GEN 1:1 Оԓәӈән Турәм турәм пӑ мўв тыйәԓтәс.
GEN 1:2 Мўв ватԓы-хŏрԓы пӑ таԓ ус, пӑтыԓы йиӈкәӈ тӑха нўмпийән пӑтлам ус, Турәм Ԓыԓәԓ йик нўмпийән йӑӈхәс.
GEN 1:3 Турәм йастәс: «Нŏвийа ат йиԓ». Пӑ нŏвийа йис.
GEN 1:4 Щӑԓта Турәм шийаԓәсԓы, нŏви щит йӑм, пӑ пӑтлам эԓты нŏви атэԓт ўсԓы.
GEN 1:5 Турәм нŏви хӑтԓа нэмәтсәԓы, пӑтлам пӑ ата нэмәтсәԓы. Йэтән ус пӑ аԓәӈсӑхат ус: оԓәӈ хӑтәԓ.
GEN 1:6 Турәм йастәс: «Йик кўтән турәм ԓŏӈәԓ ат питәԓ, йиӈкәт атэԓт ат ўԓԓы».
GEN 1:7 Турәм турәм ԓŏӈәԓ тыйәԓтәс, нўм йиӈкәт иԓта йиӈкәт эԓты атэԓт ўсԓы. Пӑ щиты щи питәс.
GEN 1:8 Турәм щи турәм ԓŏӈәԓ турәм хӑра нэмәтсәԓы. Йэтән ус пӑ аԓәӈсӑхат ус: кимет хӑтәԓ.
GEN 1:9 Турәм йастәс: «Турәм иԓпийән йиӈкәт и тӑхайа ат ӑктәщԓәт пӑ сорәм тӑха ат этәԓ». Пӑ щиты щи питәс.
GEN 1:10 Сорәм тӑха Турәм мўва нэмәтсәԓы, йӑха ӑктәм йиӈкәт щарса нэмәтсәԓы. Турәм шийаԓәсԓы, щит йӑм.
GEN 1:11 Турәм йастәс: «Мўв вŏсты тŏрнәт пӑ йўхәт ат энмәԓәԓ, тŏрнәт энәмты сэмәт ат тӑйԓәт пӑ ԓэвпәсәӈ йўхәт, кашәӈ йўх энмәԓтәм ԓэвпәсԓаԓән нохәр сэм ԓўв сырәԓ щирән мўвән ат тӑйәԓ». Пӑ щиты щи питәс.
GEN 1:12 Мўв вŏсты тŏрнәт пӑ ԓэвпәсәӈ йўхәт энмәԓтәс: кашәӈ тŏрән тŏрән сэмԓаԓ пиԓән ԓўв сырәԓ щирән; пӑ йўхәт, кашәӈ йўх энмәԓтәм нохәр сэмәӈ ԓэвпәс ԓўв сырәԓ щирән тӑйәс. Турәм шийаԓәсԓы, щит йӑм.
GEN 1:13 Йэтән ус пӑ аԓәӈсӑхат ус: хуԓмет хӑтәԓ.
GEN 1:14 Щӑԓта Турәм йастәс: «Турәм хӑрән хутԓәты ŏтәт ат питԓәт, ат пӑ хӑтәԓ ԓэра уйәтты урәӈән, пӑ щӑԓта поса ат уԓԓәт: йисәт, тӑԓәт, хӑтԓәт ԓэрапты урәӈән.
GEN 1:15 Пӑ турәм хӑрән хутԓәптәты ŏтәта ат питԓәт, мўв хутԓәптәты урәӈән». Пӑ щиты щи питәс.
GEN 1:16 Турәм кӑт вŏԓаӈ хутԓәптәты ŏтӈән тыйәԓтәс: уншәк ŏт хӑтәԓән ԓойты урәӈән, айшәк ŏт атән ԓойты урәӈән, пӑ хусәт тыйәԓтәс;
GEN 1:17 Турәм щи ŏтәт турәм хӑра ԓэщатсәԓы, мўв хутԓәптәты,
GEN 1:18 пӑ ат пӑ хӑтәԓ мŏрт пŏрайән пайтыԓыты, пӑ нŏви пӑ пӑтлам кӑтна тӑйты урәӈән. Турәм шийаԓәсԓы, щит йӑм.
GEN 1:19 Йэтән ус пӑ аԓәӈсӑхат ус: ԋӑԓмет хӑтәԓ.
GEN 1:20 Турәм йастәс: «Кӑмән хŏрпи ваӈкәтԓыты, ущиԓыты вой тащ йик ат тыйәԓтәԓ, пӑ мўв нўмпийән, турәм хӑр хўват тŏхԓәӈ войәт ат йӑхԓәт».
GEN 1:21 Турәм ун хўԓ шикет пӑ ар сыр ваӈкәтԓыты, ущиԓыты йикән вŏшиты арат ԓыԓәӈ ŏт пӑ ар сыр тŏхԓәӈ вой тыйәԓтәс. Турәм шийаԓәсԓы, щит йӑм.
GEN 1:22 Турәм ԓывиԓаԓ йӑмән мӑсԓы, пŏтәртман: «Пŏшхащаты, ара йўваты, щарсәтән йиӈкәт тэкнәптаԓән, тŏхԓәӈ войәт мўв хŏща па ара ат йиԓәт».
GEN 1:23 Йэтән ус пӑ аԓәӈсӑхат ус: ветмет хӑтәԓ.
GEN 1:24 Турәм йастәс: «Ԓыԓәӈ ŏтәт сырԓаԓ щирән мўв ат тыйәԓтәԓ: йош войәт, ут войәт, ваӈкәтԓыты, ущиԓыты, хухәтԓыты войәт хŏԓ сырԓаԓ щирән». Пӑ щиты щи питәс.
GEN 1:25 Ут войәт сырԓаԓ щирән, йош войәт сырԓаԓ щирән, ваӈкәтԓыты, ущиԓыты, хухәтԓыты войәт сырԓаԓ щирән Турәм тыйәԓтәс. Турәм шийаԓәсԓы, щит йӑм.
GEN 1:26 Турәм йастәс: «Мўӈ хŏрасэв пӑ Мўӈ хŏрпев хŏйат тыйәԓтԓув. Пӑ щӑԓта щарәс хўԓәт нўмпийән, тŏхԓәӈ войәт нўмпийән, йош войәт нўмпийән, омәсты мўв нўмпийән, мўвән ваӈкәтԓыты, ущиԓыты, хухәтԓыты войәт нўмпийән кущайа ԓўв ат уԓ».
GEN 1:27 Турәм хŏйат Ԓўв хŏрасәԓ щира, Турәм хŏрас щира, тыйәԓтсәԓы; йох хŏйат пӑ нэ хŏйат тыйәԓтәс.
GEN 1:28 Турәм ԓынан йӑмән мӑсԓы пӑ Турәм ԓынана йастәс: «Пŏшхащатән, ара йўваты, мўв тэкнәптаԓән, мўв ԓŏватән кущайа уԓаты, пӑ щарәс хўԓәт, пӑ тŏхԓәӈ войәт нўмпийән, пӑ мўвән ваӈкәтԓыты, ущиԓыты, хухәтԓыты войәт нўмпийән кущайа уԓатән».
GEN 1:29 Турәм йастәс: «Тӑта щи, мўв ԓŏватән энәмты кӑмән хŏрпи ԓат сэмәӈ тŏрән пӑ кӑмән хŏрпи ԓэвпәсәӈ йўх, мўва йŏвәԓты нохәр сэмԓаԓ пиԓән Ма нынана мӑсәм: щит нынана ԓэтŏта питәԓ.
GEN 1:30 Ут войәта, тŏхԓәӈ войәта пӑ ар сыр ваӈкәтԓыты, ущиԓыты, хухәтԓыты войәта – хŏԓ ԓыԓәӈ войәта энәмты тŏрнәт, лыптәт ԓэтŏта Ма мӑсәм». Щиты щи питәс.
GEN 1:31 Щӑԓта Турәм ватсәԓы, мўй Ԓўв тыйәԓтәс пӑ щит шек йӑм. Йэтән ус пӑ аԓәӈсӑхат ус: хутмет хӑтәԓ.
GEN 2:1 Щиты турәм пӑ мўв опсантәм щир йэтшәс, турәмән пӑ мўвән уԓты ŏтәт тыйәԓтты вер йэтшәс.
GEN 2:2 Ԓапәтмет хӑтәԓ унты Турәм Ԓўв верәм верԓаԓ йэтшәптәсԓы, щӑԓта ԓапәтмет хӑтәԓән Ԓўв верәм верԓаԓ эԓты щўтщәс.
GEN 2:3 Ԓапәтмет хӑтәԓ Турәм йӑмән мӑсԓы, йэмәӈа версәԓы, щи хӑтәԓән Ԓўв тыйәԓтәм пӑ йэтшәптәм верԓаԓ эԓты щўтщәс.
GEN 2:4 Тӑм турәм пӑ мўв опсантәм щир, тыйәԓтәм щир. Турәм Куща мўв пӑ турәм тыйәԓтмаԓән,
GEN 2:5 кӑмән хŏрпи хӑр мўв варәс пӑ кӑмән хŏрпи хӑр мўв тŏрән хŏԓна ӑт энмәс, Турәм Куща мўва йэрт хŏԓна ӑт китыԓыйәс, пӑ мўв хӑр ԓэщатты хŏйат ӑнтом ус, щишән.
GEN 2:6 Туп мўв эԓты шив нŏх этԓыйәс пӑ мўв сŏх аратәԓ иса посмәԓтысԓы.
GEN 2:7 Щӑԓта Турәм Куща мўв хиш эԓты хŏйат тыйәԓтәс пӑ ԋŏԓ ўсәԓа уԓты ԓыԓән пŏԓәтсәԓы, пӑ хŏйат ԓыԓәӈа йис.
GEN 2:8 Щӑԓта Турәм Куща хӑԓэвәт пеләк мўвән, Едэмән, ар сыр йўхәт опсәс, щи ŏйәӈ-щўԋәӈ тӑхайән тыйәԓтәм хŏйатәԓ уԓты хӑйсәԓы.
GEN 2:9 Турәм Куща ар хŏрпи йўхәт умәщԓыты кеша пӑ йӑм ԓэвпәс урәӈән энмәԓтәс, пӑ щӑԓта, щи ŏйәӈ-щўԋәӈ тӑха кўтәпән уԓәпса йўх энмәԓтәс пӑ йӑм пӑ атәм ŏша пайәтты щир тӑйты йўх щита энмәԓтәс.
GEN 2:10 Ŏйәӈ-щўԋәӈ тӑха йикән пŏшәԓтәты урәӈән, Едэм мўв эԓты йŏхан ŏвәс, йэԓԓы щи йŏхан лакки ԋӑԓ йŏхана йохарщийәс.
GEN 2:11 Йитәԓ нэмәԓ Фисон: ԓўв Хавила мўв керәтман ŏвәԓ, щита, хŏта сорԋи уԓ,
GEN 2:12 сорԋи щи мўвән йӑм; хŏԓна щита эпԓәӈ ух пӑ оникс кев уԓ.
GEN 2:13 Кимет йŏхан Гихон: Куш мўв керәтман ԓўв ŏвәԓ.
GEN 2:14 Хуԓмет йŏхан Хиддекель: Ассирия мўв йэԓпийән ԓўв ŏвәԓ. Ԋӑԓмет йŏхан Евфрат.
GEN 2:15 Турәм Куща хŏйат ўсԓы, пӑ Едэм ŏйәӈ-щўԋәӈ тӑхайән ԓўвеԓ уԓты хӑйсәԓы, щи мўвән мŏԓты энмәԓты пӑ шавиты урәӈән.
GEN 2:16 Турәм Куща хŏйата партәс, щиты йастәман: «Тӑм ŏйәӈ-щўԋәӈ тӑхайән кашәӈ йўх эԓты нӑӈ ԓэты верәтԓән,
GEN 2:17 туп йӑм пӑ атәм ŏша пайәтты йўх эԓты аԓ ԓэва, щи хӑтәԓ, хун щи йўх эԓты мŏԓты ԓэԓән ки, нӑӈ хӑԓԓән».
GEN 2:18 Щӑԓта Турәм Куща йастәс: «Хŏйата утща уԓты атәм, ԓўвеԓа ԋотты ԓўв хŏрпеԓ пиԓ тыйәԓтԓув».
GEN 2:19 Мўв хиш эԓты Турәм Куща хŏԓ ут войәт тыйәԓтсәԓы, хŏԓ тŏхԓәӈ войәт тыйәԓтсәԓы, щӑԓта ԓывиԓаԓ хŏԓ хŏйат хŏща тусԓы, ваттыйа, хŏты хŏйатән нэмәтԓайәт; хŏты хŏйатән кашәӈ ԓыԓәӈ ŏт нэмәтԓа, щиты нэмәԓ ат питәԓ.
GEN 2:20 Щӑԓта хŏйат кашәӈ шŏши войа, тŏхԓәӈ войа, ут войа нэм мӑс; туп хŏйата ԓўвеԓа ԋотты ԓўв хŏрпеԓ пиԓ ӑт ԉикмәс.
GEN 2:21 Щӑԓта Турәм Куща хŏйат так оԓма пайәтсәԓы; хун ԓўв вŏйәпса, и хŏнлŏхәԓ нŏх ўсԓы, щи лот ԋŏхеԓән лӑп пŏтсәԓы.
GEN 2:22 Щӑԓта Турәм Куща хŏйат эԓты ўйәм хŏнлŏхәԓ эԓты нэ хŏйат тыйәԓтәс, пӑ ԓўвеԓ хŏйат хŏща тусԓы.
GEN 2:23 Щӑԓта хŏйат йастәс: «Тӑта щи, тӑм ԓŏв ма ԓŏвԓам эԓты пӑ тӑм ԋŏхи ма ԋŏхем эԓты; ԓўв имийа нэмәтты питԓа: икеԓ эԓты ўйман уԓԓа».
GEN 2:24 Щишән, йох хŏйат ԓўв ащеԓ пӑ ԓўв аԋԏэԓ хӑйԓәԓы пӑ ԓын ита йиԓтән.
GEN 2:25 Адам пӑ ԓўв имеԓ кинтак ԋар эԓән усӈән, ԓын ӑт йэԓамтысӈән.
GEN 3:1 Турәм Куща тыйәԓтәм ут войәт эԓты ŏхты вой мет ŏщмарәӈ ус. Ԓўв нэ пеԓа йастәс: «Турәм мўй йӑна йастәс: ‘Тӑм ŏйәӈ-щўԋәӈ тӑхайән нэмәԓты йўх эԓты аԓ ԓэватән?’»
GEN 3:2 Ŏхты войа нэ йастәс: «Мин йўхәтән энмәм ԓэвпәсәт ԓэты верәтԓәмән,
GEN 3:3 туп Турәм щиты йастәс: ‘Ŏйәӈ-щўԋәӈ тӑха кўтәпән энәмты йўх эԓты ԓэвпәсәт аԓ ԓэватән пӑ аԓ кетмаԓән, нынана ӑт пӑрты урәӈән’».
GEN 3:4 Ŏхты вой нэӈа йастәс: «Ӑнта, ӑт пӑрԓәтән,
GEN 3:5 Турәм уйәтԓәԓы, щи хӑтәԓән, хун нын щиԓта ԓэԓтән, нын ŏшән йŏхәтԓайтән, щӑԓта Турәм иты йӑм пӑ атәм уйәтты питԓәтән».
GEN 3:6 Щитәԓән нэ шийаԓәсԓы, щи йўх сэмән ватты умәщ пӑ ԓэвпәсәԓ йӑм хŏрпи, пӑ щӑԓта йўхәԓ мосәԓ, ŏшәӈ нŏмәс мӑԓ, щишән; щикәԋща, энмәм ԓэвпәс ԓўв ўс пӑ ԓэс; пӑ ԓэвпәс икеԓа па мӑсԓы, ԓўв па ԓэс.
GEN 3:7 Щӑԓта ԓын ŏшән йŏхәтсайтән, пӑ ԋарԓŏмәԓты уԓты верән веԓщи мŏштәсԓән, пӑ смоква йўх лыптәт эԓты эԓ сайԓәты ӑнтәпӈән версәтән.
GEN 3:8 Щӑԓта Турәм Куща сый хуԓтмәстән, хŏты Ԓўв щи ŏйәӈ-щўԋәӈ тӑхайән хӑтәԓ йоләх сӑмән шушиԓыйәс; Адам нэӈәԓ пиԓән Турәм Куща эԓты йўхәт кўтән хӑԋэмәстән.
GEN 3:9 Турәм Куща пӑ Адам ўваԓсәԓы пӑ йастәс: «Нӑӈ хŏта?»
GEN 3:10 Ԓўв йастәс: «Ŏйәӈ-щўԋәӈ тӑхайән Нӑӈ шушиԓыты сыйэн ма хуԓтсэм, пӑ пӑԓтамәсәм ԋарԓŏмәԓты уԓмем урәӈән, щишән хӑԋэмәсәм».
GEN 3:11 Турәм иԋщәссәԓы: «Хŏй нӑӈена йастәс нӑӈ ԋарԓŏмәԓты уԓты верэн? Аԓт пӑ нӑӈ щи йўх эԓты ԓэсән, хŏԓща Ма нӑӈена ԓэты ӑт эсәԓсэм?»
GEN 3:12 Адам йŏхԓы йастәс: «Нэӈән, Нӑӈ мӑнэма мийәм нэӈенән, щи йўх эԓты мӑсайәм, пӑ ма ԓэсәм».
GEN 3:13 Щӑԓта Турәм Куща нэӈа йастәс: «Мўйа нӑӈ щиты версэн?» Нэ йастәс: «Ŏхты вой мӑнэм ԓэпәԓсәԓы, щишән ма ԓэсәм».
GEN 3:14 Щӑԓта Турәм Куща ŏхты войа йастәс: «Щит вермен урәӈән, мўԓман уԓты питԓән йош войәт пӑ ут войәт кўтән, тӑԓта йэԓԓы хŏн пӑтэнән хӑтыԓыты нӑӈ питԓән пӑ уԓтэн хўват мўв хиш ԓэты питԓән;
GEN 3:15 пӑ щӑԓта нӑӈ пӑ нэ, нын кўтәнән атмащ уԓты щир верԓәм, нӑӈ энмәԓты ŏтԓан пӑ ԓўв энмәԓты ŏтԓаԓ кўтән йэԓԓы ищи атмащ уԓты щир пŏнԓәм; хŏйат нӑӈен ŏхен эԓты веԓты питԓәԓы, нӑӈ пӑ ԓўвеԓ кўр йŏтԓаӈ эԓты пŏрэмәԓэн».
GEN 3:16 Нэӈа йастәс: «Ԓавәртат уԓтэнән кӑшиԓан шек ара верԓәԓам; муш пиԓән ԋаврэм тӑйты питԓән; нӑӈ икен нӑӈен мосты питәԓ, ԓўв пӑ нӑӈ кущайэн питәԓ».
GEN 3:17 Адама пӑ йастәс: «Нэӈен йасӈа хуԓәтмен урәӈән пӑ щи йўх эԓты ԓэвмен урәӈән, хŏԓща Ма нӑӈена ԓэты ӑт эсәԓсэм, щи йастыԓысәм: ‘Щиԓта аԓ ԓэва’, тӑԓта йэԓԓы нӑӈ урӈенән мўв мўԓман уԓты питәԓ; уԓтэн хўват шукащман мўв эԓты ԓэтŏт мŏщатты питԓән;
GEN 3:18 пеԓантыты тŏрнәт нӑӈена мўв энмәԓтәԓ, мўв хӑрән энәмты тŏрнәт эԓты ԓэты питԓән;
GEN 3:19 шӑк йик кўтән ԋаԋэн ԓэты питԓэн, мўва иԓ питтэн унты, хŏԓща нӑӈ ўйман уԓԓән, нӑӈ мўв хиш пӑ мўв хиша па йиԓән».
GEN 3:20 Адам имеԓ нэмән мӑсԓы: Ева, ԓўв хŏԓ уԓты хŏйатәт аԋԏийа йис.
GEN 3:21 Турәм Куща Адама пӑ ԓўв имеԓа ԓумәтты сŏхәт ԋўки эԓты верәс пӑ ԓынан ԓумәттәсԓы.
GEN 3:22 Турәм Куща йастәс: «Тӑта щи, хŏйат Мўӈ итэва йис, йӑм пӑ атәм уйәтты питәс, щишән, ӑт рӑхәԓ ԓўвеԓ щиты йэԓ эсәԓты, хŏԓна уԓәпса йўх эԓты ԓэвпәс ўты верәтәԓ, щиԓта ԓэԓ ки, веккеша уԓты питәԓ».
GEN 3:23 Щишән, Турәм Кущайән Едэм ŏйәӈ-щўԋәӈ тӑха эԓты ԓўв воштәса, мўвән ат рупитәԓ, хŏԓща ԓўв тыйәԓтса.
GEN 3:24 Щиты хŏйат воштәсԓы, пӑ Едэм ŏйәӈ-щўԋәӈ тӑха пўӈәԓән хӑтәԓ этты пеләк сӑхат херувим ŏт пӑ щӑԓта ԓӑрыты тўтәӈ аԓтты кеши, уԓәпса йўх хŏща мӑнты йуш шавиты урәӈән ԓощәԓтәс.
GEN 4:1 Адам Ева пиԓән устән, щӑԓта нэӈәԓ Каин нэмпи пŏх тӑйәс, пӑ йастәс: «Турәм Кущайән ԋаврэмән партсайәм».
GEN 4:2 Щӑԓта пӑ ху апщеԓ сэма питәс, Авель. Авель ош тащәт шавийәс, Каин пӑ мўв хӑрән рупитәс.
GEN 4:3 Мŏԓты кўт хӑщәман, Каин энмәԓтәм лэвпәсԓаԓ эԓты Турәм Кущайа мойԓәпса тус,
GEN 4:4 Авель ищи, мет оԓәӈ пўш опсәм войԓаԓ пӑ щи войԓаԓ вŏй мойԓәпсайа тусԓы. Турәм Куща Авель пеԓа пӑ ԓўв мойԓәпсайԓаԓ пеԓа йӑм сэмән вантәс,
GEN 4:5 Каин пеԓа пӑ ԓўв мойԓәпсайԓаԓ пеԓа йӑм сэмән ӑт вантәс. Каин ԉикән йŏхәтса пӑ вешәԓ ԉик эԓты питыйа йис.
GEN 4:6 Щӑԓта Турәм Куща Каина йастәс: «Мўйа нӑӈ ԉикән йŏхәтсайән? Мўйа веншен па хŏрпийа йис?
GEN 4:7 Йӑм верԓән ки, вещкат вешән ватԓән. Атәм верԓән ки, ов пўӈԓэнән кӑрэк ŏԓәԓ, ԓўв нӑӈен кӑлщәԓтԓәԓы, нӑӈ пӑ ԓўв нўмпеԓән йурәӈа уԓа».
GEN 4:8 Щӑԓта Каин Авель апщеԓ пиԓән потәртәс. Мўв хӑрән уԓманән, Каин Авель апщеԓ хŏща щӑкәс пӑ ԓўвеԓ веԓсәԓы.
GEN 4:9 Щӑԓта Турәм Куща Каин иԋщәссәԓы: «Авель апщен хŏта?» Ԓўв йастәс: «Ӑт уйәтԓэм: ма ԓўвеԓ ватман хун уԓԓәм?»
GEN 4:10 Щӑԓта Турәм Куща йастәс: «Мўй нӑӈ версән? Апщен ўр ўвты сый Мӑнэма мўв эԓты щащәԓ;
GEN 4:11 ин нӑӈ мўԓтсайән, мўвен эԓты воштысайән, мўв пелки лоӈхиԓәс, нӑӈ йошенән мӑнәԓтәм апщен кӑԓы ўты урәӈән;
GEN 4:12 тӑԓта йэԓԓы мўв хӑрән рупиттэнән, ԓўв нӑӈ урӈенән йур ӑт мӑԓ; нӑӈ мўв ԓŏватән шŏшиԓы-хотԓы хŏйата питԓән».
GEN 4:13 Щӑԓта Турәм Кущайа Каин йастәс: «Мӑнэма щи мўԓтәм верэн шек ԓавәрт, ма ӑт верәмԓэм;
GEN 4:14 ин Нӑӈ мӑнэм ма мўвем эԓты ԋухәԓԓэн, пӑ Нӑӈ эԓтэн па хӑԋэмәԓәм, шŏшиԓы-хотԓыйа уԓты питԓәм; пӑ йэщаԓт йŏхәтты оԓәӈ ŏтән ма щи веԓԓайәм».
GEN 4:15 Щӑԓта Турәм Куща ԓўвеԓа йастәс: «Каин веԓты ŏта, ԓапәт пўш нўра уԓа». Щӑԓта Турәм Куща Каина щимәщ пос ԓэщатәс, щӑха уйтантыты ŏтәтән ԓуԓән ӑт ат веԓса.
GEN 4:16 Щӑԓта Турәм Куща эԓты Каин мӑнәс пӑ Едэм эԓты хӑтәԓ этты пеләкән Нод мўвән уԓты питәс.
GEN 4:17 Каин имеԓ пиԓән устән; имеԓ Енох нэмпи пŏх тӑйәс. Пӑ щӑԓта Каин вош опсәс, вошәԓ пŏхәԓ нэмән пŏтсәԓы: Енох.
GEN 4:18 Енох Ирад пŏх тӑйәс; Ирад Мехиаель пŏх тӑйәс; Мехиаель Мафусал пŏх тӑйәс; Мафусал пӑ Ламех пŏх тӑйәс.
GEN 4:19 Ламех кӑт нэ ўйԓыйәс: йитәԓ нэм Ада, кимет нэӈәԓ нэм Цилла.
GEN 4:20 Ада Иавал пŏх тӑйәс: ԓўв эԓтэԓ пирщин хотәтән уԓты пӑ вой тащәт шавиты хŏйатәт йэԓԓы мӑтсәт.
GEN 4:21 Ԓўв ху апщеԓ нэмәԓ Иувал ус: ԓўв эԓтэԓ нарәс йўхән пӑ тŏмранән йŏтты хŏйатәт йэԓԓы мӑтсәт.
GEN 4:22 Цилла пӑ Тувалкаин тӑйәс, ԓўв пӑтәр ŏх пӑ карты эԓты ар сыр пŏрмасәт верәс. Тувалкаин Ноема нэмпи нэ апщи тӑйәс.
GEN 4:23 Щӑԓта Ламех имеӈәԓԓаԓа йастәс: «Ада пӑ Цилла! Ма пŏтрэм хуԓәнтатән; Ламех имеӈән! Ма йасәӈԓам хуԓәнтатән: ху хŏйат мӑнэм мушмәԓтмаԓ урәӈән ма веԓсэм пӑ айԓат хŏйат мӑнэм хӑтщәмаԓ урәӈән ма веԓсэм.
GEN 4:24 Каин урәӈән ԓапәт пўш нўра ўԓа, Ламех урәӈән ԓапәтйаӈ пўш ԓапәт нўра ўԓа».
GEN 4:25 Щӑԓта Адам имеԓ хŏԓна пŏх тӑйәс, Сиф нэмән мӑсԓы, пŏтәрман: «Каинән веԓәм Авель йўкана Турәм мӑнэма ԋаврэм па мӑс».
GEN 4:26 Сиф ищи пŏх тӑйәс, Енос нэмән мӑсԓы; щи йис эԓты Турәм Куща пеԓа пойәкщәты питса.
GEN 5:1 Тӑм Адам и рут хŏйатәт: Турәм, хŏйат тыйәԓтмаԓән, Турәм Ԓўв хŏрпеԓа ԓўвеԓ тыйәԓтсәԓы,
GEN 5:2 йох хŏйат пӑ нэ хŏйат тыйәԓтәс, пӑ ԓынан йӑмән мӑсԓы, пӑ щӑԓта ԓынан тыйәԓтәм хӑтәԓән ‘хŏйат’ нэмән ԓынан мӑсԓы.
GEN 5:3 Адам, нуптәԓ сот хŏԉмаӈ тӑԓ уԓмаԓән, ԓўв хŏрпеԓ пӑ ԓўв хŏраспеԓ пŏх тӑйәс, пӑ Сиф нэмән ԓўвеԓ мӑсԓы.
GEN 5:4 Сиф сэма питәм йўпийән Адам хŏԓна нийәԓсот тӑԓ ус, пӑ эвет-пŏхәт тӑйәс.
GEN 5:5 Иуԓтыйа Адам нуптәԓ йӑрәтйаӈсот хŏԉмаӈ тӑԓ ус; щӑԓта ԓўв пӑрәс.
GEN 5:6 Сиф, нуптәԓ сот вет тӑԓ уԓмаԓән, Енос пŏх тӑйәс.
GEN 5:7 Енос сэма питәм йўпийән, Сиф хŏԓна нийәԓсот ԓапәт тӑԓ ус, пӑ эвет-пŏхәт тӑйәс.
GEN 5:8 Иуԓтыйа Сиф нуптәԓ йӑрәтйаӈсот кӑтхŏщйаӈ тӑԓ ус; пӑ ԓўв пӑрәс.
GEN 5:9 Енос, нуптәԓ йӑрсот тӑԓ уԓмаԓән, Каинан пŏх тӑйәс.
GEN 5:10 Каинан сэма питәм йўпийән, Енос хŏԓна нийәԓсот ветхŏщйаӈ тӑԓ ус, пӑ эвет-пŏхәт тӑйәс.
GEN 5:11 Енос нуптәԓ йӑрәтйаӈсот вет тӑԓ ус; пӑ ԓўв пӑрәс.
GEN 5:12 Каинан, нуптәԓ ԓапәтйаӈ тӑԓ уԓмаԓән, Малелеил пŏх тӑйәс.
GEN 5:13 Малелеил сэма питәм йўпийән, Каинан хŏԓна нийәԓсот ԋӑԓйаӈ тӑԓ ус, пӑ эвет-пŏхәт тӑйәс.
GEN 5:14 Каинан нуптәԓ йӑрәтйаӈсот йаӈ тӑԓ ус; пӑ ԓўв пӑрәс.
GEN 5:15 Малелеил, нуптәԓ хутйаӈ вет тӑԓ уԓмаԓән, Иаред пŏх тӑйәс.
GEN 5:16 Иаред сэма питәм йўпийән, Малелеил хŏԓна нийәԓсот хŏԉмаӈ тӑԓ ус, пӑ эвет-пŏхәт тӑйәс.
GEN 5:17 Малелеил йӑрәтйаӈсот тӑԓ унты вет тӑԓәԓ ӑт усԓы; пӑ ԓўв пӑрәс.
GEN 5:18 Иаред, нуптәԓ сот хутйаӈ кӑт тӑԓ уԓмаԓән, Енох пŏх тӑйәс.
GEN 5:19 Енох сэма питәм йўпийән, Иаред нийәԓсот тӑԓ ус, пӑ эвет-пŏхәт тӑйәс.
GEN 5:20 Иаред нуптәԓ йӑрәтйаӈсот хутйаӈ кӑт тӑԓ ус; пӑ ԓўв пӑрәс.
GEN 5:21 Енох, хутйаӈ вет тӑԓ уԓмаԓән, Мафусал пŏх тӑйәс.
GEN 5:22 Мафусал сэма питәм йўпийән, Енох хуԓәмсот тӑԓ Турәм пиԓән ус, пӑ эвет-пŏхәт тӑйәс.
GEN 5:23 Иуԓтыйа Енох хуԓәмсот хутйаӈ вет тӑԓ ус.
GEN 5:24 Енох Турәм пиԓән ус; щӑԓта ӑнтома йис, ԓўв Турәмән уса.
GEN 5:25 Мафусал, нуптәԓ сот нийәԓйаӈ ԓапәт тӑԓ уԓмаԓән, Ламех пŏх тӑйәс.
GEN 5:26 Ламех сэма питәм йўпийән, Мафусал ԓапәтсот нийәԓйаӈ кӑт тӑԓ ус, пӑ эвет-пŏхәт тӑйәс.
GEN 5:27 Мафусал нуптәԓ йӑрәтйаӈсот ԓапәтйаӈ пеԓа йӑрәтйаӈ тӑԓ ус; пӑ ԓўв пӑрәс.
GEN 5:28 Ламех, нуптәԓ сот нийәԓйаӈ кӑт тӑԓ уԓмаԓән, пŏх тӑйәс,
GEN 5:29 Ной нэмән ԓўвеԓ мӑсԓы пӑ йастәс: «Турәм Кущайән мўԓәм мўвевән ԓавәрт рупатайэвән тӑм пŏх мўӈев торапԓәԓԓы».
GEN 5:30 Ной сэма питәм йўпийән, Ламех хутсот тӑԓ унты вет тӑԓәԓ ӑт усԓы, пӑ эвет-пŏхәт тӑйәс.
GEN 5:31 Ламех нуптәԓ ԓапәтсот ԓапәтйаӈ ԓапәт тӑԓ ус; пӑ ԓўв пӑрәс.
GEN 5:32 Нойа ветсот тӑԓ ус, хун ԓўв хŏщайәԓ сэма питсәт: Сим, Хам пӑ Иафет.
GEN 6:1 Мўвән хŏйатәт ара йисәт пӑ ԓыв хŏщайэԓ эвет сэма питсәт,
GEN 6:2 пӑ Турәм пŏхәтән хŏйат рут эвет кащаԓәсайәт, мўй хŏрпи ԓыв хŏрасәӈәт, пӑ хŏй ԓывиԓаԓа рӑхәс, нэӈа ўты питсәԓаԓ.
GEN 6:3 Щӑԓта Турәм Куща йастәс: «Ма ԓыԓэм век хун хŏйатәт хŏща уԓ, хŏйатәт пӑрԓәт, нупәтԓаԓ сот хус тӑԓ ат уԓ».
GEN 6:4 Щи пŏрайән мўвән пӑԓатәӈ-ԓŏватәӈ хŏйат шикет усәт, метшопәӈ щи пŏра эԓты, хŏты Турәм пŏхәт хŏйат эвет хŏща ԓŏӈтыты питсәт, пӑ ԋаврэмәт ԓыв эԓтыԓаԓ тӑйты питсәт: щит йис тэԓән щащәм йурәӈ уртәт.
GEN 6:5 Щӑԓта Турәм Куща шийаԓәсԓы, мўвән уԓты хŏйатәт ԓыв кўтԓаԓән шек уԉԋайа уԓԓәт, нŏмәсԓаԓ пӑ сӑмԓаԓ иса ԉикәӈәт;
GEN 6:6 хŏйат тыйәԓтмаԓ урәӈән, Турәм Куща нŏпсәԓ шӑкәс пӑ Ԓўв сӑмәԓ кӑшийән тэкәтса.
GEN 6:7 Турәм Куща йастәс: «Мўвән уԓты Ма тыйәԓтәм хŏйат рутэм, хŏйатәт эԓты ўйман, йош войәт, ваӈкәтԓыты, ущиԓыты, хухәтԓыты войәт, пӑ тŏхԓәӈ войәт унты хŏԓ хŏԓтԓыԓам, ԓывиԓаԓ тыйәԓтмем урәӈән Ма нŏпсэм шӑкәс, щишән».
GEN 6:8 Туп Ной пеԓа Турәм Куща йӑм сэмән вантәс.
GEN 6:9 Тӑта щи Ной уԓәпса: щи ишән уԓәм хŏйатәт кўтән туп Ной тўӈа-щира ус, атәм ӑт верыԓыйәс; Турәм пиԓән Ной ус.
GEN 6:10 Ной хуԓәм пŏх тӑйәс: Сим, Хам пӑ Иафет.
GEN 6:11 Турәм ватман мўв ўкщәм уԓәпсайән пӑ ԉикәӈ верәтән тэкнәс.
GEN 6:12 Турәм шийаԓәсԓы, хŏты мўв шӑкатәм, кашәӈ ԓыԓәӈ ŏт шушты йушәԓ ўкщәма вермаԓ, щишән.
GEN 6:13 Щӑԓта Турәм Ной пеԓа йастәс: «Ма кашәӈ ԓыԓәӈ ŏт хŏԓтԓэм, мўв ԓыв эԓтайэԓ ԉикәӈ верәтән тэкнәс; щишән, Ма ԓывиԓаԓ пӑратԓәԓам.
GEN 6:14 Гофер йўх эԓты ковчег хоп нӑӈена вера; хопен йӑтәӈа веры, щӑԓта ԓыпеԓ пӑ эԓтэԓ ухән нэры.
GEN 6:15 Пӑ щиты веры: хўватәԓән ковчег хоп хуԓәмсот кўш оԓәӈ, ўтатәԓән ветйаӈ кўш оԓәӈ, пӑԓатәԓән хŏԉмаӈ кўш оԓәӈ ат питәԓ.
GEN 6:16 Ковчег хоп ԓоӈәԓән веры, нумән хот щур пӑԓатәԓ и кўш оԓәӈ ԓŏват ат уԓ; и пелкәԓән ов вера; ԓыпеԓән пӑ, иԓән, кўтәпән пӑ нумән, уԓты йӑт ат тӑйәԓ.
GEN 6:17 Пӑ щӑԓта, Ма ун йик мўва партԓәм, турәм иԓпийән уԓты ԓыԓәӈ ŏтәт хŏԓ пӑратты урәӈән; мўвән уԓты ŏтәт хŏԓ пӑрԓәт.
GEN 6:18 Туп нӑӈ пиԓэнән Ма йастантәпса верԓәм: щи ковчег хопа нӑӈ ԓŏӈԓән, щӑԓта нӑӈ пŏхԓан, щӑԓта нӑӈ имен, щӑԓта пŏхԓан имет нӑӈ пиԓэнән ԓŏӈԓәт.
GEN 6:19 Щӑԓта ковчег хопа хŏԓ войәт эԓты ԓŏӈәԓта, кашәӈ вой сыр эԓты кӑтәнән, нэ вой пӑ ху вой, ԓыв нӑӈ пиԓэнән ԓыԓӈа ат хӑщԓәт.
GEN 6:20 Tŏхԓәӈ войәт эԓты кашәӈ сыр войӈән, йош войәт эԓты, хŏԓ мўвән ваӈкәтԓыты, ущиԓыты, хухәтԓыты войәт эԓты кашәӈ сыр войӈән ат уԓԓәӈән. Ԓыв нӑӈ хŏщайэн ԓŏӈԓәт, ԓыԓӈа хӑщты урәӈән.
GEN 6:21 Нӑӈ пӑ ар сыр ԓэвпәс ўйа, мўй хŏрпи мосәԓ, пӑ нӑӈ хŏщайән сопасԓы; щит нӑӈена пӑ ԓывиԓаԓа ԓэтŏта питәԓ».
GEN 6:22 Ной иса щиты версәԓы: хŏты Турәм ԓўвеԓа партәс, ԓўв щиты щи версәԓы.
GEN 7:1 Щӑԓта Турәм Куща Нойа йастәс: «Нӑӈ пӑ нӑӈ тыхԓэн хŏԓ ковчег хоп ԓыпийа ԓŏӈаты, Ма йэԓпемән тӑм ишән уԓты хŏйатәт кўтән туп нӑӈен вещката ԓўӈәтԓэм.
GEN 7:2 Сыстам йош войәт эԓты кашәӈ вой сыр эԓты кӑтәнән ԓапәт пўш ўйа, ху войәт пӑ нэ войәт, ӑнта сыстам йош войәт эԓты кӑтәнән ўйа, ху войәт пӑ нэ войәт,
GEN 7:3 тŏхԓәӈ войәт эԓты ищи кӑтәнән ԓапәт пўш кашәӈ вой сыр эԓты, ху войәт пӑ нэ войәт, йэԓԓы мўв ԓŏватән вой сыр шавиты урәӈән,
GEN 7:4 ԓапәт хӑтәԓ хӑщты йўпийән ԋӑԓйаӈ хӑтәԓ пӑ ԋӑԓйаӈ ат Ма мўва йэрт шошәмԓәм; мўвән уԓты ԓыԓәӈ ŏтәт, хŏйтат Ма тыйәԓтсәм, хŏԓ пӑратԓәԓам».
GEN 7:5 Ной щиты щи верәс, хŏты ԓўвеԓ Турәм Куща партәс.
GEN 7:6 Ун йик мўва йŏхтәмән, Ной нуптәԓ хутсот тӑԓ ус.
GEN 7:7 Щӑԓта Ной пӑ ԓўв пŏхԓаԓ, пӑ ԓўв имеԓ, пӑ пŏхԓаԓ имет ковчег хопа ԓŏксәт ун йик эԓты шаващты урәӈән.
GEN 7:8 Щӑԓта сыстам йош войәт эԓты, ӑнта сыстам йош войәт эԓты, тŏхԓәӈ войәт эԓты пӑ мўвән ваӈкәтԓыты, ущиԓыты, хухәтԓыты войәт эԓты
GEN 7:9 кӑтәнән, ху войәт пӑ нэ войәт, Нойа Турәм партәм щирән Ной хŏща ковчег хопа ԓŏксәт.
GEN 7:10 Ԓапәт хӑтәԓ хӑщәм йўпийән, ун йик мўва йŏхтәс.
GEN 7:11 Ной нупәт хутсотмет тӑԓән, кимет тыԓәщән ԓапәтхŏщйаӈмет хӑтәԓән, щи хӑтәԓ пӑтыԓы тӑха йиӈкәт ким шошатсәт пӑ опәԉ овәт пелки пўншатсәт;
GEN 7:12 щӑԓта ԋӑԓйаӈ хӑтәԓ пӑ ԋӑԓйаӈ ат мўва йэрт щошийәс.
GEN 7:13 Щи хӑтәԓән щи Ной, щӑԓта Сим, Хам пӑ Иафет – Ной пŏхәт, пӑ ԓўв имеԓ, пӑ пŏхԓаԓ хуԓәм ими ԓыв пиԓԓаԓән ковчег хопа ԓŏксәт.
GEN 7:14 Ԓывәт пӑ хŏԓ ут войәт ԓыв сырэԓ щирән, йош войәт ԓыв сырэԓ щирән, мўвән ваӈкәтԓыты, ущиԓыты, хухәтԓыты войәт ԓыв сырэԓ щирән пӑ хŏԓ тŏхԓәӈ войәт ԓыв сырэԓ щирән,
GEN 7:15 хŏԓ ԓыԓәӈ ŏтәт кӑтәнән Ной хŏща ковчег хоп ԓыпийа ԓŏксәт;
GEN 7:16 ху войәт пӑ нэ войәт ар сыр ŏтәт эԓты, Турәм Нойа партәм щирән ԓŏксәт. Щӑԓта Турәм Куща ов ԓўв йўпеԓән лӑп тухәртсәԓы.
GEN 7:17 Щӑԓта ԋӑԓйаӈ хӑтәԓ сыс мўвән йик эптәс, шек ар йиӈка йис пӑ йикән ковчег хоп нŏх хўвәтса, ԓўв мўв нўмпийа нŏх эԓԓәс.
GEN 7:18 Мўвән йик шек уна йис пӑ ковчег хоп йик сŏх эԓты нопәтса.
GEN 7:19 Щи арат ар йиӈка йис пӑ турәм иԓпийән уԓты мет пӑԓ Кевәт йик иԓпийа петсәт;
GEN 7:20 ветхŏщйаӈ кўш оԓәӈ пӑԓатән Кевәт йикән лӑп ўсайәт.
GEN 7:21 Мўй ԓыԓәӈ ŏт ус пӑ мўвән шушиԓыйәс, иса пӑрсәт – тŏхԓәӈ войәт, йош войәт, ут войәт, мўвән ваӈкәтԓыты, ущиԓыты, хухәтԓыты войәт пӑ хŏйатәт хŏԓ;
GEN 7:22 сорәм мўвән ԓыԓ тӑйәм ŏтәт хŏԓ пӑрсәт.
GEN 7:23 Мўв пӑԓатән уԓәм ԓыԓәӈ ŏтәт хŏԓ пӑратсайәт: хŏйатәт эԓт ўйман йош войәт, мўвән ваӈкәтԓыты, ущиԓыты, хухәтԓыты войәт пӑ тŏхԓәӈ войәт унты, мўвән щитәт хŏԓ пӑратсайәт; Ной пӑ ԓўв пиԓәԓән ковчег хоп ԓыпийән уԓәм ŏтԓаԓ туп хӑщсәт.
GEN 7:24 Сот ветйаӈ хӑтәԓ мўвән йик и йурәӈа, и йурәӈа йис.
GEN 8:1 Ной, пӑ ԓўв пиԓәԓән ковчег хопән уԓәм ут войәт пӑ йош войәт Турәм иса нŏмәсән тӑйсәԓы; Турәм мўва вот китәс пӑ йиӈкәт иса вŏԓысәт.
GEN 8:2 Мўв пӑтыԓы тӑха йиӈкәт лӑп пентатсәт пӑ йик шошмәм опәԉ овәт тухратсәт пӑ йэрт турәм эԓты сŏхнәс.
GEN 8:3 Йик айән-айән мўв эԓты йŏхԓы мӑнты питәс, сот ветйаӈ хӑтәԓ хӑщәм йўпийән йик айа йиты питәс.
GEN 8:4 Ԓапәтмет тыԓәщ ԓапәтхŏщйаӈмет хӑтәԓән ковчег хоп Арарат Кевәт хŏща иԓ ԓойәс.
GEN 8:5 Йаӈмет тыԓәщ унты йик айәԓта сорәс, йаӈмет тыԓәщ оԓәӈ хӑтәԓән Кев тӑйәт этсәт.
GEN 8:6 Пӑ ԋӑԓйаӈ хӑтәԓ хӑщәм йўпийән Ной ковчег хопән верәм ишԋэԓ пўшсәԓы
GEN 8:7 пӑ хуләх ким эсәԓсәԓы, щитәԓ пурԓәс, мӑныԓыйәс пӑ йŏхԓы йŏхтыԓыйәс, мўв йик эԓты сорты унты.
GEN 8:8 Щӑԓта голубь вой ԓўв ким эсԓәс, ваттыйа, мўвән йик шимԓа йис мўй ӑнта,
GEN 8:9 туп голубь кўр пурәмты сорәм мўв ӑт уйтәс пӑ йŏхԓы Ной хŏща, ковчег хопа йŏхтәс, йик хŏԓна мўв ԓŏватән ус; Ной йошәԓ йэԓ шӑшсәԓы пӑ ԓўвеԓ ўсԓы, пӑ йŏхи ковчег хоп ԓыпийа эсәԓсәԓы.
GEN 8:10 Щӑԓта ԓўв па ԓапәт хӑтәԓ ԓавԓәсәс пӑ голубь ковчег хоп эԓты па ким эсәԓсәԓы.
GEN 8:11 Голубь йэтна пеԓа йŏхԓы йŏхтәс пӑ, ԋŏԓәԓән оливка йўх йӑԓәп вŏсты лыпәт тус, щиты Ной мŏштәсԓы, йик мўв эԓты мӑнмаԓ.
GEN 8:12 Ԓўв хŏԓна ԓапәт хӑтәԓ ԓавԓәсәс, щӑԓта голубь па ким эсәԓсәԓы; ԓўв хŏщайәԓ голубь йŏхԓы ӑт йŏхтәс.
GEN 8:13 Ной нупәт хутсот оԓәӈмет тӑԓәԓән оԓәӈ тыԓәщ оԓәӈмет хӑтәԓән мўв сŏх эԓты йик сорәс; Ной ковчег хоп ԓоӈԓәԓ пўшсәԓы, ким ӑӈкәрмәс, пӑ мўв сŏх нŏх сормаԓ.
GEN 8:14 Кимет тыԓәщән, хус ԓапәтмет хӑтәԓ унты мўв нŏх сорәс.
GEN 8:15 Щӑԓта Турәм Нойа йастәс:
GEN 8:16 «Ковчег хоп эԓты нӑӈ, нӑӈ имен, нӑӈ пŏхԓан, нӑӈ пŏхԓан имиԓаԓ нӑӈ пиԓэнән ким этаты;
GEN 8:17 нӑӈ пиԓэнән уԓәм войԓан, кашәӈ вой сыр эԓты, ким этәԓтаԓән – тŏхԓәӈ войәт, йош войәт, мўвән ваӈкәтԓыты, ущиԓыты, хухәтԓыты войәт: мўв хўват ԓыв ат мӑнԓәт, ара ат йиԓәт, мўв ԓŏватән ат пŏшхащԓәт».
GEN 8:18 Ной пŏхԓаԓ пиԓән, имеԓ пиԓән, пŏхԓаԓ имет пиԓән ким этәс.
GEN 8:19 Ут войәт, мўвән ваӈкәтԓыты, ущиԓыты, хухәтԓыты войәт пӑ тŏхԓәӈ войәт, – хŏԓ мўв ԓŏватән йӑхты ŏтәт сырԓаԓ щирән ковчег хоп эԓты ким этсәт.
GEN 8:20 Турәм Кущайа йирасты нŏрәм Ной верәс пӑ кашәӈ сыстам йош вой сыр эԓты пӑ кашәӈ сыстам тŏхԓәӈ вой сыр эԓты и войән ус пӑ нŏх ўщитты йирасты нŏрма ԓўв тусԓы.
GEN 8:21 Турәм Куща щи йӑм пусәӈ эпәԓ эпсатмаԓ кемән Ԓўв, сӑмәԓ ԋŏхԓәман, йастәс: «Па йэԓԓы, хŏйат урәӈән, мўв мўԓты ӑт питԓэм, хŏйат сӑм нŏпсәт – айтэԓән ԉик тӑйԓәт; хŏты Ма ин версәм, пӑ нэмәԓты пŏрайән ԓыԓәӈ ŏтәт тӑмиты пӑратты ӑт питԓәԓам:
GEN 8:22 йэԓԓы мўв уԓтаԓ хўват ԓэвпәс энмәԓты вер пӑ ԓэвпәс ӑкәтты вер, ищки пӑ рўв, ԓўӈ пӑ тӑԓ, ат пӑ хӑтәԓ ӑт хŏԓаԓәт».
GEN 9:1 Щӑԓта, Турәм Ной пӑ пŏхԓаԓ йӑмән мӑсԓы пӑ ԓывиԓаԓа йастәс: «Пŏшхащаты, ара йўваты, мўв тэкнәптаты;
GEN 9:2 нын эԓтан хŏԓ ат пӑԓԓәт: хŏԓ мўвән уԓты войәт, хŏԓ турәмән йӑхты войәт, хŏԓ мўвән йӑхты ŏтәт, хŏԓ щарәс йикән уԓты войәт – ԓыв хŏԓ нын йошԓәна мийман уԓԓәт;
GEN 9:3 мўй ԓыԓәӈ ŏт уԓ, мўй ԋŏхаԓ, щит нынана ԓэтŏта питәԓ; йэԓпи вŏсты тŏрнәт нынана миймем иты, ин хŏԓ нынана мӑԓэм;
GEN 9:4 туп ўр тӑйты ԋŏхи аԓ ԓэваты, ўр щит ԓыԓ йур;
GEN 9:5 нын ўрән, хŏта нын ԓыԓән йур уԓ, Ма ищипа нŏх кӑшԓэм; кашәӈ вой эԓты нŏх кӑшԓэм, кашәӈ хŏйат эԓты ван хŏйатәԓ ԓыԓ йур нŏх кӑшԓэм;
GEN 9:6 хŏйат ўр шошмәм ŏт ищи хŏйат йош эԓты ԓўв ўрәԓ мӑнәԓ: хӑтнэху Турәм хŏрас щира тыйәԓтман уԓ;
GEN 9:7 нын пӑ пŏшхащаты, ара йўваты, мўв тэкнәптаты пӑ мўв ԓŏватән уԓаты».
GEN 9:8 Щӑԓта, Ной пӑ пŏхԓаԓ пеԓа, Турәм щиты йастәс:
GEN 9:9 «Ма нын пиԓанән пӑ нын ԋаврэмԓән пиԓән Ма йастантәпсайэм верԓэм,
GEN 9:10 пӑ кашәӈ нын пиԓанән уԓты ԓыԓәӈ ŏт пиԓән, ковчег хоп эԓты нын пиԓанән этәм войәт пиԓән, иса мўвән уԓты войәт пиԓән, тŏхԓәӈ войәт, йош войәт, ут войәт пиԓән;
GEN 9:11 Ма нын пиԓанән йастантәпсайэм верԓэм: тӑԓта йэԓԓы ун йикән ԓыԓәӈ ŏт ӑт пӑратԓа, ун йикән мўв таԓа ӑт пайәтԓа».
GEN 9:12 Щӑԓта Турәм йастәс: «Щи йастантәпсайэм посән ԓэщатԓэм, щит Ма нын пиԓанән верԓэм, пӑ нын пиԓанән уԓты ар сыр ԓыԓәӈ ŏтәт пиԓән, пӑ йэԓԓы уԓты рута веккеша хӑйԓэм.
GEN 9:13 Пӑԓӈәт кўтән Ма нўԓ йўхем ԓощԓэм, щит Ма мўв пиԓән верты йастантәпсайэма пос питәԓ.
GEN 9:14 Щиты питәԓ, хун Ма пӑԓӈәт ӑкәтԓәм, щита пӑԓӈәтән нўԓ йўхем ԓоԋщатәԓ;
GEN 9:15 щиты Ма нын пиԓанән пӑ ар сыр ԓыԓәӈ ŏтәт пиԓән верәм йастантәпсайэм нумты питԓэм; йэԓԓы хŏԓ ԓыԓәӈ ŏтәт ун йикән пӑратты ӑт питԓайәт.
GEN 9:16 Нўԓ йўхем пӑԓӈәтән эттаԓән, Ма ԓўвеԓ шийаԓәԓэм пӑ мўвән уԓты кашәӈ ԓыԓәӈ ŏт пиԓән уԓты веккеша йастантәпсайэм нумты питԓэм».
GEN 9:17 Турәм Ной пеԓа йастәс: «Тӑм йастантәпса пос, Ма щит ар сыр мўвән уԓты ԓыԓәӈ ŏтәт пиԓән версэм».
GEN 9:18 Ковчег хоп эԓты этәм Ной пŏхԓаԓ усәт: Сим, Хам пӑ Иафет. Хам щит Ханаан ащи ус.
GEN 9:19 Щит Ной хуԓәм пŏх ус, ԓыв эԓтыԓаԓ мўв хŏйатәӈа йис.
GEN 9:20 Ной мўвән рупитты питәс пӑ виноград йўхәт опсәс;
GEN 9:21 щӑԓта виноград йўх ўна ԓўв йиԋщәс пӑ кўтщәса, пӑ ԋарԓŏмәԓты пирщин хотәԓән ŏԓәс.
GEN 9:22 Щӑԓта Хам, щит Ханаан ащи, ԓўв ащеԓ ԋар эԓән кащаԓәсԓы, пӑ ким этмаԓән кӑт йайӈәԓаԓа щит эԓты пŏтәртсәԓы.
GEN 9:23 Сим пӑ Иафет сŏх ўстән пӑ ԓӑӈкәрԓәна пŏнман, шӑш тӑхат ԓŏксәтән пӑ ԓын ащан лӑп лаксәԓән; ԓын вешԓән йŏхԓы керәтман устән, ащан ԋар эԓ ԓын ӑт вӑтсәԓән.
GEN 9:24 Ной йиԋщәм ўнайәԓ эԓты нŏх сайкәмтәс пӑ мŏштәсԓы, мўй ай пŏхәԓ ԓўв пиԓәԓән верәс;
GEN 9:25 пӑ йастәс: «Ханаан мўԓса, митйох митйоха ԓўв йайԓаԓ хŏща уԓты питәԓ».
GEN 9:26 Щӑԓта пӑ йастәс: «Турәм Кущайа, Сим ики Турма – йӑм йасәӈ ат йастәԓәт, щӑԓта Ханаан пӑ Сим митхуйа питәԓ;
GEN 9:27 пӑ Турәм Иафет мўвәт ԓӑщкама ат верԓәԓы, пӑ Сим хотәтән Иафет ат уԓ; пӑ Ханаан ԓўвеԓа митхуйа питәԓ».
GEN 9:28 Ной ун йик йўпийән хуԓәмсот ветйаӈ тӑԓ хŏԓна ус.
GEN 9:29 Ной уԓәм нуптәԓ йӑрәтйаӈсот ветйаӈ тӑԓ арат ус, пӑ ԓўв пӑрәс.
GEN 10:1 Тӑми Ной пŏхәт тыхәԓ тэԓәт: Сим, Хам пӑ Иафет. Ун йик йўпийән ԓыв ԋаврэмәт сэма пайәтсәт.
GEN 10:2 Иафет пŏхәт: Гомер, Магог, Мадай, Иаван, Фувал, Мешех пӑ Фирас.
GEN 10:3 Гомер пŏхәт: Аскеназ, Рифат пӑ Фогарма.
GEN 10:4 Иаван пŏхәт: Елиса, Фарсис, Киттим пӑ Доданим.
GEN 10:5 Ԓыв эԓтыԓаԓ щарәс ԉэпәӈ пӑ пухрәӈ рутәт ԓыв мўвԓаԓән уԓты питсәт, кашәӈ рут утща йасӈәӈа йис, кашәӈ мир ԓыв рутԓаԓ щирән уԓты питсәт.
GEN 10:6 Хам пŏхәт: Хуш, Мицраим, Фут пӑ Ханаан.
GEN 10:7 Хуш пŏхәт: Сева, Хавила, Савта, Раама пӑ Савтеха. Раама пŏхәт: Шева пӑ Дедан.
GEN 10:8 Хуш хŏԓна Нимрод пŏх тӑйәс, ԓўв мет оԓәӈ вŏԓаӈ кущайа йис.
GEN 10:9 Турәм Куща йэԓпийән ԓўв йурәӈ веԓпәсԓәты хуйа ус, щишән, щи йастәԓа: «Нимрод хŏрпи йурәӈ веԓпәсԓәты ху Турәм Куща йэԓпийән».
GEN 10:10 Ԓўв мўвәԓән оԓәӈ вошәт усәт: Вавилон, Эрех, Аккад пӑ Халне Сеннаар мўвән.
GEN 10:11 Щи мўв эԓты этәс пӑ Ассур мўва мӑнәс пӑ Ниневия, Реховоф-ир пӑ Калах вош опсәс,
GEN 10:12 пӑ Ресен, Ниневия пӑ Калах кўтән, опсәс, щит вŏԓаӈ вош.
GEN 10:13 Мицраим эԓты луд йох, анам йох, легав йох, нафтух йох,
GEN 10:14 патрус йох, кафтор йох пӑ каслух йох мӑтсәт, каслух йох эԓты филистимәт йэԓԓы мӑтсәт.
GEN 10:15 Ханаан эԓты сэма питсәт: оԓәӈ пŏхәԓ Сидон, щӑԓта Хет,
GEN 10:16 иевус йох, амор йох, гергес йох,
GEN 10:17 ев йох, арк йох, син йох,
GEN 10:18 арвад йох, цемар йох пӑ химаф йох. Йухәт Ханаан рутәт лакки мӑтсәт.
GEN 10:19 Сидон вош эԓты Герар вош пеԓа Газа вош унты Ханаан мўв кимԓәт усәт, щиԓта йэԓԓы Содом, Гоморра, Адма пӑ Цевоим вошәт пеԓа Лаша унты.
GEN 10:20 Щит Хам пŏхәт, рутԓаԓ щирән, йасәӈԓаԓ щирән, ԓыв уԓты мўвԓаԓән, ԓыв мирԓаԓ щирән.
GEN 10:21 Сим, Иафет ун йайәԓ, ԋаврэмәт ищи тӑйәс. Сим – ԓўв Евер хŏԓ пŏхәт опращ.
GEN 10:22 Сим пŏхәт: Елам, Ассур, Арфаксад, Луд пӑ Арам.
GEN 10:23 Арам пŏхәт: Уц, Хул, Гефер пӑ Маш.
GEN 10:24 Арфаксад Сала тӑйәс, Сала Евер тӑйәс.
GEN 10:25 Евер кӑт пŏх тӑйәс; итәԓ Фалек, ԓўв уԓмаԓ ишән мўв ара ортәм урәӈән щи нэмән пŏтса; кимет пŏхәԓ нэм Иоктан.
GEN 10:26 Иоктан тӑйәс: Алмодад, Шалеф, Хацармавеф, Иерах,
GEN 10:27 Гадорам, Узал, Диклу,
GEN 10:28 Овал, Авимаил, Шева,
GEN 10:29 Офир, Хавила пӑ Иовав. Щит иса Иоктан пŏхәт.
GEN 10:30 Уԓәм лотԓаԓ Меша эԓты Сефар унты, хӑԓэвәт пеләк ун Кев унты, усәт.
GEN 10:31 Щит Сим эԓты мӑнәм пŏхәт рут йохԓаԓ щирән, ԓыв йасәӈԓаԓ, ԓыв мўвԓаԓ, ԓыв мирԓаԓ пиԓән.
GEN 10:32 Тӑми иса Ной пŏхәт эԓты мӑнәм рутәт, ԓыв рутԓаԓ пӑ мирԓаԓ щирән. Ԓыв эԓтыԓаԓ ун йик йўпийән мўв ԓŏватән мирәт лакки мӑтсәт.
GEN 11:1 Мўв ԓŏватән иса туп и йасәӈ, и пŏтәр ус.
GEN 11:2 Хӑԓэвәт пеләк эԓты касәԓман, Сеннаар мўвән хӑр мўв ԓыв уйәтсәт пӑ щита уԓты питсәт.
GEN 11:3 Пӑ ԓыв кўтэԓән йастатсәт: «Кирпищәт верԓув пӑ тўтән такапԓәԓув». Кев йўкана кирпищ питәс, пӑ мўв ух вŏщләх йўкана питәс.
GEN 11:4 Ԓыв йастатсәт: «Мўв ԓŏвата лакки мӑнтэв йэԓпийән, мўӈева ун вош пӑ турма хойты пӑԓ хот омәсԓув, нэмԓув такан щащты урәӈән».
GEN 11:5 Хŏйатәт опсәм вош пӑ пӑԓ хот ватты урәӈән Турәм Куща мўва иԓ ŏхԓәс.
GEN 11:6 Щӑԓта Турәм Куща йастәс: «Тӑм, и мир, йасӈеԓ па ит; ванты, тӑм мўй ԓыв верты питсәт, пӑ ин мўй нŏмәс ўԓәт, щит тӑԓаӈа вертэԓ унты, ӑт вŏԓыԓәт;
GEN 11:7 щишән, иԓ ŏхәԓԓув пӑ ԓыв йасӈеԓ щиты ԓыԓәтԓэв пӑ ԓыв кўтԓаԓән йасәӈ ӑт ат мŏштыԓәт».
GEN 11:8 Щиты Турәм Куща ԓывиԓаԓ щиԓта мўв ԓŏвата лакки китсәԓы; вош омәсты ԓыв нŏх вŏԓысәт.
GEN 11:9 Щишән, щи вош Вавилон нэмән пŏтса: щита Турәм Куща мўв ԓŏватән уԓты йасәӈ ԓыԓәтсәԓы, пӑ щиԓта Турәм Куща ԓывиԓаԓ мўв ԓŏвата лакки китсәԓы.
GEN 11:10 Тӑта щи Сим тыхәԓ тэԓ: Сим сот тӑԓ ԓŏватән, ун йик йўпийән кӑт тӑԓ хӑщәман, Арфаксад пŏх тӑйәс;
GEN 11:11 Арфаксад сэма питәм йўпийән Сим ветсот тӑԓ ус, пӑ эвет пӑ пŏхәт тӑйәс.
GEN 11:12 Арфаксад хŏԉмаӈ вет тӑԓ ԓŏватән Сала пŏх тӑйәс.
GEN 11:13 Сала сэма питәм йўпийән Арфаксад ԋӑԓсот хуԓәм тӑԓ ус, пӑ эвет пӑ пŏхәт тӑйәс.
GEN 11:14 Сала хŏԉмаӈ тӑԓ ус пӑ Евер пŏх тӑйәс.
GEN 11:15 Евер сэма питәм йўпийән Сала ԋӑԓсот хуԓәм тӑԓ ус, пӑ эвет пӑ пŏхәт тӑйәс.
GEN 11:16 Евер хŏԉмаӈ ԋӑԓ тӑԓ ус, пӑ Фалек пŏх тӑйәс.
GEN 11:17 Фалек сэма питәм йўпийән Евер ԋӑԓсот хŏԉмаӈ тӑԓ ус, пӑ эвет пӑ пŏхәт тӑйәс.
GEN 11:18 Фалек хŏԉмаӈ тӑԓ ус пӑ Рагав пŏх тӑйәс.
GEN 11:19 Рагав сэма питәм йўпийән, Фалек кӑтсот йӑрәтйаӈ тӑԓ ус, пӑ эвет пӑ пŏхәт тӑйәс.
GEN 11:20 Рагав нуптәԓ хŏԉмаӈ кӑт тӑԓ ус, пӑ Серух пŏх тӑйәс.
GEN 11:21 Серух сэма питәм йўпийән, Рагав кӑтсот ԓапәт тӑԓ ус, пӑ эвет пӑ пŏхәт тӑйәс.
GEN 11:22 Серух хŏԉмаӈ тӑԓ ус, пӑ Нахор пŏх тӑйәс.
GEN 11:23 Нахор сэма питәм йўпийән, Серух кӑтсот тӑԓ ус, пӑ эвет пӑ пŏхәт тӑйәс.
GEN 11:24 Нахор нуптәԓ хус йӑрәтйаӈ тӑԓ ус, пӑ Фарра пŏх тӑйәс.
GEN 11:25 Фарра сэма питәм йўпийән, Нахор сот йӑрхус тӑԓ ус, пӑ эвет пӑ пŏхәт тӑйәс.
GEN 11:26 Фарра ԓапәтйаӈ тӑԓ ус, пӑ Аврам, Нахор пӑ Аран пŏхәт тӑйәс.
GEN 11:27 Тӑми Фарра тыхәԓ тэԓ: Фарра Аврам, Нахор пӑ Аран пŏхәт тӑйәс. Аран Лот нэмпи пŏх тӑйәс.
GEN 11:28 Аран, Фарра ащеԓ уԓман, ԓўв сэма питәм мўвәԓән, Халдея мўвән Ур нэмпи тӑха хŏща пӑрәс.
GEN 11:29 Аврам пӑ Нахор нэ тустән; Аврам ими нэм Сара; Нахор ими нэм Милка, ԓўв Аран эви, Аран – щит Милка пӑ Иска ащи.
GEN 11:30 Сара ӑт ԓавәртәмәса, ԋаврэм ӑт тӑйәс.
GEN 11:31 Щӑԓта Фарра Аврам пŏхәԓ ўсԓы, пӑ Аран пŏх, Лот хиԓэԓ, пӑ Сара меԋәԓ, Аврам пŏхәԓ ими, пӑ ԓыв пиԓэԓән Халдея мўв Ур нэмпи тӑха эԓты Ханаан мўв пеԓа мӑнәс, туп Харран унты йŏхәтмеԓән, щита хӑщсәт.
GEN 11:32 Фарра кӑтсот вет тӑԓ ус, пӑ Харран мўвән Фарра пӑрәс.
GEN 12:1 Турәм Аврама йастәс: «Нӑӈ мўвен эԓты, нӑӈ рутэн эԓты пӑ нӑӈ ащен хот эԓты эта пӑ хŏԓта Ма нӑӈена аԉԓэм, щи мўва мӑна;
GEN 12:2 щӑԓта Ма нӑӈ эԓтэн вŏԓаӈ мир тыйәԓтԓәм пӑ нӑӈен йӑмән мӑԓэм, нӑӈ нэмен нŏх эԓәтԓэм, нӑӈ хўватэн мир йӑмән питԓа;
GEN 12:3 Ма, нӑӈена йӑм йасәӈ йастәты ŏтәта, йӑм мӑԓәм, пӑ нӑӈен мўԓты ŏтәт мўԓԓәԓам; нӑӈ хўватэн мўв ԓŏватән уԓты мирәт хŏԓ йӑмән мӑԓайәт».
