﻿1 PÉTRO.
5.
Lɛlɛɛɖɔ́, wenbá bɛgɛ́ɛ Krísto-dɛ́ɛ Koduuziya-dɛ́ɛ kʊ́bɔnáa bɔwɛ mɩ́lɔ́wʊ́táá nɛ́ gɛ mándasɩ́ tɔ́m. Mɔ́ɔ́ ɖʊɖɔ mɛ́gɛ́ɛ Krísto-dɛ́ɛ Koduuziya-dɛ́ɛ kʊ́bɔnɩ́ gɛ nyazɩ bɛḿ ɖʊɖɔ, mɛ́gɛ́ɛ Krísto-dɛ́ɛ wahála waana kɩ nɛ́-dɛ́ɛ seríya-dʊ́ʊ ɖʊɖɔ, bɩka mónÿuúu Ɩsɔ́ɔ-dɛ́ɛ ásícé kɩgɛrɛŋɛ nɛ́. 
Ńŋɩnáa fééni ketiráa wénveríi bɛdɛ́ɛ fééni-rɔ nɛ́, ɩbɛ́ɛ́ŋ zamɔ́ɔ Ɩsɔ́ɔ weejéle mɩ́ɩ kɩ nɛ́ kɩrɔ. Bɩ́kalá na tɩ́lásɩ gɛ mɩ́nbɛɛŋnáa kɩrɔ, amá, bɩ́la na mɩ́dɛ́ɛ sɔɔlɩ́m, ńŋɩnáa Ɩsɔ́ɔ wɔɔbɔ́ɔ́zɩ nɛ́. Bɩ́kalá sɩsɩ iyuú liideé-rɔɔzɩ́, amá, ɩlaná sɔɔlɩ́m. 
Ɩ́kanáázɩ wenbá Ɩsɔ́ɔ weejéle mɩ́ɩ bɛɛŋ́ nɛ́, amá, ɩlá wenbá bɛlɛ́ bɛ́nbɛɛŋnáa nɛ́. 
Na a ketiráa-dɛ́ɛ wúro wɔɔgɔ́nɩ, ɩfɛ́rɛ mɩ́ɩ kɩvɛrɛwʊ ásícé ńgɩ kɩvɛ́yɩ́na tɛ́m nɛ́. 
Bɩlɛ́ ɖʊɖɔ gɛ afobíya na aléewá, ɩvʊ́ʊ́zɩ mɩ́dɩ Krísto-dɛ́ɛ Koduuziya-dɛ́ɛ kʊ́bɔnáa-dɛɛzɩ́. Mɩ́rɩ́ŋa mɩ́dɛ́ɛ ɖamá-daá sʊʊ́ na lɩɩ́-daá, ɩvʊ́ʊ́zɩ mɩ́dɩ, káma, baaŋmáa Ɩsɔ́ɔ-dɛ́ɛ Tɔ́m Tákaraɖá-daá sɩsɩ: «Ɩsɔ́ɔ wángʊrʊ́ʊ na wenbá bángbaazɩ́ badɩ nɛ́, bɩka wánlám wenbá bánvʊʊzɩ́ badɩ nɛ́ kazɔ́ɔ ńbɩ.» 
Ɩvʊ́ʊ́zɩ mɩ́dɩ Ɩsɔ́ɔ yíko-dʊ́ʊ-dɛɛzɩ́ na a sáátɩ wenkí waazɩ́ɩ kɩ nɛ́ kɩɩdála, ɩkpáázɩ mɩ́ɩ. 
Ɩgbɔ́ɔ lomaazɛ́ weená arɩ́ŋa ánjaarɩ́ mɩ́ɩ nɛ́ ɩɖʊ ɩnʊ́ʊ́zɩ-daá, káma, wɛ́nbɛɛŋ kʊ mɩ́rɔ́. 
Ɩɖɔ́kɩ mɩ́dɩ, ɩjɔɔná mɩ́ɩ́zá! Mɩ́báɖaa Sitáánɩ wánlarɩ́ɩ wánmɩlɩ́ɩ nyazɩ gúúní kɩ́ńÿɛ́ɛ́ baaná nɛ́, kɩ́njáádɩ weení sɩ kɩyáázɩ yɩ nɛ́. 
Ɩɖɔ́kɩ toovonúm fáa bɩcáárɩ na ɩ́kafa kɩ ɩzá. Ɩdɔ́ɔ́zɩ sɩsɩ mígoobíya Krísto ńba ɖúúlínya rɩ́ŋa-daá wánnáa bɩdɛ́ɛ wahála nɔ́ɔ́. 
Wɩ́rɛ, mɩ́dɛ́ɛ wahála wánzɩɩ́ tɩ́ŋa. Amá, Ɩsɔ́ɔ weení ɩbá wánlám ɖáa kazɔ́ɔ ńbɩ nɛ́, waayáa mɩ́ɩ gɛ sɩsɩ iyuú ɩdɛ́ɛ ásícé kɩvɛ́yɩ́na tɛ́m mɩ́na Krísto mɩ́ɩ́lá kʊ́ɖʊḿ nɛ́. Ɩsɔ́ɔ ɩmʊ́ ɩdɩtɩŋa wɔ́nnyɔɔzɩ́ mɩ́ɩ, iyéle mɩ́dɛ́ɛ toovonúm fáa ɩcáárɩ, ɩkpáázɩ mɩ́ɩ ɖóni, bɩka iyéle mɩ́ɩ ɩbára kazɔ́ɔ. 
Ɩnáábɩ́lɛ́ yíko mɔɔ́na báa sáátɩ wenkí. Amí. 
Siláasɩ gɛ mééyéle wánŋmaá mɩ́ɩ tɔ́m bíya cʊ́kɔ bana. Mɔ́ɔ́ mɛ́dɛ́ɛ bɛɛŋ́-daá, ɩgɛ́ɛ koobúu ɩzɩɩzɛ́ɛ nɛ́ gɛ. Ménÿekí mɩ́ɩ wasɩ́ɩ́ka kana sɩsɩ kakpáázɩ mɩ́ɩ ɖóni bɩka mevééri mɩ́ɩ sɩsɩ Ɩsɔ́ɔ-dɛ́ɛ kʊnyɔnnɩɩrɛ́ tɩtɩŋa gɛ mɩ́ɩ́gbɔ́ɔ mɩ́dɩ ɩtaná. 
Yeésu Krísto-dɛ́ɛ Koduuziya kɔwɛ Babilɔ́ɔnɩ cé Ɩsɔ́ɔ waada ɩlɩzɩ́ kɛ nyazɩ waada ɩlɩzɩ́ mɩ́ɩ nɛ́, wɛɛzɛ́ɛ mɩ́ɩ. Maárɩkɩ ɩgɛ́ɛ mebiyaalʊ́ toovonúm ɖáává kɩ nɛ́ kɩnɩ́bááwʊ-daá nɛ́ ɖʊɖɔ wɛɛzɛ́ɛ mɩ́ɩ. 
Ɩzɛ́ɛ ɖamá ikpíriki ɖamá na sɔɔlɩ́m. Ɩsɔ́ɔ-dɛ́ɛ fɛɛzɩrɛ ɩ́cɔ́ɔ́ná mɩ́nyɔ́ɔ́ wenbá mɩ́gɛ́ɛ Krísto-dɛ́ɛ ńba nɛ́.
