୍‌, “ଇୟା ସିମ୍ରା ବାଡିଦୁ ନିସ ଲୋକାଙ୍ଗ୍‌ ଉଟ୍‍ପିସ୍‍କିଦେଙ୍ଗ୍‍ ଇଜି ମାଡ୍‌ ଏମେଟ୍‌କୁ ନାଣ୍ତ କାଦି ପଇନିକା ?”
MAT 15:34 ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, “ମି ଲାକ୍‌ତୁ ଏସଗୋଟା ରୁଟିଙ୍ଗ୍‌ ମାନେ ?” ୱାର୍‌ ଇର୍ହାର୍‌, “ସାତ୍‍ଗୋଟା ରୁଟିଙ୍ଗ୍‌ ମାରି ଏସ ଇସ୍ରି ମିନ୍‌କୁ ମାନେ ।”
MAT 15:35 ଜିସୁ ଲୋକାଙ୍ଗ୍‌ ବୁମି ମୁସ୍‌କୁ ବାସ୍‌ତେଙ୍ଗ୍‌ ଆଦେସ୍‌ ସିତାନ୍‌ ।
MAT 15:36 ତାନେୱେନ୍‌କା ୱାନ୍‌ ଆୟା ସାତଗଟା ରୁଟି ମାରି ମିନ୍‌କୁ ଅସି ମାପୁରୁଙ୍ଗୁଁ ଦନ୍ୟବାଦ୍‌ ସିତାନ୍‌ ମାରି ଆୟାୱାନିକାଙ୍ଗ୍‌ ମକେଙ୍ଗ୍‌ ମକେଙ୍ଗ୍‌ କିଜି ରୁକ୍‍ସି ସିସୁରିଙ୍ଗ୍‌ ସିତାନ୍‌ । ସିସୁର୍‍ ଆକା ଲୋକାଙ୍ଗ୍‌ ବାଟାକିତାସିତାର୍‌ ।
MAT 15:37 ମାରି, ୱିଜେରେ ତିନ୍‌ଞ୍ଜି ପଟା ପାଜିତାର୍‌ ମାରି ଡ଼ିକ୍‌ତି ମକାରୁଟିଙ୍ଗ୍‌ ଏସ ଏଜିତେ, ଆକା ସିସୁର୍‍ ସାତଗଟା ଡାଡ଼ିଆଙ୍ଗାଁ ବର୍ତି କିତାର୍‌ ।
MAT 15:38 ଉଟି ଲୋକୁ, ଆଇମେକାଙ୍ଗ୍‌ ନି କଡ଼ରିଙ୍ଗ୍‌ ଡ଼ିସ୍‌ସି ନାଲ୍‌ଗି ହାଜାର୍‌ ମେମାରୁଙ୍ଗୁଁ ମାର୍ହାର୍‌ ।
MAT 15:39 ତାନେୱେନ୍‌କା ଜିସୁ ୱିଜୁ ଲୋକାଙ୍ଗ୍‌ ପୋକ୍‌ତାନ୍‌ନୋ ଡଙ୍ଗାଁଦୁ ଏକ୍‌ତାନ୍‌ନୋ ମଗଦାନ୍‌ ରାଜିଦୁ ୱାତାନ୍‌ ।
MAT 16:1 ଅର୍‍ଲେନ୍‍ ଏସଲୋକ୍‌ ପାରୁସିର୍‌ ନି ସାଦୁକିର୍ ଜିସୁଙ୍ଗୁଁ ଦସ୍‌ ଆସ୍‌ତେଙ୍ଗ୍‌ ଇଜି ୱାନି ଲାକ୍‌ତୁ ୱାତାର୍‌ । ୱାର୍‌ ୱାନିଙ୍ଗ୍‌ ଇର୍ହାର୍‌, ମାପୁରୁ ୱାନିଙ୍ଗ୍‌ ଆସ୍‌କିତାମାନାନ୍‌ ଇଜି ପାର୍‌ମାଣ୍‌ ସିନି ଉଣ୍ତିଙ୍ଗ୍‌ ୱାନ୍‌ ଉନ୍‌ଡ୍ରି କାବାଆନି ପାଣି କିଜ ତର୍‌ଆ ।
MAT 16:2 ମାତର୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମିଲିମିଲିକା ବେଡ଼ାଦୁ ବାଦ୍‌ଡ଼ ନେତେର୍‌ ତରିତିଙ୍ଗ୍‌ ନେଗି ପାଗ୍‌ ଆନାତ୍‌ ଇଜି ମିର୍‌ ଇଜିନିଦେର୍‌,
MAT 16:3 ମାରି ସାଲିଦିବେଡ଼ାଦୁ ବାଦ୍‌ଡ଼ ଲାଲ୍‌ ନି ସିକାଟି ତରିତିଙ୍ଗ୍‌ ପିରୁ ଆନିକା ନେସ୍‌ନିଦେର୍‌ । ମିର୍‌ ବାଦ୍‌ଡ଼ତିଙ୍ଗ୍‌ ସୁଡ଼୍‌ଜି ପାଗ୍‌ତି ମାଟା ଆଗ୍‌ଡ଼ି ନେସ୍‌ନିଦେର୍‌ । ମାତର୍‌ ଇଲେଇତି ସମୟ୍‌ତି ସିନେଙ୍ଗ୍‌ୱିଜୁ ମିର୍‌ ନେସ୍‌ତେଙ୍ଗ୍‌ ଆଟ୍‍ଇଦେର୍‍ ?
MAT 16:4 ତାଗ୍‌ଇ ନି ଏମେକାର୍‌ ମାପୁରୁଙ୍ଗ୍‍ଁ ବିସ୍‌ବାସ୍‌ କିଏର୍‌ ୱାର୍‌ ସିନା ସୁଡ଼ୁନାର୍‌, ମାତର୍‌ ଜୁନସ୍‍ତି ସିନା ଡ଼ିସ୍‌ତିଙ୍ଗ୍‌ ଆଇ ଆମାକାବା ସିନା ୱାରିଙ୍ଗ୍‌ ସିଆୟ୍‌ଆଏତ୍‌ ।” ମାରି, ୱାନ୍‌ ୱାରିଙ୍ଗ୍‌ ଡ଼ିସ୍‌ତାନ୍‌ନୋ ସୋର୍ହାନ୍‌ ।
MAT 16:5 ସିସୁର୍‍ ଗାଡା ଆୟାପାଡ଼୍‌କା ଇତାରୋ ସୁଡ଼ୁତାର୍‌ଜେ, ୱାର୍‌ ରୁଟିଙ୍ଗ୍‌ ତାତେଙ୍ଗ୍‌ ବାଣାତାର୍‌ ।
MAT 16:6 ଜିସୁ ୱାରିଙ୍ଗ୍‌ ଇର୍ହାନ୍‌, “ଜାଗାର୍‌ତା ଆଦୁ, ପାରୁସି ନି ସାଦୁକିରି କମିର୍‌ଦାନ୍‌ ଜାଗାର୍‍ତାଆଦୁ ।”
MAT 16:7 ୱାର୍‌ ଇୟା ବିସୟତୁ ୱାରିୱାରି ଲୋଇ ୱାର୍‌ଗିଜି ସାତାର୍‌, “ମାଡ୍‌ ରୁଟିଙ୍ଗ୍‌ ତେଇକା ଇଜି ୱାନ୍‌ ଇକା ଇଜିନାନ୍‌ ।”
MAT 16:8 ୱାର୍‌ ଇନିକା ଇଜିମାର୍ହାର୍‌ ନେସ୍‌ତାନ୍‌ନୋ ଜିସୁ ୱାରିଙ୍ଗ୍‌ ଇର୍ହାନ୍‌, “ମି ଲାକ୍‌ତୁ ରୁଟିଙ୍ଗ୍‌ ସିଲୁ ଇଜି ଏନ୍ଦା ୱାର୍‌ଗିଜି ସାଜିନିଦେର୍‌ ? ମି ବିସ୍‌ବାସ୍‌ ଏସ ଉଣା ।
MAT 16:9 ମିର୍‌ ଇନିକା ଇୟାସାନ୍ଧିବା ବୁଜାଦେଙ୍ଗ୍‌ ଆଟ୍‍ଇଜିନିଦେର୍‍ ? ୫,୦୦୦ ହାଜାର୍‌ ଲୋକାମାନୁ ନାନ୍ ପାସ୍‌ଗୋଟା ରୁଟିଙ୍ଗ୍‌ ବାଟାକିତିମାନି ମାଟା ଇନିକା ମିଙ୍ଗିଁ ଏତ୍‌ ସିଲେତ୍‍ ? ନାସ୍ତିୱାଲେ ଏସଗୋଟା ଡାଡ଼ିଆଙ୍ଗାଁ ବର୍ତିକିତିମାର୍‌ଇଦେର୍‌ ?
MAT 16:10 ମାରି ଆୟା ୪,୦୦୦ ହାଜାର୍‌ ଲୋକାଙ୍ଗ୍‌ ସାତଗଟା ରୁଟିଙ୍ଗ୍‌ ମାଟା ଏତ୍‌ ସିଲେତ୍‌ ? ନାସ୍ତିୱାଲେ ମିର୍‌ ଏସଗୋଟା ଡାଡ଼ିଆଙ୍ଗାଁ ବର୍ତିକିତିମାର୍‌ଇଦେର୍‌ ?
MAT 16:11 ନାନ୍ ଜେ ରୁଟିଙ୍ଗ୍‌ ବିସୟ୍‌ତାନ୍‌ ଇନ୍‌ଏନ୍‌ ମାର୍‌ଆ, ଇକା ଏଣ୍ତେସ୍‌ ବୁଜାଦେଙ୍ଗ୍‌ ଆଟ୍‍ଇଜିନିଦେର୍‍ ? ନାନ୍ ଇଜିନା, ପାରୁସି ନି ସାଦୁକିରି କମିର୍‌ଦାନ୍‌ ଜାଗାର୍‌ତାମାନ୍‌ଡ୍ରୁ ।”
MAT 16:12 ନାସ୍ତିୱାଲେ ସିସୁର୍‍ ବୁଜାଦେଙ୍ଗ୍‌ ଆଟ୍‌ତାର୍‌ ଜେ ଜିସୁ ରୁଟିଦି କମିର୍‌ ମାଟା ଇନ୍‌ଏନ୍‌ମାର୍ହାନ୍‌, ମାତର୍‌ ପାରୁସି ନି ସାଦୁକିରି ସିକିୟା ଉଣ୍ତିଙ୍ଗ୍‌ ଜାଗାର୍‌ତା କିତାମାର୍ହାନ୍‌ ।
MAT 16:13 ୱେନ୍‌କା ଜିସୁ କାଇସରିୟା ପିଲିପି ଗାଡ଼୍‌ ଲାକ୍‌ତୁରି ରାଜିଦୁ ୱାଜି ନିଜେଦି ସିସୁରିଙ୍ଗ୍‌ ୱେନ୍‍ବାତାନ୍‌, “ମନୁସ୍ୟପୁତ୍ର ଏନ୍‌ ଇଜି ଇୟା ବିସୟ୍‌ତାନ୍‌ ଲୋକୁ ଇନିକା ଇଜିନାର୍‌ ?”
MAT 16:14 ୱାର୍‌ ଇର୍ହାର୍‌, “ଏନ୍‌ ଏନ୍‌ ଇଜିନାର୍‌, ୱାନ୍‌ ଡୁବନ୍‌ସିନି ଯୋହନ, ଏନ୍‌ ଏନ୍‌ ଇଜିନାର୍‌ ‘ଏଲିୟ୍‌,’ ମାରି ଆଇକାର୍‌ ଇଜିନାର୍‌, ଜିରିମିୟ ସିଲିତିଙ୍ଗ୍‌ ବାବବାଦିରି ମାଣାନ୍‌ ଅରେନ୍‍ ।”
MAT 16:15 ଜିସୁ ୱେନ୍‌ବାତାନ୍‌, “ନାନ୍ ଏନ୍‌ ଇୟା ବିସୟ୍‌ତାନ୍‌ ମିର୍‌ ଇନିକା ଇଜିନିଦେର୍‌ ?”
MAT 16:16 ସିମୋନ ପିତର୍‌ ଇର୍ହାନ୍‌, “ନିନୁ କ୍ରିସ୍ତ ଅର୍ତାତ୍‍ ମସିହ, ଜିବନ୍‌ମାନି ମାପୁରୁଦି ମାରିନ୍‌ ।”
MAT 16:17 ଜିସୁ ଇର୍ହାନ୍‌, “ଏ ଜୁନସ୍‍ତି ମାରିନ୍‌ ସିମୋନ, ନିନ୍‌ ଦନ୍ୟ !” ଇୟା ସତ୍‌ ନିନୁ ଆମା ଲୋକାମାଣାନ୍‌ ପୟ୍‌ଇ । ନା ମୁସ୍‌କୁପୁରୁତି ବୁବା ନିଜେ ଇକା ନିମାନୁ ୱେର୍‌ତାମାନାନ୍‌ ।
MAT 16:18 ଆୟାଉଣ୍ତିଙ୍ଗ୍‌ ନାନ୍ ବା ନିଙ୍ଗିଁ ଇଜିନା, ନିନୁ ପିତର ଅର୍ତାତ୍‍ ପିଡ଼ିପି । ମାତର୍‌ ଇୟା ମୁଲ୍‌ ପିଡ଼ିପି ମୁସ୍‌କୁ ନାନ୍ ନା ମଣ୍ତଲି ତିଆର୍‌କିନା । ଇୟାୱାଜାକି ସାନିୱାଜା ଇନି ଦଂସକିନି ସାକ୍ତି ତାନିଙ୍ଗ୍‌ ନାସ୍ଟୁ କିଦେଙ୍ଗ୍‌ ଆଟ୍‌ଏତ୍‌ ।
MAT 16:19 ନାନ୍ ନିଙ୍ଗିଁ ମୁସ୍‌କୁପୁର୍‌ତି କୁସିକାଣ୍ତି ସିନା, ମାରି ନିନ୍‌ ଦୁନିଆଦୁ ଆମାକା ବନ୍ଦକିନି, ମୁସ୍‌କୁପୁରୁତୁ ଆକା ବନ୍ଦତେବାନାତ୍‌, ମାରି ନିନ୍‌ ଦୁନିଆଦୁ ଆମାକା ଇନିକା ଡ଼ିସ୍‌ନିସିନି, ମୁସ୍‌କୁପୁରୁତୁ ଆକା ଡ଼ିସ୍‌ନି ।
MAT 16:20 ଜିସୁଙ୍ଗୁଁ ଜେ ମସିହ ଇଜି ଇକା ଏଙ୍ଗ୍‌ ଇନ୍‌ଇ ଉଣ୍ତିଙ୍ଗ୍‌ ୱାନ୍‌ ସିସୁରିଙ୍ଗ୍‌ ମାଟା ସିତାନ୍‌ ।
MAT 16:21 ଆୟା ସମୟ୍‌ତାନ୍‌ ଜିସୁ ନିଜେଦି ସିସୁରିଙ୍ଗ୍‌ ନେସ୍‌ନିୱାଜା ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ନାନ୍ ପୁରା ଜିରୁସାଲମ୍‌ତୁ ସନ୍‌ଡ୍ରେଙ୍ଗ୍ ଆନାତ୍‌ ମାରି ଦାର୍ମୁଜାଜକ, ଦାର୍ମୁଗୁରୁ ମାରି ନେତାର୍‌ରି, କିୟୁଦାନ୍‌ ନାଣ୍ତ ଦୁଃକ୍‌କାସ୍ଟୁବଗାଜି ସାଦେଙ୍ଗ୍‌ପଡ଼ାନାତ୍‌, ମାତର୍‌ ମୁନେଟି ୱେନ୍‌କା ମାରିଡ଼େସିଜିବନ୍‌ ଆଜିନିଙ୍ଗିଁନା ।”
MAT 16:22 ପିତର୍‌ ଜିସୁଙ୍ଗୁଁ ଉନ୍‌ଡ୍ରି ବାଡିଦୁ ଅତାନ୍‌ନୋ ବୁଦିୱେର୍‍ସି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ମାପୁରୁ କିମାକିନ୍‌, ପ୍ରବୁ, ନି ଉଣ୍ତିଙ୍ଗ୍‌ ଇୟାୱିଜୁ ଏସ୍‌କାଙ୍ଗ୍‌ବା ଗଟାମାକିତ୍‌ ।”
MAT 16:23 ଜିସୁ ମାର୍‌ଜିବେସ୍‌ସି ପିତରତିଙ୍ଗ୍‌ ଇର୍ହାନ୍‌, “ନା ଆଗ୍‍ଡ଼ିରାନ୍‍ ଆକ ସାଙ୍ଗ୍ଆ ସୟତାନ୍, ନିନୁ ନା ଉଣ୍ତିଙ୍ଗ୍‌ ଉନ୍‌ଡ୍ରିବାଦା, ଇରିଙ୍ଗ୍‌ ନିନୁ ମାପୁରୁଦି ବିସୟ୍‌ ଅଡ଼୍‍ବିଏଣ୍ତା ଲୋକା ବିସୟ୍‌ ଅଡ଼୍‌ବିଜିନି ।”
MAT 16:24 ତାନେୱେନ୍‌କା ଜିସୁ ସିସୁରିଙ୍ଗ୍‌ ଇର୍ହାନ୍‌, “ଏନ୍‌ଆପିନ୍‌ ନାୱାଲେ ୱାଦେଙ୍ଗ୍‌ ବଦାକିନାନ୍‌, ଆର୍‌ତିଙ୍ଗ୍‌ ୱାନ୍‌ ନିଜେଦିଙ୍ଗ୍‌ ମାନାମାକିନି, ମାରି ନିଜେଦି କ୍ରୁସ ପିଣ୍ତିଜି ନା ୱେନ୍‌କା ୱେନ୍‌କା ବୁଲାଦେଙ୍ଗ୍‌ଆନାତ୍‌ ।
MAT 16:25 ଇରିଙ୍ଗ୍‌ ଏନ୍‌ଆପିନ୍‌ ନିଜେଦି ଜିବନ୍‌ତିଙ୍ଗ୍‌ ରକିୟା କିଦେଙ୍ଗ୍‌ ବଦାକିନାନ୍‌, ୱାନ୍‌ ଆକା ଆରାକିନାନ୍‌, ମାତର୍‌ ଏନ୍‌ ନା ଉଣ୍ତିଙ୍ଗ୍‌ ନିଜେଦି ଜିବନ୍‌ତିଙ୍ଗ୍‌ ଆରାକିନାନ୍‌, ୱାନ୍‌ ଆକା ପଇନାନ୍‌ ।
MAT 16:26 ଜଦି ଅରେନ୍‌ ଲୋକୁ‌ ସାରାଦୁନିଆଦିଙ୍ଗ୍‌ ଜିଣାଜି, ମାତର୍‌ ନିଜେଦି ଜିବନ୍‌ତିଙ୍ଗ୍‌ ଆରାକିନାନ୍‌, ୱାନିଙ୍ଗ୍‌ ଇନି ଲାବ୍‌ଆନାତ୍‌ ? ଲୋକୁ ୱାନି ଜିବନ୍‍ତିଙ୍ଗ୍ ଡ଼େସି ପ‍ଇଦେଙ୍ଗ୍‌, ଇନିକା ସିଦେଙ୍ଗ୍‍ ଆଟ୍‍ନାନ୍‍ ।
MAT 16:27 ମନୁସ୍ୟପୁତ୍ର ବୁବା ମାପୁରୁଦି ମାଣାନ୍‌ ଗୌରବ୍‍ ନି ମୁସ୍‌କୁପୁର୍‌ତି ଦୁତ୍‌କାୱାଲେ ମାରିଡ଼େସି ୱାନାନ୍‌ । ନାସ୍ତିୱାଲେ ୱାନ୍‌ ୱିଜୁ ଲୋକାଙ୍ଗ୍‌ ୱାନି କିତିମାନି ପାଣି ଇସାବ୍‌ତାନ୍‌ ପଲ୍‌ସିନାନ୍‌ ।
MAT 16:28 ନାନ୍ ମିଙ୍ଗିଁ ସତ୍‌ ଇଜିନା, ମନୁସ୍ୟପୁତ୍ର ରାଜା ଆଜି ୱାନିସାନ୍ଦି ଇବେନୁ ନିର୍‌ଇ ତେବାତିମାନି ଏସୋଲୋକ୍‍ ଏଣ୍ତେସ୍‌ କିଜିବା ସାନିକା ୱେଡ୍‌ଏର୍‌ ।”
MAT 17:1 ସଅ ଦିନ୍‌ ୱେନ୍‌କା ଜିସୁ ପିତର୍‌ ମାରି ଜାକୁବ, ଯୋହନ ତଡ଼ରିଏରିଙ୍ଗ୍‌ ଅସି ଉନ୍‌ଡ୍ରି ପେରି ଗରନ୍‌ ମୁସ୍‌କୁ ସର୍ହାର୍‌ । ଆବେନୁ ଆଇକାନ୍‍ ଏନ୍‌ ସିଲେତାନ୍‌ ।
MAT 17:2 ସିସୁର୍‍ ସୁଡ଼୍‍ବୁ ସୁଡ଼୍‍ବୁ ଜିସୁଦି ଉନ୍‌ଡ୍ରି ମୁର୍ତି ବାଦେଲେଆଜି ଜାୟ୍‌ଆତାତ୍‌ । ୱାନି ମକମ୍‌ ୱେଡ଼ାୱାଜା ଜାୟ୍‌ଆତାତ୍‌ ମାରି ୱାନି ଆଙ୍ଗିଁ ଜାୟ୍‌ ୱାଜା ଅଡ଼ିନିକା ତରିତାତ୍‌ ।
MAT 17:3 ମୋଶା ନି ଏଲିୟ୍‌ ଜିସୁଦି ୱାଲେ ୱାର୍‌ଗିସାନିକା ସିସୁର୍‍ ସୁଡ଼ୁତାର୍‌ ।
MAT 17:4 ଆବେନୁ ପିତର ଜିସୁଙ୍ଗୁଁ ଇର୍ହାନ୍‌, ଏ ପ୍ରବୁ, ଏସ ୱେଡ଼ିକାଦି ମାଟା, ମାଡ୍‌ ଇବେନୁ ମାନିକା । ନିନ୍‌ ଜଦି ବଦାକିନି, ଇବେନୁ ନାନ୍ ମୁନ୍‌ଡ୍ରି ଗୁଡ଼େଙ୍ଗ୍‌ ତିଆର୍‌କିନା । ନି ଉଣ୍ତିଙ୍ଗ୍‌ ଉନ୍‌ଡ୍ରି, ମୋସାଦି ଉଣ୍ତିଙ୍ଗ୍‌ ଉନ୍‌ଡ୍ରି ମାରି ଏଲିୟ୍‌ଦି ଉଣ୍ତିଙ୍ଗ୍‌ ଉନ୍‌ଡ୍ରି ।
MAT 17:5 ପିତର୍‌ ଇୟା ମାଟା ଇନିୱାଲେ ଖାଣ୍ତେକ୍‍ ବାଦଡ଼୍‍ ଇମ୍‌ଜି ୱାତା ଦୋ ୱାରିଙ୍ଗ୍‌ ବାଦଡ଼୍‍ତି ନିଡ଼୍‍ଗା ପିଡ଼ିକ୍‍ତାତ୍‍ ମାରି ଆବେଟ୍‌ତାନ୍‌ ଉନ୍‌ଡ୍ରି ବଲ୍ ୱାତାତ୍‍, “ଇୟାକାନ୍‌ ନା ଲାଡ୍‍ତି ମାରିନ୍‌, ୱେନିମାନୁ ନାନ୍ ନାଣ୍ତ ୱେଡ଼ିକା । ୱେନି ବାକ୍ୟ ୱେନ୍‌ଡ୍ରୁ ।”
MAT 17:6 ସିସୁର୍‍ ଆୟା ବଲ୍ ୱେର୍‌ରାନୋ ନିସ ତିଲାତାର୍‌ ଜେ ୱାର୍‌ ବୁମିଦୁ ମକମ୍‌ପାଡ଼୍‌କିସି ମେଡ଼େତାର୍‌ ।
MAT 17:7 ଜିସୁ ୱାରି ଲାକ୍‌ତୁ ୱାଜି ୱାରିଙ୍ଗ୍‌ ମୁଟ୍‌ତାନ୍‌ନୋ ଇର୍ହାନ୍‌, “ନିଙ୍ଗିଁଦୁ ତିଲାମାଟ୍‌ ।”
MAT 17:8 ମାରି, ୱାର୍‌ ମୁସ୍‌କୁ ବେସ୍‍ସି କେବଲ୍‌ ଜିସୁଙ୍ଗୁଁ ଡ଼ିସ୍‌ତିଙ୍ଗ୍‌ ମାରି ଏଙ୍ଗ୍‌ବା ସୁଡ଼ୁଏତାର୍‌ ।
MAT 17:9 ୱାର୍‌ ଗରନ୍‌ତାନ୍‌ ରେତାଜି ୱାନିୱାଲେ ଜିସୁ ୱାରିଙ୍ଗ୍‌ ଆଦେସ୍‌ ସିଜି ଇର୍ହାନ୍‌, “ମନୁସ୍ୟପୁତ୍ର ସାତିମାଣାନ୍‌ ମାରିଡ଼େସିଜିବନ୍‌ ଆଇସାନ୍ଦି ଇୟା ମିର୍‌ ସୁଡ଼୍‍ତିମାଟା ଏଙ୍ଗ୍‌ବା ଇନ୍‌ମାଟ୍‌ ।”
MAT 17:10 ସିସୁର୍‍ ଜିସୁଙ୍ଗୁଁ ୱେନ୍‌ବାତାର୍‌, ଏଲିୟ୍‌ ଆଗ୍‌ଡ଼ି ୱାନାନ୍‌ ଇଜି ମା ସାସ୍ତ୍ରିର୍‍ ଏନ୍ଦା ଇର୍ହାମାନାର୍‌ ?
MAT 17:11 ଜିସୁ ଇର୍ହାନ୍‌, ହୁଁ, ଏଲିୟ୍‌ ଆଗ୍‌ଡ଼ି ୱାଜି ୱିଜୁ ବିସୟ୍‌ ମାରିଡ଼େସି ତିଆର୍‌କିନାନ୍‍ ।
MAT 17:12 ମାତର୍‌ ନାନ୍ ମିଙ୍ଗିଁ ଇଜିନା, “ଏଲିୟ୍‌ ୱାତାୱିସ୍‌ତାନ୍‌ନି ମାରି ୱାନିଙ୍ଗ୍‌ ସିନିସ୍‌କିଏଣ୍‌ଗା ଲୋକୁ ୱାନି ଉଣ୍ତିଙ୍ଗ୍‌ ଆମାକା ବଦା, ଆୟାକା କିତାମାନାର୍‍ । ମନୁସ୍ୟପୁତ୍ରଦି ଉଣ୍ତିଙ୍ଗ୍‌ ବା ୱାର୍‌ ଆୟାୱାଜା ତାଗ୍‌ଇପାଣି କିନାର୍‌ ।”
MAT 17:13 ନାସ୍ତିୱାଲେ ସିସୁର୍‍ ବୁଜାଦେଙ୍ଗ୍‌ ଆଟ୍‌ତାର୍‌ ଜେ, ଜିସୁ ଡୁବନ୍‌ସିନି ଯୋହନତି ବିସୟ୍‌ତାନ୍‌ ୱେର୍‌ସିନାନ୍‌ ।
MAT 17:14 ଜିସୁ ନି ୱାନି ସିସୁର୍‍ ଲୋକା ଗଲି ଲୋଇ ଡ଼େସି ୱାତି ୱେନ୍‌କା ଅରେନ୍‍ ଲୋକୁ ଜିସୁ ଲାକ୍‌ତୁ ୱାଜି ମେଣ୍ତେଙ୍ଗ୍‌ ଗଟ୍‌କିଜି ଇର୍ହାନ୍‌,
MAT 17:15 ଏ ପ୍ରବୁ, ନା ମାରିନ୍‌ତିଙ୍ଗ୍‌ ଦୟା କିଆ, ମୁର୍ଛାରୋଗ୍‌ତୁ ନାଣ୍ତ କାସ୍ଟୁ ପୟଜିନାନ୍‍ ମାରି ୱାନ୍‌ ଏସ ଦେବେଙ୍ଗ୍‌ ସିସୁଦୁ ନି ଏର୍‌ତୁ ଆର୍‌ନାନ୍‌ ।
MAT 17:16 ନାନ୍ ନି ସିସୁରି ଲାକ୍‌ତୁ ୱାନିଙ୍ଗ୍‌ ତାତାମାର୍‌ଆ, ମାତର୍‌ ୱାର୍‌ ୱାନିଙ୍ଗ୍‌ ନେଗେନ୍‌ କିଦେଙ୍ଗ୍‌ ଆଟ୍‌ଏତାର୍‌ ।
MAT 17:17 ଜିସୁ ଇର୍ହାନ୍‌, “ଏ ଅବିସ୍‍ବାସ୍‍ ନି ବାୟାର୍ ମିର୍‌ ! ମି ୱାଲେ ନାନ୍ ମାରିଏସ ଦିନ୍‌ ତେବାନା ? ମାରି ଏସ ଦିନ୍‌ ମି ବ୍ୟବହାର୍‌ ସାସ୍‌କିନା ? ଆୟା କଡ଼ଦିଙ୍ଗ୍‌ ନା ଲାକ୍‌ତୁ ତାଗାଟ୍‌ ।”
MAT 17:18 କଡ଼ ଲୋଇମାନି ଦୁବାଦିଙ୍ଗ୍‌ ଜିସୁ ଆଦ୍‌ରିସ୍‌ କିତାନ୍‌ । ଦୁବା ୱାନିଙ୍ଗ୍‌ ଡ଼ିସ୍‌ସି ସତାସର୍ହାତ୍‌ ମାରି ଆୟା ଦାର୍ପେନେ କଡ଼ ନେଗେନ୍‌ଆତାନ୍‌ ।
MAT 17:19 ତାନେୱେନ୍‌କା ସିସୁର୍‍ ଜିସୁଙ୍ଗୁଁ ଅରେନ୍‌ୱାନିଙ୍ଗ୍‌ନେ ୱାଜି ୱେନ୍‌ବାତାର୍‌, “ମାପ୍‌ ଏନ୍ଦା ଆୟା ଦୁବାଦିଙ୍ଗ୍‌ ପେର୍‍ଦେଙ୍ଗ୍‍ ଆଟ୍‍ଏତାପ୍‍ ?”
MAT 17:20 ଜିସୁ ଇର୍ହାନ୍‌, “ମି ବିସ୍‌ବାସ୍‌ ପୁରା ଉଣା । ନାନ୍ ମିଙ୍ଗିଁ ସତ୍‌ ଇଜିନା, ଜଦି ଉନ୍‌ଡ୍ରି ସାର୍‍ସୁ ପାଡ଼ୁ ୱାଜା ମି ବିସ୍‌ବାସ୍‌ ମାନାତ୍‌, ଇୟା ଗରନ୍‌ତିଙ୍ଗ୍‌ ଇବେଟ୍‌ତାନ୍‌ ଆବେନୁ ଗୁସାଜସାଙ୍ଗାଆ ଇଜି ଇରିଙ୍ଗ୍‌, ଆକା ଗୁସାନାତ୍‌ । ବିସ୍‌ବାସ୍‌ତି ଡାଟ୍‌ତାନ୍‌ ମିର୍‌ ୱିଜୁ କିଦେଙ୍ଗ୍‌ ଆଟ୍‌ନିଦେର୍‌ ।”
MAT 17:21 ମାତର୍‌ ପାର୍‌ତନା ନି ଉପବାସ୍‌ ଡ଼ିସ୍‌ତିଙ୍ଗ୍‌ ଆଇକା ଇନି ଉପାୟ୍‌ତାନ୍‌ ଇୟାୱାଜା ଦୁବା ସୋହସ ସଲ୍‌ଏତେ ।
MAT 17:22 ସିସୁର୍‍ ୱିଜେରେ ଗାଲିଲିଦୁ ଉନ୍‌ଡ୍ରେମାନୁ ଆତି ୱେନ୍‌କା ଜିସୁ ୱାରିଙ୍ଗ୍‌ ଇର୍ହାନ୍‌, “ମନୁସ୍ୟପୁତ୍ର ଲୋକା କିୟୁଦୁ ସର୍ପେ ଆଦେଙ୍ଗ୍‌ ସଲ୍‌ସିନାନ୍‌ ।
MAT 17:23 ୱାର୍‌ ୱାନିଙ୍ଗ୍‌ ଡାକ୍‌ନାର୍‌, ମାତର୍‌ ମୁନେଟି ୱେନ୍‌କା ୱାନ୍‌ ମାରିଡ଼େସିଜିବନ୍‌ ଆନାନ୍‌ ।” ଆବେଟ୍‌କୁ ସିସୁର୍‍ ନାଣ୍ତ ଦୁକ୍‍ ଆତାର୍‌ ।
MAT 17:24 ତାନେୱେନ୍‌କା ଜିସୁ ନି ୱାନି ସିସୁର୍‍ କପର୍‍ନାହୁମ୍‍ତୁ ୱାତାର୍‌, ମନ୍ଦିର୍‌ତି ସିସୁଟୁଲୋସ୍‌ନିକାର୍‌ ପିତରତି ଲାକ୍‌ତୁ ୱାଜି ୱେନ୍‌ବାତାର୍‌, “ମି ଗୁରୁ ଇନିକା ମନ୍ଦିର୍‌ତି ସିସୁଟୁ ସିଏନ୍‌ ନୋ ?”
MAT 17:25 ପିତର୍‌ ଇର୍ହାନ୍‌, “ହୁଁ, ସିନାନ୍‌ ।” ପିତର୍‌ ଇନ୍‌ଡ୍ର ୱାତି ୱେନ୍‌କା ଜିସୁ ଆଗ୍‌ଡ଼ି ୱାନିଙ୍ଗ୍‌ ୱେନ୍‌ବାତାନ୍‌, “ସିମୋନ, ନିନ୍‌ ଇନିକା ଅଡ଼୍‍ବିଜିନି ? ଇୟା ଦୁନିଆଦି ରାଜାରିଙ୍ଗ୍‌ ଏନ୍‌ ସିସୁଟୁଡାବୁଙ୍ଗ୍‌ ସିନାନ୍‌ ୱାରି ଦେସ୍‌ତି ପ୍ରଜାରି ମାଣ୍‌କୁ ନୋ ଆଇଦେସ୍‌ତିୱାରି ମାଣ୍‌କୁ ?”
MAT 17:26 ପିତର୍‌ ଇର୍ହାନ୍‌, “ଆଇଦେସ୍‌ତିୱାରି ମାଣ୍‌କୁ ।” ଜିସୁ ଇର୍ହାନ୍‌, “ଆର୍‌ତିଙ୍ଗ୍‌ ଦେସ୍‌ତି ପ୍ରଜାର୍‌ ସିସୁଟୁତର୍‌ନି ବଜୁତାନ୍‍ ଉସାସ୍‌ଆନାର୍‍ ?
MAT 17:27 ମାତର୍‌ ମାପ୍‌ ଇଲେଇ ୱାରିଙ୍ଗ୍‌ ଅପ୍‍ମାନ୍‍ କିଦେଙ୍ଗ୍‌ ଅଡ଼୍‌ବିଏପ୍‌ । ମିର୍‌ ଗାଡାଦୁ ସୋଲ୍‌ସ ବଣସି ପୋକ୍‌ତୁ । ଆଗ୍‌ଡ଼ି ଆମା ମିନି ୱାନାତ୍‌, ତାନି ୱେୟୁଦାନ୍‌ ଉନ୍‌ଡ୍ରି ୱେନ୍‌ଣ୍ତିଦି ଅଦ୍‌ଲି ପଇନିଦେର୍‌ । ଆକା ଅସ ନା ଉଣ୍ତିଙ୍ଗ୍‌ ନି ମି ଉଣ୍ତିଙ୍ଗ୍‌ ମନ୍ଦିର୍‌ତି ସିସୁଟୁଡାବୁଙ୍ଗ୍‌ ସିଦୁ ।”
MAT 18:1 ନାସ୍ତିୱାଲେ ସିସୁର୍‍ ଜିସୁଦି ଲାକ୍‌ତୁ ୱାତା ୱେନ୍‌ବାତାର୍‌, “ମୁସ୍‌କୁପୁର୍‌ତି ରାଜିଦୁ ୱିଜେରିମାଣାନ୍‌ ଏନ୍‌ ପେରିକାନ୍‌ ?”
MAT 18:2 ଜିସୁ ଅରେନ୍‍ ଇସ୍ରି କଡ଼ଦିଙ୍ଗ୍‌ ୱାରି ଆଗ୍‌ଡ଼ି ନିଲପ୍‌ତାନ୍‌ନୋ ଇର୍ହାନ୍‌,
MAT 18:3 ନାନ୍ ମିଙ୍ଗିଁ ସତ୍‌ ଇଜିନା, ମିର୍‌ ଇସ୍ରିକଡ଼ୱାଜା ବାଦ୍‍ଲିଆଏତିଙ୍ଗ୍‌ ଏସାଙ୍ଗ୍‍ବା ମୁସ୍‌କୁପୁର୍‌ତି ରାଜିଦୁ ସନ୍‌ଡ଼୍ରେଙ୍ଗ୍‌ ଆଟ୍‍ଇଦେର୍‍ ।
MAT 18:4 ମାରି, ଏନ୍‌ ଇୟା ଇସ୍ରି କଡ଼ଦି ୱାଜା ନିଜେଦିଙ୍ଗ୍‌ ନମ୍ର ଆନାନ୍‌, ୱାନ୍‌ ମୁସ୍‌କୁପୁର୍‌ତି ରାଜିଦୁ ୱିଜେରିଙ୍ଗ୍‌ ପେରିକାନ୍‌ ।
MAT 18:5 ମାରି, ଏନ୍‌ଆପିନ୍‌ ନା ଦର୍‌ତାନ୍‌ ଇୟାୱାଜା ଅରେନ୍‍ ଇସ୍ରି କଡ଼ଦିଙ୍ଗ୍‌ ମାନାନାର୍‌, ୱାନ୍‌ ନାଙ୍ଗିଁ ବା ମାନାନାର୍‌ ।
MAT 18:6 ମାତର୍‌ ଏନ୍‌ଆପିନ୍‌ ନାମାନୁ ବିସ୍‍ବାସ୍‍ କିଜିମାନି ଇୟା ଇସ୍ରିକଡ଼ରି ମାଣ୍‌କୁ ଅରେନ୍‍ୱାନିଙ୍ଗ୍‍ ଏର୍‌ପେନାନ୍‌, ୱାନି କକ୍‌ଲାଦୁ ଉନ୍‌ଡ୍ରି ପେରି ଜାତାକାଲୁ ତର୍‌ସୋ ୱାନିଙ୍ଗ୍‌ ସାମ୍‌ଦୁର୍‌ତି ନାଣ୍ତଗୁମିମାନି ଏର୍‌ତୁ ପୋକ୍‌ତିଙ୍ଗ୍‌ ୱାନି ଉଣ୍ତିଙ୍ଗ୍‌ ନେଗେନ୍‌ଆନାତ୍‌ ।
MAT 18:7 ଲୋକାଦି ବିସ୍‌ବାସ୍‌ତୁ ଏର୍‌ପେନି ଉଣ୍ତିଙ୍ଗ୍‌ ଗାଦି ମାଟେଙ୍ଗ୍‌ମାନେ । ଆୟାଉଣ୍ତିଙ୍ଗ୍‌ ଇୟା ଦୁନିଆଦି ଅବସ୍ତା ନିସ ତିଲାନିକା । ୱିଜୁୱାଲେ ଇୟାୱାଜା ଆର୍‍ପ୍‍ନିକା ୱାନାତ୍‌, ମାତର୍‌ ଏନ୍‌ ଏର୍‌ପିନିକା ଗଟାକିନାନ୍‌, ୱାନି ଦସ୍‌ ଏସା ପେରିକାଆନାତ୍‍ !
MAT 18:8 ଜଦି ମି କିୟୁ ନି ପାଦାମ୍‌ ଉଣ୍ତିଙ୍ଗ୍‌ ମିର୍‌ ବିସ୍‍ବାସ୍‍ ଆରାକିନିଦେର୍‌, ଆର୍‌ତିଙ୍ଗ୍‌ ଆକା କୟ୍‌ଜ ପୋକ୍‌ତୁ । ରୁଣ୍ତି କିକୁ ନି ରୁଣ୍ତି ପାଦାମ୍‌କୁ ମାନ୍‌ଞ୍ଜି ଏସ୍‌କାଙ୍ଗ୍‌ୱିଜିଇ ସିସୁଦୁ ପୋକାନି ବାଦୁଲୁ ଉନ୍‌ଡ୍ରି କିୟୁ ନି ଉନ୍‌ଡ୍ରେ ପାଦାମ୍‌ ସିଲେଣ୍‌ଗା ଏସ୍‌କାଙ୍ଗ୍‌ୱିଜିଇ ଜିବନ୍‌ତୁ ଡ଼ୁଗୁନିକା ମି ଉଣ୍ତିଙ୍ଗ୍‌ ନେଗେତ୍‌ ।
MAT 18:9 ମାରି, ମି କାଣ୍‌ଗା ଉଣ୍ତିଙ୍ଗ୍‌ ଜଦି ମି ବିସ୍‍ବାସ୍‍ ନାଷ୍ଟୁ ଆଜିନାତ୍‍, ତାନିଙ୍ଗ୍‌ ଉଦୁଜ ପୋକ୍‌ତୁ । ରୁଣ୍ତି କାଣୁକୁ ମାନ୍‌ଞ୍ଜି ସିସୁକାସ୍‌ନି ନରକଦୁ ପୋକାନି ବାଦୁଲୁ ଉନ୍‌ଡ୍ରି କାଣ୍‌ଗା ଅସି ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ତୁ ଡ଼ୁଗୁନିକା ମି ଉଣ୍ତିଙ୍ଗ୍‌ ନେଗେତ୍‌ ।
MAT 18:10 ଇୟା ଇସ୍ରିକଡ଼ରି ମାଣ୍‌କୁ ଅରେନ୍‍ୱାନିଙ୍ଗ୍‍ ବା ନିସାର୍‍ କିମାଟ୍‌ । ନାନ୍ ମିଙ୍ଗିଁ ସତ୍‌ ଇଜିନା, ଇୟାୱାରିଙ୍ଗ୍‌ ଜାତୁନ୍‌କିଜିମାନି ମୁସ୍‌କୁପୁର୍‌ତି ଦୁତ୍‌କୁ ୱିଜୁଦିନ୍‌ ନା ବୁବା ମାପୁରୁଦି ଲାକ୍‌ତୁମାନେ ।
MAT 18:11 ଇରିଙ୍ଗ୍‌ ସାରିବାଣାତିମାନି ଲୋକାଙ୍ଗ୍‌ ରକ୍‌ୟା କିଦେଙ୍ଗ୍‌ ମନୁସ୍ୟପୁତ୍ର ୱାତାମାନାନ୍‍ ।
MAT 18:12 ମିର୍‌ ଇନିକା ଅଡ଼୍‍ବିଜିନିଦେର୍‍, ଜଦି ଅରେନ୍‍ ଲୋକାୱି ୧୦୦ ଗୋଟା ମେଣ୍ତେଙ୍ଗ୍‌ମାନେ ମାରି ଆବେଣୁକୁ ଉନ୍‌ଡ୍ରି ମୁରୁନାତ୍‌, ଆର୍‌ତିଙ୍ଗ୍‌ ୱାନ୍‌ ଇନିକା କିନାନ୍‌ ? ନବେ ନଅଗୋଟା ମେଣ୍ତେଙ୍ଗାଁ ଗରନ୍‌ ଲାକ୍‌ତୁ ସାରାଦେଙ୍ଗ୍‌ ଡ଼ିସ୍‌ନାସିନାନ୍‌ନୋ ଆୟା ମୁରିତିମାନି ମେଣ୍ତାଦିଙ୍ଗ୍‌ ପୟ୍‌ଦେଙ୍ଗ୍‌ସୋନାନ୍‌ ।
MAT 18:13 ଏସ୍ତିୱାଲେ ୱାନ୍‌ ମେଣ୍ତାଦିଙ୍ଗ୍‌ ପୟ୍‌ନାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ମୁରୁଇତିମାନି ନବେ ନଅଗୋଟା ମେଣ୍ତେଙ୍ଗାଁ ଉଣ୍ତିଙ୍ଗ୍‌ ୱାନି ଏସ ୱେଡ଼ିକା, ଇୟା ଉନ୍‌ଡ୍ରେ ମେଣ୍ତାଦି ଉଣ୍ତିଙ୍ଗ୍‌ ୱାନିକାମାଣାନ୍‌ ନାଣ୍ତ ୱେଡ଼ିକାଆନାନ୍‌ ।
MAT 18:14 ଟିକ୍‌ ଆୟାୱାଜା, ଇୟା ଇସ୍ରିକଡ଼୍‍ରି ମାଣ୍‌କୁ ଅରେନ୍‍ୱାନିଙ୍ଗ୍‍ ବା ସାରିବାଣାପିନ୍‌, ଇକା ମି ମୁସ୍‌କୁପୁରୁତି ବୁବା ମାପୁରୁଦି ବଦା ସିଲେତ୍‍ ।
MAT 18:15 ଅରେନ୍‍ ତଡ଼ାନ୍‌ ଜଦି ମି ବିରଦ୍‌ତାନ୍‌ ଇନି ଦସ୍‌ କିନାନ୍‌, ୱାନି ଲାକ୍‌ତୁ ସୋଲ୍‌ସ ୱାନି ଦସ୍‌ ୱାନିଙ୍ଗ୍‌ ତର୍‌ସସିଦୁ । ମାତର୍‌ ମିର୍‌ ରିଇଦେର୍‌ ଅରେନ୍‌ନେ ମାନିୱାଲେ ଇକା ନେସ୍‌ଇୱାଜା କିଦୁ । ଜଦି ୱାନ୍‌ ମି ମାଟା ୱେନାନ୍‌, ନି ତଡ଼ାନ୍‌ତିଙ୍ଗ୍‌ ନିନ୍‌ ଡ଼େସି ପଇନିଦେର୍‌ ।
MAT 18:16 ଜଦି ୱାନ୍‌ ୱେନ୍‌ଏନ୍‌, ଅରେନ୍‍ ସିଲ୍‍ତିଙ୍ଗ୍‍ ରିଏରିଙ୍ଗ୍‌ ଆସ୍‌ସୋ ୱାନି ଲାକ୍‌ତୁସାନ୍‌ଡ୍ରୁ । ମା ସାସ୍ତ୍ରଦି ଇସାବ୍‌ତାନ୍‌, “ରିଏର୍‌ ସିଲ୍‍ତିଙ୍ଗ୍‍ ମୁଏରିଙ୍ଗ୍‍ଁ ସାକିଦି ଆଗ୍‌ଡ଼ି ମି ୱିଜୁ ଦାବି ସତ୍‌ ଇଜି ପାରାମାଣ୍‌ ଆପିତ୍‌ ।”
MAT 18:17 ଜଦି ୱାନ୍‌ ମି ମାଟା ମାନାଏନ୍‌, ଆର୍‌ତିଙ୍ଗ୍‌ ଇୟା ବିସୟ୍‌ତାନ୍‌ ପାର୍‌ତନା ମଣ୍ତଲିଦିଙ୍ଗ୍‌ ୱେର୍‍ତୁ, ସାରାସାରିୱେନ୍‌କା, ଜଦି ୱାନ୍‌ ମଣ୍ତଲି ମାଟା ବା ମାନାଏନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ଅରେନ୍‍ ସିସ୍‍ଟୁ ଡାବୁଙ୍ଗ୍‌ ଲୋସ୍‌ନିକାନ୍‌ ସିଲ୍‍ତିଙ୍ଗ୍‍ ଅରେନ୍‍ ଅବିସ୍‍ବାସ୍‍ସି ଇଜି ଅଡ଼୍‌ବିଜ ୱାନିୱାଲେ ମିସାବିଡ଼ାଆମାଟ୍‍ ।
MAT 18:18 “ନାନ୍ ମିଙ୍ଗିଁ ସତ୍‌ ଇଜିନା, ମିର୍‌ ଇୟା ଦୁନିଆଦୁ ଆମାକା ବନ୍ଦ୍‌କିନିଦେର୍‌, ମୁସ୍‌କୁପୁର୍‌ତୁ ବା ଆକା ବନ୍ଦ୍‌ତେବାନାତ୍‌ ମାରି ଆମାୱାନିଙ୍ଗ୍‌ ମିର୍‌ ଦୁନିଆଦୁ ସାରିସିନିଦେର୍‌, ମୁସ୍‌କୁପୁର୍‌ତୁ ବା ଆକା ସାରିସିଆୟ୍‌ଆନାତ୍‌ ।
MAT 18:19 “ମାରି ନାନ୍ ମିଙ୍ଗିଁ ସତ୍‌ ଇଜିନା, ଦୁନିଆଦୁ ଏସ୍ତିୱାଲେ ମି ଲୋଇରାନ୍‌ ରିଇଦେର୍‌ ଜେ ଏଣ୍ତେସ୍‌ ନାନି ବିସୟ୍‌ତାନ୍‌ ଉନ୍‌ଡ୍ରେମନ୍‌ଆଜି ଆୟାଉଣ୍ତିଙ୍ଗ୍‌ ପାର୍‌ତନାକିନିଦେର୍‌, ନା ମୁସ୍‌କୁପୁର୍‌ତି ବୁବା ମି ଆୟା ବଦାପୁରାକିନାନ୍‌ ।
MAT 18:20 ଇରିଙ୍ଗ୍‌ ଏମେ ବାଡିଦୁ ରିଏର୍‌ ଲୋକ୍ ସିଲ୍‍ତିଙ୍ଗ୍‍ ମୁଏର୍‌ ଲୋକ୍ ନା ଦର୍‌ତାନ୍‌ ଉନ୍‌ଡ୍ରେମାନୁ ଉଣ୍ତାନାର୍‌, ଆୟା ବାଡିଦୁ ନାନ୍ ୱାରିମାନୁ ମାନା ।”
MAT 18:21 ଅର୍‍ଲେନ୍‍ ପିତର୍‌ ୱାତାନ୍‌ନୋ ଜିସୁଙ୍ଗୁଁ ୱେନ୍‌ବାତାନ୍‌, “ପ୍ରବୁ, ଅରେନ୍‍ ତଡ଼ାନ୍‌ ନା ବିରଦ୍‌ତାନ୍‌ ବାର୍‌ବାର୍‌ ଦସ୍‌ କିଜିମାର୍ହାନ୍‌, ୱାନିଙ୍ଗ୍‌ ନାନ୍ ଏସ ଦେବେଙ୍ଗ୍‌ କେମାକିନା ? ଇନିକା ସାତ୍‌ଦେବେଙ୍ଗ୍‌ ସାନ୍ଦି ?”
MAT 18:22 ଜିସୁ ଇର୍ହାନ୍‌, “ସିଲେ ସାତ୍‌ଦେବେଙ୍ଗ୍‌ ସିଲେ ।” ମାତର୍‌ ସାତ୍‌ଦେବେଙ୍ଗ୍‌ ସତୁରି ଗୁଣୁ ସାନ୍ଦି ।
MAT 18:23 ଇରିଙ୍ଗ୍‌ ମୁସ୍‌କୁପୁର୍‌ ଇୟାୱାଜା । ଅର୍‍ଲେନ୍‍ ଅରେନ୍‍ ରାଜା ପାଣିକିନିୱାରି ଇସାବ୍‌ଆକୁ ସୁଡ଼ୁଦେଙ୍ଗ୍‌ ଇଜି ବଦାକିତାନ୍‍ ।
MAT 18:24 ୱାନ୍‌ ଇୟା ଇସାବ୍‌ ଆରାମ୍‌ କିତିୱାଲେ ଲକେ ଡାବୁଙ୍ଗୁଁ ଅତି ଅରେନ୍‍ ପାଣିକିନିୱାନିଙ୍ଗ୍‌ ରାଜାଦି ଲାକ୍‌ତୁ ତାତାର୍‌ ।
MAT 18:25 ରୁଣୁ ତେୱ୍‌ନି ଉଣ୍ତିଙ୍ଗ୍‌ ଇୟା ଲୋକ୍‌ତିମାନୁ ଇନିକା ସିଲେତିଙ୍ଗ୍‍ ୱାନି ମାଲିକ୍‍ ୱାନିଙ୍ଗ୍‌ ମାରି ୱାନି ଆଡ଼୍‌ସିଙ୍ଗ୍‌, କଡ଼କକ୍‌ରା ମାରି ୱିଜୁ ସମ୍ପତ୍ତି ପୋର୍‌ଜ ରୁଣ୍‌ଡାବୁଙ୍ଗ୍‌ ଅତେଙ୍ଗ୍‌ ଆଦେସ୍‌ ସିତାନ୍‌ ।
MAT 18:26 ସାକର୍‌ ରାଜାଦି କାଲ୍‌କା ଆଡ୍‍ଗି ପାଡ଼ିଗିଜି ମାଡ଼ିସ୍‍କିଜି ଇର୍ହାନ୍‌, “ଆଜ୍ଞା ମାରି ଅଡ଼ପ୍‍ ସାସ୍‌ ଆସ୍‌ଆ ନାନ୍ ନି ୱିଜୁ ରୁଣ୍‌ଡାବୁଙ୍ଗ୍‌ ତେୱେନାସିନା ।”
MAT 18:27 ମାଲିକ୍‍ଦି ମନ୍‌ତୁ ଦୟା ଆତାତ୍‌, ଆବେଟ୍‌ ରୁଣ୍‌ଡାବୁଙ୍ଗ୍‌ତାନ୍‌ କେମାସିଜି ୱାନ୍‌ ସାକର୍‌ତିଙ୍ଗ୍‌ ଡ଼ିସ୍‌ତାସିତାନ୍‌ ।
MAT 18:28 ଇୟା ଲୋକୁ ବୁଲାଜି ସନିୱାଲେ ୱାନିମାଣାନ୍‌ ଉଣା ଏସ ଡାବୁଙ୍ଗୁଁ ରୁଣୁ ଅତିମାନି ୱାନି ଅରେନ୍‍ ଅର୍‍ସେପାଣିକିନି ସାକର୍‌ତିଙ୍ଗ୍‌ ବେଟ୍‌ବୁଡ଼ାତାନ୍‌ । ୱାନ୍‌ ୱାନି କକ୍‌ଲାଦିଙ୍ଗ୍‌ ଆସ୍‌ସି, ୱାନି କକ୍‌ଲାଦିଙ୍ଗ୍‌ ପିଡ଼ିସି ଇର୍ହାନ୍‌, ନା ମାଣାନ୍‌ ଉଦାର୍‌ ଅତିମାନି ଡାବୁଙ୍ଗୁଁ ଡ଼େସି ସିଦା ।
MAT 18:29 ୱାନିୱାଲେ ଅର୍‌ସେ ପାଣିକିକାନ୍‍ ୱାନି କାଲ୍‌କା ଆଡ୍‍ଗି ପାଡ଼ିଗିଜି ମାଡ଼ିସ୍‍କିଜି ଇର୍ହାନ୍‌, ସାସ୍‌ ଆସ୍‌ଆ, ନି ୱିଜୁ ଡାବୁଙ୍ଗୁଁ ତେୱେନାସିନା ।
MAT 18:30 ମାତର୍‌ ପାର୍‍ତୁମ୍‍ତି ଲୋକୁ ୱାନି ଗୁଆରି ୱେନ୍‌ଏତାନ୍‌, ମାରି ରୁଣ୍‌ଡାବୁଙ୍ଗ୍‌ ତେୱେଇ ସାନ୍ଦି ୱାନିଙ୍ଗ୍‌ ଜଇଲ୍‌ତୁ ଇଡିସ୍‌କିତାନ୍‌ ।
MAT 18:31 ଇୟା ଗଟ୍‌ନା ସୁଡ଼ୁଜି ଆଇ ଅର୍‌ସେପାଣିକିନିକାର୍‌ ନାଣ୍ତ ଦୁକ୍‍ଆତାର୍‌ । ୱାର୍‌ ରାଜାଦି ଲାକ୍‌ତୁ ସର୍ହାର୍‌ନୋ ଆମାକା ଗଟାତା ମାର୍ହାତ୍‌, ୱିଜୁ ୱେର୍‌ତାର୍‌ ।
MAT 18:32 ରାଜା ପାର୍‍ତୁମ୍‍ତି ପାଣିକିନିୱାନିଙ୍ଗ୍‌ କୁକିସ୍‌କିତାନ୍‌ନୋ ଇର୍ହାନ୍‌, ଏ ଜଗ୍‌ସିଲି ପାଣିକିନିକିନ୍ଦା, ନିନ୍‌ ଗୁଆରି କିତିଆକା ନାନ୍ ନି ୱିଜୁ ରୁଣ୍‌ଡାବୁଙ୍ଗ୍‌ ଡ଼ିସ୍‌ତାସିତା ।
MAT 18:33 ନାନ୍ ଏଣ୍ତେସ୍‌ ନି ଉଣ୍ତିଙ୍ଗ୍‌ ଦୟା ତର୍‌ତା, ନି ଅର୍‍ସେପାଣି କିନିୱାନିଙ୍ଗ୍‌ ବା ଆୟାୱାଜା ଦୟା କିନିକା ନି ଟିକ୍‌ ମାର୍ହାତ୍‌ ।
MAT 18:34 “ରାଜା ନାଣ୍ତ ରିସାଆତାନ୍‍ ମାରି ୱିଜୁ ରୁଣ୍‌ଡାବୁଙ୍ଗ୍‌ ଡ଼େସିସିଇ ସାନ୍ଦି ଦଣ୍ତ୍‌ବଗାନି ଉଣ୍ତିଙ୍ଗ୍‌ ୱାନିଙ୍ଗ୍‌ ଜଇଲ୍‌ତୁ ପୋକ୍‌ତାନ୍‌ ।”
MAT 18:35 ଜିସୁ ୱିଜୁ ମାଟା ୱିସ୍‌ତାନ୍‌ନୋ ୱାରିଙ୍ଗ୍‌ ଇର୍ହାନ୍‌, “ମି ବିରଦ୍‌ତାନ୍‌ ଦସ୍‌ କିତିମାନି ତଡ଼ାନ୍‍ତିଙ୍ଗ୍‌ ଜିବନ୍‌ନୋନିୱାଜା ଜଦି କେମାକିଇଦେର୍‌, ଆର୍‌ତିଙ୍ଗ୍‌ ନା ମୁସ୍‌କୁପୁର୍‌ତି ବୁବା ବା ମି ଉଣ୍ତିଙ୍ଗ୍‌ ଇୟାୱାଜା ବ୍ୟବହାର୍‌ କିନାନ୍‌ ।”
MAT 19:1 ଜିସୁ ଇୟାୱିଜୁ ମାଟା ୱେର୍‌ତି ୱିସ୍‌ତି ୱେନ୍‌କା ଗାଲିଲି ଡ଼ିସ୍‌ସି ଜର୍ଦନ ଗାଡାଦି ଆୟାପାଡ଼୍‌କା ମାନି ଜିହୁଦା ରାଜିଦୁ ସୋର୍ହାର୍‌ ।
MAT 19:2 ମାରି, ନାଣ୍ତ ଲୋକୁ ୱାନି ୱେନ୍‌କା ୱେନ୍‌କା ସୋର୍ହାର୍‌ ମାରି ୱାନ୍‌ ଗାଦି ରଗ୍‌ଲୋକାଙ୍ଗ୍‌ ନେଗେନ୍‌କିତାନ୍‌ ।
MAT 19:3 ଏସଲୋକ୍‌ ପାରୁସିର୍‌ ୱାନି ଲାକ୍‌ତୁ ୱାତାରୋ ୱାନିଙ୍ଗ୍‌ ଗୁଟାଦୁ ଆର୍‌ପ୍‌ତେଙ୍ଗ୍‌ ସେସ୍ଟାକିତାର୍‌ । ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ମସାଦି ନିୟମ୍‌ ଇସାବ୍‌ତାନ୍‌ ଅରେନ୍‍ ଇନି ବିସୟ୍‌ତାନ୍‌ ନିଜେଦି ଆଡ଼୍‌ସିଙ୍ଗ୍‌ ଡ଼ିସ୍‌ନିଆକୁ ସିଦେଙ୍ଗ୍‍ ଆଟ୍‍ନାନ୍‍ ନୋ ?”
MAT 19:4 ଜିସୁ ଇର୍ହାନ୍‌, ମିର୍‌ ଇନିକା ସାସ୍ତ୍ରଦୁ ପଡ଼ାଇଦେର୍‌ ନୋ, ତିଆର୍‌କିତିମାଲିକ୍‌ ଆଗ୍‍ଡ଼ିରାନ୍‍ନେ ୱାରିଙ୍ଗ୍‌ ମେମାରି ନି ଆଇମା କିଜି ତିଆର୍‌ କିତାନ୍‌ ?
MAT 19:5 ନାସ୍ତିୱାଲେ ମାପୁରୁ ଇର୍ହାମାର୍ହାନ୍‌, “ଇୟାଉଣ୍ତିଙ୍ଗ୍‌ ଅରେନ୍‌ ମେମାର୍‌ଏନ୍‌ ନିଜେଦି ବୁବାୟାୟେଙ୍ଗ୍‌ ଡ଼ିସ୍‌ସି ନିଜେଦି ଆଡ଼୍‌ସି ୱାଲେ ତେବାନାନ୍‌ ମାରି ଆୟା ରିଏର୍‌ ଅରେନ୍‌ଆନାର୍‍ ।
MAT 19:6 ୱାର୍‌ ମାରି ରିଏର୍‌ ଆଏର୍‌, ମାତର୍‌ ଅରେନ୍‌ନେ । ଆମାୱାରିଙ୍ଗ୍‌ ମାପୁରୁ ମିସାକିତାମାନାନ୍‌, ଆକା ଲୋକୁ ୱାରିଙ୍ଗ୍‌ ୱେରେଏ କିମାକିର୍‍ ।”
MAT 19:7 ପାରୁସିର୍‌ ୱାନିଙ୍ଗ୍‌ ୱେନ୍‌ବାତାର୍‌, “ଆର୍‌ତିଙ୍ଗ୍‌ ଆଇମାଦିଙ୍ଗ୍‍ ଡ଼ିସ୍‌ନି ଆକୁ ସିଜି ଡ଼ିସ୍‌ନି ଉଣ୍ତିଙ୍ଗ୍‌ ମୋସା ଏନ୍ଦା ନିୟମ୍‌ କିତାମାନାନ୍‌ ?”
MAT 19:8 ଜିସୁ ୱାରିଙ୍ଗ୍‌ ଇର୍ହାନ୍‌, “ମି ଜିବନ୍‍ତି ଆଟୁୱାଦିଙ୍ଗ୍‍ ସୁଡ଼୍‌ଜି ମୋସା ମିଙ୍ଗିଁ ଇୟାୱାଜା କିତାମାର୍ହାନ୍‌ । ମାତର୍‌ ତିଆର୍‌ଆତି ଆଗ୍‌ଡ଼ି ଇୟାୱାଜା ନିୟମ୍‌ ସିଲେତାତ୍‍ ।
MAT 19:9 ମାତର୍‌ ନାନ୍ ମିଙ୍ଗିଁ ଇଜିନା, ଏନ୍‌ଆପିନ୍‌ ନିଜେଦି ଆଡ଼୍‌ସିଙ୍ଗ୍‌ ଦାରିପାଣି ଦସ୍‌ ଡ଼ିସ୍‌ତିଙ୍ଗ୍‌ ଆଇ ଇନି ବିସୟ୍‌ତାନ୍‌ ଡ଼ିସ୍‌ନାନ୍‌ ନୋ ଆଇ ଆଇମାଦିଙ୍ଗ୍‍ ପେଡ଼ିଆନାନ୍‌, ୱାନ୍‌ ନିଜେ ଦାରିପାଣି କିନାନ୍‌ ।”
MAT 19:10 ସିସୁର୍‍ ୱାନିଙ୍ଗ୍‌ ଇର୍ହାର୍‌, “ଆଡ଼୍‌ସି ୱାଲେ କନ୍‌ଲିଦି ଜଦି ଇୟାୱାଜା ବିସୟ୍‌ମାନି ମାଟା, ଆର୍‌ତିଙ୍ଗ୍‌ ପେଡ଼ିଆଇକା ନେଗେତ୍‌ ।”
MAT 19:11 ଜିସୁ ଇର୍ହାନ୍‌, “ଇୟା ସିକିୟା ୱିଜେରି ଉଣ୍ତିଙ୍ଗ୍‌ ସିଲେ । ମାପୁରୁଦି ମାଣାନ୍‌ ଏମେୱାରିଙ୍ଗ୍‌ ଇକା ସିଆୟ୍‌ଆତାମାନାତ୍‌, କେବଲ୍‌ ୱାର୍‌ ଇକା ମାନାଦେଙ୍ଗ୍‌ ଆଟ୍‌ନାର୍‌ ।
MAT 19:12 ଇନିଇନି ବିସୟ୍‌ତାନ୍‌ ଲୋକୁ ପେଡ଼ିଆଏଣ୍‌ଗା ତେବାନାସୋନାର୍‌ । ଏସଲୋକ୍‌ ଜନମ୍‌ତାନ୍‌ ପେଡ଼ିଆନି ଉଣ୍ତିଙ୍ଗ୍‌ ଜଗ୍‌ସିଲେର୍‌, ଏସ ଲୋକାଙ୍ଗ୍‌ ଲୋକୁ ଆୟାୱାଜା କିତାମାନାର୍‌, ମାରି ଏସଲୋକ୍‌ ମୁସ୍‌କୁପୁର୍‌ତି ଉଣ୍ତିଙ୍ଗ୍‌ ପାଣିକିଦେଙ୍ଗ୍‌ ପେଡ଼ିଆଏଣ୍‌ଗା ତେବାନାର୍‌ । ଏମେକାର୍‌ ଇୟା ସିକିୟାଦି ଅର୍ତ ବୁଜାଦେଙ୍ଗ୍‌ ଆଟ୍‌ସିନାର୍‌, ୱାର୍‌ ଆକା ମାନାପିର୍‌ ।”
MAT 19:13 ନାସ୍ତିୱାଲେ ଇସ୍ରିକଡ଼ରି ମୁସ୍‌କୁ କିୟୁ ଇଡ୍‌ଜି ପାର୍‌ତନା କିଦେଙ୍ଗ୍‌ ଇଜି ଏସଲୋକ୍‌ ୱାରିଙ୍ଗ୍‌ ଜିସୁଦି ଲାକ୍‌ତୁ ତାତାର୍‌ । ଆୟା ଲୋକାଙ୍ଗ୍‌ ସିସୁର୍‍ ଆଦ୍‌ରିସ୍‌ କିତାର୍‌ ।
MAT 19:14 ମାତର୍‌ ଜିସୁ ଇର୍ହାନ୍‌, “ଇସ୍ରି କଡ଼ରିଙ୍ଗ୍‌ ନା ଲାକ୍‌ତୁ ୱାଦେଙ୍ଗ୍‌ ସିଦୁ । ୱାରିଙ୍ଗ୍‌ ବାଦାକିମାଟ୍‌, ଇରିଙ୍ଗ୍‌ ମୁସ୍‌କୁପୁର୍‌ତି ଅଦିକାରି ଏମେକାର୍‌ ୱେରିୱାଜା ଆୟା ଲୋକ୍‌ତି ଅଦିକାରି ।”
MAT 19:15 ମାରି, ୱାରି ମୁସ୍‌କୁ କିୟୁ ଇଡ୍‌ଜି ଆସିର୍ବାଦ୍‌ କିତି ୱେନ୍‌କା ୱାନ୍‌ ଆବେଟ୍‌ତାନ୍‌ ସୋର୍ହାନ୍‌ ।
MAT 19:16 ଅର୍‍ଲେନ୍‍ ଅରେନ୍‍ ମୁରୁଲି ଜିସୁଦି ଲାକ୍‌ତୁ ୱାତାନ୍‌ନୋ ୱେନ୍‌ବାତାନ୍‌, “ଏ ଗୁରୁ, ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍ ଇନି ନେଗି ପାଣି କିଦେଙ୍ଗ୍‌ ଆନାତ୍‌ ?”
MAT 19:17 ଜିସୁ ୱାନିଙ୍ଗ୍‌ ଇର୍ହାନ୍‌, “ନେଗି ପାଣି ବିସୟ୍‌ତାନ୍‌ ନାଙ୍ଗିଁ ଏନ୍ଦା ୱେନ୍‌ବାଜିନି ? ମାପୁରୁ ନେ କେବଲ୍‌ ନେଗିକାନ୍‍ । ମାପୁରୁଦି ମାଟେଙ୍ଗ୍‌ ମାନାତିଙ୍ଗ୍‌, ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ଦେଙ୍ଗ୍‌ ଆଟ୍‌ନି ।”
MAT 19:18 ୱାନ୍‌ ୱେନ୍‌ବାତାନ୍‌, “ଆମାୱିଜୁ ମାଟେଙ୍ଗ୍‌ ?” ଜିସୁ ଇର୍ହାନ୍‌, “ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଦାରିପାଣି କିମାଟ୍‌, ଡଙ୍ଗାଁ କିମାଟ୍‌, ଏ ବିରଦ୍‌ତାନ୍‌ ମିସ୍‌ମାଟା ସାକିସିମାଟ୍‌,
MAT 19:19 ବୁବାୟାୟ୍‌ଙ୍ଗେ ମାନାଦୁ, ମାରି ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତିୱାଜା ଜିବନ୍‍ନୋଦୁ ।”
MAT 19:20 ମୁରୁଲି ଇର୍ହାନ୍‌, “ଇୟାୱିଜୁ ମାଟେଙ୍ଗ୍‌ ମାନାତାମାନା, ନାନ୍ ମାରି ଇନିକା ନାଙ୍ଗିଁ ଉଣାମାନାତ୍‍ ?”
MAT 19:21 ଜିସୁ ୱାନିଙ୍ଗ୍‌ ଇର୍ହାନ୍‌, “ଜଦି ନିନୁ ନେଗିକାନ୍‍ ଆଦେଙ୍ଗ୍‌ ବଦାକିଜିନି, ସାଙ୍ଗ୍‌ଆଁ, ନି ୱିଜୁ ସମ୍ପତ୍ତି ପର୍‌ଜ ଆୟା ଡାବୁଙ୍ଗୁଁ ସିଲିସାତିୱାରିଙ୍ଗ୍‌ ଦାନ୍‌ ସିଆ । ଆର୍‌ତିଙ୍ଗ୍‌ ନିନ୍‌ ମୁସ୍‌କୁପୁର୍‌ତୁ ଦନ୍‌ ପଇନି । ଇୟାୱିଜୁ କିଜୱିସ୍‌ସୋ ନା ୱେନ୍‌କା ୱେନ୍‌କା ରାଆ ।”
MAT 19:22 ମୁରୁଲି ଇୟା ମାଟା ୱେନ୍‌ଞ୍ଜି ଦୁଃକ୍‍ ଆଜି ସୋର୍ହାନ୍‌, ଇରିଙ୍ଗ୍‌ ୱାନ୍‌ ପେରି ମାଜନ୍‌ଲୋକ୍‌ ମାର୍ହାନ୍‌ ।
MAT 19:23 ଜିସୁ ନିଜେଦି ସିସୁରିଙ୍ଗ୍‌ ଇର୍ହାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ମାଜନ୍‌ ଲୋକୁ ବଡ଼େ କସ୍ଟଦାନ୍‌ ମୁସ୍‌କୁପୁର୍‌ତୁ ସନାର୍‌ ।
MAT 19:24 ମାରିଡ଼େସି ନାନ୍ ମିଙ୍ଗିଁ ୱେର୍‌ସିନା, ମାପୁରୁଦି ରାଜିଦୁ ମାଜନ୍‌ ଲୋକ୍‌ତି ସନି ବାଦୁଲୁ ସୁଜିଦି ବର୍‌ ସିଜି ଉଟ୍‌ ଡ଼ୁଗୁନିକା ଉସାସ୍‌ ।
MAT 19:25 ସିସୁର୍‍ ଇକା ୱେନ୍‌ଞ୍ଜି କାବାଆତାରୋ ୱେନ୍‌ବାତାର୍‌, “ଆର୍‌ତିଙ୍ଗ୍‌ ଏନ୍‌ ରକିୟା ପଇଦେଙ୍ଗ୍‍ ଆଟ୍‍ନାନ୍‍ ?”
MAT 19:26 ଜିସୁ ସିସୁରିଙ୍ଗ୍‌ ସାଡ଼୍‌କୁ ସାଡ଼୍‌କୁ ସୁଡ଼୍‍ଜି ଇର୍ହାନ୍‌, “ଇକା ଲୋକାଦି ଉଣ୍ତିଙ୍ଗ୍‌ ଆଟ୍‌ୱା ଆଦେଙ୍ଗ୍‌ ଆଟ୍‌ନାତ୍‌, ମାତର୍‌ ମାପୁରୁଦିଙ୍ଗ୍‌ ଉଣ୍ତିଙ୍ଗ୍‌ ଆନାତ୍‌, ଇରିଙ୍ଗ୍‌ ମାପୁରୁ ୱିଜୁ କିଦେଙ୍ଗ୍‍ ଆଟ୍‍ନାନ୍‍ ।”
MAT 19:27 ଇକା ୱେର୍‌ଆନ୍‌ନୋ ପିତର୍‌ ଇର୍ହାନ୍‌, “ସୁଡ଼ୁଦୁ, ମାପ୍‌ ୱିଜୁ ଡ଼ିସ୍‌ସି ନି ୱେନ୍‍କା ୱାତା ମାନାପ୍‌ । ମାଡ୍‌ ଇନିକା ପଇନିକା ?”
MAT 19:28 ଜିସୁ ୱାରିଙ୍ଗ୍‌ ଇର୍ହାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ପୁନି ଜଗ୍‌ତି ଏସ୍ତିୱାଲେ ମନୁସ୍ୟପୁତ୍ର ନିଜେଦି ଗୌରବ୍‌ମୟ୍‌ ରାଜାଗାଦିଦୁ ବାସ୍‌ନାନ୍‌, ନାସ୍ତିୱାଲେ ନା ଇୟା ବାରଲୋକ୍ ସିସୁର୍‍ ବା ବାରଗୋଟା ରାଜାଗାଦିଦୁ ବାସ୍‌ନାରୋ ଇସ୍ରାଏଲ୍‌ତି ବାରଗୋଟା କୁଟୁମ୍‌ତି ମୁସ୍‌କୁ ସାସନ୍‍ କିନିଦେର୍‌ ।
MAT 19:29 ମାରି ଏମେକାର୍‌ ନା ଉଣ୍ତିଙ୍ଗ୍‌ ନିଜେଦି ଇଲୁ, ତଡ଼ାନ୍‌ତିଙ୍ଗ୍‌ ନି ତାଙ୍ଗିଁ, ବୁବା ନି ୟାୟେଙ୍ଗ୍‌, କଡ଼କକ୍ରାରିଙ୍ଗ୍‌ ମାରି ବୁମିବାଡ଼ା ଡ଼ିସ୍‌ତାମାନାନ୍‌, ୱାର୍‌ ତାନି ସଏ ଗୁଣୁ ପୟ୍‌ନାର୍‌; ମାରି ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ବା ପୟ୍‌ନାର୍‌ ।
MAT 19:30 ମାତର୍‌ ଆଗ୍‌ଡ଼ି ମାନି ଏସ ଲୋକୁ ୱେନ୍‌କା ଆନାର୍‌ ମାରି ୱେନ୍‌କା ମାନି ଏସ ଲୋକୁ ଆଗ୍‌ଡ଼ି ଆନାର୍‌ ।
MAT 20:1 ମୁସ୍‌କୁପୁର୍‌ ଇୟାୱାଜା । ଅରେନ୍‍ ଲୋକୁ ଅର୍‍ଲେନ୍‍ ଉଟ୍‌ଲା ନାଡ଼ାକାଦେ ୱାନି ଅଙ୍ଗୁର୍‌ କିଡ଼ିଇଦୁ ପାଣି କିଦେଙ୍ଗ୍‍ ଇଜି ବୁତିଲୋକାଙ୍ଗ୍‌ ପୟ୍‌ଦେଙ୍ଗ୍‌ ସୋତାନ୍‌ ।
MAT 20:2 ଆମାୱାରିଙ୍ଗ୍‌ ପୟ୍‌ତାନ୍‌, ୱିଜେରିଙ୍ଗ୍‌ ଅର୍‌ଲେଟିଙ୍ଗ୍‌ ଉନ୍‌ଡ୍ରି ଲାକା ୱେଣ୍ଡିଅଦ୍‌ଲି ବୁତି ଡାବୁଙ୍ଗ୍‌ ସିଦେଙ୍ଗ୍‍ ତେୱେତାନ୍‌ନୋ ୱାରିଙ୍ଗ୍‌ ନିଜେଦି କିଡ଼ିଇଦୁ ପୋକ୍‌ତାନ୍‌ ।
MAT 20:3 ତାନେୱେନ୍‌କା ନାଣ୍ତିଙ୍ଗ୍‌ ନଅଟା ବେଡ଼ାଦୁ ସାତାଦୁ ସର୍‌ର୍ହାନ୍‌ନୋ ସୁଡ଼ୁତାନ୍‌, ମାନ୍ଦାଲୋକ୍‌ ସିମ୍ରା ଆଜି ନିର୍‌ଆମାନାର୍‌ ।
MAT 20:4 ୱାରିଙ୍ଗ୍‌ ୱାନ୍‌ ଇର୍ହାନ୍‌, ମିର୍‌ ବା ନା ଅଙ୍ଗୁର୍‌ କିଡ଼ିଇଦୁ ସୋଲ୍‌ସ ପାଣି କିଦୁ, ମିଙ୍ଗିଁ ସାମାନ୍‍ ବୁତି ସିନା ।
MAT 20:5 ୱାର୍‌ ସୋର୍ହାର୍‌ନୋ ପାଣି କିଦେଙ୍ଗ୍‌ ଆସ୍‌ତାର୍‌ । ୱେଡ଼େ ବାର୍‌ଟା ମାରି ତିନ୍‌ଟା ବେଡ଼ାଦୁ ଟିକ୍‌ ଆୟାୱାଜା ମାରି ଏସ ପାଣିକିନିୱାରିଙ୍ଗ୍‌ ତାତାନ୍‌ନୋ ପାଣିଦୁ ଲାଗିସ୍‌କିତାନ୍‌ ।
MAT 20:6 ମାରି ମିଲ୍‌ମିଲିକା ପାସ୍‌ଟା ବେଡ଼ାଦୁ ମାରି ଉନ୍‌ଡ୍ରି ଦେବା ସାତାଦୁ ସର୍ହାନ୍‌ନୋ ସୁଡ଼ୁତାନ୍‌, ମାରି ଏସ ଲୋକୁ ନିର୍‌ଆମାନାର୍‌, ୱାରିଙ୍ଗ୍‌ ୱେନ୍‌ବାତାନ୍‌, ୱେଡ଼୍‌ୱେଡ଼ାର୍‌ ପାଣିକିଏଣ୍‌ଗା ଏନ୍ଦା ଇବେନୁ ସମୟ୍ ନାସ୍ଟୁକିଜିନିଦେର୍‌ ?
MAT 20:7 ୱାର୍‌ ଇର୍ହାର୍‌, ଏନ୍‌ ମାଙ୍ଗିଁ ପାଣିଦୁ ଲାଗିସ୍‌କିଏର୍‌ । ୱାନ୍‌ ୱାରିଙ୍ଗ୍‌ ଇର୍ହାନ୍‌, ଆର୍‌ତିଙ୍ଗ୍‌ ମିର୍‌ ୱିଜୁ ନା ଅଙ୍ଗୁର୍‌ କିଡ଼ିଇଦୁ ସୋଲ୍‌ସ ପାଣିକିଦୁ ।
MAT 20:8 ଆୟାନାଣ୍ତିଙ୍ଗ୍‌ ମିଲ୍‌ମିଲିକା ବେଡ଼ାଦୁ କିଡ଼ିଇଦି ମାଲିକ୍‍ ଗୁମାସ୍ତାଦିଙ୍ଗ୍‌ ଇର୍ହାନ୍‌, ପାଣିକିତିୱାରିଙ୍ଗ୍‌ କୁକ୍‌ଆ । ଆମାକାର୍‌ ୱିଜେରିମାଣାନ୍‌ ୱେନ୍‌କା ପାଣି ଆରାମ୍‌କିତାମାନାର୍‌, ଆଗ୍‌ଡ଼ି ୱାରି ବୁତି ସିଆ । ଆମାକାର୍‌ ୱିଜେରି ଆଗ୍‌ଡ଼ି ପାଣିଦୁ ୱାତାମାନାର୍‌ ୱାରି ବୁତିଡାବୁଙ୍ଗ୍‌ ସାରାସାରିୱେନ୍‌କା ସିଆ ।
MAT 20:9 ମିଲ୍‌ମିଲିକା ପାସ୍‌ଟାଦୁ ଆମାକାର୍‌ ପାଣିଦୁ ୱାତା ମାର୍ହାର୍‌, ୱାର୍‌ ୱିଜେରେ ଉନ୍‌ଡ୍ରି ୱେଣ୍ଡିଅଦ୍‌ଲି ଡାବୁଙ୍ଗ୍‌ ପୟ୍‌ତାର୍‌ ।
MAT 20:10 ଆମାକାର୍‌ ଆଗ୍‌ଡ଼ି ପାଣି ଆରାମ୍‌ କିତାମାର୍ହାର୍‌, ୱାର୍‌ ନାଣ୍ତ ପୟ୍‌ନିକା ଇଜି ଅଡ଼୍‌ବିତାର୍‌, ମାତର୍‌ ୱାନ୍‌ ବା ଉନ୍‌ଡ୍ରେ ଉନ୍‌ଡ୍ରେ ୱେଣ୍ଡିଅଦ୍‌ଲି ଡାବୁଙ୍ଗ୍‌ ପୟ୍‌ତାର୍‌ ।
MAT 20:11 ୱାର୍‌ ନିସ ଅସି ମାଲିକ୍‌ ବିରଦ୍‌ତାନ୍‌ ୱେଡ଼ିକାଆଏଣ୍‌ଗା ୱେର୍‌ସି ଇର୍ହାର୍‌,
MAT 20:12 ମିଲ୍‌ମିଲିକା ପାସ୍‌ଟାଦୁ ପାଣି ଆରାମ୍‌ କିତିମାନିକାର୍‌ ଉନ୍‌ଡ୍ରେ ଗନ୍‌ଟାନେ ପାଣି କିତାମାନାର୍‌ । ମାପ୍‌ ଇୟା ନିସ ତେର୍‌ୱେଲ୍‌ତିଙ୍ଗ୍‌ ୱେଡ଼ାର୍‌ କଟେଆତାପ୍‌, ମାରି ବୁତିଡାବୁଙ୍ଗ୍‌ ସିତିୱାଲେ ୱାରିଙ୍ଗ୍‌ ମା ୱାଲେ ସାମାନ୍‍ କିଜିସିତି ।
MAT 20:13 ମାଲିକ୍‌ ୱାରି ଲୋଇରାନ୍‌ ଅରେନ୍‍ୱାନିଙ୍ଗ୍‍ ଇର୍ହାନ୍‌, ବନ୍ଧୁ; ନାନ୍ ନିଙ୍ଗିଁ ଟକେକିଏ । ଅର୍‌ଲେଟି ବୁତି ଡାବୁଙ୍ଗ୍‌ ଉନ୍‌ଡ୍ରେ ୱେଣ୍ତି ଅଦ୍‌ଲି ଅସି ପାଣି କିଦେଙ୍ଗ୍‌ ମିର୍‌ ୱିଜିଦେର୍‌ ରାଜିଆତିମାରିଇଦେର୍‌ ।
MAT 20:14 ମି ଆୟା ବୁତିଡାବୁଙ୍ଗ୍‌ ଅସି ଇନ୍‌ଡ୍ର ସାନ୍‌ଡ୍ରୁ, ମିଙ୍ଗିଁ ଏସ ସିତାମାନା, ଉନ୍‌ଡ୍ରେ ଗନ୍‌ଟା ପାଣି କିତିମାନି ଲୋକ୍‌ତିଙ୍ଗ୍‌ ବା ନାସନେ ସିଦେଙ୍ଗ୍‍ ନା ବଦା ।
MAT 20:15 ନା ନିଜେଦି ଦନ୍‌ତିଙ୍ଗ୍‌ ଏଣ୍ତେସ୍‌ ବଦା ଆୟାୱାଜା କାର୍‌ସୁକିଦେଙ୍ଗ୍‌ ଇନିକା ନା ଅଦିକାର୍‌ ସିଲେତ୍‌ ? ସିଲେ ନାନ୍ ଦାନ୍‍ସିନିକାନ୍‍ ଆତିଙ୍ଗ୍‌ ମିର୍‌ ନାଙ୍ଗିଁ ଆକାର୍‍ଆଜିନିଦେର୍‌ ?
MAT 20:16 ଇୟା କାତାଦି ମାଟା ୱିସ୍‌ତାନ୍‌ନୋ ଜିସୁ ଇର୍ହାନ୍‌, “ୱେନ୍‌କା ମାନି ଲୋକୁ ଆଗ୍‌ଡ଼ି ଆନାର୍‌ ମାରି ଆଗ୍‌ଡ଼ି ମାନି ଲୋକୁ ୱେନ୍‌କା ଆନାର୍‌ ।”
MAT 20:17 ଜିସୁ ଜିରୁସାଲମ୍‌ତୁ ସନି ସାରିଦୁ ବାର୍‌ଲୋକ୍‌ ସିସୁରିଙ୍ଗ୍‌ ଉନ୍‌ଡ୍ରି ଲାକ୍‌ତୁ କୁକ୍‌ତାଅତାନ୍‌ନୋ ଅରେନ୍‌ନେ ଇର୍ହାନ୍‌,
MAT 20:18 “ୱେନ୍‌ଡ୍ରୁ, ମାଡ୍‌ ଜିରୁସାଲମ୍‌ତୁ ସୋଲ୍‌ସିନିକା, ଆବେନୁ ମନୁସ୍ୟପୁତ୍ର ପେରି ଜାଜକ ମାରି ଦାର୍ମୁଗୁରୁରି କିୟୁଦୁ ସର୍‌ପେଆନାନ୍‌ । ମାରି ୱାର୍‌ ୱାନିଙ୍ଗ୍‌ ସାନିଦଣ୍ତ୍‌ ସିନାର୍‍
MAT 20:19 ମାରି ୱାର୍‌ ଅଣଜିହୁଦିରି କିୟୁଦୁ ସର୍‌ପେ କିଜି ସିନାର୍‍ । ଆଇଜାତିଦିକାର୍‌ ୱାନିଙ୍ଗ୍‌ ସେମାର୍‌ କିନାର୍‌, କର୍‌ଡା ମାଡ୍‌ ଡାକ୍‌ନାର୍‌ ମାରି କ୍ରୁସକାଟ୍‌ତୁ ଏକିସ୍‌କିନାର୍‌, ମାତର୍‌ ମୁନେଟି ୱେନ୍‌କା ୱାନ୍ ମାରିଡ଼େସି ଜିବନ୍‌ଆଜି ନିଙ୍ଗିଁନାନ୍‌ ।”
MAT 20:20 ଇୟା ସମୟ୍‍ତୁ ଜେବଦିଦି ଆଡ଼୍‌ସି ତାନି ରିଏରି ମାରିସିରି ୱାଲେ ଜିସୁଦି ଲାକ୍‌ତୁ ୱାଜି, ଜିସୁଙ୍ଗୁଁ ମାଡ଼ିସ୍‍କିଜି ୱାନିମାଣାନ୍‌ ଇନିକା କିଦେଙ୍ଗ୍‌ ଲସ୍‌ତାତ୍‌ ।
MAT 20:21 ଜିସୁ ତାନିଙ୍ଗ୍‌ ୱେନ୍‌ବାତାନ୍‌, “ନିନ୍‌ ଇନିକା ବଦାକିଜିନି ?” ୱାଦ୍‌ ଇର୍ହାତ୍‌, “ନିନ୍‌ ଏସ୍ତିୱାଲେ ରାଜା ଆନି, ନା ଇୟା ରିଏର୍‌ ମାରିସିରିଙ୍ଗ୍‌ ନି ଉଣେରି କିୟୁ ତରିନ୍‍ ମାରି ଅରେନ୍‍ ଲୋକ୍‌ତିଙ୍ଗ୍‌ ନି ଡେବ୍‍ରିକିୟୁ ତରିନ୍‍ ବାସ୍ତେଙ୍ଗ୍‍ ମାଟା ସିଦା ।”
MAT 20:22 ଜିସୁ ଜେବଦିରି ରିଏର୍‌ ମାରିସିରିଙ୍ଗ୍‌ ଇର୍ହାନ୍‌, “ମିର୍‌ ଇନିକା ଲସ୍‌ସିନିଦେର୍‌, ଆୟାକା ମିର୍‌ ନେସ୍‌ତେଙ୍ଗ୍‌ କି ବୁଝାଦେଙ୍ଗ୍‍ ଆଟ୍‍ଏଜିନିଦେର୍‍ । ନାନ୍ ଏମେ ଦୁଃକ୍‌ବୋଗ୍‌ତି ଉଣିଡୁବାଇତାନ୍‌ ଉନ୍‌ଣ୍ତେଙ୍ଗ୍‌ ସୋଲ୍‌ସିନା, ମିର୍‌ ଇନିକା ଆବେଟ୍‌ତାନ୍‌ ଉନ୍‌ଣ୍ତେଙ୍ଗ୍‌ ଆଟ୍‌ନିଦେର୍‌ ?” ୱାର୍‌ ଇର୍ହାର୍‌, “ହୁଁ ଆଟ୍‍ନାପ୍‍ ।”
MAT 20:23 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ନା ଆୟା ଡୁବାଇତୁ ଉଣିଦେର୍‌ ସତ୍‌, ମାତର୍‌ ନା ଉଣେରି ମାରି ଡେବିରି ତରିନ୍‌ ବାସ୍‌ତେଙ୍ଗ୍‌ଇଜି ଏଙ୍ଗ୍‌ ଆସ୍‌କିଦେଙ୍ଗ୍‌ ଅଦିକାର୍‌ ନାଙ୍ଗିଁ ସିଲେତ୍‌ । ଆମାୱାରି ଉଣ୍ତିଙ୍ଗ୍‌ ନା ବୁବା ଆୟା ବାଡି ତିଆର୍‌ କିତାମାନାନ୍‌, ଆକା କେବଲ୍‌ ୱାରିଦି ।”
MAT 20:24 ଏସ୍ତିୱାଲେ ଆଇ ଦାସ୍‌ଲୋକ୍‌ ସିସୁର୍‍ ଇୟା ମାଟା ୱେର୍‌ଆର୍‌, ଆୟା ତଡ଼ରିଏରି ମୁସ୍‌କୁ ଗିଦ୍‌ରି ଆତାର୍‌ ।
MAT 20:25 ଜିସୁ ସିସୁରିଙ୍ଗ୍‌ ଉନ୍‌ଡ୍ରେମାନୁ କିଜି ଇର୍ହାନ୍‌, “ମିର୍‌ ନେସ୍‌ନିଦେର୍‌, ଇୟା ଦୁନିଆଦି ଅଣଜିହୁଦି ରାଜାର୍‌ ଆଇୱାରି ମୁସ୍‌କୁ ଅଦିକାର୍‌ କିତାର୍‍ମାନ୍ଦି ମାରି ପେରି ପେରି ନେତାର୍‌ ବା ଆଇୱାରି ମୁସ୍‌କୁ ସାସନକିନାର୍‌ ।
MAT 20:26 ମି ଲୋଇ ଆୟାୱାଜା ସିଲେତ୍‍, ମାତର୍‌ ମି ଲୋଇରାନ୍‌ ଅରେନ୍‍ ପେରିକାନ୍‌ ଆଦେଙ୍ଗ୍‌ ବଦାକିନାନ୍‌, ୱାନ୍‌ ଆଇୱାରି ସେବାକିନିକାନ୍‍ ଆପିନ୍‌,
MAT 20:27 ମାରି ମି ଲୋଇରାନ୍‌ ଏନ୍‌ ପେରିକାନ୍‌ ଆଦେଙ୍ଗ୍‌ ବଦାକିନାନ୍‌, ୱାନ୍‌ ଆଇୱାରି ଗତିମୁରୁଲି ୱାଜା ୱାରି ସେବା କିପିନ୍‍,
MAT 20:28 ଏଣ୍ତେସ୍‌ ମନୁଷ୍ୟପୁତ୍ର ଯେ ନାନ୍ ସେବା ପ‍ଇଦେଙ୍ଗ୍‌ ରେଏ, ମାତର୍‌ ସେବା କିଜି ଆଇୱାରିଦି ଡ଼ିସିସ୍‍କିନି ଉଣ୍ତିଙ୍ଗ୍‌ ନିଜେଦି ଜିବନ୍‌ ସିଦେଙ୍ଗ୍‍ ଇଜି ୱାତାମାନାନ୍‍ ।”
MAT 20:29 ଅର୍‍ଲେନ୍‍ ଜିସୁ ସିସୁରି ୱାଲେ ଜିରିହୋ ଗାଡ଼୍‌ ଡ଼ିସ୍‌ସି ସନିୱାଲେ ନାଣ୍ତଲୋକୁ ୱାନି ୱେନ୍‌କା ୱେନ୍‌କା ବୁଲାତାର୍‌ ।
MAT 20:30 ରାସ୍ତା ପାଡ଼ି ବାସ୍‌ତିମାନି ରିଏର୍‌ କାଣାର୍‌, ଜିସୁ ଆୟା ସାରି ୱାଜିନାନ୍‍ ଇଜି ୱେନ୍‌ଞ୍ଜି ନାଣ୍ତ ଆଉଲି ଆଜି କୁକ୍‌ତାର୍‌, “ଏ ପ୍ରବୁ, ଦାଉଦତି ମାରିନ୍‌ ! ମାଙ୍ଗିଁ ଦୟା କିଆ ।”
MAT 20:31 ଲୋକ୍‌ ୱିଜେରେ ୱାରିଙ୍ଗ୍‌ ଆଦ୍‌ରିସ୍‌କିଜି ଆଲେଜ ମାନ୍‌ଡ୍ରେଙ୍ଗ୍‌ ଇର୍ହାର୍‌, ମାତର୍‌ ୱାର୍‌ ମାରି ନାଣ୍ତ ଆଉଲି ଆଜି ଇର୍ହାର୍‌, “ଏ ପ୍ରବୁ, ଦାଉଦତି ମାରିନ୍‌ ! ମାଙ୍ଗିଁ ଦୟା କିଆ ।”
MAT 20:32 ଆବେନୁ ଜିସୁ ନିର୍‌ଆନ୍‌ନୋ ୱାରିଙ୍ଗ୍‌ କୁକ୍‌ତାନ୍‌ନୋ ୱେନ୍‌ବାତାନ୍‌, “ନାନ୍ ମିଙ୍ଗିଁ ଇନିକା କିନା ଇଜି ମିର୍‌ ବଦା କିଜିନିଦେର୍‌ ?”
MAT 20:33 ୱାର୍‌ ଇର୍ହାର୍‌, “ପ୍ରବୁ ମାଙ୍ଗିଁ ସୁଡ଼ୁନି ସାକ୍ତି ସିଦା ।”
MAT 20:34 ମାରି, ଜିସୁ ଦୟାଦାନ୍‌ ଦାନ୍ଦାଆଜି ୱାରି କାଣ୍‌କାଙ୍ଗ୍‌ ମୁଟ୍‌ତାନ୍‌, ମାରି ଆୟାଦାପ୍ରେ ୱାର୍‌ ସୁଡ଼ୁଦେଙ୍ଗ୍‌ ଆଟ୍‌ତାର୍‌ ମାରି ୱାନି ୱେନ୍‌କା ୱେନ୍‌କା ବୁଲାଦେଙ୍ଗ୍‌ ଆସ୍‌ତାର୍‌ ।
MAT 21:1 ଜିସୁ ନି ୱାନି ସିସୁର୍‍ ଜିରୁସାଲମ୍‌ତି ଲାକ୍‌ତୁରି ଜିତ୍ ଗରନ୍‌ ମୁସ୍‌କୁ ମାନି ବେତ୍‍ପାଗି ନାଟ ଇତାର୍‌ । ନାସ୍ତିୱାଲେ ଜିସୁ ରିଏର୍‌ ସିସୁରିଙ୍ଗ୍‌ ଇୟା ମାଟା ୱେର୍‌ସି ପୋକ୍‌ତାନ୍‌ ।
MAT 21:2 “ମି ଆଗ୍‍ଡ଼ିରି ଆୟା ନାଟ ସାନ୍‌ଡ୍ରୁ, ଆବେ ଇତି ଦାପ୍ରେନେ ତରାତିମାନି ଉନ୍‌ଡ୍ରି ଗଦଦିଙ୍ଗ୍‌ ମାରି ତାନେୱାଲେ ଉନ୍‌ଡ୍ରି ଗଦପିଲାଦିଙ୍ଗ୍‌ ସୁଣିଦେର୍‌; ୱାନିକାଙ୍ଗ୍‌ କୁତ୍‌ସ ନା ଲାକ୍‌ତୁ ଆସ୍‌ସୋ ରାଦୁ ।
MAT 21:3 ମାରି ଏନ୍‌ ମିଙ୍ଗିଁ ଇନିକା ୱେନ୍‌ବାତିଙ୍ଗ୍‌, ଆର୍‌ତିଙ୍ଗ୍‌ ଇନିଦେର୍‌, ୱେନିକାମାନୁ ପ୍ରବୁଙ୍ଗ୍‌ ଦର୍‌କାର୍‌ ମାନାତ୍‌ । ଆୟାଦାପ୍ରେନେ ୱାନ୍‌ ୱାନିକାଙ୍ଗ୍‌ ଡ଼ିସ୍‌ନାସିନାନ୍‌ ।”
MAT 21:4 ବାବବାଦିରି ମାଣାନ୍‌ ରାସ୍‍ତିମାନି ଇୟା ବାକ୍ୟ ଏଣ୍ତେସ୍‌ ପୁରା ଆନାତ୍‌, ଆୟାଉଣ୍ତିଙ୍ଗ୍‌ ଇକା ଗଟାତାତ୍‌ ।
MAT 21:5 “ସିୟୋନତି ଗାଡ଼୍‌ତିଙ୍ଗ୍‌ ଇନ୍‌ଆଁ, ସୁଡ଼୍‍ଦୁ, ନି ରାଜା ମି ଲାକ୍‌ତୁ ୱାଜିନାନ୍‍; ୱାନ୍‌ ସାନ୍ତି ମାରି ଗଦପିଲା ନି ଗଦଦି ମୁସ୍‌କୁ ବାସ୍‌ତାନ୍‌ନୋ ୱାଜିନାନ୍‍ ।”
MAT 21:6 ସିସୁର୍‍ ସୋର୍ହାର୍‌ନୋ ଜିସୁ ୱେର୍‌ତି ଇସାବ୍‌ତାନ୍‌ ପାଣି କିତାର୍‌ ।
MAT 21:7 ଗଦ ନି ଗଦପିଲାଦିଙ୍ଗ୍‌ ତାତାରୋ ୱାନିକା ମୁସ୍‌କୁ ନିଜେନିଜେଦି ୱାତିଙ୍ଗ୍‌ ପିଡ଼ିକ୍‌ତାର୍‌, ମାରି ଜିସୁ ଆୟା ଗଦ ମୁସ୍‌କୁ ବାସ୍‌ତାନ୍‌ ।
MAT 21:8 ମାରି, ଲୋକାୱିଜେରି ମାଣାନ୍‌ ଏସଲୋକ୍‌ ଜିସୁ ସୋଲ୍‌ସିମାନି ରାସ୍ତା ମୁସ୍‌କୁ ନିଜେ ନିଜେଦି ୱାତିଙ୍ଗ୍‌ ପାର୍‌ତାସିତାର୍‌ ମାରି ଏସଲୋକ୍‌ ମାରାତାନ୍‌ କାଜିରି କମେଙ୍ଗ୍‌ କାତ୍‌ସି ତାସି ରାସ୍ତାଦୁ ପାର୍‌ତେଙ୍ଗ୍‌ ଆସ୍‌ତାର୍‌ ।
MAT 21:9 ଜିସୁଦି ଆଗ୍‌ଡ଼ି ନି ୱେନ୍‌କା ସୋଲ୍‌ସିମାନି ଲୋକୁ ୱିଜେରେ ନାଣ୍ତ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ହୋଶାନା, “ଦାଉଦତି ମାରିନ୍‌, ପ୍ରବୁଦି ଦର୍‌ତାନ୍‌ ଏନ୍‌ ୱାଜିନାନ୍‍, ମାପୁରୁ ୱାନିଙ୍ଗ୍‌ ଆସିର୍ବାଦ୍‌ କିପିନ୍‌ । ମାପୁରୁଙ୍ଗ୍‌ ପ୍ରସଂସା ଆପିତ୍‌ ।”
MAT 21:10 ମାରି, ଏସ୍ତିୱାଲେ ଜିସୁ ଜିରୁସାଲାମ୍‍ତୁ ଇତାନ୍‌, ଗାଡ଼୍‌ୱିଜୁ ଇକାନ୍‌ ଏନ୍‌ ଇଜି ପୁରା ବେମ୍‍ର୍‍ ଆତାର୍‌ । ଲୋକୁ ୱେନ୍‌ବାତାର୍‌, “ଆୟାକାନ୍‌ ଏନ୍‌ ?” ଆଇକାର୍‌ ଇର୍ହାର୍‌,
MAT 21:11 “ୱାନ୍‌ ଆଜିନାନ୍‍, ଗାଲିଲି ରାଜିଦି ନାଜରିତଦି ବାବବାଦି ଜିସୁ ।” ଲୋକୁ ୱେର୍‌ତାର୍‌ ।
MAT 21:12 ଜିସୁ ମନ୍ଦିର୍‌ ଲୋଇ ଡ଼ୁଗିତାନ୍‌ନୋ ଆୟା ବାଡିଦୁ କଡ଼ଜି ପର୍‌ଜି କିଜିମାନି ୱିଜୁ ଲୋକାଙ୍ଗ୍‌ ଆତେରେ ସୋପ୍‌ତାନ୍‌ । ମାରି ଅଦ୍‌ଲିଙ୍ଗ୍‌ ମାର୍‍ନିୱାରି ପାସ୍‌ରା ମାରି ପାଉରା ପର୍‌ନିୱାରି ପାସ୍‌ରା ମାର୍ତା ପୋକ୍‌ତାନ୍‌,
MAT 21:13 ମାରି ଜିସୁ ୱାରିଙ୍ଗ୍‌ ଇର୍ହାନ୍‌, “ଦର୍ମୁସାସ୍ତ୍ରଦୁ ରାସାତାମାନାତ୍‌, ନା ମନ୍ଦିର୍‌ ପାର୍‌ତନା ଇଲୁ ଇଜି ୱେଙ୍ଗିଁନାତ୍‌, ମାତର୍‌ ମିର୍‌ ତାନିଙ୍ଗ୍‌ ଡଙ୍ଗାଁରି ଇଲୁ କିତିମାନିଦେର୍‌ ।”
MAT 21:14 ଜିସୁ ମନ୍ଦିର୍‌ତୁ ମାନିୱାଲେ କାଣାର୍‌ ନି କିକୁକାଲ୍‌କୁ ୱାର୍‌ତିକାର୍‌ ୱାନି ଲାକ୍‌ତୁ ୱାତାର୍‌ ମାରି ୱାନ୍‌ ୱାରିଙ୍ଗ୍‌ ନେଗେନ୍‌କିତାନ୍‌ ।
MAT 21:15 ପେରି ଜାଜକ ମାରି ଦାର୍ମୁଗୁରୁର୍‌ ୱାନି କାବାଆନି ପାଣି ୱିଜୁ ମାରି ମନ୍ଦିର୍‌ ଲୋଇ “ଦାଉଦ ମାରିନ୍‌ ମାପୁରୁଦି ପ୍ରସଂସା ଆପିତ୍‌” ଇଜି ନାଣ୍ତ ଆଉଲିଆଜିମାନି କଡ଼ରିଙ୍ଗ୍‌ ସୁଡ଼ୁଜି ରିସା ଆତାର୍‌ ।
MAT 21:16 ୱାର୍‌ ଜିସୁଙ୍ଗୁଁ ୱେନ୍‌ବାତାର୍‌, “ଇୟାକାର୍‌ ଇନିକା ଆଜିନାର୍‌, ମିର୍‌ ୱେନ୍‌ଡ୍ରେଙ୍ଗ୍‌ ଆଟ୍‌ସିନିଦେର୍‌ ?” ଜିସୁ ଇର୍ହାନ୍‌, “ପୁରା ୱେନ୍‌ଞ୍ଜିନା । ଦର୍ମସାସ୍ତ୍ରଦୁ ଇୟା ମାଟା ଇନିକା ପଡ଼ାଇଦେର୍‌, ମିର୍‌ କଡ଼ରିଙ୍ଗ୍‌ ନି ଇସ୍ରି କଡ଼ର୍‌ ଟିକ୍‌ ଇସାବ୍‌ତାନ୍‌ ପ୍ରସଂସା କିଦେଙ୍ଗ୍‌ ସିକିୟା ସିତିମାନିଦେର୍‍ ?”
MAT 21:17 ଇକା ଇନ୍‌ଞ୍ଜି ଜିସୁ ୱାରିଙ୍ଗ୍‌ ଡ଼ିସ୍‌ତାନ୍‌ନୋ ଜିରୁସାଲମ୍‌ତାନ୍‌ ବେତନିୟାଦୁ ସୋର୍ହାନ୍‌, ଆବେନୁ ୱାନ୍‌ ନାଡ଼ା ତେବାତାନ୍‌ ।
MAT 21:18 ମାର୍‌ନାଣ୍ଡିଙ୍ଗ୍‌ ସାଲ୍‌ଦିନେ ଜିସୁ ଜିରୁସାଲମ୍‌ତୁ ଡ଼େସିସନିୱାଲେ ବାଙ୍ଗାଁ ସାତାନ୍ ।
MAT 21:19 ରାସ୍ତା ପାଡ଼ି ଉନ୍‌ଡ୍ରି ତଗା ମାରାନ୍‌ ମାର୍ହାତ୍‌ । ଜିସୁ ତାନେ ଲାକ୍‌ତୁ ସୋର୍ହାନ୍‌ନୋ ଆବେନୁ ଆକୁ ଡ଼ିସ୍‌ତିଙ୍ଗ୍‌ ମାରି ଇନିକାବା ତଏତାନ୍‌ । ୱାନ୍‌ ମାରାନ୍‌ତିଙ୍ଗ୍‌ ଇର୍ହାନ୍‌, “ନିନ୍‌ ମାରି ଏସ୍‌କାଙ୍ଗ୍‌ବା ପଲ୍‌ ଆସ୍‌ଇ ।” ଆୟାଦାପ୍ରେ ତଗା ମାରାନ୍‌ ୱାର୍‌ତାସୋର୍ହାତ୍‌ ।
MAT 21:20 ସିସୁର୍‍ ଆକା ସୁଡ଼ୁଜି କାବାଆତାରୋ ୱେନ୍‌ବାତାର୍‌, “ତଗା ମାରାନ୍‌ ନିସାଦାପ୍ରେ ୱାର୍‌ତାସୋର୍ହାତ୍‌ ଏଣ୍ତେସ୍‌ ?”
MAT 21:21 ଜିସୁ ଇର୍ହାନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ମନ୍‌ତୁ ଅଡ଼ପ୍‍ବା ଅଡ଼୍‌ବିଏଣ୍‌ଗା ମିର୍‌ ଜଦି ପୁରାଦାନ୍‌ ବିସ୍‌ବାସ୍‌ କିନିଦେର୍‌, ନାନ୍ ଇୟା ତଗା ମାରାନ୍‌ ଉଣ୍ତିଙ୍ଗ୍‌ ଆମାକା କିତାମାନା, ମିର୍‌ ବା ଆକା କିଦେଙ୍ଗ୍‌ ଆଟ୍‌ନିଦେର୍‌ । କେବଲ୍‌ ନାସ ସିଲେ, ଏମେ ଲୋକୁ ଇୟା ଗରନ୍‍ତିଙ୍ଗ୍‍ ନିନ୍‌ ନିଙ୍ଗ୍‍ଜି ସାମ୍‌ଦୁର୍‌ତୁ ସଲ୍‍ସି ଆର୍‌ଆ ଇଜି ଇନାନ୍‌, ଆକାବା ଆନାତ୍‌ ।
MAT 21:22 ବିସ୍‌ବାସ୍‌କିଜ ପାର୍‌ତାନାଦୁ ଆମାକା ଲସ୍‌ନିଦେର୍‌, ଆୟାୱିଜୁ ମିର୍‌ ପଇନିଦେର୍‌ ।”
MAT 21:23 ଜିସୁ ମନ୍ଦିର୍‌ତୁ ଡ଼େସିୱାଜି ଆବେନୁ ସିକିୟା ସିନିୱାଲେ ପେରି ଜାଜକର୍‌ ନି ଜିହୁଦି ନେତାର୍‌ ୱାନି ଲାକ୍‌ତୁ ୱାଜି ୱେନ୍‌ବାତାର୍‌, “ନିନ୍‌ ଆମା ଅଦିକାର୍‌ତାନ୍‌ ଇୟାୱିଜୁ ପାଣି କିଜିନି ? ମାରି, ଇୟା ନିଙ୍ଗିଁ ଏନ୍‌ ଇୟା ଅଦିକାର୍‌ ସିତାନ୍‌ ?”
MAT 21:24 ଜିସୁ ୱାରିଙ୍ଗ୍‌ ଇର୍ହାନ୍‌, “ନାନ୍ ବା ମିଙ୍ଗିଁ ଉନ୍‌ଡ୍ରି ମାଟା ୱେନ୍‌ବାନା, ଆୟା ଉତର୍‌ ସିଦେଙ୍ଗ୍‍ ଆଟ୍‌ତିଙ୍ଗ୍‌, ନାନ୍ ଆମା ଅଦିକାର୍‌ତାନ୍‌ ଇୟାୱିଜୁ ପାଣି କିଜିନା, ଆକା ନାନ୍ ବା ମିଙ୍ଗିଁ ୱେର୍‌ନା ।”
MAT 21:25 ଡୁବନ୍‌ ସିନି ଅଦିକାର୍‌ ଯୋହନ ଏମାଣାନ୍‌ ପୟ୍‌ତାମାର୍ହାନ୍‌ ? ମାପୁରୁମାଣାନ୍‌ ନୋ ଲୋକାମାଣାନ୍‌ ? ୱାର୍‌ ୱାରି ୱାରି ଲୋଇ ୱାର୍‍ଗିସାଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ଇୟା ବିସୟ୍‌ତାନ୍‌ ଇନିକା ୱେର୍‌ନିକା ? ଜଦି ଇନିକା ମାପୁରୁମାଣାନ୍‌, ଆର୍‌ତିଙ୍ଗ୍‌ ଯୋହନତିଙ୍ଗ୍‌ ଏନ୍ଦା ବିସ୍‌ବାସ୍‌ କିଏଜିନିଦେର୍‌ ଇଜି ୱାନ୍‌ ମାଙ୍ଗିଁ ୱେନ୍‌ବାନାନ୍‌ ।
MAT 21:26 ମାତର୍‌ ଲୋକାମାଣାନ୍‌ ଇଜି ଇନିକା, ଆର୍‌ତିଙ୍ଗ୍‌ ୱିଜୁଲୋକାଙ୍ଗ୍‌ ମାଡ୍‌ ତିଲାଜିନିକା, ଇରିଙ୍ଗ୍‌ ଯୋହନ ଅରେନ୍‍ ବାବବାଦି ଇଜି ୱିଜେରେ ଲୋକୁ ବିସ୍‌ବାସ୍‌କିଜିନାର୍‌ ।”
MAT 21:27 ଆବେଟ୍‌ ୱାର୍‌ ଜିସୁଙ୍ଗୁଁ ଇର୍ହାର୍‌, “ମାପ୍‌ ନେସ୍‌ଏପ୍‌ ।” ଜିସୁ ୱାରିଙ୍ଗ୍‌ ଇର୍ହାନ୍‌, ନାନ୍ ଆମା ଅଦିକାର୍‌ତାନ୍‌ ଇୟାୱିଜୁ କିଜିନା, ଆକା ନାନ୍ ବା ମିଙ୍ଗିଁ ଇନ୍‌ଏ ।
MAT 21:28 “ଇଲେଇ ଇୟା ବିସୟ୍‌ତାନ୍‌ ମିର୍‌ ଇନିକା ଅଡ଼ବିଜିନିଦେର୍‌ । ଅରେନ୍‍ ଲୋକାଦି ରିଏର୍‌ କଡ଼ର୍‌ ମାର୍ହାର୍‌ । ଅର୍‍ଲେନ୍‍ ୱାନ୍‌ ପେରି ମାରିନ୍‌ତିଙ୍ଗ୍‌ ଇର୍ହାନ୍‌, ‘ମାରିନ୍‌, ନେର୍‌ ମା ଅଙ୍ଗୁର୍‌ କିଡ଼ିଇଦୁ ସୋଲ୍‌ସ ପାଣିକିଆ ।’
MAT 21:29 ୱାନ୍‌ ଇର୍ହାନ୍‌, ନା ବଦା ସିଲେତ୍‌, ମାତର୍‌ ୱେନ୍‌କା ମନ୍‍ତିଙ୍ଗ୍‍ ଡ଼େପ୍‍ସି ପାଣି କିଦେଙ୍ଗ୍‌ ସୋର୍ହାନ୍‌ ।
MAT 21:30 ବୁବାସି ଇସ୍ରି ମାରିସିଙ୍ଗ୍‌ ବା ଆୟା ପାଣି କିଦେଙ୍ଗ୍‌ ଇର୍ହାନ୍‌ । ‘ହୁଁ, ଆଜ୍ଞା,’ ସୋଲ୍‌ସିନା ଇଜି ଇସ୍ରି ମାରିନ୍‌ ଇର୍ହାନ୍‌ । ମାତର୍‌ ୱାନ୍‌ ପାଣିଦୁ ମୁଡ଼ୁକେ ସୋଲ୍‌ଏତାନ୍‌ ।
MAT 21:31 ଇୟା ରିଏର୍‌ କଡ଼ରି ମାଣାନ୍‌ ଏନ୍‌ ତାମେ ବୁବାସିଦି ମାଟା ମାନାତାମାର୍ହାନ୍‌ ?” ୱାର୍‌ ଇର୍ହାର୍‌, “ପେରି ମାରିନ୍‌ ।” ଜିସୁ ୱାରିଙ୍ଗ୍‌ ଇର୍ହାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ସିସ୍‍ଟୁ ଲୋସ୍‌ନିକାର୍‌ ନି ଦାରିପାଣିକିନିକାର୍ ମିମାଣ୍‌କୁ ଆଗ୍‌ଡ଼ି ମାପୁରୁଦି ରାଜିଦୁ ସୋନାର୍‌ ।
MAT 21:32 ଡୁବନ୍‌ ସିନି ଯୋହନ ମି ଲାକ୍‌ତୁ ୱାଜି ଟିକ୍‌ ସାରି ତର୍‌ତାସିତା ମାର୍ହାନ୍‌, ମାତର୍‌ ମିର୍‌ ୱାନିଙ୍ଗ୍‌ ବିସ୍‌ବାସ୍‌ କିଇତିଦେର୍‌ । ମାତର୍‌ ସିସ୍‍ଟୁ ଲୋସ୍‌ନିକାର୍‌ ନି ଦାରିପାଣିକିନିକାର୍ ୱାନି ମାଟାଦାନ୍‌ ବିସ୍‌ବାସ୍‌କିତାର୍‌, ଇକା ସୁଡ଼ୁଜି ବା ମିର୍‌ ମୋନ୍‌ ଡ଼େପ୍‍ସି ୱାନିଙ୍ଗ୍‌ ବିସ୍‌ବାସ୍‌ କିଇତିଦେର୍‌ ।
MAT 21:33 ଜିସୁ ଇର୍ହାନ୍‌, “ମାରି ଉନ୍‌ଡ୍ରି କାତା ୱେନ୍‌ଡ୍ରୁ ।” ଅରେନ୍‍ ବୁମିମାଲିକ୍‌ ମାର୍ହାନ୍‌, ୱାନ୍‌ ଉନ୍‌ଡ୍ରି ଅଙ୍ଗୁର୍‍ କିଡ଼ିଇ କିତାନ୍‌ନୋ ସାରିବେଡ଼୍‍ତି କୋଅଟି ସୋସ୍‌ତାନ୍‌ ମାରି ଆୟା ଲୋଇ ଦାକ୍ଷ୍ରାକୁଣ୍ତ୍ କାରିତାନ୍‌ନୋ କାପ୍‍କିନି ସାମ୍‍ଣ୍ତା ତିଆର୍‌କିତାନ୍‌, ମାରି ବାଗ୍‍ତୁ ପାଣିକିନିୱାରିଙ୍ଗ୍‌ ଆୟା ଡଡି ବାଗ୍‌ତାନ୍‌ ସିତାନ୍‌ନୋ ଆଇଦେସ୍‌ତୁ ସୋର୍ହାନ୍‌ ।
MAT 21:34 ଅଙ୍ଗୁର୍‌କଡ଼ି କୟ୍‍ନିୱାଲେ ୱାନ୍‌ ବାଗ୍‌ତୁପାଣିକିନି ୱାରି ଲାକ୍‌ତୁ ନିଜେଦି ବାଗ୍ ଲସ୍‌ତେଙ୍ଗ୍‌ ଇଜି ନିଜେଦି ଗତିମୁରୁଲିଙ୍ଗ୍‌ ପୋକ୍‌ତାନ୍‌ ।
MAT 21:35 ମାତର୍‌ ବାଗ୍‍ତୁ ପାଣିକିନିକାର୍‌ ଆୟା ଗତିମୁରୁଲିଙ୍ଗ୍‌ ଆସ୍‌ତାରୋ ଅରେନ୍‍ୱାନିଙ୍ଗ୍‍ ଡାକ୍‌ତାର୍‌, ଆଇ ଅରେନ୍‍ୱାନିଙ୍ଗ୍‍ ସାୟାମାର୍‌ଗାଡାକ୍‌ତାର୍‌, ମାରି ଅରେନ୍‍ୱାନିଙ୍ଗ୍‍ କାଲ୍‌କୁ ପୋକ୍‌ସି ଡାକ୍‌ତାର୍‌ ।
MAT 21:36 ମାରି କିଡ଼ିଇ ମାଲିକ୍‌ ନାଣ୍ତ ଲୋକାଙ୍ଗ୍‌ ଆଇ ପାଣିକିନି ଗତିମୁରୁଲିଙ୍ଗ୍‌ ପୋକ୍‌ତାନ୍‌ ମାରିଡ଼େସି ପୋକ୍‌ତାନ୍‌ । ୱାରିଉଣ୍ତିଙ୍ଗ୍‌ ବା ବାଗ୍‍ତୁ ପାଣିକିନିକାର୍‌ ଆୟାୱାଜା କିତାର୍‌ ।
MAT 21:37 ସାରାସାରିୱେନ୍‌କା କିଡ଼ିଇ ମାଲିକ୍‌ ନିଜେଦି ମାରିନ୍‌ତିଙ୍ଗ୍‌ ବାଗ୍‌ତୁପାଣିକିନି ୱାରି ଲାକ୍‌ତୁ ପୋକ୍‌ତାନ୍‌, ୱାନ୍‌ ଅଡ଼ବିତାନ୍‌, ୱାର୍‌ ୱାନି ମାରିନ୍‌ତିଙ୍ଗ୍‌ ମାନାନାର୍‌ ।
MAT 21:38 ମାତର୍‌ ବାଗ୍‍ତୁ ପାଣିକିନିକାର୍‌ ମାଲିକ୍‌ତି ମାରିନ୍‌ତିଙ୍ଗ୍‌ ସୁଡ଼ୁତାରୋ ୱାରି ୱାରି ଲୋଇ ୱାର୍‍ଗିତାର୍‍, ଇୟାକାନ୍‌ ସୁଡ଼ୁଦୁ, ମାଲିକ୍‌ଦି ମାରିନ୍‌ । ରାଦୁ, ୱେନିଙ୍ଗ୍‌ ବା ସାୟାମାର୍‌ଗା ଡାକ୍‍ନାଟ୍‍, ଆର୍‌ତିଙ୍ଗ୍‌ ସମ୍ପତ୍ତି ମାଦିଆନାତ୍‌ ।
MAT 21:39 ଆବେଟ୍‌ ୱାର୍‌ ୱାନିଙ୍ଗ୍‌ ଆସ୍‌ସି କିଡ଼ିଇଦାନ୍‌ ପେରିତାରୋ ଆତେରେ ସାୟାମାର୍‌ଗା ଡାକ୍‌ତାର୍‌ ।
MAT 21:40 ଜିସୁ ୱେନ୍‌ବାତାନ୍‌, “ଇଲେଇ, ଏସ୍ତିୱାଲେ କିଡ଼ିଇଦି ମାଲିକ୍‍ ୱାନାନ୍‌, ୱାନ୍‌ ବାଗ୍‍ତାନ୍‍ ପାଣିକିନିୱାରିଙ୍ଗ୍‌ ଇନିକା କିନାନ୍‌ ।”
MAT 21:41 ୱାର୍‌ ଇର୍ହାର୍‌, “ଆୟା ତାଗ୍‌ଇୱାରିଙ୍ଗ୍‌ ୱାନ୍‌ ପୁରା ଡାକ୍‌ନାନ୍‌ ମାରି ଆମା ବାଗ୍‍ତାନ୍‍ପାଣିକିନିକାର୍‌ ସାମାନ୍‍ ବେଡ଼ାଦୁ ୱାନି ବାଗ୍ ପଲ୍‌ ସିନାର୍‍, କିଡ଼ିଇ ୱାରି କିୟୁଦୁ ଡ଼ିସ୍‌ନାସିନାନ୍‌ ।”
MAT 21:42 ଜିସୁ ୱାରିଙ୍ଗ୍‌ ଇର୍ହାନ୍‌, ଇୟା ଦାର୍ମୁସାସ୍ତ୍ର ମାଟା ଇନିକା ମିର୍‌ ପଡ଼ାଇଦେର୍‌, ଆମା କାଲୁଦିଙ୍ଗ୍‌ ଇଲୁକୁ ତିଆର୍‌କିନିକାର୍‌ ପାଣିସିଏତ୍‌ଇଜି ଡ଼ିସ୍‌ତାସିତାମାର୍ହାର୍‌, ଆକାନେ ପେରିକା କନାଦି କାଲୁ ଆତାତ୍‌ । ପ୍ରବୁ ନିଜେ ଇକା ଇର୍‌ଆମାନାନ୍‌ । ପ୍ରବୁଦି ପାଣି ୱିଜୁ ଏସା କାବାନିକା ?
MAT 21:43 ଜିସୁ ମାରି ଇର୍ହାନ୍‌, ଆଦେଙ୍ଗ୍‌ ମିଙ୍ଗିଁ ଇଜିନା, ମାପୁରୁଦି ରାଜି ମିମାଣ୍‌କୁ ଅଆୟ୍‌ଆନାତ୍‌ ମାରି ଆମା ଲୋକୁ ମାପୁରୁଦି ବଦାଦାନ୍ ପାଣିକିନାର୍‍, ୱାରିଙ୍ଗ୍‌ ଆକା ସିଆଇଆନାତ୍‌ ।
MAT 21:44 ମାରି ଏନ୍‌ ଇୟା କାଲୁ ମୁସ୍‌କୁ ଆର୍‍ନାନ୍‍, ୱାନ୍‌ ମକା ମକା ଆନାନ୍‌, ମାରି ଇୟା କାଲୁ ଆମାୱାନି ମୁସ୍‌କୁ ଆର୍‍ନାତ୍‍, ୱାନିଙ୍ଗ୍‌ ଆକା ଗୁଣ୍ତ୍‍ଗୁଣ୍ତା କିନାତ୍‍ ।
MAT 21:45 ପେରି ଜାଜକର୍‌ ନି ପାରୁସିର୍‌ ଇୟା କାତାଦି ମାଟା ୱେନ୍‌ଞ୍ଜି ଜିସୁ ୱାରିଙ୍ଗ୍‌ ସୁଡ଼ୁଜି ଇଜିନାନ୍‍ଇଜି ବୁଜାଦେଙ୍ଗ୍‌ ଆଟ୍‌ତାର୍‌ ।
MAT 21:46 ମାରି, ୱାର୍‌ ୱାନିଙ୍ଗ୍‌ ଆସ୍‌ତେଙ୍ଗ୍‌ ସେସ୍ଟାକିତାର୍‌, ମାତର୍‌ ଲୋକା ଗଲି ତିଏଲ୍‍ତିଙ୍ଗ୍‌ ୱାର୍‌ ଆକା କିଦେଙ୍ଗ୍‌ ଆଟ୍‍ଏତାର୍‍, ଇରିଙ୍ଗ୍‌ ୱାର୍‌ ଜିସୁଙ୍ଗୁଁ ଅରେନ୍‍ ବାବବାଦି ଇଜି ଅଡ଼ବିଜି ମାର୍ହାର୍‌ ।
MAT 22:1 ଜିସୁ ମାରିଡ଼େସି କାତାଦାନ୍‌ ଲୋକାଙ୍ଗ୍‌ ୱେର୍‌ତାନ୍‌ ।
MAT 22:2 ମାପୁରୁଦିରାଜି ଇୟାୱାଜା । ଅର୍‍ଲେନ୍‍ ଅରେନ୍‍ ରାଜା ନିଜେଦି ମାରିନ୍‌ତିଙ୍ଗ୍‌ ପେଡ଼ି ବୋଜି ତିଆର୍‌କିତାନ୍‌ ।
MAT 22:3 କୁକ୍‌ତିମାରିଇ ଲୋକାଙ୍ଗ୍‌ ବୋଜିଦୁ କୁକ୍‍ସ ତାତେଙ୍ଗ୍‌ ଇଜି ୱାନ୍‌ ସାକର୍‌କାଙ୍ଗ୍‌ ପୋକ୍‌ତାନ୍‌ । ମାତର୍‌ ଆୟା ଲୋକୁ ୱାଦେଙ୍ଗ୍‌ ବଦା କିଏତାର୍‌ ।
MAT 22:4 ରାଜା ମାରିଡ଼େସି ଆଇ ସାକର୍‌ଙ୍ଗାଁ ମାଣ୍‌କୁ ଇୟା କାବୁର୍‌ ୱେର୍‌ସି ପୋକ୍‌ତାନ୍‌, ପେଡ଼ି ବୋଜି ତିଆର୍‌ଆତାତ୍‌ନି, ବାଲ୍‌ସିତି ବାଲ୍‌ସିତି କଡି ମାରି ଗାଡ଼ାଲ୍‌ କୟ୍‌ତାରୋ ୱିଜୁ ତିଆର୍‌ଆତାମାନାତ୍‌, ବୋଜିଦୁ ବେଗି ରାଦୁ ।
MAT 22:5 ମାତର୍‌ ୱାର୍‌ ଇୟା ମାଟାଦିଙ୍ଗ୍‌ ଆସ୍‌ଏଣ୍‌ଗା ନିଜେନିଜେଦି ପାଣି କିଦେଙ୍ଗ୍‌ ଆସ୍‌ତାର୍‌ ଅରେନ୍‍ ୱାନି କିଡ଼ିଇଦୁ ସୋର୍ହାନ୍‌, ମାରି ଅରେନ୍‍ ନିଜେଦି ଦୁକାନ୍‌ତୁ ସର୍ହାନ୍‌
MAT 22:6 ମାରି ଏସ ଲୋକୁ ରାଜାଦି ସାକର୍‌କାଙ୍ଗ୍‌ ଆସ୍‌ତାରୋ ଡାକ୍‌ସି ଡାକ୍‌ସି ସାୟାମାର୍‌ଗାଡାକ୍‌ତାର୍‌ ।
MAT 22:7 ରାଜା ନାଣ୍ତ ରିସା ଆଜି ସନ୍ୟରିଙ୍ଗ୍‌ ପୋକ୍‌ତାନ୍‌, ୱାର୍‌ ଆୟା ସାୟାମାର୍‌ଗାଡାକ୍‌ତି ୱାରିଙ୍ଗ୍‌ ସାୟାମାର୍‌ଗାଡାକ୍‌ତାରୋ ୱାରି ଗାଡ଼୍‌ତିଙ୍ଗ୍‌ ଆଡ୍‌କାତାର୍‌ ।
MAT 22:8 ତାନେ ୱେନ୍‌କା ରାଜା ସାକର୍‌କାଙ୍ଗ୍‌ କୁକ୍‌ତାନ୍‌ନୋ ଇର୍ହାନ୍‌, ନା ପେଡ଼ି ବୋଜି ତିଆର୍‌ ଆତାମାନାତ୍‌, ମାତର୍‌ ନାନ୍ କୁକ୍‌ତିମାରିଇ ଲୋକୁ ଜଗ୍‌ସିଲେର୍‌ ।
MAT 22:9 ଇଲେଇ ପେରି ପେରି ସାକ୍ଡ଼ିଆଙ୍ଗ୍ ସୋଲ୍‌ସ ଏସ ଲୋକାଙ୍ଗ୍‌ ପଇନିଦେର୍‌, ୱିଜେରିଙ୍ଗ୍‌ ମା ବୋଜିଦୁ କୁକ୍‌ସତାଗାଟ୍‌ ।
MAT 22:10 ଆବେଟ୍‌ ସାକର୍‌କୁ ସାକ୍‌ଡ଼ିଦିଙ୍ଗ୍‌ ସାକ୍‌ଡ଼ି ବୁଲାଜି ନେଗିକାନ୍‌ଆପିନ୍‌ ମାରି ତାଗ୍‌ଇକାନ୍‌ଆପିନ୍‌; ଏସ ଲୋକାଙ୍ଗ୍‌ ପୋୟ୍‌ତାର୍‌, ୱିଜୁ ଲୋକାଙ୍ଗ୍‌ କୁକ୍‌ତା ତାତାର୍‌ ମାରି ପେଡ଼ି ଇଲୁଦୁ ବର୍ତିଆତାର୍‌ ।
MAT 22:11 “ରାଜା କୁଡ଼ାଆଙ୍ଗାଁ ସୁଡ଼ୁଦେଙ୍ଗ୍‌ ୱାତାନ୍‌ । ୱାନ୍‌ ସୁଡ଼ୁତାନ୍‌, ୱାରି ଲୋଇରାନ୍‌ ଅରେନ୍‍ ପେଡ଼ି ଆଙ୍ଗିଁ ଆରାଏନ୍‌ ।
MAT 22:12 ରାଜା ୱାନିଙ୍ଗ୍‌ ୱେନ୍‌ବାତାନ୍‌, ବନ୍ଦୁ, ପେଡ଼ି ଆଙ୍ଗିଁ ଆରାଏଣ୍ତା ଏଣ୍ତେସ୍‌ ଇୟା ବାଡିଦୁ ୱାତି ? ଆୟାକାନ୍‌ ଆଲେତାନୋ ତେବାତାନ୍‌ ।
MAT 22:13 ରାଜା ସେବାକିନିକାଙ୍ଗ୍‌ ଇର୍ହାନ୍‌, ୱାନି କିକୁ ପାଦାମ୍‌କୁ ତର୍‌ସୋ ଆତେରେ ସିକାଟିଦୁ ପୋକ୍‌ତୁ । ଆବେନୁ ୱାନ୍‌ ଆଡ଼ାବାଜି ୱାନି ପାଲୁକୁ କାତ୍ରେକିନାନ୍‌ ।”
MAT 22:14 କାତା ୱେର୍‌ତେଙ୍ଗ୍‌ ୱିସ୍‌ତାନ୍‌ନୋ ଜିସୁ ଇର୍ହାନ୍‌, “ନାଣ୍ତ ଲୋକୁ କୁକାୟ୍‍ଆତାମାନାର୍, ମାତର୍‌ ଉଣା ଲୋକୁ ବାସେଆତାମାନାର୍‍ ।”
MAT 22:15 ଏସଲୋକ୍‌ ପାରୁସିର୍‌ ସଲ୍‌ସି ଜିସୁଙ୍ଗୁଁ ପ୍ରସ୍ନ ୱେନ୍‌ବାଜି ୱାନିଙ୍ଗ୍‌ ଗୁଟାଦୁ ଆରେପ୍‌ତେଙ୍ଗ୍‌ ଇଜି ଉପାୟ୍‌ ପୟ୍‌ତାର୍‌ ।
MAT 22:16 ୱାର୍‌ ନିଜେଦି ଏସଲୋକ୍‌ ସିସୁରିଙ୍ଗ୍‌ ମାରି ହେରୋଦ ଦଲତୀ ଏସ ଲୋକାଙ୍ଗ୍‌ ଜିସୁଦି ଲାକ୍‌ତୁ ପୋକ୍‌ତାର୍‌ । ୱାର୍‌ ୱାଜି ଜିସୁଙ୍ଗୁଁ ଇର୍ହାର୍‌, “ଏ ଗୁରୁ, ମାପ୍‌ ନେସ୍‌ନାପ୍‌, ନିନ୍‌ ସତ୍‌ ଇନି ମାରି ନିନ୍‌ ମାପୁରୁଦି ସତ୍‌ ବିସୟ୍‌ତାନ୍‌ ସିକିୟା ସିନି । ମାରି ଆଇକାର୍‌ ଇନିକା ଅଡ଼୍‍ବିନାର୍‍ ଆୟା ବିସୟ୍‌ତାନ୍‌ ବେମ୍‍ରିଆଇ, ଇରିଙ୍ଗ୍‌ ନିନ୍‌ ଏମେୱାରି ମାଟାଦିଙ୍ଗ୍‌ ମନ୍‍ସିଇ ।
MAT 22:17 ଆର୍‌ତିଙ୍ଗ୍‌ ମାଙ୍ଗିଁ ଇନିଆ, ଇୟା ବିସୟ୍‌ତାନ୍‌ ନି ମାଟାଇନିକା ? କାଇସର୍‍ ରାଜେଙ୍ଗ୍‌ ସିସୁଟୁ ସିନିକା ନିୟମ୍‌ତି ଇସାବ୍‌ତାନ୍‌ ଟିକ୍‌ ନୋ ବୁଲ୍‌ ?”
MAT 22:18 ମାତର୍‌ ଜିସୁ ୱାରି ତାଗ୍‌ଇ ଉପାୟ୍‌ ନେସ୍‌ସି ଇର୍ହାନ୍‌, “ଏ କପଟିର୍‌, ନାଙ୍ଗିଁ ଗୁଟାଦୁ ଆରେପ୍‌ତେଙ୍ଗ୍‌ ଏନ୍ଦା ସେସ୍ଟାକିଜିନିଦେର୍‌ ?
MAT 22:19 ଆମା ଅଦଲିଦାନ୍‌ ସିସୁଟୁ ତର୍‌ସିନିଦେର୍‌, ଆବେନୁ ଉନ୍‌ଡ୍ରି ତାସ ନାଙ୍ଗିଁ ତର୍‌ତୁ !” ୱାର୍‌ ଉନ୍‌ଡ୍ରି ଅଦ୍‌ଲି ଡାବୁଙ୍ଗ୍‌ ତାତାରୋ ୱାନିଙ୍ଗ୍‌ ସିତାର୍‍ ।
MAT 22:20 ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌, “ଇୟା ଅଦ୍‌ଲି ମୁସ୍‌କୁ ଏ ବମା ମାରି ଦର୍‌ ମାନାତ୍‌ ?”
MAT 22:21 ୱାର୍‌ ଇର୍ହାର୍‌, କାଇସର୍‍ଦି, “ଜିସୁ ୱାରିଙ୍ଗ୍‌ ଇର୍ହାନ୍‌, ଆର୍‌ତିଙ୍ଗ୍‌ ଆମାକା କାଇସର୍‍ଦି, ଆକା କାଇସର୍‍ ରାଜେଙ୍ଗ୍‌ ସିଦୁ ମାରି ଆମାକା ମାପୁରୁଦି, ଆକା ମାପୁରୁଙ୍ଗ୍‌ ସିଦୁ ।”
MAT 22:22 ୱାର୍‌ ଇକା ୱେନ୍‌ଞ୍ଜି କାବାଜି ୱାନିଙ୍ଗ୍‌ ଡ଼ିସ୍‌ସି ସୋର୍ହାର୍‌ ।
MAT 22:23 ଆୟାନାଣ୍ତିଙ୍ଗ୍‌ ସାଦୁକି ଦଲତୀ ଏସ ଲୋକୁ ଜିସୁଦି ଲାକ୍‌ତୁ ୱାତାର୍‌ । ସାଦୁକିର୍ ବିସ୍‌ବାସ୍‌କିଜି ମାର୍ହାର୍‌ ଜେ, ମାରିଡ଼େସିନିଙ୍ଗିଁନିକା ସିଲେତ୍‌ ।
MAT 22:24 ୱାର୍‌ ଜିସୁଙ୍ଗୁଁ ୱେନ୍‌ବାତାର୍‌, “ଏ ଗୁରୁ, ମୋସା ଇର୍ହାମାନାନ୍‌, ଜଦି ଅରେନ୍‍ ଲୋକୁ କଡ଼କକ୍‌ରା ଆଏଣ୍ତା ସାନାସନାନ୍‌, ଆର୍‌ତିଙ୍ଗ୍‌ ୱାନି ତଡ଼ାନ୍‌ ୱାନି ଆଡ଼୍‌ସିଙ୍ଗ୍‌ ପେଡ଼ି ଆନାନ୍‌ ମାରି ୱାରି କଡ଼ର୍‌ ଆୟା ସାତି ଲୋକ୍‌ତି କଡ଼ର୍‌ ଇଜି ସିନାଆନାର୍‌ ।
MAT 22:25 ୱେନ୍‌ଡ୍ରୁ, ମା ଲୋଇ ସାତ୍‌ଲୋକ୍‌ ତଡ଼ାନ୍‌କୁ ମାର୍ହାର୍‌ । ପେରି ତଡ଼ାନ୍‌ କଡ଼କକ୍‌ରା ଆଏଣ୍ତା ସାତା ସର୍ହାନ୍‍ ଆକା ୱାନି ୱେନ୍‌କାରି ତଡ଼ାନ୍‌ ତଡ଼ାନ୍‌ତି ଆଡ଼୍‌ସିଙ୍ଗ୍‌ ପେଡ଼ିଆତାନ୍‌ ।
MAT 22:26 ମାତର୍‌ ଇୟାୱାନି ୱେନ୍‌କାରିକାନ୍‌, ମଜାୟ୍‍ଏନ୍‌ ମାରି ସାରାସାରି ସାତ୍‌ଲୋକ୍‌ ସାନ୍ଦି ଆୟାୱାଜା ଗଟାତାତ୍‌ ।
MAT 22:27 ସାରାସାରିୱେନ୍‌କା ଆୟା ଆଇମା ସାତା ସୋର୍‌ର୍ହାତ୍‌ ।
MAT 22:28 ଆମା ନାଣ୍ତିଙ୍ଗ୍‌ ସାତି ଲୋକୁ ମାରିଡ଼େସିନିଙ୍ଗିଁନାର୍‌, ଇୟା ଆଇମା ଏ ଆଇମା ଇଜି ସିନାଆନାତ୍‌ ? ୱିଜେର୍‌ତ ତାନିଙ୍ଗ୍‌ ପେଡ଼ି ଆତାମାର୍ହାର୍‌ ।”
MAT 22:29 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ଏସ ବାୟାର୍ ! ଦାର୍ମୁସାସ୍ତ୍ର ନି ମାପୁରୁଦି ସାକ୍ତି ନେସ୍‌ଇଦେର୍‌ ।
MAT 22:30 ମାରିଡ଼େସିନିଙ୍ଗିଁନି ୱେନ୍‌କା ସାତି ଲୋକୁ ୱିଜେରେ ମୁସ୍‌କୁପୁର୍‌ତି ଦୁତ୍‍କା ୱାଜା ତେବାନାର୍‌ । ୱାର୍‌ ପେଡ଼ିଆଏର୍‌ କି ପେଡ଼ି କିଏର୍‌ ।
MAT 22:31 ସାତି ଲୋକୁ ମାରିଡ଼େସିନିଙ୍ଗିଁନି ବିସୟ୍‌ତାନ୍‌ ମାପୁରୁ ଆମାକା ୱେର୍‌ତାମାନାନ୍‌, ମିର୍‌ ଇନିକା ସାସ୍ତ୍ରଦୁ ଏସ୍‌କାଙ୍ଗ୍‌ ପଡ଼ାଇଦେର୍‌ ?
MAT 22:32 ମାପୁରୁ ଇର୍‌ଆମାନାନ୍‌, ମାପ୍‌ ଅବ୍ରାହାମ, ଇସ୍‌ହାକ୍‌ ମାରି ଜାକୁବଦି ମାପୁରୁ ।” “ୱାନ୍‌ ଜିବନ୍‌ମାନିୱାରି ମାପୁରୁ ସାତିୱାରି ମାପୁରୁ ଆଏନ୍‍ ।”
MAT 22:33 ଲୋକୁ ଜିସୁଦି ସିକିୟା ୱେନ୍‌ଞ୍ଜି କାବାଆତାର୍‌ ।
MAT 22:34 ଏସ୍ତିୱାଲେ ପାରୁସିର୍‌ ୱେର୍‌ଆର୍‌ ଜେ ଜିସୁ ସାଦୁକିରିଙ୍ଗ୍‌ ଚୁପ୍‌କିବିସ୍‌ତାମାନାନ୍‌, ୱାର୍‌ ଉନ୍‌ଡ୍ରେମାନୁ ଆଜି ଜିସୁଦି ଲାକ୍‌ତୁ ୱାତାର୍‌
MAT 22:35 ମାରି ୱାରି ମାଣ୍‌କୁ ଅରେନ୍‍ ଦାର୍ମୁଗୁରୁ ଜିସୁଙ୍ଗୁଁ ଗୁଟାଦୁ ଆରେପ୍‌ତେଙ୍ଗ୍‌ ଇଜି ଉନ୍‌ଡ୍ରି ମାଟା ୱେନ୍‌ବାତାନ୍‌,
MAT 22:36 ୱାନ୍‌ ୱେନ୍‌ବାତାନ୍‌ “ଗୁରୁ, ମୋସାଦି ନିୟମ୍‌ତୁ ଆମା ଆଜ୍ଞା ୱିଜେରିମାଣ୍‌କୁ ପେରିକା ?”
MAT 22:37 ଜିସୁ ୱାନିଙ୍ଗ୍‌ ଇର୍ହାନ୍‌, ମି ପ୍ରବୁ ମାପୁରୁଙ୍ଗ୍‌ ପୁରାୱିଜୁ ଜିବନ୍‌, ପୁରାୱିଜୁ ମେନ୍ଧଲ୍‌ ମାରି ପୁରାୱିଜୁ ମନ୍ ସିଜି ଜିବନ୍‌ ନଆ ।
MAT 22:38 ଇକା ଆଜିନାତ୍‍ ୱିଜେରିମାଣାନ୍‌ ପେରିକା ମାରି ପେରିମାଟା ।
MAT 22:39 “ମାରି ଉନ୍‌ଡ୍ରି ପେରି ଆଜ୍ଞା ଆଜିନାତ୍‍, ମି ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତିୱାଜା ନୋଦୁ ।
MAT 22:40 ଇୟା ରୁଣ୍ତି ମାଟେଙ୍ଗ୍‌ ମୁସ୍‌କୁ ମୋସାଦି ୱିଜୁ ନିୟମ୍‌ ମାରି ବାବବାଦିରି ସିକିୟା ଆସାଇଡ୍‍ନାତ୍‍ ।”
MAT 22:41 ଏସ୍ତିୱାଲେ ପାରୁସିର୍‌ ଉଣ୍ତାତା ମାର୍ହାର୍‌, ଜିସୁ ୱାରିଙ୍ଗ୍‌ ୱେନ୍‌ବାତାନ୍‌,
MAT 22:42 “କ୍ରିସ୍ତ ଅର୍ତ ମସିହଦି ବିସୟ୍‌ତାନ୍‌ ମିର୍‌ ଇନିକା ଅଡ଼୍‍ବିଜିନିଦେର୍‍ ? ୱାନ୍‌ ଏ କୁଟୁମ୍‌ ?” ୱାର୍‌ ଇର୍ହାର୍‌, “ୱାନ୍‌ ଦାଉଦଦି କୁଟୁମ୍‌ ।”
MAT 22:43 ଜିସୁ ୱେନ୍‌ବାତାନ୍‌, ଆର୍‌ତିଙ୍ଗ୍‌ ଦାଉଦ ମସିହଙ୍ଗ୍‌ “ନା ପ୍ରବୁ” ଇଜି ଏନ୍ଦା ଇର୍ହାମାନାନ୍‌ ? ଇରିଙ୍ଗ୍‌ ଆତ୍ମା ୱେର୍‍ନିମାଣାନ୍‍ ୱାନ୍‌ ରାସ୍‌ତାମାନାନ୍‌,
MAT 22:44 ପ୍ରବୁ ନା ପ୍ରବୁଙ୍ଗ୍‌ ଇର୍ହାନ୍‌, ମାପ୍‌ ମି ସାତ୍ରୁରିଙ୍ଗ୍ ମି କାଲ୍‌କା ଆଡ୍‍ଗି କିଇ ସାନ୍ଦି ମିର୍‌ ମା ଉଣି ତରିନ୍‌ ବାସ୍‌ତୁ ।
MAT 22:45 ଜଦି ଦାଉଦ ମସିହଙ୍ଗ୍‌ ନା ପ୍ରବୁ, ଇଜି ମାନାତା ମାନାନ୍‌, ଆର୍‌ତିଙ୍ଗ୍‌ କ୍ରିସ୍ତ ଅର୍ତ ମସିହ ଏଣ୍ତେସ୍‌ ଦାଉଦତି ମାରିନ୍‌ ଆଦେଙ୍ଗ୍‌ ଆଟ୍‍ନାନ୍‍ ?
MAT 22:46 ଜିସୁଙ୍ଗୁଁ ଏନ୍‌ ଇୟାତାନି ଉତର୍‌ ସିଦେଙ୍ଗ୍‍ ଆଟ୍‍ଏତାର୍‍ । ଆୟା ନାଣ୍ତିରାନ୍‌ ଏନ୍‌ ୱାନିଙ୍ଗ୍‌ ମାରି ପ୍ରସ୍ନ ୱେନ୍‍ବାଦେଙ୍ଗ୍‍ ସାସ୍‌ କିଏତାର୍‌ ।
MAT 23:1 ଜିସୁ ସିସୁରିଙ୍ଗ୍‌ ମାରି ୱିଜୁଲୋକାଙ୍ଗ୍‌ ଇର୍ହାନ୍‌,
MAT 23:2 ଦାର୍ମୁଗୁରୁ ମାରି ପାରୁସିର୍‌ ମୋସାଦି ନିୟମ୍‌ତିଙ୍ଗ୍‌ ସିକିୟା ସିଦେଙ୍ଗ୍‍ ଅଦିକାର୍‌ ପୟ୍‍ତିମାନି ୱେର୍‌ନିକାର୍‌,
MAT 23:3 ଆଦେଙ୍ଗ୍‌ ୱାର୍‌ ଆମାକା କିଦେଙ୍ଗ୍‌ ୱେର୍‌ସିନାର୍‌, ଆକା କିଦୁ । ମାତର୍‌ ୱାରି ପାଣି ଇସାବ୍‌ତାନ୍‌ ପାଣି କିମାଟ୍‌ । ଇରିଙ୍ଗ୍‌ ୱାର୍‌ ନିଜେ ୱେର୍‌ସିମାନି ସିକିୟା ଇସାବ୍‌ତାନ୍‌ ପାଣି କିଏର୍‌ ।
MAT 23:4 ୱାରି ସିକିୟାୱିଜୁ ଲୋକା ମୁଟାମ୍‌ ମୁସ୍‌କୁ ନାଣ୍ତ ବଜୁ ୱାଜା ତିଗ୍‌ନାସିନାର୍‌, ମାତର୍‌ ଆୟାୱିଜୁ ବଜୁ ପିଣ୍ତିଦେଙ୍ଗ୍‌ଇଜି ନିଜେଦି ଡ଼ାସ୍‌କାଦାନ୍‌ ବା ଅଡ଼ପ୍‍ବା ସାକା କିଏର୍‌ ।
MAT 23:5 ୱାର୍‌ ଲୋକାଙ୍ଗ୍‌ ତର୍‌ତେଙ୍ଗ୍‍ଁ ଇଜି ୱିଜୁ ପାଣି କିନାର୍‌ । ସୁଡ଼ୁଦୁ, ୱାର୍‌ ସାସ୍ତ୍ର ପଦ୍‌ ରାସାତିମାନି ଏସି ଏସି ମାଟେଙ୍ଗ୍‌ ମୁଜୁଦୁ ନି ରେକାଦୁ ତରାତାମାନାର୍‌ । ମାରି ସୁଡ଼ୁଦୁ, ୱାର୍‌ ଆରାନିମାନି ପେରି ପେରି ୱାତିଦି ଜାଲିଙ୍ଗ୍‌ ୱିଜୁ ଏସ ନିରିକା ।
MAT 23:6 ୱାର୍‌ ବଜିଙ୍ଗାଁ ନେଗି ବାଡି ମାରି ପାର୍‍ତନାକିନି ଇଲ୍‌କାଙ୍ଗ୍‌ ପେରି ବାଡି ଅଦିକାର୍‌ କିଦେଙ୍ଗ୍‌ ନେଗେନ୍‌ଅଡ଼୍‌ବିନାର୍‌ ।
MAT 23:7 ମାରି ସାତାସାଉକାଦୁ ମାଡ଼ିସ୍‍କିନିକା ପୟ୍‌ଦେଙ୍ଗ୍‌ ମାରି ଲୋକା ମାଣାନ୍‌ ଏ ଗୁରୁ, ଇଜି ମାନାଦେଙ୍ଗ୍‌ ନେଗେନ୍‌ଅଡ଼୍‌ବିନାର୍‌ ।
MAT 23:8 ମାତର୍‌ ମିଙ୍ଗିଁ ଏନ୍‌ ଗୁରୁ ଇଜି କୁକ୍‌ନିକା ଟିକ୍‌ ସିଲେ । ଇରିଙ୍ଗ୍‌ ମିର୍‌ ୱିଜିଦେର୍‌ ନିଜେନିଜେଦି ତଡ଼ାନ୍‌କୁ ମାରି ମି ଗୁରୁ କେବଲ୍‌ ଅରେନ୍‌ନେ ।
MAT 23:9 ମାରି ଦୁନିଆଦୁ ମିର୍‌ ଏଙ୍ଗ୍‌ବା ବୁବା ଇଜି ମାନାନିକା ଟିକ୍‌ ସିଲେ, ଇରିଙ୍ଗ୍‌ ମି ବୁବା ଅରେନ୍‌ନେ, ୱାନ୍‌ ମୁସ୍‌କୁପୁର୍‌ତୁ ମାନାନ୍‌ ।
MAT 23:10 ମିଙ୍ଗିଁ ମାଲିକ୍‌, ଇଜି ଏନ୍‌ବା କୁକ୍‌ମାକିନ୍‌, ଇରିଙ୍ଗ୍‌ ମି ଅରେନ୍‌ମାତର୍‌ ମାଲିକ୍‌ ଆଜିନାନ୍‍ ମସିହ ।
MAT 23:11 ମି ଲୋଇରାନ୍‌ ଏନ୍‌ ୱିଜେରିମାଣାନ୍‌ ପେରିକାନ୍‌, ୱାନ୍‌ ମି ସେବା କିପିନ୍‌ ।
MAT 23:12 ଏନ୍‌ ନିଜେଦିଙ୍ଗ୍‌ ମୁସ୍‌କୁ ପେରାନାନ୍‌, ୱାନିଙ୍ଗ୍‌ ଆଡ୍‍ଗି କିନାର୍‌ ମାରି ଏନ୍‌ ନିଜେଦିଙ୍ଗ୍‌ ଆଡ୍‍ଗି କିଆନାନ୍‌, ୱାନିଙ୍ଗ୍‌ ମୁସ୍‌କୁ ପେରିସିକିନାର୍‌ ।
MAT 23:13 ଏ ଦାର୍ମୁଗୁରୁ ନି ପାରୁସିର୍‌ ମି ୱେନ୍‌କାରି ଦସ୍‌ ଏସା ବୟ୍‌ଙ୍କାର୍‌ ! ଏ ସାଲାକି ଦାର୍ମୁଦଲ୍‌, ମୁସ୍‌କୁପୁର୍‌ରାଜିଦି ଡ଼ୁଗୁନି ସେର୍‌ଲା କେର୍‌ତିମାନିଦେର୍‌ । ମିର୍‌ ନିଜେ ଆବେ ଡ଼ୁଗୁଇଜିନିଦେର୍‌ ମାରି ଆମାକାର୍‌ ଡ଼ୁଗୁଦେଙ୍ଗ୍‌ ବଦାକିଜିନାର୍‌, ୱାରିଙ୍ଗ୍‌ ସାରି ଡ଼ିସ୍‌ଇଜିନିଦେର୍‌ ।
MAT 23:14 ଏ କପଟି ଦାର୍ମୁଗୁରୁ ନି ପାରୁସିର୍‌, ମି ଦସ୍‌ ଏସା ତାଗ୍‌ଇକାଆନାତ୍‌ । ଇରିଙ୍ଗ୍‌ ମିର୍‌ ସାଲାକିଦାନ୍‍ ନିର୍‌ଇ ପାର୍‌ତାନା କିନି ଦାପେ ଦାପେ ରାଣ୍ତି ଆଇମେକା ଇଲୁକୁ ୱିଜୁ ଡ଼ିବିସ୍‌ସୋ ଅନିଦେର୍‌; ଆଦେଙ୍ଗ୍‌ ମିର୍‌ ନାଣ୍ତ ଦଣ୍ଡ୍‌ ପଇନିଦେର୍‌ ।
MAT 23:15 ଏ କପଟି ଦାର୍ମୁଗୁରୁ ନି ପାରୁସିର୍‌, ମି ଦସ୍‌ ଏସା ତାଗ୍‌ଇକାଆନାତ୍‌ । ମିର୍‌ ସାମୁଦୁର୍‌ ନାସି ଆଇ ଦେସ୍‌କାଙ୍ଗ୍‌ ସୋଲ୍‌ସି ଅରେନ୍‍ୱାନିଙ୍ଗ୍‍ ମି ଦାର୍ମୁଦୁ ମିସାକିଦେଙ୍ଗ୍‌ ଇଜି ପୟ୍‌ଜିବୁଲାଜିନିଦେର୍‌ । ମାତର୍‌ ଆୟାୱାଜା ଅରେନ୍‍ୱାନିଙ୍ଗ୍‍ ପୟ୍‌ତିଙ୍ଗ୍‌, ୱାନିଙ୍ଗ୍‌ ନରକଦୁ ଦଣ୍ଡ୍‌ ପୟ୍‌ଦେଙ୍ଗ୍‌ ମିମାଣାନ୍‌ ଦୁଇଗୁଣୁ ନାଣ୍ତ ସାକା କିଜିନିଦେର୍‌ ।
MAT 23:16 ଏ କାଣା ସାରିବୁଲାନିକାର୍‌, ମି ଦସ୍‌ ଏସ ତିଲାନିକା । ମିର୍‌ ସିକିୟା ସିଜିମାନିଦେର୍‌, ଏନ୍‌ ମନ୍ଦିର୍‌ ଦର୍‌ତାନ୍‌ ପାରାମାଣ୍‌ କିତିଙ୍ଗ୍‌, ଆକା ୱାନ୍‌ କିଦେଙ୍ଗ୍‌ କୁସାମାତ୍‌ ସିଲେ; ମାତର୍‌ ମନ୍ଦିର୍‌ତୁ ମାନି ବାଙ୍ଗାଁରାମ୍‍ ଦର୍‌ତାନ୍‌ ଏନ୍‌ ପାରାମାଣ୍‌ କିତିଙ୍ଗ୍‌ ୱାନିଙ୍ଗ୍‌ ଆକା କିଦେଙ୍ଗ୍‌ ପଡ଼ାନାତ୍‌ ।
MAT 23:17 ଏ କାଣା ବୁଦି ସିଲିକିଦେରା, ବାଙ୍ଗାଁରାମ୍‍ ପେରିକା ନୋ ବାଙ୍ଗାଁରାମ୍‍ତିଙ୍ଗ୍‌ ପବିତ୍ର କିଜିମାନି ମନ୍ଦିର୍‌ ପେରିକା ?
MAT 23:18 ମିର୍‌ ବା ସିକିୟା ସିଜିମାନିଦେର୍‌, ଅରେନ୍‍ ଲୋକୁ ବେଦି ଦର୍‌ତାନ୍‌ ପାରାମାଣ୍‌ କିତିଙ୍ଗ୍‌, ୱାନ୍‌ ଆକା କିଦେଙ୍ଗ୍‌ କୁସାମାତ୍‌ ସିଲେ । ମାତର୍‌ ବେଦି ମୁସ୍‌କୁ ଇଡିନିମାନି ପୁଜାସିନି ଦର୍‌ତାନ୍‌ ପାରାମାଣ୍‌ କିତିଙ୍ଗ୍‌, ଆକା ନିୟମ୍‌ସିଲେତ୍‌ ।
MAT 23:19 ମିର୍‌ ଏସା କାଣାର୍‌, ଆମାକା ପେରି ପୁଜାସିନିକା ନୋ ପୁଜାସିନିତାନିଙ୍ଗ୍‌ ପବିତ୍ର କିଜିମାନି ବେଦି ?
MAT 23:20 ମାରି ଏନ୍‌ ବେଦି ଦର୍‌ତାନ୍‌ ପାରାମାଣ୍‌ କିତିଙ୍ଗ୍‌, ୱାନ୍‌ ବେଦି ମାରି ଆୟା ମୁସ୍‌କୁ ମାନି ୱିଜୁ ପୁଜାସିନି ସାମାନ୍‌କା ଦର୍‌ତାନ୍‌ ପାରାମାଣ୍‌ କିନାନ୍‌ ।
MAT 23:21 ଏନ୍‌ ମନ୍ଦିର୍‌ ଦର୍‌ତାନ୍‌ ପାରାମାଣ୍‌ କିତିଙ୍ଗ୍‌ ୱାନ୍‌ ମନ୍ଦିର୍‌ ମାରି ଆବେନୁ ବାସାଜିମାନି ମାପୁରୁ ଦର୍‌ତାନ୍‌ ପାରାମାଣ୍‌ କିନାନ୍‌ ।
MAT 23:22 ମାରି, ଏନ୍‌ ମୁସ୍‌କୁପୁର୍‌ତି ଦର୍‌ତାନ୍‌ ପାରାମାଣ୍‌ କିତିଙ୍ଗ୍‌, ମାପୁରୁଦି ରାଜାଗାଦି ମାରି ତାନିମୁସ୍‌କୁ ବାସ୍‌ତିମାନି ମାପୁରୁ ଦର୍‌ତାନ୍‌ ପାରାମାଣ୍‌ କିନାନ୍‌ ।
MAT 23:23 ଏ କପଟି ଦାର୍ମୁଗୁରୁ ନି ପାରୁସିର୍‌, ମି ଅବସ୍ତା ବେସି ତାଗ୍‌ଇକାଆନାତ୍‌ ! ମିର୍‌ ମାପୁରୁଦି ଉଦେସ୍‌ଦାନ୍‌ ପୋଦିନା, ପାନ ମଊରି ମାରି ଜିରାଦି ବା ଦସ୍‍ବାଗ୍‍ତାନ୍‍ ଉଣ୍ତ୍ରି ବାଗ୍ ମାପୁରୁଙ୍ଗ୍‍ଁ ଦାନ୍‌ ସିନିଦେର୍‍; ମାତର୍‌ ନ୍ୟାୟ୍‌ ବିସାର୍‌, ଦୟା, ବିସ୍‌ବାସ୍‌ ଇୟାୱିଜୁ ନିୟମ୍‌ତି ପେରି ପେରି ବିସୟ୍‌କୁ ୱେଡ଼ା କିଜିନିଦେର୍‌ । ନିୟମ୍‌ତି ଇୟା ବିସୟ୍‌କୁ ଆଗ୍‌ଡ଼ି ଅବ୍ୟାସ୍‌ କିନିକା ମାନାତ୍‌ ।
MAT 23:24 ଏ କାଣା ସାରିଦୁବୁଲାନିକାର୍‌, ମିର୍‌ ଇନିକା ଉଣିୱାଲେ ଆନାତ୍‌ ଆବେ ୱିଜା ଆର୍‍ନାମାନାତ୍‍ ଇଜି ତାନିଙ୍ଗ୍‌ ଜଲପ୍‌ନିଦେର୍‍, ମାତର୍‌ ଉଟ୍‌ତିଙ୍ଗ୍‌ ଡ଼ିଙ୍ଗିଁନିଦେର୍‌ ।
MAT 23:25 ଏ କପଟି ଦାର୍ମୁଗୁରୁ ମାରି ପାରୁସିର୍‌, ଏସା ବୟଙ୍କାର୍‍ ମି ସାରାସାରି ବୁଲାନିକା । ମିର୍‌ ଡୁବାଇ ନି ସାଡ଼ାୱାଦି ଆତେରେ ତରିନ୍‌ ନେଗେନ୍‍ ନୋର୍‌ଜିମାନିଦେର୍‌, ମାତର୍‌ ଆୟାୱାନିକା ଲୋଇ ଗିଦ୍‌ରି ନି ଆକାର୍‍ ବର୍ତି ଆତାମାନାତ୍‌ ।
MAT 23:26 “ଏ କପଟି ଦାର୍ମୁଗୁରୁ ମାରି ପାରୁସିର୍‌, ଆଗ୍‌ଡ଼ି ଡୁବାଇତି ଲୋଇରିକା ନେଗେନ୍‌ ନର୍‌ଦୁ, ଏଣ୍ତେସ୍‌ ଆବେଣି ଆତ୍‌ରେଦିକା ବା ନେଗେନ୍‍ ନୋର୍‌ଆୟ୍‌ଆନାତ୍‌ !
MAT 23:27 “ଏ କପଟି ଦାର୍ମୁଗୁରୁ ନି ପାରୁସିର୍‌ ! ମିର୍‌ ଏସା ନାଣ୍ତ ଦସ୍‌ ବଗାନିଦେର୍‌ । ମିର୍‌ ୱିଜୁ ଆତେରେ ତରିନ୍‌ ସୁନ୍‌ତିରିପାତିମାନି ମୁସ୍‌ତିବାଡିଦି ୱାଜା । ଆକା ଆତେରେ ସୁନ୍ଦର୍‌ ତର୍‌ନାତ୍‌, ମାତର୍‌ ଲୋଇ ପେଡେକ୍‌ ନି ସାବ୍‌ତି ମାଡ଼ାଦାନ୍‌ ବର୍ତି ।
MAT 23:28 ଆୟାୱାଜା ମିର୍‌ ବା ଆତେରେ ଲୋକା ଆଗ୍‌ଡ଼ି ନେଗେନ୍‌ ତର୍‌ନିଦେର୍‌, ମାତର୍‌ ମି ଲୋଇରିକା ସାଲାକି ନି ପାପ୍‌ତୁ ବର୍ତି ।
MAT 23:29 “ଏ କପଟି ଦାର୍ମୁଗୁରୁ ନି ପାରୁସିର୍‌ ! ମି ଉଣ୍ତିଙ୍ଗ୍‌ ଇକା ଏସା ବୟ୍‌ଙ୍କାର୍‌ । ବାବବାଦିରି ଉଣ୍ତିଙ୍ଗ୍‌ ମିର୍‌ ସୁନ୍ଦର୍‌ତି ମୁସ୍‌ନିବାଡି ତିଆର୍‌କିଜିନିଦେର୍‌ ମାରି ଦାର୍ମୁଲୋକାରି ଏତ୍‌କିନି ମୁଣ୍ତା ୱିଜୁ ରସ୍‍ସିନିଦେର୍‌ ।
MAT 23:30 ମାରି ମିର୍‌ ଇଜିନିଦେର୍‌, ଜଦି ମି ପୁର୍ବେଦିଡକ୍‌ରାଦାଦାରି ବେଡ଼ାଦୁ ମିର୍‌ ତେବାତିଙ୍ଗ୍‌ମାନ୍ଦି, ଆର୍‌ତିଙ୍ଗ୍‌ ୱାରି ୱାଜା କିଇତିଦେର୍‌ମାନ୍ଦି ମାରି ବାବବାଦିରିଙ୍ଗ୍ ଡାକ୍‌ଇତିଦେର୍‌ମାନ୍ଦି ।
MAT 23:31 ଇୟା ମାଟା ୱେର୍‌ନି ମାଣ୍‌କୁ ସତ୍‌ ଇଜି ମାନାଜିନିଦେର୍‌ ଜେ ମିର୍‌ ବାବବାଦିରିଙ୍ଗ୍ ସାୟାମାର୍‌ଗା ଡାକ୍‌ତିୱାରି କୁଟୁମ୍‌ ।
MAT 23:32 ଆର୍‌ତିଙ୍ଗ୍‌ ମିର୍‌ ଆଗ୍‌ଡ଼ି ସାଦୁ, ମି ପୁର୍ବେଦିଡକ୍‌ରାଦାଦାରି ଆରାମ୍‌ କିତି ପାଣିଦିଙ୍ଗ୍‌ ପୁରା କିଦୁ ।
MAT 23:33 ଏ ସାରାସ୍‍କୁ ! ଏ ବିସ୍‌ମାନି ସାରାସ୍‍ତି କଡ଼ର୍‌ ! ମିର୍‌ ନରକ ଦଣ୍ତ୍‌ତାନ୍‌ ରକ୍ଷାପୟ୍‌ନାପ୍‌ ଇଜି ଆସାକିଜିନିଦେର୍‌ ?
MAT 23:34 ଆଦେଙ୍ଗ୍‌ ନାନ୍ ୱେର୍‌ସିନା; ନାନ୍ ମି ଲାକ୍‌ତୁ ବାବବାଦିର୍, ଗୁରୁର୍‍ ମାରି ବୁଦିମାନିୱାରିଙ୍ଗ୍‌ ପୋକ୍‌ତାନା; ୱାରି ଲୋଇରାନ୍‌ ଏଙ୍ଗ୍‌ ଏଙ୍ଗ୍‌ ସାୟାମାର୍‌ଗା ଡାକ୍‌ନିଦେର୍‌, ଏସ ଲୋକାଙ୍ଗ୍‌ କ୍ରୁସଦୁ ସାୟାମାର୍‌ଗା ଡାକ୍‌ନିଦେର୍‌ ମାରି ଆଇୱାରିଙ୍ଗ୍‌ ପାର୍‍ତନାକିନି ଇଲ୍‌କାଙ୍ଗ୍‌ କର୍‌ଡା ଡାକ୍‌ସି ଉନ୍‌ଡ୍ରି ଗାଡ଼୍‌ତାନ୍‍ ମାରି ଉନ୍‌ଡ୍ରି ଗାଡ଼୍‌ତୁ ପେର୍‌ନିଦେର୍‌ ।
MAT 23:35 ଆମା ଦାର୍ମୁ ହେବଲ୍‌ତି ସାତି ମାଣାନ୍‌ ଆମା ବେରିକିୟଦି ମାରିସି ଜିକରିୟଙ୍ଗ୍‌ ମିର୍‌ ମନ୍ଦିର୍‌ତି ପବିତ୍ର ବାଡିଦୁ ନି ପୁଜାସିନି ବେଦି ନାଡ଼୍‌ମି ସାୟାମାର୍‌ଗା ଡାକ୍‌ତିଦେର୍‌, ୱାନି ସାତି ସାନ୍ଦି ଦୁନିଆଦୁ ଏସଲୋକ୍‌ ୱିଜୁ ଦାର୍ମୁଦି ଲୋକାଙ୍ଗ୍‌ ସାୟାମାର୍‌ଗା ଡାକ୍‌ତିମାନିଦେର୍‌ । ଆୟା ଦୋସ୍‌ସିଲି ଲୋକା ସାତିମାନି ଦଣ୍ଡ୍‌ ମି ମୁସ୍‌କୁ ୱାନାତ୍‌ ।
MAT 23:36 ନାନ୍ ମିଙ୍ଗିଁ ସତ୍‌ ୱେର୍‌ସିନା, ଇୟାୱିଜୁ ଲୋକାଙ୍ଗ୍‌ ସାୟାମାର୍‌ଗା ଡାକ୍‌ତି ଉଣ୍ତିଙ୍ଗ୍‌ ଇୟା ଜଗ୍‌ତି ଲୋକୁ ଦଣ୍ଡ୍‌ ବଗାନିଦେର୍‌ ।
MAT 23:37 “ଏ ଜିରୁସାଲାମ୍‍, ଏ ଜିରୁସାଲାମ୍‍ ! ମିର୍‌ ବାବବାଦିରିଙ୍ଗ୍ ସାୟାମାର୍‌ଗାଡାକ୍‌ସିନିଦେର୍‌ ମାରି ମାପୁରୁ ପୋକ୍‌ତାତି କାବୁର୍‌ ଅନିତାନି ୱାରିଙ୍ଗ୍‌ କାଲ୍‌କୁ ପୋକ୍‌ସି ଡାକ୍‌ସିନିଦେର୍‌ । କରୁ ତାନି ରେକା ଆଡ୍‍ଗି ପିଲେକାଙ୍ଗ୍‌ ଆସ୍‌ସି ଇଡ୍‌ନି ୱାଜା, ମି ଲୋକାଙ୍ଗ୍‌ ନା ରେକା ଆଡ୍‍ଗି ପିଡ଼୍‍କିନି ଉଣ୍ତିଙ୍ଗ୍‌ ନାନ୍ ଏସ ଦେବେଙ୍ଗ୍‌ ବଦାକିତା । ମାତର୍‌ ମିର୍‌ ନାଙ୍ଗିଁ ଆକା କିଦେଙ୍ଗ୍‌ ସିଇତିଦେର୍‌ ।
MAT 23:38 ଆଦେଙ୍ଗ୍‌ ମି ମନ୍ଦିର୍‌ ୱିର୍‍ଜାଜି ମାରି ୱାରିକା ଆନାତ୍‌ ।
MAT 23:39 ନାନ୍ ମିଙ୍ଗିଁ ୱେର୍‌ସିନା, ‘ପ୍ରବୁଦି ଦର୍‌ତାନ୍‌ ଏନ୍‌ ୱାଜିନାନ୍‍, ୱାନ୍‌ ଦନ୍ୟ,’ ମିର୍‌ ଇୟା ମାଟା ଇନ୍‌ଇ ସାନ୍ଦି ଇଲେଇରାନ୍‌ ନାଙ୍ଗିଁ ମାରି ସୁଡ଼ୁଦେଙ୍ଗ୍‌ ଆଟ୍‍ଇଦେର୍‍ ।”
MAT 24:1 ଜିସୁ ମନ୍ଦିର୍‌ତାନ୍‌ ସସି ସନିୱାଲେ ସିସୁର୍‍ ମନ୍ଦିର୍‌ତି ମେଡ଼େଇଲୁକୁ ୱିଜୁ ତର୍‌ନି ଉଣ୍ତିଙ୍ଗ୍‌ ୱାନି ଲାକ୍‌ତୁ ୱାତାର୍‌ ।
MAT 24:2 ଜିସୁ ଇର୍ହାନ୍‌, “ଇଲେଇ ଗିଦେ ଇୟାୱିଜୁ ସୁଡ଼ୁଜିନିଦେର୍‌ । ନାନ୍ ମିଙ୍ଗିଁ ସତ୍‌ ଇଜିନା, ଇୟା ମନ୍ଦିର୍‌ତି ଉନ୍‌ଡ୍ରି କାଲୁ ଆଇ କାଲୁ ମୁସ୍‌କୁ ତେବାଉ, ୱିଜୁ ବୁମିଦୁମିସାନେ ।”
MAT 24:3 ଜିସୁ ଜିତ ଗରନ୍‌ ମୁସ୍‌କୁ ବାସ୍‌ତି ମାରିଇୱାଲେ ସିସୁର୍‍ ୱାନି ଲାକ୍‌ତୁ ନେସ୍‌ଇୱାଜା ୱାଜି ୱେନ୍‌ବାତାର୍‌, “ଇୟାୱିଜୁ ଏସ୍‌କାଙ୍ଗ୍‌ ଗଟାନାତ୍‌, ଆକା ମାଙ୍ଗିଁ ଇନିଆ । ଇନିକା ଗଟାତିଙ୍ଗ୍‌ ମାପ୍‌ ନେସ୍‌ନାପ୍‌ ଜେ ନିନ୍‌ ୱାନି ବେଡ଼ା ଆତାତ୍‌ନି ମାରି ଇୟା ଜୁଗ୍‌ସେସ୍‌ ଆନାତ୍‌ ।”
MAT 24:4 ଜିସୁ ୱାରିଙ୍ଗ୍‌ ଇର୍‌ଆନ୍‌, ଜାଗାର୍‌ତା ମାନ୍‌ଡ୍ରୁ । ଏନ୍‌ ଏଣ୍ତେସ୍‌ ମିଙ୍ଗିଁ ବାୟା କିଏନ୍‌ ।
MAT 24:5 ଗାଦିଲୋକ୍‌ ନା ଦର୍‌ ଆସ୍‌ସି ୱାଜି ଇନାର୍‌, ନାନ୍ ନେ କ୍ରିସ୍ତ ଅର୍ତ ମସିହ । ଇକା ଇନ୍‌ଞ୍ଜି ୱାର୍‌ ଗାଦିଲୋକାଙ୍ଗ୍‌ ବାୟାକିନାର୍‌ ।
MAT 24:6 ମିର୍‌ ଲାକ୍‌ତୁ ସାଲାତିମାନି ଜୁଦ୍‍ତି ଆଉଲି ୱେନିଦେର୍‌ ମାରି ଆକ ସାଲାତିମାନି ଜୁଦ୍‍ତି କାବୁର୍‌ ୱେନିଦେର୍‌ । ମାତର୍‌ ତିଲାମାଟ୍‌ । ଇୟାୱିଜୁ ପୁରା ଗଟାନାତ୍‌, ମାତର୍‌ ଇୟାତାନି ଅର୍ତ ଆଏତ୍‍ ଜେ ଜୁଗ୍‌ ସେସ୍‌ଆନି ଦିନ୍‌ ଲାକ୍‌ତୁ ।
MAT 24:7 ଦେସ୍‌ ଦେସ୍‌ତି ଲୋଇ ଜୁଦ୍‍ ସାଲାନାତ୍‌, ଉନ୍‌ଡ୍ରି ରାଜି ଆଇ ରାଜି ମୁସ୍‌କୁ ଡାକ୍‌ନାତ୍‌ । ୱିଜୁ ତରିନ୍‌ ଉନ୍‌ଣ୍ତେ ତିନ୍‌ଡ୍ରେଙ୍ଗ୍‌ ପୁଟ୍‌ଏତ୍‌ ମାରି ବୁମିକମ୍ପ ଆନାତ୍‌ ।
MAT 24:8 ମାତର୍‌ ଇୟାୱିଜୁ ଜନମ୍‌କିନି କାସ୍ଟୁଦି ଆରାମ୍‌ ମାତର୍‌ ।
MAT 24:9 ମିର୍‌ ଆସାୟ୍‌ଆଜି ଦୁଃକ୍‌କାସ୍ଟୁ କିନି ଉଣ୍ତିଙ୍ଗ୍‌ ସର୍‌ପେ କିନାର୍‌ ମାରି ମିଙ୍ଗିଁ ସାୟାମାର୍‌ଗା ଡାକ୍‌ନାର୍‌, ନାବାନ୍‍ ବିସ୍‌ବାସ୍‌ କିତିମାନି ଉଣ୍ତିଙ୍ଗ୍‌ ମିର୍‌ ୱିଜେରି ଲୋକାଦି ମାଣାନ୍‌ କାଡ଼ାଇଆନିଦେର୍‌ ।
MAT 24:10 ନାସ୍ତିୱାଲେ ଗାଦିଲୋକ୍‌ ୱାରି ବିସ୍‌ବାସ୍‌ ଆରାକିନାର୍‌, ନିଜେନିଜେଦିଙ୍ଗ୍‌ କାଡ଼ାଜିସାଜି ନିଜେନିଜେଦି ଉଣ୍ତିଙ୍ଗ୍‌ ଆସିସ୍‌କିଆୟ୍‌ଆନାର୍‌ ।
MAT 24:11 ନାସ୍ତିୱାଲେ ଗାଦିଲୋକ୍‌ ବଣ୍ତ ବାବବାଦିଦିର୍‌ ୱାଜି ଲୋକାଙ୍ଗ୍‌ ବାୟାକିନାର୍‌ ।
MAT 24:12 ମାରି ଅଦାର୍ମୁ ନାଣ୍ତ ଆତାତ୍‌ଆକା ଏସାଲୋକା ମାପୁରୁଙ୍ଗ୍‍ଁ ଜିବନ୍‍ନୋନିକା ସିତିଡ଼ିଆନାତ୍‌ ।
MAT 24:13 ମାତର୍‌ ଏନ୍‌ ସାରାସାରି ୱେନ୍‌କା ସାନ୍ଦି ସାସ୍‌ଆସ୍‌ସି ତେବାନାନ୍‌, ୱାନ୍‌ ରକିୟା ପଇନାନ୍‌ ।
MAT 24:14 ମାପୁରୁଦି ରାଜିଦି ବିସୟ୍‌ତାନ୍‌ ନେଗିକାବୁର୍‌ ୱିଜୁ ଲୋକାଦି ଲାକ୍‌ତୁ ସାକି ସିଦେଙ୍ଗ୍‍ ଇୟା କାବୁର୍‌ ସାରାଦୁନିଆଦି ୱିଜୁ ତରିନ୍‌ ପ୍ରଚାର୍‌ ଆନାତ୍‌ । ତାନେୱେନ୍‌କା ଜୁଗ୍‌ସେସ୍‌ ଆନାତ୍‌ ।
MAT 24:15 ମିର୍‌ ଏସ୍ତିୱାଲେ ବାବବାଦି ଦାନିୟେଲ୍‌ ମାଣାନ୍‌ ୱେର୍‍ଇଆତି ନାସ୍ଟୁକିନି କାଡ଼୍‍ନି ତାନେଙ୍ଗ୍‌ ମନ୍ଦିର୍‌ ପବିତ୍ର ବାଡିଦୁ ନିନିମାନିକା ସୁଣିଦେର୍‌ । ଇୟାତାନି ଅର୍ତ ଇନିକା, ପଡ଼ାଜ ବୁଜାଦୁ ।
MAT 24:16 ନାସ୍ତିୱାଲେ ଆମାଲୋକ୍‍ ୱିଜେରେ ଜିହୁଦା ଗାଡ଼୍‌ତୁ ମାନାର୍‌, ୱାର୍‌ ଗରନ୍‌ ମୁସ୍‌କୁ ଉରୁକ୍‍ସି ସଲିର୍‍ ।
MAT 24:17 ଆମାକାର୍‌ ସାତ୍ ମୁସ୍‌କୁ ମାନାର୍‌, ୱାର୍‌ ଇଲୁ ଲୋଇ ସାମାନ୍‌ପତର୍‌ ଅତେଙ୍ଗ୍‌ ଇଜି ଆଡ୍‍ଗି ୱାଜି ୱେଡ଼ା ନାସ୍ଟୁ କିମାକିନ୍‌ ।
MAT 24:18 ଆମାକାର୍‌ କିଡ଼ିଇଦୁ ସୋଲ୍‌ସି ମାନାର୍‌, ନିଜେଦି ସାଦର୍‌ ତାତେଙ୍ଗ୍‌ ଇଜି ଡ଼େସି ସଲ୍‌ମାକିନ୍ ।
MAT 24:19 ନାସ୍ତିୱାଲେ ପଟାଦୁମାନି ଆଇମାଲୋକ୍‍ ମାରି ଇସ୍ରି କଡ଼ରିଙ୍ଗ୍‌ ଆସ୍‌ସି ପାଲ୍‍ ଉଟ୍‍ପିସ୍‍କିନି ଆଇସିକା ଅବସ୍ତା ଏସ ତାଗ୍‌ଇକା ଆନାତ୍‌ ।
MAT 24:20 ମାପୁରୁଙ୍ଗ୍‌ ପାରାତାନା କିଜିମାନ୍‌ଡ୍ରୁ, ପିନିକାଡ଼ାଦୁ ସିଲିତିଙ୍ଗ୍‌ ରମ୍‌ନିନାଣ୍ତିଆଙ୍ଗାଁ ମିଙ୍ଗିଁ ଏଣ୍ତେସ୍‌ ଉରୁକ୍‌ସି ସନ୍‌ଡ଼୍ରେଙ୍ଗ୍‌ ପଡ଼ାଏତ୍‌ ।
MAT 24:21 ନାସ୍ତିୱାଲେ ଇୟାୱାଜା ନାଣ୍ତକାସ୍ଟୁ ଗଟ୍‌ନା ଜେ, ଦୁନିଆଦି ତିଆର୍‌ଆତିମାଣାନ୍‌ ନେର୍‌ ସାନ୍ଦି ଗଟାଏତ୍‍, ମାରି ଏସ୍‌କାଙ୍ଗ୍‌ବା ଗଟାଏତ୍‍ ।
MAT 24:22 ମାତର୍‌ ଇୟା ଦୁଃକ୍‌ତି ବେଡ଼ାଦିଙ୍ଗ୍‌ ମାପୁରୁ ଉଣା କିତାମାନାନ୍‌, ଆକା ଆଇତିମାରିଙ୍ଗ୍‌, ମାରି ଏନ୍‌ ଜିଜ ମାନ୍‌ଏତାନ୍‌ମାନ୍ଦି । ମାତର୍‌ ୱାନି ଆସ୍‌କିତିମାନି ଲୋକାଙ୍ଗ୍‌ ରକିୟା କିଦେଙ୍ଗ୍‌ ଇଜି ମାପୁରୁ ଆୟା ସମୟ୍‌ତିଙ୍ଗ୍‌ ଉଣା କିତାମାନାନ୍‌ ।
MAT 24:23 ନାସ୍ତିୱାଲେ ଜଦି ଏନ୍‌ ମିଙ୍ଗିଁ ଇନ୍‌ନାନ୍‌, ଇବେନୁ କ୍ରିସ୍ତ ମାନାନ୍‌ ସିଲିତିଙ୍ଗ୍‌ ଆବେନ୍‌ ୱାନ୍‌ ମାନାନ୍‌; ଆକା ବିସ୍‌ବାସ୍‌ କିମାଟ୍‌ ।
MAT 24:24 ଇରିଙ୍ଗ୍‌ ଆପ୍‌ଣାଦିଙ୍ଗ୍‌ କ୍ରିସ୍ତ ସିଲିତିଙ୍ଗ୍‌ ବାବବାଦି ଇନାୟ୍‌ଆଜିମାନି ବଣ୍ତବାବବାଦିର୍‍ ନାସ୍ତିୱାଲେ ତର୍‌ଆୟାଆନାର୍‌ । ୱାର୍‌ କାବାଆନିକା ମାରି ତିଲାନିପାଣି ତର୍‌ସି ମାପୁରୁଦି ଆସ୍‌କିତିମାନି ଲୋକାଙ୍ଗ୍‌ ବାୟାକିନାର୍‌ ।
MAT 24:25 ୱେନ୍‌ଡ୍ରୁ ! ଆୟା ସମୟ୍ ୱାନି ଆଗ୍‍ଡ଼ିନେ ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍‌ତା ସିଜିନା ।
MAT 24:26 ମାରି, ସୁଡ଼ୁଦୁ, ୱାନ୍‌ ବାଲିରାଜିଦୁ ମାନାନ୍‌, ଲୋକୁ ଜଦି ମିଙ୍ଗିଁ ଇୟା ମାଟା ଇନାର୍‌, ଆବେନୁ ସୋଲ୍‌ମାଟ୍‌ । ମାରି ସୁଡ଼ୁଦୁ, ଇବେନୁ ୱାନ୍‌ ବାକ୍‍ରା ଲୋଇ ମାର୍‌ଗିତାମାନାନ୍‌, ଜଦି ଇକା ଇନାର୍‌, ୱାରିଙ୍ଗ୍‌ ବିସ୍‌ବାସ୍‌ କିମାଟ୍‌ ।
MAT 24:27 ମିର୍‌ସିନିକା ଏଣ୍ତେସ୍‌ ୱେଡ଼ାସନି ତରିଟାନ୍‍ ନି ୱେଡ଼ାଆର୍‌ନିତର୍‌ନି ସାନ୍ଦି ବାଦଡ଼୍‍ତିଙ୍ଗ୍‍ ଜାୟ୍‌ କିନାତ୍‌, ଆୟାୱାଜା ମନୁସ୍ୟପୁତ୍ରଦି ୱାନିକା ଗଟାନାତ୍‌ ।
MAT 24:28 “ଏମେମାନୁ ସାତିମାଡ଼ା ମାନାତ୍‌, ଆୟାବାନୁ ଡେଗେଙ୍ଗ୍‌ ଉନ୍‌ଡ୍ରେମାନୁ ଉଣ୍ତାନେ ।”
MAT 24:29 “ଆୟା ଦୁଃକ୍‌କାସ୍ଟୁଦି ବେଡ଼ା ୱିଜିନି ବେଡ଼ାଦୁ ୱେଡ଼ା ସିକାଟି ଆନାତ୍‌ ମାରି ଲେଜୁ ମାରି ଜାୟ୍‌ ସିଏନ୍‌, ମାରି ସୁକେଙ୍ଗ୍‌ୱିଜୁ ବାଦଡ଼ତାନ୍‌ ଆର୍‌ନେ ମାରି ବାଦଡ଼ତି ସାକ୍ତିୱିଜୁ ଇନିଙ୍ଗାଁଆନିଆ ଆନେ ।
MAT 24:30 ତାନେୱେନ୍‌କା ମନୁସ୍ୟପୁତ୍ରଦି ସିନେଙ୍ଗ୍‌ ବାଦଡ଼ତୁ ତର୍‌ନେ ମାରି ମନୁସ୍ୟପୁତ୍ର ମେଗେମାଳାଦାନ୍‌ ପେରି ସାକ୍ତିଦାନ୍‍ ମାରି ଗୌରବ୍‌ଦାନ୍‌ ୱାଜିମାନିକା ସୁଡ଼ୁଜି ଦୁନିଆଦି ୱିଜୁ ବାସାଦି ଲୋକୁ ଆଡ଼ାବାନାର୍‌ ।
MAT 24:31 ବାଜାମରି ଆନାତ୍‌ ମାରି ପୃତିବିଦି ଉନ୍‌ଡ୍ରି କନାଦାନ୍‌ ଆଇ କନା ସାନ୍ଦି ସାରିବେଡ଼ିତିଦାନ୍‌ ୱାନି ଆସ୍‌କିତିମାନି ଲୋକାଙ୍ଗ୍‌ ଉଣ୍ତା କିଜ ତାନି ଉଣ୍ତିଙ୍ଗ୍‌ ମନୁସ୍ୟପୁତ୍ର ୱାନି ଦୁତ୍‌କାଙ୍ଗ୍‌ ପୋକ୍‌ନାନ୍‌ ।”
MAT 24:32 “ତଗା ମାରାନ୍‌ତାନ୍‌ କାତା ଅଜାଦୁ, ଏସ୍ତିୱାଲେ ତାନି କମେଆଙ୍ଗ୍‌ଁ ଆକୁ ପାସ୍‍ରିକା ମାରି କଡ଼୍‍କିକା ଆଜି ପୁନି ଆକୁ କାୟାନାତ୍‌, ନାସ୍ତିୱାଲେ ଜେଟାପ୍‌ ଲେଞ୍ଜୁ ଲାକ୍‌ତୁ ୱାତାନି ଇଜି ମିର୍‌ ନେସ୍‌ସିନିଦେର୍‌ ।
MAT 24:33 ଆୟାୱାଜା ମିର୍‌ ବା ଇୟାୱିଜୁ ଗଟ୍‌ନେଙ୍ଗ୍‌ ସୁଡ଼ୁତିଙ୍ଗ୍‌, ମନୁସ୍ୟପୁତ୍ର ସେର୍‍ଲା ଲାକ୍‌ତୁ ଇତାନ୍‌ ଇକା ଇଜି ମିର୍‌ ନେସ୍‌ତୁ ।
MAT 24:34 ନାନ୍ ମିଙ୍ଗିଁ ସତ୍‌ ଇଜିନା, ମାନ୍‌ତୁଇଡିଦୁ, ଇଲେଇ ଜିବନ୍‌ମାନି ଲୋକା ମାଣାନ୍‌ ୱିଜେରେ ସାନି ଆଗ୍‍ଡ଼ି ଇୟାୱିଜୁ ବିସୟ୍‌ ଗଟାଏତ୍‌ ।
MAT 24:35 ବାଦଡ଼ ନି ପୃତିବି ମାରାଗ୍‌ନାତ୍‌; ମାତର୍‌ ନା ବାକ୍ୟ ଏସ୍‌କାଙ୍ଗ୍‌ ମାର୍‌ଗେଏତ୍‌ ।”
MAT 24:36 “ମାତର୍‌ ଆୟା ଦିନ୍‌ ବା, ଆୟା ବେଡ଼ା ଏସ୍‌କାଙ୍ଗ୍‌ ୱାନାତ୍‌, ଏନ୍‌ ୱେର୍‌ତେଙ୍ଗ୍‌ ଆଟ୍‍ଏନ୍‍ । ନିଜେ ମାପୁରୁଦି ମାରିନ୍‌ ନି ଦୁତ୍‌କୁ ବା ଆୟାମାଟା ନେସେଉ, କେବଲ୍‌ ବୁବା ମାପୁରୁ ନେସ୍‌ନାନ୍‌ ।
MAT 24:37 ନୋହଦି ବେଡ଼ାଦୁ ଏଣ୍ତେସ୍‌ ଗଟାତା ମାର୍ହାତ୍‌, ମନୁସ୍ୟପୁତ୍ରଦି ୱାନି ବେଡ଼ାଦୁ ଆୟାୱାଜା ଗଟାନାତ୍‌ ।
MAT 24:38 ଗାଲିପିରୁଦି ଆଗ୍‍ଡ଼ିରି ବେଡ଼ାଦୁ ନୋହଦି ଜାହାଜ୍‌ତୁ ଡ଼ୁଗୁନି ଦିନ୍‌ ସାନ୍ଦି ଲୋକୁ ଉଣିତିନିକା ମାରି ମେମାରି ନି ଆଇମା ପେଡ଼ିଆନି ୱିଜୁପାଣିଦୁ ଦାନ୍ଦା ଆତାମାର୍ହାତ୍‌ ।
MAT 24:39 ଗାଲିପିରୁଦୁ ୱାର୍‌ ଦେଲ୍‌ଜିସନି ସାନ୍ଦି ଇନିକା ଗଟାଜିନାତ୍‌ ନେସ୍‌ତେଙ୍ଗ୍‌ ଆଟ୍‌ଏଜି ମାର୍ହାର୍‌ । ମନୁସ୍ୟପୁତ୍ର ୱାଜିନି ଦିନ୍‌ତୁ ବା ଟିକ୍‌ ଆୟାୱାଜା ଆନାତ୍‌ ।
MAT 24:40 ଆୟା ସମୟ୍‍ତୁ କିଡ଼ିଇଦୁ ପାଣି କିଜିମାନି ରିଏରି ମେମାରିରି ମାଣ୍‌କୁ ଅରେନ୍‍ୱାନିଙ୍ଗ୍‍ ଅଆୟ୍‌ଆନାତ୍‌ ମାରି ଆଇ ଅରେନ୍‌ ୱାନିଙ୍ଗ୍‍ ଡ଼ିସ୍‌ନାସିନାର୍‌ ।
MAT 24:41 ରୁଣ୍ତି ଆଇମେକ୍‍ ଜାତାଦୁ ନୁର୍‌ଜିମାନେ, ଅରେତ୍‍ତାନିଙ୍ଗ୍‍ ଅଆୟ୍‌ଆନାତ୍‌ ମାରି ଆଇତାନିଙ୍ଗ୍‌ ଡ଼ିସ୍‌ନାସିନାର୍‌ ।”
MAT 24:42 ମାରି, ଜାଗାର୍‌ତା ମାନ୍‌ଡ୍ରୁ, ଇରିଙ୍ଗ୍‌ ମି ପ୍ରବୁ ଆମା ନାଣ୍ତିଙ୍ଗ୍‌ ୱାନାନ୍‌, ଆକା ମିର୍‌ ନେସ୍‌ଇଦେର୍‌ ।
MAT 24:43 ମାତର୍‌ ଇକା ନେସ୍‌ସୋ ମାନ୍‌ଡ୍ରୁ, ଏସିୱାଲେ ଡଙ୍ଗାଁର୍‌ଏନ୍‌ ଡ଼ୁଗୁନାନ୍‌ ନେସ୍‌ତିମାରିଙ୍ଗ୍‌, ଇଲୁମାଲିକ୍‌ ଜାଗାର୍‌ତାଦାନ୍‌ ମାନ୍‌ଞ୍ଜି ଡଙ୍ଗାଁର୍‌ଏନ୍‌ତିଙ୍ଗ୍‌ ଇନ୍‌ଡ୍ର ଡ଼ୁଗିସିତେଙ୍ଗ୍‌ ସିଏନ୍‌ ।
MAT 24:44 ମିର୍‌ ବା ୱିଜୁଦିନ୍‌ ଜାଗାର୍‌ତା ଆଜମାନ୍‌ଡ୍ରୁ, ଇରିଙ୍ଗ୍‌ ଆମା ବେଡ଼ାଦୁ ମିର୍‌ ୱାନିଙ୍ଗ୍‌ କାପ୍‌କିଇ ମାନିଦେର୍‌ ଆୟା ବେଡ଼ାଦୁ ମନୁସ୍ୟପୁତ୍ର ୱାନାନ୍‌ ।
MAT 24:45 “ଏନ୍‌ ଆର୍‌ତିଙ୍ଗ୍‌ ବିସ୍‌ବାସ୍‌ ନି ବୁଦିଦି ସାକର୍‌ ? ଆମାୱାରି ମୁସ୍‌କୁ ମାଲିକ୍‌ ଆଇ ସାକର୍‌କାଙ୍ଗ୍‌ ଟିକ୍‌ ବେଡ଼ାଦୁ କାଦି ସିନି ବଜୁ ସିନାମାନାନ୍‌ ।
MAT 24:46 ମାଲିକ୍‌ ଆଇଦେସ୍‌ତାନ୍‌ ଡ଼େସିୱାନିୱାଲେ ଆୟା ସାକର୍‌ ଜଦି ବିସ୍‌ବାସ୍‌ତାନ୍‌ ୱାନି ପାଣି ଟିକ୍‌ କିଜିମାନାନ୍‌, ସୁଡ଼୍‌ଜି ୱାନ୍‌ ଏସ ୱେଡ଼ିକା ଆନାନ୍‌, ୱାନ୍‌ ଦନ୍ୟ !
MAT 24:47 ନାନ୍ ମିଙ୍ଗିଁ ସତ୍‌ ଇଜିନା, ମାଲିକ୍‌ ନିଜେଦି ୱିଜୁ ସମ୍ପତିଦି ଦାଇତ୍‌, ସିନି ଉଣ୍ତିଙ୍ଗ୍‌ ଆୟାୱାଜା ସାକର୍‌ତିଙ୍ଗ୍‌ ଆସ୍‌ କିନାନ୍‌ ।
MAT 24:48 ମାତର୍‌ ଆୟା ତାଗ୍‌ଇ ସାକର୍‌ ଜଦି ଅବିସ୍‍ବାସ୍‍ କିଜି ମାଲିକ୍‌ ୱାନିକା ୱେଡ଼ା ଆନାତ୍‌ ଇଜି ଅଡ଼୍‌ବିନାନ୍‌ ମାରି
MAT 24:49 ତଡ଼୍‍ ସାକର୍‌କାଙ୍ଗ୍‌ ଡାକ୍‌ତେଙ୍ଗ୍‌ଆସ୍‌ସି, ମାରି ମଦୁଆରି ୱାଲେ ଉନ୍‌ଣ୍ତେଙ୍ଗ୍‌ ତିନ୍‌ଡ୍ରେଙ୍ଗ୍‌ ବାସ୍‌ନାନ୍‌ ।
MAT 24:50 ସାକର୍‌ କାପ୍‌କିଇୱାଲେ ବେଡ଼ାଦୁ ଦାପ୍ରେ ଅର୍‍ଲେନ୍‍ ଏସ୍ତିୱାଲେ ମାଲିକ୍‌ ଡ଼େସି ୱାନାନ୍‌, ଆୟା ନାଣ୍ଡିଙ୍ଗ୍ ମାରି ୱେଡ଼ା ସାକର୍‌ ନେସ୍‌ଏନ୍‌ ।
MAT 24:51 ମାଲିକ୍‌ ୱାନିଙ୍ଗ୍‌ କୟ୍‍ଜି ମକା ମକା କିଜି କପଟିରିୱାଲେ ୱାନି ବାଗ୍ ଟିକ୍‌ କିନାନ୍‌, ଆବେନ୍‌ ଆଡ଼୍‍ବାନିକା ନି ପାଲୁକୁ କାତ୍ରେକିନାନ୍‌ ।
MAT 25:1 “ଆୟା ବେଡ଼ାଦୁ ମୁସ୍‌କୁପୁର୍‌ତିରାଜି ୱାନିକା ଇୟାୱାଜା ଆନାତ୍‌ । ଦାସ୍‌ଲୋକ୍‌ ରିପାଆଇଲିକ୍‌ ୱିଜେକେ ଉନ୍‌ଡ୍ରି ଉନ୍‌ଡ୍ରି ଦିୱେଙ୍ଗ୍‌ ନିୟୁ ଅସି କାନ୍ୟାମୁରୁଲିଙ୍ଗ୍‌ ମିସାଦେଙ୍ଗ୍‍ ସତେ ସର୍‌ଏମାର୍‌ଏ ।
MAT 25:2 ୱାନିକା ମାଣାନ୍‌ ପାସ୍‌ଲୋକ୍‌ ବୁଦିସିଲିକେଙ୍ଗ୍‌ ମାରି ପାସ୍‌ଲୋକ୍‌ ବୁଦିମାନିକେଙ୍ଗ୍‌ ।
MAT 25:3 ବୁଦିସିଲିକେଙ୍ଗ୍‌ ଦିୱେଙ୍ଗ୍‌ ଅତେ ମାତର୍‌ ଅର୍‌ସେ ନାଣ୍ତ ନିୟୁ ଅଉମାରେଏ
MAT 25:4 ମାତର୍‌ ବୁଦିମାନିକେଙ୍ଗ୍‌ ନିଜେନିଜେଦି ଦିୱାଦି ୱାଲେ କାୟାଦୁ ନିୟୁ ବା ଅତେ ।
MAT 25:5 କାନ୍ୟାମୁରୁଲି ୱାନିକା ୱେଡ଼ା ଆତାତ୍‌ଆକା ରିପାଆଇଲିକ୍‌ କର୍‌ଅଜି କର୍‌ଅଜି ସୁସ୍‌ତେ ।
MAT 25:6 “ମାଜାର୍‌ନାଡ଼ା ଆଉଲି ୱେନ୍‌ୟାଆତାତ୍‌, ଇଦି ସୁଡ଼୍‍ଦୁ କାନ୍ୟାମୁରୁଲି ୱାତାତ୍‌ନି, ରାଦୁ ୱାନିଙ୍ଗ୍‌ ଅର୍‌ସେ ତାନାଟ୍‌ ।
MAT 25:7 ନାସ୍ତିୱାଲେ ରିପାଆଇଲିକ୍‌ ନିଙ୍ଗିଁତେନୋ ନିଜେ ନିଜେଦି ଦିୱେଙ୍ଗ୍‌ ରସ୍‌ତେ ।
MAT 25:8 ନାସ୍ତିୱାଲେ ବୁଦିସିଲିକେଙ୍ଗ୍‌ ବୁଦିମାନିୱାନିକା ଇର୍‌ଏ, ମାଙ୍ଗିଁ କାଣ୍ତେକ୍‍ ନିୟୁ ସିଦାଟ୍‌ । ମା ଦିୱେଙ୍ଗ୍‌ୱିଜୁ ନାମ୍‌ଜିସୋଲ୍‌ସିନେ ।
MAT 25:9 ବୁଦିମାନିକେଙ୍ଗ୍‌ ଇର୍‌ଏ, ‘ସିଲେ, ସିଲେ, ସିଲେ,’ ମି ଉଣ୍ତିଙ୍ଗ୍‌ ନି ମା ଉଣ୍ତିଙ୍ଗ୍‌ ନିୟୁ ଇଏତ୍‌ । ମିର୍‌ ଦୁକାନ୍‌ତୁ ସୋଲ୍‌ସ ନିଜେନିଜେଦି ଉଣ୍ତିଙ୍ଗ୍‌ ଏସ ନିୟୁ କଡ଼ଜ ତାଗାଟ୍‌ ।
MAT 25:10 ଆଦେଙ୍ଗ୍‌ ବୁଦିସିଲିକେଙ୍ଗ୍‌ ନିୟୁ କଣ୍ତେଙ୍ଗ୍‌ ସୋତେ । ୱାକ୍‍ ସୋର୍‌ଇ ୱେନ୍‌କା କାନ୍ୟାମୁରୁଲି ୱାତା ଇତାନ୍‌ । ତିଆର୍‌ମାର୍‍ଇ ପାସ୍‌ଲୋକ୍‌ ଆଇଲିକ୍‌ ୱାନି ୱାଲେ ପେଡ଼ି ବଜିଦୁ ସୋର୍‌ଇ ୱେନ୍‌କା ସେର୍‍ଲାଦିଙ୍ଗ୍‌ କେର୍‌ତାଡ଼ିସ୍‌ତାର୍‌ ।
MAT 25:11 “ତାନେୱେନ୍‌କା ଆଇ ରିପାଆଇଲିକ୍‌ ବା ଆବେନୁ ୱାତେନୋ । ଏ ପ୍ରବୁ, ଏ ପ୍ରବୁ, ସେର୍‌ଲା ରେଆ; ମାପ୍‌ ଲୋଇ ୱାନାପ୍‌ ଇଜି ୱାକ୍‍ ଆଉଲି ଆତେ ।
MAT 25:12 କାନ୍ୟାମୁରୁଲି ଇର୍ହାନ୍‌, ସିଲେ ମୁଡ଼ୁକେ ସିଲେ, ମିର୍‌ ଏର୍‌, ନାନ୍ ନେସେଏ ।”
MAT 25:13 ଇୟା ମାଟାଦିଙ୍ଗ୍‌ ୱିସ୍‌ତାନ୍‌ନୋ ଜିସୁ ଇର୍ହାନ୍‌, ଜାଗାର୍‌ତା ଆଜି ମାନ୍‌ଡ୍ରୁ । ମିର୍‌ ଆୟା ଦିନ୍‌ ନି ଆୟା ୱେଡ଼ା ନେସ୍‌ତେଙ୍ଗ୍‌ ଆଟ୍‍ଇଦେର୍‍ ।
MAT 25:14 ଆୟା ସମୟ୍‍ତୁ ମୁସ୍‌କୁପୁର୍‌ ଇୟାୱାଜା । ଅରେନ୍‍ ଲୋକୁ ନିଜେଦି ସାକର୍‌କାଙ୍ଗ୍‌ କୁକ୍‌ସି ନିଜେଦି ସମ୍ପତ୍ତି ୱାନି କିୟୁଦୁ ଡ଼ିସ୍‌ତା ସିତାନ୍‌ନୋ ଆଇଦେସ୍‌ତୁ ସନ୍‌ଡ଼୍ରେଙ୍ଗ୍‌ ସୋତାନ୍‌ ।
MAT 25:15 ୱାରି ସାକ୍ତିଦାନ୍ ୱାରିଙ୍ଗ୍‌ ଏସ ଏସ ୱେଣ୍ତିଟାକେଙ୍ଗ୍‌ ଉଣ୍ତାକିଦେଙ୍ଗ୍‌ ଅରେନ୍‌ୱାନିଙ୍ଗ୍‌ ସିତାନ୍‌ ୫,୦୦୦ ଆଜାର୍‌ ୱେଣ୍ତିଦି ଅଦ୍‌ଲିଙ୍ଗ୍‌, ମାରି ଅରେନ୍‌ୱାନିଙ୍ଗ୍‌ ୨,୦୦୦ ଆଜାର୍‌ ନି ମାରି ଅରେନ୍‌ୱାନିଙ୍ଗ୍‌ ୧,୦୦୦ ଆଜାର୍‌ ମାତର୍‌ । ମାରି ୱାନ୍‌ ଆଇଦେସ୍‌ତୁ ସର୍ହାନ୍‍ ।
MAT 25:16 ୫,୦୦୦ ଆଜାର୍‌ ଅଦ୍‌ଲି ପଇତିମାନି ସାକର୍‌ ଆୟା ଡାବୁଙ୍ଗାଁ ବେପାର୍‌ କିଜି ମାରି ୫,୦୦୦ ଆଜାର୍‌ ଲାବ୍‍ କିତାନ୍‌ ।
MAT 25:17 ଆୟାୱାଜା ୨,୦୦୦ ଆଜାର୍‌ ଅଦ୍‌ଲି ପଇତିମାନି ସାକର୍‌ ମାରି ୨,୦୦୦ ଆଜାର୍‌ ଲାବ୍‍ କିତାନ୍‌ ।
MAT 25:18 ମାତର୍‌ ଏନ୍‌ ୧,୦୦୦ ହାଜାର୍‌ ଅଦ୍‌ଲି ପଇତାମାର୍ହାନ୍‌, ୱାନ୍‌ ଉନ୍‌ଡ୍ରି ଗୁଟା କାରିତାନ୍‌ନୋ ମାଲିକ୍‌ତି ଆୟା ଡାବୁଙ୍ଗୁଁ ଆଡ଼ାକ୍‍ସି ଇଟ୍‌ତାନ୍‌ ।
MAT 25:19 ନାଣ୍ତ ଦିନ୍‌ ୱେନ୍‌କା ମାଲିକ୍‌ ୱାତାନ୍‌ନୋ ମାରି ସାକର୍‌କା ୱାଲେ ଇସାବ୍‌ କିତାବ୍‌ କିତାନ୍‌ ।
MAT 25:20 ୫,୦୦୦ ଆଜାର୍‌ ଅଦ୍‌ଲି ଅତିମାନି ସାକର୍‌ ମାଲିକ୍‌ତିଙ୍ଗ୍‌ ମାରି ୫,୦୦୦ ଆଜାର୍‌ ସିଜି ଇର୍ହାନ୍‌, ଆଜ୍ଞା, ନିନ୍‌ ନାଙ୍ଗିଁ ୫,୦୦୦ ଆଜାର୍‌ ଅଦ୍‌ଲି ସିତିମାର୍‍ଇ, ଇକା ସୁଡୁଆ, ନାନ୍ ମାରି ୫,୦୦୦ ଆଜାର୍‌ ଲାବ୍‍ ପୟ୍‌ତାମାନା ।
MAT 25:21 ମାଲିକ୍‌ ୱେଡ଼ିକା ଆତାନ୍‌ନୋ ଇର୍ହାନ୍‌, ନେଗିକା କିତିମାନି, ନିନ୍‌ ନା ନେଗିକିନ୍ଦା ମାରି ବିସ୍‌ବାସ୍‌ତି ସାକର୍‌ । ନିନୁ ବିସ୍‌ବାସ୍‌ତାନ୍‌ ଉଣା ଦନ୍‌ତି ଇନିଙ୍ଗାଁଆନିଆ କିଦେଙ୍ଗ୍‌ଆଟ୍‌ତିମାନିଙ୍ଗ୍‌ ନି କିୟୁଦୁ ଗାଦି ଦନ୍‌ ଡ଼ିସ୍‌ନାସିନା । ରାଆ, ନା ୱାଲେ ୱେଡ଼ିକାକିଆ ।
MAT 25:22 ୨,୦୦୦ ଆଜାର୍‌ ଅଦ୍‌ଲି ଅତିମାନି ସାକର୍‌ ୱାତା ଇର୍ହାନ୍‌, ଆଜ୍ଞା, ନିନ୍‌ ନାଙ୍ଗିଁ ୨,୦୦୦ ଆଜାର୍‌ ସିତିମାର୍‍ଇ, ନାନ୍ ମାରି ୨,୦୦୦ ଆଜାର୍‌ ଲାବ୍‍ କିତାମାନା ।
MAT 25:23 ମାଲିକ୍‌ ଇର୍ହାନ୍‌, ନେକ୍‌କା କିତିମାନି । ନିନ୍‌ ବା ନା ନେଗି ନି ବିସ୍‌ବାସ୍‌ ସାକର୍‌ । ଉଣା ଦନ୍‌ତାନ୍‌ ବିସ୍‌ବାସ୍‌ ତର୍‌ତିମାନି, ଗାଦି ଦନ୍‌ ନାନ୍ ନିଙ୍ଗିଁ ନାଣ୍ତ କିନାସିନା । ରାଆ, ନା ୱେଡ଼ିକାଦୁ ମିସାଆ ।
MAT 25:24 “ସାରାସାରିୱେନ୍‌କା ଏକ୍‌ ଆଜାର୍‌ ୱେଣ୍ତିଅଦ୍‍ଲି ଅତିମାରିଇ ସାକର୍‌ ଇର୍ହାନ୍‌, ଆଜ୍ଞା, ନିନ୍‌ ଅରେନ୍‍ ଆଟ୍‌ୱା ଲୋକୁ, ଇକା ନାନ୍ ନେସ୍‍ତାମାର୍ହା । ୱିତ୍‌ଇମାନି କିଡ଼ିଇଦୁ ନିନ୍‌ ପାସି କୟ୍‌ନି । ୱିତୁ ୱିତ୍‌ଏଣ୍‌ଗା ପାସି ଉଣ୍ତାକିନି ।”
MAT 25:25 ଆୟାଉଣ୍ତିଙ୍ଗ୍‌ ନାନ୍ ତିଲାତାନୋ ନି ଡାବୁଙ୍ଗୁଁ ଅତାନୋ ବୁମିଦୁ ମୁସ୍‌ତାମାର୍‌ଆ । ସୁଡୁଆ, ନିୱି ଆୟା ଡାବୁଙ୍ଗୁଁ ।
MAT 25:26 ମାଲିକ୍‌ ଇର୍ହାନ୍‌, ଏ ଦୁସ୍ଟ ମାରି ଗାଡ଼ିଆ ସାକର୍‌ ! ନିନ୍‌ ଗିଦେ ନେସ୍‌ତିମାରିଇ, ନାନ୍ ଏମେମାନୁ ୱିତ୍‌ଏମାନା, ଆବେନୁ ପାସି କୟ୍‌ନା ?
MAT 25:27 ଆର୍‌ତିଙ୍ଗ୍‌ ନା ଡାବୁଙ୍ଗୁଁ ଅସି ନିନୁ ପୁଜିକିନି ଉଣ୍ତିଙ୍ଗ୍‌ ବେଙ୍କ୍‍ତୁ ଉଣ୍ତାକିତିସିତିମାନ୍ଦି । ଆର୍‌ତିଙ୍ଗ୍‌ ତାନିଙ୍ଗ୍‌ ନାନ୍ ପିଲାଦି ୱାଲେ ଡ଼େସି ପୟ୍‌ତାମାନ୍ଦି ।
MAT 25:28 ଇକା ୱେର୍‌ସି ମାଲିକ୍‌ ଆଦେସ୍‌ ସିତାନ୍‌, ଇୟା ସାକର୍‌ କିୟୁଦାନ୍‌ ଇୟା ଡାବୁଙ୍ଗୁଁ କୁତ୍‌ସଅସ ଆମାୱାନି କିୟୁଦୁ ୧୦,୦୦୦ ଆଜାର୍‌ ମାନେ, ୱାନିଙ୍ଗ୍‌ ସିଦୁ ।
MAT 25:29 ଇରିଙ୍ଗ୍‌ ଆମାୱାନିଙ୍ଗ୍‌ ମାନେ, ୱାନିଙ୍ଗ୍‌ ନାଣ୍ତ ସିଆୟ୍‌ଆନାତ୍‌ ମାରି ୱାନ୍‌ ନାଣ୍ତ ଲାବ୍‍ କିନାନ୍‌ । ମାତର୍‌ ଆମାୱାନିଙ୍ଗ୍‌ ସିଲୁ, ୱାନି ଲାକ୍‌ତୁ ଆମାକା ମାନାତ୍‌, ଆକାବା କୁତ୍‌ନା ଅଆୟାଆନାତ୍‌ ।
MAT 25:30 ଇୟା ଜଗ୍‌ସିଲି ସାକର୍‌ତିଙ୍ଗ୍‌ ଆତ୍‌ରେ ସିକାଟିଦୁ ପକ୍‍ତୁ, ଆବେନୁ ୱାନ୍‌ ଆଡ଼୍‍ବାଜି ପାଲୁକୁ କାତ୍ରେକିନାନ୍‌ ।
MAT 25:31 “ଏସ୍ତିୱାଲେ ମନୁସ୍ୟପୁତ୍ର ରାଜାଦି ୱାଜା ୱାନି ମୁସ୍‌କୁପୁର୍‌ତି ଦୁତ୍‌କାୱାଲେ ୱାନାନ୍‌, ୱାନ୍‌ ଗୌରବ୍‌ଜାୟ୍‌ ରାଜାଗାଦିଦୁ ବାସ୍‌ନାନ୍‌,
MAT 25:32 ମାରି ଦୁନିଆଦି ୱିଜୁ ବାସାଦି ଲୋକୁ ୱାନି ଆଗ୍‌ଡ଼ି ଉନ୍‌ଡ୍ରେମାନୁ ଆନାର୍‌ । ନାସ୍ତିୱାଲେ ମେଣ୍ତେଙ୍ଗ୍‌ଗଉଡ଼ୁ ଏଣ୍ତେସ୍‌ ଗର୍‌ଏଙ୍ଗାଁ ନି ମେଣ୍ତେଆଙ୍ଗ୍‌ ୱେରେଏ କିନାନ୍‌, ମନୁସ୍ୟପୁତ୍ର ଆୟାୱାଜା ଲୋକାଙ୍ଗ୍‌ ଦୁଇ ବାଗ୍ କିନାନ୍‌ ।
MAT 25:33 ଦାର୍ମୁଦି ଲୋକାଙ୍ଗ୍‌ ୱାନ୍‌ ଉଣି ତରିନ୍‌ ନି ଆଇ ଲୋକାଙ୍ଗ୍‌ ଡେବିରି ତରିନ୍‌ ଇଡ୍‌ନାନ୍‌ ।
MAT 25:34 ନାସ୍ତିୱାଲେ ରାଜା ୱାନି ଉଣି ତରିନ୍‌ମାନି ଲୋକାଙ୍ଗ୍‌ ଇନ୍‌ନାନ୍‌, ରାଦୁ, ମିଙ୍ଗିଁ ନା ବୁବା ଆର୍ସିବାଦ୍‌ କିତାମାନାନ୍‌ । ମି ଉଣ୍ତିଙ୍ଗ୍‌ ଦୁନିଆଦି ତିଆର୍‌ଆତି ଆଗ୍‍ଡ଼ିରାନ୍‍ ଆମା ରାଜି ତିଆର୍‌ ଆତାମାନାତ୍‌, ରାଦୁ, ଆବେନୁ ଡ଼ୁଗୁଦୁ ।
MAT 25:35 ନାନ୍ ବାଙ୍ଗାଁଦୁମାର୍‌ଆ, ମିର୍‌ ନାଙ୍ଗିଁ ଉନ୍‌ଣ୍ତେ ସିତିଦେର୍‌; ନାନ୍ ଏର୍‌କିସାଜିମାର୍‌ଆ, ମିର୍‌ ନାଙ୍ଗିଁ ଏରୁ ଉନ୍‌ଣ୍ତେ ସିତିଦେର୍‌ । ନାନ୍ ଅରେନ୍‌ନେମାର୍‌ଆ, ମିର୍‌ ନାଙ୍ଗିଁ ମି ଇନ୍‌ଡ୍ର ବାଡି ସିତିଦେର୍‌ ।”
MAT 25:36 ନାନ୍ ଡୁମ୍‌ଡାମାର୍‌ଆ, ନାଙ୍ଗିଁ ଆଙ୍ଗିଁ ଆରିସ୍‌କିତିଦେର୍‌; ନାନ୍ ନବ୍‌ଆତାମାର୍‌ଆ, ନାଙ୍ଗିଁ ଜାତୁନ୍‍ କିତିଦେର୍‌, ନାନ୍ ଜଇଲ୍‌ତୁମାର୍‌ଆ, ନାଙ୍ଗିଁ ସୁଡ଼ୁଦେଙ୍ଗ୍‌ୱାତିଦେର୍‌ ।
MAT 25:37 ଦାର୍ମୁଦିଲୋକୁ ୱାନିଙ୍ଗ୍‌ ଇନାର୍‌, ପ୍ରବୁ ! ଏସ୍‌କାଙ୍ଗ୍‌ ନିଙ୍ଗିଁ ବାଙ୍ଗାଁଆତିକା ସୁଡ଼ୁଜି କାଦି ଉନ୍‌ଣ୍ତେଙ୍ଗ୍‌ ସିତାମାନାପ୍‌ ? ଏସ୍‌କାଙ୍ଗ୍‌ ନିଙ୍ଗିଁ ଏର୍‌କିସାନିକା ସୁଡ଼ୁଜି ଏରୁ ଉନ୍‌ଣ୍ତେଙ୍ଗ୍‌ ସିତାମାନାପ୍‌ ?
MAT 25:38 ମାରି, ଏସାଙ୍ଗ୍‍ ଅରେନ୍‌ନେ ସୁଡ଼ୁଜି ଇଲ୍‌ତୁ ତେବାଦେଙ୍ଗ୍‍ ବାଡି ସିତାମାନାପ୍‌ ? ମାରି ଡୁମ୍‌ଡାଆତିକା ସୁଡ଼ୁଜି ଆଙ୍ଗିଁ ଆରିସ୍‌ କିତାମାନାପ୍‌ ?
MAT 25:39 ଏସ୍‌କାଙ୍ଗ୍‌ ନିଙ୍ଗିଁ ନବ୍‌ଆତିକା ନି ଜଇଲ୍‌ତୁମାନିକା ସୁଡ଼ୁଜି ନି ଲାକ୍‌ତୁ ୱାତାପ୍‌ ?
MAT 25:40 ରାଜା ଇନାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ଇୟା ନା ତଡ଼ାନ୍‌କା ଲୋଇରାନ୍‌ ୱିଜେରିଙ୍ଗ୍‍ ଇସ୍ରିୱାରି ଉଣ୍ତିଙ୍ଗ୍‌ ମିର୍‌ ଆମାକା ୱିଜୁ କିତିଦେର୍‌, ଆକା ନା ଉଣ୍ତିଙ୍ଗ୍‌ କିତିଦେର୍‌ ।
MAT 25:41 ତାନେୱେନ୍‌କା ରାଜା ଡେବିରି ତରିନ୍‌ମାନି ଲୋକାଙ୍ଗ୍‌ ଇନ୍‌ନାନ୍‌, ଏ ମାପୁରୁଦି ଆନାଦୁରିଆ ପୟ୍‌ତି ଲୋକୁ ! ନା ଆଗ୍‍ଡ଼ିରାନ୍‍ ଆକ ସାନ୍‌ଡ୍ରୁ । ସୟତାନ୍ ନି ତାନି ଦୁତ୍‌କା ଉଣ୍ତିଙ୍ଗ୍‌ ଆମା ଏସ୍‌କାଙ୍ଗ୍‌ୱିଜ୍‍ଇ କାସ୍‌ସିମାନି ସିସୁ ତିଆର୍‌ ଆତାମାନାତ୍‌ ଆବେନୁ ସାନ୍‌ଡ୍ରୁ ।
MAT 25:42 ନାନ୍ ବାଙ୍ଗାଁଆତାମାର୍‌ଆ, ମିର୍‌ ନାଙ୍ଗିଁ ଉନ୍‌ଣ୍ତେଙ୍ଗ୍‌ ସିଇତିଦେର୍‌; ନାନ୍ ଏର୍‌କିସାତାମାର୍‌ଆ, ନାଙ୍ଗିଁ ଏରୁ ଉନ୍‌ଣ୍ତେଙ୍ଗ୍‌ ସିଇତିଦେର୍‌ ।
MAT 25:43 ନାନ୍ ଅରେନ୍‌ନେମାର୍‌ଆ, ନାଙ୍ଗିଁ ମି ଇନ୍‌ଡ୍ର ବାଡି ସିଇତିଦେର; ନାନ୍ ଡୁମ୍‌ଡାମାର୍‌ଆ, ନାଙ୍ଗିଁ ଆଙ୍ଗିଁ ଆରିସ୍‌ କିଇତିଦେର୍‌; ନବ୍‌ ନି ଜଇଲ୍‌ତୁ ମାରିଇୱାଲେ ନାଙ୍ଗିଁ ଜାତୁନ୍‍ କିଇତିଦେର୍‌ ।
MAT 25:44 ନାସ୍ତିୱାଲେ ୱାର୍‌ ଉତର୍‌ ସିନାର୍‍, “ପ୍ରବୁ, ଏସ୍‌କାଙ୍ଗ୍‌ ମାପ୍‌ ନିଙ୍ଗିଁ ବାଙ୍ଗାଁ, ଏର୍‌କି, ଅରେନ୍‌ନେ, ଡୁମ୍‌ଡା, ନବ୍‌ ନି ଜଇଲ୍‌ତୁ ମାନିକା ସୁଡ଼ୁଜି ନିଙ୍ଗିଁ ସେବା କିଏତାପ୍‌ ?”
MAT 25:45 ରାଜା ଉତର୍‌ ସିନାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ଇୟା ଇସ୍ରି ଲୋକାରି ଲୋଇରାନ୍‌ ଅରେନ୍‍ୱାନିଙ୍ଗ୍‍ ସାକା କିଦେଙ୍ଗ୍‌ ମନାକିତିଦେର୍‌, ମିର୍‌ ନାଙ୍ଗିଁ ସାକା କିଦେଙ୍ଗ୍‌ ମନାକିତିଦେର୍‌ ।
MAT 25:46 ଇୟାକାର୍‌ ୱିଜୁଦିନ୍‌ତି ଉଣ୍ତିଙ୍ଗ୍‌ କାସ୍ଟୁବଗାନାର୍‌, ମାତର୍‌ ଦାର୍ମୁଦିକାର୍‌ ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନାର୍‌ ।
MAT 26:1 ଇୟାୱିଜୁ ସିକିୟା ସିତି ୱିସ୍‌ତି ୱେନ୍‌କା ଜିସୁ ସିସୁରିଙ୍ଗ୍‌ ଇର୍ହାନ୍‌,
MAT 26:2 “ମିର୍‌ ନେସ୍‌ନିଦେର୍‌, ନିସ୍ତାର୍‌ ପଣ୍ତୟ୍‌ ଆଦେଙ୍ଗ୍‌ ମାରି ରିନେନ୍‌ ମାନାତ୍‌ । ନାସ୍ତିୱାଲେ ମନୁସ୍ୟପୁତ୍ର କ୍ରୁସଦୁ ସାନି ଉଣ୍ତିଙ୍ଗ୍‌ ସପ୍ରେଆନାନ୍‌ ।”
MAT 26:3 ଆୟା ସମୟ୍‍ତୁ ପେରି ଜାଜକର୍‌ ମାରି ଆଇ ଜିହୁଦି ନେତାର୍‌ ୱିଜେରିଙ୍ଗ୍‌ପେରି ଜାଜକ କୟାପାଦି ଇଲୁ ଦୁଆର୍‌ତୁ ଉନ୍‌ଡ୍ରେମାନୁ ଉଣ୍ତାତାର୍‍ ।
MAT 26:4 ଜିସୁଙ୍ଗୁଁ ସାଲାକିଦାନ୍‍ ଆସ୍‌ସି ଡାକ୍‌ତେଙ୍ଗ୍‍ଁ ଇଜି ଉପାୟ୍‌ କିତାର୍‍ ।
MAT 26:5 ମାତର୍‌ ୱାର୍‌ ଇର୍ହାର୍‌, “ଇୟା ପାଣି ମାପ୍‌ ପଣ୍ତୟ୍‌ ବେଡ଼ାଦୁ କିନିକା ନେଗେତ୍‌ସିଲେ । ନାସ୍ତିୱାଲେ ଲୋକୁ ଜାଟିଜଗଡ଼ାକିନାର୍‌ ।”
MAT 26:6 ଅର୍‍ଲେନ୍‍ ଜିସୁ ବେତନିୟାଦୁ ଆଗ୍‍ଡ଼ିରାନ୍‍ କୁସ୍ଟରୋଗ୍‌ ବଗାତିମାର୍‍ଇ ସିମୋନ୍‍କା ଇଲୁଦୁ ମାର୍ହାନ୍‌ ।
MAT 26:7 ସିମୋନକା ଇଲୁଦୁ ଜିସୁ ଉନ୍‌ଣ୍ତେଙ୍ଗ୍‌ ବାସ୍‌ତି ମାରିଇୱାଲେ ଅରେତ୍‌ ଆଇମା ଉନ୍‌ଡ୍ରି ସାଟିଦୁ ନାଣ୍ତଦାରାଦି ବାସ୍‌ନା ନିୟୁ ବର୍ତି କିଜି ତାସି ୱାନି ତାଲା ମୁସ୍‌କୁ ୱାକ୍‌ତାତ୍‌ ।
MAT 26:8 ସିସୁର୍‍ ଇକା ସୁଡ଼ୁଜି ରିସା ଆତାର୍‌ । ୱାର୍‌ ତାନିଙ୍ଗ୍‌ ଇର୍ହାର୍‌, “ନିସ ନାସ୍ଟୁକିତି ଏନ୍ଦା ?”
MAT 26:9 “ଇୟା ବାସ୍‌ନା ନିୟୁ ନାଣ୍ତ ଡାବୁଙ୍ଗାଁ ପର୍‌ଦେଙ୍ଗ୍‌ ଆତାତ୍‌ମାନ୍ଦି ମାରି ଆୟା ଡାବୁଙ୍ଗୁଁ କାକୁର୍ତି ଲୋକାଙ୍ଗ୍‌ ସିଦେଙ୍ଗ୍‍ ଆତାତ୍‌ ମାନ୍ଦି ।”
MAT 26:10 ୱାର୍‌ ଇନିକା ୱେର୍‌ସିନାର୍‌, ଜିସୁ ନେସ୍‌ତେଙ୍ଗ୍‌ ଆଟ୍‍ତାନ୍‍ନୋ ଇର୍ହାନ୍‌, “ଆୟା ଆଇମାଦିଙ୍ଗ୍‍ ଏନ୍ଦା ବାଦାକିଜିନିଦେର୍‌ ? ନା ଉଣ୍ତିଙ୍ଗ୍‌ ୱାଦ୍‌ ଉନ୍‌ଡ୍ରି ନେଗି ନି ସୁନ୍ଦର୍‌ ପାଣି କିତାମାନାତ୍‌ ।
MAT 26:11 କାକୁର୍ତି ଲୋକାଙ୍ଗ୍‌ ମିୱାଲେ ୱିଜୁଦିନ୍‌ ପଇନିଦେର୍‌, ମାତର୍‌ ନାଙ୍ଗିଁ ୱିଜୁଦିନ୍‌ ପୟ୍‌ଇଦେର୍‌ ।
MAT 26:12 ୱାଦ୍‌ ନା ମେନ୍ଦଲ୍‌ତୁ ଇୟା ବାସ୍‌ନା ନିୟୁ ୱାକ୍‌ସି ସିଜି ନା ମୁସ୍‍ନି ଉଣ୍ତିଙ୍ଗ୍‌ ତିଆର୍‌ କିତି ୱାଜା କିତାମାନାତ୍‌ ।”
MAT 26:13 ନାନ୍ ମିଙ୍ଗିଁ ସତ୍‌ ୱେର୍‌ସିନା, ସାରା ଦୁନିଆଦି ଆମା ବାଡିଦୁ ଇୟା ନେଗିକାବୁର୍‌ ୱେର୍‌ନାର୍‌, ଇୟା ଆଇମା ଆମାକା କିତାମାନାତ୍‌, ତାନିଙ୍ଗ୍‌ ଏତ୍‌କିଜି ଆକାବା ପ୍ରଚାର୍‌ କିନାର୍‌ ।
MAT 26:14 ନାସ୍ତିୱାଲେ ବାରଲୋକ୍‌ ସିସୁରି ଲୋଇରାନ୍‌ ଇସ୍କାରିୟୋତିୟ ଯିହୁଦା ଦର୍‌ତି ଅରେନ୍‍ ସିସୁ ପେରି ଜାଜକରି ଲାକ୍‌ତୁ ସୋର୍‌ର୍ହାନ୍‌ନୋ ୱେନ୍‌ବାତାନ୍‌,
MAT 26:15 “ଜିସୁଙ୍ଗୁଁ ଆସିସ୍‌କିତି ସିତିଙ୍ଗ୍‌ ନାଙ୍ଗିଁ ଇନିକା ସିନିଦେର୍‌ ?” ୱାର୍‌ ୱାନିଙ୍ଗ୍‌ ତିରିସ୍‌ଗୋଟା ୱେଣ୍ତିଅଦ୍‌ଲିଙ୍ଗ୍‌ ଲେକିସ୍‌ତାସିତାର୍‌ ।
MAT 26:16 ଆୟାନାଣ୍ତିରାନ୍‌ ଜିସୁଙ୍ଗୁଁ ୱାରି କିୟୁଦୁ ଆସିସ୍‌କିନି ଉଣ୍ତିଙ୍ଗ୍‌ ଜିହୁଦା ସାରି ପୟ୍‌ତାନ୍‌ ।
MAT 26:17 “କମିର୍‌ସିଲି ରୁଟି” ପଣ୍ତୟ୍‌ତି ଆଗ୍‍ଡ଼ିରି ନାଣ୍ତିଙ୍ଗ୍‌ ସିସୁର୍‍ ଜିସୁଦି ଲାକ୍‌ତୁ ୱାତାରୋ ୱେନ୍‌ବାତାର୍‌, “ମାପ୍‌ ଏମେମାନୁ ନି ଉଣ୍ତିଙ୍ଗ୍‌ ନିସ୍ତାର୍‌ ପଣ୍ତୟ୍‌ତି ବଜି ତିଆର୍‌କିନାପ୍‌ ?”
MAT 26:18 ଜିସୁ ୱେର୍‌ତାନ୍‌, “ଗାଡ଼୍‌ତୁ ସୋଲ୍‌ସ ଆୟା ପେରି ଲୋକ୍‌ତିଙ୍ଗ୍‌ ଇନିଦେର୍‌, ‘ଗୁରୁ ଇଜିନାନ୍‌,’ ନା ଦିନ୍‌ ଲାକ୍‌ତୁ ଆଜି ୱାଜିନାତ୍‍ । ୱାନି ସିସୁରି ୱାଲେ ମି ଇନ୍‌ଡ୍ର ୱାନ୍‌ ନିସ୍ତାର୍‌ ପଣ୍ତୟ୍‌ କିନାନ୍‌ ।”
MAT 26:19 ଜିସୁ ୱେର୍‌ତି ଇସାବ୍‌ତାନ୍‌ ସିସୁର୍‍ ନିସ୍ତାର୍‌ ପଣ୍ତୟ୍‌ତି ବଜି ତିଆର୍‌ କିତାର୍‌ ।
MAT 26:20 ୱେନ୍‌କା ମିଲ୍‌ମିଲିକା ଆତାତ୍‌ଆକା ଜିସୁ ନି ବାରଲୋକ୍‌ ସିସୁର୍‍ ଉନ୍‌ଣ୍ତେଙ୍ଗ୍‌ ବାସ୍‌ତାର୍‌ ।
MAT 26:21 ଉଣୁଜିମାରିଇୱାଲେ ଜିସୁ ଇର୍ହାନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ମି ଲୋଇରାନ୍‌ ଅରେନ୍‍ ନାଙ୍ଗିଁ ସାତ୍ରୁରି କିୟୁଦୁ ସର୍‌ପେ କିନାନ୍‌ ।”
MAT 26:22 ସିସୁର୍‍ ନାଣ୍ତ ଦୁଃକ୍‌ ଆଜି ଅରେନ୍‍ ୱେନ୍‌କା ମାରି ଅରେନ୍‍ ଜିସୁଙ୍ଗୁଁ ୱେନ୍‌ବାତାର୍‌, “ପ୍ରବୁ, ନାନ୍ ଆକାନ୍‍ ନୋ ?”
MAT 26:23 ଜିସୁ ଇର୍ହାନ୍‌, “ଏନ୍‌ ନା ୱାଲେ ଡୁବାଇତୁ ରୁଟି ମୁଡ଼ୁକୁନାନ୍‌, ୱାନ୍‌ ନାଙ୍ଗିଁ ସାତ୍ରୁରି କିୟୁଦୁ ସର୍‌ପେକିନାନ୍‌ ।
MAT 26:24 ସାସ୍ତ୍ରଦୁ ରାସାତିମାନି ୱାଜା ମନୁସ୍ୟପୁତ୍ର ସାନିଦଣ୍ତବଗାନାନ୍‌, ମାତର୍‌ ମନୁସ୍ୟପୁତ୍ରଙ୍ଗ୍‌ ଏନ୍‌ ଆସିସ୍‌ କିନାସିନାନ୍‌, ୱାନି ଦଣ୍ଡ୍‌ ଏସ ବୟ୍‌ଙ୍କାର୍‌ ! ଏସ୍‌କାଙ୍ଗ୍‌ ଜନମ୍‌ ଆଇତିମାରିଙ୍ଗ୍‌ ୱାନି ଉଣ୍ତିଙ୍ଗ୍‌ ନେଗେନ୍‌ ଆତାତ୍‌ମାନ୍ଦି ।”
MAT 26:25 ଆମା ଜିହୁଦା ୱାନିଙ୍ଗ୍‌ ସାତ୍ରୁରି କିୟୁଦୁ ସର୍‌ପେକିତାନ୍‌, ୱାନ୍‌ ଇର୍ହାନ୍‌, ଗୁରୁ, ୱାନ୍‌ ଇନିକା ନାନ୍ ? ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଆକା ଇଜିନି ।”
MAT 26:26 ୱାର୍‌ ଉଣି ବେଡ଼ାଦୁ ଜିସୁ ଉନ୍‌ଡ୍ରି ରୁଟି ତାତାନ୍‌ନୋ ମାପୁରୁଙ୍ଗ୍‌ ଦନ୍ୟବାଦ୍‌ ସିତାନ୍‌ ମାରି ଆକା ରୁକୁସି ସିସୁରିଙ୍ଗ୍‌ ସିଜି ଇର୍ହାନ୍‌, ଅସି ତିନ୍‍ଣ୍ତ୍ରୁ; “ଇକା ନା ମେନ୍ଧଲ୍‍ ।”
MAT 26:27 ତାନେୱେନ୍‌କା ୱାନ୍‌ ଉଣି ଡୁବାଇ ଅତାନ୍‌ନୋ ମାପୁରୁଙ୍ଗ୍‌ ଦନ୍ୟବାଦ୍‌ ସିତାନ୍‌ ମାରି ଆକା ସିସୁରିଙ୍ଗ୍‌ ସିଜି ଇର୍ହାନ୍‌, ମିର୍‌ ୱିଜିଦେର୍‌ ଇବେଟ୍‌ତାନ୍‌ ଉଣ୍ତୁ । ୱାନ୍‌ ଇର୍ହାନ୍‌;
MAT 26:28 ଇକା ନା ନେତେର୍‌ । ଲୋକା ପାପ୍‌ କେମା ଉଣ୍ତିଙ୍ଗ୍‌ ନାନ୍ ନା ଆମା ନେତେର୍‌ ୱାକ୍‌ସ ସିଦେଙ୍ଗ୍‍ ସଲ୍‌ସିନା, ଆମାକା ମାପୁରୁଦି ପୁନି ନିୟମ୍‌ତିଙ୍ଗ୍‌ ସିଲ୍‌ଡାକ୍‌ନାତ୍‍ ।
MAT 26:29 ନାନ୍ ମିଙ୍ଗିଁ ୱେର୍‌ସିନା, “ଆମା ନାଣ୍ତିଙ୍ଗ୍‌ ନା ବୁବାଦି ରାଜିଦୁ ମି ୱାଲେ ପୁନି ଅଙ୍ଗୁର୍‍ରସ୍‍ ଉଣୁଇ ସାନ୍ଦି ନାନ୍ ମାରି ଏସ୍‌କାଙ୍ଗ୍‌ ଅଙ୍ଗୁର୍‍ରସ୍‍ ଉଣୁଏ ।”
MAT 26:30 ୱାର୍‌ ଦନ୍ୟବାଦ୍‍ତି ପାଟା ପାରିତି ୱେନ୍‌କା ଜିତ ଗରନ୍‌ ମୁସ୍‌କୁ ସତାସର୍ହାର୍‌ ।
MAT 26:31 ନାସ୍ତିୱାଲେ ଜିସୁ ୱାରିଙ୍ଗ୍‌ ଇର୍ହାନ୍‌, “ନେର୍‌ ନାଡ଼ା ମିର୍‌ ୱିଜିଦେର୍‌ ନାଙ୍ଗିଁ ଡ଼ିସ୍‌ନି ଉର୍‍କ୍‍ନିଦେର୍‌ । ସାସ୍ତ୍ରଦୁ ରାସାତାମାନାତ୍‌, ନାନ୍ ମେଣ୍ତେଙ୍ଗ୍‌ ସାରାକିନିୱାନିଙ୍ଗ୍‌ ସାୟାମାରାଗ୍‌ ଡାକ୍‌ତିଙ୍ଗ୍‌ ମାରି ମେଣ୍ଡେଙ୍ଗ୍‌ ଇନିଙ୍ଗାଁ ଆନିଙ୍ଗାଁ ଆନେସନେ ।
MAT 26:32 ମାତର୍‌ ନାନ୍ ମାରିଡ଼େସିନିଙ୍ଗିଁତି ୱେନ୍‌କା ମି ଆଗ୍‍ଡ଼ିନେ ଗାଲିଲି ରାଜିଦୁ ସନା ।”
MAT 26:33 ପିତର୍‌ ଜିସୁଙ୍ଗୁଁ ଇର୍ହାନ୍‌, “ଆଇକାର୍‌ ୱିଜେରେ ନିଙ୍ଗିଁ ଡ଼ିସ୍‌ତି ସରିଙ୍ଗ୍ ବା ନାନ୍ ମୁଡ଼ୁକେ ସୋଲଏ ।”
MAT 26:34 ଜିସୁ ପିତରତିଙ୍ଗ୍‌ ଇର୍ହାନ୍‌, ନାନ୍ ନିଙ୍ଗିଁ ସତ୍‍ ଇଜିନା, ନେର୍‌ ନାଡ଼ା କରୁ କେଡ଼େନି ଆଗ୍‍ଡ଼ିନେ ନିନୁ ନାଙ୍ଗିଁ ନେସେଏ ଇଜି ମୁନ୍‌ଡ୍ରି ଦେବେଙ୍ଗ୍‌ ଇନି ।
MAT 26:35 ପିତର୍‌ ଇର୍ହାନ୍‌, “ନି ୱାଲେ ସାଦେଙ୍ଗ୍‌ ପଡ଼ାତିଙ୍ଗ୍‌ ବା ନାନ୍ ଏସ୍‌କାଙ୍ଗ୍‌ ନିଙ୍ଗିଁ ନେସ୍‍ଏ ଇଜି ଇନ୍‌ଏ ।” ଆଇ ସିସୁର୍‍ ୱିଜେରେ ବା ଆୟାୱାଜା ଇର୍ହାର୍‌ ।
MAT 26:36 ତାନେୱେନ୍‌କା ଜିସୁ ନିଜେଦି ସିସୁରି ୱାଲେ ଗେତ୍‌ସିମାନି ଇନି ଉନ୍‌ଡ୍ରି ଡଡିଦୁ ସର୍ହାର୍‌ନୋ ୱାରିଙ୍ଗ୍‌ ଇର୍ହାନ୍‌, “ନାନ୍ ଆବେନୁ ସନାନୋ ପାର୍‌ତନା କିଜିମାନି ସାନ୍ଦି ମିର୍‌ ଇବେନୁ ବାସ୍‌ସୋ ମାନ୍‌ଡ୍ରୁ ।”
MAT 26:37 ୱାନ୍‌ ପିତର୍‌ ମାରି ଜେବଦିରି ରିଏର୍‌ ମାରିସିରିଙ୍ଗ୍‌ ୱାନି ୱାଲେ ଅତାନ୍‍ । ନାସ୍ତିୱାଲେ ଜିସୁ ନାଣ୍ତ ଦୁଃକ୍‌ ମାରି ଦାନ୍ଦା ଆଜି,
MAT 26:38 ୱାନ୍‌ ୱାରିଙ୍ଗ୍‌ ଇର୍ହାନ୍‌, “ଦୁଃକ୍‌ତାନ୍‌ ନା ଜିବନ୍‌ ସାନିୱାଜା ଆଜିନାତ୍‌, ଇବେନୁ ମିର୍‌ ନା ୱାଲେ କାପ୍‌କିଜ ମାନ୍‌ଡ୍ରୁ ।”
MAT 26:39 ଜିସୁ କାଣ୍ତେକ୍‍ ଆକ ସର୍ହାନ୍‌ନୋ ବୁମିଦୁ ମକମ୍‌ ପାଡ଼ାକ୍‌ତାନ୍‌ନୋ ପାରାତାନା କିଜି କିଜି ଇର୍ହାନ୍‌, “ଏ ନା ବୁବା, ଜଦି ଆଦେଙ୍ଗ୍‌ଆଟ୍‌ନାତ୍‌, ଆର୍‌ତିଙ୍ଗ୍‌ ଇୟା ଦୁଃକ୍‌ବୋଗ୍‌ତି ଉଣି ଡୁବାଇ ନା ମାଣାନ୍‌ ଆକ ଅଆ, ମାତର୍‌ ନା ବଦା ସିଲେ । ନି ବଦା ପୁରା ଆପିତ୍‌ ।”
MAT 26:40 ତାନେୱେନ୍‌କା ୱାନ୍‌ ମୁଏର୍‌ ସିସୁରି ଲାକ୍‌ତୁ ଡ଼େସି ୱାତାନ୍‌ନୋ ସୁଡ଼ୁତାନ୍‌, ୱାର୍‌ ସୁସ୍‌ତା ମାନାର୍‌ । ଜିସୁ ପିତରତିଙ୍ଗ୍‌ ଇର୍ହାନ୍‌, “ମିର୍‌ ଇନିକା ନା ୱାଲେ ଗନ୍‌ଟା ବା କାପ୍‌କିଦେଙ୍ଗ୍‌ ଆଟ୍‍ଇଜିନିଦେର୍‍ ?
MAT 26:41 ପରିକାଦୁ ଏଣ୍ତେସ୍‌ ପଡ଼ାଇଦେର୍‌, ଇୟାଉଣ୍ତିଙ୍ଗ୍‌ କାପ୍‌କିଜ ପାରାତାନା କିଦୁ । ଇରିଙ୍ଗ୍‌ ମି ଆତ୍ମା ବଦାକିନାତ୍‍, ମାତର୍‌ ମେନ୍ଧଲ୍‍ ଲିଡ଼ଲାଡ଼ା ।”
MAT 26:42 ଜିସୁ ମାରିଡ଼େସି ସର୍ହାନ୍‌ନୋ ପାର୍‌ତନା କିଜି ଇର୍ହାନ୍‌, “ଏ ନା ବୁବା, ଜଦି ଇୟା ଦୁଃକ୍‌ବୋଗ୍‌ତି ଉଣି ଡୁବାଇ ନା ମାଣାନ୍‌ କୁତ୍‌ସଅତେଙ୍ଗ୍‌ ଆଟ୍‍ଏର୍‍ ଆମାସାନ୍ଦି ନାନ୍ ତାନିଙ୍ଗ୍‌ ଉନ୍‌ଣ୍ତେଙ୍ଗ୍‌ ପଡ଼ାନାତ୍‌, ଆର୍‌ତିଙ୍ଗ୍‌ ନି ବଦା ପୁରା ଆପିତ୍‌ ।”
MAT 26:43 ୱାନ୍‌ ୱାଜି ମାରିଡ଼େସି ସିସୁରିଙ୍ଗ୍‌ ସୁସ୍‌ତି ମାରିକା ସୁଡ଼ୁତାନ୍‌ । ୱାରି କାଣୁକୁ ରେସ ମାନ୍‌ଡ୍ରେଙ୍ଗ୍‌ ଆଟ୍‌ଏଜି ମାର୍ହାର୍‌ ।
MAT 26:44 ଜିସୁ ୱାରିଙ୍ଗ୍‌ ଡ଼ିସ୍‌ସି କାଣ୍ତେକ୍‍ ଆକ ସୋଲ୍‌ସି ମୁନ୍‌ଡ୍ରି ଦେବେଙ୍ଗ୍‌ ବା ଆୟାୱାଜା ପାରାତାନା କିତାନ୍‌ ।
MAT 26:45 ତାନେୱେନ୍‌କା ୱାନ୍‌ ସିସୁରି ଲାକ୍‌ତୁ ୱାଜି ଇର୍ହାନ୍‌, “ମିର୍‌ ଇୟାସାନ୍ଦି ଡରିତିଦେର୍‌ନୋ ରମ୍‌ଜିନିଦେର୍‌ ? ସୁଡ଼ୁଦୁ, ମନୁସ୍ୟପୁତ୍ର ପାପି ଲୋକା କିୟୁଦୁ ସର୍‌ପେଆନି ସାକ୍ତିଦି ବେଡ଼ା ୱାତାନି ।
MAT 26:46 ନିଙ୍ଗ୍‍ଦୁ, ମାଡ୍‌ ସନାଟ୍‌; ସୁଡ଼ୁଦୁ, ଏନ୍‌ ନାଙ୍ଗିଁ ଶାତ୍ରୁରି କିୟୁଦୁ ସେରେପ୍‌ନା ସିନାନ୍‌, ୱାନ୍‌ ଲାକ୍‌ତୁ ୱାତାନ୍‍ନି ।”
MAT 26:47 ଜିସୁ ଇୟା ମାଟା ୱେର୍‌ସିମାନି ବେଡ଼ାଦୁ, ୱାରି ବାରଲୋକ୍ ସିସୁରି ଲୋଇରାନ୍‌ ଜିହୁଦା ଦର୍‌ତି ସିସୁ ୱାତା ଇତାନ୍‌ । ୱାନି ୱାଲେ କାଣ୍ତା ନି ଡୁଡୁଙ୍ଗ୍‌କଣେଙ୍ଗ୍‌ ଆସ୍‌ସି ଗାଦି ଲୋକୁ ଆବେନୁ ଉଣ୍ତାତାର୍‌ । ୱାରିଙ୍ଗ୍‌ ପେରି ଜାଜକର୍‌ ନି ଦାର୍ମୁ ନେତାର୍‌ ପୋକ୍‌ତାମାର୍ହାର୍‌ ।
MAT 26:48 ସାତ୍ରୁରି କିୟୁଦୁ ଆସ୍‌ସିସ୍‌ କିନିସିନି ଜିହୁଦା ୱାରିଙ୍ଗ୍‌ ଉନ୍‌ଡ୍ରି ସିନା ସିନି ଉଣ୍ତିଙ୍ଗ୍‌ ଟିକ୍‌ କିତାମାର୍ହାନ୍‌, ୱାନ୍‌ ୱାରିଙ୍ଗ୍‌ ଇର୍‌ଆ ମାର୍ହାନ୍‌, “ନାନ୍ ଆମାୱାନିଙ୍ଗ୍‌ ନଣ୍ତ୍‌ନା, ୱାନ୍‌ ଆୟାକାନ୍‌, ୱାନିଙ୍ଗ୍‌ ଆସ୍‌ତୁ ।”
MAT 26:49 ଜିହୁଦା ଆୟାଦାପ୍ରେ ଜିସୁଦି ଲାକ୍‌ତୁ ୱାତାନ୍‌ନୋ, ଏ ଗୁରୁ, ମାଡ଼ିସ୍‍କିନିକା, ଇକା ଇନ୍‌ଞ୍ଜି ୱାନିଙ୍ଗ୍‌ ନଣ୍ତିତାନ୍‌ ।
MAT 26:50 ଜିସୁ ୱାନିଙ୍ଗ୍‌ ଇର୍ହାନ୍‌, “ସଙ୍ଗ୍‍, ନି ପାଣି ବେଗି ୱିସ୍‌ଆ ।” ତାନେୱେନ୍‌କା ୱାର୍‌ ଲାକ୍‌ତୁ ୱାଜି ଜିସୁଙ୍ଗୁଁ ଆସ୍‌ତାରୋ ତର୍‌ତାର୍‌ ।
MAT 26:51 ଜିସୁଦି ତରିଟି ଅରେନ୍‍ ଲୋକୁ ନିଜେଦି କାଣ୍ତା ସପ୍‌ତାନ୍‌ନୋ ୱିଜେରିଙ୍ଗ୍‌ପେରି ଜାଜକଦି ସାକର୍‌ତିଙ୍ଗ୍‌ କାତ୍‌ତାନ୍‌ । ଆୟା ଲୋକ୍‌ତି ଗିତଣି ତେୱିତାତ୍‌ ।
MAT 26:52 ଜିସୁ ୱାନିଙ୍ଗ୍‌ ଇର୍ହାନ୍‌, “ନି କାଣ୍ତାଦିଙ୍ଗ୍‌ ତାନି ବାଡିଦୁ ଇଡିଆ । ଆମାକାର୍‌ କାଣ୍ତା ସୋପ୍‌ନାର୍‌ କାଣ୍ତାଦାନ୍‍ ସାନାର୍‍, ୱାର୍‌ କାଣ୍ତାଦାନ୍‌ନେ ସାନାର୍‍ ।
MAT 26:53 ନିନୁ ଇନିକା ନେସ୍‌ଇ, ନାନ୍ ନା ବୁବେଙ୍ଗ୍‌ ସାକା ଲସ୍‌ତିଙ୍ଗ୍‌, ୱାନ୍‌ ନା ଉଣ୍ତିଙ୍ଗ୍‌ ଆୟାଦାପ୍ରେନେ ବାରଗୋଟା ସନ୍‌ୟ୍ୟଦଲ୍‌ତି ବାଦୁଲୁ ନାଣ୍ତ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ପୋକ୍‌ତେଙ୍ଗ୍‌ ଆଟ୍‍ନାନ୍‍ ?
MAT 26:54 ମାତର୍‌ ଇୟାୱିଜୁ ଗଟାନାତ୍‌ ଇଜି ଦାର୍ମୁସାସ୍ତ୍ରଦୁ ଆମାକା ରାସ୍‌ତାମାନାତ୍‌, ଆକା ପୁରା ଆନାତ୍‌ ଏଣ୍ତେସ୍‌ ?”
MAT 26:55 ଜିସୁ ତାନେୱେନ୍‌କା ଉଣ୍ତାତିମାରିଇ ଆୟା ଲୋକାଙ୍ଗ୍‌ ଇର୍ହାନ୍‌, “ନାନ୍ ଇନିକା ଅରେନ୍‍ ଉରୁକ୍‌ସିମାନି ଡଙ୍ଗାଁର୍‌ଏନ୍‌ ୱାଜା କାଣ୍ତା ନି ଡୁଡୁଙ୍ଗ୍‌ ଆସ୍‌ସି ନାଙ୍ଗିଁ ଆସ୍‌ତେଙ୍ଗ୍‌ ୱାତିମାନିଦେର୍‌ ? ନାନ୍ ୱିଜୁଦିନ୍‌ ମନ୍ଦିର୍‌ତୁ ବାସ୍‌ସି ସିକିୟା ସିଜିମାର୍‌ଆ, ନାସ୍ତିୱାଲେ ମିର୍‌ ନାଙ୍ଗିଁ ଆସ୍‍ଇତିଦେର୍‍ !
MAT 26:56 ମାତର୍‌ ବାବବାଦିର୍ ସାସ୍ତ୍ରଦୁ ଆମା ଆମାକା ରାସାତାମାନାର୍‌, ଆୟାୱିଜୁ ପୁରାଆନିଉଣ୍ତିଙ୍ଗ୍‌ ଇକା ଗଟାତାମାନାତ୍‌ ।” ନାସ୍ତିୱାଲେ ସିସୁର୍‍ ୱିଜେରେ ଜିସୁଙ୍ଗୁଁ ଡ଼ିସ୍‌ସି ଉର୍‌କୁସି ସର୍ହାର୍‌ ।
MAT 26:57 ଆମାକାର୍‌ ଜିସୁଙ୍ଗୁଁ ଆସ୍‌ତାମାର୍ହାର୍‌, ୱାର୍‌ ୱାନିଙ୍ଗ୍‌ ୱିଜେରିଙ୍ଗ୍‌ପେରି ଜାଜକ କୟାପାରି ଇନ୍‌ଡ୍ର ଅତାର୍‍ । ଆୟା ବାଡିଦୁ ଦାର୍ମୁଗୁରୁ ନି ଦାର୍ମୁ ନେତାର୍‌ ଉନ୍‌ଡ୍ରେମାନୁ ଆତାମାର୍ହାର୍‌ ।
MAT 26:58 ପିତର୍‌ କାଣ୍ତେକ୍‌ ଆକ ମାନ୍‌ଞ୍ଜି ଜିସୁଦି ୱେନ୍‌କା ସୋଲ୍‌ସିମାର୍ହାନ୍‌ ମାରି ୱାନ୍‌ ୱିଜେରିଙ୍ଗ୍‌ପେରି ଜାଜକ କୟାପାରି ଇଲୁଦି ଦୁଆର୍‌ ସାନ୍ଦି ସର୍ହାନ୍‌ । ଇୟାୱିଜୁ ଗଟ୍‌ନାଦି ଅବସ୍ତା ଇନିକା ଆନାତ୍‌, ଆକା ସୁଡ଼ୁନି ଉଣ୍ତିଙ୍ଗ୍‌ ପିତର୍‌ ଲୋଇ ସୋର୍ହାନ୍‌ନୋ ମନ୍ଦିର୍‌ କାପ୍‍କିନିୱାରି ୱାଲେ ବାସ୍‌ତାନ୍‌ !
MAT 26:59 ପେରି ଜାଜକର୍‌ ନି ଜିହୁଦିର୍‌ ପେରିମିଟିଙ୍ଗ୍‌ତି ୱିଜେରେ ଜିସୁଙ୍ଗୁଁ ସାନିଦଣ୍ତ ସିନିଉଣ୍ତିଙ୍ଗ୍ ୱାନି ବିରଦ୍‌ତାନ୍‌ ମିସ୍‌ସାକି ପୟ୍‌ଦେଙ୍ଗ୍‌ ତେରେପେତେଆତାର୍‌ ।
MAT 26:60 ମାତର୍‌ ଗାଦି ଲୋକୁ ଜିସୁଦି ବିରଦ୍‌ତାନ୍‌ ମିସ୍‌ ମାଟା ଇର୍ହାର୍‌ । ମାତର୍‌ ଆୟାୱାଜା ଇନି ପାରାମାଣ୍‌ ପୟ୍‌ଏତାର୍‌ । ସାରାସାରିୱେନ୍‌କା ରିଏର୍‌ ନିଙ୍ଗିଁତାର୍‍ ।
MAT 26:61 ୱାର୍‌ ଇର୍ହାର୍‌, “ଇୟାକାନ୍‌ ଇର୍‌ଆ ମାର୍ହାନ୍‌, ନାନ୍ ମାପୁରୁଦି ମନ୍ଦିର୍‌ତିଙ୍ଗ୍‌ ରୁକୁନାନୋ ମୁନେଟି ୱେନ୍‌କା ତାନିଙ୍ଗ୍‌ ମାରିଡ଼େସି ତିଆର୍‌ କିଦେଙ୍ଗ୍‌ ଆଟ୍‍ନା ।”
MAT 26:62 ୱିଜେରିଙ୍ଗ୍‌ପେରି ଜାଜକ ନିଲ୍‌ତାନ୍‌ନୋ ଜିସୁଙ୍ଗୁଁ ୱେନ୍‌ବାତାନ୍‌, “ନିନ୍‌ ଏନ୍ଦା ଇନିକା ଇନ୍‍ଇଜିନି ? ଇୟା ମାଟାଦିଙ୍ଗ୍‌ ରୁକୁତେଙ୍ଗ୍‌ ନିନୁ ଇନିକା ୱେର୍‌ନିକା ମାନାତ୍‌ ?”
MAT 26:63 ମାତର୍‌ ଜିସୁ ଆଲେତାତେବାତାନ୍‌ । ୱିଜେରିଙ୍ଗ୍‌ପେରି ଜାଜକ ୱାନିଙ୍ଗ୍‌ ଇର୍ହାନ୍‌, “ଜିବନ୍‌ମାନି ମାପୁରୁଦି ଦର୍‌ତାନ୍‌ ନାନ୍ ନିଙ୍ଗିଁ ପାର୍‌ମାଣ୍‌ ସିଜି ୱେନ୍‌ବାଜିନା, ସତ୍‌ତାନ୍‌ ଇନ୍‌ଆଁ, ନିନ୍‌ ଇନିକା ମାପୁରୁଦି ମାରିନ୍‌ କ୍ରିସ୍ତ ଅର୍ତ ମସିହ ?”
MAT 26:64 ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଟିକ୍‌ ୱେର୍‌ତିମାନି । ମାତର୍‌ ନାନ୍ ମିଙ୍ଗିଁ ୱିଜେରିଙ୍ଗ୍‌ ଇଜିନା, ମନୁସ୍ୟପୁତ୍ର ୱିଜୁ ସାକ୍ତିମାନିୱାରି ଉଣି ତରିନ୍‌ ବାସ୍‌ତିମାନିକା ସୁଣି, ମାରି ୱାନିଙ୍ଗ୍‌ ମୁସ୍‌କୁପୁର୍‌ତାନ୍‌ ମେଗେମାଲାଦି ୱାଲେ ରେତାଜି ୱାନିକା ନିନ୍‌ ସୁଡ଼୍‌ନି ।”
MAT 26:65 ଇକା ୱେର୍‌ଆନ୍‌ନୋ ୱିଜେରିଙ୍ଗ୍‌ ପେରି ଜାଜକ ନିଜେଦି ଆଙ୍ଗିଁଦିଙ୍ଗ୍‌ କିସ୍‌ସି ପୋକ୍‌ସି ଇର୍ହାନ୍‌, “ଇକାନ୍‌ ମାପୁରୁଙ୍ଗ୍‌ ନିନ୍ଦାକିତାନ୍‌ । ମାରି ଆଇ ସାକି ଦର୍‌କାର୍‌ ସିଲେ । ଇୟାଦାପ୍ରେନେ ଇୟାୱାନି ମାପୁରୁଙ୍ଗ୍‌ ନିନ୍ଦା ତୋ ମିର୍‌ ୱେର୍‌ଇଦେର୍‌ ।
MAT 26:66 ଇୟା ବିସୟ୍‌ତାନ୍‌ ମି ବଦା ଇନିକା ?” ୱାର୍‌ ଇର୍ହାର୍‌, “ୱାନ୍‌ ଦସି, ୱାନ୍‌ ସାନିଦଣ୍ତ୍‌ତି ଜଗ୍‌ ।”
MAT 26:67 ତାନେୱେନ୍‌କା ୱାର୍‌ ଜିସୁଦି ମକମ୍‌ତୁ ପୁସ୍‌କାଡ଼ାମ୍‌ପୁସ୍‌ସି ୱାନିଙ୍ଗ୍‌ ଡାକ୍‌ତାର୍‌; ମାରି ଏନ୍‌ ଏନ୍‌ ୱାନିଙ୍ଗ୍‌ ସାପାଡ଼ା ଡାକ୍‌ସି ଇର୍ହାର୍‌,
MAT 26:68 “ଇକାନ୍‌ କ୍ରିସ୍ତ ! ନିନ୍‌ ପରା ବାବବାଦି, ମାଙ୍ଗିଁ ୱେର୍‌ଆ ତୋ, ଏନ୍‌ ନିଙ୍ଗିଁ ଡାକ୍‌ତାନ୍‌ !”
MAT 26:69 ୱିଜେରିଙ୍ଗ୍‌ପେରି ଜାଜକରି ଆତ୍‍ରେରି ଦୁଆର୍‌ତୁ ପିତର୍‌ ବାସ୍‌ତି ମାରିଇୱାଲେ ଅରେତ୍‌ ସାକର୍‌ ଆଇମା ଲାକ୍‌ତୁ ୱାଜି ଇର୍ହାତ୍‌, “ନିନ୍‌ ବା ଗାଲିଲିଦି ଜିସୁଦି ୱାଲେମାରିଇ ।”
MAT 26:70 ମାତର୍‌ ପିତର୍‌ ୱିଜେରି ଆଗ୍‌ଡ଼ି ଇୟା ମାଟା ନେସ୍‍ଏଜି ଇର୍ହାନ୍‌, “ନିନ୍‌ ଇନିକା ଇଜିନି, ନାନ୍ ନେସ୍‌ଏଜିନା ।”
MAT 26:71 ଇକା ଇନ୍‌ଞ୍ଜି ୱାନ୍‌ ଆୟା ଦୁଆର୍‌ତି କେର୍‌ପି ଲାକ୍‌ତୁ ସୋର୍ହାନ୍‌ । ମାରି ଅରେତ୍‌ ସାକର୍‌ ଆଇମା ୱାନିଙ୍ଗ୍‌ ସୁଡ଼ୁଜି ଆବେନୁ ମାନି ଲୋକାଙ୍ଗ୍‌ ଇର୍ହାତ୍‌, “ଇୟାକାନ୍‌ ନାଜରିୟତିୟ ଜିସୁଦି ୱାଲେ ମାର୍ହାନ୍‌ ।”
MAT 26:72 ପିତର୍‌ ମାରିଡ଼େସି ନେସ୍‍ଏଜି ଇର୍ହାନ୍‌, “ପାର୍‌ମାଣ୍‌ କିଜି ୱେର୍‌ସିନା, ଆୟା ଲୋକ୍‌ତିଙ୍ଗ୍‌ ନାନ୍ ନେସେଏ ।”
MAT 26:73 ଏସ ସମୟ୍ ୱେନ୍‌କା ଆବେନୁ ନିର୍‌ଇମାରିଇ ଲୋକୁ ପିତରତି ଲାକ୍‌ତୁ ୱାଜି ଇର୍ହାର୍‌, “ନିନୁ ସତେନେ ୱାରି ଲୋଇରାନ୍‌ ଅରେନ୍‍ । ନି ୱାର୍‌ଗିନିମାଣୁକୁ ଇକା ଜାଣାପଡ଼ାଜିନାତ୍‌ ।”
MAT 26:74 ପିତର୍‌ ଇର୍ହାନ୍‌, “ପାର୍‌ମାଣ୍‌ କିଜି ୱେର୍‌ସିନା, ନା ମାଟା ସତ୍‍ନେ । ଆକା ଆଏତିଙ୍ଗ୍‍ ମାପୁରୁ ନାଙ୍ଗିଁ ଦଣ୍ଡ୍‌ ସିପିନ୍‌ । ଆୟା ଲୋକ୍‌ତିଙ୍ଗ୍‌ ନାନ୍ ନେସେଏ ।” ଆୟାଦାପ୍ରେନେ କର୍‌ରୁ କେଡ଼ିତାତ୍‌ ।
MAT 26:75 ମାରି ଜିସୁ ଇନିକା ଇର୍‌ଆ ମାର୍ହାନ୍‌, “ପିତର୍‌ ମନ୍‌ତୁ ଏତ୍‌କିତାନ୍‌ କର୍‌ରୁ କେଡ଼େନି ଆଗ୍‍ଡ଼ିନେ ନାଙ୍ଗିଁ ନେସେଏ ଇଜି ନିନୁ ମୁନ୍‌ଡ୍ରି ଦେବେଙ୍ଗ୍‌ ଇନି ।” ୱାନ୍‌ ଆତେରେ ସର୍ହାନ୍‌ନୋ ନାଣ୍ତବର୍‌କୁକ୍‌ସି ଆଡ଼୍‍ବାତାନ୍‍ ।
MAT 27:1 ମାର୍‌ନାଣ୍ଡିଙ୍ଗ୍‌ ସାଲ୍‌ଦିନେ ଜିସୁଙ୍ଗୁଁ ଡାକ୍‌ତେଙ୍ଗ୍‍ଁ ୱିଜେରେ ପେରି ଜାଜକର୍‌ ମାରି ଦାର୍ମୁ ନେତାର୍‌ ରାଜି ଆତାର୍‌ ।
MAT 27:2 ୱାର୍‌ ୱାନିଙ୍ଗ୍‌ ସିକିଣିଦାନ୍‌ତର୍‌ସି ରୋମିୟ ସାସନ୍‌ତି ପେରିନେତା ପିଲାତ୍‌ଦି ଲାକ୍‌ତୁ ଅତାର୍‍ ।
MAT 27:3 ଏସ୍ତିୱାଲେ ସାତ୍ରୁରି କିୟୁଦୁ ସର୍‌ପେକିତିସିତି ଜିହୁଦା ୱେର୍‌ଆନ୍‌ ଜେ, ଜିସୁଙ୍ଗୁଁ ସାନିଦଣ୍ତ୍‌ ଆତାମାନାନ୍‌, ୱାନ୍‌ ଏତ୍‌କିତାନ୍‌ ମାରି ପେରି ଜାଜକ ମାରି ଦାର୍ମୁ ନେତାରିଙ୍ଗ୍‌ ଆୟା ତିରିସ୍‌ଗୋଟା ୱେଣ୍ତିଅଦ୍‌ଲିଙ୍ଗ୍‌ ଡ଼େସି ସିତାନ୍‌ନୋ ଇର୍ହାନ୍‌,
MAT 27:4 “ଅରେନ୍‍ ଦସ୍‌କିଇ ଲୋକ୍‌ତି ଉଣ୍ତିଙ୍ଗ୍‌ ମି କିୟୁଦୁଆସ୍‌ସି କିତାସିତାନୋ ନାନ୍ ପାପ୍‌ କିତାମାନା ।” ଜିହୁଦି ନେତାର୍‌ ଇର୍ହାର୍‌, “ଆବେନୁ ମାଦି ଇନିକା ମାନାତ୍‌ ? ଆକା ନି ନିଜେଦି ମାଟା ।”
MAT 27:5 ଜିହୁଦା ଅଦ୍‌ଲିଆଙ୍ଗାଁ ମନ୍ଦିର୍‌ ଲୋଇ ପୋକ୍‌ତାସିତା ସୋର୍ହାନ୍‌ । ୱେନ୍‌କା ୱାନ୍‌ କକ୍‌ଲାଦୁ ଉରି ଆସାତାନ୍‌ନୋ ସାତାନ୍‌ ।
MAT 27:6 ପେରି ଜାଜକର୍‌ ଆୟା ୱେଣ୍ତିଅଦ୍‌ଲିଆଙ୍ଗାଁ ଉଣ୍ତା କିଜି ଇର୍ହାନ୍‌, “ଇକା ନେତେର୍‌ତି ଦାରା ଡାବୁଙ୍ଗୁଁ । ଇକା ମନ୍ଦିର୍‌ତି ପେଡ଼ାଦୁ ଇଡ୍‌ନି ନିୟମ୍‌ତି ବିରଦ୍‌ ପାଣି ।”
MAT 27:7 ଆୟା ଡାବୁଆଙ୍ଗାଁ ଏଣ୍ତେସ୍‌ ସାଲା କିନାର୍‌, ଇୟା ବିସୟ୍‌ତାନ୍‌ ଉନ୍‌ଡ୍ରି ରାଜି ଆଜି କୁମାର୍‍ ବୁମି ଦର୍‌ତି କାଣ୍ତେକ୍‍ ବୁମି କଟାର୍‌ । ଇକା ଆଇଦେସ୍‌ତିୱାରି ମୁସ୍‌ନି ବାଡି ୱାଜା ଆତାତ୍‌ ।
MAT 27:8 ନେର୍‌ ସାନ୍ଦି ଆୟା ବୁମିଦିଙ୍ଗ୍‌ “ନେତେର୍‌ ବୁମି” ଇଜି ଆଜିନାର୍‌ ।
MAT 27:9 ଇୟାୱାଜା ଜିରିମିୟ ବାବବାଦି ୱେର୍‌ତିମାନି, “ବାବବାଣି ପୁରା ଆତାତ୍‌ ଆକାବା ତିରିସ୍‌ ଟାକେଣାନ୍‌ ପର୍‌ନି ଉଣ୍ତିଙ୍ଗ୍‌ ଇସ୍ରାଏଲ୍‌ତି କଡ଼ର୍‌ ରାଜି ଆତା ମାର୍ହାର୍‌, ଆକା ଅତାର୍‍,
MAT 27:10 ଆୟା ତିରିସ୍‌ ଗୋଟା ୱେଣ୍ତିଅଦ୍‌ଲିଙ୍ଗ୍‌ ୱାର୍‌ ତାସି, ମାରି ୱାର୍‌ କୁମାର୍‍ କିଡ଼ିଇ କଟାର୍‌ ଇକା କିନି ଉଣ୍ତିଙ୍ଗ୍‌ ନାଙ୍ଗିଁ ପ୍ରବୁ ଆଦେସ୍‌ ସିତାମାର୍ହାନ୍‌ ।”
MAT 27:11 ଜିସୁଙ୍ଗୁଁ ଆଗ୍‌ଡ଼ି ସୁଡ଼ୁଜି ରୋମିୟ ଅଦିକାରି ପିଲାତ୍‌ ୱେନ୍‌ବାତାନ୍‌, “ନିନ୍‌ ଇନିକା ଜିହୁଦିରି ରାଜା ?” ଜିସୁ ୱାନିଙ୍ଗ୍‌ ଇର୍ହାନ୍‌, “ନିନୁ ଆକା ଇଜିନି ।”
MAT 27:12 ମାତର୍‌ ପେରି ଜାଜକର୍‌ ମାରି ଦାର୍ମୁ ନେତାରି ୱାନି ବିରଦ୍‌ତାନ୍‌ ଏମେ ଦସ୍‍ମାଟା ତାତାମାର୍ହାର୍‍, ଆବେଣି ପଦେକ୍‍ବା ମାଟା ଇନ୍‌ଏତାନ୍‌ ।
MAT 27:13 ଆଦେଙ୍ଗ୍‌ ପିଲାତ୍‌ ୱାନିଙ୍ଗ୍‌ ଇର୍ହାନ୍‌, “ନି ବିରଦ୍‌ତାନ୍‌ ୱାରି ଦସ୍‍ମାଟା ୱିଜୁ ନିନୁ ଇନିକା ୱେନ୍‌ଡ୍ରେଙ୍ଗ୍‌ ଆଟ୍‌ଇଜିନି ?”
MAT 27:14 ମାତର୍‌ ଜିସୁ ଉତରଦାନ୍‌ ପଦେକ୍‌ ବା ଇନ୍‌ଇତିଙ୍ଗ୍‌ ପିଲାତ୍‌ ନାଣ୍ତ କାବାତାନ୍‍ ।
MAT 27:15 ନିସ୍ତାର୍‌ ପଣ୍ତୟ୍‌ତି ବେଡ଼ାଦୁ ୱିଜୁଲୋକା ବଦାଦାନ୍ ରୋମିୟ ଅଦିକାରି ଜେ ଅରେନ୍‍ୱାନିଙ୍ଗ୍‍ ଜଇଲ୍‌ତାନ୍‌ ଡ଼ିସ୍‌ନିସିନି ନିତିନିୟମ୍ ମାର୍ହାତ୍‌ ।
MAT 27:16 ନାସ୍ତିୱାଲେ ବାରବ୍‌ବା ଜିସୁ ଦର୍‌ତି ଅରେନ୍‍ ୱେଙ୍ଗିଁତିକାନ୍‌ ଜଇଲ୍‌ତୁ ମାର୍ହାନ୍‌ ।
MAT 27:17 ଉଣ୍ତାତିମାରିଇ ୱିଜୁ ଲୋକାଙ୍ଗ୍‌ ପିଲାତ୍‌ ୱେନ୍‌ବାତାନ୍‌, ନାନ୍ ଏଙ୍ଗ୍‌ ଡ଼ିସ୍‌ନା ସିନା ଇଜି ମି ବଦା ? “ବାରବ୍‌ବାଦିଙ୍ଗ୍‌ ନୋ ଜିସୁ ଆମାୱାନିଙ୍ଗ୍‌ କ୍ରିସ୍ତ ଇଜି ଇନାର୍‌ ?”
MAT 27:18 ପିଲାତ୍‌ ନେଗେନ୍‌ତାନ୍‌ ନେସେତା ମାର୍ହାନ୍‌ ଜେ ଜିହୁଦି ନେତାର୍‌ ଗିଦ୍‌ରିଆଜି ଜିସୁଙ୍ଗୁଁ ୱାନି କିୟୁଦୁ ସର୍‌ପେ କିତାମାନାର୍‌ ।
MAT 27:19 ପିଲାତ୍‌ ବିଚାର୍‍କିନି ବାଡିଦୁ ବାସ୍‌ତିମାରିଇ ୱାଲେ ୱାନି ଆଡ଼୍‌ସି ଉନ୍‌ଡ୍ରି କାବୁର୍‌ ପୋକ୍‌ତାତ୍‌ “ଆୟା ଦସ୍‌କିଇ ଲୋକ୍‌ତିଙ୍ଗ୍‌ ଇନିକା କିମାଟ୍‌ । ଇଏନ୍‌ ମିଲି ଉନ୍‌ଡ୍ରି ଲବେରୁ ୱାନି ଉଣ୍ତିଙ୍ଗ୍‌ ନାନ୍ ନାଣ୍ତ ଦୁଃକ୍‌ ଏତ୍‌କିତାମାନା ।”
MAT 27:20 ପେରି ଜାଜକର୍‌ ମାରି ଦାର୍ମୁ ନେତାର୍‌ ବାରବ୍‌ବାଦିଙ୍ଗ୍‌ ଡ଼ିସ୍‌ସି କିଜସିଜି, ଜିସୁଙ୍ଗୁଁ ସାନିଦଣ୍ତ ସିନି ଉଣ୍ତିଙ୍ଗ୍‌ ପିଲାତ୍‌ ଲାକ୍‌ତୁ ଦାବି କିଦେଙ୍ଗ୍‌ ଲୋକାଙ୍ଗ୍‌ ଏଗ୍ରିସ୍‌କିତାର୍‌ ।
MAT 27:21 ପିଲାତ୍‌ ମାରି ଲୋକାଙ୍ଗ୍‌ ୱେନ୍‌ବାତାନ୍‌, “ଇୟା ରିଏରି ମାଣ୍‌କୁ ନାନ୍ ଏଙ୍ଗ୍‌ ଡ଼ିସ୍‌ନାସିନା ଇଜି ମି ବଦା ?” ୱାର୍‌ ଇର୍ହାର୍‌, “ବାରବ୍‌ବାଦିଙ୍ଗ୍‌ !”
MAT 27:22 ପିଲାତ୍‌ ୱାରିଙ୍ଗ୍‌ ୱେନ୍‌ବାତାନ୍‌, “ଆର୍‌ତିଙ୍ଗ୍‌ କ୍ରିସ୍ତ ଦର୍‌ତାନ୍‌ ୱେଙ୍ଗିଁତି ଜିସୁଙ୍ଗୁଁ ଇନିକା କିନା ?” “ୱାନିଙ୍ଗ୍‌ କ୍ରୁସଦୁ ଏକିସ୍‌କିଦୁ” ଇଜି ୱାର୍‌ ୱିଜେରେ ଆଉଲି ଆତାର୍‌ ।
MAT 27:23 ପିଲାତ୍‌ ୱେନ୍‌ବାତାନ୍‌, “ମାତର୍‌ ୱାନ୍‌ ଇନି ଦସ୍‌ କିତାମାନାନ୍‌ ?” ୱାର୍‌ ମାରି ନାଣ୍ତ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ୱାନିଙ୍ଗ୍‌ କ୍ରୁସଦୁ ଏକିସ୍‌କିଦୁ ।”
MAT 27:24 ପିଲାତ୍‌ ଏସ୍ତିୱାଲେ ସୁଡ଼ୁତାନ୍‌ ଜେ ୱାରିଙ୍ଗ୍‌ ମାରି ୱେର୍‌ସ ଇନି ଲାବ୍‍ ସିଲେ, ମାରି ଜାଟିଜଗଡ଼ା ଆଜିନାର୍‌, ନାସ୍ତିୱାଲେ ୱାନ୍‌ ଉବୁଡ଼ି ଏରୁ ତାତାନ୍‌ନୋ ଲୋକା ଆଗ୍‍ଡ଼ିନେ କିୟୁ ନର୍‌ବାତାନ୍‌ନୋ ଇର୍ହାନ୍‌, “ଇୟା ଲୋକ୍‌ତି ସାନି ଉଣ୍ତିଙ୍ଗ୍‌ ନାନ୍ ଦସ୍‌ ସିଲେ । ଇକା ମି ପାଣି ।”
MAT 27:25 ୱିଜୁ ଲୋକୁ ଇର୍ହାର୍‌, “ଜିସୁଦି ସାନି ଦସ୍‌ ମାଙ୍ଗିଁ ନି ମା କଡ଼ରି ମୁସ୍‌କୁ ରାପିତ୍‍ ।”
MAT 27:26 ସାରାସାରିୱେନ୍‌କା ପିଲାତ୍‌ ବାରବ୍‌ବାଦିଙ୍ଗ୍‌ ଡ଼ିସ୍‌ସି ସିଜି ଜିସୁଙ୍ଗୁଁ କର୍‌ଡାଦାନ୍‌ ଡାକ୍‌ତେଙ୍ଗ୍‍ଁ ଆଦେସ୍‌ ସିତାନ୍‌, ତାନେୱେନ୍‌କା କ୍ରୁସ୍‌ଦୁ ଏକିସ୍‌ତେଙ୍ଗ୍‌ ଇଜି ସନ୍ୟରି କିୟୁଦୁ ସର୍‌ପେ କିତାନ୍‌ ।
MAT 27:27 ପିଲାତ୍‌ତି ସନ୍ୟର୍‌ ଜିସୁଙ୍ଗୁଁ ରୋମିୟ ସାସକଦି ମେଡ଼୍‍ଇଲୁଦୁ ଅତାର୍‍ ମାରି ୱିଜେରେ ସନ୍ୟର୍‌ ୱାନିଙ୍ଗ୍‌ କେର୍‌ପିସି ନିର୍‌ଆର୍‌ ।
MAT 27:28 ୱାର୍‌ ୱାନି ଆଙ୍ଗିଁ କୁତ୍‌ତାଅତାର ୱାନିଙ୍ଗ୍‌ ଉନ୍‌ଡ୍ରି ଲାଲ୍ ରଙ୍ଗ୍‌ତି ଆଙ୍ଗିଁ ଆରିସ୍‌କିତାର୍‌ ।
MAT 27:29 ସାମ୍‌ ମାରାତି କମାଦାନ୍‍ ଉନ୍‌ଡ୍ରି ଟପି ତିଆର୍‌ କିଜି ୱାନି ତାଲା ମୁସ୍‌କୁ ଆରିସ୍‌କିତାର୍‌ ମାରି ୱାନି ଉଣିକିୟୁଦୁ ଉନ୍‌ଡ୍ରି ନାଡ଼ା ଆସ୍‍ପିସ୍‌କିତାର୍‌ । ତାନେୱେନ୍‌କା ୱାନି ଆଗ୍‌ଡ଼ି ମେଣ୍ଡେଙ୍ଗ୍‌ ଗଟ୍‌କିଜି, “ଏ ଜିହୁଦିରି ରାଜା, ମାଡ଼ିସ୍‍କିନିକା, ଇକା ଇନ୍‌ଞ୍ଜି ୱାନିଙ୍ଗ୍‌ ସେମାର୍‌ କିତାର୍‌ ।”
MAT 27:30 ୱାର୍‌ ୱାନି ମୁସ୍‌କୁ ପୁସ୍‌ତାର୍‌, ଆୟା ନାଡ଼ା ଅସି ୱାନି ତାଲାଦୁ ଡାକ୍‌ତାର୍‌ ।
MAT 27:31 ମାରି, ୱାର୍‌ ୱାନିଙ୍ଗ୍‌ ସେମାର୍‌ କିତିୱେନ୍‌କା ଆୟା ରାଜାରି ଆଙ୍ଗିଁ କୁତ୍‌ସିଅସି ୱାନି ନିଜେଦି ଆଙ୍ଗିଁ ଆରିସ୍‌କିତାର୍‌ ମାରି ୱାନିଙ୍ଗ୍‌ କ୍ରୁସ୍‌କାଟ୍‌ତୁ ଏକିସ୍‌କିଦେଙ୍ଗ୍‌ ଅତାର୍‍ ।
MAT 27:32 ୱାର୍‌ ଗାଡ଼୍‌ତାନ୍‍ ସନିୱାଲେ ସାରିଦୁ କୁରିଣି ଗାଡ଼୍‍ଦି ସିମୋନ ଦର୍‌ତି ଅରେନ୍‍ ଲୋକ୍‌ତିଙ୍ଗ୍‌ ବେଟ୍‌ଆତାର୍‌ ମାରି ସନ୍ୟର୍‌ ୱାନିଙ୍ଗ୍‌ ଜିସୁଦି କ୍ରୁସକାଟ୍‌ ପିଣ୍ଡ୍‌ଦେଙ୍ଗ୍‌ ଇଜି ଜାସାପେଲାକିତାର୍‌ ।
MAT 27:33 ୱାର୍‌ ଗଲ୍‌ଗଥା ଦର୍‌ତି ଉନ୍‌ଡ୍ରି ବାଡିଦୁ ଇତାର୍‌ । “ଗଲ୍‌ଗଥାଦି ଅର୍ତ କାପାଲ୍‌ ନାନି ବାଡି ।”
MAT 27:34 ଆବେନୁ ୱାର୍‌ ଜିସୁଙ୍ଗୁଁ କେଇନିକା ମିସାତି ଅଙ୍ଗୁର୍‍ରସ୍‍ ଉନ୍‌ଣ୍ତେଙ୍ଗ୍‌ ସିତାର୍‍ । ଜିସୁ ତାନେଙ୍ଗ୍‌ କାଣ୍ତେକ୍‌ ୱେଡ଼୍‍ଜି ମାରି ଉଣୁଏତାନ୍‍ ।
MAT 27:35 ୱାର୍‌ ଜିସୁଙ୍ଗୁଁ କ୍ରୁସ୍‌କାଟ୍‌ତୁ ଏକିସ୍‌କିଜି ମାରି ୱାନି ଆଙ୍ଗିଁୱିଜୁ କୁଡ଼ୁକୁଡ଼ିଦାନ୍‌ ନିଜେନିଜେଦି ଲୋଇ ବାଗ୍ କିଜି ଅତାର୍‍ ।
MAT 27:36 ତାନେୱେନ୍‌କା ୱାର୍‌ ଆବେନୁ ବାସ୍‌ସି କ୍ରୁସ୍‌କାଟ୍‌ତୁ ଏକିସ୍‌କିତି ଜିସୁଙ୍ଗୁଁ କାପ୍‌କିଜି ତେବାତାର୍‌ ।
MAT 27:37 ୱାନି ବିରଦ୍‌ତାନ୍‌ ଆତିମାନି ମାଟା ଉନ୍‌ଡ୍ରି ରାସାତିମାନି ପାଟା ୱାନି ତାଲାଦି କ୍ରୁସ ମୁସ୍‌କୁ ଡ଼ତା ଡ଼ିସ୍‌ତାମାର୍ହାର୍ “ଇୟାକାନ୍‌ ଜିସୁ, ଜିହୁଦିରି ରାଜା ।”
MAT 27:38 ତାନେୱେନ୍‌କା ୱାର୍‌ ରିଏର୍‌ ଡଙ୍ଗାଁରିଙ୍ଗ୍‌ ଆବେନୁ କ୍ରୁସ୍‌କାଟ୍‌ତୁ ଏକିସ୍‌କିତାର୍‌, ଅରେନ୍‍ୱାନିଙ୍ଗ୍‍ ଉଣି ତରିନ୍‌ ମାରି ଆଇୱାନିଙ୍ଗ୍‍ ୱାନି ଡେବିରି ତରିନ୍‌ ।
MAT 27:39 ଆୟା ସାରିଦାନ୍‌ ସୋଲ୍‌ସିମାନି ଲୋକୁ ତାଲା ଦୁକ୍‌ସି ଜିସୁଙ୍ଗୁଁ ନିନ୍ଦା କିଜି ଇର୍ହାର୍‌ ।
MAT 27:40 “ନିନୁ ମନ୍ଦିର୍‌ତିଙ୍ଗ୍‌ ରୁକୁନିନୋ ମୁନେଟି ୱେନ୍‌କା ମାରି ତାନିଙ୍ଗ୍‌ ତିଆର୍‌କିଜିମାରିଇ । ନିନୁ ଜଦି ମାପୁରୁଦି ମାରିନ୍‌, ନିଜେଦିଙ୍ଗ୍‌ ରକିୟା କିଆ । କ୍ରୁସ୍‌କାଟ୍‌ତାନ୍‌ ରେତାଜ ରାଆ ।”
MAT 27:41 ପେରି ଜାଜକର୍‌, ଦାର୍ମୁଗୁରୁ ମାରି ଦାର୍ମୁ ନେତାର୍‌ ବା ଜିସୁଙ୍ଗୁଁ ସେମାର୍‌କିଜି ଇର୍ହାର୍‌,
MAT 27:42 “ୱାନ୍‌ ଆଇୱାରିଙ୍ଗ୍‌ ରକିୟାକିଜିମାର୍ହାନ୍‌, ମାତର୍‌ ନିଜେଦିଙ୍ଗ୍‌ ରକିୟା କିଦେଙ୍ଗ୍‌ ଆଟ୍‌ଏଜିନାନ୍‌ । ୱାନ୍‌ ପରା ଇସ୍ରାଏଲ୍‌ତି ରାଜା, ୱାନ୍‌ ଇୟାଦାପ୍ରେ କ୍ରୁସ୍‌ଦାନ୍‌ ରେତାଜରାପିନ୍‌, ମାପ୍‌ ୱାନିମାନୁ ବିସ୍‌ବାସ୍‌କିନାପ୍‌ ।
MAT 27:43 ୱାନ୍‌ ନିଜେଦିଙ୍ଗ୍‌ ମାପୁରୁଦି ମାରିନ୍‌ ଇନ୍‌ଞ୍ଜି ମାପୁରୁଦି ମୁସ୍‌କୁ ଆସାଇଟ୍‌ତାମାନାନ୍‌ । ଆର୍‌ତିଙ୍ଗ୍‌ ସୁଡ଼ୁନାଟ୍‌, ମାପୁରୁ ଇଲେଇ ୱାନିଙ୍ଗ୍‌ ଜିପିସ୍‌ କିଦେଙ୍ଗ୍‌ ବଦାକିଜିନାନ୍‌ ନୋ ସିଲେ ।”
MAT 27:44 ୱାନି ୱାଲେ କ୍ରୁସ୍‌କାଟ୍‌ତୁ ଡାକାଇଆତିମାନି ଡଙ୍ଗାଁର୍‌ଉଁ ବା ୱାନିଙ୍ଗ୍‌ ଆୟାୱାଜା ସେମାର୍‌ କିତାର୍‌ ।
MAT 27:45 ଆୟା ନାଣ୍ତିଙ୍ଗ୍‌ ବାର ଗନ୍‌ଟା ସମୟ୍‌ତୁ ପୃତିବି ୱିଜୁ ସିକାଟି ଆତାତ୍‌ ମାରି ଆକା ମୁନ୍‌ଡ୍ରି ଗଟ୍‌ନା ସାନ୍ଦି ତେବାତାତ୍‌ ।
MAT 27:46 ୱେଡ଼ାରେସିମାର୍‌ଇ ତିନ୍‌ଟାବେଡ଼ାଦୁ ଜିସୁ ନାଣ୍ତଆଉଲିଆଜି ଇର୍ହାନ୍‌, “ଏଲି, ଏଲି, ଲାମା ସବକ୍‌ତାନି ?” ଅର୍ତାତ୍‍, “ଏ ନା ମାପୁରୁ, ଏ ନା ମାପୁରୁ, ନିନୁ ନାଙ୍ଗିଁ ଏନ୍ଦା ଡ଼ିସ୍‌ତି ?”
MAT 27:47 ଲାକ୍‌ତୁ ନିର୍‌ଇମାରିଇ ଏସଲୋକ୍‌ ଇକା ୱେନ୍‌ଞ୍ଜି ଇର୍ହାର୍‌, “ୱାନ୍‌ ଏଲିୟଙ୍ଗ୍‌ କୁକ୍‌ସିନାନ୍‌ ।”
MAT 27:48 ଅରେନ୍‍ ଲୋକୁ ଉରୁକ୍‌ସି ସୋଲ୍‌ସି କେଇନିକା ମିସାତି ଅଙ୍ଗୁର୍‌ରସତୁ ଉନ୍‌ଡ୍ରି ଲୁବ୍‌ଲୁବାପାଗା ମୁଡୁକ୍‌ସି ତାନିଙ୍ଗ୍‌ ନାଡ଼ାଦି ଟିପୁଦୁ ତର୍‌ସି ଜିସୁଙ୍ଗୁଁ ଉଣ୍ତେଙ୍ଗ୍‌ ପେର୍‌ତା ସିତାନ୍‌ ।
MAT 27:49 ମାତର୍‌ ଆଇକାର୍‌ ଇର୍ହାର୍‌, “କାପ୍‌କିଦୁ, ସୁଡ଼ୁନାଟ୍‌, ୱାନିଙ୍ଗ୍‌ ରକିୟା କିଦେଙ୍ଗ୍‌ ଏଲିୟ ୱାଜିନାନ୍‍ ନୋ ସିଲେ ।”
MAT 27:50 ଜିସୁ ମାରିଉନ୍‌ଡ୍ରି ଦେବେଙ୍ଗ୍‌ ପେରିୱେୟୁଦାନ୍‌ ଆଉଲି ଆଜି ସାରାସାରି ୱାନି ଜିବନ୍‌ ଡ଼ିସ୍‍ତାନ୍‌ ।
MAT 27:51 ଆୟା ବେଡ଼ାଦୁ ମନ୍ଦିର୍‌ତୁ ଦୁଙ୍ଗୁଁଜିମାନି ପାର୍‌ଦା ମୁସ୍‌କୁରାନ୍‌ ଆଡ୍‍ଗି ସାନ୍ଦି ରୁଣ୍ତି ମକେଙ୍ଗ୍‌ ଆଜି କିଜିତାତ୍‌ । ବୁମିକମ୍ପ ଆତାତ୍‌, ପିଡ଼ିପିଙ୍ଗ୍‌ୱିଜୁ ପାଡିତେସର୍‌ଏ
MAT 27:52 ମାରି ଏସ ମୁସ୍‌ତିଗୁଟେଙ୍ଗ୍‌ ରେଆୟ୍‌ଆତେ, ମାରି ଗାଦି ମାପୁରୁଦି ସାତି ଲୋକୁ ମେନ୍ଧଲ୍‍ତାନ୍‌ ମାରିଡ଼େସିଜିବନ୍‌ ଆତାର୍‌ ।
MAT 27:53 ଇୟାକାର୍‌ ମୁସ୍‌ତିଗୁଟେଣ୍‌କୁ ନିଙ୍ଗିଁଜି ୱାତାର୍‌ ମାରି ଜିସୁଦି ମାରିଡ଼େସିନିଙ୍ଗିଁନି ୱେନ୍‌କା ଇୟାୱାରିଙ୍ଗ୍‌ ପବିତ୍ର ଗାଡ଼୍‌ ଜିରୁସାଲମ୍‌ତୁ ସନିକା ଗାଦିଲୋକ୍‌ ସୁଡ଼ୁତାର୍‌ ।
MAT 27:54 ଜିସୁଙ୍ଗୁଁ କାପ୍‌କିଦେଙ୍ଗ୍‌ ତେବାତିମାନି ସେନାପତି ମାରି ସନ୍ୟର୍‌ ବୁମିକମ୍ପ ନି ଆଇଆଇ ଗଟ୍‌ନେଙ୍ଗ୍‌ ସୁଡ଼ୁଜି ତିଲାତା ସର୍‌ର୍ହାର୍‌, ୱାର୍‌ ଇର୍ହାର୍‌, “ସତ୍‍ନେ, ଇୟାକାନ୍‌ ମାପୁରୁଦି ମାରିନ୍‌ ମାର୍ହାନ୍‌ ।”
MAT 27:55 ଗାଲିଲିଦାନ୍‌ ଜିସୁଦି ୱେନ୍‌କାୱାଜି, ୱାନିଙ୍ଗ୍‌ ସେବା କିତିମାନି ଗାଦି ଆଇମେକ୍‍ ଆକରାନ୍‍ ମାନ୍‌ଞ୍ଜି ୱିଜୁ ସୁଡ଼ୁଜି ମାରେଏ ।
MAT 27:56 ଇୟାୱାନିକା ମାଣ୍‌କୁ ମାର୍‌ଏ ମଗ୍‌ଦଲିନି ମରିୟମ୍‌, ଜାକୁବ ନି ଜୋସେପ୍‌କା ଆଇସି ମରିୟମ୍‌ ମାରି ଜେବଦିଦି ଆଡ଼୍‌ସି ।
MAT 27:57 ମିଲିମିଲିକା ବେଡ଼ାଦୁ ହାରାମାତିୟା ଗାଡ଼୍‌ତି ଜୋସେପ୍‌ ଦର୍‌ତି ଅରେନ୍‍ ମାଜନ୍‌ ଲୋକୁ ୱାତା ଇତାନ୍‌ । ୱାନ୍‌ ଜିସୁଦି ଅରେନ୍‍ ସିସୁ ମାର୍ହାନ୍‌ ।
MAT 27:58 ୱାନ୍‌ ପିଲାତ୍‌ତିଙ୍ଗ୍‌ ତରାଆୟ୍‌ଆତାନ୍‌ନୋ ଜିସୁଦି ମେନ୍ଦଲ୍‌ତିଙ୍ଗ୍‌ ଅତେଙ୍ଗ୍‌ ଇଜି ଅନୁମତି ଲସ୍‌ତାନ୍‌ । ଆର୍‌ତିଙ୍ଗ୍‌ ପିଲାତ୍‌ ଜିସୁଦି ମେନ୍ଦଲ୍‌ତିଙ୍ଗ୍‌ ଅତେଙ୍ଗ୍‌ ଆଦେସ୍‌ ସିତାନ୍‌ ।
MAT 27:59 ଜୋସେପ୍‌ ଜିସୁଦି ମେନ୍ଦଲ୍‌ତିଙ୍ଗ୍‌ ଅତାନ୍‌ନୋ ଉନ୍‌ଡ୍ରି ନେଗି ୱାତିଦୁ ତେରେପ୍‌ତାନ୍‌ ମାରି
MAT 27:60 ୱାନି ନିଜେଦି ଉଣ୍ତିଙ୍ଗ୍‌ କାଲୁଦୁ କାରିତି ମାରିଇ ଉନ୍‌ଡ୍ରି ପୁନି ମୁସ୍‌ନିବାଡିଦୁ ୱାନିଙ୍ଗ୍‌ ଇଟ୍‌ତାନ୍‌ ମାରି ଗୁଟାଦିମକମ୍‌ତୁ ଉନ୍‌ଡ୍ରି ପେରି କାଲୁ କେରେପ୍‌ତା ସର୍ହାନ୍‌ ।
MAT 27:61 ମଗ୍‌ଦଲିନି ମରିୟମ୍‌ ନି ଆଇ ମରିୟମ୍‌ ଆୟାବାନୁ ଗୁଟାଦିଙ୍ଗ୍‌ ମକମ୍‌କିଜି ବାସ୍‌ତେ ମାର୍‌ଏ ।
MAT 27:62 ଆୟା ମାର୍‌ନାଣ୍ଡିଙ୍ଗ୍‌ ଅର୍ତାତ୍‍ ରମ୍‌ନିନାଣ୍ତିଙ୍ଗ୍‌ ପେରି ଜାଜକର୍‌ ନି ପାରୁସିର୍‌ ପିଲାତ୍‌ତିଙ୍ଗ୍‌ ବେଟ୍‌ଆତାର୍‌ନୋ ଇର୍ହାର୍‌,
MAT 27:63 “ଆଜ୍ଞା, ମାଙ୍ଗିଁ ମନ୍‌ତୁମାନାତ୍‌, ଆୟା ମିଚ୍‌ୱେର୍‌ନିକାନ୍‌ ଜିବନ୍‌ମାର୍‌ଇ ୱାଲେ ଇର୍‌ଆ ମାର୍ହାନ୍‌, ‘ମୁନେଟି ୱେନ୍‌କା ନାନ୍ ନିଙ୍ଗିଁନା ।’
MAT 27:64 ଆଦେଙ୍ଗ୍‌ ମୁନେନ୍‌ ସାନ୍ଦି ଆୟା ମୁସ୍‌ତିଗୁଟାଦିଙ୍ଗ୍‌ କାପ୍‌କିଜ ମାନ୍‌ଡ଼୍ରେଙ୍ଗ୍‌ କାପ୍‌କିନିୱାରିଙ୍ଗ୍‌ ଆଦେସ୍‌ ସିପିନ୍‌, ଆର୍‌ତିଙ୍ଗ୍‌ ୱାନି ସିସୁର୍‍ ୱାନି ମେନ୍ଦଲ୍‌ତିଙ୍ଗ୍‌ ଡଙ୍ଗାଁକିଜ ଅସ, ୱାନ୍‌ ଜିବନ୍‌ଆଜି ନିଙ୍ଗିଁତାମାନାନ୍‌ ଇଜି ଇନ୍‌ଡ୍ରେଙ୍ଗ୍‌ ଆଟ୍‍ଏର୍‍ । ୱାରି ଇୟା ମିସ୍‌ ମାଟା ୱିଜୁମାଣ୍‌କୁ ନାଣ୍ତ ତାଗ୍‌ଇକା ଆନାତ୍‌ ।”
MAT 27:65 ପିଲାତ୍‌ ୱାରିଙ୍ଗ୍‌ ଇର୍ହାନ୍‌, “ଦଲ୍‌ କାପ୍‌କିନିୱାରିଙ୍ଗ୍‌ ଅତୁ ମାରି ଆୟା ମୁସ୍‌ତିଗୁଟାଦିଙ୍ଗ୍‌ ବେଗି ସୁରକ୍ଷା କିଦୁ ।”
MAT 27:66 ୱାର୍‌ ସର୍ହାର୍‌ନୋ ଗୁଟାଦିଙ୍ଗ୍‌ ସୁରକ୍ଷା କିନି ଉଣ୍ତିଙ୍ଗ୍‌ ତିଆର୍‌କିତାର୍‌ । ଆୟା ମକମ୍‍ତିଙ୍ଗ୍ କେରେପ୍‌ସି ଇଟ୍‍ତିମାନି କାଲୁ ମୁସ୍‌କୁ ଟାଆପ୍‌ ବାସାକିଜି କାପ୍‌କିନି ଉଣ୍ତିଙ୍ଗ୍‌ କାପ୍‌କିନିୱାରିଙ୍ଗ୍‌ ଇଟ୍‌ତାର୍‌ ।
MAT 28:1 ରମ୍‍ନିଦିନ୍‍ ୱିଜିତି ୱେନ୍‌କା ଆଦିୱାର୍‍ ସାଲ୍‍ଦି ମଗ୍‌ଦଲିନି ମରିୟମ୍‌ ମାରି ଆଇ ମରିୟମ୍‌ ଦୁକିଦୁ ସୁଡ଼୍‍ଦେଙ୍ଗ୍‍ ସର୍ହେ ।
MAT 28:2 ନାସ୍ତିୱାଲେ ଆୟାଦାପ୍ରେନେ ଉଣ୍ତ୍ରି ପେରି ବୁମି ତିରିଗ୍‌ନାତ୍‌ ଆତାତ୍‌ । ପ୍ରବୁଦି ଅରେତ୍‌ ଦୁତ୍‍ ମୁସ୍‌କୁରାନ୍‌ ରେତାଜି ୱାଜି ଦୁକିଦି ମକମି ମାର୍‍ଇ କାଲୁଦିଙ୍ଗ୍‌ ଗୁସା କିଜି ତାନି ମୁସ୍‌କୁ ବାସ୍‌ତାତ୍‌ ।
MAT 28:3 ତାନି ରୁପ୍‌ ଜାୟ୍‍ତି ୱାଜା ମାରି ତାନି ଆଙ୍ଗିଁ ଆଣ୍ତ୍ରାଗା ୱାଜା ଅଡ଼ିନିକା ମାର୍ହାତ୍‌ ।
MAT 28:4 ୱାନିଙ୍ଗ୍‌ ସୁଡ଼୍‌ଜି କାପ୍‌କିନିକାର୍‌ ତିଲାଜି ତିର୍‍ଗିତାର୍‍ ମାରି ସାତି ମାଡ଼ାଦି ୱାଜା ଆତା ସର୍ହାର୍‍ ।
MAT 28:5 ଦୁତ୍‍ ଆୟା ଆଇମେକାଙ୍ଗ୍‍ଁ ଇର୍ହାତ୍‌, “ତିଲାମାଟ୍‌ ।” ନାନ୍ ନେସ୍‌ନା, ମିର୍‌ କ୍ରୁସଦୁ ଡାକାଇଆତି ଜିସୁଙ୍ଗୁଁ ସୁଡ଼୍‍ଦେଙ୍ଗ୍‍ ୱାତିମାନିଦେର୍‌ ।
MAT 28:6 ୱାନ୍‌ ଇବେ ସିଲେନ୍‌, ୱାନ୍‌ ଏଣ୍ତେସ୍‌ ଇର୍ହାମାର୍ହାନ୍‌, ଆୟାୱାଜା ନିଙ୍ଗିଁତାମାନାନ୍‌ । ରାଦୁ, ୱାନି ସାତିମାଡ଼ା ଏମେମାନୁ ଇଟ୍‌ତାମାର୍ହାନ୍‍, ଆୟା ବାଡି ସୁଡ଼୍‍ଦୁ ।
MAT 28:7 ଦାପ୍ରେ ସଲ୍‌ସି ୱାନି ସିସୁରିଙ୍ଗ୍‌ ଇନ୍‍ଡ୍ରୁ, ୱାନ୍‌ ସାତିମାଣାନ୍‌ ଡ଼େସି ନିଙ୍ଗିଁତାମାନାନ୍‌ ମାରି ମି ଆଗ୍‌ଡ଼ି ଆଗ୍‌ଡ଼ି ୱାନ୍‌ ଗାଲିଲିଦୁ ସଲ୍‌ସିନାନ୍‌ । ଆବେ ମିର୍‌ ୱାନିଙ୍ଗ୍‌ ସୁଣିଦେର୍‍ । ନାନ୍ ଆମାକା ଇର୍‌ଆ, ମୋନ୍‌ତୁ ଇଡ୍‌ଦୁ ।
MAT 28:8 ଇବେଟ୍‍ ୱାକ୍‍ ତିଲାଜି ନି ନାଣ୍ତ ୱେଡ଼ିକାଦାନ୍‌ ଦୁକିଦାନ୍‍ ଦାପ୍ରେ ଡ଼େସି ସଲ୍‌ସି ୱାନି ସିସୁରିଙ୍ଗ୍‌ କାବୁର୍‌ ସିଦେଙ୍ଗ୍‍ଇଜି ଉର୍‍କୁତେ ।
MAT 28:9 ଦାପ୍ରେ ଜିସୁ ୱାରିଙ୍ଗ୍‌ ବେଟ୍‍ବୁଡ଼ାଜି ଇର୍ହାନ୍‌, “ମି ସାନ୍ତିଆପିତ୍‍ ।” ୱାର୍‌ ୱାନି ଲାକ୍‌ତୁ ସଲ୍‌ସି ୱାନି ପାଦାମ୍‌କୁ ଆସ୍‌ସି ମାଡ଼ିସ୍‍କିତାର୍‍ ।
MAT 28:10 ଜିସୁ ୱାରିଙ୍ଗ୍‌ ଇର୍ହାନ୍‌, “ତିଲାମାଟ୍‌ ।” ମିର୍‌ “ସଲ୍‌ସି ନା ତଡ଼ାନ୍‍କାଙ୍ଗ୍‍ ୱେର୍‌ଆ, ୱାର୍‌ ଗାଲିଲିଦୁ ସଲିର୍‌, ଆବେ ୱାର୍‌ ନାଙ୍ଗିଁ ସୁଣାର୍‍ ।”
MAT 28:11 ଆଇମେକ୍‍ ଆବେଟ୍‌କୁ ବୁଲାଜି ସୋଲ୍‌ସିମାନିୱାଲେ ମୁସ୍‌ତିଗୁଟାଦିଙ୍ଗ୍‌ କାପ୍‌କିଜି ତେବାଜିମାର୍‌ଇ ଏସଲୋକ୍‌ କାପ୍‌କିନିକାର୍‌ ଗାଡ଼୍‌ତୁ ଡ଼େସିସୋର୍ହାନ୍‌ନୋ ପେରି ଜାଜକରିଙ୍ଗ୍‌ ଇୟାୱିଜୁ ଗଟ୍‌ନା ୱେର୍‌ତାର୍‌ ।
MAT 28:12 ପେରି ଜାଜକର୍‌ ଦାର୍ମୁ ନେତାରି ୱାଲେ ୱାର୍‌ଗିଜି ସାତାର୍‌, ଆୟା ସନ୍ୟରିଙ୍ଗ୍‌ ଗାଦି ଡାବୁଙ୍ଗୁଁ ଲାଞ୍ଚ୍‌ ସିଜି ୱାରିଙ୍ଗ୍‌ ଇର୍ହାର୍‌,
MAT 28:13 “ମିର୍‌ ୱେର୍‍ତୁ ଜେ ନାଡ଼ା ମିର୍‌ ସୁସ୍‌ତିମାରିଇବେଡ଼ାଦୁ ୱାନି ସିସୁର୍‍ ୱାଜି ମାଡ଼ାଦିଙ୍ଗ୍‍ ଡଙ୍ଗାଁକିତାଅତାର୍‌ ।
MAT 28:14 ମାରି, ଜଦି ସାସନ୍‍କିନିକାନ୍‍ ଇୟା ମାଟା ୱେନ୍‌ନାନ୍‌ ମାପ୍‌ ୱାନିଙ୍ଗ୍‌ ବୁଜାକିନାସିନାପ୍‌ଜେ ମିର୍‌ ଦସ୍‌କିଇଦେର୍‌ । ଇୟା ବିସୟ୍‌ତାନ୍‌ ମିର୍‌ ଦାନ୍ଦାଆମାଟ୍‌ ।”
MAT 28:15 ସନ୍ୟର୍‌ ଡାବୁଙ୍ଗୁଁ ଅସି ୱାରିଙ୍ଗ୍‌ ୱେର୍‌ତିମାନି ଇସାବ୍‌ତାନ୍‌ ପାଣି କିତାର୍‌ । ୱାର୍‌ ନାସ୍ତିୱାଲେ ଆମାକା ଇର୍ହାର୍‌, ଜିହୁଦିର୍‌ ନେର୍‌ ସାନ୍ଦି ଆୟା ମାଟା ୱେର୍‌ସିନାର୍‌ ।
MAT 28:16 ଜିସୁ ୱେର୍‌ତିମାନି ଅନୁସାର୍‌ଦାନ୍‌ ଏଗାର୍‌ ଲୋକୁ ସିସୁର୍‍ ଗାଲିଲିଦୁ ସୋଲ୍‌ସି, ଜିସୁ ଆମା ଗରନ୍‌ ବିସୟ୍‌ ୱାରିଙ୍ଗ୍‌ ଇର୍‌ଆ ମାର୍ହାନ୍‌, ଆୟା ଗରନ୍‌ତୁ ସର୍ହାର୍‌ ।
MAT 28:17 ମାରି, ୱାର୍‌ ଜିସୁଙ୍ଗୁଁ ସୁଡ଼ୁଜି ମାଡ଼ିସ୍‌କିତାର୍‌, ମାତର୍‌ ଏନ୍‌ ଏନ୍‌ ନାମ୍‌ଏତାର୍‌ ।
MAT 28:18 ଜିସୁ ୱାରି ଲାକ୍‌ତୁ ୱାଜି ଇର୍ହାନ୍‌, “ମୁସ୍‌କୁପୁର୍‌ ନି ଆଡ୍‍ଗିପୁର୍‍ ୱିଜୁ ଅଦିକାର୍‌ ନାଙ୍ଗିଁ ସିଆୟ୍‌ଆତାମାନାତ୍‌ ।
MAT 28:19 ମିର୍‌ ୱିଜୁ ବାସାଦି ଲୋକା ଲାକ୍‌ତୁ ସୋଲ୍‌ସି ୱାରିଙ୍ଗ୍‌ ନା ସିସୁ କିଦୁ । ମାରି ବୁବା, ମାରିନ୍‌ ମାରି ପବିତ୍ର ଆତ୍ମାଦି ଦର୍‌ତାନ୍‌ ୱାରିଙ୍ଗ୍‌ ଡୁବନ୍‌ ସିଦୁ,
MAT 28:20 ମାରି ନାନ୍ ଆମା ୱିଜୁ ଆଦେସ୍‌ ସିତାମାନା, ଆୟାୱିଜୁ କିଦେଙ୍ଗ୍‌ ୱାରିଙ୍ଗ୍‌ ସିକିୟା ସିଦୁ । ମାରି ମନେଇଡ଼୍‌ଦୁ, ଜୁଗ୍‌ସେସ୍‌ ଆନିସାନ୍ଦି ୱିଜୁୱାଲେ ନାନ୍ ମି ୱାଲେମାନା ।”
MAR 1:1 ଇକା ଆଜିନାତ୍‍ ମାପୁରୁ ମାରିସି ଜିସୁ କ୍ରିସ୍ତଦି ନେଗି କାବୁର୍‌ ଆରାମ୍‌ ।
MAR 1:2 ଜିସାୟ ବାବବାଦିଦି ବଇଦୁ ଏଣ୍ତେସ୍‌ ରାସାତାମାନାତ୍‌, “ସୁଡ଼ୁଦୁ, ମାପୁରୁ ଇର୍ହାନ୍‌,” ମାପ୍‌ ମା ଦୁତ୍‌ତିଙ୍ଗ୍ ମି ଆଗ୍‌ଡ଼ି ପୋକ୍‌ନାପ୍‌, ୱାନ୍‌ ମି ସାରି ରସ୍‍ନାନ୍‍ ।
MAR 1:3 ମରୁବୁମିଦୁ ପେରିୱେୟୁଦାନ୍‌ ଆଉଲିଆଜିମାନି ଅରେନ୍‍ ୱାନି ବଲ୍, ପ୍ରବୁଦି ସାରି ରସ୍‍ଆ, ୱାନି ସାରି ସାଡ଼ୁକୁ କିଆ ।
MAR 1:4 ଆବେଟ୍‌କୁ ଏର୍‌ତୁ ଡୁବନ୍‌ ସିନି ଜୋହନ ବାଲିଭୁମିଦୁ ସର୍ହାନ୍‍ନୋ ୱେର୍‍ତାନ୍‌, ମାରି ଡୁବନ୍‌ ସିତାନ୍‌ । ୱାଣ୍ଡ୍‌ରୁ ପ୍ରଚାର୍‌ କିଜି ଲୋକାଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତୁ, ମାରି ଡୁବନ୍‌ ଅତୁ ଆବେଟ୍‌ ମାପୁରୁ ମି ପାପ୍‌କେମା କିନାନ୍‌ ।”
MAR 1:5 ଆବେଟ୍‌ ଯିହୁଦା ରାଜି ମାରି ଜିରୁସାଲାମ୍‍ତି ୱିଜୁ ଲୋକୁ ସତାରୋ ଯୋହନତି ଲାକ୍‌ତୁ ୱାଦେଙ୍ଗ୍‌ ଆସ୍‌ତାର୍‌ ମାରି ନିଜେ ନିଜେଦି ପାପ୍‌ ମାନାଜି ୱାନି ମାଣ୍‌କୁ ଜର୍ଦନ ଗାଡାଦୁ ଡୁବନ୍‌ ଅତାର୍‍ ।
MAR 1:6 ଜୋହନ ଉଟ୍‌ ବୁର୍‍ବୁସାଦାନ୍‍ ତିଆର୍‌ ଆତି ଆଙ୍ଗିଁ ଆରାଜି ମାର୍‍ଆନ୍‍ ମାରି ୱାନି ଜୁକିଦି ସାରିବେଡ୍‍ତି ତଲ୍‍ତି ନାସ୍‍ ତରାଜିମାର୍ହାନ୍‍, ମାରି ମାଡ଼ିମାଉ ନି ଗରନ୍‌ ପୁକି ତିନ୍‍ଜିମାର୍‍ଆନ୍‍ ।
MAR 1:7 ୱାଣ୍ତ୍ରୁ ଆଉଲି ଆଜି ଇଣ୍ତ୍ରେଙ୍ଗ୍‌ ଆସ୍‌ତାନ୍‌, “ଏନ୍‍କି ନା ମାଣ୍‌କୁ ନାଣ୍ତ ବପୁମାନାନ୍‍, ଆକାନ୍‍ ନା ୱେନ୍‌କା ୱାଜିନାନ୍‍; ନାନୁ ପାଡ଼୍‍ଜ ଜୁତେଙ୍ଗ୍‌ତି ଗାଟି ବା କୁତ୍‍ତେଙ୍ଗ୍‍ ଜଗ୍‌ ସିଲେ ।
MAR 1:8 ନାନୁ ମିଙ୍ଗିଁ ଏର୍‌ତୁ ଡୁବନ୍‌ ସିଜିନା, ମାତର୍‌ ୱାନ୍‌ ମିଙ୍ଗିଁ ପବିତ୍ର ଆତ୍ମାଦୁ ଡୁବନ୍‌ ସିନାନ୍‍ ।”
MAR 1:9 ନାସ୍ତିୱାଲେ ଜିସୁ ଗାଲିଲି ରାଜିଦି ନାଜରିତ ଦର୍‌ତି ନାଟାଣ୍‍କୁ ୱାଜି ଜର୍ଦନ ଗାଡାଦୁ ଜୋହନମାନୁ ୱାନ୍‌ ଡୁବନ୍‌ ଅତାନ୍‍ ।
MAR 1:10 ଜିସୁ ଏର୍‍ତାନ୍‍ ସହସି ୱାନିୱାଲେ ବାଦଡ଼୍‍ ରେଆତି ମାନିୱାଜା ମାରି ପବିତ୍ର ଆତ୍ମା ପାର୍‍ୱାଦି ୱାଜା ୱାଜି ୱାନି ମୁସ୍‌କୁ ରେତାନିକା ୱାନ୍‌ ସୁଡ଼ୁତାନ୍‌,
MAR 1:11 ନାସ୍ତିୱାଲେ ବାଦଡ଼୍‍ତାନ୍‍ ଉଣ୍ତ୍ରି ବଲ୍ ୱେଙ୍ଗିଁତାତ୍‍, “ନିନୁ ମା ଲାଡ୍‍ତି ମାରିନ୍‌, ନିବାନ୍‍ ମାପୁ ନାଣ୍ତ ୱେଡ଼ିକା ।”
MAR 1:12 ଆୟାଦାପ୍ରେ ପବିତ୍ର ଆତ୍ମା ଜିସୁଙ୍ଗୁଁ ଉଣ୍ତ୍ରି ସିମ୍ରା ବାଡିଦୁ ଅତାତ୍‍ ।
MAR 1:13 ଜିସୁ ସିମ୍ରା ବାଡିଦୁ ସାଲିସ୍‍ ଦିନ୍‌ ତେବାଜି; ସୟତାନ୍‍ତି ମାଣାନ୍‌ ପରିକା କିଆୟ୍‍ଆତାନ୍‍; ଜିସୁ ବନ୍‍ତି ଜାତୁଙ୍ଗାୱାଲେ ମାର୍‌ଆନ୍‌, ମାତର୍‌ ମୁସ୍‌କୁପୁର୍‌ତି ଦୁତ୍‌କୁ ୱାଜି ୱାନି ସେବାକିଜିମାରେଏ ।
MAR 1:14 ଯୋହନ ଜଇଲ୍‌ତୁ ସର୍‍ହି ୱେନ୍‌କା ଜିସୁ ଗାଲିଲି ରାଜିଦୁ ୱାତାନ୍‌ ନୋ ମାପୁରୁଦି ନେଗି କାବୁର୍‌ ପ୍ରଚାର୍‌ କିଦେଙ୍ଗ୍‌ ଆସ୍‌ତାନ୍‌ ।
MAR 1:15 ଜିସୁ ୱେର୍‌ତେଙ୍ଗ୍‌ ଆସ୍‌ତାନ୍‌, “ଦିନ୍‌ ଲାକ୍‌ତୁ ୱାତାତ୍‌ନି, ମାପୁରୁଦି ରାଜି ଇଗା ୱାଜିନାତ୍ ! ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତୁ ମାରି ମାପୁରୁଦି ନେଗିକାବୁର୍‌ତୁ ବିସ୍‌ବାସ୍‌ କିଦୁ ।”
MAR 1:16 ଜିସୁ ଗାଲିଲିଦି ସାମ୍‌ଦୁର୍‌ ପାଡ଼ି ସିଜି ସନିୱାଲେ ସିମୋନ୍‌ ପିତର ମାରି ଆନ୍ଦ୍ରିୟ ତଡ଼୍‍ ରିଏରିଙ୍ଗ୍‍ ସାମ୍‌ଦୁର୍‌ତୁ ମିନ୍‌କୁ ଜାଡ଼ି ପକ୍‍ନିକା ସୁଡ଼ୁତାନ୍‌, ଇରିଙ୍ଗ୍‌ ୱାର୍‌ ମିନ୍‌କୁ ଆସ୍‍ନିକାର୍‍ ମାର୍‌ଆର୍‌ ।
MAR 1:17 ଜିସୁ ୱାରିଙ୍ଗ୍‌ ଇର୍‌ଆନ୍‌, ନା ୱାଲେ ରାଦୁ, ନାନ୍ ମିଙ୍ଗିଁ ଲୋକାଙ୍ଗ୍‌ ମାପୁରୁ ଲାକ୍‌ତୁ ତାନିକା ଅଜାକିନା ।
MAR 1:18 ଆବେଟ୍‌ ୱାର୍‌ ଆୟାଦାପ୍ରେ ଜାଡ଼ି ଡ଼ିସ୍‍ତାରୋ ଜିସୁୱାଲେ ୱାଲେ ସର୍‌ଆର୍‌ ।
MAR 1:19 ମାରି, ଜିସୁ ଅଡ଼ପ୍‍ ଆଗ୍‌ଡ଼ି ସର୍‍ଆନ୍‍ନୋ ଜେବଦିଦି ରିଏର୍‌ ମାରିସିର୍‌ ଜାକୁବ ନି ୱାନି ତଡ଼ାନ୍‌ ଜୋହନତିଙ୍ଗ୍‍ ୱାରି ଡଙ୍ଗାଁଦୁ ଜାଡ଼ି ମଦାକିନିକା ସୁଡ଼ୁତାନ୍‌ ।
MAR 1:20 ଜିସୁ ୱାରିଙ୍ଗ୍‌ ସୁଡ଼ୁଜି ଦାପ୍ରେ ୱାନି ଲାକ୍‌ତୁ କୁକ୍‍ତାନ୍‍, ୱାର୍‌ ୱାରି ବୁବାସି ଜେବଦିଙ୍ଗ୍‍ ବୁତିକିନି ଲୋକାୱାଲେ ଡଙ୍ଗାଁଦୁ ଡ଼ିସ୍‍ତାରୋ ଜିସୁୱାଲେ ୱାଲେ ସର୍ହାର୍‍ ।
MAR 1:21 ଜିସୁ ମାରି ସିସୁର୍‌ କପର୍‍ନାହୁମ୍‍ ଇନି ଗାଡ଼୍‌ତୁ ସର୍‌ଆର୍‌, ଆୟାଦାପ୍ରେ ଜିସୁ ରୋମ୍‍ନି ନାଣ୍ଡିଙ୍ଗ୍ ଜିହୁଦିରି ପାର୍‌ତନା କିନି ଇଲୁ ଲୋଇ ସର୍‍ଆନ୍‍ନୋ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।
MAR 1:22 ୱାନି ସିକିୟା ୱେନ୍‍ଜି ଲୋକ୍‌ଡର୍‌ କାବାଆତାର୍‌; ଇରିଙ୍ଗ୍‌ ଜିସୁ ସାସ୍ତ୍ରୀରି ୱାଜା ସିକିୟା ସିଏନ୍‍ଣ୍ତା ଅରେନ୍‍ ଅଦିକାର୍ ପଇତି ଲୋକ୍‌ତି ୱାଜା ସିକିୟା ସିଜି ମାର୍‌ଆନ୍‌ ।
MAR 1:23 ନାସ୍ତିୱାଲେ ଅରେନ୍‍ ଦୁବା କାସ୍ତି ଲୋକୁ ପାର୍‌ତନା କିନି ଇଲୁ ଲୋଇ ମାରାନ୍‌ ନୋ ଆଉଲି ଆଜି ଇର୍‌ଆନ୍‌ ।
MAR 1:24 “ଏ ନାଜରିତିୟ ଜିସୁ, ନିୱାଲେ ମା ଇନି ପାଣି ମାନାତ୍‌ ? ନିନ୍‌ନେ ମାଙ୍ଗିଁ ୱିସ୍‍ତେଙ୍ଗ୍‍ ୱାତି ? ନିନୁ ଏନ୍‌ ଆକା ନାନ୍ ନେସ୍‌ନା, ନିନୁ ମାପୁରୁତି ମାଣ୍‌କୁ ୱାତିମାନି ପବିତ୍ର ଲୋକୁ ।”
MAR 1:25 ଜିସୁ ତାନିଙ୍ଗ୍‌ ଆଦ୍‌ରିସ୍‌ କିଜି ଇର୍ହାନ୍‌, “ଆଲ୍‌ଜ ମାନ୍‌ଆ, ଇୟା ୱେନିମାଣ୍‌କୁ ସସି ସାଙ୍ଗ୍‌ଆ ।”
MAR 1:26 ତାନେ ୱେନ୍‌କା ଆୟା ତାଗ୍‍ଇଆତ୍ମା ୱାନିଙ୍ଗ୍‌ ଦୁକ୍‍ତା ପକ୍‍ତା ଦୋ ନାଣ୍ତ ପେରି ୱେୟୁଦାନ୍‍ ଆଉଲି ଆଜି ୱାନି ମାଣ୍‌କୁ ସତା ସର୍‌ଆତ୍‌ ।
MAR 1:27 ଆବେ ମାର୍‍ଇ ଲୋକ୍‌ଡର୍‌ କାବାଆତା ସର୍‌ଆର୍‌ନୋ ୱାରି ୱାରି ଲୋଇ ୱାର୍‍ଗିଜି ସାତାର୍‌, “ଇକା ଇନିକା ? ଇକା ତୋ ଉଣ୍ତ୍ରି ଅଦିକାର୍ ମାନି ପୁନି ସିକିୟା, ୱାନ୍‌ ତାଗ୍‌ଇ ଆତ୍ମେଆଙ୍ଗ୍‌ ବା ଆଦେସ୍‌ ସିନାନ୍‍, ମାରି ତାଗ୍‌ଇ ଆତ୍‍ମେଙ୍ଗ୍‍ ୱାନି ଆଦେସ୍‌ ମାନାନେ ।”
MAR 1:28 ଆୟାୱେନ୍‌କା ଜିସୁଦି ବିସୟତୁ ମାଟା ଦାପେ ଦାପେ ଗାଲିଲି ରାଜିଦୁ ୱିଜୁ ତରିନ୍‌ ୱେଙ୍ଗିଁତାସର୍‍ଆତ୍‍ ।
MAR 1:29 ତାନେ ୱେନ୍‌କା ଜିସୁ ମାରି ସିସୁର୍‌ ପାର୍‌ତନା କିନି ଇଲୁଦାନ୍‌ ସତାରୋ ଯାକୁବ ନି ଜୋହନ ୱାଲେ ଆୟାଦାପ୍ରେ ସିମୋନ୍‌ ମାରି ଆନ୍ଦ୍ରିୟରି ଇଲ୍‌ତୁ ସର୍‌ଆର୍‌ ।
MAR 1:30 ସିମୋନ୍‌କା ମିମ୍‍ସି ନବ୍‍ତି ଉଣ୍ତିଙ୍ଗ୍‌ ନିଙ୍ଗ୍‍ଦେଙ୍ଗ୍‍ ଆଟ୍‍ଏଜି ମାର୍‌ଆତ୍‌, ମାରି ସିସୁର୍‌ ଆୟାଦାପ୍ରେ ତାନେ ମାଟା ଜିସୁଙ୍ଗୁଁ ୱେର୍‌ତାର୍‌ ।
MAR 1:31 ଆବେଟ୍‌ ଜିସୁ ଲାକ୍‌ତୁ ସର୍‍ଆନ୍‍ନୋ ତାନି କିୟୁ ଆସ୍‍ତାନ୍‍ନୋ ତାନେଙ୍ଗ୍‌ ନିକ୍‍ତାନ୍‍, ଆବେଟ୍‌ ତାନିଙ୍ଗ୍‌ ନବ୍‌ ଡ଼ିସ୍‍ତାତ୍‍, ମାରି ୱାଦ୍‌ ନେଗେଣ୍ତ୍‍ ଆତାଦୋ ଜିସୁ ମାରି ସିସୁରି ଉଣ୍ତିଙ୍ଗ୍‌ ଖାଦି ସେବା ତିଆର୍‌ କିଦେଙ୍ଗ୍‌ ଆସ୍‌ତାତ୍‌ ।
MAR 1:32 ୱେଡାସର୍ହି ୱେନ୍‌କା ଲୋକ୍‌ଡର୍‌ ଜିସୁ ଲାକ୍‌ତୁ ୱିଜୁ ରକମ୍‌ତି ରୋଗ୍‌ ମାରି ଦୁବା କାସ୍ତି ଲୋକାଙ୍ଗ୍‌ ତାତେଙ୍ଗ୍‌ ଆସ୍‌ତାର୍‌ ।
MAR 1:33 ଆୟା ଗାଡ଼୍‌ତି ଲୋକୁ ୱିଜେରେ ୱାଜି ଆୟା ଇଲୁ ସେର୍‍ଲା ଲାକ୍‌ତୁ ଉଣ୍ତାତାର୍‌ ।
MAR 1:34 ଜିସୁ ନାନା ରକମ୍‌ତି ରୋଗ୍‍ ଲୋକାଙ୍ଗ୍‍ ନେଗେଣ୍ତ୍‌ କିତାନ୍‌ ମାରି ଏସ ଦୁବା କାସ୍ତି ଲୋକାଙ୍ଗ୍‌ ଡ଼ିସିସ୍‍ କିତାନ୍‌, ମାରି ୱାନ୍‌ଡ୍ରୁ ଦୁବେଆଙ୍ଗ୍‍ ୱାର୍‍ଗିଦେଙ୍ଗ୍‍ ସିଏତାନ୍‌, ଇରିଙ୍ଗ୍‌ ଦୁବେଙ୍ଗ୍‍ ଡର୍‍ ଜିସୁଙ୍ଗୁଁ ନେସ୍‌ସି ମାର୍‍ହେ ।
MAR 1:35 ମାର୍‌ନାଣ୍ଡିଙ୍ଗ୍‌ ୱେଡ଼ା ସନି ଆଗ୍‌ଡ଼ି ସାଲ୍‌ଦି ସିକାଟି ମାନ୍‌ବୁ ମାନ୍‌ବୁନେ ଜିସୁ ନିଂଇତା ସତା ସର୍‌ଆନ୍‌ ମାରି ଉଣ୍ତ୍ରି ସିମ୍ରା ବାଡିଦୁ ସର୍‍ଆନ୍‍ନୋ ଆବେ ପାର୍‌ତନା କିଦେଙ୍ଗ୍‌ ଆସ୍‌ତାନ୍‌ ।
MAR 1:36 ସିମୋନ୍‌ ମାରି ୱାନି ତଡ଼୍‍ ଲୋକୁ ଜିସୁଙ୍ଗୁଁ ପ‍ଇଦେଙ୍ଗ୍‌ ଆସ୍‌ତାର୍‌,
MAR 1:37 ଏସ୍ତିୱାଲେ ଜିସୁଙ୍ଗୁଁ ୱାର୍‌ ସୁଡ଼ୁତାର୍‌ ୱାନିଙ୍ଗ୍‌ ଇର୍ହାର୍‌, “ୱିଜେରେ ନିଂଇ ପଇଜି ଅସିନାର୍‌ ।”
MAR 1:38 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ରାଦୁ, ମାଡୁ ଇୟା ଲାକ୍‌ତୁ ମାନି ନାର୍‍କାଙ୍ଗ୍‍ଁ ସନାଟ୍‌ । ନାନ୍ ଆବେବା ପ୍ରଚାର୍‌ କିନା, ଇରିଙ୍ଗ୍‌ ଆୟା ଉଣ୍ତିଙ୍ଗ୍‌ ନାନୁ ସତା ୱାତାମାନା ।”
MAR 1:39 ଆୟାୱେନ୍‌କା ଜିସୁ ଗାଲିଲି ରାଜିଦି ୱିଜୁ ନାର୍‍କାଙ୍ଗ୍‍ଁ ବୁଲାଜି ବୁଲାଜି ୱାରି ୱିଜୁ ପାର୍‍ତନାକିନି ଇଲ୍‌କାଙ୍ଗ୍‌ ପ୍ରଚାର୍‌ କିତାନ୍‌ ମାରି ଦୁବେଙ୍ଗ୍‍ ଆସ୍‍ତି ଲୋକାଙ୍ଗ୍‌ ଡ଼ିସ୍‍ପିସ୍‍ତାନ୍‍ ।
MAR 1:40 ଜିସୁଦି ଲାକ୍‌ତୁ ଅରେନ୍‍ କୁସ୍ଟରୋଗ୍‌ ଆତି ମାରିକାନ୍‌ ୱାତାନ୍‌ ନୋ ୱାନି ଆଗ୍‌ଡ଼ି ମେଣ୍ତେଙ୍ଗ୍‍ ଗଟ୍‍ କିତାନ୍‍ନୋ ଇର୍‌ଆନ୍‌, “ନିନ୍‌ ଜଦି ବଦା କିନି, ନାଙ୍ଗିଁ ନେଗେଣ୍ତ୍‌ କିଦେଙ୍ଗ୍‌ ଆଟ୍‌ନି ।”
MAR 1:41 ଜିସୁ ଦୟା ତର୍‍ତାନ୍‍ନୋ କିୟୁ ପେର୍‌ଜି ୱାନିଙ୍ଗ୍‌ ମୁଟ୍‌ସି ଇର୍ହାନ୍‌, ନାନ୍ ବଦା କିଜିନା, “ନିନ୍‌ ନେଗେଣ୍ତ୍‌ ଆଆ ।”
MAR 1:42 ଆୟାଦାପ୍ରେନେ କୁସ୍ଟରୋଗ୍‌ ୱାନି ମାଣାନ୍‌ ଡ଼ିସ୍‍ତା ସର୍‌ଆତ୍‌ ମାରି ୱାଣ୍ତ୍ରୁ ନେଗେଣ୍ତ୍‌ ଆତାନ୍‌ ।
MAR 1:43 ଇୟା ୱେନ୍‌କା ଜିସୁ ୱାନିଙ୍ଗ୍‌ ଆଟ୍‍ୱାଦାନ୍‍ ଆଦେସ୍‌ ସିଜି ଆୟାଦାପ୍ରେ ପୋକ୍‌ସି ଇର୍‌ଆନ୍‌,
MAR 1:44 “ଜାଗାର୍‌ତା, ଏଙ୍ଗ୍‌ବା ଇନିକା ଇନ୍‍ମା, ମାତର୍‌ ସାଙ୍ଗ୍‍ଆ, ଜାଜକରିମାନୁ ନିଜେଦିଙ୍ଗ୍‍ ତର୍‌ଆ; ନିନ୍‌ ଜେ ନେଗେଣ୍ତ୍‌ କିଆଇଆତିମାନି ଇକା ଲୋକାମାନୁ ସାକି ସିଦେଙ୍ଗ୍‍ ଇଜି ମୋସାଦି ସିତିମାନି ନିୟମ୍‍ତାନ୍‍ ପୁଜା ସିଆ ।”
MAR 1:45 ମାତର୍‌ ଆକାନ୍‍ ସତା ସର୍‌ଆନ୍‌ ନୋ ଇୟା ମାଟା ୱିଜୁ ତରିନ୍‌ ଇଜି ବୁଲାତାନ୍‌ ଜେ, ଜିସୁ ମାରି ପ୍ରଚାର୍‌ କିଦେଙ୍ଗ୍‌ ତରାଜି ଏମେ ନାର୍‍ତୁବା ସନ୍‌ଡ଼୍ରେଙ୍ଗ୍‌ ଆଟ୍‍ଏତାନ୍‍, ମାତର୍‌ ଜିସୁ ଆତ୍‌ରେ ସିମ୍ରା ବାଡିଦୁ ମାନ୍‌ଜି ମାର୍‌ଆନ୍‌; ମାରି ୱିଜୁ ତରିଣ୍‍ତି ଲୋକୁ ଜିସୁ ଲାକ୍‌ତୁ ୱାଦେଙ୍ଗ୍‌ ଆସ୍‌ତାର୍‌ ।
MAR 2:1 ଏସୋ ଦିନ୍‌ ସରିଇ ୱେନ୍‌କା ଜିସୁ କପର୍‍ନାହୁମ୍‍ ନାର୍‍ତୁ, ଏମେ ଇଣ୍ତ୍ରତେବାଜି ମାରାଆନ୍‍ ଆୟା ଇଣ୍ତ୍ରମାରିଡ଼େସି ୱାତାନ୍‌ । ଜିସୁ ଆୟା ଇଲ୍‌ତୁ ମାନାନ୍‌ ଇଜି ଲୋକାମାନୁ କାବୁର୍‌ ସର୍‌ଆତ୍‌ ।
MAR 2:2 ଆବେ ନିସା ଲୋକୁ ଉଣ୍ତାତାର୍‌ ଜେ, ସେର୍‍ଲା ଲାକ୍‍ତୁବା ଅଡ଼ପ୍‍ ବାଡି ସିଲେତାତ୍‍, ମାରି ଜିସୁ ୱାରିମାନୁ ବାକ୍ୟ ୱେର୍‌ତେଙ୍ଗ୍‌ ଆସ୍‌ତାନ୍‌ ।
MAR 2:3 ଇୟାୱାଲେ ଲୋକୁ ଅରେନ୍‍ ପକିୟାଗାତି ରୋଗ୍‌ ଲୋକ୍‌ତିଙ୍ଗ୍‌ ନାଲ୍‍ଏରିଙ୍ଗ୍‍ ପିଣ୍ତିସ୍‍ କିବିସ୍‍ କିତାରୋ ଜିସୁ ଲାକ୍‌ତୁ ଆସ୍‌ତା ୱାତାର୍‌,
MAR 2:4 ମାତର୍‌ ନାଣ୍ତ ଲୋକୁ ମାର୍‍ଆର୍‍ଆକା ଜିସୁ ଲାକ୍‌ତୁ ତାତ୍‍ତେଙ୍ଗ୍‍ ଆଟ୍‍ଏତାର୍‍, ଆଦେଙ୍ଗ୍‌ ଜିସୁ ଏମେ ବାଡିଦୁ ମାର୍‌ଆନ୍‌, ଆୟା ବାଡ଼ିଦି ରେକାମ୍‌ କୁତ୍‍ତା ପକ୍‌ତାର୍‌, ମାରି ଆକା ରୁକ୍‍ତାରୋ, ଆମା କାଟେଲ୍‍ତୁ କିକୁକାଲ୍‌କୁ ୱାର୍‌ତି ରୋଗ୍‌ ଲୋକୁ ଡରିତା ମାର୍‌ଆନ୍‌, ଆୟା ମିସ୍‍ତେ ଜିସୁ ଆଗ୍‌ଡ଼ି ରେପ୍‌ତାର୍‌ ।
MAR 2:5 ଆୟା ଲୋକାଦି ବିସ୍‌ବାସ୍‌ ସୁଡ଼୍‌ଜି ଜିସୁ କିକୁକାଲ୍‌କୁ ୱାର୍‌ତି ରୋଗିଦିଙ୍ଗ୍‍ ଇର୍‌ଆନ୍‌, “ଏ ମାରିନ୍‌, ନି ପାପ୍‌ୱିଜୁ କେମା ଆତାମାନାତ୍‌ ।”
MAR 2:6 ମାତର୍‌ ସାସ୍ତ୍ରିର୍‍ ମାଣ୍‌କୁ ଏସଲୋକ୍‌ ଆୟା ବାଡିଦୁ ବାସ୍‍ତାରୋ ୱାରିୱାରି ମନ୍ ଲୋଇ ଇକା ଅଡ଼ବିଜି ମାର୍‌ଆର୍‌,
MAR 2:7 “ଇକାନ୍‌ ଏନ୍ଦା ଇୟାୱାଜା ଇଜିନାନ୍‌ ? ୱାନ୍‌ ମାପୁରୁଙ୍ଗ୍‌ ନିଦା କିଜିନାନ୍‌ ! ମାପୁରୁଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ପାପ୍‌କେମା କିଦେଙ୍ଗ୍‌ ଆଟ୍‍ନାନ୍‍ ?”
MAR 2:8 ୱାର୍‌ ୱାରି ମୋନ୍‌ତୁ ଇୟାୱାଜା ୱାର୍‍ଗ୍‍ଜିସାଜିନାର୍‍, ଇଜି ଜିସୁ ଜିବନ୍‌ତୁ ଆୟାଦାପ୍ରେନେ ନେସ୍‌ତାନ୍‌ନୋ ୱାରିଙ୍ଗ୍‌ ଇର୍‌ଆନ୍‌, ମିର୍‌ ନିଜେ ନିଜେଦି ମନ୍‌ତୁ ଏନ୍ଦା ଇୟାୱିଜୁ ମାଟା ୱାର୍‍ଗ୍‍ଜି ସାଜିନିଦେର୍‍ ?
MAR 2:9 ଇୟା କିକୁକାଲ୍‌କୁ ୱାର୍‌ତି ରୋଗିଦିଙ୍ଗ୍‍ “ନି ପାପ୍‌କେମା ଆତାତ୍‌, ଇଜି ଇନିକା ଉସାସ୍‌,” ନୋ “ନିଙ୍ଗିଁଆ, ଟାଟି ଆସ୍‌ସି, ସାଙ୍ଗ୍‍ଆ ଇଜି ଇନିକା ଉସାସ୍‌ ?”
MAR 2:10 ମାତର୍‌ ସାରାଦୁନିଆଦୁ ପାପ୍‌କେମା କିଦେଙ୍ଗ୍‌ ମନୁସ୍ୟପୁତ୍ରଦିଙ୍ଗ୍‌ ଜେ ଅଦିକାର୍‌ ମାନାତ୍‌, ଇକା ନାନ୍ କିଦେଙ୍ଗ୍‌ ଆଟ୍‍ନା । ଇୟାଉଣ୍ତିଙ୍ଗ୍‌ ଜିସୁ ଆୟା କିକୁକାଲ୍‌କୁ ୱାର୍‌ତି ରୋଗ୍‌ ଲୋକ୍‌ଦିଙ୍ଗ୍‍ ଇର୍‌ଆନ୍‌,
MAR 2:11 “ନାନ୍ ନିଇଂ ଇଜିନା, ନିଙ୍ଗ୍‍ଆ, ନି ଟାଟି ଆସ୍‌ସି, ମି ଇଣ୍ତ୍ରସାଙ୍ଗ୍‍ଆ ।”
MAR 2:12 ଆବେଟ୍‌ ୱାନ୍‌ ନିଂଇତାନ୍‍, ଆୟାଦାପ୍ରେ କାଟେଲ୍‍ ଆସ୍‌ସି, ୱିଜେରି ଆଗ୍‌ଡ଼ି ସତା ସର୍‌ଆନ୍‌; ଆବେନ୍‌ ୱିଜେରେ କାବାଆତାରୋ ମାପୁରୁଙ୍ଗୁଁ ଦନ୍ୟବାଦ୍‌ କିଜି କିଜି ଇର୍ହାର୍‌, “ମାପ୍‌ ଇୟାୱାଜା ପାଣି ଏସାଙ୍ଗ୍‍ବା ସୁଡ଼ୁଏପ୍‍ ମାର୍ହାପ୍‍ ।”
MAR 2:13 ଜିସୁ ମାରିଡ଼େସି ଗାଲିଲି ସାମ୍‌ଦୁର୍‌ ପାଡ଼ି ସର୍‌ଆନ୍‌, ମାରି ନାଣ୍ଡଲୋକ୍‍ ୱାନି ଲାକ୍‌ତୁ ୱାତାର୍‌ ଆକା, ୱାନ୍‌ ୱାରିଙ୍ଗ୍‌ ଶିକ୍ଷା ସିଦେଙ୍ଗ୍‍ ଆସ୍‌ତାନ୍‌ ।
MAR 2:14 ମାରି, ଜିସୁ ସଲ୍‍ପୁ ସଲ୍‍ପୁ ଆଲ୍‍ଫିତି ମାରିନ୍‌ ଲେବିଙ୍ଗ୍‍ ନିଜେଦି ସିସ୍‍ଟୁ ଲସ୍‌ନି ବାଡିଦୁ ବାସ୍‍ତି ମାର୍‌ଇକା ସୁଡ଼ୁତାନ୍‌ । ୱାନ୍‌ ୱାନିଙ୍ଗ୍‌ ଇର୍‌ଆନ୍‌, “ନା ୱେନ୍‌କା ରାଆ ।” ଆବେଟ୍‌ ୱାନ୍‌ ନିଂଇତାନ୍‍ନୋ ଜିସୁ ୱେନ୍‌କା ସର୍‌ଆନ୍‌ ।
MAR 2:15 ଇୟା ୱେନ୍‌କା ଜିସୁ ଲେବି ଇଲ୍‌ତୁ ଉଣ୍ତେଙ୍ଗ୍‌ ବାସ୍‍ନିୱାଲେ ଏସୋ ସିସ୍‍ଟୁ ଲସ୍‌ନି ଲୋକୁ ମାରି ପାପି ଲୋକ୍‌ଡର୍‌ ଜିସୁ ମାରି ୱାନି ସିସୁରିୱାଲେ ଉଣ୍ତେଙ୍ଗ୍‌ ବାସ୍‌ତାର୍‌; ଇରିଙ୍ଗ୍‌ ୱାର୍‌ ନାଣ୍ତ ଲୋକୁ ମାର୍‌ଆର୍‌, ମାରି ୱାର୍‌ ଜିସୁୱାଲେ ବୁଲାଜିମାର୍‍ଆର୍‍ ।
MAR 2:16 ଜିସୁ ପାପିଲୋକା ୱାଲେ ମାରି ସିସ୍‍ଟୁ ଲସ୍‌ନି ଲୋକାୱାଲେ ଉଣୁଜି ମାର୍‍ଆନ୍‍, ଇକା ସୁଡ଼ୁତାର୍‌ ପାରୁସି ଦଳତି ଶାସ୍ତ୍ରୀର୍‍ ୱାନି ସିସୁରିଙ୍ଗ୍‌ ଇଣ୍ତ୍ରେଙ୍ଗ୍‌ ଆସ୍‌ତାର୍‌, “ଇକା ଇନିକା ? ୱାନ୍‌ ସିସ୍‍ଟୁ ଲସ୍‌ନି ଲୋକାୱାଲେ ମାରି ପାପିଲୋକା ୱାଲେ ଅର୍‌ସେ ଉଣାନ୍‌ !”
MAR 2:17 ଆୟା ମାଟା ୱେନ୍‌ଜି ଜିସୁ ଇର୍‌ଆନ୍‌, “ନେଗି ଲୋକାଦି ଉଣ୍ତିଙ୍ଗ୍‌ ଡାକ୍‌ତର୍‌ତି ଦର୍‌କାର୍‌ ସିଲେତ୍‌, ମାତର୍‌ ନବ୍ ଲୋକା ଉଣ୍ତିଙ୍ଗ୍‌ ଡାକ୍‌ତର୍‌ତି ଦର୍‌କାର୍‌ ମାନାତ୍‌; ନାନ୍ ଦାର୍ମୁ ଲୋକାଙ୍ଗ୍‌ କୁକ୍‍ତେଙ୍ଗ୍‍ ରେଏ, ମାତର୍‌ ପାପି ଲୋକାଙ୍ଗ୍‌ କୁକ୍‍ତେଙ୍ଗ୍‍ ଇଜି ୱାତାମାନା ।”
MAR 2:18 ଡୁବନ୍‌ ସିନି ଯୋହନତି ସିସୁର୍‍ ମାରି ପାରୁସିର୍‌ ଉପାସ୍‌ କିଜିମାର୍‍ଆର୍‍ । ଆବେଟ୍‌ ଏସ ଲୋକୁ ୱାତାରୋ ଜିସୁଙ୍ଗୁଁ ଇର୍ହାର୍‌, “ଡୁବନ୍‌ ସିନି ଯୋହନତି ସିସୁର୍‍ ମାରି ପାରୁସିର୍‌ ସିସୁର୍‍ ଉପାସ୍‌ କିନାର୍‌, ମାତର୍‌ ମି ସିସୁର୍‍ ଉପାସ୍‌ ଏନ୍ଦା କିଏର୍‌ ?”
MAR 2:19 ଜିସୁ ୱାରିଙ୍ଗ୍‌ ଇର୍‌ଆନ୍‌, “କାନ୍ୟାମୁରୁଲିରି ୱାଲେ ମୁରୁଲୀ ମାନିୱାଲେ ୱାର୍‌ ଉପାସ୍‌ କିନାର୍‌ ନୋ ? ମୁରୁଲି ଆମାସାନ୍ଦି ୱାରିୱାଲେ ମାନାନ୍‌, ଆୟା ସାନ୍ଦି ୱାର୍‌ ଉପାସ୍‌ କିଦେଙ୍ଗ୍‌ ଆଟ୍‍ଏର୍‍ ।
MAR 2:20 ମାତର୍‌ ଦିନ୍‌ ୱାନାତ୍‌, ଏସ୍ତିୱାଲେ ୱାରିମାଣାନ୍‌ ମୁରୁଲିଙ୍ଗ୍‍ ଅନାର୍‍, ମାରି ଆୟାୱାଲେ ଆୟାନାଣ୍ତିଙ୍ଗ୍‌ ୱାର୍‌ ଉପାସ୍‌ କିନାର୍‌ ।
MAR 2:21 “ଏନ୍‌ ପୁନି ୱାତିଦି ଇସ୍ରି ଅଟିଦିଙ୍ଗ୍‍ ଅସି ପାଡ଼ିଇ ୱାତିଦୁ ଗୁତ୍‍ଏନ୍‍; ଇରିଙ୍ଗ୍‌ ଗୁତ୍‍ତିଙ୍ଗ୍‍ ଆୟା ପୁନି ୱାତିଦି ଅଟି ପାଡ଼ିଇ ୱାତିଦିଙ୍ଗ୍‌ ନାଣ୍ତ କିଜିସ୍‌କିନାତ୍‌ ମାରି ନାଣ୍ତ ପେରିକା କିଜ୍‍ନାତ୍‍ ।
MAR 2:22 ମାରି, ଏନ୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପାଡ଼ିଇ ତଲ୍‍ ମଣିଦୁ ଇଡ୍‌ଏନ୍‌; ଜଦି ଇଟ୍‌ତିଙ୍ଗ୍‌ ଆକା ତଲ୍‍ ମଣିଦିଙ୍ଗ୍‍ ପାଡିସ୍‌ କିନାତ୍‍, ଆବେଟ୍‌ ଅଙ୍ଗୁର୍‍ରସ୍‍ ନି ତଲ୍‍ମଣି ରୁଣ୍ତିବା ସେଏଣ୍ତ୍‍ ଆନେ । ମାତର୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପୁନି ତଲ୍‍ ମଣିଦୁ ଇଡ୍‌ନିକା ମାନାତ୍‌ ।”
MAR 2:23 ଅର୍‍ଲେନ୍‍ ରମ୍‍ନିଦିନ୍‍ତୁ ଜିସୁ ପାସି କିଡ଼ିଇ ନାଡ଼୍‍ମି ସିଜି ସଲ୍‌ସି ମାର୍‌ଆନ୍‌, ମାରି ୱାନି ସିସୁର୍‍ ୱାନିୱାଲେ ସଲ୍‍ପୁ ସଲ୍‍ପୁ ପାସି ସେରେନ୍‍କୁ ତେଉତେଙ୍ଗ୍‍ ଆସ୍‌ତାର୍‌ ।
MAR 2:24 ଆବେଟ୍‌ ପାରୁସିର୍‌ ଜିସୁଙ୍ଗୁଁ ଇର୍ହାର୍‌, “ସୁଡୁଆ, ରମ୍‌ନିଦିନ୍‍ତୁ ଆମାକାକି କିଦେଙ୍ଗ୍‌ ନିୟମ୍‌ ସିଲେତ୍‌, ମି ସିସୁର୍‌ ଇନିଦାନିଙ୍ଗ୍‌ ଆକା କିଜିନାର୍‍ ?”
MAR 2:25 ଜିସୁ ୱାରିଙ୍ଗ୍‌ ଇର୍ହାନ୍‌, ଏସ୍ତିୱାଲେ ଦାଉଦଦିଙ୍ଗ୍‍ ଖାଦି ସିଲେତାତ୍‍ ଆୟାୱାଲେ ୱାନ୍‌ ମାରି ୱାନି ତଡ଼୍‍ତି ଲୋକୁ ବାଙ୍ଗାଁ ଆତାର୍‌, ନାସ୍‍ତିୱାଲେ ୱାନ୍‌ ଇନିକା କିତାମାର୍‌ଆନ୍‌, ମିର୍‌ ଆକା ଏସାଙ୍ଗ୍‍ ବା ପଡ଼ାଇଦେର୍‍ ନୋ ?
MAR 2:26 ଅବିୟାଥର ୱିଜେରିଙ୍ଗ୍‍ ପେରି ଜାଜକରି ଦିନ୍‍ତୁ ଦାଉଦ ଏଣ୍ତେସ୍‍ କିଜି ମାପୁରୁତି ଇଲ୍‌ତୁ ଡ଼ୁଗିତାନ୍‍ନୋ, ଆମା ପୁଜାସିତି ରୁଟି ଯାଜକରିଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‍ବା ତିଣ୍ତ୍ରେଙ୍ଗ୍‍ ନିୟମ୍‌ ସିଲେତ୍‌, ଆକା ତିରାଆ ମାର୍‌ଆନ୍‌, ମାରି ୱାନି ତଡ଼୍‍ ଲୋକାଙ୍ଗ୍‌ ବା ସିତା ମାର୍‌ଆନ୍‌ ।
MAR 2:27 ଜିସୁ ପାରୁସିରିଙ୍ଗ୍‍ ଇର୍‌ଆନ୍‌, ରମ୍‍ନିଦିନ୍‍ ଲୋକା ସାହାଜ୍ୟ ଉଣ୍ତିଙ୍ଗ୍‌ ତିଆର୍‌ ଆତାମାନାତ୍‌, ମାତର୍‌ ଲୋକ୍‌ତିଙ୍ଗ୍‌ ବଜୁ ଉଣ୍ତିଙ୍ଗ୍‌ ରମ୍‍ନିଦିନ୍‍ ଆଏତ୍‍ ।
MAR 2:28 ଆଦେଙ୍ଗ୍‌ ମନୁସ୍ୟପୁତ୍ର ଜେ ନାନ୍, ରମ୍‌ନିଦିନ୍‍ତି ପ୍ରବୁ ଆନା ।
MAR 3:1 ଜିସୁ ମାରିଡ଼େସି ପାର୍‌ତନା କିନି ଇଲୁଦୁ ସର୍‌ଆନ୍‌ । ଆବେ ଅରେନ୍‍ ଲୋକୁ ମାର୍‌ଆନ୍‌, ୱାନି ଉଣି କିୟୁ ୱାର୍‌ତା ମାର୍‌ଆତ୍‌ ।
MAR 3:2 ମାରି, ଜିସୁ ରମ୍‌ନି ଦିନ୍‍ତୁ ଆୟା ଲୋକ୍‌ତିଙ୍ଗ୍‌ ନେଗେଣ୍ତ୍‌ କିନାନ୍‍ନୋ ସିଲେ, ଇକା ସୁଡ଼ୁଦେଙ୍ଗ୍‍ ଇଜି ୱାର୍‌ ୱାନି ମୁସ୍‌କୁ କାଣୁକୁ ସୁଡ଼ୁଜିମାର୍‌ଆର୍‌, ଏଣ୍ତେସ୍‌କି ୱାର୍‌ ୱାନି ବିରୁଦ୍‍ତାନ୍‍ ଦୋସ୍‌ କିଦେଙ୍ଗ୍‌ ଆଟ୍‍ନାର୍‍ ।
MAR 3:3 ଆମା ୱାନିଦି କିୟୁ ୱାର୍‌ତା ସୋର୍‌ଆ ମାର୍‌ଆତ୍‌, ୱାନିଙ୍ଗ୍‌ ଜିସୁ ଇର୍‌ଆନ୍‌, “ରାଆ, ନାଣ୍‍ମି ନିଲ୍‍ଆ ।”
MAR 3:4 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, “ରମ୍‌ନି ନାଣ୍ଡିଙ୍ଗ୍ ଇନି ପାଣି କିନିକା ନିୟମ୍‌ ମାନାତ୍‌ ? ନେଗେଣ୍ତ୍‍ କିଦେଙ୍ଗ୍‌ ନୋ ସେଏଣ୍ତ୍‍ କିଦେଙ୍ଗ୍‌ ? ଅରେନ୍‍ ଲୋକ୍‌ତି ଜିବନ୍‌ ରକିୟା କିନିକା ନୋ ସାପିସ୍‌ନିକା ?” ମାତର୍‌ ଲୋକ୍‌ଡର୍‌ ଆଲେତା ସରଆର୍‌ ।
MAR 3:5 ଆବେଟ୍‌ ଜିସୁ ଲୋକା ଜିବନ୍‌ ଆଟ୍‍ୱାଆକା ଦୁଃକ୍‌ ଆଜି ରିସାଦାନ୍‌ ସାରିବେଡ଼୍‍ତି ୱାରିଙ୍ଗ୍‌ ସୁଡ଼ୁଜି କିୟୁ ୱାର୍‌ତି ମାର୍‍ଇ ଲୋକ୍‌ତିଙ୍ଗ୍‌ ଇର୍‌ଆନ୍‌, “ନି କିୟୁ ପେର୍‌ଆ ।” ୱାନ୍‌ ୱାନି କିୟୁ ପେର୍‍ତାନ୍‍, ମାରି ୱାନି କିୟୁ ନେଗେଣ୍ତ୍‍ ଆତାସର୍‍ଆତ୍‍ ।
MAR 3:6 ଇକା ସୁଡ଼ୁତାର୍‌ ନୋ ପାରୁସିର୍‌ ପାର୍‌ତନା ଇଲ୍‌ତାନ୍‌ ସହସି ସରଆର୍‌ ନୋ ଜିସୁଙ୍ଗୁଁ ସାୟା ମାର୍‍ଗା ଡାକ୍‌ତେଙ୍ଗ୍‍ଁ ଇଜି ୱାନି ବିରୁଦ୍‌ତାନ୍‌ ଆୟାଦାପ୍ରେ ହେରୋଦ ରାଜା ଦଲ୍‌ତି ନେତାରିୱାଲେ ୱାର୍‌ଗିଜି ସାତାର୍‌ ।
MAR 3:7 ଜିସୁ ୱାନି ସିସୁରିୱାଲେ ମିସାତାନ୍‌ ନୋ ଗାଲିଲି ସାମ୍‌ଦୁର୍‌ ପାଡ଼ି ସର୍‌ଆନ୍‌ । ମାରି ଗାଲିଲି ଗାଡ଼୍‌ତାନ୍‍ ନାଣ୍ତ ଲୋକୁ ସତା ରୋ ୱାନି ୱାଲେ ବୁଲାତାର୍‌; ମାରି ଜିହୁଦା,
MAR 3:8 ଜିରୁସାଲାମ୍‍, ଇଦୋମ୍, ଜର୍ଦନ ଗାଡ଼୍‌ତି ଆୟା ପାଡ୍‍କା ମାନିକାର୍‌, ମାରି ସୋର ନି ସିଦନ୍‍ତି ସାରିବେଡ଼୍‍ତିଦାନ୍‍ ଲୋକୁ ୱିଜେରେ ୱାନି ପାଣିଦିମାଟା ୱେର୍‌ଆର୍‌ରୋ ୱାନି ଲାକ୍‌ତୁ ୱାତାର୍‌ ।
MAR 3:9 ଆବେ ନାଣ୍ତ ଲୋକ୍‌ ଉଣ୍ତାତାର୍‍ଆକା, ଲୋକୁ ୱିଜେରେ ୱାନି ଲାକ୍‌ତୁ ୱାଜ ମାଟ୍‍ସି ସାଏର୍‌, ଆୟାଉଣ୍ତିଙ୍ଗ୍‌ ୱାନ୍‌ ୱାନି ସିସୁରିଙ୍ଗ୍‌ ୱାନି ଉଣ୍ତିଙ୍ଗ୍‌ ଉଣ୍ତ୍ରି ଇସ୍ରି ଡଙ୍ଗାଁ ଲାକ୍‌ତୁ ଇଡ୍‌ଦେଙ୍ଗ୍‌ ଇର୍‌ଆନ୍‌;
MAR 3:10 ଇରିଙ୍ଗ୍‌ ଜିସୁ ଏସ ରୋଗ୍‍ତୁ ମାର୍‍ଇ ଲୋକାଙ୍ଗ୍‌ ନେଗେଣ୍ତ୍‌ କିତାନ୍‍ଆକା, ମାରି ରୋଗ୍‍ତୁ ମାନି ୱିଜେରେ ୱାନିଙ୍ଗ୍‌ ମୁଟ୍‌ତେଙ୍ଗ୍‌ ଇଜି ୱାନି ମୁସ୍‌କୁ ମାଟ୍‍ସି ସାଜି ମାର୍‌ଆର୍‌ ।
MAR 3:11 ମାରି, ତାଗ୍‍ଇଆତ୍ମା ଆସ୍‌ତିମାର୍‌ଇ ଲୋକୁ ଜିସୁଙ୍ଗୁଁ ସୁଡ଼ୁଜିମାର୍‍ଆର୍‍, ୱାର୍‌ ଜିସୁ ଆଗ୍‌ଡ଼ି ଆର୍‍ଜି ଆଉଲି ଆଜି ଇନ୍‍ଜିମାର୍‍ଆର୍‍, “ନିନୁନେ ମାପୁରୁଦି ମାରିସି ।”
MAR 3:12 ଆବେଟ୍‌ ୱାନ୍‌ ଏନ୍‌ ଆକା ଏଙ୍ଗ୍‌ବା ଇନ୍‌ଇ ଉଣ୍ତିଙ୍ଗ୍‌ ୱାନ୍‌ ତାଗ୍‌ଇ ଆତ୍ମେଆଙ୍ଗ୍‌ ଆଟ୍‍ୱାଦାନ୍‍ ଆଦେସ୍‌ ସିତାନ୍‌ ।
MAR 3:13 ଆୟାୱେନ୍‌କା ଜିସୁ ଗରନ୍‌ ମୁସ୍‌କୁ ସର୍‍ଆନ୍‍ନୋ, ୱାଣ୍ତ୍ରୁ ଏମେ ଲୋକ୍‌ତିଙ୍ଗ୍‌ ବଦା କିତାନ୍‌ ଆୟା ଲୋକ୍‌ତିଙ୍ଗ୍‌ ୱାନି ଲାକ୍‌ତୁ କୁକ୍‍ତାନ୍‍ ମାରି ୱାର୍‌ ୱାନିବାନୁ ୱାତାର୍‌ ।
MAR 3:14 ଜିସୁ ବାର ଲୋକ୍‍ ସିସୁରିଙ୍ଗ୍‌ ବାସ୍‌କିତାନ୍‌, ଏଣ୍ତେସ୍‌ ୱାରୁ ୱାନିୱାଲେ ତେବାନାର୍‌, ମାରି “ୱାନ୍‌ ୱାରିଙ୍ଗ୍‌ ନେଗିକାବୁରୁ ପ୍ରଚାର୍‌ କିଦେଙ୍ଗ୍‌ ପୋକ୍‌ତାନ୍‌,”
MAR 3:15 ମାରି ୱାର୍‌ ଦୁବେଆଙ୍ଗ୍‍ ପେର୍‍ଦେଙ୍ଗ୍‍ ଅଦିକାର୍‍ ପ‍ଇତାର୍‌ ।
MAR 3:16 ଜିସୁ ଇୟା ବାର ଲୋକାଙ୍ଗ୍‌ ବାସ୍‌କିତାନ୍‌ ସିମୋନ୍‌, ଜିସୁ ଆମାୱାନିଙ୍ଗ୍‌ କି ମାରି ଉଣ୍ତ୍ରି ଦର୍‌ ପିତର୍‌ ଇଜି ସିତାନ୍‌;
MAR 3:17 ଜେବଦୀଦି ରିଏର୍‌ ମାରିସିର୍‌ ଯାକୁବ ମାରି ୱାନି ତଡ଼ାନ୍‍ ଯୋହନ, ଆମାୱାରିଙ୍ଗ୍‍ ୱାନ୍‌ ବିନେରିଗୋସ୍, ବା ମିର୍‍ସି ଆଉଲି ଆନି ବାଦଡ଼୍‍ତି ମାରିସିର୍‌ ଇଜି ଦର୍‌ ସିତାନ୍‌;
MAR 3:18 ଆନ୍ଦ୍ରିୟ, ପିଲିପ୍‌, ବାର୍ତଲମି, ମାତିଉ, ଥୋମା, ଆଲପିଦି ମାରିସି ଯାକୁବ, ଥଦ୍ଦୀୟ, କିଣାନିୟ ସିମୋନ, ଏନ୍‌ ଇସ୍ରାଏଲ୍‍ତିଙ୍ଗ୍‍ ଡ଼ିସିସ୍‍ କିଦେଙ୍ଗ୍‌ ବଦାକିଜି ମାର୍‍ଇ ଯିହୁଦି ଲୋକାମାଣ୍‌କୁ ଅରେନ୍‍ ମାର୍‌ଆନ୍‌ ।
MAR 3:19 ମାରି ଇସ୍କାରିୟୋତିୟ ଜିହୁଦା, ଆମାକାନ୍‍ କି ୱେନ୍‌କା ଜିସୁଙ୍ଗୁଁ ସାତ୍ରୁରି କିୟୁଦୁ ଆସ୍‍ପିସ୍‍ କିତାନ୍‌ ।
MAR 3:20 ଇୟା ୱେନ୍‌କା ଜିସୁ ଏସିୱାଲେ ଇନ୍‍ଡ୍ର ଡ଼େସି ୱାତାନ୍‌, ଆବେ ନିସା ଲୋକୁ ଉଣ୍ତାତା ମାର୍‌ଆର୍‌ ଯେ, ଜିସୁ ମାରି ୱାନି ସିସୁର୍‌ ଖାଦି ଉଣ୍ତେଙ୍ଗ୍‌ ବା ଆଟ୍‍ଏତାର୍‍ ।
MAR 3:21 ଏସ୍ତିୱାଲେ ଜିସୁରି ଇନ୍‍ଡ୍ରଣି ଲୋକୁ ଇକା ୱେର୍‌ଆର୍‌ ଆୟାୱାଲେ ୱାର୍‌ ଜିସୁଙ୍ଗୁଁ ଡ଼େସି କୁକ୍‍ସ ଅତେଙ୍ଗ୍‌ ସରଆର୍‌, ଇରିଙ୍ଗ୍‌ “ୱାନି ତାଲା ପାଣି ସିଏଜିନାତ୍‍ ଇଜି ଲୋକୁ ୱାର୍‍ଜିସାନିକା ୱେର୍‌ଆର୍‌ ।”
MAR 3:22 ମାରି, ଜିରୁସାଲାମ୍‍ତାନ୍‌ ୱାତି ଏସୋ ସାସ୍ତ୍ରିର୍‌ ଇର୍ହାର୍‌, “ୱେନିଙ୍ଗ୍‌ ଦୁବେଆଣି ପେରିକାତ୍‍ ବାଲ୍‍ଜିବୁଲ୍‍ ବୁଡ଼୍‍ତା ମାନାତ୍‌, ତାନେ ସାକ୍ତିଦାନ୍‌ ଦୁବେଙ୍ଗ୍‍ ଡ଼ିସିସ୍‍ନାନ୍‍ ।”
MAR 3:23 ଜିସୁ ୱାରିଙ୍ଗ୍‌ ଲାକ୍‌ତୁ କୁକ୍‍ତାନ୍‍ ମାରି ଉଣ୍ତ୍ରି କାତା ୱେର୍‌ସି ବୁଜା କିତାନ୍‌, “ସୟତାନ୍‍ ଏଣ୍ତେସ୍‌ ଶୟତାନ୍‍ତିଙ୍ଗ୍‍ ପେର୍‍ଦେଙ୍ଗ୍‍ ଆଟ୍‍ନାତ୍‍ ?”
MAR 3:24 ନିଜେଦି ଦେସ୍‌ ଜଦି ନିଜେ ନିଜେରି ଦଳ ଲୋଇ ଜୁଦ୍‍ କିନାର୍‌, ଆୟା ରାଜି ତିର୍‌ ତେବାଦେଙ୍ଗ୍‍ ଆଟ୍‍ଏତ୍‍ ।
MAR 3:25 ମାରି, ଉଣ୍ତ୍ରିଇଲ୍‍ତି ଲୋକୁ ଜଦି ବାଗ୍‌ ବାଗ୍‌ ଆଜି ନିଜେ ନିଜେରି ଲୋଇରି ବିରୁଦ୍‍ତାନ୍‍ ନିଂଇତିଙ୍ଗ୍‍, ଆୟା ଇଲୁ ତିର୍‌ ତେବାଦେଙ୍ଗ୍‍ ଆଟ୍‍ଏତ୍‍ ।
MAR 3:26 ଆୟାୱାଜା, ଜଦି ଶୟତାନ୍‍ତି ରାଜି ବାଗ୍‌ ବାଗ୍‌ ଆଜି ନିଜେଦି ବିରୁଦ୍‍ତାନ୍‍ ନିଂଇତାତ୍‍ନି, ଆୟାକା ତିର୍‌ ତେବାଏତ୍‍, ମାତର୍‌ ତାନି ସାନିକା ୱାତାତ୍‌ନି ।
MAR 3:27 “ମାତର୍‌ ଅରେନ୍‍ ବପୁମାନି ଲୋକ୍‌ତି ଇନ୍‍ଡ୍ର ଏନ୍‍ବା ଡ଼ୁଗୁଜି ଆଗ୍‌ଡ଼ି ୱାନିଙ୍ଗ୍‌ ତର୍‍ଏତିଙ୍ଗ୍‍, ୱାନି ସାମାନ୍‌ପତ୍ର ଡଂଆ କିଜ ଅତେଙ୍ଗ୍‌ ଆଟ୍‍ଏନ୍‍; ୱାନିଙ୍ଗ୍‌ ଆଗ୍‌ଡ଼ି ତର୍‍ତିଙ୍ଗ୍‍ ଗାଦେ ୱାନ୍‌ ୱାନି ଇଲୁ ଲୋଇ ଡଂଆ କିନାନ୍‌ ।
MAR 3:28 “ନାନ୍ ମିଙ୍ଗିଁ ସତ୍‌ ଇଜିନା, ଲୋକ୍‌ତି ୱିଜୁ ପାପ୍‍ ମାରି ୱାର୍‌ ଏସା ନିନ୍ଦାମାଟା ଇନ୍‌ଜି ମାପୁରୁଙ୍ଗୁଁ ନିନ୍ଦା କିନାର୍‌, ଆୟାୱିଜୁ କେମା ଆନାତ୍‌;
MAR 3:29 ମାତର୍‌ ଏନ୍‌ ପବିତ୍ରଆତ୍ମାଦି ବିରଦ୍‌ତାନ୍‌ ନିନ୍ଦା ମାଟା ଇନାନ୍‌, ୱାନିଙ୍ଗ୍‌ ମାପୁରୁ ଏସାଙ୍ଗ୍‍ ବା କେମା କିଏନ୍‍, ଆୟା ଲୋକୁ ୱିଜୁଦିନ୍‌ତି ଉଣ୍ତିଙ୍ଗ୍‌ ଶାସ୍ତି ପଇନାନ୍‌ ।”
MAR 3:30 “ଜିସୁଙ୍ଗୁଁ ତାଗ୍‍ଇଆତ୍ମା ଆସ୍ତା ମାନାତ୍‌” ଇଜି ଏସୋ ସାସ୍ତ୍ରିର୍‍ ଇର୍ହାର୍‌ ଆକା, ଜିସୁ ଇୟା ମାଟା ଇନ୍‌ଜି ୱାରିଙ୍ଗ୍‌ ବୁଝା କିତାନ୍‌ ।
MAR 3:31 ନାସ୍ତିୱାଲେ ଜିସୁଦି ୟାୟା ନି ତଡ଼ାନ୍‍କୁ ୱାତାରୋ ଆତ୍‌ରେ ନିର୍ହା ରୋ ଜିସୁଙ୍ଗୁଁ କୁକ୍‍ତେଙ୍ଗ୍‍ କାବୁର୍‌ ପୋକ୍‌ତାର୍‌ ।
MAR 3:32 ଆବେଟ୍‌ ୱାନି ସାରିବେଡ଼୍‍ତି ବାସ୍‍ତି ମାର୍‍ଇ ଲୋକୁ ୱାନିଙ୍ଗ୍‌ ଇର୍ହାର୍‌, “ସୁଡ଼ୁଆ, ମି ୟାୟା ନି ତଡ଼ାନ୍‌କୁ ମାରି ତାଙ୍ଗିଁକ୍‍ ଆତ୍‌ରେ ତେବାତେ ନୋ ନିଙ୍ଗିଁ ପଇଜିନେ ।”
MAR 3:33 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ନା ୟାୟା ନି ତଡ଼ାନ୍‍କୁ ଏର୍‌ ?”
MAR 3:34 ଜିସୁ ୱାନି ସାରିବେଡ଼୍‍ତି ବାସ୍‍ତି ମାର୍‍ଇ ଲୋକାଙ୍ଗ୍‌ ସୁଡ଼ୁଜି ଇର୍‌ଆନ୍‌, “ସୁଡ଼ୁଦୁ, ଇକାର୍‌ ଆଜିନାର୍‌ ନା ୟାୟା ନି ନା ତଡ଼ାନ‍କୁ ।
MAR 3:35 ଏନ୍‌ଆପିନ୍‌ ମାପୁରୁଦି ମାଟା ମାନାନାନ୍‍, ୱାନ୍‌ ନା ତଡ଼ାନ୍‍, ତାଙ୍ଗିଁ ମାରି ୟାୟା ।”
MAR 4:1 ଜିସୁ ଗାଲିଲି ସାମ୍‌ଦୁର୍‌ ପାଡ଼ି ମାରିଡ଼େସି ଶିକ୍ଷା ସିଦେଙ୍ଗ୍‍ ଆରାମ୍‍ କିତାନ୍, ୱାନି ଲାକ୍‌ତୁ ନାଣ୍ତ ଲୋକୁ ଉଣ୍ତାତାର୍‍ ଆକା, ୱାନ୍‌ ସାମ୍‌ଦୁର୍‌ତୁ ମାର୍‍ଇ ଉନ୍‌ଡ୍ରି ଡଙ୍ଗାଁଦୁ ସଲ୍‌ସି ବାସ୍‌ତାନ୍‌ ମାରି ଲୋକୁ ୱିଜେରେ ସାମ୍‌ଦୁର୍‌ ପାଡ଼ି ତେବାତାର୍‍ ।
MAR 4:2 ଜିସୁ କାତାଦାଣ୍ତ୍‍ ଏସୋ ସିକିୟା ସିନିୱାଲେନେ ୱାନ୍‌ ୱାରିଙ୍ଗ୍‌ ଇର୍‌ଆନ୍‌,
MAR 4:3 “ୱେଣ୍ତ୍ରୁ, ଅରେନ୍‍ ୱିତୁ ୱିତ୍‍ନିକାନ୍‍ ୱିତ୍‌ତେଙ୍ଗ୍‌ ସତାନ୍‌ ।
MAR 4:4 ୱାନ୍‌ କିଡ଼ିଇଦୁ ୱିତୁ ୱିତ୍‍ନିୱାଲେ ଏସ ୱିତୁ ସାରି ପାଡ଼୍‌କାଦୁ ଆର୍‌ତେ ଆକା ପଟିଙ୍ଗ୍‌ ୱାଜି ଆୟାୱିଜୁ ୱିତୁ ତିର୍‍ଏ ।
MAR 4:5 ମାରି ଏସ ୱିତୁ ଉଣା ସିକାଲାମାନି ପିଡ଼ିପି ବୁମିଦୁ ଆର୍‌ତାତ୍‌ । ମାରି ନାଣ୍ତ ସିକାଲା ସିଲେତାତ୍‌ ଆକା ୱିତୁ ଦାପ୍ରେ ନେରିତାତ୍‍ ।
MAR 4:6 ମାତର୍‌ ୱେଡ଼ା ସତାତ୍‌ ଆକା ଗାଜା ୱେତା ସର୍‌ଆତ୍‌ ମାରି ୱେଲା ଲୋଇ ସାର୍‍ଏତା ମାର୍‌ଆତ୍‌ ଆକା ୱାର୍‍ତା ସର୍‍ଆତ୍‍ ।
MAR 4:7 ମାରି ଏସୋ ୱିତୁ ସାମ୍‌କା ଦୁପା ଲୋଇ ଆର୍‌ତାତ୍‌, ମାରି ସାମ୍‍ମାରାକ୍‍ ପିରିତେନୋ ତାମେ ମୁସ୍‌କୁ ତିଗାତେ ମାରି ଆୟା ମାରାତୁ ଉଣ୍ତ୍ରିବା ପାଡ଼ୁ ଆସ୍‍ଏତାତ୍‍ ।
MAR 4:8 ମାତର୍‌ ଏସୋ ୱିତୁ ନେଗି ବୁମିଦୁ ଆର୍‌ତାତ୍‌, ଆୟା ବାଡିଦୁ ଗାଜା ଆଜି ପିରିତାଦୋ ତିରିସ୍‌ ଗୁଣୁ, ସାଟେ ଗୁଣୁ ମାରି ସୟେ ଗୁଣୁ ସାନ୍ଦି ପାଡ଼ୁ ଆସ୍‌ତାତ୍‌ ।”
MAR 4:9 ଆବେ ଜିସୁ ଇର୍‌ଆନ୍‌, “ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ, ୱାନ୍‌ ୱେନିନ୍‌ ।”
MAR 4:10 ଜିସୁ ଅରେନ୍‍ନେ ମାନିୱାଲେ ବାର ଲୋକୁ ଶିଶୁର୍‌ ମାରି ୱାରିୱାଲେ ମାନିଲୋକ ଜିସୁମାନୁ ୱାଜି ୱେନ୍‌ବାତାର୍‌ “ନିନୁ ଏନ୍ଧା କାତାଦାନ୍‍ ମାଟା ୱେର୍‌ସିନି ?”
MAR 4:11 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, ମାପୁରୁଦି ରାଜିଦି ମାର୍‍ଗିତି ମାଟା ବୁଜାଦେଙ୍ଗ୍‌ ଉଣ୍ତିଙ୍ଗ୍‌ ମିଙ୍ଗିଁ ବପୁ ପୁଟ୍‍ତାମାନାତ୍‍, ମାତର୍‌ ଆୟା ଆତ୍ରେଣି ଲୋକାଙ୍ଗ୍‌ ଇୟାୱିଜୁ ବିସୟ କାତାଦାନ୍‍ ୱେର୍‌ତେଙ୍ଗ୍‌ ଆଜିନାତ୍‍ ।
MAR 4:12 ଆୟା ଉଣ୍ତିଙ୍ଗ୍‌ ୱାର୍‌ ୱେନ୍‌ଜି ୱେନ୍‌ଜି ନେସ୍‌ତେଙ୍ଗ୍‌ ଆଟ୍‍ଏର୍‍, ମାରି ୱେନ୍‌ବୁ ୱେନ୍‌ବୁ ବୁଜାଏର୍‍, ଜଦି ନେସ୍‌ନାର୍‌ ମାରି ବୁଜାନାର୍ ମାରି ମାପୁରୁତି ଲାକ୍‌ତୁ ଡ଼େସିୱାନାର୍‍ ମାରି ୱାରିଙ୍ଗ୍‌ କେମା କିନାନ୍‍ ।
MAR 4:13 ଜିସୁ ମାରି ସିସୁରିଙ୍ଗ୍‌ ଇର୍‌ଆନ୍‌, “ଇୟା କାତା ମିର୍‍ବା ବୁଝାଦେଙ୍ଗ୍‍ ଆଟ୍‍ଇଜିନିଦେର୍‍ ? ଆଇ ୱିଜୁ କାତା ଏଣ୍ତେସ୍‌ ବୁଝାନିଦେର୍‍ ?
MAR 4:14 ୱିତ୍‍ନିକାନ୍‍ ୱିତୁ ଅର୍ତାତ୍‍ ମାପୁରୁତି ବାକ୍ୟ ୱିତ୍‍ନାନ୍‍ ।
MAR 4:15 ଆମାକାର୍‌ ମାପୁରୁଦି ବାକ୍ୟ ୱେନାର୍‌, ମାତର୍‌ ୱେର୍‍ହି ଦାପ୍ରେନେ ଶୟତାନ୍‍ ୱାନାତ୍‌ ନୋ ୱାରିମାନୁ ୱିତାତିମାନି ବାକ୍ୟଦିଙ୍ଗ୍ ଡଂଆ କିନା ଅନାତ୍‍, ୱାରୁ ସାର୍‍ଦୁ ବାକ୍ୟ ୱିତାତି ବୁମିଦି ୱାଜା ।
MAR 4:16 ଆୟାୱାଜା, ଏର୍‌କି ବାକ୍ୟ ୱେର୍‍ଇଦାପ୍ରେ ୱେଡ଼ିକାଦାନ୍‌ ଆକା ୱାରି ମନ୍ ଲୋଇ ଇଡ୍‍ନାର୍‍,
MAR 4:17 ମାତର୍‌ ୱାରିମାନୁ ୱେଲା ସାଗ୍‍ଏତ୍‍ଆକା ସାଣେକ୍‍ନେ ତିର୍‍ ତେବାନାର୍‌, ୱେନ୍‌କା ବାକ୍ୟ ଉଣ୍ତିଙ୍ଗ୍‌ ଦୁଃକ୍‌‍ ମାରି ନିଦା ମାଟା ୱାତିଙ୍ଗ୍‍ ଆୟାଦାପ୍ରେ ବିସ୍‍ବାସ୍‍ ଡ଼ିସ୍‍ନାର୍‍, ୱାରୁ ପିଡ଼ିପି ବୁମିଦୁ ଆର୍‍ତିମାନି ୱିତ୍‍ତି ୱିତୁଦି ୱାଜା ।
MAR 4:18 ମାରି ଆମାକାର୍‍କି ବାକ୍ୟ ୱେନ୍‍ନାର୍‍, ମାତର୍‌ ଦୁନିଆଦି ସିନ୍ତା, ଡାବୁଙ୍ଗୁଁ ଟାକେଙ୍ଗ୍‍ଣି ମାୟା ମାରି ଆଇ ୱିଜୁ ବିସୟତୁ ଆସା ମନ୍‌ତୁ ଡ଼ୁଗ୍‍ନାଦ ବାକ୍ୟଦିଙ୍ଗ୍‍ ତିଗାନାତ୍‍ ମାରି ଆକା ପାଡ଼ୁ ସିଲିକା ଆନାତ୍‌ । ୱାର୍‍ ସାମ୍‌ ମାରାକା ଲୋଇ ଆର୍‌ତି ୱିଜୁ ୱାଜା ।
MAR 4:19 ମାତର୍‍ ଦୁନିଆଦି ସିନ୍ତା, ଦନ୍‍ଲବ୍‍ ମାରି ଆଇ ଆସା ୱାରି ମନ୍‌ତିଙ୍ଗ୍‍ ତିର୍‌ଜିମାନିଙ୍ଗ୍‌ ଆୟା ମାଟା ୱାରିମାନୁ ପିର୍‌ଏତ୍‌ ।
MAR 4:20 ମାରି, ଆମାକାର୍‌ କି ବାକ୍ୟ ୱେନାରୋ ଆକା ମନ୍ ଲୋଇ ଇଡ୍‍ନାର୍‍, ୱାର୍‌ ଏନ୍‌ ତିରିସ୍‌ ଗୁଣୁ, ସାଟେ ଗୁଣୁ ମାରି ସହେ ଗୁଣୁ ପାଡ଼ୁ ଆସ୍‌ନାର୍‌ ଆୟା ଲୋକୁ ନେଗି ବୁମିଦୁ ୱିତ୍‍ତି ୱିତୁତି ୱାଜା ।”
MAR 4:21 ଜିସୁ, ମାରିଡ଼େସି ୱାରିଙ୍ଗ୍‌ ଇର୍‌ଆନ୍‌, “ଏନ୍‌ ଏସ୍‌କାଙ୍ଗ୍‌ ଇନିକା ଦିୱା କାସିସ୍‍କିଜି ଅଡି ଆଡ୍‍ଗି କି ଖାଟେଲ୍‍ ଆଡ୍‍ଗି ଇଡ୍‌ନାନ୍‌ ? ଆକା ଲୋକୁ ଦିୱା କାସିସ୍‍କିଜି ଦିଆ ଇଡ୍‌ନି ବାଡିଦୁ ଇଡ୍‌ଏର୍‌ ନୋ ?”
MAR 4:22 ଇରିଙ୍ଗ୍‌ ତର୍‍ଇ ଇସାବ୍‌ତାନ୍‌ ଏମେକାବା ମାର୍‍ଗ୍‍ଏତ୍‍; ଆମାକା ମାର୍‍ଗିତା ମାନାତ୍‌, ଆକା ତର୍‍ଦେଙ୍ଗ୍‍ ଇଜିନେ ମାର୍‍ଗିତା ମାନାତ୍‌ ।
MAR 4:23 ଜଦି “ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ, ୱାନ୍‌ ୱେନିନ୍‌ ।”
MAR 4:24 ଜିସୁ ୱାରିଙ୍ଗ୍‌ ଇର୍‌ଆନ୍‌, “ଇନିକା ୱେନ୍‌ଜିନିଦେର୍‌, ଆୟା ଉଣ୍ତିଙ୍ଗ୍‌ ଜାଗାର୍‌ତା । ମିର୍‌ ଏଣ୍ତେସ୍‌ କିଜି ଆଇ ଲୋକ୍‌ତିଙ୍ଗ୍‌ ଲେକିସ୍‌ କିଜି ସିନିଦେର୍‍, ଆୟାୱାଜା ପ୍ରବୁ ମିଙ୍ଗିଁ ନାଣ୍ତ ଲେକିସ୍‌ କିଜି ସିନାନ୍‍ ।
MAR 4:25 ଏମେ ଲୋକ୍‍ତିନ୍ଧି ମାନାତ୍‌, ୱାନିଙ୍ଗ୍‌ ପୁଟ୍‍ନାତ୍‍; ମାରି ଆମାୱାନିନ୍ଧି ସିଲେତ୍‌, ୱାନିବାନୁ ଆମାକା ମାନାତ୍‌, ଆକାବା ମାପୁରୁ ୱାନିମାଣ୍‌କୁ ଅନାନ୍‍ ।”
MAR 4:26 ଜିସୁ ମାରିଡ଼େସି ଇର୍‌ଆନ୍‌, “ମାପୁରୁତି ରାଜି ଇୟାୱାଜା । ଅରେନ୍‍ ଲୋକୁ ନିଜେଦି ବୁମିଦୁ ୱିତୁ ୱିତ୍‍ନାନ୍‍;
MAR 4:27 ୱାଣ୍ତ୍‍ରୁ ନାଡ଼ା ସୁଜ୍‍ନାନ୍‍ ମାରି ୱେଡ଼େ ନିଂନାନ୍‍, ମାରି ଆୟା ୱିତୁ ଏଣ୍ତେସ୍‌ ଗାଜା ଆତାଦୋ ପିର୍‍ତାତ୍‍, ଆକା ୱାନ୍‌ ନେସ୍‌ଏପ୍‌ ।
MAR 4:28 ବୁମି ନିଜେ ପାଡ଼ୁ ତାପିସ୍‍କିନାତ୍‍, ଆଗ୍‌ଡ଼ି ଆକୁ, ୱେନ୍‌କା ସେରେନ୍‍, ତାନି ୱେନ୍‌କା ସେରେନ୍‍ତୁ ବର୍ତି ପାଡ଼୍‍କୁ ।
MAR 4:29 ଆବେଟ୍‌ ସେରେନ୍‍ ପାଣ୍ତିତି ଦାପ୍ରେ ୱାନ୍‌ ଡେରେଙ୍ଗ୍‍ କୁଲିଙ୍ଗ୍‍ ଆତେ ଇଜି କଏର୍‌ଙ୍ଗୁଁ ଆସ୍‍ନା ସନାନ୍‌ ।
MAR 4:30 “ଜିସୁ ମାରି ଇର୍‌ଆନ୍‌, ମାଡୁ ମାପୁରୁଦି ରାଜିଦିଙ୍ଗ୍‍ ଆମାତାନିୱାଲେ ତୁସ୍‍ନାଟ୍‍ ?” ବା ଇକା ଏମେ କାତା ୱେର୍‌ସି ଆକା ବୁଝାକିନାଟ୍‍ ?
MAR 4:31 ମାପୁରୁଦି ରାଜି ଆକା ଉଣ୍ତ୍ରି ସାର୍‍ସୁ ପାଡ଼ୁଦି ୱାଜା; ବୁମିଦୁ ୱିତ୍‍ତିୱାଲେ ଆକା ଦୁନିଆଦି ୱିତୁ ପାଡ୍‍କାଣ୍‍ ଇସ୍ରିକାତ୍‍,
MAR 4:32 ମାତର୍‌ ୱିତ୍‍ତି ୱେନ୍‌କା ଆକା ପିର୍‌ଜି ନିଂଇନାଦ ୱିଜୁ କୁସେଙ୍ଗାଁ ମାଣ୍‌କୁ ପେରିକାତ୍‍ ଆନାତ୍‌, ମାରି ତାନି କମେଙ୍ଗ୍‍ ଇୟାୱାଜା ପେରିକେଙ୍ଗ୍‌ ଆନେ ଯେ, ବାଦଡ଼୍‍ତି ପଟିଙ୍ଗ୍‌ ମାରାତି ସିତ୍‍ଡ଼ିଦୁ ତେବାଦେଙ୍ଗ୍‍ ଆଟ୍‌ନେ ।
MAR 4:33 ଜିସୁ ଇୟାୱାଜା ନାଣ୍ତ କାତାଦାନ୍‍ ଲୋକା ବୁଜାନି ଶକ୍ତି ଇସାବ୍‌ତାନ୍‌ ୱାରିମାନୁ ବାକ୍ୟ ୱେର୍‌ସି ମାର୍‌ଆନ୍‌,
MAR 4:34 ଜିସୁ କାତା ଇନ୍‍ଏଣ୍ତା ଇନିକାବା ଲୋକାଙ୍ଗ୍‌ ଇନ୍‍ଏଜି ମାର୍‌ଆନ୍‌ । ମାତର୍‌ ଜିସୁ ଆଇ ଲୋକୁ ସିଲିୱାଲେ ୱାନି ସିସୁରିଙ୍ଗ୍‌ ୱିଜୁମାଟା ବୁଝାକିଜି ମାର୍‌ଆନ୍‌ ।
MAR 4:35 ଆୟା ନାଣ୍ଡିଙ୍ଗ୍ ମିଲିମିଲିକା ଜିସୁ ସିସୁରିଙ୍ଗ୍‌ ଇର୍‌ଆନ୍‌, “ରାଦୁ, ସାମ୍‌ଦୁର୍‌ତୁ ଆୟା ପାଡ଼ି ସନାଟ୍‌ ।”
MAR 4:36 ଆବେଟ୍‌ ୱାନି ସିସୁର୍‍ ଲୋକାଙ୍ଗ୍‌ ଡ଼ିସ୍‍ତାରୋ, ଜିସୁ ଆଗ୍‌ଡ଼ି ଆମା ଡଙ୍ଗାଁଦୁ ବାସ୍ତା ମାର୍‌ଆନ୍‌ ଆବେ ୱାର୍‌ ଏକ୍‍ତାର୍‍ ମାରି ଜିସୁଙ୍ଗୁଁ ଅର୍‌ସେ ଅତାର୍‍, ମାରି ଆବେ ଆଇ ଡଙ୍ଗ୍‍ଗେଙ୍ଗ୍‍ ବା ମାର୍‍ହେ ।
MAR 4:37 ଆୟାୱେନ୍‌କା ସାମ୍‌ଦୁର୍‌ତୁ ଉଣ୍ତ୍ରି ଗାଲିପିରୁ ୱାତାତ୍‍, ମାରି ଉଲ୍‍କା ଏର୍‌ ଆଟ୍‍ତେଆକା ଡଙ୍ଗାଁଦୁ ଏରୁ ପୁରୁନ୍‌ ଆଦେଙ୍ଗ୍‌ ଆରାମ୍‍ଆତେ ।
MAR 4:38 ଜିସୁ ଜାହାଜ୍‌ଦି ଲୋଇ ଉନ୍‌ଡ୍ରି ବାକ୍‌ରାଦି ୱେନ୍‌କା ତରନ୍‌ ସର୍‍ଆନ୍‍ନୋ ତାଲା ଟାଟ୍‍ନି ପିଡା ତାଲାଆଡ୍‍ଗି ଇଟ୍‍ଟାନ୍‍ନୋ ଶୁଜ୍‍ଜିମାର୍‍ଆନ୍‍; ସିସୁର୍‌ ଜିସୁଙ୍ଗୁଁ ନିକ୍‍ସି ଇର୍ହାର୍‌, “ଏ ଗୁରୁ, ମାପ୍‌ ସାତାପ୍‌, ନିନ୍‌ ଇନିକା ଅଡ଼୍‍ବିଇ ନୋ ?”
MAR 4:39 ଆବେଟ୍‌ ଜିସୁ ନିଂଇତାନ୍‍ନୋ ଗାଲିଦିଙ୍ଗ୍‍ ଆଦ୍‌ରିସ୍‌ କିଜି ଉଲକାଏର୍‍ତିଙ୍ଗ୍‍ ଇର୍‌ଆନ୍‌, “ତିର୍‌ ଆଆ” ତେବାଆ । ଆବେଟ୍‌ ଗାଲି ଉଣାଆତାତ୍‍ ମାରି ୱିଜୁ ତିର୍‍ଆତାତ୍‍ ।
MAR 4:40 ଆୟାୱେନ୍‌କା ଜିସୁ ସିସୁରିଙ୍ଗ୍‌ ଇର୍‌ଆନ୍‌, “ମିର୍‌ ଇନ୍‍ଦାନିଙ୍ଗ୍‍ ନିସା ତିଲାଜିନିଦେର୍‍ ? ଇକା ଇନିକା ! ଇୟାସାନ୍ଦି ମି ବିସ୍‌ବାସ୍‌ ସିଲେତ୍‌ ନୋ ?”
MAR 4:41 ଆବେଟ୍‌କୁ ସିସୁର୍‌ ନାଣ୍ତ ତିଲାତାରୋ ୱାରି ୱାରି ଲୋଇ ୱାର୍‌ଗିଜି ସାତାର୍‌, “ଇୟା ଲୋକ୍‍ ଏନ୍‍ ଜେ, ଗାଲି ନି ଏରୁ ବା ୱାନି ମାଟା ମାନାନେ ?”
MAR 5:1 ୱେନ୍‌କା ଜିସୁ ମାରି ୱାନି ସିସୁର୍‍ ଗାଲିଲି ସାମ୍‌ଦୁର୍‌ ଆୟାପାଡ଼ିଦି ଗରାସିୟରି ସାନ୍ଧିଦୁ ସର୍‌ଆର୍‌ ।
MAR 5:2 ଜିସୁ ଡଙ୍ଗାଁଦାନ୍‍ ରେତି ଦାପ୍ରେ ଅରେନ୍‍ ଦୁବା ଆତ୍ମା କାସ୍ତି ଲୋକୁ ଦୁକି ଲୋଇରାନ୍‌ ସତାନ୍‍ନୋ ଜିସୁଙ୍ଗୁଁ ବେଟ୍‍ଆତାନ୍‍ ।
MAR 5:3 ୱାଣ୍ତ୍ରୁ ଦୁକିଦୁ ତେବାଜି ମାର୍‌ଆନ୍‌, ୱାନିଙ୍ଗ୍‌ ଏନ୍‍ବା ସିକ୍‍ଣିଦାନ୍‍ ତର୍‌ତେଙ୍ଗ୍‍ଁ ଆଟ୍‍ଏଜିମାର୍ହାର୍‍ ।
MAR 5:4 ୱାନ୍‌ ଏସାଦେବେଙ୍ଗ୍‍ ମେଟିଙ୍ଗ୍‍ ନି ଶିକ୍‍ଣିଦାନ୍‍ ତର୍‍ରାଇ ଆତାମାର୍‍ଆନ୍‍, ମାତର୍‌ ୱାନ୍‌ ସିକ୍‍ଣି ତେଉଜି ପକ୍‍ସି ମାର୍‌ଆନ୍‌ ମାରି ମେଟିଙ୍ଗ୍‍ କଣ୍ତ୍‌ କଣ୍ତ୍‌ କିଜି ରୁକ୍‍ସି ମାର୍‌ଆନ୍‌ ମାରି ୱାନିଙ୍ଗ୍‌ ତର୍‍ସୋ ଇଡ୍‌ଦେଙ୍ଗ୍‌ ଏ ବପୁବା ସିଲେତାତ୍‍ ।
MAR 5:5 ୱାଣ୍ତ୍ରୁ ୱେଡ଼େ ନାଡ଼ା ୱିଜୁ ୱାଲେ ଦୁକିଗୁଟା ମାରି ଗରନ୍‌କାଙ୍ଗ୍‍ ତେବାଜି ଆଉଲି ଆଜିମାର୍ହାନ୍‍, ମାରି କାଲ୍‍କାଣ୍‍ ନିଜେଦି ମେନ୍ଧଲ୍‍ତିଙ୍ଗ୍‍ ଚିତ୍ରା କାବ୍ରା କିଜି କତାଜି ମାର୍‌ଆନ୍‌ ।
MAR 5:6 ୱାନ୍‌ ଆକରାନ୍‍ ଜିସୁଙ୍ଗୁଁ ସୁଡ଼ୁତାନ୍‌ନୋ ଉରୁକ୍‍ସି ୱାଜି ୱାନି ଆଗ୍‌ଡ଼ି ଆର୍‍ତାନ୍‍,
MAR 5:7 ମାରି ନାଣ୍ତ ଆଉଲି ଆଜି ଇର୍‌ଆନ୍‌, ଏ ୱିଜେରିଙ୍ଗ୍‍ ମୁସ୍‌କୁ ମାନି ମାପୁରୁଦି ମାରିସି ଜିସୁ, ନି ୱାଲେ ନା ଇନିକା ମାନାତ୍‌ ? ନିଙ୍ଗିଁ ମାପୁରୁଦି ଦର୍‌ତାନ୍‌ ମାଡ଼ିସ୍‌ କିଜିନା, ନାଙ୍ଗିଁ କାସ୍ଟୁ ସିମା ।
MAR 5:8 ଇରିଙ୍ଗ୍‌ ଜିସୁ ୱାନିଙ୍ଗ୍‌ ଇର୍‌ଆ ମାର୍‌ଆନ୍‌, “ଏରେ ତାଗ୍‍ଇଆତ୍ମା, ଇୟା ଲୋକ୍‌ତିମାଣ୍‍କୁ ସହସ ସାଙ୍ଗ୍‍ଆ ।”
MAR 5:9 ମାରି, ଜିସୁ ୱାନିଙ୍ଗ୍‌ ୱେନ୍‌ବାତାନ୍‌, ନି ଦର୍‌ ଇନିକା ? ୱାନ୍‌ ଜିସୁଙ୍ଗୁଁ ଇର୍‌ଆନ୍‌, ନା ଦର୍‌ ବାହିନି, ଇରିଙ୍ଗ୍‌ ମାପୁ ନାଣ୍ତ ।
MAR 5:10 ମାରି, ଜିସୁ ଏଣ୍ତେସ୍‌ ୱାନିକାଙ୍ଗ୍‌ ଆୟା ସାନ୍ଦିଦାନ୍‍ ଆତ୍‌ରେ ପୋକ୍‍ଏନ୍‍, ଆୟା ଉଣ୍ତିଙ୍ଗ୍‌ ଆୟା ଦୁବା ଆସ୍‍ତିକାନ୍‍ ୱାନିଙ୍ଗ୍‌ ନାଣ୍ତ ମାଡ଼ିସ୍‍କିତାନ୍‍ ।
MAR 5:11 ଆୟା ଲାକ୍‌ତୁରି ଗରନ୍‌ ଆଡ୍‍ଗି ଉଣ୍ତ୍ରି ପେରି ପାନ୍‍ଣ୍ତ୍ରିଙ୍ଗ୍‍ ମାନ୍ଦା ସାରାଜିମାର୍‌ଏ ।
MAR 5:12 ମାରି, ତାଗ୍‌ଇ ଆତ୍‍ମେଙ୍ଗ୍‍ ଜିସୁଙ୍ଗୁଁ ମାଡ଼ିସ୍‍ କିଜି ଇର୍‌ଏ, “ଆୟା ପାନ୍‍ଡ୍ରିଙ୍ଗ୍‍ଆ ଲୋଇ ଡ଼ୁଗୁଦେଙ୍ଗ୍‍ ଇଜି ମାଙ୍ଗିଁ ୱାନିକା ମାନୁ ପୋକ୍‌ଆ ।”
MAR 5:13 ଜିସୁ ୱାନିକାଙ୍ଗ୍‌ ଆଦେସ୍‌ ସିତାନ୍‌ ଆକା, ତାଗ୍‌ଇ ଆତ୍‍ମେଙ୍ଗ୍‍ ସତେନୋ ପାନ୍‍ଡ୍ରିଙ୍ଗାଁ ଲୋଇ ଡ଼ୁଗିତେ; ଆୟା ପାନ୍‍ଡ୍ରି ମାନ୍ଧା ଉରୁକ୍‍ସି ସର୍‍ହେନୋ ଟିପୁଦାନ୍‍ ଉରୁକ୍‌ସି ସଲ୍‌ସି ସାମ୍‌ଦୁର୍‌ତୁ ଆର୍‌ଜି ମୁଡ଼ୁଗିତେ ସାତେ । ପାନ୍‍ଡ୍ରିଙ୍ଗ୍‍ ଇସାବ୍‌ ଦୁଇ ହଜାର୍‍ ମାର୍‍ହେ ।
MAR 5:14 ପାନ୍‍ଡ୍ରିଆଙ୍ଗ୍‍ ସାଆରା କିନି ଲୋକୁ ଉରୁକ୍‍ସି ସର୍‍ଆର୍‍ରୋ ଗାଡ଼୍‌କାଙ୍ଗ୍‌ ନି ନାର୍‍କାଙ୍ଗ୍‍ଁ ଆୟା ମାଟା ୱେର୍‌ତାର୍‌; ଆବେଟ୍‌ ଲୋକୁ ଇନିକା ଆତାମାନାତ୍‌ ଇଜି ସୁଡ଼ୁଗା ୱାତାର୍‌ ।
MAR 5:15 ମାରି, ଲୋକୁ ଜିସୁ ଲାକ୍‌ତୁ ୱାତାରୋ ଆୟା ଆମାୱାନିଙ୍ଗ୍‌ କି ବାହିନି ଦୁବା ଆସ୍‌ତା ମାର୍‌ଆତ୍‌, ୱାନିଙ୍ଗ୍‌ ନେଗି ୱାତି ପିଡ଼୍‍ଗ୍‍ଜୋ ନେଗି ମୋନ୍‍ତାନ୍‍ ବାସ୍‍ତି ମାର୍‌ଇକା ସୁଡ଼ୁତାରୋ ତିଲାତାର୍‌ ।
MAR 5:16 ଆମାକାର୍‌ ସୁଡ଼ୁତା ମାର୍‌ଆର୍‌, ୱାର୍‌ ଆୟା ଦୁବାକାସ୍ତି ୱାନିଙ୍ଗ୍‌ ଇନିକା ଆତାମାର୍‌ଆତ୍‌, ଆକା ନି ପାନ୍‍ଡ୍ରିଙ୍ଗାଁ ବିସୟତାନ୍ ୱାରିମାନୁ ୱେର୍‌ତାର୍‌ ।
MAR 5:17 ଆବେଟ୍‌ ୱାର୍‌ ୱାରି ରାଜିଦାନ୍‍ ଡ଼ିସ୍‌ସି ସନ୍‌ଡ଼୍ରେଙ୍ଗ୍‌ ଜିସୁଙ୍ଗୁଁ ମାଡ଼ିସ୍‍କିତାର୍‍ ।
MAR 5:18 ୱେନ୍‌କା ଜିସୁ ଡଙ୍ଗାଁଦୁ ଏକ୍‍ନିୱାଲେ, ଆମାୱାନିଙ୍ଗ୍‌ ଆଗ୍‌ଡ଼ି ଦୁବା କାସ୍ତା ମାର୍‌ଆତ୍‌, ୱାନ୍‌ ଜିସୁୱାଲେ ସନ୍‌ଡ଼୍ରେଙ୍ଗ୍‌ ଇଜି ରିଜା ମୁଜା ଇର୍‌ଆନ୍‌ ।
MAR 5:19 ମାତର୍‌ ଜିସୁ ୱାନିୱାଲେ ସନ୍‌ଡ଼୍ରେଙ୍ଗ୍‌ ସାରି ସିଏଣ୍ତା ୱାନିଙ୍ଗ୍‌ ଇର୍‌ଆନ୍‌, “ମି ଇନ୍‌ଡ୍ର, ମାରି ମି ନିଜେଦି ଲୋକାମାନୁ ସାଙ୍ଗ୍‍ଆ, ପ୍ରବୁ ନି ଉଣ୍ତିଙ୍ଗ୍‌ ଆମା ଆମା କାର୍ମୁ କିତାମାନାନ୍‍ ମାରି ନି ଉଣ୍ତିଙ୍ଗ୍‌ ଏମେ ଦୟା ତର୍‍ତା ମାନାନ୍‌, ଆୟାୱିଜୁ ୱିଜେରିଙ୍ଗ୍‍ ଇନ୍‌ଆଁ ।”
MAR 5:20 ଆବେଟ୍‌ ୱାଣ୍ତ୍ରୁ ସର୍‌ଆନ୍‌, ଜିସୁ ୱାନିଙ୍ଗ୍‌ ଆମା ଆମା ପାଣି କିତାମାର୍ହାନ୍‌, ଦଶ୍‌ଗୋଟା ଗାଡ଼୍‌କୁ ଦେକାପଲି ଇଜିମାନି ଦଶ୍‌ଗୋଟା ଗାଡ଼୍‌କାଙ୍ଗ୍‌ ରାଜିଦୁ ପ୍ରଚାର୍‌ କିଦେଙ୍ଗ୍‌ ଆସ୍‌ତାନ୍‌; ଆବେଟ୍‌ ୱିଜେରେ କାବାଆତାର୍‌ ।
MAR 5:21 ଜିସୁ ଡଙ୍ଗାଁଦୁ ନାତାନ୍‍ନୋ ମାରିଡ଼େସି ସାମ୍‌ଦୁର୍‌ ଆୟାପାଡ଼ି ସର୍‌ଆନ୍‌ । ୱାନ୍‌ ସାମ୍‌ଦୁର୍‌ ପାଡ଼ିମାନିୱାଲେ ନାଣ୍ତ ଲୋକୁ ୱାନି ଲାକ୍‌ତୁ ଉଣ୍ତାତାର୍‌; ମାରି ଜିସୁ ସାମ୍‌ଦୁର୍‌ ପାଡ଼ି ତେବାତାନ୍‌ ।
MAR 5:22 ନାସ୍ତିୱାଲେ ପାର୍‌ତନା ଇଲୁଦି ପେରିକାନ୍‌ ଜାଇରସ୍‍ ଦର୍‌ତି ଅରେନ୍‍ ଲୋକୁ ୱାଜି ଜିସୁଙ୍ଗୁଁ ସୁଡ଼ୁତାନ୍‌ନୋ ୱାନି ଆଗ୍‌ଡ଼ି ପାଡ଼୍‍ଗ୍‍ଜି ମାଡ଼ିସ୍‍କିତାନ୍‍,
MAR 5:23 ମାରି ଜିସୁଙ୍ଗୁଁ ନାଣ୍ତ ମାଡ଼ିସ୍‌ କିଜି ଇର୍‌ଆନ୍‌, “ନା ଗାଡ଼ି ସାତାମାନାତ୍‌; ନା ଗାଡ଼ି ଏଣ୍ତେସ୍‌ ନେଗେନ୍‍ ଆନାତ୍‍ନୋ ଜିନାତ୍‌, ଆୟା ଉଣ୍ତିଙ୍ଗ୍‌ ନିନୁ ୱାଜ ତାନି ମୁସ୍‌କୁ ନି କିୟୁ ଇଡିଆ ।”
MAR 5:24 ଆବେଟ୍‌ ଜିସୁ ୱାନିୱାଲେ ସର୍‌ଆନ୍‌, ମାରି ଲୋକୁ ୱିଜେରେ ୱାନି ୱାଲେୱାଲେ ସନ୍‌ଡ଼୍ରେଙ୍ଗ୍‌ ଆସ୍‌ତାର୍‌, ୱାର୍‌ ୱାନି ମୁସ୍‌କୁ ମାଟ୍‍ସି ସାଜି ମାର୍‌ଆର୍‌ ।
MAR 5:25 ନାସ୍ତିୱାଲେ ବାର ବାର୍‍ସେକ୍‍ ସାନ୍ଦି ସୁତୁକ୍‍ ଆନି ରୋଗ୍‌ ଆସ୍‍ତି ଆଇମା ମାରାଆତ୍‍,
MAR 5:26 ଆମାକାତ୍‍ କି ନାଣ୍ତ ଦୁକ୍‍ ବଗାଜି ଡାକ୍‌ତର୍‌କା ମାଣ୍‌କୁ ସେବା କିଆଇଆଜି ତାନେ ୱିଜୁ ଡାବୁଙ୍ଗୁଁ ୱିସ୍‌ତା ମାର୍‌ଆତ୍‌, ମାତର୍‌ ଏମେକାବା ନେଗେଣ୍ତ୍‍ ଆଏଣ୍ତା ନାଣ୍ତନେ ରୋଗ୍‌ ଆଜିମାର୍ହାତ୍‍,
MAR 5:27 ୱାଦୁ ଜିସୁ ବିସୟତାନ୍ ୱେର୍‍ଆଦୋ ନାଣ୍ତ ଲୋକୁ ଲୋଇରାନ୍‌ ୱେନ୍‌କା ସାରି ୱାତାଦୋ ୱାନି ୱାତି ଜାଲିଦିଙ୍ଗ୍‌ ମୁଟ୍‍ତାତ୍‍, ଇରିଙ୍ଗ୍‌ ୱାଦ୍‌ ଇଜିମାର୍‍ଆତ୍‍,
MAR 5:28 “ନାନୁ ଜିସୁ ୱାତି ମୁଟ୍‍ତିଙ୍ଗ୍‍ ନେଗେନ୍‍ ଆନା ।”
MAR 5:29 ଆୟା ଆଇମା ୱାନି ୱାତି ମୁଟ୍‍ତି ଦାପ୍ରେ ତାନି ସୁତୁକ୍‍ ଆନି ରୋଗ୍‌ ଡ଼ିସ୍‍ତାତ୍‍, ମାରି ଆୟା ଆଇମା ନାନ୍ ନେଗେନ୍‍ ଆତା ଇଜି, ମେନ୍ଦଲ୍‌ତୁ ନେସ୍‌ତେଙ୍ଗ୍‌ ଆଟ୍‍ତାତ୍‍ ।
MAR 5:30 ଆୟାୱେନ୍‌କା ଜିସୁ ୱାନି ଲୋଇରାନ୍‌ ସାକ୍ତି ସହସି ସନିକା ନେସ୍‌ତାନ୍‌ନୋ ଲୋକୁ ଗହଳି ତରିଣ୍ତ୍‍ ମାର୍‍ତାନ୍‍ନୋ ୱେନ୍‌ବାତାନ୍‌, ଏନ୍‌ ନା ୱାତି ମୁଟ୍‌ତାନ୍‌ ?
MAR 5:31 ୱାନି ସିସୁର୍‍ ଇର୍ହାର୍‌, “ନିନ୍‍ତୋ ସୁଡ୍‍ଜିନି, ଲୋକ୍‌ଡର୍‌ ନି ସାରିବେଡ୍‍ତି ମାଟ୍‍ସି ସାଜିନାର୍‍, ମାରି ନିନ୍‌ ଇଜିନି, ଏନ୍‌ ନାଂଇ ମୁଟ୍‌ତାନ୍‌ ?”
MAR 5:32 ମାତର୍‌ ଏନ୍‌ ନାଂଇ ମୁଟ୍‌ତାନ୍‌, ନେସ୍‌ତେଙ୍ଗ୍‌ ଉଣ୍ତିଙ୍ଗ୍‌ ୱାନ୍‌ ସାରିବେଡ଼୍‍ତି ସୁଡ଼ୁଦେଙ୍ଗ୍‍ଆସ୍‌ତାନ୍‍ ।
MAR 5:33 ୱିଜୁ ତାନେଙ୍ଗ୍‌ ଇନିକା ଆତାତ୍‌ଆକା ନେସ୍‍ତାଦୋ ଆୟା ଆଇମା ତିଲାଜି ତିର‍ଗ୍‍ଜି ତିର୍‍ଗ୍‍ଜି ୱାତାଦୋ ଜିସୁ କାଲ୍‌କା ଆଡ୍‍ଗି ମେଣ୍ତେଙ୍ଗ୍‍ ଗଟ୍‌କିଜି ୱିଜୁ ସତ୍‌ ମାଟା ୱେର୍‌ତାତ୍‌ ।
MAR 5:34 ଜିସୁ ତାନିଙ୍ଗ୍‌ ଇର୍‌ଆନ୍‌, ଗାଡ଼ି, ନି ବିସ୍‌ବାସ୍‌ ନିଙ୍ଗିଁ ନେଗେନ୍‌ କିତାମାନାତ୍‌; ସାନ୍ତିଦାନ୍‍ ସାଙ୍ଗ୍‍ଆ ମାରି ନି ରୋଗ୍‌ତାନ୍‌ ନେଗେନ୍‍ ଆଜ ମାନ୍‌ଆ ।
MAR 5:35 ଜିସୁ ଇୟା ମାଟା ଇନିୱାଲେ, ପାର୍‌ତନା ଇଲ୍‌ତୁ ଅଦିକାର୍ ମାନି ଜାଇରସ୍‍ତି ଇନ୍‍ଡ୍ରଣାନ୍‍ ଏସୋଲୋକ୍‍ ୱାତା ରୋ ୱାନିଙ୍ଗ୍‌ ଇର୍ହାର୍‌, “ନି ଗାଡ଼ି ସାତାସରାତ୍‍ଲେ, ଗୁରୁଙ୍ଗ୍‍ ଏନ୍ଧା ମାରି କାସ୍ଟୁ ସିଜିନିଦେର୍‌ ?”
MAR 5:36 ଜିସୁ ଆୟାମାଟା ୱେର୍‍ଆନ୍‍ନୋ ୱେନ୍‍ଇ ୱାଜା ଆତାନ୍‍ନୋ ପାର୍‌ତନା ଇଲୁତୁ ଅଦିକାର୍ ମାନି ଯାଇରସ‍ତିଙ୍ଗ୍‍ ଇର୍‌ଆନ୍‌, “ତିଲାମା, ବିସ୍‌ବାସ୍‌ କିଆ ।”
MAR 5:37 ତାନେ ୱେନ୍‌କା ଜିସୁ ଯାଇରସତି ଇଲ୍‌ତୁ ସନ୍‌ଡ଼୍ରେଙ୍ଗ୍‌ ଇଜି ଯାକୁବ, ୱାନି ତଡ଼ାନ୍‌ ଯୋହନ ମାରି ପିତର୍‍ତିଙ୍ଗ୍‍ ଡ଼ିସ୍‌ତିଙ୍ଗ୍‌ ମାରି ଏଙ୍ଗ୍‌ବା ୱାନିୱାଲେ ଇଲୁ ଲୋଇ ଅଏତାନ୍‍ ।
MAR 5:38 ୱାର୍‌ ଯାଇରସ୍‍ତି ଇଲ୍‌ତୁ ୱାତାର୍‌ ରୋ, ୱାନ୍‌ ଆଉଲି ଆନିକା ମାରି ଲୋକୁ ନାଣ୍ଡ ବର୍‍କୁକ୍‍ସି ଆଡ଼୍‍ବାନିକା ମାରି ଦୁଃକ୍‌ତାନ୍‌ ଆଡ଼୍‍ବାନିକା ସୁଡ଼ୁତାନ୍‍,
MAR 5:39 ଜିସୁ ଇଲୁ ଲୋଇ ସର୍‌ଆନ୍‌ ନୋ ଲୋକାଙ୍ଗ୍‌ ଇର୍‌ଆନ୍‌, “ଏନ୍ଧା ଆଉଲି ମାରି ଆଡ଼୍‍ବାଜିନିଦେର୍‍ ? ଗାଡ଼ି ସାଏତ୍‌, ମାତର୍‌ ୱାଦୁ ସୁସ୍‍ତାମାନାତ୍‍ । ଆବେଟ୍‌ ୱାର୍‌ ୱିଜେରେ ଜିସୁଙ୍ଗୁଁ ସେମାର୍‌ କିତାର୍‍ ।”
MAR 5:40 ଜିସୁ ୱିଜୁ ଲୋକାଙ୍ଗ୍‌ ଆତ୍‌ରେ ପୋକ୍‌ତାନ୍‌ ନୋ ଆଇଲିଦି ବୁବାସି ନି ଆଇସିଙ୍ଗ୍‍ ମାରି ୱାନି ମୁଏର୍‌ ଶିଶୁର୍‍ରିଙ୍ଗ୍‍ ୱାନିୱାଲେ ଆସ୍‍ତାନ୍‍ନୋ ଆଇଲି ଆମା ବାଡିଦୁ ଡରିତା ମାର୍‌ଆତ୍‌, ଆବେ ସର୍‍ଆର୍‍ରୋ ଡ଼ୁଗିତାର୍‍ ।
MAR 5:41 ଜିସୁ ଆଇଲିଦି କିୟୁ ଆସ୍‌ସି ଇର୍‌ଆନ୍‌, “ଟାଲିଥାକୁମ୍‌,” ଇରିଙ୍ଗ୍‌ “ଏ ଆଇଲି, ନାନ୍ ନିଂଇ ଇଜିନା ନିଙ୍ଗିଁଆ ।”
MAR 5:42 ଆୟାଦାପ୍ରେ ଆଇଲି ନିଂଇତାଦୋ ବୁଲାଦେଙ୍ଗ୍‌ ଆସ୍‌ତାତ୍‌; ନାସ୍ତିୱାଲେ ଆଇଲିଦିଙ୍ଗ୍‍ ବାର ବାର୍ସେକ୍‌ ଆତାମାର୍‌ଆତ୍‌ । ଆବେଟ୍‌ ଇୟା ମାଟା ୱେର୍‌ଆର୍‌ ୱିଜେରେ ନାଣ୍ତ କାବାତାସର୍‍ଆର୍‍ ।
MAR 5:43 ମାରି, ଇୟା ମାଟା ଏଣ୍ତେସ୍‌ ଏନ୍‍ବା ନେସ୍‌ଏର୍‌, ଆୟା ଉଣ୍ତିଙ୍ଗ୍‌ ଜିସୁ ୱାରିଙ୍ଗ୍‌ ଆଟ୍‍ୱାଦାନ୍‍ ମାଟା ୱେର୍‌ତାନ୍‌, ମାରି ଆଇଲିଦିଙ୍ଗ୍‍ ଇନ୍‍କାବା ଉଟ୍‍ପିସ୍‍କିଦେଙ୍ଗ୍‍ ଇଜି ୱାରିଙ୍ଗ୍‌ ଇର୍‌ଆନ୍‌ ।
MAR 6:1 ଜିସୁ ଆୟାବାଡି ଡ଼ିସ୍‌ସି ସିସୁରିୱାଲେ ନିଜେ ଏମେ ବାଡ଼ିଦୁ ପିରିତା ମାର୍‌ଆନ୍‌ ଆୟା ବାଡ଼ିଦୁ ୱାତାର୍‌ ମାରି ୱାନି ଶିଶୁର୍‌ ୱାନି ୱାଲେ ୱାଲେ ସର୍‌ଆର୍‌ ।
MAR 6:2 ରମ୍‍ନିଦିନ୍‍ ଇଗା ୱାତାତ୍‍ ଆକା, ଜିସୁ ପାର୍‌ତନା କିନି ଇଲୁଦୁ ସର୍‍ଆନ୍‍ନୋ ଶିକ୍ଷା ସିଦେଙ୍ଗ୍‍ ଆସ୍‌ତାନ୍‌; ମାରି, ଆବେ ମାର୍‍ହି ୱିଜେରେ ୱାନି ମାଟା ୱେର୍‍ଆର୍‍ରୋ କାବାଆଜି ଇର୍ହାର୍‌, “ଇୟା ଲୋକୁ ଇୟାୱିଜୁ ଶିକ୍ଷା ଆମାଣ୍‍କୁ ପ‍ଇତାନ୍‌ ? ଇୟା ୱାନିଙ୍ଗ୍‌ ଆମାଣ୍‍କୁ ବୁଦି ପୁଟ୍‍ତାମାନାତ୍‍ ? ମାରି ଏମେ ସାକ୍ତିଦି ପାଣି ୱେନି କିୟୁଦାନ୍‌ ଆଜିନାତ୍‍, ଇୟାୱିଜୁ ଇନିକା ?
MAR 6:3 ଇକାନ୍‌ ଆଜିନାନ୍‍ ଆୟା ବଡ଼େଇ ଆଏନ୍‌ । ୱେନି ଆଇସି ଦର୍‌ ମରିୟମ୍‌, ଯାକୁବ, ଯୋସି, ଯିହୁଦା ମାରି ସିମୋନ୍‌ ୱେନି ତଡ଼ାନ୍‌କୁ । ୱେନି ତାଙ୍ଗିଁକ୍‍ ମା ୱାଲେ ମାନେ ।” ଇୟାୱାଜା ଇଜି ୱାର୍‌ ଜିସୁଙ୍ଗୁଁ ମାନାଏତାର୍‍ ।
MAR 6:4 ଜିସୁ ୱାରିଙ୍ଗ୍‌ ଇର୍ହାନ୍‌, “ବାବବାଦିର୍‌ ନିଜେଦି ରାଜିଦୁ, ନିଜେଦି ଇଲ୍‌ତୁ ମାରି ନିଜେଦି ଲୋକାଙ୍ଗ୍‌ ଡ଼ିସ୍‌ତିଙ୍ଗ୍‌ ଆଇ ଲୋକାମାନୁ ସମ୍ମାନ୍‍ ପଇନାର୍‌ ।”
MAR 6:5 ଆୟା ବାଡିଦୁ ଜିସୁ ଏସୋ ରୋଗିଲୋକାଙ୍ଗ୍‍ ମୁସ୍‌କୁ କିୟୁ ଇଡ୍‌ଜି ନେଗେଣ୍ତ୍‌ କିନିକା ଡ଼ିସ୍‌ତିଙ୍ଗ୍‌ ମାରି ଇନି ନାଣ୍ତ କାବାଦି ପାଣି କିଦେଙ୍ଗ୍‌ ଆଟ୍‍ଏତାନ୍‍ ।
MAR 6:6 ମାରି, ଜିସୁ ୱାରି ଅବିସ୍‍ବାସ୍‌ ସୁଡ଼୍‌ଜି କାବାଆତା ସରଆନ୍‌ ।
MAR 6:7 ୱେନ୍‌କା ଜିସୁ ସାରିବେଡ଼୍‍ତି ନାର୍‍କାଙ୍ଗ୍‍ଁ ନାର୍‍କାଙ୍ଗ୍‍ଁ ବୁଲାଜି ଶିକ୍ଷା ସିଦେଙ୍ଗ୍‍ ଆସ୍‌ତାନ୍‌ । ଆୟାୱାଲେ ଜିସୁ ବାରଲୋକ୍‌ ସିସୁରିଙ୍ଗ୍‌ ଲାକ୍‌ତୁ କୁକ୍‍ତାନ୍‍ନୋ ୱାରିଙ୍ଗ୍‌ ରିଏର୍‌ ରିଏର୍‌ କିଜି ପୋକ୍‌ତେଙ୍ଗ୍‌ ଆସ୍‌ତାନ୍‌ ମାରି ୱାରିଙ୍ଗ୍‌ ତାଗ୍‌ଇ ଆତ୍‌ମେଙ୍ଗ୍‌ଆଙ୍ଗ୍‌ ପେର୍‍ଦେଙ୍ଗ୍‍ ଅଦିକାର୍‍ ସିତାନ୍‌,
MAR 6:8 ମିର୍‌ ସନିୱାଲେ ଉଣ୍ତ୍ରି ବାଡିଗା ଡ଼ିସ୍‌ତିଙ୍ଗ୍‌ ରୁଟି, ବା ମଣି ବା ଡାବୁଙ୍ଗୁଁ ଇଡ୍‌ନି ମଣି ଅମାଟ୍‌ ଇଜି ଆଦେସ୍‌ ସିତାନ୍‌ ।
MAR 6:9 ୱାରିଙ୍ଗ୍‌ ଜୁତେଙ୍ଗ୍‍ ବା ଯୋଡ଼୍‍କୁ ଆରାଦେଙ୍ଗ୍‍ ଇର୍‌ଆନ୍‌, ମାତର୍‌ ଆରାତିମାନି ଆଙ୍ଗିଁ ଡ଼ିସ୍‌ତିଙ୍ଗ୍‌ ଆଇକା ଅମାଟ୍‌ ।
MAR 6:10 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, “ଆମା ଇନ୍‌ଡ୍ରଣି ଲୋକୁ ମିଙ୍ଗିଁ ମାନାନାର୍‌, ଆୟା ବାଡି ଡ଼ିସ୍‌ନି ସନି ସାନ୍ଦି ଆବେ ତେବାଦୁ ।
MAR 6:11 ଜଦି ମିର୍‌ ଏମେ ନାର୍‍ତୁ ସନିଦେର୍‍ ଆୟା ବାଡ଼ିଦି ଲୋକୁ ମିଙ୍ଗିଁ ମାନାଏର୍‍, ବା ମି ମାଟା ୱେନ୍‌ଏର୍‌, ଆୟା ବାଡି ଡ଼ିସ୍‍ନିୱାଲେ ୱାରିମାନୁ ସାକି ସିଦେଙ୍ଗ୍‍ ମି ପାଦାମ୍‍କାଣି ଦୁଡ଼ି ସାଡ଼୍‍ତୁ ।”
MAR 6:12 ଇୟା ୱେନ୍‌କା ସିସୁର୍‌ ନାର୍‍କାଙ୍ଗ୍‍ଁ ସଲ୍‌ସି ପାପ୍‍ସାରି ଡ଼ିସ୍‌ସି ମନତିଙ୍ଗ୍‌ ଡ଼େପ୍‍ସି ରାଦୁ ଇଜି, ଆକା ଲୋକାମାନୁ ପ୍ରଚାର୍‌କିତାର୍‍ ।
MAR 6:13 ୱାର୍‌ ନାଣ୍ତ ଦୁବା କାସ୍ତି ଲୋକାଙ୍ଗ୍‌ ଦୁବେଙ୍ଗ୍‍ ଡ଼ିସିସ୍‍ କିତାର୍‍ ମାରି ନାଣ୍ତ ରୋଗ୍‌ ଲୋକାଙ୍ଗ୍‌ ନିୟୁ ଉସ୍‍ସି ନେଗେଣ୍ତ୍‍କିତାର୍ ।
MAR 6:14 ଜିସୁ ଦର୍‌ ୱିଜୁ ତରିନ୍‌ ୱେଙ୍ଗିଁତାତ୍‍ଆକା ୱାନି ବିସୟତାନ୍ ହେରୋଦ ରାଜା ୱେର୍‌ଆନ୍‌, ମାରି ଲୋକୁ ଇଜିମାର୍‌ଆର୍‌, “ଡୁବନ୍‌ସିନି ଯୋହନ ସାତିଲୋକାମାଣାନ୍‌କୁ ନିଙ୍ଗିଁତାମାନାନ୍‌, ଆୟା ଉଣ୍ତିଙ୍ଗ୍‌ ଇୟାୱିଜୁ ସାକ୍ତି ୱେନିମାନୁ ପାଣିକିଜିନାତ୍‍ ।”
MAR 6:15 ମାତର୍‌ ଆଇ ଲୋକ୍‌ଡର୍‌ ଇଜିମାର୍‌ଆର୍‌, “ୱାଣ୍ତ୍‍ରୁ ଏଲିୟ୍‌,” ମାରି ଏସୋ ଲୋକୁ ଇଜିମାର୍‌ଆର୍‌, “ପୁର୍ବେଦି ବାବବାଦିରି ୱାଜା ୱାଣ୍ତ୍‍ରୁ ବା ଅରେନ୍‍ ବାବବାଦି ।”
MAR 6:16 ମାତର୍‌ ହେରୋଦ ଇକା ୱେର୍‌ଆ ଇର୍‌ଆନ୍‌, “ନାନ୍ ଆମା ଯୋହନତି ତାଲା କଇତା ମାର୍ହା, ଆୟା ଯୋହନ ମାରିଡ଼େସି ନିଙ୍ଗିଁତାମାନାନ୍‌ ।”
MAR 6:17 ହେରୋଦ, ଯୋହନତିଙ୍ଗ୍‍ ତର୍‌ସି ଜଇଲ୍‌ତୁ ଇଡ୍‌ଦେଙ୍ଗ୍‌ ଆଦେସ୍‌ ସିତାମାର୍‍ଆନ୍‍, ଇରିଙ୍ଗ୍‌ ହେରୋଦ ୱାନି ତଡ଼ାନ୍‍ ପିଲିପ୍‍ତି ଆଡ଼୍‌ସି ହେରୋଦିଆଦିଙ୍ଗ୍‍ ପେଡ଼ି ଆତା ମାର୍‌ଆନ୍‌ ଆକା ଇକା କିତାନ୍‌ ।
MAR 6:18 ଇରିଙ୍ଗ୍‌ ଯୋହନ ହେରୋଦତିଙ୍ଗ୍‍ ଇଜିମାର୍‌ଆନ୍‌, “ନିଜେଦି ତଡ଼ାନ୍‍ତି ଆଡ଼ିଦିଙ୍ଗ୍‍ ଇଡ୍‌ନିକା ନିୟମ୍‌ ସିଲେତ୍‌ ।”
MAR 6:19 ଇୟାଉଣ୍ତିଙ୍ଗ୍‌ ହେରୋଦିଆ ଯୋହନତିଙ୍ଗ୍‍ ଶାତ୍ରୁୱାଜା ସୁଡ଼୍‌ଜି ରିସା ଆତାଦୋ ସାୟାମାର୍‌ଗା ଡାକ୍‌ତେଙ୍ଗ୍‌ ବଦା କିଜିମାର୍‌ଆତ୍‌, ମାତର୍‌ ଆଟ୍‍ଏଜି ମାର୍‌ଆତ୍‌;
MAR 6:20 ଇରିଙ୍ଗ୍‌ ହେରୋଦ ଯୋହନତିଙ୍ଗ୍‍ ଅରେନ୍‍ ଦାର୍ମୁ ମାରି ପବିତ୍ର ଲୋକ୍‌ ଇଜି ନେସ୍‌ସି ତିଲାଜି ମାର୍‌ଆନ୍‌, ମାରି ଯୋହନତିଙ୍ଗ୍‍ ରକ୍ଷା କିଦେଙ୍ଗ୍‌ ବଦାକିଜି ମାର୍‌ଆର୍‌, ମାରି ହେରୋଦ ଯୋହନତି ମାଟା ୱେନ୍‌ଜି ନାଣ୍ଡ ତରବର ଆଜିମାର୍ହାନ୍‍ ଆତିଙ୍ଗ୍‌ବା ୱେଡ଼ିକାଦାନ୍‌ ଆୟା ମାଟା ୱେନ୍‍ଜି ମାର୍‍ଆନ୍‍ ।
MAR 6:21 ସାରାସାରି ଏସ ଦିନ୍‌ ୱେନ୍‌କା ହେରୋଦିଆଦିଙ୍ଗ୍‍ ଉଣ୍ତ୍ରି ସାରି ତରିତାତ୍‌ । ହେରୋଦ ୱାନି ଜନମ୍‌ ଦିନ୍‍ତୁ ୱିଜୁ ପେରି ପେରି ଲୋକାଙ୍ଗ୍‌, ସେନାପତିରିଙ୍ଗ୍‍ ମାରି ଗାଲିଲିଦି ୱିଜୁ ପେରି ଲୋକାଙ୍ଗ୍‌ ଉଣ୍ତେଙ୍ଗ୍‌ ନାଡ଼ା ସମୟତୁ ଉଣ୍ତ୍ରି ବୋଜି ତିଆର୍‌ କିତାନ୍‌;
MAR 6:22 ମାରି, ହେରୋଦିଆଦି ଗାଡ଼୍‌ସି ଲୋଇ ୱାତାତ୍‌ଦ ଗାତ୍‍ସି ହେରୋଦ ମାରି ବୋଜିଦୁ ବାସ୍‍ତି ମାର୍‍ହି କୁଡ଼ାଆଙ୍ଗ୍‍ ମୋନ୍‌ତିଙ୍ଗ୍‌ ୱେଡ଼ିକା କିବିସ୍‍କିତାତ୍‍ । ଆବେଟ୍‌ ହେରୋଦ ରାଜା ଗାଡ଼୍‍ସିଙ୍ଗ୍‍ ୱେନ୍‌ବାତାନ୍‌, “ନିନ୍‌ ଇନିକା ବଦାକିଜିନି, ଲସ୍‌ଆ, ନାନ୍ ଆକା ନିଂଇ ସିନା ।”
MAR 6:23 “ନାନ୍ ପାର୍‌ମାଣ୍‌ କିଜି ଇଜିନା, ନିନ୍‌ ଆମାକା ଲସ୍‌ନି, ଆକା ରାଜିଦି ଆଧା ବାଗ୍‌ ବା ସିନା ।”
MAR 6:24 ଆବେଟ୍‌ ଗାଡ଼୍‌ସି ଆତ୍‌ରେ ସର୍ହାଦୋ ତାନି ଆଇସିଙ୍ଗ୍‍ ୱେନ୍‌ବାତାତ୍‌, ନାନୁ ଇନିକା ଲସ୍‍ନା ? ତାମେ ଆଇସି ଦାପେ ଦାପେ, ତାନେଙ୍ଗ୍‌ ଇର୍ହାତ୍‌, “ନିନୁ ଡୁବନ୍‌ ସିନି ଯୋହନତି ତାଲା ଲସ୍‌ଆ ।”
MAR 6:25 ଆୟାଦାପ୍ରେ ଗାଡ଼୍‌ସି ରାଜାମାନୁ ଉରୁକ୍‌ସି ୱାଜି ଇର୍ହାତ୍‌, “ନା ବଦା ଯେ, ନିନ୍‌ ଡୁବନ୍‌ସିନି ଯୋହନତି ତାଲା ଇୟାଦାପ୍ରେ ନାଂଇ ଉଣ୍ତ୍ରି ସାଡ଼୍‍ୱାଦୁ ସିଦା ।”
MAR 6:26 ଇକା ମାଟା ୱେନ୍‌ଜି ହେରୋଦ ରାଜା ନାଣ୍ତ ଦୁଃଖ କିତାନ୍‌ ମାତର୍‌ କୁଡ଼ାଆଙ୍ଗାଁ ଆଗ୍‌ଡ଼ି ପାର୍‌ମାଣ୍‌ କିତାମାର୍ହାନ୍‌ଆକା ସିଲେ ଇନ୍‌ଡ୍ରେଙ୍ଗ୍‌ ଆଟ୍‍ଏତାନ୍‍ ।
MAR 6:27 ଆବେଟ୍‌ ରାଜା ଦାପ୍ରେ ଅରେନ୍‍ ସନ୍ୟଙ୍ଗ୍‍ ପୋକ୍‌ତାନ୍‌ ନୋ ଯୋହନତି ତାଲା ତାତେଙ୍ଗ୍‌ ଆଦେସ୍‌ ସିତାନ୍‌ । ୱାଣ୍ତ୍ରୁ ସର୍‌ଆନ୍‌ ନୋ ଜଇଲି ଲୋଇ ଯୋହନତି ତାଲା କଇତାନ୍‍,
MAR 6:28 ଯୋହନତି ତାଲା ଉଣ୍ତ୍ରି ସାଡ଼୍‍ୱାଦୁ ତାତାନ୍‍ ନୋ ଆଇଲିଦିଙ୍ଗ୍‍ ସିତାନ୍‌, ଆୟାକା ଆଇଲି ଆସ୍‍ତାଦୋ ତାମେ ଆଇସିଙ୍ଗ୍‍ ସିତାତ୍‌ ।
MAR 6:29 ଯୋହନତି ସିସୁର୍‍ ଆୟା କାବୁର୍‌ ୱେର୍‌ଆର୍‌ରୋ ୱାତାର୍‌ ମାରି ୱାନି ସାତି ମାଡ଼ା ଆସ୍‌ତା ଅତାରୋ ଦୁକି ଗୁଟାଦୁ ମୁସ୍‌ତାର୍‌ ।
MAR 6:30 ୱେନ୍‌କା ସିସୁର୍‍ ଜିସୁ ଲାକ୍‌ତୁ ଉଣ୍ତାତାର୍‌, ୱାରୁ ଏମେ ଏମେକା କିତାମାର୍‍ଆର୍‍ ମାରି ଏମେ ଏମେକା ଶିକ୍ଷା ସିତାମାର୍‍ଆର୍‍, ଆୟାୱିଜୁ ୱାନିଙ୍ଗ୍‌ ୱେର୍‌ତାର୍‌ ।
MAR 6:31 ଆବେଟ୍‌ ୱାନ୍‌ ୱାନି ସିସୁରିଙ୍ଗ୍‌ ଇର୍‌ଆନ୍‌, “ସାଦୁ ମାଡୁ ଏର୍‍ନାଡ ଉଣ୍ତ୍ରି ସିମ୍ରା ବାଡିଦୁ ସନାଟ୍‌ । ଆବେ ଏସୋ ସମୟ ରୋମ୍‍ନାଟ୍‍ ।” ଇରିଙ୍ଗ୍‌ ନାଣ୍ତ ଲୋକୁ ୱିଜେରେ ସନିକା ୱାନିକା ଆଜିମାର୍ହାର୍‍ ଆକା ୱାରିଙ୍ଗ୍‌ ଉଣ୍ତେଙ୍ଗ୍‌ ବା ସମୟ ସିଲେତାତ୍‍ ।
MAR 6:32 ଆୟାୱେନ୍‌କା ଜିସୁ ମାରି ୱାନି ଶିଶୁର୍‌ ଡଙ୍ଗାଁଦୁ ଏକ୍‍ତାର୍‍ନୋ ଉଣ୍ତ୍ରି ସିମ୍ରା ବାଡିଦୁ ସନ୍‌ଡ଼୍ରେଙ୍ଗ୍‌ ସତାର୍‍ ।
MAR 6:33 ମାତର୍‌ ୱାର୍‌ ସନିୱାଲେ ଏସୋ ଲୋକୁ ୱାରିଙ୍ଗ୍‌ ସୁଡ଼୍‌ଜି ମାରି ସିନିସ୍‍ କିତାର୍‍, ମାରି ଲୋକୁ ୱିଜେରେ ୱିଜୁ ଗାଡ୍‌କାଣାକୁ ପାଦାମ୍‌କାଣ୍‌କୁ ଆବେ ଅର୍‌ସେ ଉରୁକ୍‍ସି ସରଆର୍‌ ରୋ ୱାରି ଆଗିଡ଼ି ଇଗା ସରଆର୍‌ ।
MAR 6:34 ଜିସୁ ଡଙ୍ଗାଁଦାନ୍‍ ସତାନ୍‍ନୋ ନାଣ୍ତ ଲୋକାଙ୍ଗ୍‌ ସୁଡ଼୍‌ଜି ୱାରି ଉଣ୍ତିଙ୍ଗ୍‌ ଦୁଃକ୍‌‍ କିତାନ୍‌, ଇରିଙ୍ଗ୍‌ ୱାର୍‌ ଗାଉଡ଼ୁ ସିଲି ମେଣ୍ତେଙ୍ଗାଁ ମାନ୍ଦା ୱାଜା ୱାର୍‌ ସାକାସିଲିକା ନି ସିନ୍ତା ଆଜିମାର୍ହାର୍‍; ମାରି, ୱାଣ୍ତ୍ରୁ ୱାରିଙ୍ଗ୍‌ ନାଣ୍ତ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।
MAR 6:35 ନାଣ୍ତ ୱେଡ଼ା ଆତାତ୍‌ଆକା ୱାନି ସିସୁର୍‍ ୱାନି ଲାକ୍‌ତୁ ୱାତା ଇର୍ହାର୍‌, “ଇୟାବାଡିତୋ ସିମ୍ରା, ମାରି ନାଣ୍ତ ୱେଡ଼ା ଆତାତ୍‌ନି;
MAR 6:36 ଲୋକୁ ଏଣ୍ତେସ୍‌କି ସାରିବେଡ଼୍‍ତି ନାର୍‍କାଙ୍ଗ୍‍ଁ ସନାର୍‌ ନିଜେ ନିଜେଦି ଉଣ୍ତିଙ୍ଗ୍‌ ଏସୋ ଉଣି ଖାଦି କଣାର୍‍, ଆୟାଉଣ୍ତିଙ୍ଗ୍‌ ୱାରିଙ୍ଗ୍‌ ପୋକ୍‌ଆ ।”
MAR 6:37 ମାତର୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ୱାରିଙ୍ଗ୍‌ ଉଣ୍ତେଙ୍ଗ୍‌ ସିଦୁ,” ସିସୁର୍‌ ୱାନିଙ୍ଗ୍‌ ଇର୍ହାର୍‌, “ମାପ୍‌ ଇନିକା ଆଟ୍‍ଗୋଟା ଲେଜ୍‍ତି କୁଲି ଡାବୁଦାନ୍‍ ରୁଟି କଣାପ୍‍ ୱେରିଙ୍ଗ୍‌ ସିନାପ୍‍ ?”
MAR 6:38 ଜିସୁ ୱାରିଙ୍ଗ୍‌ ଇର୍‌ଆନ୍‌, “ମି ଲାକ୍‌ତୁ ଏସୋ ଗୋଟା ରୁଟିଙ୍ଗ୍‌ ମାନେ ? ସଲ୍‍ସ ସୁଡ଼୍‍ଦୁ ।” ସିସୁର୍‌ ସର୍‌ଆ ୱେର୍‌ଆ ୱାତା ରୋ ୱାନିଙ୍ଗ୍‌ ଇର୍ହାର୍‌, “ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ମାନେ ।”
MAR 6:39 ୱିଜେରେ ଏଣ୍ତେସ୍‌କି ଧାଡ଼ି ଧାଡ଼ି ଆଜି କଡ଼୍‍କି ଲାଟା ମାନି ବାଡିଦୁ ବାସ୍‍ନାର୍‍, ଆୟା ଉଣ୍ତିଙ୍ଗ୍‌ ଜିସୁ ବାସିସ୍‌ କିଦେଙ୍ଗ୍‌ ୱାରିଙ୍ଗ୍‌ ଆଦେସ୍‌ ସିତାନ୍‌ ।
MAR 6:40 ଆବେଟ୍‌ ୱିଜେରେ ଶହେ ଶହେ ଲୋକୁ ମାରି ପଚାସ୍‍ ପଚାସ୍‍ ଲୋକୁ ଧାଡ଼ି ଆଜି ବାସ୍‌ତାର୍‌ ।
MAR 6:41 ଆୟାୱେନ୍‌କା ଜିସୁ ଆୟା ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ଅସି ସ୍ୱର୍ଗ ମୁସ୍‌କୁ ସୁଡ଼୍‌ଜି ମାପୁରୁଦିଙ୍ଗ୍‌ ଦନ୍ୟବାଦ୍‌ ସିତାନ୍‌ ମାରି ରୁଟିଙ୍ଗ୍‌ ରୁକ୍‍ସି ଲୋକାଙ୍ଗ୍‌ ବାଟାକିଜି ସିଦେଙ୍ଗ୍‍ ସିସୁରିଙ୍ଗ୍‌ ସିତାନ୍‌ । ଆୟା ରୁଣ୍ତି ମିନ୍‍କାଙ୍ଗ୍‍ ବା ବାଟାକିଜି ସିଦେଙ୍ଗ୍‍ ସିତାନ୍‌ ।
MAR 6:42 ୱିଜୁ ଲୋକୁ ୱିଜେରେ ତିର୍‌ଆରୋ ପଟାପାଜିତାର୍‍ ।
MAR 6:43 ଇୟା ୱେନ୍‌କା ସିସୁର୍‌ ଏଜିତି ରୁଟିଙ୍ଗ୍‌ ମାରି ମିନ୍‌କୁ ମୋକେଙ୍ଗ୍‍ ପେର୍ଜି ବାରଗୋଟା ଡାଡ଼ିଦୁ ବର୍ତି କିତାର୍‌ ।
MAR 6:44 ଏମେ ଲୋକ୍‌ଡର୍‌ ଇୟା ରୁଟିଙ୍ଗ୍‌ ତିର୍ହା ମାର୍‍ଆର୍‍, ୱାରି ଲୋଇ ଆବ୍‍କା ମେମାର୍‍ଙ୍ଗୁଁ ଲୋକୁନେ ୫,୦୦୦ ହାଜାର୍‌ ମାର୍‌ଆର୍‌ ।
MAR 6:45 ଆୟାଦାପ୍ରେ ଜିସୁ ୱାନି ସିସୁରିଙ୍ଗ୍‌ ଡଙ୍ଗାଁଦୁ ବାସିସ୍‌ତାନ୍‌ ନୋ ସାମ୍‌ଦୁର୍‌ତୁ ଆୟା ପାଡ଼ିଦି ବେତ୍‍ସାଇଦାଦୁ ୱାନି ଆଗ୍‍ଡ଼ିନେ ସଣ୍ଡ୍ରେଙ୍ଗ୍‌ ଇର୍ହାନ୍‌, ଆବେଟ୍‌ ଲୋକାଙ୍ଗ୍‌ ଜିସୁ ପୋକ୍‌ତାନ୍‌ ।
MAR 6:46 ଜିସୁ ଲୋକାଙ୍ଗ୍‌ ପୋକ୍‍ତି ୱେନ୍‌କା ୱାନ୍‌ ପାର୍‌ତନା କିଦେଙ୍ଗ୍‌ ଇଜି ଗରନ୍‌ ମୁସ୍‌କୁ ସର୍ହାନ୍‍ ।
MAR 6:47 ମିଲିମିଲିକା ଆଜି ୱାନିୱାଲେ ଡଙ୍ଗାଁ ସାମ୍‌ଦୁର୍‌ ନାଡ଼୍‍ମି ମାର୍‌ଆତ୍‌ ମାରି ୱାନ୍‌ ପାଡ଼ି ଅରେନ୍‍ ମାର୍‌ଆନ୍‌ ।
MAR 6:48 ଜିସୁ ସୁଡ଼ୁତାନ୍‌ ଯେ ସିସୁରି ଡଙ୍ଗାଁଦି ସାଟ୍‍ୱା ଡାକ୍‌ତେଙ୍ଗ୍‍ଁ ଇଜି ନାଣ୍ତ ବାଦାଜି ମାର୍‌ଆର୍‌ । ଇରିଙ୍ଗ୍‌ ନାସ୍ତିୱାଲେ ଗାଲି ୱାରି ଆଗ୍‌ଡ଼ି ସାରି ୱାଜି ମାର୍‌ଆତ୍‌ । ସାଲ୍‍ଦି ଆନିୱାଲେ ଜିସୁ ଏର୍‌ ମୁସ୍‌କୁ ବୁଲାଜି ବୁଲାଜି ଶିଶୁରି ଲାକ୍‌ତୁ ୱାତାନ୍‌, ୱାଣ୍ତ୍ରୁ ସିସୁରି ଲାକ୍‌ତୁରାନ୍‌ ଆଜି ଆଗ୍‌ଡ଼ି ସନ୍‌ଡ଼୍ରେଙ୍ଗ୍‌ ବଦା କିଜି ମାର୍ହାନ୍‍
MAR 6:49 ମାତର୍‌ ସିସୁର୍‌ ୱାନିଙ୍ଗ୍‌ ସାମ୍‌ଦୁର୍‌ ମୁସ୍‌କୁ ବୁଲାନିକା ସୁଡ଼ୁତାରୋ, “ଦୁବା ଇଜି” ଅଡ୍‍ବିତାରୋ ନାଣ୍ତ ଆଉଲି ଆତାର୍‌,
MAR 6:50 ଇରିଙ୍ଗ୍‌ ୱିଜେରେ ଜିସୁଙ୍ଗୁଁ ସୁଡ଼ୁତାର୍‌ ତିଲାତା ସର୍‍ହାମାର୍‍ଆର୍‍ । ମାତର୍‌ ଜିସୁ ଆୟାଦାପ୍ରେ ୱାରିୱାଲେ ୱାର୍‌ଗିଜି ୱାରିଙ୍ଗ୍‌ ଇର୍‌ଆନ୍‌, ସାସ୍‌ ଆସ୍‌ତୁ, ତିଲାମାଟ୍‌, “ନାନ୍ ତୋ ଜିସୁ ।”
MAR 6:51 ଜିସୁ ୱାରି ଲାକ୍‌ତୁ ସର୍‍ଆନ୍‍ନୋ ଡଙ୍ଗାଁଦୁ ଏକ୍‍ତାନ୍‍, ଆବେଟ୍‌ ଗାଲି ତିର୍‌ ଆତାତ୍‌ । ସିସୁର୍‌ ମନ୍ ଲୋଇ ନାଣ୍ତ କାବାଆତା ସରଆର୍‌ ।
MAR 6:52 ଇରିଙ୍ଗ୍‌ ୱାର୍‌ ପାସ୍‌ ହଜାର୍‍ ଲୋକାଙ୍ଗ୍‌ ରୁଟିଙ୍ଗ୍‌ ଉଠ୍‌ପିସ୍‌କିତି ବିସୟଦି ଅର୍ତ ବୁଝାଏତା ମାର୍‌ଆର୍‌, ଇରିଙ୍ଗ୍‌ ୱାରି ବୁଦ୍ଧି ଗୁପାତା ମାର୍‌ଆତ୍‌ ।
MAR 6:53 ଜିସୁ ମାରି ୱାନି ସିସୁର୍‌ ସାମ୍‌ଦୁର୍‌ ନାସି ଗିନେସରତି ସାନ୍ଧିଦୁ ୱାତାର୍‍ନୋ ସାମ୍‌ଦୁର୍‌ ପାଡ଼ି ଡଙ୍ଗାଁ ତର୍‍ତାର୍ ।
MAR 6:54 ୱାର୍‌ ଡଙ୍ଗାଁଦାଣ୍ତ୍‍ ରେତି ୱାତିଦାପ୍ରେ ଲୋକୁ ଜିସୁଙ୍ଗୁଁ ସୁଡ଼୍‌ଜି ସିନିସ୍‍ତାର୍‍ ।
MAR 6:55 ଆବେଟ୍‌ ଆୟା ସାରିବେଡ୍‍ତି ନାର୍‌କାଙ୍ଗ୍‌ ଉର୍‌କୁସି ସର୍‌ଆର୍‌ । ଜିସୁ ଆମା ଆମା ବାଡ଼ିଦୁ ମାର୍‌ଆନ୍‌ ମାରି ଲୋକୁ ୱିଜେରେ ରୋଗ୍‌ ଲୋକାଙ୍ଗ୍‌ କାଟେଲ୍‍ତୁ ପିଣ୍ତ୍‍ଜି ଜିସୁମାନୁ ତାତାର୍‌ ।
MAR 6:56 ଜିସୁ ଏମେ ଏମେ ନାର୍‍, ଗାଡ଼୍‌ ମାରି ଲୋଇରି ନାର୍‌କାଙ୍ଗ୍‌ ସର୍‍ହାନ୍‍, ଲୋକ୍‌ ୱିଜେରେ ୱିଜୁ ବାଡ଼ିଦି ରୋଗିଲୋକାଙ୍ଗ୍‍ ସାତାଦୁ ତାତାରୋ ଉଣ୍ତାକିତାର୍‍, ମାରି ରୋଗିଲୋକ୍‍ ଏଣ୍ତେସ୍‌କି ୱାନି ୱାତି ଜାଲି ଅଡ଼ପ୍‍ ମୁଟ୍‍ନାର୍‍, ଆୟାଉଣ୍ତିଙ୍ଗ୍‌ ଜିସୁଙ୍ଗୁଁ ମାଡ଼ିସ୍‌ କିତାର୍‍; ମାରି ଏସୋ ଲୋକ୍‌ଡର୍‌ ଜିସୁଦି ୱାତି ଜାଲି ମୁଟ୍‍ତାର୍‍ ଆୟା ଲୋକ୍‌ଡର୍‌ ନେଗେନ୍‍ ଆତାର୍‌ ।
MAR 7:1 ୱେନ୍‌କା ପାରୁସିର୍‌ ମାରି ଜିରୁସାଲାମ୍‍ତାନ୍‌ ୱାତି ମାର୍‍ଇ ଏସୋ ସାସ୍ତ୍ରିର୍‌ ଜିସୁ ସାରିବେଡ୍‍ତି ଉଣ୍ତାତାର୍‌ ।
MAR 7:2 ୱାର୍‌ ସୁଡ଼ୁତାର୍‌ ଯେ, ୱାନି ଏସୋ ସିସୁର୍‍ ଜିହୁଦିରି ଇସାବ୍‌ତାନ୍‌ କିୟୁ ନର୍‍ବାଏଣ୍ତା ଉଣୁଜି ମାର୍‌ଆର୍‌ ।
MAR 7:3 ପାରୁସିର୍‌ ମାରି ୱିଜେରେ ଯିହୁଦୀଲୋକ୍‍ ୱାରି ପୁର୍ବେଦି ନେତାରି ରୀତିନୀତି ମାନାଜି ନେଗେଣ୍ତ୍‍ କିୟୁ ନର୍‍ବାଏତିଙ୍ଗ୍‍ ୱାର୍‌ ଉଣୁଏର୍‌,
MAR 7:4 ସାତାଦୁ ସର୍‍ହି ୱାତି ୱେନ୍‌କା ନିଜେ ନିଜେଦି ମୁସ୍‌କୁ ଏର୍‌ ଲଜାଏତିଙ୍ଗ୍‍ ଉଣୁଏର୍‌; ମାରି ଗିନା, ମୁତା ମାରି କସ୍‍ ନକି ଏର୍‌ତୁ ମୁଡ଼ୁକିିସି ନର୍‍ବାନିକା, ଖାଟେଲ୍‍ତୁ ଏରୁ ସିଲିକ୍‌ନିକା ୱିଜୁ ଆଇ ରୀତିନୀତି ମାନାଦେଙ୍ଗ୍‌ ଇଜି ୱାର୍‌ ଆଦେସ୍‌ ପଇତା ମାର୍‌ଆର୍‌ ।
MAR 7:5 ପାରୁସିର୍‌ ମାରି ସାସ୍ତ୍ରିର୍‌ ଜିସୁଙ୍ଗୁଁ ଇର୍ହାର୍‌, “ନି ସିସୁର୍‍ ପୁର୍ବେଦି ନେତାରି ରୀତିନୀତି ଦାଣ୍ତ୍‍ ସାଲାଏଣ୍ତା କିକୁ ନର୍‍ବାଏଣ୍ତା ଏନ୍ଦା ଉଣୁଜିନାର୍‌ ?”
MAR 7:6 ଜିସୁ ୱାରିଙ୍ଗ୍‌ ଇର୍ହାନ୍‌, ଏ ସାଲାକିଦି, ଜିସାଇୟ ବାବବାଦି ମି ବିସୟତୁ ଟିକ୍‍ତାନ୍‍ ମାଟା ୱେର୍‍ତା ମାନାନ୍‌, ଏଣ୍ତେସ୍‌ ରାସାତାମାନାତ୍‌, ମାପୁରୁ ଇନାନ୍‌, ଇୟା ଜାତିଦି ଲୋକ୍‌ଡର୍‌ ମାଙ୍ଗିଁ ତାମେ ମକମିନେ ମାନାନାର୍‌, ମାତର୍‌ ୱାରି ଜିବନ୍‌ ମାବାଣ୍‍କୁ ଆକ ତେବାନାତ୍‍ ।
MAR 7:7 ୱାର୍‌ ଲୋକୁ ତିଆର୍‌ କିତିମାନି ରୀତିନୀତି ଦିଙ୍ଗ୍‍ ମାପୁରୁଦି ଆଦେସ୍‌ ଇଜି ଶିକ୍ଷା ସିନାର୍‍ ଆର୍‍ଏନେ ମା ସେବା କିଜିନାର୍‍ ।
MAR 7:8 “ମିର୍‌ ମାପୁରୁଦି ଆଦେସ୍‌ ଡ଼ିସ୍‌ସି ଲୋକୁ ତିଆର୍‍କିତି ନିୟମ୍‌ତିଙ୍ଗ୍‌ ଆସ୍‍ସିନିଦେର୍‍ ।”
MAR 7:9 ମାରି ଜିସୁ ୱାରିଙ୍ଗ୍‌ ଇର୍ହାନ୍‌, ମିର୍‌ ମି ସାଲାକିଦାନ୍‍ ମାପୁରୁଦି ମାଟାଦିଙ୍ଗ୍‌ ମାନାଇଜିନିଦେର୍‍ ।
MAR 7:10 ଇରିଙ୍ଗ୍‌ ମୋସା ନିୟମ୍‌ ସିତାମାନାନ୍‌, ମି ବୁବା ୟାୟାଏଙ୍ଗ୍‍ ମାନାଦୁ, ମାରି ଏନ୍‌ ନିଜେଦି ବୁବା ନି ୟାୟାଙ୍ଗ୍‌ ଆନାଦୁରିଆ ସିନାନ୍‌, ୱାଣ୍ତ୍ରୁ ଏଣ୍ତେସ୍‌ କିଜିବା ସାନି ଦଣ୍ଡ୍‌ ପଇନାନ୍‌ ।
MAR 7:11 ମାତର୍‌ ମି ଇନ୍‌ଡ୍ର, ଜଦି ଅରେନ୍‍ ଲୋକ୍‌ତିମାନୁ ୱାନି ବୁବା ୟାୟାଏଙ୍ଗ୍‍ ସାହାଜ୍ୟ କିଦେଙ୍ଗ୍‌ ମାନାତ୍‌, ମାତର୍‌ ଆୟା ଲୋକୁ ଇଜିନାନ୍‌, କାର୍ବାନ୍‍ ମାପୁରୁତିଙ୍ଗ୍‍ ପୁଜା ସିତାମାନା ।
MAR 7:12 ଆଦେଙ୍ଗ୍‌ ମିର୍‌ ୱାନିଙ୍ଗ୍‌ ୱାନି ବୁବା ୟାୟାଦିଙ୍ଗ୍‍ ସାହାଜ୍ୟ କିନି ଉଣ୍ତିଙ୍ଗ୍‌ ସିଇଦେର୍‍ ।
MAR 7:13 ଇୟାୱାଜା ମିର୍‌ ପୁର୍ବେଦି ଲୋକ୍‌ତି ରୀତିନୀତି ଉଣ୍ତିଙ୍ଗ୍‌ ମାପୁରୁଦି ବାକ୍ୟଦିଙ୍ଗ୍‍ ଲାତ୍‍ ଡାକ୍‍ସିନିଦେର୍‍ ମାରି ଆୟାୱାଜା ନାଣ୍ତ ସେଇ ପାଣିବା କିଜିିନିଦେର୍‍ ।
MAR 7:14 ଅର୍‌ଲେନ୍‌ ଜିସୁ ଲୋକାଙ୍ଗ୍‌ ଲାକ୍‌ତୁ କୁକ୍‌ସି ୱାରିଙ୍ଗ୍‌ ଇର୍ହାନ୍‌, “ମିର୍‌ ୱିଜେରେ ନା ମାଟା ୱେନ୍‌ଡ୍ରୁ ମାରି ବୁଝାଦୁ ।”
MAR 7:15 ଲୋକ୍‌ତି ମେନ୍ଧଲ୍‍ ଆତ୍‌ରେ ଇୟାୱାଜା ଇନି ବିସୟ ସିଲେତ୍‌, ଆମାକା କି ୱାନି ଲୋଇ ଡ଼ୁଗୁଜି ୱାନିଙ୍ଗ୍‌ ଅପବିତ୍ର କିନାତ୍‌, ମାତର୍‌ ଏମେ ଏମେକା ଲୋକ୍‌ତି ଲୋଇରାନ୍‌ ସନାତ୍‌, ଆୟାୱିଜୁ ୱାନିଙ୍ଗ୍‌ ଅପବିତ୍ର କିନାତ୍‌ ।
MAR 7:16 ଜଦି ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ ୱାଣ୍ତ୍ରୁ ୱେନିନ୍‌ ।
MAR 7:17 ଜିସୁ ଲୋକାଙ୍ଗ୍‌ ଡ଼ିସ୍‌ସି ଇନ୍‌ଡ୍ର ୱାତି ୱେନ୍‌କା ୱାନି ସିସୁର୍‍ ଇୟା କାତାଦି ଅର୍ତ ବୁଝାକିଜି ସିଦା ଇଜି ଇର୍ହାର୍‌ ।
MAR 7:18 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‍ବା ଇନିକା ୱାରିୱାଜା ବୁଜାଦେଙ୍ଗ୍‌ ଆଟ୍‍ଏଜିନିଦେର୍‍ ? ଏମେକା କି ଆତ୍‍ରେରାନ୍‍ ଲୋକା ଲୋଇ ଡ଼ୁଗ୍‍ନାତ୍‍, ଆକା ୱାନିଙ୍ଗ୍‌ ସେଏଣ୍ଡ୍‌ କିଦେଙ୍ଗ୍‌ ଆଟ୍‍ଏତ୍‍ ।
MAR 7:19 ଇରିଙ୍ଗ୍‌ ଆକା ୱାନି ଜିବନ୍‌ତୁ ଡ଼ୁଗ୍‍ଏତ୍‍, ମାତର୍‌ ପଟା ଲୋଇ ଡ଼ୁଗୁଜି ଆତ୍‌ରେ ସନା ସନାତ୍‌ ।” ମାରି ଇବେଣୁକୁ ୱିଜୁ ଖାଦି ନରାନା ସନାତ୍‌, ଇକା ଜିସୁ ଇର୍‌ଆନ୍‌ ।
MAR 7:20 ଜିସୁ ଇର୍ହାନ୍‌, “ଆମାକା ଲୋକ୍‍ମାଣ୍‍କୁ ସନାତ୍‌, ଆକାନେ ୱାନିଙ୍ଗ୍‌ ଅପବିତ୍ର କିନାତ୍‌ ।
MAR 7:21 ଇରିଙ୍ଗ୍‌ ଲୋଇରାନ୍‌, ଲୋକ୍‌ତି ଜିବନ୍‍ତାନ୍‍, ତାଗ୍‌ଇଚିନ୍ତା ସନାତ୍‌, ଦାରିପାଣି, ଡଂଆ, ଲୋକ୍‌ତିଙ୍ଗ୍‌ ସାୟାମାର୍‌ଗାଡାକ୍‌ନିକା,
MAR 7:22 ଆଇୱାନି ଆଇମାଦିମାନୁ ସନିକା, ଲୋଭ୍‍, କାରାପ୍‌, ମିଛ୍‍ ମାଟା, ଗାଡ଼୍‍ୟା, ସୁଡ଼୍‌ଜି ଆକାର୍‍ ଆନିକା, ସୁଡ଼୍‌ଜି ଲାଲ୍‍ଇଆନିକା, ନିଦା, ଗାର୍ବୁ କିନିକା, ମୁର୍ଖୁଆନିକା;
MAR 7:23 ଇୟା ତାଗ୍‌ଇ ପାଣିୱିଜୁ ଲୋଇରାନ୍‌ ସହସି ଲୋକ୍‌ତିଙ୍ଗ୍‌ ଅପବିତ୍ର କିନାତ୍‌ ।”
MAR 7:24 ଆୟାୱେନ୍‌କା ଜିସୁ ଆୟା ବାଡି ଡ଼ିସ୍‍ସି ସୋର ଗାଡ଼୍‌ତି ରାଜିଦୁ ସର୍‌ଆନ୍‌, ଉଣ୍ତ୍ରି ଇନ୍‌ଡ୍ର ଡ଼ୁଗିତାନ୍‍ନୋ, ଏର୍‍ବା ଏଣ୍ତେସ୍‌ ଆକା ନେସ୍‌ଏର୍‌, ଇକା ବଦା କିଜିମାର୍‍ଆନ୍‍, ମାତର୍‌ ୱାଣ୍ତ୍ରୁ ଆବେ ମାର୍ଗିଜୋ ମାନ୍‌ଡ଼୍ରେଙ୍ଗ୍‌ ଆଟ୍‍ଏତାନ୍‍ ।
MAR 7:25 ଆୟାଦାପ୍ରେ ଅରେତ୍‌ ଆଇମା ଜିସୁ ୱାତି ମାର୍‍ଇ କାବୁର୍‌ ୱେର୍‍ଆଦୋ ୱାତାତ୍‍, ଇରିଙ୍ଗ୍‌ ତାନି ଗାଡ଼୍‍ସିଙ୍ଗ୍‍ ତାଗ୍‍ଇଆତ୍ମା ଆସ୍‌ତା ମାର୍‌ଆତ୍‌ । ଆଦେଙ୍ଗ୍‌ ଆୟା ଆଇମା ୱାନି ପାଦାମ୍‌କାଙ୍ଗ୍‌ ମାଡ଼ିସ୍‌ କିଜି ଗୁରିତାତ୍‍ ।
MAR 7:26 ଆୟା ସୁର ଦେଶ୍‍ତି ସୁରଫେନିକିୟା ଜାତିଦି ଅରେତ୍‌ ଗ୍ରୀକ୍‍ ଆଇମା ମାର୍‌ଆତ୍‌ । ତାନି ଆଇଲି ମାଣାନ୍‌ ଦୁବା ଡ଼ିସ୍‍ସିସ୍‍ କିଦେଙ୍ଗ୍‌ ଇଜି ଜିସୁଙ୍ଗୁଁ ଇନ୍‌ଡ୍ରେଙ୍ଗ୍‌ ଆସ୍‌ତାତ୍‌ ।
MAR 7:27 ଆବେଟ୍‌ ଜିସୁ ତାନିଙ୍ଗ୍‌ ଇର୍‌ଆନ୍‌, “ନିଜେଦି କଡ଼ରିଙ୍ଗ୍‌ ଆଗ୍‌ଡ଼ି ଖାଦି ପଟାବର୍ତି ଉଟ୍‍ପିସ୍‍ତେଙ୍ଗ୍‍ ଆନାତ୍‌, ଇରିଙ୍ଗ୍‌ କଡ଼ରି ବାଟା ଖାଦି ଅସି ନୁକୁଡ଼ିଆଙ୍ଗାଁ ମାନୁ ପୋକ୍‍ନିକା ନେଗେତ୍‌ ସିଲେ ।”
MAR 7:28 ଜିସୁଙ୍ଗୁଁ ଆୟା ଆଇମା ଇର୍ହାତ୍‌, “ହୁଁ, ପ୍ରବୁ, ନୁକୁଡ଼ିଙ୍ଗ୍‍ବା ଟେବୁଲ୍‍ ଆଡ୍‍ଗି ମାନ୍‌ଜି କଡ଼ର୍‌ ଉଟି ୱିସ୍‌ତି ସକ୍‌ଡ଼ି ଆର୍ତିକା ଉଣେ ।”
MAR 7:29 ଜିସୁ ଆୟା ଆଇମାଦିଙ୍ଗ୍‍ ଇର୍‌ଆନ୍‌, “ନିନୁ ଇୟା ମାଟା ଇର୍‍ଇ ଉଣ୍ତିଙ୍ଗ୍‌ ସାଙ୍ଗ୍‍ଆ, ନି ଗାଡ଼ିଦି ମାଣାନ୍‌ ଦୁବା ସତା ସର୍‌ଆତ୍‌ ନି ।”
MAR 7:30 ଆୟା ଆଇମା ଇନ୍‌ଡ୍ର ଡ଼େସି ସଲ୍‌ସି ସୁଡ଼ୁତାତ୍‍ ଯେ ତାନି ଆଇଲି ଟାଟିଦୁ ଡରିତା ମାନାତ୍‌ ମାରି ସତେନେ ଦୁବା ଆଇଲି ମାଣ୍‌କୁ ଡ଼ିସ୍‍ତା ସର୍‌ଆତ୍‌ ।
MAR 7:31 ଆୟାୱେନ୍‌କା ଜିସୁ ସୋର୍‍ ସାନ୍ଧିଦାଣ୍ତ୍ ଡ଼ିସ୍‌ସି ସିଦନ୍‍ ମାରି ଦେକାପଲି ସାନ୍ଧି ସିଜି ଗାଲିଲି ସାମ୍‌ଦୁର୍‌ ପାଡ଼ି ୱାତାନ୍‌ ।
MAR 7:32 ଏସୋ ଲୋକୁ ଗୁଲା ମାରି ବଇରା ଲୋକ୍‌ତିଙ୍ଗ୍‌ ଜିସୁ ଲାକ୍‌ତୁ ତାତାର୍‌ । ମାରି ୱାନି ମୁସ୍‌କୁ କିୟୁ ଇଡ୍‌ଦେଙ୍ଗ୍‌ ଜିସୁଙ୍ଗୁଁ ଇର୍ହାର୍‌ ।
MAR 7:33 ଜିସୁ ଆୟା ଲୋକ୍‌ତିଙ୍ଗ୍‌ ଲୋକା ଗଲିଦାନ୍‍ ଅଡ଼ପ୍‍ ଆକ ଅତାନ୍‍ନୋ ୱାନି ରୁଣ୍ତି ଗିତଣିଆଙ୍ଗ୍‍ ୱାନି ଡ଼ାସ୍‍କେଙ୍ଗ୍‍ ମୁଟ୍‌ତାନ୍‌ ମାରି ପୁସ୍‍ସି ୱାନି ୱେତଲ୍‍ତିଙ୍ଗ୍‍ ମୁଟ୍‌ତାନ୍‌,
MAR 7:34 ଆୟାୱେନ୍‌କା ୱାନ୍‌ ସ୍ୱର୍ଗ ମୁସ୍‌କୁ ସୁଡ଼୍‍ଜି ପୁଣ୍ତା ଡ଼ିସ୍‌ସି ୱାନିଙ୍ଗ୍‌ ଇର୍‌ଆନ୍‌, “ଇପ୍‍ପଥଃ,” ଇରିଙ୍ଗ୍‌ ଗୁଲାଦି “ୱେୟୁ ୱାର୍‍ଗିଦେଙ୍ଗ୍‍ ରାଆ ।”
MAR 7:35 ଆୟା ଦାପ୍ରେ ୱାନ୍‌ ଗିତଣିଙ୍ଗ୍‍ ୱେନ୍‌ଡ୍ରେଙ୍ଗ୍‌ ଆଟ୍‍ତାନ୍‍ ମାରି ୱାନି ୱେତଲ୍‍ କୁଦିତାତ୍‍ ଆବେଟ୍‌ ୱାନ୍‌ ନେଗେନ୍‌ କିଜି ୱାର୍‍ଗିଦେଙ୍ଗ୍‍ ଆଟ୍‍ତାନ୍‍ ।
MAR 7:36 ଇୟା ନେଗେଣ୍ତ୍‍ କିତି ମାଟା ଏଙ୍ଗ୍‌ବା ଇନ୍‌ମାଟ୍‌ ଇଜି ଆଟ୍‍ୱାଦାନ୍‍ ଜିସୁ ଲୋକାଙ୍ଗ୍‌ ଇର୍‌ଆନ୍‌, ମାତର୍‌ ଜିସୁ ଏସା ମାନା କିତିଙ୍ଗ୍‌ବା, ଲୋକ୍‌ଡର୍‌ ନାସାନେ ୱେର୍‌ସି ବୁଲାତାର୍‌ ।
MAR 7:37 ମାରି, ୱିଜେରେ ଲୋକୁ ନାଣ୍ତ କାବାଆଜି ଇର୍ହାର୍‌, “ୱାଣ୍ତ୍ରୁ ୱିଜୁ ପାଣି ନେଗ୍ରେଣ୍ତା କିତାମାନାନ୍‍; ୱାଣ୍ତ୍ରୁ ୱେନ୍ଇ ଲୋକାଙ୍ଗ୍‌ ୱେନି ବପୁ ମାରି ୱାର୍‌ଗିଇ ଲୋକାଙ୍ଗ୍‌ ୱାର୍‍ଗିନି ବପୁ ବା ସିନାନ୍‍ ।”
MAR 8:1 ଆୟାୱାଲେ ଅର୍‍ଲେନ୍‍ ମାରିଡ଼େସି ନାଣ୍ତ ଲୋକୁ ଜିସୁମାନୁ ଉଣ୍ତାତାର୍‌, ନାସ୍ତିୱାଲେ ୱାରିମାନୁ ଉଣିତିନିକା ସିଲେତାତ୍‍ ଆକା ଜିସୁ ୱାନି ସିସୁରିଙ୍ଗ୍‌ ଲାକ୍‌ତୁ କୁକ୍‍ତାନ୍‍ନୋ ୱାରିଙ୍ଗ୍‌ ଇର୍‌ଆନ୍‌,
MAR 8:2 “ଇୟା ଲୋକା ଉଣ୍ତିଙ୍ଗ୍‌ ନା ଜିବନ୍‌ ଦୟା ଆଜିନାତ୍‍, ଇରିଙ୍ଗ୍‌ ଇକାର୍‌ ମୁନେନ୍‌ ଆତାତ୍‌ନି ନାୱାଲେ ମାନାର୍‌ ମାରି ୱେରିମାନୁ ଉଣ୍ତେଙ୍ଗ୍‌ ଇନିକା ବା ସିଲେତ୍‍ ।
MAR 8:3 ଜଦି ନାନୁ ୱାରିଙ୍ଗ୍‌ ତାମେ ଇଲ୍‌କାଙ୍ଗ୍‌ ଉଟ୍‍ପିସ୍‍କିଏଣ୍ତା ପୋକ୍‌ନା, ନାସ୍ତିୱାଲେ ୱାର୍‌ ସାର୍‍ଦୁ ସନାରୋ ମେଡ଼୍‍ନାର୍‍; ଇରିଙ୍ଗ୍‌ ୱାରିମାଣାନ୍‌ ଏସୋ ଲୋକୁ ନାଣ୍ତ ଆକଣାନ୍‍ ୱାତାମାନାର୍‌ ।”
MAR 8:4 ସିସୁର୍‍ ଜିସୁଙ୍ଗୁଁ ଇର୍ହାର୍‌, “ଇୟା ସିମ୍ରା ବାଡିଦୁ ଏନ୍‌ ଆମାବାଣ୍‍କୁ ରୁଟି ତାସ ୱେରିଙ୍ଗ୍‌ ପଟାବର୍ତି ଉଟ୍‍ପିସ୍‍କିଦେଙ୍ଗ୍‍ ଆଟ୍‍ନାନ୍‍ ?”
MAR 8:5 ଜିସୁ ୱାରିଙ୍ଗ୍‌ ୱେନ୍‍ବାତାନ୍‌, ମି ଲାକ୍‌ତୁ ଏସଗୋଟା ରୁଟିଙ୍ଗ୍‌ ମାନେ ? ୱାର୍‌ ଇର୍ହାର୍‌, “ସାତ୍‍ଗୋଟା ରୁଟିଙ୍ଗ୍‌ ।”
MAR 8:6 ଜିସୁ ଲୋକାଙ୍ଗ୍‌ ବୁମି ମୁସ୍‌କୁ ବାସ୍‌ତେଙ୍ଗ୍‌ ଆଦେସ୍‌ ସିତାନ୍‌; ମାରି, ୱାଣ୍ତ୍ରୁ ଆୟା ସାତଗୋଟା ରୁଟିଙ୍ଗ୍‌ ଅତାନ୍‌ନୋ ମାପୁରୁଦିଙ୍ଗ୍‌ ଧନ୍ୟବାଦ ସିଜି ରୁଟିଙ୍ଗ୍‌ ମକା ମକା କିଜି ରୁକ୍‍ସି ବାଟା କିଜି ସିଦେଙ୍ଗ୍‍ ୱାନି ସିସୁରିଙ୍ଗ୍‌ ସିତାନ୍‌ ମାରି ୱାର୍‌ ଲୋକାଙ୍ଗ୍‌ ଆୟା ରୁଟିଙ୍ଗ୍‌ ବାଟାକିଜି ସିତାର୍‍ ।
MAR 8:7 ମାରି ୱାରିମାନୁ ଏସୋ ଇସ୍ରି ମିନ୍‌କୁବା ମାର୍‍ହେ; ଜିସୁ ଆୟା ମିନ୍‍କାଙ୍ଗ୍‌ ମାପୁରୁଦିଙ୍ଗ୍‍ ଦନ୍ୟବାଦ୍‌ ସିଜି ବାଟା କିଜି ଲୋକାଙ୍ଗ୍‌ ସିଦେଙ୍ଗ୍‍ ଇର୍‌ଆନ୍‌ ।
MAR 8:8 ୱିଜେରେ ତିନ୍‌ଞ୍ଜି ପଟା ପାଜିତାର୍‌ ମାରି ସାତ୍‍ଗୋଟା ଡାଡ଼ିଦୁ ଏଜିତି ରୁଟି ମକେଙ୍ଗ୍‌ ଡାଡ଼ିଦୁ ବର୍ତି କିତାର୍‌ ।
MAR 8:9 ଇୟା ଉଟି ଲୋକୁ ନାଲ୍‌ଗି ହାଜାର୍‌ ମାର୍‌ଆର୍‌ ।
MAR 8:10 ଆୟାୱେନ୍‌କା ଜିସୁ ଲୋକାଙ୍ଗ୍‌ ପୋକ୍‌ତାନ୍‌ ମାରି ଆୟାଦାପ୍ରେ ୱାନି ସିସୁରିୱାଲେ ଡଙ୍ଗାଁଦୁ ଏକ୍‌ତାନ୍‌ନୋ ଦଲ୍‍ମନୁଥା ରାଜିଦୁ ୱାତାନ୍‌ ।
MAR 8:11 ପାରୁସିର୍‌ ୱାତା ରୋ ଜିସୁୱାଲେ ମାଟାଦିଙ୍ଗ୍‌ ମାଟା ଆଦେଙ୍ଗ୍‌ ଆସ୍‌ତାର୍‌ । ମାରି ୱାର୍‌ ୱାନିଙ୍ଗ୍‌ ଉରିଦୁ ଆର୍‍ତେଙ୍ଗ୍‍ ବଦାକିଜି, ୱାନ୍‌ ଯେ ମାପୁରୁ ମାଣ୍‌କୁ ୱାତାମାନାନ୍‍ ଆକା ତର୍‌ତେଙ୍ଗ୍‍ଁ ବାଦଡ଼୍‍ତାନ୍‍ ଉଣ୍ତ୍ରି କାବାଆନି ପାଣି ତର୍‌ତେଙ୍ଗ୍‍ଁ ଇର୍ହାର୍‌ ।
MAR 8:12 ଜିସୁ ଜିବନ୍‌ତୁ ଦୁକ୍‍ଆଜି ନାଣ୍ତ ପୁଣ୍ତା ଡ଼ିସ୍‌ସି ଇର୍‌ଆନ୍‌, “ଇନ୍‍ଦାନିଙ୍ଗ୍‍ ଇୟା ଜୁଗ୍‍ତି ଲୋକ୍‌ଡର୍‌ ସିନା ପଇଜିନାର୍‍ ? ନାନୁ ମିଙ୍ଗିଁ ସତ୍‌ ୱେର୍‌ସିନା, ଇୟା ଜୁଗ୍‌ତି ଲୋକ୍‌ତିଙ୍ଗ୍‌ ଆମା ସିନା ବା ପୁଟ୍‌ଏତ୍‌ ।”
MAR 8:13 ୱାନ୍‌ ୱାରିଙ୍ଗ୍‌ ଡ଼ିସ୍‌ସି ମାରିଡ଼େସି ଡଙ୍ଗାଁଦୁ ଏକ୍‍ତାନ୍‍ନୋ ସାମ୍‌ଦୁର୍‌ ଆୟାପାଡ଼ି ସର୍‌ଆନ୍‌ ।
MAR 8:14 ଆୟାୱାଲେ ସିସୁର୍‌ ରୁଟି ଅତେଙ୍ଗ୍‌ ବାଣାତା ସରଆର୍‌; ଡଙ୍ଗାଁଦୁ ୱାରିମାନୁ କେବଲ୍ ଉନ୍‍ଡ୍ରେନେ ରୁଟି ମାର୍‌ଆତ୍‌ ।
MAR 8:15 ଜିସୁ ଶିଶୁରିଙ୍ଗ୍‌ ଆଟ୍‌ୱା ମାଟା ଇର୍‌ଆନ୍‌, “ଜାଗାର୍‌ତା ଆଦୁ,” ପାରୁସିର୍‌ ମାରି ହେରୋଦ୍‍କା ମିଚ୍‍ ମାଟାଦାନ୍‌ ଜାଗାର୍‌ତା ମାନ୍‌ଡ଼୍ରୁ, ଆମାକା ଖମୀର୍‍ତି ୱାଜା ଆନାତ୍‌ ।
MAR 8:16 ସିସୁର୍‌ ଇୟା ବିସୟତୁ ୱାରିୱାରି ଲୋଇ ୱାର୍‌ଗିଜି ସାତାର୍‌, “ମାବାନ୍‍ ରୁଟି ସିଲେତ୍‍ଆକା ୱାନ୍‌ ଇୟାୱାଜା ଇଜିନାନ୍‌ ।”
MAR 8:17 ଜିସୁ ଆକା ନେସ୍‌ତାନ୍‌ନୋ ୱାରିଙ୍ଗ୍‌ ଇର୍‌ଆନ୍‌, ମି ଲାକ୍‌ତୁ ରୁଟିଙ୍ଗ୍‌ ସିଲୁ ଇଜି ଏନ୍ଦା ୱାର୍‌ଗିଜି ସାଜିନିଦେର୍‌ ? ମିର୍‌ ଇୟାସାନ୍ଦି ନେସ୍‌ଇଦେର୍‌ ନୋ ? କି ବୁଝାଇଦେର୍‍ ନୋ ? ମି ଜିବନ୍‌ ନିସାନେ ଆଟ୍‌ୱା ଆତାମାନାତ୍‌ ?
MAR 8:18 କାଣୁକୁ ମାନ୍‌ବୁ ମାନ୍‌ବୁ ମିର୍‌ ସୁଡ଼୍‍ଇଜିନିଦେର୍‍ ? ମାରି, ଗିତଣିଙ୍ଗ୍‍ ମାନ୍‌ବୁ ମାନ୍‌ବୁ ୱେନ୍ଇଜିନିଦେର୍‍ ? ମିର୍‌ ଇନିକା ଅଡ଼୍‍ବିଦେଙ୍ଗ୍‍ ଆଟ୍‍ଇଜିନିଦେର୍‍ ?
MAR 8:19 ପାସ୍‌ଗୋଟା ରୁଟିଙ୍ଗ୍‌ ରୁକ୍‍ସି ଏଣ୍ତେସ୍‌ ୫,୦୦୦ ହାଜାର୍‌ ଲୋକାଙ୍ଗ୍‌ ତିର୍‍ପିସ୍‍କିତା ମାର୍‍ହା, ଆୟାନାଣ୍ତିଙ୍ଗ୍‌ ଏଜିତି ରୁଟି ମକେଙ୍ଗ୍‌ ୱିଜୁ ପେର୍‌ଜି ଏସୋ ଗୋଟା ଡାଡ଼ିଦୁ ବର୍ତି କିତିମାର୍‍ଇଦେର୍‍, ଆକା ମିଙ୍ଗିଁ ଏତ୍‌ ସିଲେତ୍‌ ? ସିସୁର୍‌ ୱାନିଙ୍ଗ୍‌ ୱେର୍‌ତାର୍‌, “ବାରଗଟା ଡାଡ଼ିଙ୍ଗ୍‍ ।”
MAR 8:20 ଜିସୁ ମାରି ୱେନ୍‌ବାତାନ୍‌, “ଏସିୱାଲେ ୪,୦୦୦ ହାଜାର୍‌ ଲୋକା ଉଣ୍ତିଙ୍ଗ୍‌ ସାତ୍‍ଗୋଟା ରୁଟିଙ୍ଗ୍‌ ରୁକ୍‍ସି ସିତାମାର୍‍ହା,” ଏଜିତି ରୁଟି ମୁକେଙ୍ଗ୍‍ ପେର୍‌ଜି ଏସୋ ଗୋଟା ଡାଡ଼ିଦୁ ବର୍ତି କିତିମାର୍‍ଇଦେର୍‍ ? ସିସୁର୍‌ ଇର୍ହାର୍‌, “ସାତ୍‍ଗୋଟା ଡାଡ଼ିଙ୍ଗ୍‍ ।”
MAR 8:21 ଜିସୁ ୱାରିଙ୍ଗ୍‌ ଇର୍‌ଆନ୍‌, “ମିର୍‌ ଇଲେଇବା ବୁଜାଦେଙ୍ଗ୍‌ ଆଟ୍‍ଇଜିନିଦେର୍‍ ।”
MAR 8:22 ୱେନ୍‌କା ୱାର୍‌ ବେତ୍‍ସାଇଦା ନାର୍‍ତୁ ୱାତାର୍‌ । ଆବେ ଏସୋ ଲୋକୁ ଅରେନ୍‍ କାଣା ଲୋକ୍‌ତିଙ୍ଗ୍‌ ଜିସୁ ଲାକ୍‌ତୁ ତାତାର୍‌ ନୋ ୱାନିଙ୍ଗ୍‌ ମୁଟ୍‌ସୋ ନେଗେଣ୍ତ୍‍ କିଦେଙ୍ଗ୍‌ ଇର୍ହାର୍‌ ।
MAR 8:23 ଜିସୁ କାଣାଦି କିୟୁ ଆସ୍‌ତାନ୍‌ନୋ ନାର୍‍ତାଣ୍ତ୍‍ ଆକ ଅତାନ୍‍, ଆବେ କାଣାଦି କାଣ୍‍ଗାଦୁ ପୁସ୍‍କାଣାଙ୍ଗ୍‌ ଉସ୍‍ତାନ୍‍ ନୋ ୱାନି ମୁସ୍‌କୁ କିୟୁ ଇଡ୍‌ଜି ୱାନିଙ୍ଗ୍‌ ୱେନ୍‌ବାତାନ୍‌, “ନିନ୍‌ ଇନିକା ସୁଡ୍‍ଜିନି ନୋ ?”
MAR 8:24 ଆୟା ଲୋକୁ ମୁସ୍‌କୁ ବେସ୍‍ସି ଇର୍‌ଆନ୍‌, “ହୁଁ ନାନ୍ ଲୋକାଙ୍ଗ୍‌ ସୁଡଦେଙ୍ଗ୍‌ ଆଟ୍‍ସିନା, ଇରିଙ୍ଗ୍‌ ନାନ୍ ଲୋକାଙ୍ଗ୍‌ ବୁଲାନି ମାରାକ୍‍ ୱାଜା ସାରିବେଡ଼୍‍ତି ସୁଡ଼୍‍ଜିନା ।”
MAR 8:25 ମାରିଡ଼େସି ଜିସୁ ୱାନି କାଣୁକୁ ମୁସ୍‌କୁ କିୟୁ ଇଟ୍‌ତାନ୍‌; ଆବେଟ୍‌ ୱାଣ୍ତ୍‍ରୁ ନେଗ୍ରେଣ୍ତା ସୁଡ଼୍‍ଦେଙ୍ଗ୍‍ ଆଟ୍‍ତାନ୍‍ ମାରି ନେଗେଣ୍ତ୍‍ ଆତାନ୍‍ନୋ ୱିଜୁ ସୁଡ଼୍‍ଦେଙ୍ଗ୍‍ ଆଟ୍‍ତାନ୍‍ ।
MAR 8:26 ଜିସୁ ୱାନିଙ୍ଗ୍‌ ତାମେ ଇନ୍‌ଡ୍ର ପୋକ୍‌ସି ଇର୍‌ଆନ୍‌, “ଇୟା ନାର୍‍ତୁ ସଲ୍‍ମା, ମାତର୍‌ ମି ଇନ୍‌ଡ୍ର ସାଙ୍ଗ୍‍ଆ ।”
MAR 8:27 ଇୟା ୱେନ୍‌କା ଜିସୁ ମାରି ୱାନି ସିସୁର୍‍ କାଇସରିୟା ପିଲିପି ରାଜିିଦି ଲାକ୍‌ତୁ ମାନି ନାର୍‍କାଙ୍ଗ୍‍ଁ ସନିୱାଲେ ସନିସାର୍‍ଦୁ ଜିସୁ ୱାନି ଶିଶୁରିଙ୍ଗ୍‌ ୱେନ୍‌ବାତାନ୍‌, “ନାନ୍ ଏନ୍‌ ଇଜି ଲୋକ୍‌ଡର୍‌ ଇନିକା ଇଜିନାର୍‍ ?”
MAR 8:28 ଆବେଟ୍‌ ସିସୁର୍‌ ଇର୍ହାର୍‌, “ଏସୋ ଲୋକୁ ଇଜିନାର୍‍ ଡୁବନ୍‌ସିନି ଯୋହନ, ମାରି ଏସୋ ଲୋକୁ ଇଜିନାର୍‍ ନିନ୍‌ ଏଲିୟ୍‌, ମାରି ଏର୍‌ ଏର୍‌ ଇଜିନାର୍‍, ନିନ୍‌ ବାବବାଦିରି ଲୋଇ ଅରେନ୍‍ ବାବବାଦି ।”
MAR 8:29 ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, “ନାନ୍ ଏନ୍‌ ଇଜି ମିର୍‌ ଇନିକା ଇଜିନିଦେର୍‌ ?” ପିତର୍‌ ୱେର୍‌ତାନ୍‌, “ନିନ୍‌ ଆଜିନି ମାପୁରୁତି ପୋକ୍‍ତିମାନି ରକ୍ଷା କିନି କ୍ରିସ୍ତ ।”
MAR 8:30 ଜିସୁ ୱାରିଙ୍ଗ୍‌ ଆଟ୍‌ୱା ମାଟା ୱେର୍‌ତାନ୍‌, “ନାନ୍ ଏନ୍‌ ନା ବିସୟ ଏଙ୍ଗ୍‌ବା ଇନ୍‌ମାଟ୍‌ ।”
MAR 8:31 ମାରି ଜିସୁ ସିସୁରିଙ୍ଗ୍‌ ବୁଜାକିଦେଙ୍ଗ୍‍ ଆସ୍‌ତାନ୍‌, “ନାନ୍ ମନୁଷ୍ୟପୁତ୍ର ନାଣ୍ତ କାସ୍ଟୁ ପଇନା ମାରି ପେରି ନେତାର୍‌, ପେରି ଯାଜକର ମାରି ସାସ୍ତ୍ରୀରି ମାଣାନ୍‌ ଦଣ୍ଡ୍‌ ପଇଜି ସାଦେଙ୍ଗ୍‌ ଆନାତ୍‌, ମାତର୍‌ ମୁନେଟି ୱେନ୍‌କା ମାରିଡ଼େସି ଜିବନ୍‌ଆଜି ନିଙ୍ଗ୍‍ନାନ୍‍ ।”
MAR 8:32 ଜିସୁ ଇୟାୱିଜୁ ମାଟା ନେଗେନେକିଜି ସିସୁରିଙ୍ଗ୍‌ ବୁଜାକିତାନ୍‍ । ଆବେଟ୍‌ ପିତର୍‌ ଜିସୁଙ୍ଗୁଁ ଆଇ ବାଡିଦୁ କୁକ୍‌ସି ଅତାନ୍‌ନୋ ୱାନିଙ୍ଗ୍‌ ଇର୍‌ଆନ୍‌, “ପ୍ରବୁ ଇୟାୱାଜା ମାଟା ଇନ୍‍ମା ।”
MAR 8:33 ମାତର୍‌ ଜିସୁ ୱାନି ସିସୁରିଙ୍ଗ୍‌ ସୁଡ଼୍‌ଜି ପିତର୍‍ତିଙ୍ଗ୍‍ ଇର୍‌ଆନ୍‌, “ନା ଲାକ୍‌ତୁରାନ୍‌ ଆକ ଆଆ, ସୟତାନ୍‍, ଇରିଙ୍ଗ୍‌ ନିନ୍‌ ମାପୁରୁତି ବିସୟ ଅଡ଼୍‍ବିଏଣ୍ତା ଲୋକା ବିସୟ ଅଡ଼୍‌ବିଜିନି ।”
MAR 8:34 ଆୟାୱେନ୍‌କା ଜିସୁ ୱାନି ସିସୁରିଙ୍ଗ୍‌ ମାରି ଉଣ୍ତାତିମାର୍‍ଇ ଲୋକାଙ୍ଗ୍‌ ଲାକ୍‌ତୁ କୁକ୍‌ସି ଇର୍‌ଆନ୍‌, “ଏନ୍‍ବା ନାୱାଲେ ୱାଦେଙ୍ଗ୍‌ ବଦା କିନାନ୍‌,” ୱାଣ୍ତ୍ରୁ ନିଜେ ନାନ୍ ଇନିକା ସିଲେ ଇଜି ଅଡ଼୍‍ବିପିନ୍‍, ୱାଣ୍ତ୍ରୁ ନା ଉଣ୍ତିଙ୍ଗ୍‌ ଦୁକ୍‍ ମାରି ସାନିକା ବଦା କିଜି ୱାଲେ ୱାଲେ ରାପିନ୍‍ ।
MAR 8:35 ଏନ୍‍ବା ନିଜେଦି ଜିବନ୍‌ତିଙ୍ଗ୍‌ ରକିୟା କିଦେଙ୍ଗ୍‌ ବଦା କିନାନ୍‌, ୱାଣ୍ତ୍ରୁ ୱାନି ଜିବନ୍‌ ଆରା କିନାନ୍‌; ମାତର୍‌ ଏନ୍‌ ନା ଉଣ୍ତିଙ୍ଗ୍‌ ମାରି ଇୟା ସୁସମାଚାର୍‌ ଉଣ୍ତିଙ୍ଗ୍‌ ନିଜେଦି ଜିବନ୍‌ ସିନାନ୍‍, ୱାଣ୍ତ୍ରୁ ୱାନି ଜିବନ୍‌ ରକିୟା କିନାନ୍‌ ।
MAR 8:36 ମାରି, ଜଦି ଅରେନ୍‌ ଲୋକୁ‌ ସାରାଦୁନିଆଦିଙ୍ଗ୍‌ ଜିଣାଜି ୱାନି ଜିବନ୍‌ ଆରା କିନାନ୍‌, ଲୋକୁ ୱାନି ଇନିକା ଲାଭ୍‍ ଆନାତ୍‌ ?
MAR 8:37 ମାରି, ଲୋକୁ ୱାନି ଜିବନ୍‍ତିଙ୍ଗ୍ ଡ଼େସି ପ‍ଇଦେଙ୍ଗ୍‌, ଇନିକା ସିଦେଙ୍ଗ୍‍ ଆଟ୍‍ନାନ୍‍ ?
MAR 8:38 ଜଦି ଏନ୍‍ବା ନା ଉଣ୍ତିଙ୍ଗ୍‌ ନା ସୁସମାଚାର୍‌ ଉଣ୍ତିଙ୍ଗ୍‌ ଇୟା ଦୁନିଆଦି ଦାରିପାଣିକିନି ଲୋକାମାଣାନ୍‌ ମାରି ପାପି ଲୋକ୍‌ତି ଲାକ୍‌ତୁ ନା ବାକ୍ୟ ବିସୟତାନ୍ ସେମାର୍‌ ଆନାନ୍‌, ମନୁଷ୍ୟପୁତ୍ର ଏସ୍ତିୱାଲେ ପବିତ୍ର ଦୁତ୍‍କାୱାଲେ ୱାନି ବୁବାସିଦି ମହିମାଦାନ୍‌ ମାରିଡ଼େସି ୱାନାନ୍‌, ଆୟାୱାଲେ ୱାନ୍‍ବା ଆୟା ବିସୟତାନ୍ ସେମାର୍‌ କିନାନ୍‌ ।
MAR 9:1 ମାରିଡ଼େସି ଜିସୁ ୱାରିଙ୍ଗ୍‌ ୱେର୍‌ତାନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ମାପୁରୁଦି ରାଜିଦୁ ସାକ୍ତିଦାନ୍‍ ମାନିବାଡି ସୁଡ଼୍‌ଇ ସାନ୍ଧି ଇବେନୁ ନିନି ମାନି ଲୋକା ମାଣ୍‌କୁ ଏସୋ ଲୋକୁ ଏଣ୍ତେସ୍‌ କିଜିବା ସାନିକା ୱେଡ଼୍ଏର୍‍ ।”
MAR 9:2 ଛଦିନ୍‍ ୱେନ୍‌କା ଜିସୁ କେବଲ୍‌ ପିତର୍‌, ଜାକୁବ ନି ଯୋହନତିଙ୍ଗ୍‍ ଅର୍‌ସେ ଆସ୍‌ସି ମିସାଜି ୱାରିଙ୍ଗ୍‌ ଉଣ୍ତ୍ରି ପେରି ଗରନ୍‍ତୁ ଅତାନ୍‍ ।
MAR 9:3 ମାରି ଜିସୁ ୱାରିଙ୍ଗ୍‌ ସୁଡ଼ୁବୁ ସୁଡ଼ୁବୁ ୱାନି ମୁର୍‍ତି ବାଦଲାତାତ୍‌, ୱାନି ଆଙ୍ଗିଁ ଇୟାୱାଜା ଜାୟ୍‌ ନି ପୁରା ଅଡ଼ିନିକା ଆତାତ୍‌ ଯେ, ଦୁନିଆତି ଏମେ ନର୍‍ବାନି ଲୋକ୍‍ବା ଇୟାୱାଜା ଅଡ଼ିନିକା କିଦେଙ୍ଗ୍‌ ଆଟ୍‍ଏନ୍‍ ।
MAR 9:4 ମାରି, ମୋଶା ନି ଏଲିୟ୍‌ ଜିସୁୱାଲେ ୱାର୍‌ଗିଜି ମାର୍‍ରିକା ୱାରିଙ୍ଗ୍‌ ତରାତାତ୍‍ ।
MAR 9:5 ଆବେନୁ ପିତର ଜିସୁଙ୍ଗୁଁ ଇର୍ହାନ୍‌, “ଏ ଗୁରୁ, ମାପ୍‌ ଜେ ଇୟା ବାଡିଦୁ ଏସୋ ନେଗେନ୍‌ତାନ୍‍ ମାନାପ୍‍, ମାପୁ ମୁଣ୍ତ୍ରି ଗୁଡ଼େଏଙ୍ଗ୍‍ ତିଆର୍‌ କିନାପ୍‍, ନି ଉଣ୍ତିଙ୍ଗ୍‌ ଉନ୍‌ଡ୍ରି, ମୋସାଦି ଉଣ୍ତିଙ୍ଗ୍‌ ଉନ୍‌ଡ୍ରି ମାରି ଏଲିୟ୍‌ଦି ଉଣ୍ତିଙ୍ଗ୍‌ ଉନ୍‌ଡ୍ରି ।”
MAR 9:6 ପିତର ଇନି ଉତର୍‌ ସିଦେଙ୍ଗ୍‍ ଇଜି ନେସ୍‌ଏନ୍‌ ମାରାନ୍‌, ଆବେଟ୍‌ ସିସୁର୍‌ ନାଣ୍ତ ତିଲାତା ସର୍‌ଆର୍‌ ।
MAR 9:7 ମାରି, ଖାଣ୍ତେକ୍‍ ବାଦଡ଼୍‍ ଇମ୍‌ଜି ୱାତା ଦୋ ୱାରିଙ୍ଗ୍‌ ବାଦଡ଼୍‍ତି ନିଡ଼୍‍ଗା ପିଡ଼ିକ୍‍ତାତ୍‍; ମାରି ଆୟା ବାଦଡ଼ତାନ୍‍ ଉଣ୍ତ୍ରି ବଲ୍ ୱାତାତ୍‍, “ଏ ନା ଲାଡ୍‍ତି ମାରିନ୍‌, ୱାନି ବାକ୍ୟ ୱେନ୍‌ଡ୍ରୁ ।”
MAR 9:8 ମାରି, ଉଲୁସ୍ତେ ସିସୁର୍‌ ସାରିବେଡ଼୍‍ତି ସୁଡ଼ୁତାର୍‌ ୱାରି ତଡ଼୍‍କାୱାଲେ ଲୋକା ଲୋଇରାନ୍‌ କେବଲ୍‌ ଜିସୁଙ୍ଗୁଁ ଡ଼ିସ୍‌ତିଙ୍ଗ୍‌ ମାରି ଏଙ୍ଗ୍‌ବା ସୁଡ଼ୁଏତାର୍‌ ।
MAR 9:9 ୱାର୍‌ ଗରନ୍‌ତାନ୍‌ ରେତାଜି ୱାନିୱାଲେ ଜିସୁ ସିସୁରିଙ୍ଗ୍‌ ଆଟ୍‌ୱା ମାଟା ସିଜି ୱେର୍‌ତାନ୍‌, “ମିର୍‌ ଆମାକା ଆମାକା ସୁଡ଼୍‍ତିଦେର୍‍, ଆୟାୱିଜୁ ସାତି ଲୋକାମାଣ୍‌କୁ ନାନ୍ ଯେ ମନୁଷ୍ୟପୁତ୍ରଦି ମାରିଡ଼େସି ଜିବନ୍‌ ଆନି ସାନ୍ଦି ଆୟାମାଟା ଏଙ୍ଗ୍‌ବା ଇନ୍‌ମାଟ୍‌ ।”
MAR 9:10 ଆବେଟ୍‌ ୱାର୍‌ ଆୟା ମାଟା ଆସ୍‌ତାରୋ ସାଜ ମାରିଡ଼େସି ଜିବନ୍‌ଆଜି ନିଂଇକା ଇନିକା, ଆୟା ବିସୟତାନ୍ ୱାରି ୱାରି ଲଅ ୱାର୍‍ଗିତାର୍‍ ।
MAR 9:11 ମାରି, ସିସୁର୍‌ ଜିସୁଙ୍ଗୁଁ ୱେନ୍‌ବାତାର୍‌, “ଏଲିୟ୍‌ ଆଗ୍‌ଡ଼ି ୱାନିକା ମାନାତ୍‌ ଇଜି, ଶାସ୍ତ୍ରୀର୍‍ ଏନ୍ଦା ଇନାର୍‌ ?”
MAR 9:12 ଆବେନୁ ଜିସୁ ସିସୁରିଙ୍ଗ୍‌ ୱେର୍‌ତାନ୍‌, ଏଲିୟ୍‌ ଆଗ୍‌ଡ଼ି ୱାନାନ୍‍ନୋ ୱିଜୁ ବିସୟ ମାରିଡ଼େସି ତିଆର୍‌ କିନିକା ସତେନେ । ମାତର୍‌ ନାନ୍ ଯେ ମନୁସ୍ୟପୁତ୍ର ନାଣ୍ତ ଦୁଃକ୍‌‍ ବୋଗାଜି ନିନ୍ଧା ପଇନା ମାରି ସେମାର୍‌ ପୟନା, ଇୟାକା ଏଣ୍ତେସ୍‌ ୱାନି ବିସୟତାନ୍ ରାସ୍‌ତିକା ମାନାତ୍‌ ?
MAR 9:13 ମାତର୍‌ ନାନ୍ ମିଙ୍ଗିଁ ଇଜିନା, “ଏଲିୟ୍‌ ୱାତାତ୍‌ନି, ମାରି ୱାନି ବିସୟତୁ ଏଣ୍ତେସ୍‌ ରାସାତା ମାନାତ୍‌, ଆୟାୱାଜା ୱାରୁ ୱାନି ଉଣ୍ତିଙ୍ଗ୍‌ ଆମାକା ବଦା ଆୟାକା କିତାମାନାର୍‍ ।”
MAR 9:14 ୱେନ୍‌କା ୱାର୍‌ ଆଇ ସିସୁରି ଲାକ୍‌ତୁ ୱାତା ରୋ ସୁଡ଼ୁତାର୍‌, ୱାରି ସାରିବେଡ଼୍‍ତି ନାଣ୍ତ ଲୋକୁ ଉଣ୍ତାତାର୍‌, ମାରି ଶାସ୍ତ୍ରୀର୍‍ ୱାରିୱାଲେ ମାଟାଦିଙ୍ଗ୍‍ମାଟା ଆନିକା ସୁଡ଼ୁତାନ୍‌ ।
MAR 9:15 ଲୋକ୍‌ଡର୍‌ ଜିସୁଙ୍ଗୁଁ ଉଲୁସ୍ତେ ସୁଡ଼୍‍ତି ଦାପ୍ରେ ବେମ୍ରି ଆତା ସର୍‌ଆର୍‌ ମାରି ଉରୁକ୍‍ସି ୱାଜି ଜିସୁଙ୍ଗୁଁ ମାଡ଼ିସ୍‍କିଦେଙ୍ଗ୍‍ ଆସ୍‌ତାର୍‌ ।
MAR 9:16 ଜିସୁ ୱାନି ସିସୁରିଙ୍ଗ୍‌ ୱେନ୍‌ବାତାନ୍‌, “ମିର୍‌ ଶାସ୍ତ୍ରୀରି ୱାଲେ ଇନିକା ମାଟାଦିଙ୍ଗ୍‍ମାଟା ଆଜି ସାଜି ମାର୍‌ଇଦେର୍‌ ?”
MAR 9:17 ଲୋକାମାଣ୍‌କୁ ଅରେନ୍‍ ଜିସୁଙ୍ଗୁଁ ଉତର୍‌ ସିତାନ୍‌, “ଏ ଗୁରୁ, ନାନ୍ ନା ମାରିନ୍‍ତିଙ୍ଗ୍‍ ନି ଲାକ୍‌ତୁ ତାତାମାର୍‍ହା; ୱାନିଙ୍ଗ୍‌ ଉଣ୍ତ୍ରି ଗୁଲାଦୁବା ଆସ୍ତାମାନାତ୍‍;
MAR 9:18 ଆମା ବାଡିଦୁ ଆପିତ୍‌ ଦୁବା ୱାନିଙ୍ଗ୍‌ ଆସ୍‍ନାତ୍‍, ୱାନିଙ୍ଗ୍‌ ଆଡ୍‍ଗି ଆର୍‍ପ୍‍ନାତ୍‍, ୱାନି ମକ୍‍ମତାନ୍‍ ପେପଲ୍‍ ସନାତ୍‌ ମାରି ୱାଣ୍ତ୍ରୁ ପାଲ୍‍କୁ କାତ୍ରେକିନାନ୍‍, ମାରି ୱାଡ୍ରୁ ୱାର୍‍ସି ସଲ୍‌ସିନାନ୍‌; ଆୟା ଦୁବା ପେର୍‍ଦେଙ୍ଗ୍‍ ଉଣ୍ତିଙ୍ଗ୍‌ ନାନ୍ ନି ସିସୁରିଙ୍ଗ୍‌ ୱେର୍‍ତା, ମାତର୍‌ ନି ସିସୁର୍‍ ଦୁବା ପେର୍‍ଦେଙ୍ଗ୍‍ ଆଟ୍‍ଏତାର୍‍ ।”
MAR 9:19 ଜିସୁ ୱାରିଙ୍ଗ୍‌ ଇର୍ହାନ୍‌, “ଏ ଅବିସ୍‍ବାସ୍‍ତି କୁଟୁମ୍‌ ! ଏସୋଦିନ୍‍ ନାନ୍ ମି ୱାଲେ ମାନା ? ଏସୋଦିନ୍‍ ନାନ୍ ମି ପାଣି କିଜିମାନା ? ମାରିନ୍‍ତିଙ୍ଗ୍‍ ନା ଲାକ୍‌ତୁ ଆସ୍‌ସି ରାଦୁ ।”
MAR 9:20 ଆବେଟ୍‌ ୱାର୍‌ ୱାନିଙ୍ଗ୍‌ ଜିସୁ ଲାକ୍‌ତୁ ତାତାର୍‌ । ମାରି, ଜିସୁଙ୍ଗୁଁ ସୁଡ଼ୁତିଦାପ୍ରେ ଦୁବା ଆୟା କଡ଼ଦିଙ୍ଗ୍‍ ବୟ୍‌ଙ୍କାର୍‍ତାନ୍‍ ତିର୍‍ପିସି ଆସ୍‌ତାତ୍‌ ମାରି କଡ଼ ବୁମିଦୁ ଆର୍‍ଜି ୱେୟୁତାନ୍‍ ପେପଲ୍‍ ସପ୍‍ସି ଗୁର୍‍ଦେଙ୍ଗ୍‍ ଆସ୍‌ତାନ୍‌ ।
MAR 9:21 ନାସ୍ତିୱାଲେ ଜିସୁ କଡ଼ଦି ବୁବାସିଙ୍ଗ୍‍ ୱେନ୍‌ବାତାନ୍‌, ଏସୋ ଦିନ୍‌ ଆତାତ୍‌ ଇୟାକା ଇୟାୱାଜା ଆତାମାନାତ୍‌ ? ୱାଣ୍ତ୍ରୁ ୱେର୍‌ତାନ୍‌, “ଇସ୍ରିରି ୱାଲେରାନ୍‍ନେ ।”
MAR 9:22 “ଦୁବା ୱାନିଙ୍ଗ୍‌ ଡ଼େଇଦେଙ୍ଗ୍‍ ଏସଦେବା ସିସୁ ନି ଏର୍‌ତୁ ପୋକ୍‍ତାମାର୍‍ଆତ୍‍; ମାତର୍‌ ନିନ୍‌ ଜଦି କିଦେଙ୍ଗ୍‌ ଆଟ୍‌ନି, ଆତିଙ୍ଗ୍‌ ମା ଉଣ୍ତିଙ୍ଗ୍‌ ଦୟା କିଜି ମାଙ୍ଗିଁ ସାହାଜ୍ୟ କିଆ ।”
MAR 9:23 ଆବେଟ୍‌ ଜିସୁ ୱାନିଙ୍ଗ୍‌ ୱେର୍‌ତାନ୍‌, “ଇନିକା ଇର୍‍ଇ ? ଜଦି କିଦେଙ୍ଗ୍‌ ଆଟ୍‌ନି ! ଏନ୍‌ ବିସ୍‍ବାସ୍‍ କିନାନ୍‌ ୱାନି ଉଣ୍ତିଙ୍ଗ୍‌ ୱିଜୁ ଆନାତ୍‌ ।”
MAR 9:24 ଆୟାଦାପ୍ରେ କଡ଼ଦି ବୁବାସି ନାଣ୍ତ ଆଉଲି ଆଜି ଇର୍‌ଆନ୍‌, “ନାନ୍ ବିସ୍‍ବାସ୍‍ କିଜିନା, ନା ବିସ୍‍ବାସ୍‍ ନାଣ୍ତ କିଦେଙ୍ଗ୍‌ ନାଂଇ ସାହାଜ୍ୟ କିଆ ।”
MAR 9:25 ତାନେୱେନ୍‍କା ଲୋକ୍‌ଡର୍‌ ଅର୍‌ସେ ଉରୁକ୍‍ସି ୱାଜିନାର୍‍ ଇକା ସୁଡ଼ୁତାନ୍‌ନୋ ଜିସୁ ଆୟା ଦୁବାଦିଙ୍ଗ୍‌ ଆଦ୍‌ରିସି ଇର୍‌ଆନ୍‌, “ଏ ଗୁଲା ନି ବଇରା ଆତ୍ମା,” ନାନ୍ ନିଂଇ ଆଦେସ୍‌ ସିଜିନା, “ଇୟା କଡ଼ଦି ମାଣ୍‌କୁ ସହସି ସାଙ୍ଗ୍‍, ମାରି ଏସାଙ୍ଗ୍‍ବା ୱାନି ଲୋଇ ଡ଼ୁଗ୍‍ମା ।”
MAR 9:26 ଆବେଟ୍‌ ଆୟା ଦୁବା ଆଉଲି ଆଜି କଡ଼ଦିଙ୍ଗ୍‌ ଆଡ୍‍ଗି ପେର୍‌ଜି ପୋକ୍‌ସି ୱାନି ମେନ୍ଧଲ୍‍ ଲୋଇରାନ୍‌ ସତା ସର୍‌ଆତ୍‌, ମାରି ଆୟା କଡ଼ ସାତିୱାଜା ଆତାନ୍‌, ଇୟାୱାଜାକି ଏସୋ ଲୋକ୍‌ଡର୍‌ ଇର୍ହାର୍‌, “ୱାଣ୍ତ୍‍ରୁ ସାତାନ୍‍ ।”
MAR 9:27 ମାତର୍‌ ଜିସୁ ୱାନି କିୟୁ ଆସ୍‌ତାନ୍‌ନୋ କଡ଼ଦିଙ୍ଗ୍‌ ନିକ୍‍ତାନ୍‍, ମାରି ୱାଣ୍ତ୍ରୁ ନିଙ୍ଗ୍‍ତାନ୍‍ ।
MAR 9:28 ମାରି, ଜିସୁ ଇଲୁ ଲୋଇ ୱାତାନ୍‌, ୱାନି ସିସୁରି ଜିସୁଙ୍ଗୁଁ ଏନ୍‌ ନେସେଇ ୱାଜା ୱେନ୍‌ବାତାର୍‌, “ମାପ୍‌ ଇନ୍‍ଦାନିଙ୍ଗ୍‍ ଆୟା ଦୁବାଦିଙ୍ଗ୍‌ ପେର୍‍ଦେଙ୍ଗ୍‍ ଆଟ୍‍ଏତାପ୍‍ ?”
MAR 9:29 ଜିସୁ ସିସୁରିଙ୍ଗ୍‌ ୱେର୍‌ତାନ୍‌, “ଇୟାୱାଜା ଦୁବା ଆବ୍‍କା ପାର୍‌ତାନା ଶକ୍ତିଦାଣ୍ତ୍‍ ପେର୍‍ଦେଙ୍ଗ୍‍ ଆଟ୍‍ତେଙ୍ଗ୍‍ ଆନାତ୍‌, ମାରି ଆଇ ଉପାୟ ସାରି ସିଲେତ୍‌ ।”
MAR 9:30 ଜିସୁ ନି ୱାନି ସିସୁର୍‍ ଆୟା ବାଡି ଡ଼ିସ୍‌ସି ଗାଲିଲି ରାଜି ସାନ୍ଧିସିଜି ସରଆର୍‌ । ମାରି ଏମେ ବାଡିଦୁ ମାନାନ୍‌ ଏନ୍‍ବା ନେସ୍‍ମାପିର୍‍ ଇଜି ୱାଣ୍ତ୍ରୁ ବଦାକିଜିମାର୍‍ଆନ୍‍,
MAR 9:31 ମାତର୍‌ ୱାନ୍‌ ୱାନି ସିସୁରିଙ୍ଗ୍‌ ଇୟା ମାଟା ସିଜି ଶିକ୍ଷା ସିତାନ୍‌ । ମାରି ୱାନ୍‌ ଇର୍‌ଆନ୍‌, “ନାନ୍ ଯେ ମନୁସ୍ୟପୁତ୍ର ଲୋକା କିୟୁଦୁ ସର୍ପେ ଆଦେଙ୍ଗ୍‌ ସଲ୍‌ସିନାନ୍‌, ମାରି ୱାରୁ ନାଂଇ ଡାକ୍‌ନାର୍‌, ମାରି ନାନୁ ସାନା ମାତର୍‌ ନାନୁ ମୁନେଟି ୱେନ୍‌କା ମାରିଡ଼େସି ଜିବନ୍‌ଆଜି ନିଙ୍ଗ୍‍ନା ।”
MAR 9:32 ମାତର୍‌ ସିସୁର୍‍ ଆୟା ମାଟା ବୁଝାଏତାର୍‍ ମାରି ୱାନିଙ୍ଗ୍‌ ୱେନ୍‍ବାଦେଙ୍ଗ୍‍ ତିଲାଜି ମାର୍‌ଆର୍‌ ।
MAR 9:33 ୱେନ୍‌କା ଜିସୁ ନି ୱାନି ସିସୁର୍‍ କପର୍‍ନାହୁମ୍‍ ନାର୍‍ତୁ ୱାତାର୍‌ । ୱାନ୍‌ ଇନ୍‌ଡ୍ର ଇତାନ୍‌ନୋ ସିସୁରିଙ୍ଗ୍‌ ୱେନ୍‌ବାତାନ୍‌, “ମିର୍‌ ସାର୍‍ଦୁ ୱାନିୱାଲେ ଇନି ବିସୟତାନ୍ ୱାରଗିଜିସାଜି ମାର୍‌ଇଦେର୍‌ ?”
MAR 9:34 ମାତର୍‌ ସିସୁର୍‌ ଆଲେତା ମାର୍‍ଆର୍‍, ଇରିଙ୍ଗ୍‌ ୱାରି ଲୋଇ ଏନ୍‌ ପେରିକାନ୍‌, ଇୟା ବିସୟତୁ ୱାର୍‌ ସାରିଦୁ ଲୋଇ ଲୋଇ ୱାର୍‌ଗିଜି ସାଜି ମାର୍‌ଆର୍‌ ।
MAR 9:35 ଆବେନ୍‌ ଜିସୁ ବାସ୍‌ତାନ୍‌ନୋ ବାର ଲୋକୁ ସିସୁରିଙ୍ଗ୍‌ କୁକ୍‍ତାନ୍‍ ମାରି ୱାରିଙ୍ଗ୍‌ ଇର୍‌ଆନ୍‌, “ଜଦି ଏନ୍‌ ପେରିକାନ୍‌ ଆଦେଙ୍ଗ୍‌ ବଦା କିନାନ୍‌, ୱାଣ୍ତ୍ରୁ ୱିଜେରେ ମାଣ୍‌କୁ ନିଜେଦିଙ୍ଗ୍‍ ନିସ୍‍ରିକା ଆପିନ୍‌ ମାରି ୱିଜେରି ସେବାକିନିକାନ୍‍ ଆପିନ୍‌ ।”
MAR 9:36 ମାରି, ଜିସୁ ଉଣ୍ତ୍ରି ଇସ୍ରି କଡ଼ଦିଙ୍ଗ୍‌ ତାତାନ୍‍ନୋ ୱିଜେରି ଆଗ୍‌ଡ଼ି ନିଲ୍‍ପ୍‍ତାନ୍‍ ମାରି ୱାନିଙ୍ଗ୍‌ ଗାତୁ ବାସା କିଜି ୱାରିଙ୍ଗ୍‌ ଇର୍‌ଆନ୍‌,
MAR 9:37 “ଏନ୍‍ବା ନା ଦର୍‍ତୁ ଇୟାୱାଜା ଇସ୍ରି କଡ଼ରିଙ୍ଗ୍‌ ମାଣ୍‌କୁ ଅରେନ୍‍ ୱାନିଙ୍ଗ୍‌ ମାନାନାର୍‌, ୱାଣ୍ତ୍ରୁ ନାଂଇ ମାନାନାର୍‌; ମାରି, ଏନ୍‍ବା ନାଂଇ ମାନାନାର୍‌, ୱାଣ୍ତ୍ରୁ ନାଂଇ ଲାଡ୍‌ କିଏନ୍‌, ମାତର୍‌ ନା ପୋକ୍‌ତିମାନି ମାଲିକ୍‌ତିଙ୍ଗ୍‌ ମାନାନାର୍‌ ।”
MAR 9:38 ଯୋହନ ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ, ମା ଦଲ୍‍ତୁ ସିଲି ଲୋକ୍‌ତିଙ୍ଗ୍‌ ନି ଦର୍‌ତାନ୍‌ ଦୁବା ପେର୍‍ନିକା ସୁଡ଼ୁତାପ୍‌, ମାରି ୱାଣ୍ତ୍ରୁ ମା ଦଲ୍‍ତୁ ସିଲେନ୍‌ ଇଜି ମାପ୍‌ ୱାନିଙ୍ଗ୍‌ ମନା କିତାପ୍‍ ।”
MAR 9:39 ମାତର୍‌ ଜିସୁ ଇର୍‌ଆନ୍‌, “ୱାନିଙ୍ଗ୍‌ ମନା କିମାଟ୍‌,” ମାତର୍‌ ନା ଦର୍‌ତି ସାକ୍ତିଦାନ୍‍ ପାଣି କିନାନ୍‌ ୱାଣ୍ତ୍ରୁ ଦାପେ ଦାପେ ନା ବିରଦ୍‌ତାନ୍‌ ଇନିକା ଇନ୍‌ଡ୍ରେଙ୍ଗ୍‌ ଆଟ୍‍ଏନ୍‍, ଇୟାୱାଜା ଲୋକୁ ଏନ୍‍ ସିଲେନ୍‍ ।
MAR 9:40 ମାତର୍‌ ଏନ୍‌ ମା ବିରୁଦ୍‌ ମାଟା ଇନ୍‌ଏନ୍‌, ୱାଣ୍ତ୍ରୁ ମା ନିଜେତି ଲୋକୁ ।
MAR 9:41 ନାନ୍ ମିଙ୍ଗିଁ ସତ୍‌ ଇଜିନା, ମିର୍‌ କ୍ରିସ୍ତଦି ଲୋକୁ ଆତିମାନି ଉଣ୍ତିଙ୍ଗ୍‌, ଏନ୍‍ବା ନା ଉଣ୍ତିଙ୍ଗ୍‌ ଗିଲାସ୍‍ ଏର୍‌ ଉଣ୍ତେଙ୍ଗ୍‌ ସିନାନ୍‍, ୱାନ୍‌ ଏଣ୍ତେସ୍‌ କିଜିବା ନିଜେଦି ପୁରସ୍‌କାର୍‌ ପଇନିକା ଆରାଏନ୍‌ ।
MAR 9:42 ଜିସୁ ମାରି ଇର୍‌ଆନ୍‌, ଏମେ ଲୋକୁ ନା ଲାକ୍‌ତୁ ବିସ୍‍ବାସ୍‍ କିଜିମାନି ଇସ୍ରି ଲୋକ୍‌ତି ମାଣ୍‌କୁ ଅରେନ୍‍ ୱାନିଦି ବିସ୍‌ବାସ୍‌ତୁ ବାଧା ସିନିକାନ୍‍ଆନାନ୍‍, ୱାନି କକ୍‍ଲାଦୁ ଉଣ୍ତ୍ରି ପେରି ଗୁଡ଼ୁବେଲି କାଲୁ ତର୍‌ସି ୱାନିଙ୍ଗ୍‌ ସାମ୍‌ଦୁର୍‌ତୁ ପୋକ୍‌ତିଙ୍ଗ୍‌ ନେଗେଣ୍ତ୍‍ ଆତାତ୍‌ମାନ୍ଧି ।
MAR 9:43 ମାରି, ଜଦି ମି ଉଣ୍ତ୍ରି କିୟୁ ମିଙ୍ଗିଁ ପାପ୍‍ତି ପାଣି କିବିସ୍‍କିଜିମାନାତ୍‍, ଆଦେଙ୍ଗ୍‌ ଆୟା କିୟୁଦିଙ୍ଗ୍‍ କୟଜ ପୋକ୍‌ତୁ; ଇରିଙ୍ଗ୍‌ ରୁଣ୍ତି କିକୁ ଅସ ନରକଦୁ, ୱିଜୁଦିନ୍‌ ସିସୁକାସ୍‍ସି ମାନି ନର୍କଦୁ ସନି ବାଦ୍‌ଲୁ ଗୁଲା ଆଜି ଜିବନ୍‌ ଆସ୍‌ସି ମୁସ୍‍କୁପୁରତୁ ସନିକା ମି ଉଣ୍ତିଙ୍ଗ୍‌ ନେଗେତ୍‌ ।
MAR 9:44 ଇରିଙ୍ଗ୍‌ ନର୍କଦୁ ୱାରିଙ୍ଗ୍‌ ଏମେ ପିଡ଼୍‍କୁ ତିନେ ଆକେଙ୍ଗ୍‍ ଏସାଙ୍ଗ୍‍ବା ସାଉ, ମାରି ଆୟା ସିସୁ ଏସ୍‍ସାଙ୍ଗ୍‍ବା ନାମ୍‍ଏତ୍‍ ।
MAR 9:45 ମାରି, ମି ପାଦାମ୍‌ ଉଣ୍ତିଙ୍ଗ୍‌ ମି ବିସ୍‍ବାସ୍‍ ନାଷ୍ଟୁ ଆନାତ୍‌, ଆଦେଙ୍ଗ୍‌ ଆୟା ପାଦାମ୍‌କାଙ୍ଗ୍‌ କୟଜ ପୋକ୍‌ତୁ, ରୁଣ୍ତି ପାଦାମ୍‌କାଙ୍ଗ୍‌ ଅର୍‌ସେ ନରକଦୁ ସନି ବାଦ୍‌ଲୁ ସଟା ଆଜି ଜିବନ୍‌ ଅସି ମୁସ୍‌କୁପୁର୍‌ତୁ ସନିକା ନେଗେତ୍‌ ।
MAR 9:46 ଇରିଙ୍ଗ୍‌ ନର୍କଦୁ ୱାରିଙ୍ଗ୍‌ ଏମେ ପିଡ଼୍‍କୁ ତିନେ ଆକେଙ୍ଗ୍‍ ଏସାଙ୍ଗ୍‍ବା ସାଉ, ମାରି ଆୟା ସିସୁ ଏସ୍‌କାଙ୍ଗ୍‌ବା ନାମ୍‍ଏତ୍‍ ।
MAR 9:47 ମାରି, ମି କାଣ୍‌ଗା ଉଣ୍ତିଙ୍ଗ୍‌ ଜଦି ମି ବିସ୍‍ବାସ୍‍ ନାସ୍ଟୁ ଆଜିନାତ୍‍, ଆଦେଙ୍ଗ୍‌ ଆୟା କାଣ୍‍ଗାଦିଙ୍ଗ୍‍ ଉନ୍ଦ୍‍ଜ ପୋକ୍‌ତୁ; ରୁଣ୍ତି କାଣୁକୁ ଅସ ନରକଦୁ ପୋକ୍‌ନି ବାଦ୍‌ଲୁ ଉଣ୍ତ୍ରି କାଣ୍‌ଗା ମାନ୍‌ଜି ମାପୁରୁଦି ପୁର୍‌ତୁ ସନିକା ମିଙ୍ଗିଁ ନେଗେତ୍‌ ।
MAR 9:48 ଇରିଙ୍ଗ୍‌ ନର୍କଦୁ ୱାରିଙ୍ଗ୍‌ ଏମେ ପିଡ଼୍‍କୁ ତିନେ ଏସାଙ୍ଗ୍‍ବା ସାଉ । ମାରି, ଆୟା ସିସୁ ଏସ୍‌କାଙ୍ଗ୍‌ବା ନାମ୍‍ଏତ୍‍ ।
MAR 9:49 ପୁଜାସିନି ସର୍‌ତାନ୍‌ ନର୍‌ନି ୱାଜା ୱିଜେରେ ସିସୁଦାନ୍‌ ନରାଇ ଆନାର୍‌ ।
MAR 9:50 ସରୁ ଉଣ୍ତ୍ରି ନେଗ୍ରି ଜିନିସ୍‌, ମାତର୍‌ ସର୍‍ ଜଦି କାର୍‍ୟା ଆନିକା ଗୁଣୁ ଆରାକିନାତ୍‍, ତାନେଙ୍ଗ୍‌ ମାରିଡ଼େସି ଏଣ୍ତେସ୍‌ କାରିୟା କିଦେଙ୍ଗ୍‌ ଆଟ୍‌ନିଦେର୍‌ ? “ଆଦେଙ୍ଗ୍‌ ମିର୍‌ ସର୍‍ ୱାଜା ନେଗି ଗୁଣୁ ଆସ୍‌ତୁ ମାରି ୱିଜେରି ୱାଲେ ସାନ୍ତିଦାଣ୍ତ୍‍ ମାନ୍‌ଡ଼୍ରୁ ।”
MAR 10:1 ଜିସୁ ଆୟା ବାଡିଦାଣ୍ତ୍‍ ସର୍‌ଆନ୍‌ ନୋ ଜିହୁଦା ଇତିରାଜିଦୁ ସର୍‌ଆନ୍‌ ମାରି ଜର୍ଦନ ଗାଡା ନାଆଜି ୱାତାନ୍‌; ମାରି ନାଣ୍ତ ଲୋକୁ ମାରିଡ଼େସି ଜିସୁ ଲାକ୍‌ତୁ ଉଣ୍ତାତାର୍‍, ଜିସୁ ଆଗ୍‍ଡ଼ିରି ୱାଜାନେ ୱାରିଙ୍ଗ୍‌ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।
MAR 10:2 ଏସୋ ଲୋକୁ ପାରୁସିର୍‌ ଜିସୁ ଲାକ୍‌ତୁ ୱାଜି ୱାନିଙ୍ଗ୍‌ ପରିକା କିଜି ୱେନ୍‌ବାତାର୍‌, “ନିଜେଦି ଆଡ଼ିଦିଙ୍ଗ୍‍ ଡ଼ିସ୍‍ତେଙ୍ଗ୍‍ଁ ଇନିକା ମେମାରି ତରଟାନ୍‍ ମା ନିୟମ୍‌ ମାନାତ୍‌ ନୋ ?”
MAR 10:3 ଜିସୁ ୱାରିଙ୍ଗ୍‌ ଉତର୍‌ ସିତାନ୍‌, “ମୋସା ମିଙ୍ଗିଁ ଇନି ମାଟା ୱେର୍‍ତା ମାନାନ୍‌ ?”
MAR 10:4 ୱାର୍‌ ୱେର୍‌ତାର୍‌, “ଡ଼ିସ୍‌ନି ଆକୁ ରାସ୍‌ସି ଆଇମାଦିଙ୍ଗ୍‍ ଡ଼ିସ୍‍ତେଙ୍ଗ୍‍ଁ ମୋସା, ୱେର୍‍ତା ମାନାନ୍‌ ।”
MAR 10:5 ଜିସୁ ୱାରିଙ୍ଗ୍‌ ଇର୍ହାନ୍‌, “ମି ଜିବନ୍‍ତି ଆଟୁୱାଦିଙ୍ଗ୍‍ ସୁଡ଼୍‌ଜି ମୋସା ମିଙ୍ଗିଁ ଇୟାୱାଜା ବିଦି ରାସ୍ତା ଇଟ୍‌ଟା ମାନାନ୍‌ ।
MAR 10:6 ମାତର୍‌ ଏଣ୍ତେସ୍‌ ସାସ୍ତ୍ର ଇନାତ୍‍, ଆୟାୱାଜା ତିଆର୍‌ ଆନି ଆଗ୍‍ଡ଼ିରାନ୍‍ ମାପୁରୁ ୱାରିଙ୍ଗ୍‌ ମେମାରି ନି ଆଇମା କିଜି ତିଆର୍‌ କିତାନ୍‌ ।
MAR 10:7 ଆଦେଙ୍ଗ୍‌ ଅରେନ୍‍ ଇୟାଉଣ୍ତିଙ୍ଗ୍‌ ମେମାର୍‌ଏନ୍‌ ନିଜେଦି ବୁବାୟାୟେଙ୍ଗ୍‌ ଡ଼ିସ୍‌ସି ନିଜେଦି ଆଡ଼୍‌ସି ୱାଲେ ତେବାନାନ୍‌ ମାରି ଆୟା ରିଏର୍‌ ଅରେନ୍‌ଆନାର୍‍,
MAR 10:8 ୱାର୍‌ ରିଏର୍‌ ଉଣ୍ତ୍ରେନେ ଆନାର୍‌ । ମାରି ୱାର୍‌ ରିଏର୍‌ ଆଏର୍‌, ମାତର୍‌ ଉଣ୍ତ୍ରେନେ ଆନାର୍‌ ।
MAR 10:9 ମାପୁରୁ ଆମାକା ମିସାକିତା ମାନାନ୍‌, ଆକା ଲୋକୁ ୱାରିଙ୍ଗ୍‌ ୱେର୍‌ଏ କିମାକିର୍‍ ।”
MAR 10:10 ୱେନ୍‌କା ସିସୁର୍‍ ଇନ୍‌ଡ୍ର ଡ଼େସି ୱାତି ୱେନ୍‌କା ଜିସୁଙ୍ଗୁଁ ଇୟା ବିସୟତୁ ମାରିଡ଼େସି ୱେନ୍‌ବାତାର୍‌ ।
MAR 10:11 ଆବେନ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ଏନ୍‌ଆପିନ୍‌ ନିଜେଦି ଆଡ଼ିଦିଙ୍ଗ୍‍ ଡ଼ିସ୍‍ନାନ୍‍ ନୋ ମାରି ଉନ୍‍ଣ୍ତ୍ରିତାନିଙ୍ଗ୍‍ ପେଡ଼ି ଆନାନ୍‌, ଆୟା ମେମାରି ଆଡ଼ିସ୍‍ ବିରଦ୍‌ତାନ୍‌ ଦାରିପାଣି କିନାନ୍‍;
MAR 10:12 ମାରି, ଜଦି ଏମେ ଆଇମା ନିଜେତି କନ୍‍ଲିଙ୍ଗ୍‍ ଡ଼ିସ୍‍ସି ମାରି ଅରେନ୍‌ ମେମାର୍‌ଏନ୍‌ତିଙ୍ଗ୍‍ ପେଡ଼ି ଆନାତ୍‌, ଆୟା ଆଇମା ବା ଦାରି ପାପ୍‌ତୁ ଦସ୍‌ ଆନାତ୍‌ ।”
MAR 10:13 ଜିସୁ ଏଣ୍ତେସ୍‌ ଇସ୍ରି କଡ଼ରିଙ୍ଗ୍‌ କିୟୁ ଇଡ୍‌ଜି ଆର୍ସିବାଦ୍‌ କିନି ଉଣ୍ତିଙ୍ଗ୍‌, ଲୋକୁ ଇସ୍ରି କଡ଼ରିଙ୍ଗ୍‌ ଜିସୁ ଲାକ୍‌ତୁ ତାତାର୍; ମାତର୍‌ ସିସୁର୍‍ ଆୟା ଲୋକାଙ୍ଗ୍‌ ଆଦ୍‌ରିସ୍‌ତେଙ୍ଗ୍‍ ଆସ୍‌ତାର୍‌ ।
MAR 10:14 ସିସୁର୍‍ ଲୋକାଙ୍ଗ୍‌ ଲାଗାନିକା ସୁଡ଼୍‍ଜି, ଜିସୁ ସିସୁରି ମୁସ୍‌କୁ ରିସା ଆତାନ୍‌ନୋ ଇର୍ହାନ୍‌, “ଇସ୍ରି କଡ଼ରିଙ୍ଗ୍‌ ନା ଲାକ୍‌ତୁ ୱାଦେଙ୍ଗ୍‌ ସିଦୁ, ୱାରିଙ୍ଗ୍‌ ମାନା କିମାଟ୍‌; ଏନ୍ଧା ଇରିଙ୍ଗ୍‌ ମାପୁରୁତି ରାଜି ଇୟାୱାଜା ଇସ୍ରି କଡ଼ରିଦି ।
MAR 10:15 ନାନ୍ ମିଙ୍ଗିଁ ସତ୍‌ ଇଜିନା, ଏନ୍‌ ଜଦି ଇସ୍ରିକଡ଼ୱାଜା ମାପୁରୁଦି ରାଜିଦିଙ୍ଗ୍‍ ଆସ୍‍ଏନ୍‍, ୱାଣ୍ତ୍ରୁ ଏଣ୍ତେସ୍‌ କିଜିବା ଆବେନ୍‌ ଡ଼ୁଗୁଦେଙ୍ଗ୍‍ ଆଟ୍‍ଏନ୍‍ ।”
MAR 10:16 ଇୟା ୱେନ୍‌କା ଜିସୁ ୱାରିଙ୍ଗ୍‌ ଗାତୁ ଆସ୍‌ତାନ୍‌ନୋ କଡ଼ରି ମୁସ୍‌କୁ କିୟୁ ଇଡ୍‌ଜି କଡ଼ରିଙ୍ଗ୍‌ ଆର୍ସିବାଦ୍‌ କିତାନ୍‍ ।
MAR 10:17 ଜିସୁ ମାରିଡ଼େସି ସନିୱାଲେ ଅରେନ୍‍ ଲୋକୁ ଉରୁକ୍‍ସି ୱାଜି ଜିସୁଦି ଆଗ୍‌ଡ଼ି ମେଣ୍ତେଙ୍ଗ୍‌ ଗଟ୍‍କିଜି ୱାନିଙ୍ଗ୍‌ ୱେନ୍‌ବାତାନ୍‌, “ଏ ସତ୍‍ ଗୁରୁ, ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍ ଇନିକା କିଦେଙ୍ଗ୍‌ ଆନାତ୍‌ ?”
MAR 10:18 ଆବେନୁ ଜିସୁ ୱାନିଙ୍ଗ୍‌ ଇର୍ହାନ୍‌, “ନାଙ୍ଗିଁ ନେଗିକାନ୍‍ ଇଜି ଇନିଦାନିଙ୍ଗ୍‌ ଇଜିନି ?” ମାରି ମାପୁରୁଙ୍ଗୁଁ ଡ଼ିସ୍‍ତିଙ୍ଗ୍, “ମାରି ଆଇକାନ୍‍ ଏନ୍‌ବା ସତ୍‌ ।
MAR 10:19 ନିନ୍‌ ସାସ୍ତ୍ରଦି ନିୟମ୍‌କୁ ୱିଜୁ ନେସ୍ତିମାନି, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଦାରିପାଣି କିମାଟ୍‌, ଡଙ୍ଗାଁ କିମାଟ୍‌, ଏ ବିରଦ୍‌ତାନ୍‌ ମିସ୍‌ ମାଟା ଇନ୍‌ଡ୍ରେଙ୍ଗ୍‌ ଆଏତ୍‍, ଲୋକାଙ୍ଗ୍‌ ଆସା କିମାଟ୍‌, ନିଜେଦି ବୁବା ୟାୟାଏଙ୍ଗ୍‍ ମାନାଦୁ ।”
MAR 10:20 ଆୟା ମାଜନ୍‌ ଲୋକୁ ଇର୍‌ଆନ୍‌, “ଏ ଗୁରୁ, ଇୟାୱିଜୁ ନାନ୍ ମୁରୁଲିୱାଲେରାନ୍‍ ଇୟାୱିଜୁ ନିୟମ୍‌ ମାନାଜି ୱାଜିନା ।”
MAR 10:21 ଜିସୁ ୱାନି ତରିଣ୍ତ୍‍ ସୁଡ଼୍‌ଜି ୱାନିଙ୍ଗ୍‌ ଲାଡ୍‍କିଜି ଇର୍‌ଆନ୍‌, “ନି ଉଣ୍ତ୍ରିବିସୟ ଉଣାମାନାତ୍‌, ସାଙ୍ଗ୍‍ ନି ୱିଜୁ ଦନ୍‌ ସମ୍ପତ୍ତି ପର୍‍ସୋ କାକୁର୍ତି ଲୋକାଙ୍ଗ୍‌ ଡାବୁଙ୍ଗୁଁ ବାଟାକିଜି ସିଆ, ଆବେଟ୍‌ ନିନ୍‌ ମୁସ୍‌କୁପୁର୍‌ତି ଦନ୍‍ ପଇନି; ମାରି, ୱାଜି ନା ୱେନ୍‌କା ବୁଲାଆ ।”
MAR 10:22 ଜିସୁଦି ଇୟା ମାଟା ୱେର୍‌ଆନ୍‌ ନୋ ଆୟା ଲୋକ୍‌ତି ମକମ୍‌ ୱାର୍‌ତା ସର୍‌ଆତ୍‌ ମାରି ୱାନ୍‌ ଦୁଃକ୍‍ ଆଜି ଇନ୍‌ଡ୍ର ସର୍‌ଆନ୍‌, ଇରିଙ୍ଗ୍‌ ୱାନିଙ୍ଗ୍‌ ନାଣ୍ତ ଦନ୍‍ ସମ୍ପତ୍ତି ମାର୍‌ଆତ୍‌ ।
MAR 10:23 ଜିସୁ ସାରିବେଡ଼୍‍ତି ସୁଡ଼ୁତାନ୍‌ ନୋ ନିଜେଦି ସିସୁରିଙ୍ଗ୍‌ ଇର୍ହାନ୍‌, “ଏମେ ଲୋକାଙ୍ଗ୍‌ ନାଣ୍ତ ଦନ୍‍ ମାନାତ୍‌, ୱାରୁ ବେସି କାସ୍ଟୁଦାନ୍‍ ମାପୁରୁତି ରାଜିଦୁ ସନ୍‌ଡ଼୍ରେଙ୍ଗ୍‌ ଆଟ୍‍ନାର୍‍ ।”
MAR 10:24 ଜିସୁଦି ମାଟା ୱେନ୍‌ଜି ସିସୁର୍‍ କାବାଆତା ସର୍‌ଆର୍‌ । ମାତର୍‌ ଜିସୁ ମାରିଡ଼େସି ୱାରିଙ୍ଗ୍‌ ଇର୍‌ଆନ୍‌, “ଏ ନା କଡ଼ର୍‌, ମାପୁରୁଦି ରାଜିଦୁ ସନ୍‌ଡ଼୍ରେଙ୍ଗ୍‌ ସତେନେ କାସ୍ଟୁ !
MAR 10:25 ଉଣ୍ତ୍ରି ସୁଜିଦି ବର୍‌ ସିଜି ଉଟ୍‌ ଡ଼ୁଗୁନିକା ଉସାସ୍‌, ମାତର୍‌ ଅରେନ୍‍ ମାଜନ୍‌ ଲୋକୁ ମାପୁରୁଦି ରାଜିଦୁ ସନିକା କାସ୍ଟୁ ।”
MAR 10:26 ଇୟା ମାଟା ୱେନ୍‌ଜି ସିସୁର୍‍ ନାଣ୍ତ କାବା ଆତାର୍‌ ନୋ ୱାରିୱାରି ଲୋଇ ୱାର୍‌ଗିଜି ସାତାର୍‌, “ଆର୍‌ତିଙ୍ଗ୍‌ ଏନ୍‌ ରକିୟା ପଇଦେଙ୍ଗ୍‍ ଆଟ୍‍ନାନ୍‍ ?”
MAR 10:27 ଜିସୁ ସିସୁରିଙ୍ଗ୍‌ ସାଡ଼୍‌କୁ ସାଡ଼୍‌କୁ ସୁଡ଼୍‍ଜି ଇର୍ହାନ୍‌, “ଇକା ଲୋକାଦି ଉଣ୍ତିଙ୍ଗ୍‌ ଆଟ୍‌ୱା, ମାତର୍‌ ମାପୁରୁଦିଙ୍ଗ୍‌ ଉଣ୍ତିଙ୍ଗ୍‌ ଉସାସ୍‌, ଇରିଙ୍ଗ୍‌ ମାପୁରୁ ୱିଜୁ କିଦେଙ୍ଗ୍‍ ଆଟ୍‍ନାନ୍‍ ।”
MAR 10:28 ଇୟା ମାଟା ୱେନ୍‌ଜି ପିତର୍‌ ଜିସୁଙ୍ଗୁଁ ଇର୍ହାନ୍‌, “ସୁଡ଼୍‌ଆ, ମାପ୍‌ ୱିଜୁ ଡ଼ିସ୍‍ସି ନି ୱେନ୍‍କା ୱାତା ମାନାପ୍‌ ।”
MAR 10:29 ଜିସୁ ଇର୍ହାନ୍‌, “ନାନ୍ ମିଙ୍ଗିଁ ସତ୍‌ ଇଜିନା,” ଏମେ ଲୋକୁ ନା ୱେନ୍‌କା ୱାନି ଉଣ୍ତିଙ୍ଗ୍‌ “ମାରି ନା ସୁସମାଚାର୍‌ ୱେର୍‍ନି ଉଣ୍ତିଙ୍ଗ୍‌ ଏନ୍‍ବା ଇଲୁ, ତଡ଼ାନ୍‌ତିଙ୍ଗ୍‌ ନି ତାଙ୍ଗିଁ, ବୁବା ନି ୟାୟେଙ୍ଗ୍‌, କଡ଼କକ୍ରାରିଙ୍ଗ୍‌ ମାରି ବୁମିବାଡ଼ା ଡ଼ିସ୍‌ତାମାନାନ୍‌,
MAR 10:30 ମାରି ଇଲେଇ ଇୟା ଜଗ୍‌ତୁ ଦାପେ ଦାପେନେ ଶହେ ଗୁଣୁତାନ୍‍ ଇଲୁ, ତଡ଼ାନ୍‍, ତାଙ୍ଗିଁ, ୟାୟା, ମାରିନ୍‌, ଗାଡ଼ି, ମାରି ଭୁମିବାଡ଼ିଦି ୱାଲେ କାସ୍ଟୁ ବା ପଇନାନ୍‍ । ମାରି ୱାନି ଦିନ୍‌ତୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପଇନାନ୍‍ ।
MAR 10:31 ମାତର୍‌ ଇଲେଇ ଏମେ ଲୋକ୍‌ଡର୍‌ ଆଗ୍‌ଡ଼ି ମାନାର୍‌, ୱାର୍‌ ୱେନ୍‌କା ଆନାର୍‌, ମାରି ୱେନ୍‌କା ମାନି ଲୋକ୍‌ଡର୍‌ ଆଗ୍‌ଡ଼ି ଆନାର୍‌ ।”
MAR 10:32 ଇୟା ୱେନ୍‌କା ୱାର୍‌ ଜିରୁସାଲାମ୍‍ତୁ ସନିୱାଲେ ସାରିଦୁ ମାରାଆନ୍‍ ମାରି ଜିସୁ ସିସୁରି ଆଗ୍‌ଡ଼ି ଆଗ୍‌ଡ଼ି ସଲ୍‍ସି ମାର୍‌ଆନ୍‌, ମାରି ଶିଶୁର୍‌ କାବାଆତା ସର୍‍ଆର୍‍, ମାରି ୱାନି ୱେନ୍‌କା ବୁଲାଜି ମାର୍‍ଇ ଲୋକ୍‌ଡର୍‌ ତିଲାତାସର୍‍ଆର୍‍ । ଜିସୁ ମାରିଡ଼େସି ବାର ଲୋକାଙ୍ଗ୍‌ କୁକ୍‍ସି, ୱାନି ଉଣ୍ତିଙ୍ଗ୍‌ ଇନିକା ଇନିକା ୱିଜୁ ଗଟେଆଦେଙ୍ଗ୍‍ ସଲ୍‍ସିନାତ୍‍, ଆୟା ବିସୟତାନ୍ ୱିଜୁ ସିସୁରିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌ ।
MAR 10:33 ଜିସୁ ଇର୍ହାନ୍‌, “ୱେନ୍‌ଡ୍ରୁ, ମାପ୍‌ ଜିରୁସାଲମ୍‌ତୁ ସଲ୍‍ସିନାପ୍‍; ଆବେ ମନୁଷ୍ୟପୁତ୍ର ଜେ ନାନ୍ ପେରି ପେରି ଜାଜକ ମାରି ସାସ୍ତ୍ରିରି କିୟୁଦୁ ସେର୍‍ପାନା, ମାରି ୱାରୁ ନାଂଇ ସାନି ଦଣ୍ଡ୍‌ ସିନି ଉଣ୍ତିଙ୍ଗ୍‌ ଆଇ ଅଣଜିହୁଦି ଲୋକ୍‌ତି କିୟୁଦୁ ସର୍ପେ କିଜି ସିନାର୍‍, ନାଂଇ ବିଚାର୍‍ କିଜି ଡାକ୍‌ନାର୍‌ ।
MAR 10:34 ମନୁଷ୍ୟପୁତ୍ରଦିଙ୍ଗ୍‍ ଜେ ନାନ୍ ୱାର୍‌ ନାଂଇ ସେମାର୍‌ କିନାର୍‍, ନା ମୁସ୍‌କୁ ପୁସ୍‍ନାର୍‍, ନାଂଇ କୋର୍‌ଡାଦାଣ୍ତ୍‍ ଡାକ୍‌ନାର୍‌ ମାରି ନାଂଇ ସାପିସ୍‌ କିନାର୍‍, ମାରି ମୁନେଟି ୱେନ୍‌କା ୱାନ୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନାନ୍‌ ।”
MAR 10:35 ଜେବଦଦି ମାରିସିର୍‌ ଯାକୁବ ନି ଯୋହନ ଜିସୁ ଲାକ୍‌ତୁ ୱାତା ରୋ ଇର୍ହାର୍‌, “ଏ ଗୁରୁ,” ମା ଉଣ୍ତିଙ୍ଗ୍‌ ଇନିକା ବା କିଆ, “ମାପ୍‌ ନିବାନୁ ଇନିକା ଲସ୍‍ନାପ୍‍, ଆୟାକା ମା ଉଣ୍ତିଙ୍ଗ୍‌ କିଆ ।”
MAR 10:36 ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, “ନାନ୍, ମି ଉଣ୍ତିଙ୍ଗ୍‌ ଇନିକା କିନା ଇଜି ମିର୍‌ ଇନିକା ବଦା କିଜିନିଦେର୍‍ ?”
MAR 10:37 ୱାରୁ ଜିସୁଙ୍ଗୁଁ ଇର୍ହାର୍‌, “ମାପୁରୁତି ରାଜିଦୁ ଏସିୱାଲେ ନିନ୍‌ ମହିମାଦି ରାଜାଗଦିଦୁ ବାସ୍‌ନି ମା ମାଣ୍‌କୁ ଅରେନ୍‍ ଲୋକ୍‌ତିଙ୍ଗ୍‌ ନି ଉଣେରି କିୟୁ ତରିନ୍‍ ମାରି ଅରେନ୍‍ ଲୋକ୍‌ତିଙ୍ଗ୍‌ ନି ଡେବ୍‍ରିକିୟୁ ତରିନ୍‍ ବାସ୍ତେଙ୍ଗ୍‍, ମାଙ୍ଗିଁ ଇୟା ବର୍‌ ସିଦା ।”
MAR 10:38 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ମିର୍‌ ଇନିକା ଲସ୍‌ସିନିଦେର୍‌, ଆୟାକା ମିର୍‌ ନେସ୍‌ତେଙ୍ଗ୍‌ କି ବୁଝାଦେଙ୍ଗ୍‍ ଆଟ୍‍ଏଜିନିଦେର୍‍ । ନାନ୍ ଏମେ ଦୁଃକୁ ବୋଗାଜି ଉଣ୍ତେଙ୍ଗ୍‌ ସନା, ଆୟା ଦୁଃକୁତିଙ୍ଗ୍‌ ବୋଗାଜି ଉଣ୍ତେଙ୍ଗ୍‌ ଆଟ୍‌ନିଦେର୍‌ ନୋ ? ନାନ୍ ଏମେ ସାନି ଡୁବନ୍‌ତୁ ଡୁବନ୍‌ ଅନା ମିର୍‌ ଇନିକା ଆୟା ଡୁବନ୍‌ତୁ ଅତେଙ୍ଗ୍‌ ଆଟ୍‌ନିଦେର୍‌ ନୋ ?”