GEN 12:4 Щӑԓта, Турәм Куща йастәм щирән, Аврам мӑнәс; Лот ики ищи ԓўв пиԓәԓән мӑнәс. Аврам, Харран эԓты мӑнмаԓән, нуптәԓ ԋийәԓйаӈ пеԓа вет тӑԓ ус.
GEN 12:5 Аврам Сара имеԓ пӑтән ўсԓы; апщеԓ пŏх Лот ики, тӑйәм войԓаԓ пӑ пŏрмасԓаԓ пӑ Харранән ԓўвеԓа рупитәм митйохԓаԓ ищи пӑтән ўсԓы; Ханаан мўв пеԓа мӑтсәт; пӑ Ханаан мўва йŏхәтсәт.
GEN 12:6 Аврам щи мўв хўват Сихем унты мӑнман, Море ун дуб йўх унты йŏхтәс. Щи мўвән щи ишән ханаан йох усәт.
GEN 12:7 Щӑԓта Турәм Куща Аврам хŏща этәс пӑ йастәс: «Йэԓԓы уԓты ԋаврэмԓана тӑм мўв Ма мӑԓэм». Ԓўв хŏщайәԓ этԓыйәм Турәм Куща урәӈән щита йирасты нŏрәм верәс.
GEN 12:8 Щиԓта ԓўв Кев пеԓа мӑнәс, Вефиль эԓты хӑтәԓ этты пелка; щӑԓта пирщин хотәԓ щиты ԓощсәԓы пӑ Вефиль ԓўв эԓтайәԓ хӑтәԓ ԓŏӈты пелка питәс, Гай пӑ хӑтәԓ этты пелка питәс; щита Турәм Кущайа йирасты нŏрәм верәс, пӑ Турәм Куща пеԓа пойәкщәс.
GEN 12:9 Щӑԓта Аврам йэԓԓы мӑнәс, Негев морты мўв пеԓа касԓәс.
GEN 12:10 Щи мўвән ԓэԓԓы пŏра ус. Щишән, Египет мўв унты Аврам йŏхтәс пӑ щита рŏнәс, йэша уԓты урәӈән, Ханаан мўвән ԓэԓԓы пŏра шек тарәм ус.
GEN 12:11 Египет мўва ванамәмаԓән, Сара пеԓа, ԓўв имеԓ пеԓа йастәс: «Ма уйәтԓэм, нӑӈ хŏрасәӈ нэ;
GEN 12:12 Египет мўв хŏйатәт нӑӈен шийаԓәтэԓән, йастәԓәт: ‘Тӑм ԓўв имеԓ’; мӑнэм веԓԓэԓ, нӑӈ пӑ ԓыԓӈа хӑйԓайән;
GEN 12:13 йаста, мӑтты ки нӑӈ ма нэ апщем, щишән, нӑӈ хўватэн мӑнэм йӑм питәԓ, пӑ ма ԓуԓән ԓыԓӈа хӑщԓәм».
GEN 12:14 Щиты щи ус, Аврам Египет мўва йŏхәтмаԓән, Египет мўв хŏйатәтән кащаԓәса, Сара шек хŏрасәӈ нэ;
GEN 12:15 фараон кущайәтән ищи кащаԓәса, ԓыв фараона щи айкеԓ тусэԓ; пӑ Сара фараон хон хота уԓты ўса.
GEN 12:16 Аврама пӑ ԓўв урӈәԓән ищи йӑм ус; ош тащәтән пӑ мис тащәтән, осёл войәтән, митйохәтән пӑ митнэӈәтән, осёл нэ войәтән пӑ верблюд войәтән тӑйты мӑса.
GEN 12:17 Туп Турәм ԓавәрт мушәт фараона пӑ ԓўв хотәԓа Аврам ими Сара урәӈән китәс.
GEN 12:18 Щӑԓта фараон Аврам вохсәԓы пӑ йастәс: «Мўй нӑӈ ма пиԓэмән версән? Мўйа нӑӈ мӑнэма ӑт йастәсән, щит нӑӈ имен?
GEN 12:19 Мўйа нӑӈ йастәсән: ‘Ԓўв ма нэ апщем’? Ма ԓўвеԓ нэӈа ўты ўтщисэм. Тӑта щи нӑӈ имен, ўйи ԓўвеԓ пӑ мӑна».
GEN 12:20 Щӑԓта фараон хŏйатԓаԓ партсәԓы, Аврам имеԓ пиԓән пӑ тӑйәм тащԓаԓ-пŏрмасԓаԓ пиԓән щи мўв эԓты китса.
GEN 13:1 Пӑ Аврам имеԓ пиԓән, тащԓаԓ-пŏрмасԓаԓ пиԓән Египет эԓты йŏхԓы, Морты мўв пеԓа мӑтсәт, Лот ики па ԓўв пиԓәԓән мӑнәс.
GEN 13:2 Аврам шек ар тащ, сорԋи ŏх пӑ щел ŏх тӑйәс.
GEN 13:3 Морты мўв эԓты Вефиль пеԓа ԓўв йэԓԓы касԓәс, щи тӑха унты, хŏта щи йэԓпийән Вефиль пӑ Гай кўтән пирщин хот ԓоԋщиԓыйәс,
GEN 13:4 щи тӑха унты, хŏта ԓўв мет оԓәӈән йирасты нŏрәм верәс; щита Аврам Турәм Куща пеԓа пойәкщәс.
GEN 13:5 Аврам пиԓән касԓыйәм Лот нэмпи хиԓэԓ ищи ош тащәт, мис тащәт, пирщин хотәт тӑйәс.
GEN 13:6 Ԓын шек ар тащ йӑха тӑйсәтән, щишән мўвән йэрмата йис, йэԓԓы щиты уԓты ӑт верәтсәтән.
GEN 13:7 Аврам пӑ Лот ики тащ шавиты йохԓән кўтәӈа йисәт. Ханаан йох пӑ ферез йох щи мўвән щи пŏрайән усәт.
GEN 13:8 Аврам Лот пеԓа щиты йастәс: «Мин кўтәӈа уԓты ӑт питԓәмән, тащ шавиты йохԓәмән ищи кўтәӈа уԓты ӑт питԓәт, мин нӑӈ пиԓэнән рутӈән;
GEN 13:9 мўй арат мўв нӑӈ йэԓпенән ӑт уԓ? Кӑтна мӑнԓәман: нӑӈ ки шӑнша, ма венша; нӑӈ ки венша, ма пӑ шӑнша».
GEN 13:10 Иордан йŏхан ԉэп мўвәт Лот ики хŏԓ ватсәԓы пӑ кащаԓәсԓы, щи мўв Сигор унты йикән йӑма пŏшԓа, Турәм Куща ŏйәӈ-щўԋәӈ тӑха иты, Египет мўв иты. Щит щи йэԓпийән ус, хун Турәм Куща Содом пӑ Гоморра вошӈән шўкатсәԓы.
GEN 13:11 Иордан йŏхан ԉэп мўв Лот ики хŏԓ ԓўв пеԓайәԓ ўсԓы; щишән, ԓўв хӑтәԓ этты мўв пеԓа мӑнәс. Кӑт тӑхайән ԓын уԓты питсәӈән.
GEN 13:12 Аврам Ханаан мўвән уԓты питәс; Лот ики пӑ Иордан йŏхан ԉэп мўв вошәтән уԓты питәс пӑ Содом унты пирщин хотәт ԓоԋщиԓыйәс.
GEN 13:13 Содомән уԓты хŏйатәт ԉикәӈәт усәт, Турәм Куща йэԓпийән ар кӑрэк верыԓысәт.
GEN 13:14 Лот утща уԓты питмаԓ йўпийән, Турәм Куща Аврама йастәс: «Ин ԓойты мўвен эԓты ар тӑха пеԓа ӑӈкәртыйа: овәс мўв пела пӑ морты мўв пеԓа, хӑтәԓ этты пӑ хӑтәԓ ԓŏӈты пеләк пеԓа;
GEN 13:15 хŏԓ ватты мўвԓан Ма нӑӈена пӑ нӑӈ ԋаврэмԓана веккеша тӑйты мӑԓԓам;
GEN 13:16 щӑԓта нӑӈ тыхԓэн сэй хиш иты ара верԓэм; щи сэй хиш мӑтты ŏтән ԓўӈәтты верәтԓа ки, нӑӈ тыхԓэн ищи щиты ԓўӈәтты питԓа;
GEN 13:17 мӑна, щи мўв хўватәԓ, ўтатәԓ хŏԓ йӑӈхи, Ма ԓўвеԓ нӑӈена мӑԓэм».
GEN 13:18 Аврам пирщин хотԓаԓ лосәтсәԓы, пӑ мӑнәс, пӑ Хеврона касԓәс, Мамре дуб йўхәӈ ут пўӈәԓән уԓты питәс; щита ԓўв Турәм Кущайа йирасты нŏрәм верәс.
GEN 14:1 Щит Амрафел, Сеннаар мўв хон, Ариох, Елласар хон, Кедорлаомер, Елам хон, Фидал, Гоим хон – щи хонәт уԓәм ишән ус,
GEN 14:2 Бера йэщаԓт, Содом хон, Бирша йэщаԓт, Гоморра хон, Шинав йэщаԓт, Адма хон, Шемевер йэщаԓт, Севоим хон, Бела (Сигор) вош хон йэщаԓт ԉаԉәсты ԓыв мӑтсәт.
GEN 14:3 Щи хонәт хŏԓ Сиддим лот мўвән, хŏта ин Сŏԓаӈ щарәс, йўрԓаԓ йӑха пŏнмеԓ.
GEN 14:4 Кӑтхŏщйаӈ тӑԓ ԓыв Кедорлаомер хон иԓпийән усәт, хуԓметхŏщйаӈ тӑԓән ԉаԉа эԓԓәсәт.
GEN 14:5 Ԋӑԓхŏщйаӈмет тӑԓән Кедорлаомер пӑ ԓўв пиԓәԓән уԓәм хонәт йŏхәтсәт пӑ рефа йох Аштероф-Карнаим вŏшән, зуз йох Гам вошән, эм йох Шаве-Кириафаимән иԓ пайәтсәԓаԓ,
GEN 14:6 пӑ хоррей йох Сеир кевәтән, Эл-Фаран унты, щит таԓ хишәӈ мўв сыԓәԓ хŏща.
GEN 14:7 Щиԓта йŏхԓы йŏхәтмеԓ йўпийән, ԓыв, Кадеса айәԓтты, Мишпат ԓыԓәӈ йик лот унты йŏхәтсәт, пӑ ԉаԉәсман, амалик йох мўв нŏх ўсэԓ, пӑ Хацацон-Фамарән уԓәм амор йох эԓты ищи нŏх питсәт.
GEN 14:8 Щӑԓта Содом хон, Гоморра хон, Адма хон, Севоим хон, Бела (Сигор) хон этсәт пӑ ԓыв пиԓэԓән Сиддим лот мўвән ԉаԉәссәт,
GEN 14:9 Кедорлаомер, Елам хон пиԓән, Фидал, Гоим хон пиԓән, Амрафел, Сеннаар хон пиԓән, Ариох, Елласар хон пиԓән, – ԋӑԓ хон вет хон йэщаԓт ус.
GEN 14:10 Сиддим мўвән ух кӑшты мўв ўсәт усәт. Хун Содом пӑ Гоморра хонӈән хухәԓман хŏнтаты питсәтән, ԓын щи мўв ўсәта рӑкәтсәтән, хӑщәм ŏтәт Кевән хӑԋэмәсәт.
GEN 14:11 Нŏх питәм ŏтәт Содом пӑ Гоморра тащәт-пŏрмасәт пӑ хŏԓ ԓэтŏт сопасәт ўсԓаԓ пӑ мӑтсәт.
GEN 14:12 Пӑ Содомән уԓәм Лот ики, Аврам хиԓы, тащԓаԓ-пŏрмасԓаԓ пиԓән ищи пӑтән тусэԓ.
GEN 14:13 Щӑԓта ԓыԓӈа хӑщәм ŏтәт эԓты ит хŏнтамаԓ, пӑ щи вер эԓты, Мамре дуб йўхәӈ ут пўӈәԓән уԓәм, Аврам еврей икийа пŏтәртәс. Щита уԓәм Мамре амор ики пӑ ԓўв хӑнам йохԓаԓ Эшкол пӑ Анер Аврам пиԓән и пеԓа усәт.
GEN 14:14 Аврам, ԓўв Лот хиԓэԓ катԓәм пӑ тўвәм вер, хуԓмаԓ кемән, ԓўв хотԓаԓән сэма питәм хуԓәмсот ԋийәԓхус ԉаԉәсты верәтты йох ӑктәс пӑ ԋӑԓ хон йўпеԓ эԓты Дан унты ԋухәԓсәԓы,
GEN 14:15 Аврам атәԓән ԉаԉ йохԓаԓ ар похла ортсәԓы, ԋухԓәм ŏтԓаԓ эԓты йŏхәтсәԓы пӑ ԉаԉәсман нŏх питәс, пӑ Хова унты, Дамаск эԓты ŏвәс пеԓа ԉаԉәсман ԋухәԓсәԓы.
GEN 14:16 Аврам ԉаԉән мŏщатәм тащәт-пŏрмасәт йŏхԓы керәтсәԓы, Лот хиԓэԓ пŏрмасԓаԓ пиԓән йŏхԓы тусԓы, нэӈат пӑ хŏйатәт ищи йŏхԓы тусԓы.
GEN 14:17 Кедорлаомер хон пӑ ԓўв пиԓәԓән уԓәм хонәт эԓты нŏх питмаԓ йўпийән, йŏхԓы йўвмаԓән, Шаве лот мўвән, Содом хон ԓўв йэщаԓтэԓ этәс, щит ин Хон лот мўва айәԓԓа;
GEN 14:18 пӑ Мелхиседек, Салим хон, ԋаԋ пӑ ўна ким тус, ԓўв Нўм Турма йир верты хŏйата ус,
GEN 14:19 щӑԓта ԓўвеԓа Турәм эԓты йӑм вохәс пӑ йастәс: «Аврам Нўм Турәмән йӑмән ат мӑԓа, турәм пӑ мўв Тӑйты Ŏт эԓты,
GEN 14:20 пӑ Нўм Турма йӑм йасәӈ ат йастәԓәт, хорахщет нӑӈ йошена миймаԓ урәӈән». Аврам шитәм ŏтԓаԓ эԓты ԓўвеԓа и йаӈметәԓ мӑс.
GEN 14:21 Щӑԓта Содом хон Аврама йастәс: «Хŏйатԓам мӑнэма мийаԓән, пŏрмасԓам нӑӈена хӑйаԓән».
GEN 14:22 Аврам пӑ щиты Содом хон пеԓа йастәс: «Турәм Куща Нўм Турмем пеԓа, турәм пӑ мўв Тӑйты Ŏтэм пеԓа йошем нŏх шӑшԓэм пӑ йасәӈ мӑԓәм,
GEN 14:23 и сŏхәм, и кеԓ нӑӈ пŏрмасԓан эԓты ӑт уԓәм, щӑха нӑӈ ӑт ат йастәсән: ‘Аврам ма тащәӈа версэм’,
GEN 14:24 мӑнэма нэмәԓты ӑт мосәԓ, ԉаԉәсәм йохәт ԓэвәм ŏт тўмпийән пӑ ма пиԓэмән йӑӈхәм хŏйатәта ортты пŏрмас тўмпийән; Анер, Эшкол пӑ Мамре, шитәм пŏрмасәт эԓты, ԓывиԓаԓа мосты арат ат ўԓәт».
GEN 15:1 Щи верәт хӑщәм йўпийән Турәм Куща уԓәмән Аврам пеԓа йастәс: «Аԓ пӑԓа, Аврам; Ма нӑӈ сайԓәпсайэн, нӑӈ мойԓәпсайэн шек ун».
GEN 15:2 Аврам йастәс: «Вŏсху Турәм Куща! Мўй Нӑӈ мӑнэма мӑԓән? Ма ԋаврэм ӑт тӑйԓәм, пŏрмасэм пӑ тащем, Дамаск вош эԓты уԓты, Елиезер нэмпи хот шавиты кущайэма хӑщәԓ».
GEN 15:3 Щиты Аврам йастәс: «Нӑӈ мӑнэма ԋаврэм ӑт мӑсән, щишән, ма хотэмән сэма питәм митхуйэма хотэм пӑ тащем хӑщәԓ».
GEN 15:4 Щӑԓта Турәм Куща ԓўвеԓа йастәс: «Ԓўвеԓа хотэн пӑ тащен ӑт питәԓ, туп хŏй нӑӈ эԓтэн тыйәԓ, щитэна нӑӈ тащен питәԓ».
GEN 15:5 Щӑԓта Турәм Куща ԓўвеԓ ким этәԓтәсԓы пӑ йастәс: «Турәм хӑр пеԓа ванта пӑ хусәт ԓўӈтаԓән, ԓўӈәтты верәтԓэн ки». Пӑ ԓўвеԓа йастәс: «Щи арат нӑӈ тыхԓэн питәԓ».
GEN 15:6 Аврам Турәм Куща йасӈа эвԓәс, щишән Турәм Куща ԓўвеԓ вещката ԓўӈәтсәԓы.
GEN 15:7 Щӑԓта ԓўвеԓа йастәс: «Ма Турәм Куща, Ма нӑӈен Халдея мўвән уԓты Ур нэмпи тӑха эԓты ты тусэм, тӑм мўв нӑӈена тӑйты мӑты урәӈән».
GEN 15:8 Авраам пӑ йастәс: «Вŏсху Турәм Куща! Мўй щирән ма мŏштәԓэм щи мўв мӑнэма питты вер?»
GEN 15:9 Турәм Куща ԓўвеԓ йастәс: «Хуԓәм тӑԓа йўвәм нэ мис, хуԓәм тӑԓа йўвәм коза, хуԓәм тӑԓа йўвәм ош, горлица вой пӑ энәмты голубь вой Мӑнэм тўва».
GEN 15:10 Аврам щиты щи верәс, пӑ войԓаԓ хўватԓаԓ щирән хŏԓ кӑтна ващсәԓы, и пеләкԓаԓ кимет пеләкԓаԓ йэщаԓт пŏтсәԓы; туп тŏхԓәӈ войӈиԓаԓ кӑтна ӑт эвәтсәԓы.
GEN 15:11 Вой хӑԓайәт хŏща кўркәт, хулхәт, вŏрӈайәт йŏхәтсәт; пӑ Аврам ԓывиԓаԓ йэԓ воштәсԓы.
GEN 15:12 Най ԓŏӈәмән Аврам так оԓма питәс, щӑԓта тўрма ԓўв эԓтэԓ питәс пӑ пӑԓщамән йŏхәтса.
GEN 15:13 Щӑԓта Турәм Куща Аврама йастәс: «Уйты, нӑӈ эԓтэн тыйты мирэн па мўва касԓәм хŏйатәта питԓәт, тынԓы-пелԓы рупата ԋўрты питԓәт, пӑ щиты йэрмәԓты уԓәпсайән ԋӑԓсот тӑԓ уԓты питԓәт,
GEN 15:14 туп Ма щи мир хŏща сўт верԓэм, хŏй хŏща ԓыв тынԓы-пелԓы рупата ԋўрты питԓәт; щи йўпийән ԓыв тащԓаԓ-вещԓаԓ пиԓән йŏхәтԓәт,
GEN 15:15 нӑӈ пӑ йӑмән ащиԓан хŏща мӑнԓән, нуптэн йӑма уԓман иԓ лоттәԓайән;
GEN 15:16 туп хиԓыԓан ԋаврэмәт тыйэԓт йŏхԓы йŏхәтԓәт, хун амор йох атәм верәт тэкәнты ўша йиԓәт».
GEN 15:17 Най ԓŏӈәмән пӑтлама йис, пӑ щи, пусӈиԓәты кур сэма питәс пӑ тўт ԋаԓәм пусәӈ пиԓән кӑтна эвтәм войәт кўтән мӑнәс.
GEN 15:18 Щи хӑтәԓән Турәм Куща Аврам пиԓән йастантәпса верәс, йастәман: «Тӑм мўв йэԓԓы уԓты ԋаврэмԓана Ма мӑԓэм, Египет йŏхан эԓты Евфрат ас унты:
GEN 15:19 кен йох, кенез йох, кедмон йох мўвәт,
GEN 15:20 хет йох, ферез йох, рефа йох мўвәт,
GEN 15:21 амор йох, ханаан йох, гергес йох пӑ иевус йох мўвәт».
GEN 16:1 Сара Аврам ийикеԓа ԋаврэм ӑт тӑйәс. Ԓўв хŏщайәԓ Египет мўв нэ, Агарь нэмпи митнэ ус.
GEN 16:2 Аврам пеԓа Сара щиты йастәс: «Турәм Кущайән ԋаврэмән ӑт партсайәм. Мӑна, митнэӈем пиԓән уԓа. Мосәӈ, ԓўв мӑнэма ԋаврэм тӑйты питәԓ». Аврам Сара йасӈәт пеԓа хуԓәнтәс.
GEN 16:3 Щиты, Ханаан мўвән йаӈ тӑԓ уԓман йўпийән, Сара Аврам ийикеԓа Египет мўв Агарь митнэӈәԓ ай нэӈа тӑйты мӑсԓы.
GEN 16:4 Аврам Агарь пиԓән ус, пӑ ԓўв нэ щирән ԓавәрта йис. Щиты питмаԓ кемән, ԓўв куща нэӈәԓ эԓты ԓўвеԓ унашәк тӑйты питсәԓы.
GEN 16:5 Сара Аврама йастәс: «Ма нӑӈена митнэӈем мӑсәм; ԓўв ԋаврэм щирән уԓ пӑ мӑнэм нэмәԓтыйа ӑт тӑйԓәԓы. Щишән, нӑӈ урӈенән ма ԉикән этԓайәм; Турәм Куща мӑнэма пӑ нӑӈена сўт верты ŏта ат уԓ».
GEN 16:6 Аврам Сара пеԓа йастәс: «Ԓўв нӑӈ митнэӈен, мўй ԓӑӈхаԓайән, щит ԓўв пиԓәԓән вера». Щишән, Сара митнэӈәԓа рупата ԋўрты партәс пӑ Агарь ԓўв эԓтэԓ хŏнтас.
GEN 16:7 Турәм Куща ангел таԓ хишәӈ мўвән йик ўты ўс пўӈәԓән, Сур пеԓа мӑнты йушән, ԓўвеԓ уйәтсәԓы.
GEN 16:8 Пӑ йастәс: «Агарь, Сара митнэ, хŏԓща йŏхәтсән пӑ хŏԓта мӑнԓән?» Ԓўв йастәс: «Ма Сара куща нэӈем эԓты хŏнтаԓәм».
GEN 16:9 Турәм Куща ангел ԓўвеԓа йастәс: «Куща нэӈен хŏща йŏхԓы мӑна пӑ ԓўв пеԓайәԓ хуԓәнта».
GEN 16:10 Щӑԓта Турәм Куща ангел ԓўвеԓа йастәс: «Энәмты тыхԓэн щи ԓŏват ара верԓэм, ԓўӈәтты йур ӑт йŏхәтәԓ».
GEN 16:11 Хŏԓна Турәм Куща ангел ԓўвеԓа йастәс: «Нӑӈ ин ԋаврэм щирән уԓԓән пӑ пŏх сэма пайәтԓән, Измаил нэмән ԓўвеԓ пŏнԓэн, Турәм Куща нӑӈ ԓавәрт уԓәпсайэн хуԓтсәԓы;
GEN 16:12 ԓўв ут вой иты хŏйатәт кўтән уԓты питәԓ: ԓўв иса мир йэщаԓт питәԓ, мир пӑ ԓўв йэщаԓтәԓ питәԓ, йайԓаԓ-апщиԓаԓ пиԓән кўтәӈа уԓты питәԓ».
GEN 16:13 Щишән, Агарь ԓўв пиԓәԓән пŏтәртәм Турәм Куща нэмән мӑсԓы: «Нӑӈ – Мӑнэм ватман тӑйты Турәм». Щиты ԓўв йастәс: «Йӑна тӑта, Мӑнэм ватман тӑйты Ŏт, ма ватсәм».
GEN 16:14 Щишән, щи йик ўты ўс щиты айәԓтԓа: Беэр-лахай-рои. Кадес лот пӑ Баред вош кўтән ԓўв уԓ.
GEN 16:15 Агарь Аврама пŏх сэма пайтәс; Агарь эԓты тӑйәм пŏхәԓ Аврам Измаил нэмән пŏтсәԓы.
GEN 16:16 Аврама ԋийәԓйаӈ хут тӑԓ ус, хун Агарь Измаил пŏхәԓ сэма пайтәс.
GEN 17:1 Аврама йӑрсот йӑрәтйаӈ тӑԓ ус, хун Турәм Куща ԓўв йэщаԓтәԓ этәс пӑ ԓўвеԓа йастәс: «Ма Иса Верәтты Турәм, Ма йэԓпемән йӑӈха пӑ вещката уԓа;
GEN 17:2 Ма йастантәпсайэм мин кўтэмәнән верԓэм пӑ щӑԓта шек-шек ара нӑӈен рутмәԓтԓэм».
GEN 17:3 Аврам мўва хŏмта рӑкнәс. Турәм пӑ ԓўв пиԓәԓән йэԓԓы пŏтәртәс пӑ щиты йастәс:
GEN 17:4 «Тӑм Ма йастантәпсэм нӑӈ пиԓэнән: ар сыр мир ащийа нӑӈ питԓән,
GEN 17:5 Аврам нэмен хӑйԓэн, пӑ тӑԓта йэԓԓы нӑӈ нэмен питәԓ: Авраам, Ма нӑӈен ар сыр мир ащийа верԓэм;
GEN 17:6 пӑ шек-шек нӑӈен рутмәԓтԓэм, пӑ нӑӈ эԓтэн Ма ар сыр мир этәԓтәԓәм, пӑ хонәт нӑӈ эԓтэн этԓәт;
GEN 17:7 Ма йастантәпсайэм мин кўтэмәнән пӑ йэԓԓы уԓты нӑӈ ԋаврэмԓан пиԓән верԓэм, щит веккеша уԓты йастантәпса, щиты Ма нӑӈ Турмена пӑ нӑӈ йўпен ԋаврэмԓана Турма уԓты питԓәм;
GEN 17:8 ин нӑӈ па мўвәӈ хŏйат иты уԓты Ханаан мўвен нӑӈена пӑ нӑӈ йўпенән рутәмты ԋаврэмԓана хŏԓ мӑԓэм, веккеша тӑйты мӑԓэм; пӑ ԓывиԓаԓа Турма уԓты питԓәм».
GEN 17:9 Щӑԓта Турәм Авраама йастәс: «Нӑӈ пӑ нӑӈ пелкен эԓты Ма йастантәпсайэм тўӈа-щира веры, нӑӈ пӑ нӑӈ йўпенән энәмты ԋаврэмԓан пӑ йэԓԓы уԓты ԓыв ԋаврэмԓаԓ ԋаврэмәт ищи.
GEN 17:10 Щит Ма йастантәпсайэм, щит мин кўтэмәнән пӑ нӑӈ йўпенән йэԓԓы уԓты нӑӈ ԋаврэмԓан ԋаврэмәт пиԓән тўӈа-щира верты верән уԓ: хŏԓ йох рут сэма питәм йох ԋаврэмәт пиԓән эвәтты щира питәԓ;
GEN 17:11 хŏԓ йох хŏйатәта сэма питәм йох ԋаврэмәт пиԓән эвәтты щир вераты: щит Ма нын пиԓанән йастантәпсайэм поса питәԓ.
GEN 17:12 Кашәӈ сэма питәм йох ԋаврэм нын рутԓән хŏща, нӑӈ пӑ нӑӈ йўпенән энәмты ԋаврэмԓан пӑ ԓыв ԋаврэмԓаԓ ԋаврэмәт хŏща ԋийәԓ хӑтԓа йитаԓән эвәтты щирән ат верԓайәт. Шŏши хотән сэма питәм пӑ щел ŏх сӑхат па рут хŏйат эԓты ԓутәм ŏт, хŏй ӑнтом нӑӈ рутэн эԓты, эвәтты щирән ат верԓайәт.
GEN 17:13 Щишән, нӑӈ хотэнән сэма питәм ŏт пӑ щел ŏх сӑхат ԓутәм ŏт эвәтты щирән ат верԓа, щиты Ма йастантәпсайэм нын эԓәнән веккеша йастантәпсайа питәԓ.
GEN 17:14 Ӑт эвтәм йох хŏйат, хŏй эвәтты щирән ӑт верԓа, ԓўв мирәԓ эԓты эртԓа, Ма йастантәпсайэм шŏппи ўшмаԓ урәӈән».
GEN 17:15 Щӑԓта Турәм Авраама йастәс: «Сара имен пӑ аԓ айәԓты Сара нэмаԓән, ԓўв нэмәԓ питәԓ: Сарра.
GEN 17:16 Ма ԓўвеԓ йӑмән мӑԓэм пӑ нӑӈен пŏхән ԓўв эԓтэԓ мӑԓэм; ԓўвеԓ йӑмән мӑԓэм, пӑ мирәт ԓўв эԓтэԓ этԓәт, хонәт ԓўв эԓтэԓ этԓәт».
GEN 17:17 Авраам хŏмта рӑкнәс пӑ ԋӑхән йŏхәтса пӑ ԓўв сӑхатәԓ йастәс: «Сот тӑԓпи ики эԓты пŏх хун уԓ? Йӑрсот тӑԓпи Сарра мўй щирән ԋаврэм сэма пайәтәԓ?»
GEN 17:18 Пӑ щӑԓта Авраам Турма йастәс: «Измаил кўш кепа Нӑӈ йэԓпенән ԓыԓӈа пӑ йӑма ат уԓ!»
GEN 17:19 Турәм пӑ йастәс: «Вŏԓԓы нӑӈ имен Сарра нӑӈена пŏх сэма пайәтәԓ, нӑӈ пӑ ԓўвеԓ Исаак нэмән пŏнԓэн; Ма пӑ йастантәпсайэм ԓўв пиԓәԓән веккеша йастантәпсайа верԓэм, пӑ ԓўв йўпеԓән уԓты ԋаврэмԓаԓа.
GEN 17:20 Измаил эԓты Ма нӑӈен ищи хуԓтсэм: Ма ԓўвеԓ йӑмән мӑԓэм, тыхԓәԓ ара верԓэм, пӑ шек-шек ԓўвеԓ рутмәԓԓэм; кӑтхŏщйаӈ кӑнащ ԓўв эԓтэԓ сэма питԓәт; Ма ԓўв эԓтайәԓ вŏԓаӈ мир этәԓтәԓәм.
GEN 17:21 Туп Ма йастантәпсайэм Исаак пиԓән верԓэм, папуш и тӑм пŏрайән Саррайән нӑӈена тӑйты пŏхен пиԓән».
GEN 17:22 Щитәԓән Турәм Авраам пиԓән пŏтәртты вŏԓыйәс пӑ нŏх эԓԓәс.
GEN 17:23 Щи хӑтәԓән Авраам Измаил пŏхәԓ эвәтты щирән версәԓы. Пӑ ԓўв хотәԓән сэма питәм йох хŏйатәт пӑ щел ŏхәԓ сӑхат ԓутәм ŏтәт ищи щиты версәԓы, хŏты Турәм ԓўвеԓ йастәс.
GEN 17:24 Авраама, эвәтты щир верәмән, йӑрсот йӑрәтйаӈ тӑԓ ус.
GEN 17:25 Измаил пŏхәԓа эвәтты щир верәмән хуԓәмхŏщйаӈ тӑԓ ус.
GEN 17:26 Вŏԓԓы щи хӑтәԓән Авраам Измаил пŏхәԓ пиԓән эвәтты щирән версайтән.
GEN 17:27 Ԓўв пиԓәԓән ԓўв хотәӈ йох хŏйатԓаԓ, ԓўв хотәԓән сэма питәм пӑ па мир хŏйатәт эԓты щел ŏх сӑхат ԓутәм ŏтәт хŏԓ эвәтты щирән версайәт.
GEN 18:1 Мамре дуб йўхәӈ ут хŏща, хӑтәԓ кўтәп рўвән пирщин хот овәԓ пўӈәԓән Авраам омәсмаԓән, ԓўв хŏщайәԓ Турәм Куща этәс.
GEN 18:2 Авраам сэмӈиԓаԓ нŏх аԓәпсәԓы пӑ шийаԓәсԓы, хуԓәм йох хŏйат ԓўв эԓтэԓ йэԓәншәк ԓойԓәт. Ԓывиԓаԓ шийаԓәмаԓ кемән, пирщин хот овәԓ эԓты ԓыв хŏщайэԓ йэщаԓт хухәԓмәс пӑ мўв унты иԓ ԋўрщәман ŏх пŏнәс,
GEN 18:3 пӑ йастәс: «Вŏԓаӈ Куща! Нӑӈ йӑм сэмән ма пеԓайэм ватԓән ки, Нӑӈ митхуйэн хот мŏхты аԓ мӑна;
GEN 18:4 кўрԓән ԉŏхәтты йикән туԓайты, щӑԓта тӑм йўх иԓпийән щўтщаты,
GEN 18:5 ма пӑ ԋаԋ туԓәм, нын сӑмԓән ԓэщтәты урәӈән, щӑԓта йэԓԓы мӑнты верәтԓәты; ищипа щи ин нын митхуйән хŏща йŏхәтсәты». Ԓыв йастәсәт: «Хŏты пŏтәртԓән, щиты веры».
GEN 18:6 Щӑԓта Авраам пирщин хота, Сарра хŏща, тэрматыман ԓŏӈемәс пӑ йастәс: «Хуԓәм мера арат йӑм ԓат сорашәк рўвта пӑ паԓәм ԋаԋ вера».
GEN 18:7 Щӑԓта тащәԓ хŏща Авраам хухәԓмәс, мет йӑм ай мис пŏшәх пирыйәс, айкем митхуйәԓа мӑсԓы пӑ щитәԓ ԓэтŏт сора верты питәс.
GEN 18:8 Щӑԓта вŏй пӑ мис йик, пӑ йӑԓпа кавәртәм ԋŏхи ўс, пӑ ԓыв йэԓпиԓаԓән омәссәԓы, ԓўв пӑ ԓыв пўӈԓэԓән йўх иԓпийән ԓойәс. Ԓыв пӑ ԓэсәт.
GEN 18:9 Щӑԓта ԓўвеԓа йастәсәт: «Сарра иимен пӑ хŏта?» Ԓўв йастәс: «Тӑта, пирщин хотән».
GEN 18:10 Итэԓ йастәс: «Папуш и тӑм пŏрайән Ма нӑӈ хŏщайэн па йŏхәтԓәм, пӑ Сарра иимен пŏх тӑйты питәԓ». Сарра пӑ пирщин хот ов сайән ԓойәс пӑ хуԓәнтәс.
GEN 18:11 Авраам пӑ Сарра уна пелка йўвәм хŏйатӈән усӈән, Сарра нэ верԓаԓ йэтшәсәт.
GEN 18:12 Сарра ԋӑхән йŏхәтса пӑ ԓўв сӑхатәԓ йастәс: «Ԏо, Ма пӑ, пирщамәмем йўпийән, ԋаврэм мўй щирән мŏщатԓәм? Иикем па пирәщ».
GEN 18:13 Турәм Куща Авраам пеԓа йастәс: «Мўйа пӑ Сарра ԋӑхәс, йастәман: ‘Пирәщ турәмән мўй щирән ма ԋаврэм мŏщатԓәм?’
GEN 18:14 Турәм Кущайа мŏԓты ԓавәрт вер хун уԓ? Папуш, йастәм хӑтԓэмән, Ма нӑӈ хŏщайэн йŏхәтԓәм, Сарра пӑ пŏх тӑйты питәԓ».
GEN 18:15 Сарра пӑԓтамәс пӑ йастәс: «Ма ӑт ԋӑхсәм». Турәм Куща пӑ йастәс: «Ӑнта, нӑӈ ԋӑхсән».
GEN 18:16 Щӑԓта щи йох хŏйатәт нŏх ԓойсәт пӑ Содом вош пеԓа мӑтсәт; Авраам ищи ԓыв пиԓэԓән тŏхишәк унты йӑӈхәс.
GEN 18:17 Щӑԓта Турәм Куща йастәс: «Ма мўй верты ўтщиԓәм, Авраам эԓты хӑԋатԓэм хун?
GEN 18:18 Авраам эԓты вŏԓаӈ пӑ йурәӈ мир йӑна рутмәԓ, мўвән уԓты мирәт хŏԓ ԓўв хўватәԓән йӑмән мӑԓайәт,
GEN 18:19 Ма ԓўвеԓ щи урәӈән пирысэм, щӑха ԓўв, ԋаврэмԓаԓа пӑ хиԓыԓаԓа, Турәм Куща аԉәм йуш хўват, тўӈа-щира пӑ вещката уԓман, шушты ат партԓәԓы, Турәм Куща пӑ мўй Авраама йастәс, ищи верԓәԓы».
GEN 18:20 Турәм Куща йастәс: «Содом пӑ Гоморра вошӈән хŏйатәт уԓәпса эԓты ар хоԓԓәпәӈ ўв щащәԓ, кӑрэкеԓ шек ԓавәрт,
GEN 18:21 иԓ ŏхәԓԓәм пӑ ватԓэм, йӑна мўй ԓыв щиты уԓԓәт, хŏты Ма хуԓԓыԓэм, мосәӈ, ӑнта, щит ԓэрапԓэм».
GEN 18:22 Щи хŏйатӈән карэмәсӈән пӑ Содом пеԓа мӑтсәӈән; Авраам пӑ Турәм Куща йэщаԓт хŏԓна ԓойәс.
GEN 18:23 Авраам Ԓўв хŏщайәԓ ванашәк мӑнәс пӑ йастәс: «Нӑӈ кӑрэкәӈ хŏйатәт пиԓән вещкат хŏйатәт мўй па пӑратԓәԓан?
GEN 18:24 Мосәӈ, тӑм вошән ветйаӈ вещкат хŏйат уԓ? Пӑр мŏԓты Нӑӈ щи тӑха пӑратԓэн, щита уԓты щи ветйаӈ вещкат хŏйат урәӈән ӑт щаԉәтԓэн?
GEN 18:25 Нӑӈ щиты ӑт верԓэн, вещкат хŏйатәт атәм хŏйатәт пиԓән пӑратԓәԓан хун, атәм хŏйатәт иты вещкат хŏйатәт сўтәтԓыԓан хун, Нӑӈ эԓтэн щит ӑт питәԓ! Иса мўв Сўт верты Ŏт йŏвра верәԓ хун?»
GEN 18:26 Турәм Куща йастәс: «Содом вошән ветйаӈ вещкат хŏйат Ма уйәтԓәм ки, Ма ԓыв урӈеԓән хŏԓ щи тӑха щаԉәтԓэм».
GEN 18:27 Авраам пӑ йастәс: «Ма пӑ Вŏсху пиԓән пŏтәртты йасӈем хŏԓна этәԓ, ма, таԓ хиш пӑ нампәр:
GEN 18:28 мосәӈ, ветйаӈ вещкат хŏйат унты вет туп ӑт тӑрмәԓ? Нӑӈ тӑԓаӈ вош щи ӑт тӑрәмты вет хŏйат урәӈән пӑратԓэн хун?» Ԓўв йастәс: «Ӑт пӑратԓэм, ԋӑԓйаӈ вет щита уйәтԓәм ки».
GEN 18:29 Авраам Ԓўв пиԓәԓән йэԓԓы пŏтәртәс пӑ йастәс: «Мосәӈ, ԋӑԓйаӈ щита ԉикмәԓ?» Ԓўв йастәс: «Ԋӑԓйаӈ хŏйат урәӈән Ма щит ищи ӑт верԓэм».
GEN 18:30 Щӑԓта Авраам йастәс: «Вŏсху ӑт ат ԉикащәԓ, ма па йастәԓәм: мосәӈ, щита туп хŏԉмаӈ хŏйат питәԓ?» Ԓўв йастәс: «Ӑт верԓэм, хŏԉмаӈ щита ԉикмәԓ ки».
GEN 18:31 Авраам йастәс: «Ма пӑ Вŏсху пиԓән пŏтәртты йасӈем хŏԓна этәԓ: мосәӈ, щита хус ԉикмәԓ?» Ԓўв йастәс: «Хус урәӈән ӑт пӑратԓэм».
GEN 18:32 Авраам йастәс: «Вŏсху ӑт ат ԉикащәԓ, ма и пуш па иԋщәсԓэм: мосәӈ, щита йаӈ туп питәԓ». Ԓўв йастәс: «Йаӈ урәӈән ӑт пӑратԓэм».
GEN 18:33 Щӑԓта Турәм Куща мӑнәс, Авраам пиԓән пŏтәртты вŏԓыйәс; Авраам пӑ ԓўв уԓты тӑхайәԓа йŏхԓы мӑнәс.
GEN 19:1 Щи ангелӈән йэтна пеԓа Содома йŏхәтсәтән, хун Лот ики Содом вош овәт пўӈәԓән опсәс. Лот ики ԓынан кащаԓәмаԓ кемән, нŏх ԓойәс пӑ ԓын йэщаԓтан мӑнәс пӑ мўв унты, ŏх пŏнман, иԓ ԋўрәс
GEN 19:2 пӑ йастәс: «Кущайӈәԓам! Митхуйән хота ԓŏӈатән пӑ хоԓатән, кўрԓән ԉŏхитаԓән, аԓәӈсӑхат нŏх киԓԓәтән пӑ йэԓԓы нын йушән хўват мӑнԓәтән». Ԓын пӑ йастәстән: «Ӑнта, мин камән хоԓԓәмән».
GEN 19:3 Ԓўв пӑ шек такан ԓынан пойәксәԓы; пӑ ԓын ԓўв йўпеԓән мӑтсәтән, пӑ ԓўв хотәԓа ԓŏксәтән. Ԓўв йӑм эпԓәӈ ԓэтŏт пӑ паԓәм ԋаԋ верәс, пӑ ԓын ԓэстән.
GEN 19:4 Ԓын хŏԓна иԓ ӑт ŏԓсәтән, хун Содом вош йох, айэԓ-унэԓән, кашәӈ вош оԓәӈ эԓты, щи хот, керәтман, лӑп ўсэԓ.
GEN 19:5 Лот ики ким вохсэԓ пӑ ԓўвеԓ йастәсәт: «Хŏта нӑӈ хŏщайэн хоԓты йŏхтәм хŏйатӈән? Ԓынан мўӈ хŏщайэв ким тўваԓән; мўӈ ԓын пиԓанән пакрасԓыты ԓӑӈхаԓайув».
GEN 19:6 Лот ики ԓыв хŏщайэԓ ким этәс, пӑ хŏт овәԓ ԓўв йўпеԓән лӑп тухәрсәԓы,
GEN 19:7 пӑ йастәс: «Хӑнам йŏх, атәм аԓ вераты;
GEN 19:8 тӑта щи ма эвеӈәԓам, ԓын хŏԓна йох хŏйат пиԓән ӑт устән; ма ԓынан нын хŏщайән этәԓтыԓԓам, мўй ԓӑӈхаԓайты, ԓын пиԓанән вераты, туп тӑм йŏхтәм хŏйатӈәна нэмәԓты аԓ вераты, ԓын ма мойәӈ хŏйатӈәԓам, ма ԓынан сайԓәты верэм уԓ».
GEN 19:9 Ԓывәт пӑ йастәсәт: «Ты йўва». Пӑ йастәсәт: «Тӑм хŏйат па мўв эԓты йŏхтәм ŏт, пӑ мўӈев сўтәтты ўтщийәԓ? Ин мўӈ нӑӈена ԓынан эԓты аршәк атәм верԓув». Щӑԓта щи хŏйат, Лот ики, пўӈԓа ипәртты питсэԓ, пӑ ов шўкатты ўтщисэԓ.
GEN 19:10 Щиӈәԋща щи йохӈән йошԓән ким ԋиншәмтысԓән пӑ Лот ики йŏхи ԋӑрэмәсԓән, пӑ ов лӑп тухәрсәԓән;
GEN 19:11 ов пўӈәԓән уԓәм хŏйатәт айэԓ-унэԓән сэмԓы пайәтсәԓән, щишән щитәт, ов кӑшман, воԓԓы шукащсәт.
GEN 19:12 Щи йохӈән Лот ики пеԓа йастәсӈән: «Хŏйтыԓан тӑта хŏԓна уԓԓәт? Веӈԓан мўй, пŏхԓан мўй, эвиԓан мўй пӑ па хŏйатԓан тӑм вош эԓты хŏԓ йэԓ тўваԓән,
GEN 19:13 мин тӑм тӑха иса таԓа верԓэмән, Турәм Куща унты шек ун хоԓԓәпәӈ ўв тӑм мŏхет уԓәпса эԓты йŏхтәс, щишән, Турәм Куща тӑм тӑха иса таԓа верты урәӈән минэмән китсәԓы».
GEN 19:14 Лот ики ким этәс пӑ веӈа верты ўтщийәм ŏтӈиԓаԓ пиԓән пŏтәртәс, пӑ йастәс: «Нŏх ԓойатән, тӑм тӑха эԓты мӑнатән, Турәм Куща тӑм вош пӑратԓәԓы». Туп ԓын ԓўвеԓа ӑт эвәԓсәтән.
GEN 19:15 Аԓәӈсӑхата йўвмаԓән, ангелӈән Лот ики тэрматты питсәԓән, щиты йастәман: «Нŏх киԓа, имен пӑ эвеӈәԓан ўйаԓән, тӑԓта йэԓ мӑнаты, нынана ԓыԓӈа хӑщты урәӈән, вош атәм верәт нӑӈена ӑт ат хойсәт».
GEN 19:16 Ԓўв пӑ ӑт тэрматыйәс, щишән, щи хŏйатӈән ԓўвеԓ пӑ ԓўв имеԓ пӑ ԓўв эвеӈәԓаԓ йошԓән эԓты катәԓман, ўсԓән пӑ вош кимпийа тусԓән, Турәм Куща йӑм сэмән Лот ики пеԓа ватмаԓ урәӈән.
GEN 19:17 Вош кимпийа ԓывиԓаԓ тўвманән, итәԓ йастәс: «Нӑӈ ԓыԓэн шавийи; йŏхԓы аԓ ванта пӑ тӑм пайԓы мўвән иԓ аԓ ԓойԓыйа; нӑӈ ӑт ат пӑртсән, Кев ўрән шаваща».
GEN 19:18 Лот ики пӑ ԓынана йастәс: «Ӑнта, Вŏԓаӈ Куща!
GEN 19:19 Тӑта щи, Нӑӈ митхуйэн пеԓа Нӑӈ йӑм сэмән ватсән, ма уԓәпсайэм шавиты урәӈән Нӑӈ щи ԓŏват йӑм версән; туп ма Кев ўр унты хухәԓты ӑт верәтԓәм, тӑм шук эԓты ат шаващсәм пӑ ԓыԓӈа ат хӑщсәм,
GEN 19:20 тўм воша хухәԓты ваншәк, ԓўв ай; щи хухәԓты мӑнэм эсԓы, – ԓўв ай; ԓыԓэм па шавиԓэм».
GEN 19:21 Пӑ ԓўвеԓа йастәс: «Нӑӈ урӈенән щит Ма па верԓэм: нӑӈ айәԓты вошен ӑт шўкатԓэм;
GEN 19:22 тэрматыйа, щита хӑԋэма, нӑӈ щи ӑт йŏхәттэн унты Ма верэм верты ӑт верәтԓэм». Щишән, щи вош Сигор нэмән мӑса.
GEN 19:23 Най нŏх этәс, хун Лот ики Сигор унты йŏхтәс.
GEN 19:24 Щӑԓта, Турәм Куща Содом пӑ Гоморра вошӈән Турәм Куща эԓты турәм эԓты тўтәӈ кевәтән пӑ тўтән йэрт иты шошәпсәԓы,
GEN 19:25 щи вошӈән, пӑ щи пайԓы мўвәт, пӑ щи вошӈән хŏԓ хŏйатәт, пӑ мўвән энмәм ŏтәт хŏԓаԓтсәԓы.
GEN 19:26 Лот ики йўпийән йўвәм имеԓ йŏхԓы ӑӈкәрмәс, пӑ сŏԓаӈ акԓа мŏхты йис.
GEN 19:27 Авраам аԓәӈсӑхат аԓәӈ нŏх киԓәс пӑ щи тӑхайа мӑнәс, хŏта Турәм Куща йэщаԓт щи йэԓпийән ԓойәс,
GEN 19:28 Содом пӑ Гоморра вошӈән пӑ йŏхан ԉэпән уԓты мўвәт пеԓа ӑӈкәрмәс пӑ кащаԓәсԓы: щи мўв эԓты, ӑԓәм кур иты, пусәӈ нŏх этәс.
GEN 19:29 Щиты ус, хун Турәм пайԓы мўв вошәт пӑратсәԓы, Турәм Авраам нŏмәсән иса тӑйсәԓы пӑ вошәт шўкатәм тӑха эԓты Лот ики йэԓ китсәԓы, хŏта Лот ики ус.
GEN 19:30 Сигор эԓты Лот ики мӑнәс, Кев ўрән эвеӈәԓаԓ пиԓән уԓты питәс, ԓўв Сигор вошән уԓты пӑԓәс. Щита эвеӈәԓаԓ пиԓән хŏшапәӈ кев ԓыпийән ус.
GEN 19:31 Щӑԓта ŏпеԓ апщеԓа йастәс: «Ащемән пирәщ, пӑ йŏх хŏйат тӑм мўвән ӑнтом, мин пиԓэмәнән уԓты урәӈән, хŏты мўв ԓŏватән уԓԓыйәԓ,
GEN 19:32 щишән, ащемән ўнайән йищәԓтәԓэмән, пӑ ащемән эԓты рутэмән йэԓԓы туԓэмән».
GEN 19:33 Щи атән ԓын ащан йищәԓтәсԓән; ун эвеԓ ԓўв хŏщайәԓ ԓŏӈтыйәс; ащеԓ пӑ ӑт уйтәс, хун ԓўв ŏԓԓыйәс пӑ хун нŏх киԓәс.
GEN 19:34 Кимет хӑтәԓ ŏпеԓ апщеԓа йастәс: «Мŏԓхатәԓ ма ащем хŏща ԓŏӈтысәм; тӑм ат ԓўвеԓ ўнайән па йищәԓтәԓэмән; пӑ нӑӈ ԓŏӈтыйа, ащемән эԓты рутэмән йэԓԓы туԓэмән».
GEN 19:35 Щи ат ащан ўнайән па йищәԓтәсԓән; пӑ ай эвеԓ ԓўв хŏщайәԓ ԓŏӈтыйәс; ащеԓ па ӑт уйтәс, хун ԓўв ŏԓԓыйәс пӑ хун нŏх киԓәс.
GEN 19:36 Щиты Лот ики эвеӈәԓаԓ ԓын ащан эԓты кинтак ԓавәрта йисӈән.
GEN 19:37 Ун эвеԓ пŏх тӑйәс, нэмән мӑсԓы: Моав. Ԓўв ин тӑм унты моав йох ащи.
GEN 19:38 Ай эвеԓ ищи пŏх тӑйәс, нэмән ԓўвеԓ мӑсԓы: Бен-Амми. Ԓўв ин тӑм унты аммон йох ащи.
GEN 20:1 Авраам йэԓԓы Морты мўв пеԓа касԓәс, Кадес лот пӑ Сур мўв кўтән уԓты питәс; мŏԓты сыс Герар вошән ус.
GEN 20:2 Авраам Сарра имеԓ эԓты щиты йастәс: «Ԓўв ма нэ апщем». Авимелех, Герар вош хон, Сарра ԓўв хŏщайәԓ туты партсәԓы.
GEN 20:3 Атәԓән уԓәмән Авимелех хŏща Турәм йŏхтәс пӑ ԓўвеԓа йастәс: «Тӑм ими ўймен урәӈән нӑӈ сŏрма питԓән, ԓўв ики тӑйәԓ».
GEN 20:4 Авимелех пӑ щи нэ хŏща ӑт кетмийәс пӑ йастәс: «Вŏсху! Нўрԓы мир пӑр мўй пӑратԓэн?
GEN 20:5 Авраам мӑнэм йастәс: ‘Ԓўв ма нэ апщем’? Сарра пӑ йастәс: ‘Ԓўв ма йайәм’. Ма щит йӑм нŏмәсән версэм пӑ йошԓам сыстамәт».
GEN 20:6 Щӑԓта Турәм ԓўвеԓ уԓәмән йастәс: «Ма ищи уйәтԓэм, щит нӑӈ йӑм нŏмәсән версэн, щишән, нӑӈен Ма йэԓпемән кӑрэк эԓты сайԓәптәсэм пӑ ԓўв хŏщайәԓ нӑӈен кетәмты ӑт эсәԓсэм;
GEN 20:7 ин пӑ икеԓа имеԓ йŏхԓы мийи, ԓўв Турәм айкеԓ туты хŏйат пӑ нӑӈ урӈенән пойәкщәԓ, щиты нӑӈ ԓыԓӈа хӑщԓән; йŏхԓы ӑт мӑԓэн ки, уйты, хотәӈ ŏтԓан пиԓән нӑӈ сŏрма питԓән».
GEN 20:8 Авимелех аԓәӈсӑхат аԓәӈ нŏх киԓәс, митйохԓаԓ хŏԓ вохсәԓы, щи йасӈәт ԓывиԓаԓ хŏԓ пŏтәртсәԓы; пӑ щи хŏйатәт шек пӑԓтәмәсәт.
GEN 20:9 Щӑԓта Авимелех Авраам вохсәԓы пӑ ԓўвеԓа йастәс: «Мўй нӑӈ мўӈ пиԓэвән версән! Мўй атәм вермем урәӈән нӑӈ мӑнэм пӑ ма хон мўвем ун кӑрэка пайәтсэн? Нӑӈ ма пиԓэмән ӑт рӑхты верәт версән».
GEN 20:10 Щӑԓта Авимелех Авраама йастәс: «Хŏты нӑӈ нумәссән, тӑмиты верменән?»
GEN 20:11 Авраам йастәс: «Ма щиты нумәссәм, тӑм тӑхайән Турәм эԓты пӑԓты вер ӑнтом пӑ ма имем урәӈән ма веԓԓайәм;
GEN 20:12 ԓўв пӑ йӑна ма нэ апщем: ԓўв ма ащем эви, туп ӑнта ма аԋԏэм тӑйәм эви; щӑԓта ма имема йис;
GEN 20:13 Турәм мӑнэм ащем хот эԓты мўв хўват йӑхты китмаԓән, ма ԓўвеԓа щиты йастәсәм: ‘Щи ԓŏват йӑм вера, хŏԓта кепа мин ӑт йŏхәтԓәмән, иса ма эԓтэм пŏтәрта: ‘Щит ма йайәм’».
GEN 20:14 Щӑԓта Авимелех ай пӑ ун йош вой, митйох пӑ митнэӈәт Авраама мӑсԓы; Сарра имеԓ па йŏхԓы мӑсԓы.
GEN 20:15 Щӑԓта Авимелех йастәс: «Тӑта щи, ма мўвем нӑӈ йэԓпенән; уԓа, хŏта нӑӈена ԓэщаԓәԓ».
GEN 20:16 Саррайа пӑ йастәс: «Тӑта щи, ма нӑӈ йайәна щŏрәс сикль щел ŏх мӑсәм; тӑм мойԓәпса нӑӈена, нӑӈ хŏйатԓан ат уйәтԓэԓ, нӑӈ иса вещкат пӑ нэмәԓты атәм ӑт версән».
GEN 20:17 Щӑԓта Авраам Турәм пеԓа пойәкщәс, пӑ щӑԓта Авимелех, пӑ ԓўв имеԓ, пӑ ԓўв митнэԓаԓ Турәмән хŏԓ йӑмәԓсайәт, пӑ ԓыв ԋаврэм тӑйты питсәт;
GEN 20:18 Авраам Сарра имеԓ урәӈән Авимелех хотән ԋаврэм тӑйты вер Турәм Куща вŏԓытысԓы.
GEN 21:1 Турәм Куща, йастымаԓ щирән, Сарра пеԓа щи арат йӑм ус пӑ, хŏты ԓўвеԓа йастыԓыйәс, щиты версәԓы.
GEN 21:2 Сарра ԓавәрта йис пӑ Авраама пŏх сэма пайтәс, Авраам пирщамәм йўпийән, вŏԓԓы щи пŏрайән, хŏты Турәмән ԓўвеԓа йастыԓыса;
GEN 21:3 Авраам ԓўв хŏщайәԓ сэма питәм пŏхәԓа, Саррайән ԓўвеԓа тӑйәм пŏхәԓа, Исаак нэм пŏнәс;
GEN 21:4 щӑԓта, Авраам Исаак пŏхәԓ эвәтты щирән ԋийәԓмет хӑтәԓән версәԓы, хŏты Турәм ԓўвеԓа партәс.
GEN 21:5 Исаак пŏхәԓ ԓўв хŏщайәԓ сэма питәмән, Авраам нуптәԓ сот тӑԓ ус.
GEN 21:6 Сарра йастәс: «Турәмән ԋӑхты партсайәм; хŏй ма эԓтэм хуԓәԓ, ма пиԓэмән ԋӑхты питәԓ».
GEN 21:7 Щӑԓта па йастәс: «Хŏй Авраама, ԓуԓән, йастәс: ‘Сарра ԋаврэм эсәмән ԓапәтты питәԓ’? Ԓўв пирща йўвмаԓ йўпийән ма пŏх тӑйсәм».
GEN 21:8 Ԋаврэм энмәс пӑ эсәм эԓты вŏԓытса; Исаак эсәм эԓты вŏԓытәм хӑтәԓән Авраам йӑм ԓэтотәӈ пӑсан верәс.
GEN 21:9 Щӑԓта Сарра кащаԓәсԓы, хŏты Египет нэ Агарь тӑйәм пŏх ԓўв Исаак пŏхәԓ эԓты ԋӑхәԓ,
GEN 21:10 пӑ Авраама йастәс: «Тӑм митнэ пŏхәԓ пиԓән вошты, ищипа тӑм митнэ пŏх ма Исаак пŏхем пиԓән нӑӈ хӑйты тащен ортты ӑт питԓәԓы».
GEN 21:11 Авраама щит щикем ӑт ԓэщаԓәс, Измаил ищи ԓўв пŏхәԓ ус.
GEN 21:12 Турәм пӑ Авраама щиты йастәс: «Нŏпсэн ӑт ат шӑкәԓ энәмты пŏхен пӑ митнэӈен урәӈән; мўй Сарра нӑӈена йастәԓ, иса ԓўвеԓ хуԓәнта, туп Исаак хўват тӑйты тыхԓэнән Ма нӑӈена партәм ԋаврэмԓам питԓәт;
GEN 21:13 митнэӈен пŏх эԓты Ма ищи мир энмәԓԓәм, ԓўв ищи нӑӈ ԋаврэмен».
GEN 21:14 Авраам аԓәӈсӑхат аԓәӈ киԓәс, ԋаԋ пӑ йик тӑйты хир ўс, пӑ щит иса Агарь ԓӑкра пŏтсәԓы, пӑ пŏхәԓ пиԓән ԓўвеԓ йэԓ китсәԓы. Агарь мӑнәс пӑ Вирсавия таԓ хишәӈ мўвән тӑпәс,
GEN 21:15 хирән йиӈкәԓ хŏԓас пӑ пŏхәԓ варәс похәл иԓпийән хӑйсәԓы,
GEN 21:16 щӑԓта йэԓшәк мӑнәс, и ԋоԓ йўвәтты хўватән иԓ опсәс. Щиты ԓўв йастәс: «Энәмты пŏх пӑрты щир ватты ӑт ԓӑӈхаԓайәм». Ԓўв опсәс пӑ ўвты питәс пӑ хоԓԓәс;
GEN 21:17 Турәм энәмты пŏх тўр сый хуԓтсәԓы; Турәм ангел турәм эԓты Агарь ўваԓтсәԓԓы пӑ йастәс: «Хŏты йисән, Агарь? Аԓ пӑԓа; Турәм энәмты пŏх тўр сый щиԓта, хŏта ԓўв уԓ, хўԓтсәԓы;
GEN 21:18 нŏх ԓойа, энәмты пŏхен нŏх ԓощәԓты пӑ йошәԓ эԓты катԓы, Ма вŏԓаӈ мир ԓўв эԓтэԓ этәԓтәԓәм».
GEN 21:19 Щӑԓта, Турәмән йушән аԉса пӑ, ԓўв йик ўты мўв ўс кащаԓәс, щи мӑнәс, хирәԓ йикән тэкәптәсԓы пӑ пŏхәԓ йищәԓтәсԓы.
GEN 21:20 Турәм энәмты пŏх пиԓән ус, ԓўв энмәс, пӑ таԓ хишәӈ мўвән уԓты питәс, ԋоԓәӈ-йухԓәӈ вой веԓты хуйа йис.
GEN 21:21 Фаран нэмпи таԓ хишәӈ мўвән ԓўв ус; Египет мўв эԓты аԋԏэԓән нэӈән ўса.
GEN 21:22 Щи ишән Авимелех хон, Фихол ԉаԉ йох кущайәԓ пиԓән, Авраама йастәс: «Турәм иса нӑӈ пиԓэнән, мўй вер кепа нӑӈ ӑт верԓән;
GEN 21:23 щишән, Турәм ватман мӑнэма тӑта йасәӈ мийа, нӑӈ мӑнэма, ма пŏхема, ма хиԓэма атәм ӑт верԓән; хŏты ма нӑӈ пиԓэнән йӑма верәт версәм, хун нӑӈ тӑм мўва уԓты йŏхәтсән, щиты нӑӈ па, ма пиԓэмән пӑ тӑм мўв пиԓән, верәт верты питԓән».
GEN 21:24 Авраам йастәс: «Ма йасәӈ мӑԓәм».
GEN 21:25 Авраам Авимелех пеԓа туп йик ўты мўв ўс урәӈән ўшмащәс, Авимелех митйохәтән нŏх ўйәм урәӈән.
GEN 21:26 Авимелех пӑ йастәс: «Ӑт уйәтԓэм, хŏй щит верәс, нӑӈ пӑ мӑнэма ӑт йастәсән; ма щит эԓты ин тӑм унты ӑт хуԓԓысэм».
GEN 21:27 Щӑԓта Авраам ошәт пӑ мисәт ўс пӑ Авимелеха мӑсԓы, щиты ԓын йастантәпса версәтән.
GEN 21:28 Ԓапәт нэ ош вой тащ эԓты Авраам атэԓт ўсԓы.
GEN 21:29 Авимелех пӑ Авраама йастәс: «Мўйа ԓапәт нэ ош нӑӈ атэԓт ўсән?»
GEN 21:30 Авраам йастәс: «Тӑм ԓапәт нэ ош ма йошем эԓты ўйи, щит щӑха нумты урәӈән, тӑм йик ўты мўв ўс ма хирсэм, ԓўв мӑнэм».
GEN 21:31 Щишән, щи лот Вирсавия нэмән мӑсԓы, щита ԓын кўтәнән йасәӈ мӑстән.
GEN 21:32 Щиты ԓын Вирсавия нэмпи тӑхайән йастантәпса версәтән. Авимелех хон ԓўв Фихол ԉаԉ йох кущайәԓ пиԓән ԓойсәт пӑ филистимәт мўва йŏхԓы мӑтсәт.
GEN 21:33 Вирсавия хŏща Авраам дуб йўхәӈ йохәм опсәс, щита Турәм Куща пеԓа, веккеша уԓты Турәм пеԓа, пойәкщәс.
GEN 21:34 Авраам филистимәт мўвән ӑԓ йŏхтыԓыты хŏйат щирән йӑм хўв кўт ус.
GEN 22:1 Щиты ус, Турәм щи верәт йўпийән Авраам эвәԓты вер артаԓәсԓы. Пӑ щиты ԓўвеԓа йастәс: «Авраам!» Ԓўв йŏхԓы йастәс: «Ма щи».
GEN 22:2 Турәм йастәс: «Сӑм вŏшән тӑйты аратәԓ и пŏхен, Исаак пŏхен, ўйи пӑ Мориа мўва мӑна; пӑ щита и кев ўр Ма нӑӈен аԉԓәм, щита ԓўвеԓ йира туты урәӈән нŏх ўщиты».
GEN 22:3 Авраам аԓәӈсӑхат аԓәӈ нŏх киԓәс, осёл войәԓ нŏх киртсәԓы, кӑт энәмты митху пӑ Исаак пŏхәԓ пӑтән ўсԓы; йир ўщитты урәӈән тўт йўх хӑлытәс, пӑ щӑԓта нŏх ԓŏйәс пӑ Турәм аԉәм тӑха пеԓа мӑнәс.
GEN 22:4 Хуԓмет хӑтәԓән Авраам хўвәԓта щи тӑха шийаԓәсԓы.
GEN 22:5 Энәмты митхуйӈәна Авраам йастәс: «Нын тӑта осёл войән пиԓән хӑщатән, мин пӑ пŏхем пиԓән тŏхи мӑнԓәмән пӑ пойәкщәԓмән, пӑ щӑԓта нын хŏщайән йŏхԓы йŏхәтԓәмән».
GEN 22:6 Авраам йир ўщитты тўт йўх ўс, пӑ Исаак пŏхәԓа шӑнша пŏтсәԓы; ԓўв пӑ йоша тўт пӑ кеши ўс, пӑ ԓын йӑха мӑтсәтән.
GEN 22:7 Щӑԓта Исаак Авраам ащеԓ пеԓа пŏтәртты питәс, пӑ йастәс: «Ащийэ!» Ԓўв пӑ йŏхԓы йастәс: «Хŏты, пŏхийэ». Пŏхәԓ йастәс: «Тӑта тўт йўх пӑ тўт, хŏта пӑ йира ўщитты ош пŏшәх?»
GEN 22:8 Авраам йастәс: «Турәм Ԓўвеԓа йира ўщитты ош уйәтәԓ, пŏхийэ». Пӑ ԓын йӑха йэԓԓы мӑтсәӈән.
GEN 22:9 Щӑԓта Турәм йастәм тӑхайа йŏхәтсәтән; Авраам щита йирасты нŏрәм верәс, тўт йўхәт пŏнәс, пӑ Исаак пŏхәԓ йӑрман йирасты нŏрма йўхәт эԓты пŏтсәԓы.
GEN 22:10 Щӑԓта Авраам ԋиншәмтыйәс пӑ кеши аԓэмәс, пŏхәԓ пŏткәты урәӈән.
GEN 22:11 Туп Турәм Куща ангел турәм эԓты ԓўв пеԓайәԓ ўваԓтәс: «Авраам! Авраам!» Ԓўв йастәс: «Ма щи».
GEN 22:12 Ангел йастәс: «Пŏхен эԓты йошен аԓ аԓми пӑ ԓўв пиԓәԓән нэмәԓты аԓ вера, ин Ма уйәтԓэм, Турәм эԓты нӑӈ пӑԓԓән, пӑ аратәԓ и пŏхен Мӑнэма мӑты ӑт щаԉәтсэн».
GEN 22:13 Щӑԓта Авраам йŏхԓы ӑӈкәрмәс пӑ кащаԓәсԓы: тӑта щи, ԓын йўпанән хӑш похәлән оӈәтԓаԓән ош йŏвәртымаԓ. Авраам мӑнәс, ош ўсԓы пӑ пŏхәԓ йўкана йира ўщитты тусԓы.
GEN 22:14 Авраам щи тӑха нэмән мӑсԓы: Иегова-ире. Щишән интӑм унты йастәԓа: «Турәм Куща кевән уйәтты питԓа».
