﻿Nahum.
2.
Utokulalu u vunu u ꞌya̱nga̱sa̱ka̱ vu ɗe, avu Niniba, zuwa awundi a asaga a pige a ilyuci i vunu, awundi ure, foɓuso kaci ka vunu adama a kuvon, ɓolomgbono gba̱ avonshi a vunu! 
Kpaci Magono ma Zuba ma gonuko ta̱ karinga̱ ka Yahuda yavu ka aza a Isaraꞌila, ko an u wokoi atokulalu a nangasai u ɗa u wokoi bawu kalen kpam a nangasai atyangi a atyaci a le. 
Nra̱ga̱ ma avonshi a utokulalu yi n shili n ɗa; avonshi a ne aminya a mini ma ma iyen ma a ukai. Nringongo ma urim ma adoki a le ma laɗa kain ka a foɓuso le; aꞌa̱ri ura̱ɗugbusa̱ nsari n le. 
Adoki a ɗa aꞌa̱ri na̱ nringongo ma adoki aꞌa̱ri ilyaɗi cika a ure, aꞌa̱ri a ubana n agoni ko nte wa a asuvu a akura̱ a ilyuci yi. A ka wakana̱sa yavu akina a macikalu; a ka wurusa yavu ulaɗa. 
Magono ma Niniba ma isa̱i azapige a asoje a ne, gba̱ n nala a ta̱ɗa̱tsa̱i a ure. Aꞌa̱ri maloko a ubana a asu u asaga a ilyuci yi; a zuwai nra̱ga̱ n ɗa ma ka̱nga̱ le a asu vi. 
A kara̱kpai ure u mini aku kuwa ku tsugono ku wa̱sa̱i. 
A foɗoi aminya a uka u magono a lazai n eyi. Nkere n ɗa ma̱ri agbashi a ka yan ulapa u una̱ a ka sa̱ yavu aꞌaɗya a ka lapusa akamba a le adama a unamgba u asuvu. 
Niniba wa̱ ta̱ yavu kaɗa̱ka̱ ka mini, kpam mini ma ne ma tsu wumkpa ta̱. A ka dansa, <<Shamgba, shamgba!>> shegai ko uza u kpatala kucina̱ wa. 
Pura̱i azurufa n zinariya a asu u kuvon! Kuwa ku ucanga u le ka̱ri n utyoku wa, aꞌa̱ ta̱ gba̱ n utsa̱ri i icun kau-kau! 
A wacinsai Niniba, a nangasa u ɗa u wokoi akpongo! Atakasuvu a ama a dara̱kpai, a ka jeke ikyamba, aꞌa̱ kpam n ucira wa upetiwaꞌeshi u le u wa̱ra̱ma̱i. 
Nte gogo-na kaɗa̱ka̱ ka igabako ka̱ri, a asu u ɗa a ka lina̱ka mmuku n le, a asu u ɗa agono n anuku a igabako a tsu bansa, na̱ mmuku n le, a ka pana kpam uwonvo wa? 
Gabako u tsu wuna ta̱ ili iꞌya i tsu rawa yi na̱ mmuku n ne u piyanla kpam udyoku u manama mi u wuna, aku u shaɗangu kaaɓuru ka ne n ili iꞌya u wunusai kaɗa̱ka̱ ka ne kpam na̱ nnama n mete n ɗa a wunai. 
Magono ma Zuba ma Ucira Gba̱ u danai, <<Ma yan ta̱ tsilala n avu. Ma runukpa ta̱ gba̱ nringongo ma adoki a vunu, kpam burundu u kuvon wa wuna ta̱ asoje a vunu. Ma ɓishinka vu ta̱ vu wuna ama a likimba. Ala̱ga̱tsu a asuki a vunu a ka doku a ka pana a ɗa wa.>> 