MAR 10:39 ୱାର୍‌ ଜିସୁଙ୍ଗୁଁ ଇର୍ହାର୍‌, “ହୁଁ ମାପ୍‌ କିଦେଙ୍ଗ୍‌ ଆଟ୍‍ନାପ୍‍ ।” ଜିସୁ ୱାରିଙ୍ଗ୍‌ ଇର୍‌ଆନ୍‌, ନାନ୍ ଏମେ ଦୁଃକୁ ବୋଗାନା, “ମିର୍‌ ଆବେନୁ ଭୋଗାନିଦେର୍‍, ମାରି ନାନ୍ ଏମେ ସାନି ଡୁବନ୍‌ତୁ ଡୁବନ୍‌ ଅସିନା, ମିର୍‌ ନା ୱାଜା ଆବେନୁ ଡୁବନ୍‌ ଅତେଙ୍ଗ୍‌ ଆଟ୍‌ନିଦେର୍‌;
MAR 10:40 ମାତର୍‌ ନା ଉଣେରି କିୟୁ ତରିଣ୍ତ୍‍ ନି ଡେବିରି କିୟୁ ତରିଣ୍ତ୍‍ ବାସିସ୍‍ କିଦେଙ୍ଗ୍‌ ନା ଅଦିକାର୍ ବିସୟ୍‌ ସିଲେତ୍‌; ମାତର୍‌ ଏମେ ଲୋକ୍‌ତି ଉଣ୍ତିଙ୍ଗ୍‌ ମା ବୁବା ଆୟା ବାଡି ତିଆର୍‌ କିତା ଇଟ୍‌ତାମାନାନ୍‌, ଆୟା ବାଡିଦୁ ୱାର୍‌ ବାସ୍‍ନାର୍‍ ।”
MAR 10:41 ଇୟା ମାଟା ୱେର୍‌ଆର୍‌ ନୋ ଆଇ ଦାସ୍‌ଲୋକ୍‌ ସିସୁର୍‌ ଜାକୁବ ନି ଯୋହନତି ମୁସ୍‌କୁ ରିସା ଆତାର୍‌ ।
MAR 10:42 ଜିସୁ ୱାରିଙ୍ଗ୍‌ ଲାକ୍‌ତୁ କୁକ୍‍ତାନ୍‍ନୋ ଇର୍‌ଆନ୍‌, “ଏମେ ଲୋକୁ ଅଣଜିହୁଦି ମାଣ୍‌କୁ ଶାସନ କିନି ଲୋକାୱାଜା ୱେଙ୍ଗ୍‌ଁନାର୍‌, ୱାର୍‌ ୱାରି ମୁସ୍‌କୁ ଶାସନ୍‍ କିଜିନାର୍‍ ମାରି ୱାରି ରାଜାର୍‌ ୱାରି ମୁସ୍‌କୁ ଶାସନ୍‍ କିଜିନାର୍‍, ମିର୍‌ ଇୟାକା ନେସ୍‌ତିମାନିଦେର୍‌ ।
MAR 10:43 ମାତର୍‌ ମି ମାନୁ ଆୟାୱାଜା ସିଲେତ୍‌; ମାତର୍‌ ମି ମାଣ୍‌କୁ ଏନ୍‌ ଜଦି ପେରିକାନ୍‌ ଆଦେଙ୍ଗ୍‌ ବଦା କିନାନ୍‍, ୱାଣ୍ତ୍‌ରୁ ମି ସେବାକିନିକାନ୍‍ ଆପିନ୍‌ ।
MAR 10:44 ମାରି ମି ମାଣ୍‌କୁ ଏନ୍‌ଆପିନ୍‌ ପେରିକାନ୍‌ ଆଦେଙ୍ଗ୍‌ ବଦାକିନାନ୍‌, ୱାଣ୍ତ୍‍ରୁ ୱିଜେରି ଗତିମୁରୁଲି ଆପିନ୍‌ ।
MAR 10:45 ଇରିଙ୍ଗ୍‌ ମନୁସ୍ୟପୁତ୍ର ଜେ ନାନ୍ ସେବା ପ‍ଇଦେଙ୍ଗ୍‌ ରେଏ, ମାତର୍‌ ସେବା କିଦେଙ୍ଗ୍‌ ୱାତାମାନା ମାରି ୱିଜୁ ଲୋକାଙ୍ଗ୍‌ ରକିୟା କିିଜି ନିଜେଦି ଜିବନ୍‌ ସିଦେଙ୍ଗ୍‍ ଇଜି ୱାତାମାନା ।”
MAR 10:46 ଜିସୁ ମାରି ୱାନି ସିସୁର୍‍ ଜିରିହୋ ଗାଡ଼୍‌ତୁ ୱାତାର୍‌, ମାରି ୱାର୍‌ ନାଣ୍ତଲୋକୁ ୱାଲେ ସଲ୍‍ସି ମାର୍‌ଆର୍‌, ଯିରିହୋତି ଆୟା ଗାଡ଼୍‌ ଡ଼ିସ୍‍ସି ସନିୱାଲେ, ଟିମାୟଦି ମାରିନ୍‌ ବାର୍ଟୀମୟ ଦରତିକାନ୍‍ ଅରେନ୍‍ କାଣା ଭିକାରି ସାରି ଲାକ୍‌ତୁ ବାସ୍ତା ମାର୍‌ଆନ୍‌ ।
MAR 10:47 ୱାନ୍‌ ଜେ ନାଜରିତିୟ ଜିସୁ, ଆୟା ସାରିଦୁ ସଲ୍‌ସିନାନ୍‌ ଇଜି ୱେନ୍‌ଜି ଆୟା କାଣା ବିକାରି ନାଣ୍ତ୍‍ ଆଉଲି ଆଜି ଇର୍‌ଆନ୍‌, “ଏ ଦାଉଦତି ମାରିନ୍‌ ଜିସୁ, ନାଙ୍ଗିଁ ଦୟା କିଆ ।”
MAR 10:48 ଆବେନୁ ଏସଲୋକ୍‌ ୱାନିଙ୍ଗ୍‌ ଆଲେଜ ମାନ୍‌ଡ଼୍ରେଙ୍ଗ୍‌ ଇଜି ଆଦିରିସ୍‌ତେଙ୍ଗ୍‍ ଆସ୍‌ତାର୍‌, ମାତର୍‌ ୱାଣ୍ତ୍ରୁ ମାରି ନାଣ୍ତଦାଣ୍ତ୍‍ ଆଉଲି ଆଜି ଇର୍‌ଆନ୍‌, “ଏ ଦାଉଦତି ମାରିନ୍‌, ନାଙ୍ଗିଁ ଅଡ଼ପ୍‍ ଦୟା କିଆ !”
MAR 10:49 ଆବେନୁ ଜିସୁ ତେବାତାନ୍‍ ନୋ ଇର୍‌ଆନ୍‌, “ୱାନିଙ୍ଗ୍‌ କୁକ୍‍ତୁ ।” ୱାର୍‌ ଆୟା କାଣା ଭିକାରିତିଙ୍ଗ୍‍ କୁକ୍‍ସି ଇର୍‌ଆନ୍‌, “ସାସ୍‌ ଆସ୍‌ଆ, ନିଂଆ, ଜିସୁ ନିଂଇ କୁକ୍‍ସିନାନ୍‍ ।”
MAR 10:50 ଆବେଟ୍‌ ୱାଣ୍ତ୍ରୁ ନିଜେଦି ସାଦର୍‌ ପୋକ୍‌ତାନ୍‌ ନୋ ନିଂଇଜି ଜିସୁ ଲାକ୍‌ତୁ ୱାତାନ୍‌ ।
MAR 10:51 ଜିସୁ ୱାନିଙ୍ଗ୍‌ ୱେନ୍‌ବାତାନ୍‌, “ନାନ୍ ନି ଉଣ୍ତିଙ୍ଗ୍‌ ଇନିକା କିନା ଇଜି ନିନୁ ବଦା କିଜିନି ?” ଆୟା କାଣା ଲୋକୁ ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ, ନାନ୍ ଏଣ୍ତେସ୍‌ ସୁଡ଼ୁଦେଙ୍ଗ୍‌ ଆଟ୍‍ନା ।”
MAR 10:52 ଜିସୁ ୱାନିଙ୍ଗ୍‌ ଇର୍‌ଆନ୍‌, “ସାଙ୍ଗ୍‍ଆ, ନି ବିସ୍‌ବାସ୍‌ ନିଙ୍ଗିଁ ନେଗେନ୍‍ କିତାମାନାତ୍‌ ।” ଆୟା ଦାପ୍ରେନେ କାଣା ୱାନି ସୁଡ଼ୁନି ସାକ୍ତି ପ‍ଇତାନ୍‌ ନୋ ସାରିଦୁ ଜିସୁ ୱେନ୍‌କା ୱେନ୍‌କା ବୁଲାଦେଙ୍ଗ୍‌ ଆସ୍‌ତାନ୍‌ ।
MAR 11:1 ଏସିୱାଲେ ଜିସୁ ମାରି ୱାନି ସିସୁର୍‍ ଜିରୁସାଲମ୍‍ତି ଲାକ୍‌ତୁ ମାନି ଜୀତ ଗରନ୍‍ତି ଲାକ୍‌ତୁରି ବେତ୍‍ପାଗି ନି ବେତନିୟା ଇନି ନାର୍‍ତୁ ଇତାର୍‌, ନାସ୍ତିୱାଲେ ଜିସୁ ୱାନି ସିସୁରି ଲୋଇ ରିଏରିଙ୍ଗ୍‍ ଇୟା ମାଟା ୱେର୍‌ସି ପୋକ୍‌ତାନ୍‌ ।
MAR 11:2 “ମି ଆଗ୍‌ଡ଼ି ମାନି ଆୟା ନାଟ ସାନ୍‌ଡ୍ରୁ; ଆବେ ଇତି ଦାପ୍ରେ, ଆମା ମୁସ୍‌କୁ ଏନ୍‍ବା ବାସ୍‍ଇ ମାନି ଉଣ୍ତ୍ରି ଗଦପିଲାଦିଙ୍ଗ୍‍ ତର୍‍ନି ମାନିକା ସୁଡ଼୍‍ନିଦେର୍‍, ଆୟା ଗଦପିଲାଦିଙ୍ଗ୍‍ କୁତ୍‍ସ ନା ଲାକ୍‌ତୁ ତାଗାଟ୍‍ ।
MAR 11:3 ମାରି, ଏନ୍‌ ଜଦି ମିଙ୍ଗିଁ ଏନ୍ଦା କୁତ୍‍ସି ଅସିନିଦେର୍‍ ଇଜି ୱେନ୍‍ବାନାନ୍‌, ଇନିଦେର୍‌, ପ୍ରବୁଙ୍ଗ୍‌ ଦର୍‌କାର୍‌ ମାନାତ୍‌, ମାରି ୱାନ୍‌ ଆୟା ଗଦପିଲାଦିଙ୍ଗ୍‍ ମାରିଡ଼େସି ୱେଡ଼ା କିଏନ୍‍ଣ୍ତା ବେନୁ ପୋକ୍‌ନାନ୍‌ ।”
MAR 11:4 ସିସୁର୍‍ ଆୟା ନାର୍‍ତୁ ସରାରୋ ଉଣ୍ତ୍ରି ଇଲୁ ସେର୍‍ଲା ଲାକ୍‌ତୁ ଆତ୍‌ରେ ଦୁୱାର୍‍ତୁ ଉଣ୍ତ୍ରି ଗଦପିଲାଦିଙ୍ଗ୍‍ ତର୍‍ତି ମାର୍‌ଇକା ସୁଡ଼ୁତାରୋ ଗଦଦିଙ୍ଗ୍‌ କୁତ୍‍ତାର୍‍ ।
MAR 11:5 ଆବେନ୍‌ ଆୟା ଲାକ୍‌ତୁ ନିରିଇ ମାନି ଲୋକା ମାଣ୍‌କୁ ଏସ ଲୋକୁ ୱାରିଙ୍ଗ୍‌ ୱେନ୍‌ବାତାର୍‌, “ଗଦପିଲାଦିଙ୍ଗ୍‍ ଇନିକା କିଜିନିଦେର୍‍, ଗଦପିଲାଦିଙ୍ଗ୍‍ ଇନ୍‍ଦାନିଙ୍ଗ୍‍ କୁତ୍‍ସିନିଦେର୍‍ ?”
MAR 11:6 ଜିସୁ ଇନିକା ଇନ୍‌ଡ୍ରେଙ୍ଗ୍‌ ଇର୍‌ଆମାର୍‌ଆନ୍‌, ସିସୁର୍‌ ଆୟାୱାଜା ୱାରିଙ୍ଗ୍‌ ଇର୍ହାର୍‌, ତାନେ ୱେନ୍‌କା ଲୋକୁ ୱାନିକାଙ୍ଗ୍‌ ଡ଼ିସ୍‍ସି ସିତାର୍‍ ।
MAR 11:7 ସିସୁର୍‍ ଆୟା ଗଦପିଲାଦିଙ୍ଗ୍‍ ଜିସୁ ଲାକ୍‌ତୁ ତାତାର୍‌ ରୋ ମାରି ଗଦଦି ମୁଟାମ୍‌ ମୁସ୍‌କୁ ନିଜେ ନିଜେଦି ୱାତିଙ୍ଗ୍‍ ପାର୍‍ସି ସିତାର୍‍, ମାରି ଜିସୁ ଆୟା ଗଦ ମୁସ୍‌କୁ ବାସ୍‌ତାନ୍‌ ।
MAR 11:8 ମାରି ଏସଲୋକ୍‌ ଜିସୁଙ୍ଗୁଁ ମାନାଜି ଇଜି ନିଜେ ନିଜେଦି ୱାତିଙ୍ଗ୍‍ ରାସ୍ତାଦୁ ପାର୍‍ସି ସିତାର୍‍ ମାରି ଏସୋଲୋକ୍‍ ମାରାତି ରଡେଙ୍ଗ୍‍ ୱିଜୁ କାତ୍‍ସି ତାତାର୍‌ ନୋ ରାସ୍ତାଦୁ ପାର୍‍ତାର୍‍ ।
MAR 11:9 ମାରି, ଜିସୁଦି ଆଗ୍‌ଡ଼ି ନି ୱେନ୍‌କା ବୁଲାଜି ସଲ୍‍ସି ମାନି ଲୋକ୍‌ଡର୍‌ ନାଣ୍ତ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ହୋଶାନା ପ୍ରବୁଦି ଦର୍‌ତାନ୍‌ ଏନ୍‌ ୱାଜିନାନ୍‍, ମାପୁରୁ ୱାନିଙ୍ଗ୍‌ ଆର୍ସିବାଦ୍‌ କିପିନ୍‍ !
MAR 11:10 ମା ପୁର୍ବେଦି ବୁବା ଦାଉଦତି ଆମା ରାଜି ୱାଜିନାତ୍‍, ଆୟାତାନେଙ୍ଗ୍‍ ଧନ୍ୟ, ଆୟା ମୁସ୍‌କୁପୁର୍‌ତୁ ମାନି ନେଗି ବୁବାଦି ଧନ୍ୟ । ନାଣ୍ତ ଲୋକାମାନୁ ହୋଶାନା ।”
MAR 11:11 ଜିସୁ ଜିରୁସାଲାମ୍‍ତୁ ଇତାନ୍‌ ମାରି ମନ୍ଦିର୍‌ ଲୋଇ ଡ଼ୁଗିତାନ୍‍ ମାରି ସାରିବେଡ଼୍‍ତି ୱିଜୁ ଜିନିସ୍‌ତିଙ୍ଗ୍‌ ସୁଡ଼ୁତାନ୍‌ ନାସ୍ତିୱାଲେ ମିଲ୍‌ମିଲିକା ଆଜି ୱାଜି ମାର୍‌ଆତ୍‌ ଆକା ବାର୍‍ ଲୋକୁ ସିସୁରିୱାଲେ ବେତନିୟା ଇନି ନାର୍‍ତୁ ସର୍‌ଆନ୍‌ ।
MAR 11:12 ଆୟା ମାର୍‍ନାଣ୍ଡିଙ୍ଗ୍ ଜିସୁ ମାରି ସିସୁର୍‍ ବେତନିୟା ନାର୍‍ତାଣ୍ତ୍‍ ଜିରୁସାଲମ୍‌ତାନ୍‌ ୱାନିୱାଲେ ଜିସୁଙ୍ଗୁଁ ନାଣ୍ତ ବାଙ୍ଗାଁ କାଟ୍‍ତାତ୍‍ ।
MAR 11:13 ମାରି, ଜିସୁ ଆକଣ୍‍କୁ ଉଣ୍ତ୍ରି ଆକୁମାନି ତଗା ମାରାନ୍‍ତିଙ୍ଗ୍‍ ସୁଡ଼ୁତାନ୍‌, ତଗା ମାରାନ୍‌ତୁ ଫଳ୍‍ ମାନାତ୍‍ନୋ ସିଲେତ୍‌, ଆୟା ଆସାଦାନ୍‍ ଜିସୁ ତଗା ମାରାନ୍‌ ଲାକ୍‌ତୁ ସର୍‌ଆନ୍‌ । ମାତର୍‌ ଲାକ୍‌ତୁ ୱାତାନ୍‌ ନୋ ଆୟା ତଗା ମାରାନ୍‌ତୁ ଆକୁ ଡ଼ିସ୍‌ସି ମାରି ଇନି ଫଳ୍‍ ବା ପଏତାନ୍‍, ଇରିଙ୍ଗ୍‌ ଆୟା ବେଡ଼ାଦୁ ତଗା ପଲ୍‌ ଆସ୍‌ନି ଦିନ୍‌ ରେଏତା ମାର୍‌ଆତ୍‌ ।
MAR 11:14 ଜିସୁ ଆୟା ତଗା ମାରାନ୍‍ତିଙ୍ଗ୍‍ ସୁଡ଼୍‌ଜି ଇର୍‌ଆନ୍‌, “ନି ଲାକ୍‌ତୁରାନ୍‌ ଏମେ ଲୋକୁ ଏସ୍‌କାଙ୍ଗ୍‌ବା ପଲ୍‌ ତିନ୍‍ମାକିର୍‍ ।” ଜିସୁଦି ଇୟା ମାଟା ସିସୁର୍‍ ୱେର୍‌ଆର୍‌ ।
MAR 11:15 ତାନେ ୱେନ୍‌କା ୱାର୍‌ ଜିରୁସାଲମ୍‍ତୁ ୱାତାର୍‌, ମାରି ଜିସୁ ମନ୍ଦିର୍‌ ଲୋଇ ସର୍‌ଆର୍‌ନୋ ଆବେ ପୁଜା ସିନି ଗରିଆ ମେଣ୍ତେଙ୍ଗ୍‍ ପର୍‌ଜି ମାନି ଲୋକାଙ୍ଗ୍‌ ଆତ୍‌ରେ ସପ୍‌ତା ପୋକ୍‌ତାନ୍‌ । ମାରି ଟାକା ପର୍‌ନି ଲୋକାଦି ଟେବୁଲ୍‍ ନି ପାଉରା ପର୍‌ନି ଲୋକାଦି ପାସ୍‌ରା ଡର୍‍ ପେର୍‌ଜି ପକ୍‌ତାନ୍‌,
MAR 11:16 ମାରି ମନ୍ଦିର୍‌ ଲୋଇରି ଦୁଆର୍‍ ସିଜି ଇନି ଜିନିସ୍‌ ଅତେଙ୍ଗ୍‌ ସାରି ଏଙ୍ଗ୍‌ବା ସିଏତାନ୍‌,
MAR 11:17 ଆୟାୱେନ୍‌କା ଜିସୁ ଶିକ୍ଷା ସିଜି ସିଜି ଇର୍‌ଆନ୍‌, “ଦାର୍ମୁସାସ୍ତ୍ରଦୁ ଇକା ରାସାତାମାନାତ୍‌, ନା ମନ୍ଦିର୍‌ ଦୁନିଆଦି ୱିଜୁ ଜାତିଦି ଲୋକ୍‌ତି ଉଣ୍ତିଙ୍ଗ୍‌ ପାର୍‌ତାନା ଇଲୁ ଇଜି ୱେଙ୍ଗ୍‌ଁନାତ୍‌ ? ମାତର୍‌ ମିର୍‌ ତୋ ଆକା ଡଙ୍ଗାଁରି ଇଲୁୱାଜା କିତିମାନିଦେର୍‍ ।”
MAR 11:18 ପେରି ପେରି ଜାଜକର୍‌ ମାରି ସାସ୍ତ୍ରିର୍‍ ଇୟା ମାଟା ୱେର୍‍ଆର୍‍ରୋ ଜିସୁଙ୍ଗୁଁ ଏଣ୍ତେସ୍‌ ସାପିସ୍‌ କିଦେଙ୍ଗ୍‌ ଆଟ୍‍ନାର୍‍, ଆୟା ଉଣ୍ତିଙ୍ଗ୍‌ ସାରି ପ‍ଇଦେଙ୍ଗ୍‌ ଆସ୍‌ତାର୍‌; ମାତର୍‌ ଆବେ ମାର୍‍ଇ ଲୋକଡର୍‍ ୱାନି ସିକିୟାଦିଙ୍ଗ୍‍ କାବା ଆତାର୍‌ ନୋ ୱାର୍‌ ୱାନିଙ୍ଗ୍‌ ତିଲାଜି ମାର୍‌ଆର୍‌ ।
MAR 11:19 ଆୟା ନାଣ୍ଡିଙ୍ଗ୍ ମିଲିମିଲିକା ଜିସୁ ମାରି ୱାନି ସିସୁର୍‌ ଆୟା ଗାଡ଼୍‌ ଡ଼ିସ୍‌ସି ସଲ୍‍ସିମାର୍‍ଆର୍‍ ।
MAR 11:20 ମାରି ଅର୍‍ଲେନ୍‍ ସାଲ୍‍ଦି ଆୟା ସାରି ସିଜି ସନିୱାଲେ ୱାର୍‌ ଜିସୁ ଏମେ ତଗା ମାରାନ୍‌ତିଙ୍ଗ୍‍ ଆନାଦୁରିଆ ସିତାମାର୍ହାନ୍‍ ଆୟା ମାରାନ୍‌ ମଦଲ୍‍ତାନ୍‍ ୱାର୍‍ସି ସରିକା ସୁଡ଼ୁତାର୍‌ ।
MAR 11:21 ନାସ୍ତିୱାଲେ ପିତର୍‌ ଆଗ୍‍ଡ଼ିରି ମାଟା ଏତ୍‌କିଜି ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ, ସୁଡ଼୍‌ଆ, ନିନ୍‌ ଏମେ ତଗା ମାରାନ୍‍ତିଙ୍ଗ୍‍ ଆନାଦୁରିଆ ସିତି ମାର୍‍ଇ, ଆୟା ତଗା ମାରାନ୍‌ ୱାର୍‍ସି ସର୍‌ଆ ମାନାତ୍‌ ।”
MAR 11:22 ଜିସୁ ଶିଶୁରିଙ୍ଗ୍‌ ୱେର୍‌ତାନ୍‌, “ମାପୁରୁଦି ମାନୁ ବିଶ୍ୱାସ୍‍ କିଦୁ ।
MAR 11:23 ନାନ୍ ମିଙ୍ଗିଁ ସତ୍‌ ଇଜିନା, ଜେ ଏମେ ଲୋକୁ ଇୟା ଗରନ୍‍ତିଙ୍ଗ୍‍ ନିନ୍‌ ନିଙ୍ଗ୍‍ଜି ସାମ୍‌ଦୁର୍‌ତୁ ସଲ୍‍ସି ଆର୍‌ଆ ଇଜି ଇନାନ୍‌, ମାରି ୱାନି ନିଜେଦି ମନ୍ ଲୋଇ ଅଡ଼୍‌ବିଏଣ୍‌ଗା, ଏମେକା ଇର୍‌ଆ ମାନା, ଆକା ଆନାତ୍‌ ଇଜି ବିସ୍‍ବାସ୍‍ କିନାନ୍‍, ୱାନି ଉଣ୍ତିଙ୍ଗ୍‌ ଆକା ସତ୍‌ ଆନାତ୍‌ ।
MAR 11:24 ଆଦେଙ୍ଗ୍‌, ନାନ୍ ମିଙ୍ଗିଁ ଇଜିନା, ମିର୍‌ ଏମେ ଏମେକା ପାର୍‌ତନା କିଜି ଲସ୍‌ନିଦେର୍‌, ଆକା ୱିଜୁ ପଇନାପ୍‍ ଇଜି ବିସ୍‍ବାସ୍‍ କିଦୁ, ଆୟାୱିଜୁ ପଇନିଦେର୍‌ ।
MAR 11:25 ମାରି, ମିର୍‌ ଏମେ ସମୟତୁ ପାର୍‌ତନା କିଦେଙ୍ଗ୍‌ ନିଙ୍ଗ୍‍ନିଦେର୍‍, ଜଦି ଏ ବିରୁଦ୍‍ତାନ୍‍ ମିଙ୍ଗିଁ ଇନି ମାଟା ମାନାତ୍‌, ୱାନିଙ୍ଗ୍‌ କେମା କିଦୁ, ଆଦେଙ୍ଗ୍‌ ମି ମୁସ୍‌କୁପୁର୍‌ତି ବୁବା ବା ମିଙ୍ଗିଁ ୱିଜୁ ପାପ୍‌କେମା କିନାନ୍‍ ।
MAR 11:26 ମାତର୍‌ ମିର୍‌ ଜଦି ଆଇ ଲୋକାଙ୍ଗ୍‌ କେମା କିଇଦେର୍‍, ଆଦେଙ୍ଗ୍‌ ମି ମୁସ୍‌କୁପୁର୍‌ତି ବୁବା ବା ମିଙ୍ଗିଁ ପାପ୍‌ ୱିଜୁ କେମା କିଏନ୍‌ ।”
MAR 11:27 ମାରିଡ଼େସି ଜିସୁ ମାରି ୱାନି ଶିଶୁର୍‌ ଜିରୁସାଲମ୍‍ତୁ ୱାତାର୍; ଜିସୁ ମନ୍ଦିର୍‌ ଲୋଇ ବୁଲାନି ୱାଲେ ପେରି ଯାଜକ, ସାସ୍ତ୍ରିର୍‍ ମାରି ନେତାର୍‌ ୱାନି ଲାକ୍‌ତୁ ୱାଜି ୱେନ୍‌ବାତାର୍‌,
MAR 11:28 “ନିନ୍‌ ଏମେ ଅଦିକାର୍‍ତାନ୍‍ ଇୟାୱିଜୁ କିଜିନି ? ମାରି ଇୟାୱିଜୁ ପାଣି କିଦେଙ୍ଗ୍‌ ନିଂଇ ଏନ୍‌ ଇୟା ଅଦିକାର୍ ସିତା ମାନାନ୍‌ ?”
MAR 11:29 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାନ୍ ମିଙ୍ଗିଁ ଉଣ୍ତ୍ରି ମାଟା ୱେନ୍‌ବାନା, ନା ମାଟାଦି ଉତର୍‌ ସିଦାଟ୍‍, ଆଦେଙ୍ଗ୍‌ ନାନ୍ ଏମେ ଅଦିକାର୍‍ତାନ୍‍ ଇୟାୱିଜୁ କିଜିନା, ଆକା ମିଙ୍ଗିଁ ଇନା ।
MAR 11:30 ଜୋହନତି ଡୁବନ୍‌ ମୁସ୍‌କୁପୁରୁତାନ୍‌ ନା ଲୋକା ମାଣ୍‌କୁ ଆତାତ୍‌ ? ନାଂଇ ୱେର୍‍ତୁ ।”
MAR 11:31 ଆବେନୁ ୱାର୍‌ ୱାରି ୱାରି ଲୋଇ ୱାର୍‍ଗିସାଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ଜଦି ମୁସ୍‌କୁପୁର୍‌ତାନ୍‌ ଇଜି ଇନିକା, ଆବେଟ୍‌ ୱାଣ୍ତ୍ରୁ ଇନାନ୍‌, ମିର୍‌ ଇନ୍‍ଦାନିଙ୍ଗ୍‍ ଜୋହନତିଙ୍ଗ୍‍ ବିସ୍‍ବାସ୍‍ କିଇତିଦେର୍‍ ?
MAR 11:32 ଜଦି ଯୋହନତି ଡୁବନ୍‌ ଲୋକାମାଣ୍‌କୁ ଆତାମାନାନ୍‌ ଇଜି ଇଡ୍ରେଙ୍ଗ୍‍ ମାପ୍‌ ଲୋକାଙ୍ଗ୍‌ ତିଲାଜି ମାର୍ହାପ୍‍ ? ଇରିଙ୍ଗ୍‌ ୱିଜୁ ଲୋକୁ ମାନାଜି ମାର୍‌ଆର୍‌ ଯେ ଯୋହନ ଅରେନ୍‍ ବାବବାଦି ଇଜି ।
MAR 11:33 ୱାର୍‌ ଜିସୁଙ୍ଗୁଁ ଉତର୍‌ ସିତାର୍‍, “ମାପ୍‌ ନେସ୍‌ଏପ୍‌ ।” ଆୟାୱେନ୍‌କା ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାନ୍ ଏମେ ଅଦିକାର୍‍ତାଣ୍ତ୍‍ ଇୟାୱିଜୁ ପାଣି କିଜିନା, ଆକା ନାନ୍ ବା ମିଙ୍ଗିଁ ୱେର୍‌ଏ ।”
MAR 12:1 ଇୟା ୱେନ୍‌କା ଜିସୁ ୱାରିଙ୍ଗ୍‌ କାତାଦାନ୍‌ ଇର୍‌ଆନ୍‌, ଅରେନ୍‍ ଲୋକ୍‌ ଉଣ୍ତ୍ରି ଅଙ୍ଗୁର୍‍ କିଡ଼ିଇ ଆରାମ୍‌ କିଜି ଆୟା କିଡ଼ିଇଦି ସାରିବେଡ଼୍‍ତି କୋଅଟି ତିଆର୍‌ କିତାନ୍‌, ମାରି ଅଙ୍ଗୁର୍‍ରସ୍‍ ଇଡ୍‌ଦେଙ୍ଗ୍‌ ଗୁଟା କାରିତାନ୍‍ ମାରି କାପ୍‍କିନି ଗୁଡ଼ା ତିଆର୍ କିତାନ୍‌, ଆୟାୱେନ୍‌କା ୱାନ୍‌ ବାଗ୍‍ତୁ ପାଣିକିନିୱାରିଙ୍ଗ୍‌ ଆୟା ଡଡି ବାଗ୍‌ତାନ୍‌ ସିତାନ୍‌ନୋ ଆଇଦେସ୍‌ତୁ ସୋର୍ହାନ୍‌ ।
MAR 12:2 ତାନେ ୱେନ୍‌କା ବାଗ୍‌ତୁପାଣିକିନି ୱାରି ମାଣ୍‌କୁ ଅଙ୍ଗୁର୍‍ କିଡ଼ିଇଦାନ୍‍ ଫଳ୍‍ ନିଜେତି ବାଗ୍‌ ଲୋସ୍‍ନି ତାନି ଉଣ୍ତିଙ୍ଗ୍‌ ୱାନ୍‌ ଅରେନ୍‍ ଗତିମୁରୁଲିଙ୍ଗ୍‌ ନାସ୍ତିୱାଲେ ପାଣିକିନିୱାରି ଲାକ୍‌ତୁ ପକ୍‌ତାନ୍‌ ।
MAR 12:3 ମାତର୍‌ ୱାର୍‌ ଆୟା ଗତିମୁରୁଲିଙ୍ଗ୍‌ ଆସ୍‌ତାରୋ ଡାକ୍‍ତାର୍‍ନୋ ୱାର୍‌ଇ କିୟୁଦୁ ପକ୍‌ତାର୍‌ ।
MAR 12:4 ଆୟାୱେନ୍‌କା ସାଉକାର୍‍ ମାରି ଅର୍‍ସୁ ମାରି ଅରେନ୍‍ ପାଣିକିନି ଗତିମୁରୁଲିଙ୍ଗ୍‌ ପୋକ୍‌ତାନ୍‌; ୱାର୍‌ ଆୟାୱାନିଙ୍ଗ୍‌ ବା ୱାନି ତାଲା ପାଟ୍‍ତାର୍‍ ମାରି ୱାନିଙ୍ଗ୍‌ ନିସାର୍‍ କିତାର୍ ।
MAR 12:5 ଇୟା ୱେନ୍‌କା ମାରି ଅରେନ୍‍ ୱାନିଙ୍ଗ୍‌ ପକ୍‌ତାନ୍‌, ୱାର୍‌ ଆୟାୱାନିଙ୍ଗ୍‌ ବା ସାୟାମାର୍‌ଗା ଡାକ୍‍ତାର୍‍ । ସାଉକାର୍‍ ମାରିଡ଼େସି ମାରି ଏସ ଲୋକାଙ୍ଗ୍‌ ପକ୍‌ତାନ୍‌; ୱାରି ଲୋଇ ଏସୋ ଲୋକାଙ୍ଗ୍‌ ଡାକ୍‍ତାର୍‍ ମାରି ଏସ ଲୋକାଙ୍ଗ୍‌ ସାୟାମାର୍‌ଗା କାତ୍‍ତାର୍‍ ।
MAR 12:6 ସାଉକାର୍‍ତି ଲାକ୍‌ତୁ ଅରେନ୍‍ନେ ବାକି ମାନାନ୍‌, ୱାଣ୍ତ୍ରୁ ୱାନି ନିଜେଦି ଲାଡ୍‍ତି ମାରିନ୍‌ । ନା ମାରିନ୍‍ତିଙ୍ଗ୍‍ ୱାର୍‌ ଏଣ୍ତେସ୍‌ବା ମାନାନାର୍‌, ଇୟାୱାଜା ଅଡ଼୍‍ବିଜି ସାରାସାରି ୱେନ୍‌କା ଆୟାୱାରି ଲାକ୍‌ତୁ ନିଜେଦି ମାରିନ୍‍ତିଙ୍ଗ୍‍ ପୋକ୍‌ତାନ୍‌ ।
MAR 12:7 ମାତର୍‌ ଆୟା ବାଗ୍‍ତୁ ପାଣିକିନି ଲୋକୁ ୱାରି ୱାରି ଲୋଇ ୱାର୍‍ଗିତାର୍‍, ଇକାନ୍‌ ସାଉକାର୍‍ତି ମାରିନ୍‌, ରାଦୁ, ୱାନିଙ୍ଗ୍‌ ସାୟାମାର୍‌ଗା ଡାକ୍‍ନାଟ୍‍; ଆବେଟ୍‌ ସାଉକାର୍‍ତି ଦନ୍‍ ୱିଜୁ ମା କିୟୁଦୁ ୱାନାତ୍‌ ।
MAR 12:8 ଆବେଟ୍‌ ୱାର୍‌ ସାଉକାର୍‍ତି ମାରିନ୍‍ତିଙ୍ଗ୍‍ ଆସ୍ତାର୍‍ନୋ ସାୟାମାର୍‌ଗା ଡାକ୍‌ତାର୍‌ ମାରି ମାଡ଼ାଦିଙ୍ଗ୍‍ ଅଙ୍ଗୁର୍‍ କିଡ଼ିଇ ଡ଼ିସ୍‌ସି ଆଇ ବାଡିଦୁ ପେର୍‌ତା ପକ୍‌ତାର୍‌ ।
MAR 12:9 ଜିସୁ ୱେନ୍‌ବାତାନ୍‌, “ଇୟା ୱେନ୍‌କା ଆୟା ଅଙ୍ଗୁର୍‍ କିଡ଼ିଇଦି ସାଉକାର୍‍ ଇନିକା କିନାନ୍‌ ?” ଆୟା ସାଉକାର୍‍ ୱାଜି ଏଣ୍ତେସ୍‌ବା ଆୟାୱାରିଙ୍ଗ୍‌ ସାୟାମାର୍‌ଗା ଡାକ୍‍ନାନ୍‍ ମାରି ଆୟା ଅଙ୍ଗୁର୍‍ କିଡ଼ିଇଦିଙ୍ଗ୍‍ ଆଇ ଲୋକାଙ୍ଗ୍‌ ବାଗ୍‍ତୁ ପାଣିକିନି ଉଣ୍ତିଙ୍ଗ୍‌ ସିନାନ୍‍ ।
MAR 12:10 ମିର୍‌ ଦାର୍ମୁସାସ୍ତ୍ରଦୁ ଇୟା ମାଟା ବା ପଡ଼ାଇଦେର୍‌, ଇଲୁ ତର୍‍ନି ମିସ୍ତ୍ରିର୍‍ ଏମେ କାଲୁଦିଙ୍ଗ୍‌ ଦର୍‌କାର୍‌ ଆଏତ୍‍ ଇର୍ହାର୍‌, ଆକାନେ କନାଦି ମୁଲ୍‌ କାଲୁ ଆତାତ୍‌;
MAR 12:11 ପ୍ରବୁ ମାଣ୍‌କୁ ଇକା ଆତାତ୍‌, ମାରି ଆକା ମା ଉଣ୍ତିଙ୍ଗ୍‌ ଏସା କାବାଦି ମାଟା !
MAR 12:12 ଆବେନ୍‌ ଜିହୁଦି ନେତାର୍‌ ୱାନିଙ୍ଗ୍‌ ଆସ୍‌ତେଙ୍ଗ୍‌ ଇଜି ବଦାକିତାର୍‌, ମାତର୍‌ ୱାର୍‌ ଲୋକାଙ୍ଗ୍‌ ତିଲାତାର୍‌; ମାତର୍‌ ଜିସୁ ଇୟା ମାଟା ୱାରିଙ୍ଗ୍‌ ସୁଡ଼୍‌ଜି ଇନ୍‍ଜିନାନ୍‍ ଇଜି ୱାର୍‌ ନେସ୍‌ତେଙ୍ଗ୍‌ ଆଟ୍‌ତାର୍‌, ମାରି ୱାର୍‌ ତିଲାଜି ଜିସୁଙ୍ଗୁଁ ଡ଼ିସ୍‌ସି ସରଆର୍‌ ।
MAR 12:13 ୱେନ୍‌କା ଏସ ପାରୁସିର୍‌ ମାରି ହେରୋଦ ରାଜା ଦଲ‍ତି ମାଣ୍‌କୁ ଏସ ଲୋକାଙ୍ଗ୍‌ ଜିସୁଦି ମାଟାଦି ଭୁଲ୍‍ତିଙ୍ଗ୍‍ ଆସ୍‌ସି ଗୁଟାଦୁ ପକ୍‍ତେଙ୍ଗ୍‍ ଇଜି ୱାର୍‌ ପକ୍‍ତା ମାର୍‌ଆର୍‌ ।
MAR 12:14 ୱାର୍‌ ୱାତା ରୋ ଜିସୁଙ୍ଗୁଁ ଇର୍ହାର୍‌, “ଏ ଗୁରୁ, ମାପ୍‌ ନେସ୍‌ନାପ୍‌, ନିନ୍‌ ସତ୍‌ ମାରି ଏମେ ଲୋକାଙ୍ଗ୍‌ ବା ତିଲାଇ; ଇରିଙ୍ଗ୍‌ ନିନ୍‌ ଏମେ ଲୋକାଙ୍ଗ୍‌ ବା ମକମ୍‌ ସୁଡ଼ୁଏଣ୍‌ଗା କିନି, ମାତର୍‌ ସତ୍‌ତାନ୍‌ ମାପୁରୁତି ସାରିଦି ବିସୟ ଶିକ୍ଷା ସିନି । ମାଙ୍ଗିଁ ୱେର୍‌ଆ କାଇସର୍‍ ରାଜାଏଙ୍ଗ୍‍ ସିସୁଟୁ ସିଦେଙ୍ଗ୍‍ ନିୟମ୍‍ନୋ ସିଲେତ୍‌ ?”
MAR 12:15 ମାଡୁ ସିନା ଡୋ ସିଲେ ? ମାତର୍‌ ଜିସୁ ୱାରି ସାଲାକି ନେସ୍‌ତାନ୍‌ନୋ ୱାରିଙ୍ଗ୍‌ ଇର୍‌ଆନ୍‌, “ଏନ୍ଦା ନାଂଇ ଉରିଦୁ ପକ୍‍ତେଙ୍ଗ୍‍ ବଦାକିଜିନିଦେର୍‌ ? ଉଣ୍ତ୍ରି ଟାକା ଅଦ୍‌ଲି ଡାବୁଙ୍ଗ୍‌ ନା ଲାକ୍‌ତୁ ତାଗାଟ୍‌, ନାନ୍ ଆକା ସୁଣା ।”
MAR 12:16 ଆବେଟ୍‌ ୱାର୍‌ ଉଣ୍ତ୍ରି ଟାକା ଅଦ୍‌ଲି ତାତାର୍‌ । ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, “ଇୟା ଟାକା ମୁସ୍‌କୁ ଏ ଦର୍‌ ମାନାତ୍‌ ମାରି ଏ ବମା ମାନାତ୍‌ ?” ୱାର୍‌ ଜିସୁଙ୍ଗୁଁ ଇର୍ହାର୍‌, “କାଇସର୍‍ ରାଜାଦି ।”
MAR 12:17 ଜିସୁ ୱାରିଙ୍ଗ୍‌ ଇର୍‌ଆନ୍‌, “କାଇସର୍‍ ରାଜାଦି ଆମାକା, ଆକା କାଇସର୍‍ ରାଜାଦିଙ୍ଗ୍‍ ସିଦୁ, ମାରି, ମାପୁରୁଦି ଏମେକା, ଆୟାକା ମାପୁରୁଦିଙ୍ଗ୍‌ ସିଦୁ ।” ନାସ୍ତିୱାଲେ ୱାର୍‌ ଜିସୁ ମାଟାଦାନ୍‌ ନାଣ୍ଡ କାବାଆତାର୍‌ ।
MAR 12:18 ତାନି ୱେନ୍‌କା ସାତି ସର୍‌ଇ ଲୋକୁ ମାରିଡ଼େସି ଜିବନ୍‌ଆଜି ନିଙ୍ଗ୍‍ନାର୍‍ ଇଜି ବିସ୍‍ବାସ୍‍ କିଇ ସାଦୁକିର୍‍ ୱାନି ଲାକ୍‌ତୁ ୱାଜି ଇୟା ମାଟା ଆସ୍‌ସି ୱେନ୍‍ବାଦେଙ୍ଗ୍‍ ଆସ୍‌ତାର୍‌,
MAR 12:19 “ଏ ଗୁରୁ, ମୋସା ମା ଉଣ୍ତିଙ୍ଗ୍‌ ଇୟା ନିୟମ୍‌ ୱାଟା ମାନାନ୍‌ ଯେ, ଜଦି ଏମେ ଲୋକା ତଡ଼ାନ୍‍ ସାନାନ୍‌, ମାରି ୱାନି ଆଡ଼ିସ୍‍ ଜିବନ୍‌ ମାନାତ୍‌, ମାରି ଆୟା ରାଣ୍ତି ଆଇମା ମାନୁ କଡ଼କକ୍‌ରା ସିଲେର୍‌, ଆଦେଙ୍ଗ୍‌ ଆୟା ୱାନି ତଡ଼ାନ୍‍ ୱାନି ଆଡ଼ିସ୍‍ ଇଡ୍‌ନାନ୍‌ ମାରି ୱାନିଙ୍ଗ୍‌ ଏମେ କଡ଼କକ୍‌ରା ଜନମ୍‌ ଆନାର୍‌, ନିଜେଦି ତଡ଼ାନ୍‍ ଉଣ୍ତିଙ୍ଗ୍‌ କୁଟୁମ୍‌ କିଦେଙ୍ଗ୍‌ ଆନାତ୍‌ ।
MAR 12:20 ସୁଡ଼୍‍ଦୁ, ସାତ୍‌ଲୋକ୍‌ ତଡ଼ାନ୍‌କୁ ମାର୍ହାର୍‌; ୱିଜେରିଙ୍ଗ୍‍ ପେରି ତଡ଼ାନ୍‍ ପେଡ଼ି ଆତାନ୍‍ନୋ କଡ଼କକ୍‍ରା ଜନମ୍‌ ଆଏଣ୍ତା ସାତା ସର୍ହାନ୍‍;
MAR 12:21 ୱେନ୍‌କା ୱାନି ୱେନ୍‌କାରି ତଡ଼ାନ୍‍ ତାନିଙ୍ଗ୍‌ ପେଡ଼ି ଆତାନ୍‍ନୋ କଡ଼କକ୍‍ରା ଜନମ୍‌ ଆଏଣ୍ତା ସାତା ସର୍‌ଆନ୍‌ । ଆୟାୱାଜା ମାରି ଅରେନ୍‍ବା ପେଡ଼ି ଆତାନ୍‌,
MAR 12:22 ମାରି ଆୟାୱାଜା ସାତ୍ ଲୋକୁ ତଡ଼ାନ୍‍କୁ ୱିଜେରେ ତାନିଙ୍ଗ୍‌ ପେଡ଼ି ଆଜି କଡ଼କକ୍‍ରା ଜନମ୍‌ ଆଏଣ୍ତା ସାତାସର୍‍ଆର୍‍; ୱିଜେରି ସାରା ସାରି ଆୟା ଆଇମା ବା ସାତା ସୋର୍ହାତ୍‌ ।
MAR 12:23 ମାରିଡ଼େସି ଜିବନ୍‌ ଆନି ଦିନ୍‍ତୁ ଏସିୱାଲେ ସାତିସରି ଲୋକ୍‍ୱିଜୁ ମାରି ଅର୍‍ସୁ ଜିବନ୍‌ଆଜି ନିଙ୍ଗ୍‍ନାର୍‍, ନାସ୍ତିୱାଲେ ଆୟା ଆଇମା ଏମେ ଲୋକ୍‌ତି ଆଡ଼ିସ୍‍ ଆନାତ୍‌ ? ସାତ୍ ଲୋକୁ ତଡ଼ାନ୍‍କୁ ୱିଜେରେତୋ ଆୟା ଆଇମାଦିଙ୍ଗ୍‍ ପେଡ଼ି ଆତାମାର୍ହାର୍‌ ।”
MAR 12:24 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ମାପୁରୁଦି ଦାର୍ମୁସାସ୍ତ୍ର, ମାରି ମାପୁରୁଦି ସାକ୍ତି ନେସ୍‌ଏଣ୍ତା ଭୁଲ୍‍ କିତିମାନିଦେର୍‌ ।
MAR 12:25 ଆଦେଙ୍ଗ୍‌ ସାତି ଲୋକାମାଣ୍‌କୁ ଡ଼େସିଜିବନ୍‌ଆଜି ନିଙ୍ଗ୍‍ତି ୱେନ୍‌କା ଲୋକୁ ପେଡ଼ି ଆଏର୍‌ କି ପେଡ଼ି ବା କିବିସ୍‍ କିଏର୍‌, ମାତର୍‌ ୱାର୍‌ ୱିଜେରେ ମୁସ୍‌କୁପୁର୍‌ତି ଦୁତ୍‍କା ୱାଜା ତେବାନାର୍‌ ।
MAR 12:26 ମାତର୍‌ ସାତିକାର୍‍ ଜେ ମାରିଡ଼େସିଜିବନ୍‌ ଆଜି ନିଙ୍ଗ୍‍ନାର୍‍, ମିର୍‌ ଆୟା ବିସୟତୁ ମୋଶାଦି ବଇଦୁ ଦୁପା କାସ୍‍ନି ବିସୟ ପଡ଼ାଇଦେର୍‌ ନୋ ? ମାପୁରୁ ୱାନିଙ୍ଗ୍‌ ଏଣ୍ତେସ୍‌ ଇର୍‌ଆନ୍‌, ମାପ୍‌ ଅବ୍ରାହାମତି ମାପୁରୁ, ଇସ୍‍ହାକ୍‍ତି ମାପୁରୁ ମାରି ଜାକୁବଦି ମାପୁରୁ ।
MAR 12:27 ୱାଣ୍ତ୍ରୁ ସାତିଲୋକ୍‍ତି ମାପୁରୁ ଆଏନ୍‍, ମାତର୍‌ ଜିବନ୍‍ମାନି ଲୋକା ମାପୁରୁ । ମିର୍‌ ବେସି ବାମା ଆଜିନିଦେର୍‍ ।”
MAR 12:28 ନାସ୍ତିୱାଲେ ସାସ୍ତ୍ରିରି ମାଣ୍‌କୁ ଅରେନ୍‍ ଲାକ୍‌ତୁ ୱାତାନ୍‌ ନୋ ୱାରି ୱିଜୁ ମାଟା ୱେନ୍‌ଜି ମାର୍‌ଆନ୍‌ ମାରି ସାଦ୍ଦୁକୀରିଙ୍ଗ୍‍ ଜିସୁ ଟିକ୍‍ ଉତର୍‌ ସିତାମାନାନ୍‌, ଇକା ନେସ୍‌ତେଙ୍ଗ୍‌ ଆଟ୍‍ତାନ୍‍ନୋ ୱାଣ୍ତ୍ରୁ ଜିସୁଙ୍ଗୁଁ ୱେନ୍‌ବାତାନ୍‌, “ୱିଜୁ ଆଦେସ୍‌ ଲୋଇରାନ୍‌ ଆମାକା ପେରି ଆଦେସ୍‌ ?”
MAR 12:29 ଜିସୁ ଇର୍‌ଆନ୍‌, “ପେରି ଆଦେସ୍‌ ଇକା, ଏ ଇସ୍ରାଏଲ୍‌, ୱେଣ୍ତ୍ରୁ; ପ୍ରବୁ ମା ମାପୁରୁ ଅରେନ୍‍ନେ ପ୍ରବୁ ମାନାନ୍‌;
MAR 12:30 ମାରି, ମିର୍‌ ମି ପୁରା ମେନ୍ଧଲ୍‍, ପୁରା ଜିବନ୍‌, ପୁରା ମନ୍‍ ମାରି ପୁରା ବପୁ ସିଜି ପ୍ରବୁ ମି ମାପୁରୁଙ୍ଗୁଁ ଲାଡ୍‍କିଦୁ ।
MAR 12:31 ମାରି ଉଣ୍ତ୍ରି ପେରି ଆଦେସ୍‌ ଆଜିନାତ୍‍, ମିର୍‌ ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତିୱାଜା ଜିବନ୍‍ନୋଦୁ । ଇୟା ରୁଣ୍ତି ଆଦେସ୍‌ ଡ଼ିସ୍‌ତିଙ୍ଗ୍‌ ଆଇ ମାରି ପେରି ଆଦେସ୍‌ ଇନିକା ସିଲେତ୍‍ ।”
MAR 12:32 ଆବେଟ୍‌ ଆୟା ସାସ୍ତ୍ରି ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ, ଆକା ସତ୍‌, ୱାଣ୍ତ୍ରୁ ନେ ଅରେନ୍‍ ମାରି ୱାନିଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‍ବା ସିଲେନ୍‌, ଇକା ନିନ୍‌ ସତ୍‌ ୱେର୍ତିମାନି ।
MAR 12:33 ମାରି, ଅରେନ୍‍ ଲୋକ୍‌ତିଙ୍ଗ୍‌ ପୁରା ମେନ୍ଧଲ୍‍, ପୁରା ବୁଦି ମାରି ପୁରା ବପୁ ସିଜି ମାପୁରୁଦିଙ୍ଗ୍‌ ଲାଡ୍‍ କିନିକା ମାରି ଲାକ୍‌ତୁରି ଲୋକାଙ୍ଗ୍‌ ଲାଡ୍‌ କିନିକା ଇୟାୱିଜୁ ଦୁପ୍‍ଣି ଆଡ଼ିକ୍‍ନିକା ନି ପୁଜା ସିନି ମାଣ୍‌କୁ ନାଣ୍ତ ପେରିକା ।”
MAR 12:34 ସାସ୍ତ୍ରି ବୁଦିଦାନ୍‍ ଇର୍‌ଆମାନାନ୍‌ ଇଜି ନେସ୍‌ସି ଜିସୁ ୱାନିଙ୍ଗ୍‌ ଇର୍‌ଆନ୍‌, “ନିନ୍‌ ମାପୁରୁଦି ରାଜିଦାନ୍‍ ଆକ ସିଲି ।” ଆବେଟ୍‌କୁ ଜିସୁଙ୍ଗୁଁ ଏନ୍‍ବା ଇନି ପ୍ରସ୍ନ ୱେନ୍‍ବାଦେଙ୍ଗ୍‍ ସାସ୍‌ କିଏତାର୍‌ ।
MAR 12:35 ମାତର୍‌ ଜିସୁ ମନ୍ଦିର୍‌ତୁ ସିକିୟା ସିନିୱାଲେ ୱେନ୍‌ବାତାନ୍‌, କ୍ରିସ୍ତ ଜେ ଦାଉଦତି ମାରିନ୍‌ ଇଜି, ସାସ୍ତ୍ରିର୍‍ ଏଣ୍ତେସ୍‌ ଇଜିନାର୍‍ ?
MAR 12:36 ଦାଉଦ ନିଜେ ପବିତ୍ର ଆତ୍ମାଦି ବପୁ ପଇଜି ଇର୍‌ଆମାର୍‌ଆନ୍‌, ପ୍ରବୁ ନା ପ୍ରବୁଙ୍ଗ୍‌ ଇର୍‌ଆନ୍‌, ମାପ୍‌ ଆମାସାନ୍ଦି ନି ୱିଜୁ ସାତ୍ରୁରିଙ୍ଗ୍‌ ନି ପାଦାମ୍‌କାଙ୍ଗ୍‌ ଆଡ୍‍ଗି ଇଡ୍‍ଏପ୍‍, ଆୟା ସାନ୍ଦି ମା ଉଣେରି କିୟୁ ତରିଣ୍ତ୍‍ ବାସ୍‌ସ ମାନ୍‌ଆ ।
MAR 12:37 ଦାଉଦ ନିଜେ କ୍ରିସ୍ତଙ୍ଗ୍‍ ପ୍ରବୁ ଇଜି ଇନାନ୍‌, ମାପୁରୁଦି ବାସ୍‍ସିକିତି ରକିୟା କିନି କ୍ରିସ୍ତ ଏଣ୍ତେସ୍‌ ୱାନି ମାରିନ୍‌ ଆନାନ୍‌ ? ୱିଜେରେ ଲୋକ୍‌ ୱେଡ଼ିକାଦାନ୍‌ ୱାନି ମାଟା ୱେନ୍‍ଜିମାର୍‍ଆର୍‍ ।
MAR 12:38 ମାରିଡ଼େସି, ୱାନ୍‌ ୱାନି ସିକିୟାଦାନ୍‌ ଇର୍‌ଆନ୍‌, “ସାସ୍ତ୍ରିରି ମାଣ୍‌କୁ ଜାଗାର୍‌ତା ! ୱାରୁ ନିର୍‍ଇ ଆଙ୍ଗିଁ ଆରାଜି ବୁଲାଦେଙ୍ଗ୍‌, ମାରି ସାତାସାଉକାଦୁ ମାଡ଼ିସ୍‌ କିପିର୍‍ ଇଜି ବଦାକିନାର୍‍ ।
MAR 12:39 ପାର୍‌ତନା କିନି ଇଲୁଦୁ ପେରି ଗଦିଦି ବାଡି ମାରି ବୋଜିଦୁ ପେରି ବାଡି ପ‍ଇଦେଙ୍ଗ୍‌ ୱାର୍‌ ବଦାକିନାର୍‍;
MAR 12:40 ୱାର୍‌ ରାଣ୍ତି ଆଇମେକା ଇଲ୍‌କାଙ୍ଗ୍‌ ୱିଜୁ ନାସ୍ଟୁ କିନାର୍‌ ମାରି ବାଣ୍ତିସ୍‍କିଜି ନିର୍‍ଇ ପାର୍‌ତନା କିନାର୍‌; ୱାର୍‌ ନାଣ୍ତ ଦଣ୍ତ୍‌ ପଇନାର୍‌ ।”
MAR 12:41 ଅର୍‍ଲେନ୍‍ ଜିସୁ ମନ୍ଦିର୍‌ତୁ ଦାନ୍‌ ସିନି ପେଡ଼ା ଲାକ୍‌ତୁ ବାସ୍‌ତାନ୍‌ନୋ ଲୋକୁ ୱିଜେରେ ଏଣ୍ତେସ୍‌ ପେଡ଼ାଦୁ ଦାନ୍‌ ସିଜିନାର୍‍, ଆକା ସୁଡ଼୍‍ଜିମାର୍‍ଆନ୍‍, ନାସ୍ତିୱାଲେ ଆବେ ମାର୍‍ଇ ମାଜନ୍‌ ଲୋକୁ ନାଣ୍ତ ଡାବୁଙ୍ଗୁଁ ପକ୍‌ତାର୍‌;
MAR 12:42 ମାରି, ଅରେତ୍‌ କାକୁର୍ତି ରାଣ୍ତି ଆଇମା ୱାତା ଦୋ ରୁଣ୍ତି ଟାକାଦି ଅଦ୍‌ଲିଙ୍ଗ୍‌ ଉଣ୍ତ୍ରିଟାକାଦି ଅଦିଲିଦାନ୍‍ ବା ଉଣା ଆକା ଆବେ ନିର୍‍ତାତ୍‍ ।
MAR 12:43 ଆବେନୁ ଜିସୁ ୱାନି ସିସୁରିଙ୍ଗ୍‌ କୁକ୍‍ତାନ୍‍ନୋ ଇର୍‌ଆନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ଇୟା ପେଡ଼ା ଲୋଇ ଡାବୁଙ୍ଗୁଁ ସିତିମାନି ଲୋକା ଭିତ୍ରେ ଇୟା କାକୁର୍ତି ରାଣ୍ତି ଆଇମା ନାଣ୍ତ ସିତାମାନାତ୍‍ ।
MAR 12:44 ଇରିଙ୍ଗ୍‌ ୱିଜେରେ ମାଜନ୍‌ ଲୋକୁ ତାମେ ଡାବୁଙ୍ଗୁଁ ବିତ୍ରେ ଅଡ଼ପ୍‍ ଅଡ଼ପ୍‍ ସିତାର୍‍, ମାତର୍‌ ଇୟା ରାଣ୍ତି ଆଇମା ତାନି ଜିବନ୍‌ ଜିନି ଉଣ୍ତିଙ୍ଗ୍‌ ଏସ ତାନି ମାନୁ ମାର୍‌ଆତ୍‌, ଆକା ୱିଜୁ ସିତାମାନାତ୍‍ ।”
MAR 13:1 ଅର୍‍ଲେନ୍‍ ଜିସୁ ମନ୍ଦିର୍‌ତାନ୍‌ ସହସି ସନିୱାଲେ ୱାନି ସିସୁରି ମାଣ୍‌କୁ ଅରେନ୍‍ ସିସୁ ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ, ସୁଡ଼ୁଆ, ମନ୍ଦିର୍‌ତି ଇଲୁ ମାରି ମନ୍ଦିର୍‌ତି ପେରି ପେରି କାଲ୍‌କୁ ଏସା ନେଗେନ୍‌ ତର୍‍ଜିନେ !”
MAR 13:2 ଜିସୁ ୱାନିଙ୍ଗ୍‌ ଇର୍‌ଆନ୍‌, “ନିନ୍‌ ଇନିକା ଇୟାୱିଜୁ ପେରି ମେଡ଼୍‍ ଇଲୁ ସୁଡ଼ୁଜିନି ? ଉଣ୍ତ୍ରି କାଲୁ ଆଇ କାଲୁ ମୁସ୍‌କୁ ତେବାଏତ୍‍, ଆକା ୱିଜୁ ଆର୍‍ଜି ବୁମିଦୁ ମିସାନାତ୍‌ ।”
MAR 13:3 ତାନେ ୱେନ୍‌କା ଜିସୁ ମନ୍ଦିର୍‌ ଆଗ୍‍ଡ଼ିରି ଜିତ ଗରନ୍‌ ମୁସ୍‌କୁ ବାସ୍‍ତା ମାର୍‌ଆନ୍‌ ଆବେ ପିତର, ଜାକୁବ, ଜୋହନ ମାରି ଆନ୍ଦ୍ରିୟ ଜିସୁଙ୍ଗୁଁ ଏନ୍‍ବା ନେସ୍‌ଇୱାଜା ୱେନ୍‌ବାତାର୍‌, ଇୟାୱିଜୁ ଏସାଙ୍ଗ୍‍ ଗଟାନାତ୍‌,
MAR 13:4 “ମାରି ଇୟାୱିଜୁ ଏମେ ସମୟ୍‌ତୁ ଇଗା ୱାନିୱାଜା ଆନାତ୍‌,” ଆୟାୱାଲେରି ସିନା ଇନିକା, “ଆକା ମାଙ୍ଗିଁ ଇନ୍‌ଆଁ ।”
MAR 13:5 ଆବେନୁ ଜିସୁ ୱାରିଙ୍ଗ୍‌ ଇର୍‌ଆନ୍‌, ଜାଗାର୍‌ତା, ଏନ୍‌ ଏଣ୍ତେସ୍‌ ମିଙ୍ଗିଁ ବାମ୍‍ରେ କିଏନ୍‌ ।
MAR 13:6 ନାଣ୍ତଲୋକ୍‍ ନା ଦର୍‌ତାନ୍‌ ୱାଜି ମାପ୍‌ କ୍ରିସ୍ତ ଇଜି ଇନାର୍‌, ଲୋକାଙ୍ଗ୍‌ ୱାର୍‌ ନାଣ୍ତ ବାମ୍‍ରେ କିନାର୍‌ ।
MAR 13:7 ମାତର୍‌ ମିର୍‌ ଏସିୱାଲେ ଜୁଦ୍‌ ଆନି ବିସୟ୍‌ ୱେନିଦେର୍‍ ମାରି ଜୁଦ୍‌ ଆନି ଲୋକା ଆଉଲି ୱେନିଦେର୍‍, ଆୟାୱାଲେ ମିର୍‌ ତିଲାମାଟ୍‌, ଇୟାୱିଜୁ ପୁରା ଗଟାନାତ୍‌, ମାତର୍‌ ଇୟାତାନି ଅର୍ତ ଆଏତ୍‍ ଜେ ଜୁଗ୍‌ ସେସ୍‌ଆନି ଦିନ୍‌ ଲାକ୍‌ତୁ ।
MAR 13:8 ଇରିଙ୍ଗ୍‌ ଜାତି ଲୋଇ ଜାତି ଜୁଦ୍‍ ଆନାତ୍‌ ମାରି ଉଣ୍ତ୍ରି ରାଜି ମାରି ଉଣ୍ତ୍ରି ରାଜି ବିରଦ୍‌ତୁ ଜୁଦ୍‍ କିନାର୍‌, ମାରି ଏସ ବାଡିଦୁ ଦିରେ ଦିରେ ବୁମିକମ୍ପ ଆନାତ୍‌ ମାରି ୱିଜୁ ଲୋକାଙ୍ଗ୍‌ ଉଣ୍ତେଙ୍ଗ୍‌ ପୁଟ୍‌ଏତ୍‌; ଇୟାୱିଜୁ ଜନମ୍‌ କିନି କାସ୍ଟୁଦି ଆରାମ୍‌ ମାତର୍‌ ।
MAR 13:9 ମାତର୍‌ ମିର୍‌ ନିଜେ ନିଜେଦି ବିସୟତାନ୍ ଜାଗାର୍‌ତା ମାନ୍‌ଡ଼୍ରୁ; ଲୋକୁ ମିଙ୍ଗିଁ ତର୍‌ସି ବିସାର୍‌ କିନି ବାଡିଦୁ ଅନାର୍‍ର ସର୍ପେ କିନାର୍‌, ମିର୍‌ ପାର୍‌ତନା କିନି ଇଲୁଦୁ ମାଡ୍‌ ତିନିଦେର୍‍ । ମାରି ମିର୍‌ ନା ସିସୁ ଆତିମାନିଙ୍ଗ୍‌ ପେରି ନେତା ନି ରାଜାରି ଆଗ୍‌ଡ଼ି ୱାରି ଉଣ୍ତିଙ୍ଗ୍‌ ସାକି ସିଦେଙ୍ଗ୍‍ ଇଜି ନିଲ୍‌ପିସ୍‌ କିନାର୍‌ ।
MAR 13:10 ମାରି, ଇୟାକା ଗଟାନି ଆଗ୍‌ଡ଼ି ୱିଜୁ ଲୋକା ଲାକ୍‌ତୁ ସୁସମାଚାର୍‌ ପ୍ରଚାର୍‌ ଆନାତ୍‌ ।
MAR 13:11 ଏସ୍ତିୱାଲେ ଲୋକୁ ମିଙ୍ଗିଁ ଆସ୍‍ନା ଅନାରୋ ସର୍ପେ କିନାର୍‌, ନାସ୍ତିୱାଲେ ମିର୍‌ ଇନିକା ଇନିଦେର୍‌, ଆୟା ବିସୟ୍‌ତାନ୍ ଆଗିଡ଼ିରାନ୍‌ ସିନ୍ତା କିମାଟ୍‌, ମାତର୍‌ ଆୟା ସମୟତୁ ମିଙ୍ଗିଁ ଇନିକା ପୁଟ୍‍ନାତ୍‍, ଆକା ଇଡ୍ରୁ; ଇରିଙ୍ଗ୍‌ ମିର୍‌ ଇନି ଲୋକୁ ଆଇଦେର୍‍, ମାତର୍‌ ପବିତ୍ର ଆତ୍ମା ମା ଉଣ୍ତିଙ୍ଗ୍‌ ମାଟା ଇନାତ୍‍ ।
MAR 13:12 ଆୟା ସମୟତୁ ଲୋକୁ ତଡ଼ାନ୍‍ ତଡ଼ାନ୍‍ତିଙ୍ଗ୍‍ ମାରି ବୁବା ମାରିନ୍‍ତିଙ୍ଗ୍‍ ସାପିସ୍‍ତେଙ୍ଗ୍‍ ଇଜି ସର୍‍ପେ କିଜି ସିନାର୍‍; ମାରି, କଡ଼କକ୍‌ରା ବୁବାସି ଆଇସି ବିରୁଦ୍‍ତାନ୍‍ ନିଙ୍ଗ୍‍ନା ରୋ ୱାରିଙ୍ଗ୍‌ ସାୟାମାର୍‌ଗା ଡାକ୍‌ନାର୍‌;
MAR 13:13 ମାରି, ମିର୍‌ ନା ୱେନ୍‌କା ୱାନି ଲୋକୁ ଆତିମାନିଙ୍ଗ୍‌ ମିଙ୍ଗିଁ ୱିଜେରେ କାଡ଼୍‍ନାର୍‍; ମାତର୍‌ ଆମାକାନ୍‍ ସାରାସାରି ୱେନ୍‌କା ସାନ୍ଦି ସାସ୍‌ଆସ୍‌ସି ତେବାନାନ୍‌, ୱାନ୍‌ ରକିୟା ପଇନାନ୍‌ ।
MAR 13:14 ମାତର୍‌ ମିର୍‌ ଏସିୱାଲେ ଆୟା ନାସ୍ଟୁକିନି କାଡ଼୍‌ନି ଜିନିସ୍‌ତିଙ୍ଗ୍‌, ଏମେ ବାଡିଦୁ ମାନ୍‌ଡ଼୍ରେଙ୍ଗ୍‌ ନିୟମ୍‌ ସିଲେତ୍‍, ଆୟା ବାଡିଦୁ ମାନିକା ସୁଡ଼ୁନିଦେର୍‍ ଏମେ ଲୋକ୍‌ଡର୍‌ ପଡ଼ାଦେଙ୍ଗ୍‌ ନେସ୍‌ନାର୍‌ ୱାର୍‌ ବୁଝାପିର୍‍, “ନାସ୍ତିୱାଲେ ଆମାଲୋକ୍‍ ୱିଜେରେ ଜିହୁଦା ଗାଡ଼୍‌ତୁ ମାନାର୍‌, ୱାର୍‌ ଗରନ୍‌ ମୁସ୍‌କୁ ଉରୁକ୍‍ସି ସଲିର୍‍;
MAR 13:15 ଏନ୍‌ ସାତ୍ ମୁସ୍‌କୁ ଏକ୍‍ନା ମାନାନ୍‌, ୱାଣ୍ତ୍ରୁ ରେସୋ ୱାନି ଇଲ୍‌ତୁ ଇନି ସାସାପାତି ଅତେଙ୍ଗ୍‌ ଇଜି ରାମାକିନ୍‍ ବା ଇଲୁ ଲୋଇ ଡ଼ୁଗ୍‍ମାକିନ୍‍;
MAR 13:16 ମାରି, ଏନ୍‌ କିଡ଼ିଇଦୁ ତେବାନାନ୍‌, ୱାଣ୍ତ୍ରୁ ୱାନି ସାଦର୍‌ ତାତେଙ୍ଗ୍‌ ଇଜି ଡ଼େସି ସଲ୍‍ମାକିନ୍‍ ।
MAR 13:17 ଆୟାୱାଲେ ପଟାଦୁମାନି ଆଇମାଲୋକ୍‍ ମାରି ଇସ୍ରି କଡ଼ରିଙ୍ଗ୍‌ ଆସ୍‌ସି ପାଲ୍‍ ଉଟ୍‍ପିସ୍‍କିନି ଆଇସିକା ଅବସ୍ତା ଏସ ତାଗ୍‌ଇକା ଆନାତ୍‌, ‍ ୱାକ୍‍ ନାଣ୍ତ ଦୁଃକ୍‌‍ ବୋଗାନେ !
MAR 13:18 ମାତର୍‌ ଇକା ଏଣ୍ତେସ୍‌ ପିନିକାଡ଼ାଦୁ ଗଟାଏତ୍‍, ଆୟା ଉଣ୍ତିଙ୍ଗ୍‌ ମାପୁରୁଦି ମାନୁ ପାର୍‌ତନା କିଦୁ ।
MAR 13:19 ଇରିଙ୍ଗ୍‌ ଆୟାୱାଲେ ଇୟାୱାଜା ଦୁଃକ୍‌ ଗଟାନାତ୍‍ ଜେ, ମାପୁରୁ ଦୁନିଆଦିଙ୍ଗ୍‍ ତିଆରି କିତି ୱାଲେରାନ୍‌ ନେର୍‌ ସାନ୍ଦି ଇୟାୱାଜା ଗଟାଏତ୍‍, ମାରି ଏସାଙ୍ଗ୍‍ବା ଗଟେ ଆଏତ୍‍ ।
MAR 13:20 ମାରି, ଜଦି ପ୍ରବୁ ଆୟା ସମୟ ଏସ୍‌କାଙ୍ଗ୍‌ ଉଣା କିତାନ୍‌ ମାନ୍ଧି, ଇରିଙ୍ଗ୍‌ ଆମା ଲୋକ୍‌ଡର୍‌ ରକିୟା ପ‍ଇଦେଙ୍ଗ୍‌ ଆଟ୍‍ଏତାର୍‍ମାନ୍ଦି; ମାତର୍‌ ମାପୁରୁ ଆମା ଲୋକାଙ୍ଗ୍‌ ଆସ୍‌କିତା ମାର୍‌ଆନ୍‍, ଆୟା ବାସ୍‍କିତି ଲୋକା ଉଣ୍ତିଙ୍ଗ୍‌ ଇଜି ଆୟା ସମୟତିଙ୍ଗ୍‍ ଉଣା କିତାମାନାନ୍‍ ।
MAR 13:21 “ନାସ୍ତିୱାଲେ ଜଦି ଏନ୍‌ ଇନାନ୍‌, ସୁଡ଼ୁଦୁ, କ୍ରିସ୍ତ ଇବେ ମାନାନ୍‌, ମାରି ସୁଡ଼ୁଦୁ, କ୍ରିସ୍ତ ଆବେ ମାନାନ୍‌,” ଏନ୍‌ ଜଦି ମିଙ୍ଗିଁ ଇୟାୱାଜା ଇନାନ୍‌, ଆଦେଙ୍ଗ୍‌ ଆକା ବିସ୍‌ବାସ୍‌ କିମାଟ୍‌ ।
MAR 13:22 କ୍ରିସ୍ତର୍‍ ନି ବଣ୍ତ ବାବବାଦିର୍‍ ସନାର୍‌ ଇୟାୱାଜା ସିନା ମାରି କାବାଆନି ପାଣି ତର୍‍ନାର୍‍ ଜେ, ଜଦି ଆତିଙ୍ଗ୍‌, ମାପୁରୁ ଆସ୍‌କିତି ଲୋକାଙ୍ଗ୍‌ ବା ବାମ୍‍ରେ କିନାର୍‌ ।
MAR 13:23 ମାତର୍‌ ମିର୍‌ ଜାଗାର୍‌ତା ମାଣ୍ତ୍ରୁ; ଇୟାୱିଜୁ ଆନି ଆଗ୍‍ଡ଼ିନେ ନାନ୍ ମିଙ୍ଗିଁ ଇଜିନା ।
MAR 13:24 ମାତର୍‌ ଆୟା ସମୟତୁ ଆୟା ଦୁଃକ୍‌ ୱେନ୍‌କା ୱେଡ଼ା ସିକାଟି ଆନାତ୍‌ ମାରି ଲେଜୁ ଜାୟ୍‌ ସିଏତ୍‌,
MAR 13:25 ମାରି ସୁକେଙ୍ଗ୍‍ ବାଦଡ଼୍‍ତାନ୍‍ ଆର୍‌ନେ ମାରି ବାଦଡ଼୍‍ତୁ ମାନି ୱିଜୁ ସାକ୍ତିଦିକେଙ୍ଗ୍‍ ଦୁଙ୍ଗ୍‌ନେ ସନେ ।
MAR 13:26 ନାସ୍ତିୱାଲେ ଲୋକୁ ୱିଜୁ ମନୁସ୍ୟପୁତ୍ରଦିଙ୍ଗ୍‌ ଜେ ନାନ୍ ପେରି ସାକ୍ତିଦାନ୍‍ ମାରି ମହିମାଦାନ୍‌ ବାଦଡ଼୍‍ତାନ୍‍ ୱାନିକା ସୁଡ଼ୁନାର୍‌ ।
MAR 13:27 ଆୟା ସମୟତୁ ନାନ୍ ଆସ୍‌କିତି ଲୋକାଙ୍ଗ୍‌ ପୃତିବିଦି ଇତି କନାଦାନ୍‍ ବାଦଡ଼୍‍ତି ଇତି କନା ସାନ୍ଦି ସାରିବେଡ଼େତି ଲୋକାଙ୍ଗ୍‌ ଉନ୍‌ଡ୍ରେମାନୁ ଉଣ୍ତାକିଦେଙ୍ଗ୍‌ ଦୁତ୍‌କାଙ୍ଗ୍‌ ପୋକ୍‌ନାନ୍‌ ।
MAR 13:28 “ତଗା ମାରାନ୍‌ତାନ୍‌ କାତା ଅଜାଦୁ; ଏସିୱାଲେ ତଗା ମାରାତି କମେଙ୍ଗ୍‌ଡ଼ି ଆକୁ ରାଲାଜି ସଲ୍‌ସି ମାରି ପୁନି ଆକୁ ସହସି‍ୱାନେ, ଆୟାୱାଲେ ଜେଟାପ୍‌ ଲେଞ୍ଜୁ ଇଗା ୱାତାତ୍‍ ଇଜି ମିର୍‌ ନେସ୍‌ସୋ ମାନ୍‌ଡ୍ରୁ;
MAR 13:29 ଆୟାୱାଜା ମିର୍‌ ବା ଇୟାୱିଜୁ ଗଟାନିକା ସୁଡ଼ୁଜି ନାନ୍ ୱାନି ଦିନ୍‌ ସେର୍‍ଲା ଲାକ୍‌ତୁ ଇଗା ୱାତାତ୍‌ନି ଇଜି, ଇକା ନେସ୍‌ତୁ ।
MAR 13:30 ନାନ୍ ମିଙ୍ଗିଁ ସତ୍‌ ଇଜିନା, ଇୟାୱିଜୁ ଗଟେ ଆଇ ସାନ୍ଦି ଇଲେଇ ଜିନିମାନି ଲୋକୁ ଏଣ୍ତେସ୍‌ କିଜିବା ସାଏର୍‌ ।
MAR 13:31 ବାଦଡ଼୍‍ ନି ଦୁନିଆ ନାସ୍ଟୁ ଆନାତ୍‌, ମାତର୍‌ ନା ବାକ୍ୟୱିଜୁ ଏସାଙ୍ଗ୍‍ ନାସ୍ଟୁ ଆଏତ୍‍ ।
MAR 13:32 “ମାତର୍‌ ଆୟା ଦିନ୍‌ ବା ଆୟା ଦଣ୍ଡ୍‌ ବିସୟ ଏନ୍‌ବା ନେସ୍‌ଏନ୍‌, ମୁସ୍‌କୁପୁର୍‌ତି ଦୁତ୍‌କୁ ନେସେଉ ମାରି ନାନ୍ ମନୁସ୍ୟପୁତ୍ର ବା ନେସେଏ, ଅରେନ୍‍ ନା ବୁବା ନେସ୍‌ନାନ୍‌ ।
MAR 13:33 ମିର୍‌ ଜାଗାର୍‌ତା ଆଜି ମାନ୍‌ଡ୍ରୁ, କାପ୍‍କିଜ ମାନ୍‌ଡ୍ରୁ; ଇରିଙ୍ଗ୍‌ ଆୟା ଦିନ୍‌ ଏସାଙ୍ଗ୍‍ ଆନାତ୍‌, ଆକା ମିର୍‌ ନେସ୍‌ଇଦେର୍‌ ।
MAR 13:34 ଆକା ଇୟାୱାଜା, ଅରେନ୍‍ ଲୋକୁ ନିଜେଦି ଇଲୁ ଡ଼ିସ୍‌ସୋ ଆଇ ଦେଶ୍‍ ତେବାଜିନାନ୍‍, ମାରି ୱାଣ୍ତ୍ରୁ ୱାନି ଗତିମୁରୁଲିରିଙ୍ଗ୍‍ ୱିଜୁ ଅଦିକାର୍‍ ସିଜି ପାଣି କିଦେଙ୍ଗ୍‌ ଇଜି ଇନାମାନାନ୍‍ ମାରି ଇଲୁ କାପ୍‍କିନି ଲୋକ୍‌ତିଙ୍ଗ୍‌ ବା ଜାଗାର୍‍ତାଦାନ୍‍ କାପ୍‍କିଜ ମାନ୍‌ଡ଼୍ରେଙ୍ଗ୍‌ ଆଦେସ୍‌ ସିତାମାନାନ୍‌ ।
MAR 13:35 ମାରି, ଏସିୱାଲେ ଇଲୁଦି ମାଲିକ୍‌ ଦାପ୍ରେ ୱାନାନ୍‍ନୋ ମିଙ୍ଗିଁ ସୁଜ୍‍ନିକା ସୁଣାନ୍‌,
MAR 13:36 ଆୟା ଉଣ୍ତିଙ୍ଗ୍‌ ଜାଗାର୍‌ତା ମାନ୍‌ଡ୍ରୁ, ଇରିଙ୍ଗ୍‌ ୱାଣ୍ତ୍‍ରୁ ମିଲିମିଲିକା ନୋ ମାଜେର୍‍ନାଡ଼ା ନୋ କରୁକେଡ଼୍‍ନିୱାଲେ ନୋ ସାଲ୍‍ଦି, ଏସ୍ତିୱାଲେ ୱାଣ୍ତ୍ରୁ ୱାନାନ୍‌, ଆକା ମିର୍‌ ନେସ୍‌ଇଦେର୍‌ ।
MAR 13:37 ନାନ୍ ଆମାକା ମିଙ୍ଗିଁ ଇଜିନା, ଆକା ୱିଜେରିଙ୍ଗ୍‍ ଇଜିନା, ଜାଗାର୍‌ତା ମାନ୍‌ଡ୍ରୁ ।”
MAR 14:1 ନିସ୍ତାର୍‍ ପଣ୍ତ୍‌ୟ ମାରି କମିର୍‍ସିଲି ରୁଟି ପଣ୍ତ୍‌ୟ ଉଣି ରିନେଟି ଆଗ୍‌ଡ଼ି । ଆୟାୱାଲେ ପେରି ଜାଜକର୍‌ ମାରି ସାସ୍ତ୍ରିର୍‍ ଜିସୁଙ୍ଗୁଁ ଏନ୍‍ବା ସୁଡ଼ୁଏନ୍‍ଣ୍ତା ଆସ୍‍ସ ଅସ ସାୟାମାର୍‌ଗା ଡାକ୍‌ତେଙ୍ଗ୍‍ଁ ଇଜି ଉପାୟ କିଜିମାର୍‌ଆର୍‌ ।
MAR 14:2 ଇରିଙ୍ଗ୍‌ ୱାର୍‌ ଇର୍ହାର୍‌, “ପଣ୍ତ୍‌ୟ ସମୟ୍‌ତୁ ଇୟା ପାଣି କିଦେଙ୍ଗ୍‌ ଆଏତ୍‍,” ଇରିଙ୍ଗ୍‌ ଆନାତ୍‌ ନାସ୍ତିୱାଲେ ଲୋକୁ ଜାଟିଜଗ୍‍ଡ଼ା କିନାର୍‌ ।
MAR 14:3 ଜିସୁ ବେତନିୟାଦୁ କୁସ୍ଟରୋଗ୍‌ ସିମୋନ୍‍କା ଇଲ୍‌ତୁ ଉଣ୍ତେଙ୍ଗ୍‌ ବାସ୍‍ତି ମାରିଇୱାଲେ ଅରେତ୍‌ ଆଇମା ଉଣ୍ତ୍ରି ସାଟିଦୁ ନାଣ୍ତଦାରାଦି ନେଗି ଉଣ୍ତ୍ରି ମାରାତାନ୍‌ ତିଆର୍‌ଆତି ମାର୍‍ଇ ବାସ୍‌ନା ନିୟୁ ତାତା ଦୋ ଆୟା ସାଟିଦି ଡାବ୍‍ଣା ରୁକ୍‍ସି ନିୟୁ ଜିସୁଦି ତାଲାଦୁ ୱାକ୍‍ତେଙ୍ଗ୍‍ ଆସ୍‌ତାତ୍‌ ।
MAR 14:4 ଆବେ ମାର୍‍ଇ ଏସ ଲୋକୁ ଆୟା ଆଇମା ନିୟୁ ୱାକ୍‍ତିକା ସୁଡ଼୍‌ଜି ରିସା ଆତାର୍‌ ମାରି ୱାରି ୱାରି ଲଅ ୱାର୍‌ଗିଜିସାତାର୍‌, “ଇୟା ଆଇମା ବାସ୍‌ନା ନିୟୁ ଇୟାୱାଜା ନାସ୍ଟୁ କିନିକା ମାର୍‌ଆତ୍‌ ନୋ ?
MAR 14:5 ଆୟା ନିୟୁ ତୋ ପର୍‍ତିଙ୍ଗ୍‍ ଅର୍‍ଲେନ୍‍ ଅରେନ୍‍ କୁଲି କିତି ଡାବୁଙ୍ଗୁଁ ନାସ ପୁଟ୍‍ତେ ମାନ୍ଧି ମାରି କାକୁର୍ତି ଲୋକାଙ୍ଗ୍‌ ସିଦେଙ୍ଗ୍‍ ଆତାତ୍‌ ମାନ୍ଦି !” ୱାର୍‌ ଆୟା ଆଇମାଦିଙ୍ଗ୍‍ କାଡ଼୍‍ଦେଙ୍ଗ୍‍ ଆସ୍‌ତାର୍‌ ।
MAR 14:6 ମାତର୍‌ ଜିସୁ ଇର୍‌ଆନ୍‌, “ଆୟା ଆଇମାଦିଙ୍ଗ୍‍ ଡ଼ିସ୍‍ତୁ ! ଇନ୍‍ଦାନିଙ୍ଗ୍‍ ତାନିଙ୍ଗ୍‌ କାସ୍ଟୁ ସିଜିନିଦେର୍‌ ? ୱାଦ୍‍ତୋ ନା ଉଣ୍ତିଙ୍ଗ୍‌ ନେଗି ପାଣି କିତାମାନାତ୍‌ ।
MAR 14:7 କାକୁର୍ତି ଲୋକ୍‍ତୋ ୱିଜୁୱାଲେ ମି ଲାକ୍‌ତୁ ମାନାର୍‌, ମାରି ୱାରି ଉଣ୍ତିଙ୍ଗ୍‌ ମିର୍‌ ଏସ୍ତିୱାଲେ ବଦାକିନିଦେର୍‍, ନାସ୍‍ସ୍ତିୱାଲେ ୱାରିଙ୍ଗ୍‌ ସାହାଜ୍ୟ କିଦେଙ୍ଗ୍‌ ଆଟ୍‌ନିଦେର୍‌; ମାତର୍‌ ନାନ୍ ୱିଜୁୱାଲେ ମି ଲାକ୍‌ତୁ ତେବାଏ ।
MAR 14:8 ତାନି ମାଣାନ୍‌ ଆମାକା ଆନାତ୍‌, ଆକା ୱାଦ୍‌ କିତାମାନାତ୍‌; ନାନ୍ ସାନି ଆଗ୍‍ଡ଼ିନେ ୱାଦ୍‌ ନା ମେନ୍ଦଲ୍‌ତୁ ନିୟୁ ୱାକ୍‍ସି ମୁସ୍‍ନି ନାଣ୍ତିଦି ଉଣ୍ତିଙ୍ଗ୍‌ ତିଆର୍‌ କିତାମାନାତ୍‌ ।
MAR 14:9 ନାନ୍ ମିଙ୍ଗିଁ ସତ୍‌ ଇଜିନା, ସାରା ଦୁନିଆଦୁ ନା ନେଗିକାବୁର୍‌ ଏମେ ବାଡିଦୁ ପ୍ରଚାର୍‌ ଆନାତ୍‌, ଇୟା ଆଇମା ଇନି ପାଣି କିତାମାନାତ୍‌, ତାନିଙ୍ଗ୍‌ ଏତ୍‌କିନି ଉଣ୍ତିଙ୍ଗ୍‌ ଇୟାୱିଜୁ ମାଟା ବା ୱେଙ୍ଗ୍‌ଁନାତ୍‌ ।”
MAR 14:10 ଆବେଟ୍‌ ବାରଲୋକ୍‌ ସିସୁରି ଲୋଇରାନ୍‌ ଇସ୍କାରିୟୋତିୟ ଜିହୁଦା ଦର୍‌ତି ଅରେନ୍‍ ସିସୁ ଜିସୁଙ୍ଗୁଁ ଆସ୍‍ପିସ୍‍ତେଙ୍ଗ୍‍ ଇଜି ପେରି ଜାଜକରି ଲାକ୍‌ତୁ ସର୍‌ଆନ୍‌ ।
MAR 14:11 ଆୟା ପେରି ଜାଜକର୍‌ ଇସ୍କାରିୟତିୟ ଜିହୁଦାଦି ମାଟା ୱେନ୍‌ଜି ୱେଡ଼ିକା ଆତାର୍‌ ମାରି ଆୟା ପାଣିକିନି ଉଣ୍ତିଙ୍ଗ୍‌ ୱାନିଙ୍ଗ୍‌ ଏସ ଡାବୁଙ୍ଗୁଁ ସିଦେଙ୍ଗ୍‍ ପାର୍‍ମାଣ୍‍କିତାର୍‍ । ଆୟାୱାଲେରାନ୍‍ ଜିହୁଦା ଜିସୁଙ୍ଗୁଁ ପେରିଜାଜକରି କିୟୁଦୁ ଆସ୍‍ପିସ୍‍ନି ଉଣ୍ତିଙ୍ଗ୍‌ ସାରି ପ‍ଇଦେଙ୍ଗ୍‌ ଆସ୍‌ତାନ୍‌ ।
MAR 14:12 ୱେନ୍‌କା କମିର୍‌ସିଲି ରୁଟି ଉଣି ପଣ୍ତୟ୍‍ତି ଆଗ୍‍ଡ଼ିରି ନାଣ୍ଡିଙ୍ଗ୍, ଆମା ନାଣ୍ଡିଙ୍ଗ୍ ନିସ୍ତାର୍‍ ପଣ୍ତ୍‌ୟତି ବୋଜି ଉଣ୍ତିଙ୍ଗ୍‌ ମେଣ୍ତାପିଲା କଇନାର୍‍, ଆୟା ନାଣ୍ଡିଙ୍ଗ୍ ୱାନି ସିସୁର୍‍ ୱାନିଙ୍ଗ୍‌ ୱେନ୍‌ବାତାର୍‌, “ମାପ୍‌ ନି ଉଣ୍ତିଙ୍ଗ୍‌ ସନାପ୍‌ ନୋ ଏମେ ବାଡିଦୁ ନିସ୍ତାର୍‍ ପଣ୍ତ୍‌ୟତି ବୋଜି ତିଆର୍‌ କିନାପ୍‍ ଇଜି ନିନ୍‌ ବଦା କିଜିନି ?”
MAR 14:13 ଜିସୁ ୱାନି ସିସୁରି ଲୋଇ ରିଏରିଙ୍ଗ୍‍ ଇୟା ମାଟା ଇର୍‌ଆ ପକ୍‌ତାନ୍‌, ମିର୍‌ ଗାଡ଼୍‌ତୁ ସାନ୍‍ଡ୍ରୁ, ଆବେ ଅରେନ୍‍ ଲୋକୁ ଏରୁ ସାଟି ଆସ୍‍ସ ସନିକା ସୁଣିଦେର୍‍; ମାରି ମିର୍‌ ୱାନି ୱେନ୍‌କା ୱେନ୍‌କା ସାନ୍‍ଡ୍ରୁ ।
MAR 14:14 ୱାନ୍‌ ଆମା ଇନ୍‌ଡ୍ର ସଲ୍‌ସି ଡ଼ୁଗ୍‍ନାନ୍‍, ଆୟା ଇନ୍‌ଡ୍ର ମାଲିକ୍‌ତିଙ୍ଗ୍‌ ଇନ୍‍ଡ୍ରୁ, ଗୁରୁ ୱେନ୍‌ବାଜିନାନ୍‌, ନାନ୍ ନା ସିସୁରିୱାଲେ ଆମା ଇନ୍‌ଡ୍ର ନିସ୍ତାର୍‍ ପଣ୍ତ୍‌ୟତି ବୋଜି କିନା, ଆୟା ନା ବାକ୍ରା ଆମାକା ?
MAR 14:15 ଆବେଟ୍‌ ୱାନ୍‌ ମିଙ୍ଗିଁ ନେଗ୍ରେଣ୍ତା ତିଆର୍ ଆତିମାନି ଉଣ୍ତ୍ରି ମୁସ୍‌କୁରି ପେରି ବାକ୍‍ରା ତର୍‍ନାନ୍‍; ଆୟା ବାଡିଦୁ ମାଡ୍‌ ପଣ୍ତ୍‌ୟ ଉଣ୍ତେଙ୍ଗ୍‌ ବୋଜି ତିଆର୍‌ କିଦୁ ।
MAR 14:16 ଆବେଟ୍‌ ସିସୁର୍‍ ସର୍ହାରୋ ନାର୍‍ତୁ ଡ଼ୁଗିତାର୍‍, ମାରି ୱାନ୍‌ ୱାରିଙ୍ଗ୍‌ ଏଣ୍ତେସ୍‌ ଇର୍‌ଆମାର୍‌ଆନ୍‌, ଆୟାୱାଜା ୱାର୍‌ ନିସ୍ତାର୍‍ ପଣ୍ତ୍‌ୟତି ବୋଜି ତିଆର୍‌ କିତାର୍‍ ।
MAR 14:17 ମିଲ୍‌ମିଲିକା ଆତାତ୍‌ଆକା ଜିସୁ ବାର୍‌ଲୋକ୍‌ ସିସୁରି ୱାଲେ ଆୟା ଇଲ୍‌ତୁ ୱାତାର୍‌ ।
MAR 14:18 ୱାର୍‌ ବାସ୍‍ସୋ ଉଣିୱାଲେ ଜିସୁ ଇର୍‌ଆନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ମି ଲୋଅ ଅରେନ୍‍, ନାଙ୍ଗିଁ ଏନ୍‍କି ନାୱାଲେ ଉଣୁଜିନାନ୍‍, ୱାନ୍‌ ନାଙ୍ଗିଁ ସାତ୍ରୁରି କିୟୁଦୁ ସର୍‌ପେ କିନାନ୍‌ ।”
MAR 14:19 ଆବେଟ୍‌ ସିସୁର୍‌ ଦୁଃକ୍‌ କିଜି ଅରେନ୍‍ ଅରେନ୍‍ ଆଜି ଜିସୁଙ୍ଗୁଁ ୱେନ୍‍ବାଦେଙ୍ଗ୍‍ ଆସ୍‌ତାର୍‌, “ଆକାନ୍‍ ଇନିକା ନାନ୍ ନୋ ?”
MAR 14:20 ଜିସୁ ୱାରିଙ୍ଗ୍‌ ଇର୍‌ଆନ୍‌, ବାର୍‍ଲୋକା ଲୋଇ ଅରେନ୍‍, ଏନ୍‍କି ନାୱାଲେ କୁଡ଼ୁକାଦୁ କିୟୁ ମୁଡ଼ୁକ୍‍ସିନାନ୍‍ ।
MAR 14:21 ନାନ୍ ସତ୍‌ ଇଜିନା, “ମନୁସ୍ୟପୁତ୍ର ଜେ ନାନ୍ ନା ବିସୟତାନ୍ ସାସ୍ତ୍ରଦୁ ଏଣ୍ତେସ୍‌ ରାସାତାମାନାତ୍‌, ଆୟାୱାଜା ନାନ୍ ସାଦେଙ୍ଗ୍‌ ସଲ୍‍ସିନା ଆକା ସତେନେ, ମାତର୍‌ ମନୁଷ୍ୟପୁତ୍ର ଜେ ନାନ୍ ଆମା ଲୋକ୍‍ତିମାଣାନ୍‍ ସାତ୍ରୁରି କିୟୁଦୁ ସର୍‍ପେ ଆଗାସଲ୍‌ସିନା, ୱାଣ୍ତ୍ରୁ ଜନମ୍‌ ଆଏତି ମାର୍‍ରିଙ୍ଗ୍‍ ୱାନି ଉଣ୍ତିଙ୍ଗ୍‌ ନେଗେଣ୍ତ୍‍ ଆତାତ୍‌ ମାନ୍ଦି ।”
MAR 14:22 ମାରି ୱାର୍‌ ଉଣିୱାଲେ ଜିସୁ ଉଣ୍ତ୍ରି ରୁଟି ଆସ୍‌ତାନ୍‌ନୋ ମାପୁରୁଙ୍ଗ୍‌ ଦନ୍ୟବାଦ୍‌ ସିତାନ୍‌ ମାରି ରୁଟି ରୁକ୍‍ସି ସିସୁରିଙ୍ଗ୍‌ ସିଜି ଇର୍ହାନ୍‌, “ଇକା ତିନ୍‍ଡ୍ରୁ, ଇକା ନା ମେନ୍ଧଲ୍‍ ।”
MAR 14:23 ଆୟାୱେନ୍‌କା ଅଙ୍ଗୁର୍‍ରସ୍‍ ଅସି ମାପୁରୁଦି ମାନୁ ଦନ୍ୟବାଦ୍‌ ସିଜି ସିସୁରିଙ୍ଗ୍‌ ସିତାନ୍‌ ମାରି ୱିଜେରେ ଅଙ୍ଗୁର୍‍ରସ୍‍ ଉଟାର୍‌ ।
MAR 14:24 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, “ଇକା ନା ନେତେର୍‌, ନାନ୍ ନା ଏମେ ନେତେର୍‌ ୱାକ୍‍ସି ସିଦେଙ୍ଗ୍‍ ସଲ୍‍ସିନା, ଆକା ମାପୁରୁଦି ୱାଲେ କିତି ପୁନି ନିୟମ୍‌ । ଆକା ଲୋକା ଉଣ୍ତିଙ୍ଗ୍‌ ନାଣ୍ତ ଦାରା ।
MAR 14:25 ନାନ୍ ମିଙ୍ଗିଁ ସତ୍‌ ଇଜିନା, ଆମା ନାଣ୍ଡିଙ୍ଗ୍ ନାନ୍ ମାପୁରୁଦି ରାଜିଦୁ ପୁନି ଅଙ୍ଗୁର୍‍ ପଲ୍‌ତି ରସ୍‌ ଉଣି ସାନ୍ଦି, ନାନ୍ ମାରି ଏସାଙ୍ଗ୍‍ ବା ଉଣୁଏ ।”
MAR 14:26 ଇୟା ୱେନ୍‌କା ଜିସୁ ମାରି ୱାନି ସିସୁର୍‌ ଉଣ୍ତ୍ରି ଦନ୍ୟବାଦ୍‍ତି ପାଟା ପାରିତି ୱେନ୍‌କା ଜିତ ଗରନ୍‌ ମୁସ୍‌କୁ ସତାସର୍ହାର୍‌ ।
MAR 14:27 ନାସ୍ତିୱାଲେ ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ୱିଜିଦେର୍‌ ନାଙ୍ଗିଁ ଡ଼ିସ୍‌ନି ଉର୍‍କ୍‍ନିଦେର୍‌ । ସାସ୍ତ୍ରଦୁ ରାସାତାମାନାତ୍‌, “ମାପ୍‌ ମେଣ୍ତେଙ୍ଗ୍‌ ସାରାକିନିୱାନିଙ୍ଗ୍‌ ସାୟାମାରାଗ୍‌ ଡାକ୍‌ତିଙ୍ଗ୍‌ ମାରି ମେଣ୍ଡେଙ୍ଗ୍‌ ଇନିଙ୍ଗାଁ ଆନିଙ୍ଗାଁ ଆନେସନେ ।”
MAR 14:28 ମାତର୍‌ ନାନ୍ ସାଜି ମାରିଡ଼େସିନିଙ୍ଗିଁତି ୱେନ୍‌କା ମି ଆଗ୍‍ଡ଼ିନେ ଗାଲିଲି ରାଜିଦୁ ସନା ।
MAR 14:29 ମାତର୍‌ ପିତର୍‌ ଜିସୁଙ୍ଗୁଁ ଇର୍‌ଆନ୍‌, “ୱିଜେରେ ଡ଼ିସ୍‌ତିଙ୍ଗ୍‌ ବା ନାନ୍ ନିଂଇ ମାତର୍‌ ଡ଼ିସ୍‍ଏ ।”
MAR 14:30 ଜିସୁ ପିତରତିଙ୍ଗ୍‌ ଇର୍ହାନ୍‌, “ନାନ୍ ନିଂଇ ସତ୍‌ ଇଜିନା, ନେର୍‍ଇ ନାଡ଼ା କର୍‌ରୁ ରିଜା କେଡ଼ିନି ଆଗ୍‌ଡ଼ି ନିନ୍‌ ନାଂଇ ମୁଜା ନାନ୍ ନେସେଏ ଇଜି ଲୋକାମାନୁ ଇନି ।”
MAR 14:31 ମାତର୍‌ ପିତର ନାଣ୍ତ ଆଟ୍‍ୱାଦାନ୍‍ ଇର୍‌ଆନ୍‌, “ନି ୱାଲେ ସାଦେଙ୍ଗ୍‌ ପଡ଼ାତିଙ୍ଗ୍‌ ବା ନାନ୍ ଏସ୍‌କାଙ୍ଗ୍‌ ନିଙ୍ଗିଁ ନେସ୍‍ଏ ଇଜି ଇନ୍‌ଏ । ମାରି ଆଇ ସିସୁର୍‍ବା ଆୟାୱାଜା ଇର୍ହାର୍‌ ।”
MAR 14:32 ଆୟାୱେନ୍‌କା ୱାର୍‌ ଗେତ୍‌ସିମାନି ଦର୍‌ତି ଉଣ୍ତ୍ରି ବାଡିଦୁ ୱାତାର୍‌, ମାରି ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌, “ନାନ୍ ପାର୍‌ତନା କିନେଣ୍‍ଗା ମିର୍‌ ଇବେନୁ ବାସ୍‌ସୋ ମାନ୍‌ଡ୍ରୁ ।”
MAR 14:33 ମାରି, ୱାନ୍‌ ପିତର, ଯାକୁବ ମାରି ଜୋହନତିଙ୍ଗ୍‍ ଅର୍‌ସେ ଅତାନ୍‌ନୋ ନାଣ୍ତ ସିମ୍ରା ମାରି ଦୁଃକ୍‌‍ କିଦେଙ୍ଗ୍‌ ଆସ୍‌ତାନ୍‌ ।
MAR 14:34 ଆବେଟ୍‌ ୱାନ୍‌ ସିସୁରିଙ୍ଗ୍‌ ଇର୍‌ଆନ୍‌, “ନା ଜିବନ୍‌ ସାନିୱାଜା ଆଜି ନାଣ୍ତ ଆଡ୍‌ବାଜିନାତ୍‌; ମିର୍‌ ଇବେ ବାସ୍‌ସ କାପ୍‍କିଦୁ ।”
MAR 14:35 ମାରି, ୱାଣ୍ତ୍ରୁ ଅଡ଼ପ୍‍ ଆକ ଆଗ୍‌ଡ଼ି ସଲ୍‌ସି ବୁମିଦୁ ମେଣ୍ତେଙ୍ଗ୍‍ ଗଟ୍‍ କିତାନ୍‌ନୋ, ପାର୍‌ତନା କିଜି ଇର୍‌ଆନ୍‌, ନି ବଦା ଜଦି ଆନାତ୍‌, ଇୟା ଦୁଃକ୍‌ ନାମାଣ୍‍କୁ ଆକ କିଆ ।
MAR 14:36 ମାରି, ଜିସୁ ଇର୍‌ଆନ୍‌, “ଅବ୍ବା, ବୁବା,” ୱିଜୁ ନିଂଇ ଉସାସ୍‌, ଇୟା ଦୁଃକ୍‌ ନାବାଣ୍‍କୁ ଆକ କିଆ; “ନା ବଦା ସିଲେ, ମାତର୍‌ ନି ବଦା ।”
MAR 14:37 ଆବେଟ୍‌ ୱାଣ୍ତ୍ରୁ ଡ଼େସିୱାଜି ୱାରିଙ୍ଗ୍‌ ସୁଜ୍‍ନିକା ସୁଡ଼ୁତାନ୍‌ ମାରି ପିତର୍‍ତିଙ୍ଗ୍‍ ଇର୍‌ଆନ୍‌, “ସିମୋନ୍‌, ମିର୍‌ ଇନିକା ସୁସ୍‍ତିଦେର୍‍ ? ନା ୱାଲେ ଉଣ୍ତ୍ରିଗନ୍‌ଟାବା କାପ୍‌କିଦେଙ୍ଗ୍‌ ଆଟ୍‍ଇତିଦେର୍‍ ?”
MAR 14:38 ପରିକାଦୁ ଏଣ୍ତେସ୍‌ ଆର୍‌ଇଦେର୍‌, “ଆୟା ଉଣ୍ତିଙ୍ଗ୍‌ ଜାଗାର୍‍ତାଦାନ୍‍ ପାର୍‌ତନା କିଦୁ; ଜିବନ୍‌ ବଦା କିନାତ୍‍ ସତ୍‌, ମାତର୍‌ ମେନ୍ଧଲ୍‍ ଲୋଡ଼ଲାଡ଼ା ।”
MAR 14:39 ୱାନ୍‌ ମାରିଡ଼େସି ସଲ୍‌ସି ଆଗ୍‌ଡ଼ି ଏଣ୍ତେସ୍‌ ପାର୍‌ତନା କିତାମାର୍‍ଆନ୍‍ ଆୟାୱାଜା ମାରି ପାର୍‌ତନା କିତାନ୍‌ ।
MAR 14:40 ମାରିଡ଼େସି, ୱାନ୍‌ ୱାଜି ସିସୁରିଙ୍ଗ୍‌ ସୁଜୁନିକା ସୁଡ଼ୁତାନ୍‌, ଇରିଙ୍ଗ୍‌ ୱାରି କାଣୁକୁ ସୁଡ଼୍‍ଦେଙ୍ଗ୍‍ ଆଟ୍‍ଏଜି ମାର୍ହାର୍‌, ୱାର୍‌ ୱାନିଙ୍ଗ୍‌ ଇନିକା ଇନାର୍‌, ଆକା ନେସ୍‌ଏର୍‌ ମାର୍ହାର୍‌ ।
MAR 14:41 ୱାନ୍‌ ମୁଜା ୱାଜି ୱାରିଙ୍ଗ୍‌ ଇର୍‌ଆନ୍‌, “ସାଣେକ୍‌ ସୁଜ୍‍ଜି ରମ୍‍ଦୁ; ନାଣ୍ତ ଆତାତ୍‌ନି ! ଆୟା ସମୟ ଇଗା ୱାତାତ୍‌ନି ! ସୁଡ଼୍‍ଦୁ, ମନୁସ୍ୟପୁତ୍ର ଜେ ନାନ୍ ପାପି ଲୋକା କିୟୁଦୁ ସେର୍‍ପାନା ।
MAR 14:42 ନିଙ୍ଗ୍‍ଦୁ, ମାଡ୍‌ ସନାଟ୍‌; ସୁଡ଼ୁଦୁ, ଏନ୍‌ ନାଙ୍ଗିଁ ସାତ୍ରୁରି କିୟୁଦୁ ସେରେପ୍‌ନା ସିନାନ୍‌, ୱାନ୍‌ ଲାକ୍‌ତୁ ୱାତାନ୍‍ନି ।”
MAR 14:43 ମାରି ଆୟାଦାପ୍ରେ, ୱାନ୍‌ ମାଟା ଇନିୱାଲେ, ବାରଲୋକ୍ ସିସୁରି ଲୋଇରାନ୍‌ ଜିହୁଦା ଦର୍‍ତିକାନ୍‍ ମାରି ଏସ ପେରି ଯାଜକର୍‌, ସାସ୍ତ୍ରିର୍‍ ମାରି ପେରି ନେତାରି ମାଣ୍‌କୁ ଲୋକୁ କାଣ୍ତା ମାରି ବାଡିଗା ଆସ୍‌ସି ୱାତାର୍‌ ।
MAR 14:44 ଜିସୁଙ୍ଗୁଁ ସାତ୍ରୁରି କିଦୁ ସେର୍‍ପେନିକାନ୍ ୱାରିଙ୍ଗ୍‌ ଇୟା ସିନା ସିଜି ଇର୍‌ଆନ୍‌, “ନାନ୍ ଆମାୱାନିଙ୍ଗ୍‌ ନଣ୍ତ୍‌ନା, ଆକାନ୍‍ ଜିସୁ; ୱାନିଙ୍ଗ୍‌ ଜାଗାର୍‍ତାଦାନ୍‍ ତର୍‍ନି ଅନିଦେର୍‍ ।”
MAR 14:45 ଜିହୁଦା ୱାଜି ଇତି ଦାପ୍ରେ ଜିସୁଦି ଲାକ୍‌ତୁ ସର୍‌ଆନ୍‌ ନୋ, “ଏ ଗୁରୁ !” ଇଜି ଇର୍‌ଆନ୍‌ ନୋ ଜିସୁଙ୍ଗୁଁ ନାଣ୍ତ ନଣ୍ତିତାନ୍‍ ।
MAR 14:46 ଆବେଟ୍‌ ୱାର୍‌ ୱାତାର୍‌ ରୋ ଜିସୁଙ୍ଗୁଁ ଆସ୍ତାରୋ ତର୍‍ତାର୍‍ ।
MAR 14:47 ମାତର୍‌ ଲାକ୍‌ତୁ ନିର୍‍ହି ମାର୍‍ଇ ଲୋକା ଲୋଇ ଅରେନ୍‍ କାଣ୍ତା ସପ୍‌ତାନ୍‌ନୋ ମାରି ପେରି ଜାଜକ୍‍ତି ଗତିମୁରୁଲିଙ୍ଗ୍‌ ଆସ୍‍ତାନ୍‍ନୋ ୱାନି ଗିତଣି କୟତା ପକ୍‌ତାନ୍‌ ।
MAR 14:48 ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାଂଇ ଆସ୍‌ତେଙ୍ଗ୍‌ ଅରେନ୍‍ ଡଙ୍ଗାଁର୍‍ଏଙ୍ଗ୍‍ ଆସ୍‌ତେଙ୍ଗ୍‌ ୱାନିୱାଜା ମିର୍‌ କାଣ୍ତା ମାରି ଡୁଡୁ ଆସ୍‌ତି ୱାତିମାନିଦେର୍‌ ?
MAR 14:49 ନାନ୍ ତୋ ୱିଜୁୱାଲେ ମିୱାଲେ ମନ୍ଦିର୍‌ତୁ ମାନ୍‌ଜି ସିକିୟା ସିଜି ମାର୍‍ଆ, ମାତର୍‌ ମିର୍‌ ନାଂଇ ଆସ୍‍ଇତିଦେର୍‍; ମାତର୍‌ ଦାର୍ମୁସାସ୍ତ୍ରଦି ମାଟା ଏଣ୍ତେସ୍‌ ସତ୍‌ ଆନାତ୍‌, ଆୟା ଉଣ୍ତିଙ୍ଗ୍‌ ଇୟାୱିଜୁ ଗଟାଜିନାତ୍‍ ।”
MAR 14:50 ଇୟା ୱେନ୍‌କା ୱାନି ସିସୁର୍‌ ୱିଜେରେ ୱାନିଙ୍ଗ୍‌ ଡ଼ିସ୍‍ସି ଉରୁକ୍‍ତାର୍‍ ।
MAR 14:51 ମାତର୍‌ ଅରେନ୍‍ ମୁରୁଲି କଡ଼ ୱାନି ଡୁମ୍‍ଡା ମେନ୍ଦଲ୍‌ତୁ ଇସ୍ରି ସାଦର୍‌ ପିଡ଼୍‍ଗିତାନ୍‍ନୋ ଜିସୁୱାଲେ ୱାଲେ ସଲ୍‌ସି ମାର୍‌ଆନ୍‌; ଆୟା ଲୋକୁ ମୁରୁଲିଙ୍ଗ୍‌ ଆସ୍‌ତେଙ୍ଗ୍‌ ବଦାକିତାର୍‌ ।
MAR 14:52 ମାତର୍‌ କଡ଼ ଆୟା ଇସ୍ରି ସାଦର୍‌ ଡ଼ିସ୍‍ତାନ୍‍ନୋ ଡୁମ୍‍ଡା ଆତା ଉରୁକ୍‍ତାନ୍‍ ।
MAR 14:53 ୱେନ୍‌କା ୱାର୍‌ ଜିସୁଙ୍ଗୁଁ ୱିଜେରିଙ୍ଗ୍‍ ପେରିଜାଜକତି ଲାକ୍‌ତୁ ଅତାର୍‍, ମାରି ପେରି ଜାଜକର୍‌, ପେରି ପେରି ନେତାର୍‍ ମାରି ସାସ୍ତ୍ରିର୍‍ ୱିଜେରେ ୱାତା ଉଣ୍ତାତାର୍‌ ।
MAR 14:54 ପିତର ଅଡ଼ପ୍‍ ଆକ ତେବାତାନ୍‌ ନୋ ୱାନି ୱାଲେ ୱାଲେ ୱିଜେରିଙ୍ଗ୍‍ ପେରି ଜାଜକ୍‍ତି ଦୁଆର୍‌ ଲୋଅ ସର୍‌ଆନ୍‌ ମାରି ଆବେ ଇଲୁ କାପ୍‍କିନି ଲୋକାୱାଲେ ସିସୁ କାଇଜିମାର୍‍ଆନ୍‍ ।
MAR 14:55 ଆୟାୱେନ୍‌କା ପେରି ଯାଜକର୍‌ ମାରି ଯିହୁଦି ସଭାତି ଲୋକୁ ୱିଜେରେ ଜିସୁଙ୍ଗୁଁ ଡାକ୍‌ତେଙ୍ଗ୍‍ଁ ଇଜି ୱାନି ବିରୁଦାନ୍‍ ସାକି ପ‍ଇଦେଙ୍ଗ୍‌ ଆସ୍‌ତାର୍‌, ମାତର୍‌ ପଇଏତାର୍‍ ।
MAR 14:56 ମାରି ଏସ ଲୋକୁ ଜିସୁ ବିରୁଦ୍‌ତାନ୍‍ ମିଚ୍‍ ସାକି ଇର୍ହାର୍‌ ମାତର୍‌ ୱାରି ମାଟା ମିସାଏତାତ୍‍ ।
MAR 14:57 ମାରି ୱେନ୍‌କା ଏସ ଲୋକୁ ନିର୍‍ରା ରୋ ୱାନି ବିରୁଦ୍‍ତାନ୍‍ ଇୟା ମିସ୍‌ ସାକି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌;
MAR 14:58 “ମାପ୍‌ ୱେନ୍‍ ଇୟା ମାଟା ଇନିକା ୱେର୍‍ଆମାନାପ୍‍, ନାନ୍ ଲୋକୁ କିୟୁଦୁ ତିଆର୍‍କିତି ଇୟା ମନ୍ଦିର୍‌ତିଙ୍ଗ୍‌ ରୁକ୍‍ସି ମୁନେଟାନ୍‍ ମାରି ଉଣ୍ତ୍ରିଲୋକା କିକାଣ୍‍ ତିଆର୍ ଆଇ ମନ୍ଦିର୍‌ ତିଆର୍‌ କିନା ।”
MAR 14:59 ମାତର୍‌ ଇବେବା ୱାରି ସାକି ମିସାଏତାତ୍‍ ।
MAR 14:60 ଆବେଟ୍‌ ୱିଜେରିଙ୍ଗ୍‍ ପେରି ଜାଜକ୍‍ ଜିସୁଙ୍ଗୁଁ ନାଡ଼୍‍ମି ନିଲ୍‍ପ୍‍ତାନ୍‍ନୋ ୱେନ୍‌ବାତାନ୍‌, “ନି ବିରୁଦ୍‍ତାନ୍‍ ଇୟାକାର୍‌ ଏମେ ମାଟା ଇଜିନାର୍‍, ଆକା ସତ୍‍ନୋ, ନିନ୍‌ ଇନିକା ବା ଇନ୍‍ଇଜିନି ?”
MAR 14:61 ମାତର୍‌ ଜିସୁ ଇନିକା ଇନ୍‍ଏଣ୍ତା ଆଲେତାମାର୍‍ଆନ୍‍, ୱିଜେରିଙ୍ଗ୍‍ ପେରି ଯାଜକ୍‍ ମାରିଡ଼େସି ୱେନ୍‌ବାତାନ୍‌, “ନିନ୍‌ ଇନିକା ପ୍ରସଂସା ପଇଜିମାନି ମାପୁରୁଦି ମାରିନ୍‌ କ୍ରିସ୍ତ ?”
MAR 14:62 ଜିସୁ ଇର୍‌ଆନ୍‌, “ହୁଁ ନାନ୍, ମିର୍‍ ମନୁସ୍ୟପୁତ୍ରଦିଙ୍ଗ୍‍ ପେରି ସାକ୍ତିଦି ମାପୁରୁଦି ଉଣି କିୟୁ ତର୍‌ନି ବାସ୍‍ନିକା ମାରି ବାଦଡ଼୍‍ତି ରତଦାନ୍‍ ୱାନିକା ମିର୍‌ ସୁଣିଦେର୍‍ ।”
MAR 14:63 ଆବେଟ୍‌ ୱିଜେରିଙ୍ଗ୍‌ ପେରି ଜାଜକ ନିଜେଦି ଆଙ୍ଗିଁଦିଙ୍ଗ୍‌ କିସ୍‌ସି ପୋକ୍‌ସି ଇର୍ହାନ୍‌, “ସାକି ମାରି ଇନି ମାଙ୍ଗିଁ ଦରକାର୍‍ଲୁ ?
MAR 14:64 ମିର୍‌ ତୋ ୱାନ୍‌ ମାପୁରୁଙ୍ଗୁଁ ନିନ୍ଦାକିନିକା ୱେର୍‌ଇଦେର୍‌; ଇଲେଇ ମିର୍‌ ଇନି ବିସାର୍‌ କିନିଦେର୍‌ ?” ଆବେଟ୍‌ ୱାର୍‌ ୱିଜେରେ ଇର୍ହାର୍‌ ଜିସୁ ସାନିକା ଜଗ୍‌ ମାନାତ୍‌ ।
MAR 14:65 ମାରି, ଏର୍‌ ଏର୍‌ ଜିସୁ ମୁସ୍‌କୁ ପୁସ୍‍କାଣାମ୍‍ ପୁସ୍‍ତେଙ୍ଗ୍‍ ଆସ୍‌ତାର୍‌ ମାରି ୱାନି ମକମ୍‍ତିଙ୍ଗ୍‍ ପାଗା କେରେପ୍‌ସି ୱାନିଙ୍ଗ୍‌ ଲାତ୍‍ ଅଦ୍‍ଗିଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ନିନୁନେ ବାବବାଦି !” ମାଙ୍ଗିଁ ୱେର୍‌ଆ । କାପ୍‍କିନିକାର୍‍ ୱିଜେରେ ସାପୁଡ଼ୁ ଡାକ୍‍ବୁ ଡାକ୍‍ବୁ ଜିସୁଙ୍ଗୁଁ ଆସ୍‌ତା ଅତାର୍‍ ।
MAR 14:66 ଆୟାୱାଲେ ପିତର ଆଡ୍‍ଗି ଦୁଆର୍‌ତୁ ତେବାନିୱାଲେ ୱିଜେରିଙ୍ଗ୍‍ ପେରି ଯାଜକତି ଲାକ୍‌ତୁ ପାଣି କିନି ଅରେତ୍‌ ଆଇମା ୱାଜି ପିତର୍‍ତିଙ୍ଗ୍‍ ସିସୁ କାୟନିକା ସୁଡ଼ୁତାତ୍‍ ।
MAR 14:67 ଆୟା ଆଇମା ପିତରତିଙ୍ଗ୍‌ ନେଗେନ୍‌ କିଜି ସୁଡ଼୍‌ଜି ଇର୍ହାତ୍‌, “ନିନ୍‍ବା ନାଜରିତିୟ ଜିସୁୱାଲେ ମାର୍‍ଇ ।”
MAR 14:68 ମାତର୍‌ ପିତର ମାନା କିଜି ଇର୍‌ଆନ୍‌, “ନାନ୍ ୱାନିଙ୍ଗ୍‌ ନେସେଏ, ମାରି ନିନ୍‌ ଇନିକା ଇଜିନି, ନାନ୍ ବୁଝାଏଜିନା ।” ଆବେଟ୍‌ ୱାନ୍‌ ଦୁଆର୍‍ ଆତ୍‌ରେ ସତା ସର୍‌ଆନ୍‌ । ଆୟାଦାପ୍ରେ କରୁ ରିଜା କେଡ଼ିତାତ୍‍ ।
MAR 14:69 ଆୟା ପାଣି କିନି ଆଇମା ପିତରତିଙ୍ଗ୍‌ ସୁଡ଼ୁଜି ଲାକ୍‌ତୁ ନିର୍‍ଇ ମାର୍‍ଇ ଲୋକାଙ୍ଗ୍‌ ମାରିଡ଼େସି ଇର୍ହାତ୍‌, “ଇକାନ୍‌ ୱାରିମାଣ୍‍କୁ ଅରେନ୍‍ !”
MAR 14:70 ମାତର୍‌ ପିତର ମାରିଡ଼େସି ମାନାକିଜି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌ । ମାରି ଏସ ସମୟ ସରି ୱେନ୍‌କା ଆବେ ନିର୍‍ଇ ମାର୍‍ଇ ଲୋକ୍‌ଡର୍‌ ପିତରତିଙ୍ଗ୍‌ ଇର୍ହାର୍‌, “ନିନ୍‌ ସତେନେ ୱାରି ମାଣାନ୍‌ ଅରେନ୍‍, ଇରିଙ୍ଗ୍‌ ନିନ୍‍ବାତୋ ଗାଲିଲିଦି ଲୋକୁ ।”
MAR 14:71 ମାତର୍‌ ପିତର ନିଜେଦିଙ୍ଗ୍‍ ଆନାଦୁରିଆ କିଜି ମାରି ପାର୍‌ମାଣ୍‌ କିଜି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ମିର୍‌ ଏମେ ଲୋକ୍‌ତି ମାଟା ଇଜିନିଦେର୍‌, ନାନ୍ ୱାନିଙ୍ଗ୍‌ ମୁଲ୍‍କେ ନେସେଏ ।”
MAR 14:72 ଆବେଟ୍‌, “କରୁ ରିଜା କେଡ଼ିତିଙ୍ଗ୍‍ ଆଗ୍‌ଡ଼ି ମୁଜା ନିନ୍‌ ନାଂଇ ନେସେଏ ଇଜି ଇନି,” ଜିସୁ ଇର୍‍ଇମାର୍‍ଇ ମାଟା ପିତରତି ମୋନ୍‌ତୁ ଏତ୍‌ ୱାତାତ୍‍, ମାରି ପିତର ଆୟାମାଟା ଅଡ଼୍‍ବିତାନ୍‍ନୋ ଦୁଃକ୍‌‍ତାନ୍‍ ଆଡ଼୍‍ବାଦେଙ୍ଗ୍‍ ଆସ୍‌ତାନ୍‌ ।
MAR 15:1 ସାଲ୍‍ଦି ଆତି ଦାପ୍ରେ ୱିଜେରେ ପେରି ନେତାର୍‌, ସାସ୍ତ୍ରିରିୱାଲେ ପେରି ଜାଜକର୍‌ ୱିଜେରେ ଉଣ୍ତାତାରୋ ୱାର୍‌ଗିଜି ସାଜି ଜିସୁଙ୍ଗୁଁ ତର୍‍ତା ଅତାରୋ ପିଲାତ୍‌ କିୟୁଦୁ ସର୍‍ପେ କିତା ସିତାର୍‍ ।
MAR 15:2 ପିଲାତ୍‌ ଜିସୁଙ୍ଗୁଁ ୱେନ୍‌ବାତାନ୍‌, “ନିନ୍‌ ଇନିକା ଜିହୁଦି ଲୋକା ରାଜା ?” ଜିସୁ ୱାନିଙ୍ଗ୍‌ ଇର୍‌ଆନ୍‌, “ନିନ୍‍ତୋ ଆୟାମାଟା ଇଜିନି ।”
MAR 15:3 ମାରି, ପେରି ଜାଜକର୍‌ ଜିସୁ ବିରୁଦ୍‍ତାନ୍‍ ନାଣ୍ତ ମାଟା ଇନ୍‌ଡ୍ରେଙ୍ଗ୍‌ ଆସ୍‌ତାର୍‌ ।
MAR 15:4 ଆବେଟ୍‌ ପିଲାତ୍‌ ମାରିଡ଼େସି ଜିସୁଙ୍ଗୁଁ ୱେନ୍‌ବାତାନ୍‌, “ନିନୁ ଇନିକା ବା ଇନ୍‍ଇଜିନି ? ସୁଡ଼ୁଆ, ଇୟାକାର୍‌ ନି ବିରୁଦ୍‍ତାନ୍‍ ଏସୋ ମାଟା ଇଜିନାର୍‍ ।”
MAR 15:5 ମାତର୍‌ ଜିସୁ ଉଣ୍ତ୍ରି ପଦ୍‍ବା ମାଟା ଇନ୍‌ଏତାନ୍‌, ଆବେଟ୍‌ ପିଲାତ୍‌ କାବାଆତାସର୍‍ଆନ୍‍ ।
MAR 15:6 ମାତର୍‌ ୱିଜୁ ବାର୍ସେକ୍‍ ନିସ୍ତାର୍ ପଣ୍ତୟ୍‌ ସମୟତୁ ଲୋକୁ ଆମା ଜଇଲ୍‌ତୁ ମାନି ୱାନିଙ୍ଗ୍‌ ଲୋସ୍‍ସି ମାର୍‌ଆର୍‌, ୱାନିଙ୍ଗ୍‌ ପିଲାତ୍‌ ୱାରି ଉଣ୍ତିଙ୍ଗ୍‌ ଡ଼ିସିସ୍‍ ସିଜିମାର୍‍ଆନ୍‍ ।
MAR 15:7 ଏମେ ଜାଟି ଜଗଡ଼ାକିନିକାର୍‍ ସରକାର୍‍ ବିରଦ୍‌ତାନ୍‌ ଜାଟି ଜଗଡ଼ା କିତାରୋ ଲୋକାଙ୍ଗ୍‌ କାତ୍‍ତା ମାର୍‌ଆର୍‌, ୱାରିୱାଲେ ବାରବ୍‌ବା ଦର୍‌ତି ଅରେନ୍‍ ଲୋକୁ ଜଇଲ୍‌ତୁ ମାର୍‌ଆନ୍‌ ।
MAR 15:8 ନାସ୍ତିୱାଲେ ଉଣ୍ତାତିମାର୍‍ଇ ଲୋକ୍‌ଡର୍‌ ପିଲାତ୍‌ ଲାକ୍‌ତୁ ୱାଜି ୱାନି ରୀତିନୀତି ଦାଣ୍ତ୍‍ ଅରେନ୍‍ ଜଇଲ୍‍ତୁମାନି ୱାନିଙ୍ଗ୍‌ ଡ଼ିସିସ୍‍ କିଦେଙ୍ଗ୍‌ ଦାବି କିତାର୍‍ ।
MAR 15:9 ଆବେଟ୍‌ ପିଲାତ୍‌ ୱାରିଙ୍ଗ୍‌ ୱେନ୍‌ବାତାନ୍‌, “ମିର୍‌ ଇନିକା ବଦା କିଜିନିଦେର୍‌ ? ନାନ୍ ଇନିକା ମି ଉଣ୍ତିଙ୍ଗ୍‌ ଜିହୁଦିରି ରାଜେଙ୍ଗ୍‍ ଡ଼ିସ୍‌ନା ସିନା ନୋ ?”
MAR 15:10 ଇରିଙ୍ଗ୍‌ ପିଲାତ୍‌ ନେସ୍‌ତାନ୍‌ ଜେ, ପେରି ଜାଜକର୍‌ ଜିସୁଙ୍ଗୁଁ ଗିଦ୍ରିଦାନ୍‍ ୱାନିମାନୁ ସେରେପ୍‍ତା ମାନାର୍‌ ।
MAR 15:11 ମାତର୍‌ ପିଲାତ୍‌ ଏଣ୍ତେସ୍‍କି ୱାରି ଉଣ୍ତିଙ୍ଗ୍‌ ଜିସୁଙ୍ଗୁଁ ଡ଼ିସ୍‍ଏଣ୍ତା ବାରବ୍‌ବାଦିଙ୍ଗ୍‌ ଡ଼ିସ୍‍ନାନ୍‍, ଆୟା ଉଣ୍ତିଙ୍ଗ୍‌ ପେରି ଜାଜକର୍‌ ୱିଜୁ ଲୋକାଙ୍ଗ୍‌ ସୁର୍ରି ୱାର୍‍ଗିସ୍‍ କିବିସ୍‍କିତାର୍‍ ।
MAR 15:12 ମାତର୍‌ ପିଲାତ୍‌ ଲୋକାଙ୍ଗ୍‌ ମାରିଡ଼େସି ୱେନ୍‌ବାତାନ୍‌, “ଆମାୱାନିଙ୍ଗ୍‌ ମିର୍‌ ଯିହୁଦି ଲୋକ୍‌ତି ରାଜା ଇଜିନିଦେର୍‌, ୱାନିଙ୍ଗ୍‌ ନାନ୍ ଇନିକା କିନା ?”
MAR 15:13 ଲୋକ୍‌ଡର୍‌ ଆଉଲି ଆଜି ଇର୍ହାର୍‌, “ୱାନିଙ୍ଗ୍‌ କ୍ରୁସଦୁ ଏକିସ୍‍କିଦୁ !”
MAR 15:14 ଆବେଟ୍‌ ପିଲାତ୍‌ ୱାରିଙ୍ଗ୍‌ ୱେନ୍‌ବାତାନ୍‌, “ଏନ୍ଦା, ୱାଣ୍ତ୍ରୁ ଇନି ଦୋଷ୍‌ କିତାମାନାନ୍‌ ?” ମାତର୍‌ ଆୟା ଲୋକ୍‌ଡର୍‌ ମାରି ନାଣ୍ତନେ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ୱାନିଙ୍ଗ୍‌ କ୍ରୁସଦୁ ଏକିସ୍‌କିଦୁ ।”
MAR 15:15 ପିଲାତ୍‌ ଲୋକା ୱେଡ଼ିକା କିବିସ୍‍ କିଦେଙ୍ଗ୍‌ ବଦାକିତାନ୍‌ନୋ, ୱାରି ଉଣ୍ତିଙ୍ଗ୍‌ ବାରବ୍‌ବାବେଙ୍ଗ୍‍ ଜଇଲ୍‍ତାନ୍‍ ମୁକୁଡ଼ା କିବିସ୍‍ କିତାନ୍‌, ମାରି ଜିସୁଙ୍ଗୁଁ କୋର୍‍ଡା ଡାକିସ୍‍କିଜି କ୍ରୁସକାଟ୍‌ତୁ ଏକିସ୍‍କିଦେଙ୍ଗ୍‍ ସେର୍ପେକିତାନ୍‍ ।
MAR 15:16 ଆବେଟ୍‌ ସେନାର୍‍ ଜିସୁଙ୍ଗୁଁ ପିଲାତ୍‌ ଉଣ୍ତ୍ରି ମେଡ଼୍‍ଇଲୁଦି ଦୁଆର୍‌ତୁ ଅତାରୋ ୱିଜୁ ସେନା ଦଳତିଙ୍ଗ୍‍ କୁକ୍‌ତା ଉଣ୍ତାତାର୍‌ ।
MAR 15:17 ସେନାର୍‍ ଜିସୁଙ୍ଗୁଁ ସେମାର୍‍ କିଦେଙ୍ଗ୍‌ ଆକ୍‍ ରଙ୍ଗ୍‍ତି ଆଙ୍ଗିଁ ଆରିସ୍‌କିତାର୍‌ ମାରି ସାମ୍‍କା ଟୋପି କିତାରୋ ୱାନି ତାଲାଦୁ ଆରିସ୍‌କିତାର୍‌;
MAR 15:18 ଆୟାୱେନ୍‌କା ସେନାର୍‍ ଜିସୁଙ୍ଗୁଁ ଏ ଜିହୁଦିରି ରାଜା, ଇଜି ମାଡ଼ିସ୍‌ କିତାର୍‍, “ମାରି ୱାନିଙ୍ଗ୍‌ ୱିଜୁଦିନ୍‌ ଜିଜି ମାନ୍‌ଆ ଇଜି ଇର୍ହାର୍‌ ।”
MAR 15:19 ମାରି, ସେନାର୍‍ ଉଣ୍ତ୍ରି ବାଡିଗାଦାନ୍‍ ୱାନି ତାଲାଦୁ ଡାକ୍‍ତାର୍‍ ମାରି ୱାନି ମୁସ୍‌କୁ ପୁସ୍‌ତାର୍‌, ଆବେଟ୍‌ ୱାର୍‌ ସେମାର୍‌ କିଜି ମେଣ୍ତେଙ୍ଗ୍‌ ଗଟ୍‌କିଜି ୱାନିଙ୍ଗ୍‌ ମାଡ଼ିସ୍‌ କିଦେଙ୍ଗ୍‌ ଆସ୍‌ତାର୍‌ ।
MAR 15:20 ୱାର୍‌ ୱାନିଙ୍ଗ୍‌ ସେମାର୍‍ କିତିୱେନ୍‌କା ଆୟା ଆକ୍‍ ରଙ୍ଗ୍‍ତି ଆଙ୍ଗିଁ କୁତ୍‍ତା ରୋ ୱାନି ନିଜେଦି ଆଙ୍ଗିଁ ଆରିସ୍‌କିତାର୍‌ । ମାରି, ଇୟା ୱେନ୍‌କା ୱାର୍‌ ଜିସୁଙ୍ଗୁଁ କ୍ରୁସଦୁ ଏକିସ୍‍ କିଦେଙ୍ଗ୍‌ ଇଜି ଆତ୍‌ରେ ସପ୍‌ତା ଅତାର୍‍ ।
MAR 15:21 ଆୟାୱାଲେ ଅରେନ୍‍ କୁରିଣିୟଦୁ ବାସାନି ସିମୋନ ନାର୍‍ଦାଣ୍ତ‍ ୱାଜି ଆୟା ସାରି ସିଜି ସଲ୍‌ସି ମାର୍‌ଆନ୍‌ । ୱାଣ୍ତ୍ରୁ ଆଲେକ୍‍ଜାଣ୍ତର୍‍ ମାରି ରୁପରି ବୁବାସି ମାର୍‌ଆନ୍‌ । ସେନାର୍‍ ୱାନିଙ୍ଗ୍‌ ଜିସୁଦି କ୍ରୁସକାଟ୍‌ ପିଣ୍ଡ୍‌ଦେଙ୍ଗ୍‌ ଜାସେ କିତାର୍‌ ।
MAR 15:22 ମାରି, ସେନାର୍‍ ଜିସୁଙ୍ଗୁଁ ଗଲ୍‌ଗଥା ଗରନ୍‍ତୁ, ଅର୍ତାତ୍‍ “ତାଲାଦି କାପାଲ୍‌ ନାନି ଦର୍‌ତି ବାଡିଦୁ ଅତାର୍‍ ।”
MAR 15:23 ମାରି, ସେନାର୍‍ ଜିସୁଙ୍ଗୁଁ କାପୁଆନି ମାୟାମ୍‍ ମିସାତି ଅଙ୍ଗୁର୍‍ରସ୍‍ ଉଣ୍ତେଙ୍ଗ୍‌ ଜାସେକିତାର୍‍, ମାତର୍‌ ଆକା ୱାନ୍‌ ଉଣୁଏତାନ୍‍ ।
MAR 15:24 ୱେନ୍‌କା ୱାର୍‌ ଜିସୁଙ୍ଗୁଁ କ୍ରୁସକାଟ୍‌ତୁ ଏକିସ୍‍କିତାର୍‍, ମାରି ଏନ୍‌ ଇନିକା ପଇନାର୍‌, ଆୟା ୱାନି ଆଙ୍ଗିଁଦିଙ୍ଗ୍‍ ବୋଟ୍‍ କିତାର୍‍ ନିଜେଦି ମାଣ୍‌କୁ ବାଗ୍‌ କିଜି ଅତାର୍‍ ।
MAR 15:25 ସାଲ୍‍ଦି ନଅଟାଦୁ ୱାର୍‌ ଜିସୁଙ୍ଗୁଁ କ୍ରୁସଦୁ ଏକିସ୍‍କିତାର୍‍ ।
MAR 15:26 ଜିସୁଦି ବିରଦ୍‍ତୁ ଉଣ୍ତ୍ରି ମାଟା କ୍ରୁସକାଟ୍‌ତି ମୁସୁକୁ ରାସ୍‌ତା ମାରାଆତ୍‌, “ଇକାନ୍‌ ଜିହୁଦିର୍‌ ରାଜା ।”
MAR 15:27 ୱାର୍‌ ଆୟା ନାଣ୍ଡିଙ୍ଗ୍ ରିଏର୍‌ ଡଙ୍ଗାଁରିଙ୍ଗ୍‌ ବା ଜିସୁୱାଲେ କ୍ରୁସକାଟ୍‌ଦୁ ଏକିସ୍‍ କିତାମାର୍‍ଆର୍‍, ଅରେନ୍‍ ୱାନିଙ୍ଗ୍‌ ଜିସୁଦି ଡେବିରି କିୟୁ ତରିଣ୍ତ୍‍ ମାରି ଅରେନ୍‍ ୱାନିଙ୍ଗ୍‌ ଜିସୁଦି ଉଣି କିୟୁ ତରିଣ୍ତ୍‍ ।
MAR 15:28 ଆବେଟ୍‌ ଦାର୍ମୁସାସ୍ତ୍ରଦି ଇୟା ବାକ୍ୟ ସତ୍‍ଆତାତ୍‍, “ୱାଣ୍ତ୍ରୁ ଡଙ୍ଗାଁରିୱାଲେ ଡଙ୍ଗାଁର୍‍ଏନ୍‍ ଇଜି ଲେକିସ୍‍ଆତାନ୍‍ ।”
MAR 15:29 ଆୟା ସାରି ସିଜି ସନି ଲୋକ୍‌ଡର୍‌ ୱାରି ତାଲେକ୍‍ ଦୁକ୍‍ସି ଜିସୁଙ୍ଗୁଁ ନିନ୍ଦା କିଜି ଇର୍ହାର୍‌, “ବାଃ ! ଏରେ ମନ୍ଦିର୍‌ ରୁକ୍‌ନି କିନ୍ଦା ମାରି ମୁନେଟାନ୍‍ ମାରିଡ଼େସି ତିଆର୍‌ କିନିକିନ୍ଦା;
MAR 15:30 ଇଲେଇ କ୍ରୁସଦାନ୍‌ ରେସ ନିଜେଦିଙ୍ଗ୍‍ ରକିୟା କିଆ ।”
MAR 15:31 ପେରି ଜାଜକର୍‍ବା ଆୟାୱାଜା ସାସ୍ତ୍ରିରିୱାଲେ ୱାରି ୱାରି ଲଅ ଜିସୁଙ୍ଗୁଁ ବାସେ କିଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ୱାଣ୍ତ୍‍ରୁ ଆଇ ଲୋକାଙ୍ଗ୍‌ ରକିୟା କିତାନ୍‌, ନିଜେଦିଙ୍ଗ୍‍ ରକିୟା କିଦେଙ୍ଗ୍‌ ଆଟ୍‌ଏଜିନାନ୍‌ ।”
MAR 15:32 ନିନ୍‌ ଜଦି ସତ୍‌ତାନ୍‌ ଇସ୍ରାଏଲ୍‌ତି ରାଜା କ୍ରିସ୍ତ ଇୟାଦାପ୍ରେ କ୍ରୁସଦାନ୍‌ ରେସ ରାଆ, ଆକା ସୁଡ଼ୁଜି ମାପ୍‍ ନିବାନ୍‍ ବିସ୍‍ବାସ୍‍ କିନାପ୍‍ । ଆମା ରିଏର୍‌ ଡଙ୍ଗାଁର୍‍ ୱାନିୱାଲେ କ୍ରୁସଦୁ ଏକ୍‌ତାମାର୍‍ଆର୍‍, ଆକାର୍‍ ବା ଆୟାୱାଜା ମାଟା ଇଜି ବାସେ କିତାର୍‌ ।
MAR 15:33 ଆୟା ନାଣ୍ଡିଙ୍ଗ୍ ବାର ଗନ୍‌ଟା ସମୟ୍‌ତୁ ପୃତିବି ୱିଜୁ ସିକାଟି ଆଜି ମୁଣ୍ତ୍ରି ଗନ୍‌ଟା ସାନ୍ଦି ତେବାତାତ୍‌ ।
MAR 15:34 ମୁଣ୍ତ୍ରିଗନ୍‌ଟା ସମୟ୍‌ତୁ ଜିସୁ ନାଣ୍ତ ଆଉଲି ଆଜି କୁକ୍‌ସି ଇର୍‌ଆନ୍‌, “ଏଲି, ଏଲି, ଲାମା ସାବକ୍‍ଥାନୀ ?” ଅର୍ତାତ୍‍, “ଏ ନା ମାପୁରୁ, ଏ ନା ମାପୁରୁ, ନିନୁ ନାଙ୍ଗିଁ ଏନ୍ଦା ଡ଼ିସ୍‍ତି ?”
MAR 15:35 ଜିସୁ ମାଟା ଇନିକା ୱେନ୍‌ଜି ଆୟା ଲାକ୍‌ତୁ ନିର୍‍ଇ ମାର୍‍ଇ ଏସ ଲୋକା ମାଣ୍‌କୁ ଏନ୍‌ ଏନ୍‌ ଇର୍ହାର୍‌, “ସୁଡ଼ୁଦୁ, ୱାଣ୍ତ୍‍ରୁ ଏଲିୟଙ୍ଗ୍‍ କୁକ୍‍ସିନାନ୍‍ ।”
MAR 15:36 ମାରି, ଅରେନ୍‍ ଉରୁକ୍‍ସି ସଲ୍‌ସି ଉଣ୍ତ୍ରି ତୁଲାଦୁ ସଇନି ରସ୍‌ ବର୍ତି କିଜି ଆକା ଉଣ୍ତ୍ରି ବାଡିଗାଦୁ ତର୍‌ସି ଜିସୁଙ୍ଗୁଁ ଉଣ୍ତେଙ୍ଗ୍‌ ସିଜି ଇର୍‌ଆନ୍‌, “ମାଣ୍ତ୍ରୁ, ଏଲିୟ୍‌ ୱେନିଙ୍ଗ୍‌ କ୍ରୁସଦାନ୍‌ ରେପ୍‌ତେଙ୍ଗ୍‌ ୱାଜିନାନ୍‍ନୋ ରେଏନ୍‌, ସୁଣାଟ୍‍ ।”
MAR 15:37 ମାତର୍‌ ଜିସୁ ନାଣ୍ତ ଆଉଲି ଆଜି ୱାନି ଜିବନ୍‌ ସିତାନ୍‌ ।
MAR 15:38 ମାରି, ମନ୍ଦିର୍‌ତୁ ପବିତ୍ର ବାଡିଦିଙ୍ଗ୍‍ ଏର୍‍ପିସିମାନି ଦୁଙ୍ଗ୍‍ନି ପାର୍‌ଦା ମୁସ୍‌କୁରାନ୍‌ ଆଡ୍‍ଗି ସାନ୍ଦି କିଜ୍‍ଜି ରୁଣ୍ତି ମକେଙ୍ଗ୍‌ ଆତାତ୍‌ ।
MAR 15:39 ସତସେନାପତି କ୍ରୁସଦି ଆଗ୍‌ଡ଼ି ନିର୍‍ଆନ୍‍ ନୋ ଜିସୁ ଏଣ୍ତେସ୍‌ ସାତାନ୍‍ ଆକା ସୁଡ଼ୁଜି ଇର୍‌ଆନ୍‌, “ସତେନେ, ଇକାନ୍‌ ମାପୁରୁଦି ମାରିନ୍‌ ମାର୍‌ଆନ୍‌ ।”
MAR 15:40 ଏସ ଆଇମେକ୍‍ ଆକଣାନ୍‍ ସୁଡ଼ୁଜି ମାର୍‍ହେ; ୱାନିକା ଲୋଇ ମଗ୍‌ଦଲିନି ମରିୟମ୍‌, ଇସ୍ରି ଜାକୁବ ମାରି ଜୋସିଦି ଆଇସି ମରିୟମ୍‌, ମାରି ଶଲୋମୀ ମାର୍‍ହେ;
MAR 15:41 ଜିସୁ ଗାଲିଲିଦୁ ମାନିୱାଲେ ୱାକ୍‍ ୱାନିୱାଲେ ତେବାଜି ୱାନି ସେବା କିଜି ମାର୍‍ହେ; ୱାନିୱାଲେ ଜିରୁସାଲମ୍‍ତୁ ୱାତି ମାର୍‍ହି ଆଇ ଏସ ଆଇମା ଆଇଲିକ୍‍ବା ଇୟାୱିଜୁ ସୁଡ଼ୁଜିମାର୍‍ହେ ।
MAR 15:42 ଆୟା ନାଣ୍ଡିଙ୍ଗ୍ ମିଲ୍‌ମିଲ୍‍କା ଆଜି ୱାଜି ମାର୍‌ଆତ୍‌, ମାରି ଇକା ରମ୍‌ନିନାଣ୍ତିଙ୍ଗ୍‌ ଆଗ୍‌ଡ଼ି ଦିନ୍‌ ମାର୍‌ଆତ୍‌,
MAR 15:43 ହାରାମାତିୟାଦି ଜୋସେପ୍‌ ଦର୍‌ତି ଅରେନ୍‍ ଜିହୁଦି ପେରି ଦଲ୍‌ତି ୱେଙ୍ଗିଁତି ନେତା ମାର୍‌ଆନ୍‌, ୱାଣ୍ତ୍ରୁ ନିଜେ ବା ମାପୁରୁଦି ରାଜିଦିଙ୍ଗ୍‍ କାପ୍‌କିଜି ମାର୍‌ଆନ୍‌, ୱାଣ୍ତ୍ରୁ ସାହାସ୍‍ତାନ୍‍ ପିଲାତ୍‌ମାନୁ ସର୍‌ଆନ୍‌ ନୋ ଜିସୁଦି ସାତି ମେନ୍ଧଲ୍‍ ଲସ୍‌ତାନ୍‌ ।
MAR 15:44 ମାତର୍‌ ଜିସୁ ସାତାସର୍‍ଆନ୍‍ ନି, ଇକା ୱେନ୍‌ଜି ପିଲାତ୍‌ କାବା ଆତାନ୍‌, ମାରି ସତସେନାପତିଙ୍ଗ୍‍ ଲାକ୍‌ତୁ କୁକିସ୍‍ସି ୱାନିଙ୍ଗ୍‌ ୱେନ୍‌ବାତାନ୍‌, ଇନିକା ଜିସୁ ସାଜ ନାଣ୍ତ ୱେଡ଼ା ଆତାତ୍‌ନି ନୋ ?
MAR 15:45 ଆୟାୱିଜୁ ପିଲାତ୍‌ ସତସେନାପତି ମାଣ୍‌କୁ ୱେର୍‍ଆନ୍‍ନୋ ଆୟା ଜିସୁଦି ସାତି ମାଡ଼ାଦିଙ୍ଗ୍‍ ଜୋସେପତିଙ୍ଗ୍‍ ସିତାନ୍‌ ।
MAR 15:46 ଜୋସେପ କାଣ୍ତେକ୍‌ ଇସ୍ରି ୱାତି କଟାନ୍‍ ନୋ ଜିସୁଦି ମାଡ଼ାଦିଙ୍ଗ୍‍ କ୍ରୁସଦାନ୍‌ ରେପ୍‍ସି ତାସି ଆବେନୁ ମାଡ଼ାଦିଙ୍ଗ୍‍ ତେର୍‍ପ୍‍ତାନ୍‍ ମାରି ଗରନ୍‍ତି କାଲୁଦୁ କାର୍‍ତି ମାର୍‍ଇ ଉଣ୍ତ୍ରି ଗୁଟାଦୁ ୱାନିଙ୍ଗ୍‌ ଇଟ୍‍ଟାନ୍‍ନୋ ଗୁଟାଦି ସେର୍‌ଲାଦୁ ଉଣ୍ତ୍ରି ପେରି କାଲୁ କେର୍‍ପ୍‍ତା ଡ଼ିସ୍‍ତାନ୍‍ ।
MAR 15:47 ଜିସୁଙ୍ଗୁଁ ଏମେ ବାଡିଦୁ ଇଟ୍‌ତାର୍‌, ଆକା ମଗ୍‌ଦଲିନି ମରିୟମ୍‌ ମାରି ଜୋସିଦି ଆଇସି ମରୀୟମ ସୁଡ଼ୁତେ ।
MAR 16:1 ରମ୍‌ନି ନାଣ୍ଡିଙ୍ଗ୍ ଜିଣାତାତ୍‍ଆକା ମଗ୍‌ଦଲିନି ମରିୟମ, ଜାକୁବରି ଆଇସି ମରିୟମ୍‌ ମାରି ଶଲୋମୀ ରକମ୍‌ ରକମ୍‌ତି ବାସ୍‌ନା ନିୟୁ କଟେ, ଏଣ୍ତେସ୍‌କି ୱାକ୍‍ ସଲ୍‌ସି ୱାନି ସାତି ମାଡ଼ାଦିଙ୍ଗ୍‍ ଉସ୍‌ତେଙ୍ଗ୍‌ ଆଟ୍‌ନେ ।
MAR 16:2 ମାରି, ଆଦିୱାର୍‍ତୁ ନାଡ଼ାକାଦେ ୱାକୁ ଗୁଟାଦୁ ସର୍‍ହେ, ଆୟାୱାଲେ ୱେଡ଼ା ସତାମାର୍‍ଆତ୍‍ ।
MAR 16:3 ସାର୍ଦୁ ୱାକୁ ୱାର୍‍ଗିସାଜି ମାର୍‍ହେ, “ଏନ୍‌ ମା ଉଣ୍ତିଙ୍ଗ୍‌ ଗୁଟାଦି ସାରିଦୁ କେର୍‍ପ୍‍ତି ମାନି କାଲୁ କୁତ୍‌ନା ସିନାନ୍‍ ?” ଇରିଙ୍ଗ୍‌ ଆକା ନାଣ୍ତ ପେରିକା ମାର୍‌ଆତ୍‌ ।
MAR 16:4 ଆୟାୱାଲେ ୱାକ୍‍ ସୁଡ଼୍‌ତେ, ଆୟା ଗୁଟାଦୁ କେର୍‍ପ୍‍ତି ମାର୍‍ହି କାଲୁଦିଙ୍ଗ୍‌ କୁତ୍‍ତା ମାନାର୍‌ ।
MAR 16:5 ୱାକ୍‍ ଗୁଟା ଲୋଇ ଡ଼ୁଗିତେନୋ ଅଡ଼ିନିଆଙ୍ଗିଁ ଆରାତି ଅରେନ୍‍ ମୁରୁଲିଙ୍ଗ୍‌ ଉଣେରି ପାଡ଼ାକା ବାସ୍‍ତି ମାରିକା ସୁଡ଼ୁତେନୋ ନାଣ୍ଡ ତିଲାତେ ସର୍‍ହେ ।
MAR 16:6 ଆବେଟ୍‌ ୱାଣ୍ତ୍ରୁ ୱାନିକାଙ୍ଗ୍‌ ଇର୍‌ଆନ୍‌, “ତିଲାମାଟ୍‌,” ମିର୍‌ କ୍ରୁସଦୁ ସାତି ମାର୍‍ହି ନାଜରିତିୟ ଜିସୁଙ୍ଗୁଁ ପ‍ଇଜିନିଦେର୍‌; ୱାଣ୍ତ୍ରୁ ନିଙ୍ଗିଁତାମାନାନ୍‌, ୱାନ୍‌ ଇବେ ସିଲେନ୍‌; ସୁଡ଼ୁଦୁ, ଇୟା ବାଡିଦୁ ୱାର୍‌ ଜିସୁଙ୍ଗୁଁ ଇଟ୍‌ଟା ମାର୍‌ଆର୍‌ ।
MAR 16:7 ମାତର୍‌ ମିର୍‌ ସଲ୍‌ସି ୱାନି ସିସୁରିଙ୍ଗ୍‌ ମାରି ପିତର୍‍ତିଙ୍ଗ୍‍ ଇୟା କାବୁର୍‍ ୱେର୍‌ତୁ, ୱାନ୍‌ ମି ଆଗ୍‌ଡ଼ି ଗାଲିଲିଦୁ ସଲ୍‌ସିନାନ୍‌; ୱାନ୍‌ ମିଙ୍ଗିଁ ଏଣ୍ତେସ୍‌ ଇର୍‌ଆ ମାର୍‌ଆନ୍‌, ଆୟାୱାଜାନେ ମିର୍‌ ୱାନିଙ୍ଗ୍‌ ଆବେ ସୁଣିଦେର୍‍ ।
MAR 16:8 ଆବେଟ୍‌ ଆଇମେକ୍‍ ସତେନୋ ଗୁଟାଦାନ୍‍ ଉରୁକ୍‍ସି ସର୍‍ହେ, ଇରିଙ୍ଗ୍‌ ୱାକୁ ତିଲାଜି ତିର୍‍ଗ୍‍ଜି ମାର୍‍ହେ ମାରି କାବାଆତେ ସର୍‍ହେ ମାର୍‍ହେ, ମାରି ଏଙ୍ଗ୍‌ ଇନିକା ଇନ୍‍ଉତେ, ଏଣ୍ତେସ୍‌ ୱାକ୍‍ ତିଲାତେ ମାର୍‍ହେ ।
MAR 16:9 ଆଦିୱାର୍‍ତି ନାଣ୍ତିଙ୍ଗ୍ ନାଡ଼ାକାଦେ ଜିସୁ ସାତି ମାଣାନ୍‌ ମାରିଡ଼େସି ନିଙ୍ଗିଁଜି, ଆମାତାନି ମାଣାନ୍‌ ସାତ୍‍ଗୋଟା ଦୁବେଙ୍ଗ୍‍ ପେରିତା ମାର୍‌ଆନ୍‌, ଆୟା ମଗ୍‌ଦଲିନି ମରିୟମ୍‌ତିଙ୍ଗ୍‍ ୱିଜେରିଙ୍ଗ୍‌ ଆଗ୍‌ଡ଼ି ତରାତାନ୍‍ ।
MAR 16:10 ୱାଦ୍‌ ସର୍ହାଦୋ, ଏମେକେଙ୍ଗ୍‍ ତାନି ସଙ୍ଗ୍‍ ଆତେ ମାର୍‍ହେ, ସିସୁରିଙ୍ଗ୍‌ କାବୁର୍‌ ସିତାତ୍‌; ୱାର୍‌ ୱିଜେରେ ଦୁଃକ୍‌ କିଜି ମାରି ଆଡ଼୍‍ବାଜି ମାର୍‌ଆର୍‌ ।
MAR 16:11 ଜିସୁ ସାତି ମାଣାନ୍‌ ଜିତାମାନାନ୍‍ ମାରି ତାନିଙ୍ଗ୍‍ ତରାତା ମାନାନ୍‌, ଆୟା ମାଟା ୱେନ୍‌ଜି ସିସୁର୍‍ ବିସ୍‍ବାସ୍‍ କିଏତାର୍‍ ।
MAR 16:12 ଇୟାୱିଜୁ ଗଟାତି ୱେନ୍‌କା ୱାରି ଲୋଇ ରିଏର୍‌ ଉଣ୍ତ୍ରି ନାର୍‍ତୁ ସନିୱାଲେ ଜିସୁ ସାର୍ଦୁ ଆଇ ମୁର୍ତି ଆଜି ୱାରିଙ୍ଗ୍‌ ତରାୟ୍‍ଆତାନ୍‍ ।
MAR 16:13 ମାରି ୱାର୍‌ ସର୍‍ଆର୍‍ରୋ ଆଇ ସିସୁରିଙ୍ଗ୍‌ ଇୟା ମାଟା ଇର୍ହାର୍‌, ମାତର୍‌ ୱାରି ମାଟାଦିଙ୍ଗ୍‌ ବା ୱାର୍‌ ମାନାଏତାର୍‍ ।
MAR 16:14 ସାରାସାରି ୱେନ୍‌କା ଏଗାର୍‍ ଲୋକୁ ସିସୁର୍‌ ଉଣ୍ତେଙ୍ଗ୍‌ ବାସ୍‍ତି ମାର୍‍ଇ ୱାଲେ ଜିସୁ ୱାରିଙ୍ଗ୍‌ ତରାୟ୍‍ଆତାନ୍‍, ୱାର୍‍ ୱେର୍‌ତି ମାଟାଦିଙ୍ଗ୍‌ ୱାର୍‌ ବିସ୍‍ବାସ୍‍ କିଏତାର୍‍ ମାରି ୱାର୍‌ ତାମେ ଜିବନ୍‌ ଆଟୁୱା କିତାର୍‍, ଆୟା ଉଣ୍ତିଙ୍ଗ୍‌ ଜିସୁ ୱାରିଙ୍ଗ୍‌ ଲାଗାତାନ୍‍ ।
MAR 16:15 ମାରି, ଜିସୁ ସିସୁରି ଲାକ୍‌ତୁ ୱାଜି ଇର୍ହାନ୍‌, “ମିର୍‌ ସାରା ଦୁନିଆଦୁ ସଲ୍‌ସି ୱିଜୁ ଲୋକ୍‍ଜାତିଦୁ ସୁସମାଚାର୍‌ ପ୍ରଚାର୍‌ କିଦୁ ।
MAR 16:16 ଏନ୍‌ ବିସ୍‍ବାସ୍‍ କିଜ ଡୁବନ୍‌ ଅନାନ୍‍, ୱାଣ୍ତ୍ରୁ ରକିୟା ପଇନାନ୍‍; ମାତର୍‌ ଏନ୍‌ ଅବିସ୍‍ବାସ୍‍ କିନାନ୍‍, ୱାନିଙ୍ଗ୍‌ ମାପୁରୁ ଦଣ୍ଡ୍‌ ସିନାନ୍‍ ।
MAR 16:17 ମାରି, ବିସ୍‍ବାସ୍‍ସି ଲୋକା ଇୟାୱିଜୁ ସିନେଙ୍ଗ୍‍ ଆନେ, ୱାର୍‌ ନା ଦର୍‌ତାନ୍‌ ଦୁବେଙ୍ଗ୍‍ ପେର୍‍ନାର୍‍, ପୁନି ପୁନି ବାସାଦୁ ମାଟା ଇନାର୍‌,
MAR 16:18 କିକାଙ୍ଗ୍‍ ସାରାସ୍‌କୁ ଆସ୍‌ନାର୍‌, ମାରି ଇନି ୱିସାମ୍‍ତି ମାୟାମ୍‍ ଉଟିଙ୍ଗ୍‍ ବା ୱାରି ଇନିକା ନାସ୍ଟୁ ଆଏତ୍‍; ୱାର୍‌ ନବ୍‍ଆତି ଲୋକା ମୁସ୍‌କୁ କିୟୁ ଇଟ୍‌ତିଙ୍ଗ୍‌ ୱାର୍‌ ନେଗେନ୍‍ଆନାର୍‍ ।”
MAR 16:19 ସିସୁରିଙ୍ଗ୍‌ ଇୟାୱିଜୁ ମାଟା ଇର୍‍ଇ ୱେନ୍‌କା ପ୍ରବୁ ଜିସୁ ମୁସ୍‌କୁପୁର୍‌ ସର୍‍ଆନ୍‍ନୋ ମାପୁରୁଦି ଉଣି କିୟୁ ତରିଣ୍ତ୍‍ ବାସ୍‌ତାନ୍‌ ।
MAR 16:20 ମାତର୍‌ ସିସୁର୍‌ ଆୟା ବାଡିଦାଣ୍ତ୍‌ ଡ଼େସିୱାଜି ସାରା ଦୁନିଆଦୁ ଜିସୁଦି ସୁସମାଚାର୍‌ ପ୍ରଚାର୍‌ କିତାର୍‌, ମାରି ପ୍ରବୁ ୱାରିୱାଲେ ଅର୍‌ସେ ମାନ୍‌ଜି ଆୟା ସିନେଣ୍‍କୁ ଆୟା ବାକ୍ୟ ସତ୍‍ଇଜି ୱେଙ୍ଗିଁସ୍‌ଏତାନ୍‌ ।
LUK 1:1 ଏ ତିୟପିଲ, ଏମେକାର୍‌ ମା ଲୋଇ କିତିମାନି ଗଟେନେଙ୍ଗ୍‍ତି ନାଣ୍ତ ମାଟେଙ୍ଗ୍‌ ସତ୍‌ତାନ୍‌ ରାସ୍‌ତେଙ୍ଗ୍‌ ବଦାକିତାର୍‌,
LUK 1:2 ଆୟା ନିଜେଦି କାଣ୍‌ଗାଦାନ୍‌ ସୁଡ଼ୁତିମାନିକା ମାରି ବାକ୍ୟ ପ୍ରଚାର୍‌ କିଜିମାନି ଲୋକୁ ମାଙ୍ଗିଁ ୱେର୍‍ନି ଇସାବ୍‌ତାନ୍‌,
LUK 1:3 ଆରାମ୍‌ତାନ୍‌ ୱିଜୁ ବିସୟ୍‌ ଇସ୍ରିମିସ୍ରିକା ଉଣ୍ତା କିଜି ଦାଡ଼ିଦି ୱାଜା ମି ଉଣ୍ତିଙ୍ଗ୍‌ ରାସ୍‌ତେଙ୍ଗ୍‌ ନାନ୍ ବା ଟିକ୍‌ ଇଜି ଅଡ଼୍‍ବିତା,
LUK 1:4 ଏଣ୍ତେସ୍‌ ନିନ୍‌ ଏମେ ୱିଜୁ ବିସୟ୍‌ ସିକିୟା ପଇତିମାନି, ଆୟାୱିଜୁ ବିସୟ୍‌ତାନ୍‌ ପୁରା ତାନି ବୁଦି ନେସ୍‌ନାର୍‌ ।
LUK 1:5 ଜିହୁଦା ରାଜିଦି ରାଜା ହେରୋଦଦି ସମୟତୁ ଅବିୟ ଜାଜକତି ଦଳ୍‍ତୁ ଜିକରିୟ ଦର୍‌ତି ଅରେନ୍‍ ଜାଜକ ମାର୍ହାନ୍‌; ୱାନି ଆଡ଼୍‌ସି ହାରୋଣ କୁଟୁମ୍‍ତିକାତ୍‍ ମାର୍ହାତ୍‌, ତାନେ ଦର୍‌ ଏଲିସାବେତ୍‍ ।
LUK 1:6 ଜିକରିୟ ମାରି ଏଲିସାବେତ୍‍ ପ୍ରବୁଦି ୱିଜୁ ମାଟା ମାରି ନିୟମ୍‍ତାନ୍‍ ଇନି ଦୋସ୍‍ କିଏଣ୍ତ୍‍ଗା ମାପୁରୁମାନୁ ଦାର୍ମୁଦିକାର୍‍ ମାର୍ହାର୍‍ ।
LUK 1:7 ମାତର୍‌ ୱାରିଙ୍ଗ୍‌ ଅରେନ୍‍ବା କଡ଼ ସିଲେତାନ୍‌, ଇରିଙ୍ଗ୍‌ ଏଲିସାବେତ୍‍ ବାଞ୍ଜି ମାର୍ହାତ୍‌, ମାରି ୱାର୍‌ ନାଣ୍ତ ଡକ୍ରା ଡକ୍ରି ଆତାମାର୍ହାର୍‍ ।
LUK 1:8 ୱାନ୍‌ ନିଜେଦି ଦଲ୍‌ତି ପାଲିଦାନ୍‍ ମନ୍ଦିର୍‌ତୁ ମାପୁରୁଦି ପାଣି କିନିୱାଲେ,
LUK 1:9 ଜାଜକତି ପାଣିଦି ନିୟମ୍‍ତାନ୍‍ କୁଡ଼ୁକୁଡ଼ି ପକ୍‌ତାର୍‌ ଆକା ୱାନି ପାଲି ୱାତାତ୍‍ ପ୍ରବୁଦି ମନ୍ଦିର୍‌ତୁ ଡ଼ୁଗୁଜି ଦୁପ୍‍ଣି ଆଡ଼େକ୍‍ତେଙ୍ଗ୍‍,
LUK 1:10 ମାରି ଦୁପୁଣି ଆଡ଼ିକ୍‍ନିୱାଲେ ୱିଜୁ ଲୋକୁ ଆତ୍‌ରେ ପାର୍‌ତନା କିଜିମାର୍‍ଆର୍‍ ।
LUK 1:11 ଆୟାୱାଲେ ପ୍ରବୁଦି ଅରେନ୍‍ ଦୁତ୍‍ ଦୁପୁଣି ଆଡ଼ିକ୍‍ନି ବାଡ଼ିଦି ଉଣେର୍‌ ତରିନ୍‌ ନିଲ୍‍ସି ଜିକରିୟଙ୍ଗ୍‍ ତରାୟ୍ ଆତାତ୍‌ ।
LUK 1:12 ଜିକରିୟ ଦୁତ୍‍ତିଙ୍ଗ୍‍ ସୁଡ଼ୁଜି ତିର୍‍ଗିତାନ୍‍ ମାରି ତିଲାତା ସର୍‌ଆନ୍‌ ।
LUK 1:13 ମାତର୍‌ ଦୁତ୍‌ ୱାନିଙ୍ଗ୍‌ ଇର୍ହାତ୍‌, “ଜିକରିୟ, ତିଲାମା, ମାତର୍‌ ନିନ୍‌ ଲସ୍‍ତିକା ୱେର୍‌ଆ ମାନାନ୍‌, ମାରି ନି ଆଡ଼୍‌ସି ଏଲିସାବେତ୍‍ ମି ଉଣ୍ତିଙ୍ଗ୍‌ ଅରେନ୍‍ କଡ଼ ଜନମ୍‍ କିନାତ୍‌, ମିର୍‌ ୱାନି ଦର୍‌ ଜୋହନ ସିନିଦେର୍‌ ।
LUK 1:14 ୱାନି ଉଣ୍ତିଙ୍ଗ୍‌ ମିର୍‌ ନାଣ୍ତ ୱେଡ଼ିକା ଆନିଦେର୍‌, ମାରି ୱାନି ଜନମ୍‌ ଆତି ଉଣ୍ତିଙ୍ଗ୍‌ ନାଣ୍ତ ଲୋକୁ ୱେଡ଼ିକା କିନାର୍‌ ।
LUK 1:15 ୱାନ୍‌ ପ୍ରବୁଦି ଲାକ୍‌ତୁ ପେରିକାନ୍‌ ଆନାନ୍‌; ୱାନ୍‌ ଅଙ୍ଗୁର୍‍ରସ୍‍ ମାରି କାଡ଼ୁ ଏସ୍‌କାଙ୍ଗ୍‌ବା ଉଣୁଏନ୍‌, ମାରି ୟାୟା ପଟା ଲୋଇରାନ୍‌ନେ ପବିତ୍ରଆତ୍ମାଦୁ ପୁରା ତେବାନାନ୍‌,
LUK 1:16 ମାରି ୱାନ୍‌ ଇସ୍ରାଏଲ୍‌ତି କଡ଼ରି ମାଣ୍‌କୁ ୱିଜୁଲୋକାଙ୍ଗ୍‌ ପ୍ରବୁ ୱାରି ମାପୁରୁମାନୁ ଡ଼େସି ତାନାନ୍‌ ।
LUK 1:17 ବୁବାରି ଜିବନ୍‌ କଡ଼ରି ଉଣ୍ତିଙ୍ଗ୍‌ ମାରି ମାନାଇୱାରିଙ୍ଗ୍‍ ଦାର୍ମୁଲୋକ୍‍ତି ବୁଦିଦୁ ସାଲାକିବିସ୍‍ କିଜି ଡ଼େପ୍‍ସିତାତେଙ୍ଗ୍‍ ମାରି ପ୍ରବୁଦି ଉଣ୍ତିଙ୍ଗ୍‌ ନେଗେନ୍‍ତିଆର୍‍କିତି ଉନ୍‍ଣ୍ତ୍ରି ଲୋକ୍‍ଦଲ୍‍ତିଙ୍ଗ୍‍ ତିଆର୍‌ କିଦେଙ୍ଗ୍‌ ୱାନ୍‌ ଏଲିୟଦି ଆତ୍ମା ମାରି ସାକ୍ତିଦାନ୍ ୱାନି ଆଗ୍‌ଡ଼ି ବୁଲାନାନ୍‌ ।”
LUK 1:18 ଆବେଟ୍‌ ଜିକରିୟ ଦୁତ୍‍ତିଙ୍ଗ୍‍ ଇର୍‌ଆନ୍‌, “ନାନ୍ ଏଣ୍ତେସ୍‌ ଇକା ନେସ୍‌ତେଙ୍ଗ୍‌ ଆଟ୍‍ନା ? ଇରିଙ୍ଗ୍‌ ନାନ୍ ତୋ ଡକ୍ରା, ମାରି ନା ଆଡ଼ିଙ୍ଗ୍‍ ନାଣ୍ତ ବାର୍ସେକ୍‍ ଆତାତ୍‌ନି ।”
LUK 1:19 ଦୁତ୍‍ ୱାନିଙ୍ଗ୍‌ ଇର୍‌ଆନ୍‌, “ନାନ୍ ଗାବ୍ରିଏଲ,” ନାନ୍ ମାପୁରୁ ଲାକ୍‌ତୁ ନିଲ୍‍ସିମାନି ଦୁତ୍‍, ମାରି ନିଙ୍ଗିଁ ଇନ୍‌ଡ୍ରେଙ୍ଗ୍‌ ମାରି ଇୟା ନେଗି କାବୁର୍‌ ୱେର୍‌ତେଙ୍ଗ୍‌ ନାନ୍ ମାପୁରୁ ମାଣ୍‌କୁ ୱାତାମାନା ।
LUK 1:20 “ସୁଡ଼ୁଆ, ଇୟାୱିଜୁ ଗଟାଇ ଦିନ୍‌ ସାନ୍ଦି ନିନ୍‌ ଗୁଲା ଆଜି ୱାର୍‍ଗିଦେଙ୍ଗ୍‍ ଆଟ୍‍ଇ, ଇରିଙ୍ଗ୍‌ ନା ଏମେ ୱିଜୁ ବାକ୍ୟ ଟିକ୍‌ ସମୟତୁ ସତ୍‌ ଆନାତ୍‌, ଆୟାୱିଜୁ ନିନ୍‌ ବିସ୍‌ବାସ୍‌ କିଇତି ।”
LUK 1:21 ଇୟାୱାଲେ ଲୋକୁ ଜିକରିୟଙ୍ଗ୍‍ କାପ୍‌କିଜି ମାର୍‌ଆର୍‌, ମାରି ମନ୍ଦିର୍‌ତୁ ୱାନି ୱେଡ଼ା କିନିକା ସୁଡ଼ୁଜି ୱାର୍‌ କାବାଆଜି ମାର୍‌ଆର୍‌ ।
LUK 1:22 ମାତର୍‌ ୱାନ୍‌ ସହସି ୱାଜି ୱାରିଙ୍ଗ୍‌ ୱାର୍‍ଗିଦେଙ୍ଗ୍‍ ଆଟ୍‍ଏତାନ୍‍; ଆବେଟ୍‌ ୱାନ୍‌ ମନ୍ଦିର୍‌ତୁ ଦର୍ସନ ପଇତାମାନାନ୍‍ ଇଜି ୱାର୍‌ ବୁଜାତାର୍‍, ମାରି ୱାନ୍‌ ୱାରିଙ୍ଗ୍‌ ଜୁଟ୍‍ସି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌ ମାରି ଗୁଲା ଆତା ତେବାତାନ୍‍ ।
LUK 1:23 ୱେନ୍‌କା ୱାନି ସେବା ପାଲିଦି ଦିନ୍‍ୱିଜୁ ୱିଜିତାତ୍‌, ମାରି ୱାନ୍‌ ୱାନି ଇନ୍‌ଡ୍ର ସର୍‌ଆନ୍‌ ।
LUK 1:24 ତାନେ ୱେନ୍‌କା ୱାନି ଆଡ଼୍‌ସି ଏଲିସାବେତ୍‍ ପଟାଦୁ ଆତାତ୍‌, ମାରି ୱାଦ୍‌ ପାସ୍‌ଗୋଟା ଲେଜ୍‌କୁ ସାନ୍ଦି ଏଙ୍ଗ୍‌ବା ଇନ୍‍ଏଣ୍‍ଗା ମାର୍‌ଆତ୍‌,
LUK 1:25 ଆବେଟ୍‌ ୱାଦ୍‌ ଇର୍ହାତ୍‌, “ଲୋକା ମାଣ୍‌କୁ ନା ଅପ୍‍ମାନ୍‍ ଆକ କିନି ଉଣ୍ତିଙ୍ଗ୍‌ ପ୍ରବୁ ନାଙ୍ଗିଁ ସୁଡ଼ୁଜି ନା ଉଣ୍ତିଙ୍ଗ୍‌ ଇୟାୱାଜା କିତାମାନାନ୍‌ ।”
LUK 1:26 ଏଲିସାବେତ୍‍ ସଗୋଟା ଲେଜ୍‌କୁ ୱେନ୍‌କା ଗାବ୍ରିଏଲ ଦୁତ୍‌ ମାପୁରୁ ମାଣ୍‌କୁ ଗାଲିଲିଦି ନାଜରିତ ଦର୍‌ତି ଗାଡ଼୍‌ତୁ ଅରେତ୍‌ ରିପା ଆଇଲି ଲାକ୍‌ତୁ ୱାତାନ୍‌;
LUK 1:27 ଦାଉଦତି କୁଟୁମ୍‌ତି ଜୋସେପ ଦର୍‌ତି ଅରେନ୍‍ ମେମାରି ୱାଲେ ତାନିଙ୍ଗ୍‌ ପେଡ଼ି କିଦେଙ୍ଗ୍‌ ଲସ୍‌ତା ମାର୍‌ଆର୍‌; ଆୟା ଆଇଲିଦି ଦରୁ ମରିୟମ୍‌ ।
LUK 1:28 ମୁସ୍‌କୁପୁର୍‌ତି ଦୁତ୍‌ ଇନ୍‌ଣ୍ତ୍ର ଡ଼ୁଗିତାଦୋ ତାନେ ଲାକ୍‌ତୁ ୱାଜି ଇର୍ହାତ୍‌, “ମାଡ଼ିସ୍‍ନା, ଏ ଆଇଲି, ନିନୁ ନେଗେନ୍‌ ମାନାଆ, ପ୍ରବୁ ନି ୱାଲେ ମାନାନ୍‌ ।”
LUK 1:29 ମାତର୍‌ ଦୁତ୍‍ତି ମାଟା ମରିୟମ୍‌ ୱେନ୍‌ଞ୍ଜି ନାଣ୍ତ କାବାଜି ଇକା ଏଣ୍ତେସ୍‌ମାରି ମାଟା ଇଜି ମନ୍‌ତୁ ଅଡ଼ବିଦେଙ୍ଗ୍‌ ଆସ୍‌ତାତ୍‌ ।
LUK 1:30 ଆବେଟ୍‌ ଦୁତ୍‌ ତାନେଙ୍ଗ୍‌ ଇର୍ହାତ୍‌, “ଏ ମରିୟମ୍‌, ତିଲାମା, ମାତର୍‌ ନିନୁ ମାପୁରୁମାନୁ ଦୟା ପଇତିମାନି ।
LUK 1:31 ମାରି ସୁଡ଼ୁଆ, ନିନୁ ପଟାଦୁ ଆନିନୋ ଅରେନ୍‍ କଡ଼ ଜନମ୍‌ ସିନି ମାରି ୱାନି ଦର୍‌ ଜିସୁ ସିନିଦେର୍‌ ।
LUK 1:32 ୱାନ୍‌ ପେରିକାନ୍‌ ଆନାନ୍‌ ମାରି ମାପ୍‌ରୁ ମାରିନ୍‌ ଇଜି ୱେଙ୍ଗ୍‌ଁନାନ୍‌; ମାରି ପ୍ରବୁ ମାପ୍‌ରୁ ୱାନିଙ୍ଗ୍‌ ୱାନି ଡକ୍ରାଦାଦା ଦାଉଦଦି ୱାଜା ରାଜା କିନାନ୍‌,
LUK 1:33 ୱାନ୍‌ ଜାକୁବରି କୁଟୁମ୍‌ତି ମୁସ୍‌କୁ ଜୁଗ୍‍ ଜୁଗ୍‍ ସାନ୍ଧି ସାସନ୍‍ କିନ୍‌ନାନ୍‌, ମାରି ଜିସୁଦି ରାଜି ଏସ୍‌କାଙ୍ଗ୍‌ବା ୱିଜେଏତ୍‌ ।”
LUK 1:34 ମାତର୍‌ ମରିୟମ୍‌ ଦୁତ୍‌ତିଙ୍ଗ୍‌ ଇର୍ହାତ୍‌, “ଇକା ଏଣ୍ତେସ୍‌ ଆନାତ୍‌ ?” ନାନ୍ ତୋ ମେମାରିଙ୍ଗ୍‍ ନେସେଏ ।
LUK 1:35 ଦୁତ୍‌ ତାନେଙ୍ଗ୍‌ ଇର୍ହାତ୍‌, “ପବିତ୍ର ଆତ୍ମା ନି ମୁସ୍‌କୁ ୱାନାତ୍‌ ମାରି ପେରି ମାପୁରୁଦି ସାକ୍ତି ନିଂଇ ଆସ୍‌ନାତ୍‌, ଏନ୍‌ ଜନମ୍‌ ଆନାନ୍‌, ୱାନ୍‌ ପବିତ୍ର ମାରି ମାପ୍‌ରୁଦି ମାର୍‌ସି ଇଜି ୱେଙ୍ଗ୍‌ଁନାନ୍‌ ।
LUK 1:36 ମାରି ସୁଡ଼ୁଦୁ, ମି ଲୋକ୍‍ବାକ୍‍ ଏଲିସାବେତ୍‍ ବା ଡକ୍ରି ଆତି ୱାଲେନେ ଉଣ୍ତ୍ରି କଡ଼ଦିଙ୍ଗ୍‌ ପଟାଦୁ ଆସ୍‌ତା ମାନାତ୍‌ । ଏଦ୍‌ ବାଞ୍ଜି ଇଜି ୱେଙ୍ଗିଁତା ମାର୍‌ଆତ୍‌, ତାନେଙ୍ଗ୍‌ ଇଲେଇ ସଗୋଟା ଲେଜ୍‌କୁ ଆଜିନାତ୍‍;
LUK 1:37 ମାତର୍‌ ମାପୁରୁଦିମାଣ୍‌କୁ ସୋନି ୱିଜୁ ବାକ୍ୟ ସତ୍‌ ଆନାତ୍‌ ।”
LUK 1:38 ଆବେନୁ ମରିୟମ୍‌ ଇର୍ହାତ୍‌, “ସୁଡ଼ୁଦୁ, ନାନୁ ପ୍ରବୁଦି ସେବାକିନିକିନ୍ଧା; ନି ବାକ୍ୟଦି ୱାଜା ନା ଉଣ୍ତିଙ୍ଗ୍‌ ଗଟାପିତ୍‌ ।” ତାନେ ୱେନ୍‌କା ଦୁତ୍‌ ତାନେ ଲାକ୍‌ତୁରାନ୍‌ ସର୍‌ଆତ୍‌ ।
LUK 1:39 ଆୟା ସମୟତୁ ମରିୟମ୍‌ ନିଙ୍ଗିଁଜି ଗରନ୍‌ ରାଜି ତରିଟି ଜିହୁଦା ଦେଶ୍‌ତି ଉଣ୍ତ୍ରି ଗାଡ଼୍‌ତୁ ବେଗି ସର୍‌ଆତ୍‌,
LUK 1:40 ମାରି ଜିକରିୟରି ଇଲୁ ଲୋଇ ଡ଼ୁଗିତାଦୋ ଏଲିସାବେତ୍‍ତିଙ୍ଗ୍‌ ମାଡ଼ିସ୍‌ କିତାତ୍‌ ।
LUK 1:41 ମାରି, ଏଲିସାବେତ୍‍ ମରିୟମ୍‌ତି ମାଡ଼ିସ୍‌ନିକା ୱେର୍‍ଇଦାପ୍ରେ ଇସ୍ରି କଡ଼ ତାନି ପଟାଦୁ ଗାତିସ୍‌ ନିଙ୍ଗିଁତାନ୍‌, ଏଲିସାବେତ ପବିତ୍ର ଆତ୍ମାଦୁ ପୁରା ତେବାଜି
LUK 1:42 ନାଣ୍ତ ଆଉଲି ଆଜି ଇର୍ହାତ୍‌, “ଆଇମେକା ମାଣ୍‌କୁ ନିନୁ ଦନ୍ୟ, ମାରି ଦନ୍ୟ ନି ପଟାଦି ପଲ୍‌ ।
LUK 1:43 ମାରି, ନା ପ୍ରବୁଦି ୟାୟା ଜେ ନା ଲାକ୍‌ତୁ ୱାନାତ୍‌, ନା ଇୟା ନେଗିକା ଏମେଣ୍‌କୁ ଆତାତ୍‌ ?
LUK 1:44 ମାତର୍‌ ସୁଡ଼ୁଦୁ, ନି ମାଟାଦି ବଲୁ ନା ଗିତଣିଦୁ ଇତି ଦାପ୍ରେ ଇସ୍ରି କଡ଼ ନା ପଟାଦୁ ୱେଡ଼ିକାଦାନ୍‌ ଗାତିସି ନିଙ୍ଗିଁତାନ୍‌ ।
LUK 1:45 ଏନ୍‌ ବିସ୍‌ବାସ୍‌ କିତାନ୍‍, ୱାନ୍‌ ଦନ୍ୟ, ଇରିଙ୍ଗ୍‌ ପ୍ରବୁମାଣ୍‌କୁ ୱାନିଙ୍ଗ୍‌ ଆମା ଆମାକା ୱେର୍‌ତାମାନାର୍‌, ଆୟାୱିଜୁ ପୁରା ଆନାତ୍‌ ।”
LUK 1:46 ଆବେଟ୍‌ ମରିୟମ୍‌ ଇର୍ହାତ୍‌, “ନା ଜିବନ୍‌ ପ୍ରବୁଙ୍ଗ୍‌ ପ୍ରସଂସା କିଜିନାତ୍‌,
LUK 1:47 ମାରି ନା ଆତ୍ମା ନା ରକିୟା କିନି ମାପ୍‌ରୁମାନୁ ୱେଡ଼ିକା କିଜିନାତ୍‌;
LUK 1:48 ଇରିଙ୍ଗ୍‌ ୱାନ୍‌ ନିଜେଦି ଦାସିଦି କାକୁର୍ତିଦିଙ୍ଗ୍‍ ସୁଡ଼ୁତାମାନାନ୍‌ । ମାରି ସୁଡୁଆ, ଇଲେରାନ୍‍ ଜୁଗ୍‍ ଜୁଗ୍‍ ସାନ୍ଦି ୱିଜେରେ ନାଙ୍ଗିଁ ଦନ୍ୟ ଇଜି ଇନାର୍‌,
LUK 1:49 ମାତର୍‌ ସାକ୍ତିମାନି ମାପୁରୁ, ୱାନ୍‌ ନା ଉଣ୍ତିଙ୍ଗ୍‌ ପେରି ପାଣି କିତାମାନାନ୍‌; ୱାନି ଦରୁ ପବିତ୍ର ।
LUK 1:50 ମାରି ଏର୍‌ ୱାନିଙ୍ଗ୍‌ ମାନାନାର୍‌ ୱାନ୍‌ ୱାରିଙ୍ଗ୍‌ ଜୁଗ୍‍ ଜୁଗ୍‍ ସାନ୍ଦି ଦୟା କିନାନ୍‌ ।
LUK 1:51 ୱାନ୍‌ ୱାନି କିୟୁଦି ସାକ୍ତି ତର୍‌ତାମାନାନ୍‌, ଆକାର୍‌ଆନିୱାରିଙ୍ଗ୍‌ ୱାରି ମନ୍‍ତୁ ଅଡ଼୍‌ବିତିମାର୍‌ଇ ମାଟାଦିଙ୍ଗ୍‌ ଇନିଙ୍ଗାଁ ଆନିଙ୍ଗାଁ କିତାମାନାନ୍‌;
LUK 1:52 ୱାନ୍‌ ରାଜାରିଙ୍ଗ୍‌ ବାସ୍‌ନି ବାଡିଦାନ୍‌ ଆଡ୍‍ଗି ରେପ୍‌ତାମାନାନ୍‌, ସିଲିସାତିୱାରିଙ୍ଗ୍‌ ମୁସ୍‌କୁ ନିକ୍‍ତାମାନାନ୍‌,
LUK 1:53 ୱାନ୍‌ ବାଙ୍ଗାଁଆତିୱାରିଙ୍ଗ୍‌ ନେଗି ନେଗି ବିସୟ୍‌ ସିଜି ପାଜିସ୍‍ କିତାମାନାନ୍‌, ମାରି ମାଜନ୍‌ ଲୋକାଙ୍ଗ୍‌ ୱାର୍‌ଇ କିୟୁଦାନ୍‌ ପୋକ୍‌ତାନ୍‌ ।
LUK 1:54 ମା ପୁର୍ବେଦିଡକ୍ରାଦାଦାରି ଉଣ୍ତିଙ୍ଗ୍‌ ରାସ୍‍ତିମାନି ୱାରି ବାକ୍ୟଦାନ୍‌ ଆୟା ଅବ୍ରାହାମ ମାରି ଇସ୍ରାଏଲ୍‌ତି କଡ଼କକ୍ରାରି ଉଣ୍ତିଙ୍ଗ୍‌,
LUK 1:55 ଜୁଗ୍‌ ଜୁଗ୍‌ ସାନ୍ଦି ଦୟା ଏତ୍‌କିନି ଉଣ୍ତିଙ୍ଗ୍‌ ନିଜେଦି ଦାସ୍‌ ଅବ୍ରାହାମ ନି ଇସ୍ରାଏଲତିଙ୍ଗ୍‌ ନେଗିକା କିତାମାନାନ୍‌ ।”
LUK 1:56 ମରିୟମ୍‌ ପୁରା ମୁଣ୍ତ୍ରି ଲେଜ୍‌କୁ ଏଲିସାବେତ୍‍ ୱାଲେ ମାନ୍‌ଞ୍ଜି ନିଜେଦି ଇନ୍‌ଣ୍ତ୍ର ଡ଼େସି ସର୍‌ଆତ୍‌ ।
LUK 1:57 ୱେନ୍‌କା ଏଲିସାବେତ୍‍ତି ଜନମ୍‌କିନି ଦିନ୍‌ ଇଗା ୱାତାତ୍‍, ୱାଦ୍‌ ଅରେନ୍‍ କଡ଼ ଜନମ୍‌ କିତାତ୍‌,
LUK 1:58 ମାରି ପ୍ରବୁ ଜେ ତାନି ଉଣ୍ତିଙ୍ଗ୍‌ ନାଣ୍ତ ଦୟା କିତାମାନାନ୍, ଇକା ୱେନ୍‌ଞ୍ଜି ତାନି ଲାକ୍‌ତୁରି ଲୋକୁ ମାରି ନିଜେଦି ଲୋକୁ ତାନି ୱାଲେ ୱେଡ଼ିକା କିଦେଙ୍ଗ୍‌ ଆସ୍‌ତାର୍‌ ।
LUK 1:59 କଡ଼ଦି ଜନମ୍‌ ଆତି ଆଟ୍‍ଦିନ୍‍ତୁ ୱାର୍‌ କଡ଼ଦିଙ୍ଗ୍‌ ସୁନ୍ନତ କିଦେଙ୍ଗ୍‌ ତାତାର୍‌ ମାରି ୱାରି ବୁବାସି ଦର୍‌ ଇସାବ୍‌ତାନ୍‌ ୱାନି ଦର୍‌ ଜିକରିୟ ସିଦେଙ୍ଗ୍‍ ବଦା କିତାର୍‌ ।
LUK 1:60 ମାତର୍‌ ୱାନି ଆଇସି ଇର୍ହାତ୍‌, “ସିଲେ, ୱାନି ଦର୍‌ ଯୋହନ ଆନାତ୍‌ ।”
LUK 1:61 ୱାର୍‌ ଏଲିସାବେତ୍‍ତିଙ୍ଗ୍‌ ୱେର୍‌ତାର୍‌, “ମି ଲୋକାମାନୁ ତୋ ଇୟା ଦର୍‌ ଏଙ୍ଗ୍‌ବା ସିଲେତ୍‌ ।”
LUK 1:62 ଆବେଟ୍‌ ୱାନିଙ୍ଗ୍‌ ଏମେ ଦର୍‌ ସିନାଟ୍‌ ଇଜି ୱାନି ବୁବାସି ବଦା କିଜିନାନ୍‌, ଆକା ୱାର୍‌ ୱାନିଙ୍ଗ୍‌ ସିନା ସିଜି ୱେନ୍‌ବାଦେଙ୍ଗ୍‌ ଆସ୍‌ତାର୍‌ ।
LUK 1:63 ଆବେନୁ ୱାନ୍‌ ଉଣ୍ତ୍ରି ରାସ୍‌ନି ପାଟା ଲସ୍‌ସି ଇକା ରାସ୍‌ତାନ୍‌, “ୱାନି ଦର୍‌ ଜୋହନ ।” ଆବେଟ୍‌ ୱିଜେରେ କାବାଆତାର୍‌ ।
LUK 1:64 ମାରି, ଆୟାଦାପ୍ରେ ଜିକରିୟଦି ୱେୟୁ ରେଆତାତ୍‌ ମାରି ୱାନ୍‌ ମାରିଡ଼େସି ମାଟା ୱାର୍‌ଗିଜି ମାପ୍‌ରୁଦିଙ୍ଗ୍‌ ଦନ୍ୟବାଦ୍‌ କିଦେଙ୍ଗ୍‌ ଆସ୍‌ତାନ୍‌ ।
LUK 1:65 ଆବେନୁ ୱାରି ଲାକ୍‌ତୁରି ଲୋକୁ ୱିଜେରେ ତିଲାତାର୍‌, ମାରି ଇୟାୱିଜୁ ମାଟା ଜିହୁଦା ଦେସ୍‌ତି ଗରନ୍‌ ରାଜିଦି ୱିଜୁ ତରିଣ୍ତ୍‌ ଲୋକୁ ଇନ୍‌ଞ୍ଜି ସାତାର୍‌,
LUK 1:66 ମାରି ୱେନି ଲୋକ୍‌ଡର୍‌ ଆୟାୱିଜୁ ନିଜେ ନିଜେଦି ମନ୍‍ତୁ ଇଡ୍‌ଜି ଇର୍ହାର୍‌, “ଇୟା ଇସ୍ରି କଡ଼ ଆତିଙ୍ଗ୍‌ ଇନିକା ଆନାନ୍‌ ?” ଇରିଙ୍ଗ୍‌ ଇକା ସତ୍‌ ମାର୍‌ଆତ୍‌ ଜେ ପ୍ରବୁଦି କିୟୁ ୱାନି ମୁସ୍‌କୁ ମାର୍ହାତ୍‌ ।
LUK 1:67 ମାରି, ଜୋହନଦି ବୁବା ଜିକରିୟ ପବିତ୍ର ଆତ୍ମାଦୁ ପୁରା ତେବାଜି ଇୟା ବାବବାଣି ଇର୍ହାନ୍‌,
LUK 1:68 “ଦନ୍ୟ ପ୍ରବୁ, ଇସ୍ରାଏଲ୍‌ତି ମାପ୍‌ରୁ, ଇରିଙ୍ଗ୍‌ ୱାନ୍‌ କାର୍ମୁ ସୁଡ଼ୁଜି ନିଜେଦି ଲୋକା ଉଣ୍ତିଙ୍ଗ୍‌ ରକିୟା କିତାମାନାନ୍‌;
LUK 1:69 ୱାନ୍‌ ନିଜେଦି ଦାସ୍‌ ଦାଉଦଦି କୁଟୁମ୍‌ତି ଅରେନ୍‍ ସାକ୍ତିମାନି ରକିୟା କିନିୱାନିଙ୍ଗ୍‍ ମାଙ୍ଗିଁ ସିତାମାନାନ୍‌
LUK 1:70 ପୁର୍ବେ କାଡ଼ାଦାନ୍‌ ନିଜେଦି ପବିତ୍ର ବାବବାଦିରି ୱେୟୁଦାନ୍‌ ଏଣ୍ତେସ୍‌ ଇର୍ହା ମାର୍‌ଆର୍‌,
LUK 1:71 ଆୟାୱାଜା ମା ସାତ୍ରୁରିମାଣ୍‌କୁ ମାରି ମାଙ୍ଗିଁ ୱିଜୁ କାଡ଼୍‍ନିୱାରି କିକାଣ୍‌କୁ ରକିୟା କିତାମାନାନ୍‌,
LUK 1:72 ଏଣ୍ତେସ୍‌ ୱାନ୍‌ ମା ପୁର୍ବେଦିଡକ୍ରାଦାଦାରି ଉଣ୍ତିଙ୍ଗ୍‌ ଦୟା ତର୍‌ନାନ୍‌ ମାରି ୱାରି ୱାଲେ କିତିମାନି ନିଜେଦି ଆୟା ନିୟମ୍‌ ଏତ୍‍କିନାର୍ ।
LUK 1:73 ଆମାକା ୱାନ୍‌ ମା ବୁବା ଅବ୍ରାହାମତି ଲାକ୍‌ତୁ ପାର୍‌ମାଣ୍‌ କିତାମାର୍ହାନ୍‌,
LUK 1:74 ମାରି ମାପ୍‌ ମା ସାତ୍ରୁରିକିୟୁଦାନ୍‌ ରକିୟା ପୟ୍‍ତାମାନାପ୍‍,
LUK 1:75 ଏଣ୍ତେସ୍‌ ମାପ୍‌ ଜିନି ସାନ୍ଧି ତିଲାଏଣ୍‌ଗା, ପବିତ୍ରଦାନ୍‌ ମାରି ଦାର୍ମୁଦାନ୍‌ ୱାନି ସେବା କିଦେଙ୍ଗ୍‌ ଆଟ୍‍ନାପ୍‍ ।”
LUK 1:76 “ଏ ମାରିନ୍‌, ନିନ୍‌ ୱିଜେରିଙ୍ଗ୍‌ ପେରି ମାପୁରୁଦି ଅରେନ୍‍ ବାବବାଦି ଇଜି ୱେଙ୍ଗ୍‌ନି । ନିନ୍‌ ପ୍ରବୁଦି ଅରେନ୍‍ ଦୁତ୍‌ ୱାନି ଉଣ୍ତିଙ୍ଗ୍‌ ୱାନି ସାରି ତିଆର୍‌ କିନାତ୍‌ ।
LUK 1:77 ପାପ୍‌କେମା ପଇନି ମାଣାନ୍‌ ୱାର୍‌ ଜେ ରକିୟା ପୟନାର୍‌, ୱାନି ଲୋକାଙ୍ଗ୍‌ ଇୟା ମାଟା ଇଣ୍ତ୍ରେଙ୍ଗ୍‌ ସନାର୍‌ ।
LUK 1:78 ମାରି ମା ମାପୁରୁ କାର୍ମୁସୁଣିକାନ୍‌ ମାରି କଡ଼୍‌କିଜିବନ୍‌ ୱାନ୍‌ ମା ଉଣ୍ତିଙ୍ଗ୍‌ ରକିୟାଦି ୱେଡ଼ା ସପ୍‌ନାନ୍‌,
LUK 1:79 ଏମେକାର୍‌ ସାନିୱାଜା ସିକାଟିଦି ସିତିଡ଼ିଦୁ ବାସାନାର୍‌, ସାନ୍ତି ସାରିଦୁ ୱାରିଙ୍ଗ୍‌ ତର୍‌ସି ଅନିଉଣ୍ତିଙ୍ଗ୍‌ ୱାନ୍‌ ୱିଜେରି ମୁସ୍‌କୁ ଜାୟ୍‌ ସିନାନ୍‌ ।”
LUK 1:80 ମାରି, କଡ଼ ପିର୍‌ଜି ଆତ୍ମାଦୁ ବପୁ ଆଦେଙ୍ଗ୍‌ ଆସ୍‌ତାନ୍‌ ମାରି ଇସ୍ରାଏଲ୍‌ ଲୋକା ଲାକ୍‌ତୁ ତରାଇ ସାନ୍ଧି ସୁନ୍‌ସାନ୍‌ ବାଡ଼ିଦୁ ତେବାତାନ୍‌ ।
LUK 2:1 ଆୟାୱାଲେ ରୋମିୟ ଦେସ୍‍ତି ପେରିରାଜା ଅଗସ୍ଟ କାଇସର୍‍ ମାଣ୍‌କୁ ଦେସ୍‍ତି ୱିଜୁ ଲୋକା ଦର୍‌କୁ ରାସାନି ଉଣ୍ତିଙ୍ଗ୍‌ ମାଟା ୱେର୍‌ତାର୍‌ ।
LUK 2:2 ସିରିଆଦି ସାସନ୍‌କିନି କୁରିଣିୟଦି ସମୟତୁ ପାର୍‍ତୁମ୍‍ତୁ ଇୟା ଲୋକୁ ଲେକିସ୍‌କିନିକା ଆତାମାର୍‌ଆତ୍‌ ।
LUK 2:3 ଆୟା ଉଣ୍ତିଙ୍ଗ୍‌ ୱିଜେରେ ଦର୍‌ ରାସ୍‌ନି ଉଣ୍ତିଙ୍ଗ୍‌ ନିଜେ ନିଜେଦି ଗାଡ଼୍‌କାଙ୍ଗ୍‌ ସର୍‌ଆର୍‌ ।
LUK 2:4 ମାରି, ଜୋସେପ ବା ଦର୍‌ ରାସ୍‌ନି ଉଣ୍ତିଙ୍ଗ୍‌ ମରିୟମତି ୱାଲେ ଗାଲିଲିଦି ନାଜରିତ ଗାଡ଼୍‌ତାନ୍‍ ଜିହୁଦା ଦେସ୍‍ତି ବେତଲିହିମ୍‍ ଦର୍‌ଦି ଦାଉଦତି ଗାଡ଼୍‌ତୁ ସର୍‌ଆର୍‌, ଇରିଙ୍ଗ୍‌ ୱାନ୍‌ ଦାଉଦତି କୁଟ୍‌ମୁ ମାରି କୁଦାଦି ଲୋକୁ ମାର୍‌ଆର୍‌;
LUK 2:5 ଜୋସେପ ପେଡ଼ି ଆଦେଙ୍ଗ୍‌ ଲସ୍‌ସାୟ୍‌ଆତି ମରିୟମତି ୱାଲେ ଦର୍‍ ରାସ୍‌ତେଙ୍ଗ୍‍ ସର୍ହାନ୍‌ । ମାରି ମରିୟମ୍‌ ପଟାଦୁ ମାର୍‌ଆତ୍‌ ।
LUK 2:6 ଜୋସେପ ମାରି ମରିୟମ୍‌ ବେତଲିହିମତୁ ମାର୍‌ଇ ୱାଲେ ମରିୟମତି ଜନମ୍‌କିନି ବେଡ଼ା ଇଗା ୱାତାତ୍‍,
LUK 2:7 ୱାଦ୍‌ ନିଜେ ପର୍‌ତୁମ୍‌ କଡ଼ଦିଙ୍ଗ୍‌ ଜନମ୍‌ କିତାତ୍‌ କଡ଼ଦିଙ୍ଗ୍‌ ୱାତିଦୁ ତେର୍‌ପ୍‌ସି ଡ଼ାକ୍‍ ଏର୍‌ଉଣି ଟଙ୍ଗାଁଦୁ ତେର୍‌ପ୍‍ତାତ୍‍, ଇରିଙ୍ଗ୍‌ ତେବାନି ଇନ୍‌ଡ୍ର ୱାରି ଉଣ୍ତିଙ୍ଗ୍‌ ବାଡି ସିଲେତାତ୍‍ ।
LUK 2:8 ଆୟା ରାଜିଦି ଏସ ଗୋଡ଼ୁଙ୍ଗୁଁ ଆତ୍‌ରେ ମାନ୍‌ଞ୍ଜି ନାଡ଼ା ୱାରି ମେଣ୍ତେଙ୍ଗ୍‌ କାପ୍‌କିଜିମାର୍‌ଆର୍‌ ।
LUK 2:9 ପ୍ରବୁଦି ଉଣ୍ତ୍ରି ଦୁତ୍‌ ୱାରି ଲାକ୍‌ତୁ ୱାତାତ୍‍, ମାରି ପ୍ରବୁଦି ଗୌରବ୍‍ତି ଜାୟ୍‌ ୱାରି ସାର୍‌ବେଡ଼୍‌ତି ତରିତାତ୍‌, ମାରି ୱାର୍‌ ନାଣ୍ତ ତିଲାତାର୍‌ ।
LUK 2:10 ଆବେଟ୍‌ ଦୁତ୍‌ ୱାରିଙ୍ଗ୍‌ ୱେର୍‌ତାତ୍‌, “ତିଲାମାଟ୍‌, ସୁଡ଼ୁଦୁ, ନାନ୍ ୱିଜୁ ଲୋକା ନାଣ୍ତ ୱେଡ଼ିକାଦି ନେଗି କାବୁର୍‌ ମିଙ୍ଗିଁ ୱେର୍‌ସିନା,
LUK 2:11 ଇରିଙ୍ଗ୍‌ ନେର୍‌ ଦାଉଦତି ଗାଡ଼୍‌ତୁ ମି ଉଣ୍ତିଙ୍ଗ୍‌ ରକିୟାକିନିକାନ୍‌ ଜନମ୍‌ ଆତାମାନାନ୍‌, ୱାନ୍‌ କ୍ରିସ୍ତ ପ୍ରବୁ ।
LUK 2:12 ମାରି, ମି ଉଣ୍ତିଙ୍ଗ୍‌ ଇକା ସିନାଦି ୱାଜା ଆନାତ୍‌, ମିର୍‌ ଅରେନ୍‍ କଡ଼ଦିଙ୍ଗ୍‌ ୱାତିଦାନ୍‌ ତେରେପ୍‌ସି ସାଡ଼ାଦି ଟଙ୍ଗାଁଦୁ ଡର୍‌ନିମାନିକା ସୁଣିଦେର୍‌ ।”
LUK 2:13 ମାରି, ଆୟାଦାପ୍ରେ ଆୟା ଦୁତ୍‌ତି ୱାଲେ ମୁସ୍‌କୁପୁର୍‌ତାନ୍‌ ଉଣ୍ତ୍ରି ଦୁତ୍‍କା ଦଲ୍‌ ଇଗାୱାତେନୋ ମାପୁରୁଦିଙ୍ଗ୍‌ ପ୍ରସଂସା କିବୁ କିବୁ ଇରେଏ,
LUK 2:14 “ମୁସ୍‌କୁପୁର୍‌ତୁ ମାପୁରୁଦିଙ୍ଗ୍‌ ମହିମା ଆପିତ୍‌, ମାରି ଇୟାୱିଜୁ ଦୁନିଆଦି ଏମେ ଲୋକା ମୁସ୍‌କୁ ମାପ୍‌ରୁ ୱେଡ଼ିକା ମାନାନ୍‌ ଆୟା ଲୋକାମାନୁ ସାନ୍ତି ରାପ୍‌ତି ।”
LUK 2:15 ଦୁତ୍‌କୁ ୱାରିମାଣାନ୍‌ ମୁସ୍‌କୁପୁର୍‌ତୁ ସର୍‌ଇ ୱେନ୍‌କା ମେଣ୍ଡେଙ୍ଗ୍‌ ସାରାକିନିକାର୍‌ ନିଜେ ନିଜେଦି ମାନୁ ୱାର୍‍ଗିଦେଙ୍ଗ୍‍ ଆସ୍‌ତାର୍‌, “ରାଦୁ, ମାଡ୍‌ ବେତଲିହିମ୍‍ ସାନ୍ଧି ସନାଟ୍‌ ମାରି ପ୍ରବୁ ମାଙ୍ଗିଁ ଇୟା ଏମେ ଗଟନା ବିସୟ୍‌ ୱେର୍‌ତାନ୍‌, ଆକା ସୁଡ଼ୁନାଟ୍‌ ।”
LUK 2:16 ଆବେଟ୍‌ ୱାର୍‌ ଦାପ୍ରେ ସଲ୍‌ସି ପଇଜି ଅସି ମରିୟମ୍‌ ମାରି ଜୋସେପତିଙ୍ଗ୍‌ ପ‍ଇତାର୍‌, ମାରି ସାଡ଼ାଦି ଟଙ୍ଗାଁଦୁ କଡ଼ଦିଙ୍ଗ୍‌ ଡରିତିମାର୍‌ଇକା ସୁଡ଼ୁତାର୍‌ ।
LUK 2:17 ୱାର୍‌ ୱାନିଙ୍ଗ୍‌ ସୁଡ଼ୁଜି ଆୟା କଡ଼ଦି ବିସୟ୍‌ତାନ୍‌ ଦୁତ୍‍ ଏମେ ମାଟା ଇର୍ହାମାର୍‌ଆତ୍‌, ଆକା ୱାରିଙ୍ଗ୍‌ ୱେର୍‌ତାର୍‌,
LUK 2:18 ମାରି ଏମେ ଲୋକୁ ମେଣ୍ତେଙ୍ଗ୍‌ସାରାକିନିୱାରି ମାଣାନ୍‌ ଆୟାୱିଜୁ ମାଟା ୱେର୍‌ଆର୍‌, ୱାର୍‌ ୱିଜେରେ କାବା ଆତାର୍‌ ।
LUK 2:19 ମାତର୍‌ ମରିୟମ୍‌ ଇୟାୱିଜୁ ମାଟା ମନ୍‍ତୁ ଇଡ୍‌ଜି ନାଣ୍ତ ଏତ୍‍କିଦେଙ୍ଗ୍‍ ଆସ୍‌ତାତ୍‌ ।
LUK 2:20 ମାରି, ମେଣ୍ତେଙ୍ଗ୍‌ସାରା କିନିୱାରିଙ୍ଗ୍‌ ଦୁତ୍‍ ଏଣ୍ତେସ୍‌ ଇର୍ହାମାର୍ହାତ୍‌, ଆୟାୱାଜା ୱାର୍‌ ଏମେ ଏମେକା ୱେର୍‌ଆର୍‌ ମାରି ସୁଡ଼ୁତାର୍‌, ଆୟାୱିଜୁ ଉଣ୍ତିଙ୍ଗ୍‌ ମାପ୍‌ରୁଦି ଗୌରବ୍‍ ମାରି ଦନ୍ ଦନ୍ୟବାଦ୍‌ କିବୁ କିବୁ ଡ଼େସିୱାତାର୍‍ ।
LUK 2:21 ଆଟ୍‍ଦିନ୍‍ ୱେନ୍‌କା ସୁନ୍ନତ କିଦେଙ୍ଗ୍‌ ଜିସୁଙ୍ଗୁଁ ମନ୍ଦିର୍‌ତୁ ଅତାର୍‍, ୱାନି ଦର୍‌ ଜିସୁ ଇଟ୍‌ତାର୍‌, ଇୟା ଦର୍‌ ୱାଦ୍‌ ଗାର୍ବୁଦୁ ତେବାଇ ଆଗ୍‍ଡ଼ିରାନ୍‍ନେ ମୁସ୍‌କୁପୁର୍‌ତି ଦୁତ୍‌ ଇୟା ଦର୍‌ ସିତାମାର୍ହାତ୍‌ ।
LUK 2:22 ୱେନ୍‌କା ଏସ୍ତିୱାଲେ ମୋସାଦି ନିୟମତାନ୍‌ ତାନି ଶୁଚି ଆନି ସମୟ ପୁରା ଆତାତ୍‌, ନାସ୍ତିୱାଲେ ୱାର୍‌ କଡ଼ଦିଙ୍ଗ୍‍ ମାପୁରୁମାନୁ ସିଦେଙ୍ଗ୍‍ ଜିରୁସାଲାମ୍‍ ମନ୍ଦିରତୁ ଅତାର୍‍
LUK 2:23 ନାସ୍ତିୱାଲେ ୱିଜେରେ ପାର୍‍ତୁମ୍ ଜନମ୍‌ ଆତି କଡ଼ର୍‌ ପ୍ରବୁଦି ନିୟମତାନ୍‌ ପବିତ୍ର ଇଜି ୱେଙ୍ଗ୍‌ଁନାର୍‌,
LUK 2:24 ପ୍ରବୁଦି ନିୟମତାନ୍‌ ରାସ୍‍ତିମାନି ଇୟା ମାଟାଦାନ୍‌ ୱାର୍‌ ୱାନିଙ୍ଗ୍‌ ପ୍ରବୁଦି ନିୟମତାନ୍‌ ସର୍ପେକିନି ଉଣ୍ତିଙ୍ଗ୍‌ ମାରି ପ୍ରବୁଦି ନିୟମ୍‌ତି ସାସ୍ତ୍ରଦାନ୍‌ ରାସ୍‍ତିମାନି ନିୟମତାନ୍‌ ରୁଣ୍ତି ପାରୁୱାପିଲେକାଙ୍ଗ୍‌ ପୁଜା କିନି ଉଣ୍ତିଙ୍ଗ୍‌ ୱାନିଙ୍ଗ୍‌ ଜିରୁସାଲମତୁ ଅତାର୍‍ ।
LUK 2:25 ମାରି ସୁଡ଼ୁଦୁ, ଜିରୁସାଲମତୁ ସିମିୟୋନ ଦର୍‌ତି ଅରେନ୍‍ ଦାର୍ମୁ ମାରି ସାଦୁ ଲୋକୁ ମାର୍‌ଆନ୍‌; ୱାନ୍‌ ଇସ୍ରାଏଲ୍‌ତି ରକିୟାକିନିୱାନିଙ୍ଗ୍‍ ସୁଡ଼୍‍ଦେଙ୍ଗ୍‍ କାପ୍‌କିଜି ମାର୍‌ଆନ୍‌, ମାରି ପବିତ୍ର ଆତ୍ମା ୱାନିୱାଲେ ମାର୍ହାତ୍‌ ।
LUK 2:26 ପ୍ରବୁ କ୍ରିସ୍ତଙ୍ଗ୍‍ ସୁଡ଼ିଇତିଙ୍ଗ୍‌ ୱାନ୍‌ ଜେ ସାଏନ୍‌, ପବିତ୍ର ଆତ୍ମା ୱାନିଙ୍ଗ୍‌ ଇୟା ମାଟା ୱେର୍‌ତା ମାର୍ହାତ୍‌ ।
LUK 2:27 ୱାନ୍‌ ପବିତ୍ର ଆତ୍ମା ୱେର୍‌ତି ଇସାବ୍‌ତାନ୍‌ ମନ୍ଦିରତୁ ୱାତାନ୍‌, ମାରି କଡ଼ ଜିସୁଦି ବୁବାୟାୟା ଏସ୍ତିୱାଲେ ୱାନି ବିସୟ୍‌ତାନ୍‌ ଜିହୁଦିରି ନିୟମ୍‌ ଇସାବ୍‌ତାନ୍‌ ପାଣି କିନି ଉଣ୍ତିଙ୍ଗ୍‌ ୱାନିଙ୍ଗ୍‌ ମନ୍ଦିର୍‌ ଲୋଇ ତାତାର୍‌,
LUK 2:28 ନାସ୍ତିୱାଲେ ସିମିୟୋନ କଡ଼ଦିଙ୍ଗ୍‌ ଗାତୁ ଆସ୍‌ସି ମାପୁରୁଦିଙ୍ଗ୍‌ ଦନ୍ୟବାଦ୍‌ କିଜି ଇର୍ହାନ୍‌,
LUK 2:29 “ଏ ପ୍ରବୁ, ଇଲେଇ ନିନୁ ନିଜେଦି ବାକ୍ୟଦାନ୍‌ ନିଜେଦି ଗତିମୁରୁଲିଙ୍ଗ୍‌ ସାନ୍ତିଦାନ୍‌ ସଣ୍ଡ୍ରେଙ୍ଗ୍‌ ସିଜିନି;
LUK 2:30 ଇରିଙ୍ଗ୍‌ ନା କାଣୁକୁ ନି ରକିୟା ସୁଡ଼ୁତା ମାନାତ୍‌,
LUK 2:31 ଆମାକା ନିନୁ ୱିଜେରି ଲୋକା ଆଗ୍‌ଡ଼ି ତିଆର୍‌ କିତିମାନି ।
LUK 2:32 ମାରି ଅଣଜିହୁଦି ଲୋକା ଉଣ୍ତିଙ୍ଗ୍‌ ସତ୍‌ ସାରି ତର୍‌ନି ଜାୟ୍‌ ଆନାନ୍‌, ମାରି ମି ଲୋକା ଇସ୍ରାଏଲ୍‌ତି ଗୌରବ୍‍ ୱାଜା କିତିମାନି ।”
LUK 2:33 ଇସ୍ରି କଡ଼ଦି ବିସୟ୍‌ତାନ୍‌ ୱେର୍‍ତିମାନି ୱିଜୁ ମାଟା ୱେନ୍‌ଜି ୱାନି ବୁବାସିଆଇସି କାବାଆତା ସର୍ହାର୍‌ ।
LUK 2:34 ମାରି, ସିମିୟୋନ ୱାରିଙ୍ଗ୍‌ ଆସିର୍ବାଦ୍‌ କିଜି ୱାନି ଆଇସି ମରିୟମ୍‌ତିଙ୍ଗ୍‌ ୱେର୍‌ତାନ୍‌, “ଇୟା କଡ଼ ଇସ୍ରାଏଲ୍‌ତି ଲୋଇ ନାଣ୍ଡ୍ ଲୋକା ନାସ୍ଟୁ ମାରି ନାଣ୍ତ ଲୋକା ରକିୟା ଉଣ୍ତିଙ୍ଗ୍‌ ମାପୁରୁ ମାଣାନ୍‌ ବାସେଆତା ମାନାନ୍‌ । ୱାନ୍‌ ମାପୁରୁମାଣାନ୍‌ ସିନାଦି ୱାଜା ଆନାନ୍‌ ।
LUK 2:35 ଏସୋ ଲୋକୁ ୱାନିଙ୍ଗ୍‌ ବିରଦ୍‌ କିଜି ନିଜେଦି ଜିବନ୍‍ତୁ ଆଡ଼ାକ୍‍ନିମାନି ମାଟେଙ୍ଗ୍‌ ୱିଜୁ ୱେର୍‌ନାନ୍‌ । ଦୁକ୍‍ ନାନି ଉଣ୍ତ୍ରି ଦାରାଦି କୁଡ଼ାମ୍‍ ମି ନିଜେଦି ଜିବନ୍‍ତିଙ୍ଗ୍‍ ଗୁତ୍‍ନାତ୍‍ ।”
LUK 2:36 ମାରି, ୱାଦ୍‌ ଆସେର୍‌ କୁଟୁମ୍‌ତି ପିନୁୟେଲଦି ଗାଡ଼୍‌ସି । ହାନା ଦର୍‍ତି ଅରେତ୍‌ ଅସେ ନାଲ୍‍ଗି ବାର୍ସେକ୍‍ତି ଡକ୍ରି ମାର୍‌ଆତ୍‌, ୱାଦ୍‌ ଅରେତ୍‌ ବାବବାଦିନି ମାର୍‌ଆତ୍‌ । ପେଡ଼ି ଆତାଦ ସାତ୍‌ବାର୍ସୁ କନ୍‍ଲି ୱାଲେ ମାର୍‍ଇ ୱେନ୍‌କା ରାଣ୍ତି ଆତାତ୍‌ ।
LUK 2:37 ୱାଦ୍‌ ମନ୍ଦିର୍‌ତିଙ୍ଗ୍‌ ଡ଼ିସ୍‌ସି ସଲ୍‍ଏଜି ମାର୍‌ଆତ୍‌, ଉପାସ୍‌ କିଜି ମାରି ୱେଡ଼େନାଡ଼ା ମାପୁରୁମାନୁ ପାର୍‍ତନା କିଜିମାର୍‌ଆତ୍‌ ।
LUK 2:38 କଡ଼ ଜିସୁ ମନ୍ଦିର୍‌ତୁ ସିଆଇ ଆନିୱାଲେ ହାନା ଆବେନ୍‌ ଇଜି ମାପ୍‌ରୁଙ୍ଗ୍‌ ଦନ୍ୟବାଦ୍‌ ସିତାତ୍‌ ମାରି ମାପୁରୁ ଜିରୁସାଲମ୍‍ତିଙ୍ଗ୍‌ ରକିୟା କିନାନ୍‍ ଇଜି ଏମେକାର୍‌ ବିସ୍‌ବାସ୍‌ କିଜି କାପ୍‌କିଜି ମାର୍‌ଆର୍‌ ଆୟା ୱିଜେରିଙ୍ଗ୍‌ କଡ଼ଦି ବିସୟ୍‌ତାନ୍‌ ୱେର୍‌ତାତ୍‌ ।
LUK 2:39 ୱେନ୍‌କା ଜୋସେପ୍‍ ମାରି ମରିୟମ୍‌ ପ୍ରବୁଦି ନିୟମତାନ୍‌ ୱିଜୁ ପାଣି ୱିସ୍‌ତାର୍‌ ଗାଲିଲିଦୁ, ୱାର୍‌ ନିଜେଦି ଗାଡ଼୍‍ତି ନାଜରିତଦୁ ଡ଼େସି ସର୍ହାର୍‌ ।
LUK 2:40 ମାରି, କଡ଼ ଦିରେ ଦିରେ ପିର୍‌ଦେଙ୍ଗ୍‌ ଆସ୍‌ତାନ୍‌ ମାରି ବୁଦିଦାନ୍‌ବା ପିର୍‌ଜି ସାକ୍ତି ଆତାନ୍‌, ମାରି ମାପ୍‌ରୁଦି ଆସିର୍ବାଦ୍‌ ୱାନି ମୁସ୍‌କୁ ମାର୍ହାତ୍‌ ।
LUK 2:41 ଜିସୁଦି ବୁବାୟାୟା ୱିଜୁ ବାର୍‌ର୍ସେକ୍‌ ନିସ୍ତାର୍‌ ପଣ୍ତୟ୍‌ ସମୟତୁ ଜିରୁସାଲମ୍‍ତୁ ସଲ୍‌ସି ମାର୍‌ଆର୍‌ ।
LUK 2:42 ଜିସୁଙ୍ଗୁଁ ବାର ବାର୍ସେକ୍‍ ଆତିୱାଲେ ୱାର୍‌ ୱାରି ରିତିଦାନ୍‌ ଜିରୁସାଲାମ୍‍ତୁ ପଣ୍ତୟ୍‍କିଦେଙ୍ଗ୍‍ ସର୍‌ଆର୍‌ ।
LUK 2:43 ମାରି ପଣ୍ତୟ୍‌ତି ଦିନ୍‌ ୱିସ୍‌ତାର୍‌ରୋ ଏସ୍ତିୱାଲେ ୱାର୍‌ ଡ଼େସିସଲ୍‍ସିମାର୍‍ଆର୍‍, ନାସ୍ତିୱାଲେ କଡ଼ ଜିସୁ ଜିରୁସାଲମ୍‍ତୁ ତେବାତାନ୍‌, ମାରି ୱାନି ବୁବାୟାୟା ଆକା ନେସ୍‌ତେଙ୍ଗ୍‌ ଆଟ୍‍ଏତାର୍‍ ।
LUK 2:44 ମାତର୍‌ ଜିସୁ ସଙ୍ଗ୍‍ ଲୋକାୱାଲେ ଅର୍‌ସେ ମାନାନ୍‌ ଇଜି ଅଡ଼୍‌ବିତାର୍‌ ୱାର୍‌ ଅର୍‌ନେଟି ସାରି ସର୍‌ଆର୍‌, ମାରି ଇଣ୍ତ୍ରଣି ଲୋକାମାନୁ ମାରି ନେସ୍‌ତି ଲୋକାମାନୁ ଜିସୁଙ୍ଗୁଁ ପଇଜି ଅତାର୍‍,
LUK 2:45 ମାରି ଜିସୁଙ୍ଗୁଁ ପଏତାର୍‌ନୋ ପଇଜି ପଇଜି ଜିରୁସାଲମତୁ ମାରିଡ଼େସି ସର୍‌ଆର୍‌ ।
LUK 2:46 ମୁନେଟି ୱେନ୍‌କା ୱାର୍‌ ଜିସୁଙ୍ଗୁଁ ମନ୍ଦିରତୁ ପ‍ଇତାର୍‌; ୱାନ୍‌ ଦାର୍ମୁଗୁରୁରି ୱାଲେ ବାସ୍‌ତାନ୍‌ନୋ ୱାରି ମାଟା ୱେନ୍‌ଜି ମାର୍‌ଆନ୍‌ ମାରି ୱାରିଙ୍ଗ୍‌ ପ୍ରସ୍ନ ୱେନ୍‌ବାଜି ମାର୍‌ଆନ୍‌ ।
LUK 2:47 ମାରି ଏସଲୋକ୍‌ ୱାନି ମାଟା ୱେନ୍‌ଜି ମାର୍‌ଆର୍‌, ୱିଜେରେ ୱାନି ବୁଦିଦିଙ୍ଗ୍‌ ମାରି ମାଟାଦିଙ୍ଗ୍‌ କାବାଆଜି ମାର୍‌ଆର୍‌ ।
LUK 2:48 ଜୋସେପ ମାରି ମରିୟମ୍‌ ଜିସୁଙ୍ଗୁଁ ସୁଡ଼ୁଜି କାବା ଆତାର୍‌, ମାରି ୱାନି ଆଇସି ୱାନିଙ୍ଗ୍‌ ଇର୍ହାତ୍‌, “ଏ କଡ଼, ମା ଉଣ୍ତିଙ୍ଗ୍‌ ଏନ୍ଧା ଇୟାୱାଜା କିତି ? ସୁଡ଼ୁଆ, ମି ବୁବା ମାରି ନାନ୍ ନାଣ୍ଡ୍ ସିନ୍ତା କିଜି ନିଙ୍ଗିଁ ପଇଜିନାପ୍‌ ।”
LUK 2:49 ଆବେନ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ଏନ୍ଧା ମିର୍‌ ନାଙ୍ଗିଁ ପଇଜି ମାର୍ହିଦେର୍‌ ? ନା ବୁବାଦି ଇଣ୍ତ୍ର ମାଣ୍ତ୍ରେଙ୍ଗ୍‌ ଯେ ନାଙ୍ଗିଁ ଅଦିକାର୍‌ ମାନାତ୍‌, ଇକା ଇନିକା ମିର୍‌ ନେସ୍‌ଇ ମାର୍ହିଦେର୍‌ ?”
LUK 2:50 ମାତର୍‌ ୱାନ୍‌ ୱାରିଙ୍ଗ୍‌ ଏମେ ମାଟା ୱେର୍‌ତାନ୍‌, ଆକା ୱାର୍‌ ବୁଜାଦେଙ୍ଗ୍‌ ଆଟ୍‍ଏତାର୍‍ ।
LUK 2:51 ୱେନ୍‌କା ଜିସୁ ୱାରିୱାଲେ ଡ଼େସି ନାଜରିତଦୁ ୱାତାନ୍‌ ମାରି ୱାନ୍‌ ୱାରି ୱିଜୁ ମାଟା ମାନାତାନ୍‌; ମାରି, ୱାନି ଆଇସି ଇୟାୱିଜୁ ମାଟା ନିଜେଦି ମାନ୍‌ ଲୋଇ ଇଡ୍‌ଜି ସିନ୍ତା କିତାତ୍‌ ।
LUK 2:52 ମାରି, ଜିସୁ ବୁଦିଦୁ ମାରି ମେନ୍ଦଲ୍‌ତୁ, ମାରି ମାପୁରୁମାନୁ ମାରି ଲୋକା ଦୟାଦାନ୍‌ ପିର୍‌ଦେଙ୍ଗ୍‌ ଆସ୍‌ତାନ୍‌ ।
LUK 3:1 ତିବିରିୟା କାଇସର୍‍ଦି ସାସନ୍‍କିଜି ମାର୍‌ଇ ୱାଲେରି ପନ୍ଦର ବାର୍ସେକ୍‍ତି ମାଟା, ଏସ୍ତିୱାଲେ ସାସନ୍‌କିନି ପନ୍ତିୟ ପିଲାତ୍‌ ଜିହୁଦା ଦେସ୍‌ତୁ ପେରିରାଜା ମାର୍‌ଆନ୍‌ ମାରି ହେରୋଦ ଗାଲିଲିଦି ପେରିରାଜା, ମାରି ୱାନି ତଡ଼ାନ୍‌ ପିଲିପ୍‍ପ ଇତୁରିୟା ମାରି ତ୍ରାକନିଦି ଦେସ୍‌ତୁ ପେରିରାଜା ମାର୍‌ଆର୍‌, ମାରି ଲୁସାନିୟା ଅବିଲିନି ଦେସ୍‌ତୁ ପେରିରାଜା ମାର୍ହାନ୍‌ ।
LUK 3:2 ମାରି ହାନାନ ମାରି କୟାପା ୱିଜେରିଙ୍ଗ୍‌ପେରି ଜାଜକର୍‌ ମାର୍ହାର୍‌, ନାସ୍ତିୱାଲେ ମାପ୍‌ରୁଦି ବାକ୍ୟ ସୁନ୍‌ସାନ୍‌ ବାଡିଦୁ ଜିକରିୟଦି ମାରିସି ଜୋହନ ଲାକ୍‌ତୁ ଇଗା ୱାତାତ୍‍ ।
LUK 3:3 ଆବେଟ୍‌ ଡୁବନ୍‌ ସିନି ଜୋହନ ଜର୍ଦନ ଗାଡାଦି ଲାକ୍‌ତୁରି ୱିଜୁ ରାଜିତରିଣ୍ତ୍‌ ସଲ୍‌ସି, “ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ସି ଡୁବନ୍‌ଅତୁ ଇଜି ୱେର୍‌ତେଙ୍ଗ୍‌ ଆସ୍‌ତାନ୍‌,”
LUK 3:4 ଏଣ୍ତେସ୍‌ ଜିସାଇୟ ବାବବାଦିଦି ସାସ୍ତ୍ରଦୁ ରସ୍‌ତାମାନ୍‌ତା, “ସିମ୍ରାବାଡିଦୁ ନାଣ୍ଡ୍ ଆଉଲିଆଜିମାନି ଅରେନ୍‍ୱାନି ବଲ୍, ପ୍ରବୁଦି ସାରି ତିଆର୍‌ କିଦୁ, ୱାନି ସାରି ସାଡ଼ୁକୁ କିଦୁ;
LUK 3:5 ୱିଜୁ ରିଆଙ୍ଗାଁଦି ଗରନ୍‌ତି ଗୁଟାଦି ବାଡିଦୁ ବର୍ତି କିଆନାତ୍‌, ମାରି ୱିଜୁ ପେରି ଗରକ୍‌ ମାରି ଇସ୍ରି ଗରକ୍‌ ସାର୍‌ଦିନେ, ବାକୁଲି ସାରିୱିଜୁ ସାଡ଼ୁକୁ ଆନାତ୍‌, ମାରି ଗୁଟାଟେମୁଦି ବୁମି ସାର୍‌ଦିଜି ସାରିଦି ୱାଜା ଆନାତ୍‌;
LUK 3:6 ମାରି, ୱିଜୁ ଲୋକୁ ମାପୁରୁଦି ରକିୟା ସୁଡ଼ୁନାଟ୍‌ ।”
LUK 3:7 ମାରି, ୱାନିମାନୁ ଡୁବନ୍‌ ଅତେଙ୍ଗ୍‌ ଇଜି ସସି ୱାଜିମାନି ୱିଜୁଲୋକାଙ୍ଗ୍‌ ସୁଡ଼ୁଜି ଇର୍‌ଆନ୍‌, “ଏ ବିସ୍‌ମାନି ସାରାସ୍‍ତି କୁଟୁମ୍‌, ମାପୁରୁଦି ୱାଜିମାନି ରିସାଦାନ୍‌ ଉର୍‌କୁତେଙ୍ଗ୍‌ ଇଜି ଏନ୍‌ ମିଙ୍ଗିଁ ୱେର୍‌ତାନ୍‌ ?
LUK 3:8 ମିର୍‌ ପୁରା ଜିବନ୍‌ତିଙ୍ଗ୍‌ ସତ୍‌ତାନ୍‌ ପାପ୍‌ ପାଣିଦାନ୍‌ ମନ୍‍ ଡ଼େପ୍‍ତି ମାନିଦେର୍‌, ଇକା ମି ନେଗି ପାଣିଦାନ୍‌ ତର୍‌ତୁ; ମାରି, ଅବ୍ରାହାମ ମା ବୁବା, ମୋନ୍‌ତୁ ମୋନ୍‌ତୁ ବା ଇୟାୱାଜା ଇନ୍‌ମାଟ୍‌; ଇରିଙ୍ଗ୍‌ ନାନ୍ ତୋ ମିଙ୍ଗିଁ ଇଜିନା, ମାପୁରୁ ଇୟା କାଲ୍‌କାଣ୍‌କୁ ବା ଅବ୍ରାହାମତି କୁଟୁମ୍‌ ତିଆର୍‌କିଦେଙ୍ଗ୍‌ ଆଟ୍‍ନାନ୍‍ ।
LUK 3:9 ମାରି, ମାରାକା ମଦଲ୍‍କୁ କାତ୍‍ତେଙ୍ଗ୍‍ ଇଜି ପାଡ଼ିସି ତିଆର୍‍କିତା ଇଟ୍‌ତାମାନାର୍‌; ମାରି, ଏମେ ମାରାନ୍‌ ନେଗି ପଲ୍‌ ଆସ୍‌ଏତ୍‌, ଆୟାୱିଜୁ ମାରାକାଙ୍ଗ୍‌ କାତ୍‌ନାର୍‌ ରୋ ସିସୁଦୁ ପୋକ୍‌ନାର୍‌ ।”
LUK 3:10 ଆବେଟ୍‌ ଲୋକ୍‌ ୱିଜେରେ ୱାନିଙ୍ଗ୍‌ ୱେନ୍‌ବାତାର୍‌, “ଆରିଙ୍ଗ୍‌ ମାପ୍‌ ଇନିକା କିନାପ୍‌ ?”
LUK 3:11 ଜୋହନ ୱାରିଙ୍ଗ୍‌ ଇର୍‌ଆନ୍‌, “ଆମାୱାନିଙ୍ଗ୍‍ ରୁଣ୍ତି ଆଙ୍ଗିଁଙ୍ଗ୍‍ ମାନେ, ୱାନ୍‍ ଆମାୱାନିଙ୍ଗ୍‍ ଇନିକା ସିଲେତ୍‍, ୱାନିଙ୍ଗ୍‍ ଉଣ୍ତ୍ରି ସିପିନ୍‍ ମାରି ଆମାୱାନିଙ୍ଗ୍‍ କାଦି ମାନାତ୍‍, ୱାନ୍‍ ଆଇୱାନିଙ୍ଗ୍‍ ଆବେ ମିସାକିପିନ୍‍ ।”
LUK 3:12 ମାରି ଏସ ସିସ୍‍ଟୁ ଲୋସ୍‌ନିକାର୍‌ ବା ଡୁବନ୍‌ ଅତେଙ୍ଗ୍‌ ଇଜି ୱାତିକାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ଏ ଗୁରୁ, ମାପ୍‌ ଇନିକା କିନାପ୍‌ ?”
LUK 3:13 ମାରି ଜୋହନ ୱାରିଙ୍ଗ୍‌ ୱେର୍‌ତାନ୍‌, “ମି ଉଣ୍ତିଙ୍ଗ୍‌ ଏସୋ ଲୋସ୍‍ନି ନିୟମ୍‌ ମାନାତ୍‌ ନାସ ଲୋସ୍‍ତୁ, ତାନି ବାଦୁଲ୍‌ ନାଣ୍ଡ୍ ଲସ୍‌ମାଟ୍‌ ।”
LUK 3:14 ସନ୍ୟର୍‌ ବା ଜୋହନତିଙ୍ଗ୍‌ ୱେନ୍‌ବାତାର୍‌, “ମାରି ମାପ୍‌ ଇନିକା କିନାପ୍‌ ?” ୱାନ୍‌ ୱାରିଙ୍ଗ୍‌ ୱେର୍‌ତାନ୍‌, “ସାକ୍ତିଦାନ୍ ନି ସାଲାକିଦାନ୍‍ ଏ ଦନ୍‌ ରେଲ୍‍ଜ ଅମାଟ୍‌, ମାରି ମି ଦରମା ଡାବୁଙ୍ଗୁଁ ଏସ ପ‍ଇଜିନିଦେର୍‌ ନାସଦାନ୍‌ ୱେଡ଼ିକା ମାଣ୍ତ୍ରୁ ।”
LUK 3:15 ୱିଜୁ ଲୋକୁ କାପ୍‌କିଜି ମାର୍‌ଆର୍‌ଆକା, ଜୋହନ ଏମୋ କ୍ରିସ୍ତ ଆନାନ୍‌, ଇକା ଜୋହନତି ବିସୟ୍‌ତାନ୍‌ ୱିଜେରେ ନିଜେ ନିଜେଦି ମୋନ୍‌ତୁ ଅଡ଼୍‍ବିଜି ମାର୍‌ଆର୍‌ ।
LUK 3:16 ଆୟାଉଣ୍ତିଙ୍ଗ୍‌ ଜୋହନ ୱିଜେରିଙ୍ଗ୍‌ ଇର୍‌ଆନ୍‌, “ନାନ୍ ତୋ ମିଙ୍ଗିଁ ଏର୍‌ତୁ ଡୁବନ୍‌ ସିଜିନା, ମାତର୍‌ ନା ମାଣ୍‌ନା ଏନ୍‌ ପେରିକାନ୍‌, ୱାନ୍‌ ୱାଜିନାନ୍‍, ୱାନି ଜୁତେଙ୍ଗ୍‌ତି ଗାଟି କୁତ୍‌ତେଙ୍ଗ୍‌ ବା ନାନ୍ ଜଗ୍‌ ସିଲେ; ୱାନ୍‌ ମିଙ୍ଗିଁ ପବିତ୍ର ଆତ୍ମାଦୁ ମାରି ସିସୁଦୁ ଡୁବନ୍‌ ସିନାନ୍‌ ।
LUK 3:17 ୱାନି କିୟୁଦୁ ସେରିଇ ମାନାତ୍‌, ଆବେଟ୍‌ ୱାନ୍‌ କାଡ଼ାତୁମାନି କୁଲିଙ୍ଗ୍‌ ଟୁଟ୍‍ନାନ୍‍ ମାରି ନିଜେଦି କଲ୍‍କିଦୁ ଉଣ୍ତାକିନାନ୍‍ ମାରି କୁଲିଙ୍ଗ୍‌ ପଟୁ ଏସ୍‌କାଙ୍ଗ୍‌ ନାମ୍‌ଇ ସିସୁଦୁ ଆଡ଼ାକ୍‌ନା ପୋକ୍‌ନାନ୍‌ ।”
LUK 3:18 ଜୋହନ ଇୟାୱାଜା ନାଣ୍ଡ୍ ମାଟା ୱେର୍‌ସି, ମାରି ରକମ୍‌ ରକମ୍‌ତି ୱେଡ଼ିକାଦି ବାକ୍ୟ ଇଜି ଲୋକା ଲାକ୍‌ତୁ ନେଗିକାବୁର୍‌ ୱେର୍‌ତାନ୍‌ ମାରି ମନ୍ ଡ଼େପ୍‍ତେଙ୍ଗ୍‍ ଲୋକାଙ୍ଗ୍‌ ବୁଜାକିତାନ୍‍;
LUK 3:19 ମାତର୍‌ ଜୋହନ ରାଜା ହେରୋଦତିଙ୍ଗ୍‍ ଆଟ୍‍ୱାଦାନ୍‍ ଇଜିମାର୍‌ଆନ୍‌ ଇରିଙ୍ଗ୍‌ ୱାନ୍‌ ୱାନି ତଡ଼ାନ୍‌ତି ଆଡ଼୍‌ସିଙ୍ଗ୍‌ ହେରୋଦିଆଦିଙ୍ଗ୍‍ ପେଡ଼ି ଆତାମାର୍‍ଆନ୍‍ ମାରି ନାଣ୍ତ ତାଗିଇ ପାଣି କିତାମାର୍‌ଆନ୍‌ ।
LUK 3:20 ଆୟାୱାଜା ହେରୋଦ ଜୋହନତିଙ୍ଗ୍‌ ଜଇଲ୍‌ତୁ ଇଟ୍‍ଟାନ୍‍ନୋ ନିଜେଦି ୱିଜୁ ତାଗିଇ ପାଣିଦି ୱାଲେ ଇକାବା ମିସାକିତାନ୍‌ ।
LUK 3:21 ୱିଜୁ ଲୋକୁ ଡୁବନ୍‌ ଅତି ୱେନ୍‌କା ଜିସୁ ବା ଡୁବନ୍‌ ଅତାନ୍‍ । ମାରି ୱାନ୍‌ ପାର୍‌ତନା କିନିୱାଲେ ବାଦଡ଼୍ ରେଆତାତ୍‌,
LUK 3:22 ମାରି ପବିତ୍ର ଆତ୍ମା ପାର୍‍ୱାଦି ୱାଜା ୱାନି ମେନ୍ଦଲ୍‍ ମୁସ୍‌କୁ ୱାଜି ବାସ୍‌ତାତ୍‌; ମାରି, ବାଦଡ଼୍‍ତାନ୍ ଇୟା ବଲ୍ ୱାତାତ୍‍, “ନିନୁ ନା ଲାଡ୍‍ତି ମାରିନ୍‌, ନିବାନୁ ନାନ୍ ନାଣ୍ତ ୱେଡ଼ିକା ।”
LUK 3:23 ଜିସୁ ପାଣି ଆରାମ୍‌ କିତି ସମୟତୁ ୱାନିଙ୍ଗ୍‌ ପୁରା ତିରିସ୍‌ ବାର୍ସେକ୍‍ ଆତାମାର୍‌ଆତ୍‌; ଲୋକୁ ଅଡ଼୍‍ବିନି ଇସାବ୍‌ତାନ୍‌ ଜିସୁ ଜୋସେପତି ମାରିନ୍‌, ଜୋସେପ ଏଲିତି ମାରିନ୍‌,
LUK 3:24 ଏଲି ମତ୍‌ତାତତି ମାରିନ୍‌; ମତ୍‌ତାତ ଲେବିତି ମାରିନ୍‌, ଲେବି ମଲ୍‌କିତି ମାରିନ୍‌, ମଲ୍‌କି ଜନୟତି ମାରିନ୍‌, ଜନୟ ଜୋସେପ୍‌ତି ମାରିନ୍‌,
LUK 3:25 ଜୋସେପ ମତିତ୍ୟାତି ମାରିନ୍‌, ମତିତ୍ୟା ଆମୋସତି ମାରିନ୍‌, ଆମୋସ ନାହୁମତି ମାରିନ୍‌, ନାହୁମ ହେଲ୍‍ସିତି ମାରିନ୍‌, ହେଲ୍‍ସି ନଗୟତି ମାରିନ୍‌,
LUK 3:26 ନାଗାୟି ମହତତି ମାରିନ୍‌, ମହତ ମତିତ୍ୟାତି ମାରିନ୍‌, ମତିତ୍ୟା ସିମିୟତି ମାରିନ୍‌, ସିମୟି ଜୋସେକତି ମାରିନ୍‌, ଜୋସେକ ଜୋଦାତି ମାରିନ୍‌,
LUK 3:27 ଜୋଦା ଜୋହନତି ମାରିନ୍‌, ଜୋହନ ରେସାଦି ମାରିନ୍‌, ରେସା ଜିରୁବ୍‍ବାବେଲତି ମାରିନ୍‌, ଜିରୁବ୍‌ବାବେଲ ସଲ୍‌ଟିୟେଲତି ମାରିନ୍‌, ସଲ୍‌ଟିୟେଲ ନେରିଦି ମାରିନ୍‌,
LUK 3:28 ନେରି ମଲ୍‌କିଦି ମାରିନ୍‌, ମଲ୍‌କି ଅଦିଦି ମାରିନ୍‌, ଅଦି କୋସାମତି ମାରିନ୍‌, କୋସାମ ଏଲମ୍‍ଦାନତି ମାରିନ୍‌, ଏଲମ୍‍ଦାନ ଏରଦି ମାରିନ୍‌,
LUK 3:29 ଏର୍‌ ଜିହୋସୁୟଦି ମାରିନ୍‌, ଜିହୋସୁୟ ଏଲିୟେଜରତି ମାରିନ୍‌, ଏଲିୟେଜର ଜୋରିମତି ମାରିନ୍‌, ଜୋରିମ ମତ୍‌ତାତଦି ମାରିନ୍‌, ମତ୍‌ତାତ ଲେବିତି ମାରିନ୍‌,
LUK 3:30 ଲେବି ସିମିୟୋନତି ମାରିନ୍‌, ସିମିୟୋନ ଜିହୁଦାଦି ମାରିନ୍‌, ଜିହୁଦା ଜୋସେପ୍‌ତି ମାରିନ୍‌, ଜୋସେପ୍‌ ଜୋନାମତି ମାରିନ୍‌, ଜୋନାମ ଏଲିୟାକିମତି ମାରିନ୍‌,
LUK 3:31 ଏଲିୟାକିମ ମଲାହତି ମାରିନ୍‌, ମଲାହ ମନାଦି ମାରିନ୍‌, ମନା ମତତାତି ମାରିନ୍‌, ମତତା ନାତନତି ମାରିନ୍‌, ନାତନ୍‌ ଦାଉଦଦି ମାରିନ୍‌,
LUK 3:32 ଦାଉଦ ଜେସିଦି ମାରିନ୍‌, ଜସିୟ ଅବେଦତି ମାରିନ୍‌, ଅବେଦ ବୟଜତି ମାରିନ୍‌, ବୟଜ ସେଲହଦି ମାରିନ୍‌, ସେଲହ ନହସନଦି ମାରିନ୍‌,
LUK 3:33 ନହସନ ଅମିନାଦବତି ମାରିନ୍‌, ଅମିନାଦବ ଅଦମିନଦି ମାରିନ୍‌, ଅଦମିନ ଅର୍ଣ୍ଣିଦି ମାରିନ୍‌, ଅର୍ଣ୍ଣି ହେସ୍ରଣତି ମାରିନ୍‌, ହେସ୍ରଣ ପେରସତି ମାରିନ୍‌, ପେରସ ଜିହୁଦାତି ମାରିନ୍‌,
LUK 3:34 ଜିହୁଦା ଜାକୁବଦି ମାରିନ୍‌, ଜାକୁବ ଇସ୍‍ହାକ୍‍ତି ମାରିନ୍‌, ଇସ୍‌ହାକ୍‌ ଅବ୍ରାହାମତି ମାରିନ୍‌, ଅବ୍ରାହାମ ତେରହଦି ମାରିନ୍‌, ତେରହ ନାହରଦି ମାରିନ୍‌,
LUK 3:35 ନାହର ସରୁଗଦି ମାରିନ୍‌, ସରୁଗ ରଗୁଦି ମାରିନ୍‌, ରଗୁ ପେଲଗତି ମାରିନ୍‌, ପେଲଗ ଏବରତି ମାରିନ୍‌, ଏବର ସେଲହତି ମାରିନ୍‌,
LUK 3:36 ସେଲହ କେନାନତି ମାରିନ୍‌, କିନାନ୍ ଅରପକେଦତି ମାରିନ୍‌, ଅରପକେଦ ସେମଦି ମାରିନ୍‌, ସେମ ନହତି ମାରିନ୍‌, ନୋହ ଲେମକତି ମାରିନ୍‌,
LUK 3:37 ଲେମକ ମିତୁସେଲହତି ମାରିନ୍‌, ମିତୁସେଲହ ହନୋକଦି ମାରିନ୍‌, ହନକ ଜେରଦତି ମାରିନ୍‌, ଜେରଦ ମହଲଲେଲତି ମାରିନ୍‌, ମହଲଲେଲ କେନାନତି ମାରିନ୍‌,
LUK 3:38 କିନାନ୍ ଏନସତି ମାରିନ୍‌, ଏନସ ସେତତି ମାରିନ୍‌, ସେତ ଆଦମ୍‌ତି ମାରିନ୍‌, ଆଦମ୍‍ ମାପୁରୁଦି ମାରିନ୍‌ ।
LUK 4:1 ଜିସୁ ପବିତ୍ର ଆତ୍ମାଦୁ ପୁରା ମାନ୍‌ଜି ଜର୍ଦନ୍‍ ଗାଡ଼୍‌ତାନ୍‍ ଡ଼େସି ୱାତାନ୍‌ ମାରି ପବିତ୍ର ଆତ୍ମା ୱେର୍‌ତି ଇସାବ୍‌ତାନ୍‌ ସିମ୍ରା ବାଡିଦୁ ସର୍‌ଆନ୍‌ ମାରି ସାଲିସ୍‍ ଦିନ୍‌ ସାନ୍ଧି ସୟତାନ୍ ୱାନିଙ୍ଗ୍‌ ପରିକା କିଜିମାର୍‍ଆତ୍‍ ।
LUK 4:2 ଆବେନ୍‍ ୱାନ୍‍ ସୟତାନ୍‍ ମାଣାନ୍‍ ସାଲିସ୍‍ ଦିନ୍‍ ସାନ୍ଦି ପରିକା କିଆୟ୍‍ ଆତାନ୍‌ । ଆୟାୱିଜୁ ଦିନ୍‌ତୁ ୱାନ୍‌ ଇନିକା ବା ଉଣୁଏଣ୍‌ଗା ତିନ୍‌ଏଣ୍‌ଗା ମାର୍‌ଆନ୍‌, ମାରି ଆୟାୱିଜୁ ନାଣ୍ଡିଙ୍ଗ୍ ୱିଜିତି ୱେନ୍‌କା, ଜିସୁ ନାଣ୍ତ ବାଙ୍ଗାଁ ସାତାନ୍ ।
LUK 4:3 ଆବେଟ୍‌ ସୟତାନ୍ ଜିସୁଙ୍ଗୁଁ ଇର୍ହାତ୍‌, “ନିନ୍‌ ଜଦି ମାପୁରୁଦି ମାରିନ୍‌, ତୋ ଇୟା କାଲୁଦିଙ୍ଗ୍‌ ରୁଟି ଆଦେଙ୍ଗ୍‌ ଆଦେସ୍‌ ସିଆ ।”
LUK 4:4 ଜିସୁ ତାନିଙ୍ଗ୍‌ ଇର୍‌ଆନ୍‌, “ଦାର୍ମୁସାସ୍ତ୍ରଦୁ ରାସାତାମାନାତ୍‌, ଲୋକୁ ଆବ୍‍କା ରୁଟିଦାନ୍‌ ଜିଏନ୍‍ ।”
LUK 4:5 ମାରି, ସୟତାନ୍ ୱାନିଙ୍ଗ୍‌ ଉନ୍‍ଣ୍ତ୍ରି ନିର୍‍ଇ ଗରନ୍‍ତି ଟିପୁଦୁ ଅତାଦୋ ସାଣେକ୍‌ତିଙ୍ଗ୍‌ ସାରାଦୁନିଆଦି ୱିଜୁ ରାଜିଙ୍ଗ୍‌ ୱାନିଙ୍ଗ୍‌ ତର୍‌ତାତ୍‌ ।
LUK 4:6 ମାରି, ସୟତାନ୍ ୱାନିଙ୍ଗ୍‌ ଇର୍ହାତ୍‌, “ନାନ୍ ନିଙ୍ଗିଁ ଆୟାୱିଜୁଦି ଅଦିକାର୍‌ ସିନା ମାରି ଦନ୍‍ ସିନା, ଇରିଙ୍ଗ୍‌ ଇୟାୱିଜୁ ନାଙ୍ଗିଁ ଆକା ସର୍ପେଆତା ମାନାତ୍‌, ମାରି ନାନ୍ ଏଙ୍ଗ୍‌ ବଦା କିନା, ୱାନିଙ୍ଗ୍‌ ଆକା ସିନା ।
LUK 4:7 ମାରି, ନିନ୍‌ ମେଣ୍ତେଙ୍ଗ୍‍ ଗଟ୍‌କିଜି ନାଙ୍ଗିଁ ମାଡ଼ିସ୍‌କିନି, ଆଦେଙ୍ଗ୍‌ ଇୟାୱିଜୁ ନିଦି ଆନାତ୍‌ ।”
LUK 4:8 ଜିସୁ ଇର୍ହାନ୍‌, “ଦାର୍ମୁସାସ୍ତ୍ରଦୁ ରାସାତାମାନାତ୍‌, କେବଲ୍‌ ନି ପ୍ରବୁ ମାପୁରୁଙ୍ଗ୍‍ଁ ମାଡ଼ିସ୍‌ କିଆ ମାରି ୱାନି ସେବା କିଆ ।”
LUK 4:9 ମାରି, ୱାନ୍‌ ୱାନିଙ୍ଗ୍‌ ଜିରୁସାଲମତୁ ଅତାଦୋ ମନ୍ଦିରତି ସାତ୍ ମୁସ୍‌କୁରି ଟିପୁଦୁ ନିଲ୍‌ପିସ୍‌କିଜି ୱାନିଙ୍ଗ୍‌ ୱେର୍‌ତାତ୍‌, “ନିନ୍‌ ଜଦି ମାପୁରୁଦି ମାରିନ୍‌, ଆତିଙ୍ଗ୍‌ ଇବେଣ୍‌କୁ ଆଡ୍‍ଗି ଗାତ୍‌ଆ ।
LUK 4:10 ଇରିଙ୍ଗ୍‌ ଦାର୍ମୁସାସ୍ତ୍ରଦୁ ରାସାତାମାନାତ୍‌, ନିଙ୍ଗିଁ ଜିପିସ୍‌ କିଦେଙ୍ଗ୍‌ ମାପୁରୁ ନି ସାକା ଅତେଙ୍ଗ୍‌ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ଆଦେସ୍‌ ସିନାନ୍‍ ।
LUK 4:11 ମାରିବା ରାସାତା ମାନାତ୍‌, ଏସ୍ତିୱାଲେ ନି ପାଦାମ୍‌ କାଲୁଦୁ ଆଟ୍‍ନାତ୍‍, ଇୟାଉଣ୍ତିଙ୍ଗ୍‌ ୱାକ୍‍ ନିଙ୍ଗିଁ କିକାଣ୍‌କୁ ପେର୍‍ଜିଆସ୍‍ନେ ।”
LUK 4:12 ମାରି, ଜିସୁ ତାନିଙ୍ଗ୍‌ ଇର୍‌ଆନ୍‌, “ଦାର୍ମୁସାସ୍ତ୍ରଦୁ ରାସାତାମାନାତ୍‌, ନିନ୍‌ ପ୍ରବୁ ନିଜେଦି ମାପୁରୁଙ୍ଗ୍‌ ପରିକା କିମା ।”
LUK 4:13 ଜିସୁଙ୍ଗୁଁ ସୟତାନ୍ ୱିଜୁଜାତିଦି ପରିକା ୱିସ୍‌ତି ୱେନ୍‌କା ଏସ ବେଡ଼ା ସାନ୍ଧି ୱାନିଙ୍ଗ୍‌ ଡ଼ିସ୍‌ତା ସର୍ହାତ୍‌ ।
LUK 4:14 ତାନେ ୱେନ୍‌କା ଜିସୁ ପବିତ୍ର ଆତ୍ମାଦି ସାକ୍ତିଦାନ୍ ଗାଲିଲିଦୁ ଡ଼େସିସର୍ହାନ୍‌, ମାରି ଗାଲିଲି ସାରିବେଡ଼ିତିଦି ୱିଜୁ ରାଜିଦୁ ୱାନି ବିସୟ୍‌ତାନ୍‌ କାବୁର୍‌ ୱେଙ୍ଗିଁତାନ୍‌ ।
LUK 4:15 ମାରି, ଜିସୁ ୱାରି ପାର୍‍ତନାକିନି ଇଲ୍‌କାଙ୍ଗ୍‌ ସିକିୟା ସିଜି ୱିଜେରି ମାଣାନ୍‌ ଦନ୍ୟବାଦ୍‌ ପ‍ଇଦେଙ୍ଗ୍‌ ଆସ୍‌ତାନ୍‌ ।
LUK 4:16 ଜିସୁ ଏମେ ନାଜରିତ ଗାଡ଼୍‌ତୁ ପିରିତା ମାର୍ହାନ୍‌, ଆୟା ବାଡ଼ିଦୁ ଆୟା ଦାପ୍ରେ ସର୍‌ଆନ୍‌ ମାରି ନିଜେଦି ରିତିଦାନ୍‌ ରମ୍‌ନିନାଣ୍ତିଙ୍ଗ୍‌ ପାର୍‌ତନା କିନି ଇଲୁଦୁ ଡ଼ୁଗିତାନ୍‌, ମାରି ସାସ୍ତ୍ର ପଡ଼ାଦେଙ୍ଗ୍‌ ନିର୍‌ଆନ୍‌ ।
LUK 4:17 ନାସ୍ତିୱାଲେ ଜିସାଇୟ ବାବବାଦିରି ବଇ ୱାନିଙ୍ଗ୍‌ ସିତାର୍‍, ମାରି ୱାନ୍‌ ଆକା କୁତ୍‌ତାନ୍‌, ଏମେ ଜାଗାଦୁ ଇୟା ବାକ୍ୟ ରାସ୍‌ତା ମାର୍‌ଆତ୍‌, ଆକା ପ‍ଇତାନ୍‌,
LUK 4:18 ପ୍ରବୁଦି ଆତ୍ମା ନା ମାନୁ ମାନାତ୍‌, “ଇରିଙ୍ଗ୍‌ କାକୁର୍ତି ଲୋକା ଲାକ୍‌ତୁ ନେଗିକାବୁର୍‌ ୱେର୍‍ନି ଉଣ୍ତିଙ୍ଗ୍‌ ମାପୁରୁ ନାଙ୍ଗିଁ ଆସ୍‌କିତାମାନାନ୍‌, ଜଇଲ୍‌ତୁ ମାନିକାର୍‌ ମୁକ୍‌ଡ଼ାନାର୍‌ ମାରି କାଣାରି ଲାକ୍‌ତୁ ସୁଡ଼ୁନି ବିସୟତିଙ୍ଗ୍‌ ୱେର୍‌ତେଙ୍ଗ୍‌, ମାରି ଦୁଃକୁକାସ୍ଟୁ ପଇତି ଲୋକାଙ୍ଗ୍‌ ମୁକ୍‌ଡା କିଦେଙ୍ଗ୍‌,
LUK 4:19 ମାରି ପ୍ରବୁ ୱାନି ଲୋକାଙ୍ଗ୍‌ ରକିୟା କିନି ସମୟ ଜେ ଇଗା ୱାତାମାନାତ୍‌ ଇକା ୱେର୍‌ତେଙ୍ଗ୍‌ ୱାନ୍‌ ନାଙ୍ଗିଁ ପୋକ୍‌ତାମାନାନ୍‌ ।”
LUK 4:20 ୱେନ୍‌କା ୱାନ୍‌ ବଇ ବନ୍ଦ କିଜ ସେବାକିନିୱାନିଙ୍ଗ୍‌ ଡେପ୍‌ସିସିତାନ୍‌ ନୋ ବାସ୍‌ତାନ୍‌, ମାରି ପାର୍‌ତନା କିନି ଇଲୁଦି ୱିଜେରେ ୱାନିଙ୍ଗ୍‌ ସୁଡ଼୍‌ଜି ମାର୍‌ଆର୍‌ ।
LUK 4:21 ମାରି, ଜିସୁ ୱାରିଙ୍ଗ୍‌ ୱେର୍‌ତାନ୍‌, “ନାନ୍ ବଇଦି ଏମେ ବିସୟ୍‌ ଇଲେଇ ପଡ଼ାତା, ଆମାକା ମିର୍‌ ୱେରିଦେର୍‍ ଦାର୍ମୁସାସ୍ତ୍ରଦି ଇୟା ବାକ୍ୟ ଇଲେଇ ନେକ୍‌କା ଆତାତ୍‌ ।”
LUK 4:22 ମାରି, ୱିଜେରେ ୱାନି ବିସୟ୍‌ତାନ୍‌ ସାକି ସିଦେଙ୍ଗ୍‍ ଆସ୍‌ତାର୍‌ ମାରି ୱାନି ୱେୟୁଦାନ୍‌ ଏମେ ନେଗି ମାଟା ସୋସି ମାର୍‌ଆତ୍‌ ଆବେନୁ ୱିଜେରେ କାବାତା ସର୍ହାର୍‌, ମାରି, ୱାର୍‌ ଇଣ୍ତ୍ରେଙ୍ଗ୍‌ ଆସ୍‌ତାର୍‌, “ଇକାନ୍‌ ଇନିକା ଜୋସେପ୍‌ତି ମାରିନ୍‌ ଆଏନ୍‍ ?”
LUK 4:23 ଆବେଟ୍‌ ୱାନ୍‌ ୱାରିଙ୍ଗ୍‌ ୱେର୍‌ତାନ୍‌, “ମିର୍‌ ସତେନେ ନାଙ୍ଗିଁ ଇୟା ପାଡ଼ିଇ ବିସୟତି ବାକ୍ୟ ଇନିଦେର୍‌, ଏ ଡାକ୍‌ଟର୍‌, ଆଗିଡ଼ି ନିଜେଦିଙ୍ଗ୍‌ ନେଗେନ୍‌ କିଆୟ୍‌ଆଆ, ମାରି ବା ଇନିଦେର୍‌ କପର୍‍ନାହୁମ୍‍ତୁ ଏମେ ଏମେକା ଗଟାତାମାନାତ୍‌ ଇଜି ମାପ୍‌ ୱେର୍‍ଆମାନାପ୍‍, ଆୟାୱିଜୁ ଇୟା ବାଡିଦୁ ନିଜେଦି ବୁବାୟାୟାଦି ଗାଡ଼୍‌ତୁ ବା କିଆ ।”
LUK 4:24 ମାରି ଜିସୁ ୱାରିଙ୍ଗ୍‌ ଇର୍ହାନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ଆମା ବାବବାଦିଦିଙ୍ଗ୍‌ ନିଜେଦି ବୁବାୟାୟାଦି ଗାଡ଼୍‌ତୁ ମାନାଏର୍‌ ।”
LUK 4:25 ମାତର୍‌ ନାନ୍ ମିଙ୍ଗିଁ ସତ୍‌ ଇଜିନା, “ଏଲିୟଦି ସମୟଦୁ ଇସ୍ରାଏଲତୁ ଏସ୍ତିୱାଲେ ମୁଣ୍ତ୍ରି ବାର୍ସେକ୍‌ ସୋଗୋଟା ଲେଜ୍‌କୁ ସାନ୍ଧି ବାଦଡ଼୍‍ତାନ୍‌ ପିରୁ ଆଏତାତ୍‌ଆକା ୱିଜୁ ଦେସ୍‌ତୁ କାଦି ଉଣ୍ତେଙ୍ଗ୍‌ ପୁଟ୍‌ଏତାତ୍‌, ନାସ୍ତିୱାଲେ ଇସ୍ରାଏଲତୁ ନାଣ୍ତ ରାଣ୍ତି ଆଇମେକ୍‍ ମାର୍‌ଏ;
LUK 4:26 ମାତର୍‌ ମାପୁରୁ ଏଲିୟଙ୍ଗ୍‍ ଆୟାୱାନିକା ଲାକ୍‌ତୁ ପୋକ୍‌ଏଣ୍‌ଗା କେବଲ୍ ସିଦନ୍‌ ଦେସ୍‌ତି ସାରିପତ୍‍ତୁମାନି ଅରେତ୍‌ ରାଣ୍ତି ଆଇମାଦି ଲାକ୍‌ତୁ ପୋକ୍‌ତାନ୍‌ ।
LUK 4:27 ମାରି, ବାବବାଦି ଇଲିସାୟତି ସମୟତୁ ଇସ୍ରାଏଲତୁ ନାଣ୍ତ କୁସ୍ଟରୋଗ୍‌ ଲୋକୁ; ମାରି ୱାରି ମାଣ୍‌କୁ ଏନ୍‌ ନେଗେନ୍‍ ଆଏର୍‌, କେବଲ୍ ସୁରିଆ ଦେସ୍‍ତି ନାମାନ ନେଗେନ୍‌ ଆତା ମାର୍‌ଆନ୍‌ ।”
LUK 4:28 ପାର୍‌ତନା ଇଲୁଦୁ ଇୟାୱିଜୁ ମାଟା ୱେନ୍‌ବୁ ୱେନ୍‌ବୁ ୱିଜେରେ ଲୋକୁ ରିସାଆତାର୍‌,
LUK 4:29 ମାରି ୱାର୍‌ ନିଙ୍ଗିଁଜି ୱାନିଙ୍ଗ୍‌ ଆୟା ଗାଡ଼୍‌ତାନ୍‍ ସୋପ୍‌ତାର୍‌ ମାରି ୱାରି ଗାଡ଼୍‌ ଏମେ ଗୋରନ୍‌ ମୁସ୍‌କୁ ତିଆର୍‌ ଆତାମାର୍‌ଆତ୍‌, ୱାର୍‌ ଗର୍‌ନତି ଟିପୁଦାନ୍‍ ଆଡ୍‍ଗି ପେଲେକିଦେଙ୍ଗ୍‍ ୱାନିଙ୍ଗ୍‌ ଆବେନୁ ଅତାର୍‍;
LUK 4:30 ମାତର୍‌ ୱାନ୍‌ ୱାରି ନାଣ୍‌ମିରାନ୍‌ ସତା ସୋର୍‌ଆନ୍‌ ।
LUK 4:31 ଜିସୁ କପର୍‍ନାହୁମ୍‍ ଇନି ଗାଲିଲିଦି ଉଣ୍ତ୍ରି ଗାଡ଼୍‌ତୁ ୱାତାନ୍‌, ମାରି ରମ୍‌ନିନାଣ୍ତିଙ୍ଗ୍‌ ଲୋକାଙ୍ଗ୍‌ ସିକିୟା ସିଦେଙ୍ଗ୍‍ ଆସ୍‌ତାନ୍‌,
LUK 4:32 ମାରି ୱାର୍‌ ୱାନି ସିକିୟାଦୁ କାବାଆତାର୍‌, ଇରିଙ୍ଗ୍‌ ୱାନ୍‌ ବାକ୍ୟ ଅଦିକାର୍‌ତି ୱାଲେ ମାଟା ଇଜିମାର୍‌ଆନ୍‌ ।
LUK 4:33 ଅର୍‍ଲେନ୍‍ ପାର୍‌ତନା ଇଲୁଦୁ ଅରେନ୍‍ ଦୁବାଆସ୍‌ତିମାର୍‌ଇ ଲୋକୁ ମାର୍‌ଆନ୍‌, ୱାନ୍‌ ପେରି ୱେୟୁଦାନ୍‌ ଆଉଲିଆତାନ୍‌,
LUK 4:34 ଏ, ନାଜରିତିୟଦି ଜିସୁ, “ମା ୱାଲେ ନି ଇନିକା ମାନ୍‌ତା ? ନିନୁ ନୋ ମାଙ୍ଗିଁ ସାପିସ୍‌ କିଦେଙ୍ଗ୍‌ ୱାତିମାନି ? ନିନୁ ଏନ୍‌, ଆକା ନାନ୍ ନେସ୍‌ନା; ନିନୁ ମାପୁରୁଦି ଆୟା ପବିତ୍ର ଲୋକୁ ।”
LUK 4:35 ଜିସୁ ତାନିଙ୍ଗ୍‌ ଆଦ୍‌ରିସ୍‌ କିଜି ଇର୍ହାନ୍‌, “ଆଲ୍‌ଜ ମାନ୍‌ଆ, ୱେନିମାଣ୍‌କୁ ସହସି ସାଙ୍ଗ୍ଆ ।” ଆବେଟ୍‌ ଆୟା ଦୁବା ୱାନିଙ୍ଗ୍‌ ୱିଜେରି ଆଗିଡ଼ି ଆରାପ୍‌ତାଦୋ ୱାନିଙ୍ଗ୍‌ ଇନିକା କିଏଣ୍‌ଗା ୱାନିମାଣ୍‌କୁ ସତା ସର୍‌ଆତ୍‌ ।
LUK 4:36 ଆବେଟ୍‌କୁ ୱିଜେରେ କାବାତାରୋ ନିଜେ ନିଜେଦିମାନୁ ଇନିଞ୍ଜି ସାତାର୍‌, “ଇକା ଇନି ମାଟା ? ୱାନ୍‌ ଅଦିକାର୍‌ ମାରି ସାକ୍ତିଦାନ୍ ଆଦେସ୍‌ ସିନାନ୍‍ ତାଗ୍‍ଇ ଦୁବେଙ୍ଗ୍‍ ମାରି ୱାକ୍‍ ସଅନେ ସନେ ।”
LUK 4:37 ଆବେଟ୍‌ ଜିସୁ ବିସୟ୍‌ତାନ୍‌ ଇୟା କାବୁର୍‌ ୱିଜୁତରିଟି ରାଜିଦୁ ୱେଙ୍ଗିଁତାତ୍‌ ।
LUK 4:38 ୱେନ୍‌କା ଜିସୁ ପାର୍‌ତନା ଇଲୁଦାନ୍‌ ନିଙ୍ଗିଁଜି ସିମୋନ୍‌କା ଇଣ୍ତ୍ର ସୋର୍‌ଆନ୍‌ । ସିମୋନକା ମିମିସିଙ୍ଗ୍‌ ନାଣ୍ତ ନବ୍‌ ଆତାମାରାତ୍‌, ମାରି ୱାର୍‌ ତାନି ବିସୟ୍‌ତାନ୍‌ ୱାନିଙ୍ଗ୍‌ ୱେର୍‌ତାର୍‌ ।
LUK 4:39 ଆବେଟ୍‌ ୱାନ୍‌ ତାନି ଲାକ୍‌ତୁ ନିର୍‌ଆନ୍‌ନୋ ନବ୍‌ତିଙ୍ଗ୍‌ ଆଦ୍‌ରିସ୍‌ତାନ୍‍, ମାରି ତାନିଙ୍ଗ୍‌ ନବ୍‌ ଡ଼ିସ୍‌ତାତ୍‌, ମାରି ୱାଦ୍‌ ଆୟାଦାର୍ପେ ନିଙ୍ଗିଁଜି ୱାରି ସେବା କିଦେଙ୍ଗ୍‌ ଆସ୍‌ତାନ୍‌ ।
LUK 4:40 ୱେଡ଼ା ସନିୱାଲେ, ଏମେୱାରି ଲାକ୍‌ତୁ ଆଇ ଆଇ ରୋଗ୍‌ ଆସ୍‌ତିମାର୍‌ଇ ଲୋକୁ ମାର୍‌ଆର୍‌, ଆୟାୱିଜେରେ ୱାରିଙ୍ଗ୍‌ ୱାନି ଲାକ୍‌ତୁ ତାତାର୍‌ ମାରି ୱାନ୍‌ ୱିଜେରି ମୁସ୍‌କୁ କିୟୁ ଇଡ୍‌ଜି ୱାରିଙ୍ଗ୍‌ ନେଗେଣ୍ତ୍‌ କିତାନ୍‌ ।
LUK 4:41 ମାରି, ଦୁବେଙ୍ଗ୍‌ ବା ଆଉଲି ଆଜି ଆଜି ନିନୁ ମାପୁରୁଦି ମାରିସି ଇଜି ଇନ୍‌ଞ୍ଜି ନାଣ୍ତ ଲୋକା ମାଣ୍‌କୁ ସୋତେ ସର୍‌ଏ । ମାରି, ଜିସୁ ୱାରିଙ୍ଗ୍‌ ଆଦ୍‌ରିସ୍‌ କିଜି ୱାର୍‍ଗିଦେଙ୍ଗ୍‍ ସିଏତାନ୍‌, “ଇରିଙ୍ଗ୍‌ ୱାନ୍‌ ଜେ କ୍ରିସ୍ତ, ଇକା ୱାକ୍‍ ନେସ୍‌ତେ ମାର୍‍ହେ ।”
LUK 4:42 ସାଲ୍‍ଦି ଆତାତ୍‌ଆକା, ଜିସୁ ଗାଡ଼୍‌ତାନ୍‍ ସୋଅସି ଉଣ୍ତ୍ରି ସୁନ୍‌ସାନ୍‌ ବାଡିଦୁ ସୋର୍‌ଆନ୍‌; ମାରି, ଲୋକୁ ୱିଜେରେ ୱାନିଙ୍ଗ୍‌ ପୟ୍‌ଜି ପୟ୍‌ଜି ୱାନି ଲାକ୍‌ତୁ ୱାତାର୍‌, ମାରି ୱାନ୍‌ ଏଣ୍ତେସ୍‌ ୱାରି ଲାକ୍‌ତୁରାନ୍‌ ସୋଲ୍‌ଏନ୍‌, ଆୟାଉଣ୍ତିଙ୍ଗ୍‌ ୱାନିଙ୍ଗ୍‌ ତେବାକିଦେଙ୍ଗ୍‌ ବଦାକିତାର୍‌ ।
LUK 4:43 ମାତର୍‌ ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ଆଇ ଆଇ ଗାଡ଼୍‌କାଙ୍ଗ୍‌ ବା ନାଙ୍ଗିଁ ମାପୁରୁଦି ରାଜିଦି ନେଗିକାବୁର୍‌ ୱେର୍‌ତେଙ୍ଗ୍‌ ଆନାତ୍‌, ଇରିଙ୍ଗ୍‌ ଆୟାଉଣ୍ତିଙ୍ଗ୍‌ ମାପୁରୁ ନାଙ୍ଗିଁ ପୋକ୍‌ତା ମାନାନ୍‌ ।”
LUK 4:44 ମାରି, ୱାନ୍‌ ଜିହୁଦା ଦେସ୍‍ତି ପାର୍‍ତନାକିନି ଇଲ୍‌କାଙ୍ଗ୍‌ ପ୍ରଚାର୍‌ କିଦେଙ୍ଗ୍‌ ଆସ୍‌ତାନ୍‌ ।
LUK 5:1 ଅର୍‍ଲେନ୍‍ ଜିସୁ ଗିନେସରତ ଗାଡା ପାଡ଼ି ନିର୍‌ଆ ମାର୍ହାନ୍‌, ମାରି ଲୋକୁ ମାପୁରୁଦି ବାକ୍ୟ ୱେନ୍‍ଣ୍ତ୍ରେଙ୍ଗ୍‍ ୱାନି ମୁସ୍‌କୁ ମାଟ୍‍ସିସାଜି ମାର୍‌ଆର୍‌ ।
LUK 5:2 ମାରି, ଜିସୁ ଗାଡାପାଡ଼ି ରୁଣ୍ତି ଡଙ୍ଗେଆଙ୍ଗ୍‌ ମାନିକା ସୁଡ଼ୁତାନ୍‌; ମିନୁକୁଆସ୍‌ନିକାର୍‌ ଆବେଟ୍‌କୁ ରେସିୱାଜି ଜାଡ଼ି ନର୍‌ଜି ମାର୍ହାର୍‌ ।
LUK 5:3 ଆୟା ଡଙ୍ଗେଆଙ୍ଗ୍‌ ମାଣ୍‌କୁ ଏମେମାନୁ ସିମୋନ୍‌ତିଦି ମାର୍ହାତ୍‌, ଆବେନୁ ଜିସୁ ଏକ୍‌ସି ଆଡ୍‍ଗିରାନ୍‌ କାଣ୍ତେକ୍‌ ଆକ ସନି ଉଣ୍ତିଙ୍ଗ୍‌ ୱାନିଙ୍ଗ୍‌ ୱେର୍‌ତାନ୍‌; ମାରି, ୱାନ୍‌ ଡଙ୍ଗାଁଦୁ ବାସ୍‌ସି ଲୋକାଙ୍ଗ୍‌ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।
LUK 5:4 ଜିସୁ ମାଟା ଇଣ୍ତ୍ରେଙ୍ଗ୍‌ ୱିସ୍‍ସି ସିମୋନ୍‌ତିଙ୍ଗ୍‌ ଇର୍ହାନ୍‌, “ନିର୍‌ଇଗୁମିଦୁ ସୋଲ୍‌ସ ମିନ୍‌କୁ ଆସ୍‌ନି ଉଣ୍ତିଙ୍ଗ୍‌ ମି ଜାଡ଼ି ପୋକ୍‌ତୁ ।”
LUK 5:5 ସିମୋନ୍‌ ଇର୍‌ଆନ୍‌, “ଏ ଗୁରୁ, ମାପ୍‌ ନାଡାୱିଗ୍‍ଜି ୱାନ୍ଦ୍‍ଜି ଏସୋବା ଆସ୍‌ଏତାପ୍‌; ମାତର୍‌ ନି ମାଟାଦାନ୍‌ ନାନ୍ ଜାଡ଼ି ପୋକ୍‌ନା ।”
LUK 5:6 ମାରି, ୱାର୍‌ ଜାଡ଼ି ପୋକ୍‌ସି ନାଣ୍ତ ମିନ୍‌କୁ ଆସ୍‌ତାର୍‌, ମାରି ୱାରି ଜାଡ଼ି ତେଉଦେଙ୍ଗ୍‌ ଆସ୍‌ତାତ୍‌ ।
LUK 5:7 ଆବେନୁ ୱାରି ଏମେ ସାଙ୍ଗର୍‌ ଆଇ ଡଙ୍ଗାଁଦୁ ମାର୍‌ଆର୍‌, ୱାର୍‌ ଏଣ୍ତେସ୍‌ ୱାଜି ସାହାଜ୍ୟ କିନାର୍‌, ଆୟା ଉଣ୍ତିଙ୍ଗ୍‌ ୱାର୍‌ ୱାରିଙ୍ଗ୍‌ କୁକ୍‌ତାର୍‌ । ଆବେଟ୍‌ ୱାର୍‌ ୱାଜି ରୁଣ୍ତି ଡଙ୍ଗେଆଙ୍ଗାଁ ଇୟାୱାଜା ମିନ୍‌କୁ ଆସ୍‌ସି ବର୍ତି କିତାର୍‌ ଜେ, ରୁଣ୍ତି ଡଙ୍ଗେଆଙ୍ଗ୍‌ ମୁଡ଼ୁଗିତି ୱାଜା ଆତେ ।
LUK 5:8 ମାତର୍‌ ସିମୋନ ପିତର୍‌ ଇକା ସୁଡ଼ୁଜି ଜିସୁଦି କାଲ୍‌କା ଆଡ୍‍ଗି ପାଡ଼୍‌ଗିଜି ଇର୍ହାର୍‌, “ଏ ପ୍ରବୁ, ନା ଲାକ୍‌ତୁରାନ୍‌ ନିନ୍‌ ସାଙ୍ଗ୍‌ଆ, ଇରିଙ୍ଗ୍‌ ନାନ୍ ଅରେନ୍‍ ପାପି ଲୋକୁ ।”
LUK 5:9 ଇରିଙ୍ଗ୍‌ ୱାର୍‌ ଆୟା ଦାପ୍ରେ ନିସା ମିନ୍‌କୁ ଆସ୍‌ତାମାର୍ହାର୍‌ ଜେ, ଆକା ସୁଡ଼ୁଜି ୱାନ୍‌ ମାରି ୱାରି ତଡ଼୍‍କୁ ୱିଜେରେ କାବାତା ସର୍ହାର୍‌;
LUK 5:10 ମାରି, ଜେବଦିରି ରିଏର୍‌ ମାର୍‌ସିର୍‌ ଜାକୁବ ମାରି ଜୋହନ, ଏର୍‌ ସିମୋନ୍‌ତି ୱାଲେ ମାର୍ହାର୍‌, ୱାନ୍‌ ବା ଆୟାୱାଜା କାବାତା ସୋର୍‌ଆର୍‌ । ମାରି, ଜିସୁ ସିମୋନତିଙ୍ଗ୍‌ ଇର୍ହାନ୍‌, “ତିଲାମା, ନେର୍‍ହାନ୍‌ ନିନ୍‌ ମିନ୍‌କୁ ଆସ୍‌ନି ବାଦ୍‌ଲୁ ଲୋକାଙ୍ଗ୍‌ ମାପୁରୁ ଲାକ୍‌ତୁ ତାନି ।”
LUK 5:11 ତାନେ ୱେନ୍‌କା ୱାର୍‌ ଡଙ୍ଗେଆଙ୍ଗ୍‌ ପାଡ଼ିତାସି ୱିଜୁ ଡ଼ିସ୍‍ସି ଜିସୁୱାଲେ ୱାଲେ ସର୍ହାର୍‌ ।
LUK 5:12 ଅର୍‍ସୁ ଜିସୁ ଉଣ୍ତ୍ରି ଗାଡ଼୍‌ତୁ ମାନିୱାଲେ, ସୁଡ଼ୁଦୁ, ଅରେନ୍‍ କୁସ୍ଟରୋଗ୍‌ ଲୋକୁ ଆୟା ବାଡିଦୁ ମାର୍‌ର୍ହାନ୍‌, ୱାନ୍‌ ଜିସୁଙ୍ଗୁଁ ସୁଡ଼ୁଜି ମୋକମ୍‌ ପାଡ଼୍‍କ୍‍ସି ଜିସୁଙ୍ଗୁଁ ମାଡ଼ିସ୍‌ କିଜି ଇର୍ହାନ୍‌, “ଏ ପ୍ରବୁ, ନିନ୍‌ ଜଦି ବଦା କିନି, ଆତିଙ୍ଗ୍‌ ନାଙ୍ଗିଁ ନେଗେଣ୍ତ୍‌ କିଦେଙ୍ଗ୍‌ ଆଟ୍‌ନି ।”
LUK 5:13 ଆବେନୁ ଜିସୁ କିୟୁ ପେର୍‌ଜି ୱାନିଙ୍ଗ୍‌ ମୁଟ୍‌ସି ଇର୍ହାନ୍‌, “ନାନ୍ ବଦା କିଜିନା, ନେଗେଣ୍ତ୍‌ ଆଆ ।” ଆୟାଦାପ୍ରେ କୁସ୍ଟରୋଗ୍‌ ୱାନିମାଣୁକୁ ଆକ ଆତାତ୍‌ ।
LUK 5:14 ମାରି, ଜିସୁ ୱାନିଙ୍ଗ୍‌ ଆଦେସ୍‌ ସିଜି ଇର୍ହାନ୍‌, “ଏଙ୍ଗ୍‌ବା ଇନିକା ଇନ୍‍ମା, ମାତର୍‌ ସିଦା ସୋଲ୍‌ସ ଜାଜକଦି ଲାକ୍‌ତୁ ସାଙ୍ଗ୍‍ଆ ମାରି ୱାନ୍‌ ନିଙ୍ଗିଁ ପରିକା କିଜି ସୁଡ଼ିନ୍‍, ତାନିୱେନ୍‍କା ନିନ୍‌ ନେଗେନ୍‌ ଆତିମାନି ଇଜି ଆଇୱାରି ଲାକ୍‌ତୁ ସାକି ସିଦେଙ୍ଗ୍‍ ଇଜି ମୋସାଦି ସିତିମାନି ନିୟମ୍‍ତାନ୍‍ ପୁଜା ସିଆ ।”
LUK 5:15 ମାତର୍‌ ୱାନି ବିସୟତି ମାଟା ମାରି ନାଣ୍ତ ୱେଙ୍ଗିଁତାତ୍‌, ମାରି ନାଣ୍ତ ଲୋକୁ ୱେନି ଉଣ୍ତିଙ୍ଗ୍‌ ମାରି ନିଜେ ନିଜେଦି ରୋଗ୍‌ତାନ୍‌ ନେଗେନ୍‌ ଆନି ଉଣ୍ତିଙ୍ଗ୍‌ ଉଣ୍ତ୍ରେମାନୁ ଆଦେଙ୍ଗ୍‌ ଆସ୍‌ତାର୍‌;
LUK 5:16 ମାତର୍‌ ଜିସୁ ସୁନ୍‌ସାନ୍‌ ବାଡିଦୁ ମାନ୍‌ଞ୍ଜି ପାର୍‌ତନା କିଜିମାର୍ହାନ୍‌ ।
LUK 5:17 ଅର୍‍ଲେନ୍‍ ଜିସୁ ସିକିୟା ସିଜି ମାର୍ହାନ୍‌, ମାରି ଗାଲିଲିଦି ୱିଜୁ ନାର୍‌କୁ, ମାରି ଜିହୁଦା ଦେସ୍‍ ମାରି ଜିରୁସାଲମତାନ୍‌ ୱାତି ମାର୍ହି ପାରୁସି ମାରି ଜିହୁଦି ଦାର୍ମୁଗୁରୁରି ଲାକ୍‌ତୁ ବାସ୍‌ତା ମାର୍ହାର୍‌, ମାରି, ୱାନ୍‌ ଏଣ୍ତେସ୍‌ ରୋଗିରିଙ୍ଗ୍‍ ନେଗେନ୍‌ କିନାନ୍‌, ଇୟାଉଣ୍ତିଙ୍ଗ୍‌ ପ୍ରବୁଦି ସାକ୍ତି ୱାତା ମାନାତ୍‌ ।
LUK 5:18 ମାରି ସୁଡ଼ୁଦୁ, ଏସ ଲୋକୁ ଅରେନ୍‍ ପକିୟାଗାତି ରୋଗ୍‌ ଲୋକ୍‌ତିଙ୍ଗ୍‌ କାଟେଲ୍‍ତୁ ପିଣ୍ତିଜି ତାତାର୍ ୱାନିଙ୍ଗ୍‌ ଲୋଇ ଅତେଙ୍ଗ୍‌ ଇଜି ମାରି ଜିସୁ ଆଗ୍‌ଡ଼ି ଇଡ୍‌ଦେଙ୍ଗ୍‌ ଇଜି ବଦା କିଜିମାର୍ହାର୍‌ ।
LUK 5:19 ମାତର୍‌ ନାଣ୍ତ ଲୋକୁ ଗୋଲି ଉଣ୍ତିଙ୍ଗ୍‌ ୱାନିଙ୍ଗ୍‌ ଲୋଇ ଅତେଙ୍ଗ୍‌ ଇଜି ସାରି ପଇଏତାର୍‌ଆକା ୱାର୍‌ ଇଲୁ ମୁସ୍‌କୁ ଏକ୍‌ତାର୍‌ରୋ ରେକାମ୍‌ତି ଟାଇଲି କୁତ୍‌ତାର୍‌ରୋ ବର୍‌ କିତାର୍‌ ଆୟା ବର୍‌ଦି ସାରିସିଜି କାଟେଲ୍‌ତି ୱାଲେ ୱାନିଙ୍ଗ୍‌ ନେଗିନାଣ୍‌ମି ବାଡିଦୁ ଜିସୁଦି ଆଗିଡ଼ି ରେପ୍‌ତାର୍‌ ।
LUK 5:20 ୱାନ୍‌ ୱାରି ବିସ୍‌ବାସ୍‌ ସୁଡ଼ୁଜି ଇର୍ହାନ୍‌, “ଏ ମାରିନ୍‌, ନି ପାପ୍‌ୱିଜୁ କେମା ଆତାମାନାତ୍‌ ।”
LUK 5:21 ଆବେଟ୍‌ ସାସ୍ତ୍ରିର୍‍ ମାରି ପାରୁସିର୍‌ ନିଜେ ନିଜେଦିମାନୁ ୱାର୍‌ଗିଜିସାଜି ଇର୍ହାର୍‌, “ଇକାନ୍‌ ଜେ ମାପୁରୁଙ୍ଗୁଁ ନିଦା କିଜିନାନ୍‌, ଇକାନ୍‌ ଏନ୍‌ ? କେବଲ୍‌ ମାପୁରୁଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ପାପ୍‌କେମା କିଦେଙ୍ଗ୍‌ ଆଟ୍‍ନାନ୍‍ ?”
LUK 5:22 ମାତର୍‌ ଜିସୁ ୱାରି ୱାର୍‌ଗିଜିସାନିକା ନେସ୍‌ସି ୱାରିଙ୍ଗ୍‌ ଇର୍‌ଆନ୍‌, ମିର୍‌ ନିଜେ ନିଜେଦି ମନ୍‍ତୁ ଇନିକା ୱାର୍‌ଗିଜି ସାଜିନିଦେର୍‌ ?
LUK 5:23 ଇନିକା ଉସାସ୍‌ ? ନି ପାପ୍‌ୱିଜୁ କେମା ଆତାତ୍‌ ଇଜି ଇନିକା, ମାରି, ନିଙ୍ଗିଁଆ, ବୁଲାଆ ଇଜି ଇନିକା ?
LUK 5:24 ମାତର୍‌ ସାରାଦୁନିଆଦୁ ପାପ୍‌କେମା କିଦେଙ୍ଗ୍‌ ମନୁସ୍ୟପୁତ୍ରଦିଙ୍ଗ୍‌ ଜେ ଅଦିକାର୍‌ ମାନାତ୍‌, ଇକା ଏଣ୍ତେସ୍‌ ମିର୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌ ଇୟାଉଣ୍ତିଙ୍ଗ୍‌ ଆୟା ପକିୟାଗାତି ରୋଗିଙ୍ଗ୍‌ ଇର୍ହାନ୍‌, “ନାନ୍ ନିଙ୍ଗିଁ ଇଜିନା, ନିଙ୍ଗିଁଆ, ନିଜେଦି ଟାଟି ଆସ୍‌ସି ମି ଇଣ୍ତ୍ରସାଙ୍ଗ୍‍ଆ ।”
LUK 5:25 ଆବେଟ୍‌ତାନ୍‌ ୱାନ୍‌ ଆୟାଦାପ୍ରେ ୱାରି ଆଗିଡ଼ିରାନ୍‌, ନିଙ୍ଗ୍‌ଜି, ଏମେ କାଟେଲ୍‍ ମୁସ୍‌କୁ ୱାନ୍‌ ଡରିତା ମାର୍ହାନ୍‌, ଆୟା କାଟେଲ୍‌ ଆସ୍‌ଇ ମାପୁରୁଙ୍ଗ୍‌ ଦନ୍ୟବାଦ୍‌ ପ୍ରସଂସା କିଜି କିଜି ନିଜେଦି ଇଣ୍ତ୍ର ସୋର୍ହାନ୍‌ ।
LUK 5:26 ଆବେଟ୍‌ ୱିଜେରେ କାବାତାରୋ ମାପୁରୁଙ୍ଗ୍‌ ଦନ୍ୟବାଦ୍‌ ପ୍ରସଂସା କିଦେଙ୍ଗ୍‌ ଆସ୍‌ତାର୍‌ ମାରି ନାଣ୍ତ ତିଲାତାରୋ ଇର୍ହାର୍‌, “ନେରୁ ମାପ୍‌ କାବାଆନି ଗଟ୍‌ଣା ସୁଡ଼ୁତାପ୍‌ !”
LUK 5:27 ତାନେୱେନ୍‌କା ଜିସୁ ସୋତା ସର୍ହାନ୍‌ନୋ ଲେବି ଦର୍‌ତି ଅରେନ୍‍ ୱାନିଙ୍ଗ୍‌ ସିସ୍‍ଟୁ ଲସ୍‌ନି ବାଡିଦୁ ବାସ୍‌ତି ମାରିକା ସୁଡ଼ୁଜି ୱାନିଙ୍ଗ୍‌ ଇର୍ହାନ୍‌, “ନା ୱେନ୍‌କା ରାଆ ।”
LUK 5:28 ଆବେଟ୍‌ ଲେବି ୱିଜୁ ଡ଼ିସ୍‌ତାନ୍‌ନୋ ନିଙ୍ଗିଁଜି ୱାନି ୱେନ୍‌କା ସଣ୍ଡ୍ରେଙ୍ଗ୍‌ ଆସ୍‌ତାନ୍‌ ।
LUK 5:29 ମାରି, ଲେବି ନିଜେଦି ଇନ୍‌ଡ୍ର ୱାନି ଉଣ୍ତିଙ୍ଗ୍‌ ଉଣ୍ତ୍ରି ପେରି ବଜି କିତାନ୍‌, ମାରି ନାଣ୍ତଲୋକୁ ସିସ୍‍ଟୁ ଲସ୍‌ନିକାର୍‌ ମାରି ଆଇ ଆଇ ଲୋକୁ ୱାରି ୱାଲେ ଉଣ୍ତେଙ୍ଗ୍‌ ବାସ୍‌ତାର୍‌ ।
LUK 5:30 ଆବେଟ୍‌ ପାରୁସିର୍‌ ମାରି ୱାରି ଦଲ୍‌ତି ସାସ୍ତ୍ରିର୍‍ ଜିସୁଦି ସିସୁରି ବିରଦ୍‌ତାନ୍‌ ବାସେ କିଜି ଇଣ୍ତ୍ରେଙ୍ଗ୍‌ ଆସ୍‌ତାର୍‌, “ମିର୍‌ ଏନ୍ଧା ସିସ୍‍ଟୁ ଲସ୍‌ନିକାର୍‌ ମାରି ପାପିଲୋକା ୱାଲେ ଉଣୁଞ୍ଜିତିଞ୍ଜିନିଦେର୍‌ ?”
LUK 5:31 ଜିସୁ ୱାରିଙ୍ଗ୍‌ ୱେର୍‌ତାନ୍‌, “ନେଗି ଲୋକାଙ୍ଗ୍‌ ଡାକ୍‌ତର୍‌ମାନୁ ଦର୍‌କାର୍‌ ସିଲେ, ମାତର୍‌ ରୋଗ୍‍ତି ଲୋକାଙ୍ଗ୍‌ ଡାକ୍‌ତର୍‌ତି ମାନୁ ଦର୍‌କାର୍‌ ମାନାତ୍‌ ।
LUK 5:32 ନାନ୍ ଦାର୍ମୁ ଲୋକାଙ୍ଗ୍‌ କୁକ୍‌ନି ଉଣ୍ତିଙ୍ଗ୍‌ ରେଏ, ମାତର୍‌ ମୋନ୍‌ତିଙ୍ଗ୍‌ ଡ଼େପ୍‍ନି ଉଣ୍ତିଙ୍ଗ୍‌ ପାପି ଲୋକାଙ୍ଗ୍‌ କୁକ୍‌ତେଙ୍ଗ୍‌ ଇଜି ୱାତାମାନା ।”
LUK 5:33 ଏସୋଲୋକ୍‍ ଜିସୁଙ୍ଗୁଁ ୱେନ୍‍ବାତାର୍‌, “ଡୁବନ୍‌ ସିନି ଜୋହନତି ସିସୁର୍‍ ମାରି ଅର୍‍ସୁ ମାରି ଉପାସ୍‌ ମାରି ପାର୍‍ତନା କିନାର୍‌, ପାରୁସିର୍‌ ସିସୁର୍‍ ବା ଆୟାୱାଜା କିନାର୍‌, ମାତର୍‌ ନି ସିସୁର୍‍ ଉଣାର୍‍ତିନାର୍‌ ।”
LUK 5:34 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “କାନ୍ୟାମୁରୁଲିରି ୱାଲେ ମୁରୁଲି ମାନିୱାଲେ ମିର୍‌ ଇନିକା ୱାରିଙ୍ଗ୍‌ ଉପାସ୍‌ ତେବାକିଦେଙ୍ଗ୍‌ ଆଟ୍‌ନିଦେର୍‌ ? ମୁଡ଼ୁକେ ସିଲେ ।
LUK 5:35 ମାତର୍‌ ସମୟ ୱାନାତ୍‌, ମାରି, ଏସ୍ତିୱାଲେ ୱାରିମାଣାନ୍‌ ମୁରୁଲିଙ୍ଗ୍‌ ୱେର୍‌ଏ କିନାର୍‌, ନାସ୍ତିୱାଲେ ଆୟାୱାଲେ ୱାର୍‌ ଉପାସ୍‌ କିନାର୍‌ ।”
LUK 5:36 ମାରି, ୱାନ୍‌ ୱାରିଙ୍ଗ୍‌ ଉଣ୍ତ୍ରି କାତାବା ଇର୍‌ଆନ୍‌, “ଏନ୍‌ ପୁନି ୱାତିଦି ଇସ୍ରି ଅଟିଦିଙ୍ଗ୍‍ ଅସି ପାଡ଼ିଇ ୱାତିଦୁ ଗୁତ୍‌ଏନ୍‌; ଗୁତ୍‌ତିଙ୍ଗ୍‌ ଆୟା ପୁନି ୱାତିଦି ଅଟି ପାଡ଼ିଇ ୱାତିଦିଙ୍ଗ୍‌ କିଜିସ୍‌କିନାତ୍‌, ମାରି ପୁନି ୱାତିଦି ଅଟି ବା ପାଡ଼ିଇ ୱାତିଦି ୱାଲେ ମିସାଏତ୍‌ ।
LUK 5:37 ମାରି, ଏନ୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପାଡ଼ିଇ ସାଟିଦୁ ଇଡ୍‍ଏନ୍‍; ଜଦି ଇଟ୍‌ତିଙ୍ଗ୍‌ ପୁନି ଅଙ୍ଗୁର୍‍ରସ୍‍ ସାଟିଦିଙ୍ଗ୍‌ ପାଡିସ୍‌ କିଜି ପଗ୍‌ନାସୋନାତ୍‌, ମାରି ସାଟିବା ନାସ୍ଟୁ ଆନାତ୍‌ ।
LUK 5:38 ମାତର୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପୁନି ସାଟିଦୁ ଇଡ୍‌ନିକା ମାନାତ୍‌ ।
LUK 5:39 ମାରି, ଏନ୍‌ ପାଡ଼ିଇ ଅଙ୍ଗୁର୍‍ ରସ୍‌ତିଙ୍ଗ୍‌ ଉଣାନ୍‌ନୋ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ଉଣ୍ତେଙ୍ଗ୍‌ ବଦା କିଏନ୍‌, ଇରିଙ୍ଗ୍‌ ୱାନ୍‌ ଇନାନ୍‌, ପାଡ଼ିଇ ଅଙ୍ଗୁର୍‍ ରସ୍‌ନେ ନେଗିକା ।”
LUK 6:1 ଅର୍‍ଲେନ୍‍ ରମ୍‍ନିଦିନ୍‍ତୁ ଜିସୁ ପାସି କିଡ଼ିଇ ସିଜି ସନି ୱାଲେ ୱାନି ସିସୁର୍‍ ସେରେନ୍‍କୁ ତେଉଜି ତେଉଜି କିୟୁଦୁ ରାସ୍‌ଇ ତିନ୍‌ଜି ମାର୍ହାର୍‌ ।
LUK 6:2 ମାତର୍‌ ପାରୁସିର୍ ମାଣ୍‌କୁ ଏସ ଲୋକୁ ଇର୍ହାର୍‌, “ରମ୍‌ନିଦିନ୍‍ତୁ ଏମେକା କିଦେଙ୍ଗ୍‌ ନିୟମ୍‌ ସିଲେତ୍‌, ଆକା ମିର୍‌ ଏନ୍ଧା କିଜିନିଦେର୍‌ ?”
LUK 6:3 ଜିସୁ ୱାରିଙ୍ଗ୍‌ ଇର୍ହାନ୍‌, “ଦାଉଦ ମାରି ୱାନି ସାଙ୍ଗର୍‌ ବାଙ୍ଗାଁ ଆତିୱାଲେ ୱାନ୍‌ ଇନିକା କିତାମାର୍‌ଆନ୍‌, ଆକାବା ଇନିକା ମିର୍‌ ପଡ଼ାଇଦେର୍‍ ନୋ ?
LUK 6:4 ଦାଉଦ ଏଣ୍ତେସ୍‌ ମାପୁରୁଦି ଇଲୁତୁ ଡ଼ୁଗିତାନ୍‌ନୋ, ଆମା ପୁଜାସିନି ରୁଟି ଜାଜକରିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ବା ତିଣ୍ତ୍ରେଙ୍ଗ୍‌ ନିୟମ୍‌ ସିଲେତ୍‌, ଆକା ଅତାନ୍‌ନୋ ତିରାଆ ମାର୍‌ଆନ୍‌, ମାରି ୱାନି ତଡ଼୍‌ ଲୋକାଙ୍ଗ୍‌ ବା ସିତା ମାର୍‌ଆନ୍‌ ।”
LUK 6:5 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, “ମନୁସ୍ୟପୁତ୍ର ରମ୍‌ନିଦିନ୍‍ତି ପ୍ରବୁ ଆନାନ୍‌ ।”
LUK 6:6 ଜିସୁ ମାରି ଅର୍‍ଲେନ୍‍ ରମ୍‌ନିନାଣ୍ତିଙ୍ଗ୍‌ ପାର୍‌ତନା ଇଲୁତୁ ଡ଼ୁଗିତାନ୍‌ନୋ ସିକିୟା ସିଜି ମାର୍‌ଆନ୍‌, ଆବେଟ୍‌ ଅରେନ୍‍ ଲୋକୁ ମାର୍‌ଆନ୍‌, ୱାନି ଉଣି କିୟୁ ୱାର୍‌ତା ମାର୍‌ଆତ୍‌ ।
LUK 6:7 ମାରି, ୱାନ୍‌ ଏଣ୍ତେସ୍‌ ରମ୍‌ନିନାଣ୍ତିଙ୍ଗ୍‌ ନେଗେଣ୍ତ୍‌ କିନାନ୍‌ନୋ ସିଲେ, ଇକା ସୁଡ଼ୁଦେଙ୍ଗ୍‍ ଇଜି ସାସ୍ତ୍ରିରି ମାରି ପାରୁସିର୍‌ ୱାନିଙ୍ଗ୍‌ ସୁଡ଼ୁଜି ମାର୍‌ଆର୍‌, ଏଣ୍ତେସ୍‌କି ୱାର୍‌ ୱାନି ବିରୁଦ୍‍ତାନ୍‍ ଦୋସ୍‌ କିଦେଙ୍ଗ୍‌ ଆଟ୍‍ନାର୍‍ ।
LUK 6:8 ମାତର୍‌ ୱାନ୍‌ ୱାରି ମନ୍‌ତୁ ଅଡ଼୍‍ବିନିକା ନେସ୍‌ତାନ୍‌ନୋ, ଏମେ ଲୋକ୍‌ତି କିୟୁ ୱାର୍‌ତା ସୋର୍‌ଆ ମାର୍‌ଆତ୍‌, ୱାନିଙ୍ଗ୍‌ ଇର୍‌ଆନ୍‌, “ନିଙ୍ଗିଁଆ, ନାଣ୍‌ମି ନିଲ୍‌ଆ ।” ମାରି, ୱାନ୍‌ ନିଙ୍ଗ୍‌ଜି ନିର୍‌ଆନ୍‌ ।
LUK 6:9 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାନ୍ ମିଙ୍ଗିଁ ୱେନ୍‌ବାଜିନା, ରମ୍‌ନି ନାଣ୍ତିଙ୍ଗ୍‌ ଇନିକା କିଦେଙ୍ଗ୍‌ ନିୟମ୍‌ ସିଲେତ୍‌ ? ନେଗେନ୍‌ କିଦେଙ୍ଗ୍‌ ନୋ ସେଏଣ୍ତ୍‍ କିଦେଙ୍ଗ୍‌ ? ଜିବନ୍‌ ରକିୟା କିନିକା ନୋ ସାପିସ୍‌ନିକା ?”
LUK 6:10 ମାରି, ଜିସୁ ସାରିବେଡ଼୍‍ତି ୱିଜେରିଙ୍ଗ୍‌ ସୁଡ଼୍‌ଜି ୱାନିଙ୍ଗ୍‌ ଇର୍‌ଆନ୍‌, “ନି କିୟୁ ପେର୍‌ଆ ।” ଆବେଟ୍‌ ୱାନ୍‌ ୱାନି କିୟୁ ପେର୍‍ତାନ୍‍, ମାରି ୱାନି କିୟୁ ନେଗେନ୍‌ ଆତାତ୍‌ ।
LUK 6:11 ମାତର୍‌ ୱାର୍‌ ନାଣ୍ତ ରିସା ଆତାର୍‌, ମାରି ଜିସୁଦି ବିରଦ୍‌ତାନ୍‌ ଇନିକା କିଦେଙ୍ଗ୍ ଆଟ୍‍ନାର୍‍, ଆୟା ବିସୟ୍‌ତାନ୍ ନିଜେ ନିଜେଦିମାନୁ ୱାର୍‌ଗିଜି ସାତାର୍‌ ।
LUK 6:12 ଆୟାୱାଲେ ଜିସୁ ଅର୍‍ଲେନ୍‍ ପାର୍‌ତନା କିଦେଙ୍ଗ୍‌ ଇଜି ଗରନ୍‌ତୁ ସର୍‌ଆନ୍‌ । ଆବେ ମାପୁରୁଦିମାନୁ ପାର୍‌ତନା କିବୁ କିବୁ ନାଡ଼ାୱିଗ୍‌ଜି ତେବାତାନ୍‌ ।
LUK 6:13 ମାର୍‌ନାଣ୍ଡିଙ୍ଗ୍‌ ସାଲ୍‍ଦି ଆତାତ୍‌, ଜିସୁ ନିଜେଦି ସିସୁରିଙ୍ଗ୍‌ ଲାକ୍‌ତୁ କୁକ୍‌ସି ୱାରି ମାଣାନ୍‌ ବାରଲୋକାଙ୍ଗ୍‌ ଆସ୍‌କିତାନ୍‍, ୱାନ୍‌ ୱାରିଙ୍ଗ୍‌ ପ୍ରେରିତ ଦର୍‌ ସିତାନ୍‌;
LUK 6:14 ୱାର୍‌ ଆତାର୍‌, ସିମୋନ, ଆମାୱାନିଙ୍ଗ୍‌ ୱାନ୍‌ ପିତର୍‌ ଇଜି ଦର୍‌ ସିତାନ୍‌, ମାରି ୱାନି ତଡ଼ାନ୍‌ ଆନ୍ଦ୍ରିୟ, ଜାକୁବ ମାରି ଜୋହନ, ପିଲିପ୍‌ ମାରି ବାର୍ତଲମି,
LUK 6:15 ମାତିଉ ମାରି ତୋମା, ଆଲପିତି ମାରିସ୍‌ ଜାକୁବ ମାରି ସିମୋନ, ଆମାୱାନିଙ୍ଗ୍‌ ୱେଡ଼ିକାକିନିକାନ୍‌ ଇଜି ଇନାର୍‌,
LUK 6:16 ଜାକୁବଦି ମାର୍‌ନି ଜିହୁଦା ମାରି ଇସ୍କାରିୟୋତିୟ ଜିହୁଦା, ଏନ୍‌ ଜିସୁଙ୍ଗୁଁ ସାତ୍ରୁରି କିୟୁଦୁ ସପ୍ରେକିତା ସିତାନ୍‌ ।
LUK 6:17 ମାରି, ଜିସୁ ସିସୁରି ୱାଲେ ଗରନ୍‌ତାନ୍‍ ରେସି ୱାତାନ୍‌ । ମାରି ସାର୍‍ଦିତି ବୁମିଦୁ ନିଜେଦି ନାଣ୍ତ ଲୋକୁ ସିସୁରି ୱାଲେ ନିର୍‍ଆନ୍‍ । ମାରି ୱିଜୁ ଜିହୁଦା ଦେସ୍‍, ଜିରୁସାଲାମ୍‍, ମାରି ସାମ୍‌ଦୁର୍‌ତିପାଡ଼ିଦି ସୋର୍‍ ନି ସିଦନ୍‍ ଗାଡ଼୍‍ତି ନାଣ୍ତ ଲୋକୁ ୱାନି ଲାକ୍‌ତୁ ୱାତାର୍‌ ।
LUK 6:18 ୱାର୍‌ ୱାନି ବାକ୍ୟ ୱେନ୍‌ଡ୍ରେଙ୍ଗ୍‌ ମାରି ନିଜେ ନିଜେଦି ରୋଗ୍‌ତାନ୍‌ ନେଗେନ୍‌ ଆଦେଙ୍ଗ୍‌ ୱାତା ମାର୍‌ଆର୍‌, ମାରି ଏର୍‌ ତାଗିଇଦୁବେଙ୍ଗ୍‌ ମାଣ୍‌କୁ କାସ୍ଟୁ ପଇଜି ମାର୍‌ଆର୍‌, ୱାରିଙ୍ଗ୍‌ ୱାନ୍‌ ନେଗେନ୍‌ କିତାନ୍‍;
LUK 6:19 ମାରି ଲୋକୁ ୱିଜେରେ ୱାନିଙ୍ଗ୍‌ ମୁଟ୍‌ତେଙ୍ଗ୍‌ ଇଜି ବଦାକିଜି ମାର୍‌ଆର୍‌, ମାତର୍‌ ୱାନିମାଣାନ୍‌ ସାକ୍ତି ସୋସି ଲୋକାଙ୍ଗ୍‌ ନେଗେଣ୍ତ୍‌ କିଜିମାର୍‌ଆତ୍‌ ।
LUK 6:20 ଆୟାୱାଲେ ଜିସୁ ନିଜେଦି ସିସୁରି ତରିଣ୍ତ୍‌ ସୁଡ଼ୁଜି ଇର୍‌ଆନ୍‌, କାକୁର୍ତିଲୋକୁ ଜେ ମିର୍‌, ମିର୍‌ ଦନ୍ୟ, ଇରିଙ୍ଗ୍‌ ମାପୁରୁଦି ରାଜି ମିଦି ।
LUK 6:21 ଇଲେଇ ବାଙ୍ଗାଁଦୁ ମାନିଦେର୍‌ ଜେ ମିର୍‌, ମିର୍‌ ଦନ୍ୟ, ଇରିଙ୍ଗ୍‌ ମିର୍‌ ପଟା ପାଜ୍‌ନିଦେର୍‌, ଇଲେଇ ଆଡ଼୍‍ବାଜିନିଦେର୍‍ ଜେ ମିର୍‌, ମିର୍‌ ଦନ୍ୟ, ଇରିଙ୍ଗ୍‌ ମିର୍‌ ସିକ୍‍ନିଦେର୍‍ ।
LUK 6:22 ଲୋକୁ ଏସ୍‌କାଙ୍ଗ୍‌ ମନୁସ୍ୟପୁତ୍ର ଉଣ୍ତିଙ୍ଗ୍‌ ମିଙ୍ଗିଁ କାଡ଼୍‍ନାର୍‌ ମାରି ୱେର୍‌ଏ କିନାର୍‌, ମାରି ନିନ୍ଦା କିନାର୍‌, ମାରି ମି ଦର୍‌ତିଙ୍ଗ୍‌ ତାଗିଇକା ଇଜି ମାନାଏର୍‌, ଆରିଙ୍ଗ୍‌ ମିର୍‌ ଦନ୍ୟ ।
LUK 6:23 ଆୟା ନାଣ୍ତିଙ୍ଗ୍‌ ୱେଡ଼ିକା କିଜି ଗାତ୍‌ତୁ, ମାତର୍‌ ସୁଡ଼ୁଦୁ, ମି ଉଣ୍ତିଙ୍ଗ୍‌ ମୁସ୍‌କୁପୁର୍‌ତୁ ମି ପୁରସ୍‌କାର୍‌ ନାଣ୍ତ ମାନାତ୍‌, ମାରି, ଆୟାୱାଜା ତୋ ୱାରି ପୁର୍ବେଦି ଡକ୍ରାଦାଦାର୍‌ରି ବାବବାଦିରି ଉଣ୍ତିଙ୍ଗ୍‌ କିଜିମାର୍‌ଆର୍‌ ।
LUK 6:24 ମାତର୍‌ ଚି, ଦଣ୍ଡ୍‌ ପଇନି ମାଜନ୍‌ ଲୋକୁ ଜେ ମିର୍‌, ଇରିଙ୍ଗ୍‌ ମିର୍‌ ନିଜେ ନିଜେଦି ସୁକ୍‌ ପ‍ଇଜିନିଦେର୍‌ ।
LUK 6:25 ଚି, ଦଣ୍ଡ୍‌ ପଇନି ଲୋକୁ ଇଲେଇ ପଟାପାଜ୍‍ଜିନିଦେର୍‍ ଜେ ମିର୍‌, ଇରିଙ୍ଗ୍‌ ମିର୍‌ ବାଙ୍ଗାଁ ଆନିଦେର୍‌, ଚି, ଦଣ୍ଡ୍‌ ପଇନି ଲୋକୁ ଇଲେଇ ସିକ୍‌ସିନିଦେର୍‌ ଯେ ମିର୍‌, ଇରିଙ୍ଗ୍‌ ମିର୍‌ ଏତ୍‍କିଜିଆଡ୍‌ବାନିଦେର୍‍ ମାରି ଆଡ଼୍‌ବାନିଦେର୍‌ ।
LUK 6:26 ଏସ୍ତିୱାଲେ ଲୋକୁ ୱିଜେରେ ମିଙ୍ଗିଁ ୱେଙ୍ଗିଁସ୍‍ କିନାର୍‌, ନାସ୍ତିୱାଲେ ଚି, ମିର୍‌ ଦଣ୍ଡ୍‌ ପଇନି ଲୋକୁ; ଆୟାୱାଜା ତୋ ୱାରି ପୁର୍ବେଦି ଡକ୍ରାଦାଦାର୍‍ ବଣ୍ତ ବାବବାଦିରିଙ୍ଗ୍ ବା ନେଗିକାର୍‍ ଇଜିମାର୍‌ଆର୍‌ ।
LUK 6:27 ମାତର୍‌ ୱେନ୍‌ଞ୍ଜିନିଦେର୍‌ ଜେ ମିର୍‌, ମିଙ୍ଗିଁ ନାନ୍ ଇଜିନା, ମି ସାତ୍ରୁରିଙ୍ଗ୍ ଜିବନ୍‍ନୋଦୁ; ଏର୍‌ ମିଙ୍ଗିଁ କାଡ଼୍‌ନାର୍‌, ୱାରିଙ୍ଗ୍‌ ଆର୍ସିବାଦ୍‌ କିଦୁ;
LUK 6:28 ଏର୍‌ ମିଙ୍ଗିଁ ଆନାଦୁରିଆ କିନାର୍‌, ୱାରିଙ୍ଗ୍‌ ଆର୍ସିବାଦ୍‌ କିଦୁ; ଏର୍‌ ମିଙ୍ଗିଁ ନିନ୍ଦା କିନାର୍‌, ୱାରି ଉଣ୍ତିଙ୍ଗ୍‌ ପାର୍‌ତନା କିଦୁ ।
LUK 6:29 ଏନ୍‌ ମିଙ୍ଗିଁ ଉଣ୍ତ୍ରି ବୁଗୁଲିଦୁ ଚାପ୍‌ଡ଼ା ଡାକ୍‌ନାନ୍‍, ୱାନି ଉଣ୍ତିଙ୍ଗ୍‌ ଆଇ ବୁଗୁଲି ବା ତର୍‌ସୋ ସିଦୁ; ମାରି, ଏନ୍‌ ମି ସାଦର୍‌ ଅନାନ୍‍, ୱାନିଙ୍ଗ୍‌ ମି ଆଙ୍ଗିଁ ବା ଅତେଙ୍ଗ୍‌ ମାନା କିମାଟ୍‌ ।
LUK 6:30 ଏନ୍‌ଆପିନ୍‌ ମିଙ୍ଗିଁ ଇନି ଜିନିସ୍‌ ଲୋସ୍‍ନାନ୍‍, ୱାନିଙ୍ଗ୍‌ ସିଦୁ; ମାରି, ଏନ୍‌ ମି ଦନ୍‌ ଅନାନ୍‍, ୱାନିମାଣ୍‌ନା ଆକା ମାରିଡ଼େସି ଲସ୍‌ମାଟ୍‌ ।
LUK 6:31 ଲୋକୁ ମି ଉଣ୍ତିଙ୍ଗ୍‌ ଏଣ୍ତେସ୍‌ବା ମାନାପିର୍‌ ଇଜି ବଦା କିନିଦେର୍‌, ମିର୍‌ ୱାରି ଉଣ୍ତିଙ୍ଗ୍‌ ଆୟାୱାଜା କିଦୁ ।
LUK 6:32 ମାରି, ଏର୍‌ ମିଙ୍ଗିଁ ଜିବନ୍‌ନୋନାର୍‌, ମିର୍‌ ଜଦି ୱାରିଙ୍ଗ୍‌ନେ ଜିବନ୍‌ନୋତିଙ୍ଗ୍‌ ମିର୍‌ ଇନିକା ଦୟା ପଇନିଦେର୍‌ ? ଇରିଙ୍ଗ୍‌ ପାପି ଲୋକ୍‌ ବା ନିଜେ ନିଜେଦି ଲାଡ଼୍‌କିନିୱାରିଙ୍ଗ୍‌ ଲାଡ୍‌ କିନାର୍‌ ।
LUK 6:33 ମାରି, ଏର୍‌ ମିଙ୍ଗିଁ ଆର୍ସିବାଦ୍‌ କିନାର୍‌, ଜଦି ମିର୍‌ କେବଲ୍‌ ୱାରିଙ୍ଗ୍‌ନେ ନେଗେନ୍‌ କିନିଦେର୍‌, ଆରିଙ୍ଗ୍‌ ମିର୍‌ ଇନିକା ଦୟା ପଇନିଦେର୍‌ ? ଇରିଙ୍ଗ୍‌ ପାପି ଲୋକ୍‌ ବା ଆୟାୱାଜା କିନାର୍‌ ।
LUK 6:34 ମାରି, ଏମେୱାରିମାଣ୍‌କୁ ମି ପଇନି ଆସା ତେବାତାନ୍‌, ୱାରିଙ୍ଗ୍‌ନେ ରୁଣୁ ସିତିଙ୍ଗ୍‌ ମିର୍‌ ଇନିକା ଦୟା ପଇନିଦେର୍‌ ? ପାପିଲୋକ୍‌ ଆକା ସାମାନ୍‌ତାନ୍‌ନେ ଡ଼େସି ପଇନି ଉଣ୍ତିଙ୍ଗ୍‌ ପାପି ଲୋକାଙ୍ଗ୍‌ ରୁଣୁ ସିନାର୍‍ ।
LUK 6:35 ମାତର୍‌ ମି ସାତ୍ରୁରିଙ୍ଗ୍‌ ଜିବନ୍‌ନଦୁ ମାରି ୱାରିଙ୍ଗ୍‌ ଆର୍ସିବାଦ୍‌ କିଦୁ, ମାରିଡ଼େସି ପ‍ଇଦେଙ୍ଗ୍‌ ଆସ୍‌ଏଣ୍ତା ରୁଣୁ ସିଦୁ; ଆଦେଙ୍ଗ୍‌ ମି ପୁରସ୍କାର୍‍ ନାଣ୍ଡ୍ ଆନାତ୍‌ ମାରି ମିର୍‌ ପେରି ମାପୁରୁଦି ମାରିନ୍‌ ଆନିଦେର୍‌, ଇରିଙ୍ଗ୍‌ ୱାନ୍‌ ସାଲାକି ନି ତାଗିଇୱାରି ଉଣ୍ତିଙ୍ଗ୍‌ ବା ଦୟା କିନାନ୍‌ ।
LUK 6:36 ମି ବୁବା ଏଣ୍ତେସ୍‌ କାର୍ମୁଦିକାନ୍‍, ମିର୍‌ ଆୟାୱାଜା କାର୍ମୁଦିକାର୍‍ ଆଦୁ ।
LUK 6:37 “ମାରି, ବିସାର୍‌ କିମାଟ୍‌, ଆଦେଙ୍ଗ୍‌ ମିର୍‌ ବିଚାର୍‌କିଆୟ୍‌ ଆଇଦେର୍‍; ଏମେ ଲୋକ୍‌ତିଙ୍ଗ୍‌ ବା ଦସ୍‍ କିମାଟ୍‌, ଆତିଙ୍ଗ୍‌ ମିର୍‌ ଦସି କିଆୟ୍‌ଆଇଦେର୍‌ । ଆଇୱାନିଙ୍ଗ୍‍ କେମା କିଦୁ, ଆଦେଙ୍ଗ୍‌ ମିଙ୍ଗିଁ ବା କେମା କିନାନ୍‌;
LUK 6:38 ଆଇୱାନିଙ୍ଗ୍‍ ଦାନ୍‌ ସିଦୁ, ଆଦେଙ୍ଗ୍‌ ମିଙ୍ଗିଁ ଦାନ୍‌ ସିନାର୍‍; ମାପୁରୁ ଅଡିଦୁ ପୁରା କିଜି ତାନିଙ୍ଗ୍‌ ତିଗ୍‌ଜି ଦୁକ୍‌ସି ବର୍ତି କିଜି ମି ଅଟିଦୁ ସିନାର୍‍; ଇରିଙ୍ଗ୍‌ ଏମେ ଅଡିଦାନ୍‌ ଇସାବ୍‌ କିଜ ଇସାବ୍‌ କିଦୁ, ଆୟା ଅଡିଦାନ୍‌ ମିଙ୍ଗିଁ ମାରି ଇସାବ୍‌ କିନାସିନାର୍‍ ।”
LUK 6:39 ଜିସୁ ୱାରିଙ୍ଗ୍‌ ଉଣ୍ତ୍ରି ମାଟା ବା ୱେର୍‌ତାନ୍‌, ଅରେନ୍‍ କାଣା ଇନିକା ମାରି ଅରେନ୍‍ କାଣାଦିଙ୍ଗ୍‌ ସାରି ତର୍‌ତେଙ୍ଗ୍‍ଁ ଆଟ୍‍ନାନ୍‍ ? ଜଦି ୱାନ୍‌ ଆୟାୱାଜା କିନାନ୍‍, ଆରିଙ୍ଗ୍‌, ୱାର୍‌ ଇନିକା ରିଏର୍‌ବା ଗୁଟାଦୁ ଆର୍‌ଏର୍‌ ନୋ ?
LUK 6:40 ଗୁରୁମାଣାନ୍‍ ସିସୁ ପେରିକାନ୍‌ ଆଏନ୍‍; ଇରିଙ୍ଗ୍‌ ୱିଜେରେ ସିସୁ ସିକିୟା ଅଜାତି ୱେନ୍‌କା ନିଜେଦି ଗୁରୁଦି ସାମାନ୍‍ ଆନାନ୍‌ ।
LUK 6:41 ମାରି, ଏନ୍ଧା ମି ତଡ଼ାନ୍‌ତି କାଣ୍‌ଗାଦୁ ମାନି ଇସ୍ରିକାସ୍ରାଦିଙ୍ଗ୍‌ ସୁଡ଼ୁଜିନିଦେର୍‍, ମାତର୍‌ ମି ନିଜେଦି କାଣ୍‌ଗାଦୁ ଏମେ ପେରି କାସ୍‌ରା ମାନାତ୍‌, ଆକା ଅଡ଼୍‍ବିଜି ସୁଡ଼ୁଦେଙ୍ଗ୍‍ ଆଟ୍‍ଏଜିନିଦେର୍‍ ?
LUK 6:42 ନିନୁ ନିଜେଦି କାଣ୍‌ଗାଦୁ ମାନି ଇସ୍ରିକାସ୍ରା ସୁଡ଼ୁଏଣ୍‌ଗା ଏଣ୍ତେସ୍‌ ନିଜେଦି ତଡ଼ାନ୍‌ତିଙ୍ଗ୍‌ ଇଣ୍ତ୍ରେଙ୍ଗ୍‌ ଆଟ୍‌ନି, ତଡ଼ାନ୍‌, ରାଆ, ନି କାଣ୍‌ଗାଦୁ ମାନି ଇସ୍ରିକାସ୍ରା କୁତ୍‌ନା ସିନା ?ଏ ପୁଲାପୁଲି କିନିକିନ୍ଦେର୍‍, ଆଗିଡ଼ି ନିଜେଦି କାଣ୍‌ଗାଦାନ୍‌ ପେରି କାସ୍‌ରା କୁତ୍‌ସ ପୋକ୍‌ଆ, ତାନିୱେନ୍‌କା ନିଜେଦି ତଡ଼ାନ୍‌ତି କାଣ୍‌ଗାଦୁ ମାନି ଇସ୍ରିକାସ୍ରା କୁତ୍‌ନି ଉଣ୍ତିଙ୍ଗ୍‌ ନେଗ୍ରେଣ୍ତା ସୁଡ଼ୁଦେଙ୍ଗ୍‍ ଆଟ୍‌ନି ।
LUK 6:43 ମାତର୍‌ ଇୟାୱାଜା ମାରାନ୍‌ ସିଲେତ୍‍, ଆମାକାକି ତାଗିଇ ମାରାନ୍‌ ନେଗି ପଲ୍‌ ଆସ୍‌ଏତ୍‌, ବା ନେଗି ମାରାନ୍‌ ତାଗିଇ ପଲ୍‌ ଆସ୍‌ଏତ୍‌ ।
LUK 6:44 ଇରିଙ୍ଗ୍‌ ୱିଜୁ ମାରାକା ନିଜେଦି ପଲ୍‌ଦାନ୍‌ ଚିନିସ୍‌ନାର୍‌; ସାମ୍‌ମାରାନ୍‌ତାନ୍‌ ତୋ ଲୋକୁ ତଗା କୟ୍‌ଏର୍‌, ମାରି ସାମ୍‌ ଦୁପାଦାନ୍‌ ଅଙ୍ଗୁର୍‍କୋଡ଼ି କୟ୍‌ଏର୍‌ ।
LUK 6:45 ଅରେନ୍‍ ନେଗି ଲୋକ୍‌ଦି ମୋନ୍‌ ଲୋଇ ନେଗି ବିସୟ୍‌ ଉଣ୍ତାତିମାନିକା, ଆଦେଙ୍ଗ୍‌ ୱାନି ମୋନ୍‌ ଲୋଇରାନ୍‌ ନେଗି ବିସୟ ସୋନାତ୍‌ । ମାତର୍‌ ଅରେନ୍‍ ତାଗିଇ ଲୋକ୍‌ଦି ମୋନ୍‌ ଲୋଇ ତାଗିଇ ବିସୟ୍‌ ଉଣ୍ତାତିମାନିକା, ଆଦେଙ୍ଗ୍‌ ୱାନି ମୋନ୍‌ ଲୋଇରାନ୍‌ ତାଗିଇ ବିସୟ ସୋନାତ୍‌, ଅରେନ୍‍ ଲୋକ୍‌ଦି ମୋନ୍‌ ଲୋଇ ଆମାକା ତେବାତାନ୍‌, ୱାନ୍‌ ଆକା ଇନାନ୍‌ ।
LUK 6:46 “ମାରି, ମିର୍‌ ଏନ୍ଧା ନାଙ୍ଗିଁ ପ୍ରବୁ, ପ୍ରବୁ ଇଜି କୁକ୍‌ସିନିଦେର୍‌, ମାତର୍‌ ନା ମାଟା ମାନାଇଜିନିଦେର୍‌ ?
LUK 6:47 ଏନ୍‌ଆପିନ୍‌ ନା ଲାକ୍‌ତୁ ୱାଜି ନା ମାଟା ୱେନ୍‌ଞ୍ଜି ଆୟାୱିଜୁ ମାନାନାର୍‌, ୱାନ୍‌ ଏୱାଜା ଆନାନ୍‌, ଆକା ନାନ୍ ମିଙ୍ଗିଁ ୱେର୍‌ନା ।
LUK 6:48 ୱାନ୍‌ ଇୟାୱାଜା ଅରେନ୍‍ ଇଲୁ ତିଆର୍‌କିନି ଲୋକୁ ୱାଜା, ୱାନ୍‌ ନାଣ୍ତ ଗୁଟା କିଜି କାର୍‌ନାନ୍‌ନୋ ମୁଲ୍‍କାଲୁ ମୁସ୍‌କୁ ବାସାକିନାନ୍‌; ମାରି, ପିରୁ ୱାଜି, ଏରୁ ଆୟା ଇଲୁଦିଙ୍ଗ୍‌ ଦେଲେପ୍‍ସୋ ଅତେଙ୍ଗ୍‌ ନାଣ୍ତ୍‌ଦାନ୍‌ ଡୁକାତାତ୍‌, ମାତର୍‌ ଆକା ଦୁକ୍‌ତେଙ୍ଗ୍‌ ଆଟ୍‍ଏତାତ୍‌, ଇରିଙ୍ଗ୍‌ ଇଲୁ ଡାଟ୍‌ତାନ୍‌ ତିଆର୍‌ ଆତାମାର୍‌ଆତ୍‌ ।
LUK 6:49 ମାତର୍‌ ଏନ୍‌ ମାଟା ୱେନ୍‌ଞ୍ଜି ମାନାଏନ୍‌, ୱାନ୍‌ ମୁଲ୍‍କାଲୁ ବାସାକିଏଣ୍ତା ସିକ୍‌ଲା ମୁସ୍‌କୁ ଇଲୁ ତିଆର୍‌କିନି ଲୋକୁ ୱାଜା; ଏରୁ ଆୟା ଇଲୁଦିଙ୍ଗ୍‌ ନାଣ୍ତ୍‌ଦାନ୍‌ ଡୁକାତିଙ୍ଗ୍‌, ଆୟାଦାପ୍ରେ ଇଲୁ ୱିର୍‌ଜିତାତ୍‌ ମାରି ତାନି ୱିର୍‍ଜିତିକା ବୟ୍‌ଙ୍କାର୍‌ ଆତାତ୍‌ ।”
LUK 7:1 ଜିସୁ ଲୋକାଙ୍ଗ୍‌ ନିଜେଦି ୱିଜୁ ମାଟା ୱେର୍‌ତି ୱିସ୍‌ତି ୱେନ୍‌କା କପର୍‍ନାହୁମ୍‍ତୁ ସୋର୍‌ଆନ୍‌ ।
LUK 7:2 ଆୟା ୱେଡ଼ାଦୁ ଅରେନ୍‍ ରମିୟ ନେତାଦି ଗତିମୁରୁଲି ନବ୍‌ ଆଜି ସାନି ୱାଜା ଆତାମାର୍ହାନ୍‍, ୱାନ୍‌ ୱାନିଙ୍ଗ୍‌ ନାଣ୍ତ ଜିବନ୍‍ନୋଜି ମାର୍‌ଆନ୍‌ ।
LUK 7:3 ୱାନ୍‌ ଜିସୁଦି ମାଟା ୱେନ୍‍ଞ୍ଜ, ୱାନ୍‌ ୱାଜି ୱାରି ଗତିମୁରୁଲି ଜିବନ୍‌ ରକିୟା କିଦେଙ୍ଗ୍, ଇୟାଉଣ୍ତିଙ୍ଗ୍‌ ୱାରି ଲାକ୍‌ତୁ ଜିହୁଦିର୍‌ ଏସ ପେରି ନେତାରିଙ୍ଗ୍‌ ପକ୍‍ସି ୱାନିଙ୍ଗ୍‌ ୱାଦେଙ୍ଗ୍‌ ଇର୍ହାର୍‌ ।
LUK 7:4 ୱାର୍‌ ଜିସୁ ଲାକ୍‌ତୁ ସଲ୍‌ସି ୱାନିଙ୍ଗ୍‌ ନାଣ୍ତ ମାଡ଼ିସ୍‌ କିଜି ଇଣ୍ତ୍ରେଙ୍ଗ୍‌ ଆସ୍‌ତାର୍‌, ନିନୁ ଜେ ୱାରି ଲାକ୍‌ତୁ ଇୟାକା କିନି, ୱାନ୍‌ ଆବେଟ୍‌ ଜଗ୍‌ ଆନାନ୍‌;
LUK 7:5 ମାତର୍‌ ୱାନ୍‌ ମା ଜାତିଦିଙ୍ଗ୍‍ ନାଣ୍ତ ଜିବନ୍‌ନୋନାନ୍‌ ମାରି ନିଜେ ମା ଉଣ୍ତିଙ୍ଗ୍‌ ପାର୍‌ତନା ଇଲୁ ତିଆର୍‍କିତା ସିତାମାନାନ୍‌ ।
LUK 7:6 ଆବେଟ୍‌ ଜିସୁ ୱାରି ୱାଲେ ସର୍‌ଆନ୍‌ । ୱାନ୍‌ ଇଡ୍ରଣାନ୍ ଅଡ଼ପ୍‍ ଆକ ଇତାନ୍‍ନୋ, ସତସେନାପତି ସଙ୍ଗ୍‌ରିଙ୍ଗ୍‌ ପକ୍‍ସି ୱାରିଙ୍ଗ୍‌ ଇର୍ହାନ୍‌, ପ୍ରବୁ, କାସ୍ଟୁ କିମା, ମାତର୍‌ ନିନ୍‌ ଜେ ନା ଇଣ୍ତ୍ର ପାଦାମ୍‌ ଇଡ୍‌ଦେଙ୍ଗ୍‌ ନାନ୍‌ ଇୟାୱାଜା ଜୋଗ୍‍ ସିଲେ;
LUK 7:7 ମାରି ନାନ୍ ନି ଲାକ୍‌ତୁ ସନ୍‌ଡ଼୍ରେଙ୍ଗ୍‌ ନିଜେଦିଙ୍ଗ୍ ଜୋଗ୍‍ ଅଡ଼୍‍ବିଏତା; ମାତର୍‌ ଉନ୍‌ଡ୍ରି ପଦ୍‍ମାଟାଦି ଆଦେସ୍‌ ଇନ୍‌ଆଁ, ନା ପାଣିକିନିକାନ୍‌ ନେଗେନ୍‍ ଆନାସନାନ୍‍ ।
LUK 7:8 ମାତର୍‌ ନାନ୍ ଅରେନ୍‍ୱାନି ଆଡ୍‍ଗିମାନି ମାର୍‍ରିଙ୍ଗ୍‍ ବା ନା ଅଦିକାର୍‍ତାନ୍‍ ସନ୍ୟ ଦଲ୍‌ ମାନାର୍‌; ମାରି, ଅରେନ୍‍ ୱାନିଙ୍ଗ୍‌ ଜଦି ନାନ୍ ସାଙ୍ଗ୍‍ଆ ଇଜି ଆଦେସ୍‌ ସିତିଙ୍ଗ୍‌, ୱାନ୍‌ ସନାନ୍‌; ଆଇୱାନିଙ୍ଗ୍‍ ରାଆ, ଇଜି ଇରିଙ୍ଗ୍‌, ୱାନ୍‌ ୱାନାନ୍‌; ମାରି, ନା ସାକର୍‌ତିଙ୍ଗ୍‌ ଇକା କିଆ, ଇରିଙ୍ଗାଁ ୱାନ୍‌ ଆକା କିନାନ୍ ।
LUK 7:9 ଜିସୁ ଇୟାୱିଜୁ ମାଟା ୱେନ୍‌ଜି ୱାରି ବିସୟତାନ୍ କାବା ଆତାନ୍‌, ମାରି ମାର୍‍ଜି ୱାନି ୱେନ୍‌କା ୱାଜିମାରି ଲୋକାଙ୍ଗ୍‌ ଇର୍ହାନ୍‌; “ନାନ୍ ମିଙ୍ଗିଁ ସତ୍‍ଇଜିନା, ଇସ୍ରାଏଲ୍‌ତୁ ବା ନିସା ପେରି ବିସ୍‌ବାସ୍‌ ପାଏ ଆଏତ୍ ।”
LUK 7:10 ମାରି, ପୋକ୍‍ତି ମାର୍‍ଇ ଲୋକୁ ଇନ୍‌ଡ୍ର ଡ଼େସି ୱାଜି ଗତିମୁରୁଲିଙ୍ଗ୍‍ ନେଗେନ୍‌ ଆତିକା ସୁଡ଼ୁତାର୍‌ ।
LUK 7:11 ଆବେଟ୍‌କୁ ଜିସୁ ନାଇନ୍‍ ଦର୍‌ତି ଗାଡ଼୍‌ତୁ ସର୍‌ଆନ୍‌, ମାରି ୱାନି ସିସୁର୍‍ ମାରି ନାଣ୍ତ ଲୋକୁ ୱାନିୱାଲେ ସଲ୍‌ସି ମାର୍‌ଆର୍‌ ।
LUK 7:12 ୱାନ୍‌ ଗାଡ଼୍‌ ଲାକ୍‌ତୁ ଇତାନ୍‌, ସୁଡ଼ୁଦୁ, ଲୋକୁ ଅରେନ୍‍ ସାତି ଲୋକ୍‌ତିଙ୍ଗ୍‌ ଡାଣ୍ତିଆଦୁ ପିଣ୍ତଜୋ ତାସିମାର୍‍ଆର୍‍, ୱାନ୍‌ ନିଜେ ଆଇସିଦି ଅରେନ୍‍ନେ ମାରିସି, ମାରି ଆୟା ଆଇମା ରାଣ୍ତି; ମାରି, ଗାଡ଼୍‌ତି ନାଣ୍ତ ଲୋକୁ ତାନି ୱାଲେ ମାର୍‌ଆର୍‌ ।
LUK 7:13 ତାନିଙ୍ଗ୍‌ ସୁଡ଼ୁଜୋ ପ୍ରବୁ ତାନି ମୁସ୍‌କୁ ଦୟାକିଜି ତାନିଙ୍ଗ୍‌ ଇର୍‌ଆନ୍‌, “ଆଡ଼୍‍ବାମା ।”
LUK 7:14 ମାରି, ୱାନ୍‌ ଲାକ୍‌ତୁ ସଲ୍‌ସି ଡାଣ୍ତିଆଦୁ ମୁଟ୍‌ତାନ୍‌, ମାରି ପିଣ୍ତିତି ମାର୍ହିକାର୍‍ ନିର୍‍ଆର୍‍, ୱାନ୍‌ ୱେର୍‌ତାନ୍‌, ଏ ମୁରୁଲି ନାନ୍ ଇଜିନା, ନିଙ୍ଗିଁଆ ।
LUK 7:15 ଆବେଣାନ୍‍ ସାତିଲୋକ୍‌ ନିଙ୍ଗିଁଜି ବାସ୍‌ତାନ୍‌, ମାରି ୱାର୍‍ଗିଦେଙ୍ଗ୍‍ ଆସ୍‌ତାନ୍‌, ମାରି ୱାନ୍‌ ୱାନିଙ୍ଗ୍‌ ୱାନି ଆଇସି କିଦୁ ଆପିସ୍‍କିତାନ୍‍ ।
LUK 7:16 ଆବେନୁ ୱିଜେରେ ତିଲାତାର୍‌, ମାରି ମାପୁରୁଦି ଦନ୍ୟବାଦ୍‌ କିଜି କିଜି ଇନ୍‌ଡ୍ରେଙ୍ଗ୍‌ ଆସ୍‍ତାର, ମା ଲୋଇରାନ୍‌ ଅରେନ୍‍ ପେରି ବାବବାଦି ସତାମାନାନ୍‍ ମାରି ମାପୁରୁ ନିଜେଦି ଲୋକାଙ୍ଗ୍‌ ରକିୟା କିଦେଙ୍ଗ୍‌ ୱାତାମାନାନ୍‍ ।
LUK 7:17 ମାରି, ଜିସୁ ବିସୟତି ଇୟା ମାଟା ୱିଜୁ ଜିହୁଦା ଦେସ୍‌ ମାରି ୱିଜୁ ତରିନ୍‌ ୱେଙ୍ଗିଁତାତ୍‌ ।
LUK 7:18 ୱେନ୍‌କା ଡୁବନ୍‌ସିନି ଜୋହନତି ସିସୁର୍‍ ଇୟା ବିସୟ୍‌ ୱାନିଙ୍ଗ୍‌ ଇର୍ହାର୍‌ ।
LUK 7:19 ଆବେନ୍‌ ଜୋହନ ନିଜେଦି ସିସୁରି ଲୋଇ ରିଏରିଙ୍ଗ୍‍ ଲାକ୍‌ତୁ କୁକ୍‍ସୋ ମାଲିକ୍‌ ଲାକ୍‌ତୁ ଇକା ଇଜି ପୋକ୍‌ତାନ୍‌, ଆମାକାନ୍‍ ୱାଦେଙ୍ଗ୍‌ ଆତା ମାର୍‌ଆର୍‌, ଆୟା ଲୋକୁ ନିନ୍‌ନେ ନୋ, ନା ମାପ୍‌ ଆଇୱାନିଙ୍ଗ୍‍ କାପ୍‍କିନାପ୍‍ ?
LUK 7:20 ଆୟା ଲୋକୁ ଜିସୁ ଲାକ୍‌ତୁ ସଲ୍‌ସି ଇର୍ହାର୍‌, “ଡୁବନ୍‌ସିନି ଜୋହନ ମାଙ୍ଗିଁ ନି ଲାକ୍‌ତୁ ଇୟାକା ଇଜି ପୋକ୍‌ତାମାନାନ୍‌, ଆମାକାନ୍‍ ୱାନିକା ଆତାମାରାତ୍‍, ଆୟା ଲୋକୁ ନୋ ନିନ୍‌, ନା ମାପ୍‌ ଆଇ ଲୋକ୍‌ତିଙ୍ଗ୍‌ କାପ୍‍କିନାପ୍‍ ?”
LUK 7:21 ଆୟା ୱେଡ଼ାଦୁ ୱାନ୍‌ ଏସୋ ରୋଗ୍‌, ବାଦା ମାରି ତାଗ୍‌ଇ ଆତ୍ମା ମାଣ୍‌କୁ ନେଗେଣ୍ତ୍‍ କିତାନ୍‌, ମାରି ଏସୋ କାଣାରିଙ୍ଗ୍‌ କାଣୁକୁ ସୁଡ଼ୁଦେଙ୍ଗ୍‍ ସାକ୍ତି ସିତାନ୍‌ ।
LUK 7:22 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ମିର୍‌ ଡ଼େସି ସଲ୍‌ସି ଆମାକା ୱିଜୁ ୱେନ୍‌ଜିନିଦେର୍‌ ମାରି ସୁଡ଼ୁଜିନିଦେର୍‍, ଆୟାକାୱିଜୁ ଜୋହନତିଙ୍ଗ୍‍ ୱେର୍‌ତୁ; କାଣା ଲୋକୁ ସୁଡ଼ୁଜିନାର୍‍, ମାରି ସଟା ଲୋକୁ ବୁଲାଜିନାର୍‌, କୁସ୍ଟରୋଗ୍‌ ଲୋକୁ ନେଗେଣ୍ତ୍‌ ଆଜିନାର୍‌, ବଇରା ଲୋକ୍‌ ୱେନ୍‍ଜିନାର୍‍, ସାତି ଲୋକୁ ନିଙ୍ଗିଁଜିନାର୍‍, କାକୁର୍ତି ଲୋକାମାନୁ ବା ନେଗି କାବୁର୍‌ ପ୍ରଚାର୍‌ କିଆଇଆଜିନାତ୍‍;
LUK 7:23 ମାରି, ଆମାକାନ୍‍ ନାଙ୍ଗିଁ ନାମ୍‍ଏନ୍‍, ୱାନ୍‌ ଦନ୍ୟ ।”
LUK 7:24 ଜୋହନତି ସିସୁର୍‍ ସର୍‌ଇ ୱେନ୍‌କା ୱାନ୍‌ ଜୋହନତି ବିସୟ୍‌ତାନ୍‌ ଲୋକାଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, ମିର୍‌ ଇନିକା ସୁଡ଼ୁଦେଙ୍ଗ୍‍ ସିମ୍ରା ବାଡିଦୁ ସତିସର୍‌ଇ ମାର୍‌ଇଦେର୍‌ ? ଇନିକା ଗାଲିଦାନ୍‍ ଦୁଙ୍ଗ୍‍ଁଜିମାନି ଉଣ୍ତ୍ରି ଦେର୍‍ ନାଡ଼ା ?
LUK 7:25 ଆୟାକା ଆଏତିଙ୍ଗାଁ ମିର୍‌ ଇନିକା ସୁଡ଼ୁଦେଙ୍ଗ୍‍ ସତିସର୍‍ଇ ମାର୍‍ଇଦେର୍‍ ? ଇନିକା ଦାରାଦି ଆଙ୍ଗିଁ ଆରାତିମାନି ଅରେନ୍‍ ଲୋକ୍‌ତିଙ୍ଗ୍‌ ? ସୁଡ଼ୁଦୁ, ଆମାକାର୍‌ ଦାରାଦି ଆଙ୍ଗିଁ ଆରାନାର୍‍ ମାରି ସୁକ୍‌ତାନ୍‌ ଜିନାର୍‌, ୱାର୍‌ ରାଜାଦି ମେଡ଼୍‍ତୁ ତେବାନାର୍‌ ।
LUK 7:26 ନାଙ୍ଗିଁ ଇନ୍‌ଆଁ, ଆୟାକା ଆଏତିଙ୍ଗାଁ ଇନିକା ସୁଡ଼ୁଦେଙ୍ଗ୍‍ ସହସୋ ସର୍‍ଇମାର୍‍ଇଦେର୍‍ ? ଇନିକା ଅରେନ୍‍ ବାବବାଦିଙ୍ଗ୍‍ନୋ ? ନାନ୍ ମିଙ୍ଗିଁ ସତ୍‌ ଇଜିନା, ବାବବାଦି ମାଣାନ୍‌ ନାଣ୍ତ ପେରିୱାନିଙ୍ଗ୍‌ ।
LUK 7:27 ଜୋହନତି ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, ମାପୁରୁ ଇର୍ହାନ୍‌, ମାପ୍‌ ନିଜେ ଦୁତ୍‍ତିଙ୍ଗ୍‍ ମି ଆଗ୍‌ଡ଼ି ପୋକ୍‍ତାମାନାପ୍‍, ୱାନ୍‌ ମି ଆଗ୍‌ଡ଼ି ମି ସାରି ତିଆର୍‌ କିନାନ୍‌, ଇୟାକାନ୍‌ ଆୟା ଜୋହନ ।
LUK 7:28 ନାନ୍ ମିଙ୍ଗିଁ ସତ୍‌ ଇଜିନା, “ଆଇମାମାନୁ ଜନମ୍‌ଆତି ଲୋଇରାନ୍‌ ଜୋହନ ମାଣାନ୍‌ ଆମାକାନ୍‍ ପେରିକାନ୍‌ ସିଲେନ୍‌; ଆତିଙ୍ଗ୍‌ବା ମାପୁରୁଦି ରାଜିଦୁ ଆମାକାନ୍‍ ଇସ୍ରିକାନ୍‌, ୱାନ୍‌ ଜୋହନତି ମାଣାନ୍‌ ପେରିକାନ୍‌ ।”
LUK 7:29 ଆମାକାର୍‌ ଇୟାୱିଜୁ ମାଟା ୱେନ୍‌ଜି ମାର୍‌ଆର୍‌, ୱାର୍‌, ବିସେସ୍‌କିଜି ସିସ୍‍ଟୁ ଲୋସ୍‌ନିକାର୍‌, ମାପୁରୁଦି ଟିକ୍‌ ଦାବିୱିଜୁ ପୁରାକିଜି ଜୋହନତି ମାଣ୍‌କୁ ଡୁବନ୍‌ ଅତାମାର୍‍ଆର୍‍ ।
LUK 7:30 ମାତର୍‌ ପାରୁସିର୍‌ ନି ଦାର୍ମୁଗୁରୁର୍‌ ୱାରି ଜିବନ୍‌ ଉଣ୍ତିଙ୍ଗ୍‌ ମାପୁରୁଦି ଉଦେସ୍‌ତିଙ୍ଗ୍‌ ମାନାଏଣ୍‍ଗା ଜୋହନ ମାଣ୍‌କୁ ଡୁବନ୍‌ ଅଏତା ମାର୍‌ଆର୍‌ ।
LUK 7:31 ଜିସୁ ମାରି ଇର୍‌ଆନ୍‌, ଆରିଙ୍ଗ୍‌ ନାନ୍ “ଇୟା ଆଜିକାଲ୍‍ତି ଲୋକାଙ୍ଗ୍‌ ଏମେତାନିୱାଲେ ତୁସ୍‍ନା, ମାରି ୱାର୍‌ ଏୱାଜା ?”
LUK 7:32 ଏମେ କଡ଼ର୍‌ ସାତା ସାଉକାଦୁ ବାସ୍‌ସି ନିଜେନିଜେ କୁକ୍‌ସି ଇନାର୍‌, ମାପ୍‌ ମି ଲାକ୍‌ତୁ ପିରଡ଼ି ଉକୁତାପ୍‍, ମିର୍‌ ଗାତ୍‍ଏତିଦେର୍‍, ମାପ୍‌ ଦୁକ୍‍ତି ପାଟା ପାରିତାପ୍‍, ମିର୍‌ ଆଡ଼ାବାଇତିଦେର୍‍, ୱାର୍‌ ୱାରି ୱାଜା ।
LUK 7:33 ଇରିଙ୍ଗ୍‌ ଡୁବନ୍‌ସିନି ଜୋହନ ୱାଜି ରୁଟି ତିନ୍‍ଏତାନ୍‍ ମାରି ଅଙ୍ଗୁର୍‍ରସ୍‍ ଉଣୁଏତାନ୍‍, ମାରି ମିର୍‌ ଇର୍‍ଇଦେର୍‍, ୱାନ୍‌ ଦୁବାକାସ୍ତିକାନ୍‍ ।
LUK 7:34 ମନୁସ୍ୟପୁତ୍ର ୱାଜି ଉଣାନ୍‌ ତିନାନ୍‍, ମାରି ମିର୍‌ ଇଜିନିଦେର୍‌, ସୁଡ଼ୁଦୁ, ୱାନ୍‌ ଅରେନ୍‍ ପେଟୁ ନି ମଦୁଆ, ସିସ୍‍ଟୁ ଲୋସ୍‍ନିୱାରି ମାରି ପାପି ଲୋକା ତଡ଼୍‍ ।
LUK 7:35 ମାତର୍‌ ଏମେକାର୍‌ ମାପୁରୁଦି ବୁଦିଦିଙ୍ଗ୍‌ ମାନାନାର୍‌, ୱାରି ଜିବନ୍‌ତୁ ତାନି ସତ୍‌ ବିସୟ୍‌ ପାର୍‍ମାଣ୍‍ଆତାନ୍‍ ।
LUK 7:36 ମାରି, ପାରୁସିର୍‌ ମାଣାନ୍‌ ଅରେନ୍‍ ଜିସୁଙ୍ଗୁଁ ୱାନିୱାଲେ ଉଣ୍ତେଙ୍ଗ୍‌ କୁକ୍‍ତାନ୍‍ । ଆବେନ୍‌ ୱାନ୍‌ ପାରୁସିର୍‌ ଇନ୍‌ଡ୍ର ଡ଼ୁଗୁଜି ଉଣ୍ତେଙ୍ଗ୍‌ ବାସ୍‌ତାନ୍‌ ।
LUK 7:37 ମାରି ସୁଡ଼ୁଦୁ, ଆୟା ଗାଡ଼୍‌ତୁ ଅରେତ୍‌ ପାପି ଆଇମା ମାର୍‌ଆତ୍‌; ଜିସୁ ଆୟା ପାରୁସିର୍‌ ଇନ୍‌ଡ୍ର ଉଣ୍ତେଙ୍ଗ୍‌ ବାସ୍‍ତା ମାର୍‌ଆନ୍‌, ଇୟାକା ନେସ୍‌ସି ୱାଦ୍‌ ଉଣ୍ତ୍ରି ସାଟିଦୁ ବାସ୍‌ନା ନିୟୁ ତାତାତ୍‍ଦୋ,
LUK 7:38 ୱେନ୍‌କା ତର୍‍ନ୍‍ ୱାନି ପାଦାମ୍‌ ଲାକ୍‌ତୁ ନିଲ୍‍ଜି ଆଡ଼୍‍ବାଜି ଆଡ଼୍‍ବାଜି କାଣେର୍‍ ଏର୍‍ତାନ୍‍ ୱାନି ପାଦାମ୍‌ ନୋର୍‍ଜି ନିଜେ ତାଲାଦି କୁକୁଟିଦାନ୍‍ ତେଲ୍‍ଦେଙ୍ଗ୍‍ ଆସ୍‌ତାତ୍‌, ମାରି ୱାନି ପାଦାମ୍‍ତିଙ୍ଗ୍‍ ନୋଣ୍ତ୍‍ନିୱାଲେ ଆୟା ବାସ୍‌ନା ନିୟୁ ଉସ୍‌ତେଙ୍ଗ୍‌ ଆସ୍‌ତାତ୍‌ ।
LUK 7:39 ଆକା ସୁଡ଼ୁଜି, ଆମା ପାରୁସି ଜିସୁଙ୍ଗୁଁ କୁକ୍‌ତା ମାର୍‌ଆନ୍‌, ୱାନ୍‌ ମୋନ୍‌ତୁ ମୋନ୍‌ତୁ ଇର୍‌ଆନ୍‌, “ଇକାନ୍‌ ଜଦି ବାବବାଦି ଆନିମାନିକାଇରିଙ୍ଗ୍‌, ଆରିଙ୍ଗ୍‌ ୱେନିଙ୍ଗ୍‌ ଜେ ମୁଟ୍‌ସିନାତ୍‌, ୱାଦ୍‌ ଏଦ୍‌ ମାରି ଏଣ୍ତେସ୍‍ମାରି ଆଇମା, ୱାଦ୍‌ ଜେ ପାପି ଲୋକ୍‍ ଇକା ନେସ୍‌ତାନ୍‌ ମାନ୍ଦି ।”
LUK 7:40 ଜିସୁ ୱାନିଙ୍ଗ୍‌ ଇର୍‌ଆନ୍‌, ସିମୋନ୍‍, ନିଙ୍ଗିଁ ଉଣ୍ତ୍ରି ମାଟା ଇନ୍‌ଡ୍ରେଙ୍ଗ୍‌ ମାନାତ୍‌ । ୱାନ୍‌ ଇର୍‌ଆନ୍‌, “ଗୁରୁ ଇନ୍‌ଆଁ ।”
LUK 7:41 ଅରେନ୍‍ ପେରି ମାଜନ୍‌ ଲୋକୁ ଲାକ୍‌ତୁରାନ୍‌ ରିଏର୍‌ ଲୋକୁ ରୁଣୁ ଅତାମାର୍‍ଆର୍‍; ଅରେନ୍‍ ପାସ୍‍ସୋ ଡାବୁଙ୍ଗ୍‌ ମାରି ଅରେନ୍‍ ପସାସ୍‌ ଡିନାରି ରୁଣୁ ତାତାମାର୍‍ଆର୍‍ ।
LUK 7:42 ଡ଼େସି ରୁଣୁ ସିଦେଙ୍ଗ୍‍ ୱାରିଙ୍ଗ୍‌ ଇନିକା ସିଲେତିଙ୍ଗ୍‍ ୱାନ୍‌ ରିଏରି ରୁଣୁ ଡ଼ିସ୍‍ତାସିତାନ୍‍ । ଏନ୍‌ ୱାରି ବାଣାନ୍‍ ଏନ୍‌ ୱାନିଙ୍ଗ୍‌ ନାଣ୍ତ ଜିବନ୍‍ନୋନାନ୍‍ ?
LUK 7:43 ସିମୋନ୍‍ ଇର୍‌ଆନ୍‌, “ନାନ୍ ଅଡ଼୍‌ବିଜିନା,” ୱାନ୍‌ ଆମାୱାନିନ୍ଦି ନାଣ୍ତ ରୁଣୁ ଡ଼ିସ୍‍ତାନ୍‍, ୱାନ୍‌ ୱାନିଙ୍ଗ୍‌ ଇର୍‌ଆନ୍‌, “ନିନ୍‌ ଟିକ୍‍ ୱେର୍‌ତି ।”
LUK 7:44 ମାରି, ୱାନ୍‌ ଆୟା ଆଇମାଦି ଉଣ୍ତିଙ୍ଗ୍‌ ମୋକମ୍‌ ଡ଼େପ୍‍ସି ସିମୋନ୍‍ତିଙ୍ଗ୍‌ ଇର୍ହାନ୍‌, “ଇୟା ଆଇମାଦିଙ୍ଗ୍‍ ସୁଡ଼ୁଜିନି ? ନାନ୍ ମି ଇନ୍‌ଡ୍ର ୱାତା ନିନୁ ନା ପାଦାମ୍‍ତି ଉଣ୍ତିଙ୍ଗ୍‌ ଏର୍‌ ସିଏତି, ମାତର୍‌ ଇୟାକାତ୍‍ କାଣେର୍‍ ଏର୍‍ତାନ୍‍ ନା ପାଦାମ୍‍ତିଙ୍ଗ୍‍ ନୋର୍‍ଜି ନିଜେ କୁକୁଟିଦାନ୍‍ ତେଲିତାତ୍‍ ।
LUK 7:45 ନିନ୍‌ ନାଙ୍ଗିଁ ନଣ୍ତ୍‍ଜି କୁକ୍‍ସୋ ଅଇତି, ମାତର୍‌ ନାନ୍ ଲୋଇ ୱାତିୱାଲେରାନ୍‍ ଇୟାକାତ୍‍ ନା ପାଦାମ୍‌ ନଣ୍ତ୍‍ଦେଙ୍ଗ୍‍ ଡ଼ିସ୍‍ଏତ୍‍ ।
LUK 7:46 ନିନ୍‌ ନା ତାଲାଦୁ ନିୟୁ ଉସ୍‍ଏତି, ମାତର୍‌ ଇୟାକାତ୍‍ ନା ପାଦାମ୍‍ତୁ ବାସ୍‌ନା ନିୟୁ ଉସ୍‍ତାତ୍‍ ।
LUK 7:47 ଇୟାଉଣ୍ତିଙ୍ଗ୍‌ ନାନ୍ ନିଙ୍ଗିଁ ଇଜିନା, ତେନି ୱିଜୁ ପାପ୍‌ କେମା ଆତାମାନାତ୍‌, ଇରିଙ୍ଗ୍‌ ୱାଦ୍‌ ନାଣ୍ତ ଜିବନ୍‌ ନତାତ୍‍; ମାତର୍‌ ଏଙ୍ଗ୍‌ ଅଲପ୍‍ କେମା ସିଆଇ ଆନାତ୍‌, ୱାନ୍‌ ଅଲପ୍‍ ଜିବନ୍‍ନୋନାନ୍‍ ।”
LUK 7:48 ମାରି, ଜିସୁ ଆୟା ଆଇମାଦିଙ୍ଗ୍‍ ଇର୍‌ଆନ୍‌, “ନି ପାପ୍‌ ୱିଜୁ କେମା ଆତାମାନାତ୍‌ ।”
LUK 7:49 ଆବେନୁ ୱାନିୱାଲେ ଉଣ୍ତେଙ୍ଗ୍‌ ବାସ୍‍ତି ମାର୍‍ଇ ଲୋକୁ ମୋନ୍‌ତୁ ମୋନ୍‌ତୁ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ପାପ୍‌ ବା କେମା କିଜିନାନ୍‍ ଜେ ଇକାନ୍‍ ଏନ୍‌ ?
LUK 7:50 ମାତର୍‌ ଜିସୁ ଆୟା ଆଇମାଦିଙ୍ଗ୍‍ ଇର୍‌ଆନ୍‌, “ନି ବିସ୍‌ବାସ୍‌ ନିଙ୍ଗିଁ ରକିୟା କିତାମାନାତ୍‌, ସାନ୍ତିଦାନ୍‌ ସାଙ୍ଗ୍‍ଆ ।”
LUK 8:1 ଇୟା ୱେନ୍‌କା ଜିସୁ ଗାଡ଼୍‌ ଗାଡ଼୍‍କାଙ୍ଗ୍‌ ମାରି ନାର୍‌ ନାର୍‌କାଙ୍ଗ୍‌ ୱେର୍‌ସି ମାପୁରୁଦି ରାଜିଦି ନେଗିକାବୁର୍‌ ପ୍ରଚାର୍‌ କିଜି ବୁଲାଦେଙ୍ଗ୍‌ ଆସ୍‌ତାନ୍‌, ମାରି ବାରଲୋକ୍ ସିସୁର୍‍ ୱାନି ୱାଲେ ମାର୍ହାର୍‌,
LUK 8:2 ମାରି ଏମେ ଆଇମେକ୍‍ ମାଣାନ୍‌ ତାଗ୍‌ଇ ଆତ୍ମା ମାରି ରୋଗ୍‌ଦାନ ନେଗେଣ୍ତ୍‌ ଆତେ ମାର୍‌ଏ, ୱାକ୍‍ ବା ୱାନିୱାଲେ ମାର୍‍ଏ, ମରିୟମ୍‌ ଆମାତାନିଙ୍ଗ୍‌ ମଗ୍‌ଦଲିନି ଇଜିମାର୍‌ଆର୍‌, ଏମେତାନି ମାଣୁକୁ ସାତଗୋଟା ଦୁବେଙ୍ଗ୍ ସପ୍‌ତା ମାର୍ହାର୍‌ ।
LUK 8:3 ହେରୋଦଦି ଗୁମୁସ୍ତା କୁଜାଦି ଆଡ଼ି ଜୋହାନା, ସୋସନା, ମାରି ନାଣ୍ତ ଆଇମେକ୍‍ ୱାନିୱାଲେ ମାନ୍‌ଜି ନିଜେ ନିଜେଦି ସମ୍ପତ୍ତି ସିଇଜି ଜିସୁ ନି ୱାନି ସିସୁରି ସେବା କିଜିମାର୍‌ଏ ।
LUK 8:4 ନାଣ୍ତ ଲୋକ୍‌ ଉଣ୍ତ୍ରେ ମାନୁ ଆଜିମାରି ଗାଡ଼୍‌ ଗାଡ଼୍‍କାଣ୍‌କୁ ଲୋକ୍‌ ୱାନି ଲାକ୍‌ତୁ ୱାତାର୍‌, ଜିସୁ ଇୟା କାତା ଇର୍ହାନ୍‌,
LUK 8:5 ଅରେନ୍‍ ୱିତୁ ୱିତିନିକାନ୍ ନିଜେଦି ୱିତୁ ୱିତ୍‌ତେଙ୍ଗ୍‌ ସତାନ୍‌ । ୱାନ୍‌ ୱିତ୍‍ବୁ ୱିତ୍‍ବୁ ଏସଡ଼ ସାର୍‌ଦୁ ଆର୍‍ତେ ମାରି ପାଦାମ୍‌ ଆଡ୍‍ଗି ମାଟ୍‌ତାର୍‌, ମାରି ବାଦଡ଼୍‍ତି ପଟିଙ୍ଗ୍‌ ଆୟାୱିଜୁ ତିର୍‌ଏ ।
LUK 8:6 ମାରି ଏସ ୱିତୁ ଉଣା ସିକ୍‌ଲାମାନି ପିଡ଼ିପି ବୁମିଦୁ ଆର୍‌ତାତ୍‌, ମାରି ଗାଜାଆଜି ସିକ୍‌ଲା ଅଲ୍‌ ସିଲେତାତ୍‌ଆକା ୱାର୍‍ତାସରାତ୍ ।
LUK 8:7 ମାରି ଏସ ୱିତୁ ସାମ୍‍କା ଦୁପା ଲୋଇ ବା ଆର୍‌ତାତ୍‌, ମାରି ସାମ୍‌ମାରାକ୍‌ ତାନି ୱାଲେ ପିରିଜି ଆୟାୱିଜୁଦିଙ୍ଗ୍ ତିଗିତାତ୍ ।
LUK 8:8 ଆୟା ଏସ ୱିତୁ ନେଗି ବୁମିଦୁ ଆର୍‌ତାତ୍‌, ମାରି ପିର୍‌ଜି ସୟେ ଗୁଣୁ ପଲ୍‌ ଆସ୍‌ତାତ୍‌ । ୱାନ୍‌ ଇକା ଇନ୍‍ବୁ ଇନ୍‍ବୁ ନାଣ୍ତ ଆଉଲି ଆଜି ଇର୍‌ଆନ୍‌, “ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ, ୱାନ୍‌ ୱେନିନ୍‌ ।”
LUK 8:9 ଜିସୁଦି ସିସୁର୍‍ ଇୟା କାତାଦି ଅର୍ତ ଇନିକା ଇଜି ୱେନ୍‌ବାଦେଙ୍ଗ୍ ଆସ୍‌ତାର୍‌ ।
LUK 8:10 ଆବେଟ୍‌ ୱାନ୍‌ ଇର୍ହାନ୍‌, ମାପୁରୁଦି ରାଜିଦି ୱିଜୁ ବିସୟ୍‌ ନେସ୍‌ତେଙ୍ଗ୍‌ ମିଙ୍ଗିଁ ବୁଦି ସିଆତାମାନାତ୍, ମାତର୍‌ ଆଇୱାରିଙ୍ଗ୍‌ କାତାଦାନ୍ ଇଣ୍ତ୍ରେଙ୍ଗ୍‌ ଆନାତ୍‌, ଏଣ୍ତେସ୍‌ ୱାର୍‌ ସୁଡ଼ୁବୁ ସୁଡ଼ୁବୁ ସୁଡ଼ୁଦେଙ୍ଗ୍‍ ଆଟ୍‍ଏର୍‍ ମାରି ୱେନ୍‌ବୁ ୱେନ୍‌ବୁ ବୁଜାଏର୍ ।
LUK 8:11 କାତାଦି ଅର୍ତ ଇକା । ୱିତୁ ମାପୁରୁଦି ବାକ୍ୟ,
LUK 8:12 ମାରି ସାରି ଲାକ୍‌ତୁରି ୱିତୁ ଇୟାୱାଜା ଲୋକାଙ୍ଗ୍‌ ବୁଜାକିନାତ୍‌, ଏମେକାର୍‌ ବାକ୍ୟ ୱେନାର୍‌, ଆୟାୱେନ୍‌କା ସୟତାନ୍ ୱାଜି, ଏଣ୍ତେସ୍‌ ୱାର୍‌ ବିସ୍‌ବାସ୍‌ କିଜ ରକିୟା ପୟ୍‌ଏର୍‌, ଆୟାଉଣ୍ତିଙ୍ଗ୍‌ ୱାରି ଜିବନ୍‌ତାନ୍ ବାକ୍ୟ ଡଙ୍ଗାଁ କିନା ଅନାତ୍‍ ।
LUK 8:13 ମାରି, ଏମେକାର୍‌ ବାକ୍ୟ ୱେନ୍‌ଜି ୱେଡ଼ିକାଦାନ୍‌ ମାନାନାର୍‌, ୱାର୍‌ ପିଡ଼ିପି ବୁମିଦୁ ଆର୍‍ତିମାନି ୱିତୁଦି ସାମାନ୍‍ । ଆୟା ସିକିୟା ୱାରିମାନୁ ନାଣ୍ତନେସ୍‌ନି ନେସ୍‌ଇ ମାନିଙ୍ଗ୍‌, ମାତର୍‌ ୱାର୍‌ ଲେୱା ସାଗ୍‍ଏତାତ୍‍ଆକା ୱାର୍‌ ଅଡ଼ପ୍‍ ସମୟ ବିସ୍‌ବାସ୍‌ କିନାର୍ ମାରି ପରିକା ୱେଡ଼ାଦୁ ଆର୍‍ନା ସନାର୍‌ ।
LUK 8:14 ମାରି, ସାମ୍‌ ମାରାକ୍‍ ଲୋଇ ଆର୍‌ତି ୱିତୁ ଇୟାୱାଜା ଲୋକାଙ୍ଗ୍‌ ବୁଜାକିନାତ୍‌, ଏମେକାର୍‌ ବାକ୍ୟ ୱେନାର୍‌, ମାତର୍‌ ଦୁନିଆଦି ସିନ୍ତା ମାରି ଦନ ନି ସୁକ୍‌ ପୟଜି ଜିବୁ ଜିବୁ ତିଗାନା ସନାର୍‌ । ନେଗି ପଲ୍‌ ପାଣ୍ତିସ୍‌ କିଏର୍‌ ।
LUK 8:15 ମାରି, ନେଗି ବୁମିଦୁ ଆର୍‌ତି ୱିତୁ ଇୟାୱାଜା ଲୋକାଙ୍ଗ୍‌ ବୁଜାକିନାତ୍‌, ଆମାକାର୍‌ ନେଗେଣାନ୍‍ ମାରି ନେଗି ଜିବନ୍‌ତୁ ବାକ୍ୟ ୱେନ୍‌ଜି ଆୟାକା ଆସ୍‌ସି ଇଡ୍‍ନାର୍‍ ମାରି ଡାଟାମ୍‍ତାନ୍‍ ପଲ୍‌ ଆସ୍‌ନାତ୍ ।
LUK 8:16 ଆମାକାର୍‌ ଦିୱା କାସିସ୍‍ କିଜ ସାଟିଦାନ୍‍ ପିଡ଼ିକ୍‍ସ ଇଡେଏନ୍, ମାରି କାଟେଲ୍‍ ଆଡ୍‌ଗି ଇଡେଏନ୍, ମାରି ଦିୱା ଇଡ୍‌ନି ବାଡ଼ି ମୁସ୍‌କୁ ଇଡିନାନ୍, ଏଣ୍ତେସ୍‌ ଡ଼ୁଗିନି ଲୋକୁ ସୁଡ଼ୁଦେଙ୍ଗ୍‌ ଆଟ୍‍ନାର୍‍ ।
LUK 8:17 ମାତର୍‌ ଆମାକା ନେସିଇକା, ଇୟାୱାଜା ନେସିଇ ବିସୟ ଇନିକା ସିଲେତ୍‌, ମାରି ଆମାକା ୱେଙ୍ଗାଁଜି ତରାଇଆଏତ୍‍, ଇୟାୱାଜା ନେସେଇ ବିସୟ୍‌ ଇନିକା ସିଲେତ୍‌ ।
LUK 8:18 “ମାରି, ଏଣ୍ତେସ୍‌ ୱେନ୍‌ଜିନିଦେର୍‌, ଆୟା ବିସୟତାନ୍ ଜାଗାର୍‌ତା; ଇରିଙ୍ଗ୍‌ ଆମାୱାନିଦି ମାନାତ୍‌, ୱାନିଙ୍ଗ୍‌ ସିଆଇ ଆନାତ୍‌, ମାରି ଆମାୱାନିଙ୍ଗ୍‌ ସିଲେତ୍‌, ୱାନ୍‌ ଆମାକା ନିଜେଦି ମାନାତ୍‌ ଇଜି ମନେକିନାର, ଆୟାକା ବା ୱାନିବାଣାନ୍ ଅଆନାତ୍ ।”
LUK 8:19 ଜିସୁଦି ୟାୟା ନି ତଡ଼ାନ୍‌କୁ ୱାନିଲାକ୍‍ତୁ ୱାତାର୍, ମାତର୍‌ ଲୋକାଗୋଲିଦି ଉଣ୍ତିଙ୍ଗ୍‌ ୱାନି ୱାଲେ ବେଟ୍‌ ଆଦେଙ୍ଗ୍‌ ଆଟ୍‍ଏଜି ମାର୍ହାର୍‌ ।
LUK 8:20 ଆବେଟ୍‌ ୱାନିଙ୍ଗ୍‌ ଏନ୍‌ ଅରେନ୍‍ ଇୟା କାବୁର୍‌ ସିତାନ୍‌, ମି ୟାୟା ନି ତଡ଼ାନ୍‌କୁ ନି ୱାଲେ ବେଟ୍‌ ଆଦେଙ୍ଗ୍‌ ବଦା କିଜି ଆତ୍‌ରେ ନିଲ୍‍ତାମାନାର୍ ।
LUK 8:21 ମାତର୍‌ ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ଆମାକାର୍‌ ମାପୁରୁଦି ବାକ୍ୟ ୱେନାର ମାରି ମାନାନାର୍‌, ୱାର୍‌ ନା ୟାୟା ନି ତଡ଼ାନ୍‌କୁ ।”
LUK 8:22 ଆୟା ୱେଡ଼ାଦୁ ଅର୍‍ନେଣ୍ତେ ଜିସୁ ମାରି ୱାନି ସିସୁର୍‍ ଉଣ୍ତ୍ରି ଡଙ୍ଗାଁଦୁ ଏକ୍‌ତାର୍‌, ମାରି ୱାନ୍‌ ୱାରିଙ୍ଗ୍‌ ଇର୍ହାନ୍‌, “ରାଦୁ, ସାମ୍‍ଦୁରୁତି ଆୟା ପାଡ଼ି ସନାଟ୍‌ ।” ଆବେଟ୍‌ ୱାର୍‌ ଏର୍‍ଜାଜ୍‌ କୁତାରଡ଼ିସିତାର୍ ।
LUK 8:23 ମାତର୍‌ ୱାର୍‌ ଏର୍‌ଜାଜ୍‌ତୁ ସନି ୱେଡ଼ାଦୁ ୱାନ୍‌ ଡରିତାମାର୍ହାନ୍‌ । ଆୟା ୱେଡ଼ାଦୁ ସାମ୍‍ଦୁରୁତୁ ଗାଲି ଆତାତ୍‌, ମାରି ୱାରି ଡଙ୍ଗାଁଦୁ ଏରୁ ପୁରୁନ୍‌ ଆଦେଙ୍ଗ୍‌ ଆରାମ୍‍ଆତେ ମାରି ୱାର୍‌ ବାଦାଦୁ ପଡ଼େଆତାର୍ ।
LUK 8:24 ଆବେନୁ ସିସୁର୍‍ ଲାକ୍‌ତୁ ୱାଜି ଜିସୁଙ୍ଗୁଁ ନିକ୍‌ସି ଇର୍ହାର୍‌, “ଏ ଗୁରୁ, ଏ ଗୁରୁ ମାପ୍‌ ସାତାପ୍‌ ।” ଇବେନୁ ୱାନ୍‌ ନିଙ୍ଗିଁଜି ଗାଲି ମାରି ନାଣ୍ତ ସାମ୍‌ଦୁରୁତି ଏରୁଦିଙ୍ଗ୍‌ ଆଦ୍‌ରିସ୍‌ତାନ୍‍, ମାରି ଆୟାୱିଜୁ ତିର୍‌ ଆଜି ସାନ୍ତି ଆତାତ୍‌ ।
LUK 8:25 ମାରି, ଜିସୁ ସିସୁରିଙ୍ଗ୍‌ ଇର୍‌ଆନ୍‌, “ମି ବିସ୍‌ବାସ୍‌ ଏମେଦି ?” ମାତର୍‌ ୱାର୍‌ ତିଲାଜି ମାରି ଚମ୍‍କେ ଆଜି ନିଜେ ନିଜେଦି ମାନୁ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ଇକାନ୍‌ ଆତିଙ୍ଗ୍‌ ଏନ୍‌ ଜେ ? ଗାଲି ନି ଏରୁଦିଙ୍ଗ୍‌ ବା ଆଦେସ୍‌ ସିଜିନାନ୍‌, ଗାଲି ନି ଏରୁଡର୍‍ ୱାନି ମାଟା ମାନ୍‌ଜିନେ ।”
LUK 8:26 ୱେନ୍‌କା ଜିସୁ ନି ୱାନି ସିସୁର୍‍ ଗାଲିଲିଦି ଆଗିଡ଼ିରି ଆୟାପାଡ଼ିଦି ଗରାସିୟରି ରାଜିଦୁ ଇତାର୍‌ ।
LUK 8:27 ୱାନ୍‌ ଏରୁଜାହାଜ୍‍ତାନ୍‍ ସହସି ପାଡ଼ିଦୁ ରେତାନ୍‍, ଆୟା ଗାଡ଼୍‌ତି ଅରେନ୍‍ ଦୁବାଆସ୍‍ତି ଲୋକୁ ୱାନିଙ୍ଗ୍‌ ବେଟ୍‍ଆତାନ୍‍; ୱାନ୍‌ ନାଣ୍ତ ଦିନ୍‌ ସାନ୍ଦି ଆଙ୍ଗିଁ ଆରାଏଣ୍ତା ମାରି ଇନ୍‌ଡ୍ର ମାନ୍‍ଏଣ୍ତା ଦୁକିଦୁ ମାନ୍‌ଜି ମାର୍‌ଆନ୍‌ ।
LUK 8:28 ୱାନ୍‌ ଜିସୁଙ୍ଗୁଁ ସୁଡ଼ୁଜି ଆଉଲି ଆଜି ୱାନି ପାଦାମ୍‌ ଆଡ୍‍ଗି ଆର୍‍ଜି ପେରି ୱେୟୁଦାନ୍‌ ଇର୍ହାନ୍‌, “ଏ ପେରି ମାପୁରୁଦି ମାରିନ୍‌ ଜିସୁ, ନି ୱାଲେ ନାଙ୍ଗିଁ ଇନିକା ମାନାତ୍‌ ? ନାନ୍ ନିଙ୍ଗିଁ ମାଡ଼ିସ୍‌କିଜିନା, ନାଙ୍ଗିଁ କାସ୍ଟୁ ସିମା ।”
LUK 8:29 ଇରିଙ୍ଗ୍‌ ୱାନ୍‌ ତାଗ୍‌ଇ ଆତ୍ମାଦିଙ୍ଗ୍‌ ଆୟା ଲୋକାମାଣ୍‌କୁ ସହସ ସନି ଉଣ୍ତିଙ୍ଗ୍‌ ଆଦେସ୍‌ ସିତା ମାର୍ହାନ୍‌ । ଆୟା ଦୁବା ନାଣ୍ତ ଦେବେଙ୍ଗ୍‌ ୱାନିଙ୍ଗ୍‌ ଆସ୍‌ତାମାର୍ହାତ୍‌, ମାରି ଲୋକୁ ୱାନିଙ୍ଗ୍‌ ସିକ୍‍ଣିଦାନ୍‍ ତର୍‌ସି ଇଡ୍‍ଜିମାର୍ହାର୍‍, ମାତର୍‌ ୱାନ୍‌ ତର୍‍ତିକାୱିଜୁ ତେଉଜି ପୋକ୍‌ସି ମାର୍‌ଆତ୍‌ ଦୁବା ୱାନିଙ୍ଗ୍‌ ସୁନ୍‍ସାନ୍‍ବାଡିଦୁ ଅସିମାର୍ହାତ୍‍ ।
LUK 8:30 ଜିସୁ ୱାନିଙ୍ଗ୍‌ ୱେନ୍‌ବାତାନ୍‌, “ନି ଦର୍‌ ଇନିକା ?” ୱାନ୍‌ ଇର୍ହାନ୍‌, “ନା ଦର୍‌ ବାହିନି; ଇରିଙ୍ଗ୍‌ ନାଣ୍ତ ଦୁବେଙ୍ଗ୍‍ ୱାନିଙ୍ଗ୍‌ କାସ୍‍ତେ ମାର୍‍ଏ ।”
LUK 8:31 ମାରି, ୱାନ୍‌ ଏଣ୍ତେସ୍‌ ୱାରିଙ୍ଗ୍‌ ପାତାଲ୍‍ତୁ ସନି ଉଣ୍ତିଙ୍ଗ୍‌ ଆଦେସ୍‌ ସିମାକିନ୍‍, ଆୟାଉଣ୍ତିଙ୍ଗ୍‌ ୱାର୍‌ ୱାନିଙ୍ଗ୍‌ ମାଡ଼ିସ୍‌ କିତାର୍‍ ।
LUK 8:32 ଆବେନୁ ଗର୍‍ନ୍‍ ଲାକ୍‌ତୁ ଉଣ୍ତ୍ରି ପେରି ପାନ୍‍ଣ୍ତ୍ରିଙ୍ଗ୍‍ ମାନ୍ଦା ସାରାଜିମାର୍‌ଏ, ମାରି ୱାନ୍‌ ଏଣ୍ତେସ୍‌ ତାଗ୍‌ଇ ଆତ୍‌ମେଙ୍ଗ୍‌ ଆୟା ପାଣ୍ତ୍ରିଙ୍ଗାଁ ଲୋଇ ଡ଼ୁଗ୍‌ଦେଙ୍ଗ୍‍ ଉଣ୍ତିଙ୍ଗ୍‌ ସାରି ସିତାନ୍‌, ଆୟାଉଣ୍ତିଙ୍ଗ୍‌ ୱାର୍‌ ଜିସୁଙ୍ଗୁଁ ମାଡ଼ିସ୍‌ କିତାର୍‍ ।
LUK 8:33 ୱାନ୍‌ ୱାନିକାଙ୍ଗ୍‌ ସାରି ସିତାନ୍‍ଆକା, ଦୁବେଙ୍ଗ୍‍ ଆୟା ଲୋକ୍‍ତିବାଣାନ୍‍ ସହସି ପାନ୍‍ଡ୍ରିଙ୍ଗାଁ ଲୋଇ ଡ଼ୁଗିତେ; ଆବେନୁ ଆୟା ପାନ୍‍ଡ୍ରିଙ୍ଗ୍‍ ୱିଜୁ ଗରନ୍‌ ଟିପୁଦାନ୍‍ ଉରୁକ୍‍ସି ସଲ୍‌ସି ସାମ୍‌ଦୁର୍‌ତୁ ଆର୍‌ଜି ମୁଡ଼ୁଗିତେ ସାତେ ।
LUK 8:34 ମିଜି ମାର୍‍ଇ ଲୋକୁ ଆୟା ଗଟ୍‍ନା ସୁଡ଼ୁଜି ଉରୁକ୍‍ସି ସଲ୍‌ସି ଗାଡ଼୍‌କାଙ୍ଗ୍‌ ନି ନାର୍‍କାଙ୍ଗ୍‍ଁ ଆକା ୱେର୍‌ତାର୍‌ ।
LUK 8:35 ଆବେନୁ ଲୋକୁ ଗଟ୍‍ନା ସୁଡ଼ୁଦେଙ୍ଗ୍‍ ସହସି ୱାତାର୍‌; ମାରି, ୱାର୍‌ ଜିସୁ ଲାକ୍‌ତୁ ୱାଜି, ଏମେ ଲୋକାମାଣାନ୍‌ ଦୁବେଙ୍ଗ୍‍ ସତେମାର୍‌ଏ, ୱାନିଙ୍ଗ୍‌ ନେଗି ୱାତି ପିଡ଼ିଗ୍‍ଜୋ ନେଗି ମୋନ୍‍ତାନ୍‍ ଜିସୁଦି ପାଦାମ୍‌ ଆଡ୍‍ଗି ବାସ୍‍ତିମାର୍‍ଇକା ସୁଡ଼ୁଜି ତିଲାତାର୍‌ ।
LUK 8:36 ମାରି, ଆମାକାର୍‌ ଇୟା ଗଟ୍‍ନା ସୁଡ଼ୁତାମାର୍‍ଆର୍‍, ୱାର୍‌ ଆୟା ଦୁବା କାସ୍‍ତି ଲୋକୁ ଏଣ୍ତେସ୍‌ ନେଗେନ୍‍ ଆତାନ୍‌, ଆକା ୱାରିଙ୍ଗ୍‌ ୱେର୍‌ତାନ୍‌ ।
LUK 8:37 ଆବେନ୍‌ ଗରାସିୟରି ରାଜିଦି ୱିଜୁ ତରିଟି ଲୋକା ମାଣାନ୍‌ ଡ଼ିସ୍‌ସି ସନ୍‌ଡ଼୍ରେଙ୍ଗ୍‌ ଜିସୁଙ୍ଗୁଁ ମାଡ଼ିସ୍‍କିତାର୍‍, ଇରିଙ୍ଗ୍‌ ୱାର୍‌ ନାଣ୍ତ ତିଲାତାମାର୍‍ଆର୍‍; ମାରି, ୱାନ୍‌ ଉଣ୍ତ୍ରି ଏରୁଜାହାଜ୍‍ତୁ ଏକ୍‌ସି ଡ଼େସିୱାତାର୍‍ ।
LUK 8:38 ମାତର୍‌ ଏମେ ଲୋକାମାଣାନ୍‌ ଦୁବେଙ୍ଗ୍‍ ସତେସର୍‍ଏ ମାର୍‍ହେ, ୱାନ୍‌ ଜିସୁୱାଲେ ମାନ୍‌ଡ଼୍ରେଙ୍ଗ୍‌ ମାଡ଼ିସ୍‌ କିଦେଙ୍ଗ୍‌ ଆସ୍‌ତାନ୍‌;
LUK 8:39 ମାତର୍‌ ୱାନ୍‌ ୱାନିଙ୍ଗ୍‌ ସାଙ୍ଗ୍‍ଆ ଇଜି ଇର୍‌ଆନ୍‌, “ମି ଇନ୍‌ଡ୍ର ଡ଼େସି ସାଙ୍ଗ୍‍ଆ, ମାରି ମାପୁରୁ ନିଙ୍ଗିଁ ଇନି ଇନି କାର୍ମୁ କିତାମାନାନ୍‌, ଆକା ୱିଜୁୱେର୍‍ଆ ।” ଆବେଣାନ୍‍ ୱାନ୍‌ ସଲ୍‌ସି, ଜିସୁ ୱାନିଙ୍ଗ୍‌ ଇନି ଇନି କାର୍ମୁ କିତାମାର୍‍ଆନ୍‍ ଆୟାୱିଜୁ ଗାଡ଼୍‌ତୁ ୱେର୍‌ତେଙ୍ଗ୍‌ ଆସ୍‌ତାନ୍‌ ।
LUK 8:40 ଏସ୍ତିୱାଲେ ଜିସୁ ଆୟାପାଡ଼ି ୱାତାନ୍‌, ନାଣ୍ତଲୋକ୍‍ ୱାନିଙ୍ଗ୍‌ ୱେଡ଼ିକାଦାନ୍‌ ମାନାତାର୍‍, ମାତର୍‌ ୱିଜେରେ ୱାନିଙ୍ଗ୍‌ କାପ୍‍କିଜିମାର୍‍ଆର୍‍ ।
LUK 8:41 ମାରି, ସୁଡ଼ୁଦୁ, ଜାଇରସ୍‍ ଦର୍‌ତି ଅରେନ୍‍ ଲୋକୁ ୱାତାନ୍‌; ୱାନ୍‌ ପାର୍‌ତନା ଇଲୁଦି ପେରିକାନ୍‌ ମାର୍‌ଆନ୍‌ । ୱାନ୍‌ ଜିସୁଦି ପାଦାମ୍‍ଆଗ୍‍ଡ଼ି ନିଜେଦି ଇନ୍‌ଡ୍ର ୱାଦେଙ୍ଗ୍‌ ୱାନିଙ୍ଗ୍‌ ମାଡ଼ିସ୍‌ତାନ୍‌,
LUK 8:42 ମାତର୍‌ ୱାନି ବାର ବାରସ୍‌ତି ଅରେତ୍‍ନେ ନା ଗାଡ଼ି ମାର୍‌ଆତ୍‌, ମାରି ୱାଦ୍‌ ସାତାମାର୍‍ଆତ୍‍ । ମାତର୍‌ ୱାନ୍‌ ସଲସିମାର୍‍ଇ ୱେଡ଼ାଦୁ ଲୋକୁ ୱାନି ୱାନି ମୁସ୍‌କୁ ମାଟ୍‍ସି ସାଜି ମାର୍‌ଆର୍‌ ।
LUK 8:43 ନାସ୍ତିୱାଲେ ବାର ବାର୍‍ସୁ ସାନ୍ଦି ସୁତୁକ୍‍ ରୋଗଦି ଅରେତ୍‌ ଆଇମା ମାର୍‌ଆତ୍‌, ଏଦ୍‍କି ନିଜେଦି ୱିଜୁ ଡାବୁଙ୍ଗୁଁ ୱିସ୍‍ସି ଏବାଣାକୁବା ନେଗେଣ୍ତ୍‍ ଆଦେଙ୍ଗ୍ ଆଟ୍‍ଏଜି ମାର୍‌ଆତ୍‌,
LUK 8:44 ୱାଦ୍‌ ୱେନ୍‍କାରି ପାଡ଼୍‍କାଦାନ୍‍ ୱାଜି ୱାନି ୱାତି ଜାଲିଦୁ ମୁଟ୍‍ତାତ୍‍, ମାରି, ଆୟାଦାପ୍ରେ ତାନି ସୁତୁକ୍‍ ଆନି ରଗ୍‌ ନେଗେନ୍‌ ଆତାତ୍‌ ।
LUK 8:45 ଆବେନୁ ଜିସୁ ଇର୍ହାନ୍‌, “ଏନ୍‌ ନାଙ୍ଗି ମୁଟ୍‌ତାନ୍‌ ?” ମାତର୍‌ ୱିଜେରେ ସିଲେ ଇଜି ଇର୍ହାର୍‌, ପିତର ଇର୍ହାନ୍‌, “ଏ ଗୁରୁ, ଲୋକୁ ମାଣ୍ତାସୁଣ୍ତା ଆଜି ନି ମୁସ୍‌କୁ ମାଟ୍‍ସି ସାଜିନାର୍‍ ।”
LUK 8:46 ମାତର୍‌ ଜିସୁ ଇର୍ହାନ୍‌, “ଏନ୍‌ ଅରେନ୍‍ ନାଙ୍ଗି ମୁଟ୍‌ତାନ୍‌, ମାତର୍‌ ନା ବାଣାନ୍‍ ସାକ୍ତି ସତାତ୍‌ ଇଜି ନାନ୍ ନେସ୍‌ତା ।”
LUK 8:47 ଏସ୍ତିୱାଲେ ଆଇମାଲୋକ୍‍ ସୁଡ଼ୁତାତ୍‍ ଜେ, ୱାଦ୍‌ ମାରାଗ୍‍ଜି ମାନ୍‌ଣ୍ଡ୍ରେଙ୍ଗ୍‌ ଆଟେଏତାତ୍‍, ନାସ୍ତିୱାଲେ ୱାଦ୍‌ ତିର୍‍ଗ୍‍ଜି ତିର୍‍ଗିଜି ୱାଜି ୱାନି ପାଦାମ୍‌ ଆଡ୍‍ଗି ଆର୍‍ଜି, ଇନିଦାନିଙ୍ଗ୍‌ ୱାନିଙ୍ଗ୍‌ ମୁଟ୍‍ତାତ୍‍, ମାରି ଏଣ୍ତେସ୍‌ ଦାପ୍ରେ ନେଗେଣ୍ତ୍‍ ଆତାତ୍‌, ଆୟାୱିଜୁ ଲୋକା ଆଗ୍‌ଡ଼ି ଇର୍ହାତ୍‌ ।
LUK 8:48 ଆବେଟ୍‌ ୱାନ୍‌ ତାନିଙ୍ଗ୍‌ ଇର୍‌ଆନ୍‌, “ଗାଡ଼ି, ନି ବିସ୍‌ବାସ୍‌ ନିଙ୍ଗିଁ ନେଗେନ୍‍ କିତାମାନାତ୍‌, ସାନ୍ତିଦାନ୍‌ ସାଙ୍ଗ୍‍ଆ ।”
LUK 8:49 ଜିସୁ ଆୟା ମାଟା ଇନିୱାଲେ ପାର୍‌ତନା ଇନ୍‍ଡ୍ରଣି ପେରିଲୋକା ଇନ୍‍ଡ୍ରଣାନ୍‍ ଅରେନ୍‍ ୱାଜି ଇର୍‌ଆନ୍‌, “ମି ଗାଡ଼ି ସାତାତ୍‍ନି, ଗୁରୁଙ୍ଗ୍‍ ମାରି କାସ୍ଟୁ ସିମା ।”
LUK 8:50 ମାତର୍‌ ଜିସୁ ଆୟାକା ୱେନ୍‌ଜି ଜାଇରସ୍‍ତିଙ୍ଗ୍‍ ଡ଼େସି ଇର୍‌ଆନ୍‌, “ତିଲାମାଟ୍‌, ବିସ୍‌ବାସ୍‌ କିଦୁ, ମାରି ୱାଦ୍‌ ନେଗେନ୍‍ ଆନାତ୍‍ ।”
LUK 8:51 ମାରି, ଇନ୍‌ଡ୍ର ୱାଜି ପିତର, ଜୋହନ ମାରି ଜାକୁବ, ମାରି ଗାଡ଼ିସ୍‌ଦି ୟାୟା ବୁବା ଡ଼ିସ୍‌ତିଙ୍ଗ୍‌ ମାରି ଏୟେଙ୍ଗ୍‍ ନିଜେୱାଲେ ଲୋଇ ସନ୍‌ଡ଼୍ରେଙ୍ଗ୍‌ ସିଏତାର୍‍ ।
LUK 8:52 ମାତର୍‌ ୱିଜେରେ ତାନି ଉଣ୍ତିଙ୍ଗ୍‌ ଆଡ଼୍‍ବାଜି ଆଡ଼୍‍ବାଜି ବକାଦୁ କତାଜି ମାର୍‌ଆର୍‌ । ଆବେନୁ ୱାନ୍‌ ଇର୍‌ଆନ୍‌, “ଆଡ଼୍‌ବାମାଟ୍‌; ୱାଦ୍‌ ସାଏତ୍‌, ମାତର୍‌ ସୁସ୍‍ତାମାନାତ୍‍ ।”
LUK 8:53 ମାତର୍‌ ୱାଦ୍‌ ସାତାମାନାତ୍‍ ଇଜି ନେସ୍‍ତିବାଣାନ୍‍ ୱାର୍‌ ଜିସୁଙ୍ଗୁଁ ସେମାର୍‌ କିଜିମାର୍‌ଆର୍‌ ।
LUK 8:54 ମାତର୍‌ ୱାନ୍‌ ଆଇଲିଦି କିୟୁ ଆସ୍‌ସି କୁକ୍‌ସି ଇର୍‌ଆନ୍‌, “ଏ ଆଇଲି, ନିଙ୍ଗିଁଆ ।”
LUK 8:55 ଆବେଟ୍‌ ତାନି ଜିବନ୍‌ ଡ଼େସି ୱାତାତ୍‍, ମାରି ୱାଦ୍‌ ଆୟାଦାପ୍ରେ ନିଙ୍ଗିଁତାତ୍‍, ଜିସୁ ତାନିଙ୍ଗ୍‌ ଇନିକାବା ଉଣ୍ତେଙ୍ଗ୍‌ ସିଦେଙ୍ଗ୍‍ ଇର୍‌ଆନ୍‌ ।
LUK 8:56 ଇବେଟ୍‍ ତାନି ୟାୟା ବୁବା କାବା ଆତାର୍‌; ମାତର୍‌ ଆୟା ଗଟ୍‌ନାଦି ମାଟାଦିଙ୍ଗ୍‌ ଏଙ୍ଗ୍‌ବା ଇନ୍‌ମାଟ୍‌ ଇଜି ୱାରିଙ୍ଗ୍‌ ଇର୍‌ଆନ୍‌ ।
LUK 9:1 ଆୟାୱାଲେ ଜିସୁ ବାର ଲୋକୁ ସିସୁରିଙ୍ଗ୍‌ କୁକ୍‌ସି ଉନ୍‌ଡ୍ରେମାନୁ ଉଣ୍ତା କିଜି ୱାରିଙ୍ଗ୍‌ ୱିଜୁ ଦୁବେଙ୍ଗାଁ ଡ଼ିସ୍‍ତେଙ୍ଗ୍‍ଁ, ମାରି ରୋଗ୍‍ତିଙ୍ଗ୍‍ ନେଗେଣ୍ତ୍‌ କିଦେଙ୍ଗ୍‌ ସାକ୍ତି ମାରି ଅଦିକାର୍‍ ସିତାନ୍‌ ।
LUK 9:2 ମାରି, ୱାନ୍‌ ୱାରିଙ୍ଗ୍‌ ମାପୁରୁଦି ରାଜିଦି ନେଗିକାବୁର୍‌ ୱେର୍‌ତେଙ୍ଗ୍‌ ମାରି ରୋଗ୍‍ତୁମାନି ଲୋକାଙ୍ଗ୍‌ ନେଗେଣ୍ତ୍‍ କିଦେଙ୍ଗ୍‌ ପୋକ୍‌ତାନ୍‌,
LUK 9:3 ମାରି ୱାରିଙ୍ଗ୍‌ ଇର୍‌ଆନ୍‌, ମିର୍‌ ସନିୱାଲେ ବାଡିଗା ନୋ ମଣି ନୋ ରୁଟି ନୋ ଡାବୁଙ୍ଗୁଁ ଇନିକା ବା ଅମାଟ୍‌, ବା ରୁଣ୍ତି ଆଙ୍ଗିଁଙ୍ଗ୍‌ ଅର୍‌ସେ ଅମାଟ୍‌ ।
LUK 9:4 ମାରି, ମିଙ୍ଗିଁ ଆମା ଇନ୍‌ଡ୍ରଣିକାର୍‌ କୁକ୍‍ନାର୍‍, ଆୟା ବାଡିଦାନ୍‍ ଡ଼େସି ରେଇ ସାନ୍ଦି ଆବେ ତେବାଦୁ ।
LUK 9:5 ମାରି, ଏସୋ ଲୋକୁ ମିଙ୍ଗିଁ ମାନାଏର୍‌, ଆୟା ଗାଡ଼୍‌ତାନ୍‍ ୱାନିୱାଲେ ଲୋକ୍‌ତି ବିରୁଦ୍‍ତାନ୍‍ ସାକି ସିଦେଙ୍ଗ୍‍ ଇଜି ମି ପାଦାମ୍‍କାଣି ଦୁଡ଼ି ସାଡ଼୍‍ଦୁ ।
LUK 9:6 ଆବେଟ୍‌ ସିସୁର୍‍ ସଲ୍‌ସି ୱିଜୁ ତରିନ୍‌ ନେଗିକାବୁର୍‌ ୱେର୍‌ତାର୍‌ ମାରି ରୋଗ୍‌ତାନ୍‌ ନେଗେଣ୍ତ୍‌ କିଜି କିଜି ନାର୍‍କାଙ୍ଗ୍‍ଁ ନାର୍‍କାଙ୍ଗ୍‍ଁ ସରଆର୍‌ ।
LUK 9:7 ଆୟାୱାଲେ ଗାଲିଲିଦି ସାସନ୍‌କିନି ସାମନ୍ତରାଜା ହେରୋଦ ଇୟାୱିଜୁ ମାଟା ୱେନ୍‌ଜି ବାୟାଆତା ସର୍‌ଆନ୍‌, ଇରିଙ୍ଗ୍‌ ଡୁବନ୍‌ସିନି ଯୋହନ ମାରିଡ଼େସିଜିବନ୍‌ ଆତାମାନାନ୍‌ ଇଜି ଏର୍‌ ଏର୍‌ ଇଜିମାର୍‌ଆର୍‌ ।
LUK 9:8 ମାରି, ଏର୍‌ ଏର୍‌ ଏଲିୟ୍‌ ତରାଇଆତାମାନାନ୍‍ ଇଜିମାର୍‌ଆର୍‌ ମାରି ଆଇକାର୍‌ ପୁର୍ବେଦି ବାବବାଦିର୍ ଲୋଇ ଅରେନ୍‍ ସାତିମାଣାନ୍‌ ଡ଼େସି ନିଙ୍ଗିଁତାମାନାନ୍‍ ଇଜି ଇଜିମାର୍‌ଆର୍‌ ।
LUK 9:9 ମାତର୍‌ ହେରୋଦ ରାଜା ଇର୍‌ଆନ୍‌, “ଡୁବନ୍‌ସିନି ଜୋହନତି ତାଲା ତୋ ନାନ୍ କଇସ୍‍ତାମାନା, ମାତର୍‌ ଆମାୱାନି ବିସୟ୍‌ତାନ୍‌ ନାନ୍ ଇୟାୱାଜା ମାଟା ୱେନ୍‍ଜିନା, ଇକାନ୍‌ ଏନ୍‌ ?” ମାରି, ହେରୋଦ ଜିସୁଙ୍ଗୁଁ ସୁଡ଼ୁଦେଙ୍ଗ୍‍ ବଦା କିଜିମାର୍‍ଆନ୍‍ ।
LUK 9:10 ୱେନ୍‌କା ସିସୁର୍‍ ଡ଼େସିୱାଜି, ଆମାକା ଆମାକା କିତାମାର୍‍ଆର୍‍, ଆୟାୱିଜୁ ଜିସୁଙ୍ଗୁଁ ୱେର୍‌ତାର୍‌ । ମାରି, ୱାନ୍‌ ଆଇମାନୁ ମାନ୍‌ଡ଼୍ରେଙ୍ଗ୍‌ ୱାରିଙ୍ଗ୍‌ ୱାନିୱାଲେ ଅସି ବେତ୍‍ସାଇଦା ଦର୍‌ତି ଗାଡ଼୍‌ତୁ ସରଆର୍‌ ।
LUK 9:11 ମାତର୍‌ ଲୋକ୍‌ ୱିଜେରେ ଆକା ନେସ୍‍ତାରୋ ୱାନିୱାଲେ ସନ୍‌ଡ଼୍ରେଙ୍ଗ୍‌ ଆସ୍‌ତାର୍‌; ମାରି, ଜିସୁ ଜିବନ୍‌ ନଜି ୱାରିଙ୍ଗ୍‌ ମାପୁରୁଦି ରାଜିଦି ବିସୟ୍‌ତାନ୍‌ ୱାରିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, ମାରି ଆମାୱାରିଙ୍ଗ୍‍ ରୋଗ୍‌ତାନ୍‌ ନେଗେଣ୍ତ୍‍ ଆନିକା ମାର୍‌ଆତ୍‌, ୱାରିଙ୍ଗ୍‌ ନେଗେଣ୍ତ୍‍ କିତାନ୍‌ ।
LUK 9:12 ନାସ୍ତିୱାଲେ ୱେଡ଼ା ଆଜି ୱାଜିମାର୍‍ଆର୍‍; ଆବେଟ୍‌ ବାର୍‍ ଲୋକୁ ସିସୁର୍‍ ଜିସୁ ଲାକ୍‌ତୁ ୱାଜି ଇର୍ହାର୍‌, “ଲୋକୁ ଏଣ୍ତେସ୍‌ ସାରିବେଡ଼୍‍ତି ନାର୍‍କାଙ୍ଗ୍‍ଁ ମାରି ଇସ୍ରିନାର୍‍କାଙ୍ଗ୍‍ ତେବାନାର୍‌ ମାରି କାଦି ଉଣ୍ତେଙ୍ଗ୍‌ ପୋଇଦେଙ୍ଗ୍‍ ଆଟ୍‍ନାର୍‍, ଆୟାଉଣ୍ତିଙ୍ଗ୍‌ ୱାରିଙ୍ଗ୍‌ ପୋକ୍‌ଆ, ଇରିଙ୍ଗ୍‌ ମାଡ୍‌ ଇବେ ସିମ୍ରା ବାଡିଦୁ ମାନିକା ।”
LUK 9:13 ମାତର୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ୱାରିଙ୍ଗ୍‌ ଉଟ୍‍ପିସ୍‍କିଦୁ ।” ୱାର୍‌ ଇର୍ହାର୍‌, “ମା ଲାକ୍‌ତୁ ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‍କାଣ୍‍ ନାଣ୍ତ ସିଲୁ; ଆରିଙ୍ଗ୍‌ ମାପ୍‌ ଇନିକା ସନାପ୍‌ ଇୟାୱିଜୁ ଲୋକା ଉଣ୍ତିଙ୍ଗ୍‌ କାଦି କଣାପ୍‍ ?”
LUK 9:14 ଇରିଙ୍ଗ୍‌ ୱାର୍‌ ୫,୦୦୦ ହାଜାର୍‌ ମେମାରୁଙ୍ଗୁଁ ମାର୍‌ଆର୍‌ । ମାରି, ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌, “ପଚାସ୍‍ ପଚାସ୍‍ କିଜି ୱାରିଙ୍ଗ୍‌ ଦଲ୍‌ ଦଲ୍‌ କିଜି ବାସିସ୍‍ କିଦୁ ।”
LUK 9:15 ଆବେଟ୍‌ ୱାର୍‌ ଆୟାୱାଜା ୱିଜେରିଙ୍ଗ୍‍ ବାସିସ୍‍ କିତାର୍‌ ।
LUK 9:16 ମାରି, ଜିସୁ ଆୟା ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ଅସି ମୁସ୍‌କୁ ତରିନ୍‌ ସୁଡ଼ୁଜି ଆୟାୱିଜୁ ଆସିର୍ବାଦ୍‌ କିତାନ୍‌, ମାରି ରୁକ୍‍ସି ଲୋକାଙ୍ଗ୍‌ ବାଟା କିଜି ସିଦେଙ୍ଗ୍‍ ଇଜି ସିସୁରିଙ୍ଗ୍‌ ସିତାନ୍‌ ।
LUK 9:17 ଆବେଟ୍‌ ୱିଜେରେ ତିର୍‌ଆରୋ ପଟାପାଜିତାର୍‍, ମାରି ୱାର୍‌ ୱାରି ଲାକ୍‌ତୁ ଏଜିତି ମାର୍‍ଇ ବାରଗୋଟା ଡାଡ଼ିଙ୍ଗ୍‍ ଉଣ୍ତାକିତାର୍‍ ।
LUK 9:18 ଅର୍‍ଲେନ୍‍ ଜିସୁ ଅରେନ୍‌ ପାର୍‌ତନା କିନିୱାଲେ ସିସୁର୍‍ ୱାନିୱାଲେ ମାର୍‌ଆର୍‌, ମାରି ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌, “ନାନ୍ ଏନ୍‌ ଇଜି ଲୋକୁ ୱିଜେରେ ଇନିକା ଇନାର୍‌ ?”
LUK 9:19 ଆବେଟ୍‌ ୱାର୍‌ ଇର୍ହାର୍‌, “ଡୁବନ୍‌ସିନି ଜୋହନ, ମାତର୍‌ ଏର୍‌ ଏର୍‌ ଇନାର୍‌, ଏଲିୟ୍‌, ମାରି ଏର୍‌ ଏର୍‌ ଇନାର୍‌, ପୁର୍ବେଦି ବାବବାଦିରି ଲୋଇ ଅରେନ୍‍ ଜିବନ୍‌ଆଜି ନିଙ୍ଗିଁତାମାନାନ୍‍ ।”
LUK 9:20 ଜିସୁ ୱାରିଙ୍ଗ୍‌ ୱେନ୍‍ବାନ୍‍, “ମାତର୍‌ ନାନ୍ ଏନ୍‌ ଇଜି ମିର୍‌ ଇନିକା ଇଜିନିଦେର୍‌ ?” ପିତର ଇର୍‌ଆନ୍‌, “ନିନ୍‌ ମାପୁରୁଦି କ୍ରିସ୍ତ ।”
LUK 9:21 ଆବେଟ୍‌ ଜିସୁ ଇକା ଏଙ୍ଗ୍‌ବା ଇନ୍‌ମାଟ୍‌ ଇଜି ୱାରିଙ୍ଗ୍‌ ଆଟ୍‌ୱାଦାନ୍‍ ୱେର୍‌ତାନ୍‌,
LUK 9:22 “ମନୁସ୍ୟପୁତ୍ରଦିଙ୍ଗ୍‍ ନାଣ୍ତ ଦୁକ୍‍ ପୋଇଦେଙ୍ଗ୍‍ ଆନାତ୍‌ ମାରି ନେତାର୍‍, ପେରିଜାଜକ୍‍କୁ ମାରି ସାସ୍ତ୍ରିର୍‍ ସେମାର୍‌ କିଜି ଡାକ୍‌ନାର୍‌, ମାରି ମୁନେଟାନ୍‍ ମାରିଡ଼େସିଜିବନ୍‌ ଆଜି ନିଙ୍ଗିଁନାନ୍‍ ।”
LUK 9:23 ନାସ୍ତିୱାଲେ ଜିସୁ ୱିଜେରିଙ୍ଗ୍‍ ଇର୍‌ଆନ୍‌, ଏନ୍‌ ଜଦି ନା ୱାଲେ ୱାଦେଙ୍ଗ୍‌ ବଦାକିନାନ୍‌, ଆରିଙ୍ଗ୍‌ ୱାନ୍‌ ନିଜେଦି ଡ଼ିସିନ୍‍, ମାରି ଦିନାମି ନିଜେଦି ଦୁକ୍‍ କସ୍ଟଦିଙ୍ଗ୍‍ ପିନ୍‍ଣ୍ତ୍‍ଜି ନା ୱେନ୍‌କା ରାପିନ୍‍ ।
LUK 9:24 ଇରିଙ୍ଗ୍‌ ଏନ୍‌ ନିଜେଦି ଜିବନ୍‌ତିଙ୍ଗ୍‌ ରକିୟା କିଦେଙ୍ଗ୍‌ ବଦାକିନାନ୍‌, ୱାନ୍‌ ଆକା ଆରାକିନାନ୍‌, ମାତର୍‌ ଏନ୍‌ ନା ଉଣ୍ତିଙ୍ଗ୍‌ ୱାନି ଜିବନ୍‌ ଆରାକିନାନ୍‌, ୱାନ୍‌ ଆକା ରକିୟା କିନାନ୍‌ ।
LUK 9:25 ମାରି, ଅରେନ୍‌ ଲୋକୁ‌ ସାରାଦୁନିଆଦିଙ୍ଗ୍‌ ଜିଣାଜି ନିଜେଦିଙ୍ଗ୍‍ ସାପିସ୍‍କିନାନ୍‍ ବା ଆରାନାନ୍‌, ଆରିଙ୍ଗ୍‌ ୱାନି ଇନି ଲାବ୍‍ ?
LUK 9:26 ଆଦେଙ୍ଗ୍‌ ଏନ୍‌ ନାଙ୍ଗିଁ ମାରି ନା ବାକ୍ୟ ବିସୟ୍‌ତାନ୍‌ ସେମାର୍‍ ଆନାନ୍‌, ମନୁସ୍ୟପୁତ୍ର ଏସ୍ତିୱାଲେ ବୁବାୱାଲେ, ମାରି ମୁସ୍‌କୁପୁର୍‌ତି ପବିତ୍ର ଦୁତ୍‍କାୱାଲେ ମହିମାଦାନ୍‌ ୱାନାନ୍‌, ନାସ୍ତିୱାଲେ ୱାନ୍‌ ୱାରି ବିସୟ୍‌ତାନ୍‌ ସେମାର୍‍ କିନାନ୍‌ ।
LUK 9:27 ମାତର୍‌ ନାନ୍ ମିଙ୍ଗିଁ ସତ୍‌ ଇଜିନା, “ମାପୁରୁଦି ରାଜି ସୁଡ଼ିଇ ସାନ୍ଦି ଇବେ ନିର୍‍ଇ ମାନି ଲୋକା ଲୋଇ ଏସୋ ଲୋକୁ ଏଣ୍ତେସ୍‌ବା ସାଏର୍‌ ।”
LUK 9:28 ଇୟାୱିଜୁ ଗଟାନି ପୁରା ଆଟ୍‍ଦିନ୍‍ ୱେନ୍‌କା ଜିସୁ ପିତର, ଜୋହନ ମାରି ଜାକୁବଙ୍ଗ୍‍ ୱାନିୱାଲେ ଅସି ପାର୍‌ତନା କିଦେଙ୍ଗ୍‌ ଇଜି ଗରନ୍‌ତୁ କୁକ୍‍ତାଅତାନ୍‍ ।
LUK 9:29 ମାରି, ୱାନ୍‌ ପାର୍‌ତନା କିନିୱାଲେ ୱାନି ମୋକମ୍‍ତି ମୁର୍‍ତି ବାଦ୍‍ଲେ ଆତାତ୍‌ ମାରି ୱାନି ଆଙ୍ଗିଁ ଅଡ଼ିନିକା ମାରି ନାଣ୍ତ ଜାୟ୍‌ ଆତାତ୍‌ ।
LUK 9:30 ମାରି ସୁଡ଼ୁଦୁ, ଆୟାଦାପ୍ରେ ମୋସା ନି ଏଲିୟ୍‌, ଇୟା ରିଏର୍‌ ଲୋକୁ ୱାନିୱାଲେ ୱାର୍‌ଗିଜିସାଦେଙ୍ଗ୍‌ ଆସ୍‌ତାର୍‌ ।
LUK 9:31 ୱାରି ମୁସ୍‌କୁପୁର୍‌ତି ଗୌରବ୍‍ତାନ୍‍ ତରାଜିମାର୍‍ଆର୍‍, ୱାର୍‌ ଜିସୁୱାଲେ ଜିରୁସାଲାମ୍‍ତୁ ଗଟାଦେଙ୍ଗ୍‍ ମାନି ୱାନି ସାନି ବିସୟ୍‌ତାନ୍‌ ୱାର୍‌ଗିଜି ସାଜି ମାର୍‍ଆର୍‍ ।
LUK 9:32 ନାସ୍ତିୱାଲେ ପିତର୍‌ ମାରି ୱାନି ତଡ଼୍‍କୁ ସୁଜ୍‍ଜିମାର୍‍ଆର୍‍; ମାତର୍‌ ୱାର୍‌ ଏସ୍ତିୱାଲେ ନିଙ୍ଗିଁତାର୍‍ ୱାନି ମହିମା ମାରି ୱାନିୱାଲେ ନିର୍‍ଇ ମାର୍‍ଇ ଆୟା ରିଏର୍‌ ଲୋକାଙ୍ଗ୍‌ ସୁଡ଼ୁତାର୍‌ ।
LUK 9:33 ମାରି, ମୋସା ନି ଏଲିୟ୍‌ ସନ୍‌ଡ଼୍ରେଙ୍ଗ୍‌ ସନିୱାଲେ ପିତର ଜିସୁଙ୍ଗୁଁ ଇର୍ହାନ୍‌, “ଏ ଗୁରୁ, ମାଡ୍‌ ଜେ ଇବେ ମାନିକା, ଇକା ନେଗେଣ୍ତ୍‍ ଆତାତ୍‌; ମାପ୍‌ ମୁଡ୍ରି ଗୁଡ଼େଙ୍ଗ୍‍ ତିଆର୍‌ କିନାପ୍‍, ନି ଉଣ୍ତିଙ୍ଗ୍‌ ଉନ୍‌ଡ୍ରି, ମୋସାଦି ଉଣ୍ତିଙ୍ଗ୍‌ ଉନ୍‌ଡ୍ରି ମାରି ଏଲିୟ୍‌ଦି ଉଣ୍ତିଙ୍ଗ୍‌ ଉନ୍‌ଡ୍ରି । ମାତର୍‌ ୱାନ୍‌ ଇନିକା ଇଜିନାନ୍‌, ଆକା ନେସ୍‌ଏତାର୍‌ ।”
LUK 9:34 ପିତର ଇକା ଇନ୍‍ବୁ ଇନ୍‍ବୁ କାଣ୍ତେକ୍‍ ବାଦଡ଼୍‍ ଇମ୍‌ଜି ୱାତା ଦୋ ୱାରିଙ୍ଗ୍‌ ବାଦଡ଼୍‍ତି ନିଡ଼୍‍ଗା ପିଡ଼ିକ୍‍ତାତ୍‍, ମାରି ୱାରିଙ୍ଗ୍‌ ବାଦଡ଼୍‍ କେର୍‍ପ୍‍ନିୱାଲେ ପିତର, ଜୋହନ ମାରି ଜାକୁବ ତିଲାତାର୍‌ ।
LUK 9:35 ମାରି, ଆୟା ବାଦଡ଼୍‍ତାନ୍‍ ଉଣ୍ତ୍ରି ବଲ୍ ୱାତାତ୍‍, “ଇକାନ୍‌ ନା ମାରିନ୍‌, ନାନ୍ ୱେନିଙ୍ଗ୍‌ ବାସେକିତାମାନା, ୱେନି ମାଟା ୱେନ୍‍ଆ ।”
LUK 9:36 ମାରି, ଆୟା ବଲ୍ ୱାତି ୱେନ୍‌କା ଜିସୁ ଅରେନ୍‍ନେ ତରାଆତାନ୍‍ । ମାରି, ୱାର୍‌ ଆଲେତା ମାର୍ହାର୍‌, ମାରି ଆମାକା ଆମାକା ସୁଡ଼ୁତାମାର୍‍ଆର୍‍, ଆୟା ମାଟାଦି ବିସୟ୍‌ ଏଙ୍ଗ୍‌ବା ଇନ୍‍ଏତାର୍‍ ।
LUK 9:37 ମାର୍‍ନାଣ୍ଡିଙ୍ଗ୍ ଜିସୁ ନି ୱାନି ମୁଏର୍‌ ସିସୁର୍‍ ଗରନ୍‌ତାନ୍‍ ରେତାୱାତାର୍‍, ମାରି ନାଣ୍ତଲୋକ୍‍ ୱାଜି ଜିସୁଙ୍ଗୁଁ ମିସତାର୍‍ ।
LUK 9:38 ମାରି ସୁଡ଼ୁଦୁ, ଲୋକା ଲୋଇ ଅରେନ୍‍ ନାଣ୍ତ ଆଉଲି ଆଜି ଇର୍‌ଆନ୍‌, “ଏ ଗୁରୁ, ନାନ୍ ନିଙ୍ଗିଁ ମାଡ଼ିସ୍‌ କିଜିନା, ନା କଡ଼ଦିଙ୍ଗ୍‌ ଦୟା କିଆ, ଇରିଙ୍ଗ୍‌ ୱାନ୍‌ ନା ଅରେନେ ମାରିନ୍‌;
LUK 9:39 ସୁଡ଼ୁଆ, ୱାନିଙ୍ଗ୍‌ ଉଣ୍ତ୍ରି ଦୁବା ଆସ୍‌ନାତ୍‌, ମାରି ୱାନ୍‌ ଦାପ୍ରେନେ ଆଉଲି ଆଜି ନିଙ୍ଗିଁନାନ୍‍, ମାରି ଦୁବା ୱାନିଙ୍ଗ୍‌ ଇୟାୱାଜା ତିର୍‍ପ୍‍ନାପୋକ୍‍ନାତ୍‍ ଜେ, ୱାନି ୱେୟୁଦାନ୍‌ ପେପଲ୍‍ ସନାତ୍‌, ମାରି ୱାଦ୍‌ ୱାନିଙ୍ଗ୍‌ ସିତାରାକାବ୍‍ରା କିଜି କାସ୍ଟୁଦାନ୍‍ ସନାସନାତ୍‍ ।”
LUK 9:40 ୱାନିଙ୍ଗ୍‌ ଦୁବା ଡ଼ିସିସ୍‍ତେଙ୍ଗ୍‍ ଇଜି ନାନ୍ ନି ସିସୁରିଙ୍ଗ୍‌ ମାଡ଼ିସ୍‍କିତା, ମାତର୍‌ ୱାର୍‌ ଆଟ୍‍ଏତାର୍‍ ।
LUK 9:41 ଜିସୁ ୱାରିଙ୍ଗ୍‌ ଇର୍ହାନ୍‌, “ଆରେ ଅଡ଼ପ୍‍ ବିସ୍‍ବାସିର୍‍ ମାରି ତାଗ୍‍ଇସାରିଦୁ ସନି କୁଟୁମ୍‌, ଏସୋଦିନ୍‍ ନାନ୍‌ ମି ୱାଲେ ତେବାଜି ମି ବ୍ୟବହାର୍‌ କିନା ? ନି ମାରିନ୍‌ତିଙ୍ଗ୍‍ ଇବେ ତାଗା ।”
LUK 9:42 ୱାନ୍‌ ୱାବୁ ୱାବୁ ଦୁବା ୱାନିଙ୍ଗ୍‌ ଆଡ୍‍ଗି ଆର୍‍ପ୍‍ସି ପୋକ୍‌ସି ବୟ୍‌ଙ୍କାର୍‍ତାନ୍‍ ତିର୍‍ପ୍‍ତା ପୋକ୍‌ତାତ୍‌, ମାତର୍‌ ଜିସୁ ଆୟା ତାଗିଇ ଆତ୍ମାଦିଙ୍ଗ୍‌ ଆଦ୍‌ରିସ୍‌ତାନ୍‍ ମାରି କଡ଼ଦିଙ୍ଗ୍‌ ନେଗେନ୍‌ କିଜି ୱାନିଙ୍ଗ୍‌ ତାମେ ବୁବାସି କିଦୁ ସିତାନ୍‌ ।
LUK 9:43 ଆବେଟ୍‌ ୱିଜେରେ ମାପୁରୁଦି ପେରିସାକ୍ତି ଉଣ୍ତିଙ୍ଗ୍‌ କାବାଆତାର୍‌ । ମାତର୍‌ ୱାନି କିତି ୱିଜୁ ପାଣିଦି ଉଣ୍ତିଙ୍ଗ୍‌ ୱିଜେରେ କାବା ଆନିୱାଲେ ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌,
LUK 9:44 “ଇୟାୱିଜୁ ମାଟା ମି ଗିତଣିଆଙ୍ଗ୍‍ଁ ୱେନ୍‌ଡ୍ରୁ; ଇରିଙ୍ଗ୍‌ ମନୁସ୍ୟପୁତ୍ର ଲୋକା କିୟୁଦୁ ସର୍‍ପେ ଆଦେଙ୍ଗ୍‌ ସଲ୍‌ସିନାନ୍‌ ।”
LUK 9:45 ମାତର୍‌ ସିସୁର୍‍ ଆୟାମାଟା ବୁଜାଦେଙ୍ଗ୍‌ ଆଟ୍‍ଏତାର୍‍, ମାରି ଆୟାକା ୱାରି ମାଣାନ୍‌ ମାର୍‍ଗିତା ମାର୍‌ଆତ୍‌, ଏଣ୍ତେସ୍‌ ଆକା ୱାର୍‌ ବୁଜାଦେଙ୍ଗ୍‌ ଆଟ୍‍ଏତିଙ୍ଗ୍‍ ବା, ମାରି ୱାର୍‌ ଆୟା ମାଟାଦି ବିସୟ୍‌ତାନ୍‌ ୱାନିଙ୍ଗ୍‌ ୱେନ୍‍ବାଦେଙ୍ଗ୍‍ ତିଲାଜି ମାର୍‌ଆର୍‌ ।
LUK 9:46 ୱାରି ମାଣାନ୍‌ ଏନ୍‌ ପେରିକାନ୍‌, ଆୟା ବିସୟ୍‌ତାନ୍‌ ୱାରି ଲୋଇ ୱାର୍‌ଗିଜି ସାତାର୍‌ ।
LUK 9:47 ମାତର୍‌ ଜିସୁ ୱାରି ମୋନ୍‌ତୁ ୱାର୍‌ଗିଜିସାନିକା ନେସ୍‌ତାନ୍‌ନୋ ଅରେନ୍‍ ଇସ୍ରି କଡ଼ଦିଙ୍ଗ୍‌ ତାତାନ୍‍ ନୋ ନିଜେଦି ଲାକ୍‌ତୁ ନିଲ୍‍ପିସ୍‍ କିତାନ୍‍ନୋ ୱାରିଙ୍ଗ୍‌ ଇର୍‌ଆନ୍‌,
LUK 9:48 “ଏନ୍‌ଆପିନ୍‌ ନା ଦର୍‌ତାନ୍‌ ଇୟା ଇସ୍ରି କଡ଼ଦିଙ୍ଗ୍‌ ମାନାନାନ୍‍, ୱାନ୍‌ ନାଙ୍ଗିଁ ମାନାନାନ୍‍, ମାରି ଏନ୍‌ଆପିନ୍‌ ନାଙ୍ଗିଁ ମାନାନାନ୍‍, ୱାନ୍‌ ନା ପୋକ୍‌ତିମାନି ମାଲିକ୍‌ତିଙ୍ଗ୍‌ ମାନାନାନ୍‍; ଇରିଙ୍ଗ୍‌ ମି ୱିଜେରି ମାଣ୍‌କୁ ଏନ୍‌ ଇସ୍ରିକାନ୍‌, ୱାନ୍‌ ପେରିକାନ୍‌ ।”
LUK 9:49 ଆବେଟ୍‌ ଜୋହନ ଇର୍‌ଆନ୍‌, “ଏ ଗୁରୁ, ମାପ୍‌ ଅରେନ୍‍ ୱାନିଙ୍ଗ୍‌ ନି ଦର୍‌ତାନ୍‌ ଦୁବା ଡ଼ିସିସ୍‍କିନିକା ସୁଡ଼ୁତାପ୍‍, ମାରି ୱାନ୍‌ ମା ଦଲ୍‍ତିକାନ୍‍ ଆଏନ୍‍ଆକା ୱାନିଙ୍ଗ୍‌ ତେବା କିତାପ୍‍ ।”
LUK 9:50 ମାତର୍‌ ଜିସୁ ଜୋହନତିଙ୍ଗ୍‍ ଇର୍‌ଆନ୍‌, “ୱାନିଙ୍ଗ୍‌ ମନା କିମାଟ୍‌, ଇରିଙ୍ଗ୍‌ ଏନ୍‌ ମି ତରିନ୍‌ ଆଏନ୍‍, ୱାନ୍‌ ମି ତରିନ୍‌ ।”
LUK 9:51 ୱେନ୍‌କା ଏସ୍ତିୱାଲେ ଜିସୁଦି ଆଡ୍‍ଗିପୁର୍‍ ଡ଼ିସ୍‌ସି ମୁସ୍‌କୁପୁର୍‌ ସନି ୱେଡ଼ା ଆଜି ୱାଜି ମାର୍‌ଆତ୍‌, ନାସ୍ତିୱାଲେ ଜିସୁ ଜିରୁସାଲାମ୍‍ତୁ ସନ୍‌ଡ଼୍ରେଙ୍ଗ୍‌ ବଦାକିତାନ୍‍,
LUK 9:52 ୱାନ୍‌ ୱାନି ଆଗ୍‌ଡ଼ି କାବୁର୍‌ ଅନିୱାରିଙ୍ଗ୍‍ ପୋକ୍‌ତାନ୍‌ । ୱାର୍‌ ସଲ୍‌ସି ୱାନି ଉଣ୍ତିଙ୍ଗ୍‌ ତିଆର୍‌ କିଦେଙ୍ଗ୍‌ ସମିରୋଣୟରିଦି ଉଣ୍ତ୍ରି ନାର୍‍ତୁ ସର୍‌ଆ ଡ଼ୁଗିତାର୍‌;
LUK 9:53 ମାତର୍‌ ୱାନ୍‌ ଜିରୁସାଲାମ୍‍ତୁ ସନି ଉଣ୍ତିଙ୍ଗ୍‌ ବଦା କିତାମାନାନ୍‍ ଇଜି ନେସ୍‌ସି ୱାର୍‌ ୱାନିଙ୍ଗ୍‌ ମାନାଏତାର୍‍ ।
LUK 9:54 ଇକା ସୁଡ଼ୁଜି ଜାକୁବ ନି ଜୋହନ, ଇୟା ରିଏର୍‌ ସିସୁର୍‍ ଇର୍ହାର୍‌, “ପ୍ରବୁ, ଏଲିୟ୍‌ ବା ଏଣ୍ତେସ୍‌ କିତାମାର୍‍ଆନ୍‍, ଆୟାୱାଜା ବାଦଡ଼୍‍ତାନ୍‍ ସିସୁ ଆର୍‍ଜି ୱାରିଙ୍ଗ୍‌ ସାପିସ୍‌ କିପିତ୍‍, ଇକା ମାପ୍‌ ଇନାପ୍‍ ଇଜି ଇନିକା ନି ବଦା ନୋ ?”
LUK 9:55 ମାତର୍‌ ୱାନ୍‌ ମାର୍‍ଜି ବେସ୍‍ସି ୱାରିଙ୍ଗ୍‌ ଲାଗାତାନ୍‍ ମାରି ଇର୍‌ଆନ୍‌, ମିର୍‌ ଏଣ୍ତେସ୍‌ ନାନି ଆତ୍ମାଦି ଲୋକୁ, ଇକା ନେସ୍‌ଏଜିନା । ମନୁସ୍ୟପୁତ୍ର ଲୋକାଦି ଜିବନ୍‌ ସାପିସ୍‌ କିଦେଙ୍ଗ୍ ରେଏଣ୍ତ୍‍ ମାତର୍‌ ରକିୟା କିଦେଙ୍ଗ୍‌ ୱାତାମାନାନ୍‍ ।
LUK 9:56 ତାନିୱେନ୍‍କା ୱାର୍‌ ମାରି ଉଣ୍ତ୍ରି ନାଟ ସରଆର୍‌ ।
LUK 9:57 ୱାର୍‌ ସାରିଦୁ ସନିୱାଲେ ଅରେନ୍‍ ଲୋକୁ ଜିସୁଙ୍ଗୁଁ ଇର୍‌ଆନ୍‌, “ନିନ୍‌ ଏମେ ବାଡିଦୁ ସନି, ନାନ୍ ନି ୱେନ୍‌କା ୱେନ୍‌କା ୱାନା ।”
LUK 9:58 ଜିସୁ ୱାନିଙ୍ଗ୍‌ ଇର୍ହାନ୍‌, “ଗଲୁଦିଙ୍ଗ୍‍ ତେବାଦେଙ୍ଗ୍‍ ସାରାଆ ମାନାତ୍‌, ବାଦଡ଼୍‍ତି ପଟିଦିଙ୍ଗ୍‍ ତେବାଦେଙ୍ଗ୍‍ ଜାଲୁ ମାନାତ୍‌, ମାତର୍‌ ମନୁସ୍ୟପୁତ୍ରଦିଙ୍ଗ୍ ତାଲା ଇଡ୍‌ଦେଙ୍ଗ୍‌ ବାଡି ସିଲେତ୍‌ ।”
LUK 9:59 ମାରି, ୱାନ୍‌ ମାରି ଅରେନ୍‍ୱାନିଙ୍ଗ୍‍ ଇର୍‌ଆନ୍‌, “ନା ୱେନ୍‌କା ରାଆ ।” ମାତର୍‌ ୱାନ୍‌ ଇର୍‌ଆନ୍‌, “ଆଗ୍‌ଡ଼ି ସଲ୍‍ସୋ ନା ବୁବେଙ୍ଗ୍‌ ମୁସ୍‍ତେଙ୍ଗ୍‍ ଇଜି ନାଙ୍ଗିଁ ସାରି ସିଦା ।”
LUK 9:60 ମାତର୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, “ସାତି ୱାରିଙ୍ଗ୍‌ ନିଜେ ନିଜେଦି ସାତି ଲୋକାଙ୍ଗ୍‌ ମୁସ୍‍ତେଙ୍ଗ୍‍ ଇଜି ଡ଼ିସ୍‍ତୁ, ଇରିଙ୍ଗ୍‌ ମିର୍‌ ସଲ୍‍ସୋ ମାପୁରୁଦି ରାଜି ପ୍ରଚାର୍‌ କିଦୁ ।”
LUK 9:61 ମାରି ଅରେନ୍‍ ବା ଇର୍‌ଆନ୍‌, “ପ୍ରବୁ, ନାନ୍ ନି ୱେନ୍‌କା ୱାନା, ମାତର୍‌ ଆଗ୍‌ଡ଼ି ନା ଇଲ୍‌ତୁ ମାନି ଲୋକାମାଣ୍‌କୁ ନି ୱାଲେ ୱାନି ବିସୟ୍‌ ମାଡ଼ିସ୍‍କିଦେଙ୍ଗ୍‍ ନାଙ୍ଗିଁ ସାରି ସିଦା ।”
LUK 9:62 ମାତର୍‌ ଜିସୁ ୱାନିଙ୍ଗ୍‌ ଇର୍ହାନ୍‌, “ଏନ୍‌ ନାଙ୍ଗେଲ୍‍ ମେଡ଼ିଦୁ କିୟୁ ଆସ୍‌ସି ୱେନ୍‌କା ବେସ୍‍ନାନ୍‍, ୱାନ୍‌ ମାପୁରୁଦି ରାଜିଦୁ ଜୋଗ୍‍ ସିଲେନ୍‌ ।”
LUK 10:1 ଇୟା ୱେନ୍‌କା ପ୍ରବୁ ମାରି ସତୁରୁ ରୁଣ୍ତି ଲୋକାଙ୍ଗ୍‌ ବାସ୍‍ସିକିତାନ୍‍ ମାରି ନିଜେ ଏମେ ଏମେ ଗାଡ଼୍‌କାଙ୍ଗ୍‌ ମାରି ବାଡିଦୁ ସନ୍‌ଡ଼୍ରେଙ୍ଗ୍‌ ବଦାକିତାମାର୍ହାନ୍‍, ଆୟା ଆୟା ବାଡିଦୁ ରିଏର୍‌ ରିଏର୍‌ କିଜି ୱାରିଙ୍ଗ୍‌ ୱାନି ଆଗ୍‌ଡ଼ି ପୋକ୍‌ତାନ୍‌ ।
LUK 10:2 ମାରି, ଜିସୁ ୱାରିଙ୍ଗ୍‌ ଇର୍ହାନ୍‌, ପାସି ନାଣ୍ତ, ମାତର୍‌ ପାଣିକିନିକାର୍‌ ଉଣା; ନିଜେଦି ପାସିକିଡ଼ିଇଦୁ ପାଣିକିନିୱାରିଙ୍ଗ୍‌ ପୋକ୍‌ନି ଉଣ୍ତିଙ୍ଗ୍‌ ପାସିକିଡ଼ିଇଦି ମାଲିକ୍‌ତି ଲାକ୍‌ତୁ ୱେର୍‍ତୁ ।
LUK 10:3 ମିର୍‌ ସାନ୍‍ଡ୍ରୁ; ସୁଡ଼ୁଦୁ, ନୋରେସ୍‍କା ଲାକ୍‌ତୁ ମେଣ୍ତାପିଲେକା ୱାଜା ନାନ୍ ମିଙ୍ଗିଁ ପୋକ୍‍ସିନା ।
LUK 10:4 ଡାବୁଙ୍ଗୁଁ ଆସ୍‌ନି ମଣି, ମଣି ମାରି ଜୁତେଙ୍ଗ୍‌ ଅମାଟ୍‌, ମାରି ସାରିଦୁ ଏଙ୍ଗ୍‌ବା ମାଡ଼ିସ୍‌ କିମାଟ୍‌ ।
LUK 10:5 ମାରି, ଏମେ ଇଲ୍‌ତୁ ମିର୍‌ ଡ଼ୁଗ୍‍ନିଦେର୍‍, ଆଗ୍‌ଡ଼ି ଇନ୍‍ଡ୍ରୁ, ଇୟା ଇଲ୍‍ତି ଉଣ୍ତିଙ୍ଗ୍‌ ସାନ୍ତି ଆପିତ୍‌ ।
LUK 10:6 ମାରି, ଆୟାବାଡିଦୁ ଜଦି ଅରେନ୍‍ ସାନ୍ତିଦି ଲୋକୁ ତେବାନାନ୍‌, ଆତିଙ୍ଗ୍‌ ମି ସାନ୍ତି ୱାନି ମୁସ୍‌କୁ ବାସାନାତ୍‍; ମାତର୍‌ ଜଦି ସିଲେତ୍‍, ଆଦେଙ୍ଗ୍‌ ଆକା ମି ଲାକ୍‌ତୁ ଡ଼େସିୱାନାତ୍‍ ।
LUK 10:7 ୱାରିମାନୁ ଆମାକା ମାନାତ୍‌, ଆକା ଉଣୁଜିତିନ୍‌ଜି ଆୟା ଇନ୍‌ଡ୍ର ମାନ୍‌ଡ଼୍ରୁ, ଇରିଙ୍ଗ୍‌ ପାଣିକିନିକାର୍‌ ନିଜେଦି କୁଲିଦି ଡାବୁଙ୍ଗୁଁ ପୋଇଦେଙ୍ଗ୍‍ ଜୋଗ୍‍ ମାନାତ୍‌ । ଇଲ୍‌କାଙ୍ଗ୍‌ ଇଲ୍‌କାଙ୍ଗ୍‌ ସଲ୍‍ମାଟ୍‍ ।
LUK 10:8 ମାରି, ଏମେ ଗାଡ଼୍‌ତୁ ମିର୍‌ ଡ଼ୁଗ୍‍ନିଦେର୍‍ ମାରି ଲୋକୁ ମିଙ୍ଗିଁ ମାନାର୍‌, ଆବେ ମିଙ୍ଗିଁ ଆମାକା ଉଣ୍ତେଙ୍ଗ୍‌ ସିନାର୍‍, ଆକା ଉଣ୍ତୁ ।
LUK 10:9 ଆୟାବାଡିଦୁ ମାନି ରୋଗ୍‌ ଲୋକାଙ୍ଗ୍‌ ନେଗେଣ୍ତ୍‍ କିଦୁ, ମାରି ୱାରିଙ୍ଗ୍‌ ଇନ୍‍ଡ୍ରୁ, ମାପୁରୁଦି ରାଜି ମି ଲାକ୍‌ତୁ ଇଗା ୱାତାତ୍‌ନି ।
LUK 10:10 ମାତର୍‌ ଏମେ ଗାଡ଼୍‌ତୁ ମିର୍‌ ଡ଼ୁଗ୍‍ନିଦେର୍‍ ମାରି ଲୋକୁ ମିଙ୍ଗିଁ ମାନାଏର୍‌, ଆୟା ଦୁଆର୍‍ଆଙ୍ଗାଁ ସଲ୍‌ସି ଇନ୍‍ଡ୍ରୁ,
LUK 10:11 ମି ଗାଡ଼୍‌ତି ଏମେ ଦୁଡ଼ି ମା ପାଦାମ୍‌କାଙ୍ଗ୍‌ କାସ୍‍ତାମାନାତ୍‍, ଆକାବା ମି ଉଣ୍ତିଙ୍ଗ୍‌ ସାଡ଼୍‍ସି ସିଜିନାପ୍‌; ମାତର୍‌ ମାପୁରୁଦି ରାଜି ଯେ ଇଗା ୱାତାତ୍‍, ଇକା ନେସ୍‌ସୋ ମାନ୍‌ଡ଼୍ରୁ ।
LUK 10:12 ନାନ୍ ମିଙ୍ଗିଁ ଇଜିନା, ଆୟାନାଣ୍ତିଙ୍ଗ୍‍ରି ଆୟା ଗାଡ଼୍‌ତି ଦଣ୍ଡ୍‌ ବାଦ୍‌ଲୁ ସଦମ୍‍ତି ଦଣ୍ଡ୍‌ ଆଟ୍‍ତେଙ୍ଗ୍‍ ଆନାତ୍‌ ।
LUK 10:13 ଏ କୋରାଜିନ୍‌ ନି ଦସ୍‌ ଏସା ବୟଙ୍କର୍‍ ଆନାତ୍‌ ଏ ବେତ୍‍ସାଇଦାଦୁ ବା ନି ଦସ୍‌ ଏସା ବୟଙ୍କାର୍‍ ଆନାତ୍‌, ଇରିଙ୍ଗ୍‌ ମିବାନୁ ଏମେ ଏମେଦି ସାକ୍ତିଦି ପାଣି କିତାମାନା, ଆୟାୱିଜୁ ଜଦି ସୋର ନି ସିଦନ୍‍ତୁ କିଆଇଆତାତ୍‍ମାନ୍ଦି, ଆରିଙ୍ଗ୍‌ ୱାର୍‌ ଏସୋ ଆଗ୍‍ଡ଼ିରାନ୍‍ ବାସ୍‌ତେଙ୍ଗ୍‌ ଆରାଜି ନିର୍‍ତୁ ବାସ୍‌ସି ମନ୍‍ତିଙ୍ଗ୍‍ ଡ଼େପ୍‍ତାର୍‍ ମାନ୍ଦି ।
LUK 10:14 ବିସାର୍‌ କିନି ନାଣ୍ଡିଙ୍ଗ୍ ମି ଦସ୍‌ ବାଦ୍‌ଲୁ ସୋର ନି ସିଦନ୍‍ତି ଦସ୍‌ ଆଟ୍‍ତେଙ୍ଗ୍‍ ଆନାତ୍‌ ।
LUK 10:15 ମାରି, ଏ କପର୍‍ନାହୁମ୍‍, ନିନ୍‌ ଇନିକା ମୁସ୍‌କୁପୁର୍‍ ସାନ୍ଦି ପିର୍‌ଦେଙ୍ଗ୍‌ ଆଟ୍‌ନି ? ନର୍କ ସାନ୍ଦି ଇଗା ସନି ।
LUK 10:16 ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌, “ଏନ୍‌ ମି ମାଟା ୱେନାନ୍‌, ୱାନ୍‌ ନା ମାଟା ୱେନାନ୍‌, ମାରି ଏନ୍‌ ମିଙ୍ଗିଁ ମାନାଏନ୍‌, ୱାନ୍‌ ନାଙ୍ଗିଁ ମାନାଏନ୍‌, ୱାନ୍‌ ନା ପୋକ୍‌ତିମାନି ମାଲିକ୍‌ତିଙ୍ଗ୍‌ ମାନାଏନ୍‌ ।”
LUK 10:17 ଆୟାୱେନ୍‌କା ଆୟା ସତୁରି ରୁଣ୍ତି ସିସୁର୍‍ ୱେଡ଼ିକାଦାନ୍‌ ଡ଼େସିୱାଜି ଇର୍ହାର୍‌, “ପ୍ରବୁ, ଦୁବେଆଙ୍ଗ୍‌ଁ ବା ନି ଦର୍‌ତାନ୍‌ ମା ମାଟା ମାନାତେ ।”
LUK 10:18 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ମିର୍‍ସ୍‍ନିୱାଜା ମୁସ୍‌କୁପୁର୍‌ତାନ୍‌ ସୟତାନ୍ ଆର୍‍ନିକା ନାନ୍ ସୁଡ଼ୁତା ।
LUK 10:19 ସୁଡ଼ୁଦୁ, ନାନ୍ ମିଙ୍ଗିଁ ସାରାସ୍‍ ନି ସର୍‍କୁପି ମୁସ୍‌କୁ ବୁଲାଦେଙ୍ଗ୍‌ ଅଦିକାର୍‌ ସିତାମାନା, ମାରି ସାତ୍ରୁଦି ୱିଜୁ ସାକ୍ତି ମୁସ୍‌କୁ ବା ଅଦିକାର୍‌ ସିତାମାନା, ମାରି ଇନିକା ଏଣ୍ତେସ୍‌ କିଜି ମି ପାଣିଦିଙ୍ଗ୍‌ ସେଏଣ୍ଡ୍‌ କିଦେଙ୍ଗ୍‌ ଆଟ୍‍ଏତ୍‍ ।
LUK 10:20 ତାଗ୍‍ଇଆତ୍ମମେଙ୍ଗ୍‌ ଜେ ମି ମାଟା ମାନାନେ, ଆବେ ୱେଡ଼ିକା ଆମାଟ୍‌, ମାତର୍‌ ମି ଦର୍‌ ଯେ ମୁସ୍‌କୁପୁର୍‌ ରାସାତାମାନାତ୍‌, ଆୟା ଉଣ୍ତିଙ୍ଗ୍‌ ୱେଡ଼ିକା ଆଦୁ ।”
LUK 10:21 ଆୟାୱେନ୍‌କା ଜିସୁ ପବିତ୍ର ଆତ୍ମାଦିମାଣାନ୍‍ ୱେଡ଼ିକାଦାନ୍‌ ପୁରାଆଜି ଇର୍‌ଆନ୍‌, “ଏ ବୁବା, ମୁସ୍‌କୁପୁର୍‌ ମାରି ଦୁନିଆଦି ପ୍ରବୁ, ନିନ୍‌ ବୁଦିମାନି ଲୋକାମାଣ୍‌କୁ ଇୟାୱିଜୁ ବିସୟ୍‌ ମାର୍‍କ୍‍ସି ଇଡ୍‌ଜି ଇସ୍ରି କଡ଼ରିମାନୁ ୱେକ୍‌ତି, ଇୟାଉଣ୍ତିଙ୍ଗ୍‌ ନି ଦନ୍ୟବାଦ୍‌ କିଜିନା; ହୁଁ ବୁବା, ଇରିଙ୍ଗ୍‌ ଇକା ନି ନାଣ୍ତ ବଦା ।
LUK 10:22 “ନା ବୁବାଦି ପାଣି ୱିଜୁ ନା କିୟୁଦୁ ସିତାମାନାନ୍‌; ମାରି, ମାରିନ୍‌ ଏନ୍‌, ଇକା ବୁବେଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‌ ନେସଏନ୍‍, ମାରି ବୁବା ଏନ୍‌, ଇକା ମାରିନ୍‍ତିଙ୍ଗ୍‍ ଡ଼ିସ୍‌ତିଙ୍ଗ୍‌ ଏନ୍‌ ନେସ୍‌ଏପ୍‌, ମାରି ମାରିନ୍‌ ଆମାୱାନି ଲାକ୍‌ତୁ ୱାନିଙ୍ଗ୍‌ ତର୍‌ତେଙ୍ଗ୍‍ଁ ବଦାକିନାନ୍‌, ୱାନ୍‌ ନେସ୍‌ନାନ୍‌ ।”
LUK 10:23 ମାରି, ଜିସୁ ସିସୁରି ତରିନ୍‌ ମାର୍‍ଜି ବେସ୍‍ସି ୱାରିଙ୍ଗ୍‌ ଇର୍‌ଆନ୍‌, “ମିର୍‌ ଇୟାୱିଜୁ ବିସୟ୍‌ ସୁଡ଼ୁତିମାନିଦେର୍‍ ଆକା ମିର୍‌ ଦନ୍ୟ ।
LUK 10:24 ନାନ୍ ମିଙ୍ଗିଁ ସତ୍‌ ଇଜିନା, ମିର୍‌ ଆମାକା ଆମାକା ସୁଡ଼ୁଜିନିଦେର୍‍, ଆୟାୱିଜୁ ଏସୋ ବାବବାଦିର୍ ମାରି ରାଜାର୍‌ ସୁଡ଼ୁଦେଙ୍ଗ୍‍ ବଦାକିତାର୍‌, ମାତର୍‌ ସୁଡ଼ୁଏତାର୍‍; ମାରି, ମିର୍‌ ଆମାକା ଆମାକା ୱେନ୍‌ଜିନିଦେର୍‌, ଆୟାୱିଜୁ ୱାର୍‌ ୱେନ୍‌ଡ୍ରେଙ୍ଗ୍‌ ବଦାକିତାର୍‌, ମାତର୍‌ ୱେନ୍‍ଏତାର୍‍ ।”
LUK 10:25 ମାରି, ସୁଡ଼ୁଦୁ, ଅରେନ୍‍ ଦାର୍ମୁଗୁରୁ ନିଙ୍ଗ୍‍ଜି ଜିସୁଙ୍ଗୁଁ ପରିକା କିଜି ୱେନ୍‌ବାତାନ୍‌, “ଏ ଗୁରୁ, ଏସ୍‌କାଙ୍ଗ୍‌ୱିଜିଇ ଜିବନ୍‌ତି ଅଦିକାରି ଆଦେଙ୍ଗ୍‌ ନାନ୍ ଇନିକା କିନା ?”
LUK 10:26 ଆବେଟ୍‌ ଜିସୁ ଇର୍‌ଆନ୍‌, “ସାସ୍ତ୍ରଦୁ ଇନିକା ରାସାଏତ୍‌ ? ନିନ୍‌ ଏଣ୍ତେସ୍‌ ପଡ଼ାଜିନି ?”
LUK 10:27 ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ନି ୱିଜୁ ଜିବନ୍‌, ୱିଜୁ ଜିବନ୍‌, ୱିଜୁ ସାକ୍ତି, ମାରି ୱିଜୁ ମନ୍‍ ସିଜି ପ୍ରବୁ ନି ମାପୁରୁଙ୍ଗୁଁ ଜିବନ୍‌ ନଆ; ମାରି, ମି ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତି ୱାଜା ଜିବନ୍‍ନୋଦୁ ।”
LUK 10:28 ଆବେଟ୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, “ନିନ୍‌ ସତ୍‌ ଇର୍ହିମାନି; ଇକା କିଆ, ଆତିଙ୍ଗ୍‌ ନିନ୍‌ ଜିବନ୍‌ ପୋଇନି ।”
LUK 10:29 ମାତର୍‌ ଦାର୍ମୁ ସାସ୍ତ୍ରି ନିଜେଦିଙ୍ଗ୍‍ ଦାର୍ମୁ ଲୋକୁ ଇଜି ତର୍‌ତେଙ୍ଗ୍‍ଁ ବଦାକିଜି ଜିସୁଙ୍ଗୁଁ ୱେନ୍‌ବାତାନ୍‌, “ଆରିଙ୍ଗ୍‌ ନା ଲାକ୍‌ତୁମାନିକାନ୍‌ ଏନ୍‌ ?”
LUK 10:30 ଜିସୁ ଆୟା ମାଟା ଅସି ଇର୍ହାନ୍‌, “ଅରେନ୍‍ ଲୋକୁ ଜିରୁସାଲାମ୍‍ତାନ୍‍ ଜିରିହୋଦି ଗାଡ଼୍‌ତୁ ସଲ୍‍ପୁ ସଲ୍‍ପୁ ଡଙ୍ଗାଁରି କିଦୁ ସେର୍‍ତାନ୍‍ । ୱାର୍‌ ୱାନି ୱାତିଗନ୍ଦା ଡ଼ିବିସ୍‍ତାଅତାରୋ ମାରି ଡାକ୍‍ତାରୋ ୱାନିଙ୍ଗ୍‌ ଅଡ଼ପ୍‌ଜିବନ୍‌ମାନ୍‌ବୁ ଡାକ୍‌ତାର ଡ଼ିସ୍‍ତା ସରଆର୍‌ ।
LUK 10:31 ଆୟାୱାଲେ ଅରେନ୍‍ ଜାଜକ ଆୟା ସାରି ସିଜି ସଲ୍‌ସି ମାର୍‌ଆନ୍‌, ମାରି ୱାନ୍‌ ୱାନିଙ୍ଗ୍‌ ସୁଡ଼ୁଜି ସାରିଦି ଆଇ ପାଡ଼୍‌କା ସିଜି ସର୍ହାନ୍‍ ।
LUK 10:32 ଆୟାୱାଜା ଅରେନ୍‍ ଲେବି ବା ଆୟା ବାଡିଦୁ ୱାଜି ୱାନିଙ୍ଗ୍‌ ସୁଡ଼ୁଜି ସାରିଦି ଆଇ ପାଡ଼୍‌କା ସିଜି ସର୍‌ଆନ୍‌ ।
LUK 10:33 ମାତର୍‌ ଅରେନ୍‍ ସମିରୋଣିୟ ଲୋକୁ ୱାନି ଲାକ୍‌ତୁ ୱାତାନ୍‌ନୋ ୱାନିଙ୍ଗ୍‌ ସୁଡ଼ୁଜି ନାଣ୍ତ ଦୁଃକ୍‌‍ କିତାନ୍‌,
LUK 10:34 ମାରି ୱାନି ଲାକ୍‌ତୁ ସଲ୍‌ସି ୱାନି ଗାଉକାଙ୍ଗ୍‍ୱିଜୁ ନିୟୁ ଉସ୍‍ତାନ୍‍ ମାରି ଅଙ୍ଗୁର୍‍ରସ୍‍ ୱାକ୍‍ସି ଆୟାୱିଜୁ ଗାଉତୁ ତର୍‍ତାନ୍‍, ମାରି ୱାନିଙ୍ଗ୍‌ ୱାନି ଗଦ ମୁସ୍‌କୁ ବାସିସ୍‍କିଜି ୱାନିଙ୍ଗ୍‌ ଲୋକୁ ରମ୍‌ନି ଉଣ୍ତ୍ରି ଇଲ୍‌ତୁ ଅତାନ୍‌ନୋ ୱାନି ସେବା କିତାନ୍‌ ।
LUK 10:35 ମାରିନାଣ୍ତିଙ୍ଗ୍‍ ୱାନ୍‌ ରୁଣ୍ତି ଡିନାରି ସପ୍‍ସି ଲୋକୁ ରମ୍‌ନି ଇଲ୍‍ତି ମାଲିକ୍‌ତିଙ୍ଗ୍‌ ସିଜି ଇର୍‌ଆନ୍‌, ୱେନି ସେବା କିଆ, ମାରି ଜଦି ନାଣ୍ତ ଡାବୁଙ୍ଗୁଁ କାର୍‌ସୁ ଆନେ, ଆକା ନାନ୍ ଡ଼େସିୱାନି ୱାଲେ ନିଙ୍ଗିଁ ସିନା ।”
LUK 10:36 ଇୟା ମୁଏରି ଲୋଇ ଏନ୍‌ ଡଙ୍ଗାଁରି କିଦୁସେରିତି ମାର୍‍ଇ ଲୋକ୍‌ତି ପାଡ଼ିରି ଲୋକୁ ଇଜି ଅଡ଼୍‍ବିଜିନିଦେର୍‍ ?
LUK 10:37 ଦାର୍ମୁ ସାସ୍ତ୍ରି ଇର୍‌ଆନ୍‌, “ଏନ୍‌ ୱାନି ଉଣ୍ତିଙ୍ଗ୍‌ କାର୍ମୁ ତର୍‍ତାନାନ୍‌ ୱାନ୍‌,” ଜିସୁ ୱାନିଙ୍ଗ୍‌ ଇର୍‌ଆନ୍‌, “ସାଙ୍ଗ୍ଆ, ନିନ୍‌ ବା ଆୟାୱାଜା କିଆ ।”
LUK 10:38 ଜିସୁ ନି ୱାନି ସିସୁର୍‍ ସନିୱାଲେ ଉଣ୍ତ୍ରି ନାର୍‍ତୁ ଡ଼ୁଗିତାର୍‍, ମାରି ମାର୍ତା ଦର୍‌ତି ଅରେତ୍‌ ଆଇମା ତାନି ଇନ୍‌ଡ୍ର ଜିସୁଙ୍ଗୁଁ କୁକ୍‍ତାତ୍‍ ।
LUK 10:39 ମରିୟମ୍‌ ଦର୍‌ତି ତାନି ଅରେତ୍‌ ତାଙ୍ଗିଁ ମାର୍‌ଆତ୍‌, ୱାଦ୍‌ ପ୍ରବୁଦି କାଲ୍‍କା ଆଡ୍‍ଗି ବାସ୍‌ସି ୱାନି ବାକ୍ୟ ୱେନ୍‌ଜି ମାର୍‌ଆତ୍‌ ।
LUK 10:40 ମାତର୍‌ ମାର୍ତା ରାନ୍ଦାବାଡ଼ା କିଦେଙ୍ଗ୍‌ ବେସି ତେରେପେତେ ଆଜି ମାର୍‌ଆତ୍‌; ଆଦେଙ୍ଗ୍‌ ୱାଦ୍‌ ଜିସୁ ଲାକ୍‌ତୁ ୱାଜି ଇର୍ହାତ୍‌, “ଏ ପ୍ରବୁ, ନା ତାଙ୍ଗିଁ ଜେ ନା ଅରେତ୍‍ତାନି ମୁସ୍‍କୁନେ ରାନ୍ଦାବାଡ଼ା କିନି ବଜୁ ଡ଼ିସ୍‍ତାମାନାତ୍‍, ତାନେ ତରିନ୍‌ ଇନିକା ନି ମନ୍‍ ସିଲେତ୍‌ ? ୱାଦ୍‌ ନାଙ୍ଗିଁ ସେବା କିନି ଉଣ୍ତିଙ୍ଗ୍‌ ତାନିଙ୍ଗ୍‌ ଇନ୍‌ଆଁ ।”
LUK 10:41 ମାତର୍‌ ପ୍ରବୁ ତାନିଙ୍ଗ୍‌ ଇର୍‌ଆନ୍‌, “ମାର୍ତା, ମାର୍ତା, ନିନ୍‌ ନାଣ୍ତ ବିସୟ୍‌ତାନ୍‌ ସିନ୍ତା ମାରି ତେରେପେତେ ଆଜିନି,”
LUK 10:42 ମାତର୍‌ ଉଣ୍ତ୍ରି ଜିନିସ୍‌ ନାଣ୍ତଦର୍‍କାର୍‍; ମରିୟମ୍‌ ତାନେ ଉଣ୍ତିଙ୍ଗ୍‌ ନେଗି ବିସୟ୍‌ ଆସ୍‌ କିତାମାନାତ୍‌, ମାରି ଆକା ତାନେମାଣାନ୍‍ ଡ଼ିବିସୋ ଅତେଙ୍ଗ୍‌ ଆଟ୍‍ଏନ୍‍ ।
LUK 11:1 ଅର୍‍ଲେନ୍‍ ଜିସୁ ଉଣ୍ତ୍ରି ବାଡିଦୁ ପାର୍‌ତନା କିଜିମାର୍ହାନ୍‍; ୱାନ୍‌ ପାର୍‌ତନା କିତି ୱିସ୍‍ତିୱେନ୍‍କା, ୱାନି ସିସୁରି ଲୋଇ ଅରେନ୍‍ ୱାନିଙ୍ଗ୍‌ ଇର୍‌ଆନ୍‌, ଏ ପ୍ରବୁ, ଡୁବନ୍‌ସିନି ଜୋହନ ଏଣ୍ତେସ୍‌ ୱାନି ସିସୁରିଙ୍ଗ୍‌ ପାର୍‌ତନା କିଦେଙ୍ଗ୍‌ ଅଜାକିତାନ୍‍, ନିନ୍‌ ବା ଆୟାୱାଜା ମାଙ୍ଗିଁ ପାର୍‌ତନା କିଦେଙ୍ଗ୍‌ ଅଜାକିଆ ।
LUK 11:2 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, ଏସ୍ତିୱାଲେ ମିର୍‌ ପାର୍‌ତନା କିନିଦେର୍‍, ନାସ୍ତିୱାଲେ ଇନ୍‍ଡ୍ରୁ, ବୁବା, ନି ପବିତ୍ର ଦରୁ ପେରିକାଆପିତ୍‍ । ନି ରାଜି ରାପିତ୍‍ ।
LUK 11:3 ମାଙ୍ଗିଁ ୱିଜୁଦିନ୍‌ ଦର୍‌କାର୍‌ ମାନି କାଦି ସିଦା ।
LUK 11:4 ମା ପାପ୍‌ ୱିଜୁ କେମା କିଆ, ଇରିଙ୍ଗ୍‌ ମାପ୍‌ ବା ମା ବିରଦ୍‌ତାନ୍‌ ପାପ୍‌ କିତିୱାରିଙ୍ଗ୍‍ କେମା କିନାପ୍‍ । ମାଙ୍ଗିଁ ଆଟ୍‌ୱା ପରିକାଦୁ ଆର୍‌ଦେଙ୍ଗ୍‌ ସିମା ।
LUK 11:5 ମାରି, ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌, ମି ଆମାୱାନି ଇୟାୱାଜା ତଡ଼୍‍ ମାନାନ୍‌ ନୋ, ଆମାୱାନି ଲାକ୍‌ତୁ ମାଜେର୍‍ନାଡ଼ା ୱାନ୍‌ ସଲ୍‌ସି ଇନାନ୍‌, ଏ ତଡ଼୍‍, ନାଙ୍ଗିଁ ମୁଣ୍ତ୍ରି ରୁଟିଙ୍ଗ୍‌ ଉଦାର୍‌ ସିଦା ।
LUK 11:6 ନା ଅରେନ୍‍ ଆଇ ନାଟି ତଡ଼୍‍ ନାବାନୁ ୱାତାମାନାନ୍‍, ୱାନିଙ୍ଗ୍‌ ଉଟ୍‍ପିସ୍‍ତେଙ୍ଗ୍‍ ନାବାନୁ ଇନିକା ସିଲେତ୍‍ ।
LUK 11:7 ମାରି ୱାନ୍‌ ଲୋଇରାନ୍‌ ଇୟାୱାଜା ଇନାନ୍‌, ନାଙ୍ଗିଁ କାସ୍ଟୁ ସିମା, ସେର୍‍ଲା କେର୍‍ତାନି, ମାରି ନା କଡ଼ର୍‌ ନାୱାଲେ ସୁଜ୍‍ଜିନାର୍‍; ନାନ୍ ନିଙ୍ଗିଁଜି ନିଙ୍ଗିଁ ସିଦେଙ୍ଗ୍‍ ଆଟ୍‍ଏ ।
LUK 11:8 ନାନ୍ ମିଙ୍ଗିଁ ଇଜିନା, ୱାନ୍‌ ଆତିଙ୍ଗ୍‌ବା ୱାନି ତଡ଼୍‍ ଆନାନ୍‌ ଆକା ନିଙ୍ଗ୍‍ଜ ସିଏନ୍‌, ମାତର୍‌ ୱାନ୍‌ ସେମାର୍‍ଆଏଣ୍ତା ରିଜା ମୁଜା ଲୋସ୍‍ତାନ୍‍ଆକା ୱାନ୍‌ ନିଙ୍ଗ୍‍ଜି, ୱାନିଙ୍ଗ୍‌ ଏସା ଦର୍‌କାର୍‌, ୱାନିଙ୍ଗ୍‌ ନାସୋ ସିନାନ୍‍ ।
LUK 11:9 ନାନ୍ ବା ମିଙ୍ଗିଁ ଇଜିନା, ଲୋସ୍‍ତୁ, ଆରିଙ୍ଗ୍‌ ମିଙ୍ଗିଁ ସିଆଇଆନାତ୍‍; ପୋୟଦୁ, ଆବେଟ୍‌କୁ ମିର୍‌ ପୋୟନିଦେର୍‍; ସେର୍‌ଲାଦୁ କତ୍‍ତୁ, ଆବେଟ୍‌କୁ ମି ଉଣ୍ତିଙ୍ଗ୍‌ ସେର୍‍ଲା ରେନାସିନାନ୍‍ ।
LUK 11:10 ଇରିଙ୍ଗ୍‌ ଏନ୍‌ ଲୋସ୍‍ନାନ୍‍, ୱାନିଙ୍ଗ୍‌ ପୁଟ୍‍ନାତ୍‍, ଏନ୍‌ ପୋୟନାନ୍‍, ୱାନ୍‌ ପୋୟ୍‍ଦେଙ୍ଗ୍‍ ଆଟ୍‍ନାନ୍‍; ମାରି, ଏନ୍‌ ସେର୍‍ଲାଦୁ କତ୍‍ନାନ୍‍, ୱାନି ଉଣ୍ତିଙ୍ଗ୍‌ ସେର୍‍ଲା ରେନାସିନାନ୍‍ ।
LUK 11:11 ମାରି, ମି ଲୋଇ ଇୟାୱାଜା ବୁବା ଏନ୍‌ ମାନାନ୍‌ ? ଆମାୱାନିଙ୍ଗ୍‍ ୱାନି ମାରିସି ମିନି ଲୋସ୍‍ତିଙ୍ଗ୍‍ ୱାନ୍‌ ୱାନିଙ୍ଗ୍‌ ମିନି ବାଦ୍‌ଲୁ ସାରାସ୍‍ ସିନାନ୍‍ ?
LUK 11:12 ମାରି କରୁ ଗୁଡୁ ଲୋସ୍‍ତିଙ୍ଗ୍‍ ୱାନ୍‌ ୱାନିଙ୍ଗ୍‌ ସର୍‍କୁପି ସିନାନ୍‍ ନୋ ?
LUK 11:13 ମିର୍‌ ତାଗ୍‌ଇ ଲୋକୁ ଆତିଙ୍ଗ୍‌ବା ଏସାଙ୍ଗ୍‍ ନିଜେ ନିଜେରି କଡ଼ରିଙ୍ଗ୍‌ ନେଗି ନେଗି ଜିନିସ୍‌ ସିଦେଙ୍ଗ୍‍ ନେସ୍‌ନିଦେର୍‌, ଆରିଙ୍ଗ୍‌ ଏମେ ବୁବା ମୁସ୍‌କୁପୁର୍‌ତାନ୍‌ ସିନାନ୍‍, ୱାନ୍‌ ୱାନିମାନୁ ଲୋସ୍‍ନି ଲୋକାଙ୍ଗ୍‌ ଏସୋ ନାଣ୍ତୱାଜା ପବିତ୍ରଆତ୍ମା ସିନାନ୍‍ !
LUK 11:14 ଅର୍‍ଲେନ୍‍ ଜିସୁ ୱାର୍‍ଗିଦେଙ୍ଗ୍‍ ଆଟ୍‍ଇ ଅରେନ୍‍ ଲୋକ୍‍ମାଣାନ୍ ଦୁବା ପେର୍‍ଜିମାର୍‍ଆନ୍‍, ଦୁବା ସତି ସର୍‌ଇ ୱେନ୍‌କା ଗୁଲା ଲୋକୁ ୱାର୍‍ଗିଦେଙ୍ଗ୍‍ ଆଟ୍‍ତାନ୍‍; ଆବେଟ୍‌ ଲୋକୁ ୱିଜେରେ କାବା ଆତାର୍‌ ।
LUK 11:15 ମାତର୍‌ ୱାରି ଲୋଇ ଏର୍‌ ଏର୍‌ ଇର୍ହାର୍‌, ଜିସୁ ଦୁବେଙ୍ଗାଁ ପେରିକାନ୍‌ ବାଲ୍‍ଜିବୁଲ୍‍ ସାକ୍ତିଦାନ୍‌ ଦୁବେଙ୍ଗ୍‍ଁ ଡ଼ିସିସ୍‍ନାନ୍‍ ।
LUK 11:16 ଆଇକାର୍‌ ୱାନିଙ୍ଗ୍‌ ଉରିଦୁ ଆର୍‌ପ୍‌ତେଙ୍ଗ୍‌ ବଦା କିଜିମାର୍‍ଆର୍‍ । ଆଦେଙ୍ଗ୍‌ ମାପୁରୁ ଜେ ୱାନିୱାଲେ ମାନାନ୍‌ ଇୟା ସିନାଦି ୱାଜା ୱାନିଙ୍ଗ୍‌ ବାଦଡ଼୍‍ତାନ୍‍ ଉଣ୍ତ୍ରି କାବାଆନି ପାଣି ତର୍‌ତେଙ୍ଗ୍‍ଁ ଇର୍ହାର୍‌ ।
LUK 11:17 ମାତର୍‌ ଜିସୁ ୱାରି ମନ୍‍ତି ମାଟା ନେସ୍‌ସି ୱାରିଙ୍ଗ୍‌ ଇର୍‌ଆନ୍‌, ଏମେ ଦେସ୍‌ ବାଗ୍ ଆଜି ନିଜେ ବିରଦ୍‌ତାନ୍‌ ନିଙ୍ଗିଁନାତ୍‍, ଆକା ନାସ୍ଟୁ ଆନା ସନାତ୍‌, ମାରି ଉଣ୍ତ୍ରି ଇଲୁ ରୁଣ୍ତି ବାଗ୍ ଆତିଙ୍ଗ୍‌ ନାସ୍ଟୁ ଆନାତ୍‌ ।
LUK 11:18 ମାରି, ସୟତାନ୍ ବା ଜଦି ବାଗ୍ ଆଜି ନିଜେ ବିରଦ୍‌ତାନ୍‌ ନିଙ୍ଗିଁତାନି, ଆତିଙ୍ଗ୍‌ ତାନି ରାଜି ଏଣ୍ତେସ୍‌ ତିର୍‍ଆଜି ତେବାନାତ୍‍ ? ନାନ୍ ବାଲ୍‍ଜିବୁଲ୍‍ତି ସାକାଦାନ୍‌ ଦୁବେଆଙ୍ଗ୍‍ଁ ଡ଼ିସିସ୍‍ନା ଇଜି ମିର୍‌ ତୋ ଇଜିନିଦେର୍‌ ।
LUK 11:19 ମାତର୍‌ ନାନ୍ ଜଦି ବାଲ୍‍ଜିବୁଲ୍‍ତି ସାକ୍ତିଦାନ୍ ତାଗ୍‌ଇ ଦୁବେଆଙ୍ଗ୍‍ଁ ପେର୍‍ଜିନା, ଆରିଙ୍ଗ୍‌ ମି କଡ଼ର୍‌ ଏମେ ସାକାଦାନ୍‌ ୱାରିଙ୍ଗ୍‌ ଡ଼ିସିସ୍‍ନାର୍‍ ? ଆଦେଙ୍ଗ୍‌ ୱାର୍‌ ମି ମୁସ୍‌କୁ ବିସାର୍‍ କିନିକାର୍‍ ଆନାର୍‌ ।
LUK 11:20 ସିଲେ, ମାତର୍‌ ମାପୁରୁଦି ସାକ୍ତିଦାନ୍ ନାନ୍ ଦୁବେଙ୍ଗ୍‌ ଡ଼ିସିସ୍‍କିନା ମାରି ଇକା ପାର୍‍ମାଣ୍‍ ଆଜିନାତ୍‍ ଜେ ମାପୁରୁଦି ରାଜି ମି ଲାକ୍‌ତୁ ଇଗା ୱାତାତ୍‌ନି ।
LUK 11:21 ଅରେନ୍‍ ବପୁମାନି ଲୋକୁ ଆମାସାନ୍ଦି ଜୁଦ୍‍ କିନି ସାସାପାତି ଆସ୍‌ସି ତିଆର୍‌ ଆଜି ନିଜେଦି ରାଜି ରକିୟା କିନାନ୍‌, ଆୟା ସାନ୍ଦି ୱାନି ୱିଜୁ ସମ୍ପତି ନେଗେନ୍‌ ତେବାନାତ୍‍ ।
LUK 11:22 ମାତର୍‌ ଏସ୍ତିୱାଲେ ୱାନିମାଣାନ୍‌ ନାଣ୍ତ ବପୁଦି ଲୋକୁ ୱାନିଙ୍ଗ୍‌ ଡାକ୍‍ସି ଜିଣାନାନ୍‍, ନାସ୍ତିୱାଲେ ଏମେ ଜୁଦ୍‍କିନି ସାସାପାତିଦୁ ୱାନି ଆସା ମାର୍‌ଆତ୍‌, ଆୟାୱିଜୁ ୱାନ୍‌ ରେନା ଅନାନ୍‍, ମାରି ୱାନି ଡଙ୍ଗାଁକିତି ଜିନିସ୍‌ ବାଟାକିନା ଅନାନ୍‍ ।
LUK 11:23 ଏନ୍‌ ନା ତରିନ୍‌ ସିଲେନ୍‌, ୱାନ୍‌ ନା ସାତ୍ରୁ; ମାରି, ଏନ୍‌ ନା ୱାଲେ ଉଣ୍ତା କିଏନ୍‍, ୱାନ୍‌ ଇନ୍‍ଙ୍ଗାଁ ଆନିଙ୍ଗାଁ କିନା ପୋକ୍‌ନାନ୍‌ ।
LUK 11:24 “ଏସ୍ତିୱାଲେ ଉଣ୍ତ୍ରି ତାଗ୍‍ଇଦୁବା ଅରେନ୍‍ ଲୋକୁ ମାଣାନ୍‌ ସତିସର୍‌ଇ ୱେନ୍‌କା ଏରୁସିଲି ବାଡିଙ୍ଗ୍‍ ୱିଜୁ ବୁଲାଜି ରମ୍‍ଦେଙ୍ଗ୍‍ ପୟ୍‌ନାତ୍‌, ମାରି ୱାଦ୍‌ ରମ୍‍ଦେଙ୍ଗ୍‍ ବାଡି ପୋୟଏତିଙ୍ଗ୍‍ ଇନାତ୍‍, ନାନ୍ ଏମେ ଇନ୍‍ଡ୍ରଣାନ୍‍ ସତା ୱାତାମାର୍‍ଆ, ନା ଆୟା ଇନ୍‌ଡ୍ର ମାରିଡ଼େସି ସନା ।
LUK 11:25 ମାରି, ୱାଦ୍‌ ୱାଜି ଆୟା ଇଲୁ ନେଗ୍ରେଣ୍ତା ସିପାତିକା ମାରି ୱିଜୁ ରସ୍‍ତିକା ସୁଣାତ୍‍ ।
LUK 11:26 ନାସ୍ତିୱାଲେ ୱାଦ୍‌ ସଲ୍‌ସି ତାନେମାଣାନ୍‍ ନାଣ୍ତ ତାଗ୍‌ଇ ମାରି ସାତ୍‍ଗୋଟା ଆତ୍‍ମେଙ୍ଗ୍‍ ଅର୍‌ସେ ଆସ୍‍ନା ୱାନାତ୍‌, ମାରି ୱାକ୍‍ ଆବେ ଡ଼ୁଗ୍‍ନେ ନୋ ଆବେ ବାସାନେ, ମାରି ଆୟା ଲୋକ୍‌ତି ପାର୍‍ତୁମ୍‍ତି ଦସ୍‌ ବାଦ୍‌ଲୁ ୱେନ୍‌କାରି ଦସ୍‌ ନାଣ୍ତ ତାଗ୍‌ଇକା ଆନାତ୍‌ ।”
LUK 11:27 ଜିସୁ ଇୟା ମାଟା ଇନିୱାଲେ ଲୋକା ଲୋଇରାନ୍‌ ଅରେତ୍‌ ଆଇମା ନାଣ୍ତ ଆଉଲି ଆଜି ଇର୍ହାତ୍‌, “ଦନ୍ୟ ମି ୟାୟା, ଏଦ୍‌ ନିଙ୍ଗିଁ ଜନମ୍‌ ସିତାମାନାତ୍‍ ମାରି ଆୟା ପାଲ୍‍, ଆମାଟ୍‍କୁ ନିନୁ ଉଟିମାନି ।”
LUK 11:28 ଜିସୁ ଇର୍‌ଆନ୍‌, “ସିଲେ, ଏମେକାର୍‌ ମାପୁରୁଦି ବାକ୍ୟ ୱେନାର୍‌, ମାରି ମାନାନାର୍‌, ୱାର୍‌ ଦନ୍ୟ ।”
LUK 11:29 ଲୋକ୍‌ ୱିଜେରେ ମାନ୍ଦା ମାନ୍ଦା ଆଜି ଜିସୁ ଲାକ୍‌ତୁ ଉଣ୍ତାଜି ମାର୍‍ଇ ୱାଲେ ୱାନ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, ଇୟା ଦିନ୍‍ତି ମେମାରିଏନ୍‍ ତାଗ୍‍ଇକାର୍‍; ଇକାର୍‌ ସିନା ପୋଇନାର୍‍, ମାତର୍‌ ଜୁନସ୍‍ତି ସିନା ଡ଼ିସ୍‌ତିଙ୍ଗ୍‌ ଆଇ ଆମା ସିନା ୱାରିଙ୍ଗ୍‌ ସିଏର୍‍ ।
LUK 11:30 ମାତର୍‌ ଜୁନସ୍‍ ଏଣ୍ତେସ୍‌ ନିନିବିଦିୱାରି ଉଣ୍ତିଙ୍ଗ୍‌ ସିନାଦିୱାଜା ଆତାନ୍‌, ମନୁସ୍ୟପୁତ୍ର ବା ଆୟାୱାଜା ଇୟା ଜୁଗ୍‌ତି ଲୋକା ଉଣ୍ତିଙ୍ଗ୍‌ ଆନାନ୍‌ ।
LUK 11:31 ସିବା ଦେସ୍‌ତି ରାଣି ବିଚାର୍‍ତୁ ଇୟା ଦିନ୍‍ତୁ ମେମାର୍‍ଙ୍ଗାଁ ୱାଲେ ନିଙ୍ଗିଁଜି ଇୟାୱାରିଙ୍ଗ୍‌ ଦୋସ୍‌ ଆସିସ୍‍ କିନାତ୍‍, ମାତର୍‌ ସଲମନ୍‍ତି ବୁଦିଦି ମାଟା ୱେନ୍‌ଡ୍ରେଙ୍ଗ୍‌ ଇଜି ଦୁନିଆଦି ଆକ ଦେସ୍‍ତାନ୍‍ ୱାଦ୍‌ ୱାତାମାର୍‍ଆତ୍‍, ମାରି ସୁଡ଼ୁଦୁ, ସଲମନ୍‍ତି ଡ଼ିସ୍‌ତିଙ୍ଗ୍‌ ପେରି ବିସୟ୍‌ ଇୟା ବାଡିଦୁ ମାନାତ୍‌ ।
LUK 11:32 ନିନିବିଦି ଲୋକୁ ବିଚାର୍‍ତୁ ଇୟା ଦିନ୍‍ତି ମେମାର୍‍ଙ୍ଗାଁ ୱାଲେ ନିଙ୍ଗିଁଜି ଇୟାୱାରିଙ୍ଗ୍‌ ଦସ୍‌ କିନାର୍‌, ମାତର୍‌ ୱାର୍‌ ଜୁନସ୍‍ତି ପ୍ରଚାର୍‌ତାନ୍‍ ମନ୍‍ ଡ଼େପ୍‍ତା ମାର୍‌ଆର୍‌, ମାରି ସୁଡ଼ୁଦୁ, ଜୁନସ୍‍ତି ଡ଼ିସ୍‌ତିଙ୍ଗ୍‌ ପେରି ବିସୟ୍‌ ଇବେନୁ ମାନାତ୍‌ ।
LUK 11:33 “ଏନ୍‌ ଦିୱା କାସିସ୍‍ କିଜ ଆଡ଼ିକ୍‍ସି ବାକ୍‌ରାଦୁ ଇଡ୍‌ଏନ୍‌ ମାରି ଅଡି ଆଡ୍‍ଗି ଇଡ୍‌ଏର୍‌, ମାତର୍‌ ଦିୱା ଇଡ୍‌ନି ବାଡିଦୁ ଇଡ୍‍ନାର୍‍, ଏଣ୍ତେସ୍‌ ଲୋଇ ଡ଼ୁଗୁନି ଲୋକୁ ଜାୟ୍‌ ସୁଡ଼ୁଦେଙ୍ଗ୍‍ ଆଟ୍‍ନାର୍‍ ।
LUK 11:34 ମି କାଣ୍‌ଗା ମେନ୍ଦଲ୍‌ତି ଦିୱା । ଏସ୍ତିୱାଲେ ମି କାଣ୍‌ଗା ନେଗିକା ତେବାନାତ୍‍, ନାସ୍ତିୱାଲେ ମି ୱିଜୁ ମେନ୍ଧଲ୍‍ ବା ଜାୟ୍‍ୱାଜା ଆନାତ୍‌; ମାତର୍‌ ଏସ୍ତିୱାଲେ କାଣ୍‌ଗା ତାଗ୍‌ଇକା ମାନାତ୍‌, ନାସ୍ତିୱାଲେ ମି ମେନ୍ଧଲ୍‍ ବା ସିକାଟିୱାଜା ଆନାତ୍‌ ।
LUK 11:35 ମାରି ଜାଗାର୍‌ତା, ଏଣ୍ତେସ୍‌ ମି ଜିବନ୍‌ତି ଜାୟ୍‌ ସିକାଟି ଆଏତ୍‍ ।
LUK 11:36 ଜଦି ମି ୱିଜୁ ମେନ୍ଧଲ୍‍ ଜାୟ୍‌ ଆନାତ୍‌ ମାରି ଆବେଣି ଇନି ବାଡିଦୁ ସିକାଟି ତେବାଏତ୍‍, ଆତିଙ୍ଗ୍‌ ଦିୱା ଏଣ୍ତେସ୍‌ ଜାୟ୍‍ତୁ ମିଙ୍ଗିଁ ଜାୟ୍‌ ସିନାତ୍‌, ଆୟାୱାଜା ମି ୱିଜୁ ମେନ୍ଧଲ୍‍ ଜାୟ୍‌ ଆନାତ୍‌ ।”
LUK 11:37 ଜିସୁ ମାଟା ଇନ୍‍ଜିମାର୍‍ଇ ୱାଲେ ଅରେନ୍‍ ପାରୁସି ୱାନିଙ୍ଗ୍‌ ୱାନି ଇନ୍‌ଡ୍ର ଉଣ୍ତେଙ୍ଗ୍‌ କୁକ୍‍ତାନ୍‍, ମାରି ୱାନ୍‌ ଇନ୍‌ଡ୍ର ଡ଼ୁଗିତାନ୍‍ ନୋ ଉଣ୍ତେଙ୍ଗ୍‌ ବାସ୍‌ତାନ୍‌ ।
LUK 11:38 ମାତର୍‌ ଉଣି ଆଗ୍‌ଡ଼ି ୱାନ୍‌ ଜେ ଆଗ୍‌ଡ଼ି ଏର୍‌ ନର୍‍ବାଏନ୍‍ ମାର୍‌ଆନ୍‌, ଇକା ସୁଡ଼ୁଜି ଆୟା ପାରୁସି କାବା ଆତାନ୍‌ ।
LUK 11:39 ଆବେଟ୍‌ ପ୍ରବୁ ୱାନିଙ୍ଗ୍‌ ଇର୍‌ଆନ୍‌, ମିର୍‌ ପାରୁସିର୍‌ ଗାଦେ ଡୁବାଇ ନି ସାଡ଼୍‍ୱାଦି ଆତ୍‌ରେ ନର୍‍ନିଦେର୍‍, ମାତର୍‌ ମି ଲୋଇ ଡଙ୍ଗାଁକିନିପାଣି ନି ତାଗ୍‌ଇପାଣି ପୁରାମାନାତ୍‍ ।
LUK 11:40 ଏ ବୁଦିସିଲିକିଦେର୍‍, ଏନ୍‌ ଆତ୍‌ରେ ତିଆର୍‌ କିତାନ୍‌, ୱାନ୍‌ ଇନିକା ଲୋଇ ବା ତିଆର୍‌ କିଏତାନ୍‌ ?
LUK 11:41 ମି ଲବ୍ରାଦାନ୍‍ ଆମାକା ଉଣ୍ତାକିତିମାନିଦେର୍‍ ଆକା କାକୁର୍ତି ଲୋକାଙ୍ଗ୍‌ ଦାନ୍‌ ସିଦୁ ଆରିଙ୍ଗ୍‌ ମିର୍‌ ପୁରା ନର୍‌ଆନିଦେର୍‍ ।
LUK 11:42 ମାତର୍‌ ଚି, ଦଣ୍ଡ୍‌ ପୋଇନି ପାରୁସିର୍‌, ଇରିଙ୍ଗ୍‌ ମିର୍‌ ପୋଦିନା, ଆରୁଦ ମାରି ୱିଜୁଜାତିଦି କୁସାପୁଲା ଦସ୍‍ବାଗ୍‍ତାନ୍‍ ଉଣ୍ତ୍ରି ବାଗ୍ ମାପୁରୁଙ୍ଗୁଁ ଦାନ୍‌ ସିନିଦେର୍‍, ମାରି ଆଇ ଲୋକାଙ୍ଗ୍‌ ନ୍ୟାୟ୍‌ ବିସାର୍‌ତୁ ଦୟା ତର୍‌ତେଙ୍ଗ୍‍ଁ ମାରି ମାପୁରୁଙ୍ଗୁଁ ଜିବନ୍‍ନୋଦେଙ୍ଗ୍‍ ବାଣାନିଦେର୍‍; ମାତର୍‌ ଇୟାୱିଜୁ କିନିକା ମାରି ଆଇକା ୱିଜୁ ବାଣାଇକା ମାନାତ୍‌ ।
LUK 11:43 “ଚି, ପାରୁସିର୍‌ ମିର୍‌ ଦଣ୍ଡ୍‌ ପୟ୍‌ନିଦେର୍‌, ଇରିଙ୍ଗ୍‌ ମିର୍‌ ପାର୍‍ତନାକିନି ଇଲ୍‌କାଙ୍ଗ୍‌ ପେରି ବାଡି ମାରି ସାତାସାଉକାଦୁ ମାଡ଼ିସ୍‍କିନିକା ପୋୟ୍‍ଦେଙ୍ଗ୍‍ ଅଡ଼୍‍ବିନିଦେର୍‍ ।
LUK 11:44 ଚି, ମିର୍‌ ଦଣ୍ଡ୍‌ ପୟ୍‌ନିଦେର୍‌, ଇରିଙ୍ଗ୍‌ ମିର୍‌ ତର୍‍ଇ ମୁସ୍‌ତି ବାଡ଼ିଦି ୱାଜା; ତାନି ମୁସ୍‌କୁ ନେସ୍‌ଏଣ୍ତା ବୁଲାସାଲାନିକାର୍‍ ଲୋକୁ ଆକା ମୁସ୍‌ତି ବାଡି ଇଜି ନେସ୍‌ଏର୍‌ ।”
LUK 11:45 ଆବେନୁ ସାସ୍ତ୍ରିରି ମାଣାନ୍‌ ଅରେନ୍‍ ୱାନିଙ୍ଗ୍‌ ଇର୍ହାନ୍‌, “ଏ ଗୁରୁ, ଇକା ଇନ୍‌ଜି ନିନୁ ମାଙ୍ଗିଁ ବା ଅପମାନ୍‍ କିଜିନି ।”
LUK 11:46 ୱାନ୍‌ ଇର୍ହାନ୍‌, “ଚି, ସାସ୍ତ୍ରିର୍‍ ଯେ ମିର୍‌ ମିର୍‌ ବା ଦଣ୍ଡ୍‌ ପୋଇନିଦେର୍‍, ଇରିଙ୍ଗ୍‌ ମିର୍‌ ଲୋକାଙ୍ଗ୍‌ ନିୟମ୍‍କୁ ମାନାଦେଙ୍ଗ୍‌ ଇଜିନିଦେର୍‌ ମାତର୍‌ ନିଜେ ମିର୍‌ ଏସାଙ୍ଗ୍‍ବା ଇବେଣି ଉନ୍‌ଡ୍ରି ନିୟମ୍‌ ବା ମାନାଦେଙ୍ଗ୍‌ ସାହାଜ୍ୟକିଇଜିନିଦେର୍‍ ।
LUK 11:47 ଚି, ମିର୍‌ ଦଣ୍ଡ୍‌ ପୟ୍‌ନିଦେର୍‌, ଇରିଙ୍ଗ୍‌ ମିର୍‌ ବାବବାଦିରି ମୁସ୍‌ନି ଗୁଟା ତିଆର୍‌ କିଜିମାନିଦେର୍‍, ଆମାୱାରିଙ୍ଗ୍‍ ମି ପୁର୍ବେଦିଡକ୍‌ରାଦାଦାର୍‌ ୱାରିଙ୍ଗ୍‌ ସାୟାମାର୍‌ଗା ଡାକ୍‌ତା ମାର୍‍ଆର୍‍ ।
LUK 11:48 ମାରି, ମି ପୁର୍ବେଦିଡକ୍‌ରାଦାଦାରି ପାଣିଦି ବିସୟ୍‌ତାନ୍‌ ମିର୍‌ ସାକି ଆନିଦେର୍‌ ମାରି ଆକା ରାଜି ଆଜିନିଦେର୍‍; ଇରିଙ୍ଗ୍‌ ୱାର୍‌ ଗାଦେ ବାବବାଦିରିଙ୍ଗ୍ ସାୟାମାର୍‌ଗା ଡାକ୍‌ତା ମାର୍‍ଆର୍‍, ମାତର୍‌ ମିର୍‌ ୱାରିଦି ମୁସ୍‌ନିବାଡି ତିଆର୍‌ କିଜିନିଦେର୍‌ ।
LUK 11:49 ଆଦେଙ୍ଗ୍‌ ମାପୁରୁ ବା ନିଜେଦି ବୁଦିଦାନ୍‍ ଇର୍‌ଆ ମାନାନ୍‌, ମାପ୍‌ ୱାରି ଲାକ୍‌ତୁ ବାବବାଦି ନି ପ୍ରେରିତ ସିସୁରିଙ୍ଗ୍‌ ପୋକ୍‌ନା; ୱାରି ଲୋଇରାନ୍‌ ଏଙ୍ଗ୍‌ ଏଙ୍ଗ୍‌ ୱାର୍‌ ସାୟାମାର୍‌ଗା ଡାକ୍‌ନାର୍‌ ମାରି ଏଙ୍ଗ୍‌ ଏଙ୍ଗ୍‌ କାସ୍ଟୁ ସିନାର୍‍,
LUK 11:50 ଇୟା ଜଗ୍‍ତି ଲୋକୁ ଦୁନିଆଦି ତିଆର୍‌ଆତି ଆଗ୍‍ଡ଼ିରାନ୍‍ ୱିଜେରେ ବାବବାଦିରି ସାୟାମାର୍‌ଗା ଡାକ୍‌ତିମାନି ଉଣ୍ତିଙ୍ଗ୍‌ ଦଣ୍ଡ୍‌ ପୟ୍‌ନାର୍‌ ।
LUK 11:51 ହେବଲ୍‌ତି ଡାକ୍‍ତିମାଣୁକୁ ଆରାମ୍‌ କିଜି ଜିକରିୟଦି ସାନ୍ଦି, ଆମାୱାନିଙ୍ଗ୍‌ ପୁଜାକିନି ବେଦି ମାରି ପବିତ୍ର ବାଡିଦୁ ସାୟାମାର୍‌ଗାଡାକ୍‍ତା ମାର୍‌ଆର୍‌, ହୁଁ, ନାନ୍ ମିଙ୍ଗିଁ ଇଜିନା, ଇୟା ଜଗ୍‍ତି ଲୋକୁ ଆୟା ୱିଜେରି ଉଣ୍ତିଙ୍ଗ୍‌ ଦଣ୍ଡ୍‌ ବଗାନାର୍‍ ।
LUK 11:52 “ଚି, ଦଣ୍ଡ୍‌ ପୟ୍‌ନି ସାସ୍ତ୍ରିର୍‍, ଇରିଙ୍ଗ୍‌ ମିର୍‌ ବୁଦିଦି କୁସିକାଣ୍ତି ନିଜେ ଇଟ୍‍ତିଦେର୍‍; ମିର୍‌ ନିଜେନିଜେ ଡ଼ୁଗ୍‍ଇତିଦେର୍‍ ମାରି ଡ଼ୁଗୁଦେଙ୍ଗ୍‍ ବଦାକିତି ଲୋକାଙ୍ଗ୍‌ ସାରି ସିଇତିଦେର୍‍ ।”
LUK 11:53 ମାରି, ଜିସୁ ଆବେଟ୍‌କୁ ସତିସର୍‌ଇ ୱେନ୍‌କା ସାସ୍ତ୍ରିର୍‍ ନି ପାରୁସିର୍‌ ନାଣ୍ତ ରିସା ଆଜି,
LUK 11:54 ୱାନି ୱେୟୁଦାନ୍‌ ଇନି ତାଗ୍‌ଇ ମାଟା ଆସ୍‌ସି ଉଣ୍ତିଙ୍ଗ୍‌ ଉରିଦୁ ଆର୍‍ପ୍‍ତେଙ୍ଗ୍‍ ୱାନିଙ୍ଗ୍‌ ନାଣ୍ତ ବିସୟ୍‌ତାନ୍‌ ମାଟା ୱେନ୍‍ବାଦେଙ୍ଗ୍‍ ଆସ୍‌ତାର୍‌ ।
LUK 12:1 ଆବେନୁ ଅଜାର୍‌ଅଜାର୍‌ ଲୋକୁ ଉଣ୍ତାତାର୍‌ ନୋ ନିଜେ ନିଜେଦି ମୁସ୍‌କୁ ମାଟ୍‌ସିସାଜିମାର୍ହାର୍‌; ନାସ୍ତିୱାଲେ ଜିସୁ ଆଗିଡ଼ି ନିଜେଦି ସିସୁରିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, ପାରୁସିର୍‌ କମିର୍‌ ୱାଜା ଟକ୍‍ତି ବିସୟ୍‌ତାନ୍‌ ଜାଗାର୍‌ତା ମାନ୍‌ଡ଼୍ରୁ ।
LUK 12:2 ମାତର୍‌ ଆମାକା ମାର୍‍ଗିତା ମାନାତ୍‌, ଆକା ତରାନାତ୍‍ । ମାରି ୱିଜୁ ବିସୟ୍‌ ତରାନାତ୍‌ ।
LUK 12:3 ମିର୍‌ ଆମାକା ସିକାଟିଦୁ ଇର୍‌ଇମାନିଦେର୍‌, ଆୟାୱିଜୁ ଜାୟ୍‌ତୁ ୱେନିଦେର୍‌, ମାରି ଆମାକା ନେସ୍‌ଇ ୱାଜା ବାକ୍‍ରା ଲୋଇ ମାରାକ୍‌ସି ଇର୍‌ଇମାନିଦେର୍‌, ଆକା ଇଲୁଦି ସାତ୍ ମୁସ୍‌କୁ ପ୍ରଚାର୍‌ କିଆୟ୍‌ଆନାତ୍‌ ।
LUK 12:4 ମାତର୍‌ ନା ତଡ଼୍‍କୁ ଜେ ମିର୍‌, ମିଙ୍ଗିଁ ନାନ୍ ଇଜିନା, ଏମାକାର୍‌ ମେନ୍ଦଲ୍‌ତିଙ୍ଗ୍‌ କାତ୍‌ନାର୍‌, ମାତର୍‌ ତାନେୱେନ୍‌କା ମାରି ଇନିକା କିଦେଙ୍ଗ୍‌ ଆଟ୍‍ଏର୍‍, ୱାରିଙ୍ଗ୍‌ ତିଲାମାଟ୍‌ ।
LUK 12:5 ମାତର୍‌ ଏଙ୍ଗ୍‌ ତିଲାନିଦେର୍‌, ଆକା ନାନ୍ ମିଙ୍ଗିଁ ୱେର୍‌ନା; ସାୟାମାର୍‌ଗାଡାକ୍‌ତି ୱେନ୍‌କା ନରକଦୁ ପୋକ୍‌ନି ଉଣ୍ତିଙ୍ଗ୍‌ ଆମା ମାପୁରୁଦି ଅଦିକାର୍‌ ମାନାତ୍‌, ୱାନିଙ୍ଗ୍‌ ତିଲାଦୁ; ହୁଁ, ନାନ୍ ମିଙ୍ଗିଁ ସତ୍‌ ଇଜିନା, ୱାନିଙ୍ଗ୍‌ ତିଲାଦୁ ।
LUK 12:6 ପାସ୍‌ଗୋଟା ସାଡ଼ାପୋଟିଙ୍ଗ୍‌ ଇନିକା ଉଣା ଡାବୁଆଙ୍ଗ୍‍ଁ ପୋର୍‌ଏର୍‌ ନୋ ? ମାରି, ୱାନିକା ମାଣ୍‌କୁ ଉଣ୍ତ୍ରିତାନିଙ୍ଗ୍‌ ବା ମାପୁରୁ ବାଣାଏନ୍‌ ।
LUK 12:7 ମାତର୍‌ ମି ତାଲାଦି କୁକୁଟି ବା ୱିଜୁ ଲେକିସ୍‌ କିଆୟ୍‍ଆତାମାନାତ୍‍ । ତିଲାମାଟ୍‌; ମିର୍‌ ନାଣ୍ତ ସାଡ଼ାପୋଟିଙ୍ଗାଁ ମାଣାନ୍‌ ନାଣ୍ତ !
LUK 12:8 ମାରି, ନାନ୍ ମିଙ୍ଗିଁ ଇଜିନା, ଏନ୍‌ ଲୋକା ଆଗିଡ଼ି ନାଙ୍ଗିଁ ମାନାନାର୍‌, ମନୁଷ୍ୟପୁତ୍ର ବା ମାପୁରୁଦି ମୁସ୍‌କୁପୁର୍‌ତି ଦୁତ୍‍କା ଆଗ୍‌ଡ଼ି ୱାନିଙ୍ଗ୍‌ ମାନାନାର୍‌;
LUK 12:9 ମାତର୍‌ ଏନ୍‌ ଲୋକା ଆଗିଡ଼ି ନାଙ୍ଗିଁ ମାନାଏନ୍‌, ୱାନ୍‌ ମାପୁରୁଦି ଦୁତ୍‌କା ଆଗିଡ଼ି ମାନାକିବିସ୍‌ କିଏର୍‌ ।
LUK 12:10 ମାରି, ଏନ୍‌ବା ମନୁଷ୍ୟପୁତ୍ରଦି ବିରଦ୍‌ତାନ୍‌ ମାଟା ଇନ୍‌ନାନ୍‌, ୱାନିଙ୍ଗ୍‌ କେମା ପୁଟ୍‌ନାତ୍‌; ମାତର୍‌ ଏନ୍‌ ପବିତ୍ରଆତ୍ମାଦି ବିରଦ୍‌ତାନ୍‌ ନିନ୍ଦା ମାଟା ଇନ୍‌ନାନ୍‌, ୱାନିଙ୍ଗ୍‌ କେମା ପୁଟ୍‌ଏତ୍‌ ।
LUK 12:11 “ମାରି, ଏସ୍ତିୱାଲେ ୱାର୍‌ ମିଙ୍ଗିଁ ପାର୍‌ତନା ଇଲୁଦୁ, ସାସନ୍‌କିନିୱାରିମାନୁ ମାରି ଅଦିକାର୍‍ ପୋଇତି ଲୋକା ଲାକ୍‌ତୁ ଅନାର୍‍, ନାସ୍ତିୱାଲେ ମିର୍‌ ମି ତରିଟାନ୍‌ ଏଣ୍ତେସ୍‌ମାରି ଇନି ମାଟା ଇଣ୍ତ୍ରେଙ୍ଗ୍‌ ଆନାତ୍‌ ମାରି ଇନିକା ଇନା, ଆୟା ବିସୟ୍‌ତାନ୍‌ ଚିନ୍ତା କିମାଟ୍‌ ।
LUK 12:12 ଇରିଙ୍ଗ୍‌ ଇନିକା ଇଣ୍ତ୍ରେଙ୍ଗ୍‌ ଆନାତ୍‌, ଆକା ପବିତ୍ର ଆତ୍ମା ଆୟାୱାଲେ ମିଙ୍ଗିଁ ଅଜା କିନାତ୍‌ ।”
LUK 12:13 ଲୋକା ଲୋଇରାନ୍‌ ଅରେନ୍‍ ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ, ନା ତଡ଼ାନ୍‌ତିଙ୍ଗ୍‌ ନା ୱାଲେ ବୁବାଦି ଦନ୍‌ ସମ୍ପତ୍ତି ବାଟା କିଜ ସିଦେଙ୍ଗ୍‍ ଇନ୍‌ଆଁ ।”
LUK 12:14 ମାତର୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, ଏ ତଡ଼୍‍, ଏନ୍‌ ନାଙ୍ଗିଁ ମି ଦନ୍‍ ସମ୍ପତି ମୁସ୍‌କୁ ବିସାର୍‌ କିନିକାନ୍‌ ମାରି ବାଟା କିଜି ସିଦେଙ୍ଗ୍‍ ନିଲପ୍‍ତାନ୍‌ ?
LUK 12:15 ମାରି, ୱାନ୍‌ ୱାରିଙ୍ଗ୍‌ ଇର୍‌ଆନ୍‌, ଜାଗ୍‌ରାତା, ୱିଜୁଜାତିଦି ଆସାଦାନ୍‍ ନିଜେ ନିଜେଦିଙ୍ଗ୍‌ ଆକ ଇଡ୍‌ଦୁ, ଇରିଙ୍ଗ୍‌ ଅରେନ୍‍ ଲୋକ୍‌ତି ଜିବନ୍‌ ୱାନି ଦନ୍‌ ସମ୍ପତ୍ତି ମୁସ୍‌କୁ ଆସାଏନ୍‍ ।
LUK 12:16 ମାରି ୱାନ୍‌ ୱାରିଙ୍ଗ୍‌ ଇୟା କାତା ଇର୍‌ଆନ୍‌, ଅରେନ୍‍ ମାଜନ୍‌ ଲୋକ୍‌ତି କିଡ଼ିଇଦୁ ନାଣ୍ତ ପାସି ଆତାତ୍‌ ।
LUK 12:17 ଆବେଟ୍‌ ୱାନ୍‌ ମନ୍‌ତୁ ମନ୍‌ତୁ ଅଡ଼୍‍ବିଜି ଇର୍‌ଆନ୍‌, ଇନିକା କିନା ? ଇରିଙ୍ଗ୍‌ ନା ପାସି ଉଣ୍ତା କିଜି ଇଡ୍‌ଦେଙ୍ଗ୍‌ ବାଡି ସିଲେତ୍‍ ।
LUK 12:18 ମାରି, ୱାନ୍‌ ଇର୍‌ଆନ୍‌, ଇକା କିନା; ନାନ୍ ଆଗିଡ଼ି ଇଡ୍‍ନି କଲ୍‍କି ରୁକ୍‍ସି ପେରି ପେରି କଲ୍‍କିଙ୍ଗ୍‍ଁ କିଜି ତିଆର୍‌ କିନା ମାରି ଆୟାୱିଜୁ ମାନୁ ନା ପାସି ଉଣ୍ତା କିଜି ଇଡିନା,
LUK 12:19 ମାରି ନାନ୍ ନା ଜିବନ୍‌ତିଙ୍ଗ୍‌ ଇନା, ରେ ଜିବନ୍‌, ଏସ ବାର୍ସେକ୍‌ତି ଉଣ୍ତିଙ୍ଗ୍‌ ନି ଉଣିତିନିକା ନାଣ୍ତ ପାସି ଉଣ୍ତାତାମାନାତ୍‌, ରମ୍‌ଆ, ଉଣୁଆ, ୱେଡ଼ିକା କିଆ;
LUK 12:20 ମାତର୍‌ ମାପୁରୁ ୱାନିଙ୍ଗ୍‌ ଇର୍‌ଆନ୍‌, ଏ ବୁଦି ସିଲିକିନ୍ଦା, ନେର୍‌ ନାଡ଼ା ନି ଜିବନ୍‌ ନିବାଣାକୁ ଅନା; ଆବେଟ୍‌କୁ ନିନ୍‌ ଆମାକା ଆମାକା ନିଜେଦିଙ୍ଗ୍‍ ଉଣ୍ତା କିତିମାନି, ଆୟାୱିଜୁ ଏନ୍ଧି ଆନାତ୍‌ ?
LUK 12:21 ଏନ୍‌ ନିଜେଦି ଉଣ୍ତିଙ୍ଗ୍‌ ଦନ୍‌ ଉଣ୍ତା କିନାନ୍‍, “ମାତର୍‌ ମାପୁରୁଦି ଆଗ୍‌ଡ଼ି ମାଜନ୍‌ ଆଏନ୍‍, ୱାନି ଉଣ୍ତିଙ୍ଗ୍‌ ଇୟାୱାଜା ଗଟେଆନାତ୍‌ ।”
LUK 12:22 ଜିସୁ ନିଜେଦି ସିସୁରିଙ୍ଗ୍‌ ଇର୍‌ଆନ୍‌, ଇୟାଉଣ୍ତିଙ୍ଗ୍‌ ନାନ୍ ଇଜିନା, ଇନିକା ଉଣା, ଇୟାୱାଜା ଇଜି ମି ଜିବନ୍‌ତି ଉଣ୍ତିଙ୍ଗ୍‌, ମାରି ଇନିକା ଆରାନା, ଇୟାୱାଜା ଇଜି ମି ମେନ୍ଦଲ୍‌ତି ଉଣ୍ତିଙ୍ଗ୍‌ ବା ସିନ୍ତା କିମାଟ୍‌ ।
LUK 12:23 ଇରିଙ୍ଗ୍‌ ଉଣି ବାଦୁଲୁ ଜିବନ୍‌ ମାରି ଆଙ୍ଗିଁ ଆରାନି ବାଦୁଲୁ ମେନ୍ଧଲ୍‍ ପେରିକା ।
LUK 12:24 କାକିଆଙ୍ଗ୍‌ଁ ବିସୟ୍‌ ଅଡ଼୍‌ବିଜ ସୁଡ଼ୁଦୁ, ୱାକ୍‍ ୱିତୁ ୱିତ୍‌ଉ କି କୟ୍‌ଉ, ମାରି ତାମେ ଇଲୁ କି ପାସି ଇଡ୍‌ନି କଲ୍‍କି ସିଲେତ୍‌, ମାରି ମାପୁରୁ ୱାନିକାଙ୍ଗ୍‌ କାଦି ସିନାନ୍‌; ମିର୍‌ ପଟିଙ୍ଗାଁ ବାଦୁଲୁ ଏସ ନାଣ୍ତ ପେରିକିଦେର୍‌ !
LUK 12:25 ମାରି, ମି ଲୋଇ ଏନ୍‌ ସିନ୍ତା କିଜି କିଜି ନିଜେଦି ବାର୍ସେକ୍‌ ଉଣ୍ତ୍ରି ମୁରା ପିରିସ୍‍କିଦେଙ୍ଗ୍‌ ଆଟ୍‍ନାନ୍‍ ?
LUK 12:26 ମିର୍‌ ଜଦି ୱିଜୁମାଣାନା ଇସ୍ରି ବିସୟତିଙ୍ଗ୍‌ ବା କିଦେଙ୍ଗ୍‌ ସାକ୍ତି ସିଲେତ୍‌, ଆରିଙ୍ଗ୍‌ ଆଇ ୱିଜୁ ବିସୟତି ଉଣ୍ତିଙ୍ଗ୍‌ ଏନ୍ଧା ସିନ୍ତା କିଜିନିଦେର୍‌ ?
LUK 12:27 ପୁଙ୍ଗୁଁକାଙ୍ଗ୍‍ ଅଡ଼୍‌ବିଜ ସୁଡ଼ୁଦୁ, ୱାକ୍‍ ଏଣ୍ତେସ୍‌ ନୁଲ୍ କୟ୍‌ଉ କି ୱାତି ଗୁତ୍‌ଉ; ନାନ୍ ମିଙ୍ଗିଁ ଇଜିନା, ରାଜା ସଲମନ୍‍ ବା ଆୟା ଦନ୍‌ତି ପୁଙ୍ଗୁଁକା ଲୋଇରାନ୍‌ ଏମେ ଉଣ୍ତ୍ରି ପୁଙ୍ଗୁଁତି ୱାଜା ବା ସୁନ୍ଦର୍‌ ଆଦେଙ୍ଗ୍‌ ଆଟ୍‍ଏନ୍‍ ମାର୍‌ଆନ୍‌ ।
LUK 12:28 ମାତର୍‌ ନେର୍‌ ଆମା ଲାଟା କିଡ଼ିଇଦୁ ମାନାତ୍‌, ମାରି ୱିଗେରିଙ୍ଗ୍‌ ସିସୁଗୁଟାଦୁ ପୋକ୍‌ନାର୍‌, ତାନେଙ୍ଗ୍‌ ଜଦି ମାପୁରୁ ଇୟାୱାଜା ରୁପ୍‌ ସିନାନ୍‌, ଆରିଙ୍ଗ୍‌, ଏ ଉଣା ବିସ୍‍ବାସ୍‍ସିର୍‍, ୱାନ୍‌ ମିଙ୍ଗିଁ ଏସ ନାଣ୍ତ ସିଏନ୍‌ !
LUK 12:29 ମାରି ଇନିକା ତିନା ମାରି ଇନିକା ଉଣା, ଆକା ମିର୍‌ ପୋଇଜି ବୁଲାମାଟ୍‌ ମାରି ସିନ୍ତା କିମାଟ୍‌,
LUK 12:30 ଇରିଙ୍ଗ୍‌ ଦୁନିଆଦି ଅଣଜିହୁଦି ଲୋକୁ ଇୟାୱିଜୁ ବିସୟ୍‌ ପୋଇଜି ବୁଲାନାର୍‌; ମାତର୍‌ ଇୟାୱିଜୁ ବିସୟ୍‌ ଜେ ମିଙ୍ଗିଁ ଦର୍‌କାର୍‌ ମାନାତ୍‌, ଆକା ମି ବୁବା ନେସ୍‌ନାନ୍‌ ।
LUK 12:31 ମିର୍‌ ମାପୁରୁଦି ରାଜି ବିସୟ୍‌ ପୋୟଦୁ, ମାରି ଇୟାୱିଜୁ ବିସୟ୍‌ ବା ମିଙ୍ଗିଁ ପୁଟ୍‌ନାତ୍‌ ।
LUK 12:32 ଏ ଇସ୍ରି ମାନ୍ଦା, ତିଲାମାଟ୍‌, ଇରିଙ୍ଗ୍‌ ମିଙ୍ଗିଁ ଆୟା ରାଜି ସିଦେଙ୍ଗ୍‍ ଇଜି ମି ମୁସ୍‌କୁପୁର୍‌ତି ବୁବା ବଦା କିଜିନାନ୍‌ ।
LUK 12:33 ମିଙ୍ଗିଁ ଆମାକା ମାନାତ୍‌, ଆକା ପୋର୍‌ଜି କାକୁର୍ତି ଲୋକାଙ୍ଗ୍‌ ସିଦୁ; ଆମାକା ସେଏଣ୍ଡ୍‌ ଆଏତ୍‍, ଇୟାୱାଜା ମଣି ନିଜେ ନିଜେଦି ଉଣ୍ତିଙ୍ଗ୍‌ ତିଆର୍‌ କିଦୁ; ଏମେମାନୁ ଡଙ୍ଗାଁର୍‌ଏନ୍‌ ଲାକ୍‌ତୁ ରେଏନ୍‌ ମାରି ପିଡ଼ୁକୁ ତିନ୍‌ଉ, ଇୟାୱାଜା ମୁସ୍‌କୁପୁର୍‌ତୁ ନାଷ୍ଟୁ ଆଇ ଦନ୍‌ ଉଣ୍ତା କିଦୁ,
LUK 12:34 ଇରିଙ୍ଗ୍‌ ଏମେମାନୁ ମି ଦନ୍‌, ଆବେବା ମି ମୋନ୍‌ ।
LUK 12:35 ପାଣିକିନି ଉଣ୍ତିଙ୍ଗ୍‌ ୱିଜୁଦିନ୍‌ ତିଆର୍‌ ଆଜି ମାନ୍‌ଡ଼୍ରୁ ମାରି ମି ଦିୱେଙ୍ଗ୍‌ କାସିସ୍‌ କିଜ ଇଡ୍‌ଦୁ;
LUK 12:36 ମାରି ମାଲିକ୍‌ ପେଡ଼ି ଇଣ୍ତ୍ରରାନ୍‌ ଡ଼େସିୱାଜି ସେର୍‌ଲାଦୁ କତ୍‌ନି ଦାପେ ଏମେ ଲୋକୁ ୱାନି ଉଣ୍ତିଙ୍ଗ୍‌ ଆୟା ଦାପ୍ରେ ସେର୍‍ଲା ରେତେଙ୍ଗ୍‌ କାପ୍‌କିଜି ତେବାନାନ୍‌, ମିର୍‌ ୱାରି ୱାଜା ଆଜି ମାନ୍‌ଡ଼୍ରୁ ।
LUK 12:37 ମାଲିକ୍‌ ୱାଜି ଆମା ଗତିମୁରୁଲିରିଙ୍ଗ୍‌ ଜାଗ୍‌ରାତା ମାନିକା ସୁଣାନ୍‌, ୱାର୍‌ ଦନ୍ୟ; ନାନ୍ ମିଙ୍ଗିଁ ସତ୍‌ ଇଜିନା, ମାଲିକ୍‌ ବା ୱାରି ସେବାକିଦେଙ୍ଗ୍‍ ନିଜେଦିଙ୍ଗ୍‌ ତିଆର୍‌ କିନାନ୍‌, ୱାନ୍‌ ୱାରିଙ୍ଗ୍‌ ବାସ୍‌ତେଙ୍ଗ୍‌ ଇଜି ଇନାନ୍‌ ମାରି ନିଜେ କାଦି ବାଟାକିଜି ସିନାନ୍‌ ।
LUK 12:38 ମାରି, ୱାନ୍‌ ଜଦି ମାଜେର୍‌ ନାଡ଼ା ନୋ କର୍‍ରୁ କେଡ଼ିପି ବା ୱାଜି ୱାରିଙ୍ଗ୍‌ ଆୟାୱାଜା ସୁଣାନ୍‌, ଆତିଙ୍ଗ୍‌ ଆୟା ସାକର୍‍କୁ ଦନ୍ୟ ।
LUK 12:39 ମାତର୍‌ ଇକା ନେସ୍‌ସୋ ମାନ୍‌ଡ୍ରୁ, ଏସିୱାଲେ ଡଙ୍ଗାଁର୍‌ଏନ୍‌ ୱାନାନ୍‌, ଇକା ଇଲୁଦି ମାଲିକ୍‌ ଏସ୍‌କାଙ୍ଗ୍‌ ନେସ୍‌ନାନ୍‌, ଆତିଙ୍ଗ୍‌ ୱାନ୍‌ ନିଜେଦି ଇଲ୍‌ତୁ ଡଙ୍ଗାଁ କିଦେଙ୍ଗ୍‌ ସିଏତାନ୍‌ମାନ୍ଧି ।
LUK 12:40 ମିର୍‌ ବା ୱିଜୁଦିନ୍‌ ଜାଗାର୍‌ତା ଆଜମାନ୍‌ଡ୍ରୁ, ଇରିଙ୍ଗ୍‌ ଏସ୍ତିୱାଲେ ମିର୍‌ ଅଡ଼୍‌ବିଇମାନିଦେର୍‌, ଆୟାୱାଲେ ମନୁସ୍ୟପୁତ୍ର ୱାନାନ୍‌ ।
LUK 12:41 ଆବେଟ୍‌ ପିତର୍‌ ଇର୍‌ଆନ୍‌, “ଏ ପ୍ରବୁ, ନିନ୍‌ନେ ମାଙ୍ଗିଁ ନୋ ୱିଜେରିଙ୍ଗ୍‌ ଇୟା କାତା ଇଜିନି ?”
LUK 12:42 ପ୍ରବୁ ଇର୍‌ଆନ୍‌, “ବିସ୍‌ବାସ୍‌ ମାରି ବୁଦିଦି ସାକର୍‌ ଏନ୍‌ ? ଆମାୱାନିଙ୍ଗ୍‌ ମାଲିକ୍‌ ଇଲୁ ସାଲାକିଦେଙ୍ଗ୍‌ ଇଡ୍‌ନାନ୍‌, ୱାନ୍‌ ଆଇ ସାକର୍‌କାଙ୍ଗ୍‌ ୱାରି କାଦି ସାମାନ୍‍ ବେଡ଼ାଦୁ ସିଦେଙ୍ଗ୍‍ ଇଜି ଅରେନ୍‍ ସାକର୍‌ତିଙ୍ଗ୍‌ ଇର୍‌ଆମାର୍‌ଆନ୍‌, ଆମାୱାନିଙ୍ଗ୍‌ ଇୟା ପାଣି କିଦେଙ୍ଗ୍‌ ଇଜି ମାଲିକ୍‌ ବିସ୍‌ବାସ୍‌ କିନାନ୍‌, ଆୟା ପାଣିକିନିକାନ୍‌ ଏନ୍‌ ?
LUK 12:43 ପ୍ରବୁ ଡ଼େସିୱାଜି ନିଜେଦି ଆମା ଗତିମୁରୁଲିଙ୍ଗ୍‌ ଆୟାୱାଜା କିନିକା ସୁଣାନ୍‌, ୱାନ୍‌ ଦନ୍ୟ ।
LUK 12:44 ନାନ୍ ମିଙ୍ଗିଁ ସତ୍‌ ଇଜିନା, ୱାନ୍‌ ୱାନିଙ୍ଗ୍‌ ନିଜେଦି ଦନ୍‍ ମୁସ୍‌କୁ ପାଣିୱିଜୁ କିଦେଙ୍ଗ୍‌ ସିନାନ୍‌ ।
LUK 12:45 ମାତର୍‌ ଜଦି ଆୟା ସାକର୍‌ ନା ମାଲିକ୍‌ ୱାନିକା ୱେଡ଼ାଆନାତ୍‌ ଇଜି ଅଡ଼୍‍ବିଜି ମନ୍‍ତୁ ଇଜି ସାକର୍‌କାଙ୍ଗ୍‌ ଡାକ୍‌ତେଙ୍ଗ୍‍ଁ ଇଜି ମାରି ଉଣୁଜିତିନ୍‌ଜି ସୋସ୍‍ତେଙ୍ଗ୍‌ ଆରାମ୍‌ କିନାନ୍‌,
LUK 12:46 ଆତିଙ୍ଗ୍‌ ଏମେ ନାଣ୍ତିଙ୍ଗ୍‌ ଗତିମୁରୁଲି ୱାନିଙ୍ଗ୍‍ କାପ୍‌କିଜି ମାନ୍‌ଇୱାଲେ ମାରି ଏମେ ୱେଡ଼ା ୱାନ୍‌ ନେସ୍‌ଏନ୍‌ମାନାନ୍‌, ଆୟା ନାଣ୍ତିଙ୍ଗ୍‌ ମାରି ନାସ୍ତିୱାଲେ ୱାନି ମାଲିକ୍‌ ୱାନାନ୍‌, ମାରି ମାଲିକ୍‌ ୱାନିଙ୍ଗ୍‌ ନାଣ୍ତ ଦଣ୍ଡ୍‌ ସିନାନ୍‍ । ୱାନ୍‍ ଅବିସ୍‍ବାସ୍‍ତି ଦାସ୍‌କା ଦଣ୍ତ୍‍ ପୟ୍‌ନାନ୍‌ ।
LUK 12:47 ମାରି ଆମା ଗତିମୁରୁଲି ନିଜେଦି ମାଲିକ୍‌ତି ବଦା ନେସେଇ ଜାଗ୍‌ରାତା ତେବାଏନ୍‌ ମାରି ୱାନି ବଦାଦାନ୍ ପାଣିକିଏନ୍‌ ମାନାନ୍‌, ୱାନ୍‌ ମାଡ୍‌ ମୁସ୍‌କୁ ମାଡ୍‌ ପୋଇନାନ୍‌;
LUK 12:48 ମାତର୍‌ ଏନ୍‌ ନେସ୍‌ଏଣ୍ତା ଦଣ୍ତ୍‍ତି ପାଣିକିନା ମାନାନ୍‌ ୱାନ୍‌ ଉଣା ଦଣ୍ଡ୍‌ ପୋଇନାନ୍‌ । ଆମାୱାନିଙ୍ଗ୍‌ ନାଣ୍ତ ସିତାମାନାନ୍‌, ୱାନି ମାନୁ ନାଣ୍ତ ଲସ୍‌ନାନ୍‌; ମାରି, ଆମାୱାନି ଲାକ୍‌ତୁ ନାଣ୍ତ ସିତାମାନାର୍‌ ୱାନି ମାଣ୍‌କୁ ନାଣ୍ତ ଲୋସ୍‌ନାର୍‌ ।”
LUK 12:49 “ନାନ୍ ଦୁନିଆଦୁ ସିସୁ କାସିସ୍‌କିଦେଙ୍ଗ୍‌ ୱାତାମାନା, ମାରି ଆକା ଜଦି କାସ୍‌ତାତ୍‌ନି, ଆତିଙ୍ଗ୍‌ ନାଙ୍ଗିଁ ମାରି ଇନିକା ବଦା ?
LUK 12:50 ମାତର୍‌ ନାଙ୍ଗିଁ ଉଣ୍ତ୍ରି ଡୁବନ୍‌ତୁ ଡୁବନ୍‌ ଆଦେଙ୍ଗ୍‌ ଆନାତ୍‌, ମାରି ଆକା ୱିଜିଇ ସାନ୍ଧି ନାନ୍ ଏଣ୍ତେସ୍‌ କାସ୍ଟୁ ଆଜିନା ।
LUK 12:51 ନାନ୍ ଦୁନିଆଦୁ ସାନ୍ତି ସିଦେଙ୍ଗ୍‍ ୱାତାମାନା ଇଜି ଇନିକା ମିର୍‌ ଅଡ଼୍‍ବିଜିନିଦେର୍‍ ? ସିଲେ, ନାନ୍ ମିଙ୍ଗିଁ ଇଜିନା, ମାତର୍‌ ବାଗ୍ ବାଗ୍ କିଦେଙ୍ଗ୍‌ ୱାତାମାନା ।
LUK 12:52 ଇରିଙ୍ଗ୍‌ ଆଗ୍‍ଡ଼ିରାନ୍‍ ଉଣ୍ତ୍ରି ଇନ୍‌ଡ୍ର ପାସ୍‌ ଲୋକୁ ମାର୍‌ଆର୍‌ ମାରି ରିଏରି ବିରଦ୍‌ତାନ୍‌ ମୁଏର୍‌ ମାରି ମୁଏରି ବିରଦ୍‌ତାନ୍‌ ରିଏର୍‌ ୱେର୍‍ହେ ଆନାର୍‌ ।
LUK 12:53 ମାରିସି ବିରଦ୍‌ତାନ୍‌ ବୁବାସି, ବୁବାସି ବିରଦ୍‌ତାନ୍‌ ମାରିସି, ଗାଡ଼୍‌ସି ବିରୁଦ୍‍ତାନ୍‍ ଆଇସି, ଆଇସି ବିରଦ୍‌ତାନ୍‌ ଗାଡ଼୍‌ସି, କଡ଼େସି ବିରୁଦ୍‍ତାନ୍‍ ମିମ୍‍ସି ମାରି ମିମ୍‍ସି ବିରଦ୍‌ତାନ୍‌ କଡ଼େସି ୱେର୍‍ଏ ଆନେ ।”
LUK 12:54 ମାରି, ଜିସୁ ଲୋକାଙ୍ଗ୍‌ ବା ଇର୍ହାନ୍‌, “ୱେଡ଼ାଆର୍‌ନି ତରିନ୍‍ ବାଦଡ଼୍‍ ନିଙ୍ଗିଁକା ସୁଡ଼ୁତିଙ୍ଗ୍‌ ଆୟାଦାପ୍ରେ ମିର୍‌ ଇନିଦେର୍‌, ପିରୁ ୱାଜିନାତ୍‍, ମାରି ଆୟାୱାଜା ଗଟାନାତ୍‍;
LUK 12:55 ମାରି, ଉଣେରି ତରିଟାନ୍‍ ଗାଲି ୱାତିଙ୍ଗ୍‍ ମିର୍‌ ଇନିଦେର୍‌, ନାଣ୍ତ ତେର୍‍ୱେଲ୍‍ ଆନାତ୍‌, ମାରି ଆୟାୱାଜା ଗଟାନାତ୍‌ ।
LUK 12:56 ଏ ସୁରିୱାର୍‍ଗିନିକିଦେର୍‍, ମିର୍‌ ଦୁନିଆ ମାରି ବାଦଡ଼୍‍ତି ସିନା ନେସ୍‌ତେଙ୍ଗ୍‌ ଆଟ୍‍ସିନିଦେର୍‍, ମାତର୍‌ ଇୟା ଦିନ୍‍ତି ସିନେଙ୍ଗ୍‍ ୱିଜୁ ଏଣ୍ତେସ୍‌ ନେସ୍‌ତେଙ୍ଗ୍‌ ଆଟ୍‍ଇଜିନିଦେର୍‍ ?”
LUK 12:57 ମାରି, ନିଜେନିଜେ ଏନ୍ଦା ଆମାକା ନେଗିକା ବିସାର୍‌ କିଦେଙ୍ଗ୍‌ ଆଟ୍‍ଇଜିନିଦେର୍‍ ?
LUK 12:58 ଜଦି ମିର୍‌ ମି ବିରଦ୍‌ ଲୋକ୍‍ତିୱାଲେ ନ୍ୟାୟ୍‌ କିନିବାଡିଦୁ ସଲ୍‍ସିନିଦେର୍‍, ଆରିଙ୍ଗ୍‌ ସାରିଦୁ ୱାନିୱାଲେ ବୁଜାଜିସାଦେଙ୍ଗ୍‍ ସେସ୍ଟା କିଦୁ । ଆକା ଆଏତିଙ୍ଗ୍‍ ୱାନ୍‌ ନିଙ୍ଗିଁ ବିସାର୍‌ କିନି ଲୋକା ଆଗ୍‌ଡ଼ି ରେନା ଅନାନ୍‍, ନ୍ୟାୟ୍‌ କିନିକାନ୍‍ ମିଙ୍ଗିଁ ପେରିଲୋକାକିଦୁ ସର୍‍ପେ କିନାସିନାନ୍‌, ମାରି ପେରିକାର୍‌ ମିଙ୍ଗିଁ ଜଇଲ୍‍ତୁ ତର୍‍ନା ଇଡ୍‍ନାର୍‍ ।
LUK 12:59 ନାନ୍ ମିଙ୍ଗିଁ ସତ୍‌ ଇଜିନା, ଆମାସାନ୍ଦି ମିର୍‌ ୱିଜୁ ରୁଣୁ ଡାବୁଙ୍ଗୁଁ ଡ଼େସିସିଇ ମାନିଦେର୍‌, ଆୟା ସାନ୍ଦି ମିର୍‌ ଆବେଟ୍‌କୁ ସହସ ୱାଦେଙ୍ଗ୍‌ ଆଟ୍‍ଇଦେର୍‍ ।
LUK 13:1 ନାସ୍ତିୱାଲେ ଆବେ ମାର୍‍ଇ ଏସୋ ଲୋକୁ ଜିସୁଙ୍ଗୁଁ ଇର୍ହାର୍‌ଜେ, ଗାଲିଲିଦିକାର୍‍ ମାପୁରୁମାନୁ ପୁଜାସିନି ୱାଲେ ପିଲାତ୍‌ ୱାରିଙ୍ଗ୍‌ ଡାକ୍‍ତା ମାର୍‌ଆନ୍‌ ।
LUK 13:2 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ଇନିକା ଅଡ଼୍‍ବିଜିନିଦେର୍‍ ଜେ ଇୟା ଲୋକୁ ଗାଲିଲିଦି ୱିଜେରିଙ୍ଗ୍‍ ନାଣ୍ତ ପାପି ମାର୍ହାର୍‍ ଇଜି ୱାରିଙ୍ଗ୍‌ ମିର୍‌ ଅଡ଼୍‍ବିଜିନିଦେର୍‍ ନୋ ?
LUK 13:3 ନାନ୍ ମିଙ୍ଗିଁ ଇଜିନା, ସିଲେ, ମାତର୍‌ ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ଇତିଙ୍ଗ୍‍ ମିର୍‌ ୱିଜେରେ ଆୟାୱାଜା ନାସ୍ଟୁ ଆନିଦେର୍‌ ।
LUK 13:4 ବା ସିଲୋହଦୁ ଆୟା ଆମା ଅଟ୍ର ଲୋକା ମୁସ୍‌କୁ କାପ୍‍କିନି ଇଲୁ ଆର୍‍ଜି ୱାରି ଜିବନ୍‌ ସର୍‌ଆତ୍‌, ୱାରି ବିସୟ୍‌ତାନ୍‌ ମିର୍‌ ଇନିକା ଅଡ଼୍‍ବିଜିନିଦେର୍‍ ? ୱାର୍‌ ୱିଜେରେ ଜିରୁସାଲାମ୍‍ତିଲୋକା ବାଦ୍‌ଲୁ ନାଣ୍ତ ଦୋସ୍‍କିତିକାର୍‍ ଇଜି ନୋ ମିର୍‌ ଅଡ଼୍‍ବିଜିନିଦେର୍‍ ?
LUK 13:5 ନାନ୍ ମିଙ୍ଗିଁ ଇଜିନା, ସିଲେ, ମାତର୍‌ ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ଏତିଙ୍ଗ୍‍ ମିର୍‌ ୱିଜେରେ ଆୟାୱାଜା ନାସ୍ଟୁ ଆନିଦେର୍‌ ।”
LUK 13:6 ମାରି, ଜିସୁ ଇୟା କାତା ୱେର୍‌ତାନ୍‌, “ଅରେନ୍‍ୱାନି ଅଙ୍ଗୁର୍‍ କିଡ଼ିଇ ଉଣ୍ତ୍ରି ତଗା ମାରାନ୍‌ ଉର୍‍ତା ମାର୍ହାର୍‍ । ମାଲିକ୍‌ ୱାଜି ପଲ୍‌ ପ‍ଇତାନ୍‌, ମାତର୍‌ ପୟ୍‍ଏତାନ୍‍ ।
LUK 13:7 ଆବେଟ୍‌ ୱାନ୍‌ ଅଙ୍ଗୁର୍‍ କିଡ଼ିଇ କାପ୍‍କିନିୱାନିଙ୍ଗ୍‌ ଇର୍‌ଆନ୍‌, ସୁଡ଼ୁଆ, ଇୟା ମୁଣ୍ତ୍ରି ବାର୍‍ସେକ୍‍ ଆତାତ୍‌ ନାନ୍ ୱାଜି ଇୟା ତଗା ମାରାନ୍‌ତୁ ପଲ୍‌ ପୟ୍‍ଜିନା, ମାତର୍‌ ପୟ୍‌ଏଜିନା; ତେନିଙ୍ଗ୍‍ କାତ୍‍ସୋ ପୋକ୍‌ଆ, ଇକା ଇନ୍‍ଦାନିଙ୍ଗ୍‍ ବୁମିଦିଙ୍ଗ୍‌ ବା ତାଗ୍‌ଇକା କିଜିନାତ୍‍ ?
LUK 13:8 ମାତର୍‌ କାପ୍‍କିନିକାନ୍‍ ମାଲିକ୍‌ତିଙ୍ଗ୍‌ ଇର୍‌ଆନ୍‌, ପ୍ରବୁ, ତେନିଙ୍ଗ୍‍ ଇୟା ଉଣ୍ତ୍ରି ବାର୍ସେକ୍‍ ବା ଡ଼ିସ୍‍ସୋସିଆ, ନାନ୍ ଇଲେ ତେନି ସାରିବେଡ଼୍‍ତି କାର୍‍ଜି ଗାତାମ୍‍ ସିନା,
LUK 13:9 ୱାନି ବାର୍‍ସେକ୍‍ ପଲ୍‌ ଆସ୍‌ତିଙ୍ଗ୍‌ ତୋ ନେଗି ମାଟା, ଆଏତିଙ୍ଗ୍‍ ତାନିଙ୍ଗ୍‌ କାତ୍‍ସପୋକ୍‍ଆ ।”
LUK 13:10 ଅର୍‍ଲେନ୍‍ ଜିସୁ ରମ୍‌ନିନାଣ୍ତିଙ୍ଗ୍‌ ଉଣ୍ତ୍ରି ପାର୍‌ତନା ଇଲୁଦୁ ସିକିୟା ସିଜିମାର୍ହାନ୍‍ ।
LUK 13:11 ମାରି ସୁଡ଼ୁଦୁ, ଅଟ୍ର ବାର୍ସେକ୍‍ ଆତାତ୍‌ ଉନ୍‍ଣ୍ତ୍ରି ତାଗ୍‍ଇଆତ୍ମା ଆସ୍‌ସି ଅରେତ୍‌ ଆଇମାଦିଙ୍ଗ୍‍ ସାକିସିଲିୱାଜା କିତାମାର୍‍ଆତ୍‍, ୱାଦ୍‌ କୁବ୍‍ଡ଼ି ଆଜି ଏଣ୍ତେସ୍‌ବା ନିଜେଦିଙ୍ଗ୍‍ ସିଦା କିଜି ବୁଲାଦେଙ୍ଗ୍‌ ଆଟ୍‍ଏଜିମାର୍ହାତ୍‍ ।
LUK 13:12 ଜିସୁ ତାନିଙ୍ଗ୍‌ ସୁଡ଼ୁଜି ଲାକ୍‌ତୁ କୁକ୍‌ସି ଇର୍‌ଆନ୍‌, ଏ ଆଇମା, ନି ରୋଗ୍‍ଜିବନ୍‍ତାନ୍‌ ନେଗେଣ୍ତ୍‍ ଆତି ।
LUK 13:13 ମାରି, ୱାନ୍‌ ତାନି ମୁସ୍‌କୁ କିୟୁ ଇଟ୍‌ତାନ୍‌, ଆବେଟ୍‌ ୱାଦ୍‌ ଆୟାଦାପ୍ରେ ସାଡ଼୍‌କୁ ଆଜି ମାପୁରୁଦି ଦନ୍ୟବାଦ୍‌ କିଦେଙ୍ଗ୍‌ ଆସ୍‌ତାତ୍‌ ।
LUK 13:14 ମାତର୍‌ ଜିସୁ ରମ୍‌ନିନାଣ୍ତିଙ୍ଗ୍‌ ନେଗେଣ୍ତ୍‌ କିତାନ୍‍ଆକା ପାର୍‌ତନା ଇଲୁଦି ପେରିକାନ୍‌ ରିସା ଆଜି ଲୋକାଙ୍ଗ୍‌ ଇର୍ହାନ୍‌, “ପାଣି କିନି ଉଣ୍ତିଙ୍ଗ୍‌ ସଅଦିନ୍‍ ମାନାତ୍‌, ଆଦେଙ୍ଗ୍‌ ଆୟାୱିଜୁ ଦିନ୍‌ ୱାଜି ନେଗେଣ୍ତ୍‍ ଆଦୁ, ରମ୍‌ନିନାଣ୍ତିଙ୍ଗ୍‌ ରାମାଟ୍‍ ।”
LUK 13:15 ମାତର୍‌ ପ୍ରବୁ ୱାନିଙ୍ଗ୍‌ ଇର୍‌ଆନ୍‌, “ରେ କପଟିର୍‍, ମିର୍‌ ୱିଜେରେ ଇନିକା ରମ୍‌ନିନାଣ୍ତିଙ୍ଗ୍‌ ନିଜେ ନିଜେଦି ଡ଼ାନ୍‍ ମାରି ଗଦ ସାଡ଼ାଦାନ୍‍ କୁତ୍‌ସିଅସି ଏରୁ ଉଟ୍‍ପିସ୍‍ କିଇଦେର୍‍ ?
LUK 13:16 ମାରି ସୁଡ଼ୁଦୁ ଅଟ୍ର ବାର୍‍ସେକ୍‍ ଆତାତ୍‌ ସୟତାନ୍ ମାଣ୍‌କୁ ତରାଜି ଅବ୍ରାହାମତି ଗାଡ଼୍‌ସି ଇୟା ଆଇମାଲୋକ୍‍ ଇନିକା ରମ୍‌ନିନାଣ୍ତିଙ୍ଗ୍‌ ନିଜେଦି ରୋଗ୍‍ତି ଗାଟିଦାନ୍‍ କୁଦାଦେଙ୍ଗ୍‍ ଦର୍‌କାର୍‌ ସିଲେତାତ୍‍ ନୋ ?”
LUK 13:17 ମାରି, ୱାନ୍‌ ଇୟା ମାଟା ୱିଜୁ ଇର୍ହାନ୍‍ଆକା, ୱାନି ବିରୁଦ୍‍ତିକାର୍‌ ୱିଜେରେ ସେମାର୍‌ ଆତାର୍‌, ମାତର୍‌ ଲୋକୁ ୱିଜେରେ ୱାନି କିତି ୱିଜୁ ପେରି ପାଣି ଉଣ୍ତିଙ୍ଗ୍‌ ୱେଡ଼ିକା କିଦେଙ୍ଗ୍‌ ଆସ୍‌ତାର୍‌ ।
LUK 13:18 ଆବେଟ୍‌ ଜିସୁ ଇର୍ହାନ୍‌, “ମାପୁରୁଦି ରାଜି ଆମାତାନି ୱାଜା ? ମାରି, ଆମାତାନିୱାଲେ ନାନ୍ ତାନିଙ୍ଗ୍‌ ତୁସ୍‍ନା ?
LUK 13:19 ଆକା ଇୟାୱାଜା ଉଣ୍ତ୍ରି ସାର୍‍ସୁ ପାଡ଼ୁ ୱାଜା, ଆମାକା ଅସି ଅରେନ୍‍ ଲୋକୁ ନିଜେଦି ଡଡିଦୁ ୱିତ୍‍ତାନ୍‍, ମାରି ଆକା ପିର୍‌ଜି ମାରାନ୍‌ ଆତାତ୍‌, ବାଦଡ଼୍‌ତି ପଟିଙ୍ଗ୍‌ ୱାଜି ତାନି କମେଆଙ୍ଗ୍‍ଁ ଜାଲୁ ତର୍‌ସି ବାସାନେ ।”
LUK 13:20 ଜିସୁ ମାରି ୱେର୍‌ତାନ୍‌, “ନା‍ନ୍‌ ଆମାତାନି ୱାଲେ ମାପୁରୁଦି ରାଜିଦିଙ୍ଗ୍‍ ତୁସ୍‍ନା ?
LUK 13:21 ଆକା କମିର୍‍ତି ୱାଜା, ଅରେତ୍‌ ଆଇମା କମିର୍‌ ଅସି ଆଡା ଅଟାଗୁଣ୍ତାଦି ଲୋଇ ମିସାକିଜି ପିଡ଼ିକ୍‍ସି ଇଟ୍‍ତାତ୍‍, ମାରି ସାରାସାରି କମିର୍‌ ୱିଜୁ ଗୁଣ୍ତାଦିଙ୍ଗ୍‍ ଉଦିସ୍‍କିତାତ୍‍ ।”
LUK 13:22 ଇୟା ୱେନ୍‌କା ଜିସୁ ଗାଡ଼୍‌କାଙ୍ଗ୍‌ ଗାଡ଼୍‌କାଙ୍ଗ୍‌ ମାରି ନାର୍‍କାଙ୍ଗ୍‍ଁ ନାର୍‍କାଙ୍ଗ୍‍ଁ ବୁଲାଜି ସିକିୟା ସିବୁ ସିବୁ ଜିରୁସାଲାମ୍‍ ତରିନ୍‌ ସଲ୍‌ସି ମାର୍ହାନ୍‌ ।
LUK 13:23 ମାରି, ଅରେନ୍‍ ୱାନିଙ୍ଗ୍‌ ଇର୍‌ଆନ୍‌, “ପ୍ରବୁ, ରକିୟା ପଇନି ଲୋକାଦି ସଂକିୟା ଇନିକା ଉଣା ?” ଆବେଟ୍‌ ୱାନ୍‌ ୱାରିଙ୍ଗ୍‌ ଇର୍ହାନ୍‌,
LUK 13:24 ସିପଡ଼ି ସେର୍‍ଲା ସିଜି ଡ଼ୁଗୁଦେଙ୍ଗ୍‍ ତେରେପେତେ ଆଦୁ, ଇରିଙ୍ଗ୍‌ ନାନ୍ ମିଙ୍ଗିଁ ଇଜିନା, ୱିଜେରେ ଡ଼ୁଗୁଦେଙ୍ଗ୍‍ ଇଜି ବଦା କିନାର୍‌, ମାତର୍‌ ଆଟ୍‍ଏର୍‍ ।
LUK 13:25 ଇଲୁଦି ମାଲିକ୍‌ ନିଙ୍ଗ୍‍ଜି ସେର୍‍ଲା କେର୍‍ତି ୱେନ୍‌କା ଏସ୍ତିୱାଲେ ମିର୍‌ ଆତ୍‌ରେ ନିନି ତେବାନିଦେର୍‍ ମାରି ଏ ପ୍ରବୁ, ମା ଉଣ୍ତିଙ୍ଗ୍‌ ସେର୍‍ଲା ରେଆ, ଇକା ଇଜି ସେର୍‍ଲା ଡାକ୍‌ତେଙ୍ଗ୍‍ଁ ଆସ୍‌ନିଦେର୍‌, ନାସ୍ତିୱାଲେ ୱାନ୍‌ ମିଙ୍ଗିଁ ଇନାନ୍‌, ମିର୍‌ ଏମେ ବାଡ଼ିଦି ଲୋକୁ, ଆକା ନାନ୍ ନେସେଏ ।
LUK 13:26 ଆୟାୱାଲେ ମିର୍‌ ଇନ୍‌ଡ୍ରେଙ୍ଗ୍‌ ଆସ୍‌ନିଦେର୍‌, ମାପ୍‌ ମି ଆଗ୍‌ଡ଼ି ଉଟାପ୍ ତିର୍‍ଆପ୍‍, ମାରି ନିନ୍‌ ମା ଦୁଆର୍‍କାଙ୍ଗ୍‍ ସିକିୟା ସିତି;
LUK 13:27 ମାରି, ୱାନ୍‌ ମିଙ୍ଗିଁ ଇନାନ୍‌, ମିର୍‌ ଏମେ ବାଡ଼ିଦି ଲୋକୁ, ଆକା ନାନ୍ ନେସେଏ; ଏ ତାଗ୍‍ଇ ପାଣିକିନି ୱିଜେରେ ନା ଲାକ୍‌ତୁରାନ୍‌ ଆକ ଆଦୁ ।
LUK 13:28 ଏସ୍ତିୱାଲେ ମିର୍‌ ଅବ୍ରାହାମ, ଇସ୍‌ହାକ୍‌, ଜାକୁବ, ମାରି ୱିଜେରେ ବାବବାଦିରିଙ୍ଗ୍ ମାପୁରୁଦି ରାଜିଦୁ ମାନିକା ମାରି ନିଜେ ନିଜେଦିଙ୍ଗ୍‍ ଆତ୍‌ରେ ପୋକ୍‌ନିକା ସୁଡ଼୍‍ନିଦେର୍‍, ନାସ୍ତିୱାଲେ ଆବେ ଆଡ଼୍‌ବାନିଦେର୍‌ ମାରି ପାଲ୍‍କୁ କାତ୍ରେ କିନିଦେର୍‍ ।
LUK 13:29 ମାରି, ୱେଡ଼ାସନି ତରିଟାନ୍‍ ମାରି ୱେଡ଼ାଆର୍‌ନି ତରିଟାନ୍‍, ଡେବିରି ତରିଟାନ୍‍ ମାରି ଉଣେରି ତରିଟାନ୍‍ ଲୋକୁ ୱାଜି ମାପୁରୁଦି ରାଜିଦୁ ଉଣ୍ତେଙ୍ଗ୍‌ ବାସ୍‍ନାର୍‍ ।
LUK 13:30 ମାରି ସୁଡ଼ୁଦୁ, ଏର୍‌ ଇଲେଇ ୱେନ୍‍କା ମାନାର୍‍ ୱାର୍‌ ଆଗ୍‌ଡ଼ି ଆନାର୍‌ ମାରି ଆଗ୍‌ଡ଼ି ମାନି ଏସୋ ଲୋକୁ ୱେନ୍‌କା ଆନାର୍‌ ।
LUK 13:31 ନାସ୍ତିୱାଲେ ଏସୋ ପାରୁସିର୍‌ ଜିସୁ ଲାକ୍‌ତୁ ୱାଜି ଇର୍ହାର୍‌, “ଇୟା ବାଡି ଡ଼ିସ୍‌ସି ସହସୋ ସାଙ୍ଗ୍‍ଆ, ଇରିଙ୍ଗ୍‌ ହେରୋଦ ନିଙ୍ଗିଁ କାତ୍‍ତେଙ୍ଗ୍‍ ବଦା କିଜିନାନ୍‍ ।”
LUK 13:32 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ମିର୍‌ ସଲ୍‍ସୋ ଆୟା ଗଲୁଦିଙ୍ଗ୍‍ ଇନ୍‍ଡ୍ରୁ, ସୁଡ଼ୁଦୁ, ନାନ୍ ନେର୍‌ ମାରି ୱିଗେରିଙ୍ଗ୍‌ ଲୋକାମାଣ୍‌କୁ ଦୁବେଙ୍ଗ୍‍ ପେର୍‍ଜିନା ମାରି ଲୋକାଙ୍ଗ୍‌ ନେଗେନ୍‌ କିଜିନା, ମିଏରିଙ୍ଗ୍‍ ନା ପାଣି ୱିଜ୍‌ନାତ୍‌ ।
LUK 13:33 ମାତର୍‌ ନାନ୍ ଇୟାୱିଜୁ ପାଣି ନେର୍‌, ୱିଗେରିଙ୍ଗ୍‌ ମାରି ମିଏରିଙ୍ଗ୍‍ ନାଙ୍ଗିଁ ସନ୍‌ଡ଼୍ରେଙ୍ଗ୍‌ ଆନାତ୍‌, ଇରିଙ୍ଗ୍‌ ଜିରୁସାଲାମ୍‍ତି ଆତ୍‌ରେ ବାବବାଦିର୍ ସାନିକା ଟିକ୍‌ ସିଲେ ।
LUK 13:34 “ଏ ଜିରୁସାଲାମ୍‍, ଏ ଜିରୁସାଲାମ୍‍, ନିନ୍‌ ବାବବାଦିରିଙ୍ଗ୍ କାତ୍‍ତିମାନି । ଏମେ ଲୋକାଙ୍ଗ୍‌ ମାପୁରୁ ନି ଲାକ୍‌ତୁ ପୋକ୍‍ତାମାର୍‍ଆନ୍‍, ନିନ୍‌ ୱାନିଙ୍ଗ୍‌ କାଲ୍‍କାଣ୍‍ ଡାକ୍‍ତିମାନି । ନାନ୍ ଏସୋ ଦେବେଙ୍ଗ୍‌ ମି ଲୋକାଙ୍ଗ୍‌ ସାକା କିଦେଙ୍ଗ୍‌ ବଦା କିଜିନା । ଉଣ୍ତ୍ରି ତାଡ଼ି କର୍‍ରୁ ତାନି ରେକା ଆଡ୍‍ଗି କରୁ ପିଲେକାଙ୍ଗ୍‌ ଅର୍‌ସେ ଉଣ୍ତାକିନିୱାଜା ନାନ୍ ମି ଲୋକାଙ୍ଗ୍‌ ଉଣ୍ତା କିଦେଙ୍ଗ୍‌ ବଦାକିତାମାର୍‍ଆ । ମାତର୍‌ ଆକା କିଦେଙ୍ଗ୍‌ ବଦା କିଇତି ।
LUK 13:35 ସୁଡ଼ୁଦୁ, ମି ମନ୍ଦିର୍‌ତିଙ୍ଗ୍‌ ଲୋକୁ ଡ଼ିସ୍‍ତାମାନାର୍‍; ମାରି, ନାନ୍ ମିଙ୍ଗିଁ ଇଜିନା, ପ୍ରବୁଦି ଦର୍‌ତାନ୍‌ ଆମାକାନ୍‍ ୱାଜିନାନ୍‍, ୱାନ୍‌ ଦନ୍ୟ, ମିର୍‌ ଆମା ନାଣ୍ଡିଙ୍ଗ୍ ଇୟା ମାଟା ଇନିଦେର୍‌, ଆୟା ଦିନ୍‌ ୱାନି ସାନ୍ଦି ନାଙ୍ଗିଁ ମାରି ସୁଡ଼ୁଦେଙ୍ଗ୍‌ ଆଟ୍‍ଇଦେର୍‍ ।”
LUK 14:1 ଅର୍‍ଲେନ୍‍ ଜିସୁ ରମ୍‌ନିନାଣ୍ତିଙ୍ଗ୍‌ ଉଣ୍ତେଙ୍ଗ୍‌ ପାରୁସିର୍‌ ଅରେନ୍‍ ପେରିୱାନ୍‍ଦି ଇଲ୍‌ତୁ ସର୍‌ଆନ୍‌, ମାରି ଲୋକୁ ୱାନିଙ୍ଗ୍‌ ସୁଡ଼ୁଜି ମାର୍‌ଆର୍‌ ।
LUK 14:2 ମାରି ସୁଡ଼ୁଦୁ, ୱାନି ଆଗ୍‌ଡ଼ି ଅରେନ୍‍ କିକୁ ନି କାଲ୍‌କୁ ୱାସ୍‍ସି ରୋଗ୍‌ ଆସ୍‌ତିମାର୍‌ଇ ଲୋକୁ ମାର୍‌ଆନ୍‌ ।
LUK 14:3 ଆବେଟ୍‌ ଜିସୁ ବାଇବଲ୍‍ତି ସାସ୍ତ୍ରିରିଙ୍ଗ୍‍ ମାରି ପାରୁସିରିଙ୍ଗ୍‍ ଇର୍‌ଆନ୍‌, “ରମ୍‌ନିନାଣ୍ତିଙ୍ଗ୍‌ ରୋଗ୍‌ତାନ୍‌ ନେଗେଣ୍ତ୍‌ କିନି ନିୟମ୍‌ ନୋ ସିଲେ ? ମାତର୍‌ ୱାର୍‌ ଆଲେତା ମାର୍‌ଆର୍‌ ।”
LUK 14:4 ମାରି, ୱାନ୍‌ ୱାନିଙ୍ଗ୍‌ ଆସ୍‌ସି ନେଗେଣ୍ତ୍‍ କିତାନ୍‌ ମାରି ୱାନିଙ୍ଗ୍‌ ୱାନି ଇନ୍‌ଡ୍ର ପୋକ୍‌ତାନ୍‌ ।
LUK 14:5 ମାରି, ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ମି ଲୋଇ ଏନ୍‌ ନିଜେଦି ମାରିନ୍‌ ବା ଡ଼ାନ୍‍ କୁଇଁଦୁ ଆର୍‌ତିଙ୍ଗ୍‌ ଇନିକା ୱାନିଙ୍ଗ୍‌ ରମ୍‌ନିନାଣ୍ତିଙ୍ଗ୍‌ ଆୟାଦାପ୍ରେ ନିକ୍‍ଏନ୍‍ ନୋ ?”
LUK 14:6 ମାରି, ୱାର୍‌ ଇୟାୱିଜୁ ମାଟାଦି ଇନି ଉତର୍‌ ସିଦେଙ୍ଗ୍‍ ଆଟ୍‍ଏତାର୍‍ ।
LUK 14:7 ମାରି, ଜିସୁ ସୁଡ଼ୁତାନ୍‌ ଜେ ଏସୋ କୁଡ଼ାଙ୍ଗ୍‌ ବାସ୍‌ତେଙ୍ଗ୍‌ ଇଜି ପେରି ପେରି ବାଡିଙ୍ଗ୍‍ ପୋୟଜି ମାର୍‌ଆର୍‌ । ଆଦେଙ୍ଗ୍‌ ଜିସୁ ଇୟା କାତା ୱେର୍‌ତାନ୍‌,
LUK 14:8 ଏସ୍ତିୱାଲେ ମିଙ୍ଗିଁ ଅରେନ୍‍ ପେଡ଼ି ବଜିଦୁ ଉଣ୍ତେଙ୍ଗ୍‌ କୁକ୍‍ନାନ୍‍, ନାସ୍ତିୱାଲେ ପେରିବାଡିଦୁ ବାସ୍‍ମାଟ୍‍, ଆନାତ୍‌ ୱାନ୍‌ ମିବାଣ୍‍କାଣ୍‍ ପେରି ପେରି ଲୋକାଙ୍ଗ୍‌ କୁକ୍‍ନା ମାନାନ୍‌,
LUK 14:9 ମାରି ଏନ୍‌ ମିଙ୍ଗିଁ ନି ଆଇୱାନିଙ୍ଗ୍‍ କୁକ୍‍ନା ମାନାନ୍‌, ୱାନ୍‌ ୱାନା ମିଙ୍ଗିଁ ୱେର୍‌ନାର୍‌, ୱେନିଙ୍ଗ୍‌ ବାଡି ସିଆ; ମାରି, ନାସ୍ତିୱାଲେ ମିର୍‌ ସେମାର୍‍ଆଜି ଆଡ୍‍ଗିରି ବାଡିଦୁ ବାସ୍‍ନିଦେର୍‍ ।
LUK 14:10 ମାତର୍‌ ଏସ୍ତିୱାଲେ ଅରେନ୍‍ ମିଙ୍ଗିଁ କୁକ୍‍ନାନ୍‍, ନାସ୍ତିୱାଲେ ମିର୍‌ ସଲ୍‌ସି ଆଡ୍‍ଗିରି ବାଡିଦୁ ବାସ୍‍ତୁ, ଏଣ୍ତେସ୍‌ ମିଙ୍ଗିଁ କୁକ୍‍ତିକାନ୍‍ ୱାଜି ମିଙ୍ଗିଁ ଇନାନ୍‌, ଏ ତଡ଼ାନ୍‌, ମୁସ୍‌କୁରି ବାଡିଦୁ ରାଆ; ନାସ୍ତିୱାଲେ ମିୱାଲେ ବାସ୍‍ସିମାନି ୱିଜେରି ଲୋକାୱାଲେ ଆଗ୍‌ଡ଼ି ମିର୍‌ ସମ୍ମାନ୍‍ ପୟନିଦେର୍‍ ।
LUK 14:11 ଇରିଙ୍ଗ୍‌ ଏନ୍‌ ନିଜେଦିଙ୍ଗ୍‍ ପେରିକାନ୍‌ ତର୍‍ନାନ୍‍, ୱାନିଙ୍ଗ୍‌ ଆଡ୍‍ଗି କିନାନ୍‌, ମାରି ଏନ୍‌ ନିଜେଦିଙ୍ଗ୍‍ ଇସ୍ରିକାନ୍‌ କିନାନ୍‌, ୱାନିଙ୍ଗ୍‌ ପେରିକାନ୍‌ କିନାନ୍‌ ।
LUK 14:12 ମାରି, ୱାନ୍‌ କୁକ୍‍ତି ମାର୍‍ଇ ଲୋକାଙ୍ଗ୍‌ ବା ଇର୍‌ଆନ୍‌, “ୱେଡ଼େ ବା ନାଡ଼ା ବୋଜି ସିତିଙ୍ଗ୍‌ ମି ତଡ଼୍‍ କି ଦାଦା କି ନିଜେଦି ଲୋକାଙ୍ଗ୍‌ କି ମାଜନ୍‍ତି ମି ଲାକ୍‌ତୁରି ଲୋକାଙ୍ଗ୍‌ କୁକ୍‍ମାଟ୍‍, ଏସ୍ତିୱାଲେ ୱାନ୍‌ ବା ମିଙ୍ଗିଁ ଡ଼େସି କୁକ୍‍ନାର୍‍ ମାରି ଡ଼େପ୍‍ନାସିନାର୍‍ ।
LUK 14:13 ମାତର୍‌ ବୋଜି କିତିଙ୍ଗ୍‌ କାକୁର୍ତି ଲୋକାଙ୍ଗ୍‌, ଇରାଜିବୁଲାନିୱାରିଙ୍ଗ୍‍, ସଟାରିଙ୍ଗ୍‍ ମାରି କାଣା ଲୋକାଙ୍ଗ୍‌ କୁକ୍‍ତୁ;
LUK 14:14 ଆତିଙ୍ଗ୍‌ ମିର୍‌ ଦନ୍ୟ ଆନିଦେର୍‌, ଇରିଙ୍ଗ୍‌ ମିଙ୍ଗିଁ ଡ଼େସି ସିଦେଙ୍ଗ୍‍ ଇଜି ତାମେମାନୁ ଇନିକା ସିଲେତ୍‍; ମାରି, ଦାର୍ମୁ ଲୋକୁ ମାରିଡ଼େସି ନିଙ୍ଗ୍‍ନିୱାଲେ ମିଙ୍ଗିଁ ପୁରସ୍କାର୍‍ ପୁଟ୍‍ନାତ୍‍ ।”
LUK 14:15 ଆକା ୱେନ୍‌ଜି ଜିସୁୱାଲେ ଉଣ୍ତେଙ୍ଗ୍‌ ବାସ୍‍ତି ମାର୍‍ରି ଲୋକା ଲୋଇ ଅରେନ୍‍ ୱାନିଙ୍ଗ୍‌ ଇର୍‌ଆନ୍‌, “ଆମା ଲୋକୁ ମାପୁରୁଦି ରାଜିଦୁ ଉଣ୍ତେଙ୍ଗ୍‌ ବାସ୍‍ନାନ୍‍, ୱାନ୍‌ ଦନ୍ୟ ।”
LUK 14:16 ମାତର୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, ଅରେନ୍‍ ଲୋକୁ ଉଣ୍ତ୍ରି ପେରି ବୋଜି ସିଦେଙ୍ଗ୍‍ ବଦାକିଜି ନାଣ୍ତ ଲୋକାଙ୍ଗ୍‌ କୁକିସ୍‍ତାନ୍‍;
LUK 14:17 ମାରି, ବୋଜି ଉଣି ସମୟ ଇଗା ୱାତାତ୍‍ଆକା, କୁକ୍‍ତି ମାର୍‍ଇ ଲୋକାମାନୁ ୱାନି ପାଣିକିନି ୱାନି ପୋକ୍‌ସି କୁକ୍‍ସୋ ତାତେଙ୍ଗ୍‌ ଇର୍‌ଆନ୍‌, ଇରିଙ୍ଗ୍‌ ବୋଜିୱିଜୁ ୱାର୍ତା ୱିସ୍‍ତାମାର୍‍ଆର୍‍ ।
LUK 14:18 ମାତର୍‌ ୱିଜେରେ ଅର୍‌ସେ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌ । ପାର୍‌ତୁମ୍‌ ଅରେନ୍‍ ଇର୍‌ଆନ୍‌, ନାନ୍ କାଣ୍ତେକ୍‍ ବୁମି କଟାମାନା, ଆକା ନାଙ୍ଗିଁ ସୁଡ଼ୁନିକା ମାନାତ୍‌; ନାନ୍ ମାଡ଼ିସ୍‌ କିଜିନା, ନିନ୍‌ ନାଙ୍ଗିଁ ଡ଼ିସ୍‍ସିତିମାନି ଇଜି ଅଡ଼୍‌ବିଜିନା ।
LUK 14:19 ମାରି ଅରେନ୍‍ ଇର୍‌ଆନ୍‌, ନାନ୍ ପାସ୍‌ଗୋଟା ସେର୍‍କୁ ଡ଼ାକ୍‍ କୋଟାମାନା, ମାରି ନାନ୍ ୱାନିକାଙ୍ଗ୍‌ ମିତେଙ୍ଗ୍‌ ସଲ୍‍ସିନା; ମାଡ଼ିସ୍‌ କିଜିନା, ନିନ୍‌ ନାଙ୍ଗିଁ ଡ଼ିସ୍‍ସିତିମାନି ଇଜି ଅଡ଼୍‌ବିଜିନା ।
LUK 14:20 ମାରି ଆଇକାନ୍‍ ଇର୍‌ଆନ୍‌, ନାନ୍ ପୁନା ପେଡ଼ି ଆତାମାନା, ଆଦେଙ୍ଗ୍‌ ୱାଦେଙ୍ଗ୍‌ ଆଟ୍‍ଏ ।
LUK 14:21 ମାରି, ଆୟା ଗତିମୁରୁଲି ୱାଜି ୱାନି ମାଲିକ୍‌ତିଙ୍ଗ୍‌ ଆୟାୱିଜୁ ଇର୍‌ଆନ୍‌, ଆବେଟ୍‌ ଆୟା ଇଲୁଦି ମାଲିକ୍‌ ରିସା ଆତାନୋ ୱାନି ଗତିମୁରୁଲିଙ୍ଗ୍‌ ଇର୍‌ଆନ୍‌, ବେଗି ଗାଡ଼ାକା ଦୁଆର୍‍କାଙ୍ଗ୍‍ ମାରି ସାକ୍‌ଡ଼ି ସାକ୍‌ଡ଼ି ସଲ୍‌ସି କାକୁର୍ତି ଲୋକାଙ୍ଗ୍‌, ଇରାଜିବୁଲାନିୱାରିଙ୍ଗ୍‍, କାଣାରିଙ୍ଗ୍‌ ମାରି ସଟାରିଙ୍ଗ୍‍ ଇବେ କୁକ୍‍ସୋ ତାଗା ।
LUK 14:22 ୱେନ୍‌କା ଆୟା ଗତିମୁରୁଲି ଇର୍‌ଆନ୍‌, ଏ ମାଲିକ୍‌, ନି ବଦାଦାନ୍ କିତାମାନା, ମାତର୍‌ ମାରି ବାଡି ମାନାତ୍‌ ।
LUK 14:23 ଆବେଟ୍‌ ମାଲିକ୍‌ ଆୟା ସାକର୍‌ତିଙ୍ଗ୍‌ ଇର୍‌ଆନ୍‌, ପେରି ଦୁଆର୍‍କାଙ୍ଗ୍‍ ମାରି କନା ମୁଲାଦୁ ସଲ୍‌ସି, ନା ଇଲ୍‌ତୁ ଲୋକୁ ଏଣ୍ତେସ୍‌ ବର୍ତି ଆନାର୍‌, ଆୟା ଉଣ୍ତିଙ୍ଗ୍‌ ଲୋକୁ ୱାଦେଙ୍ଗ୍‌ ଇନ୍‍ଡ୍ରୁ ।
LUK 14:24 ଏଣ୍ତେସ୍‌ ମିଙ୍ଗିଁ ନାନ୍ ଇଜିନା, ଆୟା କୁକ୍‍ତିମାର୍‍ଇ ଲୋକା ଲୋଇ ଏର୍‍ବା ନାନ୍ ବୋଜି କିତିମାନୁ ଉଣ୍ତେଙ୍ଗ୍‌ ଆଟ୍‍ଏର୍‍ ।
LUK 14:25 ଅର୍‍ଲେନ୍‍ ନାଣ୍ତ ଲୋକୁ ଜିସୁୱାଲେ ସଲ୍‍ସିମାର୍‍ଆର୍‍, ମାରି ୱାନ୍‌ ୱେନ୍‌କା ମାର୍‌ଜିବେସ୍‌ସି ୱାରିଙ୍ଗ୍‌ ଇର୍‌ଆନ୍‌,
LUK 14:26 ଜଦି ଅରେନ୍‍ ଲୋକୁ ନା ଲାକ୍‌ତୁ ୱାଜି, ମାତର୍‌ ୱାନ୍‌ ଜଦି ନାଙ୍ଗିଁ ଡ଼ିସ୍‌ସି ନିଜେଦି ବୁବା ୟାୟାଏଙ୍ଗ୍‍, ଆଡ଼ିସିଙ୍ଗ୍‍, କଡ଼ରିଙ୍ଗ୍‌, ତାଙ୍ଗିଁ ତଡ଼ାନ୍‍କାଙ୍ଗ୍‍ ମାରି ଏଣ୍ତେସ୍‌ ନିଜେଦି ଜିବନ୍‌ତିଙ୍ଗ୍‌ ବା ନାଣ୍ତ ଜିବନ୍‍ନୋନାନ୍‍, ୱାନ୍‌ ନା ସିସୁ ଆଦେଙ୍ଗ୍‌ ଆଟ୍‍ଏନ୍‍ ।
LUK 14:27 ଏନ୍‌ ଜଦି ନିଜେଦି କ୍ରୁସ ପିଣ୍ତ୍‍ଜି ନା ୱେନ୍‌କା ରେଏନ୍‌, ୱାନ୍‌ ନା ସିସୁ ଆଦେଙ୍ଗ୍‌ ଆଟ୍‍ଏନ୍‍ ।
LUK 14:28 ଇରିଙ୍ଗ୍‌ ମି ଲୋଇ ଏନ୍‌ କାପ୍‍କିନି ଇଲୁ ତିଆର୍‌ କିଦେଙ୍ଗ୍‌ ବଦାକିଜି ଆକା ୱିସ୍‍ତେଙ୍ଗ୍‍ ଇଜି ୱାନିମାନୁ ଡାବୁଙ୍ଗୁଁ ମାନେ ନୋ ସିଲୁ, ଇକା ପାର୍‌ତୁମ୍‌ ବାସ୍‌ସ ଏସୋ ଡାବୁଙ୍ଗୁଁ ତାକ୍‍ନେ ଲେକିସ୍‌ କିଏନ୍‌ ନୋ ?