GEN 22:15 Щӑԓта Турәм Куща ангел кимет пўш турәм эԓты Авраам пеԓа йасәӈ тӑйәс
GEN 22:16 пӑ щиты йастәс: «Мӑнэмән йасәӈ мӑԓәм, Турәм Куща йастәԓ, тӑм вер вермен урәӈән, нӑӈ пŏхен, аратәԓ и пŏхен ӑт щаԉәтсэн,
GEN 22:17 щишән Ма нӑӈен ар йӑмән мӑԓэм пӑ нӑӈ тыхәԓ тэԓэн арәԓ ара йиԓ, турәм хусәт арата пӑ щарәс сыԓ сэй хиш арата; ԓыв пиԓԓаԓән ԉаԉәсты ŏтәт вошԓаԓ нӑӈ тыхәԓ тэԓэн ԓыв йошԓаԓа пайәтԓәԓаԓ;
GEN 22:18 нӑӈ тыхԓэн хўват мўв ԓŏватән уԓты мирәт хŏԓ йӑмән мӑԓайәт нӑӈ Ма йасӈема хуԓтмәмен урәӈән».
GEN 22:19 Щӑԓта Авраам энәмты митхуйӈәԓаԓ хŏща йŏхтәс, пӑ щӑԓта хŏԓ йӑха Вирсавияйа мӑтсәт; Авраам Вирсавия тӑхайән уԓты хӑщәс.
GEN 22:20 Щи верәт йўпийән Авраам айкеԓән йŏхәтса, йастәса: «Нахор апщена Милка имеԓ ищи пŏхәт сэма пайәтмаԓ:
GEN 22:21 оԓәӈ ŏтәԓ Уц, Вуз апщеԓ, Кемуил, Арам ащи,
GEN 22:22 Кесед, Хазо, Пилдаш, Идлаф пӑ Вафуил».
GEN 22:23 Вафуил эԓты Ревекка сэма питәс. Ԋийәԓ пŏх Милка сэма пайтәс, Нахор икеԓа, Авраам апщийа.
GEN 22:24 Нахор Реума нэмпи ай нэӈәԓ Тевах, Гахам, Тахаш пӑ Мааха ищи сэма пайтәс.
GEN 23:1 Сарра уԓәм нуптәԓ сот хус ԓапәт тӑԓ арат ус: щит Сарра уԓәм тӑԓәт;
GEN 23:2 Кириаф-Арба хŏща, щит ин Хеврон, щита Ханаан мўвән Сарра пӑрәс. Авраам ԓўв урӈәԓән хоԓԓәты пӑ йирӈәԓтыты йŏхтәс.
GEN 23:3 Щӑԓта пӑрәм ŏтәԓ эԓты йэԓшәк мӑнәс пӑ хет йох пиԓән пŏтәртты питәс, пӑ йастәс:
GEN 23:4 «Ма нын хŏщайән пўӈәԓта йŏхтәм пӑ мўвемәм хŏйат, пӑрәм ŏтэм иԓ шавиты урәӈән мӑнэма йŏра тӑйты мўв тыныйаты».
GEN 23:5 Хет йох Авраама щиты йŏхԓы йастәсәт:
GEN 23:6 «Куща ики, мўӈ йасӈева хуԓәнта; нӑӈ мўӈ кўтэвән Турәм кӑнащ; мет йӑмшәк лоттәты тӑхайԓувән нӑӈ пӑрәм ŏтэн шавийи; мўӈ йŏра лоттәты тӑхайԓувән нӑӈ пӑрәм ŏтэн шавитэн урәӈән, нэмәԓты хŏйат мўӈ эԓтэв нӑӈена шŏппи йасәӈ ӑт йастәԓ».
GEN 23:7 Авраам нŏх ԓойәс пӑ щи мўв мир пеԓа, хет йох пеԓа, ŏх пŏнман, иԓ ԋўрәс;
GEN 23:8 пӑ Авраам ԓывиԓаԓа йастәс: «Нын щиты кашащԓәты ки, пӑрәм ŏтэм ат лоттәсэм, щишән, мӑнэм хуԓәнтаԓән, Цохар пŏх Ефрон ма урӈемән иԋщәсаты,
GEN 23:9 ԓўв мўв хӑрәԓ сыԓән Махпела хŏща уԓты хŏшапәӈ кев, лоттәты урәӈән, мŏрт тынән мӑнэма нын ватман ат тыныԓԓы».
GEN 23:10 Ефрон пӑ хет йох кўтән опсәс; пӑ щӑԓта Ефрон, хет ху, вошәӈ пушасәԓ ун ова ԓŏӈтыты хет йох хŏԓ хуԓман, Авраам пеԓа щиты йастәс:
GEN 23:11 «Ӑнта, кущайэм, мӑнэм хуԓәнты: мўв хӑр пӑ щита уԓты хŏшапәӈ кев ма нӑӈена мӑԓэм, мирэм ватман, нӑӈена мойԓәԓэм, нӑӈ пӑрәм ŏтэн лотты».
GEN 23:12 Авраам щи мўвәӈ мир йэщаԓт, ŏх пŏнман, иԓ ԋўрәс,
GEN 23:13 пӑ, мир хуԓәтман, Ефрон пиԓән пŏтәртәс пӑ йастәс: «Ма пеԓайэм хуԓтмәԓән ки, ма нӑӈена щи мўв хӑр урәӈән тын мӑԓәм; ма эԓтэм ўйи, пӑ ма пӑрәм ŏтэм щита лоттәԓэм».
GEN 23:14 Ефрон Авраам пеԓа йŏхԓы пŏтәртәс пӑ йастәс:
GEN 23:15 «Кущайэм! Мӑнэм хуԓәнта: щи мўв тынәԓ щел ŏхән ԋӑԓсот сикль; нӑӈена пӑ мӑнэма щит мўй ар? Пӑрәм ŏтэн лотты».
GEN 23:16 Авраам Ефрон пиԓән кашащәс пӑ Ефрона Авраам щел ŏх пусмекԓәс пӑ мӑс, мўй арат ԓўв, хет мир хуԓәтман, йастәс, щел ŏхән ԋӑԓсот сикль, вŏсйох тынасты щирән.
GEN 23:17 Щиты Ефрон мўв хӑр, Махпела хŏща, Мамре пўӈәԓән, щи тӑха пӑ щита уԓты хŏшапәӈ кев, керәтман энәмты йўхәт пиԓән,
GEN 23:18 щит иса, вошәӈ пушас ун ова ԓŏӈтыты хет йох ватман, Авраам йоша питәс.
GEN 23:19 Щи йўпийән Авраам, Сарра, ԓўв имеԓ, лоттәсԓы, Махпела хŏща уԓты хŏшапәӈ кев ԓыпийән, Мамре пўӈәԓән, щит тӑм пŏрайән Хеврон вош, Ханаан мўвән.
GEN 23:20 Щиты хет йох эԓты мўв хӑр Авраам йоша питәс, пӑ щита уԓты хŏшапәӈ кев, ԓўв мŏхиԓаԓ лоттәты урәӈән па.
GEN 24:1 Авраам пирщамәса пӑ тӑԓԓаԓ арәт усәт. Турәм Кущайән кашәӈ вер хŏща Авраам йӑмән мӑса.
GEN 24:2 Щӑԓта Авраам хотәԓән уԓты, ԓўв тӑйты хŏԓ мŏԓтыԓаԓ ԓэщатты, куща митхуйәԓа йастәс: «Ма пещем иԓпийа йошен пŏныԓыйи
GEN 24:3 пӑ Турәм Кущайән, опәԉ Турәмән пӑ мўв Турәмән, мӑнэма йасәӈ мийа, ханаан йох эвет эԓты, хŏйтат кўтән ма уԓԓәм, нӑӈ ма пŏхема нэ ӑт ўԓән,
GEN 24:4 пӑ ма мўвема, ма энмәм мўвема йӑхԓән пӑ Исаак пŏхема нэ щиԓта ўԓән».
GEN 24:5 Митхуйәԓ ԓўвеԓа йастәс: «Мосәӈ, тӑм мўва щи нэ ма пиԓэмән йиты ӑт кашащәԓ, мосәӈ, нӑӈ мўвена, хŏԓща нӑӈ этсән, пŏхен туты мосәԓ?»
GEN 24:6 Авраам ԓўвеԓа йастәс: «Ма эԓтэм пӑԓԓән ки, пŏхем тŏхи аԓ тўви;
GEN 24:7 Турәм Куща, ŏпәԉ Турәм, Хŏй ащем хот эԓты мӑнэм сэма питәм мўвем эԓты ўсԓы, пӑ Хŏй мӑнэм йасәӈ мӑс, пŏтәртман: ‘Йэԓԓы уԓты ԋаврэмԓана тӑм мўв мӑԓэм’, – Ԓўв ангеләԓ нӑӈ йэԓпенән китԓәԓы, пӑ нӑӈ пŏхема щиԓта нэ ўԓән;
GEN 24:8 нӑӈ пиԓэнән щи нэ йиты ӑт ки кашащәԓ, мӑнэма мийәм тӑм йасӈен эԓты нӑӈ веләк питԓән; туп пŏхем тŏхи аԓ тўви».
GEN 24:9 Авраам кущайәԓ пещ иԓпийа митхуйәԓ йошәԓ пŏтсәԓы пӑ ԓўвеԓа йасәӈ мӑс.
GEN 24:10 Кущайәԓ верблюдәт эԓты митхуйәԓ йаӈ верблюд ўс пӑ мӑнәс. Кущайәԓ эԓты ар сыр тынәӈ мойԓәпсайәт ԓўв пӑтән тӑйәс. Месопотамия мўва, Нахор уԓәм воша, ԓўв мӑнәс.
GEN 24:11 Йӑм хўв мӑнман, ԓўв йэтна пеԓа йик ўты мўв ўс пўӈәԓән, вош кимәԓән, верблюдԓаԓ иԓ ԓойәԓттәсԓы, щи пŏрайән, хун нэӈәт йик аԓтты йŏхтыԓыԓәт,
GEN 24:12 пӑ йастәс: «Турәм Куща, Авраам кущайэм Турәм! Тӑм хӑтәԓ эви ма йэщаԓтэм киты пӑ Авраам кущайэма щи ԓŏват йӑм этәԓта;
GEN 24:13 тӑта щи ма, йик ўты тӑхайән ԓойԓәм, пӑ вошәӈ хŏйатәт эвет йик ӑмәртты йŏхтыԓыԓәт;
GEN 24:14 и эви, хŏйа ма йастәԓәм: ‘Сŏхта пўтэн иԓшәк эсԓыйи, ма йик йищԓәм’, хŏй пӑ мӑнэма йастәԓ: ‘Йиԋща, ма нӑӈ верблюдԓана па йищты мӑԓәм’, – щи эви щи Нӑӈ Исаак митхуйэна Нӑӈ ԓэщатсэн; щиты ма мŏштәԓэм, Нӑӈ ма Авраам кущайэма щи ԓŏват йӑм этәԓтәсэн».
GEN 24:15 Ԓўв хŏԓна пойәкщәты ӑт йэтшәс, тӑта щи, сŏхта пўт ԓӑкра пŏнман Ревекка этәс, хŏй Вафуил эԓты сэма питәс, Вафуил щит Нахор пӑ Милка пŏх, Нахор пӑ Авраам апщи ус;
GEN 24:16 эви хŏрасәӈ ус, ху сайән ӑт уԓәм айԓат нэ. Ԓўв йик аԓтты тӑхайа ŏхԓәс, сŏхта пўтәԓ тэкәптәсԓы пӑ нŏхԓы шушәс.
GEN 24:17 Митху ԓўв йэщаԓтәԓ хухәԓмәс пӑ йастәс: «Сŏхта пўтэн эԓты мӑнэм йик йищты йэша мийа».
GEN 24:18 Ԓўв йастәс: «Йиԋща, кущайэм». Ищи мŏхты сŏхта пўтәԓ йоша иԓ эсәԓсәԓы пӑ ԓўвеԓ йищәԓтәсԓы.
GEN 24:19 Ԓўвеԓ йищәԓтәмаԓ йўпийән йастәс: «Верблюдԓан урәӈән йик ӑмәртты ищи верәтԓәм, мŏрта йищтэԓ унты».
GEN 24:20 Ищи мŏхты йиӈкәԓ сŏхта пўтәԓ эԓты хўрыйа шошәпсәԓы, щӑԓта пӑ йик ўты мўв ўс хŏща йик ӑмәртты хухәԓмәс, щиты хŏԓ ԓўв верблюдԓаԓ урәӈән йик ӑмәртәс.
GEN 24:21 Щи хŏйат мӑшйайән ԓўв пеԓайәԓ вантәс, шек такан нумәсәс, йӑна мўй Турәм Кущайән йŏхтәм йушәԓ йӑмән мӑса.
GEN 24:22 Хун верблюдәт йищты йэтшәсәт, щи хŏйат ԋŏԓән тӑйты сорԋэӈ ԓуйәт ўс, и сикль шуп ԓавәрт арат, пӑ кӑт сорԋэӈ йош сур кўсы, кашәӈ ŏт йаӈ сикль ԓавәрт арат, пӑ эвийа щитәт мӑсԓы;
GEN 24:23 пӑ йастәс: «Нӑӈ хŏй эви? Мӑнэм йаста, нӑӈ ащен хотән мўӈев хоԓты тӑха уԓ мўй?»
GEN 24:24 Ԓўв йастәс: «Ма Вафуил эви, ԓўв Нахор пӑ Милка пŏх».
GEN 24:25 Щӑԓта хŏԓна ԓўвеԓа йастәс: «Мўӈ хŏщайэв сорәм тŏрән пӑ вой ԓапәтты ԓат уԓ, хоԓты тӑха ищи уԓ».
GEN 24:26 Щи хŏйат, ŏх пŏнман, иԓ ԋўрәс пӑ Турәм Куща ишәксәԓы,
GEN 24:27 пӑ йастәс: «Турәм Кущайа ун ишәк йасәӈ, Авраам кущайэм Турма, Хŏй ма кущайэм Ԓўв йӑм верәԓән пӑ Ԓўв вещкатәԓән ӑт хӑйсәԓы! Турәм Куща тўӈ йушән кущайэм апщеԓ хота мӑнэм тусԓы».
GEN 24:28 Эви хухәԓмәс пӑ щит эԓты аԋԏэԓ хотән пŏтәртәс.
GEN 24:29 Ревекка Лаван нэмпи йай тӑйәс. Лаван йик ўты тӑхайа щи хŏйат хŏща хухәԓмәс.
GEN 24:30 Хун ԓўв ԋŏԓән тӑйты сорԋэӈ ԓуйәт пӑ йош сурән тӑйты кўсэт ԓўв апщеԓ хŏща кащаԓәс, пӑ Ревекка апщеԓ йасӈәт хуԓәс: «Щиты ма пиԓэмән тӑм хŏйат пŏтәртәс», ԓўв щи хŏйат хŏща йŏхтәс, пӑ тӑта щи, ԓўв верблюдәт пўӈәԓән йик ўты тӑхайән ԓойәԓ;
GEN 24:31 Лаван йастәс: «Турәм Кущайән йӑмән мийәм хŏйат, мўйа кӑмән ԓойԓән? Йŏхи ԓŏӈа, хот пӑ верблюдԓан ŏԓты тӑха ма ԓэщатсәм».
GEN 24:32 Щи хŏйат хота ԓоӈәс. Лаван верблюдәт эсәԓсәԓы пӑ сорәм тŏрәнән пӑ ԓатән мӑсԓы, пӑ щӑԓта, ԓўвеԓа пӑ ԓўв пиԓәԓән йŏхтәм хŏйатԓаԓа, кўрԓаԓ ԉŏхәтты йик тус;
GEN 24:33 пӑ пӑсан верса, туп ԓўв йастәс: «Верэм пŏтәрттэм унты ԓэты ӑт питԓәм». Пӑ йастәсәт: «Пŏтәрта».
GEN 24:34 Ԓўв йастәс: «Ма Авраам митху;
GEN 24:35 Турәм Куща ма кущайэм ар йӑмән мӑсԓы, пӑ ԓўв тащәӈа йис: ошәт пӑ хор мисәт, щел ŏх пӑ сорԋи, митйохәт пӑ митнэӈәт, верблюдәт пӑ осёл войәт Авраама Ԓўв мӑс;
GEN 24:36 кущайэм Сарра имеԓ, пирща йўвмаԓ йўпийән, кущайэма пŏх сэма пайтәс, пӑ Авраам кущайэм мўй тӑйәс, иса ԓўвеԓа мӑсԓы;
GEN 24:37 кущайэм ма эԓтэм йасәӈ ўс, йастәман: ‘Ханаан йох эвет эԓты, хŏйтат кўтән ма уԓԓәм, нӑӈ ма пŏхема нэ аԓ ўйа,
GEN 24:38 пӑ ащем хота пӑ рутԓам хŏща йӑӈха, пӑ пŏхема нэ щиԓта ўԓән’.
GEN 24:39 Кущайэма ма йастәсәм: ‘Мосәӈ, ма пиԓэмән нэ ӑт мӑнәԓ’.
GEN 24:40 Ԓўв мӑнэма йастәс: ‘Турәм Куща, Хŏй йэԓпийән ма уԓԓәм, Ԓўв ангеләԓ нӑӈ пиԓэнән китԓәԓы пӑ йушен йӑмән пӑртԓәԓы, пӑ рутԓам эԓты ащем хŏт эԓты пŏхема нэ ўԓән;
GEN 24:41 мӑнэма мийәм йасӈен эԓты нӑӈ веләк питԓән, хун рутԓам хŏща йӑхԓән; ԓыв нӑӈена нэ ӑт ки мӑԓәт, мийәм йасӈен эԓты веләк питԓән’.
GEN 24:42 Щӑԓта йик ўты тӑхайа ма тӑм хӑтәԓ йŏхәтсәм пӑ йастәсәм: ‘Турәм Куща, Авраам кущайэм Турәм! Нӑӈ ма мӑнты йушем йӑмән партԓэн ки,
GEN 24:43 тӑта щи, йик ўты тӑхайән ма ԓойԓәм, пӑ эви, хŏй йик ӑмәртты этәԓ, ԓўвеԓа ма йастәԓәм: ‘Сŏхта пўтэн эԓты мӑнэма йэша йищты мийа’,
GEN 24:44 хŏй пӑ мӑнэма йастәԓ: ‘Нӑӈ йиԋща, верблюдԓана йик ищи ӑмәртԓәм’, – щит щи нэ, хŏй Турәм Куща ма кущайэм пŏха ԓэщатсәԓы’.
GEN 24:45 Щи нŏпсэм хŏԓна пӑтэԓ унты ӑт тусэм, хун Ревекка этәс, пӑ сŏхта пўтәԓ ԓӑкрәԓән, йик ўты тӑхайа ŏхԓәс, йик ӑмәртәс; пӑ ма ԓўвеԓ йастәсәм: ‘Мӑнэма йик йищты мийа’.
GEN 24:46 Ԓўв ищи кумән сŏхта пўтәԓ иԓ эсәԓсәԓы пӑ йастәс: ‘Йиԋща, верблюдԓан ищи йищәԓтәԓԓам’. Пӑ ма йищсәм, верблюдԓам пӑ ԓўв йищәԓтәсԓы.
GEN 24:47 Ма ԓўвеԓ иԋщәссэм пӑ йастәсәм: ‘Нӑӈ хŏй эви?’ Ԓўв йастәс: ‘Вафуил эви, ԓўв Нахор пӑ Милка пŏх’. Щӑԓта ма ԓўвеԓ ԋŏԓән тӑйты сорԋэӈ ԓуйәт пӑ йош сур кўсэт йошӈиԓаԓа пŏтсәм.
GEN 24:48 Ма пӑ, ŏх пŏнман, иԓ ԋўрсәм пӑ Турәм Куща ишәксэм, пӑ Турәм Кущайа йӑм йасәӈ йастәсәм, Авраам кущайэм Турма, Хŏй тўӈ йуш хўват мӑнэм ты тусԓы, кущайэм апщи хиԓынэ ԓўв пŏхәԓа нэӈа ўты урәӈән.
GEN 24:49 Ин пӑ мӑнэма йастаты, ма кущайэма щи ԓŏват йӑм пӑ вещкат вер верты нŏмәс нын тӑйԓәты мўй ӑнта? Щит щи мӑнэма йастаты, мӑнэма йэԓԓы верәт тўӈащира верты урәӈән».
GEN 24:50 Лаван пӑ Вафуил йŏхԓы йастәстән: «Турәм Куща эԓты тӑм вер уԓ; мўӈ нӑӈена атәм пӑ йӑм йастәты ӑт верәтԓув;
GEN 24:51 тӑта щи, Ревекка нӑӈ йэԓпенән; ԓўвеԓ ўйи пӑ мӑна; Турәм Куща йастәм щирән, кущайэн пŏх имийа ԓўв ат питәԓ».
GEN 24:52 Авраам митху ԓын йасәӈԓән хуԓмаԓән, мўв унты, ŏх пŏнман, иԓ ԋўрәс пӑ Турәм Куща ишкәс.
GEN 24:53 Щӑԓта митху щел ŏх пӑ сорԋэӈ пŏрмасәт этәԓтәс, пӑ ԓумәтты сŏхәт, пӑ Ревеккайа мӑсԓы; йайәԓа пӑ аԋԏэԓа ищи тынәӈ мойԓәпсайәт мӑс.
GEN 24:54 Щӑԓта ԓўв пӑ ԓўв пиԓәԓән уԓәм хŏйатәт ԓэсәт, йищсәт пӑ хоԓсәт. Аԓәӈсӑхат нŏх киԓмеԓән, ԓўв йастәс: «Кущайэм хŏща мӑнэм эсԓаԓән».
GEN 24:55 Туп йайәԓ пӑ аԋԏэԓ йастәсӈән: «Эвев мўӈ пиԓэвән йаӈԓэм хӑтәԓ ат уԓ, щи йўпийән мӑнԓән».
GEN 24:56 Ԓўв пӑ ԓынана йастәс: «Мӑнэм аԓ рŏнаԓтаԓән, Турәм Куща ма йушем йӑмән партсәԓы; мӑнэм эсԓаԓән, кущайэм хŏща ма мӑнԓәм».
GEN 24:57 Ԓын йастәсӈән: «Эвемән вохԓэмән пӑ иԋщәсԓэмән, мўй ԓўв йастәԓ».
GEN 24:58 Ревекка вохсэԓән пӑ ԓўвеԓа йастәсӈән: «Тӑм хŏйат пиԓән мӑнԓән?» Ԓўв йастәс: «Мӑнԓәм».
GEN 24:59 Щӑԓта Ревекка, ԓыв апщеԓ, пӑ ԓўвеԓ эсәмән ԓаптәм ими, пӑ Авраам митху хŏйатԓаԓ пиԓән, Ханаан мўва китсәԓаԓ.
GEN 24:60 Ревеккайа Турәм эԓты йӑм вохсәт пӑ ԓўвеԓ йастәсәт: «Апщийэв! Щŏрсәӈ щŏрсәт нӑӈ эԓтэн сэма ат питԓәт, нӑӈ тыхԓэн ԋаврэмәт пеԓа ԉик туты ŏтәт вошԓаԓ ԓыв йошԓаԓа ат питԓәт!»
GEN 24:61 Ревекка митнэԓаԓ пиԓән ԓойс, верблюдәт шӑнша омәссәт, пӑ щи хŏйат йўпийән мӑтсәт. Щиты митху Ревекка ўсԓы пӑ мӑнәс.
GEN 24:62 Исаак Беэр-лахай-рои эԓты йŏхтәс, ԓўв Негев морты мўвән ус.
GEN 24:63 Йэтна пеԓа Исаак тŏрнәӈ-лыптәӈ хӑра шушиԓыты мӑнәс, йэԓ ватман кащаԓәсԓы: верблюдәт йиԓәт.
GEN 24:64 Ревекка пӑ Исаак кащаԓәсԓы, пӑ верблюд эԓты иԓ ŏхԓәс.
GEN 24:65 Щӑԓта митхуйа йастәс: «Хŏй щи хŏйат, мўӈ йэщаԓтэв мўв хӑр хўват йиԓ?» Митху йастәс: «Щит ма кущайэм». Щи йасӈәт хуԓтмаԓ кемән, ԓўв ŏхшам ўс пӑ ŏха пŏтсәԓы, пӑ йэмәԓман венша иԓшәк эсәԓсәԓы.
GEN 24:66 Митху Исаак пеԓа иса, мўй ԓўв верәс, пŏтәртәс.
GEN 24:67 Исаак, Сарра аԋԏэԓ пирщин хота, эви ԓŏӈәԓсәԓы, Ревекка нэӈа ўсԓы, пӑ ԓўв имеԓа йис, сӑмәӈа тӑйты питсәԓы; щиты аԋԏэԓ пӑрәм йўпийән Исаак нŏпсәԓ ԓӑрпиԓәс.
GEN 25:1 Авраам хŏԓна нэ ўйԓыйәс, Хеттура нэмәԓ.
GEN 25:2 Ԓўв Зимран, Иокшан, Медан, Мадиан, Ишбак пӑ Шуах пŏхәт ԓўвеԓа сэма пайтәс.
GEN 25:3 Иокшан Шева пӑ Дедан пŏхӈән тӑйәс. Дедан пŏхәт усәт: Ашурим, Летушим пӑ Леюмим.
GEN 25:4 Мадиан пŏхәт: Ефа, Ефер, Ханох, Авида пӑ Елдага. Щит иса Хеттура хиԓэт.
GEN 25:5 Авраам мўй тӑйәс, иса Исаак пŏхәԓа мӑсԓы,
GEN 25:6 ай нэӈԓаԓ пŏхәта, Авраам хŏԓна ԓўв уԓмаԓән мойԓәпсайәт мӑс пӑ Исаак пŏхәԓ эԓты йэԓ китсәԓы, хӑтәԓ этты мўва.
GEN 25:7 Авраам уԓәм хӑтԓәт сот ԓапәтйаӈ вет тӑԓ арат ус;
GEN 25:8 щӑԓта Авраам пӑрәс, пирща уԓәм хӑтәԓԓаԓ йӑма усԓы, уԓәпсайәԓ тэԓәӈ ус, пӑ пӑрәм ŏтԓаԓ хŏща мӑнәс.
GEN 25:9 Исаак пӑ Измаил пŏхӈәԓаԓән Мамре пўӈәԓән Цохар хет ики Ефрон пŏхәԓ мўв хӑрән Махпела хŏшапәӈ кевән ԓўв лоттәса,
GEN 25:10 хет хŏйатәт эԓты Авраам ԓутәм мўв хӑрән. Щита Авраам пӑ Сарра имеԓ лоттәман уԓԓәтән.
GEN 25:11 Авраам пӑрәм йўпийән Турәм Куща Исаак пŏхәԓ йӑмән мӑсԓы. Беэр-лахай-рои хŏща Исаак ус.
GEN 25:12 Тӑм пӑ Авраам Измаил пŏхәԓ тыхәԓ тэԓ, Сарра митнэ, Египет нэ Агарь Авраама тӑйәм пŏх тыхәԓ тэԓ.
GEN 25:13 Тӑм Измаил пŏхәт нэмәт, сэма питмеԓ щирән: Измаил оԓәӈ пŏхәԓ Наваиоф, ԓўв йўпеԓән Кедар, Адбеел, Мивсам,
GEN 25:14 Мишма, Дума, Масса,
GEN 25:15 Хадад, Фема, Иетур, Нафиш пӑ Кедма.
GEN 25:16 Щит Измаил пŏхԓаԓ нэмәт, ԓыв нэмԓаԓән ԓыв уԓәм куртԓаԓ пӑ ԓыв касԓыйәм хот вŏԓԓаԓ нэмәтсайәт. Щит кӑтхŏщйаӈ ŏх туты ху нэм рутԓаԓ щирән.
GEN 25:17 Измаил сот хŏԉмаӈ ԓапәт тӑԓ ус; ԓўв пӑрәс пӑ пӑрәм ŏтԓаԓ хŏща мӑнәс.
GEN 25:18 Хавила эԓты Сур унты ԓыв усәт, щит Ассирийа мўв пеԓа мӑнтыйән Египет ԉэпән уԓты мўв. Измаил йох Авраам па хиԓэт пиԓән кўтәӈа пӑ ԉаԉәсман усәт.
GEN 25:19 Тӑм Авраам Исаак пŏхәԓ тыхәԓ тэԓ эԓты пŏтәр. Авраам Исаак пŏх тӑйәс.
GEN 25:20 Исаак ԋӑԓйаӈ тӑԓ ԓŏватән Ревекка нэӈа тусԓы, Месопотамия мўвән уԓты Вафуил арамей ху эви, Лаван арамей ху апщи.
GEN 25:21 Турәм Кущайа Исаак имеԓ урәӈән пойәкщәс, ԓўв ԋаврэм ӑт тӑйәс; Турәм Кущайән ԓўв хуԓтмәса, Ревекка имеԓ ԓавәрта йис.
GEN 25:22 Пŏхӈәԓаԓ пӑтлам хотән пŏткатты питсәтән, пӑ ԓўв йастәс: «Щиты ки питәԓ, мўйа мӑнэма щит?» Пӑ Турәм Куща иԋщәсты мӑнәс.
GEN 25:23 Турәм Куща ԓўвеԓ йастәс: «Нӑӈ утрэнән кӑт рут, кӑт сыр мир нӑӈ эԓтэн этәԓ; и мирәԓ киметәԓ эԓты йурәӈшәк питәԓ, уншәк ŏтәԓ айшәк ŏтәԓ иԓпийән питәԓ».
GEN 25:24 Ԋаврэм сэма питты пŏра йŏхтәс: пӑ щи, пиԓаӈ ԋаврэмӈән пӑтлам хотән уԓман.
GEN 25:25 Оԓәӈән сэма питәм ԋаврэм эԓәԓ ўрты, пӑ эԓәԓ ԓŏватәԓән пўнәӈ ус, пўнәӈ сŏх хŏрпи; щишән ԓўв Исав нэмән пŏтса.
GEN 25:26 Щӑԓта апщеԓ этәс, йошәԓән Исав кўр йŏтԓаӈа катәԓман; ԓўвеԓа мийәм нэм Иаков. Исаака хутйаӈ тӑԓ ус, хун ԓын сэма питсәӈән.
GEN 25:27 Ԋаврэмӈән энәпсәтән, Исав таксар вой веԓты хуйа йис, мўвән йӑхты хŏйата; Иаков пӑ ром хŏйат ус пӑ пирщин хотәтән ус.
GEN 25:28 Исаак Исав сӑмәӈашәк тӑйсәԓы, туты войәԓ ԓўвеԓ йӑм ус, Ревекка пӑ Иаков сӑмәӈа тӑйсәԓы.
GEN 25:29 Ипуш Иаков ԓэтŏт кавәртәс; Исав пӑ мўв хӑр эԓты метман йŏхтәс.
GEN 25:30 Щӑԓта Исав Иакова йастәс: «Щи ўрты, ўрты ԓэтŏт эԓты мӑнэма мийа, ма метсәм». Щишән, ԓўв хŏԓна Едом нэмән мӑса.
GEN 25:31 Иаков пӑ йастәс: «Оԓәӈән нӑӈ унашәк уԓты верэн мӑнэма мийи».
GEN 25:32 Исав йастәс: «Ма ԓэԓԓы щи хӑԓԓәм, мўй йӑм мӑнэма щи унашәк уԓты вер хŏща?»
GEN 25:33 Иаков йастәс: «Оԓәӈән мӑнэма йасәӈ мийа». Ԓўв йасәӈ мӑс пӑ оԓӈа сэма питәм верәԓ Иаков апщеԓа мӑсԓы.
GEN 25:34 Иаков Исава ԋаԋ пӑ ӑԋкәш соԓамат мӑс; ԓўв ԓэс пӑ йиԋщәс, нŏх ԓойәс пӑ мӑнәс; щиты Исав оԓӈа сэма питәм верәԓ ӑт шависԓы пӑ уштәсԓы.
GEN 26:1 Авраам уԓәм ишән мўвән ԓэԓԓы йӑт ус, ин ԓэԓԓы пŏра па йŏхтәс; Авимелех хŏща, филистимәт хон хŏща, Герар мўва, Исаак мӑнәс.
GEN 26:2 Турәм Куща ԓўв хŏщайәԓ этәс пӑ йастәс: «Египет мўва аԓ мӑна; Ма нӑӈена йастәԓэм, мӑты мўвән нӑӈена уԓты,
GEN 26:3 тӑм мўвән уԓа, Ма нӑӈ пиԓэнән питԓәм, пӑ йӑмән нӑӈен мӑԓэм, нӑӈен пӑ йэԓԓы уԓты ԋаврэмԓана тӑм мўвәт мӑԓәм пӑ Авраама, нӑӈ ащена, мийәм йастәпсайэм Ма тӑԓаӈа верԓэм;
GEN 26:4 турәм хусәт иты нӑӈ тыхәԓ тэԓэн ара верԓэм, пӑ нӑӈ тыхәԓ тэԓэна тӑм мўвәт мӑԓәм; нӑӈ тыхԓэн хўват мўвән уԓты мирәт хŏԓ йӑмән мӑԓайәт,
GEN 26:5 Авраам Ма йасӈема хуԓәтмаԓ урәӈән пӑ Ма партәм щирэмән уԓмаԓ урәӈән: Ма партәпсайԓам, Ма йастәпсайԓам пӑ Ма законԓам щирән уԓмаԓ урәӈән».
GEN 26:6 Исаак Герар мўвән уԓты питәс.
GEN 26:7 Щита уԓәм хŏйатәт ԓўвеԓ Ревекка имеԓ эԓты иԋщәссэԓ, ԓўв пӑ йастәс: «Щит ма нэ апщем»; ԓўв пӑԓәс йастәты: «Щит ма имем», ԓўв нумәсәс, щита уԓты хŏйатәтән, Ревекка хŏрасәӈ урәӈән, ԓўв ӑт ат веԓса.
GEN 26:8 Йӑм хўв кўт ԓўв щита уԓман, ипўш филистимәт хон Авимелех, ишԋи эԓты кащаԓәсԓы, хŏты Исаак Ревекка имеԓ вощхиԓԓы.
GEN 26:9 Авимелех Исаак вохсәԓы пӑ йастәс: «Тӑм нэш нӑӈ имен; мўйа нӑӈ йастәсән: ‘Ԓўв ма нэ апщем?’» Исаак ԓўвеԓ йастәс: «Ма нумәссәм, ԓўв урӈәԓән пӑрты верәтԓәм».
GEN 26:10 Авимелех щиты йастәс: «Мўй нӑӈ мўӈ пиԓэвән версән? Мӑтты йŏх хŏйат ма мирэм эԓты нӑӈ имен хŏща ԓŏӈәс ки, нӑӈ мўӈев нўрәӈа пайәтсэн, ԓуԓән».
GEN 26:11 Авимелех хŏԓ мирәԓа партәпса мӑс, йастәман: «Хŏй тӑм хŏйат хŏща мўй пӑ ԓўв имеԓ хŏща кетмәԓ, щит сŏрма пайәтԓа».
GEN 26:12 Исаак щи мўв хӑратән ԓат сэм опсәс пӑ щи тӑԓән сот пўш аршәк ячмень ԓат тŏрән энмәс: щиты Турәм Кущайән йӑмән мӑса.
GEN 26:13 Щиты щи хŏйат тащәӈа йис, тащәԓ энмәс пӑ энмәс, шек тащәӈа йўвмаԓ унты.
GEN 26:14 Ай йош вой пӑ ун йош вой тащәт тӑйәс пӑ ар мўв хӑр, филистимәт ԓўв пеԓайәԓ сӑмԓаԓ щарыты питсәт.
GEN 26:15 Щӑԓта Авраам ащеԓ уԓәпса ишән митйохԓаԓән хирәм йик ўты мўв ўсәт филистимәтән мўвән лӑп йовәԓсайәт.
GEN 26:16 Исаак пеԓа Авимелех йастәс: «Мўӈ эԓтэв йэԓ мӑна, нӑӈ мўӈ эԓтэв йурәӈашәк йисән».
GEN 26:17 Щишән, Исаак щиԓта мӑнәс, пӑ Герар йŏхан пўӈәԓән пирщин хотәт ԓоԋщәс, пӑ щита уԓты питәс.
GEN 26:18 Щӑԓта Исаак йик ўты мўв ўсәт пӑ йӑԓпа хирсәԓы, Авраам ащеԓ ишән хирыԓыйәм йик ўты мўв ўсәт, Авраам пӑрәм йўпийән филистимәтән мўвән лӑп йовԓыԓысайәт; щӑԓта ащеԓ катра пŏныԓыйәм нэматән нэмәтсәԓы.
GEN 26:19 Исаак митйохәт Герар сорәм йŏхан курән мўв хирсәт пӑ ԓыԓәӈ йикпи мўв ўс уйәтсәт.
GEN 26:20 Герар мўв тащ шавиты йох Исаак тащ шавиты йох пиԓән йӑха питсәт, йастәман: «Мўӈ йиӈкев». Щишән, ԓўв щи йик ўты мўв ўс нэмән мӑсԓы: Есек, щита йӑха питыԓыйәм урәӈән.
GEN 26:21 Кимет йик ўты мўв ўс хирсәт; щита ищи йӑха питыԓысәт; щит ԓўв Ситна нэмән нэмәтсәԓы.
GEN 26:22 Ԓўв щиԓта йэԓ мӑнәс, йик ўты мўв ўс па хирәс, щита йӑха ӑт питыԓысәт, пӑ нэмәтсәԓы: Реховоф, щӑԓта йастәс: «Ин мўӈева Турәм Куща ԓӑщкам мўв мӑс, тӑта мўӈ ара йиԓув».
GEN 26:23 Щиԓта ԓўв Вирсавияйа мӑнәс.
GEN 26:24 Щи ат Турәм Куща ԓўв хŏщайәԓ этәс пӑ йастәс: «Ма Авраам ащен Турәм; аԓ пӑԓа, Ма нӑӈ пиԓэнән; Авраам Ма митхуйэм урәӈән нӑӈен йӑмән мӑԓэм, тыхԓэн ара верԓэм».
GEN 26:25 Щита ԓўв йирасты нŏрәм верәс пӑ Турәм Куща пеԓа пойәкщәс. Ԓўв щита пирщин хотԓаԓ ԓощсәԓы, пӑ Исаак митйохԓаԓ щита йик ўты мўв ўс хирсәт.
GEN 26:26 Авимелех, Ахузаф ԓухсәԓ пиԓән, Фихол ԉаԉ йох кущайәԓ пиԓән, Герар эԓты ԓўв хŏщайәԓ йŏхәтсәт.
GEN 26:27 Исаак ԓывиԓаԓа йастәс: «Мўйа нын ма хŏщайэм йŏхәтсәты, нын ма пеԓайэм ԉик тусты пӑ мӑнэм йэԓ воштәсԓын?»
GEN 26:28 Ԓыв йастәсәт: «Мўӈ йӑпсыйа кащаԓысэв, Турәм Куща нӑӈ пиԓэнән, щишән мўӈ щиты нумәсԓув: ‘Мўӈ нӑӈ пиԓэнән йастатԓув пӑ и нŏмәсән уԓты питԓув’,
GEN 26:29 нӑӈ мўӈева атәм ӑт ат версән, мўӈ нӑӈен ищи ӑт кетәпсэв, иса йӑм нӑӈена версув пӑ йӑм нŏмәсән нӑӈен эсәԓсэв; Турәм Кущайән нӑӈ йӑмән мӑсайән».
GEN 26:30 Ԓўв ԓывиԓаԓ йӑм пӑсанән версәԓы, ԓыв ԓэсәт пӑ йищсәт.
GEN 26:31 Аԓәӈсӑхат аԓәӈ киԓман, ԓыв кўтэԓән йастатсәт; Исаак ԓыв пиԓԓаԓән паймуԓәм верәс, ԓыв йӑм нŏмәсән ԓўв эԓтэԓ мӑтсәт.
GEN 26:32 Щи хӑтәԓ Исаак митйохԓаԓ йŏхәтсәт пӑ ԓыв хирәм йик ўты мўв ўс эԓты айкеԓ версәт, пӑ йастәсәт: «Мўӈ йик уйәтсув».
GEN 26:33 Пӑ Шива нэмән нэмәтсэԓ. Интӑм хӑтәԓ унты щи вош нэмәԓ Беэршива.
GEN 26:34 Исава ԋӑԓйаӈ тӑԓ ус, хун Беэр нэмпи хет ики эви Иегудифа нэӈа ԓўв ўсԓы, пӑ Елон нэмпи хет ики эви Васемафа нэӈа ўсԓы.
GEN 26:35 Исаака пӑ Ревеккайа ԓын пиԓанән уԓты шук хŏрпи ус.
GEN 27:1 Исаак пирщамәса пӑ сэмԓаԓ ўртԓыйа йисәт; Исавәԓ, ун пŏхәԓ, вана вохсәԓы пӑ ԓўвеԓа йастәс: «Пŏхийэ!» Ԓўв йастәс: «Ма щи».
GEN 27:2 Исаак йастәс: «Ма пирщамәсайәм, сŏрма питты хӑтԓэм ванамәс;
GEN 27:3 веԓпәс пŏрмасԓан ўйаԓән пӑ, йухԓэн пӑ ԋоԓԓан, веԓпәсԓәты йӑӈха пӑ вой ԋŏхи тўва,
GEN 27:4 мӑнэма рӑхты эпԓәӈ ԓэтŏт вера пӑ мӑнэма ԓэты тўви, пӑртэм йэԓпийән ма нӑӈен йӑмән мӑԓэм».
GEN 27:5 Ревекка хўԓтсәԓы, хŏты Исаак Исав пŏхәԓа щит пŏтәртәс. Щӑԓта Исав вой мŏщатты пӑ вой ԋŏхи туты мӑнәс.
GEN 27:6 Ревекка пӑ Иаков пŏхәԓа йастәс: «Ма хуԓтсэм, хŏты ащен Исав йайәна йастәс:
GEN 27:7 ‘Вой ԋŏхи мӑнэма тўва пӑ эпԓәӈ ԓэтŏт мӑнэма вера; ма ԓэԓәм пӑ Турәм Куща ватман пӑртэм йэԓпийән нӑӈен йӑмән мӑԓэм’.
GEN 27:8 Ин, пŏхийэ, ма йасӈема хуԓәнта, мўй ма нӑӈена партԓәм:
GEN 27:9 Таща йӑӈха пӑ кӑт йӑм коза пŏшәх щиԓта ўйа, ма пӑ нӑӈ ащена щиԓта ԓўвеԓа рӑхты эпԓәӈ ԓэтŏт верԓәм,
GEN 27:10 нӑӈ пӑ ащена туԓэн, щӑԓта ԓўв ԓэԓ пӑ пӑртаԓ йэԓпийән нӑӈен йӑмән мӑԓԓы».
GEN 27:11 Иаков Ревеккайа, аԋԏэԓа, йастәс: «Исав йайәм пўнәӈ хŏйат, ма пӑ эԓэм ԋар;
GEN 27:12 мосәӈ, ащем мӑнэм маԓәсты питԓәԓы, ма пӑ ԓўвеԓ ԓэпәԓԓэм пӑ мўԓәсты йасәӈән йастәԓайәм, йӑм йасәӈ йўкана».
GEN 27:13 Аԋԏэԓ ԓўвеԓ йастәс: «Пŏхийэ, нӑӈен мўԓты йасәӈ мӑнэма ат хойәԓ, туп ма йасӈема хуԓәнта, йӑӈха пӑ мӑнэма щи коза пŏшәхӈән тўваԓән».
GEN 27:14 Ԓўв мӑнәс, коза пŏшәхӈән ўс, пӑ аԋԏэԓа тусԓы; аԋԏэԓ пӑ ԓэтŏт верәс, ащеԓа рӑхты ԓэтŏт.
GEN 27:15 Щӑԓта Ревекка ԓўв хотәԓән уԓәм Исав ун пŏхәԓ тынәӈ сŏхәт ўсԓы, Иаков ай пŏхәԓ щи сŏхәта ԓумәттәсԓы;
GEN 27:16 йошԓаԓ пӑ ԋар сапԓәԓ коза пŏшәх сŏхәтән йŏвәртсәԓы;
GEN 27:17 щӑԓта ԓўв ԓэщатәм эпԓәӈ ԓэтŏтәԓ пӑ ԋаԋәԓ Иаков пŏхәԓ йоша мӑсԓы.
GEN 27:18 Ԓўв ащеԓ хŏща ԓŏнәс пӑ йастәс: «Ащийэ!» Щитәԓ йастәс: «Ма щи; нӑӈ пӑ хŏй, пŏхийэ?»
GEN 27:19 Иаков ащеԓа йастәс: «Ма Исав, оԓәӈ пŏхен; нӑӈ партмен щирән ма версэм; нŏх киԓа, опса пӑ вой ԋŏхи ԓэва, мӑнэм йӑмән мӑты урәӈән».
GEN 27:20 Щӑԓта Исаак пŏхәԓа йастәс: «Пŏхийэ, щикем сора нӑӈ вой уйәтсән?» Ԓўв йастәс: «Турәм Куща, нӑӈ Турмен щи вой мӑнэма йэщаԓт китсәԓы».
GEN 27:21 Щӑԓта Исаак Иакова йастәс: «Вана йӑӈха, пŏхийэ, ма нӑӈен маԓәсԓэм, нӑӈ йӑна ма Исав пŏхем мўй ӑнта?»
GEN 27:22 Иаков Исаак ащеԓ хŏща ванамәс пӑ ащеԓ ԓўвеԓ маԓәссәԓы пӑ йастәс: «Тўр сыйэн Иаков тўр сый; йошԓан пӑ Исав йошәт».
GEN 27:23 Щиты ԓўвеԓ ӑт мŏштәсԓы, йошԓаԓ Исав йайәԓ йошәт иты пўнәӈәт усәт; пӑ йӑмән мӑсԓы.
GEN 27:24 Щӑԓта па иԋщәссәԓы: «Нӑӈ ма Исав пŏхем?» Ԓўв йастәс: «Йӑна щи, ма».
GEN 27:25 Исаак йастәс: «Мӑнэма мийи, нӑӈ тўвәм вой ԋŏхен эԓты ԓэԓәм, нӑӈен йӑмән мӑты урәӈән». Иаков ԓўвеԓа мӑс пӑ ԓўв ԓэс, ўнайән ԓўвеԓ па тусԓы, пӑ ԓўв йиԋщәс.
GEN 27:26 Исаак ащеԓ ԓўвеԓа йастәс: «Вана йӑӈха, пŏхийэ, мӑнэм мосәԓты».
GEN 27:27 Ԓўв вана мӑнәс пӑ ԓўвеԓ мосәԓтәсԓы. Исаак ԓўв сŏхԓаԓ эпәԓ мŏштәс пӑ йӑмән мӑсԓы. Ԓўв йастәс: «Тӑта щи пŏхем эԓты йиты эпәԓ, ԓат сэмән опсәм мўв хӑр эпәԓ хŏрпи, Турәм Кущайән йӑмән мийәм мўв хӑр эпәԓ хŏрпи;
GEN 27:28 турәм ат йик эԓты пӑ тэԓәӈ мўв эԓты Турәмән ат мӑԓайән, ар ԋаԋ ԓатән пӑ ўнайән ат мӑԓайән;
GEN 27:29 мирәт нӑӈена ат рупитԓәт, ŏх пŏнман, иԓ ԋўрман нӑӈ йэԓпенән мирәт ат ԓойԓәт; хӑнам йохԓан нўмпийән кущайа уԓа, аԋԏэн пŏхәт нӑӈ йэԓпенән, ŏх пŏнман, иԓ ат ԋўрԓәт; нӑӈен мўԓты ŏтәт – мўԓԓайәт; нӑӈена йӑм йасәӈ йастәты ŏтәт – йӑмән мӑԓайәт!»
GEN 27:30 Исаак Иаков йӑмән миймаԓ йўпийән, Исаак ащеԓ эԓты Иаков туп этәс, Исав йайәԓ веԓпәс эԓты йŏхтәс.
GEN 27:31 Ԓўв ищи эпԓәӈ ԓэтŏт верәс, щӑԓта ащеԓа тусԓы, пӑ ащеԓа йастәс: «Ащи, нŏх киԓа пӑ пŏхен тўвәм вой ԋŏхи ԓэва, мӑнэма йӑм мӑты урәӈән».
GEN 27:32 Исаак ащеԓ пӑ ԓўвеԓа йастәс: «Нӑӈ хŏй?» Ԓўв йастәс: «Ма нӑӈ пŏхен, оԓәӈ пŏхен, Исав».
GEN 27:33 Исаак такан тӑрыты питәс пӑ йастәс: «Тўм пӑ хŏй ус, хŏй веԓпәсԓәты йӑӈхәс, мӑнэма вой ԋŏхи тус? Ма пӑ щиԓта ԓэсәм нӑӈ йŏхәттэн йэԓпийән, щӑԓта ԓўвеԓ йӑмән мӑсэм. Ԓўв щи йӑм тӑйты питәԓ».
GEN 27:34 Исав, ащеԓ йасӈәт хуԓмаԓән, сӑмәԓ похман такан ўвты питәс пӑ ащеԓа йастәс: «Ащи! Мӑнэм ищи йӑмән мийи».
GEN 27:35 Ԓўв пӑ йастәс: «Апщен ԓэпәԓтман йŏхтәс пӑ нӑӈ йўкан йӑмен ўсԓы».
GEN 27:36 Щӑԓта Исав йастәс: «Ӑԓ хун ԓўв Иаков нэм тӑйәԓ, кӑт пўш мӑнэм ԓэпәԓтсәԓы? Ма оԓәӈ сэма питәм верэм ўсԓы, ин пӑ ма йўкан йӑмем ўсԓы». Щӑԓта пӑ Исав ащеԓа йастәс: «Ма урӈемән пӑ йӑм йасәӈ нӑӈ вŏԓԓы ӑт хӑйсән?»
GEN 27:37 Исаак Исава йастәс: «Ма ԓўвеԓ нӑӈ нўмпенән кущайа пŏтсэм пӑ хӑнам йохԓаԓ ԓўв хŏщайәԓ митйоха питԓәт; ԋаԋән пӑ ўнайән ԓўвеԓ мойԓәптәсэм; нӑӈ урӈенән ма нэмәԓты ӑт верәтԓәм верты, пŏхийэ».
GEN 27:38 Исав пӑ ащеԓа йастәс: «Ащи, нӑӈ мўй туп и йӑм йасәӈ тӑйԓән? Ащи, мӑнэм ищи йӑмән мийи!» Исав такан йэԓ хоԓԓантәс.
GEN 27:39 Исаак ащеԓ ԓўвеԓа щиты йастәс: «Нӑӈ уԓты щирэн мўв тэԓ эԓты пӑ турәм ат йик эԓты уԓты питәԓ;
GEN 27:40 нӑӈ пӑ аԓтты кешен тӑйман уԓты питԓән, апщен урәӈән рупитты питԓән; пŏра йŏхәтәԓ, хун нӑӈ апщен пиԓән ԉаԉәсты питԓән, пӑ ԓўв эԓтэԓ велка йиԓән».
GEN 27:41 Иаков ащеԓән йӑмән мийәм урәӈән Исавән ԉикән этты питса; Исав ԓўв сӑхатәԓ щиты йастәс: «Ащем хоԓԓәп хӑтԓәт вана йŏхәтсәт, щи йўпийән ма Иаков апщем веԓԓэм».
GEN 27:42 Исав ун пŏхәԓ йасӈәт Ревеккайа йастәсайәт; ԓўв Иаков ай пŏхәԓ ԓўв хŏщайәԓ вохты партсәԓы, пӑ ԓўвеԓа йастәс: «Исав йайән нӑӈен веԓты ўтщиԓԓы;
GEN 27:43 пŏхийэ, ма йасӈема хуԓәнта, Харран воша Лаван йайәм хŏща хŏнта,
GEN 27:44 щита йӑм кўт уԓа, йайән ԉикәԓ мӑнтаԓ унты,
GEN 27:45 йайән ԉикәԓ мӑнәԓ пӑ ԓўв йŏрэмәԓԓы, мўй нӑӈ ԓўвеԓа версән: щи пŏрайән ма нӑӈен йŏхи вохты китԓәм; мўй урәӈән ма нынан и хӑтәԓән уштәԓԓам?»
GEN 27:46 Щӑԓта Исаака Ревекка йастәс: «Хет нэӈӈән урәӈән ма уԓәпсайэм кашԓы; хет эвет эԓты, тӑм мўв эԓты, тӑм нэӈӈән хŏрпи нэ Иаков туԓ ки, мўйа мӑнэма уԓты?»
GEN 28:1 Щӑԓта Исаак Иаков вохсәԓы, пайәмуԓәм верәс, пӑ щиты ԓўвеԓа партәс пӑ йастәс: «Ханаан мўв эвет эԓты нэ аԓ тўва;
GEN 28:2 мӑна, Месопотамия мўва йӑӈха, Вафуил хота, нӑӈ аԋԏэн ащи хота, щиԓта нӑӈена нэ тўва, Лаван эвет эԓты, нӑӈ аԋԏэн йай эвет эԓты.
GEN 28:3 Иса Верәтты Турәмән нӑӈ йӑмән ат мӑԓайән, пӑ нӑӈ ат рутмәԓԓайән, пӑ нӑӈ ара ат верԓайән, пӑ ар рут мир нӑӈ эԓтэн ат питәԓ,
GEN 28:4 пӑ Авраама мийәм йӑм, Турәмән нӑӈена ищи ат мӑԓа, нӑӈена пӑ нӑӈ пиԓэнән нӑӈ тыхԓэна, мўӈ йŏхтәм мўвев, Турәмән Авраама мийәм мўв, нӑӈена хӑйты урәӈән!»
GEN 28:5 Исаак Иаков йӑм нŏмәсән китсәԓы, пӑ ԓўв Месопотамия мўва Лаван хŏща мӑнәс, Вафуил арамей ики пŏх хŏща, Иаков пӑ Исав Ревекка аԋԏан йай хŏща.
GEN 28:6 Исав мŏштәсԓы, Иаков пŏхәԓ Исаак йӑмән мӑсԓы, пӑ, йӑм йасәӈән йастәмаԓән, Месопотамия мўва ԓўвеԓ нэ туты китсәԓы, пӑ такан партсәԓы: «Ханаан мўв эвет эԓты нэ аԓ тўва»,
GEN 28:7 пӑ хŏты ащеԓ пеԓа пӑ аԋԏэԓ пеԓа Иаков хуԓәнтәс пӑ Месопотамия мўва мӑнәс.
GEN 28:8 Исав ŏша пайәтсәԓы, Ханаан мўв эвет Исаак ащеԓа ӑт рӑхԓәт;
GEN 28:9 Исав Измаил хŏща мӑнәс пӑ Махалафа нэӈа ўсԓы, Авраам Измаил пŏхәԓ эви, Наваиоф апщи, щит тӑйәм имеӈәԓаԓ тўмпийән.
GEN 28:10 Иаков Вирсавия эԓты этәс пӑ Харран пеԓа мӑнәс,
GEN 28:11 щӑԓта и тӑхайа йŏхтәс пӑ, най ԓŏӈәмән щита хоԓты хӑщәс. Щи тӑхайән кевәт эԓты и кев ŏсма пŏтсәԓы, пӑ щита иԓ ŏԓәс.
GEN 28:12 Щӑԓта уԓмийәс: хомтэп мўв эԓты ԓойәԓ пӑ нўм оԓӈәԓ турма хойәԓ; пӑ щиԓта Турәм ангеләт итԓаԓ нŏхԓы мӑнԓәт, киметԓаԓ иԓԓы ŏхәԓԓәт.
GEN 28:13 Щӑԓта Турәм Куща щита хомтэпән ԓойәԓ пӑ пŏтәртәԓ: «Ма Турәм Куща, Авраам ащен Турәм, пӑ Исаак Турәм. Мўвен, хŏта нӑӈ ŏԓԓән, Ма нӑӈена пӑ йэԓԓы уԓты ԋаврэмԓана мӑԓэм;
GEN 28:14 нӑӈ тыхԓэн мўв сэй хиш арата йиԓ; щарәс пеԓа пӑ хӑтәԓ этты пелка, пӑ ŏвәс пеԓа пӑ морты мўв пеԓа нӑӈ ԓӑрпиԓәԓән; пӑ нӑӈ хўватэн пӑ нӑӈ тыхәԓ тэԓэн хўват мўв ԓŏватән уԓты мирәт хŏԓ йӑмән мӑԓайәт;
GEN 28:15 тӑта щи Ма нӑӈ пиԓэнән, нӑӈен шавиԓэм, хŏԓта кепа нӑӈ ӑт мӑнԓән; тӑм мўва нӑӈен йŏхԓы керәтԓэм, щишән, Ма нӑӈен ӑт хӑйԓэм, Ма йастәм йасӈем пӑтэԓа тутэм унты».
GEN 28:16 Иаков уԓмәԓ эԓты нŏх верԓәс пӑ йастәс: «Йӑна щи тӑм тӑхайән Турәм Куща уԓ; ма пӑ ӑт уйәтсэм!»
GEN 28:17 Щӑԓта хŏрщәмән йŏхәтса пӑ йастәс: «Тӑм тӑха щикем пӑԓщәм хŏрпи! Аԓт пӑ тӑта Турәм хот, тӑм пӑ турәм ов».
GEN 28:18 Иаков аԓәӈсӑхат аԓәӈ нŏх киԓәс, ŏсма пŏныԓыйәм кевәԓ ўсԓы пӑ нумты кева омәссәԓы, пӑ оливка вŏйән эԓты шошәпсәԓы.
GEN 28:19 Пӑ щи тӑха нэмән пŏтсәԓы: Вефиль, щи вош йэԓпи нэмәԓ ус: Луз.
GEN 28:20 Щӑԓта Иаков так йасәӈ мӑс, йастәман: «Турәм ма пиԓэмән питәԓ ки пӑ мӑнты йушемән мӑнэм шавиԓԓы, пӑ ԓэты ԋаԋ мӑԓ пӑ ԓумәтԓәты сŏх мӑԓ,
GEN 28:21 пӑ ащем хота ма тӑԓаӈа йŏхԓы йŏхәтԓәм, щитэмән Турәм Куща ма Турмем питәԓ, –
GEN 28:22 пӑ щӑԓта тӑм кев, нумты кева ма ԓощсэм, Турәм хота питәԓ; пӑ Нӑӈ, Турәм, мӑнэма мойԓәты ŏтэн эԓты йаӈмет шупәԓ Нӑӈена мӑԓэм».
GEN 29:1 Щӑԓта Иаков йэԓԓы мӑнәс пӑ хӑтәԓ этты пеләкән уԓты мирәт мўва йŏхтәс.
GEN 29:2 Тŏхи ванамимаԓән, кащаԓәсԓы: ԓӑщкам мўвән йик ўты мўв ўс пўӈәԓән хуԓәм ош тащ ŏԓәԓ, щи мўв ўс эԓты тащәт йикән йищәԓтәсайәт. Мўв ўс ун кев шупән лӑп пайәтман ус.
GEN 29:3 Хун ош тащәт хŏԓ щита ӑктәщисәт, йик ўты мўв ўс эԓты кев шуп йэԓ пертыԓыса пӑ ошәт йищәԓтысайәт; щӑԓта кев шуп пӑ ŏԓәм тӑхайәԓа, йик ўты мўв ўс эԓты пŏныԓыса.
GEN 29:4 Иаков ош шавиты йоха йастәс: «Хӑнам йох! Хŏԓща нын уԓԓәты?» Ԓыв йастәсәт: «Мўӈ Харран вош эԓты».
GEN 29:5 Ԓўв ԓывиԓаԓ иԋщәсәс: «Нахор пŏх Лаван уйәтԓәԓән?» Ԓыв йастәсәт: «Уйәтԓэв».
GEN 29:6 Ԓўв пӑ хŏԓна ԓывиԓаԓ иԋщәсәс: «Тўмтака ԓўв уԓ?» Ԓыв йастәсәт: «Тўмтака уԓ; тўта щи Рахиль эвеԓ ошԓаԓ пиԓән йиԓ».
GEN 29:7 Иаков йастәс: «Хӑтәԓ хŏԓна хўв; тащәт ӑкәтты хŏԓна аԓәӈ; ошԓән йищәԓтаԓән пӑ щӑхра воштаԓән».
GEN 29:8 Ԓыв йастәсәт: «Тащәт хŏԓ ӑктәщтэԓ унты щит верты ӑт верәтԓув, кев шуп йик ўты ўс эԓты йэԓ пайәтԓа пӑ веԓщи ошәт йищәԓтәты питԓәԓув».
GEN 29:9 Ԓўв хŏԓна ԓыв пиԓԓаԓән пŏтәртәс, хун Рахиль ащеԓ ошәт пиԓән вана йŏхтәс, ԓўв ош тащ шавийәс.
GEN 29:10 Хун Иаков аԋԏэԓ йай Лаван Рахиль эви пӑ Лаван ошәт кащаԓәс, ԓўв йик ўты мўв ўс эԓты кев шуп перәтсәԓы пӑ аԋԏэԓ йай Лаван ŏшәт йищәԓтәсԓы.
GEN 29:11 Иаков Рахиль мосәԓтәсԓы пӑ такан йэԓ хоԓԓаԓтәс.
GEN 29:12 Щӑԓта Иаков Рахиль пеԓа пŏтәртәс, ԓўв Ревекка пŏх пӑ ԓўв ащеԓа рута уԓ. Рахиль хухәԓмәс пӑ ащеԓа щит йастәсԓы.
GEN 29:13 Иаков эԓты, нэ апщеԓ пŏх эԓты хуԓмаԓ кемән, Лаван йэщаԓт ким хухәԓмәс, ԓўвеԓ ӑпәԓсәԓы пӑ мосәԓтәсԓы, пӑ хотәԓа ԓŏӈәԓсәԓы; Иаков пӑ Лавана иса щит пŏтәртәс.
GEN 29:14 Лаван пӑ ԓўвеԓа йастәс: «Йӑна нӑӈ ма ԓŏвем пӑ ма ԋŏхем». Иаков ԓўв хŏщайәԓ тӑԓаӈ тыԓәщ ус.
GEN 29:15 Щӑԓта Лаван Иакова йастәс: «Кўш нӑӈ мӑнэма рута уԓԓән, пӑ щӑԓта тынԓы-пелԓы хун ма хŏщайэм рупитты питԓән? Йаста мӑнэма, мўйән нӑӈен сŏхәптәты?»
GEN 29:16 Лаван кӑт эви тӑйәс; ун эвеԓ нэм Лия, айшәк эвеԓ нэм Рахиль.
GEN 29:17 Лия сэмән ватман ўртԓы ус, Рахиль пӑ хŏрасәӈ пӑ ԋӑрәк эви ус.
GEN 29:18 Иаков Рахиль пеԓа сӑмәԓ питәс пӑ йастәс: «Рахиль ай эвен урәӈән ԓапәт тӑԓ нӑӈена рупитты питԓәм».
GEN 29:19 Лаван йастәс: «Нӑӈена мӑԓэм ки, йӑмшәк, па хŏйата мӑтэм мушән; ма хŏщайэм уԓа».
GEN 29:20 Иаков Рахиль урәӈән ԓапәт тӑԓ рупитәс; кӑмәтса хӑтәԓ йўкана щи тӑԓәт хӑщәпсәт, ԓўв Рахиль шек сӑмәӈа тӑйсәԓы.
GEN 29:21 Пӑ щӑԓта Иаков Лавана йастәс: «Имийа мӑнэма мийи, ԓўв пиԓәԓән уԓты пŏрайэм йŏхтәс».
GEN 29:22 Лаван щита ванән уԓәм хŏйатәт вохсәԓы пӑ поры верәс.
GEN 29:23 Йэтнайән Лия эвеԓ ўсԓы пӑ Иаков хŏща ԓŏӈәԓсәԓы.
GEN 29:24 Лаван Зелфа митнэӈәԓ Лия эвеԓа митнэӈа мӑсԓы.
GEN 29:25 Аԓәӈсӑхат ԓэрамәс, щит Лия уԓмаԓ. Иаков Лавана йастәс: «Мўйа нӑӈ щиты ма пиԓэмән версән? Ма нӑӈ хŏщайэн Рахиль урәӈән ӑт рупитсәм? Мўйа нӑӈ мӑнэм ԓэпәԓсэн?»
GEN 29:26 Лаван йастәс: «Мўӈ уԓты тӑхайэвән щиты ӑт верԓа, хун ай ŏтәԓ ун ŏтәԓ йэԓпийән ху сайа мӑԓа;
GEN 29:27 тӑм эвем поры ԓапәт йэтшәпты пӑ кимет эвем нӑӈена мӑԓэв, щӑԓта ԓўв урӈәԓән хŏԓна ԓапәт тӑԓ рупитты питԓән».
GEN 29:28 Иаков щиты щи версәԓы пӑ щи поры ԓаптәԓ йэтшәптәсԓы. Щӑԓта Лаван Рахиль эвеԓ ԓўвеԓа нэӈа па мӑсԓы.
GEN 29:29 Лаван Валла митнэӈәԓ Рахиль эвеԓа митнэӈа мӑсԓы.
GEN 29:30 Иаков Рахиль пиԓән па ус, Лия эԓты Рахиль сӑмәӈашәк тӑйсәԓы; пӑ хŏԓна ԓапәт тӑԓ Лаван хŏща рупитәс.
GEN 29:31 Лия сӑмәӈа ӑт тӑйты вер Турәм Куща мŏштәсԓы пӑ ԋаврэмән ԓўвеԓ партсәԓы, Рахиль пӑ ԋаврэм ӑт тӑйәс.
GEN 29:32 Лия ԓавәрта йис пӑ Иакова пŏх сэма пайтәс, нэмән мӑсԓы: Рувим, щиты ԓўв йастәс: «Ма шукем Турәм Куща мŏштәсԓы, тӑԓта йэԓԓы сӑма мосман икемән тӑйты питԓайәм».
GEN 29:33 Щӑԓта па ԓавәрта йис пӑ пŏх сэма пайтәс, пӑ йастәс: «Турәм Куща хуԓтсәԓы, ма сӑма ӑт мосԓәм, па пŏхән мӑсайәм». Нэмән мӑсԓы: Симеон.
GEN 29:34 Щӑԓта па ԓавәрта йис пӑ пŏх сэма пайтәс, пӑ йастәс: «Ин хŏты икем ма пиԓэмән уԓты питәԓ, ма ԓўвеԓ хуԓәм пŏхән тӑйсэм». Щишән, пŏхәԓ нэмән мӑса: Левий.
GEN 29:35 Щӑԓта пӑ ԓавәрта йис пӑ па пŏх сэма пайтәс, пӑ йастәс: «Ин ма Турәм Куща ишәкԓэм». Щишән, пŏхәԓ нэмән мӑсԓы: Иуда. Пӑ ԋаврэм тӑйты вŏԓыйәс.
GEN 30:1 Рахиль пӑ Иакова ԋаврэм ӑт тӑйәс, щишән, Рахиль Лия ŏпеԓ пеԓа ўшмащты питәс, пӑ Иакова йастәс: «Мӑнэма ԋаврэм мийа, ӑнтом ки, ма пӑрԓәм».
GEN 30:2 Иаков Рахиль пеԓа ԉикащәс пӑ йастәс: «Ма ӑнта Турәм, Ԓўв нӑӈена ԋаврэм ӑт партәс».
GEN 30:3 Ԓўв пӑ йастәс: «Тӑта щи ма митнэӈем Валла; ԓўв пиԓәԓән уԓа; ԓўв ма шаншема ԋаврэм сэма ат пайәтәԓ, ма ищи, ԓуԓән, ԓўв мŏхтэԓ ԋаврэм ат тӑйсәм».
GEN 30:4 Пӑ Валла митнэӈәԓ ай нэӈа ԓўвеԓ мӑсԓы; Иаков ԓўв пиԓәԓән ус.
