﻿Kɩwɩlʊʊ.
5.
Ngɛ mááná tákaraɖá nakɩ́rɩ weení ɩjɔɔ́ɔ kowuro-gbelé-rɔ nɛ́-dɛ́ɛ nʊ́ʊ́nɩ kíɖiiwú-daá boogóódi kɩ. Baaŋmáa tákaraɖá kɩḿ kɩdaá na kɩwɔ́rɔ́, bɩka bɔfɔkɩná kɩ nibíízi ɖóni ńzɩ sɩrɔ lʊbɛ. 
Ngɛ mááná malááyɩ́ka naárʊ ɩbá ɩjɔɔ́ɔ ɖóni nɛ́ wɔ́nbɔɔzɩ́ na ɖóni sɩsɩ: «Weení wánbɩɩzɩ kʊ ibóɖi nibíízi ifulú tákaraɖá kɩna.» 
Amá, badana naárʊ wánbɩɩzɩ́ ifulú tákaraɖá kɩḿ, cáńfáná ɩbɛ́ɛ́ŋ kɩdaá nɛ́ ɩsɔ́ɔ́dáá na adɛ laadɔ́ɔ-rɔ na adɛ bú-daá nɛ́. 
Ngɛ máábá mabáázɩ wíídi, káma, badana weení wánbɩɩzɩ́ ifulú tákaraɖá kɩḿ, cáńfáná ɩbɛ́ɛ́ŋ kɩdaá nɛ́. 
Ngɛ kʊ́bɔnáa-daá naárʊ wɔɔdɔ́ ma sɩsɩ: «Nkewíi! Bɛɛ́ɛ, Yudáa-dɛ́ɛ ɖugoré-dɛ́ɛ gúúní, Ɖáwʊɖa-dɛ́ɛ ɖɩgɛsɩrɛ, weeɖi yowú; wánbɩɩzɩ́ ibóɖi nibíízi lʊbɛ sɩḿ bɩka ifulú kɩ.» 
Ngɛ mááná Fée-bú naárʊ sɩ́ŋɛ́ɛ kowuro-gbelé na weezuú kpɩná naazáánɩ́ na kʊ́bɔnáa ákoowú na nɔɔ́náázá bɔlɔwʊtáá. Fée-bú ɩmʊ́ ɩjɔɔ́ɔ nyazɩ bɔɔdɔ́ɖɩ yɩ bɩlɛ́. Ɩwɛná yɩ́sɩ lʊbɛ, na ɩzá lʊbɛ. Ɩzá amʊ́ agɛ́ɛ na kʊ Ɩsɔ́ɔ-dɛ́ɛ kezéézi lʊbɛ wéndiríi sɩ ɖúúlínya rɩ́ŋa-daá nɛ́. 
Fée-bú ɩmʊ́ waagánʊ́ŋ ɩkɔ́nɩ ɩmʊ tákaraɖá kɩḿ weení ɩjɔɔ́ɔ kowuro-gbelé-rɔ nɛ́-dɛ́ɛ nʊ́ʊ́nɩ kíɖiiwú-daá. 
Waamʊ tákaraɖá nɛ́, ngɛ weezuú kpɩná naazáánɩ́ na kʊ́bɔnáa ákoowú na nɔɔ́náázá bána baagá baɖʊná Fée-bú ɩzá-daá; badaá báa weení ɖɔ́kɩná cɩmʊʊ́ na kɔ́ɔ́pɩwá siká ńdɩ bɩka tulaarɩ́ bánvʊʊdɩ́ kɩ nɛ́ súu na tɩ. Tulaarɩ́ kɩḿ kɩgɛ́ɛ na kʊ Ɩsɔ́ɔ-dɛ́ɛ ńba-dɛ́ɛ sʊlʊ́ńdɩ. 
Bɔwɛ béndéédi yéńdi kɩ́fatɩ sɩsɩ: «Nyɔ́mɔ́ɔ́na kʊ nmʊ tákaraɖá kɩḿ, bɩka nbóɖi kinibíízi. Káma, baagʊ nya balá sarɔ́ɔ nɛ́, nyɛ́dɛ́ɛ azimá gɛ nyáámʊ́ ná ɖugoré báa wenɖé, kʊnʊm báa wenkí, laadɔ́ɔ báa wenká na yíri báa wenkí-dɛ́ɛ ɩráa nlɛ́ɛ wɛ nbɩsɩná wɛ wenbí bɩgɛ́ɛ Ɩsɔ́ɔ-dɛ́ɛ ńbɩ nɛ́. 
Nyáábɩ́sɩ́ná wɛ ɩdɛ́ɛ kowuro-laadɔ́ɔ-daá ńba na Ɩsɔ́ɔ sarásɩ lanɖáa bánlám yɩ sarásɩ, ɩmʊ́ weení ɩgɛ́ɛ ɖɛ́dɛ́ɛ Ɩsɔ́ɔ nɛ́; ngɛ sɩ beɖi kowúrátɩ gɛ adɛ laadɔ́ɔ-rɔɔzɩ́.» 
Máádásɩ mɛbɛ́ɛ́ŋ nɛ́, ngɛ máánɩ́ɩ malááyɩ́kawá tuutúúma lóóni: baadála mííli‑mííliwá, na mííli fuú‑fuúwá-dɛ́ɛ mííli fuú. Baalára bamɩlɩná kowuro-gbelé na weezuú kpɩná na kʊ́bɔnáa, 
bɩka béndéédi yéńdi bɩ́njaarɩ́ sɩsɩ: «Fée-bú weení baagʊ yɩ nɛ́ kɛ́ɛ na kʊ yíko-dʊ́ʊ, na ɖɔ́ɔ́lɛ-dʊ́ʊ, na áséńsí-dʊ́ʊ, na ɖóni-dʊ́ʊ. Ɩnáábɩ́lɛ́ ɖɔɔzɩ́tɩ, ásícé na sám mɔɔ́na!» 
Ngɛ máánɩ́ɩ wenbí bɩrɩ́ŋa baalá bɩ taká bʊwɛ adɛ na ɩsɔ́ɔ́dáá, na adɛ bú-daá, na tenkú-daá nɛ́, wenbí bɩrɩ́ŋa bʊwɛ ɖúúlínya rɩ́ŋa-daá nɛ́, bʊwɛ bíndéédi yéńdi sɩsɩ: «Sám, ɖɔɔzɩ́tɩ, ásícé na yíko mɔɔ́na kʊ weení ɩjɔɔ́ɔ kowuro-gbelé-rɔ nɛ́, ɩ́na Fée-bú, báa ngbeére bɩ́dɛ́ndɛŋ́!» 
Bɩka weezuú kpɩná naazáánɩ́ wéndisí sɩsɩ: «Amí.» Ngɛ kʊ́bɔnáa waagá baɖʊná bokúu wɛ tɛ́ɛ́dɩ. 