LUK 14:29 ଆନାତ୍‌ ୱାନ୍‌ କୁନାଦି ପୋକ୍‌ସି ୱିସ୍‍ତେଙ୍ଗ୍‍ ଜଦି ଆଟ୍‍ଏନ୍‍, ଲୋକୁ ଆକା ସୁଣାର୍‍, ୱିଜେରେ ୱାନିଙ୍ଗ୍‌ ସେମାର୍‍ କିଜି ଇନ୍‌ଡ୍ରେଙ୍ଗ୍‌ ଆସ୍‌ନାର୍‌,
LUK 14:30 ଇୟାକାନ୍‌ ତିଆର୍‌ କିଦେଙ୍ଗ୍‌ ଆରାମ୍‍ କିଜି ମାତର୍‌ ୱିସ୍‍ତେଙ୍ଗ୍‍ ଆଟ୍‍ଏତାନ୍‍ ।
LUK 14:31 ମାରି ଏମେ ରାଜା ଆଇ ଅରେନ୍‍ ରାଜାୱାଲେ ଜୁଦ୍‍ କିଦେଙ୍ଗ୍‌ ସନିୱାଲେ, ଦାସ୍‌ ହାଜାର୍‌ ସନ୍ୟରିଙ୍ଗ୍‍ ଆସ୍‌ସି, ୱାନି ବିରଦ୍‌ତାନ୍‌ ୱାଜିମାନି କଡ଼େ ହାଜାର୍‌ ସନ୍ୟରିଙ୍ଗ୍‍ ଅସି ଜୁଦ୍‍ କିଦେଙ୍ଗ୍‌ ୱାଜିମାନି ରାଜାୱାଲେ ଜୁଦ୍‍ କିଦେଙ୍ଗ୍‌ ଆଟ୍‍ନାନ୍‍ ନୋ ଆଟ୍‍ଏନ୍‍, ଆକା ଆଗ୍‍ଡ଼ିନେ ଅଡ଼୍‍ବିଏନ୍‍ ନୋ ?
LUK 14:32 ଜଦି ଆଟ୍‍ଏନ୍‍, ଆଇ ରାଜା ଆକ ମାନ୍‌ବୁନେ ୱାନ୍‌ ୱାନି ଲୋକାଙ୍ଗ୍‌ ପୋକ୍‌ସି ଆୟା ରାଜାୱାଲେ ସାନ୍ତି କିନାନ୍‍ ।
LUK 14:33 ଆୟାୱାଜା ମି ଲୋଇ ଏନ୍‌ ଜଦି ନିଜେଦି ୱିଜୁ ଡ଼ିସ୍‍ଏନ୍‍, ୱାନ୍‌ ନା ସିସୁ ଆଦେଙ୍ଗ୍‌ ଆଟ୍‍ଏନ୍‍ ।
LUK 14:34 ସର୍‍ ତୋ ନେଗିକା; ମାତର୍‌ ସର୍‍ ଜଦି ତାନି କାରିୟା ଆନିକା ସିଲେତ୍‍ଆନାତ୍‍, ଆରିଙ୍ଗ୍‌ ଆକା ଆମାନ୍‍ ବା କାରିୟା କିଦେଙ୍ଗ୍‌ ଆଟ୍‍ଏତ୍‍ ।
LUK 14:35 ତେନିଙ୍ଗ୍‍ ମିର୍‌ ଇୟାୱାଜା ବୁମିଦି ଉଣ୍ତିଙ୍ଗ୍‌ ବା ଗାତାମ୍‍ କିଦେଙ୍ଗ୍‌ ଆଟ୍‍ଇଦେର୍‍ । ଲୋକୁ ଆକା ଆତ୍‌ରେ ପୋକ୍‌ନାର୍‌ । ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ, ୱାନ୍‌ ୱେନିନ୍‌ ।
LUK 15:1 ଅର୍‍ଲେନ୍‍, ସିସ୍‍ଟୁ ଲୋସ୍‌ନିକାର୍‌ ନି ପାପି ଲୋକୁ ୱିଜେରେ ଜିସୁଦି ବାକ୍ୟ ୱେନ୍‌ଡ୍ରେଙ୍ଗ୍‌ ୱାନି ଲାକ୍‌ତୁ ୱାଜି ମାର୍‌ଆର୍‌ ।
LUK 15:2 ଆବେଟ୍‌ ପାରୁସିର୍‌ ନି ସାସ୍ତ୍ରିର୍‍ ୱିଜେରେ ବାସେ କିଜି କିଜି ଇର୍ହାର୍‌, ଇକାନ୍‌ ପାପି ଲୋକାଙ୍ଗ୍‌ ୱାନିଲାକ୍‍ତୁ କୁକ୍‍ନାନ୍‍ ମାରି ୱାରିୱାଲେ ଉଣାନ୍‌ ।
LUK 15:3 ଆବେଟ୍‌ ଜିସୁ ୱାରିଙ୍ଗ୍‌ ଇୟା କାତା ଇର୍‌ଆନ୍‌,
LUK 15:4 “ମି ମାଣ୍‌କୁ ଇୟାୱାଜା ଏମେ ଲୋକୁ ମାନାନ୍‌ ଜେ, ୱାନିଦି ଜଦି ୧୦୦ ଗୋଟା ମେଣ୍ତେଙ୍ଗ୍‌ମାନେ, ମାରି ତାମେ ଲୋଇ ଉଣ୍ତ୍ରି ମୁର୍‍ନାତ୍‍, ମାରି ୱାନ୍‌ ନବେ ନୋଗୋଟା ମେଣ୍ତେଙ୍ଗ୍‍ ଗରନ୍‌ତୁ ଡ଼ିସ୍‌ସି ଆୟା ମୁରୁତିମାନି ମେଣ୍ତା ପୋୟଇ ସାନ୍ଦି ତାନିଙ୍ଗ୍‌ ପୟ୍‌ଏନ୍‌ ନୋ ?
LUK 15:5 ମାରି, ୱାନ୍‌ ମେଣ୍ତାଦିଙ୍ଗ୍‌ ପ‍ଇତିଙ୍ଗ୍‌ ୱାନ୍‌ ତାନିଙ୍ଗ୍‌ ୱେଡ଼ିକାଦାନ୍‌ ଗୁଜାମ୍‍ତୁ ପିଣ୍ତିଜି ଇନ୍‌ଡ୍ର ତାନାନ୍‍,
LUK 15:6 ମାରି, ନିଜେଦି ଲୋକାଙ୍ଗ୍‌ ମାରି ପାଡ଼୍‍କାଦି ଲୋକାଙ୍ଗ୍‌ କୁକ୍‌ସି ଉଣ୍ତ୍ରେମାନୁ କିଜି ୱାରିଙ୍ଗ୍‌ ୱେର୍‌ନାନ୍‌, ନା ୱାଲେ ୱେଡ଼ିକା କିଦୁ, ଇରିଙ୍ଗ୍‌ ନା ମୁରୁତିମାର୍‍ଇ ମେଣ୍ତା ପୁଟ୍‍ତାତ୍‍ ।
LUK 15:7 ନାନ୍ ମିଙ୍ଗିଁ ୱେର୍‌ସିନା, ଆୟାୱାଜାନେ ଏମେଲୋକାଦି ମନତିଙ୍ଗ୍‌ ଡ଼େପ୍‍ତେଙ୍ଗ୍‍ ଦର୍‌କାର୍‍ ସିଲେ, ଇୟାୱାଜା ନବେ ନୋଗୋଟା ଦାର୍ମୁ ଲୋକା ବାଦ୍‌ଲୁ, ଜେ ମନତିଙ୍ଗ୍‌ ଡ଼େପ୍‍ନାନ୍‍, ଇୟାୱାଜା ଅରେନ୍‍ ପାପି ଲୋକ୍‍ ଉଣ୍ତିଙ୍ଗ୍‌ ମୁସ୍‌କୁପୁର୍‌ତୁ ନାଣ୍ତ ୱେଡ଼ିକା ଆନାତ୍‌ ।
LUK 15:8 “ଇୟାୱାଜା ଏମେ ଆଇମା ଲୋକୁ ମାନାତ୍‌ ଜେ, ତାନିଦି ଜଦି ଦଶଗୋଟା ୱେଣ୍ତି ଅଦ୍‌ଲିଙ୍ଗ୍‍ମାନେ, ମାରି ଆବେଟ୍‍ ଉଣ୍ତ୍ରି ମୁରୁନାତ୍‌, ମାରି ୱାଦ୍‌ ଦିୱା କାସ୍‍ସିସ୍‍ କିଜ ଇଲୁଦୁ ସିପାଜି ଆକା ପୟ୍‌ଇ ସାନ୍ଧି ନେଗେନ୍‌ତାନ୍‌ ପୟ୍‍ଏତ୍‍ ?
LUK 15:9 ମାରି, ଆକା ପ‍ଇତିଙ୍ଗ୍‌ ୱାନ୍‌ ନିଜେଦି ଲୋକାଙ୍ଗ୍‌ ମାରି ପାଡ଼୍‍କାଦି ଲୋକାଙ୍ଗ୍‌ କୁକ୍‌ସି ଉଣ୍ତ୍ରେମାନୁ କିଜି ୱାରିଙ୍ଗ୍‌ ୱେର୍‌ନାନ୍‌, ନା ୱାଲେ ୱେଡ଼ିକା କିଦୁ, ଏମେ ୱେଣ୍ତି ଅଦ୍‌ଲି ମୁରୁତିମାର୍‌ଇକା, ଆକା ପୁଟ୍‍ତାତ୍‍ ।
LUK 15:10 ନାନ୍ ମିଙ୍ଗିଁ ୱେର୍‌ସିନା, ଇୟାୱାଜାନେ ଏନ୍‌ ମନତିଙ୍ଗ୍‌ ଡ଼େପ୍‍ତିଙ୍ଗ୍‍, ଇୟାୱାଜା ଅରେନ୍‍ ପାପି ଉଣ୍ତିଙ୍ଗ୍‌ ମାପୁରୁଦି ଦୁତ୍‌କୁ ୱେଡ଼ିକାକିନେ ।”
LUK 15:11 ଜିସୁ ମାରି ଇର୍ହାନ୍‌, ଅରେନ୍‍ ଲୋକୁଦିଙ୍ଗ୍‍ ରିଏର୍‌ କଡ଼ର୍‌ ମାର୍‌ଆର୍‍ ।
LUK 15:12 ୱାରି ମାଣ୍‌କୁ ଇସ୍ରିରି ମାରିନ୍‌ ବୁବେଙ୍ଗ୍‌ ଇର୍ହାନ୍‌, ବୁବା, ସମ୍ପତିଦି ଏମେ ବାଗ୍ ନା ବାଗତୁ ପୋଡ଼ାଜିନାତ୍‌, ଆକା ନାଙ୍ଗିଁ ସିଦାଟ୍‍ । ଆବେଟ୍‌ ୱାନ୍‌ ନିଜେଦି ୱିଜୁ ୱାରିଙ୍ଗ୍‌ ବାଟା କିଜି ସିତାନ୍‌ ।
LUK 15:13 ଅଡ଼ପ୍‍ ଦିନ୍‌ ୱେନ୍‌କା ଇସ୍ରିରି କଡ଼ ୱିଜୁ ଉଣ୍ତ୍ରିମାନୁ କିଜି ଆକ ଦେଶ୍‍ତୁ ସର୍ହାନ୍‍, ମାରି ଆବେଣ୍‌କୁ ମୁର୍କୁ ଆଜି ନିଜେଦି ସମ୍ପତ୍ତି ଇପ୍‍ତାନ୍‍ ।
LUK 15:14 ମାତର୍‌ ୱିଜୁ ୱିସ୍‌ତି ୱେନ୍‌କା ଆୟା ଦେସ୍‌ତୁ ପେରି ଦୁର୍ବିକିୟ ଆତାତ୍‌ଆକା ୱାନିଙ୍ଗ୍‌ ସିଲିୱାଜା ଆଦେଙ୍ଗ୍‌ ଆସ୍‌ତାତ୍‌ ।
LUK 15:15 ଆବେଟ୍‌ ୱାନ୍‌ ସଲ୍‌ସି ଆୟା ଦେଶ୍‍ଦି ଅରେନ୍‍ ଲୋକ୍‍ମାନୁ ଗତି ତେବାତାନ୍‌, ମାରି ୱାନ୍‌ ୱାନିଙ୍ଗ୍‌ ପାଣ୍ତ୍ରିଙ୍ଗ୍‌ ସାରାକିଦେଙ୍ଗ୍‍ ଇଜି ନିଜେଦି କିଡ଼ିଇଦୁ ପୋକ୍‌ତାର୍‌;
LUK 15:16 ମାରି, ପାଣ୍ତ୍ରିଙ୍ଗ୍‌ ଏମେ କାଦି ତିନ୍‍ଜିମାର୍‍ଏ, ଆବେଟ୍‌ ୱାନ୍‌ ନିଜେଦି ପଟାପାଜିସ୍‍ କିଦେଙ୍ଗ୍‌ ବଦା କିଜିମାର୍ହାନ୍‌, ମାତର୍‌ ଏନ୍‌ବା ୱାନିଙ୍ଗ୍‌ ଇନିକାବା ସିଏଜି ମାର୍ହାର୍‍ ।
LUK 15:17 ମାତର୍‌ ୱାନ୍‌ ଚେତ୍‍ନା ଆଜି ଇର୍ହାନ୍‌, ନା ବୁବାଦି ଏସ କୁଲିକିନିୱାର୍‌ଇଦି ଉଣିକା ତେବାଜିନାତ୍‍, ମାତର୍‌ ନାନ୍ ଇବେନ୍‌ ବାଙ୍ଗାଁଦାନ୍‍ ସାଜିନା ।
LUK 15:18 ନାନ୍ ନିଙ୍ଗ୍‍ଜି ନା ବୁବାଦି ଲାକ୍‌ତୁ ସନା ମାରି ୱାନିଙ୍ଗ୍‌ ୱେର୍‌ନା, ବୁବା, ମାପୁରୁଦି ବିରଦ୍‌ତାନ୍‌ ମାରି ନି ବିରଦ୍‌ତାନ୍‌ ନାନ୍ ପାପ୍‌ କିତାମାନା;
LUK 15:19 ମି କଡ଼ ଇଜି କୁକ୍‍ନିକା ନାନ୍ ମାରି ଦୋର୍‌ ସିଲେ; ନାଙ୍ଗିଁ ମିବାନୁ ଅରେନ୍‍ କୁଲିକିନି ଲୋକା ୱାଜା ଇଡିଆ ।
LUK 15:20 ଆବେନ୍‌ ୱାନ୍‌ ନିଙ୍ଗ୍‍ଜି ନିଜେଦି ବୁବାଦି ଲାକ୍‌ତୁ ସର୍ହାନ୍‌ । ମାତର୍‌ ୱାନ୍‌ ଆକ ମାନ୍‌ଜି ମାନ୍‌ଜି ୱାନି ବୁବା ୱାନିଙ୍ଗ୍‌ ସୁଡ଼ୁଜି ଲାଡ଼୍‌ଦାନ୍‌ ତେର୍‌ପେତ୍‌ ଆତାନ୍‌ ମାରି ଉରୁକ୍‍ସି ସଲ୍‌ସି ୱାନିଙ୍ଗ୍‌ ପମିତାଆସ୍ତାନ୍‍ ନୋ ଲାଡ଼୍‌ଦାନ୍‌ ନଣ୍ତିତାନ୍‍ ।
LUK 15:21 ମାରିସି ୱାନିଙ୍ଗ୍‌ ଇର୍‌ଆନ୍‌, ବୁବା ମାପୁରୁଦି ବିରଦ୍‌ତାନ୍‌ ମାରି ନି ବିରଦ୍‌ତାନ୍‌ ନାନ୍ ପାପ୍‌ କିତାମାନା, ମି ମାରିନ୍ ଇଜି କୁକ୍‍ତେଙ୍ଗ୍‍ ନାନ୍ ମାରି ଜଗ୍‌ ସିଲେ ।
LUK 15:22 ମାତର୍‌ ବୁବା ନିଜେଦି ସାକର୍‌କାଙ୍ଗ୍‌ ୱେର୍‌ତାନ୍‌, ୱିଜୁମାଣ୍‌କୁ ନେଗି ୱାତି ବେଗି ଆସୋଅରାଦୁ ୱେନିଙ୍ଗ୍‌ ଆର୍‌ସିକିଦୁ, ୱେନି କିୟୁଦୁ ୱେତରି ମାରି ପାଦାମ୍‌କାଙ୍ଗ୍‌ ଜୁତେଙ୍ଗ୍‌ ସିଦୁ,
LUK 15:23 ମାରି ବାଲ୍‍ସ୍ତି ଜାତୁ ତାସ ଡାକ୍‌ତୁ; ରାଦୁ, ମାଡୁ ବୋଜି କିଜି ୱେଡ଼ିକା କିନାଟ୍‍,
LUK 15:24 ମାତର୍‌ ନା ଇୟା ମାରିନ୍‌ ସାତା ମାର୍ହାନ୍‌, ମାରିଡ଼େସି ଜିତାନ୍‍; ମୁରିତାମାର୍ହାନ୍‌, ମାରି ପ‍ଇତାନ୍‌ । ଆବେଟ୍‍ ୱାରିଙ୍ଗ୍‌ ୱେଡ଼ିକା କିଦେଙ୍ଗ୍‌ ଆତାର୍‌ ।
LUK 15:25 ନାସ୍ତିୱାଲେ ୱାରି ପେରି ମାରିନ୍‌ ଜମିଦୁ ମାର୍ହାନ୍‌ । ୱାନ୍‌ ଏସ୍ତିୱାଲେ ୱାଜି ଇଲୁଦି ଲାକ୍‌ତୁ ୱାତାନ୍‌, ନାସ୍ତିୱାଲେ ବାଜା ମାରି ଗାତ୍‍ନିକା ଆଉଲି ୱେରାନ୍‍,
LUK 15:26 ସାକର୍‌କାଙ୍ଗ୍‌ ମାଣ୍‌କୁ ଅରେନ୍‍ ଲାକ୍‌ତୁ କୁକ୍‍ତାନ୍‍ ଆୟାୱିଜୁ ଇନିକା ଇଜି ୱେନ୍‍ବାଦେଙ୍ଗ୍‍ ଆସ୍‌ତାନ୍‌ ।
LUK 15:27 ୱାନ୍‌ ୱାନିଙ୍ଗ୍‌ ୱେର୍‌ତାନ୍‌, ମି ତଡ଼ାନ୍‌ ୱାତାମାନାନ୍‍, ମାରି ମି ବୁବା ୱାନିଙ୍ଗ୍‌ ନେଗି ମେନ୍ଦଲ୍‌ତାନ୍‌ ପଇତାନ୍‌ଆକା ବାଲ୍‍ସ୍ତି ଜାତୁ ଡାକ୍‍ତାମାନାନ୍‍ ।
LUK 15:28 ଆବେଟ୍‌ ୱାନ୍‌ ରିସାଆଜି ଲୋଇ ସଣ୍ଡ୍ରେଙ୍ଗ୍‌ ଇଜି ବଦାକିଏତାନ୍‍; ମାତର୍‌ ୱାରି ବୁବା ଆତ୍‌ରେ ୱାଜି ୱାନିଙ୍ଗ୍‌ ନାଣ୍ତ ବୁଜାକିଦେଙ୍ଗ୍‍ ଆସ୍‌ତାନ୍‌ ।
LUK 15:29 ମାତର୍‌ ୱାନ୍‌ ବୁବାସିଙ୍ଗ୍‍ ଇର୍‌ଆନ୍‌, ସୁଡୁଆ, ନିସବାର୍ସେକ୍‍ ଆତାତ୍‌ ନାନ୍ ମି ସାକର୍‌ତି ୱାଜା ପାଣିକିଜି ୱାଜିନା, ମାରି ଏସ୍‌କାଙ୍ଗ୍‍ବା ମି ମାଟା ଅମାନ୍ୟ କିଏ, ମାରି ନା ସାଙ୍ଗ୍‍ରି ୱାଲେ ୱେଡ଼ିକା କିଦେଙ୍ଗ୍‌ ନିନ୍‌ ନାଙ୍ଗିଁ ଏସାକାଙ୍ଗ୍‍ବା ଗରିୟାପିଲା ବା ସିଇ;
LUK 15:30 ମାତର୍‌ ମି ଇୟା ଏମେ ମାରିସି ତାଗ୍‌ଇୱାରି ୱାଲେ ମି ଦନ୍‌ ୱିଜୁ ଉଣୁଜି ୱିସ୍‌ତା ମାନାନ୍‌, ଏସ୍ତିୱାଲେ ୱାନ୍‌ ୱାତାନ୍‌, ନାସ୍ତିୱାଲେ ନିନ୍‌ ୱାନି ଉଣ୍ତିଙ୍ଗ୍‌ ବାଲ୍‍ସ୍ତି ଜାତୁ ଡାକ୍‌ତାମାନାନ୍‌ ।
LUK 15:31 ଆବେଟ୍‌ ୱାନ୍‌ ୱାନିଙ୍ଗ୍‌ ୱେର୍‌ତାନ୍‌, ମାରିନ୍‌, ନିନ୍‍ତୋ ୱିଜୁଦିନ୍‌ ନା ୱାଲେ ମାନି, ମାରି ଆମାକା ୱିଜୁ ନାଦି, ଆୟାୱିଜୁ ନିଦି;
LUK 15:32 ମାତର୍‌ ଇୟା ଜେ ନି ତଡ଼ାନ୍‌ ସାତାମାର୍‍ଆନ୍‍, ମାରିଡ଼େସି ଜିତାନ୍‍, ମୁରିତାମାର୍ହାନ୍‍, ମାରି ପୁଟ୍‍ତାନ୍‍, ଆୟା ଉଣ୍ତିଙ୍ଗ୍‌ ୱେଡ଼ିକା କିଦେଙ୍ଗ୍‌ ଦର୍‍କାର୍‍ମାର୍ହାତ୍‍ ।
LUK 16:1 ଜିସୁ ସିସୁରିଙ୍ଗ୍‌ ବା ଇର୍ହାନ୍‌, ଅରେନ୍‍ ମାଜନ୍‌ ଲୋକୁ ମାର୍ହାନ୍‌, ୱାରି ମାନୁ ଅରେନ୍‍ ଗୋତିମୁରୁଲି ମାର୍ହାନ୍‌, ମାରି ୱାନ୍‌ ୱାରି ସମ୍ପତ୍ତି ବୁଡ଼ା କିଜିନାନ୍‍ ଇଜି ଆୟା ବିସୟ୍‌ତାନ୍‌ ୱେନ୍‌ଜି ୱାନ୍‌ ୱାନିଙ୍ଗ୍‌ କୁକ୍‍ତାନ୍‍ନୋ ଇର୍ହାନ୍‌,
LUK 16:2 ନାନ୍ ନି ବିସୟ୍‌ତାନ୍‌ ଇକା ଇନି ମାଟା ୱେନ୍‍ଜିନା ? ନି ପାଣିଦି ଇସାବ୍‌ ସିଦା, ମାତର୍‌ ନିନ୍‌ ମାରି ଗୋତିମୁରୁଲି ଆଜି ମାଣ୍ତ୍ରେଙ୍ଗ୍‌ ଆଟ୍‍ଇ ।
LUK 16:3 ଆବେନ୍‌ ଆୟା ଗୋତିମୁରୁଲି ମୋନ୍‌ତୁ ମୋନ୍‌ତୁ ଇର୍ହାନ୍‌, ଇନିକା କିନା ? ନା ମାଲିକ୍‌ ତୋ ନାମାଣ୍‌କୁ ଗୋତିମୁରୁଲିଦି ନା ସାକିରି ଅସି ସୋଲ୍‌ସିନାନ୍‌ । ସିକ୍‌ଲା କାର୍‍ଦେଙ୍ଗ୍‍ ନା ସାକ୍ତି ସିଲେତ୍‌, ଭିକିୟା ଲସ୍‌ତେଙ୍ଗ୍‌ ନାଙ୍ଗିଁ ସେମାର୍‌ ୱାଜିନାତ୍‍ ।
LUK 16:4 ନାନ୍ ଗୋତିମୁରୁଲିଦାନ୍‍ ଡ଼ିସ୍‌ତି ୱେନ୍‌କା ଲୋକୁ ଏଣ୍ତେସ୍‌ ନାଙ୍ଗିଁ ନିଜେ ନିଜେଦି ଇଲ୍‌କାଙ୍ଗ୍‌ କୁକ୍‍ନାର୍‍, ଇୟାଉଣ୍ତିଙ୍ଗ୍‌ ଇନିକା କିନା, ଆକା ନେସ୍‍ତାନି ।
LUK 16:5 ମାରି, ୱାନ୍‌ ନିଜେଦି ମାଲିକ୍‌ଦି ୱିଜେରିଙ୍ଗ୍‌ ରୁଣୁ ଅତିମାନି ଲୋକାଙ୍ଗ୍‌ ଲାକ୍‌ତୁ କୁକ୍‍ସି ଆଗ୍‍ଡ଼ିରି ଅରେନ୍‍ୱାନିଙ୍ଗ୍‍ ଇର୍ହାନ୍‌, ନି ମୁସ୍‌କୁ ନା ପ୍ରବୁଦି ମାନୁ ଏସ ଟାକା ସିଦେଙ୍ଗ୍‍ ମାନାତ୍‌ ? ୱାନ୍‌ ଇର୍ହାନ୍‌, ସଏ ଡାବା ନିୟୁ ।
LUK 16:6 ୱାନ୍‌ ୱାନିଙ୍ଗ୍‌ ଇର୍ହାନ୍‌, ନି ଇସାବ୍‌ କିନି ଆକୁ ବେଗିତାସ୍‍ ବାସ୍‌ସ ପସାସ୍‌ ଡାବା ନିୟୁ ଇଜି ରାସ୍‌ଆଁ ।
LUK 16:7 ତାନେ ୱେନ୍‌କା ୱାନ୍‌ ମାରି ଅରେନ୍‍ୱାନିଙ୍ଗ୍‍ ଇର୍ହାନ୍‌, ନି ମୁସ୍‌କୁ ଏସ ଡାବୁଙ୍ଗୁଁ ସିଦେଙ୍ଗ୍‍ ମାନାତ୍‌ ? ୱାନ୍‌ ଇର୍ହାନ୍‌, ସଏ ବାସ୍ତା ଗଦ୍‍ମୁ । ୱାନ୍‌ ୱାନିଙ୍ଗ୍‌ ଇର୍ହାନ୍‌, ନି ଇସାବ୍‌ କିନି ଆକୁ ବେଗିତାସ ଅସେ ବାସ୍ତା ଇଜି ରାସ୍‌ଆଁ ।
LUK 16:8 ଆୟା ଅବିସ୍‌ବାସ୍‌କିତି ଗୋତିମୁରୁଲି ବୁଦିଦି ୱାଲେ ପାଣି କିତିମାନିଙ୍ଗ୍‍ ୱାନି ମାଲିକ୍‌ ୱାନିଙ୍ଗ୍‌ ପ୍ରସଂସା କିତାନ୍‍; ଇୟା ଦୁନିଆ କଡ଼ର୍‍ ୱାରି ପାଣି କିଦେଙ୍ଗ୍‌ ଜାୟ୍‌ତି କଡ଼ରି ବାଦୁଲୁ ନାଣ୍ତ ବୁଦି ।
LUK 16:9 ନାନ୍ ବା ମିଙ୍ଗିଁ ଇଜିନା, “ଦୁନିଆଦି ଦନ୍‍ତୁ ନିଜେ ନିଜେଦି ଉଣ୍ତିଙ୍ଗ୍‌ ସଙ୍ଗ୍‍ ପଇଦୁ, ଏଣ୍ତେସ୍‌ ଆକା ୱିଜ୍‍ତିଙ୍ଗ୍‍ ମିଙ୍ଗିଁ ୱିଜୁଦିନ୍‌ତି ଡର୍‌ନିବାଡିଦୁ କୁକ୍‌ନାନ୍‍ ।
LUK 16:10 ଏନ୍‌ ଉଣା ବିସୟ୍‌ତାନ୍‌ ବିସ୍‌ବାସ୍‌ କିନାନ୍‌, ୱାନ୍‌ ନାଣ୍ତ ବିସୟତୁ ବା ବିସ୍‌ବାସ୍‌ ମାନାନ୍‌, ମାରି ଏନ୍‌ ଉଣା ବିସୟ୍‌ତାନ୍‌ ଅବିସ୍‍ବାସ୍‍ ୱାନ୍‌ ନାଣ୍ତ ବିସୟତୁ ବା ଅବିସ୍‍ବାସ୍‍ କିନାନ୍‌ ।
LUK 16:11 ମାରି, ମିର୍‌ ଜଦି ଦୁନିଆଦି ଦନ୍‍ତୁ ବିସ୍‌ବାସ୍‌ କିଇଦେର୍‌, ଆଦେଙ୍ଗ୍‌ ଏନ୍‌ ମିଙ୍ଗିଁ ବିସ୍‌ବାସ୍‌ କିଜି ସତ୍‌ ଦନ୍‍ ମି କିୟୁଦୁ ସପ୍ରେ କିନାନ୍‌ ?
LUK 16:12 ମାରି, ଜଦି ମିର୍‌ ଆଇୱାନି ଦନ୍‍ ବିସୟତାନ୍ ବିସ୍‌ବାସ୍‌ କିଇଦେର୍‌, ମାରି ଏନ୍‌ ମିଙ୍ଗିଁ ମି ନିଜେଦି ବିସୟ ସିନାନ୍‍ ?
LUK 16:13 “ଅରେନ୍‍ ସାକର୍‌ ରିଏରି ମାଲିକ୍‌କା ସାକର୍‌ ଆଦେଙ୍ଗ୍‌ ଆଟ୍‍ଏନ୍‍; ମାତର୍‌ ୱାନ୍‌ ଅରେନ୍‍ୱାନିଙ୍ଗ୍‍ କାଡ଼୍‍ନାନ୍‍ ମାରି ଆଇୱାନିଙ୍ଗ୍‍ ଜିବନ୍‌ନୋନା, ମାରି ଅରେନ୍‍ୱାନି ଉଣ୍ତିଙ୍ଗ୍‌ ଲାକ୍‌ତୁ କିନାନ୍‍ ମାରି ଆଇୱାନିଙ୍ଗ୍‍ ଡ଼ିସ୍‍ନାନ୍‍ । ମିର୍‌ ମାପୁରୁ ମାରି ଦନ ରିଏରି ସାକର୍‌ ଆଦେଙ୍ଗ୍‌ ଆଟ୍‍ଇଦେର୍‍ ।”
LUK 16:14 ଇୟାୱିଜୁ ମାଟା ୱେନ୍‌ଜି ଦନ୍‍ଆସାନି ପାରୁସିର୍‌ ଜିସୁଙ୍ଗୁଁ ନିଦା କିଦେଙ୍ଗ୍‌ ଆସ୍‌ତାର୍‌ ।
LUK 16:15 ଆବେନ୍‌ ୱାନ୍‌ ୱାରିଙ୍ଗ୍‌ ଇର୍ହାନ୍‌, ଏର୍‌ ନିଜେ ନିଜେଦିଙ୍ଗ୍‌ ଲୋକାରି ଆଗ୍‌ଡ଼ି ଦାର୍ମୁ ଇଜି ତର୍‍ନାର୍‍, ମିର୍‌ ଆୟାୱାଜାଦି ଲୋକୁ, ମାତର୍‌ ମାପୁରୁ ମି ଜିବନ୍‍ତିଙ୍ଗ୍‌ ନେସ୍‌ନା; ମାତର୍‌ ଏମେକା ଲୋକାରି ମାନୁ ପେରିକା, ଆୟାକା ମାପୁରୁଦି ଆଗ୍‌ଡ଼ି କାଡ଼୍‌ନିକା ।
LUK 16:16 ମୋସାଦି ନିୟମ୍‍ତାନ୍‍ ମାରି ବାବବାଦିର୍ ଦାର୍ମୁସାସ୍ତ୍ର ଡୁବନ୍‌ସିନି ଜୋହନତି ସାନ୍ଧି ୱେଙ୍ଗିଁତା ମାର୍ହାତ୍‌; ଆୟା ୱାଲେରାନ୍‌ ମାପୁରୁଦି ରାଜିଦୁ ସୁସମାଚାର୍‍ ପ୍ରଚାର୍‌ କିଜିନାର୍‌, ମାରି ୱିଜେରେ ଲୋକୁ ଡାଟ୍‌ତାନ୍‌ ଆବେନୁ ସଲ୍‌ସିନାର୍‌ ।
LUK 16:17 ମାତର୍‌ ନିୟମ୍‍ତି ଉଣ୍ତ୍ରି ଇସ୍ରି ଠିକା ମାର୍‍ଗିନି ବାଦ୍‌ଲୁ ବାଦଡ଼ ନି ଦୁନିଆ ମାର୍‍ଗିନିକା ଉସାସ୍‌ ।
LUK 16:18 ଏନ୍‌ଆପିନ୍‌ ନିଜେଦି ଆଡ଼୍‌ସିଙ୍ଗ୍‌ ଡ଼ିସ୍‍ନାନ୍‍ ନୋ ଆଇତାନିଙ୍ଗ୍‌ ପେଡ଼ି ଆନାନ୍‌, ୱାନ୍‌ ଦାରିପାଣି କିନାନ୍‍; ମାରି, ଏନ୍‌ କୋନ୍‌ଲି ମାଣ୍‌କୁ ଡ଼ିସ୍‍ତି ଆଇମାଦିଙ୍ଗ୍‍ ପେଡ଼ିଆନାନ୍‌, ୱାନ୍‌ ବା ଦାରିପାଣି କିନାନ୍‍ ।
LUK 16:19 ଅରେନ୍‍ ଦନି ଲୋକୁ ମାର୍ହାନ୍‌, ୱାନ୍‌ ନାଣ୍ତ ଦାରାଦି ଆଙ୍ଗିଁ ଆରାଜି ୱିଜୁଦିନ୍‌ ନାଣ୍ତ ୱେଡ଼ିକାଦାନ୍‌ ଉଣୁଜିତିନ୍‌ଜି ମାର୍ହାନ୍‌;
LUK 16:20 ମାତର୍‌ ୱାନି ଦୁଆର୍‍ ଲାକ୍‌ତୁ ଲାଜାର୍‌ ଇଜି ଅରେନ୍‍ ବିକାରି ବାସ୍‍ତା ମାର୍ହାନ୍‌, ୱାନି ମେନ୍ଦଲ୍‍ୱିଜୁ ଗାଉକୁ ବର୍ତି ଆତେମାରେଏ;
LUK 16:21 ୱାନ୍‌ ଆୟା ଦନି ଲୋକୁଦି ଟେବୁଲ୍‍ତାନ୍‍ ଆର୍‌ନି ସକ୍‍ଡ଼ିଦାନ୍‍ ଏସ ଉଣୁଜି ପଟାପାଜିସ୍‌ କିଦେଙ୍ଗ୍ ଆସା କିଜିମାର୍ହାନ୍‍; ମାରି, ନୁକୁଡ଼ିଙ୍ଗ୍‍ ୱାଜି ୱାନି ଗାଉକୁ ୱିଜୁ ନାକ୍‍ସି ମାର୍‌ଏ ।
LUK 16:22 ତାନେ ୱେନ୍‌କା ଆୟା ବିକାରି ସାତାନ୍‍ ମାରି ଦୁତ୍‍କା ମାଣ୍‌କୁ ଅବ୍ରାହାମତି ଗାତୁ ଅତେ; ୱେନ୍‌କା ଆୟା ଦନି ଲୋକୁ ବା ସାତାନ୍‍ ମାରି ମୁସ୍‌ତାର୍‌ ।
LUK 16:23 ମାରି, ୱାନ୍‌ ନର୍କଦି କାସ୍ଟୁଦୁ କଲ୍‌ବଲ୍‌ ଆଜି ମୁସ୍‌କୁ ସୁଡ଼ୁଜି ଆକ୍‌ରାନ୍‌ ଅବ୍ରାହାମ ମାରି ୱାନି ଗାତୁଦୁ ଲାଜାର୍‌ତିଙ୍ଗ୍‌ ସୁଡ଼ୁତାନ୍‌ ।
LUK 16:24 ଆବେଟ୍‌ ୱାନ୍‌ କୁକ୍‍ସି ଇର୍ହାନ୍‌, ଏ ବୁବା ଅବ୍ରାହାମ, ନାଙ୍ଗିଁ ଦୟା କିଜ ଲାଜାର୍‌ତିଙ୍ଗ୍‌ ପୋକ୍‍ତାଆ, ଏଣ୍ତେସ୍‌ ୱାନ୍‌ ଏର୍‍ତୁ ନିଜେଦି ଡ଼ାସ୍‍କା ମୁଡ଼ୁକ୍‌ସ ନା ୱେତ୍‌ଲତିଙ୍ଗ୍‌ ସିତ୍‌ଡ଼ି କିଦେଙ୍ଗ୍‌, ମାତର୍‌ ନାନ୍ ଇୟା ସିସୁଦୁ କଲ୍‌ବଲ୍‌ ଆଜିନା ।
LUK 16:25 ମାତର୍‌ ଅବ୍ରାହାମ ଇର୍ହାନ୍‌, ମାରିନ୍‌, ନିନ୍‌ ଜେ ଜିବନ୍‌ମାର୍‌ଇ ୱାଲେ ନିଜେଦି ନେଗି ବିସୟୱିଜୁ ପଇତି, ମାରି ଲାଜାର୍‌ ଆୟାୱାଜା ତାଗ୍‌ଇ ବିସୟୱିଜୁ ପ‍ଇତାନ୍‌, ଇକା ଅଡ଼୍‍ବିଆ; ମାତର୍‌ ଇଲେ ୱାନ୍‌ ଇୟା ବାଡ଼ିଦୁ ୱେଡ଼ିକା ପଇଜିନାନ୍‍, ମାରି ନିନୁ କଲ୍‌ବଲ୍‌ ଆଜିନି ।
LUK 16:26 ଆକା ଡ଼ିସ୍‌ତିଙ୍ଗ୍‌ ନିଦି ମାନ୍ଦି ମାଣ୍‌କୁ ନାଣ୍ତ ଗାଡ଼୍‍ଦି ମାନାତ୍‌, ଏଣ୍ତେସ୍‌ ଏମେ ଲୋକୁ ଇୟା ବାଡିଦାନ୍‍ ମି ଲାକ୍‌ତୁ ସଣ୍ଡ୍ରେଙ୍ଗ୍‌ ଇଜି ବଦା କିନାର୍‌, ୱାର୍‌ ସଣ୍ଡ୍ରେଙ୍ଗ୍‌ ଆଟ୍‍ଏର୍‍, ମାରି ଆୟାବାଡିଦାନ୍‍ ଏନ୍‌ବା ମା ଲାକ୍‌ତୁ ନାସ ୱାଦେଙ୍ଗ୍‌ ଆଟ୍‍ଏର୍‍ ।
LUK 16:27 ଆବେନ୍‌ ମାଜନ୍‌ଲୋକ୍‌ ଇର୍ହାନ୍‌, ଏ ବୁବା, ଆତିଙ୍ଗ୍‌ ନାନ୍ ନିଙ୍ଗିଁ ମାଡ଼ିସ୍‌ କିଜିନା, ୱାନିଙ୍ଗ୍‌ ନା ବୁବାଦି ଇଲ୍‍ଦୁ ପୋକ୍‌ଆ,
LUK 16:28 ମାତର୍‌ ନା ପାସ୍‌ଲୋକ୍‌ ତଡ଼ାନ୍‍କୁ ମାନାର୍‌; ୱାର୍‍ବା ଏଣ୍ତେସ୍‌ ଇୟା କାସ୍ଟୁଦି ବାଡିଦୁ ରାମାକିର୍‍, ଆୟାଉଣ୍ତିଙ୍ଗ୍‌ ୱାନ୍‌ ୱାରି ଲାକ୍‌ତୁ ସାକି ସିନି ।
LUK 16:29 ମାତର୍‌ ଅବ୍ରାହାମ ଇର୍ହାନ୍‌, ୱାରି ଲାକ୍‌ତୁ ମୋସା ମାରି ବାବବାଦିରି ଦାର୍ମୁସାସ୍ତ୍ର ମାନାତ୍‌, ୱାର୍‌ ୱାରି ମାଟା ୱେନ୍‌ରି ।
LUK 16:30 ଆବେନ୍‌ ୱାନ୍‌ ଇର୍ହାନ୍‌, ଏ ବୁବା ଅବ୍ରାହାମ, ଆକା ନାଣ୍ତ ଆଏତ୍‍; ମାତର୍‌ ଜଦି ସାତିମାନିଲୋକା ଲାକ୍‌ତୁରାନ୍‌ ଅରେନ୍‍ ୱାରି ଲାକ୍‌ତୁ ସନାର୍‌, ଆତିଙ୍ଗ୍‌ ୱାର୍‌ ମନ୍‍ତିଙ୍ଗ୍‍ ଡ଼େପ୍‍ନାର୍‍ ।
LUK 16:31 ମାତର୍‌ ୱାନ୍‌ ୱାନିଙ୍ଗ୍‌ ଇର୍ହାନ୍‌, ଜଦି ୱାର୍‌ ମୋସା ନି ବାବବାଦିରି ମାଟା ୱେନ୍‌ଏର୍‌, ଆତିଙ୍ଗ୍‌ ସାତିମାନି ଲୋକାମାଣ୍‌କୁ ଅରେନ୍‍ ମାରିଡ଼େସି ଜିବନ୍‌ଆଜିନିଙ୍ଗିଁଜି ସରିଙ୍ଗ୍ ବା ୱାର୍‌ ନେଗିମାଟା ୱେର୍‌ତିଙ୍ଗ୍‌ ୱେନ୍‌ଏର୍‌ ।
LUK 17:1 ଜିସୁ ୱାନି ସିସୁରିଙ୍ଗ୍‌ ଇର୍ହାନ୍‌, ଏମେ ୱିଜୁ ପରିକାଦାନ୍‌ ଲୋକୁ ପାପ୍‌ତୁ ଆର୍‌ନାନ୍‌, ଆୟାୱିଜୁ ଏଣ୍ତେସ୍‌ବା ୱାନାତ୍‌, ମାତର୍‌ ଜେ ଇୟା ୱିଜୁଦି ବଜ୍‌ ଆନାନ୍‌, ୱାନି ଦସ୍‌ ଏସା ବୟକାର୍‌ ଆନାତ୍‌ ।
LUK 17:2 ଇୟା ଇସ୍ରି ଲୋକାମାଣ୍‌କୁ ଅରେନ୍‍ୱାନି ଲୋକ୍‌ତି ପାପ୍‍ ଆନାନ୍‌ ୱାନି କକ୍‍ଲାଦୁ ଉଣ୍ତ୍ରି ଜାତାକାଲୁ ଡ଼ସି ୱାନିଙ୍ଗ୍‌ ସାମ୍‌ଦୁର୍‌ତୁ ପକ୍‍ତିଙ୍ଗ୍‍ ମାର୍‍ରିଙ୍ଗ୍‍ ୱାନି ଉଣ୍ତିଙ୍ଗ୍‌ ନେଗେଣ୍ତ୍‍ ଆତାତ୍‍ମାନ୍ଦି ।
LUK 17:3 ଆରିଙ୍ଗ୍‌, ମିର୍‌ ନିଜେ ନିଜେଦି ବିସୟ୍‌ତାନ୍‌ ଜାଗାର୍‌ତା ଆଜି ମାନ୍‌ଡ଼୍ରୁ । ଜଦି ମି ତଡ଼ାନ୍‌ ପାପ୍‌ କିନାନ୍‌, ଆରିଙ୍ଗ୍‌ ୱାନିଙ୍ଗ୍‌ ୱେର୍‍ତୁ; ମାରି, ୱାନ୍‌ ଜଦି ମନ୍‍ ଡ଼େପ୍‍ନାନ୍‍, ଆରିଙ୍ଗ୍‌ ୱାନିଙ୍ଗ୍‌ କେମା ସିଦୁ ।
LUK 17:4 ମାରି, ଜଦି ୱାନ୍‌ ଅର୍‌ନେଟିଙ୍ଗ୍‍ ସାତ୍ ଦେବେଙ୍ଗ୍‌ ମି ବିରଦ୍‌ତାନ୍‌ ପାପ୍‌ କିନାନ୍‌ ମାରି ସାତ୍ ଦେବେଙ୍ଗ୍‌ ମି ଲାକ୍‌ତୁ ଡ଼େସିୱାଜି ନାନ୍ ମନ୍‍ ଡ଼େପ୍‍ସିନା ଇଜି ଇନାନ୍‌, ଆରିଙ୍ଗ୍‌ ୱାନିଙ୍ଗ୍‌ ଏଣ୍ତେସ୍‌ବା କେମା ସିଦୁ ।
LUK 17:5 ଆବେଟ୍‌କୁ ପ୍ରେରିତ ସିସୁର୍‍ ପ୍ରବୁଙ୍ଗ୍‌ ଇର୍‌ଆନ୍‌, “ମା ବିସ୍‌ବାସ୍‌ ନାଣ୍ତ୍‍ ପିରିସ୍‍ କିଆ ।”
LUK 17:6 ପ୍ରବୁ ଇର୍‌ଆନ୍‌, ଜଦି ଉଣ୍ତ୍ରି ସାର୍‍ସୁ ପାଡ଼ୁ ୱାଜା ମି ବିସ୍‌ବାସ୍‌ ତେବାନାତ୍‍, ଆତିଙ୍ଗ୍‌ ଇୟା ତୁତ୍‍କଡ଼ି ମାର୍‍ତିଙ୍ଗ୍‍ ନିନ୍‌ ମଦଲ୍‍ତାନ୍‍ ରେଲାଜି ସାମ୍‌ଦୁର୍‌ତୁ ଉରାଆ ଇଜି ଇରିଙ୍ଗ୍‌ ଆକା ମି ମାଟା ମାନାନାତ୍‍ ।
LUK 17:7 ମାତର୍‌ ମି ମାଣ୍‌କୁ ଇୟାୱାଜା ଲୋକୁ ଏନ୍‌ ମାନାନ୍‌, ଆମାୱାନି ଗତିମୁରୁଲି ଡ଼ୁଜି ୱାନାନ୍‌ ମାରି ଡ଼ାକ୍‍କଡିଙ୍ଗ୍‍ ସାରାକିଜି କିଡ଼ିଇଦାନ୍‍ ୱାତିଙ୍ଗ୍‍ ୱାନ୍‌ ୱାନିଙ୍ଗ୍‌ ଇନାନ୍‌, ଇୟାଦାପ୍ରେ ୱାଜି ଉଣ୍ତେଙ୍ଗ୍‌ ବାସ୍‍ଆ ?
LUK 17:8 ୱାନ୍‌ ଇନିକା ୱାନିଙ୍ଗ୍‌ ଇନ୍‌ଏନ୍‌, ନାନ୍ ଉଣ୍ତେଙ୍ଗ୍‌ ରସ୍‍ଆ, ମାରି ନାନ୍ ତିନିଉଣିକା ୱିସ୍‌ଇ ସାନ୍ଦି ଜୁକ୍‍ଦୁ ତରାଜି ନା ସେବା କିଆ, ତାନି ୱେନ୍‌କା ନିନ୍‌ ତିନିଉଣି ?
LUK 17:9 ଗତିମୁରୁଲି ୱାନି ମାଟାଦାନ୍‌ ପାଣି କିତିଙ୍ଗ୍‌ ୱାନ୍‌ ଇନିକା ୱାନିଙ୍ଗ୍‌ ଦନ୍ୟବାଦ୍‌ ସିନାନ୍‍ ?
LUK 17:10 ଆୟାୱାଜାନେ ମିର୍‌ ବା ମାଟାଦାନ୍‌ ୱିଜୁ ପାଣିକିତି ୱେନ୍‌କା ଇନ୍‍ଣ୍ତ୍ରୁ, ମାପ୍‌ ଇନି ପାଣି କିଇ ଗତିମୁରୁଲିଙ୍ଗ୍‍, ଏମେକା କିଦେଙ୍ଗ୍‌ ଆନାତ୍‌, ଆକାନେ କିତାମାନାପ୍‍ ।
LUK 17:11 ଜିସୁ ଜିରୁସାଲମ୍‌ତୁ ସନିୱାଲେ ସମିରୋଣ୍‍ ମାରି ଗାଲିଲି ବା ସିଜି ସଲ୍‍ସିମାର୍‍ଆର୍‍ ।
LUK 17:12 ମାରି, ୱାନ୍‌ ଉଣ୍ତ୍ରି ନାର୍‍ତୁ ଡ଼ୁଗିତାନ୍‍, ଦାସ୍‍ଲୋକ୍‍ କୁସ୍ଟରୋଗ୍‌ତି ଲୋକୁ ୱାନିଙ୍ଗ୍‌ ମିସାତାର୍‍;
LUK 17:13 ୱାର୍‌ ଆକ ନିଲ୍‍ଜି ନାଣ୍ତ ଆଉଲି ଆଜି ଇର୍ହାର୍‌, “ଏ ଜିସୁ, ଗୁରୁ, ମାଙ୍ଗିଁ ଦୟା କିଆ ।”
LUK 17:14 ମାରି, ୱାନ୍‌ ୱାରିଙ୍ଗ୍‌ ସୁଡ଼ୁଜି ଇର୍ହାନ୍‌, “ମିର୍‌ ସଲ୍‌ସି ନିଜେ ନିଜେଦିଙ୍ଗ୍‍ ଜାଜକରିଙ୍ଗ୍‍ ତର୍‌ତୁ ।” ମାରି, ୱାର୍‌ ସଲ୍‍ପୁ ସଲ୍‍ପୁ ନେଗେଣ୍ତ୍‌ ଆତାର୍‌ ।
LUK 17:15 ମାତର୍‌ ୱାରି ମାଣ୍‌କୁ ଅରେନ୍‍ ନିଜେଦି ନେଗେଣ୍ତ୍‍ ଆତିକା ସୁଡ଼ୁଜି ନାଣ୍ତ ଆଉଲି ଆଜି ମାପୁରୁଦି ଦନ୍ୟବାଦ୍‌ କିଜି କିଜି ଡେସି ୱାତାନ୍‌,
LUK 17:16 ମାରି ଜିସୁଦି ପାଦାମ୍‌କା ଆଡ୍‍ଗି ଆର୍‍ଜି ୱାନିଙ୍ଗ୍‌ ଦନ୍ୟବାଦ୍‌ ସିଦେଙ୍ଗ୍‍ ଆସ୍‌ତାନ୍‌; ୱାନ୍‌ ଅରେନ୍‍ ସମିରୋଣିୟ ଲୋକୁ ।
LUK 17:17 ଆବେଟ୍‌ ଜିସୁ ଇର୍ହାନ୍‌, “ଦାସ୍‍ଲୋକ୍‍ ଇନିକା ନେଗେଣ୍ତ୍‌ ଆଏତାର୍‍ ? ଆରିଙ୍ଗ୍‌ ମାରି ଲୋକୁ ଏମେ ?
LUK 17:18 ଗୌରବ୍‍ ମାପୁରୁଦି ଦନ୍ୟବାଦ୍‌ ସିଦେଙ୍ଗ୍‍ ଇଜି ଇୟା ଆଇଜାତିଦି ଲୋକ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ ଇନିକା ମାରି ଏର୍‍ବା ଡ଼େସି ରେଏର୍‍ ?”
LUK 17:19 ମାରି, ଜିସୁ ୱାନିଙ୍ଗ୍‌ ଇର୍‌ଆନ୍‌, “ନିଙ୍ଗିଁଜ ସାଙ୍ଗ୍‍ଆ, ନି ବିସ୍‌ବାସ୍‌ ନିଙ୍ଗିଁ ନେଗେନ୍‍ କିତାମାନାତ୍‌ ।”
LUK 17:20 ମାପୁରୁଦି ରାଜି ଏସ୍‌କାଙ୍ଗ୍‌ ୱାଜିନାତ୍‍, ଇୟା ବିସୟ୍‌ତାନ୍‌ ପାରୁସିର୍‌ ଜିସୁଙ୍ଗୁଁ ୱେନ୍‌ବାତିଙ୍ଗ୍‌ ୱାନ୍‌ ୱାରିଙ୍ଗ୍‌ ଇର୍ହାନ୍‌, “ମାପୁରୁଦି ରାଜି ତରାଜି ରେଏତ୍‌;
LUK 17:21 ମାରି ସୁଡ଼ୁଦୁ, ମାପୁରୁଦି ରାଜି ଇବେନ୍‌ ବା ଆବେନ୍‌ ଇଜି ଲୋକୁ ଇନ୍‌ଏର୍‌; ମାତର୍‌ ସୁଡ଼ୁଦୁ, ମାପୁରୁଦି ରାଜି ମି ଲୋଇ ମାନାତ୍‌ ।”
LUK 17:22 ମାତର୍‌ ଜିସୁ ସିସୁରିଙ୍ଗ୍‌ ଇର୍ହାନ୍‌, “ଇୟାୱାଜା ଦିନ୍‌ ୱାନାତ୍‌, ଏସ୍ତିୱାଲେ ମିର୍‌ ମନୁସ୍ୟପୁତ୍ରଦି ଦିନାମ୍‍ତି ମାଣ୍‌କୁ ଉଣ୍ତ୍ରି ନାଣ୍ତିଙ୍ଗ୍‌ ସୁଡ଼ୁଦେଙ୍ଗ୍‍ ବଦା କିନିଦେର୍‍, ମାତର୍‌ ସୁଡ଼୍‍ଦେଙ୍ଗ୍‍ ଆଟ୍‍ଇଦେର୍‍ ।
LUK 17:23 ସୁଡ଼ୁଦୁ, ଆବେନୁ, ସୁଡ଼ୁଦୁ, ଇବେନ୍‌, ଇଜି ଲୋକୁ ମିଙ୍ଗିଁ ଇନ୍‌ନାର୍‌; ମାତର୍‌ ମିର୍‌ ଆବେ ସଲ୍‍ମାଟ୍‍ ।
LUK 17:24 ମାତର୍‌ ମିର୍‌ସିନିକା ଏଣ୍ତେସ୍‌ ବାଦଡ଼୍‍ତି ଉଣ୍ତ୍ରିଲାକ୍‍ତୁରାନ୍‍ ମାରି ଉଣ୍ତ୍ରି ସାନ୍ଦି ଜାଇସିନାତ୍‍, ମନୁସ୍ୟପୁତ୍ର ନିଜେଦି ଦିନ୍‌ତୁ ଆୟାୱାଜା ତରାୟ୍‍ ଆନାନ୍‌ ।
LUK 17:25 ମାତର୍‌ ଆଗ୍‌ଡ଼ି ୱାନିଙ୍ଗ୍‌ ପୁରା ନାଣ୍ତ ଦୁଃକ୍‌କାସ୍ଟୁ କିଦେଙ୍ଗ୍‌ ଆନାତ୍‌ ମାରି ଇୟା ଇଲେତି ମେମାରିର୍‌ ମାଣ୍‌କୁ ଡ଼ିସାଇ ଆଦେଙ୍ଗ୍‌ ପଡ଼ାନାତ୍‌ ।
LUK 17:26 ମାରି, ନୋହଦି ବେଡ଼ାଦୁ ଏଣ୍ତେସ୍‌ ଗଟାତା ମାର୍ହାତ୍‌, ମନୁସ୍ୟପୁତ୍ରଦି ୱାନି ବେଡ଼ାଦୁ ବା ଆୟାୱାଜା ଗଟାନାତ୍‌;
LUK 17:27 ଏର୍‌ଜାହାଜ୍‌ତୁ ନୋହଦି ଡ଼ୁଗୁନି ଦିନ୍‌ ସାନ୍ଦି ଲୋକୁ ଉଣିତିନିକା ମାରି ମେମାରି ନି ଆଇମା ପେଡ଼ିଆନି ୱିଜୁପାଣିଦୁ ଦାନ୍ଦା ଆତାମାର୍ହାତ୍‌, ମାରି ନାଣ୍ତ ଗାଲିପିରୁ ୱାଜି ୱିଜେରିଙ୍ଗ୍‌ ଏର୍‍ତୁ ମୁଡ଼ୁକ୍‍ତାତ୍‍ ।
LUK 17:28 ଲୋଟଦି ସମୟତୁ ବା ଆୟାୱାଜା ଗଟାତା ମାର୍ହାତ୍‌, ଲୋକୁ ଉଣିକାତିନିକା, କଣିକାପର୍‌ନିକା, ମାରାକୁଉରୁନିକା ମାରି ଇଲୁ ତିଆର୍‌ କିଦେଙ୍ଗ୍‌ ଦାନ୍ଧା ଆତା ମାର୍ହାର୍‌,
LUK 17:29 ମାତର୍‌ ଲୋଟ ସଦମ୍‍ଦାନ୍‌ ସତିସର୍‌ଇ ନାଣ୍ତିଙ୍ଗ୍‌ ବାଦଡ଼୍‍ତାନ୍ ସିସୁ ମାରି ଗନ୍ଧକ୍‌ ପିରୁ ୱାଜା ୱାଜି ୱିଜେରିଙ୍ଗ୍‌ ସାପିସ୍‌ କିତାତ୍‌ ।
LUK 17:30 ମନୁସ୍ୟପୁତ୍ର ତରାୟ୍‍ଆନି ନାଣ୍ତିଙ୍ଗ୍‌ ଆୟାୱାଜା ଗଟାନାତ୍‌ ।
LUK 17:31 “ଆୟାନାଣ୍ତିଙ୍ଗ୍‌ ଏନ୍‌ ସାତ୍ ମୁସ୍‌କୁ ତେବାନାନ୍‌, ୱାନ୍‌ ଇଲୁ ଲୋଇ ମାନି ନିଜେଦି ସାଶାପାତି ଅତେଙ୍ଗ୍‌ ଇଜି ରେସି ରାମାକିନ୍‍; ଆୟାୱାଜା ଏନ୍‌ କିଡ଼ିଇଦୁ ତେବାନାନ୍‌, ୱାନ୍‌ ଡ଼େସି ସଲ୍‍ମାକିନ୍‍ ।
LUK 17:32 ଲୋଟଦି ଆଡ଼୍‌ସି ମାଟା ଅଡ଼୍‍ବିଆ ।
LUK 17:33 ଏନ୍‍କି ନିଜେଦି ଜିବନ୍‌ତିଙ୍ଗ୍‌ ଜିଣା କିଦେଙ୍ଗ୍‌ ବଦା କିନାନ୍‌, ୱାନ୍‌ ଆକା ଆରାକିନାନ୍‍, ମାରି ଏନ୍‍କି ନିଜେଦି ଜିବନ୍‌ତିଙ୍ଗ୍‌ ଆରାକିନାନ୍‍, ୱାନ୍‌ ଆକା ଜିପିସ୍‍ନାନ୍‍ ।
LUK 17:34 ନାନ୍ ମିଙ୍ଗିଁ ୱେର୍‌ସିନା, ଆୟା ନାଡ଼ା ରିଏର୍‌ ଉଣ୍ତ୍ରେ କାଟେଲ୍‍ତୁ ଡର୍‍ନା ମାନାର୍‌, ଅରେନ୍‍ ୱାନିଙ୍ଗ୍‍ ଅନାନ୍‍ ମାରି ଆଇ ଅରେନ୍‍ୱାନିଙ୍ଗ୍‍ ଡ଼ିସ୍‍ନାନ୍‍ ।
LUK 17:35 ରୁଣ୍ତିଲୋକ୍‍ ଆଇମେକ୍‍ ଅର୍‌ସେ ଜାତାଦୁ ନୁର୍‍ଜିମାନେ, ଅରେତ୍‍ତାନିଙ୍ଗ୍‍ ଅନାନ୍‍ ମାରି ଆଇ ଅରେତ୍‍ତାନିଙ୍ଗ୍‍ ଡ଼ିସ୍‍ନାନ୍‍ ।
LUK 17:36 ରୁଣ୍ତିଲୋକ୍‍ କିଡ଼ିଇଦୁ ତେବାନେ, ଅରେନ୍‍ୱାନିଙ୍ଗ୍‍ ଅନାନ୍‍ ମାରି ଆଇ ଅରେନ୍‍ୱାନିଙ୍ଗ୍‍ ଡ଼ିସ୍‍ନାନ୍‍ ।”
LUK 17:37 ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, “ଏ ପ୍ରବୁ, ଏମେ ଇୟାୱିଜୁ ଗଟାନାତ୍‌ ?” ଜିସୁ ୱାରିଙ୍ଗ୍‌ ଇର୍‌ଆନ୍‌, “ଏମେମାନୁ ସାତି ମାଡ଼ା ମାନାତ୍‌, ଆୟାବାନୁ ଡେଗେଙ୍ଗ୍‌ ଉନ୍‌ଡ୍ରେମାନୁ ଉଣ୍ତାନେ ।”
LUK 18:1 ୱାଦ୍‍ଏଣ୍‍ଗା ୱିଜୁଦିନ୍‌ ପାର୍‌ତନା କିନିକା ଜେ ପାଣି, ଇୟା ବିସୟ୍‌ତାନ୍‌ ଜିସୁ ୱାରିଙ୍ଗ୍‌ କାତାଦାନ୍‍ ୱେର୍‌ତାନ୍‌,
LUK 18:2 ଉଣ୍ତ୍ରି ଗାଡ଼୍‌ତୁ ଅରେନ୍‍ ବିସାର୍‌ କିନିକାନ୍‍ ମାର୍‌ଆନ୍‌, ୱାନ୍‌ ମାପୁରୁଙ୍ଗୁଁ ତିଲାଏଜି ମାର୍‌ଆନ୍‌ କି ଲୋକାଙ୍ଗ୍‌ ମାନାଏଜି ମାର୍‌ଆନ୍‌ ।
LUK 18:3 ଆୟା ଗାଡ଼୍‌ତୁ ଅରେତ୍‌ ରାଣ୍ତି ମାର୍‌ଆତ୍‌, ୱାଦ୍‌ ରିଜାମୁଜା ୱାନି ଲାକ୍‌ତୁ ସଲ୍‌ସି ୱେର୍‌ସି ମାର୍‌ଆତ୍‌, ଲୋକୁ ନା ଉଣ୍ତିଙ୍ଗ୍‌ ଅନ୍ୟାୟ୍‍ କିଜିନାର୍‍ ନିନ୍‌ ନାଙ୍ଗିଁ ବିସାର୍‌ କିଆ ।
LUK 18:4 ମାରି, ୱାନ୍‌ ଏସ ସମୟ ଆତାତ୍‌ ରାଜିଆଏଜି ମାର୍‌ଆନ୍‌; ମାତର୍‌ ୱେନ୍‌କା ୱାନ୍‌ ମୋନ୍‌ତୁ ମୋନ୍‌ତୁ ଅଡ଼୍‍ବିତାନ୍‍, ଜଦିବା ନାନ୍ ମାପୁରୁଦିଙ୍ଗ୍‌ ତିଲାଏ ମାରି ଲୋକାଙ୍ଗ୍‌ ମାନାଏ,
LUK 18:5 ମାତର୍‌ ଇୟା ରାଣ୍ତି ନାଙ୍ଗିଁ ଜେଲ୍‌ ସିଜିମାର୍‍ଆତ୍‍ଆକା ନାନ୍ ତାନେ ଉଣ୍ତିଙ୍ଗ୍‌ କିତିମାନି ଅନ୍ୟାୟ୍‍ ପାଣିଦି ଉଣ୍ତିଙ୍ଗ୍‌ ନାନ୍ ତାନେଙ୍ଗ୍‌ ସାକାକିନା, ଆଏତିଙ୍ଗ୍‍ ୱାଦ୍‌ ଦିନ୍‍କେ ୱାଜି ନାଙ୍ଗିଁ ବିଜାର୍‌ କିଜିମାନାତ୍‍ ।
LUK 18:6 ଆବେଟ୍‌ ପ୍ରବୁ ୱେର୍‌ତାନ୍‌, “ଇୟା ଅଦାର୍ମୁଦି ବିସାର୍‌କିନିକାନ୍‌ ଇନିକା ୱେର୍‌ସିନାନ୍‌, ଆକା ୱେଣ୍ତ୍ରୁ ।
LUK 18:7 ମାରି ମାପୁରୁଦି ଏମେ ସେବାକିନି ଲୋକୁ ୱେଡ଼େନାଡ଼ା ୱାନିଙ୍ଗ୍‌ କୁକ୍‍ସିମାନାର୍‍, ୱାନ୍‌ ନୋ ୱାରି ଉଣ୍ତିଙ୍ଗ୍‌ କିତିମାନି ତାଗ୍‌ଇ ପାଣିଦି ଉଣ୍ତିଙ୍ଗ୍‌ ୱାରିଙ୍ଗ୍‌ ସାକା କିଏନ୍‍ ନୋ, ୱାନ୍‌ ୱାରିଙ୍ଗ୍‌ ସାହାଜ୍ୟ କିଦେଙ୍ଗ୍‌ ୱେଡ଼ା କିନାନ୍‌ନୋ ?
LUK 18:8 ନାନ୍ ମିଙ୍ଗିଁ ୱେର୍‌ସିନା, ୱାନ୍‌ ବେଗି ୱାରିଙ୍ଗ୍‌ କିତିମାନିମାନି ତାଗ୍‌ଇ ପାଣିଦି ଉଣ୍ତିଙ୍ଗ୍‌ ୱାରିଙ୍ଗ୍‌ ବିସାର୍‌କିନାନ୍‌ । ମାତର୍‌ ମନୁସ୍ୟପୁତ୍ର ୱାଜି ଦୁନିଆଦୁ ଇନିକା ବିସ୍‌ବାସ୍‌ ସୁଣାନ୍‌ ?”
LUK 18:9 ନିଜେ ନିଜେଦି ଦାର୍ମୁ ବୁଦି ମାନାତ୍‌ ଇଜି ଆଇ ୱିଜେରିଙ୍ଗ୍‍ ସେମାର୍‌ କିଜିମାନି ଏସ ନିଜେଦି ମୁସ୍‌କୁ ଆସା ଇଡ୍‌ନି ଲୋକାଙ୍ଗ୍‌ ଜିସୁ ଇୟା କାତାଦାନ୍‍ ଇର୍ହାନ୍‌,
LUK 18:10 ରିଏର୍‌ ଲୋକୁ ପାର୍‌ତନା କିନି ଉଣ୍ତିଙ୍ଗ୍‌ ମନ୍ଦିର୍‌ତୁ ସରଆର୍‌, ଅରେନ୍‍ ପାରୁସି ମାରି ଆଇକାନ୍‍ ସିସ୍‍ଟୁ ଲସ୍‌ନିକାନ୍‌ ।
LUK 18:11 ପାରୁସି ଅରେନ୍‍ ନିରାଆନ୍‍ନୋ ନିଜେଦିମାନୁ ଇୟାୱାଜା ପାର୍‌ତନା କିଦେଙ୍ଗ୍‌ ଆସ୍‌ତାନ୍‌, ଏ ମାପୁରୁ, ନାନ୍ ନିଙ୍ଗିଁ ଦନ୍ୟବାଦ୍‌ ସିଜିନା ଜେ, ନାନ୍ ଆଇ ୱିଜେରି ଲୋକା ୱାଜା କାତ୍‍ନିକାନ୍‍, ଅଦାର୍ମୁ, ଦାରିପାଣି ବା ଇୟା ସିସ୍‍ଟୁଲସ୍‍ନିୱାନି ୱାଜାବା ଆଏ;
LUK 18:12 ନାନ୍ ୱାରାମ୍‍ତୁ ରିନେଣ୍ତ୍‍ ଉପାସ୍‌ କିଜିନା ମାରି ନାନ୍ ଉଣ୍ତାକିନିକା ଦାସ୍‌ବାଗ୍‌ତାନ୍‌ ଉନ୍‌ଡ୍ରି ବାଗ୍ ସିଜିନା ।
LUK 18:13 ମାତର୍‌ ସିସ୍‍ଟୁ ଲସ୍‌ନିକାନ୍‌ ଆକ ନିଲ୍‍ସି ମୁସ୍‌କୁ ତରିନ୍‌ ସୁଡଦେଙ୍ଗ୍‌ ବା ସାସ୍‍କିଦେଙ୍ଗ୍‍ ଆଟ୍‍ଏତାନ୍‍, ମାତର୍‌ ନିଜେଦି ବକାଦୁ ଡାକାଜି ଇର୍ହାନ୍‌, ଏ ମାପୁରୁ, ନାନ୍ ପାପି, ନାଙ୍ଗିଁ ଦୟା କିଆ ।
LUK 18:14 ନାନ୍ ମିଙ୍ଗିଁ ଇଜିନାନ୍‌, “ଆୟା ପାରୁସି ଆଏନ୍‍, ମାତର୍‌ ଇୟା ସିସୁଟୁଲସ୍‌ନିକାନ୍‌ ଦାର୍ମୁ ଲୋକୁ ଆଜି ନିଜେଦି ଇଲ୍‌ତୁ ସର୍‌ଆନ୍‌; ମାତର୍‌ ଏମେକାନ୍‍ ନିଜେଦିଙ୍ଗ୍‍ ପେରିକାନ୍‌ ଇଜି ତର୍‍ଆନ୍‍, ୱାନିଙ୍ଗ୍‌ ଇସ୍ରିକାନ୍‌ କିନାର୍‍, ମାତର୍‌ ଏନ୍‌ ନିଜେଦିଙ୍ଗ୍‍ ଇସ୍ରିକାନ୍‍ କିନାନ୍‌, ୱାନିଙ୍ଗ୍‌ ପେରିକାନ୍‌ କିନାନ୍‌ ।”
LUK 18:15 ଜିସୁ ଏଣ୍ତେସ୍‌ ଇସ୍ରିକଡ଼ରି ମୁସ୍‌କୁ କିୟୁ ଇଡ୍‌ଜି ମୁଟ୍‍ନାନ୍‍, ଇୟାଉଣ୍ତିଙ୍ଗ୍‌ ଲୋକୁ ୱାରିଙ୍ଗ୍‌ ବା ଜିସୁଦି ଲାକ୍‌ତୁ ତାତେଙ୍ଗ୍‌ ଆସ୍‌ତାର୍‌; ମାତର୍‌ ସିସୁର୍‍ ଆକା ସୁଡ଼ୁଜି ୱାରିଙ୍ଗ୍‌ ଆଦ୍‌ରିସ୍‌ତେଙ୍ଗ୍‍ ଆସ୍‌ତାର୍‌ ।
LUK 18:16 ମାତର୍‌ ଜିସୁ ୱାରିଙ୍ଗ୍‌ ନିଜେଦି ଲାକ୍‌ତୁ କୁକ୍‌ତା ଇର୍ହାନ୍‌, ଇସ୍ରି କଡ଼ରିଙ୍ଗ୍‌ ନା ଲାକ୍‌ତୁ ୱାଦେଙ୍ଗ୍‌ ସିଦୁ, ମାରି ୱାରିଙ୍ଗ୍‌ ମାନା କିମାଟ୍‌; ଇରିଙ୍ଗ୍‌ ମାପୁରୁଦି ରାଜି ଇୟାୱାଜା କଡ଼ରିଦି ।
LUK 18:17 ନାନ୍ ମିଙ୍ଗିଁ ସତ୍‌ ଇଜିନା, “ଏନ୍‌ ଇସ୍ରିକଡ଼ୱାଜା ମାପୁରୁଦି ରାଜି ଆସ୍‍ଏନ୍‍, ୱାନ୍‌ ଏଣ୍ତେସ୍‍କିଜିବା ମୁସ୍‍କୁପୁର୍‌ ସଣ୍ଡ୍ରେଙ୍ଗ୍‌ ଆଟ୍‍ଏନ୍‍ ।”
LUK 18:18 ଅରେନ୍‍ ଜିହୁଦିର୍‌ ପେରିକାନ୍‌ ଜିସୁଙ୍ଗୁଁ ୱେନ୍‌ବାତାନ୍‌, “ଏ ସତ୍‍ ଗୁରୁ, ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍ ଇନିକା କିନା ?”
LUK 18:19 ଆବେଟ୍‌ ଜିସୁ ୱାନିଙ୍ଗ୍‌ ଇର୍ହାନ୍‌, “ନାଙ୍ଗିଁ ନେଗିକାନ୍‍ ଇଜି ଇନିଦାନିଙ୍ଗ୍‌ ଇଜିନି ? ମାରି ମାପୁରୁଙ୍ଗୁଁ ଡ଼ିସ୍‍ତିଙ୍ଗ୍, ମାରି ଆଇକାନ୍‍ ଏନ୍‌ବା ସତ୍‌ ସିଲେନ୍‌ ।
LUK 18:20 ପ୍ରବୁଦି ନିୟମକୁ ୱିଜୁ ତୋ ନିନ୍‌ ନେସ୍‍ତିମାନି, ଦାରିପାଣି କିମାଟ୍‌, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଡଙ୍ଗାଁ ପାଣି କିମା, ମିସ୍‌ସାକି ୱେର୍‍ମା, ନିଜେଦି ବୁବା ୟାୟାଏଙ୍ଗ୍‍ ମାନାଆ ।”
LUK 18:21 ୱାନ୍‌ ୱେର୍‌ତାନ୍‌, ଇୟାୱିଜୁ ନାନ୍ ମୁରୁଲିୱାଲେରାନ୍‍ ମାନାଜି ୱାଜିନା ।
LUK 18:22 ଜିସୁ ଇୟାକା ୱେନ୍‌ଜି ୱାନିଙ୍ଗ୍‌ ଇର୍‌ଆନ୍‌, ନି ଉଣ୍ତ୍ରିବିସୟ ଉଣାମାନାତ୍‌; ନିନ୍‌ ନିଜେଦି ୱିଜୁ ସମ୍ପତ୍ତି ପର୍‌ଜି କାକୁର୍ତି ଲୋକାଙ୍ଗ୍‌ ବାଟାକିଜି ସିଆ, ମାରି ନିନୁ ମୁସ୍‌କୁପୁର୍‌ତୁ ଦନ୍‌ ପୟ୍‌ନି; ମାରି, ୱାଜି ନା ୱେନ୍‌କା ରାଆ ।
LUK 18:23 ମାତର୍‌ ୱାନ୍‌ ଇୟାୱିଜୁ ମାଟା ୱେନ୍‌ଜି ନାଣ୍ତ୍‍ ଦୁଃକ୍‍ ଆତାନ୍‌, ଇରିଙ୍ଗ୍‌ ୱାନ୍‌ ପେରିମାଜନ୍‍ ମାର୍‌ଆନ୍‌ ।
LUK 18:24 ଆବେଟ୍‌ ୱାନି ଦୁଃକ୍‌ ଆନିକା ସୁଡ଼୍‌ଜି ଜିସୁ ନିଜେଦି ସିସୁରିଙ୍ଗ୍‌ ଇର୍ହାନ୍‌, ଏମେ ଲୋକ୍‌ତିଙ୍ଗ୍‌ ଦନ୍‍ ମାନାତ୍‌, ୱାର୍‌ ଏସ କାସ୍ଟୁଦାନ୍‍ ମାପୁରୁଦି ରାଜିଦୁ ସନାର୍‌ !
LUK 18:25 ଇରିଙ୍ଗ୍‌ ମାପୁରୁଦି ରାଜିଦୁ ମାଜନ୍‌ ଲୋକୁ ସନି ବାଦୁଲୁ ସୁଜିଦି ବର୍‌ ସିଜି ଉଟ୍‌ ଡ଼ୁଗୁନିକା ଉସାସ୍‌ ।
LUK 18:26 ଏମେ ଲୋକୁ ଇୟା ମାଟା ୱେର୍‌ଆର୍‌, ୱାର୍‌ ଇର୍ହାର୍‌, ଆର୍‌ତିଙ୍ଗ୍‌ ଏନ୍‌ ରକିୟା ପଇଦେଙ୍ଗ୍‍ ଆଟ୍‍ନାନ୍‍ ?
LUK 18:27 ମାତର୍‌ ଜିସୁ ଇର୍ହାନ୍‌, “ଆମା ପାଣି ଲୋକାମାଣାନ୍‌ ଆଏତ୍‍, ଆୟା ପାଣି ମାପୁରୁ କିନାନ୍‌ ।”
LUK 18:28 ଆବେଟ୍‌ ପିତର୍‌ ଇର୍ହାନ୍‌, “ସୁଡୁଆ, ମାପୁ ନିଜେ ନିଜେଦି ୱିଜୁ ଡ଼ିସ୍‌ସି ନି ୱେନ୍‍କା ୱାତା ମାନାପ୍‌ ।”
LUK 18:29 ଜିସୁ ୱାରିଙ୍ଗ୍‌ ଇର୍‌ଆନ୍‌, ନାନ୍ ମିଙ୍ଗିଁ ସତ୍‌ ୱେର୍‌ସିନା, ଏମେ ଲୋକୁ ମାପୁରୁଦି ରାଜିଦି ଉଣ୍ତିଙ୍ଗ୍‌ ଇଲୁ କି ନିଜେଦି ଆଡ଼ି କି ତଡ଼ାନ୍‌ କି ବୁବାୟାୟା କି କଡ଼କକ୍‍ରା ଡ଼ିସ୍‍ତି ମାନିଦେର୍‌ ।
LUK 18:30 ଇୟା ଦୁନିଆଦୁ ନାଣ୍ତ୍‍ଗୁଣ୍‍ ମାରି ୱେନ୍‌କାରି କାଡ଼ାଦୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‌ନାନ୍‌, ଇୟାୱାଜା ଲୋକୁ ଏର୍‌ ସିଲେର୍‌ ।
LUK 18:31 ୱେନ୍‌କା ଜିସୁ ବାର୍‍ଲୋକ୍ ୱେର୍‌ଏ କିଜି ୱାରିଙ୍ଗ୍‌ ୱେର୍‌ତାନ୍‌, “ୱେନ୍‌ଡ୍ରୁ, ମାପ୍‌ ଜିରୁସାଲମ୍‌ତୁ ସଲ୍‍ସିନାପ୍‍, ମାରି ମନୁସ୍ୟପୁତ୍ରଦି ବିସୟ୍‌ତାନ୍‌ ବାବବାଦିରି ଆମାୱିଜୁ ରାସ୍‌ତାମାନାର୍‌, ଆୟାୱିଜୁ ପୁରା ଆନାତ୍‌;
LUK 18:32 ଇରିଙ୍ଗ୍‌ ୱାନ୍‌ ଅଣଜିହୁଦି କିୟୁଦୁ ସର୍‍ପେ ଆନାନ୍‌, ମାରି ୱାର୍‌ ୱାନିଙ୍ଗ୍‌ ସେମାର୍‍ କିନାର୍‌, ୱାନିଙ୍ଗ୍‌ ଅପ୍‍ମାନ୍‍ କିନାର୍‌ ୱାନି ମୁସ୍‌କୁ ପୁସ୍‍କାଡ଼ାଙ୍ଗ୍‍ ପୁସ୍‍ନାର୍‍,
LUK 18:33 ୱାନିଙ୍ଗ୍‌ କର୍‌ଡା ଡ଼େଇଜି ସାୟାମାର୍‌ଗାଡାକ୍‌ନାର୍‌, ମାରି ମୁନେଟି ୱେନ୍‌କା ୱାନ୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନାନ୍‌ ।”
LUK 18:34 ମାତର୍‌ ୱାର୍‌ ଇୟାୱିଜୁ ବିସୟ୍‌ ଇନିକାବା ନେସ୍‌ଏତାର୍‌; ଇୟା ବାକ୍ୟ ୱାରିମାନ୍‍କୁ ମାର୍‍ଗିତା ତେବାତାତ୍‌, ମାରି ଇନିକା ଇନିକା ଇଜିମାର୍‌ଆର୍‌, ଆୟାୱିଜୁ ୱାର୍‌ ନେସ୍‍ଏଜି ମାର୍‌ଆର୍‌ ।
LUK 18:35 ଜିସୁ ଜିରିହୋଦି ଲାକ୍‌ତୁ ଆଜିମାରି ୱାଲେ ଅରେନ୍‍ କାଣା ସାରି ପାଡ଼ି ବାସ୍‌ତାନ୍‌ ବିକ୍‍ୟା ଲସ୍‌ସି ମାର୍‌ଆନ୍‌ ।
LUK 18:36 ୱାନ୍‌ ଲୋକୁ ବୁଲାନି ସେଉଡ଼ୁ ୱେନ୍‌ଜି ମାଟା ଇନିକା ଇଜି ୱେନ୍‍ବାଦେଙ୍ଗ୍‍ ଆସ୍‌ତାନ୍‌ ।
LUK 18:37 ୱାର୍‌ ୱାନିଙ୍ଗ୍‌ ଇର୍ହାର୍‌, ନାଜରିୟତିୟ ଜିସୁ ଇୟା ସାରି ସିଜି ସଲ୍‌ସିନାନ୍‌ ।
LUK 18:38 ଆବେଟ୍‌ ୱାନ୍‌ ନାଣ୍ତ୍‍ ଆଉଲି ଆଜି ଇର୍‌ଆନ୍‌, “ଏ ଜିସୁ, ଦାଉଦ୍‌ତି ମାରିନ୍‍, ନାଙ୍ଗିଁ ଦୟା କିଆ ।”
LUK 18:39 ମାତର୍‌ ଆଗିଡ଼ି ସଲ୍‍ସିମାରି ଲୋକୁ ୱାନିଙ୍ଗ୍‌ ଆଲେଜ ମାନ୍‌ଡ଼୍ରେଙ୍ଗ୍‌ ଇଜି ଆଦିରିସ୍‌ତେଙ୍ଗ୍‍ ଆସ୍‌ତାର୍‌, ମାତର୍‌ ୱାନ୍‌ ମାରି ନାଣ୍ତ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ଏ ଦାଉଦତି ମାରିନ୍‍, ନାଙ୍ଗିଁ ଦୟା କିଆ ।”
LUK 18:40 ଆବେଟ୍‌ ଜିସୁ ନିଲ୍‍ଜି ୱାନିଙ୍ଗ୍‌ ନିଜେଦି ଲାକ୍‌ତୁ ତାତେଙ୍ଗ୍‌ ଇଜି ଆଦେସ୍‌ ସିତାନ୍‌; ମାରି, ୱାନ୍‌ ଲାକ୍‌ତୁ ୱାତାନ୍‍ଆକା, ଜିସୁ ୱାନିଙ୍ଗ୍‌ ୱେନ୍‌ବାତାନ୍‌,
LUK 18:41 “ନାନ୍ ନି ଉଣ୍ତିଙ୍ଗ୍‌ ଇନିକା କିନା ଇଜି ନିନ୍‌ ବଦା କିଜିନି ?” ୱାନ୍‌ ଇର୍‌ଆନ୍‌, “ଏ ପ୍ରବୁ, ନାନ୍ ଏଣ୍ତେସ୍‌ମାରି ସୁଡ଼ୁଦେଙ୍ଗ୍‌ ଆଟ୍‍ନା ।”
LUK 18:42 ଜିସୁ ୱାନିଙ୍ଗ୍‌ ଇର୍‌ଆନ୍‌, “ଆରିଙ୍ଗ୍‌ ସୁଡ଼ୁଆ; ନି ବିସ୍‌ବାସ୍‌ ନିଙ୍ଗିଁ ନେଗେନ୍‍ କିତାମାନାତ୍‌ ।”
LUK 18:43 ଆୟାଦାପ୍ରେ ୱାନ୍‌ ସୁଡ଼ୁଦେଙ୍ଗ୍‍ ଆଟ୍‍ତାନ୍‍ନୋ ମାପୁରୁଙ୍ଗୁଁ ଦନ୍ୟବାଦ୍‌ କିଜି କିଜି ୱାନି ୱାଲେୱାଲେ ବୁଲାଦେଙ୍ଗ୍‌ ଆସ୍‌ତାନ୍‌ ମାରି ଲୋକୁ ୱିଜେରେ ଆକା ସୁଡ଼ୁଜି ମାପୁରୁଦି ପ୍ରସଂସା କିତାର୍‍ ।
LUK 19:1 ୱେନ୍‌କା ଜିସୁ ଜିରିହୋ ଗାଡ଼୍‌ତୁ ଡ଼ୁଗୁଜି ନାଡ଼୍‍ମିସିଜି ସଲ୍‍ସିମାର୍‍ଆନ୍‍ ।
LUK 19:2 ମାରି ସୁଡ଼ୁଦୁ, ଜକିୟ ଦର୍‌ତି ଅରେନ୍‍ ଲୋକୁ ମାର୍‌ଆନ୍‌, ମାରି ୱାନ୍‌ ଅରେନ୍‍ ପେରି ସିସ୍‍ଟୁଲସ୍‍ନିକାନ୍‍ ମାରି ମାଜନ୍‌ ମାର୍‌ଆନ୍‌ ।
LUK 19:3 ଜିସୁ ଏନ୍‌, ଆକା ସୁଡ଼ୁଦେଙ୍ଗ୍‍ ୱାନ୍‌ ବଦା କିଜିମାର୍‍ଆନ୍‍, ମାତର୍‌ ଲୋକା ଗଲିଦି ଉଣ୍ତିଙ୍ଗ୍‌ ସୁଡ଼ୁଦେଙ୍ଗ୍‍ ଆଟ୍‍ଏଜି ମାର୍‌ଆନ୍‌, ଇରିଙ୍ଗ୍‌ ୱାନ୍‌ ବୁଟ୍‍କା ମାର୍‌ଆନ୍‌ ।
LUK 19:4 ଆଦେଙ୍ଗ୍‌ ୱାନ୍‌ ଲୋକା ଆଗ୍‌ଡ଼ି ଉରୁକ୍‍ସି ସଲ୍‌ସି ଜିସୁଙ୍ଗୁଁ ସୁଡ଼ୁଦେଙ୍ଗ୍‍ ଇଜି ଉଣ୍ତ୍ରି ତଗାମାରାନ୍‌ତୁ ଏକ୍‍ତାନ୍‍, ଇରିଙ୍ଗ୍‌ ଆୟା ସାରି ସିଜି ଜିସୁ ସନିକା ମାର୍‌ଆତ୍‌ ।
LUK 19:5 ଜିସୁ ଆୟା ବାଡିଦୁ ୱାଜି ମୁସ୍‌କୁ ବେସ୍‍ସି ଜକିୟଙ୍ଗ୍‍ ଇର୍‌ଆନ୍‌, “ଜକିୟ, ବେଗି ରେସିରାଆ, ଇରିଙ୍ଗ୍‌ ନେର୍‌ ନାଙ୍ଗିଁ ମି ଇନ୍‌ଡ୍ର ଏଣ୍ତେସ୍‌ବା ତେବାଦେଙ୍ଗ୍‍ ଆନାତ୍‌ ।”
LUK 19:6 ଆବେଟ୍‌ ଜକିୟ ଦାପ୍ରେ ରେସିୱାଜି ୱେଡ଼ିକାଦାନ୍‌ ଜିସୁଙ୍ଗୁଁ ୱାନି ଇଣ୍ତ୍ର କୁକ୍‍ତାଅତାନ୍‍ ।
LUK 19:7 ଆକା ସୁଡ଼ୁଜି ୱିଜେରେ କାଡ଼୍‍ଜି ଇନ୍‍ଣ୍ତ୍ରେଙ୍ଗ୍‍ ଆସ୍‌ତାର୍‌, “ୱାନ୍‌ ଅରେନ୍‍ ପାପି ଲୋକ୍‌ତି ଇଣ୍ତ୍ର ତେବାଦେଙ୍ଗ୍‍ ସର୍‍ଆନ୍‍ନି ।”
LUK 19:8 ମାତର୍‌ ଜକିୟ ନିର୍‍ଆନ୍‍ନୋ ପ୍ରବୁଙ୍ଗ୍‌ ଇର୍‌ଆନ୍‌, “ଏ ପ୍ରବୁ, ସୁଡ଼ୁଆ, ନା ଦନ୍‌ ଆଦାବାଗ୍‍ କାକୁର୍ତି ଲୋକାଙ୍ଗ୍‌ ସିଜିନା, ମାରି ଜଦି ଅନ୍ୟାୟତାନ୍‍ ଏମାଣୁକୁ ଇନିକା ଅନାମାନା, ଆତିଙ୍ଗ୍‌ ସାରି ଗୁଣ୍‍ତାନ୍‍ ଡ଼େସିସିଜିନା ।”
LUK 19:9 ଆବେଟ୍‌ ଜିସୁ ୱାନି ବିସୟ୍‌ତାନ୍‌ ଇର୍‌ଆନ୍‌, “ନେର୍‌ ଇୟା ଇଣ୍ତ୍ର ରକିୟା ପଇନିକା ଇଗା ୱାତାମାନାତ୍‌, ଇରିଙ୍ଗ୍‌ ଇକାନ୍‌ ବା ଅବ୍ରାହାମତି ଅରେନ୍‍ ମାରିସି ।
LUK 19:10 ଇରିଙ୍ଗ୍‌ ଆମାକା ମୁରିତାମାନାତ୍‍, ଆକା ପୟଜ ରକିୟା କିଦେଙ୍ଗ୍‌ ମନୁସ୍ୟପୁତ୍ର ୱାତାମାନାନ୍‍ ।”
LUK 19:11 ଲୋକୁ ଇୟା ମାଟା ୱିଜୁ ୱେନିୱାଲେ ଜିସୁ ମାରି ଉଣ୍ତ୍ରି କାତା ୱେର୍‌ତାନ୍‌, ଇରିଙ୍ଗ୍‌ ୱାନ୍‌ ଜିରୁସାଲାମ୍‍ ଲାକ୍‌ତୁ ଇତା ମାର୍‌ଆନ୍‌ ମାରି ମାପୁରୁଦି ରାଜି ଦାପ୍ରେନେ ୱାନାତ୍‌ ଇଜି ୱାର୍‌ ଅଡ଼୍‍ବିଜି ମାର୍‌ଆର୍‌ ।
LUK 19:12 ଆବେଟ୍‌ ୱାନ୍‌ ଇର୍‌ଆନ୍‌, ଅରେନ୍‍ ପେରି ଲୋକୁ ରାଜା ଆଦେଙ୍ଗ୍‌ ଉଣ୍ତ୍ରି ଆକ ରାଜିଦୁ ସନ୍‌ଡ଼୍ରେଙ୍ଗ୍‌ ତିଆର୍‌ ଆଜି ମାର୍‌ଆନ୍‌, ୱେନ୍‌କା ୱାନ୍‌ ଡ଼େସିୱାଜି ନିଜେଦି ଲୋକା ମୁସ୍‌କୁ ସାସନ୍‍ କିଦେଙ୍ଗ୍‌ ଅଡ଼୍‍ବିଜି ମାର୍‌ଆନ୍‌ ।
LUK 19:13 ୱାନ୍‌ ନିଜେଦି ଦସ୍‍ଲୋକ୍ ସାକର୍‌କାଙ୍ଗ୍‌ କୁକ୍‌ସି ୱାରିଙ୍ଗ୍‌ ୱିଜେରିଙ୍ଗ୍‍ ଉଣ୍ତ୍ରି ଉଣ୍ତ୍ରି ବାଙ୍ଗାଁରାମ୍‍ ଅଦ୍‌ଲି ସିଜି ଇର୍‌ଆନ୍‌, ନାନ୍ ୱାନି ସାନ୍ଦି ବେପାର୍‌ କିଦୁ ।
LUK 19:14 ମାତର୍‌ ୱାନି ଦେସ୍‌ତି ଲୋକୁ ୱାନିଙ୍ଗ୍‌ କାଡ଼୍‍ଜି ମାର୍‌ଆର୍‌, ମାରି ୱାର୍‌ ୱାନି ୱେନ୍‌କା ଅରେନ୍‍ ୱାନିଙ୍ଗ୍‌ କାବୁର୍‌ ପୋକ୍‌ସି ଇର୍ହାର୍‌, ଇକାନ୍‌ ଜେ ମା ମୁସ୍‌କୁ ସାସନ୍‍ କିନାନ୍‌, ଇକା ମା ବଦା ସିଲେତ୍‍ ।
LUK 19:15 ୱେନ୍‌କା ୱାନ୍‌ ରାଜା ଆଜି ଡ଼େସିୱାତାନ୍‍, ମାରି ଆମା ସାକର୍‌କାଙ୍ଗ୍‌ ଡାବୁଙ୍ଗୁଁ ସିତାମାର୍‍ଆନ୍‍, ୱାରି ଲୋଇ ବେପାର୍‌ କିଜି ଏନ୍‌ ଏସୋ ଲାବ୍‍ ପୟତା ମାନାନ୍‌, ଆକା ନେସ୍‌ତେଙ୍ଗ୍‌ ଇଜି ୱାରିଙ୍ଗ୍‌ ୱାନି ଲାକ୍‌ତୁ କୁକ୍‍ସୋ ତାତେଙ୍ଗ୍‌ ଆଦେସ୍‌ ସିତାନ୍‌ ।
LUK 19:16 ଆବେଟ୍‌ ପାର୍‍ତୁମ୍‍ତିକାନ୍‍ ୱାଜି ଇର୍‌ଆନ୍‌, ପ୍ରବୁ, ନି ଉଣ୍ତ୍ରି ବାଙ୍ଗାଁରାମ୍‍ ଡାବୁଦୁ ନାନ୍ ମାରି ଦଶଗୋଟା ବାଙ୍ଗାଁରାମ୍‍ ଡାବୁଙ୍ଗୁଁ ଲାବ୍‍ କିତାମାନା ।
LUK 19:17 ୱାନ୍‌ ୱାନିଙ୍ଗ୍‌ ଇର୍‌ଆନ୍‌, ନିନ୍‌ ବେସି ନେଗି ସାକର୍‌, ନିନ୍‌ ଉଣା ବିସୟତୁ ବିସ୍‌ବାସ୍‌ତାନ୍‍ ପାଣି କିତିମାନି ଆକା ନିନ୍‌ ଦସ୍‍ଗୋଟା ଗାଡ଼ାକା ମୁସ୍‍କା ଅଦିକାର୍‍ ପୟଦେଙ୍ଗ୍‍ ସିଜିନା ।
LUK 19:18 ମାରି, ଅରେନ୍‍ ୱାଜି ଇର୍‌ଆନ୍‌, ପ୍ରବୁ, ନି ଉଣ୍ତ୍ରି ବାଙ୍ଗାଁରାମ୍‍ ଡାବୁଦାନ୍‍ ନାନ୍ ପାସ୍‌ଗୋଟା ବାଙ୍ଗାଁରାମ୍‍ ଡାବୁଙ୍ଗୁଁ ଲାବ୍‍ କିତାମାନା ।
LUK 19:19 ୱାନ୍‌ ୱାନିଙ୍ଗ୍‌ ବା ଇର୍‌ଆନ୍‌, ନିନ୍‌ ବା ପାସ୍‌ଗୋଟା ଗାଡ଼ାକା ମୁସ୍‌କୁ ଅଦିକାର୍‍ ପୟଦେଙ୍ଗ୍‍ ସିଜିନା ।
LUK 19:20 ମାରି ଅରେନ୍‍ ୱାଜି ଇର୍‌ଆନ୍‌, ପ୍ରବୁ, ସୁଡ଼ୁଆ, ଇୟା ନି ବାଙ୍ଗାଁରାମ୍‍ ଡାବୁଙ୍ଗୁଁ, ନାନ୍ ଇୟା ପାଗାଦୁ ତର୍‍ତା ଇଟ୍‌ଟା ମାର୍‍ଆ;
LUK 19:21 ଇରିଙ୍ଗ୍‌ ନାନ୍ ନିଙ୍ଗିଁ ତିଲାତା, ଇରିଙ୍ଗ୍‌ ନିନ୍‌ ଅରେନ୍‍ ଆଟ୍‍ୱାଦି ଲୋକୁ, ଆମାକା ଇଡ୍‍ଇମାନି, ଆକା ପେର୍‍ନିଅନି, ମାରି ଆମାକା ୱିତ୍‍ଇ, ଆକା କୟନି ।
LUK 19:22 ୱାନ୍‌ ୱାନିଙ୍ଗ୍‌ ଇର୍‌ଆନ୍‌, ରେ ତାଗ୍‌ଇ ସାକର୍‌, ନି ମୋକମ୍‍ତି ମାଟାଦି ନି ବିସାର୍‌ କିନା । ନାନ୍ ଅରେନ୍‍ ଆଟ୍‍ୱାଦି ଲୋକୁ, ଆମାକା ଇଡ୍‍ଏମାନା, ଆକା ପେର୍‍ନାଅନା, ମାରି ଆମାକା ୱିତ୍‌ଏମାନା, ଆକା କୟନା, ଇକା ଇନିକା ନେସ୍‍ତିମାର୍‍ଇ ?
LUK 19:23 ଜଦି, ଇୟା ମାଟା ସତ୍‌, ବ୍ୟାଙ୍କ୍‍ତୁ ଏନ୍ଦା ନା ବାଙ୍ଗାଁରାମ୍‍ ଡାବୁଙ୍ଗୁଁ ଇଡ୍‍ଇତି ? ଆତିଙ୍ଗ୍‌ ନାନ୍ ୱାଜି ବ୍ୟାଙ୍କ୍‍ତାନ୍‍ ଉପ୍‍ରି ପଇତାମାନ୍ଦି ।
LUK 19:24 ମାରି, ଆୟା ଲାକ୍‌ତୁ ନିର୍‍ଇ ମାର୍‍ଇ ଲୋକାଙ୍ଗ୍‌ ଇର୍‌ଆନ୍‌, ୱେନି ମାଣାନ୍‌ ଇୟା ବାଙ୍ଗାଁରାମ୍‍ ଡାବୁଙ୍ଗୁଁ ଅସି, ଆମାୱାନିମାନୁ ଦଶଗୋଟା ବାଙ୍ଗାଁରାମ୍‍ ଡାବୁଙ୍ଗୁଁ ମାନେ, ୱାନିଙ୍ଗ୍‌ ସିଦୁ ।
LUK 19:25 ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, ପ୍ରବୁ, ୱାନିଙ୍ଗ୍‌ ତୋ ଦାସ୍‍ଗୋଟା ବାଙ୍ଗାଁରାମ୍‍ ଡାବୁଙ୍ଗୁଁମାନେ ।
LUK 19:26 ନାନ୍ ମିଙ୍ଗିଁ ୱେର୍‌ସିନା, ଏମେଲୋକାଦି ମାନାତ୍‌, ୱାନିଙ୍ଗ୍‌ ସିନାର୍‍, ମାତର୍‌ ଆମାୱାନିଙ୍ଗ୍‌ ସିଲେତ୍‌, ୱାନି ଲାକ୍‌ତୁରାନ୍‌ ଆମାକା ଉଣାମାନାତ୍‌, ଆକାବା ୱାନି ମାଣ୍‌କୁ ଅନାର୍‍ ।
LUK 19:27 ମାତର୍‌ ନା ଇୟା ଆମା ସାତ୍ରୁର୍‍ ନାନ୍ ୱାରି ମୁସ୍‌କୁ ସାସନ୍‍ କିନା ଇଜି ବଦା କିଏଜିମାର୍‍ଆର୍‍, ୱାରିଙ୍ଗ୍‌ ଇବେ ତାସିନା ଆଗ୍‌ଡ଼ି କାତ୍‍ତୁ ।
LUK 19:28 ଜିସୁ ଇୟା ମାଟା ୱେର୍‌ତି ୱିସ୍‌ତି ୱେନ୍‌କା ସିସୁରି ଆଗ୍‌ଡ଼ି ଆଗ୍‌ଡ଼ି ଜିରୁସାଲାମ୍‍ ତରିନ୍‌ ସନ୍‌ଡ଼୍ରେଙ୍ଗ୍‌ ଆସ୍‌ତାନ୍‌ ।
LUK 19:29 ମାରି, ଏସ୍ତିୱାଲେ ଜିସୁ ଜୀତ ଗରନ୍‍ ଲାକ୍‌ତୁରି ବେତ୍‍ପାଗି ନି ବେତନିୟା ଲାକ୍‌ତୁ ଇତାନ୍‌, ନାସ୍‍ତିୱାଲେ ୱାନ୍‌ ୱାନି ସିସୁରି ଲୋଇ ରିଏରିଙ୍ଗ୍‍ ଇୟା ମାଟା ୱେର୍‌ସି ପୋକ୍‌ତାନ୍‌,
LUK 19:30 ମି ଆଗ୍‍ଡ଼ିରି ଆୟା ଆୟା ନାଟ ସାନ୍‌ଡ୍ରୁ; ଆବେ ଇତି ଦାପ୍ରେ, ଆମାତାନି ମୁସ୍‌କୁ ଏସାଙ୍ଗ୍‍ ଏନ୍‌ ବାସ୍‍ଏନ୍‍, ଇୟାୱାଜା ଉଣ୍ତ୍ରି ଗଦପିଲାଦିଙ୍ଗ୍‌ ତର୍‍ନି ମାନିକା ସୁଡ଼ୁନିଦେର୍‍; ତାନେଙ୍ଗ୍‌ କୁତ୍‍ସ ତାଗାଟ୍‌ ।
LUK 19:31 ମାରି, ଏନ୍‌ ଜଦି ମିଙ୍ଗିଁ ଏନ୍ଦା କୁତ୍‍ସି ଅସିନିଦେର୍‍ ଇଜି ୱେନ୍‍ବାନାନ୍‌, ମିର୍‌ ଇୟାୱାଜା ଇନିଦେର୍‌, ଇରିଙ୍ଗ୍‌ ତେନେମାନୁ ପ୍ରବୁଙ୍ଗୁଁ ଦର୍‌କାର୍‌ ମାନାତ୍‌ ।
LUK 19:32 ଆବେଟ୍‌ ଆୟା ରିଏର୍‌ ସିସୁର୍‍ ନାର୍‍ତୁ ସରଆର୍‌, ମାରି ପ୍ରବୁ ୱାରିଙ୍ଗ୍‌ ଏଣ୍ତେସ୍‌ ଇର୍‌ଆ ମାର୍‌ଆନ୍‌, ଆୟାୱାଜାନେ ସୁଡ଼ୁତାର୍‌ ।
LUK 19:33 ମାରି, ୱାର୍‌ ଗଦପିଲାଦିଙ୍ଗ୍‍ କୁତ୍‍ନିୱାଲେ ଗଦପିଲାଦି ମାଲିକ୍‍କୁ ୱାରିଙ୍ଗ୍‌ ୱେନ୍‌ବାତାନ୍‌, ଏନ୍ଦା ଗଦପିଲାଦିଙ୍ଗ୍‍ କୁତ୍‍ସିନିଦେର୍‍ ?
LUK 19:34 ୱାର୍‌ ଇର୍ହାର୍‌, ତେନେମାନୁ ପ୍ରବୁଙ୍ଗ୍‌ ଦର୍‌କାର୍‌ ମାନାତ୍‌ ।
LUK 19:35 ମାରି, ୱାର୍‌ ଗଦପିଲାଦିଙ୍ଗ୍‍ ଜିସୁ ଲାକ୍‌ତୁ ଆୟା ଗଦ ମୁସ୍‌କୁ ନିଜେ ନିଜେଦି ୱାତିଙ୍ଗ୍‍ ପାର୍‍ସି ଜିସୁଙ୍ଗୁଁ ବାସ୍‍ସିତାର୍‍ ।
LUK 19:36 ମାରି, ୱାନ୍‌ ସନିୱାଲେ ଲୋକୁ ରାସ୍ତାଦୁ ନିଜେ ନିଜେଦି ୱାତିଙ୍ଗ୍‍ ପାର୍‍ସି ସିଦେଙ୍ଗ୍‍ ଆସ୍‌ତେ ।
LUK 19:37 ମାରି, ୱାନ୍‌ ଏସ୍ତିୱାଲେ ଜୀତ ଗରନ୍‌ତି ଗାଡ଼୍‍ଗାଡ଼ା ବାଡି ଲାକ୍‌ତୁ ଇତାନ୍‌, ନାସ୍ତିୱାଲେ ୱିଜେରେ ସିସୁର୍‍ ସୁଡ଼୍‍ତି ମାର୍‍ଇ ୱିଜୁ ସାକ୍ତିଦି ପାଣି ଉଣ୍ତିଙ୍ଗ୍‌ ୱେଡ଼ିକାଦାନ୍‌ ନାଣ୍ତ ଆଉଲି ଆଜି ମାପୁରୁଦି ଦନ୍ୟବାଦ୍‌ କିଜି କିଜି ଇର୍ହାର୍‌,
LUK 19:38 ପ୍ରବୁ ଦର୍‌ତାନ୍‌ ଆମା ରାଜା ୱାଜିନାନ୍‍, ୱାନ୍‌ ଦନ୍ୟ । ମୁସ୍‌କୁପୁର୍‌ତୁ ସାନ୍ତି ମାରି ଗୌରବ୍‍ ମାପୁରୁଦି ଦନ୍ୟବାଦ୍‌ ଆପିତ୍‌ ।
LUK 19:39 ଆବେଟ୍‌କୁ ଲୋକା ଲୋଇ ଏସୋ ପାରୁସିର୍‌ ଜିସୁଙ୍ଗୁଁ ଇର୍ହାର୍‌, “ଏ ଗୁରୁ, ନି ସିସୁରିଙ୍ଗ୍‌ ଆଲ୍‌ଜ ମାନ୍‌ଡ଼୍ରେଙ୍ଗ୍‌ ଇନ୍‌ଆଁ ।”
LUK 19:40 ଜିସୁ ଇର୍‌ଆନ୍‌, “ନାନ୍ ମିଙ୍ଗିଁ ସତ୍‌ ଇଜିନା, ଇକାର୍‌ ଆଲେତି ମାର୍‍ରିଙ୍ଗ୍‍, କାଲ୍‌କୁ ଆଉଲି ଆନେ ।”
LUK 19:41 ମାରି, ଏସ୍ତିୱାଲେ ଜିସୁ ଜିରୁସାଲାମ୍ ଲାକ୍‌ତୁ ୱାତାନ୍‌, ନାସ୍ତିୱାଲେ ଗାଡ଼୍‌ତିଙ୍ଗ୍‌ ସୁଡ଼ୁଜି ତାନେ ଉଣ୍ତିଙ୍ଗ୍‌ ଆଡ଼୍‍ବାଜି ଇର୍‌ଆନ୍‌,
LUK 19:42 “ନିନ୍‌, ହୁଁ, ନିନ୍‌ ଜଦି ନେର୍‌ ସାନ୍ତି ପୟ୍‌ନି ବିସୟ୍‌ତିଙ୍ଗ୍‌ ନେସ୍‌ତି ମାନ୍ଦି ! ମାତର୍‌ ଇଲେଇ ଆୟାୱିଜୁ ନିବାଣ୍‍କୁ ମାର୍‍ଗିତା ମାନାତ୍‌ ।
LUK 19:43 ଆଦେଙ୍ଗ୍‌ ନି ମୁସ୍‌କୁ ମାନି କାର୍ମୁଦି ସମୟ ନିନ୍‌ ନେସ୍‌ଇତି ଆକା, ସମୟ ୱାଜିନାତ୍‍ ଏସ୍ତିୱାଲେ ମି ସାତ୍ରୁର୍‍ ନି ସାରିବେଡ଼୍‍ତି ଗାଟୁ ତର୍‌ସି ନିଙ୍ଗିଁ କେର୍‍ପ୍‍ସି ବାଦା କିନାର୍‌, ମାରି ମି ୱିଜୁ ସେର୍‍ଲେଙ୍ଗ୍‌ କେର୍‍ନାର୍‍ ।
LUK 19:44 ମାରି ନିଙ୍ଗିଁ ନିବାନୁ ମାନି ୱିଜୁ ଲୋକାଙ୍ଗ୍‌ ଗୁଣ୍ତା କିନାର୍‌, ମାରି ନିବାନୁ ଉଣ୍ତ୍ରି କାଲୁଦିଙ୍ଗ୍‌ ଆଇ ଉଣ୍ତ୍ରି କାଲୁ ମୁସ୍‌କୁ, ତେବାଏତ୍‍, ଇରିଙ୍ଗ୍‌ ନିଙ୍ଗିଁ ଏସ୍ତିୱାଲେ ମାପୁରୁ ରକିୟା କିଦେଙ୍ଗ୍‌ ୱାତାନ୍‌, ନିନ୍‌ ୱାନିଙ୍ଗ୍‌ ସିନିସ୍‍ କିଇତିଦେର୍‍ ।”
LUK 19:45 ମାରି, ଜିସୁ ମନ୍ଦିର୍‌ତୁ ଡ଼ୁଗିତାନ୍‍ ନୋ ପର୍‌ନି ଲୋକାଙ୍ଗ୍‌ ଇକା ଇଜି ସପ୍‍ତେଙ୍ଗ୍‍ ଆସ୍‌ତାନ୍‌,
LUK 19:46 “ଦର୍ମୁସାସ୍ତ୍ରଦୁ ରାସାତାମାନାତ୍‌, ମାପୁରୁ ଇର୍‌ଆନ୍‌, ମା ଇଲୁ ପାର୍‍ତନାଦି ଇଲୁ ଆନାତ୍‌, ମାତର୍‌ ମିର୍‌ ତାନେଙ୍ଗ୍‌ ଡଙ୍ଗାଁର୍‍ଙ୍ଗାଁ ଇଲୁ କିତିମାନିଦେର୍‌ ।”
LUK 19:47 ମାରି, ଜିସୁ ୱିଜୁଦିନ୍‌ ମନ୍ଦିର୍‌ତୁ ସିକ୍‍ଆ ସିଜିମାର୍‍ଆନ୍‍, ମାତର୍‌ ପେରି ଜାଜକର୍‌, ସାସ୍ତ୍ରିର୍‍ ମାରି ଲୋକାଣି ପେରିକାର୍‌ ୱାନିଙ୍ଗ୍‌ ସାପିସ୍‍କିଦେଙ୍ଗ୍‍ ବଦାକିଜିମାର୍‍ଆର୍‍ ।
LUK 19:48 ମାତର୍‌ ଲୋକ୍‌ ୱିଜେରେ ୱେଡ଼ିକାଦାନ୍‌ ୱାନି ସିକିୟା ୱେନ୍‍ଜିମାର୍‍ଆର୍‍, ଆୟାଉଣ୍ତିଙ୍ଗ୍‌ ୱାର୍‌ ଇନିକା କିଦେଙ୍ଗ୍‌ ଆନାତ୍‌ ଆକା ଅଡ଼୍‍ବିଦେଙ୍ଗ୍‍ ଆଟ୍‍ଏଜି ମାର୍‌ଆର୍‌ ।
LUK 20:1 ଜିସୁ ଅର୍‍ଲେନ୍‍ ମନ୍ଦିର୍‌ ଲୋଇ ମାନ୍‌ଜି ଲୋକାଙ୍ଗ୍‌ ସିକିୟା ସିଜିମାର୍‍ଆନ୍‍ ମାରି ନେଗିକାବୁର୍‌ ୱେର୍‌ସି ମାର୍‌ଆନ୍‌, ନାସ୍ତିୱାଲେ ପେରି ଜାଜକର୍‌ ନି ସାସ୍ତ୍ରିର୍‍ ଜିହୁଦିର୍‌ ପେରି ଲୋକାୱାଲେ ୱାଜି ୱାନିଙ୍ଗ୍‌ ଇର୍ହାର୍‌,
LUK 20:2 ନିନ୍‌ ଏମେ ଅଦିକାର୍‍ତାନ୍‍ ଇୟାୱିଜୁ କିଜିନି, ବା ଏନ୍‌ ନିଙ୍ଗିଁ ଇୟା ଅଦିକାର୍‌ ସିତାନ୍‌, ୱାନ୍‌ ଏନ୍‌, ମାଙ୍ଗିଁ ଇନ୍‌ଆଁ ।
LUK 20:3 ମାତର୍‌ ଜିସୁ ୱାରିଙ୍ଗ୍‌ ୱେର୍‌ତାନ୍‌, “ନାନ୍ ବା ମିଙ୍ଗିଁ ଉଣ୍ତ୍ରି ମାଟା ୱେନ୍‌ବାନା, ନାଙ୍ଗିଁ ଇନ୍‍ଣ୍ତ୍ରୁ,
LUK 20:4 ଡୁବନ୍‌ସିନି ଯୋହନତି ବାପ୍ତିସ୍ମ ସିନି ଅଦିକାର୍‌ ମାପୁରୁ ମାଣ୍‌କୁ ନୋ ଲୋକା ମାଣ୍‌କୁ ଆତାମାର୍‍ଆତ୍‍ ।”
LUK 20:5 ଆବେଟ୍‌ ୱାର୍‌ ୱାରି ୱାରି ଲୋଇ ୱାର୍‌ଗିଜି ସାତାର୍‌, ଜଦି ମାପୁରୁ ମାଣ୍‌କୁ ଇଜି ଇନିକା, ଆବେଟ୍‌ ୱାନ୍‌ ଇନାନ୍‌, ମିର୍‌ ଏନ୍ଦା ୱାନିଙ୍ଗ୍‌ ବିସ୍‌ବାସ୍‌ କିଇତିଦେର୍‍ ?
LUK 20:6 ଜଦି ଲୋକା ମାଣ୍‌କୁ ଇଜି ଇନିକା, ଆବେଟ୍‌ ଲୋକୱିଜେରେ ମାଙ୍ଗିଁ କାଲ୍‍କାଣ୍‍ ଡାକ୍‍ନା ପୋକ୍‌ନାର୍‌, ଇରିଙ୍ଗ୍‌ ଯୋହନ ଜେ ଅରେନ୍‍ ବାବବାଦି, ଇକା ୱାର୍‌ ଆଟ୍‍ୱାଦାନ୍‍ ମାନାତାମାନାର୍‌ ।
LUK 20:7 ଆଦେଙ୍ଗ୍‌ ଇକା ଆମାଣ୍‍କୁ ଆତାତ୍‌, “ଇକା ନେସ୍‌ଏପ୍‌ ଇଜି ୱାର୍‌ ଜିସୁଙ୍ଗୁଁ ୱେର୍‌ତାର୍‌ ।”
LUK 20:8 ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାନ୍ ଏମେ ଅଦିକାର୍‍ତାନ୍‍ ଇୟାୱିଜୁ କିଜିନା, ଆକାବା ନାନ୍ ମିଙ୍ଗିଁ ୱେର୍‌ତେଙ୍ଗ୍‌ କେଏ ।”
LUK 20:9 ଇୟା ୱେନ୍‌କା ଜିସୁ ଲୋକାଙ୍ଗ୍‌ ଇୟା କାତା ୱେର୍‌ତେଙ୍ଗ୍‌ ଆସ୍‌ତାନ୍‌ । “ଅରେନ୍‍ ଲୋକୁ ଉଣ୍ତ୍ରି ଅଙ୍ଗୁର୍‍ କିଡ଼ିଇ କିଜି ଆକା ପାଣିକିନିୱାରିଙ୍ଗ୍‌ ବାଗ୍‍ତୁ ପାଣି କିଦେଙ୍ଗ୍‌ ସିଜି ନାଣ୍ତ ଦିନ୍‍ତି ଉଣ୍ତିଙ୍ଗ୍‌ ଆଇ ଦେସ୍‌ତୁ ସର୍‌ଆନ୍‌ ।
LUK 20:10 ମାରି, ପାଣିକିନିକାର୍‌ ଏଣ୍ତେସ୍‌ ୱାନିଙ୍ଗ୍‌ ଅଙ୍ଗୁର୍‍ କିଡ଼ିଇଦି ପଳ୍‍ତି ବାଗ୍ ସିନାର୍‍, ଇୟାଉଣ୍ତିଙ୍ଗ୍‌ ୱାନ୍‌ ଅରେନ୍‍ ପାଣି କିନି ମୁରୁଲିଙ୍ଗ୍‌ ଟିକ୍‌ ସମୟତୁ ୱାରି ଲାକ୍‌ତୁ ପୋକ୍‌ତାନ୍‌, ମାତର୍‌ ଆୟା ପାଣିକିନିକାର୍‌ ୱାନିଙ୍ଗ୍‌ ମାଡ୍‌ ଡାକ୍‍ତାର୍‍ରୋ ୱାର୍‌ଇ କିୟୁଦାନ୍‌ ଡ଼େସିପେରିତାର୍‍ ।
LUK 20:11 ୱାନ୍‌ ମାରି ଅରେନ୍‍ ପାଣିକିନି ଗତିମୁରୁଲିଙ୍ଗ୍‌ ପୋକ୍‌ତାନ୍‌; ୱାର୍‌ ୱାନିଙ୍ଗ୍‌ ବା ଡାକ୍‍ତାର୍‍ ମାରି ଅପ୍‍ମାନ୍‍ କିଜି ୱାର୍‌ଇ କିୟୁଦାନ୍‌ ଡ଼େସିପେରିତାର୍‍ ।
LUK 20:12 ୱେନ୍‌କା ୱାନ୍‌ ମାରି ଅରେନ୍‍ୱାନିଙ୍ଗ୍‍ ବା ପୋକ୍‌ତାନ୍‌; ମାତର୍‌ ୱାର୍‌ ୱାନିଙ୍ଗ୍‌ ବା କାଣ୍ତିଆ କାବରା କିଜି ଆତ୍‌ରେ ପେର୍‍ତାପୋକ୍‍ତାର୍‍ ।
LUK 20:13 ଆବେଟ୍‌ ଅଙ୍ଗୁର୍‍ କିଡ଼ିଇଦି ମାଲିକ୍‌ ଇର୍‌ଆନ୍‌, ନାନ୍ ଇନିକା କିନା ? ନା ଲାଡ୍‍ତି ମାରିନ୍‍ତିଙ୍ଗ୍‍ ପୋକ୍‌ନା, ଆନାତ୍‌ସୁଗି ୱାର୍‌ ୱାନିଙ୍ଗ୍‌ ମାନାନାର୍‌ ।
LUK 20:14 ମାତର୍‌ ପାଣିକିନିକାର୍‌ ମାଲିକ୍‌ତି ମାରିସିଙ୍ଗ୍‌ ସୁଡ଼ୁଜି ୱାରି ଲୋଇ ୱାର୍‍ଗିସାଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ଇକାନ୍‌ ତୋ ୱାନି ମାରିସି, ୱେନିଙ୍ଗ୍‌ ସାୟାମାର୍‌ଗା ଡାକ୍‍ନାଟ୍‍, ଏଣ୍ତେସ୍‍କି ଇୟାୱିଜୁ ଦନ୍‌ ମାଦି ଆନାତ୍‌ ।
LUK 20:15 ମାରି, ୱାର୍‌ ୱାନିଙ୍ଗ୍‌ ଅଙ୍ଗୁର୍‍ କିଡ଼ିଇ ଆତ୍‌ରେ ଅସି ସାୟାମାର୍‌ଗା ଡାକ୍‌ତାର୍‌ । ଇଲେଇ, ଅଙ୍ଗୁର୍‍ କିଡ଼ିଇଦି ମାଲିକ୍‌ ୱାରିଙ୍ଗ୍‌ ଇନିକା କିନାନ୍‌ ?
LUK 20:16 ମାଲିକ୍‌ ୱାଜି ଇୟା ପାଣିକିନିୱାରିଙ୍ଗ୍‌ ସାବିସ୍‍ କିନାନ୍‌ ମାରି ଆଇ ଲୋକାଙ୍ଗ୍‌ ଅଙ୍ଗୁର୍‍ କିଡ଼ିଇ ବାଗ୍‍ତୁ ପାଣି କିଦେଙ୍ଗ୍‌ ସିନାନ୍‍ । ଇକା ୱେନ୍‌ଜି ୱାର୍‌ ଇର୍ହାର୍‌, ଆୟାୱାଜା ଆମାକିତ୍‌ ।”
LUK 20:17 ମାତର୍‌ ଜିସୁ ୱାରିଙ୍ଗ୍‌ ସୁଡ଼ୁଜି ଇର୍‌ଆନ୍‌, ଆରିଙ୍ଗ୍‌ ଇୟା ଆମା ବାକ୍ୟ ରାସାତାମାନାତ୍‌, ତାନେ ଅର୍ତ ଇନିକା, ଇଲୁ ତିଆର୍‌ କିନିକାର୍‍ ଆମା କାଲୁଦିଙ୍ଗ୍‌ ସିଲେ ଇର୍ହାର୍‌, ଆକା କନାଦି ମୁଲ୍‌କାଲୁ ଆତାତ୍‌ ।
LUK 20:18 ଆମାକାନ୍‍ ଆୟା କାଲୁ ମୁସ୍‌କୁ ଆର୍‌ନାନ୍‌, ୱାନ୍‌ ମକା ମକା ଆନାନ୍‌, ମାରି ଆୟା କାଲୁ ଆମାୱାନି ମୁସ୍‌କୁ ଆର୍‍ନାତ୍‍, ୱାନିଙ୍ଗ୍‌ ଆକା ଗୁଣ୍ତ୍‍ଗୁଣ୍ତା କିନାତ୍‍ ।
LUK 20:19 ଆବେଟ୍‌ ସାସ୍ତ୍ରିର୍‍ ମାରି ପେରି ଜାଜକର୍‌ ଆୟା ଦାପ୍ରେ ଜିସୁଙ୍ଗୁଁ ଆସ୍‌ତେଙ୍ଗ୍‌ ସେସ୍ଟା କିତାର୍‍, ମାତର୍‌ ୱାର୍‌ ଲୋକାଙ୍ଗ୍‌ ତିଲାତାର୍‌, ଇରିଙ୍ଗ୍‌ ୱାନ୍‌ ଇୟା କାତା ୱାରିଙ୍ଗ୍‌ ସୁଡ଼ୁଜି ଇର୍ହାନ୍‌ ଇଜି ୱାର୍‌ ବୁଜାତାର୍‍ ।
LUK 20:20 ଆବେଟ୍‌ ଦାର୍ମୁସାସ୍ତ୍ରିର୍‍ ମାରି ପେରି ଜାଜକର୍‌ ଜିସୁଙ୍ଗୁଁ ଜାଡ଼ିଦୁ ଆର୍‌ପ୍‌ତେଙ୍ଗ୍‌ ଇଜି ନେଗି ସମୟତିଙ୍ଗ୍‍ କାପ୍‌କିଜି ମାର୍ହାର୍‍ । ୱାର୍‌ ଜିସୁ ଲାକ୍‌ତୁ ଏସୋ ସାଲାକିଦି ୱାରିଙ୍ଗ୍‌ ଲାଞ୍ଚ୍‍ସିଜି ପୋକ୍‌ତାର୍‌ । ୱାର୍‌ ଇୟା ଲୋକାଙ୍ଗ୍‌ ନେଗି ଲୋକୁ ୱାଜା ସାଲାକି କିନି ଉଣ୍ତିଙ୍ଗ୍‌ ଇର୍‌ଆ ମାର୍ହାର୍‍ । ୱାର୍‌ ଜିସୁ ୱେର୍‍ସିମାନି ମାଟାଦୁ ଇନି ତାଗ୍‌ଇ ବିସ୍‌ୟ ପୟ୍‌ଜ ସପ୍‍ତେଙ୍ଗ୍‍ ବଦା କିଜିମାର୍ହାର୍‍ । ଇରିଙ୍ଗ୍‌ ଜଦି ୱାର୍‌ ଜିସୁମାନୁ ଇନି ତାଗ୍‌ଇ ବିସ୍‌ୟ ସୁଡ଼ୁଦେଙ୍ଗ୍‍ ଆଟ୍‍ନାର୍‍, ଆବେଟ୍‌ ୱାର୍‌ ଜିସୁଦି ମୁସ୍‌କୁ ଅଦିକାର୍‌ ମାନି ସାସନ୍‌ କିନି ଲୋକା କିୟୁଦୁ ଜିସୁଙ୍ଗୁଁ ଆସ୍‍ପିସ୍‍ନା ସିନାର୍‍ ।
LUK 20:21 ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ଏ ଗୁରୁ, ମାପ୍‌ ନେସ୍‌ନାପ୍‌, ନିନ୍‌ ଟିକ୍‍ ମାଟା ୱେର୍‍ନି, ମାରି ସିକିୟା ସିନି, ମାରି ଏଙ୍ଗ୍‌ବା ମକମ୍‌ ସୁଡ଼ୁଜି ପାଣି କିଇ, ମାତର୍‌ ସତ୍‌ତାନ୍‌ ଲୋକା ଜିବନ୍‌ ଉଣ୍ତିଙ୍ଗ୍‌ ମାପୁରୁଦି ବଦା ବିସୟ୍‌ତାନ୍‌ ସିକିୟା ସିନି ।
LUK 20:22 ମାଙ୍ଗିଁ ଇନ୍‌ଆଁ, ରାଜା କାଇସର୍‍ତିଙ୍ଗ୍‍ ସିସ୍‍ଟୁ ସିନିକା ମା ନିୟମ୍‌ ନୋ ସିଲେ ?”
LUK 20:23 ମାତର୍‌ ଜିସୁ ୱାରି ସାଲାକି ନେସ୍‌ସି ୱାରିଙ୍ଗ୍‌ ଇର୍ହାନ୍‌, ନାଙ୍ଗିଁ ଉଣ୍ତ୍ରି ଅଦ୍‌ଲି ତର୍‌ତୁ ।
LUK 20:24 ଉଣ୍ତ୍ରି ୱେଣ୍ତି ଟାକା ଡାବୁଙ୍ଗୁଁ ତର୍‍ତୁ । ତେନି ମୁସ୍‍କୁ ଏ ବମା ନି ଦର୍‌ ମାନାତ୍‌ ? ୱାର୍‌ ଇର୍ହାର୍‌, ରାଜା କାଇସର୍‍ତିନ୍‍ନ୍ଦି ।
LUK 20:25 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ଆରିଙ୍ଗ୍‌ ରାଜା କାଇସର୍‍ତି ଆମାକା, ଆକା ରାଜା କାଇସର୍‍ତିଙ୍ଗ୍‍ ସିଦୁ; ମାରି, ମାପୁରୁଦି ଆମାକା, ଆକା ମାପୁରୁଙ୍ଗୁଁ ସିଦୁ ।”
LUK 20:26 ଆବେଟ୍‌ ୱାର୍‌ ଲୋକା ଆଗ୍‌ଡ଼ି ଜିସୁ ମାଟାଦି ତାଗ୍‌ଇ ବିସୟ ଆସ୍‌ତେଙ୍ଗ୍‌ ଆଟ୍‍ଏତାର୍‍, ମାରି ୱାର୍‌ ୱାନ୍‌ ୱେର୍‌ତି ମାଟାଦି ଉଣ୍ତିଙ୍ଗ୍‌ କାବାଆଜି ଆଲେତା ମାର୍ହାର୍‍ ।
LUK 20:27 ଇୟା ୱେନ୍‌କା ସାତିଲୋକ୍‌ ମାରିଡ଼େସିଜିବନ୍‌ଆଜି ନିଙ୍ଗିଁନିକା ବିସ୍‌ବାସ୍‌ କିଇକାର୍‍ ଏସୋ ସାଦୁକିର୍ ଜିସୁ ଲାକ୍‌ତୁ ୱାତା ୱେନ୍‌ବାତାର୍‌,
LUK 20:28 “ଏ ଗୁରୁ, ମୋସା ମା ଉଣ୍ତିଙ୍ଗ୍‌ ରାସ୍‌ତାମାନାନ୍‌ ଜେ, ଜଦି ଏମେ ଲୋକ୍‌ତି ଦାଦ୍‍ସି ଆଡ଼୍‌ସି ମାନାପ୍ ମାନାପ୍ କଡ଼କକ୍‌ରା ଆଏଣ୍ତା ସାନାନ୍‌, ଆତିଙ୍ଗ୍‌ ୱାନି ତଡ଼ାନ୍‌ ୱାନି ଆଡ଼୍‌ସିଙ୍ଗ୍‌ ପେଡ଼ିଆଜ ନିଜେଦି ଦାଦ୍‍ସି ଉଣ୍ତିଙ୍ଗ୍‌ କୁଟୁମ୍‌ କିଦେଙ୍ଗ୍‌ ଆଟ୍‍ନାନ୍‍ ।
LUK 20:29 ଅର୍‍ଲେନ୍‍ ସାତ୍‌ଲୋକ୍‌ ତଡ଼ାନ୍‌କୁ ମାର୍ହାର୍‌; ପେରିଦାଦ୍‍ସି ଅରେତ୍‌ ଆଇମାଦିଙ୍ଗ୍‍ ପେଡ଼ି ଆତାନ୍‌ ମାରି କଡ଼କକ୍‍ରା ଆଏଣ୍ତା ସାତା ସର୍ହାନ୍‍;
LUK 20:30 ୱେନ୍‌କା ୱାନି କଗ୍‍ରି ତଡ଼ାନ୍‌ ପେଡ଼ିଆଜି କଡ଼କକ୍‍ରା ଆଏଣ୍ତା ସାତା ସର୍ହାନ୍‍ ମାରି ଅରେନ୍‍ ତଡ଼ାନ୍‌ ତାନେଙ୍ଗ୍‌ ପେଡ଼ି ଆତାନ୍‌;
LUK 20:31 ଆୟାୱାଜା ସାତ୍ ତଡ଼ାନ୍‌କୁ ୱିଜେରେ କଡ଼କକ୍‍ରା ଆଏଣ୍ତା ସାତାସର୍ହାର୍‍ ।
LUK 20:32 ସାରାସାରିୱେନ୍‌କା ଆୟା ଆଇମା ବା ସାତା ସର୍ହାତ୍‌ ।
LUK 20:33 ଆରିଙ୍ଗ୍‌, ମାରିଡ଼େସିଜିବନ୍‌ଆଜି ୱାର୍‌ ନିଙ୍ଗିଁନିୱାଲେ ଆୟାୱାରି ଲୋଇ ୱାଦ୍‌ ଏ ଆଡ଼୍‌ସି ଆନାତ୍‌ ? ସାତ୍‌ଲୋକ୍‌ ତୋ ତାନିଙ୍ଗ୍‌ ପେଡ଼ି ଆତାମାର୍ହାର୍‌ ।”
LUK 20:34 ଜିସୁ ୱାରିଙ୍ଗ୍‌ ଇର୍ହାନ୍‌, “ଇୟା ଦୁନିଆଦି କଡ଼କକ୍‍ରା ପେଡ଼ି ଆନାର୍‌ ମାରି ପେଡ଼ି ସିନାର୍‍,
LUK 20:35 ମାତର୍‌ ଏମେ ମେମାରି ନି ଆଇମେକ୍‍ ସାତି ଲୋକାମାଣ୍‌କୁ ମାରିଡ଼େସି ନିଙ୍ଗିଁନି ଉଣ୍ତିଙ୍ଗ୍‌ ମାରି ୱାନି ଦୁନିଆଦୁ ଜିଦେଙ୍ଗ୍‌ ଜଗ୍‌ ଆନାର୍‌ ୱାର୍‌ ପେଡ଼ି ଆଏର୍‌;
LUK 20:36 ମାରି, ୱାର୍‌ ସାଦେଙ୍ଗ୍‌ ଆଟ୍‍ଏର୍‍, ଇରିଙ୍ଗ୍‌ ୱିଜେରେ ମୁସ୍‌କୁପୁର୍‌ତି ଦୁତ୍‍କା ୱାଜା ତେବାନାର୍‌ ମାରି ମାରିଡ଼େସି ଜିବନ୍‌ଆଜିନିଙ୍ଗିଁତିଙ୍ଗ୍‌ କଡ଼ର୍‌ ଆକାର୍‌ଆକା ମାପୁରୁଦି କଡ଼ର୍‌ ଆନାର୍‌ ।
LUK 20:37 ମୋସା ନେଗ୍ରେଣ୍ତା ତର୍‍ତାମାନ୍‍ ଜେ ଲୋକୁ ସାତିମାଣ୍‌କୁ ମାରିଡ଼େସିଜିବନ୍‌ ଆଜି ଜିନାର୍‍ । ମୋସା ଏସ୍ତିୱାଲେ କାସ୍‍ନି ଦୁପାଦି ବିସୟ୍‌ତାନ୍‌ ରାସ୍‌ତାନ୍‌, ୱାନ୍‌ ଇର୍‌ଆନ୍‌ ଜେ, ପ୍ରବୁ ଆଜିନାନ୍‍ ଅବ୍ରାହାମତି ମାପୁରୁ, ଇସ୍‍ହାକ୍‍ତି ମାପୁରୁ ମାରି ଜାକୁବଦି ମାପୁରୁ ।
LUK 20:38 ୱାନ୍‌ ତୋ ସାତିଲୋକ୍‍ତି ମାପୁରୁ ଆଏନ୍‍, ମାତର୍‌ ଜିବନ୍‌ମାନି ଲୋକା ମାପୁରୁ; ଇରିଙ୍ଗ୍‌ ୱିଜେରେ ୱାନି ଆଗ୍‌ଡ଼ି ଜିନିକାର୍‍ ଆନାର୍‌ ।”
LUK 20:39 ଆବେଟ୍‌ ସାସ୍ତ୍ରିରି ଲୋଇ ଏସୋ ଲୋକୁ ଇର୍ହାର୍‌, “ଏ ଗୁରୁ, ନିନ୍‌ ସତ୍‌ ୱେର୍‌ତି ।”
LUK 20:40 ଇରିଙ୍ଗ୍‌ ୱାର୍‌ ୱାନିଙ୍ଗ୍‌ ଇନି ପ୍ରସ୍ନ ୱେନ୍‍ବାଦେଙ୍ଗ୍‍ ମାରି ସାସ୍‌ କିଏତାର୍‌ ।
LUK 20:41 ମାତର୍‌ ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, କ୍ରିସ୍ତ ଜେ ଦାଉଦତି ମାରିନ୍‌, ଇକା ଲୋକୁ ଏଣ୍ତେସ୍‌ ଇନାର୍‌ ?
LUK 20:42 ଇରିଙ୍ଗ୍‌ ନିଜେ ଦାଉଦ ଗିତସଂହିତାଦୁ ଇନାନ୍‌, ପ୍ରବୁ ନା ପ୍ରବୁଙ୍ଗ୍‌ ଇର୍ହାନ୍‌,
LUK 20:43 ମାପ୍‌ ଆମାସାନ୍ଦି ନି ସାତ୍ରୁରିଙ୍ଗ୍ ନି କାଲ୍‌କା ଆଡ୍‍ଗି କିଏପ୍‍, ଆୟା ସାନ୍ଦି ମା ଉଣେରି ତରିନ୍‌ ବାସ୍‌ସ ମାନ୍‌ଆ ।
LUK 20:44 ମାରି, ଦାଉଦ ୱାନିଙ୍ଗ୍‌ ପ୍ରବୁ ଇଜି ଇନାନ୍‌; ଆରିଙ୍ଗ୍‌, ୱାନ୍‌ ଏଣ୍ତେସ୍‌ ୱାନି ମାରିନ୍‌ ?
LUK 20:45 ୱେନ୍‌କା ଜିସୁ ୱିଜୁ ଲୋକା ଆଗ୍‌ଡ଼ି ସିସୁରିଙ୍ଗ୍‌ ଇର୍‌ଆନ୍‌,
LUK 20:46 “ସାସ୍ତ୍ରିରିମାଣ୍‍କୁ ଜାଗାର୍‌ତା ! ୱାର୍‌ ନିର୍‍ଇ ଆଙ୍ଗିଁ ଆରାନାର୍‍ । ମାରି ସାତାସାଉକାଦୁ ଲୋକୁ ମାଡ଼ିସ୍‌ କିପିର୍‍ ଇଜି ଅଡ଼୍‍ବିନାର୍‍, ପାର୍‍ତନାକିନି ଇଲ୍‌କାଙ୍ଗ୍‌ ପେରି ବାଡି ମାରି ବୋଜି ଉଣିମାନୁ ପେରି ବାଡି ପୟଦେଙ୍ଗ୍‍ ବଦାକିନାର୍‍ ।
LUK 20:47 ୱାର୍‌ ରାଣ୍ତି ଆଇମେକା ଇଲୁଦି ୱିଜୁ ବିସୟ୍‌ ରେନାଅନାର୍‍ ମାରି ନିଜେଦିଙ୍ଗ୍‍ ନେଗିକାନ୍‍ ତର୍‌ତେଙ୍ଗ୍‍ଁ ନିର୍‍ଇ ପାର୍‌ତନା କିନାର୍‌; ୱାର୍‌ ନାଣ୍ତ ଦଣ୍ତ୍‌ ପୟ୍‌ନାର୍‌ ।”
LUK 21:1 ଇୟା ୱେନ୍‌କା ଜିସୁ ସାରିବେଡ଼୍‍ତି ସୁଡ଼୍‌ଜି ଏସୋ ମାଜନ୍‌ ଲୋକୁ ମନ୍ଦିର୍‌ତି ଡାବୁଙ୍ଗୁଁ ସିନି ପେଡ଼ାଦୁ ମାପୁରୁଦି ଉଣ୍ତିଙ୍ଗ୍‌ ଦାନ୍‍ ସିନିକା ସୁଡ଼ୁତାନ୍‌ ।
LUK 21:2 ମାରି, ୱାନ୍‌ ଅରେତ୍‌ କାକୁର୍ତି ରାଣ୍ତି ଆଇମା ଆୟା ପେଡ଼ାଦୁ ରୁନ୍‍ ଟାକେଙ୍ଗ୍‍ଁ ସିନିକା ସୁଡ଼୍‌ଜି ୱେର୍‌ତାର୍‌,
LUK 21:3 ନାନ୍ ମିଙ୍ଗିଁ ସତ୍‌ ଇଜିନା, ଇୟା କାକୁର୍ତି ରାଣ୍ତି ଆଇମା ୱିଜେରିଙ୍ଗ୍‌ ନାଣ୍ତ ସିତାମାନାତ୍‍ ।
LUK 21:4 ଇରିଙ୍ଗ୍‌ ଇକାର୍‌ ୱିଜେରେ ପେଡ଼ାଦୁ ନିଜେ ନିଜେଦି ଆମାକା ୱାରିଙ୍ଗ୍‌ ଦର୍‍କାର୍‍ ସିଲେତ୍‌ ଆୟା ଡାବୁଙ୍ଗୁଁ ଦାନ୍‍ ସିତାମାନାର୍‌, ମାତର୍‌ ଇକାତ୍‍ ନିଜେ ଜିଦେଙ୍ଗ୍‌ ଆମାକା ୱିଜୁ ତାନେମାନୁ ମାର୍‌ଆତ୍‌, ଆକା ୱିଜୁ ସିତାତ୍‌ ।
LUK 21:5 ମାରି, ଏସୋ ସିସୁର୍‍ ମନ୍ଦିର୍‌ ବିସୟ୍‌ତାନ୍‍ ୱାର୍‍ଗି ସାଜିମାର୍‍ଆର୍ । ୱାର୍‌ ଇଜିମାର୍‌ଆର୍‌, ଇକା ଉଣ୍ତ୍ରିନେଗି ମନ୍ଦିର୍‌ । ଇକା ନେଗି କାଲ୍‍କାଣ୍‍ ତିଆର୍‌ ଆତାମାନାତ୍‌ । ସୁଡ଼ୁଦୁ ମାପୁରୁଙ୍ଗୁଁ ସିତିମାନି ନେଗି ନେଗି ବିସୟ୍‌ ସିତାମାନାର୍‌ ।
LUK 21:6 ଜିସୁ ଇର୍‌ଆନ୍‌, “ମିର୍‌ ଆମାୱିଜୁ ଇବେ ସୁଡ଼ୁଜିନିଦେର୍‍, ଦିନ୍‍ୱାନାତ୍‍, ଏସ୍ତିୱାଲେ ଉଣ୍ତ୍ରି କାଲୁ ମାରି ଉନ୍‌ଡ୍ରି କାଲୁ ମୁସ୍‌କୁ ତେବାଏତ୍‍ ୱିଜୁ କାଲ୍‍କୁ ଗୁଣ୍ତ୍‍ ଗୁଣ୍ତା ଆନେ ।”
LUK 21:7 ଆବେଟ୍‌ ସିସୁର୍‍ ଜିସୁଙ୍ଗୁଁ ୱେନ୍‌ବାତାର୍‌, “ଏ ଗୁରୁ, ଆରିଙ୍ଗ୍‌ ଇୟାୱିଜୁ ଏସାଙ୍ଗ୍‍ ଗଟାନାତ୍‌ ? ମାରି, ଏମେ ଦିନ୍‍ତୁ ଇୟାୱିଜୁ ଗଟ୍‍ନା ଇଗାୱାନାତ୍‌, ଆୟାଦିନ୍‍ତି ସିନା ଇନିକା ?”
LUK 21:8 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ଜାଗାର୍‌ତା, ମିର୍‌ ଏଣ୍ତେସ୍ ବାୟା ଆମାଟ୍‌; ଇରିଙ୍ଗ୍‌ ଏସୋ ଲୋକୁ ନା ଦର୍‌ତାନ୍‌ ୱାଜି, ନାନ୍ ଜିସୁ ମାରି ଦିନ୍‌ ଇଗା ୱାତାତ୍‍ ଇଜି ଇନାର୍‌; ୱାରି ୱେନ୍‌କା ସଲ୍‍ମାଟ୍‍ ।
LUK 21:9 ମାତର୍‌ ମିର୍‌ ଏସ୍ତିୱାଲେ ଜୁଦ୍‍ ମାରି ଲୋକୁ ଡାକ୍‍ସିସାନି ଆଉଲି ୱେନିଦେର୍‍, ନାସ୍ତିୱାଲେ ତିଲାମାଟ୍‌; ଇରିଙ୍ଗ୍‌ ଇୟାୱିଜୁ ସତେନେ ଆଗ୍‌ଡ଼ି ଗଟାନାତ୍‍, ମାତର୍‌ ଆୟାଦାପ୍ରେ ଜୁଗ୍‍ ସେସ୍‌ ଆଏଦେ ।”
LUK 21:10 ଆବେଟ୍‌ ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ଜାତି ବିରଦ୍‌ତାନ୍‌ ଜାତି ଲୋକା ଲୋଇ ଜୁଦ୍‍ କିନାର୍‍ ମାରି ଦେସ୍‌ ବିରଦ୍‌ତାନ୍‌ ଦେସ୍‍ ଲୋଇ ଜୁଦ୍‍ କିନାର୍,
LUK 21:11 ମାରି ନାଣ୍ତ ବୁମିକମ୍ପ ଆନାତ୍‌ ମାରି ବାଡି ବାଡିଆଙ୍ଗାଁ ମର୍‌ଡି ଆନାତ୍‌ ମାରି ଲୋକାଙ୍ଗ୍‌ ଉଣିକା ପୁଟ୍‌ଏତ୍‌, ମାରି ବାଦଡ଼୍‍ତୁ ବୟ୍‌ଙ୍କାର୍‌ ତର୍‌ନାତ୍‌ ମାରି ପେରି ପେରି ସିନେଙ୍ଗ୍‍ ତରାନେ ।
LUK 21:12 ମାତର୍‌ ଇୟାୱିଜୁ ଗଟାନି ଆଗ୍‌ଡ଼ି ଲୋକୁ ମିଙ୍ଗିଁ ଆସ୍‌ନାର୍‌ ମାରି ପାର୍‌ତନା ଇଲୁଦୁ ମାରି ଜଇଲ୍‍ତୁ ମିଙ୍ଗିଁ ପୋକ୍‌ସି କାସ୍ଟୁ ସିନାର୍‍, ମାରି ନା ଦରତି ଉଣ୍ତିଙ୍ଗ୍‌ ମିଙ୍ଗିଁ ରାଜା ନି ସାସନ୍‌କିନି ଲୋକା ଆଗ୍‌ଡ଼ି ଅନାର୍‍;
LUK 21:13 ମାତର୍‌ ଇକା ମିଙ୍ଗିଁ ନା ବିସୟ୍‌ତାନ୍‌ ଲୋକାଙ୍ଗ୍‌ ନେଗିକାବୁର୍‌ ସାକି ସିଦେଙ୍ଗ୍‍ ଇଜି ସାରି ପୟ୍‌ନିଦେର୍‌ ।
LUK 21:14 ମାରି ନିଜେଦି ତରିଟାନ୍‍ ଇନିକା ଇନ୍‌ଡ୍ରେଙ୍ଗ୍‌ ଆନାତ୍‌, ଆୟା ବିସୟ୍‌ତାନ୍‌ ଆଗ୍‍ଡ଼ିରାନ୍‍ ସିନ୍ତା କିଇ ନିଜେ ନିଜେଦି ମୋନ୍‌ତୁ ତିର୍‌ କିଦୁ ।
LUK 21:15 ଇରିଙ୍ଗ୍‌ ନାନ୍ ମିଙ୍ଗିଁ ଇୟାୱାଜା ମାଟା ନି ବୁଦି ସିନା ଜେ, ମି ୱିଜୁ ସାତ୍ରୁ ଲୋକୁ ଆବେ ଆଙ୍ଗ୍‌ଦେଙ୍ଗ୍‌ ଆଟ୍‍ଏର୍‍ ।
LUK 21:16 ମାତର୍‌ ମିଙ୍ଗିଁ ମି ବୁବାୟାୟା, ତଡ଼ାନ୍‌, ନିଜେଦି ଲୋକୁ ମାରି ସାମ୍‍ନ୍ଦିବନ୍ଦୁର୍‌ ସାତ୍ରୁରି କିୟୁଦୁ ସର୍‍ପେ କିନାସିନାର୍‍, ମାରି ମି ଲୋଇ ଲୋକୁ ଏଙ୍ଗ୍‍ ଏଙ୍ଗ୍‍ କାତ୍‍ନାର୍‍,
LUK 21:17 ମାରି ନାବାନ୍‍ ମିର୍‌ ବିସ୍‌ବାସ୍‌ କିତିମାନି ଉଣ୍ତିଙ୍ଗ୍‌ ଲୋକୁ କାଡ଼୍‍ନାର୍‍ ।
LUK 21:18 ମାତର୍‌ ମି ତାଲାଦି କୁକୁଟି ବା ନାସ୍ଟୁ ଆଏତ୍‍ ।
LUK 21:19 ମିର୍‌ ସାସ୍‍ତାନ୍‍ ତେବାତିଙ୍ଗ୍‍ ନିଜେ ନିଜେଦିଙ୍ଗ୍‍ ରକିୟା କିଦେଙ୍ଗ୍‌ ଆଟ୍‌ନିଦେର୍‌ ।”
LUK 21:20 ମାତର୍‌ ମିର୍‌ ଏସ୍ତିୱାଲେ ଜିରୁସାଲାମ୍‍ତିଙ୍ଗ୍‍ ସନ୍ୟର୍‌ ସାରିବେଡ଼୍‍ତି କାପ୍‍କିନିମାନିକା ସୁଣିଦେର୍‍, ଆୟାୱାଲେ ଆକା ୱିର୍‍ଜି ସନି ଦିନ୍‌ ଜେ ଇଗା ୱାତାତ୍‍, ଇକା ମିର୍‌ ନେସ୍‌ତୁ ।
LUK 21:21 ନାସ୍ତିୱାଲେ ଆମାଲୋକ୍‍ ୱିଜେରେ ଜିହୁଦା ଗାଡ଼୍‌ତୁ ମାନାର୍‌, ୱାର୍‌ ଗରନ୍‌ ମୁସ୍‌କୁ ଉରୁକ୍‍ସି ସଲିର୍‍; ମାରି, ଏର୍‌ ଗାଡ଼୍‌କାଙ୍ଗ୍‌ ତେବାନାର୍‌, ଏଣ୍ତେସ୍‌ବା ୱାର୍‌ ଗାଡ଼୍‌ ଡ଼ିସ୍‌ସି ସଲିର୍‌; ମାରି, ଏର୍‌ ଇସ୍ରିନାର୍‍କାଙ୍ଗ୍‍ ତେବାନାର୍‌, ଏଣ୍ତେସ୍‌ବା ୱାର୍‌ ଗାଡ଼୍‌ତୁ ଡ଼ୁଗ୍‍ମାକିର୍‍;
LUK 21:22 ଇରିଙ୍ଗ୍‌ ରାସାତିମାନି ବିସୟୱିଜୁ ପୁରା ଆନି ଉଣ୍ତିଙ୍ଗ୍‌ ଆକା ୱିଜୁ ଦଣ୍ତତି ଦିନ୍‌ ଆନାତ୍‌ ।
LUK 21:23 ଆୟା ସମୟତୁ ପଟାଦୁମାନି ଆଇମାଲୋକ୍‍ ମାରି ଇସ୍ରି କଡ଼ରିଙ୍ଗ୍‌ ଆସ୍‌ସି ପାଲ୍‍ ଉଟ୍‍ପିସ୍‍କିଜିମାନି ଆଇସିକା ଅବସ୍ତା ଏସ ତାଗ୍‌ଇକା ଆନାତ୍‌, ୱାକ୍‍ ନାଣ୍ତ ଦୁଃକ୍‌ ପୟ୍‍ନେ ! ଇରିଙ୍ଗ୍‌ ଦେସ୍‍ତୁ ନାଣ୍ତ ଦୁଃକ୍‌କାସ୍ଟୁ ୱାନାତ୍‌ ମାରି ମାପୁରୁଦି ଦଣ୍ଡ୍‌ ଇୟା ଜାତି ମୁସ୍‌କୁ ୱାନାତ୍‌ ।
LUK 21:24 ମାରି ୱାର୍‌ କୁଡ଼ାମ୍‍କାଣ୍‍ ସାନାର୍‍ ମାରି ତର୍‍ଆୟ୍‌ ଆଜି ଆଇଜାତିଦି ଲୋଇ ପୋକ୍‌ନାର୍‌, ମାରି ଅଣଜିହୁଦି ଲୋକା ଦିନ୍‌ ୱିଜ୍‌ଇ ସାନ୍ଦି ଜିରୁସାଲାମ୍‍ ୱାରି କାଲ୍‌କୁ ଆଡ୍‍ଗି ତେବାନାତ୍‍ ।
LUK 21:25 “ମାରି ୱେଡ଼ା, ଲେଞ୍ଜୁ ନି ସୁକେଙ୍ଗାଁଙ୍ଗ୍‍ ସିନେଙ୍ଗ୍‍ ତରାନେ, ମାରି ଦୁନିଆଦୁ ଜାତିଦି ଲୋକା ଲୋଇ ବାଦା ୱାନାତ୍‌; ସାମ୍‌ଦୁରୁ ମାରି ଏରୁଗାତିସ୍‌ୱାନି ଆଉଲିଦିଙ୍ଗ୍‌ ୱାର୍‌ ବାୟାବେମ୍‍ରି ଆନାର୍‌ ।
LUK 21:26 ମାରି ଦୁନିଆଦି ମୁସ୍‌କୁ ୱାଜିମାନି ଗଟନା ୱିଜୁଦିଙ୍ଗ୍‌ କାପ୍‍କିଜି ଲୋକୁ ୱିଜେରେ ମୁର୍ସା ଆନାର୍‌, ଇରିଙ୍ଗ୍‌ ବାଦଡ଼୍‍ତି ସାକ୍ତିୱିଜୁ ଦୁଙ୍ଗ୍‍ନେ ସନେ ।
LUK 21:27 ନାସ୍ତିୱାଲେ ଲୋକୁ ମନୁସ୍ୟପୁତ୍ରଦିଙ୍ଗ୍‍ ନାଣ୍ତ ସାକ୍ତିଦାନ୍‍ ମାରି ନାଣ୍ତ ମହିମାଦି ୱାଲେ ବାଦଡ଼୍‍ତାନ୍‍ ୱାନିକା ସୁଣାର୍‍ ।
LUK 21:28 ମାତର୍‌ ଇୟାୱିଜୁ ଗଟେନେଙ୍ଗ୍‍ ଆରାମ୍ଆତିଙ୍ଗ୍‍ ମିର୍‌ ମୁସ୍‌କୁ ସୁଡ଼ୁଦୁ ମାରି ତାଲା ପେର୍‍ଦୁ, ଏଣ୍ତେସ୍‍କି ମି ରକିୟା ପଇନିକା ଲାକ୍‌ତୁ ଇଗା ୱାତାତ୍‌ନି ।”
LUK 21:29 ମାରି, ଜିସୁ ୱାରିଙ୍ଗ୍‌ ଉଣ୍ତ୍ରି କାତା ଇର୍‌ଆନ୍‌, “ତଗା ମାରାନ୍‌, ମାରି ଆଇ ୱିଜୁ ମାରାକା ବିସୟ୍‌ତାନ୍‌ ଅଡ଼୍‍ବିଦୁ ।
LUK 21:30 ଏସ୍ତିୱାଲେ ଆୟା ମାରାକା ଆକ୍‍ ପୁନାକାୟ୍‍ନେ, ନାସ୍ତିୱାଲେ ମିର୍‌ ଆକା ସୁଡ଼ୁଜି ଜେଟାପ୍‌ ଲେଞ୍ଜୁ ଇଗା ୱାତାତ୍‌ନି ଇଜି ନିଜେନିଜେ ନେସ୍‌ନିଦେର୍‌ ।
LUK 21:31 ଆୟାୱାଜା ମିର୍‌ ବା ଇୟାୱିଜୁ ଗଟନା ସୁଡ଼ୁତିଙ୍ଗ୍‌ ମାପୁରୁଦି ରାଜି ଜେ ଇଗା ୱାତାତ୍‍, ଇକା ନେସ୍‌ତୁ ।
LUK 21:32 “ନାନ୍ ମିଙ୍ଗିଁ ସତ୍‌ ଇଜିନା, ଇୟାୱିଜୁ ଗଟେଆଇ ସାନ୍ଦି ଇୟା ଦିନ୍‌ତି ଲୋକୁ ଏଣ୍ତେସ୍‌ ୱିଜ୍‌ଏର୍‌ ।
LUK 21:33 ବାଦଡ଼୍‍ ନି ଦୁନିଆ ୱିଜ୍‌ନାତ୍‌, ମାତର୍‌ ନା ବାକ୍ୟୱିଜୁ ଏସାଙ୍ଗ୍‍ ବା ୱିଜ୍‍ଏତ୍‍ ।
LUK 21:34 “ମାତର୍‌ ମିର୍‌ ନିଜେ ନିଜେଦି ବିସୟ୍‌ତାନ୍‌ ଜାଗାର୍‌ତା ମାଡ୍ରୁ, ଏସ୍ତିୱାଲେ ମି ଜିବନ୍‌ ନାଣ୍ତ ୱେଡ଼ିକାଦୁ ପୁରା ତେବାନାତ୍‍ ମାରି କାଡ଼ୁଉଣ୍‍ଜିସସ୍‌ତେଙ୍ଗ୍‍, ମାରି ଜିନି ବିସୟ୍‌ତାନ୍‌ ସିନ୍ତାଦାନ୍‌ ଦୁଃକ୍‌ ୱାନାତ୍‌, ମାରି ଆୟାନାଣ୍ତିଙ୍ଗ୍‌ ଦାପ୍ରେ ମି ମୁସ୍‌କୁ ୱାନା ଆର୍‍ନାତ୍‍;
LUK 21:35 ଇରିଙ୍ଗ୍‌ ଆକା ଜାଡ଼ିଦି ୱାଜା ୱିଜୁ ଦେସ୍‍ଦୁନିଆଦି ୱିଜୁ ଲୋକା ମୁସ୍‌କୁ ୱାନାତ୍‌ ।
LUK 21:36 ମାତର୍‌ ମିର୍‌ ଏଣ୍ତେସ୍‌କି ଇୟାୱିଜୁ ୱାଜିନିଆଗ୍‍ଡ଼ି ଗଟ୍‌ନାଦାନ୍‌ ରକିୟା ପୟ୍‌ଦେଙ୍ଗ୍‍ ମାରି ମନୁସ୍ୟପୁତ୍ରଦି ଲାକ୍‌ତୁ ନିନ୍‍ଡ୍ରେଙ୍ଗ୍‍ ଡାଟ୍‍ ଆଦୁ, ଇୟାଉଣ୍ତିଙ୍ଗ୍‌ ଦିନାମି ପାର୍‌ତନା କିଜି ଜାଗାର୍‌ତା ମାଡ୍ରୁ ।”
LUK 21:37 ଜିସୁ ୱିଜୁଦିନ୍‌ ମନ୍ଦିର୍‌ତୁ ସିକିୟା ସିଜିମାର୍ହାନ୍‍, ମାରି ୱିଜୁ ନାଡ଼ା ସହସି ସଲ୍‍ସି ଜିତ ଗରନ୍‌ତୁ ତେବାଜି ମାର୍ହାନ୍‌ ।
LUK 21:38 ମାରି, ୱିଜେରେ ଲୋକୁ ମନ୍ଦିର୍‌ତୁ ୱାନି ସିକିୟା ୱେନ୍‌ଡ୍ରେଙ୍ଗ୍‌ ଇଜି ସାଲ୍‍ଦି ୱାନି ଲାକ୍‌ତୁ ୱାଜି ମାର୍ହାର୍‍ ।
LUK 22:1 ନିସ୍ତାର୍‌ ପଣ୍ତ୍‌ୟ ଇନି କମିର୍‌ସିଲି ରୁଟିଦି ପଣ୍ତ୍‌ୟ ଲାକ୍‌ତୁ ଆଜି ୱାଜିମାର୍ହାତ୍‌ ।
LUK 22:2 ମାରି, ପେରି ଜାଜକର୍‌ ନି ସାସ୍ତ୍ରିର୍‍, ଏଣ୍ତେସ୍‌ ଜିସୁଙ୍ଗୁଁ ଏନ୍‌ ନେସ୍‌ଏଣ୍‌ଗା ସାୟାମାର୍‌ଗା ଡାକ୍‌ତେଙ୍ଗ୍‍ଁ ଆଟ୍‍ନାର୍‍, ଆବେଣି ଉପାୟ୍‌ ପଇଜି ମାର୍ହାର୍‌, ମାତର୍‌ ୱାର୍‌ ଲୋକାଙ୍ଗ୍‌ ତିଲାଜି ମାର୍ହାର୍‌ ।
LUK 22:3 ନାସ୍ତିୱାଲେ ବାରଲୋକ୍‌ ସିସୁରି ଲୋଇରାନ୍‌ ଇସ୍କାରିୟୋତିୟ ଦର୍‌ତି ଅରେନ୍‍ ଜିହୁଦାମାନୁ ସୟତାନ୍ ଡ଼ୁଗିତାତ୍‌;
LUK 22:4 ମାରି, ଜିହୁଦା ସୋର୍‌ଆନ୍‌ନୋ, ଇନି ଉପାୟ୍‌ତାନ୍‌ ୱାନିଙ୍ଗ୍‌ ପେରି ଜାଜକ ନି ସେନାପତିରି କିୟୁଦୁ ସପ୍ରେ କିଦେଙ୍ଗ୍‌ ଆଟ୍‍ନାନ୍‍, ଆକା ୱାରି ୱାଲେ ୱାର୍‌ଗିତାନ୍‌ ।
LUK 22:5 ଆବେଟ୍‌ ୱାର୍‌ ୱେଡ଼ିକା ଆଜିମାରି ୱାନିଙ୍ଗ୍‌ ଡାବୁଙ୍ଗୁଁ ସିଦେଙ୍ଗ୍‍ ଇଜି ପାର୍‌ମାଣ୍‌ କିତାର୍‌ ।
LUK 22:6 ମାରି, ଜିହୁଦା ରାଜି ଆତାନ୍‌ନୋ ଲୋକ୍‌ ୱିଜେରେ ଅରେନ୍‍ବା ସିଲିୱାଲେ ୱାନିଙ୍ଗ୍‌ ୱାରି କିୟୁଦୁ ସପ୍ରେ କିଜି ସିନି ଉଣ୍ତିଙ୍ଗ୍‌ ସାରି ପ‍ଇଦେଙ୍ଗ୍‌ ଆସ୍‌ତାନ୍‌ ।
LUK 22:7 ୱେନ୍‌କା ଏମେ ନାଣ୍ତିଙ୍ଗ୍‌ ନିସ୍ତାର୍‌ ପଣ୍ତୟ୍‌ତି ମେଣ୍ତାପିଲେକାଙ୍ଗ୍‌ କାତ୍‌ତେଙ୍ଗ୍‌ ଆନାତ୍‌, ଆୟା କମିର୍‌ସିଲି ରୁଟି ପଣ୍ତ୍‌ୟ ନାଣ୍ତିଙ୍ଗ୍‌ ୱାତାତ୍‍;
LUK 22:8 ମାରି, ଜିସୁ ପିତର୍‌ ନି ଜୋହନତିଙ୍ଗ୍‌ ଇକା ଇନ୍‌ଞ୍ଜି ପୋକ୍‌ତାନ୍‌, “ମାଡ୍‌ ଏଣ୍ତେସ୍‌ ଉଣ୍ତେଙ୍ଗ୍‌ ଆଟ୍‍ନିକା, ଆୟାଉଣ୍ତିଙ୍ଗ୍‌ ମିର୍‌ ସୋଲ୍‌ସ ମା ଉଣ୍ତିଙ୍ଗ୍‌ ନିସ୍ତାର୍‌ ପଣ୍ତ୍‌ୟତି ବୋଜି ତିଆର୍‌ କିଦୁ ।”
LUK 22:9 ଆବେଟ୍‌ ୱାର୍‌ ଜିସୁଙ୍ଗୁଁ ୱେନ୍‌ବାତାର୍‌, “ମାପ୍‌ ଇକା ଏମେ ବାଡିଦୁ ତିଆର୍‌ କିନାପ୍‍ ଇଜି ନିନ୍‌ ବଦା କିଜିନି ?”
LUK 22:10 ଜିସୁ ୱାରିଙ୍ଗ୍‌ ଇର୍‌ଆନ୍‌, “ସୁଡ଼ୁଦୁ, ମିର୍‌ ଗାଡ଼୍‌ତୁ ଡ଼ୁଗିତିଙ୍ଗାଁ, ଏରୁସାଟିଦୁ ଅସିମାନିକାତ୍‌ ଅରେତ୍‌ ଲୋକୁ ମିଙ୍ଗିଁ ବେଟ୍‌ଆନାତ୍‌; ୱାଦ୍‌ ଏମେ ଇଣ୍ତ୍ର ସନ୍‌ନାତ୍‌, ତାନି ୱେନ୍‌କା ୱେନ୍‌କା ଆୟା ଇଣ୍ତ୍ର ସୋଲ୍‌ସ ଇଲୁଦି ପେରିୱାନିଙ୍ଗ୍‌ ଇନିଦେର୍‌,
LUK 22:11 ଗୁରୁ ନିଙ୍ଗିଁ ୱେନ୍‌ବାଜିନାନ୍‌, ନାନ୍ ନା ସିସୁରି ୱାଲେ ଏମେମାନୁ ନିସ୍ତାର୍‌ ପଣ୍ତ୍‌ୟତି ବୋଜି କିନାପ୍‌, ଆୟା କୁଡ଼ାଆଙ୍ଗ୍‍ଁ ତେବାନି ବାକାର୍‌ ଆମାକା ?
LUK 22:12 ଆବେଟ୍‌ ୱାନ୍‌ ମିଙ୍ଗିଁ ନେଗେନ୍‌ ସଜେ କିତିମାନି ଉଣ୍ତ୍ରି ମୁସ୍‌କୁରି ମୋହଲାଦି ପେରି ବାକ୍‍ରା ତର୍‌ନାସିନାନ୍‌; ଆୟାବାଡିଦୁ ବୋଜି ତିଆର୍‌ କିଦୁ ।”
LUK 22:13 ମାରି, ପିତର୍‌ ନି ଜୋହନ ସର୍‌ଆର୍‌ନୋ, ଜିସୁ ୱାରିଙ୍ଗ୍‌ ଏଣ୍ତେସ୍‌ ଇର୍‌ଆ ମାର୍‌ଆନ୍‌, ଆୟାୱାଜା ସୁଡ଼ୁଜି ନିସ୍ତାର୍‌ ପଣ୍ତ୍‌ୟତି ବୋଜି ତିଆର୍‌ କିତାର୍‌ ।
LUK 22:14 ମାରି, ୱାର୍‌ ନିସ୍ତାର୍‌ ପଣ୍ତ୍‌ୟତି ବୋଜି ଉଣି ସମୟ ଆତାତ୍‌, ଜିସୁ ନି ୱାନି ୱାଲେ ପ୍ରେରିତ ସିସୁର୍‍ ଉଣ୍ତେଙ୍ଗ୍‌ ବାସ୍‌ତାର୍‌ ।
LUK 22:15 ଜିସୁ ୱାରିଙ୍ଗ୍‌ ଇର୍‌ଆନ୍‌, ନାନ୍ ନା ଦୁକ୍‍ବଗାନି ଆଗିଡ଼ିନେ ନାନ୍ ମି ୱାଲେ ଅର୍‌ସେ ଇୟା ନିସ୍ତାର୍‌ ପଣ୍ତ୍‌ୟତି ବଜି ଉଣ୍ତେଙ୍ଗ୍‌ ଅରେନେ ବଦା କିତାମାର୍‌ଆ;
LUK 22:16 ମାତର୍‌ ନାନ୍ ମିଙ୍ଗିଁ ଇଜିନା, ମାପୁରୁଦି ରାଜିଦୁ ଇୟା ଅର୍ତ ପୁରା ଆଇ ସାନ୍ଧି ନାନ୍ ମାରି ଏସ୍‌କାଙ୍ଗ୍‌ବା ନିସ୍ତାର୍‌ ପଣ୍ତ୍‌ୟତି ବଜି ମାରି ଉଣୁଏ ।
LUK 22:17 ମାରି, ଜିସୁ ଉଣ୍ତ୍ରି କୁଡ଼ୁକାଦୁ ଅଙ୍ଗୁର୍‍ରସ୍‍ ଅତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିଜି ଇର୍‌ଆନ୍‌, “ଇୟା କୁଡ଼ୁକା ଅସି, ଇବେନ୍‌ ମାନି ଅଙ୍ଗୁର୍‍ରସ୍‌ତିଙ୍ଗ୍‌ ନିଜେ ନିଜେଦି ମାନୁ ବାଟା କିଦୁ,
LUK 22:18 ମାତର୍‌ ନାନ୍ ମିଙ୍ଗିଁ ଇଜିନା, ମାପୁରୁଦି ରାଜି ରେଇ ସାନ୍ଦି ଇକା ନାନୁ ମାରି ଇୟା ଅଙ୍ଗୁର୍‍ରସ୍‍ ଉଣୁଏ ।”
LUK 22:19 ମାରି, ୱାନ୍‌ ରୁଟି ଅତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିତାନ୍‌ ମାରି ରୁଟି ରୁକ୍‍ସି ସିଜି ୱାରିଙ୍ଗ୍‌ ଇର୍ହାନ୍‌, “ମି ଉଣ୍ତିଙ୍ଗ୍‌ ସିଆତିମାନି ଇକା ନା ମେନ୍ଧଲ୍‍; ନାଙ୍ଗିଁ ଏତ୍‌କିନି ଉଣ୍ତିଙ୍ଗ୍‌ ଇକା କିଦୁ ।”
LUK 22:20 ଉଟି ୱିସ୍‌ତି ୱେନ୍‌କା ଆୟାୱାଜା ୱାନ୍‌ ଅଙ୍ଗୁର୍‍ ରସ୍‌ତି ଉଣି ଡୁବାଇ ଆସ୍‌ତାନ୍‌ନୋ ଇର୍ହାନ୍‌, ଇୟା ଅଙ୍ଗୁର୍‍ରସ୍‍ ମି ଉଣ୍ତିଙ୍ଗ୍‌ ସିଆତିମାନି ନା ନେତେର୍‌ତି ପୁନି ନିୟମ୍‌ ।
LUK 22:21 ମାତର୍‌ ସୁଡ଼ୁଦୁ, “ଏନ୍‌ ନାଙ୍ଗିଁ ସାତ୍ରୁରିକିୟୁଦୁ ସର୍‍ପେ କିଜିନାନ୍‌, ୱାନି କିୟୁ ନା ୱାଲେ ଟେବୁଲ୍‌ ମୁସ୍‌କୁ ମାନାତ୍‌ ।
LUK 22:22 ମାତର୍‌ ମାପୁରୁ ଏଣ୍ତେସ୍‌ ଆତାମାନାତ୍‌ କିତାମାନାନ୍‌, ମନୁସ୍ୟପୁତ୍ର ଜେ ନାନ୍ ଆୟାୱାଜା ସାନି ଦଣ୍ଡ୍‌ ପଇନା ସତ୍‌, ମାରି ଏମେ ଲୋକୁ ମାଣ୍‌କୁ ୱାନ୍‌ ସାତ୍ରୁରିକିୟୁଦୁ ସର୍ପେ ଆଜିନାନ୍‍, ଚି, ୱାନି ଉଣ୍ତିଙ୍ଗ୍‌ ଇକା ନାଣ୍ତ୍ କାରାବ୍‍ ଆନାତ୍‌ !”
LUK 22:23 ତାନେ ୱେନ୍‌କା ମା ଲୋଇରାନ୍‌ ଏନ୍‌ ଇକା କିଦେଙ୍ଗ୍‌ ସଲ୍‌ସିନାନ୍‌, ଆୟା ବିସୟ୍‌ତାନ୍‌ ସିସୁର୍‍ ନିଜେ ନିଜେଦିମାନୁ ୱେନ୍‌ବାଜି ସାଦେଙ୍ଗ୍‌ ଆସ୍‌ତାର୍‌ ।
LUK 22:24 ମାରି, ସିସୁରି ଲୋଇ ଏନ୍‌ ପେରିକାନ୍‌ ଇଜି ୱେଙ୍ଗ୍‌ଁନାନ୍‌, ଆୟା ବିସୟ୍‌ତାନ୍‌ ୱାରିୱାରି ଲୋଇ ୱାରିଗିଜି ସାତାର୍‌ ।
LUK 22:25 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, ଅଣଜିହୁଦି ରାଜାର୍‌ ୱାରି ମୁସ୍‌କୁ ସାସନ୍‍ କିନାର୍‌, ମାରି ଏର୍‌ ୱାରି ମୁସ୍‌କୁ ସାସନ୍‍ କିନିକା ମାନାତ୍‌, ୱାର୍‌ ଦେସ୍‍ତି ସାଙ୍ଗ୍‍ ଇଜି ୱେଙ୍ଗ୍‌ଁନାନ୍‌ ।
LUK 22:26 ମାତର୍‌ ମିର୍‌ ଆୟାୱାଜା ଆମାଟ୍‌, ଇରିଙ୍ଗ୍‌ ମି ମାଣ୍‌କୁ ଏନ୍‌ ପେରିକାନ୍‌, ୱାନ୍‌ ୱିଜେରି ମାଣ୍‌କୁ ଇସ୍ରିକାନ୍‌ ୱାଜା ଆପିନ୍‌, ମାରି ଏନ୍‌ ନେତା ମାନାନ୍‌, ୱାନ୍‌ ସେବାକିନି ୱାନି ୱାଜା ଆପିନ୍‌ ।
LUK 22:27 ମାତର୍‌ ୱିଜେରି ମାଣାନ୍‌ ପେରି ଲୋକୁ ଏନ୍‌ ? ଏନ୍‌ ଉଣ୍ତେଙ୍ଗ୍‌ ବାସ୍‌ତିମାନିକାର୍‌ ନୋ ୱାନିଙ୍ଗ୍‌ ୱେର୍‌ସିମାନି ଲୋକୁ ? ମିର୍‌ ଅଡ଼୍‍ବିନିଦେର୍‍ ଜେ ଉଣ୍ତେଙ୍ଗ୍‌ ବାସ୍‌ତିମାନି ଲୋକୁ, ୱାନ୍‌ ଇନିକା ପେରିକାନ୍‌ ଆଏନ୍‍ ? ଇରିଙ୍ଗ୍‌ ନାନ୍ ମି ଲୋଇରାନ୍‌ ଅରେନେ ସେବାକିନିୱାନି ୱାଜା ମାନା ।
LUK 22:28 ମାତର୍‌ ମିର୍‌ ନା ୱିଜୁ ପରିକାଦୁ ନା ୱାଲେ ମାନ୍‌ଞ୍ଜିୱାଜିନିଦେର୍‌;
LUK 22:29 ନା ବୁବା ଏଣ୍ତେସ୍‌ ନା ଉଣ୍ତିଙ୍ଗ୍‌ ରାଜି ତିଆର୍‌ କିତାନ୍‌, ନାନ୍ ବା ଆୟାୱାଜା ମି ଉଣ୍ତିଙ୍ଗ୍‌ ତିଆର୍‌ କିଜିନା,
LUK 22:30 ଏଣ୍ତେସ୍‌ ମିର୍‌ ନା ରାଜିଦୁ ନା ଟେବୁଲ୍‌ ମୁସ୍‌କୁ ଉଣିତିନିଦେର୍‌, ମାରି ମିର୍‌ ରାଜାବାସ୍‌ନିଗୋଦିଦି ମୁସ୍‌କୁ ବାସ୍‌ନିଦେର୍‌ନୋ ଇସ୍ରାଏଲ୍‌ତି ବାରଗୋଟା କୁଟୁମ୍‌ତି ମୁସ୍‌କୁ ସାସନ୍‍ କିନିଦେର୍‌ ।
LUK 22:31 “ସିମୋନ, ସିମୋନ, ସୁଡ଼ୁଆ, ପାଣିକିନିକାନ୍‌ ଗଦ୍‍ମୁଦାନ୍‍ ସପାଦିଙ୍ଗ୍‍ ୱେର୍‌ଏ କିଦେଙ୍ଗ୍‌ ଇଜି ସୋଲିଦୁ ଜଲ୍‍ପ୍‍ନି ୱାଜା ନେଗି ଲୋକାମାଣ୍‌କୁ ତାଗ୍‍ଇ ଲୋକାଙ୍ଗ୍‌ ୱେର୍‌ଏ କିନି ଉଣ୍ତିଙ୍ଗ୍‌ ସୟତାନ୍ ମିଙ୍ଗିଁ ପରିକା କିଦେଙ୍ଗ୍‌ ସାରିପୋଇତା ମାନାତ୍‌;
LUK 22:32 ମାତର୍‌ ମି ବିସ୍‌ବାସ୍‌ ଏଣ୍ତେସ୍‌ ମାର୍‌ଗେଏତ୍‌, ଇୟାଉଣ୍ତିଙ୍ଗ୍‌ ନାନ୍ ମି ଉଣ୍ତିଙ୍ଗ୍‌ ପାର୍‌ତନା କିତାମାନା; ମାରି, ନିନ୍‌ ଡ଼େସି ୱାତି ୱେନ୍‌କା ନିଜେଦି ତଡ଼ାନ୍‌କାଙ୍ଗ୍‌ ସାକ୍ତି କିଦୁ ।”
LUK 22:33 ମାତର୍‌ ପିତର୍‌ ଜିସୁଙ୍ଗୁଁ ୱେର୍‌ତାନ୍‌, “ଏ ପ୍ରବୁ, ନାନ୍ ନି ୱାଲେ ଜଇଲ୍‌ତୁ ସଣ୍ଡ୍ରେଙ୍ଗ୍‌ ମାରି ସାନିଦଣ୍ତ୍‌ ପ‍ଇଦେଙ୍ଗ୍‌ ବା ତିଆର୍‌ ଆତାମାନା ।”
LUK 22:34 ମାତର୍‌ ଜିସୁ ୱେର୍‌ତାନ୍‌, “ଏ ପିତର୍‌, ନାନ୍ ନିଙ୍ଗିଁ ଇଜିନା, ନେର୍‌ ନାଡ଼ା କରୁ କେଡ଼ିଇ ଆଗ୍‍ଡ଼ିନେ ନିନ୍‌ ନାଙ୍ଗିଁ ମୁଜା ନେସେଏ ଇଜି ଇନି ।”
LUK 22:35 ତାନେ ୱେନ୍‌କା ଜିସୁ ସିସୁରିଙ୍ଗ୍‌ ଇର୍‌ଆନ୍‌, ଏସ୍ତିୱାଲେ ନାନ୍ ମିଙ୍ଗିଁ ଡାବୁଙ୍ଗୁଁ ମଣି, ମଣି ମାରି ଜୁତେଙ୍ଗ୍‌ ଡ଼ିସ୍‌ତିଙ୍ଗ୍‌ ପୋକ୍‌ତା ମାର୍‌ଆ, ନାସ୍ତିୱାଲେ ମିଙ୍ଗିଁ ଇନିକା ଉଣା ମାର୍‌ଆତ୍‌ ? ୱାର୍‌ ଇର୍ହାର୍‌, ଇନିକା ସିଲେ ।
LUK 22:36 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ମାତର୍‌ ଇଲେ, ଆମାୱାନିଦି ଡାବୁଙ୍ଗୁଁ ଇଡ୍‌ନି ମଣି ମାନାତ୍‌, ୱାନ୍‌ ଆକା ଅପିନ୍‌, ଆୟାୱାଜା ମଣି ବା ଅପିନ୍‌, ମାରି ଆମାୱାନିଙ୍ଗ୍‌ କୁଡ଼ାମ୍‍ ସିଲେତ୍‌, ୱାନ୍‌ ନିଜେଦି ସାଦର୍‌ ଉଣ୍ତ୍ରି ପୋର୍‌ଜ କାଣ୍ତା କଡ଼ିନ୍‍ ।
LUK 22:37 ମାତର୍‌ ନାନ୍ ମିଙ୍ଗିଁ ୱେର୍‌ସିନା, ୱାନ୍‌ ପାପିଲୋକା ୱାଲେ ମିସାତାନ୍‌, ଇୟା ଏମେ ବାକ୍ୟ ରାସ୍‌ତା ମାନାତ୍‌, ଆକା ନା ମାନୁ ପୁରା ଆନିକା ମାନାତ୍‌; ଆଦେଙ୍ଗ୍‌ ନା ବିସୟତି ମାଟା ପୁରା ଆଜିନାତ୍‍ ।”
LUK 22:38 ଆବେଟ୍‌ ୱାର୍‌ ଇର୍ହାର୍‌, “ପ୍ରବୁ, ସୁଡ଼ୁଆ, ଇବେନୁ ରୁଣ୍ତି କାଣ୍ତେଙ୍ଗ୍‌ ମାନେ ।” ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, ରୁଣ୍ତି କାଣ୍ତେଙ୍ଗ୍‌ ନାଣ୍ଡ୍ ।
LUK 22:39 ଜିସୁ ଗାଡ଼୍‌ତାନ୍‍ ସୋତା ସୋର୍‌ଆନ୍‌ନୋ ନିଜେଦି ଦିନ୍‍କେରିୱାଜା ଜିତ ଗରନ୍‌ ମୁସ୍‌କୁ ସୋର୍‌ଆନ୍‌, ମାରି ସିସୁର୍‍ ବା ୱାନି ୱାଲେ ୱାଲେ ସୋର୍ହାର୍‌ ।
LUK 22:40 ଆୟା ବାଡିଦୁ ଇତାର୍‌ରୋ ଜିସୁ ସିସୁରିଙ୍ଗ୍‌ ଇର୍‌ଆନ୍‌, “ପରିକାଦୁ ଏଣ୍ତେସ୍‌ ଆର୍‌ଇଦେର୍‌, ଆୟାଉଣ୍ତିଙ୍ଗ୍‌ ପାର୍‌ତନା କିଦୁ ।”
LUK 22:41 ମାରି, ୱାନ୍‌ ୱାରିମାଣ୍‌କୁ କାଣ୍ତେକ୍‍ ଆକ ସୋର୍‌ଆନ୍‌ନୋ ମେଣ୍ତେଙ୍ଗ୍‌ ଗୋଟ୍‌ କିଜି ପାର୍‌ତନା କିଦେଙ୍ଗ୍‌ ଆସ୍‌ତାନ୍‌ ।
LUK 22:42 ଏ ବୁବା, ଜଦି ନି ବଦା ମାନାତ୍‌, ଆୟା ଦୁଃକ୍‍ ନି କାସ୍ଟୁଦି ସାଟି ଆକ କିଆ; ଆରିଙ୍ଗ୍‌ ନା ବଦା ସିଲେ, ମାତର୍‌ ନି ବଦା ସତ୍‌ ଆପିତ୍‌ ।
LUK 22:43 ମାରି, ମୁସ୍‌କୁପୁର୍‌ତାନ୍‌ ଅରେନ୍‍ ଦୁତ୍‍ ଦର୍ସନ୍‍ ସିଜି ୱାନିଙ୍ଗ୍‌ ସାକ୍ତି ସିତାତ୍‌ ।
LUK 22:44 ମାରି, ଜିସୁ ନାଣ୍ତ ଦୁଃକ୍‍ ଆଜି ଉଣ୍ତ୍ରି ମନ୍‍ତାନ୍‍ ପାର୍‌ତନା କିଦେଙ୍ଗ୍‌ ଅତାନ୍ ମାରି ୱାନି ରୁନୁ ନେତେର୍‌ ଟିପା ୱାଜା ବୁମିଦୁ ୱାଙ୍ଗିଁତାତ୍‍ ।
LUK 22:45 ମାରି, ୱାନ୍‌ ପାର୍‍ତନା କିନିମାଣାନ୍‍ ନିଙ୍ଗିଁଜି ସିସୁରି ଲାକ୍‌ତୁ ୱାଜି ୱାରିଙ୍ଗ୍‌ ଦୁଃକ୍‍ ଉଣ୍ତିଙ୍ଗ୍‌ ସୁଜ୍‍ନିକା ସୁଡ଼ୁତାନ୍‌;
LUK 22:46 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, “ଏନ୍ଦା ସୁଜ୍‍ଜିନିଦେର୍‌ ? ପରିକାଦୁ ଏଣ୍ତେସ୍‌ ଆର୍‌ଇଦେର୍‌, ଆୟା ଉଣ୍ତିଙ୍ଗ୍‌ ନିଙ୍ଗ୍‍ଜ ପାର୍‌ତନା କିଦୁ ।”
LUK 22:47 ଜିସୁ ୱାର୍‍ଗିନିୱାଲେ, ସୁଡ଼ୁଦୁ, ଲୋକୁ ୱିଜେରେ ୱାଜି ଉଣ୍ତାତାର୍‌, ମାରି ବାରଲୋକ୍ ସିସୁରି ଲୋଇରାନ୍‌ ଜିହୁଦା ଦର୍‌ତି ଅରେନ୍‍ ୱାରି ଆଗ୍‌ଡ଼ି ଆଗ୍‌ଡ଼ି ୱାଜି ଜିସୁଙ୍ଗୁଁ ନଣ୍ତ୍‍ଦେଙ୍ଗ୍‍ ଇଜି ୱାନି ଲାକ୍‌ତୁ ସର୍‌ଆନ୍‌ ।
LUK 22:48 ମାତର୍‌ ଜିସୁ ଜିହୁଦେଙ୍ଗ୍‍ ଇର୍‌ଆନ୍‌, “ଏ ଜିହୁଦା, ମନୁସ୍ୟପୁତ୍ରଦିଙ୍ଗ୍‍ ନଣ୍ତ୍‍ଜି ନୋ ସାତ୍ରୁରି କିୟୁଦୁ ସର୍‌ପେ କିଜି ସିଜିନି ?”
LUK 22:49 ଇବେଟ୍‍ ଇନିକା ଆନାତ୍‌, ଆକା ସୁଡ଼୍‌ଜି ୱାନି ତଡ଼୍‍କୁ ଇର୍ହାର୍‌, “ପ୍ରବୁ, ମାପ୍‌ ଇନିକା କାଣ୍ତାଦାନ୍‍ କାତ୍‍ନାପ୍‍ ?”
LUK 22:50 ମାରି, ୱାରି ଲୋଇ ଅରେନ୍‍ ୱିଜେରିଙ୍ଗ୍‌ପେରି ଜାଜକ୍‍ତିମାନୁ ପାଣିକିନି ଗତିମୁରୁଲିଦି ଉଣେରି ଗିତଣି କୟାତା ପୋକ୍‌ତାନ୍‌ ।
LUK 22:51 ମାତର୍‌ ଜିସୁ ଇର୍‌ଆନ୍‌, “ନିସନେ ଆନାତ୍‍ଲେ; ମାରି, ୱାନ୍‌ ୱାନି ଗିତଣି ମୁଟ୍‍ସି ୱାନିଙ୍ଗ୍‌ ନେଗେଣ୍ତ୍‍ କିତାନ୍‍ ।”
LUK 22:52 ମାରି, ଜିସୁ ୱାନି ବିରଦ୍‌ତାନ୍‌ ୱାତି ମାର୍‍ଇ ପେରି ଜାଜକ, ମନ୍ଦିର୍‌ତି ପେରି ପେରିକାର୍‌ ମାରି ପେରି ଡକ୍ରାରିଙ୍ଗ୍‍ ଇର୍‌ଆନ୍‌, “ଡଙ୍ଗାଁର୍‍ଏନ୍‍ ବିରଦ୍‌ତାନ୍‌ ସନିୱାନିୱାଜା କାଣ୍ତା ନି ଡୁଡୁ ଆସ୍‌ସି ମିର୍‌ ଇନିକା ସତିୱାତିଦେର୍‍ ?
LUK 22:53 ନାନ୍ ଦିନାମି ମିୱାଲେ ମନ୍ଦିର୍‌ତୁ ମାନିୱାଲେ ମିର୍‌ ନା ବିରଦ୍‌ତାନ୍‌ କିୟୁ ପେର୍‍ଇତିଦେର୍‍, ମାତର୍‌ ଇକା ମି ସମୟ ମାରି ସିକାଟିଦି ସାସନ୍‍ ।”
LUK 22:54 ୱେନ୍‌କା ୱାର୍‌ ଜିସୁଙ୍ଗୁଁ ଆସ୍‌ସି ଅସି ୱିଜେରିଙ୍ଗ୍‌ପେରି ଜାଜକରି ଇଲ୍‌ତୁ ତାତାର୍‌; ମାତର୍‌ ପିତର୍‌ ଆକ ତେବାଜି ୱେନ୍‌କା ୱେନ୍‌କା ସର୍‌ଆନ୍‌ ।
LUK 22:55 ମାରି, ୱାର୍‌ ଦୁଆର୍‌ତି ନାଡ଼୍‍ମି ସିସୁ କାସିସ୍‍କିଜି ଉଣ୍ତ୍ରେମାନୁ ବାସ୍‌ତାର୍‌, ପିତର୍‌ ୱାରିମାନୁ ବାସ୍‍ତା ମାର୍‌ଆନ୍‌ ।
LUK 22:56 ଅରେତ୍‌ ପାଣି କିନି ଆଇମା ପିତର୍‍ତିଙ୍ଗ୍‍ ସିସୁ ଲାକ୍‌ତୁ ବାସ୍‍ତିମାର୍‍ଇକା ସୁଡ଼ୁଜି ଇର୍ହାତ୍‌, “ଇକାନ୍‌ ବା ଜିସୁୱାଲେ ମାର୍‌ଆନ୍‌ ।”
LUK 22:57 ମାତର୍‌ ପିତର୍‌ ଇୟା ମାଟାଦିଙ୍ଗ୍‌ ସିଲେଇଜି ଇର୍‌ଆନ୍‌, “ଏ ଆଇମା, ନାନ୍ ୱାନିଙ୍ଗ୍‌ ନେସେଏ ।”
LUK 22:58 ଏସୋ ସମୟ ୱେନ୍‌କା ମାରି ଅରେନ୍‍ ୱାନିଙ୍ଗ୍‌ ସୁଡ଼ୁଜି ଇର୍‌ଆନ୍‌, “ନିନ୍‌ ବା ଜିସୁୱାଲେ ମାର୍‍ଇ ଲୋକା ଲୋଇ ଅରେନ୍‍ ।” ମାତର୍‌ ପିତର୍‌ ଇର୍‌ଆନ୍‌, “ସିଲେ, ତଡ଼ାନ୍‍, ନାନ୍ ନେସେଏ ।”
LUK 22:59 ମାରି ଗଣ୍ଟା ୱେନ୍‌କା ମାରି ଅରେନ୍‍ ପୁରା ନେସ୍‌ସି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, “ଇକାନ୍‌ ବା ସତେନେ ୱାନିୱାଲେ ମାର୍‌ଆନ୍‌, ଇରିଙ୍ଗ୍‌ ୱାନ୍‌ ତୋ ଗାଲିଲିଦି ଲୋକୁ ।”
LUK 22:60 ମାତର୍‌ ପିତର୍‌ ଇର୍‌ଆନ୍‌, “ତଡ଼ାନ୍‍, ନିନ୍‌ ଆମାକା ଇଜିନି, ନାନ୍ ଆକା ନେସେଏ ।” ଆୟାଦାପ୍ରେ ୱାନ୍‌ ମାଟା ଇନ୍‍ବୁ ଇନ୍‍ବୁ କରୁ କେଡ଼ିତାତ୍‍ ।
LUK 22:61 ମାରି ପ୍ରବୁ ଡ଼େସି ମାର୍‍ଜି ପିତର୍‍ତିଙ୍ଗ୍‍ ସୁଡ଼ୁତାନ୍‌; “ଆବେଟ୍‌ ନେର୍‌ କର୍‌ରୁ କେଡ଼ିନି ଆଗ୍‍ଡ଼ିନେ ନିନ୍‌ ନାଙ୍ଗିଁ ମୁଜା ନେସେଏ ଇଜି ଇନି, ଇୟା ଆମା ମାଟା ପ୍ରବୁ ପିତର୍‍ତିଙ୍ଗ୍‍ ଇର୍‌ଆମାର୍‌ଆନ୍‌,”
LUK 22:62 ଆକା ପିତର୍‌ ୱାନି ମୋନ୍‌ତୁ ଏତ୍‌କିତାନ୍‌, ମାରି ୱାନ୍‌ ଆତ୍‌ରେ ସଲ୍‌ସି ନାଣ୍ତ ଦୁଃକ୍‌ତାନ୍‍ ଆଡ଼୍‍ବାତାନ୍‍ ।
LUK 22:63 ମାରି, ଏମେ ଲୋକ୍‌ ଜିସୁଙ୍ଗୁଁ ଆସ୍‌ତା ଇଟ୍‍ତାମାର୍‍ଆର୍‍, ୱାର୍‌ ୱାନିଙ୍ଗ୍‌ ଡାକ୍‍ସି ଡାକ୍‍ସି ସେମାର୍‍ କିତାର୍‌,
LUK 22:64 ମାରି ୱାନି ମୋକମି ପାଗା କେର୍‍ପ୍‍ସି ୱାନିଙ୍ଗ୍‌ ୱେନ୍‌ବାତାର୍‌, ନିନ୍‌ ପରା ବାବବାଦି ! ଇନ୍‌ଆଁ ତୋ, ଏନ୍‌ ନିଙ୍ଗିଁ ଡାକ୍‍ତାର୍‍ ?
LUK 22:65 ମାରି, ୱାର୍‌ ନାଣ୍ତ ମାଟେଙ୍ଗ୍‌ ୱାନି ବିରଦ୍‌ତାନ୍‌ ଇଜି ୱାନିଙ୍ଗ୍‌ ନିନ୍ଦା କିଦେଙ୍ଗ୍‌ ଆସ୍‌ତାର୍‌ ।
LUK 22:66 ସାଲ୍‍ଦି ଆତିଦାପ୍ରେ ଲୋକା ପେରିଡକ୍‍ରାର୍‍, ମାରି ପେରି ଜାଜକର୍‌ ମାରି ସାସ୍ତ୍ରିର୍‍ ଉଣ୍ତାଜି ତାମେ ପେରି ଲୋକାମିଟିଙ୍ଗ୍‍ତୁ ଜିସୁଙ୍ଗୁଁ ଅସି ଇର୍ହାର୍‌, “ନିନ୍‌ ଜଦି କ୍ରିସ୍ତ, ଆରିଙ୍ଗ୍‌ ମାଙ୍ଗିଁ ଇନ୍‌ଆଁ ।”
LUK 22:67 ୱାର୍‍ ଇର୍ହାର୍‌, “ମାଙ୍ଗିଁ ଇନ୍‍ଆଁ, ନିନୁ ଇନିକା ମସିହ ?” ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ନାନ୍ ଜଦି ମିଙ୍ଗିଁ ଇନା, ମିର୍‌ ତୋ ବିସ୍‌ବାସ୍‌ କିଇଦେର୍‍;
LUK 22:68 ମାରି, ନାନ୍ ଜଦି ପ୍ରସ୍ନ ୱେନ୍‍ବାନା, ମିର୍‌ ୱେର୍‌ଇଦେର୍‌ ।
LUK 22:69 ମାତର୍‌ ଇଲେଇରାନ୍‌ ମନୁସ୍ୟପୁତ୍ର ପେରି ସାକ୍ତିଦି ମାପୁରୁଦି ରାଜାଗାଦିଦି ଉଣେରି ତରିନ୍‌ ବାସ୍‍ନାନ୍‍ ।”
LUK 22:70 ଆବେଟ୍‌ ୱିଜେରେ ୱେନ୍‌ବାତାର୍‌, “ଆରିଙ୍ଗ୍‌ ନିନ୍‌ ଇନିକା ମାପୁରୁଦି ମାରିନ୍‌ ?” ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାନ୍ ଆକାନେ ଇଜି ମିର୍‌ ଇଜିନିଦେର୍‌ ।”
LUK 22:71 ଆବେଟ୍‌ ୱାର୍‌ ଇର୍ହାର୍‌, “ଆରିଙ୍ଗ୍‌ ମାଙ୍ଗିଁ ସାକି ମାରି ଏନ୍ଦା ଦରକାର୍‍ ? ମାଡ୍‌ ତୋ ନିଜେନିଜେ ୱାନି ନିଜେଦି ୱେୟୁଦାନ୍‌ ୱେରିକା ।”
LUK 23:1 ୱେନ୍‌କା କୁଟୁମ୍‍ତି ୱିଜେରେ ଲୋକୁ ନିଙ୍ଗିଁତାରୋ ପିଲାତ୍‌ ରାଜାମାନୁ ଜିସୁଙ୍ଗୁଁ ଅତାର୍‍ ।
LUK 23:2 ମାରି, ୱାର୍‌ ୱାନି ବିରଦ୍‌ତାନ୍‌ ଦୋସ୍‍ କିଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ମାପ୍‌ ସୁଡ଼ୁତାପ୍‌, ଇକାନ୍‌ ମା ଲୋକାଙ୍ଗ୍‍ ରାଜାଦି ବିରଦ୍‌ କିବିସ୍‍କିଜିନାନ୍‍ ମାରି କାଇସର୍‍ ରାଜେଙ୍ଗ୍‍ ସିସ୍‍ଟୁ ସିଦେଙ୍ଗ୍‍ ତେବା କିଜିନାନ୍‍ ମାରି ନିଜେଦିଙ୍ଗ୍‍ କ୍ରିସ୍ତ ରାଜା ଇଜିନାନ୍‌ ।”
LUK 23:3 ଆବେଟ୍‌ ପିଲାତ୍‌ରାଜା ୱାନିଙ୍ଗ୍‌ ୱେନ୍‍ବାତାନ୍‌, “ନିନ୍‌ ନୋ ଜିହୁଦି ଲୋକ୍‌ତି ରାଜା ?” ୱାନ୍‌ ୱାନିଙ୍ଗ୍‌ ଇର୍‌ଆନ୍‌, ନିନ୍‌ ଇଜିନି ।
LUK 23:4 ଆବେଟ୍‌ ପିଲାତ୍‌ ରାଜା ପେରି ଜାଜକରିଙ୍ଗ୍‍ ମାରି ଲୋକାଙ୍ଗ୍‌ ଇର୍‌ଆନ୍‌, “ନାନ୍ ଇୟାୱାନିମାନୁ ଇନି ଦୋସ୍‍ ପୟ୍‌ଏଜିନା ।”
LUK 23:5 ମାତର୍‌ ୱାର୍‌ ମାରି ନାଣ୍ତଦାନ୍‌ ନାଣ୍ତ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ଇକାନ୍‌ ୱିଜୁ ଜିହୁଦା ଦେସ୍‍ତୁ ସିକିୟା ସିଜି ଗାଲିଲିଦାନ୍‍ ଆରାମ୍‌ କିଜି ଇବେବା ଲୋକାଙ୍ଗ୍‌ ବାୟା କିଜିନାନ୍‍ ।”
LUK 23:6 ମାତର୍‌ ପିଲାତ୍‌ ରାଜା ଇକା ୱେନ୍‌ଜି ୱେନ୍‌ବାତାନ୍‌, “ଇୟା ଲୋକୁ ଇନିକା ଅରେନ୍‍ ଗାଲିଲିଦିକାନ୍‍ ?”
LUK 23:7 ମାରି, ୱାନ୍‌ ଜେ ହେରୋଦ୍‍ ରାଜାଦି ଅଦିକାର୍‌ତାନ୍‌ ମାନାନ୍‌, ଇକା ନେସ୍‌ସି ୱାନ୍‌ ଜିସୁଙ୍ଗୁଁ ହେରୋଦ୍ ଲାକ୍‌ତୁ ପୋକ୍‌ତାନ୍‌, ୱାନ୍‌ ବା ଆୟାୱାଲେ ଜିରୁସାଲାମ୍‍ତୁ ମାର୍‌ଆନ୍‌ ।
LUK 23:8 ହେରୋଦ ରାଜା ଜିସୁଙ୍ଗୁଁ ସୁଡ଼ୁଜି ନାଣ୍ତ ୱେଡ଼ିକା ଆତାନ୍‌, ଇରିଙ୍ଗ୍‌ ୱାନ୍‌ ଜିସୁଦି ବିସୟ୍‌ତାନ୍‌ ୱେର୍‍ଆମାର୍‍ଆନ୍‍ ଆକା ୱାନିଙ୍ଗ୍‌ ଏସୋ କାଡ଼ାଦାନ୍‍ ସୁଡ଼୍‍ଦେଙ୍ଗ୍‍ ବଦାକିଜିମାର୍‍ଆନ୍‍, ମାରି ଜିସୁ ମାଣାନ୍‌ ଉଣ୍ତ୍ରି କାବାଆନି ପାଣି ସୁଡ଼ୁଦେଙ୍ଗ୍‍ ଆସାକିଜିମାର୍‍ଆନ୍‍ ।
LUK 23:9 ଆଦେଙ୍ଗ୍‌ ହେରୋଦ ରାଜା ଜିସୁଙ୍ଗୁଁ ଏସୋ ମାଟେଙ୍ଗ୍‌ ୱେନ୍‍ବାଦେଙ୍ଗ୍‍ ଆସ୍‌ତାନ୍‌, ମାତର୍‌ ୱାନ୍‌ ୱାନିଙ୍ଗ୍‌ ଉଣ୍ତ୍ରି ମାଟା ବା ଇନ୍‌ଏତାନ୍‌ ।
LUK 23:10 ମାରି, ପେରି ଜାଜକର୍‌ ମାରି ସାସ୍ତ୍ରିର୍‍ ନିର୍‌ଆରୋ ୱାନି ବିରଦ୍‌ତାନ୍‌ ଦୋସ୍‍ କିଦେଙ୍ଗ୍‌ ଆସ୍‌ତାର୍‌ ।
LUK 23:11 ମାରି, ହେରୋଦ ନିଜେଦି ସୈନ୍ୟରି ୱାଲେ ୱାନିଙ୍ଗ୍‌ ସେମାର୍‌ କିଜି ସେମାର୍‌ କିନି ରାଜାରି ଆଙ୍ଗିଁ ଆରିସ୍‌ କିତାର୍‌ରୋ ପିଲାତ୍‌ଦି ଲାକ୍‌ତୁ ମାରିଡ଼େସି ପୋକ୍‌ତାର୍‌ ।
LUK 23:12 ଆୟା ନାଣ୍ତିଙ୍ଗ୍‌ ହେରୋଦ ମାରି ପିଲାତ୍‌ ମିସାବିଡ଼ାଜି ସଙ୍ଗ୍‍ ଆତାର୍‌; ଆଗିଡ଼ି ୱାର୍‌ ନିଜେ ନିଜେଦି ମାନୁ ସାତ୍ରୁରୁ ମାର୍‌ଆର୍‌ ।
LUK 23:13 ତାନେୱେନ୍‌କା ପିଲାତ୍‌ ପେରି ଜାଜକରିଙ୍ଗ୍‌, ପେରି ୱାରିଙ୍ଗ୍‌ ମାରି ୱିଜୁ ଲୋକାଙ୍ଗ୍‌ ଉଣ୍ତ୍ରେ ମାନୁ କୁକ୍‌ସି ୱାନ୍‌ ୱାରିଙ୍ଗ୍‌ ଇର୍‌ଆନ୍‌,
LUK 23:14 “ଇୟା ଲୋକାଙ୍ଗ୍‌ ସେଇପାଣି କିବିସ୍‍କିଜିନାନ୍‍ ଇଜି ମିର୍‌ ୱେନିଙ୍ଗ୍‌ ମା ଲାକ୍‌ତୁ ତାତିମାନିଦେର୍‌; ମାରି ସୁଡ଼ୁଦୁ, ମାପ୍‌ ମି ଆଗିଡ଼ିନେ ୱେନିଙ୍ଗ୍‌ ୱେନ୍‍ବାତାମାନା, ୱାନି ବିରଦ୍‌ତାନ୍‌ ମିର୍‌ ଆମାକାୱିଜୁ ଇଜିନିଦେର୍‌, ଆୟାୱାଜା ଇନି ସେଇପାଣି ୱେନିମାନୁ ପୟ୍‍ଏ ।
LUK 23:15 ହେରୋଦ ବା ୱାନି ସେଇପାଣି ପୟ୍‍ଏ, ମାତର୍‌ ହେରୋଦ ଜିସୁଙ୍ଗୁଁ ମା ଲାକ୍‌ତୁ ମାରି ପୋକ୍‌ତାତାନ୍‌; ମାରି ସୁଡ଼ୁଦୁ, ଇୟା ଲୋକ୍‌ ସାନିଦଣ୍ତ୍‌ ଜଗ୍‌ ଇନି ପାଣିବା କିଏନ୍‌;
LUK 23:16 ମାରି ମାପ୍‌ ୱେନିଙ୍ଗ୍‌ ସାସ୍ତି ସିତିୱେନ୍‌କାନେ ଡ଼ିସ୍‌ନାପ୍‌ ।
LUK 23:17 ପଣ୍ତ୍‌ୟତି ସମୟତୁ ୱାରି ଉଣ୍ତିଙ୍ଗ୍‌ ୱାନିଙ୍ଗ୍‌ ଅରେନ୍‍ ଜଇଲ୍‌ତୁ ମାନି ୱାନିଙ୍ଗ୍‌ ଡ଼ିସିସ୍‍ କିଦେଙ୍ଗ୍‌ ଆଜିମାର୍ହାତ୍‍ ।”
LUK 23:18 ମାତର୍‌ ୱାର୍‌ ୱିଜେରେ ଅର୍‌ସେ ଆଉଲି ଆଜି ଇର୍ହାର୍‌, “ୱେନିଙ୍ଗ୍‌ ସାୟାମାରାଗ୍‌ ଡାକ୍‌ତୁ, ମା ଉଣ୍ତିଙ୍ଗ୍‌ ବାରବ୍ବାଦିଙ୍ଗ୍‌ ଡ଼ିସ୍‌ତୁ ।”
LUK 23:19 ଇୟା ବାରବ୍ବା ଗାଡ଼୍‌ତୁ ଗଟାତିମାନି ଜୁଦ୍‍ ଆରାମ୍‌ କିତିମାନି ଉଣ୍ତିଙ୍ଗ୍‌ ମାରି ଏସ ଲୋକାଙ୍ଗ୍‌ ସାୟାମାର୍‌ଗା ଡାକ୍‌ତିମାନି ଉଣ୍ତିଙ୍ଗ୍‌ ଜଇଲ୍‌ତୁ ତେବାତା ମାର୍‌ଆନ୍‌ ।
LUK 23:20 ମାତର୍‌ ପିଲାତ୍‌ ଜିସୁଙ୍ଗୁଁ ଡ଼ିସ୍‌ସି କିଦେଙ୍ଗ୍‌ ବଦାକିତାନ୍‌ନୋ ୱାରିଙ୍ଗ୍‌ ମାରିଡ଼େସି ବୁଜାକିତାନ୍‌ ।
LUK 23:21 ଇରିଙ୍ଗ୍‌ ୱାର୍‌ ନାଣ୍ଡ୍ ଆଉଲି ଆଜି ଇଣ୍ତ୍ରେଙ୍ଗ୍‌ ଆସ୍‌ତାର୍‌, “ୱାନିଙ୍ଗ୍‌ କ୍ରୁସକାଟ୍‌ତୁ ଏକିସ୍‌କିଦୁ, କ୍ରୁସକାଟ୍‌ତୁ ଏକିସ୍‌କିଦୁ ।”
LUK 23:22 ମାରି, ପିଲାତ୍‌ ୱାରିଙ୍ଗ୍‌ ମୁଣ୍ତ୍ରି ଦେବେଙ୍ଗ୍‌ ଇର୍‌ଆନ୍‌, “ଏନ୍ଧା, ୱାନ୍‌ ଇନିକା ଦସ୍‌ କିତାମାନାନ୍‌ ? ମାପ୍‌ ୱାନିମାନୁ ସାନିଦଣ୍ତ୍‌ତି ଇନି ଦସ୍‍ବା ପୟ୍‍ଏପ୍‍; ମାରି, ମାଡ୍‌ ୱାନିଙ୍ଗ୍‌ ସାସ୍ତି ସିନାଡ ଡ଼ିସ୍‌ନାଟ୍‌ ।”
LUK 23:23 ମାତର୍‌ ୱାନ୍‌ କ୍ରୁସକାଟ୍‌ତୁ ଏକିସ୍‌କିଦୁ ଇଜି ଦାବି କିଜି ୱାର୍‌ ପେରି ୱେୟୁଦାନ୍‌ ଜିଦ୍‌ କିଦେଙ୍ଗ୍‌ ଆସ୍‌ତାର୍‌, ମାରି ୱାରି ଆଉଲିଦାନ୍‌ ପୁରା ଆତାତ୍‌ ।
LUK 23:24 ମାରି, ୱାରି ଦାବି କିତି ଇସାବ୍‌ତାନ୍‌ ଆପିତ୍‌ ଇଜି ପିଲାତ୍‌ ଆଦେସ୍‌ ସିତାନ୍‌ ।
LUK 23:25 ମାତର୍‌ ଜୁଦ୍‍ ମାରି ଲୋକାଙ୍ଗ୍‌ ସାୟାମାର୍‌ଗା ଡାକ୍‌ତି ଉଣ୍ତିଙ୍ଗ୍‌ ଜଇଲ୍‌ତୁ ଇଟ୍‌ତିମାନି ଏମେ ଲୋକ୍‌ତି ଉଣ୍ତିଙ୍ଗ୍‌ ୱାର୍‌ ଦାବି କିତାମାଆର୍‌, ଆୟା ବାରବ୍ବାବେଙ୍ଗ୍‌ ପିଲାତ୍‌ ଡ଼ିସ୍‌ତାନ୍‌, ମାରି ପିଲାତ୍‌ ଜିସୁଙ୍ଗୁଁ ସାୟାମାର୍‌ଗା ଡାକ୍‌ତେଙ୍ଗ୍‍ଁ ଇଜି ଲୋକା ବଦାଦାନ୍ କିୟୁଦୁ ସର୍‍ପେ କିତା ସିତାନ୍‌ ।
LUK 23:26 ସନ୍ୟର୍‌ ଜିସୁଙ୍ଗୁଁ ଆସ୍‌ତାରୋ ସନିୱାଲେ ଇସ୍ରି ନାର୍‌ତାନ୍‌ ଗାଡ଼୍‌ତୁ ୱାଜିମାନି ସିମୋନ ଦର୍‌ତି ଅରେନ୍‍ କୁରିଣି ଗାଡ଼୍‌ତି ଲୋକ୍‌ତିଙ୍ଗ୍‌ ଆସ୍‌ତାର୍‌ରୋ ଜିସୁଦି ୱେନ୍‌କା ୱେନ୍‌କା କ୍ରୁସକାଟ୍‌ ପିଡିଦେଙ୍ଗ୍‌ ଇଜି ସିମୋନତି ମେପିଦୁ ଆକା ଇଟ୍‌ତାର୍‌ ।
LUK 23:27 ମାରି, ଲୋକାଙ୍ଗ୍‌ ମାରି ୱାନି ଉଣ୍ତିଙ୍ଗ୍‌ ଦୁଃକ୍‌ କିଜି ବକାଦୁ କତାଜି ଆଡ଼୍‍ବାଜି ମାନି ଆଇମେକ୍‍ ନାଣ୍ତ ଲୋକୁ ଜିସୁ ୱେନ୍‌କା ୱେନ୍‌କା ସୋଲ୍‌ସିମାର୍‌ଏ ।
LUK 23:28 ମାତର୍‌ ଜିସୁ ଆଇମେକା ତରିଣ୍ତ୍‌ ମାର୍‌ଜିବେସତାନ୍‌ନୋ ଇର୍‌ଆନ୍‌, “ଏ ଜିରୁସାଲମତି ଆଇମେକ୍‍, ନା ଉଣ୍ତିଙ୍ଗ୍‌ ଆଡ଼୍‌ବାମାଟ୍‌, ମାରି ମିର୍‌ ନିଜେ ନିଜେଦି ଉଣ୍ତିଙ୍ଗ୍‌ ମାରି ନିଜେ ନିଜେଦି କଡ଼ରିଙ୍ଗ୍‌ ଉଣ୍ତିଙ୍ଗ୍‌ ଆଡ଼୍‌ବାଦୁ;
LUK 23:29 ମାତର୍‌ ସୁଡ଼ୁଦୁ, ଏମେ ଆଇମେକ୍‍ ବାଞ୍ଜି, ମାରି ଏମେ ଆଇମେକ୍‍ ଏସ୍‌କାଙ୍ଗ୍‌ବା ପୋଟାଦୁ ଆଉ ମାରି ପାଲ୍‍ ଉଟ୍‌ଉ, ୱାନିକାଙ୍ଗ୍‌ ଲୋକୁ ଏସ୍ତିୱାଲେ ଦନ୍ୟ ଦନ୍ୟ ଇଜି ଇନାର୍‌, ଇୟାୱାଜା ସମୟ ୱାଜିନାତ୍‍ ।
LUK 23:30 ନାସ୍ତିୱାଲେ ଲୋକୁ ଗରକାଙ୍ଗ୍‌ ଇଣ୍ତ୍ରେଙ୍ଗ୍‌ ଆସ୍‌ନାର୍‌, ମା ମୁସ୍‌କୁ ଆର୍‌ଆ, ମାରି ଇସ୍ରିଗରକାଙ୍ଗ୍‌ ଇଣ୍ତ୍ରେଙ୍ଗ୍‌ ଆସ୍‌ନାର୍‌, ମାଙ୍ଗିଁ ପିଡ଼ିକ୍‌ଆ ।
LUK 23:31 ମାତର୍‌ ଲୋକୁ ଜଦି ଜିବନ୍‌ମାନି ମାରାନ୍‌ ଉଣ୍ତିଙ୍ଗ୍‌ ଇକା କିନାର୍‌, ଆଦେଙ୍ଗ୍‌ ୱାର୍‌ତି ମାରାନ୍‌ ଉଣ୍ତିଙ୍ଗ୍‌ ଇନିକା ଗଟେଆଏତ୍‌ ?”
LUK 23:32 ମାରି, ଜିସୁଦି ୱାଲେ ସାନିଦଣ୍ତ୍‌ ସିଦେଙ୍ଗ୍‍ ଇଜି ମାରି ରିଏର୍‌ ଡଙ୍ଗାଁରିଙ୍ଗ୍‌ ବା ୱାନି ୱାଲେ ଅସିମାର୍ହାର୍‍ ।
LUK 23:33 ମାରି, ୱାର୍‌ କାପାଲ୍‌ ନାନି ଦର୍‌ତି ବାଡିଦୁ ଇତାର୍‌ରୋ ଆବେନୁ ସୈନ୍ୟର୍‌ ଜିସୁଙ୍ଗୁଁ କ୍ରୁସକାଟ୍‌ତୁ ଏକିସ୍‌କିତାର୍‌, ମାରି ଡଙ୍ଗାଁରିଙ୍ଗ୍‌ ରିଏରି ମାଣ୍‌କୁ ଅରେନ୍‍ ୱାନିଙ୍ଗ୍‌ ଉଣିକିୟୁ ତରିନ୍‌ ମାରି ଆଇୱାନିଙ୍ଗ୍‍ ଡେବିରି କିୟୁ ତରିନ୍‌ କ୍ରୁସକାଟ୍‌ତୁ ଏକିସ୍‌କିତାର୍‌ ।
LUK 23:34 ନାସ୍ତିୱାଲେ ଜିସୁ ଇର୍ହାନ୍‌, “ଏ ବୁବା, ୱେରିଙ୍ଗ୍‌ କେମା କିଆ, ଇରିଙ୍ଗ୍‌ ଇକାର୍‌ ଇନିକା କିଜିନାର୍‌, ଆକା ୱାର୍‌ ନେସ୍‌ଏର୍‌ ।” ମାରି, ୱାର୍‌ ୱାନି ଆଙ୍ଗିଁୱିଜୁ ବାଗ୍ କିନି ଉଣ୍ତିଙ୍ଗ୍‌ କୁଡ଼ୁକୁଡି କିତାର୍‌ ।
LUK 23:35 ମାରି, ଲୋକୁ ନିର୍‌ଆର୍‌ରୋ ଜିସୁଙ୍ଗୁଁ ସୁଡ଼୍‌ଜି ମାର୍ହାର୍‌ । ମାରି, ଜିହୁଦି ନେତାର୍‌ ବା ୱାନିଙ୍ଗ୍‌ ସେମାର୍‌ କିଜି ଇଣ୍ତ୍ରେଙ୍ଗ୍‌ ଆସ୍‌ତାର୍‌, ୱାନ୍‌ ଆଇୱାରିଙ୍ଗ୍‌ ରକିୟା କିତାନ୍‌, ୱାନ୍‌ ଜଦି ମାପୁରୁଙ୍ଗୁଁ ବାସେକିତି କ୍ରିସ୍ତ, ସିଲିତିଙ୍ଗ୍‌ ନିଜେଦିଙ୍ଗ୍‌ ରକିୟା କିପିନ୍‌ ।
LUK 23:36 ମାରି, ସୈନ୍ୟର୍‌ ବା ଜିସୁ ଲାକ୍‌ତୁ ୱାଜି ସୋଇନିରସ ଜାସେ କିଜି ୱାନିଙ୍ଗ୍‌ ସେମାର୍‌ କିଜି ଇର୍ହାର୍‌,
LUK 23:37 ନିନ୍‌ ଜଦି ଜିହୁଦିର୍‌ ରାଜା, “ଆଦେଙ୍ଗ୍‌ ନିଜେଦିଙ୍ଗ୍‌ ରକିୟା କିଆ ।”
LUK 23:38 ମାରି, ୱାନି ମୁସ୍‌କୁ ଇୟାୱାଜା ରାସ୍‌ତିକା ବା ମାର୍ହାତ୍‌, “ଇକାନ୍‌ ଜିହୁଦିର୍‌ ରାଜା ।”
LUK 23:39 ମାରି, କ୍ରୁସକାଟ୍‌ତୁ ଏକିସ୍‌କିତିମାନି ଡଙ୍ଗାଁରି ମାଣ୍‌କୁ ଅରେନ୍‍ ଜିସୁଙ୍ଗୁଁ ନିଦା କିଜି ଇଣ୍ତ୍ରେଙ୍ଗ୍‌ ଆସ୍‌ତାନ୍‌, “ନିନ୍‌ ଇନିକା କ୍ରିସ୍ତ ଆଇନୋ ? ନିଜେଦିଙ୍ଗ୍‌ ନି ମାଙ୍ଗିଁ ରକିୟା କିଆ ।”
LUK 23:40 ମାତର୍‌ ମାରି ଅରେନ୍‌ ୱାନିଙ୍ଗ୍‌ ଆଦ୍‌ରିସ୍‌ କିଜି ଇର୍ହାନ୍‌, “ନିନ୍‌ ସାମାନ୍‍ ଦଣ୍ତ୍‌ ତୋ ପଇଜିନି, ନିନ୍‌ ମାପୁରୁଙ୍ଗୁଁ ଇନିକା ତିଲାଇଜିନି ନୋ ?
LUK 23:41 ମାରି, ମାଡ୍‌ ଗିଦେ ନିୟ୍ୟାଇସାବତାନ୍‌ ଦଣ୍ଡ୍‌ ବୋଗାଜିନିକା, ଇରିଙ୍ଗ୍‌ ମାଡ୍‌ ନିଜେ ନିଜେଦି କାର୍ମୁଦି ଦସ୍‍ ପଲ୍‌ ପୋଇଜିନିକା, ମାତର୍‌ ଇୟା ଲୋକୁ ଇନି ଦୋସ୍‍ବା କିଏନ୍‌ ।”
LUK 23:42 ତାନେୱେନ୍‌କା ଆୟା ଡଙ୍ଗାଁରେଏନ୍‌ ଜିସୁଙ୍ଗୁଁ ଇର୍ହାନ୍‌, “ଏ ଜିସୁ ନିନ୍‌ ନିଜେଦି ରାଜିଦୁ ସୋର୍‌ରିଙ୍ଗ୍‌ ନାଙ୍ଗିଁ ଏତ୍‌ କିଆ ।”
LUK 23:43 ଆବେଟ୍‌ ଜିସୁ ୱାନିଙ୍ଗ୍‌ ଇର୍ହାନ୍‌, “ନାନ୍ ନିଙ୍ଗିଁ ସତ୍‌ ୱେର୍‌ସିନା, ନେରୁ ନିନ୍‌ ନା ୱାଲେ ମୁସ୍‌କୁପୁର୍‌ ସନି ।”
LUK 23:44 ନାସ୍ତିୱାଲେ ପୁରା ବାର୍‌ ଗଣ୍ଟା ସମୟ ଆତାମାର୍ହାତ୍‌, ମାରି, ୱେଡ଼ାଦି ଜାୟ୍‌ ସିଲେଣ୍ତ ଆତାତ୍‌ଆକା ମୁନ୍‌ଡ୍ରି ଗଣ୍ଟା ସାନ୍ଧି ପୃତିବି ୱିଜୁ ସିକାଟି ଆତାସୋର୍ହାତ୍‌ ।
LUK 23:45 ମାରି ମନ୍ଦିର୍‌ତି ପବିତ୍ର ବାଡିଦିଙ୍ଗ୍‌ ଏର୍‌ପିସିମାନି ଦୁଙ୍ଗୁନି ପାର୍‌ଦା ମୁସ୍‌କୁରାନ୍‌ ଆଡ୍‍ଗି ସାନ୍ଦି କିଜ୍‍ଜି ରୁଣ୍ତି ମୋକେଙ୍ଗ୍‍ ଆତାତ୍‌ ।
LUK 23:46 ମାରି, ଜିସୁ ନାଣ୍ତ ଆଉଲି ଆଜି ଡ଼େସି ଇର୍ହାନ୍‌, “ଏ ବୁବା, ନି କିୟୁଦୁ ନାନ୍ ନିଜେଦି ଆତ୍ମା ସପ୍ରେ କିଜିନା ।” ଇକା ଇନ୍‌ଞ୍ଜି ୱାନ୍‌ ସାତା ସୋର୍ହାନ୍‌ ।
LUK 23:47 ସତସେନାପତି ଇୟା ଗଟ୍‌ନା ସୁଡ଼ୁଜି ମାପୁରୁଙ୍ଗୁଁ ଦନ୍ୟବାଦ୍‌ କିଜି ଇର୍ହାନ୍‌, “ପୁରା ଇୟା ଲୋକୁ ଦାର୍ମୁ ମାର୍ହାନ୍‌ ।”
LUK 23:48 ମାରି, ଏମେ ଲୋକୁୱିଜେର୍‌ ଇୟା ଗଟ୍‌ନା ସୁଡ଼ୁଦେଙ୍ଗ୍‍ ଉଣ୍ତ୍ରେମାନୁ ଆତାମାର୍ହାର୍‌, ୱାର୍‌ ୱିଜେରେ ଆୟାୱିଜୁ ଗଟ୍‌ନା ସୁଡ଼ୁଜି ନାଣ୍ତ ଦୁଃକ୍‌ କିଜି ନିଜେଦି ବକାଦୁ କତାଜି ଆଡ଼୍‍ବାଜି ଡେସି ସୋର୍ହାର୍‌ ।
LUK 23:49 ମାତର୍‌ ୱାନିଙ୍ଗ୍‌ ନେସ୍‌ତିକାର୍‌ ୱିଜେରେ ମାରି ଗାଲିଲିଦାନ୍‍ ଅର୍‌ସେ ୱାନି ୱେନ୍‌କା ୱେନ୍‌କା ୱାତିମାର୍‌ଇ ଆଇମେକ୍‍ ଆକରାନ୍‍ ନିରେଏନୋ ଇୟାୱିଜୁ ସୁଡ଼ୁଜିମାରେଏ ।
LUK 23:50 ମାରି ସୁଡ଼ୁଦୁ, ଜିହୁଦିରି ହାରାମାତିୟା ଗାଡ଼୍‌ତି ଜୋସେପ୍‌ ଦର୍‌ତିକାନ୍‌ ଅରେନ୍‍ ଲୋକୁ ପେରିଦଲ୍‌ତି ନେତା ମାର୍ହାନ୍‌, ୱାନ୍‌ ଅରେନ୍‍ ନେଗିକାନ୍‌ ମାରି ଦାର୍ମୁଦି ଲୋକୁ,
LUK 23:51 ମାରି ଜିହୁଦିରି ମାଟାଦିଙ୍ଗ୍‌ ନି ପାଣିଦିଙ୍ଗ୍‌ ମାନାଏତା ମାର୍ହାନ୍‌, ମାରି ହାରାମାତିୟା ନିଜେ ବା ମାପୁରୁଦି ରାଜିଦିଙ୍ଗ୍‌ କାପ୍‌କିଜି ମାର୍ହାନ୍‌ ।
LUK 23:52 ୱାଣ୍ତ୍ରୁ ପିଲାତ୍‌ଦି ଲାକ୍‌ତୁ ସୋର୍ହାନ୍‌ ନୋ ଜିସୁଦି ସାତି ମାଡ଼ା ଲସ୍‌ତାନ୍‌,
LUK 23:53 ମାରି ସାତିମାଡ଼ାଦିଙ୍ଗ୍‌ ରେପ୍‌ସିତାସି କାଣ୍ତେକ୍‌ ୱାତିଦାନ୍‌ ତେରେପ୍‌ତାନ୍‌ ନୋ, ଆବେନୁ ଏନ୍‌ ଏସ୍‌କାଙ୍ଗ୍‌ ଇଡ୍‌ଏର୍‌ ମାର୍ହାର୍‌, ଗରନ୍‌ତୁ କାରିତିମାର୍‌ଇ ଇୟାୱାଜା ଉଣ୍ତ୍ରି ଗୁଟାଦୁ ୱାନିଙ୍ଗ୍‌ ଇଟ୍‌ତାର୍‌ ।
LUK 23:54 ଆୟା ନାଣ୍ତିଙ୍ଗ୍‌ ତିଆର୍‌ଆନି ଦିନ୍‌ ମାର୍ହାତ୍‌, ମାରି ରମ୍‌ନିଦିନ୍‌ ଲାକ୍‌ତୁ ଆଜି ୱାଜି ମାର୍ହାତ୍‌ ।
LUK 23:55 ମାରି, ଗାଲିଲିଦାନ୍‍ ୱାନି ୱାଲେ ୱାତିମାର୍‌ଇ ଆଇମେକ୍‍ ୱେନ୍‌କା ୱେନ୍‌କା ସୋର୍‌ଏ ନୋ ମୁସ୍‌ତିକା ମାରି ୱାନି ମାଡ଼ାଦିଙ୍ଗ୍‍ ଏଣ୍ତେସ୍‌ ଇଟ୍‌ତାର୍‌, ଆକା ସୁଡ଼ୁତେ,
LUK 23:56 ମାରି ୱାକ୍‍ ଡେସିସୋର୍‌ଏନୋ ବାସ୍‌ନାଜିନିସ୍‍କୁ ମାରି ନିୟୁ ତିଆର୍‌ କିତେ । ୱାକ୍‍ ରମ୍‌ନିନାଣ୍ତିଙ୍ଗ୍‌ ରମିତେ, ଇରିଙ୍ଗ୍‌ ଇକା ନିୟ୍‍ମତୁ ମାର୍‌ଆତ୍‌ ।
LUK 24:1 ମାତର୍‌ ୱାରାଦି ଆଗିଡ଼ିରି ନାଣ୍ତିଙ୍ଗ୍‌ ଉଟ୍‌ଲା ନାଡ଼ାକାଦେ ୱାକ୍‍ ୱାନିକା ତିଆର୍‌କିତି ବାସ୍‌ନାଦିଜିନିସ୍‍କୁ ନି ନିୟୁ ଆସ୍‌ତେନୋ ମୁସ୍‌ତି ଲାକ୍‌ତୁ ସୋର୍‌ଏ ।
LUK 24:2 ମାରି, ୱାକ୍‍ ମୁସ୍‌ତିମାଣ୍‌କୁ କାଲୁ ପେଲେକିତି ମାର୍‌ଇକା ସୁଡ଼ୁତେ,
LUK 24:3 ମାତର୍‌ ଲୋଇ ସୋରେଏନୋ ପ୍ରବୁ ଜିସୁଦି ମାଡ଼ା ପୟ୍‌ଉତେ ।
LUK 24:4 ମାରି, ୱାକ୍‍ ଆୟା ବିସୟତାନ୍ ବାୟାବେମ୍ରି ୱାଜା ଆତେ, ଇୟାୱାଜା ସମୟତୁ ସୁଡ଼ୁଦୁ, ଜାୟ୍‌ତି ୱାତି ଆରାତିକେଙ୍ଗ୍‌ ରିଏର୍‌ ମୁସ୍‌କୁପୁର୍‌ତି ଦୁତ୍‌କୁ ୱାନିକା ଲାକ୍‌ତୁ ୱାତେ;
LUK 24:5 ଆବେଟ୍‌ ୱାକ୍‍ ତିଲାତେ ନୋ ତାଲା ଆଡ୍‍ଗି ପାଡ଼୍‍ତେ ମାର୍‌ଏ, ଦୁତ୍‌କୁ ୱାନିକାଙ୍ଗ୍‌ ଇର୍‌ଏ, “ସାତିୱାରି ମାଣାନ୍‌ ମିର୍‌ ଏନ୍ଧା ଜିତିୱାନିଙ୍ଗ୍‌ ପୋଇଜିନିଦେର୍‌ ?
LUK 24:6 ୱାନ୍‌ ଇବେନୁ ସିଲେନ୍‌, ମାତର୍‌ ନିଙ୍ଗିଁତାମାନାନ୍‌ ? ୱାନ୍‌ ଗାଲିଲିଦୁ ମାର୍‍ଇୱାଲେ ମିଙ୍ଗିଁ ଇନିକା ଇର୍‌ଆମାର୍‌ଆନ୍‌ ଆକା ଏତ୍‍ କିଦୁ,
LUK 24:7 ମନୁସ୍ୟପୁତ୍ରଦିଙ୍ଗ୍‌ ଜେ ପାପି ଲୋକା କିୟୁଦୁ ସର୍ପେ ଆଜି କ୍ରୁସକାଟ୍‍ତୁ ସାଦେଙ୍ଗ୍‌ ଆନାତ୍‌ ମାରି ମୁଣ୍ତ୍ରି ଦିନ୍‌ତିନାଣ୍ତିଙ୍ଗ୍‌ ସାତିମାଣ୍‌ନା ଡେସିଜିବନ୍‌ ଆଜି ନିଙ୍ଗିଁତା ମାନାନ୍‌ ।”
LUK 24:8 ଆବେଟ୍‌ ୱାର୍‌ ୱାନି ବାକ୍ୟ ଏତ୍‌ କିତାର୍‌,
LUK 24:9 ମାରି ମୁସ୍‌ତିମାଣ୍‌ନା ଡେସିସୋର୍‌ଏନୋ ଏଗାର୍‌ ଲୋକାଙ୍ଗ୍‌ ନି ଆଇ ୱିଜେରିଙ୍ଗ୍‌ ଇୟାୱିଜୁ ମାଟା ୱେର୍‌ତେ ।
LUK 24:10 ଇୟାକେଙ୍ଗ୍‌ ମଗ୍‌ଦଲିନି ମରିୟମ୍‌, ଜୋହାନା, ଜାକୁବରି ଆଇସି ମରିୟମ୍‌ ମାରି ୱେନିକା ୱାଲେ ମାନି ଆଇ ଆଇମେକ୍‍, ଇୟାକେଙ୍ଗ୍‌ ସିସୁରିଙ୍ଗ୍‌ ଇୟାୱିଜୁ ବିସୟ୍‌ ୱେର୍‌ତେ ।
LUK 24:11 ମାତର୍‌ ଇୟାୱିଜୁ ମାଟା ୱାରି ଲାକ୍‌ତୁ ବାୟାଦିମାଟା ୱାଜା ଆତାତ୍‌, ମାରି ୱାର୍‌ ୱାନିକାଙ୍ଗ୍‌ ବିସ୍‍ବାସ୍‍ କିଏତାର୍‌ ।
LUK 24:12 ମାତର୍‌ ପିତର୍‌ ନିଙ୍ଗିଁତାନ୍‌ନୋ ମୁସ୍‌ତି ଲାକ୍‌ତୁ ଉରୁକ୍‌ସିସର୍ହାନ୍‌, ମାରି ପାଡ଼ିଗିଜି ବେସ୍‌ତାନ୍‌ନୋ ୱାର୍‌ଇ ୱାତିଙ୍ଗ୍‌ୱିଜୁ ସୁଡ଼ୁତାନ୍‌, ମାରି ୱାନ୍‌ ଆୟା ଗଟ୍‌ନା ବିସୟ୍‌ତାନ୍‌ ତିଲାତାନ୍‌ନୋ ନିଜେଦି ଇଣ୍ତ୍ର ସୋର୍ହାନ୍‌ ।
LUK 24:13 ମାରି ସୁଡ଼ୁଦୁ, ଆୟାନାଣ୍ତିଙ୍ଗ୍‌ ୱାରି ମାଣ୍‌ନା ରିଏର୍‌ ଲୋକୁ ଜିରୁସାଲମତାନ୍‌ ପୁରା ଏଗାର୍‌ କିଲମିଟ୍‌ରଦାନ୍‌ ଆକ ଇମ୍ମାୟୁଦି ନାଟ ସୋଲ୍‌ସିମାର୍‌ଆର୍‍
LUK 24:14 ମାରି ଇୟାୱିଜୁ ଗଟ୍‌ନା ବିସୟ୍‌ତାନ୍‌ ନିଜେ ନିଜେଦି ମାନୁ ୱାର୍‌ଗିଜିସାଜି ମାର୍ହାର୍‌ ।
LUK 24:15 ୱାର୍‌ ୱାର୍‌ଗିଜିସାନିକା ମାରି ଲୋଇ ଲୋଇ ୱାର୍‌ଗିଜିସାନିୱାଲେ ଜିସୁ ୱାନ୍‌ଣ୍ତ୍ରେ ୱାରି ଲାକ୍‌ତୁ ୱାଜି ୱାରି ୱାଲେ ଦାପେ ଦାପେନେ ବୁଲାଦେଙ୍ଗ୍‌ ଆସ୍‌ତାନ୍‌ ।
LUK 24:16 ମାତର୍‌ ୱାରି କାଣୁକୁ ଇୟାୱାଜା ନାମିତେ ମାର୍‌ଏ, ୱାର୍‌ ୱାନିଙ୍ଗ୍‌ ଚିନିସ୍‌ କିଦେଙ୍ଗ୍‌ ଆଟ୍‍ଏତାର୍‍ ।
LUK 24:17 ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌, “ମିର୍‌ ବୁଲାଜି ବୁଲାଜି ଏମେ ୱିଜୁ ବିସୟ୍‌ ନିଜେ ନିଜେଦି ମାନୁ ୱାର୍‌ଗିଜି ସାଜିନିଦେର୍‌, ଆୟାୱିଜୁ ଇନିକା ? ଆବେଟ୍‌ ୱାର୍‌ ଦୁଃକ୍‌ତୁ ମୋକ୍‌ମତାନ୍‌ ନିର୍‌ଆର୍‌ରୋ ତେବାତାର୍‌ ।”
LUK 24:18 ମାରି, ୱାରି ମାଣ୍‌ନା କୟାପା ଦର୍‌ତିକାନ୍‌ ଅରେନ୍‍ ୱାନିଙ୍ଗ୍‌ ଇର୍‌ଆନ୍‌, “ଜିରୁସାଲମତି ଲୋକାରି ମାଣ୍‌କୁ ନିନ୍‌ ଇନିକା ଅରିନ୍ଦେ ଆୟାବାଡିଦି ଇୟା ଏସ ଦିନ୍‌ତି ଗଟ୍‌ନା ନେସେଇ ?”
LUK 24:19 ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, “ଇନି ଇନି ୱାଜାଦି ଗଟ୍‌ନା ?” ୱାର୍‌ ୱାନିଙ୍ଗ୍‌ ଇର୍ହାର୍‌, “ନାଜରିତିୟ ଜିସୁଦି ବିସୟ୍‌; ୱାନ୍‌ ମାପୁରୁ ମାରି ୱିଜୁ ଲୋକାଦି ଆଗିଡ଼ି ପାଣିଦୁ ମାରି ବାକ୍ୟଦୁ ଅରେନ୍‍ ବପୁଦି ବାବବାଦି ମାର୍ହାନ୍‌,
LUK 24:20 ମାରି ମା ପେରି ଜାଜକର୍‌ ମାରି ପେରିକାର୍‌ ଏଣ୍ତେସ୍‌ ୱାନିଙ୍ଗ୍‌ ସାନି ଦଣ୍ତ୍‌ ବଗାଦେଙ୍ଗ୍‌ ସପ୍ରେ କିଜି ୱାନିଙ୍ଗ୍‌ କ୍ରୁସକାଟ୍‍ତୁ ସାପିସ୍‌ କିତାର୍‌, ଇୟାୱିଜୁ ବିସୟ୍‌ ।
LUK 24:21 ମାତର୍‌ ଏନ୍‌ ଇସ୍ରାଏଲତିଙ୍ଗ୍‌ ଡ଼ିସିସ୍‌ କିନାନ୍‌, ୱାନ୍‌ ଜେ ଇୟା ଲୋକୁ, ଆକା ମାପୁ ଆସା କିତା ମାର୍‌ଆପ୍‌; ଇରିଙ୍ଗ୍‌ ଇକା ଡ଼ିସ୍‌ତିଙ୍ଗ୍‌ ଇୟାୱିଜୁ ଗଟାତି ନେର୍‌ଆନ୍‌ ମୁନେନ୍‌ ଆତାତ୍‌ ।
LUK 24:22 ମାରି ବା, ମା ମାଣ୍‌କୁ ଏସ ଆଇମେକ୍‍ ମାଙ୍ଗିଁ କାବା କିତେମାନେ; ୱାକ୍‍ ଉଟ୍‌ଲା ନାଡ଼ାକାଦେ ମୁସ୍‌ତି ଲାକ୍‌ତୁ ସୋରେଏମାରେଏ,
LUK 24:23 ମାରି ୱାନି ସାତି ମାଡ଼ା ପୋଇଉତେନୋ ୱାଜି ଇରେଏ, ୱାକ୍‍ ଦୁତ୍‌କା ସୁଡ଼ୁତେ ମାରେଏ ମାରି ଆୟା ଦୁତ୍‌କୁ ଇରେଏ ଜେ, ୱାନ୍‌ ଜିବନ୍‌ ମାନାନ୍‌ ।
LUK 24:24 ମାରି, ମା ସଙ୍ଗ୍‌ତି ଲୋକା ମାଣ୍‌କୁ ଏର୍‌ ଏର୍‌ ମୁସ୍‌ତି ଲାକ୍‌ତୁ ସୋଲ୍‌ସି, ଆଇମେକ୍‍ ଏଣ୍ତେସ୍‌ ୱେର୍‌ତେମାରେଏ, ଆୟାୱାଜା ସୁଡ଼ୁତାର୍‌, ମାତର୍‌ ୱାନିଙ୍ଗ୍‌ ସୁଡ଼ୁଏତାର୍‌ ।”
LUK 24:25 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ଏ କାବାଦିକାର୍‌, ବାବବାଦିରି ମାଣ୍‌କୁ ୱେର୍‌ତିମାର୍‌ଇ ୱିଜୁ ବାକ୍ୟଦିଙ୍ଗ୍ ବିସ୍‌ବାସ୍‌ କିଦେଙ୍ଗ୍‌ ଦିରେ ବୁଜାନିଲୋକ୍‍,
LUK 24:26 ଇୟାୱିଜୁ ଦୁଃକ୍‌ କାସ୍ଟୁ ବୋଗାଜି ନିଜେଦି ମହିମାଦାନ୍‌ ସୋନିକା ଇନିକା କ୍ରିସ୍ତଦିଙ୍ଗ୍‌ ଦର୍‌କାର୍‌ ସିଲେତାତ୍‍ ?”
LUK 24:27 ମାରି, ମୋସା ମାରି ୱିଜେରି ବାବବାଦିରିମାଣୁକୁ ଆରାମ୍‌ କିଜି ୱିଜୁ ଦାର୍ମୁସାସ୍ତ୍ରଦୁ ନିଜେଦି ବିସୟ୍‌ତି ମାଟା ୱାନ୍‌ ୱାରିଙ୍ଗ୍‌ ବୁଜାକିତାସିତାନ୍‌ ।
LUK 24:28 ମାରି, ୱାର୍‌ ଏମେ ନାଟ ସୋଲ୍‌ସି ମାର୍‌ଆର୍‌, ଆବେଣି ନାର୍‌ ଲାକ୍‌ତୁ ଇତାର୍‌, ୱାନ୍‌ ମାରି ଆଗିଡ଼ି ସନିୱାଜା ଆତାନ୍‌ ।
LUK 24:29 ମାତର୍‌ ୱାର୍‌ ଜିସୁଙ୍ଗୁଁ ତେବାକିଜି ଇର୍ହାର୍‌, “ମା ୱାଲେ ମାନ୍‌ଆ, ମାତର୍‌ ୱେଡ଼ା ଆଜି ୱାଜିନାତ୍ ମାରି ୱେଡ଼ା ସୋଲ୍‌ସିନାତ୍‌ ।” ଆବେଟ୍‌ ୱାନ୍‌ ୱାରି ୱାଲେ ମାନ୍‌ଣ୍ତ୍ରେଙ୍ଗ୍‌ ଇଲୁ ଲୋଇ ସୋର୍‌ଆନ୍‌ ।
LUK 24:30 ମାରି, ୱାରି ୱାଲେ ଉଣିମାନୁ ବାସ୍‌ତି ୱେନ୍‌କା ଜିସୁ ରୁଟି ଅତାନ୍‌ନୋ ମାପୁରୁଙ୍ଗୁଁ ଆସିର୍ବାଦ୍‌ କିତାନ୍‌, ମାରି ଆୟା ରୁଟିଦିଙ୍ଗ୍‌ ରୁକ୍‍ସି ୱାରିଙ୍ଗ୍‌ ସିଦେଙ୍ଗ୍‍ ଆସ୍‌ତାନ୍‌ ।
LUK 24:31 ଆବେନୁ ୱାରି କାଣୁକୁ ସୁଡ଼ୁଦେଙ୍ଗ୍‍ ଆଟ୍‌ତାର୍‌ ମାରି ୱାର୍‌ ୱାନିଙ୍ଗ୍‌ ସିନିସ୍‌କିଦେଙ୍ଗ୍‌ ଆଟ୍‌ତାର୍‌; ମାରି, ୱାନ୍‌ ୱାରି ଆଗିଡ଼ିରାନ୍‌ ସାଣେକ୍‌ତିଙ୍ଗ୍‌ ଏମେନୋ ଆତାନ୍‌ ।
LUK 24:32 ଆବେଟ୍‌ ୱାର୍‌ ନିଜେ ନିଜେଦିମାନୁ ୱାର୍‌ଗିଜି ସାତାର୍‌, “ଏସ୍ତିୱାଲେ ସାରିଦୁ ୱାନ୍‌ ମା ୱାଲେ ୱାର୍‌ଗିଜିସାଜି ମାର୍‌ଆନ୍‌ ମାରି ମାଙ୍ଗିଁ ଦାର୍ମୁସାସ୍ତ୍ର ବୁଜାକିଜି ମାର୍‌ଆନ୍‌, ନାସ୍ତିୱାଲେ ଇନିକା ମା ଜିବନ୍‌ ସିସୁ କାସ୍‌ନି ୱାଜା ଆଏଜି ମାର୍‌ଆତ୍‌ ନୋ ?”
LUK 24:33 ତାନେୱେନ୍‌କା ୱାର୍‌ ଆୟା ଦାପ୍ରେ ନିଙ୍ଗିଁତାର୍‌ ନୋ ଜିରୁସାଲମ୍‍ତୁ ଡ଼େସିସୋଲ୍‌ସି ଉଣ୍ତ୍ରେମାନୁ ଆତିମାନିକା ଏଗାର୍‌ ସିସୁରିଙ୍ଗ୍‌ ମାରି ୱାରି ସଙ୍ଗ୍‌ତିୱାରିଙ୍ଗ୍‌ ସୁଡ଼ୁତାର୍‌;
LUK 24:34 ସିସୁର୍‍ ଇଜି, “ପ୍ରବୁ ସତ୍‍ନେ ନିଙ୍ଗିଁତାମାନାନ୍‌ ମାରି ସିମୋନ୍‌ତିଙ୍ଗ୍‌ ତରାତାମାନାନ୍‌ ।”
LUK 24:35 ତାନେୱେନ୍‌କା ଇୟା ରିଏର୍‌ ଲୋକୁ ସାରିଦୁ ଆମାକା ୱିଜୁ ଗଟାତା ମାର୍‌ଆତ୍‌, ଆୟାୱିଜୁ ୱାରି ଆଗିଡ଼ି ୱେର୍‌ତାର୍‌, ୱାନ୍‌ ରୁଟି ରୁକ୍‌ନି ବେଡ଼ାଦୁ ୱାର୍‌ ଏଣ୍ତେସ୍‌ ୱାନିଙ୍ଗ୍‌ ସିନେକିଦେଙ୍ଗ୍‌ ଆଟ୍‌ତାର୍‌, ୱାର୍‌ ଆୟାୱିଜୁ ବିସୟ୍‌ ଇର୍ହାର୍‌ ।
LUK 24:36 ମାତର୍‌ ସିସୁର୍‍ ଆୟାୱିଜୁ ମାଟା ଇଜିମାର୍‌ଇ ବେଡ଼ାଦୁ ପ୍ରବୁ ଜିସୁ ନିଜେନେ ୱାରିମାନୁ ୱାତାନ୍‌, ମାରି ଇର୍‌ଆନ୍‌, “ମି ସାନ୍ତି ଆପିତ୍‌ ।”
LUK 24:37 ମାତର୍‌ ସିସୁର୍‍ କାବାଜି ମାରି ତିଲାଜି ଉଣ୍ତ୍ରି ଦୁବା ସୁଡ଼ୁଜିନାପ୍‌ ଇଜି ଅଡ଼୍‌ବିତାର୍‌ ।
LUK 24:38 ଆବେଟ୍‌ ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ଇନ୍‌ନ୍ଧାନିଙ୍ଗ୍‌ ତିଲାଜିନିଦେର୍‌ ? ମାରି ମି ମୋନ୍‌ତୁ ଏନ୍ଧା ନାମ୍‍ଏଣ୍‍ଗା ଲୋଇ ଲୋଇ ୱାର୍‌ଗିଜିନିଦେର୍‌ ?
LUK 24:39 ଇକାନ୍‌ ଜେ ନିଜେ ନାନ୍, ନା କିୟୁ ମାରି ପାଦାମ୍‌କୁ ସୁଡ଼ୁଦୁ, ନାଙ୍ଗିଁ ମୁଟ୍‌ସୋ ସୁଡ଼ୁଦୁ, ମାତର୍‌ ନାନ୍ ଏଣ୍ତେସ୍‌ ଜିବନ୍‌ମାନି ମେନ୍ଧଲ୍‍ ମାନିକା ସୁଡ଼ୁଜିନିଦେର୍‍, ଦୁବା ଆୟାୱାଜା ସିଲେ ।”
LUK 24:40 ମାରି, ଜିସୁ ଇକା ଇନ୍‌ଞ୍ଜି ୱାରିଙ୍ଗ୍‌ ନିଜେଦି କିୟୁ ମାରି ପାଦାମ୍‌କୁ ତର୍‌ତାନ୍‌ ।
LUK 24:41 ଆଦେଙ୍ଗ୍‌ ୱାର୍‌ ବିସ୍‍ବାସ୍‍ କିଏତାର୍‍, ଆତିଙ୍ଗ୍‌ବା କାବାଆଜି ୱେଡ଼ିକା ଆତାର୍‌ ଆରିଙ୍ଗ୍‌ ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, ଇବେନୁ ମି ଲାକ୍‌ତୁ ଇନିକା ଉଣିକା ମାନାତ୍‌ ?
LUK 24:42 ଆବେଟ୍‌ ୱାର୍‌ ଜିସୁଙ୍ଗୁଁ କାଣ୍ତେକ୍‌ ୱାର୍‌ତି ମିନ୍‌କୁ ସିତାର୍‍ ।
LUK 24:43 ମାରି, ୱାନ୍‌ ଆୟା ମିନ୍‌କୁ ଅତାନ୍‌ନୋ ୱାରି ଆଗିଡ଼ି ତିର୍‌ଆନ୍‌ ।
LUK 24:44 ଜିସୁ ୱାରିଙ୍ଗ୍‌ ଇର୍‌ଆନ୍‌, “ମୋସାଦି ନିୟମ୍‌ତୁ ମାରି ବାବବାଦିରି ମାରି ଗୀତସଂହିତା ଦାର୍ମୁସାସ୍ତ୍ରଦୁ ନା ବିସୟ୍‌ତାନ୍‌ ଆମାକା ଆମାକା ରାସାତାମାନାତ୍‌, ଆୟାୱିଜୁ ପୁରା ଆଦେଙ୍ଗ୍‌ ଦର୍‌କାର୍‌, ନାନ୍ ମି ୱାଲେ ମାର୍‌ଇ ୱାଲେ ମିଙ୍ଗିଁ ଇୟାୱିଜୁ ମାଟା ଇର୍ହାମାର୍ହା ।”
LUK 24:45 ନାସ୍ତିୱାଲେ ୱାର୍‌ ଏଣ୍ତେସ୍‌ ଦାର୍ମୁସାସ୍ତ୍ରଦି ବିସୟ୍‌ ବୁଜାଦେଙ୍ଗ୍‌ ଆଟ୍‍ନାର୍‍, ଆୟାଉଣ୍ତିଙ୍ଗ୍‌ ୱାନ୍‌ ୱାରି ବୁଦିଦି ସେର୍‍ଲା ରେତାନ୍‍;
LUK 24:46 ମାରି, ଜିସୁ ସିସୁରି ଲାକ୍‌ତୁ ୱାଜି ଇର୍ହାନ୍‌, “ଇୟାୱାଜା ରାସାତାମାନାତ୍‌, କ୍ରିସ୍ତ ଦୁଃକ୍‌ ପୟ୍‌ନାନ୍‌ ମାରି ମୁନେଟାନ୍‍ ସାତି ଲୋକାମାଣାନ୍‌ ଡ଼େସି ନିଙ୍ଗିଁନାନ୍‍,
LUK 24:47 ମାରି ଜିରୁସାଲମ୍‍ତାନ୍‍ ଆରାମ୍‌ କିଜି ୱିଜୁ ଜାତି ଲାକ୍‌ତୁ ୱାନି ଦର୍‌ତାନ୍‌ ପାପ୍‌କେମା ଉଣ୍ତିଙ୍ଗ୍‌ ମନ୍‍ତିଙ୍ଗ୍‍ ଡ଼େପ୍‍ନି ବିସୟ୍‌ତାନ୍‌ ଲୋକୁ ୱିକ୍‍ନାର୍‍ ।
LUK 24:48 ମିର୍‌ ଇୟାୱିଜୁ ବିସୟତି ସାକି ଆନିଦେର୍‌ ।
LUK 24:49 ମାରି ସୁଡ଼ୁଦୁ, ନା ବୁବା ଆମାକା ପାର୍‌ମାଣ୍‌ କିତାମାନାନ୍‍, ଆକା ନାନ୍ ମି ଲାକ୍‌ତୁ ପକ୍‍ନା, ମାତର୍‌ ମୁସ୍‌କୁରାନ୍‌ ସାକ୍ତି ପୁଟ୍‍ଇ ସାନ୍ଦି ମିର୍‌ ଇୟା ଗାଡ଼୍‍ତୁ ମାନ୍‌ଡ୍ରୁ ।”
LUK 24:50 ତାନିୱେନ୍‍କା ଜିସୁ ୱାରିଙ୍ଗ୍‌ ବେତନିୟାଦୁ ସନି ସାରି ସାନ୍ଦି ଅତାନ୍‍ ମାରି ନିଜେଦି କିୟୁ ପେର୍‌ଜି ୱାରିଙ୍ଗ୍‌ ଆସିର୍ବାଦ୍‌ କିତାନ୍‍ ।
LUK 24:51 ମାରି, ୱାରିଙ୍ଗ୍‌ ଆସିର୍ବାଦ୍‌ କିବୁ କିବୁ ୱାନ୍‌ ୱାରିମାଣାନ୍‌ ୱେର୍‌ଏ ଆଜି ମୁସ୍‌କୁପୁର୍‌ତୁ ସର୍‌ଆନ୍‌ ।
LUK 24:52 ମାରି, ୱାର୍‌ ୱାନିଙ୍ଗ୍‌ ମାଡ଼ିସ୍‌ କିଜି ନାଣ୍ତ ୱେଡ଼ିକାଦାନ୍‌ ଜିରୁସାଲାମ୍‍ତୁ ଡ଼େସିୱାତାର୍‍ ।
LUK 24:53 ମାରି ୱାର୍‌ ୱିଜୁଦିନ୍‌ ମନ୍ଦିର୍‌ତୁ ମାନ୍‌ଜି ମାପୁରୁଦି ଦନ୍ୟବାଦ୍‌ କିଦେଙ୍ଗ୍‌ ଆସ୍‌ତାର୍‌ ।
JOH 1:1 ଆଗ୍‌ଡ଼ି ବାକ୍ୟ ମାର୍‌ଆତ୍‌, ବାକ୍ୟ ମାପୁରୁୱାଲେ ମାର୍‌ଆତ୍‌, ଆୟା ବାକ୍ୟ ମାପୁରୁ ମାର୍‌ଆତ୍‌ ।
JOH 1:2 ବାକ୍ୟ ଆଗ୍‌ଡ଼ି ମାପୁରୁୱାଲେ ମାର୍‌ଆତ୍‌ ।
JOH 1:3 ୱାନି ମାଣାନ୍‌ ମାପୁରୁ ୱିଜୁ ତିଆର୍‌ କିତାତ୍‍; ମାରି ଆମାୱିଜୁ ତିଆର୍‌ ଆତାମାନାତ୍‌, ଆୟା ଲୋଇରାନ୍‌ ଉଣ୍ତ୍ରେବା ୱାନିଙ୍ଗ୍‌ ଡ଼ିସ୍‌ତିଙ୍ଗ୍‌ ତିଆର୍‌ ଆଏତ୍‍ ।
JOH 1:4 ୱାନିମାନୁ ଜିବନ୍‌ ମାର୍‌ଆତ୍‌ ମାରି ଆୟା ଜିବନ୍‌ ଲୋକା ଜାୟ୍‌ ।
JOH 1:5 ଆୟା ଜାୟ୍‌ ସିକାଟିଦୁ ଜାୟ୍‍ଆଜି ୱାଜିନାତ୍‍, ମାରି ସିକାଟି ଆକା ମାନାଏଜିନାତ୍‍ ।
JOH 1:6 ମାପୁରୁ ୱାନି କାବୁର୍‌ ସିନିୱାନିଙ୍ଗ୍‍ ପୋକ୍‌ତାନ୍‌; ୱାନି ଦର୍‌ ଜୋହନ ।
JOH 1:7 ୱାନ୍‌ ଏଣ୍ତେସ୍‌ ଜାୟ୍‌ ବିସୟ୍‌ତାନ୍‌ ସାକି ସିନାନ୍‍, ମାରି ଆକା ୱେନ୍‌ଞ୍ଜି ୱିଜେରେ ବିସ୍‌ବାସ୍‌ କିନାର୍‌, ଆୟାଉଣ୍ତିଙ୍ଗ୍‌ ୱାନ୍‌ ୱାତାନ୍‌ ।
JOH 1:8 ଜୋହନ ନିଜେ ଆୟା ଜାୟ୍‌ ସିଲେତାନ୍‌, ମାତର୍‌ ଜାୟ୍‌ ବିସୟ୍‌ତାନ୍‌ ସାକି ସିଦେଙ୍ଗ୍‍ ଇଜି ୱାତାନ୍‌ ।
JOH 1:9 ଏମେ ସତ୍‌ ଜାୟ୍‌ ଦୁନିଆଦି ୱାଜି ୱିଜୁ ଲୋକାଙ୍ଗ୍‌ ଜାୟ୍‌ ସିନାତ୍‌, ଆକାଦେ ସତ୍‌ତି ଜାୟ୍‌ ।
JOH 1:10 ବାକ୍ୟ ଦୁନିଆଦୁ ମାର୍‌ଆତ୍‌ ମାରି ଦୁନିଆ ୱାନି ମାଣାନ୍‌ ତିଆର୍‌ ଆତାତ୍‌, ଆରିଙ୍ଗ୍‍ବା ଦୁନିଆ ୱାନିଙ୍ଗ୍‌ ସିନିସ୍‍ କିଏତାତ୍‍ ।
JOH 1:11 ୱାନ୍‌ ନିଜେଦି ରାଜିଦୁ ୱାତାନ୍‌, ଆରିଙ୍ଗ୍‍ବା ୱାନି ନିଜେଦି ଲୋକୁ ୱାନିଙ୍ଗ୍‌ ମାନାଏତାର୍‍ ।
JOH 1:12 ମାତର୍‌ ଏସୋ ଲୋକୁ ୱାନିଙ୍ଗ୍‌ ମାନାତାର୍‍, ଅର୍ତାତ୍‍ ଏମେକାର୍‌ ୱାନି ଦର୍‌ତାନ୍‌ ବିସ୍‌ବାସ୍‌ କିତାର୍‍, ଆୟା ୱିଜେରିଙ୍ଗ୍‌ ୱାନ୍‌ ମାପୁରୁଦି କଡ଼ର୍‌ ଆଦେଙ୍ଗ୍‌ ଅଦିକାର୍‌ ସିତାନ୍‌;
JOH 1:13 ୱାର୍‌ ମାପୁରୁଦି ମାରିସିର୍‌ ନିଜେଦି ବଦାଦାନ୍ କି, ମେନ୍ଦଲ୍‌ତି ନେତେର୍‌ତାନ୍ କି ଲୋକା ବଦାଦାନ୍ ଜନମ୍‌ ଆଏର୍‌, ମାତର୍‌ ମାପୁରୁ ନିଜେ ୱାରି ବୁବା ।
JOH 1:14 ମାରି, ଆୟା ବାକ୍ୟ ନର୍‍ ମେନ୍ଧଲ୍‍ ଆସ୍‌ସି ମା ୱାଲେ ଜିତାନ୍‍ । ୱାନ୍‌ ଦୟା ନି ସତ୍‍ତୁ ପୁରା ଆଜିମାର୍ହାନ୍‍ । ମାରି ମାପୁରୁଦି ଅରେନ୍‍ନେ ମାରିସିୱାଜା ୱାନ୍‌ ଏମେ କାବାଆନି ମହିମାକି ପୋଇତାମାର୍‍ହାନ୍‍, ଆକା ମାପ୍‌ ସୁଡ଼ୁତାପ୍‌ ।
JOH 1:15 ଜୋହନ ୱାନି ବିସୟ୍‌ତାନ୍‌ ସାକି ସିଜି ନାଣ୍ତ ଆଉଲି ଆଜି ଇର୍‌ଆନ୍‌, “ଏନ୍‌ ନା ୱେନ୍‌କା ୱାଜିନାନ୍‍, ୱାନ୍‌ ନାଙ୍ଗିଁ ପେରିକାନ୍‌, ଇରିଙ୍ଗ୍‌ ୱାନ୍‌ ନା ଜନମ୍‌ ଆନି ଆଗ୍‌ଡ଼ି ମାର୍‌ଆନ୍‌, ଏମେୱାନି ବିସୟ୍‌ତାନ୍‌ ନାନ୍ ଇକା ଇର୍ହାମାର୍ହା, ୱାନ୍‌ ଇକାନ୍‌ ।”
JOH 1:16 ଆଦେଙ୍ଗ୍‌ ୱାନି ଦୟାଦି ପୁରାଦାନ୍‌ ମାଡ୍‌ ୱିଜେରେ ଆସିର୍ବାଦ୍‌ ପୋଇତିମାନିକା, ହୁଁ, ଆସିର୍ବାଦ୍‌ ମୁସ୍‌କୁ ଆସିର୍ବାଦ୍‌ ପୋଇତିମାନିକା ।
JOH 1:17 ଇରିଙ୍ଗ୍‌ ନିୟମ୍‌ ମାପୁରୁ ମୋସା ମାଣାନ୍‌ ସିତାନ୍‌, ମାତର୍‌ ଦୟା ନି ସତ୍‌ ଜିସୁ କ୍ରିସ୍ତ ମାଣାନ୍‌ ୱାତାତ୍‍ ।
JOH 1:18 ଏନ୍‌ ଏସାଙ୍ଗ୍‍ ମାପୁରୁଙ୍ଗ୍‍ଁ ସୁଡ଼ୁଏନ୍‌, ବୁବାସି ଗାତୁଦୁ ମାନି ଅରେନ୍‍ନେ ୱାନି ଲାଡ୍‌ ମାରିସି, ୱାନିଙ୍ଗ୍‌ ନେସିସ୍‍ କିତାମାନାନ୍‍ ।
JOH 1:19 ଜିରୁସାଲାମ୍‍ତି ଜିହୁଦି ପେରିକାର୍‌ ଏସ ଲୋକ୍‌ ଦାର୍ମୁଜାଜକରିଙ୍ଗ୍‍ ମାରି ଲେବିୟରିଙ୍ଗ୍‍ ଜୋହନତି ଲାକ୍‌ତୁ, “ନିନ୍‌ ଏନ୍‌ ?” ଇଜି ୱେନ୍‍ବାଦେଙ୍ଗ୍‍ ପୋକ୍‌ତାର୍‌,
JOH 1:20 ୱାନ୍‌ ମାନାଏଜି ସତ୍‌ତାନ୍‌ ୱେର୍‌ତାନ୍‌, “ନାନ୍ କ୍ରିସ୍ତ ଆଏ ।”
JOH 1:21 ଆବେଟ୍‌ ୱାର୍‌ ଜୋହନ୍‍ତିଙ୍ଗ୍‍ ୱେନ୍‍ବାତାର୍‌, ଆରିଙ୍ଗ୍‌, “ନିନ୍‌ ଇନିକା ଏଲିୟ୍‌ ?” ୱାନ୍‌ ଇର୍‌ଆନ୍‌, “ନାନ୍ ଆଏ ।” ନିନ୍‌ ଇନିକା ଆୟା ବାବବାଦି ? ୱାନ୍‌ ଇର୍ହାନ୍‌, “ସିଲେ ।”
JOH 1:22 ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, “ମାଙ୍ଗିଁ ପୋକ୍‍ତିମାନି ୱାରିଙ୍ଗ୍‌ ଏଣ୍ତେସ୍‌ ଇନ୍‌ଡ୍ରେଙ୍ଗ୍‌ ଆଟ୍‍ନାପ୍‍, ଆୟାଉଣ୍ତିଙ୍ଗ୍‌ ନିନ୍‌ ଏନ୍‌ ? ନିନ୍‌ ନିଜେଦି ବିସୟ୍‌ତାନ୍‌ ଇନିକା ଇଜିନି ?”
JOH 1:23 ଜିସାୟ ବାବବାଦି ଏଣ୍ତେସ୍‌ ୱେର୍‍ତାମାର୍‍ଆନ୍‍, ଆୟାୱାଜା ଜୋହନ ଇର୍ହାନ୍‌ । “ନାନ୍ ଆୟା ସିମ୍ରାବାଡିଦୁ ଆଉଲିଆଜିମାନି ଅରେନ୍‍ୱାନି ବଲ୍, ପ୍ରବୁଦି ସାରି ସାଡ଼ୁକୁ କିଆ ।”
JOH 1:24 ମାରି, ପାରୁସିର୍‌ ପୋକ୍‍ତିମାନି କାବୁର୍‌ ଅନିକାର୍‍ ୱାନିଙ୍ଗ୍‌ ୱେନ୍‌ବାତାର୍‌,
JOH 1:25 “ନିନ୍‌ ଜଦି କ୍ରିସ୍ତ ମାରି ଏଲିୟ୍‌ ମାରି ଆୟା ବାବବାଦି ଆଇ, ଆରିଙ୍ଗ୍‌ ଏନ୍ଦା ଡୁବନ୍‌ ସିଜିନି ?”
JOH 1:26 ଜୋହନ ୱାରିଙ୍ଗ୍‌ ଇର୍‌ଆନ୍‌, “ନାନ୍ ଏର୍‌ତୁ ଡୁବନ୍‌ ସିଜିନା; ଆମାୱାନିଙ୍ଗ୍‌ ମିର୍‌ ନେସ୍‌ଇଦେର୍‌, ୱାନ୍‌ ମିବାନ୍‍ ମାନାନ୍‌;
JOH 1:27 ୱାନ୍‌ ନା ୱେନ୍‌କା ୱାଜିନାନ୍‍, ୱାନି ଜୁତେଙ୍ଗ୍‌ତି ଗାଟି କୁତ୍‌ତେଙ୍ଗ୍‌ ବା ନାନ୍ ଜଗ୍‌ ସିଲେ ।”
JOH 1:28 ଜର୍ଦନ ଗାଡାଦି ଆୟାପାଡ଼ିରି ଆମା ବେତନିଆଦୁ ଜୋହନ ଡୁବନ୍‌ ସିଜିମାର୍‍ଆନ୍‍, ଆୟା ବାଡିଦୁ ଇୟାୱିଜୁ ଗଟାତାତ୍‌ ।
JOH 1:29 ମାର୍‌ନାଣ୍ଡିଙ୍ଗ୍‌ ଜୋହନ ଜିସୁଙ୍ଗୁଁ ୱାନି ଲାକ୍‌ତୁ ୱାନିକା ସୁଡ଼ୁଜି ଇର୍‌ଆନ୍‌, ଇକା ସୁଡ଼ୁଦୁ, ମାପୁରୁଦି ମେଣ୍ତାପିଲା, ଏନ୍‌ ଦୁନିଆଦି ପାପ୍‌ ପିଣ୍ତ୍‍ନା ଅନାନ୍‍ ।
JOH 1:30 ନା ୱେନ୍‌କା ଏନ୍‌ ୱାଜିନାନ୍‍, ୱାନ୍‌ ନାମାଣାନ୍‍ ପେରିକାନ୍‌, ଇରିଙ୍ଗ୍‌ ୱାନ୍‌ ନା ଜନମ୍‌ ଆଗ୍‍ଡ଼ି ମାର୍‍ଆନ୍‍, ଆମାୱାନି ବିସୟ୍‌ତାନ୍‌ ନାନ୍ ଇକା ଇର୍‌ଆମାର୍ହା, ୱାନ୍‌ ଆକାନ୍‍ ।
JOH 1:31 ନାନ୍ ବା ୱାନିଙ୍ଗ୍‌ ସିନିସ୍‍ କିଏ ମାର୍ହା, ମାତର୍‌ ୱାନ୍‌ ଏଣ୍ତେସ୍‌ ଇସ୍ରାଏଲ୍‌ ଲୋକାମାନୁ ନେସାଇ ଆନାନ୍‌, ଆୟାଉଣ୍ତିଙ୍ଗ୍‌ ନାନ୍ ଏର୍‌ତୁ ଡୁବନ୍‌ ସିଦେଙ୍ଗ୍‍ ୱାତାମାନା ।
JOH 1:32 ମାରି ଜୋହନ ସାକି ସିଜି ଇର୍ହାନ୍‌, “ନାନ୍ ପବିତ୍ର ଆତ୍ମା ପାର୍‍ୱାଦି ୱାଜା ବାଦଡ଼୍‍ତାନ୍‍ ରେତାଜି ୱାଦ୍‌ ୱାନି ମୁସ୍‌କୁ ବାସ୍‍ନିକା ସୁଡ଼ୁତା ।
JOH 1:33 ନାନ୍ ବା ୱାନିଙ୍ଗ୍‌ ସିନିସ୍‍ କିଏ ମାର୍ହା, ମାତର୍‌ ଏନ୍‌ ନାଙ୍ଗିଁ ଏର୍‌ତୁ ଡୁବନ୍‌ ସିଦେଙ୍ଗ୍‍ ପୋକ୍‌ତାନ୍‌, ୱାନ୍‌ ନାଙ୍ଗିଁ ଇର୍‌ଆନ୍‌, ଆମାୱାନି ମୁସ୍‌କୁ ଆତ୍ମା ବାସ୍‍ନିକା ସୁଡ଼ୁନି, ଏନ୍‌ ପବିତ୍ରଆତ୍ମାଦୁ ଡୁବନ୍‌ ସିନାନ୍‍, ଆକାନ୍‍ ଆୟା ଲୋକୁ ।
JOH 1:34 ମାରି, ନାନ୍ ଆକା ସୁଡ଼ୁତାମାନା ମାରି ୱାନ୍‌ ମାପୁରୁଦି ମାରିସି ଇଜି ସାକି ସିତାମାନା ।”
JOH 1:35 ମାର୍‌ନାଣ୍ଡିଙ୍ଗ୍‌ ମାରିଡ଼େସି ଜୋହନ ନି ୱାନି ସିସୁରି ଲୋଇ ରିଏରି ୱାଲେ ନିର୍‍ଆମାର୍‍ଆର୍‍;
JOH 1:36 ମାରି, ୱାନ୍‌ ଜିସୁଙ୍ଗୁଁ ଆୟା ସାରି ସିଜି ସନିକା ସୁଡ଼ୁଜି ୱାନିଙ୍ଗ୍‌ କାଣ୍‌ଗା କିଜି ଇର୍ହାନ୍‌, ଇକାନ୍‌ ସୁଡ଼ୁଦୁ, ମାପୁରୁଦି ମେଣ୍ତା ପିଲା ।
JOH 1:37 ଆୟା ରିଏର୍‌ ସିସୁର୍‍ ୱାନି ମାଟା ୱେନ୍‌ଜି ଜିସୁୱାଲେ ୱାଲେ ସରଆର୍‌ ।
JOH 1:38 ଜିସୁ ମାର୍‍ଜି ୱେସ୍‍ସି ୱାରିଙ୍ଗ୍‌ ୱେନ୍‌କା ୱେନ୍‌କା ୱାଜିମାନିକା ସୁଡ଼ୁଜି ୱେନ୍‌ବାତାନ୍‌, “ମିର୍‌ ଇନିକା ପୋୟ୍‍ଜିନିଦେର୍‍ ?” ୱାର୍‌ ୱାନିଙ୍ଗ୍‌ ଇର୍ହାର୍‌, “ରାବ୍‍ବି” ଅନୁବାଦ୍‍ କିତିଙ୍ଗ୍‌ ତେନି ଅର୍ତ “ଗୁରୁ,” ନିନ୍‌ ଏମେ ତେବାନି ?
JOH 1:39 ଜିସୁ ୱାରିଙ୍ଗ୍‌ ଇର୍ହାନ୍‌, ରାଦୁ, ସୁଣିଦେର୍‍ । ଆବେଟ୍‌ ୱାର୍‌ ସଲ୍‌ସି ୱାନି ବାସାନିକା ସୁଡ଼ୁତାର୍‌, ମାରି ଆୟା ନାଣ୍ଡିଙ୍ଗ୍ ୱାନିୱାଲେ ତେବାତାର୍‌; ନାସ୍ତିୱାଲେ ମିଲ୍‌ମିଲିକା ସାର୍‍ଟା ୱେଡ଼ା ଆତାମାର୍‍ଆତ୍‍ ।
JOH 1:40 ଏମେ ରିଏର୍‌ ଜୋହନତି ମାଟା ୱେନ୍‌ଜି ଜିସୁଦି ୱାଲେ ୱାଲେ ସର୍‍ଆମାର୍‍ଆର୍‍, ୱାରି ଲୋଇ ଅରେନ୍‍ ସିମୋନ୍‌ ପିତର୍‌ତି ତଡ଼ାନ୍‌ ଆନ୍ଦ୍ରିୟ ମାର୍‌ଆନ୍‌ ।
JOH 1:41 ୱାନ୍‌ ପାର୍‌ତୁମ୍‌ ୱାନି ତଡ଼ାନ୍‌ ସିମୋନ୍‌ତିଙ୍ଗ୍‍ ପୋୟ୍‍ଜି ୱାନିଙ୍ଗ୍‌ ଇର୍‌ଆନ୍‌, ମାପ୍‌ “ମସିହଦି” ସୁଡ଼ୁତାମାନାପ୍‍ ।
JOH 1:42 ୱାନ୍‌ ୱାନିଙ୍ଗ୍‌ ଜିସୁ ଲାକ୍‌ତୁ ତାତାନ୍‍ । ଜିସୁ ପିତର୍‌ ତରିନ୍‌ ସୁଡ଼ୁଜି ଇର୍‌ଆନ୍‌, “ନିନ୍‌ ସିମୋନ୍‌ ଜୋହନତି ମାରିସି । ନିନ୍‌ କେପା ଦର୍‌ତାନ୍‌ ୱେଙ୍ଗ୍‍ଁନି ଅନୁବାଦ କିତିଙ୍ଗ୍‌ ତେନି ଅର୍ତ କାଲୁ ।”
JOH 1:43 ମାର୍‌ନାଣ୍ଡିଙ୍ଗ୍‌ ଜିସୁ ଗାଲିଲିଦୁ ସହସ ସନ୍‌ଡ଼୍ରେଙ୍ଗ୍‌ ବଦା କିତାନ୍‌, ମାରି ୱାନ୍‌ ପିଲିପ୍‌ତିଙ୍ଗ୍‌ ସୁଡ଼ୁତାନ୍‌ନୋ ୱାନିଙ୍ଗ୍‌ ଇର୍‌ଆନ୍‌, “ନା ୱାଲେ ରାଆ ।”
JOH 1:44 ପିଲିପ୍‌ ବେତ୍‍ସାଇଦାଦି ଲୋକୁ ମାର୍‌ଆନ୍‌, ଆକା ଆନ୍ଦ୍ରିୟ ନି ପିତର୍‌ତି ଗାଡ଼୍‌ ମାର୍‌ଆତ୍‌ ।
JOH 1:45 ପିଲିପ୍‌ ନିତନିଏଲ୍‍ତିଙ୍ଗ୍‍ ପୋୟ୍‍ଜି ୱାନିଙ୍ଗ୍‌ ଇର୍‌ଆନ୍‌, ଆମାୱାନି ବିସୟ୍‌ତାନ୍‌ ମୋସା ନିୟମ୍‌ ବଇଦୁ ରାସ୍‌ତାମାନାନ୍‌, ମାରି ବାବବାଦିର୍ ବା ରାସ୍‌ତାମାନାର୍‌, “ମାପ୍‌ ୱାନିଙ୍ଗ୍‌ ପୋୟ୍‍ତାମାନାପ୍‍; ୱାନ୍‌ ଜୋସେପ୍‌ତି ମାରିସି ନାଜରିତିୟଦି ଜିସୁ ।”
JOH 1:46 ନିତନିଏଲ୍‍ ୱାନିଙ୍ଗ୍‌ ୱେନ୍‌ବାତାନ୍‌, “ନାଜରିତଦାନ୍‍ ନୋ ଇନି ନେଗି ବିସୟ୍‌ ସନା ୱାନାତ୍‌ ନୋ ?” ପିଲିପ୍‌ ୱାନିଙ୍ଗ୍‌ ଇର୍‌ଆନ୍‌, “ୱାଜ ସୁଡ଼ୁଆ ।”
JOH 1:47 ଜିସୁ ନିତନିଏଲ୍‍ତିଙ୍ଗ୍‍ ୱାନି ଲାକ୍‌ତୁ ୱାନିକା ସୁଡ଼ୁଜି ୱାନି ବିସୟ୍‌ତାନ୍‌ ଇର୍‌ଆନ୍‌, “ଇଦି ସୁଡ଼ୁଦୁ, ସତେନେ ଇକାନ୍‌ ଅରେନ୍‍ ଇସ୍ରାଏଲ୍‌ତି ଲୋକୁ, ୱେନିମାନୁ ଇନି ତାଗ୍‌ଇକା ସିଲେତ୍‍ ।”
JOH 1:48 ନିତନିଏଲ୍‍ ୱାନିଙ୍ଗ୍‌ ୱେନ୍‌ବାତାନ୍‌, “ନାଙ୍ଗିଁ ନିନ୍‌ ଏଣ୍ତେସ୍‌ ସିନିସ୍‍କିତି ?” ଜିସୁ ୱାନିଙ୍ଗ୍‌ ଇର୍ହାନ୍‌, “ପିଲିପ୍‌ ନିଙ୍ଗିଁ କୁକ୍‍ନି ଆଗ୍‌ଡ଼ି ନିନ୍‌ ଏସ୍ତିୱାଲେ ତଗା ମାରାନ୍‌ ଆଡ୍‍ଗି ମାର୍ହି, ନାସ୍ତିୱାଲେ ନାନ୍ ନିଙ୍ଗିଁ ସୁଡ଼ୁତାମାର୍ହା ।”
JOH 1:49 ନିତନିଏଲ୍‍ ୱାନିଙ୍ଗ୍‌ ଇର୍ହାନ୍‌, “ଏ ଗୁରୁ, ନିନ୍‌ ମାପୁରୁଦି ମାରିସି, ନିନ୍‌ ଇସ୍ରାଏଲ୍‌ତି ରାଜା ।”
JOH 1:50 ଜିସୁ ୱାନିଙ୍ଗ୍‌ ଇର୍ହାନ୍‌, “ନାନ୍ ନିଙ୍ଗିଁ ତଗା ମାରାନ୍‌ ଆଡ୍‍ଗି ସୁଡ଼ୁତାମାର୍‍ହା ଇଜି ଇର୍ହାଆକା ନୋ ନିନ୍‌ ବିସ୍‌ବାସ୍‌ କିଜିନି ? ନିନ୍‌ ତେନେ ମାଣାନ୍‌ ପେରି ପେରି ବିସୟ୍‌ ସୁଣି ।”
JOH 1:51 ମାରି, ୱାନ୍‌ ୱାନିଙ୍ଗ୍‌ ଇର୍‌ଆନ୍‌, “ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ମିର୍‌ ମୁସ୍‌କୁପୁର୍‌ ରେଆତିକା ମାରି ମାପୁରୁଦି ଦୁତ୍‌କୁ ମନୁସ୍ୟପୁତ୍ରଦି ମୁସ୍‌କୁ ଏକ୍‍ନିକା ନି ରେତାନିକା ସୁଣିଦେର୍‍ ।”
JOH 2:1 ରିନେଟି ୱେନ୍‌କା ଗାଲିଲିଦି କାନା ଗାଡ଼୍‌ତୁ ଉଣ୍ତ୍ରି ପେଡ଼ି ଆଜିମାର୍ହାତ୍‍, ମାରି ଜିସୁରି ଆଇସି ଆବେ ମାର୍‌ଆତ୍‌ ।
JOH 2:2 ଜିସୁ ନି ୱାନି ସିସୁରିଙ୍ଗ୍‌ ବା ଆୟା ପେଡ଼ିଦୁ କୁକ୍‍ତାମାର୍‍ଆର୍‍ ।
JOH 2:3 ଏସ୍ତିୱାଲେ ଅଙ୍ଗୁର୍‍ରସ୍‍ ୱିଜିତେଆକା ଜିସୁରି ଆଇସି ୱାନିଙ୍ଗ୍‌ ଇର୍ହାତ୍‌, “ୱାରି ଅଙ୍ଗୁର୍‍ରସ୍‍ ସିଲୁ ।”
JOH 2:4 ଆବେଟ୍‌ ଜିସୁ ତାନିଙ୍ଗ୍‌ ଇର୍ହାନ୍‌, “ନାଙ୍ଗିଁ ଇନିକା କିଦେଙ୍ଗ୍‌ ଆନାତ୍‌ ନିନ୍‌ ୱେର୍‍ମା, ନା ୱେଡ଼ା ଇୟାସାନ୍ଦି ଇଗା ରେଏଦେ ।”
JOH 2:5 ଜିସୁଦି ଆଇସି ସେବାକିନିୱାରିଙ୍ଗ୍‌ ଇର୍ହାତ୍‌, “ୱାନ୍‌ ମିଙ୍ଗିଁ ଆମାକା ଇନାନ୍‌, ଆକା କିଦୁ ।”
JOH 2:6 ମାରି, ଆବେ ଜିହୁଦିର୍‌ ନର୍‍ବାନି ନିୟମ୍‍ତାନ୍‍ ସଗୋଟା କାଲ୍‍କାଣ୍‍କୁ ତିଆର୍‌ଆତି ପେରି ପେରି ଏର୍‍ କୁଣ୍ତ୍‍କୁ ମାର୍‍ଏ, ୱିଜୁ କୁଣ୍ତ୍‍କାଙ୍ଗ୍‍ଁ ପୁରା ସହେ ଲିଟର ଏର୍‌ ଆସ୍‌ତେଙ୍ଗ୍‌ ଆଟ୍‍ନାତ୍‍ ।
JOH 2:7 ଜିସୁ ସାକର୍‌କାଙ୍ଗ୍‌ ଇର୍‌ଆନ୍‌, କୁଣ୍ତ୍‍କାଙ୍ଗ୍‍ଁ ଏର୍‌ ପୁରା କିଦୁ । ଆବେଟ୍‌ ୱାର୍‌ ଆୟାୱିଜୁ ମୁସ୍‌କୁ ସାନ୍ଦି ପୁରା କିତାର୍‍ ।
JOH 2:8 ମାରି, ୱାନ୍‌ ୱାରିଙ୍ଗ୍‌ ଇର୍‌ଆନ୍‌, ଇଲେଇ ଆନ୍ଦ୍‍ଜି ଅସି ବୋଜିଦି ନେତା ଲାକ୍‌ତୁ ଅତୁ । ଆବେଟ୍‌ ୱାର୍‌ ଅତାର୍‍ ।
JOH 2:9 ବୋଜିଦି ନେତା ଅଙ୍ଗୁର୍‍ରସ୍‍ ଆତିମାର୍‍ଇ ଆୟା ଏର୍‍ତିଙ୍ଗ୍‍ ୱେଡ଼୍‍ଜି ଆକା ଆମାଣ୍‍କୁ ୱାତାତ୍‍, ଇକା ନେସ୍‌ଏପ୍‌ ମାର୍‌ଆନ୍‌ ମାତର୍‌ ଏମେ ସେବାକିନିକାର୍‍ ଏର୍‌ ଆନ୍ଦ୍‌ତା ମାର୍‌ଆର୍‌, ୱାର୍‌ ନେସ୍‍ତାମାର୍‍ଆର୍‍, ଆଦେଙ୍ଗ୍‌ ୱାନ୍‌ ପେଡ଼ିମୁରୁଲିଙ୍ଗ୍‍ କୁକ୍‌ସି ଇର୍‌ଆନ୍‌,
JOH 2:10 “ୱିଜେରେ ପାର୍‌ତୁମ୍‌ ନେଗି ଅଙ୍ଗୁର୍‍ରସ୍‍ ସିନାର୍‍, ମାରି ଲୋକୁ ସସ୍‍ତି ୱେନ୍‌କା ତାଗ୍‍ଇକେଙ୍ଗ୍‍ ସିନାର୍‍; ନିନ୍‌ ଇୟାସାନ୍ଦି ନେଗି ଅଙ୍ଗୁର୍‍ରସ୍‍ ଇଟ୍‌ତିମାନି ।”
JOH 2:11 ଜିସୁ ଇୟାୱାଜା ଗାଲିଲିଦି କାନା ଗାଡ଼୍‌ତୁ ୱାନି ପାର୍‌ତୁମ୍‌ କାବାଆନି ପାଣି ଆରାମ୍‌ କିଜି ନିଜେଦି ମହିମା ତର୍‍ତାନ୍‍, ମାରି ୱାନି ସିସୁର୍‍ ୱାନିବାନୁ ବିସ୍‌ବାସ୍‌ କିତାର୍‍ ।
JOH 2:12 ଇୟା ୱେନ୍‌କା ଜିସୁ ୱାନି ଆଇସି, ତଡ଼ାନ୍‌କୁ ମାରି ସିସୁରିୱାଲେ କପର୍‍ନାହୁମ୍‍ତୁ ସରଆର୍‌; ମାରି, ୱାର୍‌ ଆବେ ନାଣ୍ତ ଦିନ୍‌ ତେବାଏତାର୍‍ ।
JOH 2:13 ନାସ୍ତିୱାଲେ ଜିହୁଦିର୍‌ ନିସ୍ତାର୍‌ ପଣ୍ତୟ୍‌ ଲାକ୍‌ତୁ ଇଗାୱାତା ମାର୍‌ଆତ୍‌, ମାରି ଜିସୁ ଜିରୁସାଲାମ୍‍ତୁ ସର୍‌ଆନ୍‌ ।
JOH 2:14 ମାରି, ଜିସୁ ମନ୍ଦିର୍‌ତୁ ଡ଼ାକ୍‍, ମେଣ୍ଡେଙ୍ଗ୍‌ ମାରି ପାର୍‌ୱେଙ୍ଗ୍‌ ପୋର୍‍ନିୱାରିଙ୍ଗ୍‍ ମାରି ଡାବୁଙ୍ଗୁଁ ପର୍‍ନିୱାରିଙ୍ଗ୍‍ ବାସ୍‍ତିମାରିକା ସୁଡ଼ୁତାନ୍‌ ।
JOH 2:15 ଆବେଟ୍‌ ୱାନ୍‌ ନାସ୍‍ତାନ୍‍ ଉଣ୍ତ୍ରି କରଡ଼ା ତିଆର୍‌ କିଜି ମେଣ୍ଡେଙ୍ଗ୍‌ ନି ଡ଼ାକାୱାଲେ ୱିଜେରିଙ୍ଗ୍‍ ମନ୍ଦିର୍‌ତାନ୍‌ ସପ୍‌ତା ସିତାନ୍‌ । ମାରି, ଡାବୁଙ୍ଗୁଁ ପର୍‌ନିୱାରି ଡାବୁଙ୍ଗୁଁ ଆଡ୍‍ଗି ୱିତ୍‍ସିପକ୍‍ସି ୱାରି ଟେବୁଲ୍‍ଙ୍ଗୁଁ ମାର୍‍ତାପକ୍‍ତାନ୍‍ ।
JOH 2:16 ମାରି, ୱାନ୍‌ ପାର୍‌ୱେଙ୍ଗ୍‌ ପର୍‍ନିୱାରିଙ୍ଗ୍‍ ଇର୍‌ଆନ୍‌, ଇକେଙ୍ଗ୍‍ ୱିଜୁ ଇବେଟ୍‌କୁ ଅତୁ, ନା ବୁବାଦି ଇଲ୍‍ତିଙ୍ଗ୍‍ କଣି ପର୍‌ନି ଇଲୁ କିମାଟ୍‌ ।
JOH 2:17 ଇକା ସୁଡ଼୍‌ଜି ୱାନି ସିସୁର୍‍ ସାସ୍ତ୍ରଦୁ ରାସାତାମାନାତ୍‌ ଇଜି ଏତ୍‍କିତାର୍‍, ମାପୁରୁ “ନି ଇଲୁଦିଙ୍ଗ୍‍ ନା ଦ୍ୟାନ୍‍, ନା ଲୋଇ ସିସୁ କାସ୍‍ନି ୱାଜା ଆଜିନାତ୍‍ ।”
JOH 2:18 ଆବେଟ୍‌ ଜିହୁଦିର୍‌ ପେରିକାର୍‌ ଡ଼େସିୱାଜି ଜିସୁଦି ଲାକ୍‌ତୁ ଡ଼େସିୱାଜି ଇୟା ପ୍ରସ୍ନ ୱେନ୍‌ବାତାର୍‌, “ନିନ୍‌ ଜେ ଇୟାୱିଜୁ ପାଣି କିଦେଙ୍ଗ୍‌ ଇଜି ଅଦିକାର୍‌ ପୋୟ୍‍ତିମାନି ଇଜି ମାପ୍‌ ଏଣ୍ତେସ୍‌ ନେସ୍‌ନାପ୍‌ ? ମାଙ୍ଗିଁ ଏମେ ସିନା ଦାନ୍‌ ତର୍‍ସିନି ?”
JOH 2:19 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ଇୟା ମନ୍ଦିର୍‌ତିଙ୍ଗ୍‌ ରୁକ୍‍ତୁ, ମାରି ମୁନେନ୍‌ ଲୋଇ ନାନ୍ ଆକା ପେର୍‍ନା ।”
JOH 2:20 ଆବେଟ୍‌ ଜିହୁଦିର୍‌ ଇର୍ହାର୍‌, “ଇୟା ମନ୍ଦିର୍‌ ତିଆର୍‌ କିଦେଙ୍ଗ୍‌ ଇଜି ସାଲିସ୍‍ ସୋ ବାର୍‍ସେକ୍‍ ଆସ୍‍ତା ମାର୍‍ଆତ୍‍; ମାରି ନିନ୍‌ ଇନିକା ତାନିଙ୍ଗ୍‌ ମୁନେଟାନ୍‍ ପେର୍‍ନି ?”
JOH 2:21 ମାତର୍‌ ଜିସୁ ନିଜେଦି ମେନ୍ଦଲ୍‌ରୁପ୍‍ତି ମନ୍ଦିର୍‌ ସୁଡ଼ୁଜି ମନ୍ଦିର ବିସୟ୍‌ତାନ୍‌ ଇଜିମାର୍‍ଆନ୍‍ ।
JOH 2:22 ଆବେଟ୍‌ ୱାନ୍‌ ସାତିମାଣ୍‌କୁ ନିଙ୍ଗିଁତି ୱେନ୍‌କା ୱାନି ସିସୁର୍‍ ୱାନ୍‌ ଇକା ଇର୍ହାମାର୍ହାନ୍‌ ଇଜି ଏତ୍‍କିତାର୍‍; ମାରି, ୱାର୍‌ ଦାର୍ମୁସାସ୍ତ୍ର ନି ଜିସୁ ଇର୍‍ଇମାର୍‍ଇ ମାଟା ବିସ୍‌ବାସ୍‌ କିତାର୍‍ ।
JOH 2:23 ନିସ୍ତାର୍‍ ପଣ୍ତୟ୍‌ ଆନିୱାଲେ ଜିସୁ ଜିରୁସାଲମ୍‌ତୁ ମାନିୱାଲେ ନାଣ୍ତ ଲୋକୁ ୱାନ୍‌ କିତି କାବାଆନି ପାଣିଙ୍ଗ୍‍ୱିଜୁ ସୁଡ଼ୁଜି ୱାନି ଦର୍‌ତାନ୍‌ ବିସ୍‌ବାସ୍‌ କିତାର୍‍ ।
JOH 2:24 ମାତର୍‌ ଜିସୁ ୱାରି ମୁସ୍‌କୁ ବିସ୍‌ବାସ୍‌ କିଏଣ୍‍ଗା ୱାରି ମାଣ୍‌କୁ ନିଜେଦିଙ୍ଗ୍‍ ୱେରେହେ ଇଟ୍‌ତାନ୍‌, ଇରିଙ୍ଗ୍‌ ୱାନ୍‌ ୱିଜେରିଙ୍ଗ୍‍ ନେସ୍‌ସି ମାର୍‌ଆନ୍‌ ।
JOH 2:25 ମାରି, ଏନ୍‌ ଜେ ଲୋକା ବିସୟ୍‌ତାନ୍‌ ସାକି ସିନାନ୍‍, ଇକା ୱାନି ଦର୍‌କାର୍‌ ସିଲେତାତ୍‍, ଇରିଙ୍ଗ୍‌ ଲୋକା ଜିବନ୍‌ତୁ ଇନିକା ମାନାତ୍‌, ଆକା ୱାନ୍‌ ନିଜେ ନେସ୍‌ସି ମାର୍‌ଆନ୍‌ ।
JOH 3:1 ପାରୁସିର୍ ଲୋଇ ନିକଦିମ ଦର୍‍ତି ଅରେନ୍‍ ଲୋକୁ ମାର୍‌ଆନ୍‌, ୱାନ୍‌ ଜିହୁଦିରି ଅରେନ୍‍ ନେତା ମାର୍ହାନ୍‍ ।
JOH 3:2 ୱାନ୍‌ ନାଡ଼ା ସମୟତୁ ଜିସୁଦି ଲାକ୍‌ତୁ ୱାଜି ୱାନିଙ୍ଗ୍‌ ଇର୍‌ଆନ୍‌, ଏ ଗୁରୁ, ନିନ୍‌ ଜେ ମାପୁରୁ ମାଣ୍‌କୁ ୱାତିମାନି, ଇକା ମାପ୍‌ ନେସ୍‌ନାପ୍‌, ଇରିଙ୍ଗ୍‌ ନିନ୍‌ ଇୟା ଏମେ ୱିଜୁ କାବାଆନି ପାଣି କିଜିନି, ମାପୁରୁ ନିୱାଲେ ସିଲେତିଙ୍ଗ୍‍ ଆୟାୱିଜୁ ଏନ୍‌ କିଦେଙ୍ଗ୍‌ ଆଟ୍‍ଏନ୍‍ ।
JOH 3:3 ଜିସୁ ୱାନିଙ୍ଗ୍‌ ଇର୍ହାନ୍‌, “ସତ୍‌ ସତ୍‌ ନାନ୍ ନିଙ୍ଗିଁ ଇଜିନା, ମାରିଡ଼େସି ଜନମ୍‍ ଆଏତିଙ୍ଗ୍‍ ଏନ୍‌ ମାପୁରୁଦି ରାଜି ସୁଡ଼ୁଦେଙ୍ଗ୍‍ ଆଟ୍‍ଏନ୍‍ ।”
JOH 3:4 ନିକଦିମ ଜିସୁଙ୍ଗୁଁ ୱେନ୍‌ବାତାନ୍‌, “ଡକ୍ରା ଆତିଙ୍ଗ୍‌ ଲୋକୁ ଏଣ୍ତେସ୍‌ କିଜି ଜନମ୍‍ ଆଦେଙ୍ଗ୍‌ ଆଟ୍‍ନାନ୍‍ ? ୱାନ୍‌ ଇନିକା ରିଜା ନିଜେଦି ଆଇସି ପଟାଦୁ ଡ଼ୁଗୁଜି ଜନମ୍‍ ଆନାନ୍‌ ?”
JOH 3:5 ଜିସୁ ଇର୍‌ଆନ୍‌, ସତ୍‌ ସତ୍‌ ନାନ୍ ନିଙ୍ଗିଁ ଇଜିନା, “ଏର୍‌ ନି ଆତ୍ମାଦାନ୍‌ ଜନମ୍‌ ଆଏତିଙ୍ଗ୍‍ ଏନ୍‌ ମାପୁରୁଦି ରାଜିଦୁ ଡ଼ୁଗୁଦେଙ୍ଗ୍‍ ଆଟ୍‍ଏନ୍‍ ।
JOH 3:6 ମେନ୍ଦଲ୍‌ତାନ୍‌ ଆମାକା ଜନମ୍‍, ଆକା ମେନ୍ଦଲ୍‍ତିକା; ମାରି, ଆତ୍ମାଦାନ୍‌ ଆମାକା ଜନମ୍‍, ଆକା ଆତ୍ମାଦିକା ।
JOH 3:7 ନିଙ୍ଗିଁ ଜେ ମାରିଡ଼େସି ଜନମ୍‌ ଆଦେଙ୍ଗ୍‌ ଆନାତ୍‌ ଇଜି ନାନ୍ ଜେ ନିଙ୍ଗିଁ ଇର୍‌ଆ, ଆବେନ୍‌ କାବା ଆମା ।
JOH 3:8 ଗାଲି ଆମା ତରିନ୍‍ ବଦାକିନାତ୍‍, ଆୟା ତରିନ୍‍ ସନାତ୍‌, ମାରି ମିର୍‌ ତାନି ବଲ୍ ୱେନିଦେର୍‍, ମାତର୍‌ ଆକା ଆମାଟ୍‍କୁ ୱାନାତ୍‌ ମାରି ଏମେ ସନାଟ୍‌, ଆକା ନେସ୍‌ଇଦେର୍‌; ଆତ୍ମାଦାନ୍‌ ଜନମ୍‌ ଆତି ୱିଜେରି ଲୋକୁ ଆୟାୱାଜା ।”
JOH 3:9 ନିକଦିମ ଜିସୁଙ୍ଗୁଁ ଇର୍ହାନ୍‌, “ଇୟାୱିଜୁ ଏଣ୍ତେସ୍‌ ଆଦେଙ୍ଗ୍‌ ଆଟ୍‍ନାତ୍‍ ?”
JOH 3:10 ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଇସ୍ରାଏଲ୍‌ତି ଅରେନ୍‍ ଗୁରୁ ଆଜି ବା ଇନିକା ଇୟାୱିଜୁ ବୁଜାଇଜିନି ?
JOH 3:11 ନାନ୍ ନିଙ୍ଗିଁ ସତ୍‌ ସତ୍‌ ଇଜିନା, ମାପ୍‌ ଆମାକା ନେସ୍‌ନାପ୍‌, ଆକା ଇନାପ୍‍, ମାରି ଆମାକା ସୁଡ଼ୁତାମାନାପ୍‍, ଆୟା ବିସୟ୍‌ତାନ୍‌ ସାକି ସିନାପ୍‍, ମାରି ମିର୍‌ ମା ସାକି ମାନାଇଜିନିଦେର୍‌ ।
JOH 3:12 ନାନ୍ ମିଙ୍ଗିଁ ଦୁନିଆଦି ବିସୟ୍‌ ୱେର୍‌ତିଙ୍ଗ୍‌ ଜଦି ମିର୍‌ ବିସ୍‌ବାସ୍‌ କିଇଦେର୍‍, ଆରିଙ୍ଗ୍‌ ମିଙ୍ଗିଁ ମୁସ୍‌କୁପୁର୍‌ତି ବିସୟ୍‌ ୱେର୍‌ତିଙ୍ଗ୍‌ ଏଣ୍ତେସ୍‌ ବିସ୍‌ବାସ୍‌ କିନିଦେର୍‍ ?
JOH 3:13 ଏମେ ମନୁସ୍ୟପୁତ୍ର ମୁସ୍‌କୁପୁର୍‌ତାନ୍‌ ରେତାତାନ୍‍, ୱାନିଙ୍ଗ୍‌ ଡ଼ିସ୍‍ତିଙ୍ଗ୍‍ ମାରି ଏନ୍‍ବା ମୁସ୍‌କୁପୁର୍‌ତୁ ସଲ୍‍ଏର୍‍ ।”
JOH 3:14 ମାରି, ମୋସା ଏଣ୍ତେସ୍‌ ସୁନ୍‌ସାନ୍‌ବାଡିଦୁ ସାରାସ୍‌ତିଙ୍ଗ୍‌ ମୁଣ୍ତାଦୁ ମୁସ୍‌କୁ ପେର୍‌ତାମାର୍ହାର୍‌, ମନୁସ୍ୟପୁତ୍ର ବା ଆୟାୱାଜା ମୁସ୍‌କୁ ପେରାନାନ୍‌,
JOH 3:15 ଏଣ୍ତେସ୍‌ ଏନ୍‌ଆପିନ୍‌ ୱାନିମାନୁ ବିସ୍‌ବାସ୍‌ କିନାନ୍‌, ୱାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପଇନାନ୍‌ ।
JOH 3:16 ଇରିଙ୍ଗ୍‌ ମାପୁରୁ ଇୟା ଜଗତ୍‌ତିଙ୍ଗ୍‌ ନିସା ଜିବନ୍‌ ନତାନ୍‌ ଜେ, ୱାନ୍‌ ନିଜେଦି ଅରେନ୍‌ ମାରିନ୍‌ତିଙ୍ଗ୍‌ ସିତାନ୍‌, ଏଣ୍ତେସ୍‌ ଏନ୍‌ଆପିନ୍‌ ୱାନିମାନୁ ବିସ୍‌ବାସ୍‌ କିନାନ୍‌, ୱାନ୍‌ ନାସ୍ଟୁ ଆଏଣ୍ତା ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପଇନାନ୍‌ ।
JOH 3:17 ମାପୁରୁ ୱାନି ମାରିନ୍‍ତିଙ୍ଗ୍‍ ଦୁନିଆଦୁ ବିସାର୍‌ କିନି ଉଣ୍ତିଙ୍ଗ୍‌ ପକ୍‍ଏନ୍‍, ମାତର୍‌ ଦୁନିଆ ଏଣ୍ତେସ୍‌ ୱାନି ମାଣାନ୍‌ ରକିୟା ଆନାତ୍‌, ଇୟାଉଣ୍ତିଙ୍ଗ୍‌ ପୋକ୍‌ତାମାନାନ୍‌ ।
JOH 3:18 ଏନ୍‌ ମାରିନ୍‍ମାନୁ ବିସ୍‌ବାସ୍‌ କିନାନ୍‌, ୱାନ୍‌ ବିସାର୍‌ କିଆୟ୍‌ଆଏନ୍‌; ଏନ୍‌ ବିସ୍‌ବାସ୍‌ କିଏନ୍‌, ୱାନ୍‌ ବିସାର୍‌ ଆତା ୱିଜିତାନ୍‌ନି, ଇରିଙ୍ଗ୍‌ ୱାନ୍‌ ମାପୁରୁଦି ଅରେନ୍‌ ମାରିନ୍‌ତି ଦର୍‌ତାନ୍‌ ବିସ୍‌ବାସ୍‌ କିଏନ୍‌ ।
JOH 3:19 ମାରି, ଆୟା ବିସାର୍‌ ଇୟା, ଜଗତ୍‌ତଦୁ ଜାୟ୍‌ ତରିତା ମାନାତ୍‌, ମାରି ଲୋକୁ ଜାୟ୍‌ତି ବାଦୁଲୁ ସିକାଟିଦିଙ୍ଗ୍‌ ବଦା କିତାର୍‌, ଇରିଙ୍ଗ୍‌ ୱାରି ପାଣିୱିଜୁ ତାଗିଇକା ।
JOH 3:20 ଇରିଙ୍ଗ୍‌ ଏନ୍‌ ତାଗିଇପାଣି କିନାନ୍‌, ୱାନ୍‌ ଜାୟ୍‌ତିଙ୍ଗ୍‌ କାଡ଼୍‌ନାନ୍‌, ମାରି ଆତିଙ୍ଗ୍‌ ୱାନି ପାଣିଦି ଦୋସ୍‌ ତରାନାତ୍‌, ଇୟାଉଣ୍ତିଙ୍ଗ୍‌ ୱାନ୍‌ ଜାୟ୍‌ ଲାକ୍‌ତୁ ରେଏନ୍‌ ।
JOH 3:21 ମାତର୍‌ ଏନ୍‌ ନେଗିପାଣି କିନାନ୍‍, ଏଣ୍ତେସ୍‌ ୱାନ୍‌ କିତିମାନି ପାଣିୱିଜୁ ମାପୁରୁଦି ବଦାଦାନ୍ କିତାନ୍‍ ଇଜି ତରାନାତ୍‍, ଆୟାଉଣ୍ତିଙ୍ଗ୍‌ ୱାନ୍‌ ଜାୟ୍‌ ଲାକ୍‌ତୁ ୱାନାନ୍‌ ।
JOH 3:22 ତାନେୱେନ୍‌କା ଜିସୁ ମାରି ୱାନି ସିସୁର୍‍ ଜିହୁଦା ଦେସ୍‌ତୁ ସର୍ହାର୍‌, ମାରି ୱାନ୍‌ ଆୟାବାଡିଦୁ ୱାରି ୱାଲେ ମାନ୍‌ଜି ଡୁବନ୍‌ ସିଦେଙ୍ଗ୍‍ ଆସ୍‌ତାନ୍‌ ।
JOH 3:23 ଜୋହନ୍‍ ବା ସାଲମ ଲାକ୍‌ତୁରି ଏନୋନଦୁ ଡୁବନ୍‌ ସିଜିମାର୍ହାନ୍‌, ଇରିଙ୍ଗ୍‌ ଆୟା ବାଡିଦୁ ନାଣ୍ତ ଏରୁ ମାରେଏ, ମାରି ଲୋକୁ ୱାଜି ଡୁବନ୍‌ ଅସିମାର୍ହାର୍‍ ।
JOH 3:24 ଜୋହନ୍‍ ଆୟା ସାନ୍ଦି ଜଇଲ୍‌ତୁ ତେବାଏତା ମାର୍ହାନ୍‌ ।
JOH 3:25 ଆୟାମାନୁ ନେଗେନ୍‌ଆନିପାଣିଦି ବିସୟ୍‌ତାନ୍‌ ଜୋହନ୍‌ତି ଏସ ସିସୁରି ତରିଟାନ୍‌ ଅରେନ୍‍ ଜିହୁଦି ୱାଲେ ଆସ୍‌ସିସାତାର୍‌ ।
JOH 3:26 ମାରି, ୱାର୍‌ ଜୋହନ୍‌ତି ଲାକ୍‌ତୁ ସଲ୍‌ସି ୱାନିଙ୍ଗ୍‌ ଇର୍ହାର୍‌, ଏ ଗୁରୁ, ଏନ୍‌ ଜର୍ଦନ ଗାଡାଦି ଆୟା ପାଡ଼୍‌କା ନି ୱାଲେ ମାର୍ହାନ୍‌, ଆମାୱାନି ବିସୟ୍‌ତାନ୍‌ ନିନ୍‌ ସାକ୍ୟ ସିତିମାନି, ସୁଡ଼ୁଆ, ୱାନ୍‌ ଡୁବନ୍‌ ସିଜିନାନ୍‌ ମାରି ୱିଜେରେ ୱାନି ଲାକ୍‌ତୁ ସଲ୍‌ସିନାର୍‌ ।
JOH 3:27 ଜୋହନ୍‍ ଇର୍ହାନ୍‌, ମାପୁରୁ ସିଏତିଙ୍ଗ୍‌ ଲୋକୁ ଇନିକା ପ‍ଇଦେଙ୍ଗ୍‌ ଆଟ୍‍ଏନ୍‍ ।
JOH 3:28 ନାନ୍ ଜେ କ୍ରିସ୍ତ ଆଏ, ମାତର୍‌ ୱାନି ଆଗ୍‌ଡ଼ି ୱାତା ମାନା, ଇକା ନାନ୍ ଇର୍‌ଆମାର୍ହା ଇଜି ମିର୍‌ ନିଜେନିଜେ ନା ସାକି ।
JOH 3:29 ଏନ୍‌ ଆଇଲି ତାନାନ୍‌, ୱାନ୍‌ କାନ୍ୟାମୁରୁଲି, ମାତର୍‌ କାନ୍ୟାମୁରୁଲିଦି ଏମେ ସଙ୍ଗ୍‍ ଲାକ୍‌ତୁ ନିନାନ୍‌ନୋ ୱାନି ମାଟା ୱେନାନ୍‌, ୱାନ୍‌ କାନ୍ୟାମୁରୁଲିଦି ବଲୁ ଉଣ୍ତିଙ୍ଗ୍‌ ନାଣ୍ତ ୱେଡ଼ିକାଆନାନ୍‌ । ମାରି, ଇୟାୱାଜା ନା ଇୟା ୱେଡ଼ିକା ପୁରା ଆତାମାନାତ୍‍ ।
JOH 3:30 ୱାନିଙ୍ଗ୍‌ ଏଣ୍ତେସ୍‌ବା ପିର୍‌ଦେଙ୍ଗ୍‌ ପଡ଼ାନାତ୍‌, ମାତର୍‌ ନାଙ୍ଗିଁ ଉଣା ଆଦେଙ୍ଗ୍‌ ମାନାତ୍‌ ।
JOH 3:31 ଏନ୍‌ ମୁସ୍‌କୁରାନ୍‌ ୱାନାନ୍‌, ୱାନ୍‌ ୱିଜେରିମାଣ୍‌କୁ ପେରିକାନ୍‌, ଏନ୍‌ ଦୁନିଆଦାନ୍‍ ୱାନାନ୍‌, ୱାନ୍‌ ଦୁନିଆଦିକାନ୍‍, ମାରି ୱାନ୍‌ ଦୁନିଆଦି ମାଟା ଇନାନ୍‌; ଏନ୍‌ ମୁସ୍‌କୁପୁରୁତାନ୍‌ ୱାନାନ୍‌, ୱାନ୍‌ ୱିଜେରିମାଣ୍‌କୁ ପେରିକାନ୍‌ ।
JOH 3:32 ୱାନ୍‌ ଆମାକା ସୁଡ଼ୁତାମାନାନ୍‌ ମାରି ୱେରାମାନାନ୍‌, ଆୟା ବିସୟ୍‌ତାନ୍‌ ୱାନ୍‌ ସାକିୟ ସିନାନ୍‌, ମାତର୍‌ ୱାନି ସାକିୟ ଏନ୍‌ ମାନାଏନ୍‌ ।
JOH 3:33 ଏନ୍‌ ୱାନି ସାକିୟ ମାନାତା ମାନାନ୍‌, ମାପୁରୁ ଜେ ସତ୍‌, ଇକା ୱାନ୍‌ ପାରାମାଣ୍‌ କିତାମାନାନ୍‌ ।
JOH 3:34 ଇରିଙ୍ଗ୍‌ ମାପୁରୁ ଆମାୱାନିଙ୍ଗ୍‌ ପୋକ୍‌ତାତା ମାନାନ୍‌, ୱାନ୍‌ ମାପୁରୁଦି ବାକ୍ୟ ଇନାନ୍‌, ଇରିଙ୍ଗ୍‌ ମାପୁରୁ ୱାନିଙ୍ଗ୍‌ ପୁରାଦାନ୍‌ ୱାନି ଆତ୍ମା ସିନାନ୍‍ ।
JOH 3:35 ବୁବା ମାରିନ୍‌ତିଙ୍ଗ୍‌ ଜିବନ୍‌ନୋନାନ୍‌, ମାରି ୱିଜୁ ବିସୟ୍‌ ୱାନି କିୟୁଦୁ ସର୍ପେ କିତାମାନାର୍‌ ।
JOH 3:36 ଏନ୍‌ ମାରିନ୍‌ତିଙ୍ଗ୍‌ ବିସ୍‌ବାସ୍‌ କିନାନ୍‌, ୱାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପଇନାନ୍‌, ମାତର୍‌ ଏନ୍‌ ମାରିନ୍‌ତିଙ୍ଗ୍‌ ଅମାନ୍ୟ କିନାନ୍, ୱାନ୍‌ ଜିବନ୍‌ ସୁଡ଼ୁଏନ୍‌, ମାରି ଆୟା ଲୋକୁ ମୁସ୍‌କୁ ମାପୁରୁଦି ରିସା ତେବାତାନ୍‌ ।
JOH 4:1 ଜିସୁ ଜେ ଜୋହନତି ବାଦ୍‌ଲୁ ନାଣ୍ତ ସିସୁର୍‍ କିଜିନାନ୍‌ ମାରି ୱାରିଙ୍ଗ୍‌ ଡୁବନ୍‌ ସିଜିନାନ୍‌ ଇଜି ପାରୁସିର୍‌ ୱେର୍‌ଆର୍‌ ।
JOH 4:2 ଜଦିବା ଜିସୁ ନିଜେନେ ଡୁବନ୍‌ ସିଏଜିମାର୍ହାନ୍‌, ୱାନି ସିସୁର୍‍ ସିଜିମାର୍ହାର୍‌ ।
JOH 4:3 ଇକା ପାରୁସିର୍‌ ୱେର୍‌ସିନାର୍‌ ଇଜି ଏସ୍ତିୱାଲେ ଜିସୁ ୱେର୍‌ଆନ୍‌, ନାସ୍ତିୱାଲେ ୱାନ୍‌ ଜିହୁଦା ଦେସ୍‌ ଡ଼ିସ୍‌ସିତାନ୍‌ନୋ ମାରିଡ଼େସି ଗାଲିଲିଦୁ ସର୍ହାନ୍‌ ।
JOH 4:4 ସମିରୋଣ ନାଡ଼୍‍ମି ସାରି ସିଜି ୱାନିଙ୍ଗ୍‌ ସନ୍‌ଡ଼୍ରେଙ୍ଗ୍‌ ପଡ଼ାତାତ୍‌ ।
JOH 4:5 ଆଦେଙ୍ଗ୍‌ ୱାନ୍‌ ସଲ୍‌ସି ଜାକୁବ ନିଜେଦି ମାରିନ୍‌ ଜୋସେପ୍‌ତିଙ୍ଗ୍‌ ଆମା ବୁମିକାଣ୍ତେକ୍‌ ଦାନ୍‌ ସିତାମାର୍ହାନ୍‌, ଆବେଣି ଲାକ୍‌ତୁରି ସମିରୋଣଦି ସୁକାର ଦର୍‌ତି ଉଣ୍ତ୍ରି ନାର୍‍ତୁ ଇତାନ୍‌;
JOH 4:6 ଆୟା ବାଡିଦୁ ଜାକୁବଦି କୁଇକାଲ୍‌ ମାର୍ହାତ୍‌ । ମାରି, ଜିସୁ ବୁଲାଜି ବୁଲାଜି ୱାଦିତାନୋ ଆୟା କୁଇକାଲ୍‌ ଲାକ୍‌ତୁ ବାସ୍‌ତାନ୍‌ । ନାସ୍ତିୱାଲେ ମାଦ୍‍ଲାମ୍‍ୱେଡ଼ା ଆତାମାର୍ହାତ୍‌ ।
JOH 4:7 ଅରେତ୍‌ ସମିରୋଣିୟା ଆଇମା ଏରୁ ଅତେଙ୍ଗ୍‌ ୱାତାତ୍‍, ଜିସୁ ତାନିଙ୍ଗ୍‌ ଇର୍ହାନ୍‌, ନାଙ୍ଗିଁ ଏରୁ ଉଣ୍ତେଙ୍ଗ୍‌ ସିଦା ।
JOH 4:8 ନାସ୍ତିୱାଲେ ୱାନି ସିସୁର୍‍ ଉଣ୍ତେଙ୍ଗ୍‌ କାଦି କଣ୍ତେଙ୍ଗ୍‌ ଗାଡ଼୍‌ତୁ ସର୍‍ହାମାର୍ହାର୍‌ ।
JOH 4:9 ଆବେଟ୍‌ ସମିରୋଣିୟା ଆଇମା ଜିସୁଙ୍ଗୁଁ ଇର୍ହାତ୍‌, ନିନ୍‌ ଅରେନ୍‍ ଜିହୁଦି ମାରି ନାନ୍ ସମିରୋଣିୟା ଏଣ୍ତେସ୍‌ ନା କିୟୁଦାନ୍‌ ଏର୍‌ ଉଣ୍ତେଙ୍ଗ୍‌ ଲସ୍‌ସିନି ? ଇରିଙ୍ଗ୍‌ ସମିରୋଣିୟରି ୱାଲେ ଜିହୁଦିର୍‌ ମିସାଜିସାଏର୍‌ ।
JOH 4:10 ଜିସୁ ତାନିଙ୍ଗ୍‌ ଇର୍ହାନ୍‌, ମାପୁରୁ ଇନିକା ସିଦେଙ୍ଗ୍‍ ଆଟ୍‍ନାନ୍‍, ନିନ୍‌ ଜଦି ନେସ୍‍ତିମାନ୍ଦି ମାରି ଏନ୍‌ ନି କିୟୁଦାନ୍‌ ଏର୍‌ ଉଣ୍ତେଙ୍ଗ୍‌ ବଦାକିଜିନାନ୍‌ ଆରିଙ୍ଗ୍‌ ଜଦି ନିନ୍‌ ୱାନିଙ୍ଗ୍‌ ଲସ୍‌ତିମାନ୍ଦି, ମାରି ୱାନ୍‌ ନିଙ୍ଗିଁ ଜିବନ୍‌ତି ଏରୁ ସିତାନ୍‌ମାନ୍ଦି ।
JOH 4:11 ଆୟା ଆଇମା ୱାନିଙ୍ଗ୍‌ ଇର୍ହାତ୍‌, ଆଜ୍ଞା, ଏରୁ ଆନ୍‌ନି ଉଣ୍ତିଙ୍ଗ୍‌ ନି ଲାକ୍‌ତୁ ଇନି ଗିନା ବା ସିଲେତ୍‍, ମାରି କୁଇକାଲ୍‌ ତୋ ନାଣ୍ତ ଆଡ୍‍ଗି; ଆଦେଙ୍ଗ୍‌ ନିନ୍‌ ଏମେମାଣ୍‌କୁ ଆୟା ଜିବନ୍‌ତି ଏରୁ ପଇତିମାନି ?
JOH 4:12 ମା ଏମେ ପୁର୍ବେଦି ଡକ୍ରାଦାଦା ଜାକୁବ୍‌ ମାଙ୍ଗିଁ ଇୟା କୁଇକାଲ୍‌ ସିତାମାର୍ହାନ୍‌, ମାରି ନିଜେ, ମାରି ୱାନି କଡ଼ର୍‌ ମାରି ଜାତୁଙ୍ଗ୍‌ମାନ୍ଦା ଇବେଣ୍‌କୁ ଉଟେ ମାର୍‌ଏ, ୱାନିମାଣ୍‌କୁ ଇନିକା ନିନ୍‌ ପେରିକିନ୍ଦା ?
JOH 4:13 ଜିସୁ ତାନେଙ୍ଗ୍‌ ଇର୍ହାନ୍‌, ଏନ୍‌ଆପିନ୍‌ ଇୟା ଏରୁ ଉଣାନ୍‌, ୱାନ୍‌ ମାରିଡ଼େସି ଏର୍‍କିଆନାନ୍‌;
JOH 4:14 ମାତର୍‌ ନାନ୍ ଏମେ ଏରୁ ସିନା, ଆକା ଏନ୍‌ଆପିନ୍‌ ଉଣାନ୍‌, ୱାନ୍‌ ଏସ୍‌କାଙ୍ଗ୍‌ବା ଏର୍‌କିସାଏନ୍‌, ମାରି ନାନ୍ ସିଜିମାନି ଏର୍‌ ୱାନି ଜିବନ୍‌ତୁ ଉଣ୍ତ୍ରି ଜିବନ୍‌ ସିନି ୱାଙ୍ଗ୍‍ଁନି ୱାଜା ଆନାତ୍‌ । ଆବେଟ୍‌କୁ ଉଟିଙ୍ଗ୍‍ ୱାନ୍‌ ଏସ୍‍କାଙ୍ଗ୍‍ୱିଜ୍‍ଇ ଜିବନ୍‌ ପୋଇନାନ୍‌ ।
JOH 4:15 ଆଇମା ୱାନିଙ୍ଗ୍‌ ଇର୍ହାତ୍‌, ଆଜ୍ଞା, ଆୟାଉଣ୍ତିଙ୍ଗ୍‌ ନାଙ୍ଗିଁ ଆୟା ଏର୍‌ ସିଦା, ନାଙ୍ଗିଁ ଏଣ୍ତେସ୍‌ ଏର୍‌କି କାଟ୍‌ଏତ୍‌, ମାରି ଏରୁ ଆନ୍‌ନି ଉଣ୍ତିଙ୍ଗ୍‌ ନିସା ଆକ ସାରି ଇବେନୁ ୱାଦେଙ୍ଗ୍‌ ପଡ଼ାଏତ୍‌ ।
JOH 4:16 ଜିସୁ ତାନେଙ୍ଗ୍‌ ଇର୍ହାନ୍‌, “ସାଙ୍ଗ୍ଆ, ନି କୋନ୍‌ଲିଙ୍ଗ୍‌ କୁକ୍‌ସ ଇବେନୁ ତାଗା ।”
JOH 4:17 ଆଇମା ୱାନିଙ୍ଗ୍‌ ଇର୍ହାତ୍‌, ନା କୋନ୍‌ଲି ସିଲେନ୍‌ । ଜିସୁ ତାନେଙ୍ଗ୍‌ ଇର୍ହାନ୍‌, ନା କୋନ୍‌ଲି ସିଲେନ୍‌ ଇଜି, ସତ୍‌ ୱେର୍‌ତି;
JOH 4:18 ଇରିଙ୍ଗ୍‌ ନି କୋନ୍‌ଲିର୍‌ ପାସ୍‌ଲୋକ୍‌ ମାର୍ହାର୍‌, ମାରି ଇଲେଇ ନିନ୍‌ ଆମାୱାନିୱାଲେ ମାନି, ମାରି ନି ଲାକ୍‌ତୁ ଏନ୍‌ ମାନାନ୍‌, ଇକା ସତ୍‌ ୱେର୍‌ତିମାନି ।
JOH 4:19 ଆଇମା ୱାନିଙ୍ଗ୍‌ ଇର୍ହାତ୍‌, ଆଜ୍ଞା, ନିନ୍‌ ଜେ ଅରେନ୍‍ ବାବବାଦି, ଇକା ନାନୁ ସୁଡ଼ୁଦେଙ୍ଗ୍‍ ଆଟ୍‍ସିନା ।
JOH 4:20 ମା ପୁର୍ବେଦିଡକ୍‌ରାଦାଦାର୍‌ ଇୟା ଗରନ୍‌ତୁ ଉପାସନା କିତାର୍‌, ମାରି, ମିର୍‌ ଜିହୁଦିର୍‌ ଇଜିନିଦେର୍‌, ଏମେ ବାଡିଦୁ ଉପାସନା କିନି ନିୟମ୍‌, ଆକା ଜିରୁସାଲାମ୍‌ ମନ୍ଦିର ।
JOH 4:21 ଜିସୁ ତାନିଙ୍ଗ୍‌ ଇର୍‌ଆନ୍‌, ଏ ଆଇମା, ନା ମାଟା ବିସ୍‌ବାସ୍‌ କିଆ, ଇୟାୱାଜା ସମୟ ୱାଜିନାତ୍‍, ଏମେ ସମୟତୁ ମିର୍‌ ଇୟା ଗରନ୍‌ତୁ ମାରି ଜିରୁସାଲାମ୍‌ତୁ ବୁବାଦି ଉପାସନା କିଇଦେର୍‍ ।
JOH 4:22 ମିର୍‌ ସମିରୋଣିୟର୍‍ ଆମାୱାନିଙ୍ଗ୍‌ ସତ୍‌ତାନ୍‌ ନେସ୍‌ଇଦେର୍‌, ଆକା ଉପାସନା କିଜିମାନିଦେର୍‍; ମାତର୍‌ ମାପ୍‌ ଜିହୁଦିର୍‌ ଆମାୱାନିଙ୍ଗ୍‌ ନେସ୍‌ନାପ୍‌, ୱାନି ଉପାସନା କିଜିମାନାପ୍‍, ଇରିଙ୍ଗ୍‌ ରକିୟା ଜିହୁଦିର୍‌ ମାଣ୍‌କୁ ୱାନାତ୍‌ ।
JOH 4:23 ମାତର୍‌ ଏମେ ସମୟତୁ ସତ୍‌ ଉପାସନା କିନିକାର୍‍ ଆତ୍ମାଦୁ ନି ସତ୍‌ତାନ୍‌ ବୁବାଦି ଉପାସନା କିନାର୍‌, ଆୟାୱାଜା ସମୟ୍ ୱାଜିନାତ୍‍; ମାରି, ଇଲେଇବା ଇଗା ୱାତାତ୍‍; ଇରିଙ୍ଗ୍‌ ବୁବା ଇୟାୱାଜା ଉପାସନା କିନିୱାରିଙ୍ଗ୍‍ ବଦାକିନାନ୍‌ ।
JOH 4:24 ମାପୁରୁ ଆତ୍ମା, ମାରି କେବଲ୍‌ ଆତ୍ମାଦି ସାକ୍ତି ନି ସତ୍‌ତାନ୍‌ ୱାନି ଉପାସନା କିନିକାର୍‍ ୱାନି ଉପାସନା କିଦେଙ୍ଗ୍ ଆଟ୍‍ନାର୍‍ ।
JOH 4:25 ଆଇମା ଜିସୁଙ୍ଗୁଁ ଇର୍ହାତ୍‌, “ମସିହ, ଆମାୱାନିଙ୍ଗ୍‌ କ୍ରିସ୍ତ ଇନାର୍‌, ୱାନ୍‌ ୱାଜିନାନ୍‍ ଇଜି ନାନ୍ ନେସ୍‌ନା; ଏସ୍ତିୱାଲେ ୱାନ୍‌ ୱାନାନ୍‌, ୱାନ୍‌ ମାଙ୍ଗିଁ ୱିଜୁ ବିସୟ୍‌ ୱେର୍‌ନାନ୍‌ ।”
JOH 4:26 ଜିସୁ ତାନିଙ୍ଗ୍‌ ଇର୍‌ଆନ୍‌, “ନି ୱାଲେ ୱାର୍‍ଗିଜିନା ଜେ ନାନ୍, ନାନ୍ ଆୟାକାନ୍‌ ।”
JOH 4:27 ନାସ୍ତିୱାଲେ ଜିସୁଦି ସିସୁର୍‍ ୱାଜି ୱାନ୍‌ ଅରେତ୍‌ ଆଇମାଦି ୱାଲେ ୱାର୍‌ଗିସାନିକା ସୁଡ଼ୁଜି କାବା ଆତାର୍‌, “ଆତିବା ନିନ୍‌ ଇନିକା ବଦାକିନି, ମାରି ଏନ୍ଦା ତାନି ୱାଲେ ୱାର୍‍ଗିଜିନାନ୍‍, ଇକା ଏନ୍‌ ଜିସୁଙ୍ଗୁଁ ୱେନ୍‍ବାଦେଙ୍ଗ୍‍ ସାସ୍‌ କିଏତାର୍‌ ।”
JOH 4:28 ଆବେଟ୍‌ ଆୟା ଆଇମା ନିଜେଦି ଏର୍‌ ସାଟି ଇଡ୍‌ଜି ଗାଡ଼୍‌ତୁ ସଲ୍‌ସି ଲୋକାଙ୍ଗ୍‌ ଇର୍ହାତ୍‌,
JOH 4:29 “ରାଦୁ, ଅରେନ୍‍ୱାନିଙ୍ଗ୍‍ ସୁଣିଦେର୍‍, ନାନ୍ ଆମା ଆମାକା କିତାମାନା, ଆୟାୱିଜୁ ୱାନ୍‌ ନାଙ୍ଗିଁ ଇର୍‌ଆନ୍‌, ୱାନ୍‌ ଏମୋ କ୍ରିସ୍ତ ଆନାନ୍‌ ସୁଜି ?”
JOH 4:30 ଆବେଟ୍‌ ଲୋକୁ ଗାଡ଼୍‌ତାନ୍‍ ସହସି ୱାନି ଲାକ୍‌ତୁ ସନ୍‌ଡ଼୍ରେଙ୍ଗ୍‌ ଆସ୍‌ତାନ୍‌ ।
JOH 4:31 ଆୟାଦାପ୍ରେ ସିସୁର୍‍ ଜିସୁଙ୍ଗୁଁ ମାଡ଼ିସ୍‌ କିତାର୍‌, “ଏ ଗୁରୁ, କାଣ୍ତେକ୍‍ ଉଣୁଆ ।”
JOH 4:32 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ଉଣ୍ତେଙ୍ଗ୍‌ ଇଜି ଏମେ କାଦି ନାବାନ୍‍ ମାନାତ୍‌, ଆୟା ବିସୟ୍‌ତାନ୍‌ ମିର୍‌ ଇନିକା ନେସ୍‌ଇଦେର୍‌ ।”
JOH 4:33 ଆବେଟ୍‌ ସିସୁର୍‍ ତାମେଲୋଇ ୱାର୍‍ଗିଦେଙ୍ଗ୍‍ ଆସ୍‌ତାର୍‌, “ଏନ୍‌ ୱାନିଙ୍ଗ୍‌ କାଦି ତାତା ସିତା ମାନାନ୍‌ ସୁଗି ?”
JOH 4:34 ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାଙ୍ଗିଁ ପକ୍‍ତିମାନିୱାନିଦି ବଦା ପୁରା କିଦେଙ୍ଗ୍‌ ମାରି ୱାନି ସିତିମାନି ପାଣିୱିଜୁ ୱିସ୍‍ତେଙ୍ଗ୍‍ ଇକାନେ ନା କାଦି ।
JOH 4:35 ମିର୍‌ ଇଜିମାନିଦେର୍‍, ପାସି କୟ୍‍ଦେଙ୍ଗ୍‍ ମାରି ନାଲ୍‍ଗି ଲେଜ୍‌କୁ ମାନେ, ମାତର୍‌ ନାନ୍ ମିଙ୍ଗିଁ ଇଜିନା, ପାସି କିଡ଼ିଇ ଆଙ୍ଗ୍‍ଁ ନେଗେନ୍‌ କିଜି ସୁଡ଼ୁଦୁ; ଆୟାୱିଜୁ କୟ୍‍ଦେଙ୍ଗ୍‍ ଇଜି ପାଣ୍ତିତେନି ।
JOH 4:36 ଇଲେଇବା କୟ୍‍ନିକାନ୍‍ ମୁଲ୍‌ ପୟ୍‍ଜିନାନ୍‍ ମାରି ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ଉଣ୍ତିଙ୍ଗ୍‌ ପଲ୍‌ ଉଣ୍ତା କିଜିନା, ଏଣ୍ତେସ୍‌ ୱିତ୍‍ନିକାନ୍‍ ମାରି କୟ୍‍ନିକାନ୍‍ ରିଏର୍‌ ମିସାଜି ୱେଡ଼ିକା କିନାର୍‌ ।
JOH 4:37 ଇରିଙ୍ଗ୍‌ ଅରେନ୍‍ ୱିତ୍‍ନାନ୍‍ ମାରି ଆଇକାନ୍‍ କୟ୍‍ନାନ୍‍, ଇୟା ମାଟା ସତ୍‌ ।
JOH 4:38 ମିର୍‌ ଆମା ଉଣ୍ତିଙ୍ଗ୍‌ ପାଣି କିଇଦେର୍‍, ଆକା କୟ୍‍ଦେଙ୍ଗ୍‍ ଇଜି ନାନ୍ ମିଙ୍ଗିଁ ପକ୍‍ତା; ଆଇକାର୍‌ ପାଣିକିତାମାନାର୍‍, ମାରି ମିର୍‌ ୱାରି ପାଣିକିତି ପଲ୍‌ ପୟ୍‌ଜିନିଦେର୍‌ ।”
JOH 4:39 ନାନ୍ ଆମା ଆମାକା କିତାମାନା, ଆୟାୱିଜୁ ୱାନ୍‌ ନାଙ୍ଗିଁ ଇର୍‌ଆନ୍‌ ଇଜି ଏମେ ଆଇମା ସାକି ସିତାମାର୍‍ଆତ୍‍, ତାନି ମାଟା ଉଣ୍ତିଙ୍ଗ୍‌ ଆୟା ଗାଡ଼୍‌ତି ସମିରୋଣଦି ଲୋକା ଲୋଇ ନାଣ୍ତ ଲୋକୁ ଜିସୁମାନୁ ବିସ୍‌ବାସ୍‌ କିତାର୍‍ ।
JOH 4:40 ମାରି ସମିରୋଣୟଦି ଲୋକୁ ୱାନି ଲାକ୍‌ତୁ ୱାଜି ୱାରି ୱାଲେ ତେବାଦେଙ୍ଗ୍‍ ଇଜି ୱାନିଙ୍ଗ୍‌ ମାଡ଼ିସ୍‌ କିତାର୍‍, ମାରି ୱାନ୍‌ ରିନେନ୍‍ ଆୟା ବାଡିଦୁ ତେବାତାନ୍‌ ।
JOH 4:41 ମାରି ଜିସୁଦି ବାକ୍ୟ ୱେନ୍‌ଞ୍ଜି ମାରି ନାଣ୍ତ ଲୋକୁ ବିସ୍‌ବାସ୍‌ କିତାର୍‍,
JOH 4:42 ମାରି, ୱାର୍‌ ଆୟା ଆଇମାଦିଙ୍ଗ୍‍ ଇର୍ହାର୍‌, “ଇଲେଇ ନି ମାଟାଦି ଉଣ୍ତିଙ୍ଗ୍‌ ମାପ୍‌ ବିସ୍‌ବାସ୍‌ କିଏପ୍‍, ଇରିଙ୍ଗ୍‌ ମାପ୍‌ ନିଜେନିଜେ ୱେର୍‍ଆମାନାପ୍‍, ମାରି ଇକାନ୍‌ ଜେ ସତେନେ ଦୁନିଆଦି ରକିୟା କିନିକାନ୍‍, ଇକା ମାପ୍‌ ନେସ୍‌ତାମାନାପ୍‌ ।”
JOH 4:43 ରିନେନ୍‍ ୱେନ୍‌କା ଜିସୁ ଆବେଟ୍‌ତାନ୍‌ ସହସି ଗାଲିଲିଦୁ ସର୍‌ଆନ୍‌ ।
JOH 4:44 ଇରିଙ୍ଗ୍‌ ବାବବାଦି ନିଜେଦି ଦେସ୍‌ତୁ ସମ୍ମାନ୍‍ ପୟ୍‌ଏର୍‌ ଇଜି ଜିସୁ ନିଜେ ସାକି ସିତାମାର୍‍ଆନ୍‍ ।
JOH 4:45 ମାରି, ୱାନ୍‌ ଗାଲିଲିଦୁ ଇଗା ୱାତାନ୍‌, ନିସ୍ତାର ପଣ୍ତୟ୍‌ତିୱାଲେ ୱାନ୍‌ ଜିରୁସାଲାମ୍‍ତୁ ଇନି ଇନିକା କିତାମାର୍‍ଆନ୍‍, ଆୟାୱିଜୁ ସୁଡ଼ୁତାମାର୍‍ଆର୍‍ଆକା ଗାଲିଲିଦିକାର୍‍ ୱାନିଙ୍ଗ୍‌ ମାନାତାର୍‍, ଇରିଙ୍ଗ୍‌ ୱାନ୍‌ ବା ପଣ୍ତୟ୍‌ତୁ ସର୍‍ଆମାର୍‍ଆନ୍‍ ।
JOH 4:46 ଆବେଟ୍‌ ଗାଲିଲିଦି ଆମା କାନା ଗାଡ଼୍‌ତୁ ୱାନ୍‌ ଏର୍‍ତିଙ୍ଗ୍‍ ଅଙ୍ଗୁର୍‍ରସ୍‍ କିତାମାର୍‍ଆନ୍‍, ଆୟା ବାଡିଦୁ ଜିସୁ ମାରିଡ଼େସି ସର୍ହାନ୍‌ । ମାରି ଆବେନ୍‌ ଅରେନ୍‍ ରାଜାଦି ପାଣିକିନିକାନ୍‌ ମାର୍ହାନ୍‌, ୱାନି ମାରିସି କପର୍‍ନାହୁମ୍‍ତୁ ନବ୍‌ ଆତାମାର୍‍ଆନ୍‍ ।
JOH 4:47 ଜିସୁ ଜିହୁଦା ଦେସ୍‍ତାନ୍‍ ଗାଲିଲିଦୁ ସତାୱାତାମାନାନ୍‍, ଇକା ୱେନ୍‌ଜି ୱାନ୍‌ ୱାନି ଲାକ୍‌ତୁ ସଲ୍‌ସି ୱାନ୍‌ ଏଣ୍ତେସ୍‌ ୱାଜି ୱାନି ମାରିସିଙ୍ଗ୍‌ ନେଗେଣ୍ତ୍‍ କିନାନ୍‌, ଆୟାଉଣ୍ତିଙ୍ଗ୍‌ ୱାନିଙ୍ଗ୍‌ ମାଡ଼ିସ୍‌ତେଙ୍ଗ୍‍ ଆସ୍‌ତାନ୍‌, ଇରିଙ୍ଗ୍‌ ୱାନ୍‌ ସାନିୱାଜା ଆତାମାର୍‍ଆନ୍‍ ।
JOH 4:48 ଆବେଟ୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, “ସିନା ନି କାବାଆନିପାଣିଙ୍ଗ୍‍ଁ ସୁଡ଼ୁଏତିଙ୍ଗ୍‍ ମିର୍‌ ଏଣ୍ତେସ୍‌ବା ବିସ୍‌ବାସ୍‌ କିଇଦେର୍‍ ।”
JOH 4:49 ରାଜାଦି ପାଣିକିନିକାନ୍‌ ଜିସୁଙ୍ଗୁଁ ଇର୍‌ଆନ୍‌, “ଏ ଗୁରୁ,” ନା କଡ଼ ସାନି ଆଗ୍‍ଡ଼ିନେ ରାଆ ।
JOH 4:50 ଜିସୁ ୱାନିଙ୍ଗ୍‌ ଇର୍‌ଆନ୍‌, ସାଙ୍ଗ୍‍ଆ, ନି କଡ଼ ଜିତାନ୍‍ନି । ଆୟା ଲୋକୁ ଜିସୁ ୱେର୍‍ତିମାନି ମାଟାଦିଙ୍ଗ୍‌ ବିସ୍‌ବାସ୍‌ କିଜି ସର୍‌ଆନ୍‌ ।
JOH 4:51 ମାରି, ୱାନ୍‌ ସଲ୍‍ପୁ ସଲ୍‍ପୁ ତାନି ଗତିମୁରୁଲିରି ୱାନିଙ୍ଗ୍‌ ବେଟ୍‍ବୁଡ଼ାଜି ୱାନି କଡ଼ ଜିତାନ୍‍ନି ଇଜି ଇର୍ହାର୍‌ ।
JOH 4:52 ଆଦେଙ୍ଗ୍‌ ଏସ୍ତିୱାଲେ ୱାନି କଡ଼ଦିଙ୍ଗ୍‌ ନବ୍‌ ଡ଼ିସ୍‍ତାତ୍‍, ଆକା ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌ । ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, “ଇଏନ୍‌ ଗନ୍‍ଣ୍ଟେ ୱେଡ଼ାଦୁ ୱାନିଙ୍ଗ୍‌ ନବ୍‌ ଡ଼ିସ୍‍ତାତ୍‍ ।”
JOH 4:53 ଆବେଟ୍‌ ୱାନି ବୁବାସି ବୁଜାତାନ୍‍ ଜେ, ଜିସୁ ଏସ୍ତିୱାଲେ ନି କଡ଼ ଜିତାନ୍‍ନି ଇଜି ୱାନିଙ୍ଗ୍‌ ଇର୍‌ଆମାର୍‌ଆନ୍‌, ଟିକ୍‌ ନାସ୍ତିୱାଲେ ଇୟା ଗଟାନା ଗଟାତାତ୍‍ । ମାରି, ୱାନ୍‌ ନିଜେ ନି ୱାନି ୱିଜୁ ଇଲୁଦିକାର୍‍ ଜିସୁଙ୍ଗୁଁ ବିସ୍‌ବାସ୍‌ କିତାର୍‍ ।
JOH 4:54 ଜିହୁଦାଦାନ୍‍ ମାରିଡ଼େସି ଗାଲିଲିଦୁ ୱାତି ୱେନ୍‌କା ଇକା ଜିସୁଦି ମାରିଅର୍ସୁ କାବାଆନି ପାଣି ।
JOH 5:1 ଇୟା ୱେନ୍‌କା ଜିହୁଦିର୍‌ ଉଣ୍ତ୍ରି ପଣ୍ତୟ୍‌ ୱାତାତ୍‍, ମାରି ଜିସୁ ଜିରୁସାଲମ୍‌ତୁ ସର୍ହାନ୍‌ ।
JOH 5:2 ଜିରୁସାଲାମ୍‌ତି ମେଣ୍ତାସେର୍‌ଲା ଲାକ୍‌ତୁ ଉଣ୍ତ୍ରି ସେରୁ ମାର୍ହାତ୍‌; ଏବ୍ରି ବାସାଦାନ୍‍ ତାନିଙ୍ଗ୍‌ ବେତେସ୍‍ଦା ଇଜି ଇନାର୍‌, ତାନି ପାସ୍‌ଗୋଟା ଗୁଡିକାଲ୍‌କୁ ମାନେ ।
JOH 5:3 ଆୟା ଗୁଡିକାଲ୍‍କାଙ୍ଗ୍‍ ମୁସ୍‌କୁ ନାଣ୍ତ ନବ୍‍ଆତିକାର୍‍, କାଣାର୍‌, ସଟାର୍‍ ମାରି କିକୁକାଲ୍‍କୁ ୱାର୍‍ତିକାର୍‍ ମାନ୍‌ଜିମାର୍ହାର୍‌ । ୱାର୍‌ ଏର୍‍ଦୁଙ୍ଗ୍‍ଁନିକା କାପ୍‌କିଜି ମାନ୍‌ଜିମାର୍ହାର୍‌ ।
JOH 5:4 ଇରିଙ୍ଗ୍‌ ଏସୋ ଏସୋ ସମୟତୁ ପ୍ରବୁଦି ଅରେତ୍‌ ଦୁତ୍‍ ଇସ୍ରିଗାଡା ରେତାଜି ଏର୍‍ତିଙ୍ଗ୍‍ ଦୁକ୍‍ସିମାର୍ହାତ୍‌, ମାରି ଏର୍‌ ଦୁଙ୍ଗ୍‍ଁତି ୱେନ୍‌କା ଏନ୍‌ ଆଗ୍‌ଡ଼ି ଆବେ ଡ଼ୁଗୁଜି ମାର୍‌ଆନ୍‌, ୱାନ୍‌ ଏମେ ରୋଗ୍‍ତୁ ଆସ୍‍ତିମାରିଙ୍ଗ୍‌ ବା ନେଗେନ୍‌ ଆଜିମାର୍ହାର୍‌ ।
JOH 5:5 ଆବେ ତିରିସ୍‍ଆଟ୍‍ ବାର୍‍ସେକ୍‍ ସାନ୍ଦି ରୋଗ୍‍ଆସ୍‍ତି ଅରେନ୍‍ ଲୋକୁ ମାର୍‌ଆନ୍‌ ।
JOH 5:6 ଜିସୁ ୱାନିଙ୍ଗ୍‌ ଆବେମାନିକା ସୁଡ଼ୁଜି ନାଣ୍ତ ବାର୍‍ସେକ୍‍ତି ରୋଗି ଲୋକୁ ଇଜି ନେସ୍‌ସି ୱାନିଙ୍ଗ୍‌ ୱେନ୍‌ବାତାନ୍‌, “ନିନ୍‌ ଇନିକା ନେଗେନ୍‌ ଆଦେଙ୍ଗ୍‌ ବଦା କିଜିନି ?”
JOH 5:7 ରୋଗ୍‌ ଲୋକୁ ଜିସୁଙ୍ଗୁଁ ଇର୍‌ଆନ୍‌, “ଆଜ୍ଞା, ଏର୍‌ ଦୁଙ୍ଗିଁନିୱାଲେ ନାଙ୍ଗିଁ ସେରୁ ଲୋଇ ଅତେଙ୍ଗ୍‌ ଇଜିନା ଏନ୍‌ ସିଲେନ୍‌; ମାରି, ନାନ୍ ସଲ୍‍ପୁ ସଲ୍‍ପୁ ଆଇକାନ୍‍ ନା ଆଗ୍‌ଡ଼ି ଡ଼ୁଗ୍‍ଜିନାନ୍‍ ।”
JOH 5:8 ଜିସୁ ୱାନିଙ୍ଗ୍‌ ଇର୍‌ଆନ୍‌, “ନିଙ୍ଗ୍‍ଆ, ନି ଟାଟି ଆସ୍‌ସି, ମି ଇଣ୍ତ୍ରସାଙ୍ଗ୍‍ଆ ।”
JOH 5:9 ଆୟାଦାପ୍ରେ ଆୟା ଲୋକୁ ନେଗେଣ୍ତ୍‍ ଆତାନ୍‌ ମାରି ନିଜେଦି କାଟେଲ୍‍ ଆସ୍‌ସି ବୁଲାଦେଙ୍ଗ୍‌ ଆସ୍‌ତାନ୍‌ । ଆୟାଦିନ୍‍ ରମ୍‍ନିଦିନ୍‍ ମାର୍ହାତ୍‌ ।
JOH 5:10 ଆୟାଉଣ୍ତିଙ୍ଗ୍‌ ଜିହୁଦିର୍‌ ନେଗେଣ୍ତ୍‌ ଆତି ଲୋକ୍‌ତିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ନେର୍‌ ରମ୍‍ନିଦିନ୍‍, କାଟେଲ୍‍ ପିଣ୍ତ୍‍ଜି ସନ୍‌ଡ଼୍ରେଙ୍ଗ୍‌ ନି ନିୟମ୍‌ ସିଲେତ୍‌ ।
JOH 5:11 ମାତର୍‌, ୱାନ୍‌ ୱାରିଙ୍ଗ୍‌ ଇର୍‌ଆନ୍‌, “ଏନ୍‌ ନାଙ୍ଗିଁ ନେଗେଣ୍ତ୍‍ କିତାନ୍‌, ୱାନ୍‌ ନାଙ୍ଗିଁ ଇର୍‌ଆନ୍‌, ନି କାଟେଲ୍‍ ଆସ୍‍ସୋ ବୁଲାଆ ।”
JOH 5:12 ୱାର୍‌ ୱାନିଙ୍ଗ୍‌ ୱେନ୍‍ବାତାର୍‌, “ନି କାଟେଲ୍‍ ଆସ୍‍ସୋ ବୁଲାଆ ଇଜି ଏନ୍‌ ନିଙ୍ଗିଁ ଇର୍‌ଆନ୍‌, ଆୟା ଲୋକୁ ଏନ୍‌ ?”
JOH 5:13 ମାତର୍‌ ଜିସୁ ଏନ୍‌, ଆକା ଆୟା ନେଗେଣ୍ତ୍‍ ଆତିମାର୍‍ଇ ଲୋକୁ ନେସ୍‌ଏପ୍‌ ମାର୍‌ଆନ୍‌, ଇରିଙ୍ଗ୍‌ ଆୟା ବାଡିଦୁ ଲୋକୁ ଗଲି ମାର୍ହାର୍‌ଆକା ଜିସୁ ୱେର୍‌ଏ ଏର୍‌ଜି ସର୍‍ହାମାର୍‍ଆନ୍‍ ।
JOH 5:14 ତାନିୱେନ୍‍କା ଜିସୁ ମନ୍ଦିର୍‌ତୁ ୱାନିଙ୍ଗ୍‌ ତରାଜି ୱାନିଙ୍ଗ୍‌ ଇର୍‌ଆନ୍‌, ସୁଡ଼ୁଆ, ନିନ୍‌ ନେଗେଣ୍ତ୍‍ ଆତିମାନି, ମାରି ପାପ୍‌ କିମା, ସିଲ୍‍ତିଙ୍ଗ୍‍ ନି ଉଣ୍ତିଙ୍ଗ୍‌ ମାରି ନାଣ୍ତ କାସ୍ଟୁ ୱାନାତ୍‌ ।
JOH 5:15 ଆୟା ଲୋକୁ ସୋଲ୍‌ସି, ଏନ୍‌ ୱାନିଙ୍ଗ୍‌ ନେଗେଣ୍ତ୍‍ କିତାମାର୍‍ଆନ୍‍, ୱାନ୍‌ ଜିସୁ ଇଜି ଜିହୁଦିର୍‌ ପେରିୱାରିଙ୍ଗ୍‍ ଇର୍ହାନ୍‌ ।
JOH 5:16 ଆବେଟ୍‌ ଜିସୁ ରମ୍‍ନିଦିନ୍‍ତୁ ଇକା କିତାମାର୍ହାନ୍‌ଆକା ଜିହୁଦିର୍‌ ୱାନିଙ୍ଗ୍‌ ନିଦା କିଦେଙ୍ଗ୍‌ ଆସ୍‌ତାର୍‌ ।
JOH 5:17 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ନା ବୁବା ୱିଜୁୱାଲେ ପାଣି କିଜିନାନ୍‍, ମାରି ନାନ୍ ବା କିଜିନା ।”
JOH 5:18 ଇୟାଉଣ୍ତିଙ୍ଗ୍‌ ଜିହୁଦିର୍‌ ପେରିକାର୍‌ ୱାନିଙ୍ଗ୍‌ କାତ୍‍ତେଙ୍ଗ୍‍ ଇଜି ମାରି ନାଣ୍ତ ବଦା କିଦେଙ୍ଗ୍‌ ଆସ୍‌ତାର୍‌, ଇରିଙ୍ଗ୍‌ ୱାନ୍‌ ଜେ ରମ୍‍ନିଦିନ୍‍ତି ନିୟମ୍‌ ମାନାଏଜିମାର୍ହାନ୍‍, କେବଲ୍‌ ଆକାନେ ସିଲେ, ମାତର୍‌ ମାପୁରୁଙ୍ଗୁଁ ନିଜେଦି ବୁବା ଇଜି ଇନ୍‌ଞ୍ଜି ୱାନ୍‌ ନିଜେଦିଙ୍ଗ୍‍ ମାପୁରୁୱାଲେ ସାମାନ୍‍ କିଜିମାର୍ହାନ୍‍ ।
JOH 5:19 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ମାରିସି ନିଜେ ଇନିକା କିଦେଙ୍ଗ୍‌ ଆଟ୍‍ଏନ୍‍, ୱାନି ବୁବା ଆମାକା କିନାନ୍‌, ମାରିସି ବା ଆକା ସୁଡ଼ୁଜି ଆୟାୱିଜୁ କିନାନ୍‌ ।
JOH 5:20 ଇରିଙ୍ଗ୍‌ ବୁବା ମାରିସିଙ୍ଗ୍‌ ଲାଡ୍‌ କିନାନ୍‌, ମାରି ନିଜେ ଆମାକା କିନାନ୍‌, ଆୟାୱିଜୁ ୱାନିଙ୍ଗ୍‌ ତର୍‍ନାନ୍‍, ମାରି ୱେନିମାଣାନ୍‍ ମାରି ପେରି ପାଣିଙ୍ଗ୍‍ୱିଜୁ କିନି ଉଣ୍ତିଙ୍ଗ୍‌ ୱାନ୍‌ ୱାନିଙ୍ଗ୍‌ ତର୍‍ନାନ୍‍, ମାରି ମିର୍‌ ୱିଜେରେ କାବା ଆନିଦେର୍‌ ।
JOH 5:21 ମାରି ବୁବା ଏଣ୍ତେସ୍‌ ସାତିୱାରିଙ୍ଗ୍‍ ନିକ୍‍ସି ଜିବନ୍‌ ସିନାନ୍‍, ଆୟାୱାଜା ମାରିସି ବା ଆମାୱାନିଙ୍ଗ୍‌ ବଦାକିନାନ୍‌, ୱାନିଙ୍ଗ୍‌ ଜିବନ୍‌ସିନାନ୍‍ ।
JOH 5:22 ମାରି, ବୁବା ନିଜେ ଏଙ୍ଗ୍‌ ବିସାର୍‌ କିଏନ୍‍, ମାତର୍‌ ନିଜେ ମାରିସିଙ୍ଗ୍‌ ୱିଜୁ ବିସାର୍‌ କିନି ଅଦିକାର୍‌ ସିତାମାନାନ୍‌ ।
JOH 5:23 ଆୟାଉଣ୍ତିଙ୍ଗ୍‌ ଏଣ୍ତେସ୍‌ ବୁବେଙ୍ଗ୍‌ ମାନାନାର୍‌, ମାରିସିଙ୍ଗ୍‌ ବା ଆୟାୱାଜା ୱିଜେରେ ମାନାନାର୍‌ । ମାତର୍‌ ଏନ୍‌ ମାରିସିଙ୍ଗ୍‌ ମାନାଏନ୍‌, ୱାନିଙ୍ଗ୍‌ ପୋକ୍‍ତିମାନି ବୁବେଙ୍ଗ୍‌ ବା ୱାନ୍‌ ମାନାଏନ୍‌ ।
JOH 5:24 ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ଏନ୍‌ ନା ବାକ୍ୟ ୱେନ୍‌ଜି ନା ପୋକ୍‍ତାତିୱାନିଙ୍ଗ୍‍ ବିସ୍‌ବାସ୍‌ କିନାନ୍, ୱାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‌ତାମାନାନ୍‌, ମାରି ୱାନ୍‌ ବିସାର୍‌ ଆଏଣ୍ତା ମାତର୍‌ ୱାନ୍‌ ସାନିତାନେଙ୍ଗ୍‍ ଜିଣାଜି ଜିବନ୍‌ତୁ ଡ଼ୁଗିତାମାନାନ୍‍ ।
JOH 5:25 ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ଇୟାୱାଜା ସମୟ ୱାଜିନାତ୍‍, ମାରି ଇଲେଇବା ଇଗା ୱାତାତ୍‍, ଏମେୱାଲେ ସାତିକାର୍‍ ମାପୁରୁଦି ମାରିସିଦି ବଲ୍ ୱେନାର୍‌, ମାରି ଏମେକାର୍‌ ୱେନାର୍‌, ୱାର୍‌ ଜିବନ୍‌ ଆନାର୍‌ ।
JOH 5:26 ଇରିଙ୍ଗ୍‌ ବୁବା ଏଣ୍ତେସ୍‌ ଜିବନ୍‌ତି ମୁଲ୍‌, ମାରିସିଙ୍ଗ୍‌ ବା ଆୟାୱାଜା ୱାନ୍‌ ଜିବନ୍‌ତି ମୁଲ୍‌ କିତାମାନାନ୍‍;
JOH 5:27 ମାରି, ୱାନ୍‌ ମନୁସ୍ୟପୁତ୍ର ଆକା ୱାନ୍‌ ୱାନିଙ୍ଗ୍‌ ବିସାର୍‌ କିଦେଙ୍ଗ୍‌ ଅଦିକାର୍‌ ସିତାମାନାନ୍‌ ।
JOH 5:28 ଆବେ କାବା ଆମାଟ୍‌, ଇରିଙ୍ଗ୍‌ ଇୟାୱାଜା ସମୟ ୱାଜିନାତ୍‍, ଏସ୍ତିୱାଲେ ସାତିକାର୍‍ ୱିଜେରେ ୱାନି ବଲ୍ ୱେନାର୍‌
JOH 5:29 ମାରି ଦୁକିଦାନ୍‍ ମାରିଡ଼େସି ନିଙ୍ଗିଁଜି ୱାନାର୍‌, ଏମେକାର୍‌ ନେଗି ପାଣି କିତାମାନାର୍‍, ୱାର୍‌ ଜିବନ୍‌ ପୟ୍‌ଜି ନିଙ୍ଗିଁନାର୍‍ ମାରି ଜିନାର୍‍ ମାରି ଏମେକାର୍‌ ତାଗ୍‌ଇପାଣି କିତାମାନାର୍‍, ୱାର୍‌ ନିଙ୍ଗିଁଜି ଦଣ୍ତ୍‌ ପୟ୍‌ନାର୍‌ ।
JOH 5:30 ନାନ୍ ନା ନିଜେଦି ସାକ୍ତିଦାନ୍ ଇନିକା କିଦେଙ୍ଗ୍‌ ଆଟ୍‍ଏ; କେବଲ୍‌ ମାପୁରୁଦି ଆଦେସ୍‍ତାନ୍‍ ବିସାର୍‌ କିନା, ମାରି ନା ବିସାର୍‌ ଟିକ୍‌, ଇରିଙ୍ଗ୍‌ ନାନ୍ ନିଜେଦି ବଦା ସାଲାକିଦେଙ୍ଗ୍‍ ବଦା କିଏନ୍‍ଣ୍ତା ନାଙ୍ଗିଁ ପୋକ୍‍ତାତିୱାନିନ୍ଦି ବଦା ସାଲାକିଦେଙ୍ଗ୍‍ ବଦାକିନା ।
JOH 5:31 ଜଦି ନାନ୍ ନା ନିଜେଦି ବିସୟ୍‌ତାନ୍‌ ନିଜେ ସାକି ସିନା, ଆରିଙ୍ଗ୍‌ ନା ସାକି ସତ୍‌ତି ପାର୍‌ମାଣ୍‌ ଆଏତ୍‍ ।
JOH 5:32 ନା ତରିନ୍‌ ଏନ୍‌ ସାକି ସିନାନ୍‍, ୱାନ୍‌ ମାରି ଅରେନ୍‍; ମାରି ନା ବିସୟ୍‌ତାନ୍‌ ୱାନି ସାକି ଜେ ସତ୍‌, ଆକା ନାନ୍ ନେସ୍‌ନା ।
JOH 5:33 ମିର୍‌ ଜୋହନତି ଲାକ୍‌ତୁ କାବୁର୍‌ ଅନିୱାରିଙ୍ଗ୍‍ ପୋକ୍‍ତିମାନିଦେର୍‍ ମାରି ୱାନ୍‌ ସତ୍‌ ତରିଟାନ୍‍ ସାକି ସିତାମାନାନ୍‌ ।
JOH 5:34 ମାତର୍‌ ନାନ୍ ଲୋକାମାଣ୍‌କୁ ସାକିୟ ଅଏ, ମାତର୍‌ ମିର୍‌ ଏଣ୍ତେସ୍‌ ରକିୟା ପୟ୍‌ନିଦେର୍‌, ଆୟାଉଣ୍ତିଙ୍ଗ୍‌ ଇୟାୱିଜୁ ଇଜିନା ।
JOH 5:35 ଜୋହନ୍‍ କାସ୍‍ସି ମାରି ଜାୟ୍‍ଆନି ଦିୱାୱାଜା ମାର୍ହାନ୍‌, ମାରି ମିର୍‌ ସାଣେକ୍‌ତି ୱାନି ଜାୟ୍‍ତୁ ୱେଡ଼ିକା କିନି ଉଣ୍ତିଙ୍ଗ୍‌ ବଦା କିତିଦେର୍‍ ।
JOH 5:36 ମାତର୍‌ ଜୋହନତି ସାକି ବାଦ୍‌ଲୁ ନା ନାଣ୍ତଅଦିକାର୍‍ତି ସାକି ମାନାତ୍‌, ଇରିଙ୍ଗ୍‌ ବୁବା ନାଙ୍ଗିଁ ଏମେ ଏମେ ପାଣି ୱିସ୍‍ତେଙ୍ଗ୍‍ ସିତାମାନାନ୍‌, ଆୟାୱିଜୁ ପାଣି ନାନ୍ କିଜିନା, ବୁବା ନାଙ୍ଗିଁ ପକ୍‍ତାମାନାନ୍‍ ଇଜି ଆୟାୱିଜୁ ନା ବିସୟ୍‌ତାନ୍‌ ସାକି ସିଜିନିଦେର୍‌ ।
JOH 5:37 ମାରି, ଏମେ ବୁବା ନାଙ୍ଗିଁ ପକ୍‌ତାନ୍‌, ୱାନ୍‌ ନା ବିସୟ୍‌ତାନ୍‌ ସାକି ସିତାମାନାନ୍‌ । ମିର୍‌ ଏସାଙ୍ଗ୍‍ ବା ୱାନି ବଲ୍ ୱେନ୍‍ଇଦେର୍‍ କି ୱାନି ମକମ୍‌ ସୁଡ଼ୁଇଦେର୍‍ ।
JOH 5:38 ମାରି ୱାନି ବାକ୍ୟ ଉଣ୍ତିଙ୍ଗ୍‌ ମି ଜିବନ୍‌ତୁ ବାଡି ସିଇଦେର୍‍, ଇରିଙ୍ଗ୍‌ ୱାନ୍‌ ଆମାୱାନିଙ୍ଗ୍‌ ପକ୍‌ତାନ୍‌, ୱାନିଙ୍ଗ୍‌ ମିର୍‌ ବିସ୍‌ବାସ୍‌ କିଇଜିନିଦେର୍‍ ।
JOH 5:39 ମିର୍‌ ଦାର୍ମୁସାସ୍ତ୍ର ପୟ୍‌ଜିନିଦେର୍‌, ଇରିଙ୍ଗ୍‌ ଆବେଟ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‍ନାପ୍‍ ଇଜି ଅଡ଼୍‍ବିଜିନିଦେର୍‍, ମାରି, ଆୟା ଦାର୍ମୁସାସ୍ତ୍ର ନା ବିସୟ୍‌ତାନ୍‌ ସାକି ସିଜିନାତ୍‍ ।
JOH 5:40 ମାତର୍‌ ମିର୍‌ ଜିବନ୍‌ ପୟ୍‌ଦେଙ୍ଗ୍‌ ଇଜିନା ଲାକ୍‌ତୁ ୱାଦେଙ୍ଗ୍‌ ବଦା କିଇଜିନିଦେର୍‍ ।
JOH 5:41 ନାନ୍ ଲୋକାମାଣ୍‌କୁ ଗୌରବ୍‍ ପୟ୍‌ଦେଙ୍ଗ୍‌ ବଦାକିଏ ।
JOH 5:42 ମାତର୍‌ ନାନ୍ ମିଙ୍ଗିଁ ନେସ୍‌ନା, ମିର୍‌ ଏଣ୍ତେସ୍‌ ନାନି ଲୋକୁ ମି ଜିବନ୍‌ତୁ ମାପୁରୁଦି ଉଣ୍ତିଙ୍ଗ୍‌ ଜିବନ୍‍ନୋନିକା ସିଲେତ୍‌ ।
JOH 5:43 ନାନ୍ ନା ବୁବାଦି ଦର୍‌ତାନ୍‌ ୱାତାମାନା, ମାରି ମିର୍‌ ନାଙ୍ଗିଁ ଆସ୍‍ଇଜିନିଦେର୍‍; ଆଇକାନ୍‍ ଜଦି ନିଜେ ଦର୍‌ତାନ୍‌ ୱାନାନ୍‌, ଆରିଙ୍ଗ୍‌ ମିର୍‌ ୱାନିଙ୍ଗ୍‌ ମାନାନିଦେର୍‌ ।
JOH 5:44 ମିର୍‌ ଏଣ୍ତେସ୍‌ ନାଙ୍ଗିଁ ବିସ୍‌ବାସ୍‌ କିଦେଙ୍ଗ୍‌ ଆଟ୍‌ନିଦେର୍‌ ? ମିର୍‌ ତୋ ନିଜେନିଜେମାଣ୍‍କୁ ଗୌରବ୍‍ ପୟ୍‌ଜିନିଦେର୍‌, ମାରି ଅରେନ୍‌ ମାପୁରୁମାଣ୍‌କୁ ଏମେ ଗୌରବ୍‌, ଆକା ପୟ୍‌ଦେଙ୍ଗ୍‌ ବଦା କିଇଜିନିଦେର୍‍ ।
JOH 5:45 ନାନ୍ ଜେ ବୁବାଦି ଆଗ୍‌ଡ଼ି ମି ବିରଦ୍‌ତାନ୍‌ ଦୋସ୍‍ କିନା, ଇକା ଅଡ଼୍‍ବିମାଟ୍‍; ଏମେ ମୋସାମାନୁ ମିର୍‌ ଆସା ଇଟ୍‍ତିମାନିଦେର୍‍, ୱାନ୍‌ ମି ବିରଦ୍‌ତାନ୍‌ ଦୋସ୍‍ କିଜିନାନ୍‍ ।
JOH 5:46 ଇରିଙ୍ଗ୍‌ ମିର୍‌ ଜଦି ସତ୍‌ତାନ୍‌ ମୋସାଦିଙ୍ଗ୍‍ ବିସ୍‌ବାସ୍‌ କିତିଙ୍ଗ୍‌ମାନ୍ଦି, ଆରିଙ୍ଗ୍‌ ନାଙ୍ଗିଁ ବିସ୍‌ବାସ୍‌ କିତିଦେର୍‍ମାନ୍ଦି, ଇରିଙ୍ଗ୍‌ ୱାନ୍‌ ନା ବିସୟ୍‌ତାନ୍‌ ରାସ୍‌ତାମାନାନ୍‌ ।
JOH 5:47 ମାତର୍‌ ମିର୍‌ ଜଦି ମୋସା ରାସ୍‍ତିମାନି ବାକ୍ୟ ବିସ୍‌ବାସ୍‌ କିଇଜିନିଦେର୍‍, ଆରିଙ୍ଗ୍‌ ଏଣ୍ତେସ୍‌ ନା ବାକ୍ୟ ବିସ୍‌ବାସ୍‌ କିନିଦେର୍‍ ।
JOH 6:1 ତାନେୱେନ୍‌କା ଜିସୁ ଗାଲିଲି ବା ତିବିରିୟା ଗାଡା ଆୟାପାଡ଼୍‌କା ସର୍ହାନ୍‌ ।
JOH 6:2 ମାରି, ୱାନ୍‌ ରୋଗ୍‌ଆତିଲୋକା ଉଣ୍ତିଙ୍ଗ୍‌ ଏମେ ଏମେ କାବାଆନି ପାଣି କିଜିମାର୍ହାର୍‌, ଆୟାୱିଜୁ ସୁଡ଼ୁଜି ନାଣ୍ତ ଲୋକୁ ୱାନି ୱେନ୍‌କା ୱେନ୍‌କା ସନ୍‌ଡ୍ରେ ଆସ୍‌ତାର୍‌ ।
JOH 6:3 ଆବେଟ୍‌ ଜିସୁ ଗରନ୍‌ ମୁସ୍‌କୁ ସଲ୍‌ସି ନିଜେଦି ସିସୁରି ୱାଲେ ଆବେନୁ ବାସ୍‌ତାର୍‌ ।
JOH 6:4 ନାସ୍ତିୱାଲେ ଜିହୁଦିର୍‌ ନିସ୍ତାର୍‌ ପଣ୍ତୟ୍‌ ଲାକ୍‌ତୁୱାଜି ୱାଜିମାର୍ହାତ୍‌ ।
JOH 6:5 ମାରି, ଜିସୁ ନାଣ୍ତ ଲୋକାଙ୍ଗ୍‌ ନିଜେଦି ଲାକ୍‌ତୁ ୱାନିକା ସୁଡ଼ୁଜି ପିଲିପ୍‌ତିଙ୍ଗ୍‌ ଇର୍ହାନ୍‌, “ଇୟାୱେରିଙ୍ଗ୍‌ ଉଣ୍ତେଙ୍ଗ୍‌ ଇଜି ମାଡ୍‌ ଏମେଣ୍‌କୁ ନାଣ୍ତ ରୁଟି କଣାଟ୍‌ ?”
JOH 6:6 ମାତର୍‌ ୱାନ୍‌ ପିଲିପ୍‌ତିଙ୍ଗ୍‍ ପରିକା କିନି ଇସାବ୍‌ତାନ୍‌ ଇକା ଇର୍ହାନ୍‌, ଇରିଙ୍ଗ୍‌ ୱାନ୍‌ ଇନିକା କିଦେଙ୍ଗ୍‌ ସଲ୍‌ସିନାନ୍‌, ଆକା ୱାନ୍‌ ନିଜେ ନେସ୍‌ତାମାର୍ହାନ୍‌ ।
JOH 6:7 ପିଲିପ୍‌ ୱାନିଙ୍ଗ୍‌ ଇର୍ହାନ୍‌, “ୱିଜେରେ ଲୋକୁ କାଣ୍ତେକ୍‌ ପୟ୍‌ଦେଙ୍ଗ୍‌ ୱେରି ଉଣ୍ତିଙ୍ଗ୍‌ ଦୁଇସଦାନ୍‍ ନାଣ୍ତ ୱେଣ୍ତିଅଦୁଲି ଡାବୁଙ୍ଗୁଁ ଦାରାଦି ରୁଟି କଣ୍ତେଙ୍ଗ୍‌ ଆନାତ୍‌ ।”
JOH 6:8 ସିମୋନ୍‌ ପିତର୍‌ତି ତଡ଼ାନ୍‌ ଆନ୍ଦ୍ରିୟ ଦର୍‌ତି ୱାନି ସିସୁରି ମାଣ୍‌କୁ ଅରେନ୍‍ ୱାନିଙ୍ଗ୍‌ ଇର୍ହାନ୍‌,
JOH 6:9 ଇବେନୁ ଅରେନ୍‍ କଡ଼ ମାନାନ୍‌, ୱାନି ମାନୁ ଗଦ୍‍ମୁଦି ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ମାନେ, ମାତର୍‌ ନିସା ଲୋକା ଉଣ୍ତିଙ୍ଗ୍‌ ଆକା ନାଣ୍ତ ଆଏତ୍‍ ।
JOH 6:10 ଜିସୁ ସିସୁରିଙ୍ଗ୍‌ ଇର୍ହାନ୍‌, “ଲୋକାଙ୍ଗ୍‌ ବାସାକିଦୁ ।” ଆୟା ବାଡିଦୁ ନାଣ୍ତ ଲାଟା ମାର୍ହାତ୍‌ । ଆୟା ଲାଟା ମୁସ୍‌କୁ ୱିଜେରେ ବାସ୍‌ତାର୍‌, ଆବେନ୍‌ ଇସାବ୍‌ତାନ୍‌ ପୁରା ୫,୦୦୦ ହାଜାର୍‌ ମେମାରୁଙ୍ଗୁଁ ମାର୍ହାର୍‌ ।
JOH 6:11 ଆବେଟ୍‌ ଜିସୁ ଆୟା ରୁଟି ଆସ୍‌ତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିଜି ବାସ୍‌ତିମାର୍‌ଇ ଲୋକାଙ୍ଗ୍‌ ଆକା ବାଟାକିତାସିତାନ୍‌, ଆୟାୱାଜା ମିନ୍‌କୁ ବା ବାଟାକିତାସିତାନ୍‌, ୱାର୍‌ ଏସ ଲସ୍‌ତିଙ୍ଗ୍‌, ନାସ ସିତାର୍‍ ।
JOH 6:12 ମାରି, ୱାର୍‌ ପଟାପାଜିତି ୱେନ୍‌କା, ଜିସୁ ନିଜେଦି ସିସୁରିଙ୍ଗ୍‌ ଇର୍ହାନ୍‌, “ଏଣ୍ତେସ୍‌ ଇନିକା ନାସ୍ଟୁ ଆଏତ୍‍, ଇୟାଉଣ୍ତିଙ୍ଗ୍‌ ଏଜିତିମାନି ରୁକ୍‌ତି ମକେଙ୍ଗ୍‌ ଉନ୍‌ଡ୍ରେମାନୁ କିଦୁ ।”
JOH 6:13 ଆବେଟ୍‌ ୱାର୍‌ ଆୟାୱିଜୁ ଉନ୍‌ଡ୍ରେମାନୁ କିତାର୍‌, ମାରି ଲୋକୁ ଉଟି ୱେନ୍‌କା ଗଦ୍‍ମୁଦି ଆୟା ପାସ୍‌ଗୋଟା ରୁଟିଣିକୁ ଏମେ ରୁକ୍‌ତି ମକେଙ୍ଗ୍‌ ରୁଟିଙ୍ଗ୍‌ ଏଜିତେମାର୍‌ଏ, ଆବେଟ୍‌ ୱାର୍‌ ବାରଗୋଟା ଡାଡ଼ିଆଙ୍ଗାଁ ବର୍‌ତି କିତାର୍‌ ।
JOH 6:14 ଆବେଟ୍‌ ଜିସୁ କିତିମାନି କାବାଦି ପାଣି ସୁଡ଼ୁଜି ଆବେମାନି ଲୋକୁ ଇର୍ହାର୍‌, ଦୁନିଆଦୁ ଏମେ ବାବବାଦି ୱାନିକା ମାର୍ହାତ୍‌, ଇକାନ୍‌ ପୁରା ୱାନ୍‌ନେ ।
JOH 6:15 ମାରି, ଲୋକୁ ୱାଜି ରାଜା କିନି ଉଣ୍ତିଙ୍ଗ୍‌ ଜେ ୱାନିଙ୍ଗ୍‌ ଡାଟ୍‌ତାନ୍‌ ଆସ୍‌ତେଙ୍ଗ୍‌ ବଦା କିଜିନାର୍‌, ଜିସୁ ଇକା ନେସ୍‌ସି ୱାନ୍‌ ମାରିଡ଼େସି ଆୟା ବାଡି ଡ଼ିସ୍‌ସି ଅରେନ୍‌ନେ ଗରନ୍‌ତୁ ସତାସର୍ହାନ୍‌ ।
JOH 6:16 ଆୟାନାଣ୍ତିଙ୍ଗ୍‌ ମିଲ୍‌ମିଲିକା ଆତାତ୍‌ ଜିସୁଦି ସିସୁର୍‍ ଗାଡା ପାଡ଼ି ସର୍ହାର୍‌
JOH 6:17 ମାରି ଡଙ୍ଗାଁଦୁ ଏକ୍‌ତାର୍‌ରୋ ଗାଡାଦି ଆୟାପାଡ଼ି କପର୍‍ନାହୁମ୍‍ ତରିନ୍‌ ସନ୍‌ଡ଼୍ରେଙ୍ଗ୍‌ ଆସ୍‌ତାର୍‌ । ସିକାଟି ଆଜି ୱାଜି ମାର୍ହାତ୍‌, ମାରି ଜିସୁ ଆୟାସାନ୍ଧି ୱାରି ଲାକ୍‌ତୁ ରେଏନ୍‌ ମାର୍ହାନ୍‌,
JOH 6:18 ମାରି ନାଣ୍ତ ଗାଲି ଆଜିମାରିଙ୍ଗ୍‍ ଏର୍‌ତୁ ଉଲ୍‍କା ନିଙ୍ଗ୍‌ଜିମାର୍‌ଏ ।
JOH 6:19 ଆୟାଦାପ୍ରେ ସିସୁର୍‍ ପୁରା ପାସ୍‌ ନୋ ସଅ କିଲୋମିଟର୍‌ ସାଟ୍‍ୱା ଡାକ୍‌ସି ସର୍‌ଇ ୱେନ୍‌କା ଜିସୁଙ୍ଗୁଁ ଏର୍‌ ମୁସ୍‌କୁ ବୁଲାଜି ଡଙ୍ଗାଁ ଲାକ୍‌ତୁ ୱାନିକା ସୁଡ଼ୁଜି, ଆବେଟ୍‌ ୱାର୍‌ ତିଲାତାର୍‌ ।
JOH 6:20 ମାତର୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ଇକାନ୍‌ତ ନାନୁ, ତିଲାମାଟ୍‌ ?”
JOH 6:21 ଆଦେଙ୍ଗ୍‌ ୱାର୍‌ ଜିସୁଙ୍ଗୁଁ ଡଙ୍ଗାଁଦୁ ଅତେଙ୍ଗ୍‌ ବଦା କିତାର୍‌, ମାରି ୱାର୍‌ ଏମେ ବାଡିଦୁ ସଲ୍‌ସିମାର୍ହାର୍‌, ଡଙ୍ଗାଁ ଆୟାଦାପ୍ରେ ଆୟା ବାଡିଦୁ ଇତାତ୍‌ ।
JOH 6:22 ଆୟା ବାଡିଦୁ କେବଲ୍‌ ଉନ୍‌ଡ୍ରି ଡଙ୍ଗାଁ ମାର୍‌ଆତ୍‌, ମାରି ଆବେଟ୍‌ ଜେ ଜିସୁ ନିଜେଦି ସିସୁରି ୱାଲେ ସଲ୍‌ଏନ୍‌ ମାର୍ହାନ୍‌, ମାତର୍‌ କେବଲ୍‌ ୱାନି ସିସୁର୍‍ ସର୍‌ଆମାର୍ହାର୍‌, ଇକା ଏମେ ଲୋକୁ ଆୟା ମାର୍‌ନାଣ୍ଡିଙ୍ଗ୍‌ ଗାଡାଦି ଆୟାପାଡ଼ି ନିର୍‌ଆ ମାର୍ହାର୍‌, ୱାର୍‌ ସୁଡ଼ୁତା ମାର୍ହାର୍‌ ।
JOH 6:23 ପ୍ରବୁ ଦନ୍ୟବାଦ୍‌ ସିତି ୱେନ୍‌କା ଲୋକୁ ଏମେ ବାଡିଦୁ ରୁଟି ତିର୍‌ଆମାର୍ହାର୍‌, ଆୟା ବାଡି ଲାକ୍‌ତୁ ତିବିରିୟାଦାନ୍‌ ମାରି ଏସ ଡଙ୍ଗେଙ୍ଗ୍‌ଁ ୱାଜି ଇତେ;
JOH 6:24 ମାତର୍‌ ଜିସୁ ମାରି ୱାନି ସିସୁର୍‍ ଜେ ଆବେନୁ ସିଲେର୍‌, ଇକା ଏସ୍ତିୱାଲେ ଲୋକୁ ୱିଜେରେ ସୁଡ଼ୁତାର୍‌, ନାସ୍ତିୱାଲେ ୱାର୍‌ ୱିଜେରେ ଡଙ୍ଗେଆଙ୍ଗାଁ ଏକ୍‌ସି ଜିସୁଙ୍ଗୁଁ ପୟ୍‌ଜି ପୟ୍‌ଜି କପର୍‍ନାହୁମ୍‍ତୁ ୱାତାର୍‌ ।
JOH 6:25 ମାରି, ଲୋକୁ ଗାଡା ଆୟାପାଡ଼ି ଜିସୁଙ୍ଗୁଁ ସୁଡ଼ୁଜି ୱାନିଙ୍ଗ୍‌ ୱେନ୍‌ବାତାର୍‌, “ଏ ଗୁରୁ, ନିନ୍‌ ଏସ୍ତିୱାଲେ ଇବେନୁ ୱାତି ?”
JOH 6:26 ଜିସୁ ୱାରିଙ୍ଗ୍‌ ଇର୍ହାନ୍‌, ସତ୍‌ ସତ୍‍ନେ ନାନ୍ ମିଙ୍ଗିଁ ଇଜିନା, କାବାଆନି ପାଣି ସୁଡ଼ୁତିଙ୍ଗ୍‌ନୋ ଜେ ମିର୍‌ ନାଙ୍ଗିଁ ପୟ୍‌ଜିନିଦେର୍‌, ଆକା ସିଲେ, ମାତର୍‌ ରୁଟି ତିନ୍‌ଜ ପାଜିତିଦେର୍‌ନୋ ନାଙ୍ଗିଁ ପୟ୍‌ଜିନିଦେର୍‌ ।
JOH 6:27 ଆମା କାଦି ସେଏଣ୍ତ୍‍ ଆନାତ୍‌ ଆୟାଉଣ୍ତିଙ୍ଗ୍‌ ପାଣି କିମାଟ୍‌ ମାରି ଆମାକା ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାତ୍‌, ଆୟାଉଣ୍ତିଙ୍ଗ୍‌ ପାଣି କିଦୁ; ଆୟା କାଦି ମନୁସ୍ୟପୁତ୍ର ମିଙ୍ଗିଁ ସିନାନ୍‌, ଇରିଙ୍ଗ୍‌ ବୁବା ମାପୁରୁ ଇୟାଉଣ୍ତିଙ୍ଗ୍‌ ୱାନିଙ୍ଗ୍‌ ଅଦିକାର୍‍ ସିତାମାନାନ୍‌ ।
JOH 6:28 ଆବେଟ୍‌ ୱାର୍‌ ୱାନିଙ୍ଗ୍‌ ୱେନ୍‌ବାତାନ୍‌, “ମାପୁରୁ ଆମାକା ବଦାକିଜିନାନ୍‌ ଆକା ମାପ୍‌ କିଦେଙ୍ଗ୍‌ ମାଙ୍ଗିଁ ଇନିକା କିଦେଙ୍ଗ୍‌ ଆନାତ୍‌ ?”
JOH 6:29 ଜିସୁ ୱାରିଙ୍ଗ୍‌ ଇର୍ହାନ୍‌, “ମାପୁରୁ ଆମାୱାନିଙ୍ଗ୍‌ ପୋକ୍‌ତାମାନ୍‌ନାନ୍‌, ୱାନିମାନୁ ବିସ୍‌ବାସ୍‌ କିନି ଉଣ୍ତିଙ୍ଗ୍‌ ମିର୍‌ ଆକା କିଦେଙ୍ଗ୍‌ ଆଟ୍‌ନିଦେର୍‌ ।”
JOH 6:30 ଆବେଟ୍‌ ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ଆରିଙ୍ଗ୍‌ ନିନ୍‌ ସିନାଦିୱାଜା ଇନିକା କିଜିନି ଜେ, ଆକା ସୁଡ଼ୁଜି ମାପ୍‌ ନିଙ୍ଗିଁ ବିସ୍‌ବାସ୍‌ କିଦେଙ୍ଗ୍‌ ଆଟ୍‍ନାପ୍‍ ? ନିନ୍‌ ଇନିକା ପୁଜା କିଜିନି ?
JOH 6:31 ମା ପୁର୍ବେଦିଡକ୍‌ରାଦାଦାର୍‌ ସୁନ୍‌ସାନ୍‌ବାଡିଦୁ ମାନ୍ନା ଉଣୁଜି ମାର୍ହାର୍‌, ଏଣ୍ତେସ୍‌ ଦର୍ମସାସ୍ତ୍ରଦୁ ରାସ୍‌ତାମାନ୍‌ତା, ଉଣ୍ତେଙ୍ଗ୍‌ ଇଜି ୱାନ୍‌ ୱାରିଙ୍ଗ୍‌ ମୁସ୍‌କୁପୁର୍‌ତାନ୍‌ କାଦି ସିତାମାର୍ହାନ୍‌ ।”
JOH 6:32 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ସତ୍‌ ସତ୍‍ନେ ନାନ୍ ମିଙ୍ଗିଁ ଇଜିନା,” ଆମାକା ମିଙ୍ଗିଁ ମୋସା ସିତାମାର୍‍ହାନ୍‍ ଆକା ମୁସ୍‌କୁପୁର୍‌ତାନ୍‌ ୱାତିମାନି କାଦି ସିଲେ, ମାତର୍‌ ନା ବୁବା ମିଙ୍ଗିଁ ମୁସ୍‌କୁପୁର୍‌ତାନ୍‌ ସତ୍‌ତେନେ କାଦି ସିନାନ୍‌;
JOH 6:33 ଆମା କାଦି ମୁସ୍‌କୁପୁର୍‌ତାନ୍‌ ରେତାଜିୱାଜି ଦୁନିଆଦିଙ୍ଗ୍‍ ଜିବନ୍‌ ସିନାନ୍‍, ୱାନ୍‌ ଆଜିନାନ୍‍ ଆୟା ମାପୁରୁ ସିତିମାନି କାଦି ।
JOH 6:34 ୱାର୍‌ ୱାନିଙ୍ଗ୍‌ ଇର୍ହାର୍‌, ଆଜ୍ଞା, “ୱିଜୁଦିନ୍‌ ମାଙ୍ଗିଁ ଇୟା କାଦି ସିଦା ।”
JOH 6:35 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ନାନ୍ ଆୟା ଜିବନ୍‌ ସିନି କାଦି, ଏନ୍‌ ନା ଲାକ୍‌ତୁ ୱାନ୍‌ନାନ୍‌, ୱାନ୍‌ ମୁଡ଼ୁକେ ବାଙ୍ଗାଁ ସାଏନ୍‌, ମାରି ଏନ୍‌ ନା ମାନୁ ବିସ୍‌ବାସ୍‌ କିନାନ୍‌, ୱାନ୍‌ ମୁଡ଼ୁକେ ଏର୍‌କିସାଏନ୍‌ ।
JOH 6:36 ମାତର୍‌ ମିର୍‌ ନାଙ୍ଗିଁ ସୁଡ଼ୁତିଙ୍ଗ୍‌ ବା ବିସ୍‌ବାସ୍‌ କିଇଜିନିଦେର୍‌, ଇକା ନାନ୍ ମିଙ୍ଗିଁ ୱେର୍‌ତାମାନା ।
JOH 6:37 ବୁବା ଜେ ୱିଜେରିଙ୍ଗ୍‌ ନାଙ୍ଗିଁ ଦାନ୍‌ କିନାନ୍‌, ୱାର୍‌ ନା ଲାକ୍‌ତୁ ୱାନାର୍‌; ମାରି, ଏନ୍‌ ନା ଲାକ୍‌ତୁ ୱାନାନ୍‌, ୱାନିଙ୍ଗ୍‌ ନାନ୍ ଇନି ୱାଜାବା ସୋପ୍‌ତେଙ୍ଗ୍‍ ଆଟ୍‍ଏ;
JOH 6:38 ଇରିଙ୍ଗ୍‌ ନା ନିଜେଦି ବଦାଦାନ୍‌ଦିଙ୍ଗ୍‍ ପୁରା କିଦେଙ୍ଗ୍‌ ସିଲେ, ମାତର୍‌ ନା ପୋକ୍‍ତିୱାନି ବଦା ପୁରା କିଦେଙ୍ଗ୍‌ ନାନ୍ ମୁସ୍‌କୁପୁର୍‌ତାନ୍‌ ୱାତାମାନା ।
JOH 6:39 ମାରି, ନା ପୋକ୍‍ତିକାନ୍‍ ଜେ ୱିଜେରିଙ୍ଗ୍‌ ନାଙ୍ଗିଁ ସିତାମାନାନ୍‌, ନାନ୍ ୱାରି ମାଣୁକୁ ଅରେନ୍‍ୱାନିଙ୍ଗ୍‍ ବା ଆରାକିଏ, ନାନ୍ ୱିଜିନି ନାଣ୍ତିଙ୍ଗ୍‌ ଆୟା ୱିଜେରିଙ୍ଗ୍‌ ମାରିଡ଼େସି ଜିବନ୍‌ କିନା, ଇକା ୱାନି ବଦା ।
JOH 6:40 ଇରିଙ୍ଗ୍‌ ଏନ୍‌ ମାରିସିଙ୍ଗ୍‌ ସୁଡ଼୍‌ଜି ୱାନିମାନୁ ବିସ୍‌ବାସ୍‌ କିନାନ୍‌, ୱାନ୍‌ ଏଣ୍ତେସ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‌ନାନ୍‌, ଇକାନେ ନା ବୁବାଦି ବଦା; ଇୟାଉଣ୍ତିଙ୍ଗ୍‌ ନାନ୍ ୱିଜିନି ନାଣ୍ତିଙ୍ଗ୍‌ ଆୟା ୱିଜେରିଙ୍ଗ୍‌ ମାରିଡ଼େସି ଜିବନ୍‌ କିନା ।”
JOH 6:41 ନାନ୍ ମୁସ୍‌କୁପୁର୍‌ତାନ୍‌ ରେତାତିମାନି କାଦି, ୱାନ୍‌ ଇକା ଇର୍ହାନ୍‌ଆକା ଜିହୁଦିର୍‌ ଜିସୁଦି ବିରଦ୍‌ତାନ୍‌ ନିଦା କିଦେଙ୍ଗ୍‌ ଆସ୍‌ତାର୍‌ ।
JOH 6:42 ମାରି ୱାର୍‌ ଇର୍ହାର୍‌ “ଇକାନ୍‌ ଇନିକା ଜୋସେପତି ମାରିନ୍‌ ଜିସୁ ଆଏନ୍‍ ? ମାରି ମାପ୍‌ ୱେନି ବୁବାୟାୟାଙ୍ଗ୍‌ ନେସ୍‌ନାପ୍‌ ଆରିଙ୍ଗ୍‌ ନାନ୍ ମୁସ୍‌କୁପୁର୍‌ତାନ୍‌ ରେତାତାମାନା ଇଜି ୱାନ୍‌ ଇଲେ ଏଣ୍ତେସ୍‌ ଇଜିନାନ୍‌ ?”
JOH 6:43 ଜିସୁ ୱାରିଙ୍ଗ୍‌ ଇର୍ହାନ୍‌, “ନିଜେ ନିଜେଦି ମାନୁ ନିଦା କିମାଟ୍‌ ।
JOH 6:44 ନାଙ୍ଗିଁ ପୋକ୍‌ତାତିମାନି ବୁବା ଏମେୱାନିଙ୍ଗ୍‌ ଆସ୍‌ କିନାନ୍‌, କେବଲ୍‌ ୱାନ୍‌ ନା ଲାକ୍‌ତୁ ୱାଦେଙ୍ଗ୍‌ ଆଟ୍‍ନାନ୍‍, ମାରି ନାନ୍ ୱିଜିନି ନାଣ୍ତିଙ୍ଗ୍‌ ଆୟା ୱିଜେରିଙ୍ଗ୍‌ ମାରିଡ଼େସି ଜିବନ୍‍କିଜି କିନା ।
JOH 6:45 ବାବବାଦିର୍ ଦାର୍ମୁସାସ୍ତ୍ରଦୁ ରାସ୍‌ତା ମାନାର୍‌, ୱିଜେରେ କେବଲ୍‌ ମାପୁରୁଦି ମାଣାନ୍‌ ସିକିୟା ପୟ୍‌ନାର୍‌ । ଏନ୍‌ଆପିନ୍‌ ବୁବାଦିମାଣ୍‌ନା ୱେନ୍‌ଜି ସିକିୟା ପୟ୍‌ନାନ୍‌, ୱାନ୍‌ ନା ଲାକ୍‌ତୁ ୱାନାନ୍‌ ।
JOH 6:46 ତେନି ଅର୍ତ ଆଏତ୍‍ ଜେ, ୱାନ୍‌ ବୁବେଙ୍ଗ୍‌ ସୁଡ଼ୁତା ମାନ୍‌ନାନ୍‌, ଏନ୍‌ ମାପୁରୁଦିମାଣ୍‌ନା ୱାତାମାନ୍‌ନାନ୍‌, କେବଲ୍‌ ୱାନ୍‌ନେ ବୁବେଙ୍ଗ୍‌ ସୁଡ଼ୁତାମାନ୍‌ନାନ୍‌ ।
JOH 6:47 ସତେ ସତେନେ ନାନ୍ ମିଙ୍ଗିଁ ଇଜିନା, ଏନ୍‌ ବିସ୍‌ବାସ୍‌ କିନାନ୍‌, ୱାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‌ତାମାନାନ୍‌ ।
JOH 6:48 ନାନ୍ ଜିବନ୍‌ ସିନି କାଦି ।
JOH 6:49 ମି ପୁର୍ବେଦିଡକ୍‌ରାଦାଦାର୍‌ ସୁନ୍‌ସାନ୍‌ବାଡିଦୁ ମାନ୍ନା ଉଟାର୍‌ ଆରିଙ୍ଗ୍‍ବା ସାତାସର୍ହାର୍‌ ।
JOH 6:50 ମାତର୍‌ ଏମେ କାଦି ମୁସ୍‌କୁପୁରୁତାନ୍‌ ୱାନାତ୍‌, ତାନିଙ୍ଗ୍‍ ଏନ୍‌ ଉଣାନ୍‌ ୱାନ୍‌ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ପୋୟ୍‍ନାନ୍‍ ।
JOH 6:51 ନାନ୍ ମୁସ୍‌କୁପୁରୁତାନ୍‌ ୱାତିମାନି ଆୟା ଜିବନ୍‌ତି କାଦି, ଏନ୍‌ ଜଦି ଇୟା କାଦି ଉଣୁନାନ୍‌, ୱାନ୍‌ ଏସାଙ୍ଗ୍‌ୱିଜ୍‌ଇଦିନ୍‌ ସାନ୍ଧି ଜିବନ୍‌ ମାନାନ୍‌; ହୁଁ, ନାନ୍ ଏମେ କାଦି ସିନା, ଆକା ନା କାଣ୍ତା, ନାନ୍ ଆକା ଦୁନିଆଦିଙ୍ଗ୍‍ ଜିପିସ୍‍ନି ଉଣ୍ତିଙ୍ଗ୍‌ ସିନା ।”
JOH 6:52 ଆବେଟ୍‌ ଜିହୁଦିର୍‌ ନିଜେନିଜେଦିମାନୁ ଗିଦ୍‌ରିଆଜି ଜାଟି କିଦେଙ୍ଗ୍‌ ଆସ୍‌ତାର୍‌, “ଇକାନ୍‌ ଏଣ୍ତେସ୍‌ ମାଙ୍ଗିଁ ନିଜେଦି କାଣ୍ତା ତିନ୍‌ଡ୍ରେଙ୍ଗ୍‌ ସିଦେଙ୍ଗ୍‍ ଆଟ୍‍ନାନ୍‍ ?”
JOH 6:53 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ମନୁସ୍ୟପୁତ୍ରଦି କାଣ୍ତା ତିନ୍‌ଏତିଙ୍ଗ୍‌ ମାରି ୱାନି ନେତେର୍‌ ଉଣୁଏତିଙ୍ଗ୍‌, ମିର୍‌ ଜିବନ୍‌ ପୋୟ୍‍ଦେଙ୍ଗ୍‍ ଆଟ୍‍ଇଦେର୍‍ ।
JOH 6:54 ଏନ୍‌ ନା କାଣ୍ତା ତିନ୍‌ନାନ୍‌ ମାରି ନା ନେତେର୍‌ ଉଣୁନାନ୍‌, ୱାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ପୟ୍‌ନାନ୍‌, ମାରି ନାନ୍ ୱିଜିନି ନାଣ୍ତିଙ୍ଗ୍‌ ୱାନିଙ୍ଗ୍‌ ନିକ୍‌ନା ।
JOH 6:55 ଇରିଙ୍ଗ୍‌ ନା କାଣ୍ତା ସତେନେ କାଦି ମାରି ନା ନେତେର୍‌ ସତେନେ ଏରୁ ।
JOH 6:56 ଏନ୍‌ ନା କାଣ୍ତା ତିନ୍‌ନାନ୍‌ ମାରି ନା ନେତେର୍‌ ଉଣୁନାନ୍‌, ୱାନ୍‌ ନା ମାନୁ ତେବାନାନ୍‌ ମାରି ନାନ୍ ୱାନିମାନୁ ତେବାନା ।
JOH 6:57 ଜିବନ୍‌ମାନି ବୁବା ନାଙ୍ଗିଁ ପୋକ୍‌ତାମାନାନ୍‌ ମାରି ନାନ୍ ୱାନି ଉଣ୍ତିଙ୍ଗ୍‌ ଜିବନ୍‌ ମାନା, ଆୟାୱାଜା ଏନ୍‌ ନାଙ୍ଗିଁ ଉଣୁନାନ୍‌, ୱାନ୍‌ ବା ନା ଉଣ୍ତିଙ୍ଗ୍‌ ଜିବନ୍‌ ତେବାନାନ୍‌ ।
JOH 6:58 ଏମେ କାଦି ମୁସ୍‌କୁପୁରୁତାନ୍‌ ୱାତାମାନାତ୍‌, ଆୟାକା ଇକା; ପୁର୍ବେଦିଡକ୍‌ରାଦାଦାର୍‌ ଏଣ୍ତେସ୍‌ ଉଟାର୍‌ ସାତାସର୍ହାର୍‌, ଇକା ଆୟାୱାଜା ସିଲେ; ଏନ୍‌ ଇୟା କାଦି ଉଣୁନାନ୍‌, ୱାନ୍‌ ଏସାଙ୍ଗ୍‌ୱିଜ୍‌ଇଦିନ୍‌ ସାନ୍ଧି ଜିବନ୍‌ ତେବାନାନ୍‌ ।”
JOH 6:59 ଜିସୁ କପର୍‍ନାହୁମ୍‍ତି ଉନ୍‌ଡ୍ରି ପାର୍‌ତନା ଇଲୁତୁ ସିକିୟା ସିନିୱାଲେ ଇୟାୱିଜୁ ମାଟା ୱେର୍‌ତାନ୍‌ ।
JOH 6:60 ମାରି, ଜିସୁଦି ସିସୁରି ମାଣ୍‌କୁ ଏସଲୋକ୍‌ ଇକା ୱେନ୍‌ଜି ଇର୍ହାର୍‌, “ଇୟା ସିକିୟା ବୁଜାଦେଙ୍ଗ୍‌ ବଡ଼େ କାସ୍ଟୁ, ଏନ୍‌ ଇକା ୱେନ୍‌ଡ୍ରେଙ୍ଗ୍‌ ଆଟ୍‍ନାନ୍‍ ?”
JOH 6:61 ଇୟା ବିସୟ୍‌ତାନ୍‌ ଜିସୁଙ୍ଗୁଁ ଏନ୍‌ ଇନିକା ଇନ୍‍ଏତି ମାରିଙ୍ଗ୍‌ ବା ସିସୁର୍‍ ୱାରି ଲୋଇ ନିଦା କିଜିନାର୍‍ ଇଜି ନେସ୍‌ସି ଜିସୁ ୱାରିଙ୍ଗ୍‌ ଇର୍ହାନ୍‌, “ଇକା ଇନିକା ମିଙ୍ଗିଁ ବାଦା ଆଜିନାତ୍‍ ?
JOH 6:62 ମନୁସ୍ୟପୁତ୍ର ଆଗ୍‌ଡ଼ି ଏମେ ବାଡିଦୁ ମାର୍ହାନ୍‌, ଆୟା ବାଡିଦୁ ଏସ୍‌କାଙ୍ଗ୍‌ ୱାନିଙ୍ଗ୍‌ ସନିକା ସୁଣିଦେର୍‌, ଆରିଙ୍ଗ୍‌ ମିର୍‌ ଇନିକା କିନିଦେର୍‍ ?
JOH 6:63 କେବଲ୍‌ ମାପୁରୁଦି ଆତ୍ମା ଜିବନ୍‌ ସିନାତ୍‌; ଲୋକା ସାକ୍ତି ଇନି ପାଣିକିଦେଙ୍ଗ୍‌ ଆଟ୍‍ଏତ୍‍; ମାପୁରୁଦି ଆୟା ଜିବନ୍‌ ସିନି ଆତ୍ମାଦିଙ୍ଗ୍‌ ମିର୍‌ ଏଣ୍ତେସ୍‌ ନେସ୍‌ନିଦେର୍‌, ଆୟାଉଣ୍ତିଙ୍ଗ୍‌ ନାନ୍ ଇୟାୱିଜୁ ମାଟା ଇର୍‌ଆ ।
JOH 6:64 ଆତିଙ୍ଗ୍‌ବା ମି ମାଣ୍‌କୁ ଏନ୍‌ ଏନ୍‌ ବିସ୍‌ବାସ୍‌ କିଏଜିନାର୍‌ । ଇରିଙ୍ଗ୍‌ ଜିସୁଙ୍ଗୁଁ ଏର୍‌ ବିସ୍‌ବାସ୍‌ କିଏର୍‌ ମାରି ଏନ୍‌ ୱାନିଙ୍ଗ୍‌ ସାତ୍ରୁରି କିୟୁଦୁ ସର୍ପେ କିନ୍‌ନାନ୍‌, ଆକା ଜିସୁ ଆଗ୍‍ଡ଼ିରାନ୍‍ନେ ନେସ୍‌ତା ମାର୍ହାନ୍‌ ।
JOH 6:65 ମାରି ୱାନ୍‌ ଇର୍ହାନ୍‌, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇର୍‌ଆମାନା, ବୁବାସିମାଣାନ୍‍ ପକ୍‍ଏତିଙ୍ଗ୍‌ ଏନ୍‌ ନା ଲାକ୍‌ତୁ ୱାଦେଙ୍ଗ୍‌ ଆଟ୍‍ଏନ୍‍ ।”
JOH 6:66 ଆୟାୱାଲେରାନ୍‍ ଜିସୁଦି ସିସୁରି ମାଣ୍‌କୁ ଏସଲୋକ୍‌ ୱେର୍‌ଏ ଏର୍‌ଜି ସତାସର୍ହାର୍‌, ମାରି ୱାନି ୱାଲେ ମାରି ବୁଲାସାଲା କିଏତାର୍‌ନି ।
JOH 6:67 ଆବେଟ୍‌ ଜିସୁ ବାରଲୋକ୍ ସିସୁରିଙ୍ଗ୍‌ ୱେନ୍‌ବାତାନ୍‌, “ମିର୍‌ ବା ଇନିକା ନାଙ୍ଗିଁ ଡ଼ିସ୍‌ସି ସନ୍‌ଡ଼୍ରେଙ୍ଗ୍‌ ବଦା କିଜିନିଦେର୍‌ ?”
JOH 6:68 ସିମୋନ ପିତର୍‌ ଜିସୁଙ୍ଗୁଁ ଇର୍ହାନ୍‌, “ପ୍ରବୁ, ଏ ଲାକ୍‌ତୁ ସନାଟ୍‌ ? ନି ଲାକ୍‌ତୁ ଏସ୍‌କାଙ୍ଗ୍‌ୱିଜିଇ ଜିବନ୍‌ତି ବାକ୍ୟ ମାନାତ୍‌;
JOH 6:69 ମାରି, ନିନ୍‌ ଜେ ମାପୁରୁଦି ମାଣାନ୍‌ ୱାତିମାନି ଆୟା ପବିତ୍ର ଲୋକୁ, ଇକା ମାପ୍‌ ବିସ୍‌ବାସ୍‌ କିତାମାନାପ୍‌ ମାରି ନେସ୍‌ତାମାନାପ୍‌ ।”
JOH 6:70 ଜିସୁ ୱାରିଙ୍ଗ୍‌ ଇର୍ହାନ୍‌, “ନାନ୍ ଇନିକା ମି ବାରଲୋକାଙ୍ଗ୍‌ ଆସ୍‌କିଏ ନୋ ? ମାରି, ମି ମାଣ୍‌କୁ ଅରେନ୍‍ ସୟତାନ୍ ।”
JOH 6:71 ଜିସୁ ଇସ୍କାରିୟୋତିୟ ସିମୋନତି ମାରିନ୍‌ ଜିହୁଦାଦିଙ୍ଗ୍‌ ସୁଡ଼ୁଜି ଇକା ଇର୍ହାନ୍‌, ଇରିଙ୍ଗ୍‌ ୱାନ୍‌ ବାରଲୋକ ସିସୁରି ମାଣ୍‌କୁ ଅରେନ୍‍, ମାରି ୱାନ୍‌ ୱାନିଙ୍ଗ୍‌ ସାତ୍ରୁରି କିୟୁଦୁ ସର୍ପେ କିଦେଙ୍ଗ୍‌ ସଲ୍‌ସି ମାର୍ହାନ୍‌ ।
JOH 7:1 ତାନେୱେନ୍‌କା ଜିସୁ ଗାଲିଲିଦୁ ବୁଲାଦେଙ୍ଗ୍‌ ଆସ୍‌ତାନେ, ଇରିଙ୍ଗ୍‌ ଜିହୁଦିର୍‌ ୱାନିଙ୍ଗ୍‌ ସାୟାମାର୍‌ଗା ଡାକ୍‌ତେଙ୍ଗ୍‍ଁ ଇଜି ସେସ୍ଟା କିଜିମାରିଙ୍ଗ୍‌ ୱାନ୍‌ ଜିହୁଦା ଦେସ୍‌ତୁ ବୁଲାଦେଙ୍ଗ୍‌ ବଦା କିଏଜି ମାର୍ହାନ୍‌ ।
JOH 7:2 ଜିହୁଦିର୍‌ ଇଲୁଦୁବାସାନି ପଣ୍ତ୍‌ୟତି ଦିନ୍‌ ଇଗା ୱାତାତ୍‍,
JOH 7:3 ୱାନି ତଡ଼ାନ୍‌କୁ ଜିସୁଙ୍ଗୁଁ ଇର୍ହାର୍‌, ନିନ୍‌ ଆମା ଆମା ପାଣି କିଜିନି, ଆୟାୱିଜୁ ଏଣ୍ତେସ୍‌ ନି ସିସୁର୍‍ ବା ସୁଡ଼ୁନାଟ୍‌ ଇୟାଉଣ୍ତିଙ୍ଗ୍‌ ଇବେଣାନ୍‌ ସସିସୋଲ୍‌ସ ଜିହୁଦା ଦେସ୍‌ତୁ ସାନ୍‍ଡ୍ରୁ,
JOH 7:4 ଇରିଙ୍ଗ୍‌ ଏନ୍‌ ତରାଦେଙ୍ଗ୍‍ ବଦାକିତିଙ୍ଗ୍‍ ମାର୍‍ଗିଜି ଇନିକା କିଏନ୍‌ । ମିର୍‌ ଜଦି ଇୟାୱିଜୁ କିଜିନିଦେର୍‌, ଆରିଙ୍ଗ୍‌ ନିଜେଦିଙ୍ଗ୍‍ ଦୁନିଆ ଆଗ୍‌ଡ଼ି ତର୍‌ଆ ।
JOH 7:5 ଇରିଙ୍ଗ୍‌ ୱାନି ତଡ଼ାନ୍‌କୁ ବା ୱାନିମାନୁ ବିସ୍‌ବାସ୍‌ କିଏଜିମାର୍‍ଆର୍‍ ।
JOH 7:6 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ନା ସମୟ ଇୟାସାନ୍ଦି ଇଗା ରେଏଦେ, ମାତର୍‌ ମି ଉଣ୍ତିଙ୍ଗ୍‌ ସମୟ ୱିଜୁଦିନ୍‌ ମାନାତ୍‌ ।
JOH 7:7 ଦୁନିଆ ମିଙ୍ଗିଁ କାଡ଼୍‍ଏତ୍‍, ମାତର୍‌ ନାଙ୍ଗିଁ କାଡ଼୍‍ନାତ୍‍, ଇରିଙ୍ଗ୍‌ ୱାନି ପାଣି ଜେ ତାଗ୍‌ଇକା ଇଜି ନାନ୍ ଆୟା ବିସୟ୍‌ତାନ୍‌ ଇୟା ସାକି ସିଜିନା ।
JOH 7:8 ମିର୍‌ ଇୟା ପଣ୍ତ୍‍ୟତୁ ସାନ୍‍ଡ୍ରୁ, ନାନ୍ ଇଲେଇ ଇୟା ପଣ୍ତ୍‍ୟତୁ ସଲ୍‍ଏଜିନା, ଇରିଙ୍ଗ୍‌ ନା ସମୟ ଇୟାସାନ୍ଦି ରେଏଦେ ।”
JOH 7:9 ଜିସୁ ୱାରିଙ୍ଗ୍‌ ଇୟାୱିଜୁ ମାଟା ଇଜି ଗାଲିଲିଦୁ ତେବାତାନ୍‌ ।
JOH 7:10 ମାତର୍‌ ୱାନି ତଡ଼ାନ୍‌କୁ ପଣ୍ତ୍‍ୟତୁ ସର୍‍ରି ୱେନ୍‌କା ଜିସୁ ବା ସର୍ହାନ୍‍, ତରାଇଆଜି ସିଲେ, ମାତର୍‌ ମାର୍‍ଗିଜି ସର୍ହାନ୍‍ ।
JOH 7:11 ଆଦେଙ୍ଗ୍‌ ଜିହୁଦି ନେତାର୍‌ ପଣ୍ତ୍‍ୟତୁ ୱାନିଙ୍ଗ୍‌ ପୟ୍‍ବୁ ପୟ୍‍ବୁ ୱେନ୍‌ବାତାର୍‌, “ୱାନ୍‌ ଏମେ ?”
JOH 7:12 ମାରି, ଜିସୁ ବିସୟ୍‌ତାନ୍‌ ଲୋକା ମାନୁ ପୁସୁରୁ ପାସୁରୁ ୱାର୍‍ଗିଦେଙ୍ଗ୍‍ ଆସ୍‌ତାର୍‌; ଏନ୍‌ ଏନ୍‌ ଇର୍ହାର୍‌, “ୱାନ୍‌ ଅରେନ୍‍ ନେଗି ଲୋକୁ,” ମାରି ଏନ୍‌ ଏନ୍‌ ଇର୍ହାର୍‌, “ସିଲେ, ୱାନ୍‌ ଲୋକାଙ୍ଗ୍‌ ବାୟା କିଜିନାନ୍‍ ।”
JOH 7:13 ମାତର୍‌ ଜିହୁଦି ନେତାର୍‌ ତିଲାଜି ୱାନି ବିସୟ୍‌ତାନ୍‌ ୱେକ୍‍ସି ଏନ୍‌ ଇନିକା ଇନ୍‍ଏଜି ମାର୍ହାର୍‍ ।
JOH 7:14 ମାତର୍‌ ପଣ୍ତ୍‌ୟତି ଆଦା ସମୟ ୱିଜିତି ୱେନ୍‌କା, ଜିସୁ ମନ୍ଦିର୍‌ତୁ ସଲ୍‌ସି ସିକିୟା ସିଦେଙ୍ଗ୍‍ ଆସ୍‌ତାନ୍‌ ।
JOH 7:15 ଆବେଟ୍‌ ଜିହୁଦି ନେତାର୍‌ କାବାଆଜି ଇର୍ହାର୍‌, “ଇକାନ୍‌ ପାଟ୍‍ ପଡ଼ାଏଣ୍ତା ଏଣ୍ତେସ୍‌ ନେସ୍‌ତାନ୍‌ ?”
JOH 7:16 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, “ନା ସିକିୟା ନା ନିଜେଦିକା ଆଏତ୍‍, ମାତର୍‌ ନା ପକ୍‍ତିମାନି ମାପୁରୁଦି ମାଣାନ୍‌ ୱାତାମାନାତ୍‌ ।
JOH 7:17 ଏନ୍‌ ଜଦି ମାପୁରୁ ବଦା ମାନାଦେଙ୍ଗ୍‌ ଇଚ୍ଛା ଆନାନ୍‌, ଆରିଙ୍ଗ୍‌ ନା ସିକିୟା ମାପୁରୁ ମାଣ୍‌କୁ ୱାତାମାନାତ୍‍ନୋ, ନା ନିଜେଦି ସାକ୍ତିଦାନ୍ ନୋ ଇଜିନା, ଆକା ୱାନ୍‌ ନେସ୍‌ନାନ୍‌ ।
JOH 7:18 ଏନ୍‌ ନିଜେଦି ମାଣାନ୍‌ ଇନାନ୍‌, ୱାନ୍‌ ନିଜେଦି ଗୌରବ୍‍ ପଇନାନ୍‌, ମାତର୍‌ ଏନ୍‌ ନିଜେଦି ପକ୍‍ତିୱାନିଦି ଗୌରବ୍‍ କିଦେଙ୍ଗ୍‌ ବଦା କିନାନ୍‌, ୱାନ୍‌ ସତ୍‌ ଇନାନ୍‌, ମାରି ୱାନିମାନୁ ଇନି ମିସ୍‌ ସିଲେତ୍‌ ।
JOH 7:19 ମୋସା ଇନିକା ମିଙ୍ଗିଁ ନିୟମ୍‌ ସିଏନ୍‍ନୋ ? ଆତିଙ୍ଗ୍‌ବା ମି ମାଣ୍‌କୁ ଏନ୍‌ ନିୟମ୍‌ ମାନାଏଜିନାନ୍‍ । ମିର୍‌ ଏନ୍ଦା ନାଙ୍ଗିଁ ଡାକ୍‌ତେଙ୍ଗ୍‍ଁ ବଦା କିଜିନିଦେର୍‌ ।”
JOH 7:20 ଲୋକ୍‌ ୱିଜେରେ ଇର୍ହାର୍‌, “ନିଙ୍ଗିଁ ଦୁବା ଆସ୍‍ତାମାନାତ୍‍, ଏନ୍‌ ନିଙ୍ଗିଁ ଡାକ୍‌ତେଙ୍ଗ୍‍ଁ ବଦାକିଜିନାନ୍‌ ?”
JOH 7:21 ଜିସୁ ୱାରିଙ୍ଗ୍‌ ଇର୍‌ଆନ୍‌, “ନାନ୍ ଉଣ୍ତ୍ରି କାବା ପାଣି କିତା, ମାରି ମିର୍‌ ୱିଜେରେ କାବା ଆତିମାନିଦେର୍‍ ।
JOH 7:22 ଇୟାଉଣ୍ତିଙ୍ଗ୍‌ ମୋସା ମିଙ୍ଗିଁ ସୁନ୍ନତ ନିୟମ୍‌ ସିତାମାନାନ୍‌, ଇକା ଜେ ମୋସା ମାଣାନ୍‌ ଆତାମାନାତ୍‌, ଆକା ସିଲେ ମାତର୍‌ ପୁର୍ବେଦିଦାଦାରି ମାଣ୍‌କୁ, ମାରି ମିର୍‌ ରମ୍‌ନି ନାଣ୍ଡିଙ୍ଗ୍ କଡ଼ରିଙ୍ଗ୍‌ ସିନାତ୍‌ କିଜିନିଦେର୍‌ ।
JOH 7:23 ମୋସାଦି ନିୟମ୍‌ ଅମାନ୍ୟ କିଇ ଉଣ୍ତିଙ୍ଗ୍‌ ଜଦି ରମ୍‌ନିନାଣ୍ତିଙ୍ଗ୍‌ କଡ଼ଦି ସୁନ୍ନତ କିନିଦେର୍‍, ଆରିଙ୍ଗ୍‌ ନାନ୍ ରମ୍‌ନିନାଣ୍ତିଙ୍ଗ୍‌ ଅରେନ୍‍ ଲୋକ୍‌ତିଙ୍ଗ୍‌ ୱିଜୁ ନେଗେଣ୍ତ୍‍ କିତାଆକା ମିର୍‌ ଏନ୍ଦା ନା ମୁସ୍‌କୁ ରିସା ଆଜିନିଦେର୍‍ ?
JOH 7:24 ସୁପ୍‍ ଆଦୁ, ଆତ୍‍ରେରି ବିସୟ୍‌ ସୁଡ଼୍‌ଜି ବିସାର୍‌ କିଏଣ୍ତା ନ୍ୟାୟ୍‌ ବିସାର୍‌ କିଦୁ ।”
JOH 7:25 ଆବେଟ୍‌କୁ ଜିରୁସାଲାମ୍‍ତୁ ବାସା କିନି ଲୋକା ଲୋଇ ଏନ୍‌ ଏନ୍‌ ଇଡ୍ରେଙ୍ଗ୍‍ ଆସ୍‌ତାର୍‌, “ଜିହୁଦି ନେତାର୍‌ ଆମାୱାନିଙ୍ଗ୍‌ ଡାକ୍‌ତେଙ୍ଗ୍‍ଁ ବଦା କିଜିନାର୍‍, ଇକାନ୍‌ ଇନିକା ୱାନ୍‌ ଆଏନ୍‍ ?
JOH 7:26 ମାରି ସୁଡ଼ୁଦୁ, ୱାନ୍‌ ତରାଜି ମାଟା ଇଜିନାନ୍‌, ମାରି ୱାର୍‌ ୱାନିଙ୍ଗ୍‌ ଇନିକା କିଏଜିନାର୍‍ । ଇକାନ୍‌ ଜେ ମସିହ ଇଜି ଇକା ଇନିକା ନେତାର୍‌ ସତେ ନେସ୍‍ତାୱିସ୍‍ତାର୍‍ନି ?
JOH 7:27 ଆମାକା ଆପିତ୍‌, ୱେନି ୱାନିକା ମାପ୍‌ ନେସ୍‌ନାପ୍‌, ମାତର୍‌ ମସିହ ଏସ୍ତିୱାଲେ ୱାନାନ୍‌, ନାସ୍ତିୱାଲେ ୱାନି ୱାନିକା ଏନ୍‌ ନେସ୍‌ଏପ୍‌ ।”
JOH 7:28 ଆବେଟ୍‌ ଜିସୁ ମନ୍ଦିର୍‌ତୁ ସିକିୟା ସିବୁ ସିବୁ ନାଣ୍ତ ଆଉଲି ଆଜି ଇର୍ହାନ୍‌, ନାନ୍ ଏନ୍‌ ମାରି ଏମେଟ୍‍କୁ ୱାତାମାନା, ମିର୍‌ ଇନିକା ସତ୍‌ତାନ୍‌ ନେସ୍‌ନିଦେର୍‌ ? ନାନ୍ ନିଜେଦିମାଣାନ୍‍ ରେଏ, ମାତର୍‌ ନା ପକ୍‍ନିକାନ୍‍ ସତ୍‌, ୱାନିଙ୍ଗ୍‌ ମିର୍‌ ନେସ୍‌ଇଦେର୍‌ ।
JOH 7:29 ନାନ୍ ୱାନିଙ୍ଗ୍‌ ନେସ୍‌ନା, ଇରିଙ୍ଗ୍‌ ନାନ୍ ୱାନିମାଣ୍‌କୁ ୱାତାମାନା, ମାରି ୱାନ୍‌ ନାଙ୍ଗିଁ ପକ୍‌ତାନ୍‌ ।
JOH 7:30 ଆବେଟ୍‌ ୱାର୍‌ ଜିସୁଙ୍ଗୁଁ ଆସ୍‌ତେଙ୍ଗ୍‌ ବଦା କିତାର୍‍; ମାତର୍‌ ଏନ୍‌ ୱାନି ମୁସ୍‌କୁ କିୟୁ ମୁଟ୍‍ଏତାନ୍‍, ଇରିଙ୍ଗ୍‌ ୱାନି ସମୟ ଆୟା ସାନ୍ଦି ଇଗା ରେଏତ୍‍ମାର୍ହାତ୍‍ ।
JOH 7:31 ମାତର୍‌ ଲୋକା ଲୋଇରାନ୍‌ ନାଣ୍ତ ଲୋକୁ ୱାନିମାନୁ ବିସ୍‌ବାସ୍‌ କିଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ଇୟାୱିଜୁ କାବାଆନି ପାଣି କିଜିନାନ୍‍, ମସିହ ୱାଜି ୱେନିମାଣାନ୍‍ ଇନିକା ନାଣ୍ତ କିନ୍‌ନାନ୍‌ ?”
JOH 7:32 ପାରୁସିର୍‌ ଲୋକାଙ୍ଗ୍‌ ଜିସୁଦି ବିସୟ୍‌ତାନ୍‌ ପୁସୁରୁ ପାସୁରୁ ୱାର୍‌ଗିନିକା ୱେର୍‌ଆର୍‌ ମାରି ପେରି ଜାଜକର୍‌ ନି ପାରୁସିର୍‌ ୱାନିଙ୍ଗ୍‌ ଆସ୍‌ତେଙ୍ଗ୍‌ ଇଜି କାପ୍‍କିନିୱାରିଙ୍ଗ୍‍ ପୋକ୍‌ତାର୍‌ ।
JOH 7:33 ଆବେଟ୍‌ ଜିସୁ ଇର୍ହାନ୍‌, “ନାନ୍ ମାରି ଅଡ଼ପ୍‍ ସମୟ ମି ୱାଲେ ତେବାଜି ନା ପକ୍‍ତିୱାନିମାନୁ ଡ଼େସି ସଲ୍‍ସିନା ।
JOH 7:34 ମିର୍‌ ନାଙ୍ଗିଁ ପଇନିଦେର୍‌, ମାତର୍‌ ପୟ୍‌ଇଦେର୍‌; ମାରି, ନାନ୍ ଏମେମାନୁ ମାନା, ମିର୍‌ ଆବେ ସନ୍‌ଡ଼୍ରେଙ୍ଗ୍‌ ଆଟ୍‍ଇଦେର୍‍ ।”
JOH 7:35 ଆବେନୁ ଜିହୁଦି ନେତାର୍‌ ନିଜେ ନିଜେଦିମାନୁ ଇର୍ହାର୍‌, “ଇକାନ୍‌ ଏମେମାନୁ ସନ୍‌ଡ଼୍ରେଙ୍ଗ୍‌ ଇଜି ସତାମାନ୍‌ନାନ୍‌ ଜେ, ମାଡ୍‌ ୱାନିଙ୍ଗ୍‌ ପୋୟଇକା ? ଇକାନ୍‌ ଇନିକା ଗ୍ରିକ୍‌ରି ଗାଡ଼୍‌କାଙ୍ଗ୍‌ ଲୋଇ ଇନିଙ୍ଗାଁ ଆନିଙ୍ଗାଁ ଜିହୁଦିର୍‌ ଲାକ୍‌ତୁ ସୋଲ୍‌ସି ଗ୍ରିକ୍‌ରିଙ୍ଗ୍‌ ସିକିୟା ସିଦେଙ୍ଗ୍‍ ସତାମାନ୍‌ନାନ୍‌ ?
JOH 7:36 ମିର୍‌ ନାଙ୍ଗିଁ ପଇନିଦେର୍‌, ମାତର୍‌ ପୟଇଦେର୍‌, ମାରି ନାନ୍ ଏମେମାନୁ ମାନା, ମିର୍‌ ଆବେନୁ ସନ୍‌ଡ଼୍ରେଙ୍ଗ୍‌ ଆଟ୍‍ଇଦେର୍‍, ୱାନ୍‌ ଇୟା ଏମେ ମାଟା ଇର୍ହାନ୍‌, ତାନି ଅର୍ତ ଇନିକା ?”
JOH 7:37 ପଣ୍ତୟ୍‌ତି ୱିଜିନି ନାଣ୍ତିଙ୍ଗ୍‌, ମାରି, ପଣ୍ତ୍‌ୟତି ନେଗି ନାଣ୍ତିଙ୍ଗ୍‌, ଜିସୁ ନିଙ୍ଗିଁତାନ୍‌ନୋ ନାଣ୍ତ ଆଉଲି ଆଜି ଇର୍ହାନ୍‌, “ଏନ୍‌ ଜଦି ଏର୍‌କି ସାନାନ୍‌, ଆଦେଙ୍ଗ୍‌ ୱାନ୍‌ ନା ଲାକ୍‌ତୁ ରାପିନ୍‍,
JOH 7:38 ମାରି ଏନ୍‌ ନା ମାନୁ ବିସ୍‌ବାସ୍‌ କିନ୍‌ନାନ୍‌, ୱାନ୍‌ ଉଣିନ୍‍, ଦାର୍ମୁସାସ୍ତ୍ରଦୁ ରାସ୍‌ତାମାନାତ୍‌ ଏନ୍‌ ନାବାନୁ ବିସ୍‌ବାସ୍‌ କିନାନ୍‌ ୱାନି ଜିବନ୍‌ତାନ୍‌ ଜିବନ୍‌ସିନି ଏରୁ ପୋଗ୍‌ଜିସନେ ।”
JOH 7:39 ଜିସୁ ପବିତ୍ର ଆତ୍ମାଦି ବିସୟ୍‌ତାନ୍‌ ୱେର୍‌ତାନ୍‌, ଏମେକାର୍‌ ଜିସୁମାନୁ ବିସ୍‌ବାସ୍‌ କିଜିମାର୍ହାର୍‌ ୱାର୍‌ ୱେନ୍‌କା ଇୟା ପବିତ୍ର ଆତ୍ମାଦିଙ୍ଗ୍‌ ପୟନାର୍‌ ଆୟାସାନ୍ଧି ଜିସୁ ଦନ୍ୟବାଦ୍‌ ପୟଏନ୍‌ ମାରିଙ୍ଗ୍‌ ୱାର୍‌ ପବିତ୍ରଆତ୍ମା ପୟ୍‌ଏନ୍‌ ମାର୍ହାନ୍‌ ।
JOH 7:40 ମାରି, ଲୋକା ଲୋଇରାନ୍‌ ଏନ୍‌ ଏନ୍‌ ଇୟା ମାଟା ୱେନ୍‌ଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ଇକାନ୍‌ ସତେନେ ଆୟା ବାବବାଦି ।”
JOH 7:41 ମାରି ଆଇକାର୍‌ ଇର୍ହାର୍‌, “ଇକାନ୍‌ନେ ମସିହ,” ମାତର୍‌ ଏନ୍‌ ଏନ୍‌ ଇର୍ହାର୍‌, “ଇନିକା ! ମସିହ ଗାଲିଲିଦାନ୍‌ ରେଏନ୍‌ !
JOH 7:42 ମସିହ ଜେ ଦାଉଦଦି କୁଟୁମ୍‌ତାନ୍‌ ମାରି ଦାଉଦ ଏମେମାନୁ ମାର୍ହାନ୍‌, ଆୟା ବେତଲିହିମ୍‍ ନାର୍‌ତାନ୍‌ ଜନମ୍‌ ଆନାନ୍‌, ଇକା ଇନିକା ଦାର୍ମୁସାସ୍ତ୍ରଦୁ ବାକ୍ୟ ଇନ୍‌ଏତ୍‌ ?”
JOH 7:43 ଆରିଙ୍ଗ୍‌ ଲୋକୁୱିଜେରି ଲୋଇ ୱାନି ଉଣ୍ତିଙ୍ଗ୍‌ ୱେର୍‌ଏ ୱେର୍‌ଏ ଆତାର୍‌
JOH 7:44 ମାରି, ୱାରି ଲୋଇରାନ୍‌ ଏସ ୱାନ୍‌ ଜିସୁ ଦରା ପଡ଼ାପିନ୍‍ ଇଜି ବଦା କିଜିମାର୍ହାର୍‌, ମାତର୍‌ ଏନ୍‌ ୱାନି ମୁସ୍‌କୁ କିୟୁ ମୁଟ୍‌ଏତାର୍‌ ।
JOH 7:45 ଆୟାଦାପ୍ରେ ମନ୍ଦିର୍‌ତି କାପ୍‍କିନିକାର୍‌ ପେରି ଜାଜକ ମାରି ପାରୁସିର୍‌ ଲାକ୍‌ତୁ ଡ଼େସି ୱାତାର୍‌, ମାରି ୱାର୍‌ ୱାରିଙ୍ଗ୍‌ ୱେନ୍‌ବାତାର୍‌, “ମିର୍‌ ଏନ୍ଧା ୱାନିଙ୍ଗ୍‌ ଆସୋସ ତେଇତିଦେର୍‌ ?”
JOH 7:46 କାପ୍‍କିନିକାର୍‌ ଇର୍ହାର୍‌, “ଇୟା ଲୋକୁ ଏଣ୍ତେସ୍‌ମାରି ମାଟେଙ୍ଗ୍‌ ଇନାନ୍‌, ଆମା ଲୋକୁ ଏସ୍‌କାଙ୍ଗ୍‌ ଆୟାନାନି ମାଟେଙ୍ଗ୍‌ ଇନ୍‌ଏର୍‌ ।”
JOH 7:47 ଆବେଟ୍‌ ପାରୁସିର୍‌ ୱାରିଙ୍ଗ୍‌ ଇର୍ହାର୍‌, “ମିଙ୍ଗିଁ ବା ଇନିକା ୱାନ୍‌ ବାୟା କିତାନ୍‌ ?”
JOH 7:48 “ନେତାରି ଲୋଇରାନ୍‌ ମାରି ପାରୁସିର୍‌ ଲୋଇରାନ୍‌ ଇନିକା ଏନ୍‌ ୱାନିମାନୁ ବିସ୍‌ବାସ୍‌ କିତାମାନାର୍‌ ଇକା ମିର୍‌ ନେସ୍‌ତିମାନିଦେର୍‌ ନୋ ?
JOH 7:49 ମାତର୍‌ ଇୟା ଲୋକୁ ମୋସାଦି ନିୟମ୍‌ ନେସ୍‌ଏର୍‌, ଆୟାଉଣ୍ତିଙ୍ଗ୍‌ ୱାର୍‌ ଅବିସାପ ।”
JOH 7:50 ଆମା ନିକଦିମ ଇୟାଆଗ୍‌ଡ଼ି ୱାନି ଲାକ୍‌ତୁ ୱାତାମାର୍ହାନ୍‌ ମାରି ଏନ୍‌ ୱାରି ଲୋଇ ଅରେନ୍‌ନେ, ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌,
JOH 7:51 ଇରିଙ୍ଗ୍‌ ଅରେନ୍‍ ଲୋକାମାଣ୍‌କୁ ଆଗ୍‌ଡ଼ି ୱେନ୍‌ଏଣ୍‌ଗା ମାରି ୱାନି ବୁଲାସାଲାନି ବିସୟ୍‌ ନେସ୍‌ଏଣ୍‌ଗା ମା ସାସ୍ତ୍ର ଇନିକା ୱାନିଙ୍ଗ୍‌ ଦୋସ୍‌ କିନାତ୍‌ ?
JOH 7:52 ୱାର୍‌ ୱାନିଙ୍ଗ୍‌ ଇର୍ହାର୍‌, “ନିନ୍‌ ବା ଇନିକା ଅରେନ୍‍ ଗାଲିଲିୟ୍‌ଦି ଲୋକୁ ? ଗାଲିଲିଦାନ୍‌ ଏମେ ବାବବାଦି ସଏନ୍‌, ଇକା ନେଗେନ୍‌ କିଜି ଦାର୍ମୁସାସ୍ତ୍ର ପୟଦୁ ।”
JOH 7:53 ତାନେ ୱେନ୍‌କା ଆୟା ବାଡି ଡ଼ିସ୍‌ସି ୱିଜେରେ ଜିହୁଦି ନେତାର୍‌ ନିଜେ ନିଜେଦି ଇଲ୍‌କାଙ୍ଗ୍‌ ସର୍ହାର୍‌ ।
JOH 8:1 ମାତର୍‌ ଜିସୁ ଜିତ ଗରନ୍‌ତୁ ସର୍ହାନ୍‌ ।
JOH 8:2 ଆୟା ମାରାନାଣ୍ତିଙ୍ଗ୍‌ ସାଲ୍‌ଦିନେ ଜିସୁ ମାରିଡ଼େସି ମନ୍ଦିର୍‌ତୁ ୱାତାନ୍‌, ମାରି ୱିଜେରେ ଲୋକୁ ୱାନି ଲାକ୍‌ତୁ ଉଣ୍ତାତାର୍‌ଆକା, ୱାନ୍‌ ବାସ୍‌ତାନ୍‌ନୋ ୱାରିଙ୍ଗ୍‌ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।
JOH 8:3 ମାରି, ସାସ୍ତ୍ରିର୍‍ ମାରି ପାରୁସିର୍‌ ଦାରିପାଣି କିତିମାନି ଅରେତ୍‌ ଆଇମାଦିଙ୍ଗ୍‍ ଆସ୍‌ତାତାତାର୍‌ ତାନିଙ୍ଗ୍‌ ୱିଜେରିନାଣ୍‌ମି ନିଲ୍‌ପ୍‌ତାରୋ ଜିସୁଙ୍ଗୁଁ ଇର୍ହାର୍‌,
JOH 8:4 “ଏ ଗୁରୁ, ଇୟା ଆଇମା ଦାରିପାଣି କିନିୱାଲେ ଦରାପଡ଼ାତାମାନାତ୍‌ ।
JOH 8:5 ଇୟାୱାଜା ଆଇମେକାଙ୍ଗ୍‍ଁ କାଲ୍‌କାଣୁ ପୋକ୍‌ସି ଡାକ୍‌ତେଙ୍ଗ୍‍ଁ ମୋସା ମାଙ୍ଗିଁ ସାସ୍ତ୍ରଦୁ ଆଦେସ୍‌ ସିତାମାନାନ୍‌; ଆରିଙ୍ଗ୍‌ ନିନ୍‌ ଇନିକା ଇଜିନି ?”
JOH 8:6 ୱାର୍‌ ଏଣ୍ତେସ୍‌ ୱାନି ବିରଦ୍‌ତାନ୍‌ ଦୋସ୍‌ ପୟ୍‌ଦେଙ୍ଗ୍‌ ଆଟ୍‍ନାର୍‍, ଆୟାଉଣ୍ତିଙ୍ଗ୍‌ ୱାର୍‌ ୱାନିଙ୍ଗ୍‌ ପରିକା କିନି ଉଣ୍ତିଙ୍ଗ୍‌ ଇକା ଇର୍ହାର୍‌ । ମାତର୍‌ ଜିସୁ ପାଡ଼୍‌ଗିତାନ୍‌ନୋ ଡ଼ାସ୍‌କେଣ୍‌କୁ ବୁମିଦୁ ରାସ୍‌ତେଙ୍ଗ୍‌ ଆସ୍‌ତାନ୍‌ ।
JOH 8:7 ମାତର୍‌ ୱାର୍‌ ୱାନିଙ୍ଗ୍‌ ଡ଼େସି ଡ଼େସି ୱେନ୍‍ବାତାର୍‍ଆକା, ୱାନ୍‌ ତାଲା ପେର୍‌ଜି ୱାରିଙ୍ଗ୍‌ ଇର୍ହାନ୍‌, “ମି ଲୋଇ ଏନ୍‌ ପାପ୍‌ ସିଲିକାନ୍‍, ୱାନ୍‌ ଆଗିଡ଼ି ତାନିଙ୍ଗ୍‍ କାଲୁ ପକିନ୍‍ ।”
JOH 8:8 ମାରିଡ଼େସି ଜିସୁ ପାଡ଼୍‌ଗିଜି ବୁମିଦୁ ରାସ୍‌ତେଙ୍ଗ୍‌ ଆସ୍‌ତାନ୍‌ ।
JOH 8:9 ଆକା ୱେନ୍‌ଜି ୱାର୍‌ ପେରି ଲୋକାମାଣ୍‌କୁ ୱିଜେରେ ଅରେନ୍‍ ଅରେନ୍‍ ଆଜି ସହସି ସନ୍‌ଡ଼୍ରେଙ୍ଗ୍‌ ଆସ୍‌ତାର୍‌, ମାରି କେବଲ୍‌ ଜିସୁ ନି ମଜାୟ୍‍ ନାଡ଼୍‍ମି ଆୟା ଆଇମା ତେବାତାର୍‍ ।
JOH 8:10 ମାରି, ଜିସୁ ତାଲା ପେର୍‌ଜି ତାନିଙ୍ଗ୍‍ ଇର୍ହାନ୍‌, “ଏ ଆଇମା, ୱାର୍‌ ଏମେ ? ଏନ୍‌ ନିଙ୍ଗିଁ ଦୋସ୍‍କିଦେଙ୍ଗ୍‍ ସିଲେନ୍‌ ନୋ ?”
JOH 8:11 ଆଇମା ଇର୍ହାତ୍‌, “ଏନ୍‌ ସିଲେ, ପ୍ରବୁ ।” ଆବେଟ୍‌ ଜିସୁ ଇର୍ହାନ୍‌, “ନାନ୍ ବା ନିଙ୍ଗିଁ ଦୋସ୍‍ କିଏଜିନା; ସାଙ୍ଗ୍‍ଆ, ନେର୍‌ଆନ୍‌ ମାରି ପାପ୍‌ କିମା ।”
JOH 8:12 ଜିସୁ ମାରିଡ଼େସି ପାରୁସିରିଙ୍ଗ୍‍ ଇର୍ହାନ୍‌, “ନାନ୍ ଦୁନିଆଦି ଜାୟ୍‌; ଏନ୍‌ ନା ୱେନ୍‌କା ୱାନାନ୍‌, ମାତର୍‌ ଜିବନ୍‍ତି ଜାୟ୍‌ ପଇନାନ୍‍ ୱାନ୍‌ ଏସାଙ୍ଗ୍‍ ବା ସିକାଟିଦୁ ବୁଲାଏନ୍‍ ।”
JOH 8:13 ଆବେଟ୍‌ ପାରୁସିର୍‌ ଜିସୁଙ୍ଗୁଁ ଇର୍ହାର୍‌, “ନିନ୍‌ ନିଜେ ନିଜେଦି ବିସୟ୍‌ତାନ୍‌ ସାକି ସିଜିନି, ନି ସାକି ସତ୍‌ ସିଲେ ।”
JOH 8:14 ଜିସୁ ୱାରିଙ୍ଗ୍‌ ଇର୍ହାନ୍‌, ସିଲେ, “ନାନ୍ ନିଜେଦି ଉଣ୍ତିଙ୍ଗ୍‌ ସାକି ସିତିଙ୍ଗ୍‍ବା ନାନ୍ ଆମାକା ଇଜିନା, ଆକା ସତ୍‌, ଇରିଙ୍ଗ୍‌ ନାନ୍ ଏମେଣ୍‌କୁ ୱାତାମାନା ମାରି ଏମେମାନୁ ସଲ୍‍ସିନା, ଆକା ନାନ୍ ନେସ୍‌ନା, ମାତର୍‌ ମିର୍‌ ନାନ୍ ଏମେଣ୍‌କୁ ୱାତାମାନା ମାରି ଏମେମାନୁ ସନା, ଆକା ମିର୍‌ ନେସ୍‌ଇଦେର୍‌ ।
JOH 8:15 ମିର୍‌ ଲୋକା ୱାଜା ବିସାର୍‌ କିନିଦେର୍‍, ନାନ୍ ଏ ବିସାର୍‌ କିଏ ।
JOH 8:16 ମାତର୍‌ ନାନ୍ ଜଦି ବିସାର୍‌ କିନା, ଆରିଙ୍ଗ୍‍ବା ନା ବିସାର୍‌ ଟିକ୍‌; ଇରିଙ୍ଗ୍‌ ନାନ୍ ଅରେନେ ସିଲେ, ମାତର୍‌ ନା ପକ୍‍ତିମାନିବୁବା ନା ୱାଲେ ମାନାନ୍‌ ।
JOH 8:17 ମାରି, ରିଏରି ସାକି ସାମାନ୍‍ ଆତିଙ୍ଗ୍‌, ୱାର୍‌ ଆମାକା ଇଜିନାର୍‍ ଆକା ସତ୍‌, ଇକା ମି ନିୟମ୍‌ତୁ ବା ରାସାତାମାନାତ୍‌ ।
JOH 8:18 ନାନ୍ ନିଜେ ନିଜେଦି ସାକି, ମାରି ନା ପୋକ୍‍ତିମାନି ବୁବା ନା ବିସୟ୍‌ତାନ୍‌ ସାକି ସିଜିନାନ୍‌ ।”
JOH 8:19 ଆବେଟ୍‌ ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ମି ବୁବା ଏମେ ?” ଜିସୁ ଇର୍ହାନ୍‌, “ମିର୍‌ ନାଙ୍ଗିଁ ନେସ୍‌ଇଦେର୍‌ ମାରି ନା ବୁବେଙ୍ଗ୍‌ ବା ନେସ୍‌ଇଦେର୍‌; ଜଦି ନାଙ୍ଗିଁ ନେସ୍‌ତିଙ୍ଗ୍‌, ଆରିଙ୍ଗ୍‌ ନା ବୁବେଙ୍ଗ୍‌ ବା ନେସ୍‌ତିଦେର୍‌ମାନ୍ଦି ।”
JOH 8:20 ମନ୍ଦିର୍‌ତି ଦାନ୍‍ ଉଣ୍ତାକିନି ପେଡ଼େଙ୍ଗ୍‌ ଇଟ୍‍ତିମାର୍‍ଇ ବାକ୍‍ରାଦୁ ଜିସୁ ଇୟାୱିଜୁ ବିସୟ୍‌ ସିକିୟା ସିଜିମାର୍ହାନ୍‍, ମାତର୍‌ ଏନ୍‌ ୱାନିଙ୍ଗ୍‌ ତର୍‍ଏତାର୍‌, ଇରିଙ୍ଗ୍‌ ୱାନି ୱେଡ଼ା ଆୟାସାନ୍ଧି ରେଏତ୍‌ ମାର୍ହାତ୍‌ ।
JOH 8:21 ଆବେଟ୍‌ ଜିସୁ ମାରିଡ଼େସି ୱାରିଙ୍ଗ୍‌ ଇର୍ହାନ୍‌, “ନାନ୍ ସୋଲ୍‌ସିନା, ମାରି ମିର୍‌ ନାଙ୍ଗିଁ ପୋୟ୍‌ନିଦେର୍‌ ମାତର୍‌ ମିର୍‌ ନିଜେ ନିଜେଦି ପାପ୍‌ତାନ୍‌ ସାନିଦେର୍‌, ନାନ୍ ଏମେମାନୁ ସୋଲ୍‌ସିନା, ମିର୍‌ ଆବେନୁ ସନ୍‌ଡ଼୍ରେଙ୍ଗ୍‌ ଆଟ୍‍ଇଦେର୍‍ ।”
JOH 8:22 ଆବେଟ୍‌ ଜିହୁଦି ନେତାର୍‌ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ୱାନ୍‌ ଇଜିନାନ୍‌, ୱାନ୍‌ ଏମେମାନୁ ସଲ୍‍ସିନା, “ମାପ୍‌ ଆବେ ସନ୍‌ଡ଼୍ରେଙ୍ଗ୍‌ ଆଟ୍‍ଏପ୍‍ । ୱାନ୍‌ ସାଦେଙ୍ଗ୍‌ ସଲ୍‌ସିନାନ୍‌ ନୋ ?”
JOH 8:23 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌, ଦୁନିଆଦାନ୍‍ ଜନମ୍‍ ଆତିମାନିଦେର୍‍, ମାତର୍‌ ନାନ୍ ମୁସ୍‌କୁରାନ୍‌ ୱାତାମାନା; ମିର୍‌ ଇୟା ଦୁନିଆଦାନ୍‍ ୱାତିମାନିଦେର୍‌, ନାନ୍ ଇୟା ଦୁନିଆଦାନ୍‌ ରେଏ ।
JOH 8:24 ଆରିଙ୍ଗ୍‌ ମିର୍‌ ଜେ ନିଜେ ନିଜେଦି ପାପ୍‌ତାନ୍‌ ସାନିଦେର୍‌, ନାନ୍ ମିଙ୍ଗିଁ ଇକା ୱେର୍‌ତା; ଇରିଙ୍ଗ୍‌ ନାନ୍ ଜେ ନିଜେ ଆୟା ଲୋକୁ, ଇକା ମିର୍‌ ବିସ୍‌ବାସ୍‌ କିଇତିଙ୍ଗ୍‌ ନିଜେ ନିଜେଦି ପାପ୍‌ତାନ୍‌ ସାନିଦେର୍‌ ।”
JOH 8:25 ଆବେଟ୍‌ ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ନିନ୍‌ ଏନ୍‌ ?” ଜିସୁ ୱାରିଙ୍ଗ୍‌ ଇର୍ହାନ୍‌, “ଆୟା ମାଟା ନାନ୍ ଆଗ୍‍ଡ଼ିରାନ୍‍ ଇଜି ୱାଜିନା ।
JOH 8:26 ମି ବିସୟ୍‌ତାନ୍‌ ମାଟା ଇନ୍‌ଡ୍ରେଙ୍ଗ୍‌ ମାରି ବିସାର୍‌ କିଦେଙ୍ଗ୍‌ ନାଙ୍ଗିଁ ଗାଦି ବିସୟ୍‌କୁ ମାନେ; ଆମାକାଆପିତ୍‌; ନା ପୋକ୍‌ତାତିମାନିକାନ୍‍ ସତ୍‌, ମାରି ନାନ୍ ୱାନିମାଣ୍‌କୁ ଆମା ଆମାକା ୱେର୍‌ଆମାନା, ଆୟାୱିଜୁ ଦୁନିଆଦିଙ୍ଗ୍‌ ୱେର୍‌ସିନା ।”
JOH 8:27 ଜିସୁ ୱାନି ବୁବାଦି ବିସୟ୍‌ତାନ୍‌ ୱାରିଙ୍ଗ୍‌ ୱେର୍‌ସି ମାର୍ହାନ୍‌, ଇକା ୱାର୍‌ ବୁଜାଏତାର୍‌ ।
JOH 8:28 ମାରି, ଜିସୁ ଇର୍ହାନ୍‌, “ଏସ୍ତିୱାଲେ ମିର୍‌ ମନୁସ୍ୟପୁତ୍ରଙ୍ଗ୍‌ ମୁସ୍‌କୁ ପେର୍‌ନିଦେର୍‌, ନାସ୍ତିୱାଲେ ନାନ୍ ଜେ ନିଜେ ଆୟା ଲୋକୁ; ମାରି ନାନ୍ ନିଜେଦି ଅଦିକାର୍‍ତାନ୍‍ ଇନିକା କିଏ ମାତର୍‌ ଆମାକା ନା ବୁବା ନାଙ୍ଗିଁ ଏଣ୍ତେସ୍‌ ସିକିୟା ସିତାନ୍‌, ଆୟାୱାଜା ଇୟାୱିଜୁ ମାଟା ଜେ ୱେର୍‌ସିନା, ଇକା ମିର୍‌ ବୁଜାନିଦେର୍‌ ।
JOH 8:29 ନା ପୋକ୍‌ତାତିମାନିକାନ୍‍ ନା ୱାଲେ ମାନାନ୍‌; ୱାନ୍‌ ନାଙ୍ଗିଁ ଅରେନ୍‍ୱାନିଙ୍ଗ୍‍ ଡ଼ିସ୍‌ଏନ୍‌, ଇରିଙ୍ଗ୍‌ ନାନ୍ ୱିଜୁୱାଲେ ଆମାକା ୱାନି ୱେଡ଼ିକାଦି ପାଣି କିନା ।”
JOH 8:30 ଜିସୁଦି ଇୟା ମାଟା ୱେନ୍‌ଞ୍ଜି ନାଣ୍ତ ଲୋକୁ ୱାନିଙ୍ଗ୍‌ ବିସ୍‌ବାସ୍‌ କିତାର୍‌ ।
JOH 8:31 ମାରି, ଜିସୁ ୱାନିଙ୍ଗ୍‌ ବିସ୍‌ବାସ୍‌ କିତିମାନି ଜିହୁଦିରିଙ୍ଗ୍‌ ଇର୍ହାନ୍‌, “ଜଦି ମିର୍‌ ନା ସିକିୟାଦୁ ମାନାନିଦେର୍‌ କିନିଦେର୍‍, ଆରିଙ୍ଗ୍‌ ମିର୍‌ ସତ୍‌ତାନ୍‍ ନା ସିସୁର୍‍,
JOH 8:32 ମାରି ମିର୍‌ ସତ୍‌ ନେସ୍‌ନିଦେର୍‌ ମାରି ଆୟା ସତ୍‌ ମିଙ୍ଗିଁ ଡ଼ିସିସ୍‍ କିନାତ୍‌ ।”
JOH 8:33 ୱାର୍‌ ଜିସୁଙ୍ଗୁଁ ଇର୍ହାର୍‌, “ମାପ୍‌ ଅବ୍ରାହାମତି କୁଟୁମ୍‌, ମାରି ଏସାଙ୍ଗ୍‍ ବା ଏମେୱାନି କଟିସାକର୍‍ ଆଏପ୍‍, ଆରିଙ୍ଗ୍‌ ମିର୍‌ ଡ଼ିସାଇ ଆନିଦେର୍‌ ଇଜି ଏଣ୍ତେସ୍‌ ଇଜିନିଦେର୍‌ ? ତେନି ଅର୍ତ ଇନିକା ?”
JOH 8:34 ଜିସୁ ୱାରିଙ୍ଗ୍‌ ଇର୍ହାନ୍‌, “ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ଏନ୍‌ ପାପ୍‌ କିନାନ୍‍, ୱାନ୍‌ ପାପ୍‍ତି ସାକର୍‌ ।
JOH 8:35 ସାକର୍‌ ୱିଜୁଦିନ୍‌ ଉଣ୍ତିଙ୍ଗ୍‌ ଇଲୁଦି ଅରେନ୍‍ ଆଜି ତେବାଏନ୍‍, ମାତର୍‌ ଇଲୁଦି ମାରିନ୍‌ ୱିଜୁଦିନ୍‌ ତେବାନାନ୍‍ ।
JOH 8:36 ମାରିନ୍‌ ଜଦି ମିଙ୍ଗିଁ ଡ଼ିସିସ୍‌ କିନାନ୍‌, ଆତିଙ୍ଗ୍‌ ମିର୍‌ ସତ୍‌ତାନ୍‌ ଡ଼ିସାଇ ଆନିଦେର୍‌ ।
JOH 8:37 ମିର୍‌ ଜେ ଅବ୍ରାହାମତି କୁଟୁମ୍‌, ଆକା ନାନ୍ ନେସ୍‌ନା; ମାତର୍‌ ନା ସିକିୟା ମି ଜିବନ୍‍ତୁ ବାଡି ମାନାଏଦେର୍‍ଆକା ମିର୍‌ ନାଙ୍ଗିଁ ଡାକ୍‍ତେଙ୍ଗ୍‍ ବଦା କିଜିନିଦେର୍‍ ।
JOH 8:38 ନା ବୁବାମାନୁ ଆମା ଆମାକା ନାନ୍ ସୁଡ଼ୁତାମାନା, ଆୟାୱିଜୁ ନାନ୍ ୱେର୍‌ନା; ମାତର୍‌ ମି ବୁବା ଇନି ଇସାବ୍‌ତାନ୍‌ ପାଣି କିଜିନିଦେର୍‍ ।”
JOH 8:39 ଜିହୁଦିର୍‍ ଜିସୁଙ୍ଗୁଁ ଇର୍ହାର୍‌, “ଅବ୍ରାହାମ ମା ବୁବା ।” ଜିସୁ ୱାରିଙ୍ଗ୍‌ ଇର୍ହାନ୍‌, “ଜଦି ମିର୍‌ ଅବ୍ରାହାମତି ମାରିସିର୍‌ ଆତିଦେର୍‍ମାନ୍ଦି, ଆରିଙ୍ଗ୍‌ ଅବ୍ରାହାମ କିତିମାନି ପାଣି କିତିଦେର୍‍ମାନ୍ଦି;
JOH 8:40 ମାପୁରୁମାଣ୍‌କୁ ୱେର୍‍ଇମାନି ସତ୍‌ ଡ଼ିସ୍‍ତିଙ୍ଗ୍‍ ମିଙ୍ଗିଁ ମାରି ଇନିକା ଇନ୍‌ଏ, ଆରିଙ୍ଗ୍‍ବା ମିର୍‌ ନାଙ୍ଗିଁ ଡାକ୍‍ତେଙ୍ଗ୍‍ ବଦା କିଜିନିଦେର୍‍; ଅବ୍ରାହାମ ଇୟାୱାଜା ପାଣି କିଏନ୍‌ ମାର୍ହାନ୍‍ ।
JOH 8:41 ମିର୍‌ ମି ବୁବାଦି ପାଣିୱିଜୁ କିଜିନିଦେର୍‍ । ୱାର୍‌ ୱାନିଙ୍ଗ୍‌ ଇର୍ହାନ୍‌, ମାପ୍‌ ଦାରିପାଣିଦାନ୍‍ ଜନମ୍‍ ଆଏପ୍‍, କେବଲ୍‌ ମାପୁରୁ ଅରେନ୍‍ନେ ମା ବୁବା ।”
JOH 8:42 ଜିସୁ ୱାରିଙ୍ଗ୍‌ ଇର୍ହାନ୍‌, “ମାପୁରୁ ଜଦି ମି ବୁବା ଆତାନ୍‍ମାନ୍ଦି, ଆରିଙ୍ଗ୍‌ ମିର୍‌ ନାଙ୍ଗିଁ ଜିବନ୍‌ ନତିଦେର୍‍ମାନ୍ଦି; ଇରିଙ୍ଗ୍‌ ନାନ୍ ମାପୁରୁ ମାଣ୍‌କୁ ୱାଜି ଇଲେଇ ଇବେ ମାନା; ନାନ୍ ନିଜେଦି ଅଦିକାର୍‍ତାନ୍‍ ରେଏ, ମାତର୍‌ ୱାନ୍‌ ନାଙ୍ଗିଁ ପକ୍‌ତାନ୍‌ ।
JOH 8:43 ନାନ୍ ଆମାକା ଇଜିନା, ମିର୍‌ ଏନ୍ଦା ନା ମାଟା ବୁଜାଏଜିନିଦେର୍‍ ? ଇରିଙ୍ଗ୍‌ ମିର୍‌ ତୋ ନା ବାକ୍ୟ ୱେନ୍‌ଜି ମାନାଦେଙ୍ଗ୍‌ ଆଟ୍‍ଇଜିନିଦେର୍‍ ।
JOH 8:44 ମିର୍‌ ମି ବୁବା ସୟତାନ୍ ମାଣ୍‌କୁ ଜନମ୍‍ ଆତିମାନିଦେର୍‍, ମାରି ମି ବୁବାଦି ପାଣି କିଦେଙ୍ଗ୍‌ ମି ବଦା । ୱାଦ୍‌ ଆଗ୍‍ଡ଼ିରାନ୍‍ ଲୋକାଙ୍ଗ୍‌ କାତ୍‍ନିକାତ୍‍, ମାରି ୱାଦ୍‌ ସତ୍‍ତୁ ତେବାଏତ୍‍, ଇରିଙ୍ଗ୍‌ ତାନେମାନୁ ସତ୍‌ ସିଲେତ୍‌ । ଏସ୍ତିୱାଲେ ୱାଦ୍‌ ମିସ୍‌ ଇନାତ୍‍, ନାସ୍ତିୱାଲେ ୱାଦ୍‌ ନିଜେଦି ମାଣାନ୍‌ ଇନାତ୍‍; ଇରିଙ୍ଗ୍‌ ୱାଦ୍‌ ନିଜେ ମିସ୍‍ଇନିକାତ୍‍ ନି ମିସ୍‌ ୱେର୍‍ନି ଲୋକା ବୁବା ।
JOH 8:45 ମାତର୍‌ ନାନ୍ ସତ୍‌ ଇର୍ହାମାନାଆକା ମିର୍‌ ନାଙ୍ଗିଁ ବିସ୍‌ବାସ୍‌ କିଇଜିନିଦେର୍‍ ।
JOH 8:46 ନାବାନ୍‍ ପାପ୍‌ ମାନାତ୍‌ ଇଜି ମି ବାଣାନ୍‍ ଏନ୍‌ ପାର୍‍ମାନ୍‍ ସିଜିନାନ୍‌ ? ନାନ୍ ଏସ୍ତିୱାଲେ ସତ୍‌ ଇନା, ଆରିଙ୍ଗ୍‌ ମିର୍‌ ଏନ୍ଦା ବିସ୍‌ବାସ୍‌ କିଇଜିନିଦେର୍‍ ?
JOH 8:47 ଏନ୍‌ ମାପୁରୁ ମାଣାନ୍‌ ଜନମ୍‍ ଆତାମାନାନ୍‌, ୱାନ୍‌ ମାପୁରୁଦି ବାକ୍ୟ ୱେନାନ୍‌; ଇୟାଉଣ୍ତିଙ୍ଗ୍‌ ମିର୍‌ ନା ବାକ୍ୟ ୱେନ୍‍ଇଦେର୍‍, ଇରିଙ୍ଗ୍‌ ମିର୍‌ ମାପୁରୁଦି ମାଣାନ୍‌ ଜନମ୍‍ ଆଇଦେର୍‍ ।”
JOH 8:48 ଜିହୁଦି ନେତାର୍‌ ଜିସୁଙ୍ଗୁଁ ୱେନ୍‌ବାତାର୍‌, “ନିନ୍‌ ଜେ ଅରେନ୍‍ ସମିରୋଣିୟ ମାରି ନିଙ୍ଗିଁ ଜେ ଦୁବା ଆସ୍‍ତାମାନାତ୍‍, ଇକା ଇନିକା ମାପ୍‌ ଟିକ୍‌ ଇନ୍‍ଏପ୍‌ ମାର୍ହାପ୍‍ ?”
JOH 8:49 ଜିସୁ ଇର୍ହାନ୍‌, “ନାଙ୍ଗିଁ ଦୁବା ଆସ୍‌ଏତ୍‌, ନାନ୍ ନା ବୁବେଙ୍ଗ୍‌ ମାନାଜିନା, ମାତର୍‌ ମିର୍‌ ନାଙ୍ଗିଁ ମାନାଇଜିନିଦେର୍‌ ।
JOH 8:50 ମାତର୍‌ ନାନ୍ ନିଜେଦି ଗୌରବ୍‍ ପୟ୍‍ଏ; ଏନ୍‌ ପଇନାନ୍‍ ମାରି ବିସାର୍‌ କିନାନ୍‍, ଇୟାୱାଜା ଅରେନ୍‍ ମାନାନ୍‌ ।
JOH 8:51 ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ଜଦି ଏନ୍‌ ନା ସିକିୟା ମାନାନାନ୍‍, ଆତିଙ୍ଗ୍‌ ୱାନ୍‌ ଏସାଙ୍ଗ୍‌ ବା ସାଏନ୍‌ ।”
JOH 8:52 ଜିହୁଦିର୍‍ ଜିସୁଙ୍ଗୁଁ ଇର୍ହାର୍‌, “ଇଲେଇ ମାପ୍‌ ନେସ୍‍ତାପ୍‍ ଜେ ସତେନେ ନିଙ୍ଗିଁ ଦୁବା ଆସ୍‍ତାମାନାତ୍‍, ଅବ୍ରାହାମ ମାରି ବାବବାଦିର୍ ସାତା ମାନାର୍‌, ମାରି ନିନ୍‌ ଇଜିନି, ଜଦି ଏନ୍‌ ନା ସିକିୟା ମାନାନାନ୍‍, ଆତିଙ୍ଗ୍‌ ୱାନ୍‌ ଏସାଙ୍ଗ୍‌ ବା ସାଏନ୍‌ ।
JOH 8:53 ନିନ୍‌ ଇନିକା ମା ବୁବା ଅବ୍ରାହାମତି ମାଣାନ୍‌ ପେରିକିନ୍ଦା ? ଅବ୍ରାହାମ ତୋ ସାତା ମାନାନ୍‌, ବାବବାଦିର୍ ବା ସାତାମାନାର୍‍; ନିନ୍‌ ନିଜେଦିଙ୍ଗ୍‍ ଏନ୍‌ ଇଜି ଅଡ଼୍‍ବିଜିନି ?”
JOH 8:54 ଜିସୁ ଇର୍ହାନ୍‌, “ନାନ୍ ଜଦି ନିଜେଦି ଦନ୍ୟବାଦ୍‌ କିଦେଙ୍ଗ୍‌ ବଦା କିତାମାନ୍ଦି, ଆରିଙ୍ଗ୍‌ ତେନି ଦାରା ତେବାଏତାତ୍‍ମାନ୍ଦି; ଏନ୍‌ ନାଙ୍ଗିଁ ଗୌରବ୍‍ କିନାନ୍‍, ୱାନ୍‌ ନା ବୁବା ଏମେୱାନିଙ୍ଗ୍‌ ମିର୍‌ ମି ମାପୁରୁ ଇଜି ଇଜିନିଦେର୍‌ ।
JOH 8:55 ମାରି, ମିର୍‌ ୱାନିଙ୍ଗ୍‌ ନେସ୍‌ଇଦେର୍‌, ମାତର୍‌ ନାନ୍ ୱାନିଙ୍ଗ୍‌ ନେସ୍‌ନା । ମାରି, ନାନ୍ ୱାନିଙ୍ଗ୍‌ ନେସେଏ ଇଜି ଜଦି ଇନା, ଆତିଙ୍ଗ୍‌ ନାନ୍ ବା ମି ୱାଜା ମିସ୍‍ବାଦି ଆନା, ମାତର୍‌ ନାନ୍ ନେସ୍‌ନା ମାରି ୱାନି ବାକ୍ୟ ମାନାନା ।
JOH 8:56 ମି ବୁବା ଅବ୍ରାହାମ ନା ଦିନ୍‌ ସୁଡ଼ୁନି ଆସାଦାନ୍‍ ୱେଡ଼ିକା କିନାନ୍‍, ମାରି ୱାନ୍‌ ଆକା ସୁଡ଼ୁଜି ୱେଡ଼ିକା କିତାନ୍‍ ।”
JOH 8:57 ଆବେଟ୍‌ ଜିହୁଦିର୍‌ ଜିସୁଙ୍ଗୁଁ ଇର୍ହାର୍‌, “ନିଙ୍ଗିଁ ତୋ ଇୟାସାନ୍ଦି ପସାସ୍‌ ବାର୍‍ସେକ୍‍ ଆଏଦେ, ନିନ୍‌ ଇନିକା ଅବ୍ରାହାମ୍‍ତିଙ୍ଗ୍‌ ସୁଡ଼ୁତିମାନି ?”
JOH 8:58 ଜିସୁ ୱାରିଙ୍ଗ୍‌ ଇର୍ହାନ୍‌, “ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ଅବ୍ରାହାମ ଜନମ୍‍ ଆନି ଆଗ୍‍ଡ଼ିରାନ୍‍ ନାନ୍ ମାନା ।”
JOH 8:59 ଆବେଟ୍‌ ୱାର୍‌ ଜିସୁଙ୍ଗୁଁ ଡାକ୍‍ତେଙ୍ଗ୍‍ ଇଜି କାଲ୍‌କୁ ପେର୍‌ତାର୍‌, ମାତର୍‌ ଜିସୁ ମାର୍‍ଗିଜି ମନ୍ଦିର୍‌ତାନ୍‌ ସତାସର୍ହାନ୍‍ ।
JOH 9:1 ଜିସୁ ସନିୱାଲେ ଅରେନ୍‍ କାଣା ଆଜି ଜନମ୍‍ଆତି ୱାନିଙ୍ଗ୍‌ ସୁଡ଼ୁତାନ୍‍ ।
JOH 9:2 ମାରି, ୱାନି ସିସୁର୍‍ ୱାନିଙ୍ଗ୍‌ ୱେନ୍‍ବାତାର୍‌, “ଏ ଗୁରୁ, ଏନ୍‌ ପାପ୍‌ କିତାମାନାନ୍‍ଆକା ଇକାନ୍‌ କାଣା ଆଜି ଜନମ୍‌ ଆତାନ୍‌ ? ନିଜେ ନୋ ୱେନି ଆଇସି ବୁବାସିର୍‍ ?”
JOH 9:3 ଜିସୁ ଇର୍ହାନ୍‌, “ଇକାନ୍‌ କି ୱେନି ଆଇସି ବୁବାସି ପାପ୍‌ କିଏତାର୍‌, ମାତର୍‌ ମାପୁରୁଦି ସାକ୍ତି ଏଣ୍ତେସ୍‌ ୱେନିମାନୁ ତରାଇ ଆନାତ୍‌, ଇୟାଉଣ୍ତିଙ୍ଗ୍‌ ୱାନ୍‌ କାଣା ଆଜି ଜନମ୍‌ ଆତାନ୍‌, ଇୟାଉଣ୍ତିଙ୍ଗ୍‌ ଇକା ଗଟାତାତ୍‍ ।
JOH 9:4 ଦିନ୍‌ ମାନାପ୍ ମାନାପ୍ ନା ପକ୍‍ତିମାନି ପାଣି କିନିକା ମା ନେଗେତ୍‌; ଇୟାୱାଜା ନାଡ଼ା ୱାଜିନାତ୍‍, ଆୟା ସାନ୍ଦି ନାନ୍ ଦୁନିଆଦି ଏମେ ସମୟତୁ ଏନ୍‌ ପାଣି କିଦେଙ୍ଗ୍‌ ଆଟ୍‍ଏନ୍‍ ।
JOH 9:5 ନାନ୍ ଦୁନିଆଦୁ ଆମା ସାନ୍ଦି ମାନା, ନାନ୍ ଦୁନିଆଦି ଜାୟ୍‌ ।”
JOH 9:6 ଇକା ଇର୍‍ଇ ୱେନ୍‌କା ଜିସୁ ସିକ୍‍ଲାଦୁ ପୁସ୍‍ସି ଆୟା ପୁସ୍‍କାଣାଙ୍ଗ୍‍ତାନ୍‍ ଲାଦି କିତାନ୍‌, ମାରି ୱାନି କାଣ୍‌କାଙ୍ଗ୍‌ ଲାଦି ଉସ୍‍ସି ୱାନିଙ୍ଗ୍‌ ଇର୍ହାନ୍‌,
JOH 9:7 “ସାଙ୍ଗ୍‍ଆ, ସେରୁଦୁ ମକମ୍‌ ଉର୍‍ପାଜ ରାଆ ।” ସିଲୋହଦି ଅର୍ତ ସାଙ୍ଗ୍‍ଆ । ଆବେଟ୍‌ ୱାନ୍‌ ସଲ୍‌ସି ମକମ୍‌ ଉର୍‍ପାଜି ଡ଼େସିୱାନି ୱାଲେ କାଣୁକୁ ସୁଡ଼ୁନି ସାକ୍ତି ପ‍ଇତାନ୍‌ ।
JOH 9:8 ଆବେଟ୍‌ ୱାନି ପାଡ଼୍‍କାତିକେଙ୍ଗ୍‍, ମାରି ଏମେକାର୍‌ ୱାନିଙ୍ଗ୍‌ ଆଗ୍‌ଡ଼ି ଅରେନ୍‍ ବିକାରି ଇଜି ସୁଡ଼ୁତାମାର୍ହାର୍‍, ୱାର୍‌ ୱେନ୍‌ବାତାର୍‌, “ଏନ୍‌ ବାସ୍‌ସି ଭିକିୟା ଲସ୍‌ସି ମାର୍ହାନ୍‍, ଇକାନ୍‌ ଇନିକା ଆକାନ୍‍ ଆଏନ୍‍ ?”
JOH 9:9 ଏନ୍‌ ଏନ୍‌ ଇର୍ହାର୍‌, “ଇକାନ୍‌ ୱାନ୍‌,” ମାରି ଏନ୍‌ ଏନ୍‌ ଇର୍ହାର୍‌, “ସିଲେ; ଇକାନ୍‌ ୱାନି ନାନିକାନ୍‍ ।” ମାତର୍‌ ୱାନ୍‌ ଇର୍ହାନ୍‌, “ନାନ୍ ଆୟା ଲୋକୁ ।”
JOH 9:10 ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, “ଆରିଙ୍ଗ୍‌ ନି କାଣୁକୁ ଏଣ୍ତେସ୍‌ ନେଗେନ୍‌ ଆତେ ?”
JOH 9:11 ୱାନ୍‌ ଇର୍ହାନ୍‌, “ଆମାୱାନିଙ୍ଗ୍‌ ଜିସୁ ଇଜି ଇନାର୍‌, ଆୟାକାନ୍‌ ଲାଦି କିଜିନା କାଣ୍‌କାଙ୍ଗ୍‌ ଉସ୍‍ତାନ୍‍, ମାରି ନାଙ୍ଗିଁ ଇର୍ହାନ୍‌, ସିଲୋହଦୁ ସଲ୍‌ସି ମକମ୍‌ ଉର୍‍ପାଆ; ଆବେଟ୍‌ ନାନ୍ ସହସି ସଲ୍‌ସି ଉର୍‍ପାତା ମାରି କାଣୁକୁ ସୁଡ଼ୁଦେଙ୍ଗ୍‍ ଆଟ୍‍ତା ।”
JOH 9:12 ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ୱାନ୍‌ ଏମେ ?” ୱାନ୍‌ ଇର୍ହାନ୍‌, “ନାନ୍ ନେସେଏ ?”
JOH 9:13 ଏନ୍‌ ଜନମ୍‍ତାନ୍‍ କାଣା ମାର୍ହାନ୍‍, ୱାର୍‌ ଆୟା ଲୋକ୍‌ତିଙ୍ଗ୍‌ ପାରୁସିର୍‌ ଲାକ୍‌ତୁ ତାତାର୍‌ ।
JOH 9:14 ଜିସୁ ଆମା ନାଣ୍ଡିଙ୍ଗ୍ ଲାଦି କିଜି ୱାନି କାଣ୍‌ଗା ନେଗେଣ୍ତ୍‍ କିତାମାର୍ହାନ୍‌, ଆୟାଦିନ୍‍ ରମ୍‍ନିଦିନ୍‍ ମାର୍ହାତ୍‌ ।
JOH 9:15 ଆବେଟ୍‌ ୱାନ୍‌ ଏଣ୍ତେସ୍‌ କାଣୁକୁ ସୁଡ଼ୁତାନ୍‌, ଇକା ପାରୁସିର୍‌ ୱାନିଙ୍ଗ୍‌ ମାରିଉଣ୍ତ୍ରିଦେବା ୱେନ୍‍ବାଦେଙ୍ଗ୍‍ ଆସ୍‌ତାର୍‌ । ଆବେଟ୍‌ ୱାନ୍‌ ୱାରିଙ୍ଗ୍‌ ଇର୍ହାନ୍‌, “ୱାନ୍‌ ନା କାଣ୍‍ଗାଦୁ ଲାଦି ଉସ୍‍ତାସିତାନ୍‍, ନାନ୍ ସର୍ହାନୋ ମକମ୍‌ ଉର୍‍ପାତା ମାରି ଇଲେଇ ସୁଡ଼ୁଦେଙ୍ଗ୍‍ ଆଟ୍‍ସିନା ।”
JOH 9:16 ମାରି ପାରୁସିର୍‌ ଲୋଇ ଏନ୍‌ ଏନ୍‌ ଇର୍ହାର୍‌, “ଆୟା ଲୋକ୍‌ ମାପୁରୁ ମାଣାନ୍‌ ରେଏନ୍‌, ଇରିଙ୍ଗ୍‌ ୱାନ୍‌ ରମ୍‍ନିଦିନ୍‍ ମାନାଏଜିନାନ୍‍ ।” ମାରି, ଏନ୍‌ ଏନ୍‌ ଇର୍ହାର୍‌, “ପାପି ଲୋକୁ ଏଣ୍ତେସ୍‌ ଇୟାୱାଜା କାବାଆନି ପାଣିୱିଜୁ କିଦେଙ୍ଗ୍‌ ଆଟ୍‍ନାନ୍‍ ?” ଇୟାୱାଜା ୱାରି ଲୋଇ ଜାଟି ନିଙ୍ଗିଁତାତ୍‍ ।
JOH 9:17 ମାରି ପାରୁସିର୍‌ ମାରିଉଣ୍ତ୍ରିଦେବା ଆୟା କାଣା ଲୋକ୍‌ତିଙ୍ଗ୍‌ ୱେନ୍‌ବାତାର୍‌, “ୱାନ୍‌ ଜେ ନିଙ୍ଗିଁ କାଣୁକୁ ସୁଡ଼ିସ୍‍ କିତାନ୍‌, ଆବେନୁ ନିନୁ ୱାନି ବିସୟ୍‌ତାନ୍‌ ଇନିକା ଇଜିନି ?” ୱାନ୍‌ ଇର୍ହାନ୍‌, “ୱାନ୍‌ ଅରେନ୍‍ ବାବବାଦି ।”
JOH 9:18 ୱାନ୍‌ ଜେ ଜନମ୍‍ତାନ୍‍ କାଣା ମାର୍ହାନ୍‍ ମାରି ସୁଡ଼ୁତାମାନାନ୍‌, ଆୟା କାଣୁକୁ ସୁଡ଼ୁଦେଙ୍ଗ୍‍ ଆଟ୍‍ତି ଲୋକ୍‌ତି ବୁବାସି ଆଇସିଙ୍ଗ୍‍ କୁକ୍‌ସି ୱେନ୍‍ବାଇ ସାନ୍ଦି ଜିହୁଦି ନେତାର୍‌ ୱାନି ବିସୟ୍‌ତାନ୍‌ ଇକା ବିସ୍‌ବାସ୍‌ କିଏତାର୍‌ ।
JOH 9:19 ୱାର୍‌ ୱାନି ବୁବାସି ଆଇସିଙ୍ଗ୍‍ ୱେନ୍‍ବାତାର୍‌, ମି ଏମେ କଡ଼ କାଣା ଆଜି ଜନମ୍‌ ଆତାମାନାନ୍‌ ଇଜି ଇଜିମାରିଇଦେର୍‍, “ଇକାନ୍‌ ଇନିକା ମି ଆୟା କଡ଼ ? ଆରିଙ୍ଗ୍‌ ୱାନ୍‌ ଏଣ୍ତେସ୍‌ ଇଲେଇ ସୁଡ଼ୁଦେଙ୍ଗ୍‍ ଆଟ୍‍ସିନାନ୍‍ ?”
JOH 9:20 ଆବେଟ୍‌ ୱାନି ବୁବାସି ଆଇସି ଇର୍ହାର୍‌, “ଇକାନ୍‌ ଜେ ମା କଡ଼ ମାରି ଇକାନ୍‌ ଜେ କାଣା ଆଜି ଜନମ୍‌ ଆତାମାର୍ହାନ୍‍, ହୁଁ, ଇକା ମାପ୍‌ ନେସ୍‌ନାପ୍‌;
JOH 9:21 ମାତର୍‌ ୱାନ୍‌ ଏଣ୍ତେସ୍‌ ଇଲେଇ ସୁଡ଼ୁଜିନାନ୍‍, ଆକା ନେସ୍‌ଏପ୍‌, ମାରି ଏନ୍‌ ୱାନି କାଣୁକୁ ସୁଡ଼ିସ୍‍କିତାନ୍‍, ଆକାବା ମାପ୍‌ ନେସ୍‌ଏପ୍‌; ୱାନିଙ୍ଗ୍‌ ୱେନ୍‍ବାଦୁ, ୱାନ୍‌ ତୋ ପିରିତାମାନାନ୍‍, ୱାନ୍‌ ୱାନି ମାଟା ନିଜେ ଇନାନ୍‌ ।”
JOH 9:22 ୱାନି ବୁବାସି ଆଇସି ଜିହୁଦି ନେତାରିଙ୍ଗ୍‌ ତିଲାଜିମାର୍ହାର୍‍ଆକା ଇୟାୱିଜୁ ମାଟା ଇର୍ହାର୍‌, ଇରିଙ୍ଗ୍‌ ଜଦି ଏନ୍‌ ୱାନିଙ୍ଗ୍‌ ମସିହ ଇଜି ମାନାନାର୍‌, ଆରିଙ୍ଗ୍‌ ୱାନ୍‌ ପାର୍‌ତନା ଇଲ୍‌ତାନ୍‌ ସପାନାନ୍‍ ଇଜି ତାନି ଆଗ୍‌ଡ଼ି ଜିହୁଦିର୍‌ ଉଣ୍ତ୍ରେମାଟା ଆତାମାର୍ହାର୍‍ ।
JOH 9:23 ଆୟାଉଣ୍ତିଙ୍ଗ୍‌ ୱାନି ବୁବାସି ଆଇସି ଇର୍ହାର୍‌, “ୱାନ୍‌ ପିରିତାମାନାନ୍‍, ୱାନିଙ୍ଗ୍‌ ୱେନ୍‍ବାଦୁ ।”
JOH 9:24 ଆବେଟ୍‌ ଜନମ୍‍ତାନ୍‍ କାଣା ମାରିଇ ଲୋକ୍‌ତିଙ୍ଗ୍‌ ୱାର୍‌ ମାରିଅର୍ସୁ କୁକ୍‌ସି ୱେନ୍‌ବାତାର୍‌, “ମାପୁରୁଙ୍ଗୁଁ ଗୌରବ୍‍ ସିଆ, ୱାନ୍‌ ଜେ ପାପି, ଇକା ମାପ୍‌ ନେସ୍‌ନାପ୍‌ ।”
JOH 9:25 ଆବେଟ୍‌ ୱାନ୍‌ ଇର୍ହାନ୍‌, “ୱାନ୍‌ ପାପି ନୋ ସିଲେ, ନାନ୍ ଆକା ନେସେଏ; ମାତର୍‌ ନାନ୍ ଉଣ୍ତ୍ରି ବିସୟ୍‌ ନେସ୍‌ନା, ନାନ୍ କାଣାମାର୍ହା, ଇଲେଇ ସୁଡ଼ୁଦେଙ୍ଗ୍‍ ଆଟ୍‍ସିନା ।”
JOH 9:26 ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, “ୱାନ୍‌ ନିଙ୍ଗିଁ ଇନିକା କିତାନ୍‌ ? ୱାନ୍‌ ଏଣ୍ତେସ୍‍ କିଜିନି କାଣୁକୁ ସୁଡ଼ିସ୍‍ କିତାନ୍‌ ?”
JOH 9:27 ୱାନ୍‌ ୱାରିଙ୍ଗ୍‌ ଇର୍ହାନ୍‌, ନାନ୍ ଇର୍ହାୱିସ୍‍ତାନି, “ମାରି ମିର୍‌ ୱେନ୍‍ଇତିଦେର୍‍; ଏନ୍ଦା ମାରି ଉଣ୍ତ୍ରି ଦେବା ୱେନ୍‌ଡ୍ରେଙ୍ଗ୍‌ ବଦା କିଜିନିଦେର୍‌ ? ମିର୍‌ ବା ଇନିକା ୱାନି ସିସୁର୍‍ ଆଦେଙ୍ଗ୍‌ ବଦା କିଜିନିଦେର୍‌ ?”
JOH 9:28 ଆବେଟ୍‌ ୱାର୍‌ ୱାନିଙ୍ଗ୍‌ ଆନାଦୁରିୟା ଇଡ୍‌ଜି ଇର୍ହାର୍‌, “ନିନ୍‌ ୱାନି ସିସୁ, ମାତର୍‌ ମାପ୍‌ ମୋସାଦି ସିସୁର୍‍ ।
JOH 9:29 ମାପ୍‌ ନେସ୍‌ନାପ୍‌ ଜେ, ମାପୁରୁ ମୋସାଦିଙ୍ଗ୍‍ ମାଟା ଇର୍ହାମାନାନ୍‌, ମାତର୍‌ ଇୟା ଲୋକୁ ଏମେଣ୍‌କୁ ୱାତାମାନାନ୍‍, ଆକାବା ମାପ୍‌ ନେସ୍‌ଏପ୍‌ ।”
JOH 9:30 ଆୟା ଲୋକୁ ୱାରିଙ୍ଗ୍‌ ଇର୍ହାନ୍‌, “ୱାନ୍‌ କାଣୁକୁ ସୁଡ଼ିସ୍‍କିତାନ୍‍, ମାରି ୱାନ୍‌ ଏମେଣ୍‌କୁ ୱାତାମାନାନ୍‍, ଆକା ମିର୍‌ ନେସ୍‌ଇଦେର୍‌, ଇକା ତୋ କାବା ମାଟା ।
JOH 9:31 ମାପୁରୁ ଜେ, ପାପି ଲୋକା ମାଟା ୱେନ୍‌ଏନ୍‌, ଇକା ମାପ୍‌ ନେସ୍‌ନାପ୍‌, ମାତର୍‌ ଜଦି ଏନ୍‌ ମାପୁରୁଙ୍ଗୁଁ ମାନାଜି ୱାନି ବଦାଦିଙ୍ଗ୍‍ ମାନାନାନ୍‍, ଆରିଙ୍ଗ୍‌ ୱାନ୍‌ ୱାନି ମାଟା ୱେନାନ୍‌ ।
JOH 9:32 ଦୁନିଆ ତିଆର୍‌ ଆତି ପୁର୍ବେରାନ୍‍ ଏନ୍‌ ଜନମ୍‍ତାନ୍‍ କାଣାଆତିୱାନିଙ୍ଗ୍‍ କାଣୁକୁ ସୁଡ଼ିନି ସାକ୍ତି ସିନି ମାଟା ଏସାଙ୍ଗ୍‍ ବା ୱେନ୍‍ଇ ମାରିଇକା ।
JOH 9:33 ଇୟା ଲୋକୁ ମାପୁରୁ ମାଣାନ୍‌ ରେଇତିମାରିଙ୍ଗ୍‍ ଏସାଙ୍ଗ୍‍ ଇୟା ପାଣି କିଦେଙ୍ଗ୍‌ ଆଟ୍‍ଏତାନ୍‍ମାନ୍ଦି ।”
JOH 9:34 ୱାର୍‌ ୱାନିଙ୍ଗ୍‌ ଇର୍ହାର୍‌, “ନିନ୍‍ତୋ ପୁରା ପାପ୍‌ତୁ ଜନମ୍‌ ଆଜି ପାପ୍‌ତୁ ପିରିତିମାନି, ମାରି ନିନ୍‌ ମାଙ୍ଗିଁ ସିକିୟା ସିଜିନି ?” ଆବେଟ୍‌ ୱାର୍‌ ୱାନିଙ୍ଗ୍‌ ପାର୍‌ତନା ଇଲ୍‌ତାନ୍‌ ସପ୍‍ତାର୍‍ ।
JOH 9:35 ଜିହୁଦି ନେତାର୍‌ ଜେ ୱାନିଙ୍ଗ୍‌ ପାର୍‌ତନା ଇଲ୍‌ତାନ୍‌ ସପ୍‍ତାମାନାର୍‍, ଜିସୁ ଇକା ୱେନ୍‌ଞ୍ଜି ୱାନିଙ୍ଗ୍‌ ପଇଜି ଇର୍ହାନ୍‌, “ନିନ୍‌ ଇନିକା ମନୁସ୍ୟପୁତ୍ରମାନୁ ବିସ୍‌ବାସ୍‌ କିଜିନି ?”
JOH 9:36 ୱାନ୍‌ ଇର୍ହାନ୍‌, “ଏ ଆଜ୍ଞା, ୱାନ୍‌ ଏନ୍‌ ଇନ୍‌ଆଁ, ଏଣ୍ତେସ୍‌ ନାନ୍ ୱାନିମାନୁ ବିସ୍‌ବାସ୍‌ କିନା ?”
JOH 9:37 ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଏମେୱାନିଙ୍ଗ୍‌ ସୁଡ଼ୁତିମାନି, ମାରି ଏନ୍‌ ନି ୱାଲେ ମାଟା ଇଜିନାନ୍‌, ୱାନ୍‌ ଆକାନ୍‍ ।”
JOH 9:38 ଆବେଟ୍‌ ୱାନ୍‌ ଇର୍ହାନ୍‌, “ପ୍ରବୁ, ନାନ୍ ବିସ୍‌ବାସ୍‌ କିଜିନା,” ମାରି, ୱାନ୍‌ ଜିସୁଙ୍ଗୁଁ ମେଣ୍ତେଙ୍ଗ୍‍ ଗଟ୍‌କିଜି ମାଡ଼ିସ୍‌ କିତାନ୍‌ ।
JOH 9:39 ମାରି ଜିସୁ ଇର୍ହାନ୍‌, “ସୁଡ଼ୁଇ ଲୋକୁ ଏଣ୍ତେସ୍‌ ସୁଣାର୍‍ ମାରି ସୁଡ଼ୁଜିମାନି ଲୋକୁ ଏଣ୍ତେସ୍‌ କାଣା ଆନାର୍‌, ଇୟା ଲୋକା ବିସାର୍‌ ଉଣ୍ତିଙ୍ଗ୍‌ ନାନ୍ ଦୁନିଆଦୁ ୱାତାମାନା ।”
JOH 9:40 ପାରୁସିର୍‌ ମାଣାନ୍‌ ଏମେକାର୍‌ ୱାନି ୱାଲେ ମାର୍ହାର୍‌, ୱାର୍‌ ଇକା ୱେନ୍‌ଞ୍ଜି ୱାନିଙ୍ଗ୍‌ ଇର୍ହାର୍‌, “ମାପ୍‌ ବା ଇନିକା କାଣାର୍‌ ?”
JOH 9:41 ଜିସୁ ପାରୁସିରିଙ୍ଗ୍‍ ଇର୍ହାନ୍‌, “ଜଦି କାଣା ଆତିମାରିଙ୍ଗ୍‍ ମିର୍‌ ଦସ୍‍ ଆଇତିଦେର୍‍ମାନ୍ଦି । ମାତର୍‌ ସୁଡ଼ୁଦେଙ୍ଗ୍‍ ଆଟ୍‍ସିନାପ୍‍ ଇଜି ଇର୍ହିମାନିଙ୍ଗ୍‍ ମିର୍‌ ନାଣ୍ତ ଦସ୍‍ ।”
JOH 10:1 ଜିସୁ ଇର୍ହାନ୍‌, ନାନ୍ ସତ୍‌ ସତ୍‌ ମିଙ୍ଗିଁ ଇଜିନା, ଏମେ ଲୋକୁ ସେର୍‍ଲା ସିଜି ମେଣ୍ତାସାଡ଼ାଦୁ ଡ଼ୁଗ୍‍ଏନ୍‍, ମାତର୍‌ ଆଇସାରିଦୁ ଏକ୍‌ସି ଡ଼ୁଗ୍‍ନାନ୍‍, ୱାନ୍‌ ଡଙ୍ଗାଁ ନି ଡାକୁ;
JOH 10:2 ମାତର୍‌ ଏନ୍‌ ସେର୍‍ଲା ସିଜି ଡ଼ୁଗ୍‍ନାନ୍‍, ୱାନ୍‌ ମେଣ୍ତେଙ୍ଗାଁ ମାନ୍ଦାଦି ଗାଉଡ଼ୁଏନ୍‍ ।
JOH 10:3 ସେର୍‌ଲାଦୁ କାପ୍‍କିନିକାନ୍‍ ୱାନି ଉଣ୍ତିଙ୍ଗ୍‌ ସେର୍‍ଲା ରେନା ସିନାନ୍‍, ୱାନ୍‌ ମେଣ୍ଡେଙ୍ଗ୍‌ ଦର୍‌ ଆସ୍‌ସି କୁକ୍‍ନାନ୍‍ ।
JOH 10:4 ୱାନ୍‌ ନିଜେଦି ମେଣ୍ଡେଙ୍ଗ୍‌ ୱିଜୁ ସପ୍‌ତି ୱେନ୍‌କା ୱାନିକା ଆଗ୍‌ଡ଼ି ଆଗ୍‌ଡ଼ି ଗାଉଡ଼ୁଏନ୍‍ ବୁଲାନାନ୍‌ ମାରି ମେଣ୍ତେଙ୍ଗ୍‌ୱିଜୁ ୱାନି ୱେନ୍‌କା ୱେନ୍‌କା ବୁଲାନେ, ଇରିଙ୍ଗ୍‌ ୱାକ୍‍ ୱାନି ବଲ୍ ନେସ୍‌ନେ;
JOH 10:5 ମାତର୍‌ ମେଣ୍ଡେଙ୍ଗ୍‌ ନେସେଇ ଲୋକା ୱେନ୍‌କା ୱେନ୍‌କା ଏସ୍‌କାଙ୍ଗ୍‌ବା ବୁଲାଉ, ମାତର୍‌ ୱାନି ଲାକ୍‌ତୁରାନ୍‌ ଉରୁକ୍‌ସିସନେ, ଇରିଙ୍ଗ୍‌ ୱାକ୍‍ ନେସେଇ ଲୋକାଦି ବଲ୍ ନେସ୍‌ତେଙ୍ଗ୍‌ ଆଟ୍‌ଉ ।
JOH 10:6 ଜିସୁ ୱାରିଙ୍ଗ୍‌ ଇୟା କାତା ୱେର୍‌ତାନ୍‌, ମାତର୍‌ ୱାନ୍‌ ୱାରିଙ୍ଗ୍‌ ଆମା ଆମାକା ୱେର୍‌ସି ମାର୍ହାନ୍‌, ଆୟାୱିଜୁ ଇନିକା ଇଜି ୱାର୍‌ ବୁଜାଦେଙ୍ଗ୍‌ ଆଟ୍‍ଏତାର୍‍ ।
JOH 10:7 ଜିସୁ ମାରିଡ଼େସି ୱେର୍‌ତାନ୍‌, ସତ୍‌ ସତ୍‍ନେ ନାନ୍ ମିଙ୍ଗିଁ ଇଜିନା, ନାନ୍ ଆଜିନା ମେଣ୍ତେଆଙ୍ଗ୍‌ ସେର୍‍ଲା ।
JOH 10:8 ଏମେକାର୍‌ ୱିଜେରେ ନା ଆଗ୍‌ଡ଼ି ୱାତାମାନାର୍‌, ୱାର୍‌ ୱିଜେରେ ଡଙ୍ଗାଁର୍‌ଉଁ ମାରି ଡଙ୍ଗାଁକିନିକାର୍‌, ମାତର୍‌ ମେଣ୍ଡେଙ୍ଗ୍‌ ୱିଜୁ ୱାରି ମାଟା ୱେନ୍‌ଉତେ ।
JOH 10:9 ନାନ୍ ସେର୍‍ଲା, ଏନ୍‌ ନା ସାରି ସିଜି ଡ଼ୁଗ୍‌ନାନ୍‌, ୱାନ୍‌ ରକିୟା ପୟ୍‌ନାନ୍‌ ମାରି ଲୋଇ ୱାଜି ମାରି ଆତେରେ ସଲ୍‌ସି ସାରାଦେଙ୍ଗ୍‌ ଆଟ୍‍ନାନ୍‍ ।
JOH 10:10 ଡଙ୍ଗାଁର୍‌ଏନ୍‌ ୱାନାନ୍‌ ଡଙ୍ଗାଁକିଦେଙ୍ଗ୍‌, କାତ୍‍ତେଙ୍ଗ୍‌ ମାରି ଦଂସ କିଦେଙ୍ଗ୍‌ । ନାନ୍ ୱାତାମାନା, ମିଙ୍ଗିଁ ଜିବନ୍‌ ସିଦେଙ୍ଗ୍‍, ମିର୍‌ ଏଣ୍ତେସ୍‌ ଜିବନ୍‌ତି ବିସୟ୍‌ତାନ୍‌ ୱେଡ଼ିକା ପୟ୍‌ଦେଙ୍ଗ୍‌ ଆଟ୍‌ନିଦେର୍‌ ।
JOH 10:11 ନାନ୍ ନେଗେନ୍‌ ମେଣ୍ଡେଙ୍ଗ୍‌ ସାରାକିନିକିଦା; ନେଗେନ୍‌ ମେଣ୍ତେଙ୍ଗ୍‌ସାରାକିନିକାନ୍‌ ମେଣ୍ତେଆଙ୍ଗ୍‌ ଉଣ୍ତିଙ୍ଗ୍‌ ନିଜେଦି ଜିବନ୍‌ ସିନାନ୍‌ ।
JOH 10:12 ଏନ୍‌ ବୁତିଅସି ମେଣ୍ତେଙ୍ଗ୍‌ମାନ୍ଦା କାପ୍‍କିନାନ୍‍, ୱାନ୍‌ ଗାଉଡ଼ୁଏନ୍‍ ଆଏନ୍‍, ବା ମାନ୍ଦାଦି ମାଲିକ୍‌ ଆଏନ୍‍, ୱାନ୍‌ ବେନ୍‍ଡ୍ର ୱାନିକା ସୁଡ଼ୁଜି ମେଣ୍ତେଆଙ୍ଗ୍‍ଁ ଡ଼ିସ୍‍ସି ସନାନ୍‌, ମାରି ବେନ୍‍ଡ୍ର ମେଣ୍ତାଦିଙ୍ଗ୍‌ ଆସ୍‍ନା ଅନାତ୍‍ ମାରି କାଣ୍ତିଆ କାବାରା କିନାତ୍‍ ।
JOH 10:13 ଇରିଙ୍ଗ୍‌ ଏନ୍‌ ବୁତିଅସି ମେଣ୍ତେଙ୍ଗ୍‍ କାପ୍‍କିନାନ୍‍, ୱାନ୍‌ ଉର୍‍କୁନାନ୍‍, ଇରିଙ୍ଗ୍‌ ୱାନ୍‌ ବୁତିକିନିକାନ୍‍ ମାତର୍‌, ମେଣ୍ତେଆଙ୍ଗ୍‌ ଉଣ୍ତିଙ୍ଗ୍‌ ୱାନିଙ୍ଗ୍‌ ଏତ୍‌ ସିଲେତ୍‌ ।
JOH 10:14 “ନାନ୍ ନେଗେନ୍‌ ମେଣ୍ତେଙ୍ଗ୍‌ସାରାକିନିକିଦା । ବୁବା ଏଣ୍ତେସ୍‌ ନାଙ୍ଗିଁ ନେସ୍‌ନାନ୍‌ ମାରି ନାନ୍ ବୁବେଙ୍ଗ୍‌ ନେସ୍‌ନା,
JOH 10:15 ଆୟାୱାଜା ନାନ୍ ନା ନିଜେଦି ମେଣ୍ତେଆଙ୍ଗ୍‌ ନେସ୍‌ନା, ମାରି ନା ନିଜେଦି ମେଣ୍ଡେଙ୍ଗ୍‌ ନାଙ୍ଗିଁ ନେସ୍‌ନେ, ମାରି ମେଣ୍ତେଆଙ୍ଗ୍‌ ଉଣ୍ତିଙ୍ଗ୍‌ ନାନ୍ ନା ଜିବନ୍‌ ସିଦେଙ୍ଗ୍‍ ରାଜିମାନା ।
JOH 10:16 ଏମେ ମେଣ୍ଡେଙ୍ଗ୍‌ ଇୟା ମେଣ୍ତେଙ୍ଗ୍‌ସାଡ଼ାଦିକେଙ୍ଗ୍‌ ଆଉ, ନା ଇୟାୱାଜା ଆଇ ମେଣ୍ଡେଙ୍ଗ୍‌ ମାନେ, ୱାନିକାଙ୍ଗ୍‌ ବା ନାଙ୍ଗିଁ ତାତେଙ୍ଗ୍‌ ଆନାତ୍‌, ମାରି ୱାକ୍‍ ନା ବଲ୍ ୱେନେ; ଆବେଟ୍‌ ଉନ୍‌ଡ୍ରି ମାନ୍ଧାଦିଙ୍ଗ୍‌ ମାରି ଅରେନ୍‍ ଗୋଡ଼ୁ ଆନାନ୍‌ ।
JOH 10:17 “ନାନ୍ ନା ଜିବନ୍‌ ସିନିଉଣ୍ତିଙ୍ଗ୍ ବୁବା ନାଙ୍ଗିଁ ଜିବନ୍‌ନୋନାନ୍‌, ମାରି ନାନ୍ ନା ଆୟା ଜିବନ୍‌ ମାରିଡ଼େସି ପୟ୍‌ଦେଙ୍ଗ୍‌ ଆଟ୍‍ନା ।
JOH 10:18 ଏନ୍‌ ନାମାଣ୍‌କୁ ନା ଜିବନ୍‌ ଅତେଙ୍ଗ୍‌ ଆଟ୍‍ଏନ୍‍, ମାତର୍‌ ନା ବଦାଦାନ୍ ନା ଜିବନ୍‌ ଦାନ୍‌ କିନା । ନା ଜିବନ୍‌ ଦାନ୍‌ କିଦେଙ୍ଗ୍‌ ଅଦିକାର୍‌ ମାନାତ୍‌ ମାରି ନାନ୍ ମାରିଡ଼େସି ଜିବନ୍‌ ପୟ୍‌ଦେଙ୍ଗ୍‌ ବା ଅଦିକାର୍‌ ମାନାତ୍‌ । ଇକା କିନି ଉଣ୍ତିଙ୍ଗ୍‌ ନା ବୁବାଦିମାଣ୍‌ନା ଇୟା ଆଦେସ୍‌ ପୟ୍‌ତାମାନା ।”
JOH 10:19 ଇୟାୱିଜୁ ମାଟା ୱେର୍‌ଇ ୱେନ୍‌କା ଜିହୁଦି ଲୋକା ଲୋଇ ମାରିଡ଼େସି ଆଇ ମାଟା ଗଟାତାତ୍‌ ।
JOH 10:20 ୱାରି ଲୋଇରାନ୍‌ ଏସଲୋକ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ୱାନିଙ୍ଗ୍‌ ଦୁବା ଆସ୍‌ତାମାନାତ୍‌, ୱାନ୍‌ ବାୟା, ଏନ୍ଧା ୱାନି ମାଟା ୱେନ୍‌ଜିନିଦେର୍‌ ?”
JOH 10:21 ଆଇକାର୍‌ ଇର୍ହାର୍‌, ଇୟାୱିଜୁ ମାଟା ତୋ ଦୁବା କାସ୍‌ତି ଅରେନ୍‍ ଲୋକୁ ଇୟାୱାଜା ମାଟା ଇନ୍‌ଏନ୍‌; ଦୁବା ଇନିକା କାଣା ଲୋକ୍‌ତି କାଣୁକୁ ତର୍‌ତେଙ୍ଗ୍‍ଁ ଆଟ୍‍ନାତ୍‍ ?
JOH 10:22 ନାସ୍ତିୱାଲେ ଜିରୁସାଲମ୍‌ତୁ ମନ୍ଦିର୍‌ ତିଆର୍‌ କିତି ପଣ୍ତ୍‌ୟ ଆଜିମାର୍ହାତ୍‍; ଆୟାୱାଲେ ପିନିକାଡ଼ା ମାର୍ହାତ୍‌,
JOH 10:23 ମାରି ଜିସୁ ମନ୍ଦିର୍‌ତୁ ସଲମନ୍‍ତି ଗୁଡିକାଲ୍‌ତୁ ବୁଲାଜି ମାର୍ହାନ୍‌ ।
JOH 10:24 ଆବେଟ୍‌ ଜିହୁଦି ଲୋକୁ ଜିସୁଙ୍ଗୁଁ ସାରିବେଡ଼୍‍ତି ଉଣ୍ତାଜି ୱେନ୍‌ବାଦେଙ୍ଗ୍‌ ଆସ୍‌ତାର୍‌, ମାରି ଏସ ୱେଡ଼ାସାନ୍ଧି ମାଙ୍ଗିଁ ନାମ୍‌ଇ ୱାଜା ଇଡ୍‌ନି ? ଜଦି “ନିନୁ ମସିହ, ଆର୍‌ତିଙ୍ଗ୍‌ ମାଙ୍ଗିଁ ସତ୍‌ତାନ୍‌ ୱେର୍‌ଆ ।”
JOH 10:25 ଜିସୁ ୱାରିଙ୍ଗ୍‌ ଇର୍ହାନ୍‌, “ନାନ୍ ମିଙ୍ଗିଁ ଇଜିନା, ମାତର୍‌ ମିର୍‌ ବିସ୍‌ବାସ୍‌ କିଇଜିନିଦେର୍‌; ନା ବୁବାଦି ମାଣାନ୍‌ ଅଦିକାର୍‍ ନାନ୍ ପୟ୍‌ଜି ଆମା ଆମା ପାଣି କିଜିନା, ଆୟାୱିଜୁ ନା ବିସୟ୍‌ତାନ୍‌ ସାକ୍‌ୟ ସିଜିନା;
JOH 10:26 ମାତର୍‌ ମିର୍‌ ବିସ୍‌ବାସ୍‌ କିଇଜିନିଦେର୍‌, ଇରିଙ୍ଗ୍‌ ମିର୍‌ ନା ମେଣ୍ଡେଙ୍ଗ୍‌ ଆଇଦେର୍‍ ।
JOH 10:27 ନା ମେଣ୍ଡେଙ୍ଗ୍‌ ୱିଜୁ ନା ବଲ୍ ୱେନେ ମାରି ନାନ୍ ୱାନିକାଙ୍ଗ୍‌ ନେସ୍‌ନା, ମାରି ୱାକ୍‍ ନା ୱେନ୍‌କା ୱେନ୍‌କା ବୁଲାନେ,
JOH 10:28 ମାରି ନାନ୍ ୱାନିକାଙ୍ଗ୍‌ ଏସ୍‍କାଙ୍ଗ୍‍ୱିଜ୍‍ଇ ଜିବନ୍‌ ସିନା, ମାରି ୱାକ୍‍ ଏସ୍‌କାଙ୍ଗ୍‌ବା ସାଉ, ମାରି ୱାନିକାଙ୍ଗ୍‌ ନା କିୟୁଦାନ୍‌ ଏନ୍‌ ଡ଼ିବିସ୍‌କିଜ ଅତେଙ୍ଗ୍‌ ଆଟ୍‍ଏର୍‍ ।
JOH 10:29 ନା ବୁବା ନାଙ୍ଗିଁ ଆମାକା ସିତାମାନାନ୍‌, ଆକା ୱିଜୁମାଣ୍‌କୁ ନାଣ୍ତଦାରା, ମାରି ୱାନିକାଙ୍ଗ୍‌ ବୁବାଦି କିୟୁଦାନ୍‌ ଏନ୍‌ ଆକା ଡ଼ିବିସ୍‍କିଜ ଅତେଙ୍ଗ୍‌ ଆଟ୍‍ଏନ୍‍ ।
JOH 10:30 ବୁବା ନି ନାନ୍ ଅରେନ୍‍ ।”
JOH 10:31 ଇୟା ମାଟା ୱେନ୍‌ଞ୍ଜି ଜିହୁଦିଲୋକୁ ଜିସୁଙ୍ଗୁଁ ଡାକ୍‌ତେଙ୍ଗ୍‍ଁ ଇଜି ମାରି କାଲ୍‌କୁ ପେର୍‌ତାର୍‌ ।
JOH 10:32 ଜିସୁ ୱାରିଙ୍ଗ୍‌ ଇର୍ହାନ୍‌, ନାନ୍ ବୁବାଦିମାଣାନ୍‍ ଏସ ନେଗି ପାଣି ମିଙ୍ଗିଁ ତର୍‌ତାମାନା; ଆୟାୱିଜୁ ପାଣିଦି ଲୋଇରାନ୍‌ ଏମେ ନେଗି ପାଣିଦି ଉଣ୍ତିଙ୍ଗ୍‌ ନାଙ୍ଗିଁ ନେର୍‌ କାଲ୍‌କୁ ପୋକ୍‌ତାଜିନିଦେର୍‌ ?
JOH 10:33 ଜିହୁଦିଲୋକୁ ୱାନିଙ୍ଗ୍‌ ଇର୍ହାର୍‌, “ନେଗି ପାଣିଦି ଉଣ୍ତିଙ୍ଗ୍‌ ମାପ୍‌ ନିଙ୍ଗିଁ କାଲ୍‌କୁ ପୋକ୍‌ତାଏଜିନାପ୍‌, ମାତର୍‌ ମାପୁରୁ ନିଦା ଉଣ୍ତିଙ୍ଗ୍‌, ମାରି ନିନ୍‌ ଲୋକୁ ଆଜି ନିଜେଦିଙ୍ଗ୍‌ ମାପୁରୁ ସାମାନ୍‍ କିଜିନି ।”
JOH 10:34 ଜିସୁ ୱାରିଙ୍ଗ୍‌ ଇର୍ହାନ୍‌, “ମି ସାସ୍ତ୍ରଦୁ ଇକା ରାସାତାମାନାତ୍‌, ମାପୁରୁ ଇନାନ୍‌, ମିର୍‌ ମାପୁରୁଙ୍ଗୁଁ ?
JOH 10:35 ଆମାୱାରି ଲାକ୍‌ତୁ ମାପୁରୁଦି ବାକ୍ୟ ଇଗା ୱାତାତ୍‍, ୱାରିଙ୍ଗ୍‌ ଜଦି ୱାନ୍‌ ମାପୁରୁ ଇଜି ଇର୍ହାନ୍‌ ମାରି ଦାର୍ମୁସାସ୍ତ୍ର ୱେର୍‌ଏ କିଦେଙ୍ଗ୍‌ ଆଟ୍‍ଏର୍‍
JOH 10:36 ବୁବା ମାପୁରୁ ନାଙ୍ଗିଁ ପବିତ୍ର କିଜି ଆସ୍‍କିତାନ୍‌ନୋ ଇୟା ଦୁନିଆଦୁ ପୋକ୍‌ତାତାମାନାନ୍‌ । ଆରିଙ୍ଗ୍‌, ନାନ୍ ନିଜେଦିଙ୍ଗ୍‍ ମାପୁରୁଦି ମାରିନ୍‌ ଇନି ମାଣାନ୍‌ ମାପୁରୁଙ୍ଗ୍‌ ନିଦା କିଜିନା ଇଜି ଏଣ୍ତେସ୍‌ ଇଜିନିଦେର୍‌ ?
JOH 10:37 ଜଦି ନାନ୍ ବୁବାଦି ପାଣିୱିଜୁ କିଏ, ଆର୍‌ତିଙ୍ଗ୍‌ ନାଙ୍ଗିଁ ବିସ୍‌ବାସ୍‌ କିମାଟ୍‌;
JOH 10:38 ମାତର୍‌ ଜଦି ନାନ୍ ୱାନି ବଦାଦାନ୍ ନାନ୍ ପାଣି କିନା, ଆରିଙ୍ଗ୍‌ ନାଙ୍ଗିଁ ବିସ୍‌ବାସ୍‌ କିଇତିଙ୍ଗ୍‌ବା, ନା ପାଣି ସୁଡ଼ୁଜି ବିସ୍‌ବାସ୍‌ କିଦୁ । ଆତିଙ୍ଗ୍‌ ମିର୍‌ ପୁରା ନେସ୍‌ତେଙ୍ଗ୍‌ ଆଟ୍‌ନିଦେର୍‌, ମାରି ନା ବୁବା ନା ମାନୁ ମାନାନ୍‌ ମାରି ନାନ୍ ୱାନିମାନୁ ମାନା ।”
JOH 10:39 ଆବେଟ୍‌ ୱାର୍‌ ୱାନିଙ୍ଗ୍‌ ଆସ୍‌ତେଙ୍ଗ୍‌ ମାରିଡ଼େସି ସେସ୍ଟା କିତାର୍‌, ମାତର୍‌ ଜିସୁ ୱାରି କିୟୁଦୁ ଦାରାସିଏଣ୍ତା ସତାସର୍ହାନ୍‌ ।
JOH 10:40 ଆୟାୱେନ୍‌କା ଜିସୁ ମାରିଡ଼େସି ଜର୍ଦନ ଗାଡାଦି ଆୟାପାଡ଼ି ଇତାନ୍‌, ଜୋହନ ଏମେ ବାଡିଦୁ ପୁର୍ବେ ଡୁବନ୍‌ ସିଜିମାର୍ହାନ୍‌, ଆୟା ବାଡିଦୁ ୱାତାନୋ ଆବେନୁ ତେବାତାନ୍‌ ।
JOH 10:41 ମାରି, ନାଣ୍ତଲୋକୁ ୱାନି ଲାକ୍‌ତୁ ୱାଜି ଇର୍ହାର୍‌, “ଜୋହନ ଗିଦେ କାବାଆନି ପାଣି କିଏତାନ୍‌, ମାତର୍‌ ଇୟା ଲୋକ୍‌ତି ବିସୟ୍‌ତାନ୍‌ ଜୋହନ ଆମାୱିଜୁ ମାଟା ଇର୍ହାନ୍‌, ଆୟାୱିଜୁ ସତ୍‌ ।”
JOH 10:42 ମାରି, ଆବେନୁ ଗାଦି ଲୋକୁ ଜିସୁମାନୁ ବିସ୍‌ବାସ୍‌ କିତାର୍‌ ।
JOH 11:1 ବେତନିୟା ନାର୍‌ତି ଲାଜାର୍‌ ଦର୍‌ତିକାନ୍‌ ଅରେନ୍‍ ଲୋକୁ ନବ୍‌ ଆତାମାର୍ହାନ୍‌; ମରିୟମ୍‌ ମାରି ତାନି ତାଙ୍ଗିଁସି ମାର୍ତା ଆୟା ନାଟ ମାନ୍‌ଞ୍ଜି ମାର୍‌ଏ ।
JOH 11:2 ଇକାତ୍‍ ଆୟା ମରିୟମ୍‌, ଏମେକାତ୍‍ ପ୍ରବୁଦି ପାଦାମ୍‌କାଙ୍ଗ୍‌ ନିୟୁ ୱାକ୍‍ସି ନିଜେଦି କୁକୁଟିଦାନ୍‌ ୱାନି ପାଦାମ୍‌କୁ ତେଲିତାମାର୍ହାତ୍‍, ତାନି ତଡ଼ାସି ଲାଜାର୍‌ ନବ୍‌ ଆତାମାର୍ହାନ୍‌ ।
JOH 11:3 ଆଦେଙ୍ଗ୍‌ ଆୟା ତାଙ୍ଗିଁକ୍‍ ଜିସୁଦି ଲାକ୍‌ତୁ କାବୁର୍ ପକ୍‍ତେ, “ପ୍ରବୁ ସୁଡ଼ୁଆ, ଆମାୱାନିଙ୍ଗ୍‌ ନିନ୍‌ ଜିବନ୍‍ନୋନି, ନି ସଙ୍ଗ୍‍, ୱାନ୍‌ ନବ୍‌ ଆତାମାନାନ୍‌ ।”
JOH 11:4 ମାତର୍‌ ଜିସୁ ଆକା ୱେନ୍‌ଜି ଇର୍ହାନ୍‌, “ଇୟା ନବ୍‌ ସାନି ଉଣ୍ତିଙ୍ଗ୍‌ ସିଲେ, ମାତର୍‌ ମାପୁରୁଦି ଦନ୍ୟବାଦ୍‌ତି ଉଣ୍ତିଙ୍ଗ୍‌, ଏଣ୍ତେସ୍‌ ଆୟାବାଣାନ୍‍ ମାପୁରୁଦି ମାରିନ୍‌ ବା ଦନ୍ୟବାଦ୍‌ ପଇନାନ୍‌ ।”
JOH 11:5 ଜିସୁ ମାର୍ତା, ୱାନି ତାଙ୍ଗିଁ ମରିୟମ୍‌ ନି ଲାଜାର୍‌ତିଙ୍ଗ୍‌ ଜିବନ୍‌ ନଜି ମାର୍ହାନ୍‍ ।
JOH 11:6 ମାରି, ଲାଜାର୍‌ ନବ୍‌ ଆତାମାନାନ୍‌ ଇଜି ଏସ୍ତିୱାଲେ ୱାନ୍‌ ୱେର୍‌ଆନ୍‌, ନାସ୍ତିୱାଲେ ୱାନ୍‌ ଏମେ ବାଡିଦୁ ମାର୍ହାନ୍‍, ଆୟାବାଡିଦୁ ମାରି ରିନେନ୍‍ ତେବାତାନ୍‌ ।
JOH 11:7 ତାନିୱେନ୍‍କା ୱାନ୍‌ ସିସୁରିଙ୍ଗ୍‌ ଇର୍ହାନ୍‌, “ସାଦୁ, ମାଡ୍‌ ଜିହୁଦା ରାଜିଦୁ ଡ଼େସି ସନାଟ୍‌ ।”
JOH 11:8 ସିସୁର୍‍ ଜିସୁଙ୍ଗୁଁ ଇର୍ହାର୍‌, “ଏ ଗୁରୁ, ଜିହୁଦିର୍ ଏସ ଦିନ୍‍ ଆଗ୍‌ଡ଼ି ନିଙ୍ଗିଁ କାଲ୍‍କାଣ୍‍ ଡାକ୍‌ତେଙ୍ଗ୍‍ଁ ବଦା କିଜିମାର୍ହାର୍‍, ମାରି ନିନ୍‌ ମାରିଡ଼େସି ଆବେ ସଲ୍‌ସିନି ?”
JOH 11:9 ଜିସୁ ଇର୍ହାନ୍‌, “ୱେଡ଼େ ଇନିକା ବାର ଗନ୍‍ଟା ସିଲେତ୍‌ ? ଏନ୍‌ ୱେଡ଼େ ବୁଲାତିଙ୍ଗ୍‍ ତାକାଏନ୍‍, ଇରିଙ୍ଗ୍‌ ୱାର୍‌ ଇୟା ଦୁନିଆଦି ଜାୟ୍‌ ସୁଣାନ୍‌;
JOH 11:10 ମାତର୍‌ ନାଡ଼ା ବୁଲାତିଙ୍ଗ୍‍ ୱାନ୍‌ ତାକାନାନ୍‍, ଇରିଙ୍ଗ୍‌ ୱାରିମାନୁ ଜାୟ୍‌ ସିଲେତ୍‌ ।
JOH 11:11 ଜିସୁ ଇୟାୱିଜୁ ମାଟା ଇର୍‍ଇ ୱେନ୍‌କା ୱାରିଙ୍ଗ୍‌ ମାରି ଇର୍ହାନ୍‌, ମା ତଡ଼୍‍ ଲାଜାର୍‌ ସୁଜ୍‍ଜିନାନ୍‍, ମାତର୍‌ ୱାନିଙ୍ଗ୍‌ ସୁସ୍‍କାଣ୍‍କାଣ୍‍ ନିକ୍‍ତେଙ୍ଗ୍‍ ଇଜି ନାନ୍ ସଲ୍‍ସିନା ।”
JOH 11:12 ଆବେଟ୍‌ ସିସୁର୍‍ ଜିସୁଙ୍ଗୁଁ ଇର୍ହାର୍‌, “ପ୍ରବୁ, ଜଦି ଲାଜାର୍‌ ସୁସ୍‍ତାମାନାନ୍‍, ଆରିଙ୍ଗ୍‌ ୱାନ୍‌ ନେଗେନ୍‍ ଆନାନ୍‌ ।”
JOH 11:13 ଜିସୁ ଲାଜାର୍‌ତି ସାନି ବିସୟ୍‌ତାନ୍‌ ଇର୍ହାନ୍‌, ମାତର୍‌ ୱାନ୍‌ ସୁସ୍‍କାଣ୍‍କାଙ୍ଗ୍‍ ସୁସ୍‌ତି ବିସୟ୍‌ତାନ୍‌ ଇର୍ହାନ୍‌ ଇଜି ସିସୁର୍‍ ଅଡ଼୍‍ବିତାର୍‍ ।
JOH 11:14 ମାରି, ଜିସୁ ନାସ୍ତିୱାଲେ ୱାରିଙ୍ଗ୍‌ ବୁଜାନିୱାଜା ଇର୍ହାନ୍‌, “ଲାଜାର୍‌ ସାତାମାନାନ୍‍ ।
JOH 11:15 ମାରି, ନାନ୍ ଜେ ଆୟାବାଡିଦୁ ସିଲେତା, ଇୟାଉଣ୍ତିଙ୍ଗ୍‌ ମି ଉଣ୍ତିଙ୍ଗ୍‌ ୱେଡ଼ିକା ଆଜିନା, ଏଣ୍ତେସ୍‌ ମିର୍‌ ବିସ୍‌ବାସ୍‌ କିନିଦେର୍‍; ମାତର୍‌ ସାଦୁ, ମାଡ୍‌ ୱାନିଙ୍ଗ୍‌ ସୁଡ଼ୁଦେଙ୍ଗ୍‍ ସନାଟ୍‌ ।”
JOH 11:16 ଆବେଟ୍‌ ତୋମା ଆମାୱାନିଙ୍ଗ୍‌ ଦିଦୁମ ଇଜି ଇନାର୍‌, ୱାନ୍‌ ୱାନି ତଡ଼୍‍ ସିସୁରିଙ୍ଗ୍‌ ଇର୍ହାନ୍‌, “ସାଦୁ, ମାଡ୍‌ ବା ଗୁରୁୱାଲେ ସଲ୍‌ସି ୱାନିୱାଲେ ସାନାଟ୍‍ ।”
JOH 11:17 ଜିସୁ ବେତନିଆଦୁ ଇତାନ୍‍ନୋ ୱେର୍‌ଆନ୍‌ ଜେ, ଲାଜାର୍‌ ନାଲ୍‍ନେନ୍‍ ଆତାତ୍‌ ଦୁକି ଗୁଟାଦୁ ମୁସ୍‍ତାର୍‍ନି ।
JOH 11:18 ବେତନିୟା ଜିରୁସାଲାମ୍‌ ଲାକ୍‌ତୁ ମାର୍ହାତ୍‌, ମୁନ୍‌ଡ୍ରି କିଲମିଟର୍‍ତାନ୍‍ ଉଣା;
JOH 11:19 ମାରି, ଜିହୁଦିର୍‌ ମାଣୁକୁ ନାଣ୍ତ ଲୋକୁ ମାର୍ତା ନି ମରିୟମ୍‌ତିଙ୍ଗ୍‍ ତାନି ତଡ଼ାନ୍‍ ସାତି ବିସୟ୍‌ତାନ୍‌ ସୁକୁ ସିଦେଙ୍ଗ୍‍ ଇଜି ତାମେ ଲାକ୍‌ତୁ ୱାତାମାର୍ହାର୍‍ ।
JOH 11:20 ଆବେଟ୍‌ ଜିସୁ ୱାଜିନାନ୍‍ ଇଜି ଏସ୍ତିୱାଲେ ମାର୍ତା ୱେର୍‍ଆତ୍‍, ନାସ୍ତିୱାଲେ ୱାଦ୍‌ ଜିସୁଙ୍ଗୁଁ ବେଟ୍‍ବୁଡ଼ାଦେଙ୍ଗ୍‍ ସର୍ହାତ୍‍, ମାତର୍‌ ମରିୟମ୍‌ ଇନ୍‌ଡ୍ର ବାସ୍‍ତା ତେବାତାତ୍‌ ।
JOH 11:21 ମାର୍ତା ଜିସୁଙ୍ଗୁଁ ଇର୍ହାତ୍‌, “ପ୍ରବୁ, ଜଦି ନିନ୍‌ ଇବେ ମାର୍‍ଇମାନ୍ଦି, ଆତିଙ୍ଗ୍‌ ନା ତଡ଼ାନ୍‌ ସାଏତାନ୍‍ମାନ୍ଦି ।
JOH 11:22 ମାତର୍‌ ଇଲେଇବା ନାନ୍ ନେସ୍‌ନା, ନିନ୍‌ ମାପୁରୁଙ୍ଗୁଁ ଆମାକା ଲସ୍‌ନି, ମାପୁରୁ ଜେ ଆକା ନିଙ୍ଗିଁ ସିନାନ୍‍ ।”
JOH 11:23 ଜିସୁ ତାନିଙ୍ଗ୍‌ ଇର୍ହାନ୍‌, “ନି ତଡ଼ାନ୍‌ ଜିବନ୍‌ ପୟ୍‌ଜି ନିଙ୍ଗିଁନାନ୍‍ ।”
JOH 11:24 ମାର୍ତା ଜିସୁଙ୍ଗୁଁ ଇର୍ହାତ୍‌, “ୱାନ୍‌ ଜେ ୱିଜ୍‍ନି ଦିନ୍‍ତୁ ମାରିଡ଼େସି ନିଙ୍ଗିଁନି ୱାଲେ ନିଙ୍ଗିଁନାନ୍‍, ଇକା ନାନ୍ ନେସ୍‌ନା ।”
JOH 11:25 ଜିସୁ ତାନିଙ୍ଗ୍‌ ଇର୍ହାନ୍‌, “ନାନ୍ ମାରିଜିନିକାନ୍‍ ମାରି ଜିବନ୍‌; ଏନ୍‌ ନାବାନ୍‍ ବିସ୍‌ବାସ୍‌ କିନାନ୍‌, ୱାନ୍‌ ଜଦିବା ସାନାନ୍‌, ମାତର୍‌ ୱାନ୍‌ ମାରିଡ଼େସି ଜିନାନ୍‍ ।
JOH 11:26 ମାରି ଏନ୍‌ ଜିନାନ୍‍ ମାରି ନାବାନ୍‍ ବିସ୍‌ବାସ୍‌ କିନାନ୍‌, ୱାନ୍‌ ଏସାଙ୍ଗ୍‌ବା ସାଏନ୍‌; ଇକା ଇନିକା ବିସ୍‌ବାସ୍‌ କିଜିନି ?”
JOH 11:27 ମାର୍ତା ଜିସୁଙ୍ଗୁଁ ଇର୍ହାତ୍‌, “ହୁଁ ପ୍ରବୁ, ଆମାୱାନିଦି ଦୁନିଆଦୁ ୱାନିକା ମାର୍ହାତ୍‍, ନିନ୍‌ ଜେ ମାପୁରୁଦି ମାରିନ୍‌ ଆୟା ମସିହ, ଇକା ନା ବିସ୍‌ବାସ୍‌ ।”
JOH 11:28 ଇକା ଇର୍‍ଇ ୱେନ୍‌କା ମାର୍ତା ସଲ୍‌ସି ତାନି ତାଙ୍ଗିଁ ମରିୟମ୍‌ତିଙ୍ଗ୍‍ ନେସ୍‌ଇୱାଜା କୁକ୍‌ସି ଇର୍ହାତ୍‌, “ଗୁରୁ ୱାତାନ୍‍ନି ମାରି ନିଙ୍ଗିଁ କୁକ୍‍ସିନାନ୍‍ ।”
JOH 11:29 ମରିୟମ୍‌ ଇକା ୱେନ୍‌ଜି ବେଗି ନିଙ୍ଗିଁଜି ଜିସୁ ଲାକ୍‌ତୁ ସର୍ହାତ୍‍ ।
JOH 11:30 ଜିସୁ ନାସ୍ତିୱାଲେ ନାର୍‍ ଲୋଇ ରେଏନ୍‌ ମାର୍ହାନ୍‍, ମାତର୍‌ ମାର୍ତା ୱାନିଙ୍ଗ୍‌ ଏମେ ବାଡିଦୁ ବେଟ୍‍ବୁଡ଼ାତା ମାର୍ହାତ୍‌, ଆୟା ସାନ୍ଦି ୱାନ୍‌ ଆୟା ବାଡିଦୁ ମାର୍ହାନ୍‍ ।
JOH 11:31 ମାରି, ଏମେ ଜିହୁଦିର୍‌ ୱାନିୱାଲେ ଇନ୍‌ଡ୍ର ମାନ୍‌ଜି ମରିୟମ୍‌ତିଙ୍ଗ୍‍ ସୁକୁ ସିଜିମାର୍ହାର୍‍, ୱାର୍‌ ମରିୟମ୍‍ତିଙ୍ଗ୍‍ ବେଗି ନିଙ୍ଗ୍‍ଜି ସହସି ସନିକା ସୁଡ଼ୁଜି, ୱାଦ୍‌ ଦୁକି ଲାକ୍‌ତୁ ଆଡ଼୍‍ବାଦେଙ୍ଗ୍‍ ଇଜି ସଲ୍‍ସିନାତ୍‍, ଇକା ଅଡ଼୍‍ବିଜି ତାନି ୱେନ୍‌କା ୱେନ୍‌କା ସର୍ହାର୍‍ ।
JOH 11:32 ଆବେଟ୍‌ ଜିସୁ ଏମେ ବାଡିଦୁ ମାର୍ହାନ୍‍, ମରିୟମ୍‌ ଆୟା ବାଡିଦୁ ଇଗା ସଲ୍‌ସି ୱାନିଙ୍ଗ୍‌ ସୁଡ଼ୁଜି ୱାନି କାଲ୍‍କା ଆଡ୍‍ଗି ମାଡ଼ିସ୍‌ କିଜି ଇର୍ହାତ୍‌, “ପ୍ରବୁ, ଜଦି ନିନ୍‌ ଇବେ ଇଗା ୱାତିମାନ୍ଦି, ଆତିଙ୍ଗ୍‌ ନା ତଡ଼ାନ୍‌ ସାଏତାନ୍‍ମାନ୍ଦି ।”
JOH 11:33 ମାରି, ଜିସୁ ତାନିଙ୍ଗ୍‌ ମାରି ତାନି ୱାଲେ ୱାତିମାନି ଜିହୁଦିରିଙ୍ଗ୍‍ଁ ଆଡ଼୍‍ବାନିକା ସୁଡ଼ୁଜି ଆତ୍ମାତୁ ଆଡ଼୍‍ବାଜି, ମାରି ପାଣି ପୁରା କିଦେଙ୍ଗ୍‌ ଇଜି ନାଣ୍ତ ବଦାଦାନ୍ ୱେନ୍‌ବାତାନ୍‌,
JOH 11:34 ୱାନିଙ୍ଗ୍‌ ଏମେ ଇଟ୍‍ଟି ମାନିଦେର୍‌ ? ୱାର୍‌ ୱାନିଙ୍ଗ୍‌ ଇର୍ହାର୍‌, “ପ୍ରବୁ, ୱାଜି ସୁଡ଼ୁଆ ।”
JOH 11:35 ଜିସୁ ଆଡ଼୍‍ବାତାନ୍‍ ।
JOH 11:36 ଆବେଟ୍‌ ଜିହୁଦିର୍ ଇର୍ହାର୍‌, ସୁଡ଼ୁଦୁ, ୱାନ୍‌ ୱାନିଙ୍ଗ୍‌ ଏଣ୍ତେସ୍‌ ଜିବନ୍‌ନୋଜି ମାର୍ହାନ୍‍ ।
JOH 11:37 ମାତର୍‌ ୱାରି ଲୋଇ ଏନ୍‌ ଏନ୍‌ ଇର୍ହାର୍‌, “ଇୟା ଏମେକାନ୍‍ ଆୟା କାଣାଦି କାଣୁକୁ ସୁଡ଼ିସ୍‍ କିଏନ୍‌ ମାର୍ହାନ୍‍ ନୋ ? ୱାନ୍‌ ଇନିକା ଲାଜାର୍‌ତି ସାନିତାନେଙ୍ଗ୍‍ ବା ତେବାକିଦେଙ୍ଗ୍‍ ଆଟ୍‍ଏତାନ୍‍ମାନ୍ଦି ?”
JOH 11:38 ଆବେଟ୍‌ ଜିସୁ ମାରିଡ଼େସି ଆତ୍ମାଦୁ ଆଡ଼୍‍ବାଜି ଦୁକିଗୁଟା ଲାକ୍‌ତୁ ୱାତାନ୍‌; ଆକା ଉଣ୍ତ୍ରି ସାର୍‍ରା, ମାରି ତାନି ଦୁଆର୍‍ ଆଗ୍‌ଡ଼ି ଉଣ୍ତ୍ରି କାଲୁ ମାର୍ହାତ୍‌ ।
JOH 11:39 ଜିସୁ ଆଦେସ୍‌ ସିତାନ୍‌, “ଇୟା କାଲୁ ଗୁସାକିଦୁ ।” ସାତି ଲୋକ୍‌ତି ତାଙ୍ଗିଁସି ମାର୍ତା ଜିସୁଙ୍ଗୁଁ ଇର୍ହାତ୍‌, “ପ୍ରବୁ, ୱାନ୍‌ କାପୁ ଆଜିମାନାନ୍‍, ଇରିଙ୍ଗ୍‌ ୱାନିଙ୍ଗ୍‌ ମୁସ୍‌ତାର୍‌ ନାଲ୍‍ନେନ୍‍ ଆତାନ୍‍ନି ।”
JOH 11:40 ଜିସୁ ତାନିଙ୍ଗ୍‌ ଇର୍ହାନ୍‌, “ଜଦି ନିନ୍‌ ବିସ୍‌ବାସ୍‌ କିନି, ଆରିଙ୍ଗ୍‌ ମାପୁରୁଦି ମହିମା ସୁଣି, ଇକା ଇନିକା ନାନ୍ ନିଙ୍ଗିଁ ଇନ୍‍ଏତା ?”
JOH 11:41 ଆବେଟ୍‌ ୱାର୍‌ କାଲୁ ଗୁସାକିତାର୍‍ । ମାରି, ଜିସୁ ମୁସ୍‌କୁ ସୁଡ଼ୁଜି ଇର୍ହାନ୍‌, “ବୁବା, ନିନ୍‌ ନା ପାର୍‌ତନା ୱେର୍‌ଇ ଇଜି ନାନ୍ ନିଙ୍ଗିଁ ଦନ୍ୟବାଦ୍‌ ସିଜିନା ।
JOH 11:42 ନିନ୍‌ ଜେ ୱିଜୁୱାଲେ ନା ପାର୍‌ତନା ୱେନ୍‍ଜମାନି, ଇକା ନାନ୍ ନେସ୍‌ତାମାନା; ମାତର୍‌ ଏମେ ଲୋକୁ ୱିଜେରେ ସାରିବେଡ଼୍‍ତି ନିର୍ହାମାନାର୍‍, ନିନ୍‌ ନାଙ୍ଗିଁ ପକ୍‍ତିମାନି ଇଜି ୱାର୍‌ ଏଣ୍ତେସ୍‌ ବିସ୍‌ବାସ୍‌ କିନାର୍‌, ଇୟାଉଣ୍ତିଙ୍ଗ୍‌ ୱାରି ଉଣ୍ତିଙ୍ଗ୍‌ ନାନ୍ ଇକା ଇର୍‌ଆ ।”
JOH 11:43 ୱାନ୍‌ ଇକା ଇଜି ନାଣ୍ତ ଆଉଲି ଆଜି କୁକ୍‍ତାନ୍‍, “ଲାଜାର୍‌ ସହସ ରାଆ ।”
JOH 11:44 ୱାନ୍‌ ସତାୱାତାନ୍‍; ୱାନି କିୟୁ ନି ପାଦାମ୍‌ ଦୁକିଦି ପାଗେଣାନ୍‍ ତର୍‍ତାମାର୍ହାର୍‍, ମାରି ୱାନି ମକମି ଉଣ୍ତ୍ରି ପାସିଆ କେର୍‍ପ୍‍ତା ମାର୍ହାର୍‌ । ଜିସୁ ୱାରିଙ୍ଗ୍‌ ଇର୍ହାନ୍‌, “ୱେନି ଗାଟି କୁତ୍‍ସି ସନ୍‌ଡ଼୍ରେଙ୍ଗ୍‌ ସାରି ସିଦୁ ।”
JOH 11:45 ମାରି, ଜିହୁଦିର୍‌ ମାଣ୍‌କୁ ନାଣ୍ତ ଅର୍ତାତ୍‍ ଏମେକାର୍‌ ମରିୟମ୍‌ ଲାକ୍‌ତୁ ୱାତାମାର୍ହାର୍‍ ମାରି ଜିସୁଦି ପାଣି ସୁଡ଼ୁଜି, ୱାର୍‌ ୱାନିମାନୁ ବିସ୍‌ବାସ୍‌ କିତାର୍‍;
JOH 11:46 ମାତର୍‌, ୱାରି ମାଣାନ୍‌ ଏନ୍‌ ଏନ୍‌ ପାରୁସିର୍‌ ଲାକ୍‌ତୁ ସଲ୍‌ସି, ଜିସୁ ଆମାକା ଆମାକା କିତାମାର୍ହାନ୍‌, ଆୟାୱିଜୁ ୱାରିଙ୍ଗ୍‌ ୱେର୍‌ତାନ୍‌ ।
JOH 11:47 ଆବେଟ୍‌ ପେରି ଜାଜକର୍‌ ନି ପାରୁସିର୍‌ ପେରିମିଟିଙ୍ଗ୍‌ କିଜି ଇର୍ହାର୍‌, “ମାଡ୍‌ ଇନିକା କିନିକା ? ଇୟା ଲୋକୁ ତୋ ନାଣ୍ତ କାବାଆନି ପାଣି କିଜିନାନ୍‍ ।
JOH 11:48 ଜଦି ମାଡ୍‌ ୱାନିଙ୍ଗ୍‌ ଇୟାୱାଜା ଡ଼ିସ୍‍ନାସିନାଟ୍‍, ଆରିଙ୍ଗ୍‌ ୱିଜେରେ ୱାନିମାନୁ ବିସ୍‌ବାସ୍‌ କିନାର୍‌, ମାରି ରମିୟଅଦିକାରି ଲୋକୁ ୱାଜି ମା ମନ୍ଦିର୍‌ ନି ଜାତିଦି ୱିଜେରିଙ୍ଗ୍‍ ନାସ୍ଟୁ କିନାର୍‌ ।”
JOH 11:49 ମାତର୍‌ ୱାରିମାଣ୍‌କୁ ଆୟା ବାର୍‍ସେକ୍‍ତି ଉଣ୍ତିଙ୍ଗ୍‌ ଆସ୍‍କିଆଇଆତିମାନି ୱିଜେରିଙ୍ଗ୍‌ପେରି ଜାଜକ କୟାପା ୱାରିଙ୍ଗ୍‌ ଇର୍ହାନ୍‌, “ମିର୍‌ ଇନିକା କାବାର୍‍ !”
JOH 11:50 ମିର୍‌ ଇନିକା ବୁଜାଦେଙ୍ଗ୍‌ ଆଟ୍‍ଇଜିନିଦେର୍‍, ୱିଜୁ ଜାତି ନାସ୍ଟୁ ଆନି ବାଦ୍‌ଲୁ ଅରେନ୍‍ ଲୋକୁ ସାନିକା ଟିକ୍‍ମାନାତ୍‍ ।
JOH 11:51 କୟାପା ନିଜେଦି ମନ୍‍ତାନ୍‍ ଇକା ଇନ୍‌ଏନ୍‌ ମାର୍ହାନ୍‍, ମାତର୍‌ ୱାନ୍‌ ଆୟା ବାର୍‍ସେକ୍‍ତି ୱିଜେରିଙ୍ଗ୍‌ପେରି ଜାଜକ ମାର୍ହାନ୍‍ଆକା ଇୟା ବବିସତ୍‍ତି ମାଟା ୱାନି ୱେୟୁଦାନ୍‌ ସତାମାର୍ହାତ୍‍ । ଜିସୁ ୱେର୍‍ତା ମାର୍ହାନ୍‍ ଜେ ୱିଜୁ ଜିହୁଦି ଲୋକାଦି,
JOH 11:52 ଇନ୍‍ଙ୍ଗାଁ ଆନିଙ୍ଗାଁ ଆତିମାନି ମାପୁରୁଦି ଲୋକାଙ୍ଗ୍‌ ଉଣ୍ତ୍ରେ କୁଟୁମ୍‍ତୁ ଉଣ୍ତାକିନି ଉଣ୍ତିଙ୍ଗ୍‌ ଜିସୁ ସାନାନ୍‌ ।
JOH 11:53 ଆବେଟ୍‌ ଆୟା ନାଣ୍ତିରାନ୍‍ ଜିହୁଦି ନେତାର୍‌ ଜିସୁଙ୍ଗୁଁ ସାୟାମାର୍‍ଗାଡାକ୍‍ତେଙ୍ଗ୍‍ ଇଜି ଉପାୟ୍‌ କିତାର୍‍ ।
JOH 11:54 ମାରି, ଜିସୁ ଜିହୁଦିର୍‌ ମାନୁ ମାରି ତରାୟ୍‍ଆଜି ବୁଲାସାଲା କିଏତାନ୍‌, ମାତର୍‌ ୱାନ୍‌ ଆୟାବାଡିଦାନ୍‍ ସହସି ସଲ୍‌ସି ସୁନ୍‌ସାନ୍‌ ରାଜିଦି ଏପ୍ରୟିମ୍‍ ଦର୍‌ତି ଉଣ୍ତ୍ରି ଗାଡ଼୍‌ତୁ ସର୍ହାନ୍‍, ମାରି ୱାନ୍‌ ସିସୁରିୱାଲେ ଆବେ ତେବାତାନ୍‌ ।
JOH 11:55 ଜିହୁଦିର୍‌ ନିସ୍ତାର ପଣ୍ତୟ୍‌ ଲାକ୍‌ତୁ ମାର୍ହାତ୍‌, ମାରି ରାଜିଦାନ୍‍ ନାଣ୍ତ ଲୋକୁ ନିଜେ ନିଜେଦିଙ୍ଗ୍‍ ନେଗେଣ୍ତ୍‍ କିଦେଙ୍ଗ୍‌ ଇଜି ନିସ୍ତାର୍‍ ପଣ୍ତୟ୍‌ ଆଗ୍‍ଡ଼ିରାନ୍‍ନେ ଜିରୁସାଲାମ୍‍ତୁ ସର୍ହାର୍‍ ।
JOH 11:56 ଆବେଟ୍‌ ୱାର୍‌ ଜିସୁଙ୍ଗୁଁ ପୟ୍‍ବୁ ପୟ୍‍ବୁ ମନ୍ଦିର୍‌ତୁ ନିର୍‍ଇ ମାର୍‍ଇୱାଲେ ୱାର୍‍ୱାର୍‍ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ମିର୍‌ ଇନିକା ଅଡ଼୍‍ବିଜିନିଦେର୍‍ ? ୱାନ୍‌ ପଣ୍ତୟ୍‌ତୁ ୱାନାନ୍‌ ନୋ ରେଏନ୍‌ ?
JOH 11:57 ପେରି ଜାଜକର୍‌ ନି ପାରୁସିର୍‌ ଆଦେସ୍‌ ସିତାମାର୍ହାର୍‍ ଜେ ଜଦି ଏନ୍‌ ଜିସୁ ଏମେମାନୁ ମାନାନ୍‌ ଇଜି ନେସ୍‍ନାମାନାନ୍‍, ଆରିଙ୍ଗ୍‌ ଇୟା କାବୁର୍‌ ଦାପ୍ରେ ନେତାରିଙ୍ଗ୍‌ ୱେର୍‌ନା ସିନାର୍‍ । ଆତିଙ୍ଗ୍‌ ୱାର୍‌ ଜିସୁଙ୍ଗୁଁ ଆସ୍‌ନାର୍‌ ।
JOH 12:1 ଇୟା ୱେନ୍‌କା ଜିସୁ ନିସ୍ତାର୍‌ ପଣ୍ତୟ୍‌ତି ସଅ ଦିନ୍‌ ଆଗ୍‌ଡ଼ି ବେତନିୟାଦୁ ସର୍ହାନ୍‍; ଏମେ ଲାଜାର୍‌ତିଙ୍ଗ୍‌ ୱାନ୍‌ ସାତିମାଣ୍‌କୁ ନିକ୍‍ତା ମାର୍ହାନ୍‍, ଆବେନୁ ୱାନି ଇଲୁ ମାର୍ହାତ୍‌ ।
JOH 12:2 ଆବେଟ୍‌ ୱାର୍‌ ୱାନି ଉଣ୍ତିଙ୍ଗ୍‌ ଆୟା ବାଡିଦୁ ଉଣ୍ତ୍ରି ନାଡ଼ା ବଜି ତିଆର୍‌ କିତାର୍‍; ମାର୍ତା ସେବା କିଜିମାର୍ହାତ୍‍, ମାରି ଏମେକାର୍‌ ୱାନିୱାଲେ ବଜିଦୁ ବାସ୍‍ତାମାର୍ହାର୍‍, ଲାଜାର୍‌ ୱାରି ଲୋଇ ଅରେନ୍‍ ମାର୍ହାନ୍‍ ।
JOH 12:3 ନାସ୍ତିୱାଲେ ମରିୟମ୍‌ ଅଦାକାୟା ନାଣ୍ତ ନେଗି ଦାରାଦି ବାସ୍‌ନା ମାରାତାନ୍‌ ତିଆର୍‌ ଆତି ନିୟୁ ଅସି ଜିସୁଦି ପାଦାମ୍‍ତୁ ଆକା ୱାକ୍‍ସି ନିଜେଦି କୁକୁଟିଦାନ୍ ୱାନି ପାଦାମ୍‌କୁ ତେଲ୍‍ତାସିତାତ୍‍, ମାରି ନିୟୁଦି ବାସ୍‍ନାଦାନ୍‍ ଇଲୁ ଗାମ୍‍ରିସ୍‍ତାତ୍‍ ।
JOH 12:4 ମାତର୍‌ ଜିସୁଦି ସିସୁର୍‍ ଲୋଇ ଇସ୍କାରିୟୋତିୟ ଜିହୁଦା ଦର୍‌ତି ଏମେ ସିସୁ ୱାନିଙ୍ଗ୍‌ ସାତ୍ରୁରି କିୟୁଦୁ ସେର୍‍ପ୍‍ତେଙ୍ଗ୍‍ ସଲ୍‍ସିମାର୍ହାନ୍‍, ୱାନ୍‌ ଇର୍ହାନ୍‌,
JOH 12:5 ଇୟା ନିୟୁ ତିନିସ ୱେଣ୍ତି ଡାବୁଙ୍ଗାଁଙ୍ଗ୍‍ ପର୍‌ଜି ଏନ୍ଦା କାକୁର୍ତି ଲୋକାଙ୍ଗ୍‌ ସିଏତାର୍‍ ?
JOH 12:6 ୱାନ୍‌ ଜେ କାକୁର୍ତି ଲୋକାଙ୍ଗ୍‌ ଉଣ୍ତିଙ୍ଗ୍‌ ସିନ୍ତା କିଜିମାର୍ହାନ୍‍ ଇଜି ଇକା ଇର୍ହାନ୍‌, ଆକା ସିଲେ, ମାତର୍‌ ୱାନ୍‌ ଅରେନ୍‍ ଡଙ୍ଗାଁର୍‍ଏନ୍, ମାରି ୱାନି ଲାକ୍‌ତୁ ଡାବୁଙ୍ଗୁଁ ମଣି ମାର୍ହାତ୍‍ଆକା, ଆବେନ୍‌ ଆମା ଆମାକା ଇଡ୍‌ଜି ମାର୍ହାର୍‌, ଆକା ୱାନ୍‌ ଡଙ୍ଗାଁକିଜି ଅସିମାର୍ହାନ୍‍ ।
JOH 12:7 ମାତର୍‌ ଜିସୁ ଇର୍ହାନ୍‌, “ତେନିଙ୍ଗ୍‍ ଡ଼ିସ୍‌ସୋ ସିଦୁ, ତାନେଙ୍ଗ୍‌ ଆମାକା ମାନାତ୍‌, ନା ମାଡ଼ାଦିଙ୍ଗ୍‍ ମୁସ୍‍ନି ନାଣ୍ତିରି ଉଣ୍ତିଙ୍ଗ୍‌ ୱାଦ୍‌ ଇକା ଇଡ୍‌ଦେଙ୍ଗ୍‌ ଆଟ୍‍ନାତ୍‍ ।
JOH 12:8 କାକୁର୍ତି ଲୋକ୍‌ ତୋ ୱିଜୁଦିନ୍‌ ମି ଲାକ୍‌ତୁ ମାନାର୍‌, ମାତର୍‌ ନାନ୍ ୱିଜୁଦିନ୍‌ ମି ଲାକ୍‌ତୁ ତେବାଏ ।”
JOH 12:9 ନାସ୍ତିୱାଲେ ନାଣ୍ତ ଜିହୁଦି ଲୋକୁ ଜିସୁ ବେତନିଆଦୁ ମାନାନ୍‌ ଇଜି ନେସ୍‌ତେଙ୍ଗ୍‌ ଆଟ୍‍ସି ଆବ୍‍କା ଜିସୁଦି ଉଣ୍ତିଙ୍ଗ୍‌ ସିଲେ, ମାତର୍‌ ଏମେ ଲାଜାର୍‌ତିଙ୍ଗ୍‌ ୱାନ୍‌ ସାତିମାଣାନ୍‌ ନିକ୍‍ତାମାର୍ହାନ୍‍, ୱାନିଙ୍ଗ୍‌ ସୁଡ଼ୁଦେଙ୍ଗ୍‍ ବା ୱାତାର୍‌ ।
JOH 12:10 ମାତର୍‌ ଲାଜାର୍‌ତିଙ୍ଗ୍‌ ବା ଡାକ୍‌ତେଙ୍ଗ୍‍ଁ ଇଜି ପେରି ଜାଜକର୍‌ ଉପାୟ୍‌ କିତାର୍‍,
JOH 12:11 ଇରିଙ୍ଗ୍‌ ୱାନି ଉଣ୍ତିଙ୍ଗ୍‌ ଜିହୁଦିର୍‌ ଲୋଇ ନାଣ୍ତ ଲୋକୁ ୱାରିଙ୍ଗ୍‌ ଡ଼ିସ୍‍ସିମାର୍ହାର୍‍ ମାରି ଜିସୁମାନୁ ସଲ୍‌ସି ବିସ୍‌ବାସ୍‌ କିଜିମାର୍ହାର୍‍ ।
JOH 12:12 ମାର୍‍ନାଣ୍ଡିଙ୍ଗ୍ ନିସ୍ତାର୍‍ ପଣ୍ତୟ୍‌ତୁ ୱାତିମାର୍‌ଇ ନାଣ୍ତ ଲୋକୁ ଜିସୁ ଜିରୁସାଲାମ୍‍ତୁ ୱାଜିନାନ୍‍ ଇଜି ୱେର୍‌ଆର୍‌ ।
JOH 12:13 ଆୟାଉଣ୍ତିଙ୍ଗ୍‌ ୱାର୍‌ କାଜିରି କମେଙ୍ଗ୍‌ ଆସ୍‌ସି ୱାନିଙ୍ଗ୍‌ ବେଟ୍‌ଆଦେଙ୍ଗ୍‍ ଇଜି ସତାସର୍ହାର୍‌ ମାରି ନାଣ୍ତ ଆଉଲି ଆଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ହୋଶାନା । ପ୍ରବୁଦି ଦର୍‌ତାନ୍‌ ଏନ୍‌ ୱାଜିନାନ୍‍, ୱାନ୍‌ ଦନ୍ୟ; ଦନ୍ୟ ଇସ୍ରାଏଲ୍‌ତି ରାଜା ।
JOH 12:14 ମାରି, ଜିସୁ ଉଣ୍ତ୍ରି ଗଦପିଲା ମୁସ୍‌କୁ ବାସ୍‍ତା ୱାତାନ୍‌, ଏଣ୍ତେସ୍‌ ଇକା ଦାର୍ମୁ ସାସ୍ତ୍ରଦୁ ରାସାତାମାନାତ୍‌,
JOH 12:15 ଏ ସିୟୋନ୍‍ତି ଆଇଲିକ୍‌, “ତିଲାମା; ସୁଡୁଆ, ନି ରାଜା ୱାଜିନାନ୍‍, ୱାନ୍‌ ଗଦପିଲା ମୁସ୍‌କୁ ବାସ୍‌ତାନ୍‌ନୋ ୱାଜିନାନ୍‍ ।”
JOH 12:16 ୱାନି ସିସୁର୍‍ ପାର୍‌ତୁମ୍‍ତୁ ଇୟାୱିଜୁ ବିସୟ୍‌ ବୁଜାଏତାର୍‌, ମାତର୍‌ ଜିସୁ ଦନ୍ୟବାଦ୍‌ ପୟ୍‌ତି ୱେନ୍‌କା ଇୟାୱିଜୁ ଜେ ୱାନି ବିସୟ୍‌ତାନ୍‌ ଦାର୍ମୁସାସ୍ତ୍ରଦୁ ରାସାତାମାର୍ହାତ୍‍, ମାରି ୱାନି ଉଣ୍ତିଙ୍ଗ୍‌ ୱାର୍‌ ଜେ ଇୟାୱିଜୁ କିତାମାର୍ହାର୍‍, ଆକା ୱାର୍‌ ଏତ୍‌ କିତାର୍ ।
JOH 12:17 ମାରି, ଜିସୁ ଲାଜାର୍‌ତିଙ୍ଗ୍‌ ଦୁକିଦାନ୍‍ କୁକ୍‌ସି ସାତିମାଣାନ୍‌ ନିକ୍‍ତିୱାଲେ ଆମା ଲୋକ୍‌ଡର୍‌ ୱାନିୱାଲେ ମାର୍ହାର୍‌, ୱାର୍‌ ଆୟା ଗଟନା ବିସୟ୍‌ତାନ୍‌ ସାକି ସିଦେଙ୍ଗ୍‍ ଆସ୍‌ତାର୍‌ ।
JOH 12:18 ଇୟାଉଣ୍ତିଙ୍ଗ୍‌ ବା ଲୋକୁ ୱିଜେରେ ୱାନିଙ୍ଗ୍‌ ମିସାଦେଙ୍ଗ୍‍ ସର୍ହାମାର୍ହାର୍‍, ଇରିଙ୍ଗ୍‌ ୱାନ୍‌ ଇୟା କାବାଆନି ପାଣି କିତାମାନାନ୍‍ ଇଜି ୱାର୍‌ ୱେର୍‍ଆମାର୍ହାର୍‍ ।
JOH 12:19 ଆବେଟ୍‌ ପାରୁସିର୍‌ ତାମେ ତାମେମାନୁ ୱାର୍‌ଗିଜି ସାତାର୍‌, “ସୁଡ଼ୁଜିନିଦେର୍‍ ତୋ, ମାଡ୍‌ ଇନିକା କିଦେଙ୍ଗ୍‌ ଆଟ୍‍ଇଜିନିକା; ସୁଡ଼ୁଦୁ, ଦୁନିଆୱିଜୁ ତାନି ୱେନ୍‌କା ସର୍ହାତ୍‍ନି ।”
JOH 12:20 ପଣ୍ତୟ୍‌ ସମୟ୍‍ତୁ ଉପାସନା କିଦେଙ୍ଗ୍‌ ଇଜି ଜିରୁସାଲାମ୍‍ତୁ ୱାତି ମାର୍‍ଇ ଲୋକା ଲୋଇ ଏସୋ ଗ୍ରିକ୍‌ ଲୋକୁ ମାର୍ହାର୍‌ ।
JOH 12:21 ୱାର୍‌ ଗାଲିଲିଦି ବେତ୍‍ସାଇଦାଦୁ ତେବାନି ପିଲିପ୍‌ତି ଲାକ୍‌ତୁ ୱାଜି ୱାନିଙ୍ଗ୍‌ ମାଡ଼ିସ୍‌ କିଜି ଇର୍ହାର୍‌, “ଆଜ୍ଞା, ଜିସୁଙ୍ଗୁଁ ସୁଡ଼ୁଦେଙ୍ଗ୍‍ ମା ବଦା ।”
JOH 12:22 ପିଲିପ୍‌ ସଲ୍‌ସି ଆନ୍ଦ୍ରିୟତିଙ୍ଗ୍‍ ଇର୍ହାନ୍‌, ମାରି ଆନ୍ଦ୍ରିୟ ନି ପିଲିପ୍‌ ସଲସି ଜିସୁଙ୍ଗୁଁ ଇର୍ହାର୍‌ ।
JOH 12:23 ଜିସୁ ୱାରିଙ୍ଗ୍‌ ଇର୍ହାନ୍‌, ମନୁସ୍ୟପୁତ୍ର ଦନ୍ୟବାଦ୍‌ ପୟ୍‌ଦେଙ୍ଗ୍‌ ଇଜି ସମୟ ଇଗା ୱାତାମାନାତ୍‌ ।
JOH 12:24 ସତ୍‌ ସତ୍‌ ନାନ୍ ମିଙ୍ଗିଁ ଇଜିନା, ଗଦ୍‍ମୁପାଡ଼ୁ ଜଦି ସିକ୍‌ଲାଦୁ ଆର୍‍ଜି ସାଏତ୍‌, ଆରିଙ୍ଗ୍‌ ଆକା ଉଡ୍ରେନେ ତେବାନାତ୍‍, ମାତର୍‌ ଜଦି ସାନାତ୍‍, ନାଣ୍ତ ପାଡ଼ୁ ଆସ୍‍ନାତ୍‍ ।
JOH 12:25 ଏନ୍‌ ନିଜେଦି ଜିବନ୍‌ତିଙ୍ଗ୍‌ ନାଣ୍ତ ଜିବନ୍‍ନୋନାନ୍‍, ୱାନ୍‌ ଆକା ଆରାକିନାନ୍‌, ମାରି ଏନ୍‌ ନିଜେଦି ଜିବନ୍‌ତିଙ୍ଗ୍‌ ଇୟା ଦୁନିଆଦୁ କାଡ଼୍‍ନାନ୍‍, ୱାନ୍‌ ଆକା ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ଉଣ୍ତିଙ୍ଗ୍‌ ରକିୟା କିନାନ୍‌ ।
JOH 12:26 ଏନ୍‌ ନା ସେବା କିଦେଙ୍ଗ୍‌ ବଦାକିନାନ୍‌, ଆରିଙ୍ଗ୍‌ ୱାନ୍‌ ନା ୱାଲେ ରାପିନ୍‍; ମାରି; ନାନ୍ ଏମେନ୍‍ ମାନା, ନା ସେବାକିନିକାନ୍‍ ବା ଆବେ ତେବାନାନ୍‌; ଏନ୍‌ ଏସାଙ୍ଗ୍‍ ନା ସେବା କିନାନ୍‌, ଆରିଙ୍ଗ୍‌ ନା ବୁବା ୱାନିଙ୍ଗ୍‌ ମାନାନାନ୍‍ ।
JOH 12:27 ଇଲେଇ ନା ଜିବନ୍‌ ଦୁକ୍‍ଦୁକ୍‍ ଆଜିନାତ୍‍, ମାରି ନାନ୍ ଇନିକା କିନା ? ବୁବା, ନାଙ୍ଗିଁ ଇୟା ସମୟ୍‌ତାନ୍‌ ରକିୟା କିଆ ? ମାତର୍‌ ଇୟାଉଣ୍ତିଙ୍ଗ୍‌ ତୋ ନାନ୍ ୱାତାମାନା । ଏଣ୍ତେସ୍‌ ଦୁକ୍‍ବଗାନି ସମୟକୁ କାସ୍ଟୁ ଆଦେଙ୍ଗ୍‍ ପକାତାମାନା ।
JOH 12:28 “ବୁବା, ନିନ୍‌ ଦର୍‌ ଦନ୍ୟବାଦ୍‌ କିଆ । ଆବେଟ୍‌ ବାଦଡ଼ତାନ୍‍ ଇୟା ବଲ୍ ୱାତାତ୍‍ ମାପ୍‌ ଆକା ମହିମାନିତ କିତାମାନାପ୍‍, ମାରିଡ଼େସି ମହିମାନିତ କିନାପ୍‍ ।”
JOH 12:29 ଆଦେଙ୍ଗ୍‌ ଲାକ୍‌ତୁ ନିର୍‍ଇ ମାର୍‍ଇ ଲୋକୁ ୱିଜେରେ ଇକା ୱେନ୍‌ଜି ବାଦଡ଼୍‍ ଡିଡ଼ିତାତ୍‍ ଇଜି ଇର୍ହାର୍‌; ଆଇକାର୍‌ ଇର୍ହାର୍‌, “ଅରେନ୍‍ ଦୁତ୍‍ ୱେନିଙ୍ଗ୍‌ ମାଟା ଇର୍ହାମାନାନ୍‌ ।”
JOH 12:30 ଜିସୁ ୱାରିଙ୍ଗ୍‌ ଇର୍ହାନ୍‌, ନା ଉଣ୍ତିଙ୍ଗ୍‌ ଇୟା ବଲ୍ ଆଏତ୍‍, ମାତର୍‌ ମି ଉଣ୍ତିଙ୍ଗ୍‌ ଆତାମାନାତ୍‌ ।
JOH 12:31 ଇଲେଇ ଇୟା ଦୁନିଆଦୁ ବିସାର୍‌ ଇଗା ୱାତାତ୍‍; ଇଲେଇ ଇୟା ଦୁନିଆଦି ବିସାର୍‍ପତିଙ୍ଗ୍‌ ଆତ୍‌ରେ ପକାନାନ୍‍ ।
JOH 12:32 ମାରି, ନାନ୍ ଏସ୍ତିୱାଲେ ଦୁନିଆଦାନ୍‌ ମୁସ୍‌କୁ ପେରାଇଆନା, ନାସ୍ତିୱାଲେ ୱିଜେରିଙ୍ଗ୍‌ ଟାଣିସ୍‍ କିନା ।
JOH 12:33 ୱାନ୍‌ ଏଣ୍ତେସ୍‌ ସାଦେଙ୍ଗ୍‌ ସଲ୍‌ସିନାନ୍‌, ଆୟା ସିନା ସିଜି ଇକା ଇର୍ହାନ୍‌ ।
JOH 12:34 ଆବେଟ୍‌ ଲୋକୁ ୱିଜେରେ ଇର୍ହାର୍‌, “ମସିହ ୱିଜୁଦିନ୍‌ ତେବାନାନ୍‌ ଇଜି ନିୟମ୍‍ତାନ୍‍ ମାପ୍‌ ୱେର୍‍ଆମାନାପ୍‍, ଆରିଙ୍ଗ୍‌ ମନୁସ୍ୟପୁତ୍ର ମୁସ୍‌କୁ ପେରାନାନ୍‌ ଇଜି ମିର୍‌ ଏଣ୍ତେସ୍‌ ଇଜିନିଦେର୍‌ ? ଇୟା ମନୁସ୍ୟପୁତ୍ର ଏନ୍‌ ?”
