﻿ପିଲିମନଦି ଲାକ୍‌ତୁ ପାଉଲତି ଆକୁ.
1.
ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ଜେଲ୍‌ତୁ କାଟେକିଜିମାନି ନାନ୍‌ ପାଉଲ ମାରି ତଡ଼ାନ୍‍ ତିମତିମାଣାନ୍‍, ତଡ଼୍‍ ମାରି ଅର୍‍ସେପାଣିକିନି ପିଲିମନଦି, 
ମାରି ତାମେ ଇଲ୍‍ତୁ ଉଣ୍ତାଜି ମାନି ପାର୍‍ତନା କିଜିମାନି ମଣ୍ତଲି, ତାଙ୍ଗିଁ ଅପ୍‍ପିୟା ମାରି କ୍ରିସ୍ଟାନ୍‍ଦାର୍ମୁଦୁ ଜୁଦ୍‌ତୁ ମା ୱାଲେ ପାଣିକିତିମାନି ଆର୍କିପତି ଲାକ୍‍ତୁ ଆକୁ 
ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍‍ । 
ତଡ଼ାନ୍‌ ପିଲିମନ, ୱିଜୁ ଦେବେଙ୍ଗ୍‌ ନାନ୍‌ ପାର୍‌ତାନା କିନିୱାଲେ ମିଙ୍ଗିଁ ଏତ୍‌କିଜି ମାପୁରୁଙ୍ଗ୍‌ ଦନ୍ୟବାଦ୍‌ ସିଜିମାନା, 
ଇରିଙ୍ଗ୍‌ ନାନ୍‌ ୱେର୍‌ଆମାନା, ପ୍ରବୁ ଜିସୁମାନୁ ମି ବିସ୍‌ବାସ୍‌ ମାରି ଦାର୍ମୁଜିବନ୍‍ଜିନି ଲୋକା ଉଣ୍ତିଙ୍ଗ୍‌ ମି ଜିବନ୍‌ନୋନିକା ! 
କ୍ରିସ୍ତଦି ୱାଲେ ମିସାନି ମାଣୁକୁ ମାପ୍‍ ଜିବନ୍‌ତୁ ଆମା ୱିଜୁ ଆର୍ସିବାଦ୍‌ ପୟ୍‌ତିମାନିକା, କ୍ରିସ୍ତ ବିସ୍‌ବାସ୍‌ତି ୱାଜା ମି ୱାଲେ ମା ମିସାନିକା ଆୟାୱିଜୁଦି ବୁଜାଇ ଅରତ୍‌ ବୁଜାନି ଉଣ୍ତିଙ୍ଗ୍‌ ମିଙ୍ଗିଁ ସାକା କିପିନ୍‌, ଇୟାକା ନା ପାର୍‌ତାନା । 
ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକି, ନି ଜିବନ୍‌ନୋନିକା ନାଙ୍ଗିଁ ନାଣ୍ତ୍‌ ୱେଡ଼ିକା ସିତାମାନାତ୍‌ ମାରି ୱେଡ଼ିକା ବା କିତାମାନାତ୍‌; ଇରିଙ୍ଗ୍‌ ମିର୍‌ ପ୍ରବୁଦି ସାଦୁରି ଜିବନ୍‌ତୁ ୱେଡ଼ିକା ବର୍ତି କିତିସିତିମାନିଦେର୍‍ । 
ଇୟାଉଣ୍ତିଙ୍ଗ୍‌ ମି କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ ୱାଜା ମି ପାଣି ବିସୟ୍‌ତାନ୍‌ ଆଦେସ୍‌ ସିଦେଙ୍ଗ୍‌ ନା ସାସ୍‌ ମାନାତ୍‌ । 
ମାତର୍‌ ମି ଉଣ୍ତିଙ୍ଗ୍‌ ନା ଜିବନ୍‌ନୋନିକା ମାନିଙ୍ଗ୍‌ ନିଙ୍ଗିଁ କେବଲ ଅନୁରୋଦ୍‌ କିଜିନା । ଜଦିବା ନାନ୍‌ ପାଉଲ ଅରେନ୍‌ ଡକ୍ରା, କ୍ରିସ୍ତ ଜିସୁଦି ଉଣ୍ତିଙ୍ଗ୍‌ ଇଲେଇ ଜଇଲ୍‌ତୁ ମାନା, 
