﻿1Timotée.
3.
Tɔ́m sɩ maŋmátɩ tɩ ɖɔ́ nɛ́, tɩɩbá tɩgɛ́ɛ toovonúm gɛ, tɩlɛ́ gɛ sɩsɩ: A naárʊ sɔɔlɛ́ɛ ɩbɩ́sɩ Koduuziya-dɛ́ɛ ketirú, tɩmɛ́rɛ kazɔ́ɔ ńɖɛ gɛ ɩzɔɔlɛ́ɛ bɩlɛ́. 
Bɩlɛ́ nɛ́, Koduuziya-dɛ́ɛ ketirú mɔɔ́na ɩgɛ́ɛ ɩrʊ́ weení baasɩ ná yɩ na yáásɩ́ nakɩ́rɩ kɩdakazɔ́ɔ nɛ́ gɛ. Bɩɩbɔ́ɔ́zɩ sɩsɩ alʊ́ kʊ́ɖʊḿ-dʊ́ʊ gɛ ɩgɛ́ɛ, bɩka ɩgɛ́ɛ ɩrʊ́ weení ɩ́dánlaḿ nabʊ́rʊ bɩcɛzɩ́ na seríya nɛ́; ɩrʊ́ laakáarɩ-dʊ́ʊ, weení ɩráa wánɖʊ́ʊ yɩ gírímá nɛ́; bɩdɛ́ɛ ɩrʊ́ mɔɔ́na ɩnyɩ ɩráa mʊ́ʊ, bɩka ɩgɛ́ɛ weení wánbɩɩzɩ́ ɩwɩ́lɩ Ɩsɔ́ɔ-dɛ́ɛ tɔ́m nɛ́. 
Ɩdɔmɔɔná ɩgɛ́ɛ weení wángɩlɩ́ɩ nyɔ́ɔ́dɩ nɛ́, cáńfáná gáráɖáma-dʊ́ʊ. Amá, bɩɩbɔ́ɔ́zɩ gɛ sɩsɩ ɩgɛ́ɛ ɩrʊ́ weení ɩvɛ́yɩ́na nɔwɛ́ya báa cʊ́kɔ bɩka ɩzɔɔlɛ́ɛ na báa weení fɛɛzɩrɛ nɛ́ gɛ. Ɩdɔmɔɔná ɩgɛ́ɛ weení ɩbá ɩzɔɔlɛ́ɛ liideé nɛ́. 
Bɩɩbɔ́ɔ́zɩ ɩgɛ́ɛ weení ɩnyɩ ɩdɩtɩŋa ɩdɛ́ɛ ɖaána ketí bɩka ibíya wánnɩɩnáa yɩ, bɛ́nnyɛ́m yɩ bɩrɩ́ŋa bɩdaá nɛ́ gɛ. 
Káma, a ɩrʊ́ wɛ gɛ waasɩ ɩdɩtɩŋa ɩdɛ́ɛ ɖaána ketí, nŋɩ́nɩ́ gɛ bɩ́nlám na ɩtɩlɩ́ ɩbɛ́ɛ́ŋ Ɩsɔ́ɔ-dɛ́ɛ Koduuziya. 
Koduuziya-dɛ́ɛ ketirú tɔmɔɔná ɩgɛ́ɛ ɩrʊ́ weení waalá túúbá bideleeri tá nɛ́, na ɩ́kɔkɔ́nɩ ɩkpáázɩ ɩdɩ biyéle Ɩsɔ́ɔ ɩkʊ ɩdɔ́m ńŋɩnáa waalá Sitáánɩ nɛ́. 
Bɩɩbɔ́ɔ́zɩ ɖʊɖɔ sɩsɩ wenbá bɛdɛkɛ́ɛ Krísto ńba nɛ́, bánlɩzɩ́ɩ seríya kífeńgi ɩrɔɔzɩ́, na bɔ́kɔkɔ́nɩ bɛkpɛɛná yɩ bɩka ɩsála Sitáánɩ-dɛ́ɛ kɔdɔ́sɩ-daá. 
Bɩlɛ́ ɖʊɖɔ gɛ Koduuziya-dɛ́ɛ ketiráa-dɛ́ɛ sɩnára mɔɔ́na bɛgɛ́ɛ wenbá ɩráa wánɖʊ́ʊ wɛ gírímá nɛ́. Bɔdɔmɔɔná bɛgɛ́ɛ nɔ́ɔ́zɩ nasɩ́lɛ-dɩnáa, yáá wenbá bángɩlɩ́ɩ nyɔ́ɔ́dɩ nɛ́, cáńfáná wenbá bádánjaaná liideé na toovonúm nɛ́. 