GEN 30:5 Валла ԓавәрта йис пӑ Иакова пŏх сэма пайтәс.
GEN 30:6 Рахиль йастәс: «Турәм ма верэм тўӈа пайәтсәԓы пӑ мӑнэм хўԓсәԓы, пӑ пŏх мӑнэма мӑс». Щишән, Дан нэмән ԓўвеԓ пŏтсәԓы.
GEN 30:7 Щӑԓта Рахиль Валла митнэӈәԓ па ԓавәрта йис пӑ кимет пŏх Иакова сэма пайтәс.
GEN 30:8 Щӑԓта Рахиль йастәс: «Ŏпем пиԓән мин шек такан йӑха хойԓысмән, пӑ ма нŏх питсәм». Пӑ Неффалим нэмән ԓўвеԓ пŏтсәԓы.
GEN 30:9 Лия пӑ, ԋаврэм тӑйты вŏԓымаԓән, Зелфа митнэӈәԓ ўсԓы пӑ Иакова ай нэӈа мӑсԓы.
GEN 30:10 Щӑԓта Зелфа, Лия митнэ, Иакова пŏх сэма пайтәс.
GEN 30:11 Лия йастәс: «Шек йӑм». Гад нэмән ԓўвеԓ пŏтсәԓы.
GEN 30:12 Щӑԓта Зелфа, Лия митнэ, кимет пŏх Иакова сэма пайтәс.
GEN 30:13 Лия пӑ йастәс: «Ма ŏйэма, нэӈәт мӑнэм ŏйәӈа айәԓты питԓэԓ». Асир нэмән ԓўвеԓ пŏтсәԓы.
GEN 30:14 Ԓат тŏрән сэвәрты пŏрайән Рувим пŏхәԓ мўв хӑра мӑнәс пӑ мандрагор энәмты ԓэвпәсәт уйтәс, Лия аԋԏэԓа щитәт тусԓы. Рахиль Лияйа йастәс: «Пŏхен тўвәм мандрагор энәмты ԓэвпәсәт эԓты мӑнэма мийа».
GEN 30:15 Лия пӑ ԓўвеԓа йастәс: «Икем нŏх ўсэн, щит нӑӈена шимәԓ, пŏхем тўвәм мандрагорәт па ԓӑӈхаԓԓан?» Рахиль йастәс: «Тӑм йэтән ԓўв нӑӈ хŏщайэн ат ԓŏӈтыйәԓ, пŏхен мандрагорәт сӑхат».
GEN 30:16 Иаков йэтна пеԓа мўв хӑр эԓты йŏхәтмаԓән Лия ԓўв йэщаԓтәԓ этәс пӑ йастәс: «Ма хŏщайэм ԓŏӈтыйа, ма нӑӈен пŏхем мандрагорәт сӑхат ԓутсэм». Щи ат Иаков ԓўв хŏщайәԓ хоԓәс.
GEN 30:17 Турәм Лия хуԓтмәсԓы, ԓўв ԓавәрта йис пӑ Иакова ветмет пŏх сэма пайтәс.
GEN 30:18 Щӑԓта Лия йастәс: «Турәм мӑнэм мойԓәптәсԓы, митнэӈем икема миймем урәӈән». Иссахар нэмән ԓўвеԓ мӑсԓы.
GEN 30:19 Лия па ԓавәрта йис, щӑԓта хутмет пŏх Иакова сэма пайтәс.
GEN 30:20 Щиты Лия йастәс: «Турәм мӑнэма йӑм мойԓәпса мӑс; икем ма хŏщайэм уԓты питәԓ, ма ԓўвеԓа хут пŏх сэма пайәтсәм». Завулон нэмән ԓўвеԓ пŏтсәԓы.
GEN 30:21 Щӑԓта эви тӑйәс, Дина нэмән ԓўвеԓ пŏтсәԓы.
GEN 30:22 Турәм Рахиль нŏмәсән иса тӑйсәԓы, Турәм ԓўвеԓ хуԓтсәԓы пӑ ԋаврэмән партсәԓы.
GEN 30:23 Ԓўв ԓавәрта йис пӑ пŏх тӑйәс, пӑ йастәс: «Турәм йэԓэмем нŏх ўсԓы».
GEN 30:24 Иосиф нэмән пŏтсәԓы пӑ йастәс: «Турәм мӑнэма кимет пŏх па мӑԓ».
GEN 30:25 Рахиль Иосиф сэма пайәтмаԓ йўпийән, Иаков Лавана йастәс: «Мӑнэм эсԓы, ма ма тӑхайэма, ма мўвема мӑнԓәм;
GEN 30:26 ԋаврэмԓам пӑ имиԓам мийаԓән, ма ԓыв урӈеԓән нӑӈена рупитсәм, щӑԓта ма мӑнԓәм, нӑӈ уйәтԓэн, хŏты ма нӑӈен йӑма рупитсэм».
GEN 30:27 Лаван пӑ ԓўвеԓа йастәс: «Йӑм сэмән ма пеԓайэм ватԓән ки, тӑта хӑща. Ма мŏштәсэм, Турәм Куща нӑӈ хўватэн мӑнэм йӑм мӑԓ».
GEN 30:28 Пӑ йастәс: «Нӑӈ тынэн ма эԓтэм мӑнэма йасты, пӑ ма мӑԓэм».
GEN 30:29 Иаков ԓўвеԓа йастәс: «Нӑӈ уйәтԓэн, хŏты ма нӑӈена рупитсәм пӑ ма уԓтэм сыс хŏты нӑӈ тащԓан энәпсәт;
GEN 30:30 ма йŏхәтмемән, шимәԓ ус, ин пӑ ара йис; Турәм Куща нӑӈен йӑмән мӑсԓы ма йŏхәтмем йўпийән; ма пӑ ма хот тэԓэм урәӈән хун рупитты питԓәм?»
GEN 30:31 Лаван йастәс: «Мўй нӑӈен мӑты?» Иаков йастәс: «Нэмәԓты мӑнэм аԓ мийа. Ма йастәтэм щирән верԓэн ки, ма пӑ йэԓԓы нӑӈ тащԓан тӑйты пӑ шавиты питԓәԓам.
GEN 30:32 Ма тӑм хӑтәԓ нӑӈ ош тащԓан хŏԓ ватԓәԓам; хӑншаӈ, лотәӈ пӑ питы ошәт пӑ хӑншаӈ пӑ лотәӈ козайәт хŏԓ атэԓт ўйаԓән. Щимәщ войәт мӑнэма тына питԓәт.
GEN 30:33 Щӑха, ватты йŏхәттэнән, ма нӑӈ йэԓпенән вещкат ат усәм. Ӑнта хӑншаӈ, ӑнта лотәӈ коза пӑ ӑнта питы ош ма хŏщайэм ԉикмәԓ ки, щит ԓоԓмәм ŏта ԓўӈтәсты питәԓ».
GEN 30:34 Лаван йастәс: «Йӑм, нӑӈ йасӈен щирән ат питәԓ».
GEN 30:35 Щи хӑтәԓ хŏԓ хӑншаӈ, лотәӈ козайәт пӑ козёләт, нŏви лот тӑйты войәт, пӑ питы ошәт ԓўв атэԓт ўсԓы, пӑ пŏхԓаԓа шавиты мӑсԓы;
GEN 30:36 пӑ хуԓәм хӑтәԓ сыс мӑнты хўвата щи войәт йэԓ туты партсәԓы. Иаков пӑ, Лаван йош войәт шавиты хӑщәс.
GEN 30:37 Щӑԓта Иаков тополь, миндаль пӑ чинар йўхәт эԓты веԓщи сэврәм нўвԓаԓ хŏща йўх карԓаԓ шумԓәӈа ԋŏхәрсәԓы, нŏви ԋар йўх унты карәԓ хŏпәтман;
GEN 30:38 щимәщ шумԓәӈ нўвәт войәт йищәԓтәты хўрэт ԓыпийа пŏтсәԓы, хŏԓта войәт йищты йŏхтыԓысәт. Вохатты сыс йищты йŏхтыԓыйәм войәт,
GEN 30:39 щи нўвәт йэԓпийән вохатсәт, щишән, опсәм пŏшхәт хӑншаӈәт пӑ лотәӈәт усәт.
GEN 30:40 Иаков щи ош пŏшәхԓаԓ атэԓт тӑйсәԓы; щӑԓта пӑ, вохатты пŏрайән нŏви войәт щиты ԓощәԓтыԓысԓы, ԓыв Лаван хӑншаӈ пӑ питы войәт пеԓы ат ватсәт; ԓўв тащԓаԓ атэԓт тӑйсәԓы, Лаван войәт пиԓән ӑт ԓыԓәтсәԓы.
GEN 30:41 Кашәӈ пўш, хун йурәӈ нэ войәт хўрэт хŏща йик йищты йŏхтыԓысәт, хўрэт ԓыпийа войәт сэм йэԓпийа Иаков шумәԓтәм нўвәт пŏныԓыйәс, ԓыв щита ат вохатсәт.
GEN 30:42 Хун пӑ вевԓы войәт усәт, щи пŏрайән нўвәт ӑт пŏныԓыйәс. Щишән, вевԓы войәт Лаван пеԓа питсәт, йурәӈ ŏтәт пӑ Иаков пеԓа.
GEN 30:43 Щишән, щи хŏйат шек-шек тащәӈа йис, ар ош тащ, тӑйәс, митнэӈәт, митйох, верблюд пӑ осёл войәт тӑйәс.
GEN 31:1 Щӑԓта Лаван пŏхәт йасӈәт Иаков хуԓтсәԓы, ԓыв щиты пŏтәртсәт: «Ащев тӑйәм тащ Иаков иса нŏх ўймаԓ, щишән ԓўв тащәӈа йис».
GEN 31:2 Иаков Лаван вешәԓ кащаԓәс пӑ, ԓўв ӑнта мŏԓхатәԓ хŏрпи, ин пӑ иса мŏԓты хӑрәх-мŏрәх.
GEN 31:3 Щӑԓта Турәм Куща Иакова йастәс: «Ащиԓан мўвәта, нӑӈ мўвена йŏхԓы керԓа; Ма пӑ нӑӈ пиԓэнән питԓәм».
GEN 31:4 Иаков айкеԓ китәс, Рахиль пӑ Лия вохты, ԓўв шавиты ош тащԓаԓ хŏща ԓынан йŏхәтты партсәԓы.
GEN 31:5 Пӑ ԓынана йастәс: «Ма ваттэмән, ащан вешәԓ ӑнта щи йэԓпи хŏрпи, ин пӑ иса хӑрәх-мŏрәх; туп ма ащем Турәм иса ма пиԓэмән уԓ;
GEN 31:6 нын уйәтԓәԓԓән, йурэмән нын ащана ма рупитсәм,
GEN 31:7 ащан пӑ мӑнэм ԓэпәԓтысԓы пӑ сŏхәптәты тынәԓ йаӈ пўш пелтыԓысԓы; туп Турәм ԓўвеԓа атәм верты мӑнэма ӑт эсәԓсәԓы.
GEN 31:8 Хун ԓўв йастәс: ‘Лотәӈ войәт нӑӈена тына питԓәт’, иса лотәӈ войәт сэма питсәт. Хун пӑ ԓўв йастәс: ‘Хӑншаӈ войәт нӑӈена тына питԓәт’, иса хӑншаӈ войәт сэма питсәт.
GEN 31:9 Щиты Турәм нын ащан эԓты тащ нŏх ўсԓы пӑ мӑнэма мӑсԓы.
GEN 31:10 Ипуш ма уԓәмән ватсэм, вохатты питмеԓән козёл хор войәт иса хӑншаӈәт пӑ лотәӈәт усәт.
GEN 31:11 Турәм ангел мӑнэма уԓәмән йастәс: ‘Иаков!’ Ма йастәсәм: ‘Ма щи’.
GEN 31:12 Ԓўв йастәс: ‘Ӑӈкәрма пӑ ванта: козёл хор войәт вохатты питмеԓән иса лотәӈәт пӑ хӑншаӈәт усәт. Мӑнэма иса ныԓа, мўй Лаван нӑӈ пиԓэнән верәԓ.
GEN 31:13 Ма Вефильән нӑӈ хŏщайэн этԓыйәм Турәм, хŏта нӑӈ оливка вŏй кев эԓты шошәпсән пӑ Мӑнэма так йасәӈ мӑсән. Ин нӑӈ нŏх ԓойа, тӑм мўв хӑйи пӑ нӑӈ сэма питәм мўвена йŏхԓы мӑна’».
GEN 31:14 Рахиль пӑ Лия ԓўвеԓ йŏхԓы йастәсӈән: «Ащемән хот эԓты мин йўканэмәна хӑйәм мŏԓты пŏрмәс уԓ а мўй?
GEN 31:15 Аԓт пӑ пўӈәԓ ŏтәта минэмән ԓўӈәтԓәԓы? Минэмән тынысԓы пӑ шитәм щел ŏхәԓ ищи посатсәԓы;
GEN 31:16 Щишән, Турәмән ащемән эԓты нŏх ўйәм тащ мўӈева пӑ мўӈ ԋаврэмԓува уԓ; щишән, хŏты нӑӈена Турәм йастәс, хŏԓ щиты веры».
GEN 31:17 Иаков нŏх ԓойәс, ԋаврэмԓаԓ пӑ имиԓаԓ верблюдәт шӑнша опсәԓсәԓы,
GEN 31:18 шитәм тащԓаԓ пӑ пŏрмасԓаԓ пӑтән ўсԓы, Месопотамия мўвән ԓўв шитәм тащԓаԓ пӑ пŏрмасԓаԓ, Ханаан мўва Исаак ащеԓ хŏща мӑнты урәӈән.
GEN 31:19 Лаван пӑ, ошԓаԓ ԓŏртты мӑнмаԓән, Рахиль эвеԓән ԓухԓаԓ нŏх ԓŏԓәпсайәт.
GEN 31:20 Иаков пӑ Лаван арамей ики ԓэпәԓсәԓы, ԓўв эԓтэԓ хŏнтаман мӑнәс, мӑнты айкеԓән ӑт версәԓы.
GEN 31:21 Мўй тӑйәс, щитәԓ пиԓән мӑнәс; йŏхан ўшсәԓы пӑ Галаад кев ўр пеԓа мӑнәс.
GEN 31:22 Хуԓмет хӑтәԓән Иаков мӑнәм вер Лавана йастәса.
GEN 31:23 Ԓўв рутԓаԓ ԓўв пиԓәԓән ўс пӑ ԓапәт хӑтәԓ ԓўв йўпеԓән ԋухԓәсәс, Галаад кев ўр хŏща эԓты йŏхәтсәԓы.
GEN 31:24 Атән Лаван арамей ики хŏща уԓәмән Турәм йŏхтәс пӑ ԓўвеԓа йастәс: «Пӑԓԓән ки, Иакова йӑм аԓ йаста, атәм аԓ йаста».
GEN 31:25 Лаван Иаков эԓты йŏхәтсәԓы; Иаков пирщин хŏтԓаԓ кев ўр хŏща ԓощсәԓы, Лаван пӑ рутԓаԓ пиԓән ищи Галаад кев ўрән пирщин хŏтԓаԓ ԓощсәԓы.
GEN 31:26 Щӑԓта Лаван Иакова йастәс: «Мўй нӑӈ версән? Мўйа нӑӈ мӑнэм ԓэпәԓсэн пӑ эвеӈәԓам ԉаԉәсты иты, ԋӑрэмәман, тусԓан?
GEN 31:27 Мўйа нӑӈ хӑԋайән мӑтсән, ма эԓтэм хӑԋэмәсән, мӑнэма ӑт йастәсән? Ма, ԓуԓән, нӑӈен каш пиԓән, ар пиԓән, тимпанән пӑ нарәс йўхән йŏтман эсәԓсэм.
GEN 31:28 Нӑӈ мӑнэма хиԓыԓам пӑ эвиԓам мосәԓтәты ӑт эсәԓсэн; нӑӈ щит ӑт нумәсман версэн.
GEN 31:29 Нынан атәм верты йур ма тӑйԓәм; туп нын ащан Турәм мŏԓха атән мӑнэма йастәс: ‘Пӑԓа, Иакова атәм ӑԓ йаста, йӑм аԓ йаста’.
GEN 31:30 Ат уԓ, нӑӈ мӑтсән, ащен хота нӑӈ мӑнты шек ԓӑӈхасайән, – туп мўйа нӑӈ ма ԓухԓам ԓоԓәпсәԓан?»
GEN 31:31 Иаков Лаван пеԓа йастәс: «Ма пӑԓсәм, щиты нумәссәм, нӑӈ эвеӈәԓан йурән нŏх ӑт ат ўсԓан, ԓўԓән.
GEN 31:32 Хŏй хŏща ԓухԓан уйәтԓәԓан, щит ԓыԓӈа уԓты ӑт питәԓ; рутԓәмән уԓман ванты, мўй нӑӈ ŏтэн эԓты ма хŏщайэм уԓ, пӑ нӑӈена ўйи». Иаков ӑт уйәтсәԓы, щит Рахильән ԓоԓәпсайәт.
GEN 31:33 Иаков пирщин хота Лаван йӑӈхәс, пӑ Лия пирщин хота, пӑ митнэӈӈән пирщин хота, туп нэмәԓты ӑт уйтәс. Щӑԓта, Лия пирщин хот эԓты этмаԓән, Рахиль пирщин хота ԓŏӈәс.
GEN 31:34 Рахиль щи йэԓпийән ԓухԓаԓ ўсԓы пӑ верблюд шӑнша хушәм хира пŏтсәԓы, щӑԓта эԓты омәссәԓы. Лаван пирщин хот хŏԓ кӑшсәԓы пӑ нэмәԓты ӑт уйтәс.
GEN 31:35 Ԓўв ащеԓа щиты йастәс: «Кущайэм ӑт ат ԉикащәԓ, ма ԓўв йэԓпеԓән нŏх ԓойты ӑт верәтԓәм, нэ верән уԓԓәм». Пӑ Лаван кӑншатәс, туп ԓухԓаԓ ӑт уйәтсәԓы.
GEN 31:36 Иаков ԉикащәс пӑ Лаван пиԓән ԉавәтты питәс. Иаков пŏтәртты питәс пӑ Лавана йастәс: «Мўй хŏрпи нўр тӑйԓәм, мўй хŏрпи кӑрэк версәм, ма йўпем нӑӈ туԓэн?
GEN 31:37 Хŏԓ пŏрмасԓам нӑӈ вӑтсәԓан, нӑӈ хотэн пŏрмасәт эԓты нӑӈ мўй уйәтсән? Этәԓтыйи тӑта нӑӈ рутԓан йэԓпийән пӑ ма рутԓам йэԓпийән; ԓыв минэмән ат сўтәтԓэԓ.
GEN 31:38 Хус тӑԓ ма нӑӈ хŏщайэн усәм; коза пӑ ош нэ войәт ӑт мушмиԓысәт, тащен эԓты ош ма ӑт ԓэсәм;
GEN 31:39 войән веԓәм ŏт нӑӈена ма ӑт тутԓысәм, щит ма сŏхәптысэм; нӑӈ ма эԓтэм иса нŏх кӑшсэн, мўй хӑтԓәԓән ушәс, мўй атәԓән тӑпәс,
GEN 31:40 хӑтԓәԓән рўв эԓты, атәԓән ищки эԓты шукащсәм, ŏԓмем ӑт ŏԓԓысәм.
GEN 31:41 Щиты хус тӑԓ нӑӈ хотэнән усәм. Ԋӑԓхŏщйаӈ тӑԓ эвеӈәԓан урәӈән рупитсәм пӑ хут тӑԓ тащен урәӈән, нӑӈ пӑ сŏхәптәты тынэн йаӈ пўш пелтыԓысэн.
GEN 31:42 Ащем Турәм ма пиԓэмән ӑт ки ус, Авраам Турәм пӑ Исаак пӑԓты Ŏт, нӑӈ мӑнэм таԓты китсэн, ԓуԓән. Ма шукащты верэм пӑ ма йошԓам рупата Турәм кащаԓәсԓы пӑ хӑщәм атән мӑнэм эԓт питсәԓы».
GEN 31:43 Щӑԓта Лаван пŏтәртәс пӑ Иакова щиты йастәс: «Эвеӈәԓам – ма эвеӈәԓам; ԋаврэмәт – ма ԋаврэмԓам; тащ – ма тащем, иса, мўй нӑӈ ватԓән, щит мӑнэм: ма эвеӈәԓам пиԓән пӑ ԓын тӑйәм ԋаврэмԓән пиԓән мўй верты верәтԓәм?
GEN 31:44 Ин ма пӑ нӑӈ йастатԓәмән кўтԓәмәнән йӑма уԓты, щи йастантәпса минэмән нумты ат питәԓ».
GEN 31:45 Иаков кев шуп ўс пӑ нумты кева омәссәԓы.
GEN 31:46 Щӑԓта Иаков рутԓаԓа йастәс: «Кевәт ӑктаты». Ԓыв кевәт ӑкәтсәт пӑ кев пай версәт, щи кев пай ԓоӈәԓән ԓэсәт.
GEN 31:47 Лаван кев пай щиты нэмәтсәԓы: Иегар-Сагадуфа; Иаков пӑ кев пай Галаада нэмәтсәԓы.
GEN 31:48 Щӑԓта Лаван йастәс: «Тӑм хӑтәԓ тӑм кев пай мин кўтэмәнән вер вантәм ŏта питәԓ». Щишән, нэмән пŏтса: Галаад,
GEN 31:49 хŏԓна пӑ: Мицпа, щит Лаван йастәм урәӈән: «Турәм Куща мӑнэм пӑ нӑӈен ватман ат тӑйԓәԓы, хун уԓты кўтэмән хўва питәԓ;
GEN 31:50 эвеӈәԓам пиԓән атма уԓты питԓән ки мўй пӑ ма эвеӈәԓам тўмпийән хŏԓна имет ўԓән ки, кўш щит ватты хŏйат ӑнтом, нӑӈ уйты, Турәм ищипа ватәԓ».
GEN 31:51 Щӑԓта Лаван Иакова йастәс: «Тӑта щи кев пай пӑ нумты кев, щит мин кўтэмәнән ма ԓощсэм;
GEN 31:52 тӑм кев пай вер вантәм ŏта питәԓ, па нумты кев ищи вер вантәм ŏта питәԓ, тӑм кев пай пӑ нумты кев атәм верты урәӈән нӑӈ ма пелкема ӑт ўшԓэн пӑ ма нӑӈ пелкена ӑт ўшԓэм;
GEN 31:53 Авраам Турәм пӑ Нахор Турәм, ԓын ащан Турәм, мин кўтэмәнән ат сўтытәԓ». Исаак ащеԓ пӑԓәм Турәмән Иаков йасәӈ мӑс.
GEN 31:54 Иаков щи кев ўрән йир тус пӑ рутԓаԓ порыԓыты вохсәԓы; ԓыв порыԓысәт пӑ щи кев ўрән хоԓсәт.
GEN 31:55 Аԓәӈсӑхат аԓәӈ Лаван нŏх киԓәс, хиԓыԓаԓ пӑ эвеӈәԓаԓ мосәԓтәсԓы пӑ йӑм йасәӈән мӑсԓы. Щӑԓта Лаван мӑнәс пӑ ԓўв хотәԓа йŏхтәс.
GEN 32:1 Иаков пӑ ԓўв йушәԓән мӑнәс. Турәм ангеләт ԓўв йэщаԓтэԓ этсәт.
GEN 32:2 Ԓывиԓаԓ кащаԓәмаԓән, Иаков йастәс: «Тӑм Турәм ԉаԉ йох уԓты тӑха». Щишән, щи тӑха нэмәтсәԓы: Маханаим.
GEN 32:3 Щӑԓта Иаков Исав йайәԓ хŏща Сеир кев мўва, щит Едом мўвән, айкеԓ туты хŏйатәт ԓўв йэԓпеԓән китсәԓы,
GEN 32:4 ԓывиԓаԓа партсәԓы: «Исав кущайэма щиты йастаты: Иаков митхуйэн тӑмиты пŏтәртәԓ: ‘Лаван хŏща тӑм хӑтәԓ унты ма усәм;
GEN 32:5 хор мисәт пӑ осёл войәт, ош тащ, митйохәт пӑ митнэӈәт ма тӑйԓәм; кущайэма ма эԓтэм айкеԓ ма китԓәм, йӑм сэмән митхуйәԓ пеԓа ат вантәс, ԓуԓән’».
GEN 32:6 Айкеԓ тўвәм йох Иаков хŏща йŏхԓы йŏхәтсәт пӑ йастәсәт: «Исав йайән хŏща йӑхсув; ԓўв нӑӈ пеԓайэн йэщаԓт йиԓ, ԓўв пиԓәԓән ԋӑԓсот хŏйат».
GEN 32:7 Иаков шек пӑԓтамәс пӑ сӑмәԓ мӑнәс; щӑԓта ԓўв пиԓәԓән йўвәм хŏйатԓаԓ, ошԓаԓ, козайԓаԓ, мисԓаԓ, верблюдԓаԓ кӑтна ортсәԓы.
GEN 32:8 Пӑ йастәс: «Исав и пелкәԓ веԓты питԓәԓы ки, кимет пелкәԓ ԓыԓәԓ этәԓ».
GEN 32:9 Щӑԓта Иаков йастәс: «Авраам ащем Турәм пӑ Исаак ащем Турәм, Турәм Куща, мӑнэма тӑмиты йастыԓыйәм Ŏт: ‘Мўвена йŏхԓы мӑна, сэма питәм мўвена, пӑ Ма нӑӈен йӑмән верты питԓэм!’
GEN 32:10 Нэмәԓтыйа ӑт рӑхты митхулэӈкена щи арат йӑм пӑ щи арат ŏй Нӑӈ мӑсән; мӑнмемән, ма нэмәԓты ӑт тӑйсәм, туп шушты сўвем пиԓән тӑм Иордан йŏхан ўшсэм, ин пӑ кӑт хот тэԓ тӑйԓәм.
GEN 32:11 Исав йайәм йош эԓты мӑнэм шавийи, ма щит эԓты пӑԓԓәм, ԓўв йŏхәттаԓән, мӑнэм пӑ ԋаврэмәт аԋԏиԓаԓ пиԓән веԓԓәԓы.
GEN 32:12 Нӑӈ йастәсән: ‘Ма нӑӈен йӑмән верты питԓэм пӑ тыхәԓ тэԓэн щарәс сэй хиш иты ара верԓэм, щи аратәԓ ԓўӈәтты ӑт верәтԓа’».
GEN 32:13 Щи ат Иаков щита хоԓәс. Тӑйәм ŏтәԓ эԓты Исав йайәԓа мойԓәпса ԓэщатәс:
GEN 32:14 кӑтсот коза нэ вой, хус козёл хор вой, кӑтсот нэ ош, хус хор ош,
GEN 32:15 хŏԉмаӈ пусты верблюд нэ вой ԓыв пŏшәхԓаԓ пиԓән, ԋӑԓйаӈ мис, йаӈ хор мис, хус осёл нэ вой, йаӈ осёл хор вой.
GEN 32:16 Митйохԓаԓ йоша кашәӈ тащ атэԓт мӑсԓы пӑ митйохԓаԓа йастәс: «Ма йэԓпемән мӑнаты пӑ кўтән-кўтән тащԓән хӑйаԓән».
GEN 32:17 Мет оԓәӈ ŏтәԓа щиты йастәман, партәс: «Щӑха, Исав йайәм нӑӈ пиԓэнән уйтаттаԓән, ԓўв нӑӈен иԋщәсԓәԓы: ‘Нӑӈ хŏй? Пӑ хŏԓта мӑнԓән? Пӑ хŏй тащ нӑӈ воштәԓән?’
GEN 32:18 нӑӈ щиты йаста: ‘Иаков митхуйэн тащ; Исав кущайәԓа мойԓәпсайа ԓўв китсәԓы; ԓўв пӑ мўӈ йўпевән йиԓ’».
GEN 32:19 Щиты кимет, хуԓмет пӑ хŏԓ тащәт шавийәм митйоха йастәты партәс: «Тӑмиты Исава йастаты, хун ԓўв пиԓәԓән уйтатԓыты;
GEN 32:20 пӑ йастаты: ‘Иаков митхуйэн пӑ мўӈ йўпевән йиԓ’». Ԓўв щиты нумәсәс: «Ԓўвеԓ кащаԓәтэм йэԓпийән, оԓӈа китәм мŏйԓәпсайԓамән сӑмәԓ ԓэптапԓэм, мосәӈ, ԓўв мӑнэм вана ўԓԓы».
GEN 32:21 Щиты Иаков мойԓәпсайԓаԓ оԓӈа мӑтсәт, ԓўв пӑ щи ат пирщин хотәԓән хоԓәс.
GEN 32:22 Щӑԓта атәԓән нŏх киԓәс, имеӈәԓаԓ пӑ митнэӈәԓаԓ ўсԓы, пӑ ихŏщйаӈ пŏхәԓ ўсԓы, пӑ Иавок йŏхан кўрән шŏппи ўшсәԓы;
GEN 32:23 ԓывиԓаԓ йŏхан шŏппи тусԓы пӑ мўй ԓўв тӑйәс, хŏԓ йŏхан шŏппи ўншәптәсԓы.
GEN 32:24 Щӑԓта Иаков утща хӑщәс. Аԓәӈ хўщәԓ унты ԓўв пиԓәԓән Ахой катԓантыйәс;
GEN 32:25 ӑт верәмтаԓ мŏштымаԓән, Ԓўв Иаков пещ ԓŏв йӑта хойԓыйәс пӑ Иаков пещ ԓŏв йӑт мушмәԓтсәԓы, хун ԓўв Ԓўв пиԓәԓән катԓантыйәс.
GEN 32:26 Пӑ йастәс: «Эсԓы Мӑнэм, хущәԓ этәс». Иаков йастәс: «Ӑт эсәԓԓэм Нӑӈен, мӑнэм йӑмән ӑт мӑтэн унты».
GEN 32:27 Щӑԓта йастәс: «Нӑӈ нэмен хŏты?» Ԓўв йастәс: «Иаков».
GEN 32:28 Пӑ йастәс: «Тӑԓта йэԓԓы нӑӈ нэмен Израиль питәԓ, Иаков нэмен хӑйԓэн, нӑӈ Турәм пиԓән катԓантысән, пӑ хŏйатәт эԓты нŏх питты питԓән».
GEN 32:29 Иаков ищи ԓўвеԓ иԋщәссәԓы, щиты йастәман: «Нӑӈ нэмен йасты». Пӑ Ԓўв йастәс: «Мўйа нӑӈ Ма нэмем иԋщәсԓән?» Пӑ щи тӑхайән Иаков йӑмән мӑсԓы.
GEN 32:30 Иаков щи тӑха нэмәтсәԓы: Пенуэл; ԓўв щиты пŏтәртыйәс: «Ма Турәм веш ванән ватсэм пӑ ԓыԓӈа хӑщсәм».
GEN 32:31 Най этәс, хун ԓўв Пенуэл мŏхты мӑнәс; пещәԓ урәӈән нохман шушәс.
GEN 32:32 Щишән, интӑм унты израиль мир хŏйатәт пещән уԓты ԓон ӑт ԓэԓәт, щит Катԓантыйәм Ŏт Иаков пещ ԓŏв мушмәԓтмаԓән щи ԓона хойԓымаԓ урәӈән.
GEN 33:1 Щӑԓта Иаков кащаԓәсԓы, хŏты Исав пӑ ԓўв пиԓәԓән ԋӑԓсот хŏйат йиԓ. Щӑԓта Иаков Лия, Рахиль пӑ митнэӈӈәԓаԓ ԋаврэмԓаԓ пиԓән иса атэԓт ԓощәԓтәсԓы.
GEN 33:2 Митнэӈӈәԓаԓ ԋаврэмԓән пиԓән оԓӈа ԓощәԓтәсԓы, Лия ԋаврэмԓаԓ пиԓән ԓыв йўпеԓән, Рахиль пӑ Иосиф мет йŏԓта.
GEN 33:3 Ԓўв пӑ ԓыв йэщаԓтэԓ мӑнәс пӑ йайәԓ хŏща ванамәмаԓән, мўв унты ԓапәт пўш, ŏх пŏнман, иԓ ԋўрыԓыйәс.
GEN 33:4 Исав пӑ ԓўв йэщаԓтәԓ хухәԓмәс, пӑ сапԓәԓ эԓты ԓўвеԓ ӑпәԓсәԓы, мосәԓтәсԓы, пӑ хоԓԓәстән.
GEN 33:5 Имет пӑ ԋаврэмәт кащаԓәс пӑ иԋщәссәԓы: «Щит хŏйтыԓан?» Иаков йастәс: «Турәмән мӑнэма, нӑӈ митхуйэна, мойԓәм ԋаврэмәт».
GEN 33:6 Щӑԓта митнэӈәт ԋаврэмԓаԓ пиԓән вана йисәт пӑ, ŏх пŏнман, иԓ ԋўрсәт;
GEN 33:7 Лия ԋаврэмԓаԓ пиԓән ищи вана йис пӑ, ŏх пŏнман, иԓ ԋўрсәт; мет йухәт Иосиф пӑ Рахиль вана йистән пӑ, ŏх пŏнман, иԓ ԋўрсәтән.
GEN 33:8 Щӑԓта Исав йастәс: «Мўйа нӑӈ тӑм тащԓан ма йэщаԓтэм китсәԓан?» Иаков йастәс: «Кущайэм йӑм сэмән ма пеԓайэм, ат вантәс, ԓўԓән».
GEN 33:9 Исав йастәс: «Апщийэм, ма тӑйты ŏтэм ар; нӑӈ ŏтэн нӑӈ хŏщайэн ат уԓ».
GEN 33:10 Иаков йастәс: «Ӑнта, нӑӈ ма пеԓайэм йӑм сэмән ватԓән ки, мойԓәпсайэм ма йошем эԓты ўйи, нӑӈ веншен ваттэмән щит Турәм веш ваттэм хŏрпи, нӑӈ пӑ ма пеԓайэм щи арат йӑм усән;
GEN 33:11 нӑӈена тўвәм мойԓәпсайэм ўйи, щит Турәм мӑнэма мойԓәс, щишән, ма мўй иса тӑйԓәм». Щиты Иаков Исав пойәксәԓы, пӑ ԓўв ўсԓы
GEN 33:12 пӑ йастәс: «Нŏх ԓойԓув пӑ мӑнԓув; ма нӑӈ йэԓпенән мӑнԓәм».
GEN 33:13 Иаков ԓўвеԓа йастәс: «Кущайэм уйәтԓәԓы, ԋаврэмәт вевԓэт, щӑԓта, пусты мисәт пӑ ошәт тӑйԓәм: и хӑтәԓ сыс такан воштәты ки, войәт хŏԓ хӑԓԓәт;
GEN 33:14 кущайэм митхуйәԓ йэԓпийән ат мӑнәԓ, ма пӑ айәԓта, тащ мӑнты кемән, пӑ ԋаврэмԓам хŏты шушԓәт, пӑ кущайэм хŏща Сеир мўва йŏхәтԓәм».
GEN 33:15 Исав йастәс: «Ма хŏйатԓам эԓты кӑмәтса нӑӈ пиԓэнән хӑйԓәм». Иаков йастәс: «Мўй урәӈән? Йӑм сэмән кущайэм ма пеԓайэм ватәԓ ки, щит щи ŏй!»
GEN 33:16 Щиты Исав ищи хӑтәԓән Сеир мўва йŏхԓы мӑнәс.
GEN 33:17 Иаков пӑ Сокхоф пеԓа мӑнәс, щита хот опсәс, вой шавиты варәс хотәт ищи верәс. Щишән, щи тӑха щиты нэмәтсәԓы: Сокхоф.
GEN 33:18 Иаков, Месопотамия эԓты йŏхәтмаԓән, Ханаан мўвән уԓты Сихем воша йӑма йŏхтәс, щита вош йэԓпийән уԓты питәс.
GEN 33:19 Щӑԓта мўв хӑр щи пеләк, хŏта ԓўв пирщин хотԓаԓ верәс, сот щел ŏх сӑхат Еммор пŏхәт эԓты, Сихем пӑ ԓўв апщиԓаԓ эԓты, Иаков ԓўвеԓа ԓутсәԓы.
GEN 33:20 Щӑԓта щита йирасты нŏрәм ԓўв верәс пӑ Турәм Куща пеԓа, Израиль Турәм пеԓа, пойәкщәс.
GEN 34:1 Дина, щит Иаков эԓты Лия тӑйәм эви, щи мўвәӈ эвет пиԓән уйтантыты мӑнәс.
GEN 34:2 Пӑ щи мўв кӑнащ ики, Еммор ев ики, Сихем нэмпи пŏхән ԓўв кащаԓәса, ԓўв эви йурән катәԓсәԓы пӑ ԓўв пиԓәԓән ŏԓәс.
GEN 34:3 Щӑԓта Иаков Дина эви пеԓа нŏпсәԓ питәс пӑ ԓўвеԓа эви сӑма рӑхәс, пӑ ԓўв эвийа ԏўпаӈ йасӈәт пŏтәртәс.
GEN 34:4 Еммор ащеԓа Сихем щиты йастәс: «Щи эви мӑнэма нэӈа ўйи».
GEN 34:5 Иаков хуԓтсәԓы, хŏты Еммор пŏх ԓўв Дина эвеԓ пиԓән атәм вер верәс, туп пŏхԓаԓ тащеԓ пиԓән щӑхәрән усәт, щишән, ԓыв йŏхәттэԓ унты Иаков мӑшйайа ус.
GEN 34:6 Еммор, Сихем ащи, Иаков хŏща пŏтәртты йŏхтәс.
GEN 34:7 Иаков пŏхәт щӑхәр эԓты йŏхәтмеԓән щи вер эԓты хуԓтсэԓ, щи йох нŏпсэԓ шӑкәс пӑ шек ԉикащсәт, Израиля атәм вер верәм урәӈән, Иаков эви пиԓән Сихем ŏԓмаԓ урәӈән. Щиты верты ӑт рӑхәс.
GEN 34:8 Еммор ԓыв пиԓэԓән пŏтәртты питәс пӑ йастәс: «Сихем пŏхем нын эван пеԓа нŏпсәԓ шек уԓ, щишән имийа ԓўвеԓа мийаԓән;
GEN 34:9 рута мўӈ пиԓэвән уԓаты; нын эвиԓән мўӈева мийԓыйаԓән, мўӈ эвиԓув пӑ ўйԓыйаԓән;
GEN 34:10 щӑԓта мўӈ пиԓэвән уԓаты; тӑм мўв нын йэԓпанән, касԓыйаты пӑ тӑм мўвән уԓаты, пӑ нынана тӑйты йŏра мўва ԓутаԓән».
GEN 34:11 Сихем пӑ эви ащийа пӑ йайԓаԓа йастәс: «Йӑм сэмән ма пеԓайэм ватԓәты ки, мўй ӑт йастәԓты, ма иса мӑԓәм;
GEN 34:12 мет ун тын пӑ мойԓәпсайәт йастаты, ма мӑԓәм, мўй мӑнэма ӑт йастәԓты, туп эви мӑнэма имийа мийаԓән».
GEN 34:13 Иаков пŏхәт Дина апщеԓ атәм вера пайтәм урәӈән, Сихема пӑ Еммор ащеԓа ԋаԓмиман йŏхԓы пŏтәртсәт;
GEN 34:14 пӑ щиты Симеон пӑ Левий йастәсӈән: «Эвтәм вер ӑт тӑйты хŏйат сайа апщев мӑты мўӈ ӑт верәтԓув, щит мўӈева йэм, ӑт рӑхәԓ;
GEN 34:15 туп нын пиԓанән и верән и нŏпса йŏхәтԓув, хун нын мўӈ итэва йиԓты, хун хŏԓ йох рутән эвтәм вер тӑйты питәԓ;
GEN 34:16 щи пŏрайән мўӈ эвиԓув нынана мӑты питԓәԓув пӑ нын эвиԓән мўӈева ўты питԓәԓув, йӑха уԓты питԓув пӑ и мира йиԓув;
GEN 34:17 щи эвәтты верән мўӈев ӑт хуԓәтԓәты ки, эвев нŏх ўԓэв пӑ мӑнԓув».
GEN 34:18 Еммора пӑ Сихем пŏхәԓа щи йасӈәт рӑхсәт.
GEN 34:19 Энәмты пŏх мŏхты щи вер верты ԓэщатыйәс, Иаков эви ԓўвеԓ шек сӑма рӑхәс. Ащеԓ хотән ԓўв мет ԓӑтәӈа ԓўӈтәсәс.
GEN 34:20 Щӑԓта Еммор Сихем пŏхәԓ пиԓән вошәӈ пушас ун ова йŏхәтсәӈән пӑ вошәӈ йох пеԓа пŏтәртты питсәӈән пӑ йастәсӈән:
GEN 34:21 «Тӑм хŏйатәт мўӈ пиԓэвән йӑма уԓты ԓӑӈхаԓайәт; ат уԓԓәт пӑ касԓыԓәт тӑм мўвән; мўв тӑта ԓӑщкам. Ԓыв эвиԓаԓ нэӈа ўты питԓәԓув, мўӈ эвиԓув пӑ ԓывиԓаԓа мӑԓԓув.
GEN 34:22 Туп щи щирән щи хŏйатәт мўӈ пиԓэвән и мир иты уԓты кашащԓәт, мўӈ йохԓув па хŏԓыйэ, ԓыв итэԓән эвәтман ат усәт, ԓуԓән.
GEN 34:23 Ԓыв тащԓаԓ, пŏрмасԓаԓ аԓт мўӈева питԓәт? Ин ԓыв пиԓԓаԓән кашащԓув, пӑ ԓыв мўӈ пиԓэвән йӑха уԓты питԓәт».
GEN 34:24 Щӑԓта вошәӈ пушас ун ов хŏща ӑктәщиты йох, Еммор пӑ Сихем пŏхәԓ йасӈәта хŏԓ эвәԓсәт: вошәӈ йох хŏԓ эвәтты верән версайәт.
GEN 34:25 Хуԓмет хӑтәԓән, хун ԓыв эвтәм ԋўләмԓаԓ кӑшәтсәт, Иаков пŏхӈиԓаԓ, Симеон пӑ Левий, Дина йайӈән, аԓтты кешиԓән ўсԓән, пӑ айԓы-кеԓԓы воша мӑтсәӈән, пӑ йох хŏԓ пӑратсәԓән.
GEN 34:26 Еммор ики Сихем пŏхәԓ пиԓән аԓтты кешийән ищи веԓсәԓән; Сихем хот эԓты Дина ўсԓән пӑ мӑтсәӈән.
GEN 34:27 Иаков пŏхәт пӑратәм ŏтәт хŏща йŏхәтсәт пӑ тынәӈ пŏрмасәт пӑтән ўсԓаԓ, ԓыв апщеԓ атәм вера питәԓтәм урәӈән.
GEN 34:28 Мис тащәт, ош тащәт пӑ осёл войԓаԓ ԓывиԓаԓа воштәсԓаԓ, мўй вошән ус, мўй щӑхәрән ус, иса ўсԓаԓ;
GEN 34:29 пӑ хŏԓ ԓыв тащԓаԓ, пӑ хŏԓ ԋаврэмԓаԓ, пӑ ԓыв нэԓаԓ ԋӑрэмәман тусԓаԓ, пӑ пŏрмасәт, хотәтән мўй ус, иса пӑтән тусԓаԓ.
GEN 34:30 Щӑԓта Иаков Симеон пӑ Левий пеԓа йастәс: «Нын мӑнэм атәм вера пайәтсәԓән, тӑм мўв хŏйатәтән, ханаан йохән пӑ ферез йохән, ԉикән этты питԓайәм. Ма шимәԓ хŏйат тӑйԓәм; ԓыв ийӑха ӑктәщԓәт, ԉаԉән йŏхәтԓәт пӑ хотэм пиԓән пӑратԓайув».
GEN 34:31 Ԓын пӑ йŏхԓы йастәстән: «Мўӈ апщев уԉԋа нэӈа тӑйты рӑхәԓ мўй?»
GEN 35:1 Турәм Иакова йастәс: «Ԓойа, Вефиля мӑна пӑ щита уԓа, пӑ йирасты нŏрәм щита Мӑнэма вера, нӑӈ хŏщайэн этԓыйәм Турмена, хун нӑӈ пӑ Исав эԓты, нӑӈ йайән эԓты, хŏнтасән».
GEN 35:2 Ԓўв хот тэԓәԓа пӑ ԓўв пиԓәԓән уԓәм ŏтԓаԓа Иаков йастәс: «Ин тӑйты па мир ԓуӈхәт вŏщкаԓән, сыстамтыйаты, пӑ па сŏх ԓумтаты;
GEN 35:3 ԓойԓув пӑ Вефиля мӑнԓув; щита Турма йирасты нŏрәм ма верԓәм, Хŏй мӑнэм шука питәм хӑтԓэмән хуԓтсәԓы пӑ йушән, хŏта ма йӑхсәм, ма пиԓэмән ус».
GEN 35:4 Щӑԓта тӑйәм па мир ԓуӈхәт пӑ пӑԓән тӑйәм пӑԓрунтәт ԓыв Иакова хŏԓ мӑсԓаԓ, щи пŏрмасәт Сихем пўӈәԓән уԓты дуб йўх иԓпийән Иаковән мўва шависайәт.
GEN 35:5 Щӑԓта ԓыв мӑтсәт. Пӑ ван вошәтән Турәм эԓты пӑԉщәм ус, пӑ щишән Иаков пŏхәт ӑт ԋухәԓсайәт.
GEN 35:6 Иаков Ханаан мўвән уԓты Луз воша йŏхтәс, щит Вефиль, ԓўв пӑ ԓўв пиԓәԓән уԓәм хŏйатәт.
GEN 35:7 Щита йирасты нŏрәм верәс, пӑ щи тӑха нэмәтсәԓы: Эл-Вефиль, щита ԓўв хŏщайәԓ Турәм этԓыйәс, хун ԓўв йайәԓ эԓты хŏнтас.
GEN 35:8 Щӑԓта Девора пӑрәс, Ревекка эсәмән ԓаптәм ими, Вефиль эԓты ныкԓы дуб йўх иԓпийән ԓўв лоттәман уԓ пӑ щи йўх Иаковән «Хŏԓԓәп дуб йўха» нэмәтса.
GEN 35:9 Месопотамия эԓты Иаков йŏхәтмаԓ йўпийән Турәм ԓўв хŏщайәԓ па этәс пӑ ԓўвеԓ йӑмән мӑсԓы;
GEN 35:10 пӑ Турәм ԓўвеԓа йастәс: «Нӑӈ нэмен Иаков; тӑԓта йэԓԓы Иаков нэм тӑйты нӑӈ ӑт питԓән, нӑӈ нэмен питәԓ Израиль». Пӑ Израиль нэмән ԓўвеԓ мӑсԓы.
GEN 35:11 Пӑ Турәм ԓўвеԓа йастәс: «Ма Иса Верәтты Турәм; рутма пӑ ара йўва; мир пӑ ар мир нӑӈ эԓтэн питәԓ, хонәт нӑӈ эԓтэн этԓәт;
GEN 35:12 Авраама пӑ Исаака мийәм мўв Ма нӑӈена мӑԓэм, нӑӈ тыхԓэна тӑм мўв па мӑԓэм».
GEN 35:13 Щӑԓта щита пŏтәрттәм тӑхайәԓ эԓты Турәм нŏх эԓԓәс.
GEN 35:14 Турәм ԓўв пиԓәԓән пŏтәртәм тӑхайән Иаков нумты кев ԓоԋщәс, щи нумты кев йир йўкана ўнайән шошәпсәԓы, пӑ оливка вŏйән шошәпсәԓы.
GEN 35:15 Щи тӑха, хŏта Турәм ԓўв пиԓәԓән пŏтәртәс, Иаков нэмәтсәԓы: Вефиль.
GEN 35:16 Щӑԓта Вефиль эԓты йэԓԓы мӑтсәт. Ефрафа унты йэша ӑт йŏхәтмеԓән, Рахиль ԋаврэм сэма пайтәс, щи верәԓ шек ԓавәрт ус.
GEN 35:17 Хун ԓўв шукащәс, ԋаврэмәԓ пўкән эвтәм ими ԓўвеԓ йастәс: «Аԓ пӑԓа, пŏхән па йŏхәтсайән».
GEN 35:18 Ԓыԓ шўвәԓ мӑнмаԓән, пӑрты ўша йŏхәтмаԓән, Рахиль ԓўвеԓ нэмән мӑсԓы: «Бенони». Ащеԓән пӑ Вениамина нэмәтса.
GEN 35:19 Пӑ Рахиль пӑрәс, пӑ Ефрафа, щит Вифлеем пеԓа мӑнты йуш пўӈәԓән ԓўв лоттәса.
GEN 35:20 Ԓўвеԓ лоттәм тӑхайән Иаков нумты кев ԓоԋщәс. Щит Рахиль нумты кев тӑм хӑтәԓ унты уԓ.
GEN 35:21 Израиль йэԓԓы мӑнәс пӑ Гадер тащ ватты пӑԓ хот сайән пирщин хотәԓ ԓощсәԓы.
GEN 35:22 Израиль щи мўвән уԓмаԓ сыс Рувим пŏхәԓ ащеԓ Валла ай нэ пиԓән уԓмаԓ. Израиль щит эԓты хуԓтсәԓы. Иаков кӑтхŏщйаӈ пŏх тӑйәс.
GEN 35:23 Лия пŏхәт: Иаков оԓәӈ пŏхәԓ Рувим, ԓўв йўпеԓән Симеон, Левий, Иуда, Иссахар пӑ Завулон.
GEN 35:24 Рахиль пŏхәт: Иосиф пӑ Вениамин.
GEN 35:25 Валла, Рахиль митнэ, пŏхәт: Дан пӑ Неффалим.
GEN 35:26 Зелфа, Лия митнэ, пŏхәт: Гад пӑ Асир. Щит Иаков пŏхәт Месопотамия мўвән сэма питсәт.
GEN 35:27 Щӑԓта Иаков Исаак ащеԓ хŏща йŏхтәс, Мамре, Кириаф-Арба хŏща, щит Хеврон, хŏта Авраам пӑ Исаак па мўв эԓты йŏхтәм ŏтәта усәт.
GEN 35:28 Иуԓтыйа Исаак уԓәм нуптәԓ сот ԋийәԓйаӈ тӑԓ ус.
GEN 35:29 Пирщамәм пӑ йӑмәс уԓмаԓ йўпийән, Исаак пӑрәс, пӑрәм ŏтԓаԓ хŏща мӑнәс; Исав пӑ Иаков пŏхӈиԓаԓән иԓ ԓэщатса.
GEN 36:1 Тӑм Исав тыхәԓ тэԓ, Едом ищи ԓўв.
GEN 36:2 Исав Ханаан мўв эвет эԓты нэӈәт ўс: Елон нэмпи хет ики Ада эвеԓ, пӑ Цивеон нэмпи ев ики Ана пŏхәԓ эви Оливема,
GEN 36:3 Пӑ Васемафа, Измаил эви, Наваиоф апщи.
GEN 36:4 Ада Исав эԓты Елифаз сэма пайтәс, Васемафа Рагуил сэма пайтәс,
GEN 36:5 Иеус, Иеглом пӑ Корей Оливема сэма пайтәс. Щит Ханаан мўвән сэма питәм Исав пŏхәт.
GEN 36:6 Щӑԓта Исав имиԓаԓ, пŏхԓаԓ, эвиԓаԓ пӑ хотәԓ хŏйатәт пӑ Ханаан мўвән шитәм тащԓаԓ хŏԓ ўсԓы, пӑ хŏԓ войԓаԓ, пŏрмасԓаԓ пиԓән па мўва мӑнәс, Иаков апщеԓ эԓты йэԓшәк,
GEN 36:7 ԓын шек ар тащ тӑйсәтән, йӑха уԓты ӑт верәтсәтән, уԓты йŏхтәм мўвән хŏща тащԓын ӑт ԓэпсәт, ар тащ тӑйман урәӈән.
GEN 36:8 Исав, Едом ищи ԓўв, Сеир кевәӈ мўв хŏща уԓты питәс.
GEN 36:9 Тӑм Исав тыхәԓ тэԓ, едом йох ащи, Сеир кевәӈ мўв хŏща.
GEN 36:10 Тӑм Исав пŏхԓаԓ нэмәт: Елифаз, Исав Ада имеԓ пŏх, Рагуил, Исав Васемафа имеԓ пŏх.
GEN 36:11 Елифаз пŏхәт тӑйәс: Феман, Омар, Цефо, Гафам пӑ Кеназ.
GEN 36:12 Исав пŏх Елифаз Фамна ай нэ тӑйәс. Ԓўв Елифаза Амалик пŏх тӑйәс. Тӑми Исав Ада имеԓ йэԓԓы уԓты ԋаврэмәт.
GEN 36:13 Тӑм пӑ Рагуил пŏхәт: Нахаф пӑ Зерах, Шамма пӑ Миза. Щит Исав Васемафа имеԓ йэԓԓы уԓты ԋаврэмәт.
GEN 36:14 Тӑм Исав Оливема имеԓ пŏхәт, Цивеон ики Ана пŏхәԓ эви: ԓўв Исава Иеус, Иеглом пӑ Корей тӑйәс.
GEN 36:15 Тӑм Исав йэԓԓы уԓты ԋаврэмәт кўтән ун икет. Исав оԓәӈ пŏхәԓ Елифаз пŏхәт: ун ики Феман, ун ики Омар, ун ики Цефо, ун ики Кеназ.
GEN 36:16 Ун ики Корей, ун ики Гафам, ун ики Амалик. Щит Елифаз хот ун икет Едом мўвән; щит Исав Ада имеԓ йэԓԓы уԓты ԋаврэмәт.
GEN 36:17 Тӑм Исав пŏх Рагуил пŏхәт: ун ики Нахаф, ун ики Зерах, ун ики Шамма, ун ики Миза. Щит Рагуил ун икет Едом мўвән; щит Исав Васемафа имеԓ йэԓԓы уԓты ԋаврэмәт.
GEN 36:18 Тӑм Исав ими Оливема пŏхәт: ун ики Иеус, ун ики Иеглом, ун ики Корей. Щит Исав ими Оливема, Ана ики эви, эԓты уԓәм ун икет.
GEN 36:19 Тӑм Исав пŏхәт, пӑ ԓыв ун икиԓаԓ. Щит Едом хот.
GEN 36:20 Тӑм пӑ щи мўвән уԓәм Сеир нэмпи хоррей ики пŏхәт: Лотан, Шовал, Цивеон, Ана,
GEN 36:21 Дишон, Эцер пӑ Дишан. Щит хоррей йох ун икет, Сеир пŏхәт, Едом мўвән.
GEN 36:22 Лотан пŏхәт усәт: Хори пӑ Геман; Лотан нэ апщи: Фамна.
GEN 36:23 Тӑм Шовал пŏхәт: Алван, Манахаф, Эвал, Шефо пӑ Онам.
GEN 36:24 Тӑм Цивеон пŏхәт: Аиа пӑ Ана. Тӑм щи Ана, хŏй хошәм йиӈкәт таԓ хишәӈ мўвән уйтәс, хун Цивеон ащеԓ осёл войәт шавийәс.
GEN 36:25 Тӑм Ана ики ԋаврэмәт: Дишон пӑ Оливема, Ана ики эви.
GEN 36:26 Тӑм Дишон пŏхәт: Хемдан, Эшбан, Ифран пӑ Херан.
GEN 36:27 Тӑм Эцер пŏхәт: Билган, Зааван пӑ Акан.
GEN 36:28 Тӑм Дишан пŏхәт: Уц пӑ Аран.
GEN 36:29 Тӑм хоррей йох ун икет: ун ики Лотан, ун ики Шовал, ун ики Цивеон, ун ики Ана,
GEN 36:30 ун ики Дишон, ун ики Эцер, ун ики Дишан. Тӑм хоррей йох ун икет пӑ щит ԓыв рутԓаԓ нэмәт Сеир мўвән.
GEN 36:31 Тӑм хонәт Едом мўвән хонәта усәт, израиль йох хŏща хонәт этәм йӑм йэԓпийән.
GEN 36:32 Едомән хона Бела ус, Веор пŏх, ԓўв вошәԓ нэм Дингава.
GEN 36:33 Щӑԓта Бела пӑрәс, Иовав ԓўв йўпеԓән хона питәс, Зерах пŏх, Восор эԓты.
GEN 36:34 Иовав пӑрәс, Хушам ԓўв йўпеԓән хона питәс, Феман мўв эԓты.
GEN 36:35 Хушам пӑрәс, Гадад ԓўв йўпеԓән хона питәс, Бедад пŏх, ԓўв мадиан йох Моав мўв хӑрән ԉаԉән нŏх питсәԓы; Гадад вошәԓ нэм Авиф.
GEN 36:36 Гадад пӑрәс, Самла ԓўв йўпеԓән хона питәс, Масрека эԓты.
GEN 36:37 Самла пӑрәс, ԓўв йўпеԓән Саул хона питәс, ԓўв йŏхан пўӈәԓән омәсты Реховоф вош эԓты ус.
GEN 36:38 Саул пӑрәс, Баал-Ханан, Ахбор пŏх, ԓўв йўпеԓән хона питәс.
GEN 36:39 Баал-Ханан, Ахбор пŏх, пӑрәс, щӑԓта Гадар ԓўв йўпеԓән хона питәс; ԓўв вошәԓ нэм Пау; имеԓ нэм Мегетавеель, Мезагав ики Матреда пŏхәԓ эви.
GEN 36:40 Тӑм Исав эԓты мӑнәм ун икет нэмәт, рутԓаԓ щирән, мўвԓаԓ щирән, нэмԓаԓ щирән: ун ики Фимна, ун ики Алва, ун ики Иетеф,
GEN 36:41 ун ики Оливема, ун ики Эла, ун ики Пинон,
GEN 36:42 ун ики Кеназ, ун ики Феман, ун ики Мивцар,
GEN 36:43 ун ики Магдиил, ун ики Ирам. Тӑм Едом мўв ун икет, вошԓаԓ щирән, ԓыв йошԓаԓән тӑйәм мўвеԓән. Щит иса Исав эԓты, едом йох ащи эԓты, мӑнәм рут.
GEN 37:1 Иаков Ханаан мўвән ус, хŏта ащеԓ па мўв эԓты йŏхтәм ŏта ус.
GEN 37:2 Тӑм Иаков рут уԓәпса эԓты пŏтәр. Ԓапәтхŏщйаӈ тӑԓ ԓŏват энәмты пŏх Иосиф тащ шавиман йайԓаԓ пиԓән йӑӈхәс, ащеԓ имеӈӈән пŏхәт пиԓән, Валла пŏхәт пӑ Зелфа пŏхәт пиԓән. Ащеԓа Иосиф йайԓаԓ эԓты пŏләщ тутԓыман йӑӈхәс.
GEN 37:3 Йайԓаԓ кўтән Иосиф пŏхәԓ Израиль мет сӑма мосман тӑйсәԓы, ԓўв пирщамәмаԓән щи пŏхәԓ сэма питәс, щишән, хŏрамәӈ сŏхән ԓўвеԓ версәԓы.
GEN 37:4 Йайԓаԓән мŏштәса, ащеԓ ԓўвеԓ пŏхԓаԓ кўтән мет сӑма мосман тӑйԓәԓы; Иосиф ԉикән этты питсэԓ пӑ йӑм щирән ԓўв пиԓәԓән пŏтәртты ӑт верәтсәт.
GEN 37:5 Ипуш Иосиф уԓәм вантәс, пӑ йайԓаԓа пŏтәртсәԓы; щи йўпийән мет такан ԉикән этты питса.
GEN 37:6 Ԓўв ԓывиԓаԓа йастәс: «Ма вантәм уԓмем хуԓәнтаты:
GEN 37:7 ԋаԋ тŏрән энәмты хӑр кўтәпән мўӈ ԋаԋ тŏрән мŏнталэт йӑрԓув; пӑ ма йӑрәм ԋаԋ тŏрән мŏнталэм нŏх ԓойәс пӑ тўӈа ԓойәс, нын ԋаԋ тŏрән мŏнталыԓән пӑ керәтман ԓойсәт пӑ ма йӑрәм ԋаԋ тŏрән мŏнталэм пеԓа, ŏх пŏнман, иԓ ԋўрсәт».
GEN 37:8 Йайԓаԓ ԓўвеԓа йастәсәт: «Нӑӈ мўй мўӈ нўмпевән хона питԓән? Мўӈ мўй нӑӈ иԓпенән питԓув?» Щи уԓмәԓ пӑ йасәӈԓаԓ урәӈән мет таканшәк ԉикән этты питса.
GEN 37:9 Щӑԓта кимет уԓәм па вантәс, йайԓаԓа пŏтәртсәԓы, щиты йастәс: «Щиты ус, ма уԓәм па ватсәм: хӑтәԓ пӑ тыԓәщ пӑ ихŏщйаӈ хус ма шŏмайэм, ŏх пŏнман, иԓ ԋўрсәт».
GEN 37:10 Ащеԓа пŏтәртсәԓы пӑ йайԓаԓа ищи; ащеԓән ԉавәттәса пӑ йастәса: «Мўй щимәщ уԓәм нӑӈ ватсән? Мўй щирән ма пӑ нӑӈ аԋԏэн, пӑ нӑӈ йайԓан нӑӈ йэԓпенән мўв унты, ŏх пŏнман, иԓ ԋўрты йŏхәтԓув?»
GEN 37:11 Йайԓаԓ ԓўв пеԓайәԓ ўшмащсәт, ащеԓән пӑ щи йасәӈ ӑт йŏрэмәса.
GEN 37:12 Йайԓаԓ Сихем вош ԉэпән ащеԓ тащ шависәт.
GEN 37:13 Израиль Иосифа йастәс: «Йайԓан ӑԓт Сихемән тащ шавиԓәт? Йӑӈха, ма нӑӈен ԓыв хŏщайэԓ китԓэм». Ԓўв йастәс: «Йӑна щи, ма йӑхԓәм».
GEN 37:14 Израиль ԓўвеԓа йастәс: «Йӑӈха, ванты, йайԓан тўмтакәт мўй пӑ тащеԓ тӑԓаӈ мўй, пӑ айкеԓ мӑнэма тўва». Хеврон лот мўв эԓты ԓўвеԓ китсәԓы; ԓўв пӑ Сихема йŏхтәс.
GEN 37:15 Щита мўв хӑрән ԓўв тӑпәс пӑ ԓўвеԓ уйтәм хŏйатән иԋщәсса: «Мўй нӑӈ кӑшԓән?»
GEN 37:16 Ԓўв йастәс: «Ма йайԓам кӑшԓәм, мӑнэма йасты, хŏта ԓыв тащ шавиԓәт?»
GEN 37:17 Щи хŏйат йастәс: «Ԓыв тӑԓта мӑтсәт, ма хуԓтсэм, хŏты ԓыв пŏтәртсәт: ‘Дофана мӑнԓув’». Щиты Иосиф йайԓаԓ йуш хўват мӑнәс, пӑ Дофан вош ԉэпән ԓывиԓаԓ уйәтсәԓы.
GEN 37:18 Ԓыв хўвәԓта ԓўвеԓ кащаԓәсэԓ, пӑ ԓўв вана йитаԓ сыс, ԓыв нумәсты питсәт, хŏты ԓўвеԓ веԓты.
GEN 37:19 Щӑԓта ԓыв кўтэԓән йастәсәт: «Уԓәм вантәм ŏт йиԓ;
GEN 37:20 ин мӑнԓув пӑ ԓўвеԓ веԓԓэв, мӑтты мўв ўса йўвәтԓэв, пӑ йастәԓув, ут войән ԓэса; щи пŏрайән ватԓэв, ԓўв уԓәмԓаԓ мўйа йиԓәт».
GEN 37:21 Щит Рувим йайәԓән хуԓса пӑ атәм нŏмәсԓаԓ эԓты ԓўвеԓ шависԓы, пӑ щиты йастәс: «Ԓўвеԓ ӑт веԓԓэв».
GEN 37:22 Рувим ԓывиԓаԓа йастәс: «Ўр ӑԓ шошматы; тӑм мўв ўса таԓ йикԓы мўвән йўвтаԓән, туп йошән аԓ кетмаԓән». Щиты ԓўв пŏтәртәс, ԓыв йошԓаԓ эԓты ԓўвеԓ шавиты пӑ ащеԓ хŏща ԓўвеԓ йŏхтәптәты урәӈән.
GEN 37:23 Иосиф йайԓаԓ хŏща йŏхәтмаԓән, ԓыв ԓўв хŏрамәӈ сŏхәԓ ԓўв эԓтэԓ нŏх менәпсэԓ,
GEN 37:24 пӑ ԓўвеԓ ўсэԓ пӑ мўв ўса йўвәтсэԓ; щи мўв ўс таԓ ус, йик щита ӑнтом ус.
GEN 37:25 Ԓыв пӑ ԓэты омәссәт, пӑ ӑӈкәртмеԓән, кащаԓәсэԓ, хŏты Галаад мўв эԓты измаил йох онас йиԓ, йӑма авты стиракс йўх ух, бальзам пӑ ладан пŏрмасәт верблюдәт туԓәт: Египет мўва щит тўвман мӑнԓәт.
GEN 37:26 Щӑԓта Иуда йайԓаԓа йастәс: «Мўй ŏнтас, апщев пӑратԓэв пӑ ԓўв ўрәԓ хӑԋатԓэв?
GEN 37:27 Мӑнԓув пӑ измаил йоха ԓўвеԓ тыныԓэв, мўӈ йошԓувән ԓўвеԓ ӑт кетәмԓэв, ищипа ԓўв мўӈ апщев, ищи мўӈ ўрэв». Йайԓаԓ ԓўв пеԓайәԓ хўԓтмәсәт.
GEN 37:28 Хун Мадиан мўвәӈ тынасты йох ванамәсәт, йайԓаԓ мўв ўс эԓты Иосиф нŏх таԓсэԓ пӑ измаил йоха хус щел ŏх сӑхат тынысэԓ; ԓыв пӑ Иосиф Египта тусэԓ.
GEN 37:29 Рувим щи мўв ўс хŏща па йŏхтәс; пӑ Иосиф мўв ўсән ӑнтом. Щит кащаԓәмаԓ кемән, ԓўв ԓўмтәмԓаԓ мӑншисԓы,
GEN 37:30 апщиԓаԓ хŏща йŏхԓы йŏхтәс пӑ йастәс: «Энәмты пŏхев ӑнтом, ма пӑ, хŏԓта ма мӑнԓәм?»
GEN 37:31 Ԓыв Иосиф сŏх ўсэԓ, козёл вой хŏрсэԓ пӑ щи ўрән сŏхәԓ ԋŏсәтсэԓ;
GEN 37:32 щӑԓта щи хŏрамәӈ сŏх ащеԓа китсэԓ, пӑ йастәсәт: «Мўӈ тӑм уйәтсув; ванты, нӑӈ пŏхен сŏх мўй пӑ ӑнтом?»
GEN 37:33 Ԓўв сŏхәԓ мŏштәсԓы пӑ йастәс: «Тӑм ма пŏхем сŏх; ут войән ԓўв ԓэса; аԓт пӑ Иосиф войәтән лакки мӑншиса».
GEN 37:34 Иаков ԓўмтәмԓаԓ мӑншисԓы, уԓттӑхты хир хŏрпи сох ӑтпәԓа ԓумтәс пӑ ар хӑтәԓ пŏхәԓ эԓты хоԓԓәс.
GEN 37:35 Эвиԓаԓ, пŏхԓаԓ хŏԓ ӑктәщсәт, ԓўвеԓ щаԉәтты урәӈән; ԓўв пӑ хуԓәтты ӑт ԓӑӈхас пӑ йастәс: «Тӑмиты хощман пŏхем хŏща иԓта турма мӑнԓәм». Щиты ащеԓ ԓўв эԓтэԓ хоԓԓәс.
