﻿Mika.
6.
Aza a Isara'ila, panai ili i'ya Magono ma Zuba ma danai: <<'Ya̱nga̱i, i dana usapula ɗe a kapala ka nsasa, a̱sa̱ka̱ aga̱la̱la̱ a pana ala̱ga̱tsu a ɗe. 
Nsasa, panai usapula u Magono ma Zuba a kaci ka Isara'ila; zuwai atsuvu i pana, eɗa̱ kami ka likimba tun caupa. Panai! Kpaci Magono ma Zuba ma sapulai ama a ne, wa̱ ta̱ n kadyanshi n Isara'ila. 
<<Ama a va̱, ndya n yanka ɗa̱? Niɗa n wokoi kala̱nda̱m a asu u ɗe? Tonuko na̱ mu! 
N wutukpa̱ ɗa̱ a uyamba u Masar a asuvu a tsugbashi, n wusa ɗa̱ kpam. N suki Musa utuwa̱ u toni n a̱ɗa̱, hal n Haruna n Mariya. 
Ama a va̱, ciɓai ili i'ya Balaku magono ma Muwabu ma foɓusoi ma yain, ciɓai kpam ili i'ya Bala'am kalobo ka Beyo u wushunki yi. Ciɓai na̱ nwalu n ɗe a Shitim ubana a Giligal, adama i reve manyan ma maci ma Magono ma Zuba.>> 
Ndya ma tuwa̱ n i'ya a kapala ka Magono ma Zuba n kuɗa̱ngu n lyai kayala a kapala ka Kashila̱ ka zuba? N tuwa̱ a kapala ka ne n uɗara̱kpa u urunukpa na̱ ndyondyom ka kayen ka te ɗa? 
Magono ma Zuba ma pana kayanyan ka a'ondom azu azu, n ayenete a manivi ma zayitum azu kupa (10,000)? N yain uɗara̱kpa n maku ma kagita̱ ma va̱ adama a unyushi u va̱, mmuku n va̱ kpam adama a unyushi u cingi u va̱? 
Nala wa, vuma, Magono ma Zuba ma wenike vu ɗe ili i'ya i'a̱ri i shinga, Ili i'ya va yan i'ya na: Vu yain afada a maci n uciga u wenike asuvayali, vu vakunku kpam kaci ka vunu a asu u tono Kashila̱ ka vunu. 
Zuwai atsuvu i pana, Magono ma Zuba ma isa̱ ama i ilyuci i Urishelima. Kakiri ka, a pana uwonvo u Magono ma Zuba. Magono ma Zuba ma danai, <<Kakuma̱ ka ama n aza a ɗa a ɓolomgbonoi a ilyuci, zuwai atsuvu i pana! 
Ama a cingi, hal ma a̱sa̱nsa̱ n udukuyan u ɗa i tsa̱ra̱i a ure u cingi? Ko ma a̱sa̱nsa̱ n kakundatsu ka i doi ka n kovoi? 
Shegai mpa, Magono ma Zuba, ma kpa̱ɗa̱ ɗa̱ uyan mavura wa adama kakundatsu ka kaɓan n maryafuka. 
Aza a utsa̱ri a ɗe a tsu 'yankusu ta̱ ama; ama a ɗe a ɗa a'a̱ri na̱ ndishi ɗe a tsu yansa kaɓan, n una̱ u le ɗa a tsu yinsa̱ ama. 
Adama a nala ma lapa ɗa̱ ta̱ na̱ mɓa̱la̱, n wacinsa ɗa̱ adama a unyushi u cingi u ɗe. 
Ya lya ta̱ ilikulya shegai ya ciwa̱ wa, katsuma̱ ka ɗe ka rongo ta̱ n kambulu. Ya ɓolomgbono ta̱ ucanga u ɗe, shegai ko ili ya zuwa wa, i'ya kpam i zuwai kenu ma wacinsa ta̱ i'ya a asu u kuvon. 
Ya ce ta̱, shegai ko ili ya kapa wa. Ya pisha ta̱ ilimaci i zayitum shegai ya yan manyan n manivi ma ne wa. Ya pisha ta̱ ilimaci i cinwi, shegai ya so mini ma cinwi mi wa. 
Kpaci i tono ta̱ mele ma cingi ma Omiri, n gba̱ manyan ma kuwa ku Ahabu; i tonoi afoɓi a cingi a le. Adama a nala ma gonuko ɗa̱ ta̱ akpongo aza ɗa a'a̱ri ndishi ɗe a ka woko ta̱ ili i magori. Nala ya woko, eɗa̱ ama a va̱, ko n te wa a ka goro ɗa̱ ta̱.>> 