JOH 12:35 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, “ମାରି ଅଡ଼ପ୍‍ ସମୟ ମାତର୍‌ ଜାୟ୍‌ ମିବାନୁ ମାନାତ୍‌ । ସିକାଟି ଏଣ୍ତେସ୍‌ ମି ଡ଼ିଙ୍ଗ୍‍ଏତ୍‍, ଇୟାଉଣ୍ତିଙ୍ଗ୍‌ ମି ଲାକ୍‌ତୁ ଜାୟ୍‌ ମାନାପ୍ ମାନାପ୍ ବୁଲାସାଲା କିଦୁ; ଏନ୍‌ ସିକାଟିଦୁ ବୁଲାସାଲା କିନାନ୍‌, ୱାନ୍‌ ଏମେ ସଲ୍‌ସିନାନ୍‌, ଆକା ୱାନ୍‌ ନେସ୍‌ଏପ୍‌ ।
JOH 12:36 ମିର୍‌ ଏଣ୍ତେସ୍‌ ଜାୟ୍‍ତି କଡ଼ର୍‌ ଆଦୁ, ଆୟାଉଣ୍ତିଙ୍ଗ୍‌ ଜାୟ୍‌ ମି ଲାକ୍‌ତୁ ମାନାପ୍ ମାନାପ୍ ଜାୟ୍‍ତୁ ବିସ୍‌ବାସ୍‌ କିଦୁ । ଜିସୁ ଇୟାୱିଜୁ ମାଟା ଇନ୍‌ଜି ୱାରିମାଣାନ୍‌ ସଲ୍‌ସି ମାର୍‍ଗିଜି ତେବାତାନ୍‌ ।”
JOH 12:37 ଜଦିବା ଜିସୁ ତାମେ ଆଗ୍‌ଡ଼ି ନିସା କାବାଆନି ପାଣି କିତାମାର୍ହାନ୍‌, ଆବେବା ୱାର୍‌ ୱାନିବାନୁ ବିସ୍‌ବାସ୍‌ କିଏତାର୍‌,
JOH 12:38 ଏଣ୍ତେସ୍‌ ଜିସାଇୟ ବାବବାଦି ମାଣ୍‌କୁ ରାସାତି ବାକ୍ୟ ସତ୍‌ ଆନାତ୍‌ । “ଏ ପ୍ରବୁ, ଏନ୍‌ ମା ନେଗିକାବୁର୍‌ ମାଟା ବିସ୍‌ବାସ୍‌ କିତାମାନାନ୍‍ ? ମାରି ପ୍ରବୁଦି ସାକ୍ତି ଏମେୱାନି ଲାକ୍‌ତୁ ତର୍‍ତାନ୍‍ ?”
JOH 12:39 ଇୟାଉଣ୍ତିଙ୍ଗ୍‌ ୱାର୍‌ ବିସ୍‌ବାସ୍‌ କିଦେଙ୍ଗ୍‌ ଆଟ୍‍ଏଜିମାର୍ହାର୍‍, ଇରିଙ୍ଗ୍‌ ଜିସାଇୟ ମାରି ଇର୍ହାମାନାନ୍‌ ।
JOH 12:40 “ମାପୁରୁ ୱାରି କାଣୁକୁ କାଣା କିତାମାନାନ୍‍, ମାରି ୱାରି ଜିବନ୍‌ତିଙ୍ଗ୍‌ ଆଟ୍‌ୱା କିତାମାନାନ୍‍, ଏଣ୍ତେସ୍‌ ୱାର୍‌ କାଣ୍‍କାଙ୍ଗ୍‍ଁ ସୁଡ଼ୁଏର୍‍ ମାରି ଜିବନ୍‌ତୁ ବୁଜାଏର୍‍, ମାରିଡ଼େସି ନାବାନୁ ରେଏର୍‍, ମାରି ମାପ୍‌ ୱାରିଙ୍ଗ୍‌ ନେଗେଣ୍ତ୍‍ କିଏପ୍‍ ।”
JOH 12:41 ଜିସାୟ ଇୟାୱିଜୁ ଇର୍ହାନ୍‌, “ଇରିଙ୍ଗ୍‌ ୱାନ୍‌ ଜିସୁଦି ମହିମା ସୁଡ଼ୁତାନ୍‌ ମାରି ୱାନି ବିସୟ୍‌ତାନ୍‌ ଇର୍ହାନ୍‌ ।”
JOH 12:42 ଆବେ ଜିହୁଦି ନେତାର୍‌ ଲୋଇ ବା ନାଣ୍ତଲୋକ୍‍ ଜିସୁମାନୁ ବିସ୍‌ବାସ୍‌ କିତାର୍‍, ମାତର୍‌ ଆନାତ୍‌ସୁଗି ଏସ୍ତିୱାଲେ ପାର୍‌ତନା ଇଲ୍‌ତାନ୍‌ ସପ୍‍ନାର୍‍, ଇୟାଉଣ୍ତିଙ୍ଗ୍‌ ପାରୁସିରିଙ୍ଗ୍‍ ତିଲାଜି ଆକା ନାମ୍‍ଏଜି ମାର୍ହାର୍‍ ।
JOH 12:43 ଇରିଙ୍ଗ୍‌ ୱାର୍‌ ଗୌରବ୍‍ ମାପୁରୁଦି ୱେଡ଼ିକାକିନି ବାଦଲୁ ଲୋକାଙ୍ଗ୍‌ ୱେଡ଼ିକା ବଦା କିତାର୍‍ ।
JOH 12:44 ଜିସୁ ଆଉଲି ଆଜି ଇର୍ହାନ୍‌, “ଏନ୍‌ ନାବାନ୍‍ ବିସ୍‌ବାସ୍‌ କିନାନ୍‌, ୱାନ୍‌ କେବଲ୍‌ ନାବାନ୍‍ ବିସ୍‌ବାସ୍‌ କିଏନ୍‍, ମାତର୍‌ ନା ପକ୍‍ତିୱାନିମାନୁ ବିସ୍‌ବାସ୍‌ କିନାନ୍‌ ।
JOH 12:45 ମାରି, ଏନ୍‌ ନାଙ୍ଗିଁ ସୁଡ଼ୁତାମାନାନ୍‌, ୱାନ୍‌ ନାଙ୍ଗିଁ ପକ୍‍ତିୱାନିଙ୍ଗ୍‍ ସୁଡ଼ୁତାମାନାନ୍‌ ।
JOH 12:46 ଇୟାଉଣ୍ତିଙ୍ଗ୍‌ ନାନ୍ ଦୁନିଆଦି ଜାୟ୍‍ଆଜି ୱାତାମାନା, ଏନ୍‌ ନାବାନ୍‍ ବିସ୍‌ବାସ୍‌ କିନାନ୍, ୱାନ୍‌ ଏଣ୍ତେସ୍‌ ସିକାଟିଦୁ ବାସାଏନ୍‍ ।
JOH 12:47 ଏନ୍‌ ଜଦି ନା ବାକ୍ୟ ୱେନ୍‌ଜି ମାନାଏନ୍‌, ଆରିଙ୍ଗ୍‌ ନାନ୍ ୱାନି ବିସାର୍‌ କିଏ; ଇରିଙ୍ଗ୍‌ ନାନ୍ ଦୁନିଆଦି ବିସାର୍‌ କିଦେଙ୍ଗ୍‍ ରେଏନ୍‍ଣ୍ତା ମାତର୍‌ ଦୁନିଆଦିଙ୍ଗ୍‍ ରକିୟା କିଦେଙ୍ଗ୍‌ ୱାତାମାନା ।
JOH 12:48 ଏନ୍‌ ନାଙ୍ଗିଁ ଡ଼ିସ୍‌ସି ନା ମାଟା ମାନାଏନ୍‌, ନା ୱେୟୁଦି ବାକ୍ୟ ୱାନି ବିସାର୍‍କିନିକାତ୍‍ ଆନାତ୍‌ । ଆୟା ବାକ୍ୟ ୱିଜ୍‍ନି ଦିନ୍‍ତୁ ୱାନି ବିସାର୍‌ କିନାତ୍‌ ।
JOH 12:49 ଇୟା ମାଟା ସତ୍‌, ଇରିଙ୍ଗ୍‌ ନାନ୍ ନା ନିଜେଦି ଅଦିକାର୍‍ତାନ୍‍ ଇନିକା ଇନ୍‌ଏ, ମାତର୍‌ ନାନ୍ ଇନିକା ଇନା ମାରି ଇନିକା ୱେକ୍‍ନା, ଆକା ନାଙ୍ଗିଁ ପକ୍‍ତିମାନି ବୁବା ନାଙ୍ଗିଁ ମାଟା ସିତାମାନାନ୍‌ ।
JOH 12:50 ମାରି ନାନ୍ ନେସ୍‌ନା, ୱାନି ଆଦେସ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାତ୍‌ । ନା ବୁବା ନାଙ୍ଗିଁ ଆମାକା ଇନ୍‌ଡ୍ରେଙ୍ଗ୍‌ ଆଦେସ୍‌ ସିତାମାନାନ୍‌, କେବଲ୍‌ ନାସ ନାନ୍ ଇଜିନା ।”
JOH 13:1 ନିସ୍ତାର୍‌ ପଣ୍ତୟ୍‌ ଆନି ଆଗ୍‍ଡ଼ିରି ନାଣ୍ଡିଙ୍ଗ୍ ଜିସୁ ଇୟା ଦୁନିଆଦାନ୍‍ ବୁବା ଲାକ୍‌ତୁ ନିଜେ ସନି ସମୟ୍ ଇଗାୱାନିକା ନେସ୍‌ସି, ଦୁନିଆଦୁ ମାନି ନିଜେଦି ଏମେ ଲୋକାଙ୍ଗ୍‌ ୱାନ୍‌ ଜିବନ୍‌ ନଜି ୱାଜିମାର୍ହାନ୍‍, ୱାରି ଉଣ୍ତିଙ୍ଗ୍‌ ନାଣ୍ତ ଜିବନ୍‍ନୋନିକା ତର୍‍ତାନ୍‍ ।
JOH 13:2 ଜିସୁ ନି ୱାନି ସିସୁର୍‍ ଏସ୍ତିୱାଲେ ନାଡ଼ାଦି ବଜିଦୁ ବାସ୍‍ତାମାର୍ହାର୍‍ । ଏସ୍ତିୱାଲେ ସୟତାନ୍ ସିମୋନ ମାରିସି ଇସ୍କାରିୟୋତିୟ ଜିହୁଦାଦି ଜିବନ୍‌ତୁ ଜିସୁଙ୍ଗୁଁ ସାତ୍ରୁରି କିୟୁଦୁ ସର୍‍ପେ କିଦେଙ୍ଗ୍‌ ଇଜି ବଦା କିତାୱିସ୍‍ତା ମାର୍ହାନ୍‍ ।
JOH 13:3 ନାସ୍ତିୱାଲେ ବୁବା ଜେ ୱିଜୁ ଜିସୁଦି କିୟୁଦୁ ୱିଜୁ ସାକ୍ତି ସର୍‍ପେ କିତାମାନାନ୍‌ ମାରି ୱାନ୍‌ ଜେ ମାପୁରୁ ମାଣାନ୍‌ ୱାତାମାନାନ୍‍, ମାରି ମାପୁରୁମାନୁ ସଲ୍‌ସିନାନ୍‌, ଇକା ନେସ୍‍ତାମାର୍ହାନ ।
JOH 13:4 ଆବେଟ୍‌ ଜିସୁ ୱାନ୍‌ ଉଣି ମାଣାନ୍‌ ନିଙ୍ଗିଁତାନ୍‌ନୋ ନିଜେଦି ମୁସ୍‌କୁରି ଆଙ୍ଗିଁ କୁତ୍‍ସି ଉଣ୍ତ୍ରି ପାସିଆ ଅସି ନିଜେଦି ଜୁକିଦୁ ତରାତାନ୍‍ ।
JOH 13:5 ୱେନ୍‌କା ୱାନ୍‌ ନକିଦୁ ଏର୍‌ ୱାକ୍‍ତାନ୍‍, ମାରି ସିସୁରି ପାଦାମ୍‌କୁ ନର୍‍ଜିସିଜି ନିଜେଦି ଜୁକିଦୁ ତରାତିମାର୍‍ଇ ପାସିଆଦାନ୍‍ ତେଲ୍‍ଦେଙ୍ଗ୍‍ ଆସ୍‌ତାନ୍‌ ।
JOH 13:6 ଜିସୁ ସିମୋନ୍‌ ପିତର୍‌ ଲାକ୍‌ତୁ ୱାତାନ୍‌; ଏନ୍‌ ୱାନିଙ୍ଗ୍‌ ଇର୍ହାନ୍‌, “ପ୍ରବୁ, ନିନ୍‌ ନା ପାଦାମ୍‌କୁ ନର୍‍ବିସ୍‍କିଜି ସିଜିନି ?”
JOH 13:7 ଜିସୁ ୱାନିଙ୍ଗ୍‌ ଇର୍ହାନ୍‌, “ନାନ୍ ଏମେକା କିଜିନା, ଆକା ନିନ୍‌ ଇଲେ ନେସ୍‌ଏଜିନି, ମାତର୍‌ ୱେନ୍‌କା ନେସ୍‌ନି ।”
JOH 13:8 ପିତର୍‌ ଜିସୁଙ୍ଗୁଁ ଇର୍ହାନ୍‌, “ନିନ୍‌ ମୁଡ଼ୁକେ ଏସ୍‌କାଙ୍ଗ୍‌ବା ନା ପାଦାମ୍‌କୁ ନର୍‌ଜ ସିଇ ।” ଜିସୁ ୱାନିଙ୍ଗ୍‌ ଇର୍ହାନ୍‌, “ଜଦି ନାନ୍ ନି ପାଦାମ୍‌ ନର୍‌ଏ, ଆରିଙ୍ଗ୍‌ ନା ସିସୁ ଆଦେଙ୍ଗ୍‌ ଆଟ୍‍ଇ ।”
JOH 13:9 ସିମୋନ ପିତର୍‌ ୱାନିଙ୍ଗ୍‌ ଇର୍ହାନ୍‌, “ଏ ପ୍ରବୁ, ନିନ୍‌ କେବଲ୍‌ ନା ପାଦାମ୍‌କୁ ସିଲେ ନା କିୟୁ ନି ତାଲା ବା ନର୍‌ଜ ସିଦା ।”
JOH 13:10 ଜିସୁ ୱାନିଙ୍ଗ୍‌ ଇର୍ହାନ୍‌, ଏନ୍‌ ଏରୁ ଇବାତାମାନାନ୍‌, ୱାନି ପାଦାମ୍‌କୁ ନର୍‌ଦେଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଇନିକା ଦର୍‌କାର୍‌ ସିଲେ, ୱାନ୍‌ ସତ୍‍ନେ ନରାତାମାନ୍‌ନାନ୍‌; ମିର୍‌ ୱିଜେରେ ବା ନରାତିମାନିଦେର୍‌, କେବଲ୍‌ ଅରେନ୍‍ ସିଲେ ।
JOH 13:11 ମାତର୍‌ ଏନ୍‌ ୱାନିଙ୍ଗ୍‌ ସାତ୍ରୁରି କିୟୁଦୁ ସର୍‌ପେ କିନ୍‌ନାନ୍‌, ଜିସୁ ୱାନିଙ୍ଗ୍‌ ନେସ୍‌ତାମାର୍ହାନ୍‌, ଆୟାଉଣ୍ତିଙ୍ଗ୍‌ ୱାନ୍‌ ଇର୍ହାନ୍‌, କେବଲ୍‌ ଅରେନ୍‍ୱାନିଙ୍ଗ୍‍ ଡ଼ିସ୍‍ତିଙ୍ଗ୍‍ ମିର୍‌ ୱିଜିଦେର୍‌ ନର୍‌ୟାଆତିମାନିଦେର୍‌ ।
JOH 13:12 ତାନେୱେନ୍‌କା ଜିସୁ ୱାରି ପାଦାମ୍‌କୁ ନର୍‌ଜି ନିଜେଦି ଆଙ୍ଗିଁ ଆରାଜି ମାରିଡ଼େସି ନିଜେଦି ବାଡିଦୁ ବାସ୍‌ତି ୱେନ୍‌କା ୱାରିଙ୍ଗ୍‌ ୱେନ୍‌ବାତାନ୍‌, ନାନ୍ ମି ଉଣ୍ତିଙ୍ଗ୍‌ ଇନିକା କିତାମାନା, ଆକା ଇନିକା ମିର୍‌ ନେସ୍‌ତିମାନିଦେର୍‌ ?
JOH 13:13 ମିର୍‌ ନାଙ୍ଗିଁ ଗୁରୁ ନି ପ୍ରବୁ ଇଜି କୁକ୍‌ସିନିଦେର୍‌, ମାରି ଆକା ସତ୍‌ ଇଜିନିଦେର୍‌; ଇରିଙ୍ଗ୍‌ ନାନ୍ ତୋ ଆୟାକାନ୍‌ ।
JOH 13:14 ମାରି, ପ୍ରବୁ ନି ଗୁରୁ ଜେ ନାନ୍ ମାପୁରୁ, ନାନ୍ ଜଦି ମି ପାଦାମ୍‌କୁ ନର୍‌ତାସିତାମାନା, ଆରିଙ୍ଗ୍‌ ମିର୍‌ ବା ନିଜେ ନିଜେଦି ପାଦାମ୍‌କୁ ନରାନିକା ମାନାତ୍‌ ।
JOH 13:15 ଇରିଙ୍ଗ୍‌ ମି ଉଣ୍ତିଙ୍ଗ୍‌ ନାନ୍ ଏଣ୍ତେସ୍‌ କିତାମାନା, ମିର୍‌ ବା ଆୟାୱାଜା କିଦୁ, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଉନ୍‌ଡ୍ରି ସାରି ତର୍‌ତାମାନା ।
JOH 13:16 ସତ୍‌ ସତ୍‍ନେ ନାନ୍ ମିଙ୍ଗିଁ ଇଜିନା, ସାକର୍‌ ନିଜେଦି ମାଲିକ୍‌ମାଣ୍‌କୁ ପେରିକାନ୍‌ ଆଏନ୍‍, ମାରି କାବୁର୍‌ ଅନିକାନ୍‍ ପକ୍‍ତିମାନି ମାଲିକ୍‌ତି ମାଣାନ୍‌ ପେରିକାର୍‌ ସିଲେ ।
JOH 13:17 ଜଦି ମିର୍‌ ଇୟାୱିଜୁ ନେସ୍‌ତୁ, ଆରିଙ୍ଗ୍‌ ଆୟାୱାଜା କିତିଙ୍ଗ୍‌ ମିର୍‌ ଦନ୍ୟ ।
JOH 13:18 ମି ୱିଜେରି ବିସୟ୍‌ତାନ୍‌ ନାନ୍ ଇୟା ମାଟା ଇନ୍‌ଏଜିନା । ନାନ୍ ଏମେୱାରିଙ୍ଗ୍‍ ଆସ୍‌କିତାମାନା, ୱାରିଙ୍ଗ୍‌ ନାନ୍ ନେସ୍‌ନା । ମାତର୍‌ ଦାର୍ମୁସାସ୍ତ୍ରଦି ଇୟା ମାଟା ସତେନେ ପୁରା ଆନାତ୍‌, ଏନ୍‌ ନା କାଦିଦୁ ପିରିତାନ୍‍, ୱାନ୍‌ ନାଙ୍ଗିଁ ଲାତ୍‍ ଡାକ୍‍ତାନ୍‍ ।
JOH 13:19 ଇଲେଇ ଇକା ଗଟାନି ଆଗ୍‍ଡ଼ିରାନ୍‍ନେ ନାନ୍ ମିଙ୍ଗିଁ ଇୟା ମାଟା ୱେର୍‌ସିନା, ଏସ୍ତିୱାଲେ ଇକା ଗଟାନାତ୍‌, ମିର୍‌ ବିସ୍‌ବାସ୍‌ କିନିଦେର୍‌ ଜେ, ନାନ୍ ଆମାକାନ୍‌ ନାନ୍ ଆକାନ୍‍ ।
JOH 13:20 ସତ୍‌ ସତ୍‍ନେ ନାନ୍ ମିଙ୍ଗିଁ ୱେର୍‌ସିନା, ନାଙ୍ଗିଁ ପୋକ୍‌ତାତିମାନି ଲୋକ୍‌ତିଙ୍ଗ୍‌ ଏନ୍‌ ମାନାନାର୍‌, ୱାନ୍‌ ନାଙ୍ଗିଁ ମାନାନାର୍‌ ମାରି ଏନ୍‌ ନାଙ୍ଗିଁ ମାନାନାର୍‌, ୱାନ୍‌ ନା ପୋକ୍‌ତାତିମାନି ମାଲିକ୍‌ତିଙ୍ଗ୍‌ ବା ମାନାନାର୍‌ ।
JOH 13:21 ଜିସୁ ଇୟାୱିଜୁ ମାଟା ଇର୍ହି ୱେନ୍‌କା ଆତ୍ମାଦୁ ଦୁଃକ୍‌କିତାନ୍‌ ମାରି ୱିଜେରି ଆଗ୍‌ଡ଼ି ସାକ୍‌ୟ ସିଜି ଇର୍ହାନ୍‌, “ସତ୍‌ ସତ୍‍ନେ ନାନ୍ ମିଙ୍ଗିଁ ଇଜିନା, ମି ମାଣ୍‌କୁ ଅରେନ୍‍ ନାଙ୍ଗିଁ ସାତ୍ରୁରି କିୟୁଦୁ ସର୍‌ପେ କିନାନ୍‌ ।”
JOH 13:22 ଜିସୁ ଏ ବିସୟ୍‌ତାନ୍‌ ଇର୍ହାନ୍‌, ଆୟା ବିସୟ୍‌ତାନ୍‌ ବୁଜାଦେଙ୍ଗ୍‌ ଆଟ୍‍ଏଜି ସିସୁର୍‍ ନିଜେ ନିଜେଦି ମାନୁ ବେସ୍‌ସିସାଦେଙ୍ଗ୍‌ ଆସ୍‌ତାର୍‌ ।
JOH 13:23 ଜିସୁଦି ସିସୁରି ଲୋଇରାନ୍‌ ଅରେନ୍‍ ଆମାୱାନିଙ୍ଗ୍‌ ଜିସୁ ଜିବନ୍‌ନୋଜି ମାର୍ହାନ୍‌, ୱାନ୍‌ ଜିସୁଦି ଲାକ୍‌ତୁ ବାସ୍‌ତା ମାର୍ହାନ୍‌ ।
JOH 13:24 ମାରି, ସିମୋନ ପିତର୍‌ ୱାନିଙ୍ଗ୍‌ ଜୁଟ୍‌ସି ଇର୍ହାନ୍‌, ୱାନ୍‌ ଏ ବିସୟ୍‌ତାନ୍‌ ୱେର୍‌ସିନାନ୍‌, ଆକା ୱେନ୍‍ବାଆ ।
JOH 13:25 ୱାନ୍‌ ଆୟାୱାଜା ବାସ୍‌ସି ମାନ୍‍ଞ୍ଜି ଜିସୁଦି ବକାଦୁ ଗେକାଜିବାସ୍‌ସି ୱାନିଙ୍ଗ୍‌ ୱେନ୍‌ବାତାନ୍‌, ପ୍ରବୁ, ଆୟାକାନ୍‌ ଏନ୍‌ ?
JOH 13:26 ଆରିଙ୍ଗ୍‌ ଜିସୁ ଇର୍ହାନ୍‌, ଆମାୱାନି ଉଣ୍ତିଙ୍ଗ୍‌ ନାନ୍ ଇୟା ରୁଟି କାଣ୍ତେକ୍‌ ମୁଡ଼ୁକୁନା ମାରି ଆମାୱାନିଙ୍ଗ୍‌ ସିନା, ଆୟାକାନ୍‌ ୱାନ୍‌ । ଆବେନୁ ୱାନ୍‌ ଆୟା ରୁଟିକାଣ୍ତେକ୍‌ତିଙ୍ଗ୍‌ ମୁଡୁକ୍‌ସି ଆକା ଅସି ସିମୋନ ଇସ୍କାରିୟୋତିୟତି ମାରିସି ଜିହୁଦାଦିଙ୍ଗ୍‌ ସିତାନ୍‌ ।
JOH 13:27 ଆୟା ରୁଟି କାଣ୍ତେକ୍‌ ପୟ୍‌ତି ୱେନ୍‌କା ସୟତାନ୍ ୱାନି ମାନୁ ଡ଼ୁଗିତାତ୍‌ । ଆବେଟ୍‌ ଜିସୁ ୱାନିଙ୍ଗ୍‌ ଇର୍ହାନ୍‌, ଆମାକା କିଦେଙ୍ଗ୍‌ ସଲ୍‌ସିନି, ଆକା ଦାପେର୍‌ କିଆ ।
JOH 13:28 ମାତର୍‌ ୱାନ୍‌ ଇନି ବିସୟ୍‌ତାନ୍‌ ୱାନିଙ୍ଗ୍‌ ଇୟା ମାଟା ଇର୍ହାମାର୍ହାନ୍‌, ଆକା ବଜିଦୁ ବାସ୍‌ତିମାର୍‌ଇକାର୍‍ ଏନ୍‌ ନେସ୍‌ଏତାର୍‌ ।
JOH 13:29 ଇରିଙ୍ଗ୍‌ ଜିହୁଦା ଲାକ୍‌ତୁ ଡାବୁଙ୍ଗ୍‌ଆସ୍‌ନି ମଣି ମାର୍‍ହାତ୍‍ଆକା, ପଣ୍ତୟ୍‌ତି ଉଣ୍ତିଙ୍ଗ୍‌ ଇନି ଇନିକା ଦର୍‌କାର୍‌, ଆକା କଡ଼୍‍ଦେଙ୍ଗ୍‌ ମାରି ସିଲିସାତିୱାରିଙ୍ଗ୍‌ ଏସ ଦାନ୍‌ କିଦେଙ୍ଗ୍‌ ଜିସୁ ୱାନିଙ୍ଗ୍‌ ଇର୍ହାନ୍‌ ଇଜି ଏନ୍‌ ଏନ୍‌ ଅଡ଼୍‍ବିତାର୍‍ ।
JOH 13:30 ଜିହୁଦା ରୁଟି କାଣ୍ତେକ୍‌ ଲସ୍‌ତାନ୍‌ନୋ, ୱାନ୍‌ ଆୟାଦାର୍ପେ ସତାସର୍ହାନ୍‌, ନାସ୍ତିୱାଲେ ନାଡ଼ାଆତା ମାର୍ହାତ୍‌ ।
JOH 13:31 ଜିହୁଦା ସତିସର୍‌ଇ ୱେନ୍‌କା ଜିସୁ ଇର୍ହାନ୍‌, “ଇଲେଇ ମନୁସ୍ୟପୁତ୍ରଦି ଦନ୍ୟବାଦ୍‌ ତରିତାତ୍‌ ମାରି ୱାନିମାଣାନ୍‌ ମାପୁରୁଦି ଗୌରବ୍‍ ବା ତରାତାତ୍‍ ।
JOH 13:32 ଜଦି ମାପୁରୁ ମନୁସ୍ୟପୁତ୍ର ମାଣାନ୍‌ ଗୌରବ୍‍ ଆନାନ୍‌, ମାପୁରୁ ନିଜେଦି ଦନ୍ୟବାଦଦୁ ମନୁସ୍ୟପୁତ୍ରଙ୍ଗ୍‌ ଦନ୍ୟବାଦ୍‌ କିନ୍‌ନାନ୍‌ । ଦାପ୍ରେନେ ୱାନ୍‌ ଇକା କିଦେଙ୍ଗ୍‌ ସଲ୍‌ସିନାନ୍‌ ।”
JOH 13:33 ଜିସୁ ଇର୍ହାନ୍‌, ନା କଡ଼ର୍‌, ନାନ୍ ମାରି ସାଣେକ୍‌ତିଙ୍ଗ୍‌ ମି ୱାଲେ ମାନା । ମିର୍‌ ନାଙ୍ଗିଁ ପୟ୍‌ନିଦେର୍‌; ମାରି ନାନ୍ ଏମେ ବାଡିଦୁ ସଲ୍‌ସିନା, ମିର୍‌ ଆୟା ବାଡିଦୁ ସନ୍‌ଡ଼୍ରେଙ୍ଗ୍‌ ଆଟ୍‍ଇଦେର୍‍, ଇକା ନାନ୍ ଏଣ୍ତେସ୍‌ ଜିହୁଦି ନେତାରିଙ୍ଗ୍‌ ଇର୍‌ଆମାର୍ହା, ଆୟାୱାଜା ଇଲେଇ ମିଙ୍ଗିଁ ବା ୱେର୍‌ସିନା ।
JOH 13:34 ମିର୍‌ ନିଜେନିଜେଦିଙ୍ଗ୍‍ ଜିବନ୍‌ନୋଜିସାଦୁ, ଇୟା ପୁନି ମାଟା ନାନ୍ ମିଙ୍ଗିଁ ସିଜିନା; ନାନ୍ ଏଣ୍ତେସ୍‌ ମିଙ୍ଗିଁ ଜିବନ୍‌ନୋତାମାନା, ମିର୍‌ ବା ଆୟାୱାଜା ନିଜେନିଜେଦିଙ୍ଗ୍‌ ଜିବନ୍‍ନୋନିକା ମାନାତ୍‌ ।
JOH 13:35 ଜଦି ମିର୍‌ ନିଜେନିଜେଦିଙ୍ଗ୍‍ ଉଣ୍ତିଙ୍ଗ୍‌ ଜିବନ୍‍ନୋନିଦେର୍‍, ଆରିଙ୍ଗ୍‌ ମିର୍‌ ଜେ ନା ସିସୁର୍‍, ଇକା ୱିଜେରେ ନେସ୍‌ନାର୍‌ ।
JOH 13:36 ସିମୋନ ପିତର୍‌ ଜିସୁଙ୍ଗୁଁ ୱେନ୍‌ବାତାନ୍‌, “ପ୍ରବୁ, ନିନ୍‌ ଏମେମାନୁ ସଲ୍‌ସିନି ?” ଜିସୁ ଇର୍ହାନ୍‌, ନାନ୍ ଏମେମାନୁ ସଲ୍‌ସିନା, ନିନ୍‌ ଇଲେଇ ନା ୱେନ୍‌କା ୱେନ୍‌କା ଆବେନୁ ସନ୍‌ଡ଼୍ରେଙ୍ଗ୍‌ ଆଟ୍‍ଇ, ମାତର୍‌ ୱେନ୍‌କା ସନି ।
JOH 13:37 ପିତର୍‌ ୱାନିଙ୍ଗ୍‌ ୱେନ୍‌ବାତାନ୍‌, “ପ୍ରବୁ, ନାନ୍ ଇଲେଇ ଏନ୍ଧା ନି ୱେନ୍‌କା ୱେନ୍‌କା ସନ୍‌ଡ଼୍ରେଙ୍ଗ୍‌ ଆଟ୍‍ଏ ? ନାନ୍ ନି ଉଣ୍ତିଙ୍ଗ୍‌ ନିଜେଦି ଜିବନ୍‌ ସିଦେଙ୍ଗ୍‍ ବା ରାଜି ।”
JOH 13:38 ଜିସୁ ଇର୍ହାନ୍‌, “ନିନ୍‌ ଇନିକା ନା ଉଣ୍ତିଙ୍ଗ୍‌ ନିଜେଦି ଜିବନ୍‌ ସିନି ? ସତ୍‌ ସତ୍‍ନେ ନାନ୍ ମିଙ୍ଗିଁ ୱେର୍‌ସିନା, କରୁ କେଡ଼ିଇ ଆଗ୍‍ଡ଼ିନେ ନିନ୍‌ ନାଙ୍ଗିଁ ମୁଜା ନେସେଏ ଇଜି ଇନି ।”
JOH 14:1 ଜିସୁ ଇର୍ହାନ୍‌, ମି ଜିବନ୍‌ ଦାନ୍ଦା ଆମାକିତ୍‌; ମିର୍‌ ମାପୁରୁମାନୁ ବିସ୍‌ବାସ୍‌ କିଦୁ, ନା ମାନୁ ବା ବିସ୍‌ବାସ୍‌ କିଦୁ ।
JOH 14:2 ନା ବୁବାଦି ଇନ୍‌ଡ୍ର ନାଣ୍ତ ବାକ୍‍ରେଙ୍ଗ୍‍ ମାନେ; ଜଦି ସିଲିତିଙ୍ଗ୍‌, ଆରିଙ୍ଗ୍‌ ନାନ୍ ମିଙ୍ଗିଁ ଇନ୍‍ଏତାମାନ୍ଧି, ନାନ୍ ମି ଉଣ୍ତିଙ୍ଗ୍‌ ବାଡି ତିଆର୍‌ କିଦେଙ୍ଗ୍‌ ସଲ୍‌ସିନା;
JOH 14:3 ମାରି, ନାନ୍ ସନାନୋ ମି ଉଣ୍ତିଙ୍ଗ୍‌ ବାଡି ତିଆର୍‌ କିତିଙ୍ଗ୍‌ ମାରିଡ଼େସି ୱାନା, ମାରି ନାନ୍ ଏମେ ବାଡିଦୁ ତେବାନା, ମିର୍‌ ବା ଏଣ୍ତେସ୍‌ ଆୟା ବାଡିଦୁ ମାନିଦେର୍‌, ଆୟାଉଣ୍ତିଙ୍ଗ୍‌ ମିଙ୍ଗିଁ ନିଜେଦି ଲାକ୍‌ତୁ ଅନା ।
JOH 14:4 ମାରି, ନାନ୍ ଏମେ ବାଡିଦୁ ସଲ୍‌ସିନା, ଆୟା ସାରି ମିର୍‌ ନେସ୍‌ନିଦେର୍‌ ।
JOH 14:5 ତୋମା ଜିସୁଙ୍ଗୁଁ ୱେନ୍‌ବାତାତ୍‌, “ପ୍ରବୁ, ନିନ୍‌ ଏମେ ବାଡିଦୁ ସଲ୍‌ସିନି, ଆକା ମାପ୍‌ ନେସ୍‌ଏଜିନାପ୍‌; ସାରି ବା ଏଣ୍ତେସ୍‌ ନେସ୍‌ନାପ୍‌ ?”
JOH 14:6 ଜିସୁ ୱାନିଙ୍ଗ୍‌ ଇର୍ହାନ୍‌, ନାନ୍ ସାରି, ସତ୍‌ ମାରି ଜିବନ୍‌; ନାଙ୍ଗିଁ ସିଜି ସଲ୍‌ଇତିଙ୍ଗ୍‌ ଏନ୍‌ ବୁବାଦି ଲାକ୍‌ତୁ ସନ୍‌ଡ଼୍ରେଙ୍ଗ୍‌ ଆଟ୍‍ଏନ୍‍ ।
JOH 14:7 ଜଦି ମିର୍‌ ନାଙ୍ଗିଁ ନେସ୍‌ତିଦେର୍‌ମାନ୍ଧି, ଆରିଙ୍ଗ୍‌ ନା ବୁବେଙ୍ଗ୍‌ବା ନେସ୍‌ତିଦେର୍‌ମାନ୍ଧି; ଇଲେଇରାନ୍‌ ୱାନିଙ୍ଗ୍‌ ନେସ୍‌ତିମାନିଦେର୍‌ ମାରି ୱାନିଙ୍ଗ୍‌ ସଡ଼ୁତିମାନିଦେର୍‌ ।
JOH 14:8 ପିଲିପ୍‌ ଜିସୁଙ୍ଗୁଁ ଇର୍ହାନ୍‌, ପ୍ରବୁ, ମାଙ୍ଗିଁ ବୁବେଙ୍ଗ୍‌ ତର୍‌ରିସ୍‌କିଆ, ନାସ ମା ଉଣ୍ତିଙ୍ଗ୍‌ ନାଣ୍ତ ।
JOH 14:9 ଜିସୁ ୱାନିଙ୍ଗ୍‌ ଇର୍ହାନ୍‌, ପିଲିପ୍‌, ନିସସାନ୍ଧି ନାନ୍ ମି ୱାଲେ ମାନା, ମାରି ନିନ୍‌ ଇନିକା ନାଙ୍ଗିଁ ନେସ୍‌ଏଜିନି ? ଏନ୍‌ ନାଙ୍ଗିଁ ସୁଡ଼ୁତାମାନ୍‌ନାନ୍‌, ୱାନ୍‌ ବୁବେଙ୍ଗ୍‌ବା ସୁଡ଼ୁତାମାନ୍‌ନାନ୍‌; ମାଙ୍ଗିଁ ବୁବେଙ୍ଗ୍‌ ତରିସ୍‌କିଆ ଇଜି ନିନ୍‌ ଏଣ୍ତେସ୍‌ ୱେର୍‌ସିନିଦେର୍‌ ?
JOH 14:10 ନାନ୍ ଜେ ବୁବାମାନୁ ମାନା ମାରି ବୁବା ନାମାନୁ ମାନ୍‌ନାନ୍‌, ଇୟା ମାଟା ଇନିକା ବିସ୍‌ବାସ୍‌ କିଏଜିନିଦେର୍‌ ? ନାନ୍ ମିଙ୍ଗିଁ ଜେ ୱିଜୁ ବାକ୍ୟ ୱେର୍‌ନା, ଆୟାୱିଜୁ ନାନ୍ ନିଜେଦିମାଣ୍‌କୁ ଇନ୍‌ଏ, ମାତର୍‌ ବୁବା ନା ମାନୁ ମାନ୍‌ଜି ନିଜେଦି ପାଣି କିଜିନାନ୍‌ ।
JOH 14:11 ନାନ୍ ଜେ ବୁବାମାନୁ ମାନା ମାରି ବୁବା ନା ମାନୁ ମାନ୍‌ନାନ୍‌, ନା ଇୟା ମାଟା ବିସ୍‌ବାସ୍‌ କିଦୁ, ମାରି ନାନ୍ ଏମେ ୱିଜୁ ପାଣି କିତାମାନା ଆୟାକା ସୁଡ଼ୁଜି ବିସ୍‌ବାସ୍‌ କିଦୁ ।
JOH 14:12 ସତ୍‌ ସତ୍‌ ନାନ୍ ମିଙ୍ଗିଁ ୱେର୍‌ସିନା, ନା ମାନୁ ଏନ୍‌ ବିସ୍‌ବାସ୍‌ କିନ୍‌ନାନ୍‌, ନାନ୍ ଏମେ ଏମେ ପାଣି କିଜିନା, ୱାନ୍‌ ବା ଆୟାୱିଜୁ କିନ୍‌ନାନ୍‌, ମାରି ଆୟାମାଣାନ୍‍ ବା ନାଣ୍ତ ପେରି ପାଣି କିନାନ୍‌, ଇରିଙ୍ଗ୍‌ ନାନ୍ ବୁବାଦି ଲାକ୍‌ତୁ ସଲ୍‌ସିନା ।
JOH 14:13 ଏଣ୍ତେସ୍‌ ମାରିନ୍‌ତିମାଣାନ୍ ବୁବାଦି ଦନ୍ୟବାଦ୍‌ ତରାନାତ୍‍, ଆୟାଉଣ୍ତିଙ୍ଗ୍‌ ମିର୍‌ ନା ଦର୍‌ତାନ୍‌ ଇନିକାବା ଲସ୍‌ତିଙ୍ଗ୍‌, ଆକା ନାନ୍ ସିନା ।
JOH 14:14 ଜଦି ମିର୍‌ ନା ଦର୍‌ତାନ୍‌ ଇନି ବିସୟ୍‌ ନାଙ୍ଗିଁ ଲସ୍‌ତିଙ୍ଗ୍‌, ଆକା ନାନ୍ କିନା ।
JOH 14:15 ଜଦି ମିର୍‌ ନାଙ୍ଗିଁ ଜିବନ୍‌ନୋନିଦେର୍‌, ଆରିଙ୍ଗ୍‌ ନା ମାଟାୱିଜୁ ମାନାନିଦେର୍‌ ।
JOH 14:16 ମାରି, ନାନ୍ ବୁବେଙ୍ଗ୍‌ ମାଡ଼ିସ୍‌କିନା, ମାରି ମି ୱାଲେ ୱିଜୁଦିନ୍‌ତିଙ୍ଗ୍‌ ମାନି ଉଣ୍ତିଙ୍ଗ୍‌ ୱାନ୍‌ ମିଙ୍ଗିଁ ମାରି ଅରେନ୍‍ ସାହାଜ୍ୟକିନିୱାନିଙ୍ଗ୍‌ ସିନାନ୍‍
JOH 14:17 ମାରି ୱାଦ୍‌ ଆଜିନାତ୍‍ ସତ୍‌ତି ଆତ୍ମା । ଇୟା ଜଗତ୍‌ ୱାନିଙ୍ଗ୍‌ ମାନାଦେଙ୍ଗ୍‌ ଆଟ୍‍ଏତ୍‍, ଇରିଙ୍ଗ୍‌ ଜଗତ୍‌ ୱାନିଙ୍ଗ୍‌ ସୁଡ଼ୁଏତ୍‌ କି ନେସେତ୍‌; ମାତର୍‌ ମିର୍‌ ୱାନିଙ୍ଗ୍‌ ନେସ୍‌ନିଦେର୍‌, ଇରିଙ୍ଗ୍‌ ୱାନ୍‌ ୱାଲେ ତେବାନାନ୍‌, ମାରି ୱାନ୍‌ ମି ଜିବନ୍‍ତୁ ତେବାନାନ୍‌ ।
JOH 14:18 ନାନ୍ ସର୍‌ଇ ୱେନ୍‌କା, ନାନ୍ ମିଙ୍ଗିଁ ଟୁରା କଡ଼ କିଜ ଡ଼ିସ୍‌ସୋ ସଲ୍‌ଏ, ନାନ୍ ମି ଲାକ୍‌ତୁ ଡ଼େସିୱାନା ।
JOH 14:19 ଉଣା ୱେଡ଼ା ମାନାତ୍‌, ଜଗତ୍‌ ନାଙ୍ଗିଁ ମାରି ସୁଡ଼ୁଏତ୍‌; ମାତର୍‌ ମିର୍‌ ନାଙ୍ଗିଁ ସୁଡ଼ୁନିଦେର୍‌, ଇରିଙ୍ଗ୍‌ ନାନ୍ ଜିବନ୍‌ ମାନା, ମିର୍‌ ବା ଜିବନ୍‌ ତେବାନିଦେର୍‌ ।
JOH 14:20 ନାନ୍ ମା ବୁବାମାନୁ ମାରି ମିର୍‌ ନାମାନୁ ମାରି ନାନ୍ ମି ମାନୁ ମାନା, ଇକା ଆୟାନାଣ୍ତିଙ୍ଗ୍‌ ୱାତିଙ୍ଗ୍‍ ମିର୍‌ ନେସ୍‌ନିଦେର୍‌ ।
JOH 14:21 ଏନ୍‌ ନା ମାଟାୱିଜୁ ମାନାଜି ସାଲାନାନ୍‌, ୱାନ୍‌ ନାଙ୍ଗିଁ ଜିବନ୍‌ନୋନାନ୍‌, ମାରି ଏନ୍‌ ନାଙ୍ଗିଁ ଜିବନ୍‌ନୋନାନ୍‌, ନା ବୁବା ୱାନିଙ୍ଗ୍‌ ଜିବନ୍‌ନୋନାନ୍‌, ମାରି ନାନ୍ ୱାନିଙ୍ଗ୍‌ ଜିବନ୍‌ନୋନା ମାରି ୱାନି ଲାକ୍‌ତୁ ନିଜେଦିଙ୍ଗ୍‌ ତରାୟାଆନା ।
JOH 14:22 ଜିହୁଦା, ଇକାନ୍‌ ଇସ୍କାରିୟୋତିୟ ଜିହୁଦା ଆଏନ୍‍ ୱାନିଙ୍ଗ୍‌ ଇର୍ହାନ୍‌, ଏ ପ୍ରବୁ, ଇନିକା ଏଣ୍ତେସ୍‌ ଆନାତ୍‌ ? ନିଜେଦିଙ୍ଗ୍‍ ଦୁନିଆ ଲାକ୍‌ତୁ ତରାୟା ଆଏଣ୍‌ଗା ମା ଲାକ୍‌ତୁ ତର୍‍ତିମାନି ?
JOH 14:23 ଜିସୁ ୱାନିଙ୍ଗ୍‌ ଇର୍ହାନ୍‌, ଜଦି ଏନ୍‌ ନାଙ୍ଗିଁ ଜିବନ୍‌ନୋନାନ୍‌, ଆରିଙ୍ଗ୍‌ ୱାନ୍‌ ନା ବାକ୍ୟ ମାନାନାର୍‌, ମାରି ନା ବୁବା ୱାନିଙ୍ଗ୍‌ ଜିବନ୍‌ନୋନାନ୍‌, ମାରି ବୁବା ନି ନାନ୍ ୱାନି ଲାକ୍‌ତୁ ୱାଜି ୱାନି ୱାଲେ ତେବାନାପ୍‍ ।
JOH 14:24 ଏନ୍‌ ନାଙ୍ଗିଁ ଜିବନ୍‌ନୋଏନ୍‌, ୱାନ୍‌ ନା ବାକ୍ୟଦିଙ୍ଗ୍ ମାନାଏନ୍‌, ମାରି ଏମେ ବାକ୍ୟ ମିର୍‌ ୱେନ୍‌ଜିନିଦେର୍‌, ଆକା ନାଦି ଆଏତ୍‍, ମାତର୍‌ ନା ପୋକ୍‌ତାତିମାନି ମାଲିକ୍‌ତି ବୁବାଦି ।
JOH 14:25 ନାନ୍ ମି ୱାଲେ ମାନ୍‌ଜି ମାନ୍‌ଜି ମିଙ୍ଗିଁ ଇୟାୱିଜୁ ମାଟା ୱେର୍‌ତା ।
JOH 14:26 ଆୟା ସାହାଜ୍ୟକିନିକାନ୍‌ ମାରି ପବିତ୍ର ଆତ୍ମା ଆମାତାନିଙ୍ଗ୍‌ ବୁବା ନା ଦର୍‌ତାନ୍‌ ପୋକ୍‌ତାନାନ୍‌, ୱାନ୍‌ ମିଙ୍ଗିଁ ୱିଜୁ ବିସୟ୍‌ତିଙ୍ଗ୍‌ ସିକିୟା ସିନାନ୍‌, ମାରି ନାନ୍ ମିଙ୍ଗିଁ ଆମା ଆମାକା ୱେର୍‌ତାମାନା, ଆୟାୱିଜୁ ମିଙ୍ଗିଁ ଏତ୍‌କିବିସ୍‌ କିନ୍‌ନାନ୍‌ ।
JOH 14:27 ନାନ୍ ମିଙ୍ଗିଁ ସାନ୍ତି ଦାନ୍‌ କିତା ସଲ୍‌ସିନା, ନା ନିଜେଦି ସାନ୍ତି ଦାନ୍‌ ମିଙ୍ଗିଁ ସିଜିନା; ଜଗତ୍‌ ଏଣ୍ତେସ୍‌ ଦାନ୍‌ କିନାତ୍‌, ନାନ୍ ମିଙ୍ଗିଁ ଆୟାୱାଜା ଦାନ୍‌ କିଏ । ମି ଜିବନ୍‌ ଦାନ୍ଦା ନି ତିଲାମାକିତ୍‍ ।
JOH 14:28 ନାନ୍ ସଲ୍‌ସିନା ମାରି ମି ଲାକ୍‌ତୁ ଡ଼େସି ୱାନା, ନା ଇୟା ମାଟା ତୋ ୱେର୍‌ଇମାନିଦେର୍‌ । ଜଦି ମିର୍‌ ନାଙ୍ଗିଁ ଜିବନ୍‌ନୋଜିମାରିଙ୍ଗ୍‌, ଆରିଙ୍ଗ୍‌ ନାନ୍ ନା ବୁବାଦି ଲାକ୍‌ତୁ ସଲ୍‌ସିନାନ୍‌ ଇଜି ୱେଡ଼ିକା ଆତିଦେର୍‌ମାନ୍ଧି, ଇରିଙ୍ଗ୍‌ ନା ବୁବା ନାମାଣ୍‌କୁ ପେରିକାନ୍‌ ।
JOH 14:29 ମାରି, ଆକା ଗଟାନି ବେଡ଼ାଦୁ ମିର୍‌ ଏଣ୍ତେସ୍‌ ବିସ୍‌ବାସ୍‌ କିନିଦେର୍‌, ଆୟାଉଣ୍ତିଙ୍ଗ୍‌ ଆକା ଗଟାନି ଆଗ୍‍ଡ଼ିନେ ନାନ୍ ଇଲେଇ ମିଙ୍ଗିଁ ୱେର୍‌ତାମାନା ।
JOH 14:30 ନାନ୍ ମି ୱାଲେ ମାରି ନାଣ୍ତ ସମୟ୍ ୱାର୍‌ଗିଜିସାଦେଙ୍ଗ୍‌ କେଏନି, ଇରିଙ୍ଗ୍‌ ଦୁନିଆଦି ପେରିକାନ୍‌ ୱାଜିନାନ୍‍; ମାରି, ନା ମୁସ୍‌କୁ ୱାନି ସାକ୍ତି ଇନିକା ସିଲେତ୍‌;
JOH 14:31 ମାତର୍‌ ବୁବା ନାଙ୍ଗିଁ ଏଣ୍ତେସ୍‌ ଆଦେସ୍‌ ସିତାମାନାନ୍‌, ଆୟା ଇସାବ୍‌ତାନ୍‌ ନାନ୍ ପାଣି କିନା । ଆତିଙ୍ଗ୍‌, ନାନ୍ ନା ବୁବେଙ୍ଗ୍‌ ଜିବନ୍‌ନୋନା ଇଜି ଦୁନିଆ ନେସ୍‌ନାତ୍‌ । ନିଙ୍ଗିଁଦୁ, ମାଡ୍‌ ଇୟା ବାଡିଦାନ୍‌ ସନାଟ୍‌ ।
JOH 15:1 ନାନ୍ ସତେନେ ଅଙ୍ଗୁର୍‍ ତିୱା, ମାରି ମା ବୁବା ପାଣିକିନିକାନ୍‌ ।
JOH 15:2 ନା ମାନୁ ମାନି ଆମା କମାଦୁ ପଲ୍‌ ଆସ୍‌ଏତିଙ୍ଗ୍‌, ଆୟାକା କାତ୍‌ନା ପୋକ୍‌ନାନ୍‌; ମାରି ଆମା କମାଦୁ ପଲ୍‌ ଆସ୍‌ନାତ୍‌, ଆବେନ୍‌ ନାଣ୍ତ ଆସ୍‌ତେଙ୍ଗ୍‌ ଇଜି ୱାନ୍‌ ତାନେଙ୍ଗ୍‌ କୟ୍‍ଜି ସେବା କିନ୍‌ନାନ୍‌ ।
JOH 15:3 ନାନ୍ ମିଙ୍ଗିଁ ଏମେ ବାକ୍ୟ ୱେର୍‌ତାମାନା, ଆୟାଉଣ୍ତିଙ୍ଗ୍‌ ମିର୍‌ ନର୍‌ୟାଆତି ୱିସ୍‌ତିମାନିଦେର୍‌ ।
JOH 15:4 ନା ମାନୁ ମାନ୍‌ଡ଼୍ରୁ, ଆବେଟ୍‌ ନାନ୍ ମିମାନୁ ତେବାନା । ଏଣ୍ତେସ୍‌ କମା ଅଙ୍ଗୁର୍‍ ତିୱାଦୁ ମାନ୍‌ଏତିଙ୍ଗ୍‌ ନିଜେଦାନ୍‌ ପଲ୍‌ ଆସ୍‌ତେଙ୍ଗ୍‌ ଆଟ୍‍ଏତ୍‍, ଆୟାୱାଜା ମିର୍‌ ବା ନା ମାନୁ ମାନ୍‌ଏତିଙ୍ଗ୍‌ ପଲ୍‌ ଆସ୍‌ତେଙ୍ଗ୍‌ ଆଟ୍‍ଇଦେର୍‍ ।
JOH 15:5 ନାନ୍ ଅଙ୍ଗୁର୍‍ ତିୱା, ମିର୍‌ କମେଙ୍ଗ୍‌, ଏନ୍‌ ନାମାନୁ ମାନ୍‌ନାନ୍‌ ମାରି ନାନ୍ ଏମାନୁ ମାନା, ୱାନ୍‌ ନାଣ୍ତ ପଲ୍‌ ଆସ୍‌ନାତ୍‌; ଇରିଙ୍ଗ୍‌ ନାଙ୍ଗିଁ ଡ଼ିସ୍‌ତିଙ୍ଗ୍‌ ମିର୍‌ ଇନିକା କିଦେଙ୍ଗ୍‌ ଆଟ୍‍ଇଦେର୍‍ ।
JOH 15:6 ଏନ୍‌ ଏସ୍‌କାଙ୍ଗ୍‌ ନାମାନୁ ମାନ୍‌ଏନ୍‌, ଆରିଙ୍ଗ୍‌ ୱାନିଙ୍ଗ୍‌ କାତ୍‌ନିମାନି କମେଙ୍ଗ୍‌ ୱାଜା ଆତେରେ ପୋକ୍‌ନାର୍‌ ମାରି ୱାର୍‌ନା ସୋନାତ୍‌, ଇୟାୱାଜା କମେଆଙ୍ଗାଁ ଲୋକୁ ଉଣ୍ତା କିଜି ସିସୁଦୁ ପୋକ୍‌ନାର୍‌ ମାରି ଆୟା କମେଙ୍ଗ୍‌ ୱେନ୍‌ସନ୍‌ନେ ।
JOH 15:7 ଜଦି ମିର୍‌ ନାମାନୁ ମାନ୍‌ଡ଼୍ରୁ, ମାରି ନା ବାକ୍ୟ ମିମାନୁ ମାନାତ୍‌, ଆରିଙ୍ଗ୍‌ ଆମା ବିସୟ୍‌ ବଦା କିନିଦେର୍‌, ଆକା ଲସ୍‌ତୁ, ମାରି ମି ଉଣ୍ତିଙ୍ଗ୍‌ ଆକା ଆନାତ୍‌ ।
JOH 15:8 ମିର୍‌ ନାଣ୍ତ ପଲ୍‌ ଆସ୍‌ତିଙ୍ଗ୍‌ ମା ବୁବା ଦନ୍ୟବାଦ୍‌ ପୟ୍‌ନାନ୍‌, ମାରି ମିର୍‌ ନା ସତ୍‌ତି ସିସୁର୍‍ ଆନିଦେର୍‌ ।
JOH 15:9 ବୁବା ଏଣ୍ତେସ୍‌ୱାଜା ନାଙ୍ଗିଁ ଜିବନ୍‌ନୋତାମାନାନ୍‌, ନାନ୍ ବା ଆୟାୱାଜା ମିଙ୍ଗିଁ ଜିବନ୍‍ନୋତାମାନାନ୍‍; ନା ଜିବନ୍‌ନୋନିମାଣାନ୍‍ ତିର୍‌ ଆଜି ମାନ୍‌ଡ଼୍ରୁ ।
JOH 15:10 ନାନ୍ ଏଣ୍ତେସ୍‌ ମା ବୁବାଦି ମାଟାଦିଙ୍ଗ୍‌ ମାନାଜି ୱାନି ଜିବନ୍‍ନୋନିମାଣାନ୍‍ ତିର୍‌ ଆତାମାନା, ଆୟାୱାଜା ମିର୍‌ ଏସ୍‌କାଙ୍ଗ୍‌ ନା ମାଟାଦିଙ୍ଗ୍‌ ମାନାନିଦେର୍‌, ଆରିଙ୍ଗ୍‌ ନା ଜିବନ୍‌ନୋନିମାଣାନ୍‍ ତିର୍‌ ଆନି ତେବାନିଦେର୍‌ ।
JOH 15:11 ନା ୱେଡ଼ିକା ଏଣ୍ତେସ୍‌ ମି ମାନୁ ତେବାତାନ୍‌, ମାରି ମି ୱେଡ଼ିକା ଏଣ୍ତେସ୍‌ ବର୍ତି ଆନାତ୍‌, ଇୟାଉଣ୍ତିଙ୍ଗ୍‌ ନାନ୍ ଇୟାୱିଜୁ ମିଙ୍ଗିଁ ୱେର୍‌ତା ।
JOH 15:12 ନାନ୍ ଏଣ୍ତେସ୍‌ ମିଙ୍ଗିଁ ଜିବନ୍‌ନୋତା ମାନା, ମିର୍‌ ବା ଆୟାୱାଜା ନିଜେନିଜେଦିଙ୍ଗ୍‌ ଜିବନ୍‌ନଦୁ, ଇକା ନା ଆଦେସ୍‌ ।
JOH 15:13 ନିଜେଦି ସଙ୍ଗ୍‌ତିଲୋକା ଉଣ୍ତିଙ୍ଗ୍‌ ନିଜେଦି ଜିବନ୍‌ ସିନି ବାଦୁଲୁ ଏନ୍‌ ମାରି ନାଣ୍ତ ପେରି ଜିବନ୍‌ନୋନିକା ସିଲେତ୍‌ ।
JOH 15:14 ନାନ୍ ମିଙ୍ଗିଁ ଆମା ମାଟା ସିତାମାନା, ଆୟାକା ଜଦି ମାନାନିଦେର୍‌, ଆରିଙ୍ଗ୍‌ ମିର୍‌ ନା ସଙ୍ଗ୍‍ ।
JOH 15:15 ନାନ୍ ମିଙ୍ଗିଁ ମାରି ସାକର୍‌ ଇଜି ଇନ୍‌ଏ, ଇରିଙ୍ଗ୍‌ ମାଲିକ୍‌ ଇନିକା କିନ୍‌ନାନ୍‌, ସାକର୍‌ ଆକା ନେସ୍‌ଏପ୍‌, ମାତର୍‌ ନାନ୍ ମିଙ୍ଗିଁ ସଙ୍ଗ୍‍ ଇଜି ଇର୍ହାମାନା, ଇରିଙ୍ଗ୍‌ ନାନ୍ ମା ବୁବାଦିମାଣ୍‌ନା ଇନି ଇନିକା ୱେର୍‌ଆମାନା, ଆୟାୱିଜୁ ମିଙ୍ଗିଁ ୱେର୍‌ତାମାନା ।
JOH 15:16 ମିର୍‌ ନାଙ୍ଗିଁ ଆସ୍‌କିଇଦେର୍‌, ମାତର୍‌ ନାନ୍ ମିଙ୍ଗିଁ ଆସ୍‌କିତାମାନା, ମାରି ମିର୍‌ ଏଣ୍ତେସ୍‌ ସୋଲ୍‌ସ ପଲ୍‌ ଆସିସ୍‌କିଦୁ ମାରି ମି ପଲ୍‌ ତିର୍‍ ତେବାତାନ୍‌, ଇୟାଉଣ୍ତିଙ୍ଗ୍‌ ମିଙ୍ଗିଁ ଆସ୍‌କିତାମାନା । ଆବେଟ୍‌ ମିର୍‌ ନା ଦର୍‌ତାନ୍‌ ବୁବେଙ୍ଗ୍‌ ଆମାକା ଲସ୍‌ନିଦେର୍‌, ୱାନ୍‌ ଆକା ମିଙ୍ଗିଁ ସିନାନ୍‌;
JOH 15:17 ମିର୍‌ ଏଣ୍ତେସ୍‌ ନିଜେନିଜେଦିଙ୍ଗ୍‌ ଜିବନ୍‌ନଦୁ, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇୟାୱିଜୁ ମାଟା ସିଜିନା ।
JOH 15:18 ଜଦି ଜଗତ୍‌ ମିଙ୍ଗିଁ କାଡ଼୍‌ନାତ୍‌, ଆରିଙ୍ଗ୍‌ ମିଙ୍ଗିଁ କାଡ଼ିନି ଆଗ୍‌ଡ଼ି ଆକା ଜେ ନାଙ୍ଗିଁ କାଡ଼ିତା ମାନାତ୍‌, ଇକା ନେସ୍‌ତୁ ।
JOH 15:19 ମିର୍‌ ଜଦି ଇୟା ଦୁନିଆଦିକାର୍‌ ଆତିଦେର୍‌ ମାନ୍ଦି, ଆରିଙ୍ଗ୍‌ ଦୁନିଆ ମିଙ୍ଗିଁ ନିଜେଦିକାର୍‌ ଅଡ଼୍‍ବିଜି ଲାଡ୍‌ କିତାତ୍‌ମାନ୍ଦି; ମାତର୍‌ ନାନ୍ ମିଙ୍ଗିଁ ଆସ୍‌କିଜି ଦୁନିଆଦାନ୍‌ ୱେର୍‌ଏ କିତାମାନା । ଆୟାଉଣ୍ତିଙ୍ଗ୍‌ ଦୁନିଆ ମିଙ୍ଗିଁ କାଡ଼୍‌ନାତ୍‌ ।
JOH 15:20 ସାକର୍‌ ନିଜେଦି ମାଲିକ୍‌ମାଣୁକୁ ପେରିକାନ୍‌ ଆଏନ୍‍, ନାନ୍ ମିଙ୍ଗିଁ ଇୟା ଏମେ ବାକ୍ୟ ୱେର୍‌ତାମାନା, ଆକା ଏତ୍‌କିଦୁ । ଜଦି ୱାର୍‌ ନାଙ୍ଗିଁ ନିଦା କିତାମାନାର୍‌, ଆର୍‌ତିଙ୍ଗ୍‌ ମିଙ୍ଗିଁ ବା ନିଦା କିନାର୍‌; ଜଦି ୱାର୍‌ ନା ବାକ୍ୟ ମାନାତାମାନାର୍‌, ଆରିଙ୍ଗ୍‌ ମି ବାକ୍ୟ ବା ମାନାନାର୍‌ ।
JOH 15:21 ମାତର୍‌ ୱାର୍‌ ନା ପୋକ୍‌ତିମାନି ମାଲିକ୍‌ତିଙ୍ଗ୍‌ ନେସ୍‌ଏତିମାନିଙ୍ଗ୍‌ ନା ଦର୍‌ ଉଣ୍ତିଙ୍ଗ୍‌ ମିଙ୍ଗିଁ ଇୟାୱିଜୁ କିନାର୍‌ ।
JOH 15:22 ଜଦି ନାନ୍ ୱାଜ ୱାରିଙ୍ଗ୍‌ ଇନ୍‍ଏତି ମାରିଙ୍ଗ୍‌, ଆରିଙ୍ଗ୍‌ ୱାରି ପାପ୍‌ ଆଏତାତ୍‌ମାନ୍ଦି; ମାତର୍‌ ଇଲେଇ ୱାରି ପାପ୍‌ ବିସୟ୍‌ତାନ୍‌ ୱାରି ଇନି ସାଲାକି କିଦେଙ୍ଗ୍‌ ଆଟ୍‍ଏର୍‍ ।
JOH 15:23 ଏନ୍‌ ନାଙ୍ଗିଁ କାଡ଼୍‌ନାନ୍‌, ୱାନ୍‌ ମା ବୁବେଙ୍ଗ୍‌ ବା କାଡ଼୍‌ନାନ୍‌ ।
JOH 15:24 ଏମେ ପାଣିୱିଜୁ ମାରି ଏନ୍‌ କିଏନ୍‌, ନାନ୍ ଜଦି ଆୟାୱିଜୁ ୱାରି ମାନୁ କିଏତାମାନ୍ଦି, ଆରିଙ୍ଗ୍‌ ୱାରି ପାପ୍‌ ଆଏତାତ୍‌ମାନ୍ଦି; ମାତର୍‌ ଇଲେଇ ୱାର୍‌ ସୁଡ଼ୁତାମାନାର୍‌, ମାରି ନାଙ୍ଗିଁ ମାରି ମା ବୁବେଙ୍ଗ୍‌ ରିଏରିଙ୍ଗ୍‌ବା କାଡ଼ିତାମାନାର୍‌ ।
JOH 15:25 ମାତର୍‌ ୱାର୍‌ ମାଟାସିଲିକାବା ନାଙ୍ଗିଁ କାଡ଼ିତାର୍‌, ୱାରି ଦାର୍ମୁସାସ୍ତ୍ରଦୁ ରାସ୍‍ତିମାନି ଇୟା ବାକ୍ୟ ଏଣ୍ତେସ୍‌ ପୁରା ଆନାତ୍‌, ଇୟାଉଣ୍ତିଙ୍ଗ୍‌ ଇୟାୱାଜା ଗଟାଜିନାତ୍‌ ।
JOH 15:26 ବୁବାଦି ଲାକ୍‌ତୁରାନ୍‌ ନାନ୍ ମି ଲାକ୍‌ତୁ ଆମା ସାହାଜ୍ୟକିନିୱାନିଙ୍ଗ୍‌ ପୋକ୍‌ତାନା, ୱାନ୍‌ ବୁବାଦିମାଣାନ୍‍ ୱାନାତ୍‌, ଆୟା ସତ୍‌ତି ଆତ୍ମା ୱାତିଙ୍ଗ୍‍ ନା ବିସୟ୍‌ତାନ୍‌ ସାକିୟ ସିନାତ୍‌;
JOH 15:27 ମାରି, ମିର୍‌ ନା ବିସୟ୍‌ତାନ୍‌ ସାକି ୱେର୍‌ନିଦେର୍‌, ଇରିଙ୍ଗ୍‌ ମିର୍‌ ଆଗିଡ଼ିରାନ୍‌ନେ ନା ୱାଲେ ମାନିଦେର୍‌ ।
JOH 16:1 ମିର୍‌ ଏଣ୍ତେସ୍‌ ନିଜେଦି ବିସ୍‌ବାସ୍‌ ଆରାକିମାଟ୍‍, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍‌ସିନା ।
JOH 16:2 ମିଙ୍ଗିଁ ଲୋକୁ ୱାରି କୁଟୁମ୍‌ତାନ୍‌ ସପ୍‍ନାର୍‍ ମାରି ଇୟାୱାଜା ଦିନ୍‌ ୱାଜିନାତ୍‍, ଏସ୍ତିୱାଲେ ଏନ୍‌ ମିଙ୍ଗିଁ ଡାକ୍‍ନାନ୍‍, ୱାନ୍‌ ମାପୁରୁଦି ଇସାବ୍‌ତାନ୍‌ ଇଜି ଏତ୍‌ କିନ୍‌ନାନ୍‌ ।
JOH 16:3 ମାରି, ୱାର୍‌ ଇୟାୱିଜୁ କିନାର୍‌, ଇରିଙ୍ଗ୍‌ ୱାର୍‌ ବୁବେଙ୍ଗ୍‌ ମାରି ନାଙ୍ଗିଁ ନେସ୍‌ଏର୍‌ ।
JOH 16:4 ମାତର୍‌ ଏସ୍ତିୱାଲେ ଇୟାୱିଜୁ ଗଟାନି ବେଡ଼ା ଇଗାୱାନାତ୍‌, ନାନ୍ ମିଙ୍ଗିଁ ୱେର୍‌ତାମାର୍‌ଆ, ଇକା ଏଣ୍ତେସ୍‌ ମିର୍‌ ଏତ୍‌କିଦୁ, ଇୟାଉଣ୍ତିଙ୍ଗ୍‌ ନାନ୍ ଇୟାୱିଜୁ ମାଟା ମିଙ୍ଗିଁ ୱେର୍‌ତାମାନା । ନାନ୍ ମି ୱାଲେ ମାନିଙ୍ଗ୍‌ ଆରାମ୍‌ତାନ୍‌ ଇୟାୱିଜୁ ମାଟା ମିଙ୍ଗିଁ ୱେର୍‌ଏତା ମାର୍‌ଆ ।
JOH 16:5 ମାତର୍‌ ଇଲେଇ ନାନ୍ ନା ପୋକ୍‌ତାତିମାନି ମାଲିକ୍‌ତି ଲାକ୍‌ତୁ ସୋଲ୍‌ସିନା, ମାତର୍‌ ମି ଲୋଇରାନ୍‌ ନାଙ୍ଗିଁ ଏନ୍‌ ୱେନ୍‍ବାଇଜିନିଦେର୍‌, ନିନ୍‌ ଏମେ ବାଡିଦୁ ସୋଲ୍‌ସିନି ।
JOH 16:6 ମାରି ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍‌ତିମାନିଙ୍ଗ୍‌ ମି ଜିବନ୍‌ ଦୁଃକ୍‌ତାନ୍‌ ପୁରା ଆତାମାନାତ୍‌
JOH 16:7 ମାତର୍‌ ନାନ୍ ମିଙ୍ଗିଁ ସତ୍‌ ୱେର୍‌ସିନା, ନାନ୍ ସନିକା ମି ଉଣ୍ତିଙ୍ଗ୍‌ ନେଗେତ୍‌, ଇରିଙ୍ଗ୍‌ ନାନ୍ ସଲ୍‌ଏତିଙ୍ଗ୍‌ ଆୟା ସାହାଜ୍ୟକିନିକାନ୍‌ ମି ଲାକ୍‌ତୁ ରେଏନ୍‌, ମାତର୍‌ ନାନ୍ ସରିଇୱେନ୍‌କା ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାନା ।
JOH 16:8 ୱାନ୍‌ ୱାଜି ପାପ୍‌, ଦାର୍ମୁ ମାରି ମାପୁରୁଦି ନ୍ୟାୟ୍‍ବିସାର୍‌କିନି ବିସୟ୍‌ତାନ୍‌ ଜଗତ୍‌ତିଙ୍ଗ୍‌ ପାରାମାଣ୍‌ ସିନାତ୍‌;
JOH 16:9 ପାପ୍‌ ବିସୟ୍‌ତାନ୍‌ ୱାର୍‌ ବୁଲ୍‌ ଇରିଙ୍ଗ୍‌ ୱାନ୍‌ ତର୍‌ନା ସିନାନ୍‌ ଜେ, ନା ମାନୁ ବିସ୍‌ବାସ୍‌ କିଏର୍‌ ।
JOH 16:10 ଦାର୍ମୁଦି ବିସୟ୍‌ତାନ୍‌ ୱାର୍‌ ବୁଲ୍‌ ଇରିଙ୍ଗ୍‌ ନାନ୍ ବୁବାଦି ଲାକ୍‌ତୁ ସୋଲ୍‌ସିନା ମାରି ମିର୍‌ ନାଙ୍ଗିଁ ମାରି ସୁଡ଼ୁଇଦେର୍‌;
JOH 16:11 ବିସାର୍‌ ବିସୟ୍‌ତାନ୍‌ ୱାର୍‌ ବୁଲ୍‌ ଇରିଙ୍ଗ୍‌ ଇୟା ଜଗତ୍‌ତି ପେରିକାନ୍‌ ବିସାର୍‌ ଆତାମାନାତ୍‌ ।
JOH 16:12 ନାନ୍ ମିଙ୍ଗିଁ ମାରି ଗାଦି ମାଟେଙ୍ଗ୍‌ ଇନିକା ମାନାତ୍‌, ମାତର୍‌ ମିର୍‌ ଇଲେଇ ଆୟାୱିଜୁ ମାନାଦେଙ୍ଗ୍‌ ଆଟ୍‍ଇଦେର୍‍ ।
JOH 16:13 ମାତର୍‌ ଏସ୍ତିୱାଲେ ସତ୍‌ତି ଆତ୍ମା ୱାତିଙ୍ଗ୍‍, ନାସ୍ତିୱାଲେ ୱାଦ୍‌ ୱିଜୁ ସତ୍‌ ବୁଜାଦେଙ୍ଗ୍‌ ସାକ୍ତି ସିନାତ୍‌ । ୱାଦ୍‌ ନିଜେଦି ଅଦିକାର୍‌ତାନ୍‌ ଇନିକା ଇନ୍‌ଏତ୍‌ । ମାପୁରୁଦି ମାଣାନ୍‌ ୱାଦ୍‌ ଆମାକା ୱେର୍‌ଆ ମାନାତ୍‌, କେବଲ୍ ନାସନେ ୱାଦ୍‌ ୱେର୍‌ନାତ୍‌ । ଆମା ୱିଜୁ ଗଟାଦେଙ୍ଗ୍‌ ସୋଲ୍‌ସିନାତ୍‌ ୱାଦ୍‌ ମିଙ୍ଗିଁ ୱେର୍‌ନାତ୍‌ ।
JOH 16:14 ୱାନ୍‌ ନାଙ୍ଗିଁ ଦନ୍ୟବାଦ୍‌ କିନ୍‌ନାନ୍‌, ଇରିଙ୍ଗ୍‌ ନାନ୍ ଆମାକା ଇନା ୱାନ୍‌ ନାମାଣ୍‌କୁ ୱିଜୁ ସତ୍‌ତି ବିସୟ୍‌କୁ ଅସି ମିଙ୍ଗିଁ ୱେର୍‌ନାନ୍‌ ।
JOH 16:15 ଆମା ଆମାକା ବୁବାଦି, ଆୟାୱିଜୁ ନାଦି; ଇୟାଉଣ୍ତିଙ୍ଗ୍‌ ନାନ୍ ଇର୍ହା, ପବିତ୍ର ଆତ୍ମା ନାମାଣ୍‌କୁ ୱିଜୁ ବିସୟ୍‌ ଅସି ମିଙ୍ଗିଁ ୱେର୍‌ନାନ୍‌ ।
JOH 16:16 “କାଣ୍ତେକ୍‍ ବେଡ଼ା ମାନାତ୍‌, ମିର୍‌ ନାଙ୍ଗିଁ ମାରି ସୁଡ଼ୁଦେଙ୍ଗ୍‌ ଆଟ୍‍ଇଦେର୍‍, ମାରିଡ଼େସି ସାଣେକ୍‌ ୱେନ୍‌କା ମିର୍‌ ନାଙ୍ଗିଁ ସୁଡ଼ୁନିଦେର୍‌ ।”
JOH 16:17 ଆବେଟ୍‌ ୱାନି ସିସୁରି ଲୋଇରାନ୍‌ ଏନ୍‌ ଏନ୍‌ ନିଜେନିଜେ ଇର୍ହାର୍‌, କାଣ୍ତେକ୍‌ ବେଡ଼ା ମାନାତ୍‌, ମିର୍‌ ନାଙ୍ଗିଁ ସୁଡ଼ୁଇଦେର୍‌, ମାରିଡ଼େସି ସାଣେକ୍‌ ୱେନ୍‌କା ମିର୍‌ ନାଙ୍ଗିଁ ସୁଡ଼ୁନିଦେର୍‌ ମାରି ନାନ୍ ବୁବାଦି ଲାକ୍‌ତୁ ସୋଲ୍‌ସିନା, ଇୟା ଏମେ ମାଟା ୱାନ୍‌ ମାଙ୍ଗିଁ ୱେର୍‌ସିନାନ୍‌, ଇକା ଇନିକା ?
JOH 16:18 ୱାର୍‌ ଇର୍ହାର୍‌, “କାଣ୍ତେକ୍‌ ବେଡ଼ା ଇଜି ଇକାନ୍‌ ଇନିକା ଇଜିନି ?” ୱାନ୍‌ ଇନିକା ୱେର୍‌ସିନାନ୍‌, ମାପ୍‌ ବୁଜାଦେଙ୍ଗ୍‌ ଆଟ୍‌ଏଜିନାପ୍‌ ।
JOH 16:19 ସିସୁର୍‍ ୱାନିଙ୍ଗ୍‌ ୱେନ୍‌ବାଦେଙ୍ଗ୍‌ ବଦା କିଜିନାର୍‌ ଇଜି ନେସ୍‌ତାନ୍‌ନୋ ଜିସୁ ୱାରିଙ୍ଗ୍‌ ଇର୍ହାନ୍‌, କାଣ୍ତେକ୍‌ନେ ବେଡ଼ା ମାନାତ୍‌, ମିର୍‌ ନାଙ୍ଗିଁ ସୁଡ଼ୁଇଦେର୍‌, ମାରିଡ଼େସି ସାଣେକ୍‌ ମାର୍‌ଇ ୱେନ୍‌କା ମିର୍‌ ନାଙ୍ଗିଁ ସୁଡ଼ୁନିଦେର୍‌, ନାନ୍ ଏମେ ଇୟା ମାଟା ୱେର୍‌ତା, ଆୟା ବିସୟ୍‌ତାନ୍‌ ଅସି ମିର୍‌ ଇନିକା ନିଜେନିଜେଦିମାନୁ ୱାର୍‌ଗିଜି ସାଜିନିଦେର୍‌ ?
JOH 16:20 ସତ୍‌ ସତ୍‍ନେ ନାନ୍ ମିଙ୍ଗିଁ ୱେର୍‌ସିନା, ମିର୍‌ ଆଡ଼ାବାନିଦେର୍‌ ମାରି ଏତ୍‌କିଜି କିଜି ଆଡ଼୍‌ବାନିଦେର୍‌, ମାତର୍‌ ଜଗତ୍‌ ୱେଡ଼ିକା ଆନାତ୍‌; ମିର୍‌ ଦୁଃକ୍‌ଆନିଦେର୍‌, ମାତର୍‌ ମି ଦୁଃକ୍‌ ୱେଡ଼ିକାଦୁ ମିସାନାତ୍‌ ।
JOH 16:21 ଜନମ୍‌କିନି ବେଡ଼ା ଇଗା ୱାତିଙ୍ଗ୍‍ ଆଇମା ଦୁଃକ୍‌ ପୟ୍‌ନାତ୍‌, ମାତର୍‌ ୱାନି କଡ଼ ଜନମ୍‌ ଆତି ୱେନ୍‌କା ଦୁନିଆଦୁ ଅରେନ୍‍ ଲୋକୁ ଜନମ୍‌ ଆତାନ୍‌, ଇୟା ୱେଡ଼ିକା ଉଣ୍ତିଙ୍ଗ୍‌ ମାରି କାସ୍ଟୁ ଏତ୍‌ କିଏତ୍‍ ।
JOH 16:22 ଆୟାୱାଜା ମିର୍‌ ଇଲେଇ ଦୁଃକ୍‌ ପୟ୍‌ଜିନିଦେର୍‌, ମାତର୍‌ ନାନ୍ ମାରିଡ଼େସି ମିଙ୍ଗିଁ ତରାୟାଆନା, ମାରି ମି ଜିବନ୍‌ ୱେଡ଼ିକା ଆନାତ୍‌ ମାରି ଏନ୍‌ ମିମାଣୁକୁ ମି ୱେଡ଼ିକା ଡଙ୍ଗାଁକିଜ ଅଏନ୍‌ ।
JOH 16:23 ଆୟାନାଣ୍ତିଙ୍ଗ୍‌ ୱାତିଙ୍ଗ୍‍, ନାମାଣାନ୍‌ ମିଙ୍ଗିଁ ମାରି ଇନିକା ଲସ୍‌ତେଙ୍ଗ୍‌ ପଡ଼ାଏତ୍‌ । ସତ୍‌ ଇଜିନା, ନା ଦର୍‌ତାନ୍‌ ବୁବା ମାପୁରୁଙ୍ଗୁଁ ଆମାକା ଲସ୍‌ନିଦେର୍‌, ୱାନ୍‌ ଆକା ସିନାନ୍‌ ।
JOH 16:24 ଇୟାସାନ୍ଦି ମିର୍‌ ନା ଦର୍‌ତାନ୍‌ ଇନିକା ଲସ୍‌ଇଦେର୍‌; ଇଲେଇ ଲସ୍‌ତୁ, ମାରି ମି ୱେଡ଼ିକା ଏଣ୍ତେସ୍‌ ପୁରୁନ୍‌ ଆନାତ୍‌, ଆୟାଉଣ୍ତିଙ୍ଗ୍‌ ମିର୍‌ ଆକା ପୟ୍‌ନିଦେର୍‌ ।
JOH 16:25 ନାନ୍ ମିଙ୍ଗିଁ କାତାଦାନ୍‌ ଇୟାୱିଜୁ ମାଟା ୱେର୍‌ତାମାନା; ବେଡ଼ା ୱାଜିନାତ୍‍, ଏସ୍ତିୱାଲେ ନାନ୍ ମାରି କାତାଦାନ୍‌ ମିଙ୍ଗିଁ ୱେର୍‌ଏ, ମାତର୍‌ ବୁବାଦି ବିସୟ୍‌ ବୁଜାନିୱାଜା ମିଙ୍ଗିଁ ୱେର୍‌ନା ।
JOH 16:26 ଆୟାନାଣ୍ତିଙ୍ଗ୍‌ ମିର୍‌ ନା ଦର୍‌ତାନ୍‌ ୱାନିଙ୍ଗ୍‌ ଲସ୍‌ନିଦେର୍‌; ମାରି, ନାନ୍ ଜେ ମି ତରିଟାନ୍‌ ବୁବେଙ୍ଗ୍‌ ୱେର୍‌ନା, ଇକା ନାନ୍ ମିଙ୍ଗିଁ ଇନ୍‌ଏ;
JOH 16:27 ଇରିଙ୍ଗ୍‌ ବୁବା ନିଜେ ମିଙ୍ଗିଁ ଜିବନ୍‌ନୋନାନ୍‌, ଆଦେଙ୍ଗ୍‌ ମିର୍‌ ନାଙ୍ଗିଁ ଜିବନ୍‌ନୋତିମାନିଦେର୍‌ ମାରି ନାନ୍ ଜେ ମାପୁରୁଦି ଲାକ୍‌ତୁରାନ୍‌ ୱାତାମାନା, ଆକା ମିର୍‌ ବିସ୍‌ବାସ୍‌ କିତିମାନିଦେର୍‌ ।
JOH 16:28 ନାନ୍ ବୁବାଦି ଲାକ୍‌ତୁରାନ୍‌ ଦୁନିଆଦୁ ୱାତାମାନା; ମାରିଡ଼େସି ନାନ୍ ଦୁନିଆ ଡ଼ିସ୍‌ସି ବୁବାଦି ଲାକ୍‌ତୁ ସୋଲ୍‌ସିନା ।
JOH 16:29 ଇୟା ମାଟା ୱେନ୍‌ଞ୍ଜି ସିସୁର୍‍ ଇର୍ହାର୍‌, ସୁଡ଼ୁଦୁ, ଇଲେଇ ନିନ୍‌ ବୁଜାନିୱାଜା ୱେର୍‌ସିନି ମାରି କାତାଦାନ୍‍ ମାଟା ମାରି ୱେର୍‌ଇ ।
JOH 16:30 ଇଲେଇ ମାପ୍‌ ନେସ୍‌ନାପ୍‌; ନିନ୍‌ ୱିଜୁ ବିସୟ୍‌ ନେସ୍‌ନି ମାରି ନିନ୍‌ ଏଙ୍ଗ୍‌ ଇନି ବିସୟ୍‌ ୱେନ୍‍ବାଦେଙ୍ଗ୍‌ ଦର୍‌କାର୍‌ ସିଲେତ୍‌ । ମାପୁରୁଦି ଲାକ୍‌ତୁରାନ୍‌ ନିନ୍‌ ୱାତିମାନି ଇଜି ମାପ୍‌ ଇୟାମାଣୁକୁ ବିସ୍‌ବାସ୍‌ କିଜିନାପ୍‌ ।
JOH 16:31 ଜିସୁ ୱାରିଙ୍ଗ୍‌ ୱେର୍‌ତାନ୍‌, ମିର୍‌ ଇନିକା ଇଲେଇ ବିସ୍‌ବାସ୍‌ କିଜିନିଦେର୍‌ ?
JOH 16:32 ସୁଡ଼ୁଦୁ, ବେଡ଼ା ୱାଜିନାତ୍‍, ହୁଁ, ୱାତାତ୍‌ନି, ଏସ୍ତିୱାଲେ ମିର୍‌ ଇନିଙ୍ଗାଁ ଆନିଙ୍ଗାଁ ଆଜି ୱିଜେରେ ନିଜେ ନିଜେଦି ଇଲ୍‌କାଙ୍ଗ୍‌ ସନିଦେର୍‌, ମାରି ନାଙ୍ଗିଁ ଅରେନ୍‍ୱାନିଙ୍ଗ୍‍ ଡ଼ିସ୍‌ନିସନିଦେର୍‌; ଆରିଙ୍ଗ୍‍ବା ନାନ୍ ଅରେନ୍‌ନେ ସିଲେ, ଇରିଙ୍ଗ୍‌ ବୁବା ନା ୱାଲେ ମାନ୍‌ନାନ୍‌ ।
JOH 16:33 ମିର୍‌ ଏଣ୍ତେସ୍‌ ନା ୱାଲେ ମାନ୍‌ଞ୍ଜି ସାନ୍ତି ପୟ୍‌ନିଦେର୍‌, ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ଇୟାୱିଜୁ ବିସୟ୍‌ ୱେର୍‌ତାମାନା । ଜଗତ୍‌ଦୁ ମି ଉଣ୍ତିଙ୍ଗ୍‌ କାସ୍ଟୁ ମାନାତ୍‌, ମାତର୍‌ ସାସ୍‌ ଆସ୍‌ତୁ, ନାନ୍ ଜଗତ୍‌ତିଙ୍ଗ୍‌ ଜିଣାକିତାମାନା ।
JOH 17:1 ଜିସୁ ଇୟାୱିଜୁ ମାଟା ଇନ୍‌ଜି ମୁସ୍‌କୁପୁର୍‌ତରିନ୍‌ ସୁଡ଼ୁଜି ଇର୍ହାନ୍‌, ବୁବା, ବେଡ଼ା ଇଗା ୱାତାତ୍‌ନି; ନି ମାରିନ୍‌ତିଙ୍ଗ୍‌ ଗୌରବ୍‍ କିଆ, ଏଣ୍ତେସ୍‌ ମାରିନ୍‌ ବା ନିଙ୍ଗିଁ ଦନ୍ୟବାଦ୍‌ କିନ୍‌ନାନ୍‌,
JOH 17:2 ଏଣ୍ତେସ୍‌ୱାଜା ନିନ୍‌ ୱାନିଙ୍ଗ୍‌ ଆମା ଲୋକାଙ୍ଗ୍‌ ୱାନି କିୟୁଦୁ ସିତିମାନି, ୱାରିଙ୍ଗ୍‌ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ସିନି ଉଣ୍ତିଙ୍ଗ୍‌ ୱାନିଙ୍ଗ୍‌ ୱିଜୁ ଦୁନିଆଦି ମୁସ୍‌କୁ ଅଦିକାର୍‌ ସିତି ।
JOH 17:3 ମାରି, ନିନ୍‌ ଜେ ଅରେନ୍‌ମାତର୍‌ ସତ୍‌ତି ମାପୁରୁ, ନିଙ୍ଗିଁ ମାରି ଆମାୱାନିଙ୍ଗ୍‌ ନିନ୍‌ ପୋକ୍‌ତାତିମାନି, ଆୟା ଜିସୁ କ୍ରିସ୍ତଙ୍ଗ୍‌ ନେସ୍‌ନିକାନେ ଏସ୍‌କାଙ୍ଗ୍‌ୱିଜିଇ ଜିବନ୍‌ ।
JOH 17:4 ନିନ୍‌ ନାଙ୍ଗିଁ ଏମେ ପାଣି କିଦେଙ୍ଗ୍‌ ସିତିମାନି, ଆକା ନାନ୍ ୱିସ୍‌ତାନୋ ଦୁନିଆଦୁ ମିଙ୍ଗିଁ ଦନ୍ୟବାଦ୍‌ କିତାମାନା ।
JOH 17:5 ମାରି ଇଲେଇ, ଏ ବୁବା, ଦୁନିଆ ତିଆର୍‌ଆତି ପୁର୍ବେନେ ନି ୱାଲେ ନା ଏମେ ମହିମା ମାର୍ହାତ୍‌, ଇଲେଇ ନିନ୍‌ ମାନିମାନୁ ଆୟା ମହିମା ନାଙ୍ଗିଁ ସିଦା ।
JOH 17:6 ନିନ୍‌ ନାଙ୍ଗିଁ ଦୁନିଆଦି ମାଣ୍‌କୁ ଆମା ଲୋକାଙ୍ଗ୍‌ ଦାନ୍‌ କିତିମାନି, ନାନ୍ ୱାରି ଲାକ୍‌ତୁ ନି ଦର୍‌ ୱେର୍‌ତାମାନା; ୱାର୍‌ ନି ଲୋକ୍‌ ମାରି ନିନ୍‌ ୱାରିଙ୍ଗ୍‌ ନାଙ୍ଗିଁ ଦାନ୍‌ କିତିମାନି, ୱାର୍‌ ନି ବାକ୍ୟ ମାନାତାମାନାର୍‌ ।
JOH 17:7 ନିନ୍‌ ନାଙ୍ଗିଁ ଆମା ଆମାକା ଦାନ୍‌ କିତିମାନି, ଆୟାୱିଜୁ ଜେ ନିମାଣୁକୁ ୱାତାମାନାତ୍‌, ଇକା ୱାର୍‌ ଇଲେଇ ବୁଜାତାମାନାର୍‌;
JOH 17:8 ଇରିଙ୍ଗ୍‌ ନିନ୍‌ ନାଙ୍ଗିଁ ଆମାୱିଜୁ ମାଟା ଦାନ୍‌ କିତିମାନି, ନାନ୍ ୱାରିଙ୍ଗ୍‌ ଆୟାୱିଜୁ ଦାନ୍‌ କିତାମାନା, ମାରି ୱାର୍‌ ମାନାତାମାନାର୍‌, ମାରି ନାନ୍ ଜେ ନି ଲାକ୍‌ତୁରାନ୍‌ ୱାତାମାନା, ଆକା ସତ୍‌ତାନ୍‌ ନେସ୍‌ତାମାନାର୍‌ ମାରି ନିନ୍‌ ନାଙ୍ଗିଁ ପୋକ୍‌ତାତିମାନି ଇଜି ବିସ୍‌ବାସ୍‌ କିତାମାନାର୍‌ ।
JOH 17:9 ନାନ୍ ୱାରି ଉଣ୍ତିଙ୍ଗ୍‌ ପାର୍‌ତନା କିଜିନା, ଜଗତ୍‌ଦି ଉଣ୍ତିଙ୍ଗ୍‌ ପାର୍‌ତନା କିଏ, ମାତର୍‌ ନିନ୍‌ ନାଙ୍ଗିଁ ଆମାୱାରିଙ୍ଗ୍‌ ସିତିମାନି, ୱାରି ଉଣ୍ତିଙ୍ଗ୍‌ ପାର୍‌ତନା କିଜିନା, ଇରିଙ୍ଗ୍‌ ୱାର୍‌ ନି ଲୋକ୍‌;
JOH 17:10 ଆମା ଆମାକା ନାଦି, ଆୟାୱିଜୁ ନିଦି, ମାରି ଆମା ଆମାକା ନିଦି, ଆୟାୱିଜୁ ନାଦି, ମାରି, ନାନ୍ ୱାରିମାଣାନ୍‌ ଦନ୍ୟବାଦ୍‌ ଆତାମାନା ।
JOH 17:11 ନାନ୍ ମାରି ଇୟା ଜଗତ୍‌ଦୁ ମାନ୍‌ଏ, ମାତର୍‌ ଇୟାକାର୍‌ ଜଗତ୍‌ଦୁ ମାନ୍‌ଜିନାର୍‌; ମାରି, ନାନ୍ ନି ଲାକ୍‌ତୁ ସୋଲ୍‌ସିନା । ପବିତ୍ର ବୁବା, ନିନ୍‌ ସିତିମାନି ଦର୍‌ତି ସକ୍ତିଦାନ୍‌ ୱାରିଙ୍ଗ୍‌ ରକିୟା କିଆ, ଏଣ୍ତେସ୍‌ ନିନ୍‌ ମାରି ନାନ୍ ଅରେନ୍‌ନେ, ୱାର୍‌ ଆୟାୱାଜା ଉନ୍‌ଡ୍ରେମାନୁ ଆଦେଙ୍ଗ୍‌ ଆଟ୍‍ନାର୍‍ ।
JOH 17:12 ୱାରି ୱାଲେ ମାନ୍‌ଜିମାର୍‌ଇ ୱାଲେ ନାନ୍ ୱାରିଙ୍ଗ୍‌ ନି ଦର୍‌ତି ସାକ୍ତିଦାନ୍ ରକ୍‌ୟା କିଜି ୱାଜିନା, ମାରି ନାନ୍ ୱାରିଙ୍ଗ୍‌ ନେଗ୍‌ନେତାନ୍‌ ରକିୟା କିତାମାନା ମାରି ଦାର୍ମୁସାସ୍ତ୍ରଦି ବାକ୍ୟ ଏଣ୍ତେସ୍‌ ପୁରା ଆନାତ୍‌, ଇୟାଉଣ୍ତିଙ୍ଗ୍‌ ସାନି ମାରିନ୍‌ତିଙ୍ଗ୍‌ ଡ଼ିସ୍‌ସି ୱାରି ମାଣ୍‌କୁ ଅରେନ୍‍ ଏନ୍‌ବା ନାସ୍ଟୁ ଆଏର୍‌ ।
JOH 17:13 ମାତର୍‌ ନାନ୍ ଇଲେଇ ନି ଲାକ୍‌ତୁ ୱାଜିନା, ମାରି ୱାରି ଜିବନ୍‌ତୁ ନା ୱେଡ଼ିକା ଏଣ୍ତେସ୍‌ ପୁରା ଆନାତ୍‌, ଆୟାଉଣ୍ତିଙ୍ଗ୍‌ ଦୁନିଆଦୁ ମାନ୍‌ଜି ନାନ୍ ଇୟାୱିଜୁ ୱେର୍‌ସିନା ।
JOH 17:14 ନାନ୍ ୱାରିଙ୍ଗ୍‌ ନି ବାକ୍ୟ ସିତାମାନା, ମାରି ଇୟା ଦୁନିଆ ୱାରିଙ୍ଗ୍‌ କାଡ଼ିତା ମାନାତ୍‌, ଇରିଙ୍ଗ୍‌ ନାନ୍ ଏଣ୍ତେସ୍‌ ଇୟା ଦୁନିଆଦାନ୍‌ ସିଲେ, ଆୟାୱାଜା ୱାନ୍‌ ବା ଇୟା ଦୁନିଆଦାନ୍‌ ସିଲେର୍‌ ।
JOH 17:15 ନିନ୍‌ ୱାରିଙ୍ଗ୍‌ ଦୁନିଆଦାନ୍‌ ଅନିଉଣ୍ତିଙ୍ଗ୍‌ ପାର୍‌ତନା କିଏ, ମାତର୍‌ ୱାରିଙ୍ଗ୍‌ ତାଗ୍‌ଇ ପାଣିଦାନ୍‌ ରକ୍‌ୟା କିଦୁ ଇଜି ପାର୍‌ତନା କିଜିନା ।
JOH 17:16 ନାନ୍ ଏଣ୍ତେସ୍‌ ଦୁନିଆଦିକିନ୍ଦା ସିଲେ, ୱାର୍‌ ଆୟାୱାଜା ଇୟା ଦୁନିଆଦିକାର୍‌ ଆଏର୍‌ ।
JOH 17:17 ସତ୍‌ତାନ୍‌ ୱାରିଙ୍ଗ୍‌ ପବିତ୍ର କିଦୁ; ନି ବାକ୍ୟନେ ତୋ ସତ୍‌ ।
JOH 17:18 ନିନ୍‌ ନାଙ୍ଗିଁ ଏଣ୍ତେସ୍‌ ଦୁନିଆଦୁ ପୋକ୍‌ତାତିମାନି, ନାନ୍ ବା ୱାରିଙ୍ଗ୍‌ ଆୟାୱାଜା ଦୁନିଆଦୁ ପୋକ୍‌ତାତାମାନା ।
JOH 17:19 ମାରି, ୱାନ୍‌ ବା ଏଣ୍ତେସ୍‌ ସତ୍‌ତାନ୍‌ ପବିତ୍ର ଆନାର୍‌, ଇୟାଉଣ୍ତିଙ୍ଗ୍‌ ନାନ୍ ୱାରି ଉଣ୍ତିଙ୍ଗ୍‌ ନିଜେଦିଙ୍ଗ୍‌ ପବିତ୍ର କିଜିନା ।
JOH 17:20 ନାନ୍ କେବଲ୍‌ ଇୟାୱାରି ଉଣ୍ତିଙ୍ଗ୍‌ ପାର୍‌ତନା କିଏଜିନା, ମାତର୍‌ ଇୟାୱାରି ବାକ୍ୟଦାନ୍‌ ଆମାକାର୍‌ ନା ମାନୁ ବିସ୍‌ବାସ୍‌ କିନାର୍‌, ୱାରି ଉଣ୍ତିଙ୍ଗ୍‌ ବା ପାର୍‌ତନା କିଜିନା,
JOH 17:21 ୱିଜେରି ଉଣ୍ତିଙ୍ଗ୍‌ ପାର୍‍ତନା କିଜିନା, ଏଣ୍ତେସ୍‌ ୱାର୍‌ ୱିଜେରେ ଉନ୍‌ଡ୍ରେମାନୁ ଆନାର୍‌; ଏ ବୁବା, ନିନ୍‌ ଏଣ୍ତେସ୍‌ ନା ମାନୁ ମାନି ମାରି ନାନ୍ ନି ମାନୁ ମାନା, ୱାନ୍‌ ବା ଆୟାୱାଜା ମାମାନୁ ମାନିର୍‌, ଏଣ୍ତେସ୍‌ ନିନ୍‌ ନାଙ୍ଗିଁ ପୋକ୍‌ତାତିମାନି ଇଜି ଦୁନିଆ ବିସ୍‌ବାସ୍‌ କିନାତ୍‌ ।
JOH 17:22 ମାରି, ନିନ୍‌ ନାଙ୍ଗିଁ ଆମା ମହିମା ସିତିମାନି, ନାନ୍ ୱାରିଙ୍ଗ୍‌ ଆକା ସିତାମାନା, ଏଣ୍ତେସ୍‌ ନିନ୍‌ ମାରି ନାନ୍ ଅରେନ୍‌ନେ, ଆୟାୱାଜା ୱାନ୍‌ ବା ଉନ୍‌ଡ୍ରେମାନୁ ଆଦେଙ୍ଗ୍‌ ଆଟ୍‍ନାର୍‍ ।
JOH 17:23 ନାନ୍ ୱାରିମାନୁ, ମାରି ନିନ୍‌ ନା ମାନୁ, ଏଣ୍ତେସ୍‌ ୱାର୍‌ ପୁରାଦାନ୍‌ ଉନ୍‌ଡ୍ରେମାନୁ ଆଦେଙ୍ଗ୍‌ ଆଟ୍‍ନାର୍‍, ଆରିଙ୍ଗ୍‌ ଇୟା ଜଗତ୍‌ ନେସ୍‌ନାତ୍‌ ଜେ, ନିନ୍‌ ନାଙ୍ଗିଁ ପୋକ୍‌ତାତିମାନି, ମାରି ନାଙ୍ଗିଁ ଏଣ୍ତେସ୍‌ୱାଜା ଜିବନ୍‌ନୋତିମାନି, ୱାରିଙ୍ଗ୍‌ ବା ଆୟାୱାଜା ଜିବନ୍‌ନୋତି ।
JOH 17:24 “ଏ ବୁବା, ନିନ୍‌ ନାଙ୍ଗିଁ ଏମେ ଲୋକାଙ୍ଗ୍‌ ସିତିମାନି, ନାନ୍ ଏମେମାନୁ ମାନା, ୱାନ୍‌ ବା ଏଣ୍ତେସ୍‌ ଆବେନ୍‌ ନା ୱାଲେ ମାନାର୍‌ ମାରି ଦୁନିଆ ତିଆର୍‌ଆତି ଆଗ୍‍ଡ଼ିରାନ୍‍ନେ ନିନ୍‌ ନାଙ୍ଗିଁ ଜିବନ୍‌ ନୋତିମାନିଙ୍ଗ୍‌ ନାଙ୍ଗିଁ ଆମା ଗୌରବ୍‌ ସିତିମାନି, ନା ଆୟା ଗୌରବ୍‌ ୱାର୍‌ ଏଣ୍ତେସ୍‌ ସୁଡ଼ୁନାଟ୍‌, ଇକା ନା ବଦା ।
JOH 17:25 ଏ ଦାର୍ମୁଦି ବୁବା, ଜଗତ୍‌ ନିଙ୍ଗିଁ ନେସ୍‌ଏତ୍‌, ମାତର୍‌ ନାନ୍ ନିଙ୍ଗିଁ ନେସ୍‌ତାମାନା; ମାରି, ନିନ୍‌ ଜେ ନାଙ୍ଗିଁ ପୋକ୍‌ତାତିମାନି, ଇକା ଇୟାକାର୍‌ ନେସ୍‌ତାମାନାର୍‌;
JOH 17:26 ମାରି, ନିନ୍‌ ନାଙ୍ଗିଁ ଆମା ଜିବନ୍‌ନୋତିମାନୁ ଜିବନ୍‌ନୋତିମାନି, ଆକା ଏଣ୍ତେସ୍‌ ୱାରି ମାନୁ ତେବାନାତ୍‍ ମାରି ନାନ୍ ୱାରିମାନୁ ତେବାନା, ଇୟାଉଣ୍ତିଙ୍ଗ୍‌ ନାନ୍ ୱାରିଙ୍ଗ୍‌ ନି ଦର୍‌ ୱେର୍‌ତାମାନା ମାରି ୱେର୍‌ନା ।”
JOH 18:1 ଜିସୁ ଇୟା ପାର୍‍ତନା ୱିସ୍‌ଇ ସିସୁରି ୱାଲେ କିଦ୍ରୋଣ୍‌ ଜଲାଦି ଆୟାପାଡ଼୍‌କା ସୋର୍ହାର୍‌ । ଆବେନୁ ଉନ୍‌ଡ୍ରି ଡଡି ମାର୍ହାତ୍‌, ମାରି ୱାନ୍‌ ନି ୱାନି ସିସୁର୍‍ ଆବେନୁ ଡ଼ୁଗିତାର୍‌ ।
JOH 18:2 ଆମା ଜିହୁଦା ଜିସୁଙ୍ଗୁଁ ସାତ୍ରୁରି କିୟୁଦୁ ସର୍‌ପେ କିତାନ୍‌, ୱାନ୍‌ ବା ଆୟାବାଡି ନେସ୍‌ତା ମାର୍ହାନ୍‌, ଇରିଙ୍ଗ୍‌ ଜିସୁ ନାଣ୍ତ ଦେବେଙ୍ଗ୍‌ ନିଜେଦି ସିସୁରି ୱାଲେ ଆୟାବାଡିଦୁ ସୋଲ୍‌ସିମାର୍ହାର୍‌ ।
JOH 18:3 ମାରି, ଜିହୁଦା ସନ୍ୟରିଦଲ୍‌ ମାରି ପେରି ଜାଜକର୍‌ ମାରି ପାରୁସିରିମାଣୁକୁ ମନ୍ଦିର୍‌ କାପ୍‍କିନିୱାରିଙ୍ଗ୍‌ ଅସି ଦିୱା, ମସାଲ୍‌ ମାରି ସାଜୁମାଜୁ ଆସ୍‌ସି ଆବେନୁ ୱାତାର୍‌ ।
JOH 18:4 ଆବେଟ୍‌ ଜିସୁ, ୱାନି ଉଣ୍ତିଙ୍ଗ୍‌ ଆମା ଆମାକା ଗଟାଦେଙ୍ଗ୍‌ ସୋଲ୍‌ସିନାତ୍‌, ଆୟାୱିଜୁ ନେସ୍‌ତାନ୍‌ନୋ ଆଗ୍‌ଡ଼ି ସୋଲ୍‌ସି ୱାରିଙ୍ଗ୍‌ ୱେନ୍‌ବାତାନ୍‌, “ମିର୍‌ ଏଙ୍ଗ୍‌ ପୟ୍‌ଜିନିଦେର୍‌ ?”
JOH 18:5 ୱାର୍‌ ୱାନିଙ୍ଗ୍‌ ଇର୍ହାର୍‌, “ନାଜରିୟତିୟ ଜିସୁଙ୍ଗୁଁ ।” ଜିସୁ ୱାରିଙ୍ଗ୍‌ ଇର୍ହାନ୍‌, “ନାନ୍ ଆୟା ଜିସୁ ।” ଆମା ଜିହୁଦା ୱାନିଙ୍ଗ୍‌ ସାତ୍ରୁରି କିୟୁଦୁ ସର୍‌ପେ କିତାନ୍‌, ୱାନ୍‌ ବା ୱାରି ୱାଲେ ନିର୍‌ଆମାର୍ହାନ୍‌ ।
JOH 18:6 ଜିସୁ ଏସ୍ତିୱାଲେ ୱାରିଙ୍ଗ୍‌ ଇର୍ହାନ୍‌, “ନାନ୍ ଆୟାକାନ୍‌,” ନାସ୍ତିୱାଲେ ୱାର୍‌ ୱେନ୍‌କା ଗୁସାଜିସୋଲ୍‌ସି ବୁମିଦୁ ଆର୍‌ତାର୍‌ ।
JOH 18:7 ଆବେଟ୍‌ ଜିସୁ ୱାରିଙ୍ଗ୍‌ ମାରି ଅର୍‍ସୁ ୱେନ୍‌ବାତାନ୍‌, “ମିର୍‌ ଏଙ୍ଗ୍‌ ପୟ୍‌ଜିନିଦେର୍‌ ?” ୱାର୍‌ ଇର୍ହାର୍‌, ନାଜରିୟତିୟ୍‌ ଜିସୁଙ୍ଗୁଁ ।
JOH 18:8 ଜିସୁ ଇର୍ହାନ୍‌, “ନାନ୍‌ନେ ଆୟାକାନ୍‌,” ଇକା ତୋ ନାନ୍ ମିଙ୍ଗିଁ ୱେର୍‌ତା । “ଜଦି ମିର୍‌ ନାଙ୍ଗିଁ ପୟ୍‌ଜିନିଦେର୍‌, ଆରିଙ୍ଗ୍‌ ଇୟାୱାରିଙ୍ଗ୍‌ ସନ୍‌ଡ଼୍ରେଙ୍ଗ୍‌ ଡ଼ିସ୍‌ତୁ ।”
JOH 18:9 ୱାନ୍‌ ଇକା ଇର୍ହାନ୍‌, ଏଣ୍ତେସ୍‌ ୱାନ୍‌ ଇର୍ହିମାର୍‌ଇ ଇୟା ବାକ୍ୟ ପୁରା ଆନାତ୍‌, ନିନ୍‌ ନାଙ୍ଗିଁ ଆମାୱାରିଙ୍ଗ୍‌ ସିତିମାନି, ୱାରି ମାଣ୍‌କୁ ନାନ୍ ଅରେନ୍‍ୱାନିଙ୍ଗ୍‍ ବା ଆରାକିଏ ।
JOH 18:10 ସିମୋନ ପିତର୍‌ ଲାକ୍‌ତୁ ଉନ୍‌ଡ୍ରି କାଆଣ୍ତା ମାର୍ହାତ୍‌, ଆୟା କାଆଣ୍ତା ସୋପ୍‌ତାନ୍‌ନୋ ୱିଜେରିଙ୍ଗ୍‌ ପେରିଜାଜକରି ସାକର୍‌ତିଙ୍ଗ୍‌ କାତ୍‌ତାନ୍‌ ମାରି ଆୟା ସାକର୍‌ତି ଉଣେରି ଗିତ୍‌ଣି କୟ୍‌ତାପୋକ୍‌ତାନ୍‌; ଆୟା ସାକର୍‌ତି ଦର୍‌ ମାଲ୍‌କ ।
JOH 18:11 ଆବେଟ୍‌ ଜିସୁ ପିତରତିଙ୍ଗ୍‌ ଇର୍ହାନ୍‌, “ନିନ୍‌ କାଣ୍ତାଦିଙ୍ଗ୍‌ ଇଡ଼୍‌ନିବାଡିଦୁ ଇଡିଆ; ବୁବା ନାଙ୍ଗିଁ ଏମେ ଡୁବାଇ ସିତାମାନ୍‌ନାନ୍‌, ନାନ୍ ଇନିକା ଆବେଣ୍‌କୁ ଉଣୁଏନୋ ?”
JOH 18:12 ଇୟା ୱେନ୍‌କା ରମିୟ ସନ୍ୟରିଦଲ୍‌, ପେରି ସେନାପତିର୍‌, ମାରି ଜିହୁଦିରିଙ୍ଗ୍‌ କାପ୍‍କିନିକାର୍‌ ଜିସୁଙ୍ଗୁଁ ଆସ୍‌ସି ତର୍‌ତାର୍‌
JOH 18:13 ମାରି ୱାନିଙ୍ଗ୍‌ ଆଗ୍‌ଡ଼ି ହାନାନଦି ଲାକ୍‌ତୁ ଅତାର୍‍, ଇରିଙ୍ଗ୍‌ ୱାନ୍‌ ଆୟା ବାର୍ସେକ୍‌ତି ୱିଜେରିଙ୍ଗ୍‌ ପେରିଜାଜକ୍‌ କୟାପାଦି ପତେଲ୍‌ସି ମାର୍ହାନ୍‌ ।
JOH 18:14 ଇୟା କୟାପା ଆଗ୍‌ଡ଼ି ଜିହୁଦି ନେତାର୍‌ ୱେର୍‌ତା ମାର୍ହାନ୍‌, ୱିଜୁ ଲୋକା ନେଗି ଉଣ୍ତିଙ୍ଗ୍‌ ଅରେନ୍‍ ସାନିକା ନେଗେତ୍‌ ।
JOH 18:15 ସିମୋନ ପିତର୍‌ ନି ମାରି ଅରେନ୍‍ ସିସୁ ଜିସୁଦି ୱାଲେ ୱାଲେ ସୋଲ୍‌ସିମାର୍ହାନ୍‌ । ଆୟା ସିସୁ ୱିଜେରିଙ୍ଗ୍‌ ପେରିଜାଜକ୍‌ଦିଙ୍ଗ୍‌ ନେସ୍‌ତିକାନ୍‌ ମାର୍ହାନ୍‌ ମାରି ଜିସୁଦି ୱାଲେ ୱିଜେରିଙ୍ଗ୍‌ ପେରିଜାଜକଦି ଦୁଆର୍‌ତୁ ଡ଼ୁଗିତାର୍‌;
JOH 18:16 ମାତର୍‌ ପିତର୍‌ ଆତେରେ ଡେୱା ଲାକ୍‌ତୁ ନିର୍‌ଆ ମାର୍ହାନ୍‌ । ମାରି, ଆୟା ଏମେ ଆଇ ସିସୁ ୱିଜେରିଙ୍ଗ୍‌ ପେରିଜାଜକଦିଙ୍ଗ୍‌ ନେସ୍‌ତିକାନ୍‌ ମାର୍ହାନ୍‌, ୱାନ୍‌ ଆତେରେ ସୋର୍‌ର୍ହାନ୍‌ନୋ ଡେୱାଦୁ କାପ୍‍କିନିୱାନିଙ୍ଗ୍‌ ୱେର୍‌ସି ପିତରତିଙ୍ଗ୍‌ ଦୁଆର୍‍ ଲୋଇ ତାତାର୍‌ ।
JOH 18:17 ଆବେଟ୍‌ ଆୟା ଡେୱାଦୁ କାପ୍‍କିନି ସାକର୍‌ ପିତରତିଙ୍ଗ୍‌ ଇର୍ହାତ୍‌, “ନିନ୍‌ ବା ଇନିକା ଇୟା ଲୋକାଦି ସିସୁରି ଲୋଇରାନ୍‌ ଅରେନ୍‍ ଆଇନୋ ?” ପିତର୍‌ ଇର୍ହାନ୍‌, “ନାନ୍ ସିଲେ ।”
JOH 18:18 ପିନିଦି ଉଣ୍ତିଙ୍ଗ୍‌ ସାକର୍‌ ନି କାପ୍‍କିନିକାର୍‌ ସିସୁ କାସ୍‌ସିକିଜି ଆବେନୁ ନିର୍‌ଆରୋ ସିସୁ କାୟାଜି ମାର୍ହାର୍‌; ପିତର୍‌ ବା ୱାରି ୱାଲେ ନିର୍‌ଆନୋ ସିସୁ କାୟାଜି ମାର୍ହାନ୍‌ ।
JOH 18:19 ଆୟାଦାପ୍ରେ ୱିଜେରିଙ୍ଗ୍‌ ପେରିଜାଜକ୍‌ ଜିସୁଙ୍ଗୁଁ ୱାନି ସିସୁରି ବିସୟ୍‌ତାନ୍‌ ମାରି ୱାନି ସିକିୟା ବିସୟ୍‌ତାନ୍‌ ୱେନ୍‍ବାତାନ୍‌ ।
JOH 18:20 ଜିସୁ ୱାନିଙ୍ଗ୍‌ ଇର୍ହାନ୍‌, “ନାନ୍ ଦୁନିଆ ଲାକ୍‌ତୁ ନେସ୍‌ନିୱାଜା ମାଟା ଇର୍‌ଆମାନା; ଏମେମାନୁ ୱିଜେରେ ଜିହୁଦିର୍‌ ଉନ୍‌ଡ୍ରେମାନୁ ଆନାର୍‌, ଇୟାୱାଜା ପାର୍‍ତନାକିନି ଇଲ୍‌କାଙ୍ଗ୍‌ ମାରି ମନ୍ଦିର୍‌ତୁ ନାନ୍ ୱିଜୁଦିନ୍‌ ସିକିୟା ସିତାମାନା; ନାନ୍ ଇନି ବିସୟ୍‌ ଆଡ଼ାକ୍‌ସି ୱାଜା ଇନ୍‌ଏ ।
JOH 18:21 ନାଙ୍ଗିଁ ଏନ୍ଦା ୱେନ୍‌ବାଜିନି ? ନାନ୍ ୱାରିଙ୍ଗ୍‌ ଇନିକା ଇର୍ହାମାନା, ଏମେକାର୍‌ ୱେର୍‌ଆମାନାର୍‌, ୱାରିଙ୍ଗ୍‌ ୱେନ୍‍ବାଆ; ସୁଡ଼ୁଆ, ନାନ୍ ଆମା ଆମାକା ଇର୍‌ଆମାନା, ୱାର୍‌ ଆୟାୱିଜୁ ନେସ୍‌ନାର୍‌ ।”
JOH 18:22 ଜିସୁ ଇୟା ମାଟା ଇନିୱାଲେ ଜିସୁଦି ଲାକ୍‌ତୁ ନିର୍‌ଇ ମାର୍‌ଇ କାପ୍‍କିନିକାନ୍‌ ଅରେନ୍‍ ଜିସୁଙ୍ଗୁଁ ସାପାଡ଼ା ଡାକ୍‌ସି ଇର୍ହାନ୍‌, “ନିନ୍‌ ୱିଜେରିଙ୍ଗ୍‌ ପେରି ଜାଜକଙ୍ଗ୍‌ ଏଣ୍ତେସ୍‌ ଉତର୍‌ ୱେର୍‌ସିନି ?”
JOH 18:23 ଜିସୁ ୱାନିଙ୍ଗ୍‌ ଇର୍ହାନ୍‌, “ଜଦି ନାନ୍ ବୁଲ୍‌ ଇର୍‌ଆ, ଆର୍‌ତିଙ୍ଗ୍‌ ୱିଜେରି ଆଗ୍‌ଡ଼ି ବୁଲ୍‌ତି ସାକି ସିଦାଟ୍‌; ମାତର୍‌ ଜଦି ନେଗେନ୍‌ ଇର୍ହା, ଆର୍‌ତିଙ୍ଗ୍‌ ଏନ୍ଦା ନାଙ୍ଗିଁ ଡାକ୍‌ସିନି ?”
JOH 18:24 ଆବେଟ୍‌ ହାନାନ ଜିସୁଙ୍ଗୁଁ ତରାତିମାନି ଡ଼ାସାନେ ୱିଜେରିଙ୍ଗ୍‌ ପେରିଜାଜକ୍‌ କୟାପାଦି ଲାକ୍‌ତୁ ପୋକ୍‌ତାନ୍‌ ।
JOH 18:25 ଆବେଟ୍‌ ସିମୋନ ପିତର୍‌ ନିର୍‌ଆରୋ ସିସୁ କାୟାଜି ମାର୍ହାର୍‌ । ଆବେଟ୍‌ ୱାର୍‌ ୱାନିଙ୍ଗ୍‌ ୱେନ୍‌ବାତାର୍‌, “ନିନ୍‌ ବା ଇନିକା ୱାନି ସିସୁରି ଲୋଇରାନ୍‌ ଅରେନ୍‍ ଆଇନୋ ?” ପିତର୍‌ ନେସେଏ ଇଜି ଇର୍ହାନ୍‌, “ନାନ୍ ସିଲେ ।”
JOH 18:26 ୱିଜେରିଙ୍ଗ୍‌ ପେରିଜାଜକଦି ସାକର୍‌କା ଲୋଇରାନ୍‌ ଅରେନ୍‍, ଅର୍ତାତ୍‍ ପିତର୍‌ ଆମାୱାନି ଗିତଣି କୟ୍‌ତାପୋକ୍‌ତା ମାର୍ହାନ୍‌, ଆୟା ସାକର୍‌ତି ନିଜେଲୋକ୍‌ ଇର୍ହାନ୍‌, “ନାନ୍ ଇନିକା ନିଙ୍ଗିଁ ୱାନି ୱାଲେ ଡଡିଦୁ ସୁଡ଼ୁଏ ମାର୍ହା ନୋ ?”
JOH 18:27 ଆବେଟ୍‌ ପିତର୍‌ ମାରିଡ଼େସି “ନେସେଏ” ଇଜି ଇର୍ହାନ୍‌, ମାରି, ଆୟାଦାପ୍ରେ କରୁ କେଡ଼ିତାତ୍‌ ।
JOH 18:28 ୱେନ୍‌କା ୱାର୍‌ ଜିସୁଙ୍ଗୁଁ କୟାପାଦି ଇଲ୍‌ତାନ୍‌ ଅସି ରମିୟ ରାଜାଦି ମେଡ଼୍‍ଇଲୁତୁ ଅତାର୍‍; ନାସ୍ତିୱାଲେ କରୁ କେଡ଼େପି ଆତାମାର୍ହାତ୍‌; ମାରି, ଜିହୁଦି ନେତାର୍‌ ଏଣ୍ତେସ୍‌ ତାଗ୍‍ଇକା ଆଏଣ୍‌ଗା ନିସ୍ତାର୍‌ ପଣ୍ତୟ୍‌ତି ବୋଜି ଉନ୍‌ଣ୍ତେଙ୍ଗ୍‌ ଆଟ୍‍ନାର୍‍, ଇୟାଉଣ୍ତିଙ୍ଗ୍‌ ନିଜେ ମେଡ଼େଇଲୁ ଲୋଇ ଡ଼ୁଗ୍‌ଏତାର୍‌ ।
JOH 18:29 ମାରି, ରାଜା ପିଲାତ୍‌ ୱାରି ଲାକ୍‌ତୁ ସୋସି ୱାଜି ୱେନ୍‌ବାତାନ୍‌, “ଇୟା ଲୋକ୍‌ତି ବିରଦ୍‌ତାନ୍‌ ମି ମାଟା ଇନିକା ?”
JOH 18:30 ୱାର୍‌ ୱାନିଙ୍ଗ୍‌ ଇର୍ହାର୍‌, “ଇୟାକାନ୍‌ ଜଦି ଦସ୍‌କିତିକାନ୍‌ ଆଏତାନ୍‌ ମାନ୍ଦି, ଆର୍‌ତିଙ୍ଗ୍‌ ମାପ୍‌ ୱାନିଙ୍ଗ୍‌ ନି କିୟୁଦି ସର୍‌ପେ କିଏତାପ୍‌ ମାନ୍ଦି ।”
JOH 18:31 ଆବେଟ୍‌ ପିଲାତ୍‌ ୱାରିଙ୍ଗ୍‌ ଇର୍ହାନ୍‌, “ମିର୍‌ ୱେନିଙ୍ଗ୍‌ ଅସ ମି ନିୟମ୍‌ତାନ୍‌ ୱେନି ବିସାର୍‌ କିଦୁ ।” ଜିହୁଦିର୍‌ ୱାନିଙ୍ଗ୍‌ ଇର୍ହାର୍‌, “ଏଙ୍ଗ୍‌ ସାନିଦଣ୍ତ୍‌ ସିନି ମା ଅଦିକାର୍‌ ସିଲେତ୍‌ ।”
JOH 18:32 ଜିସୁ ଏଣ୍ତେସ୍‌ ନାନି ସାନିଦଣ୍ତ କିଦେଙ୍ଗ୍‌ ସୋଲ୍‌ସିନାନ୍‌, ଆବେଣି ସିନା ସିଜି ୱାନ୍‌ ଆମା ବାକ୍ୟ ଇର୍ହାମାର୍ହାନ୍‌ ଆକା ଏଣ୍ତେସ୍‌ ପୁରା ଆନାତ୍‌, ଇୟାଉଣ୍ତିଙ୍ଗ୍‌ ୱାର୍‌ ଇକା ଇର୍ହାର୍‌ ।
JOH 18:33 ମାରି, ପିଲାତ୍‌ ମେଡ଼୍‍ଇଲୁ ଲୋଇ ଡ଼ୁଗିତାନ୍‌ନୋ ଜିସୁଙ୍ଗୁଁ କୁକ୍‌ତାନ୍‌ନୋ ୱାନିଙ୍ଗ୍‌ ୱେନ୍‌ବାତାନ୍‌, “ନିନ୍‌ ଇନିକା ଜିହୁଦିର୍‌ ରାଜା ?”
JOH 18:34 ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଇନିକା ନିଜେଦାନ୍‍ ଇକା ଇଜିନି, ନୋ ଆଇକାର୍‌ ନା ବିସୟ୍‌ତାନ୍‌ ନିଙ୍ଗିଁ ଇକା ୱେର୍‌ତାମାନାର୍‌ ?”
JOH 18:35 ପିଲାତ୍‌ ଇର୍ହାନ୍‌, “ନାନ୍ ଇନିକା ଅରେନ୍‍ ଜିହୁଦି ? ମି ନିଜେଦି ଲୋକୁ ମାରି ପେରି ଜାଜକର୍‌ ନିଙ୍ଗିଁନା କିୟୁଦୁ ସର୍‌ପେ କିତାମାନାର୍‌; ନିନ୍‌ ଇନିକା କିତିମାନି ?”
JOH 18:36 ଜିସୁ ଇର୍ହାନ୍‌, “ନା ରାଜି ଇୟା ଦୁନିଆଦି ବିସୟ୍‌ ଆଏତ୍‍; ଜଦି ନା ରାଜି ଇୟା ଦୁନିଆଦି ବିସୟ୍‌ତାନ୍‌ ଆତାତ୍‌ମାନ୍ଦି, ଆର୍‌ତିଙ୍ଗ୍‌ ନାନ୍ ଏଣ୍ତେସ୍‌ ଜିହୁଦି ନେତାର୍‌ କିୟୁଦୁ ସର୍‌ପେ ଆଏତାମାନ୍ଦି, ଆୟାଉଣ୍ତିଙ୍ଗ୍‌ ନାୱାଲେ ବୁଲାନିକାର୍‌ ଜୁଦ୍‍ କିତାର୍‌ମାନ୍ଦି, ମାତର୍‌ ନା ରାଜି ସତ୍‌ତାନ୍‌ନେ ଇୟା ଦୁନିଆ ବିସୟ୍‌ତାନ୍‌ ସିଲେ ।”
JOH 18:37 ଆବେଟ୍‌ ପିଲାତ୍‌ ୱାନିଙ୍ଗ୍‌ ୱେନ୍‌ବାତାନ୍‌, “ଆର୍‌ତିଙ୍ଗ୍‌ ନିନ୍‌ ଇନିକା ଅରେନ୍‍ ରାଜା ନୋ ?” ଜିସୁ ଇର୍ହାନ୍‌, “ନିନ୍‍ତୋ ଇଜିନି, ନାନ୍ ଅରେନ୍‍ ରାଜା । ନାନ୍ ଏଣ୍ତେସ୍‌ ସତ୍‌ତି ତରିନ୍‌ ସାକି ସିନା, ଇୟାଉଣ୍ତିଙ୍ଗ୍‌ ନାନ୍ ଜନମ୍‌ ଆତାମାନା ମାରି ଦୁନିଆଦୁ ୱାତାମାନା । ଏନ୍‌ ସତ୍‌ତି ମାରିନ୍‌, ୱାନ୍‌ ନା ମାଟା ୱେନ୍‌ନାନ୍‌ ।”
JOH 18:38 ପିଲାତ୍‌ ୱାନିଙ୍ଗ୍‌ ଇର୍ହାନ୍‌, “ସତ୍‌ ଇନିକା ?” ଇକା ଇନ୍‌ଜି ୱାନ୍‌ ମାରି ଜିହୁଦିଲୋକା ଲାକ୍‌ତୁ ଆତ୍‌ରେ ସୋର୍‌ଆନ୍‌ନୋ ୱାରିଙ୍ଗ୍‌ ଇର୍ହାନ୍‌, ନାନ୍ ଦଣ୍ତ୍‌ସିନି ଉଣ୍ତିଙ୍ଗ୍‌ ୱେନିମାନୁ ଇନି ଦୋସ୍‌ ପୟ୍‌ଏଜିନା ।
JOH 18:39 ମାତର୍‌ ନାନ୍ ଜେ ନିସ୍ତାର୍‌ ପଣ୍ତୟ୍‌ତିୱାଲେ ମି ଉଣ୍ତିଙ୍ଗ୍‌ ଅରେନ୍‍ୱାନିଙ୍ଗ୍‍ ଡ଼ିସ୍‌ସିକିନିକା, ଇକା ମି ରିତି ମାନାତ୍‌; ମାରି, ଜିହୁଦିର୍‌ ରାଜେଙ୍ଗ୍‌ ନାନ୍ ମି ଉଣ୍ତିଙ୍ଗ୍‌ ଡ଼ିସ୍‌ନା ସିନାପ୍‌ ଇଜି ଇନିକା ମି ବଦା ?
JOH 18:40 ଆବେଟ୍‌ ୱାର୍‌ ମାରିଡ଼େସି ଆଉଲି ଆଜି ଇର୍ହାର୍‌, ଇୟା ଲୋକତିଙ୍ଗ୍‌ “ସିଲେ, ମାତର୍‌ ବାରବ୍ବାଙ୍ଗ୍‌ ଡ଼ିସ୍‌ଆ ।” ଇୟା ବାରବ୍ବା ଅରେନ୍‍ ଡଙ୍ଗାଁର୍‌ଏନ୍‌ ମାର୍ହାନ୍‌ ।
JOH 19:1 ତାନେୱେନ୍‌କା ପିଲାତ୍‌ ଜିସୁଙ୍ଗୁଁ ଅସି କୋର୍‌ଡାଦାନ୍‌ ଡାକ୍‌ସି କିତାନ୍‌ ।
JOH 19:2 ମାରି, ସନ୍ୟର୍‌ ସାମ୍‌କାଣି ଟପି ତିଆର୍‌ କିତାର୍‌ରୋ ଜିସୁଦି ତାଲାଦୁ ଆରିସ୍‌କିତାର୍‌ ମାରି ୱାନିଙ୍ଗ୍‌ ନିଡ଼ିଦି ଆଙ୍ଗିଁ ଆରିସ୍‌କିତାର୍‌;
JOH 19:3 ୱାର୍‌ ୱାନି ଲାକ୍‌ତୁ ୱାଜି ଇର୍ହାର୍‌, ଏ ଜିହୁଦିର୍‌ ରାଜା, ୱିଜୁଦିନ୍‌ତି ଉଣ୍ତିଙ୍ଗ୍‌ ରାଜା ଆଜି ମା ମୁସ୍‌କୁ ସାସନ୍‌ କିଆ; ମାରି ୱାର୍‌ ୱାନିଙ୍ଗ୍‌ ସାପ୍‌ଡ଼ା ଡାକ୍‌ତେଙ୍ଗ୍‍ଁ ଆସ୍‌ତାର୍‌ ।
JOH 19:4 ପିଲାତ୍‌ ମାରିଡ଼େସି ଆତେରେ ସର୍ହାନ୍‌ନୋ ୱାରିଙ୍ଗ୍‌ ଇର୍ହାନ୍‌, “ସୁଡ଼ୁଦୁ, ନାନ୍ ୱାନିମାନୁ ଇନି ଦସୋ ପୟ୍‌ଏଜିନା, ଇକା ଏଣ୍ତେସ୍‌ ମିର୍‌ ନେସ୍‌ନିଦେର୍‌, ଇୟାଉଣ୍ତିଙ୍ଗ୍‌ ନାନ୍ ୱାନିଙ୍ଗ୍‌ ମି ଲାକ୍‌ତୁ ସୋପ୍‌ତା ତାସିନା ।”
JOH 19:5 ଆବେଟ୍‌ ଜିସୁ ଆୟା ସାମ୍‍କାଣି ଟପି ମାରି ନିଡ଼ି କୋଲର୍‌ତି ଆଙ୍ଗିଁ ଆରାତାନ୍‌ନୋ ଆତେରେ ୱାତାନ୍‌ । ପିଲାତ୍‌ ୱାରିଙ୍ଗ୍‌ ଇର୍ହାନ୍‌, “ସୁଡ଼ୁଦୁ, ଆୟା ଲୋକୁ !”
JOH 19:6 ଆବେଟ୍‌ ପେରି ଜାଜକର୍‌ ମାରି ମନ୍ଦିର୍‌ କାପ୍‍କିନିକାର୍‌ ଜିସୁଙ୍ଗୁଁ ସୁଡ଼ୁଜି ଆଉଲି ଆଜି ଇର୍ହାର୍‌, କ୍ରୁସକାଟ୍‌ତୁ ଏକିସ୍‌କିଦୁ, କ୍ରୁସକାଟ୍‌ତୁ ଏକିସ୍‌କିଦୁ । ପିଲାତ୍‌ ୱାରିଙ୍ଗ୍‌ ଇର୍ହାନ୍‌, ମିର୍‌ ୱାନିଙ୍ଗ୍‌ ଅସି କ୍ରୁସକାଟ୍‌ତୁ ଏକିସ୍‌କିଦୁ, ଇରିଙ୍ଗ୍‌ ନାନ୍ ସାନିଦଣ୍ତ୍‌ ସିଦେଙ୍ଗ୍‍ ୱାନିମାନୁ ଇନି ଦସୋ ପୟ୍‌ଏଜିନା ।
JOH 19:7 ଜିହୁଦିଲୋକ୍‌ ୱାନିଙ୍ଗ୍‌ ଇର୍ହାର୍‌, “ମାଦି ଉନ୍‌ଡ୍ରି ନିୟମ୍‌ ମାନାତ୍‌ ମାରି ଆୟା ନିୟମ୍‌ତି ଇସାବ୍‌ତାନ୍‌ ୱାନ୍‌ ସାନିଦଣ୍ତତି ଜଗ୍‌, ଇରିଙ୍ଗ୍‌ ୱାନ୍‌ ନିଜେଦିଙ୍ଗ୍‌ ମାପୁରୁଦି ମାରିନ୍‌ ଇଜି ୱେର୍‌ସିନାନ୍‌ ।”
JOH 19:8 ଆବେଟ୍‌ ପିଲାତ୍‌ ଇୟା ମାଟା ୱେନ୍‌ଜି ନାଣ୍ତ ତିଲାତାନ୍‌;
JOH 19:9 ମାରି, ୱାନ୍‌ ମାରିଡ଼େସି ମେଡ଼୍‍ଇଲୁ ଲୋଇ ଡ଼ୁଗିତାନ୍‌ନୋ ଜିସୁଙ୍ଗୁଁ ୱେନ୍‌ବାତାନ୍‌, “ନିନ୍‌ ଏମେମାଣ୍‌କୁ ୱାତିମାନି ?” ମାତର୍‌ ଜିସୁ ୱାନିଙ୍ଗ୍‌ ଇନିକା ଇନ୍‌ଏତାନ୍‌ ।
JOH 19:10 ଆବେଟ୍‌ ପିଲାତ୍‌ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଇନିକା ନା ୱାଲେ ୱାର୍‌ଗିଇ ? ନିଙ୍ଗିଁ ଡ଼ିସ୍‌ତେଙ୍ଗ୍‌ ନା ଅଦିକାର୍‌ ମାନାତ୍‌ ମାରି ନିଙ୍ଗିଁ କ୍ରୁସକାଟ୍‌ତୁ ଏକିସ୍‌ତେଙ୍ଗ୍‌ ନା ଅଦିକାର୍‌ ମାନାତ୍‌, ଇକା ଇନିକା ନିନ୍‌ ନେସ୍‌ଏଜିନି ?”
JOH 19:11 ଜିସୁ ଇର୍ହାନ୍‌, “ଜଦି ମାପୁରୁଦିମାଣାନ୍‌ ନିଙ୍ଗିଁ ଅଦିକାର୍‌ ରେଏତିଙ୍ଗ୍‌ ମାନ୍ଦି, ଆର୍‌ତିଙ୍ଗ୍‌ ନା ବିରଦ୍‌ତାନ୍‌ ନିଦି ଇନି ଅଦିକାର୍‌ ସିଲେତାତ୍‍ ମାନ୍ଦି; ଏନ୍‌ ନାଙ୍ଗିଁ ନି କିୟୁଦୁ ସର୍‌ପେ କିତାମାନାନ୍‌, ୱାନି ପାପ୍‌ ନାଣ୍ତୋସାନିୱାଜା ।”
JOH 19:12 ଆବେଟ୍‌ ପିଲାତ୍‌ ୱାନିଙ୍ଗ୍‌ ଡ଼ିସ୍‌ତେଙ୍ଗ୍‌ ସେସ୍ଟା କିତାନ୍‌, ମାତର୍‌ ଜିହୁଦିଲୋକ୍‌ ଆଉଲି ଆଜି ଇର୍ହାର୍‌, “ଜଦି ନିନ୍‌ ଇୟା ଲୋକତିଙ୍ଗ୍‌ ଡ଼ିସ୍‌ନି, ଆର୍‌ତିଙ୍ଗ୍‌ ନିନ୍‌ ସମ୍ରାଟ୍‌ତି ସଙ୍ଗ୍‍ ଆଇ; ଏନ୍‌ ନିଜେଦିଙ୍ଗ୍‌ ରାଜା ଇଜି ଇନାନ୍‌, ୱାନ୍‌ ସମ୍ରାଟ୍‌ତି ତରିନ୍‌ ମାଟା ଇନାନ୍‌ ।”
JOH 19:13 ମାରି, ପିଲାତ୍‌ ଇୟାୱିଜୁ ମାଟା ୱେର୍‌ଆନ୍‌ନୋ ଜିସୁଙ୍ଗୁଁ ଆତେରେ ତାତ୍‌ତାନ୍‌ନୋ “ଗୁଡିକାଲୁ” ଦର୍‌ତି ବାଡିଦୁ ତାତାର୍‌, ଏବ୍ରି ବାସାଦାନ୍‌ ଇୟାତାନି ଦର୍‌ “ଗବ୍‌ବତା” ଇଜି ଇନାର୍‌, ଆୟା ବିଚାର୍‍କିନି ବାଡିଦୁ ବାସ୍‌ତାନ୍‌ ।
JOH 19:14 ଆୟାନାଣ୍ତିଙ୍ଗ୍‌ ନିସ୍ତାର୍‌ ପଣ୍ତ୍‌ୟ ତିଆର୍‌ଆନି ଦିନ୍‌, ମାରି ନାସ୍ତିୱାଲେ ୱେଡ଼େ ଆତାମାର୍ହାତ୍‌ । ମାରି, ୱାନ୍‌ ଜିହୁଦିରିଙ୍ଗ୍‌ ଇର୍ହାନ୍‌, “ସୁଡ଼ୁଦୁ ମି ରାଜା ।”
JOH 19:15 ଆବେଟ୍‌ ୱାର୍‌ ଆଉଲି ଆତାର୍‌, “ୱାନିଙ୍ଗ୍‌ ଡାକ୍‌ତୁ, ଡାକ୍‌ତୁ, କ୍ରୁସକାଟ୍‌ତୁ ଏକିସ୍‌କିଦୁ ।” ପିଲାତ୍‌ ୱାରିଙ୍ଗ୍‌ ଇର୍ହାନ୍‌, “ନାନ୍ ଇନିକା ମି ରାଜେଙ୍ଗ୍‌ କ୍ରୁସକାଟ୍‌ତୁ ଏକିସ୍‌କିନା ?” ପେରି ଜାଜକର୍‌ ଇର୍ହାର୍‌, “କେବଲ୍ ସମ୍ରାଟ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ ମାଙ୍ଗିଁ ମାରି ରାଜା ସିଲେନ୍‌ ।”
JOH 19:16 ଆବେଟ୍‌ ପିଲାତ୍‌ ଏଣ୍ତେସ୍‌ କ୍ରୁସ୍‌କାଟ୍‌ତୁ ଏକାନାନ୍‌, ଇୟାଉଣ୍ତିଙ୍ଗ୍‌, ପିଲାତ୍‌ ୱାନିଙ୍ଗ୍‌ ୱାରି ବଦାଦାନ୍ ସର୍‌ପେ କିତାନ୍‌, ତାନେୱେନ୍‌କା ୱାର୍‌ ଜିସୁଙ୍ଗୁଁ ଅତାର୍‍ ।
JOH 19:17 ମାରି, ଜିସୁ ନିଜେ କ୍ରୁସ୍‌କାଟ୍‌ ପିଡିତାନ୍‌ନୋ “ତାଲାଦି କାପାଲ୍‌ ନାନି” ଦର୍‌ତି ବାଡିଦୁ ସୋର୍ହାନ୍‌, ଏବ୍ରି ବାସାଦାନ୍‌ ଆୟାବାଡିଦିଙ୍ଗ୍‌ “ଗଲ୍‌ଗଥା” ଇଜି ଇନାର୍‌ ।
JOH 19:18 ଆବେନୁ ୱାର୍‌ ୱାନିଙ୍ଗ୍‌ କ୍ରୁସ୍‌କାଟ୍‌ତୁ ଏକିସ୍‌କିତାର୍‌ ମାରି ୱାନି ୱାଲେ ମାରି ରିଏରିଙ୍ଗ୍‌ ଏକିସ୍‌କିତାର୍‌, ରିଆଙ୍ଗାଁ ରିଏରିଙ୍ଗ୍‌ ମାରି ନାଡ଼୍‌ମି ଜିସୁଙ୍ଗୁଁ ।
JOH 19:19 ମାରି, ପିଲାତ୍‌ ଉନ୍‌ଡ୍ରି ନଟିସ୍‌ ଆକୁ ରାସ୍‌ସି କ୍ରୁସ୍‌କାଟ୍‌ତି ମୁସ୍‌କୁ ଡ଼ତାର୍‌ । ଆବେନୁ ରାସ୍‌ତା ମାର୍ହାତ୍‌, “ନାଜରିୟତିୟ ଜିସୁ, ଜିହୁଦିର୍‌ ରାଜା ।”
JOH 19:20 ଜିହୁଦିର୍‌ ଲୋଇରାନ୍‌ ଏସୋଲୋକ୍‌ ଇୟା ରାସ୍‌ତିମାନିକା ପଡ଼ାତାର୍‌, ଇରିଙ୍ଗ୍‌ ଏମେ ବାଡିଦୁ ଜିସୁଙ୍ଗୁଁ କ୍ରୁସ୍‌କାଟ୍‌ତୁ ଏକିସ୍‌କିତାମାର୍ହାର୍‌, ଆକା ଗାଡ଼୍‌ ଲାକ୍‌ତୁ ମାର୍ହାତ୍‌, ମାରି ଆୟା ରାସ୍‌ତିକା ଏବ୍ରି, ଲାଟିନ୍‌ ମାରି ଗ୍ରିକ୍‌ ବାସାଦାନ୍‌ ରାସ୍‌ତା ମାର୍ହାତ୍‌ ।
JOH 19:21 ଜିହୁଦିରି ପେରି ଜାଜକର୍‌ ପିଲାତ୍‌ତିଙ୍ଗ୍‌ ଇର୍ହାର୍‌, “ଜିହୁଦିରି ରାଜା” ଇଜି ରାସ୍‌ଏଣ୍‌ଗା ମାରି “ନାନ୍ ଜିହୁଦିରି ରାଜା ଇଜି ୱାନ୍‌ ଇର୍ହାନ୍‌, ଇକା ରାସ୍‌ଆଁ ।”
JOH 19:22 ପିଲାତ୍‌ ଇର୍ହାନ୍‌, “ନାନ୍ ଆମାକା ରାସ୍‌ତାମାନା, ଆକା ବାଦେଲ୍‌କିଦେଙ୍ଗ୍‌ ଆଟ୍‍ଏ ।”
JOH 19:23 ସନ୍ୟର୍‌ ଜିସୁଙ୍ଗୁଁ କ୍ରୁସ୍‌କାଟ୍‌ତୁ ଏକିସ୍‌କିତି ୱେନ୍‌କା ନାଲ୍‌ଏର୍‌ ସନ୍ୟର୍‌ ୱାନି ୱାତି ନାଲ୍‌ଗି ବାଗ୍‌କୁ କିଜି ୱିଜେରେ ଉଣ୍ତିଙ୍ଗ୍‌ ଉନ୍‌ଡ୍ରି ଉନ୍‌ଡ୍ରି ବାଗ୍, ମାରି ୱାର୍‌ ୱାନି ଆଙ୍ଗିଁ ବା ଅତାର୍‍ । ଆୟା ଆଙ୍ଗିଁ ସିଲାଇ କିଏଣ୍‌ଗା ମୁସ୍‌କୁରାନ୍‌ ଆଡ୍‍ଗି ସାନ୍ଦି ୱିଜୁ ଗୁତ୍‌ତା ମାର୍ହାର୍‌ ।
JOH 19:24 ଆଦେଙ୍ଗ୍‌ ସନ୍ୟର୍‌ ଲୋଇ ଲୋଇ ଇର୍ହାର୍‌, ତେନେଙ୍ଗ୍‌ କିସ୍‌ତେଙ୍ଗ୍‌ କେଏଟ୍‌, ମାତର୍‌ ଇକା ଏନ୍ଦି ଆନାତ୍‌, ଆୟାଉଣ୍ତିଙ୍ଗ୍‌ କୁଡ଼ୁକୁଡ଼ି କିନାଟ୍‌, ଏଣ୍ତେସ୍‌ ଦାର୍ମୁସାସ୍ତ୍ରଦୁ ଇୟା ବାକ୍ୟ ପୁରା ଆନାତ୍‌, ୱାର୍‌ ନିଜେ ନିଜେଦି ମାନୁ ନା ଆଙ୍ଗିଁଦିଙ୍ଗ୍‌ ବାଗ୍ କିତାର୍‌, ମାରି ନା ଆରାନି ଆଙ୍ଗିଁ ଉଣ୍ତିଙ୍ଗ୍‌ କୁଡ଼ୁକୁଡ଼ି କିତାର୍‌ । ଆଦେଙ୍ଗ୍‌ ସନ୍ୟର୍‌ ଇୟାୱିଜୁ କିତାର୍‌ ।
JOH 19:25 ମାତର୍‌ ଜିସୁଦି କ୍ରୁସ୍‌କାଟ୍‌ତି ଲାକ୍‌ତୁ ୱାନି ଆଇସି ମରିୟମ୍‌, ୱାନି ଆଇସିକା ତାଙ୍ଗିଁସି, କ୍ଳୋପାଦି ଆଡ଼୍‌ସି, ମରିୟମ୍‌ ମାରି ମଗ୍‌ଦଲିନି ମରିୟମ୍‌ ନିର୍‌ଏ ମାର୍‌ଏ ।
JOH 19:26 ଜିସୁ ନିଜେଦି ଆଇସିଙ୍ଗ୍‍ ମାରି ଏମେ ସିସୁଙ୍ଗୁଁ ଜିବନ୍‌ନୋଜି ମାର୍ହାନ୍‌, ତାନିଙ୍ଗ୍‌ ଲାକ୍‌ତୁ ନିର୍‌ଇମାରିକା ସୁଡ଼ୁତାନ୍‌ନୋ ଆଇସିଙ୍ଗ୍‍ ଇର୍ହାନ୍‌, “ସୁଡ଼ୁଆ, ନି ମାରିନ୍‌ତିଙ୍ଗ୍‌ !”
JOH 19:27 ତାନେୱେନ୍‌କା ଜିସୁ ଆୟା ସିସୁଙ୍ଗୁଁ ଇର୍ହାନ୍‌, “ସୁଡ଼ୁଆ, ମି ୟାୟା !” ମାରି ଆୟା ସମୟ୍‌ତାନ୍‌ ଆୟା ସିସୁ ତାନିଙ୍ଗ୍‌ ନିଜେଦି ଇଲୁତୁ ଅତାନ୍‍ ।
JOH 19:28 ତାନେୱେନ୍‌କା ଜିସୁ ଦାର୍ମୁସାସ୍ତ୍ରଦି ବାକ୍ୟ ଏଣ୍ତେସ୍‌ ପୁରା ଆନାତ୍‌, ଇୟାଉଣ୍ତିଙ୍ଗ୍‌ ୱିଜୁ ବିସୟ୍‌ ଇଲେଇ ୱିଜିତାମାନାତ୍‌ ଇଜି ନେସ୍‌ସି ଇର୍ହାନ୍‌, “ନାଙ୍ଗିଁ ଏର୍‌କିକାଟ୍‌ସିନାତ୍‌ ।”
JOH 19:29 ଆବେନୁ ସୟ୍‌ନିରସ୍‌ ପୁରାପୁରିମାନି ଉନ୍‌ଡ୍ରି ସାଟି ମାର୍ହାତ୍‌; ୱାର୍‌ ସୟ୍‌ନିରସ୍‌ ପୁରାମାନି ଉନ୍‌ଡ୍ରି ତୁଲାଦୁ କାଣ୍ତେକ୍‌ ବାଡିଗାଦିଟିପୁଦୁ ଲାଗିସ୍‌କିଜି ୱାନି ୱେୟୁ ଲାକ୍‌ତୁ ସିତାର୍‍ ।
JOH 19:30 ଆବେଟ୍‌ ଜିସୁ ଆୟା ସୟ୍‌ନିରସ୍‌ ଉଟାନ୍‌ନୋ ଇର୍ହାନ୍‌, “ୱିଜିତାତ୍‌” ମାରି ୱାନ୍‌ ତାଲା ଆଡ୍‍ଗି କିଜି ସାତାନ୍‌ ।
JOH 19:31 ଆୟାନାଣ୍ତିଙ୍ଗ୍‌ ନେଗିଦିନ୍‌ ମାନିଙ୍ଗ୍‌, ମେନ୍ଦଲ୍‌ୱିଜୁ ଏଣ୍ତେସ୍‌ ରମ୍‌ନିନାଣ୍ତିଙ୍ଗ୍‌ କ୍ରୁସ୍‌କାଟ୍‌ ମୁସ୍‌କୁ ତେବାଏତ୍‌, ଇରିଙ୍ଗ୍‌ ଆୟା ରମ୍‌ନିନାଣ୍ତିଙ୍ଗ୍‌ ପବିତ୍ର ଦିନ୍‌ ମାର୍ହାତ୍‌, ଆରିଙ୍ଗ୍‌ ୱାରି କାଲ୍‌କୁ ରୁକିର୍‌ ମାରି ତାନେୱେନ୍‌କା ୱାରିଙ୍ଗ୍‌ କୁସ୍ରକାଟ୍‌ତାନ୍‌ ରେପ୍‌ତେଙ୍ଗ୍‌ ଇଜି ଜିହୁଦି ନେତାର୍‌ ପିଲାତ୍‌ତିଙ୍ଗ୍‌ ମାଡ଼ିସ୍‌କିତାର୍‌ ।
JOH 19:32 ତାନେୱେନ୍‌କା ସନ୍ୟର୍‌ ୱାଜି ଆଗ୍‌ଡ଼ି ଅରେନ୍‍ୱାନି କାଲ୍‌କୁ ମାରି ଜିସୁଦି ୱେଲେ ଆମା ଅରେନ୍‍ୱାନିଙ୍ଗ୍‍ କ୍ରୁସ୍‌କାଟ୍‌ତୁ ଏକିସ୍‌କିତାମାର୍ହାର୍‌, ୱାନି କାଲୁ ବା ରୁକ୍‌ତାର୍‌ ।
JOH 19:33 ମାତର୍‌ ୱାର୍‌ ଜିସୁ ଲାକ୍‌ତୁ ୱାଜି ୱାନ୍‌ ସାତାନ୍‌ ଇଜି ସୁଡ଼ୁଜି ୱାନି କାଲୁ ରୁକ୍‌ଏତାର୍‌,
JOH 19:34 ମାଣ୍‌କୁ ଅରେନ୍‍ ଇଟାଦାନ୍‌ ୱାନି ପାଡ଼୍‌କାଦୁ ଗୁତ୍‌ତାନ୍‌, ମାରି ଆୟାଦାପ୍ରେ ନେତେର୍‌ ନି ଏରୁ ୱାଙ୍ଗ୍‍ଜି ୱାତେ ।
JOH 19:35 ଏନ୍‌ ସୁଡ଼ୁତା ମାନାନ୍‌, ୱାନ୍‌ ସାକିୟ ସିତାମାନାନ୍‌, ଏଣ୍ତେସ୍‌ ମିର୍‌ ବା ବିସ୍‌ବାସ୍‌ କିନିଦେର୍‌; ମାରି, ୱାନି ସାକ୍ୟ ସତ୍‌, ମାରି ୱାନ୍‌ ଜେ ସତ୍‌ ୱେର୍‌ସିନାନ୍‌, ଇକା ୱାନ୍‌ ନେସ୍‌ନାନ୍‌ ।
JOH 19:36 ଇରିଙ୍ଗ୍‌ ଦାର୍ମୁସାସ୍ତ୍ରଦି ଇୟା ବାକ୍ୟ ପୁରା ଆନି ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌ ଗଟାତାତ୍‌, “ୱାନି ଉନ୍‌ଡ୍ରି ପେଡ଼େନ୍‌ ବା ରୁଙ୍ଗ୍‌ଏତ୍‌ ।”
JOH 19:37 ଦାର୍ମୁସାସ୍ତ୍ରଦୁ ମାରି ଉନ୍‌ଡ୍ରି ବାକ୍ୟ ରାସ୍‌ତାମାନାତ୍‌, “ୱାର୍‌ ଆମାୱାନିଙ୍ଗ୍‌ ଇଟାଦାନ୍‌ ଗୁତ୍‌ତାର୍‌, ୱାନି ଲୋକୁ ସୁଡ଼ୁନାଟ୍‌ ।”
JOH 19:38 ଇୟାୱିଜୁ ଗଟ୍‌ନେଙ୍ଗ୍‌ ୱେନ୍‌କା, ଆମା ହାରାମାତିୟାଦି ଜୋସେପ୍‌ ଜିସୁଦି ଅରେନ୍‍ ସିସୁ ମାର୍ହାନ୍‌, ମାତର୍‌ ଜିହୁଦି ନେତାରିଙ୍ଗ୍‌ ତିଲାଜି ନେସେଇ ୱାଜା ମାର୍ହାନ୍‌, ଜୋସେପ ଜିସୁଦି ମେନ୍ଧଲ୍‍ ଅତେଙ୍ଗ୍‌ ଇଜି ପିଲାତ୍‌ତିଙ୍ଗ୍‌ ମାଡ଼ିସ୍‌ତାନ୍‌ । ଆବେଟ୍‌ ପିଲାତ୍‌ ଡ଼ିସ୍‌ତାସିତାନ୍‌ । ଆଦେଙ୍ଗ୍‌ ୱାନ୍‌ ୱାତାନ୍‌ନୋ ୱାନି ମେନ୍ଦଲ୍ ଅତାନ୍‍ ।
JOH 19:39 ଆମା ନିକଦିମ ଆଗ୍‌ଡ଼ି ନାଡ଼ା ୱାନି ଲାକ୍‌ତୁ ୱାତାମାର୍ହାନ୍‌, ୱାନ୍‌ ବା ପୁରା ତିରିସ୍‌ କେଜି ବାସ୍‌ନାଦୁମିସାତି ନିୟୁ ଆସ୍‌ସି ୱାତାନ୍‌ ।
JOH 19:40 ୱାର୍‌ ଜିସୁଦି ମେନ୍ଦଲ୍‌ତିଙ୍ଗ୍‌ ଅତାରୋ ଜିହୁଦିର୍‌ ମୁସ୍‌ନି ରିତିଦାନ୍‌ ଆକା ବାସ୍‌ନାନିୟୁଦି ୱାଲେ କାଣ୍ତେକ୍‌ ପାସିଆଦୁ ତେରେପ୍‌ତାର୍‌ ।
JOH 19:41 ଜିସୁଙ୍ଗୁଁ ଏମେ ବାଡିଦୁ କ୍ରୁସ୍‌କାଟ୍‌ତୁ ଏକିସ୍‌କିତାମାର୍ହାର୍‌, ଆୟାବାଡିଦୁ ଉନ୍‌ଡ୍ରି ଡଡି ମାର୍ହାତ୍‌, ମାରି ଆୟା ଡଡିଦୁ ଉନ୍‌ଡ୍ରି ପୁନି ମୁସ୍‌ନି ଗୁଟା ମାର୍ହାତ୍‌, ଆବେନୁ ଏନ୍‌ ଆଗ୍‍ଡ଼ିରାନ୍‍ ଏଙ୍ଗ୍‌ବା ମୁସ୍‌ଏର୍‌ ମାର୍ହାର୍‌ ।
JOH 19:42 ମାରି, ଜିହୁଦିରି ନେଗିଦିନ୍‌ତି ଉଣ୍ତିଙ୍ଗ୍‌ ଆୟା ବାଡିଦୁ ୱାର୍‌ ଜିସୁଙ୍ଗୁଁ ଇଟ୍‌ତାର୍‌, ଇରିଙ୍ଗ୍‌ ଆୟା ମୁସ୍‌ନିବାଡି ଲାକ୍‌ତୁ ମାର୍ହାତ୍‌ ।
JOH 20:1 ୱାରାଦି ଆଗ୍‍ଡ଼ିରି ନାଣ୍ତିଙ୍ଗ୍‌ ଉଟ୍‌ଲା ନାଡ଼ାକାଦେ ସିକାଟି ମାନାପ୍ ମାନ୍‌ବୁନେ ମଗ୍‌ଦଲିନି ମରିୟମ୍‌ ମୁସ୍‌ତିଗୁଟା ଲାକ୍‌ତୁ ୱାତାଦ ଆବେଣୁକୁ କାଲୁ ଗୁସାକିତିମାରିକା ସୁଡ଼ୁତାତ୍‌ ।
JOH 20:2 ଆଦେଙ୍ଗ୍‌ ମରିୟମ୍‌ ଉର୍‌କୁସି ସୋଲ୍‌ସି ସିମୋନ ପିତର୍‌ ମାରି ଜିସୁ ଆମାୱାନିଙ୍ଗ୍‌ ଜିବନ୍‌ନୋଜି ମାର୍ହାନ୍‌, ଆୟା ଆଇ ସିସୁରି ଲାକ୍‌ତୁ ୱାତାତ୍‍, ମାରି ୱାରିଙ୍ଗ୍‌ ଇର୍ହାର୍‌, “ୱାର୍‌ ମୁସ୍‌ତିଗୁଟାଦାନ୍‌ ପ୍ରବୁଙ୍ଗ୍‌ ଅତାମାନାର୍‌, ମାରି ୱାନିଙ୍ଗ୍‌ ଏମେମାନୁ ଇଟ୍‌ତାମାନାର୍‌, ଆକା ମାପ୍‌ ନେସ୍‌ଏଜିନାପ୍‌ ।”
JOH 20:3 ଆବେଟ୍‌ ପିତର୍‌ ମାରି ଆୟା ଆଇ ସିସୁ ମୁସ୍‌ତିଗୁଟା ଲାକ୍‌ତୁ ସନ୍‌ଡ଼୍ରେଙ୍ଗ୍‌ ଇଜି ସୋତାର୍‌ ।
JOH 20:4 ୱାର୍‌ ରିଏର୍‌ ଅର୍‌ସେ ଉର୍‌କୁତେଙ୍ଗ୍‌ ଆସ୍‌ତାର୍‌, ମାରି ଆୟା ଆଇ ସିସୁ ପିତରତିଙ୍ଗ୍‌ ୱେନ୍‌କା ଡ଼ିସ୍‌ସି ଆଗ୍‌ଡ଼ି ମୁସ୍‌ତିବାଡି ଲାକ୍‌ତୁ ଇତାନ୍‌,
JOH 20:5 ମାରି, ପାଡ଼୍‌ଗିତାନ୍‌ନୋ ଲୋଇ ବେସ୍‌ତାନ୍‌ ପାତଲ୍‌ତି ପାସିଏଙ୍ଗ୍‌ୱିଜୁ ଆର୍‌ତିମାରିକା ସୁଡ଼ୁତାନ୍‌, ଆତିଙ୍ଗ୍‌ବା ୱାନ୍‌ ଲୋଇ ଡ଼ୁଗୁଏତାନ୍‌ ।
JOH 20:6 ତାନେୱେନ୍‌କା ସିମୋନ ପିତର୍‌ ବା ୱାନି ୱେନ୍‌କା ୱେନ୍‌କା ୱାଜି ଇତାର୍‌ ମାରି ମୁସ୍‌ତିଗୁଟା ଲୋଇ ଡ଼ୁଗିତାନ୍‍ନୋ ସୁଡ଼ୁତାନ୍‌ ଜେ, ପାତଲ୍‌ତି ପାସ୍‌ଇଏଙ୍ଗ୍‌ୱିଜୁ ମାନେ,
JOH 20:7 ମାରି ଜିସୁଦି ତାଲାଦୁ ଆମା ପାଗା ତର୍‌ତା ମାର୍ହାର୍‌, ଆୟା ପାତଲ୍‌ତି ୱାତିଙ୍ଗାଁ ୱାଲେ ମାନ୍‌ଏଣ୍‌ଗା ୱେର୍‌ଏ ଉନ୍‌ଡ୍ରି ବାଡିଦୁ ତେର୍‌ବିତା ମାନ୍‌ତା ।
JOH 20:8 ନାସ୍ତିୱାଲେ ଆମା ଆଇ ସିସୁ ଆଗ୍‌ଡ଼ି ମୁସ୍‌ତିବାଡି ଲାକ୍‌ତୁ ୱାତାମାର୍ହାନ୍‌, ୱାନ୍‌ ବା ଲୋଇ ଡ଼ୁଗିତାନ୍‌ନୋ ସୁଡ଼ୁତାନ୍‌ ମାରି ବିସ୍‌ବାସ୍‌ କିତାନ୍‌;
JOH 20:9 ଇରିଙ୍ଗ୍‌ ସାତିୱାରି ମାଣ୍‌କୁ ଜିସୁଙ୍ଗୁଁ ଜେ ନିଙ୍ଗିଁନିକା ମାନାତ୍‌, ଦାର୍ମୁସାସ୍ତ୍ରଦି ଇୟା ବାକ୍ୟ ୱାର୍‌ ଆୟା ସାନ୍ଦି ବୁଜାଏତା ମାର୍ହାର୍‌ ।
JOH 20:10 ୱେନ୍‌କା ସିସୁର୍‍ ମାରିଡ଼େସି ୱାରି ଇଲ୍‌ତୁ ସୋର୍ହାର୍‌ ।
JOH 20:11 ମରିୟମ୍‌ ଆଡ଼୍‍ବାଜି ଆଡ଼୍‍ବାଜି ଆତେରେ ମୁସ୍‌ତିବାଡି ଲାକ୍‌ତୁ ନିର୍‌ଆ ତେବାତାତ୍‌; ମାରି, ଆଡ଼୍‍ବାଜି ଆଡ଼୍‍ବାଜି ୱାଦ୍‌ ପାଡ଼୍‌ଗିଜି ମୁସ୍‌ତିଗୁଟା ଲୋଇ ବେସ୍‌ତାତ୍‌,
JOH 20:12 ମାରି ଜିସୁଦି ମେନ୍ଧଲ୍‍ ଏମେ ବାଡିଦୁ ଇଟ୍‌ତାମାର୍ହାର୍‌, ଆବେଣି ତାଲା ଲାକ୍‌ତୁ ଅରେନ୍‍ ମାରି ପାଦାମ୍‌କା ଲାକ୍‌ତୁ ମାରି ଅରେନ୍‍, ଇୟାୱାଜା ରିଏରିଙ୍ଗ୍‌ ଅଡିନିଆଙ୍ଗିଁ ଆରାତି ଦୁତ୍‌କାଙ୍ଗ୍‌ ବାସ୍‌ତିମାରିକା ସୁଡ଼ୁତାତ୍‌ ।
JOH 20:13 ୱାର୍‌ ମରିୟମତିଙ୍ଗ୍‌ ଇର୍ହାର୍‌, “ଇୟା, ନିନୁ ଏନ୍ଦା ଆଡ଼୍‌ବାଜିନି ?” ୱାଦ୍‌ ୱାରିଙ୍ଗ୍‌ ଇର୍ହାତ୍‌, “ଏର୍‌ ନା ପ୍ରବୁଙ୍ଗୁଁ ମେନ୍ଧଲ୍‍ ଅତାମାନାର୍‌, ମାରି ୱାନିଙ୍ଗ୍‌ ଏମେ ବାଡିଦୁ ଇଟ୍‌ତାମାନାର୍‌, ଆକା ନାନ୍ ନେସ୍‌ଏଜିନା ।”
JOH 20:14 ୱାଦ୍‌ ଇକା ଇନ୍‌ଜି ୱେନ୍‌କା ମାର୍‌ଜିବେସ୍‌ସି ଜିସୁଙ୍ଗୁଁ ନିର୍‌ଇମାରିକା ସୁଡ଼ୁତାତ୍‌, ମାତର୍‌ ୱାନ୍‌ ଜେ ଜିସୁ, ଆକା ନେସ୍‌ଏତାତ୍‌ ।
JOH 20:15 ଜିସୁ ତାନିଙ୍ଗ୍‌ ଇର୍ହାନ୍‌, “ନିନୁ ଏନ୍ଦା ଆଡ଼୍‌ବାଜିନି ? ଏଙ୍ଗ୍‌ ପୟ୍‌ଜିନି ?” ୱାଦ୍‌ ୱାନିଙ୍ଗ୍‌ ଡଡିଦୁ ପାଣିକିନିକାନ୍‌ ଇଜି ଅଡ଼୍‍ବିଜି ଇର୍ହାତ୍‌, ଆଜ୍ଞା, “ନିନ୍‌ ଜଦି ୱାନିଙ୍ଗ୍‌ ଅତିମାନି, ଆର୍‌ତିଙ୍ଗ୍‌ ୱାନିଙ୍ଗ୍‌ ଏମେ ବାଡିଦୁ ଇଟ୍‌ତିମାନି, ନାଙ୍ଗିଁ ଇନ୍‌ଆଁ, ମାରି ନାନ୍ ୱାନିଙ୍ଗ୍‌ ଅନା ।”
JOH 20:16 ଜିସୁ ତାନିଙ୍ଗ୍‌ ଇର୍ହାନ୍‌, “ମରିୟମ୍‌ ।” ୱାଦ୍‌ ମାର୍‌ଜିବେସ୍‌ସି ଏବ୍ରି ବାସାଦାନ୍‌ ୱାନିଙ୍ଗ୍‌ ଇର୍ହାତ୍‌, “ରାବ୍‌ବୁନି,” ଅର୍ତାତ୍‍, “ଏ ଗୁରୁ ।”
JOH 20:17 ଜିସୁ ତାନିଙ୍ଗ୍‌ ଇର୍ହାନ୍‌, “ନାଙ୍ଗିଁ ଆସ୍‌ସୋ ଇଡିମା, ଇରିଙ୍ଗ୍‌ ନାନ୍ ଇୟାସାନ୍ଦି ବୁବାଦି ଲାକ୍‌ତୁ ସୋଲ୍‌ଏନେ; ମାତର୍‌ ନା ତଡ଼ାନ୍‌କା ମାନୁ ସୋଲ୍‌ସ ଇନ୍‌ଆଁ, ନାନ୍ ନା ବୁବା ମାରି ୱାରି ବୁବା, ନା ମାପୁରୁ ମାରି ୱାରି ମାପୁରୁ ଲାକ୍‌ତୁ ସୋଲ୍‌ସିନା ।”
JOH 20:18 ମଗ୍‌ଦଲିନି ମରିୟମ୍‌ ସଲ୍‌ସି, ନାନ୍ ପ୍ରବୁଙ୍ଗ୍‌ ସୁଡ଼ୁତାମାନା, ମାରି ୱାନ୍‌ ନାଙ୍ଗିଁ ଇୟାୱିଜୁ ୱେର୍‌ତାମାନାନ୍‌ ଇଜି ସିସୁରିଙ୍ଗ୍‌ କାବୁର୍‌ ସିତାତ୍‌ ।
JOH 20:19 ଆୟାନାଣ୍ତିଙ୍ଗ୍‌ ୱାରାଦି ଆଗ୍‍ଡ଼ିରି ନାଣ୍ତିଙ୍ଗ୍‌ ମିଲ୍‌ମିଲିକା ବେଡ଼ାଦୁ ଏସ୍ତିୱାଲେ ସିସୁର୍‍ ଏମେ ଇଲ୍‌ତୁ ମାର୍ହାର୍‌, ଆବେଣି ସେର୍‍ଲେଙ୍ଗ୍‌ୱିଜୁ ଜିହୁଦିରି ତିଏଲ୍‌ତିଙ୍ଗ୍‌ କେର୍‌ତା ମାର୍ହାର୍‌, ନାସ୍ତିୱାଲେ ଜିସୁ ୱାଜି ନେଗି ନାଡ଼୍‌ମି ନିର୍‌ଆନ୍‌ନୋ ୱାରିଙ୍ଗ୍‌ ଇର୍ହାନ୍‌, “ମିଙ୍ଗିଁ ସାନ୍ତି ଆପିତ୍‌ ।”
JOH 20:20 ମାରି, ଇକା ଇନ୍‌ଜି ଜିସୁ ୱାରିଙ୍ଗ୍‌ ନିଜେଦି କିକୁ ମାରି ପାଡ଼୍‌କା ତର୍‌ତାନ୍‌ । ଆବେଟ୍‌ ସିସୁର୍‍ ପ୍ରବୁଙ୍ଗ୍‌ ସୁଡ଼ୁଜି ୱେଡ଼ିକା ଆତାର୍‌ ।
JOH 20:21 ଜିସୁ ୱାରିଙ୍ଗ୍‌ ମାରିଡ଼େସି ଇର୍ହାନ୍‌, “ମିଙ୍ଗିଁ ସାନ୍ତି ଆପିତ୍‌; ବୁବା ଏଣ୍ତେସ୍‌ୱାଜା ନାଙ୍ଗିଁ ପୋକ୍‌ତାତାମାନାନ୍‌, ନାନ୍ ବା ଆୟାୱାଜା ମିଙ୍ଗିଁ ପୋକ୍‌ତାତାମାନା ।”
JOH 20:22 ୱାନ୍‌ ଇକା ଇନ୍‌ଜି ୱାରି ମୁସ୍‌କୁ ନେଜ୍‌ଦେଙ୍ଗ୍‌ ଡ଼ିସ୍‌ତାନ୍‌ନୋ ୱାରିଙ୍ଗ୍‌ ଇର୍ହାନ୍‌, “ପବିତ୍ରଆତ୍ମାଦିଙ୍ଗ୍‌ ମାନାଦୁ ।
JOH 20:23 ମିର୍‌ ଜଦି ଏ ପାପ୍‌ କେମା କିନିଦେର୍‌, ୱାନି ପାପ୍‌ କେମା ଆନାତ୍‌, ମାରି, ଜଦି ଏ ପାପ୍‌ କେମା କିଇଦେର୍‌, ୱାନି ପାପ୍‌ କେମା ଆଏତ୍‍ ।”
JOH 20:24 ମାତର୍‌ ଜିସୁ ଏସ୍ତିୱାଲେ ୱାତାମାର୍ହାନ୍‌, ନାସ୍ତିୱାଲେ ବାରଲୋକା ଲୋଇରାନ୍‌ ତୋମା ଦର୍‌ତି ଅରେନ୍‍, ଆମାୱାନିଙ୍ଗ୍‌ “ଦିଦୁମ” ଇନାର୍‌, ୱାନ୍‌ ୱାରି ୱାଲେ ସିଲେତାନ୍‌ ।
JOH 20:25 ମାରି, ଆଇ ସିସୁର୍‍ ୱାନିଙ୍ଗ୍‌ ଇର୍ହାର୍‌, “ମାପ୍‌ ପ୍ରବୁଙ୍ଗ୍‌ ସୁଡ଼ୁତାମାନାପ୍‌ ।” ମାତର୍‌ ତୋମା ୱାରିଙ୍ଗ୍‌ ଇର୍ହାନ୍‌, “ୱାନି କିୟୁଦୁ କୁଟିଙ୍ଗ୍‌ଣି ସିନେଙ୍ଗ୍‌ ସୁଡ଼ୁଇତିଙ୍ଗ୍‌ ମାରି ଆୟାୱିଜୁ ବାଡିଦୁ ନା ଡ଼ାସ୍‌କେଙ୍ଗ୍‌ ସିଇତିଙ୍ଗ୍‌ ମାରି ୱାନି ପାଡ଼୍‌କାଦୁ ନା କିୟୁ ଇଡ୍‌ଇତିଙ୍ଗ୍‌ ନାନ୍ ମୁଡ଼ୁକେ ବିସ୍‌ବାସ୍‌ କିଏ ।”
JOH 20:26 ଆଟ୍‍ଦିନ୍‍ ୱେନ୍‌କା ୱାନି ସିସୁର୍‍ ମାରିଡ଼େସି ଲୋଇ ମାର୍ହାର୍‌ ମାରି ତୋମା ୱାରି ୱାଲେ ମାର୍ହାନ୍‌ । ସେର୍‍ଲେଙ୍ଗ୍‌ ୱିଜୁ କେର୍‌ତିମାର୍‌ଇ ବେଡ଼ାଦୁ ଜିସୁ ୱାଜି ନେଗି ନାଡ଼୍‌ମି ନିର୍‌ଆନ୍‌ନୋ ଇର୍ହାନ୍‌, “ମିଙ୍ଗିଁ ସାନ୍ତି ଆପିତ୍‌ ।”
JOH 20:27 ୱେନ୍‌କା ୱାନ୍‌ ତୋମାଦିଙ୍ଗ୍‌ ଇର୍ହାନ୍‌, “ଇବେନୁ ନି ଡ଼ାସ୍‌କେଙ୍ଗ୍‌ ମୁଟ୍‌ଆ ନା କିୟୁଦିଙ୍ଗ୍‌ ସୁଡ଼ୁଆ ମାରି ନା ପାଡ଼୍‌କାଦୁ ନି କିୟୁ ମୁଟ୍‌ଆ; ଅବିସ୍‍ବାସ୍‍ କିଏଣ୍‌ଗା ବିସ୍‌ବାସ୍‌ କିଆ ।”
JOH 20:28 ତୋମା ୱାନିଙ୍ଗ୍‌ ଇର୍ହାନ୍‌, “ନା ପ୍ରବୁ, ନା ମାପୁରୁ ।”
JOH 20:29 ଜିସୁ ୱାନିଙ୍ଗ୍‌ ଇର୍ହାନ୍‌, “ନିନ୍‌ ଇନିକା ନାଙ୍ଗିଁ ସୁଡ଼ୁତିଙ୍ଗ୍‌ ବିସ୍‌ବାସ୍‌ କିତିମାନି ? ମାତର୍‌ ଏର୍‌ ସୁଡ଼ୁଏଣ୍‌ଗା ବିସ୍‌ବାସ୍‌ କିତାମାନାର୍‌, ୱାର୍‌ ଦନ୍ୟ ।”
JOH 20:30 ଜିସୁ ସିସୁରି ଆଗ୍‌ଡ଼ି ଇୟାୱାଜା ଏସ ମାରି ଇନିଇନି ଜାତିଦି କାବାଆନି ପାଣି କିତାନ୍‌, ଆୟାୱିଜୁ ଇୟା ବଇଦୁ ରାସାଏତ୍‌;
JOH 20:31 ମାତର୍‌ ମିର୍‌ ଏଣ୍ତେସ୍‌ ବିସ୍‌ବାସ୍‌ କିଦୁ ଜେ, ଜିସୁ ମାପୁରୁଦି ମାରିନ୍‌ ମସିହ, ମାରି ବିସ୍‌ବାସ୍‌ କିଜ ଏଣ୍ତେସ୍‌ ମିର୍‌ ୱାନି ଦର୍‌ତାନ୍‌ ଜିବନ୍‌ ପୟ୍‌ଦୁ, ଇୟାଉଣ୍ତିଙ୍ଗ୍‌ ଇୟାୱିଜୁ ରସାତାମାନାତ୍‌ ।
JOH 21:1 ତାନେୱେନ୍‌କା ଜିସୁ ତିବିରିୟା ଗାଡା ପାଡ଼ି ସିସୁରିଙ୍ଗ୍‌ ମାରିଡ଼େସି ତର୍‌ୟାଆତାନ୍‌ । ୱାନ୍‌ ଇୟାୱାଜା ତର୍‌ୟାଆତାନ୍‌;
JOH 21:2 ସିମୋନ ପିତର୍‌, ତୋମା, ଏଙ୍ଗ୍‌ ଦିଦୁମ ଇନାର୍‌, ଗାଲିଲିଦି କାନାଦିକାନ୍‌ ନିତନିଏଲ୍‍, ଜେବଦିରି ମାରିସିର୍‌ ମାରି ୱାନି ସିସୁରି ମାଣ୍‌କୁ ମାରି ରିଏର୍‌ ଉନ୍‌ଡ୍ରେମାନୁ ମାର୍ହାର୍‌ ।
JOH 21:3 ସିମୋନ ପିତର୍‌ ୱାରିଙ୍ଗ୍‌ ଇର୍ହାନ୍‌, “ନାନ୍ ମିନ୍‌କୁ ଆସ୍‌ତେଙ୍ଗ୍‌ ସୋଲ୍‌ସିନା ।” ଆଇ ସିସୁର୍‍ ୱାନିଙ୍ଗ୍‌ ଇର୍ହାର୍‌, “ମାପ୍‌ ବା ନି ୱାଲେ ସନାପ୍‌ ।” ୱାର୍‌ ସୋସିସଲ୍‌ସି ଡଙ୍ଗାଁଦୁ ଏକ୍‌ତାର୍‌ ମାରି ଜାଡ଼ି ପକ୍‌ତାର୍‌ ମାତର୍‌ ଆୟା ନାଡ଼ା ଇନିକା ଆସ୍‌ତେଙ୍ଗ୍‌ ଆଟ୍‍ଏତାର୍‍ ।
JOH 21:4 ମାତର୍‌ ମାର୍‌ନାଣ୍ଡିଙ୍ଗ୍‌ ଉଟ୍‌ଲା ନାଡ଼ାକାଦେ ଜିସୁ ଏର୍‌ ପାଡ଼ି ନିର୍‌ଆଁମାର୍ହାନ୍‌; ମାତର୍‌ ୱାନ୍‌ ଜିସୁ ଇଜି ସିସୁର୍‍ ନେସ୍‌ଏତାର୍‌ ।
JOH 21:5 ଜିସୁ ୱାରିଙ୍ଗ୍‌ ଇର୍ହାନ୍‌, “କଡ଼ର୍‌ ମି ଲାକ୍‌ତୁ ଇନିକା ଉଣିକା ମାନାତ୍‌ ?” ୱାର୍‌ ୱାନିଙ୍ଗ୍‌ ଇର୍ହାର୍‌, “ସିଲେ ।”
JOH 21:6 ଜିସୁ ୱାରିଙ୍ଗ୍‌ ଇର୍ହାନ୍‌, “ଡଙ୍ଗାଁଦି ଉଣେରି ତରିନ୍‌ ଜାଡ଼ି ପୋକ୍‌ତୁ, ମାରି ମିର୍‌ ଏସ ଆସ୍‌ନିଦେର୍‌ ।” ଆବେଟ୍‌ ୱାର୍‌ ଜାଡ଼ି ପୋକ୍‌ତାର୍‌, ମାରି ଉଣା ମିନ୍‌କୁ ୱାତେ ଜେ, ୱାର୍‌ ଜାଡ଼ି ରେଲ୍‌ଦେଙ୍ଗ୍‌ ଆଟ୍‍ଏତାର୍‍ ।
JOH 21:7 ଆବେଟ୍‌ ଜିସୁ ଆମା ସିସୁଙ୍ଗୁଁ ଜିବନ୍‌ନୋଜି ମାର୍ହାନ୍‌, ୱାନ୍‌ ପିତରତିଙ୍ଗ୍‌ ଇର୍ହାନ୍‌, “ଇକାନ୍‌ ତୋ ପ୍ରବୁ ।” ସିମୋନ ପିତର୍‌ ଇକାନ୍‌ ତୋ ପ୍ରବୁ ଇଜି ୱେନ୍‌ଜି ଡୁମ୍‍ଡା ମେନ୍ଧଲ୍‍ ଆତିମାନିଙ୍ଗ୍‌ ନିଜେଦି ଆଙ୍ଗିଁ ଆରାଜି ଏର୍‌ତୁ ଗାତ୍‌ତାନ୍‍;
JOH 21:8 ମାତର୍‌ ଆଇ ସିସୁର୍‍ ମିନ୍‌କୁ ବର୍ତି ଆତିମାନି ଜାଡ଼ିଦିଙ୍ଗ୍‌ ରେଲ୍‌ଜି ରେଲ୍‌ଜି ଇସ୍ରି ଡଙ୍ଗାଁଦୁ ୱାତାର୍‌, ଇରିଙ୍ଗ୍‌ ୱାର୍‌ ପାଡ଼ିରାନ୍‌ ନାଣ୍ତ ଆକ ସିଲେତାର୍‌, କେବଲ୍‌ ଦୁଇସ ମୁରା ଆକ ମାର୍ହାନ୍‌ ।
JOH 21:9 ୱାର୍‌ ପାଡ଼ି ରେତାର୍‌ରୋ ଆବେନୁ ଡିବ୍‌କାଣି ସିସୁ, ମାରି ତାନି ମୁସ୍‌କୁ ୱେକ୍‌ତି ମିନ୍‌କୁ ମାରି ରୁଟି ଇଟ୍‌ତିମାରିକା ସୁଡ଼ୁତାର୍‌ ।
JOH 21:10 ଜିସୁ ୱାରିଙ୍ଗ୍‌ ଇର୍ହାନ୍‌, “ମିର୍‌ ଇଲେଇ ଏମେ ମିନ୍‌କୁ ଆସ୍‌ତିମାନିଦେର୍‌, ଆବେନୁ ଏସ ତାଗାଟ୍‌ ।”
JOH 21:11 ସିମୋନ ପିତର୍‌ ସୋଲ୍‌ସି ସଏ ପସାସ୍‌ତିନି ପେରି ପେରି ମିନ୍‌କୁ ବର୍ତି ଆତିମାନି ଜାଡ଼ିଦିଙ୍ଗ୍‌ ପାଡ଼ି ରେଲ୍‌ଜିତାତାନ୍‌; ମାରି ନିସା ମିନୁୱାତିଙ୍ଗ୍‌ବା ଜାଡ଼ି ତେଉଏତାତ୍‌ ।
JOH 21:12 ଜିସୁ ୱାରିଙ୍ଗ୍‌ ଇର୍ହାନ୍‌, “ୱାଜ ଉନ୍‌ଡ୍ରୁ ।” ସିସୁରି ମାଣ୍‌କୁ ଏନ୍‌ ନିନୁ ଇଜି ୱାନିଙ୍ଗ୍‌ ୱେନ୍‌ବାଦେଙ୍ଗ୍‌ ସାହାସ୍‌ କିଏଜିମାର୍ହାର୍‌, ଇରିଙ୍ଗ୍‌ ୱାନ୍‌ ଜେ ପ୍ରବୁ, ଇକା ୱାର୍‌ ନେସ୍‌ତାମାର୍ହାର୍‌ ।
JOH 21:13 ଜିସୁ ୱାଜି ରୁଟି ଅସି ୱାରିଙ୍ଗ୍‌ ସିତାନ୍‌, ମାରି ଆୟାୱାଜା ମିନ୍‌କୁ ବା ସିତାନ୍‌ ।
JOH 21:14 ସାତିୱାରି ମାଣ୍‌କୁ ଜିବନ୍‌ଆଜି ନିଙ୍ଗିଁତି ୱେନ୍‌କା ଜିସୁ ସିସୁରିଙ୍ଗ୍‌ ଇକା ମୁନ୍‌ଡ୍ରି ଦେବେଙ୍ଗ୍‌ ତର୍‌ୟାଆତାନ୍‌ ।
JOH 21:15 ୱାର୍‌ ଉଟି ୱେନ୍‌କା ଜିସୁ ସିମୋନ ପିତରତିଙ୍ଗ୍‌ ୱେନ୍‌ବାତାନ୍‌, “ଏ ଜୋହନତି ମାରିନ୍‌ ସିମୋନ, ନିନୁ ଇନିକା ନାଙ୍ଗିଁ ୱାରିମାଣ୍‌କୁ ନାଣ୍ତ ଜିବନ୍‌ନୋଜିନି ?” ୱାନ୍‌ ୱାନିଙ୍ଗ୍‌ ଇର୍ହାନ୍‌, “ହୁଁ, ପ୍ରବୁ,” ନାନ୍ ଜେ ନିଙ୍ଗିଁ ଜିବନ୍‌ନୋଜିନା, ଆକା ନିନ୍‌ ନେସ୍‌ନି । ଜିସୁ ୱାନିଙ୍ଗ୍‌ ଇର୍ହାନ୍‌, “ନା ମେଣ୍ତାପିଲେକାଙ୍ଗ୍‌ ସାରାକିଆ ।”
JOH 21:16 ଜିସୁ ମାରିଡ଼େସି ରୁଣ୍ତି ଦେବେଙ୍ଗ୍‌ ୱାନିଙ୍ଗ୍‌ ୱେନ୍‌ବାତାନ୍‌, “ଏ ଜୋହନତି ମାରିନ୍‌ ସିମୋନ, ନିନ୍‌ ଇନିକା ନାଙ୍ଗିଁ ଜିବନ୍‌ନୋଜିନି ?” ୱାନ୍‌ ୱାନିଙ୍ଗ୍‌ ଇର୍ହାନ୍‌, “ହୁଁ, ପ୍ରବୁ,” ନାନ୍ ଜେ ନିଙ୍ଗିଁ ଜିବନ୍‌ନୋଜିନା, ଆକା ନିନ୍‌ ନେସ୍‌ନି । ଜିସୁ ୱାନିଙ୍ଗ୍‌ ଇର୍ହାନ୍‌, “ନା ମେଣ୍ତେଆଙ୍ଗ୍‌ ନେଗେନ୍‌କିଜି ସାରାକିଆ ।”
JOH 21:17 ଜିସୁ ମୁନ୍‌ଡ୍ରି ଦେବେଙ୍ଗ୍‌ ୱାନିଙ୍ଗ୍‌ ୱେନ୍‌ବାତାନ୍‌, “ଏ ଜୋହନତି ମାରିନ୍‌ ସିମୋନ, ନିନ୍‌ ଇନିକା ନାଙ୍ଗିଁ ଜିବନ୍‌ନୋଜିନି ?” ନିନ୍‌ ଇନିକା ନାଙ୍ଗିଁ ଜିବନ୍‌ନୋଜିନି, ଇକା ଇନ୍‌ଜି ୱାନ୍‌ ମୁନ୍‌ଡ୍ରି ଦେବେଙ୍ଗ୍‌ ପିତରତିଙ୍ଗ୍‌ ୱେନ୍‌ବାନିଙ୍ଗିଁ ୱାନ୍‌ ଦୁଃକ୍‌ ଆଜି ୱାନିଙ୍ଗ୍‌ ଇର୍ହାନ୍‌, “ପ୍ରବୁ, ନିନ୍‌ ୱିଜୁ ବିସୟ୍‌ ନେସ୍‌ନି; ନାନ୍ ଜେ ନିଙ୍ଗିଁ ଜିବନ୍‌ନୋଜିନା, ଆକା ନିନ୍‌ ନେସ୍‌ନି ।” ଜିସୁ ୱାନିଙ୍ଗ୍‌ ଇର୍ହାନ୍‌, “ନା ମେଣ୍ତେଆଙ୍ଗ୍‌ ସାରାକିଆ ।
JOH 21:18 ସତ୍‌ ସତ୍‍ନେ ନାନ୍ ନିଙ୍ଗିଁ ୱେର୍‌ସିନା, ମୁରୁଲି ମାନିୱାଲେ ନିନ୍‌ ନିଜେଦି ଜୁକିଦୁ ଗାଟି ତରାଜ ଏମେ ତରିନ୍‌ ବଦା, ଆୟା ତରିନ୍‌ ବୁଲାଜିମାର୍‌ଇ, ମାତର୍‌ ଡକ୍ରା ଆତିଙ୍ଗ୍‌ ନିନ୍‌ ନିଜେଦି କିୟୁ ପେରିନି ମାରି ଆଇକାନ୍‍ ଅରେନ୍‍ ନି ଜୁକିଦୁ ଗାଟି ତର୍‌ନାନ୍‌ନୋ, ଏମେ ତରିନ୍‌ ନିଙ୍ଗିଁ ବଦା ସିଲେତ୍‍, ଆୟା ତରିନ୍‌ ନିଙ୍ଗିଁ ଅନାନ୍‍ ।”
JOH 21:19 ପିତର୍‌ ଏଣ୍ତେସ୍‌ୱାଜା ସାନିଦଣ୍ତୋତି ମାଣ୍‌କୁ ମାପୁରୁଙ୍ଗୁଁ ଦନ୍ୟବାଦ୍‌ କିନାନ୍‌, ଆବେଣି ମାଟା ସିଜି ୱାନ୍‌ ଇକା ଇର୍ହାନ୍‌ । ତାନେୱେନ୍‌କା ଜିସୁ ୱାନିଙ୍ଗ୍‌ ଇର୍ହାନ୍‌, “ନା ୱେନ୍‌କା ରାଆ ।”
JOH 21:20 ଜିସୁ ଏମେ ସିସୁଙ୍ଗୁଁ ଜିବନ୍‌ନୋଜି ମାର୍ହାନ୍‌ ମାରି ଏନ୍‌ବା ନାଡ଼ାରିବଜିଦି ବେଡ଼ାଦୁ ଜିସୁଦି ବକାପାଡ୍‌କାଦୁ ଗେକାତାନ୍‌ନୋ, “ପ୍ରବୁ, ନିଙ୍ଗିଁ ଏନ୍‌ ସାତ୍ରୁରି କିୟୁଦୁ ସର୍‌ପେ କିନାନ୍‌ ଇଜି ୱେନ୍‌ବାତା ମାର୍ହାନ୍‌, ଆୟା ସିସୁଙ୍ଗୁଁ ପିତର୍‌ ମାର୍‌ଜିବେସ୍‌ସି ୱେନ୍‌କା ୱାଜିମାରିକା ସୁଡ଼ୁତାନ୍‌ ।”
JOH 21:21 ପିତର୍‌ ୱାନିଙ୍ଗ୍‌ ସୁଡ଼ୁଜି ଜିସୁଙ୍ଗୁଁ ୱେନ୍‌ବାତାନ୍‌, “ପ୍ରବୁ, ଇୟାୱାନି ବିସୟ୍‌ତାନ୍‌ ଇନିକା ଇଜିନି ?”
JOH 21:22 ଜିସୁ ୱାନିଙ୍ଗ୍‌ ଇର୍ହାନ୍‌, “ନାନ୍ ମାରିଡ଼େସିୱାନି ସାନ୍ଦି ୱାନ୍‌ ଜିଜ ମାନିନ୍‌ ଇଜି ଜଦି ନାନ୍ ବଦା କିନା, ଆର୍‌ତିଙ୍ଗ୍‌ ଆବେଟ୍‌ ନିଙ୍ଗିଁ ଇନିକା ମାନାତ୍‌ ? ନିନୁ ନା ୱାଲେ ରାଆ ।”
JOH 21:23 ଆବେଟ୍‌ ଆୟା ସିସୁ ଜେ ସାଏନ୍‌, ତଡ଼ାନ୍‌କା ଲୋଇ ଇୟା ମାଟା ୱେଙ୍ଗିଁତାତ୍‌, ମାତର୍‌ ୱାନ୍‌ ସାଏନ୍‌ ଇଜି ଜିସୁ ୱାନିଙ୍ଗ୍‌ ଇନ୍‌ଏନ୍‌ ମାର୍ହାନ୍‌, ମାତର୍‌ ନାନ୍ ଡ଼େସିୱାନି ସାନ୍ଦି ୱାନ୍‌ ଜିଜ ମାନିନ୍‌ ଇଜି ଜଦି ନାନ୍ ବଦା କିନା, ଆର୍‌ତିଙ୍ଗ୍‌ ଆବେଟ୍‌ ମିଙ୍ଗିଁ ଇନିକା ମାନାତ୍‌ ଇଜି ୱେର୍‌ତାମାର୍ହାନ୍‌ ।
JOH 21:24 ଏନ୍‌ ଇୟାୱିଜୁ ବିସୟ୍‌ତି ସାକ୍ୟ ସିଜିନାନ୍‌ ମାରି ଇୟାୱିଜୁ ରାସ୍‌ତାମାନାନ୍‌, ୱାନ୍‌ ଆୟା ସିସୁ; ମାରି, ୱାନି ସାକୟ୍ ଜେ ସତ୍‌, ଆକା ମାପ୍‌ ନେସ୍‌ନାପ୍‌ ।
JOH 21:25 ମାରି, ଜିସୁ ମାରି ନାଣ୍ତ ପାଣି ବା କିତାମାର୍ହାନ୍‌, ଆୟାୱିଜୁ ଜଦି ଉନ୍‌ଡ୍ରି ଉନ୍‌ଡ୍ରି କିଜି ରାସାତିଙ୍ଗ୍‌ ମାନ୍ଦି, ଆର୍‌ତିଙ୍ଗ୍‌ ନିସ ବଇଙ୍ଗ୍‌ ରାସାତେ ମାନ୍ଦି ଜେ, ନା ବିସାର୍‌ତୁ ସାରାଦୁନିଆଦୁ ଆୟାୱିଜୁ ବଇଙ୍ଗ୍‌ ଇଡ୍‌ନି ଉଣ୍ତିଙ୍ଗ୍‌ ବାଡି ଆଏତାତ୍‌ମାନ୍ଦି ।
ACT 1:1 ଏ ଲାଡ୍‍ତି ତିୟପିଲ, ନା ପାର୍‌ତୁମ୍‌ ବଇଦୁ ଜିସୁ ୱାନି ପାଣି ଆରାମ୍‌ କିନି ଦିନ୍‍ତାନ୍‍ ଆମାୱିଜୁ ପାଣି କିତାମାର୍ହାନ୍‌ ମାରି ସିକିୟା ସିତାମାର୍ହାନ୍‍, ଆୟାୱିଜୁ ବିସୟ୍‌ତାନ୍‌ ରାସ୍‍ତାମାର୍ହା ।
ACT 1:2 ମୁସ୍‌କୁପୁର୍‌ ସନି ଆଗ୍‍ଡ଼ିନେ ଆମାୱାରିଙ୍ଗ୍‌ ୱାନ୍‌ ନିଜେଦି ସିସୁ ୱାଜା ଆସ୍‌କିତା ମାର୍ହାନ୍‌, ୱାରିଙ୍ଗ୍‌ ୱାନ୍‌ ପବିତ୍ରାଆତ୍ମାଦି ସାକ୍ତିଦାନ୍ ସିକିୟା ସିତାମାର୍ହାନ୍‌
ACT 1:3 ନାସ୍ତିୱାଲେ ୱାନ୍‌ ଜିବନ୍‌ ମାର୍ହାନ୍‌, ଇକା ପାରାମାଣ୍‌ କିନି ଉଣ୍ତିଙ୍ଗ୍‌ ମାରି ସିସୁର୍‍ ନାମ୍‌ଇକା ଆକ କିନି ଉଣ୍ତିଙ୍ଗ୍‌ ୱାନ୍‌ ୱାରି ସାତି ୱେନ୍‌କା ସାଲିସ୍‌ ଦିନ୍‌ ସାନ୍ଦି ଗାଦି ଦେବେଙ୍ଗ୍‌ ୱାରିଙ୍ଗ୍‌ ତରାୟା ଆତାମାର୍ହାନ୍‍ । ୱାର୍‌ ଜିସୁଙ୍ଗୁଁ ସୁଡ଼ୁତାମାର୍ହାର୍‌ ମାରି ଜିସୁ ୱାରିଙ୍ଗ୍‌ ମାପୁରୁଦି ରାଜି ବିସୟ୍‌ତାନ୍‌ ଇର୍ହାନ୍‌ ।
ACT 1:4 ୱାର୍‌ ଉନ୍‌ଡ୍ରେମାନୁ ମାନିୱାଲେ ଉଣିତିନିମାନୁ ଜିସୁ ୱାରିଙ୍ଗ୍‌ ଇୟା ମାଟା ସିତାନ୍‌ ଜିରୁସାଲାମ୍‌ ଡ଼ିସ୍‌ସୋ ସଲ୍‌ମାଟ୍‌ । ମୁସ୍‌କୁପୁର୍‌ତି ବୁବା ମିଙ୍ଗିଁ ଆମାକା ସିନାନ୍‌ ଇଜି ପାର୍‌ମାଣ୍‌ କିତାମାନାନ୍‌ ମାରି ଆମା ଦାନ୍‌ ବିସୟ୍‌ତାନ୍‌ ନାନ୍ ମିଙ୍ଗିଁ ୱେର୍‌ତାମାର୍‌ଆ, ଆକା ପଇନି ସାନ୍ଦି କାପ୍‌କିଦୁ ।
ACT 1:5 ଜୋହନ ଏର୍‌ତୁ ଡୁବନ୍‌ ସିତାନ୍‌, ମାତର୍‌ ଏସ ଉଣା ଦିନ୍‌ ୱେନ୍‌କା ମିର୍‌ ପବିତ୍ର ଆତ୍ମାଦୁ ଡୁବନ୍‌ ଆନିଦେର୍‌ ।
ACT 1:6 ଅର୍‍ଲେନ୍‍ ପ୍ରେରିତ ସିସୁର୍‍ ଉନ୍‌ଡ୍ରେମାନୁ ମାନିୱାଲେ ଜିସୁଙ୍ଗୁଁ ୱେନ୍‍ବାତାର୍‌, “ପ୍ରବୁ, ନିନ୍‌ ଇନିକା ଇଲେଇ ଇସ୍ରାଏଲରିଙ୍ଗ୍‌ ୱାରି ରାଜି ଡ଼େସି ସିନି ?”
ACT 1:7 ଜିସୁ ୱାରିଙ୍ଗ୍‌ ଇର୍ହାନ୍‌, “ୱେଡ଼ା ନି ଇଲେଇତିଙ୍ଗ୍‌ ନା ବୁବା ୱାନି ଆଡ୍‍ଗି କିଜି ଇଟ୍‌ତାମାନାନ୍‌ । ଇୟାୱିଜୁ ଏସ୍‌କାଙ୍ଗ୍‌ ଗଟାନାତ୍‌, ମିର୍‌ ନେସ୍‌ତେଙ୍ଗ୍‌ ଦର୍‌କାର୍‌ ସିଲେ ।
ACT 1:8 ମାତର୍‌ ମି ମୁସ୍‌କୁ ପବିତ୍ରଆତ୍ମା ରେତାତିଙ୍ଗ୍‌, ମିର୍‌ ସାକ୍ତିଦାନ୍ ପୁରା ଆନିଦେର୍‌ ମାରି ଜିରୁସାଲାମ୍‌, ସାରାୱିଜୁ ଜିହୁଦା ମାରି ସମିରୋଣ ମାରି ଦୁନିଆଦି ସାରାସାରିଇତି ସାନ୍ଦି ନା ଉଣ୍ତିଙ୍ଗ୍‌ ମିର୍‌ ସାକି ଆନିଦେର୍‌ ।”
ACT 1:9 ଇକା ୱେର୍‌ତି ୱେନ୍‌କା ଜିସୁଙ୍ଗୁଁ ମୁସ୍‌କୁପୁର୍‌ତୁ ସନିକା ୱାର୍‌ ସୁଡ଼ୁତାର୍‌ ମାରି କାଣ୍ତେକ୍‌ ବାଦ୍‍ଡ଼ତାନ୍‌ ୱାନ୍‌ ୱାରି କାଣାଗ୍‌ଦି ଆଗ୍‌ଡ଼ିରାନ୍‌ ସାୟାମାୟା ଆତାନ୍‌ ।
ACT 1:10 ୱାନ୍‌ ମୁସ୍‌କୁ ସୋରି ୱେନ୍‌କା ବା ୱାର୍‌ ତିର୍‌ତାନ୍‌ ସୁଡ଼ୁଜି ବାଦ୍‌ଡ଼ତିଙ୍ଗ୍‌ ବେସ୍‌ସି ତେବାତାମାର୍ହାର୍‌ । ଅଡ଼ିନିଆଙ୍ଗିଁ ଆରାତିକାର୍‌ ରିଏର୍‌ ଲୋକୁ ଆୟାଦାପ୍ରେନେ ୱାରି ଲାକ୍‌ତୁ ୱାଜି,
ACT 1:11 ନିର୍ହା ଇର୍ହାନ୍‌, “ଏ ଗାଲିଲିଦି ଲୋକୁ, ଏନ୍ଦା ଇବେନୁ ନିର୍‌ଦେର୍‌ନୋ ବାଦ୍‌ଡ଼ତିଙ୍ଗ୍‌ ବେସ୍‌ସିନିଦେର୍‌ ? ଏ ଜିସୁ ମି ଲାକ୍‌ତୁରାନ୍‌ ସୋଲ୍‌ସି ମୁସ୍‌କୁପୁର୍‌ତୁ ଅତାର୍‌ । ମାତର୍‌ ୱାନ୍‌ ଆମା ୱାଜା ମୁସ୍‌ପୁର୍‌ତୁ ସନିକା ମିର୍‌ ସୁଡ଼ୁତିଦେର୍‌, ଟିକ୍‌ ଆୟାୱାଜା ୱାନ୍‌ ମାରିଡ଼େସି ୱାନାନ୍‌ ।”
ACT 1:12 ତାନେୱେନ୍‌କା ପ୍ରେରିତ ସିସୁର୍‍ ଜିତ ଗରନ୍‌ତାନ୍‌ ଜିରୁସାଲମ୍‌ତୁ ଡ଼େସି ସୋର୍ହାର୍‌ । ଜିତ ଗରନ୍‌ ଗାଡ଼୍‌ତାନ୍‍ ଉନ୍‌ଡ୍ରେ କିଲମିଟର୍‌ ଆକ ମାର୍ହାତ୍‌ ।
ACT 1:13 ଗାଡ଼୍‌ତୁ ସୋଲ୍‌ସି ୱାର୍‌ ତେବାଜିମାର୍‌ଇ ମୁସ୍‌କୁରି ବାକ୍‌ରାଦୁ ଡ଼ୁଗିତାର୍‌ । ଆୟା ପ୍ରେରିତ ସିସୁର୍‍ ଆଜିନାର୍‌ ପିତର, ଜୋହନ, ଜାକୁବ, ଆନ୍ଦ୍ରିୟ, ପିଲିପ୍‌, ଥୋମା, ବାର୍ତଲମି, ମାତିଉ, ଆଲପିଦି ମାରିନ୍‌ ଜାକୁବ, ଦେସ୍‌ତିଙ୍ଗ୍‌ଜିବନ୍‌ନୋନି ସିମୋନ ମାରି ଜାକୁବଦି ମାରିନ୍‌ ଜିହୁଦା ।
ACT 1:14 ୱାର୍‌ ବେଡ଼ାବେଡ଼ାଦୁ ଉନ୍‌ଡ୍ରେ ଦଲ୍‌ ୱାଜା ପାର୍‌ତାନା କିଦେଙ୍ଗ୍‌ ଉନ୍‌ଡ୍ରେମାନୁ ଆଜିମାର୍ହାର୍‍ ମାରି ୱାରି ୱାଲେ ଜିସୁଦି ଆଇସି ମରିୟମ୍‌ ମାରି ଆଇ ଆଇମେକ୍‍ ମାରି ଜିସୁଦି ତଡ଼ାନ୍‌କୁ ବା ଉଣ୍ତାଜି ମାର୍ହାର୍‌ ।
ACT 1:15 ଏସ ଦିନ୍‌ ୱେନ୍‌କା ସଏକଡ଼େ ଲୋକୁ ବିସ୍‌ବାସ୍‌ତି ତଡ଼ାନ୍‌କା ଉନ୍‌ଡ୍ରି ପେରି ମିଟିଙ୍ଗ୍‌ତୁ ପିତର ନିଲ୍‌ତାନ୍‌ନୋ ଇର୍ହାନ୍‌
ACT 1:16 “ତଡ଼ାନ୍‌କୁ ନି ତାଙ୍ଗିଁକି, ଆମା ଜିହୁଦା ଜିସୁଙ୍ଗୁଁ ଆସ୍‌ତେଙ୍ଗ୍‌ ଇଜି ସାତ୍ରୁରିଙ୍ଗ୍ ସାରି ତର୍‌ସି ଅତାମାର୍ହାନ୍‌, ଆୟା ବିସୟ୍‌ତାନ୍‌ ଦାଉଦ ପବିତ୍ରଆତ୍ମାଦି ମାଣାନ୍‌ ସାଲାଜି ବବିସ୍ୟତ ମାଟା ୱେର୍‌ତା ମାର୍ହାନ୍‌ । ଦାର୍ମୁସାସ୍ତ୍ରଦୁ ରାସ୍‌ତି ଆୟା ମାଟା ପୁରା ଆଦେଙ୍ଗ୍‌ ସତ୍‌ ମାର୍ହାତ୍‌ ।
ACT 1:17 ମାରିବା ଜିହୁଦା ମା ଦଲ୍‌ତୁ ମାର୍ହାନ୍‌ ମାରି ମା ଅରେନ୍‌ ଅର୍‌ସେ ସେବା ପାଣି କିନି ଉଣ୍ତିଙ୍ଗ୍‌ ଆସ୍‌କିଆତା ମାର୍ହାନ୍‌ ।”
ACT 1:18 ୱାନି ତାଗ୍‌ଇ ପାଣି ଉଣ୍ତିଙ୍ଗ୍‌ ଜିହୁଦା ପୟ୍‌ତିମାନି ଡାବୁଣାଙ୍ଗ୍‌ ଉନ୍‌ଡ୍ରି ବୁମି କଡ଼ାୟା ଆତାମାର୍ହାତ୍‌ ମାରି ଆୟା ବୁମିଦୁ ମେଡ଼େତାନ୍‌ନୋ ୱାନ୍‌ ସାତାନ୍‌ । ୱାନି ପଟା ପାଡିଜି ସୋଲ୍‌ସି ୱାସ୍‌କିଙ୍ଗ୍‌ ସତେ ସର୍‌ଏ ।
ACT 1:19 ଜିରୁସାଲାମ୍‌ତି ଗାଡ଼୍‌ତୁ ମାନି ୱିଜୁ ଲୋକୁ ଇୟାୱିଜୁ ନେସ୍‌ତେଙ୍ଗ୍‌ ଆଟ୍‌ସି ୱାରି ବାସାଦାନ୍‌ ଆୟା ବୁମିଦି ଦରୁ “ଆକେଲ ଦାମା” ଅର୍ତାତ୍‍ “ନେତେର୍‌ ତି କିଡ଼ିଇ” ଇଜି ଇଟ୍‌ତାମାନାର୍‌ ।
ACT 1:20 ଇୟା ବିସୟ୍‌ତାନ୍‌ ଗିତସଂହିତା ବଇଦୁ ରାସାତାମାନାତ୍‌ “ୱାନି ଇଲୁ ସିମ୍ରା ଆପିତ୍‌, ଆବେନୁ ଏନ୍‌ ତେବାମାକିର୍‌, ମାରି ବା ରାସାତାମାନାତ୍‌; ଆଇକାନ୍‍ ଅରେନ୍‌ ୱାନି ପାଣିଦୁ ରାପିନ୍‌ ।”
ACT 1:21 “ମାରି ପ୍ରବୁ ଜିସୁଦି ଡ଼େସିନିଙ୍ଗିଁନି ବିସୟ୍‌ତାନ୍‌ ସାକି ଆଦେଙ୍ଗ୍‌ ଇଜି ମାରି ଅରେନ୍‌ ମା ୱାଲେ ମିସାନିକା ଦର୍‌କାର୍‌ ।
ACT 1:22 ଜିସୁ ଜୋହନତି ମାଣାନ୍‌ ଡୁବନ୍‌ ଅତି ସମୟ୍‍ତାନ୍ ମୁସ୍‌କୁ ସନି ସାନ୍ଧି ୱିଜୁ ୱାଲେ ପ୍ରବୁ ଜିସୁ ମା ୱାଲେ ବୁଲାସାଲା କିନିୱାଲେ, ଏମେ ଲୋକୁ ମା, ଦଲ୍‌ତୁ ମାର୍ହାର୍‌ ଅରେନ୍ ୱାନିଙ୍ଗ୍‌ ଆସ୍‍କିଦେଙ୍ଗ୍‌ ଆନାତ୍‌ ଏମେ ଲୋକୁ ମା ଦଲ୍‍ତୁ ମାର୍ହାର୍‌, ୱାରି ଲୋଇରାନ୍‌ ଅରେନ୍‌ୱାନିଙ୍ଗ୍‌ ମାରିଡ଼େସି ଇୟାଉଣ୍ତିଙ୍ଗ୍‌ ଆସ୍‌କିଦେଙ୍ଗ୍‍ ଆନାତ୍‌ ।”
ACT 1:23 ୱାର୍‌ ରିଏରି ଦରୁ ୱେର୍‌ତାର୍‌ ଜୋସେପ୍‌ ଏନ୍‌ ବର୍ସବା ମାରି ଜୁସ୍ତସ୍‍ ଇଜି ବା ଇନାର୍‌ ମାରି ମତିୟ ।
ACT 1:24 ମାରି ପାର୍‌ତନା କିତାର୍‍, “ପ୍ରବୁ, ନିନ୍‌ ୱିଜୁ ସିନ୍ତା ନେସ୍‌ନି । ଇୟା ରିଏରି ଲୋଇ ଏଙ୍ଗ୍‍ଁ ବାସେକିତିମାନି,
ACT 1:25 ଇୟା ବେକ୍ତି ଜିହୁଦା ନିଜେଦିବାଡିଦୁ ସନି ଉଣ୍ତିଙ୍ଗ୍‌ ଇୟା ଏମେ ସେବା ମାରି ପେରିତ ସିସୁ ପାଣି କିନାନ୍ ।”
ACT 1:26 ତାନିୱେନ୍‍କା ରିଏରି ଲୋଇ ଅରେନ୍‌ୱାନିଙ୍ଗ୍‌ ବାସ୍‍କିଦେଙ୍ଗ୍‍ କୁଡ଼ୁକୁଡ଼ି ପକ୍‌ତାର୍‌ । ମାରି ମତିୟଦି ଦର୍‌ତାନ୍‌ କୁଡ଼ୁକୁଡ଼ି ସତାତ୍‍; ଆବେଟ୍‌ ୱାନ୍‌ ଏଗାର୍‍ ଲୋକୁ ସିସୁରି ୱାଲେ ମିସାତାନ୍‍ ।
ACT 2:1 ପେଣ୍ଟିକଷ୍ଟ ପଣ୍ତତି ନାଣ୍ଡିଙ୍ଗ୍ କ୍ରିସ୍ଟାନ୍‍ ଲୋକୁ ୱିଜେରେ ଉଣ୍ତ୍ରେ ବାଡିଦୁ ଉଣ୍ତାତା ମାର୍ହାର୍‌ ।
ACT 2:2 ଆୟାଦାପ୍ରେନେ ନାଣ୍ତ ଗାଲି ୱାନି ଆଉଲି ୱାଜା ବାଦଡ଼୍‍ତାନ୍‍ ଉଣ୍ତ୍ରି ବାଦଡ଼ତାନ୍‌ ଆଉଲି ଆତାତ୍‌ ମାରି ଏମେ ଇଲ୍‌ତୁ ୱାର୍‌ ବାସ୍‍ତାମାର୍ହାର୍‍, ଆକା ଆୟା ଆଉଲିଦାନ୍‍ ପୁରା ଆତାତ୍‌ ।
ACT 2:3 ତାନିୱେନ୍‍କା ୱାର୍‌ ସୁଡ଼ୁତାର୍‌, ଏସୋ ସିସୁ ୱେତଲ୍‍ ସାର୍‍ଜି ଆବେ ମାର୍ହି ୱିଜେରିଙ୍ଗ୍‍ ମୁଟ୍‍ତାତ୍‍ ।
ACT 2:4 ୱାର୍‌ ୱିଜେରେ ପବିତ୍ର ଆତ୍ମାଦୁ ପୁରା ଆତାର୍‌ ମାରି ଆତ୍ମାଦାନ୍‌ ସାଲାଜି ଆଇ ଆଇ ବାସାଦାନ୍‍ ମାଟା ଇଣ୍ତ୍ରେଙ୍ଗ୍‌ ଆସ୍‌ତାର୍‌ ।
ACT 2:5 ଦୁନିଆଦି ୱିଜୁ ଦେସ୍‍ତାନ୍‍ ୱାତିମାନି ଜିହୁଦି ଦାର୍ମୁ ଲୋକୁ ୱିଜେରେ ଜିରୁସାଲାମ୍‍ତୁ ଉଣ୍ତାତା ମାର୍ହାର୍‌ ।
ACT 2:6 କୁଟୁମ୍‍ତୁ ଆଜିମାନି ଆଉଲି ୱେନ୍‌ଜି, ନାଣ୍ତ ଲୋକ୍‌ ଆବେ ଉଣ୍ତାତାର୍‌ । କ୍ରିସ୍ତ ବିସ୍‍ବାସ୍‍ସିର୍‍ ଆବେ ଉଣ୍ତାତିମାନି ୱିଜେରି ବାସାଦାନ୍‍ ମାଟା ଇଜିମାନିକା ୱେନ୍‌ଜି ୱାରି ମନ୍‌ତୁ କାବାନିକା ୱାତାତ୍‌ ।
ACT 2:7 ମାରି, ୱାର୍‌ କାବାଆଜି ମାରି ବେମ୍‍ରିଆଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, “ଇୟାୱାଜା ୱାର୍‍ଗିଜିମାନି ଇୟା ଲୋକୁ ଇନିକା ଗାଲିଲିୟତିକାର୍‍ ଆଏର୍‌ ?
ACT 2:8 ଆରିଙ୍ଗ୍‌ ମାଡ୍‌ ୱିଜୁ ଏଣ୍ତେସ୍‌ ୱାରିଙ୍ଗ୍‌ ମା ନିଜେଦି ଜନମ୍‌ତି ବାସାଦାନ୍‍ ୱାର୍‍ଗିଜିମାନିକା ୱେନ୍‍ଜିନାପ୍‍ ?
ACT 2:9 ମାଡ୍‌ ପାର୍ତିୟ, ମାଦିୟ ମାରି ଏଲାମିୟ, ମାରି ମେସପଟାମିଆ, ଜିହୁଦା ଦେସ୍‌ ମାରି କାପ୍‍ପାଦକିଆ, ପନ୍ତ ମାରି ଆସିଆ,
ACT 2:10 ପ୍ରୁଗିଆ ମାରି ପାମ୍ଫିଲିଆ, ମିସର୍‍ ମାରି କୁରିଣି ଲାକ୍‌ତୁରି ଲିବିୟା ରାଜିଦୁମାନିକାର୍‍ । ମାବାଣ୍‍କୁ ଏସୋ ଲୋକୁ ରୋମ୍‍ତାନ୍‍ ୱାତିମାନି ଜିହୁଦିର୍‌
ACT 2:11 ମାରି ଜିହୁଦି ଦାର୍ମୁ ଆତିମାର୍‍ଇ ଲୋକୁ; ମାରି ଏସୋ କ୍ରିତି ନି ଆରବିୟ ଦେସ୍‌ତି ଲୋକୁ । ମାରିବା ମାପୁରୁ ଏମେ କାବାଆନି ବିସୟ୍‌ ୱିଜୁ କିତାମାନାନ୍‍, ଆୟା ବିସୟ୍‌ତାନ୍‌ ମାପ୍‌ ୱିଜେରେ ୱାରିମାଣ୍‌କୁ ମା ନିଜେ ନିଜେଦି ବାସାଦାନ୍‍ ୱେନ୍‍ଡ୍ରେଙ୍ଗ୍‍ ଆଟ୍‍ସିନାପ୍‍ ।”
ACT 2:12 କାବାନି ବେମ୍‍ରିଆଜି ୱାର୍‌ ନିଜେ ନିଜେଦିମାନୁ ୱେନ୍‍ବାଦେଙ୍ଗ୍‍ ଆସ୍‌ତାର୍‌, “ତେନି ଅର୍ତ ଇନିକା ?”
ACT 2:13 ମାତର୍‌ ଆଇକାର୍‌ ବିସ୍‍ବାସିରିଙ୍ଗ୍‍ ୱେକ୍‍ରିସ୍‍ କିଜି ଇର୍ହାର୍‌, “ଇୟା ଲୋକୁ ଅଙ୍ଗୁର୍‌ରସ୍‌ ଉଣୁଜି ସସ୍‍ତା ମାନାର୍‌ ।”
ACT 2:14 ତାନିୱେନ୍‍କା ଆଇ ଏଗାର୍‍ ଲୋକୁ ପ୍ରେରିତ ସିସୁରି ୱାଲେ ପିତର୍‌ ନିଙ୍ଗ୍‍ଜି ନାଣ୍ତ ଆଉଲି ଆଜି ଇର୍ହାନ୍‌, ଏ ଜିହୁଦି ତଡ଼ାନ୍‌କୁ ତାଙ୍ଗିଁକ୍‌ ମାରି ଜିରୁସାଲାମ୍‍ତୁ ବାସାତିମାନି ମଣ୍ତଲି, ନା ମାଟା ନେଗେନ୍‌ତାନ୍‌ ୱେନ୍‌ଡ୍ରୁ, ନାନ୍ ଇୟା ବିସୟ୍‌ତାନ୍‌ ବୁଜାକିଜି ଇନା ।
ACT 2:15 ମିର୍‌ ଅଡ଼୍‌ବିଜିନିଦେର୍‌, ଇୟାକାର୍‌ ସହସ୍‍ତିକାର୍‍ । ସିଲେ, ଇୟାକାର୍‌ ସହସ୍‍ତିକାର୍‍ ଆଏର୍‌ । ଇରିଙ୍ଗ୍‌ ଇଲେଇ ୱେଡ଼ା ସାଲ୍‍ଦି ନୋ ଗଣ୍ଟା ।
ACT 2:16 ମାତର୍‌ ବାବବାଦି ଜୟେଲ୍‍ ଏମେ ଗଟାନା ବିସୟ୍‌ତାନ୍‌ ବବିସତ୍‍ବାଣି ଇର୍ହାମାର୍ହାନ୍, ଆକା ଆୟାୱାଜା ଉନ୍‌ଡ୍ରି ଗଟନା;
ACT 2:17 ମାପୁରୁ ଇନାନ୍‌; ୱିଜ୍‍ନି ଦିନ୍‍କାଙ୍ଗ୍‍ଁ ଇକା ୱିଜୁ ଗଟାନାତ୍‌, ନାନ୍ ୱିଜେରି ମୁସ୍‌କୁ ନା ଆତ୍ମା ୱାକ୍‌ନା ସିନା । ମି କଡ଼ର୍‌ ନି ଆଇଲିକ୍‌ ବାବବାଦି କିନାର୍‌ । ମି ମୁରୁଲିର୍‍ ଦର୍ସନ ସୁଣାର୍‍, ମାରି ନେତାର୍‍ ଲବେର୍‍ ସୁଣାର୍‍ ।
ACT 2:18 ହୁଁ ନା ଦାସ୍‍କୁ ଅର୍‌ସେ ମେମାରି ନି ଆଇମେକା ମୁସ୍‌କୁ, ଆୟା ଦିନ୍‍ତୁ ନା ଆତ୍ମା ୱାକ୍‍ନା ସିନା, ମାରି ୱାର୍‌ ନା ବାକ୍ୟ ୱେର୍‌ନାର୍‌ ।
ACT 2:19 ନାନ୍ ବାଦଡ଼୍‍ ମୁସ୍‌କୁ କାବାଆନି ପାଣି ମାରି ଆଡ୍‍ଗିରି ଦୁନିଆଦୁ କାବାଆନି ପାଣିତର୍‍ନା । ନେତେର୍‌, ସିସୁ ମାରି ନାଣ୍ତ ଗଇଦାନ୍‌ ଦୁନିଆ ବର୍ତି ଆନାତ୍‌;
ACT 2:20 ପ୍ରବୁଦି ପେରି ଗୌରବ୍‍ ଦିନ୍‍ତି ୱାନି ଆଗ୍‌ଡ଼ି ୱେଡ଼ା ସିକାଟି ଆନାତ୍‌ ମାରି ଲେଞ୍ଜୁ ନେତେର୍‌ ୱାଜା ଆନାତ୍‌ ।
ACT 2:21 ନାସ୍ତିୱାଲେ ଏନ୍‌ ପ୍ରବୁଦି ଦର୍‌ତାନ୍‌ ପାର୍‌ତନା କିନାନ୍‌, ୱାନ୍‌ ରକିୟା ପୟ୍‌ନାନ୍‌ ।
ACT 2:22 ଏ ଇସ୍ରାଏଲ୍‌ତି ଲୋକୁ, ଇୟାୱିଜୁ ମାଟା ୱେନ୍‌ଡ୍ରୁ ! ନାଣ୍ତ ସାକ୍ତିଦି ପାଣି ମାରି କାବାନି ସିନା ଦାନ୍‌ ନାଜରିୟତିୟ ଜିସୁ ଜେ ମାପୁରୁ ପକ୍‍ତିକାନ୍ ଇଜି ପାର୍‍ମାଣ୍‍ କିଆୟ୍‍ ଆତାମାନାନ୍‍ ମାରି ମାପୁରୁ ସାକ୍ତି ପୁରାକିତିକାନ୍‍, ଇକା ମି ଲାକ୍‌ତୁ ସତ୍‌ ଆତାମାନାତ୍‌ । ମି ଲୋଇ ଇୟା ଇୟାୱିଜୁ ଗଟନା ଗଟାତାତ୍‍, ଆଦେଙ୍ଗ୍‌ ଇୟା ବିସୟ୍‌ତାନ୍‌ ମିର୍‌ ନେଗେନ୍‍କିଜି ନେସ୍‌ତିମାନିଦେର୍‌ ।
ACT 2:23 ମାପୁରୁ ୱାନି ଉପାୟ୍‌ ଇସାବ୍‌ତାନ୍‌ ଜିସୁଙ୍ଗୁଁ ମି କିୟୁଦୁ ସର୍ପେ କିଦେଙ୍ଗ୍‌ ତିର୍‍ କିତାମାର୍ହାନ୍‌ । ମାରି ମିର୍‌ ୱାନିଙ୍ଗ୍‌ ପାପିଲୋକା ମାଣାନ୍‌ କ୍ରୁସଦୁ ଏକିସ୍‍କିଜି ଡାକ୍‍ତି ମାର୍‌ଇଦେର୍‌ ।
ACT 2:24 ମାତର୍‌ ମାପୁରୁ ୱାନିଙ୍ଗ୍‌ ସାନି ମାଣ୍‌କୁ ଡ଼ିସିସ୍‍କିଜି ମାରିଡ଼େସି ନିକ୍‍ତାନ୍‍, ଇରିଙ୍ଗ୍‌ ୱାନ୍‌ ସାତି ମାନୁ ତରାୟ୍‍ଆଜି ତେବାନିକା ଅସମ୍ଭବ ।
ACT 2:25 ଦାଉଦ ୱାନି ବିସୟ୍‌ତାନ୍‌ ଇନାନ୍‌, “ୱିଜୁ ସମୟ୍‍ତୁ ନାନ୍ ପ୍ରବୁଙ୍ଗୁଁ ନା ଆଗ୍‌ଡ଼ି ସୁଡ଼ୁତାମାନା, ୱାନ୍‌ ନା ତରିନ୍‌ ତେବାତାମାନାନ୍‌ । ଏନ୍‌ ନାଙ୍ଗିଁ ତିଲିସ୍‌ କିଦେଙ୍ଗ୍‌ ଆଟ୍‌ଏନ୍‌ ।”
ACT 2:26 ଆଦେଙ୍ଗ୍‌ ନା ଜିବନ୍‌ ୱେଡ଼ିକାଦୁ ପୁରାଆତାମାନା, ନା ୱେତଲ ୱେଡ଼ିକାଆଜି ନିଙ୍ଗିଁଜିନାତ୍‍ । ମାରିବା ନାନ୍ ସାନିକିନ୍ଦା, ନା ପୁରା ମେନ୍ଦଲ୍‌ ଆସାଦୁ ତିର୍‌ତେବାନା,
ACT 2:27 ଇରିଙ୍ଗ୍‌ ନିନ୍‌ ନାଙ୍ଗିଁ ସାନି ଦୁନିଆଦୁ ଡ଼ିସ୍‍ଇ; ନିନ୍‌ ନି ବିସ୍‍ବାସ୍‍ତି ଦାସ୍‍ତିଙ୍ଗ୍‍ ଦୁକିଗୁଟା ଲୋଇ ସାବ୍‍ଦେଙ୍ଗ୍‍ ଇଜି ଡ଼ିସ୍‌ସୋ ସିଇ ।
ACT 2:28 ନିନ୍‌ ନାଙ୍ଗିଁ ଜିବନ୍‌ତି ସାରି ତର୍‍ତିମାନି ମାରି ନି ଲାକ୍‍ତୁତେବାନିକା ନାଙ୍ଗିଁ ୱେଡ଼ିକାଦୁ ପୁରାକିନାତ୍‍ ।
ACT 2:29 ଏ ନା ଇସ୍ରାଏଲତି ତଡ଼ାନ୍‌କୁ ନି ତାଙ୍ଗିଁକ୍‍, ବୁଜାନିୱାଜା ନାନ୍ ମିଙ୍ଗିଁ ମା ଡକ୍ରାଦାଦା ରାଜା ଦାଉଦତି ବିସୟ୍‌ତାନ୍‌ ଏସ ଇନ୍‌ଡ୍ରେଙ୍ଗ୍‌ ଦର୍‌କାର୍‌ ମାନାତ୍‌ ଇଜି ଅଡ଼୍‌ବିଜିନା । ୱାନ୍‌ ସିତିଙ୍ଗ୍‌ ମୁସ୍‌ତାର୍‌, ମାରି ୱାନି ଦୁକିଗୁଟା ନେର୍‌ ସାନ୍ଦି ଇବେ ମା ଲୋଇ ମାନାତ୍‌ ।
ACT 2:30 ୱାନ୍‌ ଅରେନ୍‌ ବାବବାଦି ମାର୍ହାନ୍‍, ଆଦେଙ୍ଗ୍‌ ୱାନି ଉଣ୍ତିଙ୍ଗ୍‌ ମାପୁରୁଦି ଜିଦ୍‌ ମାଟା ନେସ୍‍ତାମାର୍ହାନ୍‍ । ଦାଉଦତି କୁଟୁମ୍‌ତି ଲୋଇ ଅରେନ୍‌ ୱାନିଙ୍ଗ୍‌ ରାଜା କିନାନ୍‌ ଇଜି ମାପୁରୁ ପାର୍‌ମାଣ୍‌ କିତାମାର୍ହାନ୍‌ ।
ACT 2:31 ମାପୁରୁ ୱାନିଦିନ୍‍ତୁ ଇନିକା କିଦେଙ୍ଗ୍‌ ସଲ୍‌ସିନାନ୍‌, ଦାଉଦ ଆକା ନେସ୍‌ସି, କ୍ରିସ୍ତ ଅର୍ତାତ୍‍ ମସିହଦି ମାରିଡ଼େସି ନିଙ୍ଗିଁନି ବିସୟ୍‌ତାନ୍‌ ଇର୍ହାମାନାନ୍‌; ୱାନ୍‌ ସାନି ଦୁନିଆଦୁ ଡ଼ିସାୟ୍‍ ଆଏତାନ୍‍ । ୱାନି ମେନ୍ଧଲ୍‍ ଦୁକିଗୁଟା ଲୋଇ ସାବ୍‍ଏତାତ୍‍ ।
ACT 2:32 ମାପୁରୁ ଇୟା ଜିସୁଙ୍ଗୁଁ ସାତିମାଣାନ୍‌ ମାରିଡ଼େସି ନିକ୍‍ତାମାନାନ୍‍ । ମାପ୍‌ ୱିଜେରେ ତେନି ସାକି ।
ACT 2:33 ଜିସୁ ୱାନି ବୁବା ମାପୁରୁଦି ଉଣେରି ତରିନ୍‌ ପେରାୟ୍‍ ଆତାମାନାନ୍‌ ମାରି ବୁବାଦି ଜିଦ୍‌ ଇସାବ୍‌ତାନ୍‌ ୱାନିମାଣ୍‌କୁ ପବିତ୍ର ଆତ୍ମା ପୟ୍‌ତାମାନାନ୍‌ । ଇଲେଇ ମିର୍‌ ଆମାକା ସୁଡ଼ୁଜିନିଦେର୍‍ ମାରି ୱେନ୍‌ଜିନିଦେର୍‌, ଆକା ୱାନି ଦାନ୍‌ । ଆକା ୱାନ୍‌ ମା ମୁସ୍‌କୁ ୱାକ୍‍ତା ସିତାମାନାନ୍‌ ।
ACT 2:34 ଦାଉଦ ନିଜେ ମୁସ୍‌କୁପୁର୍‌ତୁ ସଲ୍‍ଏନ୍‍ ମାର୍ହାନ୍‍, ମାତର୍‌ ୱାନ୍‌ ଇର୍ହାନ୍‌, ପ୍ରବୁ ନା ପ୍ରବୁଙ୍ଗୁଁ ଇର୍ହାନ୍‌,
ACT 2:35 ନାନ୍ ନି ସାତ୍ରୁରିଙ୍ଗ୍ ନି ପାଦାମ୍‌ ଆଡ୍‍ଗି କିଇ ସାନ୍ଦି । ନା ଉଣେରି ତରିନ୍‌ ବାସ୍‌ସ ମାନ୍‌ଆ ।
ACT 2:36 “ମାରି ଇସ୍ରାଏଲ୍‌ତି ଲୋକୁ ୱିଜେରେ ସତ୍‍ତାନ୍‍ ନେସିର୍‍ ଜେ, ଇୟା ଏମେ ଜିସୁଙ୍ଗୁଁ ମିର୍‌ କ୍ରୁସଦୁ ଏକିସ୍‍ କିତିଦେର୍‍, ମାପୁରୁ ୱାନିଙ୍ଗ୍‌ ନେ ପ୍ରବୁ ନି କ୍ରିସ୍ତ ଅର୍ତାତ୍‍ ମସିହ କିତାମାନାନ୍‍ ।”
ACT 2:37 ଇୟାୱିଜୁ ମାଟା ୱେନ୍‌ଜି ୱାରି ଜିବନ୍‌ ନାଣ୍ତ କିଲିବିଲି ଆତାତ୍‌ ମାରି ପିତର୍‌ ନି ଆଇ ପ୍ରେରିତ ସିସୁରିଙ୍ଗ୍‌ ୱେନ୍‌ବାତାର୍‌, “ତଡ଼ାନ୍‌କୁ ମାପ୍‌ ଇନିକା କିନାପ୍‍ ?”
ACT 2:38 ପିତର ୱାରିଙ୍ଗ୍‌ ଇର୍ହାନ୍‌, “ମିର୍‌ ୱିଜେରେ ପାପ୍‌ତାନ୍‌ ଡ଼େସିୱାଜି ମି ପାପ୍‌ କେମା ଆନି ଉଣ୍ତିଙ୍ଗ୍‌ ଜିସୁ କ୍ରିସ୍ତଦି ଦର୍‌ତାନ୍‌ ଡୁବନ୍‌ ଅତୁ; ଆର୍‌ତିଙ୍ଗ୍‌ ମିର୍‌ ମାପୁରୁଦି ଦାନ୍‌ ପବିତ୍ର ଆତ୍ମା ପୟ୍‌ନିଦେର୍‌ ।
ACT 2:39 ଇରିଙ୍ଗ୍‌ ମାପୁରୁଦି ପାର୍‌ମାଣ୍‌ ମି ଉଣ୍ତିଙ୍ଗ୍‌, ମି କଡ଼ରି ଉଣ୍ତିଙ୍ଗ୍‌ ମାରି ପ୍ରବୁ, ମାପୁରୁଦି ମାଣାନ୍‌ କୁକାୟ୍‍ଆତି ଆକ ତେବାଜିମାନି ୱିଜେରି ଉଣ୍ତିଙ୍ଗ୍‌ ଟିକ୍‌ ।”
ACT 2:40 ପିତର ୱାରିଙ୍ଗ୍‍ ମାଡ଼ିସ୍‍କିଜି ମାରି ନାଣ୍ତ ମାଟେଣାନ୍‍ ୱାରିଙ୍ଗ୍‌ ସାକି ସିଜି ଇର୍ହାନ୍‌, “ଇୟା ତାଗ୍‌ଇ ଲୋକା ମୁସ୍‍କୁ ୱାନି ସାସ୍ତିଦାନ୍‍ ନିଜେ ନିଜେଦିଙ୍ଗ୍‍ ରକିୟା କିଦୁ ।”
ACT 2:41 ୱାରି ଲୋଇ ନାଣ୍ତ ଲୋକୁ ୱାନି ମାଟାଦୁ ବିସ୍‌ବାସ୍‌ କିଜି ଡୁବନ୍‌ ଅତାର୍‌ । ଆୟା ନାଣ୍ତିଙ୍ଗ୍ ତିନି ହାଜାର୍‌ ଲୋକୁ ଦଲ୍‍ତୁ ମିସାତାର୍‍ ।
ACT 2:42 ଆୟାନାଣ୍ତିରାନ୍‍ ସିସୁର୍‍ ୱାରିଙ୍ଗ୍‌ ସିକିୟା ସିତାର୍‍ । ମାରି ୱାର୍‌ ମିସାବିଡ଼୍‍ ଆତାର୍‌, ରୁଟି ରୁକ୍‌ତେଙ୍ଗ୍‍ ମାରି ପାର୍‌ତାନା କିଦେଙ୍ଗ୍‌ ମୋନ୍‌ସିଜି ତେବାତାର୍‍ ।
ACT 2:43 ପ୍ରେରିତ ସିସୁର୍‍ ନାଣ୍ତ କାବାଆନି ସିନେଙ୍ଗ୍‍ ମାରି କାବାଆନି ବିସୟ୍‌ କିତାନ୍‌ । ମାରି ୱିଜେରେ ଆବେନୁ ତିଲାତା ସର୍ହାର୍‍ ।
ACT 2:44 ବିସ୍‍ବାସ୍‍ସିର୍‍ ଆପ୍‍ଣା ଆପ୍‍ଣାଦି ୱାଲେ ଉନ୍‍ଡ୍ରେମାନୁ ମିସାତାର୍‍ ମାରି ମିସାଜି ୱାରି ୱିଜୁ ଦନ୍‌ ସିଜିସାଜି ଆତାର୍‌ ।
ACT 2:45 ୱାର୍‌ ଆପ୍‍ଣା ଆପ୍‍ଣାଦି ମାନି ଦନ୍‌ତିଙ୍ଗ୍‍ ପର୍‌ଜି, ଡାବୁଙ୍ଗୁଁ ୱିଜେରି ଦର୍‌କାର୍‌ ଇସାବ୍‌ତାନ୍‌ ନିଜେନିଜେ ଲୋଇ ବାଟା କିତାର୍‍ ।
ACT 2:46 ୱାର୍‌ ୱିଜୁଦିନ୍‌ ପାର୍‍ତନାକିନି ମନ୍ଦିର୍‌ତୁ ଉନ୍‍ଡ୍ରେ ଦଲ୍‌ ୱାଜା ଉଣ୍ତାଜି ମାର୍ହାର୍‌ ମାରି ଇଲ୍‌କାଙ୍ଗ୍‌ ଇଲ୍‌କାଙ୍ଗ୍‌ ରୁଟି ରୁକ୍‍ସି ୱେଡ଼ିକା ମନ୍‍ତାନ୍‍ ମାରି ନେଗି ଜିବନ୍‌ତାନ୍‌ ଉଣିତିନିକା କିଜି,
ACT 2:47 ମାପୁରୁଦି ଦନ୍ୟବାଦ୍‌ କିଜି ୱିଜେରେ ଲୋକା ୱାଲେ ନେଗି ୱେଡ଼ିକା କିତାର୍‍ । ମାରି ପ୍ରବୁ ରକିୟା ପୟ୍‌ନି ଲୋକାଙ୍ଗ୍‌ ୱିଜୁଦିନ୍‌ ୱାରି ଦଲ୍‍ତୁ ମିସା କିଦେଙ୍ଗ୍‌ ଆସ୍‌ତାନ୍‌ ।
ACT 3:1 ଅର୍‍ଲେନ୍‍ ପିତର ନି ଜୋହନ ପାର୍‌ତାନା ସମୟ ୱେଡ଼ାରେନି ତିନ୍‍ଟାଦୁ ମନ୍ଦିର୍‌ତୁ ସଲ୍‍ସିମାର୍ହାର୍‍ ।
ACT 3:2 ଆବେନ୍‌ “ସୁନ୍ଦର୍‌” ଦର୍‌ତି ଦୁଆର୍‍ ଲାକ୍‌ତୁ ଅରେନ୍‌ ଲୋକୁ ମାର୍ହାନ୍‍ । ୱାନ୍‌ ଜନମ୍‍ତାନ୍‍ ସଟା । ମନ୍ଦିର୍‌ତୁ ସଲ୍‍ସିମାନି ଲୋକାମାଣ୍‌କୁ ଭିକିୟା ଲସ୍‌ତେଙ୍ଗ୍‌ ଇଜି ସବୁଦିନ୍‍ ୱାନ୍‌ ଦୁଆର୍‍ ଲାକ୍‌ତୁ ପିଣ୍ତାୟ୍‍ଆଜି ସଲ୍‍ସିମାର୍ହାନ୍‍ ।
ACT 3:3 ପିତର ନି ଜୋହନତିଙ୍ଗ୍‌ ମନ୍ଦିର ଲୋଇ ସନିକା ସୁଡ଼ୁଜି ୱାନ୍‌ ୱାରିଙ୍ଗ୍‌ ଭିକିୟା ଲସ୍‌ତାନ୍‌ ।
ACT 3:4 ପିତର ନି ଜୋହନ ୱାନିଙ୍ଗ୍‌ ସିଦା ବେସ୍‍ତାର୍‍ ମାରି ପିତର୍‌ ଇର୍ହାନ୍‌, “ମା ତରିନ୍‍ ସୁଡ଼୍‌ଆ !”
ACT 3:5 ଆବେଟ୍‌ ୱାନ୍‌ ୱାରିମାଣ୍‌କୁ ଏସ ପୟ୍‌ନି ଆସାଦାନ୍‍ ୱାରି ତରିନ୍‌ ବେସ୍‍ତାନ୍ ।
ACT 3:6 ମାତର୍‌ ପିତର୍‌ ୱାନିଙ୍ଗ୍‌ ଇର୍ହାନ୍‌, “ନା ଲାକ୍‌ତୁ ବାଙ୍ଗାଁରାମ୍‍ ମାରି ୱେଣ୍ତି ସିଲେତ୍‌, ମାତର୍‌ ଆମାକା ମାନାତ୍‌, ନାନ୍ ନିଙ୍ଗିଁ ସିଜିନା : ନାଜରିୟତିୟ ଜିସୁ କ୍ରିସ୍ତଦି ଦର୍‌ତାନ୍‌ ନାନ୍ ଆଦେସ୍‌ ସିଜିନା, ନିଙ୍ଗଁଜ ବୁଲାଆ ।”
ACT 3:7 ଇକା ଇଜି ୱାନ୍‌ ୱାନି ଉଣେରି କିୟୁ ଆସ୍‌ସି ନିକ୍‍ତାନ୍‍ । ଆୟାଦାପ୍ରେ ଲୋକ୍‌ତି ପାଦାମ୍‌ ନି ସିରାଗାଟିଙ୍ଗ୍‍ ୱିଜୁ ବପୁ ଆତେ ।
ACT 3:8 ୱାନ୍‌ ତୁଲ୍‍ଜି ନିଙ୍ଗିଁଜି ନିର୍‍ଆନ୍‍ ମାରି ବୁଲାଦେଙ୍ଗ୍‌ ଆସ୍‌ତାନ୍‌ । ତାନିୱେନ୍‍କା ୱାନ୍‌ ବୁଲାବୁ ବୁଲାବୁ, ତୁଲ୍‍ବୁ ତୁଲ୍‍ବୁ ମାରି ମାପୁରୁଦି ଦନ୍ୟବାଦ୍‌ କିବୁ କିବୁ ୱାରି ୱାଲେ ମନ୍ଦିର୍‌ତୁ ସର୍ହାନ୍‍ ।
ACT 3:9 ଆବେଣି ଲୋକୁ ୱାନିଙ୍ଗ୍‌ ବୁଲାନିକା ନି ମାପୁରୁଦି ପ୍ରସଂସା କିନିକା ସୁଡ଼ୁତାର୍‌,
ACT 3:10 ୱାନିଙ୍ଗ୍‌ ମନ୍ଦିର୍ ଦୁଆର୍‍ ଲାକ୍‌ତୁ ବାସ୍‍ତିମାର୍‍ଇ ଭିକାରି ଇଜି ସିନିସ୍‍କିତାର୍‍ ମାରି ୱାନି ଉଣ୍ତିଙ୍ଗ୍‌ ଇନିକା ଗଟାତାମାର୍ହାତ୍‍, ୱିଜୁ ନେସ୍‌ସି ୱାର୍‌ କାବାନି ବେମ୍‍ରି ଆତାର୍‌ ।
ACT 3:11 ଆୟାକାନ୍‍ ପିତର୍‌ ନି ଜୋହନତି ୱାଲେ ସଲମନ୍‍ତି ଗୁଡିକାଲ୍‌ତୁ ମାନିକା ସୁଡ଼୍‌ଜି ଲୋକୁ କାବାଆଜି ଲାକ୍‌ତୁ ଉରୁକ୍‍ତାର୍‍ ।
ACT 3:12 ପିତର୍‌ ୱାରିଙ୍ଗ୍‌ ସୁଡ଼ୁଜି ଇର୍ହାନ୍‌, ଏ ଇସ୍ରାଏଲ୍‌ତି ଲୋକୁ, ମିର୍‌ ଏନ୍ଦା ଇବେନୁ କାବାଆଜି ମା ତରିନ୍‌ ଇୟାୱାଜା ବେସ୍‍ସି ମାନିଦେର୍‌ ? ମିର୍‌ ଇନିକା ଅଡ଼୍‌ବିଜିନିଦେର୍‌ ଜେ ମା ନିଜେ ସାକ୍ତିଦାନ୍ ନି ମା ଦାର୍ମୁ ଉଣ୍ତିଙ୍ଗ୍‌ ମାପ୍‌ ଇୟା ଲୋକ୍‌ତି ବୁଲାନି ସାକ୍ତି ସିତାମାନାପ୍‍ ?
ACT 3:13 ଅବ୍ରାହାମ, ଇସ୍‌ହାକ୍‌ ମାରି ଜାକୁବଦି ମାପୁରୁ, ମା ଡକ୍ରାଦାଦାରି ମାପୁରୁ, ୱାନି ଦାସ୍‌ ଜିସୁଙ୍ଗୁଁ ମାପୁରୁଦି ଦନ୍ୟବାଦ୍‌ ସିତାମାନାନ୍‌ । ମାତର୍‌ ମିର୍‌ ୱାନିଙ୍ଗ୍‌ ଅଦିକାରିରି କିୟୁଦୁ ସର୍ପେ କିତିଦେର୍‍ । ଇୟାୱାଜାକି ପିଲାତ୍‌ ରାଜା ୱାନିଙ୍ଗ୍‌ ଡ଼ିସିସ୍‍ କିଦେଙ୍ଗ୍‌ ତିର୍‌ କିତିମାରିଙ୍ଗ୍‍ ବା, ୱାନିଙ୍ଗ୍‌ ପିଲାତ୍‌ ରାଜା ଆଗ୍‌ଡ଼ି ଅମାନ୍ୟ କିତିଦେର୍‍ ।
ACT 3:14 ୱାନ୍‌ ଅରେନ୍‌ ପବିତ୍ର ମାରି ଦାର୍ମୁ ଲୋକୁ, ମାତର୍‌ ମିର୍‌ ୱାନିଙ୍ଗ୍‌ ଅମାନ୍ୟ କିତିଦେର୍‍ ମାରି ୱାନି ବାଦ୍‌ଲୁ ମିଙ୍ଗିଁ ଦୟା ତର୍‌ସି ଅରେନ୍‌ ନର୍‍କାତ୍‍ନିୱାନିଙ୍ଗ୍‍ ଡ଼ିସିସ୍‍ କିଦେଙ୍ଗ୍‌ ଇଜି ପିଲାତ୍‌ ରାଜେଙ୍ଗ୍‍ ଇର୍‍ଇଦେର୍‍ ।
ACT 3:15 ଏନ୍‌ ଜିବନ୍‌ତି ସାରି ତର୍‍ନିକାନ୍‍, ମିର୍‌ ୱାନିଙ୍ଗ୍‌ ଡାକ୍‍ତିଦେର୍‍; ମାତର୍‌ ମାପୁରୁ ୱାନିଙ୍ଗ୍‌ ସାତିମାଣାନ୍‌ ମାରିଡ଼େସି ନିକ୍‍ତାନ୍‍ । ମାପ୍‌ ତାନି ସାକି ।
ACT 3:16 ୱାନି ଦର୍‌ତି ସାକ୍ତି ନେ ଇୟା ସଟେଙ୍ଗ୍‍ ନେଗେନ୍‌ କିତାମାନାତ୍‌ । ଏମେ ଗଟନା ଇଲେଇ ମିର୍‌ ନିଜେ ସୁଡ଼୍‌ଜି ସତ୍‌ ଇଜି ନେସ୍‌ତିମାନିଦେର୍‌, ଆକା କେବଲ୍‌ ୱାନି ଦର୍‌ତାନ୍‌ ବିସ୍‌ବାସ୍‌ କିନି ଉଣ୍ତିଙ୍ଗ୍‌ ଆତାମାନାତ୍‌ । ଜିସୁମାନୁ ବିସ୍‌ବାସ୍‌ କିନି ଉଣ୍ତିଙ୍ଗ୍‌ ୱାନ୍‌ ଜେ ନେଗେନ୍‌ ଆତାମାନାନ୍‌, ଇକା ମିର୍‌ ସୁଡ଼ୁତିମାନିଦେର୍‍ ।
ACT 3:17 “ମାରି ଇଲେଇ, ଏ ଇସ୍ରାଏଲ୍‌ତି ତଡ଼ାନ୍‌କୁ ନି ତାଙ୍ଗିଁକ୍‍, ମିର୍‌ ମାରି ମି ନେତାର୍‌ ଜିସୁଦି ଉଣ୍ତିଙ୍ଗ୍‌ ଆମାକା କିତିଦେର୍‍, ଆକା ନେସ୍‌ଏଣ୍ତା କିତିମାନିଦେର୍‍, ଇକା ନାନ୍ ନେସ୍‌ନା ।
ACT 3:18 ନାଣ୍ତ ବାର୍ସେକ୍‍ ଆଗ୍‌ଡ଼ି ୱିଜେରେ ବାବବାଦି ୱେୟୁଦୁ ମାପୁରୁ ୱେର୍‍ତା ମାର୍ହାନ୍‍ ଜେ, କ୍ରିସ୍ତଙ୍ଗ୍‌ ଦୁକ୍‍ବଗାଦେଙ୍ଗ୍‍ ଆନାତ୍‌ । ଇୟାୱାଜା ଇଲେଇ ଆକା ସତ୍‌ ଆତାମାନାତ୍‌ ।
ACT 3:19 ମାରି ଅନୁତାପ୍‍ କିଜି ମାପୁରୁ ତରିନ୍‌ ଡ଼େସି ରାଦୁ । ଆରିଙ୍ଗ୍‌ ୱାନ୍‌ ମି ପାପ୍‌ କେମା କିନାନ୍‌ ।
ACT 3:20 ମାରି ପ୍ରବୁଦି ମାଣାନ୍‌ ମିର୍‌ ଆତ୍ମିକ ସାକ୍ତି ପୟ୍‌ନିଦେର୍‌ । ମାପୁରୁ ମି ଉଣ୍ତିଙ୍ଗ୍‌ ଆଗ୍‌ଡ଼ିରାନ୍‌ ବାସେଆତିମାନି ମସିହ ଜିସୁଙ୍ଗୁଁ ପକ୍‍ନାନ୍‍ ।
ACT 3:21 ପୁର୍ବେକାଡ଼ାଦି ପବିତ୍ର ବାବବାଦି ମାଣ୍‌କୁ ମାପୁରୁ ୱେର୍‌ତି ଇସାବ୍‌ତାନ୍‌ ୱିଜୁ ବିସୟ୍‌ତି ପୁନିକା ଆନି ସାନ୍ଦି ୱାନ୍‌ ମୁସ୍‌କୁପୁର୍‌ତୁ ତେବାନାନ୍‌ ।
ACT 3:22 ଇୟା ବିସୟ୍‌ତାନ୍‌ ମୋସା ଇର୍ହାମାର୍ହାନ୍‌, ମି ପ୍ରବୁ ମାପୁରୁ ମି ତଡ଼ାନ୍‌କା ମାଣୁକୁ ମି ଲାକ୍‌ତୁ ନା ନାନି ଅରେନ୍‌ ବାବବାଦିଙ୍ଗ୍‍ ପକ୍‍ନାନ୍‍ । ୱାନ୍‌ ମି ନିଜେ ଲୋକା ଲୋଇରାନ୍‌ ଅରେନ୍‌ ଆନାନ୍‍ । ୱାନ୍‌ ମିଙ୍ଗିଁ ଆମାକା ଇନାନ୍‌, ଆୟାୱିଜୁ ବିସୟ୍‌ ମିର୍‌ ମାନାନିକା ମାନାତ୍‌ ।
ACT 3:23 ଏନ୍‌ ଆୟା ବାବବାଦିଦି ବାକ୍ୟ ମାନାଏନ୍‌, ୱାନିଙ୍ଗ୍‌ ମାପୁରୁଦି ଲୋକାମାଣ୍‌କୁ ୱେର୍‌ଏ କିଜି ନାସ୍ଟୁ କିଆୟ୍‍ଆନାନ୍‍ ।
ACT 3:24 ଇଲେଇ ଆମାକା ଗଟାଜିନାତ୍‍, ଆୟା ବିସୟ୍‌ତାନ୍‌ ସାମୁଏଲ୍‍ତି ୱାଲେ ୱିଜେରେ ବାବବାଦିର୍ ମାଟା ପ୍ରଚାର୍‌ କିଜି ଇର୍ହାମାର୍ହାନ୍‌ ମାରି ୱାରି ୱେନ୍‌କାରି ବାବବାଦିର୍ ବା ଇୟା ବିସୟ୍‌ତାନ୍‌ ୱେର୍‍ତା ମାର୍ହାନ୍‍ ।
ACT 3:25 ବାବବାଦିରି ୱେୟୁଦୁ ମାପୁରୁ ଏମେ ୱିଜୁ ପ୍ରତିଜ୍ଞା କିତାମାନାନ୍‍, ଆକା ମି ଉଣ୍ତିଙ୍ଗ୍‌ ଟିକ୍‌, ମାରି ମାପୁରୁ ମି ପୁର୍ବେଦିଡକ୍‌ରାଦାଦାରି ୱାଲେ ଏମେ ନିୟମ୍‌ କିତାମାନାନ୍‍, ମିର୍‌ ଆବେଣି ବାଗ୍‍ତିକାର୍‍ । ମାପୁରୁ ଅବ୍ରାହାମ୍‍ତିଙ୍ଗ୍‌ ଇର୍ହାମାର୍ହାନ୍‌, ମି କୁଟୁମ୍‌ତି ମାଣାନ୍‌ ନାନ୍ ଦୁନିଆଦି ୱିଜୁ ବାସାଦି ଲୋକାଙ୍ଗ୍‌ ଆସିର୍ବାଦ୍‌ କିନାପ୍‍ ।
ACT 3:26 ଆଦେଙ୍ଗ୍‌ ମାପୁରୁ ୱାନି ଦାସ୍‌ତିଙ୍ଗ୍‌ ବାସେକିତାନ୍‍ ମାରି ମି ୱିଜେରିଙ୍ଗ୍‍ ତାଗ୍‌ଇ ସାରିଦାନ୍‍ ଡ଼େସିୱାନି ଆସିର୍ବାଦ୍‌ ସିଦେଙ୍ଗ୍‍ ଇଜି ଆଗ୍‌ଡ଼ି ୱାନିଙ୍ଗ୍‌ ମି ଲାକ୍‌ତୁ ପକ୍‌ତାନ୍‌ ।”
ACT 4:1 ପିତର୍‌ ନି ଜୋହନ ଲୋକାଙ୍ଗ୍‌ ଇୟାୱାଜା ସିକିୟା ସିଜିମାନି ୱାଲେ ମନ୍ଦିର୍‌ତି ଏସ ଜାଜକର୍‌, ମନ୍ଦିର୍‌ତି କାପ୍‍କିନିୱାରି ପେରିକାନ୍‌ ମାରି ଏସ ସାଦୁକିର୍ ୱାଜି ଇତାର୍‌ ।
ACT 4:2 ୱାର୍‌ ରିସା ଆତାମାର୍ହାର୍‍, ଇରିଙ୍ଗ୍‌ ଜିସୁ ସାତିମାଣାନ୍‌ ମାରିଡ଼େସି ନିଙ୍ଗିଁନି ଇଜି ରିଏର୍‌ ପ୍ରେରିତର୍‍ ଲୋକାଙ୍ଗ୍‌ ସିକିୟା ସିଜି, ଇବେଣାନ୍‍ ସାତିକାର୍‍ ମାରିଡ଼େସି ନିଙ୍ଗ୍‍ନାର୍‍ ଇଜି ପାର୍‍ମାଣ୍‍ କିଜିମାର୍ହାର୍‍ ।
ACT 4:3 ମାରି ୱାର୍‌ ୱାରିଙ୍ଗ୍‌ ତର୍‍ତାର୍‍ ମାରି ଆୟାନାଣ୍ତିଙ୍ଗ୍‌ ନାଣ୍ତ ୱେଡ଼ା ଆତାମାର୍ହାତ୍‍ଆକା ମାରିନାଣ୍ତିଙ୍ଗ୍‍ ସାନ୍ଦି ୱାରିଙ୍ଗ୍‌ ଜଇଲ୍‌ତୁ ଇଟ୍‌ତାର୍‌ ।
ACT 4:4 ମାତର୍‌ ୱାରି ସିକିୟା ୱେର୍‍ଇମାର୍ହି ନାଣ୍ତ ଲୋକୁ ଆବେନୁ ବିସ୍‌ବାସ୍‌ କିତାର୍‍ ମାରି ୱାରି ସଂଖ୍ୟା ପିର୍‌ଜି ପାସ୍‌ ହାଜାର୍‌ ଆତାତ୍‌ ।
ACT 4:5 ମାର୍‌ନାଣ୍ତିଙ୍ଗ୍‍ ଜିହୁଦି ନେତାର୍‌, ମନ୍ଦିର୍‌ତି ଆଇନେତାର୍‍ ମାରି ଦାର୍ମୁଗୁରୁର୍‌ ଜିରୁସାଲାମ୍‍ତୁ ଉଣ୍ତ୍ରେମାନୁ ଉଣ୍ତାତାର୍‌ ।
ACT 4:6 ଆବେନୁ ୱିଜେରିଙ୍ଗ୍‍ ପେରି ଜାଜକ ହାନାନା, କୟାପା, ଜୋହନ, ଆଲେକ୍‍ଜାଣ୍ତର୍‍ ମାରି ୱିଜେରିଙ୍ଗ୍‍ପେରି ଜାଜକରି ଇଲ୍‍ତି ଆଇ ଲୋକାଙ୍ଗ୍‍ ମିସାତାର୍‍ ।
ACT 4:7 ସିସୁରିଙ୍ଗ୍‌ ୱାରି ଆଗ୍‌ଡ଼ି ତାପିସ୍‍ କିଜି ୱେନ୍‌ବାତାର୍‌, “ମିର୍‌ ଇୟାୱିଜୁ ଏଣ୍ତେସ୍‌ କିଜିନିଦେର୍‌ ? ଏ ସାକ୍ତିଦାନ୍ ବା ଏ ଦର୍‌ତାନ୍‌ ଇକା କିଜିନିଦେର୍‌ ?”
ACT 4:8 ଆବେଟ୍‍ ପିତର ପବିତ୍ର ଆତ୍ମାଦୁ ପୁରା ଆଜି ୱାରିଙ୍ଗ୍‌ ଇର୍ହାନ୍‌, “ଏ ଲୋକା ନେତାର୍‌ ମାରି ପେରିକାର୍‌ :
ACT 4:9 ଜଦି ନେର୍‌ ମାଙ୍ଗିଁ ଇୟା ସଟା ଉଣ୍ତିଙ୍ଗ୍‌ କିତିମାନି ନେଗି ପାଣି ବିସୟ୍‌ତାନ୍‌ ମିର୍‌ ୱେନ୍‍ବାଜିନିଦେର୍‌ ମାରି ୱାନ୍‌ ଏଣ୍ତେସ୍‌ ନେଗେନ୍‍ ଆତାନ୍‍ ଇଜି ନେସ୍‌ତେଙ୍ଗ୍‌ ବଦାକିଜିନିଦେର୍‌ ।
ACT 4:10 ଆବେଟ୍‌ ମିର୍‌ ମାରି ଇସ୍ରାଏଲ୍‌ତି ୱିଜେରେ ନେସ୍‍ନିକା ମାନାତ୍‌ ଜେ, ମି ଆଗ୍‌ଡ଼ି ନିର୍‍ଇ ମାନି ଇୟା ଲୋକୁ କେବଲ୍‌ ନାଜରିୟତିୟ ଜିସୁ କ୍ରିସ୍ତଦି ଦର୍‌ତି ସାକ୍ତିଦାନ୍ ପୁରା ନେଗେନ୍‌ ଆତାମାନାନ୍‌ । ଆୟା ଜିସୁଙ୍ଗୁଁ ମିର୍‌ କ୍ରୁସଦୁ ଏକିସ୍‍କିତି ମାରିଇଦେର୍‍ । ମାତର୍‌ ମାପୁରୁ ୱାନିଙ୍ଗ୍‌ ସାତିମାଣାନ୍‌ ମାରିଡ଼େସି ନିକ୍‍ତାନ୍‍ ।
ACT 4:11 ଜିସୁଦି ବିସୟ୍‌ତାନ୍‌ ନେ ଦାର୍ମୁସାସ୍ତ୍ରଦୁ ରାସାତାମାନାତ୍‌, “ଏମେ କାଲୁଦିଙ୍ଗ୍‌ ଇଲୁ ତିଆର୍‌ କିନିକାର୍‍ ଡ଼ିସ୍‌ତାର୍‍, ମାତର୍‌ ଆୟା କାଲୁ ନେ କନାଦି ମୁଲ୍‌ କାଲୁ ଆତାତ୍‌ ।
ACT 4:12 କେବଲ୍‌ ୱାନି ମାଣାନ୍‌ ରକିୟା ପୟ୍‌ନିକା ଆନାତ୍‌ । ସାରା ଦୁନିଆଦୁ ମାନି ଆଇ ଇନି ଦର୍‌ ମାଣାନ୍‌ ଲୋକୁ ରକିୟା ପୟ୍‌ଦେଙ୍ଗ୍‌ ଆଟ୍‌ଏନ୍‌ ।”
ACT 4:13 ପିତର ନି ଜୋହନ ପଡ଼ାଇକାର୍‍ ମାରି ସାମାନ୍‌ତି ଲୋକୁ ଇଜି ପେରି ମିଟିଙ୍ଗ୍‍ତି ଜିହୁଦି ନେତାର୍‌ ନେସ୍‍ତାମାର୍ହାର୍‍ । ଆଦେଙ୍ଗ୍‌ ୱାରି ସାସ୍‌ ସୁଡ଼ୁଜି ୱାର୍‌ କାବାଆତାର୍‌ । ମାରି ୱାର୍‌ ନେସ୍‍ତାମାର୍ହାର୍‍, ଆୟା ରିଏର୍‌ ଜିସୁଦି ୱାଲେ ମାର୍ହାର୍‌ ।
ACT 4:14 ମାତର୍‌ ୱାର୍‌ ବିରୁଦ୍‌ କିଜି ଇନିକା ଇନ୍‌ଡ୍ରେଙ୍ଗ୍‌ ଆଟ୍‌ଏତାର୍‌; ଇରିଙ୍ଗ୍‌ ୱାର୍‌ ନେଗେନ୍‌ ଆତିମାର୍‍ଇ ଲୋକ୍‌ତିଙ୍ଗ୍‌ ପିତର ନି ଜୋହନତି ୱାଲେ ନିର୍‍ଇ ମାରିଇକା ସୁଡ଼ୁତାର୍‌ ।
ACT 4:15 ଆବେଟ୍‌ ୱାର୍‌ ସିସୁରିଙ୍ଗ୍‌ ମିଟିଙ୍ଗ୍‍ ଇଲ୍‌ତାନ୍‌ ସପ୍‍ସି ସିଜି ୱାରି ବିସୟ୍‌ତାନ୍‌ ନିଜେ ନିଜେମାନୁ ୱାର୍‍ଗିଦେଙ୍ଗ୍‍ ଆସ୍‌ତାର୍‌ ।
ACT 4:16 ୱାର୍‌ ଇର୍ହାର୍‌, “ମାଡ୍‌ ୱେରି ଉଣ୍ତିଙ୍ଗ୍‌ ଇନିକା କିନାଟ୍‍ ?” ଇକାର୍‌ କିତିମାନି ଇୟା କାବାଆନି ପାଣି ବିସୟ୍‌ତାନ୍‌ ଜିରୁସାଲାମ୍‌ତି ୱିଜେରେ ନେସ୍‌ତା ମାନାର୍‌ । ତେନି ସତ୍‌ ମାଡ୍‌ ମାରି ସିଲେ ଇନ୍‌ଡ୍ରେଙ୍ଗ୍‌ ଆଟ୍‍ଇକା ।
ACT 4:17 ମାତର୍‌ ଇୟା ମାଟା ଏଣ୍ତେସ୍‌ ଲୋକା ଲୋଇ ନାଣ୍ତ ୱେଙ୍ଗ୍‍ଁଏତ୍‍, ଜିସୁଦି ଦର୍‌ତାନ୍‌ ମାରି ଏସାଙ୍ଗ୍‍ ଆମାୱାରି ଆଗ୍‌ଡ଼ି ଇନିକା ଇନ୍‌ଇ ଉଣ୍ତିଙ୍ଗ୍‌ ଇୟାୱାରିଙ୍ଗ୍‌ ମାପ୍‌ ଜାଗାର୍‌ତା କିନା ସିନାଟ୍‍ ।
ACT 4:18 ଆବେଟ୍‌ ୱାର୍‌ ପିତର୍‌ ନି ଜୋହନତିଙ୍ଗ୍‌ ମାରିଡ଼େସି ଲୋଇ କୁକିସ୍‍ କିତାର୍‍ ମାରି ଏସାଙ୍ଗ୍‍ ବା ଜିସୁଦି ଦର୍‌ତାନ୍‌ ଇନି ମାଟା ଇନ୍‌ଇ ଉଣ୍ତିଙ୍ଗ୍‌ ମାରି ସିକିୟା ସିଇ ଉଣ୍ତିଙ୍ଗ୍‌ ଜାଗାର୍‌ତା କିତା ସିତାର୍‍ ।
ACT 4:19 ମାତର୍‌ ପିତର ନି ଜୋହନ ଇର୍ହାର୍‌, “ମିଙ୍ଗିଁ ମାନାନିକା, ଅବା ମାପୁରୁଦିଙ୍ଗ୍‌ ମାନାନିକା ଏମେ ବିସୟ୍‌ ମାପୁରୁଦି ଆଗ୍‌ଡ଼ି ଟିକ୍‌, ଆକା ମିର୍‌ ବିସାର୍‌ କିଦୁ ।
ACT 4:20 ଇରିଙ୍ଗ୍‌ ମାପ୍‌ ଆମାକା ସୁଡ଼ୁତାମାନାପ୍‍, ମାରି ୱେର୍‍ଆମାନାପ୍‍, ଆୟା ବିସୟ୍‌ ଇନ୍‍ଏଣ୍ତା ତେବାଦେଙ୍ଗ୍‍ ଆଟ୍‍ଏପ୍‍ ।”
ACT 4:21 ମାତର୍‌ ଜିହୁଦିର୍‌ ପେରି ମିଟିଙ୍ଗ୍‍ତୁ ଲୋକୁ ୱାରିଙ୍ଗ୍‌ ମାରି ଡାଟ୍‍ତାନ୍‌ ଆଦ୍‌ରିସ୍‌କିଜି ଡ଼ିସ୍‍ତା ସିତାର୍‍ । ୱାରିଙ୍ଗ୍‌ ଦଣ୍ଡ୍‌ ସିନିକା ଆଏତ୍‌ ଇଜି ୱାର୍‌ ନେସ୍‌ତେଙ୍ଗ୍‌ ଆଟ୍‌ତାର୍‌, ଇରିଙ୍ଗ୍‌ ଆୟାଗଟନା ଉଣ୍ତିଙ୍ଗ୍‌ ଲୋକୁ ୱିଜେରେ ମାପୁରୁଦି ଦନ୍ୟବାଦ୍‌ କିଜିମାର୍ହାର୍‍ ।
ACT 4:22 ଏମେ ଲୋକୁ କାବା ଇସାବ୍‌ତାନ୍‌ ନେଗେନ୍‌ ଆତାମାର୍ହାନ୍‍, ୱାନି ବୟସ୍‌ ସାଲିସ୍‍ ବାର୍ସେକ୍‍ତାନ୍‍ ନାଣ୍ତ ମାର୍ହାତ୍‌ ।
ACT 4:23 ପିତର ନି ଜୋହନ ମୁକ୍‍ଡ଼ାତି ଦାପେ ଦାପେ ୱାରି ଦଲ୍‍ତୁ ଡ଼େସି ସର୍ହାର୍‍ ମାରି ପେରି ଜାଜକର୍‌ ମାରି ନେତାର୍‍ ଆମାକା ଇର୍ହାମାର୍ହାର୍‍, ଆକା ୱାରିଙ୍ଗ୍‌ ୱେର୍‍ତାନ୍‍ ।
ACT 4:24 ବିସ୍‍ବାସିର୍‍ ୱିଜୁ ମାଟା ୱେର୍‍ଇ ୱେନ୍‌କା ୱିଜେରେ ଉଣ୍ତାଜି ମାପୁରୁଦି ଲାକ୍‌ତୁ ଇୟା ପାର୍‌ତନା କିତାର୍‍, “ଏ ପ୍ରବୁ ! ମୁସ୍‌କୁପୁର୍‌, ଦୁନିଆଦୁ, ସାମ୍‌ଦୁର୍‌ ମାରି ଆବେମାନି ୱିଜୁ ବିସୟ୍‌ତି ତିଆର୍‍କିତିକିନ୍ଦା !
ACT 4:25 ପବିତ୍ର ଆତ୍ମାଦି ମାଣାନ୍‌ ନିନ୍‌ ମା ଡକ୍ରାଦାଦା ମାରି ନି ଦାସ୍‌ ଦାଉଦତି ୱେୟୁଦାନ୍‌ ଇୟା ମାଟା ୱେର୍‍ତିମାର୍ହି, “ଅଣଜିହୁଦିର୍‍ ଏନ୍ଦା ରିସା ଆତାର୍‌; ଲୋକୁ ଏନ୍ଦା ଆର୍‍ତିତାନିଙ୍ଗ୍‌ ଉପାୟ୍‍କିତାର୍‍ ?
ACT 4:26 ପ୍ରବୁଦି ବିରଦ୍‌ତାନ୍‌ ମାରି ୱାନି କ୍ରିସ୍ତ ଅର୍ତାତ୍‍ ମସିହଦି ବିରଦ୍‌ତାନ୍‌ ଦୁନିଆଦି ରାଜାର୍‌ ନିଜେଦିଙ୍ଗ୍‍ ତିଆର୍‌ କିତାର୍‍ ମାରି ସାସନ୍‍ କିନି ନେତାର୍‌ ଉଣ୍ତାତାର୍‌,
ACT 4:27 ସତ୍‌ତାନ୍‌ ଇୟା ଗାଡ଼୍‌ତୁ ହେରୋଦ ନି ପନ୍ତିୟ ପିଲାତ୍‌ ରାଜା ଅଣଜିହୁଦି ମାରି ଇସ୍ରାଏଲ୍‌ତି ଲୋକା ୱାଲେ ମିସାଜି ମି ମାଣାନ୍‌ ବାସେଆତି କ୍ରିସ୍ତ ଅର୍ତାତ୍‍ ମସିହ, ମି ପବିତ୍ର ଦାସ୍‌ ଜିସୁଙ୍ଗୁଁ ବିରଦ୍‌ କିତାର୍‍ ।
ACT 4:28 ମି ସାକ୍ତି ମାରି ବଦା ଇସାବ୍‌ତାନ୍‌ ଆମାକା ୱିଜୁ ଗଟେଆନି ଉଣ୍ତିଙ୍ଗ୍‌ ମିର୍‌ ଆସା କିତିମାର୍‍ଇଦେର୍‍, ୱାର୍‌ ଉଣ୍ତାଜି ଆୟାୱିଜୁ କିନି ଉଣ୍ତିଙ୍ଗ୍‌ ଲାଗେ ପଡ଼େଆତାର୍‍ ।
ACT 4:29 ପ୍ରବୁ, ଇଲେଇ ୱାର୍‌ ମାଙ୍ଗିଁ ଏମେ ଆଦ୍‍ରିସ୍‍ କିତାମାନାର୍‍, ନିନ୍‌ ଆୟା ବିସୟ୍‌ତାନ୍‌ ମନ୍‍ ସିଆ ମାରି ସାହାସ୍‍ତାନ୍‍ ନି ବାକ୍ୟ ପ୍ରଚାର୍‌ କିଦେଙ୍ଗ୍‌ ଇଜି, ନି ଇୟା ଦାସ୍‍ରିଙ୍ଗ୍‍ ସାକ୍ତି କିଆ ।
ACT 4:30 ମାରି ନେଗେନ୍‌ କିଦେଙ୍ଗ୍‌ ଇଜି ନି କିୟୁ ପେର୍‌ଆ ମାରି ନି ପବିତ୍ର ଦାସ୍‌ ଜିସୁଦି ଦର୍‌ତାନ୍‌ କାବାଆନିକା ମାରି କାବାଆନି ପାଣି କିଦେଙ୍ଗ୍‌ ମାଙ୍ଗିଁ ସାକ୍ତି ସିଦା ।”
ACT 4:31 ୱାର୍‌ ପାର୍‌ତନା ୱିସ୍‌ତି ୱେନ୍‌କା ଏମେ ବାଡିଦୁ ଉଣ୍ତାତା ମାର୍ହାର୍‌, ଆକା ଦୁଙ୍ଗିଁତା ସର୍ହାତ୍‍ । ୱାର୍‌ ୱିଜେରେ ପବିତ୍ରଆତ୍ମାଦୁ ପୁରା ଆତାର୍‌ ମାରି ସାହାସ୍‍ତାନ୍‍ ମାପୁରୁଦି ବାକ୍ୟ ପ୍ରଚାର୍‌ କିଦେଙ୍ଗ୍‌ ଆସ୍‌ତାର୍‌ ।
ACT 4:32 ବିସ୍‍ବାସ୍‍ସି ଦଲ୍‌ ଉନ୍‌ଡ୍ରି ଜିବନ୍‌ ମାରି ଉନ୍‌ଡ୍ରି ମନ୍‍ ଆତାର୍‌ । ଏନ୍‌ ନିଜେଦି ଦନ୍‍ତିଙ୍ଗ୍‍ ନିଜେଦିକା ଇଜି ଦାବି କିଏଜିମାର୍ହାର୍‌, ମାତର୍‌ ୱିଜେରି ଦନ୍‍ତିଙ୍ଗ୍‍ ୱାର୍‌ ସାମାନ୍‍ତାନ୍‍ ବାଟାକିଜି ସିଜିସାତାର୍‌ ।
ACT 4:33 ନାଣ୍ତ ସାକ୍ତିଦାନ୍ ପ୍ରେରିତ୍‍ର ସିସୁର୍‍ ପ୍ରବୁ ଜିସୁଦି ମାରିଡ଼େସି ନିଙ୍ଗିଁନି ବିସୟ୍‌ତାନ୍‌ ସାକିୟ ସିତାର୍‍ ମାରି ମାପୁରୁ ୱାରି ମୁସ୍‌କୁ ନାଣ୍ତ ଆସିର୍ବାଦ୍‌ ସିତାନ୍‌ ।
ACT 4:34 ୱାରି ଦଲ୍‍ତୁ ଆମା ଲୋକୁ କାକୁର୍ତି ସିଲେତାନ୍‌ । ଏମେୱାରି ବୁମି ମାରି ଇଲୁ ମାର୍ହାତ୍‌, ୱାର୍‌ ଆକା ପର୍‍ସି ପର୍‍ତି ଦନ୍‌ତି ଡାବୁଙ୍ଗୁଁ ତାସି,
ACT 4:35 ୱାର୍‌ ସିସୁରି ପାଦାମ୍‌ ଆଡ୍‍ଗି ଇଡ୍‌ଜିମାର୍ହାର୍‌ । ମାରି ଆୟା ଡାବୁଙ୍ଗୁଁ ୱାରି ଲୋଇ ଲୋକା ଦର୍‌କାର୍‌ ଇସାବ୍‌ତାନ୍‌ ବାଟା କିଜିମାର୍ହାର୍‍ ।
ACT 4:36 ସାଇପ୍ରସ୍‍ ଦର୍‍ତି ବାଡିଦୁ ଜନମ୍‌ ଆତିମାର୍‍ଇ ଲେବି କଟୁମ୍‍ତି ଜସେପ୍‍, ଆମାୱାନିଙ୍ଗ୍‌ ପ୍ରେରିତ ସିସୁର୍‍ ବର୍ଣ୍ଣବା ଇଜି ଦର୍‌ ଇଟ୍‍ତାମାର୍ହାର୍‍, ବର୍ଣ୍ଣବାଦି ଅର୍ତ “ଦୁଃକ୍‌ତୁ ୱେଡ଼ିକାସିନି ମାରିନ୍‌”
ACT 4:37 ୱାନି ବୁମି ପର୍‍ସି ଆବେଣି ଡାବୁଙ୍ଗୁଁ ତାସି ପ୍ରେରିତ ସିସୁରିଙ୍ଗ୍‌ ସିତାନ୍‌ ।
ACT 5:1 ହନନିୟ ଦର୍‌ତି ଅରେନ୍‌ ଲୋକୁ ମାରି ୱାନି ଆଡ଼୍‌ସି ସପିରା ତାମେ ଏସ ବୁମି ପର୍‍ତାର୍‍ ।
ACT 5:2 ମାତର୍‌ ଆଡ଼୍‌ସି ମାଟା ଆସ୍‌ସି ହନନିୟ ପର୍‍ତି ଡାବୁଙ୍ଗୁଁ ଏସ ନିଜେଦି ଉଣ୍ତିଙ୍ଗ୍‌ ଇଡ୍‌ଜି, ଏଜିତିକା ପ୍ରେରିତ ସିସୁରିଙ୍ଗ୍‌ ସିତାର୍‍ ।
ACT 5:3 ପିତର୍‌ ୱାନିଙ୍ଗ୍‌ ଇର୍ହାନ୍‌, “ହନନିୟ, ନି ଜିବନ୍‌ ୱିଜୁ ଏନ୍ଦା ସୟତାନ୍‍ତି ଆଡ୍‍ଗି ଆଜି ବୁମି ପର୍‌ଜି ପୟ୍‍ତିମାନି ଡାବୁଙ୍ଗୁଁ ଏସ ନିଜେଦି ଉଣ୍ତିଙ୍ଗ୍‌ ଇଡ୍‌ଜି ପବିତ୍ର ଆତ୍ମାଦିଙ୍ଗ୍‌ ମିସ୍‌ ଇର୍ହି ?
ACT 5:4 ଦନ୍‌ ପର୍‌ନି ଆଗ୍‌ଡ଼ି ଆକା ନି ଅଦିକାର୍‌ ମାର୍ହାତ୍‌, ପର୍‌ନି ୱେନ୍‌କା ବା ଡାବୁଙ୍ଗୁଁ ନିଦି ମାର୍ହାତ୍‌, ଆର୍‍ତିଙ୍ଗ୍‍ଁ ନିନ୍‌ ଏନ୍ଦା ଇୟାୱାଜା ପାଣି କିଦେଙ୍ଗ୍‌ ମୋନ୍‌ କିତି ? ନିନ୍‌ ଲୋକାଙ୍ଗ୍‌ ମିସ୍‌ ୱେର୍‌ଇତି, ମାତର୍‌ ମାପୁରୁଙ୍ଗ୍‍ଁ ମିସ୍‌ ୱେର୍‌ତି ।”
ACT 5:5 ହନନିୟ ଇୟା ମାଟା ୱେନି ଦାପ୍ରେ ଆଡ୍‍ଗି ଆର୍‍ଜି ସାତାନ୍‍; ମାରି ଏମେକାର୍‌ ଇୟା ମାଟା ୱେର୍‌ଆର୍‌, ୱାର୍‌ ୱିଜେରେ ନାଣ୍ତ ତିଲାତାର୍‌ ।
ACT 5:6 ମାରି, ମୁରୁଲିର୍‍ ହନନିୟଦି ସାତି ମାଡ଼ାଦିଙ୍ଗ୍‍ ୱାତିଦୁ ତେରେପ୍‍ସି ଆତ୍‌ରେ ଅତାର୍‌ ମାରି ମୁସ୍‌ତାର୍‌ ।
ACT 5:7 ମାରି ମୁନ୍‌ଡ୍ରି ଗନ୍‌ଟା ୱେନ୍‌କା ହନନିୟଦି ଆଡ଼୍‌ସି ୱାଜି ଇତାତ୍‍ । ୱାଦ୍‌ ଇୟା ଗଟ୍‍ନା ବିସୟ୍‌ ନେସ୍‍ଏତ୍‍ ମାର୍ହାତ୍‌ ।
ACT 5:8 ପିତର ତାନିଙ୍ଗ୍‌ ୱେନ୍‌ବାତାନ୍‌, “ନାଙ୍ଗିଁ ଇନ୍‌ଆଁ, ନିନ୍‌ ମାରି ନି କନ୍‍ଲି ଆମା ବୁମି ପର୍‍ତିଦେର୍‍, ଇକା ଇନିକା ତାନି ପୁରା ଡାବୁଙ୍ଗୁଁ ?” ୱାଦ୍‌ ଇର୍ହାତ୍‌, “ହୁଁ ।”
ACT 5:9 ପିତର୍‌ ତାନିଙ୍ଗ୍‌ ଇର୍ହାନ୍‌, “ପ୍ରବୁଦି ଆତ୍ମାଦିଙ୍ଗ୍‍ ପରିକା କିଦେଙ୍ଗ୍‌ ଇଜି ନିନ୍‌ ମାରି କନ୍‍ଲି ଏନ୍ଦା ବାସେ କିତିଦେର୍‍ ? ଏମେକାର୍‌ ନି କନ୍‍ଲିଙ୍ଗ୍‍ ମୁସ୍‌ତାର୍‌, ୱାର୍‌ ଇଲେଇ ସେର୍‍ଲା ଲାକ୍‌ତୁ, ୱାର୍‌ ନିଙ୍ଗିଁ ବା ପିଣ୍ତ୍‍ନା ଅନାର୍‍ ।”
ACT 5:10 ୱେନି ଆୟାଦାପ୍ରେ ୱାଦ୍‌ ପିତର୍‌ତି କାଲ୍‍କା ଲାକ୍‌ତୁ ଆର୍‍ଜି ସାତାତ୍‍ । ମୁରୁଲିର୍‍ ଲୋଇ ୱାଜି ତାନି ସାତି ମାନିକା ସୁଡ଼୍‌ଜି ତାନିଙ୍ଗ୍‌ ପିଣ୍ତ୍‍ଜି ଅତାର୍‌ ମାରି ତାନି କନ୍‍ଲିସିଦି ଗୁଟା ଲାକ୍‌ତୁ ତାନିଙ୍ଗ୍‌ ମୁସ୍‌ତାର୍‌ ।
ACT 5:11 ମଣ୍ତଲିଦି ପେରିକାର୍‌ ମାରି ଏମେକାର୍‌ ଇୟା ମାଟା ୱେର୍‌ଆର୍‌, ୱିଜେରେ ନାଣ୍ତ ତିଲାତାର୍‌ ।
ACT 5:12 ପ୍ରେରିତ ସିସୁରି ମାଣାନ୍‌ ଲୋକା ଲୋଇ ନାଣ୍ତ କାବାଆନି ପାଣି ଆଜିମାର୍ହାର୍‍, ୱିଜେରେ ବିସ୍‍ବାସିର୍‍ ସଲମନ୍‍ତି ଗୁଡିକାଲ୍‌ତୁ ଉଣ୍ତାଜି ମାର୍ହାର୍‌ ।
ACT 5:13 ୱାରି ବିସୟ୍‌ତାନ୍‌ ଲୋକୁ ନେଗି ମାଟା ଇଜିମାର୍ହାର୍‍, ମାତର୍‌ ଦଲ୍‌ ଆତ୍‌ରେ ମାନି ଲୋକୁ ଏନ୍‌ ୱାରି ୱାଲେ ମିସାଦେଙ୍ଗ୍‍ ସାସ୍‌ କିଏଜିମାର୍ହାର୍‌ ।
ACT 5:14 ମାତର୍‌ ପ୍ରବୁମାନୁ ବିସ୍‌ବାସ୍‌ କିଜିମାନି ନାଣ୍ତ ଆଇମେକ୍‍ ନି ମେମାରିର୍‍ ଦଲ୍‍ତୁ ଡ଼ୁଗିତାର୍‍ ମାରି ଆୟା ବିସ୍‍ବାସି ଦଲ୍‌ ଦିନ୍‍ତିଙ୍ଗ୍‍ ଦିନ୍‌ ପିର୍‌ଦେଙ୍ଗ୍‌ ଆସ୍‌ତାର୍‌ ।
ACT 5:15 ପ୍ରେରିତ ସିସୁରି ପାଣି ନାଣ୍ତ ନେଗେନ୍‌ ଆତାତ୍‌, ଇୟାୱାଜାକି ପିତର୍‌ ବୁଲାଜି ସନିୱାଲେ ୱାନି ନିଡ଼୍‍ଗା ଆର୍‍ଦେଙ୍ଗ୍‍ ଇଜି ଲୋକୁ ରୋଗିଲୋକାଙ୍ଗ୍‍ ପିଣ୍ତ୍‍ଜିତାସି ସାର୍‍ଦୁ କାଟେଲ୍‍ ନି ଟାଟିଦୁ ତେର୍‍ପ୍‍ସି ମାର୍ହାର୍‌ ।
ACT 5:16 ଜିରୁସାଲାମ୍‌ତି ଲାକ୍‌ତୁରି ଗାଡ଼ାକାଣ୍‍କୁ ଉନ୍‌ଡ୍ରି ପେରି ଲୋକୁ ମାନ୍ଦା ରଗ୍‌ ନି ଦୁବା ଆସ୍‌ତି ଲୋକାଙ୍ଗ୍‌ ତାସି ସିସୁରି ଲାକ୍‌ତୁ ତାସିମାର୍ହାର୍‍ ମାରି ୱାର୍‌ ୱିଜେରେ ନେଗେନ୍‌ ଆଜିମାର୍ହାର୍‍ ।
ACT 5:17 ତାନିୱେନ୍‍କା ୱିଜେରିଙ୍ଗ୍‍ ପେରି ଜାଜକ ମାରି ୱାନି ପାଣିକିନିକାର୍‍ ନି ଲାକ୍‌ତୁରି ସାଦୁକି ଦଲତୀ ଲୋକୁ ପ୍ରେରିତ ସିସୁରି ମୁସ୍‌କୁ ନାଣ୍ତ ରିସା ଆଜି ୱାରି ବିରୁଦ୍‍ତାନ୍‍ ପାଣି କିଦେଙ୍ଗ୍‌ ବାସେ କିତାର୍‍ ।
ACT 5:18 ୱାର୍‌ ପ୍ରେରିତ ସିସୁରିଙ୍ଗ୍‌ ତର୍‌ସି ଇସ୍ରି ଜଇଲ୍‌ତୁ ଇଟ୍‌ତାର୍‌ ।
ACT 5:19 ମାତର୍‌ ଆୟା ନାଡ଼ା ପ୍ରବୁଦି ଅରେନ୍‌ ଦୁତ୍‍ ଜଇଲ୍‍ତି ସେର୍‍ଲା ରେତା ସିତାନ୍‌ ମାରି ପ୍ରେରିତ ସିସୁରିଙ୍ଗ୍‌ ଡ଼ିସିସ୍‍କିଜି ୱାରିଙ୍ଗ୍‌ ଇର୍ହାନ୍‌,
ACT 5:20 “ସାନ୍‍ଡ୍ରୁ, ମନ୍ଦିର୍‌ତୁ ନିଲ୍‍ସି ଲୋକାଙ୍ଗ୍‌ ଇୟା ପୁନି ଜିବନ୍‌ ବିସୟ୍‌ତାନ୍‌ ୱିଜୁ ମାଟା ୱେର୍‍ତୁ ।”
ACT 5:21 ପ୍ରେରିତ ସିସୁର୍‍ ୱାନି ମାଟା ମାନାଜି ସାଲ୍‍ଦି ମନ୍ଦିର୍‌ତୁ ଡ଼ୁଗୁଜି ସିକିୟା ସିଦେଙ୍ଗ୍‍ ଆସ୍‌ତାର୍‌ । ୱିଜେରିଙ୍ଗ୍‍ପେରି ଜାଜକ ନି ୱାନି ୱାନି ପାଣିକିନିକାର୍‍ ପେରିମିଟିଙ୍ଗ୍‍ତି ଇନ୍‌ଡ୍ର ପୁରା ବାସ୍‌ନି ଉଣ୍ତିଙ୍ଗ୍‌ ଇସ୍ରାଏଲ୍‌ତି ୱିଜେରେ ଲୋକୁ ଜିହୁଦି ନେତାରିଙ୍ଗ୍‌ କୁକିସ୍‍ କିଜି ତାତାର୍‌ ମାରି ତାନିୱେନ୍‍କା ପ୍ରେରିତ ସିସୁରିଙ୍ଗ୍‌ ଆୟା ମିଟିଙ୍ଗ୍‍ତୁ ତାତେଙ୍ଗ୍‌ ଇଜି ପାଣିକିନିୱାରିଙ୍ଗ୍‌ ଜଇଲ୍‍ତୁ ପୋକ୍‌ତାର୍‍ ।
ACT 5:22 ମାତର୍‌ ପାଣିକିନିକାର୍‌ ଜଇଲ୍‌ତୁ ପ୍ରେରିତ ସିସୁରିଙ୍ଗ୍‌ ପୟ୍‍ଏତାରୋ ଡ଼େସି ୱାଜି ପେରି ମିଟିଙ୍ଗ୍‍ତୁ ୱେର୍‌ତାର୍‌,
ACT 5:23 “ମାପ୍‍ ଜଇଲ୍‍ତୁ ଇତା ସୁଡ଼ୁତାପ୍‌, ଜଇଲି ଆଟ୍‍ୱାଦାନ୍‍ କେର୍‍ପାତା ମାନାତ୍‌ ମାରି କାପ୍‌କିନିକାର୍‌ ସେର୍‍ଲା ଆଗ୍‌ଡ଼ି କାପ୍‍କିଜିନାର୍‍, ମାତର୍‌ ସେର୍‌ଲା ରେତି ୱେନ୍‌କା ଲୋଇ ମାପ୍‌ ଏଙ୍ଗ୍‌ ପୟ୍‍ଏତାପ୍‍ ।”
ACT 5:24 ଇୟା ମାଟା ୱେନ୍‌ଜି ପେରି ଜାଜକ ନି ମନ୍ଦିର୍‌ କାପ୍‍କିନିୱାରି ଦାୟିତ୍‍ତୁ ମାନି ପାଣିକିନିକାନ୍‍ କାବାଆତାନ୍ । ପ୍ରେରିତ ସିସୁରିଙ୍ଗ୍‌ ଉଣ୍ତିଙ୍ଗ୍‌ ଇନିକା ଗଟାତାମାନାତ୍‍ ।
ACT 5:25 ନାସ୍ତିୱାଲେ ଅରେନ୍‌ ଲୋକୁ ୱାଜି ଇର୍ହାନ୍‌, “ୱେନ୍‍ଣ୍ତ୍ରୁ ! ଏମେ ଲୋକାଙ୍ଗ୍‌ ମିର୍‌ ଜଇଲ୍‌ତୁ ଇଟ୍‍ତିମାର୍ହିଦେର୍‍, ୱାର୍‌ ମନ୍ଦିର୍‌ତୁ ଲୋକାଙ୍ଗ୍‌ ସିକିୟା ସିଜିନାର୍‍ ।”
ACT 5:26 ମନ୍ଦିର୍‌ତି ପାଣିକିନିକାର୍‌ କାପ୍‍କିନିୱାରି ୱାଲେ ସଲ୍‍ସି ପ୍ରେରିତ ସିସୁରିଙ୍ଗ୍‌ ମାରିଡ଼େସି ତାସି ୱାତାର୍‌ । ୱାର୍‌ ଏଣ୍ତେସ୍‌ କିଜିବା ବପୁ ତିଗ୍‍ଏତାର୍‍, ଇରିଙ୍ଗ୍‌ ୱାରି ତିଏଲ୍‍ ମାର୍ହାତ୍‌ ଜେ ଲୋକୁ ୱାରି ମୁସ୍‌କୁ କାଲ୍‌କୁ ଡାକ୍‌ନାର୍‌ ।
ACT 5:27 ୱାର୍‌ ପ୍ରେରିତ ସିସୁରିଙ୍ଗ୍‌ ଲୋଇ ଅସି ପେରିମିଟିଙ୍ଗ୍‌ ଆଗ୍‌ଡ଼ି ନିଲ୍‍ପ୍‍ତାର୍‍ ମାରି ୱିଜେରିଙ୍ଗ୍‍ପେରି ଜାଜକ ୱାରିଙ୍ଗ୍‌ ମାଟା ୱେନ୍‍ବାତାନ୍‌,
ACT 5:28 “ଇୟା ଲୋକ୍‌ତି ଦର୍‌ତାନ୍‌ ଇନି ସିକିୟା ସିଇ ଉଣ୍ତିଙ୍ଗ୍‌ ମାପ୍‌ ଡାଟ୍‍ ଆଦେସ୍‌ ସିତାମାର୍ହାପ୍‍, ମାତର୍‌ ସୁଡ଼୍‍ଦୁ, ମିର୍‌ ଇନିକା କିତିମାନିଦେର୍‍ ! ଜିରୁସାଲାମ୍‌ତି ୱିଜୁତରିନ୍‍ ମିର୍‌ ଇୟା ସିକିୟା ପ୍ରଚାର୍‌ କିତିମାନିଦେର୍‍ ମାରି ୱାନି ନେତେର୍‌ ଉଣ୍ତିଙ୍ଗ୍‌ ମିର୍‌ ମାଙ୍ଗିଁ ଦସ୍‌ କିଦେଙ୍ଗ୍‌ ସେସ୍ଟା କିଜିନିଦେର୍‌ !”
ACT 5:29 ପିତର୍‌ ନି ଆଇ ସିସୁର୍‍ ଇର୍ହାର୍‌, “ମାପ୍‌ ମାପୁରୁଙ୍ଗୁଁ ମାନାନିକା ନେଗେତ୍‌, ଲୋକାଙ୍ଗ୍‌ ସିଲେ ।
ACT 5:30 ମିର୍‌ ଜିସୁଙ୍ଗୁଁ କ୍ରୁସଦୁ କୁଟିଙ୍ଗ୍‍ ଡାକ୍‍ସିସାପିସ୍‍ତି ୱେନ୍‌କା, ମା ଡକ୍ରାଦାଦାରି ମାପୁରୁ, ଜିସୁଙ୍ଗୁଁ ସାତିମାଣାନ୍‌ ମାରିଡ଼େସି ନିକ୍‍ତାମାନାନ୍‍ ।
ACT 5:31 ଇସ୍ରାଏଲ୍‌ତି ଲୋକାଙ୍ଗ୍‌ ଏତ୍‌କିଜି ମନ୍‌ତିଙ୍ଗ୍‌ ଡ଼େପିସ୍‌ ପାପ୍‌ କେମା ପୟ୍‍ନି ସୁଜୋଗ ସିନି ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ନେତା ନି ରକିୟାକର୍ତା ୱାଜା ନିକ୍‍ତାମାନାନ୍‍ ମାରି ୱାନି ଉଣେରି ତରିନ୍‌ ଇଟ୍‌ତାମାନାନ୍‌ ।
ACT 5:32 ମାପ୍‌ ଇୟାୱିଜୁ ବିସୟ୍‌ତି ସାକି । ମାରି ଏମେ ପବିତ୍ର ଆତ୍ମାଦିଙ୍ଗ୍‍ ମାପୁରୁ ୱାନି ମାନାନିୱାରିଙ୍ଗ୍‍ ଦାନ୍‌ ସିତାମାନାନ୍‌, ୱାନ୍‌ ବା ତେନିସାକି ।”
ACT 5:33 ପେରିମିଟିଙ୍ଗ୍‍ତି ଲୋକୁ ଇୟା ମାଟା ୱେନ୍‌ଜି ନିସା ରିସା ଆତାର୍‌ ଜେ, ୱାର୍‌ ସିସୁରିଙ୍ଗ୍‌ ଡାକ୍‌ତେଙ୍ଗ୍‍ଁ ବଦା କିତାର୍‍ ।
ACT 5:34 ମାତର୍‌ ୱାରି ଲୋଇ ଗମଲିଏଲ ଦର୍‌ତି ଅରେନ୍‌ ପେରି ପାରୁସି ଦାର୍ମୁଗୁରୁ ପେରିମିଟିଙ୍ଗ୍‍ତୁ ନିଲ୍‍ସି ପ୍ରେରିତ ସିସୁରିଙ୍ଗ୍‌ ଆତ୍‌ରେ ଅତେଙ୍ଗ୍‌ ଇଜି ଆଦେସ୍‌ ସିତାନ୍‌,
ACT 5:35 ପେରିମିଟିଙ୍ଗ୍‍ତି ଲୋକାଙ୍ଗ୍‌ ଇର୍ହାନ୍‌, “ଇସ୍ରାଏଲ୍‌ତି ଲୋକୁ, ଇୟା ଲୋକାଙ୍ଗ୍‌ ଉଣ୍ତିଙ୍ଗ୍‌ ଆମାକା କିଦେଙ୍ଗ୍‌ ସଲ୍‍ସିନିଦେର୍‍, ଅଡ଼ପ୍‌ ଜାଗାର୍‍ତାଦାନ୍‍ କିନିଦେର୍‍ ।
ACT 5:36 ମି ମନ୍‌ତୁ ତେବାତାତ୍‍, ଏସ ସମୟ ଆଗ୍‌ଡ଼ି ତିହୁଦା ନିଜେଦିଙ୍ଗ୍‍ ଅରେନ୍‌ ପେରିଲୋକ୍‍ ଇଜି ଇର୍ହାନ୍‌, ମାରି ପାକାପାକି ଚାରିସ ଲୋକୁ ୱାନି ୱାଲେ ମିସାତାମାର୍ହାର; ମାତର୍‌ ୱାନ୍‌ ସାତାନ୍‍, ୱାନି ୱାଲେ ବୁଲାନିକାର୍‍ ଇନିଙ୍ଗାଁ ଆନିଙ୍ଗାଁ ଆତାର୍‌ ମାରି ୱାନି ଦଲ୍‌ ମାର୍‍ଗିତା ସର୍ହାତ୍‍ ।
ACT 5:37 ତାନିୱେନ୍‍କା ଲୋକୁ ଲେକିସ୍‍ନି ୱେଡ଼ାଦୁ ଗାଲିଲିଦୁ ଜିହୁଦା ଦର୍‌ତି ମାରି ଅରେନ୍‌ ୱାତାନ୍‌, ୱାନ୍‌ ବା ନାଣ୍ତ ଲୋକାଙ୍ଗ୍‌ ୱାନି ଦଲ୍‍ତୁ ମିସାକିତାନ୍‌ । ମାତର୍‌ ୱାନ୍‌ ବା ସାତାନ୍‍ ମାରି ୱାନି ୱାଲେ ବୁଲାନିକାର୍‍ ଇନିଙ୍ଗାଁ ଆନିଙ୍ଗାଁ ଆତାର୍‌ ।
ACT 5:38 ଆବେଟ୍‌ ଇୟା ବିସୟ୍‌ତାନ୍‌ ଇୟା ଲୋକା ବିରଦ୍‌ତାନ୍‌ ଇନି ପାଣି କିଇ ଉଣ୍ତିଙ୍ଗ୍‌ ନାନ୍ ମାଟା ସିଜିନା । ୱାରି ବିସୟ୍‌ତାନ୍‌ ମନ୍‍ ସିମାଟ୍‍ । ୱାରି ଉପାୟ ନି ପାଣିଦି ସନିକା ଜଦି ଲୋକା ମାଣ୍‌କୁ ଆନାମାନାତ୍‍, ଆରିଙ୍ଗ୍‌ ତାନି ବିସୟ୍‌ ମାର୍‍ଗ୍‍ନାତ୍‍ ।
ACT 5:39 ମାତର୍‌ ଜଦି ଆକା ମାପୁରୁ ମାଣ୍‌କୁ ଆନାମାନାତ୍‍, ଆରିଙ୍ଗ୍‌ ୱାରିଙ୍ଗ୍‌ ଆରାକିନିକା ମି ଉସାସ୍‌ ସିଲେ । ଆନାତ୍‌ ତରାନାତ୍‍ ଜେ ମିର୍‌ ମାପୁରୁ ବିରଦ୍‌ତାନ୍‌ ଜୁଦ୍‍ କିତିମାନିଦେର୍‍ ।” ପେରିମିଟିଙ୍ଗ୍‌ ଲୋକୁ ଗମଲିଏଲ୍‍ତି ମାଟା ମାନାତାର୍‍ ।
ACT 5:40 ୱାର୍‌ ପ୍ରେରିତ ସିସୁରିଙ୍ଗ୍‌ ଲୋଇ କୁକ୍‌ସି, ୱାରିଙ୍ଗ୍‌ କର୍‍ଡା ଡାକିସ୍‍କିତାର୍‍ ମାରି ଜିସୁଦି ଦର୍‌ତାନ୍‌ ଇନି ମାଟା ଇନ୍‌ଇ ଉଣ୍ତିଙ୍ଗ୍‌ ଆଦେସ୍‌ ସିଜି ଡ଼ିସ୍‍ତା ସିତାର୍‍ ।
ACT 5:41 ପ୍ରେରିତ ସିସୁର୍‍ ୱେଡ଼ିକାଦାନ୍‌ ପେରିମିଟିଙ୍ଗ୍‍ତାନ୍‍ ସତାସର୍‌ର୍ହାର୍‌, ଇରିଙ୍ଗ୍‌ ମାପୁରୁଦି ଆଗ୍‌ଡ଼ି ୱାର୍‌ ଜିସୁ ଉଣ୍ତିଙ୍ଗ୍‌ ଅପମାନ୍‍ ପୟ୍‌ଦେଙ୍ଗ୍‌ ଇଜି ଜଗ୍‌ ଅଡ଼ବିତା ମାର୍ହାର୍‍ ।
ACT 5:42 ମାରି ୱାର୍‌ ଦିନାମି ମନ୍ଦିର୍‌ତୁ ମାରି ଲୋକା ଇଲ୍‍କାଙ୍ଗ୍‍ଁ ମସିହ ଜିସୁଦି ବିସୟ୍‌ତାନ୍‌ ନେଗିକାବୁର୍‌ ପ୍ରଚାର୍‌ କିତାର୍‍ ମାରି ସିକିୟା ସିଦେଙ୍ଗ୍‍ ଆସ୍‌ତାର୍‌ ।
ACT 6:1 ଏସ ସମୟ ୱେନ୍‌କା ସିସୁରି ଦଲ୍‌ ପିର୍‍ନି ଦାପେ ଦାପେ ଏବ୍ରି ବାସାଦି ଜିହୁଦିର୍‍ ମାରି ଆବେ ମାନି ଜିହୁଦି ଲୋକା ଲୋଇ ଜାଟିଙ୍ଗ୍‍ଁ ଆତାର୍‌ । ଦିନାମିଦି କାଦି କି ଡାବୁଙ୍ଗୁଁ ବାଟାକିନିୱାଲେ ୱାରି ରାଣ୍ତିଆଇମେକାଙ୍ଗ୍‍ଁ ନେଗେନ୍‌ ସୁଡ଼ୁଏଜିନାର୍‍ ଇଜି ଗ୍ରିକ୍‍ବାସା ୱାର୍‍ଗିନି ଜିହୁଦିର୍‌ ଦାବି କିତାର୍‍ ।
ACT 6:2 ଆବେଟ୍‌ ବାର୍‍ ଲୋକୁ ପ୍ରେରିତ ସିସୁର୍‍ ୱିଜୁ ବିସ୍‍ବାସି ଦଲ୍‍ତିଙ୍ଗ୍‍ ଉଣ୍ତା କିଜି ଇର୍ହାନ୍‌, “ଡାବୁଙ୍ଗୁଁ ସାଲାକିନି ଉଣ୍ତିଙ୍ଗ୍‌ ମାପୁରୁଦି ବାକ୍ୟ ପ୍ରଚାର୍‌ କିଦେଙ୍ଗ୍‌ ଗାଡ଼୍‍ୟା ଆନିକା ମା ଉଣ୍ତିଙ୍ଗ୍‌ ଟିକ୍‌ ସିଲେ ।
ACT 6:3 ଆଦେଙ୍ଗ୍‌ ଏ ତଡ଼ାନ୍‌କୁ ନି ତାଙ୍ଗିଁକି ମି ମାଣ୍‌କୁ ପବିତ୍ର ଆତ୍ମା ନି ବୁଦିଦୁ ପୁରା ଆତିମାନି ସାତ୍ ଲୋକାଙ୍ଗ୍‌ ଆସ୍‍କିଦୁ । ମାଡ୍‌ ୱାରିଙ୍ଗ୍‌ ଇୟା ବିସୟ୍‌ତୁ ଦାୟିତ୍‍ ସିନାଟ୍‍ ।
ACT 6:4 ଆର୍‍ତିଙ୍ଗ୍‍ଁ ପାର୍‌ତାନା ନି ପ୍ରଚାର୍‌ ସେବା ପାଣିଦୁ ମାଡ୍‌ ପୁରା ସମୟ ସିଦେଙ୍ଗ୍‍ ଆଟ୍‍ନିକା ।”
ACT 6:5 ଦଲ୍‌ତି ୱିଜେରେ ପ୍ରେରିତ ସିସୁରି ଇୟା ମାଟାଦୁ ୱେଡ଼ିକା ଆତାର୍‌ ମାରି ଇୟା ପାଣି ଉଣ୍ତିଙ୍ଗ୍‌ ବିସ୍‌ବାସ୍‌ ନି ପବିତ୍ର ଆତ୍ମାଦୁ ପୁରା ଆତିମାନି ସ୍ତିପାନ୍ ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌, ମାରି ପିଲିପ୍‍ପ, ପ୍ରକର, ନିକାନୋର, ତିମୋନ, ପାର୍ମନା ମାରି ଆଗ୍‌ଡ଼ି ଜିହୁଦି ଦର୍ମଦୁ ବାଦ୍‍ଲେ ଆତିମାର୍‍ଇ ଆଣ୍ଟିୟୋକତି ଅଣଜିହୁଦି ନିକୋଲାୟତିଙ୍ଗ୍‍ ଆସ୍‌କିତାର୍‍ ।
ACT 6:6 ପ୍ରେରିତ ସିସୁର୍‍ ଇୟା ସାତ୍ ଲୋକା ଉଣ୍ତିଙ୍ଗ୍‌ ପାର୍‌ତନା କିଜି ୱାରି ମୁସ୍‌କୁ କିକୁ ଇଟ୍‌ତାର୍‌ ।
ACT 6:7 ଇୟାୱାଜା ମାପୁରୁଦି ବାକ୍ୟ ପ୍ରଚାର୍‌ କିତାର୍‍ । ଜିରୁସାଲାମ୍‍ତୁ ସିସୁରି ଦଲ୍‌ ନାଣ୍ତଦାନ୍‌ ନାଣ୍ତ ପିର୍‌ଦେଙ୍ଗ୍‌ ଆସ୍‌ତାର୍‌; ନାଣ୍ତ ଜାଜକର୍‌ ବା କ୍ରିସ୍ତ ବିସ୍‌ବାସ୍‌ସିର୍‌ ଆତାର୍‌ ।
ACT 6:8 ମାପୁରୁମାଣାନ୍‌ ନାଣ୍ତବାବେ ଆସିର୍ବାଦ୍‌ ପୟଜି ମାରି ସାକ୍ତିଦୁ ପୁରା ଆତିମାନି ସ୍ତିପାନ୍, ଲୋକା ଲୋଇ ନାଣ୍ତ ସିନା ନି କାବାଆନି ପାଣି କିତାନ୍‌ ।
ACT 6:9 ମାତର୍‌ କୁରିଣି ମାରି ଆଲେକ୍‍ଜାଣ୍ତ୍ରିଆ ତ୍ରିଆଦି ଦାସ୍‍ପାଣିଦାନ୍‍ ମୁକ୍‍ଡ଼ାତି ମାର୍‍ଇ ଜିହୁଦିରିଙ୍ଗ୍‍ଁ ଅସି ତିଆର୍‌ଆତି ପାର୍‌ତନା ଇଲୁଦୁ ମାନି ଏସଲୋକ୍‌ ସ୍ତିପାନତି ବିରୁଦ୍‍କିତାର୍‍ । ୱାର୍‌ ମାରି କିଲିକିୟା ନି ଆସିଆ ଦେସ୍‌ତି ଆଇ ଜିହୁଦିର୍‌ ସ୍ତିପାନତି ୱାଲେ ଜାଟି କିଦେଙ୍ଗ୍‌ ଆସ୍‌ତାର୍‌ ।
ACT 6:10 ମାତର୍‌ ପବିତ୍ର ଆତ୍ମା ସ୍ତିପାନତିଙ୍ଗ୍‍ ଇୟାୱାଜା ବୁଦି ସିତାତ୍‌ ଜେ, ଏନ୍‌ ୱାନି ବିରୁଦ୍‌ତାନ୍‌ ୱେର୍‌ତେଙ୍ଗ୍‍ ଆଟ୍‍ଏତାନ୍‍ ।
ACT 6:11 ଆର୍‍ତିଙ୍ଗ୍‍ଁ “ୱାନ୍‌ ମୋସାଦି ବିରଦ୍‌ତାନ୍‌ ମାରି ମାପୁରୁଦି ବିରଦ୍‌ତାନ୍‌ ମାଟା ଇଜିମାନିକା ମାପ୍‌ ୱେର୍‍ଆପ୍‍,” ଇୟା ମିସ୍‌ ସାକି ସିନି ଉଣ୍ତିଙ୍ଗ୍‌ ୱାର୍‌ ଏସ ଲୋକାଙ୍ଗ୍‌ ଲାଚ୍‌ ସିଜି ପୁସେ‌ରେକିତାର୍‍ ।
ACT 6:12 ଇୟାୱାଜା ୱାର୍‌ ଲୋକାଙ୍ଗ୍‌, ଦାର୍ମୁ ନେତାର୍‍ ମାରି ଗୁରୁରିଙ୍ଗ୍‍ ଉତ୍‍ତାର୍‍ ମାରି ସ୍ତିପାନତିଙ୍ଗ୍‍ ଆସ୍‌ସି ପେରିମିଟିଙ୍ଗ୍‍ତୁ ଅତାର୍‌ ।
ACT 6:13 ତାନିୱେନ୍‍କା ୱାର୍‌ ୱାନି ବିରଦ୍‌ତାନ୍‌ ମିସ୍‌ ସାକି ସିଦେଙ୍ଗ୍‍ ଇଜି ଏସ ଲୋକାଙ୍ଗ୍‌ ଲୋଇ ତାତାର୍‌ । ୱାର୍‌ ଇର୍ହାର୍‌, “ଇୟା ଲୋକୁ ୱିଜୁଦିନ୍ ମା ପବିତ୍ର ମନ୍ଦିର୍‌ ନି ମୋସାଦି ନିୟମ୍‌ ବିରୁଦ୍ଧତାନ୍‌ ୱେର୍‌ସିନାନ୍‍ ।
ACT 6:14 ନାଜରିୟତିୟ ଜିସୁ ମନ୍ଦିର୍‌ତିଙ୍ଗ୍‌ ରୁକ୍‍ନା ପକ୍‍ନାନ୍‍ ମାରି ମୋସାଦି ମାଣାନ୍‌ ମାପ୍‌ ପୟ୍‍ତିମାନି ୱିଜୁ ରିତିନିତି ବାଦ୍‍ଲେ କିନା ଇଜି ଇୟା ଲୋକୁ ଇଜିମାନିକା ମାପ୍‌ ୱେର୍‍ଆମାନାପ୍‍ !”
ACT 6:15 ନାସ୍ତିୱାଲେ ଆବେନ୍‌ ବାସ୍ତିମାର୍‍ଇ ୱିଜେରେ ଅର୍‌ସେ ସ୍ତିପାନ୍‍ତି ତରିନ୍‌ ସୁଡ଼ୁତାର୍‌ ଜେ ୱାନି ମକମ୍‌ ମୁସ୍‌କୁପୁର୍‌ତି ଦୁତ୍‍ତି ମକମ୍‍ତି ୱାଜା ତର୍‍ଜିମାର୍ହାପ୍‍ ।
ACT 7:1 ୱିଜେରିଙ୍ଗ୍‍ ପେରି ଜାଜକ ସ୍ତିପାନତିଙ୍ଗ୍‍ ୱେନ୍‌ବାତାନ୍‌, “ଇକା ଇନିକା ସତ୍‌ ?”
ACT 7:2 ସ୍ତିପାନ୍ ଇର୍ହାନ୍‌, ଏ ନା ତଡ଼ାନ୍‌କୁ ନି ବୁବାର୍‍, ୱେନ୍‌ଡ୍ରୁ ! ମା ଡକ୍ରାଦାଦା ଅବ୍ରାହାମ ହାରୋଣଦୁ ବାସାଦେଙ୍ଗ୍‍ ସନି ଆଗ୍‌ଡ଼ି ଗୌରବ୍‍ତି ମାପୁରୁ ମେସପଟାମିଆଦୁ ତରାୟ୍‌ଆଜି,
ACT 7:3 ମି ଇଲୁତିଲୋକୁ ମାରି ଦେସ୍‌ ଡ଼ିସ୍‌ସି ନାନ୍ ଏମେ ଦେସ୍‌ ତର୍‍ନା, ଆବେ ସାଙ୍ଗ୍ଆ ।
ACT 7:4 ଆବେଟ୍‌ ୱାନ୍‌ ୱାନି କଲଦୀୟ ଦେସ୍‌ ଡ଼ିସ୍‌ସି ହାରୋଣତୁ ବାସାଦେଙ୍ଗ୍‍ ସର୍ହାନ୍‍ । ଅବ୍ରାହାମତି ବୁବାସି ସାତି ୱେନ୍‌କା ମିର୍‌ ଇଲେଇ ଆମା ଦେସ୍‌ତୁ ବାସାଜିନିଦେର୍‍, ମାପୁରୁ ୱାନିଙ୍ଗ୍‌ ଆୟା ଦେସ୍‌ତୁ ତାତାନ୍‍ ।
ACT 7:5 ମାପୁରୁ ନାସ୍ତିୱାଲେ ଅବ୍ରାହାମତି ଇୟା ଦେସ୍‌ତୁ ଇନି ଦନ୍‌, ଇୟାୱାଜା ଜେ କାଣ୍ତେକ୍‌ ମୁରା ବୁମି ବା ସିଏନ୍‌ ମାର୍ହାନ୍‍ । ମାତର୍‌ ମାପୁରୁ ପାର୍‌ମାଣ୍‌ କିତାମାର୍ହାନ୍‌, ଅବ୍ରାହାମ୍‍ତିଙ୍ଗ୍‌ ଇୟା ଦେସ୍‌ ସିନାନ୍‌ ମାରି ଇକା ୱାନି ନି ୱାନି କୁଟୁମ୍‌ତି ନିଜେତିକା ଆଜି ତେବାନାତ୍‍ । ମାପୁରୁ ଆୟା ପାର୍‌ମାଣ୍‌ କିନିୱାଲେ ଅବ୍ରାହାମ୍‍ତିଙ୍ଗ୍‌ କଡ଼କକ୍‍ରା ଆଏନ୍‌ ମାର୍ହାନ୍‍ ।
ACT 7:6 ନାସ୍ତିୱାଲେ ମାପୁରୁ ୱାନିଙ୍ଗ୍‌ ଇୟା ମାଟା ଇର୍ହାନ୍‌ ! ମି କୁଟୁମ୍‍ତିକାର୍‍ ଦାସ୍‍ତି ୱାଜା ଆଇ ଦେସ୍‌ତୁ ବାସାନାର୍‍ ମାରି ସାରିସ ବାର୍ସେକ୍‍ ସାନ୍ଦି କାଷ୍ଟୁ ପୟ୍‌ନାର୍‌ ।
ACT 7:7 ମାତର୍‌ ମାପୁରୁ ଇର୍ହାନ୍‌, ୱାର୍‌ ଏମେୱାରି ସେବା କିନାର୍‌, ନାନ୍ ଆୟା ଲୋକା ବିସାର୍‌ କିନାପ୍‍, ୱେନ୍‌କା ମି କୁଟୁମ୍‍ତିକାର୍‍ ଆୟା ଦେସ୍‍ତାନ୍‍ ସନା ୱାନାର୍‌ ମାରି ଇୟା ବାଡିଦୁ ନା ପାର୍‌ତନା କିନାର୍‌ ।
ACT 7:8 ୱେନ୍‌କା ମାପୁରୁ ଅବ୍ରାହାମତି ୱାଲେ ପାର୍‌ମାଣ୍‌ ସିନା ୱାଜା ସୁନ୍ନତ୍‌ ନିୟମ୍‌ ତିଆର୍‌ କିତାନ୍‌ । ଆବେଟ୍‌ ୱାନି ମାରିସି ଇସ୍‍ହାକ୍‍ତି ଜନମ୍‌ତି ଉଣ୍ତ୍ରି ସାତା ୱେନ୍‌କା ଅବ୍ରାହାମ ୱାନି ସୁନ୍ନତ କିତାନ୍‌; ଇସ୍‌ହାକ୍‌ ୱାନି ମାରିସି ଜାକୁବଙ୍ଗ୍‍ ମାରି ଜାକୁବ ୱାନି ବାର ମାରିସିରିଙ୍ଗ୍‌ ଅର୍ତାତ୍‍ ମା ଜାତିଦି ୱେଙ୍ଗିଁତି ଡକ୍ରାଦାଦାରିଙ୍ଗ୍‍ ସୁନ୍ନତ୍‌ କିତାନ୍‌ ।
ACT 7:9 ଜାକୁବଦି ମାରିସିର୍‌ ୱାରି ତଡ଼ାନ୍‌ ଜୋସେପ୍‌ ଉଣ୍ତିଙ୍ଗ୍‌ ରିସାଆଜି ୱାନିଙ୍ଗ୍‌ ମିସର୍‍ ଦେସ୍‌ତୁ କଟିସାକର୍‌ ୱାଜା ପର୍‍ତାର୍‍ । ମାତର୍‌ ମାପୁରୁ ଜସେପ୍‍ତି ୱାଲେ ମାର୍ହାନ୍‍ ।
ACT 7:10 ମାରି ୱିଜୁ ଦୁକୁ କାସ୍ଟୁଦି ୱାଲେ ୱାନିଙ୍ଗ୍‌ ସାଲା କିତାନ୍‌ । ଏସ୍ତିୱାଲେ ଜସେପ୍‍ ମିସର୍‍ତି ରାଜା ଫାରୋଦି ଆଗ୍‌ଡ଼ି ୱାତାନ୍‌, ମାପୁରୁ ୱାନିଙ୍ଗ୍‌ ଦୟା ନି ବୁଦି ସିତାନ୍‌ ମାରି ରାଜା ଜସେପ୍‍ତିଙ୍ଗ୍‍ ଦେସ୍‌ତି ସାସନ୍‍କିନିକାନ୍‍ ନି ରାଜା ମେଡ଼୍‍ତି ପେରିକାନ୍‌ ୱାଜା ଆସ୍‌କିତାନ୍‍ ।
ACT 7:11 ତାନିୱେନ୍‍କା ୱିଜୁ ମିସର୍‍ ମାରି କିଣାନ୍‍ତୁ ଉଣିକା ପୁଟ୍‍ଏତାତ୍‌ଆକା ଲୋକୁ ନାଣ୍ତ କାସ୍ଟୁ ପୟ୍‌ତାର୍‌ । ମା ଡକ୍ରାଦାଦାରି କାଦିଦି ଉଣା ଆତାତ୍‌ ।
ACT 7:12 ମିସର୍‍ ଦେସ୍‌ତୁ କାଦି ମାନାତ୍‌ ଇଜି ୱେନ୍‌ଜି ଜାକୁବ ୱାନି ମାରିସିରିଙ୍ଗ୍‌ ଅର୍ତାତ୍‍ ମା ଡକ୍ରାଦାଦାରିଙ୍ଗ୍‍ ଆବେ ପକ୍‌ତାନ୍‌ ।
ACT 7:13 ଆବେ ୱାର୍‌ ରିଜା ସନି ୱାଲେ ଜୋସେପ୍‌ ୱାନି ତଡ଼ାନ୍‌କୁ ମାନୁ ନିଜେଦି ପରିଚୟ୍‌ ୱେର୍‌ତାନ୍‌ ମାରି ଫାରୋ ରାଜା ଜସେପ୍‍ତି ଇଲୁ ବିସୟ୍‌ତାନ୍‌ ନେସ୍‌ତାନ୍‌ ।
ACT 7:14 ତାନି ୱେନ୍‌କା ଜୋସେପ୍‌ ୱାନି ବୁବାସି ଜାକୁବ ନି ୱାନି ଇଲୁଦି ୱିଜେରେ ସତୁରି ପାସ୍‌ ଲୋକାଙ୍ଗ୍‌ ମିସର୍‍ ଦେସ୍‌ତୁ ୱାଦେଙ୍ଗ୍‌ ଇଜି କୁକ୍‍ତାନ୍‍ ।
ACT 7:15 ଜାକୁବ ମିସର୍‍ ଦେସ୍‌ତୁ ସର୍ହାନ୍‍, ଆବେ ୱାନ୍‌ ମାରି ୱାନି ମାରିସିରି ସାତାର୍‌ ।
ACT 7:16 ୱାରି ସାତି ମାଡ଼ା ସିକିମ୍‍ତୁ ଅତାର୍‌ ମାରି ଅବ୍ରାହାମ ହାମୋର ଲୋକା ମାଣ୍‌କୁ କଟିମାର୍ହି ବୁମିଦୁ ୱାରିଙ୍ଗ୍‌ ଅତାର୍‍ ମୁସ୍‌ତାର୍‌ ।
ACT 7:17 “ମାପୁରୁ ଅବ୍ରାହାମ୍‍ତିଙ୍ଗ୍‌ ଏମେ ପାର୍‌ମାଣ୍‌ କିତାମାର୍ହାନ୍‌, ଆକା ସତ୍‌ ଆଜି ମିସର୍‍ ଦେସ୍‌ତୁ ମା ଲୋକୁ ସଂକିୟା ନାଣ୍ତ ଆତାର୍‌ ।
ACT 7:18 ୱେନ୍‌କା ଜୋସେପ୍‌ତି ବିସୟ୍‌ତାନ୍‌ ନେସେଇ ମାର୍ହି ଅରେନ୍‌ ରାଜା ମିସର୍‍ ଦେସ୍‌ତୁ ସାସନ୍‍ କିତାନ୍‌ ।
ACT 7:19 ୱାନ୍‌ ମା ଡକ୍ରାଦାଦାରିଙ୍ଗ୍‍ ନାଣ୍ତ କାସ୍ଟୁ ସିତାନ୍‌, ୱାରି ଜନମ୍‍ଆତି ଇସ୍ରି କଡ଼ରିଙ୍ଗ୍‌ କାତ୍‍ତେଙ୍ଗ୍‍ ଇଜି ୱାରିଙ୍ଗ୍‌ ଆତ୍‌ରେ ପକ୍‍ତେଙ୍ଗ୍‍ ଇଜି ଆଦେସ୍‌ କିତାନ୍‌ ।
ACT 7:20 ଇୟା ସମୟ୍‍ତୁ ମୋସା ଜନମ୍‌ ଆତାନ୍‌ । ୱାନ୍‌ ମାପୁରୁ ଆଗ୍‍ଡ଼ି ମାର୍ହାନ୍‍ ଅରେନ୍‌ ନେଗ୍ରି କଡ଼ ପିଲା । ଇନ୍‌ଡ୍ର ମୁଣ୍ତ୍ରି ଲେଜ୍‌କୁ ସାନ୍ଦି ୱାନ୍‌ ଜାତୁନ୍‍ ଅଆୟ୍‍ ଆତାନ୍‍,
ACT 7:21 ମାରି ଏସ୍ତିୱାଲେ ୱାନିଙ୍ଗ୍‌ ଆତ୍‌ରେ ପୋକ୍‌ତାର୍‌, ଫାରୋ ରାଜାଦି ଗାଡ଼୍‌ସି ୱାନିଙ୍ଗ୍‌ ପୟ୍‌ଜି ନିଜେଦି କଡ଼ ୱାଜା ପସା କିତାତ୍‍ ।
ACT 7:22 ମୋସା ମିସର୍‍ ଦେସ୍‌ତି ୱିଜୁ ବୁଦିଦୁ ସିକିୟା ପୟ୍‌ତାନ୍‌, ୱାନି ମାଟା ମାରି ପାଣିଦୁ ଅରେନ୍‌ ପେରି ଲୋକୁ ୱାଜା ୱେଙ୍ଗିଁତାନ୍‍ ।”
ACT 7:23 “ମସାଦି ବାର୍ସୁ ଏସ୍ତିୱାଲେ ସାଲିସ୍‍ ବାର୍ସେକ୍‍ ଆତାତ୍‌, ୱାନ୍‌ ୱାନି ଇସ୍ରାଏଲ୍‌ତି ତଡ଼ାନ୍‌କୁ ଉଣ୍ତିଙ୍ଗ୍‌ ଏଣ୍ତେସ୍‌ ବ୍ୟବହାର୍‌ କିଆୟ୍‍ଆଜିନାତ୍‍, ଆକା ନେସ୍‌ତେଙ୍ଗ୍‌ ବଦା କିତାନ୍‌ ।
ACT 7:24 ୱାରି ଲୋଇ ଅରେନ୍‌ ୱାନିଙ୍ଗ୍‌, ଅରେନ୍‌ ମିସର୍‍ ଦେସ୍‍ତିକାନ୍‍ ଜାଟିକିନିକା ସୁଡ଼୍‌ଜି, ମସା ୱାନିଙ୍ଗ୍‌ ରକିୟା କିଦେଙ୍ଗ୍‌ ଇଜି ମିସର୍‍ତି ୱାନିଙ୍ଗ୍‍ ବାଦ୍‌ଲୁ ଅସି ଡାକ୍‍ସି ସାପିସ୍‌କିତାନ୍‌ ।
ACT 7:25 ୱାନ୍‌ ଅଡ଼୍‍ବିତା ମାର୍ହାନ୍‍, ୱାନି ନିଜେ ଲୋକୁ ନେସ୍‌ନାର୍‌ ଜେ, ତଡ଼ାନ୍‌କାଙ୍ଗ୍‌ ମୁକ୍‍ଡ଼ା କିଦେଙ୍ଗ୍‌ ଇଜି ମାପୁରୁ ୱାନିଙ୍ଗ୍‌ ବ୍ୟବ୍‌ହାର୍‍ କିଜିନାନ୍‍; ମାତର୍‌ ୱାର୍‌ ଆକା ବୁଜାଏତାର୍‌ ।
ACT 7:26 ମାର୍‌ନାଣ୍ତିଙ୍ଗ୍‌ ରିଏର୍‌ ଇସ୍ରାଏଲ୍‌ ଦେସ୍‍ତିକାର୍‍ ଜାଟିକିନିକା ସୁଡ଼ୁତାନ୍‌ ମାରି ୱାରି ଲୋଇ ସାନ୍ତି କିଦେଙ୍ଗ୍‌ ସେସ୍ଟା କିତାନ୍‌ । ୱାନ୍‌ ଇର୍ହାନ୍‌, ୱେନ୍‍ଣ୍ତ୍ରୁ, ମିର୍‌ ରିଇଦେର୍‍ ତୋ ଇସ୍ରାଏଲ୍‌ ଦେସ୍‌ତି ତଡ଼ାନ୍‌କୁ । ଏନ୍ଦା ଇୟାୱାଜା ଜାଟି କିଜିନିଦେର୍‌ ?
ACT 7:27 ମାତର୍‌ ଏମେକାନ୍‍ ଆଇୱାନିଙ୍ଗ୍‍ ଜାଟି କିଜି ମାର୍ହାନ୍‍, ୱାନ୍‌ ମସେଙ୍ଗ୍‍ ପେଲେ କିଜି ୱେନ୍‌ବାତାନ୍‌, ମା ନେତାର୍‌ରି ମୁସ୍‌କୁ ନିଙ୍ଗିଁ ଏନ୍‌ ସାସନ୍‍କିନିକାନ୍‍ ନି ବିସାର୍‌ କିନିକାନ୍‍ କିତାମାନାନ୍‍ ?
ACT 7:28 ଇଏନ୍‌ ଏଣ୍ତେସ୍‌ ମିସର୍‍ ଦେସ୍‌ତି ଲୋକ୍‌ତିଙ୍ଗ୍‌ ସାୟାମାର୍‌ଗାଡାକ୍‍ତି, ନାଙ୍ଗିଁ ଇନିକା ଆୟାୱାଜା ଡାକ୍‌ତେଙ୍ଗ୍‍ଁ ବଦା କିନି ?
ACT 7:29 ମୋସା ଇକା ୱେନ୍‌ଜି ମିସର୍‍ ଦେସ୍‌ତାନ୍‍ ଉରକ୍‍ତାନ୍‍ ମାରି ମିଦିୟୋନଦୁ ବାସା କିତାନ୍‍ । ଆବେନ୍‌ ୱାନି ରିଏର୍‌ କଡ଼ର୍‌ ମାର୍ହାର୍‌ ।”
ACT 7:30 “ସାଲିସ୍‍ ବାର୍ସେକ୍‍ ସର୍‌ଇ ୱେନ୍‌କା ସିନୟ ଗରନ୍‌ ଲାକ୍‌ତୁ ଉଣ୍ତ୍ରି କାସ୍‍ସିମାନି ଦୁପା ସିସୁ ଲୋଇ ମାପୁରୁଦି ଉନ୍‌ଡ୍ରି ଦୁତ୍‍ ମସେଙ୍ଗ୍‍ ତରାଇଆତାତ୍‍ ।
ACT 7:31 ମୋସା ଇକା ସୁଡ଼୍‌ଜି ନାଣ୍ତ କାବା ଆତାନ୍‌, ମାରି ଅଡ଼ପ୍‌ ନେଗେନ୍‌କିଜି ସୁଡ଼୍‍ଦେଙ୍ଗ୍‍ ଇଜି ଦୁପାଦି ଲାକ୍‌ତୁ ସର୍ହାନ୍‍ । ମାତର୍‌ ୱାନ୍‌ ପ୍ରବୁଦି ବଲ୍ ୱେର୍‍ଆନ୍‍,
ACT 7:32 ନାନ୍ ମି ଡକ୍ରାଦାଦା ଅବ୍ରାହାମ, ଇସ୍‌ହାକ୍‌ ମାରି ଜାକୁବଦି ମାପୁରୁ । ମୋସା ତିଲାଜି ତିରଗ୍‍ଜି ବେସ୍‍ତେଙ୍ଗ୍‍ ସାସ୍‌ କିଏତାନ୍‌ ।
ACT 7:33 ପ୍ରବୁ ୱାନିଙ୍ଗ୍‌ ଇର୍ହାନ୍‌, ନି ଜୁତା କୁତ୍ଆ, ଇରିଙ୍ଗ୍‌ ନିନ୍‌ ଏମେମାନୁ ନିର୍ହିମାନି, ଆକା ପବିତ୍ର ବୁମି ।”
ACT 7:34 ମିସର୍‍ ଦେସ୍‌ତୁ ନାନ୍ ନା ଲୋକାଙ୍ଗ୍‌ ନାଣ୍ତ ଦୁକୁକାସ୍ଟୁ ସୁଡ଼ୁତାମାନା । ନାନ୍ ୱାରି ଆଡ଼୍‍ବାନିକା ୱେର୍‍ଆମାନା ମାରି ୱାରିଙ୍ଗ୍‌ ଦାସ୍‍ପାଣିଦାନ୍‍ ରକିୟା କିଦେଙ୍ଗ୍‌ ରେତା ୱାତାମାନା । ଇଲେଇ ରାଦୁ, ନାନ୍ ମିଙ୍ଗିଁ ମିସର୍‍ ଦେସ୍‌ତୁ ପକ୍‍ନା ।
ACT 7:35 “ମୋସା ଇସ୍ରାଏଲ୍‌ ଲୋକା ମାଣାନ୍‌ ଡ଼ିସାୟ୍‍ଆତା ମାର୍ହାନ୍‍ । ପେରି ନେତାର୍‌ ୱେନ୍‌ବାତାର୍‌, ମା ମୁସ୍‌କୁ ନିଙ୍ଗିଁ ଏନ୍‌ ସାସନ୍‍କିନିକାନ୍‍ ନି ବିସାର୍‌କିନିକାନ୍‍ କିତାନ୍‌ ? ମାତର୍‌ ମାପୁରୁ ଆୟା ମୋସେଙ୍ଗ୍‍ କାସ୍‍ନି ଦୁପା ଲାକ୍‌ତୁ ତରାୟ୍‍ଆତି ମାର୍ହି ଦୁତ୍‍ତି ସାକାଦାନ୍‌ ଲୋକା ମୁସ୍‌କୁ ସାସନ୍‍ କିଦେଙ୍ଗ୍‌ ମାରି ୱାରିଙ୍ଗ୍‌ ମୁକୁଡ଼ା କିଦେଙ୍ଗ୍‌ ଇଜି ପକ୍‌ତାନ୍‌ ।
ACT 7:36 ୱାନ୍‌ ମିସର୍‍ ଦେସ୍‌ତୁ ମାରି ନେତ୍‍ରେ ସାମ୍‌ଦୁର୍‌ତୁ ନାଣ୍ତ କାବାଆନି ପାଣି କିଜି ଲୋକାଙ୍ଗ୍‌ ମିସର୍‍ ଦେସ୍‍ତାନ୍‍ ସପ୍‍ସି ତାତାନ୍‍, ସାଲିସ୍‍ ବାର୍ସେକ୍‍ ସାନ୍ଦି ବାଲି ବୁମିଦୁ ୱାରିଙ୍ଗ୍‌ ସାରି ତର୍‌ସି ଅତାନ୍‌ ।
ACT 7:37 ମୋସା ନିଜେ ଇସ୍ରାଏଲ୍‌ ଦେସ୍‌ତି ଲୋକାଙ୍ଗ୍‌ ଇର୍ହାମାର୍ହାନ୍‌, ମାପୁରୁ ନାଙ୍ଗିଁ ଏଣ୍ତେସ୍‌ ପକ୍‍ତାମାର୍ହାନ୍‍, ଆୟାୱାଜା ମି ଲାକ୍‌ତୁ ଅରେନ୍‌ ବାବବାଦିଙ୍ଗ୍‌ ପକ୍‍ନାନ୍‍ ୱାନ୍‌ ମି ନିଜେ ତଡ଼ାନ୍‌କା ଲୋଇରାନ୍‌ ଅରେନ୍‌ ଆନାନ୍‌ ।
ACT 7:38 ଆୟା ମୋସା ବାଲି ବୁମିଦୁ ଉଣ୍ତାତିମାର୍ହି ଇସ୍ରାଏଲ୍‌ତି ଲୋକାୱାଲେ ଅର୍‌ସେ ମାର୍ହାନ୍‍ । ୱାନ୍‌ ସିନୟ ଗରନ୍‌ତୁ ମା ଡକ୍ରାଦାଦାରି ୱାଲେ ମାରି ୱାରି ୱାଲେ ମାଟା ଇର୍ହିମାନି ମୁସ୍‌କୁପୁର୍‌ତି ଦୁତ୍‍ତି ୱାଲେ ମାର୍ହାନ୍‍ ମାରି ମା ଲାକ୍‌ତୁ ଇନ୍‍ଣ୍ତ୍ରେଙ୍ଗ୍‍ ଇଜି ୱାନ୍‌ ମାପୁରୁଦି ମାଣ୍‌କୁ ଜିବନ୍‌ତି ବାକ୍ୟ ଆସ୍‌ତାନ୍‌ ।”
ACT 7:39 ମାତର୍‌ ମା ଡକ୍ରାଦାଦାର୍‍ ୱାନିଙ୍ଗ୍‌ ମାନାଏତାର୍‍; ୱାର୍‌ ୱାନିଙ୍ଗ୍‌ ପେଲେକିଜି ମିସର୍‍ ଦେସ୍‌ତୁ ଡ଼େସି ସନ୍‌ଡ଼୍ରେଙ୍ଗ୍‌ ମନ୍‍ବଦାକିତାର୍‌ ।
ACT 7:40 ଆୟାଉଣ୍ତିଙ୍ଗ୍‌ ୱାର୍‌ ହାରୋଣତିଙ୍ଗ୍‍ ଇର୍ହାର୍‌, ଇଲେଇ ମାଙ୍ଗିଁ ସାରି ତର୍‌ସି ଅତେଙ୍ଗ୍‌ ଇଜି ଏସ ଦିୟାମ୍‍କୁ ତିଆର୍‌ କିଜ ସିଦା । ମାଙ୍ଗିଁ ମିସର୍‍ ଦେସ୍‌ତାନ୍‍ ସପ୍‌ତି ତାତିମାନି ଆୟା ମୋସା ଜେ ଏମେ ସର୍ହାନ୍‍, ଆକା ମାପ୍‌ ନେସ୍‌ଏପ୍‌ ।
ACT 7:41 ଆୟା ସମୟ୍‍ତୁ ଆବେ ୱାର୍‌ ଉଣ୍ତ୍ରି ଗାଡ଼ାଲ୍‍ତି ବମା ତିଆର୍‌ କିତାର୍‍ ମାରି ତାନି ଉଦେସ୍‍ତାନ୍‍ ପୁଜା କିଜି ବଲି ସିତାର୍‍ । ମାରି ନିଜେ ତିଆର୍‌ କିତିମାନି ଆୟା ମୁର୍ତିଦିଙ୍ଗ୍‍ ମାନାଦେଙ୍ଗ୍‌ ଇଜି ଉଣ୍ତ୍ରି ବଜି ତିଆର୍‌ କିତାର୍‍ ।
ACT 7:42 ଆବେଟ୍‌ ମାପୁରୁ ୱାରିମାଣାନ୍‌ ଏରିତାନ୍‍ ମାରି ୱାରିଙ୍ଗ୍‌ ବାଦଡ଼୍‍ତି ସୁକେଙ୍ଗାଁଙ୍ଗ୍‍ ସେବା କିଦେଙ୍ଗ୍‌ ଇଜି ଡ଼ିସ୍‌ତାସିତାନ୍‌ । ଇୟା ବିସୟ୍‌ତାନ୍‌ ବାବବାଦିରି ବଇଦୁ ରାସାତାମାନାତ୍‌ : “ଏ ଇସ୍ରାଏଲ୍‌ କୁଟୁମ୍‌ ! ବାଲିବୁମିଦୁ ସାଲିସ୍‍ ବାର୍ସେକ୍‍ ସାନ୍ଦି ମିର୍‌ ନା ଉଣ୍ତିଙ୍ଗ୍‌ ଜାତୁ ପୁଜା ସିଇତି ମାର୍ହିଦେର୍‌ନୋ ।
ACT 7:43 ମାତର୍‌ ମିର୍‌ ପାର୍‌ତନା କିଦେଙ୍ଗ୍‌ ଇଜି ଏମେ ବମା ୱିଜୁ ତିଆର୍‌ କିତିମାର୍ହିଦେର୍‍, ଆୟା ମାଲେକ୍‍ତି ଗୁଡ଼ା ମାରି ସୁକା ଦିୟାମ୍‍ ରମ୍ଫାତି ବମାଦିଙ୍ଗ୍‍ ପିଣ୍ତିତିଦେର୍‍ । ଆୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ବାବିଲନ୍‍ତି ଆୟାପାଡ଼ି ପକ୍‍ନାପ୍‍ ।”
ACT 7:44 ବାଲିବୁମିଦୁ ମା ଡକ୍ରାଦାଦାରି ୱାଲେ ମାପୁରୁଦି ତେବାନିକା ଗୁଡ଼ା ମାର୍ହାତ୍‌ । ମାପୁରୁ ମୋସେଙ୍ଗ୍‍ ଏଣ୍ତେସ୍‌ ତିଆର୍‌ କିଦେଙ୍ଗ୍ ଇର୍ହାମାର୍ହାନ୍‌ ମାରି ମୋସାଦିଙ୍ଗ୍‍ ଏମେ ସାରି ତର୍‍ତାମାର୍ହାନ୍‍, ଇକା ଆୟାୱାଜା ତିଆର୍‌ ଆତାମାର୍ହାତ୍‍ ।
ACT 7:45 ୱେନ୍‌କା ମା ଡକ୍ରାଦାଦାରି ଲୋକା ବୁବାସିରି ମାଣ୍‌କୁ ପୟ୍‍ତିମାର୍ହି ଆୟା ଗୁଡ଼ାଦିଙ୍ଗ୍‍ ଜିହୋସିୟଦି ୱାଲେ ପିଣ୍ତ୍‍ଜି ଅସି ସର୍ହାର୍‍ ମାରି ମାପୁରୁଦି ମାଣାନ୍‌ ପେରାୟ୍‍ ଆତିମାର୍‍ଇ ଆଇ ଦେସ୍‌ ଅଦିକାର୍‌ କିତାର୍‍ । ଦାଉଦ ରାଜାଦି ସମୟ ସାନ୍ଦି ଆବେ ତେବାତାତ୍‌ ।
ACT 7:46 ୱାନ୍‌ ମାପୁରୁଦିମାଣାନ୍‌ ଦୟା ପୟ୍‌ଜି ଜାକୁବଦି ମାପୁରୁଦି ଉଣ୍ତିଙ୍ଗ୍‌ ଉଣ୍ତ୍ରି ତେବାନି ମନ୍ଦିର୍‌ ତିଆର୍‌ କିଦେଙ୍ଗ୍‌ ୱାନି ସାରି ବଦାକିତାମାର୍ହାନ୍‍ ।
ACT 7:47 ମାତର୍‌ ୱେନ୍‌କା ଆୟା ତେବାନି ଇଲୁ ତିଆର୍‌ କିତାନ୍‌ ସଲମନ୍‍ ।
ACT 7:48 ମାତର୍‌ ୱିଜେରିଙ୍ଗ୍‌ ପେରି ମାପୁରୁ ଲୋକାମାଣାନ୍‌ ତିଆର୍‌ ଆତି ଇଲ୍‌କାଙ୍ଗ୍‌ ବାସାଏନ୍‍ । ଇୟା ବିସୟ୍‌ତାନ୍‌ ବାବବାଦି ରାସ୍‌ତାମାନାନ୍‌;
ACT 7:49 “ପ୍ରବୁ ଇନାନ୍‌, ମୁସ୍‌କୁପୁର୍‌ ନା ବାସ୍‌ନି ଗାଦି ମାରି ଦୁନିଆ ନା ପାଦାମ୍‌ ଇଡ୍‌ନି ବାଡି ମିର୍‌ ନା ଉଣ୍ତିଙ୍ଗ୍‌ ଏଣ୍ତେସ୍‌ ନାନି ଇଲୁ ତିଆର୍‌ କିନିଦେର୍‍ ? ନା ରମ୍‌ନି ଉଣ୍ତିଙ୍ଗ୍‌ ବାଡି ଏମେ ?
ACT 7:50 ଇୟାୱିଜୁ ବିସୟ୍‌ ଇନିକା ନାନ୍ ନିଜେ ତିଆର୍‌ କିଏ ନୋ ?”
ACT 7:51 ସ୍ତିପାନ୍‍ ମାରି ଇର୍ହାନ୍‌, “ମିର୍‌ ଏସା ମାନାଇକାର୍‍ । ମି ଜିବନ୍‌ ଏସା ତାଗ୍‌ଇକା । ମାପୁରୁଦି ବାକ୍ୟ ଉଣ୍ତିଙ୍ଗ୍‌ ମିର୍‌ ଏସା ବଇରା ! ମିର୍‌ ଟିକ୍‌ ମି ପୁର୍ବେଦିଡକ୍ରାରି ୱାଜା : ମିର୍‌ ୱିଜୁୱାଲେ ପବିତ୍ର ଆତ୍ମାଦି ବିରୁଦ୍‌ କିଜିନିଦେର୍‌ !
ACT 7:52 ମି ପୁର୍ବେଦିଡକ୍ରାଦାଦାରି ମାଣାନ୍‌ ପେରାୟ୍‍ ଆଇ ମାନି ଏମେ ବାବବାଦି ମାନାନ୍‌ ନୋ ? ମାପୁରୁଦି ଏମେ କାବୁର୍‌ସିନିକାର୍‍ ବେସି ଆଗ୍‌ଡ଼ି ୱାରି ଦାର୍ମୁଦି ଦାସ୍‍ତି ୱାନି ବିସୟ୍‌ତାନ୍‌ ଇର୍ହାମାର୍ହାର୍‍, ମି ଡକ୍ରାଦାଦାର୍‍ ୱାରିଙ୍ଗ୍‌ ଡାକ୍‍ତାର୍‍ ।
ACT 7:53 ଇଲେଇ ମିର୍‌ ୱାନି ଉଣ୍ତିଙ୍ଗ୍‌ ବିସ୍‌ବାସ୍‌ତୁ ଆରାକିଜି ୱାନିଙ୍ଗ୍‌ ଡାକ୍‍ତିମାନିଦେର୍‍ । ମିର୍‌ ମୁସ୍‌କୁପୁର୍‌ତି ଦୁତ୍‍କା ମାଣାନ୍‌ ସିତିମାନି ମାପୁରୁଦି ନିୟମ୍‌ ୱିଜୁ ପୟ୍‌ତିମାନିଦେର୍‌ ମାତର୍‌ ଆକା ମାନାଇଦେର୍‍ ।”
ACT 7:54 ପେରିମିଟିଙ୍ଗ୍‍ତି ନେତାର୍‌ ସ୍ତିପାନ୍‍ତି ମାଟା ୱେନ୍‌ଜି ନାଣ୍ତ ରିସା ଆତାର୍‌, ୱାନି ଉଣ୍ତିଙ୍ଗ୍‌ ରିସାଦାନ୍‍ ପାଲ୍‍କୁ କାତ୍ରେ କିତାର୍‍ ।
ACT 7:55 ମାତର୍‌ ସ୍ତିପାନ୍‍ ପବିତ୍ର ଆତ୍ମାଦୁ ପୁରାଆଜି ମୁସ୍‌କୁପୁର୍‌ ତରିନ୍‌ ସୁଡ଼ୁତାନ୍‌ ମାରି ମାପୁରୁଦି ଗୌରବ୍‍ ନି ଜିସୁଙ୍ଗୁଁ ମାପୁରୁଦି ଉଣେରି ତରିନ୍‌ ନିନି ମାନିକା ସୁଡ଼ୁତାନ୍‌ ।
ACT 7:56 ୱାନ୍‌ ଇର୍ହାନ୍‌, “ସୁଡ଼ୁଦୁ, ନାନ୍ ମୁସ୍‌କୁପୁର୍‌ ରେଆତିକା ମାରି ମନୁସ୍ୟପୁତ୍ରଙ୍ଗ୍‍ ମାପୁରୁଦି ଉଣେରି ତରିନ୍‌ ନିନି ମାନିକା ସୁଡ଼ୁଜିନା !”
ACT 7:57 ଆଉଲି ଆଜି ପେରିମିଟିଙ୍ଗ୍‍ତି ନେତାର୍‌ ଇୟା ମାଟା ୱେନ୍‍ଇ ଉଣ୍ତିଙ୍ଗ୍‌ ଗିତଣିଦୁ କିକୁ କେରପ୍‍ତାର୍‍ । ୱେନ୍‌କା ୱାର୍‌ ଏକ୍‍ଜୁଟ୍‍ ଆଜି ୱାନି ତରିନ୍‌ ମାଟ୍‍ସି ୱାତାର୍‌ ।
ACT 7:58 ଗାଡ଼୍‌ ଆତ୍‌ରେ ୱାନିଙ୍ଗ୍‌ ରେଲ୍‌ଜି ଅସି, ୱାନି ମୁସ୍‌କୁ କାଲ୍‌କୁ ପକ୍‍ସି ଡାକ୍‍ତାର୍‍ । ମିସ୍‌ ସାକିସିନିକାର୍‍ ସାଉଲ୍‍ ଦର୍‌ତି ଅରେନ୍‌ ମୁରୁଲିଦି ଲାକ୍‌ତୁ ୱାରି ଆଙ୍ଗିଁପାସିୟା ୱିଜୁ ଡ଼ିସ୍‍ତା ସର୍ହାମାର୍ହାର୍‍ ।
ACT 7:59 ୱାର୍‌ ସ୍ତିପାନ୍‍ତି ମୁସ୍‌କୁ କାଲ୍‌କୁ ଡାକ୍‍ନି ସମୟ୍‍ତୁ ୱାନ୍‌ ପ୍ରବୁଙ୍ଗ୍‌ ପାର୍‌ତନା କିଜି ଇର୍ହାନ୍‌, “ପ୍ରବୁ ଜିସୁ ନା ଆତ୍ମାଦିଙ୍ଗ୍‍ ମାନାଆ !”
ACT 7:60 ୱାନ୍‌ ମେଣ୍ତେଙ୍ଗ୍‍ ଗଟ୍‌କିଜି ନାଣ୍ତ ଆଉଲିଦାନ୍‍ ଇର୍ହାନ୍‌, “ପ୍ରବୁ ! ଇୟାୱାରି ବିରଦ୍‌ତାନ୍‌ ଇୟା ପାପ୍‌ ଏତ୍‌ କିମା ।” ଇକା ଇଜି ୱାନ୍‌ ପୁଣ୍ତା ଡ଼ିସ୍‍ସି ସାତାନ୍‍ ।
ACT 8:1 ସ୍ତିପାନ୍‍ତି ସାନିଦଣ୍ତ୍‍ତିଙ୍ଗ୍‍ ସାଉଲ ଉନ୍‌ଡ୍ରେମୋନ୍‌ ଆତାନ୍‌ । ଆୟାନାଣ୍ତିରାନ୍‍ ଜିରୁସାଲାମ୍‌ତି ମଣ୍ତଲି ଉଣ୍ତିଙ୍ଗ୍‌ ନାଣ୍ତ କାସ୍ଟୁଦି ତାଡ଼ନା ଆରାମ୍‌ ଆତାତ୍‌ । ସିସୁରିଙ୍ଗ୍‌ ଡ଼ିସ୍‌ସି ଆଇ ୱିଜେରେ ବିସ୍‍ବାସିର୍‍ ଜିହୁଦା ନି ସମିରୋଣ ରାଜିଦି ଇନିଙ୍ଗାଁ ଆନିଙ୍ଗାଁ ଆତାସର୍ହାର୍‍ ।
ACT 8:2 ଏସ ମାପୁରୁଦି ଦାର୍ମୁ ଲୋକୁ ନାଣ୍ତ ଆଉଲି ଆଜି ଆଡ଼୍‌ବାଜି ସ୍ତିପାନ୍‍ତି ସାତି ମାଡ଼ାଦିଙ୍ଗ୍‍ ମୁସ୍‌ତାର୍‌ ।
ACT 8:3 ମାତର୍‌ ସାଉଲ ମଣ୍ତଲିଦିଙ୍ଗ୍‍ ଦଂସ କିଦେଙ୍ଗ୍‌ ସେସ୍ଟା କିତାନ୍‌, ଇଲୁ ଇଲୁଦୁ ସଲ୍‍ସି କ୍ରିସ୍ତ ବିସ୍‍ବାସି ମେମାରି, ଆଇମା ୱିଜେରିଙ୍ଗ୍‍ ରେଲ୍‌ଜି ତାସି ଜଇଲ୍‌ତୁ ଇଟ୍‌ତାନ୍‌ ।
ACT 8:4 ଇନିଙ୍ଗାଁ ଆନିଙ୍ଗାଁ ୱିଦିତି ମାର୍‍ଇ ବିସ୍‍ବାସିର୍‍ ୱିଜୁ ତରିନ୍‌ ସଲ୍‍ସି ସୁସମାଚାର୍‌ ପ୍ରଚାର୍‌ କିତାର୍‍ ।
ACT 8:5 ସମିରୋଣଦି ପେରି ଗାଡ଼୍‍କାଙ୍ଗ୍‍ଁ ସଲ୍‍ସି ପିଲିପ୍‍ପ, ଆବେଣି ଲୋକାମାନୁ କ୍ରିସ୍ତ ନି ମାପୁରୁଦି ସୁସମାଚାର୍‌ ପ୍ରଚାର୍‌ କିତାନ୍‌ ।
ACT 8:6 ପିଲିପ୍‍ପଦି ମାଟା ୱେନ୍‌ଜି ମାରି ୱାନି କାବାଆନି ପାଣି ୱିଜୁ ସୁଡ଼୍‌ଜି ଲୋକୁ ୱାନି ତରିନ୍‌ ନାଣ୍ତ ନେଗେନ୍‌ ବେସ୍‍ତାର୍‍ ।
ACT 8:7 ନାଣ୍ତ ଲୋକା ମାଣାନ୍‌ ତାଗ୍‌ଇ ଆତ୍‍ମେଙ୍ଗ୍‍ ଆଉଲି ଆଜି ସତେ ସର୍ହେ, ନାଣ୍ତ କୁସ୍ଟ ରୋଗି ମାରି ସଟାର୍‍ ନେଗେନ୍‌ ଆତାର୍‌ ।
ACT 8:8 ଇୟାଉଣ୍ତିଙ୍ଗ୍‌ ଆୟା ଗାଡ଼୍‌ତୁ ଉନ୍‍ଣ୍ତ୍ରି ୱେଡ଼ିକା ଆଉଲି ୱେଙ୍ଗିଁତା ସର୍ହାତ୍‍ ।
ACT 8:9 ସିମୋନ୍‌ ଦର୍‌ତି ଅରେନ୍‌ ଲୋକୁ ୱାନି ଗୁଣିଆ ବିଦ୍ୟା ଦାନ୍‌ ଆୟା ସମିରୋଣୟ ରାଜିଦି ଲୋକାଙ୍ଗ୍‌ କାବା କିଜି ଇଟ୍‌ତାମାର୍ହାନ୍‍ ।
ACT 8:10 ୱାନ୍‌ ନିଜେଦିଙ୍ଗ୍‍ ଅରେନ୍‌ ପେରିଲୋକ୍‍ ଇଜି ସମାଜ୍‍ତି ୱିଜୁଜାତିଦି ଲୋକା ଲୋଇ ପେରିପଦ୍‍ ପୟ୍‍ତାମାର୍ହାନ୍‍ । ୱାର୍‌ ଇଜିମାର୍ହାର୍‍, “ୱାନ୍‌ ପେରିସାକ୍ତି ଦର୍‌ତାନ୍‌ ୱେଙ୍ଗିଁତି ମାପୁରୁଦି ଉନ୍‍ଣ୍ତ୍ରି ସାକ୍ତି ।”
ACT 8:11 ୱାନ୍‌ ଗୁଣିଆ ବିଦ୍ୟାଦାନ୍‍ ନାଣ୍ତ ଦିନ୍‌ ଆସ୍‌ସି ୱାନ୍‌ ସମିରୋଣ୍‍ତି ଲୋକାଙ୍ଗ୍‌ ୱାନି ୱାଲେ ବୁଲାଦେଙ୍ଗ୍‌ ଇଜି ଇଟ୍‍ଟାମାର୍ହାନ୍‍ ।
ACT 8:12 ମାତର୍‌ ପିଲିପ୍‍ପତି ମାଣ୍‌କୁ ମାପୁରୁଦି ରାଜି ମାରି ଜିସୁ କ୍ରିସ୍ତଦି ବିସୟ୍‌ତାନ୍‌ ସୁସମାଚାର୍‌ ୱେନ୍‌ଜି, ଆୟାବାନୁ ଲୋକା ବିସ୍‌ବାସ୍‌ ଆତାତ୍‌ ମାରି ଆୟା ରାଜିଦି ଆଇମା ମେମାରି ୱିଜେରେ ଡୁବନ୍‌ ଅତାର୍‌ ।
ACT 8:13 ନିଜେ ସିମୋନ୍‌ ଆୟା ସୁସମାଚାର୍‍ତୁ ବିସ୍‌ବାସ୍‌ କିତାନ୍‌ । ପିଲିପ୍‍ପତି ମାଣ୍‌କୁ ଆତିମାର୍‍ଇ କାବାଆନି ପାଣି ନି ନେଗେନ୍‌ କିନି ପାଣି ୱିଜୁ ସୁଡ଼୍‌ଜି ୱାନ୍‌ ଡୁବନ୍‌ ଅସି ପିଲିପ୍‍ପତି ୱାଲେ ତେବାତାନ୍‌ ।
ACT 8:14 ସମିରୋଣଦି ଲୋକୁ ମାପୁରୁଦି ବାକ୍ୟ ଆସ୍‍ତାମାନାର୍‍ ଇଜି ଜିରୁସାଲାମ୍‍ତୁ ମାନି ପ୍ରେରିତ ସିସୁର୍‍ ୱେନ୍‌ଜି, ପିତର ମାରି ଜୋହନତିଙ୍ଗ୍‌ ୱାରି ଲାକ୍‌ତୁ ପକ୍‌ତାନ୍‌ ।
ACT 8:15 ୱାର୍‌ ଆବେ ଇତି ୱେନ୍‌କା ସମିରୋଣଦି ବସ୍‍ବାସିର୍‍ ଏଣ୍ତେସ୍‌ ପବିତ୍ର ଆତ୍ମା ପୟ୍‌ନାର୍‌, ଆୟାଉଣ୍ତିଙ୍ଗ୍‌ ପାର୍‌ତନା କିତାର୍‍ ।
ACT 8:16 ଇରିଙ୍ଗ୍‌ ଆୟା ସାନ୍ଦି ୱାରି ଲୋଇ ଏମେୱାରି ମୁସ୍‌କୁ ପବିତ୍ର ଆତ୍ମା ରେତାଏତ୍‍ ମାର୍ହାତ୍‌ । ୱାର୍‌ କେବଲ୍‌ ପ୍ରବୁ ଜିସୁକ୍ରିସ୍ତଦି ଦର୍‌ତାନ୍‌ ଡୁବନ୍‌ ଅତାମାର୍ହାର୍‍ ।
ACT 8:17 ପିତର ନି ଜୋହନ ୱାରି ମୁସ୍‌କୁ କିୟୁ ଇଟ୍‍ତି ଦାପ୍ରେ ୱାର୍‌ ପବିତ୍ର ଆତ୍ମା ପୟ୍‌ତାର୍‌ ।
ACT 8:18 ସିମୋନ୍‌ ସୁଡ଼ୁତାନ୍‌ ଜେ, ପ୍ରେରିତ ସିସୁର୍‍ ବିସ୍‍ବାସିରି ମୁସ୍‌କୁ କିୟୁ ଇଟ୍‍ତାର୍‍ଆକା ୱାର୍‌ ପବିତ୍ର ଆତ୍ମା ପୟ୍‌ତାର୍‌ । ଆବେଟ୍‌ ୱାନ୍‌ ପିତର୍‌ ନି ଜୋହନତିଙ୍ଗ୍‌ ଡାବୁଙ୍ଗୁଁ ଜାସେ କିଜି ଇର୍ହାନ୍‌,
ACT 8:19 “ନାନ୍ ଆଇୱାରି ମୁସ୍‌କୁ କିୟୁ ଇଟ୍‌ତିଙ୍ଗ୍‌, ୱାର୍‌ ଏଣ୍ତେସ୍‌ ପବିତ୍ର ଆତ୍ମା ପୟ୍‌ଦେଙ୍ଗ୍‌ ଆଟ୍‍ନାର୍‍, ଇୟାଉଣ୍ତିଙ୍ଗ୍‌ ନାଙ୍ଗିଁ ଇୟା ସାକ୍ତି ନି ଅଦିକାର୍‌ ସିଦା ।”
ACT 8:20 ମାତର୍‌ ପିତର୍ ୱାନିଙ୍ଗ୍‌ ଇର୍ହାନ୍‌, “ନି ୱାଲେ ନି ଡାବୁଙ୍ଗୁଁ ଦ୍ୱଂସ ଆପିତ୍‌, ଇରିଙ୍ଗ୍‌ ଡାବୁଦାନ୍‍ ନିନ୍‌ ମାପୁରୁଦି ଦାନ୍‌ କଣ୍ତେଙ୍ଗ୍‌ ଅଡ଼୍‍ବିତିମାନି !
ACT 8:21 ମା ପାଣିଦୁ ନି ଇନି ବାଗ୍ ସିଲେତ୍‌ । ଇରିଙ୍ଗ୍‌ ମାପୁରୁଦି ଆଗ୍‌ଡ଼ି ନି ଜିବନ୍‌ ନେଗିକା ସିଲେତ୍‌ ।
ACT 8:22 ଆଦେଙ୍ଗ୍‌ ନି ଇୟା ତାଗ୍‌ଇ ମାଟା ଉଣ୍ତିଙ୍ଗ୍‌ ମନ୍‍ ଡ଼େପ୍‍ଆ, ଇୟାୱାଜା ବିସୟ୍‌ ସିନ୍ତା କିତିମାନିଙ୍ଗ୍‍ ପ୍ରବୁ ଏଣ୍ତେସ୍‌ କେମା କିନାନ୍‌, ଆୟାଉଣ୍ତିଙ୍ଗ୍‌ ପ୍ରବୁଙ୍ଗ୍‌ ପାର୍‌ତନା କିଆ ।
ACT 8:23 ଇରିଙ୍ଗ୍‌ ନାନ୍ ସୁଡ଼ୁଜିନା ଜେ ନି ଜିବନ୍‌ ରିସାଦୁ ପୁରା ଆତାମାନାତ୍‌, ନିନ୍‌ ପାପ୍‌ ଗାଟିଦୁ ତରାତିମାନି ।”
ACT 8:24 ସିମୋନ୍‌ ଜୋହନ ନି ପିତର୍‌ତିଙ୍ଗ୍‌ ଇର୍ହାନ୍‌, “ମିର୍‌ ଆମା ୱିଜୁ ଇର୍‍ଇଦେର୍‍, ଆକା ଏଣ୍ତେସ୍‌ ନା ଉଣ୍ତିଙ୍ଗ୍‌ ଗଟାଏତ୍‍, ଇୟାଉଣ୍ତିଙ୍ଗ୍‌ ଦୟାକିଜି ପ୍ରବୁଦି ଆଗ୍‌ଡ଼ି ପାର୍‌ତନା କିଦୁ ।”
ACT 8:25 ସାକି ନି ପ୍ରବୁଦି ବାକ୍ୟ ୱେର୍‌ତି ୱେନ୍‌କା ପିତର୍‌ ନି ଜୋହନ ଜିରୁସାଲାମ୍‍ତୁ ଡ଼େସିସର୍ହାର୍‍ । ଡ଼େସି ସନି ସାରିଦୁ ୱାର୍‌ ସମିରୋଣଦି ଏସ ନାର୍‍କାଙ୍ଗ୍‍ଁ ସୁସମାଚାର୍‌ ପ୍ରଚାର୍‌ କିତାର୍‍ ।
ACT 8:26 ପ୍ରବୁଦି ଅରେନ୍‌ ଦୁତ୍‍ ପିଲିପତିଙ୍ଗ୍‍ ଇର୍ହାନ୍‌, “ତିଆର୍‌ ଆଆ, ଉଣେରି ତରିନ୍‌ ଜିରୁସାଲାମ୍‍ତାନ୍‍ ଗାଜା ତରିନ୍‌ ମାନି ପେରିଜାରିଦୁ ସାଙ୍ଗ୍‍ଆ ।” ଆଜିକାଲି ମାରି ଆୟା ରାସ୍ତା ବ୍ୟବ୍‌ହାର୍‌ ଆଏଜିନାତ୍‌
ACT 8:27 ଆବେଟ୍‌ ପିଲିପ ନିଙ୍ଗିଁତା ସର୍ହାନ୍‍ । ମାରି ସୁଡ଼ୁଦୁ, ଇତିଓପିଆ ଦେସ୍‍ତି କାଣ୍ତାକି ଦର୍‌ତି ରାଣିଦି ମାନୁ ପେରିପାଣିକିନି ପଦ୍‌ ପୟ୍‌ତି ଇତିଓପିଆଦି ପାଣିକିନିକାନ୍‌, ଏନ୍‌ ତାନି ୱିଜୁ ଦନ୍‍ସମ୍ଫତିଦି ସୁଣିକାନ୍‍ ମାର୍ହାନ୍‍, ୱାନ୍‌ ମାପୁରୁଙ୍ଗୁଁ ପାର୍‌ତନା କିଦେଙ୍ଗ୍‌ ଇଜି ଜିରୁସାଲାମ୍‍ତୁ ୱାତାମାର୍ହାନ୍‍;
ACT 8:28 ୱାନ୍‌ ୱାନି ରତଦୁ ବାସ୍‌ସି ଇନ୍‌ଡ୍ର ଡ଼େସିସଲ୍‍ସିମାର୍ହାନ୍‍ । ୱାନ୍‌ ରତଦୁ ଡ଼େସିସନି ସମୟତୁ ଜିସାୟ ବାବବାଦିଦି ପୁସ୍ତକ ନାଣ୍ତ ଆଉଲି ଆଜି ପଡ଼ାଜି ମାର୍ହାନ୍‍ ।
ACT 8:29 ପବିତ୍ର ଆତ୍ମା ପିଲିପତିଙ୍ଗ୍‍ ଇର୍ହାତ୍‌, “ଆୟା ରତ ଲାକ୍‌ତୁ ସାଙ୍ଗ୍‍ଆ ମାରି ୱାନି ଲାକ୍‌ତୁ ତେବାଆ ।”
ACT 8:30 ଆବେଟ୍‌ ପିଲିପ୍‍ପ ଉର୍‍ସି ସଲ୍‍ସି ୱାନ୍‌ ଜିସାୟ ବାବବାଦିଦି ବଇ ପଡ଼ାନିକା ୱେର୍‍ଆନ୍‍ । ୱାନ୍‌ ୱାନିଙ୍ଗ୍‌ ୱେନ୍‌ବାତାନ୍‌, “ନିନ୍‌ ଆମାକା ପଡ଼ାଜିନି, ଆକା ବୁଜାଦେଙ୍ଗ୍‌ ଆଟ୍‍ସିନିନୋ ?”
ACT 8:31 ପାଣିକିନିକାନ୍‌ ଇର୍ହାନ୍‌, “ଅରେନ୍‌ ଏନ୍‌ ନାଙ୍ଗିଁ ଇକା ବୁଜା କିଜ ସିଏତିଙ୍ଗ୍‍, ନାନ୍ ଏଣ୍ତେସ୍‌ ବୁଜାଦେଙ୍ଗ୍‌ ଆଟ୍‍ନା ?” ୱାନି ୱାଲେ ରତଦୁ ବାସ୍‌ତେଙ୍ଗ୍‌ ଇଜି ୱାନ୍‌ ପିଲିପତିଙ୍ଗ୍‍ କୁକ୍‍ତାନ୍ ।
ACT 8:32 ୱାନ୍‌ ଦାର୍ମୁସାସ୍ତ୍ରଦି ଇୟା ବାଗ୍ ପଡ଼ାଜି ମାର୍ହାନ୍‍ : “କାତ୍‍ତେଙ୍ଗ୍‍ ଇଜି ଅଆୟ୍‍ଆଜିମାନି ମେଣ୍ତା ୱାଜା, ବୁର୍‍ବୁସେଙ୍ଗ୍‍ କୟ୍‍ନିୱାଲେ ଆଲେନିମାନି ମେଣ୍ତା ୱାଜା ୱାନ୍‌ ପଦ୍‌ ବା ମାଟା ଇନ୍‍ଏତାନ୍‍ ।
ACT 8:33 ୱାନ୍‌ ଅପ୍‍ମାନ୍‍ ଆତାନ୍‍ ମାରି ନ୍ୟାୟ୍‍ତାନ୍ ଜିଣାଏତାନ୍‍ । ୱାନି କୁଟୁମ୍‌ତି ବିସୟ୍‌ତାନ୍‌ ଏନ୍‌ ଇନିକା ଇନ୍‌ଡ୍ରେଙ୍ଗ୍‌ ଆଟ୍‍ଏର୍‍, ଇରିଙ୍ଗ୍‌ ଦୁନିଆଦୁ ୱାନି ଜିବନ୍‌ତି ୱିଜ୍‍ନିକା ଗଟାତାମାନାତ୍‍ ।”
ACT 8:34 ପାଣିକିନିକାନ୍‌ ପିଲିପତିଙ୍ଗ୍‍ ୱେନ୍‌ବାତାନ୍‌, “ବାବବାଦି ଏ ବିସୟ୍‌ତାନ୍‌ ୱେର୍‍ସିନାନ୍‍, ନାଙ୍ଗିଁ ଇନ୍‌ଆଁ । ୱାନି ନିଜେଦି ବିସୟ୍‌ତାନ୍‌ ନୋ ଆଇ ଏ ବିସୟ୍‌ତାନ୍‌ ?”
ACT 8:35 ପିଲିପ ଦାର୍ମୁସାସ୍ତ୍ରଦି ଇୟା ବାଗ୍‍ତାନ୍‍ ଆରାମ୍‌ କିଜି ଜିସୁଦି ବିସୟ୍‌ତାନ୍‌ ରାସାତି ୱିଜୁ ନେଗିକାବୁର୍‌ ୱାନିଙ୍ଗ୍‌ ୱେର୍‌ତାନ୍‌ ।
ACT 8:36 ୱାର୍‌ ପେରିଜାରିଦୁ ସଲ୍‍ପୁ ସଲ୍‍ପୁ ଉନ୍‍ଣ୍ତ୍ରି ଏରୁ ମାନି ଲାକ୍‍ତୁ ଇତାର୍‌ । ପାଣିକିନିକାନ୍‌ ଇର୍ହାନ୍‌, “ଇବେ ତୋ ଏରୁ ମାନେ, ନା ଡୁବନ୍‌ ଅତେଙ୍ଗ୍‌ ଇଜି ଇନିକା ବାଦା ମାନାତ୍‌ ନୋ ?”
ACT 8:37 ପିଲିପ ଇର୍ହାନ୍‌, ନିନୁ ୱିଜୁ ମନ୍‍ତିୱାଲେ ଜଦି ବିସ୍‍ବାସ୍‍ କିନି, ଆତିଙ୍ଗ୍‍ଁ ଆନାତ୍‍, ଆବେଟ୍‍ ୱାନ୍‍ ଇର୍ହାନ୍‌, ଜିସୁ କ୍ରିସ୍ତ ଜେ ମାପୁରୁଦି ମାରିନ୍‍, ଇକା ନାନୁ ବିସ୍‍ବାସ୍‍ କିଜିନା ।
ACT 8:38 ମାରି ୱାନ୍‌ ରତଦିଙ୍ଗ୍‍ ନିଲପ୍‍ତେଙ୍ଗ୍ ଆଦେସ୍‌ ସିତାନ୍‌, ମାରି ପିଲିପ ନି ପାଣିକିନିକାନ୍‌ ରିଏର୍‌ ଏରୁ ଲୋଇ ସର୍ହାର୍‍, ମାରି ପିଲିପ ୱାନିଙ୍ଗ୍‌ ଡୁବନ୍‌ ସିତାନ୍‌ ।
ACT 8:39 ୱାର୍‌ ଏରୁତାନ୍‍ ନିଙ୍ଗ୍‍ଜି ୱାତି ୱେନ୍‌କା, ପ୍ରବୁଦି ପବିତ୍ର ଆତ୍ମା ପିଲିପତିଙ୍ଗ୍‍ ଅତାତ୍‍ । ପାଣିକିନିକାନ୍‌ ମାରି ୱାନିଙ୍ଗ୍‌ ସୁଡ଼ୁଦେଙ୍ଗ୍‍ ଆଟ୍‍ଏତାନ୍‍, ମାତର୍‌ ୱେଡ଼ିକାଦାନ୍‌ ପୁରା ଆଜି ୱାନି ସାରିଦୁ ସର୍ହାନ୍‍ ।
ACT 8:40 ଏସ ସମୟ ୱେନ୍‌କା ପିଲିପ ସୁଡ଼ୁତାନ୍‌ ଜେ ୱାନ୍‌ ଅସଦୋଦ୍‍ତୁ ଇତାନ୍‌ । ଆବେଟ୍‌କୁ ୱାନ୍‌ କାଇସରିୟାଦୁ ସର୍ହାନ୍‍ ମାରି ସାରିଦୁ ମାନି ଗାଡ଼୍‌କାଙ୍ଗ୍‌ ସୁସମାଚାର୍‌ ପ୍ରଚାର୍‍ କିତାନ୍‌ ।
ACT 9:1 ଇୟା ସମୟ୍‍ତୁ ସାଉଲ ପ୍ରବୁଦି ସିସୁରିଙ୍ଗ୍‌ କାତ୍‍ତେଙ୍ଗ୍‍ ଇଜି ଆଦ୍‌ରିସ୍‌ କିଜି ପେରି ଜାଜକଦି ଲାକ୍‌ତୁ ସର୍ହାନ୍‍ ।
ACT 9:2 ମାରି ଦାମାସ୍‍କସ୍‍ତି ପାର୍‍ତନାକିନି ଇଲ୍‌କାଙ୍ଗ୍‌ ପ୍ରବୁଦି ୱାଲେ ବୁଲାନିୱାରିଙ୍ଗ୍‍ ପୟ୍‌ତିଙ୍ଗ୍‌ ତର୍‌ସି ଜିରୁସାଲାମ୍‍ତୁ ଆସ୍‌ସି ତାତେଙ୍ଗ୍‌ ଇଜି ପେରି ଜାଜକରି ମାଣାନ୍‌ ସାରି ସିନି ଆକୁ ଲୋସ୍‍ତାନ୍‍ ।
ACT 9:3 ସାଉଲ ଦାମାସ୍‍କସ୍‍ ଗାଡ଼୍‌ ଲାକ୍‌ତୁ ଇଗା ସନି ସମୟ୍‍ତୁ ଦାପ୍ରେ ବାଦଡ଼୍‍ତାନ୍‍ ଉନ୍‍ଣ୍ତ୍ରି ଜାୟ୍‌ ୱାନି ସାରିବେଡ଼୍‍ତି କାସ୍‍ସି ନିଙ୍ଗିଁତାତ୍‍ ।
ACT 9:4 ୱାନ୍‌ ବୁମିଦୁ ଆର୍‍ତାନ୍‍ ମାରି ଉନ୍‍ଣ୍ତ୍ରି ବଲ୍ ୱେର୍‍ଆନ୍‍, “ସାଉଲ ! ସାଉଲ ! ନିନ୍‌ ଏନ୍ଦା ନାଙ୍ଗିଁ ତାଡ଼ନା କିଜିନି ?”
ACT 9:5 ୱାନ୍‌ ଇର୍ହାନ୍‌, “ପ୍ରବୁ, ନିନ୍‌ ଏନ୍‌ ?” ମାରିଡ଼େସି ଆୟା ବଲ୍ ୱାତାତ୍‍, “ନିନ୍‌ ଏଙ୍ଗ୍‍ଁ କାସ୍ଟୁ କିଜିନି, ନାନ୍ ଆୟା ଜିସୁ ।
ACT 9:6 ନିଙ୍ଗ୍‍ଆ, ଗାଡ଼୍‌ତୁ ସାଙ୍ଗ୍ଆ, ଇନିକା କିଦେଙ୍ଗ୍‌ ଆନାତ୍‌, ଆବେ ନିଙ୍ଗିଁ ୱେର୍‌ନା ସିନା ।”
ACT 9:7 ସାଉଲତି ୱାଲେ ଅର୍‌ସେ ସନିକାର୍‍ କାବାଆଜି ତେବାତା ସର୍ହାର୍‍; ୱାର୍‌ ଆୟା ବଲ୍ ୱେର୍‌ଆର୍‌, ମାତର୍‌ ଏଙ୍ଗ୍‌ ସୁଡ଼ୁଦେଙ୍ଗ୍‍ ଆଟ୍‌ଏତାର୍‌ ।
ACT 9:8 ସାଉଲ ବୁମିଦାନ୍‌ ନିଙ୍ଗ୍‍ଜି କାଣୁକୁ ରେତାନ୍‍, ମାତର୍‌ ୱାନିଙ୍ଗ୍‌ ଇନିକା ତର୍‍ଏତାତ୍‍ । ଆବେଟ୍‌ ୱାର୍‌ ୱାନି କିୟୁ ଆସ୍‌ସି ଦାମାସ୍‍କସ୍‍ ସାନ୍ଦି ସାରି ତର୍‌ସି ଅତାର୍‌ ।
ACT 9:9 ମୁନେନ୍‌ ସାନ୍ଦି ୱାନ୍‌ ସୁଡ଼ୁଦେଙ୍ଗ୍‌ ଆଟ୍‍ଏତାନ୍‍ ମାରି ଆୟା ସମୟ୍‍ତୁ ଉଣୁଏତାନ୍‍ ।
ACT 9:10 ଦାମାସ୍‍କସ୍‍ତୁ ହନନିୟ ଦର୍‌ତି ଅରେନ୍‌ ସିସୁ ମାର୍ହାନ୍‍ । ୱାନ୍‌ ଉନ୍‍ଣ୍ତ୍ରି ଦର୍ସନ୍‍ ପୟ୍‌ତାନ୍‌, ପ୍ରବୁ ୱାନିଙ୍ଗ୍‌ ଇର୍ହାନ୍‌, “ହନନିୟ !” ୱାନ୍‌ ଇର୍ହାନ୍‌, “ଏ ପ୍ରବୁ ଇନ୍‌ଆଁ ।”
ACT 9:11 ପ୍ରବୁ ଇର୍ହାନ୍‌, “ତିଆର୍‌ ଆଆ । ସିଦା ଦର୍‌ତି ପେରିଜାରି ଆସ୍‌ସି ଜିହୁଦାଦି ଇଲୁଦୁ ସାଙ୍ଗ୍ଆ । ଆବେ ତାର୍ସସ୍‍ତାନ୍‍ ୱାତିମାନି ସାଉଲ ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ ପୟ୍‍ଆ । ୱାନ୍‌ ପାର୍‌ତନା କିଜିନାନ୍‍ ।
ACT 9:12 ହନନିୟ ଦର୍‌ତି ଅରେନ୍‌ ଲୋକୁ ୱାଜି ୱାନି ମୁସ୍‌କୁ କିୟୁ ଇଟ୍‌ତିଙ୍ଗ୍‌, ୱାନ୍‌ କାଣୁକୁ ସୁଣାନ୍‌ ଇଜି ଦର୍ସନ୍‍ ପୟ୍‌ତାମାନାନ୍‌ ।”
ACT 9:13 ହନନିୟ ଇର୍ହାନ୍‌, “ପ୍ରବୁ, ଇୟା ଲୋକୁ ଜିରୁସାଲାମ୍‍ତୁ ନି ବିସ୍‍ବାସି ଲୋକା ଉଣ୍ତିଙ୍ଗ୍‌ ଏମେ କାସ୍ଟୁଦି ପାଣି ୱିଜୁ କିତାମାନାନ୍‍, ଆୟା ବିସୟ୍‌ତାନ୍‌ ନାଣ୍ତ ଲୋକୁ ନାଙ୍ଗିଁ ୱେର୍‍ତାମାନାର୍‍ ।
ACT 9:14 ମାରି ୱାନ୍‌ ପେରି ଜାଜକରି ମାଣ୍‌କୁ ଅଦିକାର୍‌ ଆକୁ ତାସି, ଦାମାସ୍‍କସ୍‍ତୁ ନି ପାର୍‌ତନା କିନିୱାରିଙ୍ଗ୍‍ ଆସ୍‌ସି ଅତେଙ୍ଗ୍‌ ଇଜି ୱାତାମାନାନ୍‍ ।”
ACT 9:15 ପ୍ରବୁ ୱାନିଙ୍ଗ୍‌ ଇର୍ହାନ୍‌, “ସାଙ୍ଗ୍ଆ, ଅଣଜିହୁଦି ମାରି ରାଜା ମାରି ଇସ୍ରାଏଲ୍‌ତି ଲୋକା ଆଗ୍‌ଡ଼ି, ନା ଦର୍‌ ୱେର୍‌ତେଙ୍ଗ୍‌ ଇଜି ମାରି ନା ସେବା କିଦେଙ୍ଗ୍‌ ନାନ୍ ୱାନିଙ୍ଗ୍‌ ଆସ୍‍କିତାମାନା ।
ACT 9:16 ନା ଉଣ୍ତିଙ୍ଗ୍‌ ୱାନ୍‌ ଏମେ ଦୁକ୍‍ ପୟ୍‌ନାନ୍‌, ନାନ୍ ନିଜେ ୱାନିଙ୍ଗ୍‌ ୱେର୍‌ନା ।”
ACT 9:17 ହନନିୟ ସର୍ହାନ୍‍, ସାଉଲ ମାନି ଇଲୁଦୁ ଡ଼ୁଗୁଜି ୱାନି ମୁସ୍‌କୁ କିୟୁ ଇଟ୍‌ତାନ୍‌ । ୱାନ୍‌ ଇର୍ହାନ୍‌, “ତଡ଼ାନ୍‌କୁ ସାଉଲ, ଇବେ ୱାନି ସାରିଦୁ ଏମେ ପ୍ରବୁ ଜିସୁ ନିଙ୍ଗିଁ ଦର୍ସନ୍‍ ସିତାନ୍‌, ୱାନ୍‌ ନାଙ୍ଗିଁ ପକ୍‍ତାମାନାନ୍‍, ଏଣ୍ତେସ୍‌ମାରି ଡ଼େସି ନିନ୍‌ କାଣୁକୁ ସୁଡ଼୍‍ଦେଙ୍ଗ୍‍ ଆଟ୍‌ନି ମାରି ପବିତ୍ର ଆତ୍ମାଦୁ ପୁରା ଆନି ।”
ACT 9:18 ଆୟାଦାପ୍ରେ ସାଉଲତି କାଣ୍‍କାଣ୍‍କୁ ମିନିଦି ସପା ୱାଜା ଏସ ଆର୍‍ତେ ମାରି ୱାନ୍‌ ମାରିଅରର୍ସୁ ସୁଡ଼୍‍ଦେଙ୍ଗ୍‍ ଆଟ୍‍ତାନ୍‍ । ୱାନ୍‌ ନିଙ୍ଗ୍‍ଜି ଡୁବନ୍‌ ଅତାନ୍‌ ।
ACT 9:19 ମାରି ଉଣୁଜି ସାକ୍ତି ପୟ୍‌ତାନ୍‌ । ସାଉଲ ସିସୁରି ୱାଲେ ଦାମାସ୍‍କସ୍‍ତୁ ଏସ ଦିନ୍‌ ତେବାତାନ୍‌ ।
ACT 9:20 ୱାନ୍‌ ସିଦା ପାର୍‍ତନାକିନି ଇଲ୍‌କାଙ୍ଗ୍‌ ସଲ୍‍ସି, ଜିସୁ ଜେ ମାପୁରୁଦି ମାରିସି, ଇୟା ମାଟା ପ୍ରଚାର୍‌ କିଦେଙ୍ଗ୍‌ ଆସ୍‌ତାନ୍‌ ।
ACT 9:21 ଏମେକାର୍‌ ୱାନି ମାଟା ୱେର୍‌ଆର୍‌, ୱାର୍‌ କାବାଆଜି ୱେନ୍‌ବାତାର୍‌, “ଜିରୁସାଲାମ୍‍ତୁ ଜିସୁ ଦର୍‌ତି ଲୋକ୍‌ତି ପାର୍‌ତନା କିନିୱାରିଙ୍ଗ୍‍ ଏମେ ଲୋକୁ କାତ୍‍ସି ମାର୍ହାନ୍‍, ଇକାନ୍‌ ଇନିକା ଆକାନ୍‍ ଆଏନ୍‌ ନୋ ? ୱାରିଙ୍ଗ୍‌ ପେରି ଜାଜକରି ଲାକ୍‌ତୁ ଆସ୍‌ସି ଅନି ଉଦେସ୍‍ତାନ୍‍ ୱାନ୍‌ ଇନିକା ଇବେ ରେଏନ୍‌ ମାର୍ହାନ୍‍ ନୋ ?”
ACT 9:22 ମାତର୍‌ ସାଉଲ ପ୍ରଚାର୍‌ ନାଣ୍ତ ସାକ୍ତି ମାର୍ହାତ୍‌, ଜିସୁ ଜେ ମସିହ, ଇୟା ବିସୟ୍‌ତାନ୍‌ ୱାନି ପାର୍‌ମାଣ୍‌ ନିସା ଜିଦ୍‌ ମାର୍ହାତ୍‍ ଜେ ଦାମାସ୍‍କସ୍‍ତୁ ବାସାଜି ମାନି ଜିହୁଦିର୍‌ ୱାନି ଇନି ମାଟାଦି ଉତର ସିଦେଙ୍ଗ୍‍ ଆଟ୍‍ଏର୍‍ ମାର୍ହାର୍‌ ।
ACT 9:23 ନାଣ୍ତ ଦିନ୍‌ ଆତି ୱେନ୍‌କା ଜିହୁଦିର୍‌ ଉଣ୍ତାଜି ସାଉଲତିଙ୍ଗ୍‍ ଡାକ୍‍ତେଙ୍ଗ୍‍ଁ ଇଜି ଉପାୟା କିତାର୍‍,
ACT 9:24 ମାତର୍‌ ସାଉଲ ୱାରି ଉପାୟ ନେସ୍‌ତେଙ୍ଗ୍‌ ଆଟ୍‍ତାନ୍‍ । ୱାନିଙ୍ଗ୍‌ କାତ୍‍ତେଙ୍ଗ୍‍ ଇଜି ୱେଡ଼େ ନାଡ଼ା ୱାର୍‌ ଗାଡ଼୍‌ତି ଦୁଆର୍‍ ୱିଜୁ କାପ୍‌କିଜି ତେବାତାର୍‌ ।
ACT 9:25 ମାତର୍‌ ଅର୍‍ଲେନ୍‍ ନାଡ଼ା ସାଉଲତି ସିସୁର୍‍ ୱାନିଙ୍ଗ୍‌ ଉନ୍‍ଣ୍ତ୍ରି ଦାଉଣିକାଦୁ ଇଡ୍‌ଜି ଗଡାଦି ଉନ୍‍ଣ୍ତ୍ରି ରେଆତି ସାରି ସିଜି ଆଡ୍‍ଗି ରେପ୍‍ତା ସିତାର୍‍ ।
ACT 9:26 ସାଉଲ ଜିରୁସାଲାମ୍‍ତୁ ସଲ୍‍ସି ସିସୁରି ୱାଲେ ମିସାଦେଙ୍ଗ୍‍ ସେସ୍ଟା କିତାନ୍‌ । ମାତର୍‌ ୱାନ୍‌ ସିସୁ ଇଜି ୱାର୍‌ ମୁଟେ ବିସ୍‌ବାସ୍‌ କିଏତାର୍‌ । ୱିଜେରେ ୱାନିଙ୍ଗ୍‌ ତିଲାଜି ମାର୍ହାର୍‌ ।
ACT 9:27 ମାତର୍‌ ବର୍ଣ୍ଣବା ୱାନିଙ୍ଗ୍‌ ପ୍ରେରିତ ସିସୁରି ଲାକ୍‌ତୁ ଅସି ଦାମାସ୍‍କସ୍‍ ସାରିଦୁ ସାଉଲ ଏଣ୍ତେସ୍‌ ପ୍ରବୁଦି ଦର୍ସନ୍‍ ପୟ୍‍ତାମାର୍ହାନ୍‍ ମାରି ପ୍ରବୁ ଏଣ୍ତେସ୍‌ ୱାନିଙ୍ଗ୍‌ ମାଟା ଇର୍ହାମାର୍ହାନ୍‌, ଇୟାୱିଜୁ ବିସୟ୍‌ ୱାରିଙ୍ଗ୍‌ ବୁଜାକିଜି ଇର୍ହାନ୍‌ । ଦାମାସ୍‍କସ୍‍ତୁ ଜିସୁଦି ଦର୍‌ତାନ୍‌ ସାଉଲ ଏଣ୍ତେସ୍‌ ତିଲାଏଣ୍ତା ପ୍ରଚାର୍‌ କିତାମାର୍ହାନ୍‌, ୱାରିଙ୍ଗ୍‌ ନେଗେନ୍‌ କିଜି ବୁଜାକିଜି ଇର୍ହାନ୍‌ ।
ACT 9:28 ଇୟା ୱେନ୍‌କା ସାଉଲ ପ୍ରେରିତ ସିସୁରି ୱାଲେ ତେବାତାନ୍‌ ମାରି ଜିରୁସାଲାମ୍‌ତି ସାରିବେଡ଼୍‍ତି ସଲ୍‍ସି ସାହାସ୍‍ତାନ୍‍ ପ୍ରବୁଦି ଦର୍‌ତାନ୍‌ ପ୍ରଚାର୍‌ କିତାନ୍‌ ।
ACT 9:29 ଇୟାୱିଜୁ ବିସୟ୍‌ତାନ୍‌ ୱାନ୍‌ ଗ୍ରିକ୍‍ ବାସାଦି ଜିହୁଦିର୍‌ ୱାଲେ ବା ଆସ୍‌ସିସାତାର୍‌, ମାତର୍‌ ୱାର୍‌ ୱାନିଙ୍ଗ୍‌ ଡାକ୍‍ତେଙ୍ଗ୍‍ଁ ସେସ୍ଟା କିତାର୍‍ ।
ACT 9:30 ବିସ୍‍ବାସି ତଡ଼ାନ୍‌କୁ ଇୟା ମାଟା ନେସ୍‌ସି; ସାଉଲତିଙ୍ଗ୍‍ କାଇସରିଆଦୁ ଅତାର୍‌ ମାରି ଆବେଣାନ୍‍ ୱାନିଙ୍ଗ୍‌ ତାର୍ସସ୍‍ତୁ ପକ୍‌ତାର୍‌ ।
ACT 9:31 ଜିହୁଦା, ଗାଲିଲି ମାରି ସମିରୋଣଦୁ ମାନି କ୍ରିସ୍ଟିୟାନ୍‍ ମଣ୍ତଲିଙ୍ଗାଁ ଉଣ୍ତିଙ୍ଗ୍‌ ଆୟା ସମୟ୍‍ତି ଦିନ୍‌ ସାନ୍ତି ମାର୍ହାତ୍‌, ମାରି ପବିତ୍ର ଆତ୍ମାଦି ସାକ୍ତିଦାନ୍ ୱାରି ଲୋକୁ ନାଣ୍ତ ଆତାର୍‌ ମାରି ୱାର୍‌ ଡାଟ୍‍ ଆତାର୍‌ । ବିସ୍‍ବାସିର୍‍ ପ୍ରବୁଦି ଉଣ୍ତିଙ୍ଗ୍‌ ମାନାଜି ଜିବନ୍‌ କାଟେ କିତାର୍‍ ।
ACT 9:32 ପିତର ନାଣ୍ତ ଜାଗେଆଙ୍ଗ୍‍ଁ ବୁଲାଜି ବୁଲାଜି ଅର୍‍ଲେନ୍‍ ଲୁଦାଦୁ ବାସାଜିମାନି ବିସ୍‍ବାସିରି ଲୋକାଙ୍ଗ୍‌ ମିସାଦେଙ୍ଗ୍‍ ୱାତାନ୍‌ ।
ACT 9:33 ଆବେନୁ ଏନିୟ ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ ବେଟ୍‍ବୁଡ଼ାତାନ୍ । ୱାନ୍‌ କୁସ୍ଟ ରୋଗ୍‍ତୁ ଆସାଇ ଆଜି ଆଟ୍‍ଗୋଟା ବାର୍ସେକ୍‍ ଆସ୍‌ସି କାଟେଲ୍‍ତାନ୍‍ ନିଙ୍ଗ୍‍ଁଦେଙ୍ଗ୍‍ ଆଟ୍‌ଏଜି ମାର୍ହାନ୍‍ ।
ACT 9:34 ପିତର ୱାନିଙ୍ଗ୍‌ ଇର୍ହାନ୍‌, “ଏନିୟ, ଜିସୁ କ୍ରିସ୍ତ ନିଙ୍ଗିଁ ନେଗେନ୍‌ କିତାମାନାନ୍‍ । ନିଙ୍ଗ୍‍ଁଆ, ନି ଟାଟି ରସ୍‍ଆ ।” ଆୟାଦାପ୍ରେ ଏନିୟ ନିଙ୍ଗିଁତାନ୍‍ ।
ACT 9:35 ଇକା ସୁଡ଼୍‌ଜି ଲୁଦା ନି ସାରୋଣଦୁ ବାସାକିଜିମାନି ଲୋକୁ ୱିଜେରେ ପ୍ରବୁଦି ଲାକ୍‌ତୁ ଡ଼େସି ୱାତାର୍‌ ।
ACT 9:36 ଜପାଦୁ ଟବିତା ଦର୍‌ତି ଅରେତ୍‌ ବିସ୍‍ବାସିନି ଆଇମା ବାସାଜି ମାର୍ହାତ୍‌ । ତାନି ଗ୍ରିକ୍‌ ଦର୍‌ ଦର୍କାସ୍‍ ଅର୍ତାତ୍‍ “ବନ୍‍ ଗରିଆ” ମାର୍ହାତ୍‌ । ୱାଦ୍‌ ତାନି ୱିଜୁ ସମୟ୍ ନେଗି ପାଣିଦୁ ମାରି କାକୁର୍ତି ଲୋକାଙ୍ଗ୍‌ ସେବା କିନିମାନି ସମୟ ସିଜି ମାର୍ହାତ୍‌ ।
ACT 9:37 ଆୟା ସମୟତୁ ନବ୍‌ ଆଜି ୱାଦ୍‌ ସାତା ସର୍ହାତ୍‍ । ତଡ଼୍‍କୁ ତାନି ମେନ୍ଦଲ୍‍ତିଙ୍ଗ୍ ଇବିସ୍‍ କିଜି ମୁସ୍‌କୁରି ମହଲାଦୁ ତେରେପ୍‍ତେ ।
ACT 9:38 ଜପା ଲୁଦାଦାନ୍‍ ଆକ ସିଲେତାତ୍‍ । ପିତର ଲୁଦାଦୁ ମାନାନ୍‌ ଇଜି ୱେନ୍‌ଜି, ଜପାଦୁ ମାନି ବିସ୍‍ବାସିର୍‍ ରିଏର୍‌ ଲୋକାଙ୍ଗ୍‌ ୱାନି ଲାକ୍‌ତୁ ଇନ୍‌ଞ୍ଜି ପୋକ୍‌ତାର୍‌, “ଦୟା କିଜି ବେଗି ମା ଲାକ୍‌ତୁ ରାଆ ।”
ACT 9:39 ପିତର ତିଆର୍‌ ଆଜି ୱାରି ୱାଲେ ସର୍ହାନ୍‍ । ଆବେ ଇତି ଦାପ୍ରେ ଲୋକୁ ୱାନିଙ୍ଗ୍‌ ମୁସ୍‌କୁରି ମହଲାଦୁ ଅତାର୍‌ । ଆବେ ରାଣ୍ତିଆଇମେକ୍‍ ତାନିଙ୍ଗ୍‌ କେର୍‍ବିତେନ ଆଡ଼୍‌ବାଜି ଆଡ଼୍‌ବାଜି ଦର୍କାସ୍‍ ଜିଜିମାନି ୱାଲେ ଗୁତ୍‍ତି ମାର୍‍ଇ ଆଙ୍ଗିଁଙ୍ଗ୍‌ ମାରି ୱାତିଙ୍ଗ୍‍ୱିଜୁ ୱାନିଙ୍ଗ୍‌ ତର୍‍ତେ ।
ACT 9:40 ପିତର ୱିଜେରିଙ୍ଗ୍‍ ବାକ୍‍ରାଦାନ୍‍ ଆତ୍‌ରେ ସପ୍‍ତାନ୍‍ ମାରି ମେଣ୍ତେଙ୍ଗ୍‍ଁ ଗଟ୍‌କିଜି ପାର୍‌ତନା କିତାନ୍‌ । ତାନିୱେନ୍‍କା ୱାନ୍‌ ଦାର୍କାସ୍‍ତି ସାତି ମେନ୍ଧଲ୍‍ ତରିନ୍‌ ସୁଡ଼୍‌ଜି ଇର୍ହାନ୍‌, “ଟବିତା, ନିଙ୍ଗ୍‍ଁଆ !” ଦର୍କାସ୍‍ କାଣୁକୁ ରେତାତ୍‍ ମାରି ପିତରତିଙ୍ଗ୍ ସୁଡ଼୍‌ଜି ନିଙ୍ଗ୍‍ଜି ବାସ୍‌ତାତ୍‌ ।
ACT 9:41 ପିତର କିୟୁ ପେର୍‌ଜି ତାନିଙ୍ଗ୍‌ ଜିବନ୍‌ କିଜି ନିକ୍‍ତାନ୍‍ । ୱେନ୍‌କା ଉଣ୍ତାତି ମାର୍‍ଇ ୱିଜୁ ବିସ୍‍ବାସି ନି ରାଣ୍ତିଆଙ୍ଗ୍‍ଁ କୁକ୍‌ସି ଦର୍କାସ୍‍ତିଙ୍ଗ୍‍ ୱାରି କିୟୁଦୁ ସର୍ପେ କିତାନ୍‌ ।
ACT 9:42 ଇୟା କାବୁର୍‌ ଜପାଦି ୱିଜୁ ତରିନ୍‌ ୱେଙ୍ଗିଁତାତ୍‌ ମାରି ନାଣ୍ତ ଲୋକୁ ପ୍ରବୁଙ୍ଗ୍ଁ ବିସ୍‌ବାସ୍‌ କିତାର୍‍ ।
ACT 9:43 ପିତର ନାଣ୍ତ ଦିନ୍‌ ସାନ୍ଦି ଜପାଦୁ ସିମୋନ ଦର୍‌ତି ଅରେନ୍‌ ତଲ୍‍କୁପାଣିକିନି ଇଲ୍‌ତୁ ତେବାତାନ୍‌ ।
ACT 10:1 କାଇସରିଆଦୁ ବାସାନି କର୍ଣ୍ଣିଲିୟ “ଇଟାଲିଦି ବାହିନି” ଦର୍‌ତି ରମିୟ ସୈନ୍ୟରି ସେନାପତି ମାର୍ହାନ୍‍ ।
ACT 10:2 ୱାନ୍‌ ଅରେନ୍‌ ଦାର୍ମୁ ଲୋକୁ ମାର୍ହାନ୍‍ । ୱାନ୍‌ ମାରି ୱାନି ଇଲୁଦି ୱିଜେରେ ମାପୁରୁଙ୍ଗୁଁ ପାର୍‌ତନା କିଜିମାର୍ହାର୍‍ । ୱାନ୍‌ କାକୁର୍ତି ଜିହୁଦି ଲୋକାଦି ନେଗି ଉଣ୍ତିଙ୍ଗ୍‌ ନାଣ୍ତ ପାଣି କିଜି ମାର୍ହାନ୍‍ ମାରି ଦିନାମି ମାପୁରୁମାନୁ ପାର୍‌ତାନା କିଜିମାର୍ହାନ୍‍ ।
ACT 10:3 ଅର୍‍ଲେନ୍‍ ୱେଡ଼ାରେନି ତିନ୍‍ ଗଣ୍ଟା ସମୟ୍‍ତୁ ୱାନ୍‌ ଉନ୍‍ଣ୍ତ୍ରି ଦର୍ସନତୁ ନେଗେନ୍ ସୁଡ଼ୁତାନ୍‌ ଜେ ମାପୁରୁଦି ଦୁତ୍‍ ୱାଜି ୱାନିଙ୍ଗ୍‌ କୁକ୍‍ସିନାନ୍‍, “କର୍ଣ୍ଣିଲିୟ ।”
ACT 10:4 ୱାନ୍‌ ତିଲାଜି ଦୁତ୍‍ତି ତରିନ୍‌ ସୁଡ଼୍‌ଜି ଇର୍ହାନ୍‌, “ଏ ପ୍ରବୁ ଇନିକା ?” ଦୁତ୍‍ ଇର୍ହାନ୍‌, “ମାପୁରୁ ନି ପାର୍‌ତାନା ନି ଦାନ୍‍ସିନିମାନୁ ୱେଡ଼ିକା ଆତାମାନାନ୍‌ ମାରି ତେନି ବାଦ୍‌ଲୁ ସିଦେଙ୍ଗ୍‍ ଇଜି ତିଆର୍‌ ମାନାନ୍‌ ।
ACT 10:5 ଇଲେଇ ସିମୋନ ପିତର ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ କୁକ୍‍ସ ତାତେଙ୍ଗ୍‌ ଇଜି ଜପାଦୁ ଲୋକାଙ୍ଗ୍‌ ପକ୍‍ଆ ।
ACT 10:6 ୱାନ୍‌ ସାମ୍‌ଦୁର୍‌ ପାଡ଼ି ବାସାଜିମାନି ସିମୋନ ଦର୍‌ତି ତଲ୍‍ପାଣିକିନିୱାନି ଇଲୁଦୁ ମାନାନ୍‌ ।”
ACT 10:7 ଇକା ଇଜି ଦୁତ୍‍ ସର୍ହାନ୍‍ । କର୍ଣ୍ଣିଲିୟ ୱାନି ଇଲ୍‍ତି ରିଏର୍‌ ସାକର୍‌ ନି ସନ୍ୟ ପାଣିକିନିୱାରି ଲୋଇ ଅରେନ୍‌ ଦାର୍ମୁ ଲୋକାଙ୍ଗ୍‌ କୁକିସ୍‍ତାନ୍‍ ।
ACT 10:8 ୱାନ୍‌ ୱାରିଙ୍ଗ୍‌ ୱିଜୁ ଗଟଣା ୱେର୍‌ସି ଜପାଦୁ ପକ୍‌ତାନ୍‌ ।
ACT 10:9 ମାରିନାଣ୍ତିଙ୍ଗ୍‍ ମାଦ୍‌ଲାମ୍‌ ୱେଡ଼ାଦୁ ୱାର୍‌ ଜପାଦି ଲାକ୍‌ତୁ ଆନିୱାଲେ, ପିତର ପାର୍‌ତନା କିଦେଙ୍ଗ୍‌ ଇଜି ସାତ୍ ମୁସ୍‌କୁ ସର୍ହାମାର୍ହାନ୍‍ ।
ACT 10:10 ୱାନ୍‌ ବାଙ୍ଗାଁ ସାଜି ଉଣ୍ତେଙ୍ଗ୍‌ ବଦା କିତାନ୍‌ ମାରି କାଦି ଆନି ସମୟ୍‍ତୁ ୱାନ୍‌ ଉଣ୍ତ୍ରି ଦର୍ସନ୍‍ ପୟ୍‌ତାନ୍‌ ।
ACT 10:11 ୱାନ୍‌ ସୁଡ଼ୁତାନ୍‌, ବାଦଡ଼୍‍ ରେଆତାମାନାତ୍‍ ମାରି ଉଣ୍ତ୍ରି ପେରି ସାଦର୍‌ ନାଲ୍‍ଗି କନାଦାନ୍‍ ଡ଼ଆଇ ଆଜି ଦୁନିଆଦି ମୁସ୍‌କୁ ଆର୍‍ଜି ୱାଜିନାତ୍‍ ।
ACT 10:12 ଆବେନୁ ଦୁନିଆଦି ବେସି ରକମ୍‌ତି ଜାତୁ, ଉଜ୍‍ନିକେଙ୍ଗ୍‌ ମାରି ବାଦଡ଼୍‌ତି ପଟିଙ୍ଗ୍‍ଁ ମାନେ ।
ACT 10:13 ମାରି ୱାନ୍‌ ଉଣ୍ତ୍ରି ବଲ୍ ୱେର୍‍ଆନ୍‍, “ପିତର ! ନିଙ୍ଗ୍‍ଁଆ, ଡାକ୍‌ସ ତିନ୍‍ଆ !”
ACT 10:14 ମାତର୍‌ ପିତର ଇର୍ହାନ୍‌, “ସିଲେ ପ୍ରବୁ, ନାନ୍ ଆଟ୍‍ଏ ! ନାନ୍ ଏସାଙ୍ଗ୍‍ ଇନି ତାଗ୍‌ଇକା ନି ଅପବିତ୍ର ଜିନିସ୍‌ ତିନ୍‌ଏ ।”
ACT 10:15 ମାରି ଉଣ୍ତ୍ରି ଦେବା ୱାନ୍‌ ୱେର୍‍ଆନ୍‍; “ମାପୁରୁ ଆମାକା ପବିତ୍ର କିତାମାନାନ୍‍, ନିନ୍‌ ତାନିଙ୍ଗ୍‌ ଅପବିତ୍ର ଅଡ଼୍‍ବିମା ।”
ACT 10:16 ମୁଜା ଇୟାୱାଜା ଆନି ୱେନ୍‌କା, ସାଦର୍‍ତିଙ୍ଗ୍‍ ମୁସ୍‌କୁପୁର୍‌ତୁ ପେର୍‌ଜି ଅଆୟ୍‍ ଆତାତ୍‌ ।
ACT 10:17 ପିତର ୱାନି ଦର୍ସନ୍‍ତି ଅର୍ତ ମାଟା ଅଡ଼୍‍ବିଜି କାବା ଆତାନ୍‌ । ଇୟା ୱେଡ଼ାଦୁ, କର୍ଣ୍ଣିଲିୟ ଏମେୱାରିଙ୍ଗ୍‍ ପକ୍‍ତାମାର୍ହାନ୍‍, ୱାର୍‌ ସିମୋନତି ଇଲୁଦିଙ୍ଗ୍ଁ ପୟ୍‌ଜି ଗେଟ୍‍ ଲାକ୍‌ତୁ ନିର୍ହା ମାର୍ହାର୍‌ ।
ACT 10:18 ୱାର୍‌ ୱେନ୍‌ବାତାର୍‌, “ସିମୋନ ପିତର ଦର୍‍ତିକାନ୍‍ ଇବେ ଅରେନ୍‌ କୁଡ଼ାଏନ୍‍ ମାନାନ୍‌ ନୋ ?”
ACT 10:19 ପିତର ଆୟା ସାନ୍ଦି ଦର୍ସନ୍‍ତି ଅର୍ତ ବୁଜାଦେଙ୍ଗ୍‌ ଇଜି ସେସ୍ଟା କିଜିମାର୍ହାନ୍‍, ଆୟା ସମୟ୍‍ତୁ ଆତ୍ମା ଇର୍ହାତ୍‌, “ସୁଡ଼୍‌ଆ, ଇବେ ମୁଏର୍‌ ଲୋକୁ ନିଙ୍ଗିଁ ପୟ୍‍ଜିନାର୍‍ ।
ACT 10:20 ତିଆର୍‌ ଆଜି ଆଡ୍‍ଗି ସାଙ୍ଗ୍ଆ ମାରି ୱାରିୱାଲେ ସନ୍‍ଡ୍ରେଙ୍ଗ୍‍ଁ ଇଜି ଅଡ଼୍‌ବିଏଣ୍‌ଗା, ଇରିଙ୍ଗ୍‌ ନାନ୍ ୱାରିଙ୍ଗ୍‍ଁ ପକ୍‍ତାମାନା ।”
ACT 10:21 ପିତର ଆଡ୍‍ଗି ସଲ୍‍ସି ଆୟା ଲୋକାଙ୍ଗ୍‌ ଇର୍ହାନ୍‌, “ମିର୍‌ ଏମେୱାନିଙ୍ଗ୍‌ ପୟ୍‌ଜିନିଦେର୍‌, ନାନ୍ ଆକାନ୍‍ । ମିର୍‌ ଏନ୍ଦା ୱାତିମାନିଦେର୍‌ ?”
ACT 10:22 ୱାର୍‌ ଇର୍ହାର୍‌, “ସେନାପତି କର୍ଣ୍ଣିଲିୟା ମାଙ୍ଗିଁ ପକ୍‍ତାମାନାନ୍‍ । ୱାନ୍‌ ଅରେନ୍‌ ଦାର୍ମୁଦି ଲୋକୁ । ୱାନ୍‌ ମାପୁରୁଙ୍ଗ୍‍ଁ ଆରାଦନା କିନାନ୍‌ ମାରି ଜିହୁଦିର୍‌ ୱିଜେରେ ୱାନିଙ୍ଗ୍‌ ମାନାନାର୍‌ । ନିଙ୍ଗିଁ ୱାନି ଇନ୍‌ଡ୍ର କୁକ୍‌ସି ଅସିନି ସିକିୟା ୱେନ୍‍ଡ୍ରେଙ୍ଗ୍‍ ଇଜି ମାପୁରୁଦି ଅରେନ୍‌ ପବିତ୍ର ଦୁତ୍‍ ୱାନିଙ୍ଗ୍‌ ଆଦେସ୍‌ ସିତାମାନାନ୍‌ ।”
ACT 10:23 ପିତର ୱାରିଙ୍ଗ୍‌ ଲୋଇ କୁକ୍‌ସି ଅସି ଆୟା ନାଡ଼ା ଆବେ ତେବାଦେଙ୍ଗ୍‍ ଇଜି ବାତିଙ୍ଗ୍‍ ମାଲିତାର୍‍ । ମାରିନାଣ୍ତିଙ୍ଗ୍‍ ୱାନ୍‌ ତିଆର୍‌ ଆଜି ୱାରିୱାଲେ ସର୍ହାନ୍‍ । ଜପାଦୁ ଏସ ବିସ୍‍ବାସି ତଡ଼ାନ୍‌କୁ ବା ୱାନିୱାଲେ ଅର୍‌ସେ ସର୍ହାର୍‍ ।
ACT 10:24 ମାରିନାଣ୍ତିଙ୍ଗ୍‍ ୱାର୍‌ ସିସେରିଆଦୁ ଇତାର୍‌ । ଆବେ କର୍ଣ୍ଣିଲିୟ ୱାନି ପାଡ଼୍‍କାଦି ସଙ୍ଗ୍‌ ନି ନିଜେଦି ଲୋକାୱାଲେ ପିତରତିଙ୍ଗ୍‌ କାପ୍‌କିଜି ମାର୍ହାର୍‌ ।
ACT 10:25 ପିତର ଲୋଇ ସନିୱାଲେ କର୍ଣ୍ଣିଲିୟ ୱାନିଙ୍ଗ୍‌ ତରାଜି ୱାନି ପାଦାମ୍‌ ଆଡ୍‍ଗି ଆର୍‍ଜି ମାଡ଼ିସ୍‌ କିତାନ୍‌ ।
ACT 10:26 ମାତର୍‌ ପିତର ୱାନିଙ୍ଗ୍‌ ନିକ୍‍ସି ଇର୍ହାନ୍‌, “ନିଙ୍ଗ୍‍ଁଆ, ନାନ୍ ନିଜେ ଅରେନ୍‌ ଲୋକୁ ।”
ACT 10:27 ପିତର କର୍ଣ୍ଣିଲିୟ ୱାଲେ ୱାର୍‍ଗିବୁ ୱାର୍‍ଗିବୁ ଇଲୁ ଲୋଇ ଡ଼ୁଗିତାର୍‍ ମାରି ଆବେ ନାଣ୍ତ ଲୋକାଙ୍ଗ୍‌ ଉଣ୍ତାନି ମାନିକା ସୁଡ଼ୁତାନ୍‌ ।
ACT 10:28 ୱାନ୍‌ ୱାରିଙ୍ଗ୍‌ ଇର୍ହାନ୍‌, “ମିର୍‌ ନେଗେନ୍‌ କିଜି ନେସ୍‌ନିଦେର୍‌, ଅରେନ୍‌ ଜିହୁଦି ୱାନି ଦାର୍ମୁ ବିସ୍‌ବାସ୍‌ ଇସାବ୍‌ତାନ୍‌ ଅଣଜିହୁଦି ଲୋକା ୱାଲେ ମିସାବିଡ଼ା କିଦେଙ୍ଗ୍‌ ଆଟ୍‌ଏନ୍‌ । ମାତର୍‌ ମାପୁରୁ ନାଙ୍ଗିଁ ୱେର୍‌ତାମାନାନ୍‍, ଏଙ୍ଗ୍‍ଁ ତାଗ୍‌ଇକା ନି ଅପବିତ୍ର ଅଡ଼ବିନିକା ନେଗେତ୍‌ ସିଲେ ।
ACT 10:29 ଆଦେଙ୍ଗ୍‌ ମିର୍‌ ଏସ୍ତିୱାଲେ ନାଙ୍ଗିଁ କୁକିସ୍‍କିତି, ନାନ୍ ଇନିକା ଅଡ଼୍‍ବିଏଣ୍ତା ୱାତା । ନାନ୍ ନେସ୍‌ତେଙ୍ଗ୍‌ ବଦା କିନା, ନିନ୍‌ ଏନ୍ଦା ନାଙ୍ଗିଁ କୁକିସ୍‍କିତି ?”
ACT 10:30 କର୍ଣ୍ଣିଲିୟ ଇର୍ହାନ୍‌, “ମୁନ୍‌ଡ୍ରିଦିନ୍‌ ଆଗ୍‌ଡ଼ି ପୁରା ଇୟା ବେଡ଼ାଦୁ ୱେଡ଼ାରେନି ମୁନ୍‌ଡ୍ରି ଗଣ୍ଟା ସମୟତୁ ନାନ୍ ନା ଇଲୁଦୁ ପାର୍‌ତନା କିଜିମାର୍ହା । ଆୟାଦାପ୍ରେ ଅଡ଼ିନିଆଙ୍ଗିଁ ଆରାତି ଅରେନ୍‌ ଲୋକୁ ନା ଆଗ୍‌ଡ଼ି ନିଲ୍‍ସି ଇର୍ହାନ୍‌;
ACT 10:31 କର୍ଣ୍ଣିଲିୟ ! ମାପୁରୁ ନି ପାର୍‌ତାନା ୱେର୍ହାମାନାନ୍‍ ମାରି ନିନ୍‌ କାକୁର୍ତି ଲୋକାଙ୍ଗ୍‌ ସେବା କିନିକା ସୁଡ଼ୁତା ମାନାନ୍‌ ।
ACT 10:32 ସିମୋନ ପିତର ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ ତାତେଙ୍ଗ୍‌ ଇଜି ଜପାଦୁ ଲୋକାଙ୍ଗ୍‌ ପକ୍‍ଆ । ୱାନ୍‌ ସାମ୍‌ଦୁର୍‌ ପାଡ଼ି ତେବାତିମାନି ତଲ୍‍ପାଣି କିନି ସିମୋନ ଇଲୁଦୁ କୁଡ଼ାଏନ୍‍ ଆତାମାନାନ୍‌ ।
ACT 10:33 ଆଦେଙ୍ଗ୍‌ ବେଗି ବେଗି ନାନ୍ ନିଙ୍ଗିଁ କୁକିସ୍‍କିତା ମାରି ନିନ୍‌ ଦୟାକିଜି ୱାତିମାନି । ପ୍ରବୁ ନିଙ୍ଗିଁ ଆମାକା କିଦେଙ୍ଗ୍‌ ଇଜି ସିକିୟା ସିତାମାନାନ୍‌, ଆକା ୱେନ୍‍ଡ୍ରେଙ୍ଗ୍‍ ମାପ୍‌ ୱିଜେରେ ଇଲେଇ ମାପୁରୁଦି ଆଗ୍‌ଡ଼ି ଉଣ୍ତାତାମାନାପ୍‍ ।”
ACT 10:34 ପିତର ସିକିୟା ସିଦେଙ୍ଗ୍‍ ଆରାମ୍‌ କିଜି ଇର୍ହାନ୍‌, “ଇଲେଇ ନାନ୍ ବୁଜାଜିନା ଜେ ସତ୍‌ ତାନ୍‍ ମାପୁରୁ ୱିଜେରିଙ୍ଗ୍‍ ସାମାନ୍‍ତାନ୍‍ ସୁଣାନ୍‌ ।
ACT 10:35 ଆମା ଇନି ଜାତିଦି ଆମା ଏମେ ଲୋକୁ ପ୍ରବୁଦି ପାର୍‌ତାନା କିତିଙ୍ଗ୍‍ଁ ମାରି ୱାନି ଆଗ୍‌ଡ଼ି ସତ୍‍ପାଣି କିତିଙ୍ଗ୍‍ଁ, ପ୍ରବୁ ୱାନିଙ୍ଗ୍‌ ଆସ୍‍ନାନ୍‍ ।
ACT 10:36 ମିର୍‌ ନେସ୍‌ତିମାନିଦେର୍‌ ଜେ ମାପୁରୁ ଇସ୍ରାଏଲ୍‌ ଲୋକା ମାନୁ ଏମେ ବାକ୍ୟ ପକ୍‍ତାମାର୍ହାନ୍‍, ଆକାନେ ଜିସୁଦି ମାଣାନ୍‌ ୱେରାୟ୍‍ଆତିମାନି ସାନ୍ତିଦି ବାକ୍ୟ, ଇୟା ଜିସୁ କ୍ରିସ୍ତ ୱିଜେରି ପ୍ରବୁ ।
ACT 10:37 ଜୋହନ ମନ୍‍ ଡ଼େପ୍‍ନି ମାରି ଡୁବନ୍‌ ସିନି କାବୁର୍‌ ୱେର୍‌ତି ୱେନ୍‌କା, ଗାଲିଲିଦାନ୍‌ ଆରାମ୍‌ କିଜି ୱିଜୁ ଇସ୍ରାଏଲ୍‌ ଦେସ୍‌ତୁ ଆମା ୱିଜୁ ଗଟନେଙ୍ଗ୍‍ଁ ଗଟାତାସର୍ହାତ୍‍, ଆକା ମିର୍‌ ନେସ୍‌ନିଦେର୍‌ ।
ACT 10:38 ମିର୍‌ ନାଜରିତଦି ଜିସୁଦି ବିସୟ୍‌ତାନ୍‌ ମାରି ମାପୁରୁ ଏଣ୍ତେସ୍‌ ୱାନି ମୁସ୍‌କୁ ପବିତ୍ର ଆତ୍ମା ନି ସାକ୍ତି ସିତାମାର୍ହାନ୍‍, ଆକା ନେସ୍‌ନିଦେର୍‌ । ୱାନ୍‌ ୱିଜୁ ତରିନ୍‌ ସଲ୍‍ସି କାବାଆନି ପାଣି କିତାନ୍‌ । ସୟତାନ୍‍ତି ଅଦିକାର୍‍ତାନ୍‍ ମାନି ଲୋକାଙ୍ଗ୍‍ଗଁ ନେଗେନ୍‌ କିତାନ୍‌, ଇରିଙ୍ଗ୍‌ ମାପୁରୁ ୱାନି ୱାଲେ ମାର୍ହାନ୍‍ ।
ACT 10:39 ଜିହୁଦିରି ଦେସ୍‌ତୁ ମାରି ଜିରୁସାଲାମ୍‍ତୁ ୱାନ୍‌ ଏମେ ୱିଜୁ ପାଣି କିତାନ୍‌, ମାପ୍‌ ଆୟାୱିଜୁଦି ସାକି । ତାନେୱେନ୍‌କା ୱାନିଙ୍ଗ୍‌ ୱାର୍‌ କ୍ରୁସଦୁ ଏକିସ୍‍କିଜି ଡାକ୍‍ତାର୍‍ ।
ACT 10:40 ମାତର୍‌ ମାପୁରୁ ମୁନେନ୍‌ ଲୋଇ ୱାନିଙ୍ଗ୍‌ ସାତିମାଣାନ୍‌ ପୁନିଜିବନ୍‍ ସିଜି ନିକ୍‍ତାନ୍‍ ।
ACT 10:41 ୱାନ୍‌ ୱିଜେରି ଲାକ୍‌ତୁ ସିଲେ, ମାତର୍‌ ମାପୁରୁଦି ବାସେଆତିମାନି ସାକି, ଅର୍ତାତ୍‍ ମା ଲାକ୍‌ତୁ ତରାୟ୍‍ଆତାନ୍‍ । ମାପୁରୁ ୱାନିଙ୍ଗ୍‌ ସାତି ମାଣାନ୍‌ ନିକ୍‍ତି ୱେନ୍‌କା ମାପ୍‌ ୱାନି ୱାଲେ ଉଟାପ୍‍ ତିର୍‍ଆପ୍‍ ।
ACT 10:42 ଲୋକାମାନୁ ନେଗି କାବୁର୍‌ ପ୍ରଚାର୍‌ କିଦେଙ୍ଗ୍‌ ଇଜି ନି ମାପୁରୁ ଜେ ୱାନିଙ୍ଗ୍‌ ଜିନିମାନି ନି ସାତିୱାରି ବିଚାର୍‌କିନି ୱାଜା ନିଲ୍‍ପତାମାନାନ୍‍, ଇୟା ମାଟାଦି ସାକି ସିଦେଙ୍ଗ୍‍ ଇଜି ୱାନ୍‌ ମାଙ୍ଗିଁ ଆଦେସ୍‌ ସିତାମାନାନ୍‌ ।
ACT 10:43 ୱିଜେରେ ବାବବାଦିର୍ ୱାନି ବିସୟ୍‌ତାନ୍‌ ଇୟା ସାକି ଇର୍ହାମାର୍ହାର୍‍, ଏନ୍‌ ୱାନିମାନୁ ବିସ୍‌ବାସ୍‌ କିନାନ୍‌, ୱାନି ଦର୍‌ତି ସାକ୍ତିଦୁ ୱାନି ପାପ୍‌ କେମା ଆନାତ୍‌ ।”
ACT 10:44 ପିତର ସିକିୟା ସିନିୱାଲେ ଏମେକାର୍‌ ୱାନି ସିକିୟା ୱେନ୍‌ଜି ମାର୍ହାର୍‌, ଆୟା ୱିଜେରି ମୁସ୍‌କୁ ପବିତ୍ର ଆତ୍ମା ରେତାତାତ୍‍ ।
ACT 10:45 ଅଣଜିହୁଦିରି ମୁସ୍‌କୁ ବା ମାପୁରୁ ୱାନି ପବିତ୍ର ଆତ୍ମାଦାନ୍‌ ସିନିମାନିକା ସୁଡ଼୍‌ଜି ପିତରତି ୱାଲେ ୱାତିମାର୍‌ଇ ଜପାଦି ଜିହୁଦି ବିସ୍‌ବାସ୍‌ସିର୍‍ କାବାଆତାର୍‌ ।
ACT 10:46 ଇରିଙ୍ଗ୍‌ ଜିହୁଦି ବିସ୍‍ବାସିର୍‍ ୱାରିଙ୍ଗ୍‌ ମାପୁରୁଦି ଦନ୍ୟବାଦ୍‌ କିଜିମାନିକା ନି ଆଇ ବାସାଦାନ୍‍ ୱାର୍‍ଗିଜିମାନିକା ୱେର୍‌ଆର୍‌ । ପିତର ଇର୍ହାନ୍‌,
ACT 10:47 “ମା ୱାଜା ଇୟା ଲୋକୁ ବା ପବିତ୍ର ଆତ୍ମା ପୟ୍‍ତାମାନାର୍‍ । ଡୁବନ୍‌ ଅତେଙ୍ଗ୍‌ ଇଜି ଏନ୍‌ ଇନିକା ୱାରିଙ୍ଗ୍‌ ବାଦା ସିଦେଙ୍ଗ୍‍ ଆଟ୍‌ନାନ୍‌ ?”
ACT 10:48 ଆଦେଙ୍ଗ୍‌ ୱାନ୍‌ ୱାରିଙ୍ଗ୍‌ ଜିସୁ କ୍ରିସ୍ତଦି ଦର୍‌ତାନ୍‌ ଡୁବନ୍‌ ଅତେଙ୍ଗ୍‌ ଇଜି ଆଦେସ୍‌ ସିତାନ୍‌ । ତାନିୱେନ୍‌କା ୱାର୍‌ ୱାନିଙ୍ଗ୍‌ ମାରି ଏସ ଦିନ୍‌ ୱାରି ୱାଲେ ତେବାଦେଙ୍ଗ୍‍ ବାତିଙ୍ଗ୍‌ ମାଲିତାର୍‍ ।
ACT 11:1 ଅଣଜିହୁଦିର୍‍ ବା ମାପୁରୁଦି ବାକ୍ୟ ୱେର୍‌ଆମାନାର୍‌ ଇଜି ପ୍ରେରିତ ସିସୁର୍‍ ମାରି ଜିହୁଦା ରାଜିଦି ଆଇ ବିସ୍‍ବାସି ତଡ଼ାନ୍‌କୁ ୱେର୍‌ଆର୍‌ ।
ACT 11:2 ପିତର ଏସ୍ତିୱାଲେ ଜିରୁସାଲାମ୍‍ତୁ ସର୍ହାନ୍‍, ଅଣଜିହୁଦିରିଙ୍ଗ୍‌ ସୁନ୍ନତ କିନି ତରିନ୍‌ ମାନି ଲୋକୁ ୱାନି ବିରୁଦ୍‌ତାନ୍‌ ଇର୍ହାର୍‌,
ACT 11:3 “ନିନ୍‌ ଅସୁନ୍ନତ ଅଣଜିହୁଦିରି ଇଲ୍‌କାଙ୍ଗ୍‌ କୁଡ଼ାଏନ୍‍ ଆତିଙ୍ଗ୍‌, ଇୟାୱାଜାକି ୱାରିୱାଲେ ଉଟି ।”
ACT 11:4 ମାତର୍‌ ଆଗ୍‌ଡ଼ିରାନ୍‌ ଆମାକା ଆମାକା ଗଟାତାମାର୍ହାତ୍‍, ପିତର ୱାରିଙ୍ଗ୍‌ ୱାନି ପୁରା ମାଟା ସିଦେଙ୍ଗ୍‍ ସଲ୍‍ସି ଇର୍ହାନ୍‌ :
ACT 11:5 “ନାନ୍ ଜପା ଗାଡ଼୍‌ତୁ ପାର୍‌ତନା କିଜିମାନିୱାଲେ ଉଣ୍ତ୍ରି ଦର୍ସନ୍‍ ପୟ୍‍ତା । ଉଣ୍ତ୍ରି ପେରି ସାଦର୍‍ତି ନାଲ୍‍ଗି କନାଦାନ୍‍ ଦୁଙ୍ଗ୍‍ଁଜି ବାଦଡ଼୍‍ତାନ୍‍ ଆଡ୍‍ଗି ଆର୍‍ଜିମାନିକା ନାନ୍ ସୁଡ଼ୁତା, ଆକା ନା ଲାକ୍‌ତୁ ତେବାତାସର୍ହାତ୍‍ ।
ACT 11:6 ନାନ୍ ନେଗେନ୍‍କିଜି ଲୋଇ ସୁଡ଼୍‌ଜି ଆୟା ଲୋଇ ଇଲ୍‌ତୁ ପସାକିନି ଜାତୁଙ୍ଗ୍‍ଁ, ଦୁନିଆଦି ବନ୍‍ ଜାତୁଙ୍ଗ୍‍ଁ, ଉଜ୍‍ନିକେଙ୍ଗ୍‌ ମାରି ବାଦଡ଼୍‌ତି ବନ୍‍ ପଟିଙ୍ଗ୍‍ଁ ସୁଡ଼ୁତା ।
ACT 11:7 ତାନିୱେନ୍‍କା ନାନ୍ ଇୟା ବଲ୍ ୱେର୍‍ଆ, ପିତର ! ନିଙ୍ଗ୍‍ଁଆ, କୟ୍‍ଜି ତିନ୍‍ଆ ।
ACT 11:8 ମାତର୍‌ ନାନ୍ ଇର୍‌ଆ, ସିଲେ, ପ୍ରବୁ ! ନାନ୍ ଆଟ୍‍ଏ । ଇୟାସାନ୍ଦି ଇନି ଅପବିତ୍ର କାଦି ନା ୱେୟୁଦୁ ଅଏ ।
ACT 11:9 ମୁସ୍‌କୁପୁର୍‌ତାନ୍‌ ମାରିଡ଼େସି ଇୟା ବଲ୍ ୱାତାତ୍‌, ମାପୁରୁ ଆମାକା ପବିତ୍ର କିତାମାନାନ୍‍, ନିନ୍‌ ତାନିଙ୍ଗ୍‍ଁ ଅପବିତ୍ର ଅଡ଼୍‍ବିମା ।”
ACT 11:10 ମୁଜା ଇୟାୱାଜା ଆତାତ୍‌, ସାରାସାରି ଆୟାୱିଜୁ ମୁସ୍‌କୁପୁର୍‌ତୁ ପେର୍‌ଜି ଅଆୟ୍‍ଆତେ ।
ACT 11:11 ଟିକ୍‌ ଆୟା ସମୟ୍‍ତୁ, ସିସେରିଆଦାନ୍‍ ନା ଲାକ୍‌ତୁ ପକାୟାଆତିମାର୍‍ରି ମୁଏର୍‌ ଲୋକୁ ନାନ୍ ଏମେ ଇଲୁଦୁ ତେବାଜିମାର୍ହା, ଆବେ ଇଗାୱାତାର୍‍ ।
ACT 11:12 ୱେନ୍‌କା ଅଡ଼୍‌ବିଏଣ୍‌ଗା ୱାରି ୱାଲେ ସନ୍‍ଣ୍ତ୍ରେଙ୍ଗ୍‍ଁ ଇଜି ପବିତ୍ର ଆତ୍ମା ନାଙ୍ଗିଁ ଆଦେସ୍‌ ସିତାତ୍‌ । ଜପାଦି ଇୟା ସଅ ଲୋକୁ ବିସ୍‍ବାସି ତଡ଼ାନ୍‌କୁ ନା ୱାଲେ ସିସେରିଆଦୁ ସର୍ହାର୍‍ ମାରି ମାପ୍‌ ୱିଜେରେ କର୍ଣ୍ଣିଲିୟଦି ଇଲ୍‌ତୁ ଇତାପ୍‍ ।
ACT 11:13 ୱାନି ଇଲ୍‌ତୁ ୱାନ୍‌ ଏଣ୍ତେସ୍‌ ମୁସ୍‌କୁପୁର୍‌ତି ଦୁତ୍‍ତି ଦର୍ସନ୍‍ ପୟ୍‍ତାମାର୍ହାନ୍‍, ଆୟା ବିସୟ୍‌ତାନ୍‌ ମାଙ୍ଗିଁ ୱେର୍‌ତାନ୍‍ । ମୁସ୍‌କୁପୁର୍‌ତି ଦୁତ୍‍ ୱାନିଙ୍ଗ୍‌ ଇର୍ହାମାର୍ହାତ୍‍, “ଜପାଦୁ ମାନି ସିମୋନ ପିତର ଦର୍‌ତି ଅରେନ୍‌ ଲୋକ୍‌ତିଙ୍ଗ୍‌ ତାତେଙ୍ଗ୍‌ ଇଜି ଲୋକାଙ୍ଗ୍‌ ପକ୍‍ତୁ ।
ACT 11:14 ୱାନ୍‌ ୱାଜି ମିଙ୍ଗିଁ ସିକିୟା ସିନାନ୍‍ ମାରି ଆବେଣ୍‍କୁ ନିନ୍‌ ମାରି ନି ଇଲୁତି ୱିଜେରେ ରକିୟା ପୟ୍‌ନାର୍‌ ।
ACT 11:15 ମାରି ନାନ୍ ଏସ୍ତିୱାଲେ ସିକିୟା ସିଦେଙ୍ଗ୍‌ ଆରାମ୍‌ କିତା, ଆଗ୍‌ଡ଼ି ପବିତ୍ର ଆତ୍ମା ଏଣ୍ତେସ୍‌ ମା ମୁସ୍‌କୁ ରେତାତା ମାର୍ହାତ୍‌, ଆୟାୱାଜା ୱାରି ମୁସ୍‌କୁ ରେତାତାତ୍‍ ।
ACT 11:16 ତାନିୱେନ୍‍କା ନାନ୍ ପ୍ରବୁଦି ଇୟା ବାକ୍ୟ ଏତ୍‌ କିତା : ଜୋହନ ଏର୍‌ତୁ ଡୁବନ୍‌ ସିତାନ୍‌, ମାତର୍‌ ମିର୍‌ ପବିତ୍ର ଆତ୍ମାଦାନ୍‌ ଡୁବନ୍‌ ଆନିଦେର୍‌ ।
ACT 11:17 ଇକା ପୁରାସତ୍‍ ଜେ ମାପ୍‌ ପ୍ରବୁ ଜିସୁ କ୍ରିସ୍ତଦିମାନୁ ବିସ୍‌ବାସ୍‌ କିତି ଉଣ୍ତିଙ୍ଗ୍‌ ମାପୁରୁ ମାଙ୍ଗିଁ ଏମେ ଦାନ୍‌ ସିତା ମାର୍ହାନ୍‍, ଅଣଜିହୁଦିରିଙ୍ଗ୍‌ ବା ଆୟା ଦାନ୍‌ ସିତାମାନାନ୍‌; ନାନ୍ ଏନ୍‌ ଜେ ମାପୁରୁଦି ଇୟା ପାଣିଦିଙ୍ଗ୍‍ଁ ବିରୁଦ୍‌ କିନା !”
ACT 11:18 ୱାର୍‌ ଇକା ୱେର୍‌ଇ ୱେନ୍‌କା ମାରି ଜାଟି କିଏନ୍‍ଣ୍ତା ମାପୁରୁଦି ଦନ୍ୟବାଦ୍‌ କିଜି ଇର୍ହାର୍‌, “ଆରିଙ୍ଗ୍‌ ମାପୁରୁ ଅଣଜିହୁଦିରିଙ୍ଗ୍‌ ବା ଏତ୍‌କିଦେଙ୍ଗ୍‍ଁ ମାରି ଜିଦେଙ୍ଗ୍‍ଁ ସୁଜୋଗ ସିତାମାନାନ୍‌ ।”
ACT 11:19 ସ୍ତିପାନ୍‍ତି ସାତି ୱେନ୍‌କା ବିସ୍‍ବାସିର୍‍ ତାଡ଼ନା ପୟ୍‌ଜି ଇନିଙ୍ଗାଁ ଆନିଙ୍ଗାଁ ଆନିୱାଲେ ୱାରି ଲୋଇ ଏସଲୋକ୍‌ କେବଲ୍‌ ଜିହୁଦିର୍‌ ଲାକ୍‌ତୁ ବାକ୍ୟ ପ୍ରଚାର୍‌ କିଜି, ପିନିସିଆ, ସାଇପ୍ରସ୍‍ ମାରି ଆଣ୍ଟିୟକ ସାନ୍ଦି ସର୍ହାର୍‍ ।
ACT 11:20 ମାତର୍‌ ସାଇପ୍ରସ୍‍ ମାରି କୁରିଣିଦି ଆଇ ଏସ ବିସ୍‍ବାସିର୍‍ ଆଣ୍ଟିୟକଦୁ ସଲ୍‍ସି ଅଣଜିହୁଦିରି ଲାକ୍‌ତୁ ପ୍ରବୁ ଜିସୁଦି ନେଗି କାବୁର୍‌ ପ୍ରଚାର୍‌ କିତାର୍‍ ।
ACT 11:21 ମାପୁରୁଦି ସାକ୍ତି ୱାରି ୱାଲେ ମାର୍ହାତ୍‌ ମାରି ନାଣ୍ତ ଲୋକୁ ବିସ୍‌ବାସ୍‌ କିଜି ପ୍ରବୁଦି ତରିନ୍‌ ମନ୍‍ ଡ଼େପ୍‍ତାର୍‍ ।
ACT 11:22 ଏସ୍ତିୱାଲେ ଇୟା କାବୁର୍‌ ଜିରୁସାଲାମ୍‍ତି ମଣ୍ତଲିଦୁ ଇତାତ୍‍, ୱାର୍‌ ବର୍ଣ୍ଣବାସ୍‍ତିଙ୍ଗ୍‍ ଆଣ୍ଟିୟକଦୁ ପକ୍‌ତାର୍‌ ।
ACT 11:23 ୱାନ୍‌ ଆବେ ଇଜି ମାପୁରୁ ଆୟା ଲୋକାଙ୍ଗ୍‌ ଏଣ୍ତେସ୍‌ ଆସିର୍ବାଦ୍‌ କିତାମାନାନ୍‍, ଆକା ସୁଡ଼୍‌ଜି ୱେଡ଼ିକା ଆତାନ୍‍ ମାରି ଜିବନ୍‌ତୁ ପ୍ରବୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ତେବାଜି ନେଗେନ୍‌ ଜିଦେଙ୍ଗ୍‍ଁ ୱାରିଙ୍ଗ୍‍ଁ ୱେର୍‌ତାନ୍‌ ।
ACT 11:24 ବର୍ଣ୍ଣବାସ୍‍ ପବିତ୍ର ଆତ୍ମା ନି ବିସ୍‌ବାସ୍‌ତୁ ପୁରାଆତି ଅରେନ୍‌ ନେଗି ଲୋକୁ ମାର୍ହାନ୍‍ । ୱାନି ପ୍ରଚାର୍‌ତାନ୍‍ ନାଣ୍ତ ଲୋକୁ ପ୍ରବୁଦି ଲାକ୍‌ତୁ ୱାତାର୍‌ ।
ACT 11:25 ତାନିୱେନ୍‍କା ବର୍ଣ୍ଣବାସ୍‍ ସାଉଲତିଙ୍ଗ୍‍ ପୟ୍‌ଦେଙ୍ଗ୍‌ ଇଜି ତାର୍ସସ୍‍ତୁ ସର୍ହାନ୍‍ ।
ACT 11:26 ଆବେ ୱାନିଙ୍ଗ୍‍ଁ ପୟ୍‌ଜି ଆଣ୍ଟିୟକଦୁ ତାତାନ୍‍ । ମାରି ପୁରା ଉନ୍‍ଣ୍ତ୍ରି ବାର୍‍ସେକ୍‍ ସାନ୍ଦି ଇୟା ରିଏର୍‌ ଆୟାବାଣି ମଣ୍ତଲିଦି ବିସ୍‍ବାସିରି ୱାଲେ ମିସାଜି ନାଣ୍ତ ଲୋକାଙ୍ଗ୍‌ ସିକିୟା ସିତାର୍‍ । ଇୟା ଆଣ୍ଟିୟକଦି ବିସ୍‍ବାସିରିଙ୍ଗ୍‍ଁ ଲୋକୁ ଆଗ୍‌ଡ଼ି କ୍ରିସ୍ଟିୟାନ୍‍ ଇଜି ଇର୍ହାମାର୍ହାର୍‍ ।
ACT 11:27 ଆୟା ବେଡ଼ାଦୁ ଜିରୁସାଲାମ୍‍ତାନ୍‍ ଏସ ବାବବାଦିର୍ ଆଣ୍ଟିୟକଦୁ ୱାତାର୍‍ ।
ACT 11:28 ୱାରି ଲୋଇ ଆଗାବ ଦର୍‌ତି ଅରେନ୍‌ ଲୋକୁ ଆତ୍ମାଦି ସାକ୍ତିଦାନ୍ ପୁରାଆଜି ୱିଜୁ ଦୁନିଆଦୁ ଉନ୍‍ଣ୍ତ୍ରି ପେରି କାକୁର୍ତି ଆନାତ୍‌ ଇଜି ବବିସତ୍‍ ମାଟା ୱେର୍‌ତାନ୍‌ । ସମ୍ରାଟ କ୍ଳାଡିୟସ୍‍ତି ସମୟ୍‍ତୁ ଇକା ଗଟାତାମାର୍ହାତ୍‍ ।
ACT 11:29 ସିସୁର୍‍ ଜିହୁଦାଦୁ ବାସାଜିମାନି ବିସ୍‍ବାସି ତଡ଼ାନ୍‌କା ଲାକ୍‌ତୁ ୱାରି ସିଦେଙ୍ଗ୍‍ ଆଟ୍‌ନି ସାନ୍ଦି ସାହାଜ୍ୟ ପକ୍‍ନାର୍‍ ଇଜି ତିର୍‍ କିତାର୍‍ ।
ACT 11:30 ୱାର୍‌ ଡାବୁଙ୍ଗୁଁ ଉଣ୍ତା କିଜି ବର୍ଣ୍ଣବାସ୍‍ ନି ସାଉଲତି କିଦୁ ମଣ୍ତଲିଦି ପେରି ନେତାର୍‍ରି ଲାକ୍‌ତୁ ଆକା ପୋକ୍‌ତାର୍‌ ।
ACT 12:1 ଇୟା ସମୟତୁ ରାଜା ହେରୋଦ ମଣ୍ତଲିଦି ଏସ ଲୋକାଙ୍ଗ୍‌ କାସ୍ଟୁସିନିକା ଆରାମ୍‌ କିତାନ୍‌ ।
ACT 12:2 ୱାନ୍‌ ଜୋହନତି ତଡ଼ାନ୍‌ ଜାକୁବଙ୍ଗ୍‍ କାଣ୍ତାଦାନ୍‍ କାତିସ୍‍ତାନ୍‍ ।
ACT 12:3 ଜିହୁଦିର୍‌ ଇବେ ୱେଡ଼ିକା ସୁଡ଼୍‌ଜି ୱାନ୍‌ ପିତର୍‍ତିଙ୍ଗ୍‍ଁ ବା ତର୍‍ସିସ୍‍ କିତାନ୍‌ । ଇୟା ଗଟନା କମିରିମିସାକିଏନ୍‍ଣ୍ତା ରୁଟି ପଣ୍ତୟ୍‌ତି ସମୟ୍‍ତୁ ଗଟାତାମାର୍ହାତ୍‍ ।
ACT 12:4 ପିତର ତରାୟ୍‍ଆଜି ଜଇଲ୍‌ତୁ ଇଡାୟ୍‍ ଆତାନ୍‍ ମାରି ନାଲ୍‍ଏର୍‍ ନାଲ୍‍ଏର୍‍ ଲୋକୁ ସନ୍ୟରିଙ୍ଗ୍‍ ଅସି କିଆୟ୍‍ଆତି ନାଲ୍‍ଗି ଦଲ୍‌ ସନ୍ୟର୍‍ ୱାନିଙ୍ଗ୍‌ କାପ୍‌କିଜି ତେବାତାର୍‌ । ନିସ୍ତାର୍‍ ପଣ୍ତୟ୍‌ ୱେନ୍‌କା ୱିଜେରେ ଲୋଇ ୱାନି ବିସାର୍‌ କିନିକା ହେରୋଦ୍‍ତି ବଦା ମାର୍ହାତ୍‌ ।
ACT 12:5 ପିତର ଜଇଲ୍‌ତୁ ମାନିୱାଲେ ମଣ୍ତଲିଦି ଲୋକୁ ଉଣ୍ତ୍ରି ମନ୍‍ତାନ୍‍ ୱାନି ଉଣ୍ତିଙ୍ଗ୍‌ ମାପୁରୁଦି ଲାକ୍‌ତୁ ପାର୍‌ତାନା କିଜିମାର୍ହାର୍‍ ।
ACT 12:6 ଆମା ନାଣ୍ଡିଙ୍ଗ୍ ହେରୋଦ ପିତର୍‍ତିଙ୍ଗ୍‍ ଲୋକା ଆଗ୍‌ଡ଼ି ତାନି ଉଣ୍ତିଙ୍ଗ୍‌ ଅଡ଼୍‍ବିତା ମାର୍ହାନ୍‍, ତାନି ଆଗ୍‌ଡ଼ିରି ନାଡ଼ା ପିତର ରିଏର୍‌ କାପ୍‍କିନିୱାରି ନାଡ଼୍‍ମି ଡରିତାମାର୍ହାନ୍‍ । ରୁଣ୍ତି ସିକ୍‍ଣି ଦାନ୍‍ ୱାନିଙ୍ଗ୍‌ ତର୍‍ତାମାର୍ହାର୍‍ ମାରି ଜଇଲ୍‍ତି ସେର୍‍ଲା ଲାକ୍‌ତୁ କାପ୍‍ନିକାର୍‍ କାପ୍‍କିତା ମାର୍ହାର୍‌ ।
ACT 12:7 ଆୟାଦାପ୍ରେନେ ପ୍ରବୁଦି ଅରେନ୍‌ ଦୁତ୍‍ ୱାଜି ନିର୍‍ଆତ୍‍ ମାରି ବାକ୍‍ରା ଜାୟ୍‌ ଆତାସର୍ହାତ୍‍ । ଦୁତ୍‍ ପିତର୍‌ତି ଗୁଜାମ୍‍ତିଙ୍ଗ୍‍ଁ ଦୁକ୍‍ଜି ୱାନିଙ୍ଗ୍‍ଁ ସୁସ୍‍କାଣ୍‍କାଣ୍‍କୁ ନିକ୍‍ସି ଇର୍ହାତ୍‌, “ବେଗି ନିଙ୍ଗ୍‍ଁଆ !” ବେଗି ବେଗି ପିତରତି କିୟୁଦୁ ତର୍‍ଆତିମାର୍ହି ସିକ୍‍ଣିଙ୍ଗ୍‍ ଆର୍‍ତେ ସର୍‌ଏ ।
ACT 12:8 ତାନିୱେନ୍‍କା ଦୁତ୍‍ ଇର୍ହାତ୍‌, “ଜୁକିଦି ଗାଟି ତର୍‌ଆ, ଜୁତେଙ୍ଗ୍‍ ଆରାଆ ।” ପିତର ଆକା କିତିୱେନ୍‌କା ଦୁତ୍‍ ଇର୍ହାତ୍‌, “ମେନ୍ଦଲ୍‌ତୁ ସାଦର୍‌ ପକ୍‍ସି ନା ୱେନ୍‌କା ରାଆ ।”
ACT 12:9 ଦୁତ୍‍ ଆମାକା କିଜିମାର୍ହାତ୍‍, ଆକା ଉଣ୍ତ୍ରି ସତ୍‌ ଗଟନା ନୋ ସିଲେ, ପିତର ନେସ୍‌ତେଙ୍ଗ୍‌ ଆଟ୍‍ଏତାନ୍‍ । ୱାନ୍‌ ଲବ୍‍ ସୁଡ଼୍‍ଜିନାନ୍‍ ଇଜି ଅଡ଼୍‍ବିତାନ୍‍ । ଆରିଙ୍ଗ୍‍ବା ପିତର ଜଇଲ୍‍ତାନ୍‍ ସହସି ଦୁତ୍‍ତି ୱାଲେ ସର୍ହାନ୍‍ ।
ACT 12:10 ୱାର୍‌ କାପ୍‍କିନିୱାରି ପାର୍‌ତୁମ୍‌ ନି ମାରି ଉନ୍‍ଣ୍ତ୍ରି ବାଡି ଜିଣାଜି ସାରାସାରି ଗାଡ଼୍‌ତୁ ଡ଼ୁଗୁନି ସାରିଦୁ ମାନି ଲୁୱା ସେର୍‍ଲା ଲାକ୍‌ତୁ ୱାତାର୍‌ । ୱାରି ଉଣ୍ତିଙ୍ଗ୍‌ ସେର୍‍ଲା ତାନି ମନ୍‍ତିଙ୍ଗ୍‍ ରେଏତାତ୍‍ ମାରି ୱାର୍‌ ସହସି ବୁଲାଜି ୱାତାର୍‌ । ୱାର୍‌ ପେରିଜାରିଦୁ ସଲ୍‍ପୁ ସଲ୍‍ପୁ ଆୟାଦାପ୍ରେନେ ମୁସ୍‌କୁପୁର୍‌ତି ଦୁତ୍‍ ପିତରତିଙ୍ଗ୍‌ ଡ଼ିସ୍‌ସି ସର୍ହାତ୍‍ ।
ACT 12:11 ତାନିୱେନ୍‍କା, ଆମାକା ଗଟାତାମାର୍ହାତ୍‍, ପିତର ଆକା ନେସ୍‌ତେଙ୍ଗ୍‌ ଆଟ୍‍ସି ଇର୍ହାନ୍‌, “ଇକା ସତେନେ ସତ୍‌ ଇଜି ନାନ୍ ନେସ୍‍ତେଙ୍ଗ୍‍ଁ ଆଟ୍‍ସିନା । ହେରୋଦତି ସାକ୍ତିଦାନ୍ ମାରି ଜିହୁଦି ଲୋକୁ ଆମାକା ଗଟାନାତ୍‌ ଇଜି ଆସା କିତାମାର୍ହାର୍‍, ଆବେଟ୍‌କୁ ନାଙ୍ଗିଁ ରକିୟା କିଦେଙ୍ଗ୍‌ ଇଜି ପ୍ରବୁ ମୁସ୍‌କୁପୁର୍‌ତି ଦୁତ୍‍ତିଙ୍ଗ୍‍ ପକ୍‍ତାମାର୍ହାନ୍‍ ।”
ACT 12:12 ନିଜେଦି ଅବସ୍ଥାଦି ବିସୟ୍‌ତାନ୍‌ ଜାଗାର୍‌ତା ଆଜି ୱାନ୍‌ ଜୋହନତି ନି ମାର୍କରି ଆଇସି ମରିୟମତି ଇଲୁଦୁ ସର୍ହାନ୍‍ । ଆବେ ନାଣ୍ତ ଲୋକୁ ଉଣ୍ତାଜି ପାର୍‌ତନା କିଜିମାର୍ହାର୍‍ ।
ACT 12:13 ପିତର ଆତ୍‌ରେ ସେର୍‌ଲାଦୁ କତ୍‍ତାନ୍‍, ରୋଦା ଦର୍‌ତି ଅରେତ୍‌ ଦାସି ସେର୍‍ଲା ରେତେଙ୍ଗ୍‍ଁ ୱାତାତ୍‍ ।
ACT 12:14 ପିତରତି ବଲ୍ ନେସ୍‍ତେଙ୍ଗ୍‍ଁ ଆଟ୍‍ସି ୱାଦ୍‌ ନିସା ୱେଡ଼ିକା ଆତାତ୍‍ଜେ ସେର୍‍ଲା ରେଏନ୍‍ଣ୍ତା ପିତର ଆତ୍‌ରେ ନିର୍‍ଆ ମାନାନ୍‌ ଇଜି ୱେର୍‌ତାତ୍‌ ।
ACT 12:15 ୱାର୍‌ ତାନିଙ୍ଗ୍‌ ଇର୍ହାର୍‌, “ନିନ୍‌ ବାୟା ଆତିମାନି ।” ମାତର୍‌ “ଇକା ସତ୍‌” ଇଜି ୱାଦ୍‌ ଆଟ୍‍ୱାଦାନ୍‍ ଇର୍ହାତ୍‍ଆକା, ୱାର୍‌ ଅଡ଼୍‍ବିତାର୍‍, “ଆରିଙ୍ଗ୍‌ ଆନାମାନାତ୍‍, ଇକା ୱାନି ଦୁତ୍‍ ।”
ACT 12:16 ପିତର ଜାରିଦିଙ୍ଗ୍ ଜାରି ସେର୍‌ଲାଦୁ କତ୍‍ସି ମାର୍ହାନ୍‍ । ସାରାସାରି ୱାର୍‌ ସେର୍‍ଲା ରେସି ୱାନିଙ୍ଗ୍‌ ସୁଡ଼୍‌ଜି କାବାତାର୍‍ ।
ACT 12:17 ୱାନ୍‌ କିୟୁଦାନ୍‌ ଜୁଟ୍‍ସି ଆଲ୍‍ଜ ମାନ୍‍ଡ୍ରେଙ୍ଗ୍‍ଁ ଇର୍ହାନ୍‌, ମାରି ପ୍ରବୁ ୱାନିଙ୍ଗ୍‌ ଏଣ୍ତେସ୍‌ ଜଇଲ୍‍ତାନ୍‍ ସପ୍‍ସି ତାତାନ୍‍, ଆୟା ବିସୟ୍‌ ୱାରି ଆଗ୍‌ଡ଼ି ୱେର୍‌ତାନ୍‌ । ତାନିୱେନ୍‍କା ଇୟାୱିଜୁ ମାଟା ଜାକୁବ ନି ଆଇ ୱିଜେରେ ବିସ୍‍ବାସିରି ତଡ଼ାନ୍‌କାଙ୍ଗ୍‌ ୱେର୍‍ତେଙ୍ଗ୍‍ଁ ଇଜି ଆଦେସ୍‌ ସିଜି ୱାନ୍‌ ଆବେଟ୍‌କୁ ଆଇତରିନ୍‍ ସର୍ହାନ୍‍ ।
ACT 12:18 ସାଲ୍‍ଦି ଆତି ୱେନ୍‌କା ପିତର ଏମେ ସର୍ହାନ୍‍ ଇଜି କାପ୍‍କିନିୱାରି ଲୋଇ ଗାବ୍‍ରା ଆତାସର୍ହାର୍‍ ।
ACT 12:19 ହେରୋଦ ୱାନିଙ୍ଗ୍‌ ପୟ୍‌ଦେଙ୍ଗ୍‌ ଆଦେସ୍‌ ସିତାନ୍‌, ମାତର୍‌ ୱାର୍‌ ୱାନିଙ୍ଗ୍‌ ପୟ୍‍ଏତାର୍‍ । ସାରାସାରି କାପ୍‍କିନିୱାରିଙ୍ଗ୍‍ ୱେନ୍‍ବାଜି ୱାରିଙ୍ଗ୍‌ ସାନିଦଣ୍ତ୍‍ ସିନି ଉଣ୍ତିଙ୍ଗ୍‌ ଆଦେସ୍‌ ସିତାନ୍‌ । ତାନିୱେନ୍‍କା ହେରୋଦ ଜିହୁଦା ଦେସ୍‍ତାନ୍‍ ସଲ୍‍ସି କାଇସରିଆଦୁ ତେବାତାନ୍‌ ।
ACT 12:20 ଆୟା ସମୟ୍‍ତୁ ହେରୋଦ ସୋର ନି ସିଦୋନତି ଲୋକା ମୁସ୍‌କୁ ନାଣ୍ତ ରିସା ଆତାମାର୍ହାନ୍‍ । ଆଦେଙ୍ଗ୍‍ଁ ୱାରି ଲୋଇ ଉଣ୍ତ୍ରି ଦଲ୍‌ ୱାନିଙ୍ଗ୍‌ ତର୍‍ଆୟ୍‍ ଆଦେଙ୍ଗ୍‌ ଇଜି ସର୍ହାର୍‍ । ପାର୍‌ତୁମ୍‌ ୱାର୍‌ ରାଜା ମେଡ଼୍‍ତି ଦାୟିତୁ ମାନି ବ୍ଳାସ୍ତଙ୍ଗ୍‌ ବୁଜାକିଜି ୱାନି ସାହାଜ୍ୟ ପୟ୍‌ତାର୍‌ । ତାନିୱେନ୍‍କା ୱାର୍‌ ହେରୋଦତି ଲାକ୍‌ତୁ ସଲ୍‍ସି ସାନ୍ତି ଲସ୍‍ତାର୍‍, ଇରିଙ୍ଗ୍‌ ହେରୋଦତି ଦେସ୍‌ଦାନ୍‍ ୱାରି ଦେସ୍‌ତୁ କାଦି ୱିଜୁ ପକ୍‍ସି ମାର୍ହାର୍‌ ।
ACT 12:21 ବାସେ ଆତି ଦିନ୍‍ତୁ ହେରୋଦ ୱାନି ରାଜାଦି ଆଙ୍ଗିଁ ଆରାତାନ୍‍ ମାରି ବିଚାର୍‍ କିନି ରାଜାଗାଦିଦୁ ବାସ୍‌ସି ଲୋକାଙ୍ଗ୍‌ ଉନ୍‍ଣ୍ତ୍ରି ମାଟା ୱେର୍‌ତାନ୍‌ ।
ACT 12:22 ୱାର୍‌ ଆଉଲି ଆତାର୍‌, “ଇକା ଇନି ଲୋକାଦି ଆଏତ୍‌, ମାତର୍‌ ଅରେନ୍‌ ମାପୁରୁଦି ବଲ୍ !”
ACT 12:23 ଆୟାଦାପ୍ରେ ପ୍ରବୁଦି ଦୁତ୍‍ ହେରୋଦତିଙ୍ଗ୍‍ ଡାକ୍‌ତାନ୍‌, ଇରିଙ୍ଗ୍‌ ମାପୁରୁଙ୍ଗ୍‍ଁ ଏମେ ଗୌରବ୍‍ ସିନି ମାଟା, ୱାନ୍‌ ଆକା ୱାନିଙ୍ଗ୍‌ ସିଏନ୍‌ ମାର୍ହାନ୍‍ । ପିଡ଼୍‍କୁ ଆଜି ୱାନ୍‌ ସାତାନ୍‍ ।
ACT 12:24 ଇୟା ସମୟ୍ ଲୋଇ ମାପୁରୁଦି ବାକ୍ୟ ପିର୍‌ଜି ୱେଙ୍ଗିଁଦେଙ୍ଗ୍‌ ଆସ୍‌ତାତ୍‌ ।
ACT 12:25 ବର୍ଣ୍ଣବା ମାରି ସାଉଲ ଜିରୁସାଲାମ୍‍ତୁ ସେବା ପାଣି ୱିସ୍‍ସି ଜୋହନ ମାର୍କଙ୍ଗ୍‍ଁ ଅର୍‌ସେ ଅସି ଜିରୁସାଲାମ୍‍ତାନ୍‍ ଡ଼େସିସର୍ହାର୍‍ ।
ACT 13:1 ଆଣ୍ଟିୟକ ମଣ୍ତଲିଦୁ ଏସ ବାବବାଦି ନି ସିକିୟା ଗୁରୁର୍‍ ମାର୍ହାର୍‌ । ୱାରି ଲୋଇ ମାର୍ହାନ୍‍ ବର୍ଣ୍ଣବା, ସିମୋନ ଆମାକାନ୍‍କି ନିଗର ଦର୍‌ତାନ୍‌ ୱେଙ୍ଗିଁତା ମାର୍ହାନ୍‍, ଲୁସିଅସ୍‍ କୁରିଣିଦୁ ବାସାନିକାନ୍‍, ମହନେମ ୱାନ୍‌ ରାଜିୟ ପାଲ ହେରୋଦତି ଇଲ୍‌ତୁ ପିରିତାମାର୍ହାନ୍‍ ମାରି ସାଉଲ ।
ACT 13:2 ୱାର୍‌ ପ୍ରବୁଦି ସେବା ନି ଉପାସ୍‌ କିନିୱାଲେ, ପବିତ୍ରଆତ୍ମା ୱାରିଙ୍ଗ୍‌ ଇର୍ହାନ୍‌, “ନାନ୍ ଏମେ ପାଣି ଉଣ୍ତିଙ୍ଗ୍‌ ବର୍ଣ୍ଣବା ନି ସାଉଲତିଙ୍ଗ୍‍ଁ କୁକ୍‍ତାମାନା, ଆୟାଉଣ୍ତିଙ୍ଗ୍‌ ୱାରିଙ୍ଗ୍‍ଁ ନା ଉଣ୍ତିଙ୍ଗ୍‌ ୱେର୍‌ଏ କିଦୁ ।”
ACT 13:3 ୱାର୍‌ ଉପାସ୍‌ ନି ପାର୍‌ତନା କିଜି ଆୟା ରିଏରି ମୁସ୍‌କୁ କିକୁ ଇଡ୍‌ଜି ୱାରିଙ୍ଗ୍‍ଁ ପ୍ରଚାରକିନି ପାଣିଦୁ ପୋକ୍‌ତାର୍‌ ।
ACT 13:4 ପବିତ୍ର ଆତ୍ମାଦି ମାଣାନ୍‌ ପକାୟ୍‍ ଆଜି ବର୍ଣ୍ଣବା ନି ସାଉଲ ସେଲୁକିୟାଦୁ ସର୍ହାର୍‍ ମାରି ଆବେଟ୍‌କୁ ଜାହାଜ୍‍ତାନ୍‍ ସାଇପ୍ରସ୍‍ ସାରିବେଡ଼୍‍ତି ସାମ୍‌ଦୁର୍‌ ମାନି ନାଣ୍‍ମିରି ଇସ୍ରିବୁମି ବାଡିଦୁ ସର୍ହାର୍‍ ।
ACT 13:5 ସାଲାମି ଗାଡ଼୍‌ତୁ ଇଜି ଜିହୁଦିର୍‌ ପାର୍‍ତନାକିନି ଇଲ୍‌କାଙ୍ଗ୍‌ ମାପୁରୁଦି ବାକ୍ୟ ପ୍ରଚାର୍‌ କିତାର୍‍ । ଜୋହନ ମାର୍କ ୱାରିୱାଲେ ମାନ୍‌ଜି ସାହାଜ୍ୟ କିଜିମାର୍ହାନ୍‍ ।
ACT 13:6 ୱାର୍‌ ସାଇପ୍ରସ୍‍ ଇସ୍ରିବୁମି ବାଡି ଜିଣାଜି ପାଫଦୁ ସର୍ହାର୍‍ । ଆବେ ୱାର୍‌ ବାର-ଜିସୁ ଦର୍‌ତି ଅରେନ୍‌ ଜିହୁଦି ଗୁଣୁଏଙ୍ଗ୍‍ଁ ବେଟ୍‍ବୁଡ଼ାତାର୍‍ । ୱାନ୍‌ ନିଜେଦିଙ୍ଗ୍‍ଁ ବାବବାଦି ଇଜିମାର୍‍ଆନ୍‍ ।
ACT 13:7 ୱାନ୍‌ ଆୟା ଦ୍ୱିପଦି ସାସନ୍‌କିନି ସର୍ଗିୟସ୍‍ ପାଉଲ୍‍ତି ଅରେନ୍‌ ନେଗି ତଡ଼୍‍ ମାର୍ହାନ୍‍ । ସର୍ଗିୟସ୍‌ ଅରେନ୍‌ ବୁଦିମାନି ଲୋକୁ ମାର୍ହାନ୍‍ । ୱାନ୍‌ ମାପୁରୁଦି ବାକ୍ୟ ୱେନ୍‍ଡ୍ରେଙ୍ଗ୍‍ ବଦାକିଜି ବର୍ଣ୍ଣବା ନି ସାଉଲତିଙ୍ଗ୍‍ଁ କୁକିସ୍‍ତାନ୍‍ ।
ACT 13:8 ମାତର୍‌ ଗୁଣିଆ ଏଲିମାସ ଇକା ୱାନି ଗ୍ରିକ୍‌ ଦରୁ ୱାରିଙ୍ଗ୍‌ ବାଦା ସିତାନ୍‌, ଇରିଙ୍ଗ୍‍ଁ ୱାନ୍‌ ସାସନ୍‍କିନିୱାନିଙ୍ଗ୍‍ଁ କ୍ରିସ୍ତଦି ବିସ୍‌ବାସ୍‌ ଉଣ୍ତିଙ୍ଗ୍‍ଁ ୱେର୍‌ଏ କିଜି ଇଡ୍‍ଦେଙ୍ଗ୍‍ଁ ବଦା କିଜିମାର୍ହାନ୍‍ ।
ACT 13:9 ମାତର୍‌ ସାଉଲ ଆମାୱାନି ଆଇ ଦରୁ ପାଉଲ ପବିତ୍ର ଆତ୍ମାଦୁ ପୁରାଆଜି ଗୁଣିଆ ତରିନ୍‌ ସିଦା କାଣ୍‍କାଣୁକୁ ସୁଡ଼ୁଜି ଇର୍ହାନ୍‌,
ACT 13:10 “ଏ ସୟତାନ୍‍ତି ମାରିସି ! ନିନ୍‌ ୱିଜୁ ନେଗି ବିସୟତି ସାତ୍ରୁ ! ନିନ୍‌ ୱିଜୁ ବିସୟତି ସାଲାକିଦୁ ପୁରାଆତିକିନ୍ଦା ମାରି ୱିଜୁଦିନ୍‌ ପ୍ରବୁଦି ସତ୍‍ତିଙ୍ଗ୍‍ ମିଚ୍‍ ଇଜି ଇନ୍‌ଡ୍ରେଙ୍ଗ୍‌ ଇଜି ସେସ୍ଟା କିଜିନି ।
ACT 13:11 ଇଲେଇ ନିନ୍‌ ପ୍ରବୁଦି କିୟୁଦୁ ଦଣ୍ଡ୍‌ ପୟ୍‌ନି । ନିନ୍‌ କାଣା ଆଜି ଏସ ସମୟ ସାନ୍ଦି ୱେଡ଼େରି ଜାୟ୍‌ ସୁଡ଼୍‍ଦେଙ୍ଗ୍‍ ଆଟ୍‍ଇ ।” ଆୟାଦାପ୍ରେ ଏଲିମାସଦି କାଣୁକୁ ନାଣ୍ତ ଦୁରିଦୁ କେର୍‍ବିନି ୱାଜା ଆନିକା ୱାନ୍‌ ଅଡ଼୍‍ବିତାନ୍‍ ମାରି ୱାନି କିୟୁ ଆସ୍‌ସି ସାରି ତର୍‌ସି ଅତେଙ୍ଗ୍‍ଁ ଇଜି ଅରେନ୍‌ୱାନିଙ୍ଗ୍‌ ପୟ୍‌ଦେଙ୍ଗ୍‌ ଆସ୍‌ତାନ୍‌ ।
ACT 13:12 ଇୟା ଗଟ୍‌ନା ସୁଡ଼୍‌ଜି ସାସନକିନିୱାନି ବିସ୍‌ବାସ୍‌ ଆତାତ୍‌, ଇରିଙ୍ଗ୍‌ ୱାନ୍‌ ପ୍ରବୁଦି ସିକିୟା ୱେନ୍‌ଜି କାବାଆତା ମାର୍ହାନ୍‍ ।
ACT 13:13 ପାଉଲ ନି ୱାନି ସାଙ୍ଗର୍‌ ପାଫଦାନ୍‍ ଗାଡାନାସି ପାମ୍ଫିଲିଆଦି ପର୍ଗା ଦର୍‌ତି ଉନ୍‍ଣ୍ତ୍ରି ଗାଡ଼୍‌ତୁ ଇତାର୍‌ । ଜୋହନ ମାର୍କ ୱାରିଙ୍ଗ୍‌ ଇୟାବାନୁ ଡ଼ିସ୍‌ସି ଜିରୁସାଲାମ୍‍ତୁ ଡ଼େସିସର୍ହାନ୍‍ ।
ACT 13:14 ୱାର୍‌ ପର୍ଗାଦାନ୍‍ ସଲ୍‍ସି ପିସିଦିଆଦି ଆଣ୍ଟିୟକଦୁ ଇତାର୍‌ ମାରି ରମ୍‍ନିଦିନ୍‍ ପାର୍‌ତନା ଇଲୁଦୁ ସଲ୍‍ସି ବାସ୍‌ତାର୍‌ ।
ACT 13:15 ମାରି ମସାଦି ନିୟମ୍‌ ମାରି ବାବବାଦିରି ମାଣାନ୍‌ ରାସ୍‌ତିକା ପଡ଼ାତି ୱେନ୍‌କା, ପାର୍‌ତନା ଇଲ୍‍ତି ପେରିକାର୍‌ ୱାରି ଲାକ୍‌ତୁ ଇୟା ମାଟା ଇଜି ପକ୍‌ତାର୍‌, “ତଡ଼ାନ୍‌କୁ, ଜଦି ଲୋକାଙ୍ଗ୍‌ ୱେଡ଼ିକାକିନି ୱାଜା ମି ଇନି ଉପଦେସ୍‍ ସିନିକା ମାନାତ୍‌, ଆର୍‍ତିଙ୍ଗ୍‍ଁ ଇନ୍‍ଡ୍ରୁ ।”
ACT 13:16 ପାଉଲ ନିଲ୍‍ଜି ଲୋକାଙ୍ଗ୍‌ ଆଲେଜ ମାନ୍‌ଡ଼୍ରେଙ୍ଗ୍‌ ଇଜି କିୟୁ ଜୁଟ୍‍ସି ଇର୍ହାନ୍‌ : ଉଣ୍ତାତିମାନି ଇସ୍ରାଏଲ୍‌ତି ତଡ଼ାନ୍‌କୁ ନି ମାପୁରୁଙ୍ଗ୍‍ଁ ପାର୍‌ତାନା କିଜିମାନି ଅଣଜିହୁଦିର୍‍, ନା ମାଟା ୱେନ୍‌ଡ୍ରୁ !
ACT 13:17 ଇସ୍ରାଏଲ୍‌ ଲୋକା ମାପୁରୁ ମା ଡକାରାଦାଦାରିଙ୍ଗ୍‍ଁ ବାସେକିତାନ୍‍ ମାରି ମିସର୍‍ତୁ ୱାର୍‌ ଆଇ ଦେସ୍‌ତିକାର୍‍ ୱାଜା ବାସାଜି ମାର୍‍ହି ସମୟତୁ ଉନ୍‍ଣ୍ତ୍ରି ପେରି କୁଟୁମ୍‌ତୁ ମିସା କିତାର୍‌ । ମାପୁରୁ ୱାନି କାବାଆନି ସାକ୍ତିଦାନ୍ ୱାରିଙ୍ଗ୍‍ଁ ମିସରତାନ୍‍ ସପ୍‍ସି ତାତାନ୍‍,
ACT 13:18 ମାରି ସାଲିସ୍‌ ବାର୍‍ସେକ୍‍ ସାନ୍ଦି ମରୁବୁମିଦୁ ୱାରି ତାଗ୍‌ଇ ତାନିଙ୍ଗ୍‌ ସାସ୍‌ କିତାନ୍‌ ।
ACT 13:19 ମାରି, ୱାନ୍‌ କିଣାନ୍‍ ଦେସ୍‌ତୁ ସାତଗୋଟା କୁଟୁମ୍‌ତିଙ୍ଗ୍‍ ଦଂସ କିଜି ବାସେକିତି ଲୋକାଙ୍ଗ୍‌ ଆୟା ଦେସ୍‌ ସିତାନ୍‌ ।
ACT 13:20 ପୁରା ସାରିସ ପଚାସ୍‌ ବାର୍‍ସେକ୍‍ ଲୋଇ ଇୟାୱିଜୁ ଗଟନା ଗଟାତାମାର୍ହାତ୍‍ । ଇୟା ୱେନ୍‌କା ସାମୁଏଲ୍‍ ବାବବାଦିଦି ସମୟ ସାନ୍ଦି ମାପୁରୁ ୱାରି ମୁସ୍‌କୁ ବିସାର୍‌ କିନିୱାରିଙ୍ଗ୍‍ ଆସ୍‌କିତାନ୍‍ ।
ACT 13:21 ଏସ୍ତିୱାଲେ ୱାର୍‌ ଅରେନ୍‌ ରାଜାଦିଙ୍ଗ୍‌ ବଦା କିତାର୍‍, ମାପୁରୁ ୱାରି ମୁସ୍‌କୁ ସାଲିସ୍‍ ବାର୍‍ସେକ୍‍ ସାନ୍ଦି ସାସନ୍ କିନି ଉଣ୍ତିଙ୍ଗ୍‍ଁ ବିନ୍ୟାମିନ୍ କୁଟୁମ୍‌ତି କିଶତି ମାରିସି ସାଉଲତିଙ୍ଗ୍‍ଁ ଆସ୍‌କିତାନ୍‍ ।
ACT 13:22 ତାନିୱେନ୍‍କା ମାପୁରୁ ୱାନିଙ୍ଗ୍‌ ରାଜାଗାଦିଦାନ୍‍ ସପ୍‍ସି ଦାଉଦତିଙ୍ଗ୍‍ଁ ୱାରି ରାଜା କିତାନ୍‌ । ମାପୁରୁ ୱାନି ବିସୟ୍‌ତାନ୍‌ ସାକିୟ୍‌ ଇର୍ହାମାର୍ହାନ୍‌, ନାନ୍ ଏମେନାନି ଲୋକାଙ୍ଗଁ ଜିବନ୍‌ନନା, ଜେସିଦି ମାରିସି ଦାଉଦ ଆୟାନାନି ଅରେନ୍‌; ୱାନ୍‌ ନା ବଦାଦାନ୍ ୱିଜୁ ପାଣି କିନାନ୍‌ ।
ACT 13:23 ଇୟା ଦାଉଦ କୁଟୁମ୍‌ତି ଜିସୁଙ୍ଗୁଁ ମାପୁରୁ ୱାନି ପାର୍‌ମାଣ୍‌ ଇସାବ୍‍ତାନ୍‍ ଇସ୍ରାଏଲ୍‌ ଜାତିଦି ରକିୟାକର୍ତ୍ତା କିତାମାନାନ୍‍ ।
ACT 13:24 ଜିସୁ ୱାନି ପାଣି ଆରାମ୍‌ କିନି ଆଗ୍‌ଡ଼ିରାନ୍‌ ଜୋହନ ଇସ୍ରାଏଲ୍‌ତି ୱିଜୁ ଲୋକା ଲାକ୍‌ତୁ ପ୍ରଚାର୍‌ କିଜି ଇର୍ହାନ୍‌, ୱାରିଙ୍ଗ୍‍ଁ ପାପ୍‌ତାନ୍‌ ମନ୍ ଡ଼େପ୍‍ସି ଡୁବନ୍‌ ଅନିକା ମାନାତ୍‌ ।
ACT 13:25 ମାରି ଜୋହନ ୱାନି ସେବା ପାଣି ସେସ୍‍ କିନି ଆଗ୍‌ଡ଼ି ଲୋକାଙ୍ଗ୍‌ ୱେନ୍‌ବାତାନ୍‌, ନା ବିସୟ୍‌ତାନ୍‌ ମି ଅଡ଼୍‍ବିନିକା ଇନିକା ? ମିର୍‌ ଆମାୱାନିଙ୍ଗ୍‍ଁ କାପ୍‍କିଜିନିଦେର୍‌, ନାନ୍ ଆକାନ୍‍ ଆଏ । ମାତର୍‌ ୱେନ୍‌ଡ୍ରୁ ! ନା ୱେନ୍‌କା ଏନ୍‌ ୱାଜିନାନ୍‍, ନାନ୍ ୱାନି ପାଦାମ୍‍ତି ଜୁତେଙ୍ଗ୍‌ତି ଗାଟି କୁତ୍‌ତେଙ୍ଗ୍‌ ବା ନାନ୍ ଜଗ୍‌ ସିଲେ ।
ACT 13:26 “ଅବ୍ରାହାମ କୁଟୁମ୍‌ତି ଏ ଇସ୍ରାଏଲ୍‌ ତଡ଼ାନ୍‌କୁ ମାରି ମାପୁରୁଙ୍ଗ୍‍ଁ ପାର୍‌ତାନା କିଜିମାନି ଇବେମାନି ଅଣଜିହୁଦି ଲୋକୁ, ମାଙ୍ଗିଁ ନେ ଇୟା ପରିତ୍ରାଣଦି ମାଟା ସିଆୟ୍‍ ଆତାମାନାତ୍‌ ।
ACT 13:27 ମାତର୍‌ ୱାନ୍‌ ରକିୟାକର୍ତ୍ତା, ଜିରୁସାଲାମ୍‌ତୁ ତେବାଜି ମାନିକାର୍‌ ମାରି ୱାରି ନେତାର୍‌ ଆକା ନେସ୍‌ଏର୍‌ ମାର୍ହାର୍‌ । ୱାର୍‌ ୱିଜୁ ରମ୍‍ନିଦିନ୍‍ତୁ ପଡ଼ାଜି ମାନି ବାବବାଦିରି ମାଟାଦି ଅର୍ତ ବୁଜାଏଜି ମାର୍ହାର୍‌ । ଆରିଙ୍ଗ୍‍ଁବା ଜିସୁଙ୍ଗୁଁ ଦୋସ୍‌ କିଜି ୱାର୍‌ ବାବବାଦିରି ବାକ୍ୟଦିଙ୍ଗ୍‍ଁ ପୁରା କିତାର୍‍ ।
ACT 13:28 ସାନିଦଣ୍ତତି ଇନି ନିନ୍ଦାଦି ମାଟା ପୟ୍‍ଏନ୍‍ଣ୍ତା ବା ୱାନିଙ୍ଗ୍‍ଁ ସାନିଦଣ୍ତ୍‍ ସିଦେଙ୍ଗ୍‌ ଇଜି ୱାର୍‌ ପିଲାତ୍‌ ରାଜେଙ୍ଗ୍‍ଁ ଇର୍ହାର୍‌ ।
ACT 13:29 ୱାନି ବିସୟ୍‌ତାନ୍‌ ଦାର୍ମୁସାସ୍ତ୍ରଦୁ ଏମେ ୱିଜୁ ବିସୟ୍‌ ରାସାତାମାନାତ୍‌, ଆୟାଇସାବ୍‍ତାନ୍‍ ୱିଜୁ ପାଣିକିତି ୱେନ୍‌କା ୱାର୍‌ ୱାନିଙ୍ଗ୍‌ କ୍ରୁସଦାନ୍ ରେପ୍‍ସି ତାସି ଉନ୍‌ଡ୍ରି ଦୁକିଗୁଟାଦୁ ଇଟ୍‌ତାର୍‌ ।
ACT 13:30 ମାତର୍‌ ମାପୁରୁ ୱାନିଙ୍ଗ୍‍ଁ ସାତିମାଣାନ୍‌ ନିକ୍‍ତାନ୍‍,
ACT 13:31 ନାଣ୍ତ ଦିନ୍‌ ସାନ୍ଦି ୱାନି ୱାଲେ ଗାଲିଲିଦାନ୍‌ ଜିରୁସାଲାମ୍‍ତୁ ସନି ୱାନିକା ଆଜିମାନି ଲୋକାଙ୍ଗ୍‌ ୱାନ୍‌ ତରାୟ୍‍ଆତାନ୍‍ । ଇଲେଇ ୱାର୍‌ ଇସ୍ରାଏଲ୍‌ ଲୋକା ଲାକ୍‌ତୁ ୱାନି ସାକି ।
ACT 13:32 ମାରି, ମାପୁରୁ ମା ଡକ୍ରାଦାଦାରିମାନୁ କିତି ପାର୍‌ମାଣ୍‌ ବିସୟ୍‌ତାନ୍‌ ମାପ୍‌ ମିଙ୍ଗିଁ ଇୟା ନେଗିକାବୁର ୱେର୍‍ସିନାପ୍‍,
ACT 13:33 ମାପୁରୁ ଜିସୁଙ୍ଗୁଁ ନିକ୍‍ସି ୱାରି ମାରିସି ଜେ ମାଡ୍‌, ମା ଉଣ୍ତିଙ୍ଗ୍‍ଁ ଆୟା ପାର୍‌ମାଣ୍‌ ପୁରାକିତାମାନାନ୍‍, ଏଣ୍ତେସ୍‌ ଗିତ ସଂହିତାଦି ମାରିଉନ୍‌ଡ୍ରି ପାଟାଦୁ ଇୟା ମାଟାଦିଙ୍ଗ୍‌ ୱେର୍‌ସି ରାସାତାମାନାତ୍‌, “ନିନ୍‌ ନା ମାରିନ୍‌, ନେର୍‌ ନାନ୍ ମି ବୁବା ଆତାମାନା ।”
ACT 13:34 ମାରି ଦୁକିଦୁ ସାବ୍‍ଦେଙ୍ଗ୍‍ଁ ଡ଼ିସ୍‍ଏନ୍‍ଣ୍ତା ୱାନିଙ୍ଗ୍‍ଁ ସାତିମାଣାନ୍‌ ନିକ୍‍ତେଙ୍ଗ୍‍ଁ ଇଜି ମାପୁରୁ ଇୟା ମାଟା ଇର୍ହାମାର୍ହାନ୍‌; ଦାଉଦତିଙ୍ଗ୍‍ଁ ସିତିମାନି ପାର୍‌ମାଣ୍‌ ଇସାବ୍‌ତାନ୍‌ ନାନ୍ ନିଙ୍ଗିଁ ପବିତ୍ର ନି ସତ୍‌ତି ଆସିର୍ବାଦ୍‌ ଦାନ ସିନା ।
ACT 13:35 ସାସ୍ତ୍ରଦୁ ମାରି ଉଣ୍ତ୍ରି ବାଡିଦୁ ରାସାତାମାନାତ୍‌, ନିନ୍‌ ନିଜେଦି ବିସ୍‍ବାସ୍‍ତାନ୍‌ ସେବାକିନିୱାନିଙ୍ଗ୍‌ ଦୁକିଦୁ ସାବ୍‍ଦେଙ୍ଗ୍‍ଁ ଡ଼ିସ୍‌ସୋ ସିଇ ।
ACT 13:36 ଦାଉଦ ୱାନି ସାସନ୍ କିନିୱାଲେ ମାପୁରୁଦି ବଦା ପୁରାକିଜି ସାରାସାରି ସାତାନ୍‍ ମାରି ଡକ୍ରାଦାଦ୍‍ସିୱାଲେ ମୁସାୟ୍‍ଆତାନ୍‍ । ୱାନି ମେନ୍ଧଲ୍‍ ଦୁକିଦୁ ସାବିତାତ୍‍ ।
ACT 13:37 ମାତର୍‌ ମାପୁରୁ ଆମାୱାନିଙ୍ଗ୍‍ଁ ସାତିମାଣାନ୍‌ ନିକ୍‍ତାନ୍‍, ୱାନ୍‌ ସାବ୍‍ଏନ୍‌ ।
ACT 13:38 ମାରି, ଏ ତଡ଼ାନ୍‌କୁ, ମିର୍‌ ଇକା ନେସ୍‌ତୁ ଜେ, କେବଲ ମୋସାଦି ମାଣାନ୍‌ ମି ଲାକ୍‌ତୁ ପାପ୍‌ କେମାଦି ସୁସମାଚାର୍‌ ପ୍ରଚାର୍‌ ଆଜିନାତ୍‌,
ACT 13:39 ମାରି, ମସାଦି ନିୟମ୍‍ତାନ୍‍ ଏମେ ୱିଜୁ ବିସୟ୍‌ତାନ୍‌ ମିର୍‌ ମୁକ୍‍ଡ଼ାଜି ଦାର୍ମୁ ଲୋକୁ ଆଦେଙ୍ଗ୍‌ ଆଟ୍‍ଇତିଦେର୍‍, ବିସ୍‍ବାସ୍‍କିନି ୱିଜେରେ ଲୋକୁ ଜିସୁଦି ମାଣାନ୍‌ ଆୟାୱିଜୁ ବିସୟ୍‌ତାନ୍‌ ମୁକ୍‍ଡ଼ାଜି ଦାର୍ମୁ ଲୋକୁ ଆଦେଙ୍ଗ୍‍ଁ ଆଟ୍‌ନାନ୍‌ ।
ACT 13:40 ଜାଗାର୍‌ତା, ବାବବାଦିର୍ ଆମାକା ଇର୍ହାମାନାର୍‌, ଆକା ଏଣ୍ତେସ୍‌ ମି ଉଣ୍ତିଙ୍ଗ୍‍ଁ ଗଟାଏତ୍‍ ।
ACT 13:41 ଏ ମାନାଇଲୋକ୍‍ ! ମିର୍‌ କଲବଲ୍‌ ଆଜି ସାଦୁ ! ଇରିଙ୍ଗ୍‌ ନାନ୍ ନେର୍‌ ଏମେ ପାଣି କିଜିନା, ଏନ୍‌ ଆକା ବୁଜା କିଜି ସିତିଙ୍ଗ୍‌ ବା ମିର୍‌ ବିସ୍‌ବାସ୍‌ କିଇଦେର୍‍ ।
ACT 13:42 ପାଉଲ ନି ବର୍ଣ୍ଣବା ପାର୍‌ତନା ଇଲୁ ଡ଼ିସ୍‌ସି ସନିୱାଲେ, ମାରିଉନ୍‍ଣ୍ତ୍ରି ରମ୍‍ନିଦିନ୍‍ ଡ଼େସିୱାଜି ଇୟାୱିଜୁ ବିସୟ୍‌ତାନ୍‌ ମାରି ନାଣ୍ତ ବୁଜାକିଦେଙ୍ଗ୍‍ଁ ଇଜି ୱାରିଙ୍ଗ୍‍ଁ ଲୋକୁ କୁକ୍‍ତାର୍‍ ।
ACT 13:43 ଲୋକୁ ମିଟିଙ୍ଗ୍‌ଁ ଡ଼ିସ୍‌ସି ସର୍ହି ୱେନ୍‍କା ନାଣ୍ତ ଜିହୁଦି ନି ଜିହୁଦି ଦର୍ମଦି ଲୋକୁ ଅଣଜିହୁଦିର୍‍ ପାଉଲ ନି ବର୍ଣ୍ଣବାଦି ୱାଲେ ସର୍ହାର୍‍, ସିସୁର୍‍ ୱାରିୱାଲେ ମିସାଜି ମାପୁରୁଦି ଦୟାଦାନ୍‍ ଜିବନ୍‌ କାଟେ କିଦେଙ୍ଗ୍‌ ୱାରିଙ୍ଗ୍ଁ ୱେଡ଼ିକା ସିତାର୍‍ ।
ACT 13:44 ୱେନ୍‌କାରି ରମ୍‌ନି ଦିନ୍‍ତୁ ଗାଡ଼୍‌ତି ୱିଜେରେ ପ୍ରବୁଦି ବାକ୍ୟ ୱେନ୍‍ଡ୍ରେଙ୍ଗ୍‍ଁ ଇଜି ଉଣ୍ତାତାର୍‌ ।
ACT 13:45 ଲୋକୁଗହଲି ସୁଡ଼୍‌ଜି ଜିହୁଦିର୍‌ ରିସାଆତାର୍‍ ମାରି ପାଉଲତି ମାଟାଦୁ ଜିଦ୍‌ କିଜି ୱାନିଙ୍ଗ୍‍ଁ ନିନ୍ଦା କିତାର୍‍ ।
ACT 13:46 ମାତର୍‌ ପାଉଲ ନି ବର୍ଣ୍ଣବା ମାରି ନାଣ୍ତ ଆଟ୍‍ୱାଦାନ୍‍ ଇର୍ହାର୍‌, ମି ଲାକ୍‌ତୁ ପାର୍‌ତୁମ୍‌ ମାପୁରୁଦି ବାକ୍ୟ ପ୍ରଚାର୍‌ ଆନିକାମାର୍ହାତ୍‍ । ମାତର୍‌ ମିର୍‌ ଏସାଙ୍ଗ୍‌ୱିଜ୍‍ଇ ଜିବନ୍‌ ପୟ୍‍ଦେଙ୍ଗ୍‍ଁ ଇଜି ନିଜେଦିଙ୍ଗ୍‍ଁ ଜଗ୍‌ ସିଲିକା ଅଡ଼୍‍ବିଜି ତେନିଙ୍ଗ୍‍ଁ ବିସାର୍‌ କିତିମାନିଙ୍ଗ୍‍ଁ, ମାପ୍‌ ମିଙ୍ଗିଁ ଡ଼ିସ୍‌ସି ଅଣଜିହୁଦିରି ମାନୁ ସନାପ୍‌ ।
ACT 13:47 ଇରିଙ୍ଗ୍‍ଁ ପ୍ରବୁ ମାଙ୍ଗିଁ ଇୟା ମାଟା ସିତାମାନାନ୍‌ : ନାନ୍ ମିଙ୍ଗିଁ ଅଣଜିହୁଦିରି ଉଣ୍ତିଙ୍ଗ୍‍ଁ ଜାୟ୍‌ ୱାଜା କିତାମାନା, ଏଣ୍ତେସ୍‌ ୱିଜୁ ଦୁନିଆ ରକିୟା ପୟ୍‌ନାତ୍‌ ।
ACT 13:48 ଅଣଜିହୁଦିର୍‍ ଇକା ୱେନ୍‌ଜି ୱେଡ଼ିକା ଆତାର୍‌ ମାରି ପ୍ରବୁଦି ମାଟା ଉଣ୍ତିଙ୍ଗ୍‍ଁ ଦନ୍ୟବାଦ୍‌ ସିତାର୍‍ । ଏମେକାର୍‌ ଏସାଙ୍ଗ୍‌ୱିଜ୍‍ଇ ଜିବନ୍‌ ଉଣ୍ତିଙ୍ଗ୍‍ଁ ବାସେଆତାମାର୍ହାର୍‍, ୱାର୍‌ ଆୟା ମାଟାଦୁ ବିସ୍‌ବାସ୍‌ କିତାର୍‍ ।
ACT 13:49 ଆୟା ରାଜିଦି ୱିଜୁ ବାଡିଦୁ ପ୍ରବୁଦି ବାକ୍ୟ ୱେଙ୍ଗିଁତାତ୍‌ ।
ACT 13:50 ମାତର୍‌ ଜିହୁଦିର୍‌ ଗାଡ଼୍‌ତି ପେରି ଲୋକାଙ୍ଗ୍‌ ୱେରିସ୍‍କିଜି ପାଉଲ ନି ବର୍ଣ୍ଣବାଦି ମୁସ୍‌କୁ କାସ୍ଟୁ ସିଦେଙ୍ଗ୍‍ ଆସ୍‌ତାର୍‌ ମାରି ଆୟା ରାଜିଦାନ୍‌ ୱାରିଙ୍ଗ୍‍ଁ ସପ୍‌ତା ପେରିତାର୍‌ ।
ACT 13:51 ପ୍ରେରିତ ସିସୁର୍‍ ଆୟା ଲୋକା ବିରଦ୍‌ତାନ୍‌ ୱାରି ପାଦାମ୍‌ତି ଦୁଡ଼ି ସାଡ଼୍‍ସି ସିଜି ଇକନିୟାଦୁ ସର୍ହାର୍‍ ।
ACT 13:52 ଆଣ୍ଟିୟକଦି ବିସ୍‍ବାସିର୍‍ ପବିତ୍ର ଆତ୍ମା ନି ୱେଡ଼ିକାଦୁ ପୁରା ଆତାର୍‌ ।
ACT 14:1 ଇକନିୟାଦୁ ଆୟା ଗଟନାଦି ବିସୟ୍‌ ମାରିଡ଼େସି ଆତାତ୍‌ : ପାଉଲ ନି ବର୍ଣ୍ଣବା ପାର୍‌ତନା ଇଲୁଦୁ ସଲ୍‍ସି ଇୟାୱାଜା ପ୍ରଚାର୍‌ କିତାନ୍‌ ଜେ ନାଣ୍ତ ଜିହୁଦି ଲୋକୁ ନି ଅଣଜିହୁଦିର୍‍ କ୍ରିସ୍ତଦିମାନୁ ବିସ୍‌ବାସ୍‌ କିତାର୍‍ ।
ACT 14:2 ମାତର୍‌ ଅବିସ୍‍ବାସି ଜିହୁଦିର୍‌ ଅଣଜିହୁଦିରିଙ୍ଗ୍‌ ବେମ୍‌ରି କିଜି ତଡ଼ାନ୍‌କା ବିରଦ୍‌ତାନ୍‌ ମନ୍‌ତିଙ୍ଗ୍‍ ଏଗ୍ରିସ୍‌କିତାର୍‍ ।
ACT 14:3 ଆତିଙ୍ଗ୍‍ବା ପ୍ରେରିତ ସିସୁର୍‍ ପ୍ରବୁଦି ବିସୟ୍‌ତାନ୍‌ ଆଟ୍‍ୱାଦାନ୍‍ ପ୍ରଚାର୍‌ କିଜି ନାଣ୍ତ ଦିନ୍‌ ଆବେ ତେବାତାର୍‌ । ସାକ୍ତିଦି ପାଣି ନି କାବାଆନି ପାଣିୱିଜୁ କିନି ମାଣ୍‌କୁ ୱାର୍‌ ପାର୍‌ମାଣ୍‌ କିତାର୍‍ ଜେ, ମାପୁରୁଦି ଦୟା ବିସୟ୍‌ତାନ୍‌ ୱାରି ପ୍ରଚାର୍‌ ଆତି ମାଟା ସତ୍‍ତାନ୍‍ ସତ୍‌ ।
ACT 14:4 ଗାଡ଼୍‌ତି ଲୋକୁ ରୁଣ୍ତି ଦଲ୍‍ତୁ ବାଗ୍ ଆତାର୍‌ । ୱାରି ଲୋଇ ଏସ ଲୋକୁ ଜିହୁଦିରିଙ୍ଗ୍‍ଁ ନି ମାରି ଏସ ପ୍ରେରିତ ସିସୁରିଙ୍ଗ୍‌ ମାନେଆତାର୍‍ ।
ACT 14:5 ତାନିୱେନ୍‍କା ଏସ ଅଣଜିହୁଦିଲୋକ୍‍ ନି ଜିହୁଦିଲୋକୁ ୱାରି ନେତାର୍‌ରି ୱାଲେ ଏକ୍‍ଜୁଟ୍‍ ଆଜି ପ୍ରେରିତ ସିସୁରି ଉଣ୍ତିଙ୍ଗ୍‍ଁ ତାଗ୍‌ଇ ବ୍ୟବହାର୍‌ କିନି ଉଣ୍ତିଙ୍ଗ୍‍ଁ ନି ୱାରିଙ୍ଗ୍‍ଁ କାଲ୍‍କାଣ୍‍ ଡାକ୍‍ସି ସାପିସ୍‌ କିଦେଙ୍ଗ୍‍ଁ ଇଜି ୱାର୍‌ଗିସାଜି ତିର୍‌ କିତାର୍‍ ।
ACT 14:6 ପ୍ରେରିତ ସିସୁର୍‍ ଇୟା ବିସୟ୍‌ତାନ୍‌ ନେସ୍‍ତେଙ୍ଗ୍‍ଁ ଆଟ୍‍ସି ଲୁକାନିଆଦି ଲୁସ୍ତ୍ରା ନି ଦର୍ବି ଗାଡ଼୍‌ତୁ ମାରି ଆୟା ସାରିବେଡ଼୍‍ତି ମାନି ରାଜିଦୁ ଉର୍‍କ୍‌ତାର୍‍,
ACT 14:7 ମାରି ଆବେ ନେଗିକାବୁର୍‌ ପ୍ରଚାର୍‌ କିତାର୍‍ ।
ACT 14:8 ଲୁସ୍ତ୍ରାଦୁ ଅରେନ୍‌ ଜନମ୍‍ତାନ୍ ସଟାଲୋକ୍‌ ମାର୍ହାନ୍‍ । ୱାଦ୍‌ ଅଡ଼ପ୍‍ବା ବୁଲାଦେଙ୍ଗ୍‍ଁ ଆଟ୍‌ଏଜି ମାର୍ହାନ୍‍ ।
ACT 14:9 ଆବେ ବାସ୍‌ସି ୱାନ୍‌ ପାଉଲ୍‍ତି ସିକିୟା ୱେନ୍‌ଜି ମାର୍ହାନ୍‍ । ୱାନି ମନ୍‌ତୁ ବିସ୍‌ବାସ୍‌ ଆତାତ୍‌ ମାରି ୱାନ୍‌ ନେଗେନ୍‍ ଆନାନ୍‌ ଇଜି ପାଉଲ ନେସ୍‍ତେଙ୍ଗ୍‍ ଆଟ୍‍ତାନ୍‍ ।
ACT 14:10 ଆଦେଙ୍ଗ୍‍ଁ ୱାନି ତରିନ୍‌ ସିଦା ସୁଡ଼୍‌ଜି ପାଉଲ ନାଣ୍ତ ଆଉଲିଦାନ୍‍ ଇର୍ହାନ୍‌, “ପାଦାମ୍‍ତାନ୍‌ ସାହାସ୍‍ଆଜି ସିଦା ନିଲ୍‍ଆ !” ଆକାନ୍‍ ଗାତ୍‍ସି ସାରିବେଡ଼୍‍ତି ବୁଲାଦେଙ୍ଗ୍‍ଁ ଆସ୍‌ତାନ୍‌ ।
ACT 14:11 ଉଣ୍ତାତିମାର୍ହି ଲୋକୁ ପାଉଲତି ଇୟା ପାଣି ସୁଡ଼୍‌ଜି ୱାରି ଲୁକାନିଆ ବାସାଦାନ୍‍ ଆଉଲି ଆଜି ଇନ୍‍ଡ୍ରେଙ୍ଗ୍‍ଁ ଆସ୍‌ତାର୍‌, “ଦିୟାମ୍‍କୁ ଲୋକୁ ବେସ୍‍ତାନ୍‍ ମାବାନୁ ୱାତାମାନାର୍‌ ।”
ACT 14:12 ୱାର୍‌ ବର୍ଣ୍ଣବାଦିଙ୍ଗ୍‍ଁ ଜିଅସ୍‍ ମାରି ପାଉଲ ପେରିକାନ୍‌ ମାନିଙ୍ଗ୍‌ ୱାନିଙ୍ଗ୍‍ ହେରମିସ୍‍ ଇର୍ହାର୍‌ ।
ACT 14:13 ଗାଡ଼୍‌ତି ଆତ୍‌ରେ ମାନି ଜିଅସ୍‍ ମନ୍ଦିର୍‌ତି ପୁଜାରି, ସେର୍‍ଲା ଲାକ୍‌ତୁ ଏସ ସଣ୍ତଙ୍ଗ୍‌ଁ ନି ପୁଙ୍ଗୁଁ ତାତାନ୍‍, ଇରିଙ୍ଗ୍‌ ୱାନ୍‌ ମାରି ଆବେ ଉଣ୍ତାତିମାର୍ହି ଲୋକୁ ପ୍ରେରିତ ସିସୁରି ଉଦେସ୍‍ତାନ୍‍ ପୁଜା ସିଦେଙ୍ଗ୍‌ ଇଜି ବଦାକିତା ମାର୍ହାର୍‍ ।
ACT 14:14 ୱାର୍‍ ଏମେ ପାଣି କିଦେଙ୍ଗ୍‍ଁ ସଲ୍‍ସିମାର୍ହାର୍‍, ସିସୁର୍‍ ଅର୍ତାତ୍‍ ବର୍ଣ୍ଣବା ନି ପାଉଲ ଆକା ୱେର୍‍ଇଦାପ୍ରେ ନିଜେଦି ଆଙ୍ଗିଁଙ୍ଗ୍‌ କିସ୍‍ତା ପକ୍‌ତାର୍‌, ଲୋକା ଲୋଇ ଉର୍‍କିସି ସଲ୍‍ସି ଆଉଲି ଆଜି ଇର୍ହାର୍‌,
ACT 14:15 “ମିର୍‌ ଏନ୍ଦା ଇକା କିଜିନିଦେର୍‌ ? ମାପ୍‌ ମି ୱାଜା ଲୋକୁ ମାତର୍‌ । ମି ଲାକ୍‌ତୁ ନେଗି କାବୁର୍‌ ପ୍ରଚାର୍‌ କିଦେଙ୍ଗ୍‍ଁ ଇଜି ମାରି ଇୟା ଅସାର୍ ବିସୟ୍‌ତାନ୍‌ ସୁପ୍‍ ଆଜି, ବାଦଡ଼୍‍, ଦୁନିଆ, ସାମ୍‌ଦୁର୍‌ ନି ଆବେମାନି ୱିଜୁ ବିସୟତି ତିଆର୍‍କିତି ଜିବନ୍‍ମାନି ମାପୁରୁଦି ତରିନ୍‌ ମିଙ୍ଗିଁ ଅତେଙ୍ଗ୍‍ଁ ଇଜି ମାପ୍‌ ଇବେ ୱାତାମାନାପ୍‌ ।
ACT 14:16 ଆଗ୍‌ଡ଼ି ନିଜେଦିବଦାଦାନ୍‍ ନିଜେଦି ସାରିଦୁ ସନ୍‍ଡ୍ରେଙ୍ଗ୍‍ଁ ଇଜି ମାପୁରୁ ଲୋକାଙ୍ଗ୍‌ ଡ଼ିସ୍‍ତା ସିତାମାର୍ହାନ୍‍ ।
ACT 14:17 ମାତର୍‌ ୱାନି ୱିଜୁ ନେଗି ପାଣିଦାନ୍‌ ୱାନ୍‌ ୱିଜୁଦିନ୍‌ ୱାନି ୱିଜୁଦିନ୍‍ମାନି କାବୁର୍‌ ସିତାମାନାନ୍‌; ୱାନ୍‌ ବାଦଡ଼୍‍ତାନ୍‍ ପିର୍‍ରୁ ମାରି ଟିକ୍‌ ୱେଡ଼ାଦୁ ପାସି ସିନାନ୍‍, କାଦି ଜଗେକିନାନ୍‍ ମାରି ୱେଡ଼ିକାଦାନ୍‌ ମି ଜିବନ୍‌ ପୁରା କିନାନ୍‌ ।”
ACT 14:18 ଇୟାୱିଜୁ ମାଟା ଇନ୍‌ଜି ପ୍ରେରିତ ସିସୁର୍‍ ଏଣ୍ତେସ୍‍କିଜିବା ପୁଜା ସିନିମାଣାଟ୍‍ ୱାରିଙ୍ଗ୍‍ଁ ତେବାକିତାର୍‍ ।
ACT 14:19 ପିସିଦିଆଦି ଆଣ୍ଟିୟକ ନି ଇକନିୟାଦାନ୍‍ ଏସ ଜିହୁଦି ଲୋକୁ ୱାତାମାର୍ହାର୍‍, ୱାର୍‌ ଲୋକାଙ୍ଗ୍‌ ଏଗ୍ରିସ୍‌କିଜି ପାଉଲତିଙ୍ଗ୍‍ଁ କାଲ୍‌କାଣୁକୁ ଡାକ୍‍ତାର୍‍ ମାରି ୱାନିଙ୍ଗ୍‍ଁ ସାତାନ୍‍ ଇଜି ଅଡ଼୍‍ବିଜି ଗାଡ଼୍‌ତି ଆତ୍‌ରେ ରେଲ୍‌ଜି ଅତାର୍‌ ।
ACT 14:20 ମାତର୍‌ ସିସୁର୍‍ ୱାଜି ୱାନି ସାରିବେଡ଼୍‍ତି ଉଣ୍ତାଜି ନିର୍ହି ୱେନ୍‌କା ୱାନ୍‌ ନିଙ୍ଗିଁଜି ଗାଡ଼୍‌ତୁ ଡ଼େସିସର୍ହାନ୍‍ । ମାରିନାଣ୍ତିଙ୍ଗ୍‍ଁ ୱାନ୍‌ ନି ବର୍ଣ୍ଣବା ଦର୍ବିଦୁ ସର୍ହାର୍‍ ।
ACT 14:21 ପାଉଲ ନି ବର୍ଣ୍ଣବା ଦର୍ବିଦୁ ସୁସମାଚାର୍‌ ପ୍ରଚାର୍‌ କିଜି ନାଣ୍ତ ସିସୁରିଙ୍ଗ୍‌ ଲାବ୍‍ କିତାର୍‍ । ତାନିୱେନ୍‍କା ୱାର୍‌ ଲୁସ୍ତ୍ରା, ଇକନିୟା ନି ପିସିଦିଆଦି ଆଣ୍ଟିୟକଦୁ ଡ଼େସିସର୍ହାର୍‍ ।
ACT 14:22 ୱାର୍‌ ବିସ୍‍ବାସିରିଙ୍ଗ୍‍ଁ ନିଜେଦି ବିସ୍‌ବାସ୍‌ତୁ ଡାଟ୍‌ତାନ୍‌ ମାନ୍‍ଡ୍ରେଙ୍ଗ୍‍ଁ ଇଜି ମନ୍‌ତିଙ୍ଗ୍‍ ୱେଡ଼ିକା କିବିସ୍‍କିତାର୍‍ । ୱାର୍‌ ସିକିୟା ସିଜି ଇର୍ହାର୍‌, “ମାପୁରୁଦି ରାଜିଦୁ ଡ଼ୁଗ୍‍ଦେଙ୍ଗ୍‍ଁ ଇଜି ମାଙ୍ଗିଁ ନାଣ୍ତ କାସ୍ଟୁଦୁକୁ ବା ସିଜି ସନ୍‍ଡ୍ରେଙ୍ଗ୍‍ଁ ଆନାତ୍‌ ।”
ACT 14:23 ୱିଜୁ ମଣ୍ତଲିଦୁ ୱାର୍‌ କିକୁ ଇଡ୍‌ଜି ମଣ୍ତଲିଦି ପେରି ନେତାର୍‍ରିଙ୍ଗ୍‌ ବାସେ କିତାର୍‍ ମାରି ଏମେ ପ୍ରବୁଦିମାନୁ ୱାର୍‌ ବିସ୍‌ବାସ୍‌ କିତାମାର୍ହାର୍‍, ପାର୍‌ତନା ନି ଉପବାସତି ୱାଲେ ୱାରିଙ୍ଗ୍‍ଁ ଆୟା ପ୍ରବୁଦି ଲାକ୍‌ତୁ ସର୍ପେ କିତାର୍‍ ।
ACT 14:24 ପିସିଦିଆ ରାଜି ସିଜି ୱାର୍‌ ପାମ୍ଫିଲିଆଦୁ ୱାତାର୍‌ ।
ACT 14:25 ଆବେ ପର୍ଗାଦୁ ପ୍ରଚାର୍‌ କିଜି ଆତ୍ତାଲିଆଦୁ ସର୍ହାର୍‍ ।
ACT 14:26 ଆବେଟ୍‌କୁ ୱାର୍‌ ଜାହାଜ୍‌ତାନ୍‌ ଆଣ୍ଟିୟକଦୁ ଡ଼େସି ୱାତାର୍‌ । ଇୟା ଆଣ୍ଟିୟକଦୁ ଇଲେଇ ଆତି ମାନି ପାଣି ଉଣ୍ତିଙ୍ଗ୍‍ଁ ମାପୁରୁଦି ଦୟା ଦାନ୍‌ ୱାର୍‌ ସର୍ପେ ଆତାମାର୍ହାର୍‍ ।
ACT 14:27 ୱାର୍‌ ଆଣ୍ଟିୟକଦୁ ଇଜି ମଣ୍ତଲିଦି ଲୋକାଙ୍ଗ୍‌ ଉଣ୍ତାକିତାର୍‍ । ମାପୁରୁ ୱାରି ଉଣ୍ତିଙ୍ଗ୍‍ଁ ଆମା ୱିଜୁ କିତାମାର୍ହାନ୍‌ ମାରି ଅଣଜିହୁଦିରି ବିସ୍‌ବାସ୍‌ ଉଣ୍ତିଙ୍ଗ୍‍ଁ ଏଣ୍ତେସ୍‌ ସାରି ରେତା ସିତାମାର୍ହାନ୍‍, ଆୟାୱିଜୁ ୱାରିଙ୍ଗ୍‍ଁ ୱେର୍‌ତାର୍‌ ।
ACT 14:28 ଆବେ ବିସ୍‍ବାସିରି ୱାଲେ ୱାନ୍‌ ନାଣ୍ତ ଦିନ୍‌ ସାନ୍ଧି ତେବାତାନ୍‌ ।
ACT 15:1 ଜିହୁଦାଦାନ୍‍ ଏସ ଲୋକୁ ଆଣ୍ଟିୟକଦୁ ୱାଜି, ମୋସାଦି ନିୟମ ଇସାବ୍‌ତାନ୍‌ ୱାର୍‌ ସୁନ୍ନତ ଆଏତିଙ୍ଗ୍‍ଁ ରକିୟା ପୟ୍‍ଦେଙ୍ଗ୍‍ଁ ଆଟ୍‍ଏର୍‍ ଇଜି ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ସିକିୟା ସିତାର୍‍ ।
ACT 15:2 ଇୟା ବିସୟ୍‌ତାନ୍‌ ୱାରି ୱାଲେ ପାଉଲ ନି ବର୍ଣ୍ଣବା ନାଣ୍ତ ଆସ୍‌ସିସାତାର୍‌ ଆକା, ଇକା ତିର୍‌ ଆତାତ୍‍ଜେ, ପାଉଲ, ବର୍ଣ୍ଣବା ମାରି ଆଣ୍ଟିୟକଦି ମାରି ଏସ ଲୋକୁ ଜିରୁସାଲାମ୍‍ତୁ ସଲ୍‍ସି ପ୍ରେରିତ ସିସୁର୍‍ ନି ମଣ୍ତଲିଦି ନେତାର୍‍ରି ୱାଲେ ଇୟା ବିସୟ୍‌ତାନ୍‌ ୱାର୍‌ଗିଜିସାନାର୍‍ ।
ACT 15:3 ମଣ୍ତଲି ୱାରି ସନି ସୁବିଦା କିଜି ପକ୍‍ତାତ୍‍ ମାରି ୱାର୍‌ ପିନିସିଆ ନି ସମିରୋଣ ସିଜି ସନି ୱାଲେ ଅଣଜିହୁଦି ଲୋକୁ ଏଣ୍ତେସ୍‌ ମନ୍‍ ଡ଼େପ୍‍ସି ଦାର୍ମୁଲୋକୁ ଆତାମାନାର୍‌, ଆୟା ବିସୟ୍‌ ୱେର୍‌ତାର୍‍; ଇୟା କାବୁର୍‌ ୱେନ୍‌ଜି ବିସ୍‍ବାସ୍‌ତି ତଡ଼ାନ୍‌କୁ ନାଣ୍ତ ୱେଡ଼ିକା ଆତାର୍‌ ।
ACT 15:4 ୱାର୍‌ ଜିରୁସାଲାମ୍‍ତୁ ଇତି ୱେନ୍‌କା ମଣ୍ତଲି, ପ୍ରେରିତ ସିସୁର୍‍ ମାରି ମଣ୍ତଲିଦି ନେତାର୍‍ ୱାରିଙ୍ଗ୍‍ଁ କୁକ୍‍ତାର୍‍ । ମାପୁରୁ ୱାରି ମାଣାନ୍‌ କିତିମାନି ପାଣି ବିସୟ୍‌ତାନ୍‌ ପାଉଲ ନି ବର୍ଣ୍ଣବା ୱାରିଙ୍ଗ୍‍ଁ ୱେର୍‌ତାର୍‍ ।
ACT 15:5 ମାତର୍‌ ପାରୁସିର୍‌ ଇସାବ୍‌ତାନ୍‌ ଜିନି ଏସ ବିସ୍‍ବାସିର୍‍ ନିଲ୍‍ସି ଇର୍ହାର୍‌, “ଅଣଜିହୁଦି ଲୋକୁ ସୁନ୍ନତ ଆନିକା ମାନାତ୍‌ ମାରି ମୋସାଦି ନିୟମ୍‌ ମାନାଦେଙ୍ଗ୍‌ ଇଜି ୱାରିଙ୍ଗ୍‍ଁ ଇନିକା ନେଗେତ୍‌ ।”
ACT 15:6 ଇୟା ବିସୟ୍‌ ୱାର୍‍ଗିଦେଙ୍ଗ୍‍ଁ ଇଜି ପ୍ରେରିତ ସିସୁର୍‍ ମାରି ମଣ୍ତଲିଦି ନେତାର୍‍ ଉଣ୍ତାତାର୍‌ ।
ACT 15:7 ନାଣ୍ତ ସମୟ ୱାର୍‍ଗିତି ୱେନ୍‌କା ପିତର ନିଲ୍‍ଜି ଇର୍ହାନ୍‌, “ତଡ଼ାନ୍‌କୁ ନି ତାଙ୍ଗିଁକ୍‌, ମିର୍‌ ନେସ୍‍ନିଦେର୍‍ ଜେ ନାଣ୍ତ ଆଗ୍‌ଡ଼ିରାନ୍‌ ମାପୁରୁ ଅଣଜିହୁଦି ଲୋକୁ ଲାକ୍‌ତୁ ସୁସମାଚାର୍‌ ପ୍ରଚାର୍‌ କିଜି ଆୟାଉଣ୍ତିଙ୍ଗ୍‌ ୱାରି ବିସ୍‌ବାସ୍‌ କିବିସ୍‍ କିଦେଙ୍ଗ୍‍ଁ ଇଜି ମି ମାଣ୍‌କୁ ନାଙ୍ଗିଁ ବାସେ କିତାମାର୍ହାର୍‍ ।
ACT 15:8 ମାରି ୱିଜେରି ମନ୍‍ତି ଚିନ୍ତା ନେସ୍‍ସିମାନି ମନ୍‍ତୁବାସାନି ମାପୁରୁ ମାଙ୍ଗିଁ ଏଣ୍ତେସ୍‌ ପବିତ୍ର ଆତ୍ମା ସିତା ମାନାନ୍‌, ଅଣଜିହୁଦି ଲୋକାଙ୍ଗ୍‌ ବା ଟିକ୍‌ ଆୟାୱାଜା ଦାନ୍‌ ସିଜି ୱାରିଙ୍ଗ୍‍ଁ ସାକି ମାନାନ୍‌ ।
ACT 15:9 ୱାରିଦି ନି ମା ଲୋଇ ୱାନ୍‌ ଇନିକା ଅଲଗା ଇଡ୍‌ଏନ୍‌ । ୱାରି ବିସ୍‌ବାସ୍‌ ଉଣ୍ତିଙ୍ଗ୍‍ଁ ୱାନ୍‌ ୱାରି ପାପ୍‌ କେମା କିତାମାନାନ୍‍ ।
ACT 15:10 ଆର୍‍ତିଙ୍ଗ୍‍ଁ ଏମେ ବଜୁ ପିଣ୍ତ୍‍ଦେଙ୍ଗ୍‍ଁ ଇଜି ମା ଡକ୍ରାଦାଦା ନି ମାପ୍‌ ସାସ୍‌ କିଦେଙ୍ଗ୍‍ଁ ଆଟ୍‍ଏତାପ୍‍, ମିର୍‌ ଇଲେଇ ବିସ୍‍ବାସିରି ମେପିଦୁ ଆକା ଲାଦେ କିଜି ଏନ୍ଦା ମାପୁରୁଙ୍ଗ୍‍ଁ ପରିକା କିଦେଙ୍ଗ୍‌ ବଦାକିଜିନିଦେର୍‌ ?
ACT 15:11 ସିଲେ, ଇକା ଟିକ୍‌ ସିଲେ । ୱାର୍‌ ଏମେ ବିସ୍‌ବାସ୍‌ କିଜି ରକିୟା ପୟ୍‍ତାମାନାର୍‍, ମାପ୍‌ ବା ଟିକ୍ ଆୟାୱାଜା ବିସ୍‌ବାସ୍‌ କିଜି ପ୍ରବୁ ଜିସୁଦି ଦୟା ଦାନ୍‌ ପରିତ୍ରାଣ ପୟ୍‍ତାମାନାପ୍‍ ।”
ACT 15:12 ପାଉଲ ନି ବର୍ଣ୍ଣବାଦି ମାଣାନ୍‌ ଅଣଜିହୁଦି ଲୋକା ଲୋଇ ମାପୁରୁ ଏମେ ୱିଜୁ ନାଣ୍ତ କାବାଆନି ପାଣି ନି କାବାଆନି ବିସୟ୍‌ କିତାମାର୍ହାନ୍, ୱାରିମାଣ୍‌କୁ ତାନେ ମାଟା ୱେନ୍‌ଜି ଦଲତି ୱିଜେରେ ଆଲେତା ତେବାତାର୍‌ ।
ACT 15:13 ୱାର୍‌ ଇର୍ହି ୱିସ୍‌ତି ୱେନ୍‌କା ଜାକୁବ ଇର୍ହାନ୍‌, “ଏ ତଡ଼ାନ୍‌କୁ ନି ତାଙ୍ଗିଁକି, ନା ମାଟା ୱେନ୍‌ଡ୍ରୁ !
ACT 15:14 ମାପୁରୁ ଏଣ୍ତେସ୍‌ ଦୟା କିଜି ଅଣଜିହୁଦି ଲୋକା ଲୋଇ ଏସ ଲୋକାଙ୍ଗ୍‌ ୱାରି ଉଣ୍ତିଙ୍ଗ୍‍ଁ ବାସେ କିତାମାନାନ୍‍, ସିମୋନ ଆୟା ମାଟା ବୁଜାକିଜି ୱେର୍‌ତାନ୍‌ ।
ACT 15:15 ବାବବାଦିରି ବାକ୍ୟ ତେନିଙ୍ଗ୍‍ଁ ପୁରାଦାନ୍‌ ମାନାଜିନାତ୍‍ । ସାସ୍ତ୍ରଦୁ ରାସାତାମାନାତ୍‌;
ACT 15:16 “ପ୍ରବୁ ଇନାନ୍‌, ତେନି ୱେନ୍‌କା ନାନ୍ ଡ଼େସି ୱାନା ମାରି ଦାଉଦତି ରାଜିଦି ମାରିଡ଼େସି ରକିୟା କିନା । ନାନ୍ ୱାନି ଦଂସଆତି ଗୁଡ଼ା ୱିଜୁ ମାରିଡ଼େସି ତିଆର୍‍ କିଜି ତାନିଙ୍ଗ୍‌ ମାରି ଉଣ୍ତ୍ରି ଦେବା ସାକ୍ତି କିନା ।
ACT 15:17 ୱିଜୁ ଲୋକୁ ନା ଲାକ୍‌ତୁ ୱାନାର୍‌, ଏମେ ଅଣଜିହୁଦି ଲୋକାଙ୍ଗ୍‍ଁ ନାନ୍ ନିଜେଦିକା କିଦେଙ୍ଗ୍‍ଁ ଇଜି କୁକ୍‍ତାମାନା, ୱାର୍‌ ୱିଜେରେ ନାନ୍ଦି ଇଜି ମାନାନାର୍‌ ।
ACT 15:18 ପ୍ରବୁ ଇୟା ମାଟା ଇର୍ହାମାନାନ୍‌, ପୁର୍ବେକାଡ଼ାଦୁ ଇୟା ମାଟା ୱାନ୍‌ ୱେର୍‍ତା ମାର୍ହାନ୍‍ ।”
ACT 15:19 “ନା ବିଚାର୍‌ ଇକା,” ଜାକୁବ ମାରି ବା ଇର୍ହାନ୍‌, ଏମେ ଅଣଜିହୁଦି ଲୋକୁ ମାପୁରୁଦି ଲାକ୍‌ତୁ ୱାତାମାନାର୍‌, ମାଡ୍‌ ୱାରିଙ୍ଗ୍‍ଁ ମାରି ବାଦା କିଏଟ୍‍ ।
ACT 15:20 ମାତର୍‌ ୱାର୍‌ ଏଣ୍ତେସ୍‌ ଦିୟାମ୍‍କାଙ୍ଗ୍‍ଁ ପୁଜାସିତିମାନି ଇନି ଅସୁଚି କାଦି ଉଣୁଏର୍‌, ଦାରିପାଣି କିନି ପାପ୍‌ତାନ୍‌ ତେବାନାର୍‌, କକ୍‍ଲା ସିପ୍‍ସି ଡାକ୍‍ତିମାନି ଜାତୁଦି ନେତେର୍‌ ନି କାଣ୍ତା ତିନ୍‍ଏର୍‍ ଇୟାୱିଜୁ ବିସୟ୍‌ତାନ୍‌ ସିକିୟା ସିଜି ୱାରି ଲାକ୍‌ତୁ ଉଣ୍ତ୍ରି ଆକୁ ରାସ୍‍ନାଟ୍‍ ।
ACT 15:21 ଇରିଙ୍ଗ୍‍ଁ ନାଣ୍ତଦିନ୍‍ ଆସ୍‌ସି ୱିଜୁ ରମ୍‍ନିଦିନ୍‍ତୁ ପାର୍‍ତନାକିନି ଇଲ୍‌କାଙ୍ଗ୍‌ ମୋସାଦି ନିୟମ୍‌ ପଡ଼ା ଆଜିନାତ୍‌ ମାରି ୱିଜୁ ଗାଡ଼୍‍କାଙ୍ଗ୍‍ଁ ୱାନି ବାକ୍ୟ ପ୍ରଚାର୍‌ ଆଜିନାତ୍‌ ।
ACT 15:22 ୱେନ୍‌କା ପ୍ରେରିତ ସିସୁର୍‍ ନି ମଣ୍ତଲିଦି ନେତାର୍‍ ମାରି ମଣ୍ତଲିଦି ୱିଜେରେ, ଦଲତି ଏସ ଲୋକାଙ୍ଗ୍‌ ବାସେକିଜି ପାଉଲ ନି ବର୍ଣ୍ଣବାଦି ୱାଲେ ୱାରିଙ୍ଗ୍‍ଁ ଆଣ୍ଟିୟକଦୁ ପକ୍‍ତେଙ୍ଗ୍‍ଁ ଇଜି ତିର୍‌ କିତାର୍‍ । ବର୍ସବା ଦର୍‌ତି ଜିହୁଦା ନି ସିଲା ବିସ୍‍ବାସ୍‌ତି ତଡ଼ାନ୍‌କା ଲୋଇ ସନ୍‍ମାନ୍‍ ପୟ୍‍ତାର୍‌ ।
ACT 15:23 ବିସ୍‍ବାସିର୍‍ ରାସାତିମାନି ଆକୁଦିଙ୍ଗ୍‌ ଇୟା ରିଏରି କିୟୁଦୁ ପକ୍‌ତାର୍‌ । “ଆଣ୍ଟିୟକ, ସିରିଆ ମାରି କିଲିକିୟାଦି ଅଣଜିହୁଦିରି ମାଣ୍‌କୁ ୱାତିମାନି ତଡ଼ାନ୍‌କୁ ପ୍ରେରିତ ସିସୁର୍‍ ମାରି ମଣ୍ତଲିଦି ନେତାର୍‍ ମାଡ଼ିସ୍‌ କିଜିନାର୍‍ ।
ACT 15:24 ମାପ୍‌ ୱେନ୍‍ଜିନାପ୍‍ ଜେ, ମା ଦଲ୍‍ତାନ୍‍ ଏସ ଲୋକୁ ମି ଲାକ୍‌ତୁ ସଲ୍‍ସି ଆମାକା ଇର୍ହାମାନାର୍‌, ଆବେଣ୍‍କୁ ୱାର୍‌ ମି ମନ୍‍ତିଙ୍ଗ୍‍ ଗାବ୍ରା ନି ତରବର୍‍ କିତାମାନାର୍‍ । ମାତର୍‌ ଇୟା ବିସୟ୍‌ତାନ୍‌ ମାପ୍‌ ୱାରିଙ୍ଗ୍‍ଁ ଇନି ସିକିୟା ସିଏପ୍‍ ।
ACT 15:25 ଆଦେଙ୍ଗ୍‌ ମାପ୍‌ ୱିଜେପେ ଉନ୍‍ଣ୍ତ୍ରି ମାଟା ଆଜି ଏସ ଲୋକ କାବୁର୍‌ ସିନିୱାରିଙ୍ଗ୍‍ଁ ବାସେ କିଜି ମି ଲାକ୍‌ତୁ ପକ୍‍ତେଙ୍ଗ୍‍ଁ ଇଜି ଆସ୍‍କିତାମାନାପ୍‍ । ୱାର୍‌ ମା ଲାଡ୍‍ତି ତଡ଼ାନ୍‌ ବର୍ଣ୍ଣବା ନି ପାଉଲତି ୱାଲେ ସନାର୍‌ ।
ACT 15:26 ଇୟା ତଡ଼୍‍କୁ ପ୍ରବୁ ଜିସୁ କ୍ରିସ୍ତଦି ସେବାଦୁ ନିଜେଦି ଜିବନ୍‍ତିଙ୍ଗ୍‍ଁ ସିତା ମାନାର୍‌ ।
ACT 15:27 ମାପ୍‌ ଜିହୁଦା ନି ସିଲେଙ୍ଗ୍‍ଁ ମି ଲାକ୍‌ତୁ ପକ୍‍ସିନାପ୍‍ । ମାପ୍‌ ଆମାକା ରାସ୍‍ସିନାପ୍‍, ୱାର୍‌ ନିଜେ ଆକା ମିଙ୍ଗିଁ ଇନାର୍‌ ।
ACT 15:28 ଏସ ଦରକାର୍‍ ମାନି ନିୟମ୍‌ ଡ଼ିସ୍‍ତିଙ୍ଗ୍‍ଁ ମି ମୁସ୍‌କୁ ମାରି ଇନି ବଜୁ ତିଗ୍‌ଇ ଉଣ୍ତିଙ୍ଗ୍‍ ମାପ୍‌ ପବିତ୍ର ଆତ୍ମାଦି ମାଣାନ୍‌ ସିକିୟା ପୟ୍‍ତାମାନାପ୍‍ ।
ACT 15:29 ଆୟା ଏସ ନିୟମ ଆତାତ୍‌; ଦିୟାମ୍‍କା ଉଦେସ୍‍ତାନ୍‍ ପୁଜାସିତିମାନି ଇନି କାଦି ଉଣ୍‍ମାଟ୍‍, ନେତେର୍‌ ତିନ୍‍ମାଟ୍‍, କକ୍‍ଲାଦିଙ୍ଗ୍‌ ପିଡ଼୍‍ସି ଡାକ୍‍ତିମାନି ଇନି ଜାତୁଦି କାଣ୍ତା ତିନ୍‍ମାଟ୍‍ ମାରି ଦାରିପାଣିଦାନ୍‌ ବନ୍ଦ୍‍ ଆନାତ୍‌ । ଇୟାୱିଜୁ ପାଣି କିଇ ଉଣ୍ତିଙ୍ଗ୍‍ଁ ଜାଗାର୍‌ତା ମାରିଙ୍ଗ୍‍ଁ, ମି ନେଗିକା ଆନାତ୍‌ । ମା ମାଟା ଆସ୍‌ତୁ ।”
ACT 15:30 ଆମା କାବୁର୍‌ ସିନିୱାରିଙ୍ଗ୍‍ଁ ପକ୍‍ତାମାର୍ହାର୍‍, ୱାର୍‌ ଆଣ୍ଟିୟକଦୁ ସଲ୍‍ସି ବିସ୍‍ବାସିରି ୱିଜୁ ଦଲ୍‍ତିଙ୍ଗ୍‍ଁ ଉଣ୍ତା କିଜି ଇୟା ସିଟି ସିତାର୍‍ ।
ACT 15:31 ଆବେଣି ବିସ୍‌ବାସିର୍‍ ସିଟିଦି ୱେଡ଼ିକାଦି କାବୁର୍‌ ପଡ଼ାଜି ୱେଡ଼ିକାଦୁ ପୁରା ଆତାର୍‌ ।
ACT 15:32 ଜିହୁଦା ନି ସିଲା ନିଜେ ବାବବାଦି ମାର୍ହାର୍‌ ମାରି ୱାର୍‌ ଆଣ୍ଟିୟକଦି ବିସ୍‍ବାସିରିଙ୍ଗ୍‍ଁ ନାଣ୍ତ ବେଡ଼ା ସାନ୍ଦି ୱାର୍‍ଜି ତଡ଼ାନ୍‌କାରି ବିସ୍‍ବାସ୍‍ତିଙ୍ଗ୍‍ଁ ଡାଟ୍‍ କିତାର୍‍ ।
ACT 15:33 ଆବେ ଏସ ଦିନ୍‌ ତେବାତି ୱେନ୍‌କା ଏମେକାର୍‌ ୱାରିଙ୍ଗ୍‍ଁ ପକ୍‍ତାମାର୍ହାର୍‍, ୱାରି ଲାକ୍‌ତୁ ଡ଼େସିସନ୍‍ଡ୍ରେଙ୍ଗ୍‍ ଇଜି ବିସ୍‍ବାସ୍‌ତି ତଡ଼ାନ୍‌କୁ ୱାରିଙ୍ଗ୍‍ଁ ସାନ୍ତିଦାନ୍‍ ପକ୍‌ତାର୍‌ ।
ACT 15:34 ମାତର୍‌ ସିଲା ଆବେନୁ ମାନିକା ନେଗେନ୍‌ ଇଜି ଅଡ଼୍‌ବିତାତ୍‌ ।
ACT 15:35 ପାଉଲ ନି ବର୍ଣ୍ଣବା ଆଣ୍ଟିୟକଦୁ ଏସ ଦିନ୍‌ ତେବାଜି ନାଣ୍ତ ଲୋକା ୱାଲେ ମିସାବିଡ଼ା ଆଜି ପ୍ରବୁଦି ବାକ୍ୟ ପ୍ରଚାର୍‌ କିତାର୍‍ ମାରି ସିକିୟା ସିତାର୍‍ ।
ACT 15:36 ଏସ ଦିନ୍‌ ୱେନ୍‌କା ପାଉଲ ବର୍ଣ୍ଣବାଦିଙ୍ଗ୍‍ଁ ଇର୍ହାନ୍‌, “ସନାଟ୍‌, ମାଡ୍‌ ଡ଼େସିସନାଟ୍‌, ୱିଜୁ ଗାଡ଼୍‍କାଙ୍ଗ୍‍ଁ ଏମେ ତଡ଼ାନ୍‍କାଙ୍ଗ୍‍ ପ୍ରବୁଦି ବାକ୍ୟ ଏଣ୍ତେସ୍‌ ୱେନିସ୍‍ କିତିମାର୍ହିକା, ତଡ଼ାନ୍‌କାଙ୍ଗ୍‌ ମିସାନାଟ୍‍ ମାରି ୱାର୍‌ ଏଣ୍ତେସ୍‌ ମାନାର୍‌, ବୁଜାନାଟ୍‍ ।
ACT 15:37 ବର୍ଣ୍ଣବା ୱାରି ୱାଲେ ଜୋହନ ଦର୍‌ତି ମାର୍କଙ୍ଗ୍‍ଁ ଅତେଙ୍ଗ୍‍ଁ ଇଜି ବଦାକିତା ମାର୍ହାନ୍‌,
ACT 15:38 ମାତର୍‌ ପାଉଲ ୱାନିଙ୍ଗ୍‍ଁ ଅତେଙ୍ଗ୍‌ ଟିକ୍‌ ଅଡ଼୍‌ବିଏତାନ୍‍; ଇରିଙ୍ଗ୍‍ଁ ୱାନ୍‌ ଆଗ୍‌ଡ଼ି ପ୍ରଚାର୍‌ କିଦେଙ୍ଗ୍‌ ସନି ପାଣିଦୁ ୱିଜ୍‍ନି ସାନ୍ଦି ୱାରି ୱାଲେ ତେବାଏନ୍‍ଣ୍ତା ୱାରିଙ୍ଗ୍‍ଁ ପାମ୍ଫିଲିଆଦୁ ଡ଼ିସ୍‌ସି ସର୍ହାମାର୍ହାନ୍ ।
ACT 15:39 ଇୟା ବିସୟ୍‌ତାନ୍‌ ନାଣ୍ତ ଆସ୍‌ସିସାତାର୍‌ ମାରି ୱାର୍‌ ୱେର୍‌ଏ ଆତାର୍‌ । ବର୍ଣ୍ଣବା ମାର୍କଙ୍ଗ୍‍ଁ ଆସ୍‌ସି ସାଇପ୍ରସ୍‍ତୁ ଏରୁ ସାରିଦୁ ସର୍ହାନ୍‍ ।”
ACT 15:40 ମାତର୍‌ ପାଉଲ ସିଲେଙ୍ଗ୍‍ଁ ଆସ୍‌କିତାନ୍‍ ମାରି ବିସ୍‍ବାସ୍‌ତି ତଡ଼ାନ୍‌କା ମାଣାନ୍‌ ପ୍ରବୁଦି ଦୟାଦାନ୍‌ ସର୍ପେ ଆଜି ସର୍ହାର୍‍ ।
ACT 15:41 ୱାନ୍‌ ମଣ୍ତଲିଆଙ୍ଗ୍‍ଁ ସାକ୍ତିକିବିସ୍‍ କିଜି ସିରିଆ ନି ସିଲିସିଆ ବା ସିଜି ସର୍ହାର୍‍ ।
ACT 16:1 ପାଉଲ ଦର୍ବି ନି ଲୁସ୍ତ୍ରାଦୁ ସର୍ହାର୍‍ । ଆବେ ତିମତି ଦର୍‌ତି ଅରେନ୍‌ କ୍ରିସ୍ଟିୟାନ୍‍ ବାସାଜି ମାର୍ହାନ୍‍ । ୱାନ୍‌ ଅରେନ୍‌ କ୍ରିସ୍ତ ବିସ୍‍ବାସି ଜିହୁଦି ଆଇମାଦି ମାରିସି । ମାତର୍‌ ୱାନି ବୁବାସି ଅରେନ୍‌ ଗ୍ରିକ୍‌ ଲୋକୁ ମାର୍ହାନ୍‍ ।
ACT 16:2 ଲୁସ୍ତ୍ରା ନି ଇକନିୟାଦୁ ମାନି ତଡ଼ାନ୍‌କା ଲୋଇ ତିମତିଦିଙ୍ଗ୍‌ ନେଗି ଲୋକ୍‌ ଇଜି ନେସ୍‌ତା ମାର୍‌ର୍ହାର୍‌ ।
ACT 16:3 ପାଉଲ ୱାନି ୱାଲେ ତିମତିଙ୍ଗ୍‍ଁ ଅତେଙ୍ଗ୍‍ଁ ଇଜି ବଦା କିତାନ୍‌, ଆଦେଙ୍ଗ୍‍ଁ ୱାନିଙ୍ଗ୍‍ଁ ସୁନ୍ନତ କିତାନ୍‌ । ଇକା କିନି ମାଟା ଆତାତ୍‌, ତିମତିଦି ବୁବାସି ଗ୍ରିକ୍‌ ଲୋକୁ ଇଜି ଆୟା ବାଡିଆଙ୍ଗ୍‍ଁ ବାସାତିମାନିକାର୍‍ ଜିହୁଦି ଲୋକୁ ନେସ୍‍ତାମାର୍ହାର୍‍ ।
ACT 16:4 ନାଣ୍ତ ଗାଡ୍‌କୁ ନାଡ଼୍‍ମି ସିଜି ସନି ୱାଲେ ୱାର୍‌ ବିସ୍‍ବାସିରିଙ୍ଗ୍‍ଁ ଜିରୁସାଲାମ୍‌ତି ପ୍ରେରିତ ସିସୁର୍‍ ନି ପେରି ନେତାର୍‍ ୱାରି ମାଣାନ୍‌ କିଆୟ୍‍ଆତି ନିତି ନିୟମ ୱିଜୁ ବୁଜାକିଜି, ଆୟାୱିଜୁ ମାନାଦେଙ୍ଗ୍‌ ଇଜି ଇଜିମାର୍ହାର୍‍ ।
ACT 16:5 ଆବେଟ୍‌କୁ ମଣ୍ତଲିଙ୍ଗ୍‍ଁ ୱିଜୁ ବିସ୍‌ବାସ୍‌ତୁ ମାରି ନାଣ୍ତ ସାକ୍ତି ଆତାତ୍‌ ମାରି ଦିନ୍‍ତିଙ୍ଗ୍‍ ଦିନ୍‌ ଲୋକୁ ନାଣ୍ତ ଆଦେଙ୍ଗ୍‍ଁ ଆସ୍‌ତାର୍‌ ।
ACT 16:6 ପବିତ୍ର ଆତ୍ମା ୱାରିଙ୍ଗ୍‍ଁ ଆସିଆ ଦେସ୍‌ତୁ ପ୍ରଚାର୍‌ କିଦେଙ୍ଗ୍‍ଁ ସାରି ପୟ୍‍ଏତାର୍‍ ଆକା ୱାର୍‌ ପ୍ରୁଗିଆ ମାରି ଗାଲାତିୟ ରାଜିଦୁ ସର୍ହାର୍‍ ।
ACT 16:7 ମିସିଆଦି ଲାକ୍‌ତୁ ଇଜି ବିତୁନିଆ ରାଜିଦୁ ସନ୍‍ଡ୍ରେଙ୍ଗ୍‍ଁ ସନିୱାଲେ ଜିସୁଦି ଆତ୍ମା ୱାରିଙ୍ଗ୍‍ଁ ସାରି ସିଏତାତ୍‍ ।
ACT 16:8 ଆଦେଙ୍ଗ୍‍ଁ ୱାର୍‌ ମିସିଆ ନାଡ଼୍‍ମି ସିଜି ସଲ୍‍ସି ତ୍ରୋୟାଦୁ ସର୍ହାର୍‍ ।
ACT 16:9 ଆୟା ନାଡ଼ା ପାଉଲ ଉନ୍‍ଣ୍ତ୍ରି ଦର୍ସନ୍‍ ପୟ୍‌ତାନ୍‌ ଜେ, ମାସିଦୋନିଆଦି ଅରେନ୍‌ ଲୋକୁ ମାଡ଼ିସ୍‌ କିଜି ଇଜିନାନ୍‌, “ମାସିଦୋନିଆଦୁ ୱାଜି ମାଙ୍ଗିଁ ସାକା କିଆ !”
ACT 16:10 ପାଉଲ ଇୟା ଦର୍ସନ୍‌ ପୟ୍‍ତିଦାପ୍ରେ ମାସିଦନିଆଦୁ ସନ୍‍ଡ୍ରେଙ୍ଗ୍‍ଁ ଇଜି ମାପ୍‌ ତିଆର୍‌ ଆତାପ୍‍, ଇରିଙ୍ଗ୍‍ଁ ମାପ୍‌ ସତେ ନେସ୍‍ତାପ୍‍, ମାପୁରୁ ଆବେଣି ଲୋକା ଲୋଇ ସୁସମାଚାର୍‌ ପ୍ରଚାର୍‌ କିଦେଙ୍ଗ୍‍ଁ ଇଜି ମାଙ୍ଗିଁ କୁକ୍‌ତାମାନାନ୍‌ ।
ACT 16:11 ମାପ୍‌ ଜାହାଜ୍‍ତାନ୍‍ ତ୍ରୋୟା ଡ଼ିସ୍‌ସି ସାମତ୍ରାଦୁ ସର୍ହାପ୍‍ ମାରି ମାରିନାଣ୍ତିଙ୍ଗ୍‍ଁ ନିଆପଲିଦୁ ଇତାପ୍‍ ।
ACT 16:12 ଆବେଟ୍‍ଟାନ୍‍ ମାପ୍‌ ମାସିଦନିଆ ଜିଲାଦି ପେରି ଗାଡ଼୍‌ ପିଲିପିଦୁ ସର୍ହାପ୍‍ । ଇୟା ଗାଡ଼୍‌ ଉନ୍‍ଣ୍ତ୍ରି ରୋମିୟରି ବସ୍ତି ମାର୍ହାତ୍‌ । ମାପ୍‌ ଆବେନୁ ନାଣ୍ତ ଦିନ୍‌ ତେବାତାପ୍‍ ।
ACT 16:13 ରମ୍‌ନି ଦିନ୍‌ ଗାଡ଼୍‌ ଆତ୍‌ରେ ମାନି ଗାଡା ପାଡ଼ି ସର୍ହାପ୍‍ । ମାପ୍‌ ଅଡ଼୍‍ବିତାପ୍‍, ଆବେ ଜିହୁଦିଲୋକୁ ଉଣ୍ତାଜି ପାର୍‌ତାନା କିଦେଙ୍ଗ୍‍ଁ ଇଜି ଉନ୍‍ଣ୍ତ୍ରି ବାଡି ତେବାନାତ୍‍ । ମାପ୍‌ ବାସ୍‍ତାପ୍‍ ମାରି ଆବେ ଉନ୍‍ଣ୍ତାତି ମାର୍ହି ଆଇମା ଲୋକା ୱାଲେ ୱାର୍‍ଗିତାପ୍‍ ।
ACT 16:14 ତାମେ ଲୋଇ ତୁୟତିରା ଗାଡ଼୍‌ତି ସେର୍‍ଗା ରଙ୍ଗ୍‍ ୱାତିଗଦା ପର୍‌ଜି ମାନି ଲୁଦିଆ ଦର୍‌ତି ଅରେତ୍‌ ଆଇମା ମାର୍ହାତ୍‌ । ୱାଦ୍‌ ମାପୁରୁଦି ଉପାସନା କିଜିମାର୍ହାତ୍‍ ମାରି ପାଉଲ ଆମାକା ଇଜିମାର୍‍ଆନ୍‍, ଆକା ମନ୍‍ ସିଜି ୱେନ୍‌ଜି ମାନାଦେଙ୍ଗ୍‍ଁ ଇଜି ପ୍ରବୁ ତାନିଙ୍ଗ୍‍ଁ ସୁଜୋଗ ସିତାନ୍‌ ।
ACT 16:15 ୱାଦ୍‌ ନି ତାନି ଇଲ୍‍ତି ୱିଜେରେ ଡୁବନ୍‌ ଅତି ୱେନ୍‌କା ମାଙ୍ଗିଁ ମାଡ଼ିସ୍‌ କିଜି ଇର୍ହାତ୍‌, “ପ୍ରବୁମାନୁ ସତ୍‍ତାନ୍‍ ନା ବିସ୍‌ବାସ୍‌ ମାନାତ୍‌ ଇଜି ଜଦି ମିର୍‌ ଅଡ଼ବିଜିନିଦେର୍‌, ଆର୍‍ତିଙ୍ଗ୍‍ଁ ୱାଜି ନା ଇଲ୍‌ତୁ ତେବାଦୁ ।” ୱାଦ୍‌ ଇୟାୱାଜା ତାନି ଇଲ୍‌ତୁ ସନ୍‍ଡ୍ରେଙ୍ଗ୍‍ଁ ଇଜି ମାଙ୍ଗିଁ ୱେର୍‌ତାତ୍‍ ।
ACT 16:16 ଅର୍‍ଲେନ୍‍ ମାପ୍‌ ପାର୍‌ତାନା ବାଡିଦୁ ସନିୱାଲେ ଅରେତ୍‌ ଦାସି ରିପାଦିଙ୍ଗ୍‍ଁ ବୁଡ଼ିତାପ୍‍ । ତାନି ଲୋଇ ମାନି ତାଗ୍‌ଇ ଆତ୍ମାଦି ସାକ୍ତିଦାନ୍ ୱାଦ୍‍ ବବିସତ୍‍ ମାଟା ଇନ୍‍ଡ୍ରେଙ୍ଗ୍‍ଁ ଆଟ୍‍ସି ମାର୍ହାତ୍‌ । ୱାଦ୍‌ ଲୋକା ବାଗ୍ୟ ଲେକିସ୍‌ କିଜି, ମାଲିକ୍‌କା ଉଣ୍ତିଙ୍ଗ୍‍ଁ ନାଣ୍ତ ଡାବୁଙ୍ଗୁଁ ଉଣ୍ତା କିଜିମାର୍ହାତ୍‍ ।
ACT 16:17 ୱାଦ୍‌ ପାଉଲ ନି ମା ୱେନ୍‌କା ୱେନ୍‌କା ୱାଜି ଆଉଲି ଆଜି ଇର୍ହାତ୍‌, “ଇୟା ଲୋକୁ ୱିଜେରିଙ୍ଗ୍‍ଁ ପେରି ମାପୁରୁଦି ସେବାକିନିକାର୍‍ । ମିର୍‌ ଏଣ୍ତେସ୍‌ ପରିତ୍ରାଣ ପୟ୍‌ନିଦେର୍‌, ଇୟା ମାଟା ୱାର୍‌ ଇଜିନାର୍‍ !”
ACT 16:18 ରିପା ଆଇଲି ବେସି ଦିନ୍‌ ଆସ୍‌ସି ଇୟାୱାଜା କିତାତ୍‍ । ସାରାସାରି ପାଉଲ ରିସା ଆଜି ୱେନ୍‌କା ମାର୍‍ଜି ତାଗ୍‌ଇ ଆତ୍ମାଦିଙ୍ଗ୍‍ଁ ଆଦ୍‌ରିସି ଇର୍ହାନ୍‌, “ଜିସୁ କ୍ରିସ୍ତଦି ଦର୍‌ତାନ୍‌ ଆଦେସ୍‌ ସିଜିନା, ତାନି ମାଣାନ୍‌ ସହସ ସାଙ୍ଗ୍ଆ !” ଆୟା ଦାପ୍ରେ ତାଗ୍‌ଇ ଆତ୍ମା ତାନି ମାଣାନ୍‌ ସତା ସର୍ହାତ୍‍ ।
ACT 16:19 ଏସ୍ତିୱାଲେ ତାନି ମାଲିକ୍‍କୁ ନିଜେଦି ଡାବୁଙ୍ଗୁଁ ଉଣ୍ତାକିନିକା ଆରାତାପ୍‌ ଇଜି ନେସ୍‍ସି, ପାଉଲ ନି ସିଲେଙ୍ଗ୍‍ଁ ଆସ୍‌ସି ଗାଡ଼୍‌ତି ମଜାୟ୍‍ ନାଡ଼୍‍ମିବାଡିଦୁ ମାନି ରମିୟ ନେତାର୍‌ଦି ଲାକ୍‌ତୁ ରେଲ୍‌ଜି ତାତାର୍‌ ।
ACT 16:20 ମାରି, ୱାର୍‌ ୱାରିଙ୍ଗ୍‍ଁ ରମିୟ ସାସନ୍‍କିନିୱାରି ଲାକ୍‌ତୁ ତାସି ଇର୍ହାର୍‌, “ଇୟା ଲୋକୁ ଜିହୁଦିର୍‌, ଇୟାକାର୍‌ ମା ଗାଡ଼୍‌ତୁ ଜାଟିଜଗଡ଼ା କିଜିନାର୍‍ ।
ACT 16:21 ୱାର୍‌ ମା ନିୟମ୍‌ ବିରୁଦ୍‍ତି ରିତିନିତି ଅଜାକିଜିନାର୍‍ । ମାଡ୍‌ ରମିୟ ଲୋକୁ, ଆଦେଙ୍ଗ୍‍ଁ ଇୟାୱିଜୁ ରିତିନିତି ଆସ୍‍ତେଙ୍ଗ୍‍ଁ ଆଟ୍‍ଏପ୍‍ ।”
ACT 16:22 ମାଲିକ୍‌କା ମାଟାଦୁ ଆସ୍‌ସି ଆବେ ମାନି ଲୋକୁ ପାଉଲ ନି ସିଲାଦି ବିରଦ୍‌ତାନ୍‌ ନିଙ୍ଗିଁତାର୍‍ । ପାଉଲ ନି ସିଲାଦି ଆଙ୍ଗିଁ କୁତ୍‍ସି ୱାରିଙ୍ଗ୍‍ଁ ବାଡିଗାଦାନ୍‍ ଡାକ୍‍ତେଙ୍ଗ୍‍ଁ ନେତା ଆଦେସ୍‌ ସିତାନ୍‌ ।
ACT 16:23 ନାଣ୍ତ ମାଡ୍‌ ତିର୍‌ଇ ୱେନ୍‌କା ୱାର୍‌ ଜଇଲ୍‌ତୁ ସର୍ହାର୍‍ ମାରି ୱାରିଙ୍ଗ୍‍ଁ କୁସିକାଣ୍ତି ଆର୍‍ପ୍‍ସି କାପ୍‌କିଜି ଇଡ୍‍ଦେଙ୍ଗ୍‍ଁ ଇଜି କାପ୍‍କିନିୱାରିଙ୍ଗ୍‍ଁ ଆଦେସ୍‌ ସିଆୟ୍‍ ଆତାତ୍‌ ।
ACT 16:24 ଇୟା ଆଦେସ୍‌ ପୟ୍‌ଜି କାପ୍‍କିନିକାନ୍‍ ୱାରିଙ୍ଗ୍‌ ଉନ୍‍ଣ୍ତ୍ରି ଲୋଇରି ବାକ୍‍ରାଦୁ ଇଡ୍‌ଜି, ବଜ୍‍ତି ମାରାନ୍‌ ଗଣ୍ତିଦୁ ୱାରି କାଲ୍‍କାଙ୍ଗ୍‍ଁ ତର୍‍ତା ଇଟ୍‌ତାନ୍‌ ।
ACT 16:25 ମଜାୟ୍‍ ନାଡ଼ା ପାଉଲ ନି ସିଲା ପାର୍‌ତନା କିଜିମାର୍ହାର୍‌, ମାପୁରୁଦି ଉଦେସ୍‍ତାନ୍‍ ପାଟା ପାର୍‍ଜି ମାର୍ହାର୍‌ ମାରି ଜଇଲ୍‌ତୁ ମାନି ଆଇକାର୍‌ ଇକା ୱେନ୍‌ଜି ମାର୍ହାର୍‌ ।
ACT 16:26 ଆୟାଦାପ୍ରେନେ ନାଣ୍ତ ବୁମିକମ୍ଫ ଆତାତ୍‌ ମାରି ଜଇଲ୍‍ତି ମୁଲ୍‍କାଲ୍‍ତିଙ୍ଗ୍‍ଁ ଦୁକାତା ପକ୍‍ତାତ୍‍ । ବେଗି ବେଗି ୱିଜୁ ସେର୍‍ଲେଙ୍ଗ୍‌ ରେଆତେ ସର୍ହେ ମାରି ୱିଜୁ ଜଇଲ୍‌ତୁ ମାନିଲୋକା ସିକିଣିଙ୍ଗ୍‍ଁ ଆର୍‍ତେ ସର୍ହେ ।
ACT 16:27 ଜଇଲ୍‍ତିଙ୍ଗ୍‍ଁ କାପ୍‍କିନିକାନ୍‍ ସେତାଆଜି ନିଙ୍ଗିଁତାନ୍‍ ମାରି ଜଇଲ୍‍ତି ସେର୍‍ଲେଙ୍ଗ୍‌ ୱିଜୁ ରେଆତିକା ସୁଡ଼୍‌ଜି ଅଡ଼୍‍ବିତାନ୍‍ ଜେ ଜଇଲ୍‍ତୁମାନିକାର୍‍ ଉର୍‍କୁତାମାନାର୍‍; ଆଦେଙ୍ଗ୍‍ଁ ୱାନ୍‌ ୱାନି କୁଡ଼ାମ୍‍ ସପ୍‍ସି କାତାଦେଙ୍ଗ୍‍ଁ ଇଜି ବଦା କିତାନ୍‌ ।
ACT 16:28 ମାତର୍‌ ପାଉଲ ନାଣ୍ତ ଆଉଲିଦାନ୍‍ ଇର୍ହାନ୍‌, “ନିଜେଦିଙ୍ଗ୍‍ଁ ଇନି ନାଷ୍ଟୁ କିମା । ମାପ୍‌ ୱିଜେରେ ଇବେ ମାନାପ୍‍ ।”
ACT 16:29 ଜଇଲ୍‌ କାପ୍‍କିନିକାନ୍‍ ଦିୱା ତାପିସ୍‍କିତାନ୍‍ ମାରି ଲୋଇ ଉରୁକ୍‍ସି ୱାଜି ତିର୍‍ଗିଜି ତିର୍‍ଗିଜି ପାଉଲ ନି ସିଲାଦି କାଲ୍‍କା ଆଡ୍‍ଗି ଆର୍‍ତାନ୍‍ ।
ACT 16:30 ୱେନ୍‌କା ୱାରିଙ୍ଗ୍‍ଁ ଆତ୍‌ରେ ଅସି ୱେନ୍‌ବାତାନ୍‌, “ଆଜ୍ଞାର୍‍, ରକିୟା ପୟ୍‍ଦେଙ୍ଗ୍‍ଁ ଇଜି ନାଙ୍ଗିଁ ଇନିକା କିଦେଙ୍ଗ୍‍ଁ ଆନାତ୍‌ ?”
