﻿Ol Provep.
7.
Go naaki neme nina agaa waru pago ratua nena kone-para mea saape. 
Nina agaa pagoa ratali rabu ne oroyalo epe-rupa mada piruali. Nina agaa-re nena ini surube-rupa waru surubape. 
Nina agaa nena kone-para oroyalo waru inaloa aape. Oroyalo kiaalo nena-ki madaa mapiraae-rupa mada pirinalape. 
Epe kone-para epe makuae yae lapo rata nena kone-para inaloa aape. Gore nena baani-para epe aa yago raapu aatede-rupa mada aape. 
Aa medana ore-me ne ogeyoa nipu raapu paake napana tea raburi epe kone ne raapu oro yalo piralia-pulu ne goa mada napali. Goa pea-pulu neme go onana agaa mada gimali. 
Yapi medame nina ada-para pirua widua-para ini penaato pare no pora-nini ogegeaanu pamuaeme. Gore nimu epe kone page makuae yae page yada ora na-i madaa pama pamuaeme. Goa peme pare aa padane-ma nipu ora maeyaaya. 
Ogegeaa nipuri ona ora wae piri medana ada pera-pera pamea. 
Gore naare pabola penaloa ribaa yolalo popea. 
Mo ona nipuri pora pami onanumi pemede-rupa pepena pua nipumi mo ogege aame adena kone ia. Goa pua mo-aa puaa mada lamu mea. 
Go onare nipu ora wae pupitagi ne ona yalo nipuna ada-para page epe-rupa napia. 
Oro yalo nipu makete-nini page pora-nini pamualaina pua nipuna ada-para page epe-rupa napia. Aa agu asapala pirina pea. 
Neme adesu pare go ogege aa i rulu ripinaawa nipumi nunu lalaina adesu. Goa pua mo oname nipuna ini agaa-para adabaa sua goa sa. 
Abiare nina ada-para agu raapo pirua opa kalape yaere meda iya-daa sa. 
Goaene nina ada gimoa ne asapula epawa. Goa pawa-pulu abia ne go epa adalo-da. 
Goa pua ne patape yapara page aba rabolo saayo. Go yapara rabolo saayo pare nena adipu patape yakopi laplap page epe pepena pubae saayo. Go epe u-patape yaenuri mo Isipi supara mea-epe yaenu saayo. 
Neme go nena u-patape epe bet madaare paura epe kaapi yae luabu koyoa saayo. 
Goa pea-ga abiare saana bana. Goa puare raapa palaawa rabialo tu patua yapi malaapana. Goa pua raana adaape meapana. 
Ninaa aaniri pala naomape. Nipu su adaalu meda-para naepope-rupa pisa. 
Gore akoloya nipumi mone ora adaapupe mea pisa-pulu sarara laapo popenaloa orope epalia. Goa pua abia go akua epola pola raapu raapu-para epalia. 
Go oname epe rede pi agaa luabu loa mo ogege aa nipuna lo-robaa ora waru marekaaya. 
Mo aa nipumi mo omeme agaa pagoa mo onana ada-para ratamea pea. Gore mo mena gawa ti ada-para mea pemede-rupa mada mea pea. Go page maeyae aa opeada patinalo mea pemede-rupa mada mea pea. 
Go aa nipuri koyati pua sua nipu aawalia kone na-i. Pa yaa-madaa biya pua mo poga madaa puaa roayade-rupa mada pea. Gore yaa nipu poga sabae-para roalua kone na-i. Pa biyaa pea-rupa mada pea. 
Go naaki nina agaa madaa-re aane waru lobapa-inaloa waru pagalepape. 
Nimimi go piaene ona rata mea popere nimina lo-robaa ora aipapulu narekena tapape. Goa pua nipuna kone gimape. 
Gore akolo ya? Aa adaapu go onana kone ratua luabu taala-pupa yabeme. 
Go ona nipuna ada-para pope porare, aa tapa-para pemede pora-rupa ia. Go yapare nimi go pora ratalimiri nimi aipapulu aba omeme onaanuna su-para palimi. 