Bɩɩbɔ́ɔ́zɩ sɩsɩ ketiráa-dɛ́ɛ sɩnára ɩbá bafa wentí ɖɛ́dɛ́ɛ toovonúm fáa-dɛ́ɛ ásíírí wánwɩlɩ́ɩ nɛ́ toovonúm, bɩka bɔɖɔ́kɩ tɩ na wenbiré ɖacɩrɩ‑cɩrɩ ńɖɛ. 
Bɩmɔɔ́na baɖáázɩ wɛ bɛbɛ́ɛ́ŋ naanɩ́; a bɩlɛ́ gɛ badana ná wɛ natɩ́rɩ tɩdakazɔ́ɔ nɛ́, bánbɩɩzɩ́ balá ketirú-dɛ́ɛ sɩnárʊ-dɛ́ɛ tɩmɛ́rɛ. 
Bɩlɛ́ ɖʊɖɔ gɛ sɩnára aláa mɔɔ́na bɛgɛ́ɛ wenbá ɩráa wánɖʊ́ʊ wɛ gírímá nɛ́, bákalá kɔrɔmɔ́tɔ-dɩnáa, bɩ́la sɩsɩ bɛgɛ́ɛ wenbá bádánlaḿ nabʊ́rʊ bɩcɛzɩ́na seríya nɛ́; bɩmɔɔ́na bɛgɛ́ɛ aláa toovonúm-dɩnáa bádánlɩɩ bɛdɛ́ɛ tɔ́m wɔ́rɔ́ nɛ́. 
Bɩɩbɔ́ɔ́zɩ sɩsɩ Koduuziya-dɛ́ɛ sɩnárʊ kɛ́ɛ alʊ́ kʊ́ɖʊḿ-dʊ́ʊ gɛ. Bɩɩbɔ́ɔ́zɩ ɩnyɩ wéngetí ibíya na ɩdɛ́ɛ koobíre kazɔ́ɔ. 
Káma, sɩnára bánlám badɩmɛ́rɛ kazɔ́ɔ nɛ́, ɩráa rɩ́ŋa wánɖʊ́ʊ wɛ gírímá gɛ, bɩka bánbɩɩzɩ́ bánŋmatɩ́ toovonúm ɖáává Yeésu Krísto nɛ́-dɛ́ɛ tɔ́m nɩdáárɛ fɛ́yɩ́. 
Mánŋmaá nya wasɩ́ɩ́ka kana ɖɔ́ nɛ́, máájáŋ mɔ́wɛná tamɔ́ɔ sɩsɩ bídénleeri, mɔ́ngɔnɩ́ nyɔ́jɔ́ ńna. 
Amá, a bínleerí gɛ mɔ́dɔkɔ́nɩ tá, wasɩ́ɩ́ka kana kánzɩnáa nya ndɩlɩ́ nŋɩ́nɩ́ bɩɩbɔ́ɔ́zɩ ɩrʊ́ ɩcɔɔná Ɩsɔ́ɔ-dɛ́ɛ koobíre-daá nɛ́. Koobíre ɖɩḿ gɛ Ɩsɔ́ɔ weezuú-dʊ́ʊ-dɛ́ɛ Koduuziya. Koduuziya kɛḿ kanáábɩ́lɛ́ zíígo kɩɖɔ́kɩná toovonúm tɩtɩŋa nɛ́. 
Ɩɩ́n, ɖɛ́dɛ́ɛ toovonúm fáa-dɛ́ɛ ásíírí Ɩsɔ́ɔ waalɩzɩ́ ɩwɩ́lɩ-ɖáa nɛ́ wɔɔɖɔ́ɔ. Krísto, waaɖʊ ɩlɩ́ɩ ɩbɩ́sɩ ɩrʊ́, Kezeŋa Ɖacɩrɩ‑cɩrɩ ńga waalɩzɩ́ kawɩ́lɩ sɩsɩ ɩgɛ́ɛ toovonúm-dʊ́ʊ, ngɛ malááyɩ́kawá waana yɩ. Bɔɔbɔ́ɔ ɩdɛ́ɛ tɔ́m yíriwá-jɔ́, ɩráa ɖabata waava yɩ toovonúm ɖúúlínya-daá. Ngɛ Ɩsɔ́ɔ waagbáázɩ yɩ ɩɖʊ yɩ ɩdɛ́ɛ ásícé-daá. 