ACT 16:31 ୱାର୍‌ ଇର୍ହାର୍‌, “ପ୍ରବୁ ଜିସୁମାନୁ ବିସ୍‌ବାସ୍‌ କିତିଙ୍ଗ୍‍ଁ, ନିନ୍‌ ମାରି ଇଲୁଦି ୱିଜୁ ଲୋକୁ ରକିୟା ପୟ୍‌ନିଦେର୍‌ ।”
ACT 16:32 ୱେନ୍‌କା ୱାର୍‌ ୱାନିଙ୍ଗ୍‍ଁ ନି ୱାନି ଇଲୁଦି ଆଇ ୱିଜେରିଙ୍ଗ୍‍ଁ ପ୍ରବୁଦି ବାକ୍ୟ ୱେର୍‌ତାର୍‌ ।
ACT 16:33 ନାଡ଼ାଦି ଆୟା ସମୟ୍‍ତୁ ଜଇଲ୍‍ତିଙ୍ଗ୍‍ଁ କାପ୍‍କିନିକାନ୍‍ ୱାରିଙ୍ଗ୍‍ଁ ଅସି ୱାରି ଗାଉକୁ ୱିଜୁ ନର୍‍ତା ସିତାନ୍‌, ମାରି ୱାନ୍‌ ନି ଇଲ୍‍ତି ୱିଜେରେ ଆୟାଦାପ୍ରେ ଡୁବନ୍‌ ଅତାର୍‌ ।
ACT 16:34 ତାନିୱେନ୍‍କା ୱାନ୍‌ ପାଉଲ ନି ସିଲେଙ୍ଗ୍‍ଁ ନିଜେଦି ଇଲ୍‌ତୁ ଅସି ଉଣ୍ତେଙ୍ଗ୍‍ଁ ସିତାନ୍‌ । ମାପୁରୁମାନୁ ବିସ୍‌ବାସ୍‌ କିତାର୍‍ଆକା ୱାନ୍‌ ନି ୱାନି ଇଲ୍‍ତି ୱିଜେରି ଜିବନ୍‌ ୱେଡ଼ିକାଦୁ ପୁରା ଆତାତ୍‌ ।
ACT 16:35 ମାରିନାଣ୍ତିଙ୍ଗ୍‍ଁ ସାଲ୍‍ଦି ରମିୟ ଅଦିକାରିର୍‍ ଜାମାନ୍‌କାଙ୍ଗ୍‍ଁ ଇୟା ଆଦେସ୍‌ ସିଜି ପକ୍‌ତାନ୍, “ଆୟା ଲୋକାଙ୍ଗ୍‌ ଡ଼ିସ୍‌ସୋ ସିଦୁ ।”
ACT 16:36 ଆବେଟ୍‌ ଜେଲ୍‌କାପ୍‍କିନିକାନ୍‍ ପାଉଲ୍‍ତିଙ୍ଗ୍‍ଁ ଇର୍ହାନ୍‌, “ଅଦିକାରିର୍‍ ନିଙ୍ଗିଁ ନି ସିଲେଙ୍ଗ୍‍ଁ ମୁକୁଡ଼ା କିଦେଙ୍ଗ୍‍ଁ ଇଜି ଆଦେସ୍‌ ପକ୍‍ତାମାନାନ୍‍ । ଇଲେଇ ମିର୍‌ ସାନ୍ତିଦାନ୍‌ ଇୟା ବାଡିଦାନ୍‍ ସନ୍‍ଡ୍ରେଙ୍ଗ୍‍ଁ ଆଟ୍‌ନିଦେର୍‌ ।”
ACT 16:37 ମାତର୍‌ ପାଉଲ ଜାମାନ୍‌କାଙ୍ଗ୍‍ଁ ଇର୍ହାନ୍‌, “ଇନି ନିନ୍ଦାଦୁ ଦସି ଆଏତିମାରିଙ୍ଗ୍‍ଁ ବା ୱାର୍‌ ଲୋକା ଆଗ୍‌ଡ଼ି ମାଙ୍ଗିଁ ଡାକ୍‍ତାର୍‍ । ମାପ୍‌ ରମିୟ ଲୋକୁ, ମାତର୍‌ ୱାର୍‌ ମାଙ୍ଗିଁ ଜଇଲ୍‌ତୁ ଇଟ୍‌ତାର୍‌ । ଇଲେଇ ୱାର୍‌ ମାଙ୍ଗିଁ ନେସ୍‌ଇୱାଜା ଡ଼ିସ୍‌ସୋ ସିଦେଙ୍ଗ୍‌ ବଦା କିଜିନାର୍‍ । ମାପ୍‌ ଇକା କିଦେଙ୍ଗ୍‍ଁ ସିଏପ୍‍ । ରମିୟ ଅଦିକାରିର୍‍ ନିଜେ ଇବେ ୱାଜି ମାଙ୍ଗିଁ ମୁକୁଡ଼ା କିପିର୍‍ ।”
ACT 16:38 ଜାମାନ୍‌କୁ ରମିୟ ଅଦିକାରିଙ୍ଗ୍‍ଁ ଇୟା ମାଟା ୱେର୍‌ତାର୍‌ । ପାଉଲ ନି ସିଲା ରମିୟ ଲୋକୁ ଇଜି ୱେନ୍‌ଜି ୱାର୍‌ ତିଲାତା ସର୍ହାର୍‍ ।
ACT 16:39 ୱେନ୍‌କା ସଲ୍‍ସି ୱାରି ଲାକ୍‌ତୁ କେମା ଲୋସ୍‍ତାର୍‍ ମାରି ୱାରିଙ୍ଗ୍‍ଁ ଜଇଲ୍‍ତାନ୍‍ ମୁକୁଡ଼ା କିଜି ଗାଡ଼୍‌ ଡ଼ିସ୍‌ସି ସନ୍‍ଡ୍ରେଙ୍ଗ୍‍ଁ ମାଡ଼ିସ୍‌ କିତାର୍‍ ।
ACT 16:40 ପାଉଲ ନି ସିଲା ଜଇଲି ଡ଼ିସ୍‌ସି ଲୁଦିଆଦି ଇଲ୍‌ତୁ ସର୍ହାର୍‍ । ଆବେ ୱାର୍‌ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ବେଟ୍‍ ଆତାର୍‌ ମାରି ୱାରିଙ୍ଗ୍‍ଁ ୱେଡ଼ିକା ମାଟା କିବିସ୍‍ କିଜି ଆୟା ବାଡି ଡ଼ିସ୍‌ସି ସର୍ହାର୍‍ ।
ACT 17:1 ପାଉଲ ନି ସିଲା ଆମ୍ଫିପଲି ମାରି ଆପଲନିଆ ଗାଡ଼୍‌ ସିଜି ସଲ୍‍ସି ତେସଲନିକିୟାଦି ଇତାର୍‌ । ଆବେ ଉନ୍‍ଣ୍ତ୍ରି ଜିହୁଦିରି ପାର୍‌ତନା ଇଲୁ ମାର୍ହାତ୍‌ ।
ACT 17:2 ପାଉଲ ୱାନି ରିତି ଇସାବ୍‌ତାନ୍‌ ପାର୍‌ତନା ଇଲ୍‌ତୁ ସର୍ହାନ୍‍ । ଆବେ ପାକାପାକି ମୁନ୍‍ଣ୍ତ୍ରି ରମ୍‌ନି ଦିନ୍‌ ସାନ୍ଧି ଦାର୍ମୁସାସ୍ତ୍ରଦି ବାକ୍ୟ ଅସି ୱାନ୍‌ ଲୋକାଙ୍ଗ୍‌ ୱେର୍‌ତାନ୍‌,
ACT 17:3 ଦାର୍ମୁସାସ୍ତ୍ର ୱେର୍‌ସି ମାରି ବୁଜାକିଜି ସତ୍‌ ତର୍‍ତାନ୍‍ ଜେ, ମସିହଦି ଦୁକୁ ବଗାନିକା ମାରି ସାତି ମାଣାନ୍‌ ନିଙ୍ଗିଁକା ଦର୍‌କାର୍‌ ମାର୍ହାତ୍‌ । ପାଉଲ ଇର୍ହାନ୍‌, “ଏମେ ଜିସୁଦି ବିସୟ୍‌ ନାନ୍ ୱେର୍‌ସିନା, ୱାନ୍‌ ଆୟା ମସିହ ।”
ACT 17:4 ୱାରି ଲୋଇ ଏସ ଲୋକୁ ଇକା ବିସ୍‌ବାସ୍‌ କିଜି ପାଉଲ ନି ସିଲା ୱାଲେ ମିସାତାର୍‍; ଆୟାୱାଜା ନାଣ୍ତ ପେରି ଆଇମେକ୍‍ ମାରି ମାପୁରୁଦି ପାର୍‍ତନାକିନି ଗ୍ରିକ୍‌ ଲୋକା ଉନ୍‍ଣ୍ତ୍ରି ପେରି ଦଲ୍‌ ବା ୱାରି ୱାଲେ ମିସାତାର୍‍ ।
ACT 17:5 ମାତର୍‌ ଜିହୁଦି ଲୋକୁ ରିସା ଆତାର୍‌ ମାରି ଏସ ତାଗ୍‌ଇ ଗୁଣ୍‍ତି ଲୋକାଙ୍ଗ୍‌ ଉଣ୍ତା କିଜି ୱିଜୁ ଗାଡ଼୍‍କାଙ୍ଗ୍‍ଁ ମାଡ୍‌ଗୋଲ୍‌ କିବିସ୍‍ କିତାର୍‍ । ୱାର୍‌ ପାଉଲ ନି ସିଲେଙ୍ଗ୍‍ଁ ପୟ୍‌ଜି ଲୋକା ଲାକ୍‌ତୁ ତାନି ଉଣ୍ତିଙ୍ଗ୍‍ଁ ଜେସନ୍‍ ଦର୍‌ତି ଅରେନ୍‌ ଲୋକ୍‌ତି ଇଲୁଦିଙ୍ଗ୍‌ ୱିର୍‍ସିତାର୍‍ ।
ACT 17:6 ମାତର୍‌ ଆବେ ପାଉଲ ନି ସିଲେଙ୍ଗ୍‍ଁ ପୟ୍‍ଏଜି, ୱାର୍‌ ଜେସନ୍‍ ନି ଆଇ ଏସ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ଗାଡ଼୍‌ତି ଅଦିକାରିରି ଲାକ୍‌ତୁ ରେଲ୍‌ଜି ତାସି ଆଉଲି ଆଜି ଇର୍ହାର୍‌, “ଇୟା ଲୋକୁ ସାରିବେଡ଼୍‍ତି ଜାଟି ଜଗଡ଼ା କିଜିନାର୍‍ ! ଇଲେଇ ୱାର୍‌ ମା ଗାଡ଼୍‌ତୁ ୱାତାମାନାର୍‌
ACT 17:7 ମାରି ଜେସନ୍‍ ୱାରିଙ୍ଗ୍‍ଁ ୱାନି ଇଲ୍‌ତୁ ଇଟ୍‌ତାମାନାନ୍‌ । ଜିସୁ ଦର୍‌ତି ମାରି ଅରେନ୍‌ ରାଜା ମାନାନ୍‌ ଇଜି ୱେର୍‌ସି ୱାର୍‌ ସମ୍ରାଟଦି ୱିଜୁ ନିୟମ୍‌ ଅମାନ୍ୟ କିଜିନାର୍‍ ।”
ACT 17:8 ଇୟା ମାଟା ଇଜି ୱାର୍‌ ଲୋକାଙ୍ଗ୍‌ ନି ଅଦିକାରିରି ଲୋଇ ନାଣ୍ତ ରିସା ନି ଜାଟି ଜଗଡ଼ା କିଜିନାର୍‍ ।
ACT 17:9 ଅଦିକାରିର୍‍ ଜେସନ୍‍ ନି ବିସ୍‍ବାସିରି ମାଣାନ୍‌ ଡାବୁଙ୍ଗୁଁ ଅସି ୱାରିଙ୍ଗ୍‍ଁ ମୁକୁଡ଼ା କିଜି ଡ଼ିସ୍‍ତା ସିତାର୍‍ ।
ACT 17:10 ନାଡ଼ା ଆତିୱେନ୍‍କା ବିସ୍‍ବାସ୍‌ତି ତଡ଼ାନ୍‌କୁ ପାଉଲ ନି ସିଲେଙ୍ଗ୍‍ଁ ବେରିଆଦୁ ପକ୍‌ତାର୍‌ । ୱାର୍‌ ଆବେଟାନ୍‍ ଇଜି ଜିହୁଦିରି ପାର୍‌ତନା ଇଲୁଦୁ ସର୍ହାର୍‍ ।
ACT 17:11 ତେସଲନିକିୟାଦି ଲୋକା ବାଦ୍‌ଲୁ ଆବେଣି ଲୋକୁ ନାଣ୍ତ ନେସ୍‌ତେଙ୍ଗ୍‌ ୱେଡ଼ିକା ମାର୍ହାର୍‍ । ୱାର୍‌ ନାଣ୍ତ ୱେଡ଼ିକାଦାନ୍‌ ସିସୁରି ବାକ୍ୟ ୱେର୍‌ଆର୍‌ ମାରି ପାଉଲଦି ମାଟାଦି ସତ୍‌ ମାଟା ନେସ୍‍ତେଙ୍ଗ୍‍ଁ ଇଜି ୱିଜୁଦିନ୍‌ ଦାର୍ମୁସାସ୍ତ୍ର ପଡ଼ାଜି ୱେନ୍‍ବାଜି ମାର୍ହାର୍‍ ।
ACT 17:12 ୱାରି ଲୋଇ ନାଣ୍ତ ଲୋକୁ ବିସ୍‍ବାସ୍‍ କିତାର୍‍ । ନାଣ୍ତ ସନ୍‌ମାନ୍‍‍ତି ଗ୍ରୀକ୍‍ ଆଇମେକ୍‍ ମାରି ଗ୍ରିକ୍‌ ଲୋକୁ ବିସ୍‍ବାସିରି ୱାଲେ ମିସାତାର୍‍ ।
ACT 17:13 ମାତର୍‌ ଏସ୍ତିୱାଲେ ତେସଲନିକିୟାଦି ଜିହୁଦି ଲୋକୁ ୱେର୍‌ଆର୍‌ ଜେ ବେରିଆଦୁ ବା ପାଉଲ ମାପୁରୁଦି ବାକ୍ୟ ପ୍ରଚାର୍‌ କିଜିନାନ୍‍, ୱାର୍‌ ଆବେ ୱାଜି ଜାଟି ଜଗଡ଼ା କିଦେଙ୍ଗ୍‍ଁ ଇଜି ଲୋକାଙ୍ଗ୍‌ ଏଗ୍ରିସ୍‍ତାର୍‍ ।
ACT 17:14 ବେଗି ବେଗି ବିସ୍‍ବାସ୍‌ତି ତଡ଼ାନ୍‌କୁ ପାଉଲ୍‍ତିଙ୍ଗ୍‍ଁ ସାମ୍‌ଦୁର୍‌ ପାଡ଼ିସିଜି ପକ୍‌ତାର୍‌; ମାତର୍‌ ସିଲା ନି ତିମତି ରିଏର୍‌ ବେରିଆଦୁ ତେବାତାର୍‌ ।
ACT 17:15 ପାଉଲ୍‍ତିଙ୍ଗ୍‍ଁ ଅସି ମାର୍ହି ଲୋକୁ ୱାନି ୱାଲେ ଆତେନ୍‍ସ୍‍ ସାନ୍ଦି ସର୍ହାର୍‍ । ଆବେଟ୍‌ତାନ୍‌ ୱାର୍‌ ବେରିଆଦାନ୍‌ ଡ଼େସି ୱାଜି ସିଲା ନି ତିମତିଦିଙ୍ଗ୍‌ ଇର୍ହାର୍‌, ୱାର୍‌ ବେଗି ପାଉଲିତି ୱାଲେ ମିସାପିର୍‌ ଇଜି ପାଉଲ ଆଦେସ୍‌ ସିତାମାନାନ୍‌ ।
ACT 17:16 ଆତେନ୍‍ସ୍‍ ସିଲା ନି ତିମତିଙ୍ଗ୍‍ଁ କାପ୍‍କିନି ସମୟ୍‍ତୁ ଗାଡ଼୍‌ ଦିୟାମ୍‍କାଙ୍ଗ୍‌ ପୁରାଆତିମାନିକା ସୁଡ଼ୁଜି ପାଉଲ ନାଣ୍ତ ଦୁକ୍‌ ଆତାନ୍‍ ।
ACT 17:17 ଆଦେଙ୍ଗ୍‍ଁ ୱାନ୍‌ ପାର୍‌ତନା ଇଲୁଦୁ ଜିହୁଦି ଲୋକା ୱାଲେ ମାପୁରୁଦି ପାର୍‍ତନାକିନି ଅଣଜିହୁଦିରି ୱାଲେ ଇୟା ବିସୟ୍‌ତାନ୍‌ ସବୁଦିନ୍‍ ୱାର୍‍ଗିଦେଙ୍ଗ୍‍ଁ ଆସ୍‌ତାନ୍‌ । ଗାଡ଼୍‌ତି ଡେଣା ବାଡିଆଙ୍ଗ୍‍ଁ ସନିୱାନିକା ଆଜିମାନି ଲୋକା ୱାଲେ ଆୟା ବିସୟ୍‌ତାନ୍‌ ୱାର୍‍ଗିତାର୍‍ ।
ACT 17:18 ଏସ “ଏପିକ୍ୟୁରିଆନ୍‍ ନି ସ୍ଟୋଇକ୍‍” ସିକିୟା ଗୁରୁରି ୱାଲେ ୱାନି ଆସ୍‌ସିସାତାର୍‌ । ୱାରି ଲୋଇ ଏସଲୋକ୍‌ ଇର୍ହାର୍‌, “ଇୟା ବୁଦିସିଲିକାନ୍‌ ଇନିକା ଇନ୍‍ଡ୍ରେଙ୍ଗ୍‍ଁ ସଲ୍‌ସିନାନ୍‌ ?” ଆଇକାର୍‌ ଇର୍ହାର୍‌, “ଆଇଦେସ୍‍ତି ଦିୟାମ୍‍କା ବିସୟ୍‌ତାନ୍‌ ୱାନ୍‌ ସୁସମାଚାର୍‌ ପ୍ରଚାର୍‌ କିନିକା ୱାଜା ଆଜିନାତ୍‌ ।” ଜିସୁ ନି ୱାନି ମାରିଡ଼େସି ନିଙ୍ଗିଁନି ବିସୟ୍‌ତାନ୍‌ ପାଉଲ ପ୍ରଚାର୍‌ କିନିକା ୱେନ୍‌ଜି ୱାର୍‌ ଇକା ଇର୍ହାର୍‌ ।
ACT 17:19 ଆୟାଉଣ୍ତିଙ୍ଗ୍‌ ୱାର୍‌ ପାଉଲ୍‍ତିଙ୍ଗ୍‍ଁ ଆସ୍‌ତା ଅତାର୍‍ ମାରି ୱାନିଙ୍ଗ୍‌ ଏରିୟ ପାଗସ୍‍ ଦର୍‌ତି ଗାଡ଼୍‌ ମିଟିଙ୍ଗ୍‍ଁତୁ ତାସି ଇର୍ହାର୍‌, “ନିନ୍‌ ଏମେ ପୁନି ସିକିୟା ବିସୟ୍‌ତାନ୍‌ ୱେର୍‌ସିନି, ଆୟା ବିସୟ୍‌ତାନ୍‌ ମାପ୍‌ ନେସ୍‍ତେଙ୍ଗ୍‍ଁ ବଦା କିଜିନାପ୍‍ ।
ACT 17:20 ନିନ୍‌ ୱେର୍‌ସି ମାନି ଏସ ମାଟା ମାଙ୍ଗିଁ କାବା ୱାଜିନାତ୍‍ । ମାପ୍‌ ତାନି ଅର୍ତ ନେସ୍‍ତେଙ୍ଗ୍‌ ବଦାକିନାପ୍‍ ।”
ACT 17:21 ଆତେନ୍‍ସ୍‍ତି ଲୋକୁ ମାରି ଆବେ ବାସାକିନି ଆଇଦେସ୍‍ତିକାର୍‍ ପୁନି ବିସୟ୍‌ ୱେନ୍‍ଡ୍ରେଙ୍ଗ୍‍ଁ ନି ଇନ୍‍ଡ୍ରେଙ୍ଗ୍‍ଁ ନାଣ୍ତ ଜିବନ୍‌ ନଜି ମାର୍ହାର୍‌ । ଇବେ ୱାର୍‌ ନାଣ୍ତ ସମୟ ସିଜି ମାର୍ହାର୍ ।
ACT 17:22 ପାଉଲ ଏରିୟ ପାଗସ୍‍ ଗାଡ଼୍‌ ମିଟିଙ୍ଗ୍‍ଁ ଆଗ୍‌ଡ଼ି ନିଲ୍‌ସି ଇର୍ହାନ୍‌, “ଆତେନ୍‍ସ୍‍ତି ବାସାନିଲୋକୁ, ମିର୍‌ ୱିଜେରେ ଦାର୍ମୁ ଲୋକୁ ଜଣା ପଡ଼ାଜିନାତ୍‍ ।”
ACT 17:23 ନାନ୍ ମି ଗାଡ଼୍‌ ବୁଲାଜି ସୁଡ଼୍‍ତି ୱାଲେ ମି ପୁଜାକିନି ବାଡିଦୁ ସୁଡ଼ୁତା । ଉନ୍‍ଣ୍ତ୍ରି ପୁଜା ସିନି ବେଦି ମୁସ୍‌କୁ ଉନ୍‍ଣ୍ତ୍ରି ନେସେଇ ମାପୁରୁଦି ଉଦେସ୍‍ତାନ୍‍, ରାସାତି ମାନିକା ବା ସୁଡ଼ୁତା । ମିର୍‌ ନେସ୍‍ଏନ୍‍ଣ୍ତା ଆମା ତାନିଙ୍ଗ୍‍ଁ ପୁଜା କିଜିନିଦେର୍‌, ଇଲେଇ ୱାନି ମାଟା ମି ଲାକ୍‌ତୁ ପ୍ରଚାର୍‌ କିଦେଙ୍ଗ୍‍ଁ ସଲ୍‍ସିନା ।
ACT 17:24 ମାପୁରୁ ଦୁନିଆ ନି ଆବେ ମାନି ୱିଜୁ ବିସୟ୍‌ ତିଆର୍‌ କିତାନ୍‌ । ୱାନ୍‌ ମୁସ୍‌କୁପୁର୍‌ ନି ଦୁନିଆଦି ପ୍ରବୁ । ଲୋକା କିକାଣ୍‍ ତିଆର୍‌ ଆତି ମନ୍ଦିର୍‍କାଙ୍ଗ୍‌ ୱାନ୍‌ ବାସାଏନ୍‍ ।
ACT 17:25 ମାଡ୍‌ ୱାନି ଉଣ୍ତିଙ୍ଗ୍‍ଁ ପାଣି କିଜି ୱାନିଙ୍ଗ୍‍ଁ ସିଦେଙ୍ଗ୍‌ ଆଟ୍‍ନିନାନି ଇନି ବିସୟ୍‌ ୱାନ୍‌ ବଦା କିଏନ୍‌; ଇରିଙ୍ଗ୍‍ଁ ୱାନ୍‌ ୱିଜେରିଙ୍ଗ୍‍ଁ ଜିବନ୍‌, ପୁନ୍‍ଣ୍ତା ମାରି ୱିଜୁ ଦର୍‌କାର୍‌ ବିସୟ୍‌ ସିତାମାନାନ୍‌ ।
ACT 17:26 ଅରେନ୍‌ ଲୋକ୍‌ତି ମାଣାନ୍‌ ୱାନ୍‌ ୱିଜୁ ଲୋକୁ ଜାତିଦିଙ୍ଗ୍‍ଁ ତିଆର୍‌ କିତାମାନାନ୍‍ ମାରି ୱାନି ଆଦେସ୍‍ତାନ୍‍ ୱାର୍‌ ଦୁନିଆଦି ନାଣ୍ତ ବାଡିଆଙ୍ଗ୍‍ଁ ବାସାନାର୍‍, ଏମେ ସମୟ୍‍ତୁ, ଏନ୍‌ ଏମେ ବାଡିଦୁ ବାସାନାନ୍‍, ଆଗ୍‌ଡ଼ିରାନ୍‌ ମାପୁରୁ ଆକା ତିଆର୍‌ କିତାମାନାନ୍‍ ।
ACT 17:27 ୱାନି ଉଦେସ୍‌ ମାର୍ହାତ୍‌, ୱିଜେରେ ଏଣ୍ତେସ୍‌ ୱାନିଦି ପୟ୍‌ଜି ୱାନିଙ୍ଗ୍‍ଁ ପୟ୍‌ନାର୍‌ । ମାତର୍‌ ସତ୍‍ତାନ୍‍ ମାପୁରୁ ଆମାୱାନିମାଣାନ୍‍ ଆକ ସିଲେନ୍‌ ।
ACT 17:28 ଇୟା ବିସୟ୍‌ତାନ୍‌ ଅରେନ୍‌ ଲୋକୁ ଇର୍ହାମାନାନ୍‌, “ୱାନିମାନୁନେ ମା ଜିବନ୍‌ତି ଜିନିକା, ବୁଲାନିକା ନି ତେବାନିକା ।” ମି ରାସ୍‌ନିୱାରି ଲୋଇ ଏସଲୋକ୍‌ ଇର୍ହାମାନାର୍‌, “ମାପ୍‌ ବା ୱାନି କଡ଼ର୍‌ ।”
ACT 17:29 ମାପ୍‌ ମାପୁରୁଦି କଡ଼ର୍‌ ଆତିମାନିଙ୍ଗ୍‌ ଲୋକା ମାଣାନ୍‌ ତିଆର୍‌ଆତି ବାଙ୍ଗାଁରାମ୍‍, ୱେନ୍‍ଣ୍ତି ମାରି କାଲ୍‍ତାନ୍‍ ତିଆର୍‌ଆତି ବମାଦି ରୁପ୍‍ତାନ୍‍ ମାପୁରୁଦି ୱାଜା ଏତ୍‌କିଦେଙ୍ଗ୍‌ ଆଟ୍‌ଏଟ୍‍ ।
ACT 17:30 ଲୋକୁ ମାପୁରୁଙ୍ଗ୍‍ଁ ନେସ୍‍ଇୱାଲେ ୱାନ୍‌ ଆୟା ଦସ୍‌ ଆସ୍‍ଏନ୍‌ ମାର୍ହାନ୍‌, ମାତର୍‌ ଇଲେଇ ଆୟାୱିଜୁ ୱିଜେରିଙ୍ଗ୍‍ଁ ୱାରି ପାପ୍‌ ସାରିଦାନ୍‍ ଡ଼େସିୱାଦେଙ୍ଗ୍‍ଁ ଇଜି ଆଦେସ୍‌ ସିଜିନାନ୍‌ ।
ACT 17:31 ୱାନ୍‌ ଉନ୍‍ଣ୍ତ୍ରି ଦିନ୍‌ ତିର୍‌ କିତାମାନାନ୍‌ । ଆୟା ଦିନ୍‌ ୱାନ୍‌ ୱାନି ବାସେଆତି ଲୋକ୍‌ତି ମାଣାନ୍‌ ୱିଜୁ ଦୁନିଆଦି ନ୍ୟାୟ୍‌ ବିସାର୍‌ କିନାନ୍‌ । ଆୟା ଲୋକ୍‌ତିଙ୍ଗ୍‌ ସାତିମାଣାନ୍‌ ନିକ୍‍ତି ମାଣାନ୍‌ ୱାନ୍‌ ଇୟା ମାଟାଦି ସତ୍‍ ୱିଜେରରିଙ୍ଗ୍‍ଁ ୱେର୍‍ତା ମାନାନ୍‌ !
ACT 17:32 ପାଉଲତିମାଣାନ୍‌ ସାତି ମାଣାନ୍‌ ମାରିଡ଼େସି ନିଙ୍ଗିଁନି ବିସୟ୍‌ ୱେନ୍‌ଜି ୱାରି ଲୋଇ ଏସ ଲୋକୁ ୱାନିଙ୍ଗ୍‍ଁ ସେମାର୍‌କିତାର୍‍, ମାତର୍‌ ଆଇକାର୍‌ ଇର୍ହାର୍‌, “ନିବାଣ୍‍କୁ ଇୟା ବିସୟ୍‌ତାନ୍‌ ମାପ୍‌ ମାରି ଉନ୍‍ଣ୍ତ୍ରି ଦେବା ୱେନ୍‍ଡ୍ରେଙ୍ଗ୍‍ଁ ବଦା କିଜିନାପ୍‍ ।”
ACT 17:33 ଆୟା ନାଣ୍ତିରି ମିଟିଙ୍ଗ୍‍ଁ ଡ଼ିସ୍‌ସି ପାଉଲ ସର୍ହାନ୍‍ ।
ACT 17:34 ଡାୟୋନିସିଅସ୍‍ ଦର୍‌ତି ମିଟିଙ୍ଗ୍‍ଁତି ଅରେନ୍‌ ଲୋକୁ, ଦାମାରି ଦର୍‌ତି ଅରେତ୍‌ ଆଇ ମାନି ମାରି ଏସ ଲୋକୁ ବିସ୍‌ବାସ୍‌ କିତେ ମାରି ୱାନି ୱାଲେ ମିସାତାର୍‌ ।
ACT 18:1 ଇୟା ୱେନ୍‌କା ପାଉଲ ଆତେନ୍‍ସ୍‍ ଡ଼ିସ୍‌ସି କରନ୍ତିଦୁ ୱାତାନ୍‌ ।
ACT 18:2 ମାରି ୱାନ୍‌ ଆକିଲା ଦର୍‌ତି ଜିହୁଦି ଲୋକ୍‍ତିଙ୍ଗ୍‍ଁ ବେଟ୍‌ଆତାନ୍‌, ପନ୍ତଦୁ ୱାନ୍‌ ଜନମ୍‌ ଆତାମାର୍ହାନ୍‍; ସମ୍ରାଟ କ୍ଳାଡିୟସ୍‍ ୱିଜେରେ ଜିହୁଦି ଲୋକାଙ୍ଗ୍‌ ରୋମ୍ ଡ଼ିସ୍‍ତେଙ୍ଗ୍‍ଁ ଇଜି ଆଦେସ୍‌ ସିତାମାର୍ହାନ୍‍ଆକା, ୱାନ୍‌ ଏସ ଦିନ୍‌ ଆଗ୍‌ଡ଼ି ୱାନି ଆଡ଼୍‌ସି ପ୍ରିସ୍କିଲାଦି ୱାଲେ ଇଟାଲିଦାନ୍‍ ୱାତାମାର୍ହାର୍‍ ।
ACT 18:3 ପାଉଲ ୱାରିଙ୍ଗ୍‍ଁ ବେଟ୍‌ଆଦେଙ୍ଗ୍‍ଁ ସଲ୍‍ସି ୱାରି ୱାଲେ ବାସାତାନ୍‍, ଇରିଙ୍ଗ୍‍ଁ ୱାନ୍‌ ବା ୱାରିୱାଜା ଗୁଡ଼େଏଙ୍ଗ୍‍ଁ ତିଆର୍‌ କିଜି ଜିଜି ମାର୍ହାର୍‌ ।
ACT 18:4 ଜିହୁଦି ନି ଗ୍ରିକ୍‌ଲୋକା ମନ୍‌ତୁ ପ୍ରବୁଦି ଉଣ୍ତିଙ୍ଗ୍‍ଁ ବିସ୍‌ବାସ୍‌ କିବିସ୍‍ କିଦେଙ୍ଗ୍‍ଁ ଇଜି ୱିଜୁ ରମ୍‌ନି ଦିନ୍‍ତୁ ୱାନ୍‌ ପାର୍‌ତନା ଇଲୁଦୁ ୱାର୍‌ଗିଜି ମାର୍ହାନ୍‍ ।
ACT 18:5 ସିଲା ନି ତିମତି ମାସିଦନିଆଦାନ୍‍ ଡ଼େସି ୱାତି ୱେନ୍‌କା ପାଉଲ ଜିହୁଦି ଲୋକା ଲାକ୍‌ତୁ ଜିସୁଦି ସୁସମାଚାର୍‌ ପ୍ରଚାର୍‌ କିଦେଙ୍ଗ୍‍ଁ ପୁରା ସମୟ୍ ସିତାନ୍‌ ମାରି ଜିସୁଙ୍ଗୁଁ ମସିହ ଇଜି ସାକି ସିତାନ୍‌ ।
ACT 18:6 ମାତର୍‌ ୱାର୍‌ ୱାନି ବିରୁଦ୍‌ତାନ୍‌ ନିନ୍ଦା କିଜି ଇର୍ହାର୍‌, ତାମେ ବାଦା ୱାଜା ୱାନ୍‌ ନିଜେଦି ଆଙ୍ଗିଁଦାନ୍‍ ଦୁଡ଼ି ସାଡ଼୍‍ସି ୱାରିଙ୍ଗ୍‍ଁ ଇର୍ହାନ୍‌, “ମି ନେତେର୍‌ ମି ତାଲା ମୁସ୍‌କୁ ୱାଙ୍ଗିଁତି, ଆରିଙ୍ଗ୍‌ ଆୟାଉଣ୍ତିଙ୍ଗ୍‌ ମିର୍‌ ନିଜେ ଦାଇ ଆନିଦେର୍‌ । ନାନ୍ ଇୟାଉଣ୍ତିଙ୍ଗ୍‍ଁ ଦାଇ ସିଲେ । ଆର୍‍ତିଙ୍ଗ୍‍ଁ ନାନ୍ ଅଣଜିହୁଦିରି ମାନୁ ସନା ।”
ACT 18:7 ଆବେଟ୍‌ ୱାନ୍‌ ୱାରିଙ୍ଗ୍‍ଁ ଡ଼ିସ୍‌ସି ମାପୁରୁଦି ପାର୍‌ତନା କିଜିମାନି ତିତସ୍‍ ଜୁସ୍ତ ଦର୍‌ତି ଅରେନ୍‌ ଅଣଜିହୁଦିଦି ଇଲ୍‌ତୁ ତେବାଦେଙ୍ଗ୍‍ଁ ସର୍ହାନ୍‍ । ଜୁସ୍ତଦି ଇଲୁ ଜିହୁଦି ପାର୍‌ତନା ଇଲୁ ଲାକ୍‌ତୁ ମାର୍ହାତ୍‌ ।
ACT 18:8 ଜିହୁଦି ପାର୍‌ତନା ଇଲ୍‍ତି ପେରିକାନ୍‌ କ୍ରିସ୍‍ପସ୍‍ ନି ୱାନି ଇଲ୍‌ତି ୱିଜେରେ ପ୍ରବୁମାନୁ ବିସ୍‍ବାସ୍‍‍ କିତାର୍‍ ମାରି କରନ୍ତିଦି ମାରି ନାଣ୍ତ ଲୋକୁ ପାଉଲଦି ସିକିୟା ୱେନ୍‌ଜି ବିସ୍‌ବାସ୍‌ କିତାର୍‍ ମାରି ଡୁବନ୍‌ ଅତାର୍‌ ।
ACT 18:9 ଉନ୍‍ଣ୍ତ୍ରି ନାଡ଼ା ପାଉଲ ଉନ୍‍ଣ୍ତ୍ରି ଦର୍ସନ୍‍ ପୟ୍‌ତାନ୍‌, ଦର୍ସନ୍‍ତୁ ପ୍ରବୁ ୱାନିଙ୍ଗ୍‍ଁ ଇର୍ହାନ୍‌, “ତିଲାମା, ପ୍ରଚାର୍‌ କିଜିମାନ୍‌ଆ । ଆବେଟାନ୍‍ ସୁପ୍‌ଚାପ୍‌ ତେବାମା,
ACT 18:10 ଇରିଙ୍ଗ୍‍ଁ ନାନ୍ ନି ୱାଲେ ଲାକ୍‌ତୁ ଲାକ୍‌ତୁ ମାନା । ଏନ୍‌ ନି କେତି କିଦେଙ୍ଗ୍‍ଁ ଆଟ୍‌ଏନ୍‌, ଇରିଙ୍ଗ୍‍ଁ ଇୟା ଗାଡ଼୍‌ତୁ ନା ନାଣ୍ତ ଲୋକୁ ମାନାର୍‌ ।”
ACT 18:11 ଆଦେଙ୍ଗ୍‍ଁ ପାଉଲ ଆବେ ମାପୁରୁଦି ବାକ୍ୟ ବିସୟ୍‌ତାନ୍‌ ସିକିୟା ସିଜି ବାର୍‍ସେକ୍‍ ଆଦା ତେବାତାନ୍‌ ।
ACT 18:12 ଗାଲିୟୋ ଆକାୟା ରୋମିୟ ସାସନ୍‍କିନିକାନ୍‍ ମାନି ୱେଡ଼ାଦୁ, ଜିହୁଦି ଲୋକୁ ଉଣ୍ତାଜି ପାଉଲତିଙ୍ଗ୍‍ଁ ଆସ୍‌ସି ବିଚାର୍‍ କିନିମାନୁ ଅତାର୍‌ ।
ACT 18:13 ୱାର୍‌ ଇର୍ହାର୍‌, “ଇୟା ଲୋକୁ ମା ନିୟମ୍‌ ବିରୁଦ୍‍ତି ରିତିଦାନ୍‍ ମାପୁରୁଦି ପାର୍‌ତନା କିଦେଙ୍ଗ୍‍ଁ ଲୋକାଙ୍ଗ୍‌ କାର୍‌ପିସ୍‌ନାନ୍‌ ।”
ACT 18:14 ପାଉଲ ଇନ୍‌ଡ୍ରେଙ୍ଗ୍‌ ସନିୱାଲେ, ଗାଲିୟୋ ଜିହୁଦିଲୋକାଙ୍ଗ୍‍ଁ ଇର୍ହାନ୍‌, “ଜଦି ଇବେ ଇନି ଦୋସ୍‍ବା ତାଗ୍‌ଇମାଟା ବିସୟ୍‌ ମାନାତ୍‌, ଆର୍‍ତିଙ୍ଗ୍‍ଁ ନି ଉଣ୍ତିଙ୍ଗ୍‍ଁ ତିର୍‌ ଆଜି ନି ମାଟା ୱେନିକା ନା ଉଣ୍ତିଙ୍ଗ୍‍ଁ ଟିକ୍‍ମାଟା ଆନାତ୍‌ ।
ACT 18:15 ମାତର୍‌ ଇୟା ବାଦା ବିସୟ୍‌ କେବଲ୍‌ ନି ନିଜେଦି ନିତି ନିୟମ୍‌ ବଲ୍ ନି ଦରୁ ଜାଟିଦି ବିସୟ୍‌ ଆତିମାନିଙ୍ଗ୍‌ ନିଜେ ତେନି ବିଚାର୍‌ କିନିକା ନେଗେତ୍‌ । ନାନ୍ ଇୟାନାନି ବିସୟ୍‌, ବିସାର୍‌ କିଏ ।”
ACT 18:16 ଇକା ଇଜି ୱାନ୍‌ ୱାରିଙ୍ଗ୍‍ଁ ବିଚାର୍‍ କିନି ବାଡିଦାନ୍‌ ସପ୍‍ତାର୍‌ ।
ACT 18:17 ୱାର୍‌ ପାର୍‌ତନା ଇଲ୍‌ତି ପେରିକାନ୍‌ ସୋସ୍ଥନାତିଙ୍ଗ୍‍ଁ ଆସ୍‌ସି ବିଚାର୍‍କିନି ଆଗ୍‌ଡ଼ି ମାଡ୍‌ ଡାକ୍‍ତାର୍‍ । ମାତର୍‌ ଗାଲିୟୋ ଆୟା ଉଣ୍ତିଙ୍ଗ୍‍ଁ ମନ୍‍ ସିଏତାନ୍‌ ।
ACT 18:18 ପାଉଲ କରିନ୍ତିଦୁ ବିସ୍‍ବାସ୍‌ତି ତଡ଼ାନ୍‌କା ୱାଲେ ନାଣ୍ତ ଦିନ୍‌ ତେବାତାନ୍‌ । ୱେନ୍‌କା ୱାରିଙ୍ଗ୍‍ଁ ଡ଼ିସ୍‌ସି ପ୍ରିସ୍କିଲା ନି ଆକିଲା ୱାଲେ ସିରିଆ ତରିନ୍‌ ଏରୁ ନାସି ସର୍ହାର୍‍ । କେଙ୍କ୍ରେୟାଦାନ୍‍ ଏରୁତୁ ନାତେଙ୍ଗ୍‌ ଆରାମ୍‌ କିନି ଆଗ୍‌ଡ଼ି ୱାନି ଉନ୍‍ଣ୍ତ୍ରି ନିୟମ୍‌ ଇସାବ୍‌ତାନ୍‌ ୱାନି ତାଲା ଟାଙ୍ଗୁଁରୁ ଆତାନ୍‍ ।
ACT 18:19 ୱାର୍‌ ଏପିସସ୍‍ତୁ ଇତି ୱେନ୍‌କା ପାଉଲ ପ୍ରିସ୍କିଲା ନି ଆକ୍ୱିଲେଙ୍ଗ୍‍ଁ ପୋକ୍‌ତାନ୍‌ । ୱାନ୍‌ ଆବେ ପାର୍‌ତନା ଇଲୁଦୁ ସଲ୍‍ସି ଜିହୁଦିଲୋକା ୱାଲେ ଦାର୍ମୁ ବିସୟ୍‍ତାନ୍‍ ୱାର୍‍ଗିତାର୍‍ ।
ACT 18:20 ଲୋକୁ ୱାନିଙ୍ଗ୍‍ଁ ମାରି ବେସି ଦିନ୍‌ ତେବାଦେଙ୍ଗ୍‍ଁ ଇର୍ହାର୍‌, ମାତର୍‌ ୱାନ୍‌ ରାଜି ଆଏତାନ୍‍ ।
ACT 18:21 ସନି ୱେଡ଼ାଦୁ ୱାନ୍‌ ୱାରିଙ୍ଗ୍‍ଁ ଇର୍ହାନ୍‌, “ଜଦି ମାପୁରୁଦି ବଦା ତେବାନାତ୍‍, ନାନ୍ ମି ଲାକ୍‌ତୁ ଡ଼େସି ୱାନା ।” ୱେନ୍‌କା ୱାନ୍‌ ଜାହାଜ୍‌ ଏକ୍‌ସି ଏପିସସ୍‍ ଡ଼ିସ୍‌ସି ୱାତାନ୍‌ ।
ACT 18:22 ସିସେରିଆଦୁ ଇଜି ଆବେଟାନ୍‍ ୱାନ୍‌ ଜିରୁସାଲାମ୍‍ତୁ ସର୍ହାନ୍‍ ମାରି ମଣ୍ତଲିଦିଙ୍ଗ୍‍ଁ ମାଡ଼ିସ୍‌ କିଜି ଆବେଟାନ୍‍ ଆଣ୍ଟିୟକଦୁ ସର୍ହାନ୍‍ ।
ACT 18:23 ଆବେ ଏସ ଦିନ୍‌ ସାନ୍ଧି ମାର୍‌ର୍ହି ୱେନ୍‌କା ମାରି ୱାନ୍‌ ସଲ୍‍ସି ଗାଲାତିୟ ନି ପ୍ରୁଗିଆ ରାଜିଦୁ ମଜାୟ୍‍ ସିଜି ସର୍ହାନ୍‍ ମାରି ସାର୍‍ଦୁ ବିସ୍‍ବାସିରିଙ୍ଗ୍‍ଁ ୱାରି ବିସ୍‌ବାସ୍‌ତୁ ଡାଟ୍‍ ଆଦେଙ୍ଗ୍‍ଁ ଇଜି ୱେଡ଼ିକା କିତାନ୍‌ ।
ACT 18:24 ଆୟା ସମୟ୍‍ତୁ ଆଲେକ୍‍ଜାଣ୍ତ୍ରିଆ ଆଦୁ ଜନମ୍‌ ଆତିମାର୍‍ଇ ଆପୋଲୋ ଦର୍‌ତି ଅରେନ୍‌ ଜିହୁଦିଲୋକୁ ଏପିସସ୍‍ତୁ ୱାତାନ୍‌ । ୱାନ୍‌ ଅରେନ୍‌ ନେଗି ପ୍ରଚାରକ ନି ଦାର୍ମୁସାସ୍ତ୍ରଦୁ ୱାନି ନାଣ୍ତ ବୁଦି ମାର୍ହାତ୍‌ ।
ACT 18:25 ୱାନ୍‌ ପ୍ରବୁଦି ସାରି ବିସୟ୍‌ତାନ୍‌ ସିକିୟା ପୟ୍‍ତାମାର୍ହାନ୍‍ ମାରି ଆତ୍ମାଦୁ ନାଣ୍ତ ୱେଡ଼ିକାଦାନ୍‌ ଜିସୁଦି ବିସୟ୍‌ତାନ୍‌ ସତ୍‌ ସିକିୟା ସିଜି ମାର୍ହାନ୍‍ । ମାତର୍‌ ଇୟା ବିସୟ୍‌ତାନ୍‌ ୱାନ୍‌ କେବଲ୍‌ ଜୋହନତି ଡୁବନ୍‌ ବିସୟ୍‌ ନେସ୍‍ତାମାର୍ହାନ୍‍ ।
ACT 18:26 ପାର୍‌ତନା ଇଲୁଦୁ ୱାନ୍‌ ତିଲାଏନ୍‍ଣ୍ତା ସିକିୟା ସିଦେଙ୍ଗ୍‌ ଆସ୍‌ତାନ୍‌ । ୱାନି ସିକିୟା ୱେନ୍‌ଜି ପ୍ରିସ୍କିଲା ନି ଆକିଲା ୱାନିଙ୍ଗଁ ତାମେ ଇଲ୍‌ତୁ କୁକ୍‌ତା ଅତାର୍‌ ମାରି ଆବେ ୱାନିଙ୍ଗ୍‍ଁ ମାପୁରୁଦି ସାରି ବିସୟ୍‌ତାନ୍‌ ନେଗେନ୍‌ କିଜି ବୁଜାକିତାସିତାର୍‍ ।
ACT 18:27 ୱେନ୍‌କା ଆପଲୋ ଆକାୟା ରାଜିଦୁ ସନ୍‍ଡ୍ରେଙ୍ଗ୍‍ଁ ଇଜି ବଦା କିତାନ୍‍ଆକା, ଏପିସସ୍‍ତି ବିସ୍‌ବାସ୍‌ତି ତଡ଼ାନ୍‌କୁ ୱାନିଙ୍ଗ୍‍ଁ ସାହାଜ୍ୟ କିତାର୍‍ ମାରି ୱାନିଙ୍ଗ୍‍ଁ ୱେଡ଼ିକାଦାନ୍‌ ଆସ୍‍ତେଙ୍ଗ୍‍ଁ ଇଜି ମାଡ଼ିସ୍‌ କିଜି ଆକାୟାଦି ବିସ୍‍ବାସିରିଙ୍ଗ୍‍ଁ ସିଟି ରାସ୍‌ତାନ୍‌ । ୱାନ୍‌ ଆବେ ଇଜି ମାପୁରୁଦି ଦୟାଦାନ୍‍ ବିସ୍‍ବାସି ଆତିମାନି ଲୋକାଙ୍ଗ୍‌ ନାଣ୍ତ ସାହାଜ୍ୟ କିତାନ୍‌ ।
ACT 18:28 ଜିସୁ ଜେ ମସିହ, ୱାନି ସାକ୍ତିଦି ମାଟାଦିମାଟାଦାନ୍‌ ଦାର୍ମୁସାସ୍ତ୍ରଦାନ୍‍ ଇକା ସତ୍‌ ଇଜି ୱେର୍‍ନିୱାଲେ ୱାନ୍‌ ଜିହୁଦିଲୋକାଙ୍ଗ୍‍ଁ ଆରାକିତାନ୍‍ ।
ACT 19:1 ଆପୋଲୋ କରନ୍ତିଦୁ ମାନିୱାଲେ, ପାଉଲ ଲୋଇ ତରିନ୍‌ ମାନି ରାଜିଙ୍ଗାଁ ବୁଲାଜି ଏପିସସ୍‍ତୁ ଇତାନ୍‌ । ଆବେନୁ ଏସ ସିସୁରିଙ୍ଗ୍‌ ପୟ୍‌ତାନ୍‌,
ACT 19:2 ୱାନ୍‌ ୱାରିଙ୍ଗ୍‍ଁ ୱେନ୍‌ବାତାନ୍‌, “ବିସ୍‌ବାସ୍‌ କିନି ସମୟ୍‍ତୁ ଇନିକା ମିର୍‌ ପବିତ୍ର ଆତ୍ମା ପୟ୍‍ତିମାର୍ହିଦେର୍‍ ?” ୱାର୍‌ ଇର୍ହାର୍‌ ସିଲେ, “ମାରି ପବିତ୍ର ଆତ୍ମା ଜେ ଏନ୍‌ ମାନାନ୍‌, ଆକାବା ମାପ୍‌ ୱେନ୍‍ଏପ୍‍ ।”
ACT 19:3 ପାଉଲ ୱେନ୍‌ବାତାନ୍‌, ଆର୍‍ତିଙ୍ଗ୍‍ଁ ମିର୍‌ ଏମେନାନି ଡୁବନ୍‌ ଆତିମାର୍‌ଇଦେର୍‍ ? ୱାର୍‌ ଇର୍ହାର୍‌, “ଜୋହନତି ଡୁବନ୍‌ ।”
ACT 19:4 ପାଉଲ ଇର୍ହାନ୍‌, “ଆମାକାର୍‌ ପାପ୍‌ତାନ୍‌ ମନ୍‍ଡ଼େପ୍‍ତା ମାର୍ହାର୍‌, ଜୋହନତି ଡୁବନ୍‌ ସିଜି ୱାନି ୱେନ୍‌କା ଏନ୍‌ ୱାନାନ୍‌, ଜିସୁଦିମାନୁ ବିସ୍‌ବାସ୍‌ କିଦେଙ୍ଗ୍‍ଁ ଆନାତ୍‌ ଇଜି ଲୋକାଙ୍ଗ୍‌ ଇଜିମାର୍‍ଆନ୍‍ ।”
ACT 19:5 ୱାର୍‌ ଇକା ୱେନ୍‌ଜି ପ୍ରବୁ ଜିସୁଦି ଦର୍‌ତାନ୍‌ ଡୁବନ୍‌ ଅତାର୍‌ ।
ACT 19:6 ମାରି ପାଉଲ ୱାରି ମୁସ୍‌କୁ କିୟୁ ଇଟ୍‌ତାନ୍‌, ଆବେଟ୍‌ ପବିତ୍ର ଆତ୍ମା ୱାରି ମୁସ୍‌କୁ ୱାତାତ୍‍, ମାରି ୱାର୍‌ ଆଇ ବାସାଦାନ୍‍ ୱାର୍‍ଗିତାର୍‍ ମାରି ବାକ୍ୟ ପ୍ରଚାର୍‌ କିତାର୍‍ ।
ACT 19:7 ୱାର୍‌ ୱିଜେରେ ବାର୍‍ ଲୋକୁ ମେମାରିର୍‍ ମାର୍ହାର୍‌ ।
ACT 19:8 ୱେନ୍‌କା ପାଉଲ ଜିହୁଦିରି ପାର୍‌ତନା ଇଲୁଦୁ ଡ଼ୁଗୁଜି ମୁନ୍‍ଣ୍ତ୍ରି ଲେଜ୍‌କୁ ସାନ୍ଦି ସାହାସ୍‍ତାନ୍‍ ମାପୁରୁଦି ରାଜି ବିସୟ୍‌ତାନ୍‌ ୱେର୍‌ସି ବିସ୍‌ବାସ୍‌ କିବିସ୍‍ କିଦେଙ୍ଗ୍‍ଁ ସେସ୍ଟା କିଦେଙ୍ଗ୍‍ଁ ଆସ୍‌ତାନ୍‌ ।
ACT 19:9 ମାତର୍‌ ଏସ୍ତିୱାଲେ ଏସ ଲୋକୁ ଆଟ୍‌ୱା ନି ବିସ୍‌ବାସ୍‌ କିଏନ୍‍ଣ୍ତା ଲୋକା ଆଗ୍‌ଡ଼ି ଆୟା ସାରି ବିସୟ୍‌ତାନ୍‌ ନିନ୍ଦା କିଦେଙ୍ଗ୍‍ଁ ଆସ୍‌ତାର୍‌, ନାସ୍ତିୱାଲେ ୱାନ୍‌ ୱାରିଙ୍ଗ୍‍ଁ ଡ଼ିସ୍‌ସି ସିସୁରିଙ୍ଗ୍‌ ୱେର୍‌ଏ କିତାନ୍‌, ମାରି ଦିନାମି ଟିରାନସ୍‌ ଇଲୁଦୁ ୱାର୍‌ଗିଜିସାଦେଙ୍ଗ୍‌ ଆସ୍‌ତାନ୍‌ ।
ACT 19:10 ଇୟାୱାଜା ଦୁଇ ବାର୍ସୁ ସାନ୍ଦି ସାଲାତାତ୍‍; ଆବେଟ୍‌ ଆସିଆ ବାସାତିମାନି ଜିହୁଦି ଲୋକୁ ନି ଅଣଜିହୁଦି ଲୋକୁ ୱିଜେରେ ପ୍ରବୁଦି ବାକ୍ୟ ୱେର୍ହାର୍‍ ।
ACT 19:11 ମାପୁରୁ ପାଉଲ୍‍ତି ମାଣାନ୍‌ ସାମାନ୍‌ତି କାବାଆନି ପାଣି ୱିଜୁ କିତାନ୍‌ ।
ACT 19:12 ଇୟାୱାଜା ଜେ ପାଉଲ ଆସ୍‌ସି ମାର୍ହି ରୁମାଲ୍‍ ନି ୱାତିଗନ୍ଦା ରଗିଲୋକାଙ୍ଗ୍‍ଁ ଲାକ୍‌ତୁ ଅତିଙ୍ଗ୍‍ଁ ୱାର୍‌ ନେଗେନ୍‌ ଆଜିମାର୍ହାର୍‍ ମାରି ୱାରି ମେନ୍ଦଲ୍‌ତାନ୍‌ ତାଗ୍‌ଇ ଦୁବେଙ୍ଗ୍‍ଁ ୱିଜୁ ସହସି ସଲ୍‍ସିମାର୍ହେ ।
ACT 19:13 ଏସ ବୁଲାନି ଜିହୁଦି ଦୁବେଙ୍ଗ୍‍ଁ ପେର୍‍ନିକାର୍‍ ବା ପ୍ରବୁ ଜିସୁ ଦର୍‌ ଆସ୍‌ସି ଦୁବେଙ୍ଗ୍‍ଁ ଡ଼ିସିସ୍‍ କିଦେଙ୍ଗ୍‍ଁ ସେସ୍ଟା କିତାର୍‍ । ୱାର୍‌ ଦୁବେଆଙ୍ଗ୍‍ଁ ଇଜିମାର୍ହାର୍‍, “ପାଉଲ ପ୍ରଚାର୍‌ କିଜିମାନି ଜିସୁଦି ଦର୍‌ତାନ୍‌ ନାନ୍ ନିଙ୍ଗିଁ ଆଦେସ୍‌ ସିଜିନା ।”
ACT 19:14 ସ୍କେବା ଦର୍‌ତି ଅରେନ୍‌ ଜିହୁଦି ପେରି ଜାଜକତି ସାତ୍‌ଲୋକ୍‌ ମାରିସିର୍‌ ଇୟାୱାଜା କିଜିମାର୍ହାର୍‌ ।
ACT 19:15 ମାତର୍‌ ଦୁବା ୱାନିଙ୍ଗ୍‍ଁ ଇର୍ହାତ୍‌, “ନାନ୍ ଜିସୁଙ୍ଗୁଁ ନେସ୍‌ନା ମାରି ପାଉଲ୍‍ତି ବିସୟ୍‌ତାନ୍‌ ନେସ୍‌ନା; ମାତର୍‌ ମିର୍‌ ୱିଜେରେ ଏର୍‌ ?”
ACT 19:16 ଦୁବା ଆସ୍‌ତି ଲୋକୁ ୱାରିଙ୍ଗ୍‍ଁ ନାଣ୍ତଦାନ୍‌ ରେଲ୍‌ଜି ୱାନିତରିନ୍‍ ଇଟ୍‌ତାନ୍‌ । ୱାରି ଆଙ୍ଗିଁପାସିୟା କିସ୍‍ତାପକ୍‍ତାତ୍‍, ୱାର୍‌ କାଣ୍ତିଆକାବ୍‍ରା ଆଜି ୱାନି ଇଲ୍‌ତାନ୍‌ ଉର୍‍କୁତେ ।
ACT 19:17 ଏପିସସ୍‍ତୁ ବାସାନି ଜିହୁଦିଲୋକୁ ନି ଅଣଜିହୁଦିଲୋକ୍‍ ଇୟା ବିସୟ୍‌ତାନ୍‌ ୱେନ୍‌ଜି ତିଲାତାର୍‌ ମାରି ଆବେ ପ୍ରବୁ ଜିସୁଦି ଦର୍‌ ମାରି ନାଣ୍ତଦାନ୍‌ ମାନାନିକା ଆତାତ୍‌ ।
ACT 19:18 ବିସ୍‍ବାସ୍‍ରି ମାଣାନ୍‌ ନାଣ୍ତ ଲୋକୁ ନିଜେଦି ୱିଜୁ ତାଗ୍‌ଇ ପାଣି ୱିଜେରରି ଆଗ୍‌ଡ଼ି ୱେକ୍‍ତାର୍‍ ।
ACT 19:19 ଗୁଣିଆ ବିଦ୍ୟା ଅଜାନି ନାଣ୍ତ ଲୋକୁ ୱାରି ବଇଙ୍ଗ୍‍ଁ ୱିଜୁ ତାସି ଲୋକା ଆଗ୍‌ଡ଼ି ଉଣ୍ତା କିଜି ଆଡ଼୍‍କ୍‍ତା ପକ୍‌ତାର୍‌ । ୱାରି ଆୟା ବଇଙ୍ଗାଁ ଦାରା ମାର୍ହାତ୍‌ ପଚାସ୍‍ ହଜାର୍‍ ୱେଡି ଡାବୁଙ୍ଗୁଁ ।
ACT 19:20 ଇୟାୱାଜା ପ୍ରବୁଦି ବାକ୍ୟ ନାଣ୍ତଦାନ୍‌ ୱେଙ୍ଗିତାସର୍ହାତ୍‌ ମାରି ନାଣ୍ତ ସାକ୍ତିସାଲି ଆତାତ୍‌ ।
ACT 19:21 ଇୟାୱିଜୁ ଗଟନା ୱେନ୍‌କା ପାଉଲ ମାସିଦନିଆ ନି ଆକାୟା ନାମ୍‍ଡ଼ିସିଜି ଜିରୁସାଲାମ୍‍ତୁ ସନ୍‍ଡ୍ରେଙ୍ଗ୍‍ଁ ଇଚ୍ଛା କିତାନ୍‌ । ୱାନ୍‌ ଇର୍ହାନ୍‌, “ଆବେ ସର୍ହି ୱେନ୍‌କା ନାନ୍ ଏଣ୍ତେସ୍‌ବା ରୋମ୍‍ତୁ ବା ସନା ।”
ACT 19:22 ଆଦେଙ୍ଗ୍‌ ୱାନ୍‌ ୱାନି ସେବାକିନି ରିଏର୍‌ ତଡ଼୍‍ ତିମତି ନି ଏରାଷ୍ଟତିଙ୍ଗ୍‌ ମାସିଦନିଆଦୁ ପକ୍‌ତାନ୍‌, ମାତର୍‌ ନିଜେ ଆସିଆ ଦେସ୍‌ତୁ ମାରି ଏସ ସମୟ ତେବାତାନ୍‌ ।
ACT 19:23 ଇୟା ଲୋଇ ପ୍ରବୁ ତର୍‌ତିମାନି ସାରି ବିସୟ୍‌ତାନ୍‌ ଅସି ଏପିସସ୍‍ତୁ ନାଣ୍ତ ଜାଟିଜଗଡ଼ା ଆତାତ୍‌ ।
ACT 19:24 ଦିମତ୍ରିୟ ଦର୍‌ତି ଅରେନ୍‌ ୱେନ୍‍ଣ୍ତି ତିଆର୍‍କିନିକାନ୍‍ ଆର୍ତ୍ତେମି ଦିୟାମ୍‍ ମନ୍ଦିର୍‌ତି ୱେନ୍‍ଣ୍ତି ବମା ରସ୍‍ସି ମାର୍ହାନ୍‍, ଇୟା ପର୍‍ନିମାଣାନ୍‍ ପାଣିକିନିକାର୍‌ ନାଣ୍ତ ଲାବ୍‍ ପୟ୍‍ଜିମାର୍ହାର୍‍ ।
ACT 19:25 ଆୟାଉଣ୍ତିଙ୍ଗ୍‌ ୱାନ୍‌ ସାମାନ୍‌ ବେପାର୍‍କିନିୱାରିଙ୍ଗ୍‍ଁ ଉନ୍‍ଣ୍ତା କିଜି ଇର୍ହାର୍‌, “ଆଜ୍ଞାର୍‌, ଇୟା ବେପାର୍‌ ମାଙ୍ଗିଁ ମାଜନ୍‌ କିତାମାନାନ୍‍ ଇଜି ୱିଜେରେ ନେସ୍‌ନିଦେର୍‌ ।
ACT 19:26 ଇଲେଇ ଇୟା ପାଉଲ ଇନିକା କିନାନ୍‍; ଆକା ମିର୍‌ ନିଜେ ସୁଡ଼ୁଦେଙ୍ଗ୍‌ ଆଟ୍‍ସିନିଦେର୍‍ ମାରି ୱେନ୍‍ଡ୍ରେଙ୍ଗ୍‍ଁ ଆଟ୍‍ସିନିଦେର୍‍ । ୱାନ୍‌ ଇଜିନାନ୍‌, ଲୋକୁ କିୟୁଦାନ୍‌ ତିଆର୍‌ଆତି ଦିୟାମ୍‍କୁ ୱିଜୁ ମୁଡ଼ୁକେ ଦିୟାମ୍‍କୁ ଆଉ, ମାରି ୱାନ୍‌ ଇବେ ଏପିସସ୍‍ ନି ୱିଜୁ ଆସିଆ ଦେସ୍‌ତୁ ନାଣ୍ତ ଲୋକାଙ୍ଗ୍‌ ଇୟା ବିସୟ୍‌ତାନ୍‌ ବାମ୍‍ରେକିଜିନାନ୍‍ ।
ACT 19:27 ଆବେଟ୍‌ ମା ବେପାର୍‌ ନାସ୍ଟୁ ଆନି ମୁସ୍‌କୁ ମାନାତ୍‌ । କେବଲ୍‌ ଆକାନେ ସିଲେ, ଆମା ଦିୟାମ୍‍ ଆସିଆ ନି ୱିଜୁ ଦୁନିଆଦୁ ୱିଜେରି ମାଣାନ୍‌ ପୁଜା ପୟ୍‌ନାତ୍‌, ଆୟା ପେରି ଆର୍ତ୍ତେମି ଦିୟାମ୍‍ତି ମନ୍ଦିର୍‌ ୱେଙ୍ଗ୍‍ଁଜି ତେବାଏତ୍‍ ନି ମାରି ଆର୍ତ୍ତେମି ଦିୟାମ୍‍ତି ୱେଙ୍ଗିଁନିକା ନାସ୍ଟୁ ଆନାତ୍‌ ।”
ACT 19:28 ଲୋକୁ ଇୟା ମାଟା ୱେନ୍‌ଜି ରିସା ଆତାର୍‌ ମାରି ଆଉଲି ଆଜି ଇର୍ହାର୍‌, “ଏପିସିୟଦି ଆର୍ତ୍ତେମି ପେରିଦିୟାମ୍‍ତି ଜିଣାନିକା ଆପିତ୍‌ !”
ACT 19:29 ଇୟା ଜାଟିଜଗଡ଼ା ୱିଜୁ ଗାଡ଼୍‌ତୁ ୱେଙ୍ଗିଁତାସର୍ହାତ୍‍ । ରିସାଆତିମାର୍ହି ଲୋକୁ ପାଉଲ୍‍ତି ୱାଲେମାର୍ହି ମାସିଦୋନିଆଦି ଗାୟସ୍‍ ନି ଆରିସ୍ଟାର୍କସ୍‍ତିଙ୍ଗ୍‍ଁ ଆସ୍‌ସି ୱାରି ଜୁଜ୍‍କିନିବାଡିଦୁ ତର୍‍ତା ଅତାର୍‌ ।
ACT 19:30 ପାଉଲ ନିଜେ ଲୋକା ଆଗ୍‌ଡ଼ି ନିନ୍‍ଡ୍ରେଙ୍ଗ୍‍ ବଦା କିତାନ୍‌, ମାତର୍‌ ବିସ୍‍ବାସିର୍‍ ୱାନିଙ୍ଗ୍‍ଁ ଇୟାକା କିଦେଙ୍ଗ୍‍ଁ ସିଏତାର୍‍ ।
ACT 19:31 ଏସ ଲୋକ ଗାଡ଼୍‌ତି ନିଜେଦି ଅଦିକାରି ସଙ୍ଗ୍‌କୁ ପାଉଲ୍‍ତିଙ୍ଗ୍‍ଁ ଜୁଦ୍‌କିନିବାଡି ଲୋଇ ସଲ୍‍ଇ ଉଣ୍ତିଙ୍ଗ୍‍ଁ ମାଡ଼ିସ୍‌ କିଜି ଉନ୍‍ଣ୍ତ୍ରି ମାଟା ପକ୍‌ତାର୍‌ ।
ACT 19:32 ଇୟା ସମୟ୍ ଲୋଇ ପୁରାମିଟିଙ୍ଗ୍‍ଁ ମାଡ୍‌ଗୋଲ୍‌ତୁ ପୁରା ଆତାତ୍‌ । ଲୋକୁ ଦଲ୍‌ ଦଲ୍‌ ଆଜି ନାଣ୍ତ ଆଉଲି ଆଜିମାର୍ହାର୍‍, ଇରିଙ୍ଗ୍‍ଁ ୱାରି ଲୋଇ ଏସ ଲୋକୁ ୱାରି ଉଣ୍ତାତି ମାର୍ହିକା ମାଟା ବା ନେସ୍‌ଏର୍‌ ମାର୍ହାର୍‌ ।
ACT 19:33 ଲୋକା ଲୋଇ ଏସ ଲୋକୁ ଇର୍ହାର୍‌ ଜେ, ଆଲେକ୍‍ଜାଣ୍ତର୍‍ ଇୟାଉଣ୍ତିଙ୍ଗ୍‍ଁ ଦସ୍‌, ଇରିଙ୍ଗ୍‌ ଜିହୁଦି ଲୋକୁ ୱାନିଙ୍ଗ୍‍ଁ ଆଗ୍‌ଡ଼ି ନିଲ୍‍ପ୍‍ତା ମାର୍ହାର୍‌ । ଆଲେକ୍‍ଜାଣ୍ତର୍‍ କିୟୁ ପେର୍‌ଜି ଲୋକାଙ୍ଗ୍‌ ଆଲ୍‍ଜ ମାନ୍‍ଡ୍ରେଙ୍ଗ୍‍ଁ ଇଜି ଜୁଟ୍‍ତାନ୍‍ ମାରି ବିସ୍‍ବାସ୍‌ରି ତରିନ୍‌ ବାସଣ ସିଜି ବୁଜାକିଦେଙ୍ଗ୍‍ଁ ସେସ୍ଟା କିତାନ୍‌ ।
ACT 19:34 ମାତର୍‌ ୱାନ୍‌ ଅରେନ୍‌ ଜିହୁଦି, ଇକା ନେସ୍‌ସି ୱାର୍‌ ୱିଜେରେ ଅର୍‌ସେ ଆଉଲି ଆତାର୍‌, “ଏପିସସ୍‍ତି ଆର୍ତ୍ତେମି ପେରିଦିୟାମ୍‍ତି ଜୟ୍‌ ଆପିତ୍‌ !” ଦୁଇ ଗଣ୍ଟା ଆସ୍‌ସି ଇୟାୱାଜା ଆଉଲି ଆଜିମାର୍‌ର୍ହାତ୍‌ ।
ACT 19:35 ସାରାସାରି ଗାଡ଼୍‌ତି ପେରିକାନ୍‌ ଲୋକାଙ୍ଗ୍‌ ଆଲେଜ ମାନ୍‍ଡ୍ରେଙ୍ଗ୍‍ଁ ଇଜି ଇର୍ହାନ୍‌, “ଏପିସିୟଦୁ ବାସାନି ତଡ଼ାନ୍‌କୁ ୱିଜେରେ ନେସ୍‍ନାର୍‍ ଜେ, ଏପିସସ୍‍ ଗାଡ଼୍‌ତି ପେରି ଦିୟାମ୍‍ ଆର୍ତ୍ତେମି ମନ୍ଦିର୍‌ ନି ବାଦଡ଼୍‍ତାନ୍‍ ଆର୍‍ତି ୱାତିମାନି ପବିତ୍ର ବମାଦି ରକ୍ଷା ଆଜି ୱାଜିନାତ୍‍ ।
ACT 19:36 ଇକା ଏନ୍‌ ସିଲେ ଇନ୍‍ଡ୍ରେଙ୍ଗ୍‍ଁ ଆଟ୍‌ଏନ୍‌ । ଆଦେଙ୍ଗ୍‌ ମିର୍‌ ୱିଜେରେ ଆଲେଜ ମାନ୍‌ଡ୍ରୁ । ଇନି ତାଗ୍‌ଇ ପାଣି କିମାଟ୍‌ ।
ACT 19:37 ଇୟା ଲୋକୁ ମନ୍ଦିର୍‌ତାନ୍‌ ଇନିକା ଡଙ୍ଗାଁ କିଏର୍‌, ମାରି ମା ଦିୟାମ୍‍ତି ବିରଦ୍‌ତାନ୍‌ ଇନି ନିନ୍ଦା ମାଟା ଇନ୍‌ଏର୍‌ । ଆରିଙ୍ଗ୍‍ବା ମିର୍‌ ୱେରିଙ୍ଗ୍‍ଁ ଆସ୍‌ସି ତାତିମାନିଦେର୍‍ ।
ACT 19:38 ଦିମତ୍ରିୟ ନି ୱାନି ପାଣିକିନିୱାରି ଏ ବିରଦ୍‌ତାନ୍‌ ଇନି ମାଟା ମାନାତ୍‌, ତାନି ବିସାର୍‌ କିଦେଙ୍ଗ୍‍ଁ ମା ପେରିକାର୍‌ ମାନାର୍‌ ମାରି ବିସାର୍‌ ଇଲ୍‍ତି ଟିକ୍‌ ଦିନ୍‌ ୱିଜୁ ମାନାତ୍‌ । ଆବେ ଆୟା ମାଟା ୱେର୍‌ତେଙ୍ଗ୍‌ ଆଦେଙ୍ଗ୍‌ ଆଟ୍‍ନାତ୍‍ ।
ACT 19:39 ଜଦି ତେନିମାଣାନ୍‍ ମାରି ନାଣ୍ତ ଇନିକା ବଦା କିତିଙ୍ଗ୍‍ଁ, ଆର୍‍ତିଙ୍ଗ୍‍ଁ ଲୋକାମାଣାନ୍‌ ନିୟମ୍‌ ଆତିମାନି ଉନ୍‍ଣ୍ତ୍ରି ମିଟିଙ୍ଗ୍‍ଁତୁ ତାନି ପୁରା ଅଆୟ୍‍ ଆଦେଙ୍ଗ୍‍ଁ ଆଟ୍‍ନାତ୍‍ ।
ACT 19:40 ନେର୍‌ ଆମାକା ଗଟାତାମାନାତ୍‍, ଆବେ ମା ବିରଦ୍‌ତାନ୍‌ ଜାଟିଜଗଡ଼ା ଗଟେକିନି ମାଟାଦି ଆସା ମାନାତ୍‌, ମାଡ୍‌ ଇୟାୱିଜୁ ଜାଟିଦାନ୍‍ ଇନି ଟିକ୍‌ ମାଟା ୱେର୍‍ତେଙ୍ଗ୍‍ଁ ଆଟ୍‍ଏପ୍‍ ।”
ACT 19:41 ଇୟାୱିଜୁ ମାଟା ଇଜି ୱାନ୍‌ ଲୋକାଙ୍ଗ୍‌ ସାନ୍ତି କିଜି ମିଟିଙ୍ଗ୍‍ଁ ବନ୍ଦ କିତାନ୍‌ ।
ACT 20:1 ଜାଟିଜଗଡ଼ା ୱିଜିତି ୱେନ୍‌କା ପାଉଲ ବିସ୍‍ବାସିରିଙ୍ଗ୍‍ଁ ଉଣ୍ତା କିଜି ୱେଡ଼ିକାଦି ମାଟା ୱେନିସ୍‍କିତାନ୍‍ । ୱାରି ମାଣ୍‌କୁ ସଲ୍‍ସି ୱାନ୍‌ ମାସିଦନିଆଦୁ ସର୍ହାନ୍‍ ।
ACT 20:2 ୱାନ୍‌ ୱିଜୁ ରାଜି ସିଜି ସର୍ହାନ୍‍ ମାରି ନାଣ୍ତ ନେଗିମାଟା ୱେର୍‌ସି ଲୋକାଙ୍ଗ୍‌ ୱେଡ଼ିକା କିତାନ୍‌ । ତାନେୱେନ୍‌କା ୱାନ୍‌ ଗ୍ରିସ୍‌ ଦେସ୍‌ତୁ ଇତାନ୍‌ ।
ACT 20:3 ଆବେ ମୁନ୍‍ଡ୍ରି ଲେଜ୍‌କୁ ତେବାତାନ୍‍ । ୱାନ୍‌ ସିରିଆଦୁ ସନ୍‍ଡ୍ରେଙ୍ଗ୍‍ଁ ତିଆର୍‌ ଆନିୱାଲେ ଜିହୁଦିଲୋକୁ ୱାନି ବିରଦ୍‌ତାନ୍‌ ଉପାୟ କିଜିନାର୍‍ ଇଜି କାବୁର୍‌ ପୟ୍‌ଜି ମାସିଦନିଆ ସାରିତରିନ୍‍ ଡ଼େସି ସନ୍‍ଡ୍ରେଙ୍ଗ୍‍ଁ ଅଡ଼୍‍ବିତାନ୍‍ ।
ACT 20:4 ବେରିଆଦୁ ବାସାନି ପୁରୁଦି ମାରିସି ସୋପାତ୍ର, ତେସଲନିକିଆଦି ଆରିସ୍ଟାର୍କସ୍‍ ନି ସେକୁନ୍ଦ, ଦର୍ବିଦି ଗାୟ, ଆସିଆ ଦେସ୍‌ତି ତୁକିକ ନି ତ୍ରପିମ, ମାରି ତିମତି ୱାନି ୱାଲେ ସର୍ହାର୍‍ ।
ACT 20:5 ୱାର୍‌ ଆଗ୍‌ଡ଼ିରାନ୍‌ ସଲ୍‍ସି ତ୍ରୋୟାଦୁ ମାଙ୍ଗିଁ କାପ୍‍କିତା ମାର୍ହାର୍‌ ।
ACT 20:6 କମିର୍‌ସିଲି ରୁଟି ପଣ୍ତୟ୍‌ତି ୱେନ୍‌କା ମାପ୍‌ ପିଲିପି ଗାଡ଼୍‌ତାନ୍‍ ଏରୁ ନାସି ପାସ୍‌ ଦିନ୍‍ ୱେନ୍‌କା ତ୍ରୋୟାଦୁ ୱାରି ୱାଲେ ମିସାତାପ୍‍ ମାରି ଆବେ ଉନ୍‍ଣ୍ତ୍ରି ୱାରା ତେବାତାପ୍‍ ।
ACT 20:7 ୱାରାଦି ଆଗ୍‌ଡ଼ିରି ନାଣ୍ତିଙ୍ଗ୍‌ ମାପ୍‌ ଅର୍‌ସେ ଉଣି ବଜୋଦୁ ଉଣ୍ତାତାପ୍‍ । ପାଉଲ ଲୋକାଙ୍ଗଁ ମାଜ୍‌ରାନାଡ଼ା ସାନ୍ଦି ମାଟା ୱେର୍‍ତାନ୍‍, ଇରିଙ୍ଗ୍‍ଁ ମାର୍‍ନାଣ୍ତିଙ୍ଗ୍‍ଁ ୱାନ୍‌ ଆୟା ବାଡି ଡ଼ିସ୍‍ତେଙ୍ଗ୍‍ଁ ସଲ୍‍ସିମାର୍ହାନ୍‍ ।
ACT 20:8 ଆମା ମୁସ୍‌କୁରି ମହଲାଦୁ ମାପ୍‌ ମିଟିଙ୍ଗ୍‍ଁ କିଜିମାର୍ହାପ୍‍, ଆବେ ନାଣ୍ତ ଦିୱେଙ୍ଗ୍‌ କାସ୍‍ସି ମାର୍ହେ ।
ACT 20:9 ଆବେ ଇଉଟିକସ୍‍ ଦର୍‌ତି ଅରେନ୍‌ ମୁରୁଲି ଜରକା ଲାକ୍‌ତୁ ବାସ୍‍ତାମାର୍ହାନ୍‍, ପାଉଲ ମାଟା ଇନି ସମୟ୍‍ତୁ ୱାନିଙ୍ଗ୍‍ଁ ସୁସ୍‍କାଣ୍‍କୁ ୱାଦେଙ୍ଗ୍‌ ଆସ୍‍ତେ । ୱାନ୍‌ ନାଣ୍ତ ସୁଜ୍‍ଜି ମୁନ୍‍ଣ୍ତ୍ରି ମହଲା ମୁସ୍‌କୁରାନ୍‌ ଆଡ୍‍ଗି ଆର୍‍ତାନ୍‍ । ୱାର୍‌ ୱାନିଙ୍ଗ୍‍ଁ ନିକିନିୱାଲେ ୱାନ୍‌ ସାତା ସର୍ହାମାର୍ହାନ୍‍ ।
ACT 20:10 ମାତର୍‌ ପାଉଲ ଆଡ୍‍ଗି ରେସି ୱାଜି ୱାନିଙ୍ଗ୍‍ଁ ପମ୍‌ଜି ଆସ୍‌ସି ଇର୍ହାନ୍‌, “ଦାନ୍ଦା ଆମାଟ୍‍ । ୱାନ୍‌ ଜିତାମାନାନ୍‍ ।”
ACT 20:11 ତାନିୱେନ୍‍କା ୱାନ୍‌ ମୁସ୍‌କୁ ଡ଼େସି ସଲ୍‍ସି ରୁଟି ରୁକ୍‍ସି ତିର୍‍ଆନ୍‍ ମାରି ୱେଡ଼ା ସନି ସାନ୍ଦି ୱାରି ୱାଲେ ନାଣ୍ତ ୱାର୍‌ଗିଜି ଆବେଣାନ୍‍ ସର୍ହାନ୍‍ ।
ACT 20:12 ଲୋକୁ ମୁରୁଲି କଡ଼ଦିଙ୍ଗ୍‍ଁ ଜିତିମାନିକା ସୁଡ଼୍‌ଜି ୱାନି ଇଲ୍‌ତୁ ଅତାର୍‌ ମାରି ନାଣ୍ତ ୱେଡ଼ିକା ପୟ୍‌ତାର୍‌ !
ACT 20:13 ମାପ୍‌ ଆଗ୍‌ଡ଼ିରାନ୍‌ ଜାହାଜ୍‍ତୁ ଏକ୍‌ସି ଆସୋସ୍‍ତୁ ସର୍ହାପ୍‍ । ଆବେଣାନ୍‍ ମାପ୍‌ ପାଉଲ୍‍ତିଙ୍ଗ୍‍ଁ ଜାଜ୍‍ତୁ ଅତେଙ୍ଗ୍‍ଁ ମନ୍‍ କିତାମାର୍ହାପ୍‍, ଇରିଙ୍ଗ୍‍ଁ ୱାନ୍‌ ସାରିବୁଲାଜି ଆୟା ବାଡିଦୁ ଇନାନ୍‌ ଇଜି ଇର୍ହାମାର୍ହାନ୍‌ ।
ACT 20:14 ୱାନ୍‌ ଏସ୍ତିୱାଲେ ମାଙ୍ଗିଁ ଆସୋସ୍‍ତୁ ବେଟ୍‌ଆତାନ୍‌, ମାପ୍‌ ୱାନିଙ୍ଗ୍‍ଁ ଜାହାଜ୍‍ତୁ ଅସି ମିତିଲିନିଦୁ ସର୍ହାନ୍‍ ।
ACT 20:15 ଆବେଣାନ୍‍ ମାରି ସଲ୍‍ସି ମାର୍‍ନାଣ୍ତିଙ୍ଗ୍‍ଁ କିଅସ୍‍ ଲାକ୍‌ତୁ ଇତାପ୍‍ । ମାରି ଉଣ୍ତ୍ରି ଦିନ୍‍ତି ୱେନ୍‌କା ମାପ୍‌ ସାମସ୍‍ତୁ ଇତାପ୍‌, ମାର୍‍ନାଣ୍ତିଙ୍ଗ୍‍ଁ ମିଲିଟସ୍‍ତୁ ଇତାପ୍‍ ।
ACT 20:16 ଆସିଆ ରାଜିଦୁ ମାରି ନାଣ୍ତ ସମୟ୍ ତେବାଏନ୍‍ଣ୍ତା ଏପିସସ୍‍ ପାଡ଼ି ପାଡ଼ି ଜାହାଜ୍‌ ସାଲାକିଦେଙ୍ଗ୍‍ଁ ପାଉଲ ମନ୍‍ କିତାନ୍‌ । ଜଦି ଆତିଙ୍ଗ୍‍ଁ, ପେଣ୍ଟିକସ୍ଟ ନାଣ୍ତିଙ୍ଗ୍‍ଁ ଜିରୁସାଲାମ୍‍ତୁ ଇଦେଙ୍ଗ୍‍ଁ ଇଜି ୱାନ୍‌ ଦାନ୍ଦା ଆଜିମାର୍ହାନ୍‍ ।
ACT 20:17 ମିଲିଟସ୍‍ତାନ୍‌ କାବୁର୍‌ ପୋକ୍‌ସି ଏପିସିୟ ମଣ୍ତଲିଦି ପେରି ନେତାର୍‍ରିଙ୍ଗ୍‌ ୱାନି ୱାଲେ ମିସାଦେଙ୍ଗ୍‍ଁ ପାଉଲ କୁକିସ୍‍ କିତାନ୍‌ ।
ACT 20:18 ୱାର୍‌ ୱାଜି ଉଣ୍ତାତାର୍‌ଆକା ପାଉଲ ଇର୍ହାନ୍‌, “ଆସିଆ ରାଜିଦୁ ଇନି ପାର୍‍ତୁମ୍‍ ଦିନ୍‍ତାନ୍‍ ନାନୁ ଏଣ୍ତେସ୍‌ ମି ୱାଲେ ଏସ ସମୟ ତେବାତା ମାର୍ହା, ଆକା ମିର୍‌ ନେସ୍‌ନିଦେର୍‌ ।
ACT 20:19 ଜିହୁଦି ଲୋକା ଉପାୟ୍‍ତି ଉଣ୍ତିଙ୍ଗ୍‍ଁ ନାଙ୍ଗିଁ ଏମେ ୱିଜୁ ଦୁକ୍‍କାସ୍ଟୁ ବଗାଦେଙ୍ଗ୍‍ଁ ପଡ଼ାତାତ୍‍, ତାନି ଲୋଇ ନାନୁ ପ୍ରବୁଦି ସେବାକିନି ୱାଜା ଆଡ଼୍‌ବାଜି ସାନ୍ତିଦାନ୍‌ ପାଣି କିତାମାନା ।
ACT 20:20 ମିର୍‌ ନେସ୍‌ନିଦେର୍‌ ଜେ, ନାନୁ ଲୋକାମାନୁ ପ୍ରଚାର୍‌ କିନିୱାଲେ ମାରି ମି ଇଲ୍‌କାଙ୍ଗ୍‌ ସିକିୟା ସିନିୱାଲେ ମି ନେଗେନ୍‌ ଆନି ୱାଜା ଇନି ବିସୟ୍‌ ୱେକ୍‍ତେଙ୍ଗ୍‍ ୱେନ୍‌କା ଗୁସାଏମାର୍ହା ।
ACT 20:21 ଜିହୁଦିଲୋକୁ ନି ଅଣଜିହୁଦି ଲୋକୁ ୱିଜେରିଙ୍ଗ୍‍ ନାନୁ ଆଟ୍‌ୱା ଜାଗାର୍‌ତା ସାକି ସିତାମାର୍ହା ଜେ, ୱାର୍‌ ପାପ୍‌ତାନ୍‌ ଡ଼େସି ଏତ୍‌କିଜି ମାପୁରୁ ତରିନ୍‌ ମନ୍‍ ସିନାର୍‍ ମାରି ପ୍ରବୁ ଜିସୁଦିମାନୁ ବିସ୍‌ବାସ୍‌ କିନାର୍‌ ।
ACT 20:22 ଇଲେଇ ପବିତ୍ର ଆତ୍ମାଦି ମାଟା ମାନାଜି ନାନୁ ଜିରୁସାଲାମ୍‍ତୁ ସଲ୍‍ସିନା, ନେସେଏ ଆବେନ୍‌ ନାନ୍‌ ଇନିକା ଆନାତ୍‌ନୋ ।
ACT 20:23 ପବିତ୍ର ଆତ୍ମା ନାଙ୍ଗିଁ ଜାଗାର୍‌ତା କିତା ସିତାମାନାତ୍‍ ଜେ ୱିଜୁ ଗାଡ଼୍‍କାଙ୍ଗ୍‍ଁ ନାନୁ ଜଇଲ୍‍ସଲ୍‍ସି କାସ୍ଟୁ ପୟ୍‍ନା ।
ACT 20:24 ମାତର୍‌ ନା ଉଣ୍ତିଙ୍ଗ୍‌ ନା ନିଜେ ଜିବନ୍‍ତିଙ୍ଗ୍‍ଁ ନାନୁ ଇସ୍ରିକା ଇଜି ଅଡ଼୍‍ବିନା । ମାପୁରୁଦି ଦୟା ବିସୟ୍‌ତାନ୍‌ ପ୍ରବୁ ଜିସୁ ଏମେ ମାଟା ୱେର୍‌ତେଙ୍ଗ୍‌ ଇଜି ନାଙ୍ଗିଁ ସେବା ଦାୟିତ ସିତାମାନାନ୍‌, ଆକା ପୁରା କିଦେଙ୍ଗ୍‌ ଇଜିନା ସୁସମାଚାର୍ ପ୍ରଚାର୍‌ ପାଣି ସାକି ପୁରା କିନା, ନିସନେ ନା ବଦା ।
ACT 20:25 “ମାପୁରୁଦି ରାଜି ବିସୟ୍‌ତାନ୍‌ ପ୍ରଚାର୍‌ କିଦେଙ୍ଗ୍‌ ଇଜି ନାନୁ ମି ୱିଜେରି ଲାକ୍‌ତୁ ସଲ୍‍ସିନା । ଇଲେଇ ସୁଡ଼ୁଦୁ, ନାନୁ ନେସ୍‌ନା ଜେ, ମି ମାଣାନ୍‌ ଏନ୍‌ ନାଙ୍ଗିଁ ମାରି ସୁଡ଼ୁଏନ୍‌ ।
ACT 20:26 ଆଦେଙ୍ଗ୍‌ ନେର୍‍ରି ଇୟା ସୁଜଗଦୁ ନାନୁ ଆଟ୍‍ୱାଦାନ୍‍ ମି ଲାକ୍‌ତୁ ୱେର୍‌ସିନା ଜେ, ଜଦି ମି ଲୋଇରାନ୍‌ ଏନ୍‌ ନାସ୍ଟୁ ଆନାନ୍‌, ଆୟାଉଣ୍ତିଙ୍ଗ୍‌ ନାନୁ ଦାଇ ସିଲେ ।
ACT 20:27 ଇରିଙ୍ଗ୍‌ ମାପୁରୁଦି ୱିଜୁ ଉଦେସ୍ ମି ଲାକ୍‌ତୁ ୱେର୍‌ତେଙ୍ଗ୍‌ ନାନୁ ୱେନ୍‌କା ଗୁସାଏ ।
ACT 20:28 ମାରି ମିର୍‌ ନେତା ୱାଜା ନିଜେଦି ବିସୟ୍‌ତାନ୍‌ ମାରି ପବିତ୍ର ଆତ୍ମା ମି ଜାତୁନ୍‍ ଅତେଙ୍ଗ୍‌ ଏମେ ବିସ୍‍ବାସି ମାନ୍ଦାଦିଙ୍ଗ୍‍ ଡ଼ିସ୍‍ତା ସିତାମାନାନ୍‌, ଆୟା ୱିଜେରି ବିସୟ୍‌ତାନ୍‌ ଜାତୁନ୍‍ ଆଆ । ମେଣ୍ତା ଗାଉଡ଼ୁ ୱାଜା ମାପୁରୁଦି ମଣ୍ତଲିଦି ଜାତୁନ୍‍ ଅଆ । ଆୟା ମଣ୍ତଲିଦିଙ୍ଗ୍‍ ୱାନ୍‌ ୱାନି ମାରିସିଦି ନେତେର୍‌ତି ମାଣାନ୍‌ ନିଜେଦିକା କିତାମାନାନ୍‍ ।
ACT 20:29 ନାନୁ ନେସ୍‌ନା, ନାନୁ ସର୍‍ରି ୱେନ୍‌କା ମି ଲୋଇ ବୟ୍‍ଙ୍କାର୍‍ ବେନ୍‍ଡ୍ରରକିଙ୍ଗ୍‍ ୱାନେ ମାରି ମାନ୍ଦାଦିଙ୍ଗ୍‍ କାଣ୍ତିଆକାବ୍‍ରା କିଏନ୍‍ଣ୍ତା ଡ଼ିସ୍‍ଉ ।
ACT 20:30 ସମୟ୍ ୱାନାତ୍‍, ଏସ୍ତିୱାଲେ ମି ନିଜେଦି ଦଲତୀ ଏସ ଲୋକୁ ବିସ୍‍ବାସିରିଙ୍ଗ୍‍ ମିଚ୍‌ ମାଟା ୱେର୍‌ସି ତାଗ୍‌ଇ ସାରିଦୁ ଅନାର୍‍ ।
ACT 20:31 ନାସ୍ତିୱାଲେ ଜାଗାର୍‌ତା ମାନ୍‌ଡ଼୍ରୁ, ନାନୁ ଜେ ୱେଡ଼େ ନାଡ଼ା କାଣେରୁଙ୍ଗୁଁ ୱାକ୍‍ସି ମୁନ୍‍ଣ୍ତ୍ରି ବାର୍‍ସେକ୍‍ ସାନ୍ଦି ମି ୱିଜେରିଙ୍ଗ୍‍ ସିକିୟା ସିତାମାନା, ଇୟା ମାଟା ମନ୍‌ତୁ ଇଡ୍‌ଦୁ ।
ACT 20:32 “ଇଲେଇ ନାନୁ ମିଙ୍ଗିଁ ମାପୁରୁଦି କିୟୁଦୁ ମାରି ୱାନି ଦୟାଦୁ ପୁରାତି ବାକ୍ୟଦୁ ସର୍ପେ କିଜିନା, ଆୟା ବାକ୍ୟ ମିଙ୍ଗିଁ ବପୁ କିଦେଙ୍ଗ୍‌ ଇଜି ମାପୁରୁଦି ଲୋକା ଉଣ୍ତିଙ୍ଗ୍‌ ମାନି ୱିଜୁ ଆର୍ସିବାଦ୍‌ ମିଙ୍ଗିଁ ସିଦେଙ୍ଗ୍‍ ଇଜି ଆଟ୍‍ନା ।
ACT 20:33 ନାନୁ ଏ ୱେଣ୍ତି, ବାଙ୍ଗାଁରାମ୍‍ ମାରି ୱାତିଗନ୍ଦା ପୟ୍‌ଦେଙ୍ଗ୍‌ ଆସା ଇଡ୍‍ଏ ।
ACT 20:34 ମିର୍‌ ନେସ୍‌ନିଦେର୍‌, ନାନୁ ନା ଇୟା ରୁଣ୍ତି କିକାଣ୍‍କୁ ପାଣି କିଜି ନିଜେଦି ମାରି ନା ୱାଲେ ପାଣିକିନିୱାରି ୱିଜୁ ଦର୍‌କାର୍‌ ପୁରା କିତାମାନା ।
ACT 20:35 ପୟ୍‌ନି ମାଣାନ୍‌ ଦାନ୍‌ କିନିମାନୁ ନାଣ୍ତ ୱେଡ଼ିକା ତେବାନାତ୍‍, ନିଜେ ପ୍ରବୁ ଜିସୁଦି ଇୟା ବାକ୍ୟଦିଙ୍ଗ୍‍ ଏତ୍‌କିଜି ଇୟାୱାଜା ନାଣ୍ତ କାସ୍ଟୁଦି ପାଣିଦାନ୍‌ ମାପ୍‌ ଆଟ୍‍ଇ ଲୋକାଙ୍ଗ୍‌ ସାକା କିନି ଦର୍‌କାର୍‌, ଇୟା ବିସୟ୍‌ତାନ୍‌ ନାନୁ ୱିଜୁଦିନ୍‌ ମିଙ୍ଗିଁ ସାରି ତର୍‍ତାମାନା ।”
ACT 20:36 ଇୟାୱିଜୁ ମାଟା ୱେର୍‌ତି ୱେନ୍‌କା ପାଉଲ ୱାରି ୱାଲେ ମେଣ୍ତେଙ୍ଗ୍‍ ଗଟ୍‌କିଜି ପାର୍‌ତନା କିତାନ୍‌ ।
ACT 20:37 ୱିଜେରେ ଆଡ଼୍‌ବାଜି ଆଡ଼୍‌ବାଜି ପାଉଲତିଙ୍ଗ୍‌ ପମ୍‍ଜି ନଣ୍ତ୍‍ଜି ପୋକ୍‌ତାର୍‌ ।
ACT 20:38 ୱାର୍‌ ୱାନିଙ୍ଗ୍‌ ମାରି ସୁଡ଼୍‍ଦେଙ୍ଗ୍‍ ଆଟ୍‍ଏର୍‍ ଇଜି ୱାନ୍‌ ଇର୍ହାନ୍‍ଆକା ୱାର୍‌ ନାଣ୍ତ ଦୁକ୍‍ ଆତାମାର୍ହାର୍‍ । ୱାର୍‌ ୱାନିଙ୍ଗ୍‌ ପୋକ୍‌ତେଙ୍ଗ୍‌ ଇଜି ଜାହାଜ୍‌ ଲାକ୍‌ତୁ ସର୍ହାର୍‍ ।
ACT 21:1 ୱାରିଙ୍ଗ୍‌ ପୋକ୍‍ତି ୱେନ୍‌କା ମାପ୍‌ ଆବେଣାନ୍‍ ସର୍ହାପ୍‍ । ଏରୁସାରି ନାସି ମାପ୍‌ କୋସ୍‍ତୁ ଇତାପ୍‍ । ମାରିନାଣ୍ତିଙ୍ଗ୍‍ ରୋଡସ୍‍ ପାଡ଼ି ସିଜି ପାତାରାଦୁ ସର୍ହାପ୍‍ ।
ACT 21:2 ଆବେଣାନ୍‍ ପିନିସିଆଦୁ ସଲ୍‌ସିମାନି ଉନ୍‍ଣ୍ତ୍ରି ଜାହାଜ୍‌ ଏକ୍‌ସି ସର୍ହାପ୍‍ ।
ACT 21:3 ତାନିୱେନ୍‍କା ସାଇପ୍ରସ୍‍ ତର୍‍ଜିମାନି ଉନ୍‍ଣ୍ତ୍ରି ବାଡିଦୁ ଇତାପ୍‍ । ଆବେଣାନ୍‍ ତାନି ଡେବିରି ତରିନ୍‌ ସିଜି ମାପ୍‌ ସିରିଆଦୁ ସର୍ହାପ୍‍ । ମାପ୍‌ ସୋର ଗାଡ଼୍‌ତୁ ଜାହାଜ୍‍ତାନ୍‍ ରେତାପ୍‍, ଇରିଙ୍ଗ୍‌ ଇୟା ଜାହାଜ୍‍ତାନ୍‍ ସାମାନ୍‍ପତର୍‌ ରେପ୍‍ନିକା ମାର୍ହାତ୍‌ ।
ACT 21:4 ଆବେ ମାପ୍‌ ଏସ ବିସ୍‍ବାସିରିଙ୍ଗ୍‍ ସୁଡ଼୍‌ଜି ୱାରି ୱାଲେ ଉନ୍‍ଣ୍ତ୍ରି ସାତା ତେବାତାପ୍‍ । ପବିତ୍ର ଆତ୍ମାଦି ଆଦେସ୍‌ ପୟ୍‌ଜି ୱାର୍‌ ପାଉଲ୍‍ତିଙ୍ଗ୍‍ ଜିରୁସାଲାମ୍‍ତୁ ସନ୍‍ଡ୍ରେଙ୍ଗ୍‍ଁ ତେବାକିତାର୍‍ ।
ACT 21:5 ମାତର୍‌ ୱାରି ୱାଲେ ଉନ୍‍ଣ୍ତ୍ରି ସାତା ତେବାତି ୱେନ୍‌କା ମାପ୍‌ ୱାରିଙ୍ଗ୍‌ ଡ଼ିସ୍‌ସି ନିଜେଦି ସାରିଦୁ ସର୍ହାପ୍‍ । ମାଙ୍ଗିଁ ଡ଼ିସ୍‌ତେଙ୍ଗ୍‌ ଇଜି ୱାର୍‌ ୱିଜେରେ ନିଜେଦି ଆଡ଼୍‍ସିକ୍‍ ମାରି କଡ଼ରି ୱାଲେ ଗାଡ଼୍‌ ଆତ୍‌ରେ ମାନି ସାମ୍‌ଦୁର୍‌ ପାଡ଼ି ସାନ୍ଦି ୱାତାର୍‌ । ଆବେ ମାପ୍‌ ୱିଜେରେ ମେଣ୍ତେଙ୍ଗ୍‍ ଗଟ୍‌କିଜି ପାର୍‌ତନା କିତାପ୍‍ ।
ACT 21:6 ତାନିୱେନ୍‍କା ମାପ୍‌ ୱାରିଙ୍ଗ୍‍ଁ ପୋକ୍‌ସି, ଜାହାଜ୍‍ତୁ ଏକ୍‌ତାପ୍‍, ୱାର୍‌ ଇନ୍‌ଡ୍ର ଡ଼େସି ସର୍ହାର୍‍ ।
ACT 21:7 ମାପ୍‌ ସୋର ଗାଡ଼୍‌ତାନ୍‍ ଏରୁ ନାସି ୱିଜ୍‍ଜି ପତଲମାଇଦୁ ଇତାପ୍‍, ଆବେ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ମାଡ଼ିସ୍‍କିଜି ୱାରିୱାଲେ ଉନ୍‍ଣ୍ତ୍ରି ଦିନ୍‌ ତେବାତାପ୍‍ ।
ACT 21:8 ମାରିନାଣ୍ତିଙ୍ଗ୍‍ ମାପ୍‌ ଆୟା ବାଡି ଡ଼ିସ୍‌ସି କାଇସରିଆଦୁ ଇତାପ୍‍ । ଆବେ ମାପ୍‌ ପ୍ରଚାର୍‌କିନି ପିଲିପିତି ଇଲ୍‌ତୁ ତେବାତାପ୍‍, ଜିରୁସାଲାମ୍‍ତୁ ସେବକ ୱାଜା ବାସେଆତି ମାନି ସାତ୍ ଲୋକା ଲୋଇ ୱାନ୍‌ ଅରେନ୍‌ ମାର୍ହାନ୍‍ ।
ACT 21:9 ୱାନି ନାଲ୍‍ଗି ପେଡ଼ିଆଇ ଆଇଲିକ୍‌ ମାପୁରୁଦି ବାକ୍ୟ ୱେର୍‌ସି ମାର୍ହେ ।
ACT 21:10 ମାପ୍‌ ଆବେ ନାଣ୍ତ ଦିନ୍‌ ତେବାତି ୱେନ୍‌କା, ଜିହୁଦା ଦେସ୍‌ତାନ୍‍ ଆଗାବ ଦର୍‌ତି ଅରେନ୍‌ ବାବବାଦି ଆବେ ୱାତାନ୍‌ ।
ACT 21:11 ୱାନ୍‌ ମା ଲାକ୍‌ତୁ ୱାଜି ପାଉଲ୍‍ତି ଜୁକିଦୁ ତରାନି ନାସୁ ଅତାନ୍‌, ଆବେଟ୍‌ ୱାନ୍‌ ନିଜେଦି କିୟୁ ମାରି କାଲୁ ତର୍‌ସି ଇର୍ହାନ୍‌, “ପବିତ୍ର ଆତ୍ମା ନାଙ୍ଗିଁ ଜାଣେକିଜିନାତ୍‌ ଜେ, ଇୟା ଜୁକି ତରାତି ଅଦିକାରିଙ୍ଗ୍‍ ଜିରୁସାଲାମ୍‍ତୁ ଜିହୁଦି ଲୋକୁ ଇୟାୱାଜା ତର୍‌ସି ୱାନିଙ୍ଗ୍‌ ଅଣଜିହୁଦି ଲୋକା କିୟୁଦୁ ସର୍ପେ କିନାର୍‌ ।”
ACT 21:12 ଇକା ୱେନ୍‌ଜି ମାପ୍‌ ମାରି ଆୟା ବାଡିଦୁ ମାନି ଆଇକାର୍‌ ପାଉଲ୍‍ତିଙ୍ଗ୍‍ ଜିରୁସାଲାମ୍‍ତୁ ସଲ୍‌ଇ ଉଣ୍ତିଙ୍ଗ୍‌ ବାତିଙ୍ଗ୍‌ ମାଲିତାପ୍‍ ।
ACT 21:13 ମାତର୍‌ ପାଉଲ ଇର୍ହାନ୍‌, “ମିର୍‌ ଇୟା ଇନିକା କିଜିନିଦେର୍‌, ଏନ୍ଦା ଇୟାୱାଜା ଆଡ଼୍‌ବାଜି ନା ଜିବନ୍‌ତିଙ୍ଗ୍‌ ରୁକ୍‍ସିନିଦେର୍‍ ? ଜିରୁସାଲାମ୍‍ତୁ କେବଲ୍‌ ତରାୟ୍‌ ଆଦେଙ୍ଗ୍‌ ସିଲେ, ମାତର୍‌ ପ୍ରବୁ ଜିସୁ ଉଣ୍ତିଙ୍ଗ୍‌ ସାଦେଙ୍ଗ୍‍ଁ ଇଜି ବା ନାନ୍‌ ତିଆର୍‌ ମାନା ।”
ACT 21:14 ମାପ୍‌ ୱାନିଙ୍ଗ୍‌ ବୁଜା କିଦେଙ୍ଗ୍‌ ଆଟ୍‌ଏଜି ଆବେଟାନ୍‍ ସୁପ୍‍ଆଜି ଇର୍ହାପ୍‍, “ପ୍ରବୁଦି ବଦା ପୁରା ଆପିତ୍‌ ।”
ACT 21:15 ଆବେ ଏସ ସମୟ ତେବାତି ୱେନ୍‌କା ମାପ୍‌ ମା ସାମାନ୍‍ ପତ୍ର ରସ୍‍ସି ଜିରୁସାଲାମ୍‌ ତରିନ୍‌ ସର୍ହାପ୍‍ ।
ACT 21:16 କାଇସରିଆଦି ଏସ ସିସୁର୍‍ ନି କୁପ୍ରଦି ମନାସୋନ ଦର୍‌ତି ଅରେନ୍‌ ବିସ୍‍ବାସି ବା ମା ୱାଲେ ୱାତାନ୍‌ । ମନାସୋନଦି ଇଲୁତୁ ମାପ୍‌ ତେବାନି ବ୍ୟବସ୍ଥା ଆତାମାର୍ହାତ୍‍ ।
ACT 21:17 ଜିରୁସାଲାମ୍‍ତୁ ବିସ୍‍ବାସ୍‌ତି ତଡ଼ାନ୍‌କୁ ୱେଡ଼ିକାଦାନ୍‌ ମାଙ୍ଗିଁ କୁକ୍‍ତାର୍‍ ।
ACT 21:18 ମାରିନାଣ୍ତିଙ୍ଗ୍‍ଁ ପାଉଲ ମା ୱାଲେ ଜାକୁବଙ୍ଗ୍‍ ସୁଡ଼୍‍ଦେଙ୍ଗ୍‍ ସର୍ହାନ୍‍; ମଣ୍ତଲି ୱିଜୁ ନେତାର୍‍ ଆବେ ଉଣ୍ତାତା ମାର୍ହାର୍‌ ।
ACT 21:19 ପାଉଲ ୱାରିଙ୍ଗ୍‌ ମାଡ଼ିସ୍‌କିଜି ୱାନି ସେବା ପାଣିଦାନ୍‌ ମାପୁରୁ ଅଣଜିହୁଦି ଲୋକା ଲୋଇ ଆମାକା ଆମାକା କିତାମାର୍ହାନ୍‌; ତାନି ଉନ୍‍ଣ୍ତ୍ରି ପୁରା ମାଟା ସିତାନ୍‌ ।
ACT 21:20 ୱାନି ମାଟା ୱେର୍‌ଇ ୱେନ୍‌କା ୱାର୍‌ ୱିଜେରେ ମାପୁରୁଦି ଦନ୍ୟବାଦ୍‌ କିତାର୍‍ । ତାନି ୱେନ୍‌କା ୱାର୍‌ ଇର୍ହାର୍‌, “ତଡ଼ାନ୍‌ ପାଉଲ, ନିନ୍‌ ସୁଡ଼୍‍ଜିନି, ଏଣ୍ତେସ୍‌ ଇଲେଇ ହାଜାର୍‌ ହାଜାର୍‌ ଜିହୁଦି ଲୋକୁ ପ୍ରବୁ ଜିସୁମାନୁ ବିସ୍‌ବାସ୍‌ କିଜିନାର୍‍ ମାରି ୱାର୍‌ ନିୟମ୍‌ ଉଣ୍ତିଙ୍ଗ୍‌ ବା ବିସ୍‌ବାସ୍‌ତାନ୍‌ ତେବାତାମାନାର୍‍ ।
ACT 21:21 ୱାର୍‌ କାବୁର୍‌ ପୟ୍‍ତାମାନାର୍‍ ଜେ, ନିନ୍‌ ଅଣଜିହୁଦି ଲୋକା ଦେସ୍‌ତୁ ବାସାଜି ମାନି ଜିହୁଦି ଲୋକାଙ୍ଗ୍‌ ମୋସାଦି ନିୟମ୍‌ ଡ଼ିସ୍‍ତେଙ୍ଗ୍‍ଁ, ୱାରି କଡ଼ରିଙ୍ଗ୍‌ ସୁନ୍ନତ କିଇ ଉଣ୍ତିଙ୍ଗ୍‌ ମାରି ଜିହୁଦି ରିତିନିତି ମାନାଇ ଉଣ୍ତିଙ୍ଗ୍‌ ସିକିୟା ସିଜିନି ।
ACT 21:22 ନିନ୍‌ ଇବେ ୱାତିମାନି ଇଜି ୱାର୍‌ ସତେନେ ୱେନାର୍‌ । ଆର୍‍ତିଙ୍ଗ୍‍ଁ ଇନିକା କିଦେଙ୍ଗ୍‌ ଆନାତ୍‌ ?
ACT 21:23 ମାପ୍‌ ବଦାକିଜିନାପ୍‍, ନିନ୍‌ ଉନ୍‍ଣ୍ତ୍ରି ପାଣି କିଆ । ଇବେମାନି ନାଲ୍‍ଏର୍‌ ଲୋକୁ ଉନ୍‍ଣ୍ତ୍ରି ଅପାତାମାନାର୍‍ ।
ACT 21:24 ୱାରି ୱାଲେ ସାଙ୍ଗ୍ଆ । ନେଗେନ୍‌କିନି ବିଦି ମାନାନିମାନୁ ୱାରି ୱାଲେ ମିସାଜି ୱାରି କାର୍ସୁ କିଆ । ତାନିୱେନ୍‍କା ୱାର୍‌ ନିଜେ ନିଜେଦି ତାଲା ଟାଙ୍ଗୁଁରୁ କିନାର୍‌ । ଇବେଟ୍‍ତାନ୍‌ ଜଣା ପଡ଼ାନାତ୍‌ ଜେ, ନି ବିସୟ୍‌ତାନ୍‌ ୱେଙ୍ଗିଁତି ମାନି ଇନି ମାଟା ସତ୍‌ ସିଲେ, ମାତର୍‌ ନିନ୍‌ ମସାଦି ନିୟମ୍‌ ଇସାବ୍‌ତାନ୍‌ ଜିଜିନି ।
ACT 21:25 ମାତର୍‌ ଏମେ ଅଣଜିହୁଦି ଲୋକୁ ବିସ୍‌ବାସ୍‌ ଆତାମାନାର୍‌, ୱାରି ଲାକ୍‌ତୁ ମାପ୍‌ ଉନ୍‍ଣ୍ତ୍ରି ଆକୁ ରାସ୍‌ସି ସିକିୟା ସିତାମାନାପ୍‍ ଜେ, ମା ମାଟାଦି ଇସାବ୍‌ତାନ୍‌ ୱାର୍‌ ଦିୟାମ୍‍କା ଲାକ୍‌ତୁ ପୁଜାସିତିମାନି କାଦି ଉଣୁଏର୍‌, ନେତେର୍‌ ଉଣୁଏର୍‌, କକ୍‍ଲା ପିଡ଼ିସି ସାପିସ୍‍କିତିମାନି ପସୁଦି କାଣ୍ତା ତିନ୍‍ଏର୍‍ ମାରି ଦାରିପାଣିଦାନ୍‌ ଆକତେବାଦୁ ।”
ACT 21:26 ମାରିନାଣ୍ତିଙ୍ଗ୍‍ଁ ପାଉଲ ୱାତିମାର୍‌ଇ ନାଲ୍‍ଏରି ୱାଲେ ନେଗେନ୍‌କିନି ବିଦି ମାନାତାର୍‍ । ୱେନ୍‌କା ୱାନ୍‌ ମନ୍ଦିର୍‍ତୁ ସଲ୍‍ସି ନେଗେନ୍‌କିନି ପାଣି ଏସାଙ୍ଗ୍‍ଁ ୱିଜ୍‌ନାତ୍‌ ମାରି ଆମା ୱେଡ଼ାଦୁ ପୁଜାସିନିକା ମାନାତ୍‌, ଆକା ୱେର୍‍ତା ସିତାନ୍‌ ।
ACT 21:27 ନେଗେନ୍‌କିନି ପାଣିଦି ସାତ୍ ଦିନ୍‌ ୱିଜିତି ୱେନ୍‌କା ଆସିଆ ରାଜିଦି ଏସ ଜିହୁଦି ଲୋକୁ ମନ୍ଦିର୍‌ତୁ ପାଉଲ୍‍ତିଙ୍ଗ୍‍ ସୁଡ଼ୁତାର୍‌ । ୱାର୍‌ ଆବେ ଉଣ୍ତାତିମାର୍‍ଇ ଲୋକାଙ୍ଗ୍‌ ଏଗ୍ରିସ୍‍ କିଜି ପାଉଲ୍‍ତିଙ୍ଗ୍‍ଁ ଆସ୍‌ତାର୍‌ ।
ACT 21:28 ୱାର୍‌ ଆଉଲି ଆଜି ଇର୍ହାର୍‌, “ଏ ଇସ୍ରାଏଲ୍‌ତି ଲୋକୁ, ମାଙ୍ଗିଁ ସାକା କିଦୁ ! ଇୟା ଲୋକୁ ସାରିବେଡ଼୍‍ତି ସଲ୍‍ସି ଇସ୍ରାଏଲ୍‌ତି ଲୋକା ବିରୁଦ୍‍ତାନ୍‍, ମସାଦି ନିୟମ୍‌ ନି ଇୟା ମନ୍ଦିର୍‌ ବିରଦ୍‌ତାନ୍‌ ସିକିୟା ସିଜିନାନ୍‌ । ମାରି ଇଲେଇ ୱାନ୍‌ ଏସ ଅଣଜିହୁଦି ଲୋକାଙ୍ଗ୍‌ ମନ୍ଦିର୍‌ ଲୋଇ ତାସି ଇୟା ପବିତ୍ର ବାଡିଦିଙ୍ଗ୍‍ଁ ତାଗ୍‌ଇକା କିଜିନାନ୍‍ ।”
ACT 21:29 ୱାର୍‌ ଗାଡ଼୍‌ତୁ ଏପିସସ୍‍ତି ତ୍ରପିମଦିଙ୍ଗ୍‍ଁ ପାଉଲତି ୱାଲେ ସୁଡ଼ୁତିମାରିଙ୍ଗ୍‍ଁ ଅଡ଼୍‍ବିତାର୍‍ ଜେ, ପାଉଲ ୱାନିଙ୍ଗ୍‍ ମନ୍ଦିର୍‌ତୁ ଅତାମାନାନ୍‍ ।
ACT 21:30 ୱିଜୁ ଗାଡ଼୍‌ତୁ ଜାଟି ନିଙ୍ଗିଁତାତ୍‍ । ଲୋକୁ ପାଉଲ୍‍ତିଙ୍ଗ୍‍ଁ ମନ୍ଦିର୍‌ ଆତ୍‌ରେ ଇର୍‍ସି ତାତାର୍‌ । ମନ୍ଦିର୍‌ତି ସେର୍‍ଲେଙ୍ଗ୍‌ ୱିଜୁ କେର୍‍ତା ଡ଼ିସ୍‌ତାର୍‍ ।
ACT 21:31 ରିସାଆତି ଲୋକୁ ୱିଜେରେ ପାଉଲ୍‍ତିଙ୍ଗ୍‍ଁ ଡାକ୍‍ତେଙ୍ଗ୍‍ଁ ଇଜି ଉପାୟ୍‌ କିତାର୍‍, ଏସ୍ତିୱାଲେ ୱିଜୁ ଜିରୁସାଲାମ୍‍ତୁ ଜାଟି ଜଗଡ଼ା ଆଜିନାତ୍‌ ଇଜି ରୋମିୟ ସନ୍ୟରି ନେତା କାବୁର୍‌ ୱେର୍‌ଆନ୍‌ ।
ACT 21:32 ନାସ୍ତିୱାଲେ ନେତା ଏସ ସେନାପତି ନି ସନ୍ୟରିଙ୍ଗ୍‍ଁ ଅସି ଜାଟି ଜଗଡ଼ା ଆନି ବାଡିଦୁ ଇତାନ୍‌ । ଲୋକୁ ସନ୍ୟରି ନେତେଙ୍ଗ୍‍ଁ ନି ସନ୍ୟରିଙ୍ଗ୍‍ଁ ସୁଡ଼୍‌ଜି ପାଉଲ୍‍ତିଙ୍ଗ୍‍ଁ ମାରି ମାଡ୍‌ ଡାକ୍‍ଏନ୍‍ଣ୍ତା ଡ଼ିସ୍‍ତାସିତାର୍‍ ।
ACT 21:33 ସନ୍ୟରି ନେତା ପାଉଲତିଙ୍ଗ୍‍ଁ ଆସ୍‌ସି ୱାନିଙ୍ଗ୍‍ଁ ରୁଣ୍ତି ସିକ୍‍ଣି ଦାନ୍‍ ତର୍‍ତେଙ୍ଗ୍‍ଁ ଇଜି ଆଦେସ୍‌ ସିତାନ୍‌ । ୱେନ୍‌କା ୱାନ୍‌ ୱେନ୍‌ବାତାନ୍‌, “ଇୟା ଲୋକୁ ଏନ୍‌ ମାରି ୱାନ୍‌ ଇନିକା କିତାମାନାନ୍‍ ?”
ACT 21:34 ଲୋକୁ ଗଲି ଲୋଇ ଏନ୍‌ ଏସ ରକମ୍‌ତି ମାଟା ଇଜି ଆଉଲି ଆତାର୍‌ । ଇୟାୱାଜା ଅସାନ୍ତି ଆତାତ୍‍ଜେ, ସନ୍ୟରି ନେତା ସତ୍‌ ମାଟା ଇନିକା, ଇନିକାବା ନେସ୍‌ତେଙ୍ଗ୍‌ ଆଟ୍‍ଏତାନ୍‍ । ଆବେଟ୍‌ ୱାନ୍‌ ପାଉଲତିଙ୍ଗ୍‍ଁ ସନ୍ୟର୍‌ତେବାନି ବାଡି ଲୋଇ ଅତେଙ୍ଗ୍‍ଁ ଇଜି ସନ୍ୟରିଙ୍ଗ୍‌ ଆଦେସ୍‌ ସିତାନ୍‌ ।
ACT 21:35 ୱାର୍‌ ୱାନିଙ୍ଗ୍‍ଁ ଅସି ସନ୍ୟର୍‌ତେବାନି ବାଡିଦି ପାଉଚ୍‌କୁ ଲାକ୍‌ତୁ ଇନି ୱେଡ଼ାଦୁ ୱାନିଙ୍ଗ୍‍ଁ କେର୍‍ବାଜି ତେବାଜିମାନି ଲୋକୁ ନିସା ରିସା ଆତାର୍‌ ଜେ ସନ୍ୟର୍‍ ପାଉଲ୍‍ତିଙ୍ଗ୍‍ଁ ପିଣ୍ତ୍‍ତା ଅତାର୍‌ ।
ACT 21:36 ଲୋକୁ ୱିଜେରେ ୱାନି ୱେନ୍‌କା ୱେନ୍‌କା ୱାଜି ଆଉଲି ଆଜି ଇଜିମାର୍ହାର୍‍, “ୱାନିଙ୍ଗ୍‍ଁ ଡାକ୍‍ଦୁ ।”
ACT 21:37 ସନ୍ୟର୍‍ ପାଉଲତିଙ୍ଗ୍‍ଁ ସନ୍ୟର ତେବାନି ବାଡି ଲୋଇ ଅନି ୱାଲେ ୱାନ୍‌ ସନ୍ୟରି ନେତେଙ୍ଗ୍‍ଁ ଇର୍ହାନ୍‌ : “ନାନୁ ନିଙ୍ଗିଁ ଏସ ମାଟା ଇନ୍‍ଡ୍ରେଙ୍ଗ୍‍ଁ ଆଟ୍‍ନାନ୍‌ ନୋ ?” ସନ୍ୟରି ନେତା ୱେନ୍‌ବାତାନ୍‌, “ନିନୁ ତୋ ଗ୍ରିକ୍‌ ୱାର୍‍ଗିଜିନି ।
ACT 21:38 ଆର୍‍ତିଙ୍ଗ୍‍ଁ ଏସ ଦିନ୍‌ ଆଗ୍‌ଡ଼ି ମିସର୍‍ ଏମେ ଲୋକୁ ଜୁଦ୍‍ କିଜି ଚାରି ହାଜାର୍‌ ଜୁଦ୍‍ ସାମାନ୍‍ ଆସ୍‌ତି କାଙ୍ଗାଁର୍‌ଆଙ୍ଗ୍‌ ଅସି ମରୁବୁମିଦୁ ଇତା ମାର୍ହାନ୍‍, ନିନୁ ତୋ ଆୟା ଲୋକୁ ସିଲେ ?”
ACT 21:39 ପାଉଲ ଇର୍ହାନ୍‌, “ସିଲିସିଆଦି ତାର୍ସସ୍‍ତୁ ଜନମ୍‌ ଆତିମାନି ନାନୁ ଅରେନ୍‌ ଜିହୁଦି, ଉନ୍‌ଡ୍ରି ପେରି ଗାଡ଼୍‌ତି ଲୋକୁ । ଇୟା ଲୋକାଙ୍ଗ୍‌ ବୁଜାକିଜି ଇନ୍‍ଡ୍ରେଙ୍ଗ୍‍ଁ ଇଜି ଦୟା କିଜି ନାଙ୍ଗିଁ ସାରି ସିଦା ।
ACT 21:40 “ସନ୍ୟରି ନେତା ୱାନିଙ୍ଗ୍‍ଁ ସାରି ସିତାନ୍‌ଆକା ପାଉଲ ପାଉଚ୍‌ ମୁସ୍‌କୁ ନିଲ୍‍ସି ଲୋକାଙ୍ଗ୍‌ ଆଲେଜ ମାନ୍‍ଡ୍ରେଙ୍ଗ୍‍ଁ ଇଜି କିୟୁ ପେର୍‌ଜି ଜୁଟ୍‌ସି ୱେର୍‌ତାନ୍‌ । ୱାର୍‌ ଆଲେତି ୱେନ୍‌କା ପାଉଲ ଏବ୍ରି ଭାସାଦାନ୍‍ ଇର୍ହାନ୍‌ :
ACT 22:1 “ତଡ଼ାନ୍‌କୁ ମାରି ବୁବାର୍‍, ମି ଆଗ୍‌ଡ଼ି ନିଜେ ତରିଟାନ୍‍ ନାନୁ ଆମାକା ଇଜିନା, ଆକା ୱେନ୍‌ଡ୍ରୁ !”
ACT 22:2 ୱାରି ୱାଲେ ୱାନ୍‌ ଏବ୍ରି ବାସାଦାନ୍‍ ମାଟା ୱାର୍‍ଗିଜିନିକା ୱେନ୍‌ଜି ୱାର୍‌ ମାରି ଆଲେତାର୍‍ ମାରି ପାଉଲ ଇନ୍‍ଡ୍ରେଙ୍ଗ୍‍ଁ ଆସ୍‌ତାନ୍‌ :
ACT 22:3 ନାନୁ ଅରେନ୍‌ ଜିହୁଦି, ସିଲିସିଆଦି ତାର୍ସସ୍‍ତୁ ନା ଜନମ୍‌, ମାତର୍‌ ନାନୁ ଜିରୁସାଲାମ୍‍ତୁ ପିରିତା ମାର୍ହା ମାରି ଗମଲିଏଲତି ଅରେନ୍‌ ସିସୁ ମାର୍ହା । ମା ଡକ୍ରାଦାଦାରି ନିୟମ୍‌ ନାନୁ ଟିକ୍‍ତାନ୍‍ ଅଜାତା ମାର୍ହା ମାରି ମି ୱାଜା ମାପୁରୁଦି ଉଣ୍ତିଙ୍ଗ୍‍ଁ ୱେଡ଼ିକା ମାର୍ହା ।
ACT 22:4 ନାନୁ ଇୟା ସାରିଦୁ ସନି ଲୋକା ମୁସ୍‌କୁ ଜାଟି କିଜି ୱାରିଙ୍ଗ୍‍ଁ ଜିବନ୍‌ତୁ ଡାକ୍‍ସି ମାର୍ହା । ମେମାରି ନି ଆଇମା ୱିଜେରିଙ୍ଗ୍‍ଁ ତର୍‌ସି ଜଇଲ୍‌ତୁ ଅସି ମାର୍ହା ।
ACT 22:5 ନା ଇୟା ମାଟା ସତ୍‌ ଜେ, ପେରି ଜାଜକ ନି ପେରି ଲୋକାମିଟିଙ୍ଗ୍‍ତି ସବାଦି ୱିଜେରେ ତେନି ସାକି । ଇୟା ଲୋକାଙ୍ଗ୍‌ ତର୍‌ସି ମାରି ସିକିଣିଦାନ୍‍ ତର୍‌ସି ଦଣ୍ଡ୍‌ ସିଦେଙ୍ଗ୍‌ ଇଜି ଜିରୁସାଲାମ୍‍ତୁ ତାତେଙ୍ଗ୍‍ଁ ଇଜି ନାନୁ ପେରି ଜାଜକତିମାଣାନ୍‌ ସିଟି ଅସି ଦାମାସ୍‍କସ୍‍ତୁ ମାନି ଜିହୁଦି ତଡ଼ାନ୍‌କା ଲାକ୍‌ତୁ ସର୍‌ଆ ।
ACT 22:6 “ନାନୁ ସଲ୍‍ସି ଏସ୍ତିୱାଲେ ଦାମାସ୍‍କସ୍‍ତି ଲାକ୍‌ତୁ ଆଜିମାର୍ହା, ମାଦ୍‌ଲାମ୍‌ ବେଡ଼ାଦୁ ବାଦଡ଼୍‍ତାନ୍‍ ଉନ୍‌ଡ୍ରି କାସ୍‍ନି ଜାୟ୍‌ ଆୟାଦାପ୍ରେନେ ନା ସାରିବେଡ଼୍‍ତି ତରାୟ୍‍ ଆତାତ୍‌ ।
ACT 22:7 ନାନୁ ବୁମିଦୁ ମକମ୍‌ ପାଡ଼୍‍କ୍‍ସି ଆର୍‍ତା ମାରି ନା ଉଣ୍ତିଙ୍ଗ୍‍ଁ ମାଟା ୱେର୍‌ଆ, ‘ସାଉଲ, ସାଉଲ’ ନିନୁ ଏନ୍ଦା ନାଙ୍ଗିଁ କାସ୍ଟୁ ସିଜିନି ?
ACT 22:8 ନାନୁ ୱେନ୍‍ବାତା, ପ୍ରବୁ, ନିନୁ ଏନ୍‌ ? ୱାନ୍‌ ନାଙ୍ଗିଁ ଇର୍ହାନ୍‌, ନିନୁ ଆମାୱାନିଙ୍ଗ୍‍ଁ କାସ୍ଟୁ ସିଜିନି, ନାନୁ ଆୟା ନାଜରିୟତିୟଦି ଜିସୁ ।
ACT 22:9 ନା ୱାଲେ ମାର୍‍ଇ ଲୋକୁ ଆୟା ଜାୟ୍‌ ସୁଡ଼ୁତାର୍‌, ମାତର୍‌ ନା ୱାଲେ ୱାର୍‌ଗିଜି ମାନି ଲୋକ୍‌ତି ବଲ୍ ୱେନ୍‍ଡ୍ରେଙ୍ଗ୍‍ଁ ଆଟ୍‌ଏତାର୍‌ ।
ACT 22:10 ନାନୁ ୱେନ୍‍ବାତା, ପ୍ରବୁ, ନାନୁ ଇନିକା କିନା ? ପ୍ରବୁ ନାଙ୍ଗିଁ ଇର୍ହାନ୍‌, ନିଙ୍ଗ୍‍ଆ, ଦାମାସ୍‍କସ୍‍ତୁ ସାଙ୍ଗ୍‍ଆ, ମାପୁରୁ ନି ଉଣ୍ତିଙ୍ଗ୍‍ଁ ଏମେ ପାଣି ଇଟ୍‌ତାମାନାନ୍‌, ଆବେନୁ ନିଙ୍ଗିଁ ଆକା ଜାଣେ କିନାନ୍‌ ।
ACT 22:11 ଜାୟ୍‍ତି ନାଣ୍ତ କାସ୍‍ନି ମାଣାନ୍‌ ନାନୁ କାଣା ଆତା ସର୍‌ଆ । ଆୟାଉଣ୍ତିଙ୍ଗ୍‌ ନା ୱାଲେ ଅର୍‌ସେ ସନିକାର୍‍ ନା କିୟୁ ଆସ୍‌ସି ନାଙ୍ଗିଁ ଦାମାସ୍‍କସ୍‍ତୁ ଅତାର୍‌ ।”
ACT 22:12 “ଆୟା ଗାଡ଼୍‌ତୁ ହନନିୟ ଦର୍‌ତି ଅରେନ୍‌ ଦାର୍ମୁଦି ଲୋକୁ ମାର୍ହାନ୍‍ । ୱାନ୍‌ ମା ନିୟମ୍‌ ମାନାଜି ମାର୍ହାନ୍‍ ମାରି ଆବେ ବାସା କିଜିମାନି ଜିହୁଦି ଲୋକୁ ୱିଜେରେ ୱାନିଙ୍ଗ୍‍ଁ ନାଣ୍ତ ମାନାଜି ମାର୍ହାର୍‌ ।
ACT 22:13 ୱାନ୍‌ ନା ଲାକ୍‌ତୁ ୱାଜି ନା ଲାକ୍‌ତୁ ନିଲ୍‍ସି ଇର୍ହାନ୍‌, ତଡ଼ାନ୍‌ ସାଉଲ ନି ସୁଣି ସାକ୍ତି ପୟ୍‍ଆ । ଟିକ୍‌ ଆୟା ୱେଡ଼ାଦୁ ନାନୁ ମାରିଡ଼େସି ସୁଣିସାକ୍ତି ପୟ୍‌ଜି ୱାନିଙ୍ଗ୍‍ଁ ସୁଡ଼ୁଦେଙ୍ଗ୍‌ ଆଟ୍‍ତା ।
ACT 22:14 ୱାନ୍‌ ଇର୍ହାନ୍‌, ମା ଡକ୍ରାଦାଦାରି ମାପୁରୁ ନିଙ୍ଗିଁ ୱାନି ମାଟା ନେସ୍‍ତେଙ୍ଗ୍‍ଁ ଇଜି, ୱାନି ଦାର୍ମୁ ସେବକତିଙ୍ଗ୍‍ଁ ସୁଡ଼ୁଦେଙ୍ଗ୍‌ ଇଜି ମାରି ୱାନି ମାଟା ୱେନ୍‍ଡ୍ରେଙ୍ଗ୍‍ଁ ଇଜି ବାସେ କିତାମାନାନ୍‍ ।
ACT 22:15 ଇରିଙ୍ଗ୍‍ଁ ନିନୁ ଆମାକା ସୁଡ଼ୁତିମାନି ମାରି ୱେର୍‍ଇମାନି, ଆକା ୱିଜେରରି ଲୋକା ଲାକ୍‌ତୁ ୱେର୍‍ତେଙ୍ଗ୍‍ଁ ଇଜି ନିନୁ ୱାନି ସାକି ଆନି ।
ACT 22:16 ମାରି ଏନ୍ଦା ୱେଡ଼ା କିଜିନି ? ନିଙ୍ଗିଁଆ, ଡୁବନ୍‌ ଅଆ ମାରି ୱାନିମାନୁ ପାର୍‌ତନା କିନି ମାଣାନ୍‌ ନି ପାପ୍‌ ୱିଜୁ ନରାୟ୍‍ ଆପିତ୍‌ ।”
ACT 22:17 “ନାନୁ ଜିରୁସାଲାମ୍‍ତାନ୍‍ ଡ଼େସି ସଲ୍‍ସି ଆବେ ମନ୍ଦିର୍‌ତୁ ପାର୍‌ତନା କିଜିମାନିୱାଲେ, ପ୍ରବୁଦି ଦର୍ସନ୍‌ ପୟ୍‍ତା ।
ACT 22:18 ଆମାମାନୁ ନାନ୍‌ ପ୍ରବୁଙ୍ଗୁଁ ସୁଡ଼ୁତା, ୱାନ୍‌ ନାଙ୍ଗିଁ ଇର୍ହାନ୍‌, ବେଗି ଜିରୁସାଲାମ୍‌ ଡ଼ିସ୍‍ଆ, ଇରିଙ୍ଗ୍‍ଁ ଇବେଣି ଲୋକୁ ନା ବିସୟ୍‌ତାନ୍‌ ନି ସାକି ମାନାଏର୍‍ ।
ACT 22:19 ନାନୁ ଇର୍‌ଆ, ପ୍ରବୁ, ନାନୁ ପାର୍‍ତନାକିନି ଇଲ୍‌କାଙ୍ଗ୍‌ ସଲ୍‍ସି ନିବାନୁ ବିସ୍‌ବାସ୍‌ କିଜିମାନି ଲୋକାଙ୍ଗ୍‌ ଏଣ୍ତେସ୍‌ ତର୍‍ତାମାର୍ହା ମାରି ଡାକ୍‍ତା ମାର୍ହା, ଇକା ୱାର୍‌ ନେଗେନ୍‌ କିଜି ନେସ୍‌ନାର୍‌ ।
ACT 22:20 ମାରି ଏସ୍ତିୱାଲେ ନି ସାକି ସ୍ତିପାନ୍‍ତିଙ୍ଗ୍‍ଁ ନେତେର୍‌ ସାୟାମାର୍‌ଗା ଡାକ୍‍ତାର୍‍, ନାନୁ ନିଜେ ଆବେ ମାର୍ହା; ୱାନିଙ୍ଗ୍‍ଁ ଜିବନ୍‌ତୁ ଡାକ୍‍ତେଙ୍ଗ୍‍ଁ ଇଜିନା ରାଜିଆନିକା ୱେର୍‍ତା ମାର୍ହା ମାରି ୱାନିଙ୍ଗ୍‌ ଡାକ୍‍ନିୱାରି ଆଙ୍ଗିଁଙ୍ଗ୍‌ ୱିଜୁ କାପ୍‍କିତା ମାର୍ହା ।
ACT 22:21 ପ୍ରବୁ ନାଙ୍ଗିଁ ଇର୍ହାନ୍‌, ସାଙ୍ଗ୍‍ଆ, ନାନୁ ନିଙ୍ଗିଁ ନାଣ୍ତ ଆକ ଅଣଜିହୁଦି ଲୋକା ଲାକ୍‌ତୁ ପକ୍‍ନା ।”
ACT 22:22 ପାଉଲ ଇୟା ମାଟା ଇନି ସାନ୍ଦି ଲୋକୁ ମନ୍‍ ସିଜି ୱେନ୍‍ଜିମାର୍ହାର୍‍, ମାତର୍‌ ତାନିୱେନ୍‍କା ୱାର୍‌ ନାଣ୍ତ ଆଉଲି ଆଜି ଇର୍ହାର୍‌, “ୱାନିଙ୍ଗ୍‍ଁ ଦୁନିଆଦାନ୍‌ ସପ୍‍ତୁ ! ୱାନିଙ୍ଗ୍‌ ସାୟାମାର୍‌ଗା ଡାକ୍‍ତୁ ! ୱାନ୍‌ ଜିନିକା ଜଗ୍‌ ସିଲେ !”
ACT 22:23 ୱାର୍‌ ଆଉଲି ଆଜିମାର୍ହାର୍‍, ୱାତିଙ୍ଗ୍‍ ଇପ୍‍ସିମାର୍ହାର୍‍ ମାରି ମୁସ୍‌କୁ ଦୁଡ଼ି ପୋକ୍‌ସିମାର୍ହାର୍‍ ।
ACT 22:24 ପାଉଲ୍‍ତିଙ୍ଗ୍‍ଁ ଦୁର୍ଗ ଲୋଇ ଅନି ଉଣ୍ତିଙ୍ଗ୍‍ଁ ରୋମିୟ ସନ୍ୟରି ନେତା ସନ୍ୟରିଙ୍ଗ୍‌ ଆଦେସ୍‍‍ ସିତାନ୍‌ ମାରି ଜିହୁଦି ଲୋକୁ ଏନ୍ଦା ୱାନି ବିରଦ୍‌ତାନ୍‌ ଇୟାୱାଜା ଆଉଲି ଆଜିନାର୍‌, ଆକା ନେସ୍‍ତେଙ୍ଗ୍‍ଁ ଇଜି ୱାନିଙ୍ଗ୍‍ଁ କରଡା ଡାକିସ୍‍ତେଙ୍ଗ୍‍ଁ ଆଦେସ୍‌ ସିତାନ୍‌ ।
ACT 22:25 ମାତର୍‌ ୱାର୍‌ ୱାନିଙ୍ଗ୍‍ଁ ତର୍‍ନି ୱାଲେ ପାଉଲ ଆବେ ମାନି ପାଣିକିନିକାନ୍‌ ଇର୍ହାନ୍‌, “ଇନି ନିନ୍ଦାଦୁ ଇୟାସାନ୍ଦି ବିଚାରିତ ଆଇ ମାନି ଅରେନ୍‌ ରମିୟ ଲୋକ୍‍ତିଙ୍ଗ୍‍ଁ କରଡା ଡାକ୍‍ନିକା ଇନିକା ରିତିନିତି ମାନାତ୍‌ ?”
ACT 22:26 ଇକା ୱେନ୍‌ଜି ପାଣିକିନିକାନ୍‌ ସଲ୍‍ସି ସନ୍ୟରି ନେତେଙ୍ଗ୍‍ଁ ଇର୍ହାନ୍‌, “ନିନୁ ଇନିକା କିଜିନି ? ଇୟା ଲୋକୁ ଜେ ଅରେନ୍‌ ରୋମିୟ ଲୋକୁ !”
ACT 22:27 ସନ୍ୟରି ନେତା ପାଉଲ୍‍ତି ଲାକ୍‌ତୁ ସଲ୍‍ସି ୱେନ୍‌ବାତାନ୍‌, “ନିନୁ ଇନିକା ଅରେନ୍‌ ରୋମିୟ ଲୋକୁ ?” ପାଉଲ ଇର୍ହାନ୍‌, “ହୁଁ ।”
ACT 22:28 ସନ୍ୟରି ନେତା ଇର୍ହାନ୍‌, “ଗାଦି ଡାବୁଙ୍ଗୁଁ ସିଜି ନାନୁ ଅରେନ୍‌ ରୋମିୟ ଲୋକୁ ଆତାମାନା ।” ପାଉଲ ଇର୍ହାନ୍‌, “ମାତର୍‌ ନାନୁ ଜନମ୍‍ତାନ୍‍ ରୋମିୟ ଲୋକୁ ।”
ACT 22:29 ଦାପ୍ରେ ଦାପ୍ରେ ଏମେ ଲୋକୁ ପାଉଲତିଙ୍ଗ୍‍ଁ ୱେନ୍‍ବାଦେଙ୍ଗ୍‍ଁ ସଲ୍‍ସି ମାର୍ହାର୍‌, ୱେନ୍‌କା ଗୁସାଜିସର୍ହାର୍‍ ମାରି ପାଉଲ ଅରେନ୍‌ ରୋମିୟ ଲୋକୁ ଆତିମାନିକା ନେସ୍‌ସି ମାରି ୱାନ୍‌ ଜେ ୱାନିଙ୍ଗ୍‍ଁ ସିକିଣିଦୁ ତର୍‌ତେଙ୍ଗ୍‍ଁ ଇଜି ଆଦେସ୍‌ ସିତାମାନାନ୍‌, ଇକା ନେସ୍‌ସି ସନ୍ୟରି ନେତା ନାଣ୍ତ ତିଲାତାନ୍‍ ।
ACT 22:30 ଜିହୁଦି ଲୋକୁ ପାଉଲତି ବିରଦ୍‌ତାନ୍‌ ଇନି ଦାବି କିତାମାନାର୍‍, ଆକା ସତେନେ ନେସ୍‌ତେଙ୍ଗ୍‌ ସନ୍ୟରି ନେତା ମାରିନାଣ୍ତିଙ୍ଗ୍‍ଁ ପାଉଲତିଙ୍ଗ୍‍ଁ ଗାଟି ୱିଜୁ କୁତ୍‍ତାନ୍‍ ପେରିସଭାଦି ପୁରା ମିଟିଙ୍ଗ୍‍ଁ କୁକିସ୍‍ କିଦେଙ୍ଗ୍‌ ଇଜି ପେରି ଜାଜକରିଙ୍ଗ୍‍ଁ ଆଦେସ୍‌ ସିତାନ୍‌ । ତାନିୱେନ୍‍କା ପାଉଲ୍‍ତିଙ୍ଗ୍‍ଁ ଅସି ୱାରି ଆଗ୍‌ଡ଼ି ନିଲ୍‌ପ୍‍ତାର୍‌ ।
ACT 23:1 ପାଉଲ ପେରିସବା ତରିନ୍‌ ସିଦା ସୁଡ଼୍‌ଜି ଇର୍ହାନ୍‌, “ଏ ଇସ୍ରାଏଲ୍‌ତି ତଡ଼ାନ୍‌କୁ ! ନେର୍‌ ସାନ୍ଦି ମାପୁରୁଦି ଆଗ୍‌ଡ଼ି ନାନୁ ଏଣ୍ତେସ୍‌ ଜିତାମାନା, ଆୟା ବିସୟ୍‌ତାନ୍‌ ନା ମନ୍‍ ପୁରା ନେଗିକା ।”
ACT 23:2 ଇୟା ମାଟା ୱେନ୍‌ଜି ପେରି ଜାଜକ ହନନିୟ ପାଉଲତି ମକମି ସାପୁଡ଼ୁ ଡାକ୍‍ତେଙ୍ଗ୍‍ଁ ପାଉଲତି ଲାକ୍‌ତୁ ନିର୍‍ଇ ମାନି ଲୋକାଙ୍ଗ୍‌ ଆଦେସ୍‌ ସିତାନ୍‌ ।
ACT 23:3 ପାଉଲ ୱାନିଙ୍ଗ୍‍ଁ ଇର୍ହାନ୍‌, “ଏ ଅଡ଼ିନି ପେଡ଼୍‍ୱା ଉସ୍‍ତି ଗଡା, ମାପୁରୁ ସତେନେ ନିଙ୍ଗିଁ ଡାକ୍‌ନାନ୍‍ । ନିୟମ୍‌ ଇସାବ୍‌ତାନ୍‌ ନା ବିସାର୍‌ କିଦେଙ୍ଗ୍‍ଁ ନିନୁ ଆବେ ବାସ୍‍ତିମାନି, ଜଦିବା ନାଙ୍ଗିଁ ଡାକ୍‍ତେଙ୍ଗ୍‍ଁ ଇଜି ଆଦେସ୍‌ ସିଜି ନିନୁ ନିୟମ୍‌ ରୁକ୍‍ସିନି ।”
ACT 23:4 ପାଉଲତି ଲାକ୍‍ତୁମାନି ଲୋକୁ ୱାନିଙ୍ଗ୍‌ ଇର୍ହାର୍‌, “ନିନୁ ମାପୁରୁଦି ପେରି ଜାଜକତିଙ୍ଗ୍‍ଁ ଅପମାନ୍‍ କିଜିନି !”
ACT 23:5 ପାଉଲ ଇର୍ହାନ୍‌, “ଏ ଇସ୍ରାଏଲ୍‌ ତଡ଼ାନ୍‌କୁ, ୱାନ୍‌ ନେତାର୍‌ରି ପେରି ଜାଜକ ଇଜି ନାନୁ ନେସେଏ ମାର୍ହା । ଦାର୍ମୁସାସ୍ତ୍ରଦୁ ରାସାତାମାନାତ୍‌, ମିର୍‌ ନିଜେଦି ଲୋକା ସାସନ୍‍କିନିୱାନିଙ୍ଗ୍‍ଁ ତାଗ୍‌ଇ ମାଟା ଇନ୍‌ମା ।”
ACT 23:6 ଜିହୁଦି ଦଲ୍‍ତୁ ଏସ ପାରୁସିର୍‌ ନି ମାରି ଏସ ସାଦୁକିର୍ ମାନିକା ସୁଡ଼୍‌ଜି ପାଉଲ ପେରିସଭାଦିଙ୍ଗ୍‍ଁ କୁକ୍‌ସି ଇର୍ହାନ୍‌, “ଏ ଇସ୍ରାଏଲ୍‌ତି ତଡ଼ାନ୍‌କୁ, ନାନୁ ଅରେନ୍‌ ପାରୁସି, ପାରୁସି କୁଟୁମ୍‌ତୁ ନା ଜନମ୍‌ । ସାତି ୱାରି ମାରିଡ଼େସି ନିଙ୍ଗ୍‍ଁନିମାନୁ ନାନୁ ଆସା କିନି ଉଣ୍ତିଙ୍ଗ୍‍ଁ ଇବେ ନା ବିସାର୍‌ କିଜିନାର୍‍ ।”
ACT 23:7 ୱାରି ଲୋଇ ଦଲ୍‌ ଏର୍‌ପିସିସାନିକା ମାରି ୱାନ୍‌ ଟିକ୍‌ ଇୟା ମାଟା ଇନି ସାଙ୍ଗେ ସାଙ୍ଗେ ପାରୁସି ନି ସାଦୁକିରି ଲୋଇ ଆଉଲି ଆରାମ୍‌ ଆତାତ୍‌ ।
ACT 23:8 ଇରିଙ୍ଗ୍‍ଁ ସାଦୁକିରି ଇସାବ୍‌ତାନ୍‌ ସାତି ଲୋକା ମାରିଡ଼େସିନିଙ୍ଗିଁକା ସିଲେତ୍‌, ମୁସ୍‌କୁପୁର୍‌ତି ଦୁତ୍‌ ମାରି ଆତ୍ମେଙ୍ଗାଁ ପେଡେନ୍‌ ସିଲେତ୍‌; ମାତର୍‌ ପାରୁସିର୍‌ ଇୟା ମୁଣ୍ତ୍ରି ବିସୟ୍‌ତାନ୍‌ ବିସ୍‌ବାସ୍‌ କିନାର୍‌ ।
ACT 23:9 ୱାରି ଆଉଲି ନାଣ୍ତ ଆଦେଙ୍ଗ୍‌ ଆସ୍‌ତାତ୍‌ ମାରି ପାରୁସିର୍‌ ଦଲତି ଏସ ଦାର୍ମୁଗୁରୁର୍‌ ନିଲ୍‍ସି ଟାଟ୍‍ତାନ୍‍ ଇର୍ହାର୍‌, “ମାପ୍‌ ୱେନିମାନୁ ଇନି ଦସ୍‌ ପେଏଜିନାପ୍‍ ! ସତେନେ ୱାନି ୱାଲେ ଅରେନ୍‌ ଆତ୍ମା ବା ମୁସ୍‌କୁପୁର୍‌ତି ଦୁତ୍‍ ମାଟା ଇନାମାନାନ୍‍ ।”
ACT 23:10 ଆସ୍‍ସିସାନିକା ନିସା ପେରିକା ଆତାତ୍‍ଜେ, ଲୋକୁ ପାଉଲତିଙ୍ଗ୍‍ଁ କୟ୍‍ଜି ମକା ମକା କିନାର୍‌ ଇଜି ସନ୍ୟରି ନେତା ତିଲାତାନ୍‍ । ଆଦେଙ୍ଗ୍‌ ୱାନ୍‌ ଜାଟିକିନିୱାରି ଲୋଇରାନ୍‌ ପାଉଲତିଙ୍ଗ୍‍ଁ ରକିୟା କିଜି ୱାନିଙ୍ଗ୍‍ଁ ଦୁର୍ଗ ଲୋଇ ଅତେଙ୍ଗ୍‌ ଇଜି ସନ୍ୟରିଙ୍ଗ୍‌ ଆଦେସ୍‌ ସିତାନ୍‌ ।
ACT 23:11 ଆୟା ନାଡ଼ା ପ୍ରବୁ ପାଉଲତି ଲାକ୍‌ତୁ ନିଲ୍‍ସି ଇର୍ହାନ୍‌, “ସାସ୍‌ ଆସ୍‌ଆ ! ନିନୁ ଇବେ ଜିରୁସାଲାମ୍‍ତୁ ନା ଉଣ୍ତିଙ୍ଗ୍‍ଁ ସାକି ସିତିମାନି । ରୋମ୍‍ତୁ ବା ନିନୁ ସତେନେ ଆୟାୱାଜା ସାକି ସିନି ।”
ACT 23:12 ମାରିନାଣ୍ତିଙ୍ଗ୍‍ଁ ସାଲ୍‍ଦି ଏସ ଜିହୁଦି ଲୋକୁ ଉଣ୍ତାଜି ଉନ୍‌ଡ୍ରି ଉପାୟ୍‌ କିତାର୍‍ । ପାଉଲତିଙ୍ଗ୍‍ଁ ସାୟାମାର୍‍ଗା ଡାକ୍‍ଇ ସାନ୍ଦି ୱାର୍‌ ଉଣୁଏପ୍‌ ଇଜି ପାର୍‌ମାଣ୍‌ କିତାର୍‍ ।
ACT 23:13 ଚାଲିସ୍‍ଲୋକ୍‌ତାନ୍‍ ନାଣ୍ତ ଲୋକୁ ଇୟା ଉପାୟ୍‍କିତାର୍‍ ।
ACT 23:14 ୱାର୍‌ ସଲ୍‍ସି ପେରି ଜାଜକ ନି ଜିହୁଦି ନେତାର୍‍ରିଙ୍ଗ୍‌ ଇର୍ହାର୍‌, “ପାଉଲତିଙ୍ଗ୍‍ଁ ସାୟାମାର୍‌ଗା ଡାକ୍‍ଇ ସାନ୍ଦି ଇନିକା ବା ଉଣୁଏପ୍‌ ଇଜି ମାପ୍‌ ଉନ୍‌ଡ୍ରି ଡାଟ୍‍ତାନ୍‌ ପାର୍‌ମାଣ୍‌ କିତାମାନାପ୍‍ ।
ACT 23:15 ଆଦେଙ୍ଗ୍‍ଁ ୱାନି ବିସୟ୍‌ତାନ୍‌ ନାଣ୍ତ ସତ୍‌ ମାଟା ନେସ୍‌ନି ସାଲାକି ତର୍‌ସି ପେରିସଭା ଆଗ୍‌ଡ଼ି ନି ମି ଲାକ୍‌ତୁ ପାଉଲତିଙ୍ଗ୍‍ଁ ମାରି ଉନ୍‌ଡ୍ରି ଦେବା ତାତେଙ୍ଗ୍‍ଁ ଇଜି ରୋମିୟ ସନ୍ୟରି ନେତେଙ୍ଗ୍‍ଁ ବାତିଙ୍ଗ୍‍ଁ ମାଲ୍‍ଦୁ । ମାତର୍‌ ୱାନ୍‌ ଇବେ ୱାନି ଆଗ୍‌ଡ଼ି ସାରିଦୁ ମାପ୍‌ ୱାନିଙ୍ଗ୍‍ଁ ସାୟାମାର୍‍ଗାଡାକ୍‍ତେଙ୍ଗ୍‌ଁ ଇଜି ତିଆର୍‌ ଆନାମାନାପ୍‍ ।”
ACT 23:16 ମାତର୍‌ ପାଉଲତି ବାଣେଜେଙ୍ଗ୍‌ ଇୟା ଉପାୟ୍‌ ମାଟା ୱେନ୍‌ଜି, ଦୁର୍ଗ ଲୋଇ ସଲ୍‍ସି ପାଉଲତିଙ୍ଗ୍‍ଁ ଇକା ୱେର୍‌ତାନ୍‌ ।
ACT 23:17 ପାଉଲ ରୋମିୟ ପାଣିକିନିୱାରି ଲୋଇ ଅରେନ୍‌ୱାନିଙ୍ଗ୍‍ଁ କୁକିସି ଇର୍ହାନ୍‌, “ଇୟା ମୁରୁଲିଙ୍ଗ୍‍ଁ ସନ୍ୟରି ନେତା ଲାକ୍‌ତୁ ଅଆ, ୱାନ୍‌ ୱାନିଙ୍ଗ୍‍ଁ ଏସ ଇନିକା ମାଟା ମାନାତ୍‌ ।”
ACT 23:18 ପାଣିକିନିକାନ୍‌ ୱାନିଙ୍ଗ୍‍ଁ ସନ୍ୟରି ନେତା ଲାକ୍‌ତୁ ଅସି ଇର୍ହାନ୍‌, “ତରାତିମାନି ପାଉଲ ନାଙ୍ଗିଁ କୁକ୍‌ସି ଇୟା ମୁରୁଲିଙ୍ଗ୍‍ଁ ନି ଲାକ୍‌ତୁ ତାତେଙ୍ଗ୍‍ଁ ଇର୍ହାନ୍‌ । ନିଙ୍ଗିଁ ୱାନ୍‌ ଏସ ଇନି ମାଟା ମାନାତ୍‌ ।”
ACT 23:19 ସନ୍ୟରି ନେତା ୱାନି କିୟୁ ଆସ୍‌ସି ନିଜେ ଅତାତ୍‍ ମାରି ୱେନ୍‌ବାତାନ୍‌, “ନାଙ୍ଗିଁ ଇନିକା ୱେର୍‌ନିକା ମାନାତ୍‌, ଇନ୍‌ଆଁ !”
ACT 23:20 ମୁରୁଲିକଡ଼ ଇର୍ହାନ୍‌, “ଜିହୁଦି ଅଦିକାରିର୍‍ ଉପାୟ୍‌ କିତାମାନାର୍‍ ଜେ, ପେରିସଭା ପାଉଲତି ବିସୟ୍‌ତାନ୍‌ ନାଣ୍ତ୍‍ ସତ୍‌ ମାଟା ନେସ୍‍ତେଙ୍ଗ୍‍ଁ ବଦା କିତାମାନାର୍‍ ଇଜି ସାଲାକିଜି ୱାନିଙ୍ଗ୍‍ଁ ପେରିସଭାଦୁ ଅତେଙ୍ଗ୍‍ଁ ଇଜି ନିଙ୍ଗିଁ ବାତିଙ୍ଗ୍‍ଁ ମାଲ୍‍ନାର୍‍ ।
ACT 23:21 ମାତର୍‌ ୱାରି ମାଟା ୱେନ୍‌ମା; ଇରିଙ୍ଗ୍‍ଁ ସାଲିସ୍‍ତାନ୍‍ ନାଣ୍ତ ଲୋକୁ ୱାନିଙ୍ଗ୍‍ଁ ସାୟାମାର୍‌ଗା ଡାକ୍‍ଇ ସାନ୍ଦି ଉଣୁଏର୍‌ ଇଜି ପାର୍‌ମାଣ୍‌ ଅସି କାପ୍‌କିତାମାନାର୍ । ଇଲେଇ ୱାର୍‌ ନି ମାଟାଦିଙ୍ଗ୍‌ କାପ୍‌କିଜି ଜାଗାର୍‌ତା ମାନାର୍‌ ।”
ACT 23:22 “ନିନୁ ନାଙ୍ଗିଁ ଇକା ୱେର୍‍ତିମାନି ଇଜି ଏଙ୍ଗ୍‍ଁ ଇନ୍‍ମା ।” ସନ୍ୟରି ନେତା ଇକା ୱେର୍‌ସି ମୁରୁଲିଙ୍ଗ୍‍ଁ ପକ୍‌ତାନ୍‌ ।
ACT 23:23 ସନ୍ୟରି ନେତା ୱାନି ଆଡ୍‍ଗିମାନି ରିଏରି ପାଣିକିନିୱାରିଙ୍ଗ୍‍ଁ କୁକିସ୍‍କିଜି ଇର୍ହାନ୍‌, “ନେରୁ ନାଡ଼ା ନଅଟା ବେଡ଼ାଦୁ କାଇସରିଆଦୁ ସନ୍‍ଡ୍ରେଙ୍ଗ୍‍ଁ ଇଜି ସତୁରି ଲୋକୁ ଗଡ଼ାସାଲାକିନିୱାରିଙ୍ଗ୍‍ଁ ମାରି ଦୁଇସ ଇଟା ଆସ୍‍ନିୱାରିୱାଲେ ଦୁଇସ ବୁଲାନି ସନ୍ୟରିଙ୍ଗ୍‍ଁ ତିଆର୍‌ କିଦୁ ।
ACT 23:24 ପାଉଲତି ସନି ଉଣ୍ତିଙ୍ଗ୍‍ଁ ଏସ ଗଡ଼େଙ୍ଗ୍‍ଁ ସିଦୁ ମାରି ନେଗେନ୍‍ତାନ୍‍ ୱାନିଙ୍ଗଁ ସାସନକିନି ପେଲିକସ୍‍ତି ଲାକ୍‌ତୁ ଅତୁ ।”
ACT 23:25 ସନ୍ୟରି ନେତା ଇୟାୱାଜା ଆକୁ ରାସ୍‌ତାନ୍‌ :
ACT 23:26 “ସନ୍‌ମାନ୍‌ତି ସାସନ୍‌କିନି ପେଲିକସ୍‍ତିଙ୍ଗ୍‌ କ୍ଳଡିଅସ୍‍ ଲୁସିୟାଦି ନମସ୍କାର୍‌ ଆପିତ୍‌ ।
ACT 23:27 ଜିହୁଦି ଲୋକୁ ଇୟା ଲୋକ୍‍ତିଙ୍ଗ୍‍ଁ ଆସ୍‌ସି ୱାନିଙ୍ଗ୍‍ଁ ସାୟାମାରାଗ୍‍ ଡାକ୍‍ତେଙ୍ଗ୍‍ଁ ତିଆର୍‌ ମାର୍ହାର୍‌ । ୱାନ୍‌ ଅରେନ୍‌ ରୋମିୟ ଲୋକୁ ଇଜି ନେସ୍‍ତାର୍‍ଆକା ନାନୁ ନା ସନ୍ୟରି ମାଣାନ୍‌ ୱାନିଙ୍ଗ୍‍ଁ ରକିୟା କିତା ।
ACT 23:28 ୱାରି ବିରଦ୍‌ତାନ୍‌ ୱାନ୍‌ ଇନି ଦସ୍‌ କିତାମାର୍ହାନ୍‌, ନେସ୍‌ତେଙ୍ଗ୍‌ ଇଜି ନାନୁ ୱାନିଙ୍ଗ୍‍ଁ ୱାରି ପେରିସଭାଦୁ ଅତା ।
ACT 23:29 ମାତର୍‌ ୱାନ୍‌ ସାନିଦଣ୍ତ୍‍ ବା ଜଇଲ୍‍ ଦଣ୍ଡ୍‌ ପୟ୍‌ନି ୱାଜା ଇନି ପାଣି କିଏନ୍‌ ଇଜି ନାନୁ ନେସ୍‍ତେଙ୍ଗ୍‍ଁ ଆଟ୍‍ତା । ୱାନି ବିରଦ୍‌ତାନ୍‌ ଆତିମାନି ଦାବିୱିଜୁ ୱାରି ଦର୍ମଦି ବିସୟ୍‌ତି ନିୟମ୍‌ ।
ACT 23:30 ମାରି ୱାନି ବିରଦ୍‌ତାନ୍‌ ଉନ୍‌ଡ୍ରି ଉପାୟ୍‌ ଆତାମାନାତ୍‌ ଇଜି କାବୁର୍‌ ପୟ୍‌ଜି ଦାପ୍ରେ ଦାପ୍ରେ ୱାନିଙ୍ଗଁ ନି ଲାକ୍‌ତୁ ପୋକ୍‌ତେଙ୍ଗ୍‌ ଅଡ଼୍‍ବିତା । ୱାନି ବିରଦ୍‌ତାନ୍‌ ମାନି ଦାବିୱିଜୁ ନି ଲାକ୍‌ତୁ ୱେର୍‍ତେଙ୍ଗ୍‍ଁ ଇଜି ନାନୁ ୱାନି ଦାବିକିନିୱାରିଙ୍ଗ୍‍ଁ ଇର୍ହାମାନା ।”
ACT 23:31 ସନ୍ୟର୍‍ ଆୟା ଆଦେସ୍‌ ଇସାବ୍‌ତାନ୍‌ ପାଉଲତିଙ୍ଗ୍‍ଁ ଆୟା ନାଡ଼ା ଆନ୍ତିପାତ୍ରିଦୁ ଇପ୍‍ତାର୍‍ ।
ACT 23:32 ମାରିନାଣ୍ତିଙ୍ଗ୍‍ଁ ବୁଲାନି ସନ୍ୟର୍‍ ଦୁର୍ଗଦୁ ଡ଼େସି ସର୍ହାର୍‍
ACT 23:33 ମାରି ଗଡେଙ୍ଗ୍‍ଁସାଲାକିନି ସନ୍ୟର୍‍ ପାଉଲତିଙ୍ଗ୍‍ଁ ଅସି କାଇସରିଆଦୁ ଇତାର୍‌ । ଆବେ ସନ୍ୟରି ନେତା ଆକୁଦିୱାଲେ ପାଉଲତିଙ୍ଗ୍‍ଁ ସାସନ୍‌କିନିମାନୁ ସର୍‍ପେ କିତାନ୍‌ ।
ACT 23:34 ସାସନ୍‌କିନି ମନ୍ତ୍ରୀ ଆକୁ ପଡ଼ାଜି ପାଉଲତିଙ୍ଗ୍‍ଁ ଆମା ଦେସ୍‌ତାନ୍‍ ୱାତିମାନି ଇଜି ୱେନ୍‌ବାତାନ୍‌ । ପାଉଲ ସିଲିସିଆଦିକାଙ୍ଗ୍‍ଁ ଇଜି ନେସ୍‌ସି,
ACT 23:35 ୱାନ୍‌ ଇର୍ହାନ୍‌, “ନି ଦାବିକିନିକାର୍‍ ଇତି ୱେନ୍‍କା ନାନୁ ନି ମାଟା ୱେନା ।” ୱେନ୍‌କା ପାଉଲତିଙ୍ଗ୍‍ଁ ହେରୋଦତି ମେଡ଼୍‍ଇଲୁତୁ ତର୍‌ସି ଇଡ୍‍ଦେଙ୍ଗ୍‍ଁ ଇଜି ଆଦେସ୍‌ ସିତାନ୍‌ ।
ACT 24:1 ପାସ୍‌ ଦିନ୍‌ ୱେନ୍‌କା ପେରି ଜାଜକ ହନନିୟ ଏସ ଜିହୁଦି ନେତାର୍‍ ନି ତର୍ତୁଲସ୍‍ ଦର୍‌ତି ଅରେନ୍‌ ଅକିଲତି ୱାଲେ କାଇସରିଆଦୁ ସର୍ହାନ୍‍ । ୱାର୍‌ ପେଲିକ୍‍ସ୍‍ତି ଆଗ୍‌ଡ଼ି ୱାଜି ପାଉଲତି ବିରଦ୍‌ତାନ୍‌ ୱାରି ଦାବି ୱେର୍‌ତାନ୍‌ ।
ACT 24:2 ୱେନ୍‌କା ପାଉଲତିଙ୍ଗ୍‍ଁ ଆବେ ତାତାର୍‌ ମାରି ତର୍ତୁଲସ୍‍ ଇୟାୱାଜା ଲୋକା ଦାବିୱିଜୁ ୱେର୍‌ତାନ୍‌ : “ମି ବୁଦିଦି ସାରି ତର୍‍ନି ମାଣାନ୍‌ ମାପ୍‌ ନାଣ୍ତ ଦିନ୍‌ ଆସ୍‌ସି ସାନ୍ତିଦାନ୍‌ ତେବାଜିନାପ୍‍ ମାରି ମା ଦେସ୍‌ତି ନେଗି ଉଣ୍ତିଙ୍ଗ୍‍ଁ ଗାଦି ନିୟମ୍‌ତି ପାଣି କିଆୟ୍‍ଆତାମାନାନ୍‍ ।
ACT 24:3 ୱିଜୁ ପେଲିକସ୍‍ ବାଡିଦୁ ନି ୱିଜୁ ୱେଡ଼ାଦୁ ମାପ୍‌ ତେନିଙ୍ଗ୍‍ଁ କୁକ୍‌ସିନାପ୍‍, ମାପ୍‌ ନି ଲାକ୍‌ତୁ ନାଣ୍ତ ଇସାବ୍‌ତାନ୍‌ ଦନ୍ୟବାଦ୍‌ ସିଜିନାପ୍‌ ।
ACT 24:4 ୱାନ୍‌ ଏଣ୍ତେସ୍‌ ଆପିନ୍‌, ନାନୁ ମି ନାଣ୍ତ ସମୟ୍ ଅତେଙ୍ଗ୍‍ଁ ବଦାକିଏ, ଆଦେଙ୍ଗ୍‍ଁ ନିନୁ ଦୟା କିଜି ମା ଏସ ମାଟା ୱେନ୍‍ଡ୍ରେଙ୍ଗ୍‍ଁ ଇଜି ନାନ୍ ମାଡ଼ିସ୍‌ କିଜିନା ।
ACT 24:5 ଇୟା ଲୋକୁ ବୟଙ୍କର୍‍ ଜାଟିକିନିକାନ୍‍ ଇଜି ମାପ୍‌ ନେସ୍‌ନାପ୍‌; ୱାନ୍‌ ଦୁନିଆଦି ୱିଜୁତରିନ୍‍ ବୁଲାଜି ଜିହୁଦିଲୋକାଙ୍ଗ୍‍ଁ ସାନ୍ତି ରୁକ୍‍ତେଙ୍ଗ୍‍ଁ ଏଗ୍ରିସ୍‍ କିଜିନାନ୍‍ । ୱାନ୍‌ ନାଜରିୟତିୟ ଦଲତୀ ନେତା ।
ACT 24:6 ୱାନ୍‌ ମା ମନ୍ଦିର୍‍ତିଙ୍ଗ୍‍ଁ ଅପବିତ୍ର କିଦେଙ୍ଗ୍‍ଁ ସେସ୍ଟା କିନିୱାଲେ ମାପ୍‌ ୱାନିଙ୍ଗ୍‍ଁ ଆସ୍‍ତାପ୍‍ ।
ACT 24:7 ମାତର୍‌ ସହେ ଲୋକା ମୁସ୍‌କୁ ମାନି ନେତା ଲୁସିୟା ୱାଜି ଡାଟ୍‌ତାନ୍‌ ୱେନିଙ୍ଗ୍‍ଁ ମା କିୟୁଦାନ୍‌ ଡ଼ିବିସ୍‍ତାଅତାନ୍‍ ।
ACT 24:8 ମାପ୍‌ ୱେନି ବିରଦ୍‌ତାନ୍‌ ଏମେ ୱିଜୁ ଦାବି କିଜିନାପ୍‍, ଆକା ନିନୁ ନିଜେ ଇୟା ଲୋକ୍‍ତିଙ୍ଗ୍‍ଁ ୱେନ୍‍ବାଜି ନେସ୍‍ତେଙ୍ଗ୍‍ଁ ଆଟ୍‌ନି ।”
ACT 24:9 ଇବେମାନି ଜିହୁଦି ଲୋକୁ ବା ଇୟା ଦାବି ସତ୍‌ ଇଜି ଆଟ୍‍ୱାଦାନ୍‍ ରାଜିଆନିକା ଜାଣେକିତାର୍‍ ।
ACT 24:10 ତାନିୱେନ୍‍କା ଆୟା ଦେସ୍‌ତି ମନ୍ତ୍ରୀ ପାଉଲତିଙ୍ଗ୍‍ ମାଟା ଇନ୍‍ଡ୍ରେଙ୍ଗ୍‍ଁ ଇଜି ସାରିସିତାନ୍‍ ଆକା ପାଉଲ ଇର୍ହାନ୍‌, “ନାନୁ ନେସ୍‌ନା ଜେ ନାଣ୍ତ ବାର୍‍ସେକ୍‍ ଆସ୍‌ସି ନିନୁ ଇୟା ଲୋକା ବିସାର୍‌ କିନିକିନ୍ଦା ଆତିମାନି, ଆଦେଙ୍ଗ୍‍ଁ ନି ଆଗ୍‌ଡ଼ି ନିଜେଦି ବିସୟ୍‌ ୱେର୍‍ତେଙ୍ଗ୍‍ଁ ନା ତରିଟାନ୍‍ ୱେଡ଼ିକାଦି ମାଟା ।
ACT 24:11 ନିନୁ ନିଜେ ପୟ୍‌ଜି ନେସ୍‌ତେଙ୍ଗ୍‌ ଆଟ୍‌ନି ଜେ, ଆନାତ୍‌ ବାର୍‍ ଦିନ୍‌ ଆଗ୍‌ଡ଼ି ନାନୁ ଜିରୁସାଲାମ୍‍ତୁ ପାର୍‌ତନା କିଦେଙ୍ଗ୍‍ଁ ସର୍ହାମାର୍ହା ।
ACT 24:12 ମନ୍ଦିର୍‌ତୁ ଏୱାଲେ ନା ଆସ୍‍ସିସାନିକା କିଜିମାନିକା ଜିହୁଦିଲୋକୁ ସୁଡ଼ୁଏର୍‍ ମାର୍ହାର୍‌ ବା ପାର୍‍ତନାକିନି ଇଲ୍‌କାଙ୍ଗ୍‌ ଆପିତ୍‌ ଗାଡ଼୍‌ତି ଆଇ ଇନି ବାଡିଦୁ ନାଙ୍ଗିଁ ଲୋକାଙ୍ଗ୍‌ ଏଗ୍ରିସ୍‌କିନିକା ସୁଡ଼ୁଏର୍‍ ମାର୍ହାର୍‌ ।
ACT 24:13 ଆଦେଙ୍ଗ୍‍ଁ ନା ବିରଦ୍‌ତାନ୍‌ ଇଲେଇ ତାତିମାନି ଦାବିୱିଜୁକା ଉଣ୍ତିଙ୍ଗ୍‍ଁ ୱାର୍‌ ସତ୍‌ ମାଟା ସିଦେଙ୍ଗ୍‌ ଆଟ୍‍ଏର୍‍ ।
ACT 24:14 ନାନୁ ନି ଲାକ୍‌ତୁ ମାନାଜିନା ଜେ, ଏମେ ସାରିଦିଙ୍ଗ୍‍ଁ ୱାର୍‌ ମିଚ୍‌ ଇଜି ଇଜିନାର୍‍, ଆୟା ସାରିଦିଙ୍ଗ୍‍ଁ ବୁଲାଜି ନାନୁ ମା ପୁର୍ବେଦିଡକ୍‌ରାଦାଦାରି ମାପୁରୁଙ୍ଗ୍‍ଁ ସେବା କିଜିନା । ମାତର୍‌ ନାନୁ ବା ମସାଦି ନିୟମ୍‌ ନି ବାବବାଦିରି ବଇଦୁ ରାସାତି ୱିଜୁ ମାଟା ବିସ୍‌ବାସ୍‌ କିନା ।
ACT 24:15 ଇୟାୱାରି ୱାଜା ମାପୁରୁଦିମାନୁ ନା ଆୟା ଉନ୍‌ଡ୍ରି ଆସା ମାନାତ୍‌ ଜେ, ଦାର୍ମୁ ନି ଅଦାର୍ମୁ ଲୋକୁ ୱିଜେରେ ସାତି ମାଣାନ୍‌ ମାରିଡ଼େସି ନିଙ୍ଗ୍‍ଁନାର୍‍ ।
ACT 24:16 ଆଦେଙ୍ଗ୍‍ଁ ମାପୁରୁ ନି ଲୋକା ଆଗ୍‌ଡ଼ି ନେଗି ବୁଦି ବ୍ୟବ୍‌ହାର୍‌ କିଦେଙ୍ଗ୍‌ ଇଜି ନାନୁ ୱିଜୁଦିନ୍‌ ବଦା କିଜିନା ।
ACT 24:17 “ନାଣ୍ତ ବାର୍‍ସେକ୍‍ ଆସ୍‌ସି ଜିରୁସାଲାମ୍‍ତାନ୍‍ ଆକ ତେବାତି ୱେନ୍‌କା, ନା ନିଜେଦି ଲୋକା ଉଣ୍ତିଙ୍ଗ୍‍ଁ ଏସ ଡାବୁଙ୍ଗୁଁ ଅତେଙ୍ଗ୍‍ଁ ନି ପୁଜା ସିଦେଙ୍ଗ୍‌ ଇଜି ନାନୁ ଆବେ ସର୍ହାମାର୍ହା ।
ACT 24:18 ନାନୁ ନେଗେନ୍‌କିନି ବିଦି ୱିସ୍‌ସି ମାର୍‌ଇ ବେଡ଼ାଦୁ ୱାର୍‌ ନାଙ୍ଗିଁ ମନ୍ଦିର୍‌ତୁ ସୁଡ଼ୁତାର୍‌ । ନାସ୍ତିୱାଲେ ନା ଲାକ୍‌ତୁ ଲୋକ୍‍ଉଣ୍ତାତିକା ସିଲେତାତ୍‍ କି ଅସାନ୍ତି ଆଏତ୍‍ମାର୍ହାତ୍‍ ।
ACT 24:19 ମାତର୍‌ ଆସିଆ ଦେସ୍‌ତି ଏସ ଜିହୁଦି ଲୋକୁ ଆବେ ମାର୍ହାର୍‌; ଜଦି ୱାରି ନା ବିରୁଦ୍‌ତାନ୍‌ ମାଟା ଇନିକା ମାନାତ୍‌, ୱାର୍‌ ନିଜେ ନି ଆଗ୍‌ଡ଼ି ୱାଜି ଦାବି କିଦେଙ୍ଗ୍‍ଁ ଆଟ୍‍ତାର୍‍ମାନ୍ଦି ।
ACT 24:20 ମାରି, ନାନୁ ଏସ୍ତିୱାଲେ ପେରିସଭା ଆଗ୍‌ଡ଼ି ନିର୍‍ଆ ମାର୍‌ର୍ହା, ନାନୁ ଏମେ ତାଗ୍‌ଇମାଟା ପାଣିଦୁ ଦସି ଇଜି ୱେଙ୍ଗିଁତା, ଆକା ଇବେମାନି ଇୟା ଲୋକୁ ଇନିର୍‍ ।
ACT 24:21 ଜଦିବା ନାନୁ ଉନ୍‌ଡ୍ରି ମାଟା କିତାମାର୍‌ର୍ହା : ୱାରି ଆଗ୍‌ଡ଼ି ନିର୍‍ଇ ମାର୍‍ଇୱାଲେ ନାନୁ ଡାଟ୍‍ତାନ୍‍ ଇର୍‌ଆମାର୍ହା, ସାତିକାର୍‍ ମାରିଡ଼େସି ଜିନାର୍‍ ଇଜି ନାନୁ ବିସ୍‌ବାସ୍‌ କିଜିମାନିଙ୍ଗ୍‍ଁ ନେରୁ ମିବାଣ୍‍କୁ ବିସାର୍‌ ଆଜିନା ।”
ACT 24:22 ପେଲିକସ୍‍ ନେଗି ସାରିଦି ବିସୟ୍‌ତାନ୍‌ ନେଗେନ୍‌ କିଜି ନେସ୍‍ତିମାନିଙ୍ଗ୍‍ଁ ୱେନିସ୍‍କିନିକା ତେବା କିଜି ଇର୍ହାନ୍‌, “ସନ୍ୟରି ନେତା ଲୁସିୟା ୱାତି ୱେନ୍‌କା ନାନୁ ନି କେସ୍‍ ପୁରା କିନା ।”
ACT 24:23 ପାଉଲତିଙ୍ଗ୍‍ଁ ୱାନ୍‌ ତର୍‌ସୋ ଇଡ୍‍ଦେଙ୍ଗ୍‍ଁ ୱାନ୍‌ ସନ୍ୟରିଙ୍ଗ୍‍ଁ ଆଦେସ୍‌ ସିତାନ୍‌, ମାତର୍‌ ୱାନି ଉଣ୍ତିଙ୍ଗ୍‍ଁ କାପ୍‍କିନା ଡ଼ିସ୍‌ସି ୱାନି ଜାତୁନ୍‍ କିଦେଙ୍ଗ୍‍ଁ ଇଜି ୱାନି ତଡ଼୍‍କାଙ୍ଗ୍‍ଁ ସାରି ସିଦେଙ୍ଗ୍‌ ୱାନ୍‌ ଆଦେସ୍‌ ସିତାନ୍‌ ।
ACT 24:24 ଏସ ଦିନ୍‌ ୱେନ୍‌କା ପେଲିକସ୍‍ ୱାନି ଜିହୁଦି ଆଇମା ଦ୍ରୁସିଲାଦି ୱାଲେ ୱାତାନ୍‍, ୱାନ୍‌ ପାଉଲତିଙ୍ଗ୍‍ଁ କୁକିସ୍‍ କିଜି ଜିସୁ କ୍ରିସ୍ତମାନୁ ବିସ୍‌ବାସ୍‌ କିନି ବିସୟ୍‌ତାନ୍‌ ୱାନି ମାଟା ୱେର୍‍ଆନ୍‍ ।
ACT 24:25 ମାତର୍‌ ଏସ୍ତିୱାଲେ ପାଉଲ ଦାର୍ମୁଦିକା, ନିଜେଦିଙ୍ଗ୍‍ଁ ନେଗେନ୍‌କିଜି ଇଡ୍‌ନିକା ମାରି ୱାନି ବିସାର୍‌ ଦିନ୍‌ ମାଟା ୱାର୍‍ଗିତାର୍‍, ପେଲିକସ୍‍ ତିଲାଜି ଇର୍ହାନ୍‌, ନିନୁ ଇଲେଇ ସନ୍‍ଡ୍ରେଙ୍ଗ୍‍ଁ ଆଟ୍‌ନି । ସୁଜୋଗ ପୟ୍‍ତିଙ୍ଗ୍‍ଁ, “ମାରି ଅର୍‍ସୁ ନିଙ୍ଗିଁ କୁକିସ୍‍କିନା ।”
ACT 24:26 ଆୟା ସମୟ୍‍ତୁ ପାଉଲ ୱାନିଙ୍ଗ୍‍ଁ ଏସ ଡାବୁଙ୍ଗୁଁ ସିନି ଇଜି ୱାନ୍‌ ଆସା କିତାମାର୍ହାନ୍‌, ଆଦେଙ୍ଗ୍‍ଁ ୱାନ୍‌ ଅର୍‍ସୁଦିଙ୍ଗ୍‍ ଅର୍‍ସୁ ୱାନିଙ୍ଗ୍‍ଁ କୁକିସ୍‍କିଜି ୱାନି ୱାଲେ ୱାର୍‍ଗିଦେଙ୍ଗ୍‍ଁ ଆସ୍‌ତାନ୍‌ ।
ACT 24:27 ଇୟାୱାଜା ରୁଣ୍ତି ବାର୍‍ସେକ୍‍ ତେବାତି ୱେନ୍‌କା ପୋର୍କିୟସ ଫେଷ୍ଟସ୍‌ ପେଲିକସ୍‍ତି ବାଡିଦୁ ସାସନକିନିକାନ୍‌ ୱାଜା ବାସେ ଆତାନ୍‍ । ପେଲିକସ୍‍ ଜିହୁଦିଲୋକା ୱେଡ଼ିକା ପୟ୍‌ନି ଉଣ୍ତିଙ୍ଗ୍‍ଁ ଲାଲାୟ୍‍ ମାନିଙ୍ଗ୍‍ଁ ପାଉଲତିଙ୍ଗ୍‍ଁ ଡ଼ିସ୍‍ଏଣ୍ତା ଜଇଲ୍‌ତୁ ଡ଼ିସ୍‍ତା ସର୍ହାନ୍‍ ।
ACT 25:1 ପେସ୍ଟସ୍‍ ଇୟା ରାଜିଦୁ ଇନି ମୁନେଟି ୱେନ୍‌କା କାଇସରିଆଦାନ୍‍ ଜିରୁସାଲାମ୍‍ତୁ ସର୍ହାନ୍‍ ।
ACT 25:2 ଆବେଟାନ୍‍ ପେରିଜାଜକ୍‌ ନି ଜିହୁଦି ନେତାର୍‌ ମାରିଡ଼େସି ପାଉଲ୍‍ତି ବିରଦ୍‌ତାନ୍‌ ଦାବି କିତାର୍‍ ।
ACT 25:3 ପାଉଲ୍‍ତିଙ୍ଗ୍‍ଁ ଜିରୁସାଲାମ୍‍ତୁ ତାସି ୱାରିଙ୍ଗ୍‍ଁ ୱେଡ଼ିକାକିବିସ୍‍ କିଦେଙ୍ଗ୍‍ ଇଜି ୱାର୍‌ ପେସ୍ଟସ୍‍ତିଙ୍ଗ୍‍ଁ ମାଡ଼ିସ୍‌ କିତାର୍‍, ଇରିଙ୍ଗ୍‍ଁ ୱାର୍‌ ପାଉଲ୍‍ତିଙ୍ଗ୍‍ଁ ସାରିଦୁ ଡାକ୍‍ତେଙ୍ଗ୍‍ଁ ଇଜି ଉପାୟ୍‌ ତିଆର୍‌ କିତାମାର୍ହାର୍‍ ।
ACT 25:4 ପେସ୍ଟସ୍‍ ଇର୍ହାନ୍‌, “ପାଉଲ୍‍ତିଙ୍ଗ୍‍ଁ ଉନ୍‌ଡ୍ରି ତରାୟ୍‍ଆତି ୱାଜା କାଇସରିଆଦୁ ଇଟାୟ୍‍ଆତାମାନାନ୍‍ ମାରି ବେଗି ନାନ୍ ନିଜେ ଆବେ ଡ଼େସି ସନା ।
ACT 25:5 ଜଦି ୱାନ୍‌ ଇନି ଦସ୍‌ କିତାମାନାନ୍‍, ଆର୍‍ତିଙ୍ଗ୍‍ଁ ମି ନେତାର୍‌ ନା ୱାଲେ କାଇସରିଆଦୁ ସଲିର୍‌ ମାରି ତାନି ବିରଦ୍‌ତାନ୍‌ ୱାରି ଦାବି ୱେର୍‍ତୁ ।”
ACT 25:6 ପେସ୍ଟସ୍‍ ୱାରି ୱାଲେ ଆଟ୍ ଦସ୍‌ ଦିନ୍‌ତାନ୍‌ ନାଣ୍ତ ତେବାଜି କାଇସରିଆଦୁ ଡ଼େସି ୱାତାନ୍‌ । ମାର୍‍ନାଣ୍ତିଙ୍ଗ୍‍ଁ ୱାନ୍‌ ବିଚାର୍‍କିନିମାନୁ ବାସ୍‌ସି ପାଉଲ୍‍ତିଙ୍ଗ୍‍ଁ ତାତେଙ୍ଗ୍‍ଁ ଇଜି ଆଦେସ୍‌ ସିତାନ୍‌ ।
ACT 25:7 ପାଉଲ ୱାତିଦାପ୍ରେ ଜିରୁସାଲାମ୍‌ତି ଜିହୁଦିଲୋକୁ ୱାନି ସାରିବେଡ଼୍‍ତି କେର୍‍ବ୍‍ଜି ନିର୍ହାର୍‍ ମାରି ୱାନି ବିରଦ୍‌ତାନ୍‌ ନାଣ୍ତ ଗୁରୁତ୍‍ଦାନ୍‍ ଦାବି କିତାର୍‍ । ମାତର୍‌ ୱାର୍‌ ଇୟାୱିଜୁ ପାର୍‍ମାଣ୍‍ତିଙ୍ଗ୍‍ଁ ସାସ୍‌ କିଏତାର୍‌ ।
ACT 25:8 ଇରିଙ୍ଗ୍‌ ପାଉଲ ନିଜେଦି ମୋନ୍‌ତିଙ୍ଗ୍‌ ସିଜି ଇର୍ହାନ୍‌, “ଜିହୁଦିରି ନିୟମ୍‌ ବିରୁଦ୍‌ତାନ୍ ସିଲେ କି ମନ୍ଦିର୍‌ ବିରୁଦ୍‌ଦାନ୍‌ ସିଲେ କି ରୋମିୟ ସମ୍ରାଟ୍, ଏ ବିରୁଦ୍‌ତାନ୍ ନାନୁ ଇନିକା ଦସ୍‌ କିଏ ।”
ACT 25:9 ମାତର୍‌ ଫେଷ୍ଟସ୍‌ ଜିହୁଦିରି ୱେଡ଼ିକାଦିକାନ୍‌ ଆଦେଙ୍ଗ୍‍ଁ ଇଛା କିଜି ପାଉଲତିଙ୍ଗ୍‌ ୱେନ୍‍ବାତାନ୍‌, “ଜିରୁସାଲାମ୍‌ତୁ ସନି ଉଣ୍ତିଙ୍ଗ୍‌ ମାରି ଆବେନୁ ନା ଆଗ୍‌ଡ଼ି ଇୟାୱିଜୁ ଦୋସ୍‌ଦୁ ବିସାର୍‌ ଆଦେଙ୍ଗ୍‌ ନିନୁ ଇନିକା ରାଜି ଆନି ?”
ACT 25:10 ପାଉଲ ଇର୍ହାନ୍‌, “ନାନୁ କାଇସର୍‍ଦି ବିଚାର୍‌ କିନି ଆଗ୍‌ଡ଼ି ନିର୍ହାମାନା । ଇବେନୁନେ ନା ବିଚାର୍‍ ଆନିକା ମାନାତ୍ । ନିନୁ ନିଜେ ନେଗେନ୍‌ତାନ୍ ନେସ୍‌ତିମାନି ଜେ, ନାନୁ ଜିହୁଦିରି ବିରୁଦ୍‌ତାନ୍ ଇନିକା ଜାଟି କିଏ ।
ACT 25:11 ଜଦି ନାନୁ ଅନ୍ୟାୟ୍‌ପାଣି କିତିମାରିଙ୍ଗ୍‌ ସାନିଦଣ୍ତ ପୋଇନା ଏମେ ପାଣିକିତାମାନା, ଆବେନୁ ଦଣ୍ତ ପୋଇଦେଙ୍ଗ୍ ନାନୁ ଇଚ୍ଛା କିଏ । ମାତର ୱାର୍ ନା ବିରୁଦ୍‌ତାନ୍ ତାତିମାନି ଦୋସ୍‌ୱିଜୁ ଜଦି ଇନିକା ସତ୍ ସିଲେତ୍‌, ଆର୍‌ତିଙ୍ଗ୍‌ ଏନ୍‌ ନାଙ୍ଗି ୱାରି କିୟୁଦାନ୍‌ ଡ଼ିସିସ୍‍ କିଦେଙ୍ଗ୍ କାଇସର୍‍ଦିମାନୁ ନାନୁ ଇୟା ଅନୁରୋଦ କିତାମାନା ।”
ACT 25:12 ତାନି ୱେନ୍‌କା ପେସ୍ଟସ୍‍ ୱାରି ନେତାରିୱାଲେ ୱାରିଙ୍ଗ୍‌ ୱେର୍‌ତାନ୍‌, “ନିନୁ କାଇସର୍‌ଦିମାନୁ ଅନୁରୋଦ କିତିମାନି, ଆଦେଙ୍ଗ୍‍ଁ ନିନୁ କାଇସର୍‍ଦି ଲାକୁତୁ ସନି ।”
ACT 25:13 ଏସଦିନ୍ ୱେନେକା ରାଜା ଆଗ୍ରିପା ମାରି ବର୍ଣ୍ଣିସ୍ ପେସ୍ଟସ୍‍ଦିଙ୍ଗ୍‌ ମିସାନି ଉଣ୍ତିଙ୍ଗ୍‌ କାଇସରିଆ ଗାଡ଼୍‌ତୁ ୱାତାର୍ ।
ACT 25:14 ଆବେନୁ ୱାର୍‌ ଏସଦିନ୍ ତେବାତି ୱେନ୍‌କା ପେସ୍ଟସ୍‍ ରାଜାଦିଙ୍ଗ୍‌ ପାଉଲଦି ବିଷୟ ୱେରିସି ଇର୍ହାନ୍‌, “ପେଲିକସ୍‍ ଜଇଲ୍‌ତୁ ଇଟିତି ମାନି ଅରେନ୍ ଲୋକ ଇବେନୁ ମାନାନ୍ ।
ACT 25:15 ନାନୁ ଏସ୍ତିୱାଲେ ଜିରୁସାଲାମ୍‌ତୁ ସର୍‌ଆ ମାର୍ହା, ଜିହୁଦି ପେରି ଜାଜକ ମାରି ଦାର୍ମୁ ନେତାର୍‍ ୱାନି ବିରୁଦ୍‌ତାନ୍ ଏସ ଦୋସକୁ ତାତାର୍ ମାରି ନାଙ୍ଗିଁ ୱାନିଙ୍ଗ୍‌ ଦୋସ୍‌ କିବିସ୍‌ କିଦେଙ୍ଗ୍ ଇର୍ହାର୍‌ ।
ACT 25:16 ମାତର ନାନୁ ୱାରିଙ୍ଗ୍ ୱେର୍‌ତା ଜେ, ଅରେନ୍ ଦୋସିଙ୍ଗ୍ ବିସାର୍ କିନିବାଡିଦୁ ୱାନି ଦୋସ୍‌ଆସ୍‌ତିୱାରି ଆଗ୍‌ଡ଼ି ନିଜେଦିଙ୍ଗ୍‌ ସର୍‌ପେ କିନି ଉଣ୍ତିଙ୍ଗ୍‌ ସୁଜୋଗ ସିନି ଆଗ୍‌ଡ଼ି ୱାନିଙ୍ଗ୍ ‌ଦାଇ କିବିସ୍‌ କିଦେଙ୍ଗ୍ ମା ରୋମିୟରି ନିୟମ୍‌ ସିଲେତ୍‌ ।
ACT 25:17 ୱାର୍ ଇବେନୁ ୱାନି ୱେନ୍‌କା ନାନୁ ୱେଡ଼ା କିଏଣ୍ତା ମାର୍‌ନାଣ୍ତିଙ୍ଗ୍‌ ବିଚାର୍‍କିନି ବାଡିଦୁ ବାସ୍‌ତା ମାରି ଆୟାୱାନିଙ୍ଗ୍‌ ଲୋଇ ତାତେଙ୍ଗ୍‌ ଇଜି ଆଦେସ୍ ସିତା ।
ACT 25:18 ୱାନି ବିରୁଦ୍‌କିନି ଲୋକୁ ୱାନି ବିରୁଦ୍‌ତାନ୍ ଇନ୍‌ଡ୍ରେଙ୍ଗ୍‌ ନିର୍ହାର୍‌, ମାତର୍‌ ୱାର୍ ଏମେନାନି ଦୋସ ତାନାର୍ ଇଜି ନାନୁ ଅଡ଼୍‌ବିତା ମାର୍‌ଆ, ଆକା ୱାର୍ କିଦେଙ୍ଗ୍ ଆଟ୍‍ଏତାର୍ ।
ACT 25:19 ୱାର୍ କେବଲ ନିଜେଦି ଦର୍ମ ବିସୟ୍‌ତିଙ୍ଗ୍ ମାରି ଜିସୁ ଦର୍‌ତି ଆମା ସାତି ଲୋକ୍‌ତିଙ୍ଗ୍‌ ପାଉଲ ଜିତିକାନ୍ ଇଜି ଦାବି କିଜିନାନ୍, ୱାନି ବିସୟ୍‌ ଅସି ଆସ୍‌ସିସାତାର୍‌ ।
ACT 25:20 ଇୟାୱିଜୁ ବିସୟ ମାରି ନେଗେନ୍‌ତାନ୍‌ ନେସିନି ଉଣ୍ତିଙ୍ଗ୍ ଇନିକା କିଦେଙ୍ଗ୍ ଆନାତ୍, ଇନିକା ତିର୍‌ କିଦେଙ୍ଗ୍ ଆଟ୍ଏଜି ଇୟା ଦୋସ୍‌ତୁ ବିଚାର୍ ଆନିଉଣ୍ତିଙ୍ଗ୍ ପାଉଲ ଜିରୁସାଲମ୍‌ତୁ ସୋନାନ୍‌ନୋ ଇଜି ନାନୁ ୱାନିଙ୍ଗ୍ ୱେନ୍‍ବାତା ।
ACT 25:21 ମାତର ପାଉଲ, ନିଜେ କାଇସର ୱାନି ମାଟା ପୁରା କିପିନ୍ ଇଜି ୱେର୍‌ସି କାପ୍‌କିନିୱାରି ମାଣାନ୍ ସୁରକ୍ଷିତ ଆନି ଉଣ୍ତିଙ୍ଗ୍‌ ଅଡ଼୍‌ବିତାନ୍‌ । ଆଦେଙ୍ଗ୍‍ଁ କାଇସର୍‍ଦି ଲାକ୍‌ତୁ ପୋକ୍‌ନି ସାନ୍ଦି ୱାନିଙ୍ଗ୍ ବନ୍ଦି କିଜି ଇଡିନି ଉଣ୍ତିଙ୍ଗ୍ ନାନ୍‌ ଆଦେସ୍‌ ସିତାମାନା ।”
ACT 25:22 ଆଗ୍ରିପା ପେସ୍ଟସ୍‌ତିଙ୍ଗ୍‌ ଇର୍ହାନ୍‌, “ନାନ୍‌ ନିଜେ ଇୟା ଲୋକ୍‌ତି ମାଟା ୱେନ୍‌ଡ୍ରେଙ୍ଗ୍‌ ବଦା କିଜିନା ।” ପେସ୍ଟସ୍‍ ଇର୍ହାନ୍‌, “ୱିଗେରିଙ୍ଗ୍‌ ନିନ୍‌ ୱାନି ମାଟା ୱେନିଦେର୍‌ ।”
ACT 25:23 ମାରିଉନ୍‌ଡ୍ରି ଦିନ୍‌ତୁ ଆଗ୍ରିପା ମାରି ବର୍ଣ୍ଣିସ୍ ସୌନ୍ୟରି ଦଲ୍‌ତି ପେରିକାନ୍‌ ମାରି ଗାଡ଼୍‌ତି ପେରି ଲୋକା ୱାଲେ ନାଣ୍ତ ୱେଡ଼ିକାଦାନ୍‌ ୱାଜି ବିଚାର୍‌କିନି ବାଡିଦୁ ଡ଼ୁଗିତାର୍‌ । ପେସ୍ଟସ୍‍ଦି ଆଦେସ୍‍ତାନ୍ ପାଉଲତିଙ୍ଗ୍‌ ଲୋଇ ତାତାର୍ ।
ACT 25:24 ପେସ୍ଟସ୍‍ ଇର୍ହାନ୍‌, “ରାଜା ଆଗ୍ରିପା ମାରି ଆବେନୁ ମାର୍‌ଇ ପେରିମଣ୍ତଲି, ମିରୁ ଇୟା ଆମା ଲୋକ୍‌ତିଙ୍ଗ୍‌ ସୁଡ଼ୁଜିନିଦେର୍‌, ୱାନି ବିରୁଦ୍‌ତାନ୍‌ ଇବେଣିକାର୍‌ ମାରି ଜିରୁସାଲମ୍‌ତୁ ମାନି ଜିହୁଦିର୍‌ ନା ଲାକ୍‌ତୁ ୱେର୍‌ତା ମାନାର୍‌ । ୱାର୍‌ ୱାନି ଜିନି ମାନିକା ଟିକ୍‍ ସିଲେଜି ଦାବି କିଜି ଆଉଲି ଆଜିନାର୍‌ ।
ACT 25:25 ମାତର୍‌ ୱାନ୍‌ ସାନିଦଣ୍ତ ପୟ୍‌ନି ନାନିକା କିତିମାନି ଇନି ଦସ୍‌ ନାନ୍‌ ସୁଡ଼ୁଏ । ୱାନ୍‌ ନିଜେ କାଇସରତିଙ୍ଗ୍‌ ୱେର୍‌ତି ମାନିଙ୍ଗ୍‌, ନାନ୍‌ ୱାନିଙ୍ଗ୍‌ ଆବେନୁ ପୋକ୍‌ତେଙ୍ଗ୍‌ ଇଜି ବଦା କିତାମାନା ।
ACT 25:26 ମାତର୍‌ ୱାନି ବିସୟ୍‌ତାନ୍‌ ନେସ୍‌ନିୱାଜା କାଇସରତିଙ୍ଗ୍‌ ରାସ୍‌ତେଙ୍ଗ୍‌ ଇଜି ନାନ୍ଦି ଇନିକା ସିଲେତ୍‌ । ଆଦେଙ୍ଗ୍‌ ନାନ୍‌ ୱାନିଙ୍ଗ୍‌ ମି ଆଗ୍‌ଡ଼ି ମାରି ରାଜା ଆଗ୍ରିପା, ମି ଆଗ୍‌ଡ଼ି ତାତାମାନାନ୍‌, ଏଣ୍ତେସ୍‌ ୱାନି ବିସୟ୍‌ ନେଗେନ୍‌ତାନ୍‌ ୱେନ୍‌ବାତି ୱେନ୍‌କାନେ ନାନ୍‌ ଇନିକା ରାସ୍‌ତେଙ୍ଗ୍‌ ଆଟ୍‌ନା ।
ACT 25:27 ଇରିଙ୍ଗ୍‌ ଅରେନ୍‌ ଜଇଲ୍‌ତୁମାନି ବିରୁଦ୍‌ତାନ୍‌ ମାନି ମାଟେଙ୍ଗ୍‌ୱିଜୁ ପୁରାନେଗେନ୍‌ତାନ୍‌ ବୁଜାଏଣ୍‌ଗା ୱାନିଙ୍ଗ୍‌ କାଇସରତି ଲାକ୍‌ତୁ ପୋକ୍‌ନିକା ଟିକ୍‌ ସିଲେ ଇଜି ନାନ୍ ଅଡ଼୍‌ବିଜିନା ।”
ACT 26:1 ଆଗ୍ରିପା ପାଉଲତିଙ୍ଗ୍‌ ଇର୍ହାନ୍‌, “ମିଙ୍ଗିଁ ନିଜେଦି ମାଣ୍‌କୁ ୱେର୍‌ତେଙ୍ଗ୍‌ ଇଜି ସାରି ସିଆୟ୍‌ଆତାତ୍ ।‌” ପାଉଲ କିୟୁ ସାର୍‌ପ୍‌ସି ନିଜେଦିଙ୍ଗ୍‌ ସମର୍ଥନ କିଜି ଇର୍ହାନ୍‌ :
ACT 26:2 ଏ ରାଜା ଆଗ୍ରିପା, ଜିହୁଦିର୍‌ ନାଙ୍ଗିଁ ଆମା ୱିଜୁ ବିସୟ୍‌ତାନ୍‌ ୱେର୍‌ତାମାନାର୍‌, ଆୟା ବିସୟ୍‌ତାନ୍‌ ମି ଆଗ୍‌ଡ଼ି ନାନ୍‌ ନିଜେଦିଙ୍ଗ୍‌ ୱେର୍‌ତେଙ୍ଗ୍‌ ସୁଜୋଗ ପୟ୍‌ତି ମାନିଙ୍ଗ୍‌ ନେରୁ ନିଜେଦିଙ୍ଗ୍‌ କାର୍ମୁ ଇଜି ଅଡ଼୍‌ବିଜିନା,
ACT 26:3 ଇରିଙ୍ଗ୍‌ ଜିହୁଦିରି ରିତି ନିତି ମାରି ୱାର୍‌ଗିନି ବିସୟ୍‌ତାନ୍‌ ନିନୁ ନେଗେନ୍‌ତାନ୍‌ ନେସ୍‌ନି, ମାଡ଼ିସ୍‌ କିଜିନା, ନିନୁ ସାହାସ୍‌ତାନ୍‌ ନା ମାଟା ୱେନ୍‌ଆ ।
ACT 26:4 କଡ଼ୱାଲେରାନ୍‌ ନାନ୍‌ ଏଣ୍ତେସ୍‌ ଜିତାମାନା, ଆକା ଜିହୁଦିର୍‌ ନେସ୍‌ନାର୍‌ । ଆଗ୍‌ଡ଼ି ନିଜେଦି ଦେସ୍‌ତୁ ମାରି ୱେନ୍‌କା ଜିରୁସାଲମ୍‌ତୁ ନାନ୍‌ ଏଣ୍ତେସ୍‌ ଜିବନ୍‌ କାଟେ କିତାମାନା, ଲୋକୁ ଆୟାକା ନେସ୍‌ନାର୍‌ ।
ACT 26:5 ନାନ୍‌ ଜେ ଆଗ୍‌ଡ଼ିରାନ୍‌ ପାରୁସି ଦର୍‌ତି ମା ଦର୍ମଦି ୱିଜୁମାଣ୍‌କୁ ଦଲ୍‌ତି ପେରିକାନ୍‌ ଆଜି ଜିଜି ମାର୍‌ଆ, ୱାର୍‌ ଇକା ନେସ୍‌ନାର୍‌ ମାରି ବଦା କିତିଙ୍ଗାଁ, ୱାର୍‌ ଇୟା ବିସୟ୍‌ତାନ୍‌ ସାକି ସିଦେଙ୍ଗ୍‌ ଆଟ୍‌ନାର୍‌ ।
ACT 26:6 ମାପୁରୁ ମା ପୁର୍ବେଦିଡକ୍‌ରାଦାଦାରିଙ୍ଗ୍‌ ଆମା ମାଟା ସିତାମାର୍ହାନ୍‌, ଆବେନୁ ନା ଆସା ମାନି ଉଣ୍ତିଙ୍ଗ୍‌ ନେରୁ ନାନ୍‌ ଇବେନୁ ବିଚାର୍‌ ଆଦେଙ୍ଗ୍‌ ନିର୍‌ଆମାନା ।
ACT 26:7 ମା ବାରଗୋଟା କୁଟୁମ୍‌ ୱେଡ଼େନାଡ଼ା ପ୍ରବୁଦି ସେବା କିଜି ଆୟା ଉନ୍‌ଡ୍ରି ବିସୟ୍‌ ପୟ୍‌ନି ଉଣ୍ତିଙ୍ଗ୍‌ ଆସା କିନାର୍‌ । ଏ ରାଜା, ନା ଆୟା ଆସା ଉଣ୍ତିଙ୍ଗ୍‌ ଜିହୁଦିର୍‌ ନାଙ୍ଗିଁ ଦୋସ୍‌ କିଜିନାର୍‌ ।
ACT 26:8 ମାପୁରୁ ଜେ ସାତିୱାରିଙ୍ଗ୍‌ ନିକ୍‍ନାନ୍‌, ଇକା ବିସ୍‌ବାସ୍‌ କିନିକା ବେକାର୍‌ ଇଜି ମିର୍‌ ଏନ୍ଦା ଅଡ଼ବିଜିନିଦେର୍‌ ?
ACT 26:9 ନାଜରିୟତିୟ ଜିସୁଦି ବିରୁଦ୍‌ତିଙ୍ଗ୍‌ ମେଡ଼େକ୍‌ନି ଉଣ୍ତିଙ୍ଗ୍‌ ନାନ୍‌ ଆୟାଦାପ୍ରେ ସେସ୍ଟା କିନିକା ଇଜି ଅଡ଼ବିତାମାର୍‌ଆ ।
ACT 26:10 ଜିରୁସାଲମ୍‌ତୁ ନାନ୍‌ ଆୟାୱାଜା କିତା । ୱିଜେରିଙ୍ଗ୍‌ ପେରିଜାଜକରିମାଣ୍‌କୁ ଅଦିକାର୍‌ତି ଆକୁ ଅସି ବିସ୍‍ବାସିରି ଲୋକା ଲୋଇରାନ୍‌ ନାଣ୍ତ ଲୋକାଙ୍ଗ୍‌ ଜଇଲ୍‌ତୁ ନିର୍‌ତାମାର୍‌ଆ ମାରି, ୱାରିଙ୍ଗ୍‌ ସାନିଦଣ୍ତ ସିଆୟ୍‌ଆନିୱାଲେ ନାନ୍‌ ବା ୱାରି ବିରୁଦ୍‌ତାନ୍‌ ମାର୍‌ଆ ।
ACT 26:11 ଗାଦି ଦେବେଙ୍ଗ୍‌ ଜିହୁଦିରି ପାର୍‍ତନାକିନି ଇଲ୍‌କାଙ୍ଗ୍‌ ନାନ୍‌ ୱାରିଙ୍ଗ୍‌ କାସ୍ଟୁ ସିତାମାନା ମାରି ୱାରି ବିସ୍‌ବାସ୍‌ତାନ୍‌ ଅଲଗା କିନି ଉଣ୍ତିଙ୍ଗ୍‌ ସେସ୍ଟା କିତାମାର୍‌ଆ । ନାନ୍‌ ୱାରି ଉଣ୍ତିଙ୍ଗ୍‌ ବେସି ରିସା ଆତାମାର୍‌ଆ, ୱାରି ମୁସ୍‌କୁ କାସ୍ଟୁ ନିନ୍ଦା ସିନି ଉଣ୍ତିଙ୍ଗ୍‌ ଆଇଦେସ୍‌କାଦି ଗାଡ଼୍‌କାଙ୍ଗ୍‌ ବା ସର୍‌ଆମାର୍‌ଆ ।
ACT 26:12 ଇୟା ଉଦେସ୍‌ତାନ୍‌ ୱିଜେରିଙ୍ଗ୍‌ ପେରି ଜାଜକରି ମାଣ୍‌କୁ ଅଦିକାର୍‌ତି ଆକୁ ମାରି ଆଦେସ୍‌ ଅସିନାନ୍‌ ଦାମାସ୍‍କସ୍‍ତୁ ସର୍‌ଆମାର୍‌ଆ ।
ACT 26:13 ଏ ରାଜା ଆଗ୍ରିପା, ଅର୍‍ଲେନ୍‍ ଦାପ୍ରେନେ ମାଦ୍‌ଲାମ୍‌ ବେଡ଼ାଦୁ ପେର୍‌ଜାରି ମୁସ୍‌କୁ ନାନ୍‌ ୱେଡ଼ାଦି ଜାୟ୍‌ତିମାଣ୍‌କୁ ନାଣ୍ତ ଅଡ଼ିନି ଜାୟ୍‌ ସୁଡ଼ୁତା, ମୁସ୍‌କୁପୁର୍‌ତାନ୍‌ ଆୟା ଜାୟ୍‌ ୱାଜି ନାଙ୍ଗିଁ ମାରି ନା ୱାଲେମାର୍‌ଇୱାରି ସାରିବେଡ଼୍‌ତି ତରିତିକା ସୁଡ଼ୁତା ।
ACT 26:14 ମାପୁ ୱିଜୁଲୋକୁ ବୁମିଦୁ ମେଡ଼େତାପ୍‌, ନାନ୍‌ ଏବ୍ରି ବାସାଦାନ୍‌ ନା, ଉଣ୍ତିଙ୍ଗ୍‌ ଇୟା ମାଟା ୱେର୍‌ଆ, ସାଉଲ, ସାଉଲ, ନିନୁ ଏନ୍ଦା ନାଙ୍ଗିଁ ତାଡ଼ନା କିଜିନି ? ଡ଼ୁଜି ମାନି ଲୋକ୍‌ତି ତୁତେରିବାଡିଗାଦି କୁଟି ଟିପୁଦୁ ଅଦ୍‌ଗିଜିମାନି ଡ଼ାନ୍‌ ୱାଜା ନିନ୍‌ ନିଜେ କାସ୍ଟୁ ଆନି ।
ACT 26:15 ନାନ୍‌ ୱେନ୍‌ବାତା, ପ୍ରବୁ, ନିନ୍‌ ଏନୁ ? ପ୍ରବୁ ଇର୍ହାନ୍‌, ନାନ୍‌ ଜିସୁ, ଆମାୱାନିଙ୍ଗ୍‌ ନିନ୍‌ ନିନ୍ଦା କିଜିନି ।
ACT 26:16 ମାତର୍‌ ନିଙ୍ଗିଁଆ, ନିଙ୍ଗିଁନା ସେବାକିନି ୱାଜା ଆସ୍‌କିନି ଉଣ୍ତିଙ୍ଗ୍‌ ନାନ୍‌ ନିଙ୍ଗିଁ ତରାୟ୍‌ଆତାମାନା । ନେରୁ ମିରୁ ନା ବିସୟ୍‌ତାନ୍‌ ଆମାକା ସୁଡ଼ୁତିଦେର୍‌ ମାରି ୱାଜିନିଦିନ୍‌ତୁ ନାନ୍‌ ନିଙ୍ଗିଁ ଆମାକା ତର୍‌ନା, ଆୟା ବିସୟ୍‌ତାନ୍‌ ନିନ୍‌ ଆଇୱାରିଙ୍ଗ୍‌ ୱେର୍‌ନି ।
ACT 26:17 ଆମା ଜିହୁଦି ମାରି ଅଣଜିହୁଦି ଲୋକା ଲାକ୍‌ତୁ ନାନ୍‌ ନିଙ୍ଗିଁ ପୋକ୍‌ନା, ୱାରିମାଣ୍‌କୁ ନାନ୍‌ ନିଙ୍ଗିଁ ରକିୟା କିନା ।
ACT 26:18 ନିଙ୍ଗିଁ ୱାରି କାଣୁକୁ ରେପିସ୍‌ କିନିକା ମାନାତ୍‌ ମାରି ୱାରିଙ୍ଗ୍‌ ସିକାଟିଦାନ୍‌ ଜାୟ୍‌ତୁ ମାରି ସୟତାନ୍‌ତି ମାଣାନ୍‌ ପ୍ରବୁଦି ଲାକ୍‌ତୁ ତାତେଙ୍ଗ୍‌ ପଡ଼ାନାତ୍‌, ଏଣ୍ତେସ୍‌ ନା ମାନୁ ବିସ୍‌ବାସ୍‌ କିନିମାଣୁକୁ ୱାରି ପାପ୍‌ କେମା ଆନାତ୍‌ ମାରି ମାପୁରୁଙ୍ଗୁଁ ଆସ୍‌କିତି ଲୋକା ମାନୁ ୱାର୍‌ ବାଡି ପୟ୍‌ନାର୍‌ ।
ACT 26:19 ମାରି, “ଏ ରାଜା ଆଗ୍ରିପା, ନାନ୍‌ ମୁସ୍‌କୁପୁର୍‌ତାନ୍‌ ଆମା ଦର୍ଶନ ପୟ୍‌ତାମାନା, ଆୟାତାନିଙ୍ଗ୍‌ ଅମାନ୍ୟ ଆଏ ।
ACT 26:20 ନାନ୍‌ ଆଗ୍‌ଡ଼ି ଦାମାସ୍‍କସ୍‍ ନି ଜିରୁସାଲମ୍‌ତୁ ମାରି ତାନେୱେନ୍‌କା ପୁରାୱିଜୁ ଜିହୁଦା ଦେସ୍‌ତୁ ମାରି ଅଣଜିହୁଦିରି ମାନୁ ପ୍ରଚାର୍‌ କିତା, ଏଣ୍ତେସ୍‌ ୱାର୍‌ ପାପ୍‌ତି ଉଣ୍ତିଙ୍ଗ୍‌ ମୋନ୍‌ ଡ଼େପ୍‌ସି ମାପୁରୁଦି ଲାକ୍‌ତୁ ଡ଼େସିୱାନାର୍‌ ମାରି ୱାର୍‌ ଜେ ଏତ୍‌ କିତାମାନାର୍‌, ଆୟା ପାଣିଦୁ ତର୍‌ନାର୍‌ ।
ACT 26:21 ଇୟା ବିସୟ୍‌ତାନ୍‌ ନାନ୍‌ ମନ୍ଦିର୍‌ତୁ ମାନିୱାଲେ ଜିହୁଦିର୍‌ ନାଙ୍ଗିଁ ଆସ୍‌ସି ସାୟାମାର୍‌ଗା ଡାକ୍‌ତେଙ୍ଗ୍‍ଁ ସେସ୍ଟା କିଜିମାର୍ହାର୍‌ ।
ACT 26:22 ମାତର୍‌ ମାପୁରୁଦିମାଣ୍‌କୁ ସାହାଜ୍ୟ ପୟ୍‌ଜି ନାନ୍‌ ନେରୁ ସାନ୍ଧି ଇସ୍ରି ପେରି ୱିଜେରି ଲାକ୍‌ତୁ ସାମାନ୍‌ତାନ୍‌ ନା ସାକ୍ଷ୍ୟ ସିଦେଙ୍ଗ୍‌ ନିର୍‌ଆମାନା । ବାବବାଦିରି ନି ମୋସା, ଆମାକା ଗଟାନାତ୍‌ ଇଜି ୱେର୍‌ତାମାନାର୍‌, ନାନ୍‌ ଆୟା ମାଟା ୱେର୍‌ସିନା :
ACT 26:23 ମସିହ ଦୁଃକ୍‌ବୋଗ କିଜି ମାରି ସାତିୱାରି ମାଣ୍‌କୁ ୱିଜେରିଙ୍ଗ୍‌ ଆଗ୍‌ଡ଼ି ଜିବନ୍‌ଆଜି ମାରିଡ଼େସି ନିଙ୍ଗିଁଜି ଜିହୁଦି ମାରି ଅଣଜିହୁଦିରି ଲାକ୍‌ତୁ ରକ୍‌ୟାଦି ଜାୟ୍‌ ତର୍‌ନାନ୍‌ ।”
ACT 26:24 ଇୟାୱାଜା ପାଉଲ ନିଜେଦି ତରିଟାନ୍‌ ୱେର୍‌ସିମାନିୱାଲେ ପେସ୍ଟସ୍‍ ଆଉଲି ଆଜି ଇର୍ହାନ୍‌, “ପାଉଲ, ନିନୁ ବାୟା; ନି ନାଣ୍ତ ସିକିୟା ନିଙ୍ଗିଁ ବାୟା କିତାମାନାତ୍‌ ।”
ACT 26:25 ପାଉଲ ଇର୍ହାନ୍‌, “ନାନ୍‌ ବାୟା ସିଲେ, ଏ ସନ୍‌ମାନ୍‌ତି ପେସ୍ଟସ୍‍, ନାନ୍‌ ଆମାକା ଇଜିନା, ଆକା ସତ୍‌ ମାରି ସାନ୍ତି ବୁଦିଦି ବାକ୍ୟ ୱେର୍‌ସିନା ।
ACT 26:26 ରାଜା ଆଗ୍ରିପା ! ନିନୁ ଇୟାୱିଜୁ ବିସୟ୍‌ ନେସ୍‌ତିମାନିଙ୍ଗ୍‌ ନାନ୍‌ ନି ଆଗ୍‌ଡ଼ି ଇୟା ମାଟା ୱେର୍‌ତେଙ୍ଗ୍‌ ସାହାସ୍‌ କିଜିନା, ନାନୁ ପୁରା ନେସ୍‌ନା ଜେ, ଇୟାୱିଜୁ ବିସୟ୍‌ ନିଙ୍ଗିଁ ଜାଣାମାନାତ୍‌, ଇରିଙ୍ଗ୍‌ ନେସ୍‌ଇ ବାଡିଦୁ ନେସ୍‌ଇ ୱାଜା ଇୟା ବିସୟ୍‌କୁ ଗଟାଉଁ ।
ACT 26:27 ଏ ରାଜା ଆଗ୍ରିପା, ନିନୁ ବାବବାଦିରିଙ୍ଗ୍‌ ବିସ୍‌ବାସ୍‌ କିନି ? ନିନୁ ବିସ୍‌ବାସ୍‌ କିନି ଇଜି ନାନ୍ ନେସ୍‌ନା ।”
ACT 26:28 ଆବେନୁ ଆଗ୍ରିପା ପାଉଲତିଙ୍ଗ୍‌ ଇର୍ହାନ୍‌, “ଇୟା ଉଣା ସମୟ୍‌ତି ଲୋଇ ନିନୁ ଇନିକା ନାଙ୍ଗିଁ କ୍ରିସ୍ଟିୟାନ୍‍ କିନା ଇଜି ଅଡ଼ବିଜିନି ?”
ACT 26:29 ପାଉଲ ଇର୍ହାନ୍‌, “ଉଣା ସମୟ୍‌ ଆପିତ୍‌, କି ନାଣ୍ତ ସମୟ୍‌ ଆପିତ୍‌, ମାପୁରୁଦିମାନୁ ନା ନିସ ପାର୍‌ତାନା, ନିନ୍‌ ମାରି ନେରୁ ନା ମାଟା ୱେର୍‌ଇମାନି ୱିଜେରେ ନା ୱାଜା ଆପିର୍‌, ମାରିବା ଇୟାୱାଜା ସିକିଣିଦାନ୍‌ ତରାୟ୍‌ଆଜି ଜଇଲ୍‍ତୁ ସୋଲିର୍‌ ଇଜି ନାନ୍ ଇନ୍‌ଏ ।”
ACT 26:30 ତାନେୱେନ୍‌କା ରାଜା, ସାସନକିନିକାନ୍‌, ବର୍ଣ୍ଣିସ୍ ମାରି ଆଇକାର୍‌ ୱିଜେରେ ସନ୍‌ଡ୍ରେଙ୍ଗ୍‌ ଇଜି ନିଙ୍ଗିଁତାର୍‌ ।
ACT 26:31 ୱାର୍‌ ସୋଲ୍‌ସି ମାର୍‌ଇୱାଲେ ନିଜେନିଜେଦିଙ୍ଗ୍‌ ଇର୍ହାର୍‌, “ଇୟା ଲୋକ୍‌ ଇୟାୱାଜା ଇନି ପାଣି କିଏନ୍‌, ଆମାତାନି ଉଣ୍ତିଙ୍ଗ୍‌ ୱାନ୍‌ ସାନିଦଣ୍ତ ପୟ୍‌ନାନ୍‌ ମାରି ଜଇଲ୍‍ତୁ ସନାନ୍‌ ।”
ACT 26:32 ଆଗ୍ରିପା ପେସ୍ଟସ୍‍ତିଙ୍ଗ୍‌ ଇର୍ହାନ୍‌, “ଜଦି ଇୟା ଲୋକୁ କାଇସର୍‍ତିମାନୁ ୱେର୍‌ଏତାନ୍‌ ମାନ୍ଧି, ଆର୍‌ତିଙ୍ଗ୍‌ ୱାନିଙ୍ଗ୍‌ ମାଡୁ ଡ଼ିସ୍‌ସୋ ସିଦେଙ୍ଗ୍‌ ଆତାତ୍‌ମାନ୍ଧି ।”
ACT 27:1 ମାପୁ ଇଟାଲିଦୁ ସନାଟ୍‌ ଇଜି ତିଆର୍‌ ଆତାମାର୍ହାପ୍‌, ନାସ୍ତିୱାଲେ ପାଉଲ ମାରି ଆଇ ଏସଲୋକ୍‌ ଜଇଲ୍‌ତୁ ମାର୍‌ଇକାର୍‌ “କାଇସର ସନ୍ୟଦଲ୍‌” ଦର୍‌ତି ଉନ୍‌ଡ୍ରି ରୋମିୟ ସନ୍ୟ ଦଲ୍‌ତି ସେନାପତି ଯୁଲିୟସଦି କିୟୁଦୁ ସର୍‌ପେ ଆତାର୍‌ ।
ACT 27:2 ମାପୁ ଆସିଆ ଦେସ୍‌ତି ସାମୁଦୁର୍‌ତିପାଡ଼ିଦୁ ମାନି ବାଡିଆଙ୍ଗାଁ ସନି ଉଣ୍ତିଙ୍ଗ୍‌ ତିଆର୍‌ଆତିମାନି ଉନ୍‌ଡ୍ରି ଆଦ୍ରାମୁତ୍ତୀୟ ଉନ୍‌ଡ୍ରି ଏରୁଜାହାଜ୍‍ତୁ ଏକ୍‌ତାପ୍‌ । ଆରିସ୍ଟାର୍କସ୍‍ ଦର୍‌ତି ତେସଲନିକିଆ ଗାଡ଼୍‌ତି ଅରେନ୍‌ ମାସିଦୋନିଆଦି ଲୋକ୍‌ ମା ୱାଲେ ମାର୍ହାନ୍‌ ।
ACT 27:3 ମାରି ଅର୍‍ଲେନ୍‍ ମାପୁ ସିଦନ୍‍ତୁ ଇତାପ୍‌ । ଯୁଲିୟସ୍‌ ପାଉଲତି ଉଣ୍ତିଙ୍ଗ୍‌ ସାକା ମାର୍ହାନ୍‌ । ପାଉଲତି ସଙ୍ଗ୍‌ରିମାଣ୍‌କୁ ୱାରି ଦରକାର୍‌ମାନି ଜିନିସ୍‌ ୱିଜୁ ଉଣ୍ତାକିନି ଉଦେସ୍‌ତାନ୍‌ ୱାରିଙ୍ଗ୍‌ ବେଟ୍‌ଆଦେଙ୍ଗ୍‌ ଇଜି ୱାନ୍‌ ପାଉଲତିଙ୍ଗ୍‌ ସାରି ସିତାନ୍‌ ।
ACT 27:4 ମାପୁ ଆବେଟ୍‌ତାନ୍‌ ସନି ବେଡ଼ାଦୁ ପାଡ଼ିୱାନି ଗାଲି ୱାତାତ୍‌ଆକା ସାଇପ୍ରସ୍‍ ସାମୁଦୁର୍‌ତି ପାଡ଼ି ପାଡ଼ି ସର୍ହାପ୍‌,
ACT 27:5 ସିଲିସିଆ ନି ପାମ୍ଫିଲିଆ ଜିଣାଜି ଲୁକିଆଦି ମୁରାଦୁ ଇତାପ୍‌ ।
ACT 27:6 ଆବେନୁ ୱିଜେରିଙ୍ଗ୍‌ ପେରିସେନାପତି ଆଲେକ୍‍ଜାଣ୍ତ୍ରିଆ ତ୍ରିଆଦି ଉନ୍‌ଡ୍ରି ଏରୁଜାହାଜ୍‍ ଇଟାଲିଦୁ ସନି ଉଣ୍ତିଙ୍ଗ୍‌ ତିଆର୍‌ ଆଜିମାନିକା ସୁଡ଼ୁଜି ମାଙ୍ଗିଁ ଆବେନୁ ଏକିସ୍‌ତାନ୍‌ ।
ACT 27:7 ମାପୁ ବେସି ଦିନ୍‌ ସାନ୍ଧି ଦିରେ ଦିରେ ସୋଲ୍‌ସି ବଡ଼େ କାସ୍ଟୁଦାନ୍‌ କ୍ନିଦ ଗାଡ଼୍‌ ଲାକ୍‌ତୁ ଇତାପ୍‌ । ପାଡ଼ିୱାନି ଗାଲିଦି ଉଣ୍ତିଙ୍ଗ୍‌ ମାପ୍‌ ଆୟା ତରିନ୍‌ ମାରି ଆଗ୍‌ଡ଼ି ସନ୍‌ଡ୍ରେଙ୍ଗ୍‌ ଆଟ୍‌ଏତାପ୍‌, ଆଦେଙ୍ଗ୍‌ କ୍ରିଟ୍‌ ସାମ୍‌ଦୁରୁତି ଉଣି ତରିନ୍‌ ସିଜି ରାଜିଦାନ୍‌ ସୋଲ୍‌ସି ସାଲମୋନି ପାଡ଼ି ସିଜି ସର୍ହାପ୍‌ ।
ACT 27:8 ମାରି, ମାପୁ ପାଡ଼ି ପାଡ଼ି ବଡ଼େ କାସ୍ଟୁଦାନ୍‌ ଲାସାୟା ଗାଡ଼୍‌ ଲାକ୍‌ତୁରି ସୁନ୍ଦର୍‌ ବନ୍ଦର୍‌ ଦର୍‌ତି ବାଡିଦୁ ଇତାପ୍‌ ।
ACT 27:9 ମାପ୍‌ ଆବେନୁ ବେସି ଦିନ୍‌ ତେବାତାପ୍‌ । ଜିହୁଦିରି ଉପବାସ ପଣ୍ତୟ୍‌ ୱିଜିତା ମାର୍ହାତ୍‌, ଆୟା ବେଡ଼ାଦୁ ସାମ୍‌ଦୁରୁତୁ ସନିକା ତିଲାନିପାଣି ଆତାତ୍‌ । ଆଦେଙ୍ଗ୍‌ ପାଉଲ ୱାରିଙ୍ଗ୍‌ ଇୟା ମାଟେଙ୍ଗ୍‌ ୱେର୍‌ତାନ୍‌ :
ACT 27:10 “ତଡ଼କୁ ନାନ୍‌ ନେସ୍‌ତେଙ୍ଗ୍‌ ଆଟ୍‌ସିନା ଜେ, ଜଦି ମାପ୍‌ ଇବେଣ୍‌କୁ ମାରି ସନ୍‌ଡ୍ରେଙ୍ଗ୍‌ ଆରାମ୍‌ କିନିକା, ଆକା ତିଲାନିପାଣି ଆନାତ୍‌ । କେବଲ ଜେ ଜିନିସ୍‌ପତ୍ର ନି ଜାହାଜ୍‌ ନାସ୍ଟୁ ଆନାତ୍‌, ଆକା ସିଲେ, ମାତର୍‌ ମା ଜିବନ୍‌ତିଙ୍ଗ୍‌ ବା ସାନି ମୁସ୍‌କୁ ମାନାତ୍‌ ।”
ACT 27:11 ମାତର୍‌ ସେନାପତି ପାଉଲତି ମାଟା ବିସ୍‌ବାସ୍‌ କିଏଣ୍‌ଗା ଜାହାଜ୍‌ତି ପେରିୱାନିମାନୁ ମାରି ଜାହାଜ୍‌ତି ମାଲିକ୍‌ତି ମାଟାଦାନ୍‌ ଆସ୍‌ତାନ୍‌ ।
ACT 27:12 ପିନି କାଡ଼ା କାଟେ କିଦେଙ୍ଗ୍‌ ଆୟା ବାଡି ସୁବିଦା ସିଲେତାତ୍‍, ଆଦେଙ୍ଗ୍‌ ସୋଲ୍‌ସିମାର୍‌ଇୱାରି ମାଣ୍‌କୁ ଏସଲୋକ୍‌ ସାମ୍‌ଦୁରୁତାନ୍‌ ସନ୍‌ଡ୍ରେଙ୍ଗ୍‌ ଜଦି ଆନାତ୍‌, ଫୈନିକ୍‌ସ୍‌ତୁ ପିନି କାଡ଼ା କାଟେକିନି ଉଣ୍ତିଙ୍ଗ୍‌ ମାରିଙ୍ଗ୍‌ । ଫୈନିକ୍‌ସ୍‌ ଉଣେରି ନି ୱେଡ଼ାଆର୍‌ନି ତରିନ୍‌ ମାରି ଡେବିରି ନି ୱେଡ଼ାଆର୍‌ନି ତରିନ୍‌ ମକମ୍‌ କିଜି ତେବାତିମାନି କ୍ରିଟ୍‌ଦି ଉନ୍‌ଡ୍ରି ବାଡି ।
ACT 27:13 ଏସ୍ତିୱାଲେ ଉଣେରି ତରିଟାନ୍‍ ଦିରେ ଦିରେ ଗାଲି ୱାତାତ୍‌, ସନିକାର୍‌ ଇୟାତାନିଙ୍ଗ୍‌ ଉନ୍‌ଡ୍ରି ନେଗି ମାଟା ଇଜି ଅଡ଼ବିତାର୍‌ ମାରି ଲଙ୍ଗର୍‌ ପେର୍‌ଜି ଏସା ଆକ ସନ୍‌ଡ୍ରେଙ୍ଗ୍‌ ଆନାତ୍‌, କ୍ରିଟ୍‌ଦି ପାଡ଼ି ପାଡ଼ି ସନ୍‌ଡ୍ରେଙ୍ଗ୍‌ ଆସ୍‌ତାର୍‌ ।
ACT 27:14 ମାତର୍‌ ଆୟା ଦାପ୍ରେନେ ସାମ୍‌ଦୁରୁ ଦିପ୍‍ ତରିଟାନ୍‌ ଡେବିରି ନି ଆଗ୍‌ଡ଼ିରାନ୍‌ ଗାଲି ନାଣ୍ତଦାନ୍‌ ନାଣ୍ତ ୱାଜି
ACT 27:15 ଜାହାଜ୍‌ତିଙ୍ଗ୍‌ ଆତାଡ଼ାତାତ୍‌ । ଜାହାଜ୍‌ତିଙ୍ଗ୍‌ ଗାଲି ତରିନ୍‌ ମକମ୍‌ କିଜି ଇଡ୍‌ଦେଙ୍ଗ୍‌ ଆଟ୍‌ଏତାପ୍‌ଆକା ମାପ୍‌ ମାରି ସେସ୍ଟା କିଏଣ୍‌ଗା ଗାଲିଦୁ ଜାହାଜ୍‌ତିଙ୍ଗ୍‌ ଦେଲ୍‌ଜ ସନ୍‌ଡ୍ରେଙ୍ଗ୍‌ ଡ଼ିସ୍‌ତା ସିତାପ୍‌ ।
ACT 27:16 ମାରି, ଉନ୍‌ଡ୍ରି ଇସ୍ରି ବାଡି କାଉଦାଦି ଉଣେରି ତରିନ୍‌ ସିଜି ସନି ୱାଲେ ଅଡ଼ପ୍‌ ଗାଲିଦାନ୍‌ ରକ୍‌ୟା ପୟ୍‌ତା ମାର୍ହାପ୍‌ । ଆବେନୁ ମାପୁ ଏଣ୍ତେସ୍‌ବା ଜାହାଜ୍‌ତି ଡଙ୍ଗାଁଦିଙ୍ଗ୍‌ ନେଗି ବାଡିଦୁ ଇଡ୍‌ଦେଙ୍ଗ୍‌ ଆଟ୍‍ତାପ୍‌ ।
ACT 27:17 ଡଙ୍ଗାଁସାଲାକିନିକାର୍‌ ତାନିଙ୍ଗ୍‌ ଜାହାଜ୍‌ ମୁସ୍‌କୁ ପେର୍‌ତାର୍‌ ମାରି ନାସ୍‌ତି ସାକାଦାନ୍‌ ଡାଟ୍‌ତାନ୍‌ ଜାହାଜ୍‌ତି ୱାଲେ ତର୍‌ତାର୍‌ । ଜାହାଜ୍‌ ଲିବିୟା ସାମ୍‌ଦୁର୍‌ ପାଡ଼ିଦି ବାଲି ଲୋଇ ଡ଼ୁଗୁଗାସନାତ୍‌ ଇଜି ତିଲାଜି ଡଙ୍ଗାଁସାଲାକିନିକାର୍‌ ପାର୍‌ଦା କୁତ୍‌ତାସିତାର୍‌ ଜାହାଜ୍‌ତିଙ୍ଗ୍‌ ଗାଲି ୱାନିମାନୁ ଦେଲ୍‌ଜି ସନ୍‌ଡ୍ରେଙ୍ଗ୍‌ ଡ଼ିସ୍‌ତାସିତାର୍‌ ।
ACT 27:18 ନାଣ୍ତ ଗାଲି ଆଜିମାରିଙ୍ଗ୍‌ ଆୟା ମାର୍‌ନାଣ୍ତିଙ୍ଗ୍‌ ୱାର୍‌ ଜାହାଜ୍‌ତାନ୍‌ ଜିନିସ୍‌ପତ୍ର ଏର୍‌ତୁ ପୋକ୍‌ତାର୍‌,
ACT 27:19 ମାରି, ଆୟା ମାର୍‌ନାଣ୍ତିଙ୍ଗ୍‌ ଜାହାଜ୍‌ତି ଏସ ସାସାପାତି ସାମ୍‌ଦୁରୁତୁ ପୋକ୍‌ତାର୍‌ ।
ACT 27:20 ନାଣ୍ତ ଦିନ୍‌ ସାନ୍ଧି ମାପ୍‌ ୱେଡ଼ା କି ସୁକେଙ୍ଗ୍‌ ସୁଡ଼ୁଦେଙ୍ଗ୍‌ ଆଟ୍‌ଏତାପ୍‌ ମାରି ନାଣ୍ତଦାନ୍‌ ନାଣ୍ତ ଗାଲି ୱାଜିମାର୍‌ର୍ହାତ୍‌ । ସାରାସାରିୱେନ୍‌କା ମାପୁ ରକିୟା ପୟ୍‍ନି ଆସା ୱିଜୁ ଡ଼ିସ୍‌ତା ସିତାପ୍‌ ।
ACT 27:21 ମାରି, ୱିଜେରେ ନିସ ଦିନ୍‌ ସାନ୍ଧି ବାଙ୍ଗାଁଦୁ ତେବାତି ୱେନ୍‌କା, ପାଉଲ ୱାରି ଲୋଇ ନିଲ୍‌ତାନ୍‌ନୋ ଇର୍ହାନ୍‌, “ଏ ତଡ଼ାନ୍‌କୁ, ମିରୁ ନା ମାଟା ଇସାବ୍‌ତାନ୍‌ କ୍ରିଟ୍‌ଦାନ୍‌ ଜାହାଜ୍‌ ଡ଼ିସ୍‌ଇ ମାନିକାଇରିଙ୍ଗାଁ, ମା ଇୟା କାକୁର୍ତି ଗଟେଆଏତାତ୍‌ ମାନ୍ଦି ।
ACT 27:22 ମାତର୍‌ ଇଲେଇ ନାନ୍‌ ମିଙ୍ଗିଁ ଇଜିନା, ମିରୁ ସାହାସ୍‌ ଆସ୍‌ତୁ । ମି ଲୋଇରାନ୍‌ ଅରେନ୍‌ୱାନିନ୍ଧିବା ଜିବନ୍‌ ସଲ୍‌ଏତ୍‌, କେବଲ ଜାହାଜ୍‌ ନାସ୍ଟୁ ଆନାତ୍‌ ।
ACT 27:23 ନାନ୍‌ ଆମା ମାପୁରୁଙ୍ଗୁଁ ସେବା କିଜିନା, ଇଏରି ନାଡ଼ାଦୁ ୱାନି ଅରେନ୍‌ ମୁସ୍‌କୁପୁର୍‌ତି ଦୁତ୍‌ ନା ଲାକ୍‌ତୁ ୱାଜି ଇର୍ହାନ୍‌,
ACT 27:24 ପାଉଲ, ନିନୁ ତିଲାମା । ନିନୁ ପୁରା କାଇସର୍‍ଦି ଆଗ୍‌ଡ଼ି ନିନି । ନି ଉଣ୍ତିଙ୍ଗ୍‌ ମାପୁରୁ ସାକା ଆତିମାନିଙ୍ଗ୍‌, ନି ୱାଲେ ସୋଲ୍‌ସିମାନି ୱିଜେରି ଜିବନ୍‌ ୱାନ୍‌ ରକ୍‌ୟା କିନାନ୍‌ ।
ACT 27:25 ମାରି, ତଡ଼ାନ୍‌କୁ, ସାହାସ୍‌ ଆସ୍‌ତୁ ! ଇରିଙ୍ଗ୍‌ ନାନୁ ମାପୁରୁଦିମାନୁ ବିସ୍‌ବାସ୍‌ କିନା, ନାଙ୍ଗିଁ ଆମାକା ୱେରାୟ୍‌ଆତାମାନାତ୍‌, ଟିକ୍‌ ଆୟାୱାଜା ଗଟାନାତ୍‌ ।
ACT 27:26 ମାତର୍‌ ମାଡୁ ଆଗ୍‌ଡ଼ି ସୋଲ୍‌ସି ଉନ୍‌ଡ୍ରି ସାମ୍‌ଦୁରୁ ଲୋଇ ମାନି ବାଡିଦୁ ଇଦେଙ୍ଗ୍‌ ପଡ଼ାନାତ୍‌ ।”
ACT 27:27 ଇୟା ସଲ୍‌ସିନିମାନୁ ସତି ସଉଦ ଦିନ୍‌ତୁ, ମାଡୁ ଆଦ୍ରିଆ ସାମ୍‌ଦୁରୁତୁ ଗାଲିପିରୁ ଦାନ୍‌ ଆୟାଦାପ୍ରେ ପେଲାୟ୍‌ ଆଜି ସୋଲ୍‌ପୁ ସୋଲ୍‌ପୁ, ପୁରା ମାଜାର୍‌ନାଡ଼ା ବେଡ଼ାଦୁ ଡଙ୍ଗାଁସାଲାକିନିକାର୍‌ ଅନୁମାନ୍‌ କିତାର୍‌ ଜେ, ମାଡୁ ପାଡ଼ି ଇଗା ସୋଲ୍‌ସିନିକା ।
ACT 27:28 ୱାର୍‌ ଲେକିସ୍‌ କିଜି ନେସ୍‌ତାର୍‌, ଆବେନୁ ଏରୁଦି ଗୁମି ସଏ କଡ଼େ ପୁଟ୍‌ ମାନାତ୍‌ । ମାରି ଅଡ଼ପ୍‌ ଆଗ୍‌ଡ଼ି ସୋଲ୍‌ସି ମାରି ଉନ୍‌ଡ୍ରି ଦେବା ଲେକିସ୍‌ କିଜି ନବେ ପୁଟ୍‌ ଗୁମି ଏରୁ ମାନେ ।
ACT 27:29 ଜାହାଜ୍‌ ଏଣ୍ତେସ୍‌ ଆମା ଗରନ୍‌ତୁ ସୋଲ୍‌ସି ଡୁକାନାତ୍‌ ଇଜି ତିଲାଜି ୱାର୍‌ ୱେନ୍‌କାରାନ୍‌ ନାଲ୍‌ଗି ପେରିଲୁହାମକେଙ୍ଗ୍‌ ପୋକ୍‌ତାରୋ ମାରି ସାଲ୍‌ଦି ଏସ୍ତିୱାଲେ ଆନାତ୍‌ ଇଜି କାପ୍‌କିଜି ତେବାତାର୍‌ ।
ACT 27:30 ତାନେୱେନ୍‌କା ଡଙ୍ଗାଁସାଲାକିନିକାର୍‌ ଜାହାଜ୍‌ତାନ୍‌ ରେସି ୱାଜି ସନ୍‌ଡ୍ରେଙ୍ଗ୍‌ ସେସ୍ଟା କିତାର୍‌ । ଜାହାଜ୍‌ତି ଆଗ୍‌ଡ଼ିରାନ୍‌ ମାରି ଏସ ପେରିଲୁହାମକେଙ୍ଗ୍‌ ପୋକ୍‌ତେଙ୍ଗ୍‌ ସାଲାକି କିଜି, ୱାର୍‌ ଜାହାଜ୍‌ ମୁସ୍‌କୁ ମାନି ଡଙ୍ଗାଁଦିଙ୍ଗ୍‌ ଆଡ୍‍ଗି ରେପ୍‌ତାର୍‌ ।
ACT 27:31 ମାତର୍‌ ପାଉଲ ସେନାପତି ମାରି ସନ୍ୟରିଙ୍ଗ୍‌ ଇର୍ହାନ୍‌, “ଡଙ୍ଗାଁସାଲାକିନିକାର୍‌ ଜାହାଜ୍‌ତୁ ମାନ୍‌ଏତିଙ୍ଗ୍‌, ମି ରକିୟା ପୟ୍‌ନିକା ମାରି ଆସା ସିଲେତ୍‌ ।”
ACT 27:32 ଆବେନୁ ସନ୍ୟର୍‌ ଡଙ୍ଗାଁଦି ନାସ୍‍କୁୱିଜୁ କୟ୍‌ଜି ଏର୍‌ତୁ ଦେଲ୍‌ଜି ସନ୍‌ଡ୍ରେଙ୍ଗ୍‌ ଡ଼ିସ୍‌ତାସିତାର୍‌ ।
ACT 27:33 ସାଲ୍‌ଦି ଆନି ଆଗ୍‍ଡ଼ିନେ ପାଉଲ ୱିଜେରିଙ୍ଗ୍‌ ଉଣ୍ତେଙ୍ଗ୍‌ ଇଜି ଇର୍ହାନ୍‌, “ଇୟା ସଉଦ ଦିନ୍‌ ଆତାତ୍‌ନି, ମିରୁ ଇନିକା ଉଣୁଇଦେର୍‌ ।”
ACT 27:34 ବାତିଙ୍ଗ୍‌ ମାଲିତା, ଇଲେଇ ଇନିକା ତିନ୍‌ଡ୍ରୁ, ଜିଜ ତେବାତେଙ୍ଗ୍‌ ଇକା ପୁରା ଦର୍‌କାର୍‌ ମାନାତ୍‌ । ତିଲାମାଟ୍‌, ମି ତାଲାଦି ଉନ୍‌ଡ୍ରି ବା କୁକୁଟି ନାସ୍ଟୁ ଆଏତ୍‌ ।
ACT 27:35 ଇୟାୱିଜୁ ମାଟା ୱେର୍‌ସି ପାଉଲ ରୁଟି ଆସ୍‌ସି ୱିଜେରି ଆଗ୍‌ଡ଼ି ମାପୁରୁଙ୍ଗୁଁ ଦନ୍ୟବାଦ୍‌ ସିଜି ରୁଟି ରୁକ୍‌ସି ତିର୍ହାର୍‌ ।
ACT 27:36 ଆବେନୁ ୱାର୍‌ ୱିଜେରେ ସାହାସ୍‌ ଆଜି ନିଜେନିଜେ ବା ତିର୍ହାର୍‌ ।
ACT 27:37 ନାସ୍ତିୱାଲେ ଜାହାଜ୍‌ତୁ ୱିଜେରେ ଦୁଇସ ସତୁରି ସୋଅ ଲୋକ୍‌ ମାର୍ହାର୍‌ ।
ACT 27:38 ୱିଜେରେ ପଟା ବର୍ତି ଉଟି ୱେନ୍‌କା ଜାହାଜ୍‌ତିଙ୍ଗ୍‌ ଉସାସ୍‌ କିନି ଉଣ୍ତିଙ୍ଗ୍‌ ଆବେନୁ ମାର୍‌ଇ ୱିଜୁ ଗଦ୍‍ମୁ ସାମ୍‌ଦୁରୁତୁ ପୋକ୍‌ତାର୍‌ ।
ACT 27:39 ମାର୍‌ନାଣ୍ତିଙ୍ଗ୍‌ ସାଲ୍‌ଦି ପାଡ଼ି ଆମା ବାଡିଦୁ ୱାଜି ୱାର୍‌ ଇତାର୍‌, ଡଙ୍ଗାଁସାଲାକିନିକାର୍‌ ନେସ୍‌ତେଙ୍ଗ୍‌ ଆଟ୍‌ଏତାର୍‌; ମାତର୍‌ ୱାର୍‌ ସୁଡ଼ୁତାର୍‌, ଆକା ଉନ୍‌ଡ୍ରି ଇସ୍ରିସାମ୍‌ଦୁରୁତି ବାଲି ବୁମି । ଆବେନୁ ଜାହାଜ୍‌ ଅତେଙ୍ଗ୍‌ ଇଜି ତିର୍‌ କିତାର୍‌ ।
ACT 27:40 ଆଦେଙ୍ଗ୍‌ ପେରିଲୁହାମକେଙ୍ଗ୍‌ ନାସ୍‌କୁ ୱିଜୁ କୟ୍‌ଜି ଆୟାୱିଜୁ ସାମ୍‌ଦୁରୁ ଆଡ୍‍ଗି ମୁସାୟ୍‌ ଆନି ଉଣ୍ତିଙ୍ଗ୍‌ ଡ଼ିସ୍‌ତାସିତାର୍‌ । ମାରି ଏଣ୍ତେଲ୍‌ତି ନାସ୍‌କୁୱିଜୁ କୁତ୍‌ସି ସିଜି ସାମାନ୍‌ଦୁ ତର୍‌ତିମାନି ପାର୍‌ଦାଦିଙ୍ଗ୍‌ ପେର୍‌ତାର୍‌ । ଏଣ୍ତେସ୍‌କି ଗାଲିଦାନ୍‌ ପେଲାୟ୍‌ ଆଜି ଜାହାଜ୍‌ ପାଡ଼ି ତରିନ୍‌ ସନ୍‌ଡ୍ରେଙ୍ଗ୍‌ ଆସ୍‌ତାତ୍‌ ।
ACT 27:41 ମାତର୍‌ ବାଲି ଚଡ଼ା ମୁସ୍‌କୁ ନାଣ୍ତଡୁକାଜି ଜାହାଜ୍‌ତି ଆଗ୍‌ଡ଼ିରିକା ଆଡ୍‍ଗି ମୁଜାୟ୍‌ ଆତାତ୍‌ ମାରି ଉଲୁକାଏରୁ ନାଣ୍ତ ଡୁକାଜି ଜାହାଜ୍‌ତି ୱେନ୍‌କା ତରିଟିକା ରୁଙ୍ଗୁଁଦେଙ୍ଗ୍‌ ଆସ୍‌ତାତ୍‌ ।
ACT 27:42 ଜଇଲ୍‌ତୁମାରିଇକାର୍‌ ପାଡ଼ି ପଙ୍ଗ୍‌ଁରାଜି ପଙ୍ଗ୍‌ଁରାଜି ସନାର୍‌ ଇଜି ଅଡ଼ବିଜି ୱାରିଙ୍ଗ୍‌ ସାୟାମାର୍‌ଗା ଡାକ୍‌ତେଙ୍ଗ୍‍ଁ ଇଜି ସନ୍ୟର୍‌ ବିଚାର୍‌ କିତାର୍‌ ।
ACT 27:43 ମାତର୍‌ ସେନାପତି ପାଉଲତି ଜିବନ୍‌ ରକିୟା କିଦେଙ୍ଗ୍‌ ଅଡ଼ବିଜି ମାର୍‌ର୍ହାନ୍‌; ଆଦେଙ୍ଗ୍‌ ୱାନ୍‌ ସନ୍ୟରିଙ୍ଗ୍‌ ଆବେଟ୍‌ତାନ୍‌ ଆଲେ କିତାନ୍‌ । ପଙ୍ଗ୍‌ଁରାଦେଙ୍ଗ୍‌ ଆଟ୍‌ସିମାନି ୱିଜେରିଙ୍ଗ୍‌ ସାମ୍‌ଦୁରୁତୁ ଗାତ୍‌ସି ପଙ୍ଗ୍‌ଁରାଜି ପଙ୍ଗ୍‌ଁରାଜି ପାଡ଼ି ସନି ଉଣ୍ତିଙ୍ଗ୍‌ ଆଦେସ୍‌ ସିତାନ୍‌,
ACT 27:44 ମାରି ମାର୍‌କାପାଟା ନି ଜାହାଜ୍‌ତି ଆମା ରୁଙ୍ଗିଁତି ମକାଦିଙ୍ଗ୍‌ ଆସ୍‌ସି ଦେଲ୍‌ଦେଙ୍ଗ୍‌ ଇଜି ଆଇୱାରିଙ୍ଗ୍‌ ଇର୍ହାନ୍‌ । ଇୟାୱାଜା ମାପୁ ୱିଜୁଲୋକ୍‌ ନେଗେନ୍‍ତାନ୍‍ ସୋଲ୍‌ସି ପାଡ଼ି ଇତାପ୍‌ ।
ACT 28:1 ନେଗେନ୍‍ତାନ୍‍ ପାଡ଼ି ସଲ୍‍ସି ସୁଡ଼ୁତାପ୍‌ ଜେ ମାପ୍‌ ମେଲତି ବାଡିଦୁ ଇତାମାନାପ୍‍ ।
ACT 28:2 ଆବେଣି ପୁର୍ବେଦାନ୍‌ ବାସାତିଲୋକୁ ମା ଉଣ୍ତିଙ୍ଗ୍‍ଁ ଜିବନ୍‌ନୋନିକା ତର୍‍ତାର୍‍ । ନାସ୍ତିୱାଲେ ପିରୁ ୱାଜି ପିନି ଆଜିମାର୍ହାତ୍‍ । ଆଦେଙ୍ଗ୍‍ଁ ୱାର୍‌ ସିସୁ କାସିସ୍‍କିଜି ମାଙ୍ଗିଁ କୁକ୍‍ତାର୍‍ ।
ACT 28:3 ପାଉଲ ମୋପ ୱେର୍‍କୁ ପେର୍‌ଜି ସିସୁଦୁ ପକ୍‍ତେଙ୍ଗ୍‍ଁ ସଲ୍‍ସି ମାର୍ହିୱାଲେ ଆବେଟାନ୍‍ ଉନ୍‍ଣ୍ତ୍ରି ସାରାସ୍‍ ସତାତ୍‍ ମାରି ୱେସ୍‍ନି ମାଣାନ୍‌ ରକିୟା ପୟ୍‍ଦେଙ୍ଗ୍‍ଁ ଇଜି ୱାନି କିୟୁ ମୁସ୍‌କୁ ଏକ୍‌ସି ଆବେ ତେର୍‌ବିଜି କାସ୍‌ତା ମାର୍‌ର୍ହାତ୍‌ ।
ACT 28:4 ଆବେ ବାସାତିଲୋକୁ ପାଉଲ୍‍ତି କିୟୁଦୁ ଦୁଙ୍ଗ୍‍ଁଜିମାନି ସାରାସ୍‌ତିଙ୍ଗ୍‍ଁ ସୁଡ଼୍‌ଜି ୱାରିୱାରି ଲୋଇ ଇନ୍‍ଜିସାତାର୍‌, “ଇକାନ୍‌ ସତେନ୍‍ ଅରେନ୍‌ ଲୋକାଙ୍ଗ୍‌ କାତ୍‍ତିକାନ୍‍ ଆନାମାନାନ୍‌, ୱାନ୍‌ ସାମ୍‍ଦୁର୍‍ତାନ୍‍ ରକିୟା ପୟ୍‌ତି ସର୍ହିମାରିଙ୍ଗ୍‍ଁ ବା ଦାର୍ମୁ କିୟୁଦାନ୍‌ ମାରି ଜିଏନ୍‍ ।”
ACT 28:5 ମାତର୍‌ ପାଉଲ ନିଜେ ଗାଉ ଆଏଜି, ସାରାସ୍‌ତିଙ୍ଗ୍‍ଁ ସିସୁ ଲୋଇ ସାଡ଼୍‍ତା ପକ୍‌ତାନ୍‌ ।
ACT 28:6 ପାଉଲ୍‍ତି ମେନ୍ଧଲ୍‍ ୱାସ୍‍ସି ନିଙ୍ଗ୍‍ଁନାତ୍‍ ମାରି ୱାନ୍‌ ସାଜି ଆଡ୍‍ଗି ଆର୍‌ନାନ୍‌ ଅଡ଼୍‍ବିଜି, ୱାର୍‌ ଏସ ସମୟ୍ କାପ୍‍କିତାର୍‍ । ମାତର୍‌ ନାଣ୍ତ ସମୟ୍ କାପ୍‌କିଜି ଏସ୍ତିୱାଲେ ସୁଡ଼ୁତାର୍‌ ଜେ, ପାଉଲ୍‍ତି ଇନିକା ନାସ୍ଟୁ ଆଏତାତ୍‌, ୱାର୍‌ ମନ୍‍ ଡ଼େପ୍‍ସି ଇର୍ହାର୍‌, “ଇକାନ୍‌ ଅରେନ୍‌ ମାପୁରୁ !”
ACT 28:7 ଆବେଟାନ୍‍ କାଣ୍ତେକ୍‍ ଆକ ଦ୍ୱୀପ ବାଡିଦି ପେରି ପାଣିକିନିକାନ୍‌ ପବ୍ଳିୟତି ଇଲୁ ନି କିଡ଼ିଇ ମାର୍ହାତ୍‌ । ୱାନ୍‌ ମାଙ୍ଗିଁ କୁକ୍‍ତାନ୍‍ ମାରି ମାପ୍‌ ମୁନେନ୍‌ ସାନ୍ଦି ତାମେମାନୁ ତେବାତାପ୍‍ ।
ACT 28:8 ପବ୍ଳିୟସ୍‍ତି ବୁବାସି ନବ୍‌ ନି ଆମାସୟ୍‍ ରୋଗ୍‍ ଆତାମାର୍ହାନ୍‍ । ପାଉଲ ୱାନି ବାକ୍‍ରାଦୁ ସର୍ହାନ୍‍, ୱାନି ଉଣ୍ତିଙ୍ଗ୍‍ଁ ପାର୍‌ତନା କିଜି ୱାନି ମୁସ୍‌କୁ କିୟୁ ଇଡ୍‌ଜି ୱାନିଙ୍ଗ୍‍ଁ ନେଗେନ୍‌ କିତାନ୍‌ ।
ACT 28:9 ଇୟା ଗଟନା ୱେନ୍‌କା ଦିପଦି ରୋଗିଲୋକ୍‍ ୱିଜେରେ ପାଉଲ ଲାକ୍‌ତୁ ୱାଜି ନେଗେନ୍‌ ଆତାର୍‌ ।
ACT 28:10 ୱାର୍‌ ମାଙ୍ଗିଁ ନାଣ୍ତ ସାହାଜ୍ୟ ସିତାର୍‍ ମାରି ମାପ୍‌ ଆବେଟାନ୍‍ ଜାହାଜ୍‍ତୁ ବାସ୍‌ସି ସନିୱାଲେ ମା ସନି ଉଣ୍ତିଙ୍ଗ୍‍ଁ ଦର୍‍କାରି ମାନି ୱିଜୁ ୱାର୍‌ ତାସି ଜାହାଜ୍‍ତୁ ଇଟ୍‍ତା ସିତାର୍‍ ।
ACT 28:11 ଆଲେକ୍‍ଜାଣ୍ତ୍ରିଆ ଦାନ୍‍ ୱାତିମାନି “ଜାଡ଼୍‌ୱା ଦିୟାମ୍‍” ଦର୍‌ତି ଉନ୍‍ଣ୍ତ୍ରି ଜାହାଜ୍‌ ମେଲିତି ଦିପଦୁ ପିନି କାଡ଼ା କାଟେ କିତାମାର୍ହାତ୍‍ । ଦିପଦୁ ମୁନ୍‍ଣ୍ତ୍ରି ଲେଜ୍‌କୁ ତେବାତି ୱେନ୍‌କା ମାପ୍‌ ଆୟା ଜାହାଜ୍‍ତୁ ବାସ୍‌ସି ମାରି ସନ୍‍ଡ୍ରେଙ୍ଗ୍‍ଁ ଆରାମ୍‌ କିତାପ୍‍ ।
ACT 28:12 ଆଗ୍‌ଡ଼ି ମାପ୍‍ ସିରାକୁସ୍‍ ଗାଡ଼୍‌ତୁ ଇଜି ଆବେ ମୁନେନ୍‌ ତେବାତାପ୍‍ ।
ACT 28:13 ଆବେଟାନ୍‍ ମାରି ସଲ୍‍ସି ମାପ୍‌ ରେଗିୟ ଗାଡ଼୍‌ତୁ ଇତାପ୍‍ । ମାର୍‍ନାଣ୍ତିଙ୍ଗ୍‍ଁ ଡେବିରି ତରିଟାନ୍‍ ଗାଲି ୱାତାତ୍‍ ମାରି ରିନେନ୍‍ ୱେନ୍‌କା ପୁତେଅଲି ଗାଡ଼୍‌ତୁ ଇତାପ୍‍ ।
ACT 28:14 ଆବେ ଏସ ଲୋକୁ କ୍ରିସ୍ତ ବିସ୍‍ବାସ୍‌ତି ତଡ଼ାନ୍‌କାଙ୍ଗ୍‌ ବୁଡ଼ିତାପ୍‍ । ୱାରି ୱାଲେ ଉନ୍‍ଣ୍ତ୍ରି ୱାରା ତେବାଦେଙ୍ଗ୍‍ଁ ଇଜି ୱାର୍‌ ମାଙ୍ଗିଁ ବାତିଙ୍ଗ୍‌ ମାଲିତାର୍‍ । ସାରାସାରି ରୋମ୍‍ତୁ ସର୍ହା ଇତାପ୍‍ ।
ACT 28:15 ମା କାବୁର୍‌ ୱେନ୍‌ଜି ରୋମ୍‍ତି ତଡ଼ାନ୍‌କୁ ମାଙ୍ଗିଁ ବେଟ୍‌ଆଦେଙ୍ଗ୍‍ଁ ଇଜି “ଆପିୟ ସାତାଦୁ” ନି “ତିନି ସରାଇ” ଦର୍‌ତି ଗାଡ଼୍‍କାଙ୍ଗ୍‍ଁ ୱାତାର୍‌ । ୱାରିଙ୍ଗ୍‍ଁ ସୁଡ଼୍‌ଜି ପାଉଲ ମାପୁରୁଙ୍ଗ୍‍ଁ ଦନ୍ୟବାଦ୍‌ ସିତାନ୍‌ ମାରି ୱେଡ଼ିକା ଆତାନ୍‌ ।
ACT 28:16 ମାପ୍‌ ରୋମ୍‍ତୁ ଇତି ୱେନ୍‌କା, ପାଉଲ୍‍ତିଙ୍ଗ୍‍ଁ ସାରି ପୁଟ୍‍ତାତ୍‍ଆକା, ୱାନିଙ୍ଗ୍‍ଁ କାପ୍‍କିଦେଙ୍ଗ୍‍ଁ ବାସେ ଆତି ଅରେନ୍‌ ସନ୍ୟ ୱାଲେ ୱାନ୍‌ ନିଜେ ବଦାଦାନ୍ ଆମା ବାଡିଦୁବା ତେବାଦେଙ୍ଗ୍‍ଁ ଆଟ୍‌ନାନ୍‌ ।
ACT 28:17 ମୁନେଟି ୱେନ୍‌କା ପାଉଲ ଲାକ୍‍ତୁରି ଜିହୁଦି ନେତାରିଙ୍ଗ୍‍ଁ ଉନ୍‍ଣ୍ତ୍ରି ମିଟିଙ୍ଗ୍‍ଁ ମିସାଦେଙ୍ଗ୍‍ଁ ଇଜି କୁକ୍‍ତାର୍‍ । ୱାର୍‌ ଉଣ୍ତାତାର୍‍ଆକା ପାଉଲ ୱାରିଙ୍ଗ୍‍ଁ ଇର୍ହାନ୍‌ : “ଇସ୍ରାଏଲ୍‌ତି ତଡ଼ାନ୍‌କୁ, ମା ଲୋକା ବିରଦ୍‌ତାନ୍‌ ମାରି ମା ଡକ୍ରାଦାଦାରି ମାଣାନ୍‌ ମାପ୍‌ ପୟ୍‍ତିମାନି ରିତିନିତି ବିରଦ୍‌ତାନ୍‌ ନାନ୍ ଇନିକା କିଏତିଙ୍ଗ୍‍ଁ ବା, ଜିରୁସାଲାମ୍‍ତୁ ନାନ୍ ତରାୟ୍‍ଆଜି ରୋମିୟରି କିୟୁଦୁ ସର୍ପେ ଆତାମାନା ।
ACT 28:18 ନାଙ୍ଗିଁ ୱେନ୍‍ବାତି ୱେନ୍‌କା ସାନି ଉଣ୍ତିଙ୍ଗ୍‍ଁ ନାନ୍ ଇନି ଦସ୍‌ କିଏ ଇଜି ନେସ୍‍ତେଙ୍ଗ୍‍ଁ ଆଟ୍‍ସି ରୋମିୟ ଲୋକୁ ନାଙ୍ଗିଁ ଡ଼ିସିସ୍‍କିଜି ସିଦେଙ୍ଗ୍‍ ବଦାକିତାମାର୍ହାର୍‍ ।
ACT 28:19 ମାତର୍‌ ଜିହୁଦି ଲୋକୁ ତେନି ବିରୁଦ୍‍କିତାର୍‍ଆକା, ନିଜେଦି ଲୋକା ବିରଦ୍‌ତାନ୍‌ ନା ଇନି ଦସ୍‌ ସିଲେତିଙ୍ଗ୍‌ ବା, ନାନ୍ ସମ୍ରାଟ୍‍ତିଙ୍ଗ୍‍ଁ ମାଡ଼ିସ୍‌ କିଦେଙ୍ଗ୍‍ଁ ରାଜି ଆତା ।
ACT 28:20 ଆୟାଉଣ୍ତିଙ୍ଗ୍‌ ଇୟା ବିସୟ୍‌ତାନ୍‌ ୱାର୍‌ଗିଜି ସାଦେଙ୍ଗ୍‍ଁ ନାନ୍ ମିଙ୍ଗିଁ କୁକିସ୍‍କିତାମାନା । ସତ୍‍ତାନ୍‍, ଆମାୱାନି ମୁସ୍‌କୁ ଇସ୍ରାଏଲ୍‌ତି ଲୋକୁ ଆସା କିତାମାନାର୍‍, ୱାରି ଉଣ୍ତିଙ୍ଗ୍‍ଁ ନାନ୍ ସିକ୍‍ଣି ଦାନ୍‍ ତରାତାମାନା ।”
ACT 28:21 ୱାର୍‌ ୱାନିଙ୍ଗ୍‌ ଇର୍ହାର୍‌, “ମାପ୍‌ ଜିହୁଦା ଦେସ୍‍ତାନ୍‍ ନି ବିସୟ୍‌ତାନ୍‌ ଇନି ସିଟିଆକୁ ପୟ୍‍ଏପ୍‍, କିନି କାବୁର୍‌ ଅସି ମାରି ନି ବିସୟ୍‌ତାନ୍‌ ଇନି ଦସ୍‌ କିଜି ଇନ୍‍ଡ୍ରେଙ୍ଗ୍‍ଁ ମା ତଡ଼ାନ୍‌କା ଲୋଇରାନ୍‌ ଏନ୍‌ ଇବେ ରେଏନ୍‌ ।
ACT 28:22 ଆୟା ଆମାକାଆପିତ୍‍, ମାପ୍‌ ନି ମାଟା ୱେନ୍‍ଡ୍ରେଙ୍ଗ୍‍ଁ ବଦାକିନାପ୍‍, ଇରିଙ୍ଗ୍‍ଁ ମାପ୍‌ ନେସ୍‌ନାପ୍‌ ୱିଜୁ ଲୋକୁ ନି ଦଲ୍‌ ବିରଦ୍‌ତାନ୍‌ ମାଟା ଇଜିନାର୍‍ ।”
ACT 28:23 ୱାର୍‌ ଉନ୍‍ଣ୍ତ୍ରି ଦିନ୍‌ ତିଆର୍‌ କିଜି ମାରି ୱାରି ଲୋଇ ନାଣ୍ତ ଲୋକୁ ଆୟାନାଣ୍ତିଙ୍ଗ୍‌ ପାଉଲ ତେବାଜିମାନି ବାଡିଦୁ ୱାତାର୍‌ । ସାଲ୍‍ଦିରାନ୍‍ ନାଡ଼ା ସାନ୍ଦି ପାଉଲ ୱାରିଙ୍ଗ୍‍ଁ ମାପୁରୁଦି ରାଜିଦି ବିସୟ୍‌ତି ବାକ୍ୟ ପ୍ରଚାର୍‌ କିଜି ସାକି ସିତାନ୍‌ ମାରି ମୋସାଦି ନିୟମ୍‌ ନି ବାବବାଦିରି ମାଣାନ୍‌ ରାସାତି ବାକ୍ୟ ସପ୍‍ସି ଜିସୁଦିମାନୁ ୱାର୍‌ ବିସ୍‌ବାସ୍‌ କିଦେଙ୍ଗ୍‍ଁ ଚେସ୍ଟାକିତାନ୍‍ ।
ACT 28:24 ୱାରି ଲୋଇ ଏସ ଲୋକା ଜିବନ୍‌ ବାଦେଲ୍‌ ଆତାତ୍‌, ମାତର୍‌ ଆଇକାର୍‌ ବିସ୍‍ବାସ୍‍ କିଏତାର୍‌ ।
ACT 28:25 ଇୟା ବିସୟ୍‌ତାନ୍‌ ୱାରି ଲୋଇ ନାଣ୍ତ ଜାଟି ସତାତ୍‍ । ୱାର୍‌ ସନି ଆଗ୍‌ଡ଼ି ପାଉଲ ଉନ୍‍ଣ୍ତ୍ରି ମାଟା ମୁସ୍‌କୁ ଦିୟାନ୍‌ସିଜି ଇର୍ହାନ୍‌ : “ପବିତ୍ର ଆତ୍ମା ମି ଡକ୍ରାଦାଦାରିଙ୍ଗ୍‍ ବାବବାଦି ଜିସାୟଦି ୱେୟୁଦାନ୍‌ ଟିକ୍‌ ମାଟା ଇର୍ହାମାର୍ହାନ୍‌ !
ACT 28:26 ୱାନ୍‌ ଇର୍ହାନ୍‌ : “ଇୟା ଲୋକାଙ୍ଗ୍‌ ସଲ୍‍ସ ଇନ୍‌ଆଁ, ମିର୍‌ ୱେନିଦେର୍‍, ନାଣ୍ତ ୱେନିଦେର୍‍, ମାତର୍‌ ବୁଜାଇଦେର୍‍ । ମିର୍‌ ସୁଡ଼୍‍ଜିମାନିଦେର୍‍, ମାତର୍‌ ସୁଡ଼ୁଦେଙ୍ଗ୍‌ ଆଟ୍‌ଇଦେର୍‌ ।
ACT 28:27 ଇରିଙ୍ଗ୍‍ଁ ଇୟା ଲୋକାଦି ଜିବନ୍‌ ଉଣା ବୁଦି, ୱାର୍‌ ନିଜେ ନିଜେଦି କାଣୁକୁ ନି ଗିତଣିଙ୍ଗ୍‍ଁ ମୁକ୍‍ତାମାନାର୍‍, ଆକା ଆଏତିମାରିଙ୍ଗ୍‍ଁ, ୱାର୍‌ କାଣୁକୁ ରେସି ସୁଡ଼ୁଦେଙ୍ଗ୍‌ ଆଟ୍‍ତାର୍‍ମାନ୍ଦି ମାରି ଗିତଣିଙ୍ଗ୍‍ଁ ସିଜି ୱେନ୍‍ଡ୍ରେଙ୍ଗ୍‍ଁ ଆଟ୍‍ତାର୍‍ମାନ୍ଦି । ୱାରି ତାଲାଦୁ ବୁଜାନି ସାକ୍ତି ମାର୍ହାତ୍‍ମାନ୍ଦି; ୱାର୍‌ ମାପୁରୁ ତରିନ୍‌ ଡ଼େସି ସର୍ହାର୍‍ମାନ୍ଦି ମାରି ୱାରିଙ୍ଗ୍‌ ନାନ୍ ନେଗେନ୍‍କିତାମାନ୍ଦି ।”
ACT 28:28 ସାରାସାରି ପାଉଲ ଇର୍ହାନ୍‌, “ମିର୍‌ ନେସ୍‍ସ ମାନ୍‌ଡ଼୍ରୁ, ପରିତ୍ରାଣ ଉଣ୍ତିଙ୍ଗ୍‍ଁ ମାପୁରୁଦି ସୁସମାଚାର୍‌ ଅଣଜିହୁଦି ଲୋକା ଲାକ୍‌ତୁ ପକାୟ୍‍ଆତାମାନାତ୍‍ । ୱାର୍‌ ଆକା ୱେନାର୍‌ ।”
ACT 28:29 ମାରି, ପାଉଲ ଇୟାୱିଜୁ ମାଟା ଇର୍ହାନ୍‍ଆକା, ଜିହୁଦି ଲୋକୁ ଆପ୍‍ଣା ଆପ୍‍ଣା ଲୋଇ ସୁରି ୱାର୍‌ଗିଜି ୱାର୍‌ଗିଜି ସର୍ହାର୍‍ ।
ACT 28:30 ପାଉଲ ଉନ୍‍ଣ୍ତ୍ରି ଇଲୁ ବାଡ଼ା ଅସି ଦୁଇ ବାର୍ସେକ୍‍ ସାନ୍ଦି ତେବାତାନ୍‌ ମାରି ୱାନିଙ୍ଗ୍‍ଁ ସୁଡ଼ୁଦେଙ୍ଗ୍‌ ୱାଜିମାନି ୱିଜୁ ଲୋକାଙ୍ଗ୍‌ କୁକ୍‍ସି ମାର୍ହାନ୍‍ ।
ACT 28:31 ଦର୍ଜ ନି ସାହାସ୍‍ତି ୱାଲେ ୱାନ୍‌ ମାପୁରୁଦି ରାଜି ବିସୟ୍‌ତାନ୍‌ ପ୍ରଚାର୍‌ କିଜି ପ୍ରବୁ ଜିସୁ କ୍ରିସ୍ତଦି ବିସୟ୍‌ତାନ୍‌ ସିକିୟା ସିଜି ମାର୍ହାନ୍‍ ।
ROM 1:1 କ୍ରିସ୍ତ ଜିସୁଦି ଦାସ୍‍ ନି ମାପୁରୁସିତିମାନି ସୁସମାଚାର୍‌ ପ୍ରଚାର୍‍ କିଦେଙ୍ଗ୍‌ ଇଜି ପ୍ରେରିତ ସିସୁ ୱାଜା କୁକାୟ୍‍ଆତିମାନି ପାଉଲ୍‍ତି ଆକୁ ।
ROM 1:2 ଦାର୍ମୁସାସ୍ତ୍ରଦୁ ରାସାତି ମାନି ଇସାବ୍‍ତାନ୍‍ ଇୟା ସୁସମାଚାର୍‌ ବିସୟ୍‍ତାନ୍‍ ମାପୁରୁ ପୁରା ପୁର୍ବେକାଡ଼ାରାନ୍‍ ୱାନି ବାବବାଦିରି ମାଣାନ୍‌ ମାଟାସିତା ମାର୍ହାନ୍‍ ।
ROM 1:3 ତେନି ନାଡ଼୍‍ମି ଆଜିନାନ୍‍; ମାପୁରୁଦି ମାରିସି, ମା ପ୍ରବୁ ଜିସୁ କ୍ରିସ୍ତ । ଲୋକାୱାଜା ୱାନ୍‌ ଦାଉଦ୍‍ତି କୁଟୁମ୍‍ ।
ROM 1:4 ମାତର୍‌ ୱାନି ମାପୁରୁଦି ପବିତ୍ର ଆତ୍ମା ଉଣ୍ତିଙ୍ଗ୍‌ ୱାନ୍‌ ମାପୁରୁଦି ମାରିସି ଇଜି ତରାୟ୍‍ଆତାନ୍‍ । ସାନି ମାଣାନ୍‌ ୱାନି ପେରି ସାକ୍ତିଦି ମାରିଡ଼େସି ନିଙ୍ଗିଁନି ମାଣାନ୍‌ ଇକା ମାରି ଟିକ୍‍ ଆତାତ୍‍ । ଜିସୁ କ୍ରିସ୍ତ ମା ପ୍ରବୁ ।
ROM 1:5 କ୍ରିସ୍ତଦି ଉଣ୍ତିଙ୍ଗ୍‌ ମାପୁରୁ ନାଙ୍ଗିଁ ପେରିତ ସିସୁ ୱାଜା ବାସେକିଜି ୱିଜୁଜାତିଦି ଲୋକା ଲାକ୍‍ତୁ ପ୍ରଚାର୍‍ କିଦେଙ୍ଗ୍‌ ଆସିର୍ବାଦ୍‌ ସିତାମାନାନ୍‌, ଏଣ୍ତେସ୍‌ ୱାର୍‌ ଜିସୁମାନୁ ବିସ୍‍ବାସ୍‍ କିଜି ୱାନିଙ୍ଗ୍‍ଁ ମାନାନାର୍‌ ।
ROM 1:6 ରୋମ୍‍ତି ଗାଡ଼୍‍ତୁ ବାସାନିଲୋକୁ ! ମିର୍‌ ବା ଜିସୁ କ୍ରିସ୍ତଦି ସାରିଦୁ ବୁଲାଦେଙ୍ଗ୍‍ ବାସେଆତିମାନିଦେର୍‍ ।
ROM 1:7 ୱେନ୍‌କା ରୋମ୍‍ ଗାଡ଼୍‍ତି ଏମେୱାରିଙ୍ଗ୍‍ ମାପୁରୁ ଲାଡ୍‍କିନାନ୍‍ ମାରି ୱାନି ନିଜେଦି ଲୋକୁ ଇଜି ଆଦେଙ୍ଗ୍‍ଁ ବାସେକିତାମାନାନ୍‍, ଆୟା ୱିଜେରିଙ୍ଗ୍‌ ନାନ୍‍ ଇୟା ଆକୁ ରାସ୍‍ସିନା । ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‍ ।
ROM 1:8 ମିର୍‌ ମାପୁରୁବିସ୍‍ବାସି ଇଜି ଦୁନିଆଦୁ ୱିଜୁତରିନ୍‍ ୱେଙ୍ଗିଁତି ମାନିଦେର୍‍ । ଇୟାଉଣ୍ତିଙ୍ଗ୍‌ ପାର୍‍ତୁମ୍‍ ମି ୱିଜେରି ଉଣ୍ତିଙ୍ଗ୍‌ ଜିସୁ କ୍ରିସ୍ତଦି ଦର୍‍ତାନ୍‍ ନାନ୍‍ ମାପୁରୁଙ୍ଗ୍‍ଁ ଦନ୍ୟବାଦ୍‍ ସିଜିନା ।
ROM 1:9 ୱିଜୁ ଜିବନ୍‍ତାନ୍‍ ନାନ୍‍ ଆମା ମାପୁରୁଦି ସେବାକିଜିନା ମାରି ଆମା ମାପୁରୁଦି ମାରିସି ବିସୟ୍‍ତାନ୍‍ ନେଗିକାବୁର୍‌ ପ୍ରଚାର୍‍ କିଜିନା, ଆୟା ମାପୁରୁ ନା ସାକି ।
ROM 1:10 ପାର୍‍ତନା କିନିୱାଲେ ନାନୁ ସବୁୱାଲେ ମିଙ୍ଗିଁ ଏତ୍‍କିନା ମାରି ମି ଲାକ୍‍ତୁ ୱାଦେଙ୍ଗ୍ ଇଜି ନାଙ୍ଗିଁ ସୁଜୋଗ୍‌ ସିଦେଙ୍ଗ୍‍ ମାପୁରୁମାନୁ ବାତିଙ୍ଗ୍‍ମାଲ୍‍ଜି ୱାତାମାନା ।
ROM 1:11 ମି ଲାକ୍‍ତୁ ୱାଜି ନାନୁ ପୟ୍‍ତିମାନି ଆତ୍ମିକ ଦାନ ବିସୟ୍‍ ମିଙ୍ଗିଁ ୱେର୍‌ନି ମାଣାନ୍‌ ମି ବିସ୍‍ବାସ୍‍ତିଙ୍ଗ୍‍ ଡାଟ୍‌ କିନା, ଇକା ନା ଅରେନ୍‌ୱାନି ବଦା ।
ROM 1:12 ଇୟାବାଣାନ୍‍ ମାପ୍‌ ନିଜେନିଜେଦିମାନୁ ବିସ୍‍ବାସ୍‍ତିଙ୍ଗ୍‍ ଆଟ୍‍ୱା କିଦେଙ୍ଗ୍‌ ଆଟ୍‍ନିକା ।
ROM 1:13 ଏ ତଡ଼ାନ୍‍କୁ ନି ତାଙ୍ଗିଁକି, ମି ଲାକ୍‍ତୁ ୱାଦେଙ୍ଗ୍ ଇଜି ନାନୁ ବେସିଦେବେଙ୍ଗ୍‍ ବଦା କିତାମାନା, ମାତର୍‌ ଏସ ବାଦା ଉଣ୍ତିଙ୍ଗ୍‌, ଇୟାସାନ୍ଦି ୱାଦେଙ୍ଗ୍ ଆଟ୍‍ଏତାମାନା । ଆଇ ରାଜିଆଙ୍ଗ୍‍ଁ ଅଣଜିହୁଦି ଲୋକା ଲୋଇ ପ୍ରଚାର୍‍ କିଜି ଏଣ୍ତେସ୍‌ ଜିଣାତାମାନା, ମି ରାଜିଦୁ ବା ଆକା କିଦେଙ୍ଗ୍‌ ନା ବଦା ।
ROM 1:14 ଗ୍ରିକ୍‌ କି ବର୍ବର, ସିକିତ୍‍ ନି ଅସିକିତ୍‍ତି ୱିଜୁଜାତିଦି ଲୋକା ଉଣ୍ତିଙ୍ଗ୍‌ ନା ଦାୟିତ୍‍ ମାନାତ୍‌ ।
ROM 1:15 ଆଦେଙ୍ଗ୍‌ ରୋମ୍‍ ଗାଡ଼୍‍ତି ମି ଲାକ୍‍ତୁ ବା ସୁସମାଚାର୍‌ ପ୍ରଚାର୍‍ କିଦେଙ୍ଗ୍‌ ନା ବଦା ।
ROM 1:16 ଆୟା ସୁସମାଚାର୍‌ ମୁସ୍‌କୁ ନା ପୁରା ଆସା ମାନାତ୍‌ । ଆକା ପାର୍‍ତୁମ୍‍ ଜିହୁଦି ଲୋକାମାନୁ ମାରି ୱେନ୍‌କା ଅଣଜିହୁଦି ବିସ୍‍ବାସି ଲୋକାମାନୁ ଉଦାର୍‌ ପାଣି କିଦେଙ୍ଗ୍‌ ଇଜି ମାପୁରୁଦି ସାକ୍ତି ୱାଜା ।
ROM 1:17 ଲୋକ୍‍ ମାପୁରୁ ଲାକ୍‍ତୁ ଏଣ୍ତେସ୍‌ ଦାର୍ମୁତିକାନ୍‍ ଇଜି ୱେଙ୍ଗ୍‍ଁଦେଙ୍ଗ୍‍ ଆଟ୍‍ନାନ୍‍, ତେନି ଉପାୟ୍‌ ଆବେ ତରାୟ୍‍ ଆତାମାନାତ୍‌ । ପାର୍‍ତୁମ୍‍ତାନ୍‌ ସାରାସାରି ସାନ୍ଦି ଉଦାର୍‌ ପୟ୍‍ନି ଉନ୍‍ଣ୍ତ୍ରିମାତ୍ର ଉପାୟ୍‌ ଆଜିନାତ୍‍, ବିସ୍‍ବାସ୍‍ । ବାକ୍ୟ ଇସାବ୍‍ତାନ୍‍, “ଜେ ବିସ୍‍ବାସ୍‍ତାନ୍ ମାପୁରୁଦି ଲାକ୍‍ତୁ ଦାର୍ମୁତିକାନ୍‍ ଇଜି ୱେଙ୍ଗ୍‍ଁନାନ୍‍, ୱାନ୍‌ ଜିନାନ୍‍ ।”
ROM 1:18 ଏମେ ପାପି ତାଗ୍‍ଇପାଣିକିନି ଲୋକୁ ନିଜେଦି ତାଗ୍‍ଇପାଣିଦାନ୍‍ ସତ୍‍ତି ବାଦା କିନାର୍‌, ୱାରି ମୁସ୍‌କୁ ମୁସ୍‍କୁପୁର୍‍ତାନ୍‍ ମାପୁରୁଦି ରିସା ୱାନାତ୍ ।
ROM 1:19 ଇରିଙ୍ଗ୍‌ ମାପୁରୁ ବିସୟ୍‍ତାନ୍‍ ଆମାକା ନେସ୍‍ନି ମାଟା, ୱାର୍‌ ଆକା ନେସ୍‍ତାମାନାର୍‍ ମାପୁରୁ ନିଜେ ଆକା ନେଗେନ୍‍ ୱେର୍‍ତାମାନାନ୍‍ ।
ROM 1:20 ମାପୁରୁ ଦୁନିଆଦିଙ୍ଗ୍‌ ତିଆର୍‍ କିନି ସମୟ୍‍ତାନ୍‍, ୱାନି ତରାୟ୍‍ଆଇ ଗୁଣ୍‍ ଅର୍ତାତ୍‍ ୱାନି କାବାଆନି ଗୁଣ୍‍ ନି ୱିଜୁଦିନ୍‍ତି ସାକ୍ତି ନେଗେନ୍‍ତାନ୍‍ ତରାୟ୍‍ଆଜି ୱାତାମାନାତ୍‍, ୱାନି ତିଆର୍‍ କିତିମାନି ମାନୁ ଆକା ବ୍ୟବହାର୍ କିଦେଙ୍ଗ୍‌ ଆନାତ୍‌ । ଆଦେଙ୍ଗ୍‌ ୱାର୍‌ ନେସ୍‍ଏର୍‍ ଇଜି ସାଲାକି ତର୍‍ତେଙ୍ଗ୍‍ ଆଟ୍‍ଏର୍‍ ।
ROM 1:21 ୱାର୍‌ ମାପୁରୁଙ୍ଗୁଁ ନେସ୍‍ସି ବା ୱାନିଙ୍ଗ୍‌ ଟିକ୍‍ତାନ୍‍ ମାନାଏତାର୍‍ ବା ୱାନିଙ୍ଗ୍‌ ଆମା ବିସୟ୍‍ ଉଣ୍ତିଙ୍ଗ୍‌ ଦନ୍ୟବାଦ୍‍ ସିଏଜିନାର୍‍ । ମାତର୍‌ ୱାରି ସିନ୍ତାୱିଜୁ ଅସାର୍ ନି ୱାରି ମାନାଇ ମୋନ୍‌ ପୁରାସିକାଟି ।
ROM 1:22 ୱାର୍‌ ନିଜେଦିଙ୍ଗ୍‍ ବୁଦିମାନିକାର୍‍ ଅଡ଼୍‍ବିନାର୍‍, ମାତର୍‌ ସତ୍‌ତାନ୍‌ ୱାର୍‌ ମୁର୍କୁ ଆତାର୍‌ ।
ROM 1:23 ୱିଜୁଦିନ୍‍ତି ମାପୁରୁଙ୍ଗୁଁ ଉପାସନା ଗୌରବ୍‍ କିଏଣ୍ତା ୱାର୍‌ ସାନି ଲୋକାଙ୍ଗ୍‍, ଜାତୁ ପଟି ନି ସାରାସ୍‍ୱାଜା ବମେଙ୍ଗ୍‍ ରସ୍‍ସି ୱାନିକାଙ୍ଗ୍‍ଁ ପୁଜାକିଜିନାର୍‍ ।
ROM 1:24 ଆଦେଙ୍ଗ୍‌ ମାପୁରୁ ୱାରି ଜିବନ୍‌ତିଙ୍ଗ୍ ଡ଼ିସ୍‍ତାମାନାନ୍‍ ମାରି ୱାର୍‌ ନିଜେ ନିଜେଦି ଆସା ଇସାବ୍‍ତାନ୍‍ ତାଗ୍‍ଇପାଣିଦୁ ମିସାଜି ତେବାଜିନାର୍‍ ୱାର୍‌ ନିଜେ ନିଜେଦି ମେନ୍ଦଲ୍‌ ଦାରିପାଣି କିନିମାନୁ ମିସାକିଜି ଇଡ୍‍ନାର୍‍ ।
ROM 1:25 ୱାର୍‌ ମାପୁରୁଦି ବିସୟ୍‍ତାନ୍‍ ସତ୍‍ ବାଦ୍‍ଲୁ ମିଚ୍‌ତି ଆସା ଇଡ୍‍ଜିନାର୍‍ । ତିଆର୍‍କିତିୱାନିଙ୍ଗ୍‍ ଉପାସନା କିଏନ୍‍ଣ୍ତା, ୱାର୍‌ ତିଆର୍‍ଆତି ଜିନିସ୍‍କାଙ୍ଗ୍‍ ପୁଜା କିନାର୍‌ । ଜୁଗ୍‌ ଜୁଗ୍‍ ଦନ୍ୟ ଆପିତ୍‍ । ଆମେନ୍‍ ।
ROM 1:26 ୱାର୍‌ ସେମାର୍‍ତି ପାପ୍‍ ପାଣିଦୁ ମିସାତିମାନିଙ୍ଗ୍‌ ମାପୁରୁ ୱାରିଙ୍ଗ୍ ଡ଼ିସ୍‍ତା ସିତାମାନାନ୍‌, ୱାରି ଆଡ଼୍‍ସିକ୍‍ ଟିକ୍‍ତାନ୍‌ ବ୍ୟବହାର୍‌ କିନି ବାଦ୍‌ଲୁ ତାଗ୍‌ଇ ପାଣି ୱିଜୁ କିଜିନେ,
ROM 1:27 ମାରି ମେମାରୁଙ୍ଗୁଁ ବା ଟିକ୍‌ତାନ୍‌ ଆଡ଼୍‌ସି ୱାଲେ ତେବାଏଣ୍‌ଗା ନିଜେନିଜେଦି ଉଣ୍ତିଙ୍ଗ୍‌ ତାଗ୍‌ଇ ପାଣିଦୁ ନାସ୍ଟୁ ଆଜିନାର୍‍ । ମେମାରୁଙ୍ଗୁଁ ନିଜେନିଜେଦି ୱାଲେ କାଡ଼୍‍ନି ବ୍ୟବହାର୍‌ କିଜିନାର୍‍ ମାରି ଆବେଟ୍‍ ତାଗ୍‌ଇ ପାଣି ଉଣ୍ତିଙ୍ଗ୍‌ ଦଣ୍ତ୍‍ ପୟ୍‍ଜିନାର୍‍ ।
ROM 1:28 ଇୟା ଲୋକୁ ମାପୁରୁଦି ବିସୟ୍‍ତାନ୍‍ ଟିକ୍‍ ସିନ୍ତା ପୟ୍‍ଦେଙ୍ଗ୍‍ ବଦା ସିଲେତାର୍‍ଆକା, ମାପୁରୁ ୱାରିଙ୍ଗ୍ ଡ଼ିସ୍‍ତାମାନାନ୍‍ ମାରି ୱାର୍‌ ତାଗ୍‍ଇମନ୍‍ ଆଜି ଲୋକ୍‍ତି ୱାଜା ବୁଲାଏଜିନାର୍‍ ।
ROM 1:29 ୱାର୍‌ ତାଗ୍‌ଇକାର୍‌, କରାପ୍‌କିନିକାର୍‌, ଆସା ମାରି ତାଗ୍‍ଇପାଣିଦୁ ପୁରାମାନାର୍‌ । ୱାର୍‌ ଆକାର୍‍, କାତ୍‍ନିକାର୍‍, ଜାଟିକିନିକାର୍‍, ଟକେକିନିକାର୍‍ ମାରି ରିସାଆନିକାର୍‌; ୱାର୍‌ ଆଇୱାରିଙ୍ଗ୍‌ ସୁରି ୱାର୍‌ଗିନାର୍‌;
ROM 1:30 ୱାର୍‌ ମାପୁରୁଦି ଲାକ୍‍ତୁ କାଡ଼୍‌ନିକାର୍‍; ଅମାନ୍ୟ, ଆକାର୍‍ ମାରି ନିଜେଦିଙ୍ଗ୍‌ ତରାୟ୍‌ଆନିକା; ତାଗ୍‍ଇପାଣିଦି ଇନିଇନି ଉପାୟ ୱାର୍‌ କିଜିମାନାର୍‍; ୱାର୍‌ ବୁବାୟାୟାରିଙ୍ଗ୍‍ ମାନାଏର୍‍,
ROM 1:31 ୱାର୍ ବୁଦିସିଲିକାର୍‍, ନିଜେଦି ସିତିମାଟାଦିଙ୍ଗ୍‍ ଇଡିଏର୍‍ । ଆଇୱାରି ଉଣ୍ତିଙ୍ଗ୍‍ଁ ୱାରି ଅଡ଼ପ୍‍ବା ଦୟା ସିଲେତ୍‍ ।
ROM 1:32 ୱାର୍‌ ନେସ୍‍ନାର୍‍ ଜେ, ମାପୁରୁଦି ନିୟମ୍‍ ଇସାବ୍‍ତାନ୍‍ ଇୟାନାନି ଲୋକୁ ସାନିଦଣ୍ତ୍‍ ପୟ୍‍ଦେଙ୍ଗ୍‍ ଜଗ୍‌ । ଇକା ନେସ୍‍ସି ବା ୱାର୍‌ ଆୟାୱାଜା ତାଗ୍‍ଇପାଣି କିନାର୍‌ ମାରି ଆକା କିଜିମାନି ଲୋକାଙ୍ଗ୍‍ ସାରି ସିନାର୍‍ ।
ROM 2:1 ଏ ତଡ଼ାନ୍‍କୁ ନି ତାଙ୍ଗିକ୍, ମିର୍‌ ଇନିକା ଆଇୱାରି ବିଚାର୍‌ କିଜିନିଦେର୍‍ ? ମିର୍‌ ଜେ ଏମେ ଲୋକ୍‍ ଆତିଙ୍ଗ୍‌ବା, ଇକା କିନିକା ମି ଇସାବ୍‍ତାନ୍‍ ଟିକ୍‍ ସିଲେ । ଆଇୱାରି ଦୋସ୍‍ ଆସ୍‌ସି ମିର୍‌ ଜଦି ନିଜେ ଆକା କିଜିମାନିଦେର୍‍, ଆବେଣାନ୍‍ ମିର୍‌ ନିଜେଦିଙ୍ଗ୍‍ ଦସି କିଜିନିଦେର୍‍ ।
ROM 2:2 ମାପ୍‌ ନେସ୍‍ନାପ୍‍, ମାପୁରୁ ଇୟାୱାଜା କିଜିମାନି ଲୋକ୍‍ତି ଟିକ୍‍ ବିଚାର୍‍ କିନାନ୍‍ ।
ROM 2:3 ଏ ତଡ଼ାନ୍‍କୁ ନି ତାଙ୍ଗିକ୍, ଆମା ତାଗ୍‌ଇ ପାଣି ଉଣ୍ତିଙ୍ଗ୍‌ ମିର୍‌ ଆଇୱାରିଙ୍ଗ୍‌ ବିଚାର୍‌ କିଜିନିଦେର୍‍, ଆକା ଜଦି ମିର୍‌ ନିଜେ କିଜିମାନିଦେର୍‍, ମିର୍‌ ମାପୁରୁଦି ବିଚାର୍‍ତି ଆଏପ୍‍ ଇଜି ଇନିକା ଅଡ଼ବିଜିନିଦେର୍‍ ନ ?
ROM 2:4 ଆନାତ୍‌, ମିର୍‌ ମାପୁରୁଦି ୱିଜ୍‍ଇ ଦୟା, ସାସ୍‌, ମାରି ଉଦାର୍‌କିନିତାନିଙ୍ଗ୍‍ ମାନାଇଜିନିଦେର୍‍ । ମିର୍‌ ଜଦିବା ନେସ୍‍ତିମାନିଦେର୍‍ ଜେ, ମି ମନ୍‍ତୁ ଅନୁତାପ୍‍ ତାତେଙ୍ଗ୍‍ ଇଜି ମାପୁରୁ ନିସା ଦୟା କିଜିନାନ୍‍ ।
ROM 2:5 ମାତର୍‌ ମିର୍‌ ଗର୍ବ ନି ଆଟ୍‍ୱା ମୋନ୍‌ । ଆଦେଙ୍ଗ୍‌ ସେସ୍‍ ଦିନ୍‍ତି ବିଚାର୍‍ତିୱାଲେ ମିର୍‌ ମାପୁରୁଦି ଦଣ୍ତ୍‍ତି ଲୋକ୍‍ ଆଜି ନାଣ୍ତ କାସ୍ଟୁ ଦଣ୍ତ୍‍ ପୟ୍‍ନିଦେର୍‍ ।
ROM 2:6 ଇରିଙ୍ଗ୍‌ ମାପୁରୁ ୱିଜେରିଙ୍ଗ୍‌ ୱାନି ପାଣି ଇସାବ୍‍ତାନ୍‍ ପଲ୍‍ ସିନାନ୍‍ ।
ROM 2:7 ଏସୋଲୋକ୍‍ ଗୌରବ୍‍, ସନ୍‌ମାନ୍‌ ନି ୱିଜୁଦିନ୍‌ ତେବାନି ଆସାଦାନ୍‍ ଦର୍ଜଦାନ୍‍ ସତ୍‍ ପାଣି କିନା ସନାନ୍‍, ୱାରିଙ୍ଗ୍ ମାପୁରୁ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାନ୍‍ ।
ROM 2:8 ଆଇକାର୍‌ ନିଜେଦିଙ୍ଗ୍‍ ସୁଣାର୍‍, ସତ୍‍ ସାରି ଡ଼ିସ୍‍ସି, ତାଗ୍‍ଇ ସାରି ସନାର୍‍ । ୱାରି ମୁସ୍‌କୁ ମାପୁରୁଦି ନାଣ୍ତ ରିସା ଆନାନ୍‍ ।
ROM 2:9 ଏମେକାର୍‌ ତାଗ୍‍ଇ ପାଣିଦୁ ମିସାନାର୍‍, ୱାରି ଉଣ୍ତିଙ୍ଗ୍‌ ଦୁକୁ ନି କାସ୍ଟୁଦି ଦିନ୍‍ ୱାଜିନାତ୍‍ । ପାର୍‌ତୁମ୍‍ ଜିହୁଦି ଲୋକା ମୁସ୍‌କୁ ମାରି ତାନେୱେନ୍‌କା ଗ୍ରିକ୍‌ ଲୋକା ଉଣ୍ତିଙ୍ଗ୍‌ ।
ROM 2:10 ମାତର୍‌ ଏମେକାର୍‌ ନେଗିପାଣି କିଜିମାନାର୍‍, ୱାର୍‌ ଜିହୁଦି ଲୋକୁ ଆପିର୍‍, ଅଣଜିହୁଦି ଲୋକୁ ଆପିର୍‍, ୱାରିଙ୍ଗ୍ ମାପୁରୁ ସମ୍ମାନ୍‍, ଗୌରବ୍‍ ନି ସାନ୍ତି ସିନାନ୍‍ ।
ROM 2:11 ଇରିଙ୍ଗ୍‌ ମାପୁରୁ ଉନ୍‍ଣ୍ତ୍ରି ସାମାନ୍‌ଇସାବ୍‍ତାନ୍‌ ବିଚାର୍‍ କିନାନ୍‍ ।
ROM 2:12 ଅଣଜିହୁଦି ଲୋକୁ ମସା ରାସ୍‍ତି ନିୟମ୍‍ ପୟ୍‍ଏର୍‍ । ନିୟମ୍‍ ପୟ୍‍ଏନ୍‍ଣ୍ତା ପାପ୍‍ କିତାର୍‌, ୱାର୍‌ ନିୟମ୍‍ ସିଲେଣ୍‌ଗା ସାନାର୍‍ । ଆଇ ଇସାବ୍‍ତାନ୍‍ ଜିହୁଦିଲୋକୁ ନିୟମ୍‍ ନେସ୍‍ତାମାନାର୍‍ ଆକା, ୱାର୍‌ ପାପ୍‍ କିତାର୍‌, ଆୟା ନିୟମ୍‍ ଇସାବ୍‍ତାନ୍‍ ବିଚାର୍‌ ଆନାର୍‍ ।
ROM 2:13 ଇରିଙ୍ଗ୍‌ କେବଲ ନିୟମ୍‍ ୱେନି ମାଣାନ୍‌ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁ ଇଜି ୱେଙ୍ଗ୍‍ଦେଙ୍ଗ୍‍ଁ ଆଟ୍‍ଏର୍‍, ମାତର୍‌ ନିୟମ୍‍ ମାନାନି ମାଣାନ୍‌ ଦାର୍ମିକ ଇଜି ଗଣେଆନାର୍ ।
ROM 2:14 ଅଣଜିହୁଦି ଲୋକା ନିୟମ୍‍ ସିଲେତ୍‍, ମାତର୍‌ ଜଦି ୱାର୍‌ ସାମାନ୍‍ତାନ୍‌ ନିୟମ୍‍ତି ବିସୟ୍‍କୁ ମାନାନାର୍‌, ଆକାନେ ୱାରି ନିୟମ୍‍ତି ୱାଜା ।
ROM 2:15 ୱାରି ପାଣିଦାନ୍‍ ଇକା ଟିକ୍‍ ଆନାତ୍‌ ଜେ, ନିୟମ୍‍ତି ରାସାତିକା ୱାରି ଜିବନ୍‍ତୁ ରାସାତା ମାନାତ୍‌ । ଇୟା ମାଟାଦି ସତ୍‍ ୱାରି ମନ୍‍ତାନ୍‍ ବା ପାର୍‍ମାଣ୍‍ ଆନାତ୍‌ ସତ୍‍ସିନ୍ତା କିନିୱାଲେ ମନ୍ ୱାରିଙ୍ଗ୍ ସାକା କିନାତ୍‍, ତାଗ୍‍ଇସିନ୍ତା ୱାଲେ ଦସି କିନାତ୍‍ ।
ROM 2:16 ଆମା ନାଣ୍ତିଙ୍ଗ୍‍ ମାପୁରୁ ଜିସୁ କ୍ରିସ୍ତଦି ମାଣାନ୍‌ ଲୋକା ମାର୍‍ଗିତି ବିସୟ୍‍ୱିଜୁ ବିଚାର୍‌ କିନାନ୍‍, ଆୟା ନାଣ୍ତିଙ୍ଗ୍‍ ନାନୁ ପ୍ରଚାର୍‍ କିତିମାନି ସୁସମାଚାର୍‌ ଇସାବ୍‍ତାନ୍‍ ଇୟାୱିଜୁ ଗଟାନାତ୍‌ ।
ROM 2:17 ମିର୍‌ ନିଜେଦିଙ୍ଗ୍‍ ଜିହୁଦି ଲୋକୁ ଇଜିନିଦେର୍‌, ମୋସାଦି ନିୟମ୍‍ ମୁସ୍‌କୁ ଆସା ଇଡ୍‍ଜି ମାରି ମାପୁରୁଦି ୱାଲେ ନିଜେ ମିସାନିକା ଅସି ଗର୍ବ କିଜିନିଦେର୍‍;
ROM 2:18 ମି ଉଣ୍ତିଙ୍ଗ୍‌ ମାପୁରୁଦି ବଦା ନେସ୍‍ତି ମାନିଦେର୍‍ ମାରି ନିୟମ୍‍ତି ସତ୍‍ ନି ଅସତ୍‍ ବୁଦି ପୟ୍‍ତିମାନିଦେର୍‍;
ROM 2:19 ସତେନେ ନେସ୍‍ତିମାନିଦେର୍‍, ଜେ ମିର୍‌ କାଣାଦିଙ୍ଗ୍‌ ସାରିତର୍‌ନିଲୋକୁ, ସିକାଟିଦୁ ମାନି ଲୋକା ଉଣ୍ତିଙ୍ଗ୍‌ ଜାୟ୍‌ ୱାଜା,
ROM 2:20 ବୁଦିସିଲି ଲୋକାଙ୍ଗ୍‍ ବୁଦିୱେର୍‍ନିକା, ନେସ୍‌ଇ ଲୋକାରି ଗୁରୁ । ମି ବିସ୍‍ବାସ୍‍ ଜେ, ନିୟମ୍‍ତାନ୍‍ ମିର୍‌ ପୁରା ସତ୍‍ ନି ବୁଦି ପୟ୍‍ତିମାନିଦେର୍‍ ।
ROM 2:21 ମିର୍‌ ଆଇୱାରିଙ୍ଗ୍‌ ଅଜା କିଜିନିଦେର୍‍, ମାତର୍‌ ନିଜେ ଏନ୍ଦା ଅଜାଇଜିନିଦେର୍‍ ? “ଡଙ୍ଗାଁ କିମାଟ୍‌” ଇଜି ଅଜା କିଜି ନିଜେ ଡଙ୍ଗାଁ କିଜିନିଦେର୍‍ ?
ROM 2:22 “ଦାରିପାଣି କିମାଟ୍‌” ଇଜି ୱେର୍‍ସି ନିଜେ ଦାରିପାଣି କିଜିନିଦେର୍‍ନୋ ? ମିର୍‌ ବମା ପୁଜାଦି କାଡ଼୍‍ଜି ମନ୍ଦିର୍‌ତିଙ୍ଗ୍‌ ଡଙ୍ଗାଁ କିଇଜିନିଦେର୍‍ ?
ROM 2:23 ମିର୍‌ ମାପୁରୁଦି ନିୟମ୍‍ ପୟ୍‍ତାମାନାପ୍‍ ଇଜି ଗର୍ବ କିଜିନିଦେର୍‍, ମାତର୍‌ ତାନିଙ୍ଗ୍‍ ମାନାଇଜି ମାପୁରୁଙ୍ଗୁଁ ଅପମାନ୍‍ କିଜିନିଦେର୍‍ନୋ ?
ROM 2:24 ସାସ୍ତ୍ରଦୁ ରାସାତା ମାନାତ୍‌, “ମି ଉଣ୍ତିଙ୍ଗ୍‍ଁ ଅଣଜିହୁଦି ଲୋକା ଲୋଇ ମାପୁରୁ ନିଦା ପାଏ ଆଜିନାନ୍‍ ।”
ROM 2:25 ଜଦି ନିୟମ୍‍ ମାନାଜିମାନିଦେର୍‍; ମି ସୁନ୍ନତ ମାଟାଦି ଇସାବ୍‌ ମାନାତ୍‌ । ମାତର୍‌ ଜଦି ନିୟମ୍‍ ଅମାନ୍ୟ କିନିଦେର୍‍, ମିର୍‌ ସୁନ୍ନତ ଆଇ ମାନି ଲୋକା ୱାଲେ ସାମାନ୍‍ ।
ROM 2:26 ଜଦି ସୁନ୍ନତ ଆଇ ମାନି ଅରେନ୍‍ ଅଣଜିହୁଦି ଲୋକୁ ନିୟମ୍‍ତି ବିଦି ୱିଜୁ ମାନାଜିମାନାନ୍‍, ମାପୁରୁ ୱାନିଙ୍ଗ୍‌ ସୁନ୍ନତ ୱାଜା ଆସ୍‍ଏନ୍‍ ନୋ ?
ROM 2:27 ଆଦେଙ୍ଗ୍‌ ମେନ୍ଦଲ୍‌ତୁ ସୁନ୍ନତ ଆଇ ମାନି ଏମେ ଅଣଜିହୁଦି ଲୋକୁ ନିୟମ୍‍ ମାନାନାର୍‌, ୱାର୍‌ ମି ବିଚାର୍‌ କିନାର୍‌, ଇରିଙ୍ଗ୍‌ ମିର୍‌ ମେନ୍ଦଲ୍‌ତୁ ସୁନ୍ନତ ଆଜି ନିୟମ୍‍ ପୟ୍‍ତି ମାରିଙ୍ଗ୍‍ଁ ବା, ଆକା ଅମାନ୍ୟ କିଜିନିଦେର୍‍,
ROM 2:28 କେବଲ ମେନ୍ଧଲ୍‍ ଇସାବ୍‍ତାନ୍‍ ସୁନ୍ନତ ଆଜି ମୁସ୍‌କୁ ଜିହୁଦିଲୋକୁ ଇଜି ତର୍‍ଆୟ୍‍ ଆଜିମାନି ଲୋକୁ ସତ୍‌ତାନ୍‌ ଜିହୁଦି ଲୋକୁ ସିଲେ ।
ROM 2:29 ଏନ୍‌ ଜିବନ୍‍ତୁ ଜିହୁଦି, ୱାନ୍‌ ଆଜିନାନ୍‍ ସତ୍‌ତାନ୍‌ ଜିହୁଦି । ସତ୍‍ ସୁନ୍ନତ ଜିବନ୍‍ତି ବିସୟ୍‍; ଆକା ଆତ୍ମିକ, ରାସାତିକା ଆଏତ୍‍ । ଇୟାୱାଜା ଲୋକୁ ମାଣାନ୍‌ ୱେଡ଼ିକା ପୟ୍‍ଦେଙ୍ଗ୍‌ ଆଟ୍‌ଏନ୍‍; ୱାନ୍‌ ଆକା ପୟ୍‍ନାନ୍‍ ମାପୁରୁଦିମାଣାନ୍‌ ।
ROM 3:1 ଆର୍‌ତିଙ୍ଗ୍‌ ଅଣଜିହୁଦି ଲୋକା ମାଣାନ୍‌ ଜିହୁଦି ଲୋକା ନାଣ୍ତ ସୁବିଦା ଇନିକା ? ସୁନ୍ନତ ମାଡ଼ାନ୍‍କୁ ନେଗିକା ଇନିକା ?
ROM 3:2 ନାଣ୍ତ ମାନାତ୍‌ । ପାର୍‍ତୁମ୍‍, ମାପୁରୁ ୱାନି ମାଟାଦି ଦାୟିତ୍‍ ଜିହୁଦିଲୋକା ମୁସ୍‌କୁ ସିତା ମାନାନ୍‌ ।
ROM 3:3 ଆନାତ୍‌ ଏସ ଲୋକୁ ବିସ୍‍ବାସ୍‍ତୁ ତେବାଏର୍‍ । ମାତର୍‌ ଆକା ଇଜି ଇନିକା ମାପୁରୁଦି ବିସ୍‍ବାସ୍‍ ଆରେଏ ଆନାତ୍‌ ?
ROM 3:4 ଏସାଙ୍ଗ୍‍ ସିଲେ । ଲୋକୁ ୱିଜେରେ ମିଚୁଆର୍‍ ଆତିଙ୍ଗ୍‌ବା, ମାପୁରୁ ସତ୍‍ । ସାସ୍ତ୍ରଦୁ ରାସାତାମାନାତ୍‌ : “ନି ବାକ୍ୟ ଦାନ୍‌ ନିନୁ ସତ୍‌ ଇଜି ପାର୍‍ମାଣ୍‍ ଅଆୟ୍‍ଆନି, ନିନୁ ବିସାର୍‍ ଆନିୱାଲେ ନିନୁ ଜିଣାନି ।”
ROM 3:5 ଇବେ ଉଣ୍ତ୍ରି ମାଟା ଆନାତ୍‌, ଜଦି ମା ଅଦାର୍ମୁ ମାପୁରୁଦି ଦାର୍ମୁଦିକା ପାର୍‍ମାଣ୍‍ କିନାତ୍‍, ଆର୍‌ତିଙ୍ଗ୍‌ ମାପୁରୁ ମାଙ୍ଗିଁ ଦଣ୍ତ୍‍ ସିଜି ଅନ୍ୟାୟ୍‍ କିଜିନାନ୍‍ ଇଜି ଇନ୍‌ଡ୍ରେଙ୍ଗ୍‌ ଆଟ୍‍ନିକା ନୋ ? ନାନୁ ଲୋକା ୱାଜା ଇଜିନା ।
ROM 3:6 ଏସାଙ୍ଗ୍‍ ସିଲେ । ମାପୁରୁ ଜଦି ନିୟାୟ୍‍ କିନିକାନ୍‍ ଆଏନ୍‍, ୱାନ୍‌ ଏଣ୍ତେସ୍‌ ଦୁନିଆଦିଙ୍ଗ୍‍ ନ୍ୟାୟ୍‍ ବିସାର୍‍ କିନାନ୍‍ ?
ROM 3:7 ମାତର୍‌ ଜଦି ନା ଅସତ୍‍ଦାନ୍‍ ମାପୁରୁଦି ସତ୍‍ମାଟା ନାଣ୍ତ ନେଗେନ୍‍ତାନ୍‍ ୱେଙ୍ଗ୍‍ଁନାତ୍‍ ମାରି ୱାନ୍‌ ଗୌରବ୍‍ ପୟ୍‍ନାନ୍‍, ନାନୁ ପାପି ଇଜି ଏନ୍ଦା ବିଚାର୍‌ ଆଜିନା ?
ROM 3:8 ମାଡୁ ଏନ୍ଧା ୱେର୍‌ଇକା, “ରାଦୁ ତାଗ୍‌ଇପାଣି କିନାଟ୍‌, ରାଦୁ ଇବେଟ୍‌ତାନ୍‌ ନେଗି ପଲ୍‌ ଆସ୍‌ତେଙ୍ଗ୍‌ ?” ନାନୁ ଟିକ୍‍ ଇୟାୱାଜା ମାଟା ଇଜିନା ଇଜି ଦାବି କିଜି ଏସଲୋକ୍‌ ନାଙ୍ଗିଁ ନିଦା କିଜିନାର୍‍ । ୱାର୍‌ ଇୟାଉଣ୍ତିଙ୍ଗ୍‌ ଏମେ ଦଣ୍ତ୍‌ ପୟ୍‍ନି ମାଟା, ସତେନେ ପୟ୍‍ନିଦେର୍‍ ।
ROM 3:9 ଆର୍‌ତିଙ୍ଗ୍‌ ଇଜିନା ଜିହୁଦିଲୋକା ଅବସ୍ତା ଅଣଜିହୁଦି ଲୋକା ମାଣାନ୍‌ ନାଣ୍ତ ନେଗିକା ? ଏସାଙ୍ଗ୍‍ ସିଲେ । ନାନୁ ଆଗ୍‍ଡ଼ିରାନ୍‍ ୱେର୍‍ତାମାନା ଜେ, ରିଏର୍‌ ଜିହୁଦି ନି ଅଣଜିହୁଦି ପାପ୍‍ତି ବାଡ଼ିଦୁ ମାନାର୍‌ ।
ROM 3:10 ଦର୍ମସାସ୍ତ୍ରଦୁ ରାସାତାମାନାତ୍‌ : “ଦାର୍ମୁତିକାନ୍‍ ଏନ୍‌ ସିଲେନ୍‌, ଅରେନ୍‍ ବା ସିଲେନ୍‌,
ROM 3:11 ଅରେନ୍‍ ଲୋକ୍‌ ବା ବୁଦିଦିକାନ୍‍ ନି ମାପୁରୁଦି ସତ୍‌ତାନ୍‌ ସେବାକିନିକାନ୍‍ ଏନ୍‌ ସିଲେନ୍‌ ।
ROM 3:12 ୱାର୍‌ ୱିଜେରେ ମାପୁରୁଦି ମାଣାନ୍‌ ଆକ ସର୍ହାମାନାର୍‍; ୱିଜେରେ ବାଣାତା ମାନାର୍‍ । ଏନ୍‌ ଅରେନ୍‍ ବା ସତ୍‍ପାଣି କିଏଜିନାର୍‍ ।
ROM 3:13 ୱାରି ମାଟାଦୁ ସାପିସ୍‌କିନି ନାନି ସାଲାକି, ୱେୟୁଦାନ୍‌ ମିସ୍‍ତି ବଲ୍‍ ସତାନେ, ୱେୟୁଦାନ୍ କତ୍‍ନି ସାରାସ୍‍ତି ୱିସାମ୍‍ ।
ROM 3:14 ୱାରି ମାଟା କେୟ୍‍ନାତ୍‍ ମାରି ଆନାଦୁରିଆଦୁ ବର୍ତି ।
ROM 3:15 ୱାର୍‌ ଡାକ୍‍ତେଙ୍ଗ୍‍ ନି କାତ୍‍ତେଙ୍ଗ୍‍ ପୁରା ଆନାର୍‍;
ROM 3:16 ୱାର୍‌ ଏମେ ତରିନ୍‌ ସନାର୍‍, ଆବେ ସାନିକା ନି କାସ୍ଟୁ ଗଟାନାତ୍‌ ।
ROM 3:17 ୱାର୍‌ ସାନ୍ତିଦି ସାରି ନେସ୍‍ଏର୍‍,
ROM 3:18 ୱାରି କାଣାଗାଦୁ ମାପୁରୁଙ୍ଗ୍‍ଁ ତିଲାନିକା ୱାର୍‌ ଅଜାଏର୍‍ ।”
ROM 3:19 ମାଡ୍‌ ନେସ୍‍ନିକା, ଏମେକାର୍‌ ନିୟମ୍‍ତି ଆଡ୍‍ଗି, ତାନି ନିତିନିୟମ୍‍ ୱାର୍‌ ମାନାଦେଙ୍ଗ୍‍ ଆନାତ୍‌ । ମାପୁରୁ ଏସ୍ତିୱାଲେ ୱିଜୁ ଦୁନିଆଦି ବିସାର୍‍ କିନାନ୍‍, ନିୟମ୍‍ ମାନାଇକାର୍‍ ଇନି ବାଣ୍ତିସ୍‍ କିଜି ନିଜେଦିଙ୍ଗ୍‍ ଦସ୍‍ସିଲିକାନ୍‍ ଇଜି ୱେର୍‍ତେଙ୍ଗ୍‍ ଆଟ୍‍ଏନ୍‍ ।
ROM 3:20 ମାତର୍‌ ନିୟମ୍‍ତି ପାଣିୱିଜୁ କିଜି ଆମା ମାପୁରୁଦି ଆଗ୍‍ଡ଼ି ଦାର୍ମୁତିକାନ୍‍ ଇଜି ୱେଙ୍ଗ୍‍ଦେଙ୍ଗ୍‍ ଆଟ୍‍ଏନ୍‍ । ନିୟମ୍‍ତାନ୍‍ ଲୋକୁ କେବଲ ପାପ୍‍ତି ବିସୟ୍‍ ନେସ୍‍ତେଙ୍ଗ୍‍ ଆଟ୍‍ନାନ୍‍ ।
ROM 3:21 ମାପୁରୁ ନିଜେଦି ୱାଲେ ଲୋକାଙ୍ଗ୍‍ ମିସାକିଦେଙ୍ଗ୍‍ ଇଜି ନିୟମ୍‍ ଆତ୍‌ରେ ଆମାକା କିତାମାନାନ୍‌, ଆକା ଇଲେଇ ତରାତାମାନାତ୍‍ । ଇୟା ବିସୟ୍‌ତାନ୍‌ ମସାଦି ନିୟମ୍‌ ନି ବାବବାଦିର୍‍ ବା ସାକି ସିତାମାନାର୍‍ ।
ROM 3:22 କେବଲ ଜିସୁ କ୍ରିସ୍ତମାନୁ ବିସ୍‍ବାସ୍‍ କିନିମାଣାନ୍‍ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁତିକାନ୍‍ ଇଜି ୱେଙ୍ଗ୍‍ଁନାନ୍‍ । ମାପୁରୁ ଆମା ଲୋକୁତିଙ୍ଗ୍ ଆଙ୍ଗ୍‍ଏଜି କ୍ରିସ୍ତମାନୁ ବିସ୍‍ବାସ୍‍ କିଜିମାନି ୱିଜେରିଙ୍ଗ୍‌ ଇୟା ସାରି ସିନାନ୍‍ ।
ROM 3:23 ୱିଜେରେ ପାପ୍‌ କିତାମାନାର୍‍ ମାରି ମାପୁରୁଦି ମହିମାଦି ପୁରାଆନିମାନୁ ପୟ୍‍ଏତା ମାନାର୍ ।
ROM 3:24 ମାତର୍‌ ମାପୁରୁ କ୍ରିସ୍ତ ଜିସୁଦି ମାଣାନ୍‌ ଆର୍‍ଏନେ ଆମା ଦୟା ସିତା ମାନାନ୍‌, ଆକା ଏମେକାର୍‌ ମାନାନାର୍‌, ୱାରିଙ୍ଗ୍ ପ୍ରବୁ ଜିସୁ ଜିପିସ୍‍ନାନ୍‍ ମାରି ୱାର୍‌ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଆନାର୍‍ ।
ROM 3:25 ମାପୁରୁ ଜିସୁଙ୍ଗୁଁ ଦାନ କିତାନ୍‌, ଏଣ୍ତେସ୍‌ ୱାନି ସାନିକା, ୱାନି ମାନୁ ବିସ୍‍ବାସ୍‍ କିଜିମାନି ଲୋକା ପାପ୍‍ କେମାଦି ଉପାୟ୍ ଆନାତ୍‌ । ମାପୁରୁ ନିଜେଦି ଦାର୍ମୁ ତର୍‍ତେଙ୍ଗ୍‍ ଇକା କିତାନ୍‍ । ମାପୁରୁ ସାସ୍‌ ଆସ୍‌ସି ଲୋକା ଆଗ୍‍ଡ଼ିକିତି ପାପ୍‍ ଆସ୍‍ଏନ୍‍ ।
ROM 3:26 ମାତର୍‌ ଇଲେଇ ୱାନ୍‌ ନିଜେଦି ଦାର୍ମୁ ତର୍‍ତେଙ୍ଗ୍‍ କିନି ଉଣ୍ତିଙ୍ଗ୍‌ ପାପ୍‍ କେମାଦି ନିୟମ୍‍ କିତାମାନାନ୍‌ । ଇୟାମାଣାନ୍‍ ମାପୁରୁ ତର୍‍ସି ସିତାମାନାନ୍‌ ଜେ, ୱାନ୍‌ ନିଜେ ଦାର୍ମୁତିକାନ୍‍ ମାରି ଏମେକାର୍‌ ଜିସୁମାନୁ ବିସ୍‍ବାସ୍‍ କିନାର୍‌, ଆୟା ୱିଜେରିଙ୍ଗ୍‌ ଦାର୍ମୁତିକାର୍‍ ୱାଜା ଆସ୍‍ନାନ୍‍ ।
ROM 3:27 ଆର୍‌ତିଙ୍ଗ୍‌ ଆମା ବିସୟ୍‍ତାନ୍‍ ଗର୍ବ କିନାଟ୍‍ ? ସିଲେ, ଆୟାୱାଜା ମାଟା ଇନିକା ସିଲେତ୍‍ । ଗାର୍ବୁ କିନି ଉଣ୍ତିଙ୍ଗ୍‌ ମା ଇନି ମାଟା ମାନ୍‍ଡ୍ରେଙ୍ଗ୍‍ଁ ଆଟ୍‍ନାତ୍‍ ? ଇନିକା ନିୟମ୍‍ ପୁରାପୁରି ମାନାଜିନିକା ଇଜି ? ସିଲେ, କେବଲ ବିସ୍‍ବାସ୍‍ ନେ ମା ଗାର୍ବୁ ମାଟା ।
ROM 3:28 ମାଡ୍‌ ସତ୍‌ତାନ୍‌ ବୁଜାଦେଙ୍ଗ୍‍ ଆଟ୍‍ସିନାପ୍‍ ଜେ, ଅରେନ୍‍ କେବଲ ୱାନି ବିସ୍‍ବାସ୍‍ତାନ୍ ମାପୁରୁ ଆଗ୍‍ଡ଼ି ଦାର୍ମୁତିକାନ୍‍ ଆନାନ୍‍ ନିୟମ୍‍ ମାନାନି ମାଣାନ୍‌ ସିଲେ ।
ROM 3:29 ମାପୁରୁ ଇନିକା କେବଲ୍‌ ଜିହୁଦିଲୋକା ମାପୁରୁ ? ୱାନ୍‌ ଇନିକା ଅଣଜିହୁଦି ଲୋକା ମାପୁରୁ ଆଏନ୍‍ ? ସତେନେ ୱାନ୍‌ ୱିଜେରି ମାପୁରୁ ।
ROM 3:30 ମାପୁରୁ ଅରେନ୍‍ । ରୁଣ୍ତି ଜିହୁଦି ନି ଅଣଜିହୁଦି ଲୋକା ବିସ୍‍ବାସ୍‍ ଉଣ୍ତିଙ୍ଗ୍‌ ୱାନ୍‌ ୱାରିଙ୍ଗ୍ ଦାର୍ମୁତିକାର୍‍ ୱାଜା ଆସ୍‍ନାନ୍‍ ।
ROM 3:31 ତେନି ଅର୍ତ ଇନିକା, ମାଡ୍‌ ବିସ୍‍ବାସ୍‍ତାନ୍ ନିୟମ୍‍ତିଙ୍ଗ୍‍ଁ ନାସ୍ଟୁ କିଦେଙ୍ଗ୍‌ ସୋଲ୍‍ସିନାପ୍‍ ନୋ ? ଏସାଙ୍ଗ୍‍ ସିଲେ । ବିସ୍‍ବାସ୍‍ ତାନ୍‍ ମାପ୍‌ ନିୟମ୍‍ତି ମୁଲ୍‌ କୁନାଦି ଆଟ୍‍ୱା କିଜିନାପ୍‍ ।
ROM 4:1 ଆର୍‌ତିଙ୍ଗ୍‌ ମେନ୍ଦଲ୍‌ ଇସାବ୍‌ତାନ୍‌ ମା ପୁର୍ବେଦି ବୁବା ଅବ୍ରାହାମତି ଇନିକା ପୋଇତାମାନାନ୍‌ ଇଜି ଇନିକା ଇନାଟ୍‍ ?
ROM 4:2 ଜଦି ୱାନି ନିଜେଦି ପାଣି ଅବ୍ରାହାମ ୱାନ୍‌ ମାପୁରୁଦି ଆଗ୍‍ଡ଼ି ଦାର୍ମୁଦିକାନ୍‍ ୱେଙ୍ଗିଁତାନ୍‌ମାନ୍ଦି, ଗାର୍ବୁ କିଦେଙ୍ଗ୍ ଇଜି ୱାନି ମାଟା ମାର୍ହାତ୍‌ । ମାତର୍‌ ମାପୁରୁ ଆଗ୍‍ଡ଼ି ଆକା ଆଏତ୍‍ମାର୍ହାତ୍‍ ।
ROM 4:3 ଦାର୍ମୁସାସ୍ତ୍ର ଇସାବ୍‍ତାନ୍‍, “ଅବ୍ରାହାମ ମାପୁରୁମାନୁ ବିସ୍‍ବାସ୍‍ କିତାନ୍‍ ମାରି ଇୟା ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‍ ଆସ୍‌ତାନ୍‌ ।”
ROM 4:4 ଏନ୍‌ ପାଣି କିନାନ୍‍, ୱାନି କୁଲି ପଇନାନ୍‌ ଆମାୱାନିମାଣାନ୍‍ ଦାନ୍‍ ୱାଜା ୱାନ୍‌ ଆକା ପୟ୍‍ଏନ୍‍ ।
ROM 4:5 ମାତର୍‌ ଏନ୍‌ ନିଜେଦି ମୁସ୍‌କୁ ବିସ୍‍ବାସ୍ ଇଡ୍‍ଏନ୍‍ଣ୍ତା, ମାପୁରୁମାନୁ ବିସ୍‍ବାସ୍‍ କିନାନ୍‍, ୱାନି ବିସ୍‍ବାସ୍‍ ଉଣ୍ତିଙ୍ଗ୍‌ ଦସ୍‍କିତି ୱାନିଙ୍ଗ୍‍ ଦସ୍‍ ଡ଼ିସିସ୍‍ କିଜିମାନି ମାପୁରୁ ୱାନିଙ୍ଗ୍‌ ଦାର୍ମୁତିକାନ୍‍ ୱାଜା ଆସ୍‍ନାନ୍‍ ।
ROM 4:6 ଏମେ ଲୋକ୍‍ତି କିତିମାନି ପାଣି ଉଣ୍ତିଙ୍ଗ୍‌ ସୁଡ଼ୁଏନ୍‍ଣ୍ତା ମାପୁରୁ ମାରି ୱାନିଙ୍ଗ୍‌ ଦାର୍ମୁଦିକାନ୍‍ ୱାଜା ଆସ୍‍ନାନ୍‍, ୱାନିଙ୍ଗ୍‌ ପ୍ରସଂସା କିଜି ଦାଉଦ ଇର୍ହାମାନାନ୍‌;
ROM 4:7 “ଆମାୱାନି ଦସ୍‍ କେମା ଆତାମାନାତ୍‌, ୱାନ୍‌ ଦନ୍ୟ, ଏନ୍‌ ପାପ୍‍ କେମା ପୟ୍‍ତାମାନାନ୍‍, ୱାନ୍‌ ଦନ୍ୟ ।
ROM 4:8 ମାପୁରୁ ଆମାୱାନି ପାପ୍‍ ଲେକିସ୍‍ କିଏନ୍‌, ୱାନ୍‌ ଦନ୍ୟ !”
ROM 4:9 ଇବେ ଦାଉଦ ଏମେୱାରିଙ୍ଗ୍‍ ଆର୍ସିବାଦ୍‍ତିକାର୍‍ ଇଜି ଇଜିନାନ୍‌, ୱାର୍‌ ଇନିକା କେବଲ ସୁନ୍ନତ ଲୋକୁ ମାର୍ହାର୍‌ ? ସିଲେ, ଅସୁନ୍ନତ ଲୋକୁ ବା ଆର୍ସିବାଦ୍‍ତି ଲୋକୁ ଆଦେଙ୍ଗ୍‌ ଆଟ୍‍ନାର୍‍ । ମାଡ୍‌ ଇଜିନିକା ଅବ୍ରାହାମ ବିସ୍‍ବାସ୍‍ ତାନ୍‍ ଦାର୍ମୁତିକାନ୍‍ ଇଜି ୱେଙ୍ଗିଁତାନ୍‍,
ROM 4:10 ଇକା ଆମା ୱେଡ଼ାଦୁ ଗଟାତାମାର୍ହାତ୍‍ ? ଅବ୍ରାହାମ ସୁନ୍ନତ ଆନି ୱେନ୍‌କା ନୋ, ତାନି ଆଗ୍‍ଡ଼ିରାନ୍‍ ? ୱେନ୍‌କା ସିଲେ ।
ROM 4:11 ସୁନ୍ନତ ଆନି ଆଗ୍‍ଡ଼ିରାନ୍‍ ଅବ୍ରାହାମ୍‍ତି ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‍ ୱାଜା ଆସ୍‍ତାମାର୍ହାନ୍‍ । ଇକା ୱେର୍‍ତେଙ୍ଗ୍‍ ଇଜି ଉନ୍‍ଣ୍ତ୍ରି ସିନା ୱାଜା ଅବ୍ରାହାମ ଇୟା ସୁନ୍ନତ ବିଦି ମାନାତାମାର୍‌ର୍ହାନ୍‌ । ମାରି, ଏମେକାର୍‌ ସୁନ୍ନତ ଆଏନ୍‍ଣ୍ତା ବା ମାପୁରୁ ମାଣାନ୍‌ ଦାର୍ମୁଦିକାର୍‍ ଇଜି ଆତାମାନାର୍‌, ଆତ୍ମିକ୍‍ ଇସାବ୍‍ତାନ୍‍ ଅବ୍ରାହାମ ୱାରି ବୁବାସି ।
ROM 4:12 ବୁବା ଅବ୍ରାହାମ ସୁନ୍ନତ ଆନି ଆଗ୍‍ଡ଼ିରାନ୍‍ ଏମେ ବିସ୍‍ବାସ୍‍ତାନ୍ ଜିଜି ମାର୍ହାନ୍‍, ଜଦି ସୁନ୍ନତ ଆଇ ମାନି ଲୋକୁ ନିଜେ ଜିବନ୍‍ତୁ ଆୟାୱାଜା ବିସ୍‍ବାସ୍‍ ତର୍‍ତେଙ୍ଗ୍‍ ଆଟ୍‍ନାର୍‍, ଅବ୍ରାହାମ ୱାରି ବୁବାସି ।
ROM 4:13 ଅବ୍ରାହାମ ନିୟମ୍‍ ମାନାନି ମାନି ଉଣ୍ତିଙ୍ଗ୍‌ ସିଲେ । କେବଲ ୱାନି ବିସ୍‍ବାସ୍‍ ଉଣ୍ତିଙ୍ଗ୍‌ ମାପୁରୁଦି ମାଣାନ୍‌ ଦାର୍ମୁତିକାନ୍‍ ୱାଜା ୱେଙ୍ଗିଁତାମାର୍ହାନ୍‍ ମାରି ଆୟା ଉଣ୍ତିଙ୍ଗ୍‌ ୱାନ୍‌ ୱାନି କୁଟୁମ୍‌ତିକାର୍‍ ଦୁନିଆଦି ଅଦିକାରି ଆନାର୍‍ ଇଜି ମାପୁରୁ ପାର୍‌ମାଣ୍‌ କିତାମାର୍ହାନ୍ ।
ROM 4:14 ଏମେକାର୍ ନିୟମ୍‍ ମାନାନାର୍‌, କେବଲ ୱାର୍‌ ଜଦି ମାପୁରୁଦି ଦାନ୍‍ ପୟ୍‍ନାର୍‍, ଆର୍‌ତିଙ୍ଗ୍‌ ଲୋକା ବିସ୍‍ବାସ୍‍ ଆର୍‍ଏ, ମାପୁରୁଦି ପାର୍‍ମାଣ୍‍ତିକା ବା ଇନି ଲାବ୍‌ ସିଲେତ୍‍ ।
ROM 4:15 ନିୟମ୍‍ ମାନାଇ ଲୋକୁ ମାପୁରୁଦି ରିସାଦିକାର୍‍ ଆନାର୍‍ । ମାତର୍‌ ଏମେମାନୁ ନିୟମ୍ ସିଲେତ୍‍, ଆବେ ନିୟମ୍‍ ମାନାଇ ମାଟା ନିଙ୍ଗିଁଏ ଜିନାତ୍‍ ।
ROM 4:16 ଆଦେଙ୍ଗ୍‌ ମାପୁରୁଦି ପାର୍‍ମାଣ୍‍ ବିସ୍‍ବାସ୍‍ ମୁସ୍‌କୁ ମାନାତ୍‍ । ଏମେକାର୍‌ ନିୟମ୍‍ ମାନାନାର୍‌, କେବଲ ୱାରି ଉଣ୍ତିଙ୍ଗ୍‌ ମାପୁରୁଦି ପାର୍‍ମାଣ୍‍ ରାସାଏତ୍‍ ! ଅବ୍ରାହାମ୍‍ତି ୱାଜା ବିସ୍‍ବାସ୍‍ କିଜିମାନି ୱିଜେରି ଉଣ୍ତିଙ୍ଗ୍‌ ଆକା ନେଗିକା, ଇରିଙ୍ଗ୍‌ ଅବ୍ରାହାମ ୱାରି ଆତ୍ମିକ ବୁବାସି ।
ROM 4:17 ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, “ନିଙ୍ଗିଁ ମାପୁ ନାଣ୍ଡ ଜାତିଦି ବୁବାସି କିତାମାନାପ୍‍ ।” ମାପୁରୁଦି ଆଗ୍‍ଡ଼ି ଇୟା ପାର୍‍ମାଣ୍‍ ଟିକ୍‍ ମାର୍ହାତ୍‌, ଇରିଙ୍ଗ୍‌ ଏମେ ମାପୁରୁଙ୍ଗ୍‍ଁ ଅବ୍ରାହାମ ବିସ୍‍ବାସ୍‍ କିଜିମାର୍ହାନ୍‍, ୱାନି ବାକ୍ୟ ସାତିତାନିଙ୍ଗ୍‍ ଜିପିସ୍‍କିନାତ୍‍ ମାରି ୱାରିମାଣାନ୍‍ ୱିଜୁ ବିସୟ୍‍ ତିଆର୍‍ କିନାତ୍‍ ।
ROM 4:18 ଆସା କିଦେଙ୍ଗ୍‌ ଇଜି ଇନି ମାଟା ସିଲେତିଙ୍ଗ୍‍ ବା ଅବ୍ରାହାମ ବିସ୍‍ବାସ୍‍ କିଜି ଆସା କିଜି ଇଟ୍‍ତାନ୍‍ । ଆଦେଙ୍ଗ୍‌ ୱାନ୍‌ ନାଣ୍ତ ଜାତିଦି ବୁବା ଆତାନ୍‌, ଇରିଙ୍ଗ୍‌ ସାସ୍ତ୍ର ଇସାବ୍‍ତାନ୍‍ ୱାନିଙ୍ଗ୍‌ ପାର୍‍ମାଣ୍‍ ପୁଟ୍‍ତାମାର୍ହାତ୍‍, “ନି କୁଟୁମ୍‌ତିକାର୍‍ ବାଦଡ଼୍‍ତି ସୁକେଙ୍ଗାଁ ୱାଜା ନାଣ୍ତଆଦେଙ୍ଗ୍‌ ଆଟ୍‍ନାର୍‍ ।”
ROM 4:19 ୱାନିଙ୍ଗ୍‌ ନାସ୍ତିୱାଲେ ସହେ ବାର୍‍ସେକ୍‍ ଆତାମାର୍ହାତ୍‍ । ମାତର୍‌ ୱାନି ସାତିୱାଜା ମେନ୍ଦଲ୍‌ତି ମାଟା ଅଡ଼୍‍ବିଜି, ମାରି ସାରା ଜେ କଡ଼ ଜନମ୍‍ କିଦେଙ୍ଗ୍‌ ଉପାୟ୍‌ ସିଲେତାତ୍‍, ଇୟା ମାଟା ନେସ୍‍ସି, ତାନିଙ୍କ୍ ବିସ୍‍ବାସ୍‍ ଆଏତ୍‍ମାର୍ହାତ୍‍ ।
ROM 4:20 ୱାନ୍‌ ୱାନି ବିସ୍‍ବାସ୍‍ତାନ୍ ୱେର୍‌ଏ ଆଏତାନ୍‍, ନ ମାପୁରୁଦି ପାର୍‍ମାଣ୍‍ତିଙ୍ଗ୍‍ ଅଡ଼୍‌ବିଏତାନ୍‍ । ବିସ୍‍ବାସ୍‍ ୱାନିଙ୍ଗ୍‌ ବପୁଦାନ୍‌ ପୁରା କିତାତ୍‍ ମାରି ୱାନ୍‌ ମାପୁରୁଦି ପ୍ରସଂସା ପାଟା କିତାନ୍‍ ।
ROM 4:21 ମାପୁରୁ ଏମେ ପାର୍‍ମାଣ୍‍ କିତାମାର୍ହାନ୍, ୱାନ୍‌ ଆକା ମାନାନାନ୍‍ ଇଜି ୱାନି ଆଟ୍‍ୱା ବିସ୍‍ବାସ୍‍ ମାର୍ହାତ୍‌ ।
ROM 4:22 ଆୟା ଉଣ୍ତିଙ୍ଗ୍‌ ୱାନି ବିସ୍‍ବାସ୍‍ ଉଣ୍ତିଙ୍ଗ୍‍ଁ ଅବ୍ରାହାମ ମାପୁରୁଦି ମାଣାନ୍‌ ଦାର୍ମୁଦିକାନ୍‍ ଇଜି ୱେଙ୍ଗିଁତା ମାର୍ହାନ୍‍ ।
ROM 4:23 “ଦାର୍ମୁଦିକାନ୍‍ ୱାଜା ଆନିକା” ସାସ୍ତ୍ର ମାଟା କେବଲ ଅବ୍ରାହାମ୍‍ତି ଉଣ୍ତିଙ୍ଗ୍‌ ଜେ ଦର୍‍କାର୍‍, ଆକା ସିଲେ ।
ROM 4:24 ଇରିଙ୍ଗ୍‌ ମାଡ୍‌ ବା ମାପୁରୁମାନୁ ବିସ୍‍ବାସ୍‍ କିନି ମାଣାନ୍‌ ଦାର୍ମୁତିକାର୍‍ ୱାଜା ୱେଙ୍ଗିଁନିକା । ମାପୁରୁ ପ୍ରବୁ ଜିସୁଙ୍ଗୁଁ ସାତିମାଣାନ୍‍ ନିକ୍‍ତାମାନାନ୍‍ ।
ROM 4:25 ଆୟା ପ୍ରବୁ ଜିସୁ ମା ପାପ୍‍ତି ଉଦାର୍‌ କିନି ଉଣ୍ତିଙ୍ଗ୍‌ ୱାନ୍‌ ସାତାମାର୍ହାନ୍‍ ମାରି ମାପୁରୁଦି ଲାକ୍‍ତୁ ମାଙ୍ଗିଁ ଦାର୍ମୁଦିକାର୍‍ କିବିସ୍‍ କିନି ଉଣ୍ତିଙ୍ଗ୍‌ ମାରିଡ଼େସି ନିଙ୍ଗିଁତାମାନାନ୍‌ ।
ROM 5:1 ଇଲେଇ ବିସ୍‍ବାସ୍‍ତାନ୍ ମାଡ୍‌ ମାପୁରୁଦି ଆଗ୍‍ଡ଼ି ଦାର୍ମୁଦିକାର୍‍ ଆତିମାନିକା ମାରି ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ମାପୁରୁଦି ୱାଲେ ମା ସାନ୍ତି ପୋଇତିମାନିକା ।
ROM 5:2 ଆୟା ଜିସୁ ମା ବିସ୍‍ବାସ୍‍ ଉଣ୍ତିଙ୍ଗ୍‌ ଇଲେଇ ମା ଜିବନ୍‍ତୁ ମାପୁରୁଦି ଦୟାଦୁ ମାନାଟ୍ । ଆଦେଙ୍ଗ୍‌ ମାପୁରୁଦି ଗୌରବ୍‍ତୁ ମିସାଦେଙ୍ଗ୍‍ ଆସା ମାଙ୍ଗିଁ ୱେଡ଼ିକାଦାନ୍‌ ଇଟ୍‍ତାମାନାତ୍‍ ।
ROM 5:3 ୱିଜୁ ରକମ୍‍ତି ଦୁକ୍‍ କାସ୍ଟୁଦୁ ବା ମାଡ୍‌ ୱେଡ଼ିକା କିଜିନିକା, ଇରିଙ୍ଗ୍‌ ତରବର୍‍ ଆଏଣ୍ତା କାସ୍ଟୁ ବଗାନି ମାଣାନ୍‌ ମନ୍‍ତୁ ସାସ୍‌ ୱାନାତ୍ ।
ROM 5:4 ସାସ୍‍ତାନ୍‍ ବପୁଦି ଗୁଣ୍‍ ମାରି ବପୁଦି ନେଗି ଗୁଣ୍‍ତାନ୍‍ ଆସା ୱାନାତ୍ ।
ROM 5:5 ଆସା ମାଙ୍ଗିଁ ନିରାସ୍‍ ଆଦେଙ୍ଗ୍‌ ସିଏତ୍‍, ଇରିଙ୍ଗ୍‌ ମାପୁରୁ ମାଙ୍ଗିଁ ପବିତ୍ର ଆତ୍ମା ସିଜି ମା ଜିବନ୍‍ତୁ ୱାନି ଜିବନ୍‍ନୋନିକା ବର୍ତି କିତା ସିତାମାନାନ୍‌ ।
ROM 5:6 ମାଡ୍‌ ନିରାସ୍‌ ମାର୍‌ଇୱାଲେ ମାପୁରୁଦି ତିଆର୍‍କିତି ସମୟ୍‍ତୁ କ୍ରିସ୍ତ ପାପି ଲୋକା ଉଣ୍ତିଙ୍ଗ୍‍ ସାତାନ୍‍ ।
ROM 5:7 ଦାର୍ମୁଲୋକା ଉଣ୍ତିଙ୍ଗ୍‌ ଆଇକାନ୍‍ ଏନ୍‌ ନିଜେଦି ଜିବନ୍‌ ସିଦେଙ୍ଗ୍‍ ବଦା କିଏନ୍‌ । ଆନାତ୍‌ ଆମା ନେଗି ଲୋକା ଉଣ୍ତିଙ୍ଗ୍‍ଁ ସାଦେଙ୍ଗ୍‍ ତିଆର୍‍ ଆନାନ୍‍ ।
ROM 5:8 ମାତର୍‌ ମାଡ୍‌ ପାପି ମାରିଇୱାଲେ କ୍ରିସ୍ତ ମା ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତାନ୍‌ । ତେନେ ମାଣାନ୍‌ ମାପୁରୁ ମାଙ୍ଗିଁ ଏସା ଜିବନ୍‍ନୋନାନ୍‍, ଆକା ୱାନ୍‌ ତର୍‍ତାମାନାନ୍‍ ।
ROM 5:9 କ୍ରିସ୍ତଦି ଜିବନ୍‌ ସିନିମାଣାନ୍‍ ମାପୁରୁ ମାଙ୍ଗିଁ ଦାର୍ମୁଦିକାର୍‍ ୱାଜା ଆସ୍‍ତାମାନାନ୍‍ । ଆତିଙ୍ଗ୍‌ ମାପୁରୁଦି ରିସାଦାନ୍‍ ମାଙ୍ଗିଁ ରକିୟା କିଦେଙ୍ଗ୍‍ଁ କ୍ରିସ୍ତ ଏସା ନାଣ୍ତ ମନ୍‍ସିନିକାନ୍‍ ଆଏନ୍‍ ।
ROM 5:10 ମାଡ୍‌ ମାପୁରୁଦି ସାତ୍ରୁ ମାରି ୱାଲେ ୱାନି ମାରିସି ମା ଉଣ୍ତିଙ୍ଗ୍‌ ଜିବନ୍‌ ସିତାନ୍‌, ତାନି ମାଣାନ୍‌ ମାପୁରୁଦି ୱାଲେ ମା ମିସାନିକା ଆତାତ୍‍ । ମାପୁରୁଦି ୱାଲେ ମିସାତି ୱେନ୍‌କା ଇଲେଇ କ୍ରିସ୍ତଦି ଜିବନ୍‍ତାନ୍‍ ରକିୟା ପୟ୍‍ଦେଙ୍ଗ୍‍ଁ ଇଜି ମାଡ୍ ଏସା ନାଣ୍ତ ସୁଜୋଗ ପୟ୍‍ଇକା ?
ROM 5:11 କେବଲ ଆକାନେ ସିଲେ, ପ୍ରବୁ ଜିସୁ କ୍ରିସ୍ତଦି ମାଣାନ୍‌ ମାପୁରୁ ଏମେ ୱିଜୁ ପାଣି କିତାମାନାନ୍‌, ଆୟାଉଣ୍ତିଙ୍ଗ୍‌ ମା ଜିବନ୍‌ ୱେଡ଼ିକାଦି ପୁରା ଆତାମାନାତ୍‌ । ଆୟା ଜିସୁ ମାପୁରୁଦି ୱାଲେ ମା ମିସାନିକା କିତାମାନାନ୍ ।
ROM 5:12 ଏସ୍ତିୱାଲେ ଅରେନ୍‍ୱାନି ମାଣାନ୍‌ ଦୁନିଆଦୁ ପାପ୍‍ ୱାତାତ୍‍ ମାରି ପାପ୍‍ତାନ୍‍ ସାନିକା ୱାତାତ୍‍ । ୱିଜେରେ ପାପ୍‍ କିତାର୍‍ଆକା ସାନିକା ୱିଜୁ ଲୋକା ଜାତିଦିଙ୍ଗ୍‍ ୱାତାତ୍‍ ।
ROM 5:13 ନିୟମ୍‍ ସିନି ଆଗ୍‍ଡ଼ିରାନ୍‍ ଦୁନିଆଦୁ ପାପ୍‍ ମାର୍ହାତ୍‌; ମାତର୍‌ ନିୟମ୍‍ ସିଲି ୱାଲେ ପାପ୍‍ତି ଇସାବ୍‌ ଆଏଜି ମାର୍ହାତ୍‌ ।
ROM 5:14 ଆଦମ୍‍ତି ୱେଡ଼ାଦାନ୍‍ ମୋସାଦି ୱେଡ଼ା ସାନ୍ଦି ଏନ୍‌ ଆଦମ୍‍ତି ୱାଜା ମାଟା ମାନାଏଜି ପାପ୍‍ କିଏତି ମାରିଙ୍ଗ୍‍ଁ ବା, ୱିଜେରେ ସାନି ଆଡ୍‍ଗି ମାର୍ହାର୍‌ । ଆମାୱାନିଦି ୱାନିକା ମାର୍ହାତ୍‌, ଆଦମ ୱାନି ଉନ୍‍ଣ୍ତ୍ରି ନିଡ଼ିଗାୱାଜା;
ROM 5:15 ମାତର୍‌ ଇୟା ରିଏରି ଲୋଇ ନାଣ୍ତ ୱେର୍‍ଏ ମାନାତ୍‌ । ଆଦମ୍‍ତି ପାପ୍‍ ନି ମାପୁରୁଦି ଇସାବ୍‌ସିଲି ଦାନ୍‍ତି ବପୁ ସାମାନ୍‍ ସିଲେ । ଅରେନ୍‍ ଲୋକ୍‍ତି ପାପ୍‍ ଉଣ୍ତିଙ୍ଗ୍‍ଁ ନାଣ୍ତ ଲୋକ ସାତାର୍‍ । ମାତର୍‌ ମାପୁରୁ ୱାନି ପେରି ଦୟାଦାନ୍‍, ମାରି ଅରେନ୍‍ ଲୋକ୍‍, ପ୍ରବୁ ଜିସୁ କ୍ରିସ୍ତଦି ମାଣାନ୍‌ ଲୋକା ଉଣ୍ତିଙ୍ଗ୍‌ ଏମେ ଦାନ୍‍ତି ନିୟମ୍‍ କିତାନ୍‍, ଆକା ନାଣ୍ତ ବପୁ ।
ROM 5:16 ଅରେନ୍‍ ଲୋକ୍‍ତି ପାପ୍‍ ଉଣ୍ତିଙ୍ଗ୍‍ଁ ଲୋକୁ ବିଚାର୍‍ତି ଆଗ୍‌ଡ଼ି ଆଜି ଦସି ଆତାର୍‌; ମାତର୍‌ ଗାଦି ଲୋକା ନାଣ୍ତ ପାପ୍‍ ଆତିଙ୍ଗ୍‌ବା ମାରି କେମା ପୟ୍‍ଦେଙ୍ଗ୍‍ଁ ଇଜି ଇନି ଜଗ୍‌ ସିଲିତିଙ୍ଗ୍‌ ବା, ମାପୁରୁ ଆୟା ଦାନ ଉଣ୍ତିଙ୍ଗ୍‍ଁ, ଇଲେଇ ଲୋକୁ ଦସ୍‍ସିଲିକାର୍‍ ଇଜି ୱେଙ୍ଗ୍‍ଁଦେଙ୍ଗ୍‍ଁ ଆଟ୍‍ନାନ୍‍ ।
ROM 5:17 ମାରିବା ଅରେନ୍‍ ଲୋକ୍‍ତି ପାପ୍‍ ଉଣ୍ତିଙ୍ଗ୍‍ଁ, ସାନି ସାସନ୍‍ କିନିକା ୱାତାତ୍‍; ମାତର୍‌ ମାରି ଅରେନ୍‍ ଅର୍ତାତ୍‍ ଜିସୁ କ୍ରିସ୍ତ ଆମାକା କିତାମାନାନ୍‌, ଆକା ଏସା ପେରିକା । ଏମେ ୱିଜେରେ ମାପୁରୁଦି ପେରି ଦୟାଦାନ୍‍ ଆର୍‍ଏନେ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ଆନାର୍‍, ୱାର୍‌ କ୍ରିସ୍ତଦି ୱାଲେ ଜିଣାନି ଜିବନ୍‌ କାଟେକିନାର୍‍ ।
ROM 5:18 ଅରେନ୍‍ୱାନି ପାପ୍‍ ଏଣ୍ତେସ୍‌ ୱିଜୁ ଲୋକା ଜାତିଦିଙ୍ଗ୍‍ ଦଣ୍ତ୍‌ କିତାତ୍‍, ଆୟାୱାଜା ଅରେନ୍‍ୱାନି ଦାର୍ମୁ ୱିଜୁ ଲୋକୁ ଜାତି ଉଣ୍ତିଙ୍ଗ୍‍ଁ ମୁକ୍‍ଡ଼ାନିକା ନି ଜିବନ୍‍ତି ସାରି ତାତା ସିତାମାନାନ୍‌ ।
ROM 5:19 ଅରେନ୍‍ୱାନି ଅମାନ୍ୟ ଉଣ୍ତିଙ୍ଗ୍‍ଁ ଏଣ୍ତେସ୍‌ ୱିଜେରେ ପାପି ଆତାର୍‌, ଆୟାୱାଜା ଅରେନ୍‍ୱାନି ମାନାନି ଉଣ୍ତିଙ୍ଗ୍‍ଁ ୱିଜେରେ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଆନାର୍‍ ।
ROM 5:20 ନିୟମ୍‍ତି ସାଲାନି ଉଣ୍ତିଙ୍ଗ୍‍ଁ ତାଗ୍‍ଇପାଣି ପିରିତାତ୍‍ । ମାତର୍‌ ପାପ୍‍ ପିର୍‍ନି ଦାପେ ଦାପେ ମାପୁରୁଦି ଦୟା ବା ନାଣ୍ତଦାନ୍ ନାଣ୍ତ ଆତାତ୍‍ ।
ROM 5:21 ପାପ୍‍ ଏଣ୍ତେସ୍‌ ସାନି ମାଣାନ୍‌ ନିଜେଦି ସାସନ୍‍ କିଜିମାର୍ହାତ୍‍, ଆୟାୱାଜା ମାପୁରୁଦି ଦୟା ପ୍ରବୁ ଜିସୁ କ୍ରିସ୍ତଦି ଦୟାଦାନ୍‍ ମାଙ୍ଗିଁ ଦାର୍ମୁଦିକାର୍‍ ଲେକିସ୍‍ କିଜି ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ସିନାତ୍‍ ।
ROM 6:1 ଆର୍‌ତିଙ୍ଗ୍‌ ଇନିକା ଇନାଟ୍‍ ? ମାପୁରୁଦି ଦୟା ମାରି ନାଣ୍ତ ଆନାତ୍‌ ଇଜି ମାଡ୍‌ ଇନିକା ପାପ୍‍ତୁ ଜିନା ମାଡ଼ିନାଟ୍‍ ?
ROM 6:2 ଏସାଙ୍ଗ୍‍ ସିଲେ । ପାପ୍‍ ଉଣ୍ତିଙ୍ଗ୍‌ ମାଡ୍‌ ସାତି ମାନିକା ଆବେ ମାରି ଜିନାଟ୍‍ ଏଣ୍ତେସ୍‌ ?
ROM 6:3 ମିର୍‌ ନେସ୍‍ନିଦେର୍‍, ଡୁବନ୍‌ ଅନି ମାଣାନ୍‌ କ୍ରିସ୍ତ ଜିସୁଦି ୱାଲେ ମିସାଜି ମାଡ୍‌ ୱାନି ସାତି ମାନୁ ବା ମିସାତି ମାନିକା ।
ROM 6:4 ଡୁବନ୍‌ ଅନି ମାଣାନ୍‌ ମାଡ୍‌ ୱାନି ସାତି ମାନୁ ମିସାଜି ୱାନି ୱାଲେ ମୁସାତି ମାନିକା । କ୍ରିସ୍ତ ଏଣ୍ତେସ୍‌ ବୁବାଦି ଗୌରବ୍‌ଦି ସାକ୍ତି ଦାନ୍‍ ମାରିଡ଼େସିଜିବନ୍‌ ଆଜି ନିଙ୍ଗିଁତାନ୍‍, ମାଡ୍‌ ବା ୱାନି ଉଣ୍ତିଙ୍ଗ୍‌ ପୁନିୱାଜା ଜିଦେଙ୍ଗ୍‌ ଆଟ୍‍ନିକା ।
ROM 6:5 ଏଣ୍ତେସ୍‍ଇରିଙ୍ଗ୍‍ ମାଡ୍‌ ସାନି ମାନୁ ମିସାଜି ୱାନି ୱାଲେ ଉନ୍‍ଡ୍ରେ ଆତିମାନିକା, ୱାନି ମାରିଡ଼େସି ନିଙ୍ଗ୍‍ଁନିମାନୁ ବା ୱାନି ୱାଲେ ଉନ୍‍ଡ୍ରେ ଆଜି ପୁନି ଜିବନ୍‌ ପୟ୍‍ନିକା ।
ROM 6:6 ମାଡ୍‌ ନେସ୍‍ନିକା, ଜେ କ୍ରିସ୍ତଦି ୱାଲେ କ୍ରୁସ ମୁସ୍‌କୁ ମା ପାଡ଼୍‍ଇ ମେନ୍ଦଲ୍‌ତି ମୁର୍ତି ସାତାମାନାତ୍‍ । ଆବେଣାନ୍‍ ମା ପାପ୍‍ ଗୁଣ୍‍ ନାସ୍ଟୁ ଆତାମାନାତ୍‌ ମାରି ମାଡ୍‌ ପାପ୍‍ତି ଦାସ୍‍ତାନ୍‍ ଡ଼ିସାୟ୍‍ ଆତିମାନିକା,
ROM 6:7 ଇରିଙ୍ଗ୍‌ ଲୋକୁ ସାତିସରିଙ୍ଗ୍‍ଁ, ପାପ୍‍ ଗାଟିଦାନ୍‍ ରକିୟା ପୟ୍‍ନାନ୍‍ ।
ROM 6:8 ମାଡ୍‌ ଜିସୁଦି ୱାଲେ ସାତିମାନିକାଆକା, ୱାନି ୱାଲେ ବା ଜିନିକା ଇଜି ବିସ୍‍ବାସ୍‍ କିଜିନିକା ।
ROM 6:9 ମାଡ୍‌ ନେସ୍‍ନିକା, କ୍ରିସ୍ତ ସାତିମାଣାନ୍‍ ନିଙ୍ଗିଁତାମାନାନ୍‌ ଆକା, ୱାନ୍‌ ମାରି ଏସାଙ୍ଗ୍‍ଁ ସାଏନ୍‍ । ୱାନି ମୁସ୍‌କୁ ସାନିକା ମାରି ସାସନ୍‍ କିଏତ୍‍ ।
ROM 6:10 ୱାନ୍‌ ଏମେନୁ ସାତାନ୍‍ ଆବେଣାନ୍‍ ପାପ୍‍ତି ସାକ୍ତିଦାନ୍‍ ଜିଣାତାମାନାନ୍‍ । ୱାନ୍‌ ଇଲେଇ ଆମା ଜିଜି ମାଡ଼ିଜିନାନ୍‍, ଆକା ମାପୁରୁଦି ୱାଲେ ମିସାତି ଜିବନ୍‌ ।
ROM 6:11 ଆୟାୱାଜା ମିର୍‌ ବା ପାପ୍‍ ଉଣ୍ତିଙ୍ଗ୍‌ ସାତି ମାନିଦେର୍‍ ଇଜି ଅଡ଼୍‍ବିଦୁ । ମିର୍‌ ଇଲେଇ କ୍ରିସ୍ତ ଜିସୁଦି ମାଣାନ୍‌ ଜିବନ୍‍ତୁ ମାପୁରୁଦି ୱାଲେ ମିସାତି ମାନିଦେର୍‍ ।
ROM 6:12 ଇୟା ମି ସାତି ମେନ୍ଧଲ୍‍ ମୁସ୍‌କୁ ପାପ୍‍ ମାରି ସାସନ୍‍ କିମାକିତ୍‍; ମିର୍‌ ମାରି ଇନି ମେନ୍ଦଲ୍‍ତି ଆସା ଆଡ୍‍ଗି ତେବାମାଟ୍‍ ।
ROM 6:13 ମିର୍‌ ନିଜେଦିଙ୍ଗ୍‍ଁ ଏମେ ଇସାବ୍‍ତାନ୍‍ ପାପ୍‍ ଲାକ୍‍ତୁ ସର୍ପେ କିଜି ତାଗ୍‌ଇ ପାଣି ୱାଜା ବ୍ୟବହାର୍ ଆମାଟ୍‌ । ମାତର୍‌ ସାନି ମାଣାନ୍‌ ରକିୟା ପୟ୍‍ଜି ଜିବନ୍‌ ପୟ୍‍ତିମାନି ଉଣ୍ତିଙ୍ଗ୍‍ଁ ମିର୍‌ ସତ୍‍ପାଣି କିଦେଙ୍ଗ୍‍ଁ ଇଜି ନିଜେ ନିଜେଦିଙ୍ଗ୍‍ଁ ସାଜୁଦାନ୍‌ ମାପୁରୁମାନୁ ସର୍ପେ କିଦୁ ।
ROM 6:14 ମାତର ପାପ୍‍ ମି ମୁସ୍‌କୁ ସାସନ୍‍ କିମାପିତ୍‍ । ମିର୍‌ ମାରି ନିୟମ୍‍ତି ଆଡ୍‍ଗି ସିଲିଦେର୍‍ । ମାତର୍‌ ମାପୁରୁଦି ଦୟାଦି ଆଡ୍‍ଗି ମାନିଦେର୍‍ ।
ROM 6:15 ଆର୍‌ତିଙ୍ଗ୍‌, ମାଡ୍‌ ନିୟମ୍‍ତି ଆଡ୍‍ଗି ତେବାଏଣ୍ତା ମାପୁରୁଦି ଦୟା ପୟ୍‍ତିମାନିକା ଇଜି ଇନିକା ପାପ୍‍ କିଜିମାନାଟ୍‍ ? ଆକା ଏସାଙ୍ଗ୍‍ ସିଲେ ।
ROM 6:16 ମିର୍‌ ପୁରା ନେସ୍‍ତିମାନିଦେର୍‍, ଜଦି ମିର୍‌ ଆମାୱାନି ଆଡ୍‍ଗି ମାନିକା ମାନାଜି ୱାନି ପୁରା ମାଟା ମାନାନିଦେର୍‍, ଆର୍‌ତିଙ୍ଗ୍‌ ମିର୍‌ ୱାନି ଦାସ୍‍ । ଜଦି ପାପ୍‍ତି ଦାସ୍‌ ଆନିଦେର୍‌, ତେନି ଦଣ୍ତ୍‍ ଆନାତ୍‌ ସାନିକା; ଜଦି ଦାର୍ମୁଦୁ ସାଲାନିଦେର୍‍, ଆର୍‌ତିଙ୍ଗ୍‌ ଜିବନ୍‌ ପୟ୍‍ନିଦେର୍‍ ।
ROM 6:17 ମାତର୍‌ ମାପୁରୁଙ୍ଗ୍‍ଁ ଦନ୍ୟବାଦ ସିଜିନା, ଜଦିବା ଅର୍‍ଲେନ୍‍ ମିର୍‌ ପାପ୍‍ତି ଦାସ୍‍କୁ ମାର୍ହିଦେର୍‍, ମିର୍‌ ଇଲେଇ ସୁସମାଚାର୍‍ତାନ୍‍ ଅଜାତିମାନି ସତ୍‍ମାଟେଙ୍ଗ୍‍ଁ ପୁରା ମୋନ୍‌ତାନ୍‍ ମାନାଜିନିଦେର୍‍ ।
ROM 6:18 ମିର୍‌ ପାପ୍‍ତାନ୍‍ ମୁକ୍‍ଡ଼ାଜି ଦାର୍ମୁଦି ଦାସ୍‍କୁ ଆତିମାନିଦେର୍‍ ।
ROM 6:19 ମି ସାକିସିଲି ଉଣ୍ତିଙ୍ଗ୍‌, ଇୟାୱିଜୁ ମାଟା ! ନାନୁ ଲୋକୁ ୱାଜା ୱିଜୁଦିନ୍‍ ୱାର୍‍ଗିନି ବାସାଦାନ୍‍ ୱେର୍‍ସିନା । ଅର୍‍ଲେନ୍‍ ମିର୍‌ ତାଗ୍‍ଇକା ନି ତାଗ୍‌ଇ ପାଣିଦୁ ନିଜେ ନିଜେଦିଙ୍ଗ୍‍ ମିସାକିଜି ଇଟ୍‍ତିମାର୍ହିଦେର୍‍ । ଆୟାୱାଜା ଇଲେଇ ପବିତ୍ର ଆଦେଙ୍ଗ୍‌ ଇଜି ଦାର୍ମୁଦି ଲାକ୍‍ତୁ ନିଜେଦିଙ୍ଗ୍‍ଁ ପୁରାଦାନ୍‌ ସିଦୁ ।
ROM 6:20 ମିର୍‌ ପାପ୍‍ତି ଦାସ୍‍ ମାର୍‌ଇୱାଲେ, ଦାର୍ମୁଦାନ୍‍ ଆକ ମାର୍ହିଦେର୍‍ ।
ROM 6:21 ଇଲେଇ ମିଙ୍ଗିଁ ଏମେ ୱିଜୁ ପାଣି କିଦେଙ୍ଗ୍‌ ସେମାର୍‍ ଆଜିନାତ୍‍, ନାସ୍ତିୱାଲେ ଆୟାୱିଜୁ କିଜିମାର୍‌ଇଦେର୍‍ । ଆବେଣାନ୍‍ ଇନି ଲାବ୍‍ ପୟ୍‍ତିଦେର୍‍ ? ଆୟାୱିଜୁ ପାଣିଦି ଦଣ୍ତ୍‍ ସାନିକା ।
ROM 6:22 ମାତର୍‌ ଇଲେଇ ମିର୍‌ ପାପ୍‍ତାନ୍‍ ମୁକ୍‍ଡ଼ାଜି ମାପୁରୁଦି ପବିତ୍ର ଦାସ୍‍ ଆତିମାନିଦେର୍‍ । ତେନି ଲାବ୍‍ ଆଜିନାତ୍‍, ମାପୁରୁମାନୁ ପୁରାଦାନ୍‌ ଜିବନ୍‌ ସର୍ପେ କିନିକା ମାରି ତେନି ପଲ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ।
ROM 6:23 ପାପ୍‍ତି ବାଦ୍‌ଲୁ ସାନିକା, ମାତର୍‌ ମାପୁରୁଦି ଦୟାଦି ଦାନ୍‍ ଆଜିନାତ୍‍, ପ୍ରବୁ ଜିସୁ କ୍ରିସ୍ତଦି ୱାଲେ ମିସାନି ମାଣାନ୍‌ ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ।
ROM 7:1 ଏ ତଡ଼ାନ୍‍କୁ ନି ତାଙ୍ଗିଁକି, ଇଲେଇ ଆମାକା ଇନ୍‌ଡ୍ରେଙ୍ଗ୍‌ ସଲ୍‍ସିନା, ମିର୍‌ ଆକା ବୁଜାଦେଙ୍ଗ୍‍ ଆଟ୍‍ନିଦେର୍‍, ଇରିଙ୍ଗ୍‌ ମିର୍‌ ନେସ୍‍ତିମାନିଦେର୍‍, ନିୟମ୍‍ ଇନିକା । ଲୋକୁ କେବଲ ୱାନି ଜିନି ୱେଡ଼ାଦୁ ନିୟମ୍‍ତି ଆଡ୍‍ଗି ତେବାନାନ୍‍ ।
ROM 7:2 କନ୍‍ଲି ଜିନିମାନି ସାନ୍ଦି ୱାନି ଆଡ଼୍‍ସି ୱାନି ୱାଲେ ପେଡ଼ିଆତିମାନୁ ତର୍‍ଆୟ୍‍ ଆନାମାନାତ୍‍ । ମାତର୍‌ କନ୍‍ଲି ସାତିଙ୍ଗ୍‍ଁ, ୱାନି ଆଡ଼୍‍ସି ଇୟା ନିୟମ୍‍ତାନ୍‍ ମୁକ୍‍ଡ଼ାନାତ୍‍ ।
ROM 7:3 କନ୍‍ଲି ଜିତି ମାନିୱାଲେ; ଆଡ଼୍‍ସି ଜଦି ଆଇ ମେମାରି ୱାଲେ ତେବାନାତ୍‍, ତାନିଙ୍ଗ୍‍ଁ ଦାରିଣି ଇଜି ଇନାର୍‍; ମାତର୍‌ କନ୍‍ଲି ସାତି ୱେନ୍‌କା ୱାଦ୍ ମାରି ଅରେନ୍‍ ୱାନିଙ୍ଗ୍‍ଁ ପେଡ଼ି ଆତିଙ୍ଗ୍‍ଁ, ଆକା ଦାରିପାଣି ଆଏତ୍‍ ।
ROM 7:4 ଏ ତଡ଼ାନ୍‍କୁ ନି ତାଙ୍ଗିଁକି, ମିଦି ବା ଟିକ୍‍ ଆୟା ବାଦା । ମିର୍‌ ଡୁବନ୍‍ ଅତି ମାଣାନ୍‌ କ୍ରିସ୍ତଦି ମେନ୍ଦଲ୍‌ତି ୱାଲେ ସାଜି, ୱାନି ମାରିଡ଼େସିଜିବନ୍‌ ଆଜି ନିଙ୍ଗିଁନିମାନୁ ବା ମିସାତିମାନିଦେର୍‍ ମାରି ଇଲେଇ ମିର୍‌ ମାପୁରୁଦି ନେଗି ସେବକ । ନିୟମ୍‍ ଉଣ୍ତିଙ୍ଗ୍‌ ମିର୍‌ ସାତି ମାନିଦେର୍‍ ।
ROM 7:5 ଆମା ଦିନ୍‍ ସାନ୍ଦି ମାଡ୍‌ ମେନ୍ଦଲ୍‍ତି ଆସାଦି ଆଡ୍‍ଗି ମାର୍ରିକା, ନିୟମ୍‍ତି ମନାକିତି ମାଟା ମା ପାପ୍‍ ପାଣିଦୁ କେବଲ ଏଗ୍ରିସ୍‍ କିବିସ୍‍ କିଜିମାର୍ହାତ୍‍ ମାରି ମାଡ୍‌ ସାନି ସେବା ଉଣ୍ତିଙ୍ଗ୍‌ ଟିକ୍‍ ମାର୍‌ଇକା ।
ROM 7:6 ଇଲେଇ ମାଡ୍‌ ନିୟମ୍‍ତି ସାସନ୍‍ତାନ୍‍ ମୁକ୍‍ଡ଼ାତି ମାନିକା, ଇରିଙ୍ଗ୍‍ଁ ଆମାକା ଅର୍‍ଲେନ୍‍ ମାଙ୍ଗିଁ ତର୍‍ତା ଇଟ୍‍ତାମାର୍ହାତ୍‍, ଆୟାଉଣ୍ତିଙ୍ଗ୍‌ ମାଡ୍‌ ଇଲେଇ ସାତିମାନିକା । ମାଡ୍‌ ମାରି ଆଗ୍‍ଡ଼ିରି ୱାଜା ରାସାତି ନିୟମ୍‍ତି ସେବା କିଇଜିନିକା, ପବିତ୍ରଆତ୍ମାଦି ପୁନି ସାରିଦୁ ଇଲେଇ ମାଡ୍‌ ବୁଲାଜିନିକା ।
ROM 7:7 ଆର୍‌ତିଙ୍ଗ୍‌ ଇନିକା ଇନାଟ୍‍, ନିୟମ୍‍ ନେ ପାପ୍‍ ? ଆକା ଏସାଙ୍ଗ୍‍ ସିଲେ । ମାତର୍‌ ପାପ୍‍ ଇନିକା, ଆକା ନାଙ୍ଗିଁ ନିୟମ୍‍ ୱେର୍‍ତାସିତାମାନାତ୍‍ । “ଆଇୱାନି ଜିନିସ୍‍ତିଙ୍ଗ୍ ଆସାମାଟ୍,” ଇୟା ମାଟା ଜଦି ନିୟମ୍‍ ସିଏତାତ୍‍ ମାନ୍ଦି, ଆସାନିକା ଇନିକା, ନାନୁ ନେସ୍‍ଏତା ମାନ୍ଦି ।
ROM 7:8 ମାତର୍‌ ମୁସ୍‍କୁରି ମାଟାଦି ସୁଜୋଗ ଅସି ପାପ୍‍ ନା ମନ୍‍ତୁ ୱିଜୁ ରକମ୍‌ତି ଲବ୍‌ ଜନମ୍‍କିତାତ୍‍ । ନିୟମ୍‌ତିଙ୍ଗ୍‌ ଡ଼ିସ୍‍ତିଙ୍ଗ୍ଁ ପାପ୍‍ ସାତି ସାମାନ୍‍ ।
ROM 7:9 ଅର୍‍ଲେନ୍‍ ନିୟମ୍‍ ନେସ୍‍ଏଣ୍ତା ନାନୁ ଜିତା ମାର୍ହା; ନିୟମ୍‍ ନେସ୍‍ତି ୱେନ୍‌କା ପାପ୍‍ ୱାତାତ୍‍ ମାରି ନାନୁ ସାତା ।
ROM 7:10 ଏମେ ନିୟମ୍‍ ଜିବନ୍‌ ସିଦେଙ୍ଗ୍‍ ଇଜି ଟିକ୍‍ ମାର୍ହାତ୍‌, ଆକା ନା ସାନି ମାଟା ଆତାତ୍‍ ।
ROM 7:11 ମାତର ନିୟମ୍‍ତି ସୁଜୋଗ ଅସି ପାପ୍‍ ନାଙ୍ଗିଁ ଟକେ କିତାତ୍‍ ମାରି ନାଙ୍ଗିଁ ଡାକ୍‍ତାତ୍‍ ।
ROM 7:12 ନିୟମ୍‍ ପବିତ୍ର; ତାନି ମାଟେଙ୍ଗ୍‍ଁ ୱିଜୁ ପବିତ୍ର, ଟିକ୍‍ ମାରି ନେଗିକା ।
ROM 7:13 ଆର୍‍ତିଙ୍ଗ୍‍ଁ, ଆମାକା ନେଗିକା, ଆକା ଇନିକା ନା ସାନି ମାଟା ଆତାମାର୍ହାତ୍‍ ? ଏସାଙ୍ଗ୍‍ ସିଲେ । ପାପ୍‌ନେ ଆକା କିତାତ୍‍ । ନେଗି ନିୟମ୍‍ତିଙ୍ଗ୍‍ଁ ବ୍ୟବହାର୍ କିଜି ପାପ୍‍ ନା ସାନିକା ଗଟାକିତାତ୍‍ । ଆବେଣାନ୍‍ ପାପ୍‍ତି ସତ୍‍ ରୁପ୍‍ ତରିତାତ୍‍ । ଆଦେଙ୍ଗ୍‍ଁ ନିୟମ୍‍ ପାପ୍‍ତି ନାଣ୍ତ ବୟଙ୍କାରିତିକା ଜାଣାପଡ଼ାତାତ୍‍ ।
ROM 7:14 ମାଡ୍‌ ନେସ୍‍ନିକା, ନିୟମ୍ ଆତ୍ମିକ ମାଟା । ମାତର୍‌ ନା ସାତି ମେନ୍ଧଲ୍‍ ପାପ୍‍ତି ସାକର୍‌ ।
ROM 7:15 ନାନୁ ଇନିକା କିନା, ଆକା ନାନୁ ବୁଜାଏ । ଆମାକା କିଦେଙ୍ଗ୍‌ ଇଜି ନାଙ୍ଗିଁ ବଦା, ଆକା ନାନୁ କିଏ; ମାତର୍‌ ଆମାକା କାଡ଼୍‍ନା, ଆକାନେ କିନା ।
ROM 7:16 ମାତର ଆମାକା କିନା, ଆକା ସତ୍‌ତାନ୍‌ ନା ବଦା ବିରୁଦ୍‍ତାନ୍‍ କିଜିମାନିଙ୍ଗ୍‍, ନିୟମ୍‍ ଟିକ୍‍ ଇଜି ନାନୁ ମାନାଜିନା ।
ROM 7:17 ଆଦେଙ୍ଗ୍‍ଁ ଆୟା ପାଣି ସତ୍‌ତାନ୍‌ ନାନୁ କିଏ ନା ମୋନ୍‌ ଲୋଇ ମାନି ପାପ୍‍ ନେ ଆକା କିନାତ୍‍ ।
ROM 7:18 ନାନୁ ନେସ୍‍ନା, ନା ଲୋଇ ମାରି ନା ଲୋକ୍‍ ଗୁଣ୍‍ତୁ ଇନି ନେଗିକା ସିଲେତ୍‍, ଇରିଙ୍ଗ୍‌ ନେଗିପାଣି କିଦେଙ୍ଗ୍ଁ ନା ବଦା ମାରିଙ୍ଗ୍ଁ ବା ଆକା କିଦେଙ୍ଗ୍‍ଁ ଆଟ୍‌ଏଜିନା ।
ROM 7:19 ଆୟାଉଣ୍ତିଙ୍ଗ୍‌ ଆମା ନେଗିପାଣି କିଦେଙ୍ଗ୍‍ଁ ନା ବଦା, ଆକା କିଏଜିନା ବଦା ବିରୁଦ୍‍ତାନ୍‍ ଅସତ୍‍ ପାଣି ନେ କିଜିମାନା ।
ROM 7:20 ନା ବଦା ବିରୁଦ୍‍ତାନ୍ ଆମାକା କିନା, ସତ୍‌ତାନ୍‌ ନାନୁ ଆକା କିଏ ନା ଲୋଇ ମାନି ପାପ୍‍ ନେ ଆକା କିନାତ୍‍ ।
ROM 7:21 ଇକା ନା ଲୋଇ ଉନ୍‍ଣ୍ତ୍ରି ନେଗି ପାଣିକିନି ନିୟମ୍‍ ଇଜି ଅଡ଼୍‍ବିନା । ଆମାକା ସତ୍‍, ଆକା ନାନୁ କିଦେଙ୍ଗ୍ଁ ସନିୱାଲେ, କେବଲ ସତ୍‍ସିଲି ପାଣି କିନା ।
ROM 7:22 ମାପୁରୁଦି ନିୟମ୍‍ତିଙ୍ଗ୍‌ ମାନାଦେଙ୍ଗ୍ଁ ଇଜିନା ବଦା,
ROM 7:23 ମାତର୍‌ ନା ମନ୍‍ତୁ ଇୟା ବଦା ବିରୁଦ୍‍ତାନ୍‍ ନା ମେନ୍ଦଲ୍‍ତିଙ୍ଗ୍‍ଁ ସାଲାକିଜିମାନି ନିୟମ୍‍ ୱିଜୁଦିନ୍ ଜୁଦ୍‌ କିଜିମାନାତ୍‍ । ନା ମେନ୍ଦଲ୍‌ତୁ ପାଣି କିଜିମାନି ଆୟା ପାପ୍‍ ପାଣି ନାଙ୍ଗିଁ ତର୍‍ତା ଇଟ୍‍ତାମାନାତ୍‍ ।
ROM 7:24 ଏସା ୱେଡ଼ିକାସିଲିକାନ୍‍ ନାନୁ ! ସାନି ସାରିଦୁ ରେଲ୍‍ଜି ଅସିମାନି ଇୟା ମେନ୍ଦଲ୍‌ତି ପାଣିଦାନ୍‍ ନାଙ୍ଗିଁ ଏନ୍‌ ରକିୟା କିନାନ୍‍ ?
ROM 7:25 ମାପୁରୁ ଧନ୍ୟ ଆପିନ୍‌, ପ୍ରବୁ ଜିସୁ କ୍ରିସ୍ତଦି ମାଣାନ୍‌ ଇକା ୱାନ୍‌ କିତାମାନାନ୍‌ । ଆର୍‍ତିଙ୍ଗ୍‍ଁ, ଇୟାକା ଆଜିନାତ୍‍ ନା ଇନସ୍ତା । ମାପୁରୁଦି ନିୟମ୍‍ କେବଲ ନାନୁ ନା ମନ୍‌ତୁ ମାନାଦେଙ୍ଗ୍ଁ ଆଟ୍‍ନା । ମାତର୍‌ ନା ଲୋକ୍‍ ଗୁଣ୍‍ ନାଙ୍ଗିଁ ପାପ୍‍ତି ଦାସ୍‍ ଆଦେଙ୍ଗ୍‍ଁ ଜାସେପେଲା କିଜିନାତ୍‍ ।
ROM 8:1 ଏମେକାର୍‌ କ୍ରିସ୍ତ ଜିସୁଦି ୱାଲେ ମିସାଜି ଜିନାର୍‍, ୱାରିଙ୍ଗ୍‍ଁ ମାରି ଦଣ୍ତ୍‌ ସିଲେତ୍‍ ।
ROM 8:2 ପବିତ୍ରଆତ୍ମା ଆମା ନିୟମ୍‍ତାନ୍‍ ମାଙ୍ଗିଁ କ୍ରିସ୍ତ ଜିସୁଦି ୱାଲେ ମିସା କିଜି ନିଜେଦି ଜିବନ୍‌ ସିତାମାନାନ୍‌, ଆବେଣାନ୍‍ ମାଡ୍‌ ପାପ୍‍ ନି ସାନି ନିୟମ୍‍ତାନ୍ ମୁକ୍‍ଡ଼ାତି ମାନିକା ।
ROM 8:3 ଇୟା ଲୋକା ଗୁଣ୍‍ ୱିଜୁ ଲିଡ଼ଲାଡ଼ା ଉଣ୍ତିଙ୍ଗ୍‍ଁ ମସା ସିତିମାନି ନିୟମ୍‍ ଆମାକା କିଦେଙ୍ଗ୍ଁ ଆଟ୍‍ଏତାତ୍‍, ମାପୁରୁ ଆକା କିତାମାନାନ୍‌ । ଲୋକା ଜିବନ୍‍ତୁ ପାପ୍‍ତିଙ୍ଗ୍‍ଁ ନାସ୍ଟୁ କିଦେଙ୍ଗ୍‍ଁ ଇଜି ୱାନ୍‌ ନିଜେଦି ମାରିସିଙ୍ଗ୍‍ଁ ପାପି ଲୋକୁ ୱାଜା ପକ୍‍ତାନ୍‍ ମାରି କ୍ରିସ୍ତ ଜିସୁ ପାପ୍‍ତି ସାକ୍ତି ନାସ୍ଟୁ କିତାମାନାନ୍‌ ।
ROM 8:4 ଆଦେଙ୍ଗ୍‍ଁ ଇଲେଇ ମାଡ୍‌ ଲୋକ୍‍ ଗୁଣ୍‍ତି ଆଡ୍‍ଗି ତେବାଏଜି ଆତ୍ମାଦି ମାଣାନ୍‌ ସାଲାଜିନିକା ମାରି ତେନି ମାଣାନ୍‌ ମାଡ୍‌ ନିୟମ୍‍ତି ଟିକ୍‍ ଦାବି ପୁରା କିଜିନିକା ।
ROM 8:5 ଏମେକାର୍‌ ଲୋକ୍‍ ଗୁଣ୍‍ ଇସାବ୍‍ତାନ୍‍ ପାଣି କିଜିମାନାର୍‍, ୱାରି ମନ୍ ଆୟା ଗୁଣ୍‍ତି ଆଡ୍‍ଗି ତେବାନାତ୍‍ । ମାତର୍‌ ଏମେକାର୍‌ ଆତ୍ମାଦି ମାଟା ଇସାବ୍‌ତାନ୍‌ ପାଣି କିନାର୍‌, ୱାରି ମନ୍ ଆତ୍ମାଦାନ୍‌ ସାଲାନାତ୍‍ ।
ROM 8:6 ଲୋକ୍‍ ଗୁଣ୍‍ତି ଆଡ୍‍ଗି ତେବାତିଙ୍ଗ୍‍ଁ, ଦସ୍‍ ଆନାତ୍‌ ସାନିକା; ଆତ୍ମାଦି ଆଡ୍‍ଗି ତେବାନି ମାଣାନ୍‌ ଜିବନ୍‌ ନି ସାନ୍ତି ପୁଟ୍‍ନାତ୍‍ ।
ROM 8:7 ନର୍‍ ଗୁଣ୍‍ତି ଆଡ୍‍ଗି ତେବାନି ମାଣାନ୍‌ ଲୋକ୍‍ ମାପୁରୁଦି ସାତ୍ରୁ ଆନାନ୍‍; ଇରିଙ୍ଗ୍‍ଁ ୱାନ୍‌ ମାପୁରୁଦି ନିୟମ୍‍ ମାନାଏନ୍‌ ୱାନ୍‌ ଆକା କିଦେଙ୍ଗ୍‍ଁ ଆଟ୍‍ଏନ୍‍ ।
ROM 8:8 ଏମେକାର୍‌ ନର୍‍ ଗୁଣ୍‍ ଇସାବ୍‍ତାନ୍‍ ପାଣି କିନାର୍‌, ୱାର୍‌ ମାପୁରୁଙ୍ଗ୍‍ଁ ୱେଡ଼ିକା କିଦେଙ୍ଗ୍‍ଁ ଆଟ୍‍ଏର୍‍ ।
ROM 8:9 ଜଦି ସତ୍‌ତାନ୍‌ ମାପୁରୁଦି ପବିତ୍ରଆତ୍ମା ମିବାନୁ ତେବାନାତ୍‍, ମିର୍‌ ମାରି ନର୍‍ ଗୁଣ୍‍ ଇସାବ୍‍ତାନ୍‍ ଜିଇଦେର୍‍, ମାତର୍‌ ଜିବନ୍‍ତୁ ଆତ୍ମାଦି ମାଟା ମାନାଜିନିଦେର୍‍ । କ୍ରିସ୍ତଦି ଆତ୍ମା ଆମାୱାନି ଲାକ୍‍ତୁ ସିଲେତ୍‍, ୱାନ୍‌ ଏସାଙ୍ଗ୍‍ଁବା ୱାନି ଲୋକ୍‍ ଆଦେଙ୍ଗ୍‍ଁ ଆଟ୍‍ଏନ୍‍ ।
ROM 8:10 ମାତର୍‌ ଜଦି କ୍ରିସ୍ତ ମିବାନୁ ବାସାଜି ମାନାନ୍‌, ମି ମେନ୍ଧଲ୍‍ ପାପ୍‍ତୁ ନାସ୍ଟୁ ଆଦେଙ୍ଗ୍‍ଁ ସଲ୍‌ସି ମାରିଙ୍ଗ୍‍ଁ ବା, ଆତ୍ମା ମିଙ୍ଗିଁ ଜିବନ୍‌ ସିନାତ୍‍, ଇରିଙ୍ଗ୍‌ ମାପୁରୁଦି ଲାକ୍‍ତୁ ମିର୍‌ ଦାର୍ମୁତିକାର୍‍ ଆତିମାନିଦେର୍‍ ।
ROM 8:11 ଜଦି ଜିସୁଙ୍ଗୁଁ ସାତି ମାଣାନ୍‌ ନିକ୍‍ତିମାନି ମାପୁରୁଦି ଆତ୍ମା ମିବାନୁ ମାନାତ୍‌, ଆର୍‍ତିଙ୍ଗ୍‍ଁ ଆୟା ଆତ୍ମାଦି ସାକାଦାନ୍‍ ମାପୁରୁ ମି ସାନି ମେନ୍ଦଲ୍‌ତିଙ୍ଗ୍‍ଁ ବା ଜିବନ୍‌ କିନାନ୍‍ ।
ROM 8:12 ଆର୍‌ତିଙ୍ଗ୍‌ ଏ ତଡ଼ାନ୍‍କୁ ନି ତାଙ୍ଗିଁକି, ମା ପାଣି ଆଜିନାତ୍‍, ନର୍‍ ଗୁଣ୍‍ତି ଇସାବ୍‍ତାନ୍‍ ଜିଦେଙ୍ଗ୍‌ କେଏଟ୍‍, ଇରିଙ୍ଗ୍‍ଁ ଆକା କିତିଙ୍ଗ୍‍ଁ ମିର୍‌ ସାନିଦେର୍‍;
ROM 8:13 ମାତର୍‌ ଜଦି ଆତ୍ମାଦି ସାକାଦାନ୍‍ ନିଜେଦି ମେନ୍ଧଲ୍‍ତି ପାପ୍‍ ପାଣିଦିଙ୍ଗ୍‍ଁ ନାସ୍ଟୁ କିଜି ମାରି ପାପ୍‍ ପାଣି କିମାଟ୍‌, ଆତିଙ୍ଗ୍‍ଁ ମିର୍‌ ଜିନିଦେର୍‍ ।
ROM 8:14 ଏମେକାର୍‌ ମାପୁରୁଦି ଆତ୍ମାଦାନ୍‌ ସାଲାଜିନାର୍‍, ୱାର୍‌ ମାପୁରୁଦି କଡ଼ର୍‍ ।
ROM 8:15 ଇରିଙ୍ଗ୍‌ ମାପୁରୁ ସିତି ଆୟା ଆତ୍ମା ମିଙ୍ଗିଁ ଦାସ୍‍ତିମାଣାନ୍‍ ମୁକ୍‍ଡ଼ା କିତାମାନାନ୍‌, ମିର୍‌ ମାରି ତିଲାନିକା ଇନିକା ସିଲେତ୍‍ । ମାତର୍‌ ଆତ୍ମା ମିଙ୍ଗିଁ ମାପୁରୁଦି କଡ଼ର୍‍ ଆନି ସାରି ସିତାମାନାତ୍‍ । ୱାନି ସାକ୍ତି ନେସ୍‍ସି ମାଡ୍‌ ଇଲେଇ ମାପୁରୁଙ୍ଗ୍‍ଁ “ବୁବା” ଇଜି କୁକ୍‍ସିନିକା ।
ROM 8:16 ମାପୁରୁଦି ଆତ୍ମା ମା ଲୋଇରି ଆତ୍ମାଦି ୱାଲେ ବଲୁ ମିସାକିଜି ମାଙ୍ଗିଁ ମାପୁରୁଦି କଡ଼ର୍‍ ଇଜି ୱେକ୍‍ସିନାତ୍‍ ।
ROM 8:17 ଏନ୍ଦାଇରିଙ୍ଗ୍‍ଁ ମାଡ୍‌ ମାପୁରୁଦି କଡ଼ର୍‍, ୱାନି ଲୋକା ଉଣ୍ତିଙ୍ଗ୍‍ଁ ଟିକ୍‍ ଆର୍ସିବାଦ୍‍ତୁ ମାଡ୍‌ ମିସାନିକା । ମାରି କ୍ରିସ୍ତଦି ଉଣ୍ତିଙ୍ଗ୍‍ଁ ମାପୁରୁ ଆମାକା ଉଣ୍ତା କିଜି ଇଟ୍‌ତାମାନାନ୍‌, ଆବେନ୍‌ ବା ମା ବାଗ୍‍ ମାନାତ୍‌ । ଜଦି ମାଡ୍‌ ଜିସୁଦି ଦୁକ୍‍ବଗ୍‍ତି ବାଗ୍‍ ଆତିମାନିକା, ଆର୍‍ତିଙ୍ଗ୍‍ଁ ୱାନି ଗୌରବ୍‌ଦୁ ବା ମିସାନିକା ।
ROM 8:18 ଆମା ଗୌରବ୍‌ମୟ୍‌ତି ୱାନିଦିନ୍‍ତୁ ମାଡ୍‌ ମିସାନିକା, ଆୟା ଇସାବ୍‍ତାନ୍‍ ଇଲେଇ ଦୁକ୍‍ବଗ୍‍ ଇନିକା ସିଲେ । ଆୟା ୱେଡ଼ାଦୁ ମାପୁରୁ ୱାନି କଡ଼ରିଙ୍ଗ୍‌ ତର୍‍ନାନ୍‍ ।
ROM 8:19 ୱିଜୁ ତିଆର୍‍ ଆତିମାନିକେଙ୍ଗ୍‍ଁ ୱେଡ଼ିକାଦାନ୍‍ ଆୟା ମାପୁରୁଦି ଦିନ୍‍ତିଙ୍ଗ୍‍ କାପ୍‌କିଜି ତେବାତେମାନେ,
ROM 8:20 ଇରିଙ୍ଗ୍‍ଁ ତିଆର୍‍ଆତିମାନି ମାପୁରୁଦି ମାଣାନ୍‌ ଆନାଦୁରିଆ ପୟ୍‍ଜି ତାନି ବଦାଦାନ୍‌ ୱେର୍‌ଏ ଆତାମାନାତ୍‌ । ମାତର୍‌ ତାନି ଆସା ମାନାତ୍‌,
ROM 8:21 ଅର୍‍ଲେନ୍‍ ମାପୁରୁଦି କଡ଼ରି ଗୌରବ୍‍ଦି ମିସାଜି ୱାଦ୍ ବା ତାନି ନାସ୍ଟୁ ଆନି ଅବସ୍ତାଦାନ୍‍ ମୁକ୍‍ଡ଼ାଦେଙ୍ଗ୍‍ଁ ଆଟ୍‍ନାନ୍‌ ।
ROM 8:22 ମାତର୍‌ ଇୟାସାନ୍ଦି ୱିଜୁ ତିଆର୍ ଜନମ୍‍ ସିନି କାସ୍ଟୁଦି ୱିସାମ୍‍ ୱାଜା ନେସ୍‍ତେଙ୍ଗ୍‌ ଆଟ୍‌ସିନିକା ।
ROM 8:23 ମାଡ୍‌ ମାପୁରୁଦି ପାର୍‍ତୁମ୍‍ ଦାନ୍‍ ୱାଜା ପବିତ୍ରଆତ୍ମାଦିଙ୍ଗ୍‍ଁ ପୟ୍‍ତିମାନିକା; ଆତିଙ୍ଗ୍‌ବା ମାପୁରୁଦି ଇଲୁଦିଲୋକ୍ ୱାଜା ଆଜି ପୁରାଦାନ୍‌ ମେନ୍ଦଲ୍‌ତି ମୁକ୍‍ଡ଼ାଦେଙ୍ଗ୍‍ଁ ଇଜି ମାଡ୍‌ ବା କାପ୍‌କିଜି ଜିବନ୍‍ତୁ ଆଡ଼ାବାଜିନାପ୍ ।
ROM 8:24 ଇରିଙ୍ଗ୍‌ ଆସା ଇଡ୍‌ନି ମାଣାନ୍‌ ନେ ମାଡ୍‌ ରକିୟା ପୟ୍‍ନିକା, ମାତର୍‌ ଆମାକା ତର୍‍ନାତ୍‍, ଆୟା ଉଣ୍ତିଙ୍ଗ୍‍ଁ ଆସା ଇଡ୍‍ନିକା ସତ୍‌ତାନ୍‌ ଆସା ସିଲେ । ଏନ୍‌ ଇନିକା ତର୍‍ନି ବିସୟ୍‍ ୱିଜୁ ଉଣ୍ତିଙ୍ଗ୍‍ଁ ଆସା କିନାନ୍‍ ?
ROM 8:25 ମାତର୍‌ ମାଡ୍‌ ଜଦି ତରାୟ୍‍ଆଇ ବିସୟ୍‍ ଉଣ୍ତିଙ୍ଗ୍‍ଁ ଆସା କିନିକା, ଆର୍‍ତିଙ୍ଗ୍‍ଁ ମାଙ୍ଗିଁ ସାସ୍‍ତାନ୍‍ କାପ୍‌କିଦେଙ୍ଗ୍‌ ପଡ଼ାନାତ୍‍ ।
ROM 8:26 ମାରି ମାଡ୍‌ ସାକିସିଲିକାର୍‍, ମାତର୍‌ ପବିତ୍ରଆତ୍ମା ମାଙ୍ଗିଁ ସାକା କିନାତ୍‍, ଏଣ୍ତେସ୍‌ ପାର୍‌ତନା କିଦେଙ୍ଗ୍ଁ ଆନାତ୍‌, ଆକା ମାଡ୍‌ ନେସ୍‍ଇକା । ଆଦେଙ୍ଗ୍‍ଁ ପବିତ୍ରଆତ୍ମା ୱେର୍‍ତେଙ୍ଗ୍‍ଆଟ୍‍ଇ ବାସାଦାନ୍‍ ମା ଉଣ୍ତିଙ୍ଗ୍‍ଁ ମାପୁରୁଙ୍ଗ୍‍ଁ ମାଡ଼ିସ୍‍ କିନାତ୍‍ ।
ROM 8:27 ମାପୁରୁ ଆକା ବୁଜାନାନ୍‍, ଇରିଙ୍ଗ୍‍ଁ ୱାନ୍‌ ମନ୍‍ ନେସ୍‍ନିକାନ୍‍ ମାରି ଆତ୍ମା ମାପୁରୁଦି ବଦାଦାନ୍ ୱାନି ଲୋକା ଉଣ୍ତିଙ୍ଗ୍‍ଁ ମାଡ଼ିସ୍‍ କିଜିମାନାତ୍‍ ।
ROM 8:28 ଏମେକାର୍‌ ମାପୁରୁଦି ବଦାଦିଙ୍ଗ୍‍ ପୁରା କିଦେଙ୍ଗ୍‍ଁ ଇଜି କୁକାତାମାନାର୍‍ ମାରି ମାପୁରୁଙ୍ଗ୍‍ଁ ଜିବନ୍‍ନୋନାର୍‍, ୱାରି ଉଣ୍ତିଙ୍ଗ୍‌ ୱିଜୁ ବିସୟ୍‍ ନେଗିକା ଆନାତ୍‌ ମାପୁ ଇକା ନେସ୍ତାମାନାପ୍ ।
ROM 8:29 ଏମେୱାରିଙ୍ଗ୍‍ଁ ମାପୁରୁ ବାସେକିତାମାନାନ୍‍, ୱାରିଙ୍ଗ୍‍ଁ ୱାନି ମାରିସିଦି ବମାୱାଜା ଆଦେଙ୍ଗ୍‍ଁ ଇଜି ଆଗ୍‍ଡ଼ିରାନ୍‍ ତିଆର୍‍ କିତାମାର୍ହାନ୍ । ଆତିଙ୍ଗ୍‍ଁ, ମାପୁରୁଦି ମାରିସି ୱାରି ତଡ଼ାକାମାନୁ ପାର୍‍ତୁମ୍‍ତିକାନ୍ ଆନାନ୍‍
ROM 8:30 ଏମେକାର୍‌ ଇୟାୱାଜା ବାସେ ଆଜି କୁକାୟ୍‍ ଆତାମାନାର୍‌, ୱାର୍‌ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ୱେଙ୍ଗିଁଜି ଗୌରବ୍‌ତିକାର୍‍ ଆତାମାନାର୍‌ ।
ROM 8:31 ଇୟାୱିଜୁ ମାଣ୍‌କୁ ମାରି ଇନିକା ୱେର୍‍ନିକା ? ମାପୁରୁ ଜଦି ମା ତରିନ୍‍, ଏନ୍‌ ମା ବିରୁଦ୍‍ ଆଦେଙ୍ଗ୍‍ଁ ଆଟ୍‍ନାନ୍‍ ?
ROM 8:32 ମାପୁରୁ ଏସାଙ୍ଗ୍‍ଁବା ମା ବିରୁଦ୍‍ ସିଲେ, ଇରିଙ୍ଗ୍‍ଁ ୱାନ୍‌ ନିଜେଦି ମାରିସିଙ୍ଗ୍‍ଁ ବା ରକିୟା କିଏନ୍‍ଣ୍ତା ମା ଉଣ୍ତିଙ୍ଗ୍‍ଁ ଦାନ୍‍ କିତାମାନାନ୍‌ । ଆର୍‍ତିଙ୍ଗ୍‍ଁ, ୱାନ୍‌ ଇନିକା ମାଙ୍ଗିଁ ୱିଜୁ ବିସୟ୍‍ଦାନ୍‍ କିଏନ୍‌ ନୋ ?
ROM 8:33 ମାପୁରୁଦି ବାସେ ଆତି ଲୋକା ବିରୁଦ୍‍ତାନ୍‍ ଏନ୍‌ ଦସ୍‍ ସିଦେଙ୍ଗ୍‍ ଆଟ୍‍ନାନ୍‍ ? ୱାରିଙ୍ଗ୍‍ଁ ଦସ୍‍ସିଲିକାର୍‍ ଇଜି ନିଜେ ମାପୁରୁ ୱେର୍‍ତାମାନାନ୍‍ ।
ROM 8:34 ଆର୍‍ତିଙ୍ଗ୍‍ଁ ଏନ୍‌ ୱାରିଙ୍ଗ୍‍ଁ ମାରି ଦସି କିଦେଙ୍ଗ୍‌ ଆଟ୍‍ନାନ୍‍ ? କ୍ରିସ୍ତ ଜିସୁ ଆକା ଏସାଙ୍ଗ୍‍ କିଏନ୍‌, ଇରିଙ୍ଗ୍‍ଁ ୱାନ୍‌ ସାତି ମାଣାନ୍‌ ନିଙ୍ଗିଁଜି ମାପୁରୁଦି ଉଣେରି ତରିନ୍‌ ବାସ୍‍ତାମାନାନ୍‍ ୱାନ୍ ମା ଉଣ୍ତିଙ୍ଗ୍‌ ପ୍ରାର୍ଥନା କିଜିନାନ୍ ।
ROM 8:35 ଆର୍‌ତିଙ୍ଗ୍‌ ଏନ୍‌ ମାଙ୍ଗିଁ କ୍ରିସ୍ତଦି ଜିବନ୍‍ନନି ମାଣାନ୍‌ ୱେର୍‌ଏ କିଦେଙ୍ଗ୍‍ଁ ଆଟ୍‍ନାନ୍‍ ? ଦୁକ୍‍, କାସ୍ଟୁ, ତାଡ଼ନା ମାରି କାକୁର୍ତି, ଏର୍‍କି, ବିପଦ୍‍ ମାରି ସାନିକା, ଏନ୍‌ ଆକା କିଦେଙ୍ଗ୍‌ ଆଟ୍‍ଏନ୍‍ ।
ROM 8:36 ଏଣ୍ତେସ୍‌ ସାସ୍ତ୍ରଦୁ ରାସାତାମାନାତ୍‌, “ମି ଉଣ୍ତିଙ୍ଗ୍‍ଁ ମାପ୍‌ ୱିଜୁଦିନ୍ ସାନିକା ୱାଜା, କାତାୟ୍‍ଆଦେଙ୍ଗ୍‍ଁ ସଲ୍‍ସିମାନି ମେଣ୍ତାୱାଜା ମାପ୍‌ ୱେଙ୍ଗିତାମାନାପ୍‍ ।”
ROM 8:37 ଏନ୍‌ ମାଙ୍ଗିଁ ଜିବନ୍‍ନୋନାନ୍‍, ୱାନି ସାକାଦାନ୍‍ ମାପ୍‌ ଇୟାୱିଜୁ ମୁସ୍‌କୁ ଜିଣାତାମାନାପ୍‍ ।
ROM 8:38 ନାନୁ ସତ୍‌ତାନ୍‌ ନେସ୍‍ତାମାନା ଜେ ୱାନି ଜିବନ୍‍ନୋନି ମାଣାନ୍‌ ଏସାଙ୍ଗ୍‍ ୱେର୍‌ଏ ଆଏଟ୍‍ । ସାନିକା ନୋ ଜିନିକା, ମୁସ୍‌କୁପୁର୍‌ତି ଦୁତ୍‍ ମାରି ମୁସ୍‌କୁପୁର୍‌ତି ଇନି ପେରିକାତ୍‍ ମାରି ସାକ୍ତି, ଇଲେଇ ମାରି ୱାନିଦିନ୍‍,
ROM 8:39 ମୁସ୍‍କୁରିକା କି ଆଡ୍‍ଗିରି ଇନି ବିସୟ୍‍ ୱିଜୁ ତିଆର୍‍ ଆତିମାନୁ ଇୟାୱାଜା ଇନି ବିସୟ୍‍ ସିଲେତ୍‍, ଆମାକା ପ୍ରବୁ ଜିସୁ କ୍ରିସ୍ତ ମାଣାନ୍‌ ତରାତି ମାପୁରୁଦି ଆୟା ଜିବନ୍‍ତାନ୍‌ ମାଙ୍ଗିଁ ୱେର୍‌ଏ କିଦେଙ୍ଗ୍‌ ଆଟ୍‍ଏନ୍‍ !
ROM 9:1 ନାନୁ ସତ୍‍ ଇଜିନା, କ୍ରିସ୍ତଦି ଆତାମାନାଆକା ନାନୁ ପବିତ୍ର ଆତ୍ମାଦିଙ୍ଗ୍‌ ମିସ୍‌ ୱେର୍‍ଏ ।
ROM 9:2 ନାନୁ ଜେ ଏସା କାସ୍ଟୁ ନି ନାଣ୍ତ ଦୁକ୍‍ତୁ ନା ଜିବନ୍‌ ଆଡ଼୍‍ବାଜିନାତ୍‍, ଇୟା ମାଟା ନାନୁ ସାଲାକି କିଜି ଇନ୍‍ଏ । ପବିତ୍ର ଆତ୍ମାଦାନ୍‌ ସାଲାଜି ନା ଜିବନ୍‌ ତେନି ସାକି ।
ROM 9:3 ନା ନିଜେଦି ଜିହୁଦି ଜାତିଦି ତଡ଼ାନ୍‍କା ଉଣ୍ତିଙ୍ଗ୍‍ଁ ନାନୁ ନିଜେ କ୍ରିସ୍ତଦି ମାଣାନ୍‌ ୱେର୍‍ଏ ଆଜି ମାପୁରୁଦି ମାଣାନ୍‌ ଆନାଦୁରିଆ ଆନି ଉଣ୍ତିଙ୍ଗ୍‌ ନାନୁ ବଦା କିଜିନା ।
ROM 9:4 ଇରିଙ୍ଗ୍‍ଁ ୱାରୁ ମାପୁରୁଦି ଲୋକୁ । ମାପୁରୁ ୱାରିଙ୍ଗ୍ ନିଜେଦି କଡ଼ରି ୱାଜା ଆସ୍‌ସି ୱାରି ଲାକ୍‍ତୁ ନିଜେଦି ମହିମା ତର୍‍ତାମାର୍ହାନ୍‍; ୱାରି ୱାଲେ ମାଟା ଇଡ୍‍ଜି ୱାରିଙ୍ଗ୍‍ଁ ନିୟମ୍‌ ସିତାମାର୍ହାନ୍‍, ୱାର୍‌ ସତ୍‌ତାନ୍‌ ଉପାସନା କିନାର୍‌; ୱାର୍‌ ମାପୁରୁଦିମାଣାନ୍‌ ମାଟେଙ୍ଗ୍‌ ପୟ୍‍ତାମାନାର୍‍,
ROM 9:5 ମା ୱେଙ୍ଗିଁତି ଜିହୁଦି ଡକ୍ରାଦାଦାରି ୱାର୍‌ କୁଟୁମ୍‌ତିକାର୍‍ ମାରି ଲୋକ୍‍ ୱାଜା କ୍ରିସ୍ତ ଆୟା କୁଟୁମ୍‌ତାନ୍‌ ଜନମ୍‍ । ଆୟା ୱିଜେରିଙ୍ଗ୍‍ଁ ସାସନ୍‍କିନି ମାପୁରୁ ଜୁଗ୍‌ ଜୁଗ୍‌ ଦନ୍ୟ ଆପିନ୍‌ । ଆମେନ୍‍ ।
ROM 9:6 ମାପୁରୁଦି ପାର୍‍ମାଣ୍‍ ଆରାତାମାନାତ୍‍ ଇଜି ନାନୁ ଇନ୍‍ଏ, ଇରିଙ୍ଗ୍‌ ଇସ୍ରାଏଲ୍‌ ଲୋକୁ ୱିଜେରେ ମାପୁରୁଦି ଲୋକୁ ଆଏର୍‍,
ROM 9:7 ମାରି ଅବ୍ରାହାମତି କୁଟୁମ୍‌ତିକାର୍‍ ୱିଜେରେ ମାପୁରୁଦି କଡ଼ର୍‍ ସିଲେ । ମାପୁରୁ ଅବ୍ରାହାମ୍‍ତିଙ୍ଗ୍‌ ଇର୍ହାମାର୍ହାନ୍‍, “ନି ଆମା କୁଟୁମ୍‌ତିରି ବିସୟ୍‍ତାନ୍‍ ମାପ୍‌ ପାର୍‍ମାଣ୍‍ କିତାମାର୍ହାପ୍‍, ୱାର୍‌ ଇସ୍‍ହାକ୍‍ମାଣାନ୍‍ ଜନମ୍‍ ଆନାର୍‍ ।”
ROM 9:8 ତେନି ଅର୍ତ ଆଜିନାତ୍‍, ଲୋକୁ ଆତିମାନିଙ୍ଗ୍‌ ମାପୁରୁଦି କଡ଼ର୍‍ ଆଦେଙ୍ଗ୍‌ ଆଟ୍‍ଏର୍‍ । ମାପୁରୁଦି ପାର୍‍ମାଣ୍‍ ଇସାବ୍‍ତାନ୍‍ ଜନମ୍‍ ଆତିମାନି କଡ଼ର୍‍ ମାପୁରୁଦି ଆଗ୍‍ଡ଼ି ସତ୍‌ତାନ୍‌ କଡ଼ ୱାଜା ୱେଙ୍ଗ୍‍ଁନାର୍‍ ।
ROM 9:9 ମାପୁରୁ ଇୟା ପାର୍‍ମାଣ୍‍ କିତାମାର୍ହାନ୍, “ଟିକ୍‍ ଇୟା କାଡ଼ାଦୁ ମାପ୍‌ ଡ଼େସି ୱାନାପ୍‍, ନାସ୍ତିୱାଲେ ସାରା କଡ଼ ପୟ୍‍ନା ମାନାତ୍‌ ।”
ROM 9:10 କେବଲ ଇୟାୱାଜା ସିଲେ । ରିବିକାଦି ରିଏର୍‌ କଡ଼ର୍‍ ଅରେନ୍‍ ବୁବା ଇସ୍‍ହାକ୍‍ତି ମାଣାନ୍‌ ଜନମ୍‍ ଆତାମାର୍ହାର୍‍,
ROM 9:11 ଏସ୍ତିୱାଲେ କଡ଼ର୍‍ ଜନମ୍‍ ଆଏର୍‍ ମାର୍ହାର୍‌, ମାରି ନେଗିକା ନି ସେଇକା ଇନିକା କିଏର୍‌ ମାର୍ହାର୍‌, ନାସ୍ତିୱାଲେ ପାଣି ଉଣ୍ତିଙ୍ଗ୍‍ଁ ସିଲେ, ମାତର୍‌ କୁକ୍‍ତିମାନି ୱାନି ବଦା ଉଣ୍ତିଙ୍ଗ୍‍ଁ ବାସେକିତି ଇସାବ୍‍ତାନ୍‍ ମାପୁରୁଦି ଉଦେସ୍‍ ଏଣ୍ତେସ୍‌ ତିର୍‍ ତେବାନାତ୍‍,
ROM 9:12 ଇୟାଉଣ୍ତିଙ୍ଗ୍‍ଁ ଇୟା ମାଟା ୱାନିଙ୍ଗ୍‍ଁ ଇନାୟ୍‍ ଆତାମାର୍ହାତ୍‍, “ପେରି ତଡ଼ାନ୍‌ ଇସ୍ରିୱାନିଙ୍ଗ୍‌ ସେବା କିନାନ୍‍ ।”
ROM 9:13 ଏଣ୍ତେସ୍‌ ରାସାତାମାନାତ୍‌, “ଜାକୁବଙ୍ଗ୍‍ଁ ମାପ୍‌ ଜିବନ୍‍ନୋତାପ୍‍, ମାତର୍‌ ଏସୌଙ୍ଗ୍‌ କାଡ଼ିତାପ୍‍ ।”
ROM 9:14 ଆର୍‌ତିଙ୍ଗ୍‌ ମାଡ୍‌ ଇନିକା ଇନାଟ୍‍ ? ମାପୁରୁମାନୁ ଇନି ଅନ୍ୟାୟ୍‌ ମାନାତ୍‌ ? ଆକା ଏସାଙ୍ଗ ବା ସିଲେ ।
ROM 9:15 ଇରିଙ୍ଗ୍‌ ୱାନ୍‌ ମୋସାଦିଙ୍ଗ୍‍ ଇର୍ହାମାର୍ହାନ୍‍, ଆମାୱାନି ମୁସ୍‌କୁ ମା ଦୟା ମାନାତ୍‌, ୱାନିଙ୍ଗ୍‍ଁ ମାପ୍‌ ଦୟା କିନାପ୍‍, ମାରି ଆମାୱାନି ମୁସ୍‌କୁ ମା ଦୟା ମାନାତ୍‌, ୱାନିଙ୍ଗ୍‍ଁ ମାପ୍‌ ଦୟା କିନାପ୍‍ ।
ROM 9:16 ଆଦେଙ୍ଗ୍‌ ଏନ୍‌ ବଦା କିନାନ୍‍ ମାରି ଏନ୍‌ ପାଣି କିନାନ୍‍, ୱାନି ମାଣାନ୍‌ ଇକା ଆଏତ୍‍, ମାତର୍‌ ମାପୁରୁଦି ଦୟାଦାନ୍‍ ଆନାତ୍‌ ।
ROM 9:17 ଦାର୍ମୁସାସ୍ତ୍ର ଇସାବ୍‍ତାନ୍‍ ମାପୁରୁ ମିସର୍‍ତି ରାଜେଙ୍ଗ୍‍ ଇର୍ହାମାର୍ହାନ୍‍, “ନି ମାଣାନ୍‌ ମା ସାକ୍ତି ତର୍‍ତେଙ୍ଗ୍‍ଁ ଇଜି ମାରି ୱିଜୁ ଦୁନିଆଦୁ ମା ମହିମା ତର୍‍ତେଙ୍ଗ୍‍ଁ ଇଜି ମାପ୍‌ ନିଙ୍ଗିଁ ରାଜା କିତାମାନାପ୍‍ ।”
ROM 9:18 ଆଦେଙ୍ଗ୍‌, ମାପୁରୁ ଆମାୱାନିଙ୍ଗ୍‍ଁ ବଦା କିନାନ୍‍, ୱାନିଙ୍ଗ୍‌ ଦୟା କିନାନ୍‍, ମାରି ଆମାୱାନିଙ୍ଗ୍‍ଁ ବଦା କିନାନ୍‍, ୱାନିଙ୍ଗ୍‍ଁ ଆଟ୍‍ୱା ଲୋକ୍‍ କିନାନ୍‍ ।
ROM 9:19 ମି ଲୋଇ ଏନ୍‌ ନାଙ୍ଗିଁ ଇନ୍‌ଡ୍ରେଙ୍ଗ୍‌ ଆଟ୍‍ନାନ୍‍ ? “ଆର୍‍ତିଙ୍ଗ୍‍ଁ ମାପୁରୁ ଏନ୍ଦା ଏଙ୍ଗ୍‍ଁ ଦସି କିନାନ୍‍ ? ଏନ୍‌ ଇନିକା ମାପୁରୁଦି ବଦା ବିରୁଦ୍‍ତାନ୍‍ ଇନିକା କିଦେଙ୍ଗ୍‍ ଆଟ୍‍ନାନ୍‍ ?”
ROM 9:20 ମାତର୍‌ ବନ୍ଧୁ, ମାପୁରୁଦି ମାଟାଦୁ ଡ଼େସି ୱାର୍‍ଗିଦେଙ୍ଗ୍‍ ନିନୁ ଏନ୍‌ ? “ନାଙ୍ଗିଁ ଇୟାୱାଜା ଏନ୍ଦା ରସ୍‍ତି” ଇଜି ସାଟି କୁମାର୍‍ତିଙ୍ଗ୍‍ଁ ୱେନ୍‍ବାଦେଙ୍ଗ୍‍ଁ ଆଟ୍‍ଏତ୍‍ ।
ROM 9:21 ସିକ୍‍ଲାଦିଙ୍ଗ୍‍ଁ ନିଜେ ବଦା ଇସାବ୍‍ତାନ୍‍ ବ୍ୟବହାର୍ କିଜି ସାଟି ରସ୍‍ତେଙ୍ଗ୍‍ଁ ଇଜି କୁମାର୍‍ତି ପୁରା ଅଦିକାର୍‌ ମାନାତ୍‌ । ଇକା ସିକ୍‍ଲା ଗୁଡ଼ିଦାନ୍‍ ୱାନ୍‌ ରୁଣ୍ତି ରକମ୍‍ତି ସାଟି ରସ୍‍ତେଙ୍ଗ୍‍ଁ ଆଟ୍‍ନାନ୍‍, ଉଣ୍ତ୍ରି ବିସେସ୍‍ ଦିନ୍‍କାଙ୍ଗ୍‍ଁ ନି ମାରି ଉଣ୍ତ୍ରି ଇସ୍ରି ପାଣିଦୁ ବ୍ୟବହାର୍ ଆଦେଙ୍ଗ୍‍ଁ ଇଜି ।
ROM 9:22 ମାପୁରୁ ବା ଟିକ୍‍ ଆୟାୱାଜା କିତାମାନାନ୍‌ । ୱାନ୍‌ ବଦାକିଜିମାର୍ହାନ୍‍ ୱାନି ରିସା ତର୍‍ତେଙ୍ଗ୍‍ ମାରି ବପୁ ତର୍‍ତେଙ୍ଗ୍‍ । ମାତର୍‌ ଏମେକାର୍‌ ୱାନି ରିସାଦି ଲୋକୁ ଆଜି ନାସ୍ଟୁ ଆନିକାମାର୍ହାତ୍‍, ୱାରି ଉଣ୍ତିଙ୍ଗ୍‍ଁ ମାପୁରୁ ନାଣ୍ତ ସାସ୍‍ଆସ୍‍ସି ଦୟା କିତାନ୍‍ ।
ROM 9:23 ମାରି ୱାନ୍‌ ୱାନି ନାଣ୍ତ ଗୌରବ୍‍ ତର୍‍ତେଙ୍ଗ୍‍ଁ ଇଜି ମାଙ୍ଗିଁ ବିସେସ୍‍ ଦୟାଦି ଲୋକ୍‍ ୱାଜା ଆଗ୍‍ଡ଼ିରାନ୍‍ ବାସେକିତା ମାର୍ହାନ୍‍ ।
ROM 9:24 ଆୟାଉଣ୍ତିଙ୍ଗ୍‌ ତୋ ୱାନ୍‌ କେବଲ ଜିହୁଦିଲୋକା ମାଣାନ୍‌ ସିଲେ, ମାତର୍‌ ଅଣଜିହୁଦି ମାଣାନ୍‌ ବା ମାଙ୍ଗିଁ କୁକ୍‌ତାମାନାନ୍‌ ।
ROM 9:25 ଇୟା ବିସୟ୍‌ତାନ୍‌ ହୋସେୟ ବଇଦୁ ମାପୁରୁ ଇର୍ହାମାନାନ୍‌ : “ଏମେକାର୍‌ ମା ଲୋକୁ ସିଲେତାର୍‍; ୱାରିଙ୍ଗ୍‍ଁ ନିଜେଦି ଲୋକୁ ୱାଜା କୁକ୍‍ନାପ୍‍ । ଏମେ ଜାତିଦିଙ୍ଗ୍‍ଁ ମାପ୍‌ ଜିବନ୍‍ନୋଏପ୍‌ ମାର୍ହାପ୍‍, ୱାରିଙ୍ଗ୍ ମା ଲାଡ୍‍ତିକାନ୍‍ ଇଜି କୁକ୍‍ନାପ୍‍ ।
ROM 9:26 ଏମେ ବାଡିଦୁ ୱାରିଙ୍ଗ୍‍ଁ ଇର୍ହାମାର୍ହାପ୍‍, ‘ମିର୍‌ ମା ଲୋକୁ ଆଇଦେର୍‍,’ ଆବେ ୱାର୍‌ ଜିବନ୍‌ମାନି ମାପୁରୁଦି କଡ଼ର୍‍ ଇଜି ଦର୍‍ପୟ୍‍ନାର୍‍ ।”
ROM 9:27 ମାରି ଇସ୍ରାଏଲ୍‌ ବିସୟ୍‍ତାନ୍‍ ଜିସାଇୟ ଇର୍ହାମାନାନ୍‌, “ଜଦିବା ଇସ୍ରାଏଲ୍‍ତିକାର୍‍ ସାମ୍‍ଦୁର୍‍ତି ବାଲି ୱାଜା ଆତିଙ୍ଗ୍‌ବା, ୱାରି ଲୋଇ ଉଣା ଏସ ମାତର୍‌ ରକିୟା ପୟ୍‍ନାର୍‍ ।
ROM 9:28 ଇରିଙ୍ଗ୍‍ଁ ପ୍ରବୁ ପୁରା ଦାପ୍ରେ ଦୁନିଆଦୁ ପୁରା ନ୍ୟାୟ୍‍ ବିଚାର୍‍ କିନାନ୍ ।”
ROM 9:29 ଏଣ୍ତେସ୍‌ ଜିସାଇୟ ମାରି ବା ଇର୍ହାମାର୍ହାନ୍‍, “ପେରିମାପୁରୁ ପ୍ରବୁ ମା ଏସ ଲୋକା କୁଡ଼ାଦିୱାରିଙ୍ଗ୍‍ ରକିୟା କିଏନ୍‌ ମାର୍ହାନ୍‍, ମା ଅବସ୍ତା ସଦମ୍‍ ଗମୋରାଦି ଲୋକାୱାଜା ଆତାତ୍‍ମାନ୍ଦି ।”
ROM 9:30 ଆଦେଙ୍ଗ୍‌ ଅଣଜିହୁଦି ଲୋକା ବିସୟ୍‍ତାନ୍‍ ଇକା ଇନ୍‍ଡ୍ରେଙ୍ଗ୍‍ଁ ଆଟ୍‍ନିକା, ୱାର୍‌ ଦାର୍ମୁତିକାର୍‍ ଆଦେଙ୍ଗ୍‍ଁ ସେସ୍ଟା କିଏଜିମାର୍ହାର୍‍, ମାତର୍‌ ୱାରି ବିସ୍‍ବାସ୍‍ ଉଣ୍ତିଙ୍ଗ୍‍ଁ ଦାର୍ମୁତିକାର୍‍ ଇଜି ୱେଙ୍ଗିଁତାମାନାର୍‍ ।
ROM 9:31 ମାତର୍‌ ଇସ୍ରାଏଲ୍‌ ଦାର୍ମୁଦି ଲୋକୁ ନିୟମ୍‍ତାନ୍‍ ଦାର୍ମୁତିକାର୍‍ ଆଦେଙ୍ଗ୍‍ଁ ଇଜି ସେସ୍ଟା କିଜି ଆରାତା ମାନାର୍‌ ।
ROM 9:32 ଏନ୍ଦା ସିଲେ ? ୱାର୍‌ ନିଜେଦି ସେସ୍ଟାଦି ମୁସ୍‌କୁ ଆସା କିଜିମାର୍ହାର୍‍, ବିସ୍‍ବାସ୍‍ ମୁସ୍‌କୁ ସିଲେ । ଆୟାଉଣ୍ତିଙ୍ଗ୍‌ ୱାର୍‌ ବାଦା ସିଜିମାନି କାଲୁଦୁ ଡୁକାୟ୍‌ଆଜି ତାକାତାର୍‍ ।
ROM 9:33 ଏଣ୍ତେସ୍‌ ସାସ୍ତ୍ରଦୁ ରାସାତାମାନାତ୍‌ : “ସୁଡ଼୍‍ଦୁ, ନାନୁ ସିୟୋନତୁ ଉନ୍‍ଣ୍ତ୍ରି କାଲୁ ମାରି ଉନ୍‌ଡ୍ରି ପେରିକାଲୁ ତିଆର୍‌ କିତାମାନାପ୍‌ । ଆବେନୁ ଡୁକାୟ୍‌ ଆଜି ଲୋକୁ ତାକାୟ୍‌ ଆନାର୍‌, ମାତର୍‌ ଏନ୍‌ ୱାନିମାନୁ ବିସ୍‍ବାସ୍‍ କିନାନ୍‍, ୱାନ୍‌ ନିରାସ୍‍ ଆଏନ୍‍ ।”
ROM 10:1 ନା ତଡ଼ାନ୍‍କୁ, ନି ତାଙ୍ଗିକ୍ ନିଜେ ଜାତିଦି ଲୋକୁ ରକିୟା ପାଏଆପିର୍, ଇକା ନା ଜିବନ୍‍ତି ବଦା ମାରି ମାପୁରୁମାନୁ ଇକା ନା ପାର୍‍ତନା ।
ROM 10:2 ମାପୁରୁ ଉଣ୍ତିଙ୍ଗ୍‌ ୱାରି ନାଣ୍ତ ତିଲାନିକା ମାନାତ୍‌, ମାତର୍‌ ଆୟା ମାନାନିକା ସତ୍‍ ସାକିୟ୍‌ ମୁସ୍‌କୁ ସିଲେତ୍‍ ।
ROM 10:3 ଲୋକାଙ୍ଗ୍‍ ଦାର୍ମୁତିକାର୍‍ ୱାଜା ମାନାଦେଙ୍ଗ୍‍ଁ ଇଜି ମାପୁରୁ କିତି ଉପାୟ୍ ମାନାଏଜି ୱାର୍‌ ଦାର୍ମୁତିକାର୍‍ ଆଦେଙ୍ଗ୍‍ଁ ନିଜେଦି ସାରିଦୁ ବୁଲାତାମାନାର୍‍ । ଆଦେଙ୍ଗ୍‍ଁ ୱାର୍‌ ମାପୁରୁଦି ଆୟା ସାରି ଡ଼ିସ୍‍ତା ସିତାମାନାର୍‍ ।
ROM 10:4 କ୍ରିସ୍ତନେ ନିୟମ୍‍ତି ସାରାସାରି, କେବଲ ୱାନିମାନୁ ବିସ୍‍ବାସ୍‍ କିନିମାଣାନ୍‍ ଲୋକ୍‍ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ଆନାର୍‍ ।
ROM 10:5 ଏମେକାର୍ ନିୟମ୍‍ ମାନାନି ମାଣାନ୍‌ ଦାର୍ମୁତିକାନ୍‍ ଆନି ବିସୟ୍‍ତାନ୍‍ ମୋସା ରାସ୍‌ତାମାନାନ୍‌ : “ଏମେକାର୍‌ ମାପୁରୁଦି ମାଟା ମାନାନାର୍‌, ୱାର୍‌ ଜିନାର୍‍ ।”
ROM 10:6 ମାତର୍‌ ବିସ୍‍ବାସ୍‍ତାନ୍ ଦାର୍ମୁଦିକାନ୍‍ ଇଜି ୱେଙ୍ଗିଁତି ବିସୟ୍‍ତାନ୍‍ ସାସ୍ତ୍ରଦୁ ରାସାତାମାନାତ୍‌, “ଏନ୍‌ ମୁସ୍‌କୁପୁର୍‌ତୁ ସନାନ୍‍ ? କ୍ରିସ୍ତଙ୍ଗ୍‌ ରେପ୍‌ସି ତାନି ଉଣ୍ତିଙ୍ଗ୍‌, ଇୟାୱାଜା ପ୍ରସ୍ନ କିନି ଦରକାର୍ ସିଲେତ୍‌
ROM 10:7 ମାରି ଏନ୍‌ ପାତାଲ୍‍ତୁ ସନାନ୍‍ ? କ୍ରିସ୍ତଦିଙ୍ଗ୍‌ ମାରିଡ଼େସି ଜିବନ୍‌କିଜି ତାନି ଉଣ୍ତିଙ୍ଗ୍‌, ଇୟା ମାଟା ବା ମିର୍‌ ୱେନ୍‍ବାନିକା ଦର୍‌କାର୍‌ ସିଲେ ।”
ROM 10:8 ଇରିଙ୍ଗ୍‌ ସାସ୍ତ୍ର ଇସାବ୍‍ତାନ୍‍, “ମାପୁରୁଦି କାବୁର୍‌ ମି ଲାକ୍‍ତୁ, ମି ୱେୟୁଦୁ ନି ଜିବନ୍‍ତୁ ମାନାତ୍‌ ।” ବିସ୍‍ବାସ୍‍ ବିସୟ୍‍ତାନ୍‍ ଇୟା କାବୁର୍‌ ନେ ମାପ୍‌ ପ୍ରଚାର୍‌ କିଜିନାପ୍‍ ।
ROM 10:9 ଜଦି ଜିସୁଙ୍ଗୁଁ ପ୍ରବୁ ଇଜି ୱେୟୁଦୁ ମାନାନିଦେର୍‍ ମାରି ମାପୁରୁ ୱାନିଙ୍ଗ୍‍ଁ ସାତିମାଣାନ୍‍ ନିକ୍‍ତାମାନାନ୍‍ ଇଜି ଜିବନ୍‍ତୁ ବିସ୍‍ବାସ୍‍ କିନିଦେର୍‍, ଆର୍‍ତିଙ୍ଗ୍‍ଁ, ମିର୍‌ ରକିୟା ପୟ୍‍ନିଦେର୍‍ ।
ROM 10:10 ମାତର ବିସ୍‍ବାସ୍‍ତାନ୍ ମାଡ୍‌ ମାପୁରୁଦି ଲାକ୍‍ତୁ ଦାର୍ମୁତିକାର୍‍ ଇଜି ୱେଙ୍ଗ୍‍ଁଦେଙ୍ଗ୍‍ଁ ଆଟ୍‍ନିକା ମାରି ୱେୟୁଦୁ ମାନାନି ମାଣାନ୍‌ ମାଡ୍‌ ରକିୟା ପୟ୍‍ଦେଙ୍ଗ୍‍ଁ ଆଟ୍‍ନିକା ।
ROM 10:11 ଦାର୍ମୁସାସ୍ତ୍ର ଇନାତ୍‍, “ଏମେକାର୍‌ ୱାନିମାନୁ ବିସ୍‍ବାସ୍‍ କିନାର୍‌, ୱାର୍‌ ନିରାସ୍‍ ଆଏର୍‍ ।”
ROM 10:12 ଇରିଙ୍ଗ୍‌ ଜିହୁଦିଲୋକୁ ନି ଅଣଜିହୁଦି ଲୋକା ଲୋଇ ଇନିକା ୱେର୍‌ଏ ସିଲେତ୍‍; ଆଦେଙ୍ଗ୍‍ଁ ୱିଜେରି ଅରେନ୍‍ ପ୍ରବୁ, ଏମେକାର୍‌ ୱାନି ସାକା ପାର୍‍ତନା କିନାର୍‌, ୱାରିଙ୍ଗ୍‍ଁ ୱାନ୍‌ ନାଣ୍ତ ଆର୍ସିବାଦ୍‌ କିନାନ୍‍ ।
ROM 10:13 “ଏନ୍‌ ପ୍ରବୁଦି ଦର୍‍ତାନ୍‍ ପାର୍‍ତନା କିନାନ୍‍, ୱାନ୍‌ ରକିୟା ପୟ୍‍ନାନ୍‍ ।”
ROM 10:14 ମାତର୍‌ ୱାନିମାନୁ ବିସ୍‍ବାସ୍‍ କିଏନ୍‍ଣ୍ତା ୱାର୍‌ ଏଣ୍ତେସ୍‌ ୱାନିଙ୍ଗ୍‍ଁ ପାର୍‍ତନା କିନାର୍‌ ? ମାରି ୱାନି ବିସୟ୍‍ତାନ୍‍ ସୁସମାଚାର୍‍ ୱେନ୍‍ଏଜି ୱାର୍‌ ଏଣ୍ତେସ୍‌ ବିସ୍‍ବାସ୍‍ କିନାର୍‌ ?
ROM 10:15 ମାରି ପ୍ରଚାର୍‍ କିଦେଙ୍ଗ୍‌ ଇଜି ପକାୟ୍‍ଆଏତିଙ୍ଗ୍‍ଁ ଅରେନ୍‍ ପ୍ରଚାର୍‍ ଏଣ୍ତେସ୍‌ କିନାନ୍‍ ? ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, “ନେଗି ସୁସମାଚାର୍‌ ପ୍ରଚାର୍‌କିନିୱାରି ୱାରି ଏସା ୱେଡ଼ିକା !”
ROM 10:16 ମାତର୍‍ ୱିଜେରେ ଆୟା ସୁସମାଚାର୍‍ ମାନାଏର୍‍ । ଆୟାଉଣ୍ତିଙ୍ଗ୍‌ ଜିସାଇୟ ରାସ୍‌ତାମାନାନ୍‌, “ଏ ପ୍ରବୁ, ଏନ୍‌ ମା ନେଗିକାବୁର୍‌ ମାଟା ବିସ୍‌ବାସ୍‌ କିତାମାନାନ୍‍ ?”
ROM 10:17 ସୁସମାଚାର୍‍ ୱେନି ମାଣାନ୍‌ ବିସ୍‍ବାସ୍‍ ଜନମ୍‍ ଆନାତ୍‌ ମାରି କ୍ରିସ୍ତଙ୍ଗ୍‍ଁ ପ୍ରଚାର୍‍ କିନିକା ନେ ଆୟା ସୁସମାଚାର୍‍ ।
ROM 10:18 ମାତର ନାନୁ ୱେନ୍‍ବାନା, ୱାର୍‌ ଇନିକା ଆୟା ମାଟା ୱେନ୍‌ଏର୍‌ ? ସତେନେ ୱେର୍‍ଆମାନାର୍‍, ଇରିଙ୍ଗ୍‍ଁ ସାସ୍ତ୍ରଦୁ ରାସାତାମାନାତ୍‌, “ୱାରି ବଲ୍‍ ଦୁନିଆ ୱିଜୁ ୱେଙ୍ଗିଁତା ସର୍ହାମାନାତ୍‍, ୱାରି ମାଟା ଦୁନିଆଦି ଇତି ସାନ୍ଦି ୱେନାୟ୍‍ ଆତାମାନାତ୍‍ ।”
ROM 10:19 ମାରିଡ଼େସି ନାନୁ ୱେନ୍‍ବାନା, ଇସ୍ରାଏଲ୍‌ ଲୋକୁ ଇନିକା ଆକା ବୁଜାଏତାର୍‍ ନୋ ? ୱାର୍ ବୁଜାତାର୍ ନାଣ୍ତ ଆଗ୍‍ଡ଼ିରାନ୍‍ ମୋସା ତେନି ଉତର ସିଜି ରାସ୍‌ତାମାନାନ୍‌ : “ମା ଲୋକାଙ୍ଗ୍‍ ରିସା କିବିସ୍‍ କିଦେଙ୍ଗ୍‍ଁ ଇଜି ଉନ୍‍ଣ୍ତ୍ରି ନେସ୍‌ଇ ଜାତିଦିଙ୍ଗ୍‍ ବ୍ୟବହାର୍ କିନାପ୍‍ । ଆୟାୱାଜା ଉନ୍‍ଣ୍ତ୍ରି ବୁଦିସିଲି ଜାତିଦାନ୍‍ ୱାରିଙ୍ଗ୍‍ଁ ରିସା କିବିସ୍‍ କିନାନ୍ ।”
ROM 10:20 ଜିସାଇୟ ମାରି ସାସ୍‍ତାନ୍‍ ଇର୍ହାମାନାନ୍‌, “ମାଙ୍ଗିଁ ପୟ୍‍ଏଜିମାନି ଲୋକୁ ମାଙ୍ଗିଁ ପୟ୍‍ତାର୍‍; ଏମେକାର୍‌ ମାଙ୍ଗିଁ ପୟ୍‍ଏଜିମାର୍ହାର୍‍, ୱାରି ଲାକ୍‍ତୁ ମାପ୍‌ ତର୍‍ଆୟ୍‍ଆତାପ୍‍ ।”
ROM 10:21 ମାତର୍‌ ମାପୁରୁ ଇସ୍ରାଏଲ୍‌ତି ଲୋକା ବିସୟ୍‍ତାନ୍‍ ୱାନ୍‌ ରାସ୍‌ତାମାନାନ୍‌, “ଉନ୍‍ଣ୍ତ୍ରି ମାନାଇ ଜାଟିକିନି ଜାତିଦିଙ୍ଗ୍‍ଁ ମାପ୍‌ ୱିଜୁଦିନ୍ କିୟୁ ସାର୍‍ପ୍‍ସି କୁକ୍‍ତାମାନାପ୍‍ ।”
ROM 11:1 ନାନୁ ମାରି ୱେନ୍‍ବାଦେଙ୍ଗ୍‍ ଆଟ୍‍ନା, ଆର୍‌ତିଙ୍ଗ୍‌ ଇନିକା ମାପୁରୁ ୱାନି ନିଜେଦି ଲୋକାଙ୍ଗ୍‍ଁ ଡ଼ିସ୍‍ତାମାନାନ୍‍ ? ଏସାଙ୍ଗ୍‍ଁ ସିଲେ ! ନାନୁ ନିଜେ ଅରେନ୍ ଇସ୍ରାଏଲ୍‌ ଲୋକ୍‍, ଅବ୍ରାହାମତି କୁଟୁମ୍‌ ମାରି ବିନ୍ୟାମିନ୍ ଇଲୁଦାନ୍‍ ଜନମ୍‍ ଆତାମାନା ।
ROM 11:2 ମାପୁରୁ ଆଗ୍‍ଡ଼ିରାନ୍‍ ବାସେକିତିମାନି ୱାନି ଲୋକାଙ୍ଗ୍‍ଁ ଏସାଙ୍ଗ୍‍ଁବା ଡ଼ିସ୍‍ଏନ୍ । ମିର୍‌ ଦାର୍ମୁସାସ୍ତ୍ର ପଡ଼ାତିମାନିଦେର୍‍ ଏଣ୍ତେସ୍‌ ଏଲିୟ ମାପୁରୁ ଲାକ୍‍ତୁ ଇସ୍ରାଏଲ୍‌ ଲୋକା ବିରୁଦ୍‍ତାନ୍‍ ଇର୍ହାମାର୍ହାନ୍‍ :
ROM 11:3 “ପ୍ରବୁ ୱାର୍‌ ୱାରି ବାବବାଦିରିଙ୍ଗ୍‍ଁ ଡାକ୍‍ତା ମାନାର୍‌ ମାରି ମି ପୁଜାବେଦିଙ୍ଗ୍‌ଁ ୱିଜୁ ରୁକ୍‍ସି ନାସ୍ଟୁ କିତାମାନାର୍‍ । କେବଲ ନାନୁ ଅରେନ୍‍ ମାତର୍‌ ରକିୟା ପୟ୍‍ତାମାନା; ନାଙ୍ଗିଁ ବା ଡାକ୍‍ସୋ ପକ୍‍ତେଙ୍ଗ୍‍ଁ ୱାର୍‌ ସେସ୍ଟା କିଜିନାର୍‍ ।”
ROM 11:4 ମାପୁରୁ ଇନିକା ଇର୍ହାମାର୍ହାନ୍‍ ଏଲିୟଙ୍ଗ ? “ମିଚ୍‍ ଦିୟାମ୍‍ ବାଲ୍‍ ବମାଦିଙ୍ଗ୍‍ଁ ପୁଜା କିଇ ମାନି ସାତ୍‍ ହାଜାର୍‌ ଲୋକାଙ୍ଗ୍‍ଁ ମା ଉଣ୍ତିଙ୍ଗ୍ଁ ଇଟ୍‍ତାମାନାପ୍‍ ।”
ROM 11:5 ଇଲେଇ ଟିକ୍‍ ଆୟାୱାଜା ଗଟାତାତ୍‌ । ମାପୁରୁ ଦୟା କିଜି ଏମେୱାରିଙ୍ଗ୍ଁ ବାସେକିତା ମାର୍ହାନ୍, ୱାରି ଲୋଇ ଏସଲୋକ୍‍ ବାକି ମାନାର୍‌ ।
ROM 11:6 ମାପୁରୁ ୱାରିଙ୍ଗ୍‍ଁ ବାସେକିତାମାନାନ୍‍ ନିଜେଦି ଦୟା ଉଣ୍ତିଙ୍ଗ୍‍ଁ । ଜଦି ୱାରି ସତ୍‍ପାଣି ଉଣ୍ତିଙ୍ଗ୍‍ଁ ମାପୁରୁ ୱାରିଙ୍ଗ୍‍ଁ ବାସେ କିତାନ୍‍ମାନ୍ଦି, ୱାନି ଦୟା ସତ୍‌ତାନ୍‌ ଦୟା ଆଏତାତ୍‍ମାନ୍ଦି ।
ROM 11:7 ଆର୍‍ତିଙ୍ଗ୍‍ଁ ଇନିକା ଆତାତ୍‍ ? ଇସ୍ରାଏଲ୍‌ ଲୋକୁ ଆମାକା ପୟ୍‍ଜିମାର୍ହାର୍‍, ଆକା ପୟ୍‍ଏତାର୍‍ । କେବଲ ମାପୁରୁ ବାସେକିତିମାନି ଉନ୍‍ଣ୍ତ୍ରି ନିସ୍ରି ଦଲ୍‌ ୱାନିଙ୍ଗ୍‍ଁ ପୟ୍‍ତାର୍‍ । ଆଇ ଏନ୍‌ ମାପୁରୁଦି କୁକ୍‍ତି ଉଣ୍ତିଙ୍ଗ୍‍ଁ ମନ୍ ସିଏତାର୍‍ ।
ROM 11:8 ଏଣ୍ତେସ୍‌ ସାସ୍ତ୍ର ଇନାନ୍‌, “ସତେ ଏଣ୍ତେସ୍‌ ମାପୁରୁ ୱାରି ମନ୍ ନି ଜିବନ୍‍ତିଙ୍ଗ୍‍ଁ ଆଟୁୱା କିତାମାନାନ୍‍ । ଇୟାସାନ୍ଦି ୱାର୍‌ ସୁଡ଼୍‍ଦେଙ୍ଗ୍‍ ଆଟ୍‍ନାର୍‍ ନ ୱେନ୍‍ଡ୍ରେଙ୍ଗ୍‍ଁ ଆଟ୍‍ସିନାର୍‍ ।”
ROM 11:9 ମାରି ଦାଉଦ ଇନାନ୍‌, “ୱାର୍‌ ବଜି କିନିୱାଲେ ଉରିଦୁ ସେର୍‌ଜି । ଆର୍‍ଜି ଦଣ୍ତ୍‍ ବଗାପିର୍‍ ।
ROM 11:10 ୱାର୍‌ କାଣୁକୁ କାଣା ଆଜି ଇନିକା ସୁଡ଼ୁଦେଙ୍ଗ୍‌ ଆଟ୍‍ମାପିର୍‍ । ୱିଜୁୱାଲେ ଦୁକ୍ କାସ୍ଟୁ ବଗାଜି ବଗାଜି ୱାରି ଜୁକି କୁବ୍‌ଡ଼ା ଆପିତ୍‌ ।”
ROM 11:11 ନାନୁ ୱେନ୍‍ବାନା, ଜିହୁଦିଲୋକୁ ତାକାନି ମାଣାନ୍‌ ଇନିକା ନାସ୍ଟୁ ଆତାର୍‌ ? ଏସାଙ୍ଗ୍ଁ ସିଲେ । ପାପ୍ କିତାର୍‍ଆକା, ୱାରିଙ୍ଗ୍‍ଁ ରିସା କିଦେଙ୍ଗ୍‍ଁ ଇଜି ଅଣଜିହୁଦି ଲୋକାଙ୍ଗ୍‍ଁ ରକିୟାଦି ଅଦିକାରି କିଆୟ୍‍ ଆତାତ୍‍ ।
ROM 11:12 ଜିହୁଦିଲୋକା ପାପ୍‍, ଦୁନିଆଦି ଆଇ ୱିଜେରି ଉଣ୍ତିଙ୍ଗ୍‍ଁ ନାଣ୍ତ ଆର୍ସିବାଦ୍‌ ତାତାମାନାତ୍‌ । ଜିହୁଦିଲୋକା ଆତ୍ମିକ ଜିବନ୍‍ତି କାକୁର୍ତି ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ଆର୍ସିବାଦ୍‍ତି ନାଣ୍ତ ଲାବ୍‍ କିତାମାନାର୍‍ । ଜଦି ୱିଜେରେ ଜିହୁଦି ଜାତି ରକିୟା ପୟ୍‍ଦେଙ୍ଗ୍‍ଁ ଆଟ୍‍ତାର୍‍ମାନ୍ଦି, ଆତିଙ୍ଗ୍‍ଁ ଆବେଣାନ୍‍ ମାରି ଏସା ନାଣ୍ତ ଆର୍ସିବାଦ୍‌ ପୁଟ୍‌ଏତ୍‌ ନୋ ?
ROM 11:13 ଅଣଜିହୁଦି ଲୋକାଙ୍ଗ୍‌ ନାନୁ ଇଜିନା, ମି ଉଣ୍ତିଙ୍ଗ୍‍ଁ ପେରିତ ସିସୁ ୱାଜା ସେବା ପାଣି କିଦେଙ୍ଗ୍‍ଁ ନାନୁ ଦନ୍ୟବାଦ ଅଡ଼୍‌ବିଜିନା ।
ROM 11:14 ଇୟାମାଣାନ୍‍ ଜଦି ନା ନିଜେଦି ଜାତିଦି ଲୋକାଙ୍ଗ୍‍ଁ ରିସା ଆଦେଙ୍ଗ୍‍ଁ ଆଟ୍‍ନା, ଆନାତ୍‌ ୱାରି ଲୋଇ ଏସ ଲୋକାଙ୍ଗ୍‌ ରକିୟା କିଦେଙ୍ଗ୍‍ଁ ଆଟ୍‍ନା ।
ROM 11:15 ଇରିଙ୍ଗ୍‍ଁ ୱାର୍‌ ଡ଼ିସାୟ୍‍ ଆନି ମାଣାନ୍‌ ମାପୁରୁଦି ୱାଲେ ସାରାଦୁନିଆ ଜାତିଦି ସଙ୍ଗ୍‌ ଆନିକା । ଆର୍‍ତିଙ୍ଗ୍‍ଁ, ଜଦି ମାପୁରୁ ୱିଜୁ ଜିହୁଦି ଜାତିଦିଙ୍ଗ୍‍ଁ ଆସ୍‍ନାନ୍‍, ତାନି ଦସ୍‍ ଇନିକା ଆନାତ୍‌ ? ଆକା ଆନାତ୍‌ ସାତି ଲୋକ୍‍ ମାରିଡ଼େସି ଜିବନ୍‌ ନିଙ୍ଗ୍‍ଁନି ୱାଜା ।
ROM 11:16 ରୁଟିଦାନ୍‍ କାଣ୍ତେକ୍‍ ମାପୁରୁଦି ଉଦେସ୍‍ତାନ୍‍ ସିତି ମାରିଙ୍ଗ୍‍, ୱିଜୁ ରୁଟି ବା ସିତିକା ଇଜି ଆସାୟ୍‍ଆନାତ୍‍ । ଉନ୍‍ଣ୍ତ୍ରି ମାରାତି ମଦଲ୍‍ ସିତିମାରିଙ୍ଗ୍‍ଁ, ତାନି କମେଙ୍ଗ୍‍ ବା ସିତାମାନାର୍‍ ଇଜି ଅଡ଼୍‍ବିଦେଙ୍ଗ୍‍ଁ ଆନାତ୍‌ ।
ROM 11:17 ଡଡିଦୁ ଜାତୁନ୍‍ ଅଆୟ୍‍ଆଜିମାନି ଉନ୍‍ଣ୍ତ୍ରି ଜିତ୍‍ ମାରାତି ଏସ କମେଙ୍ଗ୍‍ ୱେର୍‌ଏ କିଜି, ବନ୍‍ତି ଜିତ୍‍ ମାରାନ୍‌ତି କମା ଆୟା ବାଡିଦୁ ଜଡ଼ିସ୍‍ କିଆୟ୍‍ଆତାମାନାତ୍‍ । ଅଣଜିହୁଦି ଲୋକୁ ଆୟା ବନ୍‍ ଜିତ୍‍ ମାରାନ୍‌ ୱାଜା । ମିର୍‌ ଇଲେଇ ଜିହୁଦିରି ବପୁ ଆତ୍ମିକ ଜିବନ୍‍ତି ବାଗ୍‍ତୁ ମିସାତିମାନିଦେର୍‍ ।
ROM 11:18 ଆଦେଙ୍ଗ୍‍ଁ ମିର୍‌ ୱେର୍‌ଏ କିଆୟ୍‍ଆତିମାନି କମେଙ୍ଗାଁ ନିସ୍ରିବୁଦି ଅଡ଼୍‍ବିମାଟ୍‍ । ମିର୍‌ ଏନ୍ଦା ଗାର୍ବୁ କିନିଦେର୍‍ ? ମିର୍‌ କେବଲ କମା ମାରାନ୍‌ ମଦଲ୍‍ତିଙ୍ଗ୍‍ଁ ମିର୍‌ ଜାତୁନ୍‍ କିଇଦେର୍‍, ମାତର୍‌ ମଦଲ୍‍ ମିଙ୍ଗିଁ ସାକା କିଜିନାତ୍‍ ।
ROM 11:19 ଇୟାଉଣ୍ତିଙ୍ଗ୍‌ ମିର୍‌ ଇନ୍‍ଡ୍ରେଙ୍ଗ୍‍ଁ ଆଟ୍‍ନିଦେର୍‍, “ହୁଁ, ମାତର୍‌ ନାଙ୍ଗିଁ ବାଡି ସିଦେଙ୍ଗ୍‌ ଇଜି ଆୟା କମେଙ୍ଗ୍‍ ୱିଜୁ ସିନା କିଆୟ୍‍ ଆତେମାରେଏ ।”
ROM 11:20 ଆକା ସତ୍‍ । ୱାର୍‌ ବିସ୍‍ବାସ୍‍ କିଏତାର୍‍ଆକା ୱେର୍‌ଏ ଆତାର୍‌ । ମିର୍‌ କେବଲ ବିସ୍‍ବାସ୍‍ତାନ୍ ଆୟା ବାଡି ଅଦିକାର୍‍ କିତିମାନିଦେର୍‌ । ମାତର୍‌ ଗାର୍ବୁ କିଏନ୍‍ଣ୍ତା ତିଲାଦୁ ।
ROM 11:21 ଜଦି ମାରାନ୍‌ତାନ୍‌ ମିସାଜିସତି କମେଙ୍ଗ୍‍ ୱାଜା ଜିହୁଦି ଲୋକାଙ୍ଗ୍‌ ମାପୁରୁ ଦଣ୍ତ୍‍ ସିଏଜି ଡ଼ିସ୍‍ସି ସିଏତାନ୍‍, ମିଙ୍ଗିଁ ଇନିକା ୱାନ୍‌ ଡ଼ିସ୍‍ନା ସିନାନ୍‍ ?
ROM 11:22 ଇବେ ସୁଣି ମାଟା, ମାପୁରୁ ଏଣ୍ତେସ୍‌ ଦୟାକିନିକାନ୍‍ ନି ଆଟ୍‍ୱା ବା । ଏମେୱାରି ପଦ୍‌ ଆର୍‍ତାମାନାତ୍‍, ୱାରି ଉଣ୍ତିଙ୍ଗ୍‍ଁ ୱାନ୍‌ ଆଟ୍‍ୱା; ମାତର୍‌ ମି ଉଣ୍ତିଙ୍ଗ୍‍ଁ ୱାନ୍‌ ଦୟାକିନିକାନ୍‍ ଆମା ଦିନ୍‌ ସାନ୍ଦି ମିର୍‌ ୱାନି ଦୟାଦି ଲୋକ୍‍ ଆଜି ତେବାନିଦେର୍‍ । ୱାନି ଦୟା ଆରାକିତିଙ୍ଗ୍‍ଁ, ମିର୍‌ ବା ୱେର୍‌ଏ ଆନିଦେର୍‌ ।
ROM 11:23 ଜଦି ଜିହୁଦିଲୋକୁ ତାମେ ବିସ୍‍ବାସ୍‍ ଆକ କିଏର୍‌, ଆର୍‍ତିଙ୍ଗ୍‍ଁ ୱାର୍‌ ନିଜେଦି ବାଡିଦୁ ମାରିଡ଼େସି ତିଆର୍‌ ଆନାର୍‍ । ଇକା କିଦେଙ୍ଗ୍‍ଁ ମାପୁରୁ ଇଚ୍ଛା କିନାନ୍‌ ।
ROM 11:24 ଅଣଜିହୁଦି ଲୋକୁ ବନ୍‍ ଜିତ୍‍ ମାରାତି କମା ୱାଜା । ଆକା ସିନା ଆଜି ନେଗେନ୍‌ତର୍‌ଇ ଇସାବ୍‍ତାନ୍‍ ଡଡିଦି ଜାତୁନ୍‍ଅତିମାନି ଜିତ ମାରାତି ୱାଲେ ଜଡ଼ିସ୍‍ କିଆୟ୍‍ଆତାମାନାତ୍‍ । ଜିହୁଦି ଜାତି ଡଡିଦି ଜାତୁନ୍‍ଅତିମାନି ଜିତ ମାରାନ୍‌ ୱାଜା । ଇୟା ମାରାତି ୱେର୍‍ଏଆତି କମେଆଙ୍ଗାଁ ମାରିଡ଼େସି ମାରାତି ୱାଲେ ଜଡ଼ିସ୍‍କିନିକା ମାପୁରୁଦି ତରିନ୍‍ ଉସାସ୍‍ ।
ROM 11:25 ତଡ଼ାନ୍‍କୁ ନି ତାଙ୍ଗିଁକି, ଇୟା ବିସୟ୍‌ତାନ୍‌ ଉନ୍‍ଣ୍ତ୍ରି ମାର୍‍ଗିତି ସତ୍‌ ୱେକ୍‍ନାତ୍‍ । ଆକା ୱେରିଙ୍ଗ୍‍ଁ, ମିର୍‌ ନିଜେଦିଙ୍ଗ୍‍ଁ ମାରି ବୁଦିମାନିକାନ୍‍ ଇଜି ଅଡ଼୍‍ବିଦେଙ୍ଗ୍‍ଁ ଆଟ୍‍ଇଦେର୍‍ । ଇସ୍ରାଏଲ୍‌ ଲୋକା ଅମାନ୍ୟ ୱିଜୁଦିନ୍‍ ତେବାଏତ୍‍ । ଅଣଜିହୁଦିର୍‍ ୱିଜେରେ ମାପୁରୁଦି ଲାକ୍‍ତୁ ୱାନି ସାନ୍ଦି ୱାର୍‌ ଆୟାୱାଜା ତେବାନାର୍‍ ।
ROM 11:26 ତାନିୱେନ୍‍କା ଇସ୍ରାଏଲ୍‌ ଲୋକୁ ୱିଜେରେ ଶାସ୍ତ୍ର ଇସାବ୍‍ତାନ୍‍ ରକିୟା ପୟ୍‍ନାର୍‍, ଏଣ୍ତେସ୍‌ ସାସ୍ତ୍ର ଇନାତ୍‍ : “ରକିୟାକିନିକାନ୍‍ ସିୟୋନତାନ୍‍ ୱାନାନ୍, ଜାକୁବ କୁଡ଼ାଦାନ୍‍ ୱିଜୁ ଅଦାର୍ମୁ ଆକ କିନାନ୍‍ ।
ROM 11:27 ୱାରି ଅଦାର୍ମୁ ଆକ କିନିୱାଲେ ୱାରି ୱାଲେ ଇୟା ନିୟମ୍‌ କିନାପ୍‍ ।”
ROM 11:28 ମି ନେଗି ଉଣ୍ତିଙ୍ଗ୍‍ଁ ସୁସମାଚାର୍‍ତିଙ୍ଗ୍‍ଁ ଡ଼ିସ୍‍ତିଙ୍ଗ୍‌ ମାପୁରୁଦି ସାତ୍ରୁ ଆତାମାନାର୍‌ । ମାତର୍‌ ମାପୁରୁଦି ଲାଡ୍‍ତାନ୍‍ ବାସେଆନି ମାଣାନ୍‌ ମାରି ୱାରି ଡକ୍ରାଦାଦାରି ଉଣ୍ତିଙ୍ଗ୍‍ଁ ୱାର୍‌ ମାପୁରୁଦି ତଡ଼୍‍ ଆତାମାନାର୍‌ ।
ROM 11:29 ମାପୁରୁ ଏମେୱାରିଙ୍ଗ୍‍ଁ ବାସେ କିଜି ଆର୍ସିବାଦ୍‌ କିନାନ୍‍, ୱାନି ଦାନ୍‍ ସିଦେଙ୍ଗ୍‌ ବଦା ୱାନ୍‌ ଡାଟ୍‍ ତେବାନାନ୍‍ ।
ROM 11:30 ଅଣଜିହୁଦି ଲୋକୁ ପୁର୍ବେ ମାପୁରୁଦି ମାନାଇକାର୍‍ ମାର୍ହାର୍‌; ମାତର୍‌ ଇଲେଇ ଜିହୁଦିଲୋକା ମାନାଇ ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ମାପୁରୁଦି ଦୟା ପୟ୍‍ତାମାନାର୍‍ ।
ROM 11:31 ଏଣ୍ତେସ୍‌ ଅଣଜିହୁଦି ଲୋକୁ ବା ଦୟା ପୟ୍‍ତାମାନାର୍‍, ଜିହୁଦିଲୋକୁ ଇଲେଇ ମାପୁରୁଦି ମାଣାନ୍‌ ଆକ ସର୍ହିମାରିଙ୍ଗ୍‍ଁ ବା, ଅର୍‍ଲେନ୍‍ ୱାର୍‌ ଡ଼େସି ୱାଜି ଉଦ୍ଧାର୍‌ ପୟ୍‍ନାର୍‍ ।
ROM 11:32 ମାପୁରୁ ୱିଜେରିଙ୍ଗ୍‍ଁ ଅମାନ୍ୟ ଆନି ଉଣ୍ତିଙ୍ଗ୍‍ଁ ଡ଼ିସ୍‍ତା ସିତାମାନାନ୍‌; ଆବେଣାନ୍‍ ୱିଜେରେ ମାପୁରୁଦି ଦୟାଦି ଲୋକୁ ଆଦେଙ୍ଗ୍‍ଁ ଆଟ୍‍ନାର୍‍ ।
ROM 11:33 ମାପୁରୁ । ୱାନି ବୁଦି ନି ଜ୍ଞାନ୍‌ ଏସା ପେରିକା । ୱାନି ବଦାଦି ଟିକ୍‍ ଏନ୍‌ ବୁଜାକିନାନ୍‍ ? ଏନ୍‌ ୱାନି ସାରିଙ୍ଗ୍‌ଁ ନେସ୍‍ତେଙ୍ଗ୍‍ଁ ଆଟ୍‍ନାନ୍‍ ?
ROM 11:34 ସାସ୍ତ୍ର ଇନାତ୍‍ : “ଏନ୍‌ ମାପୁରୁଦି ମନ୍‍ତିମାଟା ବୁଜାଦେଙ୍ଗ୍‍ଁ ଆଟ୍‍ନାନ୍‍ ? ଏନ୍‌ ମାରି ୱାନିଙ୍ଗ୍‍ଁ ସିକିୟା ସିଦେଙ୍ଗ୍‌ ଆଟ୍‍ନାନ୍‍ ?
ROM 11:35 ଏନ୍‌ ଇନିକା ମାପୁରୁଙ୍ଗ୍‍ଁ ଇୟାୱାଜା ଇନିକା ସିଦେଙ୍ଗ୍‌ ଆଟ୍‍ତାମାନାନ୍‍, ଆମାତାନିଙ୍ଗ୍‌ ମାପୁରୁଙ୍ଗ୍‍ଁ ଡ଼େସି ସିଦେଙ୍ଗ୍‌ ପଡ଼ାଜିନାତ୍‍ ?”
ROM 11:36 ୱିଜୁ ବିସୟ୍‍ ମାପୁରୁଦି ମାଣାନ୍‌ ତିଆର୍‌ ଆତାମାନାତ୍‌; ୱିଜୁ ବିସୟ୍‍ ମାନିକା ୱାନି ଉଣ୍ତିଙ୍ଗ୍‍ଁ ମାରି ୱାନିମାଡ଼ାନ୍‌ ଆତାମାନାତ୍‌ । ଜୁଗ୍‌ ଜୁଗ୍‍ ମାପୁରୁ ଗୌରବ୍‍ ପଇନି । ଆମେନ୍‍ ।
ROM 12:1 ଆଦେଙ୍ଗ୍‍ଁ ତଡ଼ାନ୍‍କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‍ଁ ମାପୁରୁଦି ନାଣ୍ତ ଦୟା ଉଣ୍ତିଙ୍ଗ୍‍ଁ ମିଙ୍ଗିଁ ନାନୁ ବାତିଙ୍ଗ୍‌ ମାଲ୍‍ଜିନା, ମାପୁରୁମାନୁ ନିଜେଦି ମେନ୍ଦଲ୍‌ତିଙ୍ଗ୍‍ଁ ପବିତ୍ର ପୁଜା ୱାଜା ସର୍‌ପେ କିଦୁ । ୱାନି ସେବାଦୁ ନିଜେଦିଙ୍ଗ୍‍ଁ ସିଜି ୱାନିମାନୁ ସର୍‌ପେ ଆଦୁ । ଇକା ମାପୁରୁଦି ସତ୍‍ ଉପାସନା କିନିକା ।
ROM 12:2 ମିର୍‌ ଇୟା ଇଲେଇତି ଦୁନିଆଦି ଇସାବ୍‍ତାନ୍‍ ବୁଲାମାଟ୍‍ । ମାପୁରୁ ମି ମନ୍‍ତିଙ୍ଗ୍‍ ପୁରା ପୁନିକା କିପିନ୍‍ ମାରି ମି ମନ୍ ପୁରା ବାଦ୍‍ଲେ ଆପିତ୍‌ । ଆତିଙ୍ଗ୍‌, ମାପୁରୁଦି ବଦା ଇନିକା, ୱାନି ଲାକ୍‍ତୁ ଏମେ ୱିଜୁ ବିସୟ୍‍ ସତ୍‍, ୱେଡ଼ିକାଦିକା ମାରି ପୁରା ନେଗିକା, ଇକା ମିର୍‌ ନେସ୍‍ତେଙ୍ଗ୍‍ଁ ଆଟ୍‍ନିଦେର୍‍ ।
ROM 12:3 ମାପୁରୁ ନାଙ୍ଗିଁ ନାଣ୍ତ ଦୟା ସିତାମାନାନ୍‍ଆକା ମି ୱିଜେରିଙ୍ଗ୍‍ଁ ନାନୁ ଇଜିନା, ଏନ୍‌ ନିଜେଦି ଜଗ୍ୟଦି ମାଣାନ୍‌ ନିଜେଦିଙ୍ଗ୍‍ଁ ପେରିକାନ୍‌ ଇଜି ଅଡ଼୍‍ବିମାଟ୍‍ । ମାପୁରୁ ମିଙ୍ଗିଁ ସିତିମାନି ବିସ୍‍ବାସ୍‍ତି ଇସାବ୍‍ତାନ୍ ସାନ୍ତି ଆଜି ନିଜେ ବିସୟ୍‍ତାନ୍‍ ବିସାର୍‍ କିଦୁ ।
ROM 12:4 ମା ମେନ୍ଦଲ୍‌ତୁ ଗାଦି ଆଇ ଆଇ ଜିନିସ୍‌କୁ ମାନେ ମାରି ୱିଜେକା ପାଣି ଅଲଗା ।
ROM 12:5 ଆୟାୱାଜା ମାଡ୍‌ ଗାଦିଲୋକ୍‍, ମାତର୍‌ ୱିଜେରେ କ୍ରିସ୍ତଦି ୱାଲେ ମିସାତି ମାନିକାଆକା, ମାଡ୍‌ ଉନ୍‍ଡ୍ରେ ମେନ୍ଧଲ୍‍ ମାରି ମେନ୍ଦଲ୍‍ତି ଜିନିସ୍‍କା ୱାଜା ମାଡୁ ଅର୍‌ସେ ୱାଲେ ମିସାତି ମାନିକା ।
ROM 12:6 ଆଦେଙ୍ଗ୍‌ ମା ଉଣ୍ତିଙ୍ଗ୍‍ଁ ମାପୁରୁଦି ଦୟା ଇସାବ୍‍ତାନ୍‍ ୱାନିମାଣାନ୍‍ ପୟ୍‍ତି ରକମ୍‍ତି ଆଇ ଆଇ ଦାନ୍‍ ସାକ୍ତିୱିଜୁ ମାଡ୍‌ ଟିକ୍‍ ଇସାବ୍‍ତାନ୍‍ କାଟେକିଦେଙ୍ଗ୍‍ଁ ଆଟ୍‍ନିକା । ମାଡ୍‌ ଜଦି ମାପୁରୁଦି କାବୁର୍‌ ପ୍ରଚାର୍‍ କିନି ଉଣ୍ତିଙ୍ଗ୍‍ଁ ଇଜି ମାପୁରୁସିତି ସାକ୍ତି ପୟ୍‍ତିମାନିକା, ମା ବିସ୍‍ବାସ୍‍ତି ଡାଟ୍‍ ଇସାବ୍‍ତାନ୍‍ ଆୟା ପାଣି କିଦେଙ୍ଗ୍‍ଁ ଆନାତ୍‌ ।
ROM 12:7 ଜଦି ସେବା କିନି ଉଣ୍ତିଙ୍ଗ୍‍ଁ ଆୟା ସାକ୍ତି ପୟ୍‍ତିମାନିକା, ମାଡ୍‌ ସେବା କିଦେଙ୍ଗ୍ଁ ଆନାତ୍‌; ସିକିୟା ସିଦେଙ୍ଗ୍‌ ଇଜି ସାକ୍ତି ପୟ୍‍ତିମାରିଙ୍ଗ୍‍ଁ, ସିକିୟା ସିଦେଙ୍ଗ୍‌ ଆନାତ୍‌ ।
ROM 12:8 ଆଇୱାରିଙ୍ଗ୍‌ ୱେଡ଼ିକା କିଦେଙ୍ଗ୍‍ଁ ଇଜି ସାକ୍ତି ପୟ୍‍ତିମାରିଙ୍ଗ୍‍ଁ, ଆକା କିଦେଙ୍ଗ୍‍ଁ ଆନାତ୍‌ । ଦାନ୍‍ କିଦେଙ୍ଗ୍‍ଁ ସାକ୍ତି ପୟ୍‍ତିମାନି ଲୋକ୍‍ ରେଆତି ମନ୍‍ତାନ୍‍ ଦାନ୍‍ କିପିନ୍‍ । ଆଇୱାରି ପାଣିଦି ଜାତୁନ୍‍ କିଦେଙ୍ଗ୍‍ଁ ଅଦିକାର୍‍ ପୟ୍‍ତିମାରିଙ୍ଗ୍‍ଁ ନିଜେ କାସ୍ଟୁପାଣି କିଦେଙ୍ଗ୍ ଆନାତ୍‌ । ଦୟା କିନି ଲୋକ୍‍ ୱେଡ଼ିକା ମନ୍‍ତାନ୍‍ ଦୟା କିପିନ୍‍ ।
ROM 12:9 ଜିବନ୍ତି ୱାଲେ ଜିବନ୍‍ନୋନିକା ନେଗିକା ଆପିତ୍‌ । ଆମା ୱିଜୁ ସତ୍‍ସିଲେ; ତାନିଙ୍ଗ୍‍ଁ କାଡ଼୍‍ଦୁ, ୱିଜୁ ସତ୍‌ ବିସୟ୍‍ତୁ ଲାକ୍‍ତୁ ଆଦୁ ।
ROM 12:10 କ୍ରିସ୍ଟିୟାନ୍‍ ତଡ଼ାନ୍‍ ନି ତାଙ୍ଗିଁକ୍‌ ୱାଜା ନିଜେନିଜେଦିଙ୍ଗ୍‍ ଜିବନ୍‍ନଦୁ ମାରି ନିଜେନିଜେଦିଙ୍ଗ୍‌ ସନ୍‌ମାନ୍‌ ତର୍‍ତେଙ୍ଗ୍‍ଁ ଇଜି ୱେଡ଼ିକା ଆଦୁ ।
ROM 12:11 ୱେଡ଼ିକାଦାନ୍‌ ଗାଡ଼ିୟା ଆମାଟ୍‌, ଆତ୍ମାଦୁ ତେବାନିକା ଅଡ଼୍‍ବିଦୁ । ବକ୍ତିଦି ଜିବନ୍‍ତାନ୍‍ ପ୍ରବୁଦି ସେବା କିଦୁ ।
ROM 12:12 ଡାଟ୍‍ ଆସା ଇଡ୍‌ଜି ୱେଡ଼ିକା କିଦୁ । ଦୁକ୍‍କାସ୍ଟୁଦି ବେଡ଼ାଦୁ ସାସ୍‌ ଆସ୍‌ତୁ । ୱିଜୁଦିନ୍ ପାର୍‍ତନାଦୁ ପୁରା ତେବାଦୁ ।
ROM 12:13 କ୍ରିସ୍ତବିସ୍‍ବାସିରି ଦର୍‍କାର୍‍ ମାନିକା ସିଦୁ । ମାରି ୱାନି ଲୋକାଙ୍ଗ୍‍ଁ ସନ୍‌ମାନ୍‌ତାନ୍‌ କୁକ୍‍ତୁ ।
ROM 12:14 ମିଙ୍ଗିଁ ଏମେକାର୍‌ ତାଡ଼ନା କିନାର୍‌, ୱାରି ନେଗି ଉଣ୍ତିଙ୍ଗ୍‌ ଇଜି ମାପୁରୁମାନୁ ପାର୍‍ତନା କିଦୁ । ୱାରିଙ୍ଗ୍‍ଁ ଆର୍ସିବାଦ୍‌ କିଦୁ, ଆନାଦୁରିଆ ସିମାଟ୍‍ ।
ROM 12:15 ସୁକ୍‍ତାନ୍‍ ମାନି ଲୋକା ୱାଲେ ୱେଡ଼ିକା କିଦୁ, ଆଡ଼୍‍ବାନି ଲୋକା ୱାଲେ ଆଡ଼୍‍ବାଦୁ ।
ROM 12:16 ୱିଜେରି ଉଣ୍ତିଙ୍ଗ୍‍ଁ ସାମାନ୍‍ ଇସାବ୍‍ତାନ୍‍ ସୁଡ଼୍‍ଦୁ । ଆକାର୍‍ ଅଡ଼୍‍ବିନିକା ଡ଼ିସ୍‍ସି ସାନ୍ତି ଇସାବ୍‍ତାନ୍‍ ତାଗ୍‌ଇ ପାଣିୱିଜୁଦିଙ୍ଗ୍‍ଁ ବା ଆସ୍‌ତୁ । ନିଜେଦିଙ୍ଗ୍‍ଁ ବୁଦିମାନିକାନ୍‍ ଅଡ଼୍‍ବିମାଟ୍‍ ।
ROM 12:17 ଏନ୍‌ ମି ଉଣ୍ତିଙ୍ଗ୍‍ଁ ଅନ୍ୟାୟ୍‍ କିତିଙ୍ଗ୍‍ଁ, ମିର୍‌ ୱାନି ଉଣ୍ତିଙ୍ଗ୍‍ଁ ଅନ୍ୟାୟ୍‍ କିମାଟ୍‌ । ଆଇୱାରି ଲାକ୍‍ତୁ ଆମାକା ସତ୍‍ପାଣି, ଆକାନେ କିଦୁ ।
ROM 12:18 ୱିଜେରି ୱାଲେ ସାନ୍ତିଦାନ୍‍ ବାସାଦେଙ୍ଗ୍‍ଁ ଇଜି ଏସ୍ତିୱାଲେ ଆଦେଙ୍ଗ୍‍ଁ ଆଟ୍‍ନାତ୍‍ ସେସ୍ଟା କିଦୁ ।
ROM 12:19 ଏ ଲାଡ୍‍ତିକାର୍‍, ମିର୍‌ ନିଜେ ଆମାୱାନି ବିରୁଦ୍‍ତାନ୍‍ ବାଦ୍‌ ଅମାଟ୍‍ । ମାପୁରୁଦି ରିସାଦି ଲୋକ୍‍ ଆଦେଙ୍ଗ୍‍ଁ ୱାନିଙ୍ଗ୍‌ ଡ଼ିସ୍‍ସୋ ସିଦୁ । ଇରିଙ୍ଗ୍‌ ସାସ୍ତ୍ରଦୁ ରାସାତାମାନାତ୍‌, “ପ୍ରବୁ ଇନାନ୍‌, ମାପ୍‌ ପ୍ରତିସଦ୍‍ ଅନାପ୍‍ । ମାପ୍‌ ଦଣ୍ତ୍‍ ସିନାପ୍‍ ।”
ROM 12:20 ତାନିବାଦ୍‍ଲୁ ସାସ୍ତ୍ର ଏଣ୍ତେସ୍‌ ଇନାତ୍‍, “ମି ସାତ୍ରୁ ବାଙ୍ଗାଁ ମାରିଙ୍ଗ୍‍ଁ, ୱାନିଙ୍ଗ୍‍ଁ ଉଣ୍ତେଙ୍ଗ୍‍ଁ ସିଦୁ; ଏର୍‍କି ମାରିଙ୍ଗ୍‍ଁ ଉଟ୍‍ପିସ୍‍କିଦୁ । ଇବେଣାନ୍‍ ୱାନ୍‌ ସେମାର୍‍ ଆନା ସନାନ୍‍ ।”
ROM 12:21 ଅସତ୍‍ ତାନ୍‍ ଆରାମାଟ୍‍; ୱିଜୁ ଅସତ୍‍ ବିସୟ୍‍କୁ ନେଗିପାଣିଦାନ୍‍ ଜିଣାଦୁ ।
ROM 13:1 ସାସନ୍‍କିନିୱାରିଙ୍ଗ୍‍ଁ ମାନାନିକା ୱିଜେରି ପାଣି, ଇରିଙ୍ଗ୍‍ଁ ମାପୁରୁଦି ସାରି ଡ଼ିସ୍‌ତିଙ୍ଗ୍‌ ଏନ୍‌ ସାସନ୍‍ ଅଦିକାର୍‍ ପୟ୍‍ଏନ୍‍ । ଅଦିକାର୍‍ତୁ ମାନି ସାସନ୍‍କିନିକାର୍‍ ମାପୁରୁଦି ମାଣାନ୍‌ ବାସେଆତାମାନାର୍‍ ।
ROM 13:2 ଆଦେଙ୍ଗ୍‍ଁ ଏନ୍‌ ଅଦିକାର୍‍ ପୟ୍‍ତି ସାସନ୍‍କିନିୱାରିଙ୍ଗ୍‍ଁ ବିରୁଦ୍‍ କିନାନ୍‍, ୱାନ୍‌ ମାପୁରୁଦି ମାଣାନ୍‌ ଆତିମାନି ନିୟମ୍‍ତି ବିରୁଦ୍‍କିନାନ୍‍ । ଏନ୍‌ ଇକା କିନାନ୍‍, ୱାନ୍‌ ବିଚାର୍‍ତି ଆଗ୍‍ଡ଼ି ନିନାନ୍‍ ।
ROM 13:3 ଏମେକାର୍‌ ନେଗିପାଣି କିନାର୍‌, ୱାରି ସାସନ୍‍କିନିୱାରିଙ୍ଗ୍‍ଁ ତିଲାନି ଉଣ୍ତିଙ୍ଗ୍‍ଁ ଇନି ମାଟା ସିଲେତ୍‍ ତିଲାନି ମାଟା ତାଗ୍‍ଇପାଣିକିନିୱାରିଙ୍ଗ୍‍ଁ । ସାସନ୍‍କିନିୱାନି ଉଣ୍ତିଙ୍ଗ୍‍ଁ ତିଲାଇକା ମି ବଦା ନୋ ? ଆତିଙ୍ଗ୍‍ଁ ସତ୍‍ପାଣି କିଦୁ, ୱାନ୍‌ ମି ପ୍ରସଂସା କିନାନ୍‍ ।
ROM 13:4 ମି ନେଗିକା କିନି ଉଣ୍ତିଙ୍ଗ୍‍ଁ ୱାନ୍‌ ମାପୁରୁଦି ମାଣାନ୍‍ ବାସେଆତାମାନାନ୍‍ । ମାତର୍‌ ମିର୍‌ ଜଦି ତାଗ୍‍ଇପାଣି କିଜିମାନିଦେର୍‍, ଆର୍‍ତିଙ୍ଗ୍‍ଁ ସାସନ୍‍କିନିୱାନିଙ୍ଗ୍‍ଁ ତିଲାଦୁ, ଇରିଙ୍ଗ୍‍ଁ ମି ଦଣ୍ତ ସିନି ଉଣ୍ତିଙ୍ଗ୍‍ଁ ସତ୍‌ତାନ୍‌ ୱାନି ଅଦିକାର୍‌ ମାନାତ୍‌ । ୱାନ୍‌ ମାପୁରୁଦି ମାଣାନ୍‌ ବାସେଆତି ସେବାକିନିକାନ୍‍ । ତାଗ୍‍ଇପାଣିକିନିୱାରିଙ୍ଗ୍‍ଁ ସାସ୍ତି ସିନି ଉଣ୍ତିଙ୍ଗ୍‍ଁ ୱାନ୍‌ ମାପୁରୁଦି ଆଦେସ୍‌ ମାନାନାନ୍‍ ।
ROM 13:5 ଆଦେଙ୍ଗ୍‍ଁ ମିର୍‌ ସାସନ୍‍କିନିୱାରିଙ୍ଗ୍‍ଁ ମାନାନିକା ମାନାତ୍‌ କେବଲ ମାପୁରୁଦି ଦଣ୍ତ ତିଲେଇତାନ୍‍ ସିଲେ, ମାତର୍‌ ନିଜେଦି ବୁଦିଦି ନାସ୍ଟୁଦାନ୍‍ ରକିୟା ପୟ୍‍ଦେଙ୍ଗ୍‍ଁ ଇଜି ।
ROM 13:6 ଇୟାଉଣ୍ତିଙ୍ଗ୍‌ ମିର୍‌ ସିସୁଟୁ ବା ସିଜିମାନ୍‍ଡ୍ରୁ, ଇରିଙ୍ଗ୍‍ଁ ସାସନ୍‍କିନିକାର୍‍ ଆଦେସ୍‌ ମାନାନିୱାଲେ ମାପୁରୁଦି ସେବା କିନାର୍‌ ।
ROM 13:7 ଆଦେଙ୍ଗ୍‌ ୱାର୍‌ ଆମାକା ପୟ୍‍ନିକା ମାନାତ୍‌, ୱାନିଙ୍ଗ୍‌ ଆକା ସିଦୁ । ନିଜେଦିକା ମାରି ସିସୁଟୁ ମିଦି ଆମାକା ସିନିକା ମାନାତ୍‍, ଆକା ସିଦୁ ମାରି ୱାରିଙ୍ଗ୍ ୱେଡ଼ିକା ନି ସନ୍‌ମାନ୍‍ତାନ୍ ମାନାଦୁ ।
ROM 13:8 ନିଜେଦିଙ୍ଗ୍‍ଁ ନି ଆଇୱାରିଙ୍ଗ୍‌ ଜିବନ୍‍ନୋନିକା ଡ଼ିସ୍‍ସି ମାରି ଇନି ବିସୟ୍‍ତୁ ଆମାୱାନି ରୁଣୁ ଆଜି ତେବାମାଟ୍‍ । ଏନ୍‌ ଆଇୱାନିଙ୍ଗ୍‍ ଜିବନ୍‍ନୋନାନ୍‍, ୱାନ୍‌ ନିୟମ୍‌ ମାନାନାନ୍‍ ।
ROM 13:9 “ଦାରିପାଣି କିମାଟ୍‌, ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌, ଡଙ୍ଗାଁ କିମାଟ୍‌, ଆଇୱାରି ଜିନସ୍‍ତିଙ୍ଗ୍‍ଁ ଲବ୍ରାମାଟ୍‍,” ୱିଜୁ ମାଟା ଉନ୍‌ଡ୍ରି ମାଟାଦୁ ତେବାଜିନାତ୍‍, “ମି ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତିୱାଜା ଜିବନ୍‍ନୋଦୁ ।”
ROM 13:10 ମିର୍‍ ଅରେନ୍ ୱାନିଙ୍ଗ୍‌ ଜିବନ୍‌ନୋଜି ମାରିଙ୍ଗ୍‍ଁ, ୱାନି ଉଣ୍ତିଙ୍ଗ୍‌ ଏସାଙ୍ଗ୍‍ ଅନ୍ୟାୟ୍‍ କିମାଟ୍‌ । ଆଦେଙ୍ଗ୍‌ ଜିବନ୍‍ନନି ମାଣାନ୍‌ ନେ ୱିଜୁ ନିୟମ୍‍ ମାନାନିକା ଆନାତ୍‌ ।
ROM 13:11 ଇଲେଇ ଇୟାୱିଜୁ ମିଙ୍ଗିଁ ଏଣ୍ତେସ୍‍ବା କିଦେଙ୍ଗ୍‍ଁ ଆନାତ୍‌, ଇରିଙ୍ଗ୍‍ଁ ସୁଜିନି ମାଣାନ୍‌ ନିଙ୍ଗିଁନି ସମୟ ଇଗା ୱାତାତ୍‍ । ରକିୟା ପୟନି ସମୟ୍‍ ଆଗ୍‍ଡ଼ିରି ବାଦ୍‍ଲୁ ଇଲେଇ ନାଣ୍ତ ଲାକ୍‍ତୁ ।
ROM 13:12 ନାଡ଼ା ୱିଜିତାତ୍‌ନି, ୱେଡ଼େ ୱାତାତ୍‌ନି । ରାଦୁ, ସିକାଟିଦି ୱିଜୁପାଣି ଡ଼ିସ୍‍ନାଟ୍‍ ମାରି ଜାୟ୍‍ତୁ ଜୁଦ୍‍ କିଦେଙ୍ଗ୍‍ଁ ନେଗି ସାଜୁ ଆରାନାଟ୍‍ ।
ROM 13:13 ରଙ୍ଗ୍‍ରସ୍‍ ନି ସସ୍‍ନିମାନୁ, ଡଙ୍ଗାଁ ନି ଲାଲାୟ୍‍ଆନିକା, ରିସା ମାରି ଜାଟି ୱିଜୁଦୁ ତେବାଏଜି, ରାଦୁ ମାଡ୍‌ ଜାୟ୍‍ତୁ ପାଣିକିନି ଲୋକା ୱାଜା ନେଗେନ୍‌ତାନ୍‌ ବ୍ୟବ୍‌ହାର୍‌ କିନାଟ୍‌ ।
ROM 13:14 ପ୍ରବୁ ଜିସୁ କ୍ରିସ୍ତଦି ଅସ୍ତ୍ରଶସ୍ତ୍ରଦାନ୍‌ ତିଆର୍‌ ଆଦୁ ପାପ୍‌ତି ଉଣ୍ତିଙ୍ଗ୍‌ ୱେର୍‌ଏ ଆଦୁ ମାରି ନିଜେଦି ଲାଲାୟ୍‍ତୁ ବ୍ୟବହାର୍ କିମାଟ୍‌ ।
ROM 14:1 ବିସ୍‍ବାସ୍‍ତୁ ଏନ୍‌ ସାକ୍ତି ସିଲେନ୍‌, ୱାନିଙ୍ଗ୍‌ ଆସ୍‌ତୁ, ମାତର୍‌ ୱାନି ଜିବନ୍‍ତି ବିସୟ୍‍ତାନ୍‍ ୱାର୍‍ଗିମାଟ୍‍ ।
ROM 14:2 ଅରେନ୍‍ ବିସ୍‍ବାସ୍‍ କିନାନ୍‍, ୱାନ୍‌ ଆମା କାଦିବା ଉଣ୍ତେଙ୍ଗ୍ଁ ଆଟ୍‍ନାନ୍‍, ମାରି ଅରେନ୍‍ ଡାଟ୍‍ ସିଲି ବିସ୍‍ବାସି କେବଲ କୁସା କାଦି ଉଣାନ୍‍ ।
ROM 14:3 ଆମା କାଦିବା ଉଣ୍ତେଙ୍ଗ୍‍ଁ ଆମାୱାନି ଇନି ବାଦା ସିଲେତ୍‍, ୱାନ୍‌ କୁସା କାଦିଦିଙ୍ଗ୍‍ଁ କାଡ଼୍‍ମାକିନ୍‍ । ମାରି କୁସା କାଦି ଉଣିକାନ୍‍ କାଣ୍ତା ତିନି ୱାନିଙ୍ଗ୍‍ଁ ଦସ୍‌ ଅଡ଼୍‍ବିମାକିନ୍‍ । ଇରିଙ୍ଗ୍‍ଁ ମାପୁରୁ ୱାନିଙ୍ଗ୍‍ଁ ବା ବାସେକିତା ମାନାନ୍‌ ।
ROM 14:4 ମିରୁ ଆଇୱାନି ଦାସ୍‍ତିଙ୍ଗ୍‍ ବିସାର୍‍ କିଦେଙ୍ଗ୍‌ ଇଜି ମିର୍‌ ଏରୁ ? ୱାନ୍‌ ୱାନି ପାଣିଦୁ ଏସା ଆକ ଜିଣାଜିନାନ୍‍ ମାରି ଆରାଜିନାନ୍‍, ଆକା ୱାନି ମାଲିକ୍‌ ବିସାର୍‍ କିନାନ୍‍ । ୱାନ୍‌ ସତେନେ ଜିଣାନାନ୍‍, ଇରିଙ୍ଗ୍‍ଁ ପ୍ରବୁ ୱାନି ଦାସ୍‍ତିଙ୍ଗ୍‍ଁ ଜିଣାକିଦେଙ୍ଗ୍‍ଁ ଇଜି ଡାଟ୍‍ ।
ROM 14:5 ଅରେନ୍‍ୱାନି ଇସାବ୍‍ତାନ୍‍ ଆଇ ଦିନ୍‍କା ବାଦ୍‍ଲୁ ଉନ୍‍ଣ୍ତ୍ରି ଟିକ୍‍ ଦିନ୍‍ ନାଣ୍ତ ନେଗେତ୍‍ । ମାରି ଅରେନ୍‍ ଅଡ଼୍‌ବିନାନ୍‌, ୱିଜୁ ଦିନ୍‍ ସାମାନ୍‍ । ମାତର୍‌ ଏନ୍‌ ଆମା ଇସାବ୍‍ତାନ୍‍ ଟିକ୍‍ ବିସାର୍‍ କିଜି ଟିକ୍‌ ମାନାପିନ୍‌ ।
ROM 14:6 ଏନ୍‌ ଉନ୍‍ଣ୍ତ୍ରି ଦିନ୍‍ତିଙ୍ଗ୍‍ ନେଗିକା ଇଜି ଅଡ଼ବିନାନ୍‍, କେବଲ ପ୍ରବୁଦି ଗୌରବ୍‍ ଉଣ୍ତିଙ୍ଗ୍‍ଁ ୱାନ୍‌ ଆକା କିପିନ୍‍ । ଆମାୱାନି ଇନି କାଦି ଉଣ୍ତେଙ୍ଗ୍‌ ବାଦା ସିଲେତ୍‍, ମାପୁରୁଙ୍ଗ୍‍ଁ ଦନ୍ୟବାଦ୍‍ ସିଜି ୱାନ୍‌ ଆକା ଉଣିନ୍‍; ଆବେଣାନ୍‍ ମାପୁରୁ ଗୌରବ୍‍ ପୟ୍‍ନାନ୍‍ । ଏମେ ଲୋକ୍‍ କାଦି ଉଣୁଏନ୍‌, ୱାନ୍‌ ଇକା ମାପୁରୁଦି ଗୌରବ୍‍ ଉଣ୍ତିଙ୍ଗ୍‍ଁ କିପିନ୍‍ ମାରି ଇୟାଉଣ୍ତିଙ୍ଗ୍‍ଁ ମାପୁରୁଙ୍ଗ୍‍ଁ ଦନ୍ୟବାଦ୍‍ ସିପିନ୍‍ ।
ROM 14:7 ଏନ୍‌ କେବଲ ନିଜେଦି ଉଣ୍ତିଙ୍ଗ୍‍ଁ ଜିଏନ୍‍, ମାରି ନିଜେଦି ଉଣ୍ତିଙ୍ଗ୍ଁ ସାଏନ୍‍ ।
ROM 14:8 ପ୍ରବୁଦି ଉଦେସ୍‍ ଜିନି ଉଣ୍ତିଙ୍ଗ୍‌ ମାଡ଼ୁ ଜିତାମାନାପ୍‍ ମାରି ସାନାପ୍‍ । ଆଦେଙ୍ଗ୍‍ଁ ଜିବନ୍‌ ନି ସାନିମାନୁ ମାପ୍‌ ପ୍ରବୁଦି ଲୋକ୍‍ ।
ROM 14:9 ଇରିଙ୍ଗ୍‌ କ୍ରିସ୍ତ ମାରିଡ଼େସିଜିନି ମାଣାନ୍‌ ରିଏର୍‌ ଜିନିକା ନି ସାନି ଲୋକା ୱିଜେରି ୱାନ୍‌ ପ୍ରବୁ ଆତାମାନାନ୍‌ ।
ROM 14:10 ଆଦେଙ୍ଗ୍‍ଁ ମିର୍‌ ଏନ୍ଦା ନିଜେଦି ତଡ଼ାନ୍‍ତି ବିସାର୍‍ କିଜିନିଦେର୍‍ ? ଏନ୍ଦା ମାରି ନିଜେଦି ତଡ଼ାନ୍‍ତିଙ୍ଗ୍‍ଁ କାଡ଼୍‍ଜିନିଦେର୍‍ ? ମାଡ୍‌ ୱିଜେରେ ବିଚାର୍‍ ଆଦେଙ୍ଗ୍‍ଁ ଇଜି ମାପୁରୁଦି ଆଗ୍‍ଡ଼ି ନିନ୍‍ଡ୍ରେଙ୍ଗ୍‍ଁ ପଡ଼ାନାତ୍‍ ।
ROM 14:11 ଏଣ୍ତେସ୍‌ ସାସ୍ତ୍ର ଇନାତ୍‍ : “ପ୍ରବୁ ଇଜିନାନ୍‌, ଏଣ୍ତେସ୍‍କି ମାପ୍‌ ଜିବନ୍‍ତି ମାପୁରୁ, ୱିଜେରେ ମା ଆଗ୍‍ଡ଼ି ମେଣ୍ତେଙ୍ଗ୍‍ଁ ଗଟ୍‍କିନାର୍‍ । ମାପ୍‌ ମାପୁରୁ ଇଜି ୱିଜେରେ ମାନାନାର୍‌ ।”
ROM 14:12 ମା ୱିଜେରିଙ୍ଗ୍‍ଁ ମାପୁରୁଦି ଲାକ୍‍ତୁ ନିଜେ ନିଜେଦି ଇସାବ୍‌ ସିଦେଙ୍ଗ୍‌ ପଡ଼ାନାତ୍‍ ।
ROM 14:13 ଆଦେଙ୍ଗ୍‍ଁ ଆଇୱାରିଙ୍ଗ୍‌ ବିସାର୍‍ କିମାଟ୍‌ । ଇୟାୱାଜା ବା ଇନିକା କିମାଟ୍‌, ଆମାମାଣାନ୍‍ କି ମି ତଡ଼ାନ୍‍ ତାକାୟ୍‌ ଆଜି ପାପ୍‍ କିନାନ୍‍ ।
ROM 14:14 ଜିସୁଦି ମାଣାନ୍‌ ଆଦେସ୍‌ ପୟ୍‍ଜି ସତ୍‍ତାନ୍‌ ଇଜିନା, ଆମା କାଦି ତାଗ୍‍ଇକା ସିଲେ । ମାତର୍‌ ଜଦି ଏନ୍‌ ଆମା କାଦି ତାଗ୍‍ଇକା ଇଜି ବିସ୍‍ବାସ୍‍ କିନାନ୍‍, ୱାନି ଉଣ୍ତିଙ୍ଗ୍‌ ଆକା ତାଗ୍‌ଇକା ଆନାତ୍‌ ।
ROM 14:15 ମିର୍‌ ଇନି କାଦି ଉଣି ମାଣାନ୍‌ ଜଦି ଅରେନ୍‍ ତଡ଼ାନ୍‍ତି ମନ୍‍ତୁ ଦୁକ୍‍ ସିନିଦେର୍‍, ଆର୍‍ତିଙ୍ଗ୍‍ଁ ୱାନି ଉଣ୍ତିଙ୍ଗ୍‍ଁ ମି ଜିବନ୍‍ନୋନିକା ତର୍‍ଇଜିନିଦେର୍‍ । ଆମା ତଡ଼ାନ୍‍ତି ଉଣ୍ତିଙ୍ଗ୍‍ଁ କ୍ରିସ୍ତ ସାତାନ୍‍, କାଣ୍ତେକ୍‍ କାଦି ଉଣ୍ତିଙ୍ଗ୍‍ଁ ୱାନିଙ୍ଗ୍‌ ନାସ୍ଟୁ କିମାଟ୍‌ ।
ROM 14:16 ମିର୍‌ ଆମାୱାନିଙ୍ଗ୍‍ଁ ନେଗିକାନ୍‍ ଇଜି ଅଡ଼୍‍ବିଜିନିଦେର୍‍, ଆବେଣ୍‌କୁ ମି ତାଗ୍‍ଇକା ଆମାପିତ୍‍ ।
ROM 14:17 ମାପୁରୁଦି ରାଜିଦି ତିନିକା ନି ଉଣିକା ସିଲେ । ଆକା ପବିତ୍ର ଆତ୍ମାଦି ମାଣାନ୍‌ ସିଆୟ୍‍ ଆତି ଦାର୍ମୁତିକା, ସାନ୍ତି ମାରି ୱେଡ଼ିକା ।
ROM 14:18 ଏନ୍‌ଆପିନ୍‌ ଇୟାୱାଜା ଇସାବ୍‍ତାନ୍‍ କ୍ରିସ୍ତଦି ସେବା କିନାନ୍‍; ୱାନ୍‌ ମାପୁରୁଙ୍ଗ୍‍ଁ ୱେଡ଼ିକା କିବିସ୍‍କିନାନ୍‍, ଲୋକାମାନୁ ବା ଦର୍‍ ପୟ୍‍ନାନ୍‍ ।
ROM 14:19 ଆଦେଙ୍ଗ୍‍ଁ ରାଦୁ, ନିଜେ ନିଜେମାନୁ ସାନ୍ତି ତିଆର୍‌ କିଦେଙ୍ଗ୍‍ଁ ନି ପିରିସ୍‍ କିଦେଙ୍ଗ୍‍ଁ ଇଜି ଆମା ୱିଜୁ ଦର୍‍କାର୍‍ ମାନାତ୍‌, ତାନିଙ୍ଗ୍‍ଁ ସୁଣାଟ୍‍ ।
ROM 14:20 କାଣ୍ତେକ୍‍ କାଦି ଉଣ୍ତିଙ୍ଗ୍‍ଁ ମାପୁରୁ ଆମା ପାଣି କିତାମାନାନ୍‌, ଆକା ନାସ୍ଟୁ କିମାଟ୍‌ । ଏନ୍‌ ଇନି କାଦି ଉଣି ମାଣାନ୍‌ ଜଦି ମିର୍‌ ଆଇୱାରି ତାକାନି ପାଣି ଆନାତ୍‌, ଆର୍‍ତିଙ୍ଗ୍‍ଁ ଆୟା କାଦି ଉଣିକା ନେଗେତ୍‌ ସିଲେ ।
ROM 14:21 ମି କାଣ୍ତା ତିନିକା, କାଡ଼ୁ ଉଣିକା ୱିଜୁ ଜଦି ମି ତଡ଼ାନ୍‍ତିଙ୍ଗ୍‍ଁ ବାଦା କିନାତ୍‍, ଆର୍‍ତିଙ୍ଗ୍‍ଁ ଆୟାୱିଜୁ ମାଣାନ୍‌ ବନ୍ଦ୍‍ ଆନିକା ମିଙ୍ଗିଁ ନେଗେତ୍‌ ।
ROM 14:22 ଇୟା ବିସୟ୍‌ତାନ୍‌ ମି ନିଜେଦି ବିସ୍‍ବାସ୍‍ କେବଲ ମାପୁରୁ ନେସିନ୍‍ । ଏମେ ଲୋକ୍‍ ନେଗିକା ବିଚାର୍‌ କିଜି ପାଣି କିନାନ୍‍, ମାରି ଆୟାଉଣ୍ତିଙ୍ଗ୍‌ ୱାନିଙ୍ଗ୍‍ଁ ୱେନ୍‌କା ଅଡ଼୍‍ବିଦେଙ୍ଗ୍‍ଁ ଆଏତ୍‍, ୱାନ୍‌ ଦନ୍ୟ ।
ROM 14:23 ମାତର୍‌ ଇନି କାଦି ଉଣିକା ନୋ ସିଲେ, ମନ୍‍ତୁ ରୁଣ୍ତି ମନ୍ ଅଡ଼୍‌ବିଜି ଏନ୍‌ ଆକା କିନାନ୍‍; ମାପୁରୁଦି ଆଗ୍‍ଡ଼ି ୱାନ୍‌ ଦସି ଆନାନ୍‍, ଇରିଙ୍ଗ୍‍ଁ ଆକା ୱାନି ବିସ୍‍ବାସ୍‍ତି ମୁସ୍‌କୁ ପାଣି ସିଲେ । ବିସ୍‍ବାସ୍‍ ମୁସ୍‌କୁ ଆମାକା ଆଏତ୍‍, ଆକା ପାପ୍‍ ।
ROM 15:1 ବିସ୍‍ବାସ୍‍ତୁ ବପୁ ଜେ ମାଡ୍‌, ୱାର୍‌ ସାକିସିଲି ବିସ୍‌ବାସ୍‌ ତଡ଼ାନ୍‌ତି ଦୋସ୍‌ ସାକିସିଲି ଉଣ୍ତିଙ୍ଗ୍‌ ଲାକ୍‌ତୁ ଆଦୁ । ଏନ୍‌ ନିଜେଦିଙ୍ଗ୍‍ଁ ୱେଡ଼ିକା କିନି ଉଣ୍ତିଙ୍ଗ୍‌ ବଦା କିମାକିନ୍‌ ।
ROM 15:2 ମାତର୍‌ ଆଇୱାରି ନେଗି ଉଣ୍ତିଙ୍ଗ୍‍ଁ ମାରି ୱାରି ବିସ୍‍ବାସ୍‍ତିଙ୍ଗ୍‍ଁ ଡାଟ୍‍ କିନି ଉଣ୍ତିଙ୍ଗ୍‍ଁ ୱାରିଙ୍ଗ୍‍ଁ ୱେଡ଼ିକା ଇଡ୍‍ଦେଙ୍ଗ୍‍ଁ ମା ପାଣି ।
ROM 15:3 କ୍ରିସ୍ତ ନିଜେଦି ସୁକ୍‌ ଉଣ୍ତିଙ୍ଗ୍‍ଁ ଇନିକା କିଏଜିମାର୍ହାନ୍‍ । ମାତର୍‌ ସାସ୍ତ୍ର ଇସାବ୍‍ତାନ୍‍, “ୱାର୍‌ ମିଙ୍ଗିଁ ସିଜିମାନି ଅପ୍‍ମାନ୍‍ ନାନୁ ସାସ୍‌ କିଜିନା ।”
ROM 15:4 ମାରି, ଦାର୍ମୁସାସ୍ତ୍ରଦି ସିକିୟାୱିଜୁ ମା ନେଗି ଉଣ୍ତିଙ୍ଗ୍‍ଁ ସିଆୟ୍‍ଆତାମାନାତ୍‍ । ଆସାଦୁ ତିର୍‍ ତେବାନି ଉଣ୍ତିଙ୍ଗ୍‍ଁ ସାସ୍ତ୍ର ମାଙ୍ଗିଁ ସାସ୍‌ ନି ୱେଡ଼ିକା ସିନାତ୍‍ ।
ROM 15:5 କ୍ରିସ୍ତ ଜିସୁଦି ୱେନ୍‌କା ସୋଲ୍‌ସି ବୁଲାନି ୱାଜା ୱିଜେରି ଆୟାୱାଜା ମନ୍‍ସିନ୍ତା ଆନି ଉଣ୍ତିଙ୍ଗ୍‍ଁ ସାସ୍‌ ନି ୱେଡ଼ିକାଦି ଇସାବ୍‍ତାନ୍‍ ମାପୁରୁ ମିଙ୍ଗିଁ ସାକା କିପିନ୍‍ ।
ROM 15:6 ୱିଜେରେ ମିସାଜି ଉନ୍‍ଣ୍ତ୍ରେ ବଲ୍‍ତାନ୍‍ ପ୍ରବୁ ଜିସୁ କ୍ରିସ୍ତ ବୁବା ମାପୁରୁଦି ଦନ୍ୟବାଦ୍‍ କିଦୁ ।
ROM 15:7 କ୍ରିସ୍ତ ଏଣ୍ତେସ୍‌ ମିଙ୍ଗିଁ ଆସ୍‍ତାମାନାନ୍‍, ମାପୁରୁଦି ମହିମା ଉଣ୍ତିଙ୍ଗ୍‍ଁ ମିର୍‌ ଆୟାୱାଜା ଆପ୍‍ଣା ଆପ୍‍ଣାଦିଙ୍ଗ୍‍ଁ ଆସ୍‌ତୁ ।
ROM 15:8 ଇରିଙ୍ଗ୍‍ଁ କ୍ରିସ୍ତଦି ସେବାଦି ଜିବନ୍‌ ଜିହୁଦିଲୋକା ଉଣ୍ତିଙ୍ଗ୍‍ଁ ଟିକ୍‍ ମାର୍ହାତ୍‌ । ୱାରିଙ୍ଗ୍‍ଁ ୱାନ୍‌ ତର୍‍ତେଙ୍ଗ୍‍ଁ ବଦାକିଜିମାର୍ହାନ୍‍ ଜେ ମାପୁରୁ ବିସ୍‌ସାସ୍‍ତିକାନ୍‍, ଜିହୁଦି ଜାତିଦି ଡକ୍ରାଦାଦାରିଙ୍ଗ୍‍ ସିତିମାନି ୱାନି ମାଟାୱିଜୁ ୱାନ୍‌ କିନାନ୍‍ ।
ROM 15:9 ମାପୁରୁଦି ଦୟା ଉଣ୍ତିଙ୍ଗ୍‍ଁ ଅଣଜିହୁଦି ଲୋକୁ ବା ୱାନି ଦନ୍ୟବାଦ୍‍ କିନାର୍‌ । ଇୟା ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌ “ଅଣଜିହୁଦି ଲୋକା ଲୋଇ ନି ଦନ୍ୟବାଦ ନାନୁ କିନା, ୱିଜୁଦିନ୍‍ ନି ଦନ୍ୟବାଦ୍‌ ପାଟା ପାର୍‍ନା ।”
ROM 15:10 ମାରି ବା ରାସାତାମାନାତ୍‌, “ଅଣଜିହୁଦି ଲୋକୁ ମାପୁରୁଦି ଲୋକାୱାଲେ ୱେଡ଼ିକା କିପିର୍‍ !”
ROM 15:11 ମାରି, “ଅଣଜିହୁଦି ୱିଜୁ ଲୋକୁ ପ୍ରବୁଙ୍ଗୁଁ ଦନ୍ୟବାଦ କିପିର୍‍; ୱାନିଙ୍ଗ୍‍ଁ ୱିଜୁ ଲୋକୁ ଦନ୍ୟବାଦ୍‍ତି ପାଟା ପାରିର୍‍ !”
ROM 15:12 ମାରି ଜିସାଇୟ ଇର୍ହାମାନାନ୍‌, “ଜେସିଦି ଅରେନ୍‍ କୁଟୁମ୍‍ତିକାନ୍‍ ତରାଆୟ୍‍ଆନାନ୍‍, ୱାନ୍‌ ଅଣଜିହୁଦି ଲୋକାଙ୍ଗ୍‍ଁ ସାସନ୍‍ କିନାନ୍‍ ମାରି ୱାର୍‌ ୱାନିମାନୁ ଆସା ଇଡ୍‍ନାର୍‍ ।”
ROM 15:13 ୱିଜୁ ଆସାଦି ଅଦିକାରି, ମାପୁରୁ ମି ବିସ୍‍ବାସ୍‍ ଉଣ୍ତିଙ୍ଗ୍‍ଁ ମିଙ୍ଗିଁ ୱେଡ଼ିକା ନି ସାନ୍ତିଦୁ ପୁରା କିପିନ୍‍ । ପବିତ୍ର ଆତ୍ମାଦି ସାକ୍ତିଦାନ୍‍ ମି ଆସା ପିରିତ୍‍ ।
ROM 15:14 ନା ତଡ଼ାନ୍‍କୁ ନି ତାଙ୍ଗିଁକ୍‍, ନା ବିସ୍‍ବାସ୍‍, ମିର୍‌ ୱିଜୁ ନେଗିଗୁଣ୍‍ ନି ବୁଦିଦୁ ପୁରାଆଜି ମାରି ନିଜେନିଜେଦିଙ୍ଗ୍‍ଁ ସିକିୟା ସିଦେଙ୍ଗ୍‌ ଆଟ୍‌ନିଦେର୍‌ ।
ROM 15:15 ଇୟା ଆକୁଦୁ ମିଙ୍ଗିଁ ଏସ ବିସୟ୍‍ ଉଣ୍ତିଙ୍ଗ୍‍ଁ ଜାଗାର୍‌ତା କିଦେଙ୍ଗ୍‍ଁ ଇଜି ନାନୁ ମାପୁରୁ ଲାକୁତୁ ବପୁ ଆତାମାନା,
ROM 15:16 ଇରିଙ୍ଗ୍‍ଁ କ୍ରିସ୍ତ ଜିସୁଦି ଦାସ୍‍ ୱାଜା ଅଣଜିହୁଦି ଲୋକାଙ୍ଗ୍‍ଁ ଉଣ୍ତିଙ୍ଗ୍‍ଁ ପାଣି କିଦେଙ୍ଗ୍‍ଁ ଇଜି ମାପୁରୁ ନାଙ୍ଗିଁ ସାରି ସିତାମାନାନ୍‌ । ମାପୁରୁଦି ସୁସମାଚାର୍‌ ୱେର୍‍ତେଙ୍ଗ୍‍ଁ ଇଜି ନାନୁ ଅରେନ୍‍ ଦାର୍ମୁଗୁରୁ ୱାଜା ପାଣି କିଜିନା । ଅଣଜିହୁଦି ଲୋକୁ ପବିତ୍ର ଆତ୍ମାଦି ମାଣାନ୍‌ ସିୟାୟ୍‍ଆତି ବିସୟ୍‌ତି ୱାଜା ମାପୁରୁଦି ଲାକ୍‍ତୁ ସର୍‌ପେ ଆପିର୍‍, ଇକା ନା ବଦା ।
ROM 15:17 କ୍ରିସ୍ତ ଜିସୁଦି ୱାଲେ ମିସାଜି ମାପୁରୁଦି ଉଣ୍ତିଙ୍ଗ୍‍ଁ ଇୟା ସେବା ପାଣି କିଜିମାନିଙ୍ଗ୍‍ଁ ନାନୁ ନିଜେଦିଙ୍ଗ୍‌ ଗର୍ବ ଏତ୍‌ କିଜିନା ।
ROM 15:18 ଅଣଜିହୁଦି ଲୋକାଙ୍ଗ୍‍ଁ ମାପୁରୁଦିଙ୍ଗ୍‍ଁ ମାନାଦେଙ୍ଗ୍‍ଁ ଇଜି କ୍ରିସ୍ତ ନା ମାଣାନ୍‌ ଇନିକା କିତାମାନାନ୍‌, କେବଲ ଇୟା ମାଟା ଇନ୍‍ଡ୍ରେଙ୍ଗ୍‍ଁ ନାନୁ ସାସ୍‍ତିକାନ୍‍ ଆତାମାନା ।
ROM 15:19 ଇକା ୱାନ୍‌ କିତାମାନାନ୍‌, ବାକ୍ୟ ନି ପାଣି ଦାନ୍‍ ମାରି ମାପୁରୁଦି ଆତ୍ମାଦି ସାକ୍ତିଦାନ୍‍ । ଆଦେଙ୍ଗ୍‍ଁ ନାନୁ ଜିରୁସାଲାମ୍‍ତାନ୍‍ ଇଲିରିକମତୁ ସନି ୱାଲେ ସାରିଦୁ କ୍ରିସ୍ତଦି ସୁସମାଚାର୍‌ ୱେର୍‍ତାମାନା ।
ROM 15:20 ଏମେ ବାଡିଆଙ୍ଗ୍‍ଁ ଲୋକୁ କ୍ରିସ୍ତଦି ବିସୟ୍‍ତାନ୍‍ ୱେନ୍‌ଏର୍‌, ଆବେ ୱାନି ମାଟା ୱେର୍‍ତେଙ୍ଗ୍‍ଁ ନା ବଦା, ଇରିଙ୍ଗ୍‍ଁ ଆଇକାର୍‌ ପକ୍‍ତିମାନି କୁନାଦି ମୁସ୍‌କୁ ଇଲୁ ତର୍‍ତେଙ୍ଗ୍‍ଁ ନାନୁ ବଦାକିଏ ।
ROM 15:21 ସାସ୍ତ୍ର ଏଣ୍ତେସ୍‌ ରାସାତାମାନାତ୍‌ : “ଏମେକାର୍‌ ୱାନି ମାଟା ୱେନ୍‌ଏର୍‌, ୱାର୍‌ ସୁଣାର୍‍; ଏମେକାର୍‌ ୱେନ୍‌ଏର୍‌, ୱାର୍‌ ବୁଜାନାର୍‍ ।”
ROM 15:22 ଏସ ଦେବେଙ୍ଗ୍‍ଁ ମି ଲାକ୍‍ତୁ ୱାନି ଉଣ୍ତିଙ୍ଗ୍‍ଁ ନା ବଦା ସିଲେତ୍‌ ଆତାମାନାତ୍‌ ।
ROM 15:23 ମାତର୍‌ ଇୟା ରାଜିଦୁ ନା ପାଣି ୱିଜିତାମାନାତ୍‍ ମାରି ନା ଆସା, ମିଙ୍ଗିଁ ସୁଡ଼ୁଦେଙ୍ଗ୍‌ ଇଜିନା ଏସ ବାର୍‍ସେକ୍‍ତି ଆସା ଇଲେଇ ପୁରା ଆନାତ୍‌ ।
ROM 15:24 ସ୍ପେନ୍‍ ସନି ସାରିଦୁ ମିଙ୍ଗିଁ ସୁଡ଼ୁଗା ୱାନା ଇଜି ଅଡ଼୍‌ବିଜିନା । ମି ଲାକ୍‍ତୁ ଏସ ସମୟ୍‍ ତେବାତି ୱେନ୍‌କା ମି ସାକାଦାନ୍‍ ସ୍ପେନ୍‍ତୁ ସନା ।
ROM 15:25 ଇୟାଦାପ୍ରେ ମାପୁରୁଦି ଲୋକା ସେବା କିଦେଙ୍ଗ୍‍ଁ ନାନୁ ଜିରୁସାଲାମ୍‍ତୁ ସନ୍‍ଡ୍ରେଙ୍ଗ୍‍ଁ ସତାମାନା ।
ROM 15:26 ଜିରୁସାଲାମ୍‍ତୁ ମାପୁରୁଦି ଏମେ ଲୋକୁ କାକୁର୍ତି ମାନାର୍‌, ୱାରି ଉଣ୍ତିଙ୍ଗ୍‍ଁ ଏସ ଡାବୁଙ୍ଗୁଁ ସାହାଜ୍ୟ ପକ୍‍ତେଙ୍ଗ୍‍ଁ ମାସିଦନିଆ ନି ଆକାୟାଦି ମଣ୍ତଲିଙ୍ଗ୍‍ଁ ବଦା କିତାମାନାର୍‌ ।
ROM 15:27 ଇକା ୱାରି ନିଜେଦି ବଦା; ସତ୍‌ତାନ୍‌ ଇୟାୱାଜା କିନିକା ୱାରି ପାଣି । ଜିହୁଦିଲୋକୁ ନିଜେଦି ଆତ୍ମିକ ଆର୍ସିବାଦତୁ ଅଣଜିହୁଦି ଲୋକାଙ୍ଗ୍‍ଁ ମିସା କିତାମାନାର୍‌ଆକା, ଜିହୁଦିଲୋକାଙ୍ଗ୍‍ଁ ନିଜେଦି ଡାବୁଙ୍ଗୁଁ ସିଜି ଆର୍ସିବାଦ୍‍ତୁ ମିସାକିଜି ୱାରିଙ୍ଗ୍‍ଁ ସେବା କିନିକା ଅଣଜିହୁଦି ଲୋକା ପାଣି ।
ROM 15:28 ଜିରୁସାଲାମ୍‍ତୁ ଆୟା ଡାବୁଙ୍ଗୁଁ ସିଜି ନା ପାଣି ୱିସ୍‌ତି ୱେନ୍‌କା, ନାନୁ ସ୍ପେନ୍‍ ସନ୍‍ଡ୍ରେଙ୍ଗ୍‍ଁ ସୋତା ମାରି ସାରିଦୁ ମିଙ୍ଗିଁ ସୁଡ଼ୁନା ୱାନା ।
ROM 15:29 ନାନୁ ନେସ୍‍ନା, କ୍ରିସ୍ତଦି ମାଣାନ୍‌ ପୁରାଦାନ୍‌ ଆର୍ସିବାଦ୍‌ ଅସି ନାନୁ ମି ଲାକ୍‍ତୁ ୱାନା ।
ROM 15:30 ଏ ତଡ଼ାନ୍‌କୁ ନି ତାଙ୍ଗିକ୍ ପ୍ରବୁ ଜିସୁ କ୍ରିସ୍ତଦି ଦର୍‍ତାନ୍‍ ନି ପବିତ୍ର ଆତ୍ମାଦି ସିତିମାନି ଜିବନ୍‍ନନି ଉଣ୍ତିଙ୍ଗ୍‍ଁ ମାପୁରୁଦି ଲାକ୍‌ତୁ ନାନୁ ମିଙ୍ଗିଁ ବାତିଙ୍ଗ୍‌ ମାଲ୍‍ଜିନା, ନା ଉଣ୍ତିଙ୍ଗ୍‍ଁ ୱିଜୁଦିନ୍‍ ପାର୍‍ତନା କିଦୁ ।
ROM 15:31 ଜିହୁଦା ଦେସ୍‌ତି ଅବିସ୍‍ବାସ୍‍ତି ଲୋକା ଲାକ୍‌ତୁରାନ୍‌ ନାନୁ ଏଣ୍ତେସ୍‌ ନେଗେନ୍‌ତାନ୍‍ ତେବାନା ମାରି ଜିରୁସାଲାମ୍‍ତୁ ନା ସେବା ପାଣି ଏଣ୍ତେସ୍‌ କିନାର୍‌, ଆୟାଉଣ୍ତିଙ୍ଗ୍‌ ପାର୍‍ତନା କିଜିମାନ୍‍ଡ୍ରୁ ।
ROM 15:32 ମାପୁରୁଦି ବଦା ଆତିଙ୍ଗ୍‍ଁ, ନାନୁ ମି ଲାକ୍‍ତୁ ୱେଡ଼ିକାଦାନ୍‍ ୱାନା ମାରି ମି ୱାଲେ ଏସ ଦିନ୍‍ ତେବାଜି ନା ମନ୍‍ତୁ ଆରାମ୍‌ କିନା ।
ROM 15:33 ୱିଜୁ ସାନ୍ତି ସିନି ମାପୁରୁ ମି ୱାଲେ ତେବାପିନ୍‍ । ଆମେନ୍‍ ।
ROM 16:1 କେଙ୍କ୍ରେୟାଦୁମାନି ମଣ୍ତଲିଦି ଅରେତ୍‍ ସେବାକିନିକାତ୍‍ ତାଙ୍ଗିଁ ପିବେଙ୍ଗ୍‍ ମି ଲାକ୍‌ତୁ ପକସିନା ।
ROM 16:2 ପ୍ରବୁଦି ଦର୍‍ତାନ୍‍ ତାନିଙ୍ଗ୍‍ ଆସ୍‌ସି ମାପୁରୁଦି ଲୋକା ୱାଜା ସାଲାବୁଲା ଆଦୁ । ତାନି ଦର୍‍କାର୍‍ ଇସାବ୍‍ତାନ୍‍ ସାକା କିଦୁ । ନାଙ୍ଗିଁ ନି ନାଣ୍ତ ଲୋକାରି ୱାଦ୍ ଅରେତ୍‍ ନେଗି ସଙ୍ଗ୍‍ଁ ।
ROM 16:3 କ୍ରିସ୍ତ ଜିସୁଦି ସେବାଦୁ ନା ଅର୍‍ସେପାଣିକିନି ପ୍ରିସ୍କିଲା ନି ଆକିଲାଦି ନା ନମସ୍କାର୍‌ ଜାଣେକିଦୁ ।
ROM 16:4 ୱାର୍‌ ନା ଉଣ୍ତିଙ୍ଗ୍‍ଁ ନିଜେଦି ଜିବନ୍‍ତିଙ୍ଗ୍‍ଁ କାସ୍ଟୁଦି କିତାମାନାର୍‍ । ମାତର୍‌ ନାନୁ ସିଲେ, ୱିଜୁ ଅଣଜିହୁଦି ମଣ୍ତଲି ୱାନିଙ୍ଗ୍‍ଁ ଧନ୍ୟବାଦ କିଜିନାର୍‍ ।
ROM 16:5 ୱାରି ଇଲ୍‍ତୁ ଉଣ୍ତାଜି ମାନି ପାର୍‌ତନା ମଣ୍ତଲିଦିଙ୍ଗ୍‍ଁ ବା ମାଡ଼ିସ୍‍ କିଜିନା । ନା ଲାଡ୍‍ତି ତଡ଼୍‍ ଏପାଇନେତଦିଙ୍ଗ୍‍ଁ ନା ନମସ୍କାର୍‌ ୱେର୍‍ନିଦେର୍‍ । ଆସିଆ ରାଜିଦୁ ୱାନ୍‌ ଆଜିନାନ୍‍ ପାର୍‍ତୁମ୍‍ କ୍ରିସ୍ତ ବିସ୍‍ବାସି ।
ROM 16:6 ମି ନେଗି ଉଣ୍ତିଙ୍ଗ୍‍ଁ ନାଣ୍ତ ପାଣି କିତିମାନି ମରିୟମ୍‍ତିଙ୍ଗ୍‍ଁ ନା ନମସ୍କାର୍‌ କିଦୁ ।
ROM 16:7 ଆନ୍ଦ୍ରନିକ ନି ୟୁନିୟାଦିଙ୍ଗ୍‌ଁ ନମସ୍କାର୍‌ ଆପିତ୍‌ । ଇୟା ରିଏର୍‌ ଜିହୁଦିର୍‍ ନା ୱାଲେ ଜଇଲ୍‍ତୁ ମାର୍ହାର୍‌ । ନା ଆଗ୍‍ଡ଼ିରାନ୍‍ ୱାର୍‌ କ୍ରିସ୍ତଦର୍ମ ମାନାତା ମାର୍ହାର୍‌ ମାରି ପେରିତ ସିସୁରି ଲୋଇ ୱାର୍‌ ନେସ୍‌ତାମାର୍ହାର୍‍ ।
ROM 16:8 ନା ୱାଲେ ପ୍ରବୁଦି ମିସାନିକା ୱେଡ଼ିକା ଇତିମାନି ନା ଲାଡ୍‍ତି ତଡ଼୍‍ ଆମ୍ପ୍ଲିୟାତଦିଙ୍ଗ୍‍ଁ ନା ନମସ୍କାର୍‌ ଆପିତ୍‌ ।
ROM 16:9 କ୍ରିସ୍ତଦି ସେବାଦୁ ନା ୱାଲେ ଅର୍‍ସେପାଣିକିନି ଉର୍ବୋନ ନି ନା ଲାଡ୍‍ତି ତଡ଼୍‍ ସ୍ତାକିୟଦିଙ୍ଗ୍‍ଁ ବା ନା ନମସ୍କାର୍‌ ଆପିତ୍‌ ।
ROM 16:10 କ୍ରିସ୍ତଦି ବିସ୍‍ବାସ୍‍ତାନ୍ ମାନି ସେବକ ଆପେଲ ନି ଆରିସ୍ତବୁଲଦି ଇଲ୍‍ତି ୱିଜେରିଙ୍ଗ୍‍ଁ ନା ନମସ୍କାର୍‌ ୱେର୍‍ନିଦେର୍‍ ।
ROM 16:11 ନା ଜାତିଦି ହେରୋଦିୟନ୍‍ ନି ନାରକିସତି ଇଲ୍‍ତି କ୍ରିସ୍ତଦି ତଡ଼ାନ୍‍କାଙ୍ଗ୍‍ଁ ବା ନା ନମସ୍କାର୍‌ ୱେର୍‍ନିଦେର୍‍ ।
ROM 16:12 ପ୍ରବୁଦି ସେବାଦୁ ପାଣିକିଜିମାନି କ୍ରୁଫେଣା ନି କ୍ରୁପସୋତିଙ୍ଗ୍‍ଁ ମାରି ପ୍ରବୁଦି ଉଣ୍ତିଙ୍ଗ୍‍ଁ ନାଣ୍ତ ପାଣିକିତିମାନି ନା ତଡ଼୍‍ ପର୍ସିସତିଙ୍ଗ୍‍ଁ ନା ନମସ୍କାର୍‌ ଆପିତ୍‌ ।
ROM 16:13 ପ୍ରବୁଦି ବାସେଆତିମାନି ଦାସ୍‍ ରୁପସ ନି ନା ୟାୟା ୱାଜା ୱାନି ଆଇସିଙ୍ଗ୍‍ଁ ବା ନା ନମସ୍କାର୍‌ ଆପିତ୍‌ ।
ROM 16:14 ଆସୁଙ୍କ୍ରିତ, ପ୍ଲେଗୋନ୍‍, ହର୍ମିସ୍‍, ପାତ୍ରବା, ହରମାସ୍‍ ନି ୱାରି ୱାଲେ ମାନି କ୍ରିସ୍ଟିୟାନ୍‍ ତଡ଼ାନ୍‍କାଙ୍ଗ୍‍ ନି ତାଙ୍ଗିଁକାଙ୍ଗ୍‍ଁ ନମସ୍କାର୍‌ ୱେର୍‍ତୁ ।
ROM 16:15 ପିଲଲୋଗ ନି ଯୁଲିୟା, ନିରୁସ୍‍ ନି ୱାନି ତାଙ୍ଗିଁ ମାରି ଅଲୁମ୍ପା ନି ୱାରିୱାଲେ ମାନି ୱିଜୁ ଦାର୍ମୁଲୋକାଙ୍ଗ୍‍ଁ ନା ନମସ୍କାର୍‌ ୱେର୍‍ତୁ ।
ROM 16:16 ନିଜେନିଜେଦିଙ୍ଗ୍‍ଁ ନେଗେନ୍‌ତାନ୍‍ ନଣ୍ତ୍‍ଜି ନମସ୍କାର୍‌ କିଦୁ । କ୍ରିସ୍ତଦି ୱିଜୁ ମଣ୍ତଲି ମିଙ୍ଗିଁ ନମସ୍କାର୍‌ କିଜିନାତ୍‍ ।
ROM 16:17 ତଡ଼ାନ୍‍କୁ ନି ତାଙ୍ଗିଁକ୍‍, ବାତିଙ୍ଗ୍‌ ମାଲ୍‌ଜିନା, ମିର୍‌ ଆସ୍‍ତିମାନି ସିକିୟାଦି ବିରଦ୍‍ କିଜି ଏମେକାର୍‌ ମି ଲୋଇ ବାଗ୍‍ କିଦେଙ୍ଗ୍‍ଁ ଇଜି ବଦା କିନାର୍‌, ୱାରିମାଣାନ୍‍ ଆକତେବାଦୁ ।
ROM 16:18 ଏମେକାର୍‌ ଇୟାୱାଜା ପାଣିଦୁ ତେବାନାର୍‍, ୱାର୍‌ ପ୍ରବୁ କ୍ରିସ୍ତ ସେବା କିଏଜିନାର୍‍, ୱାର୍‌ କେବଲ ନିଜେଦି ପଟା ପସା କିଦେଙ୍ଗ୍‍ଁ ଆଗ୍‍ଡ଼ି । ବାସାଦି ସାଲାକି ନି ସୁରି ମାଟାଦାନ୍‌ ୱାର୍‌ ସିଲିସାତି ଲୋକା ଜିବନ୍‌ତିଙ୍ଗ୍‌ ବାଣ୍ତିସ୍‍ କିନାର୍‌ ।
ROM 16:19 ସୁସମାଚାର୍‌ ଉଣ୍ତିଙ୍ଗ୍‍ଁ ମି ବିସ୍‍ବାସ୍‍ ୱିଜେରେ ୱେର୍‌ଆମାନାର୍‌, ଇୟାଉଣ୍ତିଙ୍ଗ୍‍ଁ ନାନୁ ୱେଡ଼ିକା । ନାନୁ ବଦାକିନା, ମିର୍‌ ନେଗି ବିସୟ୍‍ତୁ ବୁଦିମାନିକାର୍‍ ଆଦୁ ମାରି ଅସତ୍‍ ବିସୟ୍‍ତୁ ମିସାମାଟ୍‍ ।
ROM 16:20 ଆକାଆତିଙ୍ଗ୍‍ଁ ସାନ୍ତି ସିନି ମାପୁରୁ ବେଗି ସୟତାନ୍‍ତିଙ୍ଗ୍‍ଁ ମି ପାଦାମ୍‍କା ଆଡ୍‍ଗି କିନାନ୍‍ । ପ୍ରବୁ ଜିସୁଦି ଦୟା ମି ୱାଲେ ମାନିତ୍‍ ।
ROM 16:21 ନା ୱାଲେ ଅର୍‍ସେପାଣିକିନି ତିମତି ମା ଜିହୁଦି ତଡ଼ାନ୍‍କୁ ଲୁକିୟ, ଜେସନ୍‍ ମାରି ସୋସିପାତ୍ର ମିଙ୍ଗିଁ ନମସ୍କାର୍‌ କିଜିନାର୍‍ ।
ROM 16:22 ଇୟା ଆକୁଦି ରାସ୍‍ତିକାନ୍‍ ତର୍ତ୍ତୀୟ ପ୍ରବୁଦି ଦର୍‍ତାନ୍‍ ମିଙ୍ଗିଁ ନମସ୍କାର୍‌ କିଜିନାନ୍‍ ।
ROM 16:23 ନା ସେବାକିନି ଗାୟ, ଆମାୱାନି ଇଲ୍‍ତୁ ପାର୍‍ତନା କିନି ମଣ୍ତଲି ଉଣ୍ତାନାର୍‍ ମାରି ଇୟା ଗାଡ଼୍‍ତି ପେରିକାନ୍‌ ଏରାସ୍ଟ ନି ତଡ଼ାନ୍‍ କ୍ୱାର୍ତ୍ତ ବା ମିଙ୍ଗିଁ ମାଡ଼ିସ୍‍ କିଜିନାନ୍‍ ।
ROM 16:24 ପ୍ରବୁ ଜିସୁ କ୍ରିସ୍ତଦି ଦୟା ମି ୱିଜେରିଙ୍ଗ୍‍ଁ ଆପିତ୍‌ ।
ROM 16:25 ରାଦୁ, ମାପୁରୁଦି ଗୌରବ୍‌ କିନାଟ୍‍ । ନାନୁ ପ୍ରଚାର୍‌ କିଜିମାନି ଜିସୁ କ୍ରିସ୍ତଦି ବିସୟ୍‍ତାନ୍‍ ସୁସମାଚାର୍ ନି ଜୁଗ୍‍ ଜୁଗ୍‍ ଆସ୍‌ସି ମାର୍‍ଗିଜିମାନି ମାଟା ସତ୍‍ ଇସାବ୍‍ତାନ୍‍ ମି ବିସ୍‍ବାସ୍‍ତିଙ୍ଗ୍‍ଁ ଆଟ୍‍ୱା ଇଡ୍‍ଦେଙ୍ଗ୍‍ଁ ଇଜି ମାପୁରୁ ଆଟ୍‌ନାନ୍‌ ।
ROM 16:26 ଆୟା ମାର୍‍ଗିତି ମାଟାଦି ସତ୍‍ୱିଜୁ ବାବବାଦିରି ଦାର୍ମୁସାସ୍ତ୍ରଦୁ ତରାୟ୍‍ ଆତାମାନାତ୍‌ ମାରି ଆକା ଇଲେଇ ୱିଜୁଦିନ୍‍ତି ପ୍ରବୁ ମାପୁରୁଦି ମାଣାନ୍‌ ୱିଜୁ ଲୋକା ଲୋଇ ପ୍ରଚାର୍‍ ଆଜିନାତ୍‍ । ତେନି ମାଣାନ୍‌ ୱିଜେରେ ବିସ୍‍ବାସ୍‍ କିଜି ମାପୁରୁଦି ମାଟା ମାନାଦେଙ୍ଗ୍‍ଁ ଆଟ୍‍ନାର୍‍ ।
ROM 16:27 ପ୍ରବୁ ଜିସୁ କ୍ରିସ୍ତଦି ମାଣାନ୍‌ ୱିଜୁନେସ୍‍ନି ଅରେନ୍‌ ମାପୁରୁଦି ଜୁଗ୍‌ ଜୁଗ୍‍ ଗୌରବ୍‍ ଆପିନ୍‌ । ଆମେନ୍‍ ।
1CO 1:1 ନାନ୍‌ ପାଉଲ, ମାପୁରୁଦି ଇଚ୍ଛାଦାନ୍‌ କ୍ରିସ୍ତ ଜିସୁଦି ଆସ୍‌କିଆତି ଅରେନ୍‍ ପ୍ରେରିତ୍‌ ସିସୁ, ମା ତଡ଼ାନ୍‌ ସୋସ୍ଥିନା,
1CO 1:2 କରନ୍ତି ଗାଡ଼୍‌ଦୁ ମାନି ମାପୁରୁଦି ମଣ୍ତଲି ଲାକ୍‌ତୁ ରାସ୍‌ସିନାନ୍‌ : ଆମାକାର୍‌ ମାପୁରୁଦି ପବିତ୍ର ଲୋକୁ ଆନି ଉଣ୍ତିଙ୍ଗ୍‌ ବଦାମାନାର୍‌ ମାରି ଜିସୁ କ୍ରିସ୍ତଦି ୱାଲେ ମିସାନି ମାଣ୍‌କୁ ମାପୁରୁଦି ଲୋକୁଆତା ମାନାର୍‌ ମାରି ୱିଜୁ ମା ପ୍ରବୁ ଜିସୁ କ୍ରିସ୍ତଦି ଉପାସନା କିଜିନାର୍‌ :
1CO 1:3 ମି ଉଣ୍ତିଙ୍ଗ୍‌ ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦିମାଣୁକୁ ଦୟା ମାରି ସାନ୍ତି ଆପିତ୍‌ ।
1CO 1:4 ଇରିଙ୍ଗ୍‌ କ୍ରିସ୍ତ ଜିସୁଦି ୱାଲେ ମିସାନିମାଣୁକୁ ମାପୁରୁ ମିଙ୍ଗିଁ ଆମା ଦୟା ସିତା ମାନାନ୍‌, ଆୟାଉଣ୍ତିଙ୍ଗ୍‌ ନାନ୍‌ ୱିଜୁଦିନ୍‌ ମି ବିସୟ୍‌ତାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିଜିନା,
1CO 1:5 ଇରିଙ୍ଗ୍‌ କ୍ରିସ୍ତଦି ୱାଲେ ମିସାତି ମାନିଙ୍ଗ୍‌ ମିର୍‌ ୱିଜୁ ବିସୟ୍‌ତି ସିକିୟାଦୁ ମାରି ୱିଜୁଜାତିଦି ବୁଦିଦୁ ବା ଦନି ଆତିମାନିଦେର୍‌ ।
1CO 1:6 ଇୟାୱାଜା କ୍ରିସ୍ତଦି ମାଟା ମିମାନୁ ସାକ୍ୟ ତିର୍‌ଆତା ମାନାତ୍‌ ।
1CO 1:7 ଆଦେଙ୍ଗ୍‌ ପ୍ରବୁ ଜିସୁ କ୍ରିସ୍ତଦି ୱାନିତାନିଙ୍ଗ୍‌ କାପ୍‌କିଜି ତେବାନି ବେଡ଼ାଦୁ ମି ଇନି ଆତ୍ମାଦି ଦାନ୍‍ତୁ ଉଣା ଆଏତ୍‍ ।
1CO 1:8 ଇୟାଉଣ୍ତିଙ୍ଗ୍‌ ୱାନ୍‌ ମିଙ୍ଗିଁ ସାରାସାରି ଦିନ୍‌ ସାନ୍ଦି ବା ତିର୍‌ ଇଡ୍‌ନାନ୍‌, ମା ପ୍ରବୁ ଜିସୁ କ୍ରିସ୍ତଦି ୱାନିନାଣ୍ତିଙ୍ଗ୍‌ ଏଣ୍ତେସ୍‌ ମିର୍‌ ନିନ୍ଦା ଆଇଦେର୍‍ ।
1CO 1:9 ଆମା ମାପୁରୁ ୱାନି ମାରିନ୍‌ ମା ପ୍ରବୁ ଜିସୁ କ୍ରିସ୍ତଦି ସାକା ପୟ୍‌ନି ଉଣ୍ତିଙ୍ଗ୍‌ ମିଙ୍ଗିଁ କୁକ୍‌ତାମାନାନ୍‌, ୱାନ୍‌ ୱିଜୁଦିନ୍‌ ବିସ୍‌ବାସ୍‌ ।
1CO 1:10 ଏ ତଡ଼ାନ୍‌କୁ ନି ତାଙ୍ଗିଁକି, ମା ପ୍ରବୁ ଜିସୁ କ୍ରିସ୍ତଦି ସାକ୍ତିଦାନ୍‌ ନାନ୍‌ ମିଙ୍ଗିଁ ଅନୁରଦ୍‌ କିଜିନା, ଏଣ୍ତେସ୍‌ ମିର୍‌ ୱିଜୁଲୋକୁ ୱାର୍‌ଗିଜିସାନିୱାଲେ ଉନ୍‌ଡ୍ରେ ମାଟା ଇନିଦେର୍‍, ମାରି ମି ଲୋଇ ଏର୍‌ପିସିସାନିକା ଆଏତ୍‍ । ମାତର୍‌ ମିର୍‌ ଉନ୍‌ଡ୍ରି ମୋନ୍‌ତାନ୍‌ ମାରି ଉନ୍‌ଡ୍ରି ବିଚାର୍‌ତାନ୍‌ ଉନ୍‌ଡ୍ରେମାନୁ ଆଦୁ ।
1CO 1:11 ଏ ନା ତଡ଼ାନ୍‌କୁ ନି ତାଙ୍ଗିଁକି, ଖ୍ଳୟୀଦି ଇଲୁଦାଣୁକୁନେ ଏସଲୋକ୍‌ ମି ବିସୟ୍‌ତାନ୍‌ ନା ଲାକ୍‌ତୁ ଇକା ୱେର୍‌ତାମାନାର୍‌, ମି ଲୋଇ ଏର୍‌ପିସିସାନିକା ମାନାତ୍‌ ।
1CO 1:12 ନା ମାଟାଦି ଏତ୍‌ ଇକା, ମିର୍‌ ୱିଜୁଲୋକ୍‌ ଆଇଆଇ ପାଣି କିଜିନିଦେର୍‌, ଏନ୍‌ ଏନ୍‌ ଆଜିନାର୍‌, ନାନୁ ପାଉଲତି ୱେନ୍‌କା ସୋଲ୍‌ସିନା, ମାରି ଏନ୍‌ ଏନ୍‌ ଆଜିନାର୍‌, ନାନୁ ଆପୋଲୋତି ୱେନ୍‌କା ସୋଲ୍‌ସିନା, ଏନ୍‌ ଏନ୍‌ ଆଜିନାର୍‌, ନାନୁ ପିତର୍‍ତି ୱେନ୍‌କା ସୋଲ୍‌ସିନା, ମାରି ଏନ୍‌ ଏନ୍‌ ଆଜିନାର୍‌, ନାନୁ କ୍ରିସ୍ତଦି ୱେନ୍‌କା ସୋଲ୍‌ସିନା ।
1CO 1:13 କ୍ରିସ୍ତ ଇନିକା ବାଗ୍‌ବାଗ୍‌ ଆତାମାନାନ୍‌ ? ପାଉଲ ଇନିକା ମି ଉଣ୍ତିଙ୍ଗ୍‌ କ୍ରୁସ୍‌କାଟ୍‌ତୁ ସାତା ମାର୍ହାନ୍‌ ? ମାରି ମିର୍‌ ଇନିକା ପାଉଲତି ଦର୍‌ତାନ୍‌ ଡୁବନ୍‌ ଅତିମାର୍‌ଇଦେର୍‌ ?
1CO 1:14 ନାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିଜିନା ଜେ କ୍ରିସ୍‍ପସ୍‍ ନି ଗାୟଙ୍ଗ୍‌ ଡ଼ିସ୍‌ତିଙ୍ଗ୍‌ ମି ଲୋଇରାନ୍‌ ମାରି ନାନ୍‌ ଏଙ୍ଗ୍‌ବା ଡୁବନ୍‌ ସିଏ ।
1CO 1:15 ଆୟାଉଣ୍ତିଙ୍ଗ୍‌ ମିର୍‌ ନା ଦର୍‌ତାନ୍‌ ଡୁବନ୍‌ ଅତାମାନାପ୍‌ ଇଜି ମି ଲୋଇରାନ୍‌ ଏନ୍‌ ଇନ୍‌ଡ୍ରେଙ୍ଗ୍‌ ଆଟ୍‍ଏନ୍‍ ।
1CO 1:16 ହୁଁ, ନାନ୍‌ ସ୍ତିପାନତିଙ୍ଗ୍‌ ମାରି ୱାରି ଇଲୁଦିୱାରିଙ୍ଗ୍‌ନେ ଡୁବନ୍‌ ସିତାମାନା; ମାତର୍‌ ଇକା ଡ଼ିସ୍‌ତିଙ୍ଗ୍‌ ମାରି ଏଙ୍ଗ୍‌ବା ନାନୁ ଡୁବନ୍‌ ସିତାମାନା ଇଜି ନାଙ୍ଗିଁ ଏତ୍‌ ରେଏଜିନା ।
1CO 1:17 ଇରିଙ୍ଗ୍‌ କ୍ରିସ୍ତ ନାଙ୍ଗିଁ ଡୁବନ୍‌ ସିନି ଉଣ୍ତିଙ୍ଗ୍‌ ପୋକତାଏନ୍‌, ମାତର୍‌ ୱାନ୍‌ ନାଙ୍ଗିଁ ସୁସମାଚାର୍‌ ପ୍ରଚାର୍‌ କିଦେଙ୍ଗ୍‌ ପୋକତାତାମାନାନ୍‌; ଆକାବା ଲୋକା ବୁଦିଦାନ୍‌ ସିଲେ, ଏସ୍ତିୱାଲେ କ୍ରିସ୍ତଦି କ୍ରୁସ୍‌କାଟ୍‌ତି ସାକ୍ତି ମାରି ପ୍ରଭାବ ବେକାର୍‌ ଆଏତ୍‍ ।
1CO 1:18 ଇରିଙ୍ଗ୍‌ ନାସ୍ଟୁ ଆଦେଙ୍ଗ୍‌ ସୋଲ୍‌ସିମାନି ଲୋକା ଉଣ୍ତିଙ୍ଗ୍‌ କ୍ରୁସ୍‌କାଟ୍‌ତି ମୁସ୍‌କୁରି ମାଟା ମୁର୍କୁ । ମାତର୍‌ ରକିୟା ପୟ୍‌ତିମାନି ମା ଉଣ୍ତିଙ୍ଗ୍‌ ଆକା ମାପୁରୁଦି ସାକ୍ତି ।
1CO 1:19 ଇରିଙ୍ଗ୍‌ ଦର୍ମସାସ୍ତ୍ରଦୁ ରାସ୍‌ତାମାନାତ୍‌ : “ନାନ୍‌ ଜ୍ଞାନ୍‌ମାନିୱାରି ଜ୍ଞାନ୍‌ ନାସ୍ଟୁ କିନାଟ୍‌, ମାରି ବୁଦିମାନିୱାରି ବୁଦି ଡ଼ିସ୍‌ସି କିନାଟ୍‌ ।”
1CO 1:20 ବୁଦି ଏମେ ? ସାସ୍ତ୍ରିର୍‍ ଏମେ ? ଇୟା ଯୁଗ୍‌ତି ସାଲାକି ଏମେ ? ମାପୁରୁ ଇନିକା ଦୁନିଆଦି ବୁଦିଦିଙ୍ଗ୍‌ ମୁର୍କୁ ଇଜି ଇନ୍‌ଏନ୍‌ ନୋ ?
1CO 1:21 ଇରିଙ୍ଗ୍‌ ମାପୁରୁ ୱାନି ପେରି ଜ୍ଞାନ୍‌ତାନ୍‌ ତିର୍‌ କିତାମାର୍ହାନ୍‌ ଜେ ଜଗତ୍‌ତି ଲୋକୁ ନିଜେଦି ଜ୍ଞାନ୍‌ଦାନ୍‌ ମାପୁରୁଙ୍ଗୁଁ ନେସ୍‌ତେଙ୍ଗ୍‌ ଆଟ୍‍ଏର୍‍ । ମାପୁ ପ୍ରଚାର୍‌ କିଜିମାନି ବାକ୍ୟଦି ତାଗ୍‌ଇମାଟା ସୁସମାଚାର୍‌ତୁ ବିସ୍‌ବାସ୍‌ କିଜିମାନି ଲୋକାଙ୍ଗ୍‌ ରକିୟା କିନି ଉଣ୍ତିଙ୍ଗ୍‌ ମାପୁରୁ ୱେଡ଼ିକା ଆତାନ୍‌ ।
1CO 1:22 ଇରିଙ୍ଗ୍‌ ଜିହୁଦିର୍‌ ସିନା ପୟ୍‌ନାର୍‌, ମାରି ଗ୍ରିକ୍‌କୁ ବୁଦି ପୟ୍‌ନାର୍‌ ।
1CO 1:23 ମାତର୍‌ ମାପୁ କ୍ରୁସ୍‌ଦି ମୁସ୍‌କୁ ସାତିମାନି କ୍ରିସ୍ତଙ୍ଗ୍‌ ପ୍ରଚାର୍‌ କିନାପ୍‌, ୱାନ୍‌ ଜିହୁଦିରି ଉଣ୍ତିଙ୍ଗ୍‌ ଏରେପ୍‌ନିୱାଜା ମାରି ଅଣଜିହୁଦିରି ଉଣ୍ତିଙ୍ଗ୍‌ ମୁର୍କୁଦିୱାଜା;
1CO 1:24 ମାତର୍‌ ଜିହୁଦି ଆପିନ୍‌ ମାରି ଅଣଜିହୁଦିରି ଆପିନ୍‌, ଆମାକାର୍‌ ଇଚ୍ଛାମାନାର୍‌, ୱାରି ଉଣ୍ତିଙ୍ଗ୍‌ କ୍ରିସ୍ତ ମାପୁରୁଦି ସାକ୍ତି ମାରି ମାପୁରୁଦି ଜ୍ଞାନ୍‌ଦିୱାଜା ।
1CO 1:25 ଆର୍‌ତିଙ୍ଗ୍‌ ମାପୁରୁଦି ମୁର୍କୁ ଇଜି ଏତ୍‌ ୱାନାତ୍‌ ବିସୟ୍‌ ଲୋକାଦି ଜ୍ଞାନ୍‌ ବାଦ୍‌ଲୁ ନାଣ୍ତ ଜ୍ଞାନ୍‌ ମାନାତ୍‌, ମାରି ମାପୁରୁଦି ଦୁର୍ବଳ ଇଜି ଏତ୍‌ ୱାନାତ୍‌ ବିସୟ୍‌ ଲୋକା ସାକ୍ତି ବାଦ୍‌ଲୁ ନାଣ୍ତ ସାକ୍ତି ।
1CO 1:26 ଏ ତଡ଼ାନ୍‌କୁ ତାଙ୍ଗିଁକି, ମାପୁରୁ କୁକ୍‌ନି ବେଡ଼ାଦୁ ମିର୍‌ ଏଣ୍ତେସ୍‌ ମାର୍‌ଇଦେର୍‌, ଆକା ଅଡ଼୍‌ବିଦୁ । ଦୁନିଆଦି ଇସାବ୍‌ତାନ୍‌ ଗାଦିଲୋକ୍‌ ଜ୍ଞାନ୍‌ରି ମାରି ଏସଲୋକ୍‌ ଅଦିକାର୍‌ରି ଡାଟ୍‌ମାନି ପରିବାର୍‌ ମାର୍ହାର୍‌ ।
1CO 1:27 ଇୟାଉଣ୍ତିଙ୍ଗ୍‌ ମାପୁରୁ ଜ୍ଞାନିରିଙ୍ଗ୍‌ ସେମାର୍‌ କିନି ଉଣ୍ତିଙ୍ଗ୍‌ ଜଗତ୍‌ତି ମୁର୍କୁରିଙ୍ଗ୍‌ ଆସ୍‌କିତାମାନାନ୍‌ ମାରି ସାକ୍ତିମାନିୱାରିଙ୍ଗ୍‌ ସେମାର୍‌ କିନି ଉଣ୍ତିଙ୍ଗ୍‌ ଜଗତ୍‌ତି ବପୁସିଲିୱାରିଙ୍ଗ୍‌ ଆସ୍‌କିତାମାନାନ୍‌,
1CO 1:28 ମାରି ଜଗତ୍‌ତି କାଣ୍‌ଗାଦୁ ଆମାକା ୱିଜୁ ନେଗି ବିସୟ୍‌, ଆୟାୱିଜୁଦିଙ୍ଗ୍‌ ନାସ୍ଟୁ କିନି ଉଣ୍ତିଙ୍ଗ୍‌; ଜଗତ୍‌ତି ବିସୟ୍‌କୁ, ତେବାତିମାନି ମାରି ନଗଣ୍ୟୱାରିଙ୍ଗ୍‌ ମାପୁରୁ ଆସ୍‌କିତାମାନାନ୍‌ ।
1CO 1:29 ଇବେଣ୍‌କୁ ନେସ୍‌ନିୱାଜା ଏନ୍‌ଆପିନ୍‌ ମାପୁରୁଦି ଆଗ୍‌ଡ଼ି ପେରିକାନ୍‌ ଇଜି ତରାଦେଙ୍ଗ୍‌ ଆଟ୍‍ଏନ୍‍ ।
1CO 1:30 ମାତର୍‌ ମାପୁରୁ ମିଙ୍ଗିଁ କ୍ରିସ୍ତ ଜିସୁଦି ୱାଲେ ମିସାକିତା ମାନାନ୍‌ ମାରି ୱାନ୍‌ ମାପୁରୁଦିମାଣୁକୁ ମା ଉଣ୍ତିଙ୍ଗ୍‌ ଜ୍ଞାନ୍‌ଦିୱାଜା କିତାମାନାନ୍‌, ୱାନି ମାଣ୍‌କୁ ମାପୁରୁଦି ଆଗ୍‌ଡ଼ି ମା ଜତାର୍ଥ ମିସାଜି ପୁନା ତିଆର୍‌ ଆଜି, ମାଡୁ ଦାର୍ମିକ ମାରି ପବିତ୍ର ଲୋକ୍‌ ଆଜି ରକିୟା ପୟ୍‌ତିମାନିକା ।
1CO 1:31 ମାରି, ଏଣ୍ତେସ୍‌ ଦର୍ମସାସ୍ତ୍ରଦୁ ରାସ୍‌ତାମାନାତ୍‌ : “ଏନ୍‌ ଗର୍ବ କିଦେଙ୍ଗ୍‌ ଇଚ୍ଛା, ୱାନ୍‌ ପ୍ରବୁଦିମାନୁ ଗର୍ବ କିପିନ୍‌ ।”
1CO 2:1 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମି ଲାକ୍‌ତୁ ମାପୁରୁଦି ସତ୍‌ତି ମାଟା ପ୍ରଚାର୍‌ କିନି ଉଣ୍ତିଙ୍ଗ୍‌ ସୋଲ୍‌ସିମାନିୱାଲେ ୱାର୍‌ଇ ମାଟେଙ୍ଗ୍‌ ମାରି ପେରିକାନ୍‌ୱାଜା ତରାଏତା ମାର୍‌ଆ ।
1CO 2:2 ମି ୱାଲେ ମାନି ବେଡ଼ାଦୁ ଜିସୁ କ୍ରିସ୍ତ, ଅର୍ତାତ୍‌ କ୍ରୁସ୍‌କାଟ୍‌ତୁ ମୁସ୍‌କୁ ୱାନି ସାତିକା ଜିସୁ କ୍ରିସ୍ତଙ୍ଗ୍‌ ଡ଼ିସ୍‌ତିଙ୍ଗ୍‌ ମିମାନୁ ମାରି ଇନି ବିସୟ୍‌ ନେସ୍‌ଇ ଉଣ୍ତିଙ୍ଗ୍‌ ନାନ୍‌ ଇଚ୍ଛା କିତା ।
1CO 2:3 ମାରି, ନାନ୍‌ ନାସ୍ତିୱାଲେ ଦୁର୍ବଳ ମାର୍ହା, ତିଲାଜି ମାରି ନାଣ୍ତତିଏଲ୍‌ତାନ୍‌ ମି ମାନୁ ମାର୍ହା ।
1CO 2:4 ଇୟାଉଣ୍ତିଙ୍ଗ୍‌ ନା ସିକିୟା ନି ପ୍ରଚାର୍‌, ଲୋକା ଜ୍ଞାନଦି ନେଗି ବାକ୍ୟ ଆଏଣ୍‌ଗା ମାପୁରୁଦି ଆତ୍ମା ମାରି ସାକ୍ତିଦି ପାର୍‌ମାଣ୍‌ ଆତାମାର୍‌ତା ।
1CO 2:5 ଆଦେଙ୍ଗ୍‌ ମି ବିସ୍‌ବାସ୍‌ ଏଣ୍ତେସ୍‌ ଲୋକାଦି ଜ୍ଞାନ୍‌ ମୁସ୍‌କୁ ମାନ୍‌ଏଣ୍‌ଗା, ଆକା ମାପୁରୁଦି ସାକ୍ତି ମୁସ୍‌କୁ ତେବାନାତ୍‌ ।
1CO 2:6 ମାରିବା ମାଡୁ ଆତ୍ମିକ ଜିବନ୍‌ତୁ ପିର୍‌ନି ଲୋକା ମାନୁ ବୁଦିଦି ମାଟା ୱେର୍‌ସିନା, ମାତର୍‌ ଆକା ଇୟା ଜୁଗ୍‌ତି ବୁଦି ଆଏତ୍‍ ମାରି ଇୟା ଦୁନିଆଦୁ ସାସନ୍‌ କିଜିମାନି ନେତାରି ଜ୍ଞାନ୍‌ ଆଏତ୍‍ ।
1CO 2:7 ନାନ୍‌ ମାପୁରୁଦି ସତ୍‌ତି ବୁଦିଦି ମାଟା ୱେର୍‌ସିନା, ଆୟା ଲୋକ୍‌ତିମାଣୁକୁ ଆଡ଼ାକ୍‌ତା ଇଟ୍‌ତାମାନାର୍‌, ମାରି ମା ଗୌରବ୍‌ଦି ଉଣ୍ତିଙ୍ଗ୍‌ ଦୁନିଆ ତିଆର୍‌ଆତି ଆଗ୍‍ଡ଼ିରାନ୍‍ନେ ମାପୁରୁ ଇୟାତାନିଙ୍ଗ୍‌ ତିଆର୍‌ କିତାମାର୍ହାନ୍‌ ।
1CO 2:8 ଇୟା ଦୁନିଆଦି ଆମା ସାସନ୍‍କିନିୱାରି ଲୋଇ ଏନ୍‌ ବୁଦିଦି ବିସୟ୍‌ ନେସ୍‌ଏନ୍‌ ମାର୍‌ର୍ହାନ୍‌, ଜଦି ୱାର୍‌ ଆକା ନେସ୍‌ତିମାରିଙ୍ଗ୍‌ ଗୌରବ୍‌ମୟ୍‌ ପ୍ରବୁଙ୍ଗୁଁ କ୍ରୁସକାଟ୍‌ତୁ ମୁସ୍‌କୁ ଡାକ୍‌ଏତାର୍‌ମାନ୍ଦି;
1CO 2:9 ଏଣ୍ତେସ୍‌ ଦର୍ମସାସ୍ତ୍ରଦୁ ରାସାତାମାନାତ୍‌ : “କାଣ୍‌ଗା ଆମାକା ସୁଡ଼ୁଏତ୍‌, ଗିତଣି ଆମାକା ୱେନ୍‌ଏତ୍‌, ଆମାକା ଗଟାନିକା ଏନ୍‌ ଅଡ଼୍‌ବିଏନ୍‌, ଆୟାୱିଜୁ ବିସୟ୍‌ ମାପୁରୁ ନିଜେଦି ଜିବନ୍‌ନୋନିୱାରି ଉଣ୍ତିଙ୍ଗ୍‌ ତିଆର୍‌ କିତାମାନାନ୍‌ ।”
1CO 2:10 ମାତର୍‌ ମାପୁରୁ ମା ଉଣ୍ତିଙ୍ଗ୍‌ ୱାନି ଆତ୍ମାଦାନ୍‌ ମାର୍‌ଗିତି ବିସୟ୍‌ ୱିଜୁ ୱେର୍‌ତା ମାନାନ୍‌; ଆୟା ଆତ୍ମା ନେ ମାପୁରୁଦି ନାଣ୍ତଲୋଇରି ବିସୟ୍‌କୁ ୱିଜୁ ପୟ୍‌ନାତ୍‌ ।
1CO 2:11 ଲୋକ୍‌ତି ବିସୟ୍‌ୱିଜୁ ଲୋକ୍‌ତିମାନୁ ମାନି ଆତ୍ମାଦିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ନେସ୍‌ନାନ୍‌ । ଆୟାୱାଜା ମାପୁରୁଦି ବିସୟ୍‌ୱିଜୁ ମାପୁରୁଦି ଆତ୍ମାଦିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ନେସ୍‌ତେଙ୍ଗ୍‌ ଆଟ୍‍ଏନ୍‍ ।
1CO 2:12 ଏଣ୍ତେସ୍‌ ମାପୁରୁଦି ମାଣାନ୍‌ ମାଙ୍ଗିଁ ଦୟାଦାନ୍‌ ସିତିମାନି ବିସୟ୍‌କୁୱିଜୁ ମାଡୁ ନେସ୍‌ତେଙ୍ଗ୍‌ ଆଟ୍‍ନିକା, ଇୟାଉଣ୍ତିଙ୍ଗ୍‌ ମାଡୁ ଜଗତ୍‌ତି ଆତ୍ମା ପୟ୍‌ଏଣ୍‌ଗା ମାପୁରୁଦି ଆତ୍ମା ପୟ୍‌ତିମାନିକା ।
1CO 2:13 ଆଦେଙ୍ଗ୍‌ ନେସ୍‌ତିମାନି ବୁଦିଦି ଲୋକା ଲାକ୍‌ତୁ ନେସ୍‌ତି ସତ୍‌ତିକା ୱେର୍‌ନିୱାଲେ ମାପୁ ଦୁନିଆଦି ବୁଦିଦାନ୍‌ ମାଟା ଇନ୍‌ଏପ୍‌ ମାନାପ୍‌, ମାତର୍‌ ଆତ୍ମିକ ବିସୟ୍‌ୱିଜୁ ଆତ୍ମିକ ବିସୟ୍‌ଦାନ୍‌ ବୁଜାକିଜି ପବିତ୍ରଆତ୍ମାଦାନ୍‌ ନେସ୍‌ତିମାନି ବାକ୍ୟଦାନ୍‌ ୱେର୍‌ନିକା ।
1CO 2:14 ମାତର୍‌ ଦୁନିଆଦି ଲୋକୁ ମାପୁରୁଦି ଆତ୍ମାଦି ବିସୟ୍‌କୁ ମାନାଏନ୍‌, ଇରିଙ୍ଗ୍‌ ଇୟାୱିଜୁ ୱାନି ଲାକ୍‌ତୁ ମୁର୍କୁ, ମାରି ୱାନ୍‌ ଆୟାୱିଜୁ ବୁଜାଦେଙ୍ଗ୍‌ ଆଟ୍‍ଏନ୍‍, ଇରିଙ୍ଗ୍‌ କେବଲ ଆତ୍ମାଦୁମାନି ଲୋକୁ ଆୟାୱିଜୁଦିଙ୍ଗ୍‌ ବିଚାର୍‌ କିଦେଙ୍ଗ୍‌ ଆଟ୍‍ନାନ୍‍ ।
1CO 2:15 ମାତର୍‌ ଏମେମାନି ଲୋଇ ମାପୁରୁଦି ଆତ୍ମା ତେବାନାତ୍‌, ୱାନ୍‌ ୱିଜୁ ବିସୟ୍‌ ବୁଜାଦେଙ୍ଗ୍‌ ଆଟ୍‍ନାନ୍‍, ମାରି ଏନ୍‌ ୱାନି ବିଚାର୍‌ କିଏନ୍‌ ।
1CO 2:16 ଦର୍ମସାସ୍ତ୍ରଦୁ ଏଣ୍ତେସ୍‌ ରାସାତାମାନାତ୍‌ : “ଏନ୍‌ ପ୍ରବୁଦି ମୋନ୍‌ତିଙ୍ଗ୍‌ ବୁଜାଦେଙ୍ଗ୍‌ ଆଟ୍‍ନାନ୍‍ ? ଏନ୍‌ ୱାନିଙ୍ଗ୍‌ ସିକିୟା ସିଦେଙ୍ଗ୍‌ ଆଟ୍‍ନାନ୍‍ ?” ୱାନ୍‌ ଏନ୍‌ଆପିନ୍‌, ମାପୁ କ୍ରିସ୍ତଦି ମୋନ୍‌ତିଙ୍ଗ୍‌ ମାନାତାମାନାପ୍‌ ।
1CO 3:1 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମାପୁରୁଦି ଆତ୍ମାମାନି ଲୋକା ୱାଲେ ୱାର୍‌ଗିଜିସାତି ୱାଜା ମି ୱାଲେ ୱାର୍‌ଗିଜିସାଏ । ମାତର୍‌ ନାନ୍‌ ମିଙ୍ଗିଁ ଇୟା ଜଗତ୍‌ତି ଲୋକୁ ମାରି କ୍ରିସ୍ତଦି ବିସ୍‌ବାସ୍‌ତୁ ଇସ୍ରିୱାରିଙ୍ଗ୍‌ ୱେର୍‌ତି ୱାଜା ମିଙ୍ଗିଁ ୱେର୍‌ତା ।
1CO 3:2 ନାନ୍‌ ମିଙ୍ଗିଁ ପାଲୁ ଉଟ୍‌ପିସ୍‌କିଜି ଆଇ କାଦି ସିଏତା, ଇରିଙ୍ଗ୍‌ ମିର୍‌ ଆକା ଉଣ୍ତେଙ୍ଗ୍‌ ଇଚ୍ଛା ସିଲେତାତ୍‍, ମାରି ଇଲେଇବା ଇଚ୍ଛା ସିଲେତ୍‌ ।
1CO 3:3 ଇଲେଇବା ମିର୍‌ ଦୁନିଆଦି ଲୋକା ୱାଜା ଜିଜିମାଡ଼ିଜିନିଦେର୍‌ । ମି ଲୋଇ ଆକାର୍‍ ମାରି ନିଜେନିଜେଦି ମାନୁ ଜାଟିଜଗଡ଼ା ତେବାନାତ୍‌; ଇବେଣ୍‌କୁ ଇନିକା ମିର୍‌ ମେନ୍ଦଲଇସାବ୍‌ତାନ୍‌ ମାରି ଦୁନିଆଦିକା ଇଜି ପାର୍‌ମାଣ୍‌ ଆଏଜିନିଦେର୍‌ ?