GEN 37:36 Иосиф пӑ Мадиан мўв хŏйатәтән Египет мўвән Потифар нэмпи ун кущайа тыныса, фараон шавиты йох кущайа.
GEN 38:1 Щи артән Иуда йайԓаԓ хӑйсәԓы пӑ Хира нэмпи хŏйат пўӈәԓән Одоллам вошән уԓты питәс.
GEN 38:2 Щита Иуда Шуа нэмпи ханаан ики эви кащаԓәс: ԓўвеԓ нэӈа тусԓы.
GEN 38:3 Щи нэ ԓавәрта йис пӑ пŏх тӑйәс, пӑ Иуда ащеԓән Ир нэмән мӑса.
GEN 38:4 Щӑԓта па ԓавәрта йис пӑ па пŏх тӑйәс, пӑ Онан нэмән ԓўвеԓ мӑсԓы.
GEN 38:5 Щӑԓта пŏх па тӑйәс пӑ Шела нэмән ԓўвеԓ мӑсԓы. Иуда пӑ, ԓўв пŏхәԓ сэма пайәтмаԓән, Хезив вошән ус.
GEN 38:6 Щӑԓта Иуда Ир нэмпи оԓәӈ пŏхәԓ нэӈән тусԓы; Фамарь нэмәԓ.
GEN 38:7 Туп Ир, Иуда оԓәӈ пŏхәԓ, Турәм Куща йэԓпийән ар кӑрэк тӑйәс, щишән, Турәм Кущайән сŏрма пайәтса.
GEN 38:8 Щишән, Иуда Онан пŏхәԓа йастәс: «Йайән ими нэӈа ўйи, ԓэху щирән, пӑ йайән тыхәԓ йэԓԓы тўви».
GEN 38:9 Онан уйәтсәԓы, щит ӑнта ԓўв тыхԓәԓ питәԓ, щишән, йайәԓ ими пиԓән щиты ус, йайәԓ тыхәԓ йэԓԓы ӑт ат рутмәс.
GEN 38:10 Турәм Куща йэԓпийән мўй ԓўв верәс, атәм ус; пӑ Ԓўв ԓўвеԓ ищи сŏрма пайәтсәԓы.
GEN 38:11 Щӑԓта Иуда Фамарь меԋәԓ пеԓа йастәс: «Шела пŏхем энәмты унты ащен хотән шукаԓт имийа уԓа». Щиты Иуда нумәсәс: «Йайԓаԓ иты Шела ӑт ат ԓуԓән пӑрәс». Фамарь мӑнәс пӑ ащеԓ хотән уԓты питәс.
GEN 38:12 Хўв кўт хӑщәс пӑ Иуда имеԓ, Шуа ики эви, пӑрәс. Иуда, хӑтәԓԓаԓ тӑрмәм йўпийән, Фамна воша мӑнәс, хŏта ошԓаԓ ԓŏртты хŏйатәт усәт, ԓўв пиԓәԓән Одоллам эԓты Хира нэмпи ԓухсәԓ ус.
GEN 38:13 Фамарь айкеԓән верса: «Ўпән ики Фамна воша ош ԓŏртты мӑнәԓ».
GEN 38:14 Ԓўв шук туты сŏхԓаԓ эхсәԓы, ŏхшам пŏнәс пӑ щиты йэмәԓман Фамна пеԓа мӑнты йушән, Енаим вош ов хŏща опсәс. Ԓўв уйәтсәԓы, Шела энмәс, ԓўв пӑ ԓэхуйәԓа ӑт опсәԓса.
GEN 38:15 Иуда ԓўвеԓ кащаԓәсԓы пӑ вешәԓ хӑԋатмаԓ урәӈән, уԉԋа нэӈа йўкатсәԓы.
GEN 38:16 Ԓўв хŏщайәԓ йирэмәс пӑ йастәс: «Нӑӈ хŏщайэн рӑхәԓ ԓŏӈтыты?» Ԓўв ӑт уйәтсәԓы, щит ԓўв меԋәԓ ус. Фамарь пӑ ԓўвеԓ ищмәсԓы: «Ма хŏщайэм ԓŏӈтытэн мита мўй нӑӈ мӑнэма мӑԓән?»
GEN 38:17 Ԓўв йастәс: «Ма нӑӈена ма тащем эԓты ош пŏшәхән китԓэм». Ԓўв пӑ йастәс: «Киттэн унты мŏԓты пŏрмас щи йўкана хӑйԓән?»
GEN 38:18 Иуда йастәс: «Мўй хŏрпи йўкан нӑӈена мӑты?» Ԓўв пӑ йастәс: «Нӑӈ йŏра кеԓәӈ посэн пӑ йошән тӑйты шушты сўвен». Иуда щит ԓўвеԓа мӑсԓы пӑ ԓўв хŏщайәԓ ԓŏӈәс; ԓўв эԓтэԓ Фамарь ԓавәрта йис.
GEN 38:19 Щӑԓта ԓўв ԓŏйәс пӑ мӑнәс, тӑйәм ŏхшамәԓ эхсәԓы пӑ шук туты сŏхԓаԓ па ԓумәтсәԓы.
GEN 38:20 Иуда Одоллам эԓты уԓты ԓухсәԓ пиԓән ош пŏшәх китәс, нэ хŏща хӑйәм пŏрмасәт нŏх ўты урәӈән, туп ԓўв щи нэ ӑт уйәтсәԓы.
GEN 38:21 Шŏши хŏйатәт эԓты иԋщәссәԓы: «Хŏта щи уԉԋа нэ, хŏй Енаим йуш пўӈәԓән опсәс?» Ԓыв йастәсәт: «Тӑта уԉԋа нэ ӑнтом ус».
GEN 38:22 Ԓўв Иуда хŏща йŏхтәс пӑ йастәс: «Ма ԓўвеԓ ӑт уйәтсэм; пӑ щита уԓты шŏши хŏйатәт йастәсәт: ‘Тӑта уԉԋа нэ ӑнтом ус’».
GEN 38:23 Иуда йастәс: «Ԓўв йўканәԓа ат ўԓԓы, туп ԋӑха ӑт ат пайәтсаймән; ма тӑм ош пŏшәхән щи китыԓысэм, нӑӈ пӑ ԓўвеԓ ӑт уйәтсэн».
GEN 38:24 Хуԓәмԓэм тыԓәщ хӑщәс пӑ Иуда айкеԓән верса: «Фамарь меԋән уԉԋайа уԓты питмаԓ пӑ нэ щирән кӑшаӈа уԓ». Иуда йастәс: «Йэԓ ԓўвеԓ тўваԓән пӑ нŏх ат ўщитԓа».
GEN 38:25 Хун ԓўв туты питса, ўпәԓ икийа щимәщ йасәӈ китәс: «Тӑм пŏрмасәт тӑйәм хŏйат эԓты ма ԓавәрта йисәм». Пӑ йастәс: «Мŏштәԓэн, тӑм хŏй йŏра кеԓәӈ пос пӑ шушты сўв?»
GEN 38:26 Иуда мŏштәсԓы пӑ йастәс: «Ԓўв ма эԓтэм вещкатшәк, щит ма ԓўвеԓ Шела пŏхема ӑт мӑсэм». Ԓўв хŏщайәԓ па ӑт ԓŏӈтыйәс.
GEN 38:27 Щӑԓта ԋаврэм сэма питты хӑтәԓән ԓэрамәс, ԓўв нэш пӑтлам хотән пиԓаӈ ŏтӈән тӑймаԓ.
GEN 38:28 Ԋаврэмӈән сэма питәмән, оԓәӈән итәԓ йош этәс; пўкән эвтәм ими ўрты сŏхәмән йошәԓ йӑрәпсәԓы, йастәман: «Тӑмен оԓӈа этәс».
GEN 38:29 Ԓўв пӑ йошәԓ йŏхԓы сухтәсԓы; пӑ йайәԓ оԓӈа этәс. Ԓўв йастәс: «Мўй щирән нӑӈ йуш версән?» Щишән Фарес нэмән мӑса.
GEN 38:30 Йухәт ўрты сŏхәмән йӑрәм йŏшәӈ апщеԓ этәс. Ԓўв нэмән мӑса: Зара.
GEN 39:1 Иосиф пӑ Египта тўвман ус, ԓўвеԓ тўвәм измаил йŏх йош эԓты фараон шавиты йох кущайән, Потифар нэмпи кущайән, Египет мўв хуйән, ԓутса.
GEN 39:2 Турәм Куща Иосиф пиԓән ус: ԓўв верԓаԓ йӑма мӑтсәт пӑ Потифар, Египет мўв ху кущайәԓ хотән ус.
GEN 39:3 Кущайәԓән мŏштәса, Турәм Куща ԓўв пиԓәԓән уԓ, мўй ԓўв ӑт верәԓ, ԓўв верты верԓаԓән Турәм Куща ԋотәԓ.
GEN 39:4 Щиты Иосиф Потифарән ванән тӑйты питса пӑ ԓўв йŏра митхуйәԓа йис. Щӑԓта ԓўвеԓ хотәԓ кущайа пŏтсәԓы пӑ мўй тӑйәс, иса ԓўв йошәԓа мӑсԓы.
GEN 39:5 Хот кущайа ԓўвеԓ пŏнмаԓ ўш эԓты пӑ иса тӑйәм ŏтәԓ ԓўв йошәԓа миймаԓ йўпийән, Иосиф урәӈән Египет мўв ху хот Турәм Куща йӑмән мӑсԓы, щишән, Турәм Куща йӑм ԓўв хотәԓән пӑ мўв хӑрәԓән тӑйәм ŏтәԓ хŏща иса ус.
GEN 39:6 Щишән, ԓўв, мўй тӑйәс, иса Иосиф йоша мӑсԓы, нэмәԓты эԓты ӑт нумәсәс, ԓўвеԓа йŏра ԓэтŏт верты тўмпийән. Иосиф хŏрасәӈ пӑ ԓŏватәӈ ус.
GEN 39:7 Щишән, кущайәԓ ими Иосиф пеԓа ватты питәс пӑ йастәс: «Ма пиԓэмән уԓа».
GEN 39:8 Ԓўв пӑ ӑт кашащәс пӑ кущайәԓ ими пеԓа йастәс: «Тӑта щи, кущайэм мўй тӑйәԓ, ма йошема мӑсԓы, нэмәԓты эԓты ӑт нумәсәԓ;
GEN 39:9 тӑм хотән ма эԓтэм уншәк ŏт ӑнтом; тӑм хотән нӑӈ тўмпенән мӑнэма ӑт рӑхты вер ӑнтом, нӑӈ ԓўв имеԓ; мўй щирән ма щимәщ атәм вер верԓәм пӑ Турма кӑрэк верԓәм?»
GEN 39:10 Кашәӈ хӑтәԓ кўш нэ щиты Иосифа пŏтәртәс, Иосиф ӑт хуԓәнтәс ԓўв пиԓәԓән уԓты.
GEN 39:11 Имŏԓты хӑтәԓән ԓўв верәԓ сӑхат хота ԓŏӈәс, щита хотәӈ ŏтәт эԓты нэмәԓт хŏйат ӑнтом ус;
GEN 39:12 щи нэ ԓумтәм сŏхәԓ эԓты ԓўвеԓ катәԓсәԓы пӑ йастәс: «Ма пиԓэмән уԓа». Иосиф пӑ, сŏхәԓ ԓўв йошәԓән хӑйман, ким хухәԓмәс.
GEN 39:13 Нэ пӑ, щит кащаԓәмаԓ кемән, хун сŏхәԓ ԓўв йошәԓән хӑщәс пӑ Иосиф ким хухәԓмәс,
GEN 39:14 хотәӈ ŏтԓаԓ ўваԓсәԓы пӑ ԓывиԓаԓа щиты йастәс: «Вантаты, Потифар мўӈев еврей тўвмаԓ пӑ щитэн мўӈ хŏщайэв йŏвәртыйәԓ. Щи еврей ма хŏщайэм йŏхтәс, ма пиԓэмән уԓты ўтщийәс, ма пӑ сыйәӈ тўрән ўваԓтсәм;
GEN 39:15 ԓўв пӑ, хўԓтмәмаԓән, хŏты ма ўваԓтсәм, сŏхәԓ ма хŏщайэм хӑйсәԓы пӑ ким хухәԓмәс».
GEN 39:16 Щиты Потифар йŏхи йŏхәтты унты Иосиф сŏх щи нэ ԓўв хŏщайәԓ хӑйсәԓы.
GEN 39:17 Ԓўвеԓа ищи щи йасӈәт пŏтәртәс, йастәман: «Нӑӈ тўвәм еврей митхуйэн ма хŏщайэм йŏвәртыты йŏхтыԓыйәс;
GEN 39:18 хун ма ўвты питсәм, ԓўв сŏхәԓ ма хŏщайэм хӑйсәԓы пӑ ким хухәԓмәс».
GEN 39:19 Кущайәԓ имеԓ йасӈәт хуԓмаԓ йўпийән, хŏты ԓўв йастәс: «Щиты ма пиԓэмән нӑӈ митхуйэн верәс», ԓўв шек ԉикащәс;
GEN 39:20 щӑԓта кущайәԓән Иосиф касна хота омәсты партса, хŏта хон вера питәм ŏтәт усәт. Щита касна хотән ԓўв опсәс.
GEN 39:21 Турәм Куща Иосиф пиԓән ус, йӑм сэмән вантәс, щишән, касна хот куща ԓўв пеԓайәԓ ищи йӑм ус.
GEN 39:22 Касна хот куща щита опсәм вера питәм ŏтәт хŏԓ Иосиф йоша мӑсԓы, щишән, мўй ԓыв щита ӑт версәт, щи верәт хŏща ԓўв пӑ уна ус.
GEN 39:23 Касна хот куща Иосиф йошән тӑйты верәт эԓты нэмәԓты ӑт ԓэрамтәс, Турәм Куща Иосиф пиԓән ус, щишән мўй ԓўв верәс, Турәм Кущайән щи верәтән иса ԋотса.
GEN 40:1 Щи йўпийән хона ўнайәт ԓэщатты куща пӑ ԋаԋ верты куща Египет хонэԓ йэԓпийән, кущайэԓ йэԓпийән, вера питсәӈән.
GEN 40:2 Кӑт кущайӈәԓаԓ пеԓа фараон ԉикащәс, ўнайәт ԓэщатты куща пӑ ԋаԋ верты куща пеԓа,
GEN 40:3 пӑ ԓўвеԓ шавиты йохԓаԓ куща йоша ԓынан мӑсԓы, щи касна хота, хŏта Иосиф опсәс.
GEN 40:4 Шавиты йох куща ԓын хŏщайән Иосиф рупитты ԓэщатәс, пӑ ԓўв ԓынана рупитәс. Щиты касна хотән мŏԓты сыс ԓын устән.
GEN 40:5 Ипуш касна хотән, ўнайәт ԓэщатты куща пӑ ԋаԋ верты куща уԓмистән, кашәӈ ŏт ԓўв уԓмәԓ, кинтак и атән, кашәӈ ŏт ŏщхўԉ уԓәм вантәс.
GEN 40:6 Аԓәӈсӑхат Иосиф ԓын хŏщайән йŏхтәс, ԓынан кащаԓәсԓы, ԓын вешԓән рўтаԉӈән.
GEN 40:7 Фараон кущайӈән ԓўв ищмәсԓы, ԓўв пиԓәԓән кущайәԓ хотән уԓты касна хотән опсәм ŏтӈән пеԓа, щиты йастәс: «Мўйа нын тӑм хӑтәԓ вешԓән рўтаԉӈән?»
GEN 40:8 Ԓын ԓўвеԓа йастәсӈән: «Мин тӑм ат уԓмисмән; туп щи уԓәмӈән ԓӑрпитты хŏйат ӑнтом». Иосиф ԓынана йастәс: «Уԓәм ԓӑрпитты вер аԓт Турәм эԓты уԓ? Мӑнэм уԓәмԓән пŏтәртаԓән».
GEN 40:9 Хона ўнайәт ԓэщатты куща ԓўв уԓмәԓ Иосифа пŏтәртәс пӑ йастәс: «Уԓмитэмән, виноград ўна йўх ма йэԓпемән;
GEN 40:10 щи йўхән хуԓәм нўв; йўх энмәс, лыпәтән этса, щӑԓта щита виноград воԋщәм ŏтәт энәпсәт пӑ пŏшсәт;
GEN 40:11 фараон ан ма йошемән катәԓԓэм; виноград воԋщәм ŏтәт ма ўсәм пӑ фараон ан ԓыпийа пӑщәртсәԓам, пӑ фараон йоша ан мӑсэм».
GEN 40:12 Иосиф ԓўвеԓ йастәс: «Тӑта щи уԓмен ԓӑрпитты щир: хуԓәм нўв – щит хуԓәм хӑтәԓ;
GEN 40:13 хуԓәм хӑтәԓ хӑщты йўпийән фараон нӑӈен эсәԓԓәԓы пӑ рупитәм тӑхайэна омәсԓәԓы, нӑӈ пӑ фараон ан ԓўв йошәԓа мӑԓэн, йэԓпи иты, хун нӑӈ ԓўв хŏщайәԓ хона ўнайәт ԓэщатты кущайа усән;
GEN 40:14 хун нӑӈен йӑм питәԓ, ма эԓтэм нумәԓми пӑ, щи ԓŏват йӑм вера, фараона ма эԓтэм йаста, тӑм касна хот эԓты ким ат эсәԓсайәм;
GEN 40:15 ма еврейәт мўв эԓты йурән тусайәм; тӑта пӑ касна хотән омәсты урәӈән нэмәԓт атәм ӑт версәм».
GEN 40:16 Ԋаԋ верты куща кащаԓәсԓы, хŏты ԓўв уԓәм йӑма ԓӑрпитсәԓы пӑ Иосифа йастәс: «Ма ищи уԓмисәм: ŏхемән хуԓәм кураԋэк катәԓԓәм;
GEN 40:17 нўмпеләк кураԋэкән кӑмән хŏрпи фараон урәӈән ԓэты ԋаԋәт, ŏхемән омәсты кураԋэк эԓты щи ԓэтŏтәт тŏхԓәӈ войәтән нухԓайәт».
GEN 40:18 Пӑ Иосиф щиты йŏхԓы йастәс: «Тӑта щи уԓмен ԓӑрпитты щир: хуԓәм кураԋэк – щит хуԓәм хӑтәԓ;
GEN 40:19 хуԓәм хӑтәԓ хӑщты йўпийән фараон нӑӈ ŏхен хŏԓт сэвәрты партԓәԓы пӑ нӑӈен йўха нŏх сухтәԓԓы, тŏхԓәӈ войәтән эԓэн нухты питԓа».
GEN 40:20 Хуԓмет хӑтәԓән, фараон ԓўв сэма питәм хӑтԓәԓән митйохԓаԓа поры пӑсан верәс, пӑ касна хота опсыԓыйәм ўнайәт ԓэщатты пӑ ԋаԋ верты кущайӈән эԓты митйохԓаԓ уԓман нумәԓмәсԓы;
GEN 40:21 щӑԓта хона ўнайәт ԓэщатты куща йэԓпи рупитәм тӑхайәԓа пŏтсәԓы, пӑ ԓўв фараон йоша ан мӑс;
GEN 40:22 ԋаԋ верты куща пӑ йўха нŏх сухтәса, хŏты Иосиф ԓынана уԓәм ԓӑрпитыйәс.
GEN 40:23 Хона ўнайәт ԓэщатты куща Иосиф эԓты ӑт пӑ нумәԓмәсԓы, ԓўв эԓтэԓ йŏрэмәсԓы.
GEN 41:1 Кӑт тӑԓ хӑщәмән фараон уԓәм вантәс: ԓўв йŏхан питарән ԓойәԓ;
GEN 41:2 йŏхан эԓты ԓапәт мис ким этәс, йӑм хŏрпет пӑ вŏйаӈәт, пӑ тŏрән ԓэты питсәт;
GEN 41:3 щӑԓта, ԓыв йўпеԓән йŏхан эԓты па ԓапәт мис этәс, атәм хŏрпет пӑ керыйәмәт, пӑ тўм мисәт пўӈԓа йŏхан питарән ԓойсәт;
GEN 41:4 щӑԓта атәм хŏрпи пӑ керыйәм мисәт ԓапәт йӑм хŏрпи пӑ вŏйаӈ мисәт йŏхи ԓэсԓаԓ. Щитәԓән фараон нŏх верԓәс,
GEN 41:5 па вŏйәпса, пӑ кимет пўш уԓмийәс: и ԋаԋ тŏрәнән ԓапәт йӑм пӑ тэԓәӈ ԋаԋ тŏрән тӑй энмәс;
GEN 41:6 щӑԓта пӑ, щи йўпийән ԓапәт сорәм пӑ хӑԓэвәт вотән сорәԓтәм ԋаԋ тŏрән тӑй энмәс;
GEN 41:7 щӑԓта сорәм ԋаԋ тŏрән тӑйәт йӑм пӑ тэԓәӈ ԋаԋ тŏрән тӑйԓаԓ йŏхи ԓэсԓаԓ. Фараон нŏх верԓәс пӑ мŏштәсԓы, щит уԓәм.
GEN 41:8 Аԓәӈсӑхат ԓўв нŏпсәԓ шӑкәс, щӑԓта ԓўв китсәԓы, пӑ Египет мўв хŏԓ щӑртәӈ пӑ хŏԓ мўтра уйәтты хŏйатәт вохсәԓы, фараон ԓывиԓаԓа уԓмәԓ пŏтәртсәԓы; туп щи уԓәм ԓӑрпитты хŏйат ӑт ԉикмәс.
GEN 41:9 Хона ўнайәт ԓэщатты куща пŏтәртты питәс пӑ щиты йастәс: «Ин ма вера питыԓыйәм щирэм нумәԓмәсэм;
GEN 41:10 ипуш фараон мин пеԓайэмән, митйохӈәԓаԓ пеԓа ԉикащәс, пӑ мӑнэм пӑ ԋаԋ верты куща фараон шавиты йох куща хотән касна хота омәссәԓы;
GEN 41:11 пӑ и атән ма пӑ ԓўв уԓмисмән, кашәӈ ŏт ŏщхўԉ уԓәм вантәс;
GEN 41:12 щита мин пиԓэмән еврей мир эԓты энәмты ху ус, фараон шавиты йох куща митху; мин ԓўвеԓа уԓәмԓәмән пŏтәртсәԓәмән, ԓўв пӑ минэмәна кашәӈ ŏт мўй вантәс, йӑпсыйа ԓӑрпитсәԓы;
GEN 41:13 щӑԓта, хŏты ԓўв минэмәна ԓӑрпитсәԓы, щиты щи тыйәс: ма тӑйәм рупатайэма йŏхԓы ўсайәм, тўм ху пӑ йўха нŏх сухтыса».
GEN 41:14 Фараон Иосиф вохты партсәԓы. Ԓўв тэрматыман касна хот эԓты эсәԓса. Ԓўв упәтԓаԓ ԓŏртсайәт, па сŏх ԓумтәс пӑ фараон хŏща йŏхтәс.
GEN 41:15 Фараон Иосифа йастәс: «Ма уԓәм ватсәм, пӑ нэмәԓты ŏт ӑнтом, хŏйән ԓуԓән ԓӑрпитты верәтса, ма хуԓԓысэм, нӑӈ уԓәм ԓӑрпитты хоштэн».
GEN 41:16 Иосиф фараона йŏхԓы йастәс: «Щит ӑнта ма; фараон йӑм урәӈән Турәм йŏхԓы йастәԓ».
GEN 41:17 Фараон Иосифа щиты пŏтәртәс: «Уԓәм ватсәм: ма йŏхан питарән ԓойԓәм;
GEN 41:18 щӑԓта йŏхан эԓты ԓапәт вŏйаӈ пӑ йӑм хŏрпи мис этәс пӑ тŏрән ԓэты питсәт;
GEN 41:19 ԓыв йўпеԓән йŏхан эԓты па ԓапәт мис этәс, керыйәмәт, ватты шек атмәт; тӑм Египет мўв ԓŏватән щимәщ керыйәм ŏтәт ӑт вантыԓысәм;
GEN 41:20 щӑԓта керыйәм мисәт оԓәӈән этәм вŏйаӈ мисәт йŏхи ԓэсԓаԓ;
GEN 41:21 кўш йŏхи ԓэсԓаԓ, ԓыв ищипа керыйәм хŏрпийа вантәссәт. Щи кемән нŏх верԓәсәм.
GEN 41:22 Щӑԓта па уԓмисәм: и ԋаԋ тŏрәнән ԓапәт йӑм пӑ тэԓәӈ ԋаԋ тŏрән тӑй энмәс;
GEN 41:23 щӑԓта пӑ, щи йўпийән ԓапәт сорәм пӑ хӑԓэвәт вотән сорәԓтәм ԋаԋ тŏрән тӑй энмәс;
GEN 41:24 щӑԓта сорәм ԋаԋ тŏрән тӑйәт ԓапәт йӑм пӑ тэԓәӈ ԋаԋ тŏрән тӑйԓаԓ йŏхи ԓэсԓаԓ. Щит ма щӑртәӈ хŏйатәта пŏтәртсэм, туп нэмәԓты хŏйатән щи уԓәм ԓӑрпитты ӑт верәтса».
GEN 41:25 Иосиф щиты фараона йастәс: «Фараон и вер эԓты кӑт пўш уԓмийәс: Турәм мўй верәԓ, щит эԓты Ԓўв фараона айкеԓ верәс.
GEN 41:26 Ԓапәт йӑм мис – щит ԓапәт тӑԓ; пӑ ԓапәт йӑм ԋаԋ тŏрән тӑй – щит ищи ԓапәт тӑԓ: кӑт уԓәм и нŏмәс;
GEN 41:27 ԓыв йўпеԓән этәм ԓапәт атәм хŏрпи пӑ керыйәм мис – щит ԓапәт тӑԓ, щӑԓта ԓапәт сорәм пӑ хӑԓэвәт вотән сорәԓтәм ԋаԋ тŏрән тӑй – щит ԓапәт ԓэԓԓы тӑԓ».
GEN 41:28 Щишән, ма щиты фараона йастәсәм: «Мўй Турәм верәԓ, щит Ԓўв фараона этәԓтәсԓы.
GEN 41:29 Иса Египет мўвән ԓапәт тащәӈ пӑ ԓэтотәӈ тӑԓ тӑԓта йэԓԓы питәԓ;
GEN 41:30 щи йўпийән ԓапәт ԓэԓԓы тӑԓ йŏхәтәԓ, щи йэԓпи йӑма уԓәм уԓәпса Египет мўвән йŏрэмәԓа, ԓэԓԓы тӑԓәтән мўв таԓа верԓа пӑ хŏйатәт вŏԓԓы нўшайа йиԓәт,
GEN 41:31 пӑ щи йэԓпи йӑм уԓәпса йŏрэмәԓа, ԓэԓԓы тӑԓәт урәӈән, йŏхәтты ԓэԓԓы тӑԓәт шек ԓавәртәт питԓәт.
GEN 41:32 Фараон кӑт пўш и хŏрпи уԓәм щишән вантәс, щит Турәм йасәӈ так урәӈән пӑ щи вер Турәмән тӑм ванән йӑна верты урәӈән.
GEN 41:33 Щӑԓта пӑ, фараон ŏшәӈ пӑ вер хошты хŏйат ат уйәтәԓ, пӑ Египет мўв ԓŏватән уна ат пŏнԓәԓы.
GEN 41:34 Пӑ щӑԓта, фараон мўвәԓ ԓŏватән ватты кущайәт ат омәсәԓ, пӑ ԓапәт тащәӈ тӑԓәт хўват Египет мўвән энмәԓты ԋаԋ ветмет пелкеԓ ат ӑкәтԓэԓ;
GEN 41:35 щи йŏхәтты йӑм тӑԓәтән ԓыв ԋаԋ ԓат пӑ па сэмәӈ ԓат ат ўԓәт, пӑ фараон партты щирән вошәтән сопаса ат акәтԓэԓ пӑ ат шавиԓэԓ.
GEN 41:36 Египет мўвән йэԓԓы йŏхәтты ԓэԓԓы ԓапәт тӑԓ кеша щи ԓэтŏт сопаса питәԓ, тӑта уԓты мир ӑт пӑрты урәӈән».
GEN 41:37 Фараона пӑ ԓўв митйохԓаԓа щи йасӈәт рӑхсәт.
GEN 41:38 Фараон митйохԓаԓа йастәс: «Ԓўв хŏрпеԓ йӑм хŏйат хŏԓща уйәтԓув, хŏй хŏща Турәм Ԓыԓ ат ус, ԓуԓән?»
GEN 41:39 Фараон Иосифа йастәс: «Хŏты Турәм нӑӈена щит иса пўшсәԓы, щимәщ ŏшәӈ пӑ мўтрайәӈ нӑӈ хŏрпен хŏйат ӑнтом;
GEN 41:40 нӑӈ ма хотэм нўмпийән питԓән, ма мирэм нӑӈ йасӈена хуԓәтты питәԓ; туп хона омәстэм щирән ма нӑӈ эԓтэн унашәк уԓԓәм».
GEN 41:41 Фараон Иосифа йастәс: «Щиты, ма нӑӈен хŏԓ Египет мўв кущайа пŏнԓэм».
GEN 41:42 Фараон ԓўв йошәԓ эԓты веншәӈ ԓуйтәԓ хŏԓт пайәтсәԓы пӑ Иосиф ԓўйа ԓумәттәсԓы; ухәԓ щӑшкан сŏхәта ԓўвеԓ ԓумәттәсԓы, сапԓәԓа сорԋэӈ карты кеԓ пŏнәс;
GEN 41:43 ԓўв йўпеԓән кимет хон йŏра ԓовәӈ ухәԓән Иосиф тутԓыты партсәԓы пӑ ԓўв йэԓпеԓән ўвты: «Ŏх пŏнман, иԓ ԋўраты!» Щиты Египет мўв ԓŏватән ԓўвеԓ кущайа пŏтсәԓы.
GEN 41:44 Фараон Иосиф пеԓа йастәс: «Ма фараон; туп нӑӈ йасӈен такԓыйа Египет мўв ԓŏватән нэмәԓты хŏйат йош ӑт тўвемәԓ, кўрәм ӑт верәԓ».
GEN 41:45 Фараон Иосиф йӑԓәп нэмән мӑсԓы: Цафнаф-панеах, пӑ Илиополь вош Потифер нэмпи йир верты хŏйат, Асенефа нэмпи эви, фараон ԓўвеԓа нэӈа мӑсԓы. Иосиф Египет мўв хўват мӑнәс.
GEN 41:46 Иосиф хŏԉмаӈ тӑԓ ԓŏват ус, хун ԓўв Египет мўв хон хŏща, фараон хŏща рупитты йŏхтәс. Фараон эԓты этмаԓ йўпийән, ԓўв Египет мўв хŏԓ йӑхсәԓы.
GEN 41:47 Щи мўвән ԓапәт тащәӈ тӑԓ хўват и ԓат сэм эԓты кўш тэԓ энмиԓыйәс.
GEN 41:48 Египет мўвән ԓапәт йӑм тӑԓ сыс энмәм ԋаԋ ԓат пӑ па сэмәӈ ԓат ԓўв ӑкәтсәԓы, пӑ вошәтән щи ԓат пŏтсәԓы; кашәӈ вош керәтман уԓты мўв хӑрәт эԓты.
GEN 41:49 Иосиф ԋаԋ ԓат пӑ па сэмәӈ ԓат шек ар ӑктәс, щарәс сэй хиш арат, щишән, ԓўӈәтты кўртәсәс пӑ йэԓԓы ӑт ԓўӈәтсәԓы.
GEN 41:50 Ԓэԓԓы тӑԓәт йэԓпийән Иосиф кӑт пŏх тӑйәс, хŏйӈән Асенефа, Илиополь вош Потифер нэмпи йир верты хŏйат эви, сэма пайтәс.
GEN 41:51 Иосиф оԓәӈ пŏхәԓ нэмән мӑсԓы: Манассия, щиты ԓўв пŏтәртәс: «Шукащты верԓам пӑ ащем хот тэԓ Турәм мӑнэма йŏрэмәты ԋотсәԓы».
GEN 41:52 Кимет пŏхәԓ нэмән мӑсԓы: Ефрем, щиты ԓўв пŏтәртәс: «Шукащәм мўвемән Турәм мӑнэм тыхԓәӈа версәԓы».
GEN 41:53 Щиты ԓапәт тащәӈ тӑԓәт Египет мўвән хӑщсәт,
GEN 41:54 щӑԓта ԓапәт ԓэԓԓы тӑԓәт йŏхәтсәт, Иосиф йастәм щирән. Пӑ хŏԓ мўвәтән ԓэԓԓы пŏра ус, туп Египет мўв ԓŏватән ԋаԋ ус.
GEN 41:55 Египет мўвән ԓэԓԓы йӑт йŏхтәмән, фараон эԓты мир ԋаԋ вохты питәс. Хŏԓ Египет хŏйатәта фараон йастәс: «Иосиф хŏща мӑнаты, ԓўв хŏты йастәԓ, щиты вераты».
GEN 41:56 Мўв ԓŏватән иса ԓэԓԓы пŏра ус; Иосиф ԋаԋ ԓат сопасԓәм хотԓаԓ пелки пўшсәԓы пӑ Египет мира тыныты питсәԓы. Ԓэԓԓы пŏра Египет мўвән йура йиты питәс.
GEN 41:57 Па хон мўвәт эԓты Египта Иосиф эԓты ԋаԋ ԓат ԓутты йŏхтыԓысәт, мўв ԓŏватән ԓэԓԓы пŏра йура йиты питәс.
GEN 42:1 Иаков Египтән ԋаԋ ԓат уԓты вер хуԓмаԓән, Иаков пŏхԓаԓа йастәс: «Мўй нын ԓавәԓԓәты?»
GEN 42:2 Пӑ йастәс: «Ма хуԓтсэм, Египтән ԋаԋ ԓат уԓтаԓ; щи мӑнаты пӑ мўӈева ԋаԋ ԓат щита ԓутаты, мўӈева уԓты пӑ ӑт пӑрты урәӈән».
GEN 42:3 Иосиф йаӈ йай Египта ԋаԋ ԓат ԓутты мӑтсәт.
GEN 42:4 Вениамин пӑ, Иосиф апщи, йайԓаԓ пиԓән Иаковән ӑт китса, ԓўв щиты йастәс: «Вера ӑт ат питәԓ».
GEN 42:5 Ханаан мўвән ԓэԓԓы пŏра ус, щишән, Израиль пŏхәт па йŏхтәм ŏтәт пиԓән ԋаԋ ԓат ԓутты йŏхәтсәт.
GEN 42:6 Иосиф пӑ щи мўвән мет ун кущайа пŏнман ус; мўвән уԓты мира ԋаԋ ԓат ԓўв щи тыныйәс. Иосиф йайԓаԓ йŏхәтсәт пӑ ԓўв йэԓпеԓән мўв унты, ŏх пŏнман, иԓ ԋўрсәт.
GEN 42:7 Иосиф йайԓаԓ кащаԓәс пӑ ԓывиԓаԓ мŏштәсԓы; туп ӑт уйәтты веш верәс пӑ ԓыв пиԓԓаԓән щикем такан пŏтәртәс пӑ ԓывиԓаԓа йастәс: «Хŏԓща нын йŏхәтсәты?» Ԓыв йастәсәт: «Ханаан мўв эԓты ԓэтŏт ԓутты урәӈән».
GEN 42:8 Иосиф йайԓаԓ мŏштәсԓы, ԓыв пӑ ԓўвеԓ ӑт мŏштәсэԓ.
GEN 42:9 Иосиф уԓәмԓаԓ нумәԓмәс, хŏта ԓыв эԓтыԓаԓ уԓмийәс; пӑ ԓывиԓаԓа йастәс: «Нын хӑԋайән верәт ԓэрапты ŏтәт, мўӈ хŏщайэв ԉаԉ пиԓән йŏхәтты урәӈән сайԓы мўв вантыԓты».
GEN 42:10 Ԓыв пӑ ԓўвеԓа йастәсәт: «Ӑнта, мўӈ кущайэв; нӑӈ митйохԓан ԓэтŏт ԓутты йŏхәтсәт;
GEN 42:11 мўӈ хŏԓ и ащи ԋаврэмәт; мўӈ вещкат хŏйатәт; нӑӈ митйохԓан ӑнта хӑԋайән верәт ԓэрапты ŏтәт».
GEN 42:12 Ԓўв пӑ ԓывиԓаԓа йастәс: «Ӑнта, мўӈ хŏщайэв ԉаԉ пиԓән йŏхәтты урәӈән сайԓы мўв вантыԓты».
GEN 42:13 Ԓыв йастәсәт: «Мўӈ, нӑӈ митйохԓан, кӑтхŏщйаӈ йай; мўӈ Ханаан мўв эԓты уԓты и хŏйат пŏхәт, ай ŏтэв ащев пиԓән хӑщәс, итэв пӑ ӑнтом».
GEN 42:14 Иосиф ԓывиԓаԓа йастәс: «Щит щи ма нынан пŏтәртсәм, йастымемән: нын хӑԋайән верәт ԓэрапты ŏтәт;
GEN 42:15 щи вер ин щиты ԓэрапԓэм: фараон уԓәпсайән йастәпса мӑԓәм, ай апщан йŏхәтты унты нын тӑԓта ӑт этԓәты;
GEN 42:16 итән китаԓән, ԓўв апщан ты ат туԓԓы, нын пӑ тӑта йэртман тӑйты питԓайты; щиты ԓэра йиԓ, йӑна мўй мӑнэм пŏтәрԓәты; ӑнта щиты ки, фараон уԓәпсайән йастәпса мӑԓәм, нын хӑԋайән верәт ԓэрапты ŏтәт».
GEN 42:17 Пӑ хуԓәм хӑтԓа касна хота ԓывиԓаԓ омәссәԓы.
GEN 42:18 Хуԓмет хӑтәԓән Иосиф ԓывиԓаԓа йастәс: «Тӑмиты вераԓән, щиты нын ԓыԓӈа хӑщԓәты, ма Турәм эԓты ищи пӑԓԓәм:
GEN 42:19 нын вещкат хŏйатәт ки, и апщан тӑм касна хотән ат хӑщәԓ; нын пӑ мӑнаты, ԓэԓԓы уԓты тыхәԓ тэԓԓәна ԋаԋ тўваты,
GEN 42:20 апщан пӑ ма хŏщайэм тўваԓән, йасәӈԓән вещкат урәӈән пӑ нынан ԓыԓӈа хӑщты урәӈән». Ԓыв щиты щи версэԓ.
GEN 42:21 Ԓыв кўтԓаԓән щиты пŏтәртсәт: «Апщева кӑрэк вермев урәӈән ин мўӈ сўтәтԓайув; мўӈ ватсэв, хŏты ԓўв шукащәс, хŏты мўӈев пойәксәԓы, туп ӑт хуԓәтсэв; щишән, тӑм шука питсув».
GEN 42:22 Рувим пӑ ԓывиԓаԓа йастәс: «Ма нынана ӑт хун пŏтәртысәм: ‘Энәмты пŏха кӑрэк аԓ вераты’? Нын пӑ ӑт хуԓәтсәты; щи, ин ўрәԓ кӑшты питса».
GEN 42:23 Туп ԓыв ӑт уйәтсэԓ, Иосиф щит иса мŏштәԓԓы; ванты, ԓўв пиԓәԓән пŏтәртмеԓән йасәӈ тŏлмащԓәты хŏйат ус.
GEN 42:24 Щӑԓта ԓыв эԓтыԓаԓ йэԓшәк мӑнәс пӑ йэԓ хоԓԓаԓтәс. Щӑԓта ԓыв хŏщайэԓ йŏхԓы йŏхтәс, па ԓыв пиԓԓаԓән пŏтәртәс, пӑ Симеон ԓыв кўтэԓ эԓты ўсԓы пӑ ԓыв ватман йӑрты партсәԓы.
GEN 42:25 Щӑԓта Иосиф ԓыв хирԓаԓ ԋаԋ ԓатән тэкәптәты партсәԓы, ԓыв щел ŏхԓаԓ пӑ йŏхԓы хирԓаԓа пŏнты партсәԓы, пӑ мӑнты йушеԓа хӑԓы хирәтән мӑты партсәԓы. Щиты щи ԓыв пиԓԓаԓән верман уса.
GEN 42:26 Ԓыв ԋаԋ ԓат хирԓаԓ осёл войәт эԓты ԓэԓтсәԓаԓ, пӑ щиԓта мӑтсәт.
GEN 42:27 Хун ԓыв хоԓты урәӈән ԓойсәт, и хуйэԓ хирәԓ эхсәԓы, осёл войәԓ ԋаԋ ԓатән мӑты урәӈән, пӑ хир овән ԓўв йŏра щел ŏхәԓ кащаԓәсԓы,
GEN 42:28 пӑ йайԓаԓа йастәс: «Щел ŏхем пӑ йŏхԓы пŏнәм; тӑта щи хирэм ԓыпийән». Ԓыв сӑмԓаԓ мӑтсәт, пӑ ԓыв кўтэԓән пӑԓтамәман пŏтәртты питсәт: «Амуй щит Турәм мўӈ пиԓэвән верәс?»
GEN 42:29 Щӑԓта Ханаан мўва, Иаков ащеԓ хŏща йŏхәтмеԓән, ԓыв пиԓэԓән уԓәм верәт хŏԓ ԓўвеԓа пŏтәртсэԓ, щиты йастәсәт:
GEN 42:30 «Щи мўвән уна уԓты куща щикем такан мўӈ пиԓэвән пŏтәртәс пӑ щи мўв хӑԋайән верәт ԓэрапты ŏтәта мўӈев йўкатсәԓы».
GEN 42:31 Мўӈ ԓўвеԓа йастәсув: «Мўӈ вещкат хŏйатәт; мўӈ ӑнта хӑԋайән верәт ԓэрапты ŏтәт;
GEN 42:32 мўӈ кӑтхŏщйаӈ йай-апщи ащев хŏща; итэв пӑ ӑнтом, ай апщев пӑ ащев пиԓән Ханаан мўвевән хӑщәс».
GEN 42:33 Щӑԓта щи мўвән уна уԓты куща щиты йастәс: «Ма щиты ԓэрапԓэм, мўй хŏрпи нын вещкат хŏйатәт: и апщан ма хŏщайэм хӑйаԓән, нын пӑ ԋаԋ ԓат ўйаты ԓэԓԓы уԓты тыхәԓ тэԓԓән урәӈән пӑ мӑнаты,
GEN 42:34 пӑ ай апщан ма хŏщайэм тўваԓән; щиты ма уйәтты питԓэм, нын ӑнта хӑԋайән верәт ԓэрапты ŏтәт, нын вещкат хŏйатәт; щишән, апщан эсәԓԓэм, пӑ тӑм мўвән тынасты верәтԓәты».
GEN 42:35 Щӑԓта, хирәт шошәмты питмеԓән, кашәӈ ху хирәԓән ԓўв йŏра щел ŏхәԓ уйтәс. Ŏхи хирԓаԓ кащаԓымеԓән, ащеԓ ики пиԓән ԓыв хŏԓт пӑԓтәмәсәт.
GEN 42:36 Щӑԓта Иаков ащеԓ ԓывиԓаԓа йастәс: «Нын урӈәнән ԋаврэмԓам ӑнтомәт: Иосиф ӑнтом, Симеон ӑнтом, Вениамин па ўты ўтщиԓԓын, – щит иса мӑнэма хойәԓ!»
GEN 42:37 Щӑԓта Рувим ащеԓа йастәс: «Ма пŏхӈиԓам веԓаԓән, Вениамин йŏхԓы ӑт туԓэм ки; ма йошема ԓўвеԓ мийи; ма ԓўвеԓ нӑӈ хŏщайэн йŏхи туԓэм».
GEN 42:38 Ԓўв пӑ йастәс: «Пŏхем нын пиԓанән ӑт мӑнәԓ; йайәԓ пӑрәс, пӑ ԓўв утща хӑщәс, щишән; йушән мӑнман мŏԓты вера питәԓ ки, вотәм ŏхем щи шукән хощман иԓта турма туԓԓән».
GEN 43:1 Мўвән ԓэԓԓы пŏра йура йис.
GEN 43:2 Египет эԓты тутԓыйәм ԋаԋ ԓантэԓ ԓэвмеԓ йўпийән, ащеԓ ики ԓывиԓаԓа йастәс: «Па йӑӈхаты, мўӈева ԓэтŏт йэша ԓутаты».
GEN 43:3 Иуда ԓўвеԓа йастәс: «Щи хŏйат мўӈева такан йастәс: ‘Апщан такԓы ма хŏщайэм аԓ йŏхтаты’.
GEN 43:4 Апщев мўӈ пиԓэвән китԓэн ки, мўӈ мӑнԓув пӑ нӑӈена ԓэтŏт ԓутԓув,
GEN 43:5 ӑт китԓэн ки, ӑт мӑнԓув, щи хŏйат щиты мўӈева йастәс: ‘Апщан такԓы ма хŏщайэм аԓ йŏхтаты’».
GEN 43:6 Израиль йастәс: «Мўй урәӈән нын мӑнэма щимәщ атәм версәты, па и апщи тӑйты верән щи хŏйата йастәманән?»
GEN 43:7 Ԓыв йастәсәт: «Щи хŏйат мўӈ эԓтэв пӑ мўӈ рутэв эԓты ар пўш иԋщәсәс, щиты пŏтәртәс: ‘Нын ащан хŏԓна ԓыԓәӈ? Йай-апщи тӑйԓәты?’ Мўӈ пӑ ԓўвеԓа щи иԋщәпсайәԓ щирән пŏтәртсэв. Хŏԓща мўӈ уйәтсэв, ԓўв щиты йастәԓ: ‘Апщан ты тўваԓән’?».
GEN 43:8 Израиль ащеԓ пеԓа Иуда щиты йастәс: «Энәмты пŏхен ма пиԓэмән эсԓы, мўӈ ԓойԓув пӑ йӑхԓув, щишән ԓыԓӈа хӑщԓув пӑ ӑт пӑрԓув: мўӈ, пӑ нӑӈ, пӑ мўӈ ԋаврэмԓув;
GEN 43:9 ма йасәӈ мӑԓәм, ма эԓтэм иԋщәсԓэн; ма нӑӈ хŏщайэн ԓўвеԓ ӑт туԓэм ки, нӑӈ веншен йэщаԓт ӑт ԓощәԓтәԓэм ки, уԓтэм хўват нўрәӈ питԓәм;
GEN 43:10 мўӈ ӑт ки рŏтсув, кӑт пўш йӑхсув – йŏхәтсув, ԓўԓән».
GEN 43:11 Израиль ащан ики ԓывиԓаԓа йастәс: «Щиты ки, тӑмиты вераԓән: тӑм мўв мет йӑм мойԓәпсайәт пӑтән ўйаты пӑ щи хŏйата тўваԓән: бальзам пӑ пирәм мав, пӑ йӑма авты стиракс йўх ух пӑ ладан йоԓ, фисташка пӑ миндаль;
GEN 43:12 кӑт пўш аршәк ŏх пӑ ўйаты; хир ова йŏхԓы пŏнәм ŏхԓән нын йошԓәнән йŏхԓы мийаԓән: мосәӈ, ӑт ватман щиты тыйәс;
GEN 43:13 апщан па ўйаԓән, ԓойаты пӑ щи хŏйат хŏща мӑнаты;
GEN 43:14 Иса Верәтты Турәм нынан ат шавиԓԓы, щи хŏйат Вениамин пӑ кимет апщан ат эсәԓԓәԓы; ма пӑ, ԋаврэмԓы хӑщԓәм ки, щиты ԋаврэмԓы ат уԓԓәм».
GEN 43:15 Щӑԓта щи хŏйатәт мойԓәпсайәт ўсәт, кӑт пўш аршәк щел ŏх ўсәт, Вениамин па пӑтән ўсэԓ, ԓойсәт пӑ Египта мӑтсәт пӑ Иосиф хŏща йŏхәтсәт.
GEN 43:16 Ԓыв кўтэԓән Вениамин кащаԓәмаԓән, Иосиф ԓўв хотәԓ митйохәт кущайа йастәс: «Щи хŏйатәт хотэма вохаԓән, мӑтты вой хŏра пӑ ԓэтŏт ԓэщата, хӑтәԓ кўтәпән щи хŏйатәт ма пиԓэмән ԓэты питԓәт».
GEN 43:17 Иосиф партәм щирән хŏйат иса версәԓы пӑ Иосиф хота щи мŏхет ԓŏӈәԓтсәԓы.
GEN 43:18 Хŏйатәт пӑ пӑԓтамәсәт, хун Иосиф хота тусайәт, пӑ йастәсәт: «Тӑм хирԓува йŏхԓы пŏнәм щел ŏхԓув урәӈән ты тусайув, мўӈ хŏщайэв йŏвәртыты пӑ мўӈев иԓ катәԓты урәӈән, тынԓы-пелԓы ԋўрты урәӈән осёл войԓув пиԓән ты тусайув».
GEN 43:19 Щитэԓән Иосиф хотәԓ митйохәт куща хŏща ванамәсәт пӑ хот ов хŏща ԓўвеԓа пŏтәртты питсәт,
GEN 43:20 пӑ йастәсәт: «Щи ԓŏват йӑм вера, хуԓәнта, куща ху, тӑм йэԓпийән мўӈ ԓэтŏт ԓутты ты йŏхтыԓысув,
GEN 43:21 щӑԓта, йŏхԓы мӑнмевән, мўӈ хоԓты ԓойԓысув, щита хирԓув эхсәԓув пӑ кашәӈ хир овән – мўӈ сŏхәптәм щел ŏхев тӑԓаӈ тэԓән уԓмаԓ, щи ŏхԓув мўӈ йŏхԓы тусԓув;
GEN 43:22 ин ԓэтŏт ԓутты урәӈән па щел ŏх тусув. Мўӈ ӑт уйәтԓэв, хŏйән щи ŏхԓув йŏхԓы хирԓува пŏтсайәт».
GEN 43:23 Ԓўв йастәс: «Рома уԓаты, аԓ пӑԓаты; нын Турмән пӑ нын ащан Турәм нын хирԓәна ԓум пŏнәс; нын щел ŏхән ма унтэм йŏхтәс». Щӑԓта Симеон ԓыв хŏщайэԓ тусԓы.
GEN 43:24 Щӑԓта щи хŏйат ԓывиԓаԓ Иосиф хота ԓŏӈәԓтсәԓы пӑ йикән тусԓы пӑ ԓыв кўрԓаԓ ԉŏхәтсәԓаԓ; осёл войԓаԓ ищи ԓэтŏтән мӑсԓы.
GEN 43:25 Хӑтәԓ кўтәпән Иосиф йŏхәтты унты ԓыв мойԓәпсайәт ԓэщатсәт, ԓыв хуԓсэԓ, щита ԓэты питԓәт.
GEN 43:26 Щӑԓта Иосиф йŏхи йŏхтәс; ԓыв йошԓаԓән мойԓәпсайԓаԓ ԓўвеԓа хота ԓŏӈәԓсәԓаԓ, пӑ мўв унты ԓўв йэԓпеԓән, ŏх пŏнман, иԓ ԋўрсәт.
GEN 43:27 Ԓўв пӑ тўмтак верэԓ эԓты ԓывиԓаԓ иԋщәссәԓы пӑ йастәс: «Нын пирәщ ащан ики тўмтака мўй уԓ, хŏй эԓты нын пŏтәртсәты? Хŏԓна ԓўв ԓыԓәӈ?»
GEN 43:28 Ԓыв йастәсәт: «Тўмтак нӑӈ митхуйэн, мўӈ ащев ики, хŏԓна ԓыԓәӈ». Щӑԓта ԓыв, ŏх пŏнман, иԓ ԋўрсәт.
GEN 43:29 Иосиф сэмԓаԓ нŏх эԓәтсәԓы пӑ Вениамин кащаԓәс, ԓўв апщеԓ, ԓўв аԋԏэԓ пŏх, пӑ йастәс: «Тӑм нын ай апщан, хŏй эԓты нын мӑнэма пŏтәртысты?» Пӑ йастәс: «Турәмән ат шавиԓайән, пŏхийэм!»
GEN 43:30 Иосиф апщеԓ урәӈән сӑмәԓ ԋŏхԓәс, хӑщ йэԓ хоԓԓаԓтәс, щишән, тэрматыман щиԓта этәс пӑ пӑты хот пӑтыйа мӑнәс пӑ щита хоԓԓәс.
GEN 43:31 Щӑԓта вешәԓ нŏх ԉŏхәтсәԓы, йŏхԓы ԓыв хŏщайэԓ йŏхтәс, нŏпсәԓ такапсәԓы пӑ йастәс: «Ԓэтŏт тўваты».
GEN 43:32 Щӑԓта ԓўвеԓа утщайа мӑса, ԓывиԓаԓа пӑ утщайа, Иосиф пиԓән ԓэвәм Египет мўв хŏйатәта па утщайа, Египет хŏйатәт еврейәт пиԓән йӑха ԓэты ӑт верәтԓәт, Египет хŏйатәта щит йэм.
GEN 43:33 Щӑԓта ԓыв Иосиф йэщаԓт опсәԓсайәт, оԓәӈ ŏт оԓәӈ ŏт щирән, ай ŏт ай ŏт щирән, щи хŏйатәт пӑ, ийэщаԓт омәсман, ощатыман ватсәт.
GEN 43:34 Иосиф пӑсан эԓты ԓэтŏтән тутԓысайәт, Вениамин йайԓаԓ эԓты вет пўш арәншак мийԓыса. Ԓўв пиԓәԓән ԓыв мŏрта ԓэсәт пӑ йищсәт пӑ кашәӈа йисәт.
GEN 44:1 Щӑԓта Иосиф ԓўв хотәԓ митйохәт кущайа партәс, щиты йастәс: «Тӑм хŏйатәт хирԓаԓ ԓэтŏтән тэԓ пŏнаԓән, мўй арат войԓаԓ туты верәтԓәт, кашәӈ ŏта сŏхәптәм щел ŏхәԓ хир ова йŏхԓы пŏны,
GEN 44:2 ма анэм пӑ, щел ŏх анэм, ай хуйэԓ хир ова ԓўв ԓутәм ԋаԋәԓ сӑхат сŏхәптәм ŏхәԓ пиԓән пŏны». Щитәԓ Иосиф йастәм щирән иса версәԓы.
GEN 44:3 Аԓәӈсӑхат, нŏвийа йўвәмән, щи хŏйатәт йŏхԓы мӑнты эсәԓсайәт, ԓыв пӑ осёл войԓаԓ па.
GEN 44:4 Ԓыв шек хўва вош эԓты ӑт питсәт, хун Иосиф хотәԓ митйохәт кущайа йастәс: «Мӑна, щи хŏйатәт йŏԓта ԋухԓаԓән, эԓты йŏхәттэнән, ԓывиԓаԓа йаста: ‘Мўйа нын йӑм йўкана атәм версәты?
GEN 44:5 Тӑм ан эԓты кущайэм йищәԓ пӑ щӑртәԓ? Атәм нын версәты’».
GEN 44:6 Ԓўв ԓывиԓаԓ эԓты йŏхәтсәԓы пӑ щи йасӈәт ԓывиԓаԓа йастәс.
GEN 44:7 Ԓыв пӑ ԓўвеԓа йŏхԓы йастәсәт: «Мўйа кущайэв щимәщ йасӈәт пŏтәртәԓ? Ӑнта, нӑӈ митйохԓан щимәщ вер ӑт верԓәт.
GEN 44:8 Тӑта щи, хир овԓувән уйтәм щел ŏхев мўӈ нӑӈена йŏхԓы Ханаан мўв эԓты тусэв: хŏты сӑхат щел ŏх мўй па сорԋи кущайэн хот эԓты ԓоԓәмты верәтԓув?
GEN 44:9 Мӑты митхуйэн хŏща щи ан уйәтԓэн, щитэна сŏрәм, мўӈ пӑ кущайэва митйоха питԓув».
GEN 44:10 Ԓўв йастәс: «Йӑм; хŏты нын йастәсты, щиты ат питәԓ: хŏй хŏща ан уйәтԓа, щит митхуйэма питәԓ, нын пӑ нўрәӈа ӑт питԓәты».
GEN 44:11 Ԓыв сора хирԓаԓ иԓ эсәԓсәԓаԓ, мўв эԓты пŏтсәԓаԓ пӑ кашәӈ хŏйат ԓўв хирәԓ пелки эхсәԓы.
GEN 44:12 Ԓўв хирәт хŏԓ ватсәԓы, ун хуйэԓ эԓты питщәсԓы пӑ ай ŏтәԓән йэтшәптәсԓы; Вениамин хирән ан уйәтса.
GEN 44:13 Ԓыв ԓумтәмԓаԓ мӑншисԓаԓ пӑ осёл войԓаԓ эԓты хирԓаԓ ԓэԓсәԓәԓ, пӑ йŏхԓы воша керԓәсәт.
GEN 44:14 Иуда пӑ ԓўв йайԓаԓ-апщиԓаԓ Иосиф хота йŏхәтсәт, ԓўв хŏԓна йŏԓән уԓмаԓ, пӑ ԓўв йэԓпеԓән мўва иԓ рӑкәтсәт.
GEN 44:15 Иосиф ԓывиԓаԓа йастәс: «Мўй нын версәты? Нын мўй ӑт уйәтсәԓән, ма хŏрпем хŏйат ищипа щи вер ԓэрапты урәӈән щӑртыԓәты верәтәԓ?»
GEN 44:16 Иуда йастәс: «Мўй мўӈ верәтԓув кущайэва йастәты? Мўй пŏтәртты? Мўй йŏхԓы йастәԓув? Митйохԓан накԓат Турәм уйәтсәԓы; ин мўӈ хŏԓ кущайэв митйохәт, мўӈ хŏԓ, пӑ щитэв, хŏйтэв хирән ан уйәтса».
GEN 44:17 Иосиф пӑ йастәс: «Ӑнта, щиты ма ӑт верԓэм; хŏй хŏща ан уйәтса, щит ма митхуйэма питәԓ, нын пӑ ащан хŏща йӑмән мӑнаты».
GEN 44:18 Иуда ԓўв хŏщайәԓ ванамәс пӑ йастәс: «Кущайэм, митхуйэна пӑԓԓана йасәӈ йастәты эсԓы, пӑ митхуйэн пеԓа аԓ ԉикаща, нӑӈ ищи фараон пӑԓатән омәсԓән.
GEN 44:19 Кущайэм митйохԓаԓ иԋщәссәԓы, йастәман: ‘Ащи мўй йай-апщи тӑйԓәты?’
GEN 44:20 Кущайэва мўӈ йастәсув, пирәщ ащи тӑйты верэв пӑ апщи, ащев тӑԓԓаԓ ара йўвман тӑйәм пŏхәԓ, ԓўв йайәԓ пӑрәс, аԋԏэԓ эԓты ԓўв утща ԓыԓӈа хӑщәс, щишән, ащеԓән сӑмәӈа тӑйԓа.
GEN 44:21 Нӑӈ митйохԓана партсэн: ‘Ма хŏщайэм ԓўвеԓ тўваԓән, мӑнэм ԓўвеԓ ватты урәӈән’.
GEN 44:22 Кущайэва мўӈ йастәсув: ‘Энәмты пŏх ащеԓ хӑйты ӑт верәтԓәԓы, ащеԓ хӑйԓәԓы ки, ащеԓ пӑрәԓ’.
GEN 44:23 Нӑӈ пӑ митйохԓана йастәсән: ‘Ай апщан нын пиԓанән ӑт ки йŏхәтәԓ, нын ма хŏщайэм аԓ па этԓыйаты’.
GEN 44:24 Хун мўӈ ащев хŏща, нӑӈ митхуйэн хŏща, йŏхәтсув, кущайэм йасӈәт ԓўвеԓа пŏтәртсәԓув.
GEN 44:25 Щӑԓта, пŏра хӑщәмән, ащев ики па йастәс: ‘Па йӑӈхаты, ԓэтŏт йэша ԓутаты’.
GEN 44:26 Мўӈ ԓўвеԓа щиты йастәсув: ‘Утща мӑнты мўӈева ӑт рӑхәԓ; туп апщев мўӈ пиԓэвән мӑнәԓ ки, мўӈ мӑнԓув; щи хŏйат веш ватты мўӈева ӑт рӑхәԓ, апщев мўӈ пиԓэвән ӑт ки питәԓ’.
GEN 44:27 Ащев, нӑӈ митхуйэн, мўӈева щиты йастәс: ‘Нын уйәтԓәԓән, имем мӑнэма кӑт пŏх сэма пайтәс;
GEN 44:28 итәԓ ма эԓтэм мӑнәс, ма йастәсәм: аԓт ԓўв ут войән лакки мӑншиса; ин тӑм унты ԓўвеԓ ӑт ватсэм;
GEN 44:29 хŏԓна тӑмем ма эԓтэм ўԓԓән ки, пӑ мŏԓты вера питәԓ ки, вотәм ŏхем, щи шукән хощман, иԓта турма туԓԓән’.
GEN 44:30 Ин ма ащев хŏща, нӑӈ митхуйэн хŏща, йŏхәтԓәм ки, пӑ ԓўв ԓыԓәԓ шавиты ай апщев мўӈ пиԓэвән ӑт ки питәԓ,
GEN 44:31 ԓўв, энәмты пŏх ӑнтом вер кащаԓәтаԓән, пӑрәԓ; пӑ мўӈ, нӑӈ митйохԓан ащев ики вотәм ŏхәԓ, хощман, иԓта турма туԓэв.
GEN 44:32 Щӑԓта пӑ ма, нӑӈ митхуйэн, щи энәмты пŏх урәӈән ащема йасәӈ мӑсәм: ‘Йŏхԓы нӑӈ хŏщайэн ӑт ки туԓэм, уԓтэм хўват нӑӈ йэԓпенән нўрәӈ питԓәм’.
GEN 44:33 Щишән, ма, нӑӈ митхуйэн, ԓўв йўканәԓа кущайэм хŏща митхуйа ат хӑщԓәм, энәмты пŏх пӑ йайԓаԓ пиԓән ат мӑнәԓ;
GEN 44:34 ӑԓ щиты, ма мўй щирән ащем хŏща апщем такԓы мӑнԓәм? Ащем шук туты вер ма ватты ӑт верәтԓәм».
GEN 45:1 Ԓўв пўӈԓәԓән ԓойәм хŏйатәт уԓман Иосиф нŏпсәԓ шӑкәс пӑ ԓўв ўваԓтәс: «Ма эԓтэм йэԓ мӑнаты!» Щишән, нэмәԓты пўӈәԓ хŏйат ӑнтом ус, хун ԓўв йайԓаԓа аԉәсәс.
GEN 45:2 Ԓўв щиты такан хоԓԓаԓтәс пӑ, Египет хŏйатәтән хуԓса пӑ фараон хот хŏйатәтән хуԓса.
GEN 45:3 Иосиф пӑ йайԓаԓа йастәс: «Ма – Иосиф, ащем хŏԓна ԓыԓәӈ?» Туп йайԓаԓ нэмәԓты йастәты ӑт верәтсәт, ԓыв ӑт уйәтсәт, мўй нумәсты.
GEN 45:4 Иосиф йайԓаԓа йастәс: «Ма хŏщайэм вана йўваты». Ԓыв ванамәсәт. Ԓўв йастәс: «Ма – Иосиф, нын апщан, хŏйтан Египта нын тынысԓән;
GEN 45:5 туп ин аԓ хошийаты пӑ нынан аԓ нўрмәԓтаԓән мӑнэм ты тыныман урәӈән, щит Турәм мӑнэм нын йэԓпанән китсәԓы нын уԓәпсайән шавиты урәӈән;
GEN 45:6 кӑт тӑԓа йис, хŏты мўвән ԓэԓԓы йӑт йŏхтәс: хŏԓна вет тӑԓ нэмәԓты мўва омәсты ӑт питԓа, нэмәԓты ӑкәтты ӑт питԓа;
GEN 45:7 Турәм мӑнэм нын йэԓпанән китсәԓы, нынан пӑ нын тыхәԓ тэԓԓән мўвән хӑйты урәӈән пӑ нын уԓәпсайән вŏԓаӈ щирән шавиты урәӈән.
GEN 45:8 Щишән, ӑнта нын мӑнэм ты китсәԓән, щит Турәм, Ԓўв мӑнэм фараон ԓӑӈкәр хуйа пŏтсәԓы, пӑ хŏԓ ԓўв хотәԓ кущайа, пӑ Египет мўв тӑйтаӈ ун кущайа ищи.
GEN 45:9 Ащем хŏща сора мӑнаты пӑ ԓўвеԓа пŏтәртаты: ‘Иосиф пŏхен щиты йастәԓ: Турәм мӑнэм Египет мўв ԓŏватән кущайа пŏтсәԓы; ма хŏщайэм йŏхта, аԓ рŏна;
GEN 45:10 Гесем мўв щуӈән нӑӈ уԓты питԓән; ма пўӈԓэмән ванән нӑӈ питԓән, нӑӈ пŏхԓан па, нӑӈ пŏхԓан пŏхәт па, ай пӑ ун войԓан, пӑ иса, мўй нӑӈ тӑйԓән;
GEN 45:11 пӑ нӑӈен щита ԓапәтты верәтԓэм, ԓэԓԓы йӑт хŏԓна вет тӑԓ питәԓ, нӑӈена пӑ нӑӈ хотәӈ ŏтԓана нўшайа ӑт питты урәӈән’.
GEN 45:12 Тӑта щи, нын сэмԓән пӑ Вениамин апщем сэмәт ватԓәт, щит ма нын пиԓанән пŏтәртԓәм;
GEN 45:13 Египет мўвән ма ун кущайа уԓты уԓәпсайэм эԓты пӑ иса, мўй нын тӑта ватсәты, ащема пŏтәртаты, пӑ сорашәк ащем ты тўваԓән».
GEN 45:14 Щӑԓта ԓўв Вениамин апщеԓ ӑпәԓсәԓы пӑ хоԓԓәс; Вениамин пӑ, ԓўвеԓ ӑпәԓтыман, хоԓԓәс.
GEN 45:15 Пӑ йайԓаԓ хŏԓ мосәԓтәсԓы, ԓывиԓаԓ ӑпәԓтыман, хоԓԓәс. Щӑԓта йайԓаԓ ԓўв пиԓәԓән пŏтәртсәт.
GEN 45:16 Иосиф йайԓаԓ йŏхтәм айкеԓ фараон унты йŏхтәс; фараон митйохԓаԓ пиԓән нŏх амтәс.
GEN 45:17 Фараон Иосиф пеԓа йастәс: «Йайԓан пеԓа йаста: ‘Тӑмиты вераты: войԓән шӑншәт ԋаԋ ԓатән ԓэԓтаԓән пӑ Ханаан мўва мӑнаты;
GEN 45:18 ащан пӑ нын тыхәԓ тэԓԓән ўйаты, пӑ ма хŏщайэм йŏхтаты; ма нынана мет йӑм тӑха Египетән мӑԓәм, мўвән энмәԓтәм мет йӑм ԓэвпәсәт нын ԓэты питԓәты’.
GEN 45:19 Нӑӈена ин партԓэм ԓывиԓаԓа йастәты: ‘Щиты вераты: Египет мўв эԓты колесница ԓовәӈ ухԓәт ԋаврэмԓән пӑ имиԓән урәӈән ўйаты, ащан ты тўваԓән пӑ нын ты йŏхтаты;
GEN 45:20 пŏрмасԓән эԓты аԓ нумәсаты, Египет мўвән мўй йӑм уԓ, щит эԓты нынана мӑԓәм’».