ଆତିଙ୍ଗ୍‍ବା ନାନ୍‌ ମାଡ଼ିସ୍‌କିଜି ଇକା ୱେର୍‌ସିନା । ଇୟା ଜଇଲ୍‍ତୁ ଅବସ୍ଥାଦାନ୍‌ ନାନ୍‌ ଆମାୱାନିଙ୍ଗ୍‌ କ୍ରିସ୍ତଦି ଉଣ୍ତିଙ୍ଗ୍‌ ନିଜେଦି ମାରିନ୍‌ ୱାଜା ପୟ୍‌ତାମାନା, ନାନ୍‌ ୱାନି ଆତ୍ମିକ ବୁବା ୱାଜା ଆତାମାନା, ଆୟା ଅନିସିମସ୍‌ ଉଣ୍ତିଙ୍ଗ୍‌ ନା ଇୟା ଅନୁରଦ୍‌ । 
ଅର୍‍ଲେନ୍‍ ଅନିସିମସ ମି ଉଣ୍ତିଙ୍ଗ୍‌ ଦର୍‌କାର୍‌ ସିଲେତାନ୍‌; ମାତର୍‌ ଇଲେଇ ୱାନ୍‌ ନିଙ୍ଗିଁ ନି ନାଙ୍ଗିଁ ବିସେସ୍‍ ଦରକାର୍‍ତୁ ୱାନାନ୍‍ । 
ୱାନ୍‌ ତୋ ନା ଜିବନ୍‌ତି ୱାଜା ନାନ୍‌ ଇଲେଇ ୱାନିଙ୍ଗ୍‌ ମି ଲାକ୍‌ତୁ ପୋକ୍‌ସି ସିନି ୱାଲେ ନା ଜିବନ୍‌ ଆଡ଼୍‍ବାତି ୱାଜା ଆଜିନାତ୍‌ । 
କ୍ରିସ୍ତଦି ନେଗିକାବୁର୍‌ ପ୍ରଚାର୍‌ କିନି ଉଣ୍ତିଙ୍ଗ୍‌ ନାନ୍‌ ଇୟା ଜଇଲ୍‍ତୁ ତେବାତାମାନା । ଇବେନୁ ମାନି ସାନ୍ଦି ନି ବାଦ୍‍ଲୁ ୱାନିଙ୍ଗ୍‌ ନା ସେବା ପାଣିଦୁ ଲାଗେକିଦେଙ୍ଗ୍‌ ନା ବଦା ମାର୍ହାତ୍‌ । 
ମାତର୍‌ ଇୟା ବିସୟ୍‌ତାନ୍‌ ନାଙ୍ଗିଁ ସାକା କିନି ଉଣ୍ତିଙ୍ଗ୍‌ ନିଙ୍ଗିଁ ଜାସାପେଲା କିଏ, ଆକା ନିଜେଦି ବଦାଦାନ୍ ନିନ୍‍ କିଦେଙ୍ଗ୍‍ ଆଟ୍‍ନି । ଆୟା ଆମାକାଆପିତ୍‌, ନି ରାଜି ଡ଼ିସ୍‌ସି ନାନ୍ ଇନିକା କିଦେଙ୍ଗ୍‌ ଅଡ଼୍‌ବିଏ । 
ମାରିବା ୱିଜୁଦିନ୍‍ ନି ଲୋକ୍‌ ଆଜି ତେବାନାନ୍‌ ଇଜି ଅନିସିମସ ଏସୋ ଦିନ୍‌ ନିଙ୍ଗିଁ ଡ଼ିସ୍‌ତା ସର୍ହାମାର୍ହାନ୍‌ । 
ମାରି ୱାନ୍‌ ଇଲେଇ କେବଲ୍‌ ଅରେନ୍‌ କଟିସାକର୍‌ ଆଏନ୍‌ । କ୍ରିସ୍ତଦି ବିସ୍‌ବାସ୍‌ସି ୱାଜା ୱାନ୍‌ ଇଲେଇ ମା ଅରେନ୍‌ ଲାଡ୍‍ତି ତଡ଼ାନ୍‌ । ନା କାଣ୍‌ଗାଦୁ ଇଲେଇ ୱାନ୍‌ ଏସ ସାହାଜ୍ୟକିନିକାନ୍‌ ! ମି ଅରେନ୍‌ ଦାସ୍‌ ମାରି କ୍ରିସ୍ତଦି ବିସ୍‌ବାସ୍‌ସି ତଡ଼ାନ୍‌ ୱାଜା ୱାନ୍‌ ମି ଉଣ୍ତିଙ୍ଗ୍‌ ମାରି ଏସ ସାହାଜ୍ୟକିନିକାନ୍‌ ଆଏନ୍‌ ! 