1CO 3:4 ମି ଲୋଇରାନ୍‌ ଅରେନ୍‍ ଇନାନ୍‌, ନାନ୍‌ ପାଉଲତି ୱାଲେ ମାନିକିନ୍ଧା, ମାରି ଅରେନ୍‍ ଇନାନ୍‌, ନାନ୍‌ ଆପୋଲୋଦି ୱାଲେ ମାନିକିନ୍ଧା, ନାସ୍ତିୱାଲେ ଇନିକା ମିର୍‌ ଦୁନିଆଦି ଲୋକା ୱାଜା ସାଲାବୁଲା କିଇଜିନିଦେର୍‌ ?
1CO 3:5 ଆପୋଲୋ ଏନ୍‌ ? ମାରି ପାଉଲ ଏନ୍‌ ? ୱାର୍‌ ମାପୁରୁଦି ସେବାକିନିକାର୍‌, ମିଙ୍ଗିଁ ବିସ୍‌ବାସ୍‌ କିଦେଙ୍ଗ୍‌ ମାପୁ ସାହାଜ୍ୟ କିଜିନାପ୍‌ । ମାପୁରୁ ମା ମାଣ୍‌କୁ ୱିଜେରିଙ୍ଗ୍‌ ଆମା ପାଣିଦୁ ଆସ୍‌କିତାମାନାନ୍‌, ମାପୁ ଆୟା ପାଣି କିଜିନାପ୍‌ ।
1CO 3:6 ନାନ୍‌ ଉରୁତା ମାନା, ଆପୋଲୋ ଆବେନ୍‌ ଏରୁ ସିତାମାନାନ୍‌, ମାତର୍‌ ମାପୁରୁ ପିରିସ୍‌ କିତାମାନାନ୍‌ ।
1CO 3:7 ମାରି, ଏନ୍‌ ଉରୁନାନ୍‌ ମାରି ଏନ୍‌ ଏରୁ ସିନାନ୍‌, ୱାନ୍‌ ଇନିକା ସିଲେ, ମାତର୍‌ ପିରିସ୍‌ କିତାମାନାନ୍‌ ଜେ ମାପୁରୁ, ୱାନ୍‌ ପେରିକାନ୍‌ ।
1CO 3:8 ଏନ୍‌ ଉରୁନାନ୍‌ ମାରି ଏନ୍‌ ଏରୁ ସିନାନ୍‌, ଆୟା ରିଏର୍‌ ସାମାନ୍‌, ଇରିଙ୍ଗ୍‌ ମାପୁରୁ‌ ୱିଜେରିଙ୍ଗ୍‌ ନିଜେ ନିଜେଦି ପାଣିଦି ଇସାବ୍‌ତାନ୍‌ ପୁରସ୍କାର୍‌ ସିନାନ୍‌ ।
1CO 3:9 ଇରିଙ୍ଗ୍‌ ମାପୁ ମାପୁରୁଦି ୱାଲେ ପାଣିକିଜିନାପ୍‌; ମିର୍‌ ମାପୁରୁଦି କିଡ଼ିଇ ମାରି ମାପୁରୁଦି ଇଲୁ ।
1CO 3:10 ନାଙ୍ଗିଁ ସିତିମାନି ମାପୁରୁଦି ଦୟା ଇସାବ୍‌ତାନ୍‌ ନାନ୍‌ ଅରେନ୍‍ ବୁଦିଦି ଇଲୁକୁତିଆର୍‌କିନିମେସ୍ତ୍ରି ୱାଜା ମୁଲୁକାଲୁ ପୋକ୍‌ତାମାନା, ଆଇକାନ୍‍ ଅରେନ୍‍ ଇୟା ମୁଲୁକାଲୁ ମୁସ୍‌କୁ ତିଆର୍‌ କିଜିନାନ୍‌ । ମାତର୍‌ ୱିଜୁ ଲୋକୁ ଆୟା ମୁସ୍‌କୁ ଏଣ୍ତେସ୍‌ ତିଆର୍‌ କିଜିନାନ୍‌ ଆୟା ବିସୟ୍‌ତାନ୍‌ ଜାଗ୍‌ରାତ୍‌ ଆନିକା ମାନାତ୍‌ ।
1CO 3:11 ଇରିଙ୍ଗ୍‌ ମାପୁରୁ ଜିସୁ କ୍ରିସ୍ତଙ୍ଗ୍‌ ଉନ୍‌ଡ୍ରେନେମାତର୍‌ କୁନାନ୍ଦିକାଲୁ କିଜି ତିଆର୍‌ କିତାମାନାନ୍‌; ଆୟାତାନିଙ୍ଗ୍‌ ଡ଼ିସ୍‌ସି ଆଇ ଇନି କୁନାନ୍ଦିକାଲୁ ତିଆର୍‌ ଆଦେଙ୍ଗ୍‌ ଆଟ୍‍ଏତ୍‍ ।
1CO 3:12 ଜଦି ଏନ୍‌ ଆୟା କୁନାନ୍ଦିକାଲୁ ମୁସ୍‌କୁ ବାଙ୍ଗାଁରାମ୍‍, ୱେଣ୍ତି, ନାଣ୍ତଦାରାଦି କାଲୁଦି ମୁସ୍‌କୁ ତିଆର୍‌ କିନାନ୍‌ ମାରି ଏନ୍‌ ଏନ୍‌ ମାରାକ୍‌, ଲାଟା ମାରି ପିରି ଦାନ୍‌ ତିଆର୍‌ କିନାନ୍‌,
1CO 3:13 ଆର୍‌ତିଙ୍ଗ୍‌ “କ୍ରିସ୍ତଦି ଡ଼େସିୱାନି ଦିନ୍‌ତୁ” ୱିଜୁ ଲୋକାଦି ପାଣି ଏଣ୍ତେସ୍‌ନାନିକା, ଆକା ୱେଙ୍ଗିଁନାତ୍‌, ଇରିଙ୍ଗ୍‌ ଆୟାନାଣ୍ତିଙ୍ଗ୍‌ ସିସୁଦି ୱାଲେ ୱେଙ୍ଗିଁନାତ୍‌, ମାରି ୱିଜୁ ଲୋକାଦି ପାଣି ଏଣ୍ତେସ୍‌ନାନିକା, ଆୟା ସିସୁ ପରିକା କିନାତ୍‌ ।
1CO 3:14 କୁନାନ୍ଦିକାଲୁ ମୁସ୍‌କୁ ଆମାୱାନି ତିଆର୍‌କିତିମାନି ପାଣି ସିସୁଦି ପରିକାଦୁ ଆର୍‌ଏଣ୍‌ଗା ତେବାନାନ୍‌, ଆର୍‌ତିଙ୍ଗ୍‌ ୱାନ୍‌ ପୁରସ୍କାର୍‌ ପୟ୍‌ନାନ୍‌ ।
1CO 3:15 ଜଦି ଆମାୱାନି ପାଣି ଦ୍ୱଂସ ଆନାତ୍‌, ୱାନିନ୍ଦିନେ ନାସ୍ଟୁ ଆନାତ୍‌, ମାରି ୱାନ୍‌ ନିଜେ ରକିୟା ପୟ୍‌ନାନ୍‌, ମାତର୍‌ ଆକା ସିସୁ ଲୋଇ ମାଟ୍‌ସି ବୁଲାତି ୱାଜା ଆନାତ୍‌ ।
1CO 3:16 ମିର୍‌ ସତ୍‌ତାନ୍‌ ନେସ୍‌ତୁ ଜେ ମିର୍‌ ମାପୁରୁଦି ମନ୍ଦିର୍‌, ମାରି ମାପୁରୁଦି ଆତ୍ମା ମି ଲୋଇ ତେବାନାତ୍‌ ।
1CO 3:17 ଜଦି ଏନ୍‌ ମାପୁରୁଦି ମନ୍ଦିର୍‌ତିଙ୍ଗ୍‌ ନାସ୍ଟୁ କିନାନ୍‌, ଆର୍‌ତିଙ୍ଗ୍‌ ମାପୁରୁ ୱାନିଙ୍ଗ୍‌ ନାସ୍ଟୁ କିନାନ୍‌; ଇରିଙ୍ଗ୍‌ ମାପୁରୁଦି ମନ୍ଦିର୍‌ ପବିତ୍ର, ଆୟା ମନ୍ଦିର୍‌ ମିର୍‌ ।
1CO 3:18 ଏନ୍‌ ନିଜେଦିଙ୍ଗ୍‌ ବାଣ୍ତିସ୍‌ କିମାକିନ୍‌ । ଜଦି ଏନ୍‌ ଇୟା ଦୁନିଆଦୁ ମି ଲୋଇରାନ୍‌ ନିଜେଦିଙ୍ଗ୍‌ ବୁଦି ଇଜି ଅଡ଼୍‌ବିନାନ୍‌, ଆର୍‌ତିଙ୍ଗ୍‌ ୱାନ୍‌ ଏଣ୍ତେସ୍‌ ବୁଦି ଆଦେଙ୍ଗ୍‌ ଆଟ୍‍ନାନ୍‍, ଇୟାଉଣ୍ତିଙ୍ଗ୍‌ ୱାନ୍‌ ମୁର୍କୁ ଆଦେଙ୍ଗ୍‌ ପଡ଼ାନାତ୍‌ ।
1CO 3:19 ଇରିଙ୍ଗ୍‌ ଇୟା ଜଗତ୍‌ତି ଆଗ୍‌ଡ଼ି ଆମାକା ବୁଦି, ଆକା ମାପୁରୁଦି ଲାକ୍‌ତୁ ମୁର୍କୁଦିକା । ଦର୍ମସାସ୍ତ୍ରଦୁ ରାସ୍‌ତାମାନାତ୍‌, “ମାପୁରୁ ବୁଦିଦିଲୋକାଙ୍ଗ୍‌ ୱାରି ସାଲାକିଦିଙ୍ଗ୍‌ ଆସ୍‌ନାନ୍‌ ।”
1CO 3:20 ମାରିଡ଼େସି ସାସ୍ତ୍ରଦୁ ରାସାତାମାନାତ୍‌ ଜେ, “ପ୍ରବୁ ନେସ୍‌ନାନ୍‌ ଜେ ବୁଦିଦିଲୋକାରି ସିନ୍ତା ବେକାର୍‌ ।”
1CO 3:21 ମାରି, ଏନ୍‌ ଲୋକ୍‌ତିମାନୁ ଗର୍ବ କିମାକିନ୍‌ । ସତ୍‌ତାନ୍‌ ୱିଜୁ ବିସୟ୍‌ ମିଦିନେ ।
1CO 3:22 ପାଉଲ, ଆପୋଲୋ, ପିତର୍‍, ଇୟା ଜଗତ୍‌, ଜିବନ୍‌ ମାରି ସାନିକା, ଇଲେଇ ମାରି ବବିସତ୍‌ ୱିଜୁ ମିଦିନେ ।
1CO 3:23 ମାତର୍‌ ମିର୍‌ କ୍ରିସ୍ତଦି ଲୋକୁ ମାରି କ୍ରିସ୍ତ ମାପୁରୁଦିକାନ୍‌ ।
1CO 4:1 ଲୋକୁ ମାଙ୍ଗିଁ କ୍ରିସ୍ତଦି ସେବାକିନିକାର୍‌ ଇଜି ୱେର୍‌ନିକା ମାନାତ୍‌ । ମାପୁରୁ ମାଙ୍ଗିଁ ମାର୍‌ଗିତି ସତ୍‌ତି ବିସୟ୍‌ ଗୁମୁସ୍ତା କିତାମାନାନ୍‌ ।
1CO 4:2 ମାରି, ଇୟାୱାଜା ଦାଇତ୍‌ ମାନାତିମାନି ଲୋକୁ ନିଜେଦି ପ୍ରବୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ଆନିକା ଅରେନ୍‍ ଦର୍‌କାର୍‌ ।
1CO 4:3 ମାତର୍‌ ମି ମାଣ୍‌କୁ ମାରି ଆମା ଇନି ବିଚାର୍‌କିନି ସବାଦି ମାଣ୍‌କୁ ବିଚାର୍‌ ଆନି ଉଣ୍ତିଙ୍ଗ୍‌ ନାନୁ ସିନ୍ତା ସିଲେ, ଇୟାୱାଜା ନୋ ନାନ୍‌ ନିଜେ ବା ନିଜେଦି ବିଚାର୍‌ କିଏଜିନା ।
1CO 4:4 ଇରିଙ୍ଗ୍‌ ନାନ୍‌ ନିଜେଦି ବିରୁଦ୍‌ତାନ୍‌ ମାନି ମାଟା ମୋନ୍‌ତୁ ନେସ୍‌ଏ । ମାରିବା ଇବେନୁ ନାନ୍‌ ଦସ୍‌ସିଲେତ୍‌ ଇଜି ପାରାମାଣ୍‌ କିଆୟ୍‌ଆଏ । ମାତର୍‌ ନା ବିଚାର୍‌ ପ୍ରବୁ କିନାନ୍‌ ।
1CO 4:5 ଆଦେଙ୍ଗ୍‌, ବେଡ଼ାଦି ଆଗ୍‍ଡ଼ିନେ ପ୍ରବୁ ବିଚାର୍‌ କିଦେଙ୍ଗ୍‌ ୱାନି ସାନ୍ଦି କାପ୍‌କିଦୁ । ଇନି ବିସୟ୍‌ ବିଚାର୍‌ କିମାଟ୍‌ । ୱାନ୍‌ ସିକାଟିଦୁ ମାର୍‌ଗିତିମାନି ବିସୟ୍‌କୁୱିଜୁ ଜାୟ୍‌ତୁ ତର୍‌ନାନ୍‌, ମାରି ଲୋକା ମୋନ୍‌ତୁ ମାର୍‌ଗିତିମାନି ମାଟେଙ୍ଗ୍‌ୱିଜୁ ୱେକ୍‌ନାନ୍‌; ନାସ୍ତିୱାଲେ ୱିଜୁ ଲୋକୁ ମାପୁରୁଦିମାଣୁକୁ ପ୍ରସଂସା ପୟ୍‌ନାର୍‌ ।
1CO 4:6 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମି ସିକିୟା ଉଣ୍ତିଙ୍ଗ୍‌ ଇୟାୱିଜୁ ମାଟେଙ୍ଗ୍‌ ନା ନିଜେଦିଙ୍ଗ୍‌ ମାରି ଆପୋଲୋଙ୍ଗ୍‌ ସୁଡ଼ୁଜି କାତା ୱେର୍‌ତା, ଏଣ୍ତେସ୍‌ “ସାସ୍ତ୍ରଦୁ ଆମାକା ରାସାତା ମାନାତ୍‌, ଆବେନୁ ତାନିମାଣୁକୁ ଆଗ୍‌ଡ଼ି ସୋଲ୍‌ମାଟ୍‌ ।” ଇକା ମିର୍‌ ମା ମାଣ୍‌କୁ ଅଜାଦୁ, ମାରି ଏଣ୍ତେସ୍‌ ମି ଲୋଇରାନ୍‌ ଏନ୍‌ ଅରେନ୍‍ୱାନି ଅସି ଗର୍ବ କିମାକିନ୍‌ ମାରି ଅରେନ୍‍ୱାନିଙ୍ଗ୍‍ ଅସି ଡ଼ିସ୍‌ମାକିନ୍‌ ।
1CO 4:7 ଇରିଙ୍ଗ୍‌ ଏନ୍‌ ମିଙ୍ଗିଁ ପେରିକାନ୍‌ କିତାମାନାନ୍‌ ? ମାରି, ଆମାକା ମିର୍‌ ଦାନ୍‍ ୱାଜା ମାପୁରୁଦିମାଣୁକୁ ପୟ୍‌ଇଦେର୍‌, ଇୟାୱାଜା ମିଦି ଇନିକା ମାନାତ୍‌ ? ମାତର୍‌ ଜଦି ମିର୍‌ ଆକା ଦାନ୍‌ତିୱାଜା ପୟ୍‌ତିମାନିଦେର୍‌, ଆର୍‌ତିଙ୍ଗ୍‌ ଆକା ଦାନ୍‌ତି ୱାଜା ପୟ୍‌ଇତିୱାଜା ଏନ୍ଦା ଗର୍ବ କିଜିନିଦେର୍‌ ?
1CO 4:8 ମି ଦର୍‌କାର୍‌ତି ୱିଜୁ ବିସୟ୍‌ ପୟ୍‌ତି ୱିସ୍‌ତିଦେର୍‌ନି ? ମିର୍‌ ଇନିକା ମାଜନ୍‌ ଆତିଦେର୍‌ନି ? ମାଙ୍ଗିଁ ଡ଼ିସ୍‌ସି ମିର୍‌ ଇନିକା ଅରେନ୍‍ ଅରେନ୍‍ ରାଜା ଆତିମାନିଦେର୍‌ ? ସତ୍‌ତାନ୍‌, ମିର୍‌ ରାଜା ଆତିମାରିଙ୍ଗ୍‌ ନେଗେନ୍‌ ଆତାତ୍‌ମାନ୍ଦି, ଏଣ୍ତେସ୍‌ ମାପ୍‌ ବା ମି ୱାଲେ ରାଜା ଆଦେଙ୍ଗ୍‌ ଆଟ୍‌ତାପ୍‌ମାନ୍ଦି ।
1CO 4:9 ଇରିଙ୍ଗ୍‌ ନାଙ୍ଗିଁ ଏତ୍‌ ୱାନାତ୍, ମା ୱାଜା ପ୍ରେରିତ୍‌ ସିସୁରିଙ୍ଗ୍‌ ମାପୁରୁ ୱିଜେରି ସାରାସାରିୱେନ୍‌କାରିବାଗ୍‌ତୁ ଇଟ୍‌ତାମାନାନ୍‌ । ନେସ୍‌ନିୱାଜା ସାନି ଦଣ୍ତବଗେ କିଜି ୱିଜୁ ଜଗତ୍‌ତି ଲୋକୁ ମାରି ଦୁତ୍‌କା ଲାକ୍‌ତୁ ସେମାର୍‌ଆନି ଲୋକା ୱାଜା ମାଙ୍ଗିଁ ୱାନ୍‌ ଇଟ୍‌ତାମାନାନ୍‌ ।
1CO 4:10 ମାପୁ କ୍ରିସ୍ତଦି ଉଣ୍ତିଙ୍ଗ୍‌ ମୁର୍କୁ ଇଜି ଜାଣାଆତାମାନାପ୍‌ । ମାତର୍‌ ମିର୍‌ କ୍ରିସ୍ତଦିମାନୁ ବୁଦିମାନିକିଦେରା; ମାପୁ ସାକିସିଲିଲୋକୁ, ମାତର୍‌ ମିର୍‌ ସାକ୍ତିମାନିକିଦେରା । ମିର୍‌ ସନ୍‌ମାନ୍‌, ମାତର୍‌ ମାପୁ ସନ୍‌ମାନ୍‌ ଆଏପ୍‌ ।
1CO 4:11 ମାପୁ ଇଲେଇବା ବାଙ୍ଗାଁ ମାରି ଏରିକି, କିଜିତି ଆଙ୍ଗିଁ ଆରାତାପ୍‌ ମାରି ଇନିଆଁଆନିଆଁ ବୁଲାଜିନାପ୍‌ ମାଡ୍‌ତିନ୍‌ଜିନାପ୍‌ ମାରି ତେବାନି ଇଲୁ ସିଲେତ୍‌ ।
1CO 4:12 ନାଣ୍ତ କାସ୍ଟୁପାଣି କିଜି ମାପୁ ଦିନ୍‌ତିଙ୍ଗ୍‌ ଦିନ୍‌ ଜିରାଜି ସଲ୍‌ସିନାପ୍‌ । ଏନ୍‌ ମାଙ୍ଗିଁ ଆନାଦୁରିଆ ଇଟ୍‌ତିଙ୍ଗ୍‌, ମାପୁ ୱାନିଙ୍ଗ୍‌ ଆସିର୍ବାଦ୍‌ କିନାପ୍‌ । କାସ୍ଟୁ ପୟ୍‌ଜି, ସାସ୍‌ କିଜିନାପ୍‌ ।
1CO 4:13 ଅପମାନ୍‌ ଆଜି ମିସାନି ମାଟା ୱେର୍‌ସିନାପ୍‌, ଇୟାସାନ୍ଦିବା ମାପୁ ଦୁନିଆଦି କାସ୍‌ରା ୱାଜା ଆତାମାନାପ୍‌, ୱିଜେରି ଉଣ୍ତିଙ୍ଗ୍‌ କିଟିଙ୍ଗ୍‌ତିରି ୱାଜା ଆତାମାନାପ୍‌ ।
1CO 4:14 ନାନ୍‌ ମିଙ୍ଗିଁ ସେମାର୍‌ କିନି ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌କୁ ରାସ୍‌ଏ, ମାତର୍‌ ମିର୍‌ ନା ଲାଡ୍‍ତି କଡ଼ର୍‌ ଆତି ମାନିଙ୍ଗ୍‌ ନେସ୍‌ତେଙ୍ଗ୍‌ ମାରି ସେତ୍‌ନା ଆନି ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌କୁ ରାସ୍‌ସିନା ।
1CO 4:15 ଇରିଙ୍ଗ୍‌ କ୍ରିସ୍ତଦି ଜିବନ୍‌ତୁ ମି ଗାଦିଲୋକ୍‌ ଦାର୍ମୁଗୁରୁର୍‌ ତେବାନାର୍‌ । ମାତର୍‌ ମି ବୁବା ଅରେନ୍‍ । ମି ଲାକ୍‌ତୁ ସୁସମାଚାର୍‌ ପ୍ରଚାର୍‌ କିନି ମାଣ୍‌କୁ କ୍ରିସ୍ତ ଜିସୁଦିମାନୁ ନାନ୍‌ ମି ବୁବା ୱାଜା ଆତାମାନା ।
1CO 4:16 ଆଦେଙ୍ଗ୍‌ ନାନୁ ମିଙ୍ଗିଁ ଅନୁରଦ୍‌ କିଜିନା, ମିର୍‌ ନା ୱେନ୍‌କା ରାଦୁ ।
1CO 4:17 କ୍ରିସ୍ତଦି ଜିବନ୍‌ତୁ ନା ଲାଡ୍‍ତି ନି ବିସ୍‌ବାସ୍‌ତି ମାରିନ୍‌ ତିମତିଙ୍ଗ୍‌ ମି ଲାକ୍‌ତୁ ପୋକ୍‌ତାଜିନା । ଏଣ୍ତେସ୍‌ ନାନ୍‌ ଜିସୁ କ୍ରିସ୍ତଦିମାନୁ ତେବାଜି ଆମା ପୁନି ଜିବନ୍‌ଜାପନ୍‌ କିଜିନା ମାରି ୱିଜୁତରିନ୍‌ ୱିଜୁ ମଣ୍ତଲିଆଙ୍ଗାଁ ଆମା ୱିଜୁ ସିକିୟା ୱେର୍‌ସିମାର୍‌ଆ, ଆକା ୱାନ୍‌ ମିଙ୍ଗିଁ ଏତ୍‌ କିବିସ୍‌କିନା ସିନାନ୍‌ ।
1CO 4:18 ନାନ୍‌ ମି ଲାକ୍‌ତୁ ସଲ୍‌ଏ ଇଜି ଅଡ଼ବିଜି ଏନ୍‌ ଏନ୍‌ ମେନ୍ଦଲ୍‌ତୁ ୱେଡ଼ିକା ଆତାମାନାର୍‌ ।
1CO 4:19 ମାତର୍‌ ଜଦି ମାପୁରୁ ବଦା କିତିଙ୍ଗ୍‌, ନାନ୍‌ ମି ଲାକ୍‌ତୁ ଦାପ୍ରେ ୱାନା; ମାରି, ଆକାର୍‍ ଗର୍ବ କିଜିନାର୍‌, ୱାରି ମାଟା ସିଲେ, ମାତର୍‌ ସତ୍‌ତାନ୍‌ ୱାରି ଏସ ସାକ୍ତିମାନାତ୍‌, ଆକା ନାନୁ ସୁଡ଼ୁନା ।
1CO 4:20 ଇରିଙ୍ଗ୍‌ ମାପୁରୁଦି ରାଜି କେବଲ ମାଟାଦି ବିସ୍‌ୟ ସିଲେ, ମାତର୍‌ ସାକ୍ତିଦି ବିସ୍‌ୟ ।
1CO 4:21 ମି ଇଚ୍ଛା ଇନିକା ? ନାନ୍‌ ଇନିକା ମିଙ୍ଗିଁ ସାସନ୍‌ କିନି ଉଣ୍ତିଙ୍ଗ୍‌ କର୍‌ଡା ଆସ୍‌ସି ୱାନା ? ନୋ, ଜିବନ୍‌ନୋନିକା ମାରି ସାନ୍ତିଦି ମୋନ୍‌ ଆସ୍‌ସି ୱାନା ।
1CO 5:1 ସତ୍‌ତାନ୍‌ ୱେଙ୍ଗିଁଜିନାତ୍‌ ଜେ, ମି ଲୋଇ ବୟ୍‌ଙ୍କାର୍‌ତି ଦାରିପାଣି ମାନାତ୍‌, ମାରି ଇୟାୱାଜାଦି ଦାରିପାଣି, ଆମାକାକି ଅଣଜିହୁଦି ଲୋକାମାନୁ ବା ଆଏତ୍‍ । ନାନ୍‌ ୱେରାଆମାନା, ମି ଲୋଇରାନ୍‌ ଅରେନ୍‍ ନିଜେଦି ବୁବାଦି ଆଡ଼୍‌ସିଙ୍ଗ୍‌ ଇଟ୍‌ତାମାନାନ୍‌ ।
1CO 5:2 ମାରି, ଏନ୍‌ ଇୟା ପାଣି କିତାମାନାନ୍‌, ମିର୍‌ ଏଣ୍ତେସ୍‌ ନିଜେଦି ବିସୟ୍‌ତାନ୍‌ ଗର୍ବ କିଦେଙ୍ଗ୍‌ ଆଟ୍‌ସିନିଦେର୍‌ ? ସତ୍‌ତି ତରିଟାନ୍‌ ମିର୍‌ ସେମାର୍‌ ଆଜି ଆୟାୱାଜାଦି ଲୋକ୍‌ତିଙ୍ଗ୍‌ ମି ମାଣ୍‌କୁ ପେର୍‌ନିକା ନେଗେତ୍‌ ।
1CO 5:3 ମାତର୍‌ ନାନ୍‌ ଆବେନ୍‌ ମେନ୍ଦଲ୍‌ତାନ୍‌ ସିଲିତିଙ୍ଗ୍‌ ବା, ଆତ୍ମାଦାନ୍‌ ତେବାତାମାନା, ଏନ୍‌ ଇୟାୱାଜା ପାଣି କିତାମାନାନ୍‌, ଆବେନୁତେବାତି ୱାଜା ୱାନି ବିଚାର୍‌ କିତାୱିସ୍‌ତାମାନାନ୍‌ ।
1CO 5:4 ପ୍ରବୁ ଜିସୁଦି ଦର୍‌ତାନ୍‌ ମିର୍‌ ଉନ୍‌ଡ୍ରେମାନୁ ଆନି ୱାଲେ ନାନ୍‌ ବା ଆବେନ୍‌ ଆତ୍ମାଦାନ୍‌ ତେବାତାମାନା ଇଜି ନେସ୍‌ସି ମାରି ପ୍ରବୁ ଜିସୁଦି ସାକ୍ତି ମାମାନୁ ତେବାତାମାନାତ୍‌ ।
1CO 5:5 ଇୟାୱାଜା ଲୋକ୍‌ତିଙ୍ଗ୍‌ ମେନ୍ଦଲ୍‌ତି ସାନି ଉଣ୍ତିଙ୍ଗ୍‌ ସୟ୍‌ତାନ୍‌ତି କିୟୁଦୁ ସର୍‌ପେ କିଜସିଦୁ, ଏଣ୍ତେସ୍‌ ପ୍ରବୁ ଜିସୁଦି ୱାନିଦିନ୍‌ତୁ ୱାନି ଆତ୍ମା ରକିୟା ପୟ୍‌ଦେଙ୍ଗ୍‌ ଆଟ୍‍ନାତ୍‍ ।
1CO 5:6 ମିର୍‌ ଇୟାୱାଜା ଗର୍ବ କିନିକା ନେଗେତ୍‌ ସିଲେ । ମିର୍‌ ଇନିକା ନେସ୍‌ଇଦେର୍‌ ଜେ, କାଣ୍ତେକ୍‌ନେ କମିର୍‌ ୱିଜୁ ଅଟାଗୁଣ୍ତୁତିଙ୍ଗ୍‌ ସଇସ୍‌ କିନାତ୍‌ ?
1CO 5:7 ମି ଲୋଇରାନ୍‌ ପାଡ଼ିଇ ପାପ୍‌କମିର୍‌ତିଙ୍ଗ୍‌ ସୋପ୍‌ସ ପୋକ୍‌ତୁ । ଆର୍‌ତିଙ୍ଗ୍‌, ମିର୍‌ କମିର୍‌ସିଲି ପୁନି ନେଗିଅଟାଗୁଣ୍ତୁ ୱାଜା ଆନିଦେର୍‌ ମାରିବା ନାନ୍‌ ନେସ୍‌ନା, ମିର୍‌ ଇଲେଇ ଆୟାୱାଜା ମାନିଦେର୍‌ । ନିସ୍ତାର୍‌ ପଣ୍ତୟ୍‌ତି ତିଆର୍‌କିନିକା ୱିଜିତାମାନାତ୍‌ । ମା ନିସ୍ତାର୍‌ ପଣ୍ତୟ୍‌ତି ମେଣ୍ତାପିଲା ୱାଜା ନିଜେ କ୍ରିସ୍ତ ପୁଜାସିନି ୱାଜା ସର୍‌ପେ ଆତାମାନାନ୍‌ ।
1CO 5:8 ଆର୍‌ତିଙ୍ଗ୍‌ ରାଦୁ, ମାଡୁ ପାଡ଼ିଇ କମିର୍‌ ମାରି ପାପ୍‌ ମାରି ତାଗ୍‌ଇପାଣି ୱାଜାଦି କମିର୍‌ତାନ୍‌ ପଣ୍ତୟ୍‌ କିଏଣ୍‌ଗା ନେଗେନ୍‌ତାନ୍‌ ମାରି ସତ୍‌ତାନ୍‌ କମିର୍‌ସିଲି ରୁଟିଦାନ୍‌ ଇୟା ପଣ୍ତୟ୍‌ କିନାଟ୍‌ ।
1CO 5:9 ଦାରିପାଣିକିନିୱାରି ୱାଲେ ସଙ୍ଗ୍‍ କିଈ ଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ନା ଆଗ୍‍ଡ଼ିରି ଆକୁଦୁ ରାସ୍‌ତାମାର୍‌ଆ;
1CO 5:10 ତାନି ଅର୍ତ ଆଏତ୍‍ ଜେ ଇୟା ଦୁନିଆଦାନ୍‌ ଦାରିପାଣି, ଦନ୍‌ଆସା, ଡଙ୍ଗାଁକିନିକା ମାରି ବମା ପୁଜାକିନିୱାରି ୱାଲେ ମୁଡ଼ୁକେ ସଙ୍ଗ୍‍ କିମାଟ୍‌ । ଆୟାୱାଜା ଆତିଙ୍ଗ୍‌, ମିଙ୍ଗିଁ ଦୁନିଆଦାନ୍‌ ସୋସ ସନ୍‍ଡ୍ରେଙ୍ଗ୍‍ ପଡ଼ାନାତ୍‌ ।
1CO 5:11 ମାତର୍‌ ନାନ୍‌ ଆକୁତୁ ଇକା ରାସ୍‌ତା ମାର୍ହା ଜେ, ଜଦି ଆମା ଲୋକ୍‌ ସଙ୍ଗ୍‍ ଇଜି ଜାଣାସିନା କିଜି ଦାରିପାଣି, ଦନ୍‌ଆସା, ବମା ପୁଜାକିନିକାନ୍‌, ଆକାର୍‍, ମଦୁଆ ମାରି ଡଙ୍ଗାଁର୍‌ଏନ୍‌ ଆନାନ୍‌, ଆର୍‌ତିଙ୍ଗ୍‌ ଇୟାୱାଜାଦି ଲୋକ୍‌ତି ୱାଲେ ତଡ଼୍‍ କିମାଟ୍‌, ମାରି ଇୟାନାନି ଲୋକ୍‌ତି ୱାଲେ ଉଣୁମାଟ୍‌ ।
1CO 5:12 ଇରିଙ୍ଗ୍‌ ଆତ୍ରେରି ଲୋକାଙ୍ଗ୍‌ ବିଚାର୍‌ କିଦେଙ୍ଗ୍‌ ନାନୁ ଏନ୍‌ ? ମାତର୍‌ ମା ମଣ୍ତଲିଦୁ ମିସାତିମାନି ଲୋକାଙ୍ଗ୍‌ ବିଚାର୍‌ କିନି ଦାଇତ୍‌ ଇନିକା ମାଦି ସିଲେ ?
1CO 5:13 ମାପୁରୁ ୱାରି ବିଚାର୍‌ କିନାନ୍‌, ଦର୍ମସାସ୍ତ୍ରଦୁ ରାସ୍‌ତାମାନାତ୍‌, “ଆୟା ତାଗ୍‌ଇ ଲୋକାଙ୍ଗ୍‌ ମି ଲୋଇରାନ୍‌ ସୋପ୍‌ତୁ ।”
1CO 6:1 ମି ଲୋଇରାନ୍‌ ଆମାୱାନି ବିରୁଦ୍‌ତାନ୍‌ ମାଟା ମାରିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ କ୍ରିସ୍ଟାନ୍‌ତି ବିସ୍‌ବାସ୍‌ରି ଲାକ୍‌ତୁ ସଲ୍‌ଏଣ୍‌ଗା ଅବିସ୍‌ବାସ୍‌ତି ବିଚାର୍‌କିନିୱାରି ଲାକ୍‌ତୁ ସନି ଉଣ୍ତିଙ୍ଗ୍‌ ଏଣ୍ତେସ୍‌ ସାସ୍‌ କିଜିନାନ୍‌ ?
1CO 6:2 ମାପୁରୁଦି ଲୋକୁ ଦୁନିଆଦି ବିଚାର୍‌ କିନାର୍‌ ଇଜି ଇୟା ମାଟା ଇନିକା ମିର୍‌ ନେସ୍‌ଇଦେର୍‌ ? ମିର୍‌ ଜଦି ଦୁନିଆଦି ବିଚାର୍‌ କିଦେଙ୍ଗ୍‌ ଆଟ୍‌ନିଦେର୍‌, ଆର୍‌ତିଙ୍ଗ୍‌ ମିର୍‌ ଇନିକା ଇୟା ଇସ୍ରି ବିସୟ୍‌ତିଙ୍ଗ୍‌ ବିଚାର୍‌ କିଦେଙ୍ଗ୍‌ ଆଟ୍‍ଇଦେର୍‍ ?
1CO 6:3 ମାଡ୍‌ ଜେ ମୁସ୍‌କୁପୁର୍‌ତି ଦୁତ୍‍କା ବିଚାର୍‌ କିନାପ୍‌, ଇକା ଇନିକା ମିର୍‌ ନେସ୍‌ଇଦେର୍‌ ? ଆର୍‌ତିଙ୍ଗ୍‌ ଦୁନିଆଦି ମାଟେଙ୍ଗ୍‌ୱିଜୁ ବିଚାର୍‌ କିନିକା, ମା ଉଣ୍ତିଙ୍ଗ୍‌ ନାଣ୍ତ ଉସାସ୍‌ ଆନାତ୍‌ ସିଲେ ?
1CO 6:4 ଇୟାୱିଜୁ ଇସ୍ରି ବିସୟ୍‌ତିଙ୍ଗ୍‌ ମାଟାୱାର୍‌ଗିନି ଉଣ୍ତିଙ୍ଗ୍‌ ଏନ୍ଦା ମଣ୍ତଲିଦୁ ଆମାକାର୍‌ ସନ୍‌ମାନ୍‌ ଆଏର୍‌, ଆୟାୱାଜା ବିଚାର୍‌ ଲୋକା ଲାକ୍‌ତୁ ସୋଲ୍‌ସିନିଦେର୍‌ ?
1CO 6:5 ଇୟାଉଣ୍ତିଙ୍ଗ୍‌ ମିର୍‌ ସେମାର୍‌ ଆନିକା ମାନାତ୍‌ । କ୍ରିସ୍ତବିସ୍‌ବାସ୍‌ସି ତଡ଼ାନ୍‌ତିମାନୁ ସୋସିମାନି ଜଗଡ଼ାଦିଙ୍ଗ୍‌ ତିର୍‌ କିଦେଙ୍ଗ୍‌ ସତ୍‌ତାନ୍‌ ମି ମଣ୍ତଲିଦୁ ଏନ୍‌ ସିଲିତିଙ୍ଗ୍‌ ଏନ୍‌ ଅରେନ୍‍ ବୁଦିଦି ଲୋକ୍‌ ମାନାନ୍‌ ।
1CO 6:6 ମାତର୍‌ ତଡ଼ାନ୍‌ ମାରି ଅରେନ୍‌ ତଡ଼ାନ୍‌ତି ବିରୁଦ୍‌ତାନ୍‌ ନିୟ୍ୟାୟ୍‌ କିନିବାଡିଦୁ ୱେର୍‌ନାନ୍‌, ଆକା ମାରି ଅବିସ୍‌ବାସ୍‌ସିର୍‌ ଆୟାତାନି ବିଚାର୍‌ କିଜିନାର୍‌ ।
1CO 6:7 ମି ଲୋଇ ସାଲାତିମାନି ଜାଟିଜଗଡ଼ା ୱେର୍‌ସିନାତ୍‌ ଜେ । ମିର୍‌ ଜେ ନିଜେନିଜେଦି ବିରୁଦ୍‌ତାନ୍‌ ନିୟ୍ୟାୟ୍‌ କିନିବାଡିଦୁ ୱେର୍‌ସିନିଦେର୍‌, ଆବେନ୍‌ ମିର୍‌ ପୁରା ଦୋସି । ତାଗ୍‌ଇପାଣି କିନି ବାଦ୍‌ଲୁ ବରଂ ଅନ୍ୟାୟ୍‌ ସାସ୍‌ କିଜି ନାସ୍ଟୁ ଆନିକା, ମି ଉଣ୍ତିଙ୍ଗ୍‌ ନେଗେତ୍‌ ସିଲେ ନୋ ?
1CO 6:8 ଇକା କିନି ବାଦ୍‌ଲୁ ନିଜେ ନିଜେଦି ଉଣ୍ତିଙ୍ଗ୍‌ ଇୟାୱାଜା ନିଜେଦି ତଡ଼ାନ୍‌କା ଉଣ୍ତିଙ୍ଗ୍‌ ଅନ୍ୟାୟ୍‌ କିଜି ୱାରିଙ୍ଗ୍ ସେମାର୍‌ କିଜିନିଦେର୍‌ ।
1CO 6:9 ଅଦାର୍ମୁଦିକାର୍‌ ଜେ ମାପୁରୁଦି ରାଜିଦି ଅଦିକାର୍‌ତିକାର୍‌ ଆଏର୍‌, ଇକା ଇନିକା ମିର୍‌ ନେସ୍‌ଇଦେର୍‌ ? ଇୟା ବିସୟ୍‌ତାନ୍‌ ମିର୍‌ ବାୟାବେବ୍‌ରି ଆମାଟ୍‌, ତାଗ୍‌ଇପାଣି, ବମା ପୁଜାକିନିକାନ୍‌, ଦାରିପାଣି, ବେସ୍ୟା, ତାଗ୍‍ଇପାଣିଦୁ ତେବାତିମାନି ଲୋକୁ
1CO 6:10 ମାରି ଡଙ୍ଗାଁର୍‌ଏନ୍‌, ଦନ୍‌ଆସା, ମଦୁଆ, ସୁରିୱାର୍‌ଗିନିକା ମାରି ଆଇ ଲୋକା ଜିନିସ୍‌କୁ ଡଙ୍ଗାଁକିନିକାର୍‌, ଇୟାକାର୍‌ ମାପୁରୁଦି ରାଜିଦୁ ବାଗ୍‌ ପୟ୍‌ଏର୍‌ ।
1CO 6:11 ମାରି, ମି ମାଣ୍‌କୁ ଏନ୍‌ ଏନ୍‌ ଆୟାୱାଜା ମାରିଇଦେର୍‌, ମାତର୍‌ ଇଲେଇ ମିର୍‌ ପାପ୍‌ତାନ୍‌ ନରାଆୟ୍‌ ଆଜି ମାପୁରୁଦି ଉଦେସ୍‌ତାନ୍‌ ମାନିଦେର୍‌ । ମାରି ପ୍ରବୁ ଜିସୁ କ୍ରିସ୍ତ ମାରି ପବିତ୍ରଆତ୍ମାଦାନ୍‌ ମିର୍‌ ଦାର୍ମୁଦିକାନ୍‌ ଇଜି ଲେକିସ୍‌କିଆତିମାନିଦେର୍‌ ।
1CO 6:12 ଏନ୍‌ ୱେର୍‍ତେଙ୍ଗ୍‍ ଆଟ୍‍ନାନ୍‌, “ୱିଜୁ ବିସୟ୍‌ କିନି ଉଣ୍ତିଙ୍ଗ୍‌ ନାଙ୍ଗିଁ ଅଦିକାର୍‌ ସିଆୟ୍‌ଆତାମାନାତ୍‌ ।” ସତ୍‌ମାଟା, ମାତର୍‌ ୱିଜୁ ବିସୟ୍‌ ମି ଉଣ୍ତିଙ୍ଗ୍‌ ନେଗେତ୍‌ ସିଲେ । ୱିଜୁ ବିସୟ୍‌ ପୁରା କିଦେଙ୍ଗ୍‌ ନା ଅଦିକାର୍‌ ମାନାତ୍‌ ଇଜି ନାଙ୍ଗିଁ ଆଡ୍‍ଗି କିନି ଉଣ୍ତିଙ୍ଗ୍‌ ନାନ୍‌ ଏଙ୍ଗ୍‌ ଏସ୍‌କାଙ୍ଗ୍‌ ସୁଜୋଗ୍‌ ସିଏ ।
1CO 6:13 ଆଇକାନ୍‍ ଏନ୍‌ ୱେର୍‍ତେଙ୍ଗ୍‍ ଆଟ୍‍ନାନ୍‍, “କାଦି ପଟାଦି ଉଣ୍ତିଙ୍ଗ୍‌, ମାରି ପଟା କାଦିଦି ଉଣ୍ତିଙ୍ଗ୍‌ ଟିକ୍‌ ।” ସତ୍‌ମାଟା, ମାତର୍‌ ମାପୁରୁ ରୁଣ୍ତିୱାନିକାଙ୍ଗ୍‌ବା ନାସ୍ଟୁ କିନାନ୍‌ । ମେନ୍ଧଲ୍‍ ଦାରିପାଣିଦି ଉଣ୍ତିଙ୍ଗ୍‌ ସିଲେ, ମାତର୍‌ ପ୍ରବୁଦି ସେବାପାଣିଦି ଉଣ୍ତିଙ୍ଗ୍‌ ବ୍ୟବ୍‌ହାର୍‌ ଆପିତ୍‌, ଇରିଙ୍ଗ୍‌ ପ୍ରବୁ ମେନ୍ଦଲ୍‌ତି ଉଣ୍ତିଙ୍ଗ୍‌ ଦରକାର୍‌ମାନିକା ପୁରା କିନାନ୍‌ ।
1CO 6:14 ମାପୁରୁ ପ୍ରବୁଙ୍ଗୁଁ ସାତିମାଣାନ୍‌ ମାରିଡ଼େସି ଜିବନ୍‌କିଜି ନିକ୍‌ତାମାନାନ୍‌, ମାରି, ନିଜେଦି ସାକ୍ତିଦାନ୍‌ ୱାନ୍‌ ମାଙ୍ଗିଁ ବା ମାରିଡ଼େସି ଜିବନ୍‌କିଜି ନିକ୍‌ନାନ୍‌ ।
1CO 6:15 ମି ମେନ୍ଧଲ୍‍ ଜେ କ୍ରିସ୍ତଦି ମେନ୍ଦଲ୍‌ତି ଉନ୍‌ଡ୍ରି ବାଗ୍‌ ୱାଜା, ଇକା ଇନିକା ନେସ୍‌ଇଦେର୍‌ ? ଆର୍‌ତିଙ୍ଗ୍‌ ନାନ୍‌ ଇନିକା କ୍ରିସ୍ତଦି ମେନ୍ଦଲ୍‌ତିଙ୍ଗ୍‌ ଆସ୍‌ସିସୋଲ୍‌ସି ବେସ୍ୟାଦି ମେନ୍ଧଲ୍‍ କିନା ? ଆକା ଏସ୍‌କାଙ୍ଗ୍‌ବା ଆମାକିତ୍‌ ।
1CO 6:16 ମାରି ଏନ୍‌ ବେସ୍ୟାଦି ୱାଲେ ମିସାନାର୍‌, ୱାନ୍‌ ୱାନି ୱାଲେ ଉନ୍‌ଡ୍ରେ ମେନ୍ଦଲ୍‌ନେ ଆନା‌ର୍‌, ଇକା ଇନିକା ମିର୍‌ ନେସ୍‌ଇଦେର୍‌ ? ଇରିଙ୍ଗ୍‌ ସାସ୍ତ୍ରଦୁ ନେଗେନ୍‌ତାନ୍‌ ରାସ୍‌ତା ମାନାତ୍‌, “ଆୟା ରିଏର୍‌ ଅରେନ୍‌ନେ ଆନାର୍‌ ।”
1CO 6:17 ମାତର୍‌ ଏନ୍‌ ପ୍ରବୁଦି ୱାଲେ ମିସାନାନ୍‌, ୱାନ୍‌ ୱାନି ୱାଲେ ଆତ୍ମାଦୁ ଉନ୍‌ଡ୍ରେ ଆନାତ୍‌ ।
1CO 6:18 ଦାରିପାଣିଦାନ୍‌ ଆକ ମାନ୍‌ଡ୍ରୁ । ଆଇ ଇନି ପାପ୍‍ ଲୋକ୍‌ତି ମେନ୍ଦଲ୍‌ତିଙ୍ଗ୍‌ କାରାପ୍‌ କିଏତ୍‌ । ମାତର୍‌ ଏନ୍‌ ଦାରିପାଣି କିନାନ୍‌, ୱାନ୍‌ ନିଜେଦି ମେନ୍ଦଲ୍‌ତି ବିରୁଦ୍‌ତାନ୍‌ ପାପ୍‌ କିନାନ୍‌ ।
1CO 6:19 ଇକା ଇନିକା ମିର୍‌ ନେସ୍‌ଇଦେର୍‌ ? ମାରି ମି ମେନ୍ଧଲ୍‍ ଜେ ମାପୁରୁଦିମାଣାନ୍‌ ପୟ୍‌ତି ମି ଜିବନ୍‌ତୁବାସାନି ପବିତ୍ରଆତ୍ମାଦି ମନ୍ଦିର୍‌, ମାରି ମିର୍‌ ନିଜେ ନିଜେଦି ଆଇଦେର୍‍, ମାତର୍‌ ମାପୁରୁଦିକାର୍‌ ।
1CO 6:20 ୱାନ୍‌ ମିଙ୍ଗିଁ ନାଣ୍ତ ଦାରା ସିଜି କଟାମାନାନ୍‌; ଆଦେଙ୍ଗ୍‌ ମି ମେନ୍ଦଲ୍‌ତାନ୍‌ ମାପୁରୁଦି ଦନ୍ୟବାଦ କିଦୁ ।
1CO 7:1 ମିର୍‌ ଆମାୱିଜୁ ବିସୟ୍‌ ରାସ୍‌ତିମାନିଦେର୍‌, ଇଲେଇ ନାନ୍‌ ଆୟାୱିଜୁଦି ଉତର୍‌ ୱେର୍‌ନା । ପେଡ଼ି ଆଇକା ନେଗେତ୍‌ ।
1CO 7:2 ମାତର୍‌ ଦାରିପାଣିଦି କିନି ଆସାଦି ଉଣ୍ତିଙ୍ଗ୍‌ ୱିଜେରେ ମେମାର୍‌ଙ୍ଗୁଁ ନିଜେଦି ଆଡ଼୍‍ସିକ୍‍ ମାନିକା, ମାରି ୱିଜୁଲୋକ୍‌ ଆଇମେକା ନିଜେଦି କନ୍‌ଲିର୍‌ ମାନିକା ଦରକାର୍‌ ।
1CO 7:3 କନ୍‌ଲି, ଆଡ଼୍‌ସି ଉଣ୍ତିଙ୍ଗ୍‌ ନିଜେଦି ମେନ୍ଧଲ୍‍ ପୁରା କିନିକା ମାରି ଆଡ଼୍‌ସି କନ୍‌ଲି ଉଣ୍ତିଙ୍ଗ୍‌ ନିଜେଦି ମେନ୍ଦଲ୍‌ତି ପୁରା କିନିକା ମାନାତ୍‍ । ମାରି ରିଏର୍‌ ରିଏରି ଦର୍‌କାର୍‌ ପୁରା କିନି ନିୟମ୍‌ ।
1CO 7:4 ନିଜେଦି ମେନ୍ଦଲ୍‌ତି ମୁସ୍‌କୁ ଆଡ଼୍‌ସିଦି ଅଦିକାର୍‌ ସିଲେତ୍‌, ମାତର୍‌ କନ୍‌ଲିନ୍ଦି ଅଦିକାର୍‌ ମାନାତ୍‌; ଆୟାୱାଜା ବା କନ୍‌ଲିଦି ନିଜେଦି ମେନ୍ଦଲ୍‌ତି ମୁସ୍‌କୁ ଅଦିକାର୍‌ ସିଲେତ୍‌, ମାତର୍‌ ଆଡ଼୍‌ସିନ୍ଦି ଅଦିକାର୍‌ ମାନାତ୍‌ ।
1CO 7:5 ନିଜେନିଜେଦିଙ୍ଗ୍‌ ୱାର୍‌ ଆକ ତେବାମାକିର୍‌ । ମାତର୍‌ ରିଏର୍‌ ମତାମ୍‌ ଆଜି ପାର୍‌ତାନାଦୁ ସମୟ୍‌ସିନି ଉଣ୍ତିଙ୍ଗ୍‌ ଏସ ସମୟ୍‌ ୱେର୍‌ଏ ତେବାଦେଙ୍ଗ୍‌ ଆଟ୍‍ନାର୍‍ । ମାରି, ମି ଜିବନ୍‌ତୁମିସାନି ଉଣା ଉଣ୍ତିଙ୍ଗ୍‌ ସୟ୍‌ତାନ୍‌ ଏଣ୍ତେସ୍‌ ୱାରିଙ୍ଗ୍ ପରିକା କିଏତ୍‌, ଆୟାଉଣ୍ତିଙ୍ଗ୍‌ ୱାର୍‌ ମାରିଡ଼େସି ଉନ୍‌ଡ୍ରେମାନୁ ଆପିର୍‌ ।
1CO 7:6 ମାତର୍‌ ନାନ୍‌ ଆଦେସ୍‌ ସିତି ୱାଜା ୱେର୍‌ଏଣ୍‌ଗା ବୁଜାକିତିୱାଜା ୱେର୍‌ସିନା ।
1CO 7:7 ମାରି, ମିର୍‌ ୱିଜୁ ଲୋକୁ ନା ୱାଜା ଆପିର୍‌ ଇଜି ଇକା ନା ଇଚ୍ଛା । ମାତର୍‌ ଏନ୍‌ ଇୟାୱାଜାଦିକା, ମାରି ଏନ୍‌ ଆୟାୱାଜାଦିକା, ୱିଜୁଲୋକୁ ମାପୁରୁଦିମାଣାନ୍‌ ଦାନ୍‍ ପୟ୍‌ତାମାନାର୍‌ ।
1CO 7:8 ମାତର୍‌ ନାନ୍‌ ପେଡ଼ିଆଇୱାରିଙ୍ଗ୍‌ ନି ରାଣ୍ତିଆଇମେକାଙ୍ଗ୍‌ ଇଜିନା, ୱାର୍‌ ନା ୱାଜା ଅରେନ୍‌ନେ ତେବାତିଙ୍ଗ୍‌ ନେଗେନ୍‌ ଆତାତ୍‌ମାନ୍ଦି ।
1CO 7:9 ମାତର୍‌ ଜଦି ୱାର୍‌ ମୋନ୍‌ତିଙ୍ଗ୍‌ ତିର୍‌ କିଦେଙ୍ଗ୍‌ ଆଟ୍‌ଇତିଙ୍ଗ୍‌, ଆର୍‌ତିଙ୍ଗ୍‌ ପେଡ଼ି ଆପିର୍‌ । ଇରିଙ୍ଗ୍‌ ଆସା ଆଜି କାରାପ୍‌ ଆନି ବାଦ୍‌ଲୁ ପେଡ଼ି ଆନିକା ନେଗେତ୍‌ ।
1CO 7:10 ମାତର୍‌ ପେଡ଼ିଆତିୱାରିଙ୍ଗ୍‌ ନାନ୍‌ ଆଦେସ୍‌ ସିଜିନା, ନାନ୍‌ ସିଲେ, ମାତର୍‌ ପ୍ରବୁ ଆଦେସ୍‌ ସିନାନ୍‌, ଆଡ଼୍‌ସି ନିଜେଦି କନ୍‌ଲିମାଣୁକୁ ୱେର୍‌ଏ ଆମାକିତ୍‌;
1CO 7:11 ଜଦି ୱାଦ୍ ୱେର୍‌ଏ ଆନାତ୍‌, ଆର୍‌ତିଙ୍ଗ୍‌ ୱାଦ୍ ମାରି ପେଡ଼ି ଆମାକିତ୍‌, ମାରି ନିଜେଦି କନ୍‌ଲି ୱାଲେ ମାରିଡ଼େସି ମିସାପିର୍‌, ମାରି କନ୍‌ଲି ନିଜେଦି ଆଡ଼୍‌ସିଙ୍ଗ୍‌ ଡ଼ିସ୍‌ମାକିନ୍‌ ।
1CO 7:12 ମାତର୍‌ ଆଇ ୱିଜେରିଙ୍ଗ୍‌ ନାନ୍‌ ୱେର୍‌ନା, ପ୍ରବୁ ଇନ୍‌ଏନ୍‌, ଜଦି ଏ ତଡ଼ାନ୍‌ତି ଅବିସ୍‌ବାସ୍‌ତି ଆଡ଼୍‌ସି ମାନାତ୍‌, ମାରି ୱାଦ୍ ୱାନି କନ୍‌ଲି ୱାଲେ ତେବାଦେଙ୍ଗ୍‌ ବଦା କିନାତ୍‌, ଆର୍‌ତିଙ୍ଗ୍‌ ୱାନ୍‌ ତାନିଙ୍ଗ୍‌ ଡ଼ିସ୍‌ମାକିନ୍‌ ।
1CO 7:13 ମାରି, ଆମା ଆଡ଼୍‌ସିଦି ଅବିସ୍‍ବାସ୍‍ କନ୍‌ଲି ମାନାନ୍‌, ମାରି ୱାନ୍‌ ତାନି ଆଡ଼୍‌ସି ୱାଲେ ତେବାଦେଙ୍ଗ୍‌ ଇଚ୍ଛା କିନାନ୍‌, ୱାଦ୍ ନିଜେଦି କନ୍‌ଲିଙ୍ଗ୍‌ ଡ଼ିସ୍‌ମାକିତ୍‌ ।
1CO 7:14 ଇରିଙ୍ଗ୍‌ ଅବିସ୍‍ବାସ୍‍ କନ୍‌ଲି ଆଡ଼୍‌ସି ଉଣ୍ତିଙ୍ଗ୍‌ ନେଗେନ୍‌ କିଆତାମାନାନ୍‌, ମାରି ଅବିସ୍‌ବାସ୍‌ତି ଆଡ଼୍‌ସି କନ୍‌ଲି ଉଣ୍ତିଙ୍ଗ୍‌ ନେଗେନ୍‌ କିଆତାମାନାତ୍‌; ପ୍ରବୁ ଜିସୁ କ୍ରିସ୍ତଙ୍ଗ୍‌ ମାନାଦେଙ୍ଗ୍‌ ଆଟ୍‍ନାର୍‍ । ଆକା ଆଏତିଙ୍ଗ୍‍ ୱାରି କଡ଼ର୍‌ ପାପ୍‌ ଆନାର୍‌, ମାତର୍‌ ସତ୍‌ତାନ୍‌ ୱାର୍‌ ମାପୁରୁଦି ମାଣ୍‌କୁ ମାନେଆତାମାନାର୍‌ ।
1CO 7:15 ଆକାଏଣ୍ତେସ୍‌ଆପିତ୍‌, ଜଦି ଅରେନ୍‍ ଅବିସ୍‍ବାସ୍‍ସି, ୱାନି କ୍ରିସ୍ତ ବିସ୍‌ବାସ୍‌ତି କନ୍‌ଲି ମାରି ଆଡ଼ିସିମାଣୁକୁ ୱେର୍‌ଏ ତେବାଦେଙ୍ଗ୍‌ ବଦା କିନାନ୍‌, ଆର୍‌ତିଙ୍ଗ୍‌ ୱାନ୍‌ ଆକା କିପିନ୍‌; ଇୟା ପାଣିଦୁ କ୍ରିସ୍ତବିସ୍‌ବାସ୍‌ସି କନ୍‌ଲି ମାରି ଆଡ଼୍‌ସି ଆମା ନିୟମ୍‌ତାନ୍‌ ମିସାଏର୍‌ । ଇରିଙ୍ଗ୍‌ ମାପୁରୁ ମିଙ୍ଗିଁ ସାନ୍ତିଦାନ୍‌ ଜିନିମାଡ଼ିନି ଉଣ୍ତିଙ୍ଗ୍‌ କୁକ୍‌ତାମାନାନ୍‌ ।
1CO 7:16 କ୍ରିସ୍ତ ବିସ୍‌ବାସ୍‌ତି ଆଡ଼୍‌ସି, ନିନୁ ନିଜେଦି କନ୍‌ଲିଙ୍ଗ୍‌ ରକିୟା କିଦେଙ୍ଗ୍‌ ଆଟ୍‌ନି ଇଜି ଇନିକା ସତ୍‌ତାନ୍‌ ନେସ୍‌ତିମାନି ? ବିସ୍‌ବାସ୍‌ତି କନ୍‌ଲି, ନିନୁ ନିଜେଦି ଆଡ଼୍‌ସିଙ୍ଗ୍‌ କ୍ରିସ୍ତବିସ୍‌ବାସ୍‌ତିକା କିଦେଙ୍ଗ୍‌ ଆଟ୍‌ନି ଇଜି ଇନିକା ପୁରା ୱେର୍‍ତେଙ୍ଗ୍‍ ଆଟ୍‌ନି ?
1CO 7:17 କେବଲ ପ୍ରବୁ ଆମାୱାନିଙ୍ଗ୍‌ ଏଣ୍ତେସ୍‌ ନାନି ଦୟା ସିତାମାନାନ୍‌, ମାପୁରୁ ୱିଜେରିଙ୍ଗ୍‌ ଆମା ଅବସ୍ଥାଦାନ୍‌ କୁକ୍‌ତାମାନାନ୍‌, ୱାନ୍‌ ଆୟାୱାଜା ଜିପିନ୍‌ । ନାନ୍‌ ୱିଜୁ ମଣ୍ତଲିଆଙ୍ଗାଁ ଇୟାୱାଜାଦି ଆଦେସ୍‌ ସିନା ।
1CO 7:18 ଏନ୍‌ କି ସୁନ୍ନତ୍‌ ଅବସ୍ଥାଦାନ୍‌ ମାପୁରୁ କୁକ୍‌ତାମାନାନ୍‌, ୱାନ୍‌ ଅସୁନ୍ନତି ୱାଜା ତରାଦେଙ୍ଗ୍‌ ସେସ୍ଟା କିମାକିନ୍‌ । ଏନ୍‌ କି ଅସୁନ୍ନତ ଅବସ୍ଥାଦାନ୍‌ ମାପୁରୁ କୁକ୍‌ତାମାନାନ୍‌, ୱାନ୍‌ ସୁନ୍ନତ୍‌ ଆମାକିନ୍‌ ।
1CO 7:19 ସୁନ୍ନତ ଇନିକା ସିଲେ, ମାରି ଅସୁନ୍ନତ ଇନିକା ପେରି ବିସୟ୍‌ ସିଲେ, ମାତର୍‌ ମାପୁରୁଦି ଆଦେସ୍‌କୁ ମାନାନିକା ପେରି ବିସୟ୍‌ ।
1CO 7:20 ମାପୁରୁଦି ମାଟା ମାନାତିୱାଲେ ଏନ୍‌ ଏଣ୍ତେସ୍‌ ନାନି ଅବସ୍ଥାଦାନ୍‌ ମାର୍‌ର୍ହାନ୍‌, ୱାନ୍‌ ଆୟା ଅବସ୍ଥାଦାନ୍‌ ମାନିନ୍‌ ।
1CO 7:21 ମାପୁରୁ କୁକ୍‌ତିୱାଲେ ନିନୁ ଇନିକା ଗତିମୁରୁଲି ମାର୍‌ଇ ? ଆୟାଉଣ୍ତିଙ୍ଗ୍‌ ସିନ୍ତା କିମା, ମାତର୍‌ ଏସ୍‌କାଙ୍ଗ୍‌ ମୁକୁଡ଼ାଦେଙ୍ଗ୍‌ ଆଟ୍‌ନି, ଆର୍‌ତିଙ୍ଗ୍‌ ଆୟା ସୁଜୋଗ୍‌ ନେଗେନ୍‌ତାନ୍‌ ମାନାଦୁ ।
1CO 7:22 ଇରିଙ୍ଗ୍‌ ପ୍ରବୁଦିମାଣୁକୁ କୁକ୍‌କାୟ୍‌ ଆତିମାନି କଟିସାକର୍‌, ୱାନ୍‌ ପ୍ରବୁଦି ମୁକୁଡ଼ାତି ଲୋକ୍‌; ଆୟାୱାଜା ଏନ୍‌ ମୁକୁଡ଼ା ଆଜି କୁକ୍‌କାୟ୍‌ଆତାମାନାନ୍‌, ୱାନ୍‌ କ୍ରିସ୍ତଦି କଟିସାକର୍‌ ।
1CO 7:23 ମାପୁରୁ ମିଙ୍ଗିଁ ନାଣ୍ତ ଦାରା ସିଜି କଟାମାନାନ୍‌, ଲୋକା ସାକର୍‌ ଆମାଟ୍‌ ।
1CO 7:24 ଏ ତଡ଼ାନ୍‌କୁ ନି ତାଙ୍ଗିଁକି, ମାପୁରୁ ମିଙ୍ଗିଁ କୁକ୍‌ତିୱାଲେ ଆମା ଅବସ୍ଥାଦାନ୍‌ ମାର୍‌ଇଦେର୍‌, ଆୟାୱାଜା ମାପୁରୁଦି ୱାଲେ ଅର୍‌ସେ ଜିନିକା ମାନାତ୍‌ ।
1CO 7:25 ମିର୍‌ ପେଡ଼ିଆଇୱାରି ବିସୟ୍‌ତାନ୍‌ ନେସ୍‌ତେଙ୍ଗ୍‌ ଅଡ଼୍‍ବିଜିନିଦେର୍‍ । ଇୟା ବିସୟ୍‌ତାନ୍‌ ନାନ୍‌ ପ୍ରବୁଦିମାଣୁକୁ ଇନି ମାଟା ପୟ୍‌ଏ । ମାତର୍‌ ପ୍ରବୁଦି ସାକାଦାନ୍‌ ଅରେନ୍‍ ବିସ୍‌ବାସ୍‌ତି ଜଗ୍‌ ଲୋକ୍‌ ୱାଜା ନା ମୋନ୍‌ତି ବଦା ୱେର୍‌ସିନାତ୍‌ ।
1CO 7:26 ନାନ୍‌ ଏତ୍‌କିନା ଜେ, ଲୋକୁ ଏଣ୍ତେସ୍‌ ମାନାର୍‌, ଇଲେଇତି ବାଦାଦି ଉଣ୍ତିଙ୍ଗ୍‌ ଆୟାୱାଜା ତେବାନିକା ନେଗେତ୍‌ ।
1CO 7:27 ନିନୁ ଇନିକା ଆଡ଼୍‌ସି ୱାଲେ ତେବାତିମାନି ? ଆର୍‌ତିଙ୍ଗ୍‌ ଇୟା ଗାଟିଦାନ୍‌ କୁଦାଦେଙ୍ଗ୍‌ ସେସ୍ଟା କିମା । ନିନୁ ଇନିକା ଆଡ଼୍‌ସିମାଣୁକୁ ମୁକୁଡ଼ାତିମାନି ? ଆର୍‌ତିଙ୍ଗ୍‌ ଆଡ଼୍‌ସିଙ୍ଗ୍‌ ପୟ୍‌ଦେଙ୍ଗ୍‌ ସେସ୍ଟା କିମା ।
1CO 7:28 ଜଦି ମିର୍‌ ପେଡ଼ି ଆତିମାନିଦେର୍‌, ଆର୍‌ତିଙ୍ଗ୍‌ ପାପ୍‌ କିଇଦେର୍‌; ମାରି ଜଦି ପେଡ଼ିଆଇ ଆଇଲି ପେଡ଼ି ଆତିଙ୍ଗ୍‌, ଆର୍‌ତିଙ୍ଗ୍‌ ୱାଦ୍ ପାପ୍‌ କିଏତ୍‌ । ମାତର୍‌ ପେଡ଼ିଆତି ଲୋକ୍‍ତିଙ୍ଗ୍‌ ଦୁନିଆଦି ବେସି ଦୁଃକ୍‌ କାସ୍ଟୁ ସାସ୍‌ କିଦେଙ୍ଗ୍‌ ପଡ଼ାନାତ୍‌ । ମାରି ମିର୍‌ ଏଣ୍ତେସ୍‌ ଆବେଟ୍‌କୁ ରକ୍‌ୟା ପୟ୍‌ନିଦେର୍‌, ଇକା ନା ବଦା ।
1CO 7:29 ମାତର୍‌ ଏ ତଡ଼ାନ୍‌କୁ, ନାନ୍‌ ଇୟା ମାଟା ୱେର୍‍ତେଙ୍ଗ୍‍ ବଦା କିଜିନା, ଦିନ୍‌ ଲାକ୍‌ତୁ ୱାତାତ୍‌ନି, ଆଦେଙ୍ଗ୍‌ ଆମାୱାରିଙ୍ଗ୍‌ ଆଡ଼୍‍ସିକ୍‍ ମାନେ, ୱାର୍‌ ଆଡ଼୍‍ସିକ୍‍ ସିଲି ୱାଜା ଆପିର୍‌ ।
1CO 7:30 ମାରି, ଆମାକାର୍‌ ଆଡ଼୍‌ବାନାର୍‌, ୱାର୍‌ ଆଡ଼୍‌ବାଇ ଲୋକା ୱାଜା ଆପିର୍‌, ମାରି, ଆମାକାର୍‌ ୱେଡ଼ିକା କିନାର୍‌, ୱାର୍‌ ୱେଡ଼ିକାକିଇ ଲୋକା ୱାଜା ଆପିର୍‌; ଆମାକାର୍‌ କଣାର୍‌, ୱାର୍‌ ନିଜେଦି ସିଲି ଲୋକା ୱାଜା ଆପିର୍‌ ।
1CO 7:31 ମାରି, ଆମାକାର୍‌ ଜଗତ୍‌ତି ବିସୟ୍‌ତାନ୍‌ ୱେଡ଼ିକା ପୟ୍‌ନାର୍‌, ୱାର୍‌ ୱେଡ଼ିକା ପୟ୍‌ଇ ଲୋକା ୱାଜା ଆପିର୍‌ । ଇରିଙ୍ଗ୍‌ ଇୟା ଦୁନିଆଦି ୱେଡ଼ିକା ନାଣ୍ତଦିନ୍‌ ତେବାଏତ୍‌ ।
1CO 7:32 ମାତର୍‌ ମିର୍‌ ଏଣ୍ତେସ୍‌ ସିନ୍ତା ଆମାଟ୍‌, ଇକା ନା ବଦା । ଏନ୍‌ ପେଡ଼ିଆଏନ୍, ୱାନ୍‌ ଏଣ୍ତେସ୍‌ ପ୍ରବୁଦି ୱେଡ଼ିକାଦିକାନ୍‌ ଆନାନ୍‌, ଇୟାଉଣ୍ତିଙ୍ଗ୍‌ ପ୍ରବୁଦି ବିସୟ୍‌ ଅସି ସିନ୍ତା ଆନାନ୍‌ ।
1CO 7:33 ମାତର୍‌ ଏନ୍‌ ପେଡ଼ିଆତିକାନ୍‌, ୱାନ୍‌ ଏଣ୍ତେସ୍‌ ନିଜେଦି ଆଡ଼୍‌ସିଙ୍ଗ୍‌ ୱେଡ଼ିକାଦିକାନ୍‌ ଆନାନ୍‌, ଆୟାଉଣ୍ତିଙ୍ଗ୍‌ ୱାନ୍‌ ଇଲୁଦି ବିସୟ୍‌ ଅସି ସିନ୍ତା ଆନାନ୍‌ ।
1CO 7:34 ମାରି ୱାନି ମୋନ୍‌ ଇନିଙ୍ଗାଁ ଆନିଙ୍ଗାଁ ଆନାତ୍‌ । ପେଡ଼ିଆଇ ଆଇ ମାନି ରିପାଆଇଲି, ପ୍ରବୁଦି ପାଣିଦୁ ମୋନ୍‌ଦିୟାନ୍‌ ସିନେ, ଇରିଙ୍ଗ୍‌ ମେନ୍ଦଲ୍‌ ମାରି ଆତ୍ମାଦାନ୍‌ ୱାଦ୍ ନିଜେଦିଙ୍ଗ୍‌ ମାପୁରୁଦି ମାନୁ ସିଦେଙ୍ଗ୍‌ ବଦା କିନାତ୍‌; ମାତର୍‌ ଏଦ୍‌ ପେଡ଼ିଆତାମାନାତ୍‌, ୱାଦ୍ ଏଣ୍ତେସ୍‌ ନିଜେଦି କନ୍‌ଲିଙ୍ଗ୍‌ ୱେଡ଼ିକା କିନି ତାନି ବଦା, ଆୟାଉଣ୍ତିଙ୍ଗ୍‌ ଦୁନିଆଦି ବିସୟ୍‌ ଅସି ସିନ୍ତା ଆନାତ୍‌ ।
1CO 7:35 ଇୟା ମାଟା ନାନ୍‌ ମି ନିଜେଦି ନେଗି ଉଣ୍ତିଙ୍ଗ୍‌ ୱେର୍‌ସିନା, ମିଙ୍ଗିଁ ଉରିଦୁ ଆର୍‌ପେତେଙ୍ଗ୍‌ ଇନ୍‌ଏ, ମାତର୍‌ ମିର୍‌ ଏଣ୍ତେସ୍‌ ନେଗି ବ୍ୟବ୍‌ହାର୍‌ କିଜି ଉନ୍‌ଡ୍ରେ ମୋନ୍‌ତାନ୍‌ ପ୍ରବୁଦି ସେବାଦୁ ସର୍‌ପେ କିଦୁ, ଇୟାଉଣ୍ତିଙ୍ଗ୍‌ ୱେର୍‌ସିନା ।
1CO 7:36 ପେଡ଼ି ଆଦେଙ୍ଗ୍‌ ଲସ୍‌ତି ୱେନ୍‌କା, ମେମାର୍‌ଏନ୍‌ ଜଦି ଅଡ଼୍‌ବିନାନ୍‌ ଜେ ୱାନି ଲସ୍‌ତିମାନି ଆଇଲି ଉଣ୍ତିଙ୍ଗ୍‌ ୱାନ୍‌ ନେଗେନ୍‌ ବ୍ୟବ୍‌ହାର୍‌ କିଦେଙ୍ଗ୍‌ ଆଟ୍‌ଏଜିନାନ୍‌, ଜଦି ୱାନି ଲାଲାୟ୍‌ ନାଣ୍ତ ଆନାତ୍‌ ମାରି ୱାନି ଉଣ୍ତିଙ୍ଗ୍‌ ପେଡ଼ି ଆନିକା ନେଗେତ୍‌, ଆର୍‌ତିଙ୍ଗ୍‌ ୱାନି ବଦା ଇସାବ୍‌ତାନ୍‌ ୱାର୍‌ ପେଡ଼ି ଆପିର୍‌ । ଇବେନୁ ଇନି ପାପ୍‌ ସିଲେତ୍‌ ।
1CO 7:37 ମାତର୍‌ ଆମା ଲୋକ୍‌ ଜାସାପେଲା ଆଜି ତାନି ଗାଡ଼୍‌ସିଙ୍ଗ୍‌ ପେଡ଼ି ଆଦେଙ୍ଗ୍‌ କେଏଣ୍‌ଗା ଡାଟ୍‌ ଆନାନ୍‌ ମାରି ନିଜେଦି ଇନ୍ଦ୍ରିୟ ଆସା ପୁରା ତେବା କିଦେଙ୍ଗ୍‌ ଆଟ୍‌ତାମାନାନ୍‌ ମାରି ଗାଡ଼୍‌ସିଙ୍ଗ୍‌ ଆୟାୱାଜା ରିପାଆଇଲିଦି ଅବସ୍ଥାଦାନ୍‌ ଇଡ୍‌ଦେଙ୍ଗ୍‌ ବଦା କିତାୱିସ୍‌ତାମାନାନ୍‌, ଆର୍‌ତିଙ୍ଗ୍‌ ୱାନ୍‌ ଟିକ୍‌ କିତାମାନାନ୍‌ ।
1CO 7:38 ଆଦେଙ୍ଗ୍‌ ଏନ୍‌ ତାନି ଆଇମାଦିଙ୍ଗ୍‍ ପେଡ଼ି କିନାନ୍‌, ୱାନ୍‌ ନେଗେନ୍‌ କିନାନ୍‌, ମାରି ଏନ୍‌ ପେଡ଼ି କିଏନ୍‌, ୱାନ୍‌ ମାରି ନାଣ୍ତ ନେଗେନ୍‌ କିନାନ୍‌ ।
1CO 7:39 କନ୍‌ଲି ଜିବନ୍‌ମାନି ସାନ୍ଦି ଆଡ଼୍‌ସି ମିସାନା ମାନାତା; ମାତର୍‌ କନ୍‌ଲି ସାତି ୱେନ୍‌କା ତାନି ବଦାଦାନ୍‌ ମାରିଡ଼େସିପେଡ଼ି ଆଦେଙ୍ଗ୍‌ ଆଟ୍‍ନାତ୍‍; ମାତର୍‌ ଆମାୱାନିଙ୍ଗ୍‌ ପେଡ଼ି ଆନାତ୍‌, ୱାନ୍‌ କ୍ରିସ୍ତ ବିସ୍‍ବାସି ଆନି ମାନିକାମାନାତ୍‌ ।
1CO 7:40 ମାତର୍‌ ୱାଦ୍ ଆମା ପେଡ଼ି ଆଏଣ୍ତା ମାନାତ୍‌, ଆୟା ଅବସ୍ଥାଦାନ୍‌ ତେବାତିଙ୍ଗ୍‌ ନାଣ୍ତ ସୁକ୍‌ ଆନାତ୍‌, ଇକା ନା ବଦା, ମାରି ଇକାବା ମାପୁରୁଦି ପବିତ୍ରଆତ୍ମାଦି ବଦା ଇଜି ନାନ୍ ଅଡ଼୍‌ବିଜିନା ।
1CO 8:1 ଦିୟାମ୍‌କାଙ୍ଗ୍‌ ସିନି ବଗ୍‌ ବିସୟ୍‌ତାନ୍‌ ନା ମାଟା ଇକା, ମା ୱିଜେରିଙ୍ଗ୍‌ ବୁଦି ମାନାତ୍‌ ଇଜି ମିର୍‌ ଆମାକା ୱେର୍‌ସିନିଦେର୍‌, ଆକା ମାପ୍‌ ନେସ୍‌ନାପ୍‌ । ବୁଦି ଲୋକ୍‌ତିଙ୍ଗ୍‌ ଆକାର୍‍ କିନାତ୍‌, ମାତର୍‌ ଜିବନ୍‌ନୋନିମାଣୁକୁ ଲୋକ୍‌ତିଙ୍ଗ୍‌ ମିସାକିନାତ୍‌ ।
1CO 8:2 ଜଦି ଏନ୍‌ ଇନିକା ନେସ୍‌ତାମାନା ଇଜି ଏତ୍‌ କିନାନ୍‌, ଆର୍‌ତିଙ୍ଗ୍‌ ୱାନିନ୍ଦି ଏଣ୍ତେସ୍‌ ନେସ୍‌ନିକା ମାନାତ୍‌, ୱାନ୍‌ ଇୟାସାନ୍ଧି ଆୟାୱାଜା ନେସ୍‌ଏନ୍‌ ।
1CO 8:3 ଜଦି ଏନ୍‌ ମାପୁରୁଙ୍ଗୁଁ ଜିବନ୍‌ନୋନାନ୍‌, ୱାନିଙ୍ଗ୍‌ ମାପୁରୁ ନେସ୍‌ନାନ୍‌ ।
1CO 8:4 ଆଦେଙ୍ଗ୍‌ ବମେଆଙ୍ଗ୍‌ ସିନି ବଗ୍‌ ଉଣି ବିସୟ୍‌ତାନ୍‌ ମାପ୍‌ ନେସ୍‌ନାପ୍‌ ଜେ, ଦୁନିଆଦୁ ଦିୟାମ୍‍ ଇଜି ଇନିକା ସିଲେତ୍‌, ମାରି ଅରେନ୍‍ ମାପୁରୁଙ୍ଗୁଁ ଡ଼ିସ୍‌ତିଙ୍ଗ୍‌ ଏନ୍‌ ସିଲେନ୍‌ ।
1CO 8:5 ଇରିଙ୍ଗ୍‌ ମୁସ୍‌କୁପୁର୍‌ତୁ ଆପିତ୍‌ ମାରି ଦୁନିଆଦୁ ଆପିତ୍‌, ଆମାୱାନିକାଙ୍ଗ୍‌ ଦିୟାମ୍‌ ଇଜି ଇନାର୍‍, ଜଦି ୱାକ୍‌ ତେବାଦେଙ୍ଗ୍‌ ଆଟ୍‌ନେମାନେ, ଇୟାୱାଜା ଗାଦି “ଦିୟାମ୍‌କୁ” ମାରି ଗାଦି “ପ୍ରବୁରୁ” ତେବାନାର୍‌ ।
1CO 8:6 ମାତର୍‌ ମା ଅରେନ୍‌ମାତର୍‌ ମାପୁରୁ, ଆମା ବୁବାଦିମାଣୁକୁ ୱିଜୁ ବିସୟ୍‌ ତିଆର୍‌ ଆତାମାନାତ୍‌, ମାରି ମାଡୁ ୱାନି ଉଣ୍ତିଙ୍ଗ୍‌ ଜିତିମାନିକା, ମାରି ଅରେନ୍‌ମାତର୍‌ ପ୍ରବୁ, ଜିସୁ କ୍ରିସ୍ତ, ୱାନି ମାଣ୍‌କୁ ୱିଜୁ ବିସୟ୍‌ ତିଆର୍‌ ଆତାମାନାତ୍‌ ମାରି ୱାନିମାଣୁକୁ ମାଡୁ ଜିତିମାନିକା ।
1CO 8:7 ମାତର୍‌ ୱିଜେରେ ଇୟା ସତ୍‍ ନେସ୍‌ଏର୍‌; ଏସ ଲୋକ୍‌ ଇୟାସାନ୍ଦିବା ଦିୟାମ୍‌ ମାନାତ୍‌ ଇଜି ଅଡ଼୍‍ବିଜି ଦିୟାମ୍‍କାଙ୍ଗ୍‌ ସିନି ବଗ୍‌ ତିନାର୍‌, ମାରି ୱାରି ବୁଦି ଦୁର୍ବଲ୍, ଆଦେଙ୍ଗ୍‌ ଆୟା କାଦି ଉଣି ମାଣ୍‌କୁ ୱାର୍‌ କାରାପ୍‌ ଆନାର୍‌ ।
1CO 8:8 ମାତର୍‌ କାଦିଦାନ୍‌ ମାପୁରୁଦି ୱାଲେ ମା ଜାଣାସିନା ଇନିକା ବାଦେଲେ ଆଏତ୍‍; ଉଣୁଇତିଙ୍ଗ୍‌ ମାଙ୍ଗିଁ ଇନିକା ଆଏତ୍‍, ମାରି ଉଟିଆଙ୍ଗାଁ ମାଙ୍ଗିଁ ଇନିକା ପୁଟ୍‌ଏତ୍‌ ।
1CO 8:9 ମାତର୍‌ ଜାଗାର୍‌ତା, ଏସ୍ତିୱାଲେ ମି ଇୟା ଅଦିକାର୍‌ ଏଣ୍ତେସ୍‌ ଦୁର୍ବଳ୍‌ଦିକାର୍‌ ତାକାନି କାରଣ୍‌ ଆଏତ୍‍ ।
1CO 8:10 ଇରିଙ୍ଗ୍‌ ବୁଦି ଜେ ମିର୍‌, ମିଙ୍ଗିଁ ଜଦି ଏନ୍‌ ମନ୍ଦିର୍‌ତୁ ଉଣିମାନୁ ବାସ୍‌ନିକା ସୁଣାନ୍‌, ଆର୍‌ତିଙ୍ଗ୍‌ ୱାନ୍‌ ମୋନ୍‌ତୁ ଦୁର୍ବଲ୍ ବିସ୍‌ବାସି ଆତିମାରିଙ୍ଗ୍‌ବା ଇନିକା ବଗ୍‌ ତିନ୍‌ଡ୍ରେଙ୍ଗ୍‌ ୱେଡ଼ିକା ଆଏନ୍‍ ?
1CO 8:11 ଆର୍‌ତିଙ୍ଗ୍‌ ଆମା ଦୁର୍ବଲ୍ ବିସ୍‌ବାସ୍‌ତି ତଡ଼ାନ୍‌ ଉଣ୍ତିଙ୍ଗ୍‌ କ୍ରିସ୍ତ ସାତା ମାର୍‌ର୍ହାନ୍‌, ୱାନ୍‌ ମି “ବୁଦିଦାନ୍‌” ନାସ୍ଟୁ ଆଜିନାତ୍‍ ।
1CO 8:12 ଇୟାପ୍ରକାର୍‌ତାନ୍‌ ତଡ଼ାନ୍‌କା ବିରୁଦ୍‌ତାନ୍‌ ପାପ୍‌ କିଜି ମାରି ୱାରି ସାସ୍‌ସିଲି ବୁଦିଦିଙ୍ଗ୍‌ ଡାକ୍‌ସି ମିର୍‌ କ୍ରିସ୍ତଦି ବିରୁଦ୍‌ତାନ୍‌ ପାପ୍‌ କିଜିନିଦେର୍‌ ।
1CO 8:13 ମାରି ଜଦି ଆମା କାଦି ନା ତଡ଼ାନ୍‌ତି ୱେର୍‌ଏ ଆଜି ୱାନିଙ୍ଗ୍‌ ପାପ୍‌ ସାରିଦାନ୍‌ ତର୍‌ସି ଅନାତ୍‌, ଇୟାଉଣ୍ତିଙ୍ଗ୍‌ ନାନ୍‌ ଏସ୍‌କାଙ୍ଗ୍‌ବା କାଣ୍ତା ତିନ୍‌ଏ ।
1CO 9:1 ନାନ୍‌ ଇନିକା ଅରେନ୍‍ ଅଦିକାର୍‌ତି ଲୋକ୍‌ ଆଏ ? ନାନ୍‌ ଇନିକା ଅରେନ୍‍ ପ୍ରେରିତ ସିସୁ ଆଏ ? ନାନ୍‌ ଇନିକା ମା ପ୍ରବୁ ଜିସୁଙ୍ଗୁଁ ସୁଡ଼ୁଏ ? ମିର୍‌ ଇନିକା ପ୍ରବୁଦିମାନୁ ନା କିତିମାନି ପାଣିଦି ପଲ୍‌ ଆଏତ୍‍ ?
1CO 9:2 ଆଇକାର୍‌ ନାଙ୍ଗିଁ ପେରିତ ସିସୁ ଇଜି ମାନାଏତିଙ୍ଗ୍‌ ବା ମିର୍‌ ମାନାତି ମାନିଦେର୍‌, ଇରିଙ୍ଗ୍‌ ପ୍ରବୁଦି ୱାଲେ ମି ଜିବନ୍‌ତି ମିସାନି ଉଣ୍ତିଙ୍ଗ୍‌ ନା ପ୍ରେରିତ ପାର୍‌ମାଣ୍‌ ମିର୍‌ ପୟ୍‌ତିମାନିଦେର୍‌ ।
1CO 9:3 ନ୍ୟାୟ୍‌କିନିୱାରିଙ୍ଗ୍‌ ନାନ୍‌ ୱେର୍‌ନିକା ଇକା ।
1CO 9:4 ନା ପାଣିଦି ଉଣ୍ତିଙ୍ଗ୍‌ କାଦି ମାରି ଏର୍‌ରୁ ଉଣି ଅଦିକାର୍‌ ଇନିକା ସିଲେତ୍‌ ?
1CO 9:5 ଆଇ ୱିଜେରେ ପ୍ରେରିତ ସିସୁ, ପିତର୍‍ ମାରି ପ୍ରବୁଦି ତଡ଼ାନ୍‌କା ୱାଜା ବିସ୍‌ବାସ୍‌ତି କୁଟୁମ୍‌ତି ଅରେତ୍‌ ଆଡ଼ିଦିଙ୍ଗ୍‍ ପେଡ଼ି ଆଜ ତାନି ୱାଲେ ବୁଲାନି ଉଣ୍ତିଙ୍ଗ୍‌ ନାଙ୍ଗିଁ ଇନିକା ଅଦିକାର୍‌ ସିଲେତ୍‌ ?
1CO 9:6 ଜିନି ଉଣ୍ତିଙ୍ଗ୍‌ କେବଲ ନାଙ୍ଗିଁ ମାରି ବର୍ଣ୍ଣବାବେଙ୍ଗ୍‌ ଇନିକା କାସ୍ଟୁପାଣି କିଦେଙ୍ଗ୍‌ ଆନାତ୍‌ ?
1CO 9:7 ଅରେନ୍‍ ସୌନ୍ୟ ନିଜେଦି କାର୍ସୁ ନିଜେ ସାଲା କିନାନ୍‌ ନ ? ଏନ୍‌ ଅଙ୍ଗୁର୍‍ କିଡ଼ିଇ କିଜି ଆବେଣି ପଲ୍‌ ତିନ୍‌ଏନ୍‌ ? ମାରି ଏନ୍‌ ମେଣ୍ତେଙ୍ଗ୍‌ମାନ୍ଦା ପୋସା କିଜ ଡ଼ାନ୍‌ତି ପାଲୁ ଉଣୁଏନ୍‌ ?
1CO 9:8 ନାନ୍‌ ଲୋକ୍‌ ଇସାବ୍‌ତାନ୍‌ ଇନିକା ଇୟାୱିଜୁ ମାଟା ୱେର୍‌ସିନା ? ମୋସାଦି ନିୟମ୍‌ ବା ଇନିକା ଇୟାୱିଜୁ ମାଟା ଇନ୍‌ଏତ୍‌ ?
1CO 9:9 ଇରିଙ୍ଗ୍‌ ମୋସାଦି ନିୟମ୍‌ତୁ ଇକା ରାସାତାମାନାତ୍‌, “ଆତେରେ ବୁଲାଜିମାନି କଡିଦି ମକମ୍‌ତୁ ତୁଣ୍ତି ତର୍‌ମାଟ୍‌ ।” ମାପୁରୁ ଇନିକା କଡିଦି ବିସୟ୍‌ତାନ୍‌ ସିନ୍ତା କିଜିନାନ୍‌ ?
1CO 9:10 ୱାନ୍‌ ଇନିକା କେବଲ ମା ଉଣ୍ତିଙ୍ଗ୍‌ ଇକା ଇନ୍‌ଏନ୍‌ ? ହୁଁ ମା ଉଣ୍ତିଙ୍ଗ୍‌ ଇକା ରାସାତାମାନାତ୍‌, ଏଣ୍ତେସ୍‌ ଚାସ୍‌ପାଣିକିନିକାନ୍‌ ମାରି ପାସି ଉଣ୍ତାକିଜତାନିକାନ୍‌, ପାସିଦାନ୍‌ ବାଗ୍‌ ପୟ୍‌ନି ଉଣ୍ତିଙ୍ଗ୍‌ ଆସା ଇଡ୍‌ଜି ପାଣି କିନାର୍‌ ।
1CO 9:11 ଜଦି ମାପ୍‌ ମି ଉଣ୍ତିଙ୍ଗ୍‌ ଆତ୍ମାଦି ୱିତୁ ୱିତ୍‌ତାମାନାପ୍‌, ଆର୍‌ତିଙ୍ଗ୍‌ ମିମାଣୁକୁ ଏସ ଦୁନିଆଦି ପାସି ପୟ୍‌ଦେଙ୍ଗ୍‌ ବଦା କିନିକା ଇନିକା ଉନ୍‌ଡ୍ରି ଆସା ସିଲେ ?
1CO 9:12 ଜଦି ମିମାଣୁକୁ ଇୟାୱାଜା ଆସା କିନି ଉଣ୍ତିଙ୍ଗ୍‌ ଆଇୱାରିଙ୍ଗ୍‌ ଅଦିକାର୍‌ ମାନାତ୍‌, ଆର୍‌ତିଙ୍ଗ୍‌ ମା ଅଦିକାର୍‌ ଇନିକା ୱାରିମାଣୁକୁ ମାରି ନାଣ୍ତ ସିଲେ ? ମାରିବା ମାପ୍‌ ଆୟା ଅଦିକାର୍‌ ବ୍ୟବ୍‌ହାର୍‌ କିଏପ୍‌; ମାତର୍‌ ଏଣ୍ତେସ୍‌ କ୍ରିସ୍ତଦି ସୁସମାଚାର୍‌ ପ୍ରଚାର୍‌ତୁ ଇନି ବାଦା ସମାକିତ୍‌, ଇୟାଉଣ୍ତିଙ୍ଗ୍‌ ମାପ୍‌ ୱିଜୁ ସାସ୍‌ କିଜିନାପ୍‌ ।
1CO 9:13 ଆମାକାର୍‌ ମନ୍ଦିର୍‌ତୁ ସେବା କିନାର୍‌, ୱାର୍‌ ଜେ ମନ୍ଦିର୍‌ତି କାଦି ପୟ୍‌ନାର୍‌, ମାରି ଆମାକାର୍‌ ବେଦିଦୁ ପୁଜା କିଦେଙ୍ଗ୍‌ ତେବାନାର୍‌, ୱାର୍‌ ଜେ ବେଦିଦି ୱାଲେ ମିସାଜି ମାନାର୍‌, ଇକା ଇନିକା ମିର୍‌ ନେସ୍‌ଇଦେର୍‌ ?
1CO 9:14 ଆୟାୱାଜା ଆମାକାର୍‌ ସୁସମାଚାର୍‌ ପ୍ରଚାର୍‌ କିନିକାର୍‌, ୱାର୍‌ ଜେ ସୁସମାଚାର୍‌ଦାନ୍‌ ପଟା ପସା କିନାର୍‌, ଇକା ପ୍ରବୁ ଆଦେସ୍‌ ସିତାମାନାନ୍‌ ।
1CO 9:15 ମାତର୍‌ ନାନ୍‌ ଇୟାୱିଜୁ ବିସୟ୍‌ ଇନିକା ବ୍ୟବ୍‌ହାର୍‌ କିଏ, ମାରି ନା ଉଣ୍ତିଙ୍ଗ୍‌ ଜେ ଇୟାୱାଜା କିଆନାତ୍‌, ଇୟାଉଣ୍ତିଙ୍ଗ୍‌ ନାନ୍‌ ଇୟାୱିଜୁ ରାସ୍‌ଏ; ଇରିଙ୍ଗ୍‌ ଏନ୍‌ ନା ଇୟା ଗର୍ବଦିଙ୍ଗ୍‌ ବେକାର୍‌ତିକା ପାର୍‌ମାଣ୍‌ କିନି ବାଦ୍‌ଲୁ ସାନିକା ନା ଉଣ୍ତିଙ୍ଗ୍‌ ନେଗେତ୍‌ ।
1CO 9:16 ଇରିଙ୍ଗ୍‌ ଜଦି ସୁସମାଚାର୍‌ ପ୍ରଚାର୍‌ କିଜିନା, ଆବେନ୍‌ ନାନୁ ଗର୍ବ କିନିକା ଇନିକା ସିଲେ, ଇୟା ଦାଇତ୍‌ କିନି ଉଣ୍ତିଙ୍ଗ୍‌ ନାନ୍‌ ଆଦେସ୍‌ ପୟ୍‌ତାମାନା; ମାରି ଜଦି ସୁସମାଚାର୍‌ ପ୍ରଚାର୍‌ କିଏ, ଆର୍‌ତିଙ୍ଗ୍‌ ହାୟ୍‌, ନାନ୍‌ ଦଣ୍ତ ପୟ୍‌ନିକିନ୍ଦା ।
1CO 9:17 ଜଦି ନାନ୍‌ ନିଜେଦି ଇଚ୍ଛାଦାନ୍‌ ଇୟା ପାଣି କିତିଙ୍ଗ୍‌, ଆର୍‌ତିଙ୍ଗ୍‌ ନାଙ୍ଗିଁ ପୁରସ୍କାର୍‌ ମାନାତ୍‌; ମାତର୍‌ ମାପୁରୁ ନା ମୁସ୍‌କୁ ଇୟା ଦାଇତ୍‌ ସିତି ମାନିଙ୍ଗ୍‌ ଇକା କିଦେଙ୍ଗ୍‌ ନା ପାଣି ।
1CO 9:18 ଆର୍‌ତିଙ୍ଗ୍‌ ନାନ୍‌ ଇନି ପୁରସ୍କାର୍‌ ପୟ୍‌ଜିନା ? ୱିଜେରି ଲାକ୍‌ତୁ ଆରେଏ ସୁସମାଚାର୍‌ ପ୍ରଚାର୍‌ କିଜିନା, ଇକା ନା ପୁରସ୍କାର୍‌, ଆୟାଉଣ୍ତିଙ୍ଗ୍‌ ସୁସମାଚାର୍‌ ପ୍ରଚାର୍‌ ଉଣ୍ତିଙ୍ଗ୍‌ ନାନ୍‌ ଇନି ସୁଜୋଗ୍‌ ସୁବିଦା ୱେଡ଼ିକା କିନି ଉଣ୍ତିଙ୍ଗ୍‌ ଅଦିକାର୍‌ ବ୍ୟବ୍‌ହାର୍‌ ଆଏତ୍‍ ।
1CO 9:19 ନାନ୍‌ ଅରେନ୍‍ ଜିବନ୍‌ତି ଲୋକ୍‌, ଏମେୱାନି ପାଣିକିନିସାକର୍‌ ଆଏ, ଏଣ୍ତେସ୍‌ ନାନ୍‌ କ୍ରିସ୍ତଦି ଉଣ୍ତିଙ୍ଗ୍‌ ନାଣ୍ତ ଲୋକାଙ୍ଗ୍‌ ପୟ୍‌ନି ଉଣ୍ତିଙ୍ଗ୍‌ ୱିଜେରି ଦାସ୍‍ ଆତାମାନା ।
1CO 9:20 ଏଣ୍ତେସ୍‌ ନାନ୍‌ ଜିହୁଦିରିଙ୍ଗ୍‌ ପୟ୍‌ଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ୱାରି ଲାକ୍‌ତୁ ଜିହୁଦିରି ୱାଜା ବ୍ୟବ୍‌ହାର୍‌ କିଜିନା; ଏଣ୍ତେସ୍‌ ମୋସାଦି ନିୟମ୍‌ ମାନାନିୱାରିଙ୍ଗ୍‌ କ୍ରିସ୍ତଦିମାନୁ ପୟ୍‌ଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ନିୟମ୍‌ତିଙ୍ଗ୍‌ ମାନାଇତିଙ୍ଗ୍‌ ବା ନିୟମ୍‌ତି ଇସାବ୍‌ତି ଲୋକା ଲାକ୍‌ତୁ ନିୟମ୍‌ତି ଇସାବ୍‌ତାନ୍‌ ମାନି ୱାଜା ବ୍ୟବ୍‌ହାର୍‌ କିଜିନା ।
1CO 9:21 ଆୟାୱାଜା ଅଣଜିହୁଦିରିଙ୍ଗ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍‌ ୱାରି ମାନୁ ପାଣି କିନିୱାଲେ ଅଣଜିହୁଦିରି ୱାଜା ନିୟମ୍‌ ସିଲି ବ୍ୟବ୍‌ହାର୍‌ କିଜିନା । ଇୟାତାନି ଅର୍ତ ସିଲେ ଜେ, ନାନ୍‌ ମାପୁରୁଦି ବିଦିବିଦାନ୍‌ ବ୍ୟବ୍‌ହାର୍‌ କିଏ, ସତ୍‌ତାନ୍‌ ନାନ୍‌ କ୍ରିସ୍ତଦି ନିୟମ୍‌ତି ଆଡ୍‌ଗିମାନା ।
1CO 9:22 ଏଣ୍ତେସ୍‌ ନାନ୍‌ ବିସ୍‌ବାସ୍‌ତୁ ସାସ୍‌ସିଲିୱାରିଙ୍ଗ୍‌ ପୟ୍‌ଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ସାସ୍‌ସିଲିୱାରି ଲାକ୍‌ତୁ ୱାରି ୱାଜା ଆତାମାନା; ଏଣ୍ତେସ୍‌ ନାନ୍‌ ଆମାଇନି ଉପାୟ୍‌ତାନ୍‌ ୱିଜୁ ଲୋକାଙ୍ଗ୍‌ ରକିୟା କିଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ୱିଜେରି ଲାକ୍‌ତୁ ୱିଜୁ ରକମ୍‍ତି ବ୍ୟବ୍‌ହାର୍‌ କିତାମାନା ।
1CO 9:23 ନାନ୍‌ ଏଣ୍ତେସ୍‌ ସୁସମାଚାର୍‌ତି ଆସିର୍ବାଦ୍‌ତିମାନୁ ମିସାନା, ଇୟାଉଣ୍ତିଙ୍ଗ୍‌ ଇୟାୱିଜୁ କିନା ।
1CO 9:24 ଆମାକାର୍‌ ଉର୍‌କୁତେଙ୍ଗ୍‌ ବାଗ୍‌ ଅନାର୍‍, ୱାର୍‌ ୱିଜେରେ ଉର୍‌କୁନାର୍‌ ସତ୍‍, ମାତର୍‌ କେବଲ ଅରେନ୍‍ ଜେ ପୁରସ୍କାର୍‌ ପୟ୍‌ନାନ୍‌, ଇକା ଇନିକା ମିର୍‌ ନେସ୍‌ଇଦେର୍‌ ? ମିର୍‌ ଏଣ୍ତେସ୍‌ ପୁରସ୍କାର୍‌ ପୟ୍‌ନିଦେର୍‌, ଇୟାଉଣ୍ତିଙ୍ଗ୍‌ ଆୟାୱାଜା ଉର୍‌କୁତୁ ।
1CO 9:25 କାର୍‌ଜିନିକାର୍‌ ଅଜା କିନିୱାଲେ ୱିଜୁ ବିସୟ୍‌ତାନ୍‌ ଜାଗାର୍‌ତା ବ୍ୟବ୍‌ହାର୍‌ କିବିସ୍‌କିନାର୍‌; ୱାର୍‌ ନାସ୍ଟୁଆନି ପୁଙ୍ଗୁଁସରା ପୟ୍‌ନି ଉଣ୍ତିଙ୍ଗ୍‌ ଆକା କିନାର୍‌; ମାତର୍‌ ମାଡୁ ନାସ୍ଟୁଆଇ ପୁରସ୍କାର୍‌ ପୟ୍‌ନି ଉଣ୍ତିଙ୍ଗ୍‌ ଆକା କିନିକା ।
1CO 9:26 ଆୟାଉଣ୍ତିଙ୍ଗ୍‌ ନାନ୍‌ ସିଦାଦାନ୍‌ ଇତି ବାଡି ଲାକ୍‌ତୁ ଉର୍‌କୁନା, ଅରେନ୍‍ ମୁଷ୍ଟିଜୁଦ୍ଦ ୱାଜା ନାନ୍‌ ନିଜେଦି ମୁଟିଦି ଡାକ୍‌ନି ୱାଜା ୱାର୍‌ଇକା ଡ଼ିସ୍‌ସୋ ସିଦେଙ୍ଗ୍‌ ଅଡ଼୍‌ବିନା‌ ।
1CO 9:27 ଆଇ ଲୋକା ଲାକ୍‌ତୁ ସୁସମାଚାର୍‌ ପ୍ରଚାର୍‌ କିତିମାରିଙ୍ଗ୍‌ ବା ନାନ୍‌ ନିଜେ ଏଣ୍ତେସ୍‌ ସପାୟ୍‌ ଆନା, ଇୟାଉଣ୍ତିଙ୍ଗ୍‌ ନା ନିଜେଦି ମେନ୍ଦଲ୍‌ତିଙ୍ଗ୍‌ କାସ୍ଟୁ ସାସ୍‌ କିଜି ମାରି ନିଜେଦି ଆଡ୍‍ଗି କିଜି ଇଡାୟ୍‌ଆତାମାନା ।
1CO 10:1 ଏ ତଡ଼ାନ୍‌କୁ ନି ତାଙ୍ଗିଁକି, ମୋସାଦି ୱେନ୍‌କା ସୋଲ୍‌ସି ମା ପୁର୍ବେଦିଡକ୍‌ରାଦାଦାରି ଉଣ୍ତିଙ୍ଗ୍‌ ଇନିକା ଗଟେ ଆତାମାର୍ହାତ୍‌, ମିର୍‌ ଏତ୍‌ କିଦୁ, ଇକା ନା ଅରେନ୍‍ୱାନି ଇଚ୍ଛା । ୱାର୍‌ ୱିଜେରେ ବାଦଡ଼ତାନ୍‌ ସୁରକ୍ୟାଦାନ୍‌ ମାର୍ହାର୍‌, ନିଡ଼ି ସାମ୍‌ଦୁର୍‌ତାନ୍‌ କାସ୍ଟୁସିଲେଏଣ୍‌ଗା ନାତାର୍‌ ।
1CO 10:2 ମାରି ମୋସାଦି ୱେନ୍‌କାସନିୱାରି ୱାଜା ୱାର୍‌ ୱିଜେରେ ବାଦଡ଼ ମାରି ସାମ୍‌ଦୁର୍‌ତୁ ଡୁବନ୍‌ ଅତାର୍‍,
1CO 10:3 ମାରି ୱିଜେରେ ଉନ୍‌ଡ୍ରେ ଆତ୍ମିକ କାଦି ମାରି ଏର୍‌ରୁ ଉଟା ମାର୍ହାର୍‌,
1CO 10:4 ଇରିଙ୍ଗ୍‌ ୱାରି ୱାଲେ ବୁଲାଜିମାନି ଜିବନ୍‌ତି ପିଡ଼୍‌ପିକାଲୁଦାନ୍‌ ୱାର୍‌ ଆତ୍ମିକ ଏର୍‌ରୁ ଉଣିଜି ମାର୍ହାର୍‌, ମାରି ଆୟା ପିଡ଼୍‌ପିକାଲୁ କ୍ରିସ୍ତ ।
1CO 10:5 ମାରିବା ୱାରି ମାଣ୍‌କୁ ଏସଲୋକାମାନୁ ମାପୁରୁଦି ୱେଡ଼ିକା ସିଲେତାତ୍‍, ଆଦେଙ୍ଗ୍‌ ୱାରି ସାତି ମେନ୍ଧଲ୍‍ ମରୁବୁମିଦି ୱିଜୁତରିନ୍‌ ଇନିଙ୍ଗାଁ ଆନିଙ୍ଗାଁ ଆଜି ମାର୍‌ଏ ।
1CO 10:6 ୱାର୍‌ ଏଣ୍ତେସ୍‌ ନାନି ତାଗ୍‌ଇ ବିସୟ୍‌ତାନ୍‌ ଲାଲାୟ୍‌ ଆଜିମାର୍ହାର୍‌, ମାଡୁ ଏଣ୍ତେସ୍‌ ଆୟାୱାଜା ଲାଲାୟ୍‌ ଆଇକା, ଇୟାଉଣ୍ତିଙ୍ଗ୍‌ ଇୟାୱିଜୁ ବିସୟ୍‌ ମା ଉଣ୍ତିଙ୍ଗ୍‌ କାତାଦି ୱାଜା ଆତାମାନାତ୍‌ ମାରି ସେତ୍‌ନା ସିଜିନାତ୍‌ ।
1CO 10:7 ଏଣ୍ତେସ୍‌ ୱାରି ମାଣ୍‌କୁ ଏସଲୋକ୍‌ ବମା ପୁଜାକିନିକାର୍‌ ଆତାର୍‌, ଆୟାୱାଜା ମିର୍‌ ଦିୟାମ୍‌ ପୁଜାରୀରି ଆମାଟ୍‌; ଏଣ୍ତେସ୍‌ ଦର୍ମସାସ୍ତ୍ରଦୁ ରାସାତାମାନାତ୍‌, “ଲୋକୁ ଉନ୍‌ଡେଙ୍ଗ୍‌ ବାସ୍‌ତାର୍‌, ମାରି ତାନେୱେନ୍‌କା ନିଙ୍ଗିଁଜି ରଙ୍ଗ୍‌ରସ୍‌ତାନ୍‌ କିତାର୍‌ ।”
1CO 10:8 ଏଣ୍ତେସ୍‌ ୱାରି ମାଣ୍‌କୁ ଏସଲୋକ୍‌ ଦାରିପାଣି କିଜି ଉନ୍‌ଡ୍ରେ ନାଣ୍ତିଙ୍ଗ୍‌ କଡ଼େ ତିନି ହାଜାର୍‌ ଲୋକୁ ସାତାର୍‌, ଆୟାୱାଜା ପାପ୍‌ ମାଡୁ କିଏଟ୍‌ ।
1CO 10:9 ଏଣ୍ତେସ୍‌ ୱାରି ମାଣ୍‌କୁ ଏସଲୋକ୍‌ ପ୍ରବୁଙ୍ଗୁଁ ପରିକା କିଜି ସାରାସ୍‌ତାନ୍‌ ନାସ୍ଟୁ ଆତାର୍‌, ଆୟାୱାଜା ମାଡୁ ପ୍ରବୁଙ୍ଗୁଁ ପରିକା କିଏଟ୍‌ ।
1CO 10:10 ଏଣ୍ତେସ୍‌ ୱାରି ମାଣ୍‌କୁ ଏସଲୋକ୍‌ ମାପୁରୁଦି ବିରୁଦ୍‍ ମାଟା ଇଜି ଜୁଦକିନି ଦୁତ୍‌ତାନ୍‌ ନାସ୍ଟୁ ଆତାର୍‌, ଆୟାୱାଜା ମିର୍‌ ବିରୁଦ୍‌ତି ମାଟେଙ୍ଗ୍‌ ଇନ୍‌ମାଟ୍‌ ।
1CO 10:11 ଇୟାୱିଜୁ କାତାଦି ୱାଜା ୱାରି ଉଣ୍ତିଙ୍ଗ୍‌ ଗଟାତା ମାର୍ହାତ୍‌, ମାରି ଆମାୱାରି ବେଡ଼ାଦୁ ଦୁନିଆ ସେସ୍‌ଆନି ଦିନ୍‌ ବାସା କିଜିନିକା, ଇୟାୱାଜା ଜେ ମାଡୁ, ମା ସେତ୍‌ନା ଉଣ୍ତିଙ୍ଗ୍‌ ଆୟାୱିଜୁ ରାସାତାମାନାତ୍‌ ।
1CO 10:12 ଏନ୍‌ ନିଜେଦିଙ୍ଗ୍‌ ଡାଟ୍‌ମାନା ଇଜି ଅଡ଼୍‌ବିନାନ୍‌, ୱାନ୍‌ ଏଣ୍ତେସ୍‌ ମେଡ଼େଏନ୍‌, ଇୟାଉଣ୍ତିଙ୍ଗ୍‌ ୱାନ୍‌ ଜାଗ୍‌ରାତା ଆପିନ୍‌ ।
1CO 10:13 ଲୋକ୍‌ତି ଉଣ୍ତିଙ୍ଗ୍‌ ଆମା ଏଣ୍ତେସ୍‌ ନାନି ପରିକା ପଡ଼ାତାମାନାତ୍‌, ଆକା ଡ଼ିସ୍‌ତିଙ୍ଗ୍‌ ଆଇପ୍ରକାର୍‌ତି ପରିକା ମି ଉଣ୍ତିଙ୍ଗ୍‌ ଗଟେ ଆଏତ୍‍; ମାତର୍‌ ମାପୁରୁ ୱାନି ପାର୍‌ମାଣ୍‌ତି ରକ୍‌ୟାଦାନ୍‌ ବିସ୍‌ବାସ୍‌, ୱାନ୍‌ ମିଙ୍ଗିଁ ଇନି ସାସ୍‌ସିଲି ପରିକାଦୁ ପରିକା ଆଦେଙ୍ଗ୍‌ ସିଏନ୍‌, ମାତର୍‌ ଏଣ୍ତେସ୍‌ ମିର୍‌ ସାସ୍‌ କିଦେଙ୍ଗ୍‌ ଆଟ୍‌ନିଦେର୍‌, ଇୟାଉଣ୍ତିଙ୍ଗ୍‌ ପରିକା ଆନି ଦାପ୍ରେ ଦାପ୍ରେ ୱାନ୍‌ ମିଙ୍ଗିଁ ସାକ୍ତି ସିନାନ୍‌ ମାରି ଉଦାର୍‌ତି ସାରି ବା ତିଆର୍‌ କିନାନ୍‌ ।
1CO 10:14 ମାରି, ଏ ନା ତଡ଼୍‍କୁ, ବମା ପୁଜାଦାନ୍‌ ଆକ ମାନ୍‍ଡ୍ରୁ ।
1CO 10:15 ନାନ୍‌ ବୁଦିଦି ଲୋକାଙ୍ଗ୍‌ ୱେର୍‌ତି ୱାଜା ୱେର୍‌ସିନା; ନାନ୍‌ ଆମାକା ୱେର୍‌ସିନା, ଆକା ମିର୍‌ ନିଜେ ବିଚାର୍‌ କିଦୁ ।
1CO 10:16 ପ୍ରବୁବୋଜତୁ ମାଡୁ ଆମା ଉଣିଡୁବାୟ୍‌ ବ୍ୟବ୍‌ହାର୍‌ କିନିକା, ତାନି ଉଣ୍ତିଙ୍ଗ୍‌ ମାଡୁ ମାପୁରୁଙ୍ଗୁଁ ଦନ୍ୟବାଦ୍‌ ସିନିକା । ଇୟା ଉଣିଡୁବାୟ୍‌ତାନ୍‌ ଉଣିୱାଲେ ମାଡୁ କ୍ରିସ୍ତଦି ନେତେର୍‌ତୁ ମିସାନିକା । ମାରି ରୁଟି ରୁକ୍‌ସୋ ତିନି ମାଣ୍‌କୁ ମାଡୁ କ୍ରିସ୍ତଦି ମେନ୍ଦଲ୍‌ତୁ ମିସାନିକା ।
1CO 10:17 ଇରିଙ୍ଗ୍‌ ରୁଟି ଉନ୍‌ଡ୍ରେ ଆତିଙ୍ଗ୍‌ବା ମାଡୁ ଗାଦିଲୋକ୍‌ ଆତିଙ୍ଗ୍‌ ‌ବା ମାଡୁ ଉନ୍‌ଡ୍ରେ ମେନ୍ଧଲ୍‍, ଇରିଙ୍ଗ୍‌ ମାଡୁ ୱିଜେରେ ଆୟା ଉନ୍‌ଡ୍ରେ ରୁଟିଦୁ ମିସାତିମାନିକା ।
1CO 10:18 କେବଲ ଇସ୍ରାଏଲ ଲୋକା ବିସୟ୍‌ତାନ୍ ଏତ୍‌କିଦୁ, ୱାରି ମାଣ୍‌କୁ ଆମାକାର୍‌ ପୁଜାକିତିକାଣ୍ତା ତିନାର୍‌, ୱାର୍‌ ଇନିକା ବେଦିଦି ଉପାସ୍‍ତି ୱାଲେ ମିସାଏର୍‌ ।
1CO 10:19 ଆର୍‌ତିଙ୍ଗ୍‌ ଦିୟାମ୍‍କାଙ୍ଗ୍‍ ସିନି ବଗ୍‌ ଇଜି ଜେ ଇନିକା ମାନାତ୍‌ ମାରି ଦିୟାମ୍‌ ଇଜି ଜେ ଇନିକା ମାନାତ୍‌, ଇକା ଇନିକା ନାନ୍‌ ୱେର୍‌ସିନା ?
1CO 10:20 ସିଲେ, ମାତର୍‌ ନାନ୍‌ ୱେର୍‌ସିନା ଜେ, ଆମା ଆମାକା ୱାର୍‌ ପୁଜା ୱାଜା ସର୍‌ପେ କିନାର୍‌, ଆୟାୱିଜୁ ୱାର୍‌ ମାପୁରୁଦି ଉଦେସ୍‌ତାନ୍‌ ସିଲେ, ଆକା ଦୁବେଙ୍ଗାଁ ଉଦେସ୍‌ତାନ୍‌ କିନାର୍‌ । ମାରି, ମିର୍‌ ଜେ ଦୁବେଙ୍ଗାଁ ୱାଲେ ମିସାଦୁ, ଇକା ନା ଇଚ୍ଛା ସିଲେ ।
1CO 10:21 ମିର୍‌ ପ୍ରବୁଦି ଉଣିଡୁବାୟ୍‌ ମାରି ଦୁବେଙ୍ଗାଁ ଉଣିଡୁବାୟ୍‌ତୁ ରୁଣ୍ତିୱାନିକାଙ୍ଗ୍‌ ଉଣ୍ତେଙ୍ଗ୍‌ ଆଟ୍‍ଇଦେର୍‍; ମିର୍‌ ପ୍ରବୁଦି ମେଜ ମାରି ଦୁବେଙ୍ଗାଁ ମେଜ ରୁଣ୍ତିୱାନିକାଙ୍ଗ୍‌ ମିସାଦେଙ୍ଗ୍‌ ଆଟ୍‍ଇଦେର୍‍ ।
1CO 10:22 ମାରିବା ମାଡୁ ଇନିକା ପ୍ରବୁଙ୍ଗୁଁ ଗିଦିରି କିନିକା ? ମାଡୁ ଇନିକା ମାପୁରୁମାଣୁକୁ ନାଣ୍ତ ସାକ୍ତି ?
1CO 10:23 ୱାର୍‌ ୱେର୍‍ସିନାର୍‍, “ୱିଜୁ ବିସୟ୍‌ ପୁରା କିନି ଉଣ୍ତିଙ୍ଗ୍‌ ମାଙ୍ଗିଁ ଅଦିକାର୍‌ ମାନାତ୍‌,” ମାତର୍‌ ୱିଜୁ ବିସୟ୍‌ ନେଗିକା ସିଲେ । ମାପ୍‌ ୱିଜୁ ବିସୟ୍‌ କିଦେଙ୍ଗ୍‌ ଆଟ୍‍ନାପ୍‍, ମାତର୍‌ ୱିଜୁ ବିସୟ୍‌ତାନ୍‌ ମିଚ୍‌ ମାଟା ସଏତ୍‌ ।
1CO 10:24 ଏନ୍‌ ନିଜେଦି ନେଗିକା ସେସ୍ଟା କିମାକିନ୍‌, ମାତର୍‌ ୱିଜୁ ଲୋକା ଆଇୱାନିଙ୍ଗ୍‍ ନେଗିକା ସେସ୍ଟା କିପିନ୍‌ ।
1CO 10:25 ବୁଦିଦିଙ୍ଗ୍‌ ସପା ଇଡ୍‌ନି ଉଣ୍ତିଙ୍ଗ୍‌ ଇନିକା ୱେନ୍‍ବାଏଣ୍‌ଗା ସାତାଦୁ ପର୍‌ଜିମାନି କାଣ୍ତା ମିର୍‌ ନିଜେଦିଇଚ୍ଛାଦାନ୍‌ ତିନ୍‌ଡ୍ରେଙ୍ଗ୍‌ ଆଟ୍‌ନିଦେର୍‌,
1CO 10:26 ଇରିଙ୍ଗ୍‌ ସାସ୍ତ୍ରଦୁ ରାସ୍‌ତିମାନି ବାକ୍ୟ ଇସାବ୍‌ତାନ୍‌, ଦୁନିଆ ମାରି ଆବେନ୍‌ ମାନି ୱିଜୁ ବିସୟ୍‌ ପ୍ରବୁଦି ।
1CO 10:27 ଅବିସ୍‌ବାସ୍‌ରି ମାଣ୍‌କୁ ଏନ୍‌ ଜଦି ମିଙ୍ଗିଁ ଉଣି ଉଣ୍ତିଙ୍ଗ୍‌ କୁକ୍‌ନାନ୍‌, ମାରି ମିର୍‌ ସନ୍‍ଡ୍ରେଙ୍ଗ୍‍ ଇଚ୍ଛା କିନିଦେର୍‌, ଆର୍‌ତିଙ୍ଗ୍‌ ମି ବୁଦିଦି ଉଣ୍ତିଙ୍ଗ୍‌ ଇନିକା ୱେନ୍‍ବାଏଣ୍‌ଗା, ଆମାକା ସିତାମାନାର୍‌, ଆକା ଉଣ୍ତୁ ।
1CO 10:28 ମାତର୍‌ ଏନ୍‌ ଜଦି ମିଙ୍ଗିଁ ୱେର୍‌ନାନ୍‌, ଇକା ପୁଜାଦି ୱାଜା ସର୍‌ପେ ଆତାମାନାତ୍‌, ଆର୍‌ତିଙ୍ଗ୍‌ ଜେ ଇକା ୱେର୍‌ତାନ୍‌, ତାନି ଉଣ୍ତିଙ୍ଗ୍‌ ମାରି ବୁଦିଦି ଉଣ୍ତିଙ୍ଗ୍‌ ଆକା ଉଣୁମାଟ୍‌ ।
1CO 10:29 ମି ନିଜେଦି ବୁଦିଦି ଉଣ୍ତିଙ୍ଗ୍‌ ଇଜି ନାନ୍ ଇନ୍‌ଏ, ମାତର୍‌ ୱାନି ବୁଦିଦି ଉଣ୍ତିଙ୍ଗ୍‌ ୱେର୍‌ସିନା । ମିର୍‌ ଏଣ୍ତେସାତିଙ୍ଗ୍‌ ପ୍ରସ୍ନ କିନିଦେର୍‌, “ମା ଅଦିକାର୍‌ ଏନ୍ଦା ଆଇୱାନି ବୁଦି ଦାନ୍‌ ବିସାର୍‌ ଆନାତ୍‌ ।”
1CO 10:30 ନାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିଜି କାଦି ଉଣୁଜିନା, ଆର୍‌ତିଙ୍ଗ୍‌ ଆମାୱାନି ଉଣ୍ତିଙ୍ଗ୍‌ ଦନ୍ୟବାଦ୍‌ ସିନା, ୱାନି ଉଣ୍ତିଙ୍ଗ୍‌ ନିନ୍ଦା ଇନିତାନିଙ୍ଗ୍‌ ଆନା ?
1CO 10:31 ଆୟାଉଣ୍ତିଙ୍ଗ୍‌ ମିର୍‌ ଉଣ୍ତୁ ସିଲିତିଙ୍ଗ୍‌ ତିନ୍‌ଡ୍ରୁ ମାରି ଆମାକା ଇନିକା କିଦୁ, ମାପୁରୁଦି ଗୌରବ୍‍ତି ଉଣ୍ତିଙ୍ଗ୍‌ ୱିଜୁ କିଦୁ ।
1CO 10:32 ଜିହୁଦି ମାରି ଗ୍ରିକ୍‌ ମାରି ମାପୁରୁଦି ମଣ୍ତଲି, ଏଙ୍ଗ୍‌ବା ତାକାନି ପାଣି ଆମାଟ୍‌ ।
1CO 10:33 ମିର୍‌ ନା ୱାଜା ବେବ୍‍ହାର୍ କିଦୁ । ଏଣ୍ତେସ୍‌ ନାନ୍‌ ବା ନା ସିନ୍ତା କିଏଣ୍‌ଗା ନାଣ୍ତଲୋକା ରକିୟାଦି ଉଣ୍ତିଙ୍ଗ୍‌ ୱାରି ନେଗିତାନିଙ୍ଗ୍‌ ସିନ୍ତା କିନା, ମାରି ୱିଜୁ ବିସୟ୍‌ତାନ୍‌ ୱିଜେରିଙ୍ଗ୍‌ ୱେଡ଼ିକା କିଦେଙ୍ଗ୍‌ ଜାତୁନ୍‍ କିନା ।
1CO 11:1 ନାନ୍‌ ଏଣ୍ତେସ୍‌ କ୍ରିସ୍ତଦି ୱେନ୍‌କାସୋର୍‌ଇ ୱାଜା ମିର୍‌ ବା ଆୟାୱାଜା ନା ୱେନ୍‌କା ରାଦୁ ।
1CO 11:2 ମିର୍‌ ଜେ ୱିଜୁ ବିସୟ୍‌ତୁ ନାଙ୍ଗିଁ ଏତ୍‌ କିନିଦେର୍‌ ମାରି ନାନ୍‌ ମିଙ୍ଗିଁ ଜେ ୱିଜୁ ସିକିୟା ସିତାମାନା, ଆୟାୱିଜୁ ମାନାଜିନିଦେର୍‌, ଇୟାଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ପ୍ରସଂସା କିଜିନା ।
1CO 11:3 ମାତର୍‌ କ୍ରିସ୍ତ ଜେ ୱିଜେରି ମେମାର୍‌ଙ୍ଗାଁ ତାଲାଦି ୱାଜା ମାରି ମେମାର୍‌ଏନ୍‌ ଜେ ଆଡ଼୍‌ସିଦି ତାଲାଦି ୱାଜା ମାରି ମାପୁରୁ ଜେ କ୍ରିସ୍ତଦି ତାଲାଦି ୱାଜା, ଇକା ମିର୍‌ ନେସ୍‌ତିମାନିଦେର୍‌ ଇଜିନା ଇଚ୍ଛା ।
1CO 11:4 ଆମା ମେମାର୍‌ଏନ୍‌ ନିଜେଦି ତାଲାଦୁ ପିଡ଼ିକାଜି ପାର୍‌ତାନା କିନାନ୍‌ ମାରି ମାପୁରୁଦି ବାକ୍ୟ ୱେର୍‌ନାନ୍‌, ୱାନ୍‌ କ୍ରିସ୍ତଙ୍ଗ୍‌ ଅପମାନ୍‌ କିନାନ୍‌ ।
1CO 11:5 ମାତର୍‌ ଆମା ଆଇମା ନିଜେଦି ତାଲାଦୁ ପିଡ଼ିକାଏଣ୍‌ଗା ପାର୍‌ତାନା କିନାତ୍‌ ମାରି ମାପୁରୁଦି ବାକ୍ୟ ୱେର୍‌ନାତ୍‌, ୱାଦ୍ ୱାନି କନ୍‌ଲିଙ୍ଗ୍‌ ଅପମାନ୍‌ କିନାତ୍‌ । ଆୟାନାନି ଆଇମା ତାନି ତାଲା ଟାଙ୍ଗିଁରି ଆନି ସାମାନ୍‌ ।
1CO 11:6 ଜଦି ଏମେ ଆଇମା ତାଲାଦୁ ପିଡ଼ିକାଏତ୍‌, ଆର୍‌ତିଙ୍ଗ୍‌ ତାନି ତାଲାଦି କୁକୁଟି ବା କୟ୍‌ଜପୋକ୍‌ତି; ମାତର୍‌ ଆଇମାଦି ଉଣ୍ତିଙ୍ଗ୍‌ କୁକୁଟି କୟ୍‌ନିକା ମାରି ତାଲା ଟାଙ୍ଗିଁରି ଆନିକା ସେମାର୍‌, ଆର୍‌ତିଙ୍ଗ୍‌ ୱାନ୍‌ ତାଲା ପିଡ଼ିକାପିତ୍‌ ।
1CO 11:7 ମେମାର୍‌ଏନ୍‌ ମାପୁରୁଦି ମୁର୍ତିୱାଜା ମାରି ଗୌରବ୍‌ଦି ୱାଜା ଆତିଙ୍ଗ୍‌ ସତ୍‌ତାନ୍‌ ୱାନି ତାଲା ପାଡ଼ାକ୍‌ନିକା ଦର୍‌କାର୍‌ ସିଲେ, ମାତର୍‌ ଆଇମା ମେମାର୍‌ଏନ୍‌ତି ଗୌରବ୍‌ତି ୱାଜା ।
1CO 11:8 ଇରିଙ୍ଗ୍‌ ମେମାର୍‌ଏନ୍‌ ଆଇମାଦିମାଣୁକୁ ତିଆର୍‌ ଆଏନ୍‍, ମାତର୍‌ ଆଇମା ମେମାର୍‌ଏନ୍‌ତିମାଣୁକୁ ତିଆର୍‌ ଆତାମାନାତ୍‌ ।
1CO 11:9 ମାରି ମେମାର୍‌ଏନ୍‌ତି ତିଆର୍‌କିନିକା ଆଇମାଦି ଉଣ୍ତିଙ୍ଗ୍‌ ଆଏତାତ୍‌; ମାତର୍‌ ମେମାର୍‌ଏନ୍‌ତି ଉଣ୍ତିଙ୍ଗ୍‌ ଆଇମାଦି ତିଆର୍‌ ଆତାତ୍‌ ।
1CO 11:10 ଇୟାଉଣ୍ତିଙ୍ଗ୍‌ ମେମାର୍‌ଏନ୍‌ତି ଅଦିକାର୍‌ ଆଇମାଦି ମୁସ୍‌କୁ ମାନାତ୍‌, ଇୟାତାନି ନେଗେନ୍‌ତାନ୍‌ ସୁଡ଼ୁନି ୱାଜା, ଦୁତ୍‌କା ଉଣ୍ତିଙ୍ଗ୍‌ ଆଇମା ତାଲାଦୁ ପିଡ଼ିକାନିକା ଟିକ୍‌ ।
1CO 11:11 ମାରିବା ପ୍ରବୁଦିମାନୁ ମେମାର୍‌ଏନ୍‌ତିମାଣୁକୁ ଆଇମା ୱେର୍‌ଏ ସିଲେ ମାରି ଆଇମାଦିମାଣୁକୁ ମେମାର୍‌ଏନ୍‌ ୱେର୍‌ଏ ସିଲେ ।
1CO 11:12 ଇରିଙ୍ଗ୍‌ ଆଇମା ଏଣ୍ତେସ୍‌ ମେମାର୍‌ଏନ୍‌ତିମାଣୁକୁ ତିଆର୍‌ ଆତାତ୍‌, ମେମାର୍‌ଏନ୍‌ ଆଇମାଦିମାଣୁକୁ ଜନମ୍‍ ଆତାମାନାନ୍‌ । ମାତର୍‌ ୱିଜୁ ବିସୟ୍‌ ମାପୁରୁଦିମାଣୁକୁ ତିଆର୍‌ ଆତାତ୍‌ ।
1CO 11:13 ମିର୍‌ ନିଜେନିଜେ ବିସାର୍‌ କିଦୁ, ତାଲାଦୁ ପିଡ଼ିକାଏଣ୍‌ଗା ମାପୁରୁଦି ଲାକ୍‌ତୁ ପାର୍‌ତାନା କିନିକା ଆଇମାଦି ଉଣ୍ତିଙ୍ଗ୍‌ ଇନିକା ନେଗେତ୍‌ ?
1CO 11:14 ଦୁନିଆଦି ଗୁଣୁ ଇନିକା ମିଙ୍ଗିଁ ସିକିୟା ସିଏତ୍‌ ଜେ, ମେମାର୍‌ଏନ୍‌ତିଙ୍ଗ୍‌ ନିର୍‌ଇ କୁକୁଟି ଡ଼ିସ୍‌ତିଙ୍ଗ୍‌ ୱାନି ଉଣ୍ତିଙ୍ଗ୍‌ ସେମାର୍‌ତିମାଟା,
1CO 11:15 ମାତର୍‌ ଆଇମାଦିଙ୍ଗ୍‍ ନିର୍‌ଇ କୁକୁଟି ଡ଼ିସ୍‌ତିଙ୍ଗ୍‌ ତାନି ଉଣ୍ତିଙ୍ଗ୍‌ ଆକା ନେଗିମାଟା ? ଇୟା ନିର୍‌ଇ କୁକୁଟି ତାନି ତାଲାଦି ସୁନ୍ଦର୍‌ତି ଉଣ୍ତିଙ୍ଗ୍‌ ସିଆୟ୍‌ଆତାମାନାତ୍‌ ।
1CO 11:16 ମାତର୍‌ ଏନ୍‌ ଜାଟିଜଗଡ଼ା କିଦେଙ୍ଗ୍‌ ଇଚ୍ଛା କିତିଙ୍ଗ୍‌ ୱାନ୍‌ ନେସ୍‌ନି ଜେ, ମାମାନୁ ଇୟାୱାଜାଦି ରିତିନିୟମ୍‌ ସିଲେତ୍‌, ମାରି ମାପୁରୁଦି ଉପାସନା ମଣ୍ତଲିଆଙ୍ଗାଁ ସିଲେତ୍‌ ।
1CO 11:17 ମାତର୍‌ ମିର୍‌ ଉପାସନା ଉଣ୍ତିଙ୍ଗ୍‌ ଉନ୍‌ଡ୍ରେମାନୁ ଆନିୱାଲେ ଜେ, ଇକା ମି ଉଣ୍ତିଙ୍ଗ୍‌ ନେଗିକା ଆଏଣ୍‌ଗା ତାଗ୍‌ଇକା ଆଜିନାତ୍‍, ଇବେନୁ ନାନ୍‌ ମିଙ୍ଗିଁ ପ୍ରସଂସା କିଦେଙ୍ଗ୍‌ ଆଟ୍‌ଏଣ୍‌ଗା ଇୟା ଆଦେସ୍‌ ସିଜିନା ।
1CO 11:18 ଇରିଙ୍ଗ୍‌ ଆଗ୍‍ଡ଼ିନେ ନାନ୍‌ ୱେନ୍‌ଜିନା ଜେ, ମଣ୍ତଲିଦୁ ମିର୍‌ ଉନ୍‌ଡ୍ରେମାନୁ ଆନିୱାଲେ ମିମାନୁ ଦଲ୍‌ ଏର୍‌ପିସିସାନିକା ଗଟାଜିନାତ୍‌, ମାରି ନାନ୍‌ ଏସ ଇସାବ୍‌ତାନ୍‌ ଇକା ବିସ୍‌ବାସ୍‌ କିଜିନା ।
1CO 11:19 ଏଣ୍ତେସ୍‌ ମିମାନୁ ପରିକାଦୁ ଜିଣାତି ଲୋକୁ ୱେଙ୍ଗିଁନାର୍‌, ଇୟାଉଣ୍ତିଙ୍ଗ୍‌ ମିମାନୁ ଦଲ୍‌ ଏର୍‌ପିସିସାନିକା ପୁରା ଗଟାନାତ୍‌ ।
1CO 11:20 ମିର୍‌ ଉନ୍‌ଡ୍ରେ ଦଲ୍‌ ୱାଜା ଉଣ୍ତାଜି ଆମା ଉଣିମାନୁ ମିସାଜିନିଦେର୍‌, ଆକା “ପ୍ରବୁବୋଜ ଆଏତ୍‍,”
1CO 11:21 ଇରିଙ୍ଗ୍‌ ନାସ୍ତିୱାଲେ ମିର୍‌ ଉଣି ବେଡ଼ାଦୁ ୱିଜିଦେର୍‌ ଆଇୱାନିଙ୍ଗ୍‍ କାପ୍‌କିଏଣ୍‌ଗା ନିଜେ ନିଜେଦି କାଦି ଉଣିଦେର୍‌, ଆୟାଉଣ୍ତିଙ୍ଗ୍‌ ଅରେନ୍‍ ବାଙ୍ଗାଁଦୁ ତେବାନାନ୍‌ ମାରି ଆଇକାନ୍‍ ଅରେନ୍‍ ସୋସ୍‌ନା ତେବାନାନ୍‌ ।
1CO 11:22 ମିଙ୍ଗିଁ ଇନିକା ଉଣିତିନି ଉଣ୍ତିଙ୍ଗ୍‌ ନିଜେଦି ଇଲୁ ସିଲେତ୍‌ ? ମାରି ମିର୍‌ ଇନିକା ମାପୁରୁଦି ମଣ୍ତଲିଦିଙ୍ଗ୍‌ ସେମାର୍‌ କିଜିନିଦେର୍‌, ମାରି ଆମାୱାରିଙ୍ଗ୍‌ ଇନିକା ବା ସିଲେତ୍‌, ୱାରିଙ୍ଗ୍ ସେମାର୍‌ କିଜିନିଦେର୍‌ ? ନାନ୍‌ ମିଙ୍ଗିଁ ଇୟା ବିସୟ୍‌ତାନ୍‌ ଇନିକା ୱେର୍‌ନା ? ଇନିକା ମିଙ୍ଗିଁ ପ୍ରସଂସା କିନା ? ଇୟା ବିସୟ୍‌ତାନ୍‌ ନାନ୍‌ ମିଙ୍ଗିଁ ପ୍ରସଂସା କିଦେଙ୍ଗ୍‌ ଆଟ୍‍ଏ ।
1CO 11:23 ଇରିଙ୍ଗ୍‌ ନାନ୍‌ ପ୍ରବୁଦିମାଣୁକୁ ପୟ୍‌ତିମାନି ଆମା ସିକିୟା ଆକା ମିଙ୍ଗିଁ ୱେର୍‌ସିନା, ଆକା ସାତ୍ରୁରି କିୟୁଦୁ ସର୍‌ପେ ଆନି ନାଡ଼ା ପ୍ରବୁ ଜିସୁ ରୁଟି ଅସି
1CO 11:24 ମାପୁରୁଙ୍ଗୁଁ ଦନ୍ୟବାଦ୍‌ ସିଜି ଆକା ରୁକୁସି ଇର୍ହାନ୍‌, “ଇକା ମି ଉଣ୍ତିଙ୍ଗ୍‌ ନା ମେନ୍ଧଲ୍‍; ନାଙ୍ଗିଁ ଏତ୍‌କିନି ଉଣ୍ତିଙ୍ଗ୍‌ ଇକା କିଦୁ ।”
1CO 11:25 ଆୟାୱାଜା ତିର୍‌ଇ ୱେନ୍‌କା ୱାନ୍‌ ଉଣି ଡୁବାଇ ବା ଆସ୍‌ସି ଇର୍ହାନ୍‌, ଇୟା ଅଙ୍ଗୁର୍‌ରସ ନା ନେତେର୍‌ତାନ୍‌ ତିଆର୍‌ଆତିମାନି ମାପୁରୁଦି ପୁନି ନିୟମ୍‌; ମିର୍‌ ଏସ ଦେବେଙ୍ଗ୍‌ ଇବେଣ୍‌କୁ ଉଣିଦେର୍‌, ନାସ ଦେବେଙ୍ଗ୍‌ ନାଙ୍ଗିଁ ଏତ୍‌କିନି ଉଣ୍ତିଙ୍ଗ୍‌ ଇକା କିଦୁ ।
1CO 11:26 ଇରିଙ୍ଗ୍‌ ଏସ ଦେବେଙ୍ଗ୍‌ ମିର୍‌ ଇୟା ରୁଟି ତିନିଦେର୍‌ ମାରି ଇୟା ଅଙ୍ଗୁର୍‌ରସତିଙ୍ଗ୍‌ ଉଣିଦେର୍‌, ନାସ ଦେବେଙ୍ଗ୍‌ ମିର୍‌ ପ୍ରବୁଦି ୱାନିଦିନ୍‌ ସାନ୍ଦି ୱାନି ସାତି ମାଟା ୱେର୍‍ସି ମାନିଦେର୍‌ ।
1CO 11:27 ମାରି, ଏନ୍‌ଆପିନ୍‌ ଜଗ୍‌ସିଲି ୱାଜାଦାନ୍‌ ପ୍ରବୁଦି ଇୟା ରୁଟି ତିନାନ୍‌ ମାରି ଇୟା ଡୁବାୟ୍‌ତିଅଙ୍ଗୁର୍‌ରସ ଉଣାନ୍‌, ୱାନ୍‌ ପ୍ରବୁଦି ମେନ୍ଦଲ୍‌ତିଙ୍ଗ୍‌ ନି ନେତେର୍‌ତି ବିରୁଦ୍‌ତାନ୍‌ ପାପ୍‌ କିନାନ୍‌ ।
1CO 11:28 ମାତର୍‌ ଲୋକ୍‌ ନିଜେଦିଙ୍ଗ୍‌ ପରିକା କିପିନ୍‌, ମାରି ଆୟାୱାଜା ଦାନ୍‌ ଇୟା ରୁଟି ତିନିନ୍‌ ମାରି ଇୟା ଡୁବାୟ୍‌ତିଅଙ୍ଗୁର୍‌ରସ ଉଣିନ୍‍ ।
1CO 11:29 ଇରିଙ୍ଗ୍‌ ଆମା ଲୋକ୍‌ ପ୍ରବୁଦି ମେନ୍ଦଲ୍‌ତିଙ୍ଗ୍‌ ସତ୍‌ତି ଅର୍ତ ବୁଜାଏଣ୍‌ଗା ତିନାନ୍‌ ମାରି ଉଣାନ୍‌, ୱାନ୍‌ ପୁରା ଦଣ୍ତ୍‌ ପୟ୍‌ନାନ୍‌ ।
1CO 11:30 ଆୟାଉଣ୍ତିଙ୍ଗ୍‌ ମି ମାଣ୍‌କୁ ନେର୍‌ରୁ ଗାଦିଲୋକ୍‌ ସାକିସିଲିକାର୍‌, ରୋଗ୍‌ତିକାର୍‌ ମାରି ଗାଦିଲୋକ୍‌ ସାତାମାନାର୍‌ ।
1CO 11:31 ଜଦି ଆଗ୍‍ଡ଼ିରାନ୍‍ ମାପୁ ନିଜେ ନିଜେଦି ବିଚାର୍‌ କିତିଙ୍ଗ୍‌, ଆର୍‌ତିଙ୍ଗ୍‌ ମାଡୁ ମାପୁରୁଦି ଦଣ୍ତ୍‌ ବୋଗାଇତିକା ମାନ୍ଧି ।
1CO 11:32 ମାତର୍‌ ଦୁନିଆଦି ୱିଜୁଦିନ୍‌ତି ଦଣ୍ଡ୍‌ତାନ୍‌ ମାଙ୍ଗିଁ ରକ୍‌ୟା କିନି ଉଣ୍ତିଙ୍ଗ୍‌ ପ୍ରବୁ ମାଙ୍ଗିଁ କାସ୍ଟୁ ସିଜି ବିସାର୍‌ କିଜିନାନ୍‌ ।
1CO 11:33 ମାରି, ଏ ନା ତଡ଼ାନ୍‌କୁ, ମିର୍‌ ପ୍ରବୁବୋଜ ଉଣି ଉଣ୍ତିଙ୍ଗ୍‌ ଉନ୍‌ଡ୍ରେମାନୁ ଉଣ୍ତାନି ୱାଲେ ନିଜେନିଜେଦି ଉଣ୍ତିଙ୍ଗ୍‌ କାପ୍‌କିଦୁ ।
1CO 11:34 ମି ଉଣ୍ତାନିକା ଏଣ୍ତେସ୍‌ ମାପୁରୁଦି ଦଣ୍ତ୍‌ତି ଉଣ୍ତିଙ୍ଗ୍‌ ଆଏତ୍‍, ଆୟାଉଣ୍ତିଙ୍ଗ୍‌ ଜଦି ଏନ୍‌ ବାଙ୍ଗାଁ, ଆର୍‌ତିଙ୍ଗ୍‌ ୱାନ୍‌ ଇନ୍‌ଡ୍ର ଉଣୁଜ ରାପିନ୍‌, ତେବାତିମାନି ବିସୟ୍‌କୁ ୱିଜୁ ନାନ୍‌ ସରିଙ୍ଗ୍‌ ବୁଜାନା ।
1CO 12:1 ଏ ତଡ଼ାନ୍‌କୁ ନି ତାଙ୍ଗିଁକି, ପବିତ୍ରଆତ୍ମାଦି ଦାନ୍‌ତି ବିସୟ୍‌ତାନ୍‌ ନାନ୍‌ ମିଙ୍ଗିଁ ପୁରା ସତ୍‍ ୱେର୍‍ତେଙ୍ଗ୍‍ ଅଡ଼୍‌ବିଜିନା ।
1CO 12:2 ମିର୍‌ ନେସ୍‌ନିଦେର୍‌ ଜେ, ଏସ୍ତିୱାଲେ ମିର୍‌ ଅଣଜିହୁଦି ମାର୍‌ଇୱାଲେ, ନାସ୍ତିୱାଲେ ଜିବନ୍‌ସିଲି ଦିୟାମ୍‍କାଙ୍ଗାଁ ପୁଜା କିଜି ମିର୍‌ ଅଲଗାସାରି ଆତିମାର୍‌ଇଦେର୍‌ ।
1CO 12:3 ଆୟାଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ଜାଣେକିଜିନା, ମାପୁରୁଦି ଆତ୍ମାଦାନ୍‌ ସାଲାନି ଲୋକ୍‌ “ଜିସୁ ଅବିସାପ୍‌” ଇଜି ଇନ୍‌ଏନ୍‌, ମାରି ଏମେ ଲୋକ୍‌ ପବିତ୍ର ଆତ୍ମା ପୟ୍‌ଏଣ୍‌ଗା “ଜିସୁ ପ୍ରବୁ” ଇଜି ୱେର୍‍ତେଙ୍ଗ୍‍ ଆଟ୍‍ଏନ୍‍ ।
1CO 12:4 ଆତ୍ମାଦି ଦାନ୍‍ ଗାଦି ଜାତିଙ୍ଗ୍‌, ମାତର୍‌ ଆୟା ଉନ୍‌ଡ୍ରେ ପବିତ୍ରଆତ୍ମା ଆୟାୱିଜୁ ସିନାତ୍‌ ।
1CO 12:5 ସେବା ଗାଦି ରକମ୍‌ତିକେଙ୍ଗ୍‌ କିଜିନାର୍‌, ମାରି, ଉନ୍‌ଡ୍ରେ ପ୍ରବୁଦି ସେବା ଆନାତ୍‌ ।
1CO 12:6 ପାଣି କିନି ୱାରିଙ୍ଗ୍ ଗାଦି ରକମ୍‌ତି ସାକ୍ତି ସିନାନ୍‌, ମାତର୍‌ ମାପୁରୁ ଅରେନ୍‍, ୱାନ୍‌ ୱିଜେରିମାନୁ ଆୟାୱିଜୁ ସିନାନ୍‌ ।
1CO 12:7 ୱିଜେରି ନେଗି ଉଣ୍ତିଙ୍ଗ୍‌ ୱିଜେରେ ଲୋକାମାନୁ ପବିତ୍ରଆତ୍ମାଦି ସାକ୍ତି ଗାଦି ରକମ୍‌ତିକେଙ୍ଗ୍‌ ତରାନାତ୍‌ ।
1CO 12:8 ଇରିଙ୍ଗ୍‌ ଅରେନ୍‍ୱାନିଙ୍ଗ୍‍ ଆତ୍ମାଦି ମାଣ୍‌କୁ ବୁଦିଦି ବାକ୍ୟ, ମାରି ଅରେନ୍‍ୱାନିଙ୍ଗ୍‍ ଆୟା ଆତ୍ମାଦି ସିକିୟା ଇସାବ୍‌ତାନ୍‌ ବୁଦିଦି ମାଟା ଇନାନ୍‌,
1CO 12:9 ମାରି ଅରେନ୍‍ୱାନିଙ୍ଗ୍‍ ଆୟା ଆତ୍ମାଦି ମାଣ୍‌କୁ ବିସ୍‌ବାସ୍‌ ସିନାତ୍‌, ମାରି ଅରେନ୍‍ୱାନିଙ୍ଗ୍‍ ଆୟା ଉନ୍‌ଡ୍ରେ ଆତ୍ମାଦି ମାଣ୍‌କୁ ନେଗେନ୍‌ କିନି ସାକ୍ତି,
1CO 12:10 ଆଇୱାନିଙ୍ଗ୍‍ ଗାଦି ରକମ୍‌ତି ସାକ୍ତିଦି ପାଣି କିଦେଙ୍ଗ୍‌ ଅଦିକାର୍‌, ମାରି ଅରେନ୍‍ୱାନିଙ୍ଗ୍‍ ମାପୁରୁଦି ବାକ୍ୟ ୱେର୍‌ନି ସାକ୍ତି, ଆଇୱାନିଙ୍ଗ୍‍ ଆଇ ଆଇ ରକମ୍‌ତି ଆତ୍ମା ସିନିସ୍‌ତେଙ୍ଗ୍‌ ସାସ୍‌, ମାରି ଅରେନ୍‍ୱାନିଙ୍ଗ୍‍ ଗାଦି ଜାତିଦି ପୁନି ବାସାଦାନ୍‌ ୱାର୍‌ଗିନି ସାକ୍ତି, ମାରି ଅରେନ୍‍ୱାନିଙ୍ଗ୍‍ ବାସାଦି ଅର୍ତ କିଦେଙ୍ଗ୍‌ ସାକ୍ତି ସିଆୟ୍‌ଆତାମାନାତ୍‌ ।
1CO 12:11 ମାତର୍‌ ଆୟା ଉନ୍‌ଡ୍ରେ ପବିତ୍ରଆତ୍ମା ନିଜେଦି ଇଚ୍ଛାଦାନ୍‌ ୱିଜୁ ଲୋକାଙ୍ଗ୍‌ ଗାଦିରକମ୍‌ତି ଦାନ୍‌ ସିଜି ଇୟାୱିଜୁ ପାଣି ପୁରା କିନାତ୍‌ ।
1CO 12:12 କ୍ରିସ୍ତ ଗାଦିଜାତିଦି ଉନ୍‍ଡ୍ରେ ମେନ୍ଦଲ୍, ମାରି ଆବେଣି ବାଗ୍‌ତି ଗାଦି, ମାତର୍‌ ମେନ୍ଦଲ୍‍ତି ୱିଜୁ ବାଗ୍‌ତି ଗାଦି ଆତିଙ୍ଗ୍‌ବା ଉନ୍‌ଡ୍ରେ ମେନ୍ଧଲ୍‍ ।
1CO 12:13 ଆୟାୱାଜା ଜିହୁଦି, ଅଣଜିହୁଦି, କଟିସାକର୍‌ ମାରି ଅଦିକାର୍‌ରି ଲୋକୁ ଆପିନ୍‌, ୱିଜେରେ ଉନ୍‌ଡ୍ରି ଆତ୍ମାଦି ମାଣ୍‌କୁ ଉନ୍‌ଡ୍ରେ ମେନ୍ଧଲ୍‍ ଆନି ଉଦେସ୍‌ତାନ୍‌ ଡୁବନ୍‌ ଅତିମାନିକା, ମାରି ୱିଜେରେ ଉନ୍‌ଡ୍ରେ ଆତ୍ମାଦାନ୍‌ ଉଟି ମାନିକା ।
1CO 12:14 ଇରିଙ୍ଗ୍‌ ମେନ୍ଧଲ୍‍ ଉନ୍‌ଡ୍ରେ ବାଗ୍‌ ଆଏତ୍‍, ମାତର୍‌ ଗାଦି ବାଗ୍‌ତାନ୍‌ ତିଆର୍‌ ।
1CO 12:15 ପାଦାମ୍‌ ଜଦି ଇନାତ୍‍, “ନାନୁ କିୟୁ ସିଲେ, ଆଦେଙ୍ଗ୍‌ ମେନ୍ଦଲ୍‌ତି ବାଗ୍‌ ଆଏ,” ଆର୍‌ତିଙ୍ଗ୍‌ ଇୟାଉଣ୍ତିଙ୍ଗ୍‌ ଆକା ଜେ ମେନ୍ଦଲ୍‍ତି ବାଗ୍‌ ଆଏ, ଆର୍‌ତିଙ୍ଗ୍‌ ଇୟା କାରଣତାନ୍‌ ଆକା ମେନ୍ଦଲ୍‌ତୁ ମିସାଏଣ୍‌ଗା ମାଡ୍ରେଙ୍ଗ୍ ଆଟ୍‍ଏତ୍‍ ।
1CO 12:16 ମାରି ଗିତଣି ଜଦି ଇନାତ୍‍, “ନାନ୍‌ କାଣ୍‌ଗା ସିଲେ, ଆଦେଙ୍ଗ୍‌ ମେନ୍ଦଲ୍‌ତି ବାଗ୍‌ ଆଏ,” ଆର୍‌ତିଙ୍ଗ୍‌ ଇୟାଉଣ୍ତିଙ୍ଗ୍‌ ୱାଦ୍ ବା ମେନ୍ଦଲ୍‌ତାନ୍‌ ଆକ ଆଜି ତେବାଦେଙ୍ଗ୍‌ ଆଟ୍‍ଏତ୍‍ ।
1CO 12:17 ୱିଜୁ ମେନ୍ଦଲ୍‌ ଜଦି କାଣ୍‌ଗା ଆନାତ୍‌, ଆର୍‌ତିଙ୍ଗ୍‌ ୱେନ୍‌ଡ୍ରେଙ୍ଗ୍ ଆଟ୍‍ନିକା ଏଣ୍ତେସ୍ ? ମାରି ଆକା ଜଦି କେବଲ ଗିତଣି ଆନାତ୍‌, ଆର୍‌ତିଙ୍ଗ୍‌ ମୁଜିନିକା ଏମେମାନୁ ?
1CO 12:18 ମାତର୍‌ ମାପୁରୁ ବାଗ୍‌ବାଗ୍‌ତିଙ୍ଗ୍‌ ଉନ୍‌ଡ୍ରେ ଉନ୍‌ଡ୍ରେ କିଜି ମେନ୍ଦଲ୍‌ତୁ ନିଜେଦି ଇଚ୍ଛାଦାନ୍‌ ତିଆର୍‌କିତାମାନାନ୍‌ ।
1CO 12:19 ମାରି, ଆୟାୱିଜୁ କେବଲ୍ ଉନ୍‌ଡ୍ରେ ବାଗ୍‌ ଆତିମାରିଙ୍ଗ୍‌, ମେନ୍ଦଲ୍‌ ଆତାତ୍‍ମାନ୍ଦି ଏଣ୍ତେସ୍ ?
1CO 12:20 ମାତର୍‌ ସତ୍‌ତାନ୍‌ ଗାଦି ବାଗ୍‌କୁ ଆତିଙ୍ଗ୍‌ବା ମେନ୍ଦଲ୍‌ ଉନ୍‌ଡ୍ରେ ।
1CO 12:21 ଆୟାୱାଜା “ନି ମାନୁ ନାଙ୍ଗିଁ ଦରକାର୍‌ ସିଲେତ୍‌ ଇଜି କାଣ୍‌ଗା କିୟୁଦିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆଟ୍ଏତ୍,” ମାରି “ନି ମାନୁ ନା ପାଣି ସିଲେତ୍‌ ଇଜି ତାଲା ପାଦାମ୍‌ତିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆଟ୍‍ଏତ୍‍ ।”
1CO 12:22 ଆଇତରିନ୍‍ ମେନ୍ଦଲ୍‌ତି ଆମାୱିଜୁ ବାଗ୍‌କୁ ନାଣ୍ତ ଦୁର୍ବଳ ଇଜି ଏତ୍‌ ୱାନାତ୍‌, ଆୟାୱିଜୁ ଦରକାର୍‌ ସିଲିକେଙ୍ଗ୍‌;
1CO 12:23 ମାରି, ମେନ୍ଦଲ୍‌ତି ଆମାୱିଜୁ ଅଙ୍ଗ ନାଣ୍ତ ଦରକାର୍ ସିଲେତ୍‌ ଇଜି ଏତ୍‌କିଇକା, ଆୟାୱିଜୁ ଅଙ୍ଗଆଙ୍ଗାଁ ନାଣ୍ତ ଜାତୁନ୍‍ ଅନିକା; ମାରି ମା ନେଗେନ୍‌ତାନ୍‌ ତର୍‌ଇ ଅଙ୍ଗଆଙ୍ଗାଁ ନାଣ୍ତ ମୋନ୍‌ସିନିକା ।
1CO 12:24 ମାରିବା ମା ମେନ୍ଦଲ୍‌ତି ଅଙ୍ଗପ୍ରତ୍ୟଙ୍ଗ୍‌ ଉଣ୍ତିଙ୍ଗ୍‌ ମାଡୁ ନାସ ମୋନ୍‌ଦିୟାନ୍‌ ସିଇକା ।
1CO 12:25 ମାତର୍‌ ଏଣ୍ତେସ୍‌ ମେନ୍ଧଲ୍‍ ଲୋଇ ଇନି ମାଟା ଗଟାଏତ୍‌, ମାରି ଗାଦିଜାତିଦି ଅଙ୍ଗପ୍ରତ୍ୟଙ୍ଗ ସାମାନ୍‌ତାନ୍‌ ନିଜେନିଜେଦିଙ୍ଗ୍‌ ନେଗି ସିନ୍ତା କିନେ ।
1CO 12:26 ମାରି, ମେନ୍ଦଲ୍‌ତି ଉନ୍‌ଡ୍ରି ଅଙ୍ଗଦିଙ୍ଗ୍‌ କାସ୍ଟୁ ଆତିଙ୍ଗ୍‌, ଆୟାୱିଜୁ ଅଙ୍ଗପ୍ରତ୍ୟଙ୍ଗ ତାନି ୱାଲେ କାସ୍ଟୁ ଏତ୍‌ କିନେ, ମାରି ଉନ୍‌ଡ୍ରି ଅଙ୍ଗ ଦନ୍ୟବାଦ ଆତିଙ୍ଗ୍‌ ୱିଜୁ ଅଙ୍ଗପ୍ରତ୍ୟଙ୍ଗ ତାନି ୱାଲେ ୱେଡ଼ିକା କିନେ ।
1CO 12:27 ମିର୍‌ କ୍ରିସ୍ତଦି ମେନ୍ଧଲ୍‍, ମାରି ମିର୍‌ ୱିଜୁଲୋକୁ ଆୟା ମେନ୍ଦଲ୍‌ତି ଉନ୍‌ଡ୍ରି ଉନ୍‌ଡ୍ରି ଅଙ୍ଗ ।
1CO 12:28 ମାରି, ମାପୁରୁ ମଣ୍ତଲିଦୁ ପାର୍‌ତୁମ୍‌ ପ୍ରେରିତ ସିସୁରିଙ୍ଗ୍‌, ତାନିୱେନ୍‌କା ବାବବାଦିରିଙ୍ଗ୍‌, ଆୟାତାନିୱେନ୍‌କା ସିକିୟାଗୁରୁରିଙ୍ଗ୍‌; ତାନିୱେନ୍‌କା ସାକ୍ତିଦି ପାଣି, ତାନିୱେନ୍‌କା ରଗ୍‌ତିଙ୍ଗ୍‌ ନେଗେନ୍‌ କିନି ଦାନ୍‌ତି ସାକ୍ତି, ସାହାଜ୍ୟକିନିକା, ସାଲାବୁଲାକିନି ପାଣିଦି ଅଦିକାର୍‌ ମାରି ଜାତିଜାତିଦି ବାସାଦାନ୍‌ ୱାର୍‌ଗିନି ଲୋକାଙ୍ଗ୍‌ ଆସ୍‌କିତାମାନାନ୍‌ ।
1CO 12:29 ୱାର୍‌ ୱିଜେରେ ପ୍ରେରିତ ସିସୁ, ବାବବାଦିରି, ସିକିୟାଗୁରୁ, ମାରି କାବାଆନି ସାକ୍ତିଦି ପାଣିକିନିକା ସିଆୟ୍‌ଆତାମାନାତ୍‌ ।
1CO 12:30 ୱିଜେରେ ରୋଗ୍‌ତିଙ୍ଗ୍‌ ନେଗେନ୍‌ କିଦେଙ୍ଗ୍‌ ଆଟ୍‍ନାର୍‍, ଜାତିଜାତିଦି ବାସାଦାନ୍‌ ୱାର୍‌ଗିଦେଙ୍ଗ୍‌ ଆଟ୍‍ନାର୍‍, ମାରି ଆୟାୱିଜୁ ବାସାଦି ଅର୍ତ କିଦେଙ୍ଗ୍‌ ଆଟ୍‍ନାର୍‍ ।
1CO 12:31 ମାତର୍‌ ମିର୍‌ ପେରି ଦାନ୍‍ ୱିଜୁ ପୟ୍‌ନି ଉଣ୍ତିଙ୍ଗ୍‌ ୱେଡ଼ିକା ଆଦୁ । ନାନ୍‌ ମିଙ୍ଗିଁ ଉନ୍‌ଡ୍ରି ନେଗି ସାରି ତର୍‌ସିନା ।
1CO 13:1 ଜଦି ନାନ୍‌ ଲୋକୁ ମାରି ଦୁତ୍‌କା ବାସାଦାନ୍‌ ୱାର୍‌ଗିନା, ମାତର୍‌ ନା ଜିବନ୍‌ନୋନିକା ତେବାଏତ୍‌, ଆର୍‌ତିଙ୍ଗ୍‌ ନାନ୍‌ ଆଉଲିଆଜିମାନି ଗଣ୍ଟା ମାରି ଜମ୍‌ ଜମ୍‌ ଆଉଲିଆଜିମାନି ଉନ୍‌ଡ୍ରି ପାପୁଡ଼ିଡାକ୍‌ନି ୱାଜା ଆତାମାନା ।
1CO 13:2 ଜଦି ନାନ୍‌ ବାବବାଣି ୱେର୍‍ତେଙ୍ଗ୍‍ ସାକ୍ତି ମାନାତ୍‌ ମାରି ନାନ୍‌ ୱିଜୁ ମାର୍‌ଗିତିମାନି ମାଟା ବୁଜାଦେଙ୍ଗ୍‌ ସାକ୍ତି ମାନାତ୍‌ ମାରି ୱିଜୁ ବିସୟ୍‌ତି ଜ୍ଞାନ୍‌ ମାନାତ୍‌, ମାରି ଗରନ୍‌ତିଙ୍ଗ୍‌ ଗୁସାକିନି ଉଣ୍ତିଙ୍ଗ୍‌ ନାଙ୍ଗିଁ ପୁରା ବିସ୍‌ବାସ୍‌ ମାନାତ୍‌, ମାତର୍‌ ନା ଜିବନ୍‌ନୋନିକା ସିଲେତିଙ୍ଗ୍‌, ଆର୍‌ତିଙ୍ଗ୍‌ ନାନ୍‌ ଇନିକା ସିଲେ ।
1CO 13:3 ଜଦି ନାନ୍‌ ସିଲିସାତିୱାରିଙ୍ଗ୍‌ ଉଟ୍‍ପିସ୍‌କିନି ଉଣ୍ତିଙ୍ଗ୍‌ ନା ୱିଜୁ ଦାନ୍‌ ସିନା, ମାରି ନାନ୍‌ ନା ମେନ୍ଦଲ୍‌ତିଙ୍ଗ୍‌ ସିସୁଦୁ ଦଂସ୍‌ ଆନି ଉଣ୍ତିଙ୍ଗ୍‌ ସର୍‌ପେ କିନା, ମାତର୍‌ ନା ଜିବନ୍‌ତୁ ଜିବନ୍‌ନୋନିକା ସିଲେତ୍‌, ଆର୍‌ତିଙ୍ଗ୍‌ ଆୟାୱିଜୁ ନା ଉଣ୍ତିଙ୍ଗ୍‌ ଇନି ଲାବ୍‌ ଆଏତ୍‍ ।
1CO 13:4 ଜିବନ୍‌ନୋନିକା ସାହାସ୍‌, ଦୟାକିନିକା । ଜିବନ୍‌ନୋନିକା ରିସା କିଏତ୍‌, ଜିବନ୍‌ନୋନିକା ଗର୍ବ କିଏତ୍‌, ଆକାର୍‍ ସିଲେ ।
1CO 13:5 ଜିବନ୍‌ନୋନିକା ତାଗ୍‌ଇ ବ୍ୟବ୍‌ହାର୍‌ କିଏତ୍‌, ସ୍ୱାର୍ଥପର ସେସ୍ଟା କିଏତ୍‌, ରିସା ଆଏତ୍‍, ଜିବନ୍‌ନୋନିକା ତାନି ଉଣ୍ତିଙ୍ଗ୍‌ କିଆୟ୍‌ଆତିମାନି ଅନ୍ୟାୟ୍‌ ଏତ୍‌ ଇଡ୍‌ଏତ୍‌ ।
1CO 13:6 ଜିବନ୍‌ନୋନିକା ଅଦାର୍ମୁଦୁ ୱେଡ଼ିକା କିଏତ୍‌, ମାତର୍‌ ସତ୍‌ତାନ୍‌ ୱେଡ଼ିକା କିନାତ୍‌ ।
1CO 13:7 ଜିବନ୍‌ନୋନିକା ୱିଜୁ ଇନିକା ସାସ୍‌ କିନାତ୍‌, ୱିଜୁ ବିସ୍‌ବାସ୍‌ କିନାତ୍‌, ୱିଜୁ ଆସା କିନାତ୍‌, ୱିଜୁ ବିସୟ୍‌ତୁ ସାସ୍‌ ଆସ୍‌ସି ତେବାନାତ୍‌ ।
1CO 13:8 ଜିବନ୍‌ନୋନିକା ଏସ୍‌କାଙ୍ଗ୍‌ବା ୱିଜ୍‌ଏତ୍‌; ଜଦି ମାପୁରୁଦି ମାଣ୍‌କୁ ପ୍ରଚାର୍‌ଆନି ମାଟା ମାନାତ୍‌, ଆକା ମାରାଗ୍‌ନାତ୍‌; ଜଦି ଆଇବାସା ମାନାତ୍‌, ଆୟାୱିଜୁ ବେକାର୍‌ ଆନାତ୍‌; ଜଦି ବୁଦି ମାନାତ୍‌, ଆକାବା ମାରାଗ୍‌ନାତ୍‌ ।
1CO 13:9 ଇରିଙ୍ଗ୍‌ ମାପ୍‌ ନେଗେନ୍‌ତାନ୍‌ ନେସ୍‌ନାପ୍‌ ମାରି ନେଗେନ୍‌ତାନ୍‌ ବାବବାଦି ଇନାପ୍‌ ।
1CO 13:10 ମାତର୍‌ ପୁରାୱିଜୁ ବିସୟ୍‌ ଇଗା ୱାତିଙ୍ଗ୍‍ ଇୟା ଇସ୍ରି ବିସୟ୍‌କୁ ମାରେଗ୍‌ନେ ।
1CO 13:11 ଇସ୍ରି କଡ଼ ମାର୍‌ଇ ବେଡ଼ାଦୁ ନାନ୍‌ ଇସ୍ରି କଡ଼ଦି ୱାଜା ୱାର୍‌ଗିନିକା, ଏତ୍‌କିନିକା, ବିଚାର୍‌ ଇସ୍ରି କଡ଼ଦି ୱାଜା କିଜିମାର୍‌ଆ; ମାତର୍‌ ନାଣ୍ତବୟସ୍‌ ଆତି ୱେନ୍‌କା ଇଲେଇ ନାନ୍‌ ମାରି ଇସ୍ରି କଡ଼ଦି ୱାଜା ବ୍ୟବ୍‌ହାର୍‌ କିଏ ।
1CO 13:12 ଇରିଙ୍ଗ୍‌ ଇଲେଇ ମାଡୁ ସତ୍‍ ବାକ୍ୟଦି ରୁପ୍‌ ଦାର୍ପାଣ୍‌ତି ସାହାଜ୍ୟଦାନ୍‌ ସୁଡ଼ୁଜିନିକା, ମାତର୍‌ ନାସ୍ତିୱାଲେ ମାଡୁ ସାମ୍‌ନାସାମ୍‌ନି ଆଜି ସୁଡ଼ୁଜିସାନିକା; ଇଲେଇ ନାନ୍‌ ଇସ୍ରି ଇସାବ୍‌ତାନ୍‌ ନେସ୍‌ସିନା, ମାପୁରୁ ନାଙ୍ଗିଁ ପୁରା ନେସ୍‌ତି ୱାଜା ନାସ୍ତିୱାଲେ ନା ବୁଦି ବା ପୁରା ଆନାତ୍‌ ।
1CO 13:13 ମାରି ବିସ୍‌ବାସ୍‌, ଆସା ମାରି ଜିବନ୍‌ନୋନିକା, ଇୟା ମୁନ୍‌ଡ୍ରିଦି ମାଟା ବିସୟ୍‌ ମାନେ, ମାରି ଇୟାୱାନିକା ଲୋଇ ଜିବନ୍‌ନୋନିକା ନେ ପେରିକା ।
1CO 14:1 ଜିବନ୍‌ନୋନି ଉଣ୍ତିଙ୍ଗ୍‌ ମିର୍‌ ୱେଡ଼ିକା ଆଦୁ, ମାରି ଆତ୍ମିକ ଦାନ୍‌ ୱିଜୁ ପୟ୍‌ନି ଉଣ୍ତିଙ୍ଗ୍‌, ବିସେସ୍‍କିଜି ବାବବାଣି ମାଟା ପ୍ରଚାର୍‌ କିନିକା, ମି ଜିବନ୍‌ତୁ ପୁରା ଆପିତ୍‌ ।
1CO 14:2 ଇରିଙ୍ଗ୍‌ ଏନ୍‌ ଆଇ ବାସାଦାନ୍‍ ମାଟା ଇନାନ୍‌, ୱାନ୍‌ ଲୋକ୍‌ତିଙ୍ଗ୍‌ ମାଟା ଇନ୍‌ଏନ୍‌, ମାତର୍‌ ମାପୁରୁଦି ଉଦେସ୍‌ତାନ୍‌ ଇନାନ୍‌, ୱାନି ମାଟା ଏନ୍‌ ବୁଜାଦେଙ୍ଗ୍‌ ଆଟ୍‍ଏର୍‍, ୱାନ୍‌ ଆତ୍ମାଦି ସାକ୍ତିଦାନ୍‌ ମାର୍‌ଗିତିମାନି ସତ୍‍ ବିସୟ୍‌କୁ ୱିଜୁ ଇନାନ୍‌ ।
1CO 14:3 ମାତର୍‌ ଏନ୍‌ ମାପୁରୁଦି ବାକ୍ୟ ପ୍ରଚାର୍‌ କିନାନ୍‌, ୱାନ୍‌ ଆକା ଲୋକାଙ୍ଗ୍‌ ଇନାନ୍‌, ଆୟାମାଣୁକୁ ୱାରିଙ୍ଗ୍ ସାହାଜ୍ୟ, ୱେଡ଼ିକା ମାରି ସାନ୍ତି ସିନାତ୍‌ ।
1CO 14:4 ଏନ୍‌ ଆଇ ବାସାଦାନ୍‍ ମାଟା ଇନାନ୍‌, ୱାନ୍‌ କେବଲ ନିଜେଦି ଉଣ୍ତିଙ୍ଗ୍‌ ସାହାଜ୍ୟ କିନାନ୍‌; ମାତର୍‌ ଏନ୍‌ ମାପୁରୁଦି ବାକ୍ୟ ପ୍ରଚାର୍‌ କିନାନ୍‌, ୱାନ୍‌ ୱିଜୁ ମଣ୍ତଲିଦିଙ୍ଗ୍‌ ସାହାଜ୍ୟ କିନାନ୍‌ ।
1CO 14:5 ମିର୍‌ ୱିଜିଦେର୍‌ ଜେ ଆଇ ବାସାଦାନ୍‍ ମାଟା ଇନ୍‍ଡ୍ରୁ, ଇକା ନା ଇଚ୍ଛା, ମାତର୍‌ ମିର୍‌ ଜେ ମାପୁରୁଦି ବାକ୍ୟ ପ୍ରଚାର୍‌ କିଦୁ, ଇକା ନା ନାଣ୍ତ ଇଚ୍ଛା । ଏନ୍‌ ଆଇ ବାସାଦାନ୍‍ ମାଟା ଇନିକା, ମଣ୍ତଲିଦି ଉଣ୍ତିଙ୍ଗ୍‌ ନେଗେତ୍‌ ଆନାତ୍‌; ଜଦି ଏନ୍‌ ଆୟାତାନି ଅର୍ତ ନେଗେନ୍‌ତାନ୍‌ ବୁଜାକିଜି ୱେର୍‌ନାନ୍‌, ସିଲିତିଙ୍ଗ୍‌ ଆଇ ବାସାଦାନ୍‍ ୱାର୍‌ଗିନିମାଣୁକୁ ମାପୁରୁଦି ମାଟା ପ୍ରଚାର କିନିକା ନେଗେତ୍‌ ।
1CO 14:6 ଏ ତଡ଼ାନ୍‌କୁ, ନାନ୍‌ ଜଦି ମି ଲାକ୍‌ତୁ ସୋଲ୍‌ସି ମାପୁରୁଦିମାଣୁକୁ ୱେର୍‌ଆୟ୍‌ଏତି ବାକ୍ୟ, ମାରି ବୁଦି, ମାରି କାବୁର୍‌ ମାରି ସିକିୟାଦି ମାଟା ୱେର୍‌ଏଣ୍‌ଗା କେବଲ ଆଇ ବାସାଦାନ୍‍ ୱାର୍‌ଗିନା, ଆର୍‌ତିଙ୍ଗ୍‌ ଆବେନ୍‌ ନାନ୍‌ ମିଙ୍ଗିଁ ଇନି ସୁବିଦା କିନା ।
1CO 14:7 ପିରଡ଼ି ଆପିତ୍‌ ସିଲ୍‌ତିଙ୍ଗ୍‌ ଟଇଲା ଆପିତ୍‌, ଜିବନ୍‌ସିଲି ଅଡ଼୍‌ନିକା ଜଦି ନେଗି ସର୍‌ତାନ୍‌ ଅଡ଼୍ଏତେ, ଆର୍‌ତିଙ୍ଗ୍‌ ପିରଡ଼ିଦୁ ଇନିକା ଅଡ଼୍‌ଜିନାତ୍ ମାରି ଟଇଲାଦୁ ଇନିକା ଅଡ଼ଜିନାତ୍‌, ଆକା ଏନ୍‌ ଇନିକା ନେସ୍ତେଙ୍ଗ୍ ଆଟ୍‍ନାନ୍ ?
1CO 14:8 ମାରି, ମରି ଆଉଲିଦି ସ୍ୱର୍‌ ଟିକ୍‌ତାନ୍‌ ଆଏତିଙ୍ଗ୍‍, ଆର୍‌ତିଙ୍ଗ୍‌ ଏନ୍‌ ଜୁଦ୍‌ଦି ଉଣ୍ତିଙ୍ଗ୍‌ ତିଆର୍‌ ଆନାନ୍‌ ?
1CO 14:9 ଆୟାୱାଜା ମିର୍‌ ବା ଜଦି ଆଇ ବାସାଦାନ୍‍ ନେସ୍‌ନିନାନି ମାଟା ଇନ୍‌ଏତିଙ୍ଗ୍‌, ଆର୍‌ତିଙ୍ଗ୍‌ ଇନିକା ଇଜିନିଦେର୍‌, ଆକା ଏଣ୍ତେସ୍‌ ଜଣାପଡ଼ାନାତ୍‌ ? ଇରିଙ୍ଗ୍‌ ମିର୍‌ ଗାଲିଦିଙ୍ଗ୍‌ ୱେର୍‌ତି ୱାଜା ଆନାତ୍‌ ।
1CO 14:10 ଦୁନିଆଦୁ ଗାଦି ଜାତିଦି ବାସେଙ୍ଗ୍‌ ମାନେ, ମାରି ଆୟାୱିଜୁ ମାଣ୍‌କୁ ଉନ୍‌ଡ୍ରି ଶବ୍ଦବା ଅର୍ତସିଲିକେଙ୍ଗ୍ ଆଉ ।
1CO 14:11 ଜଦି ନା ୱାଲେ ୱାର୍‌ଗିସାଜି ମାନି ଲୋକ୍‌ତି ବାସା ନାନୁ ବୁଜାଦେଙ୍ଗ୍ ଆଟ୍ଏ, ଆର୍‌ତିଙ୍ଗ୍‌ ଆୟା ଲୋକୁ ନା ଲାକ୍‌ତୁ ନେସ୍‌ଇନାନି ଲୋକୁ ୱାଜା ଆନାନ୍‌, ନାନୁ ବା ୱାନି ଲାକ୍‌ତୁ ନେସ୍‌ଇନାନି ଲୋକୁ ୱାଜା ଆନା ।
1CO 14:12 ମିର୍‌ ଆଇ ଆଇ ପବିତ୍ରଆତ୍ମାଦି ଦାନ ପୟ୍‌ଦେଙ୍ଗ୍‌ ୱେଡ଼ିକାମାନିଙ୍ଗ୍, ତାନିମାଣୁକୁ ଏମେ ୱିଜୁ ମଣ୍ତଲିଦି ନେଗି ଉଣ୍ତିଙ୍ଗ୍‌ ପୁରା କିଦେଙ୍ଗ୍‌ ଆଟ୍‍ନାତ୍ ଆୟାୱିଜୁ ନାଣ୍ତଇସାବ୍‌ତାନ୍‌ ପୟ୍‌ଦେଙ୍ଗ୍‌ ଚେଷ୍ଟାକିଦୁ ।
1CO 14:13 ଏନ୍‌ ଆଇ ବାସାଦାନ୍ ୱାର୍‌ଗିନାନ୍‌, ୱାନ୍‌ ଇୟାତାନି ଅର୍ତ ୱେର୍‍ତେଙ୍ଗ୍‍ ଦାନ୍‌ ପୟ୍‌ଦେଙ୍ଗ୍‌ ପାର୍‌ତାନା କିପିନ୍ ।
1CO 14:14 ଜଦି ନାନୁ ଆଇ ବାସାଦାନ୍ ପାର୍‌ତାନା କିନା, କେବଲ ନା ମୋନତି ଆତ୍ମା ଆକା କିନାତ୍, ନା ବୁଜାନି ସାକ୍ତି ଆବେନ୍‌ ତିର୍‌ ମୋନ୍‌ତାନ୍ ତେବାଏତ୍ ।
1CO 14:15 ଆର୍‌ତିଙ୍ଗ୍‌ ନାନୁ ଇନିକା କିନା ? ନାନୁ ନା ଆତ୍ମାଦାନ୍‌ ପାର୍‌ତାନା କିନା, ମାରି ନାନ୍‌ ବୁଜାନିୱାଜା ପାର୍‌ତାନା କିନା । ନାନ୍‌ ନା ଆତ୍ମାଦାନ୍‌ ପାଟା ପାର୍‍ନା, ମାତର୍‌ ତାନି ୱାଲେ ମୋନ୍‌ ଦିୟାନ୍‌ ସିଜି ପାଟା ପାର୍‌ନା ।
1CO 14:16 ଆକା ଆଏତିଙ୍ଗ୍‍ ମାପୁରୁଙ୍ଗୁଁ କେବଲ ମି ଆତ୍ମାଦାନ୍‌ ଦନ୍ୟବାଦ୍‌ ସିଦୁ, ଆବେନ୍‌ ମାନି ଅରେନ୍ ସାମାନ୍‌ତି ଲୋକୁ ଏଣ୍ତେସ୍ ମି ୱାଲେ ଆମେନ୍‍ ଇନାନ୍‌ । ଇରିଙ୍ଗ୍‌ ମିର୍‌ ଇନିକା ଇଜିନିଦେର୍‌, ଆକା ୱାନ୍‌ ନେସ୍‌ତେଙ୍ଗ୍‌ ଆଟ୍‍ଏନ୍ ।
1CO 14:17 ମିର୍‌ ନେଗେନ୍‌ତାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିତିମାରିଙ୍ଗ୍‌ ବା, ୱାନି ମାଣ୍‌କୁ ଆଇ ଲୋକ୍‌ତି ଇନି ରକମ୍‌ତି ପାଣି ଆଦେଙ୍ଗ୍‍ଁ ଆଟ୍ଏତ୍ ।
1CO 14:18 ନାନ୍‌ ମାପୁରୁଙ୍ଗୁଁ ଦନ୍ୟବାଦ୍‌ ସିଜିନା, ଇରିଙ୍ଗ୍‌ ନାନ୍‌ ମି ୱିଜେରିମାନୁ ନାଣ୍ତଦାନ୍‌ ଆଇବାସା ମାଟା ୱେର୍‍ତେଙ୍ଗ୍ ଆଟ୍‍ନା ।
1CO 14:19 ମାତର୍‌ ମଣ୍ତଲିଦି ଉପାସନାଦୁ ଆଇ ବାସାଦାନ୍‍ ହାଜାର୍‌ ହାଜାର୍‌ ବଲ୍‌କୁ ୱେର୍‌ଏଣ୍‌ଗା ମାରି ୱିଜେରି ବୁଦିଦି ୱାଲେ ପାସ୍‌ଗୋଟା ବଲ୍‌କୁ ୱେର୍‌ନିକା ନେଗିକା ।
1CO 14:20 ଏ ତଡ଼ାନ୍‌କୁ, ବୁଦିଦୁ ଇସ୍ରିକଡ଼ରି ୱାଜା ଆମାଟ୍, ମାତର୍‌ ତାଗ୍‌ଇ ବିସୟ୍‌ତିଙ୍ଗ୍ ଇସ୍ରିକଡ଼ରି ୱାଜା ଆଦୁ; ମାତର୍‌ ବୁଦିଦୁ ମିର୍‌ ପୁରା ବୟସ୍‌ତି ଲୋକା ୱାଜା ଆନିକା ମାନାତ୍‌ ।
1CO 14:21 ଦାର୍ମୁସାସ୍ତ୍ରଦୁ ରାସାତା ମାନାତ୍‌ : “ପ୍ରବୁ ଇନାନ୍‌, ଆଇବାସା ୱାର୍‌ଗିଜିମାନି ଆଇଦେସ୍‌ତିଲୋକା ମକମ୍‌ତୁ ନାନ୍‌ ଇୟା ଲୋକା ୱାଲେ ୱାର୍‌ଗିନା, ମାରିବା ୱାର୍‌ ମା ମାଟା ୱେନ୍‌ଏର୍‌ ।”
1CO 14:22 ଆଦେଙ୍ଗ୍‌ ଆଇ ବାସାଦାନ୍‍ ୱାର୍‌ଗିନି ବିସ୍‌ବାସ୍‌ସିରି ଉଣ୍ତିଙ୍ଗ୍‌ ସିନାଦି ୱାଜା ଆଏତ୍‍, ମାତର୍‌ ଅବିସ୍‍ବାସିରି ଉଣ୍ତିଙ୍ଗ୍‌ ସିନାଦି ୱାଜା ଆନାତ୍‌; ଆଇତରିନ୍‍, ମାପୁରୁଦି ବାକ୍ୟ ପ୍ରଚାର୍‌ କିନି ଅବିସ୍‍ବାସିରି ଉଣ୍ତିଙ୍ଗ୍‌ ସିନାଦି ୱାଜା ଆଏତ୍‍, ମାତର୍‌ ବିସ୍‌ବାସିରି ଉଣ୍ତିଙ୍ଗ୍‌ ସିନାଦି ୱାଜା ଆନାତ୍‌ ।
1CO 14:23 ମାରିବା ମଣ୍ତଲିଦି ୱିଜେରେ ଉନ୍‌ଡ୍ରେମାନୁ ଆନାର୍‌ ମାରି ୱିଜେରେ ଆଇ ବାସାଦାନ୍‍ ୱାର୍‌ଗିନିନାର୍‌, ମାରି ସାମାନ୍‌ତି ଲୋକୁ ମାରି ଅବିସ୍‌ବାସ୍‌ତି ଲୋକୁ ୱାନାର୍‌, ଆର୍‌ତିଙ୍ଗ୍‌ ମିର୍‌ ବାୟା ଇଜି ଇନିକା ୱାର୍‌ ଇନ୍‌ଏର୍‌ ?
1CO 14:24 ମାତର୍‌ ୱାର୍‌ ଜଦି ମାପୁରୁଦି ବାକ୍ୟ ୱେର୍‌ନାର୍‌, ମାରି ଅରେନ୍‍ ଅବିସ୍‌ବାସି ମାରି ସାମାନ୍‌ତି ଲୋକୁ ୱାନାନ୍, ଆର୍‌ତିଙ୍ଗ୍‌ ୱାନ୍‌ ୱିଜେରି ମାଣାନ୍‌ ପାପ୍‌ତିକାନ୍‌ ଇଜି ନେସ୍‌ତେଙ୍ଗ୍‌ ଆଟ୍‍ନାନ୍‍, ୱିଜେରି ମାଣାନ୍‌ ବିଚାର୍‌ ଆନାନ୍‌ ।
1CO 14:25 ୱାନି ଜିବନ୍‌ତୁ ମାର୍‌ଗିତିମାନି ବିସୟ୍‌କୁ ୱିଜୁ ତରାନାତ୍‌; ଆବେନ୍‌ ୱାନ୍‌ ମକମ୍ ପାଡ଼ିକ୍‌ସି ମାରି “ସତ୍‌ତାନ୍‌ ମାପୁରୁ ଜେ ପୁରା ମି ଲୋଇ ମାନାନ୍‌,” ଇକା ମାନାଜି ୱାନିଙ୍ଗ୍‌ ମାଡ଼ିସ୍‌ କିନାନ୍‌ ।
1CO 14:26 ଏ ତଡ଼ାନ୍‌କୁ ନି ତାଙ୍ଗିଁ, ମିଙ୍ଗିଁ ନାନ୍‌ ୱେର୍‌ନି ମାଟା; ଉପାସନା କିନି ଉଣ୍ତିଙ୍ଗ୍‌ ଉଣ୍ତାନି ୱାଲେ ଏନ୍‌ ଅରେନ୍‍ ପାଟା ପାରିନ୍‌, ମାରି ଅରେନ୍‍ ସିକିୟା ସିପିନ୍‌, ଏନ୍‌ ଅରେନ୍‍ ମାପୁରୁଦି ୱେର୍‌ତି ବାକ୍ୟ ୱେର୍‌ନି, ମାରି ଅରେନ୍‍ ଆଇ ବାସାଦାନ୍‍ ୱାର୍‌ଗିପିନ୍‌ ମାରି ଏନ୍‌ ଇୟା ନେସ୍‌ଇ ବାସାଦି ଅର୍ତ ବୁଜା କିପିନ୍‌ । ଇୟାୱିଜୁ ମଣ୍ତଲିଦି ନେଗି ଉଣ୍ତିଙ୍ଗ୍‌ କିନିକା ଦର୍‌କାର୍‌ ।
1CO 14:27 ଜଦି ଏନ୍‌ ଆଇ ବାସାଦାନ୍‍ ୱାର୍‌ଗିନାନ୍‌, ଆର୍‌ତିଙ୍ଗ୍‌ ଅରେନ୍‍ ୱେନ୍‌କା ମାରି ଅରେନ୍‍ ଇୟାୱାଜା ରିଏର୍‌ ସିଲିତିଙ୍ଗ୍‌ ଅଦିକ୍‍ନାଣ୍ତ ଆତିଙ୍ଗ୍‌, ମୁଏର୍‌ ୱେର୍‌ରି ମାରି ଅରେନ୍‍ ତାନି ଅର୍ତ ବୁଜାକିଜ ସିପିନ୍‌ ।
1CO 14:28 ଜଦି ଅର୍ତ ବୁଜା କିଦେଙ୍ଗ୍‌ ଏନ୍‌ ସିଲେତିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ପାର୍‌ତାନାଦି ମଣ୍ତଲିଦୁ ଆଲେଜ ତେବାପିନ୍‌ ମାରି ସୁନ୍‌ସାନ୍‌ ବାଡିଦୁ ମାପୁରୁଙ୍ଗୁଁ ଇନିନ୍‌ ।
1CO 14:29 ମାରି, ରିଏର୍‌ ସିଲିତିଙ୍ଗ୍‌ ମୁଏର୍‌ ମାପୁରୁଦି ବାକ୍ୟ ବାବବାଦି ୱେର୍‌ରି, ମାରି ଆଇକାର୍‌ ବିଚାର୍‌ କିପିର୍‌ ।
1CO 14:30 ମାତର୍‌ ଉପାସନାଦୁ ତେବାତିମାନିକାନ୍‌ ଏନ୍‌ ଜଦି ଦାପ୍ରେନେ ମାପୁରୁଦିମାଣାନ୍‌ ଇନି ବାକ୍ୟ ୱାନାତ୍, ଆର୍‌ତିଙ୍ଗ୍‌ ଆଗ୍‌ଡ଼ି ୱେର୍‍ସି ମାନିକାନ୍‌ ଆଲେପିନ୍‌ ।
1CO 14:31 ଇରିଙ୍ଗ୍‌ ଏଣ୍ତେସ୍‌ ୱିଜେରେ ସିକିୟା ପୟ୍‌ନାର୍‌, ମାରି ୱିଜେରେ ସେତେନା ଆନାର୍‌, ଇୟାଉଣ୍ତିଙ୍ଗ୍‌ ମିର୍‌ ୱିଜିଦେର୍‌ ଅରେନ୍‍ ୱେନ୍‌କା ଅରେନ୍‍ ମାପୁରୁଦି ବାକ୍ୟ ୱେର୍‍ତେଙ୍ଗ୍‍ ଆଟ୍‌ନିଦେର୍‌ ।
1CO 14:32 ମାତର୍‌ ବାବବାଦି ବାକ୍ୟ ପ୍ରଚାର୍‌ କିନି ଦାନ୍‌ ପ୍ରଚାର୍‌କିନିୱାନି ଆଡ୍‍ଗି ଆନିକା ମାନାତ୍‌ ।
1CO 14:33 ଇରିଙ୍ଗ୍‌ ମାପୁରୁ ସାନ୍ତିସିଲି ମାପୁରୁ ଆଏନ୍‍, ମାତର୍‌ ସାନ୍ତିଦି ମାପୁରୁ । ମାତର୍‌ ୱିଜୁ ମଣ୍ତଲିଆଙ୍ଗାଁ ଏଣ୍ତେସ୍‌ ଆନାମାନାତ୍‍ ।
1CO 14:34 ଆୟାୱାଜା ମି ମଣ୍ତଲିଦି ଉପାସନାଦୁ ଆଇମେକ୍‍ ଆଲେଜ ମାନିଉ, ଆବେନ୍‌ ୱାର୍‌ଗିନି ଉଣ୍ତିଙ୍ଗ୍‌ ୱାକ୍‌ ଅନୁମତି ପୟ୍‌ଉ, ଜିହୁଦିରି ନିୟମ୍‌ତି ଇସାବ୍‌ତାନ୍‌ ୱାକ୍‌ ଆଡ୍‍ଗି ତେବାଜି ମାନିୱି ।
1CO 14:35 ୱାକ୍‌ ଜଦି ଇନି ବିସୟ୍‌ ବୁଜାଦେଙ୍ଗ୍‌ ଇଚ୍ଛା କିନେ, ଆର୍‌ତିଙ୍ଗ୍‌ ଇନ୍‌ଡ୍ର ନିଜେ ନିଜେଦି କନ୍‌ଲିରିଙ୍ଗ୍‌ ୱେନ୍‌ବାପିୱି, ଇରିଙ୍ଗ୍‌ ମଣ୍ତଲି ଲୋଇ ୱାର୍‌ଗିନିକା ଆଇମେକା ଉଣ୍ତିଙ୍ଗ୍‌ ସେମାର୍‌ତିମାଟା ।
1CO 14:36 ମାପୁରୁଦି ବାକ୍ୟ ଇନିକା ମିମାଣାନ୍‌କୁ ସତାମାନାତ୍‌ ? ଇକା ଇନିକା କେବଲ ମି ଲାକ୍‌ତୁ ୱାତାମାନାତ୍‌ ?
1CO 14:37 ଏନ୍‌ ଜଦି ନିଜେଦିଙ୍ଗ୍‌ ଅରେନ୍‍ ବାବବାଦି ନି ଆତ୍ମିକ ଦାନ୍‌ ପୟ୍‌ତି ଲୋକ୍‌ ଇଜି ଅଡ଼୍‌ବିନାନ୍‌, ଆର୍‌ତିଙ୍ଗ୍‌ ନାନ୍‌ ମିଙ୍ଗିଁ ଆମାକା ଆମାକା ରାସ୍‌ସିନା, ଆୟାୱିଜୁ ଜେ ପ୍ରବୁଦି ଆଦେସ୍‌, ଇକା ୱାନ୍‌ ନେସିନ୍‌ ।
1CO 14:38 ମାତର୍‌ ୱାନ୍‌ ଜଦି ମାନାଏନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ମିର୍‌ ମାନାମାଟ୍‌ ।
1CO 14:39 ଆଦେଙ୍ଗ୍‌ ଏ ନା ତଡ଼ାନ୍‌କୁ ନି ତାଙ୍ଗିଁକି, ମାପୁରୁଦି ବାକ୍ୟ ପ୍ରଚାର୍‌ କିନି ଉଣ୍ତିଙ୍ଗ୍‌ ୱେଡ଼ିକା ଆଦୁ; ମାରି ଆଇ ବାସାଦାନ୍‍ ୱାର୍‌ଗିନି ଉଣ୍ତିଙ୍ଗ୍‌ ଏଙ୍ଗ୍‌ବା ମାନା କିମାଟ୍‌ ।
1CO 14:40 ୱିଜୁ ପାଣି ନେଗେନ୍‌ତାନ୍‌ ମାରି ସାନ୍ତିଦାନ୍‌ କିଆନିକା ଦର୍‌କାର୍‌ ।
1CO 15:1 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମି ଲାକ୍‌ତୁ ଆମା ସୁସମାଚାର୍‌ ପ୍ରଚାର୍‌ କିତାମାର୍‌ଆ, ଆମାକା ମିର୍‌ ମାନାତି ମାନିଦେର୍‌, ଆବେନ୍‌ ବା ତିର୍‌ ଆଜି ତେବାତିମାନିଦେର୍‌, ନାନ୍‌ ଏଣ୍ତେସ୍‌ୱାଜା ମି ଲାକ୍‌ତୁ ପ୍ରଚାର୍‌ କିତାମାର୍‌ଆ, ଇକା ମିଙ୍ଗିଁ ଏତ୍‌ କିବିସ୍‌କିଜିନା ।
1CO 15:2 ନାନ୍‌ ମି ଲାକ୍‌ତୁ ପ୍ରଚାର୍‌ କିତିମାନି ଆୟା ସୁସମାଚାର୍‌ତୁ ଡାଟ୍‌ ୱାଜା ତେବାତିଙ୍ଗ୍‌, ଆର୍‌ତିଙ୍ଗ୍‌ ତାନି ମାଣାନ୍ ରକିୟା ପୟ୍‌ଜିନିଦେର୍‌, ସିଲିତିଙ୍ଗ୍‌ ମି ବିସ୍‌ବାସ୍‌ ବେକାର୍‌ ।
1CO 15:3 ଇରିଙ୍ଗ୍‌ ଆମା ଆମା ସିକିୟା ନାନ୍‌ ପୟ୍‌ତାମାନା, ଆୟାତାନିମାଣୁକୁ ଇୟା ପେରି ସିକିୟା ମିଙ୍ଗିଁ ୱେର୍‌ତାମାନା । ଆକା ଆଜିନାତ୍‍, ଦାର୍ମୁସାସ୍ତ୍ରଦୁ ରାସାତା ମାନାତ୍‌, କ୍ରିସ୍ତ ମା ପାପ୍‌ତି ଉଣ୍ତିଙ୍ଗ୍‌ ସାତାନ୍‌,
1CO 15:4 ଦୁକି ଗୁଟାଦୁମୁସାୟା ଆତାନ୍‌, ଦାର୍ମୁସାସ୍ତ୍ରଦି ଇସାବ୍‌ତାନ୍‌ ମୁନେଟି ୱେନ୍‌କା ଜିବନ୍‌ଆଜି ନିଙ୍ଗିଁତାମାନାନ୍‌;
1CO 15:5 ୱାନ୍‌ ପିତର୍‍, ମାରି ତାନିୱେନ୍‌କା ୱାନି ବାର୍‌ଲୋକ୍‌ ସିସୁରିଙ୍ଗ୍‌ ତରାୟ୍‌ଆତାନ୍‌,
1CO 15:6 ତାନିୱେନ୍‌କା ଉନ୍‌ଡ୍ରେ ଦେବାନେ ଅର୍‌ସେ ପାସ୍‌ସୋଦାନ୍‌ ନାଣ୍ତ ୱାନି ତଡ଼ାନ୍‍କାଙ୍ଗ୍‍ଁ ତରାୟ୍‌ଆତାନ୍‌, ୱାରି ଲୋଇରାନ୍‌ ଏସ ଲୋକୁ ନେର୍‌ ସାନ୍ଧି ଜିବନ୍‌ ମାନାର୍‌, ମାତର୍‌ ଏନ୍‌ ଏନ୍‌ ଇୟା ଦୁନିଆଦୁ ସିଲେର୍‌ ।
1CO 15:7 ଇୟାତାନିୱେନ୍‌କା ଜେ ଯାକୁବଙ୍ଗ୍‌, ମାରି, ତାନିୱେନ୍‌କା ୱିଜୁ ସିସୁରିଙ୍ଗ୍‌ ତରାୟ୍‌ଆତାନ୍‌;
1CO 15:8 ସାରାସାରିୱେନ୍‌କା ଜଗ୍‌ସିଲିନାଣ୍ତିଙ୍ଗ୍ ଜନମ୍‌ଆନିକଡ଼ଦି ୱାଜା ଅରେନ୍‍ ଜେ ନାନୁ, ୱାନ୍‌ ନାଙ୍ଗିଁ ବା ତରାୟ୍‌ଆତାନ୍‌
1CO 15:9 ଇରିଙ୍ଗ୍‌ ନାନ୍‌ ମାପୁରୁଦି ମଣ୍ତଲିଦିଙ୍ଗ୍‌ କାସ୍ଟୁ ସିତିମାନିଙ୍ଗ୍‌ ସିସୁରିମାନୁ ନାନ୍‌ ୱେଜେରିଙ୍ଗ୍‌ ଇଜ୍ରିକିନ୍ଧା, ମାରି ପ୍ରେରିତ ଦର୍‌ତାନ୍‌ ୱେଙ୍ଗ୍‌ଦେଙ୍ଗ୍‌ ଜଗ୍‍ ସିଲେତ୍‌ ।
1CO 15:10 ମାତର୍‌ ନାନ୍‌ ଆମାକା ଆତାମାନା, ଆକା ମାପୁରୁଦି ଦୟାଦାନ୍‌ ଆତାମାନାତ୍‌, ମାରି ନା ଉଣ୍ତିଙ୍ଗ୍‌ ୱାନି ଆୟା ଦୟା ବେକାର୍‌ ଆଏତ୍‍ । ମାତର୍‌ ନାନ୍‌ ଆୟା ୱିଜେରିମାଣୁକୁ ନାଣ୍ତ ପାଣି କିତାମାନା, ମାରିବା ନାନ୍‌ ସିଲେ, ମାତର୍‌ ନା ଉଣ୍ତିଙ୍ଗ୍‌ ମାପୁରୁଦି ଦୟା ମାନିଙ୍ଗ୍‌ ଇକା ପୁରା ଆତାମାନାତ୍‌ ।
1CO 15:11 ମାରି ନାନ୍‌ ଆନା, ସିଲ୍‌ତିଙ୍ଗ୍‌ ୱାର୍‌ ଆପିର୍‌, ଇୟା ପ୍ରଚାର୍‌ କିଜିନାପ୍, ଇୟାୱାଜା ମିର୍‌ ବିସ୍‌ବାସ୍‌ କିତିମାନିଦେର୍‌ ।
1CO 15:12 କ୍ରିସ୍ତ ଜେ ସାତିୱାରି ମାଣ୍‌କୁ ଜିବନ୍‌ଆଜି ମାରିଡ଼େସି ନିଙ୍ଗିଁତାମାନାନ୍‌, ଇକା ଜଦି ପ୍ରଚାର୍‌ କିଆୟାଆଜିନାତ୍‌, ଆର୍‌ତିଙ୍ଗ୍‌ ସାତିୱାରି ଜିବନ୍‌ଆଜିନିଙ୍ଗିଁନିକା ସିଲେତ୍‌ ଇଜି ମି ଲୋଇ ଏନ୍‌ ଏନ୍‌ ଏଣ୍ତେସ୍‌ ୱେର୍‌ସିନିଦେର୍‌ ?
1CO 15:13 ଜଦି ସାତିକାର୍‌ ଜିବନ୍‌ଆଜି ମାରିଡ଼େସି ନିଙ୍ଗିଁନିକା ସିଲେତିଙ୍ଗ୍‌, ଆର୍‌ତିଙ୍ଗ୍‌ କ୍ରିସ୍ତ ବା ଜିବନ୍‌ଆଜିନିଙ୍ଗିଁଏନ୍‌;
1CO 15:14 ଜଦି କ୍ରିସ୍ତ ସାତିମାଣାନ୍‌ ଜିବନ୍‌ଆଜିନିଙ୍ଗିଁଏନ୍‌, ଆର୍‌ତିଙ୍ଗ୍‌ ମା ପ୍ରଚାର୍‌ ବେକାର୍‌ ମାରି ମି ବିସ୍‌ବାସ୍‌ ବା ବେକାର୍‌,
1CO 15:15 ମାରି, ମାଡୁ ମାପୁରୁଦି ବିସୟ୍‌ତାନ୍‌ ଜେ ମିଚ୍‌ ସାକିୟ୍‌ ୱେର୍‌ତି ୱାଜା ଆନାତ୍‌, ଇରିଙ୍ଗ୍‌ ମାଡୁ ମାପୁରୁଦି ବିସୟ୍‌ତାନ୍‌ ସାକ୍ୟ ସିଜିମାନିକା ଜେ, ୱାନ୍‌ କ୍ରିସ୍ତଙ୍ଗ୍‌ ସାତିମାଣୁକୁ ମାରିଡ଼େସିଜିବନ୍‌ କିତାମାନାନ୍‌ । ମାତର୍‌ ଜଦି ସାତିକାର୍‌ ଜିବନ୍‌ଆଜିନିଙ୍ଗିଁଏର୍‌, ଆର୍‌ତିଙ୍ଗ୍‌ ୱାନ୍‌ କ୍ରିସ୍ତଙ୍ଗ୍‌ ସାତିମାଣାନ୍‌ ଜିବନ୍‌କିଜି ନିକ୍‌ଏନ୍‌ ।
1CO 15:16 ଜଦି ସାତିକାର୍‌ ଜିବନ୍‌ଆଜିନିଙ୍ଗିଁଏର୍‌, ଆର୍‌ତିଙ୍ଗ୍‌ କ୍ରିସ୍ତ ବା ଜିବନ୍‌ଆଜିନିଙ୍ଗିଁଏନ୍‌;
1CO 15:17 ଆଉ, ଜଦି କ୍ରିସ୍ତ ସାତିମାଣାନ୍‌ ଜିବନ୍‌ଆଜିନିଙ୍ଗିଁଏନ୍‌, ଆର୍‌ତିଙ୍ଗ୍‌ ମି ବିସ୍‌ବାସ୍‌ ମିଚ୍‌ ମାରି ମିର୍‌ ଇଲେଇବା ନିଜେ ନିଜେଦି ପାପ୍‌ତୁ ମାନିଦେର୍‌ ।
1CO 15:18 ଆର୍‌ତିଙ୍ଗ୍‌ ଆମାକାର୍‌ କ୍ରିସ୍ତ ବିସ୍‌ବାସିର୍‌ ସାତାମାନାର୍‌, ୱାନ୍‌ ବା ନାସ୍ଟୁ ଆତାମାନାର୍‌ ।
1CO 15:19 ଜଦି ଇୟା ଜିବନ୍‌ ଉଣ୍ତିଙ୍ଗ୍‌ ମାଡୁ କ୍ରିସ୍ତଦିମାନୁ ଆସା ଇଡ଼୍‌ତିମାନିକା, ଆର୍‌ତିଙ୍ଗ୍‌ ଆଇ ୱିଜୁଲୋକାମାଣୁକୁ ମାଡୁ କାର୍ମୁସିଲିକା ।
1CO 15:20 ମାତର୍‌ ସତ୍‌ତାନ୍‌ କ୍ରିସ୍ତ ସାତିମାନି ଲୋକା ମାରିଡ଼େସି ଜିବନ୍‌ଆଜି ନିଙ୍ଗିଁନିକା ପୁରା ତର୍‌ତେଙ୍ଗ୍‍ଁ ଇଜି ୱାରି ମାଣ୍‌କୁ ନିଜେ ଆଗ୍‌ଡ଼ି ସାତିମାଣାନ୍‌ ନିଙ୍ଗିଁତାମାନାନ୍‌ ।
1CO 15:21 ଇରିଙ୍ଗ୍‌ ଅରେନ୍ ଲୋକା ମାଣ୍‌କୁ ସାନିକା ୱାତିମାନିଙ୍ଗ୍‌ ମାରି ଅରେନ୍ ଲୋକା ମାଣାନ୍‌ ବା ସାତିୱାରିଙ୍ଗ୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନିକା ଆତାମାନାତ୍‌ ।
1CO 15:22 ଆଦମତି ୱାଲେ ମିସାତିକା ମାନିଙ୍ଗ୍‌ ଏଣ୍ତେସ୍‌ ୱିଜୁ ଲୋକୁ ସାନାର୍‌, ଆୟାୱାଜା ବା କ୍ରିସ୍ତଦିମାନୁ ମିସାତିମାନିଙ୍ଗ୍ ୱିଜେରେ ମାରିଡ଼େସିଜିବନ୍‌ ଆନାର୍‌ ।
1CO 15:23 ମାତର୍‌ ୱିଜେରେ ଲୋକୁ ତିଆର୍‌ଆନି ବେଡ଼ାଦୁ ଜିବନ୍‌ଆଜିନିଙ୍ଗିଁନାର୍‌, ୱିଜେରି ଆଗ୍‌ଡ଼ି କ୍ରିସ୍ତଦି ସାତିମାଣାନ୍‌ ନିଙ୍ଗିଁତାମାନାନ୍‌ । ୱେନ୍‌କା ୱାନ୍‌ ୱାନିବେଡ଼ାଦୁ ୱାନି ଆସିର୍ବାଦ୍‍ତି ଲୋକୁ ଆଗ୍‌ଡ଼ି ଜିବନ୍‌ଆନାର୍‌ ।
1CO 15:24 ତାନେୱେନ୍‌କା ଜୁଗ୍‌ସେସ୍‌ ଇଗା ୱାନାତ୍ । ଆୟାବେଡ଼ାଦୁ କ୍ରିସ୍ତ ୱିଜୁ ତାଗ୍‌ଇ ଆତ୍ମା ଆମାୱାନିଙ୍ଗ୍‌ ସାସନ୍‌, ୱିଜୁ ଅଦିକାର୍‌ ମାରି ସାକ୍ତିଦି ପାଣି ୱିସ୍‌ତି ୱେନ୍‌କା ବୁବା ମାପୁରୁଙ୍ଗୁଁ ରାଜି ସର୍‌ପେ କିନାନ୍‌ ।
1CO 15:25 ଇରିଙ୍ଗ୍‌ ମାପୁରୁ ୱିଜୁ ସାତ୍ରୁରିଙ୍ଗ୍‌ ନିଜେଦି ପାଦାମ୍‌ ଆଡ୍‍ଗି ଇଡିଇ ସାନ୍ଧି କ୍ରିସ୍ତଙ୍ଗ୍‌ ପୁରା ସାସନ୍‌ କିଦେଙ୍ଗ୍‌ ପଡ଼ାନାତ୍‌ ।
1CO 15:26 ସାରାସାରିୱେନ୍‌କାରି ସାତ୍ରୁ ସାନିକା ଆକାବା ଆରାନାନ୍‌ ।
1CO 15:27 ଇରିଙ୍ଗ୍‌ ଦର୍ମସାସ୍ତ୍ରଦୁ ରାସାତା ମାନାତ୍‌, ମାପୁରୁ ୱିଜୁ ବିସୟ୍‌ ୱାନି ପାଦାମ୍‌ ଆଡ୍‍ଗି ଇଟ୍‌ତାନ୍‌ । ମାରିବା ମାପୁରୁ ଇୟାୱିଜୁ ବିସୟ୍‌ତୁ ମିସାଏନ୍‌, ଆୟାଉଣ୍ତିଙ୍ଗ୍‌ ମାପୁରୁ ନିଜେ ୱିଜୁ ବିସୟ୍‌ତିଙ୍ଗ୍‌ କ୍ରିସ୍ତଦି ଆଡ୍‍ଗି ଇଡ୍‌ନାନ୍‌ ।
1CO 15:28 ମାରି ୱିଜୁ ବିସୟ୍‌ତିଙ୍ଗ୍‌ କ୍ରିସ୍ତଦି ଆଡ୍‍ଗି ଇଡ୍‌ତି ୱେନ୍‌କା, ୱାନ୍‌ ନିଜେ ବୁବା ମାପୁରୁଦି ଆଡ୍‍ଗି ଆନାନ୍‌ ମାରି ସାରାଦୁନିଆଦି ମୁସ୍‌କୁ ମାପୁରୁଦି ସାସନ୍‌ କିନିକା ପୁରା ଆନାତ୍‌ ।
1CO 15:29 ସାତିକାର୍‌ ନିଙ୍ଗିଁଏତିଙ୍ଗ୍, ଆମାକାର୍‌ ସାତିୱାରି ଉଣ୍ତିଙ୍ଗ୍‌ ଡୁବନ୍‌ ଅନାର୍‍, ୱାରି ବିସୟ୍‌ତାନ୍‌ ଇନିକା ରାସ୍‌ତିଦେର୍‌ ? ଜଦି ସାତିକାର୍‌ ମାରିଡ଼େସି ଜିବନ୍‌ଆଜିନିଙ୍ଗିଁଏର୍‌, ଆର୍‌ତିଙ୍ଗ୍‌ ୱାରି ଉଣ୍ତିଙ୍ଗ୍‌ ଆଇୱାରିଙ୍ଗ୍‌ ଏନ୍ଦା ଡୁବନ୍‌ ସିନାର୍‌ ।
1CO 15:30 ମାରି ମାଡୁ ବା ଏନ୍ଦା ୱିଜୁ ଦଣ୍ତତୁ ସାନିକା ଆଗ୍‌ଡ଼ି କିଜିନିକା ?
1CO 15:31 ଏ ତଡ଼ାନ୍‌କୁ ନି ତାଙ୍ଗିଁକି, ମା ଜିବନ୍‌ ପ୍ରବୁ ଜିସୁ କ୍ରିସ୍ତଦି ୱାଲେ ମିସାତି ମାନିଙ୍ଗ୍‌, ମି ବିସୟ୍‌ତାନ୍‌ ନାନ୍‌ ଆମା ଗର୍ବ କିଜିନା, ଆବେଣି ପାର୍‌ମାଣ୍‌ କିଜି ୱେର୍‌ସିନା, ନାନ୍‌ ଦିନାମି ସାନି ସାରିଦୁ ବୁଲାଜିନା ।
1CO 15:32 ଜଦି ନାନ୍‌ କେବଲ ଲୋକା ଆସା ଅସି ଏପିସ୍‌ତୁ ବନ୍‌ତି ଜାତୁଙ୍ଗାଁ ୱାଜା ଲୋକା ୱାଲେ ଜୁଦ୍ କିତାମାର୍‌ଆ, ଆର୍‌ତିଙ୍ଗ୍‌ ଆବେନ୍‌ ନା ଲାବ୍‌ ଇନିକା ଆତାତ୍‌ ? ଜଦି ସାତିକାର୍‌ ଜିବନ୍‌ଆଜିନିଙ୍ଗିଁଏର୍‌, କାତାଦି ଇସାବ୍‍ତାନ୍ “ରାଦୁ ଉଣୁଜିତିନ୍‌ଞ୍ଜି ବେଡ଼ା କାଟେକିନାଟ୍‌, ଇରିଙ୍ଗ୍‌ ୱିଗେରିଙ୍ଗ୍‌ ମାଙ୍ଗିଁ ସାଦେଙ୍ଗ୍‌ ଆନାତ୍‌ ।”
1CO 15:33 ମିର୍‌ ବେମ୍ରି ଆମାଟ୍‌, “ତାଗ୍ଇ ଲୋକା ୱାଲେ ମିସାତିଙ୍ଗ୍ ନେଗି ଜିବନ୍‌ ନାସ୍ଟୁ ଆନାତ୍‌ ।”
1CO 15:34 ଆଦେଙ୍ଗ୍‌ ଜାଗ୍‌ରାତା ଆଦୁ, ପାପ୍‌ କିମାଟ୍‌; ଇରିଙ୍ଗ୍‌ ଏନ୍‌ ଏନ୍‌ ମାପୁରୁଦି ବିସୟ୍‌ତାନ୍‌ ନେସ୍‌ଏର୍‌; ନାନ୍‌ ମିଙ୍ଗିଁ ସେମାର୍‌ତି ମାଟା ୱେର୍‌ସିନା ।
1CO 15:35 ଏନ୍‌ଆପିନ୍‌ ୱେନ୍‌ବାଦେଙ୍ଗ୍‌ ଆଟ୍‍ନାନ୍‍, ସାତିକାର୍‌ ଏଣ୍ତେସ୍‌ ଜିବନ୍‌ଆଜିନିଙ୍ଗିଁନାର୍‌ ? ୱାର୍‌ ଏଣ୍ତେସ୍‌ ନାନି ମେନ୍ଦଲ୍‌ତାନ୍‌ ୱାନାର୍‌ ?
1CO 15:36 ଏ ବକୁଆର୍‌, ମିର୍‌ ନିଜେ ଆମାକା ୱିତ୍‌ନିଦେର୍‌, ଆକା ସାଏତିଙ୍ଗ୍‌ ନେର୍‌ଏତ୍‌, ମାରି, ଆମା ମାରାନ୍‌ ନେର୍‌ନାତ୍‌, ମିର୍‌ ତାନିଙ୍ଗ୍‌ ୱିତ୍‌ଇଦେର୍‌,
1CO 15:37 ମାରି, ଆମା ମେନ୍ଧଲ୍‍ ଆନାତ୍‌, ମିର୍‌ ୱିତ୍‌ନିମାନିଦେର୍‌ ଗଦ୍‍ମୁ ଆପିତ୍‌ ସିଲିତିଙ୍ଗ୍‌ ଆଇ ଇନି ୱିତୁ ଆପିତ୍‌, ଆକା କେବଲ ଉନ୍‌ଡ୍ରେ ୱିତୁନେ;
1CO 15:38 ମାତର୍‌ ମାପୁରୁ ନିଜେଦି ଇଚ୍ଛାଦାନ୍‌ ୱାନିଙ୍ଗ୍‌ ମେନ୍ଦଲ ସିନାନ୍‌, ମାରି ୱିଜୁ ୱିତୁଦି ମାଣାନ୍‌ ୱିଜୁଦିଙ୍ଗ୍‌ ୱାନି ନିଜେଦି ମେନ୍ଦଲ୍‌ ସିନାନ୍‌ ।
1CO 15:39 ୱିଜୁ ଜିବନ୍‌ମାନିକା ଉନ୍‌ଡ୍ରେନାନି ମେନ୍ଦଲ ସିଲେତ୍‌, ମାତର୍‌ ଲୋକା ଉନ୍‌ଡ୍ରେନାନିକା ମେନ୍ଦଲ, ଜାତୁଆଙ୍ଗାଁଦି ଆଇନାନି ମେନ୍ଦଲ, ମାରି ପଟିଆଙ୍ଗାଁ ମାରି ଉନ୍‌ଡ୍ରିନାନି ମେନ୍ଦଲ ମାରି ମିନ୍‌କୁ ମେନ୍ଦଲ ଆଇନାନିକା ।
1CO 15:40 ମୁସ୍‌କୁପୁର୍‌ତି ମେନ୍ଧଲ୍‍ ମାନାତ୍‌, ଜଗତ୍‌ତି ମେନ୍ଧଲ୍‍ ବା ମାନାତ୍‌, ମାତର୍‌ ମୁସ୍‌କୁପୁର୍‌ତି ମେନ୍ଦଲ୍‌ତି ଉନ୍‌ଡ୍ରିନାନି ସୁନ୍ଦର୍‌ ମାନାତ୍‌, ମାରି ଜଗତ୍‌ତି ମେନ୍ଦଲ୍‌ତି ଆଇନାନି ସୁନ୍ଦର୍‌ ମାନାତ୍‌ ।
1CO 15:41 ୱେଡ଼ାଦି ଉନ୍‌ଡ୍ରିନାନି ସୁନ୍ଦର୍‌, ଲେଜୁଦି ଆଇନାନି ସୁନ୍ଦର୍‌ ମାରି ସୁକେଆଙ୍ଗାଁ ଆଇନାନି ସୁନ୍ଦର୍‌; ଇରିଙ୍ଗ୍‌ ସୁନ୍ଦର୍‌ତିଙ୍ଗ୍‌ ଉନ୍‌ଡ୍ରେ ସୁକା ଆଇ ସୁକେଆଙ୍ଗାଁ ମାଣ୍‌କୁ ଆଇକା ।
1CO 15:42 ସାତିକାର୍‌ ମାରିଡ଼େସି ଜିବନ୍‌ଆଜି ନିଙ୍ଗିଁନିକା ବା ଆୟାୱାଜା । ୱିସ୍‌ସି ୱିତ୍‌ନିକା, ୱିଜ୍‌ଏଣ୍‌ଗା ନେର୍‌ନାତ୍‌;
1CO 15:43 ଗୁଟାଦୁ ମୁସାଜିମାନି ମେନ୍ଧଲ୍‍ ଅସୁନ୍ଦର୍‌ ନି ତାଗ୍‌ଇକା । ମାତର୍‌ ମାରିଡ଼େସିନିଙ୍ଗିଁତି ମେନ୍ଧଲ୍‍ ସୁନ୍ଦର୍‌ ନି ସାକ୍ତିଦିକା ।
1CO 15:44 ଗୁଟାଦୁ ମୁସ୍‌ନିୱାଲେ ମେନ୍ଦଲ ନେଗେନ୍‌ ତେବାନାତ୍‌; ମାତର୍‌ ମାରିଡ଼େସି ଜିବନ୍‌ ଆନିୱାଲେ, ଆକା ଆନାତ୍‌ ଆତ୍ମିକ ମେନ୍ଦଲ । ନେଗି ମେନ୍ଦଲ୍‌ତି ପେଡ଼େକ୍‌ ମାନିଙ୍ଗ୍‌, ଆତ୍ମିକ ମେନ୍ଧଲ୍‍ ଆଟ୍‌ସିନାତ୍‌ ।
1CO 15:45 ଇୟାୱାଜା ଦର୍ମସାସ୍ତ୍ରଦୁ ରାସାତା ମାନାତ୍‌, “ପ୍ରାତୁମ୍‌ତି ଲୋକ୍‌ ଆଦମ ଜିବନ୍‌ତି ଲୋକ୍‌ ଆତାନ୍‌ ।” ସାରାସାରିୱେନ୍‌କା ଆଦମ ଜିବନ୍‌ମାନି ଆତ୍ମା ।
1CO 15:46 ମାତର୍‌ ଆମାକା ଆତ୍ମିକ, ଆକା ଆଗ୍‌ଡ଼ି ସିଲେତାତ୍‍, ମାତର୍‌ ଆମାକା ମେନ୍ଦଲ ନେଗିକା, ଆକା ଆଗ୍‌ଡ଼ି ମାର୍‌ର୍ହାତ୍‌, ତାନେୱେନ୍‌କା ଆତ୍ମିକ ।
1CO 15:47 ଆଗ୍‍ଡ଼ିରି ଲୋକୁ ଆଦମ ମାର୍‌ଆନ୍‌ ଦୁନିଆଦୁ, ସିକ୍‌ଲାଦାନ୍‌ ତିଆର୍‌ଆତିକାନ୍‌, ମାରି ଅରେନ୍‌ ଆଦମ ମୁସ୍‌କୁପୁର୍‌ତାନ୍‌ ୱାତାମାର୍‌ର୍ହାନ୍‌ ।
1CO 15:48 ଆମାକାର୍‌ ସିକ୍‌ଲାଦାନ୍‌ ତିଆର୍‌ଆତିକାର୍‌, ୱାର୍‌ ସିକ୍‌ଲାଦାନ୍‌ ତିଆର୍‌ଆତି ଆୟା ଲୋକ୍‌ ୱାଜା, ମାରି ଆମାକାର୍‌ ମୁସ୍‌କୁପୁର୍‌ତିକାର୍‌, ୱାର୍‌ ମୁସ୍‌କୁପୁର୍‌ତାନ୍‌ ୱାତିମାନି ଆୟା ଲୋକ୍‌ ୱାଜା ।
1CO 15:49 ମାରି, ମାଡୁ ଏଣ୍ତେସ୍‌ ଦୁନିଆଦାନ୍‌ ସିକ୍‌ଲାଦାନ୍‌ ତିଆର୍‌ଆତି ଆୟା ଲୋକ୍‌ତି ମୁର୍ତି ଆସ୍‌ତି ମାନିକା, ଆୟାୱାଜା ଆୟା ମୁସ୍‌କୁପୁର୍‌ତି ଲୋକ୍‌ତି ମୁର୍ତି ୱାଜା ବାଦ୍‌ଲେ ଆନିକା ।
1CO 15:50 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ଇକା ୱେର୍‌ସିନା, ନେତେର୍‌କାଣ୍ତା ମେନ୍ଧଲ୍‍ ଆସ୍‌ସି ମାପୁରୁଦି ରାଜି ଅଦିକାର୍‌ କିଦେଙ୍ଗ୍‌ ଆଟ୍‌ଇକା, ମାରି ୱିଜ୍‌ନିକା ୱିଜ୍‌ଇତାନିଙ୍ଗ୍‌ ଅଦିକାର୍‌ କିଦେଙ୍ଗ୍‌ ଆଟ୍‍ଏତ୍‍ ।
1CO 15:51 ୱେନ୍‌ଡ୍ରୁ, ନାନ୍‌ ମିଙ୍ଗିଁ ଉନ୍‌ଡ୍ରି ସତ୍‌ତି ମାଟା ୱେର୍‌ସିନା, ମାଡୁ ୱିଜୁଲୋକୁ ସାଇକା, ମାତର୍‌ ସାରାସାରି ମରି ଆଉଲି ଆନି ୱାଲେ,
1CO 15:52 ଉନ୍‌ଡ୍ରେ ଦେବାନେ, କାଣ୍‌ଗା ନାପ୍‌ନେଣ୍‌ଗା ମାଡୁ ୱିଜୁଲୋକ୍‌ ବାଦ୍‌ଲେଆନିକା; ନାସ୍ତିୱାଲେ ମରି ଅଡ଼ନାତ୍‌, ମାରି ବିସ୍‌ବାସ୍‌ତି ସାତିକାର୍‌ ଜିବନ୍‌ଆଜି ନିଙ୍ଗିଁନାର୍‌, ମାରି ମାଡୁ ୱିଜୁଲୋକ୍‌ ବାଦ୍‌ଲେଆନିକା ।
1CO 15:53 ଇରିଙ୍ଗ୍‌ ‌ଇୟା ୱିଜ୍‌ନି ମେନ୍ଦଲ୍‌ତିଙ୍ଗ୍‌ ୱିଜ୍‌ଇକାୱାଜା ବାଦ୍‌ଲେ ଆଦେଙ୍ଗ୍‌ ପଡ଼ାନାତ୍‌; ମାରି ଇୟା ଦୁନିଆଦି ମେନ୍ଦଲ୍‌ତିଙ୍ଗ୍‌ ଜିନିନାନି ଆଙ୍ଗିଁ ଆରାଦେଙ୍ଗ୍‌ ପଡ଼ାନାତ୍‌ ।
1CO 15:54 ଆର୍‌ତିଙ୍ଗ୍‌ ଇୟା ସାତି ମେନ୍ଧଲ୍‍ ଜିନିକା ପୟ୍‌ତିଙ୍ଗ୍‌, ଦର୍ମସାସ୍ତ୍ରଦି ଇୟା ବାକ୍ୟ ପୁରା ଆନାତ୍‌ : “ଜିଣାନିକା ସାନିତାନିଙ୍ଗ୍‌ ଆରାକିତାମାନାତ୍‌ ।”
1CO 15:55 “ଏ ସାନିକା, ଆମାନ୍ଧି ନି ଜିଣାନିକା ? ଏ ସାନିକା, ଆମାନ୍ଧି ନି ଦଂସ କିନିକା ?”
1CO 15:56 ସାନିକା ପାପ୍‌, ମାରି ପାପ୍‌ତି ସାକ୍ତି ନିୟମ୍‌;
1CO 15:57 ମାତର୍‌ ଆମା ମାପୁରୁ ମା ପ୍ରବୁ ଜିସୁ କ୍ରିସ୍ତଦି ମାଣ୍‌କୁ ମାଙ୍ଗିଁ ଜିଣା କିତାମାନାନ୍‌, ୱାନିଙ୍ଗ୍‌ ଦନ୍ୟବାଦ୍‌ ଆପିତ୍‌ ।
1CO 15:58 ମାରି, ଏ ନା ଲାଡ୍‍ତି ତଡ଼୍‍କୁ, ପ୍ରବୁଦି ସେବାଦୁ ମି ପାଣି ବେକାର୍‌ ଆଏତ୍‍, ଇକା ନେସ୍‌ସି ପ୍ରବୁଦି ପାଣିଦୁ ତିର୍‌ ମାରି ଡାଟ୍‌ ତେବାଜି ୱିଜୁଦିନ୍‌ ନାଣ୍ତଦାନ୍‌ ନାଣ୍ତ ୱେଡ଼ିକା ଆଦୁ ।
1CO 16:1 ଜିହୁଦାଦୁ ମାନି ମଣ୍ତଲିଦି ବିସ୍‍ବାସ୍‍ସିରି ଉଣ୍ତିଙ୍ଗ୍‌ ଡାବୁଙ୍ଗ୍‌ ସାହାଜ୍ୟ ସିନି ବିସୟ୍‌ତାନ୍ ନା ମାଟା : ନାନ୍‌ ଗାଲାତିଆଦି ରାଜିଦି ମଣ୍ତଲିଆଙ୍ଗାଁ ଆମାକା କିଦେଙ୍ଗ୍ ଆଦେସ୍ ସିତାମାନା, ଆକା ନେଗେନ୍‌ତାନ୍‌ ମାନାଦୁ ।
1CO 16:2 ମି ସୁବିଦା ଇସାବ୍‌ତାନ୍‌ ୱିଜୁ ଆଦିୱାର୍‍ଙ୍ଗୁଁ ଇୟା ପାଣିଦିଙ୍ଗ୍‌ ଏସ ଡାବୁଙ୍ଗୁଁ ଉଣ୍ତା କିଜ ୱେର୍‌ଏ ଇଡ୍‌ଦୁ । ଆର୍‌ତିଙ୍ଗ୍‌, ନାନ୍‌ ୱାତିଙ୍ଗ୍‍ ଏଣ୍ତେସ୍‌ ମିଙ୍ଗିଁ ମାରି ଡାବୁଙ୍ଗୁଁ ଲସ୍‌ତେଙ୍ଗ୍‌ ପଡ଼ାଏତ୍‌ ।
1CO 16:3 ମାରି, ନାନ୍‌ ୱାତିଙ୍ଗ୍‍ ମିର୍‌ ଆମାୱାରିଙ୍ଗ୍‌ ନେଗିକାର୍‌ ଇଜି ଅଡ଼୍‍ବିଜିନିଦେର୍‍, ନାନ୍‌ ୱାରିଙ୍ଗ୍ ଆକୁ ସିଜି ଜିରୁସାଲମତୁ ମି ଡାବୁଙ୍ଗୁଁ ଆସ୍‌ସୋସନି ଉଣ୍ତିଙ୍ଗ୍‌ ପୋକ୍‌ନା ।
1CO 16:4 ମାତର୍‌ ନାନ୍‌ ବା ସନ୍‍ଡ୍ରେଙ୍ଗ୍‍ ଦରକାର୍‌ ଆତିଆଙ୍ଗାଁ, ୱାର୍‌ ନା ୱାଲେ ସନ୍‍ଡ୍ରେଙ୍ଗ୍‍ ଆଟ୍‍ନାର୍ ।
1CO 16:5 ନାନୁ ମାସିଦୋନିଆଦୁ ବୁଲାଦେଙ୍ଗ୍‌ ସଲ୍‌ସିନା । ବୁଲାନିକା ୱିଜିତିଙ୍ଗ୍ ନାନୁ ମି ଲାକ୍‌ତୁ ଡ଼େସି ୱାନା ।
1CO 16:6 ନା ବଦା ଆତିଆଙ୍ଗାଁ, ମି ୱାଲେ ଏସୋ ଦିନ୍ ତେବାନା, ଆର୍‌ତିଙ୍ଗ୍‌ ପିନିକାଡ଼ା କାଟେକିନା । ତାନିୱେନ୍‌କା ଏମେମାନୁ ସନା ଉଣ୍ତିଙ୍ଗ୍‌ ବଦାକିନା, ମିର୍‌ ବା ନାଙ୍ଗିଁ ଆବେନ୍‌ ସନି ଉଣ୍ତିଙ୍ଗ୍‌ ସାହାଜ୍ୟ କିଦେଙ୍ଗ୍ ଆଟ୍‍ନିଦେର୍‌ ।
1CO 16:7 ମାତର୍‌ ସନି ସାରିଦୁ ମି ୱାଲେ କେବଲ ସାଣେକ୍‌ତି ଉଣ୍ତିଙ୍ଗ୍‌ ବେଟ୍‍ବୁଡ଼ାଦେଙ୍ଗ୍ ନା ବଦା ସିଲେତ୍‌ । ନାନ୍‌ ଆସା କିଜିନା, ମାପୁରୁଦି ବଦା ଆତିଙ୍ଗାଁ, ନାନ୍‌ ମି ୱାଲେ ନାଣ୍ତଦିନ୍ ସାନ୍ଦି ତେବାନା ।
1CO 16:8 ମାତର୍‌ ପେଣ୍ଟିକସ୍ଟ ପଣ୍ତୟ ଦିନ୍‍ତିନାଣ୍ତିଙ୍ଗ୍‌ ସାନ୍ଦି ନାନୁ ଇବେନୁ ଏପିସ୍‌ଦୁ ତେବାନା ।
1CO 16:9 ଇବେନୁ ନା ବିରୁଦ୍‌ତାନ୍ ଗାଦିଲୋକ୍‌ ମାରିଙ୍ଗ୍ ବା, ନେଗି ପାଣି କିଦେଙ୍ଗ୍‌ ନା ଉଣ୍ତିଙ୍ଗ୍‌ ଅସାର୍ ସେର୍‍ଲା ରେଆତା ମାନାତ୍ ।
1CO 16:10 ତିମତି ମି ଲାକ୍‌ତୁ ୱାତାନ୍‌, ୱାନିଙ୍ଗ୍‌ ନେଗେନ୍‌ତାନ୍‌ କୁକ୍‌ତୁ । ମାତର୍‌ ୱାନ୍‌ ବା ନା ୱାଜା ପ୍ରବୁଦି ପାଣି କିଜିନାନ୍ ।
1CO 16:11 ଏନ୍‌ ୱାନିଙ୍ଗ୍‌ କାଡ଼ାମାକିର୍‌ । ସାନ୍ତିଦାନ୍ ସନ୍‌ଡ୍ରେ ମିର୍‌ ୱାନିଙ୍ଗ୍‌ ପୁରା ସାହାଜ୍ୟ କିନିଦେର୍‌ । ଆର୍‌ତିଙ୍ଗ୍‌, ୱାନ୍‌ ତଡ଼ାନ୍‍କା ୱାଲେ ନା ଲାକ୍‌ତୁ ଡ଼େସି ୱାନାର୍ । ୱାରିଙ୍ଗ୍ କାପ୍‌କିଜିନାନ୍‌ ତେବାତାମାନା ।
1CO 16:12 ତଡ଼ାନ୍ ଆପୋଲୋଦି ବିସୟ୍‌ତାନ୍ ଇଜିନାନ୍‌ ଜେ, ଆଇ ତଡ଼ାନ୍‍କା ୱାଲେ ମି ମାଣ୍‌କୁ ସନି ଉଣ୍ତିଙ୍ଗ୍‌ ନାନୁ ୱାନିଙ୍ଗ୍‌ ବେସିଦେବେଙ୍ଗ୍‌ ୱେଡ଼ିକା କିତାମାନାନ୍ । ମାତର୍‌ ଇଲେଇ ସନି ଉଣ୍ତିଙ୍ଗ୍‌ ୱାନ୍‌ ଏମେମାଣୁକୁ ବା ରାଜିଆଏତାନ୍ । ୱେନ୍‌କା ସୁଜୋଗ ପୟ୍‌ତାନ୍, ୱାନ୍‌ ସତେନେ ମି ଲାକ୍‌ତୁ ୱାନାନ୍ ।
1CO 16:13 ମିର୍‌ କାପ୍‌କିଜ ମାନ୍‌ଡ୍ରୁ, ବିସ୍‍ବାସ୍‍ଦୁ ତିର୍‌ ତେବାଦୁ, ବପୁ ମାରି ସାକ୍ତିଆଦୁ ।
1CO 16:14 ମି ୱିଜୁ ପାଣି ଜିବନ୍‌ନୋନିମାଣୁକୁ ପୁରା ଆପିତ୍‌ ।
1CO 16:15 ମିର୍‌ ସ୍ତିପାନ୍ ମାରି ୱାନି ଇଲୁଦି ବିସୟ୍‌ତାନ୍‌ ନେସ୍‌ନିଦେର୍‌ । ୱାର୍‌ ଆକାୟାଦି ଆଗ୍‍ଡ଼ିରି କ୍ରିସ୍ଟାନ୍‌ ବିସ୍‌ବାସ୍‌ସିର୍‌ । ୱାର୍‌ ମାପୁରୁଦି ଲୋକାଙ୍ଗ୍‌ ସେବାଦୁ ନିଜେଦିଙ୍ଗ୍‌ ସର୍‌ପେ ଆତାମାନାନ୍‌, ତଡ଼ାନ୍‍କୁ ନି ତାଙ୍ଗିଁକି; ନାନ୍‌ ମିଙ୍ଗିଁ ବାତିଙ୍ଗ୍‌ମାଲ୍‌ଜିନା,
1CO 16:16 ମିର୍‌ ଇୟାୱାରିନ୍ଦି ମାରି ଇୟାୱାରି ୱାଲେ ପାଣି ମାରି ସେବା କିଜିମାନି ଲୋକାରି ୱେନ୍‌କା ସାନ୍‍ଡ୍ରୁ ।
1CO 16:17 ସ୍ତିପାନ୍, ଫର୍ତୁନାତ ମାରି ଆଖାୟିକ ଇବେନୁ ୱାତାନ୍‌ଆକା ନାନୁ ବେସି ୱେଡ଼ିକା । ମିର୍‌ ସିଲିୱାଲେ ୱାର୍‌ ୱାଜି ମି ଜାଗା ପୁରାକିତାମାନାର୍ ।
1CO 16:18 ୱାର୍‌ ମିଙ୍ଗିଁ ମାରି ନାଙ୍ଗିଁ ଆତ୍ମାଦିଙ୍ଗ୍‌ ୱେଡ଼ିକା କିବିସ୍‌ତାର୍ । ଇୟାୱାଜାଦି ଲୋକୁ ସନ୍‍ମାନ ପୟ୍‌ନାର୍ ।
1CO 16:19 ଆସିଆ ଦେସ୍‍ତି ମଣ୍ତଲିଙ୍ଗ୍‌ ମିଙ୍ଗିଁ ନମସ୍କାର୍ ଜାଣେକିଜିନାତ୍‌ । ଆକିଲା ମାରି ପ୍ରିସ୍କିଲା ମାରି ୱାରି ଇନ୍‌ଡ୍ର ଉପାସନା କିଜିମାନି ମଣ୍ତଲି, ପ୍ରବୁଦି ଦର୍‌ତାନ୍‌ ମିଙ୍ଗିଁ ଜିବନ୍‌ତାନ୍‌ ନମସ୍କାର୍‌ ଜାଣେକିଜିନା ।
1CO 16:20 ଇବେଣି ତଡ଼ାନ୍‌କୁ ୱିଜେରେ ମିଙ୍ଗିଁ ନମସ୍କାର୍ ଜାଣେକିଜିନାର୍ । ମିର୍‌ ପବିତ୍ର ଚୁମାଦାନ୍ ନିଜେନିଜେଦିଙ୍ଗ୍‌ ନମସ୍କାର୍ ଜାଣେକିଦୁ ।
1CO 16:21 ନାନୁ ପାଉଲ ନିଜେଦି କିୟୁଦାନ୍‌ ଇୟାୱିଜୁ ରାସ୍‌ସିନା । ମିର୍‌ ନା ନମସ୍କାର୍ ମାନାଦୁ ।
1CO 16:22 ଜଦି ଏନ୍‌ ପ୍ରବୁଙ୍ଗୁଁ ଜିବନ୍‌ନୋଏନ୍, ୱାନ୍‌ ଅବିସାପ୍ ଆପିନ୍ । ମାରାନାଥା, ଅର୍ତାତ୍‌ ମା ପ୍ରବୁ ରାପିନ୍ ।
1CO 16:23 ପ୍ରବୁ ଜିସୁଦି ଦୟା ମିମାନୁ ସାକା ଆପିତ୍‌ ।
1CO 16:24 କ୍ରିସ୍ତ ଜିସୁଦି ୱାଲେ ମିସାତିମାନିଙ୍ଗ୍‌ ମିର୍‌ ୱିଜେରେ ନା ଜିବନ୍‍ତି ଜିବନ୍‌ନୋନିକା ମାନାଦୁ ।
2CO 1:1 ନାନ୍‌ ପାଉଲ, ମାପୁରୁଦି ବଦାଦାନ୍ ବାସେଆତି ଜିସୁ କ୍ରିସ୍ତଦି ପ୍ରେରିତ ସିସୁ ପାଉଲ ମାରି ମା ତଡ଼ାନ୍‍ ତିମତି କରନ୍ତି ଗାଡ଼ାଦି ମାପୁରୁଦି ମଣ୍ତଲି ମାରି ଆକାୟା ଦେସ୍‍ତି ୱିଜୁ ବିସ୍‍ବାସିରି ଲାକୁତୁ ଇୟା ଆକୁ ରାସ୍‍ସିନାନ୍‍ ।
2CO 1:2 ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ମାରି ସାନ୍ତି ସିପିନ୍‍ ।
2CO 1:3 ରାଦୁ, ମା ମାପୁରୁ ଜିସୁ କ୍ରିସ୍ତଦି ବୁବା, ଦୟାକିନିକାନ୍‍ ମାରି ୱିଜେରିଙ୍ଗ୍ ସାକାକିନିକାନ୍‍, ମାପୁରୁଙ୍ଗୁ ଦନ୍ୟବାଦ୍‍ ଜାଣେକିନାଟ୍‌ ।
2CO 1:4 ମା ଦୁକ୍ କାସ୍ଟୁ ବେଡ଼ାଦୁ ୱାନ୍‌ ମାଙ୍ଗିଁ ଏମେ ସାନ୍ତି ସିନାନ୍, ଆୟା ସାନ୍ତି ଦାନ୍ ମାଡ଼ୁ ଦୁଃକ୍‍କାଷ୍ଟୁ ପୟ୍‍ଜିମାନି ଆଇୱାରିଙ୍ଗ୍‌ ସାନ୍ତି ସିଦେଙ୍ଗ୍‌ ଆଟିନିକା ।
2CO 1:5 ମାଡୁ କ୍ରିସ୍ତଦି ନାଣ୍ତ ଦୁକ୍‌ବୋଗଦୁ ମିସାତିମାନିଙ୍ଗ୍ କ୍ରିସ୍ତଦି ସାକାଦାନ୍ ମାପୁରୁଦି ନାଣ୍ତସାନ୍ତିଦୁ ବା ମିସାଦେଙ୍ଗ୍ ଆଟ୍‍ନିକା ।
2CO 1:6 ମାଡୁ ଜଦି ଏମେ ଦୁଃକ୍‌ବୋଗ୍‌ କିନିକା, ଆକା ମି ନେଗିତାନିଙ୍ଗ୍‌ ମାରି ରକ୍‌ୟାଦି ଉଣ୍ତିଙ୍ଗ୍‌ । ମାପୁ ସାନ୍ତିପୋୟ୍‍ତିଙ୍ଗ୍‍, ମିର୍‌ ବା ଆୟାୱାଜା ଆଟୁୱାଦାନ୍‌ ଦୁକ୍ ବୋଗକିନି ଉଣ୍ତିଙ୍ଗ୍‌ ସାନ୍ତି ମାରି ସାକ୍ତି ପୟ୍‌ନିଦେର୍‌ ।
2CO 1:7 ମି ବିସୟ୍‍ତାନ୍‍ ମା ଆସା ମାନାତ୍ । ମାପୁ ନେସ୍‌ନାପ୍, ମିର୍‌ ମା ଦୁକ୍‍କାଷ୍ଟୁଦୁ ଏଣ୍ତେସ୍ ମିସାଜିନିଦେର୍‌, ଆୟାୱାଜା ମା ସାନ୍ତିଦୁ ବା ମିସାଦୁ ।
2CO 1:8 ତଡ଼ାନ୍‌କୁ ନି ତାଙ୍ଗିଁକି, ମାଡ଼ୁ ଆସିଆ ଦେସ୍‌ତୁ ପୋଇତିମାନି କାସ୍ଟୁ ବିଷୟ ମିଙ୍ଗିଁ ୱେର୍‍ତେଙ୍ଗ୍ ଇଛାକିଜିନା । ଆୟାକାସ୍ଟୁ ବଜୁଆଜିମାନିଙ୍ଗ୍‌ ମା ଜିବନ୍‌ତୁ ସାକ୍ତି ଆସା ଡ଼ିସ୍‌ତାମାରାପ୍ ।
2CO 1:9 ମାଙ୍ଗିଁ ବିଚାର୍‌ ସିଆତାମାନାତ୍‌ ଇଜି ଅଡ଼୍‌ବିତାମାରାପ୍ । ମାତର ନିଜେ ମୁସୁକୁ ଆସାଇଡ୍‍ଏନ୍‍ଙ୍ଗା ସାନିମାଡ଼ାନ୍‍କୁ ଜିବନ୍‌ ସିନି ମାପୁରୁଦି ମୁସୁକୁ ଆସା ଇଡିନି ଉଣ୍ତିଙ୍ଗ୍ ଇୟାୱିଜୁ ଗୋଟାତା ମାନାତ୍ ।
2CO 1:10 ଇୟାୱାଜା ନାଣ୍ତସାନି ବିପଦତାନ୍ ୱାନ୍‌ ମାଙ୍ଗିଁ ଉଦାର୍‌ କିତାମାନାନ୍ ମାରି କିଜିମାନାନ୍ । ୱାନ୍‌ ମାରିଡ଼େସି ମାଙ୍ଗିଁ ଜାଗ୍‌ରାତା କିନାନ୍ ଇୟା ଆସା ମାଙ୍ଗିଁ ୱାନିମାନୁ ମାନାତ୍‌ ।
2CO 1:11 ମିର୍‌ ପାର୍‍ତନାଦାନ୍‍ ମାଙ୍ଗିଁ ସାହାଜ୍ୟ କିଦୁ । ଆର୍‌ତିଙ୍ଗ୍‌, ମା ଉଣ୍ତିଙ୍ଗ୍ କିତିମାନି ଏସ ପାର୍‍ତନାଦୁ ଉତର୍‌ ପୋଇନିକା ମାରି ମାପୁରୁ ମାଙ୍ଗିଁ ଆସିର୍ବାଦ୍‌ ଦାନ୍‍ କିନାନ୍ । ମା ଉଣ୍ତିଙ୍ଗ୍ ଗାଦିଲୋକ୍‌ ମାପୁରୁମାଡ଼ାନ୍ ଦନ୍ୟବାଦ ସିନାର୍‌ ।
2CO 1:12 ଦୁନିଆଦୁ ଜିବନ୍‌ ମାରି ବିସେସ୍‍କିଜି ମିୱାଲେ ମା ମିଲାମିସା ମାପୁରୁମାନୁ ପବିତ୍ର ମାରି ବିସ୍‍ବାସ୍ ବୁଲାଜିସାଜି ଇଜି ମା ବୁଦିଦୁ ସାକି । ଇୟାଉଣ୍ତିଙ୍ଗ୍‌ ମା ମୋନତୁ ଗର୍ବ ଆଜିନାତ୍ ଦୁନିଆଦି ବୁଦିଦାନ୍ ଆଏତେ, ମାତର୍‌ ମାପୁରୁଦି ଦୟାଦାନ୍ ଇକା କିଦେଙ୍ଗ୍ ମାପୁ ସାକି ଆତିମାନିକା ।
2CO 1:13 ଆମାକା ପଡ଼ାଜି ମିର୍‌ ବୁଜାଜିନିଦେର୍‌, ମିମାନୁ ମାପ୍‌ ନାସନେ ରାସ୍‌ତାମାନାପ୍ ।
2CO 1:14 ନାନୁ ଆସା କିଜିନା, ଇଲେଇ ଆମାକା ଅଡ଼ପ୍‍ତାନ୍‍ ବାବେ ବୁଜାଜିନାପ୍, ଆକା ଅଡ଼ପ୍‍ତାନ୍‍ ବାବରେ ପ୍ରବୁ ଜିସୁଦି ଡ଼େସିୱାନି ୱାନିକା ପୁରା ବୁଜାଦେଙ୍ଗ୍ ଆଟ୍‌ନାର୍ । ଆର୍‌ତିଙ୍ଗ୍‌, ମିର୍‌ ମା ଉଣ୍ତିଙ୍ଗ୍ ଗର୍ବ କିଜିନିଦେର୍‌ ମାରି ମାପୁ ବା ମି ଉଣ୍ତିଙ୍ଗ୍ ଗର୍ବ କିଜିନାପ୍ ।
2CO 1:15 ଇୟା ବିସୟତାନ୍ ନାନୁ ଟିକ୍‍ବାବେ ନେସ୍ତିମାନିଙ୍ଗ୍ ଆଗିଡ଼ିନେ ମି ଲାକ୍‌ତୁନେ ସନି ଉଣ୍ତିଙ୍ଗ୍‌ ନା ବଦା ମାର୍‌ଆତ୍‌ । ଆର୍‌ତିଙ୍ଗ୍‌ ମିର୍‌ ରିଜା ସୁଡ଼ୁଜି ନାଙ୍ଗିଁ ଦୟା ପୟ୍‌ଦେଙ୍ଗ୍‌ ଆଟ୍‌ତିଦେର୍‌ମାନ୍ଦି ।
2CO 1:16 ମାସିଦନିଆ ସନିୱାଲେ ମାରି ଆବେଟ୍‌କୁ ଡ଼େସିୱାନିୱାଲେ ମି ଲାକ୍‌ତୁ ଏସ ଦିନ୍ ମାନ୍‌ଡ୍ରେଙ୍ଗ୍ ନା ପାଣିକିନିକା ମାର୍‌ଆତ୍, ମାତର୍‌ ଜିହୁଦା ଦେସ୍‌ତୁ ସନିଉଣ୍ତିଙ୍ଗ୍ ନାନୁ ମି ସାହାଜ୍ୟ ଦରକାର୍ ମାର୍‌ଆତ୍ ।
2CO 1:17 ନାନୁ ଇନିକା ନା ବଦାଦାନ୍ ଇୟା ପାଣି ତିଆର୍ କିତାମାର୍‌ଆ ? ଏମେକାର୍ ଅରସେ “ହଁ, ହଁ” ମାରି “ସିଲେ, ସିଲେ,” ଇନାର୍, ୱାରିୱାଜା ଇନିକା ନା ନିଜେଦି ତରାନିଉଣ୍ତିଙ୍ଗ୍ ନା ପାଣିକିଜିନା ?
2CO 1:18 ସତ୍‍ ମାପୁରୁ ନେସ୍‌ନାନ୍‌, ଅବସ୍ୟ ମାପୁରୁ ମି ମାଟା ୱେର୍‌ନିୱାଲେ ମାପ୍‌ ଏସ୍‌କାଙ୍ଗ୍‌ବା “ହୁଁ ସିଲ୍‌ତିଙ୍ଗ୍‌ ସିଲେ ।”
2CO 1:19 ସିଲା, ତିମତି ମାରି ନାମାଣୁକୁ ମି ଲାକ୍‌ତୁ ପ୍ରଚାର୍‌କିତିମାନି ମାପୁରୁଦି କଡ଼ ଜିସୁ କ୍ରିସ୍ତଙ୍ଗ୍‌, ଏସ୍‌କାଙ୍ଗ୍ ଅର୍‌ସେ “ହୁଁ ” ମାରି “ସିଲେ” ଇନ୍‌ଏର୍‌ । ଆଇତରିନ୍‍, ୱାନ୍‌ ୱିଜୁଦିନ୍ ମାପୁରୁଦି ମାଟାଦିଙ୍ଗ୍‌ “ହୁଁ” ଇଜିନାନ୍‌ ।
2CO 1:20 ମାପୁରୁଦି ୱିଜୁ ଆସାଦି ଉଣ୍ତିଙ୍ଗ୍‌ ଜିସୁ କ୍ରିସ୍ତ “ହୁଁ,” ଇନାନ୍‌ ୱାନିମାନୁ ପୁରା ଆତାମାନାତ୍ । ଇୟାଉଣ୍ତିଙ୍ଗ୍‌ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ମା ମାପୁରୁଦି ଗୌରବ୍‍ ଉଣ୍ତିଙ୍ଗ୍‌ “ଆମେନ୍‍ ।”
2CO 1:21 ନିଜେ ମାପୁରୁ ଜିସୁ କ୍ରିସ୍ତଦିମାନୁ ମିଦି ମାରି ମା ଜିବନ୍‌ତିଙ୍ଗ୍‌ ଅର୍‌ସେ କିଜି ରକ୍‌ୟା କିତାମାନାନ୍ ।
2CO 1:22 ୱାନ୍‌ ମାଙ୍ଗିଁ ୱେରେଏ କିତାମାନାନ୍ ମାରି ମା ଜିବନ୍‌ତୁ ୱାନି ପବିତ୍ରଆତ୍ମାଦିଙ୍ଗ୍ ଇଟିତାମାନାନ୍ । ପବିତ୍ରଆତ୍ମା ଆଜିନାତ୍, ମା ମୁସ୍‌କୁ ମାପୁରୁଦି ଅଦିକାର୍‍ତି ସିନା ମାରି ବବିସତ୍‌ଦୁ ମାଡୁ ଆମାକା ପୟ୍‌ନିକା, ୱାନି ୱିଜୁ ୱାଜା ।
2CO 1:23 ମାପୁରୁ ନା ସାକି । ୱାନ୍‌ ନା ଜିବନ୍‌ ନେସ୍‌ନାନ୍‌ । ମିଙ୍ଗିଁ ନାନୁ ଏଣ୍ତେସ୍‌ମାରି ଦୁଃକ୍‌ସିଏ, ଆୟାଉଣ୍ତିଙ୍ଗ୍‌ ନାନ୍‌ କରନ୍ତିଦୁ ସନିକା ତେବାକିତା ।
2CO 1:24 ମିର୍‌ ଏମେ ବାସା ବିସ୍‍ବାସ୍‍ କିନିଦେର୍‌, ଇୟା ବିସୟ୍‌ତାନ୍‌ ମି ମୁସ୍‌କୁ ପାଣିକିଦେଙ୍ଗ୍ ମାପ୍‌ ସେସ୍ଟାକିଏପ୍, ମାତର୍‌ ମିର୍‌ ବିସ୍‍ବାସ୍ ଆଟୁୱା ଆଜି । ମାରି ମିଙ୍ଗିଁ କେବଲ ୱେଡ଼ିକା କିନି ଉଣ୍ତିଙ୍ଗ୍ ମି ୱାଲେ ମିସାବିଡ଼ାଜି ମାଡୁ ପାଣିକିନାଟ୍ ।
2CO 2:1 ଜଦି ନାନ୍‌ ମି ଲାକ୍‌ତୁ ୱାନିକା ମି ଉଣ୍ତିଙ୍ଗ୍‌ ଦୁଃକ୍‍ଆଜିନାତ୍, ମି ଲାକ୍‌ତୁ ମାରି ଏସ୍‌କାଙ୍ଗ୍ ବା ୱାଦେଙ୍ଗ୍ ନାନୁ ବଦାକିଏ ।
2CO 2:2 ମିଙ୍ଗିଁ ଦୁକ୍ ସିତିଙ୍ଗ୍, ନାଙ୍ଗିଁ ଏନ୍‌ ୱେଡ଼ିକା ସିନାନ୍ ? ମିଙ୍ଗିଁ ଡ଼ିସ୍‍ତିଙ୍ଗ୍‌ ମାରି ଆୟାୱାଜା ଏନ୍‌ ସିଲେର୍‌ ।
2CO 2:3 ଆୟାଉଣ୍ତିଙ୍ଗ୍‌ ନାନୁ ମିଙ୍ଗିଁ ରାସ୍‍ତାମାର୍‌ଆ, ନାନ୍‌ ଆବେନ୍‌ ସରିଙ୍ଗ୍‌; ଏମେୱାରି ଉଣ୍ତିଙ୍ଗ୍‌ ନା ୱେଡ଼ିକା ଆତାତ୍‍ମାନ୍ଦି, ୱାରିମାଡ଼ାନ୍‍କୁ ଏଣ୍ତେସ୍‌ ନାନ୍‌ ଦୁକ୍ ପୟ୍‌ଏ । ସତ୍‍ତାନ୍‌ ନା ଡାଟ୍‌ ବିସ୍‍ବାସ୍ ଜେ, ନା ୱେଡ଼ିକାଦୁ ମି ୱେଡ଼ିକା ।
2CO 2:4 ନାଣ୍ତ ଦୁକ୍ ନି କାସ୍ଟୁଦାନ୍‌ ଜିବନ୍‌ତାନ୍‌ ଆଡ଼୍‍ବାଜି ଆଡ଼୍‍ବାଜି ନାନୁ ଏମେ ସିଟି ରାସ୍‍ତାମାର୍‌ଆ, ମିଙ୍ଗିଁ ଦୁକ୍ ସିଦେଙ୍ଗ୍‌ ସିଲେ, ମାତର ମିଙ୍ଗିଁ ନାନୁ ଏସଜିବନ୍‌ନୋନା, ଇକା ୱେର୍‌ନିକା ମାରାତ୍ ଆୟାଚିଟିଦି ଆଦେସ୍ ।
2CO 2:5 ଜଦି ଏନ୍‌ ଏମେୱାନିଙ୍ଗ୍ ଦୁକ୍ ସିନାନ୍, ୱାନ୍‌ ନେ ନା ମୋନ୍‌ତୁ ଦୁକ୍ ସିଏନ୍‌, ଏସ ନାଣ୍ତ ମିଙ୍ଗିଁ ବା ଦୁକ୍ ସିଜିନା । ଇୟା ବିସୟତାନ୍ ନାନୁ ନାଣ୍ତ ବୋଜୁ ସିନିଉଣ୍ତିଙ୍ଗ୍ ମିଙ୍ଗିଁ ବଦାକିଏଜିନା ।
2CO 2:6 ମି ମାଡ଼ାନ୍‍କୁ ଏସଲୋକ୍‌ ବଦାଦାନ୍‌ ଆୟା ଲୋକ୍‌ତିଙ୍ଗ୍ ଆମା ଦଣ୍ତସିତାମାନାର୍, ଆକା ୱାନି ଉଣ୍ତିଙ୍ଗ୍‌ ବେସି ।
2CO 2:7 ୱାନ୍‌ ଏଣ୍ତେସ୍ ନାଣ୍ତ ଦୁକ୍‌ତାନ୍‌ ଆଏନ୍‍, ଆୟାଉଣ୍ତିଙ୍ଗ୍‌ ଇଲେଇ ୱାନିଙ୍ଗ୍‌ କେମା ମାରି ସାନ୍ତି ସିଦେଙ୍ଗ୍‌ ମି ପାଣି ।
2CO 2:8 ମିଙ୍ଗିଁ ନା ଅନୁରଦ୍‌, ମିର୍‌ ୱାନିଙ୍ଗ୍‌ ଲାଡ୍‌ ମାରି ୱେଡ଼ିକା କିଜିନିଦେର୍‌ ଇଜି ୱେରସ୍‌ ସିଦାଟ୍ ।
2CO 2:9 ମିର୍‌ ୱିଜୁଦିନ୍ ନା ମାଟା ମାନାଦେଙ୍ଗ୍ ତିଆର୍ ନୋ ସିଲେ, ଆକା ନେସ୍‌ନି ଉଣ୍ତିଙ୍ଗ୍‌ ନାନ୍‌ ଆୟା ଆକୁ ରାସ୍‍ତାମାର୍‌ଆ ।
2CO 2:10 ଜଦି ମିର୍‌ ଏଙ୍ଗ୍‌ବା କେମା କିନିଦେର୍‌, ନାନ୍‌ ବା ୱାନିଙ୍ଗ୍‌ କେମା କିନା । ଜଦି ଇନି ବିସୟତାନ୍ ଏମେୱାନିଙ୍ଗ୍ କେମାକିନାମାନାନ୍, ଆକା ୱାନିଙ୍ଗ୍‌ କ୍ରିସ୍ତଦି ଆଗ୍‍ଡ଼ିରାନ୍ ମି ଉଣ୍ତିଙ୍ଗ୍‌ କିତାମାନା ।
2CO 2:11 ଆର୍‌ତିଙ୍ଗ୍‌ ସୟତାନ୍ ମା ବିରୁଦ୍‍ତାନ୍ ଇନି ପାଣି କିନି ଉଣ୍ତିଙ୍ଗ୍ ସୁଜୋଗ ପୟ୍‌ଏତ୍‌; ତାନି ୱିଜୁ ପାଣି ମାପ୍‌ ନେସ୍‌ନାପ୍‌ ।
2CO 2:12 କ୍ରିସ୍ତଦି ସୁସମାଚାର୍‌ ୱେର୍‍ନି ଉଣ୍ତିଙ୍ଗ୍‌ ତ୍ରୋୟା ଦିପଦୁ ଇଜି ନାନ୍ ସୁଡ଼ୁତା, ଇୟା ପାଣି ଉଣ୍ତିଙ୍ଗ୍‌ ପ୍ରବୁ ସାରି ରେତା ମାନାନ୍ ।
2CO 2:13 ମାତର୍‌ ତଡ଼ାନ୍ ତିତସତିଙ୍ଗ୍‌ ଆବେନ୍‌ ସୁଡ଼ୁଏଣ୍ତା ନାନ୍‌ ଦାନ୍ଦା ଆତା । ଆଦେଙ୍ଗ୍‌ ଆବେଣି ଲୋକାମାଣୁକୁ ଡ଼ିସ୍‌ତାନୋ ନାନ୍‌ ମାସିଦୋନିଆଦୁ ସର୍‌ଆ ।
2CO 2:14 ମାପୁରୁଦି ଦନ୍ୟବାଦ୍‌ ଆପିତ୍‌ । ଇରିଙ୍ଗ୍‌ ୱାନ୍‌ ଜିସୁ କ୍ରିସ୍ତଦିମାଣୁକୁ ୱିଜୁଦିନ୍ ମାଙ୍ଗିଁ ଜିଣାନି ସାରିଦୁ ଆଗ୍‍ଡ଼ି ଅନାନ୍ । ମାରି ବାସ୍‌ନା ଦୁପୁଣି ୱିଜୁତରିନ୍‌ ୱେଙ୍ଗିଁତି ୱାଜା କ୍ରିସ୍ତଦି ବୁଦି ଆଇୱାରିଙ୍ଗ୍‌ ସିନିଉଣ୍ତିଙ୍ଗ୍ ମାପୁରୁ ମାଙ୍ଗିଁ ବ୍ୟବହାର୍‌ କିତାମାନାନ୍ ।
2CO 2:15 ଇରିଙ୍ଗ୍‌ ଏମେକାର୍ ରକିୟା ପୟ୍‌ତାମାନାର୍ ମାରି ଏମେକାର୍ ନାସ୍ଟୁ ସାରିଦୁ ମୁଜିତାମାନାର୍, ୱିଜେରିମାଣୁକୁ ମାପ୍‌ ଆଜିନାପ୍ ମାପୁରୁଦି ଉଦେସ୍‍ତାନ୍‍ ସିଆୟ୍‍ଆତିମାନି କ୍ରିସ୍ତଦି ବାସ୍‍ନା ଦୁପ୍‍ଣି ୱାଜା ।
2CO 2:16 ଆମାକାର୍‌ ସାତି ସାରିଦୁ ବୁଲାଜିନାର୍; ୱାରି ଲାକ୍‌ତୁ ଇୟା ବାସ୍‌ନାନାନିକା ସାନିକା, ଆମାକାର୍‌ ରକ୍‌ୟା ପୟ୍‌ତାମାନାର୍‌, ୱାରି ଉଣ୍ତିଙ୍ଗ୍‌ ଇକା ଜିବନ୍‌ମାନିବାକ୍ୟ । ମାତର୍‌ ଇୟା ପାଣି କିନି ଉଣ୍ତିଙ୍ଗ୍‌ ଏନ୍‌ ଡାଟ୍‌ ।
2CO 2:17 ଗାଦିଲୋକ୍‌ ନିଜେ ଲାବବାନ୍ ଆଦେଙ୍ଗ୍‍ଁ ମାପୁରୁଦି ବାକ୍ୟ ବ୍ୟବହାର୍ କିଜିନାର୍ । ମାଡ଼ୁ ମାତର ଆୟାୱାଜା ସିଲେ । ମାଙ୍ଗିଁ ମାପୁରୁ ପୋକିସି କିତିମାନିଙ୍ଗ୍ ମାଡ଼ୁ ବିସ୍‍ବାସ୍‍ତାନ୍ ୱାନି ଆଦେସ୍ ମାନାଜିନି ମାରି ମାପୁରୁଦି ସାକିଦାନ୍ କ୍ରିସ୍ତଦି ଦାସ ୱାଜା ପ୍ରଚାର କିନାପ୍‌ ।
2CO 3:1 ମାଡ଼ୁ ଇନିକା ମାରି ଗର୍ବ ୱାଜା ମନେଆଜିନାତ୍ ? ଇରିଙ୍ଗ୍‌ ଆଇୱାରିୱାଜା ମାଡ଼ୁ ଇନିକା ମି ଲାକୁତୁ ବା ମି ଲାକୁତୁରାନ୍ ପରିଚୟ ଆକୁ ଦର୍‌କାର୍‌ ଇଜିନିକା ।
2CO 3:2 ମିର୍‌ ମା ପରିଚୟ ଆକୁ, ମା ଜିବନ୍‌ଲୋଇ ପାଟାଦି ରାସାତି ସିଟି, ଏମେତାନିଙ୍ଗ୍‌ ୱିଜେରେ ନେସ୍‌ନାର୍ ମାରି ପଡ଼ାଦେଙ୍ଗ୍ ଆଟ୍‌ନାର୍ ।
2CO 3:3 ଇୟା ସେବା ଆକୁ କ୍ରିସ୍ତଦି ମାଡ଼ାନ୍ ରାସାତାମାନାତ୍‌ ମାରି ମା ମୋନତି ଆକୁଦୁ ଲୋଇସରାମାନାତ୍ । ଇକା ସିରାଦାନ୍‍ ରାସାଏତ୍‍, ମାତର୍‌ ଜିବନ୍‌ମାନି ମାପୁରୁଦି ଆତ୍ମାଦାନ୍‌ ଲୋକା ଜିବନ୍‌ତୁ ରାସାତାମାନାତ୍‌ ।
2CO 3:4 କ୍ରିସ୍ତଦି ସିଜି ମାପୁରୁଦି ମୁସୁକୁ ଆସା ମାନିଙ୍ଗ୍‌ ମାଡ଼ୁ ଇଜିନିକା,
2CO 3:5 ଇରିଙ୍ଗ୍‌ ମାଡ଼ୁ କିତିମାନି ଦାବି କିନି ଉଣ୍ତିଙ୍ଗ୍‌ ଇନି ଜୋଗ୍ୟ ବା ସିଲେତ୍‌ । ମା ଜୋଗ୍ୟତା ମାପୁରୁଦିମାଣୁକୁ ୱାନାତ୍ ।
2CO 3:6 ପୁନି ନିୟମ୍‍ଦି ସେବାକିନିଉଣ୍ତିଙ୍ଗ୍ ମାପୁରୁ ମାଙ୍ଗିଁ ଆସ୍‌କିତାମାନାନ୍‌ । ଇୟା ନିୟମ ରାସାଏତ୍‍, ମାତ୍ର ମାପୁରୁଦି ଆତ୍ମାଦି ଦାନ୍ ୱାତିମାନିକା, ଇରିଙ୍ଗ୍‌ ରାସାତି ନିୟମ୍‌ ସାନିକା ଗଟେକିନାତ୍, ମାତର ଆତ୍ମାଦି ନିୟମ୍‌ ଜିବନ୍‌କିନାତ୍ ।
2CO 3:7 ପିଡ଼୍‌ପିକାଲୁ ମୁସ୍‌କୁ ରସାତିମାନି ମୋସାଦି ବ୍ୟବସ୍ଥାଦି ସେବା ତିଆର୍‍ ବେଡ଼ାଦୁ ମାପୁରୁ ଗୌରବ୍‍ ତରାତା ମାର୍ହାତ୍‌ । ଆୟା ଗୌରବ୍‍ତି ଦିୱା ନାମିତି ମାରିଙ୍ଗ୍‍ବା ମୋସାଦି ଜାୟ୍‌ ମୋକମ୍‌ତରିନ୍‌ ଇସ୍ରାଏଲ୍‌ ଲୋକୁ ସୁଡ଼ୁଦେଙ୍ଗ୍‌ ଆଟ୍‍ଏତାମାରାର୍ । ସାନିକା ଗଟେକିନି ବ୍ୟବସ୍ଥା ଜଦି ଇୟାୱାଜା ଗୌରବ୍‌ଦି ୱାଲେ ୱେଙ୍ଗିଁତାତ୍‌ ।
2CO 3:8 ଆର୍‌ତିଙ୍ଗ୍‌ ପବିତ୍ରଆତ୍ମାଦି ସେବା ପାଣିଙ୍ଗ୍‌ୱିଜୁ ୱାନି ମାଡ଼ାନ୍ ଏସ ନାଣ୍ତ ଗୌରବ୍‌ତାନ୍‌ ତିଆର୍‌ ଆଏତ୍ ।
2CO 3:9 ଦଣ୍ତ ସିନି ନିୟମ୍‌ ସେବା ପାଣି ମୋହିମାଦୁ ଜଦି ଏସ ଗୌରବ୍‍ଦୁ, ଆର୍‌ତିଙ୍ଗ୍‌ ପରିତ୍ରାଣ ଲୋକୁଦି ନିୟମ୍‍ତିଙ୍ଗ୍‌ ମାନାତିଙ୍ଗ୍ ଏସ ନାଣ୍ତ ଗୌରବ୍‍ ଆଏତେମାନାତ୍ ।
2CO 3:10 ମାଡ଼ୁ ଇନ୍‌ଡ୍ରେଙ୍ଗ୍‌ ଆଟିନିକା, ପୁର୍ବେ ଆମାକା ଦନ୍ୟବାଦ୍‌ ମାରାତ୍, ଜାୟ୍‌ତି ଉଣ୍ତ୍ରି ମହିମାଦି ୱାତାତ୍‍ଆକା ଇଲେଇ ଆକା ୱାର୍‍ସି ସରାମାନାତ୍ ।
2CO 3:11 ଜଦି ତେବାଇ ବିସୟ ନିସ ଗୌରବ୍‍ ପୋଇନାତ୍, ୱିଜୁ ଦିନ୍‍ତି ବିସୟ ୱେନିମାଡ଼ାନ୍‍କୁ ଏସ ନାଣ୍ତ ଗୁଣୁତାନ୍ ଗୌରବ୍‌ ପୋଇନାନ୍ !
2CO 3:12 ଆୟା ଆସା ମାନିଙ୍ଗ୍ ମାଡୁ ନାଣ୍ତ ସାହାସ୍ ।
2CO 3:13 ମାଡ଼ୁ ମୋସାଦି ୱାଜା ଆଇକା । ୱାନ୍‌ ନିଜେ ମୋକମତୁ କାବର୍‍ ପିଡ଼ିଗିତା ମାରାନ୍, ଏଣ୍ତେସ୍ ନାମ୍‍ଜିମାନି ଆୟା ଦିୱେଙ୍ଗ୍ ୱିଜ୍‍ନିକା ଇସ୍ରାଏଲ୍‌ ଲୋକୁ ସୁଡ଼ୁଦେଙ୍ଗ୍‌ ଆଟ୍‍ଏର୍‍ ।
2CO 3:14 ସତେନେ ୱାର୍‌ ବୁଜାନି ସାକ୍ତି ହାରା କିତାମାନାର୍‌ । ଇଲେଇବା ପାଡ଼୍‍ଇ ନିୟମ୍‌ ପଡ଼ାନି ୱାଲେ ୱାରି ଆଗ୍‍ଡ଼ି ଆୟା ଓଡ଼ଣି ବ୍ୟବ୍‌ହାର୍‌ ମାନାତ୍ । ଜିସୁ କ୍ରିସ୍ତଦି ୱାଲେ ମିସାନିମାଡ଼ାନ୍ କେବଲ ଆୟାୱାନିକା ଆକ ଆନାତ୍‌ ।
2CO 3:15 ନେରୁ ବା ମୋସାଦି ବ୍ୟବସ୍ଥା ପଡ଼ାନିୱାଲେ ୱାରି ମୋନ୍‌ ମୁସୁକୁ ମାନାତ୍ ଉଣ୍ତ୍ରି କାବର୍‍ ।
2CO 3:16 ମାତର୍‌ ଆୟା କାବର୍‍ ଗୁସାଦେଙ୍ଗ୍ ଆଟ୍‌ନାତ୍ । ଇରିଙ୍ଗ୍‌ ଦର୍ମ ସାସ୍ତ୍ର ଇନାତ୍‍, ବ୍ୟବସ୍ଥାଦୁ ମୋସାଦି ବିସୟତାନ୍‍ ରାସାତାମାନାତ୍‌, ମାପୁରୁଦି ଆଗ୍‍ଡ଼ି ମୋକମ୍ ସୁଣିଉଣ୍ତିଙ୍ଗ୍ ଆୟା କାବର୍‍ ଗୁସାତାସରାତ୍ ।
2CO 3:17 ଇୟା ବ୍ୟବସ୍ଥାଦୁ ରାସାତିକା “ପ୍ରବୁ ଆଜିନାନ୍ ଆତ୍ମା” ଏମେନୁ ପ୍ରବୁଦି ଆତ୍ମା, ଆବେନ୍‌ ମାନାତ୍ ମୁକୁଡ଼ାନିକା ।
2CO 3:18 ମା ୱିଜେରି କେର୍‍ବିଇ ମୋକମି ଇଲେ ପ୍ରବୁଦି ମହିମା ଜାୟ୍‍ଆନାତ୍ ମାରି ପ୍ରବୁଦି ଆତ୍ମା ମାଡ଼ାନ୍ ସସିମାନି ଆୟା ମହିମାଦି ଆଟ୍‍ନିମାଡ଼ାନ୍‍ ମାଡ଼ୁ ନାଣ୍ତ ଜାୟ୍‌ ଇସାବ୍‍ତାନ୍‍ ୱାନି ମୁର୍ତିୱାଜା ବାଦ୍‍ଲେ ଆଜିନିକା ।
2CO 4:1 ମାପୁରୁଦି ଦୟା କିଜି ମାଙ୍ଗିଁ ଇୟା ସେବା ପାଣି ସିତିମାନିଙ୍ଗ୍ ମାଡ଼ୁ ୱେଡ଼ିକାସିଲି ଲୋକା ୱାଜା କିଇକା ।
2CO 4:2 ସେମାର୍‌ତି ମାରି ଆରେତିପାଣି କିତି ପାଣି ୱିଜୁ ମାଡ଼ୁ ଡ଼ିସିନିକା । ମାପ୍‌ ଟକେ କିଏପ୍‍ ମାରି ମାପୁରୁଦି ବାକ୍ୟଦିଙ୍ଗ୍ ତାଗ୍‍ଇ ଅର୍ତ କିଏପ୍‍ । ମାତର ତରାନି ଇସାବ୍‍ତାନ୍‍ ମାପୁରୁଦି ଆଗ୍‍ଡ଼ି ଲୋକା ବୁଦି ଲାକୁତୁ ମାପ୍‌ ନିଜେ ନିଜେଦି ସତ୍‌ ପାର୍‍ମାଣ୍‍ କିନି ଉଣ୍ତିଙ୍ଗ୍ ଚେଷ୍ଟାକିଜିନାପ୍‍;
2CO 4:3 ମାତର ମା ମାଡ଼ାନ୍ ପ୍ରଚାର୍ ଆତିମାନି ସୁସମାଚାର୍‌ ଜଦି ମାର୍‍ଗିନାମାନାତ୍‍, ଆର୍‌ତିଙ୍ଗ୍‌ ଆରେତି ନାସ୍ଟୁଆନିଲୋକା ଉଣ୍ତିଙ୍ଗ୍‌ ଆକା ମାର୍‍ଗିନାମାନାତ୍‍ ।
2CO 4:4 ୱାର୍‌ ବିସ୍‍ବାସ୍ କିଏରେ, ଇରିଙ୍ଗ୍‌ ୱାରି ମନ୍‍ତିଙ୍ଗ୍ ଇୟା ଦୁନିଆଦି ଦିୟାମ୍‌ କାଣା କିତାମାନାତ୍ । ଇସାବ୍‍ତାନ୍ ମାପୁରୁଦି ମୁର୍ତିଦି କ୍ରିସ୍ତଦି ମହିମାନ୍ନିତ ସୁସମାଚାର୍‌ତି ଜାୟ୍‌ ୱାରି ଲାକୁତୁ ସଲ୍‌ଏତ୍‍ନି ।
2CO 4:5 ମାପ୍‌ ନିଜେଦିଙ୍ଗ୍ ପ୍ରଚାର୍‌ କିଏପ୍‍, ମାତର୍‌ କ୍ରିସ୍ତଦି ପ୍ରବୁ ଇଜି ମାରି ଜିସୁଦି ଉଣ୍ତିଙ୍ଗ୍‌ ନିଜେ ନିଜେଦିଙ୍ଗ୍ ମି ସେବାକିନିକା ଇଜି ପ୍ରଚାର୍ କିନାପ୍,
2CO 4:6 ଇରିଙ୍ଗ୍‌ ଆମା ମାପୁରୁ ଇର୍‌ଆମାନାନ୍‌, “ସିକାଟିଦି ଲୋଇରାନ୍‌ ଜାୟ୍‌ତିକା ଆନିକା,” ଆୟା ମାପୁରୁ କ୍ରିସ୍ତଦି ମୋକମ୍‌ତାନ୍ ସାକ୍ତିଦି ମହିମା ସୁଡ଼ୁନି ଉଣ୍ତିଙ୍ଗ୍‌ ମା ଜିବନ୍‌ତୁ ଜାୟ୍‌ କିତାମାନାନ୍ ।
2CO 4:7 ମାତର୍‌ ମାଡୁ କେବଲ ମା ସାମାନ୍‌ତି ସିକିଲା ସାଟିଦୁ ଇୟା ମୁସ୍‌କୁପୁର୍‌ତି ଦନ୍‌ସମ୍ପତି ପୟ୍‍ତିମାନିକା । ଇବେଣ୍‌କୁ ପାର୍‍ମାଣ୍‍ ଆତାମାନାତ୍‌ ଜେ, ଇୟାୱାଜା କାବାଆନି ସାକ୍ତି ମାଦି ଆଏତ୍‍, ମାତର୍‌ ମାପୁରୁଦି ।
2CO 4:8 ମାପ୍‌ ୱିଜୁ ଦୁଃକ୍ କାଷ୍ଟୁ ପୋଇଜିନାପ୍, ମାତର୍‌ ନିରାସ୍‌ ଆଏପ୍ । ବେଡ଼ା ବେଡ଼ାଦୁ ତିଲାଜିନାପ୍‌ ମାତର୍‌ ନିରାସ୍‌ ଆଏପ୍ ।
2CO 4:9 ମାପ୍‌ ଦୁଃକ୍‌କାସ୍ଟୁ ପୟ୍‌ତାପ୍, ମାତର୍‌ ମାପୁରୁ ମାଙ୍ଗିଁ ଏସ୍‌କାଙ୍ଗ୍‍ ବା ଡ଼ିସ୍‍ଏନ୍‍ । ଏସ ବେଡ଼ାଦୁ ମାପ୍‌ କାସ୍ଟୁ ପୟ୍‌ତାମାନାପ୍‌, ମାତର୍‌ ଦ୍ୱଂସ ଆଏପ୍‌ ।
2CO 4:10 ଜିସୁଦି ଜିବନ୍‌ ଏଣ୍ତେସ୍‌ ମାମାନୁ ୱେଙ୍ଗିଁନାତ୍‌, ଆୟାଉଣ୍ତିଙ୍ଗ୍‌ ମାଡୁ ୱିଜୁଦିନ୍ ମା ମେନ୍ଦଲ୍‌ତୁ ଜିସୁଦି ସାନିକା ପିଡ଼ିଜିନାପ୍‌ ।
2CO 4:11 ଜିସୁଦି ଜିବନ୍‌ତିଙ୍ଗ୍‌ ଇୟା ସାତି ମେନ୍ଦଲ୍‌ତାନ୍‌ ୱେକ୍‌ନି ଉଣ୍ତିଙ୍ଗ୍‌ କ୍ରିସ୍ତଦି ଉଣ୍ତିଙ୍ଗ୍‌ ୱିଜୁଦିନ୍‌ତି ଜିବନ୍‌ ମାଡୁ ସାନି ମାନୁ ଆର୍‌ତି ମାନିକା ।
2CO 4:12 ମାରି ଇୟାୱାଜା ଦାନ୍‌, ମାମାନୁ ସାନିକା ମାରି ମି ଲୋଇ ଜିବନ୍‌ତି ପାଣି କିଜି ସାଲାନିକା ।
2CO 4:13 ଦର୍ମସାସ୍ତ୍ରଦୁ ରାସାତା ମାନାତ୍, “ନାନ୍‌ ବିସ୍‌ବାସ୍‌ କିନି ଉଣ୍ତିଙ୍ଗ୍‌ ୱାର୍‌ଗିତା ।” ମାଡୁ ଆୟା ବିସ୍‍ବାସ୍‌ତି ଆତ୍ମା ପୟ୍‌ତିମାନିକା । ମାଡୁ ବିସ୍‍ବାସ୍ କିଜିନିକା, ଆଦେଙ୍ଗ୍‍ଁ ୱେର୍‌ସିନାପ୍‌ ।
2CO 4:14 ମାପୁ ନେସ୍‍ନିକା, ମାପୁରୁ ପ୍ରବୁ ଜିସୁଙ୍ଗୁଁ ସାତିମାଣୁକୁ ଜିବନ୍‌ କିତାମାନାନ୍‌ । ଆୟା ମାପୁରୁ, ଜିସୁଦି ୱାଲେ ମାଙ୍ଗିଁ ବା ଜିବନ୍‌ କିନାନ୍ ମାରି ମି ୱାଲେ ମାଙ୍ଗିଁ ୱାନି ଲାକ୍‌ତୁ ଅନାନ୍ ।
2CO 4:15 ମି ନେଗି ଉଣ୍ତିଙ୍ଗ୍‌ ଇୟାୱିଜୁ ଗଟାଜିନାତ୍ । ମାପୁରୁଦି ଦୟା ମାରି ନାଣ୍ତଦାନ୍ ନାଣ୍ତ ପିର୍‌ଜି ଲୋକାଙ୍ଗ୍‌ ମୁଟୁତାତ୍‌, ମାରି ଗାଦିଲୋକ୍‌ ନେଗି ମୋନ୍‌ତାନ୍‌ ମାପୁରୁଦି ଗୌରବ୍‍ କିନାର୍ ।
2CO 4:16 ଇୟାଉଣ୍ତିଙ୍ଗ୍‌ ମାପ୍‌ ଏସ୍‌କାଙ୍ଗ୍‍ ନିସାର୍‌ ଆଏପ୍‌ । ମା ମେନ୍ଧଲ୍‍ ଦିରେ ଦିରେ ୱିଜ୍‌ଜିନାତ୍‌ । ମାତର୍‌ ମା ଜିବନ୍‌ତିଆତ୍ମା ଦିନ୍‌ତିଙ୍ଗ୍‌ ଦିନ୍‌ ପୁନିକା ଆଜିନାତ୍ ।
2CO 4:17 ଇୟା ଇସ୍ରିମାଟା ମାରି ଅଡ଼ପ୍‍ତି ଦୁକ୍ କାସ୍ଟୁ ମା ଉଣ୍ତିଙ୍ଗ୍‌ ତାସିନାତ୍ ଇସାବ୍‌ସିଲି ୱିଜୁଦିନ୍‌ତି ଗୌରବ୍‍ ପୁରା କିଜିନାତ୍‌ । ଇୟା ଗୌରବ୍‍ ଦୁଃକ୍‌କାସ୍ଟୁଦାନ୍‌ ପେରିକା ।
2CO 4:18 ମା କାଣ୍‌ଗା ସୁଡ଼ୁନି ଜିନିସ୍‌ ମୁସ୍‌କୁ ସିଲେ, ମାତର୍‌ ତର୍‍ଇ ଜିନିସ୍‍ ମୁସ୍‌କୁ ସୁଡ଼ୁଜିନିକା, ଇରିଙ୍ଗ୍‌ ତର୍‍ନି ୱିଜୁ ଜିନିସ୍‍ ସାଣେକ୍‌ତିଙ୍ଗ୍‌, ମାତର୍‌ ଆମାକା ତର୍‍ଏତ୍, ଆକା ୱିଜୁଦିନ୍‍ ତେବାନାତ୍‍ ।
2CO 5:1 ମାପୁ ନେସିନିକା, ଏମେ ଦୁନିଆଦି ମେନ୍ଦଲ୍‍ତି ୱାଜା ଗୁଡ଼ାଦୁ ମାପୁ ଇଲେଇ ବାସା କିଜିନିକା, ଆକା ନାସ୍ଟୁ ଆତିଆଙ୍ଗାଁ, ମାଙ୍ଗିଁ ମାପୁରୁଦି ମୁସ୍‌କୁପୁର୍‌ତୁ ଉନ୍‌ଡ୍ରି ୱିଜୁଦିନିତି ଇଲୁ ଜଗେକିନାନ୍ । ଆକା ଲୋକ କିୟୁଦାନ୍‌ ତିଆର୍ କିତିକା ଆଏତ୍‍ ନିଜେ ମାପୁରୁ ଆକା ତିଆର୍ କିତାମାନାନ୍ । ଆକା ୱିଜୁଦିନ୍‍ ତେବାନାତ୍‌ ।
2CO 5:2 ଇୟା ଦୁନିଆଦି ଇଲୁଦୁ ମାନ୍‌ଜି ମାପ୍‌ ଆୟା ମୁସ୍‌କୁପୁର୍‌ତି ଇଲୁୱାଜା ଆଙ୍ଗିଁ ଆରାଦେଙ୍ଗ୍ ୱେଡ଼ିକା କିଜିନାପ୍‌ ।
2CO 5:3 ମାତର୍‌ ଆୟା ମୁସ୍‌କୁପୁର୍‌ତି ଇଲୁଦୁ ସରିଆଙ୍ଗାଁ, ମା ମେନ୍ଦଲ୍‌ନାଗାଡ଼ା ତର୍‌ଏତ୍‌ ।
2CO 5:4 ମାପୁ ଇୟା ଦୁନିଆଦି ଗୁଡ଼ାଦୁ ମାନିୱାଲେ ୱିଜୁଦିନ୍‌ତି ଜିବନ୍‌ ଆଡ଼ାବାଜିନାତ୍‌ । ଦୁନିଆଦି ମେନ୍ଦଲତିଙ୍ଗ୍ ଡ଼ିସିତେଙ୍ଗ୍ ମା ଆସା ସିଲେତ୍‌, ମାତର୍‌ ମାପ୍‌ ଅଡ଼୍‌ବିନାପ୍‌, ମୁସ୍‌କୁପୁର୍‌ତି ଆଙ୍ଗିଁ ଆରାନି ମାଣ୍‌କୁ ମା ଇୟା ସାତି ମେନ୍ଦଲ୍‍ ଏଣ୍ତେସ୍ ୱିଜୁଦିନ୍‌ତିଙ୍ଗ୍‌ ନେଗିକା ଆନାତ୍‌ ।
2CO 5:5 ମାପୁରୁ ମାଙ୍ଗିଁ ଇୟା ବାଦ୍‌ଲେଆନି ଉଣ୍ତିଙ୍ଗ୍‌ ତିଆର୍ କିତାମାନାନ୍ । ମାରି ଇୟାକା ମା ଉଣ୍ତିଙ୍ଗ୍‌ ୱାନି ପବିତ୍ରଆତ୍ମାଦିଙ୍ଗ୍ ୱାନ୍‌ ୱାନି ସିନା ୱାଜା ମାଙ୍ଗିଁ ଦାନ୍ କିତାମାନ୍ ।
2CO 5:6 ଆୟାଉଣ୍ତିଙ୍ଗ୍‌ ମାପୁ ୱିଜୁଦିନ୍ ସାହାସ୍ ଆସ୍ତିମାନିକା । ମାପ୍‌ ନେସ୍‍ନିକା, ଏସ ଦିନ୍ ମାପୁ ଇୟା ମେନ୍ଦଲ୍‌ତୁ ମାନ୍‍ଜିନିକା, ନାସ ଦିନ୍‌ ପ୍ରବୁଦି ଇଲୁଦାନ୍‌ ଆକମାନିଜି ଜିଜି ମାଡ଼ିନିକା ।
2CO 5:7 ଇରିଙ୍ଗ୍‌ ମା ଜିବନ୍‌ ତର୍‌ନି ବିସୟ୍‍ ମୁସ୍‌କୁ ଜିଜି ମାଡ଼ିଏଣ୍‌ଗା ମାତର୍‌ ବିସ୍‍ବାସ୍ ମୁସ୍‌କୁ ଜିଜି ମାଡ଼ିନିକା ।
2CO 5:8 ଆଦେଙ୍ଗ୍‍ଁ ମାପୁ ସାହାସ୍‌ତାନ୍, ମାରି ଇୟା ମେନ୍ଦଲ୍‌ ଡ଼ିସ୍‍ସି ପ୍ରବୁ ୱାଲେ ବାସା କିନି ଉଣ୍ତିଙ୍ଗ୍ ମାପୁ ନାଣ୍ତ ୱେଡ଼ିକା ।
2CO 5:9 ଆୟାଉଣ୍ତିଙ୍ଗ୍‌ ଆତ୍‌ରେ ଆପିତ୍‌ ଇଲୁଦୁଆପିତ୍ ମାପୁରୁଙ୍ଗୁ ୱେଡ଼ିକା କିଦେଙ୍ଗ୍ ହଁ ମା ଉଣ୍ତ୍ରେ ବଦା ।
2CO 5:10 ଇରିଙ୍ଗ୍‌ ମା ୱିଜେରିଙ୍ଗ୍ ୱାନିମାଡ଼ାନ୍‍କୁ ବିଚାର୍‍ ଆଦେଙ୍ଗ୍‍ଁ ସତେନ୍ କ୍ରିସ୍ତଦି ଆଗ୍‍ଡ଼ି ନିଣ୍ତ୍‍ରେଙ୍ଗ୍ ପଡ଼ାନାତ୍ । ନାସ୍ତିୱାଲେ ସାନି ମେନ୍ଦଲ୍‌ତୁ ମାଡୁ କିତିମାନି ନେଗିକା ବା ତାଗ୍‍ଇକା, ୱିଜୁ ପାଣିକିତି ଇସାବ୍‍ତାନ୍‍ ମାଡୁ ପଲ୍‌ ପୋଇନିକା ।
2CO 5:11 ମାପୁରୁଙ୍ଗୁ ତିଲାନି ଅର୍ତ ଇନିକା, ମାପ୍‌ ନେସ୍‍ତାମାନାପ୍‍, ମାରି ଇକା କିନି ଉଣ୍ତିଙ୍ଗ୍‌ ମାପୁ ୱିଜେରିଙ୍ଗ୍ ୱେର୍‍ତାମାନାପ୍ । ମାପୁରୁ ମାଙ୍ଗିଁ ୱିଜେରିଙ୍ଗ୍ ନେଗେନ୍‌ତାନ୍‌ ନେସ୍‍ତା ମାନାନ୍ । ନାନୁ ଆସା କିଜିନା, ମି ବୁଦିଦାନ୍‌ ନାଙ୍ଗିଁ ନେଗେନ୍‍ତାନ୍‍ ନେସ୍‍ନିଦେର୍‍ ।
2CO 5:12 ମାପୁ ମାରିଡ଼େସି ମି ଲାକ୍‍ତୁ ମାପୁ ଜିବନ୍‌ ଗର୍ବ କିଦେଙ୍ଗ୍ ଇଛା କିଏଜିନାପ୍ । ମାତର୍‌ ମା ବିସୟତାନ୍‍ ଟିକ୍‍ତାନ୍‍ ଗର୍ବ କିନି ଉଣ୍ତିଙ୍ଗ୍‍ଁ ମିଙ୍ଗିଁ ସୁଜୋଗ ସିଦେଙ୍ଗ୍‌ ମା ଉଦେସ୍ । ଆର୍‌ତିଙ୍ଗ୍‌, ମୋନତି ଗୁଣ୍‍ ସୁଡ଼ୁଏଜି କେବଲ ଆତେରି ୱେଡ଼ିକା ସୁଡ଼୍‌ଜି ଏମେକାର୍ ଗର୍ବ କିନାର୍, ୱାରିଙ୍ଗ୍ ମିର୍‌ ଟିକ୍ ବେଡ଼ାଦୁ ଉତର ସିଦେଙ୍ଗ୍‌ ଆଟିନିଦେର୍‌ ।
2CO 5:13 ମାଦି ଇନିକା ବୁଦିବେମ୍ରି ଆତାମାନାତ୍‌ ? ମାଦି ଜଦି ବେମ୍‌ରି ଆନାମାନାତ୍‍, ଆକା ମାପୁରୁଦି ଉଣ୍ତିଙ୍ଗ୍‌ ଆତାମାନାତ୍ । ମାପ୍‌ ଇନିକା ଆୟା ନାନିଲୋକ ? ମାପ୍‌ ଜଦି ଆୟା ନାନିଲୋକ, ଆର୍‌ତିଙ୍ଗ୍‌ ମି ଉଣ୍ତିଙ୍ଗ୍‌ ଆୟାୱାଜା ମାନାପ୍ ।
2CO 5:14 କ୍ରିସ୍ତଦି ଜିବନ୍‍ନନି ମାଣାନ୍‌ ମାପୁ ବୁଲାଜିସାଜିନିକା । ମାଡୁ ବୁଜାଜିନିକା ଜେ, ଅରେନ୍ ୱିଜେରିଉଣ୍ତିଙ୍ଗ୍ ସାତିମାନିଙ୍ଗ୍ ୱିଜେରେ ଆୟାୱିଜେରେ ସାତିମାନୁ ମିସାତାର୍ ।
2CO 5:15 ୱାନ୍‌ ୱିଜେରି ଉଣ୍ତିଙ୍ଗ୍‌ ସାତିମାନିଙ୍ଗ୍ ଏମେକାର୍ ଜିବନ୍‌ ମାନାର୍, ୱାର୍‌ ମାରି ନିଜେଦି ଉଣ୍ତିଙ୍ଗ୍‌ ଜିବନ୍‌ଜାପନ୍‌ କିଏଜି ୱାନିଉଣ୍ତିଙ୍ଗ୍ ଜିନାର୍‍, ମାତର ୱାନିଉଣ୍ତିଙ୍ଗ୍‌ନେ ୱାନ୍‌ ସାଜି ମାରିଡ଼େସି ନିଙ୍ଗିଁତାମାନାନ୍‌ ।
2CO 5:16 ମାପ୍‌ ମାରି ଏମେୱାନିଙ୍ଗ୍ ଲୋକା ଇସାବ୍‍ତାନ୍‍ ବିଚାର୍‌ କିଏପ୍‍ । ବେଡ଼ା ମାରାତ୍ ନାସ୍ତିୱାଲେ ମାପୁ କ୍ରିସ୍ତଦିଙ୍ଗ୍‌ ବା ଲୋକା ଇସାବ୍‍ତାନ୍‍ ବିଚାର୍ କିଜିମାର୍ହାପ୍‍ । ମାତର ଇଲେ ମାରି ମାପୁ ଆୟାୱାଜା କିଏଜିନାପ୍‍
2CO 5:17 କ୍ରିସ୍ତଦି ୱାଲେ ମିସାତିଙ୍ଗ୍, ଲୋକୁ ପୁନିକାନ୍ ତିଆର ଆନାତ୍‌ । ପାଡ଼୍‍ଇ ବିସୟୱିଜୁ ମାରିଗିତା ସର୍ହାମାନାତ୍, ମାରି ପୁନି ବିଷୟ ଆତାନ୍‌ ।
2CO 5:18 ଇୟାୱିଜୁ ମାପୁରୁଦି ପାଣି । ୱାନ୍‌ କ୍ରିସ୍ତଦି ମାଡ଼ାନ୍‍କୁ ମାଙ୍ଗିଁ ୱାନିୱାଲେ ମାରି ମିସାକିତା ମାନାନ୍ ମାରି ୱାନିୱାଲେ ଆଇୱାରିଙ୍ଗ୍‌ ବା ମାରି ମିସା କିନି ଉଣ୍ତିଙ୍ଗ୍ ୱାନ୍‌ ମାଙ୍ଗିଁ ସେବା ଦାୟିତ୍‍ ସିତାମାନାନ୍‌ ।
2CO 5:19 ଆର୍‌ତିଙ୍ଗ୍‌ ମା କାବୁର୍ ଆଜିନାତ୍, ମାପୁରୁ କ୍ରିସ୍ତଦି ମାଡ଼ାନ୍ ୱିଜୁ ଦୁନିଆଦି ଲୋକାଙ୍ଗ୍‌ ୱାନି ୱାଲେ ମାରି ମିସା କିନି ଉଣ୍ତିଙ୍ଗ୍ ନିୟମ କିତାମାନାନ୍ । ୱାନି ବିରୁଦ୍‌ତାନ୍ ୱାରି ପାପ୍‌ୱିଜୁ ୱାନ୍‌ ମାରି ୱାନି ଇସାପ୍‍ତାନ୍ ଇଡ୍‍ଏନ୍‍ । ମାରି, ଇୟା ପୁନି ମିସାକିନି କାବୁର୍ ୱେର୍‍ତେଙ୍ଗ୍ ଦାୟିତ୍‌ ମା ମୁସୁକୁ ବୋଜୁ ସିତାନ୍‌ ।
2CO 5:20 ଆର୍‌ତିଙ୍ଗ୍‌ ମାପ୍‌ କ୍ରିସ୍ତଦି ତରିଟାନ୍‍ ଇୟା ବଲୁ ଇଜିନାପ୍‍ । ନିଜେ ମାପୁରୁ ମା ମାଡ଼ାନ୍‍କୁ ଇୟା କୁକ୍‌ନିକା ସିତାମାନା ଇଜି ଅଡ଼୍‍ବିଦେଙ୍ଗ୍‍ଁ ଆନାତ୍‌ । କ୍ରିସ୍ତଦି ତରିଟାନ୍ ମାପୁ ମାଡ଼ିସ୍‍ କିଜିନାପ୍, ମାପୁରୁ ବାଦେଲେ କିପିନ୍‍ ମିଙ୍ଗିଁ ସାତ୍ରୁଦାନ୍‍ ତଡ଼୍‍ଆଦେଙ୍ଗ୍‍ଁ । ମାପୁରୁଦି ୱାଲେ ପୁନା ମିସାଦୁ,
2CO 5:21 ମାତର କ୍ରିସ୍ତମାନୁ ପୁରା ପାପ୍‌ ସିଲେତିଙ୍ଗ୍‌ ବା, ମାପୁରୁ ୱାନିଙ୍ଗ୍‌ ମା ଉଣ୍ତିଙ୍ଗ୍‌ ପାପ୍‍ତି ପୁଜା ୱାଜାକିତାନ୍, ମାଡ୍‌ ଏଣ୍ତେସ୍ ୱାନିୱାଲେ ମିସାଜି ମାପୁରୁଦି ଦାର୍ମୁପାଣିଦୁ ମିସାଦେଙ୍ଗ୍ ଆଟିନିକା ।
2CO 6:1 ମାପୁରୁଦି ଉଣ୍ତିଙ୍ଗ୍‌ ଅର୍‌ସେ ପାଣି କିତିମାନିଙ୍ଗ୍‌ ମାପ୍‌ ମିଙ୍ଗିଁ ମାଡ଼ିସ୍‍ କିଜିନାପ୍, ମି ଜିବନ୍‌ତୁ ମାପୁରୁଦି ଦୟା ଆରେଏ କିମାଟ୍‌ ।
2CO 6:2 ୱେନ୍‌ଡ୍ରୁ ଆମାକା ମାପୁରୁ ଇନାନ୍‌ : “ମି ଉଣ୍ତିଙ୍ଗ୍‌ ଦୟା ତର୍‌ନି ବେଡ଼ା ୱାତିମାନିଙ୍ଗ୍‌ ନାନ୍‌ ମି ପାର୍‌ତାନା ୱେର୍‌ଆ, ରକ୍‌ୟାଦି ନାଣ୍ତିଙ୍ଗ୍‌ ମି ସାକା ଆତା ।” ୱେନ୍‌ଡ୍ରୁ ! ଇକା ଆଜିନାତ୍, ମାପୁରୁଦି ଦୟା ମାନାନି ବେଡ଼ା । ନେରୁ ଆଜିନାତ୍ ରକ୍‌ୟାଦି ଦିନ୍‌ ।
2CO 6:3 ଆମା ସେବାକିନି ବାଡି ମାପ୍‌ ପୟ୍‍ତା ମାନାପ୍, ତାନି ଦସ୍‍ ଏଣ୍ତେସ୍‌ ଆଏତ୍‍, ଆୟାଉଣ୍ତିଙ୍ଗ୍‌ ମାପ୍‌ ଏମେୱାନି ପାଣିଦୁ ବାଦା ସିଏପ୍ ।
2CO 6:4 ମାରି ମାଡୁ ୱିଜୁ ଅବସ୍ଥାଦୁ ନିଜେଦିଙ୍ଗ୍ ମାପୁରୁଦି ସେବାକିନିକା ୱାଜା ଜାଣାସିନା କିଜିନାପ୍‌ । ନାଣ୍ତ ସାହାସ୍‍ତାନ୍‍ ମାପ୍‌ ୱିଜୁ ରକମ୍‌ତି କାସ୍ଟୁ, କାକୁର୍ତି ମାରି କାସ୍ଟୁ ସାସ୍‍କିତାମାନାପ୍;
2CO 6:5 ମାପ୍‌ ମାଡ୍‌ ତିର୍‌ଆର୍ହାପ୍‍, ଜେଲଦଣ୍ତ ବୋଗକିତାମାନାପ୍‍, ଜୁଦ୍‌ଦୁ ସାମ୍‍ନା କିତାମାନାପ୍‍; ନାଣ୍ତକାସ୍ଟୁପାଣି କିତାମାନାପ୍‍, ଅନିଦ୍ରାଆଜି ତେବାତାପ୍‍ ମାରି କାଦି ଉଣୁଏଣ୍‌ଗା ତେବାତାମାରାପ୍ ।
2CO 6:6 ମା ପବିତ୍ରତା ବୁଦି, ସାହାସ୍‍, ଦୟା, ସତ୍‍ ଜିବନ୍‍ନୋନିକା ମାରି ସତ୍‍ତି ମାଟା ଉଣ୍ତିଙ୍ଗ୍‌ ପବିତ୍ର ମାପୁରୁଦି ସାକ୍ତିଦାନ୍ ମାପ୍‌ ମାପୁରୁଦି ସେବକ ଇଜି ପରିଚୟ ସିତାମାନାପ୍‍,
2CO 6:7 ସତ୍‍ ବାକ୍ୟଦୁ, ମାପୁରୁଦି ସାକ୍ତିଦୁ ଉଣେରି ତରିନ୍‌ ନି ଡେବ୍ରି ତରିନ୍‍ ବିରୁଦ୍‌ତାନ୍ ଲଡ଼େଇ କିନି ଉଣ୍ତିଙ୍ଗ୍ ଦାର୍ମୁ ଜିବନ୍‌ ମା ପେରି ସାଜୁ ।
2CO 6:8 ମାପ୍‌ ସନ୍‌ମାନ୍‌ ଆଜିନାପ୍‍ ମାରି ଅପମାନିତ ଆଜିନାପ୍‍, ପ୍ରସଂସା ମାରି ସେମାର୍‍ ପୟ୍‍ଜିନାପ୍ । ମାଙ୍ଗିଁ ମିଚୁଆର୍‍ ଇଜି ଅପମାନ୍‍ ସିତାମାନାର୍, ଆତିଙ୍ଗ୍‍ଁବା ମାପ୍‌ ପୁରା ସତ୍‌ ଇଜିନାପ୍‍ ।
2CO 6:9 ମାପ୍‌ ନେସ୍‍ତି ଲୋକ୍‍ ଆଜି ବା ନେସ୍‍ଇ ଲୋକା ୱାଜା, ଜିବନ୍‌ ମାନ୍‍ଜି ବା, ସାତିକାର୍‍ ଇଜି ଦର୍‍ପୟ୍‍ତାପ୍‍ । ମାପ୍‌ ଦଣ୍ତ ପୋଇତାମାନାପ୍‍, ମାତର ସାଏପ୍‍ ।
2CO 6:10 ମାପ୍‌ ଆଡ଼୍‍ବାଜି ବା ୱିଜୁଦିନ୍ ୱେଡ଼ିକା । ମାପ୍‌ କାକୁର୍ତିୱାଜା ତରାଜିନାପ୍‍, ମାତର ଏସ ଲୋକାଙ୍ଗ୍‌ ମାଜନ୍‍କିତାମାନାପ୍‍ । ମାଙ୍ଗିଁ ଇନିକା ସିଲେତିୱାଜା ମନେଆଜିନାତ୍, ମାତର ସତ୍‌ତାନ୍‌ ମାପ୍‌ ୱିଜୁଦି ଅଦିକାରିର୍‍ ।
2CO 6:11 କରନ୍ତିଦି ଲାଡ୍‍ତି ତଡ଼ାନ୍‍କୁ ନି ତାଙ୍ଗିଁକ୍‍ ମାପୁ ସୁରି ୱାର୍‍ଗିନି ଲୋକ୍‍ ସିଲେ ମିଙ୍ଗିଁ ୱିଜୁ ଇର୍ହାମାନାପ୍ । ମି ଲାକୁତୁ ମା ଜିବନ୍‌ ରେତା ସିତାମାନାପ୍ ।
2CO 6:12 ମାପୁ ମି ଉଣ୍ତିଙ୍ଗ୍‌ କେରେପ୍‍ତି ଜିବନ୍‌ ଆଏପ୍, ମାତର ମି ଜିବନ୍‌ ମା ଉଣ୍ତିଙ୍ଗ୍‌ କେର୍‍ବିତାମାନାତ୍‍ ।
2CO 6:13 ମିଙ୍ଗିଁ ନା କଡ଼ର୍ ଇଜି ଅଡ଼୍‍ବିଜି ଇୟାୱିଜୁ ଇଜିନା । ମା ଅଡ଼ବିନି ଇସାବ୍‍ତାନ୍‍ ମି ଜିବନ୍‌ ରେଆପିତ୍‍ ।
2CO 6:14 ମିର୍‌ କ୍ରିସ୍ତଦିମାନୁ ଏମେକାର୍‌ ବିସ୍‍ବାସ୍‍ କିଏର୍‌ ୱାରିୱାଲେ ସାମାନ୍ ପାଣି କିଦେଙ୍ଗ୍ ସେସ୍ଟା କିମାଟ୍ । ଇକା ଏସାଙ୍ଗ୍‍ ବା ଆଦେଙ୍ଗ୍‍ଁ ଆଟ୍‍ଏତ୍‍ । ଦାର୍ମୁ ମାରି ଅଦାର୍ମୁ ମିସାନେ ଏମେ ? ଜାୟ୍‌ ନି ସିକାଟି ଏଣ୍ତେସ୍‌ ଅର୍‌ସେ ତେବାନେ ?
2CO 6:15 କ୍ରିସ୍ତ ମାରି ସୟତାନ୍ ଏଣ୍ତେସ୍ ଉଣ୍ତ୍ରେ ମାଟା ଆନାର୍ ? ବିସ୍‍ବାସି ୱାଲେ ଅବିସ୍‍ବାସି ଏମେ ବିସୟ୍‍ତୁ ଉଣ୍ତ୍ରେ ମାଟା ଆଦେଙ୍ଗ୍‌ ଆଟ୍‍ନାର୍‍ ?
2CO 6:16 ମାପୁରୁଦି ମନ୍ଦିର୍‌ତୁ ଏଣ୍ତେସ୍ ଦିୟାମ୍‍ ତିଆର୍‍ ଆନାତ୍‌ ? ମାଡ୍‌ ତୋ ଜିବନ୍‍ମାନି ମାପୁରୁଦି ମନ୍ଧିର୍‍, ଇରିଙ୍ଗ୍‌ ମାପୁରୁ ନିଜେ ଇର୍ହାମାନାନ୍‌, “ନା ଲୋକାୱାଲେ ନାନୁ ବାସାକିନା ମାରି ୱାରି ମାନୁ ତେବାନା; ନାନୁ ୱାରି ମାପୁରୁ ଆନା ମାରି ୱାର୍‌ ନା ନିଜେ ଲୋକ ଆନାର୍ ।”
2CO 6:17 ଆଦେଙ୍ଗ୍‌ ପ୍ରବୁ ଇନାନ୍‌, “ୱାରି ମାଡ଼ାନ୍‍କୁ ମିର୍‌ ସୋହସିରାଦୁ, ୱାରିମାଡ଼ାନ୍‍କୁ ନିଜେଦିଙ୍ଗ୍‍ ୱେର୍‌ଏ କିଦୁ । ତାଗ୍‍ଇ ବିସୟ୍‍ତି ୱାଲେ ମିସାମାଟ୍, ଆର୍‍ତିଙ୍ଗ୍‍ଁ ନାନୁ ମିଙ୍ଗିଁ ଆସ୍‍ନା ।
2CO 6:18 ନାନୁ ମି ବୁବା ଆନା, ମାରି ଆନିଦେର୍‌ ନା କଡ଼ର୍ ଆଇଲିକ୍‌, ସର୍ବସାକ୍ତିମାନ୍ ପ୍ରବୁ ଇୟା ବଲୁ ଇନାନ୍‌ ।”
2CO 7:1 ତଡ଼୍‍କୁ ନି ତାଙ୍ଗିଁକ୍‍ ଇୟାୱିଜୁ ମାଟା ମାଡ୍‌ ମାପୁରୁଦିମାଣାନ୍‍ ପୋଇତିମାନିକା । ଆଦେଙ୍ଗ୍‌ ରାଦୁ, ମେନ୍ଧଲ୍‍ ମାରି ଆତ୍ମାଦିଙ୍ଗ୍‌ ତାଗ୍‍ଇକାକିତିମାନୁ ୱିଜୁ ବିସୟତାନ୍ ନିଜେ ନିଜେଦିଙ୍ଗ୍ ନର୍‍ନାଟ୍‍ । ମାରି ମାପୁରୁଦିଙ୍ଗ୍ ତିଲାଜି ପୁରା ପବିତ୍ର ୱାଜା ଜିନାଟ୍‍ ।
2CO 7:2 ମି ଜିବନ୍‌ତୁ ମାଙ୍ଗିଁ ବାଡି ସିଦାଟ୍ । ମାପ୍‌ ଏମେୱାନିଙ୍ଗ୍ ଅନ୍ୟାୟ୍‌ କିଏପ୍‍, ଏମେୱାନିଙ୍ଗ୍ ନାଷ୍ଟୁକିଏପ୍‍ ଇରିଙ୍ଗ୍‌ ଏମେୱାନି ମାଡ଼ାନ୍‌କୁ ଇନିକା ଲାବ୍‍ ପୟ୍‍ଦେଙ୍ଗ୍ ଚେଷ୍ଟାକିଏପ୍‍ ।
2CO 7:3 ମିଙ୍ଗିଁ ଦୋସ୍‌ ସିଦେଙ୍ଗ୍‌ ନାନୁ ଇୟା ବଲୁ ଇନ୍‍ଏ । ନାନୁ ଆଗ୍‍ଡ଼ିରାନ୍ ଇଜିନା, ମିର୍‌ ମା ନିସ ଲାଡ୍‍ ଜେ ମାପ୍‌ ଜିତିଙ୍ଗ୍‌ ଉଣ୍ତ୍ରେମାନୁ ଜିନାଟ୍‍ ମାରି ସାତିଙ୍ଗ୍‍ ଉଣ୍ତ୍ରେମାନୁ ସାନାଟ୍ ।
2CO 7:4 ମି ମୁସୁକୁ ନା ବେସି ଆସା ମାନାତ୍ । ମି ଉଣ୍ତିଙ୍ଗ୍‌ ନାନୁ ଗର୍ବ ବା ନାଣ୍ତ । ଦୁକ୍ କାସ୍ଟୁ ବେଡ଼ାଦୁ ନାନୁ ସାହାସ୍ ତର୍‍ତାମାନା । ୱେଡ଼ିକାଦୁ ମୁଜିତାମାନା ।
2CO 7:5 ଇୟାୱାଜାକି ମାସିଦୋନିଆଦୁ ଇତିୱାଲେ ମାପୁ ରମ୍‍ଏତାପ୍‍ନି । ୱିଜୁମାନୁ ଅସାନ୍ତି ମାରି ଜାଟି ଲାଗାତାମାରାତ୍, ଆଦେଙ୍ଗ୍‍ଁ ମା ମୋନତୁ ସାନ୍ତି ସିଲେତାତ୍ ।
2CO 7:6 ମାତର ଏମେ ନିରାସ୍‍ତି ୱାରିଙ୍ଗ୍ ସାସ୍‌ ସିଜିମାନି ମାପୁରୁ ତିତସତିଙ୍ଗ୍‌ ପୋକ୍‌ସି ମାଙ୍ଗିଁ ୱେଡ଼ିକା ସିତାମାନାନ୍‌ ।
2CO 7:7 କେବଲ ୱାନି ୱାନିମାଣାନ୍‍ ସିଲେ, ମାତର ୱାନ୍‌ ମି ଲାକୁତୁ ସଲ୍‌ସି ଏମେ ୱେଡ଼ିକା ପୋଇତାମାନାନ୍‍, ଆୟାମାଡ଼ାନ୍ ମାପୁ ୱେଡ଼ିକା ଆତାମାନାପ୍‌ । ନାଙ୍ଗି ସୁଡ଼ୁଦେଙ୍ଗ୍‌ ମି ଏସ ୱେଡ଼ିକା, ନା ଉଣ୍ତିଙ୍ଗ୍‌ ମି ଏସ ଦୁକ୍, ନାଙ୍ଗି ସାସ୍‌ କିଦେଙ୍ଗ୍ ମିର୍‌ ଏସ ୱେଡ଼ିକା, ଇୟାୱିଜୁ ବିସୟ ୱାନ୍‌ ନାଙ୍ଗି ୱେର୍‍ତାମାନାନ୍ । ଆବେଣାନ୍‍ ନାନୁ ନାଣ୍ତ ୱେଡ଼ିକା ଆତାମାନା ।
2CO 7:8 ନା ସିଟି ପୋଡ଼ାଜି ମିର୍‌ ମୁର୍ଚାଆତିମାରିଙ୍ଗ୍ ବା, ଆୟାଚିଟି ରାସ୍‌ତିମାନିଙ୍ଗ୍ ନା ମୋନତୁ ଇନି ଦୁକ୍ ସିଲେତ୍‌ । ସିଟି ମିଙ୍ଗିଁ ସାଣେକ୍‍ତିଙ୍ଗ୍‍ ଦୁକ୍ କିବିସ୍‍କିତିମାନିଙ୍ଗ୍ ନାନୁ ଦୁକ୍ ଆତାମାନ୍ଦି ।
2CO 7:9 ମାତର ମି ମୋନତୁ ଦୁକ୍ ସିତିମାନିଙ୍ଗ୍ ସିଲେ, ମାତର ଇୟା ଦୁକ୍ ମି ଜିବନ୍‌ତି ବୁଲାସାଲା ବାଦ୍‌ଲେ କିତିମାନିଙ୍ଗ୍ ଇଲେଇ ନାନୁ ୱେଡ଼ିକା କିଜିନା । ମାପୁରୁଦି ବଦା ଇସାବ୍‍ତାନ୍‍ ମିର୍‌ ଇୟା ଦୁକ୍ ସାସ୍‌ କିଜିନିଦେର୍‌ । ଆଦେଙ୍ଗ୍‌ ମା ମାଡ଼ାନ୍ ମିର୍‌ ଇନି ରକମ୍‍ତି ନାଷ୍ଟୁ ଆଇଦେର୍‍ ।
2CO 7:10 ମାତର ଇୟାୱାଜାଦି ଦୁକ୍ ମାପୁରୁଦି ମାଡ଼ାନ୍ ବେବହାର୍‍ ଆଜି ତାନିମାଡ଼ାନ୍ ଜିବନ୍‌ ବାଦ୍‌ଲେ ଆତିଙ୍ଗ୍‌ ରକିୟା ପୁଟ୍‍ନାତ୍ । ଇବେନୁ ଚିନ୍ତାକିନି ବିସୟ ସିଲେତ୍‌ । ମାତର କେବଲ ଦୁନିଆଦି ଦୁକ୍ ସାନିକା ଗଟେକିନାତ୍ ।
2CO 7:11 ଆଦେଙ୍ଗ୍‌ ସୁଡ଼ୁଦୁ, ମାପୁରୁଦି ମାଡ଼ାନ୍ ବଦାଦାନ୍ ପୟ୍‍ତିମାନିଦେର୍‍ ଇୟା ଦୁକ୍ ମିଙ୍ଗିଁ ମୋନତୁ ଏସ ୱେଡ଼ିକା, ଏସ ତିଲାନିକା, ଏସ ରିସା, ଏସ, ନିଜେଦିଙ୍ଗ୍‍ଁ ଟିକ୍‍ କିଦେଙ୍ଗ୍‍ଁ ଏସ ସିକିୟା, ତାଗ୍‍ଇ ପାଣିକିନିୱାରିଙ୍ଗ୍‍ ସାସ୍ତିସିଦେଙ୍ଗ୍‌ ଏସ ତାନ୍ଦ୍ରା ମାନାତ୍‌ । ଇୟାୱିଜୁ ବିସୟତାନ୍ ମିର୍‌ ଦୋସ୍ ସିଲିକାର୍‍ ପାର୍‍ମାଣ୍ ଆଜିନିଦେର୍ ।
2CO 7:12 ଜଦିବା ନାନୁ ମି ଲାକ୍‍ତୁ ରାସ୍‍ତା ସିଟି, ମି ମାଡ଼ାନ୍‌କୁ ଜେ ଅନ୍ୟାୟ୍‌ କିତାମାନାନ୍‍ ବା ଜେ ଅନ୍ୟାୟ୍‍ ସାସ୍‌ କିତାମାନାନ୍‌, ତାନି ଉଦେସ୍‍ତାନ୍ ନାନୁ ଆୟା ସିଟି ରାସ୍‍ଏମାରା । ମାତର୍‌ ମାପୁରୁଦି ଆଗ୍‍ଡ଼ି ମା ଉଣ୍ତିଙ୍ଗ୍‌ ମି ମାନାନିକା ଏସ ନାଣ୍ତ ମାରି ।
2CO 7:13 ଆୟା ଉଣ୍ତିଙ୍ଗ୍ ମାପୁ ଏସ ୱେଡ଼ିକା, ଆକା ୱେର୍‍ନି ଉଣ୍ତିଙ୍ଗ୍‌ ନାନୁ ଆୟା ସିଟି ରାସାତା । ମାପୁ କେବଲ ୱେଡ଼ିକା ଆଏପ୍ । ମିର୍‌ ତିତସତିଙ୍ଗ୍‌ ୱିଜୁ ବିସୟତି ସାହାଜ୍ୟ କିଜି ଏଣ୍ତେସ୍‌ ୱେଡ଼ିକା କିଜିନିଦେର୍‌, ଆକା ମାଙ୍ଗିଁ ବେସିୱେଡ଼ିକା ସିତାମାନାତ୍ ।
2CO 7:14 ୱାନି ଲାକୁତୁ ମି ଉଣ୍ତିଙ୍ଗ୍‌ ନାନୁ ଗର୍ବ କିଜିନା । ମାରି ଆୟାଉଣ୍ତିଙ୍ଗ୍‌ ନା ତାଲା ଆଡ୍‍ଗି ଆଏତ୍‍ । ଏଣ୍ତେସ୍‌ ମି ଲାକୁତୁ ମାପୁ ୱିଜୁଦିନ୍ ସତ୍‌ ଇଜିୱାଜିନାପ୍, ଆୟାୱାଜା ତିତସତି ଲାକୁତୁ ମାପୁ କିତିମାନି ପେରି ମାଟେଙ୍ଗ୍, ମିଚ୍‍ ପାର୍‍ମାଣ୍ ଆଏତ୍‍ ।
2CO 7:15 ମିର୍‌ ୱିଜେରେ ଏଣ୍ତେସ୍‍ତାନ୍‍ ୱାନିଙ୍ଗ୍‍ଁ ମାନାଜି ମାରିଇଦେର୍‍ ମାରି ତିଲାଜି ମାରି ତିର୍‍ଗିଜି ମୋନତୁ ୱାନିଙ୍ଗ୍‌ କୁକ୍‍ତିମାରିଇଦେର୍‌, ଇୟା ମାଟା ଅଡ଼୍‍ବିଜି ମି ଉଣ୍ତିଙ୍ଗ୍‌ ୱାନି ଜିବନ୍‌ନୋନିକା ମାରି ନାଣ୍ତଆଜିନାତ୍ ।
2CO 7:16 ନାନୁ ୱିଜୁ ବିସୟ୍‍ତୁ ମି ମୁସୁକୁ ପୁରା ଆସା ଇଡ୍‌ଜି ଆଟ୍‍ତିମାନିଙ୍ଗ୍ ନାନୁ ଏସ ୱେଡ଼ିକା ।
2CO 8:1 ଏ ତଡ଼ାନ୍‌କୁ ନି ତାଙ୍ଗିଁକ୍‍, ମାସିଦୋନିଆଦି ମଣ୍ତଲିୟାଙ୍ଗ୍ ଏଣ୍ତେସ୍ ମାପୁରୁଦି ଦୟା ପୋଇତାମାନାର୍, ଆକା ମିଙ୍ଗିଁ ୱେର୍‌ତେଙ୍ଗ୍‌ ବଦା କିଜିନା ।
2CO 8:2 ୱାର୍‌ ନାଣ୍ତକାସ୍ଟୁ ମାଣାନ୍‌କୁ ସିଜି ପରିକା ଆତାମାନାର୍‌ ମାରି ୱାର୍‌ ବେସି କାକୁର୍ତି ଆତିଙ୍ଗ୍‌ବା, ୱିଜ୍‍ଇ ବଦାଦି ମାଡ଼ାନ୍‌କୁ ନିଜେ ମୋନତି ୱେଡ଼ିକାଦାନ୍ ୱେକ୍‍ତାମାନାର୍‍ ।
2CO 8:3 ନାନୁ ସତ୍‍ ବାବେ ଇଜିନା ଜେ, ୱାରି ବଦାଦାନ୍ ନିଜେଦି ସାକ୍ତି ଇସାବ୍‍ତାନ୍‍ ଇୟାୱାଜାନେ ନିଜେଦି ଆଟ୍‍ନି ମାଣାନ୍‌ ନାଣ୍ତ ବା ଦାନ କିତାମାନାର୍‌ ।
2CO 8:4 ଜିହୁଦାଦୁମାନି ମାପୁରୁଦି ଲୋକାଙ୍ଗ୍‌ ସେବାକିନି ଉଣ୍ତିଙ୍ଗ୍‌ ୱାରିଙ୍ଗ୍ ଦୟା ସିଆୟ୍‍ଆପିତ୍‍ ଇଜି ୱାର୍‌ ମାଙ୍ଗିଁ ବାତିଙ୍ଗ୍‌ଁ ମାଲିତାମାର୍ହାର୍‍ ।
2CO 8:5 ୱାରିମାଡ଼ାନ୍‌କୁ ମାପୁ ନିସ ଆସା କିଏତା ମାରାପ୍ । ଆଗ୍‍ଡ଼ିନେ ୱାର୍‌ ନିଜେ ନିଜେଦିଙ୍ଗ୍ ମାପୁରୁଦି ମାନୁ ସିଆୟ୍‌ଆଜି ମାରାର୍ ମାରି ୱେନେକା ମାପୁରୁଦି ଇଚ୍ଛା ଇସାବ୍‌ତାନ୍‌ ନିଜେ ନିଜେଦିଙ୍ଗ୍ ମା ଉଦେସ୍‍ତାନ୍‍ ସିଆଇଆତାର୍‍ ।
2CO 8:6 ତିତସଦି ସାହାଜ୍ୟଦାନ୍ ଇୟା ଦୟା ପାଣି ଆରାମ୍‌ ଆତାମାରାତ୍ । ତେନିଙ୍ଗ୍‌ ସାଲାକିଜି ଇଡ୍‍ଦେଙ୍ଗ୍‌ ମାରି ଇୟା ଜିବନ୍‍ନନି ଉଣ୍ତିଙ୍ଗ୍‌ ସେବାପାଣିଦୁ ମିଙ୍ଗିଁ ସାହାଜ୍ୟ କିନିଉଣ୍ତିଙ୍ଗ୍ ତିତସତିଙ୍ଗ୍‌ ଅନୁରଦ୍‌ କିତା ।
2CO 8:7 ମିର୍‌ ୱିଜୁ ବିସୟତୁ ମାଜନ୍‌ ଆତିମାନିଦେର୍‍ । ମି ବିସ୍‍ବାସ୍, ମାଟା ୱାର୍‍ଗିଦେଙ୍ଗ୍‍, ଜ୍ଞାନ, ସାହାଜ୍ୟକିଦେଙ୍ଗ୍‍ ୱେଡ଼ିକା ମାରି ମା ଉଣ୍ତିଙ୍ଗ୍‌ ଜିବନ୍‍ନୋନିକା ତର୍‍ତେଙ୍ଗ୍‍ଁ ନାଣ୍ତ ପରିଚୟ ସିତିମାନିଦେର୍‍ । ଆଦେଙ୍ଗ୍‍ଁ ଇୟା ଦୟା ସେବାପାଣିଦୁ ବା ଦାନ୍‌ ସିନିକାନ୍‍ ଆଜି ଜିବନ୍‍ନୋନିକା ପରିଚୟସିଦୁ, ଇକା ନା ବଦା ।
2CO 8:8 ଇୟା ବିସୟ୍‌ତାନ୍‌ ମି ଉଣ୍ତିଙ୍ଗ୍‌ ନାନୁ ଇନିକା ନିତିନିୟମ୍‍ କିଏଜିନା । କେବଲ ସେବାପାଣିଦୁ ଆଇୱାରିଙ୍ଗ୍‌ ୱେଡ଼ିକାଦି କାତାସିଜି ମି ଜିବନ୍‍ନନି ସତ୍‍ ନେସିନି ଉଣ୍ତିଙ୍ଗ୍‌ ନାନୁ ଚେଷ୍ଟାକିଜିନା ।
2CO 8:9 ମିର୍‌ ପ୍ରବୁ ଜିସୁ କ୍ରିସ୍ତଦି ଦୟା ବିସୟନେସ୍ତୁ । ୱାନ୍‌ ମାଜନ୍‌ ଆତିଙ୍ଗ୍‌ବା ମି ଉଣ୍ତିଙ୍ଗ୍‌ ଗରିବ୍‍ ଆତାନ୍‌ ୱାନି କାକୁର୍ତିମାଡ଼ାନ୍ ମିର୍‌ ବା ଏଣ୍ତେସ୍ ମାଜନ୍‌ ଆଦେଙ୍ଗ୍‍ଁ ଆଟିନିଦେର୍‌ ।
2CO 8:10 ଇୟା ବିସୟତାନ୍ ମିଙ୍ଗିଁ ନା ଇୟା ଆଦେସ୍, ଦରନ୍ ମିର୍‌ ଏମେକା ଆରାମ୍‌କିତିମାରିଦେର୍‌, ଆକା ଇଲେଇ ୱିଜିସି କିଦେଙ୍ଗ୍ ମି ଇଛା । ଇରିଙ୍ଗ୍‌ ପାଣି କିଦେଙ୍ଗ୍ ସିଲେ, ମାତର ପାଣିକିଦେଙ୍ଗ୍ ଟିକ୍ ୱିକ୍‌ତେଙ୍ଗ୍ ମିର୍‌ ଆଜିନିଦେର୍‌ ଆଗିଡ଼ି ।
2CO 8:11 ଇଲେଇ ପାଣିକିଜି ସାଡ୍ରୁ ମାରି ମି ସୁଜଗ୍‌ତାନ୍ ଆକା ୱିସ୍‌ତୁ । ନେଗିକାଆସିନି ବେଡ଼ାଦୁ ମି ଏମେ ୱେଡ଼ିକା ମାରାତ୍, ପାଣି ୱିଜିନିସାନ୍ଦି ଆକା ଆସ୍‍ସ ଇଡ୍‍ଦୁ ।
2CO 8:12 ମାତର୍‌ ଦାନ ସିଦେଙ୍ଗ୍‌ ୱେଡ଼ିକା ମାରିଙ୍ଗ୍, ଲୋକୁ ୱାନି ବଦା ଇସାବ୍‍ତାନ୍ ଆମାକା ଦାନ୍ କିନାନ୍, ମାପୁରୁ ଆସ୍‍ନାନ୍‍ । ୱାନି ସିଦେଙ୍ଗ୍‍ଆଟ୍‍ନି ଆତ୍‌ରେ ୱାନ୍‌ ଇନିକା ସିପିନ୍ ଇଜି ମାପୁରୁ ବଦା କିଏନ୍‌ ।
2CO 8:13 ମି ମୁସୁକୁ ଇୟା ବୋଜୁଦିଙ୍ଗ୍ ତିଗଜ ଆଇୱାରିଙ୍ଗ୍‌ ସୁକ୍‌ ସିଦେଙ୍ଗ୍‌ ନାନୁ ବଦା କିଏଜିନା ।
2CO 8:14 ମାତର୍‌ ଇଲେଇ ମିଙ୍ଗିଁ ନାଣ୍ତ ମାନିଙ୍ଗ୍ ସିଲିସାତି ଲୋକାଙ୍ଗ୍‍ ସାହାଜ୍ୟ କିନିକା ମି ପାଣି । ବେଡ଼ା ୱାନାତ୍, ମିର୍‌ ସିଲିସାତି ମାର୍‍ଇୱାଲେ, ୱାରି ନାଣ୍ତ ମି ଉଣା ପୁରା କିନି ଉଣ୍ତିଙ୍ଗ୍‌ ସାହାଜ୍ୟ କିନାତ୍ । ଇୟାୱାଜା ଇସାବ୍‍ତାନ୍ ମିମାନୁ ସାମାନ୍‍ ରକ୍‌ୟା କିଦେଙ୍ଗ୍‌ ଆଟ୍‌ନାର୍ ।
2CO 8:15 ଦର୍ମସାସ୍ତ୍ରଦୁ ରାସାତାମାନାତ୍‌, “ଏନ୍‌ ନାଣ୍ତ ଉଣ୍ତା କିତାନ୍‌, ୱାନିଦି ଇନିକା ଏଜେଏତାତ୍‌ । ଏନ୍‌ ଉଣା ଉଣ୍ତା କିତାନ୍‌, ୱାନିଦି ଉଣା ଆଏତାତ୍ ।”
2CO 8:16 ମାପୁରୁଦି ଦନ୍ୟବାଦ୍‌ ଆପିତ୍‌ । ଇରିଙ୍ଗ୍‌ ମା ୱାଜା ତିତସତି ଜିବନ୍‌ ବା ମିଙ୍ଗିଁ ସାହାଜ୍ୟ କିଦେଙ୍ଗ୍‌ ୱେଡ଼ିକା ମାନାନ୍‌ ।
2CO 8:17 ୱାନ୍‌ କେବଲ ମା ଅନୁରଦଦିଙ୍ଗ୍ କୁକ୍‌ନିକା ୱେର୍‌ଏନ୍, ମାତର୍‌ ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନିସ ୱେଡ଼ିକା ଜେ, ନିଜେଦି ବଦାଦାନ୍ ମି ଲାକ୍‌ତୁ ସନ୍‍ଡ୍ରେଙ୍ଗ୍‍ ୱାନ୍‌ ବଦା କିତାମାନାନ୍ ।
2CO 8:18 ୱାନି ୱାଲେ ମାରି ଅରେନ୍ ତଡ଼ାନ୍‌ତିଙ୍ଗ୍‌ ମାପ୍‌ ପୋକ୍‌ତାତାମାନାପ୍ । ନେଗି କାବୁର୍‌ ପ୍ରଚାର୍‍ କିଦେଙ୍ଗ୍ ୱିଜୁ ମଣ୍ତଲିଆଙ୍ଗାଁ ୱାନ୍‌ ପୁରା ୱିଜୁତରିନ୍‌ ୱେଙ୍ଗିଁତାମାନାନ୍ ।
2CO 8:19 ମାରି ନାସ ସିଲେ, ପ୍ରବୁଦି ଗୌରବ୍‍ ମାରି ମା ନମସ୍କାର୍‌ ୱିକ୍‌ନି ଉଣ୍ତିଙ୍ଗ୍‌ ଆମା ଉଣ୍ତାକିତି ଦାନ୍‍ତି ଅନି ସେବା ପାଣି ମାପ୍‌ ପୟ୍‍ତାମାନାତ୍‍, ଆବେନ୍‌ ମା ଅର୍‌ସେସନି ଉଣ୍ତିଙ୍ଗ୍‌ ଆଇଆଇ ମଣ୍ତଲି ୱାନିଙ୍ଗ୍‌ ଆସ୍‍ କିତାମାନାର୍‌ ।
2CO 8:20 ନିଜେଦି ବଦାଦାନ୍ ସିଆୟ୍‌ଆତିମାନି ଇୟା ଦାନଦିଙ୍ଗ୍ ନାଣ୍ତ ଜାଗାର୍‌ତାଦାନ୍‌ ମାପ୍‌ ବ୍ୟବହାର୍ କିଜିନାପ୍, ଏଣ୍ତେସ୍‌ ମା ମୁସ୍‌କୁ ଏନ୍‌ ଦୋସ୍‍ତିଗିଦେଙ୍ଗ୍ ଆଟ୍‌ଏନ୍ ।
2CO 8:21 ମାତର ମାପୁରୁଦି ଆଗିଡ଼ି ସିଲେ, ମାତ୍ର ଲୋକା ଆଗିଡ଼ି ବା ସତ୍‌ ମାଡ୍ରେଙ୍ଗ୍‍ଁ ମା ବଦା ।
2CO 8:22 ଆର୍‌ତିଙ୍ଗ୍‌ ୱାରି ୱାଲେ ଇୟା ମା ତଡ଼ାନ୍‌ତିଙ୍ଗ୍‌ ମାପ୍‌ ପୋକ୍‌ତାତାମାନାପ୍‌ । ୱାନିଙ୍ଗ୍‌ ଗାଦି ଦେବେଙ୍ଗ୍‌ ପରିକା କିଜି ୱାନିଙ୍ଗ୍‌ ବିସ୍‍ବାସ୍‌ତି ପରିଚୟ ପୋୟ୍‌ତାମାନାପ୍‌ । ମି ମୁସ୍‌କୁ ୱାନି ଆଟ୍‌ୱା ମାନିଙ୍ଗ୍‌ ୱାନ୍‌ ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନାଣ୍ତ ୱେଡ଼ିକା ଆତାମାନାନ୍‌ ।
2CO 8:23 ତିତସଦି ପରିଚୟ ଇକା ୱାନ୍‌ ନା ୱାଲେମାନିକାନ୍‌ ମାରି ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନା ୱାଲେ ପାଣିକିନିକାନ୍‌ । ମାରି ୱାନି ୱାଲେ ସଲିସ୍‍ମାନି ଆଇ ବିସ୍‌ବାସି ତଡ଼ାନ୍‌କା ପରିଚୟ ୱାର୍‌ ମଣ୍ତଲିଆଙ୍ଗାଁ ୱିଜୁ ପ୍ରେରିତ ସିସୁ ମାରି କ୍ରିସ୍ତଦି ଗୌରବ୍‍ ୱାଜା ।
2CO 8:24 ୱାରିଙ୍ଗ୍ ମି ଜିବନ୍‍ନୋନିକା ତର୍‍ତୁ । ଆତିଙ୍ଗ୍‌ ୱିଜୁ ମଣ୍ତଲିଙ୍ଗ୍‍ଁ ଇୟା ବିସୟ୍‌ତାନ୍‌ ସେତାଆନାର୍ ମାରି ମି ଉଣ୍ତିଙ୍ଗ୍‌ କିଜିମାନି ଗର୍ବ ସତ୍‌ ଇଜି ବିସ୍‍ବାସ୍‍ କିଦେଙ୍ଗ୍ ଆଟ୍‍ନାର୍‍ ।
2CO 9:1 ଜିହୁଦାଦୁ ମାନି ମାପୁରୁଦି ଲୋକାଦି ଲାକୁତୁ ସାହାଜ୍ୟ ପୋକନି ଉଣ୍ତିଙ୍ଗ୍‌ ମିଙ୍ଗିଁ ରାସ୍‌ନିକା ଇନିକା ଦରକାରସିଲେତ୍ ।
2CO 9:2 ନାନୁ ନେସେନା, ମିର୍‌ ୱିଜୁଦିନ୍ ସାହାଜ୍ୟ କିଦେଙ୍ଗ୍ ତିଆର୍ ମାରି ମାସିଦୋନିଆଦି ଲୋକାଦି ଲାକୁତୁ ମି ବିସୟତାନ୍ ନାନୁ ଗର୍ବ କିତାମାନା । ନାନୁ ଇର୍ହାମାର୍ହାନ୍, “ଆକାୟାଦି ତୋଡ଼ାନକୁ ସାହାଜ୍ୟକିନି ଉଣ୍ତିଙ୍ଗ୍‌ ଦରଟାନ୍ ତିଆରଆତାମାନାର୍ ।” ମି ୱେଡ଼ିକା ୱାରି ମାଡ଼ାନ୍‍କୁ ବା ଏସ ଲୋକାଙ୍ଗ୍‌ ଜାଗାର୍‌ତା କିତାମାନାତ୍‌ ।
2CO 9:3 ଇଲେଇ ନାନୁ ଇୟା ତଡ଼ାନ୍‍କାଙ୍ଗ୍‍ ମି ଲାକୁତୁ ପୋକସିନା । ସୁଡ଼ୁଦୁ, ଇୟା ୱେଡ଼ାଦୁ ଏଣ୍ତେସ୍ ମି ବିସୟତାନ୍ ମା ଗର୍ବ ଆର୍‍ଏ ଆଏତ୍ । ନାନୁ, ୱେର୍‍ନି ଇସାବ୍‍ତାନ୍ ମିର୍‌ ଦାନତି ୱାଲେ ତିଆରଆଜମାନ୍‍ଡ୍ରୁ ।
2CO 9:4 ମାସିଦୋନିଆଦି ଲୋକୁ ନା ୱାଲେ ସଲିସି ଜଦି ମିଙ୍ଗିଁ ତିଆରଆଇମାନିକା ସୁଣାର୍‍; ଆର୍‌ତିଙ୍ଗ୍‌ ମି ମୁସୁକୁ ଆଟୁୱା ବିସ୍‍ବାସ୍ ମାନିଙ୍ଗ୍‌ ମାପୁ ସେମାର୍‌ଆନାପ୍ ସତ୍‍ତାନ ୱେର୍‍ତେଙ୍ଗ୍‍ ସରିଙ୍ଗ୍, ଆକା ମି ଇସାବ୍‍ତାନ୍ ବା ସେମାର୍‌ତିକା ଆନାତ୍ ।
2CO 9:5 ମିର୍‌ ମାଟା ସିତିମାନି ଦାନ ଉଣ୍ତାକିନି ଉଣ୍ତିଙ୍ଗ୍‌ ଇୟା ତଡ଼ାନ୍‍କାଙ୍ଗ୍‍ ନା ସନି ଆଗ୍‍ଡ଼ି ମି ଲାକୁତୁ ପୋକତେଙ୍ଗ୍‌ ଅନୁରଦ୍‌ କିତା । ଆରିଙ୍ଗ୍‌, ନାନୁ ମି ଲାକୁତୁ ଇନିୱାଲେ ଇୟା ଦାନ୍ ଉଣ୍ତା କିଜି ଇଡ୍‍ଜମାନ୍‍ଡ୍ରୁ । ଇୟାମାଡ଼ାନ୍‍କୁ ମିର୍‌ ଜାସେପେଲାଦାନ୍‍ ସିଏନ୍‍ଣ୍ତା ନିଜେଦିବଦାଦାନ୍‍ ସିଜିନିଦେର୍‌ ଇଜି ୱେଙ୍ଗିଁନିଦେର୍‌ ।
2CO 9:6 ମୋନ୍‍ତୁ ଇଡ୍‍ଦୁ, ଆମାଲୋକ୍‍ ଉଣା ୱିତୁ ୱିତ୍‍ନାନ୍, ୱାନ୍‌ ଉଣା ପାସି ଉଣ୍ତାକିନାନ୍, ଯେ ନାଣ୍ତ ୱିତୁ ୱିତିନାନ୍, ୱାନ୍‌ ନାଣ୍ତ ପାସି ଉଣ୍ତାକିନାନ୍ ।
2CO 9:7 ମାରି, ଯେ ଏଣ୍ତେସ୍ ଅଡ଼ବିତାମାନାନ୍, ୱାନ୍‌ ଆୟାୱାଜା ଦାନ କିପିନି ମାରି ଆୟା ଦାନ ଦୁକ୍‍ତି ମୋନ୍‌ତାନ୍‍ ଆଏଜି ମାରି କେବଲ ସିନି ନେଗେତ୍‌ ମାନାତ୍‌ ଇଜି ସିଲେ । ଇରିଙ୍ଗ୍‌ ୱେଡ଼ିକାଦାନ୍‍ ସିନି ଲୋକାଙ୍ଗ୍‍ ମାପୁରୁ ଲାଡ୍‍ କିନାନ୍ ।
2CO 9:8 ୱିଜୁ ରକମ୍‍ତି ଦାନତୁ ମିଙ୍ଗିଁ ପିରିସ୍‍କିଦେଙ୍ଗ୍ ମାପୁରୁ ଆଟ୍‍ନାନ୍‍; ଆବେଣାନ୍ ମିର୍‌ ୱିଜୁଦିନ୍ ନାଣ୍ତଦାନ୍ ବାସାଦେଙ୍ଗ୍‌ ଆଟିନିଦେର୍‌ ମାରି ୱିଜୁ ରକମ୍‍ତି ନେଗି ପାଣି ଉଣ୍ତିଙ୍ଗ୍‌ ନାଣ୍ତଦାନ୍ ସିଦେଙ୍ଗ୍‍ ଆଟିନିଦେର୍‌ ।
2CO 9:9 ଦର୍ମସାସ୍ତ୍ରଦୁ ରାସାତାମାନାତ୍‌, ସିଲିସାତି ଲୋକାଙ୍ଗ୍‌ ୱାନ୍‌ ନିଜେଦିଇଚ୍ଛାଦାନ୍‍ ଦାନ୍‍ କିନାନ୍; ୱାନି ଜିବନ୍‌ନୋନିକା ୱିଜୁଦିନ୍‌ ମାନାତ୍ ।
2CO 9:10 ଏମେ ୱିତୁ ୱିତୁୱିତିନିଲୋକାଙ୍ଗ୍‌ ମାପୁରୁ ୱିତ୍‍ନି ଉଣ୍ତିଙ୍ଗ୍‌ ୱିତୁ ମାରି ଉଣ୍ତେଙ୍ଗ୍‌ ଇଜି କାଦି ସିନାନ୍, ୱାନ୍‌ ମି ଦରକାର୍ ଇସାବ୍‍ତାନ୍ ୱିତୁ ଜଗେକିନାନ୍ ମାରି ମି ନିଜେଦି ବଦାଦି ପଲ୍‌ତିୱାଜା ମିର୍‌ ବା ନାଣ୍ତ ପାସି ଉଣ୍ତାକିନିଦେର୍‌ ।
2CO 9:11 ମିର୍‌ ୱିଜୁଦିନ୍‍ ଏଣ୍ତେସ୍ ନିଜେଦିବଦାଦାନ୍‍ ଦାନକିଦେଙ୍ଗ୍ ଆଟିନିଦେର୍‌, ଇୟାଉଣ୍ତିଙ୍ଗ୍‌ ମାପୁରୁ ମିଙ୍ଗିଁ ୱିଜୁ ବିସୟତାନ୍ ମାଜନ୍‍କିନାନ୍ ମାରି ମା ମାଡ଼ାନ୍‍କୁ ମିର୍‌ ପୋକିତିମାନି ଦାନ ଉଣ୍ତିଙ୍ଗ୍‌ ନାଣ୍ତଲୋକ୍‍ ମାପୁରୁଦିମାନୁ ମାଡ଼ିସି କିଜି ଦନ୍ୟବାଦ୍‌ ସିନାର୍ ।
2CO 9:12 ମି ଦାନସିନି ସେବାଦି ମାଡ଼ାନ୍ କେବଲ ଯେ ମାପୁରୁଦି ଲୋକାଦି ଅବାବ ଉଣା ଆନାତ୍‌, ଆକା ସିଲେ, ମାତର ଇୟାମାଡ଼ାନ୍ ମାପୁରୁଦି ଉଣ୍ତିଙ୍ଗ୍‌ ନାଣ୍ତଲୋକା ଜିବନ୍‌ତି ୱେଡ଼ିକା ନିଙ୍ଗିଁଜି ୱାନାତ୍ ।
2CO 9:13 ଇୟା ସେବାପାଣିଦାନ୍ କ୍ରିସ୍ତଦି ସୁସମାଚାର୍‍ତି ଉଣ୍ତିଙ୍ଗ୍‌ ମି ବିସ୍‍ବାସ୍ ଉଣ୍ତିଙ୍ଗ୍‌ ମାରି ୱିଜେରି ୱାଲେ ମିସାଜି ମିର୍‌ ଏମେ ନାଣ୍ତସିନିକା ତର୍‍ତିମାନିଦେର୍‍, ଆୟାଇଣ୍ତିଙ୍ଗ୍ ୱାର୍‌ ମାପୁରୁଦି ଦନ୍ୟବାଦ କିନାର୍ ।
2CO 9:14 ମି ଉଣ୍ତିଙ୍ଗ୍‌ ମାପୁରୁଦି ନାଣ୍ତ ଦୟା ଉଣ୍ତିଙ୍ଗ୍‌ ୱାର୍‌ ନାଣ୍ତ ୱେଡ଼ିକାଦାନ୍‌ ପାର୍‍ତନାଦୁ ମିଙ୍ଗିଁ ଏତ୍‍କିନାର୍ ।
2CO 9:15 ରାଦୁ, ମାପୁରୁଦି ଆର୍‍ଏସିତିମାନି ଦାନ୍‍ ଉଣ୍ତିଙ୍ଗ୍‌ ୱାନିଙ୍ଗ୍‌ ଦନ୍ୟବାଦ୍‌ କିନାଟ୍ !
2CO 10:1 ନାନୁ ପାଉଲ ମିଙ୍ଗିଁ ନା ଇୟା ନିଜେଦି ଅନୁରୋଦ ଏନ୍‌ ଏନ୍‌ ଇନାର୍‍, “ନାନୁ ମି ଲାକୁତୁ ମାରିଇୱାଲେ ନାଣ୍ତ ଦାର୍ମୁ ନି ତିର୍‌, ମାତର ଆକ ସରିଙ୍ଗାଁ ନାଣ୍ତଆଟ୍‍ୱା ।” କ୍ରିସ୍ତଦି ନମ୍ରତା ମାରି କାର୍ମୁ ସିଜି ନାନୁ ମିଙ୍ଗିଁ ଅନୁରୋଦ କିଜି ୱେରିସିନା ।
2CO 10:2 ମି ୱାଲେ ବେଟେଗାଟ୍ ଆତିୱାଲେ ନାଙ୍ଗି ଏଣ୍ତେସ୍ ସାସ୍ତି ବ୍ୟବହାର୍‌ କିଦେଙ୍ଗ୍ ଆଏତେ । ଇରିଙ୍ଗ୍‌ ଏମେକାର୍ ଅଡ଼ବିନାର୍ ଯେ, ମାପୁ ଦୁନିଆଦି ପାଣି ଇସାବ୍‍ତାନ୍‍ ବୁଲାନାଟ୍‍, ୱାରି ବିରୁଦ୍‌ତାନ୍ ଆଟ୍‍ୱା ମାଟା ଅନି ନାଣ୍ତ ସାସ୍‌ ନାଙ୍ଗି ମାନାତ୍ ।
2CO 10:3 ମାଡ୍‌ ଇୟା ଦୁନିଆଦୁ ବାସାକିଜିନିକା ସତ୍‌, ମାତର୍‌ ଇନି ଦୁନିଆଦି ଉଦେସ୍‍ ଇଡ୍‍ଜି ଜୁଦ୍ଧ କିଏଜିନିକା ।
2CO 10:4 ମାତର୍‌ ମାପୁରୁଦି ସାକ୍ତିଦି ସାସାପାତି ବ୍ୟବହାର୍‌ କିଜି ଆଟୁୱା ମୁଣ୍ତେଙ୍ଗ୍‍ୱିଜୁ ନାସ୍ଟୁକିଜିମାନିକା, ମିଚ୍‍ତି ଜୁକ୍ତିଦିମାଟେଙ୍ଗ୍‍ ମାପ୍‌ ନାସ୍ଟୁ କିନାପ୍‍
2CO 10:5 ମାପୁରୁଦି ବୁଦିଦିଙ୍ଗ୍ ବିରୁଦ୍‌କିନି ୱିଜେରେ ୱିଜୁ ବନ୍ଦନଦିଙ୍ଗ୍‌ ମାପୁ କୁତ୍‍ନାପ୍ ମାରି ଲୋକୁଦି ୱିଜୁ ଚିନ୍ତା ଆଡ୍‍ଗି ଆଜି କ୍ରିସ୍ତଦି ମାଟାମାନାନେ ।
2CO 10:6 ମିର୍‌ ପୁରାଦାନ୍‌ କ୍ରିସ୍ତଦି ତରିଟିକାନ୍‍ ମାନାନିକା ୱେନେକା ମି ମାଡ଼ାନ୍ ମାରି ଇନି ମାନାଇକା ତରିତିଙ୍ଗା, ତାନି ୱାଲେ ଦଣ୍ତ୍‍ ସିଦେଙ୍ଗ୍‌ ମାପୁ ତିଆରମାନାପ୍ ।
2CO 10:7 ମି ସାରିବେଡ଼ିତି ଇନିକା ୱିଜୁ ଗଟେଆଜିନାତ୍, ସୁଡ଼ୁଦୁ । ମି ମାଡ଼ାନ୍‍କୁ ଏନ୍‌ କ୍ରିସ୍ତଦି ୱେନେକା ମାନାର୍ ନୋ ? ଜଦି ମାନାର୍, ଆର୍‌ତିଙ୍ଗ୍‌ ୱାନ୍‌ ମାରି ଅର୍‍ସୁ ଚିନ୍ତାକିଜ ସୁଡ଼ିନ୍ । ଇରିଙ୍ଗ୍‌ ୱାନି ୱାଜା ମାଡ୍‌ ବା କ୍ରିସ୍ତଦି ୱେନେକା ବୁଲାନିକାର୍‍ ।
2CO 10:8 ମିଙ୍ଗିଁ ନାସ୍ଟୁ କିଦେଙ୍ଗ୍ ସିଲେ, ମାତର୍‌ ତିଆର୍‌ କିଦେଙ୍ଗ୍ ମାପୁରୁ ମାଙ୍ଗିଁ ଏମେ ଅଦିକାର୍‍ ସିତାମାନାନ୍‌, ଆୟାଉଣ୍ତିଙ୍ଗ୍‌ ଜଦି ନାନୁ ନାଣ୍ତ ଗର୍ବ କିତାମାନା, ଆର୍‌ତିଙ୍ଗ୍‌ ସେମାର୍ ଆଏ ।
2CO 10:9 ନା ସିଟିଦାନ୍ ମିଙ୍ଗିଁ ତିଲିସି କିନି ଉଣ୍ତିଙ୍ଗ୍ ଚେଷ୍ଟାକିଏ ନା ବଦା ସିଲେତ୍‌ ।
2CO 10:10 ଏନ୍‌ ଏନ୍‌ ଇନାର୍, “ପାଉଲଦି ସିଟିୱିଜୁ ନାଣ୍ତଡାଟ୍‍ ନି ଆଟ୍‍ୱା ମାତର ମା ଲାକୁତୁ ମାରିଇୱାଲେ ୱାନି ମେନ୍ଦଲ୍‌ ଦୁର୍ବଳ ତରିତାତ୍‍ ମାରି ୱାନି ବଲୁ ପାଣିସିଲିକା ୱାଜାଆତାତ୍ ।”
2CO 10:11 ଆୟା ଲୋକ୍‌ ବୁଜାନିକା ମାନାତ୍‌ ଜେ, ମାପୁ ଆକରାନ୍ ସିଟିଦୁ ଏମେକା ରାସ୍‌ନାପ୍, ଲାକ୍‍ତୁ ମାନିୱାଲେ ତାନିଙ୍ଗ୍‌ ପାଣିଦୁ କିନା ତର୍‍ନାପ୍ ।
2CO 10:12 ଏଣ୍ତେସ୍‍ବା ନିଜେଦିଙ୍ଗ୍ ପେରିକାନ୍ ଇଜି ଅଡ଼ବିନି ଲୋକାଦି ଦାଡ଼ି ଆନି ଉଣ୍ତିଙ୍ଗ୍‌ ବା ୱାରିୱାଲେ ନିଜେଙ୍ଗ୍‌ ତୁସ୍‍ତେଙ୍ଗ୍‍ ସାହାସ୍ ମାଦି ସିଲେତ୍‌ । ୱାର୍‌ ଏସ ବୁଦିସିଲିକାର୍‌, ଇରିଙ୍ଗ୍‌ ୱାର୍‌ ନିଜେଦିଙ୍ଗ୍‌ ନିଜେ ୱାଲେ ଇସାବ୍‌ କିନାର୍‌, ନିଜେ ଲେକିସ୍‍କିନି ବାଡିଗାଦାନ୍‍ ନିଜେନିଜେ ବିଚାର୍‌ କିଆୟ୍‍ଆନାର୍ ।
2CO 10:13 ମାତର ମା ଗର୍ବ ଉଣା । ମାପୁରୁ ମା ଉଣ୍ତିଙ୍ଗ୍‌ ଏମେ ପାଣିବାଡି ଟିକ୍ କିତାମାନାନ୍‌, ତାନି ମାଡ଼ାନ୍‍କୁ ମାପୁ ଗର୍ବ କିଜିନାପ୍ । ଆୟା ପାଣିବାଡିଦି ଲଇ ମିର୍‌ ମିସାତିମାନିଦେର୍‍ ।
2CO 10:14 ଆୟାଉଣ୍ତିଙ୍ଗ୍‌ ମାପୁ ଆଗିଡ଼ିରାନ୍ କ୍ରିସ୍ତଦି ସୁସମାଚାର୍‌ ମି ଲାକୁତୁ ଅସି ୱାନିବେଡ଼ାଦୁ ଇନିକା ଏରିଆ ଆତ୍‌ରେ ପାଣି କିଏପ୍‌ ।
2CO 10:15 ମାପୁରୁ ପାଣିକିତିମାନି ମା ପାଣିଜାଗାଦୁ ପାଣିକିନି ଆତ୍‌ରେ ଆଇୱାରି ପାଣିଦୁ ସୁଜୋଗ ଅସି ଗର୍ବ କିଏପ୍ । ମାତର୍‌ ମାପୁ ଆସା କିଜିନାପ୍ ଜେ, ମିର୍‌ ବିସ୍‍ବାସ୍‍ଦୁ ପିରିଜିମାନି ସାଙ୍ଗେ ସାଙ୍ଗେ ମିଙ୍ଗିଁ ମାଡ଼ାନ୍‍କୁ ମା ପାଣିୱିଜୁ ମାରି ୱେଙ୍ଗ୍‍ନାତ୍ । ମାତର ଇକା ମାପୁରୁ କିତିମାନି ନିୟମ୍‍ ମାଟା ଅମାନ୍ୟ କିମାଟ୍‌ ।
2CO 10:16 ଆକାଆତିଙ୍ଗ୍ ଆଇୱାରି ପାଣିଜାଗାଦୁ ଆଜିମାନି ପାଣି ଉଣ୍ତିଙ୍ଗ୍‌ ଗର୍ବ କିଏଜି ମି ଅଡ଼୍‍ବିନି ଆତ୍‌ରେ ଆଇଦେସ୍‍ତି ୱାରିଙ୍ଗ୍ ବା ମାଡ଼ୁ ସୁସମାଚାର୍‌ତି ପ୍ରଚାର୍‌ କିଦେଙ୍ଗ୍ ଆଟିନିକା ।
2CO 10:17 ବ୍ୟବସ୍ଥାଦୁ ରାସାତାମାନାତ୍‌, “ଏନ୍‌ ଗର୍ବ କିଦେଙ୍ଗ୍ ଇଚାକିନାନ୍, ୱାନ୍‌ ପ୍ରବୁଦି ପାଣି ଉଣ୍ତିଙ୍ଗ୍‌ ଗର୍ବ କିପିନ୍ ।”
2CO 10:18 ମାତର୍‌, ନିଜେଦିଙ୍ଗ୍‍ ପ୍ରସଂସା ମାଣାନ୍‌ ଏନ୍‌ ପରିକାଦୁ ଜିଣାଏନ୍‌, ପ୍ରବୁଦି ତରିନ୍‍ ନେଗିକାନ୍‍, ଆୟାକାନ୍‌ କେବଲ ୱାନି ଗ୍ରହଣଜଗ୍ୟ ।
2CO 11:1 ନାନ୍‌ ଅଡ଼୍‌ବିନା, ଇନି ବିସୟ୍‌ତିଙ୍ଗ୍ ଅଡ଼ପ୍‍ ବୁଲ୍‌ ଆତିଙ୍ଗ୍‌ବା ମିର୍‌ ନାଙ୍ଗିଁ ସାସ୍‌କିନିଦେର୍‌ ।
2CO 11:2 ମି ବିସୟ୍‍ତାନ୍‍ ଉନ୍‌ଡ୍ରି ସାକ୍ତିଦି ରିସାଆନିକା ନା ମୋନ୍‌ତୁ ମାନାତ୍ । ଇରିଙ୍ଗ୍‌ ମିର୍‌ ପବିତ୍ର ରିପାଆଇଲି ୱାଜା । ଅରେନ୍‌ନେମାତର୍‌ କାନ୍ୟାମୁରୁଲି କ୍ରିସ୍ତଦି ୱାଲେ ମି ମିସାକିନି ସିନି ଉଣ୍ତିଙ୍ଗ୍‌ ନାନ୍‌ ପାର୍‌ମାଣ୍‌ କିତାମାନା ।
2CO 11:3 ନାଙ୍ଗିଁ ତିଏଲ୍‍ୱାଜିନାତ୍‌, ସାରାସ୍‌ତି ସାଲାକିଦାନ୍‌ ହବା ଏଣ୍ତେସ୍‌ ବାୟାଆତି ୱାଜା ମିର୍‌ ଏଣ୍ତେସାତିଙ୍ଗ୍‌ କ୍ରିସ୍ତଦି ଉଣ୍ତିଙ୍ଗ୍‌ ମି ସାନ୍ତି ମାରି ପବିତ୍ର ବିସ୍‍ବାସ୍‌ତାନ୍‌ ୱେର୍‌ଏ ଆନିଦେର୍‌ ।
2CO 11:4 ଇରିଙ୍ଗ୍‌ ଏନ୍‌ ଜଦି ୱାଜି ମାଡୁ ପ୍ରଚାର୍‍ କିତିମାନି ଜିସୁଙ୍ଗୁଁ ଡ଼ିସ୍‍ସି ଆଇ ଇନି ଜିସୁଦି ମାଟା ପ୍ରଚାର୍‌ କିନାର୍‌ ବା ମିର୍‌ ପୟ୍‌ତିମାନି ପବିତ୍ର ଆତ୍ମାଦିଙ୍ଗ୍‌ ଡ଼ିସ୍‌ତିଙ୍ଗ୍‌ ଆଇ ଏମେ ଆତ୍ମାଦି ମାଟା ୱେର୍‌ନାର୍‌ ମାରି ମିର୍‌ ମାନାତିମାନି ସୁସମାଚାର୍‌ତିଙ୍ଗ୍‌ ଡ଼ିସ୍‌ସି ଆଇ ଇନି ସୁସମାଚାର୍‌ ପ୍ରଚାର୍‌ କିନାର୍‌, ମିର୍‌ ପୁରା ମାନାତିମାନିଦେର୍‌ ।
2CO 11:5 ମି ଆୟା ୱିଜେରିଙ୍ଗ୍‌ପେରି “ପ୍ରେରିତ ସିସୁରି” ମାଣ୍‌କୁ ନାନ୍‌ ଇନି ଗୁଣୁତୁ ଇସ୍ରିକିନ୍ଦା ଇଜି ଅଡ଼ବିଏ ।
2CO 11:6 ନାନ୍‌ ୱାରି ୱାଜା ସାଲାକିଦିକାନ୍‌ ଆଦେଙ୍ଗ୍‌ ଆଟ୍‍ଏ, ମାତର୍‌ ବୁଦିଦୁ ଉଣା ସିଲେ । ମିଙ୍ଗିଁ ଇୟା ମାଟା ମାପ୍‌ ୱିଜୁଦିନ୍‌ ମାରି ୱିଜୁ ଅସୁବିଦାଦୁ ୱେର୍‍ସି ୱାଜିନାପ୍‌ ।
2CO 11:7 ମାପୁରୁଦି ସୁସମାଚାର୍‌ ପ୍ରଚାର୍‌ କିତିୱାଲେ ନାନ୍‌ ମିମାଣୁକୁ ମୁସ୍‌କୁପେରାନି ଉଣ୍ତିଙ୍ଗ୍‌ ନାନ୍‌ ନିଜେଦିଙ୍ଗ୍‌ ଆଡ୍‍ଗି କିତାମାନା । ଇକା ଇନିକା ନା ବୁଲ୍ ?
2CO 11:8 ମି ଲୋଇ ପାଣି କିତିୱାଲେ ନାନ୍‌ ଆଇ ମଣ୍ତଲିଙ୍ଗାଁମାଣୁକୁ ଡାବୁଙ୍ଗ୍‌ ସାହାଜ୍ୟ ପୟ୍‌ତାମାନା । ୱେର୍‍ତେଙ୍ଗ୍‍ ସରିଙ୍ଗ୍‌, ମି ନେଗି ଉଣ୍ତିଙ୍ଗ୍‌ ନାନ୍‌ ୱାରିଙ୍ଗ୍ ଡଙ୍ଗାଁ କିତାମାନା ।
2CO 11:9 ମି ୱାଲେ ମାରିଇୱାଲେ ନା ଅବାବ୍‌ ପୁରାକିନି ଉଣ୍ତିଙ୍ଗ୍‌ ନାନୁ ଏଙ୍ଗ୍‌ବା ବଜୁତିଗ୍‌ଦେଙ୍ଗ୍‌ ସିଏ । ଇରିଙ୍ଗ୍‌ ମାସିଦୋନିଆଦାନ୍‌ ୱାତିମାନି ତଡ଼ାନ୍‌କୁ ନା ୱିଜୁ ଅବାବ୍‌ ପୁରା କିତାମାର୍ହାର୍‌ । ସର୍‌ଇଦିନ୍‌ତି ୱାଜା ବବିସ୍ୟତରେ ବା ନାନୁ ଏସ୍‌କାଙ୍ଗ୍‌ ମିଙ୍ଗିଁ ବଜୁତିଗ୍‌ଏ ।
2CO 11:10 ନା ଜିବନ୍‌ତୁ ମାନି କ୍ରିସ୍ତଦି ସତ୍‌ତିଙ୍ଗ୍‌ ସାକି ସିଜି ନାନୁ ପାର୍‌ମାଣ୍‌ କିଜି ୱେର୍‌ସିନା ଜେ, ଆକାୟା ରାଜିଦି ଆମା ରାଜିଆଙ୍ଗାଁ ନା ଇୟା ଗର୍ବଦିଙ୍ଗ୍ ଏନ୍‌ ନାସ୍ଟୁ କିଦେଙ୍ଗ୍ ଆଟ୍‌ଏନ୍ ।
2CO 11:11 ନାନ୍‌ ଇନିଦାନିଙ୍ଗ୍ ଇୟାୱାଜା ଇଜିନା ? ନାନୁ ଇନିକା ମିଙ୍ଗିଁ ଜିବନ୍‌ନୋଏ ? ମାପୁରୁ ନେସ୍‌ନାନ୍, ମିଙ୍ଗିଁ ନାନୁ ଏସଜିବନ୍‌ନୋନା ।
2CO 11:12 ମାତର୍‌ ଇଲେ ନାନୁ ଆମାକା କିଜିନା, ଆକା କିଜିମାନା । ଆର୍‌ତିଙ୍ଗ୍‌, ମା ୱାଜା ପାଣି କିଜିନିଦେର୍‌ ଇଜି ଆଇ “ପେରିତ୍‍ର୍‍” ଗର୍ବ କିନାର୍, ୱାର୍‌ ମାରି ଆକା କିଦେଙ୍ଗ୍ ଆଟ୍‍ଏର୍‍ ।
2CO 11:13 ୱାର୍‌ ସତ୍‌ତି ପ୍ରେରିତ ସିସୁର୍‍ ଆଏର୍‌, ୱାର୍‌ ୱିଜେରେ ଟକେକିନିକାର୍‌, ୱାର୍‌ ନିଜେଦି ପାଣି ବିସୟ୍‌ତାନ୍‌ ମିଚ୍ ଇନାର୍ ମାରି କ୍ରିସ୍ତଦି ପ୍ରେରିତ ସିସୁ ୱାଜା ତରାନି ଉଣ୍ତିଙ୍ଗ୍‌ ରୁପ୍‌ ବାଦ୍‌ଲେକିନାର୍ ।
2CO 11:14 ମାରି ଇକା କାବାଆନିକା ଇନିକା ସିଲେତ୍‌, ମାତର୍‌ ସୟତାନ୍ ବା ଜାୟ୍‌ତି ମୁସ୍‌କୁପୁର୍‌ତି ଦୁତ୍‍କା ୱାଜା ତରାନି ଉଣ୍ତିଙ୍ଗ୍‌ ରୁପ୍‌ ବାଦ୍‌ଲେକିଜିନାତ୍ ।
2CO 11:15 ଆଦେଙ୍ଗ୍‌ ୱାନି ଦାସ୍‍କୁ ଦାର୍ମୁଦି ସେବାକିନିୱାନି ରୁପ୍‌ ଆସ୍‌ତାର୍‌, କାବାଆନିକା ଇନିକା ସିଲେତ୍‌, ମାତର୍‌ ସାରାସାରିୱେନ୍‌କା ୱାର୍‌ କିତିମାନି ପାଣିଦି ଇସାବ୍‌ତାନ୍‌ ଦଣ୍ତ ୱାର୍‌ ପୟ୍‌ନାର୍ ।
2CO 11:16 ନାନ୍‌ ମାରିଡ଼େସି ଇଜିନା, ଏନ୍‌ ଏଣ୍ତେସ୍ ନାଙ୍ଗିଁ ବୁଦିସିଲିକାନ୍‌ ଇଜି ଅଡ଼୍‌ବିମାକିନ୍ । ଜଦି ଆୟାୱାଜା ଅଡ଼୍‌ବିନା, ଆର୍‌ତିଙ୍ଗ୍‌ ନାଙ୍ଗିଁ ବୁଦିସିଲିକାନ୍‌ ୱାଜା ମାନାଦୁ, ଆର୍‌ତିଙ୍ଗ୍‌ ନାନୁ ବା ଅଡ଼ପ୍‍ ଗର୍ବ କିଦେଙ୍ଗ୍‌ ଉନ୍‌ଡ୍ରି ସୁଜୋଗ୍‌ ପୟ୍‌ନା ।
2CO 11:17 ମାରିବା ଇଲେ ନାନ୍‌ ଆମାକା ଇଜିନା, ଆୟାଉଣ୍ତିଙ୍ଗ୍‌ ପ୍ରବୁ ନାଙ୍ଗିଁ ଆଦେସ୍‌ ସିଏନ୍‌ । ଇରିଙ୍ଗ୍‌ ଗର୍ବ କିନି ବିସୟତାନ୍ ନାନୁ ସତ୍‌ତାନ୍‌ ବୁଦିସିଲି ୱାଜା ୱାର୍‌ଗିଜିନା ।
2CO 11:18 ମାତର୍‌ ଦୁନିଆଦି ବିସୟ୍‌ତାନ୍ ନାଣ୍ତଲୋକ୍‌ ଏଣ୍ତେସ୍ ଗର୍ବ କିନାର୍, ନାନ୍‌ ବା ଆୟାୱାଜା କିଦେଙ୍ଗ୍ ଆଟ୍‍ନା ।
2CO 11:19 ମିର୍‌ ବୁଦିଆଜି ବା ୱେଡ଼ିକାଦାନ୍ ବୁଦିସିଲିୱାରିଙ୍ଗ୍‌ ସାସ୍‌ କିଜିନିଦେର୍‌ ।
2CO 11:20 ଜଦି ଏନ୍‌ ମି ମୁସ୍‌କୁ ଅଦିକାର୍‍ କିଜି ସାକର୍‌ କିତିଙ୍ଗ୍‌, ମି ୱିଜୁ ଦନସମ୍ପତି ଆସ୍‌ତିଙ୍ଗ୍‌, ମିଙ୍ଗିଁ ଉରିଦୁ ପକ୍‍ତିଙ୍ଗ୍‍, ମିଙ୍ଗିଁ କାଡ଼ିତିଙ୍ଗ୍‍, ଇୟାୱାଜା ଜେ ମି ବୁଗୁଲିଦୁ ସାପୁଡ଼ା ଡାକ୍‌ତିଙ୍ଗ୍ ବା ମିର୍‌ ଆକା ସାସ୍‌କିଜିନିଦେର୍‌ ।
2CO 11:21 ନାନ୍‌ ସେମାର୍‌ତି ୱାଲେ ମାନାଜିନା ଜେ, ଇୟାୱିଜୁ ବିସୟ୍‌ଦୁ ନାନୁ ନାଣ୍ତ ଦୁର୍ବଲମାନା । ମାତର୍‌ ଆଇ ଇନି ବିସୟ୍‌ତୁ ଏନ୍‌ ଜଦି ଗର୍ବ କିଦେଙ୍ଗ୍‌ ସାହାସ୍ କିନାନ୍, ଆର୍‌ତିଙ୍ଗ୍‌ ମୁର୍କୁ ୱାଜା ନାନୁ ଇଜିନା, ନା ଆୟାୱାଜା ସାହାସ୍‌ ମାନାତ୍ ।
2CO 11:22 ୱାର୍‌ ଇନିକା ଏବ୍ରିୟ ? ନାନ୍‌ ବା ଏବ୍ରିୟ । ୱାର୍‌ ଇନିକା ଇସ୍ରାଏଲିୟ ? ନାନୁ ବା ଇସ୍ରାଏଲିୟ । ୱାର୍‌ ଇନିକା ଅବ୍ରାହାମଦି କୁଟୁମ୍‌ ? ନାନ୍‌ ବା ଅବ୍ରାହାମଦି କୁଟୁମ୍‌ ।
2CO 11:23 ୱାର୍‌ ଇନିକା କ୍ରିସ୍ତଦି ସେବାକିନିକାର୍‌ ? ନାନ୍‌ ବାୟାୱାଜା ଇଜିନା, ନାନ୍‌ ୱାରିମାଣୁକୁ ୱିଜେରିଙ୍ଗ୍‌ପେରି ସେବାକିନିକିନ୍ଦା । ନାନ୍‌ ୱାରିମାଣୁକୁ ନାଣ୍ତ କାସ୍ଟୁପାଣି କିତାମାନା, ନାଣ୍ତ ଜଇଲ୍‌ତୁ ତେବାତାମାନା ମାରି ବାଡିଗାଦାନ୍‌ ଡାଟ୍‌ତିମାନିକା ସାସ୍‌ କିତାମାନା ମାରି ନାଣ୍ତ ଦେବେଙ୍ଗ୍‌ ସାନିମାନୁ ସାମାନ୍‌ କିତାମାନା ।
2CO 11:24 ନାନ୍‌ ଜିହୁଦିରିମାଣୁକୁ ପାସ୍‌ ଦେବେଙ୍ଗ୍‌ ତିରିସ୍‌ ନ ଦେବେଙ୍ଗ୍‌ ବାଡିଗାଦାନ୍‌ ମାଡ୍‌ ତିରାମାନା ।
2CO 11:25 ରୋମିୟରିମାଣୁକୁ ମୁନ୍‌ଡ୍ରି ଦେବେଙ୍ଗ୍‌ କର୍‌ଡା ମାଡ୍‌ ପୟ୍‌ତାମାନା । ଉନ୍‌ଡ୍ରି ଦେବେଙ୍ଗ୍‌ କାଲୁକୁ ମାଡ୍‌ ତିରାମାନା । ମୁନ୍‌ଡ୍ରି ଦେବେଙ୍ଗ୍‌ ଜାହାଜ୍‌ ଦୁର୍ଗଟଣାଦାନ୍‌ ସାମାନ୍‌ କିତାମାନା ମାରି ଉନ୍‌ଡ୍ରି ଦେବେଙ୍ଗ୍‌ ସାମ୍‌ଦୁରୁତି ଏରୁଦୁ କଡ଼େ ନାଲ୍‍ଗି ଗଣ୍ଟା ତେବାତାମାନା ।
2CO 11:26 ଗାଦି ଦେବେଙ୍ଗ୍‌ ସନି ୱାଲେ ଗାଡାଦି ସାନିମାନୁ, ଡଙ୍ଗାଁରି କିୟୁଦୁ, ଜିହୁଦି ମାରି ଅଣଜିହୁଦିରି କିୟୁଦୁ, ଗାଡ଼୍‌ତୁ ମାରି ସୁନ୍‌ସାନ୍‌ବାଡିଦୁ, ସାମ୍‌ଦୁରୁତୁ, ଟକେକିନି ସଙ୍ଗ୍‌ରି ମାଣ୍‌କୁ ସାନିମାନୁ ସାମ୍‍ନା କିତାମାନା ।
2CO 11:27 ବେସିନାଣ୍ତ ପାଣି କିତାମାନା ମାରି ଦୁକ୍ କାସ୍ଟୁ ବୋଗକିତାମାନାନ୍, ସୁଜୁଏଣ୍‌ଗା ମାରି ବାଙ୍ଗାଁ, ଏର୍‌କିଦାନ୍‌ ବେସିଦିନ୍ କାଟେ କିତାମାନା, ନେଗି କାଦି, ଆଙ୍ଗିଁ ମାରି ଡର୍‌ନିବାଡି ସିଲେତି ଉଣ୍ତିଙ୍ଗ୍‌ ବେସି କାସ୍ଟୁ ପୟ୍‌ତାମାନା ।
2CO 11:28 ଇୟାକା ୱିଜୁ ଡ଼ିସ୍‍ତିଙ୍ଗ୍‍ ୱିଜୁ ମଣ୍ତଲିଆଙ୍ଗାଁ ଉଣ୍ତିଙ୍ଗ୍‌ ନା ଦାଇତ୍‌ ୱିଜୁ ଦିନ୍ ପିଣ୍ତ୍‍ଜି ବୁଲାଜିନା ।
2CO 11:29 ଏନ୍‌ ଜଦି ଦୁର୍ବଳ ଆନାନ୍‌, ନାନୁ ବା ୱାନି ୱାଲେ ଦୁର୍ବଳ ଏତ୍‌କିନା । ଏନ୍‌ ପାପ୍‌ କିତିଙ୍ଗ୍‌, ନାନ୍‌ ଜିବନ୍‌ତୁ କାସ୍ଟୁ ଏତ୍‌କିନା ।
2CO 11:30 ଜଦି ଗର୍ବ କିଦେଙ୍ଗ୍‌ ଆନାତ୍‌, ଆର୍‌ତିଙ୍ଗ୍‌ ନା ଇୟାୱିଜୁ ଦୁର୍ବଲଦି ଉଣ୍ତିଙ୍ଗ୍‌ ନାଙ୍ଗିଁ ଗର୍ବ କିଦେଙ୍ଗ୍‌ ଆନାତ୍‌ ।
2CO 11:31 ପ୍ରବୁ ଜିସୁ କ୍ରିସ୍ତଦି ବୁବା ମାପୁରୁ ୱିଜୁଦିନ୍‌ ଦନ୍ୟ ଆପିତ୍‌ । ୱାନ୍‌ ନେସ୍‌ନାନ୍‌ ଜେ, ନାନ୍‌ ମିଚ୍ ୱେର୍‌ଏଜିନା ।
2CO 11:32 ନାନ୍‌ ଦାମାସ୍‍କସ୍‍ଦୁ ମାର୍‌ଇୱାଲେ ରାଜା ଆରେଟସ୍‌ଦି ଅଦିକାରତାନ୍‌ ସାସନ୍‌କିନିକାନ୍‌ ନାଙ୍ଗିଁ ଆସ୍‌ନି ଉଣ୍ତିଙ୍ଗ୍‌ ଗାଡ଼୍‌ତି ୱିଜୁତରିନ୍‌ ସନ୍ୟରିଙ୍ଗ୍ କାପ୍‌କିବିସ୍‌ କିତାମାର୍ହାନ୍‌ ।
2CO 11:33 ମାତର୍‌ ନାଙ୍ଗିଁ ସାଟ୍‌ନାଦି ସାହାଜ୍ୟଦାନ୍ ଜରକା ସାରି ଗାଡ଼୍‍ତି ଗଡା ଆତ୍‌ରେ ରେପ୍‌ତା ମାର୍‌ର୍ହାର୍‌ । ଇୟାୱାଜା ଇସାବ୍‌ତାନ୍‌ ନାନ୍‌ ଆୟା ସାସନ୍‌କିନିୱାନି ମାଣ୍‌କୁ ରକ୍‌ୟା ପୟ୍‌ତାମାର୍‌ଆ ।
2CO 12:1 ଇନିକା ଲାବ୍‌ ଆଏତିଙ୍ଗ୍‍ ବା ନାଙ୍ଗିଁ ଏଣ୍ତେସ୍‍ବା ଗର୍ବ କିଦେଙ୍ଗ୍‌ ଆନାତ୍‌ । ମାତର୍‌ ପ୍ରବୁ ନାଙ୍ଗି ଏମେ ୱିଜୁ ଦର୍ସନ ମାରି ତର୍‍ତା ସିତାମାନାନ୍‌, ଆୟାୱିଜୁ ଇଲେଇ ନାନୁ ଇନା ।
2CO 12:2 କ୍ରିସ୍ତଦିମାନୁ ମାନି ଅରେନ ଲୋକ୍‍ ସଉଦ ବାର୍ସେକ୍ ଆଗ୍‍ଡ଼ି ମୁନ୍‍ଡ୍ରିରିପୁର୍‍ତୁ ସର୍ହାମାର୍ହାନ୍‍ ୱାନ୍‌ ନିଜେଦି ମେନ୍ଦଲ୍‌ତାନ୍ ସର୍ହାମାର୍ହାନ୍‍ ବା ଲବ୍‍ ସୁଡ଼ୁତାମାର୍ହାନ୍, ନାନୁ ନେସେଏ, ଆକା କେବଲ ମାପୁରୁ ନେସ୍‌ନାନ୍ ।
2CO 12:3 ନାନୁ ନେସ୍‍ନା, ୱାନିଙ୍ଗ୍‌ ମୁସ୍‌କୁପୁର୍‌ତି ଡଡିଦୁ ଅଆୟ୍‍ଆତାମାର୍ହାତ୍‍ ୱାନ୍‌ ମେନ୍ଦଲ୍‌ତୁ ମାର୍ହାନ୍‍ ନୋ ମେନ୍ଧଲ୍‍ ଆତ୍‌ରେ ମାର୍ହାନ୍‌, ନାନୁ ନେସେଏ, କେବଲ ମାପୁରୁନେ ନେସ୍‍ନାନ୍‍ ।
2CO 12:4 ଆବେନ୍‌ ୱାନ୍‌ ମାଟାଦୁ ଇନ୍‍ଏଣ୍ତା ମାରି ବଲ୍‍ କିଦେଙ୍ଗ୍‌ ଆଟ୍‍ନିନାନି ମାଟା ୱେନ୍‌ଡ୍ରେଙ୍ଗ୍‌ ଆଟ୍‍ତାମାର୍ହାନ୍‍ ।
2CO 12:5 ଇୟା ଲୋକ୍‌ତି ଉଣ୍ତିଙ୍ଗ୍‌ ନାନୁ ଗର୍ବ କିନା । ମାତର୍‌ ନିଜେଦି ସାକ୍ତିସିଲିକା ଡ଼ିସ୍‍ତିଙ୍ଗ୍‌ ଆଇ ଇନି ବିସୟତୁ ନାନୁ ଗର୍ବ କିହେ ।
2CO 12:6 ଗର୍ବ କିନିକା ନା ମାଡ଼ାନ୍‍କୁ ମୁର୍କ ଆଏତ୍‌, ଇରିଙ୍ଗ୍‌ ନାନୁ ସତ୍‌ ମାଟା ଇନା । ମାତର୍‌ ନାନୁ ଗର୍ବ କିଏଜିନା, ଇରିଙ୍ଗ୍‌ ନାନୁ ବଦାକିନା, ଲୋକୁ ନାଙ୍ଗି ଏଣ୍ତେସ୍‌ ପାଣି କିନିକା ସୁଣାର୍‍ ବା ନା ମାଡ଼ାନ୍‌କୁ ଏଣ୍ତେସ୍ ମାଟା ୱେନାର୍, ୱାନି ମାଡ଼ାନ୍‌କୁ ନାଙ୍ଗିଁ ପେରିକାନ୍ ଇଜି ମନ୍‍ତୁ ଇନ୍‍ମାକିର୍‍ ।
2CO 12:7 ଇୟା ଇସ୍ରି ପୁନା ତରାନିକା ଲାବ୍‌କିଜି ନାନୁ ଏଣ୍ତେସ୍ ଆକାର୍‍ ଆଏ, ଇୟାଉଣ୍ତିଙ୍ଗ୍‌ ନା ମେନ୍ଦଲ୍‌ତୁ ଉଣ୍ତ୍ରି ନନି ନୋପି ସିଆୟ୍‍ ଆତାମାନାନ୍, ଇକା ନାଙ୍ଗି ଗର୍ବ ଆଇ ଉଣ୍ତିଙ୍ଗ୍‌ ସୟ୍‌ତାନ୍‌ଦି ଦୁତ୍ ୱାଜା ପାଣିକିନାମାନାତ୍ ।
2CO 12:8 ଇବେଟ୍‍କୁ ଆକ କିଦେଙ୍ଗ୍‌ ନାନୁ ପ୍ରବୁଦି ଲାକୁତୁ ମୁଜା ପାର୍‍ତନା ଅନୁରୋଦ କିତାମାନା ।
2CO 12:9 ମାତର୍‌ ୱାନ୍‌ ନାଙ୍ଗି ଇର୍ହାନ୍‌, “ନା ଦୟା ନି ଉଣ୍ତିଙ୍ଗ୍‌ ନାଣ୍ତ, ନିନୁ ସାକ୍ତିସିଲିୱାଲେ ନା ସାକ୍ତି ପୁରା ଦାନ୍‍ ତରାୟ୍‍ ଆନାତ୍‌ ।” ଆଦେଙ୍ଗ୍‌ କ୍ରିସ୍ତଦି ସାକ୍ତି ନା ମାନୁ ବାସାନି ଉଣ୍ତିଙ୍ଗ୍‌ ନାନୁ ନା ସାକ୍ତିସିଲି ଉଣ୍ତିଙ୍ଗ୍‌ ନାଣ୍ତ ଗର୍ବ କିନା ମାରି ୱେଡ଼ିକା ଆନା ।
2CO 12:10 ମାରି କ୍ରିସ୍ତଦି ଉଣ୍ତିଙ୍ଗ୍‌ ୱିଜୁ ରକମ୍‍ତି ସାକ୍ତିସିଲିକା, ଅପମାନ୍‍, କାଷ୍ଟୁ, ତାଡ଼ନା, ମାରି ସାନିଜିନିକା ନାନୁ ୱେଡ଼ିକାଦାନ୍‍ଜିନା, ଇରିଙ୍ଗ୍‌ ଏସ୍ତିୱାଲେ ନାନୁ ସାକିସିଲେ, ନାସ୍ତିୱାଲେ ନାନୁ ବପୁଦିକାନ୍‍ ।
2CO 12:11 ନାନୁ ବୁଦିସିଲି ୱାଜା ବ୍ୟବ୍‌ହାର୍‌ କିଜିନା । ଇକା କିନି ଉଣ୍ତିଙ୍ଗ୍‌ ମିର୍‌ ନାଙ୍ଗି ଜାସେପେଲା କିତିମାନିଦେର୍‌, ମାତର ନା ପ୍ରସଂସା କିନିକା ମି ଟିକ୍‌ ମାର୍ହାତ୍ । ନାନୁ ଇନିକା ଆଏତିଙ୍ଗ୍‌ ବା ମି ଆୟା ପେରି “ପ୍ରେରିତ ସିସୁରି” ମାଣ୍‌କୁ ଇନି ଗୁଣୁତାନ୍ ଇସ୍ରିକାନ୍‍ ଆଏ ।
2CO 12:12 ମି ଲୋଇ ସାସ୍‍ତାନ୍ ନାଣ୍ତ କାବାଆନି ପାଣି ପୁରାକିଜି ନାଣ୍ତ କାବାଆନି ବିସୟତାନ୍ ନାନୁ ଯେ ସତେନେ ଅରେନ୍ ପ୍ରେରିତ ସିସୁ, ତେନି ପାର୍‍ମାଣ୍‍ ସିତାମାନା ।
2CO 12:13 କେବଲ ଉଣ୍ତ୍ରି ବିସୟତୁ ଆଇ ମଣ୍ତଲିମାଣୁକୁ ମି ୱାଲେ ନାନ୍‌ ମିଙ୍ଗିଁ ଡାବୁଙ୍ଗ୍‌ ଲସ୍‌ନି ଉଣ୍ତିଙ୍ଗ୍‌ ବଜୁ ୱାଜା ଆଏ । ଜଦି ଇକା ମି ଉଣ୍ତିଙ୍ଗ୍‌ ନା ତାଗ୍‍ଇ ଜିବନ୍‌ତି ବ୍ୟବହାର୍, ଆର୍‌ତିଙ୍ଗ୍‌ ଇୟାଉଣ୍ତିଙ୍ଗ୍‌ ନାଙ୍ଗିଁ ଦୟାକିଜି କେମା କିଦୁ ।
2CO 12:14 ମୁଣ୍ତ୍ରି ଦେବେଙ୍ଗ୍‍ ଉଣ୍ତିଙ୍ଗ୍‌ ମି ଲାକୁତୁ ସନି ଉଣ୍ତିଙ୍ଗ୍‌ ନାନୁ ତିଆର୍ ଆଜିନା । ନାନୁ ମି ମାଡ଼ାନ୍‍କୁ ଇନି ବିସୟ ଦାବି କିଏ । ନାନୁ ମିଙ୍ଗିଁ ଇଛାକିନା । ମି ଦନସମ୍ଫତି ସିଲେ । ଇରିଙ୍ଗ୍‌ ବୁବା ୟାୟାରି ଉଣ୍ତିଙ୍ଗ୍‌ କଡ଼କକ୍‌ରା ଉଣ୍ତା କିଏର୍‌, ବୁବା ୟାୟା କଡ଼କକ୍ରାରି ଉଣ୍ତିଙ୍ଗ୍‌ ଦନ୍ ଉଣ୍ତାକିନିକା ମାନାତ୍‌ ।
2CO 12:15 ମିଙ୍ଗିଁ ସାହାଜ୍ୟ କିନି ଉଣ୍ତିଙ୍ଗ୍‌ ନା ୱିଜୁ, ଇୟାୱାଜାକି ନିଜେଦିଙ୍ଗ୍‌ ୱେଡ଼ିକାଦାନ୍‌ ସର୍‌ପେ କିନିସିନି ଉଣ୍ତିଙ୍ଗ୍‌ ନାନୁ ତିଆର୍ ଆତାମାନା । ନାନୁ ମିଙ୍ଗିଁ ନାଣ୍ତ ଜିବନ୍‌ନୋଜିନା ଇଜି ମିର୍‌ ଇନିକା ନାଙ୍ଗିଁ ନିସ ଉଣା ଜିବନ୍‍ନୋନିଦେର୍‍ ?
2CO 12:16 ନାନୁ ମି ମୁସ୍‌କୁ ବଜୁଦି ୱାଜା ଆଏ । ଇୟା ବଲୁ ମିର୍‌ ସତେନେ ମାନାନିଦେର୍‍ । ମାତର୍‌ ମି ମାଣ୍‌କୁ ଏନ୍‌ ୱେର୍‌ତେଙ୍ଗ୍‍ ଆଟ୍‍ନାନ୍‍, ନାନୁ ସାଲାକି ଆତିମାନିଙ୍ଗ୍‌ ମିଚ୍ ୱେରିସି ମିଙ୍ଗିଁ ଉରିଦୁ ପୋକ୍‍ତାମାନାନ୍‌ ।
2CO 12:17 ମି ଲାକ୍‌ତୁ ଏମେୱାରିଙ୍ଗ୍‌ ପୋକ୍‍ତାମାନା, ୱାରିମାଣୁକୁ ବା ଏମାଣୁକୁ ନାନୁ ଇନିକା ମିମାଣୁକୁ ଇନି ସୁବିଦା ରେଲିଜିଅତାମାନା ?
2CO 12:18 ମି ଲାକ୍‌ତୁ ସନିଉଣ୍ତିଙ୍ଗ୍ ନାନୁ ତିତସଦିଙ୍ଗ୍‌ ଅନୁରୋଦ କିତା ମାରି ୱାନିୱାଲେ ଆଇ ତଡ଼ାନ୍‍କାଙ୍ଗ୍‌ ପୋକ୍‍ତା । ତିତସ ମି ଲୋଇରାନ୍‌ ଇନି ସୁବିଦା ପୟ୍‍ତାମାନାନ୍‍ ଇଜି ଏନ୍‌ ଇନ୍‌ଡ୍ରେଙ୍ଗ୍‌ ଆଟ୍‍ନାନ୍ ? ୱାନ୍‌ ମାରି ନାନୁ ଇନିକା ସାମାନ୍‌ ପାଣି ଅସି ମି ୱାଲେ ସାମାନ୍‌ ବ୍ୟବହାର୍ କିଏ ନୋ ?
2CO 12:19 ଏଣ୍ତେସାତିଙ୍ଗ୍‌ ମିର୍‌ ଅଡ଼୍‍ବିଜିନିଦେର୍‍ ଜେ, ଇୟାସାନ୍ଦି ମାପୁ କେବଲ ନିଜେଦିକା ନର୍‌ଜି ସିଜି ୱାତାମାନାପ୍‌ ନୋ ! ମାପୁରୁଦି ଆଗ୍‍ଡ଼ି କ୍ରିସ୍ତ ମାଙ୍ଗିଁ ଇର୍‍ଇ ୱାଜା ମାପ୍‌ ମିଙ୍ଗିଁ ଇଜିନାପ୍‍ । ଲାଡ୍‍ତି ତଡ଼୍‍କୁ, ମାପୁ ଏମେକା କିଜିନାପ୍ ଆକା କେବଲ ମି ନେଗି ଉଣ୍ତିଙ୍ଗ୍‌ କିଜିନାପ୍ ।
2CO 12:20 ଇରିଙ୍ଗ୍‌ ନାନୁ ତିଏଲ୍‍ ୱାଜିନାତ୍‌, ନାନୁ ମି ଲାକ୍‌ତୁ ୱାଜି ମିଙ୍ଗିଁ ଏଣ୍ତେସ୍ ସୁଡ଼ୁଦେଙ୍ଗ୍‌ ବଦା କିଜିନା, ଆୟାୱାଜା ସୁଡ଼ୁଦେଙ୍ଗ୍‌ ଆଟ୍‍ଏ ମାରି ମିର୍‌ ନା ଆମା ରୁପ୍‌ ସୁଡ଼ୁଦେଙ୍ଗ୍‌ ବଦା କିଇଜିନିଦେର୍‌, ଆର୍‌ତିଙ୍ଗ୍‌ ଆକା ସୁଡ଼ୁଦେଙ୍ଗ୍‌ ଆଟ୍‌ନିଦେର୍‌ । ଆର୍‌ତିଙ୍ଗ୍‌ ଆବେନ୍‌ ସଲ୍‌ସି ନାନୁ ୱିଜୁ ରକମ୍‍ତି ଜାଟି, ଆକାର୍‍, ରିସା, ଗର୍ବ କିନିକା, ସୁରି, ଗର୍ବ, ମାରି ସାନ୍ତିସିଲିକା ସୁଡ଼ୁଦେଙ୍ଗ୍‌ ଆଟ୍‍ନା ।
2CO 12:21 ଇଲେଇ ମି ଲାକ୍‌ତୁ ସନିୱାଲେ ଆୟାୱାଜା ମାପୁରୁ ମି ଆଗ୍‍ଡ଼ି ନାଙ୍ଗିଁ ସେମାର୍‍ କିନାନ୍, ଏମେକାର୍ ଆଗ୍‍ଡ଼ିରାନ୍ ପାପ କିତାମାନାର୍‌, ମାତର୍‌ ୱାରି ତାଗ୍‍ଇ ପାଣିୱିଜୁ, ଲାଲାୟ୍‍ ମାରି ଦାରିପାଣି ଉଣ୍ତିଙ୍ଗ୍‌ ମନ୍‍ବାଦ୍‍ଲେ କିଏର୍‌, ଇୟାୱାଜା ନାଣ୍ତଲୋକ୍‌ ଉଣ୍ତିଙ୍ଗ୍‌ ନାଙ୍ଗିଁ ଆଡ଼୍‍ବାଦେଙ୍ଗ୍ ଆନାତ୍‌ ।
2CO 13:1 ଇୟାତାନିଙ୍ଗ୍‍ ମିସାକିଜି ମୁଜା ନାନୁ ମି ଲାକୁତୁ ୱାଜିନା । ଦର୍ମସାସ୍ତ୍ରଦି ଇସାବ୍‍ତାନ୍‍, ରିଏର୍‌ ସିଲିତିଙ୍ଗ୍‌ ମୁଏର୍‌ରି ସାକିଦି ପାର୍‍ମାଣ୍‍ତାନ୍‍ ୱିଜୁ ମାଟା ପୁରା ଆନାତ୍‌ ।
2CO 13:2 ପୁର୍ବେ ପାପ୍‌ କିତିମାନି ଲୋକାଙ୍ଗ୍‌ ମାରି ଆଇ ୱିଜେରିଙ୍ଗ୍ ନାନୁ ରିଜା ଆବେନ୍‌ ସୋଲ୍‌ସି ଇର୍ହାର୍‌ ମାରି ଇଲେଇ ଆକମାନିଜି ବା ଇଜିନା ଯେ, ନାନୁ ଇଲେଇ ସରିଙ୍ଗ୍‌, ଏନ୍‌ ଦଣ୍ତଦାନ୍ ଡ଼ିସାଇ ଆଦେଙ୍ଗ୍‌ ଆଟ୍‌ଏର୍‍ ।
2CO 13:3 କ୍ରିସ୍ତ ଜେ ନା ମାଣ୍‌କୁ ସିଜି ୱାର୍‌ଗିଜିନାନ୍‍, ଇୟା ବିସୟ୍‌ତାନ୍‌ ମିର୍‌ ଅଡ଼୍‌ବିନିମାନି ୱିଜୁ ପାର୍‌ମାଣ୍‌ ପୋଇନିଦେର୍‌ । ମି ଉଣ୍ତିଙ୍ଗ୍‌ ୱାନ୍‌ ଏସାଙ୍ଗ୍‍ବା ଦୁର୍ବଳ ଆଏନ୍‍ । ମାତର୍‌ ମି ଲାକ୍‌ତୁ ୱାନ୍‌ ୱାନି ସାକ୍ତିଦି ପରିଚୟ ସିତାମାନାନ୍‌ ।
2CO 13:4 ୱାନ୍‌ ଦୁର୍ବଳ ଆଜି କ୍ରୁସଦୁ ସାତିଙ୍ଗ୍‌ବା ମାପୁରୁଦି ସାକ୍ତିଦାନ୍ ଇଲେଇ ଜିବନ୍‌ ମାନାନ୍ । ୱାନିୱାଲେ ମିସାଜି ମାପୁ ବା ସାକ୍ତିସିଲି ୱାଜା ଆତାମାନାପ୍‌, ମାତର୍‌ ମି ୱାଲେ ମା ମିସାନିମାନୁ ମାପୁରୁଦି ସାକ୍ତିଦି ମିସାଜି କ୍ରିସ୍ତଦି ୱାଲେ ମାଡ୍‌ ଜିବନ୍‌ ଆନିକା ।
2CO 13:5 ମିର୍‌ ବିସ୍‍ବାସ୍‍ତୁ ମାନିଦେର୍‌ ନୋ ସିଲେ, ନିଜେଦି ପରିକା ନି ବିଚାର୍‍ କିଜି ସୁଡ଼ୁଦୁ । ମି ଜିବନ୍‌ତୁ ଜିସୁ କ୍ରିସ୍ତ ବାସାକିଜିନାନ୍, ଇୟା ବଲୁ ଇନିକା ନେସିଇଦେର୍‌ ନୋ, ଇବେନୁ ମିର୍‌ ଅର୍‌ସେ ଆରାତି ଆତିମାନିଦେର୍‌ ?
2CO 13:6 ଆସା କିଜିନା, ମିର୍‌ ବୁଜାଦେଙ୍ଗ୍ ଆଟ୍‌ନିଦେର୍‌ ଜେ, ମାଡୁ ଆରାଏପ୍‌ ।
2CO 13:7 ମିର୍‌ ଇନି ଅନ୍ୟାୟପାଣିଦୁ ତେବାମାଟ୍‍, ଇୟାଉଣ୍ତିଙ୍ଗ୍‌ ମାପୁ ମାପୁରୁଦି ଲାକ୍‌ତୁ ପାର୍‍ତାନା କିଜିନାପ୍ । ମାପୁ ଜେ ଇବେନୁ ପରିକାଦୁ ଜିଣାତାମାନାପ୍, ଇକା ମାପୁ ତର୍‌ତେଙ୍ଗ୍ ସଲ୍‌ଏପ୍, ମାତର୍‌ ମାପୁ ଆରାତିମାରିଙ୍ଗ୍ ବା ମିର୍‌ ଏଣ୍ତେସ୍‌ ନେଗି ପାଣି କିନିଦେର୍‌, ଇୟାଉଣ୍ତିଙ୍ଗ୍‌ ପାର୍‍ତାନା କିଜିନାପ୍‍ ।
2CO 13:8 ସତ୍‍ତିଙ୍ଗ୍‍ ବିରୁଦ୍‍ କିଦେଙ୍ଗ୍ ମା ଅଦିକାର୍‌ ସିଲେତ୍‌; ମାପୁ କେବଲ ସତ୍‍ତି ଉଣ୍ତିଙ୍ଗ୍‌ ପାଣି କିଦେଙ୍ଗ୍‌ ଆଟ୍‌ନାପ୍ ।
2CO 13:9 ମାପୁ ଦୁର୍ବଳ ମାର୍‌ଇୱାଲେ ମିର୍‌ ସାକ୍ତିମାନିଙ୍ଗ୍‍ ମାପୁ ୱେଡ଼ିକା । ଆୟାଉଣ୍ତିଙ୍ଗ୍‌ ମି ନେକ୍‌କାଆନି ଉଣ୍ତିଙ୍ଗ୍‌ ମାପୁ ପାର୍‍ତାନା କିଜିନାପ୍ ।
2CO 13:10 ଆୟାଉଣ୍ତିଙ୍ଗ୍‌ ଆକ ମାନ୍‌ଜି ନାନୁ ମି ଲାକ୍‌ତୁ ଇୟା ସିଟି ରାସ୍‍ସିନା, ଆବେଣାନ୍‍ ମି ଲାକ୍‌ତୁ ଇଗାୱାନି ବେଡ଼ାଦୁ ଏଣ୍ତେସ୍ ଆଟ୍‍ୱାଦି ୱାଜା ନାଙ୍ଗିଁ ଅଦିକାର୍‌ କିଦେଙ୍ଗ୍ ପଡ଼ାଏତ୍ । ଇରିଙ୍ଗ୍‌ ମିଙ୍ଗିଁ ରୁକୁତେଙ୍ଗ୍ ସିଲେ, ମାତର୍‌ ତିଆର୍‌ କିଦେଙ୍ଗ୍ ମାପୁରୁ ନାଙ୍ଗିଁ ଅଦିକାର୍‌ ସିତାମାନାନ୍‌ ।
2CO 13:11 ତଡ଼ାନ୍‍କୁ ନି ତାଙ୍ଗିଁକ୍‍ ନା ସାରାସାରି ମାଟା ଇକା ନିଜେଦିଙ୍ଗ୍ ଟିକ୍‍ କିଦୁ, ନା ମାଟା ଆସ୍‌ତୁ, ୱିଜେରେ ଉନ୍‌ଡ୍ରେମାନୁ ଆଦୁ ମାରି ସାନ୍ତିଦାନ୍ ତେବାଦୁ । ଜିବନ୍‌ନୋନିକା ମାରି ସାନ୍ତିଦି ମାପୁରୁ ମି ୱାଲେ ତେବାପିନ୍‍ ।
2CO 13:12 ପବିତ୍ର ଚୁମାଦାନ୍‌ ନିଜେନିଜେଦିଙ୍ଗ୍‌ ମାଡ଼ିସ୍‍ କିଦୁ । ୱିଜେରେ ମାପୁରୁଦିଲୋକ୍‍ ମିଙ୍ଗିଁ ମାଡ଼ିସ୍‍ କିଜିନାର୍‍ ।
2CO 13:13 ପ୍ରବୁ ଜିସୁ କ୍ରିସ୍ତଦି ଦୟା, ମାପୁରୁଦି ଜିବନ୍‌ନୋନିକା ମାରି ପବିତ୍ରଆତ୍ମାଦି ସାହାଜ୍ୟ ମି ୱିଜେରି ୱାଲେ ମାନିତ୍‍ ।
GAL 1:1 ନାନ୍‌ ପେରିତ ସିସୁ ପାଉଲ ଆଦେଙ୍ଗ୍‍ଁ ଇଜି ନାନ୍ ଲୋକାମାଣାନ୍‍ ବା ଲୋକା ବଦାଦାନ୍ କୁକାୟ୍‍ ଆଏ, ଇୟା କୁକ୍‍ନିକା, ନିଜେ ମାପୁରୁ ମାଣାନ୍‍ ମାରି ୱାନ୍‍ ଆମାୱାନିଙ୍ଗ୍‍ଁ ସାତିମାଣାନ୍‍ ନିକ୍‍ତାମାନାନ୍‍, ଆୟା ଜିସୁ କ୍ରିସ୍ତ ମାଣାନ୍‍ ପୟ୍‍ତାମାନାପ୍‍ ।
GAL 1:2 ମାରି ନା ୱାଲେ ମାନି ବିସ୍‌ବାସ୍‌ତି ତଡ଼ାନ୍‍କୁ ନି ତାଙ୍ଗିକ୍ ୱିଜେରେ ଗାଲାତିଆ ମଣ୍ତଲିଆଙ୍ଗ୍‍ଁ ମାଡ଼ିସିକିଜିନାପ୍ ।
GAL 1:3 ମା ବୁବା ମାପୁରୁ ନି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‍ ।
GAL 1:4 ଇଲେଇତି ଇୟା ପାପ୍‌ ଦୁନିଆଦାନ୍‍ ମାଙ୍ଗିଁ ରକିୟା କିଦେଙ୍ଗ୍‍ଁ ଇଜି, ମା ବୁବା ମାପୁରୁଦି ବଦା ମାନାଜି, କ୍ରିସ୍ତ ମା ପାପ୍‍ ଉଣ୍ତିଙ୍ଗ୍‍ଁ ନିଜେଦିଙ୍ଗ୍‍ଁ ସର୍ପେ କିତାନ୍‍ ।
GAL 1:5 ଜୁଗ୍‌ ଜୁଗ୍‍ ମାପୁରୁ ଗୌରବ୍‍ ଆପିନ୍‌ । ଆମେନ୍‍ ।
GAL 1:6 କ୍ରିସ୍ତଦି ଦୟାଦାନ୍‍ ଜେ ମିଙ୍ଗିଁ କୁକ୍‍ତାମାର୍ହାନ୍‍, ନିସା ବେଗି ମିର୍‍ ୱାନିଙ୍ଗ୍‍ଁ ଡ଼ିସ୍‍ସି ଆଇ ଉନ୍‍ଣ୍ତ୍ରି ସୁସମାଚାର୍‍ ତରିନ୍‍ ମୋନ୍‌ଦିୟାନ୍‌ ସିଜିନିଦେର୍‍, ଆୟାଉଣ୍ତିଙ୍ଗ୍‌ ନାନ୍‍ କାବା ଆଜିନା ।
GAL 1:7 ସତ୍‍ତାନ୍‍ “ଆଇ ଇନି ସୁସମାଚାର୍‍” ସିଲେତ୍‍ । ମାତର୍‍ ନାନ୍‍ ଇୟାୱାଜା ଇଜିନା, ଇରିଙ୍ଗ୍‍ଁ ଏସଲୋକ୍‍ କ୍ରିସ୍ତଦି ସୁସମାଚାର୍‍ତିଙ୍ଗ୍‍ଁ ଆଇ ରୁପ୍‍ ସିଜି, ମିଙ୍ଗିଁ ବେମ୍ରି କିଦେଙ୍ଗ୍‍ଁ ସେସ୍ଟା କିଜିନାର୍‍ ।
GAL 1:8 ମାତର୍‍ ମାପ୍‍ ମି ଲାକ୍‍ତୁ ଏମେ ସୁସମାଚାର୍‍ ପ୍ରଚାର୍‍ ସିତାମାର୍ହାପ୍‍, ଜଦି ତାନିମାଣାନ୍‍ ଆଇ ଉନ୍‍ଣ୍ତ୍ରି ସୁସମାଚାର୍‌ ମାପ୍‍ ନିଜେ ମାରି ମୁସ୍‌କୁପୁର୍‍ତି ଦୁତ୍‍ ପ୍ରଚାର୍‍ କିନାତ୍‌, ଆର୍‌ତିଙ୍ଗ୍‌ ୱାନ୍‍ ଅବିସାପ୍‌ ଆପିନ୍‍ ।
GAL 1:9 ମାପ୍‍ ପୁର୍ବେ ଇକା ଇର୍ହାମାର୍ହାପ୍‍ ମାରି ଇଲେଇ ନାନ୍‍ ମାରିଡ଼େସି ଇଜିନା, ମିର୍‍ ଏମେ ସୁସମାଚାର୍‍ ମାନାତି ମାନିଦେର୍‍, ତାନିମାଣାନ୍‍ ଆଇ ଇନି ସୁସମାଚାର୍‌ ଜଦି ଏନ୍‍ ପ୍ରଚାର୍‍ କିନାନ୍‍, ଆର୍‍ତିଙ୍ଗ୍‍ଁ ୱାନ୍‍ ଅବିସାପ୍‌ ଆପିନ୍‌ ।
GAL 1:10 ଇକା ୱେନ୍‍ଜି ମିର୍‍ ଇନିକା ଅଡ଼୍‍ବିଜିନିଦେର୍‍ ଜେ, ନାନ୍‍ ଲୋକ୍‍ ସାକା ଆନିକା ଲାବ୍‍ କିନି ଉଣ୍ତିଙ୍ଗ୍‍ଁ ସେସ୍ଟା କିଜିନା ? ସିଲେ, ଏସାଙ୍ଗ୍‍ଁ ସିଲେ । ନାନୁ ବଦାକିନା କେବଲ ମାପୁରୁଦି ସାକା । ନାନୁ ଇନିକା ୱେଙ୍ଗ୍‍ଁଦେଙ୍ଗ୍‍ଁ ଆନି ଉଣ୍ତିଙ୍ଗ୍‍ଁ ବଦା କିଜିନା ? ନାନୁ ଜଦି ଇୟାସାନ୍ଦି ୱେଙ୍ଗ୍ଁଦେଙ୍ଗ୍‍ଁ ଇଜି ସେସ୍ଟା କିତାମାନ୍ଦି, ଆର୍‍ତିଙ୍ଗ୍‍ଁ ନାନୁ ନେର୍‍ କ୍ରିସ୍ତଦି ସେବାକିନିକିନ୍ଦା ଆଏତାମାନ୍ଦି ।
GAL 1:11 ଏ ତଡ଼ାନ୍‍କୁ ତାଙ୍ଗିଁକି, ମିଙ୍ଗିଁ ୱେର୍‍ସିନା ଜେ, ନାନୁ ଏମେ ସୁସମାଚାର୍‌ ପ୍ରଚାର୍‍ କିନା, ଆକା ଲୋକା ମାଣାନ୍‍ ରେଏତ୍‍ ।
GAL 1:12 ନାନୁ ଇନି ଲୋକାମାଣାନ୍‍ ଆକା ପୟ୍‍ଏ, ମାରି ଏନ୍‍ ନାଙ୍ଗିଁ ଆକା ଅଜା କିଏନ୍‍ । ନିଜେ ଜିସୁ କ୍ରିସ୍ତ ଆକା ନା ଲାକ୍‍ତୁ ତର୍‍ତାମାନାନ୍‍ ।
GAL 1:13 ଜିହୁଦି ଦାର୍ମୁ ଉଣ୍ତିଙ୍ଗ୍‍ଁ ୱେଡ଼ିକାମାନି ସମୟ୍‍ତୁ ନାନ୍‍ ଏଣ୍ତେସ୍‍ ଜିବନ୍‍ ଜିଜିମାର୍ହା, ଏଣ୍ତେସ୍‍ ତାଗ୍‍ଏଣ୍ତା ମାପୁରୁଦି ସେବା କିନି ମଣ୍ତଲିଦିଙ୍ଗ୍‍ଁ ତାଡ଼ନା କିଜିମାର୍ହା ମାରି ତାନିଙ୍ଗ୍‍ଁ ଦଂସ କିନି ଉଣ୍ତିଙ୍ଗ୍‌ ଏଣ୍ତେସ୍‍ ବେଗିଆନାତ୍‍ ସେସ୍ଟା କିଜିମାର୍ହା, ଇୟାୱିଜୁ ବିସୟ୍‍ ମିଙ୍ଗିଁ ଜାଣେ କିଆୟ୍‍ଆତା ମାନାତ୍‍ ।
GAL 1:14 ଜିହୁଦି ଦାର୍ମୁ ମାନାନିମାନୁ ସାମାନ୍‌ତାନ୍‍ ଜିହୁଦି ଲୋକାମାନୁ ବା ନାନୁ ଆଗ୍‍ଡ଼ିମାର୍ହା ମାରି ମା ଡକ୍ରାଦାଦାରି ରିତିନିତି ଉଣ୍ତିଙ୍ଗ୍‍ଁ ନାଣ୍ତ ମାନାଜିମାର୍ହା ।
GAL 1:15 ମାତର୍‍ ମାପୁରୁ ୱାନି ଦୟାଦାନ୍‍ ନା ଜନମ୍‍ ଆନି ଆଗ୍‍ଡ଼ିରାନ୍‍ ନାଙ୍ଗିଁ ଆସ୍‍କିତାମାର୍ହାନ୍‍ ମାରି ୱାନି ସେବା କିନି ଉଣ୍ତିଙ୍ଗ୍‍ଁ ନାଙ୍ଗିଁ କୁକ୍‍ତାମାର୍ହାନ୍‍ ।
GAL 1:16 ମାରି ଅଣଜିହୁଦି ଲୋକା ଲାକ୍‍ତୁ ସୁସମାଚାର୍‌ ପ୍ରଚାର୍‍ କିନି ଉଣ୍ତିଙ୍ଗ୍‍ଁ ଏସ୍ତିୱାଲେ ନା ଲାକ୍‍ତୁ ୱାନ୍‍ ୱାନି ମାରିସିଙ୍ଗ୍‍ ତର୍‍ତାନ୍‍, ଇୟା ବିସୟ୍‌ତାନ୍‌ ସିକିୟା ସିଦେଙ୍ଗ୍‌ ଇଜି ନାନ୍ ଆଇ ଏ ଲାକ୍‍ତୁ ସଲ୍‍ଏ ମାର୍ହା ।
GAL 1:17 ଇୟାୱାଜାକି ନା ଆଗ୍‍ଡ଼ିରାନ୍‍ ଏମେକାର୍‍ ପେରିତ ସିସୁ ଆତାମାର୍ହାର୍‍, ୱାରି ୱାଲେ ବା ବେଟ୍‌ବୁଡ଼ାଦେଙ୍ଗ୍‍ଁ ଇଜି ଜିରୁସାଲାମ୍‍ତୁ ସଲ୍‍ଏମାର୍ହା । ମାତର୍‍ ନାନୁ ଦାପ୍ରେ ଦାପ୍ରେ ଆରବ ଦେସ୍‍ତୁ ସର୍ହାମାର୍ହା ମାରି ୱେନ୍‍କା ଦାମାସ୍‍କସ୍‍ତୁ ଡ଼େସି ୱାତା ।
GAL 1:18 ଇୟାତେନି ତିନ୍‍ ବାର୍ସେକ୍‍ ୱେନ୍‍କା ନାନୁ ପିତର୍‍ତି ୱାଲେ ମିସାଦେଙ୍ଗ୍‍ଁ ଇଜି ଜିରୁସାଲାମ୍‍ତୁ ସର୍ହା ମାରି ୱାନି ୱାଲେ ରୁଣ୍ତି ୱାରେଙ୍ଗ୍‌ ତେବାତା ମାର୍‌ଆ ।
GAL 1:19 ପ୍ରବୁଦି ତଡ଼ାନ୍‍ ଜାକୁବଙ୍ଗ୍‍ଁ ଡ଼ିସ୍‍ତିଙ୍ଗ୍‍ଁ ନା ଆଇ ଏମେ ପେରିତ ସିସୁରି ୱାଲେ ମିସାଏତା ମାର୍ହା ।
GAL 1:20 ନାନୁ ଆମାକା ରାସ୍‍ସିନା, ଆକା ସତ୍‍; ମାପୁରୁ ନେସ୍‍ନାନ୍‍ ନାନୁ ମିସ୍‍ ଇନ୍‍ଏ !
GAL 1:21 ତେନିୱେନ୍‍କା ନାନୁ ସିରିଆ ନି ସିଲିସିଆଦି ନାଣ୍ତ ବାଡିଆଙ୍ଗ୍‍ଁ ସର୍ହାମାର୍ହା ।
GAL 1:22 ଆୟା ସମୟ୍‍ତୁ ଜିହୁଦା ଦେସ୍‌ତୁ ମାନି କ୍ରିସ୍ତ ମଣ୍ତଲିଦି ବିସ୍‍ବାସିର୍‍ ନାଙ୍ଗିଁ ନେଗେନ୍‍ତାନ୍‌ ନେସ୍‍ଏର୍‌ ମାର୍‌ର୍ହାର୍‍ ।
GAL 1:23 ନା ବିସୟ୍‌ତାନ୍‌ ଆଇକାର୍‌ ଆମାକା ଇର୍ହାମାର୍ହାର୍‍, ୱାର୍‍ କେବଲ ନାସନେ ନେସ୍‍ତାମାର୍ହାର୍‍ । ଆଇଲୋକାମାଣ୍‍କୁ ୱାର୍‍ ୱେର୍‍ଆମାର୍ହାର୍‍, “ଆମା ଲୋକ୍‍ ମାଙ୍ଗିଁ ତାଡ଼ନା କିଜିମାର୍ହାନ୍‍ ମାରି ଅର୍‍ଲେନ୍‍ ମା ବିସ୍‌ବାସ୍‌ତିଙ୍ଗ୍‌ ଦଂସ କିଦେଙ୍ଗ୍‍ଁ ସେସ୍ଟା କିଜିମାର୍ହାନ୍‍, ଇଲେଇ ୱାନ୍‍ ଆୟା ସୁସମାଚାର୍‌ତିଙ୍ଗ୍‌ ପ୍ରଚାର୍‍ କିଜିନାନ୍‍ !”
GAL 1:24 ଆୟାଉଣ୍ତିଙ୍ଗ୍‌ ୱାର୍‍ ନା ଉଣ୍ତିଙ୍ଗ୍‍ଁ ମାପୁରୁଦି ପ୍ରସଂସା କିଜିମାର୍ହାର୍‍ ।
GAL 2:1 ସଉଦ ବାର୍ସେକ୍‍ ୱେନ୍‍କା ବର୍ଣ୍ଣବାଦି ୱାଲେ ନାନୁ ଜିରୁସାଲାମ୍‍ତୁ ଡ଼େସିସର୍ହାପ୍‌; ନା ୱାଲେ ତିତସ୍‍ତିଙ୍ଗ୍‍ଁ ବା ଅତା ମାର୍ହାପ୍‌ ।
GAL 2:2 ଆବେ ସନ୍‍ଡ୍ରେଙ୍ଗ୍‍ଁ ଆନାତ୍‍ ଇଜି ମାପୁରୁମାଣାନ୍‍ ଦର୍ସନ୍‍ ପୟ୍‍ଜି ନାନୁ ସର୍ହାମାର୍ହା । ଅଣଜିହୁଦି ଲୋକା ଲାକ୍‍ତୁ ନାନୁ ଏମେ ସୁସମାଚାର୍‌ ପ୍ରଚାର୍‌ କିତାମାନା, ଜିରୁସାଲାମ୍‍ତି ନେତାରିଙ୍ଗ୍‍ଁ ଉନ୍‍ଣ୍ତ୍ରି ଇଲୁ ମିଟିଙ୍ଗ୍‍ଁତୁ ଆକା ବୁଜାକିତା ସିତାମାର୍ହା । ନା ଆଗ୍‍ଡ଼ିରି ମାରି ଇଲେଇତି ୱେଡ଼ାଦି ପାଣି ଏଣ୍ତେସ୍‍ ଆରେଏ ଆଏତ୍‍, ଆୟାଉଣ୍ତିଙ୍ଗ୍‌ ନାନୁ ସୁଡ଼ୁଜି ମାର୍‌ର୍ହା ।
GAL 2:3 ନା ତଡ଼୍‍ ତିତସ୍‍ ଅରେନ୍‍ ଗ୍ରିକ୍‌ ଲୋକ୍‍ ଆତିମାରିଙ୍ଗ୍‌ବା, ୱାନିଙ୍ଗ୍‍ଁ ସୁନ୍ନତ ଆନି ଉଣ୍ତିଙ୍ଗ୍‍ଁ ଜବର୍‍ଦସ୍ତ କିଆୟ୍‍ ଆଏତ୍‍ମାର୍ହାତ୍‍ ।
GAL 2:4 ମାତର୍‍ ଏସ ଲୋକୁ ୱାନିଙ୍ଗ୍‍ଁ ସୁନ୍ନତ କିବିସ୍‍କିଦେଙ୍ଗ୍‍ଁ ଇଜି ବଦାକିଜିମାର୍ହାର୍‍ । ୱାର୍‍ ବିସ୍‍ବାସିରି ତଡ଼ାନ୍‍କୁ ଇଜି ସାଲାକି କିଜି ନେସ୍‌ଇ ୱାଜା ଦଲ୍‍ତୁ ମିସାତାମାର୍ହାର୍‍ । କ୍ରିସ୍ତ ଜିସୁଦି ୱାଲେ ମିସାନି ମାଣାନ୍‍କୁ ମାପ୍‍ ଏମେ ଜିଣାନିକା ଲାବ୍‍ କିତାମାନାପ୍‍, ତାନିଙ୍ଗ୍‍ଁ ପୟ୍‍ଜ ଅତେଙ୍ଗ୍‍ ଇଜି ୱାରି ଉଦେସ୍‍ ମାର୍ହାତ୍‍ । ମାଙ୍ଗିଁ ମାରିଡ଼େସି ନିୟମ୍‍ତି ଦାସ କିଦେଙ୍ଗ୍‍ଁ ୱାର୍‍ ବଦା କିଜିମାର୍ହାର୍‍ ।
GAL 2:5 ମାତର୍‍ ମି ଉଣ୍ତିଙ୍ଗ୍‍ ସୁସମାଚାର୍‍ତି ସତ୍‍ତିଙ୍ଗ୍‍ ଜିପିସ୍‍କିଜି ଇଡ୍‍ଦେଙ୍ଗ୍‍ ମାପ୍‍ ଆୟା ଟକେକିନିୱାରିଙ୍ଗ୍‍ ସାଣେକ୍‍ ବା ମାଟା ଇନ୍‌ଡ୍ରେଙ୍ଗ୍‌ ସାରି ସିଏପ୍‍ ମାର୍ହାପ୍‍ ।
GAL 2:6 ମାତର୍‍ ଏମେକାର୍‍ ନେତା ଇଜି ୱେଙ୍ଗିଁଜି ମାର୍ହାର୍‍, ୱାର୍‍ ଜେ ଏର୍‍ ଆପିର୍‍, ଆବେ ଇନିକା ନା ସଲ୍‍ଏତ୍‍ ରେଏତ୍‍; ଇରିଙ୍ଗ୍‌ ଆତ୍‍ରେରି ବୁଲାସାଲା ସୁଡ଼୍‍ଜି ମାପୁରୁ ଏମେୱାନି ବିଚାର୍‍ କିଏନ୍‍, ଆୟା ନେତାର୍‍ ନାଙ୍ଗିଁ ଇନି ପୁନି ମାଟା ସିଏର୍‍ ମାର୍ହାର୍‍ ।
GAL 2:7 ମାରି ଉନ୍‍ଣ୍ତ୍ରି ତରିନ୍‍, ୱାର୍‍ ସୁଡ଼ୁତାମାର୍ହାର୍‍ ଜେ, ମାପୁରୁ ଏଣ୍ତେସ୍‍ ଜିହୁଦିଲୋକା ଲାକ୍‍ତୁ ସୁସମାଚାର୍‍ ପ୍ରଚାର୍‍ କିନି ଦାୟିତ ପିତର୍‍ତିଙ୍ଗ୍‍ଁ ସିତାମାର୍ହାନ୍‍, ଆୟାୱାଜା ଅଣଜିହୁଦି ଲୋକା ଲାକ୍‍ତୁ ସୁସମାଚାର୍‍ ପ୍ରଚାର୍‍ କିନି ଦାୟିତ ନାଙ୍ଗିଁ ସିତାମାନାନ୍‌,
GAL 2:8 ଇରିଙ୍ଗ୍‌ ପିତର ଏଣ୍ତେସ୍‍ ମାପୁରୁଦି ସାକ୍ତିଦାନ୍‌ ଜିହୁଦିଲୋକା ଉଣ୍ତିଙ୍ଗ୍‍ ପେରିତ ସିସୁ ୱାଜା ବାସେ କିଆୟ୍‍ଆତାମାର୍ହାନ୍‍, ନାନୁ ବା ଟିକ୍‍ ଆୟାୱାଜା ମାପୁରୁଦି ସାକ୍ତିଦାନ୍‍ ଅଣଜିହୁଦି ଲୋକା ଉଣ୍ତିଙ୍ଗ୍‍ ପେରିତ ସିସୁ ୱାଜା ବାସେ କିଆୟ୍‍ଆତାମାନା ।
GAL 2:9 ନାସ୍ତିୱାଲେ ମୁଣ୍ତା ୱାଜା ୱେଙ୍ଗିଁଜିମାନି ଜାକୁବ, ପିତର୍‍ ନି ଜୋହନ ମାନାତା ମାର୍ହାର୍‍ ଜେ, ମାପୁରୁ ନାଙ୍ଗିଁ ଇୟା ଦୟା ପାଣିଦି ଦାୟିତ୍ ସିତାମାନାନ୍‌ । ଆଦେଙ୍ଗ୍‌ ୱାର୍‍ ନାଙ୍ଗିଁ ନି ବର୍ଣ୍ଣବାଦିଙ୍ଗ୍‍ ଅର୍‌ସେମାନିକା ୱାଜା ୱେଡ଼ିକାଦାନ୍‍ ମାନାତାମାନାର୍‍ । ବର୍ଣ୍ଣବା ନି ନାନୁ ଅଣଜିହୁଦି ଲୋକା ଲାକ୍‍ତୁ ମାରି ୱାର୍‍ ଜିହୁଦିଲୋକା ଲାକ୍‍ତୁ ପାଣି କିନାପ୍‌ ଇଜି ମାପ୍‍ ଉନ୍‍ଣ୍ତ୍ରେମନ୍‍ ଆତାମାର୍ହାପ୍‍ ।
GAL 2:10 ୱାର୍‍ କେବଲ ନିସନେ ଅନୁରୋଦ କିତାମାର୍ହାର୍‍ ଜେ, ମାପ୍‍ ୱାରି ଦଲ୍‍ତୁ ମାନି କାକୁର୍ତି ଲୋକାଙ୍ଗ୍‍ଁ ଏତ୍‌ ଇଡ୍‍ନାପ୍‍ । ଆୟା ବିସୟ୍‍ ଉଣ୍ତିଙ୍ଗ୍‍ ନେ ନା ଆସା ମାର୍‌ର୍ହାତ୍‍ ।
GAL 2:11 ପିତର୍‍ ଆଣ୍ଟିୟକଦୁ ୱାତିମାର୍‌ଇୱାଲେ ନାନୁ ୱିଜେରି ଆଗ୍‍ଡ଼ି ୱାନିଙ୍ଗ୍‌ ଜାଟି କିତାମାର୍‌ଆ, ଇରିଙ୍ଗ୍‌ ୱାନ୍‍ ସତେନେ ବୁଲ୍‍ ପାଣି କିଜିମାର୍ହାନ୍‍ ।
GAL 2:12 ଜାକୁବଦି ମାଣାନ୍‍ ପେରିତ ଏସଲୋକ୍‍ ଆବେନୁ ୱାନି ଆଗ୍‍ଡ଼ି, ପିତର ଅଣଜିହୁଦି ତଡ଼ାନ୍‍କୁ ନି ତାଙ୍ଗିଁକା ୱାଲେ ଉଣୁଜି ମାର୍ହାନ୍‌ । ମାତର୍‍ ଆୟା ଲୋକୁ ୱାତି ୱେନ୍‍କା, ୱାନ୍‍ ଇବେଟ୍‌ତାନ୍‌ ନିଙ୍ଗିଁତା ସର୍ହାନ୍‍ ମାରି ୱାରି ୱାଲେ ୱାନ୍‍ ମାରି ଉଣୁଏତାନ୍‍, ଇରିଙ୍ଗ୍‌ ଅଣଜିହୁଦି ଲୋକୁ ସୁନ୍ନତ ଆନିକା ଦରକାର୍‍ ଇଜି ଏମେକାର୍‍ ଇଜିମାର୍ହାର୍‍, ୱାନ୍‍ ୱାରିଙ୍ଗ୍‍ ତିଲାଜି ମାର୍ହାନ୍‍ ।
GAL 2:13 ଆଇ ଜିହୁଦି ତଡ଼ାନ୍‍କୁ ପିତରତି ୱାଲେ ମିସାଜି ଟକେକିନି ଲୋକା ୱାଜା ବ୍ୟବ୍‌ହାର୍‌ କିଜିମାର୍‌ର୍ହାର୍‍, ଇୟାୱାଜାକି ବର୍ଣ୍ଣବା ବା ୱାରି ସାଲାକିଦୁ ଆର୍‍ତାନ୍‍ ।
GAL 2:14 ନାନୁ ଏସ୍ତିୱାଲେ ସୁଡ଼ୁତା ଜେ, ସୁସମାଚାର୍‍ତି ସତ୍‍ ଇସାବ୍‍ତାନ୍‍ ୱାର୍‍ ନେଗେନ୍‍ ବ୍ୟବ୍‌ହାର୍‌ କିଏଜିନାର୍‍, ନାନୁ ୱାରି ଆଗ୍‍ଡ଼ି ପିତର୍‍ତିଙ୍ଗ୍‍ ଇର୍‌ଆମାର୍ହା, “ଜଦି ନିନୁ ଜିହୁଦିଲୋକୁ ଆଜି ଅଣଜିହୁଦି ଲୋକା ୱାଜା ଜିଜି ମାଡ଼ିଜିନି, ଆର୍‍ତିଙ୍ଗ୍‍ଁ ଜିହୁଦିଲୋକା ୱାଜା ଜିଦେଙ୍ଗ୍‍ଁ ନିନୁ ଅଣଜିହୁଦି ଲୋକାଙ୍ଗ୍‌ ଏଣ୍ତେସ୍‍ ଜବର୍‍ଦସ୍ତ୍‍ କିଦେଙ୍ଗ୍‍ଆଟ୍‍ନି ।”
GAL 2:15 ସତ୍‍ତାନ୍‍ ମାପୁ ଜନମ୍‍ତାନ୍‍ ଜିହୁଦି ଲୋକୁ; ୱାର୍‌ଗିଜିସାନି ଇସାବ୍‌ତାନ୍‌ “ପାପି ଅଣଜିହୁଦି ଲୋକୁ” ସିଲେ ।
GAL 2:16 ମାପୁ ନେସ୍‍ନାପ୍‍, ନିୟମ୍‍ତି ଦାବିୱିଜୁ ପୁରା କିନି ମାଣାନ୍‍ ସିଲେ, ମାତର୍‍ କେବଲ ଜିସୁ କ୍ରିସ୍ତଦିମାନୁ ବିସ୍‍ବାସ୍‍ କିନି ମାଣାନ୍‍ ଅରେନ୍‍ ମାପୁରୁଦି ଆଗ୍‍ଡ଼ି ଦସ୍‍ସିଲେଣ୍‌ଗା ମିସାଦେଙ୍ଗ୍‌ ଆଟ୍‌ନାପ୍‌ । ମାପୁରୁଦି ଆଗ୍‍ଡ଼ି ଦାର୍ମୁ ଲୋକ୍‍ ଆଦେଙ୍ଗ୍‍ଁ ଇଜି ମାପ୍‍ ମାରି ନିୟମ୍‍ତି ମୁସ୍‍କୁ ଆସା ଇଡ୍‍ଏନ୍‍ଣ୍ତା ଜିସୁ କ୍ରିସ୍ତମାନୁ ବିସ୍‍ବାସ୍‍ କିଜିନାପ୍‍, ଇରିଙ୍ଗ୍‍ଁ କେବଲ ନିୟମ୍‍ ମାନାନି ମାଣାନ୍‍ ଏନ୍‍ ମାପୁରୁ ଆଗ୍‍ଡ଼ି ଦାର୍ମୁ ଲୋକ୍‍ ଆଦେଙ୍ଗ୍‍ଁ ଆଟ୍‍ଏନ୍‍ ।
GAL 2:17 ମାତର୍‍ କ୍ରିସ୍ତଦି ୱାଲେ ମିସାଜି ମାପୁରୁଦି ଆଗ୍‍ଡ଼ି ସେବାକିନି ଦାର୍ମୁ ଲୋକ୍‍ ଆଦେଙ୍ଗ୍‍ଁ ଇଜି ସେସ୍ଟା କିତିୱାଲେ, ଜଦି ମାପ୍‍ ବା ଅଣଜିହୁଦି ଲୋକା ୱାଜା “ପାପି” ଆଜି ତେବାତିମାନିକା, ଇୟାଉଣ୍ତିଙ୍ଗ୍‌ ଇନିକା କ୍ରିସ୍ତ ଦାୟି ? ସିଲେ, ଇକା ଏସାଙ୍ଗ୍‍ ସିଲେ ।
GAL 2:18 ମାତର୍‍ ଏମେ ନିୟମ୍‍ତି ଗାଟିଦିଙ୍ଗ୍‍ଁ ନାନୁ ସିନା କିତାମାନା, ତାନି ମାରିଡ଼େସି ତିଆର୍‌ କିଦେଙ୍ଗ୍‌ ସରିଙ୍ଗ୍‍ ନାନୁ ଦସି ଆନା ।
GAL 2:19 “ନିୟମ୍‍ତି ଉଣ୍ତିଙ୍ଗ୍‍ ନାନୁ ପୁରା ସାତାମାନା ଆୟା ନିୟମ୍‍ତାନ୍‍ ନେ ନାନୁ ସାତାମାନା । ମାତର୍‌ ନାନୁ ଇଲେଇ ମାପୁରୁଦି ଉଣ୍ତିଙ୍ଗ୍‌ ଜିତାମାନା । କ୍ରିସ୍ତଦି ୱାଲେ ୱାନି କ୍ରୁସ୍‌କାଟ୍‌ ମୁସ୍‌କୁ ନାନ୍‌ ବା ସାତାମାନା ।
GAL 2:20 ଆଦେଙ୍ଗ୍‌ ଇଲେଇ ସତ୍‌ତାନ୍‍ ନାନୁ ମାରି ଜିଏ, ନା ବାନୁ କ୍ରିସ୍ତ ଜିବନ୍‌ ମାନାନ୍‌ । ନାନୁ ଇଲେଇ ଆମା ଜିଜି ମାଡ଼ିଜିନା, ଆକା କେବଲ ମାପୁରୁଦି ମାରିନ୍‌ତି ମୁସ୍‍କୁ ନା ବିସ୍‍ବାସ୍‍ତାନ୍ ଆତାମାନାତ୍‍, ଏନ୍‍ ନାଙ୍ଗିଁ ଜିବନ୍‌ନୋଜି ନା ଉଣ୍ତିଙ୍ଗ୍‍ଁ ୱାନି ଜିବନ୍‌ ସିତାମାନାନ୍‌ ।
GAL 2:21 ଇୟାଉଣ୍ତିଙ୍ଗ୍‌ ମାପୁରୁଦି ଦୟାଦିଙ୍ଗ୍‍ ନାନୁ ଏସାଙ୍ଗ୍‍ ଅମାନ୍ୟ କିଏ । ଇରିଙ୍ଗ୍‍ଁ କେବଲ ନିୟମ୍‍ ମାନାନି ମାଣାନ୍ ଜଦି ଅରେନ୍‍ ମାପୁରୁଦି ଆଗ୍‍ଡ଼ି ଦାର୍ମୁ ଆଦେଙ୍ଗ୍‌ ଆଟ୍‍ନାନ୍‍, ଆର୍‍ତିଙ୍ଗ୍‍ଁ କ୍ରିସ୍ତଦି ସାନିକା ଇନିକା ସିଲେ ଇଜି ଇନ୍‌ଡ୍ରେଙ୍ଗ୍‌ ଆନାତ୍‍ ।”
GAL 3:1 ଏ ବୁଦିସିଲି ଗାଲାତିୟଦି ଲୋକୁ ! ଏନ୍‌ ମି ମୁସ୍‌କୁ ଇୟା ଉପାୟ୍‌ ୱେର୍‌ତାମାନାନ୍‌ ? କ୍ରୁସକାଟ୍‌ ମୁସ୍‌କୁ ଜିସୁ କ୍ରିସ୍ତଦି ସାତି ବିସୟ୍‌ ପୁରାନେସ୍‌ନି ୱାଜା ମି ଲାକ୍‌ତୁ ୱେର୍‌ଆଇ ଆତାମାନାତ୍‍ ।
GAL 3:2 ନାଙ୍ଗିଁ ଉନ୍‍ଣ୍ତ୍ରି ମାଟା ଇନ୍‍ଣ୍ତ୍ରୁ : ନିୟମ୍‍ ମାନାଜିନି ମାଣ୍‌କୁ ମିର୍‌ ପବିତ୍ରଆତ୍ମାଦିଙ୍ଗ୍‍ ପୟ୍‍ତିମାନିଦେର୍‍, ନୋ, ମିର୍‍ ସୁସମାଚାର୍‍ ୱେନ୍‍ଜି ଆବେନୁ ବିସ୍‍ବାସ୍‍ କିଜିନି ମାଣ୍‌କୁ ?
GAL 3:3 ମିର୍‍ ଇନିକା ନିସବା ବୁଜାଦେଙ୍ଗ୍‌ ଆଟ୍‌ଇଜିନିଦେର୍‌ ? ଆଇଆତ୍ମାଦି ସାକ୍ତିଦାନ୍‌ ମିର୍‌ ଆମା ଜିବନ୍‌ ଆରାମ୍‍ କିତିମାନିଦେର୍‍, ନିଜେଦି ସାକ୍ତିଦାନ୍‌ ଇନିକା ତାନିଙ୍ଗ୍‌ ପୁରା କିଦେଙ୍ଗ୍‌ ଅଡ଼୍‌ବିଜିନି ?
GAL 3:4 ଇୟାଉଣ୍ତିଙ୍ଗ୍‌ ମି ୱିଜୁ ଏତ୍‌କିତିମାଟା ଇନିକା ୱାର୍‌ଇକା ? ଆବେଣୁକୁ ଇନିକା ଅଡ଼୍‌ପବା ଅଜାଇଦେର୍‌ ?
GAL 3:5 ମିର୍‌ କେବଲ ନିୟମ୍‌ତୁ ବିସ୍‌ବାସ୍‌ କିଜିମାନିଙ୍ଗ୍‌ ଇନିକା ମାପୁରୁ ମିଙ୍ଗିଁ ୱାନି ଆତ୍ମା ସିତାମାନାନ୍‌ ମାରି ମି ଲୋଇ ସାକ୍ତିଦି ପାଣିୱିଜୁ ପୁରା କିନାନ୍‍, ନୋ, ମିର୍‌ ସୁସମାଚାର୍‌ ୱେନ୍‌ଜି ଆବେନୁ ବିସ୍‌ବାସ୍‌ କିଜିନିଦେର୍‌ ଇଜି ?
GAL 3:6 ମାରି ଅବ୍ରାହାମତି ମାଟା ଏତ୍‌ କିଦୁ । ସାସ୍ତ୍ରଦୁ ରାସାତାମାନାତ୍‌, “ୱାନ୍‌ ମାପୁରୁଦିମାନୁ ବିସ୍‌ବାସ୍‌ କିତାନ୍‌ ମାରି ୱାନି ବିସ୍‌ବାସ୍‌ତି ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ଦାର୍ମୁଦିକାନ୍‌ ୱାଜା ମାନାତାନ୍‌ ।”
GAL 3:7 ଇକା ମିର୍‌ ନେସ୍‌ତୁ, ଆମାକାର୍‌ ବିସ୍‌ବାସ୍‌ କିଦେଙ୍ଗ୍‌ ଡାଟ୍‌, କେବଲ ଆୟାକାର୍‌ନେ ଅବ୍ରାହାମତି ସତ୍‌ତି ମାରିନ୍‌କୁ,
GAL 3:8 ଆଗ୍‍ଡ଼ିରାନ୍‍ ଦାର୍ମୁସାସ୍ତ୍ରଦୁ ରାସାତାମାନାତ୍‍, ବିସ୍‍ବାସ୍‍ତାନ୍ ମାପୁରୁ ଅଣଜିହୁଦି ଲୋକାଙ୍ଗ୍‌ ବା ଦାର୍ମୁଦିଲୋକ୍‍ ଇଜି ମିସାକିନାନ୍‍ । ଅବ୍ରାହାମତି ଲାକ୍‍ତୁ ଇୟା ମାଟା ଆଗ୍‌ଡ଼ି ୱେର୍‌ଆୟ୍‌ଆତାମାରାତ୍‌, “ମି ମାଣ୍‌କୁ ମାପୁରୁ ଦୁନିଆଦି ୱିଜୁ ଲୋକାଙ୍ଗ୍‍ ଆସିର୍ବାଦ୍‌ କିନାନ୍‍ ।”
GAL 3:9 ଅବ୍ରାହାମ ବିସ୍‍ବାସ୍‌ କିଜି ଆସିର୍ବାଦ୍‌ ପୟ୍‍ତାମାର୍ହାନ୍‍; ଆଦେଙ୍ଗ୍‌ ଆମାକାର୍‍ ବିସ୍‍ବାସ୍‍ କିନାର୍‍, ୱାର୍‍ ୱିଜେରେ ୱାନି ୱାଜା ଆସିର୍ବାଦ୍‌ ପୟ୍‍ନାର୍‍ ।
GAL 3:10 ଏମେକାର୍‍ ନିୟମ୍‍ ମାନାନି ମୁସ୍‍କୁ ଆସା ଇଡ୍‍ନାର୍‍, ୱାର୍‍ ଆନାଦୁରିଆଦି ଲୋଇ ଜିନାର୍‍ । ଇରିଙ୍ଗ୍‌ ଦାର୍ମୁସାସ୍ତ୍ରଦୁ ରାସାତାମାନାତ୍‍, “ମସାଦି ନିୟମ୍‍ ବଇଦୁ ଆମା ୱିଜୁ ରାସାତାମାନାତ୍‍, ଜଦି ଏନ୍‍ ପୁରାଦାନ୍‍ ଆକା ମାନାଏନ୍‍, ୱାନ୍‍ ମାପୁରୁଦି ଆନାଦୁରିଆଦି ଲୋକୁ ଆନାନ୍‍ ।”
GAL 3:11 ଆଦେଙ୍ଗ୍‌ ଇବେଟ୍‌ତାନ୍‍ ପୁରାନେସ୍‌ନିୱାଜା ୱେରାୟ୍‍ଆନାତ୍‍, ନିୟମ୍‍ତାନ୍‍ ଏମେ ଲୋକୁ ମାପୁରୁଦି ଆଗ୍‍ଡ଼ି ଦାର୍ମୁଲୋକୁ ଆଦେଙ୍ଗ୍‌ ଆଟ୍‍ଏନ୍‍, ଇରିଙ୍ଗ୍‌ ଦାର୍ମୁସାସ୍ତ୍ରଦୁ ରାସାତାମାନାତ୍‍, “ବିସ୍‍ବାସ୍‍ତାନ୍ ମାପୁରୁଦି ଲାକ୍‍ତୁ ଦସ୍‍ସିଲିକାନ୍‍ ୱେଙ୍ଗିଁଜି ମାନି ଲୋକୁ ନେ କେବଲ ଜିନାନ୍‍ ।”
GAL 3:12 ମାତର୍‍ ନିୟମ୍‍ତି ୱାଲେ ବିସ୍‍ବାସ୍‍ତି ଇନି ମିସାବିଡ଼ା ସିଲେତ୍‍ । ଦାର୍ମୁସାସ୍ତ୍ରଦୁ ରାସାତାମାନାତ୍‍, “ଏମେ ଲୋକୁ ନିୟମ୍‍ତି ଦାବିଦି ୱିଜୁ ପାଣି କିନାନ୍‍, ୱାନ୍‍ ଜିନାନ୍‍ ।”
GAL 3:13 ମାତର୍‍ କ୍ରିସ୍ତ ମା ଉଣ୍ତିଙ୍ଗ୍‌ ଆନାଦୁରିଆ ପୟ୍‍ଜି ନିୟମ୍‍ତୁ ରାସାତି ଆନାଦୁରିଆଦାନ୍‌ ମାଙ୍ଗିଁ ମୁକୁଡ଼ା କିତାମାନାନ୍‍ । ଦାର୍ମୁସାସ୍ତ୍ରଦୁ ରାସାତାମାନାତ୍‍, “ଏନ୍‍ ମାରାତୁ ଡ଼ଆୟ୍ ଆଜି ସାନାନ୍‍, ୱାନ୍‍ ମାପୁରୁଦି ମାଣାନ୍‍ ଆନାଦୁରିଆ ଆନାନ୍‌ !”
GAL 3:14 ମାପୁରୁ ଅବ୍ରାହାମ୍‍ତିଙ୍ଗ୍‌ ଏମେ ଆସିର୍ବାଦ୍‌ ସିଦେଙ୍ଗ୍‍ ପାର୍‍ମାଣ୍‍ କିତାମାର୍ହାନ୍‍, ଅଣଜିହୁଦି ଲୋକୁ ବା ଏଣ୍ତେସ୍‍ ଆକା ପୟ୍‌ଦେଙ୍ଗ୍‌ ଆଟ୍‍ନାର୍‍, ଇୟାଉଣ୍ତିଙ୍ଗ୍‌ କ୍ରିସ୍ତ ଜିସୁ ଇୟା ପାଣି କିତାମାନାନ୍‍ । ଆଦେଙ୍ଗ୍‌ ବିସ୍‍ବାସ୍‍ତାନ୍ ମାପ୍‍ ବା ମାପୁରୁଦି ସିତିମାନିମାଟା ଇସାବ୍‍ତାନ୍‍ ପବିତ୍ର ଆତ୍ମା ପୟ୍‌ଦେଙ୍ଗ୍‌ ଆଟ୍‍ନାପ୍‍ ।
GAL 3:15 ତଡ଼ାନ୍‍କୁ ନି ତାଙ୍ଗିଁକ୍‌ ! ନାନୁ ଉନ୍‍ଣ୍ତ୍ରି ଉପାସ୍‌ ମାଟା ଇଜିନା, ଏସ୍ତିୱାଲେ ରିଏର୍‌ ଇନି ବିସୟ୍‍ତାନ୍‍ ଉନ୍‍ଣ୍ତ୍ରି ନିୟମ୍‌ ମାଟା ଇନାନ୍‌, ଏନ୍‍ ଆୟା ନିୟମ୍‌ ମାଟା ରୁକ୍‍ତେଙ୍ଗ୍‍ଁ ଆଟ୍‍ଏନ୍‍ ବା ଆବେ ଇନିକା ମିସାକିଦେଙ୍ଗ୍‍ଁ ଆଟ୍‍ଏନ୍‍ ।
GAL 3:16 ଅବ୍ରାହାମ ନି ୱାନି କୁଟୁମ୍‍ତି ଲାକ୍‍ତୁ ମାପୁରୁ ୱାନି ପାର୍‍ମାଣ୍‍ କିତାମାର୍ହାନ୍ । ମାତର୍‍ ଇୟା ବିସୟ୍‌ତାନ୍‌ “ମି କୁଟୁମ୍‍ତିୱାରି ଉଣ୍ତିଙ୍ଗ୍‍,” ଅର୍ତାତ୍‍ ନାଣ୍ତ ଲୋକା ଉଣ୍ତିଙ୍ଗ୍‍ ଇଜି ସାସ୍ତ୍ରଦୁ ରାସାଏତ୍‍ । କେବଲ “ମି କୁଟୁମ୍‍ ଉଣ୍ତିଙ୍ଗ୍‍ଁ” ଇଜି ରାସାତାମାନାତ୍‍ । ଆଦେଙ୍ଗ୍‍ଁ ଆୟା ସାସ୍ତ୍ରଦୁ ରାସାତିକା କେବଲ ଅରେନ୍‍ ଲୋକ୍‍, ଅର୍ତାତ୍‍ କ୍ରିସ୍ତଦି ଉଣ୍ତିଙ୍ଗ୍‍ଁ ଟିକ୍‍ ।
GAL 3:17 ନାନୁ ଇନି ଅର୍ତ ଆଜିନାତ୍‍, ମାପୁରୁ ଅବ୍ରାହାମତି ୱାଲେ ଉନ୍‍ଣ୍ତ୍ରି ନିୟମ୍‌ ତିଆର୍‌ କିତାମାର୍ହାର୍‌ ମାରି ଆକା ରକିୟା କିନି ଉଣ୍ତିଙ୍ଗ୍‍ ପାର୍‍ମାଣ୍‍ କିତାମାର୍ହାର୍‌ । ଏମେ ନିୟମ୍‍ ସାରିସ ତିରିସ୍‌ ବାର୍‍ସେକ୍‍ ୱେନ୍‍କା ସିଆୟ୍‍ଆତାତ୍‍, ଆକା ଆୟା ରାଜିମାନାଦିଙ୍ଗ୍‍ ରୁକ୍‍ସି ମାପୁରୁଦି ପାର୍‍ମାଣ୍‍ତିଙ୍ଗ୍‍ ତେବାକିଦେଙ୍ଗ୍‍ ଆଟ୍‍ଏତ୍‍ ।
GAL 3:18 ମାପୁରୁଦି ପାର୍‍ମାଣ୍‍ତି ଆସିର୍ବାଦ୍‌ ଜଦି ନିୟମ୍‍ ମାନାନି ମୁସ୍‍କୁ ଆସା ଇଡିନାତ୍‍, ଆର୍‍ତିଙ୍ଗ୍‍ଁ ଆକା ୱାନି ପାର୍‍ମାଣ୍‍ତି ପଲ୍‍ ଇଜି ମାରି ଇନାୟ୍‍ ଆଦେଙ୍ଗ୍‍ଁ ଆଟ୍‍ଏତ୍‍ । ଆଦେଙ୍ଗ୍‍ଁ ମାପୁରୁ କେବଲ ୱାନି ପାର୍‍ମାଣ୍‍ତି ଇସାବ୍‍ତାନ୍‍ ଆୟା ଆସିର୍ବାଦ୍‌ ଅବ୍ରାହାମ୍‍ତିଙ୍ଗ୍‌ ସିତାନ୍‌ ।
GAL 3:19 ଆର୍‍ତିଙ୍ଗ୍‍ଁ ନିୟମ୍‍ ଏନ୍ଦା ସିଆୟ୍‍ ଆତାତ୍‍ ? ଲୋକା ଅସତ୍‍ ପାଣି ୱିଜୁ ତର୍‍ସି ସିନି ଉଦେସ୍‍ ମାର୍ହାତ୍‍ ମାରି ଅବ୍ରାହାମ୍‍ତି ଆମା କୁଟୁମ୍‌ତିଙ୍ଗ୍‍ ସୁଡ଼୍‍ଜି ମାପୁରୁ ଆୟା ପାର୍‍ମାଣ୍‍ କିତାମାର୍ହାନ୍, ଆୟା ଲୋକ୍‌ତି ୱାନି ସାନ୍ଦି ନିୟମ୍‍ତି ଦର୍‍କାର୍‍ ମାର୍ହାତ୍‍ । ଅରେନ୍‍ ଲୋକା ନାଡ଼ିମିଆଜି ମୁସ୍‌କୁପୁର୍‌ତି ଦୁତ୍‍ମାଣାନ୍‍ ନିୟମ୍‍ ସିଆୟ୍‍ ଆତାମାର୍ହାତ୍‍ ।
GAL 3:20 ମାତର୍‍ ପାର୍‍ମାଣ୍‍କିତି ଦାନ୍‍ତି ୱାଲେ କେବଲ ଉନ୍‍ଣ୍ତ୍ରି ତରିନ୍‍ ମାର୍ହାର୍‍ । ୱାନ୍‍ ଆଜିନାନ୍‍ ନିଜେ ମାପୁରୁ ।
GAL 3:21 ନିୟମ୍‍ ଇନିକା ମାପୁରୁଦି ପାର୍‍ମାଣ୍‍ତି ବିରୁଦ୍‍ କିନାତ୍‍ ? ସିଲେ, ଏସାଙ୍ଗ୍‍ଁ ସିଲେ ! ଇରିଙ୍ଗ୍‌ ଲୋକାଙ୍ଗ୍‍ଁ ଜିବନ୍‌ ସିନି ନାନି ଉନ୍‍ଣ୍ତ୍ରି ନିୟମ୍‍ କିଆୟ୍‍ ଆତାତ୍‍ମାନ୍ଦି, ଆର୍‍ତିଙ୍ଗ୍‍ଁ ଆକା ମାନାନି ମାଣାନ୍‍ ନେ ଲୋକ୍‍ ମାପୁରୁଦି ଆଗ୍‍ଡ଼ି ଦସ୍‍କିଇକାନ୍‍ ୱାଜା ୱେଙ୍ଗାଁୟ୍‍ ଆଦେଙ୍ଗ୍‍ଁ ଆଟ୍‍ତାତ୍‍ମାନ୍ଦି ।
GAL 3:22 ମାତର୍‍ ଦାର୍ମୁସାସ୍ତ୍ରଦୁ ରାସାତାମାନାତ୍‍, ୱିଜୁ ଲୋକୁ ଜାତି ପାପ୍‍ ସାକ୍ତିଦି ଆଡ୍‍ଗି, ଆଦେଙ୍ଗ୍‍ଁ ଏଣ୍ତେସ୍‌ ଜିସୁ କ୍ରିସ୍ତମାନୁ ବିସ୍‍ବାସ୍‍ତି ପଲ୍‍ ୱାଜା ପାର୍‍ମାଣ୍‍ଆତି ଆସିର୍ବାଦ୍‌ କ୍ରିସ୍ତ ବିସ୍‍ବାସିର୍‍ ପୟ୍‍ନାର୍‍ ।
GAL 3:23 ବିସ୍‍ବାସ୍‍ତି ଜୁଗ୍‍ ୱାନି ଆଗ୍‍ଡ଼ି ମାରି ତରାୟ୍‍ଆନି ସାନ୍ଦି ନିୟମ୍‍ ମା ୱିଜେରିଙ୍ଗ୍‍ଁ ତର୍‍ସି ଇଟ୍‍ତାମାର୍ହାତ୍‍ ।
GAL 3:24 କ୍ରିସ୍ତଦି ୱାନି ସାନ୍ଦି ନିୟମ୍‍ ମାଙ୍ଗିଁ ଆଡିଗିକିଜି ଇଟ୍‌ତାମାର୍ହାତ୍‍; ମାତର୍‍ ତାନିୱେନ୍‍କା, କେବଲ ବିସ୍‍ବାସ୍‍ତାନ୍ ମାପୁ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଇଜି ୱେଙ୍ଗ୍‍ଁନାପ୍‍ ।
GAL 3:25 ଇଲେଇ ବିସ୍‍ବାସ୍‍ତି ଜୁଗ୍‍ ଇଗା ୱାତାତ୍‍, ମାପୁ ମାରି ନିୟମ୍‍ତି ଆଡ୍‍ଗି ସିଲେପ୍‍ ।
GAL 3:26 ବିସ୍‍ବାସ୍‍ତାନ୍ କ୍ରିସ୍ତ ଜିସୁଦି ୱାଲେ ଜଡ଼ାଜି ମିର୍‍ ୱିଜିଦେର୍‌ ମାପୁରୁଦି କଡ଼ର୍‍ ଆଇଲିକ୍‌ ଆତିମାନିଦେର୍‍ ।
GAL 3:27 ଡୁବନ୍‌ତାନ୍‍ ମିର୍‍ କ୍ରିସ୍ତଦି ୱାଲେ ଉନ୍‍ଣ୍ତ୍ରେ ଆତିମାନିଦେର୍‍ ମାରି ଇଲେଇ ଜିସୁ କ୍ରିସ୍ତଦି ଜିବନ୍‍ରୁପ ଆଙ୍ଗିଁ ଆରାତିମାନିଦେର୍‍ ।
GAL 3:28 ଆଦେଙ୍ଗ୍‍ଁ ଜିହୁଦି ନି ଅଣଜିହୁଦି, କଟିସାକର୍‌ ନି ମୁକ୍‍ଡ଼ାତି ଲୋକୁ, ମେମାରି ବା ଆଇମା ଲୋଇ ମାରି ଇନି ୱେର୍‍ଏ ସିଲେ । ମିର୍‍ ୱିଜେରେ ଜିସୁ କ୍ରିସ୍ତଦି ୱାଲେ ଜଡ଼ାଜି ଉନ୍‍ଣ୍ତ୍ରେମାନୁ ଆତିମାନିଦେର୍‍ ।
GAL 3:29 ଜଦି ମିରୁ କ୍ରିସ୍ତଦି ଲୋକୁ ଆର୍‌ତିଙ୍ଗ୍‌ ମିରୁ ଅବ୍ରାହାମତି କୁଟୁମ୍‍ ମାରି ମାପୁରୁ ଆମାକା ପାର୍‍ମାଣ୍‍ କିତାମାନାନ୍‍, ଆକା ଲାବ୍‍ କିନିଦେର୍‍ ।
GAL 4:1 ମାତର୍‌ ନାନ୍‌ ୱେର୍‌ସିନା ମାରିସି ବୁବାସିଦି ୱିଜୁ ଦନ୍‍ତି ଅଦିକାରି, ମାତର୍‍ ୱିଜୁ ବିସୟ୍‍ତି ମାଲିକ୍‌ ଆତିଙ୍ଗ୍‍ଁ ବା ପିର୍‍ଇ ବୟସ୍‍ ମାନି ସାନ୍ଦି ୱାନ୍‍ ସାକର୍‌ତି ୱାଜା ତେବାନାନ୍‍ ।
GAL 4:2 କଡ଼ ବେଡ଼ାଦୁ, ୱାନି ବୁବାସିଦି କିତି ସମୟ୍‍ ସାନ୍ଦି ଆଇକାର୍‌ ଜାତୁନ୍‍ ଅନାର୍‍ ମାରି ୱିଜୁ ବିସୟ୍‍ତି ଜାତୁନ୍‍ କିନାର୍‍ ।
GAL 4:3 ଟିକ୍‌ ଆୟାୱାଜା ମାପ୍‍ ବା ଆତ୍ମିକ ଜିବନ୍‍ତୁ ପିର୍‍ନି ଆଗ୍‍ଡ଼ି, ଦୁନିଆ ମୁସ୍‍କୁ ସାସନ୍‍ କିଜିମାନି ସାକ୍ତିଙ୍ଗାଁ ଦାସ୍‍ ମାର୍ହିକା ।
GAL 4:4 ସାରାସାରି ଏସ୍ତିୱାଲେ ଟିକ୍‍ ସମୟ୍‍ ୱାତାତ୍‍, ମାପୁରୁ ୱାନି ନିଜେ ମାରିସିଙ୍ଗ୍‍ଁ ପକ୍‍ତାନ୍‍ । ଅରେତ୍‌ ସାମାନ୍‌ତି ଆଇମା ପଟାଦାନ୍‍ ୱାନ୍‌ ଜନମ୍‍ ଆଜି ଜିହୁଦିଲୋକା ନିୟମ୍‍ତି ଅଦିକାର୍‍ତାନ୍‍ ଜିତାନ୍‌ ।
GAL 4:5 ଏଣ୍ତେସ୍‌ ୱାନ୍‌ ସାମାନ୍‌ ଡାବୁଙ୍ଗୁଁ ସିଜି ଆୟା ନିୟମ୍‍ତି ଗାଟିଦାନ୍‍ ଆଇୱାରିଙ୍ଗ୍‌ ମୁକୁଡ଼ା କିନିକା ମାରି ୱାରିଙ୍ଗ୍‍ଁ ମାପୁରୁଦି ମାରିସି ଆନି ସାରି ସିନିକା ୱାନି ଜିବନ୍‍ତି ବଦା ମାର୍ହାତ୍‍ ।
GAL 4:6 ମିର୍‍ ଜେ ମାପୁରୁଦି ମାରିସି, ଇକା ପାର୍‌ମାଣ୍‌ କିଦେଙ୍ଗ୍‍ ଇଜି, ମାପୁରୁ ୱାନି ମାରିସିଦି ପବିତ୍ର ଆତ୍ମାଦିଙ୍ଗ୍‍ଁ ମା ଜିବନ୍‍ତୁ ପକ୍‍ତାମାନାନ୍‍ । ଆୟା ପବିତ୍ର ଆତ୍ମା ଆଉଲିଦାନ୍‍ ଇଜିନାତ୍, “ବୁବା ! ଏ ନା ବୁବା !”
GAL 4:7 ଆଦେଙ୍ଗ୍‍ଁ ମିର୍‍ ମାରି କଟିସାକର୍‌ ଆଇଦେର୍‍, ମାତର୍‌ ମାରିସି ଆତିମାନିଦେର୍‌ । ମିର୍‍ ୱାନି ମାରିସି ଗାଡ଼ିସି ଆତିମାନିଙ୍ଗ୍‌, ମାପୁରୁ ୱାନି ମାରିନ୍‌ ଗାଡ଼ିସି ଉଣ୍ତିଙ୍ଗ୍‍ଁ ଆମାକା ଇଟ୍‍ଟା ମାନାର୍‍, ଆୟାୱିଜୁ ମିଙ୍ଗିଁ ଦାନ୍‍ କିନାନ୍‍ ।
GAL 4:8 ଆଗ୍‍ଡ଼ି ମିର୍‍ ମାପୁରୁଙ୍ଗ୍‍ଁ ନେସ୍‍ଇମାର୍ହିଦେର୍‍, ଆଦେଙ୍ଗ୍‍ଁ ଏମେକାର୍‍ ସତ୍‍ତାନ୍‍ ମାପୁରୁ ଆଏର୍‍, ଆୟାନାନି ମିଚ୍‍ ଦିୟାମ୍‍କା ଦାସ୍‍ ମାର୍ହିଦେର୍‍ ।
GAL 4:9 ମାତର୍‍ ଇଲେଇ ମିର୍‍ ମାପୁରୁଙ୍ଗ୍‍ଁ ନେସ୍‍ତିମାନିଦେର୍‍, ମାରିବା ନାନୁ ଇନା, ଇଲେଇ ମାପୁରୁ ମିଙ୍ଗିଁ ନେସ୍‍ତାମାନାନ୍‍ । ଆର୍‍ତିଙ୍ଗ୍‍ଁ ଇକା ଏଣ୍ତେସ୍‍ ଆଦେଙ୍ଗ୍‍ଁ ଆଟ୍‍ନାତ୍‍ ଜେ, ମିର୍‍ ମାରିଡ଼େସି ଆୟା ବପୁସିଲି, ଇନିକାସିଲି ଦିୟାମ୍‍କା ଲାକ୍‍ତୁ ଡ଼େସି ସନ୍‍ଡ୍ରେଙ୍ଗ୍‍ଁ ବଦାକିଜିନିଦେର୍‍ ? ମିର୍‍ ଏନ୍ଦା ମାରିଡ଼େସି ଆୟାୱାନିକା ଦାସ୍‍ ଆଦେଙ୍ଗ୍‍ଁ ବଦା କିଜିନିଦେର୍‍ ?
GAL 4:10 ଦୁକ୍‍ତି ମାଟା, ମିର୍‍ ଏସ ଦିନ୍‍, ଲେଜୁ, କାଡ଼ା ନି ବାର୍ସୁ ଉଣ୍ତିଙ୍ଗ୍‍ଁ ମନ୍‍ଦିୟାନ୍‌ ସିଜିନିଦେର୍‍ ।
GAL 4:11 ନାନୁ ମି ଉଣ୍ତିଙ୍ଗ୍‍ଁ ନାଣ୍ତ ସିନ୍ତା କିଜିନା । ମି ଉଣ୍ତିଙ୍ଗ୍‍ଁ ନା ୱିଜୁ ପାଣି ଇନିକା ବେକାର୍‌ ଆତାମାନାତ୍‍ ?
GAL 4:12 ତଡ଼ାନ୍‍କୁ ନି ତାଙ୍ଗିଁକ୍, ମିଙ୍ଗିଁ ବାତିଙ୍ଗ୍‍ଁମାଲ୍‍ଜିନା, ନା ୱାଜା ଆଦୁ । ନାନୁ ମି ୱାଜା ଆତାମାନା ମାରି ମିର୍‍ ନା ଉଣ୍ତିଙ୍ଗ୍‍ଁ ଇନି ଅନ୍ୟାୟ୍‌ କିଇଦେର୍‍ ।
GAL 4:13 ନାନୁ ଆଗ୍‍ଡ଼ି ଏନ୍ଦା ମି ଲାକ୍‍ତୁ ସୁସମାଚାର୍‌ ପ୍ରଚାର୍‍ କିତାମାର୍ହା, ଆକା ଏତ୍‍ କିଦୁ । ନାସ୍ତିୱାଲେ ନା ମେନ୍ଦଲ୍‌ ନେଗେନ୍‍ ସିଲେତାଆକା ଆୟାୱାଜା କିତାମାର୍ହା ।
GAL 4:14 ମାତର୍‍ ନା ମେନ୍ଦଲ୍‍ତି ଅବସ୍ଥା ମି ତରିନ୍‍ ରିସାଦିୱାଜା ଆତିମାର୍‌ଇରିଙ୍ଗ୍‍ଁ, ନିନ୍‌ ନାଙ୍ଗିଁ ଅମାନ୍ୟ ନି ଡ଼ିସ୍‌ଇତି ମାର୍‍ଇ, ମାତର୍‍ ନାଙ୍ଗିଁ ଉନ୍‍ଣ୍ତ୍ରି ମୁସ୍‍କୁପୁର୍‍ତି ଦୁତ୍‍ ୱାଜା ମାନାତିମାର୍ହିଦେର୍‍ । କ୍ରିସ୍ତ ଜିସୁଙ୍ଗୁଁ ନିନ୍‌ ଏଣ୍ତେସ୍‍ ମାନାତିଦେର୍‍ମାନ୍ଦି, ଆୟାୱାଜା ନାଙ୍ଗିଁ ବା ମାନାତିମାର୍ହିଦେର୍‍ ।
GAL 4:15 ମିର୍‍ ଏସା ୱେଡ଼ିକା ସିଲିତିଦେର୍‍ ! ମାତର୍‍ ଇଲେଇ ଇନିକା ଆତାମାନାତ୍‍ ? ମି ବିସୟ୍‍ତାନ୍‍ ନାନୁ ଇୟା ସାକିୟ୍‌ ଡାଟ୍‍ତାନ୍‍ ଇନ୍‍ଡ୍ରେଙ୍ଗ୍‍ଁ ଆଟ୍‍ନା ଜେ, ଆଦେଙ୍ଗ୍‍ଁ ଆଟ୍‍ତିଙ୍ଗ୍‍ଁ, ମିର୍‍ ନିଜେ ନିଜେଦି କାଣୁକୁ କୁତ୍‍ସି ତାସି ନାଙ୍ଗିଁ ସିଦେଙ୍ଗ୍‌ ଆଟ୍‍ତିଦେର୍‍ମାନ୍ଦି ।
GAL 4:16 ମାତର୍‍ ଇଲେଇ ନାନୁ ସତ୍‍ ଇର୍‌ଆ ମାନାଆକା ଇନିକା ମି ସାତ୍ରୁ ଆତାମାନା ?
GAL 4:17 ଆୟା ଆଇ ଲୋକୁ ମି ନେଗେନ୍‍ କିନି ଉଣ୍ତିଙ୍ଗ୍‍ଁ ନାଣ୍ତ ୱେଡ଼ିକା ତର୍‍ଆୟ୍‍ ଆନାର୍‍ । ମାତର୍‍ ଇବେ ୱାରି ସତ୍‍ ଉଦେସ୍‍ ସିଲେତ୍‍ । ୱାରି ଉନ୍‌ଡ୍ରେମାତର୍‌ ବଦା, ଏଣ୍ତେସ୍‍ ମିର୍‌ ନା ଉଣ୍ତିଙ୍ଗ୍‍ଁ ୱେର୍‍ଏ ଆଜି ୱାରି ଉଣ୍ତିଙ୍ଗ୍‌ ମନ୍‍ ସିନିଦେର୍‍ ।
GAL 4:18 ସତ୍‍ ଉଦେସ୍‍ ଅସି ୱେଡ଼ିକା ଆନିକା ସାଲାକି, କେବଲ ନାନୁ ମି ୱାଲେ ତେବାତିମାର୍‌ଇ ବେଡ଼ାଦୁ ସିଲେ, ମାତର୍‍ ୱିଜୁଦିନ୍ ମିର୍‍ ତେନି ସତ୍‍ତିକା ତର୍‌ନିକା ମାନାତ୍‍ ।
GAL 4:19 ଏ ନା ଲାଡ଼୍‍ତି କଡ଼ର୍‍, ମିଙ୍ଗିଁ କ୍ରିସ୍ତଦି ୱାଜା କିଜି ତିଆର୍‍ କିଦେଙ୍ଗ୍‍ଁ ନାନୁ ମାରିଡ଼େସି ଜନମ୍‍ କିନି ୱିସାମ୍‍ କାସ୍ଟୁ ଏତ୍‌ କିଜିନା ।
GAL 4:20 ନାନୁ ଇଲେଇ ମି ଲାକ୍‍ତୁ ତେବାତାମାନ୍ଦି ଇଜିନା ବଦା, ଆର୍‍ତିଙ୍ଗ୍‍ଁ ଆନାତ୍‍ ମି ବିସୟ୍‍ତାନ୍‍ ନା ଆଇ ରକମ୍‍ତି ସିନ୍ତା ଆତାତ୍‍ମାନ୍ଦି । ସତ୍‍ତାନ୍‍ ମି ଉଣ୍ତିଙ୍ଗ୍‍ଁ ନାନୁ ନାଣ୍ତ ସିନ୍ତାକିଜିନା ।
GAL 4:21 ଏମେକାର୍‍ ନିୟମ୍‍ତି ଆଡ୍‍ଗି ତେବାଦେଙ୍ଗ୍‍ଁ ବଦାକିନାର୍‍, ନାନୁ ୱାରିଙ୍ଗ୍‍ଁ ୱେନ୍‍ବାନା, ନିୟମ୍‍ତୁ ଇନିକା ରାସାତାମାନାତ୍‍, ଆକା ମିର୍‍ ନେସ୍‍ଇଦେର୍‍ ?
GAL 4:22 ଆବେ ରାସାତିମାନି, ଅବ୍ରାହାମତି ରିଏର୍‌ ମାରିସିର୍‍ ମାର୍ହାର୍‍, ଅରେନ୍‍ କଟିଆଇମାଦି ମାରିସି ମାରି ଆଇକାନ୍‍ ୱାନି ନିଜେଦି ଆଡ଼୍‍ସିଦି ମାରିନ୍‌ ।
GAL 4:23 କଟିଆଇମାଦି ମାରିସି ମାମୁଲିଦାନ୍‍ ଜନମ୍‍ ଆତାମାର୍‌ର୍ହାନ୍‍ । ମାତର୍‍ ୱାନି ନିଜେ ଆଡ଼ିଦି ମାରିନ୍‍ ମାପୁରୁଦି ପାର୍‍ମାଣ୍‍ ଇସାବ୍‍ତାନ୍‍ ଜନମ୍‍ ଆତାମାର୍ହାନ୍‍ ।
GAL 4:24 ତେନିଙ୍ଗ୍‍ଁ ଉନ୍‍ଣ୍ତ୍ରି କାତା ୱାଜା ଆସ୍‍ତେଙ୍ଗ୍‍ଁ ଆନାତ୍‍ । ଇୟା ରୁଣ୍ତି ଆଇମେକ୍‍ ରୁଣ୍ତି ନିୟମ୍‍ତି ୱାଜା । ଆମାତାନି ମାରିସି ଦାସ୍‍ତି ଗାଟିଦାନ୍‍ ଜନମ୍‍ ଆତାମାର୍ହାନ୍‍, ଆୟା ହାଗାର୍‍, ସିନୟ ଗରନ୍‌ତାନ୍‍ ୱାତିମାନି ନିୟମ୍‌ତି ସିନା ୱାଜା ।
GAL 4:25 ଆରବ ଦେସ୍‍ତୁ ମାନି ସିନୟ ଗରନ୍‌ତି ୱାଜା ହାଗାର୍‍ ଇଲେଇତି ଜିରୁସାଲାମ୍‍ ଗାଡ଼୍‍ ୱାଜା । ହାଗାର୍‍ ୱାଜା ଜିରୁସାଲାମ୍‍ ନି ଆବେଣି ଲୋକୁ ଇଲେଇ ଦାସ୍‍ତି ଗାଟିଦୁ ତରାୟ୍‍ ଆତାମାନାର୍‌ ।
GAL 4:26 ମାତର୍‍ ମୁସ୍‍କୁପୁର୍‍ତି ଜିରୁସାଲାମ୍‍ ମୁକୁଡ଼ାତାମାନାତ୍‍ ମାରି ଆକା ମା ୟାୟା,
GAL 4:27 ଇରିଙ୍ଗ୍‍ଁ ସାସ୍ତ୍ରଦୁ ରାସାତାମାନାତ୍‍, “ଏ ବାଞ୍ଜି ଆଇମା, ନିନୁ ୱେଡ଼ିକା ଆଆ ! ଏସ୍‍କାଙ୍ଗ୍‍ଁ ଜନମ୍‍ କିନି ୱିସାମ୍‍ ନେସ୍‍ଇମାରିଙ୍ଗ୍‍ଁ ବା, ୱେଡ଼ିକା ଆଆ । ଇରିଙ୍ଗ୍‍ଁ କନ୍‍ଲିୱାଲେ ତେବାଜିମାନି ଆଡ଼ି ବାଦ୍‍ଲୁ ଅରେତ୍‍ ଡ଼ିସ୍‍ତି ଆଇମାଦି କଡ଼କକ୍ରାରି ସଂକିୟା ନାଣ୍ତ ଆନାର୍‍ ।”
GAL 4:28 ଏ ତଡ଼ାନ୍‍କୁ ନି ତାଙ୍ଗିଁକି, ଇସ୍‍ହାକ୍‍ତି ୱାଜା ଇଲେଇ ମିର୍‌ ମାପୁରୁଦି ପାର୍‍ମାଣ୍‍ କିତି କଡ଼ର୍‍ ।
GAL 4:29 ଅର୍‍ଲେନ୍‍ ନେସ୍‌ନିୱାଜା ଜନମ୍‍ କିତିମାନି ମାରିସି ମାପୁରୁଦି ପବିତ୍ର ଆତ୍ମାଦି ମାଣାନ୍‍ ଜନମ୍‍ ଆତିମାନି ମାରିସିଙ୍ଗ୍‍ଁ କାସ୍ଟୁ ସିତାମାର୍ହାର୍‌ । ଆୟାୱାଜା ଇଲେଇବା କିଜିନିଦେର୍‌ ।
GAL 4:30 ମାତର୍‍ ଇୟା ବିସୟ୍‌ତାନ୍‌ ଦାର୍ମୁସାସ୍ତ୍ର ଇନିକା ଇନାତ୍‍ ? ଆବେ ରାସାତାମାନାତ୍‍, “କଟିଦାସି ନି ତାନି ମାରିସିଙ୍ଗ୍‍ଁ ପେର୍‍ଦୁ, ଇରିଙ୍ଗ୍‍ଁ ନିଜେ ଆଇମାଦି ମାରିସି ୱାଲେ କଟିଦାସିଦି ମାରିସି ବୁବାରି ଦନ୍‍ତୁ ମିସାଦେଙ୍ଗ୍‍ଁ ଆଟ୍‍ଏନ୍‍ ।”
GAL 4:31 ଆଦେଙ୍ଗ୍‍ଁ ଏ ନା ତଡ଼ାନ୍‍କୁ ତାଙ୍ଗିଁକ୍, ମାଡ୍‍ କଟିଦାସିଦି କଡ଼ର୍‍ ଆଏଟ୍‍, ମାତର୍‌ ପେଡ଼ିଆତି ଆଇମାଦି କଡ଼ର୍‍ ୱାଜା ।
GAL 5:1 ମାଡ୍‍ ମୁକୁଡ଼ାତିମାନିକା । କ୍ରିସ୍ତ ମାଙ୍ଗିଁ ମୁକୁଡ଼ାକିତାମାନାତ୍‍ । ଆଦେଙ୍ଗ୍‍ଁ ମିର୍‍ ମୁକୁଡ଼ାତିମାନୁ ଡାଟ୍‌ ତେବାଦୁ । ମାରିଡ଼େସି ଦାସ୍‍ତି ପୁନ୍ଦିଦୁ ତର୍‍ଆୟ୍‍ଆଦେଙ୍ଗ୍‍ଁ ଇଜି ନିଜେଦିଙ୍ଗ୍‍ଁ ଜାସାୟ୍‍ ଆମାଟ୍‍ ।
GAL 5:2 ନାନୁ ପାଉଲ, ଆମାକା ଇଜିନା ୱେନ୍‍ଣ୍ତ୍ରୁ; ମିର୍‍ ଜଦି ସୁନ୍ନତ ନିୟମ୍‍ ମାନାନିଦେର୍‍, ତାନି ଅର୍ତ ଆନାତ୍‍, ମି ଉଣ୍ତିଙ୍ଗ୍‍ଁ କ୍ରିସ୍ତଦି ଇନି ଲାବ୍‌ ସିଲେତ୍‍ ।
GAL 5:3 ଏମେ ଲୋକ୍‍ ସୁନ୍ନତ ଆନାନ୍‍, ନାନୁ ୱାନିଙ୍ଗ୍‍ଁ ମାରିଉନ୍‍ଣ୍ତ୍ରିଦେବା ଜାଗାର୍‌ତା କିଜିନା ଜେ, ମସାଦି ନିୟମ୍‍ତିଙ୍ଗ୍‍ଁ ପୁରା ମାନାନିକା ୱାନି ପାଣି ।
GAL 5:4 ମି ଲୋଇ ଏମେକାର୍‍ ନିୟମ୍‍ ମାନାନି ମାଣ୍‍କୁ ମାପୁରୁ ଆଗ୍‍ଡ଼ି ଦାର୍ମୁତିକାର୍‍ ଆଦେଙ୍ଗ୍‌ ଇଜି ସେସ୍ଟା କିଜିନାର୍‍, ୱାର୍‍ ନିଜେ ନିଜେଦିଙ୍ଗ୍‍ଁ କ୍ରିସ୍ତମାଣ୍‍କୁ ୱେର୍‍ଏ କିତାମାନାର୍‍, ୱାର୍‍ ମାପୁରୁଦି ଦୟାଦାନ୍‌ ଆକ ଆତାମାନାପ୍‌ ।
GAL 5:5 ମାତର୍‍ ମାପ୍‍ ଆସା କିଜିନାପ୍‍ ଜେ, ମାପୁରୁ ମାଙ୍ଗିଁ ୱାନି ଆଗ୍‍ଡ଼ି ଦସ୍‍ସିଲିକାର୍‍ ୱେକ୍‍ନାନ୍‍; ମା ବିସ୍‍ବାସ୍‍ତି ପଲ୍‍ ୱାଜା, ମା ଲୋଇ ପାଣି କିଜିମାନି ଆଇଆତ୍ମାଦି ସାକ୍ତିଦାନ୍‌ ଇକା ପୁରା ଆନାତ୍‍ ଇଜି କାପ୍‍କିତା ତେବାତାମାନାପ୍‍ ।
GAL 5:6 ଇରିଙ୍ଗ୍‍ଁ କ୍ରିସ୍ତ ଜିସୁଦି ୱାଲେ ମିସାଜି ଜିତିଙ୍ଗ୍‍ଁ, ସୁନ୍ନତ ମାରି ଅସୁନ୍ନତି ଇନି ଅଲଗା ସିଲେତ୍‍ । ଉନ୍‍ଡ୍ରେନେ ଦର୍‍କାର୍‍ ବିସୟ୍‍ ଆଜିନାତ୍‍, ବିସ୍‍ବାସ୍‍ତୁ ଡାଟ୍‍ ତେବାଜି ଜିବନ୍‍ନୋଜି ପାଣି କିନିକା ।
GAL 5:7 ମିର୍‍ ନେଗେନ୍‍ତାନ୍‍ ଆଗ୍‍ଡ଼ି ସଲ୍‍ସିମାର୍ହିଦେର୍‍ । ସତ୍‍ସାରିଦୁ ବୁଲାନିୱାଲେ, ଏନ୍‍ ମିଙ୍ଗିଁ ବାଦା ସିତାନ୍‌ ? ମିଙ୍ଗିଁ ବୁଲ୍‌ ସାରିଦୁ ସନ୍‌ଡ୍ରେଙ୍ଗ୍‌ ୱାନ୍‌ ଏଣ୍ତେସ୍‌ ୱେର୍‌ତାନ୍‌ ?
GAL 5:8 ମିଙ୍ଗିଁ କୁକ୍‍ତିମାନି ମାପୁରୁଦି ତରିଟାନ୍‍ ଇକା ଆଏତ୍‍ ।
GAL 5:9 ମାଟାଦୁ ମାନାତ୍‍, “ପିଡ଼୍‍ସିତିମାନି ଦୁର୍‍ତିଙ୍ଗ୍‍ଁ ଉଦିସ୍‌ତେଙ୍ଗ୍‍ଁ ଇଜି କାଣ୍ତେକ୍‍ ମାତର୍‍ କମିର୍‌ ଦର୍‍କାର୍‍ ।”
GAL 5:10 ଆକା ଆମାକାଆପିତ୍‍, ଇୟାସାନ୍ଦି ମି ମୁସ୍‍କୁ ନା ଆସା ମାନାତ୍‍ । ଇୟାଉଣ୍ତିଙ୍ଗ୍‌ ମାଡ୍‌ ୱିଜେରେ ପ୍ରବୁଦି ୱାଲେ ମିସାତାମାନାପ୍‍, ନା ଡାଟ୍‍ ବିସ୍‍ବାସ୍‍, ମିର୍‍ ନା ମାଟାଦିଙ୍ଗ୍‍ଁ ବିରୁଦ୍‍ କିଇଦେର୍‍ । ମାରି ଏମେ ଲୋକ୍‍ ମିଙ୍ଗିଁ ବାୟା କିଜିନାନ୍‍, ୱାନ୍‍ ଆମାକାନ୍‍ ଆପିନ୍ ନେ, ୱାନିଙ୍ଗ୍‍ଁ ମାପୁରୁ ଦଣ୍ତ୍‌ ସିନାନ୍‍ ।
GAL 5:11 ମାତର୍‍ ତଡ଼ାନ୍‍କୁ ନି ତାଙ୍ଗିଁକି, ନାନୁ ଜଦି ନେର୍‍ ସାନ୍ଦି ସୁନ୍ନତ୍‌ଦି ଦର୍‍କାର୍‍ତି ତରିଟାନ୍‍ ପ୍ରଚାର୍‍ କିଜିମାନା, ଆର୍‍ତିଙ୍ଗ୍‍ଁ ନାନୁ ଇଲେଇବା ଏନ୍ଦା ତାଡ଼ନା ପୟ୍‍ଜିନା ? ଜଦି ଆକା ନାନୁ କିଜିମାନା, ଆର୍‍ତିଙ୍ଗ୍‍ଁ ଆୟା ବେଗି ବେଗି କ୍ରିସ୍ତଦି କ୍ରୁସ୍‌କାଟ୍‌ ବିସୟ୍‍ତାନ୍‍ ପ୍ରଚାର୍‌ କିନି ମାଣାନ୍‍ ନା ଇନି ବାଦା ଆଏତାତ୍‍ମାନ୍ଦି ।
GAL 5:12 ନାନୁ ବଦାକିନା, ଇୟା ବିସୟ୍‌ତାନ୍‌ ଏର୍‍ ମିଙ୍ଗିଁ ବାମ୍‍ରେ କିଜିନାର୍‍, ୱାର୍‍ ମାରି ଅଡ଼ପ୍‍ ଆଗ୍‍ଡ଼ି ସଲିର୍‍ । କେବଲ ସୁନ୍ନତ ଆଏନ୍‍ଣ୍ତା ନିଜେଦି ବପୁ ଆରାକିନାର୍‌ ।
GAL 5:13 ଏ ତଡ଼ାନ୍‍କୁ ନି ତାଙ୍ଗିଁକି, ମିର୍‍ ମୁକ୍‍ଡ଼ାଦେଙ୍ଗ୍‍ଁ ଇଜି କୁକାତିମାର୍ହିଦେର୍‍ । ମାତର୍‍ ଜାଗାର୍‍ତା, କେବଲ ମେନ୍ଦଲ୍‍ତିଙ୍ଗ୍‌ ଲାଲାୟ୍‌ ଆନି ଉଣ୍ତିଙ୍ଗ୍‌ ଆୟା ମୁକ୍‍ଡ଼ାତିକା ଏଣ୍ତେସ୍‍ ବାଡିସ୍‌ ୱାଜା ବ୍ୟବହାର୍‍ କିମାଟ୍‌ । ମାତର୍‍ ଜିବନ୍‍ନନି ମାଣାନ୍‍ ସାଲାଜି ମିର୍‍ ନିଜେନିଜେଦି ସେବା କିଦୁ ।
GAL 5:14 ଇରିଙ୍ଗ୍‍ଁ ଉନ୍‍ଣ୍ତ୍ରି ବାକ୍ୟଦୁ ୱିଜୁ ନିୟମ୍‍ତି ଅରତ୍‌ ରାସାତାମାନାତ୍‍, “ମି ଲାକ୍‌ତୁରି ଲୋକାଙ୍ଗ୍‌ ନିଜେଦିଙ୍ଗ୍‍ ଜିବନ୍‌ନୋତିୱାଜା ନୋଦୁ ।”
GAL 5:15 ମାତର୍‍ ଜଦି ମିର୍‍ ବନ୍‌ତି ପସୁ ୱାଜା ବୁଲାସାଲା ଆଜି ନିଜେନିଜେଦିଙ୍ଗ୍‌ ଡାକ୍‌ସି ମାନିଦେର୍‌ ମାରି ନିଜେନିଜେଦିଙ୍ଗ୍‌ ନାସ୍ଟୁ କିଜିମାନିଦେର୍‍, ଆର୍‍ତିଙ୍ଗ୍‍ଁ ଜାଗାର୍‌ତା ମାନ୍‍ଡ୍ରୁ, ସିଲ୍‍ତିଙ୍ଗ୍‍ ଆନାତ୍‍ ମିର୍‍ ନିଜେନିଜେଦିଙ୍ଗ୍‍ ପୁରା ନାସ୍ଟୁ କିନିଦେର୍‍ ।
GAL 5:16 ନା ୱେର୍‌ନି ମାଟା ଆତାତ୍‍ : ପବିତ୍ର ଆତ୍ମା ମି ଜିବନ୍‍ତିଙ୍ଗ୍‍ଁ ସାଲାକିପିତ୍‍ । ଆର୍‍ତିଙ୍ଗ୍‍ଁ ମିର୍‍ ମାରି ଲୋକା ଗୁଣ୍‍ତି ଆସାଦିଙ୍ଗ୍‍ଁ ନାସ୍ଟୁ କିଇଦେର୍‍ ।
GAL 5:17 ଲୋକା ଗୁଣ୍‍ ପବିତ୍ରଆତ୍ମାଦି ବଦାଦି ବିରୋଦ୍‌ । ଆୟାୱାଜା ପବିତ୍ରଆତ୍ମାଦି ବଦା, ଲୋକା ଗୁଣ୍‍ତି ବିରୋଦ୍‌ । ଇକାନ୍‌ ନିଜେ ନିଜେଦି ସାତ୍ରୁ । ଆଦେଙ୍ଗ୍‌ ମିର୍‍ ଆମାକା କିଦେଙ୍ଗ୍‍ ବଦା କିନିଦେର୍‍, ଆକା କିଦେଙ୍ଗ୍‍ ଆଟ୍‍ଇଦେର୍‍ ।
GAL 5:18 ଜଦି ପବିତ୍ରଆତ୍ମା ମିଙ୍ଗିଁ ସାଲାକିନାତ୍‍, ଆର୍‍ତିଙ୍ଗ୍‍ଁ ମିର୍‍ ମାରି ନିୟମ୍‍ତି ଆଡିଗି ସିଲେ ।
GAL 5:19 ମେନ୍ଦଲ୍‍ତି ପାଣିୱିଜୁ ନେଗେନ୍‍ତାନ୍‌ ନେସ୍‌ତିମାନିଦେର୍‌ ଦାରିପାଣି, ତାଗ୍‍ଇକା,
GAL 5:20 ଲାଲାୟ୍‍ ଆନିକା, ବମା ପୁଜା, ଜାଦୁବିଦ୍ୟା ଗୁଣିଆ, ସାତ୍ରୁ, ଜାଟି, ଆକାର୍‍, ରିସା, ନିଜେଦି ସୁଣିକା, ଦଲ୍‍ଆନିକା ଆସା,
GAL 5:21 ରିସା ନି ସସ୍‍ନିକା ମାରି ରଙ୍ଗ୍‍ରସ୍‍ ୱିଜୁ ରମ୍‍ତି ପାଣି ୱିଜୁ; ନାନୁ ଆଗ୍‍ଡ଼ି ଏଣ୍ତେସ୍‍ ଇର୍ହାମାର୍ହା, ଆୟାୱାଜା ଆଗ୍‍ଡ଼ିରାନ୍‍ ଇଜିନା ଜେ, ଏମେକାର୍‍ ଇୟାୱିଜୁ ରକମ୍‍ତି ପାଣି କିନାର୍‍, ୱାର୍‍ ମାପୁରୁଦି ରାଜିଦି ଅଦିକାରି ଆଦେଙ୍ଗ୍‍ଁ ଆଟ୍‍ଏର୍‍ ।
GAL 5:22 ମାତର୍‍ ଆତ୍ମାଦି ଦାନ୍‌ ଆଜିନାତ୍‌; ଜିବନ୍‍ନୋନିକା, ୱେଡ଼ିକା, ସାନ୍ତି, ସାସ୍‍ଆନିକା, ଦୟା, ନେଗିକା, ବିସ୍‍ବାସ୍‍,
GAL 5:23 ତିର୍‌ଜିବନ୍‌ ମାରି ଆତ୍ମା ରକିୟା ଇୟାୱିଜୁ ବିରୁଦ୍‍ତାନ୍‍ ଆମାଇନି ନିୟମ୍‍ ସିଲେତ୍‍ ।
GAL 5:24 ଏମେକାର୍‍ କ୍ରିସ୍ତ ଜିସୁଦିକାର୍‌, ୱାର୍‍ ୱିଜୁ ଆସାନି ଆସାଦି ଲୋକା ଗୁଣୁତିଙ୍ଗ୍ କ୍ରୁସଦୁ ଡାକ୍‍ତାମାନାନ୍‍ ।
GAL 5:25 ପବିତ୍ରଆତ୍ମା ମାଙ୍ଗିଁ ଜିବନ୍‌ ସିତାମାନାତ୍‍, ୱାନ୍‌ ମା ଜିବନ୍‍ତିଙ୍ଗ୍‍ ବା ସାଲାକିପିତ୍‍ ।
GAL 5:26 ଆଦେଙ୍ଗ୍‌ ଗର୍ବ କିନିକା ମାରି ଆଇୱାରିଙ୍ଗ୍‌ ରିସା କିନିକା ମାରି ଆମାୱାନିଙ୍ଗ୍‍ ରିସା କିନିକା ମାଙ୍ଗିଁ ନେଗେତ୍‌ ସିଲେତ୍‍ ।
GAL 6:1 ଏ ତଡ଼ାନ୍‌କୁ ନି ତାଙ୍ଗିଁକି ! ଜଦି ଅରେନ୍‍ ତାଗ୍‍ଇ ପାଣିଦୁ ଦାରା ପଡ଼ାନାନ୍‍, ମି ଲୋଇ ଏମେକାର୍‍ ପବିତ୍ରଆତ୍ମାଦି ମାଣାନ୍‍ ସାଲାନାନ୍‍, ୱାର୍‍ ୱାନିଙ୍ଗ୍‍ ବୁଜାକିନିକା ମାନାତ୍‍, ମାତର୍‍ ମିର୍‍ ଇୟା ପାଣି ନେଗେନ୍‌ତାନ୍‌, ସାନ୍ତିଦାନ୍‍ କିନିକା ମାନାତ୍‍ । ମାରି ଜାଗାର୍‍ତା, ନିଜେ ଏଣ୍ତେସ୍‍ ଆୟାୱାଜା ପାଣି କିଦେଙ୍ଗ୍‍ ଲାଲାୟ୍‍ ଆମାଟ୍‍ ।
GAL 6:2 ନିଜେନିଜେଦି ବଜୁ ପିଣ୍ତ୍‍ଦେଙ୍ଗ୍‍ ଇଜି ସାହାଜ୍ୟ କିଦୁ । ଇକା କିନି ମାଣାନ୍‍ ମିର୍‍ କ୍ରିସ୍ତଦି ମାଟା ମାନାନିଦେର୍‍ ।
GAL 6:3 ନେସ୍‍ଏଜି ବା ଜେ ନିଜେଦିଙ୍ଗ୍‍ ନେସ୍‍ତାମାନା ଇଜି ଅଡ଼୍‍ବିତିଙ୍ଗ୍‍, ୱାନ୍‍ ନିଜେଦିଙ୍ଗ୍‍ କେବଲ ଟକେ କିଜିନାନ୍‍ ।
GAL 6:4 ୱିଜେରେ ନିଜେ ନିଜେଦି ସାଲାବୁଲାନିକା ବିଚାର୍‍ କିଜି ସୁଣି ଦର୍‍କାର୍‍ । ଜଦି ଆକା ନେଗିକାଆନାତ୍‍, ଆୟାଉଣ୍ତିଙ୍ଗ୍‌ ୱାନ୍‍ ନିଜେଦିଙ୍ଗ୍ ଜିଣାତିକାନ୍‍ ଇଜି ଅଡ଼୍‍ବିତାମାନା ମାରି ଆଇୱାନି ପାଣିଦି ୱାଲେ ନିଜେଦି ଜିଣାନିତାନିଙ୍ଗ୍‍ ତୁସ୍‍ସି ୱାନ୍‍ ଗର୍ବ କିମାକିନ୍‌ ।
GAL 6:5 ଇରିଙ୍ଗ୍‌ ୱିଜେରିଙ୍ଗ୍‍ ନିଜେ ନିଜେଦି ବଜୁ ପିଣ୍ତ୍‍ଦେଙ୍ଗ୍‍ ପଡ଼ାନାତ୍‍ ।
GAL 6:6 କ୍ରିସ୍ତଦି ସୁସମାଚାର ଅଜାନି ୱାଲେ ସିକିୟାସିନି ଗୁରୁଙ୍ଗ୍ ନିଜେ ପୟ୍‍ଜି ମାନି ୱିଜୁ ନେଗି ବିସୟ୍‍ତି ମିସାକିନିକା ମାନାତ୍‍ ।
GAL 6:7 ମାପୁରୁ ଟକେ ଆଏନ୍‍ : ଆକା କିଦେଙ୍ଗ୍ ସଲ୍‍ସି ମିରୁ ନିଜେ ଟକେ ଆମାଟ୍‍ । ଲୋକୁ ଆମାକା ୱିତ୍‍ନାର୍‌, ଆକାନେ କୟ୍‍ନାର୍‍ ।
GAL 6:8 ଏନ୍‍ ଦୁନିଆ ଇସାବ୍‍ତାନ୍‍ ଆସାଦି କିଡ଼ିଇଦୁ ୱିତୁ ୱିତ୍‍ନାନ୍‍, ୱାନ୍‍ ସାନି ରୁପ୍‍ତି ପାସି ଉଣ୍ତା କିନାନ୍‍ । ଜଦି ୱାନ୍‍ ପବିତ୍ର ଆତ୍ମାଦି କିଡ଼ିଇଦୁ ୱିତ୍‍ନାନ୍‍, ଆର୍‍ତିଙ୍ଗ୍‍ଁ ଏସ୍‌କାଙ୍ଗ୍‌ୱିଜିଇ ଜିବନ୍‍ତି ପାସି ଉଣ୍ତା କିନାନ୍‍ ।
GAL 6:9 ଆଦେଙ୍ଗ୍‌ ସତ୍‍ପାଣି କିଦେଙ୍ଗ୍‍ ମାଡ୍‍ ୱାଦ୍‌ନି ନେଗେତ୍‌ ସିଲେ । ଇରିଙ୍ଗ୍‌ ଆବେଟାନ୍‍ ୱାନ୍ଦ୍‍ଏତିଙ୍ଗ୍‍, ଟିକ୍‍ ସମୟ୍‍ତୁ ମାଡ୍‍ ପାସି ଉଣ୍ତାକିଦେଙ୍ଗ୍‌ ଆଟ୍‍ନିକା ।
GAL 6:10 ଆଦେଙ୍ଗ୍‌ ଏସ ଦେବେଙ୍ଗ୍‍ ସାରି ପୁଟ୍‍ନାତ୍‍, ୱିଜୁଦିନ୍ ୱିଜେରି, ବିସେସ୍‍କିଜି ଏମେକାର୍‍ ମା ବିସ୍‍ବାସି ପରିବାର୍‌ତୁ, ୱାରି ନେଗିକା କିନିକା ମା ପାଣି ।
GAL 6:11 ସୁଡ଼୍‍ଦୁ, ଏସ ପେରି ପେରି ଅଇକର୍‍ତାନ୍‍ ନିଜେଦି କିୟୁଦାନ୍‌ ନାନ୍‍ ମିଙ୍ଗିଁ ଇକା ରାସ୍‍ସିନା ।
GAL 6:12 ଏମେକାର୍‍ ଆତ୍‍ରେଦି ବିସୟ୍‍ତିଙ୍ଗ୍‍ ତର୍‍ଆଇ ଆନାର୍‍ ମାରି ପେରିକାର୍‍ ତର୍‍ନାର୍‍, ୱାର୍‍ ନେ ମିଙ୍ଗିଁ ସୁନ୍ନତ ଆଦେଙ୍ଗ୍‌ ଜାସେ କିଜିନାର୍‍ । କ୍ରିସ୍ତଦି କ୍ରୁସ ଉଣ୍ତିଙ୍ଗ୍‍ ତାଡ଼ନା ବଗ୍‌ କିଇ ଇସାବ୍‍ତାନ୍‍ ୱାର୍‍ ଇକା କିଜିନାର୍‍,
GAL 6:13 ଏମେକାର୍‍ ସୁନ୍ନତ ନିୟମ୍‍ ମାନାନାର୍‍, ୱାର୍‍ ବା ମସାଦି ନିୟମ୍‍ ମାନାଏର୍‍ । ମିର୍‍ ସୁନ୍ନତ ଆଦୁ ଇଜି ୱାର୍‍ ବଦାକିଜିନାର୍‍ । ଇକା ମେନ୍ଦଲ୍‍ତି ନିୟମ୍‍ ମାନାଦେଙ୍ଗ୍‍ଁ ଇଜି ମିଙ୍ଗିଁ ଟକେ କିଦେଙ୍ଗ୍‍ ଆଟ୍‍ତିଙ୍ଗ୍‍, ୱାର୍‍ ଗର୍ବ କିନାର୍‍ ।
GAL 6:14 ମାତର୍‍ ନାନୁ କେବଲ ମା ପ୍ରବୁ ଜିସୁ କ୍ରିସ୍ତଦି କ୍ରୁସ ବିସୟ୍‍ତାନ୍‍ ଗର୍ବ କିଜିନା; ଇରିଙ୍ଗ୍‌ ୱାନି କ୍ରୁସ ଉଣ୍ତିଙ୍ଗ୍‍ ଦୁନିଆ ନା ଉଣ୍ତିଙ୍ଗ୍‍ ସାତାମାନାତ୍‍ ମାରି ନାନୁ ଦୁନିଆ ଉଣ୍ତିଙ୍ଗ୍‍ ସାତାମାନା ।
GAL 6:15 ଏନ୍‍ ସୁନ୍ନତ ମାରି ଅସୁନ୍ନତ, ଆବେନୁ ଇନିକା ସଲ୍‍ଏତ୍‍ ରେଏତ୍‍, ପୁନି ଜନମ୍‍ ନେ ସତ୍‍ ବିସୟ୍‍ ।
GAL 6:16 ଏମେକାର୍‍ ନିଜେଦି ଜିବନ୍‍ତୁ ଇୟା ନିତି ମାନାନାର୍‍, ୱାର୍‍ ୱିଜେରେ ମାରି ମାପୁରୁଦି ଇସ୍ରାଏଲ୍‌ତି ଲୋକୁ ୱିଜେରେ ଜିବନ୍‍ତୁ ସାନ୍ତି ପୟ୍‍ନାର୍‍ ମାରି ଦୟା ଏତ୍‌ କିପିର୍‌ ।
GAL 6:17 ସାରାସାରି, ନା ନିସନେ ୱେର୍‌ନି ମାଟା, ନାଙ୍ଗିଁ ମାରି ଏନ୍‍ ଦୁକୁ ସିମାକିନ୍‍ । ଇରିଙ୍ଗ୍‌ ନା ମେନ୍ଦଲ୍‌ତୁ ଏମେ ୱିଜୁ ଗାଉ ସିନା ମାନାତ୍‍, ଆବେଣାନ୍‍ ତରାଜିନାତ୍‍ ଜେ, ନାନୁ ଜିସୁଦି ଦାସ୍‍ ।
GAL 6:18 ଏ ତଡ଼ାନ୍‍କୁ ନି ତାଙ୍ଗିଁକି ! ମା ପ୍ରବୁ ଜିସୁ କ୍ରିସ୍ତଦି ଦୟା ମି ଆତ୍ମାଦୁ ୱିଜେରି ଲାକ୍‍ତୁ ମାନିତ୍‍ । ଆମେନ୍‍ ।
EPH 1:1 ମାପୁରୁଦି ବଦାଦାନ୍ କ୍ରିସ୍ତ ଜିସୁଦି ଅରେନ୍‍ ପ୍ରେରିତ ସିସୁ ବାସେଆତି ମାନି ପାଉଲ ଜିସୁ କ୍ରିସ୍ତଦି ୱାଲେ ମିସାଜି ବିସ୍‍ବାସ୍‍ତାନ୍ ଜିଜିମାନି ଏପିସିୟଦି ମାପୁରୁଦି ବିସ୍‌ବାସିଲୋକା ଲାକ୍‍ତୁ ରାସ୍‍ତିମାନି ଇୟା ଆକୁ
EPH 1:2 ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‍ ।
EPH 1:3 ରାଦୁ ଦନ୍ୟବାଦ୍‍ ସିନାଟ୍‍ ମା ପ୍ରବୁ ଜିସୁ କ୍ରିସ୍ତଦି ବୁବା ମାପୁରୁ । ଇରିଙ୍ଗ୍‌ ୱାନ୍‌ ମାଙ୍ଗିଁ କ୍ରିସ୍ତଦି ୱାଲେ ମିସାକିଜି ମୁସ୍‌କୁପୁର୍‌ତି ମେନ୍ଧଲ୍‍ତି ୱିଜୁ ଆତ୍ମିକ ଆର୍ସିବାଦ୍‌ ସିତିମାନି ।
EPH 1:4 କ୍ରିସ୍ତଦିମାନୁ ମିସାଜି ମାଡୁ ଏଣ୍ତେସ୍‌ ମାପୁରୁଦି ଲୋକୁ ଆନିକା ଆୟାଉଣ୍ତିଙ୍ଗ୍‌ ୱାନ୍‌ ମାଙ୍ଗିଁ ପୃତିବି ତିଆର୍‍ ଆନି ଆଗ୍‍ଡ଼ିରାନ୍‍ ବାସେକିତାମାନାନ୍‍ । ମାରି ୱାନି ଜିବନ୍‌ନୋନିକା ମାଡୁ ୱାନି ଆଗ୍‌ଡ଼ି ପବିତ୍ର ନି ଦସ୍‍ସିଲିକାର୍‍ ଆନିକା ।
EPH 1:5 ଜିସୁ କ୍ରିସ୍ତଦି ମାଣାନ୍‌ ୱାନ୍‌ ମାଙ୍ଗିଁ ୱାନି କଡ଼ର୍‍ ନି ଆଇଲିକ୍‌ ୱାଜା ପସା କିଦେଙ୍ଗ୍‌ ଇଜି ତିଆର୍‌ କିତାମାର୍ହାନ୍; ଇକାନେ ମାର୍ହାତ୍‌ ୱାନି ୱେଡ଼ିକା ନି ବଦା ।
EPH 1:6 ମାପୁରୁଦି ଗୌରବ୍‌ ଦୟା ଉଣ୍ତିଙ୍ଗ୍‍ଁ ମାରି ୱାନି ଲାଡ୍‍ତି ମାରିନ୍‍ତିଙ୍ଗ୍‍ଁ ଆର୍‍ଏନେ ଦାନ୍‍ ୱାଜା ପୟ୍‍ତିମାନିଙ୍ଗ୍‍ଁ ସିଲେ, ମାପ୍‌ ମାପୁରୁଦି ଦନ୍ୟବାଦ କିଜିନାପ୍‍ ।
EPH 1:7 କ୍ରିସ୍ତଦି ସାତି ମାଣାନ୍‌ ମାଡ୍‌ ରକିୟା ପୟ୍‍ତିମାନିକା, ଅର୍ତାତ୍‍ ମା ୱିଜୁ ପାପ୍‍ କେମା ଆତାମାନାତ୍‌ । ମାପୁରୁଦି ଦୟା ଏସା ପେରିକା,
EPH 1:8 ଆୟା ଦୟା ୱିଜୁଜାତିଦି ବୁଦି ମାରି ଜ୍ଞାନ୍‌ ୱାନ୍‌ ମାଙ୍ଗିଁ ନାଣ୍ତଦାନ୍‌ ସିତାମାନାନ୍‌ !