GEN 45:21 Израиль пŏхәт щиты щи версэԓ. Колесница ԓовәӈ ухԓәт Иосиф ԓывиԓаԓа мӑсԓы, хŏты фараонән партса, пӑ йушән тӑрәмты арат хӑԓ мӑс;
GEN 45:22 кашәӈ хŏйата йӑԓәп ԓумтәм сŏх мӑс, Вениамина пӑ хуԓәмсот щел ŏх пӑ вет йӑԓәп ԓумтәм сŏх мӑс;
GEN 45:23 ащеԓа пӑ Египет мўв мет йӑм пŏрмасәтән ԓэԓтәм йаӈ осёл вой китәс, пӑ йаӈ осёл нэ вой ԋаԋ ԓатән, ԋаԋән пӑ хӑԓы хирән ащеԓа йŏхԓы йуш кеша ԓэԓсәԓы.
GEN 45:24 Щӑԓта йайԓаԓ эсәԓсәԓы, пӑ ԓыв мӑтсәт. Пӑ ԓывиԓаԓа йастәс: «Йушән кўтәӈа ӑԓ йўваты».
GEN 45:25 Ԓыв Египет мўв эԓты мӑтсәт пӑ Ханаан мўва Иаков ащеԓ хŏща йŏхәтсәт,
GEN 45:26 пӑ айкеԓ тусәт, щиты йастәсәт: «Иосиф ԓыԓәӈ пӑ Египет мўв ԓŏватән ун кущайа уԓ». Иаков ԓыԓәԓ йэрмәс, пӑ ԓўв ԓывиԓаԓа ӑт эвԓәс.
GEN 45:27 Щӑԓта, хун ԓыв ԓўвеԓа Иосиф йасӈәт пŏтәртсәԓәԓ, мўй ԓўв йастыԓыйәс, пӑ щӑԓта, хун Иосифән ԓўвеԓ туты китәм колесница ԓовәӈ ухԓәт кащаԓәс, Иаков ащеԓ ԓыԓәԓ ԓӑщкама йис,
GEN 45:28 пӑ Израиль йастәс: «Мета щи, тӑрмәԓ, Иосиф пŏхем ԓыԓәӈ; мӑнԓәм пӑ пӑртэм йэԓпийән ԓўвеԓ ватԓэм».
GEN 46:1 Израиль ԓўв тӑйәм ŏтәԓ пиԓән мӑнәс, пӑ Вирсавияйа йŏхтәс, пӑ Исаак ащеԓ Турма Иаков щита йир верәс.
GEN 46:2 Атәԓән уԓәмән Турәм Израиль вохсәԓы: «Иаков! Иаков!» Ԓўв йастәс: «Ма щи».
GEN 46:3 Турәм йастәс: «Ма Турәм, нӑӈ ащен Турәм; Египет мўва мӑнты аԓ пӑԓа, щита нӑӈ эԓтэн вŏԓаӈ мир тыйәԓтԓәм;
GEN 46:4 Ма нӑӈ пиԓэнән Египет мўва мӑнԓәм, Ма нынан йŏхԓы па туԓԓам. Иосиф ԓўв йошәԓән нӑӈ сэмԓан лӑп петԓәԓы».
GEN 46:5 Вирсавия эԓты Иаков йэԓԓы мӑнәс; пӑ щӑԓта Израиль пŏхәт Иаков ики, ԋаврэмԓаԓ, имиԓаԓ пиԓән колесница ԓовәӈ ухԓәтән Египет мўва тусԓаԓ; щитәт фараонән китсайәт, ԓўвеԓ туты урәӈән.
GEN 46:6 Ханаан мўвән шитәм войԓаԓ пӑ пŏрмасԓаԓ пӑтән ўсԓаԓ, пӑ Египет мўва йŏхәтсәт, – Иаков пӑ хŏԓ рутәԓ ԓўв пиԓәԓән.
GEN 46:7 Пŏхԓаԓ пӑ хиԓыԓаԓ, эвиԓаԓ пӑ хиԓынэԓаԓ, пӑ хŏԓ рутәԓ ԓўв пиԓәԓән Египет мўва пӑтән тусԓы.
GEN 46:8 Тӑта щи Египет мўва йŏхтәм Израиль пŏхԓаԓ нэмәт: Иаков пӑ ԓўв пŏхԓаԓ. Иаков оԓәӈ пŏхәԓ Рувим.
GEN 46:9 Рувим пŏхәт: Ханох пӑ Фаллу, Хецрон пӑ Харми.
GEN 46:10 Симеон пŏхәт: Иемуил пӑ Иамин, пӑ Огад, пӑ Иахин, пӑ Цохар, пӑ Саул, ханаан нэ пŏх.
GEN 46:11 Левий пŏхәт: Гирсон, Кааф пӑ Мерари.
GEN 46:12 Иуда пŏхәт: Ир пӑ Онан, пӑ Шела, пӑ Фарес, пӑ Зара; туп Ир пӑ Онан ханаан мўвән пӑрсәтән. Фарес пŏхәт: Есром пӑ Хамул.
GEN 46:13 Иссахар пŏхәт: Фола пӑ Фува, Иов пӑ Шимрон.
GEN 46:14 Завулон пŏхәт: Серед пӑ Елон, пӑ Иахлеил.
GEN 46:15 Щит Лия тыхәԓ тэԓ ус, Месопотамия мўвән Иакова тӑйәм пŏхәт пӑ Дина эвеԓ, пӑ ԓыв пŏхԓаԓ. Аратәԓән ԋӑԓйаӈ пеԓа хуԓәм хŏйат эвиԓаԓ пӑ пŏхԓаԓ, пӑ ԓыв ԋаврэмԓаԓ.
GEN 46:16 Гад пŏхәт: Цифион пӑ Хагги, Шуни пӑ Эцбон, Ери пӑ Ароди пӑ Арели.
GEN 46:17 Асир пŏхәт: Имна пӑ Ишва, пӑ Ишви, пӑ Бриа, пӑ Серах нэ ŏпеԓ. Бриа пŏхәт: Хевер пӑ Малхиил.
GEN 46:18 Щит Зелфа тыхәԓ тэԓ ус, Лаванән Лия эвеԓа ԓўв митнэӈа мӑса. Иакова ԓўв энмәԓтәм тыхԓаԓ аратәԓән хутхŏщйаӈ ԋаврэм ус.
GEN 46:19 Иаков Рахиль имеԓ пŏхәт: Иосиф пӑ Вениамин.
GEN 46:20 Египет мўвән Иосиф хŏща Манассия пӑ Ефрем сэма питсәтән, Асенефа, Илиополь вош Потифер нэмпи йир верты хŏйат эвийән, сэма пайәтсайтән.
GEN 46:21 Вениамин пŏхәт: Бела пӑ Бехер пӑ Ашбел; Гера пӑ Нааман, Эхи пӑ Рош, Муппим пӑ Хуппим пӑ Ард.
GEN 46:22 Щит иса Рахиль тыхәԓ тэԓ ус, хŏйтат Иаков хŏща сэма питсәт, аратәԓән ԋӑԓхŏщйаӈ хŏйат.
GEN 46:23 Дан пŏх: Хушим.
GEN 46:24 Неффалим пŏхәт: Иахцеил пӑ Гуни, пӑ Иецер, пӑ Шиллем.
GEN 46:25 Тӑм Валла тыхәԓ тэԓ ус, Лаванән Рахиль эвеԓа ԓўв митнэӈа мӑса. Иакова ԓўв энмәԓтәм тыхәԓ тэԓәԓ аратәԓән ԓапәт хŏйат.
GEN 46:26 Египет мўва Иаков пиԓән йŏхтәм хŏйатәт, хŏйтат ԓўв эԓтэԓ тыйсәт, аратәԓән ԓапәтйаӈ пеԓа хут хŏйат, ԓыв тўмпеԓән хŏԓна Иаков пŏхԓаԓ имет па.
GEN 46:27 Иосиф пŏхӈән, хŏйӈән Египет мўвән сэма питсәӈән, кӑт хŏйат. Египет мўва касԓәм Иаков хŏттэԓ хŏйат иуԓтыйа ԓапәтйаӈ.
GEN 46:28 Иаков ԓўв йэԓпеԓән Иосиф хŏща Иуда китсәԓы, Иосифән Гесем пеԓа йуш аԉты урәӈән. Щӑԓта Гесем мўва ԓыв йŏхәтсәт.
GEN 46:29 Иосиф ԓўв колесница ԓовәӈ ухԓәԓ киртсәԓы пӑ Израиль ащеԓ йэщаԓт Гесем мўва мӑнәс, ԓўвеԓ кащаԓәмәԓән, ӑпәԓсәԓы, пӑ ԓўв сапԓәԓән хўв хоԓԓәс.
GEN 46:30 Пӑ Израиль Иосифа йастәс: «Ин ма нӑӈен ԓыԓӈа ватмем йўпийән пӑрты верәтԓәм».
GEN 46:31 Иосиф йайԓаԓа пӑ ащеԓ хŏт тэԓа йастәс: «Ма мӑнԓәм, фараона айкеԓ туԓәм пӑ ԓўвеԓ йастәԓәм: ‘Ма йайԓам пӑ ма ащем хот тэԓ, хŏйтат Ханаан мўвән усәт, ма хŏщайэм йŏхәтсәт;
GEN 46:32 щит ош шавиты хŏйатәт; ԓыв вой энмәԓԓәт; пӑ ун вой па ай вой тащԓаԓ пӑ мўй тӑйԓәт, ԓыв пӑтән тусԓаԓ’.
GEN 46:33 Фараон нынан вохԓаԓы ки пӑ иԋщәсԓәԓы: ‘Мўй верман уԓԓәты?’,
GEN 46:34 нын щиты йастаты: ‘Мўӈ, нӑӈ митйохԓан, айтэԓән ин тӑм унты вой энмәԓтман усув, опращԓув иты’; щишән, нын Гесем мўвән уԓты хӑйԓайты. Египет хŏйатәт ош шавиты хŏйатәт ӑт шӑктәԓԓаԓ, ԓывиԓаԓа щит ўкщәм».
GEN 47:1 Иосиф йŏхтәс пӑ фараона айкеԓ верәс пӑ йастәс: «Ащем пӑ йайԓам, ай пӑ ун вой тащԓаԓ пиԓән, пӑ иса мўй ԓыв тӑйԓәт, Ханаан мўв эԓты йŏхәтсәт; пӑ ин ԓыв Гесем мўвән».
GEN 47:2 Йайԓаԓ эԓты вет хŏйат ўс пӑ фараон йэщаԓт ԓощәԓтәсԓы.
GEN 47:3 Фараон ԓўв йайԓаԓ иԋщәссәԓы: «Мўй верман уԓԓәты?» Ԓыв фараона йастәсәт: «Мўӈ ащиԓув иты ош тащ шавиты йох, нӑӈ митйохԓан».
GEN 47:4 Щӑԓта ԓыв фараона йастәсәт: «Мўӈ тӑм мўва уԓты щира йŏхәтсув, тащ ԓапәтты мўв ӑнтом урәӈән, Ханаан мўвән шек ԓэԓԓы йӑт йŏхтәс; щишән, митйохԓан Гесем мўвән уԓты эсԓаԓән».
GEN 47:5 Фараон Иосифа йастәс: «Ащен пӑ йайԓан нӑӈ хŏщайэн йŏхәтсәт;
GEN 47:6 Египет мўв нӑӈ йэԓпенән: ащен пӑ йайԓан мет йӑм мўвән уԓты мийаԓән; Гесем мўвән ԓыв ат уԓԓәт; щӑԓта вер йӑма уйәтты хŏйатәт ԓыв кўтэԓән уйәтԓән ки, ма тащԓам вантыты хŏйатәт ԓыв эԓтыԓаԓ пŏна».
GEN 47:7 Щӑԓта Иосиф Иаков ащеԓ фараон пиԓән уйтантыты тусԓы. Иаков фараон Турәм йӑмән мӑсԓы.
GEN 47:8 Фараон Иаков пеԓа йастәс: «Нӑӈ нуптэн мўй арат тӑԓ?»
GEN 47:9 Иаков фараона йастәс: «Ма касԓыйәм хӑтәԓԓам сот хŏԉмаӈ тӑԓ; ма уԓәм тӑԓԓам шимԓәт пӑ шукәӈәт, пӑ аратэԓән ащиԓам касԓыйәм тӑԓәта ӑт йŏхәтԓәт».
GEN 47:10 Щӑԓта Иаков фараон Турәм йӑмән мӑсԓы, пӑ фараон эԓты этәс.
GEN 47:11 Иосиф ащеԓ пӑ йайԓаԓ Египет мўвән уԓты хӑйсәԓы, Египет мет йӑм мўвән, Раамсес мўвән, ԓывиԓаԓа мўв щуӈ тӑйты мӑсԓы, хŏты фараонән партса.
GEN 47:12 Иосиф ащеԓ пӑ йайԓаԓ, пӑ хŏԓ иса ащеԓ тыхәԓ тэԓ тӑрәмты аратән ԋаԋән мийԓысԓы, кашәӈ хот тэԓ тӑрәмты аратән.
GEN 47:13 Мўв ԓŏватән ԋаԋ ӑнтом ус, мет ԓэԓԓы йӑт йŏхтәс, щишән, Египет пӑ Ханаан мўвәт ԓэԓԓы шукащсәт.
GEN 47:14 Египет мўвән пӑ Ханаан мўвән мўй арат щел ŏх ус, щи ŏх тыныйәм ԋаԋ ԓат сӑхат Иосиф хŏԓ ӑкәтсәԓы пӑ фараон хотән шависԓы.
GEN 47:15 Щиты Египет мўвән пӑ Ханаан мўвән щел ŏх хŏԓас. Египет мўв хŏйатәт Иосиф хŏща йŏхәтсәт пӑ йастәсәт: «Мўӈева ԋаԋ мийа; щел ŏхев хŏԓәм урәӈән, нӑӈ ватман, мўӈев мўй пӑрты мосәԓ?»
GEN 47:16 Иосиф йастәс: «Тащԓән ты воштаԓән, войԓән сӑхат ԋаԋән мӑԓԓам, ŏхԓән ки хŏԓасәт».
GEN 47:17 Ԓыв тащԓаԓ Иосиф хŏща воштәсԓаԓ; Иосиф пӑ ԓывиԓаԓа ԋаԋ мийԓыйәс ԓовәт сӑхат, ош тащәт, мис тащәт пӑ осёл войәт сӑхат; щи тӑԓ ԓывиԓаԓ хŏԓ войԓаԓ сӑхат ԋаԋән ԓўв мийԓысԓы.
GEN 47:18 Щи тӑԓ щиты хӑщәс; йухәт тӑԓ ԓўв хŏщайәԓа йŏхәтсәт пӑ ԓўвеԓа йастәсәт: «Мўӈ кущайэв эԓты ӑт хӑԋатԓэв, ŏхев хŏԓас, тащԓув па кущайэв пеԓа питсәт; кущайэва мӑты урәӈән нэмәԓты ӑт хӑщәс, мўӈ эԓԓув пӑ мўӈ мўвԓув тўмпийән;
GEN 47:19 мўй урәӈән мўӈева, нӑӈ сэмԓан ватман, пӑрты пӑ мўвԓув таԓты хӑйты? Мўӈиԓув пӑ мўӈ мўвԓув ԋаԋ сӑхат ԓутаԓән, пӑ мўӈ, мўвԓув пиԓән веккеша фараон митйоха питԓув, нӑӈ пӑ мўӈева ԋаԋ сэмәӈ ԓат мийа, мўӈев ԓыԓӈа хӑщты пӑ ӑт пӑрты урәӈән пӑ мўвев таԓты ӑт хӑйты урәӈән».
GEN 47:20 Щиты Иосиф хŏԓ Египет мўв фараон урәӈән ԓутсәԓы, Египет мўвәӈ хŏйатәт кашәӈ ԓўв мўв хӑрәԓ тынысԓы ԓыԓӈа хӑщты урәӈән. Фараон пеԓа мўв иса питәс.
GEN 47:21 Египет мўв и оԓӈәԓ эԓты кимет оԓӈәԓ унты уԓты мир хŏԓ митйоха Иосиф версәԓы.
GEN 47:22 Туп йир верты хŏйатәт мўвәт Иосиф ӑт ԓутсәԓы, ԓыв фараон эԓты йўкан ŏхән мийԓысайәт, фараон мийәм ŏх эԓты ԓэсәт; щишән мўвеԓ ԓыв ӑт тынысэԓ.
GEN 47:23 Иосиф мир пеԓа йастәс: «Тӑта щи, фараон кеша нынан пӑ нын мўвԓән ма ԓутсәԓам; тӑта щи нынана ԋаԋ сэмәӈ ԓат, пӑ мўва пŏнаԓән;
GEN 47:24 ԋаԋ ӑкәтты пŏра йŏхәттаԓән, ветмет пелкәԓ фараона мийаԓән, ԋӑԓ пелкәԓ пӑ мўва омәсты пӑ нынана пӑ хотәӈ ŏтԓән пӑ ԋаврэмԓән ԓапәтты урәӈән хӑщәԓ».
GEN 47:25 Ԓыв йастәсәт: «Нӑӈ мўӈ ԓыԓэв шависэн; йӑм сэмән кущайэв мўӈ пеԓэва ат ватәԓ пӑ фараона митйоха питԓув».
GEN 47:26 Щиты Иосиф Египет мўвән тӑм хӑтәԓ унты уԓты закон постәс: ӑктәм ԋаԋ ԓат ветмет пелкәԓ фараона мӑты, туп йир верты хŏйатәт ӑктәм ԋаԋ ԓат тўмпийән, ԓыв мўвеԓ фараон пеԓа ӑт ԓўӈтәсәс.
GEN 47:27 Щиты Израиль Египет мўвән ус, Гесем мўв щуӈән, щи мўвән ԓыв тӑйтаӈаӈа уԓты питсәт, пӑ ԋаврэмәӈа йисәт, пӑ шек ара йисәт.
GEN 47:28 Иаков Египет мўвән ԓапәтхŏщйаӈ тӑԓ ус; пӑ аратәԓ тӑԓԓаԓ щирән ԓўв сот ветйаӈ пеԓа ԓапәт тӑԓ ус.
GEN 47:29 Израиль пӑрты хӑтԓаԓ ванамәс, Иосиф пŏхәԓ вохсәԓы пӑ ԓўвеԓа йастәс: «Йӑм сэмән ма пеԓайэм ватԓән ки, йошен ма пещ иԓпема пŏныԓыйи пӑ йасәӈ мийа, нӑӈ мӑнэм щаԉәтԓэн пӑ ӑт ԓэпәԓԓэн, Египет мўвән мӑнэм ӑт лоттәԓэн,
GEN 47:30 ащиԓам пиԓән мӑнэм ŏԓты урәӈән; Египет мўв эԓты мӑнэм тўви пӑ ԓыв ŏԓты хŏшапәӈ кевеԓән мӑнэм лотты». Иосиф йастәс: «Нӑӈ йасӈен щирән верԓэм».
GEN 47:31 Пӑ йастәс: «Мӑнэма йасәӈ мийа». Иосиф йасәӈ ԓўвеԓа мӑс. Израиль пӑ ԓўв ŏԓттәхайәԓ ŏсмәԓән, ŏх пŏнман, иԓ ԋўрәс.
GEN 48:1 Щи йўпийән Иосифа йастәса: «Щиты, нӑӈ ащен кӑшаӈ». Пӑ ԓўв Манассия пӑ Ефрем пŏхӈәԓаԓ пӑтән ўсԓы.
GEN 48:2 Иакова айкеԓ верса пӑ йастәса: «Щиты, Иосиф пŏхен нӑӈ хŏщайэн йиԓ». Израиль хӑщәм йурԓаԓ ӑктәс пӑ ŏԓттӑхайәԓән нŏх опсәс.
GEN 48:3 Иаков Иосиф пеԓа йастәс: «Иса Верәтты Турәм Луз вошән, Ханаан мўвән, ма хŏщайэм этәс пӑ йӑмән мӑнэм мӑсԓы,
GEN 48:4 пӑ мӑнэма йастәс: ‘Ма нӑӈен рутмӑԓтԓэм, ара верԓэм, ар мир нӑӈ эԓтэн питәԓ, пӑ тӑм мўв нӑӈ йўпенән нӑӈ тыхԓэна веккеша тӑйты мӑԓэм’.
GEN 48:5 Ин нӑӈ пŏхӈәԓан, ма йŏхәттэм йэԓпийән Египет мўвән сэма питәм пŏхӈәԓан, ԓын мӑнэӈәԓам; Ефрем пӑ Манассия, ԓын Рувим пӑ Симеон иты, мӑнэӈәԓам питԓәӈән;
GEN 48:6 ԓын йўпанән сэма питты ԋаврэмԓән нӑӈиԓан питԓәт; ԓыв щӑха йайӈәԓән нэм хўват йайӈәԓән мўвәт эԓты мўвән ортԓайәт йэԓԓы тӑйты урәӈән.
GEN 48:7 Месопотамия эԓты мӑнмемән, Ханаан мўвән, Ефрафа унты йэша ӑт йŏхәтмемән, Рахиль пӑрәс, ма ԓўвеԓ щита, Ефрафа пеԓа мӑнты йуш пўӈәԓән, лоттәсэм», Ефрафа щит ин Вифлеем.
GEN 48:8 Щӑԓта Израиль Иосиф пŏхӈән кащаԓәс пӑ йастәс: «Щит хŏйӈән?»
GEN 48:9 Иосиф ащеԓа йастәс: «Щит ма пŏхӈәԓам, Турәмән тӑта мӑнэм мийәм пŏхӈәԓам». Иаков йастәс: «Ма пўӈԓэма ԓынан тўваԓән, ма ԓынан йӑмән мӑԓԓам».
GEN 48:10 Пирща йўвәм Израиль ики сэмԓаԓ нўшайа йисәт, йӑма ӑт нысайәт. Иосиф пŏхӈәԓаԓ ԓўв пўӈԓәԓа тусԓы, ԓўв ԓынан мосәԓтәсԓы пӑ ӑпәԓсәԓы.
GEN 48:11 Израиль Иосифа щиты йастәс: «Нӑӈ веншен шийаԓәты ӑт нумисысәм; ин пӑ Турәмән ԋаврэмԓан мӑнэм хŏԓна этәԓтәсайәт».
GEN 48:12 Иосиф ԓынан ԓўв шаншŏхԓаԓ эԓты йэԓшәк тусԓы пӑ ԓўв йэԓпеԓән мўв унты, ŏх пŏнман, иԓ ԋўрәс.
GEN 48:13 Щӑԓта Иосиф пŏхӈәԓаԓ кинтак ўсԓы, Ефремәԓ йӑм пеләк йошәԓа, Израиль пӑрта пеләк йош шŏма, Манассияйәԓ пӑ пӑрта пеләк йошәԓа, Израиль йӑм пеләк йош шŏма, пӑ ԓўв хŏщайәԓ вана тусԓы.
GEN 48:14 Израиль пӑ йӑм пеләк йошәԓ Ефрем ŏха пŏтсәԓы, кўш щитәԓ айшәк ус, пӑрта пеләк йошәԓ пӑ Манассия ŏха пŏтсәԓы. Номәс тӑйман йошӈиԓаԓ щиты, пеләтман, пŏтсәԓы, кўш Манассия оԓәӈ пŏх ус.
GEN 48:15 Щитәԓән Израиль Иосиф йӑмән мӑсԓы пӑ щиты йастәс: «Турәм, Хŏй йэԓпийән Авраам пӑ Исаак ащеӈәԓам устән, пӑ мӑнэм уԓтэм хўват тӑм хӑтәԓ унты шавийәм Турәм,
GEN 48:16 атәм вер эԓты мӑнэм нŏх пайтыԓыты ангел, тӑм энәмты пŏхӈән йӑмән ат мӑԓԓы; ԓын нэмԓән йастытыйән, ма нэмем пӑ, Авраам пӑ Исаак ащеӈәԓам нэмӈән, ищи ат нумәԓмиԓайәт, пӑ ԓын тыхәԓ тэԓԓән мўвән ара ат йиԓтән».
GEN 48:17 Иосиф кащаԓәсԓы, ащеԓ йӑм пеләк йошәԓ Ефрем ŏха пŏнмаԓ; нŏпсәԓ щит эԓты шӑкәс. Ащеԓ йош ўсԓы пӑ Ефрем ŏх эԓты Манассия ŏха пŏнты ўтщисԓы,
GEN 48:18 пӑ ащеԓа йастәс: «Ӑнта, ащи, тӑта щи – оԓәӈ пŏхем; ԓўв ŏхәԓа йӑм пеләк йошен пŏны».
GEN 48:19 Ащеԓ пӑ ԓўв пиԓәԓән ӑт кашащәс пӑ йастәс: «Уйәтԓэм, пŏхийэ, уйәтԓэм; ԓўв эԓтэԓ ищи вŏԓаӈ мир тыйәԓ, туп апщеԓ ԓўв эԓтэԓ унашәк питәԓ, ԓўв эԓтэԓ ар мир тыйәԓ».
GEN 48:20 Щи хӑтәԓ ԓынан йӑмән мӑсԓы, йастәман: «Нын нэмԓән хўват израиль йох хŏйатәта йасәӈән йӑм мӑты питԓәт, пŏтәрман: ‘Турәм Ефрем пӑ Манассия иты нӑӈена ат верәԓ’». Щиты Ефрем Манассия эԓты унашәк пŏтсәԓы.
GEN 48:21 Щӑԓта Израиль Иосифа йастәс: «Щи, ма пӑрты хӑтԓэм йŏхтәс; Турәм нын пиԓанән питәԓ пӑ ащиԓән мўва нынан йŏхԓы туԓԓы;
GEN 48:22 амор йох эԓты аԓтты кешемән пӑ йухԓэмән ма йŏра шитәм мўвем нӑӈена мӑԓэм, щит йайԓан мўв эԓты аршәк, йайԓан кўтән уна уԓтэн урәӈән».
GEN 49:1 Иаков пŏхԓаԓ вохсәԓы пӑ йастәс: «Йӑха ӑктәщаты, пӑ ма нынана йастәԓәм, мўй нын пиԓанән йэԓԓы уԓты хӑтԓәтән питәԓ.
GEN 49:2 Ӑктәщаты пӑ хуԓәнтаты, Иаков пŏхәт, Израиль ащан ики хуԓәнтаты.
GEN 49:3 Рувим, оԓәӈ пŏхем! Нӑӈ – ма йурэм пӑ ма ху йурэм оԓәӈ ԋаврэмем, мет ԓӑтәӈ пӑ мет йурәӈ;
GEN 49:4 туп нӑӈ хўмпәт иты йэшащсән, – ащен ŏԓттӑхайа ŏԓсән, нӑӈ ма ŏԓттӑхайэм шӑкатсэн, щишән, мет уна нӑӈ ӑт питԓән.
GEN 49:5 Симеон пӑ Левий, йайсакӈән, аԓтты кешиԓән пӑратты урәӈән тӑйԓәԓән;
GEN 49:6 ԓын нŏмәсԓән хŏща ма вер ӑт тӑйԓәм, ԓын пиԓанән ӑт ӑктәщиԓәм, ԓын хŏйатәт ԉикащман веԓԓыстән пӑ каш урәӈән хор кўр ԓон эвтыԓыстән;
GEN 49:7 ԓын ԉикән мўԓман ат уԓ, мŏрт тўмпи так урәӈән пӑ йэшащты щирән мўԓман ат уԓ, мŏрт тўмпи йурәӈ урәӈән; Иаков тыхәԓ тэԓ кўтән лакки йŏвәԓԓыԓам пӑ Израиль мўв ԓŏватән лакки рӑԋӈәԓԓыԓам.
GEN 49:8 Иуда! Йайԓанән нӑӈ ишәкты питԓайән. Вўракԓан нӑӈ эԓтэн пӑԓты питԓәт; ащен пŏхәт нӑӈ йэщаԓтэн, ŏх пŏнман, иԓ ԋўрԓәт.
GEN 49:9 Иуда, нӑӈ энәмты лев вой, нӑӈ йӑм веԓпәс эԓты йŏхәтԓән, пŏхийэ. Лев ху вой иты пӑ лев нэ вой иты, ԓўв мўвән ŏԓтаԓән, хŏйән нŏх кўрәтты верәтԓа?
GEN 49:10 Скипетр хон пос Иуда хŏща хӑщәԓ пӑ ԓўв хот тэԓәԓән хон катәԓты пос йэԓԓы тӑйты питԓа, Йӑмащты Ŏт йŏхәттаԓ унты, Хŏй йэщаԓт хŏԓ мирәт шаншŏхән ԓойты питԓәт.
GEN 49:11 Виноград йўха осёл вой пŏшхәԓ ԓўв йӑрԓәԓы, виноград мет йӑм йўх хŏща осёл пŏшхәԓ ԓощәԓтәԓԓы; сŏхԓаԓ ўнайән пусԓәԓы пӑ ԓумтәмәԓ виноград ўрән ԉŏхәтԓәԓы.
GEN 49:12 Сэмԓаԓ ўна иты вŏԉиԓәт пӑ пекԓаԓ мис йик иты нŏвет.
GEN 49:13 Завулон щарәс питарән уԓты питәԓ пӑ ун хопәт ԓойты шитам лух йўкана питәԓ, Сидон унты ԓўв мўв сыԓәԓ йŏхәтәԓ.
GEN 49:14 Иссахар – йŏханӈән кўтән ŏԓты йурәӈ осёл вой;
GEN 49:15 ԓўв кащаԓәсԓы, щўтщәты лотәԓ йӑм, мўвәԓ ԓӑтәӈ: ԓӑӈкәрԓаԓ ԓавәрт аԓтты урәӈән иԓ эсәԓсәԓы, пӑ мит сŏхәптәты урәӈән рупитты питәс.
GEN 49:16 Дан, Израиль и тыхәԓ иты, ԓўв мирәԓ сўтәтты питԓәԓы;
GEN 49:17 Дан ŏхты вой иты йушән ŏԓты питәԓ, атәм ŏхты вой иты йушән ԓавԓәсәԓ, ԓов кўрәԓ эԓты пŏрэмәтаԓән ԓов шӑшән омәсты хŏйат йŏхԓы рӑкәнәԓ.
GEN 49:18 Нӑӈ ԋотпена нŏмәс пŏнԓәм, Турәм Куща!
GEN 49:19 Гад ԓоԓмасты ŏтәтән иԉапты питԓа, ԓўв пӑ ԓывиԓаԓ каԓтәмԓаԓ хўват йŏхԓы ԋухәԓԓәԓы.
GEN 49:20 Асир пӑ – ԋаԋәԓ мавәӈ питәԓ, хонәт ԓэты ԓэвпәсәт тутԓыты питәԓ.
GEN 49:21 Неффалим – ун теревинф йўх, хŏрам нўвәт ԓўв энмәԓтәԓ.
GEN 49:22 Иосиф – йӑм ԓыԓәӈ йўх нўв, йӑм ԓыԓәӈ йўх нўв йик пўӈәԓән; нўвԓаԓ пушас нўмпийән энәмԓәт;
GEN 49:23 ԉаԉәсман ԓўв шукатыса, йухԓәӈ йохән ԋоԓән эсԓыса,
GEN 49:24 ԓўв пӑ йухԓәԓ ищипа така хӑщәс, йошԓаԓ ищиты йурәӈәт, Иаков йурәӈ Турәм йошәт эԓты, Ԓыԓәт Шавиты Ŏт эԓты пӑ Израиль Так Вер эԓты,
GEN 49:25 ащен Турәм эԓты, Хŏйән нӑӈ ат ԋотԓайән, Иса Верәтты Ŏт эԓты, Хŏйән нӑӈ йӑмән ат мӑԓайән нумәԓта турәм эԓты, иԓән ŏԓты пӑтыԓы тӑха эԓты, эсәм шўв пӑ утрәԓ эԓты;
GEN 49:26 ащен йӑм йасӈәт эԓты, ԓыв катра Кевәт йӑм эԓты пӑ йис сӑхмәт йӑм эԓты ԓыв пӑԓшәкәт; Иосиф ŏх пӑтыйа ԓыв ат питԓәт, йайԓаԓ кўтән пирыйәм ŏт ŏх пӑтыйа ԓыв ат питԓәт.
GEN 49:27 Вениамин, ԋэԓәӈ йэвәр, аԓәӈсӑхат веԓәм ŏтәԓ ԓэԓ пӑ йэтнайән мŏщатәм ŏтәԓ ортәԓ».
GEN 49:28 Тӑм Израиль кӑтхŏщйаӈ сыр рут; щиты ԓывиԓаԓа ащеԓ ики йастәс; ԓывиԓаԓ йӑмән мӑсԓы, кашәӈ ŏтәԓ ԓўв йўкан йӑмән мӑсԓы.
GEN 49:29 Щӑԓта Иаков ԓывиԓаԓа щиты партсәԓы, ԓывиԓаԓа щиты йастәс: «Ма ма мирэм хŏща мӑнԓәм; ащиԓам ŏԓты хŏшапәӈ кевән мӑнэм лоттаԓән, щит Ефрон хет ики мўв хӑр хŏща,
GEN 49:30 Махпела мўв хӑр хŏща, Мамре шŏма Ханаан мўвән. Авраам Ефрон хет ики эԓты щи хŏшапәӈ кев лоттәты урәӈән мўв хӑр пиԓән ԓутәс.
GEN 49:31 Щи хŏшапәӈ кевән Авраам Сарра имеԓ пиԓән лоттәман уԓԓайтән; щита Исаак Ревекка имеԓ пиԓән лоттәман уԓԓайтән; щита Лия имем ма лоттәсэм;
GEN 49:32 щи мўв хӑр хŏшапәӈ кевәԓ пиԓән хет йох эԓты ԓутса».
GEN 49:33 Щитәԓән, пŏхԓаԓа партәм йасәӈԓаԓ Иаков вŏԓәтсәԓы, кўрԓаԓ ŏԓттӑхайа пŏтсәԓы, пӑ пӑрәс, пӑ опращԓаԓ хŏща мӑнәс.
GEN 50:1 Иосиф ащеԓ эԓты рӑкнәс пӑ хоԓԓәс, пӑ ԓўвеԓ мосәԓтәсԓы.
GEN 50:2 Щӑԓта Иосиф ԉэккар митйохԓаԓа ащеԓ бальзамән ԋŏсәтты партсәԓы; ԉэккарәт Израиль бальзамән ԋŏсәтсэԓ.
GEN 50:3 Ԋӑԓйаӈ хӑтәԓ хӑщәс, щи арат хӑтәԓ бальзамән пŏшәԓтәԓа, пӑ ԓапәтйаӈ хӑтәԓ Египет хŏйатәт ԓўв эԓтэԓ хоԓԓәсәт.
GEN 50:4 Хоԓԓәп хӑтԓәт хӑщәмән, фараон ԓӑӈкәр хŏйатәт пеԓа Иосиф йастәс: «Йӑм сэмән ма пеԓайэм ватԓәты ки, тӑмиты фараона йастаты:
GEN 50:5 ащем ма эԓтэм йасәӈ ўс, щиты пŏтәртәс: ‘Ма пӑрты хӑтԓэм ванамәс; Ханаан мўвән ма ԓэщатәм хŏшапәӈ кевемән мӑнэм шавийи’. Ин пӑ мӑнэм эсԓы йӑхты пӑ ащем лоттәты, пӑ щӑԓта йŏхԓы йŏхәтты».
GEN 50:6 Фараон йастәс: «Йӑӈха пӑ ащен лотты, хŏты ԓўв нӑӈена партәс».
GEN 50:7 Иосиф ащеԓ лоттәты мӑнәс. Ԓўв пиԓәԓән фараон хŏԓ ԓӑӈкәр йохԓаԓ мӑтсәт, ԓўв хотәԓ ун икет пӑ Египет мўв хŏԓ ун икет,
GEN 50:8 пӑ Иосиф хот тэԓ, пӑ йайԓаԓ, пӑ ащеԓ хот тэԓ. Туп ԋаврэмԓаԓ пӑ ай пӑ ун вой тащԓаԓ Гесем мўвән хӑйсыԓаԓ.
GEN 50:9 Ԓыв пиԓԓаԓән ԓовәӈ ухԓәт пӑ ԓов шӑнша ԓэԓәм хŏйатәт па мӑтсәт, щишән, мӑнәм ŏтэԓ ар ус.
GEN 50:10 Щиты ԓыв Горен-гаатад унты Иордан йŏхан па пелка йŏхәтсәт пӑ щита шек так хоԓԓәп версәт; ԓапәт хӑтәԓ щита ащеԓ урәӈән Иосиф хоԓԓәс.
GEN 50:11 Ханаан мўвән уԓты хŏйатәт щи хоԓԓәп Горен-гаатад хŏща ватсәт пӑ йастәсәт: «Египет мўв хŏйатәт хŏща ун шук пӑ хоԓԓәп!» Щишән, щи тӑха щиты нэмәтса: ‘Египет мўв хŏйатәт хоԓԓәп’, щит Иордан йŏхан па пеләкән уԓ.
GEN 50:12 Щиты Иаков пŏхәт ԓўв партәм верәԓ версэԓ:
GEN 50:13 Ханаан мўва пŏхԓаԓән ԓўв туса пӑ Мамре шŏма Махпела мўв хӑр хŏща уԓты хŏшапәӈ кев ԓыпийән шависа. Щи хŏшапәӈ кев мўв хӑр пиԓән Авраам Ефрон хет ики эԓты лоттәты урәӈән ԓутәс.
GEN 50:14 Щӑԓта ащеԓ лоттәмеԓ йўпийән Иосиф пӑ йайԓаԓ пӑ хŏԓ ԓўв пиԓәԓән ащеԓ лоттәты йӑӈхәм хŏйатәт Египта йŏхԓы йŏхәтсәт.
GEN 50:15 Ащеԓ пӑрәм йўпийән Иосиф йайԓаԓ йастәсәт: «Мосәӈ, Иосиф мўӈев ԉикән этԓәԓы пӑ ԓўвеԓ атәм вермев нўр йŏхԓы катәԓԓәԓы?»
GEN 50:16 Пӑ ԓыв Иосифа айкеԓ китсәт: «Ащен пӑртаԓ йэԓпийән щиты йастәс:
GEN 50:17 ‘Иосифа тӑмиты йастаты: йайԓан нўрәт пӑ кӑрэкәт йŏрэмаԓән нӑӈена атәм вермеԓ урәӈән’. Пӑ ин ащен Турәм митйохԓаԓ нўрԓаԓ эсԓаԓән». Щит ԓўвеԓа пŏтәртәмән, Иосиф хоԓԓәс.
GEN 50:18 Щӑԓта йайԓаԓ ищи йŏхәтсәт, пӑ ԓўв йэԓпеԓән мўв унты, ŏх пŏнман, иԓ ԋўрсәт, пӑ йастәсәт: «Мўӈ нӑӈена рупитты йохԓан».
GEN 50:19 Иосиф йастәс: «Аԓ пӑԓаты, ма мўй Турәм хун?
GEN 50:20 Йӑна щи, нын ма пеԓайэм атәм версәты; туп Турәм щит йӑма керәтсәԓы, ин тыйәԓтәм верәԓ урәӈән: ар хŏйат ԓыԓ шавиты урәӈән;
GEN 50:21 щишән, аԓ пӑԓаты: ма нынан, имиԓән пӑ нын ԋаврэмԓән ԓапәтԓыԓам». Пӑ ԓывиԓаԓ роммәԓтсәԓы, пӑ сӑмԓаԓ рӑхты щирән ԓыв пиԓԓаԓән пŏтәртәс.
GEN 50:22 Щиты Иосиф Египет мўвән ус пӑ ащеԓ хот тэԓ ищи ус; Иосиф уԓәм нуптәԓ сот йаӈ тӑԓ ус.
GEN 50:23 Ефрем хиԓэт ԋаврэмԓаԓ хŏԓна вантәс, Манассия Махир пŏхәԓ пŏхәт сэма питәмән Иосиф шанша ищиты пŏныԓысайәт.
GEN 50:24 Щӑԓта Иосиф йайԓаԓа йастәс: «Ма пӑрты хӑтԓэм ванамәс, нын хŏщайән Турәм йŏхәтәԓ пӑ нынан тӑм мўв эԓты щи мўва туԓԓы, мўй эԓты Ԓўв Авраама, Исаака пӑ Иакова йасәӈ мӑс».
GEN 50:25 Щӑԓта Иосиф Израиль пŏхәт эԓты так йасәӈ ўс, щиты пŏтәртман: «Турәм нын хŏщайән йŏхәтәԓ, пӑ ԓŏв шўкԓам тӑԓта тўваԓән».
GEN 50:26 Иосиф нуптәԓ сот йаӈ тӑԓ аратән пӑрәс. Египет мўвән бальзамән ԓўв ԋŏсәтса пӑ кев эԓты верәм хӑԓа йўха пŏтса.
JON 1:1 Иона, Амафий пŏх, пеԓа Турәм Куща йасәӈ ус:
JON 1:2 «Нŏх ԓойа, Ниневияйа, ун воша, мӑна пӑ щита хŏйатәта такан пŏтәрта, ԓыв шек атәм верԓаԓ Ма уйәтты питсәԓам».
JON 1:3 Туп Иона нŏх ԓойәс пӑ Фарсис вош пеԓа Турәм Куща эԓты хӑԋемәты урәӈән, хŏнтас. Иоппия воша йŏхтәс, Фарсис пеԓа мӑнты паршәӈ ун хоп уйтәс, ŏх сŏхәптәс пӑ хопа ԓэԓәс, ԓыв пиԓэԓән Фарсис унты мӑнты, Турәм Куща эԓты шӑшән хŏнтаты урәӈән.
JON 1:4 Туп Турәм Куща щарәсән так вот этәԓтәс, вот шек тарма йис, паршәӈ хоп шўкаԓәты кема йис.
JON 1:5 Хопәӈ хŏйатәт пӑԓтамәсәт, пӑ кашәӈ хŏйат ԓўв турмәԓ пеԓа пойәкщәс, пӑ пŏрмасԓаԓ йиӈка йовәԓты питсәԓаԓ, хоп йэша кенашәк верты урәӈән; Иона пӑ хоп ԓыпийа, ŏхәԓмаԓ йўпийән, иԓ ŏԓәс пӑ такан вŏйәпса.
JON 1:6 Ԓўв хŏщайәԓ хоп куща йŏхтәс пӑ ԓўв пеԓайәԓ йастәс: «Мўй нӑӈ ŏԓԓән? Нŏх ԓойа, турмен пеԓа пойәкща; мосәӈ пӑ ԓўв мўӈ эԓтэв нумәԓмәԓԓы пӑ мўӈ ӑт пӑрԓув».
JON 1:7 Хŏйатәт кўтԓаԓән йастәсәт: «Пос йўвәтԓув, ватԓэв, хŏй урәӈән мўӈ тӑмәщ шук туԓув». Пӑ пос йўвәтсәт, ин пос Иона пеԓа аԉәс.
JON 1:8 Щиӈәԋща ԓўвеԓа йастәсәт: «Мўӈева йаста, хŏй урәӈән мўӈ тӑмәщ шук туԓув? Мўй вер тӑйԓән пӑ хŏԓща нӑӈ йиԓән? Нӑӈ мўвен хŏта уԓ пӑ мӑты рут эԓты уԓԓән?»
JON 1:9 Ԓўв йастәс: «Ма еврей, щарәс пӑ мўв опсәԓтәм Турәм Куща йэԓпийән шаншэм иԓ эсәԓԓэм».
JON 1:10 Щӑԓта хŏйатәт шек такан пӑԓтамәсәт пӑ ԓўвеԓа йастәсәт: «Мўй урәӈән нӑӈ щиты версэн?» Хŏйатәт ŏша пайәтсэԓ, Турәм Куща эԓты ԓўв хŏнтаԓ, хŏты ԓўв ԓывиԓаԓа йастәс.
JON 1:11 Щарәс йэшащты щирәԓ и тарма, и тарма йис, ԓыв йастәсәт: «А хŏты мўӈэва нӑӈен верты, щарәсән тэвна йиты урәӈәӈ».
JON 1:12 Щи йўпийән ԓўв щиты йŏхԓы йастәс: «Мӑнэм ўйаԓән пӑ щарса йўвтаԓән, щӑԓта щарәсән нын урӈәнән тэвна йиԓ, ма уйәтԓэм, ма ўрӈемән нын тӑм так вот шук ватԓәты».
JON 1:13 Туп щи хŏйатәт йуртат ԓовәԓты питсәт, мўв сыԓа хойты урәӈән пӑ ӑт верәтсәт, щарәс йэшащты щирәԓ мет тарма йис, щишән.
JON 1:14 Щиӈәԋща Турәм Куща пеԓа ўвман пойәкщәты питсәт пӑ йастәсәт: «Турәм Куща, тӑм хŏйат ԓыԓ урәӈән ӑт ат пӑрԓув, пӑ нӑрԓы ўр мўӈева аԓ пŏны; Нӑӈ, Турәм Куща, Нӑӈена хŏты рӑхәԓ, щиты версэн!»
JON 1:15 Иона ўсэԓ пӑ йиӈка йўвәтсэԓ, щӑԓта щарәсән тэвна йис.
JON 1:16 Щиӈәԋща щи хŏйатәт Турәм Куща эԓты шек пӑԓтамәсәт, пӑ Турәм Кущайа йир тусәт пӑ йастәпса мӑсәт.
JON 2:1 Турәм Куща ун веса Иона йŏхи ԓавемәты партсәԓы; Иона щи вес хŏн ԓыпийән хуԓәм хӑтәԓ пӑ хуԓәм ат ус.
JON 2:2 Иона Турәм Куща ԓўв Турмәԓ пеԓа вес хŏн ԓыпи эԓты пойәкщәс.
JON 2:3 Пӑ йастәс: «Шука ма питмем урәӈән Турам Куща пеԓа пойәкщәсәм, пӑ Ԓўв мӑнэм хуԓсәԓы; ма иԓта турәм эԓты уваԓсәм, пӑ Нӑӈ ма тўр сыйэм хуԓсэн.
JON 2:4 Нӑӈ мӑнэм мӑԓ йиӈка, щарәс сӑма, шуйԓәптәсэн, ма йикән лӑп ўсайәм, иса Нӑӈ йикԓан, Нӑӈ хўпԓан ма нўмпемән йӑӈхиԓысәт.
JON 2:5 Ма йастәсәм: Нӑӈ мӑнэм куш сэм сайа йэԓ воштәсэн, ма ищи пӑ Нӑӈ йэмәӈ хотэн шийаԓәԓэм.
JON 2:6 Ԓыԓэм сŏхәнты унты ма йиӈкәтән ӑпәԓтсайәм, пӑтыԓы тӑхайа ма щи тухәрсайәм; щарәс лывәщән ŏхем лӑп йŏвәртса.
JON 2:7 Кев вŏш унты ма иԓ шуйԓәсәм, мўв ԓўв йэртэпԓаԓән мӑнэм веккеша лӑп петсәԓы; Нӑӈ пӑ, Турәм Куща, ма Турмем, ма ԓыԓэм иԓта турәм эԓты нŏх туԓэн.
JON 2:8 Хун ма ԓыԓэм сŏхәнты питәс, ма Турәм Куща эԓты нумәԓмәсәм, пӑ ма пойкем Нӑӈ хуԓсэн, Нӑӈ йэмәӈ хотэна пойкем йŏхтәс.
JON 2:9 Хŏй йурԓы пӑ нэмәԓтыйа ӑт рӑхты ŏтԓаԓ пеԓа пойәкщәԓәт, Йӑм Сӑмәӈ Ŏтэԓ хӑйԓәт.
JON 2:10 Ма пӑ ишкаԋщәп арән Нӑӈен йирән туԓәм; мўй йастыԓысәм, верԓэм: Турәм Куща хŏща нŏх пайтәсты щир уԓ!»
JON 2:11 Турәм Куща ун веса партәс, пӑ ԓўв сорәм мўва Иона ким охтаԓсәԓы.
JON 3:1 Щӑԓта Турәм Куща кимет пўш Иона пеԓа йастәс:
JON 3:2 «Нŏх ԓойа, Ниневия ун воша мӑна, щита хŏйатәта йасәӈ такан пŏтәрта, мўй Ма нӑӈен партсәм».
JON 3:3 Иона нŏх ԓойәс пӑ Турәм Куща йасәӈ хўват Ниневия воша мӑнәс; Ниневия хŏты Турәм ԓӑтәӈ ун вош, вош хўватәԓ хуԓәм хӑтәԓ шушты мосәԓ.
JON 3:4 Щӑԓта Иона вош хўват шушты питәс, ий хӑтәԓ мўй арат верәтәԓ мӑнты, ԓўв сыйәӈа пŏтәртәс, йастыман: «Хŏԓна ԋӑԓйаӈ хӑтәԓ - пӑ Ниневия вош шўкатԓа!»
JON 3:5 Ниневия вошәӈ хŏйатәт Турма эвәԓсәт, вўщԓәты йасәӈ версәт, ԓӑтәӈ ŏтԓаԓ эԓты ԓӑтԓы ŏтԓаԓ унты уԓттӑхты хир хŏрпи сŏха ԓумәтԓысәт.
JON 3:6 Щи айкеԓ Ниневия хон унты йŏхтәс, ԓўв хон омәсты тӑхайәԓ эԓты нŏх ԓойәс, пӑ хон сŏхԓәԓ нŏх эхсәԓы, пӑ уԓттӑхты хир хŏрпи сŏх ԓумтәс, пӑ рат хыша опсәс.
JON 3:7 Хон Ниневия вошән йастәты партсәԓы: «Хон пӑ ԓўв ԓӑӈкәр йŏхԓаԓ партԓәт: хŏйатәт пӑ войәт – мисәт пӑ ошәт нэмәԓты ӑт ат ԓэԓәт, тŏрән энәмты тӑхайа ӑт ат йӑхԓәт, йик ӑт ат йищԓәт.
JON 3:8 Пӑ хŏйатәт пӑ войәт уԓттӑхты хир хŏрпи сŏхән пŏнман ат усәт, пӑ Турәм пеԓа такан ат пойәкщәсәт, кашәӈ хŏйат йŏвра йўшԓаԓ, атәм верԓаԓ эԓты шӑшән ат керԓәс.
JON 3:9 Хŏй уйәтәԓ, мосәӈ, Турәм мўӈев щаԉәтԓәԓы, Ԓўв тарәм ԉикәԓ мўӈ эԓтэв нŏх ўԓԓы, пӑ мўӈ ӑт пӑрԓув».
JON 3:10 Турәм ԓыв верԓаԓ шийаԓәсԓы, хŏты ԓыв атәм верԓаԓ эԓты шӑшән керԓәсәт. Турәм ԓывиԓаԓ щаԉитсәԓы, йэԓпи йастыԓыйәм шука пайәтты йасәӈԓаԓ йŏхԓы ўсԓы. Йастыԓыйәс ԓывиԓаԓа атәм верты, пӑ ӑт верәс.
JON 4:1 Иона щи вер урәӈән нŏпсәԓ шӑкәс пӑ ԉикащәс.
JON 4:2 Щӑԓта Турәм Куща пеԓа ԓўв пойәкщәс пӑ йастәс: «Турәм Куща! Щит эԓты щи ма пӑԓсәм, хун ма ма мўвемән хŏԓна усәм? Щи урәӈән Фарсис пеԓа ма хŏнтасәм, ма уйәтсэм, Нӑӈ, Турәм, йӑм сӑмәӈ, щаԉаӈ, арпуш умщәӈ, хўв ԓавԓәсты верәтԓән, шука пайәтты йасӈен китты ӑт кашащԓән.
JON 4:3 Ин хŏты, Турәм Куща, ма ԓыԓэм ма эԓтэм ўйи, уԓтэм эԓты, хӑԓԓәм–ки йӑмшәк».
JON 4:4 Щӑԓта Турәм Куща йастәс: «Щит эԓты нӑӈ шек нŏпсэн шӑкәс?»
JON 4:5 Иона вош эԓты ким этәс, пӑ хутԓыты пеләк сӑхат вош пўӈәԓән пӑԓ нŏрәм хŏрпи ŏт верәс, ԓоӈԓа варәс нўвәт пŏнәс, щи иԓпийа сай тӑхайа опсәс, ваттыйа, вош хŏты йиԓ.
JON 4:6 Турәм Куща щиты верәс, ун лыптәӈ пухращ энмәԓтәс, Иона нўмпийән пӑԓа энмәс, ԓўв охәԓ сайән ат ус, Иона ԉикәԓ ат мӑнәс ԓуԓән; Иона щи ун лыптәӈ пухращ урәӈән нŏх амтәс.
JON 4:7 Турәм щиты верәс, кимет хӑтәԓән хутԓәты пŏрайән, ин ун лыптәӈ пухращ сŏв шупән шŏппи пŏрса пӑ ԓўв нŏх сорәс.
JON 4:8 Хун най этәс, Турәм рўвәӈ вот китәс, Иона ŏх найән щиты кўтәрԓыса пӑ ԓўв рэԋԓы питәс. Сŏрәм ԓўвеԓа вохәс пӑ йастәс: «Уԓтэм ушән, хӑԓԓәм–ки йӑмшәк».
JON 4:9 Турәм Иона пеԓа йастәс: «Нӑӈ мўй йӑна щи лыптәӈ пухращ урәӈән нŏпсэн шӑкәс?» Ԓўв йастәс: «Шек нŏпсэм шӑкәс, хӑԓты унты!»
JON 4:10 Щиӈәԋща Турәм Куща йастәс: «Нӑӈ лыптәӈ пухращ щаԉәтԓән, ԓўвеԓ ӑт энмәԓтысэн пӑ щи кеша ӑт рупитысән. Ԓўв и ат сыс энмиԓыйәс пӑ кимет ат сыс нŏх сорәс.
JON 4:11 Ниневия мўй Мӑнэм щаԉәтты ӑт рӑхәԓ? Щит Вŏԓаӈ вош, хŏта сот хус щŏрәс мŏԓтас хŏйат йӑм пеләк йош пӑрта пеләк йош эԓты артаԓәтты ӑт верәтԓәт, пӑ ар вой уԓ.»
LUK 1:1 Хун ар хŏйат, мўӈ тŏрԓы уйтәм верԓув эԓты, хӑшты питәс,
LUK 1:2 хун мўӈева мет оԓәӈ вантәм хŏйатәтән щит айкеԓа туса пӑ щи йўпийән ԓыв йасәӈ туты хŏйатәта питсәт,
LUK 1:3 ма пӑ щи вер эԓты нумәссәм, йӑмәс ԓэрапман, оԓӈәԓ эԓты ԓŏватәԓән йўпеԓ тўвман, нӑӈ урӈена йэшәк Феофил, щит нэпека хӑшты нŏмәс ўсәм,
LUK 1:4 йӑна уԓәм утәԓтәпса, хŏты утәԓтәсайән ԓуԓән нӑӈ йӑма ат мŏштәсэн.
LUK 1:5 Иудея мўвән Ирод ики хона уԓәм пŏрайән, Захария нэмпи Авия пеләк эԓты Турма йир верты хŏйат ус; ԓўв итэԓән Елизавета ийимеԓ пӑ Аарон рут эԓты ус.
LUK 1:6 Ԓын кинәӈтак Турәм йэԓпийән тўӈа–щира усӈән, Турәм Куща партәпса йасӈәт пӑ мŏрт щира верәт сыстама версәӈән.
LUK 1:7 Туп ԋаврэм ӑт тӑйсәӈән: Елизавета ӑт ԓавәртәмәԓа пӑ щиты щи ԓын пирщамәсайӈән.
LUK 1:8 И пўш, Захария хŏйатԓаԓ пиԓән ԓыв пŏрайэԓән, Турма йэмәӈ верәт верман, уԓмаԓән,
LUK 1:9 ԓўвеԓа питәм пос xўват, xŏты уԓтыйән Турма йир верты xŏйатәт xŏща уԓԓыйәс, Турәм Куща Хот йэмәӈ йӑтәԓа ԓŏӈты пӑ щита йоԓ кўшмәԓтты вера йис.
LUK 1:10 Мир, щи йоԓ кўшмәԓтты пŏрайән, Турма ким пеләк сӑхат пойәкщәсәт.
LUK 1:11 Щи сыс Турәм Куща ангел Захария сэма этәс, йоԓ кўшмәԓтты йирасты нŏрәм ԉэпән йӑм пеләк сӑхат ԓойәс.
LUK 1:12 Захария, Ԓўвеԓ кащаԓәмаԓ кемән, нŏпсәԓ ԓыԓэмәс, пӑ пӑԓщәмән йŏхәтса.
LUK 1:13 Ангел щиты йастәс ԓўвеԓа: "Аԓ пӑԓа, Захария: нӑӈ пойкен хуԓса! Елизавета ийименән пŏхән туԓайән, пӑ нӑӈ ԓўвеԓ Иоанн нэмән пŏнԓэн;
LUK 1:14 нӑӈена амәт пӑ каш питәԓ, ар хŏйат, ԓўв сэма питмаԓ урәӈән, амтәтԓыты питәԓ.
LUK 1:15 Турәм Куща хŏща ԓўв ԓӑтәӈа питәԓ, ўна пӑ па кўтрәӈ ŏт йищты ӑт питәԓ, пӑ хŏԓна аԋԏеԓ хŏща пӑтлам хотән уԓман Йэмәӈ Ԓыԓән тэкәнԓа,
LUK 1:16 пӑ ар хŏйат Израиль йох эԓты Турәм Куща пеԓа керәтԓәԓы;
LUK 1:17 Ԓўв Турәм Куща йэԓпийән, Илияйа мийԓыйәм хŏрпи ԓыԓ пӑ йур пиԓән мӑнты питәԓ, ащет сӑм ԋаврэмԓаԓа йŏхԓы мӑты урәӈән, ӑт хуԓәтты хŏйатәта тўӈа–щира уԓты нŏмәс мӑты урәӈән. Щиты Турәм Куща урәӈән хŏйатәт ԓэщатәԓ”.
LUK 1:18 Захария ангела йастәс: "Xŏты сӑхат ма щи вер уйәтԓэм? Ма пирщамәсайәм, имем пӑ тӑԓԓаԓ арамәсәт".
LUK 1:19 Ангел йŏхԓы йастәс: "Ма – Гавриил, Турәм пўӈәԓән ԓойты ангел, нӑӈ пиԓэнән пŏтәртты пӑ нӑӈена тӑм йӑм айкеԓ туты китсайәм.
LUK 1:20 Мўйа нӑӈ ма йасәӈԓама ӑт эвәԓсән, ин нӑӈ мӑшйайән уԓты питԓән, пӑ хŏԓна щи унты пŏтәртты щир ӑт тӑйты питԓән, хун аԉәм верэм йŏхәтәԓ, мŏрт пŏрайән ԓыв тӑԓаӈа йиԓәт”.
LUK 1:21 Щи сыс мир камән Захария ԓавәԓсәт пӑ нумәсты питсәт, мўйа ԓўв щиты Турәм Хотән рŏнащәԓ.
LUK 1:22 Ԓўв ким этмаԓән, нэмәԓты хŏйат пеԓа пŏтәртты ӑт веритәс. Хŏйатәтән ŏша пӑйәтса, ԓўв, иԓампа, Турәм Хотән мŏԓты йэм вантәс; щиӈәԋща ԓўв хŏйатәт пеԓа ԓўйән-паӈән аԉисыман пŏтәртәс, ўӈәԓԓы щиты щи ус.
LUK 1:23 Туп хун ԓўв йэмәӈ верәт верты хӑтәԓԓаԓ йэтшәсәт, йŏхи йŏхтәс.
LUK 1:24 Щи йўпийән Елизавета имеԓ ԓавәрта йис, пӑ вет тыԓәщ хŏйатәт эԓты хӑԋатыйәс пӑ пŏтәртыйәс: "Турәм Куща тӑм хӑтԓәтән ма урӈема щи йӑм верәс, ма эԓтайэм хŏйатәт ԋухматты вер нŏх ўты урәӈән, ма пеԓайэм аԋкәрмәс".
LUK 1:26 Хун Елизавета xутмет тыԓәщ ўшән уԓмаԓән, Турәм Гавриил нэмпи ангел Галилея мўвән уԓты Назарет воша эви xŏща китсәԓы. Щи эви Иосиф xŏща уртыса, Иосиф Давид рут эԓты уԓ. Эви нэмәԓ: Мария.
LUK 1:28 Ангел ԓўв хŏщайәԓ ԓŏӈмаԓән, йастәс: "Амтәтԓыйа, йӑм мŏщатәм нэ! Турәм Куща Нӑӈ пиԓэнән уԓ; имет кўтән йӑмән мийәм нэ!"
LUK 1:29 Мария ԓўвеԓ кащаԓәмаԓ кемән, щи йасәӈԓаԓ эԓты нŏпсәԓ ԓыԓэмәс пӑ нумәсәс: мўй тӑмәщ ўща верты щир.
LUK 1:30 Ангел пӑ ԓўвеԓа йастәс: "Аԓ пӑԓа, Мария! Турәм нӑӈ пеԓайэн йӑм щирән ӑӈкәрмәс;
LUK 1:31 ԓавәрта йиԓән пӑ Пŏх сэма пайәтԓән, Иисус нэмән Ԓўвеԓ пŏнԓэн.
LUK 1:32 Ԓўв ԓӑтәӈ питәԓ, пӑ Нўм Турәм Пŏха айәԓты питԓа; Турәм Куща Ԓўвеԓа Давид ащеԓ хон омәсты тӑха мӑԓ.
LUK 1:33 Щӑԓта Ԓўв Иаков хот тэԓ хŏща веккеша хона уԓты питәԓ, пӑ Хон Уԓәпсайәԓ нэмәԓты пŏрайән ӑт йэтшәԓ".
LUK 1:34 Мария ангела йастәс: "Xŏты сӑхат щиты питәԓ, ма xу сайән уԓты вер хŏԓна ӑт уйәтԓэм?"
LUK 1:35 Ангел йŏхԓы йастәс: "Йэмәӈ Ԓыԓ Нӑӈ хŏщайэн эсԓәщәԓ пӑ Нўм Турәм йурән йŏхәтԓайән, щишән сэма пайәтты йэмәӈ Ԋаврэмийэн Турәм Пŏха айәԓтты питԓа.
LUK 1:36 Ин Елизавета, xŏйатәтән таԓа айәԓтәм Нӑӈ рут нэӈен, кўш пирщамәса, ищи пŏх ԓавәԓәԓ: ин ԓўв хутмет тыԓщәԓ.
LUK 1:37 Турәм и йасӈәԓ йурԓы ӑт уԓԓыйәԓ".
LUK 1:38 Мария йастәс: "Щишән, ма Турәм Куща митнэ; нӑӈ йасӈен щира ма xŏщайэм щи вер ат тыйәԓ". Щи йўпийән ангел ԓўвеԓ утща хӑйсәԓы.
LUK 1:39 Йэша ус, щи йўпийән Мария ԓэщатэмийәс пӑ сора Иуда кевәтән уԓты воша мӑнәс.
LUK 1:40 Захария хота ԓŏӈәс пӑ Елизавета пиԓән ўща верәс.
LUK 1:41 Хун Елизавета Мария эԓты ўща йасәӈ хуԓмәс, сӑмәԓ иԓпийән тӑйты ԋаврэмәԓ ԋŏхԓыйәс. Щи кемән Елизавета Йэмәӈ Ԓыԓән тэкәтса,
LUK 1:42 пӑ ԓўв такан йастәс: "Нӑӈ имет кўтән йӑмән мийәм нэ, сӑм иԓпенән тӑйты ŏтыйэн ищи йӑмән мийәм!
LUK 1:43 Мўй щирән щит тыйәс? Ма хŏщайэма Турәм Кущайэм аԋԏи йŏхтәс!
LUK 1:44 Ванта-са: хун ма нӑӈ ўща верты сыйэн хуԓмәсәм, щи пŏрайән ԋаврэмем сӑмем иԓпийән амәтман ԋŏхԓыйәс.
LUK 1:45 Ин эвԓәм нэ щўԋԓән, Турәм Куща эԓты йастәм йасӈәт тӑԓаӈа йиԓәт, щишән".
LUK 1:46 Щӑԓта Мария йастәс: "Ма сӑмем Турәм Куща ԓӑтәӈа айәԓԓәԓы,
LUK 1:47 Ма сӑмемән шек амтәтԓыԓәм Турмем урәӈән, ма ԓыԓэм Этәԓтәты Ŏтэм урәӈән,
LUK 1:48 Ԓўв митнэ лэӈкеԓ пеԓа сэмәԓ пайәтсәԓы, тӑԓта йэԓԓы ин омәсты мир, йӑԓпа йиты мŏхет мӑнэм щўԋән мийәм нэӈа айәԓты питԓэԓ;
LUK 1:49 Йурәӈ Ŏт мӑнэм вŏԓаӈ верәт вермаԓ урәӈән, пӑ Ԓўв Нэмәԓ йэмәӈ,
LUK 1:50 Турәм сӑмәӈ верәԓ кашәӈ Ԓўв эԓтайәԓ пӑԓты хŏйата, ин уԓты пӑ йӑԓпа йиты мŏхета, уԓты питәԓ;
LUK 1:51 Ԓўв йурәӈ йошәԓ этәԓтәсԓы; сӑмԓаԓән йŏрәӈ нŏмәс тӑйты хŏйатәт лакки йовәԓсәԓы;
LUK 1:52 ун кущайәт кущайа омәсты тӑхайԓаԓ эԓты иԓ пайәтсәԓы, лэӈкийа уԓты хŏйатәт нŏх эԓәтсәԓы;
LUK 1:53 ԓэԓԓы уԓты хŏйатәт йӑм эԓты ԓапәтсәԓы, тащәӈа уԓты хŏйатәт таԓты китсәԓы.
LUK 1:54 Ԓўв Израиль митхуйәԓа ԋотыԓыйәс, аԉәм сӑмәӈ щирәԓ нумман,
LUK 1:55 хŏты мўӈ опращԓува йастыԓыйәс, Авраама пӑ йиты ԋаврэмԓаԓа веккеша".
LUK 1:56 Мария Елизавета хŏща хуԓәм тыԓәщ кем мойԓәман ус, щӑԓта йŏхи мӑнәс.
LUK 1:57 Елизавета пŏрайәԓ йŏхтәс пӑ пŏх сэма пайтәс.
LUK 1:58 Ванән уԓты хŏйатәтән пӑ рутԓаԓән хуԓса, хŏты ԓўв урӈәԓән Турәм Куща ԓӑтәӈ сӑмәӈ вер аԉәс пӑ ԓўв пиԓәԓән амтәтԓысәт.
LUK 1:59 Нийәԓмет хӑтәԓән ԓыв ԋаврэм хŏща эвәтты вер урәӈән йŏхәтсәт пӑ ащеԓ иты Захария нэма пŏнты ўтщисэԓ.
LUK 1:60 Туп Елизавета йастәс: "Ӑнта, Иоанн нэмән пŏнԓэв".
LUK 1:61 Ăктәщәм хŏйатәт йастәсәт: "Нӑӈ рутэн кўтән тӑмәщ нэм тӑйты и хŏйат нэш ӑнтом!"
LUK 1:62 Ащеԓ эԓты ԓўйән-паӈән аԉиԓыман иԋщәсты питса, мўйсыр нэм ԓўв ԋаврэмәԓа мӑты ԓӑӈхас.
LUK 1:63 Хӑшты сохәԓ вохәс пӑ хӑншәс: "Ԓўв нэмәԓ Иоанн". Ăктәщәм хŏйатәт йасәӈ ӑт шитԓәт, ӑԓ щи ватԓәт.
LUK 1:64 Щи пўԉаӈ ԓўв ўӈԓәԓ-ԋаԓмәԓ пел пўншаԋщәс, пӑ Турәм ишәкман пŏтәртты питәс.