ଆଦେଙ୍ଗ୍‌ ନାଙ୍ଗିଁ ଜଦି ନି ୱାଲେ ଅର୍‍ସେମାନିକାନ୍‌ ଇଜି ଅଡ଼୍‌ବିଜିମାନି, ନାଙ୍ଗିଁ ଏଣ୍ତେସ୍‌ କୁକ୍‌ତିମାନ୍ଦି, ୱାନିଙ୍ଗ୍‌ ବା ଆୟାୱାଜା ମାନାଆ ! 
ୱାନ୍‌ ଜଦି ନି ଇନି ଅନ୍ୟାୟ୍‌ କିନାମାନାନ୍‌, ମାରି ନିଙ୍ଗିଁ ୱାନିନ୍ଦି ଇନିକା ସିନିକାମାନାତ୍‌, ଆକା ନା ଇସାବ୍‌ତୁ ରାସ୍‌ସୋ ସିଦା । 
ଇକା ସୁଡ଼୍‌ଦୁ, ନାନ୍‌ ନିଜେଦି କିୟୁଦାନ୍‌ ରାସ୍‌ସି ସିଜିନା, “ନାନ୍‌, ପାଉଲ, ସତ୍‌ ଆକା ଡ଼େସିସିନା ।” ପୁରା ମିଙ୍ଗିଁ ନାନ୍‌ ଏତ୍‌ କିବିସ୍‌କିନି ସିନି ଦର୍‍କାର୍‍ସିଲେ ଜେ, ମି ଜିବନ୍‌ତି ଉଣ୍ତିଙ୍ଗ୍‌ ବା ନିନ୍‍ ନାମାନୁ ରୁଣୁଆତିମାନି । 
ଆଦେଙ୍ଗ୍‌ ତଡ଼ାନ୍‌, ନା ୱାଜା ଅରେନ୍‌ କ୍ରିସ୍ତ ବିସ୍‌ବାସ୍‌ତି ତଡ଼ାନ୍‌ତିଙ୍ଗ୍‌ ପ୍ରବୁଦି ଉଣ୍ତିଙ୍ଗ୍‌ ଦୟା କିଆ, ଇୟାମାଣାନ୍‍ ନାନ୍‌ ନାଣ୍ତ୍‌ ୱେଡ଼ିକା ଆନା । 
ନିନୁ ନା ମାଟା ଇଡ୍‍ନି ଇଜି ସତ୍‌ତାନ୍‌ ନେସ୍‌ସି, ନାନ୍‌ ନିଙ୍ଗିଁ ଇୟା ଆକୁ ରାସ୍‌ସିନା । ସତ୍‌ତାନ୍‌ ନାନ୍‌ ନେସ୍‌ନା, ନି ମାଣ୍‌କୁ ନାନ୍‌ ଏସ ଆସା କିଜିନା, ନିନ୍‌ ନା ଉଣ୍ତିଙ୍ଗ୍‌ ତାନି ମାଣୁକୁ ନାଣ୍ତ୍‌ କିନି । 
ଇୟାତାନି ୱାଲେ ନା ମାରି ଉନ୍‌ଡ୍ରି ଅନୁରଦ୍‌, ଆବେନୁ ନା ଉଣ୍ତିଙ୍ଗ୍‌ ଉନ୍‌ଡ୍ରି ବାକାର୍‌ ତିଆର୍‌ କିଜ ଇଡ୍‌ଦୁ । ନା ଆସା, ମି ପାର୍‌ତାନା କିନିମାଣୁକୁ ନାନୁ ମି ଲାକ୍‌ତୁ ମାରିଡ଼େସି ୱାନା । 
ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ନା ୱାଲେ ଜଇଲ୍‌ତୁ ତେବାତିମାନି ଏପାଫ୍ରା ମାରି ନା ୱାଲେଅରେସ୍‌ପାଣିକିନିକାନ୍‌, 
ମାରି ମାର୍କ, ଆରିସ୍ଟାର୍କସ୍‍, ଦିମା ମାରି ଲୁକ ମାଡ଼ିସ୍‍ କିଜିନାର୍‍, 
ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ଦୟା ମି ୱିଜେରି ଲାକ୍‌ତୁ ମାନିତ୍‌ ।