EPH 1:9 ମାପୁରୁ ୱାନି ପେରି ବୁଦି ନି ଲୋଇ ସୁଣି ମାଣାନ୍‌ ଆମାକା ବଦାକିତା ମାର୍ହାର୍‍, ଆକା ପୁରା କିତାମାନାନ୍‌ ମାରି ତାନିଙ୍ଗ୍‍ କ୍ରିସ୍ତଦି ସାକାଦାନ୍‍ ପୁରା କିଦେଙ୍ଗ୍‌ ଇଜି ୱାନ୍‌ ଏମେ ମାର୍‍ଗିତି ସିନ୍ତା କିତାମାର୍ହାନ୍, ଆକା ମା ଲାକ୍‌ତୁ ୱେକ୍‍ତା ମାନାନ୍‌ ।
EPH 1:10 ଆୟା ସିନ୍ତାଦି ଇସାବ୍‍ତାନ୍‍ ମୁସ୍‌କୁପୁର୍‌ ନି ଦୁନିଆଦି ୱିଜୁ ତିଆର୍‌ ଆତି ବିସୟ୍‍ ଉନ୍‍ଡ୍ରେ ଆନେ ମାରି କ୍ରିସ୍ତ ଆୟାୱିଜୁଦି ତାଲା ୱାଜା ତେବାନାନ୍‍ । ଇୟା ସିନ୍ତା ମାପୁରୁ ଟିକ୍‍ ୱେଡ଼ାଦୁ ପୁରା କିନାନ୍‍ ।
EPH 1:11 ୱିଜୁ ବିସୟ୍‍ ମାପୁରୁଦି ଜୋଜନା ନି ରାଜିଆନି ଇସାବ୍‍ତାନ୍‍ ଆନାତ୍‍; ଆଗ୍‍ଡ଼ିରାନ୍‍ କିତିମାର୍ହି ନିଜେଦି ଉଦେସ୍‍ କିଦେଙ୍ଗ୍‌ ଇଜି, କ୍ରିସ୍ତଦି ମାଣାନ୍‌ ୱାନି ନିଜେ ଲୋକୁ ଆଦେଙ୍ଗ୍‌ ଇଜି ମାପୁରୁ ମାଙ୍ଗିଁ ଆସ୍‌କିତାମାନାନ୍‌ ।
EPH 1:12 ରାଦୁ, ଏମେକାର୍‌ ୱିଜେରି ଆଗ୍‍ଡ଼ି କ୍ରିସ୍ତମାନୁ ଆସା ଇଟ୍‍ତାମାର୍‌ପା, ୱିଜେରେ ମାପୁରୁଦି ମହିମା କିନିକା ।
EPH 1:13 ମିର୍‌ ବା ଏସ୍ତିୱାଲେ ରକିୟା ପୁଟ୍‍ନି ଇୟା ସୁସମାଚାର୍‍ତି ସତ୍‍ ମାଟା ୱେର୍‍ଇଦେର୍‍, ଆୟା ୱେଡ଼ାଦାନ୍‍ ମାପୁରୁଦି ଆତିମାନିଦେର୍‍ । ମିର୍‌ କ୍ରିସ୍ତଙ୍ଗ୍‍ଁ ବିସ୍‍ବାସ୍‍ କିତିମାନିଙ୍ଗ୍‍, ମାପୁରୁ ୱାନି ପାର୍‍ମାଣ୍‍ ଇସାବ୍‍ତାନ୍‍ ପବିତ୍ର ଆତ୍ମାଦିଙ୍ଗ୍‌ ସିଜି ମି ମୁସ୍‌କୁ ୱାନି ଅଦିକାର୍‍ତି ଟାପ୍‍ଡ଼େଇତା ମାନାନ୍‌ ।
EPH 1:14 ମାପୁରୁ ୱାନି ଲୋକାଙ୍ଗ୍‍ଁ ଏମେ ୱିଜୁ ବିସୟ୍‍ ସିଦେଙ୍ଗ୍‍ ଇଜି ପାର୍‍ମାଣ୍‍ କିତାମାନାନ୍‌, ଆୟାୱିଜୁ ଜେ ମାଡ୍‌ ପୟ୍‍ନିକା, ପବିତ୍ର ଆତ୍ମା ତାନି ସତ୍‌ ୱାଜା । ମାପୁରୁ ୱାନି ଲୋକାଙ୍ଗ୍‍ ମୁକ୍‍ଡ଼ାନି ପୁରାଆନିକା ସିନାନ୍‍, ଇୟା ସତ୍‍ ନେସ୍‍ସି, ରାଦୁ ମାପୁରୁଦି ଦନ୍ୟବାଦ କିନାଟ୍‍ ।
EPH 1:15 ଇୟାଉଣ୍ତିଙ୍ଗ୍‌ ପ୍ରବୁ ଜିସୁମାନୁ ମି ବିସ୍‍ବାସ୍‍ ନି ମାପୁରୁ ଲୋକା ଉଣ୍ତିଙ୍ଗ୍‌ ମି ଜିବନ୍‍ନୋନିକା ମାନାତ୍‌,
EPH 1:16 ଇୟାୱିଜୁ କାବୁର୍‌ ୱେନ୍‌ଜି ମି ଉଣ୍ତିଙ୍ଗ୍‌ ମାପୁରୁଙ୍ଗୁଁ ଦନ୍ୟବାଦ ସିଜି ୱାଜିନା, ନାନୁ ବା ନା ପାର୍‍ତନାଦୁ ମିଙ୍ଗିଁ ୱିଜୁଦିନ୍‍ ଏତ୍‌କିଜି ୱାଜିନା ।
EPH 1:17 ନାନୁ ନା ଗୌରବ୍‍ତି ବୁବା, ମା ପ୍ରବୁ ଜିସୁ କ୍ରିସ୍ତଦି ମାପୁରୁଙ୍ଗୁଁ ପାର୍‍ତନା କିନା, ଏଣ୍ତେସ୍‌ ୱାନ୍‌ ମିଙ୍ଗିଁ ପବିତ୍ର ଆତ୍ମା ସିନାନ୍‍, ଆୟା ଆତ୍ମା ମିଙ୍ଗିଁ ବୁଦି ସିନାତ୍‍ ମାରି ମାପୁରୁଙ୍ଗୁଁ ମି ଲାକ୍‍ତୁ ତର୍‍ନାତ୍‍ । ଆତିଙ୍ଗ୍‌, ମିର୍‌ ୱାନିଙ୍ଗ୍‌ ନେସ୍‍ତେଙ୍ଗ୍‍ ଆଟ୍‍ନିଦେର୍‍ ।
EPH 1:18 ନାନୁ ବାତିଙ୍ଗ୍‍ ମାଲ୍‍ନା, ଏଣ୍ତେସ୍‌ ୱାନି ଜାୟ୍‍ ସୁଡ଼ୁଦେଙ୍ଗ୍‌ ଇଜି ମି ଲୋଇରି କାଣ୍‌ଗା ରେଆନାତ୍‍ । ଆବେଣାନ୍‍ ଏମେ ଆସା ଉଣ୍ତିଙ୍ଗ୍‌ ମିର୍‌ ୱାନି ମାଣାନ୍‌ କୁକାୟ୍‍ଆତିମାନିଦେର୍‍, ଆକା ନେସ୍‌ନିଦେର୍‌ ।
EPH 1:19 ୱାନି ଲୋକା ଉଣ୍ତିଙ୍ଗ୍‌ ୱାନି ପାର୍‍ମାଣ୍‍ତିକା କାବାଆନି ଆର୍ସିବାଦ୍‌ ୱିଜୁ ଜେ ଏସା ନାଣ୍ତ, ମାରି ମା ନାନି ବିସ୍‍ବାସି ଲୋକା ଲୋଇ ୱାନି ସାଲାନି ସାକ୍ତି ଜେ ଏସା ପେରିକା, ଆକା ମିର୍‌ ନେସ୍‍ତେଙ୍ଗ୍‍ ଆଟ୍‍ନିଦେର୍‍ ।
EPH 1:20 ଇଲେଇ, ମା ଲୋଇ ପାଣିକିଜି ମାନି ଆୟା ସାକ୍ତି ଦାନ୍‍ ନେ ମାପୁରୁ କ୍ରିସ୍ତଙ୍ଗ୍‍ଁ ସାତି ମାଣାନ୍‌ ନିକ୍‍ସି ୱାନି ମୁସ୍‌କୁପୁର୍‌ତି ନିଜେଦି ଉଣେରି ତରିନ୍‌ ବାସିସ୍‍ କିତାମାନାନ୍‌ ।
EPH 1:21 କ୍ରିସ୍ତ ୱିଜୁ ମୁସ୍‌କୁପୁର୍‌ତି ସାସନ୍‍ କିନିକାନ୍‍, କିଦେଙ୍ଗ୍‍ ଆଟ୍‍ନି ଅଦିକାରି, ସାକ୍ତିଦିକାନ୍‍ ମାରି ନେତାରି ମୁସ୍‌କୁ ସାସନ୍‍ କିନାନ୍‍, ଇୟା ଜୁଗ୍‌ କି ୱାନି ଜୁଗ୍‌ଦି ଅଦିକାରିସିନା ୱିଜୁ ଅଦିକାର୍‌ ବାଦ୍‍ଲୁ ୱାନି ଅଦିକାର୍‌ ନାଣ୍ତ ପେରିକା ।
EPH 1:22 ମାପୁରୁ ୱିଜୁ ବିସୟ କ୍ରିସ୍ତଦି ପାଦାମ୍‍ ଆଡ୍‍ଗି ଇଟ୍‌ତାମାନାନ୍‌ ମାରି ୱିଜୁ ବିସୟ ମୁସ୍‌କୁ ୱାନିଙ୍ଗ୍‍ଁ ୱିଜେରିଙ୍ଗ୍‌ ପେରି ପ୍ରବୁ ୱାଜା ମଣ୍ତଲିଦିଙ୍ଗ୍‍ଁ ସିତାମାନାନ୍‌ ।
EPH 1:23 ମଣ୍ତଲି କ୍ରିସ୍ତଦି ମେନ୍ଧଲ୍‍; ମଣ୍ତଲି ଦାନ୍‍ କ୍ରିସ୍ତଦି ପାଣିଦି ପୁରାଆନି ପାଣି ଆନାତ୍‌; ମାରି କ୍ରିସ୍ତ ୱିଜୁ ବିସୟ ପୁରା କିନାନ୍‍ ।
EPH 2:1 ମି ମାନାଇକା ମାରି ପାପ୍‌ ଉଣ୍ତିଙ୍ଗ୍‌ ସର୍‌ଇଦିନ୍‌ତୁ ନେସ୍‌ନିୱାଜା ସାତି ମାର୍‌ଇଦେର୍‌ ।
EPH 2:2 ଆୟା ବେଡ଼ାଦୁ ମିର୍‌ ଦୁନିଆଦି ସତ୍‌ସିଲି ସାରିଦୁ ବୁଲାଜି, ବାଦଡ଼ତି ରାଜିଦି ଅଦିପତିଦି ଆଡ୍‍ଗି ମାର୍‌ଇଦେର୍‌ । ଆୟା ଅଦିପତି ଇଲେଇ ମାପୁରୁଦି ମାଟା ଆସ୍‌ଇୱାରି ଲୋକା ମୁସ୍‌କୁ ସାସନ୍‌ କିଜିନାନ୍‌ ।
EPH 2:3 ସତ୍‌ତାନ୍‌ ମାଡୁ ୱିଜୁଲୋକୁ ୱାରି ୱାଜା ମାର୍‌ଇକା ମାରି ମେନ୍ଦଲ ନି ମନ୍‍ତି ଆସାଆନି ଇସାବ୍‌ତାନ୍‌ ଜିଜି ମାର୍‌ଆଟ୍‌ । ମାରି ଆଇୱାରି ୱାଜା ମାଡୁ ବା ମାପୁରୁଦି ରିସାଦି ବାଦ୍‌ଲୁ କାସ୍ଟୁ ପୟ୍‌ଦେଙ୍ଗ୍‌ ସୋଲ୍‌ସିମାର୍ହାପ୍‌ ।
EPH 2:4 ମାତର୍‌ ମାପୁରୁଦି ଦୟା ନିସା ନାଣ୍ତ ମାରି ମା ଉଣ୍ତିଙ୍ଗ୍‌ ୱାନି ଜିବନ୍‌ନୋନିକା ନିସା ପେରିକା ଜେ,
EPH 2:5 ମା ମାନାଇ ଉଣ୍ତିଙ୍ଗ୍‌ ମାଡୁ ନେସ୍‌ନିୱାଜା ସାତି ମାର୍‌ଇ ବେଡ଼ାଦୁ ୱାନ୍‌ କ୍ରିସ୍ତଦି ୱାଲେ ମାଙ୍ଗିଁ ଜିବନ୍‌ କିତାନ୍‌ । ମାପୁରୁଦି ଦୟାଦାନ୍‌ ନେ ମିର୍‌ ରକିୟା ପୟ୍‌ତିମାନିଦେର୍‌ ।
EPH 2:6 କ୍ରିସ୍ତ ଜିସୁଦି ୱାଲେ ଅର୍‌ସେଆତି ମାଣ୍‌କୁ ୱାନି ୱାଲେ ମୁସ୍‌କୁପୁର୍‌ତୁ ସାସନ୍‌ କିନି ଉଣ୍ତିଙ୍ଗ୍‌ ୱାନ୍‌ ମାଙ୍ଗିଁ ବା ନିକ୍‌ତାମାନାନ୍‌ ।
EPH 2:7 ଜିସୁ କ୍ରିସ୍ତଦିମାନୁ ତର୍‌ତିମାନି ଜିବନ୍‌ନୋନିମାନୁ ୱାନି ଜୁଗ୍‍ତୁ ନିଜେଦି ଦୟାଦାନ୍‌ ସାମାନ୍‌ତି ପେରି ନାଣ୍ତ୍‌ ଧନ ତର୍‌ନି ଉଣ୍ତିଙ୍ଗ୍‌ ମାପୁରୁ ଇକା କିତାନ୍‌ ।
EPH 2:8 ଇରିଙ୍ଗ୍‌ ମାପୁରୁଦି ଦୟା ଉଣ୍ତିଙ୍ଗ୍‌ ବିସ୍‌ବାସ୍‌ତାନ୍‌ ମିର୍‌ ରକିୟା ପୟ୍‌ତିମାନିଦେର୍‌; ଇକା ମି ନିଜେଦିମାଣୁକୁ ଆଏତ୍‍, ମାତର୍‌ ମାପୁରୁଦି ଦାନ୍‍ ଇକା ।
EPH 2:9 ଆଦେଙ୍ଗ୍‌ ଇୟା ବିସୟ୍‌ତାନ୍‌ ଏନ୍‌ ଗର୍ବ କିଦେଙ୍ଗ୍‌ ଆଟ୍‍ଏନ୍‍ ।
EPH 2:10 ମାଡୁ ଆମାକା ଆଦେଙ୍ଗ୍‌ ଆଟ୍‌ତିମାନିକା, କେବଲ ମାପୁରୁନେ ଆକା କିତାମାନାନ୍‌; ଆମାୱିଜୁ ସତ୍‍ ପାଣି ମାପ୍‌ କିନାପ୍‌ ଇଜି ମାପୁରୁ ଆଗ୍‍ଡ଼ିନେ ତିଆର୍‌ କିତାମାର୍ହାନ୍‌, ମାପୁ କ୍ରିସ୍ତ ଜିସୁଦି ୱାଲେ ମିସାନି ମାଣ୍‌କୁ ଆକା ପୁରା ଆତାମାନାତ୍‌ ।
EPH 2:11 ନିଜେଦି ସର୍‌ଇଦିନ୍‌ତି ଅବସ୍ତା ଏତ୍‌ କିଦୁ, ମିର୍‌ ଅଣଜିହୁଦି ମାର୍‌ଇଦେର୍‌, ନିଜେଦିଙ୍ଗ୍‌ “ସୁନ୍ନତ” ଇଜି ୱେର୍‌ସିମାନି ଜିହୁଦିର୍‌ ମିଙ୍ଗିଁ “ଅସୁନ୍ନତ” ଇଜି ଇଜିମାରାର୍‌ । ଇକା କେବଲ ଉନ୍‌ଡ୍ରେ ମେନ୍ଦଲ୍‌ତି ଅବସ୍ତାଦିଙ୍ଗ୍‌ ବୁଜାନାତ୍‌ ।
EPH 2:12 ଆଗ୍‌ଡ଼ି ମିର୍‌ କ୍ରିସ୍ତଦିମାଣୁକୁ ଆକ ମାର୍‌ଇଦେର୍‌, ମିର୍‌ ଆଇଦେସ୍‍ତି ଲୋକ୍‌ ମାର୍‌ଇଦେର୍‌ ମାରି ମାପୁରୁଦି ଆସ୍‌କିତିମାନି ଲୋକାମାନୁ ମିସାଏତି ମାର୍‌ଇଦେର୍‌ । ମାପୁରୁ ତାମି ଇସ୍ରାଏଲ ଲୋକା ଉଣ୍ତିଙ୍ଗ୍‌ କିତିମାନି ପାର୍‍ମାଣ୍‍ ମୁସ୍‌କୁ ତିଆର୍‌ତି ନିୟମ୍‌ତୁ ମି ଇନିକା ମିସାଏତ୍‌ ମାର୍‌ର୍ହାତ୍‌ । ମାରି ଆସାସିଲିକା ମାରି ମାପୁରୁଦିମାଣୁକୁ ୱେର୍‌ଏ ଆଜି ମିର୍‌ ଜଗତ୍‌ତୁ ବାସାତି ମାର୍‌ଇଦେର୍‌ ।
EPH 2:13 ପୁର୍ବେ ମିର୍‌ ଆକ ମାର୍‌ଇଦେର୍‌, ମାତର୍‌ ଇଲେଇ କ୍ରିସ୍ତ ଜିସୁଦିମାନୁ ୱାନି ନେତେର୍‌ତାନ୍‌ ଲାକ୍‌ତୁ ଆତିମାନିଦେର୍‌ ।
EPH 2:14 ଇରିଙ୍ଗ୍‌ ଜିହୁଦି ମାରି ଅଣଜିହୁଦିରିଙ୍ଗ୍‌ ଅର୍‌ସେ କିଜି, କ୍ରିସ୍ତ ନିଜେ ମାମାନୁ ସାନ୍ତି ତିଆର୍‌ କିତାମାନାନ୍‌ । ୱାରିଙ୍ଗ୍ ୱେର୍‌ଏ କିଜି ନିଜେନିଜେଦିମାନୁ ସାତ୍ରୁ ୱାଜା ଇଡ୍‌ନିମାନି ଗଡାଦିଙ୍ଗ୍‌ ୱାନ୍‌ ୱାନି ନିଜେଦି ମେନ୍ଦଲ୍‌ଦାନ୍‌ ରୁକ୍‌ତାମାନାନ୍‌ ।
EPH 2:15 ୱାନ୍‌ ଜିହୁଦିରି ୱିଜୁ ବିଧିବିଧାନ୍‌ ମାଟାଦି ନିୟମ୍‌ତିଙ୍ଗ୍‌ ନିଜେଦି ମେନ୍ଦଲତାନ୍‌ ଗୁସା କିତାମାନାନ୍‌, ଏଣ୍ତେସ୍‌ ୱାନ୍‌ ସାନ୍ତି ତିଆର୍‌ କିଜି ରୁଣ୍ତିୱାନିକାଙ୍ଗ୍‌ବା ନିଜେଦିମାନୁ ଅରେନ୍‍ ପୁନି ଲୋକ୍‌ ୱାଜା ତିଆର୍‌ କିନାନ୍‌,
EPH 2:16 କ୍ରୁସକାଟ୍‌ତୁ ୱାନି ସାତିମାଣୁକୁ କ୍ରିସ୍ତ ଆୟା ଲୋକାମାନୁ ମାନି ସତ୍ରୁଦିଙ୍ଗ୍‌ ନାସ୍ଟୁ କିତାମାନାନ୍‌; କ୍ରୁସକାଟ୍‌ଦାନ୍‌ ୱାନ୍‌ ରୁଣ୍ତି ଜାତିଆଙ୍ଗାଁ ମିସା କିଜି ଉନ୍‌ଡ୍ରେ ମେନ୍ଦଲ୍‌ ୱାଜା କିତାମାନାନ୍‌ ମାରି ମାପୁରୁଦି ଲାକ୍‌ତୁ ଡ଼େସି ତାତାମାନାନ୍‌ ।
EPH 2:17 ଆୟାଉଣ୍ତିଙ୍ଗ୍‌ କ୍ରିସ୍ତ ୱାତାମାର୍ହାନ୍‌ ମାରି ମାପୁରୁଦିମାଣୁକୁ ଆକ ସୋର୍‌ଇମାନି ଅଣଜିହୁଦି ମାରି ୱାନି ଲାକ୍‌ତୁମାନି ଜିହୁଦିରିମାନୁ ସାନ୍ତିଦି ସୁସମାଚାର୍‌ ପ୍ରଚାର୍‌ କିତାମାର୍ହାନ୍‌ ।
EPH 2:18 କ୍ରିସ୍ତଦି ମାଣ୍‌କୁ ନେ ଜିହୁଦି ମାରି ଅଣଜିହୁଦି ୱିଜେରେ ଉନ୍‌ଡ୍ରେ ଆତ୍ମାଦୁ ବୁବାଦି ଆଗ୍‌ଡ଼ି ୱାଦେଙ୍ଗ୍‌ ଆଟ୍‌ତା ମାନାପ୍‌ ।
EPH 2:19 ମାରି, ମିର୍‌ ମାରି ଆଇଦେସ୍‌ତୁ ନି ଆଇମାନୁବାସାକିନିଲୋକୁ ଆଇଦେର୍‍, ମାତର୍‌ ଇଲେଇ ମାପୁରୁଦି ଲୋକା ୱାଲେ ମିର୍‌ ବା ୱାନି ରାଜିଦି ଲୋକୁ ମାରି ୱାନି ଇଲୁପରିବାର୍‌ତି ଲୋକୁ ଆତିମାନିଦେର୍‌ ।
EPH 2:20 ମିର୍‌ ବା ପ୍ରେରିତ ସିସୁ ମାରି ବାବବାଦିରି ତିଆର୍‌କିତି ମୁଲ୍‌କାଲୁ ମୁସ୍‌କୁ ତିଆର୍‌ଆତି ଇଲୁୱାଜା । ଆୟା ଇଲୁଦି କୁନାଦି ମୁଲ୍‌କାଲୁ ନିଜେ କ୍ରିସ୍ତ ଜିସୁ ।
EPH 2:21 ୱାନ୍‌ନେ କେବଲ ଇୟା ଇଲୁଦିଙ୍ଗ୍‌ ଜଡ଼େଇ କିଜି ଇଡ୍‌ନାନ୍‌ ମାରି ପ୍ରବୁଦି ଉଣ୍ତିଙ୍ଗ୍‌ ଉନ୍‌ଡ୍ରି ପବିତ୍ର ମନ୍ଦିର୍‌ ୱାଜା ପିରିସ୍‌ କିନାନ୍‌ ।
EPH 2:22 ୱାନି ସାହାଜ୍ୟଦାନ୍‌ ମିର୍‌ ବା ଆଇ ୱିଜେରି ୱାଲେ ଆତ୍ମାୱାଜା ମାପୁରୁଦି ତେବାନି ଉଣ୍ତିଙ୍ଗ୍‌ ଉନ୍‌ଡ୍ରି ତେବାନି ଇଲୁୱାଜା ତିଆର୍‌ ଆଜିନିଦେର୍‌ ।
EPH 3:1 ଇୟାଉଣ୍ତିଙ୍ଗ୍‌ ମି ୱାଜା ଅଣଜିହୁଦିରି ଉଣ୍ତିଙ୍ଗ୍‌ କ୍ରିସ୍ତ ଜିସୁଦି ଉଣ୍ତିଙ୍ଗ୍‌ ଜଇଲ୍‌ତୁ ମାନି ନାନୁ ପାଉଲ, ମାପୁରୁଦି ଲାକ୍‌ତୁ ପାର୍‌ତାନା କିଜିନା ।
EPH 3:2 ମି ନେଗି ଉଣ୍ତିଙ୍ଗ୍‌ ମାପୁରୁ ୱାନି ଦୟାଦାନ୍‌ ନାଙ୍ଗିଁ ଜେ ଇୟା ପାଣି କିଦେଙ୍ଗ୍‌ ସିତାମାନାନ୍‌, ଇକା ପୁରା ୱେର୍‌ଇମାନି ।
EPH 3:3 ମାପୁରୁ ୱାନି ଆୟା ମାର୍‌ଗିତିମାନି ମାଟା ୱେର୍‍ସି ନାଙ୍ଗିଁ ଜାଣେକିତାନ୍‌ । ଇୟା ବିସୟ୍‌ତାନ୍‌ ନାନ୍‌ ଇସ୍ରିକାକିଜି ରାସ୍‌ସିନା ।
EPH 3:4 ଆକା ପଡ଼ାତିଙ୍ଗ୍‌, କ୍ରିସ୍ତଦି ମାର୍‌ଗିତିମାନି ମାଟା ବିସୟ୍‌ତାନ୍‌ ନାନ୍‌ ଆମାକା ବୁଜାତାମାନା, ଆକା ମିର୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌ ।
EPH 3:5 ପୁର୍ବେକାଡ଼ାଦି ଲୋକା ଲାକ୍‌ତୁ ଇୟା ମାର୍‌ଗିତିମାନି ମାଟା ବିସୟ୍‌ତାନ୍‌ ୱେର୍‌ଏର୍‌ ମାର୍ହାର୍‌ । ମାତର୍‌ ମାପୁରୁ ଇଲେଇ ୱାନି ପବିତ୍ର ପ୍ରେରିତ ସିସୁ ମାରି ବାବବାଦିରିଙ୍ଗ୍‌ ଆତ୍ମାଦାନ୍‌ ଇକା ୱେର୍‌ତାମାନାନ୍‌ ।
EPH 3:6 ଆୟା ମାର୍‌ଗିତିମାନି ମାଟା ଆଜିନାତ୍‍, ସୁସମାଚାର୍‌ତି ଉଣ୍ତିଙ୍ଗ୍‌ ଜିହୁଦିରି ୱାଲେ ଅଣଜିହୁଦିରି ବା ମାପୁରୁଦି ଆସିର୍ବାଦ୍‌ତୁ ମିସାତାମାନାର୍‌ । ୱାର୍‌ ଆୟା ଉନ୍‌ଡ୍ରେ ମେନ୍ଦଲତି ମେନ୍ଦଲୱିଜୁ ମାରି ଜିସୁ କ୍ରିସ୍ତଦି ସାହାଜ୍ୟଦାନ୍‌ ମାପୁରୁ ସିତିମାନି ପାର୍‌ମାଣ୍‌ତୁ ମିସାତାମାନାର୍‌ ।
EPH 3:7 ମାପୁରୁଦି ପାଣିକିନି ସାକ୍ତି ଇସାବ୍‌ତାନ୍‌ ନାଙ୍ଗିଁ ଆମା ଅନୁଗ୍ରହଦି ଦାନ୍‌ ସିତାମାନାନ୍‌, ଆୟାଉଣ୍ତିଙ୍ଗ୍‌ ଆୟା ସୁସମାଚାର୍‌ତି ନାନ୍‌ ଅରେନ୍‍ ସେବାକିନିକିନ୍ଦା ଆତାମାନା ।
EPH 3:8 ନାନ୍‌ ମାପୁରୁଦି ଲୋକା ଲୋଇ ୱିଜେରିମାଣୁକୁ ଇସ୍ରିକିନ୍ଧା, ମାରିବା ଅଣଜିହୁଦିରି ଲାକ୍‌ତୁ କ୍ରିସ୍ତଦି ୱିଜ୍‌ଇ ସମ୍ପତିଦି ବାକ୍ୟ ଆସ୍‌ସି ସନି ଉଣ୍ତିଙ୍ଗ୍‌ ନାଙ୍ଗିଁ ମାପୁରୁ ଦୟା ସିତାମାନାନ୍‌ ।
EPH 3:9 ମାରି ମାପୁରୁଦି ଆୟା ମାର୍‌ଗିତିମାନି ମାଟା ଏଣ୍ତେସ୍‌ ପାଣି ସିଦେଙ୍ଗ୍‌ ଆଟ୍‍ନାତ୍‍, ଆକା ୱିଜେରିଙ୍ଗ୍‌ ନେସ୍‌ସି କିନି ଉଣ୍ତିଙ୍ଗ୍ ବାଗ୍ୟ ନାନ୍‌ ପୟ୍‌ତାମାନା । ୱିଜୁ ବିସୟ୍‌ତି ତିଆର୍‌କିତିକାନ୍‌ ମାପୁରୁ ପୁର୍ବେ ୱିଜୁ ଜୁଗ୍‌ତୁ ୱାନି ମାର୍‌ଗିତିମାନି ମାଟାଦିଙ୍ଗ୍‌ ଆଡାକ୍‌ତା ଇଟ୍‌ତା ମାର୍‌ର୍ହାନ୍‌,
EPH 3:10 ଏଣ୍ତେସ୍‌ ଇଲେଇତି ବେଡ଼ାଦୁ କ୍ରିସ୍ଟିୟାନ୍‌ ମଣ୍ତଲିଦି ପାଣିଦାନ୍‌ ମୁସ୍‌କୁପୁର୍‌ତି ସାସନ୍‍ କିନି ମାରି ସାକ୍ତିଙ୍ଗ୍‌ଁ ମାପୁରୁଦି ନାଣ୍ତ ବୁଦି ବିସୟ୍‌ତାନ୍‌ ଅଜାଜ ବୁଜାଦେଙ୍ଗ୍‌ ଆଟ୍‍ନାର୍‍ ।
EPH 3:11 ମାପୁରୁ ୱାନି ପୁର୍ବେଦି ଉଦେସ୍‌ତି ଇସାବ୍‌ତାନ୍‌ ମା ପ୍ରବୁ କ୍ରିସ୍ତ ଜିସୁଦିମାଣୁକୁ ଇକା ପାଣି କିତାମାନାନ୍‌ ।
EPH 3:12 ଆୟା କ୍ରିସ୍ତଦି ୱାଲେ ମିସାତି ମାନିଙ୍ଗ୍‌ ୱାନିମାନୁ ବିସ୍‌ବାସ୍‌ କିତିମାନିଙ୍ଗ୍‌ ଆସାଦାନ୍‍ ମାପୁରୁଦି ଆଗ୍‌ଡ଼ି ସନି ଉଣ୍ତିଙ୍ଗ୍‌ ମା ସାହାସ୍‌ ମାନାତ୍‌ ।
EPH 3:13 ଆୟାଉଣ୍ତିଙ୍ଗ୍‌ ନା ବାତିଙ୍ଗ୍‌ମାଲ୍‌ନିକା, ମି ଉଣ୍ତିଙ୍ଗ୍‌ ନା ଆମା ଦୁଃକ୍‌କାସ୍ଟୁଦି ଉଣ୍ତିଙ୍ଗ୍‌ ନିରାସ୍‌ ଆମାଟ୍‌, ଇରିଙ୍ଗ୍‌ ଇୟାୱିଜୁ ମି ନେଗି ଉଣ୍ତିଙ୍ଗ୍‌ ଆତାମାନାତ୍‌ ।
EPH 3:14 ଆୟା ବୁବା ମାପୁରୁଦି ଆଗ୍‌ଡ଼ି ନାନ୍‌ ମେଣ୍ତେଙ୍ଗ୍‌ ଗଟ୍‌କିଜି ପାର୍‌ତାନା କିଜିନା ।
EPH 3:15 ଇୟାଉଣ୍ତିଙ୍ଗ୍‌ ଆମା ବୁବାଦିମାଣୁକୁ ମୁସ୍‌କୁପୁର୍‌ ମାରି ଦୁନିଆଦି ୱିଜୁ ଇଲୁକୁପରିବାର୍‌ ୱାନି ସତ୍‍ ଦରୁ ପୟ୍‌ଆ ଆତାମାନାତ୍‌,
EPH 3:16 ଏଣ୍ତେସ୍‌ ନାନ୍‌ ପାର୍‌ତାନା କିନା ୱାନ୍‌ ୱାନି ଆତ୍ମାଦି ଅଦିକାର୍‌ ୱାନି ଗୌରବ୍‌ତି ଉଣ୍ତାକିତିମାନିମାଣୁକୁ ମି ଜିବନ୍‌ତି ଆତ୍ମାଦିଙ୍ଗ୍‌ ବପୁ କିନି ଉଣ୍ତିଙ୍ଗ୍‌ ସାକ୍ତି ସିନାନ୍‌ ।
EPH 3:17 ନାନ୍‌ ପାର୍‌ତାନା କିନା, ଏଣ୍ତେସ୍‌ ମି ବିସ୍‌ବାସ୍‌ତି ବପୁଦାନ୍‌ କ୍ରିସ୍ତ ମି ଜିବନ୍‌ତୁ ବାସା କିନାନ୍‌ । ନାନ୍‌ ପାର୍‌ତାନା କିନା, ଏଣ୍ତେସ୍‌ ମି ମୁଲ୍‌କୁନାଦିକାଲୁ ଜିବନ୍‌ନୋନିମାଣୁକୁ ତିଆର୍‌ ମାରି ଡାଟ୍‌ ଆନାତ୍‌ ।
EPH 3:18 ଆର୍‌ତିଙ୍ଗ୍‌, କ୍ରିସ୍ତଦି ଜିବନ୍‌ନୋନିକା ଜେ ଏସା ନିର୍‌ଇକା ନି ଅସାର୍, ଏସ ନିରିକା ନି ନିର୍‌ଇଗୁଟା, ମିର୍‌ ମାପୁରୁଦି ଆଇଆଇ ଲୋକା ୱାଲେ ଇକା ନେସ୍‌ତେଙ୍ଗ୍‌ ଆଟ୍‌ନିଦେର୍‌ ।
EPH 3:19 ହୁଁ, ମିର୍‌ ୱାନି ଜିବନ୍‌ନୋନି ବାକ୍ୟ ନେସ୍‌ତେଙ୍ଗ୍‌ ଆଟ୍‌ନିଦେର୍‌, ମାରିବା ଇକା ଏସ୍‌କାଙ୍ଗ୍‌ବା ପୁରାୱିଜୁ ନେସ୍‌ତେଙ୍ଗ୍‌ ଆଟ୍‌ଇକା । ଇୟାୱାଜା ମିର୍‌ ମାପୁରୁଦି ୱାଜା ବର୍ତିଦୁ ପୁରାବର୍ତି ଆଦେଙ୍ଗ୍‌ ଆଟ୍‌ନିଦେର୍‌ ।
EPH 3:20 ମାପୁରୁ ମା ଲୋଇ ପାଣି ପୁରା କିଜିମାନି ନିଜେଦି ସାକ୍ତି ଇସାବ୍‌ତାନ୍‌ ମା ଲସ୍‌ନିକା ମାରି ଅଡ଼୍‌ବିନିମାଣୁକୁ ନାଣ୍ତ ସିଦେଙ୍ଗ୍‌ ଆଟ୍‍ନାନ୍‍;
EPH 3:21 ମଣ୍ତଲିଦାନ୍‌ ମାରି କ୍ରିସ୍ତ ଜିସୁଦିମାଣୁକୁ ଜୁଗ୍‌ ଜୁଗ୍‌ ୱିଜୁ ଦିନ୍‌ ସାନ୍ଦି ଆୟା ମାପୁରୁଦି ଗୌରବ୍‍ ଆପିତ୍‌ ! ଆମେନ୍‍ ।
EPH 4:1 ପ୍ରବୁଦି ସେବା କିଜିମାର୍‌ଇ ଉଣ୍ତିଙ୍ଗ୍‌ ଜେଲ୍‌ତୁ ତେବାତିମାନି ନାନ୍‌ ପାଉଲ ମିଙ୍ଗିଁ ଅନୁରଦ୍‌ କିଜିନା, ଏଣ୍ତେସ୍‌ ଜିନି ମାଡ଼ିନି ଉଣ୍ତିଙ୍ଗ୍‌ ମାପୁରୁ ମିଙ୍ଗିଁ କୁକ୍‌ତାମାନାନ୍‌, ଆୟାୱାଜା ସାଲାବୁଲା କିଦୁ ।
EPH 4:2 ୱିଜୁୱାଲେ ନମ୍ରତା, ସାନ୍ତି ମାରି ସାସ୍‌ ଆଦୁ । ଜିବନ୍‌ନୋନିମାନୁ ନିଜେନିଜେଦି ଉଣ୍ତିଙ୍ଗ୍‌ ମିସାଜି ତେବାଦୁ ।
EPH 4:3 ପବିତ୍ରଆତ୍ମାଦି ସାହାଜ୍ୟଦାନ୍‌ ସାନ୍ତିଦାନ୍‌ ବାସାନି ଉଣ୍ତିଙ୍ଗ୍‌ ମି ମାନୁ ଆମାକା ଉନ୍‌ଡ୍ରେ ତିଆର୍‌ ଆତାମାନାତ୍‌, ତାନିଙ୍ଗ୍‌ ରକ୍‌ୟା କିନି ଉଣ୍ତିଙ୍ଗ୍‌ ଜାତୁନ୍‍ ଆଦୁ ।
EPH 4:4 ମା ମେନ୍ଦଲ୍‌ ଉନ୍‌ଡ୍ରେ, ଆତ୍ମା ବା ଉନ୍‌ଡ୍ରେ ମାରି ଉନ୍‌ଡ୍ରେ ଆସା ସିଜି ମାପୁରୁ ମାଙ୍ଗିଁ କୁକ୍‌ତାମାନାନ୍‌ ।
EPH 4:5 ଅରେନ୍‍ ପ୍ରବୁ, ଉନ୍‌ଡ୍ରେ ବିସ୍‌ବାସ୍‌, ଉନ୍‌ଡ୍ରେ ଡୁବନ୍‌;
EPH 4:6 ୱିଜେରି ଲୋକା ଜାତିଦୁ ମାପୁରୁ ନି ବୁବା ଅରେନ୍‍; ୱାନ୍‌ ୱିଜେରି ପ୍ରବୁ, ୱିଜେରି ମାନୁ ମାରି ୱିଜେରି ଜିବନ୍‌ତୁ ମାନାନ୍‌ ।
EPH 4:7 କ୍ରିସ୍ତସିତିମାନି ଅଡି ଇସାବ୍‌ତାନ୍‌ ମାଡୁ ୱିଜେରିଙ୍ଗ୍‌ ଉନ୍‌ଡ୍ରି ଉନ୍‌ଡ୍ରି ଦୟା ଦାନ୍‌ ପୟ୍‌ତିମାନିକା ।
EPH 4:8 ଦର୍ମସାସ୍ତ୍ରଦୁ ଇୟା ବିସୟ୍‌ତାନ୍‌ ରାସ୍‌ତାମାନାତ୍‌, “ଏସ୍ତିୱାଲେ ୱାନ୍‌ ମୁସ୍‌କୁ ସର୍ହାନ୍‌, ୱାନି ୱାଲେ ନାଣ୍ତ ଜଇଲ୍‌ତୁ ମାର୍‌ଇୱାରିଙ୍ଗ୍‌ ୱାନ୍‌ ଅତାନ୍‍, ମାରି ଲୋକାଙ୍ଗ୍‌ ନାଣ୍ତ ବର୍‌ ସିତାନ୍‌ ।”
EPH 4:9 ୱାନ୍‌ ମୁସ୍‌କୁ ସର୍ହାନ୍‌ ଇଜି ୱେର୍‌ନି ଅର୍ତ ଇନିକା ? ଇୟାତାନି ଅର୍ତ ଆଜିନାତ୍‍, ଆଗ୍‌ଡ଼ି ୱାନ୍‌ ଦୁନିଆଦି ଇସ୍ରି ବାଡିଆଙ୍ଗାଁ ୱାତା ମାର୍ହାନ୍‌ ।
EPH 4:10 ଏନ୍‌ ୱାତା ମାର୍ହାନ୍‌, ୱାନ୍‌ ଏଣ୍ତେସ୍‌ ସାରା ପୃତିବିଦିଙ୍ଗ୍‌ ୱାନି ମାନିମାନୁ ପୁରାବର୍ତି କିନାନ୍‌, ଆୟାଉଣ୍ତିଙ୍ଗ୍‌ ୱାନ୍‌ ବା ମୁସ୍‌କୁପୁର୍‌ତି ମୁସ୍‌କୁ ସର୍ହାନ୍‌ ।
EPH 4:11 ୱାନ୍‌ ନେ ଲୋକାଙ୍ଗ୍‌ ନାଣ୍ତ ବର୍‌ ଦାନ୍‌ ସିଜି ସର୍‌ଆମାନାନ୍‌ । ଏସ ଲୋକାଙ୍ଗ୍‌ ପ୍ରେରିତ ସିସୁ, ମାରି ଏସ ଲୋକାଙ୍ଗ୍‌ ବାବବାଦି, ଏସ ଲୋକାଙ୍ଗ୍‌ ସୁସମାଚାର୍‌ ପ୍ରଚାର୍‌କିନିକାନ୍‌, ମାରି ଏସ ଲୋକାଙ୍ଗ୍‌ ପାସ୍‌ଟର୍‌ ମାରି ମାସ୍‌ଟର୍‌ ୱାଜା ଆସ୍‌କିତାମାନାନ୍‌ ।
EPH 4:12 କ୍ରିସ୍ତଦି ଆୟା ମେନ୍ଦଲ୍‌ ରସ୍‌ନି ଉଦେସ୍‌ତାନ୍‌ କ୍ରିସ୍ଟିୟାନ୍‌ ସେବା ପାଣି ଉଣ୍ତିଙ୍ଗ୍‌ ମାପୁରୁଦି ଲୋକାଙ୍ଗ୍‌ ତିଆର୍‌ କିଦେଙ୍ଗ୍‌ ୱାନ୍‌ ଇକା କିତାମାନାନ୍‌ ।
EPH 4:13 ଆୟାଉଣ୍ତିଙ୍ଗ୍‌ ମାଡୁ ୱିଜୁଲୋକୁ ମା ବିସ୍‌ବାସ୍‌ତୁ ମାରି ମାପୁରୁଦି ମାରିନ୍‌ ବିସୟ୍‌ତି ବୁଦିଦୁ ଉନ୍‌ଡ୍ରେମାନୁ ଆନାପ୍‌, କ୍ରିସ୍ତଦି ପୁରାବର୍ତି ଆଜି ମାପୁ ପୁରାବୟସ୍‌ ଆନାପ୍‌ ।
EPH 4:14 ଗାଲିଦି ସନିକା ମାରି ଉଲୁକାଏରୁ ଆତ୍‌ଡ଼ାତିଙ୍ଗ୍‌ ଇନିଙ୍ଗାଁ ଆନିଙ୍ଗାଁ ଆଜିମାନି ଇସ୍ରିକଡ଼ରି ୱାଜା ମାଡୁ ମାରି ତିର୍‌ ଆଇକା । ଆଇୱାରିଙ୍ଗ୍‌ ସେଇସାରିଦୁ ପୋକ୍‌ସିମାନି ବେମ୍‌ରିକିନିୱାରି ବାୟାନାନି ସିକିୟାଦୁ ମାଡୁ ଇନିଙ୍ଗାଁ ଆନିଙ୍ଗାଁ ଆଇକା ।
EPH 4:15 ତାନିବାଦ୍‌ଲୁ ଜିବନ୍‌ନୋନି ସତ୍‍ ୱେର୍‍ସି ୱିଜୁ ବିସୟ୍‌ତୁ ତାଲା ୱାଜା କ୍ରିସ୍ତଦି ୱାଜା ଆନାଟ୍‌ ।
EPH 4:16 ୱାନିମାଣୁକୁ ମେନ୍ଦଲତି ଆଇଆଇ କିକୁକାଲ୍‌କୁ ଉନ୍‌ଡ୍ରେମାନୁ ମିସାନେ ମାରି ଆବେନୁ ମାନି ସିରେଙ୍ଗ୍‌ ସାହାଜ୍ୟଦାନ୍‌ ୱିଜୁ ମେନ୍ଦଲ ତିଆର୍‌ ଆନାତ୍‌ । ଆଦେଙ୍ଗ୍‌ ମେନ୍ଦଲ୍‌ତିକେଙ୍ଗ୍‌ ୱିଜୁ ନିଜେଦି ପାଣି କିନି ୱାଜା ବ୍ୟବ୍‌ହାର୍‌ କିନିମାଣୁକୁ ୱିଜୁ ମେନ୍ଦଲ ପିରିଜି ତିଆର୍‌ ଆନାତ୍‌ ।
EPH 4:17 ମାରି, ପ୍ରବୁଦି ଦର୍‌ତାନ୍‌ ନାନ୍‌ ମିଙ୍ଗିଁ ଜାଗାର୍‌ତା କିଜି ସିଜିନା, ଅଣଜିହୁଦିରି ୱାଜା ମାରି ସାଲାବୁଲା କିମାଟ୍‌ । ୱାରି ସିନ୍ତା ପେରିକା
EPH 4:18 ମାରି ୱାରି ମନ୍‍ ସିକାଟି । ମାପୁରୁ ସିତିମାନି ଜିବନ୍‌ତୁ ୱାରିନ୍ଦି ଇନିକା ମିସାଏତ୍‌ । ଇରିଙ୍ଗ୍‌ ୱାର୍‌ ପୁରା ବୁଦିସିଲିକାର୍‌ ମାରି ମାନାଇକାର୍‌ ।
EPH 4:19 ୱାର୍‌ ସେମାର୍‌ସିଲିକାର୍‌, ତାଗ୍‍ଇ ପାଣିକିନିକାର୍‌ ମାରି ଲୋବ୍‌ଦାନ୍‍ ୱିଜୁଜାତିଦି ନେଗେନ୍‌ତର୍‌ଇ ପାଣିଦୁ ମାନାର୍‌ ।
EPH 4:20 ଇୟାୱିଜୁ ମିର୍‌ କ୍ରିସ୍ତଦି ବିସୟ୍‌ତାନ୍‌ ସିକିୟା କିତିମାନି ବିସୟ୍‌ ଆଏତ୍‍ ।
EPH 4:21 ମିର୍‌ ୱାନି ବିସୟ୍‌ ୱେର୍‌ଇମାନିଦେର୍‌, ମାରି ୱାନି ୱେନ୍‌କାସନି ୱାଜା ଜିସୁଦି ବିସୟ୍‌ତାନ୍‌ ସତ୍‍ ସିକିୟା ପୟ୍‌ତିମାନିଦେର୍‌ ।
EPH 4:22 ମିର୍‌ ଆମା ପାଡ଼ିଇ ସାଲାବୁଲାଦାନ୍‌ ଜିବନ୍‍ ଜିଜି ମାର୍‌ଇଦେର୍‌, ଆକା ୱିଜୁ ଡ଼ିସ୍‌ତୁ, ଇରିଙ୍ଗ୍‌ ଆୟାତାନି ସାଲାକି ପାଣିଦାନ୍‌ ମି ଆତ୍ମା ନାସ୍ଟୁ ଆଜିମାର୍ହାତ୍‌ ।
EPH 4:23 ମାରି ମି ଜିବନ୍‌ ମାରି ମୋନ୍‌ ପୁରା ପୁନିକା ଆନିକା ମାନାତ୍‌ ।
EPH 4:24 ଆମା ପୁନି ସାଲାବୁଲାନିକା ମାପୁରୁଦି ୱାଜା ତିଆର୍‌ଆତି ପୁନି ଆତ୍ମା ଆରାଦୁ । ଆକା ମି ପବିତ୍ର ମାରି ଦାର୍ମୁଦାନ୍‌ ଜିବନ୍‌ତୁ ୱେଙ୍ଗିଁତି ।
EPH 4:25 ମାରି ମିଚ୍‌ ୱେର୍‌ମାଟ୍‌ । କ୍ରିସ୍ତବିସ୍‌ବାସ୍‌ସିର୍‌ ନିଜେନିଜେଦିଙ୍ଗ୍‌ ସତ୍‍ ୱେର୍‌ନିକା ମାନାତ୍‌; ଇରିଙ୍ଗ୍‌ ମାପୁ କ୍ରିସ୍ତଦି ମେନ୍ଦଲତି ମେନ୍ଦଲୱିଜୁ ।
EPH 4:26 ମିର୍‌ ରିସା ଆଜି ପାପ୍‌ କିମାଟ୍‌, ୱେଡ଼ା ଆର୍‌ଏଣ୍‌ଗା ମି ରିସା ତିର୍‌ ଆପିତ୍‌ ।
EPH 4:27 ମାରି ସୟତାନ୍‌ତିଙ୍ଗ୍‌ ବାଡି ସିମାଟ୍‌ ।
EPH 4:28 ଡଙ୍ଗାଁର୍‌ଏନ୍‌ ମାରି ଡଙ୍ଗାଁ କିମାକିନ୍‌ । ମାରି ସିଲିସାତିୱାରିଙ୍ଗ୍‌ ଦାନ୍‌ କିନି ଉଣ୍ତିଙ୍ଗ୍‌ ଏଣ୍ତେସ୍‌ ୱାନି ଲାକ୍‌ତୁ ଇନିକା ତେବାଦେଙ୍ଗ୍‌ ଆଟ୍‍ନାତ୍‍, ଇୟାଉଣ୍ତିଙ୍ଗ୍‌ ନିଜେଦି କିୟୁଦାନ୍‌ ନେଗେନ୍‌ ପାଣି କିଜି କାସ୍ଟୁପାଣି କିପିନ୍‌ ।
EPH 4:29 ମି ୱେୟୁଦାନ୍‌ ଇନି ତାଗ୍‌ଇମାଟା ସୋମାକିତ୍‌, ମି ମାଟା ନେଗିକା, ପିରିସ୍‌କିନିକା ମାରି ପାଣିଦୁଲାଗେ ଆପିତ୍‌ । ଆର୍‌ତିଙ୍ଗ୍‌ ଆମାକାର୍‌ ମି ମାଟା ୱେନାର୍‌, ୱାରି ଉଣ୍ତିଙ୍ଗ୍‌ ଆକା ନେଗିକା ଆନାତ୍‌ ।
EPH 4:30 ମାପୁରୁଦି ପବିତ୍ର ଆତ୍ମାଦିଙ୍ଗ୍‌ ଦୁଃକ୍‌ ସିମାଟ୍‌ । ଇରିଙ୍ଗ୍‌ ପବିତ୍ର ଆତ୍ମା ମି ମୁସ୍‌କୁ ମାପୁରୁଦି ନିଜେଦି ଅଦିକାର୍‌ତି ସିନାଦି ୱାଜା ମାରି ମାପୁରୁ ଜେ ଅର୍‍ଲେନ୍‍ ମିଙ୍ଗିଁ ରକିୟା କିନାନ୍‌, ଇୟାକା ଆନାତ୍‌ଆକା ।
EPH 4:31 ୱିଜୁଜାତିଦି ସୁରିମାଟେଙ୍ଗ୍‌, ଗିଦିର୍‌ ମାରି ରିସା ଡ଼ିସ୍‌ତୁ । ମାଡ୍‌ଗଲ୍‌ ନି ଆଇୱାରିଙ୍ଗ୍‌ ନିନ୍ଦା କିମାଟ୍‌ । ଏ ଉଣ୍ତିଙ୍ଗ୍‌ କାଡ଼ାମାଟ୍‌ ।
EPH 4:32 ମାରି, ନିଜେନିଜେଦି ଉଣ୍ତିଙ୍ଗ୍‌ ସାକା ଆଦୁ ମାରି ନେଗି ଜିବନ୍‌ ଆଦୁ, ମାରି ମାପୁରୁ କ୍ରିସ୍ତଦିମାନୁ ମିଙ୍ଗିଁ ଏଣ୍ତେସ୍‌ କେମା କିତାନ୍‌, ଆୟାୱାଜା ମିର୍‌ ନିଜେନିଜେଦିଙ୍ଗ୍‌ କେମା କିଦୁ ।
EPH 5:1 ମିର୍‌ ମାପୁରୁଦି ଲାଡ୍‍ତି କଡ଼ର୍‍, ମାରି ୱାନି ୱାଜା ଆଦେଙ୍ଗ୍‍ଁ ଇଜି ବଦା କିଦୁ ।
EPH 5:2 କ୍ରିସ୍ତ ଏଣ୍ତେସ୍‌ ମାଙ୍ଗିଁ ଜିବନ୍‌ନୋତାନ୍‍ ମାରି ମାପୁରୁଦି ୱେଡ଼ିକାଦି ଉଣ୍ତିଙ୍ଗ୍‍ଁ ନିଜେଦି ଜିବନ୍‍ତିଙ୍ଗ୍‍ ମା ଉଣ୍ତିଙ୍ଗ୍‌ ବାସ୍‍ନାଦି ଦୁପ୍‍ଣି ମାରି ପୁଜା ୱାଜା ଆତାନ୍‌, ମି ଜିବନ୍‌ ବା ଆୟାୱାଜା ଜିବନ୍‍ନୋନି ମାଣାନ୍‌ ସାଲାପିତ୍‍ ।
EPH 5:3 ମାପୁରୁଦି ଲୋକୁ ଆତିମାନିଙ୍ଗ୍‌ ମି ଲୋଇ ଦାରିପାଣି, ୱିଜୁ ରକମ୍‍ତି ତାଗ୍‍ଇକା ମାରି ଲୋବ୍ରାଆନିକା, ଇୟାୱିଜୁ ତେବାମାକିତ୍‍ । ଆକା ମାପୁରୁଲୋକା ଉଣ୍ତିଙ୍ଗ୍‌ ନେଗେନ୍‌ ସିଲେ,
EPH 5:4 ମି ଉଣ୍ତିଙ୍ଗ୍‍ଁ ତାଗ୍‍ଇ ବାସା, ୱାର୍‍ଇ ମାଟା ନି ବାଣ୍ତିସ୍‍ ମାଟା ୱାର୍‍ଗିନିକା ବା ନେଗେତ୍‍ ସିଲେ । ମାତର୍‌ ମି ୱାର୍‍ଗିମାନୁ ମାପୁରୁଙ୍ଗ୍‍ଁ ଦନ୍ୟବାଦ ସିଦୁ ।
EPH 5:5 ଇକା ସତ୍‍ ଇଜି ନେସ୍‍ସୋ ମାନ୍‍ଡ୍ରୁ, ଏମେକାର୍‌ ଦାରିଏନ୍‍, ତାଗ୍‍ଇକାନ୍‍ ମାରି ଲୋବ୍ରା, ନାଣ୍ତ ଲୋବ୍ରା ଆନିକାନ୍‍ ବମା ପୁଜା କିନି ସାମାନ୍‍, ୱାନ୍‌ ଏସାଙ୍ଗ୍‍ବା କ୍ରିସ୍ତଦି ନି ମାପୁରୁଦି ରାଜିଦି ଅଦିକାରି ଆଏନ୍‍ ।
EPH 5:6 ପୁଲାପୁଲି ମାଟେଙ୍ଗ୍‌ ୱେର୍‌ସି ଆମାକାନ୍‍ ମିଙ୍ଗିଁ ବାଣ୍ତିସ୍‍ କିମାକିନ୍‌ । ଇୟାୱିଜୁ ତାଗ୍‍ଇ ପାଣିଦାନ୍‍ ଏମେକାର୍‌ ମାପୁରୁଦି ମାଟା ଅମାନ୍ୟ କିନାର୍‌, ୱାରି ଉଣ୍ତିଙ୍ଗ୍‌ ୱାନି ରିସା ନାଣ୍ତ ଆନାତ୍‌ ।
EPH 5:7 ଇୟାନାନି ଲୋକାୱାଲେ ମିସାମାଟ୍‍ ।
EPH 5:8 ମିର୍‌ ନିଜେ ଅର୍‍ଲେନ୍‍ ସିକାଟିଦୁ ମାର୍ହିଦେର୍‍ । ମାତର୍‌ ଇଲେଇ ପ୍ରବୁଦି ଲୋକୁ ଆତିମାନିଙ୍ଗ୍‌ ମିର୍‌ ଜାୟ୍‌ତୁ ମାନିଦେର୍‍ । ଆଦେଙ୍ଗ୍‌ ମିର୍‌ ଜାୟ୍‌ତି କଡ଼ରି ୱାଜା ସାଲାବୁଲା ଆଦୁ ।
EPH 5:9 ମାତର ଜାୟ୍‌ ନେ ୱିଜୁ ରକମ୍‍ତି ନେଗିଗୁଣୁ, ଦାର୍ମୁତିକା ମାରି ସତ୍‍ନାନି ପଲ୍‌ ଆସ୍‌ନାତ୍‌ ।
EPH 5:10 ପ୍ରବୁଦି ୱେଡ଼ିକାଦିକାନ୍‌ ଆଦେଙ୍ଗ୍‌ ଇଜି ଅଜାଦୁ ।
EPH 5:11 ଲୋକୁ ସିକାଟିଦୁ ଏମେ ୱିଜୁ ଟକେକିନି ପାଣି କିନାର୍‌, ଆୟାୱିଜୁ ମାଣ୍‌କୁ ଆକ ମାନ୍‍ଡ୍ରୁ । ମାରି ୱାରି ପାଣିୱିଜୁ ଜାୟ୍‍ତୁ ତର୍‍ସି ସିଦୁ ।
EPH 5:12 ସତ୍‌ତାନ୍‌ ୱାର୍‌ ମାର୍‍ଗିଜି ଆମା ପାଣି ୱିଜୁ କିନାର୍‌, ଆୟା ବିସୟ୍‍ ୱେର୍‍ତେଙ୍ଗ୍‍ ସେମାର୍‍ତି ମାଟା ।
EPH 5:13 ଏସ୍ତିୱାଲେ ୱିଜୁ ବିସୟ୍‍ ଜାୟ୍‍ତୁ ତାନାର୍‍, ନାସ୍ତିୱାଲେ ଆୟାୱିଜୁଦି ସତ୍‍ ମାଟା ତର୍‍ନାତ୍‍ ।
EPH 5:14 ମାତର ଜାୟ୍‍ତି ୱିଜୁ ବିସୟ୍‍ତି ତର୍‍ନାନ୍‌ । ଆୟାଉଣ୍ତିଙ୍ଗ୍‌ ଇୟାୱାଜା ରାସାତାମାନାତ୍‌ : “ଏ ସୁଜ୍‍ତି ଲୋକୁ ନିଙ୍ଗ୍‍ଦୁ ମାରି ସାତି ଲୋକାମାଣାନ୍‌ ଜିବନ୍‌ଆଜି ନିଙ୍ଗ୍‍ଁଦୁ ! କ୍ରିସ୍ତଦି ଜାୟ୍‍ତୁ ଜାୟ୍‍ଆଦୁ ।”
EPH 5:15 ଆଦେଙ୍ଗ୍‌ ମିର୍‌ ଏଣ୍ତେସ୍‌ ସାଲାବୁଲା କିନିଦେର୍‍, ଆୟା ବିସୟତାନ୍ ଜାଗାର୍‌ତା ମାନ୍‍ଡ୍ରୁ । ବୁଦିସିଲିଲୋକା ୱାଜା ଆଏଣ୍ତା ବୁଦି ମାନି ଲୋକା ୱାଜା ସାଲାବୁଲା କିଦୁ ।
EPH 5:16 ୱିଜୁ ଦିନ୍‍ତିଙ୍ଗ୍‍ ନେଗେନ୍‍ତାନ୍‍ ବ୍ୟବ୍‌ହାର୍‌ କିଦୁ, ଇରିଙ୍ଗ୍‌ ତାଗ୍‍ଇ ଦିନ୍‍ ଇଗା ୱାଜିନାତ୍ ।
EPH 5:17 ବୁଦିସିଲି ୱାଜା ଆମାଟ୍‌, ମାତର୍‌ ପ୍ରବୁଦି ବଦାଦିଙ୍ଗ୍‍ ବୁଜାଦେଙ୍ଗ୍‍ ସେସ୍ଟା କିଦୁ ।
EPH 5:18 କାଡ଼ୁ ଉଣିମାନୁ ସସ୍‍ମାଟ୍‍, ଇରିଙ୍ଗ୍‌ ଆକା କେବଲ ମିଙ୍ଗିଁ ସାପିସ୍‍ କିନାତ୍‍, ମାତର୍‌ ପବିତ୍ର ଆତ୍ମାଦୁ ପୁରାଆଦୁ ।
EPH 5:19 ୱେଡ଼ିକାଦି ପାଟା, ଦନ୍ୟବାଦ ପାଟା ମାରି ପ୍ରସଂସା ପାଟା ଦାନ୍‍ ନିଜେ ନିଜେଦିଙ୍ଗ୍‍ ୱେଡ଼ିକା କିଦୁ । ଜିବନ୍‍ତି ଦନ୍ୟବାଦ ତାନ୍‍ ପ୍ରବୁଦି ଉଦେସ୍‍ତାନ୍‍ ପାଟା ମାରି ୱେଡ଼ିକାଦି ପାଟା ପାର୍‍ଦୁ ।
EPH 5:20 ୱିଜୁଦିନ୍‍ ୱିଜୁ ବିସୟ୍‍ ଉଣ୍ତିଙ୍ଗ୍‌ ପ୍ରବୁ ଜିସୁ କ୍ରିସ୍ତଦି ଦର୍‍ତାନ୍‍ ବୁବା ମାପୁରୁଙ୍ଗୁଁ ଦନ୍ୟବାଦ୍‍ ସିଦୁ ।
EPH 5:21 କ୍ରିସ୍ତଦି ଉଣ୍ତିଙ୍ଗ୍‌ ମି ମାନାନିକା ମାନିଙ୍ଗ୍‍ ମିର୍‌ ନିଜେ ନିଜେଦିଙ୍ଗ୍‍ ମାନାଜି ସାଦୁ ।
EPH 5:22 ଆଇମେକ୍‍ ! ମିର୍‌ ଏଣ୍ତେସ୍‌ ପ୍ରବୁଙ୍ଗ୍‍ଁ ମାନାନିଦେର୍‍, ଆୟାୱାଜା ନିଜେ ନିଜେଦି କନ୍‌ଲିରିଙ୍ଗ୍‌ ମାନାଦୁ ।
EPH 5:23 ମଣ୍ତଲି ମୁସ୍‌କୁ କ୍ରିସ୍ତଦି ଅଦିକାର୍‍ ୱାଜା ଆଡ଼୍‍ସିକା ମୁସ୍‌କୁ କନ୍‍ଲିସିରି ଅଦିକାର୍‌ ମାନାତ୍‌; ମାରି କ୍ରିସ୍ତନେ ୱାନି ମେନ୍ଧଲ୍‍ ୱାଜା ମଣ୍ତଲିଦି ରକିୟାକିନିକାନ୍‍ ।
EPH 5:24 ମଣ୍ତଲି ଏଣ୍ତେସ୍‌ କ୍ରିସ୍ତମାନୁ ମାନାନାତ୍‍, ଆଡ଼୍‍ସିକ୍‍ ଟିକ୍‍ ଆୟାୱାଜା ନିଜେ ନିଜେଦି କନ୍‍ଲିସିରି ଲାକ୍‍ତୁ ପୁରାଦାନ୍‌ ମାନାପିଉ ।
EPH 5:25 କନ୍‌ଲିର୍‌, କ୍ରିସ୍ତଦିଙ୍ଗ୍ ଏଣ୍ତେସ୍‌ ମଣ୍ତଲିଦିଙ୍ଗ୍‍ ଜିବନ୍‍ନୋଜି, ତାନି ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତାନ୍‌, ମିର୍‌ ଟିକ୍‍ ଆୟାୱାଜା ନିଜେ ନିଜେଦି ଆଡ଼ିକାଙ୍ଗ୍‍ଁ ଜିବନ୍‍ନୋଦୁ ।
EPH 5:26 କ୍ରିସ୍ତ ମଣ୍ତଲିଦିଙ୍ଗ୍‍ ଏରୁଦୁ ନୋର୍‍ଜି ମାପୁରୁଦି ଉଦେସ୍‍ତାନ୍‍ ପବିତ୍ର କିନାନ୍‌,
EPH 5:27 ମାରି ମଣ୍ତଲିଦିଙ୍ଗ୍‍ ପବିତ୍ର, ଦସ୍‍ସିଲିକା, ପାପ୍‌ସିଲିକା ମାରି ୱିଜୁ ସୁନ୍ଦର୍‌ କିଜି ନିଜେ ଆସ୍‌ତାନ୍‌ ।
EPH 5:28 କନ୍‍ଲିସିର୍‍ ନିଜେଦି ମେନ୍ଧଲ୍‍ ୱାଜା ଅଡ଼୍‍ବିଜି ନିଜେଦି ଆଡ଼ିଦିଙ୍ଗ୍‍ ଜିବନ୍‌ନୋନିକା ମାନାତ୍‌ । ଏନ୍‌ ନିଜେ ଆଡିଦିଙ୍ଗ୍ ଜିବନ୍‌ନୋନାନ୍‌, ୱାନ୍‌ ନିଜେଦିଙ୍ଗ୍ ଜିବନ୍‌ନୋନାନ୍‌ ।
EPH 5:29 ଏନ୍‌ ଏସାଙ୍ଗ୍‍ ନିଜେଦି ମେନ୍ଦଲ୍‌ତିଙ୍ଗ୍‌ କାଡ଼୍‍ଏନ୍‍ । ମାତର୍‌ ମେନ୍ଦଲ୍‍ତି ଉଣିକାତିନିକା କିନାନ୍‍ ମାରି ତାନି ଜାତୁନ୍‍ ଅନାନ୍‍ କ୍ରିସ୍ତ ଏଣ୍ତେସ୍‌ ମଣ୍ତଲିଦି ଜାତୁନ୍‍ କିନାନ୍‍ ।
EPH 5:30 ଇରିଙ୍ଗ୍‌ ମାଡ୍‌ ୱାନି ମେନ୍ଦଲ୍‌ତି ମେନ୍ଦଲକାନ୍ଦଲ୍‍ ।
EPH 5:31 ଦାର୍ମୁସାସ୍ତ୍ରଦୁ ରାସାତାମାନାତ୍‌, “ଇୟାଉଣ୍ତିଙ୍ଗ୍‌ ଅରେନ୍‌ ମେମାର୍‌ଏନ୍‌ ନିଜେଦି ବୁବାୟାୟେଙ୍ଗ୍‌ ଡ଼ିସ୍‌ସି ନିଜେଦି ଆଡ଼୍‌ସି ୱାଲେ ତେବାନାନ୍‌ ମାରି ଆୟା ରିଏର୍‌ ଅରେନ୍‌ଆନାର୍‍ ।”
EPH 5:32 ସାସ୍ତ୍ରଦି ଇୟା ବାଗ୍‍ତୁ ଉନ୍‌ଡ୍ରି ମାର୍‍ଗିତି ସତ୍‍ ୱେଙ୍ଗିଁତା ମାନାତ୍‌ : ଇକା କ୍ରିସ୍ତ ନି ମଣ୍ତଲି ଉଣ୍ତିଙ୍ଗ୍‌ ବ୍ୟବହାର୍‌ କିଜିନା ଇଜି ନାନୁ ବୁଜାତାମାନା ।
EPH 5:33 ୱିଜୁ କନ୍‌ଲିର୍‌ ଆଡ଼ିଦିଙ୍ଗ୍‍ ନିଜେଦି ଜିବନ୍‌ନୋନି ୱାଜା ଜିବନ୍‌ନୋପିନ୍‍ ମାରି ୱିଜୁ ଆଡ଼ି ନିଜେଦି କନ୍‍ଲିଙ୍ଗ୍‍ ମାନାପିଉ ।
EPH 6:1 ଏ କଡ଼ର୍‍, ପ୍ରବୁଦି ଉଣ୍ତିଙ୍ଗ୍‌ ବୁବାୟାୟାରିଙ୍ଗ୍‍ ମାନାନିକା ମି ବିସ୍‍ବାସି ଲୋକା ପାଣି, ଇରିଙ୍ଗ୍‌ ଇକାନେ ଟିକ୍‌ ସାଲାବୁଲା ।
EPH 6:2 “ମି ବୁବାୟାୟାରିଙ୍ଗ୍‍ ମାନାଦୁ ।” ଇୟା ମାଟାଦୁ ଉନ୍‌ଡ୍ରି ପାର୍‍ମାଣ୍‍ ମିସାକିଜି ୱେର୍‍ଆଇ ଆତାମାନାତ୍‌,
EPH 6:3 “ଏଣ୍ତେସ୍‌ ମି ନେଗିକା ଆନାତ୍‌ ମାରି ମିର୍‌ ଦୁନିଆଦୁ ନାଣ୍ତ ଦିନ୍‌ ଜିନିଦେର୍‍ ।”
EPH 6:4 ଏ ବୁବାୟାୟାର୍‍, କଡ଼ରିଙ୍ଗ୍‍ ଗିଦ୍ରି ଆନି ନାନି ଇନି ପାଣି କିମାଟ୍‌, ମାତର୍‌ ପ୍ରବୁଦି ବିସ୍‍ବାସ୍‌ତାନ୍‌ ବ୍ୟବ୍‌ହାର୍‌ କିଦୁ ମାରି ସିକିୟାଦୁ ୱାରିଙ୍ଗ୍ ଜାତୁନ୍‍ କିଦୁ ।
EPH 6:5 କଟିସାକର୍‌, ମିର୍‌ କ୍ରିସ୍ତଦି ସେବା କିଜିନାପ୍‍ ଅଡ଼୍‍ବିଜି ମନ୍‍ତାନ୍‍ ତିଲାଜି ନି ତିର୍‍ଗିଜି ଦୁନିଆଦି ମାଲିକାଙ୍ଗ୍‍ଁ ମାନାନିଦେର୍‍ ।
EPH 6:6 କେବଲ ମାଲିକ୍‌ ମିଙ୍ଗିଁ ସୁଡ଼ୁନିୱାଲେ ୱାନି ୱେଡ଼ିକା ଆନି ଉଣ୍ତିଙ୍ଗ୍‍ଁ ଇକା କିଏଣ୍ତା, କ୍ରିସ୍ତଦି କଟିସାକର୍‌ ୱାଜା ମି ୱିଜୁ ମନ୍ ସିଜି ମାପୁରୁଦି ବଦା ମାନାଦୁ ।
EPH 6:7 କେବଲ ଲୋକା ସେବାକିଜିନାପ୍‍ ଅଡ଼୍‍ବିଏଣ୍ତା ପ୍ରବୁଦି ସେବା କିନି ୱାଜା ୱେଡ଼ିକାଦାନ୍‍ ପାଣି କିଦୁ ।
EPH 6:8 ମନ୍‌ତୁ ଇଡ୍‌ଦୁ, ୱାନ୍‌ କଟିସାକର୍‌ ଆପିନ୍‌ କି ମୁକ୍‍ଡ଼ାତିକାନ୍‍ ଆପିନ୍‌ ପ୍ରବୁ ୱିଜୁ ଲୋକ୍‍ତିଙ୍ଗ୍‍ ୱାନି ନେଗିପାଣି ଉଣ୍ତିଙ୍ଗ୍‌ ପୁରସ୍କାର୍‍ ସିନାନ୍‍ ।
EPH 6:9 ଏ ମାଲିକ୍‍କୁ, ମି କଟିସାକର୍‌କା ଉଣ୍ତିଙ୍ଗ୍‍ଁ ନେଗେନ୍‍ତାନ୍‍ ବ୍ୟବ୍‌ହାର୍‌ କିଦୁ ମାରି ୱାରିଙ୍ଗ୍‍ଁ ଆଦ୍‍ରିସ୍‍କିମାଟ୍‍ । ମନ୍‌ତୁ ଇଡ୍‌ଦୁ, ମିର୍‌ ନି ମି କଟିଦାସ୍‍କୁ ୱିଜେରେ ମୁସ୍‌କୁପୁର୍‌ତି ପ୍ରବୁଦି ଆଡ୍‍ଗି ମାନିକା । ୱାନ୍‌ ୱିଜେରିଙ୍ଗ୍‍ଁ ସାମାନ୍‍ତାନ୍‍ ବିଚାର୍‍ କିନାନ୍‍ ।
EPH 6:10 ସାରାସାରି ୱେନ୍‌କା, ପ୍ରବୁଦି ୱାଲେ ମିସାଜି ୱାନି ପେରିସାକ୍ତିଦୁ ବପୁ ଆଦୁ ।
EPH 6:11 ମାପୁରୁ ସିତିମାନି ୱିଜୁ ଜୁଦ୍‍ସାଜୁଦାନ୍‌ ତିଆର୍‍ ଆଦୁ, ଏଣ୍ତେସ୍‌ ସୟତାନ୍‍ତି ତାଗ୍‍ଇ ପାଣିଦି ଆଗିଡ଼ି ନିନ୍‌ଡ୍ରେଙ୍ଗ୍‍ ଆଟ୍‍ନିଦେର୍‍ ।
EPH 6:12 ଇରିଙ୍ଗ୍‌ ମାଡ୍‌ ଦୁନିଆଦୁ ବାସାଜିମାନି ଲୋକା ବିରୁଦ୍‍ତାନ୍‍ ଜୁଦ୍‍ କିଇକା; ମାଡ୍‌ ୱାର୍‍ଇବାଦଡ଼୍‍ତି ତାଗ୍‍ଇ ସାକ୍ତି ମାରି ସିକାଟି ଜୁଗ୍‍ତି ସାସନ୍‌କିନିକାତ୍‍, ଅଦିକାରି ମାରି ୱିଜୁ ଦୁନିଆଦି ତାଗିଇ ଆତ୍ମିକ ସାକ୍ତି ବିରୁଦ୍‍ତାନ୍‍ ଜୁଦ୍‍ କିଜିନିକା ।
EPH 6:13 ମାତର୍‌ ଇଲେଇ ମାପୁରୁସିତିମାନି ଜୁଦ୍‍ସାଜୁ ଆରାଦୁ; ଆତିଙ୍ଗ୍‍ଁ କାକୁର୍ତି ଦିନ୍‍ତୁ ମିର୍‌ ସାତ୍ରୁଦି ଆଗ୍‌ଡ଼ି ନିନ୍‌ଡ୍ରେଙ୍ଗ୍‍ ଆଟ୍‍ନିଦେର୍‍ ମାରି ସେସ୍‍ ସାନ୍ଦି ଜୁଦ୍‍ କିଜିବା ଡାଟ୍‍ତାନ୍‍ ତେବାନିଦେର୍‍ ।
EPH 6:14 ଆଦେଙ୍ଗ୍‌ ଜାଗାର୍‌ତା ଆଦୁ, ସତ୍‍ନାନି ବେଲେଟୁ ଗାଟିଦୁ ମି ଜୁକି ସାରିବେଡ଼୍‍ତି ତର୍‌ତୁ, ଦାର୍ମୁ ନାନି ମି ବକାଦିସାଜୁ ଆରାଦୁ,
EPH 6:15 ମାରି ସାନ୍ତିଦି ସୁସମାଚାର୍‌ତି ଉଣ୍ତିଙ୍ଗ୍‌ ରସ୍‌ତିନାନି ପାଦାମ୍‌ତୁ ଜୁତେଙ୍ଗ୍‍ ଆରାଜି ଡାଟ୍‌ ଆଜି ନିଲ୍‍ତୁ ।
EPH 6:16 ୱିଜୁଦିନ୍ ବିସ୍‍ବାସ୍‍ତି ସାଜୁ ପିଣ୍ତଦୁ, ତେନି ସାକାଦାନ୍‍ ସୟତାନ୍‍ ମାଣାନ୍‌ ପୋକ୍‌ନି ୱିଜୁ ସିସୁ ଇଟା ନାପ୍‍ତେଙ୍ଗ୍‍ ମିର୍‌ ଆଟ୍‍ନିଦେର୍‍ ।
EPH 6:17 ମାରି ପରିତ୍ରାଣନାନି ଜୁଦ୍‍ଦି ଟପି ଆରାଦୁ, ପବିତ୍ରଆତ୍ମା ସିତିମାନି ମାପୁରୁଦି ବାକ୍ୟନାନି କାଣ୍ତା ଆସ୍‌ତୁ ।
EPH 6:18 ମାପୁରୁଦି ସାକା ଲସ୍‍ସି ପାର୍‌ତାନାଦି ୱାଲେ ଇୟାୱିଜୁ କିଦୁ । ୱିଜୁ ୱେଡ଼ାଦୁ ପବିତ୍ର ଆତ୍ମାଦି ସାଲାକିନି ଇସାବ୍‍ତାନ୍‍ ପାର୍‍ତନା କିଦୁ । ଜାଗାର୍‌ତା ମାନ୍‍ଡ୍ରୁ; ଏସାଙ୍ଗ୍‍ ୱାନ୍ଦ୍‍ମାଟ୍‍ । ମାପୁରୁଦି ଲୋକା ଉଣ୍ତିଙ୍ଗ୍‌ ୱିଜୁୱାଲେ ପାର୍‍ତନାଦୁ ଏତ୍‌ କିଦୁ ।
EPH 6:19 ନା ଉଣ୍ତିଙ୍ଗ୍‌ ବା ପାର୍‍ତନା କିଦୁ, ଏଣ୍ତେସ୍‌ ସୁସମାଚାର୍‍ତି ମାର୍‍ଗିତିମାନି ମାଟା ୱେର୍‌ତେଙ୍ଗ୍‍ ମାରି ତିଲାଏଣ୍ତା ଆକା ୱେର୍‍ତେଙ୍ଗ୍‍ ମାପୁରୁ ନା ୱେୟୁଦୁ ଟିକ୍‍ ବାକ୍ୟ ସିନାନ୍ ।
EPH 6:20 ଇଲେଇ ଜଇଲ୍‌ତୁ ମାରିଙ୍ଗ୍‍ଁ ବା ନାନୁ ସୁସମାଚାର୍‌ ଉଣ୍ତିଙ୍ଗ୍‌ ଅରେନ୍‍ ରାଜାଦୁତ୍‍ । ପାର୍‍ତନା କିଦୁ, ଏଣ୍ତେସ୍‌ ନାନୁ ସାସ୍ତି ୱାଲେ ଟିକ୍‍ତାନ୍‍ ସୁସମାଚାର୍‌ ୱେର୍‍ତେଙ୍ଗ୍‍ ଆଟ୍‍ନା ।
EPH 6:21 ନା ଅବସ୍ତା ବିସୟ୍‍ତାନ୍‍ ମିର୍‌ ଏଣ୍ତେସ୍‌ ନେସ୍‍ତେଙ୍ଗ୍‍ ଆଟ୍‍ନିଦେର୍‍, ଆୟାଉଣ୍ତିଙ୍ଗ୍‌ ମା ଲାଡ୍‍ତି ତଡ଼ାନ୍‍ ମାରି ପ୍ରବୁଦି ପାଣି କିଜିମାନି ବିସ୍‍ବାସିରି ସେବାକିନି ତୁକିକ ନା ବିସୟ୍‍ତାନ୍‍ ମିଙ୍ଗିଁ ୱିଜୁ ମାଟା ୱେର୍‍ନାନ୍‍ ।
EPH 6:22 ମାପ୍‌ ୱିଜେରେ ଏଣ୍ତେସ୍‌ ମାନାପ୍‍, ଆୟା ମାଟା ୱେର୍‍ସି ମିଙ୍ଗିଁ ୱେଡ଼ିକା କିବିସ୍‍ କିଦେଙ୍ଗ୍‍ଁ ଇଜି ନାନୁ ୱାନିଙ୍ଗ୍‍ଁ ମି ଲାକ୍‍ତୁ ପକ୍‍ତାଜିନା ।
EPH 6:23 ବୁବା ମାପୁରୁ ନି ପ୍ରବୁ ଜିସୁ କ୍ରିସ୍ତ ବିସ୍‍ବାସି ତଡ଼ାନ୍‍କାଙ୍ଗ୍‍ଁ ନି ତାଙ୍ଗିଁକାଙ୍ଗ୍‍ଁ ସାନ୍ତି, ଜିବନ୍‍ନୋନିକା ମାରି ବିସ୍‍ବାସ୍‍ ସିପିନ୍‍ ।
EPH 6:24 ମା ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‍ଁ ଏମେୱାରି ଜିବନ୍‍ନୋନିକା ୱିଜ୍‌ଏତ୍‍, ୱାନ୍‌ ୱାରିଙ୍ଗ୍‌ ଉଣ୍ତିଙ୍ଗ୍‌ ଦୟା କିପିନ୍‍ ।
PHI 1:1 ପାଉଲ ମାରି ତିମତି, କ୍ରିସ୍ତ ଜିସୁଦି ରିଏର୍‌ ଦାସ୍‌କୁ, ପିଲିପି ମଣ୍ତଲିଦୁ ମାନି କ୍ରିସ୍ତ ଜିସୁଦି ମାନି ୱିଜେରେ ସାଦୁରି ଲାକ୍‌ତୁ ମାରି ନେତାର୍‌ ମାରି ସେବାକିନିୱାରି ଲାକ୍‌ତୁ ରାସ୍‌ସିନାନ୍‌;
PHI 1:2 ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦିମାଣ୍‌କୁ ଦୟା ମାରି ସାନ୍ତି ମି ଉଣ୍ତିଙ୍ଗ୍‌ ଆପିତ୍‌ ।
PHI 1:3 ନାନ୍‌ ମିଙ୍ଗିଁ ଏସ ଦେବେଙ୍ଗ୍‌ ଏତ୍‌କିନା, ନାସ ଦେବେଙ୍ଗ୍‌ ନା ମାପୁରୁଙ୍ଗୁଁ ଦନ୍ୟବାଦ୍‌ ସିନା ।
PHI 1:4 ୱିଜୁ ଦେବେଙ୍ଗ୍‌ ମି ଉଣ୍ତିଙ୍ଗ୍‌ ପାର୍‍ତନା କିନି ବେଡ଼ାଦୁ ୱେଡ଼ିକାଦି ମୋନ୍‌ତାନ୍‌ ପାର୍‌ତନା କିଜିନା,
PHI 1:5 ଇରିଙ୍ଗ୍‌ ମି ବିସ୍‌ବାସ୍‌ ଆରାମ୍‌ତାନ୍‌ ନେର୍‌ସାନ୍ଧି ସୁସମାଚାର୍‌ତି ପାଣିଦୁ ମିର୍‌ ନାଙ୍ଗିଁ ଏଣ୍ତେସ୍‌ ସାକା ଆତିମାନିଦେର୍‌,
PHI 1:6 ନାନ୍‌ ଇୟା ବିସୟ୍‌ତାନ୍‌ ସତ୍‍ ଜେ, ଆମା ପ୍ରବୁ ମି ଲାକ୍‌ତୁ ଇୟା ନେଗିପାଣି ଆରାମ୍‌ କିତାମାନାନ୍‌, କ୍ରିସ୍ତ ଜିସୁ ମାରିଡ଼େସିୱାନି ଦିନ୍‌ତୁ ଇକା ସେସ୍‍ ଆନି ସାନ୍ଧି ୱାନ୍‌ ଆକା ପାଣି କିଜି ପୁରା କିନାନ୍‌ ।
PHI 1:7 ମିର୍‌ ୱିଜୁଦିନ୍ ନା ମନ୍‍ତୁ ମାନିଦେର୍‌; ମାରି ମି ୱିଜୁଲୋକା ବିସୟ୍‌ତାନ୍‌ ଇୟାୱାଜା ଏତ୍‌ କିନିକା ମାନାତ୍‌ । ନାନ୍‌ ଜଇଲ୍‍ତୁ ସଲ୍‍ଇ ମାର୍‌ଇ ବେଡ଼ାଦୁ ମାରି ଇଲେଇ ଇୟା ଜଇଲ୍‍ତୁମାନି ଅବସ୍ଥାଦୁ ସୁସମାଚାର୍‌ତି ତିଆର୍‌କିନିକା ନି ରକ୍ଷାଦି ଉଣ୍ତିଙ୍ଗ୍‌ ପାଣି କିଦେଙ୍ଗ୍‌ ମାପୁରୁ ନାଙ୍ଗିଁ ଆମା ଦୟା ସିତାମାନାନ୍‌, ମିର୍‌ ୱିଜିଦେର୍‌ ଇବେନୁ ମିସାତିମାନିଦେର୍‌ ।
PHI 1:8 ମି ୱିଜେରି ଉଣ୍ତିଙ୍ଗ୍‌ ନା ନାଣ୍ତ ୱେଡ଼ିକା ଜିସୁ କ୍ରିସ୍ତଦିମାଣ୍‌କୁ ନାନ୍‌ ପୟ୍‌ତାମାନା ଇଜି ଏସ୍ତିୱାଲେ ନାନ୍‌ ୱେର୍‌ନା, ଇକା ପୁରାସତ୍‌ । ଇୟା ବିସୟ୍‌ତାନ୍‌ ମାପୁରୁ ନା ସାକି ।
PHI 1:9 ମାରି, ନାନ୍‌ ପାର୍‌ତାନା କିଜିନା, ଏଣ୍ତେସ୍‌ ସତ୍‌ତି ବୁଦି ମାରି ନିୟାୟ୍‌ ବିଚାର୍‌ତି ୱାଲେ ମି ଜିବନ୍‌ନୋନିକା ନାଣ୍ତଦାନ୍‌ ନାଣ୍ତ ପିରିତ୍‌,
PHI 1:10 ଏଣ୍ତେସ୍‌ ମିର୍‌ ନେଗି ବିସୟ୍‌କୁ ୱିଜୁ ଆସ୍‌କିଦେଙ୍ଗ୍‌ ଆଟ୍‌ନିଦେର୍‌ । ଆର୍‌ତିଙ୍ଗ୍‌, ମିର୍‌ କ୍ରିସ୍ତଦି ୱାନିଦିନ୍‌ତୁ ପୁରାନେଗେନ୍‌ତାନ୍‌ ମାରି ନିନ୍ଦାସିଲିକା ତେବାନିଦେର୍‍,
PHI 1:11 ମାରି, ମାପୁରୁଦି ଗୌରବ୍‍ ମାରି ଦନ୍ୟବାଦତି ଉଣ୍ତିଙ୍ଗ୍‌ ମି ଜିବନ୍‌ ଜିସୁ କ୍ରିସ୍ତଦି ସିତିମାନି ୱିଜୁ ନେଗିଗୁଣୁତୁ ପୁରା ଆନାତ୍‌ ।
PHI 1:12 ଏ ତଡ଼ାନ୍‌କୁ ନି ତାଙ୍ଗିଁକି, ନା ଉଣ୍ତିଙ୍ଗ୍‌ ଆମା ଆମାକା ଗଟାତାମାନାତ୍‌, ଆକା ସୁସମାଚାର୍‌ତି ପାଣିଦିଙ୍ଗ୍‌ ପିର୍‌ନି ଉଣ୍ତିଙ୍ଗ୍‌ ସାହାଜ୍ୟ କିତାମାନାତ୍‌, ଇକା ମିଙ୍ଗିଁ ୱେର୍‍ତେଙ୍ଗ୍‍ ନାନ୍‌ ଇଚ୍ଛା କିଜିନା ।
PHI 1:13 ଇବେଣି ୱିଜେରେ ରାଜାରି ମେଡ଼୍‍ଇଲୁଦିଙ୍ଗ୍‌ କାପ୍‌କିନିକାର୍‌ ମାରି ଆଇକାର୍‌ ୱିଜେରେ ନେସ୍‌ତାମାନାର୍‌ ଜେ, କ୍ରିସ୍ତଦି ସେବାକିନିକାନ୍‌ ଆତିମାନିଙ୍ଗ୍‌ ନାନ୍‌ ଇଲେଇ ଜଇଲ୍‍ତୁ ମାନା ।
PHI 1:14 ମାତର୍‌ ନାନ୍‌ ଜଇଲ୍‍ତୁ ମାନିଙ୍ଗ୍‌ ଏସଲୋକ୍‌ ତଡ଼ାନ୍‌କୁ ନି ତାଙ୍ଗିଁକି ପ୍ରବୁଦି ଉଣ୍ତିଙ୍ଗ୍‌ ନାଣ୍ତ ବିସ୍‌ବାସ୍‌ କିତାମାନାର୍‌, ମାରି ଇୟାଉଣ୍ତିଙ୍ଗ୍‌ ତିଲାଏଣ୍‌ଗା ମାପୁରୁଦି ବାକ୍ୟ ପ୍ରଚାର୍‌ କିଦେଙ୍ଗ୍‌ ୱାର୍‌ ସାହାସ୍‌ ପୟ୍‌ତାମାନାର୍‌ ।
PHI 1:15 ଅବସ୍ୟ ୱାରି ଲୋଇରାନ୍‌ ଏନ୍‌ ଏନ୍‌ ଗିଦ୍‌ରି ମାରି ଲାଗାଜିସାନି ଉଣ୍ତିଙ୍ଗ୍‌ କ୍ରିସ୍ତଙ୍ଗ୍‌ ପ୍ରଚାର୍‌ କିଜିନାର୍‌ ସତ୍‍, ମାତର୍‌ ମାରି ଏନ୍‌ ଏନ୍‌ ଜିବନ୍‌ତାନ୍‌ ଆକା କିଜିନାର୍‌ ।
PHI 1:16 ଇୟାକାର୍‌ ଇୟାୱାଜା କିନି ଉଣ୍ତିଙ୍ଗ୍‌ ଜିବନ୍‌ନୋନାର୍‌ । ଇରିଙ୍ଗ୍‌ ୱାର୍‌ ନେସ୍‌ନାର୍‌ ଜେ, ମାପୁରୁ ନାଙ୍ଗିଁ ସୁସମାଚାର୍‌ତିଙ୍ଗ୍‌ ସୁରକ୍ଷା କିଦେଙ୍ଗ୍‌ ଦାଇତ୍‌ ସିତାମାନାନ୍‌ ।
PHI 1:17 ଆଇକାର୍‌ ବିସ୍‌ବାସ୍‌ତାନ୍‌ କ୍ରିସ୍ତଦି ମାଟା ପ୍ରଚାର୍‌ କିଏଣ୍‌ଗା ଆକାର୍‌ତି ଉଦେସ୍‍ ଅସି ଆକା କିତାମାନାର୍‌ । ନାନ୍‌ ଜଇଲ୍‍ତୁ ତେବାତିମାର୍‌ଇ ୱାଲେ ନା ମୋନ୍‌ତୁ ନାଣ୍ତ୍‌ କାସ୍ଟୁ ସିଦେଙ୍ଗ୍‌ ୱାର୍‌ ଆକା କିତା ମାନାର୍‌ ।
PHI 1:18 ଆବେନ୍‌ ଇନିକା ପୁଟ୍‌ଏତ୍‌ ! ଉଦେସ୍‌ଦି ଇସାବ୍‌ତାନ୍‌ ଆପିତ୍‌ ମାରି ନେଗେନ୍‌ତି ଇସାବ୍‌ତାନ୍‌ ଆପିତ୍‌, ଏଣ୍ତେସ୍‌ୱାଜାଦାନ୍‌ବା କ୍ରିସ୍ତ ପ୍ରଚାରିତ ଆଜିନାନ୍‍, ଇବେନୁ ନାନ୍‌ ୱେଡ଼ିକା କିଜିନା, ହୁଁ, ୱେଡ଼ିକା କିଜିମାନା ।
PHI 1:19 ଇରିଙ୍ଗ୍‌ ନାନ୍‌ ନେସ୍‌ନା ଜେ, ମି ପାର୍‍ତନା ମାରି ଜିସୁ କ୍ରିସ୍ତଦି ଆତ୍ମାଦି ସାହାଜ୍ୟ ଦାନ୍‌ ନାନ୍‌ ମୁକୁଡ଼ାନିକା ଲାବ୍‌ କିନା ।
PHI 1:20 ଇୟା ବିସୟ୍‌ତାନ୍‌ ନା ଅରେନ୍‍ ଆସାନି ଆସା ଇଡ୍‌ନି ମାନାତ୍‌ ଜେ ନାନ୍‌ ଇନି ବିସୟ୍‌ତାନ୍‌ ସେମାର୍‌ ଆଏ, ମାତର୍‌ ୱିଜୁଦିନ୍ ଏଣ୍ତେସ୍‌ୱାଜା, ଇଲେଇବା ଆୟାୱାଜା ନାଣ୍ତ୍‌ ଡାଟ୍‌ତାନ୍‌, ଜିବନ୍‌ତୁ ଆପିତ୍‌ ବା ସାନିମାନୁ ଆପିତ୍‌, କ୍ରିସ୍ତଙ୍ଗ୍‌ ନା ମେନ୍ଦଲ୍‌ତାନ୍‌ ମହିମା କିନା ।
PHI 1:21 ଇରିଙ୍ଗ୍‌ ନା ଜିବନ୍‌ତୁ କ୍ରିସ୍ତନେ ୱିଜୁ, ଆଦେଙ୍ଗ୍‌ ନା ଉଣ୍ତିଙ୍ଗ୍‌ ସାନିକା ନାଣ୍ତ୍‌ ଲାବ୍‌ ଆନାତ୍‌ ।
PHI 1:22 ମାତର୍‌ ଜଦି ଜିବନ୍‌ ମାନ୍‌ଞ୍ଜି ନାନ୍‌ ନାଣ୍ତ ପଲ୍‌ଆସ୍‌ନି ପାଣି କିଦେଙ୍ଗ୍‌ ଆଟ୍‍ନା, ଆର୍‌ତିଙ୍ଗ୍‌ ଜିବନ୍‌ ନି ସାନିତାନିଙ୍ଗ୍‌ ଏଙ୍ଗ୍‌ ଆସ୍‌କିନା, ନାନ୍‌ ଟିକ୍‌ କିଦେଙ୍ଗ୍‌ ଆଟ୍‌ଏଜିନା ।
PHI 1:23 ନାନ୍‌ ରୁଣ୍ତି ବିସୟ୍‌କୁ ଅସି ପେରିଆର୍‌ଲାଦୁ ପଡ଼େଆତାମାନା; ଇୟା ଜିବନ୍‌ ଡ଼ିସ୍‌ସୋ କ୍ରିସ୍ତଦି ୱାଲେ ତେବାଦେଙ୍ଗ୍‌ ନା ଇଚ୍ଛା, ଇରିଙ୍ଗ୍‌ ଆକା ପୁରା ନେଗେତ୍‌ ।
PHI 1:24 ମାତର୍‌ ମି ଉଣ୍ତିଙ୍ଗ୍‌ ଜିଜୋ ତେବାଦେଙ୍ଗ୍‌ ନାଣ୍ତ ଦର୍‌କାର୍‌ ।
PHI 1:25 ମାରି ନାନ୍‌ ଇୟା ବିସୟ୍‌ତାନ୍‌ ନେସ୍‌ନା ଜେ, ନାନ୍‌ ଜିନା ତେବାନା । ମି ବିସ୍‌ବାସ୍‌ତି ପିର୍‌ନିକା ମାରି ୱେଡ଼ିକାଦି ଉଣ୍ତିଙ୍ଗ୍‌ ନାନ୍‌ ମି ୱିଜେରି ୱାଲେ ତେବାନା ।
PHI 1:26 ଏଣ୍ତେସ୍‌ ମି ମାନୁ ନାନୁ ମାରିଡ଼େସି ଇଗାୱାନି ଉଣ୍ତିଙ୍ଗ୍‌ ନା ମାଣ୍‌କୁ କ୍ରିସ୍ତ ଜିସୁଦିମାନୁ ମି ଗର୍ବ ନାଣ୍ତ ବଡ଼େ ଆନାତ୍‌ ।
PHI 1:27 ନାନ୍‌ ମିଙ୍ଗିଁ ସୁଡ଼ୁଦେଙ୍ଗ୍‌ ଇଜି ସନ୍‍ଡ୍ରେଙ୍ଗ୍‍ ଡାଟ୍‌ ଆନା ସିଲିତିଙ୍ଗ୍‌ ଆଏ, ଇଲେଇ ପେରି ବିସୟ୍‌ ଆଜିନାତ୍‍, ମି ଜିବନ୍‌ ଜିନିକା ଏଣ୍ତେସ୍‌ କ୍ରିସ୍ତଦି ସୁସମାଚାର୍‌ତି ୱାଜା ଆନାତ୍‌ ନାନ୍‌ ଏଣ୍ତେସ୍‌ ୱେନା, ମିର୍‌ ଉନ୍‌ଡ୍ରି ଉଦେସ୍‍ ଅସି ଡାଟ୍‌ତାନ୍‌ ନିର୍‌ଇ ମାନିଦେର୍‌ ମାରି ଉନ୍‌ଡ୍ରି ଆସା ଅସି ସୁସମାଚାର୍‌ ବିସ୍‌ବାସ୍‌ତି ଉଣ୍ତିଙ୍ଗ୍‌ ଅର୍‌ସେ ଜୁଦ୍‌ କିଜିନିଦେର୍‌ ।
PHI 1:28 ସାତ୍ରୁରିଙ୍ଗ୍‌ ତିଲାମାଟ୍‌, ସାହାସ୍‌ତାନ୍‌ ଡାଟ୍‌ ତେବାଦୁ । ଆର୍‌ତିଙ୍ଗ୍‌, ୱାର୍‌ ନେସ୍‌ତେଙ୍ଗ୍‌ ଆଟ୍‍ନାର୍‍ ଜେ, ୱାର୍‌ ଆର୍‌ନିକା ପୁରାସତ୍‌ ମାରି ମିର୍‌ ଜିଣାନିଦେର୍‌, ଇରିଙ୍ଗ୍‌ ମାପୁରୁ ନେ ମିଙ୍ଗିଁ ଜିଣା କିନା ।
PHI 1:29 ଇରିଙ୍ଗ୍‌ କ୍ରିସ୍ତଦିମାନୁ କେବଲ ବିସ୍‌ବାସ୍‌ କିନି ଉଣ୍ତିଙ୍ଗ୍‌ ମିଙ୍ଗିଁ ଜେ ସୁଜୋଗ୍‌ ସିଆୟ୍‌ଆତା ମାନାତ୍‌, ଆକା ସିଲେ, ମାତର୍‌ କ୍ରିସ୍ତଦି ଉଣ୍ତିଙ୍ଗ୍‌ ଦୁଃକ୍‌କାସ୍ଟୁ ବୋଗାନି ଉଣ୍ତିଙ୍ଗ୍‌ ମିଙ୍ଗିଁ ସୁଜୋଗ୍‌ ସିଆୟ୍‌ଆତା ମାନାତ୍‌ ।
PHI 1:30 ଇଲେଇ ଇୟା ଜୁଦ୍‌ଦୁ ମିର୍‌ ନାମାନୁ ମିସାଦେଙ୍ଗ୍‌ ଆଟ୍‌ନିଦେର୍‌ । ସର୍‌ଇଦିନ୍‌ତୁ ମିର୍‌ ନାଙ୍ଗିଁ ଆମା ଜୁଦ୍‌ କିନିକା ସୁଡ଼ୁତିମାର୍‌ଇଦେର୍‌, ଇଲେଇବା ନାନ୍‌ ଆୟା ଜୁଦ୍‌ଦୁ ପୁରା ମାନା ଇଜି ମିର୍‌ ୱେନିମାନିଦେର୍‌ ।
PHI 2:1 କ୍ରିସ୍ତଦି ୱାଲେ ମିସାନି ଉଣ୍ତିଙ୍ଗ୍‌ ମିର୍‌ ଜିବନ୍‌ତୁ ବପୁ ଆତିମାନିଦେର୍‌ । ମାରି ୱାନି ଜିବନ୍‌ନୋନିକା ମିଙ୍ଗିଁ ୱେଡ଼ିକା ସିଜିନାତ୍‌ । ମିର୍‌ ପବିତ୍ରଆତ୍ମାଦି ସାକାଦାନ୍‌ ୱେଡ଼ିକା କିଜିନିଦେର୍‌ ମାରି ନିଜେନିଜେଦି ଉଣ୍ତିଙ୍ଗ୍‌ ମିଙ୍ଗିଁ ଜିବନ୍‍ନୋନିକା ମାରି ଦୟା ମାନାତ୍‌ ।
PHI 2:2 ଆଦେଙ୍ଗ୍‌ ନାନ୍‌ ମିଙ୍ଗିଁ ଅନୁରଦ୍‌ କିଜିନା, ଉନ୍‌ଡ୍ରେ ମନ୍‌ତାନ୍‌, ଉନ୍‌ଡ୍ରେ ଜିବନ୍‌ନୋନିମାନୁ ମିସାନିକା ମାରି ଉନ୍‌ଡ୍ରେମୋନ୍‌ ମାରି ଆତ୍ମାଦୁ ଅର୍‌ସେ ଆଜି ମିର୍‌ ନାଙ୍ଗିଁ ପୁରା ୱେଡ଼ିକା କିଦୁ ।
PHI 2:3 ଆକାର୍‍ ମାରି ନାଣ୍ତ ଗର୍ବ ତରାନି ଉଣ୍ତିଙ୍ଗ୍‌ ଇନି ପାଣି କିମାଟ୍‌, ମାତର୍‌ ନମ୍ର ଆଜି ୱିଜେରେ ଆଇୱାରିଙ୍ଗ୍‌ ନିଜେଦିମାଣ୍‌କୁ ପେରିକାନ୍‌ ଅଡ଼୍‌ବିଦୁ ।
PHI 2:4 କେବଲ ନିଜେଦି ବିସୟ୍‌ତୁ ମୋନ୍‌ ସିଏଣ୍‌ଗା ଆଇୱାରି ବିସୟ୍‌ତୁ ବା ମୋନ୍‌ସିଦୁ ।
PHI 2:5 କ୍ରିସ୍ତ ଜିସୁଦି ଏଣ୍ତେସ୍‌ ନାନି ମନ୍‌ ମାରାତ୍‌, ମିଦି ଆୟାୱାଜା ମୋନ୍‌ ଆପିତ୍‌ :
PHI 2:6 ୱାନ୍‌ ମାପୁରୁୱାଜା ଆତିଙ୍ଗ୍‌ବା ମାପୁରୁଦି ୱାଲେ ସାମାନ୍‌ ଆଜି ତେବାଦେଙ୍ଗ୍‌ ନିଜେଦି ଉଣ୍ତିଙ୍ଗ୍‌ ଆସ୍‌ସୋ ଇଡ୍‌ନି ବିସୟ୍‌ ଏତ୍‌ କିଏତାନ୍‌ ।
PHI 2:7 ବରଂ ନିଜେଦି ଇଚ୍ଛାଦାନ୍‌ ୱାନି ୱିଜୁ ଡ଼ିସ୍‌ତାନ୍‌ନୋ ସାକର୍‌ ମୁର୍ତି ଆସ୍‌ତା ୱାତାନ୍‌ । ଲୋକା ୱାଜା ଆଜି ଲୋକା ୱାଜାତର୍‌ଜି ୱାତାନ୍‌ ।
PHI 2:8 ମାରି, ୱାନ୍‌ ସାନ୍ତି ମାରି ସାନ୍ତିଦିକାନ୍‌ ଆଜି ସାନି ସାନ୍ଦି, କ୍ରୁସଦୁ ସାନି ସାନ୍ଦି ମାନାତାନ୍‌ ।
PHI 2:9 ଇୟାଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ପୁରାନାଣ୍ତ ମୁସ୍‌କୁ ପେର୍‌ତା ମାନାନ୍‌, ମାରି ୱିଜେରି ଦର୍‌କା ବାଦ୍‌ଲୁ ପେରି ଦରୁ ୱାନିଙ୍ଗ୍‌ ସିତାମାନାନ୍‌ ।
PHI 2:10 ଏଣ୍ତେସ୍‌ ମୁସ୍‌କୁପୁର୍‌, ଦୁନିଆ ମାରି ପାତାଲ୍‍ତୁ ମାନି ୱିଜୁ ଲୋକୁ ଜିସୁଦି ଦର୍‌ତିଙ୍ଗ୍‌ ମେଣ୍ତେଙ୍ଗ୍‌ ଗଟ୍‌କିଜି ମାଡ଼ିସ୍‌ କିନାର୍‌ ।
PHI 2:11 ମାରି, ବୁବା ମାପୁରୁଦି ଗୌରବ୍‍ତି ଉଣ୍ତିଙ୍ଗ୍‌ ୱିଜେରି ୱେତଲ୍‌ ଜିସୁ କ୍ରିସ୍ତ ପ୍ରବୁ ଇଜି ମାନାନାର୍‌ ।
PHI 2:12 ମାରି, ଏ ନା ଲାଡ୍‍ତି ତଡ଼୍‍କୁ, ଏଣ୍ତେସ୍‌ ନାନ୍‌ ମି ୱାଲେ ମାର୍‌ଇ ବେଡ଼ାଦୁ ମିର୍‌ ଏଣ୍ତେସ୍‌ ୱିଜୁୱାଲେ ନା ମାଟାଦାନ୍‌ ମାର୍‌ଇଦେର୍‌, ମାତର୍‌ ଇଲେଇ ନାନ୍‌ ସିଲିୱାଲେ ମାରି ନାଣ୍ତଦାନ୍‌ ତିଲାଜି ମାରି ତିର୍‌ଜି ନିଜେ ନିଜେଦି ପରିତ୍ରାଣ୍‌ ପାଣି ଏଣ୍ତେସ୍‌ ପୁରା ଆନାତ୍‌ ।
PHI 2:13 ଇରିଙ୍ଗ୍‌ ଇଚ୍ଛା କିଦେଙ୍ଗ୍‌ ମାରି ପାଣି କିଦେଙ୍ଗ୍‌ ମାପୁରୁ ନିଜେଦି ନେଗି ଉଦେସ୍‌ଦିଙ୍ଗ୍‌ ପୁରା କିନି ଉଣ୍ତିଙ୍ଗ୍‌ ମି ଜିବନ୍‌ତୁ ପାଣି କିନାନ୍‌ ।
PHI 2:14 ଆସ୍‌କିଏଣ୍‌ଗା ମାରି ୱାର୍‌ଗିଜିସାଏଣ୍‌ଗା ୱିଜୁ ପାଣି କିଦୁ ।
PHI 2:15 ଆର୍‌ତିଙ୍ଗ୍‌, ଇୟା କାକୁର୍ତି ମାରି ପାପ୍‌ମାନି ଦୁନିଆଦୁ ମିର୍‌ ମାପୁରୁଦି ଦାର୍ମୁ କଡ଼କକ୍‌ରା ୱାଜା ଦସ୍‍ସିଲିକା ମାରି ଦାର୍ମୁଦାନ୍‌ ଜିଜି ମାଡ଼ିଦେଙ୍ଗ୍‌ ଆଟ୍‌ନିଦେର୍‌ ।
PHI 2:16 ଆଇୱାରି ଲାକ୍‌ତୁ ଜିବନ୍‌ମାନି କାବୁର୍‌ ପ୍ରଚାର୍‌ କିନିୱାଲେ ମିର୍‌ ବାଦଡ଼୍‌ତିଙ୍ଗ୍‌ ଜାୟ୍‌ କିଜିମାନି ସୁକେଙ୍ଗ୍‌ ୱାଜା ଜାୟ୍‌ ଆନିକା ମାନାତ୍‌ । ମିର୍‌ ଜଦି ଇୟାୱାଜା ଆନିଦେର୍‌, “କ୍ରିସ୍ତଦି ଦିନ୍‌ତୁ” ମି ବିସୟ୍‌ତୁ ନାନ୍‌ ଗର୍ବ କିଦେଙ୍ଗ୍‌ ଆଟ୍‍ନା, ଇରିଙ୍ଗ୍‌ ଇବେଣ୍‌କୁ ପାର୍‌ମାଣ୍‌ ଆନାତ୍‌ ଜେ, ନା ୱିଜୁ ଜୋଜନା ମାରି ପାଣି ଆରେଏ ଆଏତ୍‍ ।
PHI 2:17 ମାପୁରୁଦି ଉଦେସ୍‌ତାନ୍‌ ମି ବିସ୍‌ବାସ୍‌ୱାଜା ବଲିଦାନ୍‌ତୁ ଆନାତ୍‌ସୁଗି ନା ଜିବନ୍‌ତି ନେତେର୍‌ ୱାକ୍‌ସୋ ସିଦେଙ୍ଗ୍‌ ପଡ଼ାନାତ୍‌, ଆର୍‌ତିଙ୍ଗ୍‌ ନାନ୍‌ ୱେଡ଼ିକା କିଜିନା ମାରି ନା ଇୟା ୱେଡ଼ିକାଦୁ ମିଙ୍ଗିଁ ମିସା କିଦେଙ୍ଗ୍‌ ଅଡ଼୍‌ବିଜିନା ।
PHI 2:18 ମାରି, ଆୟାୱାଜା ମିର୍‌ ବା ୱେଡ଼ିକା କିଦୁ ମାରି ଆୟା ୱେଡ଼ିକାଦୁ ନାଙ୍ଗିଁ ବା ମିସାକିଦୁ ।
PHI 2:19 ମାତର୍‌ ନାନ୍‌ ମି ଲାକ୍‌ତୁ ତିମତିଦିଙ୍ଗ୍‌ ବେଗି ପୋକ୍‌ନା ଇଜି ପ୍ରବୁ ଜିସୁଦିମାନୁ ଆସା କିଜିନା, ଏଣ୍ତେସ୍‌ ମି କାବୁର୍‌ ନେସ୍‌ସି ନାନ୍‌ ବା ୱେଡ଼ିକା ଆନା ।
PHI 2:20 ଇରିଙ୍ଗ୍‌ ୱାନ୍‌ ମି ବିସୟ୍‌ତୁ ସତ୍‌ତାନ୍‌ ମୋନ୍‌ଦିୟାନ୍‌ କିନାନ୍‌, ଇୟାୱାଜା ଅଡ଼୍‌ବିନି ଲୋକ୍‌ ୱାନିଙ୍ଗ୍‌ ଡ଼ିସ୍‌ତିଙ୍ଗ୍‌ ନା ଲାକ୍‌ତୁ ଏନ୍‌ ସିଲେନ୍‌ ।
PHI 2:21 ଆଇକାର୍‌ ୱିଜେରେ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ମୋନ୍‌ଦିୟାନ୍‌ କିଏଣ୍‌ଗା କେବଲ ନିଜେଦି ପାଣିଦି ଉଣ୍ତିଙ୍ଗ୍‌ ଦାନ୍ଧା ଆନାର୍‌ ।
PHI 2:22 ତିମତି ଜେ ପରିକାଦୁ ଜିଣାତି ଲୋକ୍‌, ଇକା ମିର୍‌ ନେସ୍‌ତିମାନିଦେର୍‌; ମାରିନ୍‌ ବୁବାଦି ସେବା କିତି ୱାଜା ୱାନ୍‌ ତୋ ସୁସମାଚାର୍‌ ପ୍ରଚାର୍‌ ପାଣିଦୁ ନା ୱାଲେ ସେବା କିତାମାର୍ହାନ୍‌ ।
PHI 2:23 ମାରି, ନା ଉଣ୍ତିଙ୍ଗ୍‌ ଇନିକା ଗଟାନାତ୍‌, ଆକା ନେସ୍‌ନି ଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାନା ଇଜି ଆସା କିଜିନା ।
PHI 2:24 ମାତର୍‌ ନାନ୍‌ ପ୍ରବୁଦିମାନୁ ବିସ୍‌ବାସ୍‌ କିଜିନା ଜେ, ନାନ୍‌ ନିଜେ ବା ଦାପ୍ରେ ମି ଲାକ୍‌ତୁ ୱାଦେଙ୍ଗ୍ ଆଟ୍‍ନା ।
PHI 2:25 ମାତର୍‌ ନାନ୍‌ ନା ତଡ଼ାନ୍‌, ଅର୍‍ସେପାଣିକିନାପ୍‌, ଜୁଦ୍‌ ମାରି ନା ଅବାବ୍‌ ପୁରା କିନି ଉଣ୍ତିଙ୍ଗ୍‌ ମି କାବୁର୍‌ ଅନିକାନ୍‍ ମାରି ସେବାକିନି ଏପାଫ୍ରଦିତ୍‌ତିଙ୍ଗ୍‌ ମି ଲାକ୍‌ତୁ ପୋକ୍‌ନି ଉଣ୍ତିଙ୍ଗ୍‌ ଦର୍‌କାର୍‌ ଇଜି ଏତ୍‌ କିତା ।
PHI 2:26 ଇରିଙ୍ଗ୍‌ ୱାନ୍‌ ମିଙ୍ଗିଁ ସୁଡ଼ୁନି ଉଣ୍ତିଙ୍ଗ୍‌ ଇଚ୍ଛା କିଜିନାନ୍‌, ମାରି ୱାନ୍‌ ନବ୍‌ଆତାମାନାନ୍‌ ଇଜି ମିର୍‌ ୱେର୍‌ଇମାନିଙ୍ଗ୍‌ ୱାନ୍‌ ଦୁଃକ୍‌କିଜିନାନ୍‌ ।
PHI 2:27 ସତ୍‌ତାନ୍‌ ୱାନ୍‌ ନବ୍‌ଆଜି ସାତିୱାଜା ଆତାମାର୍‌ର୍ହାନ୍‌, ମାତର୍‌ ମାପୁରୁ ୱାନିଙ୍ଗ୍‌ ଦୟା କିତାନ୍‌, ମାରି କେବଲ ୱାନିଙ୍ଗ୍‌ ସିଲେ, ମାତର୍‌ ଏଣ୍ତେସ୍‌ ନା ଉଣ୍ତିଙ୍ଗ୍‌ ଦୁଃକ୍‌ ମୁସ୍‌କୁ ଦୁଃକ୍‌ ଗଟାଏତ୍‌, ଇୟାଉଣ୍ତିଙ୍ଗ୍‌ ନା ମୁସ୍‌କୁ ବା ଦୟା କିତାନ୍‌ ।
PHI 2:28 ଇୟାଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାନି ଉଣ୍ତିଙ୍ଗ୍‌ ଇଚ୍ଛା, ଇରିଙ୍ଗ୍‌ ମିର୍‌ ଏଣ୍ତେସ୍‌ ୱାନିଙ୍ଗ୍‌ ମାରିଡ଼େସି ସୁଡ଼ୁଜି ୱେଡ଼ିକା ଆନିଦେର୍‌ ମାରି ନା ଦୁଃକ୍‌ ବା ଉଣା ଆନାତ୍‌ ।
PHI 2:29 ଆଦେଙ୍ଗ୍‌ ଅରେନ୍‌ କ୍ରିସ୍ତବିସ୍‌ବାସ୍‌ସି ତଡ଼ାନ୍‌ ୱାଜା ମିର୍‌ ୱାନିଙ୍ଗ୍‌ ମାନାଦୁ ମାରି ୱାନି ୱାଜା ୱିଜୁ ଗୁଣୁମାନି ଲୋକ୍‌ତିଙ୍ଗ୍‌ ସନ୍‌ମାନ୍‌ କିଦୁ ।
PHI 2:30 ଇରିଙ୍ଗ୍‌ ମିର୍‌ ନାଙ୍ଗିଁ ଆମା ସେବା ସିଦେଙ୍ଗ୍‌ ଆଟ୍‌ଇତିଦେର୍‌, କ୍ରିସ୍ତଦି ପାଣି ପୁରା କିନି ଉଣ୍ତିଙ୍ଗ୍‌ ୱାନ୍‌ ଆକା ନା ଉଣ୍ତିଙ୍ଗ୍‌ କିଦେଙ୍ଗ୍‌ ସର୍‌ର୍ହାନ୍‌ନୋ ନିଜେଦି ଜିବନ୍‌ତିଙ୍ଗ୍‌ ନାସ୍ଟୁକିଜି ସାନି ଆଗ୍‌ଡ଼ିସାମାନା କିତାମାର୍ହାନ୍‌ ।
PHI 3:1 ସାରାସାରିୱେନ୍‌କା, ଏ ନା ତଡ଼ାନ୍‌କୁ ନି ତାଙ୍ଗିଁକି, ପ୍ରବୁଦିମାନୁ ମିସାତି ମାନିଙ୍ଗ୍‌, ପ୍ରବୁଦିମାନୁ ୱେଡ଼ିକା କିଦୁ । ଆଗ୍‍ଡ଼ିରାନ୍‍ ଆମାକା ରାସ୍‌ତା ମାନାତ୍‌, ଆୟାତାନିଙ୍ଗ୍‌ ମାରିଡ଼େସି କିଦେଙ୍ଗ୍‌ ନାନ୍‌ ୱାଦ୍‌ନିକା ଅଡ଼ବିଏ, ଇରିଙ୍ଗ୍‌ ମି ସୁରକ୍ଷା ଉଣ୍ତିଙ୍ଗ୍‌ ଇକା ସାହାଜ୍ୟ କିନାତ୍‌ ।
PHI 3:2 ଆମାକାର୍‌ ସତ୍‌ସିଲି ପାଣିଦୁ ମିସାତାମାନାର୍‌, ନୁକୁଡ଼ିଆମାଣ୍‌କୁ ଜାଗ୍‌ରାତା, ତାଗ୍‌ଇ ପାଣିକିନି ୱାରିମାଣ୍‌କୁ ଜାଗ୍‌ରାତା, ସୁନ୍ନତ୍‌କିନି ଲୋକାମାଣ୍‌କୁ ଜାଗ୍‌ରାତା;
PHI 3:3 ଇରିଙ୍ଗ୍‌ ମାପ୍‌ ସତ୍‌ତାନ୍‌ ସୁନ୍ନତ୍‌ପୟ୍‌ତି ଲୋକୁ, ମାପୁ ମାପୁରୁଦି ଆତ୍ମାଦାନ୍‌ ଉପାସନା କିଜିନାପ୍‌, ମାରି ଆତ୍‌ରେରି ରିତିନୀତି ମୁସ୍‌କୁ ଆସା କିଏଣ୍‌ଗା କ୍ରିସ୍ତ ଜିସୁଦିମାନୁ ଗର୍ବ କିନାପ୍‌ ।
PHI 3:4 ନାନ୍‌ ଆତ୍‌ରେରି ବିସୟ୍‌ ମୁସ୍‌କୁ ବା ଆସା କିଦେଙ୍ଗ୍‌ ଆଟ୍‍ନା, ଜଦି ଆଇକାନ୍‍ ଏନ୍‌ ଆତ୍‌ରେରି ରିତିନୀତି ମୁସ୍‌କୁ ଆସା କିଦେଙ୍ଗ୍‌ ଆଟ୍‍ନାନ୍‍ ଇଜି ଏତ୍‌ କିନାନ୍‌, ଆର୍‌ତିଙ୍ଗ୍‌ ନାନ୍‌ ନାଣ୍ତ କିଦେଙ୍ଗ୍‌ ଆଟ୍‍ନା;
PHI 3:5 ନା ଜନମ୍‍ତି ଆଟ୍‌ଦିନ୍‌ତି ନାଣ୍ତିଙ୍ଗ୍‌ ନାନ୍‌ ସୁନ୍ନତ୍‌ ଆତାମାର୍‌ଆ, ନାନ୍‌ ଇସ୍ରାଏଲତି ଲୋକ୍‌, ବିନ୍ୟାମିନ୍ କୁଡ଼ା, ପୁରାନେଗି ଏବ୍ରିୟ, ନିୟମ୍‌ ମାନାନି ବିସୟ୍‌ତାନ୍‌ ଅରେନ୍‍ ପାରୁସି ମାର୍‌ଆ,
PHI 3:6 ନା ତାଗ୍‌ଇ ବ୍ୟବ୍‌ଆର୍‌ତି ଉଣ୍ତିଙ୍ଗ୍‌ କ୍ରିସ୍ଟାନ୍‌ ମଣ୍ତଲିଦିଙ୍ଗ୍‌ କାସ୍ଟୁ ସିଜି ମାର୍‌ଆ, ମାରି ବ୍ୟବସ୍ଥାଦି ମାଟା ମାନାନି ମାଣୁକୁ ଜଦି ଅରେନ୍‌ ଦାର୍ମୁଦିକାନ୍‌ ଆନାନ୍‌, ଆର୍‌ତିଙ୍ଗ୍‌ ନାନ୍‌ ଦୋସ୍‌ ସିଲେତା ।
PHI 3:7 ମାତର୍‌ ଆମାକାୱିଜୁ ନା ଉଣ୍ତିଙ୍ଗ୍‌ ନେଗେତ୍‌ ଇଜି ଅଡ଼୍‍ବିଜି ମାର୍‌ଆ, ଆୟାୱିଜୁ ନାନ୍‌ କ୍ରିସ୍ତଦି ଉଣ୍ତିଙ୍ଗ୍‌ ତାଗ୍‌ଇକା ଇଜି ଅଡ଼୍‌ବିଜିନା ।
PHI 3:8 କେବଲ୍‌ ନାସ ସିଲେ; ନା ପ୍ରବୁ ଜିସୁ କ୍ରିସ୍ତଙ୍ଗ୍‌ ନେସ୍‌ନି ମାଣ୍‌କୁ ଆମା ନାଣ୍ତ ବୁଦି ପୟ୍‌ତାମାନା, ତାନି ବାଦ୍‌ଲୁ ୱିଜୁ ବିସୟ୍‌ତିଙ୍ଗ୍‌ ତାଗ୍‌ଇକା ଇଜି ଏତ୍‌କିନା; ୱାନି ଉଣ୍ତିଙ୍ଗ୍‌ ନାନ୍‌ ୱିଜୁ ବିସୟ୍‌ତିଙ୍ଗ୍‌ ଡ଼ିସ୍‍ତାମାନା, ଏଣ୍ତେସ୍‌ ନାନ୍‌ କ୍ରିସ୍ତଙ୍ଗ୍‌ ପୟ୍‌ଦେଙ୍ଗ୍‌ ଆଟ୍‌ନାନ୍‌ ।
PHI 3:9 ମାରି ୱାନି ୱାଲେ ପୁରା ମିସାନି ଉଣ୍ତିଙ୍ଗ୍‌, ମାରି ଆୟାୱିଜୁ ବିସୟ୍‌ତିଙ୍ଗ୍‌ କାସ୍‌ରା ଇଜି ଅଡ଼୍‌ବିଜିନା । ମାରି, ଆମା ଦାର୍ମୁଦି ନିୟମ୍‌ ମାନାନି ମାଣ୍‌କୁ ପୟ୍‌ଦେଙ୍ଗ୍‌ ଆଟ୍‌ନିକା, ଆୟା ନାନି ଇନି ନିଜେଦି ଦାର୍ମୁ ନାଦି ସିଲେତ୍‌ । ଇଲେଇ ନାଦି ଆମା ଦାର୍ମୁ ମାନାତ୍‌, ଆକା କ୍ରିସ୍ତଦିମାନୁ ବିସ୍‌ବାସ୍‌ କିନି ମାଣ୍‌କୁ ପୟ୍‌ତାମାନା; ଆକା ମାପୁରୁଦିମାଣୁକୁ ୱାନାତ୍ ମାରି ଆକା ବିସ୍‌ବାସ୍‌ତି ମୁସ୍‌କୁ ତିଆର୍‌ଆତାମାନାତ୍‌ ।
PHI 3:10 ଏଣ୍ତେସ୍‌ ନାନ୍‌ କ୍ରିସ୍ତଙ୍ଗ୍‌ ନେସ୍‌ନା ମାରି ୱାନି ମାରିଡ଼େସିଜିବନ୍‌ଆଜିନିଙ୍ଗିଁନି ସାକ୍ତି ଏତ୍‌କିନା; ୱାନି କାସ୍ଟୁ ବୋଗ୍‌ତି ଦଣ୍ତ୍‌ ଏତ୍‌କିଜି ସାନିମାନୁ ବା ୱାନି ୱାଜା ଆନା,
PHI 3:11 ମାରି ସାତିୱାରି ମାଣ୍‌କୁ ମାରିଡ଼େସିନିଙ୍ଗିଁନିକା ପୟ୍‌ଦେଙ୍ଗ୍‌ ଆସା କିଜିନା ।
PHI 3:12 ନାନ୍‌ ଜେ ଇଲେଇ ଆୟାୱିଜୁ ପୟ୍‌ତା ମାନା ମାରି ପୁରା ପୟ୍‌ତା ମାନା, ଆକା ସିଲେ, ମାତର୍‌ ନାନ୍‌ କ୍ରିସ୍ତ ଜିସୁଦି ମାଣ୍‌କୁ କୁକାୟ୍‍ ଆତିମାନିଙ୍ଗ୍‌ ଆକା ଆସିନି ଉଣ୍ତିଙ୍ଗ୍‌ ଉର୍‌କୁସିନା ।
PHI 3:13 ଏ ତଡ଼ାନ୍‌କୁ ନି ତାଙ୍ଗିଁକି, ଇୟାସାନ୍ଧି ନାନ୍‌ ଇତି ବାଡିଦୁ ଇଏନେ, ମାତର୍‌ ଉନ୍‌ଡ୍ରି ପାଣିଦୁ ପୁରାମାନ୍‌ଞ୍ଜି, ୱେନ୍‌କା ଡ଼ିସ୍‌ତିୱାତିମାନି ବିସୟ୍‌କୁୱିଜୁ ମୋନ୍‌ତାନ୍‌ ଆକ କିଜି ଆଗ୍‌ଡ଼ି ମାନି ବିସୟ୍‌କୁ ପୟ୍‌ନି ଉଣ୍ତିଙ୍ଗ୍‌ ସାନିଜିନିୱାଜା ସେସ୍ଟା କିଜିନା ।
PHI 3:14 ଆଦେଙ୍ଗ୍‌ କ୍ରିସ୍ତ ଜିସୁଦି ୱାଲେ ଆମା ମୁସ୍‌କୁପୁର୍‌ତି ଜିବନ୍‌ ପୟ୍‌ନି ଉଣ୍ତିଙ୍ଗ୍‌ ମାପୁରୁ ନାଙ୍ଗିଁ କୁକ୍‌ତାମାନାନ୍‌, ଆୟା ପୁରସ୍କାର୍‌ତି ଉଣ୍ତିଙ୍ଗ୍‌ ଆସା ଇଡ୍‌ଜି ନାନ୍‌ ଇତି ବାଡିଦୁ ଉର୍‌କୁସିନା ।
PHI 3:15 ମାରି, ମା ଲୋଇ ଏସଲୋକ୍‌ ଆତ୍ମାଦାନ୍‌ ଜିଣାତିମାନିକା, ୱାରି ଇୟାୱାଜା ମୋନ୍‌ଅଡ଼୍‌ବିନିକା ତେବାନିକା ନେଗେତ୍‌, ମାରି ଜଦି ଇନି ବିସୟ୍‌ତୁ ମି ଅଡ଼୍‌ବିନିକା ଅଲଗା ନାନିକା ମନ୍‌ଅଡ଼୍‌ବିନିକା ମାନାତ୍‌, ଆର୍‌ତିଙ୍ଗ୍‌ ମାପୁରୁ ମିଙ୍ଗିଁ ୱିଜୁ ମାଟା ନେସ୍‌ନିୱାଜା ୱେର୍‌ନାନ୍‌ ।
PHI 3:16 କେବଲ, ନେର୍‌ସାନ୍ଧି ମାଡୁ ଆମା ନିୟମ୍‌ ମାନାଜି ୱାଜିନିକା, ଆୟା ଇସାବ୍‌ତାନ୍‌ ଆଗ୍‌ଡ଼ି ସନିକା ମାନାତ୍‌ ।
PHI 3:17 ଏ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ଅର୍‌ସେ ମିସାଜି ନା ୱେନ୍‌କା ରାଦୁ, ମାରି ମାମାନୁ ଆମା ସାନ୍ତି ସୁଡ଼ୁଜିନିଦେର୍‌, ଆମାକାର୍‌ ଆୟାଇସାବ୍‌ତାନ୍‌ ବୁଲାସାଲାଜିନାର୍‌, ୱାରିଙ୍ଗ୍ ସୁଡ଼ୁଦୁ ।
PHI 3:18 ଇରିଙ୍ଗ୍‌ ଇୟାୱାଜା ଗାଦିଲୋକ୍‌ ମାନାର୍‌, ଆମାୱାରି ବୁଲାସାଲାନି ବିସୟ୍‌ତାନ୍‌ ନାନ୍‌ ମିଙ୍ଗିଁ ଗାଦି ଦେବେଙ୍ଗ୍‌ ୱେର୍‌ତାମାନା, ମାରି ଇଲେଇବା ଆଡ଼୍‍ବାଜି ଆଡ଼୍‍ବାଜି ୱେର୍‌ସିନା, ୱାର୍‌ କ୍ରିସ୍ତଦି କ୍ରୁସକାଟ୍‌ତି ସାତ୍ରୁରୁ;
PHI 3:19 ନରକଦୁ ୱାରି ଜିବନ୍‌ ସାନି ଉଣ୍ତିଙ୍ଗ୍‌ ସଲ୍‌ସିନାତ୍‌, ମେନ୍ଦଲ୍‌ ଆସାନେ ୱାରି ଦିୟାମ୍‌, ୱାର୍‌ ନିଜେ ନିଜେଦି ସେମାର୍‌ତିଙ୍ଗ୍‌ ଗର୍ବଦି ବିସୟ୍‌ ଏତ୍‌ କିନାର୍‌, ମାରି କେବଲ ଦୁନିଆଦି ବିସୟ୍‌ତି ଉଣ୍ତିଙ୍ଗ୍‌ ୱାର୍‌ ସିନ୍ତା କିନାର୍‌ ।
PHI 3:20 ମାଡୁ ମୁସ୍‌କୁପୁର୍‌ତି ପ୍ରଜା, ଆୟା ବାଡିଦାନ୍‌ ବା ମାଡୁ ରକିୟାକର୍ତ୍ତା ପ୍ରବୁ ଜିସୁ କ୍ରିସ୍ତଦି ୱାନିଦିନ୍‌ତିଙ୍ଗ୍‌ ୱେଡ଼ିକାଦାନ୍‌ କାପ୍‌କିଜି ମାନାପ୍‌ ।
PHI 3:21 ୱାନ୍‌ ନିଜେଦି ଆମା ପାଣିଦି ସାକ୍ତି ଦାନ୍‌ ୱିଜୁ ବିସୟ୍‌ତିଙ୍ଗ୍‌ ନିଜେଦି ଆଡ୍‍ଗି କିଦେଙ୍ଗ୍‌ ଆଟ୍‍ନାନ୍‍, ଆୟା ସାକ୍ତିଦାନ୍‌ ମା ସାକ୍ତିସିଲି ମେନ୍ଦଲ୍‌ତିଙ୍ଗ୍‌ ବାଦେଲ୍‌କିଜି ନିଜେଦି ଗୌରବ୍‌ମୟ୍‌ ମେନ୍ଧଲ୍‍ ୱାଜା କିନାନ୍‌ ।
PHI 4:1 ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକ୍‍, ମିଙ୍ଗିଁ ସୁଡ଼ୁନି ଉଣ୍ତିଙ୍ଗ୍‌ ନା ଏସ ବଦା, ମିଙ୍ଗିଁ ଅସିନା ଏସା ୱେଡ଼ିକା, ମି ଉଣ୍ତିଙ୍ଗ୍‌ ନା ଏସା ଗର୍ବ । ତଡ଼ାନ୍‌କୁ ନି ତାଙ୍ଗିଁକି, ନା ସିକିୟା ଇସାବ୍‌ତାନ୍‌ ପ୍ରବୁଦିମାନୁ ତିର୍‌ ତେବାଜି ଜିଜିମାଡ଼ିଦୁ ।
PHI 4:2 ଇୟଦିଆ ମାରି ସୁନ୍ତୁଖୀ ରୁଣ୍ତିୱାନିକାଙ୍ଗ୍‌ ନା ଅନୁରୋଦ୍‌ ୱାକ୍‌ ପ୍ରବୁଦିମାନୁ ତାଙ୍ଗିଁ ୱାଜା ମିସାବିଡ଼ାଜି ମାନିୱି ।
PHI 4:3 ମାରି, ଏ ନା ବିସ୍‌ବାସ୍‌ତି ଅର୍‌ସେପାଣିକିନିକାନ୍‌, ଇୟା ତାଙ୍ଗିଁକାଙ୍ଗ୍‍ଁ ସାହାଜ୍ୟ କିନି ଉଣ୍ତିଙ୍ଗ୍‌ ନିଙ୍ଗିଁ ବା ନା ବାତିଙ୍ଗ୍‌ମାଲ୍‌ଜିନା, ଇରିଙ୍ଗ୍‌ ଇୟାକେଙ୍ଗ୍‌ କ୍ଲେମେନ୍‌ସ୍‌ ମାରି ନା ଆଇ ପାଣିକିନିୱାନିକା ୱାଲେ ସୁସମାଚାର୍‌ ପାଣିଦୁ ନା ୱାଲେ ପାଣି କିତେମାନେ; ଆୟା ପାଣିକିନିୱାନିକା ଦରୁ ମାପୁରୁଦି “ଜିବନ୍‌ ପୁସ୍ତକଦୁ” ରାସ୍‌ତାମାନାତ୍‌ ।
PHI 4:4 ପ୍ରବୁଦି ୱାଲେ ମିସାତି ମାନିଙ୍ଗ୍‌ ୱିଜୁୱାଲେ ୱେଡ଼ିକା କିଦୁ, ମାରିଡ଼େସି ୱେର୍‌ସିନା, “ୱେଡ଼ିକା କିଦୁ ।”
PHI 4:5 ମି ନେଗି ବ୍ୟବ୍‌ହାର୍‌ ୱିଜୁ ଲୋକା ଲାକ୍‌ତୁ ତରାପିତ୍‌ । ପ୍ରବୁଦି ୱାନିଦିନ୍‌ ଲାକ୍‌ତୁ ଆତାତ୍‌ନି ।
PHI 4:6 ଇନି ବିସୟ୍‌ତାନ୍‌ ସିନ୍ତା କିମାଟ୍‌, ମାତର୍‌ ମିଙ୍ଗିଁ ଆମାକା ଦର୍‌କାର୍‌, ଆକା ପାର୍‌ତନାଦୁ ମାପୁରୁଙ୍ଗୁଁ ଲସ୍‌ତୁ । ମାରି ପାର୍‌ତନା କିନିୱାଲେ ୱିଜୁୱାଲେ ଜିବନ୍‌ତି ଦନ୍ୟବାଦ୍‌ତି ୱାଲେ ମି ପାର୍‌ତନା ୱିଜୁ ମାପୁରୁଦିମାନୁ ୱେର୍‌ତୁ;
PHI 4:7 ଆର୍‌ତିଙ୍ଗ୍‌ ଲୋକ୍‌ତି ବୁଜାଦେଙ୍ଗ୍‌ ଆଟ୍‌ଇକା ମାପୁରୁଦି ସାନ୍ତି କ୍ରିସ୍ତ ଜିସୁଦି ସାକାଦାନ୍‌ ମି ଜିବନ୍‌ ମାରି ମୋନ୍‌ତିଙ୍ଗ୍‌ ନେଗେନ୍‌କିଜି ଇଡିନାତ୍‌ ।
PHI 4:8 ସାରାସାରିୱେନ୍‌କା, ଏ ତଡ଼ାନ୍‌କୁ ନି ତାଙ୍ଗିଁକି, ଆମା ୱିଜୁ ନେଗିକା ମାରି ୱେଡ଼ିକାଦି ବିସୟ୍‌ ମାନାତ୍‌, ଆମା ଆମାକା ସତ୍‌, ଆମା ଆମାକା ପେରିକା, ଆମା ଆମାକା ଟିକ୍‌, ଆମା ଆମାକା ପୁରାନେଗିକା, ଆମା ଆମାକା ଲୋକ୍‌ତିଙ୍ଗ୍‌ ନେଗିକା, ଆମା ଆମାକା ସନ୍‍ମାନଜନକ, ଆୟାୱିଜୁ ବିସୟ୍‌ ସିନ୍ତା କିଦୁ ।
PHI 4:9 ମିର୍‌ ଆମାୱିଜୁ ବିସୟ୍‌ ନା ମାଣ୍‌କୁ ଅଜାତିମାନିଦେର୍‌, ପୟ୍‌ତିମାନିଦେର୍‌, ୱେର୍‌ଇମାନିଦେର୍‌ ମାରି ନା ମାନୁ ସୁଡ଼ୁତିମାନିଦେର୍‌, ଆୟାୱିଜୁ କିଦୁ; ଆବେନ୍‌ ସାନ୍ତିଦାତା ମାପୁରୁ ମି ସାକା ଆନାନ୍‌ ।
PHI 4:10 ପ୍ରବୁଦି ୱାଲେ ମିସାଜି ଜିଜି ମାଡ଼ିନି ୱାଲେ ନା ୱେଡ଼ିକା ଜେ, ମିର୍‌ ନା ଉଣ୍ତିଙ୍ଗ୍‌ ମନ୍‍ ସିଦୁ । ନାଣ୍ତ୍‌ ଦିନ୍‌ ୱେନ୍‌କା ମାରିଡ଼େସି ବାଦେଲ୍‌ଆନିକା ତର୍‌ତିମାନି । ନାନ୍‌ ଇନ୍‌ଏ ଜେ, ମିର୍‌ ଇୟାଦାପ୍ରେ ନା ଉଣ୍ତିଙ୍ଗ୍‌ ମାରି ମୋନସିଇ ମାର୍‌ଇଦେର୍‌, କେବଲ୍‌ ଆକା ୱେର୍‌ତେଙ୍ଗ୍‌ ସୁଜୋଗ୍‌ ପୋଇତିମାର୍‌ଇ ।
PHI 4:11 ନାନ୍‌ ନିଜେଦିଙ୍ଗ୍‌ ୱେଡ଼ାଆଜିନାତ୍‌ ଏତ୍‌କିଜି ଇୟା ମାଟା ଇନ୍‌ଏ, ଇରିଙ୍ଗ୍‌ ନାନ୍‌ ଏଣ୍ତେସ୍‌ ନାନି ଅବସ୍ଥାଦାନ୍‌ ମାନା, ନାନ୍‌ ନାସଦାନ୍‌ନେ ତିର୍‌ ତେବାଦେଙ୍ଗ୍‌ ସିକିୟା କିତାମାନା ।
PHI 4:12 ଉଣା ଆପିତ୍‌ ମାରି ନାଣ୍ତ ଆପିତ୍‌, ଏଣ୍ତେସ୍‌ ତାନି ସାମାନା କିଦେଙ୍ଗ୍‌ ଆନାତ୍‌, ଆକା ନାନ୍‌ ନେସ୍‌ତାମାନା । ଆଦେଙ୍ଗ୍‌ ଆମା ଇନି ବେଡ଼ାଦୁ, ଆମା ଇନି ଅବସ୍ଥାଦାନ୍‌ ମାରି ବାଙ୍ଗାଁଦୁ ତେବାତି ୱାଲେ ଏଣ୍ତେସ୍‌, ପଟାପାଜିତି ୱେନ୍‌କା ବା ଆୟାୱାଜା, କାକୁର୍ତି ଆନି ବେଡ଼ାଦୁ ମାରି ନାଣ୍ତ ଦୁବା ନାନ୍‌ ୱିଜୁଦିନ୍‌ ସାମାନ୍‌ ।
PHI 4:13 ନା ସକ୍ତିଦାତା କ୍ରିସ୍ତଦି ସାହାଜ୍ୟଦାନ୍‌ ନାନ୍‌ ୱିଜୁ କିଦେଙ୍ଗ୍‌ ଆଟ୍‌ସିନା ।
PHI 4:14 ମାରିବା ମିର୍‌ ନା ଦୁଃକ୍‌ବୋଗ୍‌ତି ବେଡ଼ାଦୁ ମିସାଜି ପେରି ପାଣି କିତିମାନିଦେର୍‌ ।
PHI 4:15 ଏ ପିଲିପ୍‌ପିୟଦି, ତଡ଼ାନ୍ ନି ତାଙ୍ଗିଁକ୍‌ ମିର୍‌ ବା ନିଜେ ନେସ୍‌ନିଦେର୍‌ ଜେ, ସୁସମାଚାର୍‌ ପ୍ରଚାର୍‌ କିନି ଆରାମ୍‌ ବେଡ଼ାଦୁ, ଏସ୍ତିୱାଲେ ନାନ୍‌ ମାସିଦୋନିଆଦାନ୍‌ ଡ଼ିସ୍‌ତା ସର୍‌ଆ, ନାସ୍ତିୱାଲେ ମିଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଆମା ମଣ୍ତଲି ନା ୱାଲେଅର୍‌ସେ ଆଜି ନା ୱାଲେ ସିନିକା ଅନିକା ଇସାବ୍‌ ଇଡ୍‌ଏର୍‌ ମାର୍ହାର୍‌ ।
PHI 4:16 ଇରିଙ୍ଗ୍‌ ତେସଲନିକିୟାଦୁ ନାନ୍‌ ମାନି ବେଡ଼ାଦୁ ମିର୍‌ ଅର୍‍ସୁ ନି ନାଣ୍ତ୍‌ ଦେବେଙ୍ଗ୍‌ ନା ଲାକ୍‌ତୁ ଦରକାର୍‌ତି ସାହାଜ୍ୟ ପୋକ୍‌ତାତି ମାର୍‌ଇଦେର୍‌ ।
PHI 4:17 ମିମାଣ୍‌କୁ କେବଲ ଦାନ୍‌ ଅତେଙ୍ଗ୍‌ ନାନ୍‌ ଅଡ଼୍‌ବିଏ; ଇୟାତାନି ବାଦ୍‌ଲୁ ମିର୍‌ ଏଣ୍ତେସ୍‌ ନାଣ୍ତଦାନ୍‌ ନାଣ୍ତ ପୟ୍‌ଦୁ, ଇକା ନା ବଦା ।
PHI 4:18 ମିମାଣ୍‌କୁ ନାନ୍‌ ପୟ୍‌ତିମାନି ୱିଜୁ ଦାନ୍‌ ଉଣ୍ତିଙ୍ଗ୍‌ ପୋୟ୍‌ତିକା ମାନାଜି ଜାଣେକିଜିନା । ଆକା ନା ଉଣ୍ତିଙ୍ଗ୍‌ ନାଣ୍ତଦାନ୍‌ ନାଣ୍ତ ଆତାମାନାତ୍‌, ଏପାଫ୍ରଦିତ୍‌ଦି କିୟୁଦୁ ମିର୍‌ ପୋକ୍‌ତାତିମାନି ଦାନ୍‌ ନା ୱିଜୁ ସିଲିମାନୁ ପୁରା କିତାମାନାତ୍‌ । ଆକା ମାପୁରୁଦି ଉଦେସ୍‌ତାନ୍‌ ସିତିମାନି ବାସ୍‌ନାଆନି ଦୁପୁଣି ମାରି ୱାନି ମାନାନିନାନିକା ମାରି ୱେଡ଼ିକାଦି ବଲିପୁଜାସିନି ୱାଜା ।
PHI 4:19 ମାରି, ନା ମାପୁରୁ କ୍ରିସ୍ତ ଜିସୁଦିମାନୁ ୱାନି ଗୌରବ୍‌ମୟ୍‌ ପାଣିଦି ଇସାବ୍‌ତାନ୍‌ ମି ୱିଜୁ ଅଭାବ୍‌ ପୁରା କିନାତ୍‌ ।
PHI 4:20 ମା ମାପୁରୁ ମାରି ବୁବାଦି ଉଣ୍ତିଙ୍ଗ୍‌ ଜୁଗ୍‌ ଜୁଗ୍‌ ଗୌରବ୍‍ ଆପିତ୍‌ । ଆମେନ୍‍ ।
PHI 4:21 କ୍ରିସ୍ତ ଜିସୁଦି ଦର୍‌ତାନ୍‌ ୱିଜୁ ସାଦୁରିଙ୍ଗ୍‌ ନମସ୍କାର୍‌ ଜାଣେକିଦୁ । ନା ୱାଲେ ମାନି ତଡ଼ାନ୍‌କୁ ନି ତାଙ୍ଗିଁକି ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ ।
PHI 4:22 ଇବେନୁ ମାନି ମାପୁରୁଦି ଲୋକୁ, ବିସେସ୍‌ତାନ୍‌ ଆମାକାର୍‌ କାଇସର୍‍ତି ମେଡ଼୍‌ଇଲୁଦୁ ମାନାର୍‌, ୱାର୍‌ ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ ।
PHI 4:23 ପ୍ରବୁ ଜିସୁ କ୍ରିସ୍ତଦି ଦୟା ମି ଆତ୍ମାଦି ୱାଲେରାନ୍‌ ତେବାପିତ୍‌ ।
COL 1:1 ମାପୁରୁଦି ବଦାଦାନ୍‌ କ୍ରିସ୍ତ ଜିସୁଦି ଅରେନ୍‍ ପ୍ରେରିତ ସିସୁ, ପାଉଲ ମାରି ତଡ଼ାନ୍‌ ତିମତି
COL 1:2 କଲସିଦୁ ମାନି ସାଦୁରିଙ୍ଗ୍‌ ମାରି କ୍ରିସ୍ତବିସ୍‌ବାସ୍‌ସିର୍‌ ତଡ଼ାନ୍‌କୁ ନି ତାଙ୍ଗିକ୍ ଲାକ୍‌ତୁ ଇୟା ଆକୁ ରାସ୍‌ସିନାନ୍‌, ମା ବୁବା ମାପୁରୁମାଣୁକୁ ଦୟା ମାରି ସାନ୍ତି ମି ଉଣ୍ତିଙ୍ଗ୍‌ ଆପିତ୍‌ ।
COL 1:3 ମାପୁ ମି ଉଣ୍ତିଙ୍ଗ୍‌ ପାର୍‌ତାନା କିଜି ମା ପ୍ରବୁ ଜିସୁ କ୍ରିସ୍ତଦି ବୁବା ମାପୁରୁଙ୍ଗୁଁ ୱିଜୁଦିନ୍ ଦନ୍ୟବାଦ୍‌ ସିଜିନାପ୍‌;
COL 1:4 ଇରିଙ୍ଗ୍‌ କ୍ରିସ୍ତ ଜିସୁଦିମାନୁ ମି ବିସ୍‌ବାସ୍‌ ମାରି ମାପୁରୁଦି ୱିଜେରି ଲୋକା ଉଣ୍ତିଙ୍ଗ୍‌ ଜିବନ୍‍ନନି ବିସୟ୍‌ ୱେର୍ହାମାନାପ୍,
COL 1:5 ଏସ୍ତିୱାଲେ ସୁସମାଚାର୍‌ତି ସତ୍‌ ବାକ୍ୟ ମି ଲାକ୍‍ତୁ ଆଗ୍‍ଡ଼ି ୱାତାତ୍‍, ମିର୍‌ ଆୟାମାଣାନ୍‍ ସିଆୟ୍‍ଆତିମାନି ଆସାଦି ମାଟା ୱେର୍‌ଇମାର୍‍ଇଦେର୍‌ । ମିର୍‌ ଆମାକା ଆସା କିନିଦେର୍‍, ଆମାକା ମି ଉଣ୍ତିଙ୍ଗ୍‌ ମୁସ୍‌କୁପୁର୍‌ତୁ ନେଗେନ୍‍ ତେବାନାତ୍‍, ତାନି ମୁସ୍‌କୁ ମି ବିସ୍‍ବାସ୍‍ ମାରି ଜିବନ୍‍ନୋନିକା ତିଆର୍‌ଆତାମାନାତ୍‌ ।
COL 1:6 ଆମା ସୁସମାଚାର୍‌ ପ୍ରଚାର୍‍ତି ଉଣ୍ତିଙ୍ଗ୍‌ ମିର୍‌ ଆଗ୍‍ଡ଼ିନେ ମାପୁରୁଦି ଦୟା ବିସୟ୍‍ ୱେର୍‌ଇଦେର୍‌ ମାରି ତେନି ସତ୍‍ତିକା ଅଡ଼୍‍ବିତିଦେର୍‍, ଆୟା ସୁସମାଚାର୍‌ ଇଲେଇ ସାରା ଜଗତ୍‌ଦୁ ୱେଙ୍ଗିଁତାମାନାତ୍‍ ମାରି ଆର୍ସିବାଦ୍‌ ତାସିନାତ୍‍ ।
COL 1:7 ମା ତରିଟାନ୍‌ କ୍ରିସ୍ତଦି ଅରେନ୍‍ ବିସ୍‌ବାସ୍‌ତାନ୍‌ ସେବାକିନିକାନ୍‌ ମାରି ମା ଲାଡ୍‍ତି ଅର୍‍ସେପାଣିକିନି ଏପାଫ୍ରାଦିମାଣ୍‌ନା ମିର୍‌ ମାପୁରୁଦି ଆୟା ଦୟା ବିସୟ୍‌ କିତିମାନିଦେର୍‌;
COL 1:8 ପବିତ୍ର ଆତ୍ମା ମିଙ୍ଗିଁ ସିତିମାନି ଜିବନ୍‌ନୋନି ବିସୟ୍‌ତାନ୍‌ ୱାନ୍‌ ମାଙ୍ଗିଁ ୱେର୍‌ତାମାନାନ୍‌ ।
COL 1:9 ଇୟାଉଣ୍ତିଙ୍ଗ୍‌ ମି ବିସୟ୍‌ତାନ୍‌ ୱେନି ନାଣ୍ତିରାନ୍‌ ମାପ୍‌ ବା ମି ଉଣ୍ତିଙ୍ଗ୍‌ ୱିଜୁଦିନ୍‍ ପାର୍‌ତାନା କିଜିନାପ୍‌ । ପବିତ୍ରଆତ୍ମା ସିତିମାନି ୱିଜୁ ବୁଦି ମାରି ବୁଜାନି ସାକ୍ତିଦାନ୍‌ ମାପୁରୁଦି ବଦା ପୁରାଦାନ୍‌ ମିର୍‌ ଏଣ୍ତେସ୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌, ଇୟାଉଣ୍ତିଙ୍ଗ୍‌ ମି ଉଣ୍ତିଙ୍ଗ୍‌ ମାପ୍‌ ପାର୍‍ତନା କିଜିନାପ୍‍ ।
COL 1:10 ଆର୍‌ତିଙ୍ଗ୍‌, ମିର୍‌ ପ୍ରବୁଦି ବଦାଦି ୱାଜା ଜିଦେଙ୍ଗ୍‌ ଆଟ୍‍ନିଦେର୍‍ ମାରି ୱାନି ୱେଡ଼ିକାଦି ପାଣି କିଦେଙ୍ଗ୍‌ ଆଟ୍‍ନିଦେର୍‍ । ମିର୍‌ ଜିବନ୍‍ତୁ ୱିଜୁ ରକମ୍‍ତି ନେଗି ପାଣି କିଦେଙ୍ଗ୍‌ ଆଟ୍‍ନିଦେର୍‍ ମାରି ମାପୁରୁଦି ବିସୟ୍‍ତାନ୍‍ ମି ବୁଦି ପିର୍‍ନାତ୍‍ ।
COL 1:11 ମାରି ୱିଜୁ ବିସୟ୍‌ତୁ ମିର୍‌ ଏଣ୍ତେସ୍‌ ସାସ୍‌ତାନ୍‌ ମାରି ସାସ୍‌ କିଦେଙ୍ଗ୍‌ ଆଟ୍‌ନିଦେର୍‌, ଇୟାଉଣ୍ତିଙ୍ଗ୍‌ ୱାନି ଗୌରବ୍‌ଦି ସାକ୍ତି ଦାନ୍‌ ମିର୍‌ ବପୁ ଆଦୁ,
COL 1:12 ମାରି ଆମା ବୁବା ମାପୁରୁ ଜାୟ୍‌ତି ରାଜିଦୁ ୱାନି ଲୋକା ଉଣ୍ତିଙ୍ଗ୍‌ ଆମାକା ରକିୟାକିଜି ଇଟ୍‌ତାମାନାନ୍‌, ୱାନି ମିସାନି ଉଣ୍ତିଙ୍ଗ୍‌ ୱାନ୍‌ ଜେ ମିଙ୍ଗିଁ ଆସ୍‌କିତାମାନାନ୍‌, ଇୟାଉଣ୍ତିଙ୍ଗ୍‌ ୱାନିଙ୍ଗ୍‌ ୱେଡ଼ିକାଦି ୱାଲେ ଦନ୍ୟବାଦ୍‌ ସିଦୁ ।
COL 1:13 ୱାନ୍‌ ମାଙ୍ଗିଁ ସିକାଟିଦି ସାକ୍ତିଦାନ୍‌ ଉଦାର୍‌ କିତାମାନାନ୍‌ ମାରି ତିର୍‌ତାନ୍‌ ମାଙ୍ଗିଁ ୱାନି ଲାଡ୍‍ତି ମାରିନ୍‌ତି ରାଜିଦୁ ତାତାମାନାନ୍‌,
COL 1:14 ଆୟା ମାରିନ୍‌ତି ମାଣାନ୍‌ ମାପୁ ମୁକୁଡ଼ାତା ମାନାପ୍‌, ମାରି, ମା ପାପ୍‌ କେମା ଆତାମାନାପ୍‌ ।
COL 1:15 କ୍ରିସ୍ତ ତରାୟ୍‌ଆଇ ମାପୁରୁଦି ତରାଇଆନି ମୁର୍ତିୱାଜା, ୱାନ୍‌ ଆଗ୍‌ଡ଼ି ଜନମ୍‌ଆତି ମାରିନ୍‌, ୱିଜୁ ଗାଡ଼୍‍ଆତିମାନି ବିସୟ୍‌ତିମାଣ୍‌କୁ ପେରିକାନ୍‌ ।
COL 1:16 ଇରିଙ୍ଗ୍‌ ୱାନି ମାଣାନ୍‌ ମାପୁରୁ ମୁସ୍‍କୁପୁର୍‍ତୁ ନି ଦୁନିଆଦୁ ୱିଜୁ ତରାନିକା ମାରି ତରାଇକା ଜିନିସ୍‍, ଆତ୍ମାଦି ସାକ୍ତିୱିଜୁ, ସାଲାକିନିମାଲିକ୍‌, ସାସନ୍‌କିନିକାର୍‍ ମାରି ୱିଜୁ ଅଦିକାରିରିଙ୍ଗ୍‍ ତିଆର୍‍ କିତାନ୍‍ । ୱାନି ମାଣୁକୁ ମାରି ୱାନି ଉଣ୍ତିଙ୍ଗ୍‌ ମାପୁରୁ ସାରାଦୁନିଆଦିଙ୍ଗ୍‌ ତିଆର୍‌ କିତାନ୍‌ ।
COL 1:17 ୱିଜୁ ବିସୟ୍‌ ତିଆର୍‌ ଆନି ଆଗ୍‍ଡ଼ିନେ କ୍ରିସ୍ତ ମାନାନ୍‌ ମାରି ୱାନିୱାଲେ ମିସାନି ମାଣାନ୍‌ ୱିଜୁ ବିସୟ୍‌ ନିଜେ ନିଜେଦି ଗାଡ଼୍‌ଆତିମାନି ବାଡିଦୁ ମାନେ ।
COL 1:18 ମାରି, ୱାନ୍‌ ୱାନି ପାର୍‌ତନା କିନି ମଣ୍ତଲିୱାଜା ମେନ୍ଦଲ୍‌ତି ତାଲା, ଆୟା ମେନ୍ଦଲ୍‍ତି ୱାନ୍‌ ଜିବନ୍‍ ସାକ୍ତି, ସାତିୱାରିମାଣାନ୍‍କୁ ୱାନ୍‌ ପାର୍‍ତୁମ୍‍ ଜନମ୍‍ ଆତିମାନି କଡ଼, ୱିଜୁ ବିସୟ୍‍ତୁ ପାର୍‍ତୁମ୍‍ ବାଡି ପୟ୍‍ନି ଉଣ୍ତିଙ୍ଗ୍‍ ଆଗ୍‌ଡ଼ିଆନାନ୍‌ ।
COL 1:19 ଇରିଙ୍ଗ୍‌ ମାପୁରୁଦି ବଦା ଇସାବ୍‌ତାନ୍‌ ମାରିନ୍‌ ନିଜେ ମାପୁରୁଦି ପୁରାଗୁଣ୍‍ ଆସ୍‍ତାମାନାନ୍‍ ।
COL 1:20 ମାରିନ୍‌ତି ମାଣ୍‌କୁ ମାପୁରୁ ସାରାଦୁନିଆଦିଙ୍ଗ୍‌ ନିଜେଦି ଲାକ୍‌ତୁ ଡ଼େସି ତାତେଙ୍ଗ୍‌ ଇଜି ତିର୍‌ କିତାନ୍‌, କ୍ରୁସକାଟ୍‌ଦୁ ୱାନି ମାରିନ୍‌ତି ସାତିମାଣାନ୍‌ ମାପୁରୁ ସାନ୍ତି ତିଆର୍‌ କିତାମାନାନ୍‌ ମାରି ପୃତିବି ନି ମୁସ୍‌କୁପୁର୍‌ତୁ ମାନି ୱିଜୁ ବିସୟ୍‌ତିଙ୍ଗ୍‌ ନିଜେଦି ଲାକ୍‌ତୁ ଡ଼େସି ତାତାମାନାନ୍‌ ।
COL 1:21 ଉନ୍‌ଡ୍ରେ ବେଡ଼ାଦୁ ତାଗ୍‌ଇ ପାଣି ନି ତାଗ୍‍ଇ ସିନ୍ତା କିଜିମାନିଙ୍ଗ୍‌ ମିର୍‌ ମାପୁରୁଦିମାଣୁକୁ ଆକ ମାର୍‌ଇଦେର୍‌ ମାରି ୱାନି ସାତ୍ରୁ ମାର୍‌ଇଦେର୍‌ ।
COL 1:22 ମାତର୍‌ ଇଲେଇ ୱାନ୍‌ ମିଙ୍ଗିଁ ବା ୱାନି ଆଗ୍‌ଡ଼ି ପବିତ୍ର, ନିନ୍ଦା ମାରି ଦସ୍‍ସିଲିକା କିଜି ତାନି ଉଣ୍ତିଙ୍ଗ୍‌ ୱାନି ମାରିନ୍‌ତି ମେନ୍ଦଲ୍‌ତାନ୍‌ ସାତି ମାଣୁକୁ ମିଙ୍ଗିଁ ନିଜେଦି ୱାଲେ ମାରିଡ଼େସି ମିସାକିତା ମାନାନ୍‌ ।
COL 1:23 ମିର୍‌ ଏସ୍‌କାଙ୍ଗ୍‌ ବିସ୍‌ବାସ୍‌ତାନ୍‌ କୁନାଦି ମାରି ଡାଟ୍‌ତାନ୍‌ ତେବାଜି ମାରି ସୁସମାଚାର୍‌ ୱେନି ୱାଲେ ଆମା ଆସା କିତିମାର୍‌ଇଦେର୍‌, ଆବେଟ୍‌କୁ ତିଲାମାଟ୍‌ । ଆର୍‌ତିଙ୍ଗ୍‌ ଏଣ୍ତେସ୍‌ବା ଇୟାୱିଜୁ ଫଲ୍‌ ପୟ୍‌ନିଦେର୍‌; ଆୟା ସୁସମାଚାର୍‌ ନେ ସାରା ପୃତିବିଦି ୱିଜେରି ଲାକ୍‌ତୁ ପ୍ରଚାର୍‌ ଆତାମାନାତ୍‌, ମାରି ନାନ୍‌ ପାଉଲ ଆବେଣି ଅରେନ୍‍ ବିସ୍‌ବାସ୍‌ତି ସେବାକିନିକିନ୍ଦା ଆତାମାନା ।
COL 1:24 ନାନ୍‌ ମି ଉଣ୍ତିଙ୍ଗ୍‌ ଆମାୱିଜୁ ଦୁଃକ୍‌କାସ୍ଟୁ କିଜିନା, ଆୟାଉଣ୍ତିଙ୍ଗ୍‌ ଇଲେଇ ୱେଡ଼ିକା କିଜିନା, ମାରି କ୍ରିସ୍ତଦି ଆମା ଦୁଃକ୍‌କାସ୍ଟୁ ମାରି ମାନାଦେ, ଆକା ନାନ୍‌ ୱାନି ମେନ୍ଦଲ୍‌ତିୱାଜା ମଣ୍ତଲିଦି ଉଣ୍ତିଙ୍ଗ୍‌ ନା ମେନ୍ଦଲ୍‌ତାନ୍ ପୁରା କିନି ଉଣ୍ତିଙ୍ଗ୍‌ ସାକା କିଜିନା ।
COL 1:25 ମି ନେଗି ଉଣ୍ତିଙ୍ଗ୍‌ ଇୟା ପାଣି କିଦେଙ୍ଗ୍‍ଁ ନାନୁ ମାପୁରୁଦି ମାଣାନ୍‌ ମଣ୍ତଲିଦି ଅରେନ୍‍ ସେବାକିନିକାନ୍‌ ୱାଜା ଆସ୍‌କିତାମାନାନ୍‌ । ୱାନି ସୁସମାଚାର୍‌ ପୁରାଦାନ୍‌ ପ୍ରଚାର୍‌ କିନିକା ନା ପାଣି,
COL 1:26 ଆୟା ସୁସମାଚାର୍‌ ଉନ୍‌ଡ୍ରି ମାର୍‍ଗିତି ମାଟା, ପୁର୍ବେଦିକାଡ଼ାଦୁ ପୁର୍ବେଦିଡକ୍‌ରା ଦାଦାରିମାଣୁକୁ ମାର୍‌ଗିତା ମାର୍‌ର୍ହାତ୍‌, ମାତର୍‌ ଇଲେଇ ୱାନି ସାଦୁରି ଲାକ୍‌ତୁ ୱେଙ୍ଗିଁସିକିତା ମାନାନ୍‌ ।
COL 1:27 ମାପୁରୁ ଅଣଜିହୁଦି ଲୋକା ଲାକ୍‌ତୁ ଆୟା ମାର୍‌ଗିତିମାର୍‌ଇ ମାଟା ୱେର୍‍ତେଙ୍ଗ୍‍ ବଦା କିତାନ୍‌, ୱାନି ଇୟା ନାଣ୍ତଦାରା ମାରି ଗୌରବ୍‌ତି ମାଟା ସାରା ଦୁନିଆଦି ଲୋକା ଉଣ୍ତିଙ୍ଗ୍‌ ନେଗିକା । ଆୟା ସତ୍‌ତି ମାଟା ଆଜିନାତ୍‍, ମି ମାନୁବା କ୍ରିସ୍ତ ମାନାନ୍‌ । ଇୟାତାନି ଅର୍ତ, ମିର୍‌ ମାପୁରୁଦି ଗୌରବ୍‌ତୁ ମିସାତିମାନିଦେର୍‌ ।
COL 1:28 ଆୟାଉଣ୍ତିଙ୍ଗ୍‌ ମାପୁ ୱିଜେରି ଲାକ୍‌ତୁ କ୍ରିସ୍ତଙ୍ଗ୍‌ ପ୍ରଚାର୍‌ କିଜିନାପ୍‌, ମାରି ୱିଜୁ ଲୋକାଙ୍ଗ୍‌ ସେତେନା ମାରି ପୁରା ବୁଦି ୱାଲେ ସିକିୟା ସିଜିନାପ୍‌, ଏଣ୍ତେସ୍‌ ମାପୁ ୱିଜୁ ଲୋକାଙ୍ଗ୍‌ କ୍ରିସ୍ତଦି ୱାଲେ ମିସା କିଜି ଅରେନ୍‍ ପୁରାନେଗି ଲୋକ୍‌ ୱାଜା ମାପୁରୁଦି ଆଗ୍‌ଡ଼ି ତାତେଙ୍ଗ୍‌ ଆଟ୍‍ନାପ୍‍ ।
COL 1:29 ଇୟାତାନିଙ୍ଗ୍‌ ପୁରା କିନି ଉଣ୍ତିଙ୍ଗ୍‌ ନା ମାନୁ ପାଣିସିନିସାକ୍ତି ମାନିଙ୍ଗ୍‌ କ୍ରିସ୍ତସିତିମାନି ପେରି ସାକ୍ତିଦିଙ୍ଗ୍‌ ବ୍ୟବ୍‌ଆର୍‌ କିଜିନାନ୍‌ ସାନିଜିନିୱାଜା ସେସ୍ଟା ନି କାସ୍ଟୁପାଣି କିଜିନା ।
COL 2:1 ମି ଉଣ୍ତିଙ୍ଗ୍‌, ଲାଅଦିକିଆଦି ଲୋକୁ ମାରି ନାଙ୍ଗିଁ ନିଜେଦିଙ୍ଗ୍‌ ଚିନିସ୍‌କିଇ ମାନି ୱିଜୁ ଲୋକା ଉଣ୍ତିଙ୍ଗ୍‌ ନାନ୍‌ ଜେ ଏସା କାସ୍ଟୁପାଣି କିଜିନା, ଇକା ମିର୍‌ ନେସ୍‌ନିଦେର୍‌ ଇଜିନା ଇଚ୍ଛା ।
COL 2:2 ନା ଉଦେସ୍‍ ଇକା, ଏଣ୍ତେସ୍‌ ମିର୍‌ ୱିଜୁଲୋକୁ ୱେଡ଼ିକା ଆନିଦେର୍‌, ମାରି ୱାର୍‌ ନିଜେନିଜେଦି ୱାଲେ ଜିବନ୍‌ନୋନିମାନୁ ମିସାନିଦେର୍‌ ମାରି ସତ୍‌ତି ବୁଦି ପୟ୍‌ଜି ସତ୍‌ତିୱାଜା ୱିଜୁ ଦନ୍‌ତି ପୁରା ଅଦିକାରି ଆନିଦେର୍‌, ଇୟାଉଣ୍ତିଙ୍ଗ୍‌ ମିର୍‌ ୱିଜିଦେର୍‌ ନେସ୍‌ନିଦେର୍‌ ଜେ, କ୍ରିସ୍ତନେ ମାପୁରୁଦି ଆୟା ମାର୍‌ଗିତିମାନି ମାଟା ।
COL 2:3 ଜିସୁ କ୍ରିସ୍ତ ଆଜିନାନ୍‍ ଆୟା କୁସିକାଣ୍ତି, ଆମାକା ମାପୁରୁଦି ବୁଦି ମାରି ବୁଦିୱାଜା ୱିଜୁ ମାର୍‌ଗିତିମାନି ଦନ୍‌ତି ଗୁଦାମ୍‍ ରେନାନ୍‌ ।
COL 2:4 ଏନ୍‌ ଏଣ୍ତେସ୍‌ ମିଙ୍ଗିଁ ସାଲାକିଦାନ୍‍ ବାଣ୍ତିସ୍‍ କିମାକିନ୍‌ । ଆୟାଉଣ୍ତିଙ୍ଗ୍‌ ନାନ୍‌ ଇକା ୱେର୍‌ସିନା ।
COL 2:5 ଇରିଙ୍ଗ୍‌ ନାନ୍‌ ମେନ୍ଦଲ୍‌ତାନ୍‌ ସିଲେତିଙ୍ଗ୍‌ ବା, ଆତ୍ମାଦାନ୍‌ ନାନ୍‌ ମି ୱାଲେ ମାନା । କ୍ରିସ୍ତଦି ମୁସ୍‌କୁ ଡାଟ୍‌ତାନ୍‌ ବିସ୍‌ବାସ୍‌ ଇଡ୍‌ଜି ମିର୍‌ ଏଣ୍ତେସ୍‌ ସାନ୍ତି ଆତିମାନିଦେର୍‌, ଆକା ସୁଡ଼ୁଜି ନାନ୍‌ ୱେଡ଼ିକା ଆଜିନା ।
COL 2:6 ମାରି, କ୍ରିସ୍ତ ଜିସୁଙ୍ଗୁଁ ପ୍ରବୁ ୱାଜା ମାନାତିମାନିଦେର୍‌, ଆୟାଇସାବ୍‌ତାନ୍‌ ୱାନି ୱାଲେ ମିସାଜି ଜିଜି ମାଡ଼ିଦୁ,
COL 2:7 ମି ୱେଲେଙ୍ଗ୍‍ ୱାନି ମୁସ୍‌କୁ ଡାଟ୍‌ତାନ୍‌ ତିଆର୍‌ କିଜ ଜିବନ୍‌ ତିଆର୍‌ କିଦୁ ମାରି ମିର୍‌ ପୟ୍‌ତିମାନି ସିକିୟା ଇସାବ୍‌ତାନ୍‌ ବିସ୍‌ବାସ୍‌ତୁ ନାଣ୍ତ ସାକ୍ତି ଆଦୁ । ମି ଜିବନ୍‌ ଦନ୍ୟବାଦ ସିନିମାନୁ ବର୍ତି ଆପିତ୍‌ ।
COL 2:8 ଜାଗାର୍‌ତା, ଏନ୍‌ ଏଣ୍ତେସ୍‌ ମିଙ୍ଗିଁ ଲୋକ୍‌ତି ବାୟାକିନିନାନି ବେକାର୍‌ତି ବୁଦିଦାନ୍‌ ବେମ୍‌ରି କିଏନ୍‌ । ଆୟାୱିଜୁ ବୁଦି କ୍ରିସ୍ତଦି ସିକିୟାଦାନ୍‌ ରେଏତ୍‌ ମାନାତ୍‌ । ଆକା ଲୋକା କୁଟୁମ୍‌ତାନ୍‌ ରିତିନିୟମ୍‌ତି ସିକିୟା ମାରି ସାରାଦୁନିଆ ମୁସ୍‌କୁ ସାସନ୍‌ କିଜିମାନି ଦୁବେଙ୍ଗ୍‌ଆଙ୍ଗାଁ ସାକ୍ତି ସିକିୟାଦି ପଲ୍‌ ।
COL 2:9 କେବଲ୍‌ ଲୋକାୱାଜା କ୍ରିସ୍ତଦିମାନୁ ନେଗି ଗୁଣ୍‍ ପୁରାବର୍ତି ତେବାତାମାନାତ୍‌ ।
COL 2:10 ୱାନି ୱାଲେ ମିସାତିମାନିଙ୍ଗ୍‌ ମିର୍‌ ଜିବନ୍‌ତୁ ପୁରାବର୍ତି ପୟ୍‌ତିମାନିଦେର୍‌ । ଆଇ ୱିଜୁ ସାକ୍ତି ମାରି ଅଦିକାର୍‌ ମୁସ୍‌କୁ କ୍ରିସ୍ତଦି ସାସନ୍‌ ନେ ପେରିକା ।
COL 2:11 କ୍ରିସ୍ତଦି ୱାଲେ ମିସାଜିମାନି ଜିବନ୍‌ ନେ ମି ସୁନ୍ନତ ୱାଜା । ଇୟା ସୁନ୍ନତ ଲୋକ୍‌କିତିକା ଆଏତ୍‍, ଆକା କ୍ରିସ୍ତଦିମାଣୁକୁ ଆତାମାନାତ୍‌ । ଆକା ଲୋକ୍‌ତିଙ୍ଗ୍‌ ପାପ୍‌ବର୍ତିମାନି ମେନ୍ଦଲ୍‌ତି ୱିଜୁ ସାକ୍ତିଦାନ୍‌ ଡ଼ିସିସ୍‍ କିନାତ୍‌ ।
COL 2:12 ଇରିଙ୍ଗ୍‌ ଡୁବନ୍‌ ଅତି ମାଣ୍‌କୁ ମିର୍‌ କ୍ରିସ୍ତଦି ୱାଲେ ମୁସାତିମାର୍‌ଇଦେର୍‌ ମାରି ଆମା ମାପୁରୁ ୱାନିଙ୍ଗ୍‌ ସାତିୱାରି ମାଣୁକୁ ନିକ୍‌ତାନ୍‌, ୱାନି ପାଣିକିତିମାନି ସାକ୍ତିଦାନ୍‌ ବିସ୍‌ବାସ୍‌ କିଜି କ୍ରିସ୍ତଦି ୱାଲେ ମିର୍‌ ବା ମାରିଡ଼େସିନିଙ୍ଗିଁତି ମାନିଦେର୍‌ ।
COL 2:13 ମି ପାପ୍‌ ଉଣ୍ତିଙ୍ଗ୍‌ ମାରି ମିର୍‌ ନିୟମ୍‌ତାନ୍‌ ୱେର୍‌ଏ ଆଜି ଅଣଜିହୁଦି ମାନିଙ୍ଗ୍‌ ଉନ୍‌ଡ୍ରି ଦେବା ମିର୍‌ ଜିବନ୍‌ତାନ୍‌ ସାତି ମାର୍‌ଇଦେର୍‌; ମାତର୍‌ ମାପୁରୁ ଇଲେଇ କ୍ରିସ୍ତଦି ୱାଲେ ମିଙ୍ଗିଁ ବା ଜିବନ୍‌ କିତାମାନାନ୍‌; ମାପୁରୁ ମା ୱିଜୁ ପାପ୍‌ କେମା କିତାମାନାନ୍‌ ।
COL 2:14 ୱାନ୍‌ ମା ବିରୁଦ୍‌ତାନ୍‌ ମାନି ନିୟମ୍‌ତି ଆକୁ ମାରି ଇୟାତାନି ନିତିନିୟମ୍‌ତିଙ୍ଗ୍‌ କ୍ରୁସକାଟ୍‌ତୁ ଡ଼ସି ମା ମାଣାନ୍‌କୁ ଆକ କିତାମାନାନ୍‌ ।
COL 2:15 ମାରି ଆୟା କ୍ରୁସକାଟ୍‌ ମୁସ୍‌କୁ କ୍ରିସ୍ତ ୱିଜୁ ରକମ୍‌ତି ସାକ୍ତି ମାରି ଅଦିକାର୍‍ତାନ୍‍ ନିଜେଦିଙ୍ଗ୍‌ ମୁକୁଡ଼ାତା ମାନାନ୍‌ ମାରି ୱାରିଙ୍ଗ୍ ଜଇଲ୍‌ତୁ ନିରିସି ନିଜେଦି ଜିଣାନି ସନି ସାରିଦୁ ଲୋକା ଆଗ୍‌ଡ଼ି ୱାରିଙ୍ଗ୍ ସେମାର୍‌ କିତାମାନାନ୍‌ ।
COL 2:16 ଏନ୍‌ ମି ଉଣିକା, ତିନିକା, ପବିତ୍ରଦିନ୍‍ ମାରି କଡ଼୍‍କିଲେଜୁ ପଣ୍ତୟ୍‍, ମାରି ରମ୍‌ନିଦିନ୍‌ ବିସୟ୍‌ତାନ୍‌ ଇନି ନିୟମ୍‌ ବିଚାର୍‌ କିମାକିର୍‌ ।
COL 2:17 ଆୟାୱିଜୁ କେବଲ ୱାଜିନିଦିନ୍‌ତୁ ଗଟାଦେଙ୍ଗ୍‌ ସୋଲ୍‌ସିମାନି ବିସୟ୍‌ତି ନିଡ଼ିଗା ୱାଜା; କ୍ରିସ୍ତନେ ୱିଜୁ ବିସୟ୍‌ତୁ ସତ୍‌ତିକାନ୍‌ ।
COL 2:18 ଆମାକାର୍‌ ବିସେସ୍‌ ସୁଣିକା ସାଲାକିଦି ସାନ୍ତି ମାରି ମୁସ୍‌କୁପୁର୍‌ତି ଦୁତ୍‌ ପୁଜା ମୁସ୍‌କୁ ଦିୟାନ୍‌ ସିଜି ନିଜେଦିଙ୍ଗ୍‌ ପେରିକାର୍‌ ଇନାର୍‌, ୱାରିଙ୍ଗ୍ ସୁଡ଼ୁଜି ମିର୍‌ ନିଜେଦିଙ୍ଗ୍‌ ଇସ୍ରିକାନ୍‌ ଇଜି ଅଡ଼୍‌ବିମାଟ୍‌ । ଇୟାୱାଜା ଲୋକୁ ନିଜେଦିଙ୍ଗ୍‌ ଲୋକା ବିସୟ୍‌ ସିନ୍ତାଦାନ୍‌ ବେକାର୍‌ତି ଗର୍ବଦାନ୍‌ କେଇନିକା ଆଜି ତେବାନାର୍‌ ।
COL 2:19 ମେନ୍ଦଲ୍‌ତି ତାଲାଦି ୱାଜା କ୍ରିସ୍ତଦିମାଣୁକୁ ୱାର୍‌ ୱେର୍‌ଏ ଆତାମାନାର୍‌ । ତାନି ସାଲାକିନି ମେନ୍ଦଲ୍‍ୱିଜୁ ଗାଟିଙ୍ଗ୍‌ ମାରି ସିରେଙ୍ଗ୍‌ ମିରେଙ୍ଗ୍‌ ଦାନ୍‌ ନିଜେନିଜେଦି ୱାଲେ ମିସାଜି ମଟାଆନେ ମାରି ମେନ୍ଧଲ୍‍ ମାପୁରୁଦି ମାଟା ଇସାବ୍‌ତାନ୍‌ ପିରିଏନ୍‌ ।
COL 2:20 ମିର୍‌ ଜଦି କ୍ରିସ୍ତଦି ୱାଲେ ସାତି ମାନିଦେର୍‌ ମାରି ଇୟା ଦୁନିଆଦି ସିକିୟାଦାନ୍‌ ମୁସ୍‌କୁ ସାସନ୍‌ କିଜିମାନି ସାକ୍ତିଆଙ୍ଗାଁ ମାଣ୍‌କୁ ମୁକୁଡ଼ାତିମାନିଦେର୍‌ । ଆର୍‌ତିଙ୍ଗ୍‌ ଏନ୍ଦା ମିର୍‌ ଦୁନିଆଦି ଲୋକା ୱାଜା ଜିବନ୍‌ କାଟେକିଜିନିଦେର୍‌ ? ଏନ୍ଦା ମିର୍‌ ଇୟାୱାଜା ରୀତିନିୟମ୍‌ ମାନାଜିନିଦେର୍‌,
COL 2:21 “ଇକା ଆସ୍‌ମାଟ୍‌, ଆକା ଉଣୁମାଟ୍‌, ଆକା ମୁଟ୍‌ମାଟ୍‌ ?”
COL 2:22 ଇୟାୱିଜୁ ବିସୟ୍‌ ୱିଜ୍‌ନିକା । ଇକା ବ୍ୟବ୍‌ହାର୍‌ ଆନି ଦାପେ ଦାପେ ଦାରାସିଲିକା ଆନାତ୍‌ । ଇୟାୱିଜୁ କେବଲ ଲୋକ୍‌ ତିଆର୍‌କିତି ନିୟମ୍‌ ମାରି ସିକିୟା ।
COL 2:23 ମାରିବା ମୁସ୍‌କୁପୁର୍‌ତି ଦୁତ୍‌ ପୁଜା, ସାଲାକିଦି ଦାର୍ମୁ ମାରି ଆତ୍ମାକାସ୍ଟୁ କିନି ଉଣ୍ତିଙ୍ଗ୍‌ ୱେର୍‌ସିମାନି ଇୟାୱିଜୁ ନିୟମ୍‌କୁ ନାଣ୍ତ ବୁଦିଦାନ୍‌ ନେସ୍‌ତାମାନା ଇଜି ଏତ୍‌ ୱାନାତ୍‌; ମାତର୍‌ ମେନ୍ଦଲ୍‌ତି ପାଣିଦିଙ୍ଗ୍‌ ନାସ୍ଟୁ କିନି ଉଣ୍ତିଙ୍ଗ୍‌ ଇୟାୱାନିକା ସାକ୍ତି ସିଲେତ୍‌ ।
COL 3:1 ମିର୍‌ ଏସ୍‌କାଙ୍ଗ୍‌ କ୍ରିସ୍ତଦି ୱାଲେ ସାତିମାଣୁକୁ ନିଙ୍ଗିଁତି ମାନିଦେର୍‌, ଆଦେଙ୍ଗ୍‌ ମୁସ୍‌କୁପୁର୍‌ତି ବିସୟ୍‌ତି ଉଣ୍ତିଙ୍ଗ୍‌ ମନ୍ ସିଦୁ, ଇରିଙ୍ଗ୍‌ କ୍ରିସ୍ତ ମୁସ୍‌କୁପୁର୍‌ତୁ ମାପୁରୁଦି ଉଣି ତରିନ୍‌ ବାସ୍‌ତାମାନାନ୍‌ ।
COL 3:2 ଦୁନିଆଦି ବିସୟ୍‌ତି ଉଣ୍ତିଙ୍ଗ୍‌ ମନ୍ ସିଏଣ୍‌ଗା ମୁସ୍‌କୁପୁର୍‌ତି ବିସୟ୍‌ ଉଣ୍ତିଙ୍ଗ୍‌ ମନ୍ ସିଦୁ ।
COL 3:3 ଇରିଙ୍ଗ୍‌ ମିର୍‌ ସାତି ମାନିଦେର୍‌, ମାରି ମି ଜିବନ୍‌ ମାପୁରୁଦିମାନୁ କ୍ରିସ୍ତଦି ୱାଲେ ନେଗେନ୍‌ତାନ୍‌ ମାନାତ୍‌ ।
COL 3:4 ମା ଜିବନ୍‌ ୱାଜା ଜେ କ୍ରିସ୍ତନେ, ମାରି ଏସ୍ତିୱାଲେ ୱାନ୍‌ ତରାୟାଆନାନ୍‌, ନାସ୍ତିୱାଲେ ମିର୍‌ ବା ୱାନି ୱାଲେ ଗୌରବ୍‌ତାନ୍‌ ତରାୟାଆନିଦେର୍‌ ।
COL 3:5 ମି ଜିବନ୍‌ତୁ ପାଣିକିନିକା ଦୁନିଆଦି ପାଣିଙ୍ଗ୍‌ ଅର୍ତାତ୍‌ ଦାରିପାଣି, ତାଗ୍‍ଇସିନ୍ତା, ମନ୍‍ତୁ ଲାଲାୟ୍‌ଆନିକା, ଲାଲାୟ୍‌ଆନିକା ମାରି ଲବ୍‌ତିଙ୍ଗ୍‌ ମିର୍‌ ସାପିସ୍‌ କିଦୁ । ଲବ୍‌ ବମା ପୁଜାଦି ଉନ୍‌ଡ୍ରି ରୁପ୍‌ ।
COL 3:6 ଇୟାୱିଜୁ ବିସୟ୍‌ଦୁ ମାନ୍‌ଜି ଆମାକାର୍‌ ମାପୁରୁଙ୍ଗ୍‌ ମାନାଏର୍‌, ୱାରି ମୁସ୍‌କୁ ମାପୁରୁ ରିସା ଆନାନ୍‌ ।
COL 3:7 ଅର୍‍ଲେନ୍‍ ମିର୍‌ ବା ଇୟାୱିଜୁ ବିସୟ୍‌ତୁ ମାନାଜି ଆୟାୱାଜା ଜିଜି ମାଡ଼ିଜି ମାର୍‌ଇଦେର୍‌ ।
COL 3:8 ମାତର୍‌ ଇଲେଇ ମିର୍‌ ବା ଇୟାୱିଜୁ ବିସୟ୍‌କୁ ଇନ୍‌ଡ୍ରେଙ୍ଗ୍‌ ସରିଙ୍ଗ୍‍ : ରିସା, ଆକାର୍‍, କାଡ଼୍‌ନିକା ଡ଼ିସ୍‌ତେଙ୍ଗ୍‌ ପଡ଼ାନାତ୍‌ । ମି ୱେୟୁଦାନ୍‌ ତାଗ୍‌ଇ ମାଟେଙ୍ଗ୍‌ ମାରି ତାଗ୍‌ଇ ବାସା ମୁଡ଼ୁକେ ଇନ୍‌ମାଟ୍‌ ।
COL 3:9 ନିଜେନିଜେଦିଙ୍ଗ୍‌ ମିଚ୍‌ ଇନ୍‌ମାଟ୍‌, ଇରିଙ୍ଗ୍‌ ମିର୍‌ ପାଡ଼ିଇ ଗୁଣୁ ମାରି ତାନି ବ୍ୟବ୍‌ହାର୍‌ ଡ଼ିସ୍‌ତିମାନିଦେର୍‌,
COL 3:10 ମାରି ପୁନି ଗୁଣ୍‍ ଆସ୍‌ତିମାନିଦେର୍‌ । ଲୋକ୍‌ତି ଇୟା ପୁନିପାଣି, ତିଆର୍‌କିତି ମାପୁରୁ ନିଜେଦି ମୁର୍ତି ଇସାବ୍‌ତାନ୍‌ ପାଣି କିଜିନାନ୍‌ । ଇୟାଉଣ୍ତିଙ୍ଗ୍‌ ମିର୍‌ ୱାନି ବିସୟ୍‌ତାନ୍‌ ପୁରା ବୁଦି ପୟ୍‌ଜିନିଦେର୍‌ ।
COL 3:11 ଇୟାୱାଜା ଜିହୁଦି, ଅଣଜିହୁଦି, ସୁନ୍ନତ ମାରି ଅସୁନ୍ନତ, ନିଜେଦି ଦେସ୍‌, ଆଇଦେସ୍‌, ଗତିମୁରୁଲି ମାରି ଆରେଏମାନି ଲୋକ୍‌ତି ଲୋଇ ଆମାଇନି ଅଲଗା ସିଲେତ୍‌ । ମାତର୍‌ କ୍ରିସ୍ତ ୱିଜେରିମାନୁ ମାନାନ୍‌ ମାରି ୱାନ୍‌ ଆଜିନାନ୍‍ ୱିଜୁୱିଜୁନେ ।
COL 3:12 ମାରି, ମିର୍‌ ମାପୁରୁଦି ଲୋକୁ । ୱାନ୍‌ ମିଙ୍ଗିଁ ଜିବନ୍‌ନୋଜି ନିଜେଦି ଉଣ୍ତିଙ୍ଗ୍‌ ଆସ୍‌କିତାମାନାନ୍‌ । ଆଦେଙ୍ଗ୍‌ ମିର୍‌ ସିତ୍‍ଡ଼ି ଜିବନ୍‌, ଦୟା, ସାନ୍ତି, କରୁଣା ମାରି ସାହାସ୍‌ତିନାନି ଆଙ୍ଗିଁ ଆରାଦୁ ।
COL 3:13 ନିଜେନିଜେଦି ଉଣ୍ତିଙ୍ଗ୍‌ ମିସାବିଡ଼ା ଆଦୁ, ମାରି ଜଦି ଆଇ ଏମେୱାନି ବିରୁଦ୍‌ତାନ୍‌ ଇନି ମାଟା ମାର୍‌ଇଙ୍ଗାଁ, ଆର୍‌ତିଙ୍ଗ୍‌ ନିଜେନିଜେଦିଙ୍ଗ୍‌ କେମା କିଦୁ । ପ୍ରବୁ ଏଣ୍ତେସ୍‌ ମିଙ୍ଗିଁ କେମା କିତାମାନାନ୍‌, ମିର୍‌ ବା ଆୟାୱାଜା ନିଜେନିଜେଦିଙ୍ଗ୍‌ କେମା କିଦୁ ।
COL 3:14 ମାରି ଇୟାୱିଜୁ ଗୁଣୁ ୱାଲେ ଜିବନ୍‌ନୋନିକା ମିସାକିଦୁ । ଜିବନ୍‌ନୋନିକା ୱିଜୁ ବିସୟ୍‌ତିଙ୍ଗ୍‌ ମିସାକିଜି ଉନ୍‌ଡ୍ରେମାନୁ କିନାତ୍‌ ।
COL 3:15 କ୍ରିସ୍ତସିତିମାନି ସାନ୍ତି ମି ଜିବନ୍‌ତିଙ୍ଗ୍‌ ସାଲାକିପିତ୍‌; ଇରିଙ୍ଗ୍‌ ଇୟା ସାନ୍ତି ଉଣ୍ତିଙ୍ଗ୍‌ ମାପୁରୁ ମିଙ୍ଗିଁ ଅରେସ୍‌ୱାଜା ଉନ୍‌ଡ୍ରେ ମେନ୍ଧଲ୍‍ ଆନି ଉଣ୍ତିଙ୍ଗ୍‌ କୁକ୍‌ତାମାନାନ୍‌ । ୱିଜୁଦିନ୍‌ ଦନ୍ୟବାଦ୍‌ ସିଦୁ ।
COL 3:16 କ୍ରିସ୍ତଦି ବାକ୍ୟ ନାଣ୍ତଦାନ୍‌ନାଣ୍ତ ମି ଜିବନ୍‌ତୁ ବାସା କିପିତ୍‌; ମିର୍‌ ନିଜେନିଜେଦିଙ୍ଗ୍‌ ପୁରା ବୁଦିଦି ୱାଲେ ସିକିୟା ମାରି ସତେନେ ସିଦୁ । ମାରି ଆତ୍ମିକ ମାପୁରୁଦି ଉଦେସ୍‌ତାନ୍‌ ପାଟା ପାର୍‍ଦୁ, ଆରାଦନା କିଦୁ, ମାରି ଦନ୍ୟବାଦ୍‍ଦାନ୍‌ ୱେଡ଼ିକାଦି ଜିବନ୍‌ତାନ୍‌ ପାଟା ପାର୍‌ଦୁ ।
COL 3:17 ମାରି, ବାକ୍ୟ ସିଲିତିଙ୍ଗ୍‌ ପାଣିଦାନ୍‌ ମିର୍‌ ଆମାକା ଇନିକା କିଦୁ, ଆୟାୱିଜୁ ପ୍ରବୁ ଜିସୁଦି ଦର୍‌ତାନ୍‌ କିଜି ୱାନିମାଣୁକୁ ବୁବା ମାପୁରୁଙ୍ଗୁଁ ଦନ୍ୟବାଦ୍‌ ସିଦୁ ।
COL 3:18 ଏ ଆଇମେକ୍‍, ମି କନ୍‌ଲିରି ଆଡ୍‍ଗି ତେବାଦୁ, ଇରିଙ୍ଗ୍‌ ପ୍ରବୁ ଜିସୁ କ୍ରିସ୍ତଦି ୱେନ୍‌କାସନି ୱାଜା ଇକା ମି ପାଣି ।
COL 3:19 ଏ କନ୍‌ଲିରି, ନିଜେ ନିଜେଦି ଆଇମେକାଙ୍ଗ୍‍ଁ ଜିବନ୍‍ନୋଦୁ, ୱାନିକା ଉଣ୍ତିଙ୍ଗ୍‌ ତାଗ୍‌ଇ ବ୍ୟବ୍‌ହାର୍‌ କିମାଟ୍‌ ।
COL 3:20 ଏ କଡ଼ର୍‌ ଆଇଲିକ୍‌, ୱିଜୁଦିନ୍‌ ମି ବୁବା ୟାୟାରି ମାଟା ଆସ୍‌ତୁ, ଇକା ମି କ୍ରିସ୍ଟାନ୍‌ତି ପାଣି, ଇରିଙ୍ଗ୍‌ ଇବେନୁ ମାପୁରୁ ୱେଡ଼ିକା ଆନାନ୍‌ ।
COL 3:21 ଏ ବୁବାୟାୟାର୍‌, ନିଜେ ନିଜେଦି କଡ଼ରିଙ୍ଗ୍‌ ରିସା କିମାଟ୍‌, ଏଣ୍ତେସ୍‌ ୱାର୍‌ ୱେଡ଼ିକା ଆଏର୍‌ ।
COL 3:22 ଏ ଗତିମୁରୁଲିର୍‍, ୱିଜୁ ବିସୟ୍‌ତୁ ମି ମାଲିକ୍‌କା ମାଟା ଆସ୍‌ତୁ । ୱାର୍‌ ମି ଉଣ୍ତିଙ୍ଗ୍‌ ସୁଡ଼ୁଜି ମାନିୱାଲେ ୱାରିଙ୍ଗ୍ ୱେଡ଼ିକା କିନି ଉଣ୍ତିଙ୍ଗ୍‌ ସିଲେ, ମାତର୍‌ ପ୍ରବୁଦି ଉଣ୍ତିଙ୍ଗ୍‌ ମି ତିଲାଏତାନ୍‍ ତିର୍‌ ଜିବନ୍‌ତାନ୍‌ ଇକା କିଦୁ ।
COL 3:23 ମିର୍‌ ଆମାକା ଇନିକା କିନିଦେର୍‌, ପ୍ରବୁଦି ଉଣ୍ତିଙ୍ଗ୍‌ କିତି ୱାଜା ଜିବନ୍‌ତି ୱାଲେ ଆକା କିଦୁ, ଲୋକା ଉଣ୍ତିଙ୍ଗ୍‌ କିତି ୱାଜା କିମାଟ୍‌ ।
COL 3:24 ମନେଇଡ଼୍‌ଦୁ, ମାପୁରୁ ତାମି ଲୋକା ଉଣ୍ତିଙ୍ଗ୍‌ ଆମାକା ଇଟ୍‌ତାମାନାନ୍‌, ଆକା ୱାନ୍‌ ମିଙ୍ଗିଁ ପୁରସ୍କାର୍‌ ୱାଜା ସିନାନ୍‌ । ମିର୍‌ ପ୍ରବୁ କ୍ରିସ୍ତଦିଙ୍ଗ୍‌ନେ ସେବା କିଜିନିଦେର୍‌ ।
COL 3:25 ମାରି ଏନ୍‌ ଅନ୍ୟାୟ୍‌ କିନାନ୍‌, ୱାନ୍‌ ନିଜେଦି ଅନ୍ୟାୟ୍‌ଦି ବାଦ୍‌ଲୁ ଦଣ୍ତ୍‍ ପୟ୍‌ନାନ୍‌; ଇରିଙ୍ଗ୍‌ ମାପୁରୁ ସାମାନ୍‍ତାନ୍‌ ୱିଜେରି ବିଚାର୍‌ କିନାନ୍‌ ।
COL 4:1 ଏ ମାଲିକ୍‌କୁ, ମୁସ୍‌କୁପୁର୍‌ତୁ ମି ଉଣ୍ତିଙ୍ଗ୍‌ ବା ପ୍ରବୁ ମାନାନ୍‌ ଇଜି ନେସ୍‌ସି ନିଜେ ନିଜେଦି ଗତିମୁରୁଲିଙ୍ଗାଁ ଉଣ୍ତିଙ୍ଗ୍‌ ନ୍ୟାୟ୍‌ ମାରି ସାମାନ୍‌ତାନ୍‍ ସୁଡ଼୍‍ଦୁ ।
COL 4:2 ୱିଜୁୱାଲେ ପାର୍‌ତାନାଦାନ୍‌ ଜିଜି ମାଡ଼ିଦୁ ମାରି ମାପୁରୁଦି ଦନ୍ୟବାଦ୍‌ କିଜି ପାର୍‌ତାନାଦୁ ଜାଗାର୍‌ତା ତେବାଦୁ ।
COL 4:3 କ୍ରିସ୍ତଦି ମାର୍‍ଗିତି ମାଟା ପ୍ରଚାର୍‌ କିନି ଉଦେସ୍‌ତାନ୍‌ ମାପୁରୁ ଏଣ୍ତେସ୍‌ ମାଙ୍ଗିଁ ସାରି ସିନାନ୍‌, ଆୟାଉଣ୍ତିଙ୍ଗ୍‌ ବା ପାର୍‌ତାନା କିଦୁ । ଆମା ବାକ୍ୟ ପ୍ରଚାର୍‌ କିତି ଉଣ୍ତିଙ୍ଗ୍‌ ନାନ୍‌ ଇଲେଇ ଜଇଲ୍‌ତୁ ମାନା ।
COL 4:4 ପାର୍‌ତାନା କିଦୁ, ଏଣ୍ତେସ୍‌ ନାନ୍‌ ଟିକ୍‌ତାନ୍‌ ମାରି ନେଗେନ୍‌ତାନ୍‌ ଆକା ପ୍ରଚାର୍‌ କିଦେଙ୍ଗ୍‌ ଆଟ୍‍ନା ।
COL 4:5 ସୁଜୋଗ୍‌ତି ସତ୍‌ ବ୍ୟବ୍‌ହାର୍‌ କିଜି ଅବିସ୍‌ବାସ୍‌ରି ଲୋକା ଲାକ୍‌ତୁ ବୁଦିଦାନ୍‌ ନେଗେନ୍‍ତାନ୍‌ ସାଲାବୁଲାଦୁ ।
COL 4:6 ମି ମାଟା ୱିଜୁଦିନ୍‌ ଦୟା ୱାଜା ସାୱି ମାରି ମୋନ୍‌ତିଙ୍ଗ୍‌ ୱେଡ଼ିକାକିନିକେଙ୍ଗ୍‌ ଆପିତ୍‌ । ୱିଜେରିଙ୍ଗ୍‌ ଏଣ୍ତେସ୍‌ ଟିକ୍‌ ଉତର୍‌ ସିଦେଙ୍ଗ୍‌ ଆଟ୍‌ନିଦେର୍‌, ଇୟା ମାଟା ମିର୍‌ ନେସ୍‌ନିକା ଦର୍‌କାର୍‌ ମାନାତ୍‌ ।
COL 4:7 ଲାଡ୍‍ତି ତଡ଼ାନ୍‌, ପ୍ରବୁଦି ପାଣିଦୁ ବିସ୍‌ବାସ୍‌ତି ସେବାକିନିକାନ୍‌ ମାରି ନା ୱାଲେ ଅର୍‌ସେ ସେବାକିନିକାନ୍‌ ଜେ ତୁକିକ, ୱାନ୍‌ ନା ୱିଜୁ ବିସୟ୍‌ ମିଙ୍ଗିଁ ୱେର୍‍ନାନ୍‌;
COL 4:8 ମାପୁ ଏଣ୍ତେସ୍‌ ମାନାପ୍‌, ୱିଜୁ ବିସୟ୍‌ ୱେର୍‍ସି ମିଙ୍ଗିଁ ୱେଡ଼ିକା ସିନି ଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ତାଜିନା ।
COL 4:9 ୱାନି ୱାଲେ ନାନ୍‌ ବିସ୍‌ବାସ୍‌ତି ମାରି ଲାଡ୍‍ତି ତଡ଼ାନ୍‌ ଅନିସିମସ୍‌ଦିଙ୍ଗ୍‌ ପୋକ୍‌ତାତା, ୱାନ୍‌ ମି ଲୋଇରାନ୍‌ ଅରେନ୍‍ । ୱାର୍‌ ମିଙ୍ଗିଁ ଇୟା ବାଡିଦୁ ଗଟାଜିମାନି ୱିଜୁ ମାଟା ୱେର୍‍ନାନ୍‌ ।
COL 4:10 ନା ୱାଲେ ଅର୍‌ସେ ଜଇଲ୍‌ତୁ ମାର୍‌ଇ ଆରିସ୍ଟାର୍କସ୍‍ ମାରି ୱାନି ୱାଲେ ବର୍ଣ୍ଣବାଦି କୁଟୁମ୍‌ତି ତଡ଼ାନ୍‌ ମାର୍କ ବା ମିଙ୍ଗିଁ ନମସ୍କାର୍‌ ଜାଣେକିଜିନାନ୍‌ । ମାର୍କ ମି ଲାକ୍‌ତୁ ୱାତିଙ୍ଗ୍‍ ୱାନିଙ୍ଗ୍‌ ନେଗେନ୍‌ କୁକ୍‌ତୁ, ଇୟା ଆଦେସ୍‌ ମିଙ୍ଗିଁ ଆଗ୍‍ଡ଼ିରାନ୍‍ନେ ୱେର୍‌ତାମାନାର୍‌ ।
COL 4:11 ମାରି, ଯୁସ୍ତ ଦର୍‌ଦାନ୍‌ ଜାଣାସିନା ଯିହୋଶୁୟ ବା ମିଙ୍ଗିଁ ନମସ୍କାର୍‌ ଜାଣେକିଜିନାନ୍‌; କ୍ରିସ୍ଟାନ୍‌ ଦର୍ମ ମାନାତିମାନିକାର୍‌ କେବଲ ଇୟା ମୁଏର୍‌ ଜିହୁଦି ମାପୁରୁଦି ରାଜି ଉଣ୍ତିଙ୍ଗ୍‌ ନା ୱାଲେଅର୍‌ସେ ପାଣିକିନିକାନ୍‌ ଆଜି ନାଙ୍ଗିଁ ନାଣ୍ତ ସାହାଜ୍ୟ କିତାମାନାର୍‍ ।
COL 4:12 ମି ଦଲ୍‌ତି ମାରି ଅରେନ୍‍ ଲୋକ୍‌ ମାରି କ୍ରିସ୍ତ ଜିସୁଦି ସେବାକିନି ଏପାଫ୍ରା ବା ନମସ୍କାର୍‌ ଜାଣେକିଜିନାନ୍‌ । ଏଣ୍ତେସ୍‌ ମିର୍‌ ଟିକ୍‌ ମାରି ମାପୁରୁଦି ୱିଜୁ ବଦା ବିସୟ୍‌ତାନ୍‌ ପୁରା ମାନାଜି ଡାଟ୍‌ କ୍ରିସ୍ତ ବିସ୍‍ବାସି ୱାଜା ଦୁଙ୍ଗୁଁଏଣ୍‌ଗା ନିନ୍‌ଡ୍ରେଙ୍ଗ୍‌ ଆଟ୍‌ନିଦେର୍‌, ଆୟାଉଣ୍ତିଙ୍ଗ୍‌ ୱାନ୍‌ ୱିଜୁଦିନ୍‌ ମାପୁରୁଦି ଲାକ୍‌ତୁ ସାନିଜିନିୱାଜା ସାକ୍ତିଦି ପାର୍‌ତାନା କିଜିନାନ୍‌ ।
COL 4:13 ଇରିଙ୍ଗ୍‌ ୱାନ୍‌ ମି ଉଣ୍ତିଙ୍ଗ୍‌ ମାରି ଲାଅଦିକିଆ ମାରି ହିଏରାପଲିଦି ଲୋକା ଉଣ୍ତିଙ୍ଗ୍‌, ୱାନ୍‌ କିତିମାନି କାସ୍ଟୁପାଣି ବିସୟ୍‌ତାନ୍‌ ନାନ୍‌ ନିଜେ ଇୟା ସାକ୍ୟ ୱେର୍‌ସିନା ।
COL 4:14 ଲାଡ୍‍ତି ଡାକ୍ତର୍‌ ଲୁକ ମାରି ଦିମା ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ ।
COL 4:15 ଲାଅଦିକିଆଦୁ ମାନି ତଡ଼ାନ୍‌କୁ ନି ତାଙ୍ଗିଁକି, ତାଙ୍ଗିଁ ନୁମ୍‌ଫା ମାରି ତାମି ଇନ୍‌ଡ୍ର ଉନ୍‌ଡ୍ରେମାନୁ ଆଜିମାନି ମଣ୍ତଲିଦି ୱିଜେରିଙ୍ଗ୍‌ ମା ନମସ୍କାର୍‌ ଜାଣେକିଦୁ ।
COL 4:16 ମାରି, ମିର୍‌ ଏଣ୍ତେସ୍‌ ଇୟା ଆକୁ ପଡ଼ାତି ୱିସ୍‌ତିଙ୍ଗ୍‌ ଲାଅଦିକିଆ ମଣ୍ତଲିଦୁ ବା ଏଣ୍ତେସ୍‌ ଇକା ପଡ଼ାଦେଙ୍ଗ୍‌ ଆଟ୍‍ନାର୍‍, ମାରି ଲାଅଦିକିଆଦି ମଣ୍ତଲିଦି ତଡ଼ାନ୍‌କୁ ନି ତାଙ୍ଗିଁକି ମି ଲାକ୍‌ତୁ ଆମା ଆକୁ ପୋକ୍‌ତାନାର୍‌, ଆକା ମିର୍‌ ବା ଏଣ୍ତେସ୍‌ ପଡ଼ାଦେଙ୍ଗ୍‌ ଆଟ୍‌ନିଦେର୍‌, ଇୟାଉଣ୍ତିଙ୍ଗ୍‌ ଜାତୁନ୍‍ ଆଦୁ ।
COL 4:17 ମାରି ଆର୍କିପତିଙ୍ଗ୍‌ ୱେର୍‌ନି, “ପ୍ରବୁଦି ସେବା କିନି ଉଣ୍ତିଙ୍ଗ୍‌ ମିଙ୍ଗିଁ ଆମା ଦାଇତ୍‌ ସିଆୟ୍‌ଆତାମାରାତ୍‌, ଆକା ଏଣ୍ତେସ୍‌ ୱାଜାବା ୱିସ୍‌ତୁ ।”
COL 4:18 ନାନ୍‌ ପାଉଲ ନା ନିଜେଦି କିୟୁଦାନ୍‌ ଇୟା ନମସ୍କାର୍‌ ରାସ୍‌ସିନା । ନା ଜଇଲ୍‍ତି ଅବସ୍ତାଦିଙ୍ଗ୍‌ ବାଣାମାଟ୍‌ । ମାପୁରୁଦି ଦୟା ମି ୱିଜେରି ଲାକ୍‌ତୁ ମାନିତ୍‌ ।
1TH 1:1 ପାଉଲ, ସିଲା ମାରି ତିମତିଦି ଲାକ୍‌ତୁ ତେସଲନିକିଆଦୁ ମାନି ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ବିସ୍‌ବାସ୍‌ତି ମଣ୍ତଲିଦୁ ଇୟା ଆକୁ । ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ଦୟା ମାରି ସାନ୍ତି ମି ଉଣ୍ତିଙ୍ଗ୍‌ ଆପିତ୍‌ ।
1TH 1:2 ମାପ୍‌ ୱିଜୁଦିନ୍‌ ମି ୱିଜୁଲୋକାଙ୍ଗ୍‌ ଉଣ୍ତିଙ୍ଗ୍‌ ମାପୁରୁଙ୍ଗ୍‌ ଦନ୍ୟବାଦ୍‌ ସିଜିମାନାପ୍‌ ମାରି ମା ପାର୍‍ତନାଦୁ ମି ବିସୟ୍‌ତାନ୍‌ ୱିଜୁଦିନ୍ ୱେର୍‌ସିମାନାପ୍‌ ।
1TH 1:3 ମା ବୁବା ମାପୁରୁଦି ଲାକ୍‌ତୁ ଏତ୍‌କିଜି ମାନାପ୍‌, ଏଣ୍ତେସ୍‌ ମିର୍‌ ନିଜେଦି ବିସ୍‌ବାସ୍‌ତିଙ୍ଗ୍‌ ପାଣିଦୁ ତର୍‍ସିନିଦେର୍‌, ଜିବନ୍‌ନୋଜି ମିସାଜି ଏଣ୍ତେସ୍‌ ଆଟ୍‌ୱା ପାଣି କିଜିନିଦେର୍‌ ମାରି ମା ପ୍ରବୁ ଜିସୁ କ୍ରିସ୍ତଦି ଲାକ୍‌ତୁ ମି ଆସା ଏଣ୍ତେସ୍‌ ଆଟ୍‌ୱା ।
1TH 1:4 ଏ ନା ତଡ଼ାନ୍‌କୁ ନି ତାଙ୍ଗିଁକି ! ମାପ୍‌ ନେସ୍‌ନାପ୍‌ ଜେ, ମାପୁରୁ ମିଙ୍ଗିଁ ଜିବନ୍‌ନୋନାନ୍‌ ମାରି ୱାନି ନିଜେଦି ଲୋକ୍‌ ଆନି ଉଣ୍ତିଙ୍ଗ୍‌ ମିଙ୍ଗିଁ ଆସ୍‍କିତାମାନାନ୍‌ ।
1TH 1:5 ଇରିଙ୍ଗ୍‌ କେବଲ ମାଟାଦାନ୍‌ ଆଏତ୍‍, ପବିତ୍ରଆତ୍ମାଦି ସାକାଦି ସାକ୍ତିଦି ୱାଲେ, ନେଗିକାବୁର୍‌ତି ସତ୍‌ତାନ୍‌ ୱିଜୁନେସ୍‌ନିୱାଜା ୱେର୍‍ସି ମାପ୍‌ ଆକା ମି ଲାକ୍‌ତୁ ୱେର୍‌ତାମାର୍ହାପ୍‌ । ମିର୍‌ ନେସ୍‌ନିଦେର୍‌, ମି ୱାଲେ ମାରିଇୱାଲେ ମାଡ୍‌ ଏଣ୍ତେସ୍‌ ଜିଜିମାଡ଼ିଜି ମାରିକା; ଏଣ୍ତେସ୍‌ କେବଲ ମି ସାକା ମା ଜିବନ୍‌ତୁ ବଦାମାର୍ହାତ୍‌ ।
1TH 1:6 ମିର୍‌ ମାଙ୍ଗିଁ ମାରି ମା ପ୍ରବୁଦି ୱେନ୍‌କା ସର୍‌ଇମାରିଇଦେର୍‌ ମାରି ନାଣ୍ତ୍‌ ଦୁଃକ୍‌କାସ୍ଟୁ ବୋଗାତିଙ୍ଗ୍‌ବା ପବିତ୍ର ଆତ୍ମାଦିମାଣାନ୍‌ ପୟ୍‌ତି ୱେଡ଼ିକାଦି ୱାଲେ ଆୟା ନେଗିକାବୁର୍‌ ମାନାତିମାରିଇଦେର୍‌ ।
1TH 1:7 ଇୟାୱାଜା ମିର୍‌ ମାସିଦୋନିଆ ମାରି ଆକାୟାଦୁ ମାନି ୱିଜୁ ବିସ୍‌ବାସ୍‌ତି ଲୋକା ଉଣ୍ତିଙ୍ଗ୍‌ ନେଗିସାରି ତର୍‍ନି ଲୋକ୍‍ ୱାଜା ଆତିମାରିଇଦେର୍‌ ।
1TH 1:8 ମି ଲାକ୍‌ତୁରାନ୍‌ ପ୍ରବୁଦି ବାକ୍ୟ ଜେ କେବଲ ମାସିଦୋନିଆ ଆକାୟାଦୁ ୱେଙ୍ଗିଁତା ମାର୍ହାତ୍‌, ଆକା ସିଲେ, ମାତର୍‌ ମାପୁରୁଦି ଉଣ୍ତିଙ୍ଗ୍‌ ମି ବିସ୍‌ବାସ୍‌ତି ବିସୟ୍‌ ୱିଜୁ ବାଡିଦୁ ଇୟାୱାଜା ୱେଙ୍ଗିଁତା ମାର୍ହାତ୍‌ ଜେ, ଆୟା ବିସୟ୍‌ତାନ୍‌ ମାଡୁ ଇନିକା ୱେର୍‍ତେଙ୍ଗ୍‍ ଦର୍‌କାର୍‌ ସିଲେତ୍‌ ।
1TH 1:9 ମାପ୍‌ ମି ଲାକ୍‌ତୁ ସନିୱାଲେ ମିର୍‌ ଏଣ୍ତେସ୍‌ ମାଙ୍ଗିଁ ୱେଡ଼ିକାଦାନ୍‌ କୁକ୍‍ତିମାରିଇଦେର୍‌ ମାରି ଦିୟାମ୍‍ ପୁଜା ଡ଼ିସ୍‌ସି ସତ୍‌ ମାରି ଜିବନ୍‌ମାନି ମାପୁରୁଙ୍ଗ୍‌ ଉପାସନା କିଦେଙ୍ଗ୍‌ ଆଗ୍‌ଡ଼ି ୱାତିମାର୍‌ଇଦେର୍‌;
1TH 1:10 ମାରି ଏଣ୍ତେସ୍‌ ମାପୁରୁଦି ରିସାଦାନ୍‌ ମାଙ୍ଗିଁ ରକିୟାକିନି ଉଣ୍ତିଙ୍ଗ୍‌, ସାତିମାଣାନ୍‌ ଜିବନ୍‌ଆଜିନିଙ୍ଗିଁତାନ୍‌ ୱାନି ମାରିସି ଜିସୁ ମୁସ୍‍କୁପୁର୍‍ତାନ୍‍ ମାରିଡ଼େସିୱାନିତାନିଙ୍ଗ୍‌ ମିର୍‌ କାପ୍‌କିଜି ତେବାତିମାନିଦେର୍‌, ଇୟାୱିଜୁ ବିସୟ୍‌ତାନ୍‌ ଆବେଣି ଲୋକୁ ୱାର୍‌ଗିଜିସାଜି ମାର୍ହାର୍‌ ।
1TH 2:1 ଏ ନା ତଡ଼ାନ୍‌କୁ ନି ତାଙ୍ଗିଁକି ! ମିର୍‌ ନିଜେ ନେସ୍‌ନିଦେର୍‍ ଜେ, ମି ଲାକ୍‌ତୁ ମା ୱାନିକା ଆର୍‍ଏ ସିଲେ ।
1TH 2:2 ତେସଲ୍‌ନିକାଦୁ ମି ଲାକ୍‌ତୁ ୱାନିଆଗ୍‌ଡ଼ି ପିଲିପିତୁ ମା ଉଣ୍ତିଙ୍ଗ୍‌ ଏଣ୍ତେସ୍‌ ତାଗ୍‌ଇ ବ୍ୟବହାର୍ ମାରି ନିନ୍ଦା କିଆୟ୍‌ଆତାମାର୍ହାର୍‌, ଆକା ମିର୍‌ ନେସ୍‌ନିଦେର୍‌ । ମାରିବା ନାଣ୍ତ୍‌ ବିରୋଦ୍‌ କିତିଙ୍ଗ୍‌ବା, ମାପୁରୁଦିମାଣାନ୍‌ ପୟ୍‌ତିମାନି ସୁସମାଚାର୍‌ ମିଙ୍ଗିଁ ୱେର୍‌ନି ଉଣ୍ତିଙ୍ଗ୍‌ ୱାନ୍‌ ମାଙ୍ଗିଁ ବପୁ ସିତାମାର୍ହାନ୍‌ ।
1TH 2:3 ଇନିକା ବାୟା ନି ଅଦାର୍ମୁଦି ୱାଜା ତାସି ମାପ୍‌ ମି ଲାକ୍‌ତୁ ମା ମାଟା ୱେର୍‌ଏପ୍‌ମାର୍ହାପ୍‌, ମାରିବା ମିଙ୍ଗିଁ ଟକେ କିଦେଙ୍ଗ୍‍ ଇନିକାବା ସାଲାକିଦି ୱାଜା କିଏପ୍‌ମାର୍ହାପ୍‌ ।
1TH 2:4 ମାତର୍‌ ମାପୁରୁଦି ବଦାଦି ମାଟା ମାପ୍‌ ୱିଜୁଦିନ୍ ୱେର୍‌ସିମାନାପ୍‌, ଇରିଙ୍ଗ୍‌ ୱାନ୍‌ ମାଙ୍ଗିଁ ବଦାକିଜି ମା ମୁସ୍‌କୁ ନେଗିକାବୁର୍‌ ୱେର୍‍ତେଙ୍ଗ୍‍ ଦାଇତ୍‌ ସିତା ମାର୍ହାନ୍‌ । ଲୋକାଙ୍ଗ୍‌ ୱେଡ଼ିକା କିନିକା ମା ବଦା ସିଲେତ୍‌ । ଆମା ମାପୁରୁ ମା ମୋନ୍‌ତି ଅଡ଼୍‍ବିନିକା ପରିକା କିଜି ସୁଡ଼ୁନାନ୍‌, କେବଲ ୱାନିଙ୍ଗ୍‌ ୱେଡ଼ିକା କିନି ଉଣ୍ତିଙ୍ଗ୍‌ ମାପ୍‌ ସେସ୍ଟା କିଜିନାପ୍‌ ।
1TH 2:5 ମିର୍‌ ନେଗେନ୍‌ତାନ୍‌ ନେସ୍‌ତୁ ଜେ, ସୁରିମାଟା ୱେର୍‍ସି ମି ଲାକ୍‌ତୁ ରେଏପ୍‌ ମାର୍ହାପ୍‌, ମାରି ମା ଲୋବ୍‌ତିଙ୍ଗ୍‌ ଆଡ଼ିକ୍‌ନି ଉଣ୍ତିଙ୍ଗ୍‌ ମି ଲାକ୍‌ତୁ ସାଲାକି ବ୍ୟବ୍‌ହାର୍‌ କିଏପ୍‌ ମାର୍ହାପ୍‌, ଇୟା ବିସୟ୍‌ତାନ୍‌ ମାପୁରୁ ମା ସାକି ।
1TH 2:6 ମାପ୍‌ ମିମାଣାନ୍‌ ମାରି ଆଇୱାରିମାଣୁକୁ ପ୍ରସଂସା ପୟ୍‌ଦେଙ୍ଗ୍‌ ଇଜି ମାପ୍‌ ବଦା କିଏପ୍‌ ମାର୍ହାପ୍‌,
1TH 2:7 ମାରିବା କ୍ରିସ୍ତଦି ପ୍ରେରିତ ସିସୁ ୱାଜା ମାପ୍‌ ମିମାଣୁକୁ ଆକା ଦାବି କିଦେଙ୍ଗ୍‌ ଆଟ୍‌ତାପ୍‌ମାନ୍ଦି । ମାତର୍‌ ୟାୟା ଏଣ୍ତେସ୍‌ ନିଜେଦି କଡ଼କକ୍ରାରିଙ୍ଗ୍‌ ଜାତୁନ୍‍ କିନାମାନାତ୍‌, ମି ଲାକ୍‌ତୁ ମାର୍‌ଇ ୱାଲେ ମାପ୍‌ ମି ଉଣ୍ତିଙ୍ଗ୍‌ ଆୟାୱାଜା ଜିବନ୍‌ନୋତା ମାର୍ହାପ୍‌ ।
1TH 2:8 ମି ଉଣ୍ତିଙ୍ଗ୍‌ ମା ଜିବନ୍‌ନୋନିକା ମାନିଙ୍ଗ୍‌ ମାପ୍‌ ଆୟାୱାଜା ମିଙ୍ଗିଁ ମାପୁରୁଦି ସୁସମାଚାର୍‌ କେବଲ ଆଏତ୍‍, ମାତର୍‌ ନିଜେ ନିଜେଦି ଜିବନ୍‌ ବା ସିଦେଙ୍ଗ୍‌ ବଦା ମାର୍ହାତ୍‌, ଇରିଙ୍ଗ୍‌ ମିର୍‌ ମା ଏସା ତଡ଼୍‍ ମାର୍‌ଇଦେର୍‌ ।
1TH 2:9 ଏ ତଡ଼ାନ୍‌କୁ ନି ତାଙ୍ଗିଁକି, ମା ପାଣି ମାରି ଆଟ୍‌ୱା ପାଣି ମି ପୁରା ଏତ୍‌ ମାନାତ୍‌, ମି ଲାକ୍‌ତୁ ଏଣ୍ତେସ୍‌ ମାପୁରୁଦି ନେଗିକାବୁର୍‌ ୱେର୍‌ନି ୱାଲେ ମି ମୁସ୍‌କୁ ବୋଜୁ ଆଇ ଉଣ୍ତିଙ୍ଗ୍‌ ମାପ୍‌ ନାଡ଼ାୱେଡ଼େ କାସ୍ଟୁପାଣି କିତାମାର୍ହାପ୍‌ ।
1TH 2:10 ମିର୍‌ ମାରି ନିଜେ ମାପୁରୁ ମା ସାକି ମି ୱାଜା ବିସ୍‌ବାସ୍‌ୱାରି ଲାକ୍‌ତୁ ମା ସାଲାବୁଲାନିକା ନେଗିକା, ନ୍ୟାୟ୍‌ବିସାର୍‌ ମାରି ଦସ୍‌ ସିଲେତାତ୍‍ ।
1TH 2:11 ମିର୍‌ ନେସ୍‌ନିଦେର୍‌, ବୁବା ଏଣ୍ତେସ୍‌ ନିଜେଦି କଡ଼କକ୍ରାରି ଉଣ୍ତିଙ୍ଗ୍‌ ବ୍ୟବ୍‌ହାର୍‌ କିତାନ୍‍ମାନ୍ଦି, ମାପ୍‌ ମି ଉଣ୍ତିଙ୍ଗ୍‌ ଟିକ୍‌ ଆୟାୱାଜା ବ୍ୟବ୍‌ହାର୍‌ କିତାମାର୍ହାପ୍‌ ।
1TH 2:12 ମାପ୍‌ ମିଙ୍ଗିଁ ସାସ୍‌ ସିତାମାର୍ହାପ୍‌, ସାନ୍ତି ସିତା ମାର୍ହାପ୍‌, ମାରି ମିର୍‌ ଏଣ୍ତେସ୍‌ ମାପୁରୁଦି ବଦା ବ୍ୟବ୍‌ହାର୍‌ କିଜି ୱାନି ରାଜି ମାରି ଗୌରବ୍‌ଦି ବାଗ୍‍ ଆନି ଉଣ୍ତିଙ୍ଗ୍‌ ୱାନି ମାଟା ମାନାଦେଙ୍ଗ୍‌ ଆଟ୍‌ନିଦେର୍‌, ଇୟାଉଣ୍ତିଙ୍ଗ୍‌ ୱେଡ଼ିକା ସିତାମାର୍ହାପ୍‌ ।
1TH 2:13 ମାପ୍‌ ୱିଜୁଦିନ୍ ମାପୁରୁଙ୍ଗ୍‌ ଦନ୍ୟବାଦ୍‌ ସିଜିମାନାପ୍‌, ତାନି ଆଇ ଉନ୍‌ଡ୍ରି ମାଟା ବା ମାନାତ୍‌ । ମାପ୍‌ ଏସ୍ତିୱାଲେ ମି ଲାକ୍‌ତୁ ମାପୁରୁଦି କାବୁର୍‌ ତାତାମାର୍ହାପ୍‌, ମିର୍‌ ଆକା ଲୋକା କାବୁର୍‌ ଇଜି ଅଡ଼୍‌ବିଏଣ୍‌ଗା, ମାପୁରୁଦି କାବୁର୍‌ ୱାଜା ୱେର୍‌ଇମାର୍‌ଇଦେର୍‌ ମାରି ମାନାତିମାର୍‌ଇଦେର୍‌ । ସତ୍‌ତାନ୍‌ ଆକା ମାପୁରୁଦି କାବୁର୍‌ ମାରି ମି ୱାଜା ବିସ୍‌ବାସ୍‌ରି ଜିବନ୍‌ତୁ ଆକା ପାଣି କିଜିନାତ୍‌ ।
1TH 2:14 ଏ ତଡ଼ାନ୍‌କୁ ନି ତାଙ୍ଗିଁକି, ଜିହୁଦା ଦେସ୍‌ତୁ ମାନି ଜିସୁଦି ମଣ୍ତଲିଆଙ୍ଗାଁ ମାରି ଆବେଣି କ୍ରିସ୍ତବିସ୍‌ବାସ୍‌ରି ଉଣ୍ତିଙ୍ଗ୍‌ ଆମାକା ଗଟାତାମାର୍ହାତ୍‍, ମି ଉଣ୍ତିଙ୍ଗ୍‌ ବା ଆକା ଗଟାତାମାନାତ୍‌ । ୱାର୍‌ ଜିହୁଦିରିମାଣୁକୁ ଏଣ୍ତେସ୍‌ ଦୁଃକ୍‌କାସ୍ଟୁ ବୋଗାତା ମାର୍ହାର୍‌, ମିର୍‌ ବା ନିଜେଦି ଦେସ୍‌ତି ଲୋକାମାଣୁକୁ ଦୁଃକ୍‌କାସ୍ଟୁ ବୋଗାତି ମାନିଦେର୍‌ ।
1TH 2:15 ଆୟା ଜିହୁଦିରି ପ୍ରବୁ ଜିସୁଙ୍ଗୁଁ ମାରି ବାବବାଦିରିଙ୍ଗ୍‌ ସାୟାମାର୍‌ଗାଡାକ୍‌ତା ମାର୍ହାର୍‌ ମାରି ମାଙ୍ଗିଁ ବା ଦୁଃକ୍‌କାସ୍ଟୁ ସିତାମାର୍ହାର୍‌ । ୱାରି ଉଣ୍ତିଙ୍ଗ୍‌ ମାପୁରୁ ୱେଡ଼ିକା ଆଏନ୍‍ ! ସାରାଦୁନିଆଦି ଲୋକୁ ଜାତିଦୁ ୱାର୍‌ ସାତ୍ରୁ ।
1TH 2:16 ଇୟାୱାଜା ଆମା ସୁସମାଚାର୍‌ ପ୍ରସାର୍‌ଦାନ୍‌ ଅଣଜିହୁଦିରି ରକିୟା ପୁରା ଆଦେଙ୍ଗ୍‌ ଆଟ୍‍ନାତ୍‍, ଆବେଣ୍‌କୁ ୱାର୍‌ ମାଙ୍ଗିଁ ବାଦା ସିନାର୍‌ । ଇୟାୱାଜା ୱାର୍‌ ୱିଜୁଦିନ୍ ନିଜେ ନିଜେଦି ପାପ୍‌ ପୁରା କିଜିମାନାର୍‌ । ସାରାସାରିୱେନ୍‌କା ଇଲେଇ ୱାରି ବିରୁଦ୍‌ତାନ୍‌ ମାପୁରୁଦି ରିସା କାସ୍‌ସିନାତ୍‌ ।
1TH 2:17 ଏ ତଡ଼ାନ୍‌କୁ ନି ତାଙ୍ଗିଁକି, ଏସ୍ତିୱାଲେ ଅଡ଼ପ୍‍ ସମୟ୍‌ ଉଣ୍ତିଙ୍ଗ୍‌ ମି ଲାକ୍‌ତୁରାନ୍‌ ମାପ୍‌ ୱେର୍‌ଏ ଆତାମାର୍ହାପ୍‌ ଏଣ୍ତେସ୍‌ବା ମେନ୍ଦଲ୍‌ତିୱାଜା, ମାତର୍‌ ମା ମନ୍‍ତୁ ମିର୍‌ ୱିଜୁଦିନ୍ ମାନିଦେର୍‌ । ମିଙ୍ଗିଁ ଏତ୍‌କିଜି ମାପ୍‌ ଏସା ସିନ୍ତା ଆତାମାର୍ହାପ୍‌ ମାରି ମାରିଡ଼େସି ମିଙ୍ଗିଁ ସୁଡ଼ୁନି ଉଣ୍ତିଙ୍ଗ୍‌ ମାପ୍‌ ଏସ ଇଚ୍ଛା କିତାମାର୍ହାପ୍‌ ।
1TH 2:18 ମି ଲାକ୍‌ତୁ ଡ଼େସିସନି ଉଣ୍ତିଙ୍ଗ୍‌ ମାଙ୍ଗିଁ ବେସି ଇଚ୍ଛା ମାର୍ହାତ୍‌ ମାରି ନାନ୍‌ ପାଉଲ ନିଜେ ଡ଼େସିସନି ଉଣ୍ତିଙ୍ଗ୍‌ ରୁଣ୍ତି ଦେବେଙ୍ଗ୍‌ ସେସ୍ଟା କିତାମାର୍ହା, ମାତର୍‌ ସୟ୍‌ତାନ୍‌ ମାଙ୍ଗିଁ ବାଦା ସିତାତ୍‌ ।
1TH 2:19 ୱାନ୍‌ ଆମାକାଆପିନ୍‌, ନା ଆସା, ମା ପ୍ରବୁ ଜିସୁଦି ୱାନିବେଡ଼ାଦୁ ୱାନି ଆଗ୍‌ଡ଼ି ଆଇୱାରି ୱାଜା ମିର୍‌ ବା ମା ଆସା, ୱେଡ଼ିକା ମାରି ଜିଣାନି ଗାର୍ବୁଦି ମାଟା ଆନାତ୍‌ ।
1TH 2:20 ସତ୍‌ତାନ୍‌, ମିର୍‌ ମା ଗୌରବ୍‍ ମାରି ୱେଡ଼ିକା ।
1TH 3:1 ଆୟାଉଣ୍ତିଙ୍ଗ୍‌, ମାପ୍‌ ମାରି ୱେନ୍‌ଡ୍ରେଙ୍ଗ୍‌ ଆଟ୍‌ଏଆଜି ତିର୍‌ କିତାପ୍‌ ଜେ, ମାପ୍‌ ୱେନ୍‌କା ଆତେନ୍‌ସ୍‌ଦୁ ଅରେନ୍‌ନେ ଜିଜି ମାଡ଼ିଜି ତେବାନାପ୍‌,
1TH 3:2 ମାତର୍‌ ମିଙ୍ଗିଁ ତିର୍‌ କିଦେଙ୍ଗ୍‌ ମାରି ମିଙ୍ଗିଁ ବିସ୍‌ବାସ୍‌ ଡାଟ୍‌ କିନି ଉଣ୍ତିଙ୍ଗ୍‌ ମି ଲାକ୍‌ତୁ ମା ତଡ଼ାନ୍‌ ତିମତିଙ୍ଗ୍‌ ପୋକ୍‌ତାନାପ୍‌ । ୱାନ୍‌ ମା ୱାଲେ ଅର୍‍ସେପାଣି କିଜି କ୍ରିସ୍ତଦି ନେଗି କାବୁର୍‌ ପ୍ରଚାର୍‌ କିଜି ମାପୁରୁଦି ସେବା କିଜିନାନ୍‌ ।
1TH 3:3 ମି ମୁସ୍‌କୁ ୱାଜିମାନି କାସ୍ଟୁ ଉଣ୍ତିଙ୍ଗ୍‌ ଏନ୍‌ ଏଣ୍ତେସ୍‌ ସାରି ବାଣାମାକିନ୍‌, ଇୟାଉଣ୍ତିଙ୍ଗ୍‌ ୱାନ୍‌ ମିଙ୍ଗିଁ ସାହାଜ୍ୟ କିନାନ୍‌ । ଏଣ୍ତେସ୍‌ବା ମିର୍‌ ନେସ୍‌ନିଦେର୍‌, ମାପ୍‌ ଇୟାୱାଜା କାସ୍ଟୁ ପୟ୍‌ନାପ୍‌, ଇକା ମାପୁରୁଦି ଇଚ୍ଛା ।
1TH 3:4 ମି ୱାଲେ ମାନିୱାଲେ, ମାପ୍‌ ନାଣ୍ତ୍‌ ଆଗ୍‍ଡ଼ିରାନ୍‍ ୱେର୍‌ତା ସିତାମାର୍ହାପ୍‌, ମାଙ୍ଗିଁ ଦୁଃକ୍‌କାସ୍ଟୁ ବୋଗାଦେଙ୍ଗ୍‌ ଆନାତ୍‌ । ଇଲେଇ ମିର୍‌ ନେସ୍‌ନିଦେର୍‌, ଟିକ୍‌ ଆକାନେ ଗଟାନାତ୍‌ ।
1TH 3:5 ଆୟାଉଣ୍ତିଙ୍ଗ୍‌ ତିମତିଙ୍ଗ୍‌ ପୋକ୍‌ତାତା । ନାନ୍‌ ମାରି ତିର୍‌ ଆଜି ମାନ୍‌ଡ୍ରେଙ୍ଗ୍‌ ଆଟ୍‌ଏତା । ମିର୍‌ ମି ବିସ୍‌ବାସ୍‌ତୁ ଡାଟ୍‌ ମାନିଦେର୍‌ ନୋ ସିଲେ, ନେସ୍‌ନି ଉଣ୍ତିଙ୍ଗ୍‌ ନାନ୍‌ ୱାନିଙ୍ଗ୍‌ ପୋକ୍‌ତାତା । ଏଣ୍ତେସାତିଙ୍ଗ୍‌ ସୟତାନ୍ ମିଙ୍ଗିଁ ପରିକା କିନାତ୍‌ ମାରି ମା ୱିଜୁ ପାଣି ଆରେଏ ଆନାମାନାତ୍‍ ? ସିଲେ, ଇକା ଏସ୍‌କାଙ୍ଗ୍‌ ପୁରା ଆଏତ୍‍ ।
1TH 3:6 ଇଲେଇ ମି ଲାକ୍‌ତୁରାନ୍‌ ଡ଼େସି ୱାଜି ତିମତି ମି ବିସ୍‌ବାସ୍‌ ମାରି ଜିବନ୍‌ନୋନି ବିସୟ୍‌ତାନ୍‌ ନେଗି ମାଟା ତାତାମାନାନ୍‌ । ୱାନ୍‌ ମାଙ୍ଗିଁ ୱେର୍‌ତା ମାନାନ୍‌ ଜେ, ମିର୍‌ ୱିଜୁଦିନ୍ ମା ନେଗି ପାଣି କିଜିନିଦେର୍‌ ମାରି ମାପ୍‌ ଏଣ୍ତେସ୍‌ ମିଙ୍ଗିଁ ସୁଡ଼ୁଦେଙ୍ଗ୍‌ ବଦା, ମିର୍‌ ବା ଆୟାୱାଜା ମାଙ୍ଗିଁ ସୁଡ଼ୁଦେଙ୍ଗ୍‌ ଇଚ୍ଛା କିଜିନିଦେର୍‌ ।
1TH 3:7 ଇୟାଉଣ୍ତିଙ୍ଗ୍‌, ଏ ତଡ଼ାନ୍‌କୁ ନି ତାଙ୍ଗିଁକି, ମା ୱିଜୁ ଦୁଃକ୍‌କାସ୍ଟୁ ସମୟ୍‌ତୁ ମାପ୍‌ ମି ଉଣ୍ତିଙ୍ଗ୍‌ ସାସ୍‌ ଆଜିନାପ୍‌ । ମି ଡାଟ୍‌ ବିସ୍‌ବାସ୍‌ନେ ମାଙ୍ଗିଁ ସତ୍‌ତାନ୍‌ ଜିପିସ୍‌ କିତା ଇଟ୍‌ତାମାନାତ୍‌ ।
1TH 3:8 ମାରିବା ଇଲେଇ ମାପ୍‌ ଜିତା ମାନାପ୍‌ ପ୍ରବୁଦି ମାନୁ ତିର୍‌ ଆତାମାନାପ୍‌, ମିର୍‌ ଡାଟ୍‌ତିୱାଜା ପ୍ରବୁଦି ୱାଲେ ମିସାବିଡ଼ା ଆଜି ଜିଜିମାଡ଼ିଜିନିଦେର୍‌ ।
1TH 3:9 ଇଲେଇ ମି ଉଣ୍ତିଙ୍ଗ୍‌ ମାପୁ ଆମା ୱେଡ଼ିକାଦୁ ୱେଡ଼ିକା ଆଜିନାପ୍‌, ଆୟାଉଣ୍ତିଙ୍ଗ୍‌ ମାପୁରୁଙ୍ଗ୍‌ ଏଣ୍ତେସ୍‌ ଦନ୍ୟବାଦ୍‌ ସିନାପ୍‌, ନେସ୍‌ତେଙ୍ଗ୍‌ ଆଟ୍‌ଏଜିନାପ୍‌ ।
1TH 3:10 ମିଙ୍ଗିଁ ବେଟ୍‌ବୁଡ଼ାଜି ମି ବିସ୍‌ବାସ୍‌ତୁ ଆମାକା ଉଣାମାନାତ୍‌, ଆକା ପୁରା କିଦେଙ୍ଗ୍‌ ଇଜି ମାଙ୍ଗିଁ ସୁଜୋଗ୍‌ ସିଦେଙ୍ଗ୍‌ ୱେଡ଼େନାଡ଼ା ମାପ୍‌ ମାପୁରୁଙ୍ଗୁଁ ପାର୍‌ତନା କିଜିନାପ୍‌ ।
1TH 3:11 ମି ଲାକ୍‌ତୁ ୱାନି ଉଣ୍ତିଙ୍ଗ୍‌ ମା ବୁବା ମାପୁରୁ ମାରି ମା ପ୍ରବୁ ଜିସୁ ମା ସାରି ତିଆର୍‌ କିଜ ସିପିନ୍‌ ।
1TH 3:12 ମି ଉଣ୍ତିଙ୍ଗ୍‌ ମା ଜିବନ୍‌ନୋନିକା ଏଣ୍ତେସ୍‌ ନାଣ୍ତ୍‌, ଆୟାୱାଜା ନିଜେନିଜେଦି ଉଣ୍ତିଙ୍ଗ୍‌ ମାରି ୱିଜେରି ଉଣ୍ତିଙ୍ଗ୍‌ ପ୍ରବୁ ମି ଜିବନ୍‌ନୋନିକା ନାଣ୍ତ୍‌ ପିରିସ୍‌ କିପିନ୍‌ ।
1TH 3:13 ଇୟାୱାଜା ୱାନ୍‌ ମିଙ୍ଗିଁ ତିର୍‌ କିନାନ୍‌ । ଆର୍‌ତିଙ୍ଗ୍‌, ମା ପ୍ରବୁ ଜିସୁ ଏସ୍ତିୱାଲେ ମୁସ୍‌କୁପୁର୍‌ତି ସାଦୁରି ୱାଲେ ମାରିଡ଼େସି ୱାନାନ୍, ନାସ୍ତିୱାଲେ ମିର୍‌ ବୁବା ମାପୁରୁଦି ଆଗ୍‌ଡ଼ି ଦାର୍ମୁ ମାରି ପବିତ୍ର ଆଦେଙ୍ଗ୍‌ ଆଟ୍‌ନିମାନିଦେର୍‌ ।
1TH 4:1 ସାରାସାରିୱେନ୍‌କା, ତଡ଼ାନ୍‌କୁ ନି ତାଙ୍ଗିଁକି, ମାପୁରୁଙ୍ଗୁଁ ୱେଡ଼ିକା କିନି ଉଣ୍ତିଙ୍ଗ୍‌ ଏଣ୍ତେସ୍‌ ଜିଜି ମାଡ଼ିଜିଦେଙ୍ଗ୍‌ ଆନାତ୍‌, ଆୟା ମାଣାନ୍‌ ଅଜାତିମାନିଦେର୍‌ । ଏଣ୍ତେସ୍‌ବା ଆୟାୱାଜା ଦାନ୍‌ ମିର୍‌ ଜିଜି ମାଡ଼ିଜି ୱାଜିନିଦେର୍‌, ମାତର୍‌ ଇୟାମାଣାନ୍‍ ଅଡ଼ପ୍‍ ନାଣ୍ତ୍‌ କିଦେଙ୍ଗ୍‌ ମିଙ୍ଗିଁ ମାପ୍‌ ଇଲେଇ ପ୍ରବୁ ଜିସୁଦି ଦର୍‌ତାନ୍‌ ୱେଡ଼ିକା ନି ଅନୁରୋଦ୍‌ କିଜିନାପ୍‍ ।
1TH 4:2 ମାପ୍‌ ପ୍ରବୁ ଜିସୁଦି ମାଣାନ୍‌ ଅଦିକାର୍‌ ପୟ୍‌ତାପ୍ ମିଙ୍ଗିଁ ଆମା ଆମା ଆଦେସ୍‌ ସିତାମାର୍‌ର୍ହାପ୍‌, ଆକା ମିର୍‌ ନେସ୍‌ନିଦେର୍‌ ।
1TH 4:3 ମିର୍‌ ଏଣ୍ତେସ୍‌ ପବିତ୍ର ଆନିଦେର୍‌, ଇକାନେ ମାପୁରୁଦି ବଦା, ଅର୍ତାତ୍‍ ମିର୍‌ ଏଣ୍ତେସ୍‌ ଦାରିପାଣିଦାନ୍‌ ଆକ ତେବାନିଦେର୍‌ ।
1TH 4:4 ୱିଜେରେ ଲୋକ୍‌ ନେସ୍‌ନିକା ମାନାତ୍‌ ଜେ ଏଣ୍ତେସ୍‌ ନିଜେ ନିଜେଦି ଆଡ଼୍‌ସିକା ୱାଲେ ପବିତ୍ର ନି ସନ୍‌ମାନ୍‌ତାନ୍‌ ଜିନିକା ମାନାତ୍‌ ।
1TH 4:5 ମାପୁରୁଙ୍ଗ୍‍ଁ ନେସ୍‌ଇମାନି ଦୁନିଆଦି ଅଣଜିହୁଦି ଲୋକା ୱାଜା ଲାଲାୟ୍‌ ଆମାଟ୍‌ ।
1TH 4:6 ଏମେ କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ ଉଣ୍ତିଙ୍ଗ୍‌ ଅନ୍ୟାୟ୍‌ପାଣି କିମାଟ୍‌, ମାରି ୱାନିଙ୍ଗ୍‌ ବାଣ୍ତିସ୍‍ କିମାଟ୍‌ । ଇୟା ମାଟା ମାପ୍‌ ଆଗ୍‍ଡ଼ିରାନ୍‍ନେ ୱେର୍‌ତାମାନାପ୍‌ ମାରି ଡାଟ୍‌ତାନ୍‌ ଜାଗାର୍‌ତା କିତାମାନାପ୍‌, ଆମାକାର୍‌ ଆୟାୱାଜା କିନାର୍‌, ପ୍ରବୁ ୱାରିଙ୍ଗ୍ ସାସ୍ତି ସିନାନ୍‌ ।
1TH 4:7 ମାପୁରୁ ମାଙ୍ଗିଁ ତାଗ୍‍ଇକାର୍‍ ଆଜି ଜିନିମାଡ଼ିନି ଉଣ୍ତିଙ୍ଗ୍‌ କୁକ୍‌ଏନ୍‌, ମାତର୍‌ ପବିତ୍ର ଆଜି ମାନ୍‌ଡ୍ରେଙ୍ଗ୍‌ କୁକ୍‌ତାମାନାନ୍‌ ।
1TH 4:8 ମାରି, ଏନ୍‌ ମା ଇୟା ମାଟାଦିଙ୍ଗ୍‌ ମାନାଏନ୍‌, ୱାନ୍‌ ଲୋକ୍‌ତିଙ୍ଗ୍‌ ମାନାଏନ୍‌, ମାତର୍‌ ଆମା ମାପୁରୁ ମିଙ୍ଗିଁ ମନ୍‌ତୁ ନିଜେଦି ପବିତ୍ରଆତ୍ମା ସିନାନ୍‌, ୱାନିଙ୍ଗ୍‌ ମାନାଏନ୍‌ ।
1TH 4:9 ଇଲେଇ କ୍ରିସ୍ତବିସ୍‌ବାସ୍‌ସିର୍‌ ମି ଜିବନ୍‌ନୋନି ବିସୟ୍‌ତାନ୍‌ ମାପ୍‌ ମାରି ନାଣ୍ତ୍‌ ରାସ୍‌ନିକା ଦର୍‌କାର୍‌ ସିଲେ । ନିଜେନିଜେଦିଙ୍ଗ୍‌ ଏଣ୍ତେସ୍‌ ଜିବନ୍‍ନୋନିକା ମାନାତ୍‌, ଇକା ନିଜେ ମାପୁରୁମାଣାନ୍‌ ଅଜାତିମାନିଦେର୍‌ ।
1TH 4:10 ସତ୍‌ତାନ୍‌ ୱିଜୁ ମାସିଦୋନିଆଦୁ ମାନି କ୍ରିସ୍ତଦି ବିସ୍‌ବାସ୍‌ସିର୍‌ ତଡ଼ାନ୍‌କା ଉଣ୍ତିଙ୍ଗ୍‌ ମିର୍‌ ଆୟାୱାଜା ପାଣି କିତିମାନିଦେର୍‌ । ଆତିଙ୍ଗ୍‌ବା ମାରି ନାଣ୍ତ୍‌ଦାନ୍‌ ଆକା କିଦୁ, ମିଙ୍ଗିଁ ନିସନେ କେବଲ ଅନୁରୋଦ୍‌ କିଜିନାପ୍‍ ।
1TH 4:11 ଆଗ୍‍ଡ଼ିରାନ୍‍ ଏଣ୍ତେସ୍‌ ୱେର୍‌ତାମାର୍ହାପ୍‌, ସାନ୍ତିଦାନ୍‌ ଜିନିମାଡ଼ିନିକା, ନିଜେଦି ପାଣିଦୁ ମୋନ୍‌ ସିଜି ମାରି ନିଜେ ନିଜେଦି ଜିନିକା ଉଣ୍ତାକିନିକା ମିଦି ପୁରା ଆପିତ୍‌ ।
1TH 4:12 ଇୟାୱାଜା କିନି ମାଣ୍‌କୁ ମିର୍‌ ଅବିସ୍‍ବାସିରି ୱାରିମାଣାନ୍‌ ବା ସନ୍‌ମାନ୍‌ ପୟ୍‌ନିଦେର୍‌ ମାରି ମି ୱିଜୁ ଦର୍‌କାର୍‌ତି ଉଣ୍ତିଙ୍ଗ୍‌ ଏ ମୁସ୍‌କୁ ଆସା ଇଡ୍‌ନି ଦର୍‍କାର୍‍ ସିଲେତ୍‍ ।
1TH 4:13 ଏ ତଡ଼ାନ୍‌କୁ ନି ତାଙ୍ଗିଁକି, ଆସାସିଲି ଆଇ ୱିଜେରିଲୋକା ୱାଜା ମିର୍‌ ଏଣ୍ତେସ୍‌ ଦୁକ୍‍ସିନ୍ତାକିମାଟ୍‍, ଇୟାଉଣ୍ତିଙ୍ଗ୍‌ ସାତିମାନି ଲୋକା ବିସୟତାନ୍‍ ମିର୍‌ ଜେ ସତ୍‍ ନେସ୍‍ମାଟ୍‍, ଇକା ମା ବଦା ସିଲେତ୍‍ ।
1TH 4:14 ଆୟାଉଣ୍ତିଙ୍ଗ୍‌ ମାଡ୍‌ ବିସ୍‌ବାସ୍‌ କିନାଟ୍‍ ଜେ, ଜିସୁ ସାଜି ମାରିଡ଼େସି ନିଙ୍ଗିଁତାନ୍‌, ଆଦେଙ୍ଗ୍‌ ମାପ୍‌ ଆଟ୍‌ୱା ବିସ୍‍ବାସ୍‍ ଜେ, ଜିସୁଦିମାନୁ ବିସ୍‌ବାସ୍‌ କିଜି ଆମାକାର୍‌ ସାନାର୍‌, ଜିସୁଦି ମାରିଡ଼େସି ୱାନିୱାଲେ ମାପୁରୁ ୱାରିଙ୍ଗ୍ ଜିସୁଦି ୱାଲେଅନାନ୍‌ ।
1TH 4:15 ମାପ୍‌ ଇଲେଇ ମିଙ୍ଗିଁ ଆମା ସିକିୟା ସିଜିନାପ୍‌, ଆକା ପ୍ରବୁଦି ସିକିୟା । ପ୍ରବୁଦି ୱାନିଦିନ୍‌ତୁ ମାଡ୍‌ ଆମାକାର୍‌ ଜିବନ୍‌ମାନିକା, ପୁର୍ବେଦାନ୍‍ ସାତିମାନି ଲୋକାମାଣ୍‌କୁ ଆଗ୍‌ଡ଼ି ଆଜି ସଲ୍‌ଇକା ।
1TH 4:16 ନାସ୍ତିୱାଲେ ପେରି ବଲ୍‌ତାନ୍‌ ଉନ୍‌ଡ୍ରି ଆଦେସ୍‌ ଆନାତ୍‌, ପେରି ମୁସ୍‌କୁପୁର୍‌ତି ଦୁତ୍‌ତି ବଲୁ ୱେନିଦେର୍‌, ମାପୁରୁଦି ମରିବାଜା ଆଉଲି ୱେନିଦେର୍‌ ମାରି ପ୍ରବୁ ମୁସ୍‌କୁପୁର୍‌ତାନ୍‌ ରେସିୱାନାନ୍‌ । କ୍ରିସ୍ତମାନୁ ବିସ୍‌ବାସ୍‌ କିଜି ଆମାକାର୍‌ ସାତାମାନାର୍‌, ୱାର୍‌ ଆଗ୍‌ଡ଼ି ଜିବନ୍‌ଆଜି ନିଙ୍ଗିଁନାର୍‌;
1TH 4:17 ତାନେୱେନ୍‌କା ମାଡ୍‌ ଆମାକାର୍‌ ଆୟା ସମୟ୍‌ତୁ ଜିବନ୍‌ ତେବାନାମାନାପ୍‌, ବାଦ୍‌ଡ଼ତୁ ୱାରି ୱାଲେ ନିଙ୍ଗିଁଜି ୱାର୍‌ ବାଦଡ଼୍‍ତି ଦୁରିଦୁ ପ୍ରବୁଦି ୱାଲେ ବେଟ୍‌ଆନାର୍‌, ତାନେୱେନ୍‌କା ମାଡ୍‌ ୱିଜୁଦିନ୍‌ତିଙ୍ଗ୍‌ ପ୍ରବୁଦି ୱାଲେ ମାନିକା ।
1TH 4:18 ମାରି, ଇୟାୱିଜୁ ମାଟା ୱେର୍‍ସି ମିର୍‌ ନିଜେନିଜେଦିଙ୍ଗ୍‌ ୱେଡ଼ିକା କିଦୁ ।
1TH 5:1 ଏ ତଡ଼ାନ୍‌କୁ ନି ତାଙ୍ଗିଁକି, ଇୟାୱିଜୁ ବିସୟ୍‌ତାନ୍‌ ଏସ୍‌କାଙ୍ଗ୍‌ ମାରି ଆମା ବେଡ଼ାଦୁ ଗଟାନାତ୍‌, ଆୟା ବିସୟ୍‌ତାନ୍‌ ମି ଲାକ୍‌ତୁ ନାଣ୍ତ ରାସ୍‌ନିକା ଲୋଡ଼ା ସିଲେତ୍‍,
1TH 5:2 ଇରିଙ୍ଗ୍‌ ନାଡ଼ା ଡଙ୍ଗାଁରେଏନ୍‌ ୱାନି ୱାଜା ପ୍ରବୁଦି ଦିନ୍‌ ଜେ ୱାନାତ୍, ଇକା ମିର୍‌ ନେଗେନ୍‌ତାନ୍‌ ନେସ୍‌ନିଦେର୍‌ ।
1TH 5:3 ଏସ୍ତିୱାଲେ ଲୋକୁ ସାନ୍ତି ମାରି ନେଗିବାଡି ଇଜି ୱେର୍‍ସି ମାନି ୱେଡ଼ାଦୁ ଆୟାଦାପ୍ରେ ୱାରି ମୁସ୍‌କୁ ସାନିକା ତିଗ୍‌ଜି ୱାନାତ୍ । ପଟାଦୁମାନି ଆଇମାଦି ଜନମ୍‌କିନି କାସ୍ଟୁ ୱାଜା ଆକା ନେସ୍‌ଇୱାଜା ଦାପ୍ରେ ଇଗା ୱାନାତ୍ ମାରି ଏନ୍‌ ଆୟା ଆଗ୍‍ଡ଼ିରାନ୍‍ ଉର୍‌କୁତେଙ୍ଗ୍‌ ଆଟ୍‍ଏନ୍‍ ।
1TH 5:4 ମାତର୍‌ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ସିକାଟିଦୁ ବାସା କିଇଦେର୍‌, ଆଦେଙ୍ଗ୍‌ ଆୟା ନାଣ୍ତିଙ୍ଗ୍‌ ଡଙ୍ଗାଁର୍‌ଏନ୍‌ ୱାଜା ନେସ୍‌ଇୱାଜା ମି ଲାକ୍‌ତୁ ୱାନାନ୍ ।
1TH 5:5 ଇରିଙ୍ଗ୍‌ ମିର୍‌ ୱିଜୁ ଜାୟ୍‌ ନି ୱେଡ଼େରି କଡ଼ର୍‌ । ମାଡ୍‌ ନାଡ଼ା ନି ସିକାଟିଦି କଡ଼ର୍‌ ଆଏପ୍‌ ।
1TH 5:6 ମାରି ରାଦୁ, ମାଡ୍‌ ଆଇ ଲୋକା ୱାଜା ସୁଜ୍‌ଏଣ୍‌ଗା, ଜାଗାର୍‌ତା ଆଜି ସେତା ତେବାନାଟ୍‍ ।
1TH 5:7 ଲୋକୁ ନାଡ଼ା ସମୟ୍‌ତୁ ସୁଜ୍‌ନାମାନାର୍‌, ନାଡ଼ା ୱାର୍‌ ଅଙ୍ଗୁର୍‍ରସ୍‍ ଉଣୁଜି ସୋସ୍‌ନାର୍‌ ।
1TH 5:8 ମାତର୍‌ ମାଡ୍‌ ୱେଡ଼େରି କଡ଼ର୍‌ ମାରି ୱିଜୁଦିନ୍ ଜାଗ୍‌ରାତା ମାନ୍‍ଜି । ରାଦୁ, ବିସ୍‌ବାସ୍‌ ମାରି ଜିବନ୍‌ନୋନିୱାଜା ବକାଦିସାଜୁ ଆରାଜି ମାରି ରକିୟାଦି ଆସା ଇଡ୍‌ଜି ଟପି ତାଲାଦୁ ଆରାନାଟ୍‍ ।
1TH 5:9 ଇରିଙ୍ଗ୍‌ ମାପୁରୁ ମାଙ୍ଗିଁ ୱାନି ରିସାଦି ଲୋକ୍‍ ଆଦେଙ୍ଗ୍‌ ଆସ୍‌କିଏନ୍‌, ପ୍ରବୁ ଜିସୁ କ୍ରିସ୍ତଦି ମାଣ୍‌କୁ ମାଙ୍ଗିଁ ରକିୟା କିନି ଉଣ୍ତିଙ୍ଗ୍‌ ତିର୍‌ କିତାମାନାନ୍‌ ।
1TH 5:10 କ୍ରିସ୍ତଦି ମାରିଡ଼େସି ୱାନିୱାଲେ ମାଡ୍‌ ଜିବନ୍‌ ମାନାଟ୍‍ ନୋ ସିଲେଟ୍‍, ୱାନି ୱାଲେ ଏଣ୍ତେସ୍‌ ମିସାନା ତେବାନାଟ୍‍, ଆୟାଉଣ୍ତିଙ୍ଗ୍‌ ୱାନ୍‌ ମା ଉଣ୍ତିଙ୍ଗ୍‌ ସାତାନ୍‌ ।
1TH 5:11 ଆର୍‌ତିଙ୍ଗ୍‌ ଇଲେଇ ଏଣ୍ତେସ୍‌ କିଜିନିଦେର୍‌, ଟିକ୍‌ ଆୟାୱାଜା ନିଜେଦିଙ୍ଗ୍‌ ନି ଆଇୱାରିଙ୍ଗ୍‌ ୱେଡ଼ିକା ନି ସାହାଜ୍ୟ କିଜିମାନ୍‌ଡ୍ରୁ ।
1TH 5:12 ଏ ତଡ଼ାନ୍‌କୁ ନି ତାଙ୍ଗିଁକି, ଆମାକାର୍‌ ମି ଲଇ ୱାନ୍‍ଜିପାଣି କିଜିନାର୍‌ ମାରି କ୍ରିସ୍ଟାନ୍‌ ଜିବନ୍‌ତୁ ମିଙ୍ଗିଁ ସାହାଜ୍ୟ କିଜିନାର୍‌ ମାରି ପ୍ରବୁଦି ନେଗିମାଟା ୱେର୍‍ସିନାର୍‍, ୱାରିଙ୍ଗ୍ ମାନାଦେଙ୍ଗ୍‌ ମାପ୍‌ ମିଙ୍ଗିଁ ବାତିଙ୍ଗ୍‌ମାଲ୍‍ଜିନାପ୍‌ ।
1TH 5:13 ମାରି, ୱାରି ପାଣି ଉଣ୍ତିଙ୍ଗ୍‌ ୱାରିଙ୍ଗ୍ ଜିବନ୍‌ତାନ୍‌ ନାଣ୍ତ ଜିବନ୍‍ନୋଦୁ । ନିଜେନିଜେଦି ୱାଲେ ସାନ୍ତିଦାନ୍‌ ତେବାଦୁ ।
1TH 5:14 ଏ ତଡ଼ାନ୍‌କୁ ନି ତାଙ୍ଗିଁକି, ମାପ୍‌ ମିଙ୍ଗିଁ ମାଡ଼ିସ୍‌ କିଜିନାପ୍‌, ଗାଡ଼୍‍ୟା ପାଣି କିଜିମାନି ଲୋକାଙ୍ଗ୍‌ ଜାଗାର୍‌ତା କିଦୁ, ତିଲାନିୱାରିଙ୍ଗ୍‌ ସାହାସ୍‍ ସିଦୁ, ବପୁସିଲିୱାରିଙ୍ଗ୍‌ ଜାତୁନ୍‍ କିଦୁ ମାରି ୱିଜେରି ଉଣ୍ତିଙ୍ଗ୍‌ ସାହାସ୍‍ ଆଦୁ ।
1TH 5:15 ଏନ୍‌ ଏନ୍ଧି ଅନ୍ୟାୟ୍‌ ବାଦ୍‌ଲୁ ଅନ୍ୟାୟ୍‌ କିମାକିନ୍‌, ମାରି ୱିଜୁଦିନ୍ ୱିଜେରି ନେଗିକା ସେସ୍ଟା କିପିନ୍‍ ।
1TH 5:16 ୱିଜୁଦିନ୍ ୱେଡ଼ିକା ଆଜି ମାନ୍‌ଡ୍ରୁ ।
1TH 5:17 ରମ୍‍ଏଣ୍ତା ପାର୍‌ତାନା କିଦୁ ।
1TH 5:18 ୱିଜୁ ଅବସ୍ତାଦୁ ଦନ୍ୟବାଦ୍‌ ସିଦୁ । କ୍ରିସ୍ତ ଜିସୁଦି ୱାଲେ ମିସାଜି ଜିଜି ମାଡ଼ିଜି, ମିମାଣୁକୁ ମାପୁରୁ ଇକାନେ ବଦା କିନାନ୍‍ ।
1TH 5:19 ପବିତ୍ରଆତ୍ମାଦିଙ୍ଗ୍‌ ବାଦାସିମାଟ୍‌ ।
1TH 5:20 ପବିତ୍ର ଆତ୍ମାଦି ବାକ୍ୟଦିଙ୍ଗ୍‌ କାଡ଼୍‍ମାଟ୍‍ ।
1TH 5:21 ୱିଜୁ ବିସୟ୍‌ତିଙ୍ଗ୍‌ ପରିକା କିଜ ସୁଡ଼୍‍ଦୁ : ଆମାକା ୱିଜୁ ସତ୍‍, ତାନିଙ୍ଗ୍‌ ମାନାଦୁ;
1TH 5:22 ୱିଜୁ ରକମ୍‍ତି ତାଗ୍‌ଇପାଣିଦାନ୍‌ ଆକତେବାଦୁ ।
1TH 5:23 ଆମା ମାପୁରୁ ମାଙ୍ଗିଁ ସାନ୍ତି ସିନାନ୍‌, ୱାନ୍‌ ମିଙ୍ଗିଁ ପୁରାପୁରି ପବିତ୍ର କିପିନ୍‌ ମାରି ମା ପ୍ରବୁ ଜିସୁ କ୍ରିସ୍ତଦି ୱାନିଦିନ୍‌ତି ସମୟ୍‌ତୁ ମି ଆତ୍ମା, ପୁଣ୍ତା, ମେନ୍ଦଲ୍‌ତିଙ୍ଗ୍ ପୁରାପୁରି ଦସ୍‌ ସିଲେଣ୍‌ଗା ଇଡ୍‌ଦୁ ।
1TH 5:24 ଏନ୍‌ ମିଙ୍ଗିଁ କୁକ୍‌ତାମାନାନ୍‌, ୱାନ୍‌ ଆକା କିନାନ୍‌, ଇରିଙ୍ଗ୍‌ ୱାନ୍‌ ବିସ୍‍ବାସ୍‍ତିକାନ୍‌ ।
1TH 5:25 ତଡ଼ାନ୍‌କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‌ ବା ପାର୍‌ତାନା କିଦୁ ।
1TH 5:26 ୱିଜୁ ବିସ୍‌ବାସ୍‌ଲୋକାଙ୍ଗ୍‌ ପବିତ୍ର ଚୁମାଦାନ୍‌ ମାଡ଼ିସ୍‍ କିଦୁ ।
1TH 5:27 ପ୍ରବୁଦିମାଣ୍‍କୁ ଅଦିକାର୍‌ ପୟ୍‌ଆୟ୍‍ ଆତିମାନି ଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ବାତିଙ୍ଗ୍‍ମାଲ୍‍ଜିନା, ୱିଜୁ ବିସ୍‌ବାସ୍‌ଲୋକା ଲାକ୍‌ତୁ ଇୟା ଆକୁ ପଡ଼ାଦୁ ।
1TH 5:28 ମା ପ୍ରବୁ ଜିସୁ କ୍ରିସ୍ତଦି ଦୟା ୱିଜେରି ସାକା ଆପିତ୍‌ ।
2TH 1:1 ପାଉଲ, ସିଲା ମାରି ତିମତି ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦିମାନୁ ମାନି ତେସଲନିକିଆ ମଣ୍ତଲି ଲାକ୍‌ତୁ ଇୟା ବଇ ରାସ୍‌ସିନା ।
2TH 1:2 ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‌ ।
2TH 1:3 ଏ ତଡ଼ାନ୍‌କୁ ନି ତାଙ୍ଗିଁକି, ମି ଉଣ୍ତିଙ୍ଗ୍‌ ମାପୁରୁଙ୍ଗ୍‍ଁ ୱିଜୁଦିନ୍ ଦନ୍ୟବାଦ୍‌ ସିନିକା ମା ଦର୍‌କାର୍‌ । ମା ତରିନ୍‌ ଇକା ଟିକ୍‌ ଇଜି ମାପ୍‌ ଅଡ଼୍‌ବିଜିନାପ୍‌, ଇରିଙ୍ଗ୍‌ ମି ବିସ୍‌ବାସ୍‌ ନାଣ୍ତ୍‌ ପିର୍‍ଜିନାତ୍‌ ମାରି ମିର୍‌ ନିଜେନିଜେଦିଙ୍ଗ୍‌ ନାଣ୍ତ୍‌ ଜିବନ୍‌ନୋଜିନିଦେର୍‌ ।
2TH 1:4 ଆଦେଙ୍ଗ୍‌ ମାପୁରୁଦି ପାର୍‍ତନାକିନି ମଣ୍ତଲିଆଙ୍ଗାଁ ମିଙ୍ଗିଁ ଅସି ମାପ୍‌ ଗାର୍ବୁ କିନାମାନାପ୍‌ । ମିର୍‌ ଏଣ୍ତେସ୍‌ ଆମା ୱିଜୁ ତାଡ଼ନା ମାରି ଦୁଃକ୍‌କାସ୍ଟୁ ସାସ୍‌ କିଜି ନିଜେଦି ବିସ୍‌ବାସ୍‌ତୁ ଇନିଙ୍ଗାଁ ଆନିଙ୍ଗାଁ ଆଏଣ୍‌ଗା ତେବାତିମାନିଦେର୍‌ । ଇୟା ମାଟା ମାଡୁ ଗର୍ବଦାନ୍‌ ୱେର୍‌ନା ମାନାପ୍‌ ।
2TH 1:5 ଇୟା ୱିଜୁମାଣାନ୍‌ ପାରାମାଣ୍‌ ଆଜିନାତ୍‍ ଜେ, ମାପୁରୁଦି ବିସାର୍‌ ଟିକ୍‍ ମାରି ମିର୍‌ ୱାନି ରାଜିଦି ଜଗ୍‍ ଆନିଦେର୍‌, ଇରିଙ୍ଗ୍‌ ଆୟା ରାଜି ଉଣ୍ତିଙ୍ଗ୍‌ ମିର୍‌ ଦୁଃକ୍‌ ବୋଗାଜିନିଦେର୍‌ ।
2TH 1:6 ଆମାକା ନ୍ୟାୟ୍‌ତିକା, ମାପୁରୁ ଆକା ପୁରା କିନାନ୍‌ । ଆମାକାର୍‌ ଇଲେଇ ମିଙ୍ଗିଁ କାସ୍ଟୁ ସିଜିନାର୍‌, ୱାର୍‌ କାସ୍ଟୁ ପୟ୍‌ନାର୍‌ ।
2TH 1:7 ମାପୁରୁ ମିଙ୍ଗିଁ ନି ମାଙ୍ଗିଁ ବା ୱିଜୁ ଦୁଃକ୍‌ ବୋଗ୍‍ତାନ୍‍ ରମିସ୍‌ କିନାନ୍‌ । ମାପୁରୁ ଇୟା ପାଣି ପୁରା କିନାନ୍‌, ନାସ୍ତିୱାଲେ ପ୍ରବୁ ଜିସୁ ୱାନି ପେରି ସାକ୍ତିଦାନ୍‌ ଦୁତ୍‌କା ୱାଲେ ମୁସ୍‌କୁପୁର୍‌ତାନ୍‌ ରେତାନାନ୍‌ ।
2TH 1:8 ଆମାକାର୍‌ ମାପୁରୁଙ୍ଗ୍‌ ନେସ୍‌ଏର୍‌ ମାରି ମା ପ୍ରବୁ ଜିସୁଦି ସୁସମାଚାର୍‌ ମାନାଏର୍‌, ଆୟା ଲୋକାଙ୍ଗ୍‌ ସାସ୍ତି ସିନି ଉଣ୍ତିଙ୍ଗ୍‌ ୱାନ୍‌ ନାସ୍ତିୱାଲେ କାସ୍‌ସିମାନି ସିସୁଦୁ ପକ୍‍ନାନ୍‌ ।
2TH 1:9 ଆୟା ଲୋକୁ ପ୍ରବୁଦି ଆଗ୍‍ଡ଼ିରାନ୍‍ ମାରି ପରାକ୍ରମ୍‌ଦି ଗୌରବ୍‌ଦାନ୍‌ ୱେର୍‌ଏ ଆଜି ୱିଜୁଦିନ୍‌ତି ଉଣ୍ତିଙ୍ଗ୍‌ ନାସ୍ଟୁ ଆନାର୍‌ ।
2TH 1:10 ମାତର୍‌ ଆୟା ନାଣ୍ତିଙ୍ଗ୍‌ ୱାନ୍‌ ୱାରି ଲୋକାମାଣୁକୁ ମାରି ୱିଜେରି ବିସ୍‌ବାସ୍‌ତି ଲୋକା ମାଣ୍‌କୁ ସନ୍‌ମାନ୍‌ ମାରି ଗୌରବ୍‍ ପୟ୍‌ନାନ୍‌ । ଇୟାୱାରି ମାଣ୍‌କୁ ମିର୍‌ ବା ମିସାନିଦେର୍‌, ଇରିଙ୍ଗ୍‌ ମାପ୍‌ ମିଙ୍ଗିଁ ଆମା କାବୁର୍‌ ସିତାମାର୍ହାପ୍‌, ଆବେନ୍‌ ମିର୍‌ ବିସ୍‌ବାସ୍‌ କିତିମାନିଦେର୍‌ ।
2TH 1:11 ଆୟାଉଣ୍ତିଙ୍ଗ୍‌ ମାପ୍‌ ୱିଜୁଦିନ୍ ମି ଉଣ୍ତିଙ୍ଗ୍‌ ପାର୍‌ତାନା କିଜିନାପ୍‌ । ମିଙ୍ଗିଁ ଆମା ଜିନି ମାଡ଼ିନି ଉଣ୍ତିଙ୍ଗ୍‌ ମାପୁରୁ ମିଙ୍ଗିଁ କୁକ୍‌ତାମାନାନ୍‌, ଆକା କିଦେଙ୍ଗ୍‌ ଇଜି ମାପ୍‌ ମାପୁରୁଙ୍ଗ୍‌ ମାଡ଼ିସ୍‌ କିଜିନାପ୍‌ । ୱାନି ସାକ୍ତିଦାନ୍‌ ୱାନ୍‌ ମି ୱିଜୁ ସତ୍‍ପାଣି ପୁରା କିଜି ମି ବିସ୍‌ବାସ୍‌ତିଙ୍ଗ୍‌ ପିରିସ୍‌କିଜି ପୁରା କିନାନ୍‌ ।
2TH 1:12 ଆର୍‌ତିଙ୍ଗ୍‌ ମା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ଦୟାଦାନ୍‌, ମିର୍‌ ମା ପ୍ରବୁ ଜିସୁଦି ଦର୍‌ତିଙ୍ଗ୍‌ ଗୌରବ୍‍ କିଦେଙ୍ଗ୍‌ ଆଟ୍‌ନିଦେର୍‌ ମାରି ମିଙ୍ଗିଁ ବା ୱାନ୍‌ ଗୌରବ୍‍ କିନାନ୍‌ ।
2TH 2:1 ଏ ତଡ଼ାନ୍‌କୁ ନି ତାଙ୍ଗିଁକି, ପ୍ରବୁ ଜିସୁ କ୍ରିସ୍ତଦି ଡ଼େସିୱାନିଦିନ୍‌ତି ବିସୟ୍‌ତାନ୍‌ ମାରି ୱାନି ଲାକ୍‌ତୁ ମାଡ୍‌ ୱିଜେରେ ଉନ୍‌ଡ୍ରେମାନୁ ଆନି ବିସୟ୍‌ତାନ୍‌ ମିଙ୍ଗିଁ ବାତିଙ୍ଗ୍‌ମାଲ୍‍ଜିନାପ୍‌ ।
2TH 2:2 ପ୍ରବୁଦି ଦିନ୍‌ ୱାତାତ୍‌ନି ଇଜି ଏମାଣାନ୍‌ ୱେନ୍‌ଞ୍ଜି ମିର୍‌ ଇନ୍‌ଙ୍ଗାଁଆନିଙ୍ଗାଁ ମାରି ବେମ୍ରି ଆମାଟ୍‌ । ମାପ୍‌ ପ୍ରଚାର୍‍ କିନିୱାଲେ ଇୟାୱାଜା ଇନି ମାଟା ୱେର୍‌ତାମାନାପ୍‌ ମାରି ଇୟା ବିସୟ୍‌ତାନ୍‌ ଇନିକା ରାସ୍‌ସି ୱେର୍‌ତାମାନାପ୍‌ ଇଜି ଏସଲୋକାଙ୍ଗ୍‌ ଏତ୍‌ ମାନାତ୍‌ ।
2TH 2:3 ଇୟାୱାଜା ୱେର୍‍ସି ମିଙ୍ଗିଁ ଏନ୍‌ ଏଣ୍ତେସ୍‌ ୱାଜାବା ବେମ୍ରି କିମାକିନ୍‌ । ମାପୁରୁଦି ବିରୁଦ୍‌ତାନ୍‌ ସାରାସାରିୱେନ୍‌କାରି ଜୁଦ୍‌ ଗଟାଇ ସାନ୍ଦି ମାରି ଆୟା ଅଦାର୍ମୁଦି ଲୋକ୍‌ ପୁରାୱେର୍‌ଇ ସାନ୍ଦି ମାରି ୱାନିଙ୍ଗ୍‌ ନର୍‌କଦି ପୋକ୍‌ଇ ସାନ୍ଦି ପ୍ରବୁଦି ଆୟା ଦିନ୍‌ ରେଏତ୍‌ ।
2TH 2:4 ଆୟା ତାଗ୍‌ଇଆତ୍ମା ଲୋକାଦି ୱାର୍‌ଗିଜିସାନିକା ୱିଜୁ ପୁଜାଦି ଦିୟାମ୍‌ ମାରି ପୁଜାସିତି ଜିନିସ୍‍ତି ବିରୁଦ୍‍ କିନାତ୍‌ ମାରି ନିଜେଦିଙ୍ଗ୍‌ ୱିଜେରିଙ୍ଗ୍‌ ମୁସ୍‌କୁ ଇଡାୟ୍‌ଆଦେଙ୍ଗ୍‌ ଆସା କିନାତ୍‌ । ଇୟାୱାଜା ଜେ ୱାନ୍‌ ମାପୁରୁଦି ମନ୍ଦିର୍‌ତୁ ବାସ୍‌ସି ନିଜେଦିଙ୍ଗ୍‌ ମାପୁରୁ ଇଜି ତରାନାତ୍‌ ।
2TH 2:5 ମିଙ୍ଗିଁ ଇନିକା ଏତ୍‌ ସିଲେତ୍‌ ? ନାନ୍‌ ମି ୱାଲେ ମାର୍‌ଇୱାଲେ ମିଙ୍ଗିଁ ଇୟାୱିଜୁ ବିସୟ୍‌ ୱେର୍‌ତାମାର୍‌ଆ ।
2TH 2:6 ଏଣ୍ତେସ୍‍ବା ଆୟା ସନିରାଉ ଇଲେଇ ଗଟାଏତ୍‌, ଇରିଙ୍ଗ୍‌ ତାନିଙ୍ଗ୍‌ ବିରୁଦ୍‍ କିଦେଙ୍ଗ୍‌ ଇଲେଇ ଉନ୍‌ଡ୍ରି ସାକ୍ତି ମାନାତ୍‌, ଆକା ଇନିକା ମିର୍‌ ନେସ୍‌ନିଦେର୍‌ ! ମାତର୍‌ ଆୟା ବେଡ଼ାଦୁ ଆୟା ତାଗ୍‌ଇଦୁବା ଇଗାୱାନାତ୍‌ ।
2TH 2:7 ଇୟାଦାପ୍ରେ ୱାନି ମାର୍‌ଗିତିମାନି ତାଗ୍‌ଇ ପାଣି କିଜିନାତ୍‌; ମାତର୍‌ ୱାନି ବିରଦ୍‌କିତି ଲୋକ୍‌ ଆକ ସଲ୍‌ଇ ସାନ୍ଦି ଆୟା ଗଟଣେଙ୍ଗ୍‌ ଗଟେଆଉ ।
2TH 2:8 ତାନେୱେନ୍‌କା ଆୟା ତାଗ୍‌ଇ ଦୁବା ଇଗାୱାନାତ୍‌; ମାତର୍‌ ଏସ୍ତିୱାଲେ ପ୍ରବୁ ଜିସୁ ୱାନାନ୍, ୱାନ୍‌ ୱାନି ୱେୟୁଦି ପୁଣ୍ତାଦାନ୍‌ ତାନିଙ୍ଗ୍‌ ଜୁଦ୍‌ କିନାନ୍‌, ମାରି ୱାନି ଜାୟ୍‌ତି ଆଗ୍‌ଡ଼ି ୱାନ୍‌ ଦଂସ୍‌ ଆନାନ୍‌ ।
2TH 2:9 ଆୟା ତାଗ୍‌ଇଦୁବା ସୟ୍‌ତାନ୍‌ତି ସାକ୍ତିଦାନ୍‌ ନାଣ୍ତ୍‌ଡାଟ୍‌ ଆଜି ୱାନାତ୍ ମାରି ନାଣ୍ତ କାବାଆନି ପାଣି କିଜି ସାଲାକି କିନାତ୍‌ ।
2TH 2:10 ଗାଦିଲୋକ୍‌ ୱାନି ମାଟା ଆସ୍‌ସି ବାୟା ଆଜି ନାସ୍ଟୁ ଆନାର୍‌ । ଆମା ସତ୍‌ତିଙ୍ଗ୍‌ ମାନାଜି ୱାନି ଉଣ୍ତିଙ୍ଗ୍‌ ମିସାଆଜିମାନି ମାଣାନ୍‌ ୱାର୍‌ ରକିୟା ପୟ୍‌ତାର୍‌ମାନ୍ଧି, ତାନିଙ୍ଗ୍‌ ମାନାଏତି ମାନିଙ୍ଗ୍‌ ୱାରି ଇୟା ଦଣ୍ତ୍‌ ଆନାତ୍‌ ।
2TH 2:11 ମାରି, ଇୟାଉଣ୍ତିଙ୍ଗ୍‌ ୱାର୍‌ ଏଣ୍ତେସ୍‌ ମିଚ୍‌ତାନ୍‌ ବିସ୍‌ବାସ୍‌ କିନାର୍‌, ଆୟାଉଣ୍ତିଙ୍ଗ୍‌ ମାପୁରୁ ୱାରି ଲାକ୍‌ତୁ ବାୟାଆନି ସାକ୍ତି ପୋକ୍‌ନାନ୍‌ ।
2TH 2:12 ଆମାକାର୍‌ ସତ୍‌ତାନ୍‌ ବିସ୍‌ବାସ୍‌ କିଏର୍‌, ମାତର୍‌ ଅଦାର୍ମୁପାଣିଦୁ ୱେଡ଼ିକା କିନାର୍‌, ୱାର୍‌ ୱିଜେରେ ଇୟାୱାଜା ବିଚାର୍‌ ଆନାର୍‌ ।
2TH 2:13 ଏ ତଡ଼ାନ୍‌କୁ ନି ତାଙ୍ଗିଁକି, ମି ଉଣ୍ତିଙ୍ଗ୍‌ ମାପୁରୁଙ୍ଗ୍‌ ୱିଜୁଦିନ୍ ଦନ୍ୟବାଦ୍‌ ସିନିକା ନେଗେତ୍‌ । ମାତର୍‌ ପ୍ରବୁ ମିଙ୍ଗିଁ ଜିବନ୍‌ନୋନାନ୍‌ । ସତ୍‌ତାନ୍‌ ମି ବିସ୍‌ବାସ୍‌ ଉଣ୍ତିଙ୍ଗ୍‌ ମାପୁରୁ ମିଙ୍ଗିଁ ପ୍ରାତୁମ୍‌ତି ୱାଜା ଆସ୍‌କିତାମାନାନ୍‌ ଏଣ୍ତେସ୍‌ ପବିତ୍ରଆତ୍ମାଦି ସାକ୍ତିଦାନ୍‌ ମିର୍‌ ରକ୍‌ୟା ପୟ୍‌ନିଦେର୍‌ ମାରି ଉନ୍‌ଡ୍ରି ପବିତ୍ର କୁଟୁମ୍‌ ଆନାତ୍‌ ।
2TH 2:14 ମି ଲାକ୍‌ତୁ ମାପ୍‌ ଆମା ସୁସମାଚାର୍‌ ପ୍ରଚାର୍‍ କିତାମାନାପ୍‌, ୱାନି ମାଣାନ୍‌ ମାପୁରୁ ମିଙ୍ଗିଁ ଇୟାଉଣ୍ତିଙ୍ଗ୍‌ କୁକ୍‌ତାମାନାନ୍‌ । ମା ପ୍ରବୁ ଜିସୁ କ୍ରିସ୍ତଦି ଗୌରବ୍‌ଦୁ ମିସାକିନି ଉଣ୍ତିଙ୍ଗ୍‌ ୱାନ୍‌ ମିଙ୍ଗିଁ କୁକ୍‌ତାମାନାନ୍‌ ।
2TH 2:15 ଏ ତଡ଼ାନ୍‌କୁ ନି ତାଙ୍ଗିଁକି, ମା ପ୍ରଚାର୍‍ ମାରି ମା ବଇଦୁ ମାପ୍‌ ମି ଲାକ୍‌ତୁ ଆମା ସତ୍‍ ୱେର୍‌ତା ମାନାପ୍‌, ତାନିଙ୍ଗ୍‌ ଡାଟ୍‌ତାନ୍‌ ଆସ୍‌ସ ଇଡ୍‌ଦୁ; ଆବେନ୍‌ ତିଲାଏଣ୍‌ଗା ମାନ୍‌ଡ୍ରୁ ।
2TH 2:16 ମା ପ୍ରବୁ ଜିସୁ କ୍ରିସ୍ତ ନିଜେ ମାରି ମା ଆମା ବୁବା ମାପୁରୁ ମାଙ୍ଗିଁ ଜିବନ୍‌ନୋଜି ଦୟାଦାନ୍‌ ମାଙ୍ଗିଁ ଡାଟ୍‌ତି ସାସ୍‌ ମାରି ନେଗି ଆସା ସିତାମାନାନ୍‌ ।
2TH 2:17 ୱାନ୍‌ ମି ଜିବନ୍‌ତିଙ୍ଗ୍‌ ୱିଜୁଦିନ୍ ସତ୍‍ ପାଣି କିଦେଙ୍ଗ୍‌ ମାରି ସତ୍‍ ବାକ୍ୟ ୱେର୍‍ତେଙ୍ଗ୍‍ ପୋକ୍‌ସି ମାରି ବପୁ ସିପିନ୍‌ ।
2TH 3:1 ସାରାସାରିୱେନ୍‌କା, ଏ ତଡ଼ାନ୍‌କୁ ନି ତାଙ୍ଗିଁକି, ମା ଉଣ୍ତିଙ୍ଗ୍‌ ପାର୍‌ତାନା କିଦୁ, ଏଣ୍ତେସ୍‌ ପ୍ରବୁଦି ବାକ୍ୟ ଦାପ୍ରେ ୱେଙ୍ଗିଁତା ମାର୍ହାତ୍‌, ଆକା ଏଣ୍ତେସ୍‌ ମି ଲୋଇ ଆୟାୱାଜା ଦନ୍ୟବାଦ ଲାବ୍‌ କିନାତ୍‌ ।
2TH 3:2 ମାରି ବା ପାର୍‌ତାନା କିଦୁ, ମାପୁରୁ ଏଣ୍ତେସ୍‌ ମାଙ୍ଗିଁ ତାଗ୍‌ଇଲୋକୁ ମାରି ସୁରି ଲୋକାମାଣାନ୍‍କୁ ରକିୟା କିନାନ୍‌, ଇରିଙ୍ଗ୍‌ ୱିଜେରେ ସୁସମାଚାର୍‌ତୁ ବିସ୍‌ବାସ୍‌ କିଏର୍‌ ।
2TH 3:3 ମାତର୍‌ ପ୍ରବୁ ବିସ୍‌ବାସ୍‌ତିକାନ୍‌ ! ୱାନ୍‌ ମିଙ୍ଗିଁ ସାକ୍ତି କିନାନ୍‌ ମାରି ତାଗ୍‌ଇ ଆତ୍ମାଦାନ୍‌ ରକ୍‌ୟା କିନାନ୍‌ ।
2TH 3:4 ମି ମୁସ୍‌କୁ ଆସା ଇଡ୍‌ଦେଙ୍ଗ୍‌ ପ୍ରବୁ ମାଙ୍ଗିଁ ଆସା ସିତାମାନାନ୍‌ ମାରି ମାପ୍‌ ଆମାକା ୱେର୍‌ସିନାପ୍‌, ଆକା ମିର୍‌ ଜେ କିଜିନିଦେର୍‌ ମାରି କିଜିମାନିଦେର୍‌, ଇୟା ବିସୟ୍‌ତାନ୍‌ ମାପ୍‌ ଜେ ନେସ୍‌ନାପ୍‌ ।
2TH 3:5 ମାପୁରୁଦି ଜିବନ୍‌ନୋନିକା ମାରି କ୍ରିସ୍ତସିତିମାନି ସାସ୍‌ଆସ୍‌ନି ନାଣ୍ତଦାନ୍‌ ନାଣ୍ତ୍‌ ନେସ୍‌ନି ଉଣ୍ତିଙ୍ଗ୍‌ ପ୍ରବୁ ମିଙ୍ଗିଁ ସାକା ଆପିନ୍‌ ।
2TH 3:6 ଏ ତଡ଼ାନ୍‌କୁ ନି ତାଙ୍ଗିଁକି, ଆମାକାର୍‌ ଗାଡ଼ିଆ ଜିବନ୍‌ତାନ୍‌ ଜିଜିନାନ୍‌ ମାରି ମା ମାଣ୍‌କୁ ପୟ୍‌ତି ସିକିୟା ଇସାବ୍‌ତାନ୍‌ ପାଣି କିଏନ୍‌; ପ୍ରବୁ ଜିସୁ କ୍ରିସ୍ତଦି ଦର୍‌ତାନ୍‌ ମିଙ୍ଗିଁ ଇୟା ମାଟା ୱେର୍‌ସିନାପ୍‌, ଆୟା ତଡ଼ାନ୍‌କାମାଣୁକୁ ଆକ ମାନ୍‌ଡ୍ରୁ ।
2TH 3:7 ଏଣ୍ତେସ୍‌ବା ମିର୍‌ ନେସ୍‌ତିମାନିଦେର୍‌, ମି ପାଣିକିତି ୱେନ୍‌କା ମାଙ୍ଗିଁ ଏତ୍‌ କିନିକା ମାନାତ୍‌ । ମି ୱାଲେ ତେବାତିମାର୍‌ଇ ୱାଲେ ମାପ୍‌ ଗାଡ଼ିଆ ଆଏପ୍‌ ମାର୍ହାପ୍‌ ।
2TH 3:8 ମାରି ଇନିକା ସିଲେଣେଗା ମାପ୍‌ ଏମାଣାନ୍‌ ଜାୱା ଉଣୁଏପ୍‌ ମାର୍ହାପ୍‌, ମାରି ଏ ମୁସ୍‌କୁ ବୋଜୁ ଆଇ ଉଣ୍ତିଙ୍ଗ୍‌ ମାପ୍‌ କାସ୍ଟୁ ପୟ୍‌ଜି ୱେଡ଼େନାଡ଼ା ପାଣି କିତାମାର୍ହାପ୍‌ ।
2TH 3:9 ମିମାଣୁକୁ ଇନିକା ଲସ୍‌ତେଙ୍ଗ୍‌ ଜେ ମା ଅଦିକାର୍‌ ସିଲେତ୍‌, ଆକା ସିଲେ, ମାତର୍‌ ଏଣ୍ତେସ୍‌ ମିର୍‌ ମାଙ୍ଗିଁ ଏତ୍‌ କିଦୁ; ଇୟାଉଣ୍ତିଙ୍ଗ୍‌ ମାପ୍‌ ମି ଲାକ୍‌ତୁ ନିଜେ ନିଜେଦିଙ୍ଗ୍‌ ନେଗିକାନ୍‌ ୱାଜା ତର୍‌ତେଙ୍ଗ୍‍ଁ ଇଜି ଆୟାୱାଜା କିତାପ୍‌ ।
2TH 3:10 ମି ୱାଲେ ମାର୍‌ଇବେଡ଼ାଦୁ ମାପ୍‌ ମିଙ୍ଗିଁ ୱେର୍‌ତାମାର୍ହାପ୍‌, “ଆମା ଲୋକ୍‌ ପାଣି କିଦେଙ୍ଗ୍‌ ବଦା କିଏନ୍‌, ୱାନ୍‌ ଉଣୁମାକିନ୍‌ ।”
2TH 3:11 ଇୟା ମାଟା ମାରି ୱେର୍‌ସିନାପ୍‌, ଇରିଙ୍ଗ୍‌ ମାପ୍‌ କାବୁର୍‌ ୱେର୍‌ଆମାନାପ୍‌ ଜେ, ମି ଲୋଇରାନ୍‌ ଏସଲୋକ୍‌ ଗାଡ଼ିଆ ଜିବନ୍‌ତାନ୍‌ ଜିଜିନାର୍‌ ମାରି ଆଇ ଲୋକା ପାଣିଦୁ ଆର୍‍ଏ ତେବାନିକା ଡ଼ିସ୍‌ସି ଆଇକା ଇନିକା କିଏର୍‌ ।
2TH 3:12 ପ୍ରବୁ ଜିସୁ କ୍ରିସ୍ତଦି ଦର୍‌ତାନ୍‌ ମାପ୍‌ ଆୟା ଲୋକାଙ୍ଗ୍‌ ଜାଗାର୍‌ତା କିଜି ଆଦେସ୍‌ ସିଜିନାପ୍‌, ୱାରି ଜିବନ୍‌ତୁ ମାରି ଅଡ଼ପ୍‍ ସେତା ଆଜି ନିଜେଦି ଜିନିକା ତିଆର୍‌ କିଦୁ ।
2TH 3:13 ମାତର୍‌ ତଡ଼ାନ୍‌କୁ ନି ତାଙ୍ଗିଁକି, ମିର୍‌ ନେଗିପାଣି କିଦେଙ୍ଗ୍‌ ୱାନ୍ଦ୍‍ମାଟ୍‌ ।
2TH 3:14 ଇୟା ଆକୁଦୁ ମିଙ୍ଗିଁ ଆମାକାବୁରୁ ପୋକ୍‌ତାଜିନାପ୍‌, ଆତିଙ୍ଗ୍‌ ମି ଲୋଇରାନ୍ ଏନ୍‌ ଆକା ମାନାଦେ‍ଙ୍ଗ୍ ବଦା କିଏନ୍‌ । ଆୟାୱାଜା ଲୋକ୍‌ତିଙ୍ଗ୍‍ ଚିନିସ୍‌କିଜ ଇଡ୍‍ଦୁ ମାରି ୱାନି ୱାଲେ ମି ମିସାବିଡ଼ା ଡ଼ିସ୍‍ସସିଦୁ । ଆର୍‌ତିଙ୍ଗ୍‌, ୱାନ୍‌ ସେମାର୍ ଆନାନ୍‌ ।
2TH 3:15 ମାତର୍‌ ୱାନି ଉଣ୍ତିଙ୍ଗ୍‌ ସାତ୍ରୁ ଇଜି ଅଡ଼ବିମାଟ୍, ତଡ଼ାନ୍‌ ୱାଜା ୱାନିଙ୍ଗ୍‌ ଜାଗାର୍‌ତା କିଦୁ ।
2TH 3:16 ଆମା ପ୍ରବୁ ମା ସାନ୍ତି ସିନାନ୍‍, ୱାନ୍‌ ମିଙ୍ଗିଁ ୱିଜୁଦିନ୍ ସାନ୍ତି ସିପିନ୍‌ । ପ୍ରବୁ ମି ୱିଜେରି ଲାକ୍‌ତୁ ମାନିନ୍ ।
2TH 3:17 ନାନ୍‌ ନିଜେଦି କିୟୁଦାନ୍‌ ଇକା ରାସ୍‌ସିନା “ପାଉଲଦିମାଣାନ୍‌ ମାଡ଼ିସ୍‍କିନିକା” ନା ୱିଜୁ ଆକୁଦୁ ଇକା ସିନାଦି ୱାଜା, ନାନ୍‌ ଇୟାୱାଜା ରାସ୍‌ନା ।
2TH 3:18 ମା ପ୍ରବୁ ଜିସୁ କ୍ରିସ୍ତଦି ଦୟା ମିର୍‌ ୱିଜିଦେର୍‌ ଜିବନ୍‌ତୁ ଅଡ଼୍‌ବିଦୁ ।
1TI 1:1 ନାନୁ ପାଉଲ, ମା ରକିୟାକର୍ତ୍ତା ମାପୁରୁ ମାରି ଆସାଦିମୁଣ୍ତା କ୍ରିସ୍ତ ଜିସୁଦି ମାଟା ଇସାବ୍‌ତାନ୍‌ କ୍ରିସ୍ତ ଜିସୁଦି ଅରେନ୍‌ ପୋକ୍‌ତିମାନି ସିସୁ,
1TI 1:2 ୱାନି ଦାର୍ମୁମାରିସି ତିମତିଦି ଲାକ୍‌ତୁ ରାସ୍‌ତିମାନି ଆକୁ : ବୁବା ମାପୁରୁ ମାରି ମା ପ୍ରବୁ କ୍ରିସ୍ତ ଜିସୁଦିମାଣାନ୍‌ ଦୟା, ସାକା ମାରି ସାନ୍ତି ମି ଉଣ୍ତିଙ୍ଗ୍‌ ଆପିତ୍‌ ।
1TI 1:3 ନାନ୍‌ ମାସିଦୋନିଆଦୁ ସନିୱାଲେ ମିଙ୍ଗିଁ ୱେର୍‌ତିମାର୍‌ଇ ଇସାବ୍‌ତାନ୍‌ ମିର୍‌ ଏପିସ୍‌ତୁ ମାନ୍‌ଡ୍ରୁ । ଆବେନୁ ଆମାକାର୍‌ ତାଗ୍‌ଇ ସିକିୟା ୱିଜୁ ସିଜିନାର୍‌, ୱାରିଙ୍ଗ୍‌ ଆବେଟ୍‌ତାନ୍‌ ସୁପ୍‌ ଆଦେଙ୍ଗ୍‌ ଇଜି ଆଦେସ୍‌ ସିଦୁ ।
1TI 1:4 ୱାର୍‌ ପୁର୍ବେଦି କାତେଙ୍ଗ୍‌ ନି ପୁର୍ବେଦିଡକ୍‌ରାଦାଦାରି ନିର୍‍ଇ ଦାଡ଼ି ତିଆର୍‌ କିଜିନାର୍‌ । ଆୟାୱିଜୁ ଡ଼ିସ୍‌ତେଙ୍ଗ୍‌ ୱାରିଙ୍ଗ୍‌ ସିକିୟା ସିଦୁ, ଇରିଙ୍ଗ୍‌ ଆକା କେବଲ୍‌ ତାଗ୍‌ଇ ମାଟେଙ୍ଗ୍‌ ସପ୍‌ନାତ୍‌ । ଆମା ନେଗି ବିସ୍‌ବାସ୍‌ତୁ ମାପୁରୁଦି ବଦା ନେସ୍‌ତେଙ୍ଗ୍‌ ଆନାତ୍‌, ଇୟାୱିଜୁ ତାନିଙ୍ଗ୍‌ ବାଦା କିନାତ୍‌ ।
1TI 1:5 ନେଗି ଜିବନ୍‌, ନେଗି ବୁଦି ମାରି ସତ୍‍ ବିସ୍‌ବାସ୍‌ତାନ୍‌ ଆମା ଜିବନ୍‌ନୋନିକା ସନାତ୍‌, ତାନିଙ୍ଗ୍‌ ଜାଗାର୍‌ତା କିନି ଉଣ୍ତିଙ୍ଗ୍‌ ନେରୁ ନାନ୍‌ ଇୟା ଆଦେସ୍‌ ସିଜିନା ।
1TI 1:6 ଏସ ଲୋକୁ ଇୟା ମୁକିୟ ବିସୟ୍‌ଆଙ୍ଗ୍‌ ବାଣାଜି ସୋଲ୍‌ସି ପୁକା ମାଟେଙ୍ଗ୍‌ ଆସ୍‌ସି ସାରିବାଣାତା ମାନାର୍‌ ।
1TI 1:7 ୱାର୍‍ ଦାର୍ମୁଗୁରୁ ଆଜି ମାପୁରୁଦି ବିଦି ନିୟମ୍‌ ୱେର୍‌ତେଙ୍ଗ୍‌ ୱାର୍‌ ଆସାଆନାର୍‌, ମାତର୍‌ ନିଜେଦି ସିକିୟାଦି ଅରତ୍‌ ୱାର୍‌ ବୁଜାଦେଙ୍ଗ୍‌ ଆଟ୍‍ଏର୍‍; ଆମା ୱିଜୁ ବିସୟ୍‌ତାନ୍‌ ସତ୍‌ତାନ୍‌ ନିଜେଦି ମାଟା ୱେର୍‌ନାର୍‌, ଆକା ସତ୍‌ତାନ୍‌ ଇନିକା, ୱାର୍‌ ନେସ୍‌ଏର୍‌ ।
1TI 1:8 ମାଡ୍ ନେସ୍‌ନାଟ୍ ଜେ, ନିୟମ୍‌ ନେଗେନ୍‌ତାନ୍‌ ମାନାଦେଙ୍ଗ୍‌ ଆଟ୍‌ତିଙ୍ଗ୍‌, ଆକା ନେଗିକା ।
1TI 1:9 ମାତର୍‌ ମନେ ଇଡ୍‌ଦେଙ୍ଗ୍‌ ଆନାତ୍‌, ଇୟା ନିୟମ୍‌ ଦାର୍ମୁଦି ଲୋକା ଉଣ୍ତିଙ୍ଗ୍‌ ଆଏତ୍‌ । ନିୟମ୍‌ତିଙ୍ଗ୍‌ ମାନାଇ ପାପିଦିଲୋକା ଉଣ୍ତିଙ୍ଗ୍‌ ଆକା ତିଆର୍‌ ଆତାମାନାତ୍‌ । ଆମାକାର୍‌ ତାଗ୍‌ଇକାର୍‌, ଆମାୱାରିଙ୍ଗ୍‌ ମାପୁରୁଙ୍ଗ୍‌ ତିୟେଲ୍‌ ସିଲେ, ଆମାକାର୍‌ ପାପ୍‌ ତାଗ୍‍ଇପାଣିଦୁ ମିସାତାମାନାର୍‌, ଆମାୱାରିଙ୍ଗ୍‌ ଦାର୍ମୁ ନି ସାନ୍ତିଜିବନ୍‍ ସିଲେତ୍‌, ଆମାକାର୍‌ ବୁବାୟାୟ୍‌ଙ୍ଗେ ସାୟାମାର୍‌ଗାଡାକ୍‌ତେଙ୍ଗ୍‌ ତିୟେଲ୍‌ ଆଏର୍‌; ଲୋକାଙ୍ଗ୍‌ ସାୟାମାର୍‌ଗାଡାକ୍‌ନିକା,
1TI 1:10 ଲାଲାୟ୍‍ଆନି, ଲୋକାଙ୍ଗ୍‌ ଡଙ୍ଗାଁକିନିକାର୍‍ ମାରି ମିଚ୍‌ ମାଟା ୱେର୍‌ତେଙ୍ଗ୍‌ ଆମାକାର୍‌ ଅବ୍ୟାସ୍‌, ମିଚ୍‍ ସାକି ସିନାର୍‍ ଆମାକାର୍‌ ୱିଜୁ ସତ୍‌ସିକିୟାଦୁ ବିରୁଦ୍‌ କିନାର୍‌, ୱାରି ଉଣ୍ତିଙ୍ଗ୍‌ ନିୟମ୍‌ ନେଗିକା ।
1TI 1:11 ଗୌରବ୍‌ମୟ୍‌ ଦନ୍ୟ ମାପୁରୁଦି ନେଗି କାବୁର୍‌ ପ୍ରଚାର୍‌ କିନି ଦାଇତ୍‌ ନା ମୁସ୍‌କୁ ସିଆୟ୍‌ଆତା ମାନାତ୍‌ ।
1TI 1:12 ନା ଦାଇତ୍‌ କିଦେଙ୍ଗ୍‌ ନାଙ୍ଗିଁ ଦୟା କିତିମାନିଙ୍ଗ୍‌ ମା ପ୍ରବୁ ଜିସୁ କ୍ରିସ୍ତଙ୍ଗ୍‌ ଦନ୍ୟବାଦ୍‌ ସିଜିନା । ପୁର୍ବେ ନାନ୍‌ ୱାନିଙ୍ଗ୍‌ ନିନ୍ଦା କିଜିମାର୍‌ଆ, ୱାନିଙ୍ଗ୍‌ କାସ୍ଟୁ ନି ଅପ୍‌ମାନ୍‌ ସିଜିମାର୍ହା । ମାରିବା ୱାନ୍‌ ନାଙ୍ଗିଁ ବିସ୍‌ବାସ୍‌ ବୁଦି କିଜି ୱାନି ସେବା ଉଣ୍ତିଙ୍ଗ୍‌ ଆସ୍‌କିତାମାନାନ୍‌ ।
1TI 1:13 ମାରିବା ନାନ୍‌ ପୁର୍ବେ ନିନ୍ଦା, କାସ୍ଟୁସିନିକା ମାରି ଲୋକାଙ୍ଗ୍‌ ସାୟାମାର୍‌ଗାଡାକ୍‌ନିକାନ୍‌ ମାର୍ହା; ମାତର୍‌ ନାନ୍‌ ବିସ୍‍ବାସ୍‍ କିଇ ଉଣ୍ତିଙ୍ଗ୍‌ ନେସ୍‌ଏଣ୍‌ଗା ଆକା ୱିଜୁ କିତାମାର୍ହା, କେମା କିଜି ମାପୁରୁ ନା ଉଣ୍ତିଙ୍ଗ୍‌ ସାକା ଆତାମାନାନ୍‌ ।
1TI 1:14 ମାରି, ମା ପ୍ରବୁ ଜିସୁ ମାରି ଦୟା କ୍ରିସ୍ତ ଜିସୁଦି ୱାଲେ ମିସାଜି ବିସ୍‌ବାସ୍‌ ମାରି ଜିବନ୍‌ନୋନିକା ଆୟାୱାଜା ନା ଉଣ୍ତିଙ୍ଗ୍‌ ଅଦିକ୍‌ ନାଣ୍ତ୍‌ ଆତାତ୍‌ ।
1TI 1:15 ପାପି ଲୋକାଙ୍ଗ୍‌ ରକିୟା କିନି ଉଣ୍ତିଙ୍ଗ୍‌ କ୍ରିସ୍ତ ଜିସୁ ଜଗତ୍‌ଦୁ ୱାତାନ୍‌, ଇକା ଉନ୍‌ଡ୍ରି ପୁରା ସତ୍‌ ଇୟା ବାକ୍ୟ ବିସ୍‌ବାସ୍‌ ମାରି ୱିଜେରେ ମାନାନାର୍‌; ଆୟା ପାପି ଲୋକା ଲୋଇରାନ୍‌ ନାନ୍‌ ୱିଜେରିମାଣୁକୁ ପେରିକାନ୍‌ ।
1TI 1:16 ମାତର୍‌ ନା ୱାଜା ଉନ୍‌ଡ୍ରି ପାପି ଉଣ୍ତିଙ୍ଗ୍‌ ବା ମାପୁରୁଦି ଦୟା ମାରି କ୍ରିସ୍ତ ଜିସୁଦି ସାକା ନାଙ୍ଗିଁ ଉନ୍‌ଡ୍ରି କାତା କିଜି ଇଟ୍‌ତାମାନାତ୍‌ ଆଇକାର୍‌ ଏଣ୍ତେସ୍‌ ଜିସୁଦିମାନୁ ବିସ୍‌ବାସ୍‌ ତିଆର୍‌ କିଜି ଏସ୍‌କାଙ୍ଗ୍‌ୱିଜିଇ ଜିବନ୍‌ ପୟ୍‌ନାନ୍‌ ।
1TI 1:17 ୱିଜୁ ଦୁନିଆଦି ତରାଇ, ୱିଜ୍‌ଇ, ୱିଜୁଦିନ୍‍ତି ରାଜା ଅରେନ୍‌ ମାପୁରୁ ଜେ, ୱାନି ସମ୍ଭ୍ରମ ଗୌରବ୍‍ ଜୁଗ୍‌ ଜୁଗ୍‌ ଆପିତ୍‌ ! ଆମେନ୍‍ ।
1TI 1:18 ଏ କଡ଼ ତିମତି, ମି ବିସୟ୍‌ତାନ୍‌ ଆଗ୍‌ଡ଼ି ରାସ୍‌ତିମାନି ୱିଜୁ ବାବବାଣି ଇସାବ୍‌ତାନ୍‌ ନାନ୍‌ ନିଙ୍ଗିଁ ଇୟା ମାଟା ୱେର୍‌ସିନା, ଏଣ୍ତେସ୍‌ ନିନୁ ଆୟାୱିଜୁ ବାବବାଣି ସାହାଜ୍ୟଦାନ୍‌ ନେଗେନ୍‌ତାନ୍‌ ଜୁଦ୍‌ କିଦେଙ୍ଗ୍‌ ଆଟ୍‌ନିଦେର୍‌;
1TI 1:19 ବିସ୍‌ବାସ୍‌ ମାରି ନେଗି ବୁଦି ଆସ୍‌ସୋ ଇଡିଆ; ଆକା ଡ଼ିସ୍‌ତାର୍‍ଆକା ଏସଲୋକାଙ୍ଗ୍‌ ଦାର୍ମୁ ବିସ୍‌ବାସ୍‌ ରୁଙ୍ଗିଁତା ସର୍ହାତ୍‌ ।
1TI 1:20 ୱାରି ମାଣ୍‌କୁ ହୁମନାୟ ମାରି ଆଲେକ୍‍ଜାଣ୍ତର୍‍ ଆଇକାର୍‌; ଇୟାକାର୍‌ ଏଣ୍ତେସ୍‌ ସାସନ୍ ପୟ୍‌ଆୟ୍‌ ମାପୁରୁଙ୍ଗ୍‌ ନିନ୍ଦା କିଏର୍‌, ଇୟାଉଣ୍ତିଙ୍ଗ୍‌ ନାନ୍‌ ୱେରିଙ୍ଗ୍‌ ସୟ୍‌ତାନ୍‌ କିୟୁଦୁ ସର୍‌ପେ କିତା ।
1TI 2:1 ନାନ୍‍ ପାର୍‍ତୁମ୍‍ ଅନୁରୋଦ କିଜିନା, ପାର୍‍ତନା କିନିୱାଲେ, ୱିଜେରେ ଉଣ୍ତିଙ୍ଗ୍‍ ମାପୁରୁମାନୁ ପାର୍‍ତନା କିଦୁ, ମାଡ଼ିସ୍‍କିଦୁ ମାରି ଦନ୍ୟବାଦ୍‌ ସିଦୁ ।
1TI 2:2 ଇୟାୱାଜା ଆଇ ସାସନ୍‌କିନିୱାରିଙ୍ଗ୍‍ ମାରି ରାଜାରିଙ୍ଗ୍‍ ପାର୍‍ତନା କିଦୁ, ଏଣ୍ତେସ୍‍ ମାପୁରୁଦି ବକ୍ତିଦାନ୍‍ ସାନ୍ତିଦାନ୍‍ ତେବାନିକା ମାରି ଆଇୱାରି ଉଣ୍ତିଙ୍ଗ୍‌ ନେଗେନ୍‍ତାନ ୱେଡ଼ିକାଦାନ୍‍ ଜିନିକା
1TI 2:3 ଇୟାନାନି ପାର୍‍ତନା ରକିୟା କିନି ମାପୁରୁ ଆଗ୍‍ଡ଼ି ଟିକ୍‍ ନି ଜଗ୍‌ ।
1TI 2:4 ୱିଜେରେ ଏଣ୍ତେସ୍‌ ରକିୟା ମାରି ସତ୍‌ ବିସୟ୍‌ତାନ୍‌ ଜ୍ଞାନ୍‌ ପୟ୍‌ନାର୍‌, ୱାନ୍‌ ଇକା ବଦା କିନାନ୍‌ ।
1TI 2:5 ଇରିଙ୍ଗ୍‌ ଅରେନ୍‌ମାତର୍‌ ମାପୁରୁ ମାନାନ୍‌, ମାରି ମାପୁରୁ ମାରି ଲୋକା ଲଇ ଅରେନ୍‌ମାତର୍‌ ନାଡ଼୍‌ମି ମାନାନ୍‌, ୱାନ୍‌ କ୍ରିସ୍ତ ଜିସୁ, ଅରେନ୍‌ ଲୋକ୍‌;
1TI 2:6 ୱାନ୍‌ ୱିଜେରିଙ୍ଗ୍‌ ମୁକୁଡ଼ାକିନି ଉଣ୍ତିଙ୍ଗ୍‌ ନିଜେଦିଙ୍ଗ୍‌ ଦାନ୍‌ ସିଜି ଇବେଣାନ୍‍ ଟିକ୍‍ ୱେଡ଼ାଦୁ ପାର୍‌ମାଣ୍‌ ଆତାମାନାତ୍‌ ଜେ, ମାପୁରୁ ୱିଜୁ ଲୋକାଙ୍ଗ୍‌ ସାକ୍ୟ ସିଦେଙ୍ଗ୍‌ ଇଚ୍ଛା କିନାନ୍‌ ।
1TI 2:7 ଆୟା ସତ୍‌ ମାରି ବିସ୍‌ବାସ୍‌ତି କାବୁର୍‌ ଅଣଜିହୁଦିରି ଲାକ୍‌ତୁ ୱେର୍‌ତେଙ୍ଗ୍‌ ନାନ୍‌ ଅରେନ୍‌ ସିସୁ ମାରି ଗୁରୁ ୱାଜା ୱାତା ମାନା । ନାନ୍‌ ମିଚ୍‌ ୱେର୍‌ଏ, ଆମାକା ୱେର୍‌ସିନା, ଆକା ୱିଜୁ ପୁରା ସତ୍‌ ।
1TI 2:8 ପାର୍‍ତନାଦୁ ମାପୁରୁଦି ଦାର୍ମୁ ଲୋକୁ କିୟୁ ମୁସ୍‌କୁ ପେର୍‌ଜି ରିସା ନି ସୁରିୱାର୍‍ଗିଏନ୍‍ଣ୍ତା ପାର୍‌ତାନା କିପିର୍‍ ।
1TI 2:9 ଆଇମେକାଙ୍ଗ୍‍ଁ ନା ଅନୁରଦ୍‌, ୱାକୁ ଜାତୁନ୍‍ ଆପିୱି । ନାଣ୍ତ୍‌ଦାରାଦି ୱାତିଗନ୍ଦା ଆରାନିକା, କୁକୁଟି ରଙ୍ଗ୍‍ ଉସାଏନଣ୍ତା ମାରି ବାଙ୍ଗାଁରାମ୍‍ତାନ୍‌ ନିଜେଦିଙ୍ଗ୍‌ ତିଆର୍‌ଆଏଣ୍‌ଗା,
1TI 2:10 ଆଇମେକ୍‍ ସତ୍‍ ପାଣିଦାନ୍‌ ନିଜେଦି ଦାର୍ମୁବିସୟ୍‌ତି ତରିୱି ।
1TI 2:11 ଆଇମେକ୍‍ ତିର୍‌ଆଜ ନେଗେନ୍‌ତାନ୍‌ ସିକିୟା ମାନାନିକା ମାନାତ୍‌ ।
1TI 2:12 ଉପଦେସ୍‌ ସିନିକା ମାରି ଲୋକାଦି ମୁସ୍‌କୁ ସାସନ୍‌ କିନି ଉଣ୍ତିଙ୍ଗ୍ ଅଦିକାର୍‌ ନାନ୍‌ ଆଇମେକାଙ୍ଗ୍‍ଁ ସିଏ । ୱାକୁ ତିର୍‌ଆଜ ମାନିୱି ।
1TI 2:13 ଇରିଙ୍ଗ୍‌ ଆଦମ୍‌ ପୁର୍ବେ ତିଆର୍‌ ଆତାମାର୍ହାନ୍‌; ତାନେୱେନ୍‌କା ହବାଦି ତିଆର୍‌ କିତାନ୍,
1TI 2:14 ମାରି ଆଗ୍‌ଡ଼ି ଆଦମ ଲାଲାୟ୍‍ ଆଇତିମାରିଙ୍ଗ୍‌, ଆଇମାନୁ ଲାଲାୟ୍‍ଆଜି ପାପ୍‌ କିଜି ମାପୁରୁଦି ମାଟା ମାନାଏତାତ୍‌ ।
1TI 2:15 ମାତର୍‌ ୱାକୁ ନେଗି ବୁଦିଦାନ୍‌ ବିସ୍‌ବାସ୍‌, ଜିବନ୍‌ନୋନିକା ମାରି ପବିତ୍ରଦାନ୍‌ ତିର୍‌ ତେବାତିଙ୍ଗ୍‌, ୱାଦ୍‌ କଡ଼ ଜନମ୍‌ କିନି ମାଣୁକୁ ରକିୟା ପୟ୍‌ନାତ୍‌ ।
1TI 3:1 ଇୟା ମାଟା ସତ୍‌, ପାର୍‌ତନା କିନି ମଣ୍ତ୍‌ଲିଦୁ ନେତା ଆନି ଉଣ୍ତିଙ୍ଗ୍‌ ଆମା ଲୋକ୍‌ ବଦା କିନାନ୍‌, ୱାନ୍‌ ସତ୍‌ ଉଣ୍ତ୍ରି ନେଗି ପାଣି କିଦେଙ୍ଗ୍‌ ବଦା କିନାନ୍‍ ।
1TI 3:2 ମାତର୍‌ ମଣ୍ତ୍‌ଲିଦିଙ୍ଗ୍‌ ସୁଡ଼ୁନିକାନ୍‌ ଇନିଦୋସ୍‌ସିଲି ଲୋକୁ ଆନିକାମାନାତ୍‌, ଅରେତ୍‍ ଆଇମାଦି କନ୍‍ଲି, ମିଚ୍‌ ଇନ୍‍ଇକା, ନେଗିବୁଦି ମାରି ସେବାକିନିକା ଆନି ଦର୍‌କାର୍‌ । ୱାନ୍‌ କୁଡ଼ାଆଙ୍ଗ୍‌ ସନ୍‌ମାନ୍‌କିନିକା ଆନିମାନିକା ମାରି ସିକିୟାଦାନ୍‌ କିଦେଙ୍ଗ୍‌ ୱାନି ବପୁ ମାନିକାମାନାତ୍‌ ।
1TI 3:3 ୱାନ୍‌ କାଡ଼ୁଉଣିକାନ୍‌ ନି ରିସାଦି ଲୋକ୍‌ ଆଇକା ମାନାତ୍‍, ତିର୍‌ ମାରି ସାନ୍ତିଦି ଲୋକ୍‍ ଆନିକା ମାନାତ୍‍ । ୱାନ୍‍ ଦନ୍‌ତିଙ୍ଗ୍‌ ଆସାଇକା ମାନାତ୍‍ ।
1TI 3:4 ନିଜେଦି ଇଲୁପରିବାର୍‌ତିଙ୍ଗ୍‌ ୱାନ୍‌ ନେଗେନ୍‌ତାନ୍‌ ସାଲାକିଦେଙ୍ଗ୍‌ ଆଟ୍‌ସିମାନାନ୍‌ ମାରି ୱାନିଙ୍ଗ୍‌ ସନ୍‌ମାନ୍‌ ସିଜି ୱାନି ରାଜି ଆନି ଉଣ୍ତିଙ୍ଗ୍‌ ୱାନି କଡ଼ର୍‌ ସିକିୟା ସିନାନ୍‍ ।
1TI 3:5 ଆମା ଲୋକ୍‌ ନିଜେଦି ଇଲୁପରିବାର୍‌ତିଙ୍ଗ୍‌ ସାଲାକିଦେଙ୍ଗ୍‌ ଆଟ୍‌ଏନ୍‌, ୱାନ୍‌ ମାପୁରୁଦି ଉପାସକ୍‌ ମଣ୍ତଲିଦିଙ୍ଗ୍‌ ଜାତୁନ୍‍ ଅନାନ୍‌ ଏଣ୍ତେସ୍‌ ?
1TI 3:6 ୱାନ୍‌ ବିସ୍‌ବାସ୍‌ତୁ ପୁରା ତେବାନିକା ମାନାତ୍‌; ଆଇତିଙ୍ଗ୍‍ ସୟତାନ୍‌ ୱାଜା ଗର୍ବ କିଜି ଦଣ୍ତ୍‌ ପୟ୍‌ନି ମାଟା ମାନାତ୍‌ ।
1TI 3:7 ମଣ୍ତ୍‌ଲି ଆତେରେ ଲୋକାମାନୁବା ୱାନ୍‌ ଅରେନ୍‌ ସନ୍‌ମାନ୍‌ ପଇନି ଲୋକ୍‌ ଆନିକା ମାନାତ୍‍, ଉସାସ୍‌ତାନ୍‌ ସୟତାନ୍‌ତି ଉରିଦୁ ଆର୍‌ଜି ୱାନ୍‌ ଏଣ୍ତେସ୍‌ ଅପ୍‌ମାନ୍‌ ଆନାନ୍‌ ।
1TI 3:8 ମଣ୍ତ୍‌ଲିଦି ସେବାକିନିକାର୍‌ ବା ନେଗିଗୁଣୁ ମାରି ନେଗିପାଣିକିଦେଙ୍ଗ୍‌ ଆନି ଦର୍‌କାର୍‌ । ୱାର୍‌ କାଡ଼ୁଉଣିକାର୍‌ ନି ଦନ୍‌ତିଙ୍ଗ୍‌ ଆସାନିକାର୍‍ ଆଏର୍‌ ମାନାର୍‌ ।
1TI 3:9 ମା ଦାର୍ମୁ ବିସ୍‌ବାସ୍‌ତି ୱେର୍‌ଆୟ୍‌ଆତିମାନି ମାଟେଙ୍ଗ୍‌ୱିଜୁ ୱାର୍‌ ନେଗି ବୁଦିଦାନ୍‌ ଡାଟ୍‌ତାନ୍‌ ବିସ୍‌ବାସ୍‌ କିଜିମାନାର୍‌ ।
1TI 3:10 ମଣ୍ତ୍‌ଲିଦି ପାଣି କିଦେଙ୍ଗ୍‌ ଅଦିକାର୍‌ ପୟ୍‌ନି ଆଗ୍‍ଡ଼ିନେ ୱାରିଙ୍ଗ୍‌ ବା ପରିକା କିପିର୍‌ । ଇୟା ପରିକାଦୁ ନିନ୍ଦା ସିଲିକାନ୍‍ ଇଜି ତରିତିଙ୍ଗ୍‍ନେ ୱାର୍‌ ସେବା ପାଣିକିଦେଙ୍ଗ୍‌ ଅଦିକାର୍‍ ପୟ୍‌ନାର୍‌ ।
1TI 3:11 ୱାରି ଆଡ଼୍‍ସିକ୍‍ ବା ନେଗିଗୁଣୁ ଆନେମାନେ ମାରି ଆଇ ଲୋକା ସୁରି ମାଟା ୱେର୍‌ଇକା ମାନାତ୍ । ୱାକୁ ମିଚ୍‌ୱେର୍‌ନିକା ମାରି ୱିଜୁ ବିସୟ୍‌ତୁ ବିସ୍‌ବାସ୍‌ ଆନିକା ଦର୍‌କାର୍‌ ।
1TI 3:12 ସେବାକିନିକାର୍‌ ଅରେତ୍‌ ଆଇମାଦି କନ୍‌ଲି ଆପିନ୍‌, ମାରି ନିଜେଦି ଇଲୁପରିବାର୍‌ତିଙ୍ଗ୍‌ ମାରି କଡ଼ରିଙ୍ଗ୍‌ ନେଗେନ୍‌ତାନ୍‌ ସାଲାକିଦେଙ୍ଗ୍‌ ଆଟ୍‌ସିନିକା ମାନାନ୍‌ ।
1TI 3:13 ସେବାକିନି ଇସାବ୍‌ତାନ୍‌ ଆମାକାର୍‌ ନେଗିପାଣି ତର୍‌ନାର୍‌, ୱାର୍‌ ମଣ୍ତ୍‌ଲିଦୁ ସନ୍‌ମାନ୍‌ କିନାର୍‌ ମାରି କ୍ରିସ୍ତ ଜିସୁଦି ବିସ୍‌ବାସ୍‌ ବିସୟ୍‌ତାନ୍‌ ତିଲାଏଣ୍‌ଗା ନିଜେଦି ମାଟା ୱେର୍‌ତେଙ୍ଗ୍‌ ଆଟ୍‌ନାର୍‌ ।
1TI 3:14 ଇୟା ଆକୁ ରାସ୍‌ନି ୱାଲେ, ଦାପ୍ରେ ମିଙ୍ଗିଁ ସୁଡ଼ୁଜ ୱାନି ଉଣ୍ତିଙ୍ଗ୍‌ ନାନ୍‌ ଆସା କିଜିନା,
1TI 3:15 ମାତର୍‌ ଜଦି ନାନ୍‌ ୱାନିକା ୱେଡ଼ା ଆନାତ୍‌, ଜିବନ୍‌ମାନି ମାପୁରୁଦି ଇଲୁୱାଜା ଇୟା ପାର୍‍ତନାକିନି ମଣ୍ତଲିଦୁ ମାଙ୍ଗିଁ ଏଣ୍ତେସ୍‌ ଜିଦେଙ୍ଗ୍‌ ଆନାତ୍‌, ଇୟା ଆକୁ ଦାନ୍‌ ଆକା ମିର୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌ । ଇୟା ମାପୁରୁଦି ମଣ୍ତଲି ନେ ୱିଜୁଦିନ୍‌ତି ସତ୍‌ତି ମୁଣ୍ତା ନି କୁନାଦି ରାସ୍‌ତିକା ।
1TI 3:16 ମା ଦାର୍ମୁବିସ୍‌ବାସ୍‌ତି ଇୟା ପେରିବିସୟ୍‌ ଏନ୍‌ ମାନାଦେଙ୍ଗ୍‌ ଆଟ୍‌ଏନ୍‌ : କ୍ରିସ୍ତ ଲୋକା ମେନ୍ଦଲ୍‌ ଆସ୍‌ସି ରେତାତାନ୍‌, ମୁସ୍‌କୁପୁର୍‌ତି ଦୁତ୍‌କୁ ମାଣୁକୁ ତରାୟ୍‌ଆତାନ୍‌, ଆତ୍ମାଦୁ ଦାର୍ମିକ ଇଜି ପାର୍‌ମାଣ୍‌ କିଆୟାଆତାନ୍‌, ୱିଜୁଜାତିଦି ଲଇ ୱାନି ନେଗିକାବୁର୍‌ ପ୍ରଚାର୍‌ ଆତାତ୍‌, ସାରାଦୁନିଆଦି ୱିଜୁତରିନ୍‌ ୱାନ୍‌ ବିସ୍‌ବାସ୍‌ ଆଜି ଗୌରବ୍‌ତାନ୍‌ ମୁସ୍‌କୁପୁର୍‌ତୁ ମୁସ୍‌କୁ ସର୍ହାନ୍‌ ।
1TI 4:1 ପବିତ୍ରଆତ୍ମା ପୁରାନେସ୍‌ନି ୱାଜା ୱେର୍‌ସିନାତ୍ ଜେ, ଦୁବାଆତ୍ମାଦି ତାଗ୍‌ଇ ସିକିୟାଦୁ ଆର୍‌ଜି ଅର୍‍ଲେନ୍‍ ଏନ୍‌ ଏନ୍‌ କ୍ରିସ୍ତ ବିସ୍‌ବାସ୍‌ତାନ୍‌ ଇନିଙ୍ଗାଁ ଆନିଙ୍ଗାଁ ଆନାର୍‌ ।
1TI 4:2 ଇକାର୍‍ ଏସ ଟକ୍‌ ନି ମିଚ୍‌ୱେର୍‌ନିକାର୍‌, ୱାରି ବୁଦି ୱେତାଦୋ ନିରୁ ଆତାମାନାତ୍‌ ।
1TI 4:3 ପେଡ଼ି କିନିକା ମାରି ଇନି ଇନି କାଦିଙ୍ଗ୍‌ ଉଣିକା ନେଗେନ୍‌ସିଲେତ୍‌ ଇଜି ୱାର୍‌ ୱେର୍‌ସିନାର୍‌ । ମାତର୍‌ ଆମା କ୍ରିସ୍ତବିସ୍‌ବାସ୍‌ସିର୍‌ ସତ୍‌ ତିଆର୍‌ କିତାମାନାନ୍‌, ୱାର୍‌ ମାପୁରୁ ତିଆର୍‌ କିତିମାନିକା ଉଣି କାଦି ଉଣ୍ତିଙ୍ଗ୍‌ ୱାନିଙ୍ଗ୍‌ ଦନ୍ୟବାଦ୍‌ ସିଜି ଆକା ୱେଡ଼ିକା ମୋନ୍‌ତାନ୍‌ ଉନ୍‌ଣ୍ତେ ଆଟ୍‌ନାର୍‌ ।
1TI 4:4 ମାପୁରୁ ଆମାକା ତିଆର୍‌ କିତାମାନାନ୍‌, ଆୟାୱିଜୁ ନେଗିକା, ଆବେଣୁକୁ ଆମାକାବା ଅଲଗା ଆଦେଙ୍ଗ୍‌ ଆଟ୍‌ଏତ୍‌ । ୱାନିଙ୍ଗ୍‌ ଦନ୍ୟବାଦ୍‌ ସିଜି ୱାନି ୱିଜୁ ଦାନ୍‌ତିଙ୍ଗ୍‌ ୱେଡ଼ିକାଦାନ୍‌ ମାନାନିକା ମାନାତ୍‌ ।
1TI 4:5 ଇରିଙ୍ଗ୍‌ ମାପୁରୁଦି ବାକ୍ୟ ମାରି ପାର୍‌ତାନାଦାନ୍‌ ୱିଜୁ ବିସୟ୍‌ ପବିତ୍ର ଆନାତ୍‌ ।
1TI 4:6 ତିମତି, ଇୟାୱିଜୁ ବିସୟ୍‌ ନିନ୍‍ ତଡ଼ାନ୍‌ ନି ତାଙ୍ଗିଁକାଙ୍ଗ୍‌ ସିକିୟା ସିତିଙ୍ଗ୍‌ କ୍ରିସ୍ତ ଜିସୁଦି ଅରେନ୍‌ ନେଗି ସେବା କିନିକାନ୍‌ ଆନି, ମାରି ନିନ୍‍ ଆମା ବିସ୍‌ବାସ୍‌ ମାରି ନେଗି ବୁଦିଦୁ ବୁଲାଜିନି, ଆୟା ବିସୟତି ବାକ୍ୟଦାନ୍‌ ସାକ୍ତି ଆନି;
1TI 4:7 ମାପୁରୁଙ୍ଗୁଁ ଅପମାନ୍‍ କିଜି ୱାର୍‍ଇ ମାଟେଙ୍ଗ୍‍ ଡ଼ିସ୍‍ସି, ମି ଦାର୍ମୁ ଜିବନ୍‌ତିଙ୍ଗ୍‌ ବପୁ କିଦେଙ୍ଗ୍‌ ଅବ୍ୟାସ୍‌ କିଦୁ ।
1TI 4:8 ଇରିଙ୍ଗ୍‌ ମେନ୍ଦଲ୍‍ତି ବ୍ୟାୟାମ୍‌ତି ଦର୍‌କାର୍‌ ମାନାତ୍‌ । ମାତର୍‌ ଆତ୍ମିକ ପୁରା କିଦେଙ୍ଗ୍‌ ୱିଜୁଦାନ୍‌ ନେଗେନ୍‌ ଆନାତ୍‌, ଇରିଙ୍ଗ୍‌ ଇୟାମାଣାନ୍‍ ଲୋକୁ ରୁଣ୍ତି ବିସୟ୍‌ତାନ୍‌ ଇୟାଜୁଗ୍‌ତିଲୋକ୍‌ ମାରି ସାତି ଲୋକ୍‌ ଜିବନ୍‌ଆଜି ତେବାନାନ୍‌ ଇଜି ବିସ୍‌ବାସ୍‌ ପୟ୍‌ତାମାନା ।
1TI 4:9 ଇକା ପୁରା ସତ୍‌ ମାରି ୱିଜେରେ ଇକା ତରିସ୍‌ କିଜି ପୁରା ଜିବନ୍‌ତାନ୍‌ ବିସ୍‌ବାସ୍‌ କିନିକା ମାନାତ୍‌ ।
1TI 4:10 ଆମା ରକିୟାକର୍ତ୍ତାମାନୁ ବିସ୍‌ବାସ୍‌ କିତିଙ୍ଗ୍‌ ୱିଜେରେ ରକିୟା ପୟ୍‌ଦେଙ୍ଗ୍‌ ଆଟ୍‌ନାର୍‌, ଆୟା ଜିବନ୍‌ ମାପୁରୁମାନୁ ଆସା ଇଡ୍‌ଜି ମାଡ୍‌ ନିସା କାସ୍ଟୁ ବିସ୍‌ବାସ୍‌ କିଜି ଇୟା ପାଣି କିଜି ସୋଲ୍‌ସିନାପ୍‌ ।
1TI 4:11 ମିର୍‌ ଇୟାୱିଜୁ ବିସୟ୍‌ ମାଟା ସିଜି ୱାରିଙ୍ଗ୍‌ ସିକିୟା ସିଦୁ ।
1TI 4:12 ନି ନିଜେଦି ୱାର୍‌ଗିନିକା, ବ୍ୟବ୍‌ହାର୍‌, ଜିବନ୍‌ନୋନିକା, ବିସ୍‌ବାସ୍‌ ମାରି ପବିତ୍ରଦୁ ନେଗେନ୍‌ତାନ୍‌ ସେବା ତର୍‌ତେଙ୍ଗ୍‍ଁ ଆଟ୍‌ତିଙ୍ଗ୍‌, ଉଣା ବୟସ୍‌ ଆତିମାରିଙ୍ଗ୍‌ବା ମିଙ୍ଗିଁ ଏନ୍‌ ସେମାର୍‌ କିଦେଙ୍ଗ୍‌ ଆଟ୍‌ଏନ୍‌ ।
1TI 4:13 ନାନ୍‌ ନି ଲାକ୍‌ତୁ ୱାନି ସାନ୍ଦି ନିନୁ ଦାର୍ମୁସାସ୍ତ୍ର ପଡ଼ାନିକା, ଉପଦେସ୍‌, ସିକିୟାସିନି ପାଣି କିଜିମାନ୍‌ଆ ।
1TI 4:14 ମଣ୍ତ୍‌ଲିଦି ନେତାର୍‌ ମିଙ୍ଗିଁ ମାପୁରୁଦି ବାକ୍ୟ ୱେର୍‌ସି ମି ମୁସ୍‌କୁ କିୟୁଇଡ୍‌ନି ୱାଲେ ମିର୍‌ ଆମା ଅନୁଗ୍ରହଦି ଦାନ୍‍ ପୟ୍‌ତିମାନି, ତାନିଙ୍ଗ୍‌ ୱେଡ଼ା କିମାଟ୍‌ ।
1TI 4:15 ନାନ୍‌ ରାସ୍‌ତିମାନିକା ୱିଜୁ ପାଣି ଜିବନ୍‌ତି ୱାଲେ ମାନାଦେଙ୍ଗ୍‌ ଅବ୍ୟାସ୍‌ କିଦୁ ୱେନ୍‌କା ମି ପାଣିକିତି ୱେନ୍‌କା ୱିଜେରି ଉଣ୍ତିଙ୍ଗ୍‌ ଜାଗାର୍‌ତା ମାନ୍‌ଡ୍ରୁ ।
1TI 4:16 ନିଜେଦି ବିସୟ୍‌ତାନ୍‌ ମାରି ନିଜେଦି ସିକିୟା ବିସୟ୍‌ତାନ୍‌ ଜାଗାର୍‍ତା ମାନ୍‌ଡ୍ରୁ, ଇୟାୱିଜୁ ବିସୟ୍‌ତାନ୍‌ ଲାଗେଆଜି ମାନ୍‌ଡ୍ରୁ, ମାତର୍‌ ଆକା କିତିଙ୍ଗ୍‌ ମିର୍‌ ନିଜେ ପରିତ୍ରାଣ ପୋଇନିଦେର୍ ମାରି ମିର୍‌ ଆଇୱାରିଙ୍ଗ୍‌ ରକିୟା ବା ପୁରା କିନିଦେର୍‌ ।
1TI 5:1 ଡକ୍ରାଦାଦାରିଙ୍ଗ୍‍ ବୁବାୱାଜା ଅଡ଼୍‌ବିଦୁ, ମାତର୍‌ ୱାରିଙ୍ଗ୍‌ ଲାଗାଏଣ୍‌ଗା ନେଗେନ୍‌ତାନ୍‌ ମାନାଦୁ । ମୁରୁଲିଆଙ୍ଗାଁ ଉଣ୍ତିଙ୍ଗ୍‌ ତଡ଼ାନ୍‌ ୱାଜା ବ୍ୟବ୍‌ହାର୍‌ କିଦୁ ।
1TI 5:2 ଡକ୍ରିବିବିକାଙ୍ଗ୍‌ ୟାୟାୱାଜା ମାରି ଆଇଲିକଡ଼କାଙ୍ଗ୍‌ ତାଙ୍ଗିଁକି ୱାଜା ଅଡ଼୍‌ବିଜ ୱାନିକା ଉଣ୍ତିଙ୍ଗ୍‌ ପବିତ୍ର ୱାଜା ମିର୍‌ ବ୍ୟବ୍‌ହାର୍‌ କିଦୁ ।
1TI 5:3 ଅରେତ୍‌ନେ ଆଜି କାକୁର୍ତିଦାନ୍‌ ସାଲାଜିମାନି ରାଣ୍ତିଆଇମେକାଙ୍ଗ୍‌ ଜାତୁନ୍‍ ଅତୁ ।
1TI 5:4 ମାତର୍‌ ଏସ୍‌କାଙ୍ଗ୍‌ ଆମା ରାଣ୍ତିଆଇମାଦି କଡ଼ ନି ଆଇଲିକଡ଼୍‌ ମାରିଙ୍ଗ୍‌, ଆର୍‌ତିଙ୍ଗ୍‌ ୱାର୍‌ ଆଗ୍‍ଡ଼ିନେ ନିଜେଦି ଇଲୁପରିବାର୍‌ ଉଣ୍ତିଙ୍ଗ୍‌ ଜିବନ୍‌ନୋନିକା ତର୍‌ତେଙ୍ଗ୍‍ଁ ମାରି ୟାୟାବୁବା ଉଣ୍ତିଙ୍ଗ୍‌ ଜିବନ୍‌ନୋନିକା ସିକିୟା କିଦୁ; ଇରିଙ୍ଗ୍‌ ଇକା ମାପୁରୁଦି କାଣ୍‌କାଙ୍ଗ୍‌ ନେଗିକା ଆନାତ୍‌ ।
1TI 5:5 ଆମା ରାଣ୍ତିଆଇମା ସତ୍‌ତାନ୍‌ ଅରେଦେ ମାରି ସିଲିସାତିକାତ୍‌, ୱାଦ୍‌ ମାପୁରୁ ଆସା ଇଡ୍‌ଜି ୱେଡ଼େନାଡ଼ା ମାଡ଼ିସ୍‌କିଜି ମାରି ପାର୍‌ତାନାଦାନ୍‌ ତେବାପିତ୍‍ ।
1TI 5:6 ମାତର୍‌ ଏଦ୍‌ ରାଣ୍ତି ଆତିଙ୍ଗ୍‌ବା ୱେଡ଼ିକାଦାନ୍‌ ଦିନ୍‌କାଟେକିଜିନାତ୍‌, ୱାଦ୍‌ ଜିବନ୍‌ ମାରିଙ୍ଗ୍‌ବା ସାତିକାତ୍‌ ଇଜି ଅଡ଼୍‌ବିଦେଙ୍ଗ୍‌ ଆନାତ୍‌ ।
1TI 5:7 ରାଣ୍ତିଆଇମେକାଙ୍ଗ୍‌ ଇୟା ବିସୟ୍‌ତାନ୍‌ ଜାଗ୍‌ରାତା କିଦୁ, ଏନ୍‌ ଏଣ୍ତେସ୍‌ ୱାନିକା ବିରୁଦ୍‌ତାନ୍‌ ଇନି ମାଟା ୱେର୍‌ତେଙ୍ଗ୍‌ ସାରି ପୟ୍‌ଏନ୍‌ ।
1TI 5:8 ମାତର୍‌ ଜଦି ଏନ୍‌ ନିଜେଦି ଲୋକାଙ୍ଗ୍‌, ନିଜେଦି ଇଲୁପରିବାର୍‌ତିଙ୍ଗ୍‌ ଜାତୁନ୍‍ କିଏନ୍‌, ୱାନ୍‌ ଦାର୍ମୁ ବିସ୍‌ବାସ୍‌ତିଙ୍ଗ୍‌ ମାନାଏଜିନାନ୍‌ ମାରି ୱାନ୍‌ ଅବିସ୍‌ବାସିରି ମାଣୁକୁ ନାଣ୍ତ୍‌ ନିନ୍ଦାଆଜିନାନ୍‌ ।
1TI 5:9 ଇୟାନାନି ଜଗ୍‍ ମାନି ରାଣ୍ତିଆଇମେକାଙ୍ଗ୍‌ ଉନ୍‌ଡ୍ରି ଦାଡ଼ି କିଦୁ ଆମାୱାନିକା ବୟସ୍‌ ସାଟେ ବାର୍ସେକ୍‌ତାନ୍‌ ମୁସ୍‍କୁ ଆନାତ୍‍, ଆଇମେକ୍‍ ଉନ୍‌ଡ୍ରେଦେବା ମାତର୍‌ ପେଡ଼ି ଆନେମାନେ,
1TI 5:10 କଡ଼ରି ନେଗେନ୍‌ ଜତନ୍‌ ଅନିକା, କୁଡ଼ାଆଙ୍ଗାଁ ସନ୍‌ମାନ୍‌ କିନିକା, କ୍ରିସ୍ଟାନ୍‌ ତଡ଼ାନ୍‌ ତାଙ୍ଗିଁକା ଉଣ୍ତିଙ୍ଗ୍‌ ସାନ୍ତିଦାନ୍‌ ବ୍ୟବ୍‌ହାର୍‌ କିନିକା, ସିଲିସାତି ଲୋକାଙ୍ଗ୍‌ ସାହାଜ୍ୟ କିନିକା ଇନି ଇନିକା ୱିଜୁ ସତ୍‌ପାଣି ଉଣ୍ତିଙ୍ଗ୍‌ ଆମାକାର୍‌ କୁଟୁମ୍‌ତୁ ୱେଙ୍ଗିଁନା ମାନାର୍‌ ।
1TI 5:11 ମାତର୍‌ ଉଣା ବୟସ୍‌ତି ରାଣ୍ତିଆଇମେକାଙ୍ଗ୍‌ ଇୟା ଦାଡ଼ିଦୁ ଇଡ଼୍‌ମାଟ୍‌; ଇରିଙ୍ଗ୍‌ ୱାକୁ ମେନ୍ଦଲ୍‍ତୁ ଲାଲାୟ୍‌ ଆଜି କ୍ରିସ୍ତଦି ମାଣାନ୍‌ ୱେର୍‌ଏ ଆଜି ପେଡ଼ି ଆଦେଙ୍ଗ୍‌ ବଦା କିନେ;
1TI 5:12 ମାରି ୱାକୁ ୱାନିକା ଆଗ୍‌ଡ଼ିରି ପାର୍‌ମାଣ୍‌ ମାନାଉତେ ଆକା ଦଣ୍ତ୍‌ ପୟ୍‌ନେ ।
1TI 5:13 ମାରି ବା ୱାକୁ ଇଲୁକୁ ଇଲୁକୁ ବୁଲାଜି ସମୟ୍‌ ଉପ୍‌କା କିନେ, ମାତର୍‌ ନାଣ୍ତ୍‌ ନାମ୍‌ଇ କାତେଙ୍ଗ୍‌ ମାରି ଆଇ ଲୋକା ସୁରି ମାଟା ୱେର୍‌ସି ତାଗ୍‌ଇ ମାଟେଙ୍ଗ୍‌ ୱିଜୁ ୱେର୍‌ନେ ।
1TI 5:14 ମାରି, ଉଣା ବୟସ୍‌ତି ରାଣ୍ତିଆଇମେକ୍‌ ପେଡ଼ି ଆପିୱି, କଡ଼ ଜନମ୍‌ କିପିୱି, ଇଲୁ ପାଣି ନେଗେନ୍‌ତାନ୍‌ ସାଲା କିପିୱି, ନିନ୍ଦା କିନି ଉଣ୍ତିଙ୍ଗ୍‌ ସାତ୍ରୁଦିଙ୍ଗ୍‌ ଇନି ସାରି ସିମାକିୱି ।
1TI 5:15 ଇଲେଇବା ଏସଲୋକ୍‌ ରାଣ୍ତିଆଇମେକ୍‌ ସୟ୍‌ତାନ୍‌ତି ୱେନ୍‌କା ଆଜି ସାରିବାଣାତେ ମାନେ ।
1TI 5:16 ଜଦି ଆମା ବିସ୍‌ବାସ୍‌ତି ଆଇମା ଇଲୁଦୁ ରାଣ୍ତିଆଇମେକ୍‌ ତେବାନେ, ଆର୍‌ତିଙ୍ଗ୍‌ ୱାନିକା ଦୁଃକ୍‌ତି ବୋଜୁ ନିଜେ ପିଣ୍ତିୱି, ମାରି ଏଣ୍ତେସ୍‌ ମଣ୍ତଲି ଇୟାୱାନିକା ଉଣ୍ତିଙ୍ଗ୍‌ ବେକାର୍‌ ବୋଜୁ ଆମାକିତି, କାକୁର୍ତି ରାଣ୍ତିଆଇମେକାଙ୍ଗ୍‌ ଜାତୁନ୍‍ ଅତେଙ୍ଗ୍‌ ଆଟ୍‌ନାତ୍‌ ।
1TI 5:17 ଆମା ନେତାର୍‌ ନେଗେନ୍‌ତାନ୍‌ ଜାତୁନ୍‍ କିନାର୍‌, ଆମାକାର୍‌ କାସ୍ଟୁ ପୟ୍‌ଜି ବାକ୍ୟ ୱେର୍‌ନାର୍‌ ମାରି ସିକିୟା ପାଣି କିଜିମାନାର୍‌, ୱାର୍‌ ଦୁଇ ଗୁଣୁ ମୁସ୍‌କୁ କାସ୍ଟୁ କିତିକା ପୟ୍‌ନାର୍‌ ।
1TI 5:18 ଇରିଙ୍ଗ୍‌ ଦାର୍ମୁସାସ୍ତ୍ର ୱେର୍‌ନାତ୍‌ : “ପାସି ଉଣ୍ତା କିଜିମାନିୱାଲେ କଡି ୱେୟୁଦୁ ନାସୁ ତର୍‌ମାଟ୍‌ ।” ମାରି “ପାଣିକିନିକାନ୍‌ ଟିକ୍‌ତାନ୍‌ ପାଣିକିତିକା ପୟ୍‌ଦେଙ୍ଗ୍‌ ଆଟ୍‌ନାନ୍‌ ।”
1TI 5:19 ରିଏର୍‌ ବା ମୁଏର୍‌ ଲୋକ୍‌ ସାକି ସିଲେଏଣ୍‌ଗା ମଣ୍ତ୍‌ଲିଦି ଅରେନ୍‌ ପେରି ନେତା ବିରୁଦ୍‌ତାନ୍‌ ଇନି ମାଟା ବିଚାର୍‌ତୁ ଅମାଟ୍‌ ।
1TI 5:20 ଆମାକାର୍‌ ସତ୍‌ତାନ୍‌ ପାପ୍‌ ପାଣିଦୁ ମାନାର୍‌, ଆଇୱାରିଙ୍ଗ୍‌ ଜାଗାର୍‌ତା କିନି ଉଣ୍ତିଙ୍ଗ୍‌, ୱାରିଙ୍ଗ୍‌ ନେସ୍‌ନିୱାଜା ସେତା କିଦୁ ।
1TI 5:21 ମାପୁରୁଦି କ୍ରିସ୍ତ ଜିସୁଦି ମାରି ଆସ୍‌କିତି ମୁସ୍‌କୁପୁର୍‌ତି ଦୁତ୍‍କା ଆଗ୍‌ଡ଼ି ନାନ୍‌ ଡାଟ୍‌ତାନ୍‌ ମାଟା ୱେର୍‌ସିନା, ମିର୍‌ ଆଗ୍‌ଡ଼ିରି ଇସାବ୍‌ତାନ୍‌ ସାଲାଏଣ୍‌ଗା ଇୟାୱିଜୁ ମାନାଦୁ, ମାରି ଏ ବିରୁଦ୍‌ତାନ୍‌ ମକମ୍‌ ସୁଡ଼ୁଜି ଇନି ପାଣି କିମାଟ୍‌ ।
1TI 5:22 ତର୍‌ବର୍‌ ଆଜି ଏ ମୁସ୍‌କୁ କିୟୁ ଇଡ୍‍ଜି ସର୍‌ପେ କିମାଟ୍‌, ଆଇୱାରି ପାପ୍‌ତୁ ନିଜେଦିଙ୍ଗ୍‌ ମିସା କିମାଟ୍‌; ମିର୍‌ ନିଜେଦିଙ୍ଗ୍‌ ପୁରା ପବିତ୍ର ଇଡ୍‌ଦୁ ।
1TI 5:23 କେବଲ୍‌ ଏରୁ ଉଣୁଏଣ୍‌ଗା, ମି ଜିରାନିସାକ୍ତି ପିରିସ୍‌ କିଦେଙ୍ଗ୍‌ ଉବୁଡ଼ିନେ ମାତର୍‌ ଅଙ୍ଗୁର୍‍ରସ୍‍ ଉଣୁଆ, ଇରିଙ୍ଗ୍‌ ନିନ୍‍ ଜାରିଦିଙ୍ଗ୍‌ଜାରି ନବ୍‌ ଆଜିନି ।
1TI 5:24 ଏସଲୋକ୍‌ ପାପ୍‌ପାଣି ୱିଜୁଲୋକାମାନୁ ୱେଙ୍ଗିଁନାତ୍‌, ୱାର୍‌ ଆୟାଉଣ୍ତିଙ୍ଗ୍‌ ଦାପ୍ରେନେ ବିଚାର୍‍ତୁ ସାମ୍‌ନା ଆଦେଙ୍ଗ୍‌ ପଡ଼ାନାତ୍‌ । ମାରି ଏସଲୋକ୍‌ ପାପ୍‌କିତିକାର୍‌ ନାଣ୍ତ୍‌ ଦିନ୍‌ତାନ୍‌ ଦରାପଡ଼େ ଆନାର୍‌ ।
1TI 5:25 ଆୟାୱାଜା ଏସଲୋକ୍‌ଦି ଦାର୍ମୁପାଣି ଉସାସ୍‌ତାନ୍‌ ୱିଜେରେ ସୁଡ଼ୁନାର୍‌, ମାତର୍‌ ମାରି ଏସଲୋକା ସତ୍‌ପାଣି ଆୟାୱାଜା ନେସ୍‌ଇତିଙ୍ଗ୍‌ ବା, ୱିଜୁଦିନ୍‌ତିଙ୍ଗ୍‌ ମାର୍‌ଗିଜ ମାନ୍‌ଡ୍ରେଙ୍ଗ୍‌ ଆଟ୍‌ଏତ୍‌ ।
1TI 6:1 କ୍ରିସ୍ଟାନ୍‌ ବିସ୍‌ବାସ୍‌ସିର୍‌ ପାଣିକିନିକାର୍‌ ମାଲିକାଙ୍ଗ୍‌ ନିୟମ୍‌ତାନ୍‌ ସନ୍‌ମାନ୍‌ ସିପିର୍‌ । ଆର୍‌ତିଙ୍ଗ୍‌, ମାପୁରୁଦି ବିରୁଦ୍‌ତାନ୍‌ ମାରି ମା ସିକିୟା ବିସୟ୍‌ତାନ୍‌ ଏନ୍‌ ଇନି ନିନ୍ଦା କିଦେଙ୍ଗ୍‌ ଆଟ୍‌ଏନ୍‌ ।
1TI 6:2 ମାରି ଆମାୱାରି ମାଲିକ୍‌କୁ ବା କ୍ରିସ୍ତବିସ୍‌ବାସ୍‌ସିର୍‌, ୱାର୍‌ ମାଲିକାଙ୍ଗ୍‌ ତଡ଼ାନ୍‌କୁ ନି ତାଙ୍ଗିଁକି ଇଜି ଅଡ଼୍‍ବିଜି ୱାରିଙ୍ଗ୍‌ ନେଗେନ୍‌ତାନ୍‌ ସନ୍‌ମାନ୍‌ ସିଦେଙ୍ଗ୍‌ ଗାଡ଼ିଆ ଆମାକିର୍‌ ମାରି ନାଣ୍ତ୍‌ ଜାତୁନ୍‌ଦାନ୍‌ ୱାରି ସେବା କିପିର୍‌, ଇରିଙ୍ଗ୍‌ ଆମାକାର୍‌ ସେବାଦାନ୍‌ ଲାଡ୍‍ ପୟ୍‌ନାର୍‌, ୱାର୍‌ ବିସ୍‌ବାସ୍‌ସିର୍‌ ମାରି ନାଣ୍ତ୍‌ ୱେଡ଼ିକା ଲୋକୁ । ଇୟାୱିଜୁ ବିସୟ୍‌ ମିର୍‌ ସିକିୟା ସିଜି ପ୍ରଚାର୍‌ କିନିଦେର୍‌ ।
1TI 6:3 ଆମାକାର୍‌ ପ୍ରବୁ ଜିସୁ କ୍ରିସ୍ତଦି ସିକିୟାଦି ୱାଲେ ଅରତ୍‌ ସିଲିକା ମାରି ମା ଦାର୍ମୁ ସିକିୟାଦି ବିରଦ୍‌ କିଜିମାନି ଆଇଜାତିଦି ବାକ୍ୟ ପ୍ରଚାର୍‌ କିନାର୍‌,
1TI 6:4 ୱାର୍‌ କେବଲ୍‌ ପଟାଦୁ କେଇନିକା ଡ଼ିସ୍‌ତିଙ୍ଗ୍‌ ମାରି ଇନିକା ସିଲେଏର୍‌ । ୱାର୍‌ ସାସ୍ତ୍ରଦି ଅରତ୍‌କୁ ଅସି ଆଉଲି କିନାର୍‌; ଆବେଣୁକୁ କେବଲ୍‌ ଆକାର୍‍, ନାମ୍‌ଇକା, ସୁରିୱାର୍‌ଗିନିକା ମାରି ଗଣ୍ତ୍‌ଗଲ୍‌ କିନିକା ଆନାତ୍‌ ।
1TI 6:5 ୱାର୍‌ ବିସାର୍‌ସିଲିକା ଆଜି ବେକାର୍‌ ଆସାନି ମାଣ୍‌କୁ ସତ୍‌ତି ବିରୁଦ୍‌ କିନାର୍‌ । ଦାର୍ମୁବିସ୍‌ବାସ୍‌ତିଙ୍ଗ୍‌ କେବଲ୍‌ ଦନି ଆନିକା ଉଣ୍ତ୍ରି ଉପାୟ୍‌ ଇଜି ୱାର୍‌ ଅଡ଼୍‌ବିନାର୍‌ ।
1TI 6:6 ଦର୍ମକିନି ଲୋକୁ ସତ୍‌ତାନ୍‌ ଦନି, ଇରିଙ୍ଗ୍‌ ୱାନିନ୍ଦି ଏସ ମାନାତ୍‌, ନାସ୍‌ଦାନ୍‌ନେ ୱାନ୍‌ ୱେଡ଼ିକା ମାନିନ୍‌ ।
1TI 6:7 ଇରିଙ୍ଗ୍‌ ମାଡ୍‌ ଇୟା ଦୁନିଆଦୁ ଇନିକା ଆସ୍‌ସି ୱାତିମାନିକା ? ଇନିକା ସିଲେ । ମାରି ଇବେଣ୍‌କୁ ଅର୍‌ସେ ଇନିକା ଆସ୍‌ସି ଡ଼େସିସନିକା ? ଇନିକା ସିଲେ ।
1TI 6:8 ଆର୍‌ତିଙ୍ଗ୍‌, ମାଙ୍ଗିଁ ଉଣିକା ନି ଆରାନିକା ନିଜେଦିବାଡି ଆଦେଙ୍ଗ୍‌ଆଟ୍‌ତିଙ୍ଗ୍‌, ଇକା ମା ଉଣ୍ତିଙ୍ଗ୍‌ ନାଣ୍ତ୍‌ ସିଲେ ନୋ ?
1TI 6:9 ମାତର୍‌ ଦନ୍‌ସମ୍ପତିଦିଙ୍ଗ୍‌ ଆସା ଲୋକ୍‌ତିଙ୍ଗ୍‌ ଗାଦି ପରିକା ମାରି ଉରି ଲଇ ରେନାଅନାତ୍‌; ୱାନି ମୋନ୍‌ତୁ ଗାଦି ତାଗ୍‌ଇ ମାଟେଙ୍ଗ୍‌ ଆସା କିଜି ୱାନିଙ୍ଗ୍‌ ଦଂସ୍‌ ମାରି ସାନି ତରିନ୍‌ ତର୍‌ସି ଅନାତ୍‌ ।
1TI 6:10 ଡାବୁଙ୍ଗୁଁ ଲୋବ୍‌ ୱିଜୁ ୱିଜ୍‌ନି ମୁଲ୍‌ । ଆମାକାର୍‌ ୱିଜୁଦିନ୍ କେବଲ୍‌ ଡାବୁଙ୍ଗ୍‌ଣି ଉପାୟ୍‌ ପୟ୍‌ଜି ମାନାର୍‌, ୱାର୍‌ ଦାର୍ମୁ ବିସ୍‌ବାସ୍‌ତିଙ୍ଗ୍‌ ହାରାକିଦେଙ୍ଗ୍‌ ବାସ୍‌ନାର୍‌ ସାରାସାରିୱେନ୍‌କା କେବଲ୍‌ ଦୁଃକ୍‌ବୋଗ୍‌ତାନ୍‌ ୱାରି ଜିବନ୍‌ ରୁଙ୍ଗୁଁନା ମାନାତ୍‌ ।
1TI 6:11 ମାତର୍‌ ଏ ତିମତି ମାପୁରୁଦି ଲୋକୁ, ଇୟା ୱିଜୁମାଣାନ୍‌ ନିନ୍‍ ଆକ ମାନ୍‌ଆ । ଦାର୍ମୁପାଣି, ମାପୁରୁ ଦାର୍ମୁ ଜିବନ୍‌ ବିସ୍‌ବାସ୍‌, ଜିବନ୍‍ନୋନିକା, ସାନ୍ତି ମାରି ସାସ୍‌ ୱିଜୁଦୁ ପୁରାଗୁଣୁତାନ୍‌ ପୁରାପୁରି ଆଦେଙ୍ଗ୍‌ ସେସ୍ଟା କିଦୁ ।
1TI 6:12 ବିସ୍‌ବାସ୍‌ତି ନେଗି ଜୁଦ୍‌ କିଜି ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ପୟ୍‌ଦୁ । ଇୟା ପାଣିଦୁ ଇନି ଉଣ୍ତିଙ୍ଗ୍‌ ମିର୍‌ ବାସେଆତିମାନି ମାରି ଗାଦିଲୋକା ସାକିଙ୍ଗାଁ ଲୋଇ ଇକା ମାନାତିମାନି ।
1TI 6:13 ୱିଜେରି ଜିବନ୍‌ସିନି ମାପୁରୁଦି ଆଗ୍‌ଡ଼ି, ମାରି ପନ୍ତିୟ୍‌ ପିଲାତ୍‌ଦି ଆଗ୍‌ଡ଼ି ଡାଟ୍‌ ବିସ୍‌ବାସ୍‌ତାନ୍‌ ସାକିୟ୍‌ ସିତିମାନି ପ୍ରବୁ ଜିସୁ କ୍ରିସ୍ତଦି ଦର୍‌ତାନ୍‌ ନିଙ୍ଗିଁ ଆଦେସ୍‌ ସିଜି ୱେର୍‌ସିନା :
1TI 6:14 ପ୍ରବୁ ଜିସୁ କ୍ରିସ୍ତଦି ମାରିଡ଼େସିୱାନି ସାନ୍ଦି ନିଙ୍ଗିଁ ସିଆୟ୍‌ଆତିମାନି ମାଟେଙ୍ଗ୍‌ୱିଜୁ ବିସ୍‌ବାସ୍‌ତାନ୍‌ ମାନାଜି ନେଗେନ୍‍ ମାରି ନିନ୍ଦା ଆଏନ୍‍ଣ୍ତା ତେବାଦୁ ।
1TI 6:15 ୱାନି ମାରିଡ଼େସିୱାନିକା ନେଗି ସମୟ୍‌ ଆସ୍‌ କିନାନ୍‌ ନିଜେ ମାପୁରୁ ଦନ୍ୟ, ରାଜାରି ରାଜା ମାରି ପ୍ରବୁରି ପ୍ରବୁ, ମାରି ଅରେନ୍‌ ସାସନ୍‌ କିନିକାନ୍‌;
1TI 6:16 ୱାନ୍‌ କେବଲ୍‌ ସାଏନ୍‌; ଲୋକାଦି ନେସ୍‍ଇ ଜାୟ୍‌ ରାଜିଦୁ ୱାନ୍‌ ବାସା କିନାନ୍‌; ଏନ୍‌ ୱାନିଙ୍ଗ୍‌ ସୁଡ଼ୁଏନ୍‌; ଏନ୍‌ ଏସ୍‌କାଙ୍ଗ୍‌ ସୁଡ଼ୁଦେଙ୍ଗ୍‌ ଆଟ୍‌ଏନ୍‌ । ୱାନି ଗୌରବ୍‌ ମାରି ରାଜି ଜୁଗ୍‍ ଜୁଗ୍‌ ସାନ୍ଦି ମାନିତ୍‌ ।
1TI 6:17 ଇୟା ଦୁନିଆଦୁ ବିସୟ୍‌ତାନ୍‌ ଆମାକାର୍‌ ଦନି, ୱାରିଙ୍ଗ୍‌ ଆକାର୍‍ ଆଇଉଣ୍ତିଙ୍ଗ୍‌ ଜାଗାର୍‌ତା କିଦୁ । ୱାରିଙ୍ଗ୍‌ ଆଦେସ୍‌ ସିଜି ୱେର୍‌ତୁ, ବେକାର୍‌ ଦନ୍‍ସମ୍ପତି ମୁସ୍‌କୁ ଆସା ଇଡ୍‌ମାଟ୍‌, ୱାର୍‌ ୱିଜୁଦିନ୍‌ ମାପୁରୁଦି ମୁସ୍‌କୁ ଆସା ଇଡ୍‌ଦୁ । ତାନି ୱେନ୍‌କା ଜିଦେଙ୍ଗ୍‌ ଇଜି ମା ୱିଜୁ ଦରକାର୍‍ତି ବିସୟ ୱାନ୍‍ ମାଙ୍ଗିଁ ସିନାନ୍‍ ।
1TI 6:18 ସତ୍‌ପାଣିଦୁ ଜାତୁନ୍‍ ଆଜି ନେଗିଦନ୍‌ ଉଣ୍ତା କିଦୁ; ଦାନ୍‌ସିଜି ନିଜେଦି ପାଣିଦୁ ଆଇୱାରିଙ୍ଗ୍‌ ମିସା କିଦୁ ।
1TI 6:19 ଆର୍‌ତିଙ୍ଗ୍‌ ଇୟାୱାଜା କିତିଙ୍ଗ୍‌ ୱାର୍‌ ୱାଜିନିଦିନ୍‌ତି ଉଣ୍ତିଙ୍ଗ୍‌ ମୁଲ୍‌ଦନ୍‌ ନିଜେ ନିଜେଦି ଉଣ୍ତିଙ୍ଗ୍‌ ଉଣ୍ତା କିନାର୍‌ ମାରି ସାରାସାରିୱେନ୍‌କା ୱାର୍‌ ସତ୍‌ତି ଜିବନ୍‌ ପୟ୍‌ନାର୍‌ ।
1TI 6:20 ଏ ତିମତି, ନି ମୁସ୍‌କୁ ସିଆୟ୍‌ ଆତିମାନି ଦାଇତ୍‌ ବିସ୍‌ବାସ୍‌ତାନ୍‌ ମାନେଆଆ । ଏନ୍‌ ଏନ୍‌ ଦାର୍ମୁସିଲି ନିର୍ବୁଦି କାବାଦିଙ୍ଗ୍‌ “ବୁଦି” ଇଜି ଅଡ଼୍‍ବିଜି ସତ୍‌ତି ଦାର୍ମୁ ବିସ୍‌ବାସ୍‌ତାନ୍‌ ୱେର୍‌ଏ ଆଜିନାର୍‌ ଇୟା ୱିଜୁମାଣାନ୍‌ ନିନ୍‍ ଆକ ମାନ୍‌ଆ
1TI 6:21 ଏନ୍‌ ଏନ୍‌ ୱେଡ଼ା କିଜି ବିସ୍‌ବାସ୍‌ ବିସୟ୍‌ତାନ୍‌ ସାରିବାଣାତା ମାନାର୍‌ । ମାପୁରୁ ମି ୱିଜେରିଙ୍ଗ୍‌ ୱାନି ଦୟା ସିପିନ୍‌ ।
2TI 1:1 ନାନ୍‌ ପାଉଲ, କ୍ରିସ୍ତ ଜିସୁଦି ୱାଲେ ମିସାତି ମାଣାନ୍ ମାପୁରୁଦି ପାର୍‌ମାଣ୍‌ତି ଇସାବ୍‌ତାନ୍‌ ମାପ୍‌ ଆମା ଜିବନ୍‌ ପୟ୍‌ତା ମାନାପ୍‌, ଆକା ୱେର୍‌ତେଙ୍ଗ୍‌ ମାପୁରୁଦି ମାଟା ଇସାବ୍‌ତାନ୍‌ ନାନ୍‌ ଅରେନ୍‌ ସିସୁ ୱାଜା ୱାତାମାନା ।
2TI 1:2 ନା ଲାଡ୍‍ତି ମାରିନ୍‌ ତିମତିଦି ଲାକ୍‌ତୁ ନାନ୍‌ ଇୟା ଆକୁ ରାସ୍‌ସିନା : ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା, ସାକା ମାରି ସାନ୍ତି ସିପିନ୍‌ ।
2TI 1:3 ନା ପୁର୍ବେଦିଡକ୍‌ରାଦାଦାରି ୱାଜା ନାନ୍‌ ମାପୁରୁଙ୍ଗ୍‌ ନେଗି ବୁଦିଦାନ୍‌ ସେବା କିଜି ୱାଜିନା, ୱାନିଙ୍ଗ୍‌ ଦନ୍ୟବାଦ୍‌ ସିଜିନା । ନା ପାର୍‍ତନାଦୁ ୱେର୍‌ସି ୱେଡ଼େନାଡ଼ା ନିଙ୍ଗିଁ ଏତ୍‌ କିନିୱାଲେ ନାନ୍‌ ମାପୁରୁଙ୍ଗ୍‌ ଦନ୍ୟବାଦ୍‌ ସିଜିନା ।
2TI 1:4 ନି କାଣେର୍‌ଙ୍ଗୁ ନାଙ୍ଗିଁ ଏତ୍‌ ମାନାତ୍‌ ମାରି ନିଙ୍ଗିଁ ସୁଡ଼ୁଜି ସୁକ୍‌ ଆନି ଉଣ୍ତିଙ୍ଗ୍‌ ନାନ୍‌ ବଦା କିଜିନା ।
2TI 1:5 ମି ଡକ୍ରିବିବି ଲୋୟି ମାରି ଆଇସି ଇଉନିସି ଆମାୱାଜା ବିସ୍‌ବାସ୍‌ କିଜିମାର୍ହାତ୍‌, ମିଦି ବା ଆୟା ଜିବନ୍‌ତି ବିସ୍‌ବାସ୍‌ ମାନାତ୍‌ । ଇୟା ମାଟା ନାନ୍‌ ଏତ୍‌ କିଜିନା । ମି ଆୟା ବିସ୍‌ବାସ୍‌ ମାନାତ୍‌ ଇଜି ସତ୍‍ତାନ୍‌ ନାନ୍‌ ନେସ୍‌ନା ।
2TI 1:6 ନାନ୍‌ ନି ମୁସ୍‌କୁ କିୟୁସର୍‌ପେ କିତିୱାଲେ ନିନ୍‌ ମାପୁରୁମାଣାନ୍‌ ଆମା ଦାନ୍‍ ପୟ୍‌ତିମାର୍‌ଇ, ତାନିଙ୍ଗ୍‌ ଜିବନ୍‌କିଜି ଇଡ୍‌ଦେଙ୍ଗ୍‌ ନାନ୍‌ ନିଙ୍ଗିଁ ଏତ୍‌ କିବିସ୍‌କିଜିନା ।
2TI 1:7 ମାପୁରୁ ମାଙ୍ଗିଁ ଆମା ଆତ୍ମା ଦାନ୍‌ କିତାମାନାନ୍‌, ଆକା ମାଙ୍ଗିଁ ତାଗ୍‌ଇଲୋକ୍‌ କିଏତ୍‌, ମାରି ୱାନିମାଣାନ୍‌ ମାପ୍‌ ସାକ୍ତି, ଜିବନ୍‌ନୋନିକା ମାରି ଆତ୍ମାଦାନ୍‌ ପୁରାବର୍ତି ଆପିତ୍‌ ।
2TI 1:8 ଆଦେଙ୍ଗ୍‌ ପ୍ରବୁ ଜିସୁଦି ବିସୟ୍‌ତାନ୍‌ ସାକ୍ୟୟ୍‌ ସିଦେଙ୍ଗ୍‌ ସେମାର୍‌ ଆମାଟ୍‌; ୱାନି ଉଣ୍ତିଙ୍ଗ୍‌ ନାନ୍‌ ଜଇଲ୍‌ତୁ ନା ଉଣ୍ତିଙ୍ଗ୍‌ ବା ସେମାର୍‌ ଆମାଟ୍‌ । ମାରି ମାପୁରୁ ମିଙ୍ଗିଁ ସିତିମାନି ସାକ୍ତି ଇସାବ୍‌ତାନ୍‌ ମିର୍‌ କ୍ରିସ୍ତ ଜିସୁଦି ସୁସମାଚାର୍‌ ଉଣ୍ତିଙ୍ଗ୍‌ ଦୁଃକ୍‌କାସ୍ଟୁ ପୟ୍‌ଦେଙ୍ଗ୍‌ ତିଆର୍‌ ଆଦୁ ।
2TI 1:9 ମା ନିଜେଦି ସତ୍‌ପାଣିଦି ପୁର୍‌ସ୍କାର୍‌ ୱାଜା ୱାନ୍‌ ମାଙ୍ଗିଁ କୁକ୍‌ଏନ୍‌, କେବଲ୍‌ ୱାନି ଦୟାଦାନ୍‌ ୱାନି ଉଦେସ୍‍ ପୁରା କିଦେଙ୍ଗ୍‌ ମାଙ୍ଗିଁ ୱାନି ଲାଡ୍‍ତିଲୋକୁ ଆନି ଉଣ୍ତିଙ୍ଗ୍‌ ରକିୟା କିତାମାନାନ୍‍ ମାରି ଆସ୍‌କିତାମାନାନ୍‌ । କ୍ରିସ୍ତ ଜିସୁଦି କିତିମାନି ପାଣି ପୁର୍ବେ କାଡ଼ାଦାନ୍‌ ମାପୁରୁ ମାଙ୍ଗିଁ ଇୟା ଦୟା କିଜି ଇଟ୍‌ତା ମାର୍ହାନ୍‌ ।
2TI 1:10 ମାତର୍‌ ଇଲେଇ ଇୟା ଦୁନିଆଦୁ ୱାତାନ୍‌ନୋ ରକିୟାକର୍ତ୍ତା କ୍ରିସ୍ତ ଜିସୁ ଇୟାୱିଜୁ ବିସୟ୍‌ ୱେର୍‌ତା ମାନାନ୍‌ । ୱାନ୍‌ ସାନି ସାକ୍ତିଦିଙ୍ଗ୍‌ ମାରିଗିସ୍‌ କିତାମାନାନ୍‌ ମାରି ୱାନି ସୁସମାଚାର୍‌ଦାନ୍‌ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ତି ସାରି ୱେର୍‌ତା ମାନାନ୍‌ ।
2TI 1:11 ଇୟା ସୁସମାଚାର୍‌ ୱେର୍‌ସି ବୁଜାକିଦେଙ୍ଗ୍‌ ମାପୁରୁ ନାଙ୍ଗିଁ ଅରେନ୍‌ ପ୍ରେରିତ୍‌ ସିସୁ ମାରି ଗୁରୁ ୱାଜା ଆସ୍‌କିତାମାନାନ୍‌ ।
2TI 1:12 ଆୟାଉଣ୍ତିଙ୍ଗ୍‌ ନାନ୍‌ ଇୟାୱିଜୁ ଦୁଃକ୍‌କାସ୍ଟୁ କିଜିନା । ଇରିଙ୍ଗ୍‌ ନାନ୍‌ ଆମାୱାନିଙ୍ଗ୍‌ ବିସ୍‌ବାସ୍‌ କିଜିନା, ନାନ୍‌ ୱାନିଙ୍ଗ୍‌ ନେଗେନ୍‌ତାନ୍‌ ନେସ୍‌ତାମାନା, ଆକା ସାଲାକିଦେଙ୍ଗ୍‌ ପେରିବିସାର୍‌ ଦିନ୍‌ ସାନ୍ଦି ୱାନ୍‌ ନାଙ୍ଗିଁ ନେଗେନ୍‌ତାନ୍‌ ଇଡ୍‌ନାନ୍‌, ଇକା ସତ୍‌ତାନ୍‌ ନେସ୍‌ସି ନାନ୍‌ ଇୟାସାନ୍ଦି ପୁରାପୁରି ଆସା ଆଜି ତେବାତାମାନା ।
2TI 1:13 ନାନ୍‌ ମିଙ୍ଗିଁ ସିକିୟା ସିତିମାନିକା ସତ୍‌ ବିସୟ୍‌ତିଙ୍ଗ୍‌ ଡାଟ୍‌ତାନ୍‌ ଆସ୍‌ସୋ ଇଡ୍‌ଦୁ ମାରି ପ୍ରବୁ ଜିସୁ କ୍ରିସ୍ତଦି ୱାଲେ ମିସାଜ ସତ୍‌ତି ଜିବନ୍‌ନୋନିକା ମାରି ଦର୍ମ ବିସ୍‌ବାସ୍‌ତାନ୍‌ ତିଲାଏଣ୍‌ଗା ମାନ୍‌ଡ୍ରୁ ।
2TI 1:14 ଆମା ପେରି ବିସୟ୍‌ତି ଦାଇତ୍‌ ମି ମୁସ୍‌କୁ ସର୍‌ପେ ଆତାମାନାତ୍‌, ମା ଲୋଇ ବାସାଜିମାନି ପବିତ୍ର ଆତ୍ମାଦି ସାକ୍ତିଦାନ୍‌ ଆୟାୱିଜୁଦିଙ୍ଗ୍‌ ଜାଗ୍‌ରାତା କିଜି ଇଡ୍‌ଦୁ ।
2TI 1:15 ମିର୍‌ ନେସ୍‌ନିଦେର୍‌ ପୁଗେଲ୍‌ ନି ହର୍ମଗେନା ୱିଜୁ ଆସିଆ ଦେସ୍‌ତୁ ୱିଜେରେ ନାଙ୍ଗିଁ ଡ଼ିସ୍‌ତା ସରାମାନାର୍‌ ।
2TI 1:16 ଅନିସିପର୍‌ଦି ଇଲୁପରିବାର୍‌ତିଙ୍ଗ୍‌ ପ୍ରବୁ ଦୟା କିପିନ୍‌, ମାତର୍‌ ୱାନ୍‌ ବାର୍‌ବାର୍‌ ୱାଜି ନାଙ୍ଗିଁ ସାନ୍ତି ନି ୱେଡ଼ିକା ସିତାମାନାନ୍‌, ନାନ୍‌ ଜଇଲ୍‌ତୁ ଇଜି ୱାନ୍‌ ସେମାର୍‌ ଆଏନ୍‌ ।
2TI 1:17 ମାତର୍‌ ରୋମ୍‍ ଗାଡ଼୍‌ତୁ ଇତି ଦାପ୍ରେ ୱାନ୍‌ ନାଙ୍ଗିଁ ପୋଇତାନ୍‌ନୋ ନା ଲାକ୍‌ତୁ ୱାତାମାର୍ହାନ୍‌ ।
2TI 1:18 ପେରିବିସାର୍‌ ଦିନ୍‌ତୁ ପ୍ରବୁ ୱାନି ଉଣ୍ତିଙ୍ଗ୍‌ ଦୟା କିପିନ୍‌, ଏପିସ୍‌ତୁ ୱାନ୍‌ ନାଙ୍ଗିଁ ଏସ ସେବା କିତାମାର୍ହାନ୍‌, ମିର୍‌ ଆୟାୱିଜୁ ମାଟା ନେସ୍‌ନିଦେର୍‌ ।
2TI 2:1 ନା ୱେଡ଼ିକାଦି ମାରିନ୍‌, କ୍ରିସ୍ତ ଜିସୁଦି ୱାଲେ ମିସାତିଙ୍ଗ୍‌ ୱାନି ଦୟାଦାନ୍‌ ଆମା ସାକ୍ତି ପୟ୍‌ତିଙ୍ଗ୍‌, ଆବେଟ୍‌କୁ ମିର୍‌ ବପୁ ଆଦୁ ।
2TI 2:2 ମାରି ଗାଦି ଲୋକ୍‌ ସାକିରି ଆଗ୍‌ଡ଼ି ନାନ୍‌ ପ୍ରଚାର୍‌ କିତିମାନି ବାକ୍ୟୱିଜୁ ମିର୍‌ ୱେର୍‌ଇମାନିଦେର୍‌ । ଆଇୱାରିଙ୍ଗ୍‌ ସିକିୟା ସିନି ଉଣ୍ତିଙ୍ଗ୍‌ ସାସ୍‌ ମାରି ବିସ୍‌ବାସ୍‌ତି ଲୋକା ଲାକ୍‌ତୁ ଆୟାୱିଜୁ ବିସୟ୍‌ ସର୍‌ପେ କିଦୁ ।
2TI 2:3 କ୍ରିସ୍ତ ଜିସୁଦି ଅରେନ୍‌ ବିସ୍‌ବାସ୍‌ତି ସନ୍ୟ ୱାଜା ମିର୍‌ ୱାନି ଉଣ୍ତିଙ୍ଗ୍‌ ଦୁଃକ୍‌କାସ୍ଟୁ ପୟ୍‌ଦୁ ।
2TI 2:4 ଜୁଦ୍‌ ସାଲାନି ମାନିୱାଲେ ସନ୍ୟ କେବଲ୍‌ ୱାନି ସେନାପତିଙ୍ଗ୍‌ ୱେଡ଼ିକା କିନି ଉଣ୍ତିଙ୍ଗ୍‌ ଦାନ୍ଦାଆନା ମାନାନ୍‌ । ନାସ୍ତିୱାଲେ ୱାନ୍‌ ଇନି ଦୁନିଆଦି ପାଣିଦୁ ମୋନ୍‌ ସିଏନ୍‌ ।
2TI 2:5 ଉରୁକୁନିମାନୁ ମିସାତି ମାନି କାର୍‌ଜିନିକାନ୍‌ ଉରୁକୁନିମାନି ନିୟମ୍‌ତିଙ୍ଗ୍‌ ମାନାଏତିଙ୍ଗ୍‌, ଆବେନୁ ୱାନ୍‌ କିନିପାଣିଦୁ ପୁରସ୍କାର୍‌ ପୟ୍‌ଦେଙ୍ଗ୍‌ ଆଟ୍‌ଏନ୍‌ ।
2TI 2:6 ଆଟ୍‌ୱା ପାଣି କିତିମାନି ଲୋକ୍‌ ପାସି ଆତିମାନି ପାସିଦି ଆଗ୍‌ଡ଼ି ବାଗ୍‍ ପୟ୍‌ନିକା ମାନାତ୍‌ ।
2TI 2:7 ନାନ୍‌ ଆମାକା ୱେର୍‌ସିନା, ମୋନ୍‌ ସିଜି ସିନ୍ତା କିଦୁ, ଆର୍‌ତିଙ୍ଗ୍‌ ଇୟାୱିଜୁ ବିସୟ୍‌ତାନ୍‌ ଅରତ୍‌ ବୁଜାଦେଙ୍ଗ୍‌ ପ୍ରବୁ ମିଙ୍ଗିଁ ସାକ୍ତି ସିନାନ୍‌ ।
2TI 2:8 ନାନ୍‌ ପ୍ରଚାର୍‌ କିତିମାନି ସୁସମାଚାର୍‌ ଇସାବ୍‌ତାନ୍‌ ଆମା ସାତିମାଣାନ୍‌ ନିଙ୍ଗିଁତି ଜିସୁ କ୍ରିସ୍ତ ଦାଉଦ ରାଜାଦି କୁଟୁମ୍‌, ୱାନିଙ୍ଗ୍‌ ଏତ୍‌ କିଦୁ ।
2TI 2:9 ଇୟା ସୁସମାଚାର୍‌ ପ୍ରଚାର୍‌ କିତାଆକା ନାନ୍‌ ଡଙ୍ଗାଁର୍‌ଏନ୍‌ ୱାଜା ତର୍‌ଆୟ୍‌ ଆଜି କାସ୍ଟୁ ବୋଗାଜିନା । ମାତର୍‌ ମାପୁରୁଦି ବାକ୍ୟଦିଙ୍ଗ୍‌ ଏନ୍‌ ଜଇଲ୍‍ କିଦେଙ୍ଗ୍‌ ଆଟ୍‌ଏନ୍‌ ।
2TI 2:10 ମାପୁରୁଦି ଆସ୍‌କିତିମାନି ଲୋକ୍‌ କ୍ରିସ୍ତ ଜିସୁଦି ମାଣୁକୁ ପୟ୍‌ତିମାନି ପରିତ୍ରାଣ ମାରି ଏସ୍‌କାଙ୍ଗ୍‌ୱିଜ୍‌ଇ ଗୌରବ୍‍ ପୟ୍‌ଦୁ, ଇୟା ଉଦେସ୍‌ଦାନ୍‌ ନାନ୍‌ ୱିଜୁ କାସ୍ଟୁ ସାସ୍‌ କିଜିନା ।
2TI 2:11 ଇୟା ମାଟା ଉନ୍‌ଡ୍ରି ପୁରା ସତ୍‌ : “ଜଦି ମାଡ୍‌ ୱାନି ୱାଲେ ସାତିମାନିକା, ଆର୍‌ତିଙ୍ଗ୍‌ ୱାନି ୱାଲେ ଜିବନ୍‌ଆଜି ବା ଜିନାଟ୍‍ ।
2TI 2:12 ଜଦି ମାଡ୍‌ ସାସ୍‌ ଆସ୍‌ସି ତେବାନାପ୍‌, ଆର୍‌ତିଙ୍ଗ୍‌ ୱାନି ୱାଲେ ସାସନ୍ କିନାପ୍‌ । ଜଦି ୱାନିଙ୍ଗ୍‌ ମାନାଏତିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ବା ମାଙ୍ଗିଁ ମାନାଏନ୍‌ ।
2TI 2:13 ଜଦି ୱାନି ଉଣ୍ତିଙ୍ଗ୍‌ ମାଡ୍‌ ଅବିସ୍‌ବାସ୍‌ ଆତିଙ୍ଗ୍‌ବା, ୱାନ୍‌ ୱିଜୁଦିନ୍ ବିସ୍‍ବାସ୍‍ ତେବାନାନ୍‌, ଇରିଙ୍ଗ୍‌ ୱାନ୍‌ ନିଜେଦି ବିସୟ୍‌ତାନ୍‌ ମିଚ୍‌ ୱେର୍‌ତେଙ୍ଗ୍‌ ଆଟ୍‌ଏନ୍‌ ।”
2TI 2:14 ମିର୍‌ ୱିଜୁ ବିସ୍‌ବାସ୍‌ରିଙ୍ଗ୍‌ ଇୟାୱିଜୁ ବିସୟ୍‌ତାନ୍‌ ଏତ୍‌ କିବିସ୍‌ କିଦୁ ମାରି ସାସ୍ତ୍ରଦି ଅରତ୍‌ ବିସୟ୍‌ତାନ୍‌ ଆଉଲି ଆଇ ଉଣ୍ତିଙ୍ଗ୍‌ ୱାରିଙ୍ଗ୍‌ ଜାଗାର୍‌ତା କିଦୁ । ଇୟାୱାଜା ଆଉଲି ଏନ୍ଦି ଇନିକା ନେଗିକା କିଏତ୍‌ ମାରି ଆମାକାର୍‌ ଆବେନୁ ୱେନାର୍‌, ୱାରିନ୍ଦି ନାସ୍ଟୁ ଆନାତ୍‌ ।
2TI 2:15 ମିର୍‌ ସେମାର୍‌ ଆଏଣ୍‌ଗା ବୁଲ୍‌ସିଲେଏଣ୍‌ଗା ମାପୁରୁଦି ସତ୍‌ବାକ୍ୟ ୱେର୍‌ତୁ; ଆର୍‌ତିଙ୍ଗ୍‌, ଅରେନ୍‌ ବିସ୍‌ବାସ୍‌ତି ଲୋକୁ ୱାଜା ମିର୍‌ ମାପୁରୁଦି ପୁରା ପରିକାଦୁ ଜିଣାନି ବିସୟ୍‌ ପୟ୍‌ନିଦେର୍‌ ।
2TI 2:16 ଆମା ଦାର୍ମୁଦୁସିଲି ବୁଦିସିଲି ବାକ୍ୟ ୱେନି ଲୋକ୍‌ତିଙ୍ଗ୍‌ ମାପୁରୁମାଣାନ୍‌ ଅଲଗା କିନାତ୍‌, ଆୟା ୱିଜୁମାଣୁକୁ ଆକ ମାନ୍‌ଡ୍ରୁ ।
2TI 2:17 ଆମାକାର୍‌ ଇୟାୱାଜା ବାକ୍ୟ ୱେନାର୍‌, ୱାରି ସିକିୟା ସାବ୍‌ତି ଗାଉ ୱାଜା ତିନ୍‌ଜିସନାତ୍‌ ୱାରି ଲୋଇ ମାନାର୍‌ ହୁମନାୟ ନି ପିଲିତ ।
2TI 2:18 ୱାର୍‌ ସତ୍‌ସାରିଦାନ୍‌ ୱେର୍‌ଏ ଆତାମାନାର୍‌ ମାରି ଇୟା ଜିବନ୍‌ତୁ ମାରିଡ଼େସି ଜିବନ୍‌ଆଜି ନିଙ୍ଗିଁକା ଗଟାତାମାନାତ୍‌ ଇଜି ସିକିୟା ସିଜି ଏସଲୋକା ଦାର୍ମୁ ବିସ୍‌ବାସ୍‌ତିଙ୍ଗ୍‌ ମାର୍ତା ପୋକ୍‌ସିନାର୍‌ ।
2TI 2:19 ମାତର୍‌ ମାପୁରୁ ଆମା ଡାଟ୍‌ତି ମୁଲ୍‌କୁନାଦି ତିଆର୍‌ କିତାମାନାନ୍‌, ତାନିଙ୍ଗ୍‌ ଏନ୍‌ ଦୁକ୍‌ତେଙ୍ଗ୍‌ ଆଟ୍‌ଏନ୍‌ । ଆୟା କୁନାଦିକାଲୁ ମୁସ୍‌କୁ ଇକା ରାସ୍‌ତା ମାନାତ୍‌ : “ମାପୁରୁ ୱାନି ନିଜେଦି ଲୋକାଙ୍ଗ୍‌ ନେସ୍‌ନାନ୍‌ ଏନ୍‌ ନିଜେଦିଙ୍ଗ୍‌ ମାପୁରୁଦି ଲୋକୁ ଇଜି ପରିଚୟ୍‌ ସିନାନ୍‌, ଆୟାୱିଜୁ ତାଗ୍‍ଇ ପାଣିଦାନ୍‌ ଆକ ମାନିନ୍‌ ।”
2TI 2:20 ଅରେନ୍‌ ପେରି ଲୋକା ଇନ୍‌ଡ୍ର ଆଇଆଇ ଜାତିଦି ସାଡ଼୍‌ୱାକୁଡ଼ୁକେଙ୍ଗ୍‌ ମାନେ । ଆବେଣାନ୍‍ ଏସଗୋଟା ନାଣ୍ତ୍‌ଦାରାଦିକେଙ୍ଗ୍‌ ବାଙ୍ଗାଁରାଓ ନି ୱେଡିଦାନ୍‌ ତିଆର୍‌ଆତିକେଙ୍ଗ୍‌, ମାରି ଏସଗୋଟା ଉଣା ଦାରାଦାନ୍‌ ସିକ୍‌ଲା ନି ମାରାତାନ୍‌ ତିଆର୍‌ଆତିକେଙ୍ଗ୍‌ । ଏସଗୋଟା ସାଡ଼୍‌ୱାଡୁବାଇଙ୍ଗୁ ପଣ୍ତୟ୍‌ତି ୱିଜୁ ୱେଡ଼ିକାଦି ୱାଲେ ବ୍ୟବ୍‌ହାର୍‌ ଆନେ, ଆଇକେଙ୍ଗ୍‌ ୱିଜୁଦିନ୍‌ତି ପାଣିଦୁ ଲାଗେ ଆନେ ।
2TI 2:21 ଜଦି ଏନ୍ ୱିଜୁ ପାପ୍‌ ପାଣିଦାନ୍‌ ନିଜେଦିଙ୍ଗ୍‌ ନେଗିକା ଇଡିନାନ୍‌, ୱାନ୍ ପ୍ରବୁଦି ବିସେସ୍‌ ପାଣିଦୁ ବ୍ୟବ୍‌ହାର୍‌ ଆନାନ୍‌, ଇରିଙ୍ଗ୍‌ ୱାନ୍‌ ପ୍ରବୁଦିମାନୁ ଲାଡ୍‌ତିକାନ୍‌, ୱାନି ଉଣ୍ତିଙ୍ଗ୍‌ ୱାନ୍‌ ଦର୍‌କାର୍‌ । ଆମା ଇନି ପେରି ପାଣିଦୁ ବ୍ୟବ୍‌ହାର୍‌ ଆନି ଉଣ୍ତିଙ୍ଗ୍‌ ୱାନ୍‌ ତିଆର୍‌ ମାନାନ୍‌ ।
2TI 2:22 ଆମାକାର୍ ନେଗି ଜିବନ୍‌ତାନ୍ ମାପୁରୁଦି ସାହାଜ୍ୟ ପାର୍‌ତାନା କିଜିମାନାର୍, ୱାରି ଲାକ୍‌ତୁ ତେବାଜି ମିର୍‌ ମୁରୁଲି ମାନିୱାଲେ ତାଗ୍‌ଇପାଣିଦାନ୍‌ ଆକ ମାନ୍‌ଡ୍ରୁ, ମାରି ଦାର୍ମୁ, ବିସ୍‌ବାସ୍‌, ଜିବନ୍‌ନୋନିକା ମାରି ସାନ୍ତି ଉଣ୍ତିଙ୍ଗ୍‌ ପାଣି କିଦୁ ।
2TI 2:23 ମାରି ଉନ୍‌ଡ୍ରି ଦେବା ୱେର୍‌ସିନା, ମିଚ୍‌ ମାରି ବୁଦିସିଲି ଆସ୍‌ସିସାନିମାଣାନ୍‌ ଆକ ମାନ୍‌ଡ୍ରୁ । ମିରୁ ନେସ୍‌ନିଦେର୍‌, ଇରିଙ୍ଗ୍‌ ଇୟା ୱିଜୁଦି ପାଣି କେବଲ୍‌ ଲାଗାଜିସାନିକା ।
2TI 2:24 ମାପୁରୁଦି ପାଣିକିନିକାନ୍‌ ଆଉଲି ଆନିକା ନେଗେତ୍‌ ସିଲେ, ୱାନ୍‌ ୱିଜେରି ଉଣ୍ତିଙ୍ଗ୍‌ ସାନ୍ତି ଆଜି ଅରେନ୍‌ ପୁରା ସାସ୍ତି ଗୁରୁ ଆନି ଦର୍‌କାର୍‌ ।
2TI 2:25 ୱାନିଙ୍ଗ୍‌ ବିରୁଦ୍‌ କିଜିମାନି ଲୋକାନ୍ଦି ଦସ୍‌ତିବୁଲ୍‌ ୱାନ୍‌ ଡାଟ୍‌ତି ୱାଜା ସାସନ୍‌ କିନିକା ଟିକ୍‌, ମାତର୍‌ ଏତ୍‌କିଜି ସତ୍‌ ପାଣି କିଦେଙ୍ଗ୍‌ ଆର୍‌ତିଙ୍ଗ୍‌ ଅର୍‍ଲେନ୍‍ ମାପୁରୁ ୱାରିଙ୍ଗ୍‌ ସୁଜୋଗ ସିନାନ୍ ।
2TI 2:26 ମାରି ଆମା ସୟ୍‌ତାନ୍‌ ୱାରିଙ୍ଗ୍‌ ତାନି ବଦା ପୁରା କିନି ଉଣ୍ତିଙ୍ଗ୍‌ ତର୍‌ତା ମାନାତ୍‌, ସେତା ଆଜି ସୟତାନ୍‌ ଉରିଦାନ୍‌ ଡ଼ିସାନାର୍ ।
2TI 3:1 ମନେ ଇଡ୍‌ଦୁ, ସାରାସାରି ଦିନ୍‌ତୁ ଗାଦି ରାଓକୁ ୱାଜି ଇନେ ।
2TI 3:2 ଲୋକୁ ନିଜେଦିଙ୍ଗ୍‌ ତରାନିକା, ଦନ୍‍ଲୋବ୍‌, ଗର୍ବ, ନିନ୍ଦା; ୱାର୍‌ ବୁବାୟାୟାଙ୍ଗେ ମାନାଏଣ୍‌ଗା ୱାରିଙ୍ଗ୍‌ ଅପ୍‌ମାନ୍‌ କିନାର୍‌; ୱାରି ମୋନ୍‌ତାନ୍‌ ଦୟା ମାରି ଦାର୍ମୁ ମାରାଗ୍‌ନାତ୍‌,
2TI 3:3 ୱାର୍‌ ଆନାର୍‌ ଆଇ ଲୋକା ସୁରି କିନିକାର୍‌, ରିସାଆନିକା ମାରି ବୟଙ୍କାକାର୍‌ତିକାର୍‌; ୱିଜୁ ନେଗି ବିସୟ୍‌ତିଙ୍ଗ୍‌ କାଡ଼ାନାନ୍‌ ।
2TI 3:4 ୱାର୍‌ ଗର୍ବଦାନ୍‌ କେଇନିକା ଆଜି ବିସ୍‌ବାସ୍‌ ଆରାକିଜି ମାରି ବିଚାର୍‌ସିଲିକାର୍‌ ଆନାର୍‌; ୱାର୍‌ ମାପୁରୁଦି ବକ୍ତିମାଣାନ୍‌ ଉଣିତିନିମାନୁ ନାଣ୍ତ୍‌ ସୁକ୍‌ କିନାର୍‌ ।
2TI 3:5 ଦାର୍ମୁଦି ସତ୍‌ତି ସାକ୍ତିଦିଙ୍ଗ୍‌ ମାନାଏଣ୍‌ଗା ୱାର୍‌ ଆତ୍‍ରେରି ଦାର୍ମୁପାଣିଦିଙ୍ଗ୍‌ ୱିଜୁ ଅଡ଼୍‌ବିନାର୍‌ । ଇୟାୱାରିମାଣୁକୁ ମିର୍‌ ଆକ ମାନ୍‌ଡ୍ରୁ ।
2TI 3:6 ଇୟାୱାଜା ଲୋକୁ ଏସଲୋକା ଇଲ୍‌କାଙ୍ଗ୍‌ ସୋଲ୍‌ସି ବପୁସିଲି ଆଇମେକା ମୁସ୍‌କୁ ଆସା ଇଡ୍‌ନାର୍‌ । ଆମା ଆଇମେକ୍‍ ଇନିଇନି ଆସାଦି ଲାକ୍‌ତୁ ଆଜି ନିଜେଦି ପାପ୍‌ ବୋଜୁଦୁ ଆଜି ପଡ଼େଆନେମାନେ ।
2TI 3:7 ଆମାକେଙ୍ଗ୍‌ ୱିଜୁଦିନ୍ ସତ୍‌ ନେସ୍‌ତେଙ୍ଗ୍‌ ସେସ୍ଟା କିଜିମାନେ, ମାତର୍‌ ତାନି ବିସୟ୍‌ ପୟ୍‌ଉ, ଇୟାୱାଜା ଆଇମେକାଙ୍ଗ୍‍ଁ ୱାର୍‌ ୱାରିଆଡ୍‌ଗି କିନାର୍‌ ।
2TI 3:8 ଆଉ ଯନ୍ନିସ ମାରି ଯମ୍ୱ୍ରୀସ ଏଣ୍ତେସ୍‌ ମୋସାଦି ବିରୁଦ୍‌ କିତାମାର୍ହାର୍‌, ଆୟାୱାଜା ୱେନ୍‌କାରି ଦିନ୍‌ତୁ ଇୟା ତାଗ୍‌ଇକାର୍‌ ସତ୍‌ତିଙ୍ଗ୍‌ ବିରୁଦ୍‌ କିନାର୍‌ ୱାରି ବୁଦି ପାଣି ସିଏଜିନାତ୍‌ ମାରି ୱାରି ଦାର୍ମୁବିସ୍‌ବାସ୍‌ ବେକାର୍‌ ଆତାତ୍‌ ।
2TI 3:9 ମାତର୍‌ ୱାର୍‌ ନାଣ୍ତ୍‌ ଆଗ୍‌ଡ଼ି ଆଦେଙ୍ଗ୍‌ ଆଟ୍‍ଏର୍‍ । ଅର୍‍ଲେନ୍‍ ୱିଜେରେ ନେସ୍‌ନାର୍‌, ୱାର୍‌ ଏସ ବୁଦିସିଲିକାର୍‌ । ଯନ୍ନିସ ମାରି ଯମ୍ୱ୍ରିସଦି ଜିବନ୍‌ତୁ ଆମାକା ଗଟାତା ମାର୍ହାତ୍‌, ୱାରି ଜିବନ୍‌ତୁ ଆକାନେ ଗଟାନାତ୍‌ ।
2TI 3:10 ମାତର୍‌ ନିନ୍‌ ନା ସିକିୟା, ନା ବ୍ୟବହାର୍‌ ମାରି ନା ଜିବନ୍‌ତି ପାଣି ସୁଡ଼ୁତିମାନିଦେର୍‌ । ନା ବିସ୍‌ବାସ୍‌, ସାସ୍‌, ଜିବନ୍‌ନୋନିକା, ସାନ୍ତି,
2TI 3:11 ନା କାସ୍ଟୁ ମାରି ଦୁଃକ୍‌ବୋଗ୍‌ ନିନ୍‌ ସୁଡ଼ୁତିମାନି । ନିନ୍‌ ନେସ୍‌ତିମାନି, ଏଣ୍ତେସ୍‌ ଆଣ୍ଟିୟକ, ଇକନିୟା, ଲୁସ୍ତ୍ରାଦୁ ନାନ୍‌ ନାଣ୍ତ୍‌ କାସ୍ଟୁ ପୟ୍‌ତା ମାର୍‌ଆ । ମାତର୍‌ ଏଣ୍ତେସ୍‌ ୱାନ୍‌ ୱିଜୁଦାନ୍‌ ପ୍ରବୁ ନାଙ୍ଗିଁ ଉଦାର୍‌ କିତାମାନାନ୍‌ ।
2TI 3:12 ସତ୍‌ତାନ୍‌ ଆମାକାର୍‌ କ୍ରିସ୍ତ ଜିସୁଦି ୱାଲେ ମିସାଜି ଦାର୍ମୁଜିବନ୍‌ତାନ୍‌ ଜିଦେଙ୍ଗ୍‌ ଇଚ୍ଛା କିନାନ୍‌, ୱାରିଙ୍ଗ୍‌ ଦୁଃକ୍‌କାସ୍ଟୁଦିଙ୍ଗ୍‌ ସାମ୍‌ନା ଆଦେଙ୍ଗ୍‌ ପଡ଼ାନାତ୍‌ ।
2TI 3:13 ମାତର୍‌ ସୁରିୱାର୍‌ଗିନି ଲୋକ୍‌ ମାରି ପୁକାପୁଲିକିନିୱାରି ସାରି ପୁରାସେସ୍‌ ଆନିତରିନ୍‌ ୱାର୍‌ ଆଇୱାରିଙ୍ଗ୍‌ ଟକେ କିନାର୍‌ ସାରାସାରି ୱେନ୍‌କା ନିଜେ ଗୁଟାଦୁ ଆର୍‌ନାର୍‌ ।
2TI 3:14 ମାତର୍‌ ଆମା ୱିଜୁ ସତ୍‌ ସିକିୟା କିଜି ଡାଟ୍‌ତାନ୍‌ ବିସ୍‌ବାସ୍‌ କିଜିନିଦେର୍‌, ଆୟାୱିଜୁଦୁ ନିନ୍‌ ଡାଟ୍‌ତାନ୍‌ ତେବାଆ । ନି ଗୁରୁର୍‍ ଏନ୍‌, ନିନ୍‌ ନେସ୍‌ତିମାନି ।
2TI 3:15 କ୍ରିସ୍ତ ଜିସୁଦିମାନୁ ବିସ୍‌ବାସ୍‌ କିଜି ରକିୟା ପୟ୍‌ନି ବୁଦି ଆମା ପବିତ୍ର ଦାର୍ମୁସାସ୍ତ୍ରଦୁ ସୁଡ଼ିତିମାନିଦେର୍‌, ମିର୍‌ କଡ଼ୱାଲେରାନ୍‌ ଆୟାୱିଜୁ ସାସ୍ତ୍ର ପଡ଼ାଜି ବୁଜାତିମାନିଦେର୍‌ ।
2TI 3:16 ୱିଜୁ ଦାର୍ମୁସାସ୍ତ୍ର ମାପୁରୁଦି ମାଣାନ୍‌ ସିଆୟ୍‌ଆତା ମାନାତ୍‌ ମାରି ସତ୍‌ ବାକ୍ୟ, ସିକ୍‌ୟା, ମିଚ୍‌ତି ବିରୁଦ୍‌ କିଜି ମାରି ବୁଲ୍‌ତିଙ୍ଗ୍‌ ଟିକ୍‌ କିନି ଉଣ୍ତିଙ୍ଗ୍‌ ୱେର୍‌ସି, ସତ୍‌ ଜିଦେଙ୍ଗ୍‌ ଦାର୍ମୁସାସ୍ତ୍ର ସାହାଜ୍ୟ କିନାତ୍‌,
2TI 3:17 ଏଣ୍ତେସ୍‌ ମାପୁରୁଦି ଲୋକୁ ପୁରା ଆଜି ୱିଜୁ ନେଗି ପାଣି ଉଣ୍ତିଙ୍ଗ୍‌ ଜଗ୍‌ ପୟ୍‌ଦେଙ୍ଗ୍‌ ଆଟ୍‌ନାନ୍‌ ।
2TI 4:1 ମାପୁରୁଦି ଆଗ୍‌ଡ଼ି ମାରି ୱିଜୁ ଜିବନ୍‌ତିକାର୍‌ ମାରି ସାତିମାନି ଲୋକାଙ୍ଗ୍‌ ବିସାର୍‌ କିଦେଙ୍ଗ୍‌ ମାରି ସାସନ୍‌ କିଦେଙ୍ଗ୍‌ ୱାଜିମାନି କ୍ରିସ୍ତ ଜିସୁଦି ଆଗ୍‍ଡ଼ିନେ, ନାନ୍‌ ମିଙ୍ଗିଁ ଇୟା ଡାଟ୍‌ ମାଟା ସିଜିନା,
2TI 4:2 ବାକ୍ୟ ପ୍ରଚାର୍‌ କିଦୁ, ବେଡ଼ା ଅବେଡ଼ାଦୁ ବିସାର୍‌ କିଏଣ୍‌ଗା, ମିର୍‌ ସବୁୱାଲେ ଆୟା ବିସୟ୍‌ ମୁସ୍‌କୁ ନେସ୍‌ନି ୱାଜା ବୁଜାକିନିଦେର୍‌; ସାହାସ୍‌ତାନ୍‌ ସିକିୟା ସିଜି, ଏସ୍ତିୱାଲେ ଆଦ୍‌ରିସ୍‌ କିଜି ଏସ୍ତିୱାଲେ ମାରି ୱେଡ଼ିକା କିଜି ଆଇୱାରି ମୋନ୍‌ତୁ ଆୟାଉଣ୍ତିଙ୍ଗ୍‌ ୱେଡ଼ିକା ପିରିସ୍‌ନାତ୍‌ ।
2TI 4:3 ଦିନ୍‌ ୱାନାତ୍‌, ଏସ୍ତିୱାଲେ ଲୋକୁ ସତ୍‌ ସିକିୟାଦୁ ୱେନ୍‌ଏର୍‌, ୱାର୍‌ କେବଲ୍‌ ନିଜେ ନିଜେଦି ଆସା ବ୍ୟବ୍‌ହାର୍‌ କିନି ଉଣ୍ତିଙ୍ଗ୍‌ ଲାଲାୟ୍‌ ଆନାର୍‌ ମାରି ଇୟାଉଣ୍ତିଙ୍ଗ୍‌ ୱାରିଙ୍ଗ୍‌ ଲାକ୍‌ତୁ କିଜିମାନି ଟକେକିନି ଗୁରୁରିଙ୍ଗ୍‌ ୱାର୍‌ କୁକ୍‌ନାର୍‌ ।
2TI 4:4 ସତ୍‌ତି ବାକ୍ୟ ୱେନ୍‌ଏଣ୍‌ଗା ଲୋକା ମୋନ୍‌ତି କାତା ୱେନ୍‌ଡ୍ରେଙ୍ଗ୍‌ ବଦା କିନାର୍‌ ।
2TI 4:5 ମାତର୍‌ ମିର୍‌ ୱିଜୁ କାସ୍ଟୁଦିଙ୍ଗ୍‌ ସାସ୍‌ କିଦୁ; ସୁସମାଚାର୍‌ ୱେର୍‌ନିକାନ୍‌ ମାରି ମାପୁରୁଦି ବିସ୍‌ବାସ୍‌ତି ସେବାକିନିକାନ୍‌ ୱାଜା ମିର୍‌ ଦୁଃକ୍‌କାସ୍ଟୁ ବୋଗାଦେଙ୍ଗ୍‌ ତିଆର୍‌ ଆଦୁ ।
2TI 4:6 ନା ଜିବନ୍‌ତିଙ୍ଗ୍‌ ସର୍‌ପେ କିଜି ସିଦେଙ୍ଗ୍‌ ଇୟା ଦୁନିଆ ଡ଼ିସ୍‌ସୋ ସନ୍‌ଡ୍ରେଙ୍ଗ୍‌ ବେଡ଼ା ୱାତାତ୍‌ନି ।
2TI 4:7 ଜିବନ୍‌ତି ନେଗି ଜୁଦ୍‌ତାନ୍‌ ନାନ୍‌ ସାନି ୱାଜା ଜୁଦ୍‌ କିଜିନା, ଜିବନ୍‌ ମାନିୱାଲେ ନାନ୍‌ ତିଆର୍‌କିତି ସାରି ଜିଣାତାମାନା । ନା ବିସ୍‌ବାସ୍‌ତୁ ନାନ୍‌ ଡାଟ୍‌ ତେବାତାମାନା ।
2TI 4:8 ଇଲେଇ ନାନ୍‌ ଦାର୍ମୁପାଣିକିନି ଉଣ୍ତିଙ୍ଗ୍‌ ଜିଣାନି ପୁର୍‌ସ୍କାର୍‌ ଇଟ୍‌ତାମାନାନ୍‌, ପେରିଦିନ୍‌ତୁ ନ୍ୟାୟ୍‌କିନି ବିସାର୍‌କିନି ପ୍ରବୁ ନାଙ୍ଗିଁ ଆୟା ପୁର୍‌ସ୍କାର୍‌ ସିନାନ୍‌, କେବଲ୍‌ ନାଙ୍ଗିଁ ସିଲେ; ଜିବନ୍‌ନୋନିକା ବକ୍ତିଦି ୱାଲେ ଆମାକାର୍‌ ୱାନି ୱାନିଦିନ୍‌ତିଙ୍ଗ୍‌ କାପ୍‌କିତା ମାନାର୍‌, ୱିଜେରେ ଇୟା ପୁର୍‌ସ୍କାର୍‌ ପୟ୍‌ନାର୍‌ ।
2TI 4:9 ନା ଲାକ୍‌ତୁ ବେଗି ୱାଦେଙ୍ଗ୍‌ ତିଆର୍‌ ଆଦୁ ।
2TI 4:10 ଦିମା ଇୟା ଇଲେଇତି ଦୁନିଆଦିଙ୍ଗ୍‌ ଜିବନ୍‌ନୋଜି ନାଙ୍ଗିଁ ଡ଼ିସ୍‌ତାସରା ମାନାନ୍‌, ୱାନ୍‌ ଇଲେଇ ତେସଲନିକିୟାଦୁ ସର୍‌ଆମାନାନ୍‌, କ୍ରେସ୍‌କେନସ୍‌ ଗାଲାତିଆଦୁ ମାରି ତିତସ ଡଲମାତିଆଦୁ ସର୍‌ଆମାନାର୍‌ ।
2TI 4:11 କେବଲ୍‌ ଲୁକ ନା ଲାକ୍‌ତୁ ମାନାନ୍‌ । ମିର୍‌ ଅର୍‌ସେ ମାର୍କଙ୍ଗ୍‌ ଆସ୍‌ସି ୱାନିଦେର୍‌; ମାତର୍‌ ୱାନ୍‌ ନାଙ୍ଗିଁ ନା ପାଣି ସାହାଜ୍ୟ କିଦେଙ୍ଗ୍‌ ଆଟ୍‌ନାନ୍‌ ।
2TI 4:12 ତୁକିକସଦିଙ୍ଗ୍‌ ନାନ୍‌ ଏପିସ୍‌ଦୁ ପୋକ୍‌ତାମାନା ।
2TI 4:13 ତ୍ରୋୟା ଗାଡ଼୍‌ତୁ କାର୍‌ପସ୍‌ଦି ଲାକ୍‌ତୁ ନାନ୍‌ ଆମା ଆଙ୍ଗିଁ ଡ଼ିସ୍‌ତା ୱାତାମାନା, ମିର୍‌ ୱାନିୱାଲେ ତାନିଙ୍ଗ୍‌ ଅର୍‌ସେ ଆସ୍‌ସି ୱାନି । ନା ବଇଙ୍ଗ୍‌ ନି ତଲୁବଇଙ୍ଗ୍‌ ବା ଆସ୍‌ସି ରାଆ ।
2TI 4:14 କଂସାରି ଆଲେକ୍‍ଜାଣ୍ତର୍‍ ନାଙ୍ଗିଁ ନାଣ୍ତ୍‌ କାସ୍ଟୁ କିତାମାନାନ୍‌, ପ୍ରବୁଦିମାଣାନ୍‌ ୱାନ୍‌ ନିଜେଦି ପାଣି ଇସାବ୍‌ତାନ୍‌ ୱାନ୍‌ ଦଣ୍ତ୍‌ ପୟ୍‌ନାନ୍‌ ।
2TI 4:15 ମିର୍‌ ବା ୱାନି ଲାକ୍‌ତୁରାନ୍‌ ଜାଗ୍‌ରାତା ମାନ୍‌ଡ୍ରୁ, ଇରିଙ୍ଗ୍‌ ୱାନ୍‌ ମା ସୁସମାଚାର୍‌ ୱେର୍‌ତେଙ୍ଗ୍‌ ନାଣ୍ତ୍‌ ବିରୁଦ୍‌ କିଜିମାର୍ହାନ୍‌ ।
2TI 4:16 ଆଗ୍‍ଡ଼ିନେ ଏସ୍ତିୱାଲେ ନାଙ୍ଗିଁ ନିଜେଦି ତରିନ୍‌ ସାମ୍‌ନା କିଦେଙ୍ଗ୍‌ ପଡ଼ାତାମାର୍ହାତ୍‌, ଏନ୍‌ ନା ଲାକ୍‌ତୁ ତେବାଏତାର୍‌, ୱିଜେରେ ନାଙ୍ଗିଁ ଡ଼ିସ୍‌ତା ସର୍ହାର୍‌ । ମାପୁରୁ ୱାରି ଇୟା ଦୋସ୍‌ତିଙ୍ଗ୍‌ ଆସ୍‌ମାକିନ୍‌ ।
2TI 4:17 ମାତର୍‌ ମାପୁରୁଦି ୱାଲେ ଏତ୍‌କିଜି ଅଣଜିହୁଦିରି ମାନୁ ନେଗିକାବୁର୍‌ ପ୍ରଚାର୍‌ କିନି ଉଣ୍ତିଙ୍ଗ୍‌ ନାନ୍‌ ନାଣ୍ତ୍‌ ସାକ୍ତି ପୟ୍‌ତାମାନା ମାରି ନାନ୍‌ ପାର୍ଟାନରେସ୍‌ତି ୱେୟୁଦାନ୍‌ ବା ରକିୟା ପୟ୍‌ତାମାନା ।
2TI 4:18 ନା ବିସ୍‌ବାସ୍‌, ପ୍ରବୁ ନାଙ୍ଗିଁ ୱିଜୁ ତାଗ୍‌ଇ ପାଣିଦାନ୍‌ ରକିୟା କିଜି ସାରାସାରିୱେନ୍‌କା ୱାନି ମୁସ୍‌କୁପୁର୍‌ତି ରାଜିଦୁ ଅନାନ୍‌, ୱାନ୍‌ ଜୁଗ୍‌ ଜୁଗ୍‌ ୱାନି ଗୌରବ୍‍ ଆପିତ୍‌ ! ଆମେନ୍‍ ।
2TI 4:19 ପ୍ରିସ୍କିଲା, ଆକିଲା ମାରି ଅନିସିପର୍‌ଦି ଇଲୁପରିବାର୍‌ତୁ ନା ମାଡ଼ିସ୍‍କିନିକା ୱେର୍‌ତୁ ।
2TI 4:20 ଏରାଷ୍ଟ କରନ୍ତିଦୁ ତେବାତା ମାନାର୍‌, ତ୍ରପିମସ୍‌ଙ୍ଗ୍‌ ୱାନି ନବ୍‌ତି ଉଣ୍ତିଙ୍ଗ୍‌ ନାନ୍‌ ମିଲିଟସ୍‍ଦୁ ଡ଼ିସ୍‌ତା ୱାତାମାନା ।
2TI 4:21 ପିନି କାଡ଼ା ଆଗ୍‍ଡ଼ିନେ ଇବେନୁ ୱାଦେଙ୍ଗ୍‌ ସେସ୍ଟା କିଦୁ । ଇଉବୁଲସ୍‌, ପୁଦେନସ୍‌, ଲିନସ୍‌, କ୍ଳାଦିଆ ମାରି ଇବେଣିକାର୍‌ ଆଇଆଇ କ୍ରିସ୍ତବିସ୍‌ବାସ୍‌ସିର୍‌ ତଡ଼ାନ୍‌କୁ ମିଙ୍ଗିଁ ମାଡ଼ିସ୍‍କିନିକା ଜାଣେକିଜିନାର୍‌ ।
2TI 4:22 ପ୍ରବୁ ମି ଆତ୍ମାଦୁ ତେବାପିନ୍‌ । ମାପୁରୁଦି ଦୟା ମି ୱିଜେରି ୱାଲେ ମାନିତ୍‌ ।
TIT 1:1 ପାଉଲ, ମାପୁରୁଦି ଦାସ୍‍ ମାରି ଜିସୁ କ୍ରିସ୍ତଦି ଅରେନ୍‍ ପ୍ରେରିତ ସିସୁ । ତିତସଦି ଲାକ୍‌ତୁ ଇୟା ଆକୁ ଆସ୍‌ସିନା । ମାପୁରୁଦି ବାସେଆତି ଲୋକା ବିସ୍‍ବାସ୍‍ତିଙ୍ଗ୍‍ ଡାଟ୍‌ କିନି ଉଣ୍ତିଙ୍ଗ୍‌ ମାରି ଏସାଙ୍ଗ୍‍ୱିଜ୍‍ଇଜିବନ୍‌ ପୟ୍‍ନି ଆସା ମୁସ୍‌କୁ ରାସାତିମାନି ମା ଦାର୍ମୁବିସ୍‍ବାସ୍‍ତି ସତ୍‍ ଉଣ୍ତିଙ୍ଗ୍‌ ୱାରିଙ୍ଗ୍ ଜାଗାର୍‌ତା କିଦେଙ୍ଗ୍‌ ଇଜି ନାନୁ ପକାୟ୍‍ ଆତାମାନା ।
TIT 1:2 ପୁର୍ବେଦି କାଡ଼ାଦାନ୍‍ ମାପୁରୁ ମାଙ୍ଗିଁ ଇୟା ଏସ୍‌କାଙ୍ଗ୍‌ୱିଜିଇ ଜିବନ୍‌ ଦାନ୍‌ ସିଦେଙ୍ଗ୍‍ ପାର୍‍ମାଣ୍‍ କିତାମାନାନ୍‌ ମାପୁରୁ ମିସ୍‍ୱେର୍‍ନିକାନ୍‍ ଆଏନ୍‍ ।
TIT 1:3 ମାରି ଟିକ୍‍ ୱେଡ଼ାଦୁ ଇୟା କାବୁର୍‌ ୱାନ୍‌ ୱେକ୍‍ତାମାନାନ୍‍ । ମା ରକିୟାକିନି ମାପୁରୁଦି ଆଦେସ୍‍ତାନ୍‍ ଇକା ୱେର୍‍ତେଙ୍ଗ୍‍ ନାଙ୍ଗିଁ ଦାୟିତ୍‍ ସିଆୟ୍‌ ଆତାମାନାତ୍‌ ।
TIT 1:4 ନା ୱିଜୁ ବିସ୍‌ବାସ୍‌ସିର୍‌ ମାରି ଇୟା ବିସ୍‌ବାସ୍‌ ଉଣ୍ତିଙ୍ଗ୍‌ ଟିକ୍‍ତାନ୍‌ ନା ମାରିନ୍‌ ତିତସଦି ଲାକ୍‌ତୁ ନାନ୍‌ ଇୟା ଆକୁ ରାସ୍‌ସିନା : ବୁବା ମାପୁରୁ ମାରି ମା ରକିୟାକର୍ତ୍ତା କ୍ରିସ୍ତ ଜିସୁ ମିଙ୍ଗିଁ ଦୟା ନି ସାନ୍ତି ସିପିନ୍‌ ।
TIT 1:5 ଆବେନ୍‌ ଏସଗୋଟା ବିସୟ୍‌ତି ନେଗିନିୟମ୍‌ କିଦେଙ୍ଗ୍‌ ମାରି ଇୟାଉଣ୍ତିଙ୍ଗ୍‌ ୱିଜୁ ଗାଡ଼ାକା ମଣ୍ତ୍‌ଲିଦି ପେରିନେତାରିଙ୍ଗ୍‌ ଆସ୍‌କିନି ଉଣ୍ତିଙ୍ଗ୍‌ ମିଙ୍ଗିଁ ନାନ୍‌ କ୍ରିଟ୍‌ଦୁ ଡ଼ିସ୍‌ତା ୱାତାମାର୍ହା । ଇୟା ବିସୟ୍‌ତାନ୍‌ ନା ମାଟେଙ୍ଗ୍‌ୱିଜୁ ଏତ୍‌ କିଦୁ,
TIT 1:6 ମଣ୍ତ୍‌ଲିଦି ନେତା ୱାଜା ଆନି ନିନ୍ଦା ସିଲି ଲୋକ୍‍ ଆନିକାମାନାତ୍‌ । ୱାନ୍‌ ଅରେତ୍‌ ଆଇମାଦି କନ୍‌ଲି ଆନାମାନାନ୍‌ ମାରି ୱାରି କଡ଼ର୍‌ ବିସ୍‌ବାସ୍‌ ଆନାମାନାର୍‌; ସାନ୍ତି ମାରି ଅବାଦ୍ୟ ଇଜି ୱାରି ତାଗ୍‌ଇପାଣି ସିଲେତ୍‌ ।
TIT 1:7 ମାପୁରୁଦି ପାଣିଦୁ ଦାଇତ୍‌ତୁ ମାନି ମଣ୍ତ୍‌ଲିଦି ନେତା ପୁରା ନିନ୍ଦା ସିଲିକାନ୍‍ ମାନିକା ମାନାତ୍‌ । ୱାନ୍‌ ତାଗ୍‍ଇକାନ୍‍ ନି ଗିଦ୍‌ରିଆନିକା ଆଏନ୍‍ ମାନାନ୍‌, କାଡ଼ୁ ଉଣିକା ନି ଜାଟିଜଗଡ଼ା ମାରି ଡାବୁଙ୍ଗୁଁଲୋବ୍‌ ଆଏନ୍‍ ମାନାନ୍‌ ।
TIT 1:8 ମାତର୍‌ ୱାନ୍‌ ନେଗିକାନ୍‌ ଆନାମାନାନ୍‌ ମାରି ୱିଜୁ ସତ୍‍ ବିସୟ୍‌ତିଙ୍ଗ୍‌ ସୁକ୍‌ ପୟ୍‌ଜିମାନାନ୍‌, ନିଜେଦିଙ୍ଗ୍‍ଁ ଇଡ୍‍ନିକା, ନ୍ୟାୟ୍‌, ନେଗିବୁଦି ମାରି ନିୟମ୍‌ତୁପୁରା ଆନା ମାନାନ୍‌ ।
TIT 1:9 ମା ନେଗି କାବୁର୍‌ତୁ ୱାନ୍‌ ଡାଟ୍‌ତାନ୍‌ ବିସ୍‌ବାସ୍‌ କିଜିମାନାର୍‌, ଇୟା ବାକ୍ୟ ସତ୍‌ତି ଦାର୍ମୁଦି ବୁଦି ମୁସ୍‌କୁ ଇଡ୍‌ଜି ମାରି ୱିଜୁଦାନ୍‌ ଆସାଦିଜଗ୍‌ । ଇୟା ବାକ୍ୟଦୁ ସତ୍‍ ସିକିୟାଦାନ୍‌ ଆଇୱାରିଙ୍ଗ୍‌ ୱେର୍‍ତେଙ୍ଗ୍‍ କିଦେଙ୍ଗ୍‌ ମାରି ତେନିଙ୍ଗ୍‌ ବିରଦ୍‌ କିଜିମାନି ଲୋକା ବୁଲ୍‌ତିଙ୍ଗ୍‌ ଆକ କିଦେଙ୍ଗ୍‌ ୱାନି ସାସ୍‌ ମାନାତ୍‌ ।
TIT 1:10 ଗାଦିଲୋକ୍‌, ବିସେସ୍‌ କ୍ରିସ୍ଟାନ୍‌ଦାର୍ମୁ ମାନାତିମାନି ଜିହୁଦିରି ଜୁଦ୍‌ କିଜି ତାଗ୍‌ଇ ମାଟାଦାନ୍‌ ଆଇୱାରିଙ୍ଗ୍‌ ଜାସେ କିଜିନାର୍‌ ।
TIT 1:11 ୱାରି ୱେୟୁ ମୁକ୍‍ତେଙ୍ଗ୍‍ ଆନାତ୍‌, ଇରିଙ୍ଗ୍‌ ୱାର୍‌ ସେମାର୍‌ ଆଏଣ୍‌ଗା କେବଲ ଡାବୁଙ୍ଗ୍‌ ପୟ୍‌ନି ଇସାବ୍‌ତାନ୍‌ ତାଗ୍‌ଇ ସିକିୟା ସିଜି ନାଣ୍ତ୍‌ ଇଲୁପରିବାର୍‌ତି ଲୋଇ ଅସାନ୍ତି କିଜିନାର୍‌ ।
TIT 1:12 କ୍ରିତିଦି ଲୋକା ବିସୟ୍‌ତାନ୍‌ ୱାରିମାଣୁକୁ ଅରେନ୍‍ ବାବବାଦି ଇର୍ହାମାନାନ୍‌ : କ୍ରିତିୟର୍‌ ୱିଜୁଦିନ୍ ମିଚ୍‌ ୱେର୍‌ନାର୍‌, ୱାର୍‌ ପାର୍ଟାନରେସ୍‌ ପସୁୱାଜା ମାରି ଗାଡ଼ିଆପେଟୁ ମାନାର୍‌ ।
TIT 1:13 ୱାରି ଇୟା ସାକ୍ୟ ପୁରା ସତ୍‌ । ମାରି, ମିର୍‌ ଆୟାୱାଜା ଲୋକାଙ୍ଗ୍‌ ନାଣ୍ତ ଜାଗାର୍‌ତା କିଦୁ । ଆତିଙ୍ଗ୍‌ ଆୟାମାଣୁକୁ ୱାର୍‌ ନେଗି ଦାର୍ମୁ ବିସ୍‌ବାସ୍‌ତି ଉଣ୍ତିଙ୍ଗ୍‌ ଡ଼େସି ୱାନାର୍‌ ।
TIT 1:14 ସତ୍‌ତିଙ୍ଗ୍‌ ମାନାଜିମାନି ଲୋକ୍‌ତି ନିତିନିୟମ୍‌ତିଙ୍ଗ୍‌ ମାରି ଜିହୁଦିରି ୱାର୍‌ଇ କାତେଆଙ୍ଗ୍‌ ବନ୍ଦ୍‌ କିଦେଙ୍ଗ୍‌ ୱାରିଙ୍ଗ୍ ସିକ୍‌ୟା ସିଦୁ ।
TIT 1:15 ନେଗି ଲୋକା ଉଣ୍ତିଙ୍ଗ୍‌ ୱିଜୁନେ ପବିତ୍ର; ମାତର୍‌ ତାଗ୍‍ଇକା ଅବିସ୍‌ବାସ୍‌ସିର୍‌ ଇନି ବିସୟ୍‌ବା ପବିତ୍ରତା ମାନାଏର୍‌, ଇରିଙ୍ଗ୍‌ ୱାରି ମୋନ୍‌ ନି ବୁଦି ତାଗ୍‍ଇକା ।
TIT 1:16 ୱାର୍‌ ମାପୁରୁଙ୍ଗ୍‌ ନେସ୍‍ତାମାନାପ୍‌ ଇଜି ମାନାନାର୍‌, ମାତର୍‌ ୱାରି ପାଣିଦାନ୍‌ ୱାନିଙ୍ଗ୍‌ ମାନାଏର୍‌; ୱାର୍‌ ଆକାର୍‍ ମାରି ତାଗ୍‌ଇକାର୍‌ ଇନି ସତ୍‍ପାଣି ପୁରା କିଦେଙ୍ଗ୍‌ ୱାର୍‌ ଜଗ୍‍ ସିଲେର୍‌ ।
TIT 2:1 ମାତର୍‌ ମିର୍‌ ନେଗି ସିକିୟାଦି ନେଗି ମାଟା ୱେର୍‍ତୁ ।
TIT 2:2 ପେରିପେରିୱାରିଙ୍ଗ୍‌ ମାନାଦେଙ୍ଗ୍‍, ବିସାର୍‌କିନି ମାରି ନିଜେଦିଙ୍ଗ୍‍ ଡାଟ୍‍ଇଡ୍‍ଦେଙ୍ଗ୍‍ ଅନୁରଦ୍‌ କିଦୁ; ୱାର୍‌ ଟିକ୍‍ ବିସ୍‌ବାସ୍‌, ଜିବନ୍‌ନୋନିକା ନି ସାସ୍‌ତାନ୍‌ ପୁରାବର୍ତି ଆପିର୍‌ ।
TIT 2:3 ବୟ୍‌ସତି ଆଇମେକାଙ୍ଗ୍‍ଁ ପବିତ୍ର ଜିନି ମାଡ଼ିଦେଙ୍ଗ୍‌ ସିକିୟା ସିଦୁ । ୱାକୁ ଆଇ ଲୋକା ସୁରିମାଟା ୱାର୍‌ଗିମାକିୱି, କାଡ଼ୁ ଉଣିମାନୁ ଦାସ୍‍ ଆମାକିୱି ।
TIT 2:4 ମାପୁରୁଦି ବାକ୍ୟ ଏଣ୍ତେସ୍‌ ନିଦା ଆଏତ୍‍, ଇୟାଉଣ୍ତିଙ୍ଗ୍‌ ୱାର୍‌ ଆଇଲିକାଙ୍ଗ୍‍ ନିଜେଦି କନ୍‌ଲିରିଙ୍ଗ୍‌ ମାରି କଡ଼ରିଙ୍ଗ୍‌ ଜିବନ୍‌ନୋନି ଉଣ୍ତିଙ୍ଗ୍‌ ସିକିୟା ସିଦୁ,
TIT 2:5 ଆର୍‌ତିଙ୍ଗ୍‌, ୱାକୁ ପବିତ୍ରତା, ନେଗି ଇଲ୍‍ତି ଆଇମା, ଦାର୍ମୁ, ମାରି ନିଜେଦି କନ୍‍ଲିଙ୍ଗ୍‍ ମାନାପିଉ, ମାଙ୍ଗିଁ ସିଆୟ୍‌ ଆତିମାନି ମାପୁରୁଦି କାବୁର୍ ବିରୁଦ୍‌ତାନ୍‌ ଏନ୍‌ ଇନି ନିଦା କିଦେଙ୍ଗ୍‌ ଆଟ୍‍ଏର୍‍ ।
TIT 2:6 ଆୟାୱାଜା ମୁରୁଲିଆଙ୍ଗ୍‌ ୱିଜୁ ବିସୟ୍‌ତାନ୍‌ ନିଜେଦିଙ୍ଗ୍ ଡାଟ୍‍ଇଡ୍‍ଦେଙ୍ଗ୍‍ ଅଜା କିଦୁ ।
TIT 2:7 ୱିଜୁ ବିସୟ୍‌ତାନ୍‌ ସତ୍‌ପାଣି ପୁରା କିଜି ମିର୍‌ ନିଜେଦି ଜିବନ୍‌ତୁ ନେଗିକା ତର୍‌ତୁ । ନେଗିମୋନ୍‌ତାନ୍‌ ମାରି ବୁଦିଦାନ୍‌ ନେଗି ବାସାଦାନ୍‌ ସିକିୟା ସିଦୁ ।
TIT 2:8 ଆର୍‌ତିଙ୍ଗ୍‌, ଏନ୍‌ ମିଙ୍ଗିଁ ସୁରି ୱାର୍‌ଗିଦେଙ୍ଗ୍‌ ଆଟ୍‍ଏନ୍‍ ମାରି ଏଣ୍ତେସ୍‌ ମି ସାତ୍ରୁରୁ ମା ବିରୁଦ୍‌ତାନ୍‌ ଇନି ତାଗ୍‌ଇ ମାଟା ଇନ୍‌ଡ୍ରେଙ୍ଗ୍‌ ଆଟ୍‍ଏଜି ସେମାର୍‌ ଆନାର୍‌ ।
TIT 2:9 ଦାସ୍‍କୁ ମାଲିକ୍‌କାଙ୍ଗ୍‌ ମାନାଜି ୱିଜୁ ବିସୟ୍‌ତୁ ୱାରିଙ୍ଗ୍ ସିକିୟା ସିପିର୍‌; ମାଲିକ୍‌କା ମାଟାଦିଙ୍ଗ୍‌ ଡ଼େସି ୱେର୍‌ମାକିର୍‌ ।
TIT 2:10 ୱାର୍‌ ଡଙ୍ଗାଁ କିଏଣ୍‌ଗା, ୱିଜୁଦିନ୍ ନିଜେଦି ସାଦୁ ମାରି ବିସ୍‌ବାସ୍‌ତି ପରିଚୟ ସିପିର୍‌ । ଆର୍‌ତିଙ୍ଗ୍‌, ୱାରି ୱିଜୁ ପାଣିକିତି ୱେନ୍‌କା ମାଙ୍ଗିଁ ରକିୟାକର୍ତ୍ତା ମାପୁରୁଦି ବିସୟ୍‌ତାନ୍‌ ମା ଦାର୍ମୁ ସିକିୟାଦିଙ୍ଗ୍‌ ଗୌରବ୍‍ କିନାର୍‌ ।
TIT 2:11 ଇରିଙ୍ଗ୍‌ ୱିଜୁ ଲୋକାଙ୍ଗ୍‌ ରକିୟା ଉଣ୍ତିଙ୍ଗ୍‌ ମାପୁରୁଦି ଦୟା ୱେଙ୍ଗିଁତା ମାନାତ୍‌ ।
TIT 2:12 ମାରି, ୱାନି ଆୟା ଦୟା ଉଣ୍ତିଙ୍ଗ୍‌ ଦାର୍ମୁସିଲିକା ମାରି ଦୁନିଆ ଆସାଦିଙ୍ଗ୍‌ ଡ଼ିସ୍‌ସି, ଇୟା ଜୁଗ୍‌ତୁ ନେଗିବୁଦି, ଦାର୍ମୁ ମାରି ଦାର୍ମୁ ୱାଜା ଜିନାଟ୍‍,
TIT 2:13 ମାରି ଆୟା ୱେଡ଼ିକାଦି ଆସା ମାରି ମା ପେରି ମାପୁରୁ ନି ରକିୟାକିତିକାନ୍‌ ଜିସୁ କ୍ରିସ୍ତଦି ଗୌରବ୍‍ ୱେଙ୍ଗିଁଦେଙ୍ଗ୍‌ ସୋଲ୍‌ସିନାତ୍‌, ଆୟା ଦିନ୍‌ତିଙ୍ଗ୍‌ କାପ୍‌କିଜି ମାପ୍‌ ତେବାତାମାନାପ୍‌ ।
TIT 2:14 ଆୟା କ୍ରିସ୍ତ ଜିସୁ ମାଙ୍ଗିଁ ୱିଜୁ ତାଗ୍‌ଇ ପାଣିଦାନ୍‌ ଡ଼ିସିସ୍‌ କିଦେଙ୍ଗ୍‌ ମାରି ନିଜେଦି ଉଣ୍ତିଙ୍ଗ୍‌ ସତ୍‌ପାଣିଦୁ ୱେଡ଼ିକାଆଜି ନିଜେଦି ଲୋକା ୱାଜା ପୁରା ନେଗେନ୍‍ କିଦେଙ୍ଗ୍‌ ମା ଉଣ୍ତିଙ୍ଗ୍‌ ନିଜେଦିଙ୍ଗ୍‌ ସିଆୟ୍‌ଆତାନ୍‌ ।
TIT 2:15 ଇୟାୱିଜୁ ବିସୟ୍‌ ଅଜା କିଦୁ ମାରି ମି ପୁରା ଡାଟ୍‌ତାନ୍‌ ଲୋକାଙ୍ଗ୍‌ ୱେଡ଼ିକା କିଦୁ । ୱାରିଙ୍ଗ୍ ୱେର୍‍ସି ଜାଗ୍‌ରାତା କିଦୁ, ମିଙ୍ଗିଁ ଏନ୍‌ କାଡ଼୍‍ମାକିନ୍‌ ।
TIT 3:1 ସାସନ୍‍କିନି ମାରି ଅଦିକାର୍‌ ପୟ୍‌ତି ଲୋକା ଆଡ୍‍ଗି ମାନ୍‍ଜି ୱାରି ଆଦେସ୍‌ ମାନାଦେଙ୍ଗ୍‌ ମାରି ୱିଜୁ ସତ୍‍ପାଣିଦୁ ସାକା କିନି ଉଣ୍ତିଙ୍ଗ୍‌ ତିଆର୍‌ ଆଦେଙ୍ଗ୍‌ ମଣ୍ତ୍‌ଲିଦି ପେରିୱାରିଙ୍ଗ୍‌ ଏତ୍‌ କିବିସ୍‌କିଦୁ ।
TIT 3:2 ଏ ନିଦା ମାଟା ୱାର୍‌ଗିଏଣ୍‌ଗା ସାନ୍ତି ମାରି ସଙ୍ଗ୍‌ତି ୱାଜା ସାଲାଦେଙ୍ଗ୍‌ ମାରି ୱିଜୁ ଲୋକା ଉଣ୍ତିଙ୍ଗ୍‌ ନେଗି ପାଣି କିଦେଙ୍ଗ୍‌ ୱାରିଙ୍ଗ୍ ଆଦେସ୍‌ ସିଦୁ ।
TIT 3:3 ମାପ୍‌ ନିଜେ ଅର୍‍ଲେନ୍‍ ବୁଦିସିଲିକା, ମାନାଏଜି ମାରି ବାୟା ମାର୍ହାପ୍‌, ୱିଜୁ ରକମ୍‍ତି ସୁକ୍‌ବୋଗ୍‌ ମାରି ତାଗ୍‍ଇ ବିସୟ୍‌କାଙ୍ଗ୍‌ ୱିଜୁ ତେବାତା ମାର୍ହାପ୍‌; ଆକାର୍‍ ମାରି ରିସାଦାନ୍‌ ଦିନ୍‌କାଟେକିଜି ମାର୍ହାପ୍‌; ଆଇକାର୍‌ ମାଙ୍ଗିଁ କାଡ଼୍‌ଜି ମାର୍ହାର୍‌, ମାପ୍‌ ବା ୱାରିଙ୍ଗ୍ କାଡ଼୍‌ଜି ମାର୍ହାପ୍‌ ।
TIT 3:4 ମାତର୍‌ ଏସ୍ତିୱାଲେ ମାଙ୍ଗିଁ ରକିୟାକିତି ମାପୁରୁଦି ଦୟା ମାରି ଲୋକା ଉଣ୍ତିଙ୍ଗ୍‌ ୱାନି ଜିବନ୍‌ନୋନିକା ୱେଙ୍ଗିଁତାତ୍‌ ।
TIT 3:5 ମା ସତ୍‍ପାଣିଦି ପଲ୍‌ ୱାଜା ଇକା ଆଏତ୍‍ । କେବଲ ୱାନି ଦୟାଦାନ୍‌ ପବିତ୍ର ଆତ୍ମାଦି ମୁଟ୍‌ନିମାଣାନ୍‌ ମା ପାପ୍‌ ୱିଜୁ ନରାଇ ଆତାମାନାତ୍‌ ମାରି ମାପ୍‌ ପୁନି ଜନମ୍‍ ପୟ୍‌ଜି ରକିୟା ପୟ୍‌ତାମାନାପ୍‌ ।
TIT 3:6 ମାଙ୍ଗିଁ ରକିୟାକିତି ପ୍ରବୁ ଜିସୁ କ୍ରିସ୍ତଦି ମାଣାନ୍‌ ଇୟାୱିଜୁ ପୁରା ଆତାମାନାତ୍‌ । ୱାନି ଉଣ୍ତିଙ୍ଗ୍‌ ମାପୁରୁ ମାଙ୍ଗିଁ ନାଣ୍ତ୍‌ଦାନ୍‌ ପବିତ୍ରଆତ୍ମା ସିତାମାନାନ୍‌ ।
TIT 3:7 ୱାନି ଦୟାଦାନ୍‌ ମାପ୍‌ ମାପୁରୁଦି ଆଗ୍‌ଡ଼ି ଦାର୍ମୁଦୁ ମିସାଜି, ମା ଆସା ଇସାବ୍‌ତାନ୍‌ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ତୁ ସନ୍‍ଡ୍ରେଙ୍ଗ୍‍ ସାରି ପୟ୍‌ତାମାନାପ୍‌ ।
TIT 3:8 ଇୟା ମାଟା ପୁରା ସତ୍‍ । ଇୟାୱିଜୁ ବିସୟ୍‌ ମୁସ୍‌କୁ ମିର୍‌ ନାଣ୍ତ୍‌ ଦିୟାନ୍‌ ସିଜି ବୁଜାକିନିଦେର୍‌, ଆମାକାର୍‌ ମାପୁରୁମାନୁ ବିସ୍‌ବାସ୍‌ କିନାର୍‌, ୱାର୍‌ ସତ୍‌ପାଣି କିଜି ଦିନ୍‌ କାଟେକିନିକା ମାନାତ୍‌; ୱିଜେରି ଉଣ୍ତିଙ୍ଗ୍‌ ଆମାକା ନେଗିକା, ଆୟାୱିଜୁ ପାଣିଦୁ ତେବାନିକା ମାନାତ୍‌ ।
TIT 3:9 ମାତର୍‌ ଆର୍‌ଏ ଲାଗାଜିସାନିକା, ପୁର୍ବେଦି ଡକ୍ରାଦାଦାରି ନିର୍‌ଇ ଦର୍‌କା ଦାଡ଼ି ମାରି ସାସ୍ତ୍ର ଅସି ଆର୍‍ଏ ଜାଟି, ଆଉଲି ମାରି ଆସ୍‌ସିସାନିକା ୱିଜୁ ଡ଼ିସ୍‌ତୁ । ଇକା ଇନିକାସିଲିକା ନି ବେକାର୍‌ ।
TIT 3:10 ଜାଟି କିଜିମାନି ଲୋକ୍‌ତିଙ୍ଗ୍‌ ରୁଣ୍ତି ଦେବେଙ୍ଗ୍‌ ଜାଗ୍‌ରାତା ମାଟା ୱେର୍‍ତୁ, ଆର୍‌ତିଙ୍ଗ୍‌ ୱାନ୍‌ ଜଦି ୱେନ୍‌ଏନ୍‌ ୱାନି ୱାଲେ ମିସାବିଡ଼୍‍ ଡ଼ିସ୍‌ସୋ ସିଦୁ ।
TIT 3:11 ମିର୍‌ ନେସ୍‌ତିମାନିଦେର୍‌, ଇୟାୱାଜା ଲୋକ୍‌ ଏଣ୍ତେସ୍‌ ସାରିବାଣାତାମାନାନ୍‌, ୱାନି ପାଣି ମାଣାନ୍‌ ୱାନ୍‌ ନିଜେଦିଙ୍ଗ୍‌ ପାପ୍‌ ଇଜି ନିଜେ ପାର୍‌ମାଣ୍‍ କିନାନ୍‍ ।
TIT 3:12 ନାନ୍‌ ଏସ୍ତିୱାଲେ ମି ଲାକ୍‌ତୁ ଆର୍ତ୍ତେମା ନି ତୁକିକଦିଙ୍ଗ୍‍ ପୋକ୍‌ତାନା, ନାସ୍ତିୱାଲେ ମିର୍‌ ନିକପଲିଦୁ ୱାଦେଙ୍ଗ୍ ଇଜି ସେସ୍ଟା କିଦୁ, ଇରିଙ୍ଗ୍‌ ଆବେନ୍‌ ନାନ୍‌ ପିନିକାଡ଼ା କାଟେକିଦେଙ୍ଗ୍‍ଁ ବଦା କିତାମାନା ।
TIT 3:13 ସାସ୍ତ୍ରଗୁରୁ ଜିନା ମାରି ଆପୋଲୋଦି ବୁଲାନି ଉଣ୍ତିଙ୍ଗ୍‌ ଆମା ଆମାକା ଦର୍‌କାର୍‌, ୱିଜୁ ଉଣ୍ତା କିଜି ସିଜି, ସନିସାରିଦୁ ୱାରିଙ୍ଗ୍ ସାହାଜ୍ୟ କିଦୁ ।
TIT 3:14 ସତ୍‌ପାଣିଦାନ୍‌ ଦିନ୍‌ କାଟେକିଜି ନିଜେ ନିଜେଦି ଆସା ପୁରା କିନି ଉଣ୍ତିଙ୍ଗ୍‌ ସିଲିସାତି ଲୋକାଙ୍ଗ୍‌ ସିକ୍‌ୟା ସିଦୁ । ୱାର୍‌ ଆର୍‍ଏ ବାସ୍‌ସୋ ମାନ୍‌ମାକିର୍‌ ।
TIT 3:15 ଇବେନୁ ନା ୱାଲେ ମାନି ୱିଜୁ ଲୋକ୍‌ ମିଙ୍ଗିଁ ନମସ୍କାର୍‌ ଜାଣେକିଜିନାର୍‌ । ୱିଜୁ ବିସ୍‌ବାସ୍‌ସିର୍‌ ବନ୍ଦୁରିଙ୍ଗ୍‌ ମା ନମସ୍କାର୍‌ ଜଣେକିଦୁ । ମାପୁରୁଦି ଦୟା ମି ୱିଜେରି ଉଣ୍ତିଙ୍ଗ୍‌ ଆପିତ୍‌ ।
PHM 1:1 ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ଜେଲ୍‌ତୁ କାଟେକିଜିମାନି ନାନ୍‌ ପାଉଲ ମାରି ତଡ଼ାନ୍‍ ତିମତିମାଣାନ୍‍, ତଡ଼୍‍ ମାରି ଅର୍‍ସେପାଣିକିନି ପିଲିମନଦି,
PHM 1:2 ମାରି ତାମେ ଇଲ୍‍ତୁ ଉଣ୍ତାଜି ମାନି ପାର୍‍ତନା କିଜିମାନି ମଣ୍ତଲି, ତାଙ୍ଗିଁ ଅପ୍‍ପିୟା ମାରି କ୍ରିସ୍ଟାନ୍‍ଦାର୍ମୁଦୁ ଜୁଦ୍‌ତୁ ମା ୱାଲେ ପାଣିକିତିମାନି ଆର୍କିପତି ଲାକ୍‍ତୁ ଆକୁ
PHM 1:3 ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‍ ।
PHM 1:4 ତଡ଼ାନ୍‌ ପିଲିମନ, ୱିଜୁ ଦେବେଙ୍ଗ୍‌ ନାନ୍‌ ପାର୍‌ତାନା କିନିୱାଲେ ମିଙ୍ଗିଁ ଏତ୍‌କିଜି ମାପୁରୁଙ୍ଗ୍‌ ଦନ୍ୟବାଦ୍‌ ସିଜିମାନା,
PHM 1:5 ଇରିଙ୍ଗ୍‌ ନାନ୍‌ ୱେର୍‌ଆମାନା, ପ୍ରବୁ ଜିସୁମାନୁ ମି ବିସ୍‌ବାସ୍‌ ମାରି ଦାର୍ମୁଜିବନ୍‍ଜିନି ଲୋକା ଉଣ୍ତିଙ୍ଗ୍‌ ମି ଜିବନ୍‌ନୋନିକା !
PHM 1:6 କ୍ରିସ୍ତଦି ୱାଲେ ମିସାନି ମାଣୁକୁ ମାପ୍‍ ଜିବନ୍‌ତୁ ଆମା ୱିଜୁ ଆର୍ସିବାଦ୍‌ ପୟ୍‌ତିମାନିକା, କ୍ରିସ୍ତ ବିସ୍‌ବାସ୍‌ତି ୱାଜା ମି ୱାଲେ ମା ମିସାନିକା ଆୟାୱିଜୁଦି ବୁଜାଇ ଅରତ୍‌ ବୁଜାନି ଉଣ୍ତିଙ୍ଗ୍‌ ମିଙ୍ଗିଁ ସାକା କିପିନ୍‌, ଇୟାକା ନା ପାର୍‌ତାନା ।
PHM 1:7 ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକି, ନି ଜିବନ୍‌ନୋନିକା ନାଙ୍ଗିଁ ନାଣ୍ତ୍‌ ୱେଡ଼ିକା ସିତାମାନାତ୍‌ ମାରି ୱେଡ଼ିକା ବା କିତାମାନାତ୍‌; ଇରିଙ୍ଗ୍‌ ମିର୍‌ ପ୍ରବୁଦି ସାଦୁରି ଜିବନ୍‌ତୁ ୱେଡ଼ିକା ବର୍ତି କିତିସିତିମାନିଦେର୍‍ ।
PHM 1:8 ଇୟାଉଣ୍ତିଙ୍ଗ୍‌ ମି କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ ୱାଜା ମି ପାଣି ବିସୟ୍‌ତାନ୍‌ ଆଦେସ୍‌ ସିଦେଙ୍ଗ୍‌ ନା ସାସ୍‌ ମାନାତ୍‌ ।
PHM 1:9 ମାତର୍‌ ମି ଉଣ୍ତିଙ୍ଗ୍‌ ନା ଜିବନ୍‌ନୋନିକା ମାନିଙ୍ଗ୍‌ ନିଙ୍ଗିଁ କେବଲ ଅନୁରୋଦ୍‌ କିଜିନା । ଜଦିବା ନାନ୍‌ ପାଉଲ ଅରେନ୍‌ ଡକ୍ରା, କ୍ରିସ୍ତ ଜିସୁଦି ଉଣ୍ତିଙ୍ଗ୍‌ ଇଲେଇ ଜଇଲ୍‌ତୁ ମାନା,
PHM 1:10 ଆତିଙ୍ଗ୍‍ବା ନାନ୍‌ ମାଡ଼ିସ୍‌କିଜି ଇକା ୱେର୍‌ସିନା । ଇୟା ଜଇଲ୍‍ତୁ ଅବସ୍ଥାଦାନ୍‌ ନାନ୍‌ ଆମାୱାନିଙ୍ଗ୍‌ କ୍ରିସ୍ତଦି ଉଣ୍ତିଙ୍ଗ୍‌ ନିଜେଦି ମାରିନ୍‌ ୱାଜା ପୟ୍‌ତାମାନା, ନାନ୍‌ ୱାନି ଆତ୍ମିକ ବୁବା ୱାଜା ଆତାମାନା, ଆୟା ଅନିସିମସ୍‌ ଉଣ୍ତିଙ୍ଗ୍‌ ନା ଇୟା ଅନୁରଦ୍‌ ।
PHM 1:11 ଅର୍‍ଲେନ୍‍ ଅନିସିମସ ମି ଉଣ୍ତିଙ୍ଗ୍‌ ଦର୍‌କାର୍‌ ସିଲେତାନ୍‌; ମାତର୍‌ ଇଲେଇ ୱାନ୍‌ ନିଙ୍ଗିଁ ନି ନାଙ୍ଗିଁ ବିସେସ୍‍ ଦରକାର୍‍ତୁ ୱାନାନ୍‍ ।
PHM 1:12 ୱାନ୍‌ ତୋ ନା ଜିବନ୍‌ତି ୱାଜା ନାନ୍‌ ଇଲେଇ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ସି ସିନି ୱାଲେ ନା ଜିବନ୍‌ ଆଡ଼୍‍ବାତି ୱାଜା ଆଜିନାତ୍‌ ।
PHM 1:13 କ୍ରିସ୍ତଦି ନେଗିକାବୁର୍‌ ପ୍ରଚାର୍‌ କିନି ଉଣ୍ତିଙ୍ଗ୍‌ ନାନ୍‌ ଇୟା ଜଇଲ୍‍ତୁ ତେବାତାମାନା । ଇବେନୁ ମାନି ସାନ୍ଦି ନି ବାଦ୍‍ଲୁ ୱାନିଙ୍ଗ୍‌ ନା ସେବା ପାଣିଦୁ ଲାଗେକିଦେଙ୍ଗ୍‌ ନା ବଦା ମାର୍ହାତ୍‌ ।
PHM 1:14 ମାତର୍‌ ଇୟା ବିସୟ୍‌ତାନ୍‌ ନାଙ୍ଗିଁ ସାକା କିନି ଉଣ୍ତିଙ୍ଗ୍‌ ନିଙ୍ଗିଁ ଜାସାପେଲା କିଏ, ଆକା ନିଜେଦି ବଦାଦାନ୍ ନିନ୍‍ କିଦେଙ୍ଗ୍‍ ଆଟ୍‍ନି । ଆୟା ଆମାକାଆପିତ୍‌, ନି ରାଜି ଡ଼ିସ୍‌ସି ନାନ୍ ଇନିକା କିଦେଙ୍ଗ୍‌ ଅଡ଼୍‌ବିଏ ।
PHM 1:15 ମାରିବା ୱିଜୁଦିନ୍‍ ନି ଲୋକ୍‌ ଆଜି ତେବାନାନ୍‌ ଇଜି ଅନିସିମସ ଏସୋ ଦିନ୍‌ ନିଙ୍ଗିଁ ଡ଼ିସ୍‌ତା ସର୍ହାମାର୍ହାନ୍‌ ।
PHM 1:16 ମାରି ୱାନ୍‌ ଇଲେଇ କେବଲ୍‌ ଅରେନ୍‌ କଟିସାକର୍‌ ଆଏନ୍‌ । କ୍ରିସ୍ତଦି ବିସ୍‌ବାସ୍‌ସି ୱାଜା ୱାନ୍‌ ଇଲେଇ ମା ଅରେନ୍‌ ଲାଡ୍‍ତି ତଡ଼ାନ୍‌ । ନା କାଣ୍‌ଗାଦୁ ଇଲେଇ ୱାନ୍‌ ଏସ ସାହାଜ୍ୟକିନିକାନ୍‌ ! ମି ଅରେନ୍‌ ଦାସ୍‌ ମାରି କ୍ରିସ୍ତଦି ବିସ୍‌ବାସ୍‌ସି ତଡ଼ାନ୍‌ ୱାଜା ୱାନ୍‌ ମି ଉଣ୍ତିଙ୍ଗ୍‌ ମାରି ଏସ ସାହାଜ୍ୟକିନିକାନ୍‌ ଆଏନ୍‌ !
PHM 1:17 ଆଦେଙ୍ଗ୍‌ ନାଙ୍ଗିଁ ଜଦି ନି ୱାଲେ ଅର୍‍ସେମାନିକାନ୍‌ ଇଜି ଅଡ଼୍‌ବିଜିମାନି, ନାଙ୍ଗିଁ ଏଣ୍ତେସ୍‌ କୁକ୍‌ତିମାନ୍ଦି, ୱାନିଙ୍ଗ୍‌ ବା ଆୟାୱାଜା ମାନାଆ !
PHM 1:18 ୱାନ୍‌ ଜଦି ନି ଇନି ଅନ୍ୟାୟ୍‌ କିନାମାନାନ୍‌, ମାରି ନିଙ୍ଗିଁ ୱାନିନ୍ଦି ଇନିକା ସିନିକାମାନାତ୍‌, ଆକା ନା ଇସାବ୍‌ତୁ ରାସ୍‌ସୋ ସିଦା ।
PHM 1:19 ଇକା ସୁଡ଼୍‌ଦୁ, ନାନ୍‌ ନିଜେଦି କିୟୁଦାନ୍‌ ରାସ୍‌ସି ସିଜିନା, “ନାନ୍‌, ପାଉଲ, ସତ୍‌ ଆକା ଡ଼େସିସିନା ।” ପୁରା ମିଙ୍ଗିଁ ନାନ୍‌ ଏତ୍‌ କିବିସ୍‌କିନି ସିନି ଦର୍‍କାର୍‍ସିଲେ ଜେ, ମି ଜିବନ୍‌ତି ଉଣ୍ତିଙ୍ଗ୍‌ ବା ନିନ୍‍ ନାମାନୁ ରୁଣୁଆତିମାନି ।
PHM 1:20 ଆଦେଙ୍ଗ୍‌ ତଡ଼ାନ୍‌, ନା ୱାଜା ଅରେନ୍‌ କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ତିଙ୍ଗ୍‌ ପ୍ରବୁଦି ଉଣ୍ତିଙ୍ଗ୍‌ ଦୟା କିଆ, ଇୟାମାଣାନ୍‍ ନାନ୍‌ ନାଣ୍ତ୍‌ ୱେଡ଼ିକା ଆନା ।
PHM 1:21 ନିନୁ ନା ମାଟା ଇଡ୍‍ନି ଇଜି ସତ୍‌ତାନ୍‌ ନେସ୍‌ସି, ନାନ୍‌ ନିଙ୍ଗିଁ ଇୟା ଆକୁ ରାସ୍‌ସିନା । ସତ୍‌ତାନ୍‌ ନାନ୍‌ ନେସ୍‌ନା, ନି ମାଣ୍‌କୁ ନାନ୍‌ ଏସ ଆସା କିଜିନା, ନିନ୍‌ ନା ଉଣ୍ତିଙ୍ଗ୍‌ ତାନି ମାଣୁକୁ ନାଣ୍ତ୍‌ କିନି ।
PHM 1:22 ଇୟାତାନି ୱାଲେ ନା ମାରି ଉନ୍‌ଡ୍ରି ଅନୁରଦ୍‌, ଆବେନୁ ନା ଉଣ୍ତିଙ୍ଗ୍‌ ଉନ୍‌ଡ୍ରି ବାକାର୍‌ ତିଆର୍‌ କିଜ ଇଡ୍‌ଦୁ । ନା ଆସା, ମି ପାର୍‌ତାନା କିନିମାଣୁକୁ ନାନୁ ମି ଲାକ୍‌ତୁ ମାରିଡ଼େସି ୱାନା ।
PHM 1:23 ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ନା ୱାଲେ ଜଇଲ୍‌ତୁ ତେବାତିମାନି ଏପାଫ୍ରା ମାରି ନା ୱାଲେଅରେସ୍‌ପାଣିକିନିକାନ୍‌,
PHM 1:24 ମାରି ମାର୍କ, ଆରିସ୍ଟାର୍କସ୍‍, ଦିମା ମାରି ଲୁକ ମାଡ଼ିସ୍‍ କିଜିନାର୍‍,
PHM 1:25 ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ଦୟା ମି ୱିଜେରି ଲାକ୍‌ତୁ ମାନିତ୍‌ ।
HEB 1:1 ପୁର୍ବେଦାନ୍ ମାପୁରୁ ଆଇ ବେଡ଼ାଦୁ ମାରି ଆଇ ଆଇ ଉପାୟତାନ୍ ବାବବାଦିରି ମାଡ଼ାନ୍ ମା ଡକ୍ରାଦାଦାରିଙ୍ଗ୍‍ କାବୁର୍ ସିତାମାର୍ହାନ୍,
HEB 1:2 ମାତର୍‌ ଇୟା ୱିଜିନ୍‌ ଦୁନିଆଦୁ ୱାନ୍‌ ନିଜେଦି ମାରିନ୍‌ତି ମାଡ଼ାନ୍ ମା ୱାଲେ ୱାରିଗିତାମାନାନ୍ । ଆୟା ମାରିନ୍‍ତି ମାଡ଼ାନ୍ ନେ ମାପୁରୁ ସାରାଦୁନିଆଦିଙ୍ଗ୍‌ ତିଆର୍‌କିତାନ୍‌ ମାରି ସାରାସାରିୱେନ୍‌କା ୱିଜୁ ବିସୟ୍‌ତି ଅଦିକାରି ଆନି ଉଣ୍ତିଙ୍ଗ୍ ୱାନ୍‌ ୱାନିଙ୍ଗ୍‌ ବାସେକିତାନ୍ ।
HEB 1:3 ୱାନିମାନୁ ମାପୁରୁଦି ମହିମା ଜାୟ୍‌ କିବିସ୍‍କିତାମାନାନ୍‍ ମାରି ପୁରା ମାପୁରୁଦି ନିଜେଦି ରୁପ୍‍ୱାଜା । ମାରି ୱାନ୍‌ ନିଜେଦି ସାକ୍ତି ବାକ୍ୟ ଦାନ୍ ୱିଜୁଦେସ୍‍ତିଙ୍ଗ୍ ସାଲା କିତାମାନାନ୍ । ୱାନ୍‌ ଲୋକା ଜାତି ଉଣ୍ତିଙ୍ଗ୍‌ ପାପ୍‌ କେମା କିଜି ମୁସ୍‌କୁପୁର୍‌ ମହାମହିମା ମାପୁରୁଦି ଉଣିକିୟୁ ତରିନ୍‌ ବାସ୍‍ତାମାନାନ୍ ।
HEB 1:4 ୱାନ୍‌ ମୁସ୍‌କୁପୁର୍‌ତି ଦୁତ୍‍କା ବାଦ୍‍ଲୁ ଏଣ୍ତେସ୍ ପେରିକାନ୍‌, ୱାନି ଦରୁ ବା ଆୟାୱାଜା ତାମେକା ଦରୁ ବାଦ୍‍ଲୁ ନାଣ୍ତ ପେରିକା ।
HEB 1:5 ଇରିଙ୍ଗ୍‌ ଏସାଙ୍ଗ୍‍ବା ମାପୁରୁ ଏମେ ଦୁତ୍‍କାଙ୍ଗ୍‍ଁ ଇନ୍‌ଏନ୍‌ : “ନିନୁ ନା ମାରିନ୍, ନେର୍‍ରାନ୍ ନାନୁ ମି ବୁବା ଆତାମାନା ।” ମାପୁରୁ ବା ଇର୍ହାନ୍‌, “ନାନୁ ୱାନି ବୁବା, ମାରି ୱାନ୍‌ ନା ମାରିନ୍ ।”
HEB 1:6 ମାତର୍‌ ମାପୁରୁ ୱାନି ଆଗ୍‌ଡ଼ିରି ମାରିନ୍‍ତିଙ୍ଗ୍ ଇୟା ଜଗତ୍‌ତୁ ପୋକ୍‍ତି ୱାଲେ ଇକା ଇର୍ହାମାର୍ହାନ୍ : “ମାପୁରୁଦି ଦୁତ୍‍କୁ ୱିଜୁ ୱାନି ପୁଜା କିନେ ।”
HEB 1:7 ମାତର୍‌ ମୁସ୍‌କୁପୁର୍‌ତି ଦୁତ୍‍କା ବିସୟ୍‌ତାନ୍ ମାପୁରୁ ଇୟା ମାଟା ଇର୍ହାମାନାନ୍‌; “ମାପୁରୁ ନିଜେଦି ଦୁତ୍‍କାଙ୍ଗ୍‌ ଗାଲି ୱାଜା ମାରି ନିଜେଦି ସେବାକିନିୱାରିଙ୍ଗ୍‌ ସିସୁଡ଼ିବୁ ୱାଜା କିନାନ୍ ।”
HEB 1:8 ୱାନି ମାରିନ୍‌ତି ବିସୟ୍‌ତାନ୍ ୱାନ୍‌ ଇର୍ହାମାର୍ହାନ୍ : “ଏ ମାପୁରୁ, ନି ରାଜି ୱିଜୁଦିନ୍‌ ମାନିତ୍ ! ନିନୁ ନ୍ୟାୟଦଣ୍ତତାନ୍‌ ନି ଲୋକାଙ୍ଗ୍‌ ସାସନ୍ କିଜିନି ।
HEB 1:9 ନିନୁ ନେଗିତାନିଙ୍ଗ୍‌ ଜିବନ୍‌ନୋନି ମାରି ତାଗ୍‌ଇ ତାନିଙ୍ଗ୍‌ କାଡ଼୍‍ନି । ଆୟାଉଣ୍ତିଙ୍ଗ୍‌ ମି ମାପୁରୁ ନିଙ୍ଗିଁ ବାସେ କିତାମାନାନ୍ ମାରି ନି ସାଙ୍ଗର୍‌ ବାଦ୍‍ଲୁ ନିଙ୍ଗିଁ ଅଦିକ୍‍ନାଣ୍ତ ମାନାଜି ୱେଡ଼ିକାଦି ନିୟୁଦାନ୍‌ ଉସୁତାମାନାନ୍‌ ।”
HEB 1:10 ୱାନ୍‌ ମାରି ବା ଇର୍ହାମାନାନ୍‌ : “ଏ ପ୍ରବୁ, ନିନୁ ଆଗ୍‍ଡ଼ିନେ ଦୁନିଆ ତିଆର୍ କିତି, ମାରି ନିଜେଦି କିୟୁଦାନ୍‌ ବାଦଡ଼୍‍ ତିଆର୍ କିତି ।
HEB 1:11 ଆୟାୱିଜୁ ଅର୍‍ଲେନ୍‍ ମାରାଗ୍‌ନାତ୍‌ । ମାତର୍‌ ନିନୁ ୱିଜୁଦିନ୍ ମାନି; ୱାର୍‌ ପାଡ଼ିଇ ଆଙ୍ଗିଁ ୱାଜା ନାସ୍ଟୁ ଆନାର୍ ।
HEB 1:12 ଆଙ୍ଗିଁପାସିୟା ରସ୍‍ତି ୱାଜା ନିନୁ ଆୟାୱିଜୁ ରସ୍‍ନି ଇଡ୍‌ନି ମାରି ଆଙ୍ଗିଁ ବାଦେଲେକିନି ୱାଜା ବାଦ୍‍ଲେ କିନି । ମାତର ନିଜେ ନିନୁ ବାଦ୍‍ଲେଆଇ ମାରି ନିନୁ ୱିଜୁଦିନ୍‌ ତେବାନି ।”
HEB 1:13 ମାପୁରୁ ୱାନି ଏମେ ଦୁତ୍‍କାଙ୍ଗ ଏସାଙ୍ଗ୍ ଇନ୍‌ଏନ୍‌, “ନାନୁ ନି ସାତ୍ରୁରିଙ୍ଗ୍‌ ନି କାଲ୍‌କା ଆଡ୍‍ଗି କିଏତି ସାନ୍ଦି ନିନୁ ନା ଉଣେରି କିୟୁ ତରିନ୍‌ ବାସ୍‍ସୋମାନ୍‍ଆ ।”
HEB 1:14 ଆର୍‌ତିଙ୍ଗ୍‌ ମୁସ୍‌କୁପୁର୍‌ତି ଦୁତ୍‍କୁ ଏର୍‌ ? ୱାର୍‌ ଆଜିନାର୍ ମାପୁରୁଦି ସେବାକିନିକାର୍‍, ରକିୟା ପୋଇତିମାନି ଲୋକୁଦି ସାକା ଉଣ୍ତିଙ୍ଗ୍‌ ମାପୁରୁଦି ମାଡ଼ାନ୍ ପକାତି ଆତ୍‍ମେଙ୍ଗ୍‍ ।
HEB 2:1 ମାପ୍‌ ଏଣ୍ତେସ୍ ସତ୍‌ତାନ୍‌ ୱେର୍‌ଏ ଆଏପ୍‌, ଇୟାଉଣ୍ତିଙ୍ଗ୍‌ ମାଡ୍‌ ୱେର୍‌ଇମାନି ସତ୍‌ ମାଟାଦୁ ଆଟୁୱାଆଜି ତେବାନିକା ମାନାତ୍‌ ।
HEB 2:2 ଇରିଙ୍ଗ୍‌ ଆଗ୍‌ଡ଼ି ମାପୁରୁ ମୁସ୍‌କୁପୁର୍‌ତି ଦୁତ୍‍କାଙ୍ଗ୍‌ ଏମେ କାବୁର୍ ସିତାମାନା, ଆକା ସତ୍‍ ଇଜି ପାର୍‍ମାଣ୍‍ ଆତାମାନାତ୍, ଆମାକାର୍ ତାନିଙ୍ଗ୍‌ ଡ଼ିସ୍‌ସି ମାନାଏତାର୍, ୱାର୍‌ ସାମାନ୍‌ ଦଣ୍ତ ପୋଇତାମାନାର୍ ।
HEB 2:3 ଆର୍‌ତିଙ୍ଗ୍‌, ଇୟା ପେରିରକିୟାଦିଙ୍ଗ୍‌ ଡ଼ିସ୍‌ତିଙ୍ଗ୍‌, ମାଡ୍‌ ଏଣ୍ତେସ୍ ରକିୟା ପୋଇନିକା ? ଇୟା ପରିତ୍ରାଣ ନିଜେ ପ୍ରବୁ ନିଜେ ଆଗ୍‍ଡ଼ିନେ ୱେର୍‍ତାମାନାନ୍ ମାରି ୱାନିମାନୁ ୱେର୍‌ଇମାନି ଲୋକୁ ୱାନି ପେରିସତ୍‍ ମା ଲାକୁତୁ ପାର୍‌ମାଣ୍‌ କିତାମାନାର୍‍ ।
HEB 2:4 ମାରି ବା, ମାପୁରୁ ଆଇ ଆଇ ସିନେଙ୍ଗ୍‌ ନି କାବାଆନି ପାଣି ମାରି ଏସାଙ୍ଗ୍‍ ଗଟ୍‌ନାଦାନ୍‌ ଆୟାୱିଜୁ କାବୁର୍ ସତ୍‍ ଇଜି ସାକି ସିତାମାନାନ୍‌ ମାରି ନିଜେଦି ବଦାଦାନ୍ ପବିତ୍ରଆତ୍ମାଦି ଦାନ୍‍ ୱିଜୁ ବାଟା କିତାମାନାନ୍ ।
HEB 2:5 ମାପୁରୁ ଆମା ପୁନି ଦୁନିଆ ତିଆର୍‌ କିନାନ୍‌ ମାରି ଆମା ଦୁନିଆଦି କାବୁର୍ ମାପ୍‌ ଇଜିନାପ୍‍, ୱାନି ଅଦିପତି ଇସାପ୍‍ତାନ୍ ୱାନ୍‌ ମୁସ୍‌କୁପୁର୍‌ତି ଦୁତ୍‍କାଙ୍ଗ୍‌ ଆସ୍‌କିଏନ୍‌ ।
HEB 2:6 ଦାର୍ମୁସାସ୍ତ୍ରଦୁ ମାଟା ରାସାତାମାନାତ୍‌ : “ଏ ମାପୁରୁ, ଲୋକୁ ଏନ୍‍ ଜେ, ନିନୁ ୱାନି ଉଣ୍ତିଙ୍ଗ୍‌ ସିନ୍ତା କିଜମାନ୍‌ଆ ମାରି ମନୁଷ୍ୟପୁତ୍ର ଏସ ତାଗ୍‍ଇକାନ୍ ଆତିଙ୍ଗ୍‌ବା ମିରୁ ୱାନି ଜାତୁନ୍‍ ଅସିନି ?
HEB 2:7 ନିନୁ ୱାନିଙ୍ଗ୍‌ ମୁସ୍‌କୁପୁର୍‌ତି ଦୁତ୍‍କା ମାଡ଼ାନ୍‍କୁ ଅଡ଼ପ୍‍ ମାତର୍‌ ଇସ୍ରିକାକିଜି ଇଟ୍‍ତିମାନି; ନିନୁ ୱାନିଙ୍ଗ୍‌ ଗୌରବ୍‍ ମାରି ସନ୍‍ମାନ୍‍ରୁପ୍‌ତି ଟପିଦାନ୍‌ ଆରିସ୍‌କିତିମାନି,
HEB 2:8 ମାରି ୱିଜୁ ବିସୟ୍‌ ମୁସୁକୁ ସାସନ୍ କିଦେଙ୍ଗ୍‌ ସିତିମାନି ।” ମାପୁରୁ ଲୋକାଙ୍ଗ୍‌ “ୱିଜୁ ବିଷୟ ମୁସୁକୁ ସାସନ୍ କିଦେଙ୍ଗ୍‌ ସିତାମାନାନ୍‌ ।” ଇବେଟ୍‍ତାନ୍‌ ପୁରାନେସ୍‌ନିକା ଜେ, ୱିଜୁ ବିଷୟ ୱାନି ଅଦିକାର୍‍ତୁ ତେବାତେମାନେ, ଏଣ୍ତେସ୍‌ବା ମାଡ୍‌ ନେସ୍‍ନିକା, ଲୋକୁ ଇଲେଇ ୱିଜୁ ବିଷୟ ମୁସୁକୁ ଅଦିକାର୍‌ କିଏର୍‌ ।
HEB 2:9 ମାତର୍‌ ମାପ୍‌ ସୁଡ଼ୁଜିନାପ୍‌, ଏଣ୍ତେସ୍ ଜିସୁ ମୁସ୍‌କୁପୁର୍‌ତି ଦୁତ୍‍କା ମାଣୁକୁ ଅଡ଼ପ୍‍ ଇସ୍ରିକା କିଆୟ୍‍ଆତା ମାର୍ହାନ୍‍, ଏଣ୍ତେସ୍‍କି ମାପୁରୁଦି ଦୟାଦାନ୍‍ ୱାନ୍‌ ୱିଜେରି ଉଣ୍ତିଙ୍ଗ୍‌ ସାନାନ୍‍ । ୱାନି ଆୟା ସାତିଦଣ୍ତ୍‍ ଉଣ୍ତିଙ୍ଗ୍‌ ମାଡୁ ୱାନିଙ୍ଗ୍‌ ଇଲେଇ ଗୌରବ୍‍ ମାରି ସନ୍‍ମାନ୍‍ରୁପତି ଟପିଦାନ୍‌ ଆରାତିମାନିକା ସୁଡ଼ୁଜିନିକା ।
HEB 2:10 ୱିଜେରିଙ୍ଗ୍‌ ତିଆର୍‌କିତିକାନ୍‌ ମାରି ରକିୟାକିନିକାନ୍‍ ମାପୁରୁ ୱାନି ନାଣ୍ତ କଡ଼ରିଙ୍ଗ୍‌ ଜିସୁଦି ଗୌରବ୍‌ଦୁ ମିସା କିନି ଉଣ୍ତିଙ୍ଗ୍‌, ସାତି ମାଡ଼ାନ୍‍କୁ ଜିସୁଙ୍ଗୁଁ ପୁରାନେଗିକା କିଜି ଟିକ୍ ପାଣି କିତାମାନାନ୍ । ଇରିଙ୍ଗ୍‍ଁ ଜିସୁନେ ପରିତ୍ରାଣଦି ସାରିଦୁ ୱାରିଙ୍ଗ୍ ସାଲାକିଜି ଅନାନ୍ ।
HEB 2:11 ୱାନ୍‌ ଲୋକାଙ୍ଗ୍‌ ପାପ୍‌ତାନ୍ ପବିତ୍ର କିନାନ୍ । ମାରି, ଆମାକାର୍‌ ଜିସୁ ମାଡ଼ାନ୍ ପବିତ୍ର ଆନାର୍‌, ୱାର୍‌ ୱିଜେରେ ଅରେନ୍‌ ବୁବାଦି କଡ଼ର୍‌ । ଆୟାଉଣ୍ତିଙ୍ଗ୍‌ ଜିସୁ ୱାରିଙ୍ଗ୍ ତଡ଼ାନ୍‍ ନି ତାଙ୍ଗିଁ ଇଜି ଇନ୍‌ଡ୍ରେଙ୍ଗ୍‌ ସେମାର୍ ଆଏନ୍‍ ।
HEB 2:12 ୱାନ୍‌ ମାପୁରୁଙ୍ଗୁଁ ଇର୍ହାମାନାନ୍‌ : “ନାନୁ ନି ୱିଜୁ ପାଣି ନା ତଡ଼ାନ୍‍ ନି ତାଙ୍ଗିଁକାଙ୍ଗ୍‌ ୱେର୍‍ନା । ନାନୁ ୱାରି ମଣ୍ତଲିଦି ନାଣ୍ତଲୋକୁ ଉଣ୍ତାତିମାନୁ ନି ପ୍ରସଂସା ପାଟା କିନା ।”
HEB 2:13 ୱାନ୍‌ ଇକାବା ୱେର୍‌ତାମାନାନ୍, “ନାନୁ ମାପୁରୁଦିମାନୁ ବିସ୍‌ବାସ୍‌ ତିଆର୍‌ କିନା” ମାରି ମାପୁରୁ ନାଙ୍ଗିଁ ଏମେ କଡ଼ରିଙ୍ଗ୍‌ ସିତାମାନାନ୍‌, ୱାର୍‌ ନା ୱାଲେ ମାନାର୍ ।
HEB 2:14 ୱାନ୍‌ ଏମେୱାରିଙ୍ଗ୍‌ କଡ଼ର୍‍ ଇଜି ମାନାତାମାନାନ୍‍, ୱାର୍‌ ନେତେର୍‍କାଣ୍ତା ମେନ୍ଦଲତି ଲୋକୁ ଆତିମାନିଙ୍ଗ୍‌ ଜିସୁ ବା ନିଜେ ୱାରି ୱାଜା ଲୋକା ମୁର୍ତି ନି ଗୁଣ୍‍ ଆସ୍‌ସି ୱାତାନ୍‌ । ୱାନ୍‌ ଇକା କିନି ମାଟା ଆଜିନାତ୍, ୱାନ୍‌ ଏଣ୍ତେସ୍ ନିଜେଦି ସାନି ମାଡ଼ାନ୍‍କୁ ସୟତାନ୍‍ତିଙ୍ଗ୍‌ ବିନାସ୍ କିନାନ୍, ଇରିଙ୍ଗ୍‍ଁ ସାନି ମୁସୁକୁ ସୟତାନ୍‍ତି ଅଦିକାର୍‌ ମାର୍‌ଆତ୍ ।
HEB 2:15 ଇବେଟ୍‍କୁ ୱିଜୁଦିନ୍‍ ଉଣ୍ତିଙ୍ଗ୍‍ ସାନି ତିଲାନି ଦାସ୍‍ତି ଗାଟିଦୁ ମାନି ଲୋକାଙ୍ଗ୍‌ ୱାନ୍‌ ମୁକ୍‍ଡ଼ା କିତାମାନାନ୍ ।
HEB 2:16 ଇବେଟ୍‌କୁ ଟିକ୍ ନେସ୍ତେଙ୍ଗ୍ ଆନାତ୍‌ ଜେ, ୱାନ୍‌ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ସାହାଜ୍ୟ କିଏନ୍, ମାତର୍‌ “ୱାନ୍‌ ଅବ୍ରାହାମ୍‍ଦି କୁଟୁମ୍‌ତି ଲୋକାଙ୍ଗ୍‍ଁ ସାହାଜ୍ୟ କିନାନ୍ ।”
HEB 2:17 ତେନି ଅର୍ତ ଆଜିନାତ୍, ୱିଜୁ ବିସୟ୍‌ତାନ୍‌ ୱାନି ତଡ଼ାନ୍‍କା ୱାଜା ଆନିକା ୱାନି ବଦା ମାର୍ହାତ୍, ଏମେ ମାଣାନ୍‌ କି ୱାନ୍‌ ୱାରି ବିସ୍‍ବାସ୍ ମାରି ଦୟାକିନି ପେରିଜାଜକ ଆଜି ମାପୁରୁଦି ସେବା କିଦେଙ୍ଗ୍‌ ଆଟ୍‌ନାନ୍‍ ମାରି ଲୋକୁ ପାପ୍‌କେମା ପୋଇନାର୍‌ ।
HEB 2:18 ଇରିଙ୍ଗ୍‌ ୱାନ୍‌ ନିଜେ ପରିକାଦୁ ଆର୍‌ଜି କାସ୍ଟୁବଗାତି ମାନିଙ୍ଗ୍‌, ପରିକାଦୁ ଆର୍‌ତିମାନି ଲୋକାଙ୍ଗ୍‌ ସାକା କିଦେଙ୍ଗ୍‌ ଆଟ୍‍ନାନ୍ ।
HEB 3:1 କ୍ରିସ୍ତ ବିସ୍‍ବାସି ତଡ଼ାନ୍‍କୁ ନି ତାଙ୍ଗିଁକ୍‍, ମିର୍‌ ବା ମାପୁରୁଦି ମାଡ଼ାନ୍ କୁକାୟ୍‍ଆତିମାନିଦେର୍‍ ! ମିର୍‌ ଜିସୁଦି ବିଷୟ ଚିନ୍ତା କିଦୁ, ୱାନ୍‌ ମା ଦାର୍ମୁବିସ୍‍ବାସ୍‍ତି ପେରିଜାଜକ ଆନି ଉଣ୍ତିଙ୍ଗ୍‌ ମାପୁରୁଦି ମାଡ଼ାନ୍ ପୋକାଇ ଆତାମାନାନ୍‌ ।
HEB 3:2 ମୋସା ଏଣ୍ତେସ୍ ମାପୁରୁଦି ଇଲୁତୁ ବିସ୍‍ବାସ୍‌ତାନ୍‌ ପାଣି କିତାମାର୍ହାନ୍, ମାପୁରୁଦି ମାଣୁକୁ ଆସ୍‌କିଆୟ୍‌ଆତି ଜିସୁ ଆୟାୱାଜା ଇୟା ପାଣି ଉଣ୍ତିଙ୍ଗ୍‌ ମାପୁରୁଦି ଉଣ୍ତିଙ୍ଗ୍‌ ବିସ୍‍ବାସ୍ ମାର୍‌ର୍ହାନ୍ ।
HEB 3:3 ଇଲୁଦି ବାଦ୍‍ଲୁ ଇଲୁକୁତିଆର୍‌କିନିୱାନିଙ୍ଗ୍‍ଁ ନାଣ୍ତ ସମ୍ମାନ୍‍ ସିନାର୍‍ । ଆୟାୱାଜା ମୋସାଦି ବାଦ୍‍ଲୁ ଜିସୁଙ୍ଗୁଁ ନାଣ୍ତ ସନ୍‍ମାନ୍‍ ପୋଇଦେଙ୍ଗ୍‍ଁ ଜଗ୍‍ମାନାତ୍ ।
HEB 3:4 ୱିଜୁ ଇଲୁକୁ ଏନ୍‌ ସିଲେତିଙ୍ଗ୍‌ ଏନ୍‌ ଲୋକା ମାଡ଼ାନ୍ ତିଆର୍‍ ଆତେମାନେ, ମାତର୍‌ ମାପୁରୁ ୱିଜୁ ବିସୟତିଙ୍ଗ୍‌ ତିଆର୍‌କିତିକାନ୍‌ ।
HEB 3:5 ସେବକ ୱାଜା ମୋସା ମାପୁରୁଦି ଇଲୁଦୁ ବିସ୍‍ବାସ୍‍ଦାନ୍ ପାଣି କିତାମାର୍ହାନ୍ ମାରି ଆମାୱିଜୁ ବିସୟ୍‌ ମାପୁରୁ ୱାଜିନିଦିନ୍‍ତୁ ସାକ୍ୟ ୱେର୍‍ତେଙ୍ଗ୍‌ ବଦାକିତା ମାର୍ହାନ୍, ଆୟା ବିସୟ୍‍ତାନ୍‍ ମୋସା ୱେର୍‍ତା ମାର୍ହାନ୍‍ ।
HEB 3:6 ମାତର୍‌ କ୍ରିସ୍ତ ମାରିନ୍ ୱାଜା ମାପୁରୁଦି ଇଲୁଦୁ ଜାତୁନ୍‍ ଅତେଙ୍ଗ୍‍ ବିସ୍‍ବାସ୍‍ତିକାନ୍‍ । ମାଡୁ ଜଦି ସାହାସ୍ ଆସ୍‌ସି ଆସାଦି ବିଷୟ ପୋଇନିକା ଇଜି ମା ବିସ୍‍ବାସ୍‍ଦୁ ଡାଟ୍‍ ମାନାଟ୍‍, ଆର୍‌ତିଙ୍ଗ୍‌ ମାଡୁ ୱାନି ଇଲୁୱାଜା ଆନିକା ।
HEB 3:7 ମାରି ପବିତ୍ର ଆତ୍ମା ଏଣ୍ତେସ୍ ଇଜିନାତ୍ : “ନେରୁ ଜଦି ମିର୍‌ ମାପୁରୁଦି ବାକ୍ୟ ୱେନ୍‌ଡ୍ରୁ,
HEB 3:8 ଆର୍‌ତିଙ୍ଗ୍‌ ମି ପୁର୍ବେଦିଡକ୍‍ରାଦାଦାରି ୱାଜା ଜିବନ୍‌ ଆଟ୍‍ୱା କିମାଟ୍ । ମରୁବୁମିଦୁ ୱାର୍‌ ଆୟା ନାଣ୍ତିଙ୍ଗ୍ ମାପୁରୁଙ୍ଗୁଁ ପରିକା କିଜି ୱାନି ଉଣ୍ତିଙ୍ଗ୍‌ ବିରୁଦ୍‍ କିତାମାର୍ହାର୍‍ ।
HEB 3:9 ମାପୁରୁ ଇନାନ୍‌, ଆବେନ୍‌ ୱାର୍‌ ନା ସାକ୍ତି ନି ସାସ୍‌ ପରିକା କିତାର୍, ମାରିବା ଚାଲିସ୍ ବାର୍ସେକ୍ ସାନ୍ଦି ନାନୁ ଏମେ ୱିଜୁ ପାଣି କିତାମାର୍ହା, ଆକା ୱାର୍‌ ସୁଡୁତାମାର୍ହାର୍ ।
HEB 3:10 ଆଦେଙ୍ଗ୍‌ ନାନୁ ୱାରି ଉଣ୍ତିଙ୍ଗ୍‌ ରିସାଆଜି ଇର୍ହା, ‘ୱାର୍‌ ୱିଜୁଦିନ୍ ଅବିସ୍‍ବାସ୍‍ତିକାର୍‍ ମାରି ନା ମାଟା ମାନାଦେଙ୍ଗ୍‍ଁ ବଦା କିଏର୍ ।’
HEB 3:11 ନାନୁ ରିସାଦାନ୍ ପାର୍‍ମାଣ୍‍ କିତା, ନାନୁ ଏମେ ରାଜିଦୁ ୱାରିଙ୍ଗ୍ ରମ୍‍ଦେଙ୍ଗ୍‍ ସିତାମାନ୍ଦି, ଆୟା ଦେସ୍‌ତୁ ୱାର୍‌ ଏସାଙ୍ଗ୍‍ବା ସନ୍‌ଡ୍ରେଙ୍ଗ୍ ଆଟ୍‍ଏର୍‍ !”
HEB 3:12 ଏ ନା ବିସ୍‍ବାସ୍‍ତି ତଡ଼ାନ୍‍କୁ ନି ତାଙ୍ଗିଁକ୍‍, ଜାଗାର୍‌ତା, ମି ଲୋଇରାନ୍‌ ଆମାୱାନି ଜିବନ୍‌ ଏଣ୍ତେସ୍ ପାପ୍‌ ମାରି ଅବିସ୍‍ବାସ୍‌ତୁ ପୁରା ଆଜି ଜିବନ୍‌ମାନି ମାପୁରୁଦି ଉଣ୍ତିଙ୍ଗ୍‌ ୱେର୍‌ଏ ଆମାଟ୍‌ ।
HEB 3:13 ମି ମାଡ଼ାନ୍‍କୁ ଏନ୍‍ ଏଣ୍ତେସ୍ ପାପ୍‌ଦାନ୍ ବେମ୍‌ରି ଆଜି ଆଟୁୱା ଜିବନ୍‌ କିମାଟ୍, ଇୟାଉଣ୍ତିଙ୍ଗ୍‌ ନିଜେନିଜେଦିଙ୍ଗ୍‌ ୱିଜୁଦିନ୍ ୱେଡ଼ିକା କିଦୁ । ମାରି ଦାର୍ମୁସାସ୍ତ୍ରଦୁ ରାସାତିମାନି “ନେରୁ” ବଲୁ ଜେ ଆମାସାନ୍ଦି ମା ଉଣ୍ତିଙ୍ଗ୍‌ ଦରକାର୍‍, ଆୟା ସାନ୍ଦି ଆକା କିଜିମାଡ୍ରୁ ।
HEB 3:14 ଜଦି ମାଡୁ ସାରାସାରି ସାନ୍ଦି ମା ଆଗ୍‌ଡ଼ିରି ବିସ୍‍ବାସ୍‍ତୁ ଡାଟ୍‍ ମାନାଟ୍, ଆର୍‌ତିଙ୍ଗ୍‌ ମାଡୁ ୱିଜେରେ କ୍ରିସ୍ତଦିମାନୁ ମିସାଦେଙ୍ଗ୍ ଆଟ୍‍ନିକା ।
HEB 3:15 ଦାର୍ମୁସାସ୍ତ୍ରଦୁ ରାସାତାମାନାତ୍‌ : “ନେରୁ ଜଦି ମିରୁ ମାପୁରୁଦି ବାକ୍ୟ ୱେନିଦେର୍‌, ଆର୍‌ତିଙ୍ଗ୍‌ ମି ଡକ୍ରାଦାଦାର୍‍ ଜିବନ୍‌ ଆଟୁୱା କିଜି ମାପୁରୁଦି ଉଣ୍ତିଙ୍ଗ୍‌ ଏଣ୍ତେସ୍ ବିରୁଦ୍‍ କିତାମାର୍ହାର୍, ଆୟାୱାଜା କିମାଟ୍ ।”
HEB 3:16 ମାପୁରୁଦି ବାକ୍ୟ ୱେନ୍‌ଜି ବା ଏମେକାର୍ ୱାନି ଉଣ୍ତିଙ୍ଗ୍‌ ବିରୁଦ୍‍ କିତାମାର୍ହାର୍‍, ୱାର୍‌ ଏର୍‌ ? ଏମେୱାରିଙ୍ଗ୍‌ ମୋସା ମିସର୍‍ ଦେସ୍‍ଦାନ୍ ସପ୍‍ତା ତାତା ମାର୍ହାନ୍, ଆୟାକାର୍‌ ଆଏର୍‌ନୋ ।
HEB 3:17 ଚାଲିସ୍ ବାର୍ସେକ୍ ସାନ୍ଦି ଏମେ ମାପୁରୁଙ୍ଗୁଁ ରିସା କିତାମାର୍ହାର୍, ୱାର୍‌ ଏର୍‌ ? ଏମେକାର୍ ପାପ୍‌ ପାଣି କିଜି ମରୁବୁମିଦୁ ସାତା ମାର୍ହାର୍, ଆୟାକାର୍‌ ।
HEB 3:18 ମାପୁରୁ ନାସ୍ତିୱାଲେ ପାର୍‍ମାଣ୍‍ କିଜି ଇର୍ହାମାର୍ହାନ୍, ୱାର୍‌ ୱାନି ରମ୍‍ନିମାନୁ ଏସାଙ୍ଗ୍‍ ବା ସନ୍‌ଡ୍ରେଙ୍ଗ୍‌ ଆଟ୍‍ଏର୍‍, ନାସ୍ତିୱାଲେ ୱାନ୍‌ ଏମେୱାରି ବିସୟତାନ୍ ଆକା ଇର୍ହାମାର୍ହାନ୍ ? ଏମେକାର୍ ବିରୁଦ୍‍ କିତାମାର୍ହାର୍‍ ୱାରି ବିସୟ୍‌ତାନ୍ ୱାନ୍‌ ଆକା ଇର୍ହାମାର୍ହାନ୍ ।
HEB 3:19 ମାରି ମାଡୁ ସୁଡ଼ୁଜିନିକା ଜେ, ୱାରି ଅବିସ୍‍ବାସ୍‌ତି ଉଣ୍ତିଙ୍ଗ୍‌ ୱାର୍‌ ଆୟା ପାର୍‌ମାଣ୍‌ତି କିଣାନ୍‌ ଦେସ୍‌ତୁ ସନ୍‌ଡ୍ରେଙ୍ଗ୍‍ ଆଟ୍‍ଏତାର୍‍ ।
HEB 4:1 ମାଙ୍ଗିଁ ଏମେ କିଣାନ୍‌ ଦେସ୍‌ ସିନା ଇଜି ମାପୁରୁ ଇର୍ହାମାର୍ହାନ୍‍, ଆକା ମାଡୁ ପୋଇଦେଙ୍ଗ୍ ଆଟ୍‍ନିକା ଇଜି ମାପୁରୁ ପାର୍‍ମାଣ୍‍ କିତାମାନାନ୍ । ଆୟା ପାର୍‍ମାଣ୍‍ତି ରମ୍‍ନିମାଣାନ୍‍ ଏନ୍‌ ଏଣ୍ତେସ୍ ତେବାମାକିନ୍‍, ଆୟା ଉଣ୍ତିଙ୍ଗ୍‌ ଜାଗାର୍‌ତା ତେବାଦୁ ।
HEB 4:2 ଇରିଙ୍ଗ୍‌ ୱାରିୱାଜା ମାପ୍‌ ବା ସୁସମାଚାର୍‌ ୱେରିମାନିକା । ୱାର୍‌ ଆକା ୱେନ୍‌ଜି ବା ବିସ୍‍ବାସ୍‍ଦୁ ମାନାଏତାର୍ । ଆଦେଙ୍ଗ୍‍ଁ ୱାରି ଉଣ୍ତିଙ୍ଗ୍‌ ଆକା ନେଗିକା ଆଏତାତ୍ ।
HEB 4:3 ମାତର୍‌ ମା ଲୋଇରାନ୍‌ ଏମେକାର୍ ବିସ୍‌ବାସ୍‌ କିନାର୍, ୱାର୍‌ ନେ ମାପୁରୁଦି ପାର୍‍ମାଣ୍‍ତି ରମ୍‍ନିକା ପୋଇନାର୍, ଇରିଙ୍ଗ୍‌ ମାପୁରୁ ଇର୍ହାମାନାନ୍‌, ନାନୁ ରିସାଆଜି ପାର୍‍ମାଣ୍‍ କିତା : ୱାର୍‌ ନା ରମ୍‍ନିମାନୁ ସନ୍‌ଡ୍ରେଙ୍ଗ୍‌ ଆଟ୍‌ଏର୍‍ । ମାରିବା ଇୟା ରମ୍‌ନିକା ଦୁନିଆଦି ତିଆର୍‌ ଆନି ବେଡ଼ାଦାନ୍‍ ତିଆର୍‌ଆତା ମାନାତ୍‌ ।
HEB 4:4 ଦାର୍ମୁସାସ୍ତ୍ରଦି ଏମେ ଉନ୍‌ଡ୍ରି ବାଡିଦୁ “ସାତ୍‌ ଦିନ୍” ବିସୟତାନ୍ ଇୟାୱାଜା ରାସାତାମାନାତ୍‌, “ମାପୁରୁ ୱାନି ୱିଜୁ ପାଣି ପୁରାକିଜି ସାତ୍‍ ଦିନ୍‍ତୁ ରମିତାନ୍ ।”
HEB 4:5 ମାରି ଇୟା ବିସୟ୍‌ତାନ୍‌ ଆଇମାନୁ ରାସାତାମାନାତ୍‌, ମାପୁରୁ ଇର୍ହାନ୍‌, “ୱାର୍‌ ନା ରମ୍‍ନିମାନୁ ଏସାଙ୍ଗ୍‌ ବା ସନ୍‌ଡ୍ରେଙ୍ଗ୍‌ ଆଟ୍‍ଏର୍‍ ।”
HEB 4:6 ଏମେକାର୍ ଆଗ୍‍ଡ଼ିନେ ସୁସମାଚାର୍‌ ୱେର୍‌ଆମାର୍ହାର୍, ନିଜେଦି ଅବିସ୍‍ବାସ୍ ଉଣ୍ତିଙ୍ଗ୍‌ ଆୟା ରମ୍‍ନିକା ପୟ୍‌ଦେଙ୍ଗ୍‌ ଆଟ୍‌ଏତା ମାର୍ହାର୍ । ଇଲେଇ, ଆଇକାର୍‌ ଆୟା ରମ୍‍ନିକା ପୟ୍‌ଦେଙ୍ଗ୍‌ ସୁଜୋଗ୍‌ ପୋଇତାମାନାର୍‌;
HEB 4:7 ଇରିଙ୍ଗ୍‌ ୱାରି ଉଣ୍ତିଙ୍ଗ୍‌ ମାପୁରୁ ଆଇ ଉନ୍‌ଡ୍ରି ଦିନ୍ ତିଆର୍‌ କିତାମାନାନ୍ ମାରି ଆକା ଆଜିନାତ୍, “ନେରୁ ।” ନେଗି ବେଡ଼ାଦୁ ନାଣ୍ତ ବାର୍ସେକ୍ ୱେନ୍‌କା ମାପୁରୁ ରାଜା ଦାଉଦଦି ମାଡ଼ାନ୍ ଇୟା ବିସୟ୍‌ ରାସାତିମାନି ସାସ୍ତ୍ର ବାକ୍ୟଦୁ ୱେର୍‌ତା ମାର୍ହାନ୍ : “ନେରୁ ଜଦି ମିର୍‌ ମାପୁରୁଦି ବାକ୍ୟ ୱେନିଦେର୍‌, ଆର୍‌ତିଙ୍ଗ୍‌ ଜିବନ୍‌ ଆଟୁୱା କିମାଟ୍ ।”
HEB 4:8 ଜଦି ଯିହୋସୁୟ ଲୋକାଙ୍ଗ୍‌ ମାପୁରୁଦି ପାର୍‍ମାଣ୍‍ତି ରମ୍‍ନିକା ସିଦେଙ୍ଗ୍‌ ଆଟ୍‍ତାନ୍‍ମାନ୍ଦି, ଆର୍‌ତିଙ୍ଗ୍‌ ମାପୁରୁ ୱେନ୍‌କା ଆଇ ମାରିଉନ୍‌ଡ୍ରି ରମ୍‌ନିଦିନ୍ ମାଟା ରାସ୍‌ଏତାନ୍‍ମାନ୍ଦି ।
HEB 4:9 ମାରି ଇକା ସତ୍‍ ଜେ, ସାତ୍‍ଦିନ୍‍ତୁ ମାପୁରୁ ରମ୍‍ନି ୱାଜା, ୱାନି ଲୋକା ଉଣ୍ତିଙ୍ଗ୍‌ ଉଣ୍ତ୍ରି ରମ୍‍ନି ୱେଡ଼ା ଇଡାୟ୍‍ଆତାମାନାତ୍‍ ।
HEB 4:10 ମାପୁରୁ ଏଣ୍ତେସ୍ ନିଜେଦି ପାଣିଦାନ୍‌ ରମିତାନ୍, ଏନ୍‌ ମାପୁରୁଦି ପାର୍‍ମାଣ୍‍ତି ରମ୍‍ନିମାନୁ ଡ଼ୁଗିତା ମାନାନାନ୍‍, ୱାନ୍‌ ବା ନିଜେଦି ପାଣିଦି ୱାନ୍‍ନ୍ଦିମାଣୁକୁ ରମ୍‍ନାନ୍ ।
HEB 4:11 ମା ଲୋଇରାନ୍‌ ଏନ୍‌ ଏଣ୍ତେସ୍ ନିଜେଦି ଅବିସ୍‍ବାସ୍ ଉଣ୍ତିଙ୍ଗ୍‌ ଆୟା ଲୋକା ୱାଜା ଇୟା ରମ୍‍ନିମାଣାନ୍‍ ତେବାଏନ୍‍, ଇୟାଉଣ୍ତିଙ୍ଗ୍‌ ଆଟ୍‌ନି ସାନ୍ଦି ସେସ୍ଟା କିନାଟ୍‍ ।
HEB 4:12 ମାପୁରୁଦି ବାକ୍ୟ ଜିବନ୍‌ ମାରି ସାକ୍ତିମାନିକା । ଆକା ରିୟାଙ୍ଗାଁଦି ଦାରା କାଣ୍ତା ବାଦ୍‍ଲୁ ନାଣ୍ତ ଦାରା; ଆମାମାନୁ ଆତ୍ମା ନି ଜିବନ୍‌ ମାରି ସିରେଙ୍ଗ୍‍ଁ ନି ପେଡେନ୍‌ରସ୍‌ ଲୋଇ, ମାରି ଲୋକା ଜିବନ୍‍ତି ଆସା ମାରି ଚିନ୍ତାଦି ବିଚାର୍ କିନିକା ।
HEB 4:13 ମାପୁରୁଦି ମାଡ଼ାନ୍ ଇନି ବିସୟ ମାର୍‍ଗେଏତ୍‍; ୱିଜୁ ତିଆର୍‍ଆତିମାନୁ ୱିଜୁ ବିସୟ ୱାନି ୱିଜୁସୁଡ଼ୁଜିନି କାଣୁକୁ ଆଗ୍‌ଡ଼ି କେର୍‍ପାୟ୍‍ ଆଏତ୍‍ ମାରି ରେଆତାମାନାତ୍‍ । ଆୟା ମାପୁରୁଦି ଆଗ୍‍ଡ଼ି ମାଙ୍ଗିଁ ଇସାବ୍‌ ସିଦେଙ୍ଗ୍‌ ପୋଡ଼ାନାତ୍ ।
HEB 4:14 ଆଦେଙ୍ଗ୍‍ଁ ମାଡୁ ଏମେ ଦାର୍ମୁବିସ୍‍ବାସ୍‍ତିଙ୍ଗ୍‍ ମାନାଜିନିକା, ଆକା ଆଟ୍‍ୱାଦାନ୍‍ ଆସ୍‌ସି ଇଡ୍‍ଦେଙ୍ଗ୍‌ ଆନାତ୍‌; ଇରିଙ୍ଗ୍‍ଁ ମା ୱିଜେରିଙ୍ଗ୍‌ ପେରିଯାଜକ, ମାପୁରୁଦି ମାରିନ୍ ଜିସୁ, ମାପୁରୁଦି ଲାକ୍‍ତୁ ସର୍ହାମାନାନ୍‍ ।
HEB 4:15 ଏନ୍‌ ମା ଦୋସ୍‌ ଦୁର୍ବଲ୍ ଚିନ୍ତା କିଦେଙ୍ଗ୍ ଆଟ୍‍ଏର୍‍, ଆୟାୱାଜା ପେରିଯାଜକ ୱାନ୍‌ ଆଏନ୍‍ । ମାତର୍‌ ମା ପେରିଜାଜକ, ମା ୱାଜା ୱିଜୁଦି ପରିକାଦୁ ଆର୍‌ତାମାର୍ହାନ୍‍, ମାତର୍‌ ୱାନ୍‌ ପାପ୍‌କିଏଣ୍‌ଗା ତେବାତାନ୍‍;
HEB 4:16 ଆଦେଙ୍ଗ୍‍ଁ ମାପ୍‌ ସାସ୍‌ତାନ୍‌ ମାପୁରୁଦି ଦୟା ରାଜାଗାଦି ଲାକ୍‌ତୁ ସନ୍‍ଡ୍ରେଙ୍ଗ୍ ଆଟ୍‌ନାପ୍‌ । ଆବେନ୍‌ ମା ଟିକ୍‌ ବେଡ଼ାଦୁ ମା ନେଗି ଉଣ୍ତିଙ୍ଗ୍‌ ଦୟା ନି ଦୟା ପୟ୍‌ନାପ୍‌ ।
HEB 5:1 ୱିଜେରେ ପେରିଯାଜକ ନିଜେଜାତିଦି ଲୋକା ଲୋଇରାନ୍‌ ବାସେଆଜି ମାରି ନିଯୁକ୍ତ ଆନାର୍ । ୱାନ୍‌ ୱାରି ତରିଟାନ୍‌ ପାପ୍‌ କେମା ଉଣ୍ତିଙ୍ଗ୍‌ ବଲି ନି ପୁଜା ସିଜି ମାପୁରୁଙ୍ଗୁଁ ସେବା କିନାର୍ ।
HEB 5:2 ୱାନ୍‌ ନିଜେ ଆଇଆଇ ଜାତିଦି ଦୋସ୍‍ ଦୁର୍ବଲତୁ ପୁରାଆଜିମାନିଙ୍ଗ୍ ଦୋସ୍‍ କିଜିମାନି ବୁଦିସିଲି ଲୋକା ଉଣ୍ତିଙ୍ଗ୍‌ ୱାନ୍‌ କାର୍ମୁ ସୁଣାନ୍‍ ।
HEB 5:3 ମାରି, କେବଲ ଜେ ଆଇୱାରି ପାପ୍ ଉଣ୍ତିଙ୍ଗ୍‌ ୱାନିଙ୍ଗ୍‌ ପୁଜା ସିଦେଙ୍ଗ୍‌ ପୋଡ଼ାନାତ୍, ଆକା ସିଲେ, ମାତର୍‌ ୱାନି ନିଜେଦି ପାପ୍‌ ଉଣ୍ତିଙ୍ଗ୍‌ ବା ୱାନିଙ୍ଗ୍‌ ପୁଜା ସିଦେଙ୍ଗ୍‌ ପୋଡ଼ାନାତ୍ ।
HEB 5:4 ଏନ୍‍ ନିଜେ ନିଜେଦିଙ୍ଗ୍‌ ପେରିଜାଜକଦି ସମ୍ମାନ୍‍ ପଦ୍‌ତୁ ବାସେ ଆଦେଙ୍ଗ୍‌ ଆଟ୍ଏନ୍‍ । ହାରୋଣଦି ୱାଜା ଜେ କେବଲ ମାପୁରୁଦି ମାଡ଼ାନ୍ ବାସେଆତାମାର୍ହାନ୍‍, ୱାନ୍‌ ପେରିଜାଜକ ପଦ୍‌ ପୋଇନାନ୍‌ ।
HEB 5:5 ଆୟାୱାଜା ପେରିଜାଜକ ପଦ୍‌ଦୁ ସନ୍‌ମାନ୍‌ ପୟ୍‌ଦେଙ୍ଗ୍‌ କ୍ରିସ୍ତ ନିଜେଦିଙ୍ଗ୍‌ ଆସ୍‌କିଆଏନ୍‌ ମାରାନ୍ । ମାରି ମାପୁରୁ ୱାନିଙ୍ଗ୍‌ ଆସ୍‌କିଜି ଇର୍ହାମାର୍ହାନ୍‌, “ନିନୁ ନା ମାରିନ୍, ନେରୁ ନାନୁ ମି ବୁବା ଆତା ।”
HEB 5:6 ଆଇ ବାଡିଦୁ ୱାନ୍‌ ଇକାବା ଇର୍ହାମାନାନ୍‌, “ନିନୁ ଜାଜକ ପଦ୍‌ଦୁ ମଲ୍‍କିସେଦକଦି ଉତ୍ତରାଦିକାରି ୱାଜା ୱିଜୁଦିନ୍‌ତି ଉଣ୍ତିଙ୍ଗ୍‌ ଜାଜକ ତେବାନି ।”
HEB 5:7 ଆମା ମାପୁରୁ ୱାନି ସାନିମାଣୁକୁ ରକିୟା କିଦେଙ୍ଗ୍‌ ଆଟ୍‍ନାନ୍‍, ୱାନି ଲାକୁତୁ ମାପୁରୁ ଇୟା ଜିବନ୍‍ତୁ ଆଡ଼୍‌ବାଜି କାଣେରୁଙ୍ଗୁଁ ୱାକ୍‍ସି ବାତିଙ୍ଗ୍‍ମାଲ୍‍ଜି ପାର୍‍ତନା କିତାମାର୍ହାନ୍ । ୱାନ୍‌ ସାନ୍ତି ନି ଦାର୍ମୁ ଆତିମାନିଙ୍ଗ୍‌, ମାପୁରୁ ୱାନି ପାର୍‍ତନା ୱେର୍ହାନ୍ ।
HEB 5:8 ଜଦିବା ୱାନ୍‌ ମାପୁରୁଦି ମାରିନ୍ ମାର୍ହାନ୍, ୱାନ୍‌ ଦୁଃକ୍‌ ବୋଗଦି ମାଡ଼ାନ୍ ମାନାଦେଙ୍ଗ୍ ଅଜାତାନ୍ ।
HEB 5:9 ଇୟାୱାଜା ମାପୁରୁ ୱାନିଙ୍ଗ୍‌ ଅରେନ୍‌ ନେଗି ପେରି ଜାଜକ ଇଜି ଜଗ୍‌ ଆସ୍‌କିତାନ୍‍, ୱାନ୍‌ ୱାନି ମାଟାମାନାନି ଲୋକା ଉଣ୍ତିଙ୍ଗ୍‌ ୱିଜୁଦିନ୍‍ତି ରକିୟାଦି ୱେଡ଼ିକା ଆତାନ୍‍ ।
HEB 5:10 ମାରି ୱାନ୍‌ ମଲ୍‍କିସେଦକଦି ଉତ୍ତରାଦିକାରି ୱାଜା ପେରିଜାଜକ ଆତାନ୍‍ ଇଜି ମାପୁରୁ ୱେର୍‍ତାନ୍‍ ।
HEB 5:11 ଇୟା ବିସୟତାନ୍ ମା ନାଣ୍ତ ମାଟେଙ୍ଗ୍‌ ମିଙ୍ଗିଁ ୱେର୍‌ତେଙ୍ଗ୍‌ ବଦା କିଜିନାପ୍‌ । ମାତର୍‌ ମି ବୁଜାନି ସାକ୍ତି ଉଣା । ଆଦେଙ୍ଗ୍‌ ମିଙ୍ଗିଁ ବୁଜାକିନିକା ବେସିକାସ୍ଟୁ । ଇରିଙ୍ଗ୍‌ ମିର୍‌ ଆତ୍ମିକ ଜିବନ୍‌ତୁ ୱେନ୍‌ଡ୍ରେଙ୍ଗ୍‌ ସିତିଡ଼ି ।
HEB 5:12 ମିର୍‌ ଆଇୱାରିଙ୍ଗ୍‌ ସିକିୟା ସିନି ବେଡ଼ା ଆତାତ୍‍ନି, ଆତିଙ୍ଗ୍ ଇଲେ ବା ମାପୁରୁଦି ବାକ୍ୟଦି ପାର୍‍ତୁମ୍‍ ବିସୟୱିଜୁ ମିଙ୍ଗିଁ ସିକ୍‌ୟା ସିଦେଙ୍ଗ୍‌ ଗୁରୁ ଦର୍‌କାର୍‌ ଆଜିନାତ୍ । ମିର୍‌ ଆଟୁୱା କାଦି ଉଣି ବାଦ୍‍ଲୁ ଇୟାସାନ୍ଦି ପାଲୁ ଉଣିଜିନିଦେର୍‌ ।
HEB 5:13 ଏନ୍‌ ୱାର୍‌ଇ ପାଲୁ ଉଣାନ୍‌, ୱାନ୍‌ ଇସ୍ରି କୋଡ଼ଦି ଅବସ୍ଥାଦାନ୍‌ ମାନାନ୍‌ । ନେଗି ତାଗ୍‍ଇ ବିସୟ୍‌ତାନ୍‌ ୱାନି ବୁଦି ଆଏଦେ ।
HEB 5:14 ଆଇ ତରିଟାନ୍‍ ଆଟ୍‍ୱା କାଦି ପେରିବୟସ୍‌ତି ଲୋକା ଉଣ୍ତିଙ୍ଗ୍‌; ୱାର୍‌ ଜିବନ୍‌ତି ଆଇଆଇ ବୁଦିଦାନ୍ ନେଗିକା ନି ତାଗ୍‍ଇ ବିସୟ୍‌ତାନ୍‌ ନେସ୍‍ନାର୍‍ ।
HEB 6:1 ମାରି ମାଡୁ ଏଣ୍ତେସ୍‌କି କ୍ରିସ୍ତଦାର୍ମୁଦି ପାର୍‍ତୁମ୍‍ ବିସୟ୍‌କୁୱିଜୁ ଡ଼ିସ୍‍ସି ସତ୍‌ତି ମାଟେଙ୍ଗ୍‍ୱିଜୁ ଅଜାଦେଙ୍ଗ୍‌ ଆଗ୍‍ଡ଼ି ସନିକା ମାନାତ୍ । ମାଡୁ ଦାର୍ମୁବିସ୍‍ବାସ୍‍ତି ପାର୍‍ତୁମ୍‍ ବିସୟ୍‌କୁୱିଜୁ ଆତାତ୍‍, ତାଗ୍‌ଇ ପାଣିଦାନ୍‌ ତେବାଜି ମାପୁରୁଦିମାନୁ ବିସ୍‍ବାସ୍ କିନାଟ୍‌ ।
HEB 6:2 ଡୁବନ୍‌ ଅନି ବିସୟ୍‌ତାନ୍‌ ସିକ୍‌ୟା, କିୟୁ ମୁସ୍‌କୁ ପେର୍‌ନିକା, ପେରି ବିଚାର୍‍, ସାତିକାର୍‌ ମାରିଡ଼େସିନିଙ୍ଗିଁକା ମାରି ଏସ୍‌କାଙ୍ଗ୍‌ୱିଜିଇ ଦଣ୍ତ ୱିଜୁ ମାଟେଙ୍ଗାଁ ନିୟମ ମାରିଡ଼େସି ତିଆର୍‍ କିଦେଙ୍ଗ୍‌ ଦରକାର୍‍ସିଲେ ।
HEB 6:3 ମାଙ୍ଗିଁ ଇଲେଇ ଆଗ୍‌ଡ଼ି ସନ୍‌ଡ୍ରେଙ୍ଗ୍ ଆନାତ୍‌ । ମାପୁରୁଦି ମୁସୁକୁ ଆସା ଇଡ୍‍ଜି ଇକାନେ ମାଡୁ କିନାଟ୍ ।
HEB 6:4 ଏମେକାର୍ ବିସ୍‍ବାସ୍ ଆରାକିତାମାନାର୍, ୱାର୍‌ ଏତ୍‌କିଜି ଡ଼େସି ୱାଦେଙ୍ଗ୍‌ ଆଟ୍‍ନାର୍ ନୋ ? ୱାର୍‌ ଅର୍‍ଲେନ୍‍ ମାପୁରୁଦି ଜାୟ୍‍ତୁ ବାସାଜିମାର୍ହାର୍, ମୁସ୍‌କୁପୁର୍‌ତି ଦାନତି ସାୱି ପୋୟ୍‌ଜି, ପବିତ୍ରଆତ୍ମାଦିଙ୍ଗ୍‌ ପୋଇତା ମାର୍ହାର୍‍,
HEB 6:5 ୱାର୍‌ ମାପୁରୁଦି ନେଗି ବାକ୍ୟଦିଙ୍ଗ୍‍ ପୟ୍‍ତା ମାର୍ହାର୍‍ ମାରି ୱାଜିନି ଜୁଗ୍‍ତି ସାକ୍ତି ଏତ୍‌ କିତାମାର୍ହାର୍‍ ।
HEB 6:6 ମାରିବା ୱାର୍‌ ବିସ୍‍ବାସ୍ ଆରାକିତାମାନାର୍ । ଆଦେଙ୍ଗ୍‍ଁ ମାରିଡ଼େସି ଏତ୍‌କିନି ଉଣ୍ତିଙ୍ଗ୍ ୱାରିଙ୍ଗ୍ ଡ଼େସି ୱେର୍‍ତେଙ୍ଗ୍ ଆଟ୍‌ଇକା, ଇରିଙ୍ଗ୍‌ ୱାର୍‌ ମାପୁରୁଦି ମାରିନ୍‍ତିଙ୍ଗ୍ ମାରିଡ଼େସି କ୍ରୁସକାଟ୍‌ଦୁ ଡାକ୍‍ସି ୱିଜେରି ଲୋକା ଆଗ୍‍ଡ଼ି ସେମାର୍‍ କିଜିନାର୍ ।
HEB 6:7 ଇରିଙ୍ଗ୍‌ ଆମା ବୁମି ନିଜେଦି ମୁସ୍‌କୁ ଜାରିଦିଙ୍ଗ୍‌ଜାରି ମୁଜିତି ପିରୁଏରୁ ଉଣାତ୍‌, ମାରି ଆମାୱାରି ଉଣ୍ତିଙ୍ଗ୍‌ ଆକା ପାସି କିଆୟ୍‌ଆନାତ୍‌, ୱାରି ନେଗି ପାସି ସିନାତ୍‌, ଆୟା ଭୁମିଦିଙ୍ଗ୍‌ ମାପୁରୁ ଆର୍ସିବାଦ୍‌ କିନାନ୍ ।
HEB 6:8 ମାତର୍‌ ଆୟା ବୁମିଦୁ ଜଦି ସାମ୍‌ମାରାନ୍ ମାରି ଲାଟା ନେରିସ୍‌ କିନାତ୍‌, ଆର୍‌ତିଙ୍ଗ୍‌ ଆୟାତାନି ଇନି ପାଣି ତେବାଏତ୍‍ । ଆକା ମାପୁରୁଦି ଅବିସାପ୍‍ତିକା ଆନାତ୍‍ ମାରି ସିସୁଦୁ ନାସ୍ଟୁ ଆନାତ୍‍ ।
HEB 6:9 ମାତର୍‌ ଏ ଲାଡ୍‍ତିଲୋକୁ, ମାପ୍‌ ଜଦି ଇୟାୱାଜା ମାଟା ୱେର୍‌ସିନା, ମାରିବା ମି ଅବସ୍ଥା ଜେ ଆୟାତାନିମାଣୁକୁ ନେଗିକା ମାରି ପରିତ୍ରାଣଦି ୱାଲେ ମିସାତାମାନାତ୍‌, ଇକା ମାପ୍‌ ଆଟ୍‌ୱାଦାନ୍‌ ବିସ୍‌ବାସ୍‌ କିଜିନାପ୍‌ ।
HEB 6:10 ମାପୁରୁ ଅନ୍ୟାୟ କିଏନ୍ । ମି ପାଣି ସେବା, ବିସେସ୍‌ କିଜି ଆଇ ବିସ୍‌ବାସ୍‌ରିଙ୍ଗ୍‌ ସାହାଜ୍ୟ କିଜି ମାପୁରୁଦି ଉଣ୍ତିଙ୍ଗ୍‍ ମିର୍‌ ଆମା ଜିବନ୍‍ନୋନିକା ତର୍‍ସି ୱାଜିନିଦେର୍‍, ଆକା ୱାନ୍‌ ବାଣାଏନ୍‍ ।
HEB 6:11 ମା ଉନ୍‍ଣ୍ତ୍ରି ବଦା, ସାରାସାରି ସାନ୍ଦି ଆଇୱାରି ଉଣ୍ତିଙ୍ଗ୍‌ ମି ଜିବନ୍‌ନୋନିକା ୱିଜୁଦିନ୍ ମାନିତ୍ । ଆର୍‌ତିଙ୍ଗ୍‌, ମି ଆସା କିତିମାନି ୱିଜୁ ବିସୟ୍‌ ପୁରା ଆନାତ୍‌ ।
HEB 6:12 ଆର୍‌ତିଙ୍ଗ୍‌ ମିର୍‌ ଏସାଙ୍ଗ୍‌ ଗାଡ଼ିଆ ଆଏଣ୍‌ଗା ଆଟ୍‍ୱା ବିସ୍‍ବାସ୍‌ ମାରି ସାସ୍‍ମାନି ଲୋକା ୱେନ୍‌କାସାନ୍‍ଡ୍ରୁ ମାରି ମାପୁରୁ ପାର୍‍ମାଣ୍‍ କିତିମାନି ୱିଜୁ ବିସୟ୍‌ ପୟ୍‍ଦୁ ।
HEB 6:13 ଅବ୍ରାହାମ୍‍ତିଙ୍ଗ୍‌ ମାପୁରୁ ଏସ୍ତିୱାଲେ ଆଦେସ୍ ସିତାନ୍‌, ନାସ୍ତିୱାଲେ ୱାନ୍‌ ୱାନି ଆଦେସ୍ ରକ୍‌ୟା କିନାନ୍‌ ଇଜି ପାର୍‍ମାଣ୍‍ କିତାମାନାନ୍ । ୱାନି ବାଦ୍‍ଲୁ ପେରିକାନ୍ ଏନ୍‍ ସିଲିତିଙ୍ଗ୍‌ ୱାନ୍‌ ନିଜେଦି ଦରୁଦାନ୍‍ ପାର୍‍ମାଣ୍‍ କିତାମାର୍ହାନ୍ ।
HEB 6:14 ୱାନ୍‌ ଇର୍ହାମାର୍ହାନ୍, “ନାନ୍‌ ମିଙ୍ଗିଁ ଆର୍ସିବାଦ୍‌ କିନା, ମି କୁଟୁମ୍‌ତିଙ୍ଗ୍‌ ନାଣ୍ତଦାନ୍ ନାଣ୍ତ ପିରିସ୍‌ କିନା ।”
HEB 6:15 ଅବ୍ରାହାମ ସାହାସ୍‍ ଆସ୍‌ସି କାପ୍‍କିତାନ୍ । ଆଦେଙ୍ଗ୍‍ଁ ୱାନ୍‌ ମାପୁରୁଦି ପାର୍‌ମାଣ୍‌ତି ବିସୟ୍‌କୁୱିଜୁ ପୋଇତାନ୍ ।
HEB 6:16 ଲୋକୁ ପାର୍‌ମାଣ୍‌ କିନିୱାଲେ ନିଜେଦିମାଣୁକୁ ପେରି ଲୋକ୍‌ତି ଦରୁଦାନ୍‌ ପାର୍‍ମାଣ୍‍ କିନାର୍‌, ଇୟାୱାଜା ପାର୍‍ମାଣ୍‍ କିନିମାଡ଼ାନ୍ ୱିଜୁ ଜାଟିଜଗଡ଼ା ୱିଜିନାତ୍‌ ।
HEB 6:17 ମାପୁରୁ ଏମେୱାରିଙ୍ଗ୍ ଆୟାୱିଜୁ ବିଷୟ ଦାନ୍ କିନାନ୍ ଇଜି ପାର୍‍ମାଣ୍‍ କିତାମାର୍ହାନ୍, ଆୟା ପାର୍‌ମାଣ୍‌ତୁ ୱାନ୍‌ ଡାଟ୍‌ ତେବାନାନ୍ ଇଜି ୱାରିଙ୍ଗ୍ ପୁରାନେସ୍‌ନିୱାଜା ୱେର୍‌ନି ଉଣ୍ତିଙ୍ଗ୍‌ ୱାନ୍‌ ୱାନି ବାଦ୍‌ତି ୱାଲେ ପାର୍‍ମାଣ୍‍ ମିସା କିତାମାର୍ହାନ୍ ।
HEB 6:18 ୱାନି ବାଦ୍‌ ମାରି ପାର୍‍ମାଣ୍‍ ବାଦ୍‍ଲେଆଏତାତ୍‍, ଆକା ରୁକିସ୍ ମାପୁରୁ ମିସ୍‍ୱେର୍‍ନିକାନ୍‍ ଆଏନ୍ । ଆୟାମାଣୁକୁ ଆଗ୍‌ଡ଼ି ମାନି ଆସାଦିଙ୍ଗ୍‌ ଆସ୍‌ନି ଉଣ୍ତିଙ୍ଗ୍‌ ଡର୍‌ନିବାଡିଦୁ ଉରୁକ୍‌ତାପ୍‌ ଜେ ମାପ୍‌, ମାପ୍‌ ଡାଟ୍‌ ୱେଡ଼ିକା ପୋଇନାପ୍‌ ।
HEB 6:19 ଇୟା ଆସା ମା ଜିବନ୍‌ତି ତଅକା ୱାଜା । ଇକା ଆସାସିନିକା ନି ରକିୟାକିନିକା ମାରି ମୁସ୍‌କୁପୁର୍‌ତି ମନ୍ଦିର୍‍ତି ପାର୍‌ଦାଦିଙ୍ଗ୍‌ ବରୋକିଜି ମହାପବିତ୍ର ବାଡିଦୁ ଇଦେଙ୍ଗ୍‌ ଆଟ୍‌ତାମାନାତ୍‍ ।
HEB 6:20 ମା ପାଣିକିନିସିନି ୱାଜା ଜିସୁ ଆଗ୍‍ଡ଼ିନେ ଆବେନ୍‌ ସର୍‌ର୍ହାନ୍‍ନି । ୱାନ୍‌ ମଲ୍‍କିସେଦକତି ଉତରାଦିକାରି ୱାଜା ୱିଜୁଦିନ୍‌ତି ଉଣ୍ତିଙ୍ଗ୍ ପେରିଜାଜକ ଆତାମାନାନ୍ ।
HEB 7:1 ଇୟା ମଲ୍‍କିସେଦକ ସାଲେମତି ରାଜା ମାରି ପେରି ମାପୁରୁଦି ଜାଜକ ମାର୍ହାନ୍ । ଅବ୍ରାହାମ ନି ୱାନି ସାଙ୍ଗର୍‌ ଏସ୍ତିୱାଲେ ନାଲ୍‌ଏର୍‌ ରାଜାରିଙ୍ଗ୍ ଆରାକିଜି ଜୁଦ୍ଧଦାନ୍ ୱାଜିମାର୍‌ଇ ବେଡ଼ାଦୁ, ନାସ୍ତିୱାଲେ ମଲ୍‍କିସେଦକ ୱାନିଙ୍ଗ୍‌ ବେଟ୍ଆଜି ଆସିର୍ବାଦ୍‌ କିତାମାର୍ହାନ୍ ।
HEB 7:2 ମାରି ଅବ୍ରାହାମ ୱାନିଙ୍ଗ୍‌ ଜୁଦ୍ଧଦୁଜିଣାତି ସମ୍ପତିଦି ଏକ ଦସମାଂସ ସିତାମାରାନ୍ । ମଲ୍‍କିସେଦକଦି ଦରୁଦି ଆଗ୍‌ଡ଼ିରି ଅର୍ତ ଆଜିନାତ୍ “ଦାର୍ମୁଦି ରାଜା” ୱାନ୍‌ ସାଲେମତି ରାଜାଦି ଅର୍ତ ଆଜିନାତ୍‌ “ସାନ୍ତି ରାଜା ।”
HEB 7:3 ମଲ୍‍କିସେଦକଦି ବୁବା କି ୟାୟା ମାରି କୁଟୁମ୍‌ ନି ୱାନି ଜନମ୍‌ ମାରି ଜିବନ୍‍ତି ବିସୟ୍‌ତାନ୍ ଇନିକା ବା ଜାଣା ସିଲେତ୍‌ । ୱାନ୍‌ ମାପୁରୁଦି ମାରିନ୍ ୱାଜା; ୱିଜୁଦିନ୍‍ ଜାଜକ ଆଜି ତେବାଜି ୱାତାମାନାନ୍‌ ।
HEB 7:4 ଅଡ଼୍‌ବିଜ ସୁଡ଼ୁଦୁ, ଇୟା ଲୋକ୍‌ ଏଣ୍ତେସ୍‌ ପେରିକାନ୍‌ । ମା ୱେଙ୍ଗିଁତି ପୁର୍ବେଦିଡକ୍‌ରା ଅବ୍ରାହାମ ଜୁଦ୍ଧଦୁଜିଣାତି ସମ୍ପତିଦି ଏକ ଦସମାଂସ ୱାନିଙ୍ଗ୍‌ ସିତାମାର୍‌ଆନ୍ ।
HEB 7:5 ଲେବିରି ଆମା କୁଟୁମ୍‌ତିକାର୍‍ ଜାଜକ ପାଣି କିନାର୍, ୱାର୍‌ ମୋସାଦି ନିୟମ୍‌ତି ଇସାବ୍‌ତାନ୍‌ ଇସ୍ରାଏଲତି ତଡ଼ାନ୍‌କା ମାଣୁକୁ ଦସମାଂସ ଦାନ ଲସ୍‌ନାର୍, ଇସ୍ରାଏଲତିଲୋକୁ ଅବ୍ରାହାମଦି କୁଟୁମ୍‌ ମାରି ଲେବିରି ନିଜେ ଜାତିଆତିଙ୍ଗ୍ ବା ୱାରିମାଡ଼ାନ୍‍କୁ ଇୟା ଦସ୍‌ବାଗ୍‌ ଲସ୍‌ସିମାର୍ହାର୍‌ ।
HEB 7:6 ମଲ୍‍କିସେଦକ ଲେବି କୁଟୁମ୍‌ତିକାନ୍‌ ଆଏତିଙ୍ଗ୍‌ ବା, ୱାନ୍‌ ମାପୁରୁଦି ପାର୍‌ମାଣ୍‌ତି ଅବ୍ରାହାମଦିମାଡ଼ାନ୍ ଏକ ଦସମାଂସ ଦାନ ପୋଇଜି ୱାନିଙ୍ଗ୍‌ ଆସିର୍ବାଦ୍‌ କିତାମାର୍ହାନ୍ ।
HEB 7:7 ଆସିର୍ବାଦ୍‌ କିନି ଲୋକୁ ଆସିର୍ବାଦ୍‌ ପୋଇନି ଲୋକାମାଣୁକୁ ଏନ୍‌ ପେରିକାନ୍, ଇବେନୁ ଇନିକା ଅଡ଼୍‌ବିନିକା ସିଲେତ୍‌ ।
HEB 7:8 ଏକ ଦସମାଂସ ଦାନ ଲସ୍‌ନି ଯାଜକର୍ ସାତିୱାଜା ଲୋକୁ, ମାତର୍‍ ମଲ୍‌କିସେଦକ ସାସ୍ତ୍ରଦି ବାକ୍ୟ ଇସାବ୍‍ତାନ୍‍ ୱାନ୍‌ ଇଲେଇବା ଜିବନ୍‌ମାନାନ୍‌ ।
HEB 7:9 ମାରି ଅବ୍ରାହାମ ମଲ୍‍କିସେଦକଦିଙ୍ଗ୍‌ ଦସବାଗ୍‍ତାନ୍‍ ଉନ୍‌ଡ୍ରି ବାଗ୍ ଦାନ ସିତିୱାଲେ, ଏମେ ଲେବିଦି କୁଟୁମ୍‌ତି ଯାଜକର୍ ଇଲେଇ ଦସମାଂସ ଦାନ୍ ଲସ୍‌ସିନାର୍, ଆୟା ଲେବି ବା ମଲ୍‍କିସେଦକଦିଙ୍ଗ୍‌ ଆୟା ଦାନ୍‌ ସିତାମାରାନ୍ ଇଜି ଇନ୍‌ଡ୍ରେଙ୍ଗ୍‌ ଆଟ୍‍ନିକା ।
HEB 7:10 ଲେବି ନାସ୍ତିୱାଲେ ଜନମ୍‌ ଆଏନ୍ ମାରାନ୍ ସତ୍‌, ମାତର୍‌ ଅବ୍ରାହାମ ମଲ୍‍କିସେଦକଦିଙ୍ଗ୍ ବେଟ୍‌ ଆତିୱାଲେ ପୁର୍ବେଦିଡକ୍‌ରାଦାଦା ଅବ୍ରାହାମଦି କୁଟୁମ୍‌ତି ୱାଜା ଲେବି ୱାନି ମେନ୍ଦଲ୍‌ତୁ ମାର୍‌ଆନ୍ ଇଜି ଇରିଙ୍ଗ୍‍ବା ବୁଲ୍‌ ଆଏତ୍‍ ।
HEB 7:11 ଇୟା ଲେବିୟରି ଜାଜକଦି ମାନାଜି ଇସ୍ରାଏଲ ଜାତିଦିଙ୍ଗ୍‍ ୱାନି ନିୟମ୍‌ ସିଆୟ୍‍ ଆତାମାର୍ହାତ୍‍ । ଲେବିୟରି ପାଣି ଜଦି ସାରାସାରି ଆତାତ୍‍ମାନ୍ଦି, ଆର୍‌ତିଙ୍ଗ୍‌ ହାରୋଣଦି ଉତରାଦିକାରି ଇୟା ଲେବିୟ ଜାଜକରିଙ୍ଗ୍ ଡ଼ିସ୍‍ସି ସିଜି, ମଲ୍‍କିସେଦକଦି ଉତରାଦିକାରି ୱାଜା ଆଇକାନ୍‍ ଅରେନ୍‌ ଜାଜକ ୱାଦେଙ୍ଗ୍‌ ଇନିକା ଦରକାର୍ ମାର୍ହାତ୍ ।
HEB 7:12 ଜାଜକ କୁଟୁମ୍‍ତି ବାଦ୍‍ଲେ ଆତିଙ୍ଗ୍‌ ନିୟମ୍‍ତୁ ବା ବାଦ୍‍ଲେ ଆନି ଦରକାର୍ ।
HEB 7:13 ଏମେୱାନି ବିସୟ୍‌ତାନ୍‌ ମାପ୍‍ ଇୟାୱିଜୁ ମାଟା ଇଜିନାପ୍‍, ମା ଆୟା ପ୍ରବୁ ଜିସୁ ଆଇ ଉନ୍‍ଡ୍ରି କୁଟୁମ୍‌ ମାର୍ହାନ୍; ଆୟା କୁଟୁମ୍‌ତୁ ଏନ୍‍ ଏସାଙ୍ଗ୍ ଯାଜକ ପାଣି କିଏର୍‌ ।
HEB 7:14 ଇକା ଟିକ୍‍ ଜେ, ୱାନ୍‌ ଜିହୁଦା କୁଟୁମ୍‌ତୁ ଜନମ୍‍ ଆତା ମାର୍ହାନ୍ ମାରି ଯାଜକ ଆନି ଉଣ୍ତିଙ୍ଗ୍ ମୋସା ଇୟା କୁଟୁମ୍‌ତି ଦରୁ ରାସ୍ଏନ୍‍ ।
HEB 7:15 ଇବେନୁ ଟିକ୍ ବୁଜାଜିନାତ୍‌ ଜେ, ମଲ୍‍କିସେଦକଦି ୱାଜା ଆଇ ଅରେନ୍ ଜାଜକ ୱାତାନ୍‌ ।
HEB 7:16 ମାତର୍‌ ୱାନ୍‌ ଲୋକ୍‌ ତିଆର୍‌କିତି ନିୟମ୍‌ ମାରି ପଦ୍‌ତି ମାଡ଼ାନ୍ ଜାଜକ ଆଏନ୍ ମାର୍ହାନ୍; ୱିଜ୍‍ଇ ଜିବନ୍‌ତି ସାକ୍ତି ପାଣି ୱାନ୍‌ ଯାଜକ ଆତାମାର୍ହାନ୍‍ ।
HEB 7:17 ଇରିଙ୍ଗ୍‌ ଦର୍ମସାସ୍ତ୍ରଦୁ ରାସାତା ମାନାତ୍, “ନିନୁ ମଲ୍‍କିସେଦକଦି ଉତରାଦିକାରି ୱାଜା ୱିଜୁଦିନ୍‌ତି ଯାଜକ ଆନି ।”
HEB 7:18 ଇବେନୁ ପାଡ଼୍‍ଇ ନିୟମ ସାକ୍ତିସିଲେତ୍ ମାରି ଦରକାର୍‌ ସିଲେତାତ୍‌ଆକା ତାନିଙ୍ଗ୍‌ ଡ଼ିସ୍‍ତା ସିତାର୍‍ ।
HEB 7:19 ଇରିଙ୍ଗ୍‌ ମୋସା ସିତିମାନି ନିୟମ୍‍ତାନ୍‍ ଇନି ବିସୟ୍‌ ପୁରା ପୋଇଦେଙ୍ଗ୍ ଆଟ୍ଏତାର୍‌ । ଇଲେଇ ମାଙ୍ଗିଁ ଉନ୍‍ଡ୍ରି ସାହାସ୍‍ତି ଆସା ସିତାମାନାନ୍‌; ଆୟାମାଡ଼ାନ୍ ମାପୁ ମାପୁରୁଦି ଲାକୁତୁଆନି ଉଣ୍ତିଙ୍ଗ୍‌ ଆଟ୍‌ତାମାନାନ୍ ।
HEB 7:20 ନାଣ୍ତଦାନ୍ ନାଣ୍ତ ମା ଉଣ୍ତିଙ୍ଗ୍‌ ମାପୁରୁଦି ପାର୍‌ମାଣ୍‌ ବା ମାନାତ୍ । ହାରଣଦି କୁଟୁମ୍‌ତିକାର୍‍ ଯାଜକ ପଦଦୁ ଆସ୍‌କିଆୟା ଆତିୱାଲେ ଇୟାୱାଜା ଇନି ପାର୍‌ମାଣ୍‌ ସିଆୟ୍‌ଏତ୍‌ ମାରାତ୍ ।
HEB 7:21 ମାତର୍‌ କ୍ରିସ୍ତ ଯାଜକ ଆନି ବେଡ଼ାଦୁ ମାପୁରୁ ପାର୍‌ମାଣ୍‌ କିଜି ୱାନିଙ୍ଗ୍‌ ୱେର୍‌ତାମାର୍ହାର୍‌, “ପ୍ରବୁ ଉନ୍‍ଡ୍ରି ପାର୍‍ମାଣ୍‍ କିତାମାନାନ୍” ୱାନ୍‌ ୱାନି ପାର୍‍ମାଣ୍‌ ବାଦ୍‍ଲେ କିଏନ୍‌ : ନିନୁ ୱିଜୁଦିନ୍‌ତି ଜାଜକ ଆନି ।
HEB 7:22 ଇୟା ମାଟା ଉଣ୍ତିଙ୍ଗ୍ ଜିସୁ ଉଡ୍ରି ପେରି ନିୟମ୍‌ତି ପୁରା ସିତାମାନାନ୍‌ ।
HEB 7:23 କେବଲ୍‌ ପାଡ଼ିଇ ନିୟମ୍‌ତୁ ବା ଆଇ ଯାଜକର୍‌ ସାତିସରିୱାଜା ଆତିମାନିଙ୍ଗ୍‌ ୱାର୍‌ ସାତି ୱେନ୍‌କା ଆଇକାର୍‌ ଜାଜକ ଆନାର୍; ଆଦେଙ୍ଗ୍‌ ୱାର୍‌ ଇସାପ୍‍ତୁ ନାଣ୍ତ ମାନାର୍‌ ।
HEB 7:24 ମାତର୍‌ ଜିସୁ ୱିଜୁଦିନ୍ ଜିବନ୍‌ମାନାନ୍‌ । ୱାନି ଜାଜକ ପାଣି ବା ୱିଜୁଦିନ୍‌ ।
HEB 7:25 ଆଦେଙ୍ଗ୍‌ ଏମେକାର୍‌ ୱାନି ମାଡ଼ାନ୍ ମାପୁରୁଦି ଲାକୁତୁ ସନାର୍, ୱାରିଙ୍ଗ୍ ରକିୟା କିଦେଙ୍ଗ୍‌ ୱାନ୍‌ ଇଲେଇ ମାରି ୱିଜୁଦିନ୍ ଡାଟ୍‌ ମାନାନ୍‌, ମାତର୍‌ ୱାରି ଉଣ୍ତିଙ୍ଗ୍‌ ମାପୁରୁଦି ଲାକୁତୁ ପାର୍‌ତନା କିଦେଙ୍ଗ୍‌ ୱାନ୍‌ ୱିଜୁଦିନ୍ ଜିତାମାନାନ୍‍ ।
HEB 7:26 ଆର୍‌ତିଙ୍ଗ୍‌ ମା ୱିଜୁ ଉଣା ପୁରା କିଦେଙ୍ଗ୍‌ ଜିସୁନେ ଅରେନ୍ ମାତ୍ର ପେରିଯାଜକ । ୱାନ୍‌ ପବିତ୍ର, ପାପ୍‌ଦସ୍‍ ସିଲିକାନ୍‍, ପାପି ଲୋକାମାଣୁକୁ ଆକମାନିକାନ୍‍, ମୁସ୍‌କୁପୁର୍‌ତୁ ପରିକାନ୍‌ ଆତାନ୍‌ ।
HEB 7:27 ୱାନ୍‌ ଆଇଆଇ ପେରିଜାଜକରି ୱାଜା ଆଏନ୍; ୱାରି ୱାଜା ୱାନିଙ୍ଗ୍‌ ଆଗ୍‍ଡ଼ି ନିଜେଦି ପାପ୍‌ ଉଣ୍ତିଙ୍ଗ୍‌ ମାରି ୱେନ୍‌କା ଆଇୱାରି ପାପ୍‌ ଉଣ୍ତିଙ୍ଗ୍‌ ୱିଜୁଦିନ୍ ପୁଜା ସିଦେଙ୍ଗ୍‌ ପୋଡ଼ାଏତ୍ । ୱାନ୍‌ ନିଜେଦିଙ୍ଗ୍ ପୁଜା ସିଜି ଉଡ୍ରେ ଦେବାନେ ଆଇ ଆଇ ବଲିସିଜି ପାଣି କିତାମାର୍ହାନ୍ ।
HEB 7:28 ମୋସାଦି ନିୟମ୍‍ ଇସାବ୍‍ତାନ୍‍ ବାସେଆତି ପେରିଜାଜକରି ଦୋସ୍‌ ଦୁର୍ବଳ ମାନାତ୍; ମାତର୍‌ ନିୟମ୍‍ ତିଆର୍‌କିତି ୱେନ୍‍କାରି ବେଡ଼ାଦୁ ମାପୁରୁ ନିଜେଦି ବାଦ୍‌ ମାରି ପାର୍‌ମାଣ୍‌ ଇସାବ୍‌ତାନ୍‌ ୱାନି ଏମେ ମାରିନ୍‍ତିଙ୍ଗ୍‌ ପେରିଜାଜକ ୱାଜା ବାସେ କିତାନ୍, ୱାନ୍‌ ୱିଜୁଦିନ୍‌ତିଙ୍ଗ୍‌ ଉଣ୍ତିଙ୍ଗ୍‌ ପୁରା ଆତାମାନାନ୍ ।
HEB 8:1 ମା ମାଟାଦି ଅର୍ତ ଇକା ମାଡୁ ଏମେ ପେରିଜାଜକଦିଙ୍ଗ୍‌ ପୋଇତିମାନିକା, ୱାନ୍‌ ମୁସ୍‍କୁପୁର୍‌ତୁ ମହାମହିମା ମାପୁରୁଦି ସିଂହାସନ୍‌ଦି ଉଣେରି କିୟୁ ତରିନ୍‌ ବାସ୍‌ତାମାନାନ୍ ।
HEB 8:2 ୱାନ୍‌ ଏମେ ମହାପବିତ୍ର ବାଡିଦୁ ତିଆର୍‌ଆତିମାନି ଗୁଡ଼ା ଆଡିଗି ପେରିଜାଜକ ୱାଜା ପାଣି କିନାନ୍, ଆକା ଲୋକା ମାଡ଼ାନ୍ ତିଆର୍ ଆଏତ୍‌, ତାନିଙ୍ଗ୍ ପ୍ରବୁ ତିଆର୍ କିତାମାନାନ୍ ।
HEB 8:3 ୱିଜେରେ ପେରିଜାଜକର୍‌ ମାପୁରୁଦି ଉଦେସ୍‌ଦାନ୍‌ ପୁଜା ମାରି ଜାତୁବଲି ପୁଜା କିଦେଙ୍ଗ୍‌ ବାସେଆତା ମାନାର୍‌ । ଆଦେଙ୍ଗ୍‌ ମା ପେରିଜାଜକ ବା ଆୟାୱାଜା ଇନି ପୁଜା କିଦେଙ୍ଗ୍‌ ଦରକାର୍ ମାନାତ୍‌ ।
HEB 8:4 ୱାନ୍‌ ଜଦି ଇୟା ଦୁନିଆଦୁ ମାରିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ମୁଡ଼ୁକେ ଜାଜକ ଆଦେଙ୍ଗ୍‍ଁ ଆଟ୍ଏତାନ୍‌ମାନ୍ଦି, ଇରିଙ୍ଗ୍‌ ଜିହୁଦିର୍ ନିୟମ୍‍ ଇସାବ୍‌ତାନ୍‌ ପୁଜା ସିଦେଙ୍ଗ୍‌ ଜାଜକର୍‌ ମାନାର୍ ।
HEB 8:5 ୱାରି ଜାଜକରି ସେବା ପାଣି ମୁସ୍‌କୁପୁର୍‌ତି ବିସୟ୍‌ତି କାତା ନି ନିଡ଼ିଗାମାତ୍ର । ମୋସାଦି ବେଡ଼ାଦାନ୍ ଇୟାୱାଜା ଆଜି ୱାଜିନାତ୍ । ମୋସା ଏସ୍ତିୱାଲେ ଉପାସନା ଉଣ୍ତିଙ୍ଗ୍ ଉନ୍‍ଣ୍ତ୍ରି ଗୁଡ଼ା ତିଆର୍ କିଦେଙ୍ଗ୍‌ ସୋଲ୍‍ସିମାରାନ୍‌, ମାପୁରୁ ୱାନିଙ୍ଗ୍‌ ଇର୍ହାମାର୍ହାନ୍‌, “ସୁଡୁଆ, ଗୋରନ୍‌ ମୁସୁକୁ ନିଙ୍ଗିଁ ଏମେ ବାନା ତୋର୍‍ସି ସିତାମାନା ଟିକ୍‌ ଆୟା ଇସାପ୍‍ତାନ୍ ୱିଜୁ ବିସୟ୍‌ ତିଆର୍ କିଆ ।”
HEB 8:6 ମାତର୍‌ ଇଲେଇ ଜିସୁଙ୍ଗୁଁ ଏମେ ଜାଜକ ପାଣି ସିଆୟ୍‍ ଆତାମାନାତ୍, ଆକା ଆଇୱାରି ଜାଜକିୟ ପାଣି ବାଦ୍‍ଲୁ ନେଗିକା । ଆୟାୱାଜା ମାପୁରୁ ମାରି ଲୋକା ଲୋଇ ୱାନ୍‌ ଏମେ ନିୟମ୍‌ ତିଆର୍‌ କିତାମାନାନ୍, ଆକା ପେରିକା, ଇରିଙ୍ଗ୍‌ ଇୟା ନିୟମ୍‌ଦୁ ନେଗି ବିସୟ୍‌ୱିଜୁ ସିଆୟ୍‍ ଆନି ଉଣ୍ତିଙ୍ଗ୍ ପାର୍‌ମାଣ୍‌ ମାନାତ୍ ।
HEB 8:7 ଆଗ୍‌ଡ଼ିରି ନିୟମ୍‍ତୁ ଜଦି ଦସ୍‌ ସିଲେତାତ୍‌ମାନ୍ଦି, ଆର୍‌ତିଙ୍ଗ୍‌ ମାରିଉନ୍‍ଡ୍ରି ନିୟମ୍‌ ଦର୍‌କାର୍ ସିଲେତାତ୍‌ମାନ୍ଦି ।
HEB 8:8 ମାତର୍‌ ମାପୁରୁ ୱାନି ଲୋକାଙ୍ଗ୍‌ ଦୋସ୍‌ ଆସ୍‌ସି ଇର୍ହାମାନାନ୍‌, “ପ୍ରବୁ ଇଜିନାନ୍‌, ବେଡ଼ା ୱାଜିନାତ୍, ଏସ୍ତିୱାଲେ ନାନୁ ଇସ୍ରାଏଲ ସିଲ୍‌ତିଙ୍ଗ୍‌ ଜିହୁଦାଦି ଲୋକାୱାଲେ ଏକ ପୁନି ନିୟମ୍‌ ତିଆର୍‌ କିନା ।
HEB 8:9 ନାନୁ ୱାରି ପୁର୍ବେଦିଡକ୍‌ରାରିଙ୍ଗ୍‌ କିୟୁ ଆସ୍‌ସି ମିସର୍‍ ଦେସ୍‌ତାନ୍‍ ସୋପ୍‍ସି ତାନି ୱାଲେ ଏମେ ନିୟମ କିତାମାର୍ହା, ଇୟା ନିୟମ୍‌ ଆୟାୱାଜା ଆଏତେ । ନାନୁ ୱାରିୱାଲେ ଏମେ ନିୟମ୍‌ କିତାମାର୍ହା, ଆବେନ୍‌ ୱାର୍‌ ବିସ୍‍ବାସ୍ ତେବାଏତାର୍‌; ଆଦେଙ୍ଗ୍‍ଁ ନାନୁ ୱାରି ଉଣ୍ତିଙ୍ଗ୍ ମୋନ୍‌ଦିୟାନ୍‌ ସିଏତା ।
HEB 8:10 ପ୍ରବୁ ଇଜିନାନ୍‌, ନାନୁ ବବିସତ୍‌ଦୁ ଇସ୍ରାଏଲତି ଲୋକା ୱାଲେ ଇୟା ନିୟମ୍‌ କିନା : ନାନୁ ନା ନିୟମ୍‌ ୱାରି ମନ୍‍ପାଟାଦୁ ମାରି ଜିବନ୍‌ତି ପାଟାଦୁ ରାସ୍‍ନା । ନାନୁ‍ ୱାରି ମାପୁରୁ ଆନା, ୱାର୍‌ ନା ଲୋକ୍ ଆନାର୍ ।
HEB 8:11 ନାସ୍ତିୱାଲେ ୱାର୍‌ ଲାକ୍‌ତୁରି ତଡ଼ାନ୍‌କାଙ୍ଗ୍ ସିକିୟା ସିଦେଙ୍ଗ୍‌ ଦର୍‌କାର୍‌ ଆଏତ୍‌ନି, ମାରି ଦେସ୍‍ତି ଲୋକାଙ୍ଗ୍‌ ‘ପ୍ରବୁଦି ବିସୟ ୱେର୍‌ତୁ,’ ଇୟା ମାଟା ୱେର୍‌ତେଙ୍ଗ୍‌ ଦର୍‌କାର୍‌ ଆଏତ୍‌ନି, ଇରିଙ୍ଗ୍‌ ଇସ୍ରିଲୋକା ମାଣାନ୍‌କୁ ପେରିଲୋକା ସାନ୍ଧି ୱିଜେରେ ନା ପରିଚୟ ନେସ୍‌ନାର୍ ।
HEB 8:12 ନାନୁ ୱାରି ୱିଜୁ ପାପ୍‌ କେମା କିନା ମାରି ୱାରିଦି ଇନି ଅନ୍ୟାୟ୍‌ ମୋନତୁ ଏତ୍‌ ଇଡେଏ ।”
HEB 8:13 ଇୟାତେନିଙ୍ଗ୍‌ ପୁନି ନିୟମ୍‌ ଇଜି ରାସ୍‌ନି ମାଡ଼ାନ୍ ମାପୁରୁ ଆଗ୍‌ଡ଼ିରିତାନିଙ୍ଗ୍‌ ପାଡ଼ିଇକା ଇଜି ଇର୍ହାମାନାନ୍‌ ମାରି ଆମାକା ପାଡ଼ିଇକା ମାରି ସାଲାଏତ୍‍, ଆକା ବେଗି ମାର୍‌ଗିନା ସନାତ୍‍ ।
HEB 9:1 ପାରତୁମ୍‍ତି ନିୟମ୍‍ତୁ ପାର୍‍ତନାଦି ସାରି ନି ଲୋକୁ ତିଆର୍‍କିତି ଉଣ୍ତ୍ରି ସେବା କିନି ଇଲୁ ବିସୟ୍‌ତାନ୍‍ ରାସାତା ମାର୍ହାତ୍ ।
HEB 9:2 ଆୟାଇସାବ୍‌ତାନ୍ ଉଣ୍ତ୍ରି ପାର୍‍ତନା କିନି ଗୁଡ଼ା ତିଆର୍ ଆତାମାର୍ହାତ୍‍ । ଆବେନ୍‌ ମାନି ପାର୍‍ତୁମ୍‍ତି ବାକ୍‍ରା ପବିତ୍ର ବାଡି ଇନ୍‍ଜିମାର୍ହାର୍ । ଇୟା ଲୋଇ ଦିୱା ଇଡ୍‍ନି ବାଡି, ଉନ୍‍ଡ୍ରି ଟେବୁଲ୍‍ ମାରି ଟେବୁଲୁ ମୁସୁକୁ ମାପୁରୁଦି ଉଦେସ୍‍ତାନ୍ ପୁଜା ସିତିମାର୍‍ଇ ରୁଟି ମାର୍ହାତ୍ ।
HEB 9:3 ପାର୍‌ଦା ୱେନ୍‍କା ଏମେ ମାରିଉଣ୍ତ୍ରି ବାକ୍‍ରା ମାର୍ହାତ୍, ତାନିଙ୍ଗ୍‌ ମହାପବିତ୍ର ବାଡି ଇନ୍‍ଜିମାର୍ହାର୍ ।
HEB 9:4 ଆବେନ୍‌ ଉନ୍‍ଡ୍ରି ବାଙ୍ଗାଁରାମ୍‍ତି ଦୁପୁଣି ବେଦି ମାରି ବାଙ୍ଗାଁରାମ୍‍ତି ତିଆର୍‍ଆତି “ନିୟମ୍‌ ପେଡ଼ା” ମାର୍ହାତ୍ । ଇୟା ପେଡ଼ା ଲୋଇ “ମାନ୍ନା” ମାନି ଉନ୍‍ଡ୍ରି ବାଙ୍ଗାଁରାମ୍‌ତି ସାଟି, ହାରୋଣତି କାୟ୍‍ତି ବାଡିଗା ମାରି ମାପୁରୁଦି ମାଟା ରାସାତି ରୁଣ୍ତି କାଲୁକୁ ପାଟା ମାର୍ହେ ।
HEB 9:5 ସିନ୍ଦୁକପେଡ଼ା ମୁସୁକୁ ମାପୁରୁଦି ଆବେନ୍‌ମାନ୍‌ଜି ତରାୟ୍‌ଆନି ୱାଜା ରେକେଙ୍ଗ୍‌ମାନି ରୁଣ୍ତି ଲୋକ୍‌ଦି ମୁର୍ତି ମାର୍ହାତ୍‍ । ଇୟାକାର୍‌ “ପାପ୍‍କେମା” ବାଡି ମୁସୁକୁ ରେକେଙ୍ଗ୍‌ ଅସାର୍ କିଜି ତେବାତାମାର୍ହାର୍‍, ମାତର୍‌ ଇଲେଇ ଇୟା ୱିଜୁଦି ବିସୟ୍‌ ନେଗେନ୍‌ତାନ୍ ୱେର୍‍ତେଙ୍ଗ୍‍ ଦରକାର୍‍ ସିଲେ ।
HEB 9:6 ଆବେନ୍‌ ଇୟାୱାଜା ନିୟମ୍‍ ମାନାତ୍ ଯାଜକର୍‌ ୱିଜୁଦିନ୍ ଗୁଡ଼ାଦି ପାର୍‍ତୁମ୍‍ ବାକ୍‍ରାଦୁ ଡ଼ୁଗ୍‌ଜି ୱାରି ସେବା ପାଣି ପୁରା କିନାର୍ ।
HEB 9:7 ମାତର୍‌ ମାରିଉନ୍‍ଡ୍ରି ବାକ୍‍ରା ଲୋଇ କେବଲ ପେରିଜାଜକଦି ସୋନି ଅଦିକାର୍‌ ମାନାତ୍‌, ୱାନ୍‌ ଆବେ ବାର୍ସେକ୍‍ତିଙ୍ଗ୍‌ ଅରୁସୁ ମାତ୍ର ସନାନ୍‍ । ୱାନ୍‌ ନିଜେଦି ଉଣ୍ତିଙ୍ଗ୍‌ ମାରି ଲୋକୁ ନେସ୍‍ଏଣ୍ତା କିତିମାନି ପାପ ଉଣ୍ତିଙ୍ଗ୍‌ ମାପୁରୁଦି ଉଦେସ୍‌ତାନ୍ ପୁଜା ସିଦେଙ୍ଗ୍‌ ଅର୍‌ସେ ନେତେର୍‍ ଆସ୍‌ସି ସନାନ୍‍ ।
HEB 9:8 ଇୟାୱିଜୁ ବିସୟ୍‌ତାନ୍ ପବିତ୍ର ଆତ୍ମା ଇୟା ମାଟା ନେଗେନ୍‍ତାନ୍‍ ସିକିୟା ସିତାମାନାତ୍‍ ଜେ, ପାର୍‍ତୁମ୍‍ତି ବାକ୍‍ରା ମାନି ସାନ୍ଦି, ମହାପବିତ୍ର ବାଡିଦୁ ସନି ସାରି ରେଆଏତ୍ ।
HEB 9:9 ଇଲେଇତି ବେଡ଼ା ସୁଡ଼୍‍ଜି ଇକା ଉନ୍‍ଡ୍ରି କାତା ୱାଜା । ତେନି ଅର୍ତ ଆଜିନାତ୍, ମାପୁରୁଦି ଉଦେସ୍‍ତାନ୍ ପୁଜାସିତିମାନିକା ମାରି ପସୁବଲି ଉପାସ୍‌କିନିୱାନି ବୁଦିଦିଙ୍ଗ୍‌ ପୁରା କିଦେଙ୍ଗ୍‌ ଆଟ୍‍ଏତ୍ ।
HEB 9:10 ଇରିଙ୍ଗ୍‌ ଆୟାୱିଜୁ କେବଲ ଉଣି କାଦି ମାରି ସୁଚିକିନି ଉଣ୍ତିଙ୍ଗ୍‌ ଆତ୍‍ରେରି ପାଣି ମାତ୍ର । ମାପୁରୁଦି ପୁନି ନିୟମ୍‍ତି ତିଆର୍‍ଆନି ସାନ୍ଦି ଆୟାୱିଜୁଦି ଦରକାର୍‍ ମାର୍ହାତ୍ ।
HEB 9:11 ମାତର୍‌ ଇଲେଇ ଏମେ ୱିଜୁ ନେଗି ବିସୟ୍‌ ମାଡ୍‍ ପୋୟ୍‍ତିମାନିକା, ଆୟାୱିଜୁଦି ପେରିଜାଜକ ୱାଜା କ୍ରିସ୍ତ ୱାତାମାନାନ୍ । ୱାନ୍‌ ଏମେ ପାର୍‍ତନା ଗୁଡ଼ାଦୁ ପାଣି କିଜିନାନ୍, ଆକା ପେରିକା ମାରି ନାଣ୍ତ ବର୍ତିଦିକା । ଆକା ଲୋକୁ ତିଆର୍ କିତିକା ଆଏତ୍‍ । ମାରି ଆକା ଇୟା ଦୁନିଆଦି ସିନା ଆଏତ୍‌ ।
HEB 9:12 କ୍ରିସ୍ତ ଆୟା ଗୁଡ଼ା ନାଡ଼୍‍ମିସିଜି ଆୟା ମହାପବିତ୍ର ବାଡିଦୁ ଉନ୍‍ଡ୍ରେଦେବାଦି ଉଣ୍ତିଙ୍ଗ୍‌ ଡ଼ୁଗିନି ୱାଲେ ଆବେନ୍‌ ବଲିସିନି ଉଣ୍ତିଙ୍ଗ୍‌ ଗରିଏଙ୍ଗ୍‌ଁ ସିଲେତିଙ୍ଗ୍‌ ଡ଼ାକା ନେତେର୍‍ ଆସ୍‌ସି ସଲ୍‍ଏନ୍‍ ମାର୍ହାନ୍‍ । ମାତର୍‍ ୱାନ୍‌ ନିଜେଦି ନେତେର୍‌ ଅସି ମା ଉଣ୍ତିଙ୍ଗ୍ ୱିଜୁଦିନ୍‍ତିଙ୍ଗ୍ ମୁକୁଡ଼ାନି ପାଣି କିତାନ୍ ।
HEB 9:13 ପାଡ଼ିଇ ନିୟମ୍‍ତାନ୍ ଏମେକାର୍ ରିତିନିତି ପାଣି ମାନାଇ ଉଣ୍ତିଙ୍ଗ୍‌ ଅସୁଚି, ୱାରି ମୁସୁକୁ ଗରିଏଙ୍ଗ୍‌ଁ ସିଲେତିଙ୍ଗ୍‌ ଡ଼ାକା ନେତେର୍‍ ମାରି ଡ଼ାକା ନିର୍‍ ୱାକାତିଙ୍ଗ୍‍, ୱାରି ଅସୁଚି ଆକ ଆନାସନାତ୍ ।
HEB 9:14 ଇକା ଜଦି ସତ୍‌ ଆନାମାନାତ୍‍, ଆର୍‌ତିଙ୍ଗ୍‌ କ୍ରିସ୍ତଦି ନେତେର୍ ମାରି ଏସ ନାଣ୍ତ ପାଣି ସିନିକା ଆଏତ୍‍ ? ୱିଜୁଦିନ୍‌ତି ଆତ୍ମାଦି ସାକାଦାନ୍ ୱାନ୍‌ ନିଜେଦିଙ୍ଗ୍ ମାପୁରୁଦି ଉଦେସ୍‌ତାନ୍ ଉନ୍‍ଡ୍ରି ଦସ୍‍ସିଲି ପୁଜା ୱାଜା ସିତାମାନାନ୍‌ । ୱାନି ଆୟା ନେତେର୍‍ ଦାନ୍ ତାଗ୍‌ଇ ରିତିନିତି ପାଣିଦାନ୍ ନେଗେନ୍‍ ଆଜି ମା ବୁଦି ଟିକ୍‌ଆନାତ୍‌ ମାରି ମାପ୍‌ ଜିବନ୍‍ମାନି ମାପୁରୁଦି ଟିକ୍ ସେବା କିଦେଙ୍ଗ୍ ସୁଜୋଗ୍‌ ପୋୟ୍‍ନାପ୍‌ ।
HEB 9:15 ଇୟାଉଣ୍ତିଙ୍ଗ୍‌ କ୍ରିସ୍ତ ନେ ପୁନି ନିୟମ୍‌ ତିଆର୍‌ କିତାମାନାନ୍, ଏଣ୍ତେସ୍‍କି ଏମେକାର୍ ମାପୁରୁଦି ମାଡ଼ାନ୍ କୁକାୟ୍‍ଆତାମାନାର୍, ୱାର୍‌ ମାପୁରୁ ପାର୍‍ମାଣ୍‍ କିତିମାନି ଏସ୍‌କାଙ୍ଗ୍‌ୱିଜିଇ ଆସିର୍ବାଦ୍‌ ପୋଇନାର୍ । ପାର୍‍ତୁମ୍‍ ନିୟମ ପାଣିକିଜିମାନି ବେଡ଼ାଦୁ, ଲୋକୁ ଏମେ ୱିଜୁ ପାପ୍‌ ଦୋସ୍‌ କିତାମାର୍ହାର୍, କେବଲ କ୍ରିସ୍ତଦି ସାତିମାଡ଼ାନ୍ ୱାର୍‌ ଆବେଟ୍‌କୁ ମୁକ୍‍ଡ଼ାନିକା ପୋଇନାର୍‍ ।
HEB 9:16 ଉଣ୍ତ୍ରି ସିନି ଆକୁଦି ନିୟମ୍‍ ଇସାବ୍‍ତାନ୍‍, ଆକା ପାଣି ଆନି ଉଣ୍ତିଙ୍ଗ୍‍ ନିୟମ୍‌ କିତିମାନି ଲୋକ୍‍ଦି ସାନିକା ପାର୍‍ମାଣ୍‍ ଆନିକା ଦରକାର୍‍ ।
HEB 9:17 ଇରିଙ୍ଗ୍‌ ନିୟମ୍‌ କିତିମାନି ଲୋକ୍ ଜିନିମାନି ସାନ୍ଦି, ନିୟମ୍‌ତି ପାଣି ସିଲେତ୍‌; କେବଲ୍‌ ୱାନି ସାତି ୱେନ୍‌କାନେ ଆକା ଡାଟ୍‍ତି ପାଣି ଆନାତ୍‌ ।
HEB 9:18 ଆୟାଉଣ୍ତିଙ୍ଗ୍‌ ପାର୍‍ତୁମ୍‍ ନିୟମ ବା ନେତେର୍‍ସିନି ମାଡ଼ାନ୍ ପାଣି ଆତାମାର୍ହାତ୍‍ ।
HEB 9:19 ପାର୍‍ତୁମ୍‍ ମୋସା ନିୟମ୍‍ତି ଆଦେସ୍‌କୁ ଲୋକା ଲାକୁତୁ ୱେର୍‍ତାର୍‍ । ତାନିୱେନ୍‌କା ୱାନ୍‌ ଡ଼ାକ୍‍ ନି ଗରିଏଙ୍ଗାଁ ନେତେର୍‌ ଏରୁଦି ୱାଲେ ମିସାକିଜି ଏସୋବ କମା ମାରି ଏସ ରଙ୍ଗ୍‌ତି ମେଣ୍ତା ବୁରୁବୁସେଙ୍ଗ୍ ଦାନ୍ ନିୟମ୍‌ ବଇ ମାରି ଲୋକା ମୁସୁକୁ ଲଜିତାନ୍‍ ।
HEB 9:20 ୱାନ୍‌ ଇର୍ହାନ୍‌, “ଏମେ ନିୟମ୍‌ ମାନାଦେଙ୍ଗ୍‌ ମାପୁରୁ ମିଙ୍ଗିଁ ଆଦେସ୍ ସିତାମାନାନ୍‌, ଇୟା ନେତେର୍‌ ଆୟା ନିୟମ୍‌ତିଙ୍ଗ୍ ଟାପ୍‍ ଡ଼େୟ୍‍ଜିନାତ୍‍ ।”
HEB 9:21 ମୋସା ଆୟା ଇସାପ୍‍ତାନ୍ ନେତେର୍‌ ଅସି ଗୁଡ଼ା ମାରି ପାର୍‍ତନାଦୁ ବ୍ୟବ୍‌ହାର୍‌ ଆଜିମାନି ୱିଜୁ ଜିନିସ୍‍ ମୁସୁକୁ ଲଜିତାନ୍ ।
HEB 9:22 ମାରି ମୋସାଦି, ନିୟମ୍‌ ଇସାପ୍‍ତାନ୍ ୱିଜୁ ବିସୟ୍‌ ନେତେର୍ ମାଡ଼ାନ୍ ପବିତ୍ରଆନାତ୍ ମାରି ନେତେର୍‍ସିନି ମାଡ଼ାନ୍ ନେ ପାପ କେମା ଆନାତ୍‌ ।
HEB 9:23 ଆମା ବିସୟ୍‌ୱିଜୁ ମୁସ୍‌କୁପୁର୍‌ତି ମୁଲ୍‌ ବିସୟ୍‌ଦି ରୁପ୍‌ ମାତ୍ର, ଆୟାୱିଜୁ ନେତେର୍‍ତାନ୍ ପବିତ୍ର ଆନିକା ଦରକାର୍‍ ମାର୍ହାତ୍, ମାତର ମୁସ୍‍କୁପୁର୍‍ତି ବିସୟ୍‌ତି ଉଣ୍ତିଙ୍ଗ୍ ନେଗି ବଲିଦାନ୍ ଦରକାର୍‍ ।
HEB 9:24 ଆମାକା ଲୋକା କିୟୁଦୁ ତିଆର୍‍ ଆଏତ୍‌, ଇୟାୱାଜା ଉଣ୍ତ୍ରି ପବିତ୍ର ବାଡିଦୁ କ୍ରିସ୍ତ ସୋର୍ହାମାନାନ୍ । ଆକା ଇନି ମୁଲ୍‌ ବିସୟ୍‌ଦି ରୁପ୍‌ ସିଲେ । ୱାନ୍‌ ମୁସ୍‍କୁପୁର୍‍ତୁ ନେ ସୋର୍ହାମାନାନ୍ । ଆବେନ୍‌ ୱାନ୍‌ ମା ଉଣ୍ତିଙ୍ଗ୍‌ ଇଲେଇ ମାପୁରୁଦି ଆଗ୍‍ଡ଼ି ସର୍ହାମାନାନ୍ ।
HEB 9:25 ଜିହୁଦିରି ପେରିଯାଜକ ଏଣ୍ତେସ୍ ବାର୍ସେକ୍‍ତିଙ୍ଗ୍‌ ଅର୍‌ସୁ ଜାତୁ ନେତେର୍‌ ଅସି ମହାପବିତ୍ର ବାଡିଦୁ ସୋନାନ୍ । ଆୟାୱାଜା କ୍ରିସ୍ତ ନିଜେଦିଙ୍ଗ୍‌ ରିଜାମୁଜା ପୁଜା କିନି ଉଣ୍ତିଙ୍ଗ୍‌ ଆବେନ୍‌ ସୋଲ୍‍ଏନ୍ ।
HEB 9:26 ଆର୍‌ତିଙ୍ଗ୍‌, ୱାନିଙ୍ଗ୍‌ ଦୁନିଆଦି ତିଆର୍‍ଆତି ବେଡ଼ାଦାନ୍‍ ନାଣ୍ତଦେବେଙ୍ଗ୍‌ ଦୁଃକ୍‌କାସ୍ଟୁ ବୋଗାଦେଙ୍ଗ୍ ପୋଡ଼ାତାତ୍‍ମାନ୍ଦି । ମାରି ୱାନ୍‌ ଜୁଗ୍‌ସେସ୍‌ଆନି ବେଡ଼ାଦୁ ନିଜେଦିଙ୍ଗ୍‌ ବଲି ୱାଜା ସିନି ମାଡ଼ାନ୍ କାଡ଼ା କାଡ଼ାଦିଙ୍ଗ୍‍ ପାପ୍‌ତି ସାକ୍ତି ମେଡ଼ିକ୍‌ନି ଉଣ୍ତିଙ୍ଗ୍‍ ୱାତାମାର୍ହାନ୍‍ ।
HEB 9:27 ୱିଜେରେ ଉନ୍‍ଣ୍ତ୍ରେଦେବା ସାନାର୍ ମାରି ତାନିୱେନ୍‌କା ମାପୁରୁଦି ବିଚାର୍‍ଦି ଆଗ୍‍ଡ଼ି ନିନାର୍‍ ।
HEB 9:28 ଆୟାୱାଜା ୱିଜୁଲୋକା ଉଣ୍ତିଙ୍ଗ୍‌ ପାପ୍ ଆକ କିଦେଙ୍ଗ୍ କ୍ରିସ୍ତ ଉନ୍‍ଣ୍ତ୍ରେ ଦେବାଦି ଉଣ୍ତିଙ୍ଗ୍ ବଲି ୱାଜା ସିଆୟ୍‍ ଆତାନ୍ । ୱାନ୍‌ ମାରିଉଣ୍ତ୍ରି ଦେବା ୱାନାନ୍ । ନାସ୍ତିୱାଲେ ମାରି ପାପ୍‍ତି ଜୁଦ୍‍ କିନି ଉଣ୍ତିଙ୍ଗ୍‌ ୱାନ୍‌ ରେଏନ୍‍ । ୱାନ୍‌ ୱାନାନ୍, ୱାନି ଉଣ୍ତିଙ୍ଗ୍‌ କାପ୍‍କିଜିମାନି ଲୋକାଙ୍ଗ୍ ଉଦ୍ଧାର୍‌ କିନି ଉଣ୍ତିଙ୍ଗ୍‌ ୱାନାନ୍‌ ।
HEB 10:1 ଜିହୁଦିୟ ନିୟମ୍‌ ସତ୍‌ ବିସୟଦି ଉଣ୍ତ୍ରି ପୁରା ମାରି ଟିକ୍‌ଆୟାନାନି ମୁର୍ତି ଆଏତ୍‌, ଇକା ୱାଜିନିଦିନ୍‍ତି ନେଗି ବିସୟଦି ଉଣ୍ତ୍ରି ନେସ୍‍ନିନାନି‌ ମାଟା ମାତ୍ର । ୱିଜୁୱାଲେ ବାର୍ସେକ୍‌ତିଙ୍ଗ୍‍ ବାର୍ସେକ୍ ଆୟା ଉନ୍‍ଣ୍ତ୍ରି ରକମ୍‍ତି ପୁଜା କିଆୟ୍‍ଆଜିନାତ୍‍ । ଏମେକାର୍ ମାପୁରୁଦି ଲାକୁତୁ ୱାନାର୍, ନିୟମ୍‍ଦି ଆୟାୱିଜୁ ବଲିଦାନ୍‌ତାନ୍ ୱାର୍‌ ଇନିକା ନେଗିକା ଆଦେଙ୍ଗ୍‌ ଆଟ୍‍ସିନାର୍ ?
HEB 10:2 ଇୟାୱାଜାନେ ମାପୁରୁଦି ଉପାସ୍‌କିନିକାର୍‌ ଜଦି ସତ୍‌ତାନ୍‌ ପାପ୍‌ଦାନ୍ ନେଗେନ୍‍ ଆଦେଙ୍ଗ୍‌ ଆଟ୍‍ତାର୍‍ମାନ୍ଦି, ଆର୍‌ତିଙ୍ଗ୍‌ ୱାର୍‌ ମାରି ନିଜେଦି ବୁଦିଦିଙ୍ଗ୍ ପାପି ଇଜି ଅଡ଼୍‍ବିଏତାର ମାନ୍ଦି ମାରି ୱିଜୁ ପୁଜାସିନିକା ୱିଜିତାତ୍‍ମାନ୍ଦି ।
HEB 10:3 ମାତର, ଆୟାୱାଜା ଆଏଜି ବାର୍ସେକ୍‍ତିଙ୍ଗ୍‍ ବାର୍ସେକ୍ ପୁଜାସିନି ମାଡ଼ାନ୍ ଲୋକୁଦିଙ୍ଗ୍ କେବଲ ୱାନି ପାପ୍‌ ବିସୟ୍‌ ଏତ୍‍ କିବିସ୍‍ କିଆୟ୍‍ଆଜିନାତ୍‍ ।
HEB 10:4 ଇରିଙ୍ଗ୍‌ ଡ଼ାନ୍‌ ନି ଗରିଏଙ୍ଗାଁ ନେତେର୍‌ ଏସାଙ୍ଗ୍‍ବା ପାପ୍‌ କେମା କିଦେଙ୍ଗ୍‌ ଆଟ୍‍ଏତ୍ ।
HEB 10:5 ଆୟା ଉଣ୍ତିଙ୍ଗ୍‌ କ୍ରିସ୍ତ ଦୁନିଆଦୁ ୱାନି ପୁର୍ବେଦାନ୍ ମାପୁରୁଙ୍ଗୁ ଇର୍ହାମାର୍ହାନ୍, “ପୁଜା ନି ଦାନ୍‍ତୁ ନିନୁ ୱେଡ଼ିକା ସିଲେ, ମାତର ନିନୁ ନା ଉଣ୍ତିଙ୍ଗ୍‌ ଉନ୍‍ଡ୍ରି ମେନ୍ଧଲ୍‍ ତିଆର୍‌ କିତିମାନି ।
HEB 10:6 ପାପ୍‌କେମା ଉଣ୍ତିଙ୍ଗ୍‌ ନିନୁ ବେଦି ମୁସୁକୁ ହୋମବଲିଦୁ ସିଲେତିଙ୍ଗ୍‌ ପସୁବଲିଦୁ ୱେଡ଼ିକା ଆଇଦେର୍‍ ।
HEB 10:7 ଆଦେଙ୍ଗ୍‌ ନାନୁ ଇର୍ହା, ଏ ମାପୁରୁ ନା ବିସୟ୍‌ତାନ୍‍ ନିୟମ ବଇଦୁ ଏଣ୍ତେସ୍ ରାସାତା ମାନାତ୍, ନାନୁ ଆୟା ରକମ୍‍ତାନ୍‍ ନି ବଦା ପୁରା କିଦେଙ୍ଗ୍‌ ତିଆର୍ ମାନା ।”
HEB 10:8 ପାର୍‍ତୁମ୍‍ ୱାନ୍‌ ଇର୍ହାମାର୍ହାନ୍, “ନିନୁ ଲୋକା ପାପ୍‌ କେମା ଉଣ୍ତିଙ୍ଗ୍‌ ପୁଜା ନି ଦାନ୍‍ସିନିକା ସିଲେତିଙ୍ଗ୍‌ ବେଦି ମୁସୁକୁ ହୋମବଲି ବଦା କିଇ; ଆୟାୱିଜୁ ମିଙ୍ଗିଁ ୱେଡ଼ିକା କିଦେଙ୍ଗ୍ ଆଟ୍ଏତ୍‍ ।” ଇୟାୱିଜୁ ବଲିଦାନ୍ ନିୟମ୍‍ ଇସାବ୍‍ତାନ୍‍ କିଆୟ୍‍ଆଜିମାରିଙ୍ଗ୍‍ ବା ୱାନ୍‌ ଇୟାୱାଜା ଇର୍ହାମାର୍ହାନ୍‌ ।
HEB 10:9 ୱେନେକା ୱାନ୍‌ ଇର୍ହାମାର୍ହାନ୍, “ଏ ମାପୁରୁ, ନାନୁ ନି ଇଛା ପୁରା କିଦେଙ୍ଗ୍‌ ତିଆର୍ ମାନା ।” ମାରି ମାପୁରୁ ଇୟାୱିଜୁ ପାଡ଼ିଇ ନିୟମ୍‌ ଡ଼ିସ୍‍ସି ତାନି ବାଦ୍‌ଲୁ କ୍ରିସ୍ତଦି ପୁନି ବଲିଦାନ୍‌ ଆସ୍‍ତି ।
HEB 10:10 ଜିସୁ କ୍ରିସ୍ତ ଉନ୍‍ଡ୍ରେଦେବା ମାତ୍ର ମାରି ୱିଜୁଦିନ୍‌ତି ଉଣ୍ତିଙ୍ଗ୍ ନିଜେଦି ମେନ୍ଦଲ୍‌ତିଙ୍ଗ୍‌ ସିଜି ମାପୁରୁଦି ଇଛା ପୁରା କିତିମାନିଙ୍ଗ୍, ୱାନି ଆୟା ନିଜେଦିଙ୍ଗ୍‍ସିତି ଉଣ୍ତିଙ୍ଗ୍‍ ମାଡୁ ୱିଜୁ ଲୋକୁ ପାପ୍‌ଦାନ୍ ନେଗେନ୍‌ ଆତିମାନିକା ।
HEB 10:11 ଜିହୁଦି ଜାଜକର୍‌ ୱିଜୁଦିନ୍ ନିଜେଦି ପାଣି ପୁରାକିଜି ଆୟା ଉଣ୍ତ୍ରି ରକମ୍‍ତି ସେବା ଅର୍‌ସୁଦିଙ୍ଗ୍‌ଅର୍‌ସୁ କିଜିମାନାର୍, ମାତର୍‌ ଇୟାୱିଜୁ ବଲିଦାନ୍ ମାଡ଼ାନ୍ ଏସାଙ୍ଗ୍‍ବା ପାପ୍‌ କେମା ଆଦେଙ୍ଗ୍‌ ଆଟ୍‍ଏତ୍ ।
HEB 10:12 ମାତର୍‌ କ୍ରିସ୍ତ ପାପ୍‌ତି ନିଜେଦିଙ୍ଗ୍‌ସିତି ୱାଜା ୱିଜୁଦିନ୍‌ତି ଉଣ୍ତିଙ୍ଗ୍‌ ଉନ୍‍ଡ୍ରି ମାତ୍ର ବଲି ସିତାମାନାନ୍‌ । ତାନିୱେନେକା ୱାନ୍‌ ସଲସି ମାପୁରୁଦି ଉଣିକିୟୁ ତରିନ୍‌ ବାସ୍‍ତା ମାନାନ୍ ।
HEB 10:13 ମାପୁରୁ ୱାନି ସାତ୍ରୁରିଙ୍ଗ୍‌ କାଲ୍‌କା ଆଡିଗି କିଇସାନ୍ଦି ୱାନ୍‌ ଆବେନ୍‌ କାପ୍‍କିଜିନାନ୍ ।
HEB 10:14 ଏମେକାର୍ ପାପ୍‌ଦାନ୍ ନରାଜି ସୁଚି ଆତାମାନା, ଆୟା ଉନ୍‌ଡ୍ରେମାତ୍ର ବଲିଦି ମାଡ଼ାନ୍ ୱାରିଙ୍ଗ୍ ୱାନ୍‌ ୱିଜୁଦିନ୍‌ତି ଉଣ୍ତିଙ୍ଗ୍‌ ପୁରା କିତାମାନାନ୍ ।
HEB 10:15 ପବିତ୍ରଆତ୍ମା ବା ୱାନି ସାକ୍ୟ ସିଜି ଇର୍ହାମାନାତ୍ :
HEB 10:16 “ପ୍ରବୁ ଇଜିନାନ୍‌, ବବିସତ୍‌ଦୁ ନାନୁ ୱାରି ୱାଲେ ଇୟା ପୁନି ନିୟମ୍‌ କିନା । ନାନୁ ନା ନିୟମ୍‍ ୱାରି ଜିବନ୍‌ତୁ ଇଡିନା ମାରି ୱାରି ମନ୍‍ତୁ ରାସ୍‍ନା ।”
HEB 10:17 ମାରି ବା ୱାନ୍‌ ଇଜିନାନ୍‌, “ନାନୁ ମାରି ୱାରି ପାପ୍‌ ନି ତାଗ୍‌ଇ ପାଣି ଏତ୍‍ କିଏନି ।”
HEB 10:18 ଆଦେଙ୍ଗ୍‌ ୱାର୍‌ ଜଦି କେମା ପୋଇତା ମାନାର୍‍, ଆର୍‌ତିଙ୍ଗ୍‌ ପାପ୍‌ କେମା ଉଣ୍ତିଙ୍ଗ୍‌ ମାରି ବଲିଦାନ୍‍ଦି ଦର୍‍କାର୍‍ ସିଲେତ୍‌ ।
HEB 10:19 ମାରି ଏ ତଡ଼ାନ୍‍କୁ ନି ତାଙ୍ଗିଁକ୍‍, ଜିସୁଦି ସାତି ମାଡ଼ାନ୍ ମାଡୁ ମହାପବିତ୍ର ବାଡିଦୁ ସୋନି ଉଣ୍ତିଙ୍ଗ୍‌ ପୁରା ଅଦିକାର୍ ପୋଇତିମାନିକା ।
HEB 10:20 ୱାନ୍‌ ୱାନି ମେନ୍ଦଲ୍‍ତିୱାଜା ପାର୍‌ଦା ନାଣିମିରାନ୍ ମା ଉଣ୍ତିଙ୍ଗ୍‌ ଉଣ୍ତ୍ରି ପୁନି ଜିବନ୍‌ତି ସାରି ତର୍‌ତାମାନାନ୍ ।
HEB 10:21 ମାପୁରୁଦି ଇଲୁ ଇଲେଇ ମା ପେରିଜାଜକଦି ଅଦିକାର୍‍ତୁ ମାନାତ୍ ।
HEB 10:22 ମାରି ରାଦୁ, ମାଡୁ ନେଗି ମୋନ୍‌ତାନ୍ ମାରି ଆଟୁୱା ବିସ୍‍ବାସ୍‌ତି ୱାଲେ ମାପୁରୁଦି ଲାକୁତୁ ସୋନାଟ୍‍; ଇରିଙ୍ଗ୍‌ ମାଡୁ ଇଲେଇ ତାଗ୍‍ଇ ବୁଦିଦାନ୍‍ କ୍ରିସ୍ତଦି ନେତେର୍‍ତାନ୍ ନେଗେନ୍‌ ଆତିମାନିକା ମାରି ମା ମେନ୍ଦଲ୍‌ ନେଗି ଏରୁଦାନ୍ ଇବାତି ମାନିକା ।
HEB 10:23 ଏମେ ଆସା ମାଦି ମାନାତ୍ ଇଜି ମାନାତିମାନିକା, ଆବେନ୍‌ ମାଡୁ ଡାଟ୍‌ ମାନିକା ମାନାତ୍‌, ଇରିଙ୍ଗ୍‌ ମାଡୁ ମାପୁରୁଦି ସିତିମାନିମାଟା ମୁସୁକୁ ଆସା ଇଟ୍‍ତିମାନିକା ।
HEB 10:24 ରାଦୁ, ମାଡୁ ଆଇୱାରି ଉଣ୍ତିଙ୍ଗ୍‌ ମୋନ୍‌ଦିୟାନ୍‌ ଆଜି ୱାରି ସୁବିଦା କିନାଟ୍; ଇୟାୱାଜା ଇସାବ୍‌ତାନ୍‌ ଜିବନ୍‍ନୋନିକା ସିଜି ସତ୍‌ପାଣି କିନାଟ୍ ।
HEB 10:25 ମାରି ଏନ୍‍ ଏନ୍‍ ଏଣ୍ତେସ୍ ପାର୍‌ତନାଦୁ ସୋନ୍‍ଡ୍ରେଙ୍ଗ୍‍ ଏଲା କିନାର୍, ମାଡୁ ଆୟାୱାଜା କିଏଟ୍ । ମାରି ପ୍ରବୁଦି ଦିନ୍‌ ଲାକୁତୁ ଆଜି ୱାଜିନାତ୍ ନେସ୍‌ସି ନିଜେନିଜେଦିଙ୍ଗ୍‌ ନାଣ୍ତ ୱେଡ଼ିକା କିନିକା ମାନାତ୍ ।
HEB 10:26 ମା ଲାକୁତୁ ସତ୍‍ ନେସ୍‌ତି ୱେନେକା ମାଡୁ ଜଦି ନେସ୍‌ସି ନେସ୍‌ସି ପାପ୍‌ତୁ ମାନିକା, ଆର୍‌ତିଙ୍ଗ୍‌ ମାରି ଇନି ବଲିଦାନ୍ ମାଙ୍ଗିଁ ପାପ୍‌ତାନ୍ ମୁକୁଡ଼ା କିଦେଙ୍ଗ୍ ଆଟ୍‍ଏତ୍ ।
HEB 10:27 ଆର୍‌ତିଙ୍ଗ୍‌, ମାଡୁ ୱାଜିମାନି ପେରି ବିଚାର୍‍ତୁ ସାମାନ୍‌ ଆଜି ମାପୁରୁଦି ବିରୁଦ୍‍କିନିୱାରି ଉଣ୍ତିଙ୍ଗ୍‌ ନାଣ୍ତକାସ୍‍ସିମାନି ସିସୁଦୁ ଦଂସ୍‌ ପୋଇନି ଇସାପ୍‍ତି ତିଲାନି ବାଦ୍‍ଲୁ ମା ଆଇ ଇନି ଉପାୟ ସିଲେତ୍‌ ।
HEB 10:28 ଏନ୍‍ ଜଦି ମୋସାଦି ନିୟମ୍‍ ଅମାନ୍ୟ କିନାନ୍ ମାରି ଅରେନ୍ ସିଲେତିଙ୍ଗ୍‌ ନାଣ୍ତଲୋକା ସାକିରି ସାକ୍ୟଦି ମାଡ଼ାନ୍ ୱାନ୍‌ ଦୋସି ଆନାନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ଦୟା କିଏଣ୍‌ଗା ସାନି ଦଣ୍ତ ସିନାର୍ ।
HEB 10:29 ଆର୍‌ତିଙ୍ଗ୍‌, ଏନ୍‍ ମାପୁରୁଦି ମାରିନ୍‌ତିଙ୍ଗ୍ ଅମାନ୍ୟ କିନାନ୍, ମାପୁରୁଦି ପୁନି ନିୟମ୍‌ତି ନେତେର୍‍ତି ମାଡ଼ାନ୍ ପାପ୍‌ କେମାଦି ସୁଜୋଗ୍‌ ପୋଇତିମାରିଙ୍ଗ୍‍ ବା ୱାନିଙ୍ଗ୍‌ କାଡ଼ିଜିନାନ୍‌ ମାରି ଅନୁଗ୍ରହଦି ପବିତ୍ରଆତ୍ମାଦିଙ୍ଗ୍‌ ଅପମାନ୍‌ କିନାନ୍, ୱାନି ଦସ୍‌ ଇନିକା ଆଏତ୍‌ ? ଅଡ଼୍‌ବିଜ ସୁଡ଼ୁଦୁ, ୱାନ୍‌ ଏସୋ ନାଣ୍ତ ଦଣ୍ତପୋଇନାନ୍ ।
HEB 10:30 “ନାନୁ ପ୍ରତିସଦ୍‍ ଅନା, ନାନୁ ଦଣ୍ତସିନିକିନ୍ଦା ।” ଇୟା ମାଟା ଜେ ଇର୍ହାମାନାନ୍‌, ୱାନିଙ୍ଗ୍‌ ମାପ୍‍ ନେସ୍‍ନାପ୍‍ । ୱାନ୍‌ ମାରିବା ଇର୍ହାମାନାନ୍, “ପ୍ରବୁ ୱାନି ଲୋକାଙ୍ଗ୍ ବିଚାର୍‌କିନାନ୍ ।”
HEB 10:31 ଜିବନ୍‌ମାନି ମାପୁରୁଦି ବିସାର୍‍ତି ଆଗ୍‍ଡ଼ିନିନିକା ଏସୋ ତିଲାନିକା ।
HEB 10:32 ମି ଆଗ୍‌ଡ଼ିରି ମାଟା ଅଡ଼୍‌ବିଦୁ । ମାପୁରୁଦି ଜାୟ୍‌ ମିଙ୍ଗିଁ ନାଣ୍ତଜାୟ୍‌ କିତି ୱେନେକା ମିର୍‌ ଆଇ ଆଇ ଦୁଃକ୍‌ କାସ୍ଟୁ ପୋଇତିଦେର୍‌, ମାତର୍‌ ଆରାଏତି ମାର୍‌ଇଦେର୍‌ ।
HEB 10:33 ଏସାଙ୍ଗ୍ ଏସାଙ୍ଗ୍ ମିର୍‌ ୱିଜୁଲୋକାମାନୁ ନିଦା ମାରି ମାଡ୍‍ତିନ୍‍ଞ୍ଜି ମାର୍ହିଦେର୍‍ । ମାରି ଏସାଙ୍ଗ୍ ଏସାଙ୍ଗ୍‌ ମିର୍‌ ଆଇୱାରି ଦୁଃକ୍ କାସ୍ଟୁଦୁ ଦୋସ୍‌ଆଦେଙ୍ଗ୍‌ ତିଆର୍ ମାର୍ହିଦେର୍‍ ।
HEB 10:34 ମିର୍‌ ଜଇଲ୍‍ତୁମାନି ଲୋକା ଦୁଃକ୍ କାକୁର୍ତିଦି ସାକା କିଜିମାର୍‌ଇଦେର୍‌ ମାରି ଏସ୍ତିୱାଲେ ମି ୱିଜୁ ଡଆଁ ଆତାତ୍‌, ନାସ୍ତିୱାଲେ ମିର୍‌ ୱେଡ଼ିକାଦାନ୍ ୱିଜୁ କାସ୍ଟୁ ସାସ୍‌ କିତିଦେର୍‍, ଇରିଙ୍ଗ୍‌ ମିଦି ଜେ ପେରିକା ୱିଜୁଦିନ୍‌ତି ଦନ୍‍ସମ୍ପତି ମାନାତ୍, ଆକା ମିର୍‌ ନେସ୍ତିମାରିଇଦେର୍‍ ।
HEB 10:35 ଆଦେଙ୍ଗ୍‌ ସାହାସ୍ ଆରାକିମାଟ୍‍, ଇରିଙ୍ଗ୍‌ ସତ୍‌ ସାହାସ୍‍ତି ପେରି ପୁରସ୍କାର୍‌ ମାନାତ୍ ।
HEB 10:36 ମାପୁରୁଦି ବଦା ପୁରା କିଜି, ଏମେକା ୱାନ୍‌ ସିନାନ୍ ଇଜି ପାର୍‌ମାଣ୍‌ କିତାମାନାନ୍, ଆକା ପୋଇନି ଆସାଦିଙ୍ଗ୍‌ ସାସ୍‌ ଆସ୍‌ସି ମାଡ୍ରୁରୁ ।
HEB 10:37 ଦାର୍ମୁସାସ୍ତ୍ରଦୁ ରାସାତାମାନାତ୍‌ : “ମାରି ଅଡ଼ପ୍‌ ସାଣେକ୍‌ କାପ୍‍କିଦୁ, ଏମେୱାନି ୱାନିକା ମାନାତ୍, ୱାନ୍‌ ୱାନାନ୍, ୱେଡ଼ା କିଏନ୍‍,
HEB 10:38 ନା ଦାର୍ମୁଦି ଲୋକୁ ବିସ୍‍ବାସ୍‍ତାନ୍ ଆଟୁୱା ତେବାଜି ଜିନାର୍‍, ମାତର୍‌ ଏନ୍‌ ଜଦି ୱେନ୍‌କା ଗୁସାନାନ୍, ୱାନି ଉଣ୍ତିଙ୍ଗ୍‌ ନାନୁ ୱେଡ଼ିକା ଆଦେଙ୍ଗ୍‍ଁ ଆଟ୍ଏ ।”
HEB 10:39 ୱେନ୍‌କା ସଲସି ନାସ୍ଟୁ ଆନି ଲୋକୁ ମାପୁ ଆଏପ୍ । ମାପୁ ଆଟୁୱା ବିସ୍‍ବାସ୍ ମାରି ପରିତ୍ରାଣ୍‌ ପୋଇତାମାନାପ୍‌ ।
HEB 11:1 ଆସା କିନି ବିସୟ୍‌ ପୋଇନିକା ପୁରା ନେସ୍‍ନାଟ୍‍ ମାରି ତର୍‌ଇ ବିସୟ୍‍ତି ସତ୍‍ବୁଦି ଆସାନିକା ନେ ବିସ୍‍ବାସ୍‍ ।
HEB 11:2 ପୁର୍ବେଦି ଲୋକୁ ୱାରି ବିସ୍‌ବାସ୍‍ଦାନ୍ ମାପୁରୁଦି ୱେଡ଼ିକାଦିଲୋକୁ ଆତାମାର୍ହାର୍‍ ।
HEB 11:3 ମାପୁରୁଦି ବାକ୍ୟଦାନ୍ ସାରା ଦୁନିଆ ତିଆର୍‍ ଆତାତ୍‌ ମାରି ସୁଡ଼ିଇ ବିସୟ୍‌ଦାନ୍ ସୁଣି ବିସୟ୍‌ତି ତିଆର୍ ଆତାତ୍‌, ଇୟା ମାଟା ବିସ୍‍ବାସ୍‍ତାନ୍ ମାଡୁ ନେସ୍‌ସିନିକା ।
HEB 11:4 ବିସ୍‍ବାସ୍‌ତାନ୍‌ ହେବଲ ମାପୁରୁଦି ଲାକ୍‌ତୁ କୟିନଦି ବାଦ୍‍ଲୁ ନେଗି ପୁଜା କିତାମାର୍ହାନ୍ । ନିଜେଦି ବିସ୍‍ବାସ୍‍ଦାନ୍ ୱାନ୍‌ ମାପୁରୁଦି ମାଡ଼ାନ୍ ଦାର୍ମୁଦିକାନ୍‌ ଇଜି ସାକ୍ୟ ପୋଇତାନ୍‌, ଇରିଙ୍ଗ୍‌ ମାପୁରୁ ନିଜେ ୱାନି ସିତିମାନିପୁଜା ମାନାତାମାରାନ୍ । ୱାନି ବିସ୍‍ବାସ୍ ଉଣ୍ତିଙ୍ଗ୍‌ ହେବଲ ସାତିସରିଙ୍ଗ୍‌ ବା ଇୟାସାନ୍ଦି ୱାର୍‌ଗିଜିନାନ୍ ।
HEB 11:5 ବିସ୍‍ବାସ୍‍ତାନ୍ ହନୋକ ସାନି ମାଡ଼ାନ୍‍କୁ ରକିୟା ପୋଇତାମାରାନ୍ । ମାପୁରୁ ୱାନିଙ୍ଗ୍‌ ନିଜେ ଲାକୁତୁ ଅତାମାରାନ୍ ମାରି ୱାନିଙ୍ଗ୍‌ ଏନ୍‌ ମାରି ସୁଡ଼ୁଦେଙ୍ଗ୍‌ ଆଟ୍‍ଏତାମାର୍ହାର୍‍ । ଦର୍ମସାସ୍ତ୍ରଦୁ ରାସାତାମାନାତ୍‌ ଜେ, ହନୋକ ମାପୁରୁଦି ଲାକୁତୁ ସନି ଆଗ୍‍ଡ଼ି ୱାନି ୱେଡ଼ିକାଦିକାନ୍‌ ଆତାମାର୍ହାନ୍‌ ।
HEB 11:6 ବିସ୍‍ବାସ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ ଏନ୍‍ ମାପୁରୁଙ୍ଗୁଁ ୱେଡ଼ିକା କିଦେଙ୍ଗ୍ ଆଟ୍ଏନ୍‍, ଇରିଙ୍ଗ୍‌ ଏନ୍‌ ମାପୁରୁଦି ଲାକ୍‌ତୁ ୱାନାନ୍, ୱାନ୍‌ ମାପୁରୁଦିମାନୁ‍ ବିସ୍‌ବାସ୍‌ କିନିକା ଦରକାର୍, ମାପୁରୁ ଜେ ୱାନି ୱେନ୍‌କାସନିୱାରିଙ୍ଗ୍‌ ଆସା ପୁରା କିନାନ୍, ଆକାବା ବିସ୍‍ବାସ୍ କିନିକା ଦରକାର୍ ।
HEB 11:7 ବିସ୍‍ବାସ୍‌ତି ସାକ୍ତିଦାନ୍ ନୋହ ଇନିକା ଅଡ଼୍‌ବିଏଣ୍‌ଗା ଗଟ୍‌ନା ବିସୟ୍‌ତାନ୍‌ ମାପୁରୁଦି ଜାଗ୍‌ରାତାଦି ବାକ୍ୟ ୱେନ୍‌ଡ୍ରେଙ୍ଗ୍‌ ଆଟ୍‍ତାମାର୍‌ଆନ୍‌ । ୱାନ୍‌ ମାପୁରୁଦି ଆଦେସ୍ ମାନାଜି ଉଡ୍ରି ଜାହାଜ୍‌ ତିଆର୍ କିତାନ୍‌ । ଆବେନ୍‌ ୱାନ୍‌ ମାରି ୱାନି ଇଲୁଦିଲୋକ୍‍ ୱିଜୁ ରକ୍‌ୟା ପୋଇତାର୍ । ତାନିବାଦ୍‌ଲୁ ଦେସ୍‍ତିଲୋକୁ ଦଣ୍ତ୍‌ ଆତାର୍‌, ମାତର୍‌ ନୋହ ୱାନି ବିସ୍‍ବାସ୍ ଉଣ୍ତିଙ୍ଗ୍‌ ଦାର୍ମୁଦି ପୁରସ୍କାର୍‌ ପୋଇତାର୍ ।
HEB 11:8 ମାପୁରୁ ଅବ୍ରାହାମଦିଙ୍ଗ୍‌ ଏମେ ଦେସ୍ ସିନା ଇଜି ମାଟା ସିତାମାରାନ୍, ଆୟା ଦେସ୍‍ତୁ ସୋନି ଉଣ୍ତିଙ୍ଗ୍‌ ୱାନ୍‌ ଏସ୍ତିୱାଲେ ୱାନିଙ୍ଗ୍‌ କୁକ୍‍ତାନ୍, ନାସ୍ତିୱାଲେ ଅବ୍ରାହାମ ବିସ୍‍ବାସ୍‍ତାନ୍ ମାପୁରୁଦି ମାଟା ମାନାତା ମାର୍ହାନ୍‍ । ୱାନ୍‌ ଏମେମାନୁ ସୋନାନ୍, ଆକା ନେସ୍‍ଏଜି ବା ନିଜେଦି ଦେସ୍ ଡ଼ିସ୍‍ତା ସର୍ହାନ୍‌ ।
HEB 11:9 ୱାନ୍‌ ବିସ୍‍ବାସ୍‍ଦୁ ମାପୁରୁଦି ସିତିମାନି ଦେସ୍‌ତୁ ଆଇଦେସ୍‍ତିକାନ୍‍ ୱାଜା ବାସା କିତାନ୍‍ । ୱାନ୍‌ ଗୁଡ଼ାଦୁ ବାସା କିତାନ୍ ମାରି ୱାନି ୱାଜା ମାପୁରୁଦିମାଡ଼ାନ୍ ପାର୍‌ମାଣ୍‌ ଆଜି ଇସ୍‍ହାକ୍‍ ନି ଜାକୁବ ବା ଆୟାୱାଜା ଗୁଡ଼ାଦୁ ବାସା କିତାମାର୍ହାର୍‌ ।
HEB 11:10 ଏମେ ୱିଜୁଦିନ୍‍ତି ଗାଡ଼୍‌ ମାପୁରୁଦି ମାଡ଼ାନ୍ ରସ୍‌ତିକାନ୍‌ ନି ତିଆର୍‌କିତିକାନ୍‌, ଅବ୍ରାହାମ ଆୟା ଗାଡ଼୍‌ତିଙ୍ଗ୍‌ କାପ୍‍କିଜି ମାରାନ୍ ।
HEB 11:11 ଜଦିବା ସାରା କଡ଼ର୍‌ଆଇଲି ଆନିକା ସିଲେତାତ୍, ବିସ୍‌ବାସ୍‌ତି ସାକ୍ତିଦାନ୍‌ ଅବ୍ରାହାମ ଡକ୍ରା ବୟସ୍‍ତୁ ବା ବୁବା ଆଦେଙ୍ଗ୍‌ ଆଟ୍‌ତା ମାର୍ହାନ୍‌ । ମାପୁରୁ ୱାନି ମାଟା ରକିୟା କିନାନ୍ ଇଜି ଅବ୍ରାହାମତି ବିସ୍‍ବାସ୍ ମାରାତ୍ ।
HEB 11:12 ଅବ୍ରାହାମ ସାନି ୱାଜା ଆତିମାରିଙ୍ଗ୍‌ ବା ୱାନିମାଡ଼ାନ୍‌କୁ ବାଦଡ଼ଦି ସୁକେଙ୍ଗ୍‌ ମାରି ସାମ୍‌ଦୁରୁତି ବାଲି ୱାଜା ଲେକିସ୍‍ତେଙ୍ଗ୍‍ ଆଟ୍‍ଇ କୁଟୁମ୍‌ ଜନମ୍‌ ଆତାର୍‌ ।
HEB 11:13 ଇୟାୱିଜୁ ଲୋକୁ ନିଜେଦି ବିସ୍‍ବାସ୍‍ତୁ ଆଟୁୱା ତେବାଜି ସାତାସର୍ହାର୍‌ । ମାପୁରୁ ପାର୍‌ମାଣ୍‌ କିତିମାନି ବିସୟ୍‌ୱିଜୁ ୱାର୍‌ ପୋଇଦେଙ୍ଗ୍‌ ଆଟ୍ଏତିଙ୍ଗ୍‌ ବା ଆକରାନ୍ ଆକା ସୁଡ଼ିଜି କୁକ୍‌ନିକା କିତାମାର୍ହାର୍‌ ମାରି ଇୟା ଜଗତ୍‌ଦୁ ୱାର୍‌ କେବଲ ଆଇଦେସ୍‍ତିକାର୍‍ ମାରି ଆଇମାନୁବାସାନିକାର୍‍ ଇଜି ମାନାତା ମାର୍ହାର୍‌ ।
HEB 11:14 ଏମେକାର୍ ଇୟାୱାଜା ମାଟା ଇନାର୍, ୱାର୍‌ ମାରି ଉଣ୍ତ୍ରି ନିଜେଦିବୁମିଦିଙ୍ଗ୍‌ ପୋଇଜିନାର୍ ଇଜି ନେସ୍‍ତେଙ୍ଗ୍ ଆନାତ୍‌ ।
HEB 11:15 ୱାର୍‌ ଏମେ ଦେସ୍ ଡ଼ିସ୍‍ତା ୱାତାର୍‍ମାରାର୍, ଆୟା ଦେସ୍‍ତିଙ୍ଗ୍ ମାରି ଏତ୍‌ କିଏଜି ମାର୍ହାର୍‌ । ଜଦି ଏତ୍‌ କିତାର୍‍ମାନ୍ଦି, ଆର୍‌ତିଙ୍ଗ୍‌ ଆବେନ୍‌ ୱାର୍‌ ଡ଼େସି ସନ୍‍ଡ୍ରେଙ୍ଗ୍‌ ସୁଜୋଗ୍‌ ପୋଇତାର୍‍ମାନ୍ଦି ।
HEB 11:16 ମାତର୍‌ ୱାର୍‌ ଉନ୍‍ଡ୍ରି ନେଗି ଦେସ୍‍ତୁ, ଅର୍ତାତ୍ ମୁସ୍‌କୁପୁର୍‌ତି ଦେସ୍‍ତୁ ସନି ଉଣ୍ତିଙ୍ଗ୍‌ ବଦା କିଜିମାରାର୍ । ଆଦେଙ୍ଗ୍‌ ୱାର୍‌ ମାପୁରୁଙ୍ଗୁଁ ନିଜେଦି ମାପୁରୁ ଇଜି ମାନାଜିନି ମାଡ଼ାନ୍ ୱାନ୍‌ ସେମାର୍ ଆଏନ୍‌ ମାର୍‌ର୍ହାନ୍‌ । ମାପୁରୁ ୱାରି ଉଣ୍ତିଙ୍ଗ୍‌ ଉନ୍‍ଡ୍ରି ଗାଡ଼୍‌ ତିଆର୍ କିଜି ଇଟ୍‌ତାମାନାନ୍‌ ।
HEB 11:17 ମାପୁରୁ ଅବ୍ରହାମତି ବିସ୍‍ବାସ୍ ପରିକା କିନିୱାଲେ ଅବ୍ରାହାମ ନିଜେ ମାରିନ୍‍ ଇସ୍‌ହାକ୍‌ତିଙ୍ଗ୍‌ ପୁଜାୱାଜା ସିଦେଙ୍ଗ୍‌ ତିଆର୍ ଆତାନ୍‌ । ମାପୁରୁ ଅବ୍ରାହାମତିଙ୍ଗ୍ ନେ ୱାନି ପାର୍‌ମାଣ୍‌ ମାଟା ସିତାମାର୍‌ର୍ହାନ୍‌, ମାରିବା ଅବ୍ରାହାମ ନିଜେଦି ଅରେନ୍ ମାରିନ୍‌ତିଙ୍ଗ୍‌ ପୁଜାୱାଜା ସିଦେଙ୍ଗ୍‌ ତିଆର୍ ଆତାନ୍‌ ।
HEB 11:18 ମାପୁରୁ ୱାନିଙ୍ଗ୍‌ ଇର୍ହାମାରାନ୍, “ନାନୁ ନିଙ୍ଗିଁ ଏମେ କୁଟୁମ୍‍ ସିନା ଇଜି ମାଟା ସିତାମାନାନ୍‌, ଆକା ଇସ୍‌ହାକ୍‌ଦି ମାଡ଼ାନ୍ ନେ ଜନମ୍‍ ଆନାର୍ ।”
HEB 11:19 ମାପୁରୁ ଜେ ଇସ୍‌ହାକତିଙ୍ଗ୍ ସାତିମାଡ଼ାନ୍ ଜିବନ୍‌ କିଦେଙ୍ଗ୍‌ ଆଟ୍‌ନାନ୍‍, ଇୟା ବିସ୍‍ବାସ୍ ଅବ୍ରାହାମଦି ମାରାତ୍ । ସତ୍‍ତାନ୍‍, ଅବ୍ରାହାମ ଇସ୍‌ହାକ ସାତିମାଡ଼ାନ୍ ଡ଼େସି ଜିବନ୍‌ ପୋଇତାମାନାନ୍‍ ଇଜି କାତାଦି ୱାଜା ୱେର୍‍ତିଙ୍ଗ୍‍ ଇକା ବୁଲ୍‍ ଆଏତ୍‍ ।
HEB 11:20 ଇସ୍‍ହାକ୍‍ ନିଜେଦି ବିସ୍‍ବାସ୍‌ତି ବପୁଦାନ୍‌ ଜାକୁବ ମାରି ଏସୌଦି ଅଡ଼୍‍ବିଜି ନେଗିତାନି ଉଣ୍ତିଙ୍ଗ୍‌ ଆସିର୍ବାଦ୍‌ କିତାନ୍ ।
HEB 11:21 ବିସ୍‍ବାସ୍‍ତାନ୍ ନେ ଜାକୁବ ସାନି ପୁର୍ବେ ଜୋସେପ୍‌ତି ରିଏରି ମାରିସିରିଙ୍ଗ୍ ଆସିର୍ବାଦ୍‌ କିତାମାରାନ୍ । ୱାନ୍‌ ନିଜେଦି ବାଡିଗାଦି ଆଡ୍‍ଗି ପାଡ଼୍‌ଗିଜି ମାପୁରୁଦି ପାର୍‌ତନା କିତାମାର୍ହାନ୍ ।
HEB 11:22 ଜୋସେପ୍‌ ସାନି ୱାଲେ ୱାନି ବିସ୍‍ବାସ୍‌ତି ବପୁଦାନ୍‌ ଇସ୍ରାଏଲ୍‌ ଲୋକାଦି ମିସର ଦେସ୍‍ତାନ୍ ସର୍‌ଇ ବବିସତ୍‍ ମାଟା ଇର୍ହାମାର୍ହାନ୍‌ ମାରି ୱାନି ମାଡ଼ା ଏଣ୍ତେସ୍‌ ନେଗେନ୍‌ ପୋକ୍‌ନାର୍‌, ଆୟାଉଣ୍ତିଙ୍ଗ୍‌ ଆଦେସ୍ ୱେର୍‌ତାମାରାନ୍ ।
HEB 11:23 ବିସ୍‍ବାସ୍‍ତାନ୍ ମୋସାଦି ବୁବା ୟାୟା ୱାନିଙ୍ଗ୍‌ ଜନମ୍‌ତାନ୍‌ ମୁଡ୍ରି ଲେଜୁକୁ ସାନ୍ଦି ଆଡ଼ାକ୍‌ତା ଇଟ୍‍ତାମାରାର୍ । ଇସ୍ରି କଡ଼ଦିଙ୍ଗ୍‌ ସୁନ୍ଦର୍‌ ସୁଡ଼ିଜି ୱାର୍‌ ରାଜେଙ୍ଗ୍ ବା ଅମାନ୍ୟ କିଦେଙ୍ଗ୍ ତିଲାଏଜି ମାର୍ହାର୍‌ ।
HEB 11:24 ମୋସା ବୟସ୍‌ ଆତି ୱେନ୍‌କା ବିସ୍‍ବାସ୍‌ତି ବପୁଦାନ୍‌ ରାଜାଦି ଗାଡ଼୍‌ସିଦି ମାରିନ୍‍ ଇଜି ପରିଚୟ୍‌ ଆଦେଙ୍ଗ୍‌ ମନା କିତାନ୍‍ ।
HEB 11:25 ପାପ୍‌ତୁ ତେବାଜି ଏସ ବେଡ଼ା ଜିବନ୍‌ ଜିନି ବାଦ୍‍ଲୁ ମାପୁରୁଦି ଲୋକା ୱାଲେ ଦୁଃକ୍‌ବୋଗ୍‌ କିଦେଙ୍ଗ୍‌ ୱାନ୍‌ ବଦାକିତା ମାର୍ହାନ୍ ।
HEB 11:26 ୱାନ୍‌ ମିସର୍‍ ଦେସ୍‍ତି ୱିଜୁ ଦନ୍‌ ବାଦ୍‍ଲୁ ମସିହଦି ଉଣ୍ତିଙ୍ଗ୍‌ କାଡ଼ାୟ୍‍ଆନିକା ନେଗେତ୍‌ ଇଜି ଏତ୍‌କିତାନ୍‌, ଇରିଙ୍ଗ୍‌ ୱାନ୍‌ ପୁରସ୍କାର୍‌ତି ଉଣ୍ତିଙ୍ଗ୍ ‌ୱାନି ଆସା ମାରାତ୍ ।
HEB 11:27 ବିସ୍‌ବାସ୍‌ତାନ୍‌ ମୋସା ରାଜାଦି ରିସାଦିଙ୍ଗ୍ ତିଲାଏଜି ମିସର୍‍ ଦେସ୍ ଡ଼ିସ୍‍ତା ସର୍ହାନ୍‌; ସତେ ଏଣ୍ତେସ୍ ୱାନ୍‌ ସୁଡ଼ୁଇ ମାପୁରୁଙ୍ଗୁଁ ସୁଡ଼ିଜିମାରାନ୍; ଆଦେଙ୍ଗ୍‍ଁ ଡ଼େସି ସଲ୍‌ଏଣ୍‌ଗା କେଏତା ମାର୍ହାନ୍‌ ।
HEB 11:28 ବିସ୍‍ବାସ୍‍ତାନ୍‌ ୱାନ୍‌ ନିସ୍ତାର୍‌ ପଣ୍ତୟ୍‌ କିତାମାର୍ହାନ୍‌ ମାରି ଜୁଦ୍ଧ୍‌କିନି ଦୁତ୍‌ ଏଣ୍ତେସ୍ ଇସ୍ରାଏଲ ଲୋକାରି ପେରିମାରିନ୍‌ତିଙ୍ଗ୍ ସାପିସ୍‌ କିଏତ୍‌, ଇୟାଉଣ୍ତିଙ୍ଗ୍‌ ଦୁୱାର୍‍ବନ୍ଦ୍‌ଦୁ ନେତେର୍‌ ସିଲେକ୍‌ତେଙ୍ଗ୍‌ ଆଦେସ୍ ସିତାମାରାନ୍ ।
HEB 11:29 ବିସ୍‍ବାସ୍‍ତାନ୍ ଇସ୍ରାଏଲଦି ଲୋକୁ ୱାରିତି ବୁମି ମୁସୁକୁ ବୁଲାତି ୱାଜା ସୁଫ୍‌ ସାମ୍‌ଦୁରୁ ଲୋଇ ସିଜି ନାତାର୍‌; ମାତର୍‌ ମିସର୍‍ତିକାର୍‌ ଆୟାୱାଜା ନାତେଙ୍ଗ୍‌ ସେସ୍ଟା କିଦେଙ୍ଗ୍ ସଲ୍‌ସି ମୁଡ଼ିଗିଜି ସାତାସର୍ହାର୍‌ ।
HEB 11:30 ଇସ୍ରାଏଲତିଲୋକୁ ଜିରିହୋ ଗାଡ଼୍‍ତି ବାଉଡ୍ରି ଗଡା ସାରିବେଡ଼ିତି ବିସ୍‍ବାସ୍‍ତାନ୍‌ ସାତ୍ ଦିନ୍ ବୁଲାତି ୱେନେକା, ଆକା ଦଂସ ଆତାମାର୍ହାତ୍‌ ।
HEB 11:31 ଦାରିପାଣିକିନି ରାହାବ ତାନି ବିସ୍‍ବାସ୍‌ତି ଉଣ୍ତିଙ୍ଗ୍ ଇସ୍ରାଏଲତି ଡଙ୍ଗାଁରିଙ୍ଗ୍‌ ବାଡି ସିତାତ୍‌ ମାରି ମାପୁରୁଦି ବିରୁଦ୍‌କିନି ଲୋକା ୱାଲେ ସାଏଣ୍‌ଗା ରକ୍ଷା ପୋଇତା ମାର୍ହାତ୍‌ ।
HEB 11:32 ନାନ୍‌ ମାରି ଏସୋ ମାଟେଙ୍ଗ୍ ବର୍ଣ୍ଣନାକିଜି ୱେର୍‌ନା ? ଗିଦିୟୋନ, ବାରାକ, ଶାମ୍‍ଶୋନ୍, ଯିପ୍ତାହ, ଦାଉଦ, ସାମୁଏଲ୍‍ ମାରି ବାବବାଦିରି ବିସୟ୍‌ତାନ୍ ୱେର୍‌ତେଙ୍ଗ୍ ସରିଙ୍ଗ୍‍ଁ ବେଡ଼ା ସିଲେତ୍‌ ।
HEB 11:33 ବିସ୍‍ବାସ୍‍ତାନ୍‌ ଇୟାକାର୍‌ ଆଇଆଇ ଦେସ୍‌ ବିରୁଦ୍‌ତାନ୍ ଜୁଦ୍‍ କିଜି ଜିଣାତା ମାର୍ହାର୍‌ । ଇୟାକାର୍‌ ଦାର୍ମୁ ପାଣି ପୁରା କିତାର୍, ମାପୁରୁ ପାର୍‌ମାଣ୍‌ କିତିମାନି ବିସୟ୍‌କୁୱିଜୁ ପୋଇତାର୍‌; ପାର୍ଟାନରେସ୍‌ ୱେୟୁ କେରେପ୍‍ତାର୍‍,
HEB 11:34 ସିସୁ ନାପ୍‍ତାର୍ ମାରି କାଣ୍ତା ଦାରାଦାନ୍ ରକିୟା ପୋଇତାର୍ । ଇୟାକାର୍‌ ସାକ୍ତିସିଲେତାତ୍, ମାତର୍‌ ସାକ୍ତି ଆତାର୍‌; ଜୁଦ୍‌ଦୁ ଜିଣାତାର୍‌, ମାରି ଆଇଦେସ୍‍ତି ସାତ୍ରୁ ସନ୍ୟରିଙ୍ଗ୍‌ ଆରା କିତାର୍ ।
HEB 11:35 ବିସ୍‍ବାସ୍‍ତାନ୍ ଆଇମେକ୍‍ ତାମେକା ସାତି ନିଜେଦି ଲୋକାଙ୍ଗ୍‌ ଜିବନ୍‌ମାନି ଅବସ୍ଥାଦାନ୍‌ ମାରିଡ଼େସି ପୋଇତେ । ଆଇକାର୍‌ ଉଣ୍ତ୍ରି ନେଗି ଜିବନ୍‌ ପୋଇନି ଉଣ୍ତିଙ୍ଗ୍‌ ରକିୟା ପୋୟ୍‌ଦେଙ୍ଗ୍‌ ବଦା କିଏଣ୍‌ଗା କାସ୍ଟୁଦାନ୍ ସାତେ ସର୍ହେ ।
HEB 11:36 ଏନ୍‌ ଏନ୍‌ କାସ୍ଟୁ ସାସ୍‌କିତାର୍‍, କରଡାମାଡ୍‍ ପୋଇତାର୍ ମାରି ସିକିଡ଼ିଦାନ୍ ତୋରାଜି ଜଇଲ୍‍ ଦଣ୍ତ ପୋଇତାର୍ ।
HEB 11:37 ୱାର୍‌ କାଲୁକାଣୁକୁ ଡାକ୍‍ତିଙ୍ଗ୍‌ ସାତାର୍, କରତ୍‌ଦାନ୍ ରୁଣ୍ତି ମକେଙ୍ଗ୍‌ ଆତାର୍‌ ମାରି କାଣ୍ତାଦାନ୍ ସାତାର୍ । ଏନ୍‍ ଏନ୍‍ ମେଣ୍ତା ନି ଗରିଆ ତୋଲୁ ଆରାଜି କାକୁର୍ତି ଆତାର୍‌, କାସ୍ଟୁ ନି ତାଡ଼ନା ଆଜି ଆୟାୱାଜା ବୁଲାତାର୍‍ ।
HEB 11:38 ଇୟାୱାଜା ଲୋକା ଉଣ୍ତିଙ୍ଗ୍ ଦୁନିଆଦୁ ନେଗି ବାଡି ସିଲେତାତ୍ । ୱାର୍‌ ବୁଲାନିକାର୍‍ ୱାଜା ବାଲିବୁମିଦୁ ମାରି ଗରନ୍‌ତୁ ବୁଲାତାର୍, ସାରେଙ୍ଗ୍‌ ନି ବୁମିଦିଗୁଟେଆଙ୍ଗ୍‍ଁ ବାସାକିତାର୍ ।
HEB 11:39 ଇୟା ୱିଜେରେ ନିଜେ ନିଜେଦି ବିସ୍‍ବାସ୍‍ତାନ୍ ଏସ ସିନା ଇଟ୍‍ତା ସର୍ହା ମାନାର୍ । ମାରିବା ୱାର୍‌ ମାପୁରୁଦି ସିନି ବିସୟ୍‌ ପୋଇଏତାମାରାର୍,
HEB 11:40 ଇରିଙ୍ଗ୍‌ ମାପୁରୁ ମା ଉଣ୍ତିଙ୍ଗ୍ ଉନ୍‍ଡ୍ରି ନେଗି ଜଜନା କିତାମାର୍ହାନ୍ । ୱାର୍‌ ମା ୱାଲେ ଏଣ୍ତେସ୍ ପୁରା ଆନାର୍, ଇକାନେ ମାପୁରୁଦି ବଦା ମାରାତ୍ ।
HEB 12:1 ଇୟାୱାଜା ସାକିଲୋକାରି ଉଣ୍ତ୍ରି ପେରି ଦଲ୍ ମା ସାରିବେଡ଼ିତି କେର୍‍ବିତାମାନାର୍ । ମାରି ରାଦୁ, ଏମେ ୱିଜୁ ବିସୟ୍‌ ମାଙ୍ଗିଁ ବାଦା କିଜିନାତ୍ ମାରି ଏମେ ୱିଜୁ ପାପ୍‌ ମାଙ୍ଗିଁ ରେଲ୍‍ଜି ଆସିନାତ୍, ୱିଜୁ ଡ଼ିସ୍‍ସି ଆଟୁୱା ଆଜି ମା ଉଣ୍ତିଙ୍ଗ୍ ତିଆର୍‌ଆତିମାନି ସାରିଦୁ ଉରୁକ୍‍ସି ଆଗ୍‍ଡ଼ି ସନାଟ୍ ।
HEB 12:2 ଏମେୱାନି ମୁସୁକୁ ମା ଟିକ୍ ବିସ୍‍ବାସ୍ ଆସା କିଜିନିକା, ଆୟା ଜିସୁଦି ଉଣ୍ତିଙ୍ଗ୍ ମା କାଣୁକୁ ନେଗିକା ଇଡିନିକା । ୱାନ୍‌ କ୍ରୁସଦି ତିଲାଜି ନିଜେ ପାଣିଦାନ୍ ତେବାଏନ୍‍ ମାର୍ହାନ୍‌; ମାତର୍‍ ୱାନିଦିନ୍‍ତୁ ୱାନି ଉଣ୍ତିଙ୍ଗ୍ ଉଣ୍ତାତିମାନି ୱେଡ଼ିକା ଉଣ୍ତିଙ୍ଗ୍‌, କ୍ରୁସକାଟ୍‌ଦି ସାତିମାନି ଅପମାନ୍‍ତିଙ୍ଗ୍‌ ୱାନ୍‌ ମାନାଏନ୍‍ଣ୍ତା ବୁଦି କିତାନ୍; ଇଲେଇ ୱାନ୍‌ ମାପୁରୁଦି ରାଜାଗାଦିଦି ଉଣିକିୟୁ ତରିନ୍‌ ବାସ୍‌ତାମାନାନ୍ ।
HEB 12:3 ଅଡ଼୍‌ବିଜ ସୁଡ଼ୁଦୁ, ୱାନ୍‌ ଏସୋ ଦୁଃକ୍‍ ପୋଇତାମାନାନ୍ । ୱାନ୍‌ ପାପି ଲୋକାମାଡ଼ାନ୍ ଏସୋ ନିଦା ପୋଇଏତାମାନାନ୍ । ଆଦେଙ୍ଗ୍‍ଁ ମିର୍‌ ମନ୍‍ଉଣା କିଜି ନିରାସ୍‌ ଆମାଟ୍ ।
HEB 12:4 ଇରିଙ୍ଗ୍‌ ମିଙ୍ଗିଁ ଇୟାସାନ୍ଦି ପାପ୍‌ ବିରୁଦ୍‌ତାନ୍ ସାନିନାନି ଜୁଦ୍‌ କିଦେଙ୍ଗ୍ ପୋଡ଼ାଏତ୍ ।
HEB 12:5 ମାପୁରୁ ୱାନି ମାରିନ୍ ୱାଜା ମିଙ୍ଗିଁ ଏମେ ୱେଡ଼ିକା କାବୁର୍ ୱେନିସ୍ତା ମାନାର୍‍, ଆକା ଇନିକା ମିର୍‌ ବାଣାଜିନିଦେର୍‌ ? “ଏ ନା ମାରିନ୍, ମାପୁରୁ ମିଙ୍ଗିଁ ସାସନ୍ କିନିୱାଲେ ମୋନଦିୟାନ୍‌ ସିଦୁ । ୱାନ୍‌ ମିଙ୍ଗିଁ ଲାଗାନିୱାଲେ ମନ୍‍ଉଣା କିମାଟ୍ ।
HEB 12:6 ଇରିଙ୍ଗ୍‌ ମାପୁରୁ ଏମେୱାନିଙ୍ଗ୍ ଜିବନ୍‌ନୋନାନ୍‌, ୱାନିଙ୍ଗ୍‌ ସାସନ୍ କିନାନ୍ ମାରି ଏମେୱାନିଙ୍ଗ୍ ମାରିନ୍ ଇଜି ମାନାନାନ୍, ୱାନିଙ୍ଗ୍‌ ସାସ୍ତି ସିନାନ୍ ।”
HEB 12:7 ମି ଦୁଃକ୍‌ କାସ୍ଟୁଦିଙ୍ଗ୍‌ ବୁବାଦି ସାସନ୍ ଇଜି ଅଡ଼୍‍ବିଜି ସାସ୍‌ ଆସ୍‍ତୁ, ତେନିମାଡ଼ାନ୍ ମାପୁରୁ ମି ୱାଲେ ମାରିନ୍‌ ୱାଜା ବ୍ୟବହାର୍ କିଜିନାନ୍ ଇଜି ୱେଙ୍ଗିଁଜିନାତ୍‌ । ଇରିଙ୍ଗ୍‌ ବୁବା ଆମାୱାନିଙ୍ଗ୍‌ ସାସନ୍‌ କିଏନ୍‌, ଇୟାୱାଜା ମାରିନ୍ ଏନ୍‌ ମାନାନ୍ ?