LUK 1:65 Щиӈәԋща ԓывиԓаԓ керәтман уԓәм хŏйатәт пӑԓщәмән йŏхәтсайәт, пӑ ин щи вер эԓты кев пеләк Иудея мўв ԓŏватән пŏтәртты питса.
LUK 1:66 Хŏйән айкеԓ хуԓса, хŏԓыйэ ԓыв сӑма пŏтсэԓ пӑ пŏтәртсәт: "Xŏйа тӑм ԋаврэм йиԓ?" Турәм Куща йош ԓўв пиԓәԓән ус.
LUK 1:67 Щӑԓта Захария, Иоанн ащи, Йэмәӈ Ԓыԓән тэкәтса, Турәм эԓты хуԓәм йасәӈԓаԓ пŏтәртты питәс:
LUK 1:68 "Турәм Куща - Израиль Турәм ат ишәкԓа, Ԓўв Израиль мирәԓ хŏща йŏхтәс пӑ хŏԓт пайтәсты щир мӑс,
LUK 1:69 пӑ мўӈева ԓыԓ этәԓтәты йурәӈ Ŏт Давид, митхуйәԓ, рут сӑхат мӑс,
LUK 1:70 хŏты йис тэԓән Турәм йасәӈ туты йэмәӈ xŏйатԓаԓ ўӈәԓән пŏтәртәс,
LUK 1:71 щит мўӈев веԓты ŏтԓув эԓты пӑ мўӈиԓув нўрыты ŏтԓув эԓты мўӈев нŏх пайәтԓәԓы,
LUK 1:72 мўӈ ащиԓув пиԓән сӑмәӈ верәԓ ватәԓтәԓ пӑ Ԓўв йэмәӈ йастантәм щирәԓ нумԓәԓы,
LUK 1:73 Ԓўв Авраама, ащева, мийԓыйәм йасӈәԓ нумԓәԓы, мўӈева,
LUK 1:74 мўӈ нўрәӈ ŏтԓув эԓты нŏх пайәттаԓ йўпийән, хурԓыйа Ԓўвеԓа
LUK 1:75 йэмәӈ пӑ вещкат щирән кашәӈ хӑтәԓ уԓәпсайэвән митйоxа уԓты вер мӑԓ.
LUK 1:76 Нӑӈ ищи, ԋаврэмийэ, Нўм Турәм йасәӈ туты хŏйата нэмәтԓайән, Турәм Куща йэԓпийән мӑнты питԓән: Ԓўв кешайәԓа йуш ԓэщатты урәӈән,
LUK 1:77 Ԓўв мирәԓа щит ŏша пайәтты мӑты урәӈән: кӑрэкԓаԓ йŏрэмәты щир хŏща ԓыԓ этәԓтәты вер уԓ,
LUK 1:78 Турмев йӑм сӑм хўватән, Ԓўв йӑԓпа этты хӑтәԓ иты, нумәԓта мўӈ хŏщайэва йŏхтәс,
LUK 1:79 пӑтламән пӑ хӑԓа хŏрән уԓты xŏйатәт нŏх хутԓәптәты урәӈән, мўӈ кўрԓув пайԓы уԓәпса йуш хўват мӑнәԓтты урәӈән."
LUK 1:80 Ԋаврэмийэ щи сыс энмәԓтыйәс пӑ ԓыԓәԓ-нŏпсәԓ такамтыйәс, таԓ шитам тӑхайәтән Израильәԓ хŏща эттаԓ унты ус.
LUK 2:1 Щи хӑтԓәтән Август нэмпи кесарь ики йасәӈ китәс, Ԓўв мўвәԓ ԓŏватән уԓты хŏйатәт нэпека ат хӑшсайәт.
LUK 2:2 Щит мет оԓәӈ хŏйат ԓӑт щирән хӑншәпса ус. Щи пŏрайән Сирия мўвән Квириний нэмпи куща ус.
LUK 2:3 Нэпека пайтәсты кеша кашәӈ хŏйат ԓўв йŏра вошәԓа мӑнәс.
LUK 2:4 Щи урәӈән Иосиф па Галилея мўвән омәсты Назарет вош эԓты, Иудея мўва Давид ики воша, Вифлеема, мӑнәс. Ԓўв Давид хот пӑ рут эԓты ус,
LUK 2:5 ԓўв, нэпека питты урәӈән, Мария пиԓән мӑнәс. Мария ԓўвеԓа уртыса пӑ щи пŏрайән ԓавәртан ус.
LUK 2:6 Щита уԓман сыс, ԋаврэмәԓ сэма питты пŏра йŏхтәс.
LUK 2:7 Пŏхән, оԓәӈ Ԋаврэмәԓән, йŏхәтса, сŏха Ԓўвеԓ йŏвәртсәԓы пӑ вой ԓапәтты хŏшапа пŏтсәԓы, хŏйат хоԓты хотән ŏԓты тӑха ӑт мŏщатсәӈән.
LUK 2:8 Щи ԉэпән, мўв хӑрән вой тащ шавиты икет ат ԓавәԓман усәт.
LUK 2:9 Турәм Куща ангел ԓыв йэщаԓтэԓ этмәс пӑ Турәм Куща йэмәӈ нŏвийән ԓыв нŏх xутԓәптысайәт; ԓыв шек пӑԓтамәсәт.
LUK 2:10 Туп ангел ԓывиԓаԓа йастәс: "Аԓ пӑԓаты! Ма нынана амтәтԓыты ун айкеԓ туԓәм, щи амәт иса тӑм мўв хŏйатәта уԓты питәԓ:
LUK 2:11 тӑм ат Давид вошән нынан Ԓыԓ Этәԓтәты Ŏт – Христос, Турәм Куща сэма питәс;
LUK 2:12 тӑта щи нынана пос: вой ԓапәтты хŏшапән йŏвәртәм Ԋаврэмийэ уйәтԓәты".
LUK 2:13 И щишән ангел пиԓән аратәԓ турәм ԉаԉ йоx йŏхәтсәт, Турәм ишәкԓәт пӑ такан йастәԓәт:
LUK 2:14 "Турма нумән ишәк йасәӈ! Пӑ мўвән пайԓы уԓәпса, хŏйатәт xŏща йӑм!"
LUK 2:15 Ангеләт турма нŏх мӑнмеԓ йўпийән, вой шавиты йох кўтԓаԓән пŏтәртты питсәт: "Вифлеем воша мӑнԓув пӑ ватԓэв, мўй щита тыйәс, мўй эԓты Турәм Куща мўӈев йастәс".
LUK 2:16 Ԓыв мŏхты йуша йэтшәптәсәт, йŏхәтсәт, Мария пӑ Иосиф, пӑ вой ԓапәтты хŏшапән йŏвәртәм Ай Ԋаврэмийэ уйәтсәт.
LUK 2:17 Ԓывиԓаԓ кащаԓәмеԓ кемән, вой шавиты йох Тӑм Ԋаврэмийэ эԓты мўй хуԓсәт, щит иса пŏтәртсэԓ.
LUK 2:18 Хуԓәнтәм мŏхет хŏԓыйэ тащ шавиты йох йасәӈ эԓты пакнысыԓәт.
LUK 2:19 Мария щи йасӈәт хŏԓыйэ сӑмәԓән шависԓы пӑ нумәссәԓы.
LUK 2:20 Тащ шавиты икет йŏхԓы йŏхәтсәт, Турәм вŏԓаӈа айәԓтман пӑ ишәкман, мўй хуԓсәт пӑ ватсәт, щит иса ԓывиԓаԓа йастәман ус, щи урәӈән.
LUK 2:21 Нийәԓмет хӑтәԓән Ԋаврэма эвәтты вер верты пŏра йŏхтәс, пӑ щита Иисус нэмән пŏтса – щи нэмән, Ԓўв, аԋԏеԓ хŏща пӑтлам хота питтаԓ йэԓпийән, ангелән нэмәтса.
LUK 2:22 Хун Моисей Закон хўват сыстамтыты хӑтәԓ йŏхтәс, ԓын Ԋаврэмән Иерусалим воша тусԓән, Турәм Кущайа ватәԓтәты урәӈән,
LUK 2:23 Турәм Куща законән хӑшман уԓԓа: "Кашәӈ оԓәӈ сэма питәм ху ԋаврэм Турәм Кущайа аԉты мосәԓ".
LUK 2:24 Пӑ ищи пўԉаӈ Турәм Куща закон хўват йир туты мосәԓ: кӑт горлица нэмпи тŏхԓәӈ войӈән, мўй пӑ голубь нэмпи тŏхԓәӈ кӑт пŏшәхӈән.
LUK 2:25 Щи пŏрайән Иерусалим вошән Симеон нэмпи хŏйат ус, ԓўв вещкат па тўӈа–щира xŏйат ус, Израиль мир нŏх пойәкты щир ԓавԓәс; Йэмәӈ Ԓыԓ ԓўв пиԓәԓән ус.
LUK 2:26 Йэмәӈ Ԓыԓән ԓўв аԉса, Турәм Куща китәм Христос шийаԓәтаԓ унты, ԓўв ӑт пӑрәԓ.
LUK 2:27 Йэмәӈ Ԓыԓән тўвман, Симеон Турәм Хота йŏхтәс, хун Иисус Ԋаврэмийэ аԋԏеԓән-ащеԓән, закон хўват мосты верәт верты урәӈән, тŏхи туса,
LUK 2:28 Симеон Ԓўвеԓ йоша ўсԓы, Турәм ишәксәԓы пӑ пŏтәртты питәс:
LUK 2:29 "Вос Xу! Нӑӈ йасӈен хўватән, ин Нӑӈ митхуйэн йӑм нŏмәсән эсәԓԓэн,
LUK 2:30 Нӑӈ мойԓәм ԓыԓ этәԓтәты верэн сэмԓамән шийаԓәсэм,
LUK 2:31 щит Нӑӈ иса уԓты омәсты мир кеша,
LUK 2:32 пўншантәм нŏви Турәм ӑт уйәтты па рут мира пӑ ишәк йасәӈ Израиль мирэна ԓэщатсэн!"
LUK 2:33 Иосиф пӑ Иисус аԋԏеԓ Ԓўв эԓтэԓ йасәӈ хуԓтанән туп ӑԓ пакнысыстән.
LUK 2:34 Симеон ԓыв урәӈԓаԓа йӑм воxәс, щӑԓта Мария, Иисус аԋԏи пеԓа, йастәс: "Тӑм ŏԓәԓ, Щит, Хŏй тӑxрэпа китса: Израильән хŏйтат иԓ питԓәт, хŏйтат пӑ нŏх ԓойԓәт, Турәм эԓты китәм поса уԓ, йасәӈԓаԓ урәӈән хŏйатәтән нўрыԓа, –
LUK 2:35 Нӑӈ па щитән, аԓтты кеши иты, сӑмен мŏхты мӑнԓайән, – ар хŏйат сӑм хŏща уԓты хӑԋа нŏмәсԓаԓ эԓпа ат этәԓтәԓайәт".
LUK 2:36 Хŏԓна щита Турәм йасәӈ туты ими, Анна, ус. Ԓўв Фануил эви, пирща йўвәм ими, Асир рут эԓты ус, икеԓ пиԓән ԓапәт тӑԓ уԓмаԓ,
LUK 2:37 икиԓы хӑщәс, пӑ нийәԉйаӈ ԋӑԓ тӑԓа йис. Анна Турәм Хот эԓты пўӈԓа ӑт йӑӈхиԓыйәԓ, Турма ата-хӑтԓа пойәкщәман пӑ вўщԓәман ус.
LUK 2:38 Щи пўԉаӈ ԓыв хŏщайэԓа ԓўв, вана шушман, Турәм Куща ишәкԓәԓы пӑ кашәӈ хŏйата щи Ԋаврэмийэ эԓты пŏтәртыйәс, хŏй Иерусалимән xŏԓт пайтәсты щир ԓавԓәс.
LUK 2:39 Хун Иосиф пӑ Мария верәт иса версәԓән, Турәм Куща закон xўват, ԓыв Галилея мўва, Назарет вошеԓа йŏхԓы йŏхәтсәт.
LUK 2:40 Ԋаврэмийэ пӑ энмәԓтыйәс, ԓыԓәԓ-нŏпсәԓ такамтыйәс, мўтрайән тэкнәптыман, Турәм йӑм Ԓўв эԓтэԓ ус.
LUK 2:41 Кашәӈ тӑԓ Иисус аԋԏеԓ-ащеԓ Пасха йэмәӈ хӑтԓәт урәӈән Иерусалим воша йӑӈхиԓыстән.
LUK 2:42 Хун Ԓўв кӑтхŏщйаӈ тӑԓа йис, ищиты, xŏты уԓԓытыйән, ԓыв Иерусалима йэмәӈ хӑтԓа мӑтсәт.
LUK 2:43 Хун йэмәӈ хӑтԓәт мӑнәм йўпийән йŏхи мӑтсәӈән, Иисус Пŏхийэ Иерусалим вошән хӑщәс; щит Иосиф пӑ Иисус аԋԏеԓ, ӑт мŏштәсԓән,
LUK 2:44 ԓын нумәссәӈән, Ԓўв па мŏхет пиԓән йиԓ. Оԓәӈ хӑтәԓ йуш xўват шушманән, хӑтәԓ xўват рутԓаԓ пӑ уйәтты йŏхԓаԓ кўтән Ԓўвеԓ кӑшсәԓән.
LUK 2:45 Иисус ӑт уйәтсәԓән, Ԓўвеԓ кӑшман, Иерусалима йŏхԓы йŏхәтсәӈән.
LUK 2:46 Хуԓәм хӑтәԓ xӑщәм йўпийән Ԓўвеԓ Турәм Хотән уйәтсәԓән, утәԓтәты йохәт кўтән ԓывиԓаԓ хуԓәтман пӑ ԓыв эԓтыԓаԓ иԋщәсман опсәс;
LUK 2:47 хŏԓыйэ Ԓўвеԓ хуԓәнтәм хŏйатәт йасәӈ ӑт шитԓәт, Ԓўв пеԓайәԓ ӑԓ ватԓәт пӑ хуԓәтԓәт, xŏты Ԓўв йŏxԓы ŏшәӈа–нŏпсәӈа йастәԓ.
LUK 2:48 Аԋԏеԓ-ащеԓ Ԓўвеԓ шийаԓәман кемән, йасәӈ йастәты ӑт верәтсәӈән, туп аԋԏеԓ Ԓўвеԓа йастәс: "Пŏхийэ, минэмән хŏты Нӑӈ версэн? Тӑм мўй, ащен пӑ ма, сӑм мӑнман, Нӑӈен кӑшԓэмән."
LUK 2:49 Иисус йастәс: "Мўйа нын Мӑнэм кӑшԓәԓән? Нын мўй ӑт уйәтсәԓән, Мӑнэм щита уԓты мосәԓ, хŏта Ма Ащэм Xот уԓ?"
LUK 2:50 Туп Ԓўв йастәм йасәӈԓаԓ ԓын ӑт мŏштәсԓән.
LUK 2:51 Щиты Ԓўв аԋԏеԓ-ащеԓ пиԓән Назарет воша йŏхԓы йŏхтәс; пӑ ԓынана хуԓәтман ус. Щи йастәм йасәӈԓаԓ xŏԓыйэ аԋтеԓән сӑмән шависайәт.
LUK 2:52 Иисус пӑ нуптәԓ хўвашәк йис, ŏшәӈа-щащәӈа йис. Ԓўв Турәмән пӑ хŏйатәтән сӑма мосман тӑйса.
LUK 3:1 Тиверий кесарьа уԓәм ветхŏщйаӈмет тӑԓән, хун Понтий Пилат Иудея мўв ԓŏватән кущайа уԓмаԓән, Ирод ики пӑ Галилея мўвән, ԓўв Филипп йайәԓ Итурея, Трахонитида мўвән, Лисаний ики Авилиней мўвән, ԋӑԓмет мўв щуӈ кущайәта уԓмеԓән,
LUK 3:2 Турма йир верты хŏйатәт ŏх икеӈән Анна пӑ Каиаф уԓәм пŏрайән Иоанна, Захария пŏха, хӑр пӑ таԓ мўвән Турәм айкеԓ йŏхтәс.
LUK 3:3 Щи йўпийән ԓўв Иордан йŏxан ԉэпән уԓты мўв ԓŏватән йӑӈхәс пӑ щи вер эԓты сыйәӈа пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ, щиты Турәмән кӑрэк йŏрэмәԓа.
LUK 3:4 Xŏты Турәм йасәӈ туты ики Исаия йасӈәӈ нэпекән хӑшман уԓԓа: "Таԓ мўвән такан ўвты xу тўр сый: Турәм Кущайа йуш ԓэщататы, йуш хурийэт Ԓўв урӈәԓа тўӈа вераԓән!
LUK 3:5 Кашәӈ мўв лот тэԓәӈа ат йиԓ, кашәӈ кев пай, кашәӈ сӑӈхәм ԓэԓа ат йиԓәт. Мўвеӈ йушәт тўӈа ат йиԓәт, хŏмалэӈ йушәт пайԓы ат йиԓәт;
LUK 3:6 пӑ кашәӈ хŏйат Турәм ԓыԓ этәԓтәты щир шийаԓәԓ".
LUK 3:7 Иоанн, ԓўв эԓтайәԓ йиӈка ԓŏӈәԓтыты урәӈән йŏхтыԓыйәм ар хŏйата щиты пŏтәртәс: ”Ŏхты вой эԓты тыйәм ŏтәт! Хŏйән нын нŏмәсән мӑсайты, йиты ԉик эԓты хŏнтаты?
LUK 3:8 Кӑрэк эԓты шӑшән керԓәм щирән йӑм верԓәнән аԉаԓән, xŏты йўx йӑм ԓэвпәс энмәԓтԓәԓ. Аԓ тӑйаты тӑмәщ нŏмәс, йастыман: "Мўӈ ащев – Авраам!" Нынана йастәԓәм, Турәм тӑм кев шўкәт эԓты Авраама ԋаврэмәт верты верәтәԓ.
LUK 3:9 Тӑм мўй, йўх ԓэрәт пўӈәԓән ԓайәм пŏнман уԓ, йӑм ԓэвпәс ӑт энмәԓтты йўх иԓ сэвәрԓа пӑ тўта вŏщкәԓа".
LUK 3:10 Мир иԋщәсәс: "Мўй щиӈәԋща мўӈева верты?"
LUK 3:11 Ԓўв щиты йŏхԓы йастәс: "Xŏй кӑт йэрнас тӑйәԓ ки, и йэрнасәԓ ӑт тӑйты хŏйата ат мӑԓԓы, хŏй ԓэтәт тӑйәԓ ки, ищиты ат верәԓ".
LUK 3:12 Налог ӑкәтты йохәт ԓўв хŏщайәԓа йиӈка ԓŏӈәԓтыты урәӈән йŏхәтсәт, ԓўв эԓтэԓ иԋщәссәт: "Утәԓтәты ху, мўӈева мўй верты?"
LUK 3:13 Иоанн ԓывиԓаԓа йастәс: "Xŏйатәт эԓты мŏрт тўмпи ар аԓ вохаты".
LUK 3:14 Соԓтан йох ищи иԋщәссәт: "Мўӈева пӑ мўй верты?" Пӑ ԓывиԓаԓа йастәс: "Нэмәԓты хŏйат ŏх урәӈән аԓ шукататы, ԋаԓәм аԓ вераты, пӑ тыԓәщ ŏхԓәнән тӑрматыйаты".
LUK 3:15 Хун хŏйатәт ԓавԓәсман усәт, пӑ хŏԓыйэ Иоанн эԓты нумәссәт, ԓўв а мўй Христос, -
LUK 3:16 Иоанн ԓывиԓаԓа йастәс: "Ма нынан йиӈка ԓŏӈәԓтыԓԓам, туп ма киԋщайэм Йурәӈ Ŏт йŏxәтәԓ. Мӑнэм хŏԓна Ԓўв кўр ԓумтәм пушәх кеԓәԓ нŏх эхты йэм, ӑт рӑхәԓ; Ԓўв нынан Йэмәӈ Ԓыԓа пӑ тўта ԓŏнәԓтты питԓәԓы.
LUK 3:17 Ԓўв сӑрәԓ йошәԓән уԓ, ԓат сэм ӑктәм тӑxайәԓ сыстапԓәԓы, ԓат сэмәт ампарәԓа ӑкәтԓәԓы, сорәм тŏрнәт пӑ ӑт xурԓәты тўтән нŏх ўщәтԓәԓы".
LUK 3:18 Иоанн Йӑм айкеԓ эԓты пŏтәртмаԓән, ар па хŏрпи щирән хŏйатәт утәԓтәсԓы.
LUK 3:19 Ԓўв Ирод, ԋӑԓмет мўв щуӈ куща ики, йайәԓ ими, Иродиада, нэӈа тўвмаԓ урәӈән пӑ па атәм верәт вермаԓ урәӈән, нўрыты питсәԓы,
LUK 3:20 Ирод ики щиӈәԋща, верәм атәмԓаԓ хŏща и вер па пŏнәс, Иоанн касна хота омәссәԓы.
LUK 3:21 Хун хŏйатәт иса Иоаннән йиӈка ԓŏӈәԓтысайәт, Иисус ищи йиӈка ԓŏӈәԓтыса, йиӈка ԓŏӈәԓтыйәм йўпийән пойәкщәман ус: турәм хӑр пелки лоӈхиԓәс,
LUK 3:22 Йэмәӈ Ԓыԓ, голубь вой хŏрпийән, Ԓўв хŏщайәԓ иԓ эсԓәщәс, пӑ турәм эԓты тўр сый щащәс: "Нӑӈ – Ма Сӑмема Мосты Пŏхем, Ма йӑм кашэм Нӑӈ хŏщайэнән уԓ!"
LUK 3:23 Иисус верәт верты питмаԓән хŏԉмаӈ тӑԓ кема йўвман ус; хŏйатәт нумәссәт Ԓўв Иосиф пŏх, щишән опращԓаԓ - Илий,
LUK 3:24 Матфат, Левий, Мелхий, Ианнай, Иосиф,
LUK 3:25 Маттафий, Амос, Наум, Еслим, Наггей,
LUK 3:26 Мааф, Маттафий, Семеи, Иосиф, Иуда,
LUK 3:27 Иоаннан, Рисай, Зоровавель, Салафиил, Нирий,
LUK 3:28 Мелхий, Аддий, Косам, Елмодам, Ир,
LUK 3:29 Иосий, Елиезер, Иорим, Матфат, Левий,
LUK 3:30 Симеон, Иуда, Иосиф, Ионан, Елиаким,
LUK 3:31 Мелеай, Маинан, Маттафай, Нафан, Давид,
LUK 3:32 Иессей, Овид, Вооз, Салмон, Наассон,
LUK 3:33 Аминадав, Арам, Есром, Фарес, Иуда,
LUK 3:34 Иаков, Исаак, Авраам, Фара, Нахор,
LUK 3:35 Серух, Рагав, Фалек, Евер, Сала,
LUK 3:36 Каинан, Арфаксад, Сим, Ной, Ламех,
LUK 3:37 Мафусал, Енох, Иаред, Малелеил, Каинан,
LUK 3:38 Енос, Сиф, Адам, Турәм.
LUK 4:1 Иисус, Йэмәӈ Ԓыԓән тэкәнман, Иордан йŏхан эԓты йŏхԓы мӑнәс, пӑ щи Ԓыԓән хӑр пӑ таԓ мўва тўвман уса.
LUK 4:2 Щита Ԓўв ԋӑԓйаӈ хӑтәԓ хиԋән хўщман уса пӑ щи хӑтԓәтән Иисус нэмәԓты ӑт ԓэс, щи хӑтԓәт мӑнәм йўпийән, мет йўхәт Ԓўв ԓэты ԓӑӈхаты питса.
LUK 4:3 Хиԋ Ԓўвеԓа йастәс: "Нӑӈ – Турәм Пŏх ки, тӑм кев шуп, ԋаԋа йитыйа парты".
LUK 4:4 Иисус йŏхԓы йастәс: "Йэмәӈ Нэпекән xӑшман уԓԓа: ”Ӑнта туп ԋаԋ йурән хŏйат уԓты питәԓ, пӑ кашәӈ Турәм йасәӈ йурән”".
LUK 4:5 Щӑԓта Ԓўв хиԋән пӑԓ кев ԓŏӈԓа нŏх туса пӑ щиԓта ищи кумат хŏԓыйэ мўв ԓŏватән уԓты хон мўвәт аԉиԓысԓы,
LUK 4:6 хиԋ ики пӑ йастәс: "Нӑӈен тӑм хон мўвәт хŏща кущайа уԓты пŏнԓэм, пӑ ԓыв вŏсԓәты–вŏрԓәты щирэԓ Нӑӈен мӑԓэм, щит иса мӑнэма мӑса, пӑ ма, хŏйа ԓӑӈхаԓәм, щита мӑԓэм.
LUK 4:7 Нӑӈ ма йэԓпемән шаншен иԓ эсәԓԓэн ки, тӑм иса Нӑӈен мӑԓэм".
LUK 4:8 Туп Иисус йŏхԓы йастәс: "Сатана, Ма эԓтайэм пўӈԓа мӑна; Йэмәӈ Нэпекән xӑшман уԓԓа: ”Турәм Кущайэн йэԓпийән туп шаншен иԓ эсԓы, Ԓўвеԓа туп митхуйа уԓа”".
LUK 4:9 Щӑԓта Иисус сатанайән Иерусалим воша туса, Турәм Хот ԓоӈәԓ йира ԓощәԓтәса, пӑ йастәса: "Нӑӈ Турәм Пŏх ки, тӑԓта иԓ керәптыйа,
LUK 4:10 хӑшман ӑт уԓ: “Ԓўв ангелԓаԓа Нӑӈен шавиты партԓәԓы”,
LUK 4:11 пӑ “Нӑӈен нŏх аԓәмман туԓэԓ, Нӑӈ кўрэн кева аԓт вакләпәԓ”".
LUK 4:12 Иисус йŏхԓы йастәс: "Йастәман уԓ: ”Турәм Кущайэн, Турмен аԓ хўщи”".
LUK 4:13 Хун хиԋ ики хўщәпсайԓаԓ вŏԓәтсәԓԓы, Ԓўв эԓтайәԓ мӑтты пŏра унты шӑшән мӑнәс.
LUK 4:14 Иисус, Йэмәӈ Ԓыԓ йурән тэкәнман, Галилея мўва йŏхԓы йŏхтәс. Ԓўв айкеԓәԓ Галилея мўв керәтман лакки ԓӑрпиԓәс.
LUK 4:15 Ԓўв Турәм йасӈа утәԓтәты хотԓаԓән ԓывиԓаԓ утәԓтәс, пӑ хŏԓыйэ Ԓўвеԓ ишәксэԓ.
LUK 4:16 Иисус Назарета, энмәм вошәԓа, йŏхтәс, пӑ шаббат хӑтәԓән, Ԓўв уԓтаԓ иты, Турәм йасӈа утәԓтәты хота ԓŏӈәс, пӑ щита Йэмәӈ Нэпек эԓты сыйәӈа ԓуӈәтты ԓойәс.
LUK 4:17 Ԓўвеԓа Исаия, Турәм йасәӈ туты ху, нэпек мӑса: Ԓўв нэпек нŏх ԓӑрпитмаԓ йўпийән, щи тӑха уйәтсәԓы, хŏта хӑшман уса:
LUK 4:18 "Турәм Куща Ԓыԓ Ма хŏщайэм уԓ; Ԓўв Мӑнэм, куԋарәта Йӑм айкеԓ йастәты урәӈән, ԋŏсәтсәԓы, пӑ Мӑнэм, сӑмԓаԓ рӑкнәм хŏйатәт тўмтака верты урәӈән, китсәԓы, ԋӑрэмәм хŏйатәта хŏԓт сŏхәнты вер пӑ сэмԓы хŏйатәта – сэмәӈа йиты вер аԉты китсәԓы, шукатты хŏйатәт хŏԓт эсәԓты китсәԓы,
LUK 4:19 Турәм Куща йӑм ŏт тӑԓ-ԓўӈ йŏхтәм такан айәԓтты китсәԓы".
LUK 4:20 Иисус, нэпек лӑп йŏвәртман, ԋотты хŏйата мӑсԓы пӑ иԓ опсәс. Турәм йасӈа утәԓтәты хот тэԓ хŏйат хŏԓ Ԓўв пеԓайәԓ тŏрԓы ватԓәт.
LUK 4:21 Щӑԓта Ԓўв ԓыв пеԓайэԓ пŏтәртты питәс: "Тӑмхӑтәԓ, нын хуԓәм тӑм Йэмәӈ Нэпек йасӈәт, йӑнәпсәт".
LUK 4:22 Хŏԓыйэ ԓыв кўтэԓән Ԓўвеԓ ишәксэԓ, пӑ Ԓўв эԓтэԓ этты сӑма рӑхты йасәӈԓаԓ эԓты ощатыԓәт, пӑ пŏтәрԓәт: "Тӑм мўй ӑнта Иосиф пŏх?"
LUK 4:23 Иисус ԓывиԓаԓа йастәс: "Нын, уйәтман, Мӑнэма щимәщ йасәӈ йастәԓты: ”Ԉэккар, Нӑӈен Нӑӈ йӑмәԓты!”, хŏԓна: ”Тӑта Нӑӈ вошенән па щит вера, мўй, мўӈ хуԓмевән, Капернаум вошән версән”".
LUK 4:24 Щӑԓта йастәс: "Йӑна нынана йастәԓәм: Турәм йасәӈ туты и ху нэш энмәм мўвәԓән вана ӑт уԓа.
LUK 4:25 Вещката нынана пŏтәртԓәм: Илия Турәм йасәӈ туты ху уԓмаԓән, Израиль мўвән ар икиԓы хӑщәм ими ус, щи пŏрайән хуԓәм тӑԓ пӑ хут тыԓәщ турәм хӑр щиты лӑп йэртман уса, пӑ иса мўв ԓŏвата ун ԓэԓԓы пŏра йŏхтәс,
LUK 4:26 ԓыв кўтэԓа ий ими хŏща нэш Илия ӑт китса, туп Сидон вош пўӈәԓән уԓты Сарепта курта икиԓы ий ими хŏща китса.
LUK 4:27 Елисей Турәм йасәӈ туты ху уԓәм пŏрайән, йэмәӈ ԓайӈәӈ ԋўлмәт тӑйты ар хŏйат Израиль мўвән ус, Нееман нэмпи Сирия мўвәӈ ики тўмпийән, нэмәԓты хŏйат ӑт сыстапса".
LUK 4:28 Щит хуԓмеԓ кемән, Турәм йасӈа утәԓтәты хотән уԓты хŏйатәт хŏԓыйэ ԉикән йŏхәтсайәт.
LUK 4:29 Ԓыв нŏх ԓойәпсәт, Иисус вош эԓты ким воштәсэԓ; вошеԓ кев пай эԓты омәсман уԓ, пӑ пӑԓ кев пай венша тусэԓ, иԓ вŏщкәты урәӈән.
LUK 4:30 Туп Ԓўв, хŏйатәт кўтән шушман, пўӈԓа йирԓәс.
LUK 4:31 Иисус Галилея мўвән уԓты Капернаум воша йŏхтәс, пӑ шаббат хӑтәԓән ԓывиԓаԓ утәԓтәс.
LUK 4:32 Мŏхет Ԓўв утәԓтәпсайәԓ эԓты ӑԓ пакнысыԓәт, Ԓўв йасӈәԓ партатты щир тӑйәс.
LUK 4:33 Турәм йасӈа утәԓтәты хотән кўԉ сŏх тӑйәм хŏйат ус, пӑ ԓўв сыйәӈ тўрән ўваԓтәс:
LUK 4:34 "А-а-а: Назарет эԓты уԓты Иисус, мўӈ эԓтэв мўй Нӑӈен мосәԓ? Нӑӈ мўӈев пӑратты йŏхәтсән; уйәтԓэм, Хŏй Нӑӈ! Нӑӈ – Турәм Йэмәӈ Ŏт!"
LUK 4:35 Иисус ԓўвеԓ такан партсәԓы: "Мӑшйайа йўвәмта па ԓўв эԓтэԓ ким эта!" Кўԉ сŏх Турәм йасӈа утәԓтәты хот кўтәпән хŏйат иԓ вŏщкәсԓы, щӑԓта ԓўв эԓтэԓ ким этәс, нэмәԓты атәм ин хŏйата ӑт верәс.
LUK 4:36 Мŏхет хŏԓыйэ хŏрщәмән йŏхәтсайәт, пӑ кўтԓаԓән пŏтәртсәт: "Мўй щит? Ԓўв щиты партатты щирән пӑ йуртат кўԉ сŏхәта пӑртәԓ пӑ ԓыв ким этԓәт?"
LUK 4:37 Пӑ Ԓўв эԓтэԓ айкеԓ керәтман куртәт хўват лакки мӑнәс.
LUK 4:38 Турәм йасӈа утәԓтәты хот эԓты ким этмаԓ йўпийән, Иисус Симон хота ԓŏӈәс. Симон утпәԓ ими шек кӑшаӈ ус; пӑ Иисус щи ими урәӈән вохса.
LUK 4:39 Ԓўв щи ими хŏща ԋўрман, муш нŏх вŏԓыты партсәԓы; ин ими мушән хӑйса. Ԓўв ищи мŏхты нŏх ԓойәс, пӑ мŏхета пӑсан омәсты питәс.
LUK 4:40 Хӑтәԓ иԓ опсәм сыс хŏԓыйэ, хŏй мушән йŏхтәм хŏйат тӑйәс, щи ар сыр мушпи хŏйатԓаԓ Ԓўв хŏщайәԓа тусԓаԓ. Ԓўв пӑ, кашәӈ мушәӈ хŏйат эԓты йошԓаԓ пŏныԓыман, ԓывиԓаԓ тўмтака версәԓы.
LUK 4:41 Ар хŏйат эԓты ищиты кўԉ сŏхәт, ўвман, ким этсәт пӑ пŏтәртсәт: "Нӑӈ – Христос, Турәм Пŏх!" Ԓыв уйәтԓәт - Ԓўв – Христос, туп Иисус щит ԓывиԓаԓа йастыты ӑт эсәԓсәԓы.
LUK 4:42 Хун хӑтԓа йис, Ԓўв хот эԓты ким этмаԓ йўпийән, таԓ шитам тӑхайа мӑнәс. Ар хŏйатән кӑшса, пӑ Ԓўв хŏщайәԓ йŏхәтмеԓән, Ԓўвеԓ иԓ рŏнатԓэԓ, ԓыв эԓтайэԓ ӑт ат мӑнәс.
LUK 4:43 Ԓўв пӑ ԓывиԓаԓа йастәс: "Мӑнэм па вошәтән ищи Турәм Хон Уԓәпса эԓты Йӑм айкеԓ йастәты мосәԓ. Щи урәӈән Ма китсайәм".
LUK 4:44 Щиты Ԓўв Галилея Турәм йасӈа утәԓтәты хотәтән сыйәӈа пŏтәртәс.
LUK 5:1 И пўш, хун Иисус Геннисарет нэмпи ԓор питарән ԓоймаԓән, хŏйатәт керәтман Ԓўв хŏщайәԓ нӑптәщсәт, Турәм йасәӈ хуԓәтты урәӈән,
LUK 5:2 Ԓўв кӑт ўты кӑтԓәм хоп шийаԓәс; хўԓ веԓты хŏйатәт пӑ, хоп эԓты иԓ ŏхәԓман, хоԓәпԓаԓ ԉŏхәтсәт.
LUK 5:3 Иисус и хопәԓа ԓэԓәс, Симон хопа. Ԓўв ԓор питар эԓты Симон йэша йэԓшәк мӑнты пӑртсәԓы, Ԓўв пӑ, хопән омәсман, хŏйатәт утәԓтәс.
LUK 5:4 Хун Ԓўв хŏйатәт утәԓтәты йэтшәс, Симон пеԓа йастәс: "Мӑԓ тӑхайа мӑна, пӑ хоԓпән хўԓ хойты щира йовәԓмаԓән".
LUK 5:5 Симон Ԓўвеԓа йастәс: "Утәԓтәты ху, мўӈ тӑԓаӈ ат рупәтсув, нэмәԓты ӑт мŏщатсув, туп Нӑӈ йасӈен хўватән ма хоԓпем йовәԓмәԓэм".
LUK 5:6 Щиты вермеԓ йўпийән, ԓыв щи арат ар хўԓ мŏщатсәт, пӑ хŏԓна хоԓпеԓ тŏхты питәс.
LUK 5:7 Щиӈәԋща ԓыв кимет хопән уԓәм пиԓԓаԓа йош йовәԓты питсәт, ԓывиԓаԓа ԋотты ат йŏхәтсәт; щӑԓта йŏхәтсәт пӑ хопӈәԓаԓ кинәӈтак хўԓән тэкәптәсԓаԓ, хопӈәԓаԓ вŏԓԓы иԓ шуйԓәты питсәӈән.
LUK 5:8 Щит шийаԓәмаԓ кемән, Иисусән Петрайа айәԓтәм Симон Иисус шашӈән хŏща рӑкнәс пӑ йастәс: "Турәм Куща, ма эԓтэм йэԓ мӑна, ма кӑрэкәӈ хŏйат".
LUK 5:9 Петрайа айәԓтәм Симон пӑ хŏԓ, ԓўв пиԓәԓән уԓәм йохԓаԓ, тӑм веԓәм хўԓԓаԓ пӑтыйән, пӑԓщәмән йŏхәтсайәт;
LUK 5:10 Симон пиԓӈәԓаԓ Иаков пӑ Иоанн, Зеведей пŏхӈән ищиты пӑԓтәмәсӈән. Щӑԓта Иисус Симон пеԓа йастәс: "Аԓ пӑԓа, тӑԓта йэԓԓы нӑӈ хŏйатәт кӑтәԓты питԓән".
LUK 5:11 Щиӈәԋща, хопӈән ўты тӑԓмеԓ йўпийән, пŏрмасԓаԓ иса хӑйсәԓаԓ пӑ Иисус йўпийән мӑтсәт.
LUK 5:12 Хун Иисус и мŏԓты вошән уԓмаԓән, ԓŏватәԓән ԓайӈәӈ ԋўләмән этәм хŏйат йŏхтәс. Щӑԓта, Иисус шийаԓәмаԓ кемән, Ԓўв йэԓпеԓән хŏмта шаншантәс пӑ, пойәкман пŏтәртәс: "Йэшәк Турәм Куща! Кашен уԓ ки, верәтԓэн мӑнэм Нӑӈ нŏх сыстапты".
LUK 5:13 Иисус йошәԓ йэԓ шӑшсәԓы, ԓўв хŏщайәԓа хӑнәмтыйәс пӑ йастәс: "Ԓӑӈхаԓайәм, сыстама йўва!" Ищи мŏхты ԓайӈәӈ ԋўләмԓаԓ йӑма йисәт.
LUK 5:14 Иисус ԓўвеԓа нэмәԓты хŏйата щи вер эԓты пŏтәртты ӑт эсәԓсәԓы. Туп Турма йир верты хŏйата этәԓтыты пӑртсәԓы, пӑ сыстапты верәԓ пеԓа йир туты пӑртсәԓы, хŏты Моисей партәс, ԓывиԓаԓ эвԓәптәты урәӈән.
LUK 5:15 Туп Иисус айкеԓәԓ мет йэԓ ԓӑрпиԓәс, пӑ тэԓыйэ хŏйат Ԓўв хŏщайәԓа йŏхтыԓыйәс, Ԓўв йасәӈԓаԓ хуԓәтты пӑ мушԓаԓ эԓты йӑмәԓтыты.
LUK 5:16 Туп Иисус таԓ шитам тӑхайата мӑныԓыйәс пӑ щита пойәкщәс.
LUK 5:17 И хӑтәԓән, хун Иисус хŏйатәт утәԓтәс, щита Галилея пӑ Иудея куртәт эԓты, Иерусалим вош эԓты па йŏхтәм фарисейәт пӑ Закона утәԓтәты икет омәссәт; Турәм Куща йур мушәӈ хŏйатәт тўмтака верты верән этԓыйәс.
LUK 5:18 Щӑԓта ин, кӑмәтса хŏйат щащԓы питәм ху ŏԓты сŏxԓаԓән тусәт. Ԓыв хота ԓўвеԓ ԓŏӈәԓтты ўтщисэԓ, Иисус йэԓпийа ԓуԓән пŏнты,
LUK 5:19 туп и ԓӑӈкәрән ԓойты хŏйатәт кўт эԓты ӑт верәтсэԓ туты. Щиӈәԋща ԓыв хот ԓоӈԓа нŏх ўратсәт, хот ԓоӈәԓ, нŏх лосәтман, усән версэԓ пӑ мушәӈ ŏтэԓ ŏԓты сŏxԓаԓән кўтԓәпа Иисус йэԓпийа иԓ эсәԓсэԓ.
LUK 5:20 Иисус ԓыв эвәԓты щирэԓ шийаԓәмаԓ кемән, мушәӈ хŏйата йастәс: "Ԓухсэм, кӑрэкԓан йŏрэмәсайәт!"
LUK 5:21 Фарисейәт пӑ Закона утәԓтәты икет щит хуԓмеԓ кемән нумәсты питсәт, пŏтәртԓәт: "Хŏй щит, Хŏй Турма ӑт рӑхты йасӈәт йастыйәԓ? Турәм тўмпийән хŏй верәтәԓ хŏйата кӑрэкәт йŏрэмәты?"
LUK 5:22 Иисус, ԓыв нŏмәсԓаԓ ŏша пайәтмаԓ кемән, йŏхԓы ԓывиԓаԓа йастәс: "Мўйа щиты нумәсԓәты?
LUK 5:23 Мўй кеншәк йастәты: ”Нӑӈ кӑрэкԓан йŏрэмәсайәт!”, мўй пӑ йастәты: ”Нŏх ԓойа пӑ шушиԓыйа”?
LUK 5:24 Уйтаты, Хŏйат Пŏх тӑта, мўвән, кӑрэкәт йŏрэмәты щир тӑйәԓ, - Иисус щащԓы питәм хŏйат пеԓа йастәс, - Нӑӈена пŏтәртԓәм: нŏх ԓойа, ŏԓты сŏхԓан ўйаԓән пӑ йŏхи мӑна".
LUK 5:25 Ищи мŏхты ԓыв йэщаԓтэԓ ԓўв нŏх ԓойәс, ŏԓәм сŏxԓаԓ усԓы, Турәм вŏԓаӈа айәԓтман, йŏхи мӑнәс.
LUK 5:26 Щиӈәԋща вантәм хŏйатәт пӑԓщәмән йŏхәтсайәт, ԓыв Турәм вŏԓаӈа айәԓтсәт пӑ, пӑԓман, пŏтәртсәт: "Тӑмхӑтәԓ унты ӑт вантыԓыйәм верәт мўӈ ин щи ватсув!"
LUK 5:27 Щи йўпийән, Иисус ким этәс, пӑ Левий нэмпи налог ӑкәтты хŏйат шийаԓәс, налог ӑкәтты тӑхайәԓән опсәс. Иисус ԓўвеԓа йастәс: "Ма йўпемән йўва".
LUK 5:28 Щиӈәԋща, мŏԓтыԓаԓ иса хӑйсәԓы, нŏх ԓойәс пӑ Иисус йўпийән мӑнәс.
LUK 5:29 Левий ԓўв хотәԓән Иисус урәӈән ун поры пӑсан ԓэщатәс, ԓыв пиԓԓаԓән пӑсан сурыйән налог ӑкәтты ар хŏйат пӑ па мŏхет усәт.
LUK 5:30 Фарисейәт пӑ Закона утәԓтәты икет Иисус утәԓтәты йохԓаԓ пеԓа ўшмащсәт пӑ пŏтәртсәт: "Мўйа нын налог ӑкәтты хŏйатәт пӑ кӑрэкәӈ хŏйатәт пиԓән и йӑха ԓэԓты, йищԓәты?"
LUK 5:31 Иисус ԓывиԓаԓа йŏхԓы йастәс: "Тўмтак хŏйатәта хун ԉеккар мосәԓ, мушәӈ хŏйатәта мосәԓ.
LUK 5:32 Ма ӑнта тўӈа–щира уԓты хŏйатәт, Ма кӑрэкәӈ хŏйатәт кӑрэкԓаԓ эԓты шӑшән керԓәптәты урәӈән йŏхәтсәм".
LUK 5:33 Щӑԓта ԓыв Иисуса йастәсәт: "Иоанн утәԓтәты йохԓаԓ ван кўтән вўщԓәты хӑтԓәт верыԓыԓәт пӑ пойәкщәты верәт верԓәт, фарисейәт утәԓтәты йŏх ищиты уԓԓәт, Нӑӈиԓан пӑ ԓэԓәт-йищԓәт".
LUK 5:34 Иисус ԓывиԓаԓа йŏхԓы йастәс: "Нын мўй поры пӑсан хŏща, Нэ Туты Ху омәсман, мŏйәӈ йох вўщԓәты партты верәтԓәты?
LUK 5:35 Хӑтԓәт йŏхәтԓәт, хун Нэ Туты Ху ԓыв эԓтэԓ нŏх ўԓа, щи пŏрайән ԓыв вўщԓәты хӑтԓәт верты питԓәт".
LUK 5:36 Иисус ԓывиԓаԓа хŏԓна тӑмәщ утәԓтәты пŏтәр пŏтәртәс: "Нэмәԓты хŏйат, йӑԓәп ԓумтәмәԓ эԓты менэмәм йŏԓәптайәԓ, катра сŏхәԓа ӑт рӑхәԓԓәԓы; па щирән ки йӑԓәп ԓумтәмәԓ мӑшԓәԓы, пӑ йӑԓәп йŏԓәптайәԓ катра сŏхәԓа па ӑт рӑхәԓ.
LUK 5:37 Пӑ нэмәԓты хŏйат йӑԓәп ўна катра ԋўки хира ӑт пŏнԓәԓы, па щирән ки, веԉщи кавәрты ўнайән хир мӑшԓа, ўнайәԓ иԓ мӑнәԓ пӑ хирәԓ ӑт мосты питәԓ.
LUK 5:38 Ӑнта, йӑԓәп ўна йӑԓәп хира пŏнты мосәԓ. Ши пŏрайән тўмеԓ тӑԓаӈа хӑщәԓ, пӑ тӑмеԓ па.
LUK 5:39 Нэмәԓт хŏйат, катра ўна йиԋщемәман, ищи мŏхты йӑԓәп ўна йиԋщемәты ӑт ԓӑӈхамәԓа. Ԓўв йастәԓ: "Катра ўна йӑмшәк".
LUK 6:1 И пўш, шаббат хӑтәԓән Иисус ԓатән опсәм мўв хӑр хўват шушәс. Ԓўв утәԓтәты йохԓаԓ ԋаԋ тŏрән тӑйәт мӑшсәт, йошән сыстапсыԓаԓ пӑ ԓат сэмԓаԓ йŏхи ԓэсԓаԓ.
LUK 6:2 Тухәԓ фарисейәт иԋщәссәт: "Мўйа нын шаббат хӑтәԓән, мўй ӑт эсәԓман уԓԓа верты, щит верԓәты?"
LUK 6:3 Иисус йŏхԓы йастәс: "Нын мўй ӑт ԓўӈәтсәԓән, хун Давид мŏхиԓаԓ пиԓән сӑмԓаԓ вохәмән, мўй ԓўв верәс?
LUK 6:4 Хŏты ԓўв Турәм Хота ԓŏӈәс пӑ Турәм кеша пŏнәм йэмәӈ ԋаԋәт усԓы, ԓэс пӑ хŏԓна ԓўв пиԓәԓән уԓәм мŏхиԓаԓа мӑсԓы, Турма йир верты хŏйатәт тўмпийа щи ԋаԋәт нэмәԓт хŏйата ԓэты ӑт эсәԓман уса?"
LUK 6:5 Щӑԓта Иисус ԓывиԓаԓа йастәс: "Хŏйат Пŏх шаббат хӑтәԓ хŏща па куща".
LUK 6:6 Па шаббат хӑтәԓән пӑ Иисус Турәм йасӈа утәԓтәты хота ԓŏӈәс пӑ утәԓтәс. Щита и хŏйат ус, ԓўв йӑм пеләк йошәԓ нŏх сорман ус.
LUK 6:7 Закона утәԓтәты икет пӑ фарисейәт Иисус ватман тӑйԓэԓ, шаббат хӑтәԓән хŏйат тўмтака верԓәԓы мўй ӑнтом, Ԓўв хŏщайәԓ нўр этәԓтәты урәӈән.
LUK 6:8 Иисус, ԓыв нŏмәсԓаԓ уйәтман, сорәм йошпи хŏйата йастәс: "Нŏх ԓойа пӑ хот кўтпа йўва". Щитэн нŏх ԓойәс пӑ хот кўтпа этәс.
LUK 6:9 Иисус лывиԓаԓа йастәс: "Ма нынан иԋщәсԓәм: шаббат хӑтәԓән мўй верты эсәԓман уԓԓа? Йӑм вер мўй атәм вер? Ԓыԓ этәԓтәты мўй пӑратты?" Ԓывәт иса мӑшйайәт.
LUK 6:10 Ԓыв пеԓайԓаԓа ӑӈкәртмаԓ йўпийән, Иисус щи хŏйата йастәс: "Йошэн йэԓ ԋиншәмты". Щитэн щиты версәԓы; ин йошәԓ кимет йошәԓ хŏрпийа пӑ йӑма йис.
LUK 6:11 Ԓыв пӑ пӑԓщәм ԉикән йŏхәтсайәт, кўтԓаԓән пŏтәртсәт, а мўй хŏты Иисус верты.
LUK 6:12 Щи хӑтԓәтән Иисус кев пай ԓоӈԓа нŏх хуӈхәс пойәкщәты урәӈән, щита ат хўват Турәм пеԓа пойәкщәман ус.
LUK 6:13 Хун хӑтԓа йис, Ԓўв утәԓтәты йохԓаԓ вохсәԓы пӑ ԓыв эԓтыԓаԓ кӑтхŏщйаӈ хŏйат пирыйәс, ԓывиԓаԓ апостоләта айәԓты щи питсәԓы:
LUK 6:14 Симон, ԓўвеԓ Петрайа пӑ айәԓты питсәԓы, ԓўв Андрей апщеԓ па, Иаков пӑ Иоанн, Филипп пӑ Варфоломей,
LUK 6:15 Матфей пӑ Фома, Иаков - Алфей пŏх пӑ Зилота нэмтәм Симон,
LUK 6:16 Иуда - Иаков пŏх пӑ Иуда Искариот – щит щӑха Иисус пӑратты йохәт йоша мӑты ху.
LUK 6:17 Ԓыв пиԓԓаԓән кев пай эԓты иԓ ŏхәԓмаԓ йўпийән, Иисус пайԓы тӑхайән иԓ ԓойәс, хŏта мŏԓты кем Ԓўв утәԓтәты йохԓаԓ пӑ ар хŏйат Иудея мўв ԓŏват эԓты, Иерусалим вош эԓты, па щарәс питар мўвӈән Тир па Сидон эԓты ус,
LUK 6:18 Ԓыв Иисус хуԓәтты па мушԓаԓ эԓты тўмтака пайтәсты урәӈән йŏхәтсәт, щӑԓта пӑ кўԉ сŏхән шукатты ŏтәт ищи йӑма йисәт;
LUK 6:19 Мир xŏԓыйэ Ԓўв хŏщайәԓа хӑнәмтыты ўратԓәт, Ԓўв эԓтайәԓ йур йис пӑ хŏԓыйэ тўмтака версайәт.
LUK 6:20 Щӑԓта Ԓўв, утәԓтәты йохԓаԓ пеԓа ӑӈкәртман, йастәс: "Куԋар сӑмпи ŏтәт щўԋԓәԓты! Турәм Хон Уԓәпса нынана уԓ.
LUK 6:21 Ин ԓэԓԓы уԓты ŏтәт ŏй тӑйԓәты, щӑха тӑрәмԓайты! Ин хоԓԓәты ŏтәт ŏй тӑйԓәты, ԋӑхты питԓәты!
LUK 6:22 Нын щўԋԓәԓты, хун хŏйатәтән ԉикән этты питԓайты, хун нŏмәс кимпийән тӑйты питԓайты, пӑ ԋэрты питԓайты, нэмԓән нўрәӈа айәԓты питԓайәт, Хŏйат Пŏха эвәԓман урәӈән.
LUK 6:23 Щи хӑтәԓән амтәтԓыйаты пӑ ԋӑхман-йŏтман уԓаты: турәмән нын мойԓапсайԓән вŏԓаӈәт! Ԓыв ащиԓаԓ Турәм йасәӈ туты хŏйатәт пиԓән ищи щиты уԓԓысәт.
LUK 6:24 Туп, тащәӈ хŏйатәт, нынана шук – нын тŏрамтыты щир тӑԓаӈ тэԓән мŏщатсәԓән!
LUK 6:25 Ин тарәмтыйа ԓэты ŏтәт, нынана шук! Сӑмԓән вохты питԓайәт! Ин ԋӑхман уԓты ŏтәт, нынана шук – хоԓԓәты пӑ йирӈәԓтыты питԓәты!
LUK 6:26 Шук нынана, хун хŏйатәт иса нын эԓтан йӑма пŏтәртты питԓәт! Ԓыв ащиԓаԓ ӑнта йӑна Турәм йасәӈ туты хŏйатәт пиԓән ищи щиты уԓԓысәт!"
LUK 6:27 "Нынана, Мӑнэм хуԓәтты ŏтәта, пŏтәртԓәм: нынан нўрмәԓтты хŏйатԓән мосман тӑйаԓән, йӑм вер вераты щи хŏйатәта, хŏйән нын ԉикән этԓайты,
LUK 6:28 нынан эӈкәрты ŏтԓәна Турәм эԓты йӑмән вохаԓән, пӑ нынана атәм верты хŏйатәт урәӈән, пойәкщаты.
LUK 6:29 Веш пўӈԓэн эԓты рэскийәм ŏтэна, кимет веш пўӈԓэн па шӑши, эԓты ԓумтәмен эхты ŏтэна, ԓыпи йэрнасэн ўты па аԓ йэрты.
LUK 6:30 Кашәӈ нӑӈ эԓтэн вохты хŏйата, мўй вохәԓ, мийи, пӑ нӑӈ ŏтэн ўйәм xŏйат эԓты ŏтэн йŏхԓы аԓ вохи.
LUK 6:31 Хŏты ԓӑӈхаԓайты, нын пиԓәнән хŏйатәт ат усәт, щиты ԓыв пиԓԓаԓән нын уԓаты.
LUK 6:32 Нынан мосман тӑйты хŏйатәт мосман тӑйԓәԓән ки, нынан мўй йӑм? Кӑрэкәӈ хŏйатәт ԓывиԓаԓа мосты хŏйатԓаԓән ищи мосман тӑйԓайәт.
LUK 6:33 Пӑ щи хŏйатәта йӑм вер верԓәты ки, хŏй нынан йӑм вер верәԓ, нынана мўй йӑм? Кӑрэкәӈ хŏйатәт ищи щиты верԓәт.
LUK 6:34 Пӑ, хŏйатәта артнайа мийԓыԓты ки, щи хŏйатәт эԓты артнайән йŏхԓы хоӈәтԓәԓән ки, нынан мўй йӑм? Кӑрэкәӈ хŏйатәт ищи кўтэԓән артнайа мийантыԓәт, йŏхԓы ищи щи арат ўты нумәсԓәт.
LUK 6:35 Туп нынан нўрмәԓтты хŏйатԓән мосман тӑйаԓән, йӑм вер вераты пӑ, нэмәԓты йŏхԓы ӑт хоӈәтман, артнайа мийаты; щишән нынан мойԓәпса вŏԓаӈ питәԓ, пӑ Нўм Турәм ԋаврэма уԓты питԓәты; Ԓўв кўш йӑм ӑт нумты хŏйатәт пеԓа, кўш ԉикәӈ хŏйатәт пеԓа и хŏрпийа сӑмәӈ.
LUK 6:36 Щиӈәԋща хŏйатәт пеԓа сӑмәӈа уԓаты, хŏты Турәм Ащан сӑмәӈ.
LUK 6:37 Аԓ сўтытаты пӑ нынан нэмәԓты хŏйат сўтәтты ӑт питәԓ. Аԓ ԋухмантаты, пӑ нын эԓтан нэмәԓты хŏйат ԋухматты ӑт питәԓ. Нўр аԓ нуматы, пӑ нын нўрԓән ищи йŏрэмәԓайәт.
LUK 6:38 Мийаты, пӑ нын па мӑԓайты: йӑм мŏртән, йовԓәм, иԓ тыԋхәм, щурщаӈа пŏнәм тэԓәӈ мŏртән хŏхәнԓәна шŏшәмԓайты; мўй сыр мерайән пŏнԓәты, щимәщ мерайән нынана пŏнты питԓа".
LUK 6:39 Утәԓтәты пŏтәр ԓывиԓаԓа па пŏтәртәс: "Сэмԓы хŏйат мўй верәтәԓ сэмԓы хŏйат ватәԓтәты? Мўв ўса мўй ӑнта кинәӈтак иԓ питԓәтән?
LUK 6:40 Утәԓтыты хŏйат утәԓтәты икеԓ эԓты унашәк ӑт уԓԓыйәԓ, туп утәԓтыты вер йэтшәман, кашәӈ хŏйат утәԓтәты икеԓ иты йиты верәтәԓ.
LUK 6:41 Мўйа нӑӈ ԓухсэн сэма питәм нўв шўк пеԓа ватԓән, нӑӈ сэменән ŏԓты павәрт шуп ӑт мŏштәԓэн?
LUK 6:42 Мўй щирән нӑӈ веритԓән щи ԓухсэна йастәты: "Ԓухсэм, мийи ма нӑӈ сэмен эԓты нўв шўк нŏх ўԓэм, - щи пўԉаӈ нӑӈ сэменән павәрт ӑт шийаԓәԓэн? Кӑт вешпи хŏйат! Оԓәӈән павәрт нӑӈ сэмен эԓты нŏх ўйи, щӑԓта ныты питԓа, хŏты нўв шўк ԓухсэн сэм эԓты нŏх ўԓэн".
LUK 6:43 И йӑм йўх атәм ԓэвпәс ӑт энмәԓԓәԓ; пӑ и вевтам йўх йӑм ԓэвпәс ӑт энмәԓԓәԓ,
LUK 6:44 кашәӈ йўх ԓўв энмәԓтәм ԓэвпәсԓаԓ эԓты уйәтԓа. Пеԓантыты варәс эԓты смоква вощтŏт ӑт ӑкәтԓа пӑ варәс пŏхәл эԓты – виноград ӑт ӑкәтԓа.
LUK 6:45 Сӑмәԓ йӑм хŏйат сӑмәԓән шавиты йӑмәԓ этәԓтәԓ, ԉикәӈ хŏйат сӑмәԓән тӑйты ԉикәԓ этәԓтәԓ, хŏйат тэԓәӈ сӑмәԓ эԓты ԓўв ўӈԓәԓ пŏтәртәԓ".
LUK 6:46 "Мўйа нын Мӑнэм вохԓәԓән: "Турәм Куща, Турәм Куща!" пӑ хŏты Ма йастәԓәм, щиты ӑт верԓәты?
LUK 6:47 Кашәӈ Ма хŏщайэма йŏхтыԓыты хŏйат пӑ Ма йасәӈԓам хуԓәтты хŏйат пӑ йасәӈԓам щирән верты хŏйат, нынана йастәԓәм ԓўв хŏй хŏрпи.
LUK 6:48 Ԓўв щимәщ хŏйат хŏрпи, хŏй хот омәсәԓ, хот лотәԓ мӑԓа хирсәԓы пӑ хот пӑтэԓ кев эԓты ўсԓы. Мўйа, хун йик эпәтмаԓән пӑ щи хот йикән ԋорәтман, йэша нэш пўӈԓа ԋŏхтәты ӑт верәтса, хот кев эԓты омәсман уса, щишән.
LUK 6:49 Ма йасӈем хуԓәтты хŏйат пӑ йасәӈ щирән ӑт верәԓ, щит хотәԓ мўв эԓты опсәм хŏйат хŏрпи, хотәԓ так пӑты ӑт тӑйәԓ; хун ун йикән ԋорәтса, и щишән иԓ ӑркәмтәс; щи хот пŏԉха шўкаԓәс".
LUK 7:1 Хун Иисус хуԓәнтәм мир пеԓа йасәӈԓаԓ хŏԓасәт, Капернаум воша мӑнәс.
LUK 7:2 Щита и сот ԉаԉ йох ŏх ху митхуйәԓ ԓавәртат кӑшаӈ ус, сŏрмәԓ вŏԓԓы ванамәс. Щи митху ԓўв шек мостыйа тӑйсәԓы.
LUK 7:3 Иисус эԓты хуԓмаԓ кемән, ԓўв иудейәт хŏща уна уԓты икет эԓты тухәԓԓаԓ Иисус хŏща китсәԓԓы, йастәты, ԓўв митхуйәԓ тўмтака верты урәӈән, ат йŏхтәс.
LUK 7:4 Ԓыв Иисус хŏща йŏхәтмеԓән, эвԓа-йŏԓа Ԓўвеԓ пойәксэԓ, щиты пŏтәртԓәт: "Нӑӈен ԓўвеԓа щит верты рӑхәԓ, ԓўв йӑм хŏйат,
LUK 7:5 ԓўв мирэв мостыйа тӑйԓәԓы, хŏԓна Турәм йасӈа утәԓтәты хот мўӈева верәс".
LUK 7:6 Иисус ԓыв пиԓԓаԓән мӑнәс. Туп хун Ԓўв ԉаԉ йох ŏх ху хот ԉэпа йŏхтәс, ԉаԉ йох ŏх ху ԓухәсԓаԓ йэщаԓт китсәԓы, йастәты: "Йэшәк Турәм Куща, йэԓԓы аԓ мӑна, ма мўй вŏԓаӈ хŏйат, ма хотэма Нӑӈ ат ԓŏксән,
LUK 7:7 щишән, мӑнэм ма йӑм хŏйата ӑт ԓуӈәтсэм, Нӑӈ хŏщайэн ванамәты урәӈән; туп и йасәӈ йаста, митхуйэм тўмтака йиԓ.
LUK 7:8 Ма ищи хуԓәтты хŏйат, туп ма иԓпемән ищи ԉаԉ йохәт уԓԓәт, ита йастәԓәм: "Мӑна", па мӑнәԓ, пӑ кимета йастәԓәм: "Ты йўва!", пӑ йиԓ, митхуйэма йастәԓәм: "Щит вера", пӑ верәԓ".
LUK 7:9 Щит хуԓмаԓ кемән, Иисус ԓўв пелайәԓ ӑԓ ватәԓ пӑ, йŏхԓы каремәман, Ԓўв йўпеԓән шушәм хŏйатәта йастәс: "Нынана пŏтәртԓәм, тӑмәщ эвәԓты щир Ма Израиль мир хŏща хŏԓна ӑт уйәтсәм".
LUK 7:10 Китыԓыйәм мŏхет, йŏхԓы йŏхәтмеԓән, кӑшаӈ митхуйэԓ, уйәтмеԓән, тўмтака йўвмаԓ.
LUK 7:11 Щи йўпийән Иисус Наин нэмпи воша мӑнәс; ар пеләк утәԓтәты йŏхԓаԓ пӑ тэԓыйэ хŏйат Ԓўв пиԓәԓән шушсәт.
LUK 7:12 Хун Ԓўв вош пушас ова вана йŏхтәс, вош эԓты пӑрәм хŏйат ким этәԓтәса, икиԓы хӑщәм ими туп тӑйәм и пŏхәԓ ус. Ши ими пиԓән вош эԓты ар хŏйат шушәс.
LUK 7:13 Ими шийаԓәмаԓ кемән, Турәм Куща сӑмәԓ хощты питәс, щаԉа ўсԓы пӑ ԓўвеԓа йастәс: "Аԓ хоԓԓа!"
LUK 7:14 Вана шушман, Иисус ԓэԓтŏта йошәԓән хӑнәмтыйәс; ӑпа тўвәм мŏхет иԓ ԓойсәт. Щӑԓта Иисус йастәс: "Энәмты пŏх, нӑӈена йастәԓәм, нŏх ԓойа!"
LUK 7:15 Пӑрәм пŏх нŏх опсәс пӑ пŏтәртты питәс; Иисусән ԓўв аԋԏеԓ йоша катԓәптәса.
LUK 7:16 Хŏйатәт пӑԓщәмән йŏхәтсайәт, пӑ ԓыв Турәм вŏԓаӈа айәԓтты питсәт, пŏтәртԓәт: "Вŏԓаӈ, ун Турәм йасәӈ туты хŏйат этәс, мўӈ кўтэвән уԓ! Турәм мирәԓ хŏща ԋотты йŏхтәс!"
LUK 7:17 Тӑмәщ айкеԓ Ԓўв эԓтэԓ Иудея мўв ԓŏвата пӑ керәтман иса лакки ԓӑрпиԓәс.
LUK 7:18 Иоанн тӑм верәт утәԓтәты йохԓаԓ эԓты хуԓсәԓы.
LUK 7:19 Кӑт хŏйатӈәԓаԓ вана вохман, Иисус хŏща китсәԓы, иԋщәсты: "Нӑӈ мўй Щит, Хŏй йŏхәтты верәԓ уԓ, мўй пӑ па Ŏт ԓавәԓты мосәԓ?"
LUK 7:20 Ԓын Иисус хŏща йŏхәтсәӈән, йастәсӈән: "Иоанн йиӈка ԓŏӈәԓтыты хŏйат минэмән Нӑӈ хŏщайэна иԋщәсты китсәԓы: "Нӑӈ мўй Щит, Хŏй йŏхәтты верәԓ уԓ, мўй пӑ па Ŏт ԓавәԓты мосәԓ?"
LUK 7:21 Щи пŏрайән Иисус ар сыр муш пӑ кӑши эԓты, кўԉ сŏх эԓты йӑмәԓтәс, пӑ мŏԓты кем сэмԓы хŏйатәта ватты щир мойԓәс.
LUK 7:22 Щӑԓта Ԓўв щиты йŏхԓы йастәс: "Мӑнаты пӑ Иоанна пŏтәртаты, мўй ватсәты, хуԓсәты: сэмԓы хŏйатәт сэмәӈа йиԓәт, нохты хŏйатәт йӑма шушиԓыԓәт; ԓайӈәӈ ԋўлмәӈ хŏйатәт сыстама йиԓәт, пӑԓԓы хŏйатәт хуԓԓәт, пӑрәм хŏйатәт нŏх ԓыԓӈатԓайәт, пӑ нўша хŏйатәта Йӑм айкеԓ эԓты сыйәӈа пŏтәртԓа;
LUK 7:23 Щит ŏйәӈ, хŏй мӑнэма эвәԓты нŏх ӑт вŏԓыйәԓ".
LUK 7:24 Иоанн китәм йохӈән мӑнәм йўпийән, Иисус мирәԓа Иоанн эԓты пŏтәртты питәс: "Хӑр пӑ таԓ мўва мўй ватты йӑхсәты? Вотән йовәԓты тŏрән ватты?
LUK 7:25 Мўй пӑ ватты нын йӑхсәты? Ԓэпәт сŏхәта ԓумәтԓыйәм хŏйат ватты? Йӑма ԓумәтԓыйәм пӑ тащәӈа уԓты хŏйатәт хон хотәтән уԓԓәт.
LUK 7:26 Мўй пӑ ватты нын йӑхсәты? Турәм йасәӈ туты хŏйат? Йӑна, пŏтәртԓәм нынана, Турәм йасәӈ туты хŏйат эԓты вŏԓаӈшәк хŏйат ватты йӑхсәты.
