﻿Wasɩ́ɩ́ka baaŋmáa kɛ Éburu ńba nɛ́.
1.
Ɖoo nɛ́, Ɩsɔ́ɔ waalaaná anɖébiwá banáa yáásɩ́wá ndɩ‑ndɩ-daá ɩŋmatɩná ɖájaájaanáa. 
Amá, lɛlɛɛɖɔ́, wɛ́ kɛdɛɛzɩya ńná ana adaá nɛ́, waaŋmatɩná ɖáa na Ibiyaalʊ́. Biyaalʊ́ʊ ɩmʊ́ gɛ Ɩsɔ́ɔ waabaná ɩlá ɖúúlínya, ɩnáábɩ́lɛ́ weejéle bɩrɩ́ŋa sɩsɩ bɩ́bɩsɩ ɩdɛ́ɛ ńbɩ. 
Biyaalʊ́ʊ ɩmʊ́ ɩrɔ gɛ bánnáa Ɩsɔ́ɔ-dɛ́ɛ ásícé, wenbí ɩjɔɔ́ɔ nɛ́, bɩlɛ́ nɔ́ɔ́ ɖʊɖɔ gɛ Ɩsɔ́ɔ cɔɔ́ɔ. Ɩnɔɔ́-daá tɔ́m wɛná yíko gɛ, bɩka tɩnáábɩ́lɛ́ ɩɖɔ́kɩná na ɖúúlínya. Waayáálɩ ɩráa bɛdɛ́ɛ alaháácɩ́wá, ɩlá wɛ ɖacɩrɩ‑cɩrɩ bɩtɛ́ nɛ́, waagba ɩsɔ́ɔ́dáá ɩcɔ́ɔ yíko-dʊ́ʊ-dɛ́ɛ kíɖiiwú-rɔ. 
Biiyéle wɛɛjɛzɩ́ malááyɩ́kawá, ngɛ Ɩsɔ́ɔ waava yɩ yɩ́ɖɛ ɖɩɩgɩ́lɩ bɛdɛ́ɛ ńɖɛ nɛ́. 
Káma, malááyɩ́kawá-daá, weení gɛ kɛtɛngɛrɛ Ɩsɔ́ɔ wɔɔdɔ́ sɩsɩ: «Nyɔ́ɔ́ gɛ Mebiyaalʊ́, kpɔɔná sinje, mɔ́ɔ́ gɛ Njaa.» Malááyɩ́kawá-daá weení gɛ kɛtɛngɛrɛ wɔɔdɔ́tɔḿ ɖʊɖɔ sɩsɩ: «Mánbɩsɩ́ yɩ Caáwʊ, bɩka ɩmʊ́ ɩbɩ́sɩ ma Biyaalʊ́ʊ.» 
Amá, sáátɩ wenkí sɩ ɩkɔ́gɔ́ná Biyaalʊ́ʊ kaɖaa ńnɩ́ ɖúúlínya-daá nɛ́, wɔɔdɔ́ gɛ sɩsɩ: «Ɩsɔ́ɔ-dɛ́ɛ malááyɩ́kawá rɩ́ŋa íkuu yɩ tɛ́ɛ́dɩ.» 
Amá, Ɩsɔ́ɔ wánŋmatɩ́ malááyɩ́kawá-dɛ́ɛ tɔ́m nɛ́, wɔɔdɔ́ gɛ sɩsɩ: «Wánlanáa ɩdɛ́ɛ malááyɩ́kawá nyazɩ fefelimá, bɩka wánlanáa ɩdɛ́ɛ bɔwʊtá-dɩnáa nyazɩ nimidʊlʊʊ́.» 
Amá, wánŋmatɩ́ Biyaalʊ́ʊ-dɛ́ɛ tɔ́m nɛ́, wɔɔdɔ́ gɛ sɩsɩ: «Ɩsɔ́ɔ, nyógowúrɔ́ɔ fɛ́yɩ́na tɛ́m kɛtɛngɛrɛ. Nyɛ́dɛ́ɛ kowúrátɩ ɖíi-daá, wenbí bɩzɩɩzɛ́ɛ nɛ́ gɛ nyánlám. 
Nyɔ́zɔɔlɛ́ɛ wenbí bɩzɩɩzɛ́ɛ nɛ́, bɩka ńdánjaa kidaavééníti; Ɩsɔ́ɔ, bʊrɔ gɛ nyɛ́dɛ́ɛ Ɩsɔ́ɔ waada ɩlɩzɩ́ nya, ɩtáa nyágʊjʊʊ́ jíńgáárɩ́ núm, ngɛ wɔɔzɔ́ɔ́lɩ nyɔ́dɔ́m bɩkɩ́lɩ nɖɔndɩnáa.» 
Wɔɔdɔ́ ɖʊɖɔ sɩsɩ: «Mádʊ́ʊ Ɩsɔ́ɔ, ɖoo bɩgabaazɩya, nyɔ́ɔ́ nyóózúu ná ɖúúlínya; nyáálá ná ɩsɔ́ɔ́dáá. 
Bɩlɛ́ bɩrɩ́ŋa ɖɔ́ bɩ́ngɔnɩ́ bɩtɛlɛ́ŋ; amá, nyɔ́ɔ́ nyɔ́wɛ gɛ. Ńŋɩnáa tóko wánzɩ́m nɛ́, bɩlɛ́ gɛ bɩrɩ́ŋa sɩ bɩkɔ́nɩ bɩsɩ́. 
Ńŋɩnáa bóngoodí baramáásʊ́ nɛ́, bɩlɛ́ gɛ sɩ ngóódi bɩ; bɩrɩ́ŋa bɩ́ngɔnɩ́ bɩkɛ́ɛ ńŋɩnáa bɛ́ngɛɛ́ tóko nɛ́. Amá, nyɔ́ɔ́, wenbí nyɔ́jɔɔ́ɔ nɛ́, bɩlɛ́ gɛ sɩ njɔ́ɔ, bɩka nyéweezuú fɛ́yɩ́ kɩ́ndɛ́m kɛtɛngɛrɛ.» 
Kɛtɛngɛrɛ malááyɩ́kawá-daá, weení gɛ Ɩsɔ́ɔ wɔɔdɔ́ sɩsɩ: «Cɔɔ mégíɖíiwú-rɔ, hálɩ maɖʊ nbáɖaanáa nyɔ́nʊvɔ́-dɛ.» 
Malááyɩ́kawá nɛ́, we gɛ bɛgɛ́ɛ. Bɩdɛkɛ́ɛ Ɩsɔ́ɔ-dɛ́ɛ tɩndɩnáa bádánnáa wɛ, bɩka bánlám Ɩsɔ́ɔ bɔwʊtá nɛ́ gɛ bɛgɛ́ɛ? Ɩsɔ́ɔ wéndiríi wɛ gɛ bɛ́nɖɛɛ́ bángazɩnáa wenbá bɩmɔɔ́na boyuú lɛ́ɛ́dɩ nɛ́. 