HEB 12:8 ୱାରି ଆଇ ମାରିସିର୍ ୱାଜା ନିଙ୍ଗିଁ ଜଦି ମି ବୁବା ମିସା କିଏନ୍, ଆର୍‌ତିଙ୍ଗ୍‌ ନିନୁ ନିଜେଦି ମାରିନ୍ ଆଇ, ନିନୁ ଉପ୍‍କା ମାରିନ୍ ।
HEB 12:9 ମା ଦୁନିଆଦି ବୁବାର୍ ମାଙ୍ଗିଁ ସାସ୍ତି ସିତିଙ୍ଗ୍ ବା ମାଡୁ ମେନ୍ଦଲ୍‌ତି ବୁବାରିଙ୍ଗ୍‍ ମାନାନିକା । ଆର୍‍ତିଙ୍ଗ୍‍ଁ ମା ମୁସ୍‌କୁପୁର୍‌ତି ବୁବାଦି ସାସନ୍‌ତି ଆଡ୍‍ଗି ଆଜି ତେବାନିକା ଏସ ନାଣ୍ତ ନେଗିମାଟା !
HEB 12:10 ମା ଦୁନିଆଦି ବୁବାରି ଆଗ୍‍ଡ଼ି ଏମେକା ତାଗ୍‌ଇକା, ଆୟା ଇସାବ୍‍ତାନ୍‍ ମାଙ୍ଗିଁ ଉଣା ଦିନ୍‌ ଉଣ୍ତିଙ୍ଗ୍‌ ସାସନ୍ କିନାର୍; ମାତର୍‌ ମାଡୁ ଏଣ୍ତେସ୍ ୱାନି ପବିତ୍ରତାଦୁ ମିସାଦେଙ୍ଗ୍ ଆଟ୍‍ନିକା, ଇୟାଉଣ୍ତିଙ୍ଗ୍‌ ମାପୁରୁ ମା ନେଗି ଉଣ୍ତିଙ୍ଗ୍ ମାଙ୍ଗିଁ ସାସନ୍ କିନାନ୍ ।
HEB 12:11 ସାସ୍ତି ପୋଇନି ୱାଲେ ମାଙ୍ଗିଁ ଆକା ଦୁଃକ୍‍ଅଡ଼୍‌ବିନିକା ମାନାତ୍‌, ମୁଡ଼ୁକେ ୱେଡ଼ିକାଦିକା ଆଏତ୍‌ । ମାତର୍‌ ସାସ୍ତିଦାନ୍ ଏମେୱାରି ଜିବନ୍‌ ସାନ୍ତି ଆନାତ୍‌, ୱାର୍‌ ୱେନ୍‍କା ସାନ୍ତିଦି ଦାର୍ମୁଦି ଜିବନ୍‌ ୱାଜା ପୁରସ୍କାର୍‌ ପୋଇନାର୍‍ ।
HEB 12:12 ଆଦେଙ୍ଗ୍‍ଁ ମି ସାକିସିଲି କିୟୁ ମୁସ୍‌କୁ ପେରୁଦୁ ମାରି ତିରିଗ୍‌ନି ମେଣ୍ତାଦିଙ୍ଗ୍‌ ସାକ୍ତି କିଦୁ ।
HEB 12:13 ମାରି ନିଜେ ନିଜେଦି ପାଦାମ୍‌ତି ଉଣ୍ତିଙ୍ଗ୍‌ ସିଦା ସାରିଙ୍ଗାଁ ବୁଲାଦୁ; ଆର୍‌ତିଙ୍ଗ୍‌ ମି ସଟା କାଲୁ ସଟାଆଏଜି ନେଗେନ୍‍ ତେବାନାତ୍ ।
HEB 12:14 ୱିଜେରି ୱାଲେ ସାନ୍ତିଦାନ୍ ବାସାକିଦେଙ୍ଗ୍ ମାରି ପବିତ୍ରଦାନ୍‌ ଜିଦେଙ୍ଗ୍‌ ସେସ୍ଟା କିଦୁ; ଇରିଙ୍ଗ୍‌ ତାନି ବାଦୁଲୁ ଏନ୍‌ ପ୍ରବୁଦି ଦର୍ସନ ପୋଇଦେଙ୍ଗ୍‌ ଆଟ୍‌ଏନ୍‌ ।
HEB 12:15 ଜାଗାର୍‍ତା, ଏଣ୍ତେସ୍ ମାପୁରୁଦି ଦୟାଦାନ୍ ତେବାମାଟ୍‍ । କେୟ୍‍ନି ମାରାନ୍ ୱାଜା ଆମାଟ୍ । କେୟ୍‍ନି ମାରାନ୍ ପିରିତିଙ୍ଗାଁ, ତାନି ୱିସାମ୍‍ତି ମାଡ଼ାନ୍ ନାଣ୍ତ ନାସ୍ଟୁ ଆନାତ୍‌ ।
HEB 12:16 ଏସୌ ୱାଜା ଏନ୍‍ ତାଗ୍‍ଇକାନ୍ ମାରି ଅଦାର୍ମୁଦିକାନ୍‌ ଆମାଟ୍; ୱାନ୍‌ ତୋ ଉନ୍‌ଡ୍ରେ ଅଡିଦି କାଦି ଉଣ୍ତିଙ୍ଗ୍‌ ପେରିଅଦିକାର୍‌ ପୋର୍‍ତା ମାର୍ହାନ୍‌ ।
HEB 12:17 ମିର୍‌ ନେସ୍‌ତିମାନିଦେର୍‌ ଜେ, ୱାନ୍‌ ବୁବାଦି ଆସିର୍ବାଦ୍‌ତି ଅଦିକାରି ଆନି ଉଣ୍ତିଙ୍ଗ୍‌ ବଦା କିତାନ୍‌, ମାତର୍‌ ଡ଼ିସାୟ୍‍ ଆତାତ୍‌ । ମାରି ଏତ୍‌କିନି ନାଣ୍ତ କାଣେର୍‍ଙ୍ଗୁଁ ୱାକ୍‍ସି ଜାତୁନ୍‌ତାନ୍‌ ସେସ୍ଟା କିତିଙ୍ଗ୍‌ବା ଆକା କିନି ଉଣ୍ତିଙ୍ଗ୍‌ ମାରି ସୁଜୋଗ୍‌ ପୋଇଏତାନ୍‌ ।
HEB 12:18 ଇସ୍ରାଏଲ୍‍ତିଲୋକୁ ୱାଜା ମିର୍‌ ସିନାଇ ଗରନ୍‌ତୁ କାସ୍‌ସିମାନି ସିସୁ, ସିର୍‌ ସିକାଟି, ନାଣ୍ତଗାଲିପିରୁ,
HEB 12:19 ବାଜାମରିଦି ଆଉଲି ମାରି ବାକ୍ୟଦି ବଲୁ ଲାକ୍‌ତୁ ରେଇଦେର୍‌, ଲୋକୁ ଆୟା ବଲୁ ୱେନ୍‌ଜି ଏଣ୍ତେସ୍‌ ୱାରିଙ୍ଗ୍‌ ମାରି ଆମାଇନି ବାକ୍ୟ ୱେର୍‌ଏର୍‌, ଇକା ଅନୁରଦ୍‌ କିତାମାର୍ହାର୍‌,
HEB 12:20 ଇରିଙ୍ଗ୍‌ ଆମାଇନି “ଜାତୁ ବା ଜଦି ଆୟା ଗରନ୍‌ତିଙ୍ଗ୍‌ ମୁଟ୍‍ତିଙ୍ଗ୍‌, ଆର୍‌ତିଙ୍ଗ୍‌ ତାନିଙ୍ଗ୍ କାଲ୍‍କାଣ୍‍କୁ ସାୟାମାର୍‌ଗା ଡାକ୍‍ନାର୍‍,” ଇୟା ଆମା ମାଟା ସିଆୟ୍‌ଆତା ମାର୍ହାତ୍‌ ଆକା ୱାର୍‌ ସାସ୍‌ କିଦେଙ୍ଗ୍‌ ଆଟ୍‌ଏତାର୍‌ ।
HEB 12:21 ମାରି ଆୟା ସୁଡ଼ୁତିକା ଇୟାୱାଜା ତିଲାନିକା ମାରାତ୍ ଜେ, ମୋସା ଇର୍ହାମାରାନ୍, “ନାନୁ ତିଲାତା ମାରି ତିର୍‌ଗିଜିନା ।”
HEB 12:22 ମାତର୍‌ ମିର୍‌ ୱାତିମାନିଦେର୍‌ ସିୟୋନ ଗରନ୍‌ତୁ ମାରି ଜିବନ୍‌ତି ମାପୁରୁଦି ଗାଡ଼୍‌, ମୁସ୍‌କୁପୁର୍‌ତି ଜିରୁସାଲମ୍‌ତୁ, ଏମେମାନୁ ହଜାର୍‌ ହଜାର୍‌ ମୁସ୍‌କୁପୁର୍‌ତି ଦୁତ୍‍କା ଦୋଲ୍ ।
HEB 12:23 ମାପୁରୁଦି ଏମେ ଆଗ୍‌ଡ଼ି ଜନମ୍‌ଆତି କଡ଼ର୍‌ଆଇଲିକା ଦରୁ ମୁସ୍‍କୁପୁର୍‍ତୁ ରାସାତା ମାନାତ୍, ମିର୍‌ ୱାରି ୱେଡ଼ିକାଦୁ ୱାତିମାନିଦେର୍‍ । ୱିଜୁ ଲୋକା ଜାତିଦି ବିଚାର୍‌କିନି ମାପୁରୁଦି ଲାକ୍‌ତୁ ମାରି ପୁରା ଦାର୍ମୁଦି ଲୋକାଦି ଆତ୍ମେଙ୍ଗାଁ ଲାକ୍‌ତୁ ମିର୍‌ ୱାତିମାନିଦେର୍‌ ।
HEB 12:24 ମାରି, ପୁନି ନିୟମ୍‌ ତିଆର୍ ଆତିମାନି ଜିସୁଦି ଲାକ୍‌ତୁ ମାରି ଏମେୱାନି ନେତେର୍ ହେବଲଦି ନେତେର୍‌ ବାଦ୍‍ଲୁ ନେଗି ବାକ୍ୟ ସିନାନ୍ ଇଜି ଆସା କିଜିନା, ଆୟା ନେତେର୍ ଲାକୁତୁ ୱାତିମାନିଦେର୍‌ ।
HEB 12:25 ଆୟାଉଣ୍ତିଙ୍ଗ୍‌ ଜାଗାର୍‍ତା, ଏନ୍‌ ବାକ୍ୟ ୱେର୍‌ସିନାନ୍‌, ୱାନିଙ୍ଗ୍‌ ଡ଼ିସ୍‌ମାଟ୍ । ମୁସ୍‌କୁପୁର୍‌ତାନ୍‌ ବାକ୍ୟ ଆସ୍‌ସି ୱାଜି ଦୁନିଆଦୁ ତାନିଙ୍ଗ୍‌ ୱେର୍‍ତିମାନି ଲୋକ୍‍ତି ଉଣ୍ତିଙ୍ଗ୍‍ ଏମେକାର୍ ୱେନ୍‍ଏତାର୍, ୱାର୍‌ ଏର୍‍ବା ରକିୟା ପୋୟ୍‌ଏତାର୍ । ଆର୍‌ତିଙ୍ଗ୍‌, ଇଲେଇ ଏନ୍‍ ମୁସ୍‍କୁପୁର୍‌ତୁ ମାନ୍‌ଜି ୱାର୍‌ଗିଜିନାନ୍‍, ୱାନିଙ୍ଗ୍‌ ଡ଼ିସ୍‍ତିଙ୍ଗ୍‍ ମାଡୁ ଇନିକା ରକିୟା ପୋଇଦେଙ୍ଗ୍ ଆଟ୍‍ନିକା ?
HEB 12:26 ନାସ୍ତିୱାଲେ ୱାନି ବଲୁ ପୃତିବିଦିଙ୍ଗ୍‌ ଦୁକ୍‌ତା ମାର୍ହାତ୍‌ । ମାତର୍‌ ଇଲେଇ ୱାନ୍‌ ପାର୍‌ମାଣ୍‌ କିଜି ଇର୍ହାମାନାନ୍‌, “ନାନୁ ମାରିଡ଼େସି କେବଲ ପୃତିବିଦିଙ୍ଗ୍‌ ସିଲେ, ବାଦଡ଼୍‍ତିଙ୍ଗ୍‍ ବା ଦୁକ୍‌ନା ପୋକ୍‌ନା ।”
HEB 12:27 ଇବେଟ୍‌ତାନ୍‌ ଟିକ୍ ଜେ, ୱାନ୍‍ “ମାରିଡ଼େସି” ଆମାକା କିନାନ୍‌, ତାନିମାଡ଼ାନ୍ ତିଆର୍‍ଆତି ୱିଜୁ ବିସୟ୍‌ ଦୁଙ୍ଗୁଁଜି ମାର୍‌ଗାନାତ୍‌ । କେବଲ ଏମେ ୱିଜୁ ବିସୟ୍‌ ଦୁଙ୍ଗୁଁଦେଙ୍ଗ୍‌ ଆଟ୍‌ଉ, ଆକା ଡାଟ୍‌ ଆଜି ତେବାନାତ୍ ।
HEB 12:28 ଆଦେଙ୍ଗ୍‌ ରାଦୁ, ମାଡ୍‍ ଦନ୍ୟବାଦ୍‌ ସିନାଟ୍‍, ଇରିଙ୍ଗ୍‌ ମାଡ୍‍ ଉନ୍‍ଡ୍ରି ଆଟ୍‌ୱା ରାଜି ପୋୟ୍‍ନାଟ୍‍ । ରାଦୁ, ମା ଦନ୍ୟବାଦ୍‌ ସିଜି ମାରି ବକ୍ତି ନି ତିଏଲ୍‌ତି ୱାଲେ ମାପୁରୁଦି ୱେଡ଼ିକା ଆଜି ୱାନିଙ୍ଗ୍‌ ପୁଜା କିନାଟ୍ ।
HEB 12:29 ଇରିଙ୍ଗ୍‌ ସତ୍‌ତାନ୍‌ ମା ମାପୁରୁ ଅରେନ୍ ଦଂସକିନି ସିସୁ ୱାଜା ।
HEB 13:1 କ୍ରିସ୍ତ ବିସ୍‍ବାସି ତୋଡ଼ାନ୍‌କୁ ନି ତାଙ୍ଗିଁକ୍‍ ନିଜେନିଜେଦିଙ୍ଗ୍‌ ଜିବନ୍‍ନୋଜି ମାଣ୍ତ୍ରୁ ।
HEB 13:2 ୱାଜିମାନି ଲୋକାଙ୍ଗ୍‌ ମି ଇଲୁତୁ କୁକ୍‍ତୁ । ଇକା କିନି ମାଡ଼ାନ୍ ଏନ୍‍ ଏନ୍‍ ନେସ୍‍ଏଣ୍‍ଗା ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ସେବାକିତାମାନାର୍‍ ।
HEB 13:3 ଜଇଲ୍‍ତୁମାନି ଲୋକା ୱାଲେ ନିନ୍‌ ନିଜେ ଜଇଲ୍‍ତୁ ତେବାଜି ଦଣ୍ତ ପୋଇଜିନି ୱାଜା ଅଡ଼୍‍ବିଜି ୱାରିଙ୍ଗ୍ ଏତ୍‌କିଦୁ । ଦୁଃକ୍‍କାସ୍ଟୁ ବଗ୍‌ କିଜିମାନି ଲୋକା ୱାଲେ ୱିଜୁ ଦୁଃକ୍‍ ସିନ୍ତା କିଜି ୱାରିଙ୍ଗ୍ ଏତ୍‌ କିଦୁ ।
HEB 13:4 ପେଡ଼ି ୱିଜେରି ଉଣ୍ତିଙ୍ଗ୍ ନେଗିକା ଆପିତ୍‌, ମେମାରି ନି ଆଇମା ନିଜେନିଜେଦି ଉଣ୍ତିଙ୍ଗ୍ ବିସ୍‍ବାସ୍‍ତାନ୍ ତେବାପିର୍‌ । ମାପୁରୁ ଲାଲାୟ୍‍ଆନି ୱାରିଙ୍ଗ୍‍ ମାରି ଦାରିପାଣିକିନିୱାରିଙ୍ଗ୍‍ ବିଚାର୍‌ କିନାନ୍ ।
HEB 13:5 ଦନ୍‍ସମ୍ପତି ଆସାଦାନ୍‍ ଆକତେବାଦୁ ମାରି ମି ଏମେକା ମାନାତ୍, ଆବେନ୍‌ ୱେଡ଼ିକାଦାନ୍‍ ତେବାଦୁ । ଇରିଙ୍ଗ୍‌ ମାପୁରୁ ଇର୍ହାମାନାନ୍‌, “ନାନୁ ମିଙ୍ଗିଁ ଡ଼ିସ୍‍ଏ, ନାନୁ ନିଙ୍ଗିଁ ଏସାଙ୍ଗ୍ ପେର୍‍ଏ ।”
HEB 13:6 ମାରି ମାଡୁ ସାହାସ୍‍ତାନ୍‍ ଇନ୍‌ଡ୍ରେଙ୍ଗ୍‌ ଆଟ୍‍ନିକା, “ପ୍ରବୁ ନା ସାକାକିନିକାନ୍‍ । ନାନୁ ତିଲାଏ, ଏନ୍‍ ନା ଅନିସ୍ଟ କିଦେଙ୍ଗ୍‍ ଆଟ୍‍ନାନ୍ ?”
HEB 13:7 ଏମେ ନେତାର୍ ପୁର୍ବେ ମିଙ୍ଗିଁ ମାପୁରୁଦି ବାକ୍ୟ ୱେର୍‍ତା ମାର୍ହାର୍, ୱାରିଙ୍ଗ୍ ଏତ୍‍କିଦୁ । ୱାରି ଜିବନ୍‌ ବା ସାନିକା ଏଣ୍ତେସ୍‌ନାନିକା ମାର୍ହାତ୍, ଆକା ଏତ୍‍କିଜି ୱାରି ବିସ୍‍ବାସ୍‍ତିଙ୍ଗ୍‍ ନିଜେଦି ଜିବନ୍‍ତୁ ଆସ୍‌ତୁ ।
HEB 13:8 ଜିସୁ କ୍ରିସ୍ତ ଇଏନ୍‍, ନେରୁ ମାରି ୱିଜୁଦିନ୍‌ ସାମାନ୍ ମାନାନ୍ ।
HEB 13:9 ଆଇ ଆଇ ବୁଲ୍‍ ଦାର୍ମୁ ସିକ୍‌ୟା ମିଙ୍ଗିଁ ସତ୍‌ ସାରିଦାନ୍ ୱେର୍‌ଏ କିମାକିତ୍‍ । ମାପୁରୁଦି ଦୟାଦାନ୍ ଜିବନ୍‌ତି ଉଣ୍ତିଙ୍ଗ୍ ସାକ୍ତି ଉଣ୍ତାକିନିକା ନେଗିକା, କାଦି ଉଣି ବିସୟତାନ୍ ନିୟମ୍‌ ମାନାନି ମାଡ଼ାନ୍ ଇକା ଆଦେଙ୍ଗ୍‍ଁ ଆଟ୍ଏତ୍ । ଆତ୍‌ରେରି ବିଦି ୱିଜୁ ମାନାଜିମାନି ଲୋକୁ ଆବେଣାନ୍‍ ଇନି ଉପକାର୍ ପୋୟ୍‍ଏର୍‍ ।
HEB 13:10 ମା ଏମେ ଜଜ୍ଞ ବେଦି ମାନାତ୍, ଆବେନୁ ମାନି ପୁଜାସିତିମାନି କାଦି ଉଣ୍ତେଙ୍ଗ୍‌ ଜିହୁଦି ଜାଜକରି ଅଦିକାର୍ ସିଲେତ୍‌ ।
HEB 13:11 ଜିହୁଦି ପେରିଜାଜକ ବଲି ସିତିମାନି ଜାତୁଦି ନେତେର୍‌ ପାପ୍‌ତି ବାଦ୍‍ଲୁ ୱାଜା ପୁଜାସିଦେଙ୍ଗ ମହାପବିତ୍ର ବାଡିଦୁ ଆସ୍‌ସି ସନାର୍; ମାତର୍‌ ଆୟା ଜାତୁଦି ମେନ୍ଦଲ୍‌ ନାର୍‌ତି ଆତେରେ ଆଡ଼ାକ୍‌ନା ପୋକନାର୍ ।
HEB 13:12 ଆୟାୱାଜା ଜିସୁ ବା ନିଜେଦି ନେତେର୍‌ତାନ୍‌ ଏଣ୍ତେସ୍‌ ଲୋକାଙ୍ଗ୍ ପାପ୍‌ଦାନ୍ ପବିତ୍ର କିନି ଉଣ୍ତିଙ୍ଗ୍‌ ଗାଡ଼୍‌ତି ଆତେରେ ସାତାନ୍ ।
HEB 13:13 ଆଦେଙ୍ଗ୍‌ ସାଦୁ, ମାଡୁ ବା ଗାଡ଼୍‌ ଆତ୍‌ରେ ୱାନି ଲାକୁତୁ ସନାଟ୍ ମାରି ୱାନି ୱାଲେ ନିନ୍ଧା, ଅପମାନ୍ ସାସ୍‌ କିନାଟ୍ ।
HEB 13:14 ଇରିଙ୍ଗ୍‌ ମା ଉଣ୍ତିଙ୍ଗ୍‌ ଇୟା ଜଗତ୍‌ଦୁ ଆମାଇନି ୱିଜୁଦିନ୍‍ତି ତେବାନି ଗାଡ଼୍‌ ସିଲେତ୍‌, ଏମେ ଗାଡ଼୍‌ ବବିସତ୍‌ଦୁ ତିଆର୍‍ ଆନାତ୍, ମାପ୍‌ ଆୟା ଗାଡ଼୍‌ତିଙ୍ଗ୍‌ କାପ୍‍କିଜିନାପ୍‌ ।
HEB 13:15 ମାରି ରାଦୁ, ମାପ୍‌ ଜିସୁଦି ମାଣାନ୍‌ ମାପୁରୁଙ୍ଗୁଁ ମା ପ୍ରସଂସା ନାନି ବଲି ସିନାଟ୍‍ । ଇୟା ବଲି ଜିସୁଙ୍ଗୁଁ “ପ୍ରବୁ” ଇଜି ମାନାଜିମାନି ୱେୟୁଦାନ୍‌ ପୁଜା କିନାଟ୍ ।
HEB 13:16 ଆଇୱାରି ନେଗିପାଣି କିଦେଙ୍ଗ୍‌ ମାରି ୱାରିଙ୍ଗ୍ ସାହାଜ୍ୟ କିଦେଙ୍ଗ୍‌ ବାଣାମାଟ୍, ଇରିଙ୍ଗ୍‌ ଇୟାୱିଜୁ ନେ ମାପୁରୁଦି ୱେଡ଼ିକାଦି ବଲି ୱାଜା ।
HEB 13:17 ମି ନେତାରି ଆଡ୍‍ଗି ଆଦୁ, ୱାରି ଆଦେସ୍‍ ଆସ୍‍ତୁ । ୱାର୍‌ କାପ୍‍କିନିଲୋକ୍‍ ୱାଜା ମି ଆତ୍ମାଦି ରକ୍ଷା ଉଣ୍ତିଙ୍ଗ୍ ରମ୍‍ଏଣ୍‍ଗା କାପ୍‌କିତାମାନାର୍, ଇରିଙ୍ଗ୍‌ ୱାରିଙ୍ଗ୍ ମାପୁରୁଦି ଲାକୁତୁ ନିଜେଦି ପାଣିଦି ଇସାପ୍ ସିଦେଙ୍ଗ୍‌ ପଡ଼ାନାତ୍‌ । ମିର୍‌ ଜଦି ୱାରି ଆଡ୍‍ଗି ଆନିଦେର୍‌, ଆର୍‌ତିଙ୍ଗ୍‌ ୱାରୁ ୱେଡ଼ିକାଦି ମୋନତାନ୍ ନିଜେଦି ପାଣି କିନାର୍, ମାତର୍‌ ଜଦି ଆକା କିଇଦେର୍‌, ଆର୍‌ତିଙ୍ଗ୍‌ ୱାର୍‌ ଦୁଃକ୍‌ ମୋନତାନ୍ ଆକା କିନାର୍ ମାରି ଇକା ମି ଉଣ୍ତିଙ୍ଗ୍‌ ନେଗିକା ଆଏତ୍‍ ।
HEB 13:18 ମା ଉଣ୍ତିଙ୍ଗ୍ ପାର୍‌ତନା କିଦୁ । ମା ବୁଦି ଜେ ନେଗିକା, ଇବେନୁ ନାମ୍‌ଇକା ସିଲେତ୍‌, ଇରିଙ୍ଗ୍‌ ୱିଜୁଦିନ୍ ନେଗେନ୍‍ ଜିଦେଙ୍ଗ୍‌ ମା ଉଣ୍ତ୍ରେ ବଦା ।
HEB 13:19 ମାରି, ମାପୁରୁ ନାଙ୍ଗିଁ ମି ଲାକ୍‌ତୁ ବେଗି ପୋକିନ୍‍, ମିର୍‌ ନା ଉଣ୍ତିଙ୍ଗ୍‌ ଇୟା ପାର୍‌ତନା କିଜିମାଣ୍ତ୍ରୁ । ଇକା ମି ଲାକ୍‌ତୁ ନା ଜିବନ୍‍ତାନ୍‍ ଅନୁରୋଦ୍‌ କିଜିନା ।
HEB 13:20 ଏନ୍‌ ନିଜେଦି ବଲିଦାନ୍‌ ମେଣ୍ତେଆଙ୍ଗାଁ “ପେରି ମେଣ୍ତେଙ୍ଗ୍‌ସାରାକିନିକାନ୍‌” ଆତାମାନାନ୍‌, ମା ଆୟା ପ୍ରବୁ ଜିସୁଙ୍ଗୁଁ ମାପୁରୁ ସାତିମାଣାନ୍‌ ମାରିଡ଼େସି ନିକ୍‌ତାମାନାନ୍‌ । ଆୟା ଜିସୁଦି ସାତି ବଲିଦି ନେତେର୍‌ତାନ୍‌ ଉଣ୍ତ୍ରି ୱିଜୁଦିନ୍‌ତି ନିୟମ୍‌ ଆତାମାନାତ୍‌ । ସାନ୍ତିସିନି ମାପୁରୁ ୱାନି ବଦା ମାନାନି ଉଣ୍ତିଙ୍ଗ୍‌ ମି ଦର୍‌କାର୍‌ତି ଇସାବ୍‌ତାନ୍‌ ୱିଜୁ ନେଗି ବିସୟ୍‌ ସିପିନ୍‌ ।
HEB 13:21 ମାରି ଜିସୁ କ୍ରିସ୍ତଦି ମାଣାନ୍‍ ମା ଜିବନ୍‍ତୁ ୱାନି ୱେଡ଼ିକାଦି ନେଗି ପାଣି ପୁରା କିପିନ୍‍ । ଜୁଗ୍‌ ଜୁଗ୍‍ ଗୌରବ୍‍ ୱାନିନ୍ଦି ଆପିତ୍‌ । ଆମେନ୍‍ ।
HEB 13:22 ଏ ତଡ଼ାନ୍‌କୁ ନି ତାଙ୍ଗିଁକ୍‍, ଅନୁରୋଦ୍‌ କିଜିନା, ନା ଇୟା ଆକୁଦି ବାକ୍ୟ ଉଣ୍ତିଙ୍ଗ୍‌ ସାସ୍ତି ୱାଲେ ମୋନଦିୟାନ୍‌ ସିଦୁ । ମିଙ୍ଗିଁ ୱେଡ଼ିକା କିନି ଉଣ୍ତିଙ୍ଗ୍ ଇକା ନାନୁ ରାସ୍‍ତାମାନା ।
HEB 13:23 ମା ତଡ଼ାନ୍ ତିମତି ଜଇଲ୍‍ତାନ୍ ମୁକ୍‍ଡ଼ାତାମାନାନ୍ ଇଜି ନେସ୍‍ନିଦେର୍‍ । ୱାନ୍‍ ଜଦି ବେଗି ୱାନାନ୍‍, ଆର୍‌ତିଙ୍ଗ୍‌ ନାନୁ ୱାନିଙ୍ଗ୍‍ ଅର୍‌ସେ ଆସ୍‌ସି ମି ଲାକ୍‌ତୁ ୱାନା ।
HEB 13:24 ମି ୱିଜେରି ପେରିୱାରିଙ୍ଗ୍ ମାରି କ୍ରିସ୍ତ ବିସ୍‍ବାସିରିଙ୍ଗ୍ ମା ନମସ୍କାର୍ ଜାଣେ କିଦୁ । ଇଟାଲି ଦେସ୍‍ତାନ୍ ୱାତିମାନି ତଡ଼ାନ୍‌କୁ ମିଙ୍ଗିଁ ନମସ୍କାର୍ କିଜିନାର୍ ।
HEB 13:25 ମି ୱିଜେରି ଲାକ୍‌ତୁ ମାପୁରୁଦି ଦୟା ୱିଜୁଦିନ୍ ମାନିତ୍ ।
JAM 1:1 ସାରା ଦୁନିଆଦୁ ଇନ୍‌ଙ୍ଗାଁଆନିଙ୍ଗାଁ ଆତିମାନି ମାପୁରୁଦି ବାର କୁଟୁମ୍‍ତି ଲୋକାଙ୍ଗ୍‌ ମାପୁରୁଦି ମାରି ପ୍ରବୁ ଜିସୁ କ୍ରିସ୍ତଦି ଦାସ୍‍ ଜାକୁବ ମାଡ଼ିସ୍‍କିନିକା ଜାଣେକିଜି ଇୟା ଆକୁ ରାସ୍‌ସିନାନ୍‍ ।
JAM 1:2 ଏ ନା ତଡ଼ାନ୍‌କୁ ନି ତାଙ୍ଗିଁକି, ମିର୍‌ ଜିନି ସାରିଦୁ ଦୁଃକ୍‌କାସ୍ଟୁ ୱାତିଙ୍ଗ୍‌ବା, ଆକା ନିଜେଦିବାଗ୍ୟ ଇଜି ଅଡ଼୍‌ବିଦୁ ।
JAM 1:3 ଇରିଙ୍ଗ୍‌ ମିର୍‌ ନେସ୍‌ନିଦେର୍‌, ଇୟାୱାଜା ଦୁଃକ୍‌କାସ୍ଟୁଦି ପରିକା ଜିଣାନିକା ସାମ୍‌ନା ଆନି ୱାଲେ ବିସ୍‌ବାସ୍‌ ଡାଟ୍‌ ତେବାତିଙ୍ଗ୍‌, ସାସ୍‍ଆସ୍‍ନି ସାକ୍ତି ପିର୍‌ନାତ୍‌ ।
JAM 1:4 ମିର୍‌ ୱେନ୍‌କା ସାନ୍ଦି ସାସ୍‌ ଆସ୍‌ସି ତେବାତିଙ୍ଗ୍‌, ଇନି ବିସୟ୍‌ତୁ ଉଣା ଆଏଣ୍‌ଗା ପୁରା ନି ପୁରାପୁରିବର୍ତି ଆନାତ୍‌ ।
JAM 1:5 ମାତର୍‌ ମି ଲୋଇରାନ୍‌ ଆମାୱାନିଙ୍ଗ୍‌ ଜଦି ବୁଦି ଉଣାମାନାତ୍‌, ୱାନ୍‌ ମାପୁରୁଦି ଲାକ୍‌ତୁ ପାର୍‌ତାନା କିପିନ୍‌, ଆର୍‌ତିଙ୍ଗ୍‌ ମାପୁରୁ ୱାନିଙ୍ଗ୍‌ ବୁଦି ସିନାନ୍‌, ଇରିଙ୍ଗ୍‌ ମାପୁରୁ ଦୋସ୍‌ଆସ୍‌ଏଣ୍‌ଗା ମାରି ଲବ୍ରାଆଇ ମୋନ୍‌ତାନ୍‌ ୱିଜେରିଙ୍ଗ୍‌ ଦାନ୍‌ କିନାନ୍‌ ।
JAM 1:6 ମାତର୍‌ ପାର୍‌ତାନା କିନିୱାଲେ ମୁଡ଼୍‌କେ ଅଡ଼୍‌ବିଏଣ୍‌ଗା ବିସ୍‌ବାସ୍‌ତାନ୍‌ ପାର୍‌ତାନା କିପିନ୍‌ । ଏନ୍‌ ଆନ୍‍ମାନ୍‍ କିନାନ୍‍, ୱାନ୍‌ ଗାଲିଦୁ ମିସାଜି ତିର୍‌ ତେବାଇ ସାମ୍‌ଦୁର୍‌ତି ଲଡ଼ି ଏରୁ ୱାଜା ।
JAM 1:7 ଆୟାୱାଜା ଲୋକ୍‌ ପ୍ରବୁଦିମାଣୁକୁ ଇନିକା ପୟ୍‌ନା ଇଜି ଏତ୍‌କିମାକିନ୍‌,
JAM 1:8 ୱାନ୍‌ ରିୟାଙ୍ଗ୍‌ମୋନ୍‌ତି ଲୋକ୍‌, ନିଜେଦି ୱିଜୁ ବୁଲାନିମାନୁ ତିର୍‌ସିଲେତ୍‌ ।
JAM 1:9 ସିଲିସାତିଅବସ୍ଥାଦାନ୍‌ ମାନି କ୍ରିସ୍ତ ବିସ୍‌ବାସ୍‌ସିଙ୍ଗ୍‍ଁ ମୁସ୍‌କୁପେରାତିଙ୍ଗ୍‌ ୱେଡ଼ିକା କିପିନ୍‌ ।
JAM 1:10 ମାରି, କ୍ରିସ୍ତବିସ୍‌ବାସ୍‌ସି ମାଜନଲୋକ୍‌ ୱାନି ସିଲିସାତିମାନୁ ଗାର୍ବୁ କିପିନ୍‌, ଇରିଙ୍ଗ୍‌ ମାଜନଲୋକ୍‌ ଲାଟାଦି ପୁଙ୍ଗୁଁ ୱାଜା ରାଲ୍‌ନାସୋନାନ୍‌ ।
JAM 1:11 ୱେଡ଼ାଦି ନାଣ୍ତ୍‌ ତାତିଦାନ୍‌ ଲାଟା ୱାର୍‌ନା ସୋନାତ୍‌, ତାନି ପୁଙ୍ଗୁଁ ରାଲ୍‌ନାସୋନାତ୍‌ ମାରି ତାନି ସୁନ୍ଦର୍‌ ନାସ୍ଟୁ ଆନାତ୍‌ । ଆୟାୱାଜା ମାଜନଲୋକ୍‌ ବା ୱାନି ୱିଜୁ ପାଣିଦାନ୍ଦା ଲଇ ଅର୍‍ଲେନ୍‍ ୱାଙ୍ଗ୍‌ନା ସୋନାନ୍‌ ।
JAM 1:12 ଆମା ଲୋକ୍‌ ଦୁଃକ୍‌କାସ୍ଟୁଦୁ ସାସ୍‌ କିନାନ୍‌, ୱାନ୍‌ ଆସିର୍ବାଦ୍‍ତିକାନ୍‍; ଇରିଙ୍ଗ୍‌ ଇୟାୱାଜା ଲୋକ୍‌ ପରିକାଦୁ ଜିଣାତିଙ୍ଗ୍‌, ମାପୁରୁ ୱାନି ଲୋକାଙ୍ଗ୍‌ ଆମା ଜିବନ୍‌ ସିନାନ୍‌ ଇଜି ପାର୍‌ମାଣ୍‌ କିତାମାନାନ୍‌, ୱାନ୍‌ ଆକା ପୁର୍‌ସ୍କାର୍‌ ୱାଜା ପୟ୍‌ନାନ୍‌ ।
JAM 1:13 ଏନ୍‌ ଦୁକ୍‍କାସ୍ଟୁଦୁ ଆର୍‌ତିଙ୍ଗ୍‌, ନା ଇୟା ଲାଲୟ୍‍ଆନିକା ମାପୁରୁମାଣୁକୁ ଆଜିନାତ୍‌ ଇଜି ଅଡ଼୍‌ବିମାକିନ୍‌, ମାପୁରୁ ତାଗ୍‌ଇ ବିସୟ୍‌ତାନ୍‌ ଲାଲାୟ୍‍ ଆଦେଙ୍ଗ୍‌ ଆଟ୍‌ଏନ୍‌, ମାରିବା ୱାନ୍‌ ଏଙ୍ଗ୍‌ବା ଲାଲାୟ୍‍ ଆଦେଙ୍ଗ୍‌ ସିଏନ୍‌ ।
JAM 1:14 ମାତର୍‌ ଲୋକ୍‌ ନିଜେଦି ତାଗ୍‍ଇପାଣିଦୁ ତେବାତିଙ୍ଗ୍‌ ପରିକାଦୁ ଆର୍‌ନାର୍‌ ।
JAM 1:15 ତାଗ୍‍ଇପାଣିକିନି ୱାନି ପଟାଦାନ୍‌ ପାପ୍‌ ଜନମ୍‌ ଆନାତ୍‌ ମାରି ଆୟା ପାପ୍‌ ନାଣ୍ତ୍‌ନାଣ୍ତ୍‌ଦାନ୍‌ ପିର୍‍ଜି ସାନିତାନିଙ୍ଗ୍‌ ଜନମ୍‌ ସିନାତ୍‌ ।
JAM 1:16 ଏ ନା ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକି, ବାୟା ଆମାଟ୍‌ !
JAM 1:17 ୱିଜୁ ନେଗି ଦାନ୍‌ ମାରି ୱିଜୁଦିଙ୍ଗ୍‌ ପେରି ଇନାମ୍‍ ମୁସ୍‌କୁପୁରୁତି ବୁବାମାଣୁକୁ ୱାନାତ୍‌ । ୱାନ୍‌ ସାରାଦୁନିଆଦି ୱେଡ଼ା, ଲେଜୁ ନି ସୁକେଙ୍ଗାଁ ତିଆର୍‍ କିତିକାନ୍‍ । ୱାନ୍‌ ନିଡ଼ିଗା ୱାଜା ବାଦ୍‌ଲେଆନିକାନ୍‍ ଆଏନ୍‌;
JAM 1:18 ସାରା ଦୁନିଆଦି ଲୋକୁ ମାପ୍‌ ଏଣ୍ତେସ୍‌ ପାର୍‌ତୁମ୍‌ ବାଡି ଅଦିକାର୍‌ କିନାପ୍‌, ଇୟାଉଣ୍ତିଙ୍ଗ୍‌ ୱାନ୍‌ ନିଜେଦି ବଦାଦାନ୍‌ ସତ୍‌ ବାକ୍ୟଦାନ୍‌ ମାଙ୍ଗିଁ ତିଆର୍‌ କିତାନ୍‌ ।
JAM 1:19 ଏ ନା ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକି, ଏତ୍‍କିଦୁ । ମିର୍‌ ୱେନ୍‌ଡ୍ରେଙ୍ଗ୍‌ ଦାନ୍ଦାଆନିକା ମାନାତ୍‌, ୱେର୍‌ତେଙ୍ଗ୍‌ ସାନ୍ତି, ରିସା କିଦେଙ୍ଗ୍‌ ତିର୍‌ ଆପିତ୍‌, ମାତର୍‌ ଆଗ୍‌ଡ଼ିୱେନ୍‌କା ଅଡ଼୍‍ବିଜି ମାଟା ଇନ୍‍ଡ୍ରୁ
JAM 1:20 ଇରିଙ୍ଗ୍‌ ଲୋକୁ ରିସାଦାନ୍‌ ମାପୁରୁଦି ଦାର୍ମୁ ପାଣି ପୟ୍‍ଦେଙ୍ଗ୍‍ ଆଟ୍‍ଏର୍‍ ।
JAM 1:21 ମାରି ୱିଜୁଜାତିଦି ତାଗ୍‌ଇଅବ୍ୟାସ୍‌ ମାରି ତାଗ୍‌ଇପାଣି ଡ଼ିସ୍‌ସି । ମାପୁରୁଦି ଲାକ୍‌ତୁ ନିଜେଦିଙ୍ଗ୍‌ ସର୍‌ପେ ଆଦୁ ମାରି ମି ଜିବନ୍‌ତୁ ୱାନ୍‌ ଆମା ବାକ୍ୟ ଉରୁତା ମାନାନ୍‌ ମାରି ଆମାକା ମିଙ୍ଗିଁ ରକିୟା କିଦେଙ୍ଗ୍‌ ଆଟ୍‌ନାତ୍‍, ତାନିଙ୍ଗ୍‌ ନେଗେନ୍‌ତାନ୍‌ ମାନାଦୁ ।
JAM 1:22 ମିର୍‌ ନିଜେ ନିଜେଦିଙ୍ଗ୍‌ ବାଣ୍ତିସ୍‍କିମାଟ୍‌ । ୱାନି ବାକ୍ୟ କେବଲ ୱେରିଙ୍ଗ୍‌ ନାଣ୍ତ୍‌ ଆଏତ୍‌ । ତାନିଙ୍ଗ୍‌ ପାଣିଦୁ ଲାଗେକିଦୁ ।
JAM 1:23 ଆମା ଲୋକ୍‌ ମାପୁରୁଦି ବାକ୍ୟ କେବଲ ୱେନାନ୍‍, ମାତର୍‍ ପାଣିଦୁ ଲାଗେ କିଏନ୍‍, ୱାନ୍‌ ଦାର୍ପାଣ୍‌ତୁ ନିଜେଦି ମକମ୍‌ ସୁଡ଼୍‌ନି ଲୋକୁ ୱାଜା ।
JAM 1:24 ୱାନ୍‌ ନେଗେନ୍‌ କିଜି ନିଜେଦି ମକମ୍‌ତିଙ୍ଗ୍‌ ସୁଡ଼ୁନାନ୍‌, ମାତର୍‌ ଆବେଟ୍‌କୁ ସର୍‌ଇ ୱେନ୍‌କା ୱାନି ନିଜେଦି ମକମ୍‌ ୱାନ୍‌ ବାଣାନାନ୍‌ ।
JAM 1:25 ମାତର୍‌ ଲୋକାଦି ରକିୟା ଉଣ୍ତିଙ୍ଗ୍‌ ଉନ୍‌ଡ୍ରି ପୁରା ନିୟମ୍‌ ମାନାତ୍‌ । ଏନ୍‌ ଆକା ୱେନ୍‌ଞ୍ଜି ବାଣାଏନ୍‌ ମାରି ୱାନି ଉଣ୍ତିଙ୍ଗ୍‌ ମେନ୍ଦଲ୍‌ୱିଜୁଦାନ୍‌ ମୋନ୍‌ସିଜି ନିଜେଦି ଜିବନ୍‌ତୁ ମାନାତିଙ୍ଗ୍‌, ୱାନି ୱିଜୁ ପାଣିଦିଙ୍ଗ୍‌ ମାପୁରୁ ଆସିର୍ବାଦ୍‍ କିନାନ୍‌ ।
JAM 1:26 ଜଦି ଏନ୍‌ ନିଜେଦିଙ୍ଗ୍‌ ଦାର୍ମୁ ଇଜି ଅଡ଼୍‌ବିଜିନାନ୍‌ ? ୱାନ୍‌ ଜଦି ନିଜେଦି ୱେତଲ୍‌ତିଙ୍ଗ୍‌ ତିର୍‌ କିଏନ୍‌, ଆର୍‌ତିଙ୍ଗ୍‌ ୱାନି ଦାର୍ମୁପାଣିୱିଜୁ ୱାରିକା ମାରି ୱାନ୍‌ କେବଲ୍‌ ନିଜେଦିଙ୍ଗ୍‌ ବାଣ୍ତିସ୍‍କିଜିନାନ୍‌ ।
JAM 1:27 ଆମା ଦାର୍ମୁପାଣି ବୁବା ମାପୁରୁଦି ଲାକ୍‌ତୁ ନେଗିକା ମାରି ଟିକ୍‍, ଆକା ଆଜିନାତ୍‌ କାକୁର୍ତିମାନି ଟୁରାଲୋକାଙ୍ଗ୍‍ ମାରି ରାଣ୍ତିଆଇମେକାଙ୍ଗ୍‌ ଜାତୁନ୍‍ କିନିକା ମାରି ଦୁନିଆଦାନ୍‌ ନିଜେଦିଙ୍ଗ୍‍ ପାପ୍‌ପାଣିଦାନ୍‌ ରକିୟା କିନିକା ।
JAM 2:1 ଏ ନା ତଡ଼ାନ୍‌କୁ ନି ତାଙ୍ଗିଁକି, ଗୌରବ୍‌ମୟ୍‌ ପ୍ରବୁ ଜିସୁ କ୍ରିସ୍ତଦିମାନୁ ବିସ୍‌ବାସ୍‌ କିତିମାନିଙ୍ଗ୍‌ ମିର୍‍ ଲୋକା ସାମାନ୍‍ତାନ୍‌ ଆତ୍‍ରେ ଆରାନିକା ସୁଡ଼ୁଜି ପେରିକାନ୍‍ ଇସ୍ରିକାନ୍‍ କିମାଟ୍‌ ।
JAM 2:2 ଅଡ଼୍‍ବିଦୁ, ମି ମିଟିଙ୍ଗ୍‌ଁତୁ ଅରେନ୍‌ ବାଙ୍ଗାଁରାମ୍‌ତି ୱେତରି ମାରି ନାଣ୍ତ୍‌ଦାରାଦି ଆଙ୍ଗିଁ ଆରାଜି ୱାତାମାନାନ୍‌ । ମାରି ଅରେନ୍‌ କାକୁର୍ତି ଲୋକ୍‌ ମାଇତିକା ନି କିଜିତି ଆଙ୍ଗିଁ ଆରାତା ୱାତାମାନାନ୍‌ ।
JAM 2:3 ଜଦି ମିର୍‌ ନାଣ୍ତ୍‌ଦାରାଦି ଆଙ୍ଗିଁ ଆରାତି ଲୋକ୍‌ତିଙ୍ଗ୍‌ ନାଣ୍ତ୍‌ ସନ୍‌ମାନ୍‌ ତର୍‌ସି ଇନିଦେର୍‌, “ଇୟା ବାଡିଦୁ ବାସ୍‌ଆ,” ମାତର୍‌ କାକୁର୍ତି ଲୋକ୍‌ତିଙ୍ଗ୍‌ ଇନିଦେର୍‌, “ଆବେନୁ ନିଲ୍‌ଆ, ମାରି ଆଡ୍‍ଗି ବାସ୍‌ଆ,”
JAM 2:4 ଆର୍‌ତିଙ୍ଗ୍‌, ନିଜେ ନିଜେଦି ଲୋଇ ପେରିକାନ୍‌ ଇସ୍ରିକାନ୍‌ ୱାଜା ତିଆର୍‌ କିଜିନିଦେର୍‌ ମାରି ସତ୍‌ସିଲିକା ମୋନ୍‌ତୁ ଇଡ୍‍ଜି ଲୋକା ମକମ୍‌ସୁଡ଼ୁଦେଙ୍ଗ୍‌ ବିସାର୍‌ କିଜିନିଦେର୍‌ ।
JAM 2:5 ଏ ନା ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକି, ୱେନ୍‌ଡ୍ରୁ, ମାପୁରୁ ଇନିକା ଇୟା ଦୁନିଆଦି କାକୁର୍ତି ଲୋକାଙ୍ଗ୍‌ ବିସ୍‌ବାସ୍‌ୱାଜା ଦନ୍‌ତୁ ମାଜନ୍‌ ଆଦେଙ୍ଗ୍‌ ମାରି ୱାନି ସେବାକିନିୱାରିଙ୍ଗ୍‌ ଆମା ରାଜି ସିନା ଇଜି ମାଟା ସିତାମାନାନ୍‌, ଆବେଣି ଅଦିକାର୍‌ ଆନି ଉଣ୍ତିଙ୍ଗ୍‌ ଆସ୍‌କିଏନ୍‌ ?
JAM 2:6 ମାତର୍‌ ମିର୍‌ ସିଲିସାତିୱାରିଙ୍ଗ୍‌ ଅସନ୍‌ମାନ୍‌ କିଜିନିଦେର୍‌ ! ଆମାକାର୍‌ ମି ଉଣ୍ତିଙ୍ଗ୍‌ ତାଗ୍‌ଇପାଣି କିନାର୍‌ ମାରି ନ୍ୟାୟ୍‌କିନି ବାଡିଦୁ ରେଲ୍‌ଜି ଅନାର୍‌, ୱାର୍‌ ଏର୍‌ ? ୱାର୍‌ ଆୟା ମାଜନ୍‌ ଲୋକୁ ।
JAM 2:7 ଆମା ଜିସୁ କ୍ରିସ୍ତଦି ଦରୁଦାନ୍‌ ମିର୍‌ ୱେଙ୍ଗିଁତି ମାନିଦେର୍‌, ୱାର୍‌ ଆୟା ଦର୍‌ତିଙ୍ଗ୍‌ ନିନ୍ଦା କିନାର୍‌ ।
JAM 2:8 “ମିର୍‌ ନିଜେଦି ଲାକ୍‌ତୁରି ଲୋକାଙ୍ଗ୍‌ ଜିବନ୍‌ନୋତିୱାଜା ଜିବନ୍‍ନୋଦୁ,” ଦାର୍ମୁସାସ୍ତ୍ରଦୁ ରାସ୍‌ତିମାନି ମାପୁରୁଦି ରାଜିଦି ଇୟା ନିୟମ୍‌ ଜଦି ମାନାଜିନିଦେର୍‌, ଆର୍‌ତିଙ୍ଗ୍‌ ମିର୍‌ ଟିକ୍‌ ପାଣି କିଜିନିଦେର୍‌ ।
JAM 2:9 ମାତର୍‌ ଜଦି ଆତ୍ରେ ସୁନ୍ଦର୍‌ ସୁଡ଼ୁଜି ଲୋକା ଉଣ୍ତିଙ୍ଗ୍‌ ମକମ୍‍ସୁଡ଼ୁଜି ବ୍ୟବ୍‌ହାର୍‌ କିଜିନିଦେର୍‌, ଆର୍‌ତିଙ୍ଗ୍‌ ମିର୍‌ ପାପ୍‌ କିଜିନିଦେର୍‌ ମାରି ନିୟମ୍‌ତି ଇସାବ୍‌ତାନ୍‌ ନିନ୍‌ ଅରେନ୍‌ ଦସି ଇଜି ପାର୍‌ମାଣ୍‌ ଆଜିନି ।
JAM 2:10 ଆମା ଉନ୍‌ଡ୍ରି ମାଟା ମାନାଏନ୍‌, ୱାନ୍‌ ୱିଜୁ ମାଟାଦିଙ୍ଗ୍‌ ମାନାଏତିଙ୍ଗ୍‌ ପାପ୍‌ ଆଜି ଦଣ୍ତ୍‌ ପୟ୍‌ନାନ୍‌ ।
JAM 2:11 ଇରିଙ୍ଗ୍‌ ମାପୁରୁ ମାଟା ୱେର୍‌ତାମାନାନ୍‌, “ଦାରିପାଣି କିମାଟ୍‌,” ଆୟା ମାପୁରୁ ମାରି ଉନ୍‌ଡ୍ରି ମାଟା ୱେର୍‌ତାମାନାନ୍‌; “ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌ ।” ମାରି, ମିର୍‌ ଦାରିପାଣି କିଏତିଙ୍ଗ୍‌ବା, ଜଦି ଲୋକାଙ୍ଗ୍‌ ସାୟାମାର୍‌ଗା ଡାକ୍‌ନିଦେର୍‌, ଆର୍‌ତିଙ୍ଗ୍‌ ନିନ୍‌ ଅରେନ୍‌ ନିୟମ୍‌ ମାନାଇଜି ଦସି ଇଜି ପାର୍‌ମାଣ୍‌ ଆଜିନି ।
JAM 2:12 ଆମା ମୁକ୍‍ଡ଼ାନି ପାଣିକିନି ନିୟମ୍‌ତାନ୍‌ ମିର୍‌ ବିସାର୍‌ ଆନିଦେର୍‌, ଆକା ମି ୱାର୍‌ଗିଜିମାନୁ ମାରି ପାଣିଦାନ୍‌ ତର୍‌ତୁ ।
JAM 2:13 ଇରିଙ୍ଗ୍‌ ଏନ୍‌ ଆଇୱାନିଙ୍ଗ୍‍ ଦୟା କିଏନ୍‌, ମାପୁରୁ ୱାନିଙ୍ଗ୍‌ ଦୟା କିଏନ୍‌ । ନ୍ୟାୟ୍‌ ବିସାର୍‌ ମୁସ୍‌କୁ ଦୟା ନେ ଜିଣାନାତ୍‌ ।
JAM 2:14 ଏ ନା ତଡ଼ାନ୍‌କୁ ନି ତାଙ୍ଗିଁକି, ଏନ୍‌ ଜଦି ଇନାନ୍‌, ନା ବିସ୍‌ବାସ୍‌ ମାନାତ୍‌, ମାତର୍‌ ପାଣିଦୁ ଆକା ତର୍‌ଏନ୍‌, ଆର୍‌ତିଙ୍ଗ୍‌ ୱାନି ମାଟାଦି ଇନି ଲାବ୍‌ ମାନାତ୍‌ ? ଇୟାୱାଜା ବିସ୍‌ବାସ୍‌ ୱାନିଙ୍ଗ୍‌ ରକିୟା କିଦେଙ୍ଗ୍‌ ଆଟ୍‌ନାତ୍‌ ନୋ ?
JAM 2:15 ଜଦି ଅରେନ୍‌ ତଡ଼ାନ୍‌ ସିଲିତିଙ୍ଗ୍‌ ତାଙ୍ଗିଁକି ୱାତିଗନ୍ଦା ନି ଉଣିତିନିକା ଉଣାମାନାତ୍‌,
JAM 2:16 ମାରି ମିର୍‌ ୱାନି ମେନ୍ଧଲ୍‍ ଦରକାର୍‍ ପୁରା କିଏଣ୍‌ଗା ଜଦି ଇନିଦେର୍‌, ମାପୁରୁ ମିଙ୍ଗିଁ ଆସିର୍ବାଦ୍‌ କିପିନ୍‌; ଉଣୁଜିତିନ୍‌ଞ୍ଜି ନେଗେନ୍‌ତାନ୍‌ ମାନ୍‌ଡ୍ରୁ, ମି ମାଟା ବେକାର୍‌ ଆଏତ୍‌ ନୋ ?
JAM 2:17 ବିସ୍‌ବାସ୍‌ ଟିକ୍‌ ଆୟାୱାଜା : ପାଣି ସିଲେତିଙ୍ଗ୍‌ କେବଲ୍‌ ବିସ୍‌ବାସ୍‌ ସାତିକା ।
JAM 2:18 ମାତର୍‌ ଏନ୍‌ ଆର୍‌ତିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆଟ୍‌ନାନ୍‌, “ଅରେନ୍‌ୱାନି ବିସ୍‌ବାସ୍‌ ମାନାତ୍‌, ଆଇ ୱାନିନ୍ଦି ପାଣି ମାନାତ୍‌ ।” ଇୟା ବିସୟ୍‌ତାନ୍‌ ନାନ୍‌ ୱେର୍‌ନା, “ପାଣି ସିଲେଣ୍‌ଗା ଏମେୱାନି ବିସ୍‌ବାସ୍‌ ମାନ୍‌ଡ୍ରେଙ୍ଗ୍‌ ଆଟ୍‌ନାତ୍‌ ଇଜି ନାଙ୍ଗିଁ ପାର୍‌ମାଣ୍‌ ସିଦାଟ୍‌ । ନାନ୍‌ ପାଣିଦାନ୍‌ ନା ବିସ୍‌ବାସ୍‌ ମାନାତ୍‌ ଇଜି ପାର୍‌ମାଣ୍‌ ସିନା ।”
JAM 2:19 ମିର୍‌ ଇନିକା ବିସ୍‌ବାସ୍‌ କିଜିନିଦେର୍‌ ଜେ, କେବଲ୍‌ ଅରେନ୍‌ ମାତର୍‌ ମାପୁରୁ ମାନାନ୍‌ ? ନେଗିକା ! ଦୁବେଙ୍ଗ୍‌ ବା ଇୟାୱାଜା ବିସ୍‌ବାସ୍‌ କିନେ ମାରି ତିଲାଜି ତର୍‌ତର୍‌ ଆନେ ।
JAM 2:20 ଏ ବୁଦିସିଲିଲୋକ୍‌ ! ପାଣି ଡ଼ିସ୍‌ସି ବିସ୍‌ବାସ୍‌ ଜେ ୱାରିକା, ଇୟାତାନି ପାର୍‌ମାଣ୍‌ ସୁଡ଼୍‌ଦେଙ୍ଗ୍‌ ମିର୍‌ ଇନିକା ବଦା କିଜିନିଦେର୍‌ ?
JAM 2:21 ମା ପୁର୍ବେଦି ବୁବା ଅବ୍ରାହାମ, ମାପୁରୁଦି ଆଗ୍‍ଡ଼ି ଏଣ୍ତେସ୍‌ ଦାର୍ମୁ ଆତା ମାର୍ହାନ୍‌ ? ୱାନ୍‌ ପାଣିଦାନ୍‌ ଦାର୍ମୁ ତରାୟ୍‌ଆତାନ୍‌, ଏସ୍ତିୱାଲେ ୱାନ୍‌ ୱାନି ମାରିସିଙ୍ଗ୍‌ ଇସ୍‌ହାକ୍‌ତିଙ୍ଗ୍‌ ବେଦି ମୁସ୍‌କୁ ସିତାନ୍‌ ।
JAM 2:22 ମିର୍‌ ଇନିକା ବୁଜାଦେଙ୍ଗ୍‌ ଆଟ୍‌ଏଜିନିଦେର୍‌ ? ଅବ୍ରାହାମଦି ବିସ୍‌ବାସ୍‌, ପାଣିଦୁ ୱେଙ୍ଗିଁତାତ୍‍; ପାଣିଦାନ୍‌ ୱାନି ବିସ୍‌ବାସ୍‌ ପୁରା ଆତାତ୍‌ ।
JAM 2:23 ଇୟାମାଣୁକୁ ଦାର୍ମୁସାସ୍ତ୍ରଦି ଇୟା ରାସାତି ବାକ୍ୟ ପୁରା ଆତାତ୍‌ : “ଅବ୍ରାହାମ ମାପୁରୁଙ୍ଗୁ ବିସ୍‌ବାସ୍‌ କିତାନ୍‌ ମାରି ୱାନି ବିସ୍‌ବାସ୍‌ ଉଣ୍ତିଙ୍ଗ୍‌ ମାପୁରୁଦି ଆଗ୍‌ଡ଼ି ୱାନ୍‌ ଦାର୍ମୁ ତରାୟାତାନ୍‌ ।” ମାରି ଅବ୍ରାହାମ ମାପୁରୁଦି ସଙ୍ଗ୍‍ ଇଜି ଦରୁ ପଇତାନ୍‌ ।
JAM 2:24 ମାରି, ମିର୍‌ ବୁଜାଦେଙ୍ଗ୍‌ ଆଟ୍‌ନିଦେର୍‌ ଜେ, ଲୋକୁ ପାଣିଦାନ୍‌ ଦାର୍ମୁ ତର୍‌ନାନ୍‌, କେବଲ୍‌ ବିସ୍‌ବାସ୍‌ତାନ୍‌ ସିଲେ ।
JAM 2:25 ଆୟାୱାଜା ଦାରିପାଣିକିନି ରାହାବ ବା ପାଣିଦାନ୍‌ ଦାର୍ମୁଦିକାତ୍‌ ତରାୟ୍‌ ଆତାମାର୍‌ର୍ହାତ୍‌ । ୱାଦ୍‌ ଇସ୍ରାଏଲିୟତି ଡଙ୍ଗାଁରିଙ୍ଗ୍‌ ତେବାଦେଙ୍ଗ୍‍ ବାଡି ସିତାମାର୍ହାତ୍‌ ମାରି ଆଇ ଉନ୍‌ଡ୍ରି ସାରିଦାନ୍‌ ସନ୍‌ଡ୍ରେଙ୍ଗ୍‌ ସାକା କିତାମାର୍ହାତ୍‌ ।
JAM 2:26 ଆଦେଙ୍ଗ୍‌ ଆତ୍ମାଦିଙ୍ଗ୍‌ ଡ଼ିସ୍‌ସି ମେନ୍ଦଲ୍‌ ଏଣ୍ତେସ୍‌ ସାତିକା, ଆୟାୱାଜା ପାଣିଦିଙ୍ଗ୍‌ ଡ଼ିସ୍‌ସି ବିସ୍‌ବାସ୍‌ ବା ସାତିକା ।
JAM 3:1 ଏ ନା ତଡ଼ାନ୍‌କୁ ନି ତାଙ୍ଗିଁକ୍‍ ମି ଲୋଇ ୱିଜୁଲୋକ୍‌ ଗୁରୁର୍‍ ଆମାଟ୍‍, ଇରିଙ୍ଗ୍‌ ମିର୍‌ ନେସ୍‍ନିଦେର୍‌ ଜେ, ମା ୱାଜା ସିକିୟା ଗୁରୁର୍‌ ଆଇୱାରି ବାଦ୍‌ଲୁ ନାଣ୍ତ୍‌ତାନ୍‌ କାସ୍ଟୁଦି ୱାଜା ବିସାର୍‌ ଆନାର୍‌ ।
JAM 3:2 ମାଡୁ ୱିଜୁଲୋକ୍‌ ଗାଦି ଦେବେଙ୍ଗ୍‌ ବୁଲ୍‌ କିନିମାନିକା । ଜଦି ଏନ୍‌ ୱାନି ୱାର୍‌ଗିଜିସାଜିମାନୁ ମୁଡ଼ୁକେ ପାପ୍‌ କିଏନ୍‌, ଆର୍‌ତିଙ୍ଗ୍‌ ୱାନ୍‌ ନେଗିକାନ୍‌ ମାରି ନିଜେଦି ମେନ୍ଧଲ୍‍ତିଙ୍ଗ୍‌ ପୁରା ନେଗେନ୍‌ ଇଟ୍‌ତାମାନାନ୍‌ ।
JAM 3:3 ଗଡ଼ାଦିଙ୍ଗ୍‌ ତିର୍‌ କିନି ଉଣ୍ତିଙ୍ଗ୍‌ ମାଡ୍‍ ତାନି ୱେୟୁଦୁ ନାସୁ ତର୍‌ନିକା ମାରି ମା ବଦାଦାନ୍‌ ତାନିଙ୍ଗ୍‌ ବୁଲାକିଦେଙ୍ଗ୍‌ ଆଟ୍‌ନିକା ।
JAM 3:4 ଉନ୍‌ଡ୍ରି ପେରି ଜାହାଜ୍‌ ବିସୟ୍‌ତାନ୍‌ ସିନ୍ତା କିଦୁ । ଜାଜ୍‌ ସାଲାକିନିକାନ୍‌ ନାଣ୍ତ୍‌ ଗାଲି କିଜିମାରିଙ୍ଗ୍‌ବା, ପୁରା ଇସ୍ରି ମଙ୍ଗ ସାହାଜ୍ୟଦାନ୍‌ ତାନିଙ୍ଗ୍‌ ଡାଟ୍‌ କିଜି ବଦାଦାନ୍‌ ସାଲାକିଜି ଅନାନ୍‌ ।
JAM 3:5 ଆୟାୱାଜା ୱେତଲ୍ ଉନ୍‌ଡ୍ରି ଇସ୍ରିକା ଆତିଙ୍ଗ୍‌ବା ପେରି ପେରି ମାଟେଙ୍ଗ୍‌ ଇନ୍‌ଞ୍ଜି ଗର୍ବ କିଦେଙ୍ଗ୍‌ ଆଟ୍‌ନାତ୍‌ । ଅଡ଼୍‌ବିଜ ସୁଡ଼ୁଦୁ, ଏଣ୍ତେସ୍‌ ସିସୁଡ଼ିବୁ ଇସ୍ରିକା ଆତିଙ୍ଗ୍‌ବା ଏସ ପେରି ବନ୍‌ତିଙ୍ଗ୍‌ ସିସୁ କାସିସ୍‌ କିନାତ୍‌ ।
JAM 3:6 ୱେତଲ୍ ବା ସିସୁ ୱାଜା; ଇୟା ଦୁନିଆଦୁ ନାଣ୍ତ ତାଗ୍‌ଇ ବିସୟ୍‌ତୁ ପୁରାବର୍ତି; ମାରି ଆକା ମା ମେନ୍ଦଲ୍‌ ଲଇ ମାନିଙ୍ଗ୍‌ ତାଗ୍‍ଇ ମାଟେଙ୍ଗ୍‌ ୱେର୍‌ସି ମା ୱିଜୁ ମେନ୍ଦଲ୍‌ତିଙ୍ଗ୍‌ ମାଇସ୍‌ କିନାତ୍‌ । ୱେତଲ୍‌ତି ନରକ୍‌ସିସୁଦୁ ମା ୱିଜୁଦିନ୍‌ତି ଜିବନ୍‌ ୱେପିସ୍‌ କିନାତ୍‌ ।
JAM 3:7 ଲୋକ୍‌ ୱିଜୁ ବନ୍‌ତି ଜାତୁ, ପଟିଙ୍ଗ୍‌, ଉଜ୍‍ଜି ବୁଲାନିକେଙ୍ଗ୍‍ ମାରି ଏର୍‌ତୁମାନି ଜିବନ୍‌ମାନିକେଙ୍ଗ୍‌ ତେବାକିଦେଙ୍ଗ୍‌ ଆଟ୍‌ତାମାନାତ୍‌ ।
JAM 3:8 ମାତର୍‌ ଏନ୍‌ ଏସ୍‌କାଙ୍ଗ୍‌ ୱେତ୍‌ଲତିଙ୍ଗ୍‌ ତିର୍‌ କିଦେଙ୍ଗ୍‌ ଆଟ୍‌ଏନ୍‌ । ଆକା ସତ୍‌ସିଲିକା ମାରି ଇଡ୍‍ଦେଙ୍ଗ୍‍ ଆଟ୍‍ଏର୍‍; ସାନିନାନି ୱିସାମ୍‍ତୁ ପୁରାବର୍ତି ।
JAM 3:9 ମାଡୁ ୱେତଲ୍‌ତାନ୍‌ ପ୍ରବୁ ବୁବା ମାପୁରୁଙ୍ଗୁ ଦନ୍ୟବାଦ୍‌ ସିନାପ୍‌ । ମାରି ଇୟା ୱେତଲ୍‌ତାନ୍‌ ମାପୁରୁଦି ରୁପ୍‍ତାନ୍‍ ତିଆର୍‌ଆତି ଲୋକ୍‌ତିଙ୍ଗ୍‌ ଆନାଦୁରିଆ ବା ସିନିକା ।
JAM 3:10 ଆୟା ଉନ୍‌ଡ୍ରି ୱେୟୁଦାନ୍‌ ଦନ୍ୟବାଦ୍‌ ମାରି ଆନାଦୁରିଆ ସନାତ୍‌ । ଏ ନା ତଡ଼ାନ୍‌କୁ ନି ତାଙ୍ଗିଁକି, ଇୟାୱାଜା ଆନିକା ନେକ୍‌କା ସିଲେତ୍‌ ।
JAM 3:11 ଉନ୍‌ଡ୍ରି ଜଲାଦାନ୍‌ ସାୱି ନି ସାପ୍‌ରା ଏରୁ ସତେଙ୍ଗ୍‌ ଆଟ୍‌ନେ ନୋ ?
JAM 3:12 ଏ ନା ତଡ଼ାନ୍‌କୁ ନି ତାଙ୍ଗିଁକି, ତଗା ମାରାନ୍‌ତୁ ଇନିକା ଜିତ ପଲ୍‌ ଆସ୍‌ନାତ୍‌ ? ଅଙ୍ଗୁର୍‍ ତିୱାଦୁ ଇନିକା ତଗା ଆସ୍‌ନାତ୍‌ ? ଆୟାୱାଜା କାରିୟା ଏରୁ ସନି ଜଲାଦାନ୍‌ ସାୱି ଏରୁ ସୋଉ ।
JAM 3:13 ମି ଲଇ ଏନ୍‌ ଇନିକା ଜ୍ଞାନି ନି ବୁଦିମାନିକାନ୍‌ ଏନ୍‌ ମାନାନ୍‌ ? ୱାନ୍‌ ବୁଦିମାନିକାନ୍‌ ମାରି ସାନ୍ତିଦି ୱାଲେ ସତ୍‌ପାଣି କିଜି ୱାନି ଜିବନ୍‍ତୁ ଇୟାତାନି ପାର୍‌ମାଣ୍‌ ସିପିନ୍‌ ।
JAM 3:14 ମାତର୍‌ ଜଦି ମି ଜିବନ୍‌ତୁ ରିସା, ଆକାର୍‍ ମାରି ଦାରା ୱାଜା ମାନାତ୍‌, ନିଜେଦି ବୁଦି ମାରି ଜ୍ଞାନ୍‌ ଉଣ୍ତିଙ୍ଗ୍‌ ଗର୍ବ କିଜି ସତ୍‌ତି ବିରୁଦ୍‌ତାନ୍‌ ଗର୍ବ କିମାଟ୍‌ । ମିଚ୍‌ ୱେର୍‌ମାଟ୍‌ ।
JAM 3:15 ଇୟାୱାଜା ବୁଦି ମାପୁରୁଦି ମାଡ଼ାନ୍ ରେଏତ୍‌; ଆକା ଦୁନିଆଦିକା, ମେନ୍ଦଲ୍‌ତିକା, ତାଗ୍‍ଇ ମାଣାନ୍‍ ଆନାତ୍‌ ।
JAM 3:16 ଆମାମାନୁ ରିସା ମାରି ଆକାର୍‍, ଆବେନୁ ସାନ୍ତିସିଲେତ୍‌ ମାରି ୱିଜୁ ରକମ୍‍ତି ତାଗ୍‌ଇପାଣି ମାନାତ୍‌ ।
JAM 3:17 ମାତର୍‌ ମୁସ୍‌କୁରାନ୍‌ ୱାନି ବୁଦି ଆଗ୍‌ଡ଼ି, ପବିତ୍ର; ଆକାବା ସାନ୍ତି ସିନାତ୍‌, କାର୍ମୁ ମାରି ସଙ୍ଗ୍‍ ଆନିକା । ଆକା ସତ୍‍ପାଣିଦୁ ପୁରାବର୍ତି ମାରି ନାଣ୍ତ୍‌ଦାନ୍‌ ସତ୍‌ପାଣିଦୁ ପଲ୍‌ ଆସିସ୍‌ କିନାତ୍‌; ଆକା ୱିଜୁ ଲୋକାଙ୍ଗ୍‍ ସାନ୍ତି ମାରି ବାଣ୍ତିସ୍‍ କିଏତ୍‍ ।
JAM 3:18 ସାନ୍ତି ତିଆର୍‌କିତିମାନି ଲୋକା ମାଣୁକୁ ୱିତାତି ମାନି ୱିତୁଦାନ୍‌ ଦାର୍ମୁଦିନାନି ପାସି ଆସ୍‌ନାତ୍‌ ।
JAM 4:1 ମି ଲୋଇ ଜୁଦ୍‌ ନି ଲାଗାଜିସାନିକା ଏନ୍ଦା ଆନାତ୍‌ ? ମି ମେନ୍ଦଲ୍‌ତୁ କାସ୍‌ତିମାନି ସୁକ୍‌ଦୁକ୍‌ତିପାଣି ନେ ଇୟାତାନି ବିସୟ୍‌ ।
JAM 4:2 ଇରିଙ୍ଗ୍‌ ମିର୍‌ ଆମାକା ପୟ୍‌ଦେଙ୍ଗ୍‌ ବଦା କିଜିନିଦେର୍‌, ଆକା ପୟ୍‌ଦେଙ୍ଗ୍‌ ଆଟ୍‌ଏତିଙ୍ଗ୍‌, ସାୟାମାର୍‌ଗାଡାକ୍‌ତେଙ୍ଗ୍‌ ଅଡ଼୍‌ବିଜିନିଦେର୍‌ । ଆମାକା ପୟ୍‌ଦେଙ୍ଗ୍‌ ମିର୍‌ ନାଣ୍ତ୍‌ ଆସା ଆନିଦେର୍‌, ଆକା ପୟ୍‌ଏତିଙ୍ଗ୍‌ ଲାଗାଜିସାନିକା ମାରି ଜୁଦ୍‌ କିନିଦେର୍‌ । ମି ବଦାକିତି ବିସୟ୍‌ ପୟ୍‌ଇ କାରଣ୍‌ ଆଜିନାତ୍‌, ମିର୍‌ ମାପୁରୁଙ୍ଗୁଁ ଲସ୍‌ଇମାନିଦେର୍‌ ।
JAM 4:3 ମାରି, ଲସ୍‌ତିଙ୍ଗ୍‌ ବା ପୟ୍‌ଇ କାରଣ୍‌ ଆଜିନାତ୍‌, ମି ଲସ୍‌ନିକା ସତ୍‌ସିଲେତ୍‌ । ମିର୍‌ ନିଜେ ନିଜେଦି ସୁକ୍‌ଦୁଃକ୍‌ ପୟ୍‍ନି ଉଣ୍ତିଙ୍ଗ୍‌ ଲସ୍‌ନିମାନିଦେର୍‌ ।
JAM 4:4 ଏ ବିସ୍‌ବାସ୍‌ତୁ ବିସ୍‌ ସିନି ଲୋକୁ ! ମିର୍‌ ଇନିକା ନେସ୍‌ଇଦେର୍‌, ଦୁନିଆ ମାପୁରୁଦି ଉଣ୍ତିଙ୍ଗ୍‌ ସାତ୍ରୁଆନାତ୍‌ ? ଏନ୍‌ ଇୟା ଦୁନିଆଦି ୱାଲେ ସଙ୍ଗ୍‌ ଆଦେଙ୍ଗ୍‌ ବଦା କିନାନ୍‌; ୱାନ୍‌ ମାପୁରୁଦି ସାତ୍ରୁ ।
JAM 4:5 ଦାର୍ମୁସାସ୍ତ୍ରଦି ଇୟା ବାକ୍ୟଦୁ ଇନିକା ସତ୍‌ସିଲେତ୍‌ ଇଜି ଅଡ଼୍‌ବିଜିନିଦେର୍‌, “ମାପୁରୁ ମାମାନୁ ଆମା ଆତ୍ମା ସିତା ମାନାନ୍‌, ତାନିଙ୍ଗ୍‌ ପୁରାୱିଜୁ ଅଦିକାର୍‌ କିନି ଉଣ୍ତିଙ୍ଗ୍‌ ୱାନ୍‌ ରାଜି ।”
JAM 4:6 ମାତର୍‌ ମାପୁରୁ ଆମା ଦୟା ସିନାନ୍‌, ଆକା ନାଣ୍ତ୍‌ ସାକ୍ତି । ସାସ୍ତ୍ରଦୁ ରାସ୍‌ତାମାନାତ୍‌, “ମାପୁରୁ ଆକାର୍‌ଆନିଲୋକାଙ୍ଗ୍‌ ବିରୁଦ୍‌ କିନାନ୍‌, ମାତର୍‌ ସାନ୍ତି ଲୋକାଙ୍ଗ୍‌ ଦୟା ସିନାନ୍‌ ।”
JAM 4:7 ମାରି, ମାପୁରୁଦି ଲାକ୍‌ତୁ ନିଜେଦିଙ୍ଗ୍‌ ସର୍‌ପେ ଆଦୁ । ସୟତାନ୍‌ତିଙ୍ଗ୍‌ ଜୁଦ୍‌ କିଦୁ । ଆର୍‌ତିଙ୍ଗ୍‌, ୱାଦ୍‌ ମି ଲାକ୍‌ତୁରାନ୍‌ ଉରୁକ୍‌ନାତ୍‌ ।
JAM 4:8 ମାପୁରୁଦି ଲାକ୍‌ତୁ ରାଦୁ, ମାରି ୱାନ୍‌ ମି ଲାକ୍‌ତୁ ୱାନାନ୍‌ । ଏ ପାପି ଲୋକୁ, ମି କିକୁ ନର୍‍ଦୁ, ଏ ରିୟାଙ୍ଗାଁଆନି ଲୋକୁ, ମି ଜିବନ୍‌ ନେଗେନ୍‍ କିଦୁ,
JAM 4:9 ଅଡ଼୍‌ବିଦୁ ମାରି ଦୁଃକ୍‌ ଆଜି ଆଡ଼୍‌ବାଦୁ; ମି ସିକ୍‌ନିକା ଦୁକ୍‍ତୁ ମିସାପିତ୍‌; ମି ୱେଡ଼ିକା ନିରାସ୍‍ତୁ ମିସାପିତ୍‌ ।
JAM 4:10 ପ୍ରବୁଦି ଆଗ୍‌ଡ଼ି ନିଜେ ନିଜେଦିଙ୍ଗ୍‌ ଇସ୍ରିକା ଆଦୁ, ଆର୍‌ତିଙ୍ଗ୍‌ ୱାନ୍‌ ମିଙ୍ଗିଁ ମୁସ୍‌କୁ ପେର୍‌ନାନ୍‌ ।
JAM 4:11 ଏ ତଡ଼ାନ୍‌କୁ ନି ତାଙ୍ଗିଁକି, ନିଜେନିଜେଦିଙ୍ଗ୍‌ ବିସୟ୍‍ତାନ୍‍ ୱାର୍‌ଗିଜିସାମାଟ୍‌ । ବିସ୍‌ବାସ୍‌ତି ତଡ଼ାନ୍‌ତିଙ୍ଗ୍‌ ବିସାର୍‌ କିଜି ଏନ୍‌ ୱାନି ବିରୁଦ୍‍ କିନାନ୍‌, ୱାନ୍‌ ନିୟମ୍‌ତି ବିସାର୍‌ ମାରି ବିରୁଦ୍‍ କିନାନ୍‌ । ମିର୍‌ ଜଦି ନିୟମ୍‌ତି ବିସାର୍‌ କିନିଦେର୍‌, ଆର୍‌ତିଙ୍ଗ୍‌ ମିର୍‌ ଆକା ମାନାଇଜିନିଦେର୍‌, ମାରି ତାନି ବିସାର୍‌କିନିଲୋକ୍‌ ଆଜିନିଦେର୍‌ ।
JAM 4:12 ମାପୁରୁ ନେ ନିୟମ୍‍ଦି ମାରି ବିସାର୍‌କିନିକାନ୍‌ । କେବଲ୍‌ ୱାନ୍‌ ରକିୟା କିଦେଙ୍ଗ୍‌ ଆଟ୍‌ନାନ୍‌, ମାରି ସାପିସ୍‌ କିଦେଙ୍ଗ୍‌ ଆଟ୍‌ନାନ୍‌, ଆୟାଉଣ୍ତିଙ୍ଗ୍‌ ଲାକ୍‌ତୁରି ଲୋକାଙ୍ଗ୍‌ ବିସାର୍‌ କିଜିନିଦେର୍‌ ଜେ ମିର୍‌ ଏଇଦେର୍‌ ?
JAM 4:13 ଇଲେଇ ୱେନ୍‌ଡ୍ରୁ, ଆମାକାର୍‌ ୱେର୍‌ସିନାର୍‌, “ନେରୁ ସିଲ୍‌ତିଙ୍ଗ୍‌ ୱିଗେ ମାପ୍‍ ଆୟା ଗାଡ଼୍‌ତୁ ସନାପ୍‌ ମାରି ଆବେନୁ ଉନ୍‌ଡ୍ରି ବାର୍ସେକ୍‌ ସାନ୍ଧି ତେବାଜି ବେପାର୍‌ କିଜି ନାଣ୍ତ୍‌ ଡାବୁଙ୍ଗ୍‌ ଉଣ୍ତା କିନାପ୍‌ ।”
JAM 4:14 ମାତର୍‌ ୱିଗେରିଙ୍ଗ୍‌ ମି ଜିବନ୍‌ତୁ ଇନିକା ଗଟାଆନାତ୍‌, ଆକା ମିର୍‌ ନେସ୍‌ଇଦେର୍‌ ! ମି ଜିବନ୍‌ ଦୁରି ୱାଜା, ସାଣେକ୍‌ତିଙ୍ଗ୍‌ ତରାୟ୍‌ଆଜି ମାରିସାଣେକ୍‌ତିଙ୍ଗ୍‌ ତରାୟ୍‌ଆଏତ୍‍ ।
JAM 4:15 ଆଦେଙ୍ଗ୍‌ ମିର୍‌ ୱେର୍‌ନିକା ମାନାତ୍‌, “ପ୍ରବୁଦି ବଦା ଆତିଙ୍ଗ୍‌, ମାପ୍‍ ଜିବନ୍‌ ମାନ୍‌ଞ୍ଜି ଇକା କିନାପ୍‍ ମାରି ଆକା କିନାପ୍‍ ।”
JAM 4:16 ମାତର୍‌ ଇଲେଇ ମିର୍‌ ଆକାର୍‍ ଆଜି ଗର୍ବ କିଜିନିଦେର୍‌; ଇୟାୱାଜା ଗର୍ବ ତାଗ୍‌ଇକା ଆନାତ୍‌ ।
JAM 4:17 ମନେ ଇଡ୍‌ଦୁ, ଆମା ଲୋକ୍‌ ଇନି ସତ୍‌ପାଣି କିନିକା ମାନାତ୍‌ ଇଜି ନେସ୍‍ସି ବା ଆକା କିଏନ୍‌, ୱାନ୍‌ ପାପ୍‌ କିନାନ୍‌ ।
JAM 5:1 ଏ ମାଜନ୍‌ ଲୋକ୍‌, ନା ମାଟା ୱେନ୍‌ଡ୍ରୁ । ମି ଆମା କାସ୍ଟୁ ଆଦେଙ୍ଗ୍‌ ସୋଲ୍‌ସିନାତ୍‌, ଆୟାଉଣ୍ତିଙ୍ଗ୍‌ ଆଡ଼୍‍ବାଦୁ ମାରି ଦୁଃକ୍‌ କିଦୁ ।
JAM 5:2 ମି ଦନ୍‌ ୱିଜିତାତ୍‌ନି, ମାରି ମି ୱାତିଗନ୍ଦା ସେଦା ତିରାତ୍‌ନି ।
JAM 5:3 ମାରି ମି ବାଙ୍ଗାଁରାମ୍‍ ମାରି ୱେଣ୍ତିଦୁ କିଟିଙ୍ଗ୍‌ ଆସ୍‌ତାତ୍‌ନି ମାରି ଇୟା କିଟିଙ୍ଗ୍‌ ମି ବିରୁଦ୍‌ତାନ୍‍ ସାକି ସିନାତ୍‌, ମାରି ମି ମେନ୍ଦଲ୍‌ତିଙ୍ଗ୍‌ ସିସୁୱାଜା ତିନାତ୍‌ । ଇୟା ୱିଜ୍‌ନିଦିନ୍‌ତୁ ମିର୍‌ ଦନ୍‌ ଉଣ୍ତା କିଜିନିଦେର୍‌ ।
JAM 5:4 ୱେନ୍‌ଡ୍ରୁ, ମି କିଡ଼ିଇଦୁ ପାଣି କିଜିମାନି ପାଣିକିନିୱାରିଙ୍ଗ୍‌ ବୁତି ସିଇଦେର୍‌ । ୱାରି ମାଟା ୱେନ୍‌ଡ୍ରୁ । ପାସି କୟ୍‌ନିୱାରି ମାଟା ସାକ୍ତିମାନ୍‌ ପ୍ରବୁ ମାପୁରୁ ୱେର୍‌ଆ ମାନାନ୍‌ ।
JAM 5:5 ଇୟା ଦୁନିଆଦୁ ମି ଜିବନ୍‌ ସୁକ୍‌ ମାରି ୱେଡ଼ିକାଦାନ୍‌ ଦିନ୍‌କାଟେକିଜିନିଦେର୍‌ । ସାନିଦିନ୍‌ତି ଉଣ୍ତିଙ୍ଗ୍‌ ମିର୍‌ ମଟାରଟା ଆତିମାନିଦେର୍‌ ।
JAM 5:6 ମିର୍‌ ଦସ୍‌ ସିଲି ଲୋକାଙ୍ଗ୍‍ ଦସ୍‌ ଆସ୍‌ସି ସାୟାମାର୍‌ଗାଡାକ୍‌ତିମାନିଦେର୍‌; ୱାର୍‌ ମିଙ୍ଗିଁ ବିରୁଦ୍‌ କିଦେଙ୍ଗ୍‍ ଆଟ୍‍ଏତାର୍‌ ।
JAM 5:7 ମାରି, ଏ ତଡ଼ାନ୍‌କୁ ନି ତାଙ୍ଗିଁକି, ପ୍ରବୁଦି ୱାନିଦିନ୍‌ ସାନ୍ଦି ସାସ୍‌ ଆସ୍‌ସି ତେବାଦୁ । ସୁଡ଼ୁଦୁ, ଚାସ୍‌ପାଣିକିନିକାନ୍‌ ଏଣ୍ତେସ୍‌ ୱାନି ଡଡିଦୁ ନାଣ୍ତ୍‌ ପାସି ପୟ୍‌ନି ଉଣ୍ତିଙ୍ଗ୍‌ ସାସ୍‌ ଆସ୍‌ସି ପାର୍‍ତୁମ୍‍ତି ନି ସାରାସାରିଦି ପିରୁଦିଙ୍ଗ୍‌ କାପ୍‌କିନାନ୍‌ ।
JAM 5:8 ଆୟାୱାଜା, ମି ଜିବନ୍‌ତିଙ୍ଗ୍‌ ବା ସାସ୍‌ ଆସ୍‌ସି କାପ୍‌କିଦୁ । ମି ଆସା ଡାଟ୍‌ ମାନିତ୍‌, ଇରିଙ୍ଗ୍‌ ପ୍ରବୁଦି ୱାନିଦିନ୍‌ ଲାକ୍‌ତୁ ୱାତାତ୍‌ନି ।
JAM 5:9 ଏ ତଡ଼ାନ୍‌କୁ ନି ତାଙ୍ଗିଁକି, ନିଜେନିଜେଦିମାନୁ ଦୋସ୍‌ ଆସ୍‌ସିସାମାଟ୍‌, ଆର୍‌ତିଙ୍ଗ୍‌ ମାପୁରୁ ମି ବିସାର୍‌ କିଏନ୍‌ । ସୁଡ଼ୁଦୁ ! ପେରିବିସାର୍‌କିନିକାନ୍‌ ସେର୍‍ଲା ଲାକ୍‌ତୁ ନିର୍‌ଆମାନାନ୍‌ ।
JAM 5:10 ଏ ତଡ଼ାନ୍‌କୁ ନି ତାଙ୍ଗିଁକି, ଆମା ବାବବାଦିରି ପ୍ରବୁଦି ଦର୍‌ତାନ୍‌ ମାଟା ସିତାମାର୍ହାର୍‌, ୱାରିଙ୍ଗ୍‌ ଏତ୍‌ କିଦୁ ।
JAM 5:11 ଦୁଃକ୍‌କାସ୍ଟୁ ସମୟ୍‌ତୁ ସାସ୍‌ ନି ସାକା ଆନି ଉଣ୍ତିଙ୍ଗ୍‌ ୱାର୍‌ ମି ଲାକ୍‌ତୁ ମାନିର୍‌ । ୱାରି ସାସ୍‌ ଉଣ୍ତିଙ୍ଗ୍‌ ମାପ୍‌ ୱାରିଙ୍ଗ୍‌ ଦନ୍ୟ ଇଜି ୱେର୍‌ସିନାପ୍‌ । ମିର୍‌ ଆୟୁବଦି ସାସ୍‌ ବିସୟ୍‌ ୱେର୍‌ଇମାନିଦେର୍‌ ମାରି ସାରାସାରିୱେନ୍‌କା ପ୍ରବୁ ଏଣ୍ତେସ୍‌ ୱାନିଙ୍ଗ୍‌ ଆସିର୍ବାଦ୍‌ କିତାମାର୍ହାନ୍‌, ଆକା ନେସ୍‌ତିମାନିଦେର୍‌ । ଇରିଙ୍ଗ୍‌ ପ୍ରବୁଦି ଦୟା ମାରି କାର୍ମୁଦୁ ବର୍ତି ।
JAM 5:12 ଏ ନା ତଡ଼ାନ୍‌କୁ ନି ତାଙ୍ଗିଁକି, ପାର୍‌ମାଣ୍‌ କିନିୱାଲେ ମୁସ୍‌କୁପୁର୍‌ ନୋ ଦୁନିଆ ନୋ ଆଇ ଇନି ବିସୟ୍‌ ଅସି ପାର୍‌ମାଣ୍‌ କିମାଟ୍‌ । ମି “ହଁ” ମାଟା “ହଁ” ଆପିତ୍‌, “ସିଲେ” ମାଟା “ସିଲେଣ୍‌” ଆପିତ୍‌ । ଆର୍‌ତିଙ୍ଗ୍‌ ମିର୍‌ ବିସାର୍‌ତୁ ଦଣ୍ତ୍‌ ପୟ୍‌ଇଦେର୍‌ ।
JAM 5:13 ମି ଲୋଇରାନ୍‌ ଏନ୍‌ ଇନିକା ଦୁଃକ୍‌କାସ୍ଟୁ ପୟ୍‍ଜିନାନ୍‌ ? ୱାନ୍‌ ପାର୍‌ତାନା କିପିନ୍‌ । ଏନ୍‌ ଇନିକା ୱେଡ଼ିକା କିଜିନାନ୍‌ ? ୱାନ୍‌ ପ୍ରସଂସାଦି ପାଟା ପାରିନ୍‌ ।
JAM 5:14 ମି ଲଇ ଏନ୍‌ ଇନିକା ନବ୍‌ ? ୱାନ୍‌ ମଣ୍ତଲିଦି ନେତାରିଙ୍ଗ୍‌ କୁକିନ୍‌; ୱାର୍‌ ପ୍ରବୁଦି ଦର୍‌ତାନ୍‌ ନିୟୁ ଉସ୍‌ସି ଆୟା ଉଣ୍ତିଙ୍ଗ୍‌ ପାର୍‌ତାନା କିପିର୍‌ ।
JAM 5:15 ଇୟାୱାଜା ବିସ୍‌ବାସ୍‌ତୁମାନି ପାର୍‌ତାନାଦାନ୍‌ ରଗ୍‍ତିୱାନିଙ୍ଗ୍‌ ନେଗେନ୍‍ କିନାତ୍‍ । ପ୍ରବୁ ୱାନିଙ୍ଗ୍‌ ନେଗେନ୍‌ କିନାନ୍‌ ମାରି ଜଦି ୱାନ୍‌ ପାପ୍‌ କିନାମାନାନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ କେମା ସିଆୟ୍‌ଆନାତ୍‌ ।
JAM 5:16 ମାରି, ନିଜେନିଜେଦି ମାନୁ ନିଜେ ନିଜେଦି ପାପ୍‌ ମାନାଦୁ, ମାରି ନେଗେନ୍‌ ଆନି ଉଣ୍ତିଙ୍ଗ୍‌ ନିଜେନିଜେଦି ଉଣ୍ତିଙ୍ଗ୍‌ ପାର୍‍ତନା କିଦୁ । ଦାର୍ମୁଦି ଲୋକ୍‌ତି ପାର୍‌ତାନା ନାଣ୍ତ୍‌ ପାଣି ପୁରା କିଦେଙ୍ଗ୍‌ ଆଟ୍‍ନାତ୍‌ ।
JAM 5:17 ଏଲିୟ ମା ୱାଜା ସୁକ୍‌ଦୁଃକ୍‌ତି ଲୋକ୍‌ ମାର୍ହାନ୍‌ । ପିରୁ ଆମାକିତି ଇଜି ୱାନ୍‌ ଉନ୍‌ଡ୍ରି ମୋନ୍‌ତାନ୍‌ ପାର୍‌ତାନା କିତାମାର୍ହାନ୍‌, ମାରି ତିନି ବାର୍ସେକ୍‌ ସଗୋଟା ଲେଜ୍‌କୁ ସାନ୍ଦି ଦୁନିଆଦୁ ପିରୁ ଆଏତାତ୍‌ ।
JAM 5:18 ୱାନ୍‌ ମାରିଡ଼େସି ପାର୍‌ତାନା କିତାନ୍‌, ମାରି ବାଦ୍‌ଡ଼ତାନ୍‌ ପିରୁ ଆତାତ୍‌ ମାରି ବୁମିଦୁ ମାରିଡ଼େସି ପାସି ଆସ୍‌ତାତ୍‌ ।
JAM 5:19 ଏ ନା ତଡ଼ାନ୍‌କୁ ନି ତାଙ୍ଗିଁକି, ମି ଲୋଇରାନ୍‌ ଏନ୍‌ ଜଦି ସତ୍‌ ସାରିଦାନ୍‌ ବାଣାନାନ୍‌ ମାରି ଆଇକାନ୍‍ ଅରେନ୍‌ ୱାନିଙ୍ଗ୍‌ ସତ୍‌ସାରିଦୁ ଡ଼େସି ତାନାନ୍‌,
JAM 5:20 ଆର୍‌ତିଙ୍ଗ୍‌ ମନ୍‍ତୁଇଡ୍‍ଦୁ ଏନ୍‌ ତାଗ୍‌ଇସାରିଦାନ୍‌ ପାପ୍‌ଲୋକ୍‌ତିଙ୍ଗ୍‌ ଡ଼େସି ତାନାନ୍‌, ୱାନ୍‌ ଆୟା ପାପି ଲୋକ୍‌ତି ଆତ୍ମାଦିଙ୍ଗ୍‌ ସାନିମାଣୁକୁ ରକିୟା କିନାନ୍‌ ମାରି ୱାନି ନିଜେଦି ନାଣ୍ତ୍‌ ପାପ୍‌ କେମା ଆନାତ୍‌ ।
1PE 1:1 ନାନ୍‌ ପିତର୍‌, ଜିସୁ କ୍ରିସ୍ତଦି ଅରେନ୍‌ ପ୍ରେରିତ ସିସୁ ରାସ୍‍ତିମାନି ଆକୁ ପନ୍ତ, ଗାଲାତିଆ, କାପ୍‍ପାଦକିଆ, ଆସିଆ ମାରି ବିତୁନିଆଦି ଦେସ୍‌କାଣି ଇନିଙ୍ଗାଁ ଆନିଙ୍ଗାଁ ଆତିମାନି ଆମା ଲୋକୁ ।
1PE 1:2 ମିର୍‌ ବୁବା ମାପୁରୁଦି ବୁଦିଇସାବ୍‌ତାନ୍‌ ଆସାତିମାନିଦେର୍‍ । ଜିସୁ କ୍ରିସ୍ତଦି ମାଟା ମାନାଜି ୱାନି ନେତେର୍‌ତାନ୍‍ ନେଗେନ୍‌ ଆନି ଉଣ୍ତିଙ୍ଗ୍‌ ମିର୍‌ ଆତ୍ମାଦି ପାଣିଦି ଉଣ୍ତ୍ରି ପବିତ୍ର ଆତିମାନିଦେର୍‌ । ମି ଉଣ୍ତିଙ୍ଗ୍‌ ନାଣ୍ତ୍‌ଦାନ୍‌ ମାପୁରୁଦି ଦୟା ମାରି ସାନ୍ତି ଆପିତ୍‌ ।
1PE 1:3 ମା ପ୍ରବୁ ଜିସୁ କ୍ରିସ୍ତଦି ବୁବା ମାରି ମାପୁରୁଙ୍ଗୁଁ ଦନ୍ୟବାଦ୍‌ ଆପିତ୍‍, ଇରିଙ୍ଗ୍‌ ୱାନ୍‌ ୱାନି ଦୟାଦାନ୍‌ ଜିସୁ କ୍ରିସ୍ତଙ୍ଗ୍‌ ସାତିମାଣୁକୁ ମାରିଡ଼େସିଜିବନ୍‌ କିଜି ମାଙ୍ଗିଁ ପୁନି ଜିବନ୍‌ ସିତାମାନାନ୍‌ । ଇକା ମାଙ୍ଗିଁ ଜିବନ୍‌ତି ଆସାଦୁ ପୁରା କିତାମାନାନ୍‌ ।
1PE 1:4 ମାରି ମାପୁରୁ ତାମି ଲୋକା ଉଣ୍ତିଙ୍ଗ୍‌ ଆମା ନାଣ୍ତଦାରାଦି ଆସିର୍ବାଦ୍‌ ଇଟ୍‌ତାମାନାନ୍‌, ଆକା ପୋଇନି ଉଣ୍ତିଙ୍ଗ୍‌ ମାପୁ ଆସାଦାନ୍‍ ମାନାପ୍ । ଆକା ୱାନ୍‌ ମୁସ୍‌କୁପୁର୍‌ତୁ ମି ଉଣ୍ତିଙ୍ଗ୍‌ ଉଣ୍ତା କିତା ଇଟ୍‌ତାମାନାନ୍‌ । ଆବେନୁ ଆକା ତାଗ୍‌ଏଣ୍‌ ଆଏତ୍‌, ନାସ୍ଟୁ ବା ୱାରାଏତ୍‌ ।
1PE 1:5 ଆମା ରକିୟା ସାରାସାରି କାଡ଼ାଦୁ ୱେଙ୍ଗ୍‌ନି ଉଣ୍ତିଙ୍ଗ୍‌ ତିଆର୍‌ ଆତାମାନାତ୍‌, ଆକା ପୟ୍‍ନି ଉଣ୍ତିଙ୍ଗ୍‍ ମିର୍‌ ବିସ୍‍ବାସ୍‍ତାନ୍ ମାପୁରୁଦି ସାକ୍ତିଦାନ୍‌ ନେଗେନ୍‍ ମାନିଦେର୍‌ ।
1PE 1:6 ଇବେନୁ ମିର୍‌ ୱେଡ଼ିକା କିଜିନିଦେର୍‌, ଜଦିବା ଇଲେଇ ସାଣେକ୍‌ତି ଉଣ୍ତିଙ୍ଗ୍‌ ଏଣ୍ତେସ୍‌ ନାନି କାସ୍ଟୁ ଉଣ୍ତିଙ୍ଗ୍‌ ଦୁଃକ୍‌ବୋଗ୍‌ ବଗାଦେଙ୍ଗ୍‌ ମିଙ୍ଗିଁ ପଡ଼ାନାତ୍‌ ।
1PE 1:7 ମି ବିସ୍‌ବାସ୍‌ତି ନେଗିକା ପରିକା କିନିକା ଇୟା ୱିଜୁଦି ଉଦେସ୍‍ । ୱିଜ୍‌ନି ବାଙ୍ଗାଁରାମ୍‍ତିଙ୍ଗ୍‌ ସିସୁଦୁ ପରିକା କିନାର୍‌ । ମି ବିସ୍‌ବାସ୍‌ ବାଙ୍ଗାଁରାଓ ତାନ୍‌ ନାଣ୍ତ ଦାରା ଆତିମାନିଙ୍ଗ୍‌ ପରିକାଦାନ୍‌ ତାନିଙ୍ଗ୍‌ ପୁରା କିଦେଙ୍ଗ୍‌ ପଡ଼ାନାତ୍‌ । ଜିସୁ କ୍ରିସ୍ତଦି ତରାନି ବେଡ଼ାଦୁ ମିର୍‌ ଦନ୍ୟବାଦ୍‌, ଗୌରବ୍‍ ମାରି ସନ୍‌ମାନ୍‌ ପୟ୍‌ନିଦେର୍‌ ।
1PE 1:8 ମିର୍‌ ୱାନିଙ୍ଗ୍‌ ସୁଡ଼ୁଏଣ୍‌ଗା ଜିବନ୍‌ନୋଜିନିଦେର୍‌, ମାରି, ଇଲେଇବା ସୁଡ଼ୁଏଣ୍‌ଗା ୱାନିମାନୁ ବିସ୍‌ବାସ୍‌ କିଜିନିଦେର୍‌ । ଆମାକା ୱେର୍‌ତେଙ୍ଗ୍‌ ଆଟ୍‌ଇକା ବଲ୍‌ ମାରି ଗୌରବ୍‌ତି ୱେଡ଼ିକା କିଦୁ,
1PE 1:9 ଆୟା ବିସ୍‌ବାସ୍‌ତି ପଲ୍‍ ଜେ ମି ଆତ୍ମାଦି ରକିୟା, ଆକା ପୟ୍‌ତିମାନିଦେର୍‌ ।
1PE 1:10 ମାରି, ଆୟା ରକିୟା ବିସୟ୍‌ତାନ୍‌ ବାବବାଦିର୍‍ ମନ୍‍ସିଜି ପୟ୍‌ଜି ମାରି ପୟ୍‍ଜି ମାପୁରୁଙ୍ଗୁଁ, ମି ଉଣ୍ତିଙ୍ଗ୍‌ ମାପୁରୁଦି କିତିମାର୍ହି ଦାନ୍‍ ବିସୟ୍‌ତାନ୍‌ ବାବବାଣି ୱେର୍‌ତା ମାର୍ହାର୍‌ ।
1PE 1:11 ଆୟା ଦାନ୍‍ ମିର୍‌ ଏସ୍‌କାଙ୍ଗ୍‌ ମାରି ଏଣ୍ତେସ୍‌ ପୟ୍‌ନିଦେର୍‌, ନେସ୍‌ତେଙ୍ଗ୍‌ ଇଜି ୱାର୍‌ ସେସ୍ଟା କିଜିମାର୍ହାର୍‌ । ଇୟା ବିସୟ୍‌ତାନ୍‌ ପବିତ୍ର ଆତ୍ମାଦି ସାକାଦାନ୍‌ ୱାର୍‌ କ୍ରିସ୍ତଙ୍ଗ୍‌ ଦୁଃକ୍‌କାସ୍ଟୁ ମାରି ୱେନ୍‌କାରି ଗୌରବ୍‌ ପୟ୍‌ନି ବିସୟ୍‌ତାନ୍‌ ୱେର୍‌ତା ମାର୍ହାର୍‌ ।
1PE 1:12 ଇୟାୱିଜୁ ବିସୟତାନ୍‌ ୱାର୍‌ ଜେ ନିଜେ ନିଜେଦି ସେବା କିଏଣ୍‌ଗା ମି ସେବା କିଜିମାର୍ହାର୍‌, ଇକା ବାବବାଦିରି ଲାକ୍‌ତୁ ୱେଙ୍ଗିଁତା ମାର୍ହାତ୍‌, ମାରି, ଆୟାୱିଜୁ ବିସୟ୍‌ ମୁସ୍‌କୁପୁର୍‌ତାନ୍‌ ପୋକ୍‌ତାତିମାନି ପବିତ୍ରଆତ୍ମାଦି ସାକ୍ତିଦାନ୍‌ ଇଲେଇ ଆମା କାବୁର୍‌ୱେର୍‌ନିକାର୍‌ ନେଗିକାବୁର୍‍ ୱେର୍‍ସିନାର୍‌, ମିର୍‌ ଇଲେଇ ୱାରିମାଣୁକୁ ଆୟାୱିଜୁ ମାଟା ୱେନ୍‌ଞ୍ଜିନିଦେର୍‌, ଇୟାୱିଜୁ ବିସୟ୍‌ତି ଅର୍ତ ବୁଜାନି ଉଣ୍ତିଙ୍ଗ୍‌ ମୁସ୍‌କୁପୁର୍‌ତି ଦୁତ୍‌କୁ ବା ବଦା କିନେ ।
1PE 1:13 ମାରି, ପାଣି କିଦେଙ୍ଗ୍‍ ଜାଗାର୍‌ତା ମାନ୍‌ଡ୍ରୁ, ଜାଗାର୍‍ତା ମନ୍‍ତୁ ମାନ୍‍ଜି ଜିସୁ କ୍ରିସ୍ତ ୱାନି ବେଡ଼ାଦୁ ଆମା ଆସିର୍ବାଦ୍‌ ମି ଉଣ୍ତିଙ୍ଗ୍‌ ସିଆୟ୍‍ ଆନାତ୍‌, ତାନି ମୁସ୍‌କୁ ପୁରା ଆସା ଇଡ୍‌ଦୁ ।
1PE 1:14 ମାପୁରୁଦି ମାଟା ଆସ୍‌ତୁ । ମି ଆଗ୍‌ଡ଼ି ଆମା ଆସାଦୁ ପୁରା ଆତିମାର୍‌ଇଦେର୍‌, ଆୟାୱିଜୁ ଦାନ୍‌ ମି ଜିବନ୍‌ ମାରି ସାଲାମାକିତ୍‌ ।
1PE 1:15 ମାତର୍‌ ମିଙ୍ଗିଁ କୁକ୍‌ନିମାଲିକ୍‌ ଏଣ୍ତେସ୍‌ ପବିତ୍ର, ମିର୍‌ ବା ନିଜେ ନିଜେଦି ପାଣିଦୁ ଆୟାୱାଜା ପବିତ୍ର ଆଦୁ ।
1PE 1:16 ସାସ୍ତ୍ରଦୁ ରାସ୍‌ତାମାନାତ୍‌, “ମିର୍‌ ପବିତ୍ର ଆଦୁ, ଇରିଙ୍ଗ୍‌ ମାପୁ ପବିତ୍ର ।”
1PE 1:17 ମାରି ମାପୁରୁ ମକମ୍‌ ସୁଡ଼ୁଏଣ୍‌ଗା ୱିଜୁ ଲୋକାଦି ପାଣିକିତିମାନି ଇସାବ୍‌ତାନ୍‌ ବିଚାର୍‌ କିନାନ୍‌, ମିର୍‌ ୱାନି ଲାକ୍‌ତୁ ପାର୍‌ତାନା କିନିୱାଲେ ୱାନିଙ୍ଗ୍‌ ବୁବା ଇଜି ସନ୍‌ମାନ୍‌ କିଜିମାନିଦେର୍‌, ମାରି, ଇୟା ଦୁନିଆଦୁ ମି ଜିବନ୍‌ତି ନେଗି ବେଡ଼ା ୱାନିଙ୍ଗ୍‌ ମାନାଜି ତିଲାଜି ଜିଜିମାଡ଼ିଦୁ ।
1PE 1:18 ମିର୍‌ ନେସ୍‌ନିଦେର୍‌ ଜେ, ମି ପୁର୍ବେଦିଡକ୍‌ରା ଦାଦାରିମାଣୁକୁ ୱାତିମାନି ନିତିନିୟ୍‌ମ ଜିବନ୍‌ତାନ୍‌ ମିଙ୍ଗିଁ ମୁକ୍‍ଡ଼ା କିନି ଉଣ୍ତିଙ୍ଗ୍‌ ମାପୁରୁ ଏସ ଡାବୁଙ୍ଗ୍‌ ସିଦେଙ୍ଗ୍‌ ପଡ଼ାତାମାର୍ହାତ୍‌, ଆକା ୱିଜ୍‌ନି ୱେଣ୍ତି ନି ବାଙ୍ଗାଁରାମ୍‍ ଆଏତ୍‌ ।
1PE 1:19 ମାତର୍‌ ଆକା ଦସ୍‍ସିଲେଣ୍‌ଗା ମାରି ସିନାସିଲି ମେଣ୍ତା ପିଲା ୱାଜା କ୍ରିସ୍ତଦି ନାଣ୍ତ୍‌ଦାରାଦି ନେତେର୍‌ତାନ୍‍ ମୁକ୍‍ଡ଼ାତି ମାନିଦେର୍‌ ।
1PE 1:20 ୱାନ୍‌ ଦୁନିଆ ତିଆର୍‌ଆତି ଆଗ୍‌ଡ଼ିରାନ୍‌ନେ ମାପୁରୁଦି ମାଣୁକୁ ଆସ୍‌କିଆୟାଆତା ମାର୍ହାନ୍‌ ମାରି ମି ଉଣ୍ତିଙ୍ଗ୍‌ ଇୟା ସାରାସାରିକାଡ଼ାଦୁ ୱେଙ୍ଗିଁତା ମାନାନ୍‌ ।
1PE 1:21 ଆମା ମାପୁରୁ ୱାନିଙ୍ଗ୍‌ ସାତିଲୋକାମାଣୁକୁ ନିକ୍‍ସି ଗୌରବ୍‍ନିତ କିତାମାନାନ୍‌, ଆୟା ମାପୁରୁମାନୁ ମିର୍‌ ୱାନି ମାଣୁକୁ ବିସ୍‌ବାସ୍‌ କିତିମାନିଦେର୍‌, ଆଦେଙ୍ଗ୍‌ ମାପୁରୁ ମି ବିସ୍‌ବାସ୍‌ ମାରି ଆସା ଡାଟ୍‌ ଆତାମାନାନ୍‌ ।
1PE 1:22 ଇଲେଇ ମିର୍‌ ସତ୍‍ତି ସାରିତରିନ୍‌ ବୁଲାଜିମାନିଙ୍ଗ୍‌ ନିଜେ ନିଜେଦିଙ୍ଗ୍‌ ନେଗେନ୍‌ କିଆତିମାନିଦେର୍‌ ମାରି ବିସ୍‌ବାସ୍‌ତି ତଡ଼ାନ୍‌କାଙ୍ଗ୍‌ ଜିବନ୍‌ ନୋଦେଙ୍ଗ୍‌ ବଦା ମାନାତ୍‌ । ନିଜେନିଜେଦିଙ୍ଗ୍‌ ଜିବନ୍‌ତାନ୍‌ ଜିବନ୍‍ନୋଦୁ ।
1PE 1:23 ଇରିଙ୍ଗ୍‌ ମାପୁରୁଦି ଜିବନ୍‌ମାନିକା ମାରି ୱିଜୁଦିନ୍‌ତି ବାକ୍ୟ ଦାନ୍‌ ମିର୍‌ ଆମା ସାନିନାନି ବୁବାଦି ମାରିନ୍‌ ୱାଜା ସିଲେ, ମାତର୍‌ ୱିଜୁଦିନ୍‌ତିଙ୍ଗ୍‌ ମାନି ବୁବାଦି ମାରିନ୍‌ ୱାଜା ମାରିଡ଼େସି ଜନମ୍‍ ପୟ୍‌ତି ମାନିଦେର୍‌ ।
1PE 1:24 ସାସ୍ତ୍ରଦୁ ରାସ୍‌ତାମାନାତ୍‌ : “ଇରିଙ୍ଗ୍‌ ୱିଜୁ ଲୋକା ଜାତି ଲାଟା ୱାଜା, ୱାରି ୱିଜୁ ସବା ବନ୍‍ତି ପୁଙ୍ଗୁଁ ୱାଜା; ଲାଟା ୱାର୍‌ନା ସୋନାତ୍‌, ମାରି ପୁଙ୍ଗୁଁ ରାଲ୍‌ନାସୋନାତ୍‌,
1PE 1:25 ମାତର୍‌ ମାପୁରୁଦି ବାକ୍ୟ ୱିଜୁଦିନ୍‌ତିକା ।” ଇୟା ନେଗିକାବୁର୍‍ ଆମାକା ମି ଲାକ୍‌ତୁ ପ୍ରଚାର୍‌ ଆତାମାନାତ୍‌ ।
1PE 2:1 ମାରି, ପ୍ରବୁ ଜେ ନେଗିକାନ୍‍, ଇକା ଜଦି ୱେଟି ମାନିଦେର୍‍, ଆର୍‍ତିଙ୍ଗ୍‍ଁ ୱିଜୁ ରକମ୍‍ତି ତାଗ୍‌ଇକା, ମିଚ୍‌ୱେର୍‌ନିକା ମାରି ଟକେକିନିକା, ଆକାର୍‍ ମାରି ଆଇୱାରିଙ୍ଗ୍‌ ନିନ୍ଧାକିନିକା ଡ଼ିସ୍‌ସି ।
1PE 2:2 ଆଲ୍‌ଜନମ୍‌ଆତି କଡ଼ ୱାଜା ଆଦୁ, ୱିଜୁଦିନ୍ ପୁରାନେଗି ଦିନ୍‌କେରି ଆତ୍ମିକ ପାଲ୍‌ ଉଣ୍ତେଙ୍ଗ୍‌ ଇଜି ଏର୍‌କି ସାଦୁ । ଆର୍‌ତିଙ୍ଗ୍‌, ମିର୍‌ ପିର୍‍ଜି ରକିୟା ପୟ୍‌ନିଦେର୍‌ ।
1PE 2:3 ସାସ୍ତ୍ରଦୁ ରାସ୍‌ତାମାନାତ୍‌, “ମାପୁରୁ ଜେ ଏଣ୍ତେସ୍‌ ନେଗିକାନ୍‌, ଆକା ମିର୍‌ ନିଜେଦି ମୋନ୍‌ତାନ୍‌ ନେସ୍‌ତିମାନିଦେର୍‌ ।”
1PE 2:4 ମିର୍‌ ଆମା ଜିବନ୍‌ମାନି କାଲୁ ୱାଜା ମାପୁରୁ ଦାରାସିଲିକା ଅଡ଼୍‍ବିଜି ଡ଼ିସ୍‌ତାର୍‌, ୱାନି ଲାକ୍‌ତୁ ରାଦୁ, ଇରିଙ୍ଗ୍‌ ୱାନ୍‌ ମାପୁରୁଦି ଲାକ୍‌ତୁ ଆସ୍‌କିଆୟ୍‌ଆତାମାନାନ୍‌ ମାରି ନାଣ୍ତ୍‌ଦାରା ମାନାନ୍‌ ।
1PE 2:5 ମିର୍‌ ଉନ୍‌ଡ୍ରି ଜିବନ୍‌ତି ମନ୍ଦିର୍‌ ତିଆର୍‌କିଦେଙ୍ଗ୍‌ ଜିବନ୍‌ମାନି କାଲୁ ୱାଜା ବ୍ୟବ୍‌ହାର୍‌ ଆନି ଉଣ୍ତିଙ୍ଗ୍‌ ରାଦୁ । ଆୟା ମନ୍ଦିର୍‌ତୁ ମିର୍‌ ଜିସୁ କ୍ରିସ୍ତଦି ମାଣାନ୍‍ ମାପୁରୁ ଆତ୍ମିକ ଆସ୍‍ନିନାନି ଦିନ୍‌କେରି ପୁଜା ସିନି ଉଣ୍ତିଙ୍ଗ୍‌ ପବିତ୍ର ଜାଜକଦି ପାଣି କିନିଦେର୍‌ ।
1PE 2:6 ଦାର୍ମୁସାସ୍ତ୍ରଦୁ ଇୟାୱାଜା ରାସ୍‌ତାମାନାତ୍‌ : “ମାପ୍‌ ଉନ୍‌ଡ୍ରି ନାଣ୍ତ୍‌ଦାରାଦି କାଲୁ ଆସ୍‌କିତାମାନାପ୍‌; ଆକା ମାପ୍‌ ସିୟୋନ୍‌ଦି ମୁଲ୍‌କାଲୁ ୱାଜା ତିଆର୍‌ କିଜିନାପ୍‌ । ମାରି ଏନ୍‌ ୱାନିମାନୁ ବିସ୍‌ବାସ୍‌ କିନାନ୍‌, ୱାନ୍‌ ଏସ୍‌କାଙ୍ଗ୍‌ ମୁଲ୍‍ଙ୍ଗୁଁମାଲାଙ୍ଗ୍‍ଁ ଆଏନ୍‌ ।”
1PE 2:7 ମିର୍‌ ବିସ୍‍ବାସ୍‍ କିତିମାନିଙ୍ଗ୍‌ ମି ଉଣ୍ତିଙ୍ଗ୍‌ ଇୟା କାଲୁ ନାଣ୍ତ ଦାରା । ମାତର୍‌ ଅବିସ୍‌ବାସ୍‌ତି ଲୋକା ଉଣ୍ତିଙ୍ଗ୍‌ : “ଆମା କାଲୁଦିଙ୍ଗ୍‌ ଇଲୁକୁ ତିଆର୍‌କିନିକାର୍‌ ସିଲେ ଇଜି ଲାତ୍‍ ଡାକ୍‍ତାର୍‌, ଆକା ୱିଜୁମାଣୁକୁ ପେରି ଦର୍‍କାର୍‍ତି କାଲୁ ଆତାତ୍‌ ।”
1PE 2:8 ମାରି ପବିତ୍ର ସାସ୍ତ୍ରଦୁ ଆଇ ଉନ୍‌ଡ୍ରି ବାଡିଦୁ ରାସ୍‌ତାମାନାତ୍‌ : “ଇୟା କାଲୁ ମୁସ୍‌କୁ ଗାଦିଲୋକୁ ତାକାୟ୍‌ଆନାର୍‌, ଇୟା କାଲୁପିଲା ୱାରି ସାରିଦି ବାଦାନିକା ଆନାତ୍‌ ।” ୱାର୍‌ ମାପୁରୁଦି ବାକ୍ୟଦୁ ବିସ୍‌ବାସ୍‌ କିଏତାର୍‌, ଆଦେଙ୍ଗ୍‌ ୱାର୍‌ ତାକାୟ୍‌ଆତାର୍‌ । ଇକା ମାର୍ହାତ୍‌ ୱାରି ଉଣ୍ତିଙ୍ଗ୍‌ ମାପୁରୁଦି ବଦା ।
1PE 2:9 ମିର୍‌ ଉନ୍‌ଡ୍ରି ଆସ୍‌କିଆୟ୍‌ଆତିମାନି କୁଟୁମ୍‌, ରାଜାଦି ଜାଜକ ଇଲୁ, ଉନ୍‌ଡ୍ରି ପବିତ୍ର ଜାତି ମାରି ମାପୁରୁଦି ନିଜେଦି ଲୋକୁ ଆତିମାନିଦେର୍‌ । ମାପୁରୁ ମିଙ୍ଗିଁ ସିକାଟିଦାନ୍‌ ନିଜେଦି କାବାଆନି ଜାୟ୍‌ତୁ କୁକ୍‌ତାମାନାନ୍‌ । ମିର୍‍ ୱାନି କାବାଆନି ପାଣି ୱିଜୁ ୱେର୍‍ତେଙ୍ଗ୍‍ ଇଜି କୁକାତିମାନିଦେର୍‍ ।
1PE 2:10 ପୁର୍ବେ ମିର୍‌ ମାପୁରୁଦି ଲୋକ୍‌ ଆଏତିମାରିଇଦେର୍‌, ମାତର୍‌ ଇଲେଇ ମାପୁରୁଦି ଲୋକ୍‌ ଆତିମାନିଦେର୍‌ । ପୁର୍ବେ ମିର୍‌ ମାପୁରୁଦି ଦୟା ବିସୟ୍‌ତାନ୍‌ ନେସ୍‌ଏତି ମାର୍‌ଇଦେର୍‌, ମାତର୍‌ ଇଲେଇ ୱାନି ଦୟା ପୟ୍‌ତି ମାନିଦେର୍‌ ।
1PE 2:11 ଏ ନା ତଡ଼୍‍କୁ ନି ତାଙ୍ଗିଁକ୍‍, ମିର୍‌ ଇୟା ଦୁନିଆଦୁ ଆଇ ଦେସ୍‌ ମାରି ୱାଜି ତେବାନିଲୋକୁ ଇଜି ନାନ୍ ମିଙ୍ଗିଁ ଅନୁରୋଦ୍‌ କିଜିନା, ମିର୍‌ ମେନ୍ଦଲ୍‍ତି ଆସାଦାନ୍‍ ଆକ ଆଦୁ, ଆୟାୱିଜୁ ଆତ୍ମାଦି ବିରୁଦ୍‌ତାନ୍‌ ଜୁଦ୍‍ କିନାତ୍‌ ।
1PE 2:12 ମିର୍‌ ଅଣଜିହୁଦି ଲାକ୍‍ତୁ ନେଗେନ୍‍ତାନ ସାଲାବୁଲା କିଦୁ, ଏଣ୍ତେସ୍‌ ୱାର୍‌ ଆମା ବିସୟ୍‌ତାନ୍‌ ମିଙ୍ଗିଁ ତାଗ୍‌ଇପାଣିକିନିକାର୍‌ ଇଜି ନିନ୍ଦା କିନାର୍‌, ମି ନେଗିପାଣି ସୁଡ଼ୁଜି କ୍ରିସ୍ତଦି ୱାନିଦିନ୍‌ତୁ ମାପୁରୁଦି ଦନ୍ୟବାଦ୍‌ କିନାର୍‌ ।
1PE 2:13 ପ୍ରବୁଦି ଦର୍‌ତାନ୍‌ ଅନୁରୋଦ୍‌ କିଜିନା, ୱିଜୁ ସାସନ୍‍କିନିୱାରିଙ୍ଗ୍‍ଁ ମାନାଦୁ, ଦେସ୍‌ତି ୱିଜେରିଙ୍ଗ୍‌ ପେରିସାସନ୍‌କିନି ରାଜାଦିଙ୍ଗ୍‌ ମାରି ଆଇଆଇ ସାସନକିନିପେରିୱାରିଙ୍ଗ୍‌ ମାନାଦୁ,
1PE 2:14 ମାରି ସାସନ୍‍କିନିକାର୍‍ ସାସ୍ତି ସିନି ଉଣ୍ତିଙ୍ଗ୍‌ ମାରି ନେଗିପାଣି କିଜିମାନି ଲୋକାଙ୍ଗ୍‌ ଦନ୍ୟବାଦ୍‌ କିନି ଉଣ୍ତିଙ୍ଗ୍‌ ରାଜାଦି ମାଣୁକୁ ବାସେଆତା ମାନାର୍‌ ।
1PE 2:15 ମାପୁରୁଦି ବଦା, ମିର୍‌ ଜେ ନେଗିପାଣି କିଜି ବୁଦିସିଲିୱାରି ୱାର୍‌ଇ ମାଟେଆଙ୍ଗ୍‌ ତେବା କିଦୁ ।
1PE 2:16 ମିର୍‌ ମୁକ୍‍ଡ଼ାତି ଲୋକା ୱାଜା ଜିଜି ମାଡ଼ିଦୁ । ମାତର୍‌ ମୁକ୍‍ଡ଼ାତି ଉଣ୍ତିଙ୍ଗ୍‍ ତାଗ୍‌ଇ ପାଣି କିମାଟ୍‌ । ମାରି ମାପୁରୁଦି କଟିମାନି ଗତିମୁରୁଲି ୱାଜା ଜିଜି ମାଡ଼ିଦୁ ।
1PE 2:17 ୱିଜେରିଙ୍ଗ୍‌ ମାନାଦୁ, ୱିଜୁ କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌କାଙ୍ଗ୍‌ ନି ତାଙ୍ଗିଁକାଙ୍ଗ୍‌ ଜିବନ୍‍ନୋଦୁ, ମାପୁରୁଙ୍ଗ୍‌ଁ ତିଲାଦୁ, ରାଜେଙ୍ଗ୍‌ ମାନାଦୁ ।
1PE 2:18 ଏ ସାକର୍‌କୁ, ମିର୍‌ ତିଏଲ୍‌ତାନ୍‌ ନିଜେ ନିଜେଦି ମାଲିକ୍‌କା ଆଡ୍‍ଗି ତେବାଦୁ, କେବଲ୍‌ ନେଗିକାର୍‌ ମାରି ଦୟାଲୁ ମାଲିକ୍‌କାଙ୍ଗ୍‌ ସିଲେ, ମାତର୍‌ ଦୟାକିଇ ୱାରିଙ୍ଗ୍‌ ବା ନେଗେନ୍‌ ମାନାଦୁ ।
1PE 2:19 ମିର୍‌ ମାପୁରୁଦି ବଦା ନେସ୍‌ତି ମାର୍‌ରିଙ୍ଗ୍‌ ବା ଅନ୍ୟାୟ୍‌ତାନ୍‌ ସାସ୍ତି ପୟ୍‌ଜି କାସ୍ଟୁ ସାସ୍‌ କିନିଦେର୍‌, ଆର୍‌ତିଙ୍ଗ୍‌ ମାପୁରୁ ମିଙ୍ଗିଁ ଆସିର୍ବାଦ୍‌ କିନାନ୍‌ ।
1PE 2:20 ମିର୍‌ ନିଜେ ନିଜେଦି ଦସ୍‌ତାନ୍‌ ଜଦି ଦଣ୍ତ୍‌ବୋଗ୍‌ ପୟ୍‌ତିଙ୍ଗ୍‌, ଆର୍‌ତିଙ୍ଗ୍‌ ଆବେନୁ ଦନ୍ୟବାଦତି ଇନି ମାଟା ମାନାତ୍‌ ? ମାତର୍‌ ନେଗି ପାଣି କିଜିବା ସାସ୍ତି ପୟ୍‌ନିଦେର୍‌, ଆର୍‌ତିଙ୍ଗ୍‌ ମାପୁରୁ ମିଙ୍ଗିଁ ଆସିର୍ବାଦ୍‌ କିନାନ୍‌ ।
1PE 2:21 ମାପୁରୁ ଇୟା ବଦାଦାନ୍‌ ମିଙ୍ଗିଁ କୁକ୍‌ତାମାନାନ୍‌ । କ୍ରିସ୍ତ ନିଜେ ମି ଉଣ୍ତିଙ୍ଗ୍‌ ଦୁଃକ୍‌ବୋଗ୍‌ କିଜି ମିଙ୍ଗିଁ ଉନ୍‌ଡ୍ରି ସାରି ତର୍‌ତାମାନାନ୍‌, ଏଣ୍ତେସ୍‌ ମିରୁ ୱାନି ପାଦାମ୍‍ସିନା ସିଜି ୱେନ୍‌କାସନିଦେର୍‌ ।
1PE 2:22 ୱାନ୍‌ ଇନି ପାପ୍‌ କିଏନ୍‌ ମାର୍ହାନ୍‌, ମାରି ୱାନି ୱେୟୁଦାନ୍‌ ମିଚ୍‌ ମାଟା ୱେର୍‌ନିକା ଏନ୍‌ ଏସ୍‌କାଙ୍ଗ୍‌ ୱେନ୍‌ଏନ୍‌ ମାର୍ହାନ୍‌ ।
1PE 2:23 ୱାନ୍‌ ନିଦା ଆନି ୱାଲେ ଡ଼େସି ନିନ୍ଦାମାଟା ୱେର୍‍ଏତାନ୍; ୱାନ୍‌ ଦୁଃକ୍‌ବୋଗ୍‌ କିନିୱାଲେ ବାଦ୍‍ଲା ଅତେଙ୍ଗ୍‌ ତିଲିସ୍‌କିଏନ୍‌ ମାର୍ହାନ୍‌; ମାତର୍‌ ନ୍ୟାୟ୍‌ ବିସାର୍‌କିନି ମାପୁରୁଦି ମୁସ୍‌କୁ ପୁରା ଆସା ଇଟ୍‌ତାମାର୍ହାନ୍‍ ।
1PE 2:24 ମାପ୍‌ ଏଣ୍ତେସ୍ ପାପ୍‌ତି ଉଣ୍ତିଙ୍ଗ୍‌ ସାଜି ମାରି ଦାର୍ମୁଦି ଉଣ୍ତିଙ୍ଗ୍‌ ଜିଜି ମାଡ଼ିନାପ୍‌, ଇୟାଉଣ୍ତିଙ୍ଗ୍‌ କ୍ରିସ୍ତ ନିଜେ କ୍ରୁସ୍‌କାଟ୍‌ ମୁସ୍‌କୁ ନିଜେଦି ମେନ୍ଦଲ୍‌ତାନ୍‌ ମା ୱିଜୁ ପାପ୍‌ ବଜୁ ପିଣ୍ତିତାନ୍‌ । ୱାନି ମେନ୍ଦଲ୍‌ତି ଆୟା ଗାଉତି ମାଣୁକୁ ମିର୍‌ ନେଗେନ୍‌ ଆତିମାନିଦେର୍‌ ।
1PE 2:25 ଇରିଙ୍ଗ୍‌ ମିର୍‌ ମେଣ୍ଡେଙ୍ଗ୍‌ ୱାଜା ସାରିବାଣାତି ମାର୍‌ଇଦେର୍‌, ମାତର୍‌ ଇଲେଇ ମି ମେଣ୍ତେଙ୍ଗ୍‌ଗାଉଡ଼ୁ ମାରି ଆତ୍ମାଦି ରକିୟାକିନିୱାନି ୱେନ୍‌କା ସନି ଉଣ୍ତିଙ୍ଗ୍‌ ଡ଼େସି ୱାତିମାନିଦେର୍‌ ।
1PE 3:1 ଇୟାୱାଜା ଏ ଆଇମେକ୍‍ ! ମିରୁ ମି କନ୍‌ଲିରିଙ୍ଗ୍‌ ମାନାଦୁ । ଆର୍‌ତିଙ୍ଗ୍‌, ଜଦି ମାପୁରୁଦି ବାକ୍ୟଦୁ ବିସ୍‌ବାସ୍‌ କିଏଜି ମାନାନ୍‌, ଆର୍‌ତିଙ୍ଗ୍‌ ମି ବୁଲାସାଲାନି ମାଣୁକୁ ଆୟା ବାକ୍ୟ ଉଣ୍ତିଙ୍ଗ୍‌ ୱାନି ବିସ୍‌ବାସ୍‌ ପିର୍‌ନାତ୍‌ । ମିର୍‌ ପଦ୍‌କେ ବା ଇନିକା ଇନ୍‌ଡ୍ରେଙ୍ଗ୍‌ ଦର୍‌କାର୍‌ ସିଲେତ୍‌ ।
1PE 3:2 ଇରିଙ୍ଗ୍‌ ମି ନେଗି ବୁଲାସାଲାନିକା ମାରି ଦାର୍ମୁ ଜିବନ୍‌ ୱାର୍‌ ସୁଡ଼ୁନାର୍ ।
1PE 3:3 କୁକୁଟି ତିଆର୍‌ଆନିକା, ନିଜେ ରଜ୍‍ନିକା, ନେଗି ୱାତିଗନ୍ଦା ଆରାନିକା, ବାଙ୍ଗାଁରାମ୍‍ ଆରାନିକା ୱିଜୁ ଆତ୍‌ରେ ତିଆର୍‌ମିଆର୍‌ ଆଜି ନିଜେଦି ସବା ତର୍‌ନିକା ମିରୁ କିଇକାମାନାତ୍‌ ।
1PE 3:4 ସତ୍‌ତି ସୁନ୍ଦର୍‌ ଆଜିନାତ୍‌, ମି ଜିବନ୍‌ତି ଦାର୍ମୁ ମାରି ସାନ୍ତି ମାର୍‌ଗିତିମାନିକା ସୁନ୍ଦର୍‌ ମାପୁରୁଦି କାଣେକେଆଙ୍ଗାଁ ୱିଜୁଦିମାଣୁକୁ ନାଣ୍ତ୍‌ନେଗିକା ।
1PE 3:5 ପୁର୍ବେକାଡ଼ାଦୁ ଆମା ଦାର୍ମୁଦି ଆଇମେକ୍‍ ମାପୁରୁଦିମାନୁ ଆସା ଇଟ୍‌ତେମାରେଏ, ୱାକୁ ନିଜେଦି କନ୍‍ଲିରିଙ୍ଗ୍‍ଁ ମାନାନିମାଣାନ୍‍ ନିଜେଦିଙ୍ଗ୍‍ଁ ନେଗେନ୍‌ ତିଆର୍‌ ଆଜି ମାର୍‌ଏ ।
1PE 3:6 ସାରା ଆୟାୱାଜା ଅରେତ୍‌ ଆଇମା ମାର୍ହାତ୍ । ୱାଦ୍‌ ଅବ୍ରାହାମ୍‌ଦି ମାଟା ମାନାଜି ୱାନିଙ୍ଗ୍‌ ପ୍ରବୁ ଇଜି ମାନାଜିମାରାତ୍‌ । ମିରୁ ଇଲେଇ ତାନି ଗାଡ଼୍‌ସିକ୍‌ । ଜଦି ମାନାତିଙ୍ଗ୍‌, ଆର୍‌ତିଙ୍ଗ୍‌, ଇନି ବିସୟ୍‌ ମିଙ୍ଗିଁ ମାରି ତିଲିସ୍‌ କିଦେଙ୍ଗ୍‌ ଆଟ୍‌ଏତ୍‌ ।
1PE 3:7 ଏ କନ୍‌ଲିର୍‌, ଆୟାୱାଜା ମି ଆଡ଼ିକାଙ୍ଗ୍‌ ସାକିସିଲି ତଡ଼୍‍ ଇଜି ନେସ୍‌ସି ୱାନିକା ଉଣ୍ତିଙ୍ଗ୍‌ ସାସ୍‌ ଆସ୍‌ସି ତେବାଦୁ । ୱାନିକାଙ୍ଗ୍‌ ମାନାଦୁ । ୱାକ୍‌ ବା ମି ୱାଲେ ମାପୁରୁମାନୁ ଜିବନ୍‌ନୋନି ଦୟାଦାନ୍‌ ପଇନେ । ମିରୁ ୱାନିକା ଉଣ୍ତିଙ୍ଗ୍‌ ନେଗେନ୍‌ତାନ୍‌ ସୁଡ଼ୁତିଙ୍ଗ୍‌, ମି ପାର୍‍ତନା ଏଣ୍ତେସ୍‌ ବାଦା ଆଏତ୍‌ ।
1PE 3:8 ସାରାସାରିୱେନ୍‌କା, ମିର୍‌ ୱିଜେରେ ଉନ୍‍ଡ୍ରେମୋନ୍‌ ଆଦୁ, ନିଜେନିଜେଦି ସୁକ୍‌ଦୁଃକ୍‌ତୁ ଅର୍‌ସେ ତେବାନିକା, ତଡ଼ାନ୍‌ତିଙ୍ଗ୍‌ ଜିବନ୍‌ନୋନିକା, ସିତ୍‌ଡ଼ି ଜିବନ୍‌ ମାରି ସାନ୍ତି ଆଦୁ;
1PE 3:9 ନିସ୍ଟୁର୍‌ ବାଦ୍‌ଲୁ ନିସ୍ଟୁର୍‌ କିମାଟ୍‌, ଆନାଦୁରିଆ ବାଦ୍‌ଲୁ ଆନାଦୁରିଆ ଇଡ୍‌ମାଟ୍‌; ତାନି ବାଦ୍‌ଲୁ ଆସିର୍ବାଦ୍‌ କିଦୁ, ଇରିଙ୍ଗ୍‌ ଇୟାଉଣ୍ତିଙ୍ଗ୍‌ ମାପୁରୁ ମିଙ୍ଗିଁ କୁକ୍‌ତାମାର୍ହାନ୍‌ ମାରି ଇକା କିନି ମାଣୁକୁ ମିରୁ ଆସିର୍ବାଦ୍‌ ପୟ୍‌ନିଦେର୍‌ ।
1PE 3:10 ସାସ୍ତ୍ରଦୁ ରାସ୍‌ତାମାନାତ୍‌, “ଜଦି ଏନ୍‌ ଜିବନ୍‌ତୁ ସୁକ୍‌ବୋଗ୍‌ କିଦେଙ୍ଗ୍‌ ମାରି ସୁକ୍‌ତି ଦିନ୍‌ ସୁଡ଼ୁଦେଙ୍ଗ୍‌ ବଦା କିନାନ୍‌, ୱାନ୍‌ ତାଗ୍‌ଇ ମାଟେଙ୍ଗ୍‌ ଇନ୍‌ମାକିନ୍‌ ମାରି ବାଣ୍ତିସ୍‍ ମାଟେଙ୍ଗ୍‍ ୱେର୍‍ତେଙ୍ଗ୍‍ ଆଲ୍‌ଜମାନିନ୍‌ ।
1PE 3:11 ୱାନ୍‌ ତାଗ୍‌ଇପାଣିଦାନ୍‌ ଆକ ମାନ୍‌ଞ୍ଜି ସତ୍‍ପାଣି କିପିନ୍‌; ମାରି ଜିବନ୍‌ତି ୱାଲେ ସାନ୍ତି ପାଣି ପଇନି ।
1PE 3:12 ଇରିଙ୍ଗ୍‌ ଦାର୍ମୁଦିଲୋକା ଉଣ୍ତିଙ୍ଗ୍‌ ପ୍ରବୁଦି ସାକା ମାନାତ୍‌ ମାରି ୱାରି ପାର୍‍ତନା ୱେନାନ୍‌; ମାତର୍‌ ୱାନ୍‌ ତାଗ୍‌ଇୱାରିଙ୍ଗ୍‌ ବିରୁଦ୍‌ କିନାନ୍‌ ।”
1PE 3:13 ମାରି ମିର୍‌ ଜଦି ସତ୍‍ପାଣି କିଦେଙ୍ଗ୍‌ ମୋନ୍‌ ସିନିଦେର୍‌, ଆର୍‌ତିଙ୍ଗ୍‌ ଏନ୍‌ ମିଙ୍ଗିଁ ନିସ୍ଟୁର୍‌ କିନାନ୍‌ ?
1PE 3:14 ଦାର୍ମୁଦି ଉଣ୍ତିଙ୍ଗ୍‌ ମିରୁ ଦୁଃକ୍‌କାସ୍ଟୁ ପୟ୍‌ତିଙ୍ଗ୍‌ ବା ମିର୍‌ ସତ୍‌ତାନ୍‌ ସୁକ୍‌ମାନିଦେର୍‌ । ଏଙ୍ଗ୍‌ବା ତିଲାମାଟ୍‌; ଆର୍‍ଏ ସିନ୍ତା କିମାଟ୍‌ ।
1PE 3:15 ମାତର୍‌ ଜିବନ୍‌ତାନ୍‌ କ୍ରିସ୍ତଙ୍ଗ୍‌ ମାନାଜି, ୱାନିଙ୍ଗ୍‌ ପ୍ରବୁ ଇଜି ମାନାଦୁ । ଜଦି ଏନ୍‌ ମିମାନୁ ମାନି ଆସାଦି ମାଟା ବିସୟ୍‌ତାନ୍‌ ୱେନ୍‌ବାନାନ୍‌, ୱାନିଙ୍ଗ୍‌ ମାଟା ସିଦେଙ୍ଗ୍‌ ୱିଜୁଦିନ୍ ଜାଗାର୍‌ତା ମାନ୍‍ଡ୍ରୁ ।
1PE 3:16 ମାତର୍‌ ସାନ୍ତିଦାନ୍‌ ମାରି ତିଏଲ୍‌ତାନ୍‌ ନେଗି ବୁଦିଦାନ୍‌ ମାଟା ୱେର୍‌ତୁ । ମି ବୁଦିଦିଙ୍ଗ୍‌ ନେଗେନ୍‍ ଇଡ୍‌ଦୁ । ଆର୍‌ତିଙ୍ଗ୍‌, ମିରୁ କ୍ରିସ୍ତଦି ୱେନ୍‌କାସନିୱାଜା ପାଣି କିଜିମାନିୱାଲେ, ଆମାକାର୍‌ ମି ବାଣ୍ତିସ୍‍ ମାଟା ୱେର୍‌ନାର୍‌, ଆବେନୁ ୱାର୍‌ ସେମାର୍‌ ଆନାର୍‌ ।
1PE 3:17 ମାତର୍‌ ତାଗ୍‍ଇପାଣିଦି ଉଣ୍ତିଙ୍ଗ୍‌ ଦୁଃକ୍‌ ପୟ୍‍ନି ବାଦ୍‌ଲୁ ମାରି ଜଦି ମାପୁରୁଦି ବଦା ଆନାତ୍‌, ଆର୍‌ତିଙ୍ଗ୍‌ ସତ୍‌ପାଣି କିଜି ଦୁଃକ୍‌ ପୟ୍‍ନିକା ନେଗେତ୍‌ ।
1PE 3:18 ମିଙ୍ଗିଁ ମାପୁରୁଦି ଲାକ୍‌ତୁ ତାନି ଉଣ୍ତିଙ୍ଗ୍‌ କ୍ରିସ୍ତ ନିଜେ ଦାର୍ମୁଦିକାନ୍‌ ଆଜି ଅଦାର୍ମୁ ଲୋକୁ ପାପ୍‌ ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତାନ୍‌ । ଇୟା ପାଣି ୱାନ୍‌ ପୁରାଅର୍‌ସେ ୱିଜୁଦିନ୍‌ତି ଉଣ୍ତିଙ୍ଗ୍‌ ପୁରା କିତାମାନାନ୍‌ । ୱାନ୍‌ ମେନ୍ଦଲ୍‌ତାନ୍‌ ସାତାନ୍‌, ମାତର୍‌ ଆତ୍ମାଦାନ୍‌ ଜିବନ୍‌ ଆତାନ୍‌;
1PE 3:19 ଆବେନୁ ବା ୱାନ୍ ଜଇଲ୍‌ତୁମାନି ଆତ୍ମେଆଙ୍ଗାଁ ଲାକ୍‌ତୁ ସଲ୍‌ସି ପ୍ରଚାର୍‌ କିତାନ୍ ।
1PE 3:20 ପୁର୍ବେକାଡ଼ାଦୁ ନୋହଦି ବେଡ଼ାଦୁ ଏରୁଜାହାଜ୍‌ ତିଆର୍‍ କିନିୱାଲେ, ନାସ୍ତିୱାଲେ ମାପୁରୁ ସାସ୍‌ ଆସ୍‌ସି କାପ୍‌କିଜି ମାର୍ହାନ୍‌, ନାସ୍ତିୱାଲେ ଆମା ଲୋକୁ ମାପୁରୁଦି ମାଟା ଆସ୍‌ଏର୍‌ ମାର୍ହାର୍‌ । ଆୟା ଜାହାଜ୍‌ଦୁ ଡ଼ୁଗିତାରୋ ଆମା ଉଣା ଲୋକ୍‌ ୱିଜେର୍‌ମିସାଜି ଆଟ୍‌ ଲୋକ୍‌ ମାର୍ହାର୍‌, ମାତର୍‌ ଗାଲିପିରୁଦାନ୍‌ ରକିୟା ପୟ୍‌ତାର୍‌ ।
1PE 3:21 ଆବେଣି ସିନାୱାଜା ଡୁବନ୍‌ ଅତାର୍‍ ଇୟା ଡୁବନ୍‌ ମି ମେନ୍ଦଲ୍‌ତି ରୋପି ସୋଲ୍‌ସିପ୍‌ କିଏତ୍‌, ମାତର୍‌ ମାପୁରୁଦି ଲାକ୍‌ତୁ ନେଗି ବୁଦି ପୟ୍‌ନି ଉଣ୍ତିଙ୍ଗ୍‌ ପାର୍‌ତାନା କିତାନ୍‍, ଜିସୁ କ୍ରିସ୍ତଦି ମାରିଡ଼େସିଜିବନ୍‌ଆଜିନିଙ୍ଗ୍‌ନି ମାଣୁକୁ ଇଲେଇ ମିଙ୍ଗିଁ ରକିୟା କିଜିନାତ୍‌;
1PE 3:22 ଆୟା କ୍ରିସ୍ତ ଇଲେଇ ମୁସ୍‌କୁପୁର୍‌ତୁ ମାପୁରୁଦି ଉଣେରି ତରିନ୍‌ ବାସ୍‌ତା ମାନାନ୍‌, ମୁସ୍‌କୁପୁର୍‌ତି ଦୁତ୍‌କୁ ମାରି ୱିଜେରେ ଅଦିକାର୍‌ପୟ୍‌ତିକାର୍‌ ମାରି ସାକ୍ତିମାନିୱାରି ମୁସ୍‌କୁ ସାସନ୍‌ କିଜିନାନ୍‌ ।
1PE 4:1 କ୍ରିସ୍ତ ମେନ୍ଦଲ୍‌ତୁ ଦୁଃକ୍‌ ପୟ୍‍ତିମାନିଙ୍ଗ୍‌ ମିର୍‌ ବା ୱାନି ୱାଜା ମୋନ୍‌ତିଙ୍ଗ୍‌ଡ଼େପ୍‌ସି ନେଗେନ୍‌ ଆଦୁ ଜେ, ଇରିଙ୍ଗ୍‌ ଏନ୍‌ ମେନ୍ଦଲ୍‌ତୁ କାସ୍ଟୁ ସାସ୍‌ କିନାନ୍‌, ୱାନ୍‌ ମାରି ପାପ୍‌ତୁ ତେବାଏନ୍‌ ।
1PE 4:2 ଏଣ୍ତେସ୍‌ ମିର୍‌ ଇଲେଇରାନ୍‌ ଜିବନ୍‌ତୁ ତେବାନି ଦିନ୍‌ ଲଇ ଲୋକ୍‌ତି ମେନ୍ଦଲ୍‍ତି ଆସା ଇସାବ୍‌ତାନ୍‌ ସାଲାଏଣ୍‌ଗା ମାପୁରୁଦି ବଦାଦାନ୍‌ ସାଲାଦୁ ।
1PE 4:3 ଆଗିଡ଼ି ମିର୍‌ ଅଣଜିହୁଦିରି ୱାଜା ପାଣି କିଜି ନାଣ୍ତ୍‌ ବେଡ଼ା କାଟେକିତି ମାନିଦେର୍‌ । ମି ଜିବନ୍‌ ଲୋଇ ୱିଜୁ ରକମ୍‍ତି ପାପ୍‍, ଲାଲାୟ୍‌ଆନିକା, କାଡ଼ୁ ଉଣିକା, ରସ୍‌ୟାଆନିକା, ସୋସ୍‌ନିକା ମାରି କାଡ଼୍‌ନି ବମା ପୁଜାଦୁ ଜିଜିମାର୍‌ଇଦେର୍‍ ।
1PE 4:4 ମିର୍‌ ଇଲେଇ ଆୟାୱାଜା ପେରି ତାଗ୍‍ଇ ପାଣିଦୁ ୱାରି ୱାଲେ ମିସାଏତିଙ୍ଗ୍‌ ୱାର୍‌ କାବାଆଜି ମିଙ୍ଗିଁ ନାଣ୍ତ ନିନ୍ଦା କିତାର୍‌ ।
1PE 4:5 ମାତର୍‌ ଆମା ମାପୁରୁ ଜିବନ୍‌ ମାରି ସାତିୱାରିଙ୍ଗ୍‌ ବିଚାର୍‌ କିଦେଙ୍ଗ୍‌ ମାନାନ୍‌, ୱାନି ଲାକ୍‌ତୁ ୱାରିଙ୍ଗ୍‌ ଇସାବ୍‌ ସିଦେଙ୍ଗ୍‌ ପଡ଼ାନାତ୍‌ ।
1PE 4:6 ଇରିଙ୍ଗ୍‌ ଇୟାଉଣ୍ତିଙ୍ଗ୍‌ ସାତିୱାରି ଲାକ୍‌ତୁ ବା ସୁସମାଚାର୍‌ ପ୍ରଚାର୍‌ କିତାମାର୍ହାର୍‌, ଏଣ୍ତେସ୍‌ ୱାର୍‌ ଲୋକା ୱାଜା ମେନ୍ଦଲ୍‌ତାନ୍‌ ବିଚାର୍‌ ଆତିଙ୍ଗ୍‌ବା, ମାପୁରୁଦି ୱାଜା ଆତ୍ମାଦୁ ଜିବନ୍‌ ଆନାର୍‌ ।
1PE 4:7 ମାତର୍‌ ୱିଜୁ ବିସୟ୍‌ତି ୱିଜ୍‌ନି ଦିନ୍‌ ଲାକ୍‌ତୁ ୱାତାତ୍‌ନି । ମାରି ମିର୍‌ ମନ୍‍ତିଙ୍ଗ୍‍ ତିର୍‍ ଇଡ୍‍ଜି, ପାର୍‍ତନା କିଦେଙ୍ଗ୍‌ ଜାଗାର୍‌ତା ମାନ୍‌ଡ୍ରୁ,
1PE 4:8 ୱିଜେରିୱାଜା ନିଜେନିଜେଦିଙ୍ଗ୍‌ ଜିବନ୍‌ତାନ୍‌ନୋଦୁ, ଇରିଙ୍ଗ୍‌ ଜିବନ୍‌ନୋନିକା ପିଡ଼ିକ୍‍ନାତ୍‌ ପାପ୍‌ତିଙ୍ଗ୍‍ ।
1PE 4:9 ଗୁଜୁ ଗୁଜୁ ଆଏଣ୍‌ଗା ଲୋକାଙ୍ଗ୍‍ ମି ଇଲ୍‌କାଙ୍ଗ୍‌ କୁକ୍‍ତୁ ।
1PE 4:10 ଏନ୍‍ ଏମେ ଦାନ୍‍ ପୟ୍‌ତା ମାନାନ୍‍, ତାନି ଜଗ୍‌ତି ନେଗେନ୍‌ ପାଣିକିନିୱାଜା ଆଇୱାରି ନେଗେନ୍‌ ଉଣ୍ତିଙ୍ଗ୍‌ ଆୟା ଦାନ୍‌ତି ନେଗି ସେବା କିନିକା ମାନାତ୍‌ ।
1PE 4:11 ଏନ୍‌ ପ୍ରଚାର୍‌ କିନାନ୍‌, ୱାନ୍‌ ମାପୁରୁଦି ବାକ୍ୟ ପ୍ରଚାର୍‌ କିପିନ୍‌ । ଏନ୍‌ ଜଦି ସେବା କିନାନ୍‌, ୱାନ୍‌ ମାପୁରୁଦିମାଣୁକୁ ସାକ୍ତି ପୟ୍‍ତିମାନି ଲୋକ୍‌ ୱାଜା ସେବା କିପିନ୍‌, ଏଣ୍ତେସ୍‌ ଜିସୁ କ୍ରିସ୍ତଦି ମାଣାନ୍‌ ମାପୁରୁ ଦନ୍ୟବାଦ ଆନାନ୍‌; ଜୁଗ୍‌ ଜୁଗ୍‌ ଗୌରବ୍‌ ମାରି ପରିସାକ୍ତି ୱାନିଦି ଆପିତ୍‌ । ଆମେନ୍‍ ।
1PE 4:12 ଏ ନା ତଡ଼୍‍କୁ ନି ତାଙ୍ଗିଁକ୍‌ ଏମେ ସିସୁ ପରିକାଦୁ ମିର୍‍ ଦୁଃକ୍‌ ପୟ୍‍ଜିନିଦେର୍‍, ଆକା ଉଣ୍ତ୍ରି ପେରିମାଟା ଇଜି ଅଡ଼୍‍ବିଜି କାବା ଆମାଟ୍‌ ।
1PE 4:13 ମାରି ୱେଡ଼ିକା ଆଦୁ, ଇରିଙ୍ଗ୍‌ ମିର୍‌ କ୍ରିସ୍ତଦି ଦୁଃକ୍‌ ପୟ୍‍ନିମାନୁ ମିସାଜିନିଦେର୍‌, ଆୟା ପାଣିଦିଙ୍ଗ୍‌ ୱେଡ଼ିକା ଆଦୁ, ୱାନି ମହିମା ତରାନି ୱାଲେ ବା ମିର୍‌ ନାଣ୍ତ୍‌ୱେଡ଼ିକାଦାନ୍‌ ୱେଡ଼ିକା ଆଦୁ ।
1PE 4:14 ଜଦି ମିରୁ କ୍ରିସ୍ତଦି ୱେନ୍‌କାସୋନି ଉଣ୍ତିଙ୍ଗ୍‌ ନିଦା ପୟ୍‌ତିଙ୍ଗ୍‍, ମିରୁ ଆସିର୍ବାଦ୍‍ତି ଲୋକୁ, ଇରିଙ୍ଗ୍‌ ମାପୁରୁଦି ଗୌରବ୍‌ମୟ୍‌ ଆତ୍ମା ମିମାନୁ ତେବାତା ମାନାତ୍‌ ।
1PE 4:15 ମି ଲୋଇରାନ୍‌ ଏନ୍‌ ଲୋକାଙ୍ଗ୍‌ ସାୟାମାର୍‌ଗା ଡାକ୍‌ନିକା, ଡଙ୍ଗାଁର୍‌ଏନ୍‌ ମାରି ତାଗ୍‌ଇପାଣି, ନି ଜାଟିକିନି ଉଣ୍ତିଙ୍ଗ୍‌ ଦୁଃକ୍‌ ପୟ୍‍ମାକିନ୍‌ ।
1PE 4:16 ମାତର୍‌ ମିରୁ ଜଦି କ୍ରିସ୍ତବିସ୍‌ବାସ୍‌ ଆତିଉଣ୍ତିଙ୍ଗ୍‌ ଦୁଃକ୍‌ ପୟ୍‍ଜିନିଦେର୍‌, ଆର୍‌ତିଙ୍ଗ୍‌ ସେମାର୍‌ ଆମାଟ୍‌ । ମାପୁରୁଙ୍ଗୁଁ ଦନ୍ୟବାଦ୍‌ ସିଦୁ, ଇରିଙ୍ଗ୍‌ ମିର୍‌ କ୍ରିସ୍ତଦି ଦରୁ ଆସ୍‌ତିମାନିଦେର୍‌ ।
1PE 4:17 ବିଚାର୍‌କିନି ଦିନ୍‌ ଇଗା ୱାତାତ୍‍ ମାରି ମାପୁରୁଦି ଲୋକୁ ଆଗ୍‌ଡ଼ି ବିଚାର୍‌ କିଆୟ୍‌ଆନାର୍‌ । ଜଦି ମାବାଣାନ୍‍କୁ ଆକା ଆରାମ୍‍ ଆନାତ୍‍, ଆର୍‍ତିଙ୍ଗ୍‍ଁ ଏମେକାର୍‍ ମାପୁରୁଦି ସୁସମାଚାର୍‌ ବିସ୍‌ବାସ୍‌ କିଏର୍‌, ୱାରି ସାରାସାରିଦି ଦଣ୍ତ୍‌ ଏସା ପେରିକା ଆଏତ୍‌ ?
1PE 4:18 ଦାର୍ମୁସାସ୍ତ୍ରଦୁ ରାସ୍‌ତାମାନାତ୍‌ : ଜଦି ଦାର୍ମୁଦିଲୋକୁ ରକିୟା ପୟ୍‌ଦେଙ୍ଗ୍‌ ନିସା କାସ୍ଟୁ, ଆର୍‌ତିଙ୍ଗ୍‌ ଅଦାର୍ମୁଦିଲୋକୁ ମାରି ପାପି ଲୋକା ଦଣ୍ତ୍‌ ଏସ ଆଏତ୍‌ ମାନାତ୍‌ ?
1PE 4:19 ମାରି, ଆମାକାର୍‌ ମାପୁରୁଦି ଇଚ୍ଛାଦାନ୍‌ ଦୁଃକ୍‌ବୋଗ୍‌ କିନାର୍‌, ୱାର୍‌ ନେଗି ପାଣି କିଜି ୱାନିମାନୁ ପୁରାଦାନ୍‌ ଆସା ଇଡିର୍‌ । ୱାରିଙ୍ଗ୍‌ ତିଆର୍‌କିତି ବିସ୍‌ବାସ୍‌ତି ମାପୁରୁ ୱିଜୁଦିନ୍ ୱାନି ପାର୍‌ମାଣ୍‌ ରକିୟା କିନାନ୍‌ ।
1PE 5:1 ନାନ୍‌ ଅରେନ୍‌ ପେରିନେତା ଇସାବ୍‌ତାନ୍‌ ମିଙ୍ଗିଁ ମଣ୍ତ୍‌ଲିଦି ପେରିନେତାରିଙ୍ଗ୍‌ ମାଡ଼ିସ୍‍ କିଜିନା । ମାରି କ୍ରିସ୍ତଦି ଦୁଃକ୍‌ ପୟ୍‍ନିମାନୁ ନାନ୍‌ ଅରେନ୍‌ ସାକି ମାରି ୱାନି ଗୌରବ୍‌ ତରାୟ୍‍ଆନି ବେଡ଼ାଦୁ ନାନ୍‌ ଆବେନୁ ସାକି ତେବାନା ।
1PE 5:2 ମାପୁରୁ ମି କିୟୁଦୁ ଆମା ମେଣ୍ତେଙ୍ଗ୍‌ ମାନ୍ଦାଦି ଦାଇତ୍‌ ସିତାମାନାନ୍‌, ନାନୁ ମାଡ଼ିସ୍‍ କିଜିନା, ମିରୁ ଜାସେକିନିୱାଜା ଆକା କିଏଣ୍‌ଗା ୱେଡ଼ିକାଦାନ୍‌ ୱାନିକାଙ୍ଗ୍‌ ସେବା କିଦୁ । ମାତର୍‌ ମାପୁରୁଦି ବଦାଦାନ୍‌ ନେଗି ମୋନ୍‌ତାନ୍‌, ଦନ୍‌ ଆସାଦି ଉଣ୍ତିଙ୍ଗ୍‌ ଆକା କିଏଣ୍‌ଗା, ମାତର୍‌ ୱେଡ଼ିକାଦାନ୍‌ ଆକା କିଦୁ ।
1PE 5:3 ମାରି ଆମାୱାରି ଦାଇତ୍‌ବୋଜୁ ମି କିୟୁଦୁ ସର୍ପେ ଆତାମାନାତ୍‌, ୱାରି ମୁସ୍‌କୁ ସାସନ୍‌ କିଏଣ୍‌ଗା ମାନ୍ଦା ଉଣ୍ତିଙ୍ଗ୍ ନିଜେଦି ଜିବନ୍‌ତୁ ସାରିତର୍‍ନି ଲୋକା ୱାଜା ଆଜି ଆକା ତରତୁ ।
1PE 5:4 ଏସ୍ତିୱାଲେ ପେରି ମେଣ୍ତେଙ୍ଗ୍‌ଗାଉଡ଼ୁ ୱାନାନ୍‌, ମିରୁ ଗୌରବ୍‌ଦି ମୁକୁଟ୍ ପୋଇନିଦେର୍ । ତାନି ଜାୟ୍‌ ଏସ୍‌କାଙ୍ଗ୍‌ ନାମ୍‌ଏତ୍‌ ।
1PE 5:5 ଆୟାୱାଜା, ଏ ମୁରୁକଡ଼ର୍‌ ମିରୁ ପେରିନେତାରି ମାଟା ମାନାଦୁ । ମିରୁ ୱିଜେରେ ନିଜେନିଜେଦି ସେବା କିନି ଉଣ୍ତିଙ୍ଗ୍‌ କାର୍ମୁନାନି ଆଙ୍ଗିଁ ଆରାଦୁ । ସାସ୍ତ୍ରଦୁ ରାସାତାମାନାତ୍, “ମାପୁରୁ ଆକାର୍‍ ଲୋକାଙ୍ଗ୍‌ ବିରୁଦ୍‌ କିନାନ୍‌, ମାରି ସାନ୍ତି ଲୋକାଙ୍ଗ୍‌ ଦୟା କିନାନ୍ ।”
1PE 5:6 ମାରି, ମାପୁରୁଦି ସାକ୍ତିମାନି କିୟୁ ଆଡ୍‍ଗି ନିଜେ ନିଜେଦିଙ୍ଗ୍‌ ତେବାକିଦୁ; ଏଣ୍ତେସ୍‌ ୱାନ୍ ମିଙ୍ଗିଁ ଟିକ୍ ବେଡ଼ାଦୁ ମୁସ୍‌କୁ ପେର୍‍ନାନ୍ ।
1PE 5:7 ମି ୱିଜୁ ସିନ୍ତାଦି ବଜୁ ମାପୁରୁ ମୁସ୍‌କୁ ସର୍‌ପେ କିଦୁ, ଇରିଙ୍ଗ୍‌ ୱାନ୍ ମି ଜାତୁନ୍‍ ଅନାନ୍‌ ।
1PE 5:8 ତିଆର୍‌ ଆଜି ଜାଗାର୍‌ତା ମାନ୍‌ଡ୍ରୁ, ମି ସାତ୍ରୁ ସୟତାନ୍‌ ଆଉଲି ଆନି ପାର୍ଟା ନରେସ୍‍ ୱାଜା ଏଙ୍ଗ୍‌ ଡ଼ିଙ୍ଗ୍‍ଦେଙ୍ଗ୍‌ ପୟ୍‌ଜି ଅସିନାତ୍‌ ।
1PE 5:9 ମିର୍‌ ବିସ୍‌ବାସ୍‌ତୁ ଡାଟ୍‍ ତେବାଜି, ତାନିଙ୍ଗ୍‌ ବିରୁଦ୍‌ କିଦୁ । ମାରି ଇକା ମିର୍‌ ନେସ୍‌ତିମାନିଦେର୍‌, ଇୟା ଦୁନିଆଦୁ ମାନି ମି ବିସ୍‌ବାସ୍‌ତି ତଡ଼ାନ୍‌କା ଉଣ୍ତିଙ୍ଗ୍‌ ଇୟାୱାଜା ଦୁଃକ୍‌ ଗଟେଆଜିନାତ୍ ।
1PE 5:10 ୱିଜୁ ଦୟା ସିନି ଆମା ମାପୁରୁ ନିଜେଦି ୱିଜୁଦିନ୍‌ତି ଗୌରବ୍‌ତୁ ମିସାନି ଉଣ୍ତିଙ୍ଗ୍‌ କ୍ରିସ୍ତ ଜିସୁଦି ମାଣୁକୁ ମିଙ୍ଗିଁ କୁକ୍‌ତାମାନାନ୍‌ । ୱାନ୍‌ ନିଜେ ସାଣେକ୍‌ତି ଦୁଃକ୍‌ପୟ୍‍ତି ୱେନ୍‌କା ମିଙ୍ଗିଁ ପୁରା କିନାନ୍‌, ତିର୍‌କିନାନ୍‍, ସାକ୍ତିକିନାନ୍‍ ମାରି ଡାଟ୍‍କିନାନ୍‌ ।
1PE 5:11 ଜୁଗ୍‌ ଜୁଗ୍‌ ୱାନିଦି ଆପିତ୍‌ ! ଆମେନ୍‍ ।
1PE 5:12 ସିଲେଙ୍ଗ୍‌ ବିସ୍‌ବାସ୍‌ତି କ୍ରିସ୍ଟାନ୍‌ ତଡ଼ାନ୍‍ ୱାଜା ନାନ୍‌ ଜିବନ୍‌ନୋନା, ୱାନି ସାକାଦାନ୍‌ ନାନୁ ଇୟା ଇସ୍ରି ସିଟି ରାସ୍‌ତାମାନା । ମାପୁରୁଦି ସତ୍‌ ଦୟା ବିସୟ୍‌ତାନ୍‌ ସାକି ସିଜି ମିଙ୍ଗିଁ ୱେଡ଼ିକା କିନିକା ନା ମାଟା । ଆୟା ଦୟାଦାନ୍‌ ମିର୍‌ ଡାଟ୍‌ ତେବାଦୁ ।
1PE 5:13 ମାପୁରୁଦି ମାଣୁକୁ ଆସ୍‌କିଆୟ୍‌ଆତିମାନି ବାବିଲନ୍‌ଦି ମଣ୍ତଲି ମାରି ନା ଦାର୍ମୁ ମାରିନ୍‌ ମାର୍କ ବା ମିଙ୍ଗିଁ ମାଡ଼ିସ୍‍ କିଜିନାନ୍‌ ।
1PE 5:14 କ୍ରିସ୍ତ ଜିବନ୍‌ନୋନିକା ନିଜେନିଜେଦିଙ୍ଗ୍‌ ମାଡ଼ିସ୍‍କିନିକା ଜାଣେକିଦୁ । କ୍ରିସ୍ତଦିମାନୁ ତେବାତିମାନି ମି ୱିଜେରିଙ୍ଗ୍‌ ସାନ୍ତି ଆପିତ୍‌ ।
1JO 1:1 ପୁର୍ବେକାଡ଼ାଦାନ୍‍ ଏନ୍‌ ମାର୍ହାନ୍‌, ଆୟା ଜିବନ୍‌ସିନି ବାକ୍ୟ ବିସ୍‌ୟତାନ୍‌ ମାପୁ ରାସ୍‌ତେଙ୍ଗ୍‌ ସୋଲ୍‌ସିନାପ୍ । ୱାନି ବାକ୍ୟ ମାଡୁ ୱେର୍‌ଇମାନିକା, ନିଜେଦି କାଣ୍‌କାଣୁକୁ ସୁଡ଼ୁତାମାନାପ୍‌, ଆମାୱାନିଙ୍ଗ୍‌ ସୁଡ଼ୁତାମାନାପ୍‌ ମାରି ନିଜେଦିକିୟୁଦାନ୍‌ ମୁଟ୍‌ତାମାନାପ୍‌ ।
1JO 1:2 ଜିବନ୍‌ମାନି ଆୟା ବାକ୍ୟ ଏସ୍ତିୱାଲେ ତରାଇଆତାତ୍‌, ମାପୁ ୱାନିଙ୍ଗ୍‌ ସୁଡୁତାମାନାପ୍ ଆଦେଙ୍ଗ୍‌ ୱାନି ବିସୟତାନ୍ ଇୟା ମାଟା ସାକ୍ୟ, ଏସାଙ୍ଗ୍‌ ୱିଜ୍ଇ ମାଟା ୱେର୍‍ତାମାନାପ୍‌; ଯେ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ୱାଜା ୱାନ୍‌ ବୁବା ୱାଲେ ୱିଜୁଦିନ୍ ମାର୍ହାନ୍‌ ମାରି ୱାନ୍ ମା ଲାକୁତୁ ତରିତାମାନାନ୍, ୱାନି ବିସୟ୍‌ତାନ୍‌ ମାପୁ ଇୟା ମାଟା ୱେର୍‌ସିନାପ୍‌ ।
1JO 1:3 ଆମାକା ମାପୁ ସୁଡ଼ୁତାମାନାପ୍‌ ମାରି ୱେରିମାନିକା, କେବଲ୍‌ ଆୟା ମାଟା ମି ଲାକ୍‌ତୁ ୱେର୍‌ସିଇଜିନାପ୍‌, ଇକା ୱେନ୍‌ଜି ବୁବା ମାପୁରୁ ମାରି ୱାନି ମାରିସି ଜିସୁ କ୍ରିସ୍ତଦି ୱାଲେ ମା ଆମା ସହବାଗିତା ମାନାତ୍‌, ଆବେନୁ ମିରୁ ମିସାନିଦେର୍‌,
1JO 1:4 ମାରି ମା ୱେଡ଼ିକା ଏଣ୍ତେସ୍‌ ପୁରାବର୍ତି ଆନାତ୍‌, ଆୟାଉଣ୍ତିଙ୍ଗ୍‌ ମାପୁ ଇୟାୱିଜୁ ରାସ୍‌ସିନାପ୍‌ ।
1JO 1:5 ମାପୁରୁଦି ମାରିନ୍‌ ଜିସୁଦିମାନୁ ଆମା କାବୁର୍‌ ୱେନ୍‍ଜି ୱେର୍‌ସିନାପ୍‌ ମାରି ମିଙ୍ଗିଁ ୱେର୍‌ସିନାପ୍‌, ଆକା ଆଜିନାତ୍‌ : ମାପୁରୁଦି ଜାୟ୍‌, ମାରି ୱାନିମାନୁ ଇସ୍ରିକା ଟିକାବା ସିକାଟି ସିଲେତ୍‌ ।
1JO 1:6 ୱାନି ୱାଲେ ମା ସହବାଗିତା ମାନାତ୍‌, ଇକା ଇନ୍‌ଞ୍ଜି ଜଦି ମାଡୁ ସିକାଟିଦି ମାନିକା, ଆର୍‌ତିଙ୍ଗ୍‌ ମାଟାଦୁ ମାରି ପାଣିଦୁ ମାଡୁ ମିଚ୍‌ଆନିକା । ମାରି ସତ୍‍ ବ୍ୟବ୍‌ହାର୍‌ କିଏପ୍‌ ମାନାପ୍‌ ।
1JO 1:7 ମାତର୍‌ ମାପୁରୁଦି ୱାଜା ମାଡ଼ୁ ଜଦି ଜାୟ୍‌ତୁ ବାସାନିକାନ୍‌, ମାଡୁ ଆୟାୱାଜା ଜାୟ୍‌ତୁ ବାସାନିକା, ଆର୍‌ତିଙ୍ଗ୍‌ ମା ନିଜେନିଜେଦିଙ୍ଗ୍‌ ସହବାଗିତା ମାନାତ୍‌, ମାରି ୱାନି ମାରିସି ଜିସୁଦି ନେତେର୍‌ ୱିଜୁ ପାପ୍‌ତାନ୍‌ ନରିସ୍ କିନାତ୍‌ ।
1JO 1:8 ମାଡ଼ୁ ଜଦି ପାପ୍‌ ସିଲେତ୍‌, ଇଜି ଇନିକା, ଆର୍‌ତିଙ୍ଗ୍‌ ନିଜେନିଜେଦିଙ୍ଗ୍‌ ଟକେ କିନିକା, ମାରି ମାମାନୁ ଅଡ଼ପ୍‌ବା ସତ୍‌ ସିଲେତ୍‌ ।
1JO 1:9 ମାତର୍‌ ମାପୁରୁଦି ଲାକ୍‌ତୁ ଜଦି ନିଜେଦି ପାପ୍‌ ମାନାନିକା, ୱାନି ପାର୍‌ମାଣ୍‌ତି ଇସାବ୍‌ତାନ୍‌ ମା ଉଣ୍ତିଙ୍ଗ୍‌ ନ୍ୟାୟ୍‌ତି ବ୍ୟବ୍‌ହାର୍‌ କିନାନ୍‌, ୱାନ୍‌ ମା ପାପ୍‌ କେମା କିଜି ୱିଜୁ ଅଦାର୍ମୁଦାନ୍‌ ମାଙ୍ଗିଁ ନରିସ୍ କିଦେଙ୍ଗ୍‌ ବିସ୍‌ବାସ୍‌ ନି ନ୍ୟାୟ୍‌ତିକାନ୍‌ ।
1JO 1:10 ମାପୁ ପାପ୍‌ କିଏପ୍‌, ଇକା ଜଦି ଇନିକା, ଆର୍‌ତିଙ୍ଗ୍‌ ମାଡୁ ମାପୁରୁଙ୍ଗୁଁ ମିଚ୍‌ୱେର୍‌ନିକାନ୍‌, ମାରି ୱାନି ବାକ୍ୟ ମା ମୋନ୍‌ତୁ ସିଲେତ୍‌ ।
1JO 2:1 ଏ ନା କଡ଼ର୍‌, ମିଙ୍ଗିଁ ନାନୁ ଇୟା ସିଟି ରାସ୍‌ନି ବିଷୟ, ଇକା ପଡ଼ାଜି ଏଣ୍ତେସ୍‌ମାରି ପାପ୍‌ କିଇଦେର୍‌ । ମାରି ମିର୍‌ ଏଣ୍ତେସ୍‌ ନେସ୍‌ନିଦେର୍‌, ଏନ୍‌ ଜଦି ପାପ୍‌ କିନାନ୍‌, ମା ଉଣ୍ତିଙ୍ଗ୍ ବୁବା ମାପୁରୁଦି ଲାକ୍‌ତୁ ମା ଅରେନ୍‌ ପେରି ଲୋକ୍‌ ମାନାନ୍‌ ଆୟା ଦାର୍ମୁଦି ଜିସୁ କ୍ରିସ୍ତ ।
1JO 2:2 ମାରି ଆୟା କ୍ରିସ୍ତ ନିଜେ ମା ପାପ୍‌ ଉଣ୍ତିଙ୍ଗ୍‌, କେବଲ୍‌ ମା ପାପ୍‌ ଉଣ୍ତିଙ୍ଗ୍‌ ସିଲେ, ମାତର୍‌ ସାରାଦୁନିଆଦି ପାପ୍‌ ଉଣ୍ତିଙ୍ଗ୍‌ ବା ଜିବନ୍‌ ସିତାମାନାନ୍‌ ।
1JO 2:3 ଜଦି ମାପୁ ୱାନି ମାଟା ମାନାନାପ୍‌, ଆର୍‌ତିଙ୍ଗ୍‌ ଆୟାମାଣୁକୁ ନେସ୍‌ତେଙ୍ଗ୍‌ ଆଟ୍‌ନାପ୍‌ ଜେ, ମାପୁ ୱାନିଙ୍ଗ୍‌ ନେସ୍‌ନାପ୍‌ ।
1JO 2:4 ୱାନି ମାଟା ମାନାଏଣ୍‌ଗା ୱାନିଙ୍ଗ୍‌ ନେସ୍‌ତାମାନା ଇଜି ଏନ୍‌ ଇନ୍‌ନାନ୍‌, ୱାନ୍‌ ଅରେନ୍‌ ମିଚ୍‌ୱେର୍‌ନିକାନ୍‌ ମାରି ୱାନିମାନୁ ସତ୍‌ ସିଲେତ୍‌ ।
1JO 2:5 ମାତର୍‌ ଏନ୍‌ ୱାନି ବାକ୍ୟ ମାନାନାନ୍‌, ୱାନିମାନୁ ମାପୁରୁଦି ଜିବନ୍‌ନୋନିକା ସତ୍‌ତାନ୍‌ ପୁରା ଆତାମାନାତ୍‌ । ଆୟାମାଣୁକୁ ମାପୁ ନେସ୍‌ନାପ୍‌ ଜେ, ମାପୁ ୱାନିମାନୁ ମାନାପ୍‌ ।
1JO 2:6 ଏନ୍‌ ମାପୁରୁଦି ମାନୁ ମାନା ଇଜି ଇନାନ୍‌, ୱାନ୍‌ କ୍ରିସ୍ତ ଜିସୁଦି ୱାଜା ଜିବନ୍‌ ଯାପନ କିନିକା ମାନାତ୍‌ ।
1JO 2:7 ଏ ନା ତଡ଼୍‍କୁ, ନାନୁ ମି ଲାକ୍‌ତୁ ଆମା ପୁନି ମାଟା ରାସ୍‌ଏ, ମାତର୍‌ ଆଗ୍‌ଡ଼ିରାନ୍‌ ଆମା ପାଡ଼ିଇ ମାଟା ମିର୍‌ ନେସ୍‌ତିମାନିଦେର୍‌, ଆକା ରାସ୍‌ସିନା; ମାପୁ ପ୍ରଚାର୍‍ କିଜିମାନି କାବୁର୍‌ତୁ ଆୟା ମାଟା ୱେର୍‌ଇମାନିଦେର୍‌ ।
1JO 2:8 ମାତର, ନାନୁ ପୁନି ମାଟା ମି ଲାକ୍‌ତୁ ରାସ୍‌ସିନା, ଇକା କ୍ରିସ୍ତଦିମାନୁ ନି ମିମାନୁ ସତ୍‌ ଇଜି ୱେଙ୍ଗେନାତ୍‌ । ଇରିଙ୍ଗ୍‌ ସିକାଟି ଗୁସାଜିସୋଲ୍‌ସିନାତ୍‌ ମାରି ସତ୍‌ତି ଜାୟ୍‌ ଇଲେ ତରିତାତ୍‌ନି ।
1JO 2:9 ଜଦି ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ କାଡ଼ାଜି ଇନାନ୍‌ ଜେ, ୱାନ୍‌ ଜାୟ୍‌ତୁ ମାନାନ୍‌, ୱାନ୍‌ ଇୟାସାନ୍ଧିବା ସିକାଟିଦୁ ମାନାନ୍‌ ।
1JO 2:10 ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ ଜିବନ୍‌ନୋନାନ୍‌, ୱାନ୍‌ ଜାୟ୍‌ତୁ ତେବାନାନ୍‌, ମାରି ୱାନିମାନୁ ତାକାନି ଇନି ପାଣି ସିଲେତ୍‌ ।
1JO 2:11 ମାତର୍‌ ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ କାଡ଼ାନାନ୍‌, ୱାନ୍‌ ସିକାଟିଦୁ ମାନାନ୍‌, ମାରି ସିକାଟିଦୁ ବୁଲାଜି ଆମା ତରିନ୍‌ ସୋଲ୍‌ସିନାନ୍‌, ଆକା ନେସ୍‌ଏନ୍‌, ଇରିଙ୍ଗ୍‌ ସିକାଟି ୱାନି କାଣା କିତାମାନାତ୍‌ ।
1JO 2:12 ଏ କଡ଼ର୍, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ କ୍ରିସ୍ତଦି ଦର୍‌ତି ଉଣ୍ତିଙ୍ଗ୍‌ ମି ପାପ୍‌ କେମା ଆତାମାନାତ୍‌ ।
1JO 2:13 ଏ ବୁବାର୍‌, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ ଏନ୍‌ ପୁର୍ବେକାଡ଼ାଦାନ୍‌ ମାନାର୍‌, ୱାନିଙ୍ଗ୍‌ ମିରୁ ନେସ୍‌ତିମାନିଦେର୍‌ । ଏ ମୁର୍‌କଡ଼ର୍‌, ନାନୁ ମି ଲାକ୍‌ତୁ ବା ରାସ୍‌ସିନା, ଇରିଙ୍ଗ୍‌ ମିରୁ ପାପ୍‌ ଆତ୍ମାଦିଙ୍ଗ୍‌ ଜିଣାତି ମାନିଦେର୍‌ ।
1JO 2:14 ଏ କଡ଼ର୍‌, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ ମିରୁ ବୁବେଙ୍ଗ୍‌ ନେସ୍‌ତିମାନିଦେର୍‌ । ଏ ବୁବାର୍‌, ନାନୁ ମି ଲାକ୍‌ତୁ ରାସ୍‌ସିନା, ଇରିଙ୍ଗ୍‌ ଏନ୍‌ ପୁର୍ବେକାଡ଼ାଦାନ୍‌ ମାନାନ୍‌, ମିରୁ ୱାନିଙ୍ଗ୍‌ ନେସ୍‌ତିମାନିଦେର୍‌ । ଏ ମୁର୍‌କଡ଼ର୍‌, ନାନୁ ମି ଲାକ୍‌ତୁ ବା ରାସ୍‌ସିନା, ଇରିଙ୍ଗ୍‌ ମିରୁ ସାକ୍ତିମାନିଦେର୍‌, ମାରି ମାପୁରୁଦି ବାକ୍ୟ ମିମାନୁ ମାନାତ୍‌ ମାରି ମିରୁ ପାପ୍‌ତିଙ୍ଗ୍‍ ଜିଣାତି ମାନିଦେର୍‌ ।
1JO 2:15 ଇୟା ଦୁନିଆ ମାରି ଆବେନୁ ମାନି ବିସୟ୍‌ତିଙ୍ଗ୍‌ ୱିଜୁ ଜିବନ୍‌ନୋମାଟ୍, ଜଦି ମିରୁ ଜଗତ୍‌ତିଙ୍ଗ୍‌ ଜିବନ୍‍ନୋନିଦେର୍‍, ବୁବାଦି ଉଣ୍ତିଙ୍ଗ୍‌ ଜିବନ୍‌ନୋନିକା ମିଙ୍ଗିଁ ସିଲେତ୍‌ ।
1JO 2:16 ଇୟା ଜଗତ୍‌ତି ଆମାୱିଜୁ ମେନ୍ଦଲ୍‌ ବିସୟ୍‌ ୱେଡ଼ିକା କିଦେଙ୍ଗ୍‌ ଲୋକୁ ଆସାଆନାର୍‌, ଲୋକୁ ଆମାୱିଜୁ ସୁନ୍ଦର୍‌ତି ବିସୟ୍‌ ସୁଡ଼ୁଜି ଆସାୟ୍‌ ଆନାର୍‌ ମାରି ଆମା ୱିଜୁ ଦୁନିଆଦି ବିସୟ୍‌ ଅସି ଲୋକୁ ଗର୍ବ କିନାର୍‌, ଆକା ୱିଜୁ ବିସୟ୍‌ ବୁବାଦିମାଣୁକୁ ସିଲେ, ମାତର୍‌ ଦୁନିଆଦାନ୍‌ ୱାତା ମାନାତ୍‌ ।
1JO 2:17 ଲୋକୁ ଜଗତ୍‌ ମାରି ୱାନି ଆମା ୱିଜୁ ବିସୟ୍‌ ପାଣି କିନାନ୍‌, ୱାନ୍‌ ସାନିକା ଗଟାନାତ୍‌, ମାତର୍‌ ଏନ୍‌ ମାପୁରୁଦି ବଦା ମାନାନାନ୍‌, ୱାନ୍‌ ୱିଜୁଦିନ୍‌ତିକାନ୍‌ ।
1JO 2:18 ଏ କଡ଼ର୍‌, ସାରାସାରି ଦିନ୍‌ ଇଗା ୱାତାତ୍‌ନି, କ୍ରିସ୍ତଦି ସାତ୍ରୁ ୱାନାନ୍‌ ଇଜି ମିରୁ ୱେର୍‌ଇମାନିଦେର୍‌, ଆୟାୱାଜା କ୍ରିସ୍ତଦି ଗାଦିଲୋକ୍‌ ସାତ୍ରୁରୁ ଇଲେଇ ତରିତାର୍‌ନି; ଇୟାଉଣ୍ତିଙ୍ଗ୍‌ ମାପୁ ନେସ୍‌ସିନାପ୍‌ ଜେ, ସାରାସାରି ଦିନ୍‌ ଇଗା ୱାତାତ୍‌ନି ।
1JO 2:19 ଇୟାକାର୍‌ ସତ୍‌ତାନ୍‌ ମା ଦଲ୍‌ତି ଲୋକୁ ଆଏର୍‌, ଆୟାଉଣ୍ତିଙ୍ଗ୍‌ ୱାର୍‌ ମା ଲୋଇରାନ୍‌ ସତାସର୍ହାର୍‌, ମା ଲୋକୁ ଆତିମାରିଙ୍ଗ୍‌, ଆର୍‌ତିଙ୍ଗ୍‌ ୱାର୍‌ ମା ୱାଲେ ତେବାତାର୍‌ ମାନ୍ଧି, ମାତର୍‌ ୱାର୍‌ ମା ଦଲ୍‌ତିକାର୍‌ ଆଏର୍‌ ଇଜି ଇକା ଏଣ୍ତେସ୍‌ ୱେଙ୍ଗ୍‌ନାତ୍‌, ଇୟାଉଣ୍ତିଙ୍ଗ୍‌ ୱାର୍‌ ଆକ ସର୍ହାର୍‌ ।
1JO 2:20 ମାତର୍‌ ମିରୁ କ୍ରିସ୍ତଦି ଦୟାଦାନ୍‌ ପବିତ୍ରଆତ୍ମାଦି ମାଣୁକୁ ସାକା ଆତିମାନିଦେର୍‌; ମିରୁ ୱିଜିଦେର୍‌ ସତ୍‌ ଇନିକା ନେସ୍‌ତିମାନିଦେର୍‌ ।
1JO 2:21 ମିରୁ ସତ୍‌ ନେସ୍‌ଇତି ମାନିଙ୍ଗ୍‌ ନାନ୍‌ ଜେ ମି ଲାକ୍‌ତୁ ରାସ୍‌ସିନା, ଆକା ସିଲେ; ମାତର୍‌ ମିରୁ ସତ୍‌ ନେସ୍‌ତିମାନିଙ୍ଗ୍‌ ମାରି ଆମା ମିଚ୍‌ ମାଟା ସତ୍‌ତାନ୍‌ ସଏତ୍‌ ଇଜି ନେସ୍‌ତିମାନିଙ୍ଗ୍‌ ନାନୁ ମି ଲାକ୍‌ତୁ ରାସ୍‌ସିନା ।
1JO 2:22 ଆର୍‌ତିଙ୍ଗ୍‌ ମିଚ୍‌ୱେର୍‌ନିକାନ୍‌ ଏନ୍‌ ? ଜିସୁଙ୍ଗୁଁ ରକ୍‌ୟାକର୍ତ୍ତା କ୍ରିସ୍ତ ଇଜି ଏନ୍‌ ମାନାଏନ୍‌, ମାରି ୱାନ୍‌ କ୍ରିସ୍ତଦି ସାତ୍ରୁ ବୁବା ମାରି ୱାନି ମାରିନ୍‌ତିଙ୍ଗ୍‌, ରିଏରିଙ୍ଗ୍‌ବା ୱାନ୍‌ ଡ଼ିସ୍‌ନାନ୍‌ ।
1JO 2:23 ଏନ୍‌ ମାରିସିଙ୍ଗ୍‌ ଡ଼ିସ୍‌ନାନ୍‌, ୱାନ୍‌ ବୁବେଙ୍ଗ୍‌ ବା ଡ଼ିସ୍‌ନାନ୍‌; ଏନ୍‌ ମାରିସିଙ୍ଗ୍‌ ମାନାନାନ୍‌, ୱାନ୍‌ ବୁବେଙ୍ଗ୍‌ ବା ମାନାତା ମାନାନ୍‌ ।
1JO 2:24 ମାରି, ମିରୁ ଆରାମ୍‌ତାନ୍‌ ଆମା କାବୁର୍‌ ୱେର୍‌ଇମାନିଦେର୍‌, ଆକା ମିମାନୁ ତେବାପିତ୍‌ । ମିରୁ ଆରାମ୍‌ତାନ୍‌ ଆମା କାବୁର୍‌ ୱେର୍‌ଇମାନିଦେର୍‌, ଆକା ଜଦି ମିମାନୁ ତେବାନାତ୍‌, ଆର୍‌ତିଙ୍ଗ୍‌ ମିରୁ ବା ମାରିନ୍‌ ନି ବୁବାଦିମାନୁ ତେବାନି ।
1JO 2:25 ମାରି କ୍ରିସ୍ତ ମାଙ୍ଗିଁ ଆମାକା ପାର୍‌ମାଣ୍‌ କିତାମାନାନ୍‌, ଆକାନେ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ।
1JO 2:26 ଆମାକାର୍‌ ମିଙ୍ଗିଁ ତିଲିସ୍‌ କିଦେଙ୍ଗ୍‌ ସେସ୍ଟା କିଜିନାର୍‌, ୱାରି ବିସୟ୍‌ତାନ୍‌ ନାନୁ ମି ଲାକ୍‌ତୁ ଇୟାୱିଜୁ ରାସ୍‌ସିନା ।
1JO 2:27 ମାତର୍‌ ମିଙ୍ଗିଁ କ୍ରିସ୍ତ ଜିସୁ ୱାନି ପବିତ୍ରଆତ୍ମାଦୁ ପୁରାବର୍ତି ଇଟ୍‌ତାମାନାନ୍‌, ଆମା ସାନ୍ଧି ଇୟା ପବିତ୍ରଆତ୍ମା ମିମାନୁ ମାନାତ୍‌, ମାରି ଏନ୍‌ଆପିନ୍‌ ମିଙ୍ଗିଁ ସିକ୍‌ୟା ସିନାନ୍‌, ଇକା ମିଙ୍ଗିଁ ଦର୍‌କାର୍‌ ସିଲେତ୍‌ । ପବିତ୍ରଆତ୍ମା ମିଙ୍ଗିଁ ୱିଜୁ ବିସୟ୍‌ତାନ୍‌ ଆମା ସିକ୍‌ୟା ସିନାତ୍‌, ଆକା ସତ୍‌, ମିଚ୍‌ ସିଲେ । ଆୟା ଆତ୍ମାଦି ସିକ୍‌ୟା ମାନାଜି କ୍ରିସ୍ତଦି ୱାଲେ ମିସାଜି ତେବାଦୁ ।
1JO 2:28 ମାରି, ଏ କଡ଼ର୍‌, ୱାନିମାନୁ ତେବାଦୁ, ଏଣ୍ତେସ୍‌ ୱାନ୍‌ ଏସ୍ତିୱାଲେ ତରାନାନ୍‌, ନାସ୍ତିୱାଲେ ୱାନି ୱାନିଦିନ୍‌ତି ବେଡ଼ାଦୁ ୱାନି ଆଗ୍‌ଡ଼ି ମାଡୁ ସେମାର୍‌ ଆଏଣ୍‌ଗା ସାହାସ୍‌ ପୟ୍‌ନିକା ।
1JO 2:29 ମାଡୁ ନେସ୍‌ନିଦେର୍‌, କ୍ରିସ୍ତ ପୁରା ନ୍ୟାୟ୍‌କିନିକାନ୍‌ । ମାରି ଇକାବା ନେସ୍‌ନି ମାନିକା ମାନାତ୍‌ ଜେ, ଆମାକାର୍‌ ସତ୍‌ପାଣି କିନାର୍‌, ୱାର୍‌ ନେ ମାପୁରୁଦି କଡ଼ ।
1JO 3:1 ସୁଡ଼ୁଦୁ, ବୁବା ମାଙ୍ଗିଁ ଏସା ଜିବନ୍‌ନୋନାନ୍‌, ମା ଉଣ୍ତିଙ୍ଗ୍‌ ୱାନି ଜିବନ୍‌ନୋନିକା ନିସା ନାଣ୍ତ ଜେ, ମାଡୁ ମାପୁରୁଦି ୱାଜା ଦର୍‌ଆତି ମାନିକା । ସତ୍‌ତାନ୍‌ ମାଡୁ ୱାନି କଡ଼ର୍‌ ଆୟାଉଣ୍ତିଙ୍ଗ୍‌ ଜଗତ୍‌ ମାପୁରୁଙ୍ଗୁଁ ନେସ୍‌ଇତିମାନିଙ୍ଗ୍‌, ମାଙ୍ଗିଁ ବା ସିନେ କିଦେଙ୍ଗ୍‌ ଆଟ୍‌ଏତ୍‌ ।
1JO 3:2 ଏ ନା ତଡ଼୍‍କୁ, ଇଲେଇ ମାଡୁ ମାପୁରୁଦି କଡ଼ର୍‌, ମାତର୍‌ ୱାଜିନିକାଡ଼ାଦୁ ମାଡୁ ଇନିକା ଆନିକା, ଆକା ଇୟାସାନ୍ଧି ୱେଙ୍ଗେଏତ୍‌ । ନିସନେ ମାତ୍ର ମାଡୁ ନେସ୍‌ନିକା ଜେ, କ୍ରିସ୍ତ ଏସ୍ତିୱାଲେ ତରାୟ୍‌ଆନାନ୍‌, ନାସ୍ତିୱାଲେ ମାଡୁ ୱାନି ୱାଜା ଆନାଟ୍‌, ଇରିଙ୍ଗ୍‌ ୱାନ୍‌ ଏଣ୍ତେସ୍‌, ମାଡୁ ଆୟାୱାଜା ୱାନିଙ୍ଗ୍‌ ସୁଡ଼ୁନାଟ୍‌ ।
1JO 3:3 ମାରି ଆମାକାର୍‌ କ୍ରିସ୍ତଦିମାନୁ ଇୟା ଆସା ତିଆର୍‌ କିତାମାନାର୍‌, ୱାର୍‌ କ୍ରିସ୍ତଦି ୱାଜା ନିଜେଦିଙ୍ଗ୍‌ ପବିତ୍ର କିଜି ଇଡ୍‌ନାର୍‌ ।
1JO 3:4 ଏନ୍‌ଆପିନ୍‌ ପାପ୍‌ କିନାନ୍‌, ୱାନ୍‌ ମାପୁରୁଦି ନିୟମ୍‌ ମାନାଏନ୍‌, ଇରିଙ୍ଗ୍‌ ପାପ୍‌ତି ଅରତ୍‌ ଆଜିନାତ୍‌ ମାଟାଦିଙ୍ଗ୍‌ ମାନାଇକା ।
1JO 3:5 ମାରି ମିର୍‌ ନେସ୍‌ନିଦେର୍‌ ଜେ, କ୍ରିସ୍ତ ପାପ୍‌ ଅତେଙ୍ଗ୍‌ ଇଜି ୱାତା ମାର୍‌ର୍ହାନ୍‌, ମାରି ୱାନିମାନୁ ପାପ୍‌ ସିଲେତ୍‌ ।
1JO 3:6 ଏନ୍‌ କ୍ରିସ୍ତଦି ୱାଲେ ମିସାଜି ତେବାନାନ୍‌, ୱାନ୍‌ ପାପ୍‌ କିଏନ୍‌; ମାତର୍‌ ଏନ୍‌ ପାପ୍‌ କିନାନ୍‌, ୱାନ୍‌ କ୍ରିସ୍ତଙ୍ଗ୍‌ ଏସ୍‌କାଙ୍ଗ୍‌ବା ସୁଡ଼ୁଏନ୍‌, ଏସ୍‌କାଙ୍ଗ୍‌ ୱାନିଙ୍ଗ୍‌ ନେସ୍‌ଏନ୍‌ ।
1JO 3:7 ଏ କଡ଼ର୍‌, ଏନ୍‌ ମିଙ୍ଗିଁ ବାୟା କିମାକିନ୍‌; ଏନ୍‌ ସତ୍‌ପାଣି କିନାନ୍‌, କ୍ରିସ୍ତ ଏଣ୍ତେସ୍‌ ଦାର୍ମୁଦିକାନ୍‌, ୱାନ୍‌ ଆୟାୱାଜା ଦାର୍ମୁଦିକାନ୍‌ ।
1JO 3:8 ଏନ୍‌ ପାପ୍‌ କିନାନ୍‌, ୱାନ୍‌ ସୟତାନ୍‌ତି ମାଣୁକୁ ଜନମ୍‌, ଇରିଙ୍ଗ୍‌ ସୟ୍‌ତାନ୍‌ ଜଗତ୍‌ ତିଆର୍‌ଆତି ଆଗ୍‌ଡ଼ିରାନ୍‌ନେ ପାପ୍‌ କିଜିୱାଜିନାତ୍‌ । ଆୟା ସୟ୍‌ତାନ୍‌ତି ପାଣିଦିଙ୍ଗ୍‌ ଦ୍ୱଂସ କିନି ଉଣ୍ତିଙ୍ଗ୍‌ ମାପୁରୁଦି ମାରିନ୍‌ ୱାତାନ୍‌ ।
1JO 3:9 ଏନ୍‌ ମାପୁରୁଦିମାଣୁକୁ ଜନମ୍‌, ୱାନ୍‌ ପାପ୍‌ କିଏନ୍‌, ଇରିଙ୍ଗ୍‌ ମାପୁରୁଦି ୱିତୁ ୱାନିମାନୁ ମାନାତ୍‌, ମାରି ମାପୁରୁ ୱାନି ବୁବା, ୱାନ୍‌ ପାପ୍‌ କିଦେଙ୍ଗ୍‌ ଆଟ୍‌ଏନ୍‌ ।
1JO 3:10 ଇବେନୁ ଏନ୍‌ ମାପୁରୁଦି ମାରିନ୍‌ ମାରି ଏନ୍‌ ସୟତାନ୍‌ଦି ମାରିନ୍‌, ଇକା ତରାୟ୍‌ଆନାତ୍‌ : ଏନ୍‌ ସତ୍‍ପାଣି କିଏନ୍‌, ମାରି ନିଜେଦି ତଡ଼ାନ୍‌ତିଙ୍ଗ୍‌ ଜିବନ୍‌ନୋଏନ୍‌, ୱାନ୍‌ ମାପୁରୁଦି ମାରିନ୍‌ ଆଏନ୍‌ ।
1JO 3:11 ଅରେନ୍‌ ଆଇୱାନିଙ୍ଗ୍‍ ଜିବନ୍‌ନୋନିକା ମାନାତ୍‌, ଇୟା ମାଟା ମିର୍‌ ପୁର୍ବେଦାନ୍‌ ୱେର୍‌ଇମାନିଦେର୍‌ ।
1JO 3:12 ପାପ୍‌ଆତ୍ମାଦି ମାରିନ୍‌ ଜେ କୟିନ, ୱାନି ୱାଜା ଆମାଟ୍‌, ୱାନ୍‌ ନିଜେଦି ତଡ଼ାନ୍‌ତିଙ୍ଗ୍‌ ସାୟାମାର୍‌ଗାଡାକ୍‌ତାନ୍‌ । ୱାନି ତଡ଼ାନ୍‌ତିଙ୍ଗ୍‌ ୱାନ୍‌ ଏନ୍ଧା ସାୟାମାର୍‌ଗାଡାକ୍‌ତାନ୍‌ ? ୱାନି ନିଜେଦି ପାଣି ପାପ୍‌ତୁ ମାର୍ହାତ୍‌; ମାତର୍‌ ୱାନି ତଡ଼ାନ୍‌ ୱିଜୁଦିନ୍ ସତ୍‍ପାଣି କିଜିମାର୍ହାନ୍‌ ।
1JO 3:13 ମାରି, ଏ ତଡ଼ାନ୍‌କୁ ନି ତାଙ୍ଗିକ୍, ଇୟା ଜଗତ୍‌ତି ଲୋକୁ ମିଙ୍ଗିଁ ଜେ କାଡ଼ାନାର୍‌, ଇବେନୁ କାବା ଆମାଟ୍‌ ।
1JO 3:14 ମାପୁ ନେସ୍‌ନାପ୍‌ ଜେ, ଇଲେଇ ମାପୁ ସାନିତାନିଙ୍ଗ୍‌ ଜିଣାଜି ଜିବନ୍‌ ପୟ୍‌ତା ମାନାପ୍‌, ଇରିଙ୍ଗ୍‌ ମାପୁ ତଡ଼ାନ୍‌କାଙ୍ଗ୍‌ ଜିବନ୍‌ନୋଜିନାପ୍‌ । ଏନ୍‌ ଜିବନ୍‌ନୋଏନ୍‌, ୱାନ୍‌ ସାନି ଅଦିକାର୍‌ତାନ୍‌ ତେବାନାନ୍‌ ।
1JO 3:15 ଏନ୍‌ ନିଜେଦି ତଡ଼ାନ୍‌ତିଙ୍ଗ୍‌ କାଡ଼ାନାନ୍‌, ୱାନ୍‌ ଅରେନ୍‌ ନରକ୍‌ଦିକାନ୍‌; ମାରି ନରକଦୁ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ସିଲେତ୍‌, ଇକା ମିରୁ ନେସ୍‌ନିଦେର୍‌ ।
1JO 3:16 ଜିସୁ କ୍ରିସ୍ତ ମା ଉଣ୍ତିଙ୍ଗ୍‌ ନିଜେଦି ଜିବନ୍‌ ସିତି ମାଣୁକୁ ମାଡୁ ଜିବନ୍‌ନୋନି ସିକ୍‌ୟା ପୟ୍‌ତାମାନାପ୍‌; ମାରି ତଡ଼ାନ୍‌କା ଉଣ୍ତିଙ୍ଗ୍‌ ମା ଜିବନ୍‌ ବା ସିନିକା ମାନାତ୍‌ ।
1JO 3:17 ଜଦି ଅରେନ୍‌ ଜଗତ୍‌ଦୁ ମାଜନ୍‌ ଲୋକୁ ତଡ଼ାନ୍‌ତି କାକୁର୍ତି ସୁଡ଼ୁଜି ବା ୱାନି ଉଣ୍ତିଙ୍ଗ୍‌ ଦୟା କିଏନ୍‌, ୱାନିମାନୁ ମାପୁରୁଦି ଜିବନ୍‌ନୋନିକା ମାନାତ୍‌ ଇଜି ଏଣ୍ତେସ୍‌ ୱେର୍‌ତେଙ୍ଗ୍‌ ଆଟ୍‌ନାନ୍‌ ?
1JO 3:18 ଏ କଡ଼ର୍‌, ରାଦୁ, ମାଡୁ ବାକ୍ୟଦାନ୍‌ ନୋ ୱେତଲ୍‌ତାନ୍‌ ଜିବନ୍‌ନୋଏଣ୍‌ଗା, ପାଣିଦାନ୍‌ ମାରି ସତ୍‌ତାନ୍‌ ଜିବନ୍‌ନୋନିକା ।
1JO 3:19 ଆର୍‌ତିଙ୍ଗ୍‌ ମାଡୁ ନେସ୍‌ତେଙ୍ଗ୍‌ ଆଟ୍‌ନିକା ଜେ, ସତ୍‍ତାନ୍‌ ମା ତେବାନିକା ମାରି ମାଡୁ ତିଲାଇ ମୋନ୍‌ତାନ୍‌ ମାପୁରୁଦି ଲାକ୍‌ତୁ ତେବାଦେଙ୍ଗ୍‌ ଆଟ୍‌ନିକା ।
1JO 3:20 ଜଦି ଆମାଇନି ବିସୟ୍‌ତାନ୍‌ ମା ବୁଦି ମାଙ୍ଗିଁ ଦୋସ୍‌ କିନାତ୍‌, ମାଡୁ ମନେ ଇଡିନିକା ମାନାତ୍‌, ଇରିଙ୍ଗ୍‌ ମାପୁରୁ ମା ବୁଦିଦାନ୍‌ ପେରିକାନ୍‌ ମାରି ୱାନ୍‌ ୱିଜୁ ମାଟା ନେସ୍‌ନାନ୍‌ ।
1JO 3:21 ନା ତଡ଼୍‍କୁ, ମା ବୁଦି ଜଦି ମାଙ୍ଗିଁ ଦୋସ୍‌ କିଏତ୍‌, ଆର୍‌ତିଙ୍ଗ୍‌ ମାପୁରୁଦି ଲାକ୍‌ତୁ ମା ସାହାସ୍‌ ମାନାତ୍‌ ।
1JO 3:22 ମାରି ୱାନିଙ୍ଗ୍‌ ମାଡୁ ଇନି ଇନିକା ଲସ୍‌ନିକା, ଆୟାୱିଜୁ ୱାନିମାଣୁକୁ ପୟ୍‌ନିକା, ଇରିଙ୍ଗ୍‌ ମାଡୁ ୱାନି ମାଟା ମାନାନିକା, ମାରି ୱାନି କାଣ୍‌କାଙ୍ଗ୍‌ ଆମାକା ନେଗିକା, ଆକା କିଜିନାପ୍ ।
1JO 3:23 ୱାନି ମାଟା ଇକା ଜେ, ମାଡୁ ୱାନି ମାରିନ୍‌ ଜିସୁ କ୍ରିସ୍ତଦି ଦର୍‌ତାନ୍‌ ବିସ୍‌ବାସ୍‌ କିନିକା ମାରି କ୍ରିସ୍ତଦି ଆଦେସ୍‌ ଇସାବ୍‌ତାନ୍‌ ନିଜେନିଜେଦିଙ୍ଗ୍‌ ଜିବନ୍‌ନୋଜିସାନିକା ।
1JO 3:24 ଏନ୍‌ ମାପୁରୁଦି ମାଟା ମାନାନାନ୍‌, ୱାନ୍‌ ମାପୁରୁଦି ମାଟା ଏତ୍‌ କିନାନ୍‌ : ମାପୁରୁ ୱାନିମାନୁ ତେବାନାନ୍‌ ମାରି ୱାନ୍‌ ମାପୁରୁଦିମାନୁ ତେବାନାନ୍‌, ମାରି ମାପୁରୁ ମାମାନୁ ତେବାନାନ୍‌, ଇୟା ମାଟା ମାଙ୍ଗିଁ ସିତିମାନି ୱାନି ଆତ୍ମାଦି ସାହାଜ୍ୟଦାନ୍‌ ମାଡୁ ନେସ୍‌ତେଙ୍ଗ୍‌ ଆଟ୍‌ସିନିକା ।
1JO 4:1 ଏ ନା ତଡ଼୍‍କୁ, ୱିଜୁ ଆତ୍ମେଆଙ୍ଗ୍‌ ବିସ୍‌ବାସ୍‌ କିମାଟ୍‌; ୱାର୍‌ ପୟ୍‌ତିମାନି ଆତ୍ମା ମାପୁରୁଦିମାଣୁକୁ ୱାତିକା ନୋ ସିଲେ, ଆଗ୍‌ଡ଼ି ୱାରିଙ୍ଗ୍‌ ପରିକା କିଜ ସୁଡ଼ୁଦୁ । ଇରିଙ୍ଗ୍‌ ଜଗତ୍‌ଦୁ ଗାଦିଲୋକ୍‌ ବଣ୍ତ୍‌ ବାବବାଦିର୍‌ ସତାମାନାର୍‌ ।
1JO 4:2 ୱାର୍‌ ମାପୁରୁଦି ଆତ୍ମା ପୟ୍‌ତାମାନାର୍‌ ନୋ ସିଲେ, ଆକା ନେସ୍‌ନି ଉପାୟ୍‌ ଆଜିନାତ୍‌ ଆମା ଲୋକ୍‌ତିମାନୁ ମାପୁରୁଦି ଆତ୍ମା ମାନାତ୍‌, ୱାନ୍‌ ପେରି ୱେୟୁଦାନ୍‌ ମାନାନାନ୍‌ ଜେ, ଜିସୁ କ୍ରିସ୍ତ ଲୋକା ୱାଜା ୱାତା ମାର୍ହାନ୍‌ ।
1JO 4:3 ମାତର୍‌ ଏନ୍‌ ଜିସୁଙ୍ଗୁଁ ମାନାଏନ୍‌, ୱାନ୍‌ ଏସ୍‌କାଙ୍ଗ୍‌ବା ମାପୁରୁଦି ଆତ୍ମା ପୟ୍‌ଏନ୍‌ । କ୍ରିସ୍ତଦି ସାତ୍ରୁଦି ମାଣୁକୁ ୱାନ୍‌ ଆୟା ଆତ୍ମା ପୟ୍‌ତାମାନାନ୍‌, ଆମାୱାନି ୱାନିଦିନ୍‌ତି ମାଟା ମିରୁ ୱେର୍‌ଇମାନିଦେର୍‌, ମାରି ଆକା ଇଲେଇ ଇୟା ଜଗତ୍‌ଦୁ ୱାତାମାନାତ୍‌ ।
1JO 4:4 ଏ କଡ଼ର୍‌, ମିରୁ ମାପୁରୁଦିମାଣୁକୁ ଜନମ୍‌, ମାରି ମିରୁ ଆୟା ବଣ୍ତ୍‌ ବାବବାଦିରିଙ୍ଗ୍‌ ଆରାକିତିମାନିଦେର୍‌, ଇରିଙ୍ଗ୍‌ ମି ଜିବନ୍‌ତୁ ବାସାତି ମାନି ମାପୁରୁଦି ଆତ୍ମା, ଜଗତ୍‌ଦି ଲୋକା ଆତ୍ମାଆଙ୍ଗ୍‌ ମାଣୁକୁ ନାଣ୍ତ୍‌ ସାକ୍ତି ।
1JO 4:5 ବଣ୍ତ୍‌ ବାବବାଦିର୍‌ ଜଗତ୍‌ତାନ୍‌ ୱାତାମାନାର୍‌, ମାରି ବଣ୍ତ୍‌ ବାବବାଦିର୍‌ ଦୁନିଆଦି ମାଟା ୱେର୍‌ସି ବୁଲାଜିନାର୍‌ ମାରି ଦୁନିଆଦି ଲୋକୁ ୱାରି ମାଟା ୱେନ୍‌ଞ୍ଜିନାର୍‌ ।
1JO 4:6 ମାତର୍‌ ମାଡୁ ମାପୁରୁଦିମାଣୁକୁ ଜନମ୍‌; ଏନ୍‌ ମାପୁରୁଦି ନେସ୍‌ନାନ୍‌, ୱାନ୍‌ ମା ମାଟା ୱେନାନ୍‌ । ଏନ୍‌ ମାପୁରୁଦିମାଣୁକୁ ଜନମ୍‌ ଆଏନ୍‌, ୱାନ୍‌ ମା ମାଟା ୱେନ୍‌ଏନ୍‌ । ଇୟାମାଣୁକୁ ମାଡୁ ସତ୍‌ତି ଆତ୍ମା ମାରି ବାୟାକିନି ଆତ୍ମାଦିଙ୍ଗ୍‌ ସିନିସ୍‌ କିଦେଙ୍ଗ୍‌ ଆଟ୍‌ନିକା ।
1JO 4:7 ଏ ନା ତଡ଼୍‍କୁ, ମାଡୁ ନିଜେନିଜେଦିଙ୍ଗ୍‌ ଜିବନ୍‌ନୋଜିସାନିକା, ଇରିଙ୍ଗ୍‌ ଜିବନ୍‌ନୋନିକା ମାପୁରୁଦିମାଣୁକୁ ୱାତାମାନାତ୍‌, ମାରି ଏନ୍‌ ଜିବନ୍‌ନୋନାନ୍‌, ୱାନ୍‌ ମାପୁରୁଦି ମାରିନ୍‌ ମାରି ୱାନ୍‌ ମାପୁରୁଙ୍ଗୁଁ ନେସ୍‌ନାନ୍‌ ।
1JO 4:8 ଏନ୍‌ ଜିବନ୍‌ନୋଏନ୍‌, ୱାନ୍‌ ମାପୁରୁଙ୍ଗୁଁ ନେସ୍‌ଏନ୍‌, ଇରିଙ୍ଗ୍‌ ମାପୁରୁନେ ଜିବନ୍‌ନୋନିକାନ୍‌ ।
1JO 4:9 ଇବେନୁ ମାପୁରୁଦି ଜିବନ୍‌ନୋନିକା ମା ଉଣ୍ତିଙ୍ଗ୍‌ ତର୍‌ତାମାନାନ୍‌, ମାପୁରୁ ଜେ ନିଜେଦି ମାରିନ୍‌ତିଙ୍ଗ୍‌ ଜଗତ୍‌ଦୁ ପୋକ୍‌ତାତାନ୍‌, ଏଣ୍ତେସ୍‌ ମାପ୍‌ ୱାନିମାଣୁକୁ ୱିଜୁଦିନ୍ ଜିବନ୍‌ ପୟ୍‌ନାପ୍‌ ।
1JO 4:10 ଇକାନେ ସତ୍‌ତି ଜିବନ୍‌ନୋନିକା, ମାଡୁ ମାପୁରୁଙ୍ଗୁଁ ଜିବନ୍‌ନୋଇକା, ମାତର୍‌ ୱାନ୍‌ ମାଙ୍ଗିଁ ଜିବନ୍‌ନୋଜି, ମାରି ନିଜେଦି ମାରିନ୍‌ତିଙ୍ଗ୍‌ ମା ପାପ୍‌ତିଙ୍ଗ୍‍ ପିଣ୍ଡିନି ଅନିଉଣ୍ତିଙ୍ଗ୍‌ ପୋକ୍‌ତାତାନ୍‌ ।
1JO 4:11 ଏ ନା ତଡ଼୍‍କୁ, ମାପୁରୁ ଜଦି ମାଙ୍ଗିଁ ଇୟାୱାଜା ଜିବନ୍‌ନୋତା ମାନାନ୍‌, ଆର୍‌ତିଙ୍ଗ୍‌ ମାଡୁ ବା ନିଜେନିଜେଦିଙ୍ଗ୍‌ ଜିବନ୍‌ନୋଜିସାନିକା ମାନାତ୍‌ ।
1JO 4:12 ମାପୁରୁଙ୍ଗୁଁ ଏନ୍‌ ଏସ୍‌କାଙ୍ଗ୍‌ ସୁଡ଼ୁଏନ୍‌, ମାତର୍‌ ମାଡୁ ଜଦି ନିଜେନିଜେଦିଙ୍ଗ୍‌ ଜିବନ୍‌ନୋଜିସାନିକା, ଆର୍‌ତିଙ୍ଗ୍‌ ମାପୁରୁ ମାମାନୁ ମାନାନ୍‌ ମାରି ୱାନି ଜିବନ୍‌ନୋନିକା ମାମାନୁ ପୁରାତେବାତା ମାନାତ୍‌ ।
1JO 4:13 ମାଡୁ ଜେ ମାପୁରୁଦିମାନୁ ମାନିକା ମାରି ୱାନ୍‌ ମାମାନୁ ମାନାନ୍‌, ଇକା ମାଡୁ ନେସ୍‌ନିକା, ଇରିଙ୍ଗ୍‌ ୱାନ୍‌ ମାଙ୍ଗିଁ ନିଜେଦି ଆତ୍ମାଦି ୱାଲେ ସିତାମାନାନ୍‌ ।
1JO 4:14 ବୁବା ଜେ ମାରିସିଙ୍ଗ୍‌ ଜଗତ୍‌ଦି ରକିୟାକର୍ତ୍ତା ଆନି ଉଣ୍ତିଙ୍ଗ୍‌ ପୋକ୍‌ତାତା ମାନାନ୍‌, ଇକା ମାଡୁ ସୁଡ଼ୁତି ମାନିକା ମାରି ୱାନି ବିସୟ୍‌ତାନ୍‌ ଆଇୱାରିଙ୍ଗ୍‌ ସାକିୟ୍‌ ୱେର୍‌ସିନିକା ।
1JO 4:15 ଏନ୍‌ ଜିସୁଙ୍ଗୁଁ ମାପୁରୁଦି ମାରିନ୍‌ ଇଜି ମାନାନାନ୍‌, ମାପୁରୁ ୱାନିମାନୁ ମାନାନ୍‌ ମାରି ୱାନ୍‌ ମାପୁରୁଦିମାନୁ ମାନାନ୍‌ ।
1JO 4:16 ମାରି ମା ଉଣ୍ତିଙ୍ଗ୍‌ ମାପୁରୁଦି ଆମା ଜିବନ୍‌ନୋନିକା ମାନାତ୍‌, ଆକା ମାଡୁ ନେସ୍‌ତି ମାନିକା ମାରି ବିସ୍‌ବାସ୍‌ କିତାମାନାପ୍‌ । ମାପୁରୁନେ ଜିବନ୍‌ନୋନିକାନ୍‌ । ଆମାୱାନି ଜିବନ୍‌ତୁ ଜିବନ୍‌ନୋନିକା ପୁରା ତେବାତା ମାନାତ୍‌, ୱାନ୍‌ ମାପୁରୁଦିମାନୁ ତେବାନାନ୍‌ ମାରି ମାପୁରୁ ୱାନିମାନୁ ତେବାନାନ୍‌ ।
1JO 4:17 ଇବେନୁ ଜିବନ୍‌ନୋନିକା ମାମାନୁ ପୁରାତେବାତା ମାନାତ୍‌ ଜେ, ବିଚାର୍‍ତି ନାଣ୍ତିଙ୍ଗ୍‌ ମାଡୁ ସାହାସ୍‌ ପୟ୍‌ନିକା, ଇରିଙ୍ଗ୍‌ କ୍ରିସ୍ତ ଏଣ୍ତେସ୍‌ ମାନାନ୍‌, ମାଡୁ ବା ଇୟା ଜଗତ୍‌ଦୁ ଆୟାୱାଜା ମାନିକା ।
1JO 4:18 ଏମେମାନୁ ଜିବନ୍‌ନୋନିକା ମାନାତ୍‌, ଆବେନୁ ତିଲାନିକା ସିଲେତ୍‌, ମାତର୍‌ ସତ୍‌ତି ଜିବନ୍‌ନୋନିକା ତିଲାନି ତାନିଙ୍ଗ୍‌ ଆକ କିନାତ୍‌, ଇରିଙ୍ଗ୍‌ ତିଲାନିକା ଦଣ୍ତ୍‌ତି ୱାଲେ ସିମାନାତ୍‌, ମାରି ଏନ୍‌ ତିଲାନାନ୍‌, ୱାନିମାନୁ ଜିବନ୍‌ନୋନିକା ପୁରା ସିଲେତ୍‌ ।
1JO 4:19 ମାଡୁ ଜିବନ୍‌ନୋନିକା ଅଜାତାମାନାପ୍‌, ଇରିଙ୍ଗ୍‌ ମାପୁରୁ ନେ ଆଗ୍‌ଡ଼ି ମାଙ୍ଗିଁ ଜିବନ୍‌ନୋତା ମାନାନ୍‌ ।
1JO 4:20 ମାପୁରୁଙ୍ଗୁଁ ଜିବନ୍‌ନୋଜିନା ଇଜି ୱେର୍‌ସି ଜଦି ଏନ୍‌ ନିଜେଦି ବିସ୍‌ବାସିରି ତଡ଼ାନ୍‌ତିଙ୍ଗ୍‌ ନି ତାଙ୍ଗିଁକ୍‌ କାଡ଼ାନାନ୍‌, ଆର୍‌ତିଙ୍ଗ୍‌ ୱାନ୍‌ ମିଚ୍‌ୱେର୍‌ନିକାନ୍‌ । ଲାକ୍‌ତୁ ସୁଡ଼ୁଜିମାନି ଅରେନ୍‌ ତଡ଼ାନ୍‌ତିଙ୍ଗ୍‌ ଏନ୍‌ ଜିବନ୍‌ନୋଦେଙ୍ଗ୍‌ ଆଟ୍‌ଏନ୍‌, ୱାନ୍‌ ତର୍‌ଇ ମାପୁରୁଙ୍ଗୁଁ ଏସ୍‌କାଙ୍ଗ୍‌ବା ଜିବନ୍‌ନୋଦେଙ୍ଗ୍‌ ଆଟ୍‌ଏନ୍‌ ।
1JO 4:21 ଇୟା ଆଦେସ୍‌ କ୍ରିସ୍ତ ମାଙ୍ଗିଁ ସିତାମାନାନ୍‌, ଏନ୍‌ ମାପୁରୁଙ୍ଗୁଁ ଜିବନ୍‌ନୋନାନ୍‌, ୱାନ୍‌ ନିଜେଦି ତଡ଼ାନ୍‌ତିଙ୍ଗ୍‌ ବା ଜିବନ୍‌ନୋପିନ୍‌ ।
1JO 5:1 ଏନ୍‌ ଜିସୁଙ୍ଗୁଁ ମସିହ ଇଜି ବିସ୍‌ବାସ୍‌ କିନାନ୍‌, ୱାନ୍‌ ମାପୁରୁଦି ମାରିନ୍‌; ମାରି, ଏନ୍‌ଆପିନ୍‌ ଅରେନ୍‌ ବୁବେଙ୍ଗ୍‌ ଜିବନ୍‌ନୋନାନ୍‌, ଆୟା ବୁବାସିଦି କଡ଼ଦିଙ୍ଗ୍‌ ବା ୱାନ୍‌ ଜିବନ୍‌ନୋନାନ୍‌ ।
1JO 5:2 ମାଡୁ ଏସ୍ତିୱାଲେ ମାପୁରୁଙ୍ଗୁଁ ଜିବନ୍‌ନୋନିକା ମାରି ୱାନି ମାଟା ମାନାନାପ୍‌, ନାସ୍ତିୱାଲେ ନେସ୍‌ତେଙ୍ଗ୍‌ ଆଟ୍‌ନାପ୍‌ ଜେ, ମାଡୁ ମାପୁରୁଦି କଡ଼ରିଙ୍ଗ୍‌ ଜିବନ୍‌ନୋଜିନାପ୍‌ ।
1JO 5:3 ଇରିଙ୍ଗ୍‌ ମାପୁରୁଙ୍ଗୁଁ ଜିବନ୍‌ନୋନି ଅର୍ତ ଆଜିନାତ୍‌, ମାଡୁ ୱାନି ମାଟା ମାନାନିକା, ମାରି ୱାନି ମାଟା ମାନାନିକା ନାଣ୍ତ କାସ୍ଟୁସିଲେ ।
1JO 5:4 ଇରିଙ୍ଗ୍‌ ମାପୁରୁଦି କଡ଼ର୍‌ ଇୟା ଜଗତ୍‌ତିଙ୍ଗ୍‌ ଆରା କିଦେଙ୍ଗ୍‌ ସାକ୍ତି ପୟ୍‌ତାମାନାନ୍‌ । ବିସ୍‌ବାସ୍‌ତି ସାକ୍ତିଦାନ୍‌ ମାଡୁ ଜଗତ୍‌ତି ମୁସ୍‌କୁ ଜିଣାଦେଙ୍ଗ୍‌ ଆଟ୍‌ନିକା ।
1JO 5:5 ଇୟା ଜଗତ୍‌ତିଙ୍ଗ୍‌ ଏନ୍‌ ଆରା କିଦେଙ୍ଗ୍‌ ଆଟ୍‌ନାନ୍‌ ? ଜିସୁଙ୍ଗୁଁ ମାପୁରୁଦି ମାରିନ୍‌ ଇଜି ଏନ୍‌ ବିସ୍‌ବାସ୍‌ କିନାନ୍‌, ଆୟାକାନ୍‌ନେ କେବଲ୍‌ ଇକା କିଦେଙ୍ଗ୍‌ ଆଟ୍‌ନାନ୍‌ ।
1JO 5:6 ଆୟା ଜିସୁ କ୍ରିସ୍ତ ମାପୁରୁଦି ମାରିନ୍‌ ଇଜି ଡୁବନ୍‌ତାନ୍‌ ୱାନି ଜିବନ୍‌ତି ପାଣି ଆରାମ୍‌ କିତାମାର୍ହାନ୍‌, ମାରି ନିଜେଦି ନେତେର୍‌ତାନ୍‌ ଲୋକା ରକ୍ଷାକିନି ପାଣିକିତାନ୍‌ । କେବଲ୍‌ ଡୁବନ୍ ଅସି ୱାନ୍‌ ରେଏନ୍‌ ମାର୍ହାନ୍‌, ମାତର୍‌ ଏରୁ ନି ନେତେର୍‌ ରୁଣ୍ତିୱାନିକାଙ୍ଗ୍‌ ସିଜି ୱାତାମାର୍ହାନ୍‌ । ମାରି ଆତ୍ମା ବା ଇବେଣି ସାକି ୱେର୍‌ନାନ୍‌; ଇରିଙ୍ଗ୍‌ ଆତ୍ମା ନେ ସତ୍‌ ।
1JO 5:7 ମାରି ଇୟା ମୁଏରି ସାକି ଉନ୍‌ଡ୍ରେ ସାମାନ୍‌,
1JO 5:8 ଆତ୍ମା, ଏରୁ ମାରି ନେତେର୍‌, ଇୟା ମୁଏର୍‌ ସାକି ୱେର୍‌ନାର୍‌ ।
1JO 5:9 ମାଡୁ ଜଦି ଲୋକା ସାକି ମାନାନିକା, ଆର୍‌ତିଙ୍ଗ୍‌ ମାପୁରୁଦି ସାକି ଆୟାମାଣୁକୁ ନାଣ୍ତ ପେରିକା, ମାରି ମାପୁରୁଦି ସାକି ଇକା ଜେ, ୱାନ୍‌ ନିଜେଦି ମାରିନ୍‌ତି ବିସୟ୍‌ତାନ୍‌ ସାକି ସିତାମାନାନ୍‌ ।
1JO 5:10 ଏନ୍‌ ମାପୁରୁଦି ମାରିନ୍‌ତିମାନୁ ବିସ୍‌ବାସ୍‌ କିନାନ୍‌, ୱାନ୍‌ ନିଜେଦି ଜିବନ୍‌ତୁ ଇୟା ସାକି ପୟ୍‌ତା ମାନାନ୍‌; ଏନ୍‌ ମାପୁରୁଦି ସାକି ବିସ୍‌ବାସ୍‌ କିଏନ୍‌, ୱାନ୍‌ ମାପୁରୁଙ୍ଗୁଁ ମିଚ୍‌ୱେର୍‌ନିକାନ୍‌ କିତାମାନାନ୍‌, ଇରିଙ୍ଗ୍‌ ମାପୁରୁ ନିଜେଦି ମାରିନ୍‌ତି ବିସୟ୍‌ତାନ୍‌ ଆମା ସାକି ୱେର୍‌ତାମାନାନ୍‌, ଆବେନୁ ୱାନ୍‌ ବିସ୍‌ବାସ୍‌ କିଏନ୍‌ ।
1JO 5:11 ଆୟା ସାକିଦି ଅରତ୍‌ ଆତାତ୍‍ଜେ, ମାପୁରୁ ମାଙ୍ଗିଁ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ସିତାମାନାନ୍‌; ମାରି ଆୟା ଜିବନ୍‌ ୱାନି ମାରିନ୍‌ତିମାନୁ ମାନାତ୍‌ ।
1JO 5:12 ଏନ୍‌ ମାରିନ୍‌ତିଙ୍ଗ୍‌ ପୟ୍‌ତା ମାନାନ୍‌, ୱାନ୍‌ ଜିବନ୍‌ ପୟ୍‌ତା ମାନାନ୍‌; ଏନ୍‌ ମାପୁରୁଦି ମାରିନ୍‌ତିଙ୍ଗ୍‌ ପୟ୍‌ଏନ୍‌, ୱାନ୍‌ ଜିବନ୍‌ ବା ପୟ୍‌ଏନ୍‌ ।
1JO 5:13 ମାପୁରୁଦି ମାରିନ୍‌ତି ଦର୍‌ତାନ୍‌ ବିସ୍‌ବାସ୍‌ କିଜିନିଦେର୍‌ ଜେ ମିରୁ, ମିରୁ ଏଣ୍ତେସ୍‌ ନେସ୍‌ନିଦେର୍‌ ଜେ, ମିରୁ ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ପୟ୍‌ତିମାନିଦେର୍‌, ଇୟାଉଣ୍ତିଙ୍ଗ୍‌ ନାନୁ ମିଙ୍ଗିଁ ଇୟା ଆକୁ ରାସ୍‌ସିନା ।
1JO 5:14 ମାପୁ ତିଲାଏଣ୍‌ଗା ମାପୁରୁଦି ଲାକ୍‌ତୁ ୱାଦେଙ୍ଗ୍‌ ଆଟ୍‌ସିନାପ୍‌, ଇରିଙ୍ଗ୍‌ ମାପୁ ସତ୍‌ତାନ୍‌ ନେସ୍‌ନାପ୍‌ ଜେ, ମାପୁ ଏସ୍‌କାଙ୍ଗ୍‌ ୱାନି ଇଚ୍ଛାଦାନ୍‌ ଇନି ପାର୍‌ତାନା କିତିଙ୍ଗ୍‌, ଆର୍‌ତିଙ୍ଗ୍‌ ୱାନ୍‌ ମା ଆୟା ପାର୍‌ତାନା ୱେନାନ୍‌ ।
1JO 5:15 ମାରି ମାଡୁ ୱାନି ଲାକ୍‌ତୁ ଆମାକା ଇନିକା ପାର୍‌ତାନା କିନିକା, ଆକା ୱାନ୍‌ ୱେନାନ୍‌ ଇଜି ଜଦି ମାଡୁ ନେସ୍‌ନିକା, ଆର୍‌ତିଙ୍ଗ୍‌ ୱାନି ଲାକ୍‌ତୁ ଆମାକା ପାର୍‌ତାନା କିତିମାନିକା, ଆୟାୱିଜୁ ଜେ ପୟ୍‌ତିମାନିକା, ଇକାବା ନେସ୍‌ନାପ୍‌ ।
1JO 5:16 ଜଦି ମି ଅରେନ୍‌ ତଡ଼ାନ୍‌ ପାପ୍‌ କିଜିମାନିକା ସୁଡ଼ୁତିଙ୍ଗ୍‌, ମାରି ଆୟା ପାପ୍‌ ସାନିନାନିକା ଆଏତ୍‌ ମାନାତ୍‌, ୱାନି ଉଣ୍ତିଙ୍ଗ୍‌ ମାପୁରୁଙ୍ଗୁଁ ପାର୍‌ତାନା କିଦୁ, ଏଣ୍ତେସାତିଙ୍ଗ୍‌ ମାପୁରୁ ୱାନିଙ୍ଗ୍‌ କେମା ସିଜି ରକ୍‌ୟା କିନାନ୍‌ । ମାରି ମାପୁରୁ ଏଣ୍ତେସ୍‌ୱାଜା ସାନିକା ପାପ୍‌ କିଇ ମାନି ଲୋକାଙ୍ଗ୍‌ ଜିବନ୍‌ ଦାନ୍‌ ସିନାନ୍‌, ଆୟାୱାଜା ୱାନିଙ୍ଗ୍‌ ବା ଜିବନ୍‌ ଦାନ୍‌ ସିନାନ୍‌ । ସାନିନାନି ପାପ୍‌ ମାନାତ୍‌; ଆୟାଉଣ୍ତିଙ୍ଗ୍‌ ୱାନ୍‌ ପାର୍‌ତାନା କିପିନ୍‌ ଇଜି ନାନୁ ଇନ୍‌ଏ ।
1JO 5:17 ୱିଜୁ ତାଗ୍‌ଇ ପାଣି ପାପ୍‌, ମାତର୍‌ ଆମାକା ସାନିନାନିକା ସିଲେତ୍‌, ଇୟାୱାଜା ପାପ୍‌ ମାନାତ୍‌ ।
1JO 5:18 ମାପୁ ନେସ୍‌ନାପ୍‌, ମାପୁରୁଦି ମାରିନ୍‌ ପାପ୍‌ତୁ ମିସାଜ ତେବାଏନ୍‌; ଇରିଙ୍ଗ୍‌ ମାପୁରୁଦି ମାରିନ୍‌ ୱାନିଙ୍ଗ୍‌ ରକ୍‌ୟା କିନାନ୍‌, ମାରି ସୟ୍‌ତାନ୍‌ ୱାନିଙ୍ଗ୍‌ ଇନିକା କିଦେଙ୍ଗ୍‌ ଆଟ୍‌ଏତ୍‌ ।
1JO 5:19 ମାଡୁ ଜେ ମାପୁରୁଦିମାଣୁକୁ ଜନମ୍‌ ମାରି ୱିଜୁ ଜଗତ୍‌ ଜେ ସୟତାନ୍‍ତି ଅଦିକାର୍‌, ଇକା ମାପୁ ନେସ୍‌ନାପ୍‌ ।
1JO 5:20 ମାରି ବା ମାପୁ ନେସ୍‌ନାପ୍‌ ଜେ, ମାପୁରୁଦି ମାରିନ୍‌ ୱାତାମାନାନ୍‌ ମାରି ସତ୍‌ତିଙ୍ଗ୍‌ ନେସ୍‌ନି ଉଣ୍ତିଙ୍ଗ୍‌ ମାଙ୍ଗିଁ ବୁଦି ସିତାମାନାନ୍‌; ମାରି ମାଡୁ ଆୟା ସତ୍‌ତି ମାପୁରୁଦିମାନୁ ମାରି ୱାନି ମାରିନ୍‌ ଜିସୁ କ୍ରିସ୍ତଦି ୱାଲେ ମାନାତ୍‌ । ୱାନ୍‌ ନେ ସତ୍‌ତି ମାପୁରୁ ମାରି ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ ।
1JO 5:21 ଏ କଡ଼ର୍‌, ସତ୍‌ସିଲି ଦିୟାମ୍‍କାମାଣୁକୁ ନିଜେ ନିଜେଦିଙ୍ଗ୍‌ ଆକତେବାଦୁ ।
2JO 1:1 ପ୍ରାଚିନ୍ ଜୋହନ ଯେ ନାନୁ ଅରେତ୍‌ ଆସ୍‌କିଆୟ୍‌ଆତି ଆଇମା ମାରି ତାନି କଡ଼ରି ଲାକ୍‌ତୁ ଇୟା ଆକୁ ରାସ୍‌ସିନା । ମିଙ୍ଗିଁ ନାନୁ ସତ୍‌ ୱାଜା ଜିବନ୍‌ନୋନା, ମାରି କେବଲ୍‌ ନାନ୍‌ ସିଲେ, ମାତର୍‌ ସତ୍‌ ନେସ୍‌ତିମାନି ୱିଜୁ ଲୋକୁ ବା ଜିବନ୍‌ନୋନାର୍‌ ।
2JO 1:2 ଆମା ସତ୍‌ ମା ଜିବନ୍‌ତୁ ତେବାତାମାନାତ୍‌ ମାରି ୱିଜୁଦିନ୍‌ତିଙ୍ଗ୍‌ ମା ୱାଲେ ତେବାନାତ୍‌ ।
2JO 1:3 ବୁବା ମାପୁରୁ ମାରି ଆୟା ବୁବାଦି ମାରିନ୍‌ ଜିସୁ କ୍ରିସ୍ତଦିମାଣୁକୁ ଦୟା, ଦୟା ମାରି ସାନ୍ତି ମା ୱାଲେ ସତ୍‌ ନି ଜିବନ୍‌ନୋନିକା ତେବାନାତ୍‌ ।
2JO 1:4 ମି କଡ଼ରି ମାଣୁକୁ ଏସଲୋକ୍‌ ମାପୁରୁଦି ମାଟାଇସାବ୍‌ତାନ୍‌ ସତ୍‌ତାନ୍‌ ବୁଲାସାଲା କିଜିନିକା ୱେନ୍‌ଜି ନାନ୍‌ ନାଣ୍ତ ୱେଡ଼ିକା ।
2JO 1:5 ଏ ନେଗି ଆଇମା, ନିଙ୍ଗିଁ ନାନୁ ୱେର୍‌ନି ମାଟା, ମାଡୁ ନିଜେନିଜେଦିଙ୍ଗ୍‌ ଜିବନ୍‌ନୋଜିସାନିକା ମାନାତ୍‌ । ନାନ୍‌ ଜେ ମି ଲାକ୍‌ତୁ ଇନି ପୁନି ମାଟା ରାସ୍‌ସିନା, ଆକା ସିଲେ, ମାତର୍‌ ପୁର୍ବେଦାନ୍‌ନେ ମାପୁ ଇୟା ଆଦେସ୍‌ ପୟ୍‌ତା ମାନାପ୍‌ ।
2JO 1:6 ଆମା ଜିବନ୍‌ନୋନି ମାଟା ଇବେନୁ ନାନ୍‌ ୱେର୍‌ସିନା, ତାନି ଅର୍ତ ଆଜିନାତ୍‌, ଜିବନ୍‌ତୁ ମାପୁରୁଦି ମାଟା ମାନାନିକା । ଆୟା ମାଟା ଇନିକା, ମିରୁ ପୁର୍ବେଦାନ୍‌ନେ ୱେର୍‌ଇମାନିଦେର୍‌, ଆକା ଆଜିନାତ୍‌, ମାଡୁ ୱିଜୁଲୋକୁ ନିଜେନିଜେଦି ଉଣ୍ତିଙ୍ଗ୍‌ ଜିବନ୍‌ନୋଜିସାନିକା ମାନାତ୍‌ ।
2JO 1:7 ନାନ୍ ଇକା ଇଜିନା ଇରିଙ୍ଗ୍‌ ଆମାକାର୍‌ ଜିସୁ କ୍ରିସ୍ତ ସାତାନ୍‌ନୋ ଲୋକା ମେନ୍ଧଲ୍‌ତାନ୍‌ ୱାତାମାନାନ୍‌ ଇଜି ମାନାଏନ୍‌, ଇୟାୱାଜା ଗାଦିଲୋକ୍‌ ବାୟାକିନିକାର୍‌ ଜଗତ୍‌ତୁ ସତା ୱାତାମାନାର୍‌ । ଇୟାୱାଜା ଲୋକୁ ପୁରାସତ୍‌ ବାୟାକିନିକାର୍‌, ୱାନ୍‌ କ୍ରିସ୍ତଦି ସାତ୍ରୁ ।
2JO 1:8 ମିରୁ ଏଣ୍ତେସ୍‌ ମା କିତିମାନି ପାଣିଦି ପଲ୍‌ ଆରାକିଏଣ୍‌ଗା ବରଂ ଆବେଣି ପୁରାବର୍ତି ପୁରସ୍କାର୍‌ ପୟ୍‌ଦୁ, ଆୟାଉଣ୍ତିଙ୍ଗ୍‌ ନିଜେ ନିଜେଦି ବିସୟ୍‌ତାନ୍‌ ଜାଗ୍‌ରାତା ମାନ୍‌ଡ୍ରୁ ।
2JO 1:9 ଏନ୍‌ଆପିନ୍‌ କ୍ରିସ୍ତଦି ସିକିୟାଦି ଆୟା ଲୋଇ ତେବାଏଣ୍‌ଗା ଆକା ନାଜି ସୋନାନ୍‌, ୱାନ୍‌ ମାପୁରୁଙ୍ଗୁଁ ପୟ୍‌ଏନ୍‌; ଏନ୍‌ ସିକିୟାଦି ଲୋଇ ତେବାନାନ୍‌, ୱାନ୍‌ ବୁବା ନି ମାରିନ୍‌ ରିଏରିଙ୍ଗ୍‌ ପୟ୍‌ତା ମାନାନ୍‌ ।
2JO 1:10 ଏନ୍‌ ଜଦି ଇୟା ସିକିୟା ଆସ୍‌ଏଣ୍‌ଗା ମି ଲାକ୍‌ତୁ ୱାନାନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ମି ଇନ୍‌ଡ୍ର କୁକ୍‌ମାଟ୍‌, “ନି ସାନ୍ତି ଆପିତ୍‌” ଇଜି ୱେର୍‌ସି ୱାନିଙ୍ଗ୍‌ ନମସ୍କାର୍‌ କିମାଟ୍‌ ।
2JO 1:11 ଇରିଙ୍ଗ୍‌ ଏନ୍‌ଆପିନ୍‌ ୱାନିଙ୍ଗ୍‌ ନମସ୍କାର୍‌ କିନାନ୍‌, ୱାନ୍‌ ୱାନି ତାଗ୍‍ଇପାଣିଦୁ ମିସାନାନ୍‌ ।
2JO 1:12 ମି ଲାକ୍‌ତୁ ଗାଦି ବିସୟ୍‌ ରାସ୍‌ନିକା ମାନାତ୍‌, ମାତର୍‌ କାଗଜ ନି ସିରାଦାନ୍‌ ଆୟାୱିଜୁ ଇଲେଇ ନାନୁ ୱେର୍‌ତେଙ୍ଗ୍‌ ଇଚ୍ଛା କିଏ; ନା ଆସା ମାନାତ୍‌ ଜେ, ମି ଲାକ୍‌ତୁ ୱାଜି ସାମ୍‌ନାସାମ୍‌ନିଦାନ୍‌ ୱାର୍‌ଗିଜିସାନାଟ୍‌, ଆକା କିଦେଙ୍ଗ୍‌ ଆଟ୍‌ତିଙ୍ଗ୍‌ ମାଡୁ ୱେଡ଼ିକା ପୁରା ଆନାତ୍‌ ।
2JO 1:13 ମି ଲାଡ୍‍ତି ତାଙ୍ଗିଁକି କଡ଼ର୍‌ ମିଙ୍ଗିଁ ନମସ୍କାର୍‌ ଜାଣେ କିଜିନାର୍‌ ।
3JO 1:1 ପ୍ରାଚିନ୍ ଜୋହନ ଯେ ନାନୁ, ନା ଲାଡ୍‍ତି ତଡ଼୍‍ ଗାୟ୍‌ଦି ଲାକ୍‌ତୁ ଇୟା ଆକୁ ରାସ୍‌ସିନା; ୱାନିଙ୍ଗ୍‌ ନାନୁ ସତ୍‌ତାନ୍‌ ଜିବନ୍‌ନୋନା ।
3JO 1:2 ନା ଲାଡ୍‍ତି ତଡ଼୍‍, ମି ଆତ୍ମା ମାରି ୱିଜୁନେଗି ପାଣି କିଜିନାନ୍‌ ମାପୁରୁଙ୍ଗୁଁ ପାର୍‍ତାନା କିଜିନା, ନାନ୍‌ ନେସ୍‌ନା, ଇଲେଇତି ଜିବନ୍‌ତୁ ମିରୁ ନେଗେନ୍‌ ମାନିଦେର୍‌ ।
3JO 1:3 ଇରିଙ୍ଗ୍‌ ତଡ଼ାନ୍‌କୁ ୱାଜି ଏସ୍ତିୱାଲେ ସତ୍‌ତି ଉଣ୍ତିଙ୍ଗ୍‌ ବିସ୍‌ବାସ୍‌ସି ତେବାତା ମାନାର୍‌ ମାରି ଜିବନ୍‌ତୁ ୱିଜୁଦିନ୍ ସତ୍‌ତାନ୍‌ ବୁଲାସାଲା ଆନି ବିସୟ୍‌ତାନ୍‌ ସାକ୍ଷ୍ୟ ୱେର୍‌ସିନାର୍‌, ନାସ୍ତିୱାଲେ ନାନୁ ଇୟା ମାଟା ୱେନ୍‌ଜି ୱେଡ଼ିକା ଆତା ।
3JO 1:4 ନା କଡ଼ର୍‌ ଜେ ସତ୍‌ତିଙ୍ଗ୍‌ ଆସ୍‌ସି ବୁଲାସାଲା କିଜିନାର୍‌, ଇକା ୱେନିଙ୍ଗ୍‌ ନାନୁ ୱେଡ଼ିକା ଆନା ।
3JO 1:5 ଲାଡ୍‍ତି ତଡ଼୍‍, ଆଇଦେସ୍‌ତି କ୍ରିସ୍ତ ସିକ୍‌ୟା ସିନିକାର୍‌, ଇୟାୱାଜା ନୋ ୱାର୍‌ ସିନାପରିଚୟ୍‌ ଆଏତିମାରିଙ୍ଗ୍‍ ବା, ୱାରି ଉଣ୍ତିଙ୍ଗ୍‌ ନିନୁ ବିସ୍‌ବାସ୍‌ତାନ୍‌ କିଜିନି ।
3JO 1:6 ୱାର୍‌ ମଣ୍ତଲିଦୁ ମି ଜିବନ୍‌ନୋନି ବିସୟ୍‌ତାନ୍‌ ସାକ୍ୟ ୱେର୍‌ତାମାନାର୍‌; ମିର୍‌ ୱାରି ସନି ଉଣ୍ତିଙ୍ଗ୍‌ ସାହାଜ୍ୟ କିଦୁ । ଇୟାଉଣ୍ତିଙ୍ଗ୍‌ ମାପୁରୁ ୱେଡ଼ିକା ଆନାନ୍‌ ।
3JO 1:7 ଇରିଙ୍ଗ୍‌ ୱାର୍‌ ଅବିସ୍‍ବାସ୍‍ରି ମାଣୁକୁ ଇନି ସାହାଜ୍ୟ ଅଏଣ୍‌ଗା କ୍ରିସ୍ତଦି ସେବା ଉଣ୍ତିଙ୍ଗ୍‌ ସତା ମାନାର୍‌ ।
3JO 1:8 ମାରି, ମାଡୁ କ୍ରିସ୍ତବିସ୍‌ବାସ୍‌ସିର୍‌ ୱାରିଙ୍ଗ୍‌ ସାହାଜ୍ୟ କିଜି ସତ୍‌ତି ଉଣ୍ତିଙ୍ଗ୍‌ ୱାରି ପାଣିଦୁ ମିସାନିକା ନେଗେତ୍‌ ।
3JO 1:9 ନାନ୍‌ ମି ମଣ୍ତଲିଦୁ ଉନ୍‌ଡ୍ରି ଇସ୍ରି ଆକୁ ରାସ୍‌ତା ମାର୍ହା, ମାତର୍‌ ଡାୟୋଟ୍ରେଫିସ୍ ମଣ୍ତଲିଦି ପେରିକାନ୍‌ ଆଦେଙ୍ଗ୍‌ ବଦା କିଜି ମା ମାଟାଦିଙ୍ଗ୍‌ ଡ଼ିସ୍‌ନାନ୍‌ ।
3JO 1:10 ନାନ୍‌ ଆବେନୁ ୱାତିଙ୍ଗ୍‌, ୱାନ୍‌ ଆମାକା କିଜିନାନ୍‌, ୱିଜୁ ୱିକ୍‌ନାସିନା ମା ବିରୁଦ୍‌ତାନ୍‌ ତାଗ୍‌ଇ ମାଟା ଇନ୍‌ଜି ମାଙ୍ଗିଁ ନିନ୍ଦା କିଜିନାନ୍‌, ମାରି ୱାନ୍‌ କ୍ରିସ୍ତବିସ୍‌ବାସ୍‌ସି ତଡ଼ାନ୍‌କାଙ୍ଗ୍‌ ସନ୍‌ମାନ୍‌ କିଏନ୍‌, ମାରି ଆଇକାର୍‌ ଆକା କିଦେଙ୍ଗ୍‌ ବଦା କିତିଙ୍ଗ୍‌ ୱାରିଙ୍ଗ୍‌ ମନା କିନାନ୍‌, ମାରି ମଣ୍ତଲିଦାନ୍‌ ୱାରିଙ୍ଗ୍‌ ସପ୍‌ନାନ୍‌ ।
3JO 1:11 ନା ଲାଡ୍‍ତି ତଡ଼୍‍କୁ, ମିରୁ ତାଗ୍‍ଇପାଣିଦୁ ସଲଏଣ୍‌ଗା ସତ୍‍ପାଣିଦି ତରିନ୍‌ ସାନ୍‌ଡ୍ରୁ । ଏନ୍‌ ସତ୍‌ପାଣି କିନାନ୍‌, ୱାନ୍‌ ମାପୁରୁଦି ଲୋକୁ; ଏନ୍‌ ତାଗ୍‌ଇପାଣି କିନାନ୍‌, ୱାନ୍‌ ମାପୁରୁଙ୍ଗୁଁ ନେସ୍‌ଏନ୍‌ ।
3JO 1:12 ଡିମିଟ୍ରିଅସ୍‌ଦିଙ୍ଗ୍‌ ୱିଜେରେ ପ୍ରସଂସା କିଜିନାର୍‌; ସତ୍‌ ନିଜେ ବା ସାକ୍ୟ ସିତାମାନାନ୍‌; ମାପ୍‌ ବା ୱାନିଙ୍ଗ୍‌ ସାକ୍ୟ ସିଜିନାପ୍‌, ମା ସାକ୍ୟ ଜେ ସତ୍‌, ଇକା ନିନୁ ନେସ୍‌ତିମାନି ।
3JO 1:13 ମି ଲାକ୍‌ତୁ ନା ଗାଦି ବିସୟ୍‌ ୱେର୍‌ନିକା ମାନାତ୍‌, ମାତର୍‌ ଆୟାୱିଜୁ ନାନ୍‌ ଇଲେଇ ସିରା ନି ପେନ୍‌ତାନ୍‌ ରାସ୍‌ତେଙ୍ଗ୍‌ ବଦା କିଏଜିନା ।
3JO 1:14 ମି ୱାଲେ ବେଟ୍‌ ଆନା ଇଜିନା ଆସା ନାସ୍ତିୱାଲେ ମାଡୁ ସାମ୍‌ନାସାମ୍‌ନି ଆଜି ୱାର୍‌ଗିଜିସାନାଟ୍‌ ।
3JO 1:15 ମି ଉଣ୍ତିଙ୍ଗ୍‌ ସାନ୍ତି ଆପିତ୍‌, ସାଙ୍ଗର୍‌ ୱିଜେରେ ମିଙ୍ଗିଁ ନମସ୍କାର୍‌ ଜାଣେ କିଜିନାର୍‌ । ମା ୱିଜୁ ସାଙ୍ଗରିଙ୍ଗ୍‌ ନମସ୍କାର୍‌ ଜାଣେ କିଦୁ ।
JUD 1:1 ଜିହୁଦା, ଜିସୁ କ୍ରିସ୍ତଦି ଅରେନ୍‌ ଦାସ୍‍ ମାରି ଜାକୁବଦି ତଡ଼ାସି, ଆମାକାର୍‌ ବୁବା ମାପୁରୁଦି ମାଣାନ୍‌ ବଦାଆତିକାର୍‌ ମାରି ୱାନି ଲାଡ୍‍ତିକାର୍‌, ମାରି ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ନେଗେନ୍‌ମାନାର୍‌, ୱାରି ଲାକ୍‌ତୁ ଆକୁ ରାସ୍‌ସିନା ।
JUD 1:2 ମି ଉଣ୍ତିଙ୍ଗ୍‌ ମାପୁରୁଦି ଦୟା, ସାନ୍ତି ମାରି ଜିବନ୍‌ନୋନିକା ନାଣ୍ତ ଆପିତ୍‌ ।
JUD 1:3 ଏ ଲାଡ୍‌ତି ତଡ଼୍‍କୁ, ମାଡୁ ୱିଜୁଲୋକୁ ଆମା ରକିୟାଦୁ ମିସାତିମାନିକା ଆୟା ବିସୟ୍‌ତାନ୍‌ ମି ଲାକ୍‌ତୁ ରାସ୍‌ତେଙ୍ଗ୍‌ ନାଙ୍ଗିଁ ବଦା ମାର୍ହାତ୍‌ । ମାତର୍‌ ଇୟାଦାପ୍ରେନେ ମାପୁରୁ ୱାନି ଲୋକାଙ୍ଗ୍‌ ୱିଜୁଦିନ୍‌ତି ଉଣ୍ତିଙ୍ଗ୍‌ ସିତିମାନି ବିସ୍‌ବାସ୍‌ତି ତରିନ୍‌ ସାନିଜିନିକା ଜୁଦ୍‍ କିନି ଉଣ୍ତିଙ୍ଗ୍‌ ମିଙ୍ଗିଁ ୱେଡ଼ିକା କିନି ଉଣ୍ତିଙ୍ଗ୍‌ ରାସ୍‌ତେଙ୍ଗ୍‌ ଦର୍‌କାର୍‌ ଇଜି ଏତ୍‌ କିତା ।
JUD 1:4 ଏସ ଅଦାର୍ମୁଦି ଲୋକୁ ମି ଲୋଇ ନେସ୍‌ଇ ୱାଜା ଡୁଗିତାମାନାର୍‌ । ୱାର୍‍ ନିଜେଦି ତାଗ୍‍ଇ ପାଣିଦିଙ୍ଗ୍‍ ସାକାକିନି ଉଣ୍ତିଙ୍ଗ୍‍ ମାପୁରୁଦି ଦୟାଦି ବିସୟ୍‍ ମାଟାଦି ତାଗ୍‍ଇ ଅର୍ତ କିଜିନାର୍‍ । ମା ଅରେନ୍‌ମାତର୍‌ ଗୁରୁ, ମାରି ପ୍ରବୁ ଜିସୁ କ୍ରିସ୍ତଙ୍ଗ୍‌ ୱାର୍‌ ମାନାଏର୍‌ । ୱାରି ଉଣ୍ତିଙ୍ଗ୍‍ ଇଡାୟ୍‍ଆତିମାନି ବିଚାର୍‍ ବିସୟତାନ୍‍ ବେସି ଆଗ୍‍ଡ଼ିରାନ୍‍ ଦାର୍ମୁସାସ୍ତ୍ରଦୁ ରାସାତାମାନାତ୍‍ ।
JUD 1:5 ଜଦି ମିର୍‌ ଇୟାୱିଜୁ ବିସୟ୍‌ ପୁରା ନେସ୍‌ତି ମାନିଦେର୍‌, ମାରି ନାନ୍‌ ମିଙ୍ଗିଁ ଏତ୍‌ କିବିସ୍‌ତେଙ୍ଗ୍‌ ବଦା କିଜିନା ଜେ, ଉନ୍‌ଡ୍ରି ଦେବା ଜିସୁ ମିସର୍‍ ଦେସ୍‌ତାନ୍‍ ଲୋକାଙ୍ଗ୍‌ ରକିୟା କିତାମାର୍ହାନ୍‌, ମାରି ଆମାକାର୍‌ ଅବିସ୍‌ବାସ୍‌ କିତାର୍‌, ୱେନ୍‌କା ୱାରିଙ୍ଗ୍‌ ଦଂସ କିତାନ୍‌ ।
JUD 1:6 ମାରି ଆମା ମୁସ୍‌କୁପୁର୍‌ତି ଦୁତ୍‌କୁ ନିଜେ ନିଜେଦି ଅଦିକାର୍‌ତି ଲୋଇ ତେବାଏଣ୍‌ଗା ନିଜେ ନିଜେଦି ଡ଼ିସ୍‍ତେସରେଏ, ଦୁତ୍‌କାଙ୍ଗ୍‌ ଏତ୍‌ କିଦୁ । ୱାନିକାଙ୍ଗ୍‌ ମାପୁରୁ ପେରି ବିସାର୍‌ତି ୱିଜୁଦିନ୍‍ତି ଉଣ୍ତିଙ୍ଗ୍‌ ଜଇଲ୍‍ତୁ ନାଣ୍ତସିକାଟିଦି ୱିଜୁ ଦିନ୍‍ତି ସାନ୍ତି କିଜି ଇଟ୍‌ତାମାନାନ୍‌ ।
JUD 1:7 ଆୟାୱାଜା ସଦମ୍‍ ମାରି ଗମୋରା ମାରି ଲାକ୍‌ତୁରି ଗାଡ଼୍‌କାଣି ଦଣ୍ତତିଙ୍ଗ୍‌ ଏତ୍‌ କିଦୁ । ୱାର୍‌ ତେବାତିମାନି ଆୟା ଦୁତ୍‌କା ୱାଜା ପାଣି କିଜି ଦାରିପାଣି ମାରି ତାଗ୍‍ଇପାଣିଦୁ ମିସାତାର୍‌ । ଆଇୱାରିଙ୍ଗ୍‌ ଜାଗ୍‌ରାତାକିନି ଉଣ୍ତିଙ୍ଗ୍‌ ୱାର୍‌ ୱିଜୁଦିନ୍‌ତି ନରକଦି ସିସୁଦୁ ଦଣ୍ତବୋଗ କିଜିନାର୍‌ ।
JUD 1:8 ଆୟାୱାଜା ଇୟା ଲୋକୁ ଲବ୍‌ ସୁଡ଼ୁତାମାନାପ୍‌ ଅଡ଼୍‍ବିଜି ନିଜେଦି ମେନ୍ଦଲ୍‌ତିଙ୍ଗ୍‌ ପାପ୍‌ କିନାର୍‌ । ୱାର୍‌ ମାପୁରୁଦି ପାଣିଦିଙ୍ଗ୍‌ ମାନାଏର୍‌ ମାରି କାବାଆନି ସାକ୍ତିଆଙ୍ଗାଁ ନିନ୍ଦା କିନାର୍‌ ।
JUD 1:9 ମାତର୍‌ ୱିଜେରିଙ୍ଗ୍‌ପେରି ଦୁତ୍‌ ମୀଖାୟେଲ ବା ଇୟାୱାଜା ବ୍ୟବ୍‌ହାର୍‌ କିଏନ୍‌ ମାର୍ହାନ୍‌ । ମୋସାଦି ମାଡ଼ା ବିସୟ୍‌ତାନ୍‌ ସୟତାନ୍‌ତି ୱାଲେ ମାଟାଦିଙ୍ଗ୍‍ ମାଟା ଆନିବେଡ଼ାଦୁ ମୀଖାୟେଲ ନିନ୍ଦା କିଜି ସୟ୍‌ତାନ୍‌ତି ବିଚାର୍‌ କିଏନ୍‌ ମାର୍ହାନ୍‌ । ୱାନ୍‌ କେବଲ ନିସନେ ଇର୍ହାନ୍‌, “ପ୍ରବୁ ନିଙ୍ଗିଁ ଆଦ୍‌ରିସ୍‌ କିପିନ୍‌ ।”
JUD 1:10 ମାତର୍‌ ଇୟା ଲୋକୁ ଆମା ୱିଜୁ ବିସୟ୍‌ ନେସ୍‌ଏର୍‌, ଆୟାୱିଜୁଦିଙ୍ଗ୍‌ ନିନ୍ଦା କିନାର୍‌, ମାରି ବୁଦିସିଲି ବନ୍‌ତି ଜାତୁ ୱାଜା ଆମା ଆମାକା ନେସ୍‌ନିୱାଜା ବୁଜାନେ, ଆୟାୱିଜୁ ଦାନ୍‌ ନେ ଆୟାକେଙ୍ଗ୍‌ ନାସ୍ଟୁ ଆନେ ।
JUD 1:11 ଇକା ୱାରି ଉଣ୍ତିଙ୍ଗ୍‌ ଏସ ତିଲାନିକା । ଇରିଙ୍ଗ୍‌ ୱାର୍‌ କୟିନଦି ସାରିଦୁ ସର୍ହାମାନାର୍‌, ବାଲାମ ଅର୍ତ ଡାବୁଙ୍ଗ୍‌ଲବ୍‌ତିଙ୍ଗ୍‌ ଆମା ବୁଲ୍‌ କିତାମାର୍ହାନ୍‌, ୱାର୍‌ ଆୟା ମାଟାଦୁ ଆର୍‌ତାମାନାର୍‌ ମାରି କୋରହ ୱାଜା ଜୁଦ୍‌ କିଜି ନାସ୍ଟୁ ଆତାମାନାର୍‌ ।
JUD 1:12 ୱାର୍‌ ତିଲାଏଣ୍‌ଗା କାଡ଼ୁ ଉଣୁଜି ସୋସ୍‌ସି ମି ଜିବନ୍‌ନୋନି ବୋଜିଦି କିଟିଙ୍ଗ୍‌ ୱାଜା ଆଜିନାର୍‌; ୱାର୍‌ ନିଜେ ନିଜେଦି ଉଣ୍ତିଙ୍ଗ୍‌ ମୋନ୍‍ସିନାର୍‍ । ୱାର୍‌ ପିରୁ ୱାଜିମାନି ଗାଲିଦାନ୍‌ ଇମ୍‌ଜିମାନି ବାଦ୍‌ଡ଼ ୱାଜା; ୱାର୍‌ ଶରତ କାଡ଼ାଦୁ ପଲ୍‌ ଆସ୍‌ଇ ମାରାନ୍‌ ମାରି ୱେଲେଙ୍ଗ୍‌ଡାସାରେଲାତି ୱାର୍‌ତି ମାରାନ୍‌ ୱାଜା ।
JUD 1:13 ୱାର୍‌ ସାମୁଦୁର୍‌ତି ନିଙ୍ଗିଁଜି ୱାନି ଏରୁ ଉଲ୍‍କା ୱାଜା, ୱାର୍‌ ନିଜେ ନିଜେଦି ସେମାର୍‌ତି ପାଣିଙ୍ଗ୍‌ ପେପଲ୍‌ ୱାଜା ମୁସ୍‌କୁ ତର୍‌ଜିୱାନାତ୍‌ । ୱାର୍‌ ଇମ୍‌ଜିବୁଲାନି ସୁକା ୱାଜା; ମାପୁରୁ ୱାରି ଉଣ୍ତିଙ୍ଗ୍‌ ନାଣ୍ତ ସିକାଟି ୱିଜୁଦିନ୍‌ତିଙ୍ଗ୍‌ ଇଡାଆୟ୍‌ଆତାମାନାତ୍‌ ।
JUD 1:14 ଆଦମଦିମାଣୁକୁ ସାତଗୋଟାଦି ମେମାର୍‌ଏନ୍‌ ଜେ ହନୋକ, ୱାନ୍‌ ବା ପୁର୍ବେ କାଡ଼ାଦୁ ଇୟାୱାରି ବିସୟ୍‌ତାନ୍‌ ବାବବାଣି ପ୍ରଚାର୍‌ କିଜି ୱେର୍‌ସି ମାର୍ହାନ୍‌ : ପ୍ରବୁ ଆଜାର୍‌ ଆଜାର୍‌ ମୁସ୍‌କୁପୁର୍‌ତି ପବିତ୍ର ଦୁତ୍‌କା ୱାଲେ
JUD 1:15 ୱିଜୁଲୋକାଙ୍ଗ୍‌ ବିଚାର୍‍ କିଦେଙ୍ଗ୍‌ ୱାନାନ୍‌ । ମାରି ଅଦାର୍ମୁଦି ଲୋକୁ ୱିଜେରେ ନିଜେ ନିଜେଦି ଅଦାର୍ମୁଦାନ୍‌ ଆମାୱିଜୁ ପାପ୍‌ ପାଣି କିତାମାନାର୍‌ ମାରି ଅଦାର୍ମୁଦି ପାପି ଲୋକୁ ମାପୁରୁଦି ବିରୁଦ୍‌ତାନ୍‌ ଆମାୱିଜୁ ତାଗ୍‌ଇ ମାଟା ଇର୍‌ଆ ମାନାର୍‌, ଆୟାୱିଜୁ ବିସୟ୍‌ତି ଉଣ୍ତିଙ୍ଗ୍‌ ୱାରିଙ୍ଗ୍‌ ଦସି କିଜି ଦଣ୍ତ ସିନାନ୍‌ ।
JUD 1:16 ଇୟା ଲୋକୁ ୱିଜୁଦିନ୍ ୱେଡ଼ିକାସିଲେ ମାରି ଆଇୱାରି ମୁସ୍‌କୁ ଦସତିଗ୍‌ନାର୍‌ । ୱାର୍‌ ନିଜେ ନିଜେଦି ତାଗ୍‍ଇପାଣିଦୁ ବୁଲାନାର୍‌; ୱାରି ୱେୟୁ ପେରି ପେରି ମାଟେଙ୍ଗ୍‌ ଇନାତ୍‍ ମାରି ନିଜେଦି ତରାନି ଉଣ୍ତିଙ୍ଗ୍‌ ୱାର୍‌ ଲୋକା ମକମ୍‌ ମୁସ୍‌କୁ ପ୍ରସଂସା କିନାର୍‌ ।
JUD 1:17 ମାତର୍‌ ଏ ନା ତଡ଼୍‍କୁ, ମା ପ୍ରବୁ ଜିସୁ କ୍ରିସ୍ତଦି ପ୍ରେରିତ ସିସୁର୍‍ ପୁର୍ବେ ଆମାୱିଜୁ ମାଟା ୱେର୍‌ତାମାନାର୍‌, ଆୟାୱିଜୁ ଏତ୍‌ କିଦୁ ।
JUD 1:18 ୱାର୍‌ ଏଣ୍ତେସ୍‌ ମିଙ୍ଗିଁ ୱେର୍‌ସିମାର୍ହାର୍‌, “ସାରାସାରିଦି କାଡ଼ାଦୁ ତାଗ୍‌ଇପାଣିଦିଙ୍ଗ୍‌ ଆସାନି ଲୋକୁ ସୋସି ମିଙ୍ଗିଁ ସେମାର୍‌ କିନାର୍‌ ।”
JUD 1:19 ଇୟା ଲୋକୁନେ ଅଲଗାଏରେପ୍‌ତେଙ୍ଗ୍‌ ତିଆର୍‌ କିନାର୍‌, ୱାର୍‌ କେବଲ୍‌ ମେନ୍ଦଲତି ବଦାଦାନ୍ ବୁଲାନାର୍‌ ମାରି ମାପୁରୁଦି ଆତ୍ମାସିଲିକାର୍‌ ।
JUD 1:20 ମାତର୍‌, ଏ ନା ତଡ଼୍‍କୁ, ମିର୍‌ ପବିତ୍ର ଦାର୍ମୁବିସ୍‌ବାସ୍‌ ମୁସ୍‌କୁ ନିଜେ ନିଜେଦି ଦାର୍ମୁ ଜିବନ୍‌ ୱାଜା ଇଲୁକୁ ତିଆର୍‌ କିନିଦେର୍‌, ପବିତ୍ର ଆତ୍ମାଦି ସାକ୍ତିଦାନ୍‌ ପାର୍‌ତାନା କିଦୁ ।
JUD 1:21 ମାରି, ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ତି ଉଣ୍ତିଙ୍ଗ୍‌ ମା ପ୍ରବୁ ଜିସୁ କ୍ରିସ୍ତଦି ଦୟାଦିଙ୍ଗ୍‌ କାପ୍‌କିଜ ମାପୁରୁଦି ଜିବନ୍‌ନୋନିଙ୍ଗ୍‌ ନିଜେଦିଙ୍ଗ୍‌ ତିର୍‌ ତେବାଦୁ ।
JUD 1:22 ନାମ୍‌ଏଣ୍‌ଗା ପେଡ଼ିଆତିମାନି ଲୋକା ମୋନ୍‌ତୁ ବିସ୍‌ବାସ୍‌ ତର୍‌ତୁ ।
JUD 1:23 ଏମେକାର୍‌ ତାଗ୍‍ଇମାନୁ ଆରିଜି ନାସ୍ଟୁ ଆଦେଙ୍ଗ୍‍ଁ ସଲିସ୍‍ନି ଲୋକାଙ୍ଗ୍‌ ସିସୁଦାନ୍ ରକିୟା କିଦୁ । ମାରି ଏସ ଲୋକା ପାପ କାସ୍‍ତି ୱାତିଗନ୍ଦାଦିଙ୍ଗ୍‍ କାଡ଼ଦୁ, ମାତର୍‍ ତିଏଲ୍‌ତାନ୍‌ ୱାରିଙ୍ଗ୍ ଦୟା କିଦୁ ।
JUD 1:24 ଏନ୍‌ ମିଙ୍ଗିଁ ଗାଡ଼୍‌ଦିରାନ୍‌ ରକ୍‌ୟା କିଦେଙ୍ଗ୍‌ ମାରି ୱାନି ଗୌରବ୍‌ ଆଗ୍‌ଡ଼ି ଦସ୍‍ସିଲିକା ମାରି ୱେଡ଼ିକା କିଜି ଇଗାୱାଦେଙ୍ଗ୍‌ ଡାଟ୍‌ମାନାନ୍‌,
JUD 1:25 ମା ଆୟା ଅରେନ୍‌ମାତର୍‌ ରକିୟାକର୍ତ୍ତା ମାପୁରୁଦି ଗୌରବ୍‌, ପରାକ୍ରମ ମାରି କିତିମାନି ପାଣି; ମା ପ୍ରବୁ ଜିସୁ କ୍ରିସ୍ତଦି ମାଣୁକୁ ପୁର୍ବେ କାଡ଼ାଦାନ୍‌ ଇଲେଇ ସାନ୍ଦି ମାରି ଜୁଗ୍‌ ଜୁଗ୍‌ ୱାନିଦି ଆପିତ୍‌ ! ଆମେନ୍‍ ।
REV 1:1 ଆମାକା ୱିଜୁ ଦାପ୍ରେନେ ଗଟେଆଦେଙ୍ଗ୍ ସଲ୍‌ସିନାତ୍, ମାପୁରୁ ଜିସୁ କ୍ରିସ୍ତଦି ଲାକୁତୁ ୱେର୍‌ତିମାନି ତାନି ଉଡ୍ରି ଦାଡ଼ି ଇୟା ବଇଦୁ ରାସାତାମାନାତ୍ । ଆୟାୱିଜୁ ବିସ୍‌ୟ ୱାନି ଦାସରିଙ୍ଗ୍‌ ୱେର୍‍ନି ଉଣ୍ତିଙ୍ଗ୍‌ କ୍ରିସ୍ତ ଅରେନ୍‌ ମୁସ୍‌କୁପୁର୍‌ତି ଦୁତ୍‌ତିଙ୍ଗ୍ ପୋକସି ୱାନି ଦାସ୍‍ ଜୋହନତିଙ୍ଗ୍‌ ଆକା ୱେର୍‌ତାନ୍‌ ।
REV 1:2 ମାରି ଜୋହନ ନିଜେ ଆମାକା ୱିଜୁ ସୁଡ଼ୁତା ମାନାନ୍‌, ଆକା ଇବେନୁ ୱେର୍‌ତାମାନାନ୍ । ଇୟା ଦାଡ଼ିଦୁ ମାପୁରୁଦି ସାକ୍ୟ ମାରି ଜିସୁ କ୍ରିସ୍ତଦି ମାଡ଼ାନ୍ ୱିଙ୍ଗିଁତିମାନି ସତ୍ କାବୁର୍ ରାସାତାମାନାତ୍‌ ।
REV 1:3 ଆମା ଲୋକ୍‌ ଇୟା ବଇ ପୋଡ଼ାନାନ୍‌ ମାରି ଆମାକାର୍ ଇବେନୁ ୱିଙ୍ଗିଁତିମାନି ବବିସ୍ୟତ୍‌ମାଟା ୱେନ୍‌ଜି ତାନି ଆଦେସ୍‍ତାନ୍‌ ମାନାନାର୍‌, ୱାର୍‌ ଦନ୍ୟ, ଇରିଙ୍ଗ୍‌ ଆୟାୱିଜୁ ଗଟେଆନି ବେଡ଼ା ଲାକ୍‌ତୁ ୱାତାତ୍‌ନି !
REV 1:4 ଜୋହନ ଆସିଆ ଦେସ୍‌ତୁ ମାନି ସାତଗୋଟା ମଣ୍ତଲିଙ୍ଗାଁ ନା ନମସ୍କାର୍ । ମାପୁରୁଦି ମାଣାନ୍‍ ଦୟା ନି ସାନ୍ତି ମି ମୁସ୍‍କୁ ଆପିତ୍‍ । ୱାନିଦିନ୍‍ତୁ, ଆଗ୍‍ଡ଼ି ମାରି ଇଲେଇତି ଜିବନ୍‌ତି ମାପୁରୁ, ୱାନି ସିଂହାସନ୍ ଆଗ୍‌ଡ଼ିରି ସାତ୍‌ଗୋଟା ଆତ୍‍ମେଙ୍ଗ୍‍
REV 1:5 ମାରି ସାତିୱାରି ମାଣୁକୁ ଆଗ୍‌ଡ଼ି ନିଙ୍ଗିଁନିକା, ବିସ୍‌ବାସ୍‌ତି ସାକି ମାରି ଦୁନିଆ ରାଜାଦିରାଜା ଜିସୁ କ୍ରିସ୍ତଦି ଦୟା ମାରି ସାନ୍ତି ମି ମୁସୁକୁ ରାପିତ୍ । ୱାନ୍‌ ମାଙ୍ଗିଁ ଜିବନ୍‌ନୋନାନ୍‌ ମାରି ୱାନି ସାତି ମାଣୁକୁ ମାଙ୍ଗିଁ ପାପ୍‌ତାନ୍‌ ରକ୍ଷା କିତାମାନ୍ ।
REV 1:6 ମାରି ୱାନି ବୁବା ମାପୁରୁଦି ରାଜିଦୁ ସେବା କିନି ଉଣ୍ତିଙ୍ଗ୍‌ ମାଙ୍ଗିଁ ଉନ୍‌ଡ୍ରେ ଜାଜକ ୱାଜା କିତାମାନାନ୍ । ୱିଜେରେ ଗୌରବ୍‌ ମାରି ପରାକ୍ରମ ୱିଜୁଦିନ୍‌ ଜିସୁ କ୍ରିସ୍ତଦି ଆପିତ୍ ! ଆମେନ୍‍ ।
REV 1:7 ସୁଡୁଦୁ, ୱାନ୍‌ ବାଦଡ଼୍‌ତାନ୍‌ ୱାଜିନାନ୍ ଦୁନିଆଦି ଲୋକୁ ୱିଜେରେ ୱାନିଙ୍ଗ୍‌ ସୁଣାର୍‍; ଇୟାୱାଜାନେ ଆମାକାର୍ ୱାନିଙ୍ଗ୍‌ ଡାକ୍‌ତା ମାର୍‌ଆର୍‌, ୱାନ୍‌ ବା ୱାନିଙ୍ଗ୍‌ ସୁଡ଼ୁଜି ତିଲାଜି ଆଡ୍‌ବାନାର୍ । ଇୟାୱିଜୁ ପୁରା ଗଟାନାତ୍ ଆମେନ୍‍ ।
REV 1:8 ପ୍ରବୁ ସର୍ବସାକ୍ତିମାନ୍ ମାପୁରୁ ଇଜିନାନ୍‌, “ନାନୁ ଆରାମ୍‌ ନି ସାରାସାରି,” ୱାନ୍‌ ସର୍‌ଇଦିନ୍‌ତୁ ମାର୍‌ଆନ୍‌, ଇଲେଇବା ମାନାନ୍‌, ମାରି ବବିସତ୍‌ଦୁ ୱାନାନ୍ ।
REV 1:9 ନାନୁ ଜୋହନ, ମି ଅରେନ୍‌ ତଡ଼ାନ୍, ଜିସୁଦି ସିସୁ ୱାଜା ୱାନି ଦେସ୍‌ତି ଲୋକା ମୁସ୍‌କୁ ଆଜିମାନି କାସ୍ଟୁ ସାସ୍ତି ୱାଲେ ସାସ୍‌ କିନି ଉଣ୍ତିଙ୍ଗ୍‌ ନାନ୍‌ ମି ଅରେନ୍‌ ମିସାତାମାନା । ଜିସୁ ୱେର୍‌ତିମାନି ସତ୍‌ ମାରି ମାପୁରୁଦି ସାକ୍ୟ ୱେରିନି ଉଣ୍ତିଙ୍ଗ୍‌ ନାନୁ ପାତ୍ମ ଦର୍‌ତି ତର୍‌ତାରୋ ଅତାମାର୍ହାର୍‌ ।
REV 1:10 ନାନ୍‌ ପ୍ରବୁଦି ନାଣ୍ତିଙ୍ଗ୍‌ ପବିତ୍ରଆତ୍ମାଦୁ ପୁଟ୍‌ତାତ୍ ମାରି ନା ୱେନ୍‌କା ବାଜା ମରି ଆଉଲି ୱାଜା ଉନ୍‌ଡ୍ରି ପେରି ବଲୁ ୱେର୍‌ଆ ।
REV 1:11 ଏନ୍‌ ଅରେନ୍‌ ନାଙ୍ଗିଁ ଇର୍ହାନ୍‌, “ମିର୍‌ ଆମାକା ସୁଡ଼ିଜି ମାନିଦେର୍‌, ଆକା ଉନ୍‌ଡ୍ରି ବଇଦୁ ରାସ୍‌ସୋ ଇଡୁଦୁ ମାରି ସାତ୍‌ଗୋଟା ମଣ୍ତଲିଙ୍ଗ୍‌, ଏପିସ୍‌, ସ୍ମୁର୍ଣ୍ଣା, ପର୍ଗମ, ତୁୟତିରା, ସାର୍ଦ୍ଦୀ, ଫିଲାଦେଲ୍‍ଫିଆ, ମାରି ଲାଅଦିକିଆଦି ମଣ୍ତଲିଙ୍ଗାଁ ଲାକ୍‌ତୁ ପୋକ୍‍ତୁ ।”
REV 1:12 ଏନ୍‌ ନା ୱାଲେ ୱାର୍‌ଗିଜିନାନ୍, ସୁଡ଼ୁନି ଉଣ୍ତିଙ୍ଗ୍ ନାନୁ ୱେନ୍‌କା ମାରିଜିବେସ୍‌ସି ସୁଡ଼ୁତା, ସାତ୍‌ଗୋଟା ବାଙ୍ଗାଁରାମ୍ ଦିୱେଙ୍ଗ୍‌,
REV 1:13 ମାରି ଆୟା ଦିୱେଙ୍ଗାଁ ନାଡ଼୍‌ମି ମନୁସ୍ୟପୁତ୍ରଦି ୱାଜା ଅରେନ୍‌ ଲୋକ୍‌ । ୱାନି ଆଙ୍ଗିଁ ପାଦାମ୍‌ ସାନ୍ଦି ଆରାଜି ମାରି ୱାନି ବକାଦୁ ଉନ୍‌ଡ୍ରି ବାଙ୍ଗାଁରାମ୍‍ତି ବେଲୁଟୁ ଦାନ୍‌ ତର୍‌ଜିମାରାତ୍‌ ।
REV 1:14 ୱାନି ତାଲାଦି କୁକୁଟି ବୁରୁବୁସା ନି ଅଡ଼ିନିକା ୱାଜା ଅଡ଼ିନିକା ମାରାତ୍ ମାରି ୱାନି କାଣୁକୁ ସିସୁ ୱାଜା କାସ୍‌ସିମାରେ ।
REV 1:15 ୱାନି ପାଦାମ୍‌କୁ ରୁଣ୍ତି ସିସୁଦୁ ପୁରା ପିତଲ୍‌କଂସ୍‌ ୱାଜା କାସ୍‌ସି ମାରାତ୍‌ ମାରି ୱାନି ୱାର୍‌ଗିନି ବଲୁ ଏରୁୱାଙ୍ଗିଁଜିନି ୱାଜା ଆଜିମାରାତ୍ ।
REV 1:16 ୱାନ୍‌ ୱାନି ଉଣିକିୟୁଦୁ ସାତ୍‌ଗୋଟା ସୁକେଙ୍ଗ୍ ଆସ୍‌ତାମାରାନ୍ ମାରି ୱାନି ୱେୟୁଦାନ୍‌ ଉନ୍‌ଡ୍ରି ସିକ୍‌ସିକା ରିୟାଙ୍ଗାଁଦାରାମାନି କାଣ୍ତା ସୋସି ମାର୍ହାତ୍‌ । ୱାନି ମକମ୍‌ ୱେଡ଼େରି ୱେଡ଼ା ୱାଜା ଜାୟ୍‌ମାରାତ୍ ।
REV 1:17 ୱାନିଙ୍ଗ୍‌ ସୁଡ଼ୁତି ଦାପ୍ରେ ନାନୁ ସାତି ୱାଜା ୱାନି ପାଦାମ୍‌ ଆଡ୍‍ଗି ମେଡ଼େତା । ୱାନ୍‌ ୱାନି ଉଣି କିୟୁ ନା ମୁସୁକୁ ଇଡିଜି ଇର୍ହାନ୍‌, “ତିଲାମାଟ୍, ନାନୁ ଆରାମ୍‌ ନି ସେସ୍‌ ।
REV 1:18 ନାନ୍‌ ନିଜେ ଜିତାମାନା; ସାତାମାର୍ହାର୍‌, ମାତର୍‌ ନାନୁ ଇଲେଇ ଜୁଗ୍‌ ଜୁଗ୍‌ ଜିବନ୍‌ ତେବାନା । ସାନିକା ମାରି ପାତାଲ୍‌ତି କୁସିକାଣ୍ତି ନା କିୟୁଦୁ ମାନାତ୍ ।
REV 1:19 ଆଦେଙ୍ଗ୍‍ଁ ନିନ୍‌ ଆମା ୱିଜୁ ବିସୟ୍‌ ସୁଡ଼ିଜିନିଦେର୍‌ ଏମେ ୱିଜୁ ବିସୟ୍‌ ଇଲେଇ ଗଟେଆଜିନାତ୍ ମାରି ଆମାକା ୱିଜୁ ବବିସ୍ୟତ୍‍ଦୁ ଗଟେଆନାତ୍, ଆୟାୱିଜୁ ରାସ୍‍ସ ଇଡୁଦୁ ।
REV 1:20 ନା ଉଣିକିୟୁଦୁ ମାନି ସାତ୍‌ଗୋଟା ସୁକେଙ୍ଗ୍‌ ମାରି ଇୟା ସାତ୍‌ଗୋଟା ବାଙ୍ଗାଁରାମ୍‌ତି ଦିୱେଙ୍ଗାଁ ମାର୍‌ଗିତିମାନି ମାଟା ଆଜିନାତ୍‌, ସୁକେଙ୍ଗ୍‌ ସାତ୍‌ଗୋଟା ମଣ୍ତଲିଦି ଦେବ ଦୁତ୍‌ ମାରି ଦିୱେଙ୍ଗ୍‌ ସାତ୍‌ଗୋଟା ମଣ୍ତଲିଙ୍ଗ୍‌ ।”
REV 2:1 ଏପିସ୍‌ ମଣ୍ତଲିଦି ଦୁତ୍‍ଦି ଲାକୁତୁ ରାସ୍‍ତୁ : ଏମେୱାନି ଉଣିକିୟୁଦୁ ସାତଗୋଟା ସୁକେଙ୍ଗ୍‌ ମାରି ଏନ୍‌ ସାତଗୋଟା ବାଙ୍ଗାଁରାମ୍‍ ଦିୱେଙ୍ଗ୍‌ ମାଣାନ୍‌କୁ ବାଟା କିନାନ୍‌, ୱାନି ଇୟା କାବୁର୍ ।
REV 2:2 ମି ପାଣିକିତିମାନିକା, ନାଣ୍ତକାସ୍ଟୁ ପାଣି ମାରି ସାସ୍ତି ବିସୟ୍‌ ନାନୁ ନେସ୍‌ନା । ନାନୁ ବା ନେସ୍‌ନା ଜେ, ନିନୁ ତାଗ୍‌ଇପାଣିକିନିୱାରିଙ୍ଗ୍‌ ସାସ୍‌ କିଦେଙ୍ଗ୍‌ ଆଟ୍‌ଇ । ଏମେକାର୍‌ ପ୍ରେରିତ ସିସୁ ଇଜି ନିଜେଦି ପରିଚୟ ସିନାର୍‍, ସତ୍‍ତାନ୍ ସିସୁ ଆଏର୍‌, ପରିକା କିଜି ୱାରିଙ୍ଗ୍‌ ମିଚ୍‌ୱେର୍‌ନିକାର୍‌ ଇଜି ନିନ୍‌ ପାରାମାଣ୍‌ କିତିମାନି ।
REV 2:3 ମାରି ନିନ୍‌ ସାସ୍‌ ଆସ୍‌ସି ମା ଉଣ୍ତିଙ୍ଗ୍‌ ଦୁଃଖକାସ୍ଟୁ ସାସ୍‌ କିତିମାନି ମାରି ନିରାସ୍‌ ଆଇ ।
REV 2:4 ମାତର୍‌ ନି ବିରୁଦ୍‌ତାନ୍ ନା ଇୟା ମାଟା ମାନାତ୍‌ : ମିର୍‌ ଆଗ୍‍ଡ଼ି ଏଣ୍ତେସ୍‌ ନାଙ୍ଗିଁ ଜିବନ୍‍ନୋଜି ମାରିଇଦେର୍‌, ଇଲେଇ ଆୟାୱାଜା ମାରି ଜିବନ୍‌ନୋଇଦେର୍‌ ।
REV 2:5 ମିଦି ଏସା ଆଡିଗିଆତା ମାନାତ୍‌, ସିନ୍ତା କିଦୁ । ପାପ୍‌ତାନ୍ ଡ଼େସିୱାଜି ଆଗ୍‌ଡ଼ିରି ୱାଜା ସତ୍‌ପାଣି କିଦୁ । ଜଦି ପାପ୍‌ତାନ୍ ଡ଼େସି ରେଇଦେର୍‌, ଆର୍‌ତିଙ୍ଗ୍‌ ନାନୁ ମି ଦିୱାଦିଙ୍ଗ୍‌ ଆଇ ବାଡିଦୁ ଅନା ।
REV 2:6 ମାତର୍‌ ମି ଉଣ୍ତିଙ୍ଗ୍‌ ଉନ୍‌ଡ୍ରି ବିସୟ୍‌ ମାନାତ୍‌ । ଆକା ଆଜିନାତ୍, ମାପ୍‌ ନୀକଲାୟତିୟରି ଆମା ୱିଜୁ ପାଣି କାଡ଼ିଜିନା, ନିନ୍‌ ବା ଆୟାୱିଜୁ କାଡ଼ିଜିନି ।
REV 2:7 ୱେନ୍‌ଡ୍ରେଙ୍ଗ୍‌ ଗିତଣି ମାରିଙ୍ଗ୍‌, ମଣ୍ତଲିଆଙ୍ଗ୍‌ ଉଣ୍ତିଙ୍ଗ୍‌ ପବିତ୍ରଆତ୍ମା ଇନିକା ଇଜିନାତ୍, ୱେନ୍‌ଡ୍ରୁ ! ଏମେକାର୍‌ ଜିଣାନିକା ଲାବକିନାର୍, ନାନୁ ୱାରିଙ୍ଗ୍‌ ମାପୁରୁଦି ମୁସ୍‌କୁପୁର୍‌ତି ଡଡିଦୁ ଆସ୍ତିମାନି ଜିବନ୍‌ ମାରାତି ପଲ୍‌ ତିନି ଉଣ୍ତିଙ୍ଗ୍‌ ଅଦିକାର୍‌ ସିନା ।
REV 2:8 ସ୍ମୁର୍ଣ୍ଣାଦୁ ମାନି ମଣ୍ତଲିଦି ଦୁତ୍‌ଦି ଲାକୁତୁ ରାସ୍‍ତୁ : ଏନ୍‌ ଆରାମ୍‌ ନି ସାରାସାରିୱେନ୍‌କା ମାରି ଏନ୍‌ ସାତାନ୍‌ନୋ ଡ଼େସି ଜିବନ୍‌ ଆତାନ୍‌, ୱାନି ଲାକ୍‌ତୁରାନ୍‌ ଇୟା କାବୁର୍ :
REV 2:9 ମି ଦୁଃକ୍‌କାସ୍ଟୁ ୱିଜୁ ନାନ୍‌ ନେସ୍‌ନା; ନାନୁ ବା ନେସ୍‌ନା ଜେ, ମିର୍‌ କାକୁର୍ତିଲୋକୁ; ମାତର୍‌ ସତ୍‍ତାନ୍ ମିର୍‌ ମାଜନ୍‌ ଲୋକ୍‌ । ଏମେକାର୍ ନିଜେଦିଙ୍ଗ୍ ଜିହୁଦି ଇଜି ଇନାର୍, ମାତର୍‌ ସତ୍‍ତୁ ଜିହୁଦିର୍ ଆଏର୍‌ ମାରି ଏମେକାର୍ ସୟତାନ୍‍ଦି ୱେନ୍‌କା ସନାର୍‌, ୱାର୍‌ ଏଣ୍ତେସ୍‌ ମିଙ୍ଗିଁ ଅପମାନ୍ କିଜି ମାଟା ଆଜିନାର୍‌, ଆକା ନାନୁ ନେସ୍‌ନା ।
REV 2:10 ମିର୍‌ ଏମେ ୱିଜୁ ଦୁଃକ୍‌କାସ୍ଟୁ କିଦେଙ୍ଗ୍ ସଲିସିନିଦେର୍‌, ଆୟାଉଣ୍ତିଙ୍ଗ୍‌ ତିଲାମାଟ୍ । ୱେନ୍‌ଡ୍ରୁ ! ମି ମାଣୁକୁ ଏସ ଲୋକାଙ୍ଗ୍‌ ଜଇଲ୍‌ତୁ ନିରିସି କିଜି ସୟତାନ୍ ପରିକା କିନାତ୍‌ । ମାତର୍‌ ମି ଇୟା କାସ୍ଟୁ କେବଲ୍‌ ସାଣେକ୍‌ ଦିନ୍‍ସାଦି ତେବାନାତ୍ । ଇବେନୁ ସାନିତାନିଙ୍ଗ୍ ତିୟେଲ୍‌ ମାରିଙ୍ଗ୍‌ବା, ନା ଉଣ୍ତିଙ୍ଗ୍‌ ବିସ୍‌ବାସ୍‌ ତେବାତିଙ୍ଗ୍‌, ନାନୁ ମିଙ୍ଗିଁ ଜିବନ୍‌ନାନି ଟପି ସିନା ।
REV 2:11 ୱେନ୍‌ଡ୍ରେଙ୍ଗ୍‌ ଗିତଣି ମାରିଙ୍ଗ୍‌, ମଣ୍ତଲିକାଙ୍ଗ୍ ମାପୁରୁଦି ଆତ୍ମା ଇନିକା ଇଜିନାତ୍, ୱେନ୍‌ଡ୍ରେରୁ ଏମେକାର୍ ଜିଣାଜି ଲାବକିନାର୍, ରିଜାସାନିକା ୱାରିଙ୍ଗ୍‌ ମୁଟ୍‍ତେଙ୍ଗ୍‌ ଆଟ୍ଏତ୍‌ ।
REV 2:12 ପର୍ଗମ ମଣ୍ତଲିଦି ଦୁତ୍‌ଦି ଲାକ୍‌ତୁ ରାସ୍‍ତୁ : ଏମେୱାନି ଲାକ୍‌ତୁ ରିଆଙ୍ଗାଁଦାରାଦି କାଣ୍ତା ମାନାତ୍‌, ୱାନି ଇୟା କାବୁର୍ ।
REV 2:13 ନାନୁ ନେସ୍‌ନା, ମିର୍‌ ସୟତାନ୍‍ଦି ସିଂହାସନ୍ ଲାକୁତୁ ବାସାକିଜିନିଦେର୍‌ । ମାତର୍‌ ମିର୍‌ ନା ଉଣ୍ତିଙ୍ଗ୍‌ ବିସ୍‌ବାସ୍‌, ଇୟାୱାଜାନେ ସୟତାନ୍ ବାସାକିନି ଜାଗାଦୁ ଏସ୍ତିୱାଲେ ନା ଅରେନ୍‌ ବିସ୍‌ବାସ୍‌ତି ସାକିସିନି ଆନ୍ତିପାଦିଙ୍ଗ୍‌ ସାୟାମାର୍‌ଗା ଡାକ୍‌ତାର୍‌, ନାସ୍ତିୱାଲେ ବା ମି ବିସ୍‌ବାସ୍‌ ଡ଼ିସ୍‌ଇମାରିଇଦେର୍‌ ।
REV 2:14 ମାତର୍‌ ନି ବିରୁଦ୍‌ତାନ୍‌ ନା ଏସ ବିସୟ ଇନିକା ମାନାତ୍‌ । ଆବେନୁ ମି ୱାଲେ ମାନି ଏସ ଲୋକୁ, ବାଲାମଦି ସିକିୟାଦାନ୍‌ ବୁଲାସାଲା ଆଜିନାର୍‌ । ବାଲାମ ପୁଜାସିନି ବଗ୍‌ ତିନ୍‌ଡ୍ରେଙ୍ଗ୍‌ ମାରି ଦାରିପାଣି କିନି ଉଣ୍ତିଙ୍ଗ୍‌ ଇସ୍ରାଏଲ୍‌ତି ଲୋକାଙ୍ଗ୍‌ ୱେର୍‌ନି ଉଣ୍ତିଙ୍ଗ୍‌ ବାଲାକଦିଙ୍ଗ୍‌ ଅଜାକିତାମାରାନ୍ ।
REV 2:15 ଟିକ୍ ଆୟାୱାଜା ନୀକଲାୟତିୟରି ମାଟାଦି ୱେନ୍‌କା ସୋଲ୍‌ସିମାନି ଲୋକୁ ମି ଲୋଇ ମାନାର୍‌ ।
REV 2:16 ମି ପାପ୍‌ ଡ଼ିସ୍‍ତୁ; ସିଲେତିଙ୍ଗ୍‌ ନାନୁ ବେଗି ମି ଲାକୁତୁ ୱାଜି ନା ୱେୟୁଦାନ୍‌ ସୋସିମାନି କାଣ୍ତାଦାନ୍‌ ଆୟା ଡଙ୍ଗାର୍‍ଙ୍ଗାଁ ବିରୁଦ୍‌ତାନ୍ ଜୁଦ୍‍ କିନା ।
REV 2:17 ଏମେକାର୍ ୱେନି ଉଣ୍ତିଙ୍ଗ୍‌ ଗିତଣି ମାନାତ୍‌, ମଣ୍ତଲିଙ୍ଗାଁ ମାପୁରୁଦି ଆତ୍ମା ଇନିକା ଇଜିନାତ୍, ଆକା ୱେନ୍‌ଡ୍ରୁ । “ଏମେକାର୍ ଜିଣାନିକା ଲାବ କିନାର୍, ନାନୁ ୱାରିଙ୍ଗ୍‌ ଇଟ୍‌ତିମାନି ମାନ୍ନାଦାନ୍ ଏସ ସିନା । ୱାରି ମାଣ୍‌କୁ ୱିଜେରିଙ୍ଗ୍ ପୁନି ଦରୁ ରାସ୍‍ତିମାନି ଅଡ଼ିନି କାଲୁ ସିନା । ଆୟା ପୁନି ଦରୁ ଇନିକା, କାଲୁଦିଙ୍ଗ୍‌ ମାନାନିକାନ୍‌ ଡ଼ିସ୍‌ତିଙ୍ଗ୍‌ ଆଇକାନ୍‍ ଏନ୍‌ ଆକା ନେସ୍‌ତେଙ୍ଗ୍‌ ଆଟ୍‍ଏର୍‍ ।”
REV 2:18 ତୁୟତିରା ମଣ୍ତଲିଦି ଦୁତ୍‌ଦି ଲାକୁତୁ ରାସ୍‍ତୁ : ଇୟା କାବୁର୍‌ ମାପୁରୁଦି ମାରିନ୍‌ଦି ଲାକୁତୁରାନ୍‌ ୱାତାମାନାତ୍ । ୱାନି କାଣୁକୁ କାସ୍‍ସିମାନି ସିସୁ ୱାଜା ମାରି ୱାନି ପାଦାମ୍‌ ଜାୟ୍‌ତି ପିତଲ୍‌ ୱାଜା ।
REV 2:19 ମି ପାଣିକିତିକା, ମି ଜିବନ୍‍ନୋନିକା, ବିସ୍‌ବାସ୍‌ ମି ସେବା ପାଣି ମାରି ସାସ୍‌ ନାନୁ ନେସ୍‌ନା ! ନାନୁ ବା ନେସ୍‌ନା ଜେ, ମିର୍‌ ପୁର୍ବେ ଏମେକା କିଜିମାରିଇଦେର୍‌, ଇଲେଇ ତାନିମାଣୁକୁ ନାଣ୍ତ କିଜିନିଦେର୍‌ ।
REV 2:20 ମାତର୍‌ ନି ବିରୁଦ୍‌ତାନ୍ ନାନୁ କେବଲ୍‌ ନିସ ଇନିକା ମାନାତ୍, ମାପୁରୁଦି କାବୁରୁଅନିତାନି ୱାଜା ନିଜେଦି ପରିଚୟ ସିଜିମାନି ଯେଜେବଲ୍ ଦର୍‌ତି ଆଇମାଦିଙ୍ଗ୍‍ ନିନ୍‌ ଜିବନ୍‌ନୋନିକା ସିତିମାନି । ବାବବାଦିନି ନା ଦାସ୍‍ରିଙ୍ଗ୍‍ ଦାରିପାଣି କିଦେଙ୍ଗ୍‌ ମାରି ଦିୟାମ୍‌କା ଲାକ୍‌ତୁ ସିଆୟ୍‌ଆତିମାନି ବଗ୍‌ ତିନ୍‌ଡ୍ରେଙ୍ଗ୍‌ ସିକିୟା ସିଜି ୱାରିଙ୍ଗ୍‌ ଆଇସାରିଦୁ ପୋକ୍‌ସିନାତ୍‌ ।
REV 2:21 ପାପ୍‌ଦାନ୍ ଡ଼େସିୱାନି ଉଣ୍ତିଙ୍ଗ୍‌ ନାନୁ ତାନିଙ୍ଗ୍‌ ସମୟ ସିତାମାନା, ମାତର୍‌ ୱାଦ୍‌ ନିଜେଦି ଦାରିପାଣିଦିଙ୍ଗ୍ ଡ଼ିସ୍‍ତେଙ୍ଗ୍‌ ଇଛାକିଏଜିନାତ୍ ।
REV 2:22 ଆଦେଙ୍ଗ୍‌ ନାନୁ ତାନିଙ୍ଗ୍‌ ମାରି ତାନି ୱାଲେ ଦାରିପାଣିଦୁ ମିସାତି ମାନି ୱିଜେରିଙ୍ଗ୍‌ ଖାଟେଲ୍‍ଦୁ ତେର୍‌ପେନା ମାରି ୱାର୍‌ ବୟଙ୍କାର୍‌ କାସ୍ଟୁ ଭୋଗ କିନାର୍ । ଜଦି ୱାର୍‌ ତାନି ୱାଲେ କିତିମାନି ଦାରିପାଣି ଉଣ୍ତିଙ୍ଗ୍‌ ଏତ୍‌ କିଏର୍‌, ଆର୍‌ତିଙ୍ଗ୍‌ ନାନୁ ଇକା ଏଣ୍ତେସ୍‌ବା କିନା ।
REV 2:23 ତାନି ୱେନେକା ବୁଲାନିୱାରିଙ୍ଗ୍ ବା ସାପିସ୍‌ କିନା, ଆର୍‌ତିଙ୍ଗ୍‌ ମଣ୍ତଲିଙ୍ଗ୍‌ ୱିଜୁ ନେସ୍ତେଙ୍ଗ୍ ଆଟ୍‍ନାର୍‌ ଜେ, ନାନ୍‌ ଜିବନ୍‌ତିକାୱିଜୁ ନେସ୍‌ନା, ଲୋକ୍‌ଦି ୱିଜୁ ଚିନ୍ତା ମାରି ପାଣି ନାନୁ ନେସ୍ତେଙ୍ଗ୍‍ ଆଟ୍‍ନା । ମିର୍‌ ୱିଜେରେ ଆମାକା କିତିମାନିଦେର୍‌, ଆୟା ଇସାପ୍‍ତାନ୍ ନାନୁ ମିଙ୍ଗିଁ କାସ୍ଟୁ ସିନା ।
REV 2:24 “ମାତର୍‌ ତୁୟତିରାଦୁ ମି ଲୋଇରାନ୍‌ ଏମେକାର୍ ଇୟା ତାଗ୍‌ଇସିକ୍‌ୟା ମାନାଇଦେର୍‌ ମାରି ଆମାତାନିଙ୍ଗ୍‌ ସୟତାନ୍‌ଦି ମାର୍‌ଗିତିମାନି ଅର୍ତଦି ସିକ୍‌ୟା କିଇଦେର୍‌, ନାନୁ ୱାରି ମୁସୁକୁ ମାରି ଇନି ବଜୁ ତିଗିଜ ସିଏ ।
REV 2:25 ମାତର୍‌ ନାନୁ ରେଇମାନି ସାନ୍ଦି ମିଦି ଏମେକା ମାନାତ୍‌, ଆକା ଡାଟ୍‌ତାନ୍‌ ଆସ୍‍ସୋ ଇଡିଦୁ ।
REV 2:26 ଏମେ ଲୋକୁ ଜିଣାନାର୍ ମାରି ସାରାସାରି ୱେନ୍‌କା ସାନ୍ଧି ନା ବଦାଦାନ୍‌ ପାଣି କିନା, ନାନ୍‌ ବୁବାଦି ଲାକ୍‌ତୁରାନ୍‌ ଏମେ ଅଦିକାର୍ ପୋଇତାମାନା, ଆକା ୱାରିଙ୍ଗ୍‌ ସିନା ।
REV 2:27 ପୃତିବିଦି ଆଇଆଇ ଜାତିଦି ଲୋକାଙ୍ଗ୍‌ ଲୁୱା ଦଣ୍ତଦାନ୍ ସାସନ୍ କିଦେଙ୍ଗ୍ ମାରି ସିକିଲା ସାଟି ୱାଜା ଗୁଣ୍ତ୍‍ଗୁଣ୍ତା କିଦେଙ୍ଗ୍ ନାନୁ ୱାରିଙ୍ଗ୍‌ ଅଦିକାର୍ ସିନା ।
REV 2:28 ନାନୁ ୱାରିଙ୍ଗ୍‌ ୱିଗାପି ସୁକା ବା ଦାନ୍ କିନା ।”
REV 2:29 ୱେନ୍‌ଡ୍ରେଙ୍ଗ୍‌ ସାକ୍ତି ମାରିଙ୍ଗ୍, ମଣ୍ତଲିଙ୍ଗାଁ ମାପୁରୁଦି ଆତ୍ମା ଇନିକା ଇଜିନାତ୍, ୱେନ୍‌ଡ୍ରୁ !
REV 3:1 ସାର୍ଦ୍ଦୀଦୁ ମାନି ମଣ୍ତଲିଦି ଦୁତ୍‌ଦି ଲାକ୍‌ତୁ ରାସ୍‍ତୁ, “ମାପୁରୁଦି ସାତ୍‌ଗୋଟା ଆତ୍ମା ମାରି ସାତ୍‌ଗୋଟା ସୁକେଙ୍ଗ୍ ଆସ୍ତିମାନି ଲୋକ୍‌ତିମାଡ଼ାନ୍‍କୁ ଇୟା କାବୁର୍ । ନାନୁ ମି ପାଣିକିତିକା ନେସ୍‌ନା; ମିର୍‌ ସାତିମାରିଙ୍ଗ୍‌ ବା ଜିବନ୍‌ମାନାପ୍‌ ଇଜି ୱେଙ୍ଗିଁତିମାନିଦେର୍‌ ।
REV 3:2 ଆଦେଙ୍ଗ୍‌ ଜାଗାର୍‌ତା ଆଦୁ ମାରି ମି ଲାକୁତୁ ଆମା ବିସୟ୍‌କୁୱିଜୁ ମାନାତ୍‌, ଆକା ପୁରାୱାଜା ମାର୍‌ଗିନି ଆଗ୍‍ଡ଼ିନେ ତାନିଙ୍ଗ୍‌ ସାକ୍ତି କିଦୁ । ଇରିଙ୍ଗ୍‌ ନାନୁ ନେସ୍‌ନା, ମି ପାଣିୱିଜୁ ମାପୁରୁଦି କାଣ୍‌ଗାଦୁ ଇୟାସାନ୍ଧି ପୁରା ଆଏତ୍‌ ।
REV 3:3 ମିଙ୍ଗିଁ ଏମେ ସିକିୟା ସିଆୟ୍‌ଆତାମାରାତ୍‌ ମାରି ମିର୍‌ ଏମେକା ୱେରିଇମାରିଇଦେର୍‌, ଆକା ଏତ୍‌କିଜି ମାନାଦୁ ମାରି ମୋନ ବାଦ୍‌ଲେକିଦୁ । ଜଦି ଜାଗାର୍‌ତା ଆଏତିଙ୍ଗ୍, ନାନୁ ଡଙ୍ଗାଁର୍‌ଏନ୍‌ ୱାଜା ମି ଲାକୁତୁ ୱାନା । ଆକା ମିର୍‌ ନେସ୍‍ତେଙ୍ଗ୍ ଆଟ୍‍ଇଦେର୍‌ ।
REV 3:4 ମାତ୍ର ସାର୍ଦ୍ଦୀଦୁ ମି ଲୋଇରାନ୍‌ ଉଣା ଏସ ଲୋକ୍‌ ୱାରି ଆଙ୍ଗିଁଙ୍ଗ୍‌ ମାତ୍‌ଏର୍‌ । ୱାର୍‌ ଅଡ଼ିନିଆଙ୍ଗିଁ ଆରାଜି ନା ୱାଲେ ବୁଲାସାଲା କିନାର୍, ଇରିଙ୍ଗ୍‌ ଇୟାଉଣ୍ତିଙ୍ଗ୍‌ ୱାରି ଜୋଗ୍‌ ମାନାତ୍‌ ।
REV 3:5 ଏମେକାର୍ ଜିଣାନାର୍, ୱାର୍‌ ଇୟାୱାଜା ଅଡ଼ିନି ଆଙ୍ଗିଁଙ୍ଗ୍‌ ଆରାନାର୍ । ଜିବନ୍‌ ବଇଦାନ୍‌ ୱାରି ଦରୁ ଏସାଙ୍ଗ୍‌ବା ମାର୍‌ଗେଏତ୍, ମାରି ମା ବୁବା ମାରି ୱାନି ଦୁତ୍‍କା ଆଗ୍‌ଡ଼ି ୱାରିଙ୍ଗ୍‌ ନା ୱେନ୍‌କାୱାନିକାର୍‌ ଇଜି ନାନ୍ ମାନାନା ।
REV 3:6 “ୱେନ୍‌ଡ୍ରେଙ୍ଗ୍‌ ଗିତଣି ମାରିଙ୍ଗ୍, ମଣ୍ତଲିଆଙ୍ଗାଁ ପବିତ୍ରଆତ୍ମା ଇନିକା ଇଜିନାତ୍, ମୋନ୍ ସିଜି ୱେନ୍‌ଡ୍ରୁ ।”
REV 3:7 ଫିଲାଦେଲ୍‍ଫିଆଦୁ ମାନି ମଣ୍ତଲିଦି ଦୁତ୍‍ ଲାକୁତୁ ରାସ୍‍ତୁ : ଏନ୍‌ ୱିଜୁୱାଜା ପବିତ୍ର ନି ସତ୍‍ଦି ୱାଜା ୱାନିମାଣ୍‌କୁ ଇୟା କାବୁର୍‌ ୱେନ୍‌ଡ୍ରୁ । ୱାନି ଲାକୁତୁ ଦାଉଦଦି କୁସିକାଣ୍ତି ମାନାତ୍‌, ୱାନ୍‌ ଏମେ ସେର୍‍ଲା ରେନାନ୍, ଆଇକାନ୍‍ ଏନ୍‌ ଆକା କେର୍‌ତେଙ୍ଗ୍ ଆଟ୍‍ଏନ୍‌ ମାରି ୱାନ୍‌ ଏମେକା କେର୍‌ନାନ୍, ଆଇକାନ୍‍ ଏନ୍‌ ଆକା ରେତେଙ୍ଗ୍ ଆଟ୍‍ଏନ୍‌ ।
REV 3:8 ମି ପାଣି ୱିଜୁ ନାନୁ ନେସ୍‌ନା; ଇୟାସାନ୍ଧି ମି ସାକ୍ତି ମାନାତ୍‌, ଇକାବା ନେସ୍‌ନା; ମିର୍‌ ନା ସିକ୍‌ୟା ମାନାଜି ୱାତିମାନିଦେର୍‌ ମାରି ନା ଉଣ୍ତିଙ୍ଗ୍‌ ବିସ୍‌ବାସ୍‌ ମାନିଦେର୍‌ । ଆଦେଙ୍ଗ୍‌ ନାନୁ ମି ଆଗ୍‌ଡ଼ି ଉଣ୍ତ୍ରି ସେର୍‍ଲା ରେତାମାନା । ଆକା ଏନ୍‌ କେର୍‌ତେଙ୍ଗ୍ ଆଟ୍ଏନ୍‌ ।
REV 3:9 ୱେନ୍‌ଡ୍ରୁ ! ଏସ ଲୋକୁ ମିଚ୍‌ତାନ୍‌ ନିଜେ ନିଜେଦିଙ୍ଗ୍ ଜିହୁଦି ଇଜି ଇନାର୍, ମାତର୍‌ ସତ୍‍ତାନ୍ ଜିହୁଦିର୍‌ ଆଏର୍‌, ସୟତାନ୍‍ଦି ଆୟା ଲୋକାଙ୍ଗ୍‌ ନାନୁ ମି ପାଦାମ୍‌ ଆଡ୍‍ଗି କିନା । ନାନୁ ମିଙ୍ଗିଁ ଜିବନ୍‌ନୋନା ଇଜି ୱାର୍‌ ୱିଜେରେ ନେସ୍‌ନାର୍ ।
REV 3:10 ନା ଆଦେସ୍‌ ଇସାବ୍‌ତାନ୍‌ ମିର୍‌ ସାସ୍‌ଆଜି ମାନିଦେର୍‌, ଆଦେଙ୍ଗ୍‌ ପୃତିବିଦିଲୋକୁ ଲୋକାଙ୍ଗ୍‌ ପରିକା କିନି ଉଣ୍ତିଙ୍ଗ୍ ସାରା ଦୁନିଆଦୁ ଆମା କାସ୍ଟୁ ୱାଦେଙ୍ଗ୍‌ ସୋଲିସ୍‍ନାତ୍, ଆବେଟ୍‌କୁ ନାନୁ ମିଙ୍ଗିଁ ନେଗିବାଡିଦୁ ଇଡ୍‌ନା ।
REV 3:11 ନାନୁ ଦାପ୍ରେ ୱାଜିନା, ମି ମୁକୁଟ୍ ଏମେକା ମାନାତ୍‌, ଆକା ନେଗେନ୍ ଇଡିଦୁ, ଏଣ୍ତେସ୍‌ ଏନ୍‌ ମି ଲାକ୍‌ତୁରାନ୍, ମି ଜିଣାତି ପୁରସ୍କାର୍‌ ଡଙ୍ଗାଁକିଜଅତେଙ୍ଗ୍ ଆଟ୍ଏନ୍‌ ।
REV 3:12 ଜିଣାତି ଲୋକ୍‌ତିଙ୍ଗ୍‌ ନାନୁ ନା ମାପୁରୁଦି ମନ୍ଦିର୍‌ଦୁ ମୁଣ୍ତାୱାଜା ତିଆର୍‌ କିନା ମାରି ୱାନ୍‌ ମୁଡ଼ୁକେ ଆବେଟ୍‌ତାନ୍‌ ଗୁସାଦେଙ୍ଗ୍ ଆଟ୍‌ଏନ୍‌ । ନାନୁ ତାନି ମୁସୁକୁ ନା ମାପୁରୁଦି ଦରୁ ରାସ୍‍ନା । ନା ମାପୁରୁଦି ଲାକ୍‌ତୁରାନ୍‌ ମୁସ୍‌କୁପୁର୍‌ତାନ୍‌ ୱାତିମାନି ମାପୁରୁଦି ଗାଡ଼୍‌, ପୁନି ଜିରୁସାଲମ୍‌ଦି ଦରୁ ମାରି ନା ପୁନି ଦରୁ ବା ଆୟା ମୁସୁକୁ ରାସ୍‍ନା ।
REV 3:13 ଏମେୱାନିଙ୍ଗ୍ ଗିତଣି ମାନାତ୍, ୱାନ୍‌ ମଣ୍ତଲିଆଙ୍ଗାଁ ମାପୁରୁଦି ଆତ୍ମା ଇନିକା ୱେର୍‌ସିନାତ୍, ମୋନ୍ ସିଜି ୱେନ୍‌ଡ୍ରୁ ।
REV 3:14 ଲାଅଦିକିଆ ମଣ୍ତଲିଦୁ ମାନି ଦୁତ୍‍ଦି ଲାକ୍‌ତୁ ରାସ୍‍ତୁ : ବିସ୍‌ବାସ୍‌ ନି ସତ୍‌ ସାକି ମାରି ମାପୁରୁଦି ୱିଜୁ ତିଆର୍‌କିତିମାନି ଆରାମ୍‌ ଆୟା “ଆମେନ୍‍ଦି” ଇୟା କାବୁର୍‌ :
REV 3:15 ନାନୁ ମି ପାଣିୱିଜୁ ନେସ୍‌ନା; ନିନ୍‌ ସିତିଡ଼ି ସିଲେ କି ଉସୁମ୍‌ ସିଲେ, ଇକା ନାନୁ ନେସ୍‌ନା । ନିନ୍‌ ସିତ୍‍ଡ଼ି ସିଲେତିଙ୍ଗ୍‌ ଉସୁମ୍‌ ଆତିମାରିଙ୍ଗ୍‌ ନେଗେନ୍‌ ଆତାତ୍‍ମାନ୍ଧି ।
REV 3:16 ମାତର୍‌ ନିନ୍‌ ସିତ୍‍ଡ଼ି ବା ଉସୁମ୍‌ ଆଏଜି ଅଡ଼ପ୍‌ ଉସୁମ୍‌ ଆତିମାନିଙ୍ଗ୍‌, ନାନୁ ନିଙ୍ଗିଁନା ୱେୟୁଦାନ୍ କାକ୍‍ନା !
REV 3:17 ମିର୍‌ ଇଜିନିଦେର୍‌; ନାନୁ ଦନି, ନାଦି ନାଣ୍ତ ସମ୍ପତି ମାନାତ୍, ନାଦି ଏମେ ୱିଜୁ ଦର୍‌କାର୍‌, ଆୟାୱିଜୁ ମାନାତ୍‌; ମାରି ସତେନେ ମିର୍‌ ଏସା ଜଗ୍‌ସିଲିକା, ମାରି ସିଲିସାତିକା, ଇକା ନେସ୍‍ଇ । ମିର୍‌ କାକୁର୍ତି, ନାଗ୍‌ଡ଼ା ମାରି କାଣାର୍ !
REV 3:18 ଆଦେଙ୍ଗ୍‌ ନାନ୍‌ ନିଙ୍ଗିଁ ଆଦେସ୍ ସିଜିନା, ଦନିଆଦେଙ୍ଗ୍ ନାମାଣୁକୁ ନେଗି ବାଙ୍ଗାଁରାମ୍‍ କଡ଼ୋଦୁ ମି ସେମାର୍‌ତି ଉଣ୍ତିଙ୍ଗ୍‌ ଡୁମ୍‌ଡାମେନ୍ଦଲଦୁ ପିଡ଼ାଗାଦେଙ୍ଗ୍ ନା ଲାକୁତୁ ଅଡ଼ିନି ୱାତିଗନ୍ଦା କଡ଼ୋଦୁ । ମାରି ସୁଣି ସାକ୍ତି ନେଗେନ୍‌ କିନି ଉଣ୍ତିଙ୍ଗ୍ କାଟିକା କଡ଼ୋଜ କାଣ୍‌ଗାଦୁ ଉସାଆ ।
REV 3:19 ନାନୁ ଏମେୱାରିଙ୍ଗ୍ ଜିବନ୍‌ନୋନା, ୱାରିଙ୍ଗ୍‌ ନିନ୍ଦାକିନା ମାରି ସାସ୍ତି ସିନା । ଆଦେଙ୍ଗ୍‌ ଜିବନ୍‌ତି ୱାଲେ ପାପ୍‌ ସାରିଦାନ୍ ଡ଼େସିୱାଜି ମୋନ୍‌ ବାଦ୍‌ଲେ କିଦୁ ।
REV 3:20 ସୁଡ଼ୁଦୁ ! ନାନୁ ଆତ୍‌ରେ ନିଲ୍‌ତାନୋ ସେର୍‌ଲାଦୁ କତ୍‌ସିନା; ଜଦି ଏନ୍‌ ନା ବଲୁ ୱେନିଜି ସେର୍‍ଲା ରେନାନ୍, ନାନ୍‌ ୱାନି ଇଲୁ ଲୋଇ ସଲ୍‌ସି ୱାନି ୱାଲେ ଉଣା ମାରି ୱାନ୍‌ ନା ୱାଲେ ଉଣାନ୍ ।
REV 3:21 ନାନୁ ଏଣ୍ତେସ୍‌ ଜିଣାଜି ନା ବୁବାଦି ୱାଲେ ୱାନି ସିଂହାସନ୍‍ଦୁ ବାସ୍‌ତାମାନା, ଆୟାୱାଜା ଏମେକାର୍ ଜିଣାନାର୍, ୱାନ୍‌ ୱିଜେରିଙ୍ଗ୍ ନାନୁ ଟିକ୍ ଆୟାୱାଜା ନା ସିଂହାସନ୍‍ଦୁ ନା ଲାକ୍‌ତୁ ବାସିସ୍‍କିଦେଙ୍ଗ୍ ଅଦିକାର୍‍ ସିନା ।
REV 3:22 ୱେନ୍‌ଡ୍ରେଙ୍ଗ୍ ଗିତଣି ମାରିଙ୍ଗ୍‌, ମାପୁରୁଦି ଆତ୍ମା ମଣ୍ତଲିଙ୍ଗାଁ ଇନିକା ଇଜିନାତ୍, ୱେନ୍‌ଡ୍ରୁ ।
REV 4:1 ଇୟା ବେଡ଼ାଦୁ ନାନୁ ମାରି ଉଣ୍ତ୍ରି ସିନା ସୁଡ଼ୁତା । ମୁସ୍‌କୁପୁର୍‌ତୁ ଉଣ୍ତ୍ରି ସେର୍‍ଲା ରେଆଇ ଆତାମାରାତ୍ ମାରି ମରିବାଜା ଆଉଲି ୱାଜା ଉଣ୍ତ୍ରି ୱେୟୁଦି ବଲୁଦାନ୍‌ ନାଙ୍ଗିଁ ଆଦେସ୍ ୱାତାତ୍‌; “ଇବେନୁ ନିଙ୍ଗିଁଜ ରାଆ । ତେନି ୱେନେକା ଏମେ ୱିଜୁ ଗଟାଦେଙ୍ଗ୍ ସୋଲିସ୍‍ନାତ୍, ଆକା ନାନୁ ମିଙ୍ଗିଁ ତୋରନା ।”
REV 4:2 ଦାପ୍ରେ ଦାପ୍ରେ ପବିତ୍ରଆତ୍ମାଦି ମାଣାନ୍ ପୁରାଆଜି ନାନୁ ସୁଡ଼ୁତା, ମୁସ୍‌କୁପୁର୍‌ତୁ ଉନ୍‌ଡ୍ରି ସିଂହାସନ୍‍ଦୁ ଅରେନ୍‌ ଏନ୍‌ ବାସ୍‌ତାମାନାନ୍ ।
REV 4:3 ୱାନି ମୋକମ୍ ହିରା ମାରି ମୋତି ୱାଜା ଚକ୍‍ମକ୍‌ ଆଜିମାରାତ୍ ମାରି ସିଂହାସନ୍‌ଦିଙ୍ଗ୍‌ ପାସ୍‌ରିକାଦି ହିରାକାଲୁ ୱାଜା ଉନ୍‌ଡ୍ରି ଇନ୍ଦ୍ରଦନୁ କେରେପ୍‌ତା ମାରାତ୍ ।
REV 4:4 ମାରି ସିଂହାସନ୍‍ଦି ସାରିବେଡ଼ିତି ଗୁଡ଼ୁବେଲିଆଜିମାନି ଆଇ ଚବିସ୍‍ଗୋଟା ସିଂହାସନ୍‍ଦୁ ଚବିସ ଲୋକୁ ପେରି ମଣ୍ତଲିନେତାର୍ ବାସ୍‌ତାମାରାର୍ । ୱାର୍‌ ଅଡ଼ିନି ଆଙ୍ଗିଁ ଆରାତାମାରାର୍ ମାରି ୱାରି ତାଲେକା ମୁସ୍‌କୁ ବାଙ୍ଗାଁରାମ୍‌ତି ଟପି ।
REV 4:5 ସିଂହାସନ୍‌ଦାନ୍‌ ଲାଇନ୍‌ତି ଜାୟ୍‌, ଆଇଆଇ ବଲୁ ମାରି ବାଦଡ଼ତି ଆଉଲି ୱାଜିମାରାତ୍ । ସିଂହାସନ୍‌ଦି ଆଗିଡ଼ି ମାପୁରୁଦି ସାତଗୋଟା ଆତ୍ମାଏଙ୍ଗାଦି ସାତ୍‌ଗୋଟା ଦିୱେଙ୍ଗ୍ କାସ୍‌ସିମାରେଏ ।
REV 4:6 ମାରି ସିଂହାସନ୍ ଆଗ୍‌ଡ଼ି ଇର୍ସିକା ୱାଜା ଉନ୍‌ଡ୍ରି ନେଗି ସାମୁଦୁର୍ ତର୍‌ଜିମାରାତ୍ । ସିଂହାସନ୍‌ଦିଙ୍ଗ୍‌ ରିଆଙ୍ଗାଁ ତରିନ୍‌ କାପ୍‌କିଜି ତେବାଜିମାରାର୍‌ ନାଲ୍‌ଗି ଜାତୁ; ୱାରି ମେନ୍ଦଲ୍‌ତି ନାଡ଼ିମିସାନ୍ଧି ମାରି ୱେନ୍‌କା କାଣୁକୁ ପୁରାବର୍ତି ମାରାତ୍‌ ।
REV 4:7 ଆଗ୍‌ଡ଼ିରି ଜାତୁ ପାର୍ଟାନରେସ୍‌ ୱାଜା ତର୍‌ଜିମାରାତ୍; ମାରିଉନ୍‌ଡ୍ରି ଷଣ୍ତଡ଼ାନ୍‌ ୱାଜା ତର୍‌ଜିମାରାତ୍ । ମାରିଉନ୍‌ଡ୍ରି ମୋକମ୍ ଲୋକାଦି ମୋକମ୍‌ ୱାଜା ମାରାତ୍ ମାରିଉନ୍‌ଡ୍ରି ଇମିନି ଡେଗା ପଟି ୱାଜା ତର୍‌ଜିମାରାତ୍ ।
REV 4:8 ୱିଜୁ ଜାତୁଦି ସୋଅଗୋଟାଲାକା ରେକେଙ୍ଗ୍‌ ମାରେଏ ମାରି ୱାନିକା ଆତ୍‌ରେ ମାରି ଲୋଇ ବା କାଣୁକୁ ପୁରାବର୍ତି ମାରାତ୍‌ । ୱାକୁ ନାଡ଼ା ୱେଡ଼େ, ରମ୍‌ଏଣ୍‌ଗା ପାଟା ପାରିଜିମାରେଏ : “ପବିତ୍ର, ପବିତ୍ର, ପବିତ୍ର, ସର୍ବସାକ୍ତିମାନ୍ ପ୍ରବୁ ମାପୁରୁ ! ପୁର୍ବେଦାନ୍‌ ଇଲେସାନ୍ଦି ଏନ୍‌ ୱିଜୁଦିନ୍‌ ମାନାନ୍‌ ମାରି ଉନ୍‌ଡ୍ରି ଦେବା ୱାନ୍‌ ୱାନାନ୍‌ ।”
REV 4:9 ଜାତୁଙ୍ଗ୍‌ ସିଂହାସନ୍‍ଦୁ ବାସ୍‌ତିମାନି ଆୟା ୱିଜୁଦିନ୍ ମାନି ଲୋକ୍‌ତିଙ୍ଗ୍‌ ଗୌରବ୍‍, ସମ୍ଭ୍ରମ ମାରି ଧନ୍ୟବାଦ ସିଜି ୱାରି ଆରାଦନା ପାଟା କିଜିମାନି ବେଡ଼ାଦୁ
REV 4:10 ନାସ୍ତିୱାଲେ ୨୪ ଲୋକୁ ପେରି ନେତାର୍ ୱିଜୁଦିନ୍ ମାନି ମାପୁରୁଦି ସିଂହାସନ୍ ଆଗ୍‌ଡ଼ି ମେଣ୍ତେଙ୍ଗ୍‌ ଗଟ୍‌କିଜି ୱାନି ଆରାଧନା କିଦେଙ୍ଗ୍‌ ଆସ୍‌ତାର୍‌ । ମାରି ସିଂହାସନ୍ ଆଡ୍‍ଗି ନିଜେ ନିଜେଦି ମୁକୁଟ୍ ଇଡ୍‌ଜି ଇର୍ହାର୍‌ :
REV 4:11 “ଏ ମା ପ୍ରବୁ ମାପୁରୁ ! ନିନୁ ନେ ଗୌରବ୍‍, ସମ୍ଭ୍ରମ ମାରି ସାକ୍ତି ପୋଇଦେଙ୍ଗ୍‌ ଜଗ୍‌ ମାନି, ଇରିଙ୍ଗ୍‌, ନିନୁ ୱିଜୁ ବିସୟ ତିଆର୍‌ କିତିମାନି, ମାରି ନିଜେଦି ବଦାଦାନ୍ ଆୟା ୱିଜେରିଙ୍ଗ୍‌ ପେଡ଼େନ୍‌ ସିତିମାନି, ଲୋକାଙ୍ଗ୍‌ ଜିବନ୍‌ କିତିମାନି ।”
REV 5:1 ସିଂହାସନ୍‌ଦୁ ବାସ୍‌ତିମାନି ଲୋକ୍‌ତି ଉଣିକିୟୁଦୁ ନାନୁ ଉନ୍‌ଡ୍ରି ପାଡ଼ିଇକା ବଇ ସୁଡ଼ୁତା; ତାନି ରିଆଙ୍ଗାଁ ତରିନ୍‌ ରାସାତାମାରାତ୍ ମାରି ସାତ୍‌ଗୋଟା ସିଲ୍‌ ଆଜି ଆକା ଟାପ୍‍ ଆତାମାରାତ୍ ।
REV 5:2 ମାରି ନାନୁ ସୁଡ଼ୁତା, ଅରେନ୍‌ ନାଣ୍ତସାକ୍ତିମାନି ମୁସ୍‌କୁର୍‌ତି ଦୁତ୍‍ ନାଣ୍ତଆଉଲିଦାନ୍ ୱେର୍‌ସି ଇଜିନାନ୍‌ : “ସିଲ୍‌ଆତିକେଙ୍ଗ୍‌ୱିଜୁ ରୁକୁସି ଇୟା ବଇ କୁତିନି ଉଣ୍ତିଙ୍ଗ୍‌ ଏନ୍‌ ଜଗ୍‌ ଲୋକୁ ମାରିଙ୍ଗ୍‌, ସୋସ ରାଦୁ ।”
REV 5:3 ମାତର୍‌ ଆୟା ବଇ କୁତିସି ଆବେନ୍‌ ଇନିକା ରାସାତାମାନାତ୍, ଆକା ପଡ଼ାଦେଙ୍ଗ୍‌ ମୁସ୍‌କୁପୁର୍‌ତୁ, ଦୁନିଆଦୁ ମାରି ପାତାଲ୍‌ତୁ ଏନ୍‌ ସୋତେଙ୍ଗ୍ ଆଟ୍ଏତାର୍ ।
REV 5:4 ବଇ କୁତ୍‌ସୋ ଆବେନୁ ଇନିକା ରାସାତାମାନାତ୍‌, ପଡ଼ାନି ଉଣ୍ତିଙ୍ଗ୍‌ ଏନ୍‌ ଅରେନ୍‌ବା ଜଗ୍‌ ଲୋକୁ ତର୍‌ଇତିଙ୍ଗ୍‌, ନାନ୍‌ ନିରାସ୍‌ ଆଜି ଆଡ଼୍‌ବାଦେଙ୍ଗ୍ ଆସ୍ତା ।
REV 5:5 ତାନିୱେନେକା ପେରିନେତାରି ମାଣ୍‌କୁ ଅରେନ୍‌ ନାଙ୍ଗିଁ ଆଲ୍‌ଜ ମାନ୍‌ଆ ଇଜି ଇର୍ହାନ୍‌, “ଆଡ଼୍‌ବାମା, ସୁଡ଼ୁଆ ! ଦାଉଦଦି ପେରି କୁଟୁମ୍‌, ଯିହୁଦା କୁଟୁମ୍‍ତି ପାର୍ଟାନରେସ୍‌ ଜିଣାଜି ୱାତାମାନାନ୍‌; ୱାନ୍‌ ଇୟା ସାତଗୋଟା ସିଲ୍‌ଆତିକେଙ୍ଗ୍‌ ରୁକୁସି ବଇ କୁତେଙ୍ଗ୍ ଆଟ୍‍ନାନ୍ ।”
REV 5:6 ତାନିୱେନେକା ସିଂହାସନ୍‌ଦି ନାଡ଼ିମିଜାଗାଦୁ ନାଲିଗି ଜାତୁଙ୍ଗ୍‌ ମାରି ପେରି ନେତାରି ଲାକ୍‌ତୁ ଉନ୍‌ଡ୍ରି ମେଣ୍ତାପିଲାଦିଙ୍ଗ୍‌ ନିରିଇମାନିକା ସୁଡ଼ୁତା । ମେଣ୍ତାପିଲା ସାତିମାନି ୱାଜା ତର୍‌ଜିମାରାତ୍ । ତାନିଙ୍ଗ୍‌ ସାତଗୋଟା କମୁକୁ ମାରି ସାତଗୋଟା କାଣୁକୁ ମାରେଏ । ଆୟା କାଣୁକୁ ସାରା ଦୁନିଆଦୁ ପୋକ୍‍ତିମାନି ମାପୁରୁଦି ସାତଗୋଟା ଆତ୍ମେଙ୍ଗ୍‍ ।
REV 5:7 ମେଣ୍ତାପିଲା ସିଂହାସନ୍‍ଦୁ ବାସ୍ତିମାନି ଲୋକ୍‌ତି ଲାକୁତୁ ସଲସି ୱାନି ଉଣିକିୟୁଦାନ୍ ଆୟା ବଇ ଅତାନ୍‌ ।
REV 5:8 ୱାନ୍‌ ଇୟା ବଇ ଅନି ଦାପ୍ରେ ନାଲିଗି ଜାତୁଙ୍ଗ୍‌ ମାରି କଡ଼େ ନାଲିଗି ଲୋକୁ ପେରି ନେତାର୍‌ ମେଣ୍ତାପିଲାଦି ଆଗ୍‌ଡ଼ି ମେଣ୍ତେଙ୍ଗ୍‌ ଗଟ୍‌କିଜି ମାଡ଼ିସ୍‌ କିତାର୍‌ । ୱିଜେରି କିୟୁଦୁ ଉନ୍‌ଡ୍ରି ଉନ୍‌ଡ୍ରି ଟଇଲା ମାରି ମାପୁରୁଦି ସେବାକିନିୱାରି ପାର୍‌ତନାୱାଜା ଦୁପୁଣିଦାନ୍‌ ପୁରାବର୍ତି ଉନ୍‌ଡ୍ରି ବାଙ୍ଗାଁରାମ୍‍ତି ଡୁବାଇ ମାରାତ୍ ।
REV 5:9 ୱାର୍‌ ଉନ୍‌ଡ୍ରି ପୁନି ପାଟା ପାରିଜିମାର୍ହାର୍‌ : “ବଇ ମାନାଜି ତାନି ସିଲ୍‍ ଆତିକେଙ୍ଗ୍‌ ରୁକୁତେଙ୍ଗ୍‌ ମିର୍‌ ନେ ଜୋଗ୍‍ : ଇରିଙ୍ଗ୍‌ ନିନୁ ସାତିମାର୍‌ଇ ମାରି ନି ସାତିମାଡ଼ାନ୍, ୱିଜୁ କୁଟୁମ୍‌, ବାସାବାଦି, ଦେସ୍ ମାରି ଜାତି ମାଡ଼ାନ୍‍କୁ ମାପୁରୁଦି ଉଣ୍ତିଙ୍ଗ୍ ଲୋକାଙ୍ଗ୍‌ କଟି ମାନି ।
REV 5:10 ମାରି ମାପୁରୁଦି ସେବା କିନି ଉଣ୍ତିଙ୍ଗ୍ ୱାରିଙ୍ଗ୍‌ ଉଡ୍ରି ଜାଜକ କୁଟୁମ୍‌ତୁ ମିସାକିତା ମାନାନ୍‌ ମାରି ୱାର୍‌ ଦୁନିଆ ମୁସୁକୁ ସାସନ୍‌ କିନାର୍ ।”
REV 5:11 ନାନୁ ମାରି ମାରିଜି ସୁଡ଼ୁତା, ହଜାର୍ ହଜାର୍ ମାରି ଲକେ ଲକେ ମୁସ୍‌କୁପୁର୍‌ତି ଦୁତ୍‌କୁ ସିଂହାସନ୍‌ଦିଙ୍ଗ୍‌, ନାଲିଗି ଜାତୁଙ୍ଗ୍‌ ମାରି ପେରି ନେତାରିଙ୍ଗ୍ ଗେରେଆଜି ନିରାମାନାର୍‌ ।
REV 5:12 ୱାର୍‌ ପେରିବଲୁଦାନ୍ ଫାଟାପାର୍‌ଜି ମାର୍‌ଆର୍‌ : “ସାତିମାନି ଆୟା ମେଣ୍ତାପିଲା ଅଦିକାର୍, ପରାକ୍ରମ, ବୁଦ୍ଧି ମାରି ସାକ୍ତି ସମ୍ଭ୍ରମ, ଗୌରବ୍‌ ମାରି ପ୍ରସଂସାଦି ପୋଇନି ଜୋଗ୍‌ !”
REV 5:13 ନାସ୍ତିୱାଲେ ମୁସ୍‌କୁପୁର୍‌, ଦୁନିଆ, ପାତାଲ୍ ମାରି ସାମୁଦୁର୍ ୱିଜୁ ଜାତୁ ମାରି ସାରା ପୃତିବିଦି ୱିଜୁ ଲୋକୁ ଫାଟା ପାରିଜିମାନିକା ନାନୁ ୱେର୍‌ଆ । ୱାରୁ ପାରିଜିମାରାର୍‌ : “ରାଜାଗାଦିଦୁ ବାସ୍ତିମାନି ଲୋକ୍‌ତି ମାରି ୱାନି ମେଣ୍ତାପିଲାଦି ପ୍ରସଂସା କିଦୁ ୱାନି ସମ୍ଭ୍ରମ, ଗୌରବ୍‌ ମାରି ପରାକ୍ରମ ଜୁଗ୍‌ ଜୁଗ୍‌ ଆପିତ୍ !”
REV 5:14 ନାଲିଗି ଜାତୁଙ୍ଗ୍‌ ୱେର୍‌ସିମାରେଏ, “ଆମେନ୍‍” ମାରି ନେତାର୍‌ ମେଣ୍ତେଙ୍ଗ୍ ଗଟ୍‌କିଜି ୱାନିଙ୍ଗ୍‌ ମାଡ଼ିସ୍‌ କିତାର୍ ।
REV 6:1 ତେନି ୱେନ୍‌କା ନାନୁ ସୁଡ଼ୁତା, ମେଣ୍ତାପିଲା ସାତଗୋଟା ସିଲ୍‌ଆତିମାନି ମାଣ୍‌କୁ ଆଗ୍‌ଡ଼ିରିକା ରୁକ୍‍ତାନ୍‌ ମାରି ନାଲିଗି ଜାତୁଙ୍ଗାଁ ମାଣ୍‌କୁ ଅରେନ୍‌ ନାଙ୍ଗିଁ ବାଦଡ଼ ଡିଡ଼୍‌ଜିନି ବଲୁଦାନ୍ ଇର୍ହାନ୍‌, “ରାଆ !”
REV 6:2 ନାନୁ ମାର୍‌ଜି ସୁଡ଼ୁତା, ଉନ୍‌ଡ୍ରି ଅଡ଼ିନି ଗଡ଼ା, ଗଡ଼ାଦୁ ଏକ୍‌ତିମାନି କିୟୁଦୁ ଧନୁ ଆସ୍ତାମାରାନ୍‌ । ୱାନିଙ୍ଗ୍‌ ଉନ୍‌ଡ୍ରି ମୁକୁଟ୍ ସିଆୟ୍‌ଆତାତ୍ ମାରି ୱାନ୍‌ ଜିଣାନି ଉଣ୍ତିଙ୍ଗ୍‌ ସୋତାନ୍‌ ।
REV 6:3 ତାନି ୱେନେକା ମେଣ୍ତାପିଲା ମାରିଉନ୍‌ଡ୍ରି ସିଲ୍‍ ରୁକୁତାନ୍‌ ମାରି ମାରିଉନ୍‌ଡ୍ରି ଜାତୁ ନାଙ୍ଗିଁ ଇର୍ହାତ୍‌, “ରାଆ ।”
REV 6:4 ନାନୁ ସୁଡ଼ୁତା, ନେତେର୍ ରଙ୍ଗ୍‌ତି ମାରି ଉଣ୍ତ୍ରି ଗଡ଼ା । ଦେସ୍‍ତାନ୍‍ ସାନ୍ତି ଆକ କିନି ଉଣ୍ତିଙ୍ଗ୍‌ ୱାନି ସାଲାକିନିୱାନିଙ୍ଗ୍‌ଁ ଅଦିକାର୍ ପୁଟ୍‌ତାତ୍‌, ଲୋକୁ ଏଣ୍ଡେସ୍‌ ଜୁଦ୍ କିଜି ନିଜେ ନିଜେଦିଙ୍ଗ୍‌ ସାପିସ୍‌ କିଆଇଆନାର୍ ୱାନି କିୟୁଦୁ ଉନ୍‌ଡ୍ରି ପେରିକାଣ୍ତା ପୁଟ୍‌ତାତ୍‌ ।
REV 6:5 ତାନିୱେନ୍‌କା ମେଷସାବକ ତିନି ନମ୍ୱର୍‌ତି ସିଲ୍‌ଆତିକା ରୁକୁତାନ୍ ମାରି ମାରି ଅରେନ୍‌ ଲୋକୁ ନାଙ୍ଗିଁ ଇର୍ହାନ୍‌, “ରାଆ ସୁଡ଼ୁଆ ।” କାର୍‌ନି କଲର୍‌ତି ଗଡ଼ା; ଆୟା ଗଡ଼ାସାଲାକିନିୱାନି କିୟୁଦୁ ଉନ୍‌ଡ୍ରି କେଜିଗୁଣ୍ତୁ ମାର୍ହାତ୍‌ ।
REV 6:6 ମାରି ନାଙ୍ଗିଁ ମନେ ଆତାତ୍ ଯେ, ନାଲିଗିୱିଜୁ ଜାତୁଙ୍ଗ୍‌ ଉନ୍‌ଡ୍ରି ବଲୁଦାନ୍ ଇଜିନାର୍‍, “ଅର୍‌ଲେଟି ବୁତି ଡାବୁଙ୍ଗ୍‌ ଉନ୍‌ଡ୍ରେ କେଜି ଗଦ୍‍ମୁ ସିଲେତିଙ୍ଗ୍‌ କାକିଜନା ପୁଟ୍‍ନାତ୍ । ମାତର୍‌ ଜିତ ମାରାନ୍‌ ମାରି ଅଙ୍ଗୁର୍‍ରସ୍‍ ଡଡିଦିଙ୍ଗ୍‌ ନାସ୍ଟୁ କିମାଟ୍ ।”
REV 6:7 ତାନିୱେନ୍‌କା ମେଣ୍ତାପିଲା ନାଲିଗି ନମ୍ୱର୍‌ତି ସିଲ୍‌ଆତିତାନିଙ୍ଗ୍‌ ରୁକୁତାନ୍ ମାରି ନାଲିଗି ନମ୍ୱର୍‌ତି ଲୋକୁ ନାଙ୍ଗିଁ ଇର୍ହାନ୍‌, “ରାଆ !”
REV 6:8 ନାନୁ ସୁଡ଼ୁତା, ଉଣ୍ତ୍ରି ସିନ୍‌ଡ୍ରା ରଙ୍ଗ୍‍ତି ଗଡ଼ା । ତାନିଙ୍ଗ୍‍ ସାଲାକିନି ଦରୁ ସାନିକା; ତାଗ୍‍ଇଦୁବା ତାନି ୱେନେକା ବୁଲାଜି ମାରାତ୍ । ଜୁଦ୍, ବାଙ୍ଗାଁ, ରୋଗ୍‌, ନୋପି, ମାରି ଗୋରତି ଜାତୁ ମୁସୁକୁ ଦାନ୍ ଦେସ୍‍ତି ଉଣ୍ତ୍ରି ନାଲ୍‍ଗି ବାଗ୍‍ତାନ୍‍ ଉଣ୍ତ୍ରି ବାଗ୍‍ ଲୋକାଙ୍ଗ୍‍ ନାଷ୍ଟୁ କିନି ଉଣ୍ତିଙ୍ଗ୍‌ ୱାରିଙ୍ଗ୍‌ ଅଦିକାର୍ ପୁଟ୍‍ତାତ୍ ।
REV 6:9 ତାନି ୱେନେକା, ମେଷସାବକ ପାସ୍‍ଗୋଟା ସିଲ୍‍ ରୁକୁତାନ୍ ମାରି ନାନୁ ସୁଡୁତା, ଉଣ୍ତ୍ରି ବେଦି । ମାପୁରୁଦି ବାକ୍ୟ ୱେରିସି ସାକ୍ୟସିଜି ବିସ୍‌ବାସ୍‌ ତେବାନି ଉଣ୍ତିଙ୍ଗ୍‌ ସାତିମାନି ଲୋକା ଆତ୍ମାୱିଜୁ ଆୟା ବେଦି ଆଡ୍‍ଗି ରକିୟା ଆତେମାରେଏ ।
REV 6:10 ୱାକୁ ପେରିବଲୁଦାନ୍ ଆଉଲିକିଜି ଇଜିମାରେଏ, “ପେରି ପ୍ରବୁ ପବିତ୍ର ମାରି ସତ୍‌ ମାପୁରୁ ! ଦେସ୍‍ତୁ ଏମେକାର୍ ମାଙ୍ଗିଁ ସାପିସ୍‌ କିତାମାନାର୍‌, ୱାରିଙ୍ଗ୍‌ ବିଚାର୍‌ କିଜି ସାସ୍ତିସିଦେଙ୍ଗ୍ ମାରି ଏସ ଦିନ୍‌ ୱେଡ଼ାକିନି ?”
REV 6:11 ୱାରି ମାଡ଼ାନ୍‍କୁ ୱିଜେରିଙ୍ଗ୍ ଉନ୍‌ଡ୍ରି ଲାକା ଅଡ଼ିନିଆଙ୍ଗିଁ ସିଆୟ୍‍ ଆତାତ୍‍ । ମାରି ୱାରି ସଙ୍ଗ୍‌ତି ତଡ଼ାନ୍‌କାଙ୍ଗ୍‌ ମାରି ସେବାକିନିୱାରିଙ୍ଗ୍ ଟିକ୍ ଇସାପ୍‍ତାନ୍ ସାଇ ସାନ୍ଦି ୱାରିଙ୍ଗ୍‌ ମାରି ଏସ ବେଡ଼ା କାପ୍‍କିନି ଉଣ୍ତିଙ୍ଗ୍ ଇର୍ହାର୍‌ ।
REV 6:12 ତାନିୱେନ୍‍କା ନାନୁ ସୁଡୁତା, ମେଷସାବକ ସୋ ସିଲ୍‍ ରୁକୁତାନ୍; ଅଟାତ୍ ପେରି ଭୁମିକମ୍ପ ଆତାତ୍ । ୱେଡ଼ା କାର୍‍ନି ରଙ୍ଗ୍‍ତି ଡୁଷା ୱାଜା ସିକାଟି ଆତାତ୍ ମାରି ଲେଜୁ ୱିଜୁ ନେତେର୍‌ ରଙ୍ଗ୍‍ ଆତାସରାତ୍ ।
REV 6:13 ନାଣ୍ତ ଗାଲିଦି ଦୋକାଦିଙ୍ଗ୍ ତଗା ମାରାନ୍‌ତି ପାସି ପଲ୍‌ ୱିଜୁ ଆର୍‍ନି ୱାଜା, ସୁକେଙ୍ଗ୍ ବାଦଡ଼ତାନ୍ ଦୁନିଆଦି ମୁସୁକୁ ଆର୍‍ତେ ।
REV 6:14 ଉଣ୍ତ୍ରି କାଗଜ ପର୍ଦା ଗୁଡ଼େଆନି ୱାଜା ବାଦଡ଼ ତିର୍‍ବିଜି ଅଲଗାସରାତ୍ । ଗୋରକ୍ ମାରି ସାମ୍‍ଦୁର୍‍ ଲୋଇ ମାନି ଇସ୍ରି ବାଡିଙ୍ଗ୍‍ ଗୁସାତେ ସରେ ।
REV 6:15 ଆୟା ବେଡ଼ାଦୁ ଦୁନିଆଦି ୱିଜେରେ, ରାଜା, ସାସକ, ବା ସେନାରି ପେରିକାନ୍‍, ମାଜନ୍‍ ମାରି ସାକ୍ତି, କଟିସାକର୍‌ ବା ସାଦାସିଦା ଲୋକୁ ୱିଜେରେ ସାରେଆଙ୍ଗ୍ ମାରି ଗୋରନ୍‌କା କାଲୁକୁ ଆଡ୍‍ଗି ସଲସି ମାର୍‌ଗିତାର୍‌ ।
REV 6:16 ୱାର୍‌ ଗୋରକାଙ୍ଗ୍‌ ମାରି କାଲୁ ମକେକାଙ୍ଗ୍ କୁକିସି ଇଜିମାରାର୍, “ମା ମୁସୁକୁ ଆର୍‍ଦୁ ସିଂହାସନ୍‍ତୁ ବାସ୍‍ତିମାନି ଆୟା ୱାନିମାଣାନ୍‍ତି କାଣ୍‍ଗାଦାନ୍‍ ମାରି ମେଷସାବକତି ରିସାଦାନ୍ ମାଙ୍ଗିଁ ଆଡ଼କ୍‍ସ ଇଡିଆ ।
REV 6:17 ୱାରି ରିସାଦି ବୟଙ୍କର୍‍ ଦିନ୍‍ ଇଗା ୱାତାତ୍ । ଏନ୍‍ ଆକା ଆଙ୍ଗ୍‌ଦେଙ୍ଗ୍‌ ଆଟ୍‍ନାନ୍ ?”
REV 7:1 ତେନି ୱେନ୍‌କା ନାନୁ ସୁଡ଼ୁତା, ଦୁନିଆଦି ନାଲିଗି କନେଆଙ୍ଗାଁ ନାଲିଗି ମୁସ୍‌କୁପୁର୍‌ତି ଦୁତ୍‌କୁ ନିରେଏମାନେ ମାରି ଦୁନିଆଦି ନାଲିଗି ତରିଟାନ୍‍ ଗାଲି ସନିତାନିଙ୍ଗ୍‍ ଆଙ୍ଗିଁତେମାନେ । ଆଦେଙ୍ଗ୍‌ ଦୁନିଆ, ସାମୁଦୁରୁ ମାରି ଇନି ମାରାକ୍ ମୁସୁକୁ କାଣ୍ତେକ୍ ବା ଗାଲି ରେଏଜିମାରାତ୍ ।
REV 7:2 ମାରି ନାନୁ ସୁଡୁତା, ମାରି ଅରେନ୍‌ ମୁସ୍‌କୁପୁର୍‌ତି ଦୁତ୍‌ ୱିଜୁଦିନ୍ ମାନି ମାପୁରୁଦି ସିଲ୍‍ ଅସି ମକମ୍‍ତରିଟାନ୍‍ ୱାଜିନାନ୍ । ଇୟା ଦୁତ୍ ଦୁନିଆ ମାରି ସାମୁଦୁର୍‍ତିଙ୍ଗ୍‌ ନାସ୍ଟୁ କିନି ଉଣ୍ତିଙ୍ଗ୍ ମାପୁରୁ ଏମେ ନାଲ୍‍ଗି ଦୁତ୍‍କାଙ୍ଗ୍ ଅଦିକାର୍ ସିତାମାର୍ହାନ୍‌ ।
REV 7:3 ୱାନିକାଙ୍ଗ୍ ନାଣ୍ତ ଆଉଲିଦାନ୍ ଦୁତ୍‍ ଇର୍ହାନ୍‌, “ମାପୁ ଏମେ ସାନ୍ଦି ମାପୁରୁଦି ସେବାକିନିୱାରି କାପାଲ୍‍ତୁ ସିଲ୍‍ ଡ଼େଏପ୍‍ମାନାପ୍, ଆୟା ସାନ୍ଦି ଦୁନିଆ, ସାମୁଦୁର୍ ବା ମାରାକାଙ୍ଗ୍‌ ଇନି ନାସ୍ଟୁ କିମାଟ୍ ।”
REV 7:4 ଏମେୱାରି କାପାଲ୍‍ତୁ ମାପୁରୁଦି ସିଲ୍‍ ଡ଼େଇତାର୍, ୱାରି ଇସାପ୍ ୧୪୪,୦୦୦ ଇଜି ନାନୁ ୱେର୍‍ଆ । ୱାରି ଇସାପ୍‍ତାନ୍ ୱାର୍ ଇସ୍ରାଏଲ୍‌ତି ବାର କୁଟୁମ୍‌ତି ଲୋକୁ ।
REV 7:5 ଯିହୁଦା କୁଟୁମ୍‍ତାନ୍ ୧୨,୦୦୦ ହଜାର୍, ରୁବେନ୍ କୁଟୁମ୍‍ତାନ୍‍ ବାରହଜାର୍, ଗାଦ୍‌ କୁଟୁମ୍‍ତାନ୍‍ ବାରହଜାର୍,
REV 7:6 ଆସେର୍ କୁଟୁମ୍‍ତାନ୍ ବାରହଜାର୍, ନପ୍‍ତାଲି କୁଟୁମ୍‍ତାନ୍ ବାରହଜାର୍, ମନସି କୁଟୁମ୍‍ତାନ୍ ବାରହଜାର୍,
REV 7:7 ସିମିୟନ୍ କୁଟୁମ୍‍ତାନ୍ ବାରହଜାର୍, ଲେବି କୁଟୁମ୍‍ତାନ୍ ବାରହଜାର୍, ଇସ୍‍ହାକ୍‍ତି କୁଟୁମ୍‍ତାନ୍ ବାରହଜାର୍,
REV 7:8 ସବୁଲୁନ କୁଟୁମ୍‍ତାନ୍ ବାରହଜାର୍‍, ଜୋସେପ୍‌ କୁଟୁମ୍‍ତାନ୍ ବାରହଜାର୍, ବିନ୍ୟାମିନ୍ କୁଟୁମ୍‍ତାନ୍ ବାରହଜାର୍ ।
REV 7:9 ତେନିୱେନ୍‌କା ନାନୁ ସୁଡୁତା, ଉଣ୍ତ୍ରି ପେରିଦଲ୍; ୱାରି ଇସାବ୍‌ ଲେକିସ୍‍କିଦେଙ୍ଗ୍‌ ଆଏତ୍‍ । ୱାର୍‍ ୱିଜୁ ଜାତି, କୁଟୁମ୍‌, ଦେସ୍ ମାରି ଭାସାଦି ମାଡ଼ାନ୍ ୱାତାମାର୍ହାର୍‌ । ୱାର୍‍ ଅଡ଼ିନିଆଙ୍ଗିଁ ଆରାଜି ମାରି କିୟୁଦୁ କାଜିରି କମେଙ୍ଗ୍ ଆସ୍‌ସି, ସିଂହାସନ୍ ମାରି ମେଷସାବକଦି ଆଗିଡ଼ି ନିର୍ହାମାର୍ହାର୍‍ ।
REV 7:10 ୱାର୍‍ ପେରିବଲୁଦାନ୍ ଇଜିମାର୍ହାର୍‍, “କେବଲ୍‌ ସିଂହାସନ୍ ମୁସୁକୁ ବାସ୍‍ତିମାନି ମାପୁରୁ ମାରି ମେଷସାବକ ମା ରକିୟାକିନିକାନ୍‍ ।”
REV 7:11 ସିଂହାସନ୍‍ତିଙ୍ଗ୍‌, ପେରିନେତାରିଙ୍ଗ୍ ମାରି ନାଲ୍‌ଏରିଙ୍ଗ୍ ଗେରେଆଜି ମୁସ୍‌କୁପୁର୍‌ତି ଦୁତ୍‍କୁ ନିରେଏମାର୍ହେ । ୱାକ୍ ସିଂହାସନ୍ ଆଗ୍‍ଡ଼ି ବୁମିଦୁ ମାଡ଼ିସ୍‌ କିତେ ମାରି ମାପୁରୁଦି ଆରାଦନା କିଜି,
REV 7:12 ଇରେଏ “ଆମେନ୍‍ ! ପ୍ରସଂସା, ଗୌରବ୍‌, ବୁଦି, ଦନ୍ୟବାଦ୍‌, ସମ୍ଭ୍ରମି, ଅଦିକାର୍ ମାରି ସାକ୍ତି ଜୁଗ୍‌ ଜୁଗ୍‌ ମାପୁରୁଦି ଆପିତ୍, ଆମେନ୍‍ !”
REV 7:13 ପେରିନେତାରି ମାଡ଼ାନ୍‍କୁ ଅରେନ୍‌ ନାଙ୍ଗିଁ ୱେନ୍‍ବାତାନ୍‌, “ଅଡ଼ିନିଆଙ୍ଗିଁ ଆରାତି ଆୟା ଲୋକୁ ଏର୍‍ ? ୱାର୍‌ ଏମେଟ୍‍କୁ ୱାତାମାନାର୍ ?”
REV 7:14 ନାନୁ ଇର୍‌ଆ, “ଆଜ୍ଞା ! ନାନୁ ନେସେଏ । ନିନୁ ନେସ୍‍ନିମାନି ।” ୱାନ୍‌ ନାଙ୍ଗିଁ ଇର୍ହାନ୍‌, “ଇୟା ଲୋକୁ ବେସି ତାଡ଼ନା ପୋଇଜି ୱାତାମାନାର୍ । ୱାର୍‌ ମେଷସାବକଦି ନେତେର୍‍ତାନ୍ ନିଜେ ନିଜେଦି ଆଙ୍ଗିଁଙ୍ଗ୍‍ ନର୍‌ବାଜି ସପା କିତାମାନାର୍‌ ।
REV 7:15 ଆୟା ଉଣ୍ତିଙ୍ଗ୍‌ ୱାର୍‌ ମାପୁରୁଦି ମନ୍ଦିର୍‍ତୁ ୱାନି ସିଂହାସନ୍ ଆଗ୍‍ଡ଼ି ନିଲିଜି ୱେଡ଼େ ନାଡ଼ା ୱାନି ଆରାଦନା କିଜିନାର୍ । ସିଂହାସନ୍‍ତୁ ବାସ୍‍ତିମାନିକାନ୍‍ ୱାରିଙ୍ଗ୍‌ ରମ୍‌ନିବାଡି ସିନାନ୍ ।
REV 7:16 ୱାର୍‌ ମାରି ଏସାଙ୍ଗ୍‍ବା ବାଙ୍ଗାଁ କି ଏରିକି ସାଏର୍‌ନି; ୱେଡ଼ା ତାତି ମାରି ଆଇ ଇନି ତାତି ୱାରିଙ୍ଗ୍‌ ଆଡ଼୍‍କ୍‍ତେଙ୍ଗ୍‍ କିଦେଙ୍ଗ୍ ଆଟ୍‍ଏତ୍‍ ।
REV 7:17 ଇରିଙ୍ଗ୍‌, ସିଂହାସନ୍ ବାସ୍‌ତିମାନି ମେଷସାବକ ୱାରି ମେଣ୍ତାଗାଉଡ଼ୁ ଆନାନ୍ । ୱାନ୍‌ ଜିବନ୍‌ ସିନି ଏର୍‍ତି ସନି ଲାକୁତୁ ୱାରିଙ୍ଗ୍‌ ସାରିଦୁ କୁକୁନାଅନାନ୍ ମାରି ମାପୁରୁ ୱାରି କାଣାଗ୍‍ଦି ୱିଜୁ କାଣେର୍‍ଙ୍ଗୁଁ ତେଲ୍‍ନାସିନାନ୍ ।”
REV 8:1 ମେଷସାବକ ସାତ୍‌ଗୋଟା ସିଲ୍‌ଆତିକେଙ୍ଗ୍‌ ରୁକିତି ଦାପ୍ରେ ମୁସ୍‌କୁପୁର୍‍ତୁ ଉଣ୍ତ୍ରି ଅଦଗଣ୍ଟା ସାନ୍ଦି ସିମ୍ରା ଆତାସରାର୍ ।
REV 8:2 ତାନିୱେନ୍‍କା ମାପୁରୁଦି ଆଗିଡ଼ି ନିନିମାନି ସାତ୍‌ଗୋଟା ଦୁତ୍‍କାଙ୍ଗ୍ ନାନୁ ସୁଡ଼ୁତା; ୱାନିକାଙ୍ଗ୍‌ ସାତ୍‌ଗୋଟା ମରିଙ୍ଗ୍‌ ସିଆୟ୍‍ଆତେ ।
REV 8:3 ମାରି ଅରେନ୍‌ ଦୁତ୍‍ ଉଣ୍ତ୍ରି ବାଙ୍ଗାଁରାମ୍‍ତି ଦୁପିଣିଆଡ଼୍‌ନିକା ଅସି ବେଦି ଆଗିଡ଼ି ୱାଜି ନିରାତ୍ । ସିଂହାସନ୍ ଆଗିଡ଼ି ମାନି ବାଙ୍ଗାଁରାମ୍ ବେଦି ମୁସୁକୁ, ମାପୁରୁଦି ଲୋକା ପାର୍‍ତନାଦି ଦୁପୁଣିଦି ୱାଲେ ମିସାକିଜି ସିନି ଉଣ୍ତିଙ୍ଗ୍‌, ୱାନିଙ୍ଗ୍‌ ନାଣ୍ତ ଇସାପ୍‍ତାନ୍ ଦୁପୁଣି ସିଆୟ୍‍ଆତାତ୍‍ ।
REV 8:4 ଆୟା ଦୁତ୍‍ଦି କିୟୁଦୁ କାସ୍‍ସିମାନି ଦୁପୁଣିଦି ଗୋଇଦି ୱାଲେ ମାପୁରୁଦି ଲୋକା ପାର୍‍ତନାଦୁ ମିସାଜି ମୁସୁକୁ ନିଙ୍ଗିଁତାତ୍‍ ।
REV 8:5 ତାନିୱେନ୍‍କା ଦୁତ୍‍, କାସ୍‍ନିଦୁପିଣିଦାନ୍‍ ବେଦିଦୁ ସିସୁ ବର୍ତି କିଜି ଆକା ଦୁନିଆ ମୁସୁକୁ ପୋକ୍‍ତା ସିତାତ୍ । ତେନି ଉଣ୍ତିଙ୍ଗ୍‍ ଡିଡ଼ିତାତ୍‌, ବାଦଡ଼ ମିରିସ୍‌ତାତ୍‌ ମାରି ଭୁମିକମ୍ପ ଆତାତ୍ ।
REV 8:6 ତାନିୱେନ୍‍କା ସାତଗୋଟା ମୋରି ଆସ୍‍ତିମାନି ସାତଗୋଟା ଦୁତ୍‍କୁ ମରି ଉକୁତେ ତିଆର୍ ଆତେ ।
REV 8:7 ପାର୍‍ତୁମ୍‍ ଦୁତ୍ ମୋରି ଉକୁତି ଦାପ୍ରେ ଆଣ୍ତ୍‍ରାଗା କାଲୁକୁ, ସିସୁ ମାରି ନେତେର୍‌ ଦେସ୍‍ ମୁସୁକୁ ଆର୍‍ତେ । ତେନି ୱେନେକା ୱିଜୁ ମାରାକ୍, ପାସି ଲାଟାଦି ୱାଲେ ଦୁନିଆଦି ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ୱେତାତ୍ ।
REV 8:8 ତାନିୱେନ୍‍କା ମାରିଉଣ୍ତ୍ରି ଦୁତ୍‍ ତାନି ମୋରି ଉକୁନି ଦାପ୍ରେ ଗୋରନ୍‌ ୱାଜା ତର୍‍ନି ଉଣ୍ତ୍ରି ପେରି ସିସୁ ସାମୁଦୁର୍‍ତୁ ପୋକାୟାଆତାତ୍ ମାରି ସାମୁଦୁର୍ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ନେତେର୍‍ ଆତା ସର୍ହାତ୍‍,
REV 8:9 ସାମୁଦୁର୍‍ତି ଜିଜିମାନି ଜାତୁଙ୍ଗାଁ ମାଡ଼ାନ୍‍କୁ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ସାତେସର୍‍ଏ ମାରି ସାମୁଦୁର୍‍ତୁ ମାନି ଜାହାଜ୍‍କା ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ଦଂସ ଆତାସର୍‍ଆତ୍‍ ।
REV 8:10 ତାନିୱେନ୍‌କା ମୁନ୍‌ଡ୍ରି ଦୁତ୍‍ ତାନି ମୋରି ଉକୁତାତ୍‍ । ଦାପେ ଦାପେ ବାଦଡ଼ତାନ୍ ଦିୱା ନାନି ଉଣ୍ତ୍ରି ନାଣ୍ତ କାସ୍‍ନି ସୁକା ୱିଜୁ ଗାଡେଙ୍ଗାଁ ମାରି ଜଲେଙ୍ଗାଁ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ମୁସୁକୁ ୱାଙ୍ଗ୍‍ଜି ଆର୍‍ତାତ୍ ।
REV 8:11 ଆୟା ସୁକାଦି ଦରୁ “କେୟ୍‍ନିକା ।” ଆବେଟ୍‌କୁ ଉଣି ଏରୁଦି ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ କେୟ୍‌ତା ସର୍ହାତ୍‍ ମାରି ଆୟା ଏରୁ ଉଣିଜି ନାଣ୍ତ ଲୋକୁ ସାତାସରାର୍ ।
REV 8:12 ତାନିୱେନ୍‌କା ନାଲିଗି ନମ୍ୱର୍‌ତି ଦୁତ୍‍ ତାନି ମୋରି ଉକୁନି ଦାପେ ଦାପେ, ୱେଡ଼ାଦି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌, ଲେଜୁଦି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ମାରି ସୁକେଙ୍ଗାଁ ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ନାସ୍ଟୁ ଆତାତ୍ । ଆଦେଙ୍ଗ୍‌ ଜାୟ୍‌ତି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ସିକାଟି ଆତାତ୍ । ୱେଡ଼େରି ମୁଣ୍ତ୍ରିବାଗ୍‌ତାନ୍‌ ଉଣ୍ତ୍ରିବାଗ୍‌ ଜାୟ୍‌ଆଏତାତ୍‌ ମାରି ନାଡ଼ା ବା ଆୟାୱାଜା ଆତାତ୍ ।
REV 8:13 ତାନିୱେନ୍‌କା ନାନୁ ମାର୍‌ଜି ବେସ୍‌ତା, ବାଦଡ଼ତି ବେସି ମୁସୁକୁରାନ୍ ଉଣ୍ତ୍ରି ଡେଗାପଟି ଇମିଜି ଇମିଜି ପେରିବଲୁଦାନ୍ ଇଜିନାତ୍, “ହାୟ ! ଏସା ବୟଙ୍କାର୍‌ ! ଆଇ ମୁଣ୍ତ୍ରି ଦୁତ୍‍କୁ ମରି ଉକୁନି ବେଡ଼ାଦୁ ଦୁନିଆଦି ଲୋକା ଅବସ୍ତା ଏସା କାସ୍ଟୁ ଆଏତ୍‍ ମାନାତ୍ ।”
REV 9:1 ତାନିୱେନ୍‌କା ପାଚ୍‌ ନମ୍ୱର୍‌ତି ଦୁତ୍‍ ମୋରି ଉକୁତାତ୍ ମାରି ନାନୁ ସୁଡ଼ୁତା, ଦାପେ ଦାପେ ବାଦଡ଼ତାନ୍ ଉଣ୍ତ୍ରି ସୁକା ଆରିଜି ଦେସ୍‍ ମୁସୁକୁ ଆର୍‌ତାତ୍‌ । ତାନିଙ୍ଗ୍‌ ପାତାଲ୍‍ପୁର୍‌ତି କୁସିକାଣ୍ତି ସିଆୟ୍‌ଆତାମାରାତ୍‌ ।
REV 9:2 ୱାଦ୍‌ ୱାଜି ପାତାଲ୍‍ତି ସେର୍‍ଲା ରେତିଦାପ୍ରେ ଉନ୍‌ଡ୍ରି ପେରି ବାଟିଦାନ୍‌ ସୋସିମାନି ଗୋଇ ୱାଜା ପାତାଲ୍‍ତି କୁଣ୍ତୁତାନ୍‌ ସିକାଟି ଗୋଇ ସତାତ୍ ମାରି ଆୟା ଗୋଇ ଉଣ୍ତିଙ୍ଗ୍ ୱେଡ଼ା ନି ବାଦଡ଼ ସିକାଟି ଆତାତ୍‌ ।
REV 9:3 ମାରି ଆୟା ଗୋଇଦାନ୍ ମାଡ଼ିମାଉକୁ ସୋସି ଦୁନିଆଦୁ ୱିଜୁ ତରିନ୍‌ ଆତେ । ୱାକ୍ ସର୍‍କୁପି ସାକ୍ତି ୱାଜା ସାକ୍ତି ସିଆୟ୍‌ଆତାତ୍‌ ।
REV 9:4 ଦୁନିଆଦି ଲାଟା, ମାରାକ୍ ବା ଆମାଇନି ଜିନିମାରାନ୍‌ତିଙ୍ଗ୍‌ ନାଷ୍ଟୁ କିଏଣ୍‌ଗା ଏମେୱାରି କାପାଲ୍‌ତୁ ମାପୁରୁଦି ଟାପ୍‌ତି ସିନା ସିଲେତାତ୍, କେବଲ୍‌ ଆୟାୱାରିଙ୍ଗ୍‌ କାସ୍ଟୁ ସିନି ଉଣ୍ତିଙ୍ଗ୍ ଆୟା ମାଡ଼ିମାଉକୁ ୱାତେ ମାରେଏ ।
REV 9:5 ମାରି ୱାରିଙ୍ଗ୍‌ ସାପିସ୍‍କିଏଣ୍‌ଗା ପାସ୍‌ଗୋଟା ଲେଜୁକୁ ସାନ୍ଦି କେବଲ୍‌ କାସ୍ଟୁ ସିଦେଙ୍ଗ୍‌ ମାଡ଼ିମାଉକୁ ଅଦିକାର୍ ପୋଇତେମାରେଏ । ସର୍‍କୁପି ଲୋକ୍‌ତିଙ୍ଗ୍‌ କାଟ୍‌ତିଙ୍ଗ୍‌ ଏଣ୍ତେସ୍‌ ୱିସାମ୍‌ ଆନାତ୍‌, ଇୟା ୱିସାମ୍ ଆୟାୱାଜା ଆନାତ୍‌ ।
REV 9:6 ଆୟା ବେଡ଼ାଦି ଲୋଇ କାସ୍ଟୁପୋଇନି ଲୋକୁ ସାନିତାନିଙ୍ଗ୍ ପୋ‌ୟ୍‌ନାର୍‌, ମାତର୍‌ ପୋଇଦେଙ୍ଗ୍‌ ଆଟ୍‌ଏତାର୍‌ । ୱାର୍‌ ସାଦେଙ୍ଗ୍‌ ବଦା କିନାର୍‌, ମାତର୍‌ ସାନିକା ୱାରି ଲାକ୍‌ତୁରାନ୍ ଉର୍‍କୁତାତ୍‌ ।
REV 9:7 ମାଡ଼ିମାଉକୁୱିଜୁ ଜୁଦ୍‍କିନି ଉଣ୍ତିଙ୍ଗ୍ ତିଆର୍‌ଆତିମାନି ଗଡ଼ା ୱାଜା ତୋର୍‌ଜିମାରେ । ୱାନିକା ତାଲେକାଙ୍ଗ୍‌ ବାଙ୍ଗାଁରାମ୍‍ତି ମୁକୁଟ୍ ୱାଜା ତର୍‌ଜିମାରାତ୍ । ୱାନିକା ମୋକମ୍‌ ଲୋକା ମୋକମ୍‌ ୱାଜା,
REV 9:8 ଆଇମେକା କୁକୁଟି ୱାଜା ୱାନିକା କୁକୁଟି ମାରାତ୍‌, ୱାନିକା ପାଲୁକୁ ପାର୍ଟାନରେସ୍‌ ପାଲୁକୁ ୱାଜା ମାରେଏ ।
REV 9:9 ତାମେ ବକାଦୁ ଲୁହା ସାଜୁ ନାନି ଇନି ଜିନିସ୍‍ ପିଡ଼ିଗିତା ମାର୍ହାତ୍‍ ମାରି ରତ ନି ଜୁଦ୍‍ବାଡିଦୁ ଉର୍‍କିସିମାନି ନାଣ୍ତ ଗଡ଼େଙ୍ଗାଁ ଆଉଲି ୱାଜା ତାମେକା ଡ଼େଣେଙ୍ଗାଁ ଆଉଲି ସୋସିମାରାତ୍ ।
REV 9:10 ସର୍‍କୁପିଙ୍ଗାଁ ୱାଜା ତାମେକା ତକେଙ୍ଗ୍ ମାରି ୱିସାମ୍‍ମାର୍ହାତ୍ । ଆୟା ତକାଦାନ୍‍ ପାସ୍‍ଗୋଟା ଲେଜୁକୁ ସାନ୍ଦି ଲୋକାଙ୍ଗ୍ କାସ୍ଟୁ ସିନି ଉଣ୍ତିଙ୍ଗ୍‌ ୱାକ୍ ସାକ୍ତି ପୋଇତେମାର୍‍ଏ ।
REV 9:11 ତାମେକା ମୁସୁକୁ ଅରେନ୍‌ ରାଜା ସାସନ୍ କିଜିନାନ୍ । ୱାନ୍‌ ପାତାଲ୍‍ତୁ ଦାୟିତଦୁ ମାନି ଅରେନ୍‌ ଦୁତ୍‍ । ଏବ୍ରି ବାସାଦାନ୍ ତାନି ଦରୁ ଆବାଦନ୍; ଗ୍ରିକ୍‌ ବାସାଦାନ୍ ଆୟା ଦରୁ ଆଜିନାତ୍, ଆପୋଲ୍ଲୀୟନ୍ । ଆମାତାନି ଦରୁ ଦଂସକିନିକାତ୍‍ ।
REV 9:12 ସୁଡ଼ୁଦୁ, ପାର୍‍ତୁମ୍‍ କାସ୍ଟୁଦୁକ୍ ୱିଜିତା ସୋରାତ୍ । ତେନିୱେନ୍‌କା ମାରି ରୁଣ୍ତି ବୟ୍‌ଙ୍କାର୍‌ତି କାସ୍ଟୁ ୱାଜିନାତ୍ ।
REV 9:13 ତେନିୱେନ୍‌କା ସୋଅ ନମ୍ୱର୍‌ତି ଦୁତ୍‍ ତାନି ମୋରି ଉକୁନି ଦାପେ ମାପୁରୁଦି ଆଗିଡ଼ି ମାନି ବାଙ୍ଗାଁରାମ୍ ବେଦିଦି ନାଲିଗି କନାଦାନ୍ ନାନୁ ଉଣ୍ତ୍ରି ବଲ୍‍ ୱେର୍‌ଆ ।
REV 9:14 ଆୟା ମରି ଆସ୍‌ତିମାନି ସୋଅ ନମ୍ୱର୍‌ତି ଦୁତ୍‍ତିଙ୍ଗ୍‌ ଆଦେସ୍‌ ସିତାତ୍‌, “ୟୁପ୍ରେଟିସ ପେରିଗାଡା ଲାକୁତୁ ବନ୍ଦି ଆତିମାନି ନାଲ୍‍ଗି ଦୁତକାଙ୍ଗ୍‌ ଡ଼ିସ୍‍ତୁ ।”
REV 9:15 ଆର୍‌ତିଙ୍ଗ୍‌ ଇୟା ବାର୍ସେକ୍‌, ଲେଜୁ, ଦିନ୍‌ ମାରି ବେଡ଼ାଦୁ, ୱିଜୁ ଲୋକା ଜାତିଦି ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ଲୋକାଙ୍ଗ୍‌ ସାପିସ୍‍କିନି ଉଣ୍ତିଙ୍ଗ୍‌ ତିଆର୍‍ ଆଜିମାନି ଆୟା ନାଲିଗି ଦୁତ୍‍କାଙ୍ଗ୍‌ ଡ଼ିସ୍‍ତା ସିତାର୍ ।
REV 9:16 ମାରି ନାନୁ ସୁଡୁତା, ଉଣ୍ତ୍ରି ଦଲ୍‍ତି ଗଡ଼େଙ୍ଗାଁସାଲାକିନି ସୌନ୍ୟଦଲ୍ । ୱାରି ଇସାବ୍‌ ୨,୦୦୦୦୦ ଲକ୍ୟ ଇଜି ନାଙ୍ଗିଁ ୱେର୍‌ତାସିତାର୍ ।
REV 9:17 ମାରି ନାନୁ ଦର୍ସନତୁ ଗଡ଼ା ନି ତାମେ ସାଲାକିନିୱାରିଙ୍ଗ୍‍ଁ ଇୟାୱାଜା ସୁଡୁତା, ୱାରି ବକାସାଜୁ ସିସୁ ୱାଜା ନେତେର୍ ରଙ୍ଗ୍‍, ନିଳକାନ୍ତ ମଣି, ୱାଜା ନିଡ଼ି ମାରି ଗନ୍ଧକ ୱାଜା ଗେର୍‍କା ରଙ୍ଗ୍‍ ମାରାତ୍ । ଗଡ଼େଙ୍ଗ୍‍ଁ ନରେସ୍‍ ୱାଜା ତାଲାମାରାତ୍ ମାରି ତାମେ ୱେୟୁଦାନ୍‍ ସିସୁ, ଗୟି ନି ଗନ୍ଧକ ସତାତ୍‍ ।
REV 9:18 ୱାରି ୱେୟୁଦାନ୍ ସନି ସିସୁ, ଗୋଇ ମାରି ଗନ୍ଧକ ୱାଜା ଇୟା ମୁଣ୍ତ୍ରି କାସ୍ଟୁଦାନ୍‍ ମୁଣ୍ତ୍ରି ବାଗ୍‍ତାନ୍‍ ଉଣ୍ତ୍ରି ବାଗ୍‍ ଲୋକାଙ୍ଗ୍‍ଁ ସାପିସ୍‍କିତାର୍‍ ।
REV 9:19 ଗଡ଼େଙ୍ଗାଁ ସାକ୍ତି ତାମେ ୱେୟୁଦୁ ନି ତକାଦୁ ମାର୍ହାତ୍‍ । ତାମେକା, ତକେଙ୍ଗ୍, ତାଲେକ୍ ମାନି ସାରାସ୍ ୱାଜା ମାରି ଆବେଟ୍‌କୁ ୱାକ୍ ଲୋକାଙ୍ଗ୍‌ ଡାକ୍‌ସିମାରେଏ ।
REV 9:20 ମର୍‍ଡିଦାନ୍ ସାଏଣ୍ତା ତେବାତି ଲୋକୁ ଜାତିଦି, ଇନିକା ବା ବାଦେଲେ ଆଏତାତ୍‍ । ୱାର୍‌ ଦୁବେଆଙ୍ଗ୍‍ଁ ପୁଜାକିଦେଙ୍ଗ୍‍ ଡ଼ିସ୍‍ଏତାର୍ । ମାରି ସୁଡ଼ୁଦେଙ୍ଗ୍‌, ୱେନ୍‍ଡ୍ରେଙ୍ଗ୍‍ଁ ମାରି ବୁଲାଦେଙ୍ଗ୍‍ ଆଟ୍‍ଇକା ବାଙ୍ଗାଁରାମ୍, ୱେଣ୍ତି, ପିତଲ୍‌, କାଲୁ ନି ୱେର୍‍ଗୁଦାନ୍‍ ତିଆର୍ ଆତିମାନି ଦିୟାମ୍‍କାଙ୍ଗ୍‍ଁ ପୁଜା କିନିକା ଡ଼ିସ୍‍ଏତାର୍ ।
REV 9:21 ୱାର୍‌ ମୋନ ଡ଼େପ୍‍ଏଣ୍ତା ଲୋକ୍‌ସାପିସ୍‍ନିକା, ଗୁଣିଆ ବିଦ୍ୟା, ଦାରିପାଣିକିନିକା ମାରି ଡଙ୍ଗାଁକିନି ବୁଦିଦୁ ମୁଜିତାମାରାର୍ ।
REV 10:1 ତାନିୱେନେକା ନାନୁ ସୁଡ଼ୁତା, ମାରି ଅରେନ୍‌ ସାକ୍ତିମାନି ଦୁତ୍‍ ମୁସ୍‌କୁପୁର୍‌ତାନ୍ ରେତାଜି ୱାଜିନାନ୍‌ । ୱାନ୍‌ ବାଦଡ଼ଦାନ୍‍ ପିଡ଼ିଗିତା ମାର୍ହାନ୍‌ ମାରି ବାଦଡ଼ଦୁ ୱାନି ତାଲାଦିଙ୍ଗ୍ କେର୍‍ବିତାମାରାତ୍ । ୱାନି ମୋକମ୍‌ ୱେଡ଼ାଦି ୱାଜା ମାରି ପାଦାମ୍‍କୁ ସିସୁ ମୁଣ୍ତା ୱାଜା ତୋର୍‍ଜିମାରାତ୍ ।
REV 10:2 ୱାନି କିୟୁଦୁ ଉଣ୍ତ୍ରି ଇସ୍ରି କୁତ୍‍ତି ବଇ ମାରାତ୍‌ । ୱାନ୍‌ ୱାନି ଉଣେରି ପାଦାମ୍‍ ସାମୁଦୁର୍ ମୁସୁକୁ ମାରି ଡେବିରି ପାଦାମ୍‍ ବୁମି ମୁସୁକୁ ଇଟ୍‍ତାମାର୍ହାନ୍‌ ।
REV 10:3 ନରେସ୍‍ ଆଉଲି ୱାଜା ଆଉଲିକିଜି ୱାନ୍‌ କୁକୁତାନ୍, ଟିକ୍ ଆୟାୱାଜା ଆଉଲିକିଜି ସାତଗୋଟା ଡିଡ଼ିନିକେଙ୍ଗ୍‍ ଇୟା ଆଉଲିଦାନ୍ ଉତର୍‌ ସିତେ ।
REV 10:4 ୱାର୍‌ ଆମାକା ୱାରିଗିତାର୍‌, ଆକା ନାନୁ ରାସ୍‍ତେଙ୍ଗ୍ ସଲ୍‍ସିମାର୍ହା, ମାତର୍‌ ମୁସ୍‌କୁପୁରୁତାନ୍ ଉଣ୍ତ୍ରି ପେରି ବଲୁୱେର୍‌ଆ । ଆୟା ବଲୁ ନାଙ୍ଗି ଇର୍ହାତ୍‌, “ବାଦଡ଼୍‍ ଆଉଲିଦୁ ଆମାକା ୱେର୍‌ଇମାନି, ଆକା ଆଡ଼ିକ୍‍ସି ଇଡିଆ; ରାସ୍‍ମା ।”
REV 10:5 ତାନିୱେନ୍‍କା ଏମେ ଦୁତ୍‍ଦିଙ୍ଗ୍‌ ସାମୁଦୁର୍‌ ମାରି ବୁମି ମୁସୁକୁ ନିରିଇମାନିକା ନାନୁ ସୁଡ଼ୁତାମାର୍ହା, ୱାନ୍‌ ୱାନି ଉଣେରି କିୟୁ ମୁସ୍‌କୁପୁର୍‌ ତରିନ୍‌ ନିକିତାନ୍‌ ।
REV 10:6 ମାରି ଏନ୍‍ ମୁସ୍‍କୁପୁର୍‌, ଦୁନିଆ, ସାମୁଦୁର୍‍ ମାରି ଆବେମାନି ୱିଜୁ ବିସୟ ତିଆର୍‌ କିତାମାନାନ୍‌, ଆୟା ୱିଜୁଦିନ୍‌ତି ମାପୁରୁଦି ଦରୁଦାନ୍‌ ପାର୍‌ମାଣ୍‌କିଜି ଇର୍ହାନ୍‌, “ମାରି ୱେଡ଼ା ଡ଼େରି ଆଏତ୍ ।
REV 10:7 ଏସ୍ତିୱାଲେ ସାତ୍‌ ନମ୍ୱର୍‌ତି ଦୁତ୍‍ ମୋରି ଉକୁନାତ୍‍, ମାପୁରୁ ୱାନି ସେବକ ବାବବାଦିର୍ ଲାକୁତୁ ଏମେ ମାରିଗିତି ମାନି ବାକ୍ୟ ୱେର୍‌ତାମାର୍ହାନ୍, ଆକା ୱିସ୍‍ନାନ୍ ।”
REV 10:8 ତାନିୱେନ୍‍କା ମୁସ୍‌କୁପୁର୍‌ତି ଆୟା ବଲୁ ନାଙ୍ଗିଁ ମାରି ଇର୍ହାନ୍‌, ସାଙ୍ଗ୍‍ଆ, “ସାମୁଦୁର୍‌ ମାରି ବୁମି ମୁସୁକୁ ନିରିଇ ମାନି ଦୁତ୍‍ଦି କିୟୁଦାନ୍‌ କୁତ୍‍ତି ବଇ ଅଆ ।”
REV 10:9 ନାନୁ ଦୁତ୍‍ଦି ଲାକୁତୁ ସୋଲ୍‌ସି ଆୟା ଇସ୍ରି ବଇଦିଙ୍ଗ୍‌ ଲସ୍‌ତା । ୱାନ୍‌ ନାଙ୍ଗିଁ ଇର୍ହାନ୍‌, “ଅସି ତିନ୍‍ଆ । ନି ପଟା ଉଣ୍ତିଙ୍ଗ୍‌ ଇକା କେୟ୍‍ନାତ୍‍, ମାତର୍‌ ନି ୱେୟୁଦୁ ଇକା ପୁକି ୱାଜା ସାୱି ୱାନାତ୍ ।”
REV 10:10 ନାନୁ ଆୟା ଇସ୍ରି ବଇଦିଙ୍ଗ୍‍ ଦୁତ୍‍ତି କିୟୁଦାନ୍‌ ଅସି ତିର୍‍ଆ । ଆକା ନା ୱେୟୁଦୁ ପୁକି ୱାଜା ସାୱି ଆତାତ୍, ମାତର୍‍ ଡ଼ିଙ୍ଗିଁନି ଦାପ୍ରେ ପୋଟା ଲୋଇ କେଇତାତ୍ ।
REV 10:11 ତାନିୱେନ୍‍କା ଏନ୍‍ନୋ ନାଙ୍ଗିଁ ଇର୍ହାନ୍‌, “ନାଣ୍ତ ଦେସ୍‌କୁ, ଜାତି, ବାସାଦୁ ମାରି ରାଜାରି ବିସୟତାନ୍‍ ମାପୁରୁଦି କାବୁର୍ ମିର୍‌ ସୋଲ୍‌ସି ମାରିଡ଼େସି ବାବବାଣି ୱେର୍‍ତୁ ।”
REV 11:1 ତାନିୱେନ୍‍କା ଏନ୍‌ ଅରେନ୍‌ ଲେକିସ୍‌କିନି କାଣ୍ତି ନାନି ଇସ୍ରି ବାଡିଗା ନାଙ୍ଗିଁ ସିଜି ଇର୍ହାନ୍‌, “ସାଙ୍ଗ୍‍ଁଆ, ମାପୁରୁଦି ମନ୍ଦିର୍‌ ନି ବେଦି ଲେକିସ୍‌ କିଆ ମାରି ମନ୍ଦିରିତୁ ପାର୍‌ତନା କିନିୱାରିଙ୍ଗ୍‍ ଲେକିସ୍‌ କିଆ ।
REV 11:2 ମାତର୍‌ ମନ୍ଦିର୍‍ତି ଆତେରେ ମାନି ଦୁଆର୍‌ତିଙ୍ଗ୍‍ ଲେକିସ୍‌କିମା । ଇରିଙ୍ଗ୍‌, ଆକା ଅଣଜିହୁଦିରିଙ୍ଗ୍ ସିଆୟ୍‍ ଆତାମାନାତ୍ । ୱାର୍‌ ୪୨ ଗୋଟା ଲେଜୁକୁ ସାନ୍ଦି ଇୟା ପବିତ୍ର ଗାଡ଼୍‌ତିଙ୍ଗ୍‌ ମାଟ୍‍ସି ଇଡ୍‍ନାର୍‌ ।
REV 11:3 ବାସ୍‌ତେଙ୍ଗ୍‌ ଆରାତିମାନି ନା ରିଏର୍‌ ସାକିରିଙ୍ଗ୍‌ ନାନୁ ପୋକ୍‍ନା । ୱାର୍‌ ଆୟା ୧, ୨୬୦ ଦିନ୍‌ ସାନ୍ଦି ବାବବାଣି ୱେର୍‍ନାର୍‌ ।”
REV 11:4 ଆୟା ରିଏର୍‌ ସାକିର୍‌ ଦୁନିଆଦି ପ୍ରବୁଦି ଆଗିଡ଼ି ନିରିଇମାନି ରୁଣ୍ତି ଜିତ ମାରାକ୍‌ ନି ରୁଣ୍ତି ଦିୱେଙ୍ଗାଁ ୱାଜା ।
REV 11:5 ଜଦି ଏନ୍‍ ୱାରି ନାସ୍ଟୁ କିଦେଙ୍ଗ୍‌ ଚେଷ୍ଟାକିନାନ୍, ଆର୍‌ତିଙ୍ଗ୍‌ ୱାରି ୱେୟୁଦାନ୍ ସିସୁ ସୋସି ସାତ୍ରୁରି ଦଂସ କିନାତ୍‌ । ଇୟାୱାଜା ଏନ୍‍ ୱାରି କେତି କିଦେଙ୍ଗ୍‌ ସୋନାନ୍, ୱାନ୍‌ ଦଂସ ଆନାନ୍ ।
REV 11:6 ମାପୁରୁଦି କାବୁର୍ ୱେର୍‍ନି ବେଡ଼ାଦୁ ବାଦଡ଼ତିଙ୍ଗ୍‍ କେର୍‍ପିସି ପିରୁଦିଙ୍ଗ୍‍ଁ ତେବାକିନି ଅଦିକାର୍ ୱାରିଙ୍ଗ୍‌ ସିଆୟ୍‍ ଆତାମାର୍ହାତ୍‍ । ଏରୁ ଜଲା ନେତେର୍‍ତୁ ମାର୍‍ତେଙ୍ଗ୍ ମାରି ନିଜେ ବଦାଦାନ୍ ଦୁନିଆଦୁ ମାରିଡ଼େସି ମର୍‍ଡି ଆରାମ୍‍ କିଦେଙ୍ଗ୍‌ ୱାରି ଅଦିକାର୍‌ ମାନାତ୍‌ ।
REV 11:7 ୱାର୍‌ ସାକ୍ୟ ୱେର୍‍ତେଙ୍ଗ୍‍ ସେସ୍‍ କିନି ୱେନ୍‍କା ପାତାଲ୍‍ପୁର୍‍ତାନ୍‍ ଉଣ୍ତ୍ରି ଜାତୁ ନିଙ୍ଗିଁଜି ୱାଜି ୱାରି ବିରୁଦ୍‍ତାନ୍ ଜୁଦ୍‍ କିନାତ୍‌ ।
REV 11:8 ୱାଦ୍‌ ୱାରିଙ୍ଗ୍‌ ଆରାକିଜି ସାପିସ୍‌ କିନାତ୍‌ ମାରି ଆମା ପେରିଗାଡ଼୍‌ତୁ, ପେରିଜାରିଦୁ ପ୍ରବୁ କ୍ରୁସଦୁ ସାତାମାରାନ୍, ଆବେନୁ ୱାରି ମାଡ଼ା ତେବାନାତ୍ । ଆୟା ଗାଡ଼୍‌ତିଙ୍ଗ୍‌ ଆତ୍ମାଦୁମାନି ସଦମ୍‍ ବା ମିସର୍‍ ଇଜି ଇନ୍‌ଡ୍ରେଙ୍ଗ୍‌ ଆଟ୍‍ନାର୍‌ ।
REV 11:9 ୱିଜୁ ଦେସ୍‍କୁ, କୁଟୁମ୍‌, ବାସାବାଦି ମାରି ଜାତିଦି ଲୋକୁ ମୁନେନ୍‌ ଆଦା ସାନ୍ଦି ଆୟା ମାଡ଼େଙ୍ଗ୍‌‍ ସୁଣାର୍‍ ମାରି ଆୟାୱାନିକାଙ୍ଗ୍‌ ମୁସୁନି ଉଣ୍ତିଙ୍ଗ୍‌ ଡ଼ିସ୍‍ଏର୍‍ ।
REV 11:10 ଇୟା ରିଏରି ସାନି ଉଣ୍ତିଙ୍ଗ୍‌ ଦେସ୍‍ତି ଲୋକୁ ୱେଡ଼ିକା ଆନାର୍‌, ଉଣିଜି ତିନିଜି କିଜି ନିଜେ ନିଜେଦି ଲାକୁତୁ ଦାନ୍‍ ପୋକନାର୍‌; ଇରିଙ୍ଗ୍‌ ଆୟା ବାବବାଦିରି ଉଣ୍ତିଙ୍ଗ୍‍ ଦେସ୍‍ତି ଲୋକୁ ନାଣ୍ତ ବାଦା ଆଜିମାରାର୍‌ ।
REV 11:11 ମାତର୍‌ ମୁନେନ୍‌ ଆଦା ଦିନ୍‌ ୱେନ୍‍କା ମାପୁରୁଦି ମାଡ଼ାନ୍ ଜିବନ୍‌ ୱାଜି ୱାରି ମେନ୍ଦଲ ଲୋଇ ଡ଼ୁଗିତାତ୍ ମାରି ୱାର୍‌ ନିଙ୍ଗିଁଜି ନିରାର୍ । ଏମେକାର୍‌ ଇୟା ଗଟନା ସୁଡ଼ୁତାର୍‌, ୱାର୍‌ ନାଣ୍ତ ତିଲାତାର୍‌ ।
REV 11:12 ମାରି, ଆୟା ରିଏର୍‌ ବାବବାଦି ୱାରିଙ୍ଗ୍‌ ମୁସ୍‌କୁପୁର୍‌ତାନ୍ ନାଣ୍ତ ଆଉଲିଦାନ୍ ଇୟା ବଲୁ ଇଜିମାନି ଉଣ୍ତ୍ରି କାବୁର୍ ୱେରାର୍‍, “ଇବେନୁ ନିଙ୍ଗ୍‍ଜି ରାଦୁ !” ୱାରି ସାତ୍ରୁର୍‌ ସୁଡ଼ୁବୁ ସୁଡ଼ୁବୁ ୱାର୍‌ ବାଦ୍ଡ଼ ଦୁରିଦୁ ମିସାଜି ମୁସ୍‌କୁପୁର୍‌ତୁ ସୋରାର୍ ।
REV 11:13 ଟିକ୍‌ ଆୟା ବେଡ଼ାଦୁ ନାଣ୍ତ ଭୁମିକମ୍ପ ଆତାତ୍, ଗାଡ଼୍‌ତି ଦସ୍‍ବାଗ୍‍ ଦଂସ ଆତାତ୍ ମାରି ବୁମିକମ୍ପଦୁ ୭,୦୦୦ ହଜାର୍‌ ଲୋକୁ ସାତାସରାର୍‌ । ଜିତିମାନି ଲୋକୁ ତିଲାଜି ମୁସ୍‍କୁପୁର୍‍ତି ମାପୁରୁଙ୍ଗୁଁ ଦନ୍ୟବାଦ୍‌ କିତାର୍‌ ।
REV 11:14 ଇୟା କାସ୍ଟୁ ସେସ୍‍ ଆତାତ୍; ମାତର୍‌ ତିନି ନମ୍ୱର୍‌ତି କାସ୍ଟୁ ଇଗା ୱାଜିନାତ୍ ।
REV 11:15 ତାନିୱେନ୍‍କା ସାତ୍‌ ନମ୍ୱର୍‌ତି ଦୁତ୍‍ ତାନି ମୋରି ଉକୁତାତ୍ ମାରି ମୁସ୍‌କୁପୁର୍‌ଦୁ ନାଣ୍ତ ଆଉଲଦି ୱାଲେ ଇୟା କାବୁର୍ ୱିଙ୍ଗିତାତ୍ ! “ମା ପ୍ରବୁ ମାରି ୱାନି ମସିହ ଦୁନିଆ ମୁସୁକୁ ସାସନ୍ କିନି ଅଦିକାର୍‌ ଇଲେଇ ନିଜେ କିଦୁ ଅତାମାନାନ୍ । ୱାନ୍‌ ଇବେନୁ ୱିଜୁଦିନ୍‌ ସାସନ୍‌ କିନାନ୍ ।”
REV 11:16 ତେନିୱେନ୍‍କା ମାପୁରୁଦି ଆଗିଡ଼ି ନିଜେ ନିଜେଦି ସିଂହାସନ୍‍ଦୁ ବାସିସ୍ତିମାନି ୨୪ ଲୋକୁ ପେରିନେତାର୍ ମାଡ଼ିସ୍‍ କିଜି ମାପୁରୁଦି ଆରାଦନା କିଜି,
REV 11:17 ଇର୍ହାନ୍‌, “ଏ ସର୍ବସାକ୍ତିମାନ୍ ମାପୁରୁ, ନିନୁ ଆଗ୍‍ଡ଼ି ମାରି ଇଲେଇ ! ମାପୁ ନିଙ୍ଗିଁ ଦନ୍ୟବାଦ୍‌ ସିଜିନାପ୍; ଇରିଙ୍ଗ୍‌ ନି ପେରିସାକ୍ତିଦାନ୍‍ ଦେସ୍‍ତିଙ୍ଗ୍‌ ବଜୁ ଅତିମାନି ।
REV 11:18 ଅଣଜିହୁଦିର୍‍ ରିସା ଆତାମାନାର୍‌; ଇରିଙ୍ଗ୍‌ ନି ରିସାଦି ବେଡ଼ା ଇଗା ୱାତାତ୍, ସାତିକାର୍‌ ଇଲେ ବିଚାର୍‌ ଆନାର୍ । ନି ସେବକ ବାବବାଦିର୍, ସାଦୁର୍‍ ମାରି ଏମେକାର୍‌ ନିଙ୍ଗିଁ ତିଲାଜିନାର୍‌, ପେରିକାର୍‍ ନି ଇସ୍ରିକାର୍‍ ୱିଜେରେ ପୁରସ୍କାର୍‌ ପୟ୍‌ନାର୍‌ । ମାରି ଏମେକାର୍ ଦୁନିଆଦିଙ୍ଗ୍‌ ଦଂସ କିନାର୍‌, ୱାନ୍‌ ବା ଦଂସ ଆନାର୍‌ ।”
REV 11:19 ମୁସ୍‌କୁପୁର୍‌ଦୁ ମାନି ମାପୁରୁଦି ମନ୍ଦିର୍‌ ସେର୍‍ଲା ରେଆତାତ୍ ମାରି ମନ୍ଦିର୍‍ତୁ ନିୟମ୍‌ ପେଡ଼ା ମାନିକା ତରିତାତ୍ । ତାନିୱେନ୍‍କା ବାଦଡ଼ ମିରିସ୍‌ତାତ୍‌, ବିଜ୍‍ଡାକ୍‍ତାତ୍‍, ଭୁମିକମ୍ପ ମାରି ନାଣ୍ତ ଆଡ୍‍ରାଗା ପିରୁ ଆତାତ୍ ।
REV 12:1 ୱେନ୍‍କା ବାଦଡ଼ଦୁ ଉଣ୍ତ୍ରି ପେରି ନି କାବାଆନି ସିନା ତୋରିତାତ୍‍ । ଅରେତ୍ ଆଇମା ୱେଡ଼ାଦି ଜାୟ୍‌ ଆରାତାମାରାତ୍ । ତାନି ପାଦାମ୍‍ ଆଡ୍‍ଗି ଲେଜୁ ମାରି ତାଲାଦୁ ବାରଗୋଟା ସୁକେଙ୍ଗ୍‌ ମାନି ଉଣ୍ତ୍ରି ମୁକୁଟ୍ ମାରାତ୍ ।
REV 12:2 ୱାଦ୍‌ ଗାର୍ବୁଦୁ ମାର୍‌ର୍ହାତ୍‍ ମାରି ଜନମ୍‍ କିନି ୱିସାମ୍‍ତାନ୍‍ କସ୍ଟ ପୟଜି ମାର୍ହାତ୍‍ ।
REV 12:3 ବାଦଡ଼ତୁ ମାରି ଉନ୍‌ଡ୍ରି କାବାଆନି ସିନା ତୋରିତାତ୍ । ନେତେର୍‌ ରଙ୍ଗ୍‍ତି ସାରାସ୍ ୱାଜା ଉନ୍‌ଡ୍ରି ପେରି ଜାତୁ, ତାନିଙ୍ଗ୍‌ ସାତ୍‌ଗୋଟା ତାଲେକ୍, ଦାସ୍‍ଗୋଟା କମୁକୁ ମାରି ୱିଜୁ ତାଲେକାଙ୍ଗ୍‌ ଉନ୍‌ଡ୍ରି ଲାକା ମୁକୁଟ୍ ମାରାତ୍‌ ।
REV 12:4 ଆୟାକାତ୍‌ ତାନି ତକାଦାନ୍‍ ବାଦଡ଼ତାନ୍‌ ମୁନ୍‌ଡ୍ରିବାଗ୍‌ତାନ୍‌ ଉନ୍‌ଡ୍ରିବାଗ୍‌ ସୁକେଙ୍ଗ୍ ରେଲ୍‌ଜିତାସି ଦୁନିଆ ମୁସୁକୁ ପୋକ୍‍ତାତ୍ । କଡ଼ ଜନମ୍‌ ଆତି ଦାପେ ଦାପେ ୱାନିଙ୍ଗ୍‌ ତିନି ଉଦେସ୍‌ତାନ୍‌ ସାରାସ୍ ଆୟା ଆଇମା ଲାକ୍‌ତୁ ୱାତାଦୋ ନିରାତ୍ ।
REV 12:5 ଟିକ୍ ଆୟା ୱେଡ଼ାଦୁ ଆଇମା ଅରେନ୍‍ କଡ଼ପିଲାଦିଙ୍ଗ୍ ଜନମ୍‌ କିତାତ୍ । ମାତର୍‌ ଲୁୱା ଦଣ୍ତ ସାକାଦାନ୍ ୱିଜୁ ଜାତିମୁସୁକୁ ସାସନ୍ କିନି ଉଣ୍ତିଙ୍ଗ୍ ଟିକ୍ ବେଡ଼ାଦୁ ଆୟା କଡ଼ ପେରାୟ୍‌ଆଜି ମାପୁରୁ ସିଂହାସନ୍ ଲାକୁତୁ ଅଆୟ୍‍ ଆତାନ୍‍ ।
REV 12:6 ମାରି ଆୟା ଆଇମା ମରୁଜାଗାଦୁ ଉର୍‌କୁତାତ୍‌ । ଆବେନୁ ୧, ୨୬୦ ଦିନ୍‌ ସାନ୍ଦି ୱାଦ୍‌ ମାନି ଜାଗା ମାପୁରୁ ତିଆର୍ କିତାସିତାମାର୍ହାନ୍‌ ।
REV 12:7 ତାନିୱେନ୍‍କା ମୁସ୍‌କୁପୁର୍‌ଦୁ ଜୁଦ୍‍ ଆରାମ୍‌ ଆତାତ୍ । ମୀଖାୟେଲ୍ ମାରି ତାମେ ଦୁତ୍‌କୁ ଆୟା ପେରି ସାରାସ୍‍ ମାରି ତାନି ସେବାକିନିୱାରି ୱାଲେ ଜୁଦ୍‍ କିତାତ୍ ।
REV 12:8 ଜୁଦଦୁ ସାରାସ୍ ମାରି ତାନି ଦୁତ୍‌କୁ ଆରାତାର୍ ମାରି ୱାର୍‌ ମାରି ମୁସ୍‌କୁପୁର୍‌ଦୁ ଜାଗା ପୋଇଏତାର୍ ।
REV 12:9 ଆୟା ସାରାସ୍ ଆଜିନାତ୍, ୱିଜୁ ଦୁନିଆଦିଙ୍ଗ୍‍ ବାଣ୍ତିସ୍‍ କିତିମାନି ସାକ୍ତି ପୁର୍ବେଦି ସାରାସ୍, ସୟତାନ୍; ତାନି ଦୁତ୍‍କା ୱାଲେ ମୁସ୍‌କୁପୁର୍‌ଦାନ୍ ପୋକାୟ୍‌ଆଜି ଦୁନିଆଦି ମୁସୁକୁ ୱାଜି ଆର୍‌ତାତ୍ ।
REV 12:10 ତାନିୱେନ୍‍କା ନାନୁ ମୁସ୍‌କୁପୁର୍‌ତୁ ପେରି ଆଉଲିଆଜିନିକା ଉଣ୍ତ୍ରି ମାଟା ୱେର୍‌ଆ, “ଇଲେଇ ମାପୁରୁଦି ରକିୟା ଇତାତ୍‌ । ୱାନି ରାଜା ସାକ୍ତି ମାରି ୱାନି ମସିହଦି ଅଦିକାର୍ ତରତାମାନାନ୍ ଏମେ ମିଚ୍‌ୱେର୍‌ନିକାନ୍‌ ୱେଡ଼େ ନାଡ଼ା ମାପୁରୁଦି ଆଗିଡ଼ି ନିଲିଜି, ମା ମାପୁରୁଦି ତଡ଼ାନ୍‌କା ନି ତାଙ୍ଗିଁକା ବିରୁଦ୍‌ତାନ୍ ମିଚ୍ ଦାବି କିଜିମାର୍ହାତ୍‍, ୱାନ୍‌ ନେରୁ ମୁସ୍‌କୁପୁର୍‌ଦାନ୍ ପୋକାଇଆତାନ୍ ।
REV 12:11 ମେଷସାବକଦି ନେତେର୍‌ତି ସାକ୍ତିଦାନ୍ ମାରି ୱାର୍‌ ସାକ୍ୟ ୱେରିସିମାନି ସତ୍ ବିସୟ୍‌ ଉଣ୍ତିଙ୍ଗ୍‌ ଜିବନ୍‌ସିଦେଙ୍ଗ୍ ତିଆର୍‍ ଆତିମାନିଙ୍ଗ୍‌ ମା ତଡ଼ାନ୍‌କୁ ନି ତାଙ୍ଗିଁକି ଜିଣାତାମାନାର୍ ।
REV 12:12 ଆର୍‌ତିଙ୍ଗ୍‌ ମୁସ୍‌କୁପୁର୍‌ ନି ଦୁନିଆଦୁମାନି ୱିଜେରେ ୱେଡ଼ିକା କିଦୁ । ମାତର୍‌ ଆୟ୍‌ ! ଦୁନିଆଦି ବୁମି ନି ସାମ୍‌ଦୁରୁ ୱିଜୁ ! ମି ଦଣ୍ଡ୍‌ ଏସା ବୟ୍‌ଙ୍କାର୍ ! ଇଲେ ସୟତାନ୍ ମି ଲାକୁତୁ ମାରି ୱାଦ୍‌ ବେସି ରିସାଆତାମାନାତ୍, ମାତର୍‌ ୱାଦ୍‌ ନେସ୍‍ନାତ୍, ତାନି ୱେଡ଼ା ଇଗା ୱାତାତ୍‌ନି ।”
REV 12:13 ଦୁନିଆଦୁ ପୋକ୍‌ନିକା ସୁଡ଼ୁଜି ସୟତାନ୍ କଡ଼ଦି ଜନମ୍‌ସିତି ଆୟା ଆଇମାଦିଙ୍ଗ୍‍ ପେରିତାତ୍ ।
REV 12:14 ସାରାସ୍‌ଦି ଆକ୍ରମଣଦାନ୍ ରକିୟା ପୋଇନି ଉଣ୍ତିଙ୍ଗ୍ ଆଇମାଦିଙ୍ଗ୍‍ ରୁଣ୍ତି ପେରି ଡେଗା ପୋଟିଦି ରେକେଙ୍ଗ୍‍ ସିଆୟ୍‌ଆତାତ୍‌ । ତାନି ସାକାଦାନ୍ ୱାଦ୍‌ ମରୁଜାଗାଦୁ ନିଜେଦି ତେବାନି ବାଡିଦୁ ଇମିଜିସଲ୍‍ସି, ଆବେନୁ ମୁନ୍‌ଡ୍ରି ବାର୍ସେକ୍ ଆଦା ସାନ୍ଦି ସାନ୍ତିଜାଗାଦୁ ତେବାଦେଙ୍ଗ୍‌ ଇଚାକିତାତ୍ ।
REV 12:15 ତାନିୱେନ୍‍କା ଆଇମାଦିଙ୍ଗ୍‍ ଏରୁତୁ ଦେଲ୍‌ପିସ୍‌ ଅତେଙ୍ଗ୍‌ ଇଜି ସାରାସ୍ ନିଜେଦି ୱେୟୁଦାନ୍ ତାନି ୱେନ୍‌କା ୱେନ୍‍କା ଉଣ୍ତ୍ରି ପିରୁଏରୁ ସପ୍‍ତାତ୍ ।
REV 12:16 ମାତର୍‌ ଆଇମାଦିଙ୍ଗ୍‍ ରକ୍ଷାକିନି ଉଣ୍ତିଙ୍ଗ୍‌ ଦୁନିଆ ନିଜେଦି ୱେୟୁ ରେସି ସୟତାନ୍‍ତି ୱେୟୁଦାନ୍ ସୋସିମାନି ୱିଜୁ ଏରୁଦିଙ୍ଗ୍‌ ଉଟାନ୍ ।
REV 12:17 ଆବେଟ୍‌କୁ ସୟତାନ୍ ଆଇମାଦି ମୁସୁକୁ ନାଣ୍ତରିସା ଆଜି, ତାନି କୁଟୁମ୍‌ ଏମେ ତେବାତି ଲୋକୁ ମାପୁରୁଦି ମାଟା ମାନାନାର୍ ମାରି ଜିସୁଦି ବିସୟତାନ୍‍ ସାକି ସିନାର୍‍, ୱାରି ୱାଲେ ଜୁଦ୍‍ କିଦେଙ୍ଗ୍ ସତାତ୍ ।
REV 12:18 ମାରି ସୟତାନ ସାମୁଦୁର୍‍ଦି ପାଡ଼ି ସଲ୍‍ସି ନିରାନ୍ ।
REV 13:1 ତାନି ୱେନେକା ନାନ୍‌ ସୁଡ଼ୁତା, ଉଣ୍ତ୍ରି ଜାତୁ ସାମୁଦୁରୁ ଲୋଇରାନ୍‌ ନିଙ୍ଗିଁଜି ୱାଜିନାତ୍ ତାନିଙ୍ଗ୍‌ ଦସଗୋଟା କମୁକୁ ମାରି ସାତଗୋଟା ତାଲେକ୍‌ । ୱିଜୁ କମୁକାଙ୍ଗ୍‌ ଉଣ୍ତ୍ରି ଉଣ୍ତ୍ରି ମୁକୁଟ୍ ମାରାତ୍ ମାରି ୱିଜୁ ତାଲେକାଙ୍କ୍ ଉଣ୍ତ୍ରି ଉଣ୍ତ୍ରି ମାପୁରୁଙ୍ଗୁଁ ନିନ୍ଦାକିନି ସିନା ଦରୁ ରାସାତାମାରାତ୍ ।
REV 13:2 ଅଡ଼ୁଜୁ ଉଣ୍ତ୍ରି କାବ୍‍ରା ନରେସ୍‍ ୱାଜା ତୋରିଜିମାରାତ୍ । ତାନି ପାଦାମ୍‍କୁ ଅଡ଼ୁଜୁ ପାଦାମ୍‍କୁ ୱାଜା ମାରି ୱେୟୁ ନରେସ୍‍ ୱେୟୁ ୱାଜା । ସାରାସ୍‍ ଇୟା ଜାତୁଦିଙ୍ଗ୍‌ ନିଜେଦି ସାକ୍ତି, ସିଂହାସନ୍ ମାରି ପେରିଅଦିକାର୍ ସିତାନ୍‌ ।
REV 13:3 ଜାତୁଦି ଉଣ୍ତ୍ରି ତାଲା ନାଣ୍ତ ଗାଉ ଆତିମାରି ୱାଜା ମନେ ଆଜିମାରାତ୍ । ମାତର୍‌ ଗାଉ ବାଡି ନେଗେନ୍‍ ଆତାମାରାତ୍ ମାରି ଦୁନିଆଦି ଲୋକ୍‌ ୱିଜେରେ କାବାଆଜି ଜାତୁଦି ୱେନେକା ସରାର୍ ।
REV 13:4 ମାରି, ୱିଜେରେ ଜାତୁଦିଙ୍ଗ୍‌ ଅଦିକାର୍‌ ସିତିମାନି ସାରାସ୍‍ତିଙ୍ଗ୍‍ ପୁଜା କିତାର୍ । ୱାର୍‌ ଜାତୁଦିଙ୍ଗ୍‌ ବା ପୁଜା କିଜି ଇର୍ହା, “ଏନ୍‍ ଇୟା ଜାତୁଦି ସାମାନ୍‍ ଆନାନ୍ ? ଏନ୍‍ ତାନି ବିରୁଦ୍‍ତାନ୍ ଜୁଦ୍‍ କିଦେଙ୍ଗ୍‌ ଆଟ୍‍ନାନ୍‍ ?”
REV 13:5 ଜାତୁ ଗରବ୍‍ତାନ୍‍ ମାଟା ୱାରିଗିଜି ମାରାତ୍ ମାରି ମାପୁରୁ ନିନ୍ଦା କିଜିମାରାତ୍, ଆରିତିଙ୍ଗ୍‌ବା ୪୨ ଗୋଟା ଲେଜୁକୁ ସାନ୍ଦି ସାସନ୍‍ କିନି ଉଣ୍ତିଙ୍ଗ୍‌ ତାନିଙ୍ଗ୍‌ ସାରି ପୁଟ୍‍ତାତ୍ ।
REV 13:6 ମାପୁରୁଦି, ୱାନି ଦରୁ ମାରି ୱାନି ବାସାନିବାଡି ମାରି ମୁସ୍‌କୁପୁର୍‌ଦୁମାନି ୱିଜେରିଙ୍ଗ୍‌ ୱାନ୍‌ ଆନାଦୁରିଆ ସିଦେଙ୍ଗ୍‍ ଆସ୍‌ତାନ୍‌ ।
REV 13:7 ମାପୁରୁଦି ଲୋକା ବିରୁଦ୍‍ତାନ୍ ଜୁଦ୍‍ କିଜି ୱାରିଙ୍ଗ୍‌ ଆରା କିଦେଙ୍ଗ୍‌ ୱାନ୍‌ ସାରି ପୋଇତାନ୍‍ ମାରି ୱିଜୁ କୁଟୁମ୍‌, ଦେସ୍ ମାରି ବାସା ମାରି ଜାତି ମୁସୁକୁ ତାନିଙ୍ଗ୍‌ ଅଦିକାର୍ ସିଆୟ୍‍ ଆତାତ୍‍ ।
REV 13:8 ଦୁନିଆ ତିଆର୍‍ଆନି ପୁର୍ବେଦାନ୍ ଏମେୱାରି ଦରୁ ସାତିମାନି ମେଷସାବକତି ଜିବନ୍‌ ବଇଦୁ ରାସାତାମାରାତ୍, ୱାରିଙ୍ଗ୍‍ ଡ଼ିସ୍‍ତିଙ୍ଗ୍‍ ଦୁନିଆଦି ଆଇ ୱିଜେରେ ଆୟା ଜାତୁଦିଙ୍ଗ୍‌ ପୁଜାକିନାର୍ ।
REV 13:9 “ଏମେୱାନିଙ୍ଗ୍‌ ଗିତଣିଙ୍ଗ୍‍ଁ ମାନେ ୱାନ୍‌ ୱେନିନ୍‌ ।
REV 13:10 ମାପୁରୁଦି ବଦା ଇସାବ୍‍ତାନ୍‍ ଏନ୍‍ ତରାୟ୍‍ ଆନିକାମାନାତ୍‌, ୱାନ୍‌ ସତେନେ ତରାୟ୍‍ ଆନାନ୍ । ଏନ୍‍ ଆଇୱାନିଙ୍ଗ୍‍ କାଣ୍ତାସାରି ସାପିସ୍‌ କିନାନ୍, ୱାନ୍‌ ନିଜେ କାଣ୍ତାସାରି ସାନାନ୍ । ମାପୁରୁଦି ଲୋକା ଉଣ୍ତିଙ୍ଗ୍‌ ସାସ୍‌ ନି ବିସ୍‍ବାସ୍‍ ଲୋଡ଼ା ମାନାତ୍‌ ।”
REV 13:11 ତାନିୱେନ୍‍କା ନାନୁ ସୁଡୁତା, ମାରି ଉଣ୍ତ୍ରି ଜାତୁ ବୁମି ଲୋଇରାନ୍‌ ନିଙ୍ଗିଁଜି ୱାଜିନାତ୍ । ମେଷସାବକଦି କମୁକୁ ୱାଜା ତାନି ରୁଣ୍ତି କମୁକୁ ମାର୍‍ଏ ମାରି ୱାନ୍‌ ପୁର୍ବେଦି ସାରାସ୍ ୱାଜା ମାଟା ଇଜିମାର୍‌ଆତ୍‌ ।
REV 13:12 ଇୟା ମାରିଉନ୍‌ଡ୍ରି ପସୁ ପାର୍‍ତୁମ୍‍ ପସୁଦି ମାନିମାନୁ ତାନି ଅଦିକାର୍ ବ୍ୟବହାର୍‍ କିଜି ପାର୍‍ତୁମ୍‍ ପସୁଦି ପୁଜା କିନି ଉଣ୍ତିଙ୍ଗ୍ ଦୁନିଆଦୁ ବାସାନି ୱିଜେରିଙ୍ଗ୍ ରାଜି କିତାତ୍ । ଆମାତାନି ଗାଉ ନେଗେନ୍‌ ଆତାମାର୍ହାତ୍‌,
REV 13:13 ମାରିଉଣ୍ତ୍ରି ପସୁଦି ପେରି କାବାଆନି ପାଣି ୱିଜୁ ପୁରାକିତାତ୍ । ୱିଜେରି ଆଗିଡ଼ି ମୁସ୍‌କୁପୁର୍‍ତାନ୍‍ ଦୁନିଆ ମୁସୁକୁ ସିସୁ ପିରୁଆରାପ୍‌ତାତ୍‍ ।
REV 13:14 ମାରି ପାର୍‌ତୁମ୍‌ ପସୁଦି ମାନିମାନୁ ଇୟାୱାଜା ନାଣ୍ତ କାବାଆନି ପାଣି କିଜି ଦୁନିଆଦି ଲୋକାଙ୍ଗ୍‌ ୱିଜେରିଙ୍ଗ୍ ବାଣ୍ତିସ୍‍ କିତାତ୍ । କାଣ୍ତାସାରି ଗାଉ ଆଜି ନେଗେନ୍‍ ଆତିମାର୍‍ଇ ଆଗିଡ଼ିରି ପସୁଦିଙ୍ଗ୍ ସନ୍‌ମାନ୍‌ତି ଉଣ୍ତିଙ୍ଗ୍‍ ତାନି ଉଣ୍ତ୍ରି ବମା ତିଆର୍‌ କିଦେଙ୍ଗ୍ ମାରିଉନ୍‌ଡ୍ରି ପସୁ ଲୋକାଙ୍ଗ୍‌ ଆଦେସ୍ ସିତାତ୍ ।
REV 13:15 ପାର୍‌ତୁମ୍‌ ପସୁଦି ବମାଦୁ ଜିବନ୍‌ସିଜି ତାନିଙ୍ଗ୍‌ ଜିବନ୍‌ କିନି ଉପାୟ୍‍ ମାରିଉନ୍‌ଡ୍ରି ପସୁ ନେସ୍ତାମାରାତ୍ । ଆବେଟ୍‍ ବମା ୱାରିଗିତାତ୍ ମାରି ଏମେକାର୍ ତାନି ପୁଜାକିଏତାର୍, ୱାରିଙ୍ଗ୍‌ ସାପିସ୍‍ କିଦେଙ୍ଗ୍‌ ଅଦିକାର୍‌ ସିଆୟ୍‌ଆତାତ୍‌ ।
REV 13:16 ମାରି ପେରି ଇସ୍ରି, ପାଣିକିନିକାନ୍‍, ବା ମୁକ୍‍ଡ଼ାତିକାନ୍‍, ମାଜନ୍‍ କାକୁର୍ତି, ୱିଜେରିଙ୍ଗ୍‌ ଉଣିକିୟୁଦୁ ସିଲେତିଙ୍ଗ୍‌ କାପାଳ୍‍ତୁ ଉଣ୍ତ୍ରି ସିନା ଡାକାଦେଙ୍ଗ୍‌ ୱାଦ୍‍ ଲୋକାଙ୍ଗ୍‌ ରାଜି କିତାତ୍‍ ।
REV 13:17 ପସୁଦି ଦରୁ ବା ଆୟା ଦରୁଦି ସିନା ଉଣ୍ତ୍ରି ଇସାବ୍‌ ଡାକାଏଜି ମାନି ଏନ୍‍ କଡ଼ଦେଙ୍ଗ୍‍ ପୋର୍‍ଦେଙ୍ଗ୍‌ ଆଟ୍ଏନ୍‍ ଇଜି ପସୁ ଆଦେସ୍ ସିତାତ୍ ।
REV 13:18 ଇବେନୁ ବୁଦି ଦରକାର୍ ଏମେୱାନିଙ୍ଗ୍‌ ବୁଦି ମାନାତ୍‌ ୱାନ୍‌ ପସୁଦି ଇସାପ୍‌ କିପିନ୍, ମାତର୍‌ ଆକା ଅରେନ୍‌ ଲୋକୁ ଇସାପ୍‌, ମାରି ଆୟା ଇସାପ୍‌ ଆଜିନାତ୍ ୬୬୬ ।
REV 14:1 ତାନିୱେନ୍‌କା ନାନୁ ସୁଡ଼ୁତା, ମେଣ୍ତାପିଲା ସିୟୋନ ଗୋରନ୍‌ ମୁସୁକୁ ନିରାମାନାନ୍ । ୱାନି ୱାଲେ ୧୪୪,୦୦୦ ଲୋକୁ ମାର୍ହାର୍‌ । ୱାରି କାପାଲ୍‌ତୁ ମେଣ୍ତାପିଲା ମାରି ୱାନି ବୁବାଦି ଦରୁ ରାସାତାମାରାତ୍ ।
REV 14:2 ତାନିୱେନ୍‌କା ନାନୁ ୱେର୍‌ଆ, ଏରୁ ୱାଙ୍ଗ୍‌ନିଆଉଲି ମାରି ମିର୍‌ସିନି ଆଉଲି ୱାଜା ମୁସ୍‌କୁପୁର୍‌ତାନ୍‌ ଉନ୍‌ଡ୍ରି ବଲୁ ୱାତାତ୍‌ । ବାଜାଏସ୍‌ନିକାର୍‌ ବାଜାଏସ୍‌ସି ମାନି ମୋରି ଝୁମ୍‌କା ୱାଜା ଆକା ୱେନ୍‌ଜି ମାର୍ହାତ୍ ।
REV 14:3 ଆୟା ୧୪୪,୦୦୦ ଲୋକୁ ମୁସ୍‌କୁପୁର୍‌ ସିଂହାସନ୍‌ଦୁ, ନାଲ୍‌ଗି ଜାତୁଙ୍ଗୁଁ ମାରି ମଣ୍ତଲିଦି ପେରିନେତାରି ଆଗ୍‌ଡ଼ି ନିର୍ହାର୍ । ୱାର୍‌ ପୁନିପାଟା ପାରିଜିମାରାର୍‌ । ୱାରିଙ୍ଗ୍‌ ଡ଼ିସ୍‌ତିଙ୍ଗ୍‌ ଆଇକାର୍‌ ଏର୍‌ ଆୟା ପାଟା ପାର୍‍ଦେଙ୍ଗ୍‌ ଆଟ୍‍ଏଜିମାର୍ହାର୍‍ । ସାରା ଦୁନିଆ ଲୋକା ଜାତିଦି ମାଣୁକୁ କେବଲ୍‌ ୱାର୍‌ ରକିୟା ପୋଇତାମାରାର୍ ।
REV 14:4 ୱାର୍‌ ଆଇମେକା ୱାଲେ ନିଜେଦିଙ୍ଗ୍ ଏସ୍‌କାଙ୍ଗ୍ ପାପ୍‌ କିଏର୍‌ ମାର୍ହାର୍‌, ୱାର୍‌ ମାର୍ହାର୍‌ ନେଗିକାର୍‌ । ୱାର୍‌ ୱିଜୁଦିନ୍ ମେଣ୍ତାପିଲାଦି ୱେନ୍‌କା ବୁଲାଜିମାର୍ହାର୍‌ । ୱାର୍‌ ଲୋକା ମାଣୁକୁ ପାର୍‌ତୁମ୍‌ ରକିୟା ପଇଜି ମାପୁରୁ ମାରି ମେଣ୍ତାପିଲାଦି ଲାକ୍‌ତୁ ସର୍ପେ ଆତାମାନାର୍‌ ।
REV 14:5 ୱାର୍‌ ଏସ୍‌କାଙ୍ଗ୍ ମିଚ୍‌ ୱେର୍‌ନିକା ତର୍‌ଏତ୍, ୱାର୍‌ ପୁରା ଦସ୍‍ସିଲିକାର୍‍ ।
REV 14:6 ତାନିୱେନ୍‌କା ନାନୁ ମାରିଡ଼େସି ସୁଡ଼ୁତା, ମାରି ଅରେନ୍‌ ଦୁତ୍‍ ବାଦଡ଼ଦୁ ନାଣ୍ତ ମୁସ୍‌କୁରାନ୍‌ ଇମିଜି ଇମିଜି, ଦୁନିଆଦି ୱିଜୁ ଜାତି, କୁଟୁମ୍‌, ବାସାଦି ମାରି ଦୁନିଆଦି ଲୋକା ଲାକ୍‌ତୁ ମାପୁରୁଦି ଆୟା ୱିଜୁଦିନ୍‍ତି ସୁସମାଚାର୍‌ ୱେର୍‌ସିନାନ୍‌ ।
REV 14:7 ୱାନ୍‌ ପେରି ବଲୁଦାନ୍ ୱେର୍‌ସିନାନ୍‌, “ମାପୁରୁଙ୍ଗୁଁ ତିଲାଦୁ, ୱାନି ଆତ୍ମାଦିଙ୍ଗ୍‌ ପ୍ରସଂସା କିଦୁ, ମାତର୍‌ ଲୋକା ବିଚାର୍‍ ବେଡ଼ା ଇଗା ୱାତାତ୍‌ନି । ମୁସ୍‍କୁପୁର୍‍, ଦୁନିଆ, ସାମୁଦୁର୍‌ ମାରି ୱିଜୁ ଏରୁଜଲେଙ୍ଗ୍‌ ତିଆର୍‍କିତିୱାନିଙ୍ଗ୍‍ ପୁଜାକିଦୁ ।”
REV 14:8 ଆୟା ଆଗ୍‌ଡ଼ିରି ଦୁତଦି ୱେନ୍‌କା ମାରିଉଣ୍ତ୍ରି ଦୁତ୍‍ ୱାଜି ଇର୍ହାତ୍‌, “ୱାନିଦି ଦଂସ ଗଟାତାତ୍ । ୱେଙ୍ଗିଁତିମାନି ବାବିଲନ୍ ଦଂସ୍‌ ଆତାମାନାତ୍‌ । ୱାନ୍‌ ୱାନି ଦାରିପାଣି ୱାଜା କାଡ଼ୁ ଉଟ୍‌ପିସ୍‌ କିଜି ୱିଜୁ ଲୋକାଙ୍ଗ୍‌ ସୋସପିସ୍‌ କିତାମାର୍ହାନ୍‌ ।”
REV 14:9 ଇୟା ରୁଣ୍ତି ଦୁତଦି ୱେନ୍‌କା ମାରିଉଣ୍ତ୍ରି ଦୁତ୍‍ ୱାଜି ପେରି ବଲୁଦାନ୍ ଇନ୍‌ଡ୍ରେଙ୍ଗ୍‌ ଆସ୍‌ତାତ୍‌, “ଏନ୍‌ଆପିନ୍‌ ଜାତୁ ମାରି ତାନି ବମାଦିଙ୍ଗ୍‌ ପୁଜା କିନାନ୍ ମାରି ନିଜେଦି କାପାଲ୍‌ ନି କିୟୁଦୁ ୱାନି ସିନା ଆସ୍‌ନାନ୍‌,
REV 14:10 ୱାନ୍‌ ମାପୁରୁଦି ରିସାଦିୱାଜା ଡୁବାଇଦୁ ୱାକ୍‍ତିମାନି ୱାନି ନାଣ୍ତ ରିସାଦି କାଡ଼ୁ ଉଣାନ୍‌ । ଏମେକାର୍‌ ଇୟା ପାଣିକିନାର୍‌, ୱାର୍‌ ୱିଜେରେ ମେଣ୍ତାପିଲା ମାରି ପବିତ୍ର ଦୁତ୍‍ରି ଆଗ୍‌ଡ଼ି ସିସୁ ମାରି ଗନ୍ଧକଦୁ କାସ୍ଟୁ ଆନେ ।
REV 14:11 ଆୟା କାସ୍‌ସିମାନି ସିସୁଦି ଗୋୟି ଜୁଗ୍‌ ଜୁଗ୍‌ କାସିସ୍‌ମାନାତ୍ । ଏମେକାର୍‌ ଜାତୁ ମାରି ଆୟା ମୁର୍ତିଦି ପୁଜା କିନାର୍, ମାରି ୱାନି ସିନା ଆସ୍‌ନାର୍‌, ୱାର୍‌ ନାଡ଼ାୱେଡ଼େ ୱିଜୁଦିନ୍‌ ଅସାନ୍ତି ଭୋଗାଜିମାନାର୍‌ ।”
REV 14:12 ଏମେକାର୍‌ ମାପୁରୁଦି ମାଟାଆସ୍‌ନାର୍‌ ମାରି ଜିସୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ତେବାନାର୍‌, ମାପୁରୁଦି ଆୟା ଲୋକା ଉଣ୍ତିଙ୍ଗ୍‌ ଏଣ୍ତେସ୍‌ବା ଦରକାର୍ ।
REV 14:13 ନାନ୍‌ ୱେର୍‌ଆ, ମୁସ୍‌କୁପୁର୍‌ତାନ୍ ଉନ୍‌ଡ୍ରି ମାଟା ୱେଙ୍ଗିଁଜିନାତ୍; “ଇୟା ମାଟା ରାସ୍‍ତୁ ଏମେକାର୍ ଏଣ୍ତେସ୍‌କି ପ୍ରବୁଦି ସେବାକିଜି ସାନାସନାର୍, ୱାର୍‌ ଦନ୍ୟ ।” ମାରି ନାନ୍‌ ୱେର୍‌ଆ, ତାଗ୍‍ଇଆତ୍ମା ଇଜିନାତ୍, “ଇକା ଏଣ୍ତେସ୍‌ବା ଗଟାନାତ୍ । ୱାର୍‌ ନିଜେ ନିଜେଦି କାସ୍ଟୁପାଣିଦାନ୍‌ ରମ୍‌ନାର୍‌, ଇରିଙ୍ଗ୍‌ ୱାରି ପାଣି ୱାରି ଲାକ୍‌ତୁ ଆନାତ୍‌ ।”
REV 14:14 ତାନିୱେନ୍‌କା ନାନୁ ସୁଡ଼ୁତା, କାଣ୍ତେକ୍ ଅଡ଼ିନି ବାଦଡ଼ ମାରି ତାନି ମୁସୁକୁ ବାସ୍ତାମାନାନ୍‌ ମନୁସ୍ୟପୁତ୍ର ୱାଜା ଅରେନ୍‌; ୱାନି ତାଲାଦୁ ବାଙ୍ଗାଁରାମ୍‌ତି ମୁକୁଟ୍ ମାରି କିୟୁଦୁ ଦାରାଦି କଏର୍‌ ।
REV 14:15 ମନ୍ଦିର୍‌ତାନ୍ ମାରି ଉନ୍‌ଡ୍ରି ଦୁତ୍‍ ସୋସିୱାଜି ବାଦଡ଼ପିଡ଼ିକ୍‌ତିମାନି ଲୋକ୍‌ତିଙ୍ଗ୍‌ ନାଣ୍ତଆଉଲିଆଜି ଇର୍ହାନ୍‌, “ନି କଏର୍‌ ଆସ୍‌ସି ପାସି କୟ୍‌ଆ । ଦୁନିଆଦି ପାସି ଉଣ୍ତାକିଦେଙ୍ଗ୍‌ ଟିକ୍ ବେଡ଼ା ଇଗା ୱାତାମାନାତ୍‌ ।”
REV 14:16 ଇକା ୱେନ୍‌ଜି ବାଦଡ଼ପିଡ଼୍‌ତି ଲୋକୁ ୱାନି କଏର୍‌ ଆସ୍‌ପିସ୍‌ସି ମାରି ଦୁନିଆଦି ପାସି ୱିଜୁ ଉଣ୍ତାତାତ୍‌ ।
REV 14:17 ତାନିୱେନ୍‌କା ନାନୁ ସୁଡ଼ୁତା, ମାରି ଉନ୍‌ଡ୍ରି ଦୁତ୍‍ ମୁସ୍‌କୁପୁର୍‌ତି ମନ୍ଦିର୍‌ତାନ୍‌ ୱାଜିନାନ୍, ୱାନି କିୟୁଦୁ ବା ଉନ୍‌ଡ୍ରି ଦାରାଦି କଏର୍‌ ମାର୍ହାତ୍‌ ।
REV 14:18 ତାନିୱେନ୍‌କା ବେଦିଦି ସିସୁ ଦାଇତ୍‌ତାନ୍‌ ମାନି ଉଣ୍ତ୍ରି ଦୁତ୍‍ କଏର୍‌ ଆସ୍ତିମାନି ମାରିଉଣ୍ତ୍ରି ଦୁତଦିଙ୍ଗ୍‌ ଆଉଲି ଆଜି ଇର୍ହାନ୍‌, “କଏର୍‌ ଆସ୍‌ସି ଦୁନିଆଦି ଅଙ୍ଗୁର୍‍ କିଡ଼ିଇଦାନ୍‌ ଅଙ୍ଗୁର୍‍ ୱିଜୁ କୋୟ୍‌ଜ ପୋକ୍‌ଆ; ଆୟାୱିଜୁ ପାଣ୍ତିତେମାନେ ।”
REV 14:19 ଆବେଟ୍‌ତାନ୍‌ ଦୁତ୍‍ ଦୁନିଆଦୁ ୱାନି କଏର୍‌ ଆସ୍‌ସି ଅଙ୍ଗୁର୍‍ ତିୱେଙ୍ଗ୍‌ଣ୍‌କୁ ଅଙ୍ଗୁର୍‍ କୋୟ୍‌ଜି ଉଣ୍ତା କିତାନ୍‌ ମାରି ଆୟାୱିଜୁ ମାପୁରୁଦି ନାଣ୍ତ ରିସାଦି ଅଙ୍ଗୁର୍‍ ପିର୍‌ନି କୁଣ୍ତ୍‌ଦୁ ପୋକ୍‍ତାର୍ ।
REV 14:20 ଗାଡ଼୍‌ତି ଆତେରେ ମାନି ଆୟା କୁଣ୍ତ୍‌ଦୁ ଅଙ୍ଗୁର୍‍ କାଙ୍ଗ୍‌ ପିରିତାର୍ ମାରି ଆବେଟ୍‌ତାନ୍‌ ନେତେର୍‌ ସୋସି ଗଡ଼େଙ୍ଗାଁ ୱେୟୁ ସାନ୍ଧି ୩୦୦ କିଲୋମିଟର୍‌ତାନ୍‌ ପୁରା ନିରିକା ମାରି ପୁରା ଦୁଇ ମିଟର୍‌ ମୁସୁକୁ ନିଙ୍ଗିଁଜି ନେତେର୍‌ ୱାତାତ୍‌ ।
REV 15:1 ତାନିୱେନ୍‌କା ନାନୁ ବାଦଡ଼ତୁ ମାରି ଉଣ୍ତ୍ରି କାବାଆନି ସିନା ସୁଡ଼ୁତା । ସାତ୍‌ଗୋଟା ଦୁତ୍‌କୁ, ୱାରି କିୟୁଦୁ ସାତ୍‌ଗୋଟା କାସ୍ଟୁଙ୍ଗୁଁ, ଇକାନେ ସାରାସାରି, ଇରିଙ୍ଗ୍‌ ଇୟା କାସ୍ଟୁଦିଙ୍ଗାଁ ମାପୁରୁଦି ରିସା ୱିଜିତାତ୍‌ ।
REV 15:2 ତାନିୱେନ୍‌କା ନାନୁ ସୁଡ଼ୁତା, ଏଣ୍ତେସ୍‌ ସିସୁମିସାତି ଉଣ୍ତ୍ରି କାୟାଦି ସାମୁଦୁର୍ ୱାଜା । ଆୟା ସାମ୍‌ଦୁରୁତି ଟିପୁବାଡିଦୁ ନିର୍‌ଆ ମାର୍ହାର୍‌ ଜିଣାତି ଲୋକୁ ଇୟାକାର୍‌ ମାପୁରୁଦି ଟଇଲା ଆସ୍‌ସି, ଜାତୁ, ଜାତୁଦି ମୁର୍ତି ମାରି ମୁସ୍‌କୁରି ଇସାବ୍‌ଦାନ୍‌ ନେସ୍‌ତିମାନି ଆୟା ତାଗ୍‌ଇଆତ୍ମା ମୁସ୍‌କୁ ଜିଣାତାମାର୍ହାର୍‌ ।
REV 15:3 ୱାର୍‌ ମାପୁରୁ ସିତିମାନି ଟଇଲା ଏସ୍‌ସି ମାପୁରୁଦି ସେବାକିନିକାନ୍‌ ମୋସାଦି ପାଟା ମାରି ମେଣ୍ତାପିଲାଦି ପାଟା ପାରିଜିମାର୍ହାର୍‌ । “ଏ ସର୍ବସାକ୍ତିମାନ୍ ମାପୁରୁ ! ନି ସାରିୱିଜୁ ଏସ ପେରିକା ମାରି କାବାଆନିକା, ୱିଜୁ ଲୋକା ଜାତିଦୁ ରାଜାଦି ରାଜା ! ନି ପାଣିୱିଜୁ ଏସ ନ୍ୟାୟ୍‌ ନି ସତ୍‌ ।
REV 15:4 ଏ ପ୍ରବୁ ! ଏନ୍‌ ନିଙ୍ଗିଁ ତିଲାଏନ୍‌ ? ଏନ୍‍ ନି ଦର୍‍ତି ଦନ୍ୟବାଦ କିଏନ୍‌ ? କେବଲ୍‌ ନିନୁ ନେ ପବିତ୍ର, ୱିଜୁ ଲୋକୁ ୱାଜି ନି ପୁଜାକିନାର୍ । ଇରିଙ୍ଗ୍‌ ନି ନ୍ୟାୟ୍‌ ପାଣି ୱିଜୁ ୱିଜେରେ ସୁଡ଼ୁତାମାନାର୍‌ ।”
REV 15:5 ତାନିୱେନ୍‌କା ମୁସ୍‌କୁପୁର୍‌ତି ସାକି ମନ୍ଦିର୍‌ ସେର୍‍ଲା ରେଆୟ୍‌ଆନିକା ନାନୁ ସୁଡ଼ୁତା । ଆବେନୁ ମାପୁରୁଦି ତେବାନି ଗୁଡ଼ା ମାର୍ହାତ୍‌ ।
REV 15:6 ସାତ୍‌ଗୋଟା କାସ୍ଟୁସିନିକା ଆସ୍ତିମାନି ସାତ୍‌ଗୋଟା ଦୁତ୍‍କୁ ମୁସ୍‌କୁପୁର୍‌ତି ମନ୍ଦିର୍‌ତି ଲୋଇରାନ୍‌ ସୋସି ୱାତେ; ୱାକ୍‌ ନେଗି ଅଡ଼ିନି ଆଙ୍ଗିଁଙ୍ଗ୍‌ ଆରାତେ ମାରେଏ ମାରି ବକାଦୁ ବାଙ୍ଗାଁରାମ୍‍ତି ବେଲୁଟୁ ତର୍‌ଆୟ୍‌ଆତା ମାର୍ହାର୍‌ ।
REV 15:7 ଆବେନୁ ନାଲିଗି ଜାତୁଙ୍ଗାଁ ଲୋଇରାନ୍‌ ଉନ୍‌ଡ୍ରି ଜାତୁ ୱିଜୁଦିନ୍‌ତି ମାପୁରୁଦି ରିସାଦୁ ପୁରାବର୍ତି ସାତ୍‌ଗୋଟା ବାଙ୍ଗାଁରାମ୍‍ତି ଡୁବାଇଙ୍ଗୁଁ ଆୟା ସାତ୍‌ଗୋଟା ଦୁତ୍‍କାଙ୍ଗ୍‌ ସିତାନ୍‌ ।
REV 15:8 ମାପୁରୁଦି ଗୌରବ୍‍ ମାରି ସାକ୍ତିଦି ଗୋଇତାନ୍‌ ମନ୍ଦିର୍‌ ପୁରାବର୍ତି ଆତାତ୍; ସାତ୍‌ଗୋଟା ଦୁତ୍‍କୁ ଆସ୍‌ତି ୱାତିମାନି ସାତ୍‌ଗୋଟା କାସ୍ଟୁଙ୍ଗୁଁ ୱିଜ୍‌ଇ ସାନ୍ଧି ଏନ୍‌ ମନ୍ଦିର୍‌ତୁ ଡ଼ୁଗୁଦେଙ୍ଗ୍‌ ଆଟ୍‌ଏତାର୍‌ ।
REV 16:1 ତାନିୱେନ୍‌କା ନାନୁ ୱେର୍‌ଆ, ମନ୍ଦିର୍‌ତାନ୍‌ ଏନ୍‌ ଅରେନ୍‌ ଆଉଲି ଆଜି ଆୟା ସାତ୍‌ଗୋଟା ଦୁତ୍‌କାଙ୍ଗ୍‌ ୱେର୍‌ସିନାନ୍‌, “ସାଙ୍ଗ୍‌ଆ, ସାତ୍‌ଗୋଟା ଡୁବାଇଦୁ ମାନି ମାପୁରୁଦି ରିସା ଦୁନିଆଦୁ ମୁସ୍‌କୁ ୱାକ୍‍ସୋ ସିଦୁ ।”
REV 16:2 ଇକା ୱେନ୍‌ଜି ପାର୍‌ତୁମ୍‌ ଦୁତ୍ ସୋଲ୍‌ସି ୱାନି ଡୁବାଇଦୁ ଆମାକା ମାର୍ହାତ୍‌, ଦୁନିଆଦୁ ମୁସ୍‌କୁ ୱାକ୍‍ତାସିତାତ୍‌ । ଦାପେ ଦାପେ ଏମେକାର୍ ଜାତୁଦି ସିନା ଆସ୍‌ତାମାର୍ହାର୍‌ ମାରି ଆୟାତାନି ମୁର୍ତିଦିଙ୍ଗ୍‌ ପୁଜା କିତାମାର୍ହାର୍‌, ୱାରି ମେନ୍ଦଲତାନ୍ ନାଣ୍ତ କାସ୍ଟୁଦାନ୍‍ ଗାଉ ସୋତାତ୍ ।
REV 16:3 ତାନିୱେନ୍‌କା ମାରିଉନ୍‌ଡ୍ରି ଦୁତ୍‌ ତାନି ଡୁବାଇଦିଙ୍ଗ୍‌ ସାମ୍‌ଦୁର୍‌ ମୁସୁକୁ ୱାକ୍‌ତା ସିତାତ୍ । ସାମ୍‌ଦୁର୍‌ତି ଏରୁ ସାତି ଲୋକାଦି ନେତେର୍ ୱାଜା ଆତାସରାତ୍ ମାରି ସାମ୍‌ଦୁର୍‌ତି ୱିଜୁ ଏର୍‌ତୁ ଜିଜିମାନିକେଙ୍ଗ୍‌ ସାତେସର୍‌ଏ ।
REV 16:4 ତାନିୱେନ୍‌କା ତିନି ନମ୍ୱର୍‌ତି ଦୁତଦି ଡୁବାଇଦୁ ଏମେକା ମାର୍ହାତ୍, ଆକା ୱାଦ୍‌ ଗାଡ଼୍‌ ମାରି ଜଲେଙ୍ଗାଁ ମୁସୁକୁ ୱାକ୍‍ତା ସିତାତ୍ ମାରି ଆୟାୱିଜୁ ଏରୁ ନେତେର୍‍ତୁ ମିସାତେ ।
REV 16:5 ନାସ୍ତିୱାଲେ ନାନ୍‌ ୱେର୍‌ଆ, ଏରୁଦୁ ଦାଇତି ମାନି ଦୁତ୍‍ ଇଜିନାତ୍, “ନିନୁ ପବିତ୍ର, ନିନୁ ଇଲେଇ ମାରି ସର୍‌ଇଦିନ୍‌ତୁ; ନିନୁ ସାମାନ୍‌ ବିଚାର୍‌ କିତିମାନି ।
REV 16:6 ୱାର୍‌ ମାପୁରୁଦି ଲୋକାଙ୍ଗ୍‌ ମାରି ବାବବାଦିରିଙ୍ଗ୍ ଏମେ କାତ୍‌ସି ନେତେର୍‌ କିତାମାର୍ହାର୍‌, ଆକା ନିନ୍‌ ୱାରିଙ୍ଗ୍‌ ଉଟ୍‍ପିସ୍‌ କିତିମାନି । ୱାରି ପାଣି ୱାର୍‌ ପୋଇତାମାନାର୍‌ ।”
REV 16:7 ତାନିୱେନ୍‌କା ନାନୁ ବେଦିଦି ଉନ୍‌ଡ୍ରି ବଲୁ ୱେର୍‌ଆ, “ପ୍ରବୁ ସର୍ବସାକ୍ତିମାନ୍ ମାପୁରୁ ! ନି ବିଚାର୍ ଟିକ୍‌ ମାରି ନ୍ୟାୟ୍‍ତିକା ।”
REV 16:8 ତାନିୱେନ୍‌କା ନାଲିଗି ନମ୍ୱର୍‌ତି ଦୁତ୍‍ ତାନି ଡୁବାଇଦୁ ମାନି ଜିନିସ୍‌ଦିଙ୍ଗ୍‌ ୱେଡ଼ା ମୁସ୍‌କୁ ୱାକ୍‍ତା ସିତାତ୍ । ତାନିୱେନ୍‌କା ୱେଡ଼ା ନାଣ୍ତତାତିଆଜି ଲୋକାଙ୍ଗ୍‌ ସାପିସ୍ତାତ୍‌ ।
REV 16:9 ଇବେଟ୍‌କୁ ୱାର୍‌ ରିସାଆଜି କାସ୍ଟୁ ମୁସ୍‌କୁ ଅଦିକାର୍‌ ମାନି ମାପୁରୁଙ୍ଗୁଁ ଆନାଦୁରିଆ ସିତାର୍; ମାତର୍‌ ମୋନ୍‌ ବାଦେଲେ କିଜି ୱାନି ମହିମା ମାନାଏତାର୍ ।
REV 16:10 ତାନିୱେନ୍‌କା ପାସ୍‌ ନମ୍ୱର୍‌ତି ଦୁତ୍ ତାନି ଡୁବାଇଦିଙ୍ଗ୍‌ ଜାତୁଦି ସିଂହାସନ୍‌ଦି ମୁସ୍‌କୁ ୱାକ୍‌ତା ସିତାତ୍ । ଜାତୁଦି ଦେସ୍‌ ମୁସ୍‌କୁ ସିକାଟି ଆତାସର୍ହାତ୍‍ ମାରି ଲୋକୁ କାସ୍ଟୁଦାନ୍ ୱାରି ୱେତଲ୍ କାଟ୍‌ତା ପକ୍‌ତାର୍ ।
REV 16:11 ୱାରି ମେନ୍ଦଲ୍‍ତି ଗାଉକା ଉଣ୍ତିଙ୍ଗ୍‌ ମାରି ନୋପି କାସ୍ଟୁଦି ଉଣ୍ତିଙ୍ଗ୍‌ ମାପୁରୁଙ୍ଗୁଁ ଆନାଦୁରିଆ ସିତାର୍ । ମାତର୍‌ ନିଜେଦି ନେଗିସାରିଦାନ୍‌ ଡ଼େସି ରେଏତାର୍‌ ।
REV 16:12 ୱିଜୁଦିନ୍‌ତି ସୋଅ ନମ୍ୱର୍‌ତି ଦୁତ୍ ପେରି ୟୁପ୍ରେଟିସ ପେରିଗାଡା ମୁସ୍‌କୁ ତାନି ଡୁବାଇତିକା ୱାକ୍‍ତା ସିତାତ୍‌ । ଦାପେ ଦାପେ ଗାଡାଦି ଏରୁ ୱାର୍‌ତେସର୍‌ଏ ମାରି ୱେଡ଼ାସୋନିତରିଟାନ୍‌ ସାତ୍ରୁ ରାଜାରି ଆଗମନ ଉଣ୍ତିଙ୍ଗ୍‌ ସାରି ରେଆତାତ୍‌ ।
REV 16:13 ତାନିୱେନ୍‌କା ନାନୁ କାପକି ୱାଜାତର୍‌ନି ମୁଣ୍ତ୍ରି ତାଗିଇଦୁବେଙ୍ଗ୍‌ ସୁଡ଼ୁତା । ଆୟାକେଙ୍ଗ୍‌ଁ ପୁର୍ବେଦି ସାରାସ୍‌, ପସୁ ମାରି ବଣ୍ତ ବାବବାଦିର୍ ୱେୟୁଦାନ୍ ସୋସିମାରେଏ ।
REV 16:14 ଆୟା ଦୁବାଆତ୍ମେଙ୍ଗ୍‌ କାବାଆନି ପାଣି ପୁରା କିଦେଙ୍ଗ୍‌ ଆଟ୍‍ନେ । ୱାର୍‌ ସର୍ବସାକ୍ତିମାନ୍ ମାପୁରୁଦି ଦିନ୍‍ତୁ ଜୁଦ୍‍ କିନି ଉଣ୍ତିଙ୍ଗ୍‌ ପୃତିବିଦି ରାଜାରିଙ୍ଗ୍‌ ଉଣ୍ତାକିନି ଉଣ୍ତିଙ୍ଗ୍‌ ସୋସିୱାତାର୍‌ ।
REV 16:15 “ୱେନ୍‌ଡ୍ରୁ ! ନାନୁ ଡଙ୍ଗାଁରେଏନ୍‌ ୱାଜା ୱାନା । ଏମେ ଲୋକୁ ଜାଗ୍ରାତ୍ ମାନିଜି ଡଙ୍ଗାଁଏର୍‌ତି ମାଡ଼ାନ୍ ନିଜେଦି ୱାତିଗୋଦା ନେଗେନ୍‌କିଜି ଇଡିନାନ୍, ୱାନ୍‌ ଦନ୍ୟ । ନାଗାଡ଼ା ଆଜି ସାଲାବୁଲା କିନି ମାଡ଼ାନ୍ ୱାନିଙ୍ଗ୍‌ ସେମାର୍ ଆଦେଙ୍ଗ୍‌ ପୋଡ଼ାଏତ୍ ।”
REV 16:16 ତାଗିଇଆତ୍ମେଙ୍ଗ୍‌ ଟିକ୍‌ ବେଡ଼ାଦୁ ପୃତିବିଦି ରାଜାରିଙ୍ଗ୍‌ ଏମେ ଜୁଦ୍‌ଦୁ ଉଣ୍ତାକିବିସ୍‍ତାତ୍‌, ଏବ୍ରି ବାସାଦାନ୍ ତାନି ଦରୁ ଅର୍ମିଗିଦ୍ଦୋନ୍‌ ।
REV 16:17 ତାନିୱେନ୍‌କା ସତ୍‌ ନମ୍ୱର୍‌ତି ଦୁତ୍ ତାନି ଡୁବାଇତି ଜିନିସ୍‌ତିଙ୍ଗ୍‌ ଗାଲିଦି ମୁସୁକୁ ୱାକ୍‍ତାସିତାତ୍ । ଆଦେଙ୍ଗ୍‌ ମନ୍ଦିର୍‌ତୁ ମାନି ସିଂହାସନ୍‌ତାନ୍ ପେରିବଲୁଦାନ୍ ଉନ୍‌ଡ୍ରି ମାଟା ୱିଙ୍ଗିଁତାତ୍, “ପାଣି ୱିଜିତାମାନାତ୍ ।”
REV 16:18 ଆୟାଦାପ୍ରେ ଲାଇନି କାସ୍‌ତାତ୍‌, ବାଦଡ଼ ଡିଡ଼ିତାତ୍‌ ମାରି ଉନ୍‌ଡ୍ରି ବୟ୍‌ଙ୍କର୍‌ ବୁମିକମ୍ପ ଆତାତ୍, ଲୋକୁ ତିଆର୍‌ଆତି ଆଗ୍‌ଡ଼ିରାନ୍‌ ଇୟାୱାଜା ବୁମିକମ୍ପ ଏସାଙ୍ଗ୍ ଆଏତ୍‌ମାର୍ହାତ୍‌; ଇକା ମାର୍ହାତ୍‌ ୱିଜୁଦି ମାଡ଼ାନ୍‌ ବୟ୍‌ଙ୍କାର୍‌ ବୁମିକମ୍ପ ।
REV 16:19 ପେରିଗାଡ଼୍‌ ମୁଣ୍ତ୍ରି ବାଗ୍‍ତାନ୍ ଅଲଗା ଆତାତ୍‌, ଦେସ୍‌ତି ୱିଜୁ ଗାଡ଼୍‌କୁ ଦ୍ୱଂସ୍‌ ଆତେସର୍‌ଏ । ମାପୁରୁ ପେରିଗାଡ଼୍‌ ବାବିଲନ୍‌ତିଙ୍ଗ୍‌ ବାଣାଏନ୍‌ ମାର୍ହାନ୍‌ । ୱାନ୍‌ ୱାନି ଉଣିଡୁବାଇତାନ୍‌ ୱାନି ନାଣ୍ତ ରିସାୱାଜା କାଡ଼ୁ ୱାନିଙ୍ଗ୍‌ ଉଟ୍‍ପିସ୍‌କିତାର୍ ।
REV 16:20 ମାରି ସାମ୍‌ଦୁର୍‌ ନାଡ଼ିମିମାନି ଦେସ୍‌କୁ ୱିଜୁ ମାର୍‌ଗିତେ ସରେଏ, ପେରି ପେରି ଗରକ୍ ୱିଜୁ ତର୍‌ଉତେ ।
REV 16:21 ୫୦ କେଜି ବଜୁଦି ପେରି କାଲୁକୁ ବାଦଡ଼ତାନ୍ ଲୋକାମୁସୁକୁ ଆର୍‍ତେ, ଲୋକୁ ଇୟା ନାଣ୍ତ କାସ୍ଟୁ ଉଣ୍ତିଙ୍ଗ୍‌ ମାପୁରୁଙ୍ଗୁଁ ଆନାଦୁରିଆ ଇଟ୍‌ତାର୍‌ ।
REV 17:1 ତାନିୱେନ୍‌କା ସାତ୍‌ଗୋଟା ଡୁବାଇଆସ୍ତିମାନି ସାତ୍‌ଗୋଟା ଦୁତ୍‌କା ଲୋଇରାନ୍‌ ଅରେନ୍‌ ନା ଲାକୁତୁ ୱାଜି ଇର୍ହାନ୍‌, “ଇବେନୁ ରାଆ ! ନାଣ୍ତ ଗାଡେଆଙ୍ଗ୍‌ଁ ଲାକୁତୁ ତିଆର୍‌ ଆତିମାନି ଦାରିପାଣି ୱାଜା ଆୟା ପେରିଗାଡ଼୍‌ ଏସ ଦଣ୍ତ୍‌ ପୋଇନାତ୍‌, ଆକା ତୋର୍‌ନା ।
REV 17:2 ଆମାୱାନି ୱାଲେ ଦୁନିଆଦି ରାଜାର୍‌ ଆୟା ଦାରିପାଣିଦି କିତାମାନାର୍‌ ମାରି ପୃଥିବିଦି ଲୋକ୍‌ ୱିଜେରେ ୱାନି ଦାରିପାଣିୱାଜା କାଡ଼ୁ ଉଣୁଜି ସୋସତା ମାନାର୍‌ ।”
REV 17:3 ନାସ୍ତିୱାଲେ ପବିତ୍ରଆତ୍ମା ନାମାନୁ ବାସାତାତ୍‌ ମାରି ଆୟା ଦୁତ୍ ନାଙ୍ଗିଁ ଉଣ୍ତ୍ରି ବାଲିଜାଗାଦୁ ଅତାତ୍ । ଆବେନୁ ନାନୁ ସୁଡ଼ୁତା, ଅରେତ୍ ଆଇମା ଲୋକୁ ଉଣ୍ତ୍ରି ଲାଲ୍ ରଙ୍ଗ୍‌ତି ଜାତୁ ମୁସୁକୁ ବାସ୍‌ତାମାନାତ୍ । ଜାତୁଦି ୱିଜୁମେଦଲ୍‍ତୁ ମାପୁରୁଦି ନିନ୍ଦାସିନି ଦର୍‌କୁ ରାସାତେମାନେ ମାରି ତାନିଙ୍ଗ୍‌ ସାତ୍‌ଗୋଟା ତାଲେକ୍ ମାରି ଦାସ୍‌ଗୋଟା କମୁକୁ ମାନେ ।
REV 17:4 ଅରେତ୍ ଆଇମା ସେର୍‍ଗାନାନିକା ମାରି ପୁରା ଲାଲ୍ ରଙ୍ଗ୍‌ତି ୱାତି ପିଡ଼ିଗିତାମାର୍ହାତ୍‌ ମାରି ବାଙ୍ଗାଁରାମ୍‍ତି ସରେଙ୍ଗ୍‌, ନାଣ୍ତଦାରାଦି ମଣିମାଣିକ ମାରି ୱେଡିଦାନ୍‌ ଆରାତାମାର୍ହାତ୍ । ୱାନି ନାସ୍ଟୁକିନି ପଲ୍‌ ୱାଜା ଦାରିପାଣି ନି ତାଗ୍‍ଇ ବିସୟୱିଜୁ ଉଣ୍ତ୍ରି ବାଙ୍ଗାଁରାମ୍‌ତି ଡୁବାଇ ୱାନ୍‌ ଆସ୍ତାମାର୍ହାନ୍‌ ।
REV 17:5 ତାନି କାପାଲ୍‌ତୁ ଉନ୍‌ଡ୍ରି ମାର୍‌ଗିତିମାନି ଦର୍‌ ରାସାତାମାନାତ୍, “ପେରି ବାବିଲନ୍, ଦୁନିଆଦି ୱିଜୁ ଦାରିପାଣି ମାରି ନାସ୍ଟୁକିନିୱାରି ଆଇସି ।”
REV 17:6 ନାନୁ ମାରି ସୁଡ଼ୁତା, ଆୟା ଆଇମା ସାଦୁରି ମାରି ଜିସୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ତେବାଜି ସାତି ମାନି ଲୋକାରି ନେତେର୍ ଉଣୁଜି ସୋସ୍‍ତାମାରାତ୍ । ତାନିଙ୍ଗ୍‌ ସୁଡ଼ିଜି ନାନୁ କାବାଆତା ସୋର୍‌ଆ ।
REV 17:7 ଦୁତ୍‍ ଇର୍ହାତ୍, “ଏନ୍ଦାନିଙ୍ଗ୍‌ କାବାଆଜିନି ? ଆୟା ଆଇମା ମାରି ସାତଗୋଟା ତାଲେକ୍ ମାରି ଦାସ୍‌ଗୋଟା କମୁକୁ ୱାଦ୍‌ ବୁଲାନି ଜାତୁଦି ମାର୍‌ଗିତିମାନି ଅର୍ତ ନାନୁ ନିଙ୍ଗିଁ ଇଜିନା, ୱେନ୍ଆ !
REV 17:8 ଜାତୁ ଅର୍‍ଲେନ୍‍ ଜିତାମାର୍‌ଆତ୍‌; ଇଲେ ମାରି ଜିଏତ୍‌, ମାତର୍‌ ଆୟାଦାପ୍ରେନେ ପାତାଲ୍‍ପୁର୍‌ତାନ୍ ନିଙ୍ଗିଁଜି ୱାନାତ୍‌ ମାରି ଉଣ୍ତ୍ରି ଦେବା ନାସ୍ଟୁ ଆନାତ୍ । ତିଆର୍‌ଆତି ପୁର୍ବେଦାନ୍‌ ଏମେୱାରି ଦରୁକୁ ଜିବନ୍‌ ବଇଦୁ ରାସାଏତ୍, ଦୁନିଆଦି ଲୋକୁ ଆୟାୱିଜେରେ ଜାତୁଦିଙ୍ଗ୍‌ ସୁଡ଼ିଜି କାବାଆତାର୍‌ । ୱାଦ୍‌ ଅର୍‍ଲେନ୍‍ ଜିବନ୍‌ ମାର୍ହାତ୍, ଇଲେଇ ମାରି ସିଲେତ୍‌, ମାତର୍‌ ମାରିଡ଼େସି ୱାଦ୍‌ ୱାନାତ୍‌ ।
REV 17:9 “ଇୟାୱିଜୁ ବିସୟ୍‌ ବୁଜାନି ଉଣ୍ତିଙ୍ଗ୍‌ ବୁଦି ଦରକାର୍ । ଜାତୁଦି ସାତ୍‌ଗୋଟା ତାଲେକ୍ ସତ୍‌ତାନ୍‌ ସାତ୍‌ଗୋଟା ଗୋରକ୍, ଏମେ ମୁସୁକୁ ଆଇମା ବାସ୍ତାମାର୍ହାତ୍‌ । ଆୟାୱିଜୁ ବା ସାତ୍‌ଗୋଟା ରାଜାରି ସିନେଙ୍ଗ୍‌ ।
REV 17:10 ୱାରି ଲୋଇରାନ୍‌ ପାସ୍‌ ଲୋକୁ ସାତା ସରାମାନାର୍‌ । ଅରେନ୍‌ ଇଲେ ସାସନ୍‌ କିଜିନାନ୍, ମାରି ଅରେନ୍‌ ଇଲେ ସାନ୍ଦି ରେଏନ୍‍ନେ । ୱାନ୍‌ ୱାଜି ସାଣେକ୍‌ତି ଉଣ୍ତିଙ୍ଗ୍‌ ସାସନ୍‌ କିନାନ୍
REV 17:11 ମାରି ଆମା ଜାତୁ ଅର୍‍ଲେନ୍‍ ଜିତାମାର୍ହାତ୍, ମାତର୍‌ ଇଲେ ମାରି ସିଲେତ୍‌, ୱାନ୍‌ ଆଜିନାତ୍ ଆଟ୍‌ ନମ୍ୱର୍‌ ରାଜା; ଆୟା ସାତ୍‌ଗୋଟା ରାଜାରି ଲୋଇରାନ୍‌ ଅରେନ୍‌ ମାରି ୱାନ୍‌ ବା ବେଗି ସାନାସନାନ୍ ।
REV 17:12 “ମିର୍‌ ସୁଡ଼ିତିମାନି ଦାସ୍‌ଗୋଟା କମୁକୁ, ଦାସ୍‌ଗୋଟା ରାଜାରି ସିନେଙ୍ଗ୍‌, ୱାର୍‌ ଇୟାସାନ୍ଦି ସାସନ୍‌ କିଏର୍‌ । ମାତର୍‌ ଜାତୁ ୱାଲେ ସାସନ୍‌ କିନି ଉଣ୍ତିଙ୍ଗ୍‌ ଉନ୍‌ଡ୍ରେ ଗନ୍‌ଟା ଉଣ୍ତିଙ୍ଗ୍‌ ୱାରିଙ୍ଗ୍‌ ଅଦିକାର୍‌ ସିଆୟ୍‌ଆନାତ୍ ।
REV 17:13 ଇୟା ଦାସ୍ ଲୋକା ରାଜାରି ଉଦେସ୍‌ ଉନ୍‌ଡ୍ରେ । ୱାର୍‌ ନିଜେଦି ୱିଜୁ ସାକ୍ତି ମାରି ଅଦିକାର୍ ଜାତୁଦିଙ୍ଗ୍‌ ସର୍ପେ କିନାର୍ ।
REV 17:14 ୱାର୍‌ ମେଷସାବକଦି ବିରୁଦ୍‌ତାନ୍ ଜୁଦ୍‍ କିନାର୍; ମାତର୍‌ ମେଷସାବକ ୱାନି କୁକାୟ୍‌ଆତାମାନା, ବାସେଆତାମାନା, ବୁଲାନିକାର୍ ମାରି ବିସ୍‌ବାସ୍‌ତି ଲୋକା ସାହାଜ୍ୟଦାନ୍ ୱାରିଙ୍ଗ୍‌ ଆରାକିନାର୍ । ଇରିଙ୍ଗ୍‌ ୱାନ୍‌ ପ୍ରବୁରି ପ୍ରବୁ ମାରି ରାଜାରି ରାଜା ।”
REV 17:15 ଦୁତ୍ ନାଙ୍ଗିଁ ମାରି ଇର୍ହାତ୍‌, “ନିନ୍‌ ଏମେ ଏରୁତୁମାନିକେଙ୍ଗ୍‌ ସୁଡ଼ୁତି, ଏମେ ମୁସୁକୁ ଆୟା ଦାରିପାଣିକିନିକାତ୍‌ ବାସ୍ତାମାର୍ହାତ୍, ଆକା ଆଜିନାତ୍ ଆଇ ଆଇ ଦେସ୍, ଜାତି, କୁଟୁମ୍‌ ମାରି ଭାସାବାସିଦି ଲୋକୁ ମାନାର୍‌ ।
REV 17:16 ମିର୍‌ ସୁଡ଼ିତିମାନି ସାତ୍‌ଗୋଟା କମୁକୁ ମାରି ଆୟା ଜାତୁ, ଦାରିପାଣିଦିଙ୍ଗ୍‌ କାଡ଼୍‌ନାର୍‌; ୱାର୍‌ ତାନିମାଡ଼ାନ୍‌କୁ ତାନି ୱିଜୁ ଡ଼ିବିସ୍‍କିଜି ଅସି ତାନିଙ୍ଗ୍‌ ନାଗାଡ଼ା କିଜି ଡ଼ିସ୍‍ନାସିନାର୍ । ୱାର୍‌ ତାନି କାଣ୍ତା କୁତ୍‌ସି, ତାନିଙ୍ଗ୍‌ ସିସୁଦୁ ପୋକ୍‌ସି ଦଂସ କିନାର୍‌ ।”
REV 17:17 ଇରିଙ୍ଗ୍‌ ମାପୁରୁ ନିଜେଦି ଉଦେସ୍‌ ପୁରାକିନି ଉଣ୍ତିଙ୍ଗ୍ ୱାରିଙ୍ଗ୍‌ ଇୟା ଆଦେସ୍‌ ସିତାମାନାନ୍‌ । ୱାର୍‌ ଉନ୍‌ଡ୍ରେ ମୋନ୍‌ଆଜି ପାଣି କିନାର୍ ମାରି ମାପୁରୁଦି ବାକ୍ୟ ସତ୍‌ତାନ୍‌ ପୁରାଆଇ ସାନ୍ଧି ଦେସ୍‍ତି ସାସନ୍‌ ବଜୁ ଆୟା ଜାତୁ କିୟୁଦୁ ଡ଼ିସ୍‍ନାସିନାର୍ ।
REV 17:18 ନିନ୍‌ ଏମେ ଆଇମାଦିଙ୍ଗ୍‍ ସୁଡ଼ୁତି, ୱାଦ୍‌ ଆଜିନାତ୍, ଦୁନିଆଦି ରାଜାରି ମୁସୁକୁ ସାସନ୍‌ କିଜିମାନି ଆୟା ପେରିଗାଡ଼୍‌ ।
REV 18:1 ତାନିୱେନ୍‌କା ନାନୁ ମାରି ଉନ୍‌ଡ୍ରି ଦୁତ୍‌ଦିଙ୍ଗ୍ ମୁସ୍‌କୁପୁରୁତାନ୍ ରେତାଜି ୱାଜିନିକା ସୁଡ଼ୁତା । ୱାଦ୍‌ ନାଣ୍ତସାକ୍ତିଦିକାତ୍ ମାରାତ୍ ମାରି ତାନି ମହିମାଦାନ୍‌ ସାରାଦୁନିଆଦିଙ୍ଗ୍‌ ଜାୟ୍‌ କିଜିମାରାତ୍ ।
REV 18:2 ୱାଦ୍‌ ପେରି ବଲୁଦାନ୍ ଇଜିନାତ୍, “ୱାନିଦି ସାନିକା ଗଟାତାତ୍ । ପେରି ବାବିଲନ୍ ଦଂସ ଆତାମାନାତ୍ ! ଆକା ଇଲେଇ ଦୁକି ମାରି ତାଗ୍‍ଇ ଦୁବେଙ୍ଗ୍‌ ମାନି ଜାଗା ଆତାମାନାତ୍‌ । ୱିଜୁ ଜାତି ଅସୁଚି ମାରି କାଡ଼୍‌ନି ପୋଟିଙ୍ଗ୍ ଆବେନୁ ବାସା ତୋରିସି ମାନେ ।
REV 18:3 ଇରିଙ୍ଗ୍‌ ୱାଦ୍‌ ସାରା ପୃତିବିଦି ଜାତିଦି ଲୋକାଙ୍ଗ୍‌ ତାନି ସାକ୍ତି କାମୋଦିପକ ସୁରା ଉଟ୍‌ପିସ୍‌କିଜି, ପୃତିବିଦି ରାଜାରିଙ୍ଗ୍‌ ୱାନି ୱାଲେ ଦାରିପାଣିଦି ପାପ୍‍ଦୁ ମିସା କିତାମାନାତ୍, ପୃତିବିଦି ବେପାର୍‍ଙ୍ଗୁଁ ୱାନି ୱେଡ଼ିକାଦି ଉଣ୍ତିଙ୍ଗ୍‌ ଦନି ଆତାମାନାର୍‌ ।”
REV 18:4 ତେନିୱେନ୍‌କା ନାନୁ ୱେର୍‌ଆ, ମୁସ୍‌କୁପୁର୍‌ଦାନ୍‌ ଆଇ ଉଣ୍ତ୍ରି ମାଟା ୱେଙ୍ଗିଁଜିନାତ୍ : “ନା ଲୋକୁ ୱିଜେରେ ସୋସି ରାଦୁ ! ତାନି ଲାକୁତୁରାନ୍ ସୋସି ରାଦୁ ! ମିର୍‌ ତାନି ପାପ୍‍ଦୁ ମାରି ମିସାଜ ମାନାମାଟ୍‍ନି; ୱାଦ୍‌ ଆମା ସାସ୍ତି ପୋଇନାତ୍‌, ଆବେନୁ ମିସାମାଟ୍ !
REV 18:5 ତାନି ପାପ୍‌ୱିଜୁ ମୁସ୍‌କୁପୁର୍‌ ସାନ୍ଦି ନିଙ୍ଗିଁଜିନାତ୍ । ତାନି ପାପ୍‍ପାଣି ୱିଜୁ ମାପୁରୁ ମନ୍‍ତୁ ଇଟ୍‌ତାମାନାନ୍‌ ।
REV 18:6 ୱାଦ୍‌ ଏଣ୍ଡେସ୍ ମି ଉଣ୍ତିଙ୍ଗ୍‌ ବ୍ୟବହାର୍‌ କିତାମାନାନ୍‌, ମିର୍‌ ତାନି ଉଣ୍ତିଙ୍ଗ୍‌ ଟିକ୍ ଆୟାୱାଜା ବ୍ୟବହାର୍‌ କିଦୁ । ୱାଦ୍‌ ଆମାକା କିତାମାନାନ୍‌, ୱାନିଙ୍ଗ୍‌ ତାନି ଦୁଇଗୁଣ ଦଣ୍ଡ୍‌ ସିଦୁ । ମିଙ୍ଗିଁ ଉଟ୍‍ପିସ୍‍କିନି ଉଣ୍ତିଙ୍ଗ୍‌ ୱାଦ୍‌ ଆମା ଏରୁ ତିଆର୍‍ କିତାମାର୍ହାତ୍‌, ଆୟାତାନି ଦୁଇଗୁଣ ସୁରିୱାର୍‌ଗିନି ଏରୁ ୱାନି ଉଣିଡୁବାଇଦୁ ବର୍ତି କିଦୁ ।
REV 18:7 ୱାଦ୍‌ ନିଜେଦିଙ୍ଗ୍‌ ଏସ ଗୌରବ୍‌ କିଜିମାର୍ହାତ୍‌ ମାରି ୱେଡ଼ିକାଦୁ ୱେଡ଼ିକା କିଜି ମାନିଜିମାର୍ହାତ୍‌, ଆୟା ଇସାପ୍‍ତାନ୍ ତାନିଙ୍ଗ୍‌ ଦୁଃକ୍‌ କାସ୍ଟୁ ସିଦୁ । ଇରିଙ୍ଗ୍‌ ୱାଦ୍‌ ନିଜେଦିଙ୍ଗ୍‌ ପିରିସିକିଜି ଇଜିନାତ୍, ‘ନାନୁ ଇବେନୁ ରାଣି ୱାଜା ବାସ୍‌ତାମାନା ! ନାନୁ ରାଣ୍ଡି ଆଇମା ଆଏ ।’ ନାନ୍ଦି ଏସାଙ୍ଗ୍‍ବା ଦୁଃଖ ଆଏତ୍‌ ।
REV 18:8 ତାନି ଇୟାୱିଜୁ ପାପ୍‌ ଉଣ୍ତିଙ୍ଗ୍‌ ରୋଗ୍‌, ଆଡ଼୍‌ବାନିକା, ଦୁର୍ଭିକ୍ଷ, ମହାମାରି ଅର୍‍ଲେନ୍‍ ତାନିଙ୍ଗ୍‌ ଉଣ୍ତ୍ରେ ଦେବାନେ ଡାକ୍‌ନାତ୍ । ମାରି ୱାଦ୍‌ ସିସୁଦୁ ୱିଜୁ ଦଂସ ଆନାତ୍ । ଇରିଙ୍ଗ୍‌ ତାନିଙ୍ଗ୍‌ ଏନ୍‌ ବିଚାର୍‌ କିଜିନାନ୍, ଆୟା ପ୍ରବୁ ମାପୁରୁ ୱିଜେରିଙ୍ଗ୍‌ପେରି ସର୍ବସକ୍ତିମାନ୍ ।”
REV 18:9 ଦୁନିଆଦି ଆମା ରାଜାପେରିରାଜାର୍ ତାନି ୱାଲେ ଦାରିପାଣି ନି ପାପ୍‌ପାଣି କିତାମାର୍‌ଆର୍‌, ୱାର୍‌ ତାନି ଦଂସ ଆଜିମାନି ମେନ୍ଦଲ୍‌ତାନ୍‌ ନିଙ୍ଗିଁଜିମାନି ଗୋଇ ସୁଡ଼ିଜି ଆଡ଼୍‌ବାନାର୍ ।
REV 18:10 ତାନି ଦୁଃଖ କଷ୍ଟଦୁ ମିସାଦେଙ୍ଗ୍‌ ତିଲାଜି ୱାର୍‌ ତାନି ମାଣ୍‌କୁ ନାଣ୍ତ ଆକ ନିଲ୍‍ଜି ତେବାନାର୍‌ ମାରି ହାୟ୍‌, ହାୟ୍‌ ଇଜି ଇନାର୍‌ : “ଏସ ବୟ୍‌ଙ୍କାର୍‌ ! ନିନୁ ଇନିକା ଆୟା ସାକ୍ତିମାନି ପେରିଗାଡ଼୍‌ ବାବିଲନ୍ ! ମାତ୍ର ଉଣ୍ତ୍ରି ଗୋଣ୍ଟା ଲୋଇ ଇୟାୱାଜା ସାସ୍ତି ପୋୟ୍‌ତି !”
REV 18:11 ମାରି ଦୁନିଆଦି ବେପାରାଙ୍ଗୁଁ ତାନି ଉଣ୍ତିଙ୍ଗ୍‌ ଆଡ଼୍‌ବାଜି ସିନ୍ତା କିନାର୍, ଇରିଙ୍ଗ୍‌ ମାରି ଏନ୍‌ ୱାରି ପର୍‌ନିଜିନିସ୍‌ କଡ଼ଏର୍‌,
REV 18:12 ୱାରି ବାଙ୍ଗାଁରାମ୍‍, ୱେଣ୍ତି, ହିରାକାଲୁ, ମୁକ୍ତା, ୱାରି ଇସ୍ରି ଆରାନି ଆଙ୍ଗିଁ, ସେର୍‌ଗା ରଙ୍ଗ୍‌ତି ଆଙ୍ଗିଁ ମାରି ଲାଲ୍ ରଙ୍ଗ୍‌ତି ଆଙ୍ଗିଁ; ୱିଜୁ ପ୍ରକାର୍‌ତି ଛନ୍ଦନ ୱେରୁକୁ, ଏନିପାଲ୍‌କୁଦି ୱିଜୁ ପ୍ରକାର୍‌ତି ଜିନିସ୍‌କୁ, ନାଣ୍ତଦାରାଦି ମାରାକ୍‌ଦାନ୍‌ ତିଆର୍‌ଆତି ଜିନିସ୍‌କୁ; ପିତଲ୍‌, ଲୁହା ମାରି ମର୍ମର କାଲୁ ମାର୍ବଲ୍‌ ତିଆର୍‌କିତି ୱିଜୁ ପ୍ରକାର୍‍ତି ଜିନିସ୍‌କୁ,
REV 18:13 ଦାରୁଚିନି, ଆଇଆଇ ମସଲା ଜିନିସ୍‌କୁ, ଦୁପୁଣି, ବାସ୍‌ନାଦି ଉସାନି ଜିନିସ୍‌କୁ, କୁନ୍ଦୁରୁ, ଅଙ୍ଗୁର୍‍ରସ୍‍, ନିୟୁ, ମଈଦା, ଗଦ୍‍ମୁ, ଡ଼ାକୁ, ମେଣ୍ଡେଙ୍ଗ୍‌, ଗଡ଼ା, ରତ୍‌, ଇୟାୱାଜା ଚାକର୍‍ଙ୍ଗୁଁ ମାରି ଆତ୍ମାଦୁମାନି ଲୋକାଙ୍ଗ୍‌ ବା କଣି ଉଣ୍ତିଙ୍ଗ୍‌ ଏନ୍‌ କଣିକାନ୍‌ ସୋଏର୍‌ ।
REV 18:14 ବେପାର୍‌ଙ୍ଗୁଁ ୱାନିଙ୍ଗ୍ ଇନାର୍ “‍ମି ପାଣ୍ତିତି ପଲ୍‌ ୱିଜୁ ନେଗି ଜିନିସ୍‌କୁ ଆକ ଆତାମାନାତ୍ ମାରି ମି ଦନ୍‌ସମ୍ପତିଦିଙ୍ଗ୍‌ ଆକ ଅସି ନାସ୍ଟୁ ଆତାମାନାତ୍‌, ମାରି ଏସାଙ୍ଗ୍‍ବା ଆୟାୱିଜୁ ଉଦେସ୍‍ ପୁଟ୍‌ଏତ୍‌ ।”
REV 18:15 ଆମା ବେପାର୍‌ଙ୍ଗୁଁ ଆୟା ଗାଡ଼୍‌ଦୁ ବେପାର୍‌ କିଜି ଦନି ଆତାମାର୍ହାର୍‌, ୱାର୍‌ ତାନି ଦୁଃକ୍‌ବୋଗଦୁ ମିସାଦେଙ୍ଗ୍‌ ତିଲାଜି ନାଣ୍ତ ଆକ ନିଲିଜି ତେବାନାର୍‌ ।
REV 18:16 ୱାର୍‌ ଆଡ଼୍‌ବାଜି ଇନାର୍, “ହାୟ୍‌ ! ପେରିଗାଡ଼୍‌ଦି ଅବସ୍ତା ଇଲେଇ ଏସା ବୟଙ୍କାର୍, ଏସା ଚିନ୍ତାଦି ବିସୟ୍‌ ! ୱାନ୍‌ ଇସ୍ରି ଆଙ୍ଗିଁ, ସେର୍‌ଗା ରଙ୍ଗ୍‌ତି ମାରି ଲାଲ୍‌ ରଙ୍ଗ୍‌ତି ଆଙ୍ଗିଁ ଆରାତା ମାର୍ହାତ୍‌, ମାରି ବାଙ୍ଗାଁରାମ୍‍, ହିରାକାଲୁ ମାରି ମୁକ୍ତାଦାନ୍‌ ପୁରା ଆରାତା ମାର୍ହାତ୍ ।
REV 18:17 ମାତର୍‌ ଉଣ୍ତ୍ରି ଗନ୍‍ଟା ଲୋଇ ୱାଦ୍‌ ଇୟାୱିଜୁ ସମ୍ପତ୍ତି ହାରାକିତାତ୍‌ !” ଜାହାଜ୍‍ଦି ପେରିକାନ୍‌, ସୋନିକାର୍‌, ଡଙ୍ଗାଁସାଲାକିନି ଲୋକୁ ମାରି ସାମ୍‌ଦୁର୍‌ତୁ ବେପାର୍‌କିନିକାର୍‌ ନାଣ୍ତ ଆକ ନିର୍‌ଆର୍‌ ।
REV 18:18 ମାରି କାସ୍‌ସିମାନି ଗାଡ଼୍‌ତି ଗୋଇ ସୁଡ଼ୁଜି ଇର୍ହାର୍‌, “ଇୟା ପେରିଗାଡ଼୍‌ତି ୱାଜା ମାରି ଆମା ଗାଡ଼୍‌ ସିଲେତାତ୍ ।”
REV 18:19 ୱାର୍‌ ତାଲା ମୁସୁକୁ ଦୁଡ଼ି ୱାକ୍‍ସି ଆଡ଼୍‌ବାଜି ଇର୍ହାର୍‌, “ଏସା ନାଣ୍ତ ବୟଙ୍କାର୍‌ ! ଗାଡ଼୍‌ ଇକା ଏସ ଦୁଃକ୍ କାସ୍ଟୁ ! ସାମ୍‌ଦୁର୍‌ତୁ ସୋଲ୍‌ସିମାନି ଏରୁଜାହାଜ୍‍କୁ ତାନି ଦନ୍‌ତାନ୍ ଦନି ଆତାମାର୍‌ଆର୍‌ ! ମାତର୍‌ ଉଣ୍ତ୍ରି ଗନ୍‌ଟା ଲୋଇ ଆୟାକା ଦଂସ ଆତାମାନାତ୍ !”
REV 18:20 ଏ ମୁସ୍‌କୁପୁର୍‌ଦି ଲୋକୁ ! ଆୟାକା ଦ୍ୱଂସ ଆତିମାନିଙ୍ଗ୍‌ ୱେଡ଼ିକା କିଦୁ । ଏ ସାଦୁଲୋକୁ; ପ୍ରେରିତ ସିସୁର୍‍ ମାରି ବାବବାଦିରି ! ୱେଡ଼ିକା କିଦୁ, ଇରିଙ୍ଗ୍‌ ମି ଉଣ୍ତିଙ୍ଗ୍ ୱାଦ୍‌ ଏମେକା କିତାମାରାତ୍, ଆୟାଉଣ୍ତିଙ୍ଗ୍‌ ମାପୁରୁ ତାନିଙ୍ଗ୍‌ ଦଣ୍ତ୍‌ ସିତାମାନାନ୍‌ ।
REV 18:21 ତାନିୱେନ୍‍କା ଅରେନ୍‌ ନାଣ୍ତ ସାକ୍ତିଦି ଦୁତ୍‌ ଜାତାକାଲୁଦି ୱାଜା ଉଣ୍ତ୍ରି କାଲୁ ଅସି ସାମୁଦୁର୍‌ତୁ ପୋକ୍‍ତାନ୍‌ ମାରି ଇର୍ହାନ୍‌, “ପେରିଗାଡ଼୍‌ ବାବିଲନ୍ ଇୟାୱାଜା ପୋକାଇ ଆନାତ୍ ମାରି ତାନିଙ୍ଗ୍‌ ମାରି ଏନ୍‌ ଏସାଙ୍ଗ୍‌ ବା ସୁଡ଼ୁଦେଙ୍ଗ୍‌ ଆଟ୍‍ଏର୍‌ନି ।
REV 18:22 ଇନି ଟଇଲା, ଇନି ପାଟାପାର୍‌ନିକାନ୍‌, ପିରଡ଼ି ମାରି ବାଜାମରି ଏସାଙ୍ଗ୍ ମାରି ନି ମାଣ୍‌କୁ ୱେନ୍‌ଡ୍ରେଙ୍ଗ୍‌ ଆଏତ୍ । ଆମା ତିଆର୍‌କିନିକାନ୍‌ ନି ମାଣ୍‌କୁ ମାରି ତରାୟ୍‌ଆଏତ୍‌; ମାରି ଜାତା କାଲୁଦି ଆଉଲି ବା ୱେନ୍‌ଡ୍ରେଙ୍ଗ୍‌ ଆଏତ୍‌ ।
REV 18:23 ନି ମାଣ୍‌କୁ ଏସାଙ୍ଗ୍ ଦିୱା କାସ୍‌ଏତ୍‍; ମାରି କାନ୍ୟାମୁରୁଲିଦି ଆଉଲି ୱେନାଇଆଏତ୍‌ । ଇରିଙ୍ଗ୍‌ ନି ବେପାର୍‌ଙ୍ଗୁଁ ଦୁନିଆଦୁ ନାଣ୍ତସାକ୍ତି ଆତାମାର୍ହାର୍‌ ନି ବେମ୍‌ରିଦାନ୍‌ ନିନ୍‌ ଦୁନିଆଦି ୱିଜେରିଙ୍ଗ୍ ବାୟାକିଜି ଆସ୍‌ତିମାର୍ହି ।”
REV 18:24 ମାରି ଇୟା ଗାଡ଼୍‌ତୁ ଦୁନିଆଦି ନାଣ୍ତ ବାବବାଦିର୍ ମାରି ସାଦୁର୍‌ ସାତାମାର୍ହାର୍‌ । ଇୟାୱିଜୁ ପାପ୍‌ଦି ଉଣ୍ତିଙ୍ଗ୍‌ ୱାଦ୍‌ ସାନିନାନି ଦଣ୍ଡ୍‌ ପୋଇତାତ୍ ।
REV 19:1 ତେନିୱେନ୍‌କା ନାନୁ ଆମାକା ୱେର୍‌ଆ, ଆକା ମୁସ୍‌କୁପୁର୍‌ଦୁ ଉଣ୍ତ୍ରି ପୁରାନାଣ୍ତ ଲୋକୁଦି ଆଉଲି ୱାଜା ମନେଆଜିମାରାତ୍ । ୱାର୍‌ ଇଜିମାର୍ହାର୍‌, “ମାପୁରୁଙ୍ଗୁଁ ପ୍ରସଂସା କିଦୁ । ମା ମାପୁରୁ ରକ୍‌ୟା, ଗୌରବ୍‌ ମାରି ସାକ୍ତିଦି ଅଦିକାରି ।
REV 19:2 ୱାନି ବିଚାର୍‌ ସତ୍‌ ମାରି ନ୍ୟାୟ୍‍ତିକା; ଆମା ପେରି ଦାରିପାଣି ନିଜେଦି ଦାରିପାଣିଦାନ୍‌ ଦୁନିଆଦିଙ୍ଗ୍‌ ନାସ୍ଟୁ କିତାମାର୍ହାତ୍‌, ୱାନ୍‌ ୱାନିଙ୍ଗ୍‌ ଦଣ୍ତ ସିଜି ନିଜେଦି ଦାସରି ନେତେର୍‌ତି ବାଦ୍‌ ୱାନିମାଣ୍‌କୁ ଅତାମାନାର୍‌ ।”
REV 19:3 ନାନୁ ୱେର୍‌ରା, ୱାର୍‌ ମାରି ପେରିଆଉଲିଦାନ୍ ଇଜିନାର୍‍, “ମାପୁରୁଦି ପ୍ରସଂସା ପାଟାକିଦୁ । ଆୟା ପେରିଗାଡ଼୍‌ତିଙ୍ଗ୍‌ ଦଂସ କିଜି ସିଜିମାନି ସିସୁଦି ଗୋଇ ୱିଜୁଦିନ୍‌ ମୁସୁକୁ ନିଙ୍ଗିଁଜିମାନାତ୍ ।”
REV 19:4 ସିଂହାସନ୍‌ଦୁ ବାସ୍‌ତିମାନି ମାପୁରୁଦି ଆଗ୍‌ଡ଼ି ୨୪ ଲୋକୁ ପେରିନେତାର୍ ମାରି ଆୟା ନାଲିଗି ଦୁତ୍‍କୁ ବୁମିଦୁ ମାଡ଼ିସିକିଜି ମାପୁରୁଦି ଆରାଦନା କିତାର୍ । ୱାର୍‌ ଇର୍ହାର୍‌, “ଆମେନ୍‍ ! ମାପୁରୁଦି ପ୍ରସଂସା କିଦୁ ।”
REV 19:5 ତାନିୱେନ୍‌କା ସିଂହାସନ୍‌ଦାନ୍‌ ଉଣ୍ତ୍ରି ମାଟା ୱାତାତ୍ । “ମାପୁରୁଦି ପ୍ରସଂସା କିଦୁ । ଏସ ପେରିକାନ୍, ଏସ ଲୋକୁ, ମାପୁରୁଦି ସେବାକିନିକାର୍‌ ମାରି ପାର୍‌ତାନା କିନିକାର୍‍ ୱିଜେରେ ୱାନି ପ୍ରସଂସା କିଦୁ ।”
REV 19:6 ଆୟା ବେଡ଼ାଦୁ ନାନୁ ୱେର୍‌ରା ସାମୁଦୁର୍‌ ଆଉଲି ମାରି ବାଦଡ଼ ଆଉଲିଦି ୱାଲେ ନାଣ୍ତ ଲୋକାଦି ଆଉଲି ୱାଜିନାତ୍ । ଲୋକୁ ମାରି ପ୍ରସଂସା କିଜି ଇଜିନାର୍‍, “ମାପୁରୁଦି ପ୍ରସଂସା କିଦୁ, ଇରିଙ୍ଗ୍‌ ମା ମାପୁରୁ ସର୍ବସାକ୍ତିମାନ୍ ମାପୁରୁ, ୱାନ୍‍ନେ କେବଲ୍‌ ମା ରାଜା ।
REV 19:7 ରାଦୁ, ୱେଡ଼ିକାଦୁ ୱେଡ଼ିକା କିନାଟ୍‌, ୱାନି ଗୌରବ୍‌ ପ୍ରସଂସା କିନାଟ୍ । ମେଷସାବକଦି ପେଡ଼ି ବଜି ଇଗା ୱାତାତ୍‌ନି, ୱାନି କାନ୍ୟା ଆୟାଉଣ୍ତିଙ୍ଗ୍‌ ନିଜେଦିଙ୍ଗ୍‌ ତିଆର୍‌ କିତାମାନାନ୍ ।
REV 19:8 ୱାନି ଆରାନି ଉଣ୍ତିଙ୍ଗ୍‌ ୱାନ୍‌ ଅଡ଼ିନିକା ନି ନେଗିକା ଅଡ଼ିନିଆଙ୍ଗିଁ ପୋଇତାମାନାନ୍ ।” ସାଦୁରି ନେଗିପାଣି ଆଜିନାତ୍, ଆୟା ଅଡ଼ିନିଆଙ୍ଗିଁ ।
REV 19:9 ନାସ୍ତିୱାଲେ ମୁସ୍‌କୁପୁର୍‌ ଦୁତ୍‌ ନାଙ୍ଗିଁ ଇର୍ହାତ୍‌, “ରାସ୍‌ସୋ ଇଡ୍‌ଦୁ, ଆମାକାର୍‌ ମେଷସାବକଦି ପେଡ଼ି‍ ବୋଜିଦୁ କୁକାତାମାନାର୍‍, ୱାର୍‌ କାର୍ମୁଦିକାର୍‌ ।” ୱାନ୍‌ ମାରି ବା ଇର୍ହାନ୍‌ “ଇକା ମାପୁରୁଦି କାବୁର୍ ଇକା ପୁରା ସତ୍‌ ।”
REV 19:10 ଆୟା ଦୁତ୍‌ତିଙ୍ଗ୍‌ ପୁଜାକିନି ଉଣ୍ତିଙ୍ଗ୍‌ ନାନୁ ୱାନି କାଲ୍‌କା ଆଡ୍‍ଗି ମାଡ଼ିସିକିତା । ମାତର୍‌ ୱାନ୍‌ ନାଙ୍ଗିଁ ଇର୍‌ଆନ୍‌, “ଆୟାୱାଜା କିମାଟ୍ । ମି ୱାଜା ମାରି ମି ତଡ଼ାନ୍‍କା ୱାଜା ନାନୁ ମାପୁରୁଦି ଅରେନ୍‌ ଦାସ ମାତ୍ର । ମି ୱାଜା ନାନୁ ବା ଜିସୁ ୱେର୍‌ତିମାନି ସତ୍‍ତିଙ୍ଗ୍‌ ମାନାତାମାନା । କେବଲ୍‌ ମାପୁରୁଦି ପୁଜା କିଦୁ । କେବଲ୍‌ ଜିସୁ ୱେର୍‌ତିମାନି ସାକ୍ୟ ସତ୍‌, ଭାବଭାଦିରି ମାଣାନ୍‌କୁ ସିକିୟା ସିଦୁ ।”
REV 19:11 ତାନିୱେନ୍‌କା ନାନୁ ସୁଡ଼ୁତା, ମୁସ୍‌କୁପୁର୍‍ତି ସେର୍‍ଲା ରେଆତାତ୍‌ ମାରି ଆବେନୁ ଉନ୍‌ଡ୍ରି ଅଡ଼ିନି ଗଡ଼ା । ତାନିଙ୍ଗ୍‌ ସାଲାକିନିକାନ୍‌ ବିସ୍‌ବାସ୍‌ତିକାନ୍‌ ମାରି ସତ୍‌ତି ଦରୁଦାନ୍‌ ଜାଣାସିନା । ୱାନି ବିଚାର୍‌ ନ୍ୟାୟ୍‌ତିକା ମାରି ୱାନ୍‌ ଦାର୍ମୁଜୁଦଦୁ ମିସାନାନ୍‌ ।
REV 19:12 ୱାନି କାଣୁକୁ ସିସୁଡ଼ିବୁ ୱାଜା ମାରି ୱାନି ତାଲାଦୁ ନାଣ୍ତ ମୁକୁଟ୍‌କୁ ମାରେଏ । ୱାନି ମୁସୁକୁ ଉନ୍‌ଡ୍ରି ଦରୁ ରାସାତାମାରାତ୍, ମାତର୍‌ ଆକା ଇନିକା, ୱାନିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ନେସ୍‌ଏନ୍‌ ।
REV 19:13 ୱାନ୍‌ ଆରାତିମାନି ଆଙ୍ଗିଁ ନେତେର୍‌ ଆତାମାରାତ୍ । ୱାନ୍‌ “ମାପୁରୁଦି ବାକ୍ୟ” ଇଜି ୱିଙ୍ଗିଁତାନ୍ ।
REV 19:14 ମୁସ୍‌କୁପୁର୍‌ତି ସୌନ୍ୟଦଲ୍, ନେଗିକାର୍‌, ଅଡ଼ିନିକା, ଅଡ଼ିନିଆଙ୍ଗିଁ ଆରାଜି, ଅଡ଼ିନି ଗଡ଼ାମୁସୁକୁ ଏକ୍‍ସି ୱାନି ୱେନ୍‍କା ସଲିସ୍‍ମାର୍‌ଆର୍‌ ।
REV 19:15 ୱାନି ୱେୟୁଦାନ୍ ଉନ୍‌ଡ୍ରି ଦାରାଦି କାଣ୍ତା ସୋସିମାରାତ୍ । ତାନି ସାହାଜ୍ୟଦାନ୍ ୱାନ୍‌ ଦୁନିଆଦି ୱିଜୁ ଜାତିଦିଙ୍ଗ୍‍ ସାପିସ୍‌ କିନାନ୍‌ । ମାରି ୱାରିଙ୍ଗ୍‌ ୱାଦ୍‌ ଲୁୱା ଦଣ୍ତତାନ୍ ସାସନ୍‌ କିନାନ୍‌ ମାରି ସର୍ବସାକ୍ତିମାନ୍ ମାପୁରୁଦି ନାଣ୍ତରିସାନାନି ଅଙ୍ଗୁର୍‌ତିଙ୍ଗ୍‌ ୱାନ୍‌ ପିର୍‌ନି କୁଣ୍ତିଦୁ ନିଜେ ପିର୍‌ଜି ଅଙ୍ଗୁର୍‍ରସ୍‍ ସୋପ୍‍ନାନ୍ ।
REV 19:16 ୱାନି ଆଙ୍ଗିଁ ମୁସୁକୁ ମାରି ଊରୁ ଦେସ୍‌ତାନ୍‌ ରାସାତାମାରାତ୍, “ରାଜାରି ରାଜା ମାରି ପ୍ରବୁରି ପ୍ରବୁ ।”
REV 19:17 ୱିଜୁଦିନ୍‌ ନାନୁ ସୁଡ଼ୁତା, ମାରି ଅରେନ୍‌ ମୁସ୍‌କୁପୁର୍‌ତି ଦୁତ୍‌ ୱେଡ଼ା ମୁସୁକୁ ନିର୍‌ଆମାନାନ୍‌ । ବାଦଡ଼୍‌ଦୁ ଇମିଜିମାନି ୱିଜୁ ପୋଟିଙ୍ଗାଁ ୱାନ୍‌ ନାଣ୍ତ ଆଉଲି ଆଜି ଇର୍ହାନ୍‌, “ରାଦୁ, ମାପୁରୁଦି ପେରିବଜିଦୁ ସନି ଉଣ୍ତିଙ୍ଗ୍‌ ୱିଜୁ ଉନ୍‌ଡ୍ରେମାନୁ ଆଦୁ ।
REV 19:18 ରାଜା, ପ୍ରଜା, ସୌନ୍ୟ, ସୋନ୍ୟରିପେରିକାନ୍‌, ଗଡ଼ା, ଗଡ଼ା ସାଲାକିନିକାର୍‌, ପାଣିକିନି ସାକର୍‌, ମୁକୁଡ଼ାତିକାନ୍‌, ପେରିକାନ୍‌ ମାରି ଇସ୍ରିୱାରି ଲୋକା ୱିଜେରି କାଣ୍ତା ୱାଜି ତିନ୍‌ଡ୍ରୁ ।”
REV 19:19 ତାନିୱେନ୍‍କା ନାନୁ ସୁଡ଼ୁତା, ଆୟା ଗଡ଼ା ସାଲାକିନିକାନ୍‌ ମାରି ୱାରି ସୌନ୍ୟଦଲ୍‍ତି ବିରୁଦ୍‌ତାନ୍ ଜୁଦକିନି ଉଣ୍ତିଙ୍ଗ୍ ଆୟା ପସୁ ମାରି ଦୁନିଆଦି ୱିଜେରେ ରାଜାର୍‌ ମାରି ୱାରି ସୌନ୍ୟଦଲ୍‍ ଏକଜୁଟ୍‌ ଆତାର୍‌ ।
REV 19:20 ଆୟା ଜୁଦଦୁ ପସୁ ମାରି ଆୟା ଆଗ୍‌ଡ଼ି କାବାଆନି ପାଣି କିଜିମାନି ଆୟା ବଣ୍ତବାବବାଦି ଦାରାପଡ଼ାଜି ତରାତାନ୍‌ । ଏମେୱାରିମାନୁ ପସୁଦି ସିନା ମାର୍‌ଆତ୍‌ ମାରି ଏମେକାର୍ ତାନି ବମାଦିଙ୍ଗ୍ ପୁଜା କିଜିମାର୍‌ଆର୍‌ । ପସୁ ତାନି କାବା ଆନିପାଣିଦାନ୍ ୱାରିଙ୍ଗ୍ ବେମ୍‌ରି କିଜିମାର୍‌ଆତ୍‌ ପସୁ ମାରି ଆୟା ବଣ୍ତବାବବାଦି ଗନ୍ଧକ କାସ୍‌ସିମାନି ସିସୁଦି ସାମ୍‌ଦୁର୍‌ଦୁ ଜିବନ୍‌ତାନ୍‌ ପୋକାୟ୍‌ ଆତାନ୍‌ ।
REV 19:21 ମାରି ୱାରି ସୌନ୍ୟଦଲ୍ ଗଡ଼ା ସାଲାକିନିକାର୍‌ ୱେୟୁଦାନ୍‌ ସୋସିମାନି କାଣ୍ତାଦାନ୍‌ ସାତାର୍‌; ଆବେନୁ ବାଦଡ଼୍‌ତି ପୋଟିଙ୍ଗ୍ ୱାରି କାଣ୍ତା ତିନିଜି ପଟା ପାଜିତେ ।
REV 20:1 ତାନି ୱେନ୍‌କା ନାନୁ ମାରି ଅରେତ୍ ମୁସ୍‌କୁପୁର୍‌ ଦୁତ୍‌ତିଙ୍ଗ୍ ମୁକ୍‌ପୁର୍‌ତାନ୍ ରେତାଜି ୱାନିକା ସୁଡ଼ୁତା । ୱାନି କିୟୁଦୁ ପାତାଲ୍‍ପୁର୍‌ଦି କୁସିକାଣ୍ତି ମାରି ଉଣ୍ତ୍ରି ବଜୁଦି ସିକ୍‍ଣି ମାରାତ୍ ।
REV 20:2 ୱାଦ୍‌ ଆୟା ପ୍ରାଚିନ୍ ସାରାସ୍, ଆୟା ତାଗ୍‌ଇ ସୟତାନ୍‍ତିଙ୍ଗ୍‌ ଆସ୍‌ସି ୧,୦୦୦ ବାର୍ସେକ୍ ସାନ୍ଦି ସିକ୍‌ଣିଦାନ୍ ତୋର୍‌ତା ମାର୍ହାତ୍‌ ।
REV 20:3 ମାରି ପାତାଲ୍‍କୁଣ୍ତିଦୁ ପୋକ୍‌ସି ଆୟାତାନି ସେର୍‍ଲା କେର୍‌ତାତ୍‌ ମାରି ସେର୍‍ଲା ଦେସ୍‍ତିଙ୍ଗ୍‌ ସିଲ୍‍ କିତାତ୍‌ । ହଜାର୍ ବାର୍ସେକ୍ ଜିଣାଇ ସାନ୍ଦି ୱାଦ୍‌ ମାରି ଏମେ ଦେସ୍‍ତି ଲୋକାଙ୍ଗ୍‌ ବାୟାକିଦେଙ୍ଗ୍‌ ଆଟେତ୍‍ନି । ଟିକ୍ ବେଡ଼ା ଇଗା ୱାତିଙ୍ଗ୍‍, ତାନିଙ୍ଗ୍‌ ଏସ ବେଡ଼ା ଉଣ୍ତିଙ୍ଗ୍‌ ମାରି ଉଣ୍ତ୍ରି ଦେବା ମୁକୁଡ଼ାକିନାର୍ ।
REV 20:4 ତାନିୱେନ୍‍କା ନାନୁ ସୁଡ଼ୁତା ଏସ ସିଂହାସନ୍ ମାରି ଆୟାୱାନିକାଙ୍ଗ୍‌ ବାସ୍‌ତିମାନି ଲୋକା ବିଚାର୍‍ କିଦେଙ୍ଗ୍ ଅଦିକାର୍ ସିଆୟ୍‌ଆତାମାନାନ୍‌ । ମାରି ବା ନାନୁ ସୁଡ଼ୁତା, ଏସ ଲୋକା ସାତିୱାରି ଆତ୍ମା । ଜିସୁଦି ୱେର୍‌ତିମାନି ସତ୍‌ ମାରି ମାପୁରୁଦି ବାକ୍ୟ ପ୍ରଚାର୍‌ କିତିମାନିଙ୍ଗ୍‌ ଆୟା ଲୋକୁ ସାନିଦଣ୍ତ ପୋଇତା ମାର୍ହାର୍‌ । ୱାର୍‌ ପସୁଦିଙ୍ଗ୍‌ ନି ତାନି ବମାଦିଙ୍ଗ୍ ପୁଜା କିଏର୍‌ମାର୍ହାର୍‌, ମାରି କାପାଲ୍‌ତୁ ନି କିୟୁଦୁ ପସୁଦି ସିନା ଆସ୍‌ଏର୍‌ ମାର୍ହାର୍‌ । କ୍ରିସ୍ତଦି ୱାଲେ ୧,୦୦୦ ବାର୍ସେକ୍ ସାସନ୍‌ କିନି ଉଣ୍ତିଙ୍ଗ୍ ୱାର୍‌ ପୁନିଜିବନ୍‌ ଆତାମାର୍ହାର୍‌ ।
REV 20:5 ଆୟା ୧,୦୦୦ ବାର୍ସେକ୍ ପୁରା ଆଇ ସାନ୍ଦି ଆଇ ଆମା ସାତି ଲୋକ୍‌ଦି ମାରିଡ଼େସି ନିଙ୍ଗିଁନିକା ଆଏତ୍‍ ମାର୍‌ଆତ୍‌ । ଇକା ପାର୍‍ତୁମ୍‍ ମାରିଡ଼େସି ଜିବନ୍‌ଆଜି ନିଙ୍ଗିଁକା ।
REV 20:6 ସାତି ଲୋକ୍‌ତି ଇୟା ପାର୍‍ତୁମ୍‍ ମାରିଡ଼େସି ନିଙ୍ଗିଁନିମାନୁ ଏମେକାର୍ ମିସାତାମାନାର୍‌ ୱାର୍‌ ଏସା କାର୍ମୁଦିକାର୍‌ । ୱାର୍‌ ଏସ ୱେଡ଼ିକା ! ୱାରିଙ୍ଗ୍‌ ମାରି ରୁଣ୍ତି ଦେବେଙ୍ଗ୍‌ ସାନିକା ପୋଡ଼ାଏତ୍‌ନି । ୱାର୍‌ ମାପୁରୁଦି ମାରି କ୍ରିସ୍ତଦି ଜାଜକ ଆଜି କ୍ରିସ୍ତଦି ୱାଲେ ୧,୦୦୦ ବାର୍ସେକ୍ ସାନ୍ଦି ସାସନ୍‍ କିନାର୍ ।
REV 20:7 ୧,୦୦୦ ବାର୍ସେକ୍‌ ପୁରା ଆନି ୱେନ୍‌କା ସୟତାନ୍‍ତିଙ୍ଗ୍‌ ଜଇଲ୍‍ତାନ୍ ମୁକୁଡ଼ା କିନାର୍ ।
REV 20:8 ମାରି ଗୋଗ୍ ମାରି ମାଗୋଗ୍ ୱାଜା ଦୁନିଆଦି ସାରିବେଡ଼ିତି ସାମ୍‌ଦୁରୁତି ବାଲିଗଣ୍ତି ୱାଜା ୱିଜୁତରିନ୍‌ ଆଜି ତେବାତିମାନି ଲୋକାଙ୍ଗ୍‌ ଲେକିସ୍‌ତେଙ୍ଗ୍‌ ଆଟ୍‌ଇ ଲୋକାଙ୍ଗ୍‌ ସୟତାନ୍ ବାୟାକିଜି ଜୁଦକିନି ଉଣ୍ତିଙ୍ଗ୍‌ ଏକଜୁଟ୍‌ କିନାତ୍‌ ।
REV 20:9 ୱାର୍‌‌ ଦୁନିଆଦି ୱିଜୁ ତରିନ୍‌ ସଲ୍‍ସି ପ୍ରବୁଦି ସାଦୁରିଙ୍ଗ୍‌ ମଣ୍ତଲିଙ୍ଗ୍‌ ୱିଜୁ ମାରି ମାପୁରୁଦି ଲାଡ୍‍ତି ଗାଡ଼୍‌ତିଙ୍ଗ୍‌ ଗେରେଆନାର୍ । ମାତର୍‌ ମୁସ୍‍କୁପୁର୍‍ତାନ୍‍ ସିସୁ ଆରିଜି ୱାରିଙ୍ଗ୍‌ ଦଂସ କିନାତ୍‌
REV 20:10 ମାରି ଏମେ ଗନ୍ଧକ୍‌ସିସୁ କାସ୍‌ସିମାନି ସାମ୍‌ଦୁର୍‌ତୁ ପସୁ ନି ବଣ୍ତବାବବାଦିର୍‌ ପୋକାତା ମାର୍ହାର୍‌, ବେମ୍‌ରିକିନି ସୟତାନ୍‌ତିଙ୍ଗ୍‌ ବା ଆବେନୁ ପୋକ୍‍ନାର୍‌ । ଆବେନୁ ୱାର୍‌ ୱେଡ଼େ ନାଡ଼ା ଜୁଗ୍‌ ଜୁଗ୍‌ ସାନ୍ଧି କାସ୍ଟୁ ଦୁଃକ୍‌ ପୋଇଜିମାନାର୍ ।
REV 20:11 ତାନିୱେନ୍‌କା ନାନୁ ସୁଡ଼ୁତା, ଅଡ଼ିନି ରଙ୍ଗ୍‌ତି ଉଣ୍ତ୍ରି ପେରି ସିଂହାସନ୍ ମାରି ତାନି ମୁସ୍‌କୁ ଅରେନ୍‌ ବାସ୍‌ତା ମାନାନ୍‌ । ୱାନି ଆଗିଡ଼ିରାନ୍ ପୃତିବି ମାରି ବାଦଡ଼ ଉରୁକ୍‍ତେ ମାରି ୱାର୍‌ ମାରି ସୁଡ଼ୁଦେଙ୍ଗ୍‌ ଆଟ୍ଏତାର୍‍ନି ।
REV 20:12 ତାନିୱେନ୍‌କା ନାନୁ ସୁଡ଼ୁତା, ଏସ ପେରିକା, ଏସ ତାଗ୍‌ଇ ସାତିଲୋକୁ ୱିଜେରେ ସିଂହାସନ୍ ଆଗ୍‌ଡ଼ି ନିରାଆମାନାର୍‌ । ବଇଙ୍ଗ୍‌ୱିଜୁ କୁତ୍‌ତାର୍; ଆୟାୱିଜୁ ବଇଙ୍ଗାଁ ଲୋଇରାନ୍‌ ଜିବନ୍‌ ପୁସ୍ତକ ଦରୁଦି ଉଣ୍ତ୍ରି ବଇ ମାରାତ୍ । ଆୟା ଜିବନ୍‌ ପୁସ୍ତକଦୁ ଲୋକୁ ପାଣିକିତିମାନି ବିସୟ୍‌ତାନ୍‌ ଏମେ ୱିଜୁ ରାସାତାମାନାତ୍, ଆୟା ଇସାପ୍‍ତାନ୍ ୱାରି ବିସାର୍‍ଆତାତ୍‌ ।
REV 20:13 ଆୟା ବେଡ଼ାଦୁ ସାମୁଦୁର୍ ଲୋଇ ସାତିମାନି ଲୋକୁ ନିଙ୍ଗିଁଜି ୱାତାର୍‌ । ସାତିଗୁଟାଦୁ ମାନି ଲୋକୁ ବା ସୋସି ୱାତାର୍ । ୱାର୍‌ ୱିଜେରେ ନିଜେ ନିଜେଦି ପାଣିକିତି ଇସାପ୍‍ତାନ୍ ବିଚାର୍‌ ଆତାର୍‌ ।
REV 20:14 ତାନିୱେନ୍‌କା ସାନିକା ମାରି ସାନିପାତାଲ୍‌ତି ଆୟା ସିସୁଦି ସାମ୍‌ଦୁର୍‌ତୁ ପୋକ୍‌ତାର୍‌ । ଇୟା ସିସୁଦି ସାମ୍‌ଦୁର୍‌ ଆଜିନାତ୍, ରୁଣ୍ତି ଦେବେଙ୍ଗ୍‌ ସାନିକା ।
REV 20:15 ଆମାୱାରିନ୍ଦି ଦରୁ ଜିବନ୍‌ ପୁସ୍ତକଦୁ ରାସାଏତ୍‌ ମାର୍ହାତ୍‌, ୱାନ୍‌ ବା ୱିଜେରେ ସିସୁଦି ସାମ୍‌ଦୁର୍‌ତୁ ପୋକାଇ ଆତାର୍‌ ।
REV 21:1 ତେନି ୱେନେକା ନାନୁ ଉଣ୍ତ୍ରି ପୁନି ବାଦଡ଼୍‍ ମାରି ପୁନି ଦୁନିଆ ସୁଡୁତା । ପାଡ଼ିଇ ବାଦଡ଼୍‍, ପାଡ଼ିଇ ଦୁନିଆ ମାରି ସାମ୍‍ଦୁରୁ ସିଲେତାତ୍‍ ।
REV 21:2 ମାରି ଉଣ୍ତ୍ରି ପବିତ୍ର ଗାଡ଼୍‌, ପୁନି ଜିରୁସାଲାମ୍, କାନ୍ୟା ରୁପ୍‌ତାନ୍ ତିଆର୍‍ଆଜି ମୁସ୍‌କୁପୁର୍‌ଦାନ୍ ମାପୁରୁଦି ଲାକୁତୁ ଦେସ୍ ମୁସୁକୁ ରେତାନିକା ସୁଡ଼ୁତା ।
REV 21:3 ମାରି ମୁସ୍‌କୁପୁର୍‌ ସିଂହାସନ୍‍ତାନ୍ ଉନ୍‍ଣ୍ତ୍ରି ମାଟା ଆତାତ୍, “ଇଲେଇ ମାପୁରୁଦି ଆସା ଲୋକା ମାଡ଼ାନ୍; ୱାନ୍‌ ୱାରି ସଙ୍ଗତାନ୍ ବାସା କିନାର୍ ମାରି ୱାର୍‌ ୱାନି ନିଜେଦି ଲୋକୁ ଆନାର୍ । ମାପୁରୁ ୱାରିୱାଲେ ବାସାକିନାର୍ ମାରି ୱାରି ମାପୁରୁ ଆନାର୍ ।
REV 21:4 ୱାର୍‌ ୱାରି କାଣ୍‍ଗାଦି କାଡ଼େର୍‌ଙ୍ଗୁ ୱିଜୁ ତେଲ୍‌ଜି ସିନାନ୍ । ସାନିକା, ସିନ୍ତା, ଆଡ଼୍‍ବାନିକା ଇରିଙ୍ଗ୍‌ ନୋପି, ମାରି ଇନିକା ତେବାଏତେନି । ୱିଜୁ ପାଡ଼ିଇ ବିସୟ ମାର୍‌ଗିତାତ୍ ସରାତ୍ ।”
REV 21:5 ସିଂହାସନ୍‌ତି ମୁସ୍‌କୁପୁର୍‌ତି ମାପୁରୁ ଇର୍ହାନ୍‌, “ହୁଁ, ନାନୁ ୱିଜୁ ବିସୟ ପୁନିକା କିତାନ୍‍ମାନାନ୍ ।” ମାରି ୱାନ୍‌ ନାଙ୍ଗି ଆଦେସ୍ ସିତାନ୍‌, “ଇୟାୱିଜୁ ମାଟା ରାସ୍‌ସ ଇଡୁଦୁ ମାତର୍‌ ଇକା ସତ୍‌ ମାରି ବିସ୍‌ବାସ୍‌ ।”
REV 21:6 ମାରି ବା ୱାନ୍‌ ଇର୍ହାନ୍‌, “ପାଣି ୱିଜିତା ମାନାତ୍‌ । ନାନୁ ପାର୍‌ତୁମ୍‌ ନି ସେସ୍‍ ମାରି ଆଗ୍‌ଡ଼ି ନି ୱେନ୍‌କା । ଏନ୍ ଏରିକି, ଜିବନ୍‌ସିନି ଏରୁ ଲାକୁତୁ ନାନୁ ୱାନିଙ୍ଗ୍‌ ଆରେଦାନ୍ ଉଟ୍‍ପିସ୍‍କିଦେଙ୍ଗ୍‍ ସିନାନ୍ ।
REV 21:7 ଏନ୍‌ ଜିଣାଜି ତେବାନାନ୍‌, ନାନ୍‌ ୱାନିଙ୍ଗ୍‌ ଇୟା ପୁରସ୍କାର୍‍ ସିନା ନାନ୍‌ ୱାନି ମାପୁରୁ ଆନା ମାରି ୱାନ୍‌ ନା ମାରିନ୍‌ ଆନାନ୍‌ ।
REV 21:8 ମାତର୍‌ ବିରୁ, ଅବିସ୍‌ବାସି, କାଡ଼ିନିକାର୍, ଲୋକାଙ୍ଗ୍‍ ୱେଡ଼ିଇକାର୍ ଦାରିପାଣିକିନିକାର୍ ଗୁଣିଆର୍, ବମା ପୁଜାକିନିକାର୍‌, ମିଚ୍‌ ୱେର୍‌ନି ୱିଜେରେ ତାଗିଇ ୱାରି ଜାଗା ଆଜିନାତ୍, ଗନ୍ଧକ୍‍ତାନ୍ କାସ୍‌ସିମାନି ସିସୁଗୁଟା ଆବେନୁ ୱାର୍‌ ରିଜାସାନି ଦଣ୍ଡ୍‌ ପୋଇନାର୍ ।”
REV 21:9 ସପ୍ତ ସାରାସାରି ମହାମାରି ପୁରା ସପ୍ତ ଡୁବାଇ ଆସ୍‌ସିମାନି ସପ୍ତ ଦୁତ୍‍ଙ୍ଗ୍‌ ମାଡ଼ାନ୍ ଅରେନ୍‌ ନା ଲାକୁତୁ ୱାଜି ଇର୍‌ଆନ୍‌, “ରାଦୁ, ମେଷସାବକଦି ଆଡ଼୍‌ସିଙ୍ଗ୍‌ ତରନା ସିନା ।”
REV 21:10 ଆବେଟ୍‌କୁ ୱାନ୍‌ ନାଙ୍ଗିଁ ଆତ୍ମାଦାନ୍‌ ଉଣ୍ତ୍ରି ପେରିକା ମାରି ନିରିଇ ଗରନ୍‍ତୁ ଆସ୍‌ସି ଅସି ପବିତ୍ର ଗାଡ଼୍‌ ଜିରୁସାଲାମ୍‍ଦିଙ୍ଗ୍‌ ତୋରିସ୍ତାନ୍, ଆକା ମୁସ୍‌କୁପୁର୍‌ଦାନ୍ ମାପୁରୁ ଲାକୁତୁ ।
REV 21:11 ରେତାଜି ୱାଜିମାର୍ହାତ୍‌ ମାରି ମାପୁରୁ ଗୌରବ୍‍ ପୋଇଜି ମାର୍ହାନ୍‌ ୱାନି ଜାୟ୍‌ ବେସିନେଗିକା ମଣି ବାଙ୍ଗାଁରାମ୍ ୱାଜା, ନେଗି ୱେଡ଼ାଦିଗଡ଼ା ୱାଜା ।
REV 21:12 ଇୟାତାନି ଉଡ୍ରି ନିରିଇ ଗଡା ମାର୍ହାତ୍‌ । ଇୟା ଗଡାଦୁ ବାରଗୋଟା ମୁସ୍‌କୁପୁର୍‌ଦି ଦୁତ୍‌କାମାଣାନ୍‌ ରକିୟାକିନି ବାରଗୋଟା ସେର୍‍ଲେଙ୍ଗ୍‌ ମାରେଏ ମାରି ଆୟା ସେର୍‌ଲେଙ୍ଗାଁ ମୁସୁକୁ ଇସ୍ରାଏଲ୍‌ ଜାତିଦି ବାରଗୋଟା କଟୁମ୍‌ତି ଦର୍‌କୁ ରାସାତା ମାନାତ୍‌ ।
REV 21:13 ଗଡାଦି ୱିଜୁତରିନ୍‌ ମୁଣ୍ତ୍ରି ସେର୍‌ଲେଙ୍ଗ୍‌ ମାରେଏ : ଆଗ୍‌ଡ଼ି ତରିନ୍‌ ମୁଣ୍ତ୍ରି, ଡେବିରି ତରିନ୍‌ ମୁଣ୍ତ୍ରି, ଉଣି ତରିନ୍‌ ମୁଣ୍ତ୍ରି ମାରି ୱେନ୍‌କା ତରିନ୍‌ ମୁଣ୍ତ୍ରି ।
REV 21:14 ଗାଡ଼୍‌ତି ଇୟା ଗଡାଦିଙ୍ଗ୍‌ ବାରଗୋଟା କାଲ୍‌କାଙ୍ଗ୍‌ଦି ଅସାର୍‍ତି ମୁସୁକୁ ତିଆର୍‍ ଆତାମାର୍ହାତ୍‌ ମାରି ଆୟା ଦାସ୍‍ଗୋଟା ଅସାର୍ ମୁସୁକୁ ମେଣ୍ତାପିଲାଦି ବାର୍‍ଲୋକ୍ ପ୍ରେରିତ ସିସୁରି ଦରୁକୁ ରାସାତାମାର୍ହାତ୍‌ ।
REV 21:15 ନାୱାଲେ ୱାର୍‌ଗିଜିମାନି ଦୁତ୍‍କା କିୟୁଦୁ ଗାଡ଼୍‌ତି, ଗଡା ମାରି ସେର୍‌ଲେଙ୍ଗ୍‌ ଲେକିସ୍‌କିନି ଉଣ୍ତିଙ୍ଗ୍‌ ଉଣ୍ତ୍ରି ବାଙ୍ଗାଁରାମ୍‍ତି ଲେକିସ୍‌କିନି କାଣ୍ତି ମାର୍ହାତ୍‌ ।
REV 21:16 ଗାଡ଼୍‌ତି ବର୍ଗକ୍ଷେତ୍ର ମାରାତ୍; ତାନି ଲମ୍ୱା ମାରି ଅସାର୍ ସାମାନ୍ ମାର୍ହାତ୍‌ । ଦୁତ୍‌ ତାନି ଲେକିସ୍‌କିନି କାଣ୍ତିଦାନ୍ ଗାଡ଼୍‌ତିଙ୍ଗ୍‌ ଲେକିସ୍‌ କିତାତ୍ । ତାନି ଲମ୍ୱା ମାର୍ହାତ୍‌ ୨,୪୦୦ କିଲୋମିଟର୍ ମାରି ଅସାର୍ ମାରି ନିରିକା ଲମ୍ୱାଦି ୱାଲେ ସାମାନ୍ ମାର୍ହାତ୍‌ ।
REV 21:17 ଦୁତ୍‌ ଗଡାଦି ନିରିକା ବା ଲେକିସ୍‌ତାତ୍ । ଆକା ୬୦ ମିଟର୍ ମାର୍ହାତ୍‌ ।
REV 21:18 ଆୟା ଗଡା ୱେଡ଼ାଦି ମଣିଦାନ୍‌ ତିଆର୍‌ଆତିକା, ମାରି ଗାଡ଼୍‌ ନେଗି କାୟାଦି ୱାଜା ପୁରା ବାଙ୍ଗାଁରାମ୍‍ତାନ୍‌ ତିଆର୍‌ ଆତାମାନାତ୍‌ ।
REV 21:19 ଗାଡ଼୍‌ତି ସାରିବେଡ଼ିତି ମାନି ଗଡାଦି ଅସାର୍ ହିରାକାଲ୍‌କାଣି ମଣିଦାନ୍‌ ତିଆର୍‍ ଆତାମାରାତ୍, ପାର୍‌ତୁମ୍‌ କୁନାଦିକନାଦୁ ମାରାତ୍ ହିରାକାଲୁ, ଦୁଇ ନମ୍ୱର୍‌ତୁ ମାର୍ହାତ୍‌ ନିଲକାନ୍ତ ମଣି, ତିନି ନମ୍ୱର୍‌ତି ବୋଦୁର୍ଯ୍ୟ ମଣି, ଚାର୍‌ ନମ୍ୱର୍‌ତି ମରକତ ମଣି ।
REV 21:20 ପାଞ୍ଚ୍‌ ନମ୍ୱର୍‌ତି ପୁଳକ ମଣି, ସଅ ନମ୍ୱର୍‌ତି ମାଣିକ୍ୟ ମଣି, ସାତ୍‌ ନମ୍ୱର୍‌ତି ପୁଙ୍ଗୁଁ ମଣି ଆଟ୍‌ ନମ୍ୱର୍‌ତି ଫିରୋଜ ମଣି, ନଅ ନମ୍ୱର୍‌ତି ଗୋମେଦକ ମଣି, ଦାସ୍‌ ନମ୍ୱର୍‌ଦି ଲସୁନିୟ ମଣି, ଏଗାର୍‌ ନମ୍ୱର୍‌ଦି ଇନ୍ଦ୍ରଦନୁ ମଣି, ମାରି ବାର୍‌ ନମ୍ୱର୍‌ଦି ବାସ୍‌ନାଆନି ମଣି, ମାରେଏ ।
REV 21:21 ଦାସ୍‍ଗୋଟା ସେର୍‍ଲା ମାରେଏ, ଦାସଗୋଟା ମୁକ୍‌ତେଙ୍ଗ୍‌ ୱିଜୁ ସେର୍‍ଲେଙ୍ଗ୍‌ ଉଡ୍ରି ମୁକ୍ତାଦି ତିଆର୍ ଆତେମାରେଏ । ଗାଡ଼୍‌ତି ସାରି ପୁରା ନେଗି କାୟାଦି ୱାଜା ପୁରାନେଗିକା ବାଙ୍ଗାଁରାମ୍‍ତାନ୍ ଆତାମାନାତ୍ ।
REV 21:22 ନାନୁ ଗାଡ଼୍‌ତି ଏମେ ମନ୍ଦିର୍‌ତିଙ୍ଗ୍‌ ସୁଡ଼ୁଦେଙ୍ଗ୍‌ ଆଟ୍‍ଏତା, ମାତର୍‌ ନିଜେ ସର୍ବସାକ୍ତିମାନ୍ ମାପୁରୁ ମାରି ମେଣ୍ତାଗଡ଼ୁଦି ୱାନି ମନ୍ଦିର୍‌ ଆନାତ୍ ।
REV 21:23 ଗାଡ଼୍‌ତିଙ୍ଗ୍‌ ଜାୟ୍‌ କିନି ଉଣ୍ତିଙ୍ଗ୍ ୱେଡ଼ା ବା ଲେଜୁଦି ଜାୟ୍‌ ସିଲେତ୍‌, ମାତର୍‌ ମାପୁରୁଦି ଗୌରବ୍‍ତାନ୍‍ ଆକା ଜାୟ୍‌ ଆଜିନାତ୍ ମାରି ମେଣ୍ତାଗଡ଼ୁଦି ୱାନି ଦିୱା ଜାୟ୍‌ ୱାଜା ।
REV 21:24 ଦୁନିଆଦି ୱିଜୁଜାତିଦି ଲୋକାଙ୍ଗ୍‌ ୱାନି ଜାୟ୍‌ଦୁ ବୁଲାସାଲାକିନାର୍ । ଦେସ୍‌ତି ରାଜାରି ମାନୁ ୱାରି ଦନ୍‌ ସମ୍ପତ୍ତି ତାସି ସିନାର୍‌ ।
REV 21:25 ଗାଡ଼୍‌ତି ସେର୍‌ଲେଙ୍ଗ୍‌ ୱିଜୁ ୱିଜୁଦିନ୍‌ ରେଆତାମାନାତ୍ ଆୟାୱିଜୁ ଏସାଙ୍ଗ୍‌ ବା ବୁଲ୍‌ କିଏର୍‍ନି; ମାତର୍‌ ଆବେନୁ ଏସାଙ୍ଗ୍ ସିକାଟି ଆଏତ୍ ।
REV 21:26 ୱିଜୁ ଦେସ୍‌ତୁ କାବାଆନିକା ମାରି ମହିମା ଇୟା ଗାଡ଼୍‌ତୁ ୱାଜି ଉଣ୍ତାନାର୍ ।
REV 21:27 ଇନିକା ତାଗ୍‍ଇ ଜିନିସ୍‌ ଇବେନୁ ତାସି ରେଏର୍‌ । ତାଗ୍‌ଇ ପାଣିଦୁ ମାନିକାର୍ ତାଗ୍‌ଇକାର୍‌ ମାରି ମିଥ୍ୟାବାଦିର୍‌ ଇୟା ଗାଡ଼୍‌ଦୁ ଡ଼ୁଗୁଦେଙ୍ଗ୍‌ ଆଟ୍‍ଏର୍‍ । ଏମେୱାରି ଦରୁ ମେଣ୍ତାପିଲାଦି ଜିବନ୍‌ ବଇଦୁ ରାସାତିମାରିଙ୍ଗ୍‌, କେବଲ ୱାରେଏ ଇୟା ଗାଡ଼୍‌ତୁ ସନ୍‌ଡ୍ରେଙ୍ଗ୍‍ ଆଟ୍‍ନାର୍ ।
REV 22:1 ପୁନି ଦୁନିଆଦୁ କାୟାଦି ୱାଜା ନେଗି ଜିବନ୍‌ ଏରୁଦି ଉଣ୍ତ୍ରି ଗାଡା ଦୁତ୍ ନାଙ୍ଗିଁ ତର୍‌ତାତ୍ । ଇୟା ଗାଡା ମାପୁରୁ ନି ମେଷସାବକତି ସିଂହାସନ୍‌ଦାନ୍‌ ସହସି
REV 22:2 ମାରି ଗାଡ଼୍‌ତି ପେର୍‌ଜାରି ନାଡ଼୍‍ମି ସିଜି ସୋର୍ହାମାର୍ହାତ୍‌ । ଗାଡାଦି ରିଆଙ୍ଗାଁ ତର୍‌ନି ଜିବନ୍‌ ମାରାନ୍‍ ମାର୍ହାତ୍‍ । ଆକା ବାର୍ସେକ୍‍ତି ୱିଜୁ ଲେଜ୍‍କାଙ୍ଗ୍‍, ମାରି ବାର୍ସେକ୍‌ତିଙ୍ଗ୍‍ଁ ବାର ଦେବେଙ୍ଗ୍‌ ପଲ୍‌ ଆସ୍‌ନାତ୍‌ ମାରି ଇୟାତେନି ଆକୁ ଲୋକାଙ୍ଗ୍‍ ନେଗେନ୍‍ କିନାତ୍‌ ।
REV 22:3 ମାପୁରୁଦି ଅବିସାପ୍‍ତି ମାଟା ଏମେ ବିସୟ ଆୟା ଗାଡ଼୍‌ତୁ ସୁଡ଼ୁଦେଙ୍ଗ୍‌ ପୋୟ୍‌ଇକାନି । ମାପୁରୁ ମାରି ମେଷସାବକତି ରାଜାଗାଦି ଆୟା ଗାଡ଼୍‌ତି ନାଡ଼ିମି ତେବାନାତ୍‌ ମାରି ଆବେନୁ ୱାରି ସେବା କିନିକାର୍‌ ୱାନି ଆରାଦନା କିନାର୍ !
REV 22:4 ୱାର୍‌ ୱାନି ମୋକମ୍ ସୁଣାର୍‍ ମାରି ୱାରି କାପାଲ୍‍ତୁ ୱାରି ଦରୁ ରାସାନାତ୍‍ ।
REV 22:5 ଆବେନୁ ମାରି ନାଡ଼ା ଆଏତ୍‍ ମାରି ଦିୱା ବା ୱେଡ଼ାଜାୟ୍‍ ୱାରିଙ୍ଗ୍‌ ମାରି ଲୋଡ଼ା ଆଏତ୍‍ନି, ଇରିଙ୍ଗ୍‌ ପ୍ରବୁ ମାପୁରୁ ୱାରି ଜାୟ୍‌ ଆନାନ୍ ମାରି ୱାର୍‌ ଜୁଗ୍‌ ଜୁଗ୍‌ ସାସନ୍ କିନାର୍ ।
REV 22:6 ଦୁତ୍‌ ନାଙ୍ଗିଁ ଇର୍ହାତ୍‌, “ଇୟାୱିଜୁ କାବୁର୍‌ ସତ୍‌ ନି ଆସାଦିକା । ଆମା ଆମାକା ବେଗି ଗଟାନାତ୍, ଆକା ୱାରି ସେବାକିନିୱାରିଙ୍ଗ୍‌ ୱେର୍‍ନି ଉଣ୍ତିଙ୍ଗ୍ ବାବବାଦିରିଙ୍ଗ୍‌ ଆତ୍ମିକ ବୁଦି ସିଜିମାନି ମାପୁରୁ ୱାନି ଦୁତ୍‌ତିଙ୍ଗ୍ ପୋକ୍‍ତାମାନାନ୍‌ ।”
REV 22:7 ଜିସୁ ଇଜିନାନ୍‌, “ୱେନ୍‍ଣ୍ତ୍ରୁ ! ନାନୁ ବେଗି ୱାଜିନା ! ଏମେକାର୍ ଇୟା ବଇଦୁ ୱେଙ୍ଗିଁତିମାନି ବାବବାଣି ଉଣ୍ତିଙ୍ଗ୍‌ ମୋନ୍‍ସିଜି ମାନାନାର୍, ୱାର୍‌ ଦନ୍ୟ !”
REV 22:8 ନାନୁ ଜୋହନ, ଇୟାୱିଜୁ ବିସୟ୍‌ ନିଜେ ୱେର୍‍ଆମାନା ମାରି ସୁଡ଼ୁତାମାନା । ଇୟାୱିଜୁ ୱେନିଜି ମାରି ସୁଡ଼ୁତି ୱିସ୍‌ତି ୱେନ୍‌କା, ଏମେ ଦୁତ୍‌ ନା ଲାକୁତୁ ଆକା ୱିକିତାତ୍, ନାନୁ ୱାନି କାଲ୍‌କା ଆଡିଗି ୱାନିଙ୍ଗ୍‌ ପୁଜା କିଦେଙ୍ଗ୍ ସଲ୍‍ସିମାର୍ହା ।
REV 22:9 ମାତର୍‌ ୱାନ୍‌ ଇର୍ହାନ୍‌, “ଆୟାୱାଜା କିମାଟ୍, ଇରିଙ୍ଗ୍‌ ନାନୁ ବା ମି ୱାଜା ଅରେନ୍‌ । ମି ଏମେ ବାବବାଦି ତଡ଼ାନ୍‍କୁ ମାରି ଆମା ୱିଜେରେ ଇୟା ବଇଦି ମାଟା ଇସାପ୍‍ତାନ୍ ମାନାଜି ମାନାର୍‌, ୱାରି ୱାଜା ନାନୁ ଅରେନ୍ ସେବକ ମାତ୍ର । ମାପୁରୁଦି ଆରାଦନା କିଦୁ ।”
REV 22:10 ୱାଦ୍‌ ନାଙ୍ଗିଁ ମାରି ଇର୍ହାତ୍‌, “ଇୟା ବଇଦି ବବିସ୍ୟତ୍‍ମାଟା ୱିଜୁ ଆଡ଼କ୍‌ସ ଇଡ୍‍ମାଟ୍‌, ଇରିଙ୍ଗ୍‌ ଇୟାୱିଜୁ ବିସୟ୍‌ ଗଟେଆନି ବେଡ଼ା ଲାକୁତୁ ଆଜିୱାତାତ୍‍ନି ।
REV 22:11 ଆଦେଙ୍ଗ୍‌ ଇୟା ମାଟା ନେସ୍‍ସି ଏନ୍‍ ଏମେକା ବଦା, ଆକା କିପିନ୍‌ । ଅଦାର୍ମୁ ଜଦି ବଦାକିନାନ୍‍, ମାରି ଅଦାର୍ମୁପାଣି କିପିନ୍; ଅସୁଚି ଲୋକ୍‌ ଅସୁଚିଆଜି ମାନିନ୍; ମାତର୍‌ ଏନ୍‍ ନେଗିକାନ୍‍, ୱାନ୍‌ ନେଗିପାଣିଦୁ ନେଗେନ୍‍ ମାନିନ୍; ଏନ୍‍ ପବିତ୍ର, ୱାନ୍‌ ପବିତ୍ର ଆଜି ମାନିନ୍ ।”
REV 22:12 ଜିସୁ ଇଜିନାନ୍‌, “ୱେନ୍‍ଣ୍ତ୍ରୁ ! ନାନୁ ବେଗି ୱାଜିନା ! ୱିଜେରିଙ୍ଗ୍ ନିଜେ ନିଜେଦି ପାଣି ଇସାପ୍‍ତାନ୍ ପଲ୍‌ ସିନି ଉଣ୍ତିଙ୍ଗ୍ ନାନୁ ପୁରସ୍କାର୍‌ ଆସ୍‌ସି ୱାନା ।
REV 22:13 ନାନୁ ଆଗିଡ଼ି ମାରି ୱେନେକା, ପାର୍‍ତୁମ୍‍ ମାରି ସାରାସାରି ।”
REV 22:14 ଏମେକାର୍ ନିଜେ ନିଜେଦି ଆଙ୍ଗିଁଙ୍ଗ୍ ନର୍‍ବାଜି ନେଗେନ୍‌ କିତାମାନାର୍‌, ୱାର୍‍ ବାଗ୍ୟବାନ୍‍ । ଜିବନ୍‌ ମାରାତି ପଲ୍‌ ତିନ୍‍ଡ୍ରେଙ୍ଗ୍ ମାରି ସେର୍‍ଲା ସିଜି ଗାଡ଼୍‌ ଲୋଇ ଡ଼ୁଗୁଦେଙ୍ଗ୍ ଇଜି ୱାରି ଅଦିକାର୍‍ ମାନାତ୍‍ ।
REV 22:15 ନୁକୁଡ଼ିଙ୍ଗ୍‌ ମାତର୍‌ ତାଗ୍‌ଇକାର୍‌, ତନ୍ତ୍ରମନ୍ତ୍ର ଜାଦୁକିନିକାର୍‌, ଲୋକାଙ୍ଗ୍‌ ସାପିସ୍‍କିନିକାର୍, ଦିୟାମ୍‌ପୁଜାକିନିକାର୍, ବାଣ୍ତିସ୍‍କିନିକାର୍, ଟକେକିନିକାର୍ ୱିଜୁ ତାଗିଇ ଲୋକ୍‌ ୱିଜେରେ ଗାଡ଼୍‌ତି ଆତ୍‌ରେ ତେବାନାର୍ ।
REV 22:16 “ନାନ୍‌ ଜିସୁ । ମଣ୍ତଲିଙ୍ଗାଁ ମି ନେଗି ତାନିଙ୍ଗ୍‌ ଇୟାୱିଜୁ ବିସୟ୍‌ ସାକ୍ୟ ସିନି ଉଣ୍ତିଙ୍ଗ୍ ନା ଦୁତ୍‌ତିଙ୍ଗ୍ ପୋକ୍‍ତାମାନା । ନାନୁ ଦାଉଦଦି କୁଟୁମ୍‍ତିକାନ୍‍ । ନାନୁ ଆୟା ଜାୟ୍‌ତି ୱିଗାପି ସୁକା ।”
REV 22:17 ପବିତ୍ରଆତ୍ମା ମାରି ଆୟା ପୁନିକାନ୍ୟା ଇଜିନେ “ରାଦୁ !” ୱେନିଲୋକୁ ୱିଜେରେ ବା ଇନାର୍‌ : “ରାଦୁ !” ଏନ୍‍ ଜଦି ଏରିକିସାନାନ୍‌, ୱାନ୍‌ ରାପିନ୍ । ଜିବନ୍‌ସିନି ଏରୁ ଉଣ୍ତେଙ୍ଗ୍ଁ ଏନ୍‍ ଇଛା କିନାନ୍‌, ୱାନ୍‌ ୱାଜି ଆରେଏଦାନ୍ ଆକା ଅପିନ୍ ।
REV 22:18 ନାନୁ ଜୋହନ । ଏମେକାର୍ ଇୟା ବଇଦି ବବିସ୍ୟତ୍‌ମାଟା ୱିଜୁ ୱେନାର୍‌, ୱାରିଙ୍ଗ୍‌ ନାନୁ ସାକି ସିଜିନା : ଜଦି ଇବେନୁ ଏନ୍‍ ଇନିକା ମିସା କିନାନ୍, ଆର୍‌ତିଙ୍ଗ୍‌ ଇୟା ବଇଦୁ ରାସାତିମାନି ମର୍‍ଡିଦାନ୍‍ ମାପୁରୁ ୱାନିଙ୍ଗ୍‌ ସାସ୍ତି ସିନାନ୍
REV 22:19 ମାରି ଇୟା ବଇଦି ବବିସ୍ୟଦ୍‍ମାଟାଦାନ୍‍ ଏନ୍‍ ଜଦି ଇନି ବାଦା କିନାନ୍, ଆର୍‌ତିଙ୍ଗ୍‌ ମାପୁରୁ ୱାନିଙ୍ଗ୍‌ ଇୟା ବଇଦୁ ରାସାତି ଜିବନ୍‌ ମାରାନ୍‌ତି ପଲ୍‌ତାନ୍ ମାରି ପବିତ୍ର ଗାଡ଼୍‌ତାନ୍ ପେର୍‍ନାନ୍ ।
REV 22:20 ଏନ୍‍ ଇୟାୱିଜୁ ବିସୟ୍‌ତାନ୍ ସାକ୍ୟ ସିଜିନାନ୍, ୱାନ୍‌ ଇଜିନାନ୍‌, “ଇକା ସତ୍‍ । ନାନୁ ବେଗି ୱାଜିନା ।” ଆକାନେ ଆପିତ୍ । ପ୍ରବୁ ଜିସୁ, ରାପିନ୍‌ !
REV 22:21 ପ୍ରବୁ ଜିସୁଦି ଦୟା ୱିଜେରି ମୁସୁକୁ ଆପିତ୍ । ଆମେନ୍‍ ।