LUK 7:27 Тӑм щит, хŏй эԓты хӑшман уԓԓа: "Тӑм, Ма айкеԓ туты хŏйатэм Нӑӈ йэԓпенән китԓэм, xойән Нӑӈ йушен Нӑӈ йэԓпенән ԓэщатԓа".
LUK 7:28 Щишән нынана пŏтәртԓәм: иметән сэма пайтәм хŏйатәт кўтән, Иоанн йиӈка ԓŏӈәԓтыты хŏйат эԓты ԓӑтәӈшәк Турәм йасәӈ туты хŏйат ӑнтом; туп мет ай ŏт Турәм Хон Уԓәпсайән ԓўв эԓтайәԓ ԓӑтәӈшәк".
LUK 7:29 Хŏԓ Ԓўвеԓ хуԓәнтәм мир, пӑ налог ӑкәтты мŏхет, Турәм вещкат вер вана ўйман, Иоанн йиӈка ԓŏӈәԓтыты щирән йиӈка ԓŏӈәԓтысайәт;
LUK 7:30 фарисейәт пӑ Закона утәԓтәты икет йиӈка ԓŏӈәԓтыты ӑт кашащсәт, Турәм ԓӑӈхаты щир вана ӑт усэԓ.
LUK 7:31 Щӑԓта Турәм Куща йастәс: "Ин тӑм хŏйат рут артаԓәты мосәԓ, хŏй хŏрпет? Ԓыв хŏй хŏрпет?
LUK 7:32 Ԓыв вош хӑры хŏща омәсты ԋаврэмәт хŏрпет, кўтԓаԓән ўвәтԓәт пӑ пŏтәртԓәт: ”Мўӈ нарәс йўхән нын урӈәнән йŏтсув, нын пӑ ӑт йаксәты, мўӈ хоԓԓәты арәт арисув, нын ӑт хоԓԓәсты”.
LUK 7:33 Иоанн йиӈка ԓŏӈәԓтыты хŏйат йŏхтәс: ԋаԋ ӑт ԓэԓ, ўна ӑт йищәԓ, пӑ пŏтәртԓәты: ”Ԓўв ԓыпеԓән кўԉ уԓ”.
LUK 7:34 Хŏйат Пŏх йŏхтәс: ԓэԓ пӑ йищәԓ; пӑ йастәԓты: ’’Тӑта щи хŏйат, хŏй ԓэԓ пӑ ўна йищәԓ, налог ӑкәтты хŏйатәт пиԓән, кӑрэкәӈ хŏйатәт пиԓән ԓухса уԓ’’.
LUK 7:35 Ŏшәӈ–щащәӈ нŏмәс хŏԓыйэ ԓўв ԋаврэмԓаԓән вещката пӑйәтса".
LUK 7:36 И фарисейән Иисус ԓэты вохса; Ԓўв хота ԓŏӈәс, пӑсан сурыйа иԓ опсәс.
LUK 7:37 Щи вошән и уԉԋайа уԓты нэ ус, Иисус фарисей хотән ԓэты вер хуԓмаԓ кемән, нŏви кев эԓты верәм, эпԓәӈ миро вŏйән пŏнәм, ващ турпи пўт тус.
LUK 7:38 Щӑԓта, ԓўв шӑш пеләк сӑхат Иисус кўрнат шŏма шаншәха омәсман пӑ хоԓԓәман, Ԓўв кўрԓаԓ сэмйикән ŏвӈәԓтты пӑ ŏхсŏхԓаԓән нŏх мухты питсәԓы. Ԓўв кўрԓаԓ мосәԓтәсԓы пӑ эпԓәӈ миро вŏйән ԋŏсәтсәԓы.
LUK 7:39 Хун Иисус вохәм фарисей щит шийаԓәс, нумәсэмәс: "Тӑм йӑна Турәм йасәӈ туты хŏйат ки ус, Ԓўв ԓуԓән уйәтсәԓы, хŏй, мўй хŏрпи нэ Ԓўв хŏщайәԓ хӑныԓыйәԓ, щит кӑрэкәӈ нэ".
LUK 7:40 Ԓўв пеԓайәԓ Иисус йастәс: "Симон! Ма нӑӈена мŏԓты йастәты верэм уԓ". Ԓўв йастәс: "Пŏтәрта, Утәԓтәты Ху".
LUK 7:41 Иисус йастәс: "И ŏхәӈ ху кӑт артнайәӈ хŏйатӈән тӑйәс: итәԓ – ветсот динарий, киметәԓ – ветйаӈ.
LUK 7:42 Ԓын артнайԓын сŏхәптәты ŏх ӑт тӑйсәӈән, щишән ŏхәӈ ху кӑтӈән артнайԓын йŏрэмәсԓы. Йаста, мӑты ŏтәԓән ŏхәӈ ху мет мостыйа тӑйԓа?"
LUK 7:43 Симон йастәс: "Аԓт щитэн, хŏйа ԓўв аршәк ŏх йŏрэмәс". Иисус ԓўвеԓа йастәс: "Йӑна щиты пŏтәртԓән".
LUK 7:44 Ин нэ пеԓа керԓәман, Симона йастәс: "Тӑм нэ нӑӈена ныԓа? Ма нӑӈ хотэна йŏхәтсәм, нӑӈ кўр ԉŏхәтты йик Мӑнэм ӑт мӑсән, ԓўв пӑ Ма кўрԓам сэм йикԓаԓән ŏвӈәԓтсәԓы, ŏхсŏхԓаԓән нŏх мўхсәԓы;
LUK 7:45 уйтатмемәнән нӑӈ Мӑнэм хŏԓна ӑт мосәԓтәсэн, ԓўв пӑ, Ма йŏхәтмем ўш эԓты, Ма кўрԓам мосәԓтәты ӑт вŏԓыйәԓ.
LUK 7:46 Нӑӈ Ма ŏхем оливка вŏйән ӑт ԋŏсәтсэн, ԓўв пӑ эпԓәӈ миро вŏйән кўрԓам ԋŏсәтсәԓы.
LUK 7:47 Щишән, Ма нӑӈена йастәԓәм: Ма пеԓайэм артан сӑмәӈа уԓты верәԓ аԉәԓ, мўй арат ԓўв ар кӑрэкԓаԓ йŏрэмәсайәт; хŏйа шимәԓ нўр йŏрэмәԓа, щит шимәԓ сӑмәӈа уԓ".
LUK 7:48 Иисус щи нэ пеԓа йастәс: "Нӑӈ кӑрэкԓан йŏрэмәсайәт".
LUK 7:49 Ԓўв пиԓәԓән пӑсан сурыйән опсәм мŏхет нумәсты питсәт: "Хŏй тӑм, кӑрэкәт пӑ йŏрэмәԓ?"
LUK 7:50 Иисус пӑ нэӈа йастәс: "Нӑӈ эвәԓты верэнән нӑӈ нŏх пайәтсайән, йӑм нŏмәсән мӑна!"
LUK 8:1 Щи йўпийән Иисус вошәт куртәт хўват, Турәм эԓты сыйәӈа пŏтәртман, Йӑм айкеԓ Турәм Хон Уԓәпса эԓты тўвман, йӑӈхәс. Ԓўв пиԓәԓән кӑтхŏщйаӈ утәԓтәты йохԓаԓ усәт,
LUK 8:2 пӑ тухәԓ нэӈәт, хŏйтат Ԓўв кўԉ сŏх пӑ арсыр мушәт эԓты йӑмәԓтәс: Магдалинайа айәԓты Мария, ԓўв эԓтэԓ ԓапәт кўԉ сŏх ким этәс;
LUK 8:3 Иоанна па, Ирод хŏща хот рупата ŏх ху Хуза ийими; Сусанна, хŏԓна пӑ па имет. Тӑм нэӈәт Иисуса тӑйәм ŏхԓаԓән ԋотсәт.
LUK 8:4 Хун щи арат ар мир ӑктәщәс пӑ арсыр вошәтән уԓты мŏхет Ԓўв хŏщайәԓ йŏхәтсәт, Ԓўв утәԓтәты пŏтәрән пŏтәртты питәс:
LUK 8:5 "Ики мўв хӑрәԓа ԓат сэм йовәԓты этәс, хун ԓўв ԓат сэмԓаԓ йŏвәԓмаԓән, тухәԓԓаԓ йуш пўӈԓа рӑкәтсәт пӑ иԓ пурәтсайәт, щищкетән ԓэсайәт;
LUK 8:6 тухәԓԓаԓ па кев эԓты рӑкәтсәт, тŏрән тӑйԓаԓ йэша нŏх этмисәт, йик ӑт тӑймаԓ пӑтыйән, нŏх сорсәт.
LUK 8:7 Тухәԓ ԓат сэмԓаԓ пуԓән кўта рӑкәтсәт, пуԓән пӑ энмәс, щӑԓта пуԓәнән лӑп аԓэмәсайәт;
LUK 8:8 тухәԓ ԓат сэмԓаԓ йӑм мўва рӑкәтсәт пӑ энәммеԓ йўпийән, йӑм арат ӑкәтса, иԓ йовԓәм ԓат сэм эԓты сот пўш ар". Щи пŏтәр пŏтәртмаԓ йўпийән, Ԓўв такан йастәс: "Хŏй хуԓты пӑԓ тӑйәԓ ки, ат хуԓәԓ!"
LUK 8:9 Утәԓтәты йохԓаԓән Ԓўв иԋщәсса: "Мўй эԓты тӑм утәԓтәты пŏтәр".
LUK 8:10 Иисус йŏхԓы йастәс: "Нынан Турәм Хон Уԓәпса хӑԋа щирәт уйәтты мӑса, па хŏйатәта утәԓтәты пŏтәр хŏща, щиты ԓыв, ватман, ӑт шийаԓәԓәт, хуԓман, ӑт мŏштәԓәт.
LUK 8:11 Утәԓтәты пŏтәр щит айәԓԓәԓ: ԓат сэм – щит Турәм йасәӈ.
LUK 8:12 Йуш пўӈԓа рӑкнәм ԓат сэмәт хŏрпет тухәԓ йасәӈ хуԓты хŏйатәт, хŏйтат хŏща йухәт хиԋ йŏхәтәԓ пӑ щи йасәӈ сӑмԓаԓ эԓты нŏх уԓԓы, ԓыв ӑт ат эвәԓсәт пӑ нŏх ӑт ат пайтәссәт.
LUK 8:13 Кев эԓты питәм ԓат сэмәт хŏрпет тухәԓ хŏйатәт, амәтман йасәӈ вана ўԓәт. Туп ԓыв ԓэр ӑт тӑйԓәт, оԓәӈән эвәԓԓәт, хун хўщәпса этмәԓ, йŏхԓы ԓэԓәпԓәт.
LUK 8:14 Пуԓән кўта рӑкнәм ԓат сэмәт хŏрпет тухәԓ йасәӈ хуԓты хŏйатәт, туп ԓыв айән-айән кашәӈ хӑтәԓ верԓаԓән, тащәӈ пӑ каш хŏрпи уԓәпсайән йŏхи пайәтԓайәт, пӑ щи йасәӈ нэмәԓтыйа ӑт йиԓ.
LUK 8:15 Йӑм мўва питәм ԓат сэмәт хŏрпет тухәԓ хŏйатәт, хŏй йасәӈ хуԓмеԓ йўпийән йӑм пӑ вещкат сӑмԓаԓән шавиԓэԓ, пӑ щи йасӈеԓ ун йӑм вер верәԓ"; Щит йастәмаԓ йўпийән, Ԓўв такан йастәс: "Хŏй хуԓты пӑԓ тӑйәԓ ки, ат хуԓәԓ!"
LUK 8:16 Нэмәԓты хŏйат тўт сун ўщәтмаԓ йўпийән, хŏшамән лӑп ӑт пŏнԓәԓы, мўй пӑ иԓ ӑт хӑԋатԓәԓы, хŏԓна пӑ тўт акԓа нŏх опсәԓԓәԓы, ԓŏӈты хŏйатәта нŏви ат ныса.
LUK 8:17 Нэмәԓты хӑԋа ӑнтом, мўй эԓпа ӑт ат этәс, пӑ нэмәԓты хӑԋатәм ӑнтом, мўй эԓпа ӑт ат аԉса пӑ эԓпа ат питәс.
LUK 8:18 Щӑԓта, вантаты, хŏты нын хуԓәтԓәты: хŏй тӑйәԓ, щита па мӑты питԓа, хŏй ӑт тӑйәԓ, щит эԓты, мўй тӑйты нумәсәԓ, щитәԓ па нŏх ўԓа.
LUK 8:19 Ԓўв хŏщайәԓ аԋԏеԓ пӑ ху апщиԓаԓ йŏхәтсәт, хŏйатәт кўт эԓты вана мӑнты ӑт верәтсәт.
LUK 8:20 Иисуса йастәса: "Аԋԏен пӑ ху апщиԓан камән ԓойԓәт, Нӑӈен ватты ԓӑӈхәԓайәт".
LUK 8:21 Ԓўв щиты йŏхԓы йастәс: "Турәм йасәӈ хуԓәтты пӑ йасәӈ хўват уԓты ŏтәт – щитәт Ма аԋԏем пӑ Ма ху апщиԓам".
LUK 8:22 И хӑтәԓән Иисус утәԓтәты йохԓаԓ пиԓән хопа ԓэԓәс пӑ йастәс ԓывиԓаԓа: "Ԓор тўм пелка ўшԓув". Щӑԓта мӑтсәт.
LUK 8:23 Мӑнмеԓ сыс Ԓўв иԓ вŏйәпса. Ԓорән ун вота йис, хўмпәтән эԓт хӑщ мӑнԓайәт, пӑ ԓыв туп сŏртэԓа йŏхәтсәт.
LUK 8:24 Иисус хŏща вана ԋўрман, Ԓўвеԓ нŏх кўрәтсэԓ пӑ йастәсәт: "Утәԓтәты Ху! Утәԓтәты Ху! Щи пӑрԓув". Нŏх киԓмаԓән, Ԓўв вот пӑ хўмпәт иԓ вŏԓәтсәԓы; щӑԓта ромәпсәт, пӑ шитама йис.
LUK 8:25 Щиӈәԋща Ԓўв утәԓтәты йохԓаԓ пеԓа йастәс: "Хŏта нын эвԓәпсайән?" Ԓыв, пӑԓман пӑ пакәнман, кўтэԓән пŏтәртсәт: "Хŏй щит щимәщ, вотәта па йиӈка партәԓ, Ԓўвеԓа ԓыв хуԓәтԓәт?"
LUK 8:26 Галилея шŏма уԓты Гадара мўва йŏхәтсәт.
LUK 8:27 Хун Иисус ўты ŏхԓәс, Ԓўв йэщаԓтәԓ вошән уԓәм и хŏйат этәс. Ԓўв хўв тэԓән кўԉәтән ԓŏӈман уса па ԓумәтты сŏха ӑт ԓумәтԓыйәс, ӑнтом хот ԓыпийән, ӑпайәт пŏнәм кев хŏшапәт ԓыпийән ус.
LUK 8:28 Иисус шийаԓәмаԓ кемән, ԓўв ўваԓтәс, Иисус йэԓпийа иԓ рӑкнәс пӑ сыйәӈ тўрән йастәс: "Нӑӈен ма хŏщайэм мўй вер, Иисус, Нўм Турәм Пŏх? Нӑӈен пойәкԓэм, мӑнэм аԓ шукаты!"
LUK 8:29 Иисусән кўԉ тӑм хŏйат эԓты ким этты партса, ԓўв щишән ўвәс. Ин унты кўԉән ар пўш мŏщатыса пӑ шукатыса, карты кеԓән йошԓаԓ кўрԓаԓ хŏԓна иԓ йӑрыԓысайәт, щиты шависа, туп ищипа карты кеԓәт ԓўв лакки мӑшԓәԓы, пӑ кўԉән атэԓт тӑхайа воштәԓа.
LUK 8:30 Иисус ԓўвеԓ иԋщәссәԓы: "Нӑӈ нэмен мўй?" Щитэн йастәс: "Легион", ԓўв хŏщайәԓа шек ар кўԉ ԓŏӈман ус.
LUK 8:31 Ԓыв Иисус пойәксэԓ, пӑтыԓы ўса ԓыв ӑт ат китсайәт.
LUK 8:32 Щита, кев ԓŏӈәԓән пурәщ тащ ԓӑрпиԓәмаԓ; кўԉәт Иисус пойәксэԓ, ԓуԓән ԓывиԓаԓ пурщәт ԓыпийа ԓŏӈты ат эсәԓсәԓы. Ԓўв эсәԓсәԓы.
LUK 8:33 Кўԉәт хŏйат эԓты ким этмеԓ йўпийән, пурщәт ԓыпийа ԓŏксәт, пӑ пурәщ тащ кев веш эԓты ԓора иԓ керәптыйәс пӑ щита щи иԓ шуйԓәс.
LUK 8:34 Тащ шавийәм хŏйатәт, щит шийаԓәмеԓ кемән, сӑм мӑнман хухәԓмәсәт пӑ вошән, куртәтән уԓты хŏйатәта пŏтәртсэԓ.
LUK 8:35 Тыйәм вер ватты ким этсәт; Иисус хŏща йŏхәтмеԓән, ԓыв кўԉәтән хӑйәм хŏйат шийаԓәсәт, Иисус пўӈәԓән опсәс, ԓумәтԓыман, ŏшәԓән ус; щиӈәԋща, пӑԓтамәсәт.
LUK 8:36 Вантәм мŏхет пӑ ԓывиԓаԓа пŏтәртсэԓ, хŏты кўԉәӈ ху тўмтака йис.
LUK 8:37 Гадара вош ԉэп мўвән уԓты хŏйатәт хŏԓ Иисус пўӈԓа мӑнты партсэԓ, шек ун пӑԓщәмән йŏхәтсайәт, щишән. Ԓўв хопа ԓэԓәс пӑ йŏхԓы мӑнты питәс.
LUK 8:38 Кўԉәтән хӑйәм хŏйат Ԓўв пўӈԓәԓән уԓты пӑтән ўратәс. Туп Ԓўв ин ху щиты йастәман китсәԓы:
LUK 8:39 "Йŏхи хотэна мӑна, пӑ пŏтәрты, мўй нӑӈена Турәм верәс". Ԓўв мӑнәс пӑ вош хўватән сыйәӈа пŏтәртәс, мўй ԓўвеԓа Иисус верәс.
LUK 8:40 Хун Иисус йŏхԓы йŏхтәс, ар хŏйатән ўщайән верса, хŏԓыйэ Ԓўвеԓ ԓавәԓсәт, щишән.
LUK 8:41 Щӑԓта, Ԓўв хŏщайәԓа Иаир нэмпи ики, Турәм йасӈа утәԓтәты хот куща, йŏхтәс; Иисус кўрӈән хŏща хŏмта иԓ шаншатман, Ԓўвеԓ ԓўв хотәԓа ԓŏӈты вохсәԓы;
LUK 8:42 ԓўв кӑтхŏщйаӈ тӑԓ ԓŏват кем эви, туп и ԋаврэм, тӑйәс пӑ щитәԓ пӑрты кема йис, щишән вохсәԓы. Хун Ԓўв Иаир пиԓән шушәс, Иисус ар хŏйатән лӑп нӑпәтса.
LUK 8:43 Ԓыв кўтэԓән и нэ ус, кӑтхŏщйаӈ тӑԓ кӑԓыйән этәԓтәса; ԓўв ԉэккарәта, мўйкем ŏх, пŏрмас тӑйәс, хŏԓ мӑсԓы, нэмәԓты ŏтԓаԓән йӑмәԓтты ӑт верәтса;
LUK 8:44 Иисус хŏща шӑш пеләк сӑхат ԓўв вана хӑтәс, Ԓўв сŏхәԓ кимԓа йошән хӑнәмтыйәс, и мŏхты кӑԓэԓ мӑнты нŏх вŏԓыйәс.
LUK 8:45 Щиӈәԋща Иисус ищмәс: "Хŏй Ма хŏщайэма хӑнәмтыйәс?" Хун хŏйатәт иса йастәсәт: "Ӑнтом ма, ӑнтом ма", Петра пӑ Иисус пиԓән уԓәм па мŏхет йастәсәт: "Утәԓтәты Ху, Нӑӈ ар хŏйатән керәтман ԓойԓайән, пӑ тӑӈәртԓайән, Нӑӈ хŏԓна иԋщәсԓән: "Хŏй Ма хŏщайэма хӑнәмтыйәс?"
LUK 8:46 Иисус пӑ йастәс: "Ӑнта, Ма хŏщайэма а хŏй хӑнәмтыйәс, Ма эԓтэм йур шўкем этмаԓ щащәԓ".
LUK 8:47 Ин нэ ватԓәԓы, хӑнәмтыйәм верәԓ ӑт пентәс, сӑмәԓ мӑнман, вана мӑнәс пӑ Иисус йэԓпийән хŏмта иԓ шаншантәс. Ԓўвеԓа, хŏйатәт хуԓәтман, йастәсԓы, мўй урәӈән Ԓўв хŏщайәԓ хӑнәмтыйәс, пӑ ищи кўрәмән тўмтака йис.
LUK 8:48 Иисус щиты йастәс ԓўвеԓа: "Эвийэм, аԓ пӑԓа, нӑӈ эвԓәпсайэнән нӑӈ нŏх пайәтсайән; йӑм нŏмәсән мӑна".
LUK 8:49 Хун Ԓўв хŏԓна щит пŏтәрмаԓән, Турәм йасӈа утәԓтәты хот куща, ԓўв хотәԓ эԓты и хŏйат йŏхтәс пӑ ԓўвеԓа йастәс: "Нӑӈ эвен пӑрәс, Утәԓтәты Ху хŏща аԓ тŏрастыйа".
LUK 8:50 Иисус щи йасӈәт хуԓмаԓ кемән, ԓўвеԓа йастәс: "Аԓ пӑԓа. Туп эвԓа, пӑ эвен сŏрәм эԓты нŏх пайәтԓа".
LUK 8:51 Ԓўв хотәԓа йŏхәтмаԓән, Иисус нэмәԓты хŏйата йŏхи ԓŏӈты ӑт эсԓәс, туп Петрайа, Иоанна па Иакова, пӑ эви ащийа, аԋԏийа.
LUK 8:52 Хŏԓыйэ эви урәӈән хоԓԓәсәт, ирӈәԓтысәт. Туп Иисус йастәс: "Аԓ хоԓԓаты; ԓўв ӑнта пӑрәс – ԓўв ŏԓәԓ".
LUK 8:53 Ԓыв уйәтԓэԓ - эви йӑна пӑрәс, щишән Ԓўв эԓтэԓ ԋӑхты питсәт.
LUK 8:54 Иисус ԓывиԓаԓ хŏԓ ким воштәсԓы пӑ эви йошәԓ эԓты катәԓсәԓы, такан йастәс: "Ԋаврэмийэ! Нŏх ԓойа".
LUK 8:55 Щӑԓта эви ԓыԓән йŏхәтса; ԓўв мŏхты нŏх ԓойәс, Иисус ԓўвеԓ ԓапәтты партсәԓы.
LUK 8:56 Ащеԓ-аԋԏеԓ ӑԓ пакнысыстән. Иисус пӑ нэмәԓты хŏйата щи вер эԓты пŏтәртты ӑт эсәԓсәԓы.
LUK 9:1 Кӑтхŏщйаӈәԓ вохмаԓ йўпийән, ԓывиԓаԓа кўԉәт воштәты, мушәт йӑмәԓты йур пӑ партатты щир мӑс,
LUK 9:2 пӑ ԓывиԓаԓ Турәм Хон Уԓәпса эԓты сыйәӈа пŏтәртты, мушәӈ хŏйатәт тўмтака верты китсәԓы.
LUK 9:3 Щӑԓта ԓывиԓаԓа йастәс: "Пӑтән нэмәԓты аԓ ўйаты, - ӑнта шушты сўв, ӑнта хир, ӑнта ԋаԋ, ӑнта ŏх, ӑнта кимет ԓумәтты сŏх;
LUK 9:4 мўйсыр хота ԓŏӈԓәты, щита хӑщаты, щиԓта йэԓԓы мӑнаты.
LUK 9:5 Хŏта вана ӑт ки ўԓайты, щи вош эԓты эттанән, кўрԓән эԓты хиш иԓ пӑркатаԓән. Щит ԓывиԓаԓа нўра ат питәԓ".
LUK 9:6 Ԓыв мӑтсәт, пӑ куртәт сӑхат кашәӈ тӑхайән Йӑм айкеԓ тутԓыман пӑ мушәӈ хŏйатәт йӑмәԓтман йӑхсәт.
LUK 9:7 Ԋӑԓмет мўв щуӈ кущайа уԓты Ирод ики, Иисус верәм верәт эԓты хуԓмаԓ кемән, нŏпсәԓ ԓыԓԓәс: хŏй йастәԓ, мӑтты щит Иоанн пӑрмаԓ эԓты нŏх ԓыԓәӈԓәс,
LUK 9:8 тухԓәт пӑ – Илия сэма этәс, па хŏйатәт пӑ – катра уԓәм Турәм йасәӈ туты икет эԓты мӑтты ŏт нŏх ԓыԓәӈԓәс.
LUK 9:9 Ирод йастәс: "Ма Иоанн ŏхәԓ хŏԓт пайәтсэм; а хŏй Тӑм Хŏйат, Хŏй эԓты ма тӑмәщ айкеԓ хуԓԓәм?" Пӑ Ԓўвеԓ ватты урәӈән, мŏԓты щир кӑшты питәс.
LUK 9:10 Апостоләт йŏхԓы йŏхәтмеԓән, мўй версәт, Иисуса иса пŏтәртсэԓ; щӑԓта Ԓўв, щитԓаԓ пӑтән ўйман, Вифсаида вош ԉэпән уԓты атэԓ тӑхайа мӑнәс.
LUK 9:11 Хŏйатәтән щи вер мŏштәм кемән, Ԓўв хŏщайәԓ мӑтсәт. Ԓўв, щи мŏхет вана усԓы, ԓывиԓаԓа Турәм Хон Уԓәпса эԓты пŏтәртәс пӑ хŏй тўмтака верты мосәс, щит тўмтака версәԓ.
LUK 9:12 Хӑтәԓ йэтна пелка йиты питәс. Кӑтхŏщйаӈ утәԓтәты йохԓаԓ Ԓўв ԉэпәԓа вана хӑтман, йастәсәт: "Мŏхет эсԓаԓән, ванән уԓты куртәта хоԓты пӑ ԓэтәт кӑшты ат мӑнԓәт; мўӈ тӑта таԓ тӑхайән уԓԓув".
LUK 9:13 Ԓўв пӑ йастәс: "Нын ԓывиԓаԓ ԓэтәтән мийаԓән!" Ԓыв йастәсәт: "Мўӈ вет ԋаԋ, кӑт хўԓ тўмпийән па ӑт тӑйԓув; мосәӈ мўӈева тӑм хŏйатәт урәӈән ԓэтәт ԓутты йӑхты?".
LUK 9:14 Щита вет щŏрәс кем йох хŏйат ус. Иисус утәԓтәты йохԓаԓа йастәс: "Ԓывиԓаԓ и пўӈԓа ветйаӈ хŏйат аратән опсәԓтаԓән".
LUK 9:15 Щӑԓта ԓыв щиты версэԓ, иса хŏԓ опсәԓтсәԓаԓ.
LUK 9:16 Ԓўв, вет ԋаԋ, кӑт хўԓ ўйман, турәм пеԓа нŏхԓы ӑӈкәртман, пойәкщәман, Турма пумащипа йасӈәт йастәс, морәтсәԓы пӑ утәԓтәты йохԓаԓа мӑсԓы, мира ортты урәӈән.
LUK 9:17 Щӑԓта ԓэсәт пӑ хŏԓ тӑрәпсайәт; пӑ хӑщәм ԋаԋ пўләт кӑтхŏщйаӈ кураԋэк арат ӑкәтсәт.
LUK 9:18 И пўш, хун Ԓўв атэԓт тӑхайән пойәкщәман ус, пӑ утәԓтәты йохԓаԓ Ԓўв пиԓәԓән усәт, йухәт Ԓўв ԓывиԓаԓ ищмәсԓы: "Хŏйатәтән Ма хŏй йўкана тӑйԓайәм?"
LUK 9:19 Ԓыв йŏхԓы йастәсәт: "Иоанн йиӈка ԓŏӈәԓтыты хŏйат йўкана, тухԓәтән пӑ – Илия йўкана; па хŏйатәт пӑ йастәԓәт, катра пŏрайән уԓәм Турәм Йасәӈ туты икет эԓты и мӑтты ŏт нŏх ԓыԓәӈԓәс".
LUK 9:20 Ԓўв ԓывиԓаԓ ищмәсԓы: "Нын пӑ хŏй йўкана Мӑнэм тӑйԓәԓән". Петра йŏхԓы йастәс: "Турәмән китәм Христоса".
LUK 9:21 Туп Иисус ԓывиԓаԓа щит эԓты нэмәԓты хŏйата пŏтәртты шек такан ӑт эсәԓсәԓы,
LUK 9:22 йастәс: "Хŏйат Пŏха мосәԓ ар шук туты, уна уԓты икетән, Турма йир верты хŏйатәт ŏх икетән, Закона утәԓтәты икетән вана ӑт ўты вер уԓ, пӑ пӑратты вер уԓ, щӑԓта хуԓмет хӑтәԓән нŏх ԓыԓәӈԓәты верәԓ уԓ".
LUK 9:23 Ԓўв хŏԓ хŏйатәт пеԓа йастәс: "Хŏй Ма йўпемән йиты ԓӑӈхаԓ ки, ԓўв эԓтайәԓ ат йŏрэмәԓ, пернайәԓ ат ўԓ, пӑ Ма йўпемән йиԓ.
LUK 9:24 Хŏй уԓәпсайәԓ шавиты ки ԓӑӈхаԓ, щит ԓўвеԓ уштәԓԓы; хŏй уԓәпсайәԓ Ма урӈема уштәԓԓы ки, щит ԓўвеԓ шавиԓԓы.
LUK 9:25 Мўй ŏнтас хŏйата, уԓты омәсты мир иса йоша пайәтԓәԓы ки, ԓўвеԓ пӑ ԓўв пӑратԓәԓы, мўй пӑ ԓўвеԓ ԓўв атәм верәԓ?
LUK 9:26 Хŏй Ма эԓтэм пӑ Ма йасәӈԓам эԓты йэԓамтыты питәԓ, щи хŏйат эԓты Хŏйат Пŏх ищи йэԓамтыты питәԓ, хун Ԓўв хутԓәты–вŏрԓәты щирәԓән, щӑԓта Ащэԓ пӑ йэмәӈ ангеләт хутԓәты–вŏрԓәты щирән йŏхәтәԓ.
LUK 9:27 Йӑна нынана йастәԓәм: тӑта ԓойты хŏйатәт эԓты тухԓәт, Турәм Хон Уԓәпса шийаԓәтэԓ унты, сŏрма ӑт питԓәт.
LUK 9:28 Щи йасәӈԓаԓ йўпийән, ԋийәԓ кем хӑтәԓ хӑщәм йўпийән, Иисус Петра, Иоанн пӑ Иаков пӑтән ўйман, кев ԓŏӈԓа нŏх хуӈхәс, пойәкщәты урәӈән.
LUK 9:29 Хун Ԓўв пойәкщәс, веш хŏрасәԓ па хŏрпийа йис, ԓумтәмԓаԓ нŏвийа йисәт, вŏрԓәты питсәт.
LUK 9:30 Щӑԓта, кӑт ики Ԓўв пиԓәԓән пŏтрэмәсӈән. Щит Моисей пӑ Илия усӈән;
LUK 9:31 ԓын хутԓыман–вŏрԓыман этсәӈән, Иисус тӑм уԓәпса эԓты мӑнты верәԓ эԓты пŏтәртсәӈән, мўй Ԓўвеԓ Иерусалим вошән верты мосәԓ.
LUK 9:32 Петра пӑ ԓўв пиԓәԓән уԓәм йохӈиԓаԓ оԓәмән ԓавәртамәсайәт; туп нŏх верԓәмеԓән, Иисус хутԓәты–вŏрԓәты щирәԓ пӑ Ԓўв пиԓәԓән ԓойәм щи кӑт икеӈән, шийаԓәсәт.
LUK 9:33 Хун ԓын Ԓўв эԓтайәԓ йэԓ мӑнты питсәӈән, Петра Иисуса йастәс: "Утәԓтәты Ху! Тӑта мўӈева йӑм уԓты; хуԓәм ԓэпәс хот верԓув: ит – Нӑӈена, ит – Моисейа, ит – Илияйа", - мўй пŏтәртәс ӑт уйәтәԓ.
LUK 9:34 Хун ԓўв щит пŏтәртмаԓән, пӑԓәӈ этәс пӑ ԓыв эԓтэԓа иԓ эсԓәщәс; хун пӑԓӈа ԓŏксәт, ԓыв шек пӑԓтамәсәт.
LUK 9:35 Пӑԓәӈ эԓты тўр сый ус, щащыԓыйәс: "Тӑм – Ма сӑмема мосты Пŏхем, Ԓўвеԓа хуԓәнтаты".
LUK 9:36 Хун щи тўр сый щащәс, Иисус утща хӑщәс. Ԓыв мӑшйайа йисәт, пӑ мўй ватсәт, нэмәԓты хŏйата щи пŏрайән ӑт пŏтәртысэԓ.
LUK 9:37 Кимет хӑтәԓ, хун ԓыв кев эԓты иԓ ŏхәԓсәт, Ԓўв ар хŏйатән йэщаԓ этса.
LUK 9:38 Шӑмкапан, а хŏй ху мир кўт эԓты ўваԓтәс: "Утәԓтәты Ху! Щи ԓŏват йӑм вера, Нӑӈ пŏхем пеԓа ӑӈкәрмийа, ԓўв ма туп тӑйты и ԋаврэмем:
LUK 9:39 ԓўв кўԉән ԓŏӈтыԓа, щӑԓта ԓўв роман ўваԓтәԓ, пӑ ԓўвеԓ шукатԓәԓы, пӑ ўӈԓәԓ эԓты ԋавәр мӑнәԓ; пӑ йӑма шукаттаԓ йўпийән ўрайән ԓўв эԓтэԓ йэԓ мӑнәԓ.
LUK 9:40 Ма Нӑӈ утәԓтәты йохԓан, щи кўԉ воштәты урәӈән, вохсәԓам, пӑ ԓыв ӑт верәтсәт".
LUK 9:41 Иисус пӑ йŏхԓы йастәс: "Ӑт эвәԓты пӑ вевтама нумәсты хŏйат рут! Мўй унты Ма нын пиԓанән уԓты пӑ нынан верәтты питԓәм! Пŏхен ты тўви".
LUK 9:42 Хун щи пŏх шушәс, кўԉ ԓўвеԓ мўва иԓ вŏщкәсԓы пӑ кӑмән щирән тӑрӈәԓтты питсәԓы; туп Иисус ԋаврэм кетәмты кўԉа ӑт эсәԓсәԓы, пŏх тўмтака версәԓы пӑ ԓўв ащеԓа ԓўвеԓ мӑсԓы.
LUK 9:43 Иса хŏԓ Турәм ун йурәԓ эԓты туп ӑԓ пакнысысәт. Хун пӑ хŏԓыйэ Иисус верты верәт эԓты ӑԓ пакнысысәт, Ԓўв утәԓтәты йохԓаԓа йастәс:
LUK 9:44 "Тӑм йасӈәт нын нŏпсәна пŏнаԓән: Хŏйат Пŏх хŏйатәт йоша мӑԓа".
LUK 9:45 Ԓыв щи йасәӈ ŏша ӑт пŏтсэԓ, пӑ ԓыв эԓтэԓ щит лӑп уса, щишән ԓыв ӑт мŏштәсэԓ, Ԓўвеԓ щит эԓты ищмәты пӑ ԓыв пӑԓсәт.
LUK 9:46 Ԓывиԓаԓа и нŏмәс йŏхтәс: хŏй ԓыв кўтэԓән вŏԓаӈшәк?
LUK 9:47 Иисус ԓыв сӑмԓаԓән тӑйты нŏмәсԓаԓ ватман, ԋаврэм ўсԓы пӑ Ԓўв йэԓпәԓа ԓощәԓтәсԓы
LUK 9:48 пӑ ԓывиԓаԓа йастәс: "Хŏй тӑм ԋаврэмийэ Ма нэмем урәӈән вана уԓԓы, щит Мӑнэм вана уԓԓы; хŏй Мӑнэм вана уԓԓы, щит Мӑнэм Китәм Ŏт вана уԓ; хŏй нын эԓтан мет айшәк, щит вŏԓаӈ питәԓ".
LUK 9:49 Щи пўԉаӈ Иоанн йастәс: "Утәԓтәты Ху! Мўӈ и хŏйат ватсув, ԓўв Нӑӈ нэменән кўԉәт воштәԓ, пӑ ԓўвеԓ нŏх вŏԓәтсэв, ԓўв мўӈ пиԓэвән Нӑӈ йўпенән ӑт йӑӈхәԓ, щишән.
LUK 9:50 Иисус Иоанна йастәс: "Аԓ вŏԓытаԓән, хŏй ӑнта нын йэщаԓтән уԓ, щит нын пеԓайән уԓ".
LUK 9:51 Хун Ԓўвеԓ мир уԓәпса эԓты нŏх ўты пŏра ванамәс, Ԓўв Иерусалим воша мӑнты нŏмәс верәс;
LUK 9:52 щишән айкеԓ туты йохԓаԓ Ԓўв йэԓпеԓән китсәԓы; щиӈәԋща ԓыв мӑтсәт пӑ Самария мŏхет курта йŏхәтсәт, Ԓўв урӈәԓән мўй иса ԓэщатты.
LUK 9:53 Туп щита Ԓўв вана ӑт эсәԓса, Ԓўв Иерусалим воша шушәс, щишән.
LUK 9:54 Щит шийаԓәмаԓән, Ԓўв утәԓтәты кӑтӈиԓаԓ, Иаков пӑ Иоанн, йастәсӈән: "Турәм Куща, Нӑӈ ԓӑӈхаԓән ки, мўӈ йастәԓув, турәм эԓты тўт иԓ ат ŏхәԓәԓ, ԓывиԓаԓ ат пӑратԓәԓы, хŏты Илия верәс?"
LUK 9:55 Туп Ԓўв, ԓын пеԓайԓәна карэмәман, ԓынан нўрысԓы пӑ йастәс: "Ӑт уйәтԓәԓән, мӑты ԓыԓ эԓты нын уԓԓәтән?"
LUK 9:56 Хŏйат Пŏх ӑнта хŏйатәт уԓәпса пӑратты йŏхтәс, нŏх пайәтты". Щишән ԓыв па курта мӑтсәт.
LUK 9:57 Щиты тыйәс, хун ԓыв мӑнмеԓән, и мӑтты ŏт Ԓўвеԓа йастәс: "Турәм Куща! Ма Нӑӈ йўпенән мӑнԓәм, хŏԓта кепа Нӑӈ ат мӑтсән".
LUK 9:58 Иисус ԓўвеԓа йастәс: "Ŏхсарәт ух тӑйԓәт, щищкет - тыхәԓ, Хŏйат Пŏх пӑ ŏхәԓ пŏнты тӑха ӑт тӑйәԓ".
LUK 9:59 Кимет хŏйата Ԓўв йастәс: "Ма йўпемән йўва". Щитэн йастәс: "Турәм Куща, мӑнэм оԓәӈән йŏхи йӑхты эсԓы, пӑрәм ащем иԓ ԓэщатты".
LUK 9:60 Туп Иисус ԓўвеԓа щиты йастәс: "Пӑрәм хŏйатәта хӑԓайԓаԓ ԓывиԓаԓа иԓ ԓэщатты хӑйи, нӑӈ пӑ мӑна, Турәм Хон Уԓәпса эԓты такан пŏтәрта.
LUK 9:61 Хŏԓна хуԓмет хŏйат па йастәс: "Турәм Куща, ма Нӑӈ йўпенән мӑнԓәм, туп йэԓпи мӑнэм йŏԓән уԓты мŏхиԓам пиԓән пайәмуԓәм верты эсԓы".
LUK 9:62 Иисус ԓўвеԓа йастәс: "Нэмәԓты хŏйат, хŏй йошәԓ мўв шўкатты ŏта пŏнмаԓ йўпийән пӑ йŏхԓы ӑӈкәртыйәԓ, Турәм Хон Уԓәпсайа ӑт рӑхәԓ".
LUK 10:1 Тӑм йўпийән, Турәм Куща па ԓапәтйаӈ утәԓтәты хŏйат пирыйәс, пӑ ԓывиԓаԓ кӑтәнән Ԓўв йэԓпеԓән кашәӈ воша пӑ кашәӈ тӑхайа китсәԓы, хŏԓта Ԓўв йӑхты ўтщийәс,
LUK 10:2 щӑԓта ԓывиԓаԓа йастәс: "Ӑкәтты вер ун, туп рупәтты хŏйат шимәԓ; щишән, ӑкәтты вер пеԓа уԓты Куща пойкаԓән, ԓуԓән Ԓўв рупәтты хŏйат, ӑкәтты вер урәӈән, ат китәс.
LUK 10:3 Мӑнаты! Ма нынан ош пŏшхәт иты атәԓән йӑхты ŏтәт кўта китԓәԓам.
LUK 10:4 Нэмәԓты пӑтән аԓ ўйаты: ӑнта тўтхот, ӑнта хир, ӑнта кўра ԓумәтты ŏт, пӑ йушән нэмәԓты хŏйат хŏща, ўщайән верты урәӈән, иԓ аԓ ԓойаты.
LUK 10:5 Мӑтты хота ԓŏӈтанән, оԓәӈән йастаты: "Тӑм хота йӑм уԓәпса!"
LUK 10:6 Щита йӑм нŏмәс нŏх катԓәпты хŏйат ки уԓ, нын йӑм нŏпсән ԓўвеԓа питәԓ, ӑнта ки – нынана йŏхлы йŏхәтәԓ.
LUK 10:7 Щи хотән хӑщаты, щит ԓэваты па йиԋщаты, мўйән мӑԓайты, рупәтты хŏйат рупәттаԓ урәӈән мŏԓтыйән сŏхәптәԓа. И хот эԓты кимет хота аԓ йӑӈхаты.
LUK 10:8 Мӑтты воша йŏхәтԓәты ки пӑ щита вана ўԓайты ки, мўйән мӑԓайты, щит ԓэваты,
LUK 10:9 пӑ щита уԓты мушәӈ хŏйатәт йӑмәԓтаԓән пӑ ԓывиԓаԓа пŏтәртаты: "Турәм Хон Уԓәпса нын хŏщайәна ванамәс!"
LUK 10:10 Мӑтты воша йŏхәтԓәты ки пӑ щита вана ӑт ўԓайты, ким эттан йўпийән йастаты:
LUK 10:11 "Мўӈ хŏщайэв хӑнәм нын вошәӈ хишԓән нынана пӑркатԓыԓув; туп уйтаты, Турәм Хон Уԓәпса нын хŏщайәна ванамәс".
LUK 10:12 Пŏтәртԓәм нынана, Содом воша тӑм вош эԓты сўт верты хӑтәԓән кеншәк питәԓ.
LUK 10:13 Шук нӑӈена, Хоразин! Шук нӑӈена, Вифсаида! Нын хŏщайән тыйәԓтыйәм йурәӈ верәт, Тир па Сидон вошӈән хŏща тыйәԓтысайәт ки, хўвән ԓуԓән, вевтам сŏхән пӑ рат хиш кўтән омәсман, ԓыв кӑрэкԓаԓ эԓты шӑшән керԓәсәт.
LUK 10:14 Тира пӑ Сидона сўт верты хӑтәԓән нын эԓтан кеншәк питәԓ.
LUK 10:15 Нӑӈ пӑ, нўм турма нŏх пайтәсәм Капернаум, иԓта турма иԓ вŏщкиԓайән!
LUK 10:16 Нынан хуԓәтты ŏт, Мӑнэм хуԓәтәԓ, хŏйән нын вана ӑт ўԓайты, щитән Ма вана ӑт ўԓайәм; Мӑнэм вана ӑт ўты хŏйат, щит Мӑнэм Китәм Ŏт вана ӑт ўԓ".
LUK 10:17 Ԓапәтйаӈ утәԓтәты хŏйат амтәтԓыман йŏхԓы йŏхәтсәт пӑ пŏтәртсәт: "Турәм Куща! Кўԉәт хŏԓна мўӈева хуԓәтԓәт, хун мўӈ Нӑӈ нэмен айәԓԓув!"
LUK 10:18 Иисус ԓывиԓаԓа йастәс: "Ма ватсәм, хŏты сатана похәл тўт иты турәм эԓты иԓ рӑкнәс!
LUK 10:19 Ин щи ма нынана, ŏхты войәт эԓты, скорпион войәт эԓты па хŏԓ хиԋ йурәт эԓты пурәтты щир мӑсәм пӑ нэмәԓты хŏтащ ӑт йиԓты.
LUK 10:20 Туп, ӑнта щи кўԉәт нынана хуԓәтты урәӈән амтәтԓыйаты, нэмԓән турәмән хӑшман уԓԓайәт, щи урәӈән амтәтԓыйаты".
LUK 10:21 Ищишән Йэмәӈ Ԓыԓ Иисус амәтән тэкнәптәсԓы, пӑ Иисус йастәс: "Ащийэ, турәм пӑ мўв Куща, Нӑӈ вŏԓаӈ щирэн щи урәӈән айәԓԓэм, мўй Нӑӈ мўтрайәӈ пӑ ŏшәӈ хŏйатәт эԓты тӑм иԓ хӑԋатсэн пӑ щит ай ԋаврэмәта эԓпа этәԓтәсэн. Йӑна, Ащийэ! Шиты Нӑӈена мосәс!"
LUK 10:22 Утәԓтәты йохԓаԓ пеԓа, каремәман, йастәс: "Ащемән хŏԓ Мӑнэма мӑса; Пŏх –Ԓўв хŏй, Ащэԓ тўмпийән нэмәԓты ŏтән ӑт уйәтԓа, Ащи – Ԓўв хŏй, Пŏхәԓ тўмпийән нэмәԓты ŏтән ӑт уйәтԓа, пӑ хŏйа Пŏх Ащеԓ этәԓтәты ԓӑӈхаԓԓы.
LUK 10:23 Щӑԓта, утәԓтәты йохԓаԓ пеԓа карэмәман, ԓывиԓаԓа утща щира йастәс: "Щи сэмәт щўԋәӈәт, хŏй нын ватты ŏтԓән ватԓәт.
LUK 10:24 Йӑна нынана пŏтәртԓәм , ар Турәм йасәӈ туты хŏйат пӑ хонәт, мўй нынанән ныԓа, щит ватты ԓӑӈхасәт пӑ ӑт ватсәт, мўй нын хуԓԓәты, щит хуԓты ԓӑӈхасәт, пӑ ӑт хуԓсәт".
LUK 10:25 И пўш, Закона утәԓтәты и ики нŏх ԓойәс пӑ, Иисус артаԓәты урәӈән, ищмәсԓы: "Утәԓтәты Ху! И пўша уԓты уԓәпса мŏщатты урәӈән, мӑнэма мўй верты мосәԓ?"
LUK 10:26 Иисусән пӑ ищмәса: "Закон хŏща мўй хӑшман уԓԓа? Мўй ԓўӈәтԓән?"
LUK 10:27 Щитэн йŏхԓы йастәс: "Турәм Кущайэн нӑӈ Турмен арат сӑменән, арат ԓыԓэнән, арат йурэнән, арат ŏшенән сӑмәӈа тӑйи, пӑ ванән уԓты хŏйатэн ищи сӑмәӈа тӑйи, хŏты нӑӈен нӑӈ сӑмәӈа тӑйԓэн".
LUK 10:28 Иисус ԓўвеԓа йастәс: "Нӑӈ йӑна йастәсән; щиты вера, пӑ уԓты питԓән".
LUK 10:29 Щитэн, ԓўвеԓ йӑма пайәтты ԓӑӈхаман, Иисус ищмәсԓы: "Ма ванән уԓты хŏйатэм – хŏй?"
LUK 10:30 Ши йасәӈ пеԓа Иисус йастәс: "И хŏйат Иерусалим эԓты Иерихон воша шушәс пӑ хорахщетән мŏщатса. Щитәтән ԓумтәмԓаԓ хŏԓ нŏх эхсайәт, напрыйэ сэкса пӑ туп ай ԓыԓыйэԓ хӑйса, ин ŏтәт мӑтсәт.
LUK 10:31 Щи пŏрайән йуш хўват и Турма йир верты хŏйат шушәс пӑ ԓўвеԓ шийаԓәмаԓ кемән, ԓўв пўӈԓәԓ эԓты мŏхты мӑнәс.
LUK 10:32 Левит ики ищи, хун щи шома йŏхтәс, вана шушиԓыйәс, ватсәԓԓы па ԓўв пўӈԓәԓ эԓты йэԓԓы мӑнәс.
LUK 10:33 Самария мўвәӈ и ху, щи йуш хўват мӑнман, ԓўв хŏщайәԓ уйтантәс пӑ, ԓўвеԓ шийаԓәмаԓ кемән, ԓўвеԓ щаԉәтсәԓы
LUK 10:34 пӑ, вана шушәс, ԋўләмԓаԓ оливка вŏйән, ўнайән ԉŏхәтмаԓ йўпийән лӑп йӑрсәԓы; щӑԓта ԓўв осёләԓ шӑнша нŏх омәсман, хоԓты хота ԓўвеԓ тусԓы пӑ щита хŏԓна ԓўвеԓ пӑйкәԓтман тӑйсәԓы.
LUK 10:35 Кимет хӑтәԓән пӑ, мӑнтаԓ йэԓпийән, кӑт динарий лакәптәс, хоԓты хотәӈ икийа мӑсԓы пӑ йастәс: ”Тӑм хŏйат ԋоты. Тӑԓта аршәк ки посатԓән, йŏхәттэмән, нӑӈена йŏхԓы мӑԓэм”.
LUK 10:36 Нӑӈ хŏты нумәсԓән, тӑм хуԓәм хŏйат эԓты, хорахщет йоша питыԓыйәм ху хŏща, хŏй вана уԓ?"
LUK 10:37 Закона утәԓтәты ики йастәс: "Хŏй ԓўвеԓа сӑмәӈ вер верәс, щит". Щишән Иисус ԓўвеԓа йастәс: "Мӑна, нӑӈ па ищиты вера".
LUK 10:38 Иисус утәԓтәты йохԓаԓ пиԓән йэԓԓы мӑнты йушеԓ хŏща и курта йŏхтәс. Щита Марфа нэмпи нэ йŏԓән Ԓўвеԓ мойԓәты иԓ опсәԓтсәԓы.
LUK 10:39 Щи нэ Мария нэмпи хӑнамнэ тӑйәс; Мария Иисус кўрнатән опсәс пӑ Ԓўв йасәӈԓаԓ хуԓәнтәс.
LUK 10:40 Марфа пӑ Иисус кеша ун ԓэтŏтәӈ пӑсан ԓэщатәԓ, пӑ вана йŏхәтмаԓ кемән йастәс: "Турәм Куща, Нӑӈена мўй вер ӑнтом, хŏты хӑнамнэӈэм, хот ԓыпи верәт верты, мӑнэм утща хӑйсәԓы? Йасты ԓўвеԓа, мӑнэма ат ԋотәԓ!"
LUK 10:41 Иисус пӑ йŏхԓы йастәс: "Марфа, Марфа! Нӑӈ ар ŏт эԓты нумәсԓән пӑ, сӑм мӑнман, ар вер эԓты нумәсԓән,
LUK 10:42 туп ит мосәԓ; Мария мет йӑм вер пирыйәс, щит ԓўв эԓтэԓ нŏх ӑт ўԓа".
LUK 11:1 Имŏԓты ишән, хун Иисус и тӑхайән пойәкщәс, пӑ нŏх вŏԓымаԓ йўпийән, и утәԓтәты хуйәԓ Ԓўвеԓа йастәс: "Турәм Куща! Мўӈев пойәкщәты утәԓты, хŏты Иоанн утәԓтәты йŏхԓаԓ утәԓтәс".
LUK 11:2 Ԓўв щиты ԓывиԓаԓа йастәс: "Хун пойәкщәԓты, щиты пŏтәрттаты: "Турәм Ащев! Турәмән Нӑӈ уԓԓән! Нӑӈ нэмен ат йэмԓәԓ! Нӑӈ Хон Уԓәпсайэн ат йŏхәтәԓ! Нӑӈ партәпсайэн хŏты турәмән уԓ, щиты мўвән ат питәԓ;
LUK 11:3 Ԓэты ԋаԋэв мўӈева кашәӈ хӑтԓа мийи;
LUK 11:4 Мўӈ кӑрэкԓув мўӈева йŏрэмаԓән, хŏты мўӈ хŏйатԓува ԓўв артнайԓаԓ йŏрэмәԓув; атәм хўщәпсайа питты мўӈев аԓ эсԓы, ԉикәӈ ŏт эԓты хŏԓт пайты!"
LUK 11:5 Щӑԓта ԓывиԓаԓа йастәс: "Мӑттыки нын мӑтŏтән ԓухәс тӑйәԓ, ат кўтәпән ԓўв хŏщайәԓ йŏхәтәԓ пӑ йастәԓ: "Ԓухсыйэ, мӑнэм хуԓәм ԋаԋ, артнайа мийԓыйа,
LUK 11:6 пиԓхуйэм мӑнтаԓ сӑхат ма хŏщайэм хойәс, ма нэмәԓты ԓўвеԓ ԓапәтты ӑт тӑйԓәм".
LUK 11:7 Щитэн ов мŏхты ԓўвеԓа йастәԓ: "Мӑнема аԓ тŏрастыйа, овем йӑканән лӑп пŏтсэм, ԋаврэмԓам па ма пиԓэмән ŏԓтӑхайән уԓԓәт. Ма ӑт верәтԓәм нŏх киԓты пӑ нӑӈена ԋаԋ мӑты".
LUK 11:8 Нынана пŏтәртԓәм, ԓўв ԓухсәԓ урәӈән нŏх ӑт ԓойәԓ ки, пӑ ԋаԋ ԓўвеԓа, пиԓа уԓтаԓ хўватән, ӑт мӑԓ ки, щитәԓ такан вохтаԓ урәӈән, ищи пӑ нŏх киԓты вера йиԓ, мўй арат вохәԓ, щи арат ԓўвеԓа мӑԓ.
LUK 11:9 Ма нынана щи йастәԓәм: вохаты, пӑ мӑԓайты, кӑншаты, пӑ уйәтԓәты; ов сэӈкаԓән, пӑ пўшԓа,
LUK 11:10 кашәӈ ŏт, хŏй вохәԓ, мŏщатәԓ, хŏй кӑшәԓ, уйәтәԓ, ов сэкты ŏта, ов пўшԓа.
LUK 11:11 Мўй щимәщ ащи, хун пŏхәԓ ԓўв эԓтайәԓ ԋаԋ вохәԓ, щи йўкана кев шупән мӑԓԓы? Хун хўԓ вохәԓ, хўԓ йўкана ŏхты вой мӑԓ?
LUK 11:12 Мўй пӑ, карәӈ пŏшәх вохтаԓән, скорпион нэмпи карәӈ хŏмләхән мӑԓԓы?
LUK 11:13 Щӑԓта, хун нын ԉик тӑйман, ԋаврэмԓәна йӑм ŏт мӑты хошԓәты, Турәм Ащи мет щи Ԓўв эԓтэԓ вохты хŏйатәта Йэмәӈ Ԓыԓ мӑԓ".
LUK 11:14 И пўш Иисус уӈәԓԓы пайәтты кўԉ хŏйат эԓты ким воштәсԓы. Хун кўԉ ким этәс, уӈәԓԓы хŏйат пŏтәртты питәс. Хŏйатәт туп ӑԓ пакнысысәт.
LUK 11:15 Тухәԓаԓ пӑ пŏтәртсәт: "Ԓўв кўԉәт веельзевул йурән воштәԓ. Щит кўԉәт ŏх".
LUK 11:16 Па хŏйатәт пӑ Иисус артаԓәман, Ԓўвеԓа мŏԓты пос турәм эԓты этәԓтәты партсәт.
LUK 11:17 Туп Ԓўв ԓыв нŏмәсԓаԓ уйәтман, йастәс: "Кашәӈ, кӑт йэшащты пелка ортәсәм хон мўв, таԓа йиԓ, пӑ хот, хŏта йэшащԓа, иԓ ӑркәпәԓ.
LUK 11:18 Сатана ԓыпи нŏпсәԓән кӑт щира ки уԓ, мўй щирән ԓўв хон пелкәԓ уԓты верәтәԓ? Нын пŏтәртԓәты, мӑтты Ма веельзевул йурән кўԉәт воштәԓәм;
LUK 11:19 Ма веельзевул йурән кўԉәт ки воштәԓәм, нын йўпанән йиты йохԓән пӑ хŏй йурән ԓывиԓаԓ воштәԓԓаԓ? Щишән ԓыв нынана сўт верты хŏйатәта питԓәт.
LUK 11:20 Ма Турәм йурән кўԉәт воштәԓәм ки, уйәтман Турәм Хон Уԓәпса нын хŏщайән йŏхтәс.
LUK 11:21 Хун йурәӈ ŏт ԉаԉәсты пŏрмасы тэԓән хотәԓ шавиԓԓы, ԓўв тащәԓ-вещәԓ нэмәԓты хŏтащ ӑт йиԓ.
LUK 11:22 Хун пӑ ԓўв эԓтэԓ йурәӈшәк ŏт ԉаԉәсты йŏхәтәԓ пӑ ԓўвеԓ иԓ пайәтԓәԓы, щи пŏрайән хотәӈ ху нŏмәс пŏныԓыйәм ԉаԉәсты пŏрмасԓаԓ, ԓўв эԓтэԓ нŏх уԓԓы, пӑ ԋӑрэмәм мŏԓтыԓаԓ лакки ортԓәԓы.
LUK 11:23 Хŏй ӑнтом Ма пиԓэмән уԓ, щит Ма йэщаԓтэм уԓ; хŏй Ма пиԓэмән ӑт ӑкәтәԓ, щит лакки йовәԓәԓ.
LUK 11:24 Хун кўԉ, хŏйат эԓты ким этәԓ, йикԓы тӑхайәтән йӑӈхәԓ, щўтщәты тӑха кӑшман, пӑ ӑт уйәтман, пŏтәртәԓ: "Ма хотэма керԓәԓәм-са, хŏԉща этсәм!".
LUK 11:25 Йŏхԓы йŏхәттаԓән, хотәԓ нŏх йовәԓман пӑ нŏх ԓэщатман уйәтԓәԓы;
LUK 11:26 щӑԓта ԓўв мӑнәԓ пӑ па ԓапәт кўԉ туԓ, ԓўв эԓтэԓ мет ԉикәӈәт; ԓыв, ԓыпийа ԓŏӈман, щита уԓты питԓәт. Щиӈәԋща хŏйата оԓәӈ уԓәм эԓты мет атма йиԓ".
LUK 11:27 Хун Иисус щи йасӈәт йастәс, ий ими хŏйат кўт эԓты такан ўваԓтәс: "Щўԋәӈ щи аԋԏи, хŏйән Нӑӈ сэма пайәтсайән пӑ эсәмән ԓапәтсайән!".
LUK 11:28 Туп Ԓўв йŏхԓы йастәс: "Щўԋәӈ щит, хŏй Турәм йасәӈ хуԓәԓ пӑ щиты верәԓ!"
LUK 11:29 Хун хŏйатәт арән йŏхәтты питсәт, Иисус пŏтәртты питәс: "Ин тӑм уԓты мир ԉикәӈ. Ԓыв Турәм пос кӑшԓәт, туп Иона Турәм йасәӈ туты ики этәԓтыйәм пос тўмпийа, нэмәԓты Турәм пос ԓывиԓаԓа ӑт питәԓ.
LUK 11:30 Хŏты Иона, Нинэвия вошәӈ хŏйатәта, поса ус, щиты Хŏйат Пŏх тӑм уԓты мира поса питәԓ.
LUK 11:31 Нўм мўв нэ хон, сўт вертыйән, ин тӑм хŏйат рут пиԓән нŏх ԓойәԓ пӑ ԓывиԓаԓ сўтытԓәԓы, ԓўв Соломон мўтра йасӈәт хуԓәтты урәӈән, мўв кимәԓ эԓты йŏхтыԓыйәс. Ин тӑта пӑ нын пиԓәнән Щит, Хŏй Соломон эԓты вŏԓаӈшәк.
LUK 11:32 Нинэвия вошәӈ хŏйатәт ищи, сўт вертыйән, ин тӑм уԓты мир пиԓән нŏх ԓойԓәт, пӑ ԓывиԓаԓ сўтытԓыԓаԓ. Ԓыв Иона йастәм Турәм йасӈәт хуԓәтман, кӑрэкԓаԓ эԓты шӑшән керԓәсәт. Ин тӑта пӑ нын пиԓәнән Щит, Хŏй Иона эԓты вŏԓаӈшәк.
LUK 11:33 Нэмәԓты хŏйат тўт сун ўщитман, ԓўвеԓ хӑԋа тӑхайа мўй пӑ хŏшам иԓпийа ӑт омәсԓәԓы, нŏхшәк, тўт акԓа, омәсԓәԓы, ԓуԓән хота ԓŏӈты хŏйатәта нŏви ат ныса.
LUK 11:34 Ԓыпийән уԓты тўт сун – щит сэм; сэмԓан сыстамәт ки, эԓэн иса нŏвийән тэкәнман уԓԓа, атмәт ки – эԓэн ԓыпийән иса пӑтԓам.
LUK 11:35 Щишән ванта: нӑӈ ԓыпийән тӑйты нŏвен мосәӈ пӑтԓам.
LUK 11:36 Эԓэн нŏвийән ки тэкәнман уԓԓа пӑ нэмәԓты питы лот ӑт тӑйәԓ ки, щишән иса нŏви питәԓ, хŏты тўт сунән нӑӈ хутԓәптыԓайән".
LUK 11:37 Хун Ԓўв щит пŏтәртәс, и фарисей Ԓўвеԓ хотәԓа йŏхи ԓэты вохсәԓы. Иисус йŏхтәс пӑ пӑсан сурыйа опсәс.
LUK 11:38 Иисус ԓэты йэԓпийән йошԓаԓ ӑт ԉŏхәтсәԓы, Фарисей щит шийаԓәмаԓ кемән, пӑ ӑԓ щи пакнәс.
LUK 11:39 Туп Турәм Куща ԓўвеԓа йастәс: "Нын, фарисейәт, анԓән-сунԓән эԓтыԓаԓ сыстапԓәԓән, нын ԓыпиԓән аратэԓән тармәт пӑ ԉикәӈәт.
LUK 11:40 Ŏтшамәт! Ăнта мўй Щит, Хŏй эԓпат уԓты ŏт тыйәԓтәс, ԓыпийән уԓты ŏт ищи тыйәԓтәс?
LUK 11:41 Щикем ушән нўша хŏйатәта анԓәнән мўй тӑйԓәты, щит мийԓыйаты, щи пŏрайән нынана иса сыстам питәԓ.
LUK 11:42 Шук нынана, фарисейәт! Мята, рута пӑ арсыр эпԓәӈ тŏрән эԓты йаӈмет шупәԓ мӑԓты, вещкат пӑ Турма сӑма мосты вер эԓты пӑ пўӈԓа ўратԓәты: тӑми верты мосәс, пӑ тўми хӑйты ӑт мосәс.
LUK 11:43 Шук нынана, фарисейәт! Нын Турәм йасӈа утәԓтәты хотән ԓӑтәӈ тӑхайәтән омәсты сӑмәӈәт, пӑ хŏйатәт ӑктәщиты тӑхайән нын иса ат ватԓайты, ўщайән иса ат верԓайты.
LUK 11:44 Шук нынана, Закона утәԓтәты икет пӑ фарисейәт, нын нэмәԓты щирән ӑт постәм хӑԓа лотәт хŏрпет, хŏйатәтән, ӑт мŏштыман, эԓты шушиԓыԓайәт".
LUK 11:45 Закона утәԓтәты ий ики Ԓўвеԓа йастәс: "Утәԓтәты Ху! Щиты пŏтәртман, Нӑӈ мўӈев па ԉикән этԓэн!"
LUK 11:46 Ԓўв йастәс: "Нынана, Закона утәԓтәты икета, па шук! Хŏйатәта ԓавәрт вер пŏнԓәты, нын пӑ и ԓуйән нэш ԓўв хŏщайэԓа ӑт хӑнәмтыԓты.
LUK 11:47 Шук нынана! Ащиԓәнән пӑратәм Турәм йасәӈ туты хŏйатәт урәӈән, ԓыв ӑпа лотԓаԓ хŏрән верԓәԓән.
LUK 11:48 Щитән нын ащиԓән верәм верәт аԉԓәты пӑ ԓыв пиԓԓаԓән кашащԓәты, ԓыв Турәм йасәӈ туты хŏйатәт пӑратсәт, нын пӑ ӑпа лотԓаԓ хŏрән верԓәԓән.
LUK 11:49 Щишән Турәм ŏшәӈ нŏпсәԓ йастәс: "Турәм йасәӈ туты хŏйатәт пӑ апостоләт ԓыв хŏщайэԓа китԓәм, щитәт эԓты тухәԓаԓ пӑратԓайәт, тухәԓаԓ пӑ воштыԓайәт,
LUK 11:50 мўйа Турәм йасәӈ туты хŏйатәт кӑԓы мӑнәԓтса, уԓты турәм тыйәԓтәм уш эԓты, щишән ин уԓты хŏйатәт эԓты щи нўр иԋщәсты питԓа,
LUK 11:51 Авель кӑԓы эԓты Захария кӑԓы унты, хŏй йирасты нŏрәм пӑ Турәм Хот кӑт кўтән пӑратса. Йӑна пŏтәртԓәм нынана: ин уԓты хŏйатәт эԓты мўй ус иса кӑшԓа.
LUK 11:52 Шук нынана, Закона утәԓтәты хŏйатәта! Нын уйәтты вер щирәԓ усԓән: нын ӑт ԓŏксәты, хŏй ԓŏӈты утщийәс, щит ӑт эсәԓԓәԓән".
LUK 11:53 Хун Ԓўв щит пŏтәртәс, Закона утәԓтәты хŏйатәт пӑ фарисейәт мет такан ўшмащты питсәт, Ԓўвеԓ ар вер эԓты апрәӈа иԋщәсты питсэԓ.
LUK 11:54 Ԓыв щиты ŏщмарәӈа каншатсәт пӑ верәтты кемеԓән мŏԓты Ԓўв эԓтэԓ мӑтты йасәӈ нŏх кӑтәԓты ўтщисәт, Ԓўвеԓ ўнавота павәттыйа.
LUK 12:1 Щи кўтән, щŏрәс мир щиты ӑктәщәс, пӑ хŏйатәт йэрмат кўтән ўратысәт, Иисус, оԓәӈән утәԓтәты йохԓаԓ пеԓа ватман, пŏтәртты питәс: "Фарисей сŏхәм щир, ԋаԋ шўм хŏрпи, ропхәӈ вер эԓты шаващаты, кӑт вешпийа аԓ уԓаты.
LUK 12:2 Нэмәԓты сайԓәм вер ӑнтом, ищипа эԓпа этәԓ, пӑ хӑԋа вер ӑнтом, ищипа уйәтԓа.
LUK 12:3 Щишән, мўй эԓты нын пӑтламән йастәсты, нŏвийән хуԓԓа, пӑ мўй хот ԓыпийән пӑԓ ўса йастыԓысты, щит хот ԓоӈәԓ эԓты такан йастәԓа.
LUK 12:4 Ма нынана, пиԓйохԓама, пŏтәртԓәм: щитәт эԓты аԓ пӑԓаты, хŏй хŏйат эԓ пӑратәԓ, пӑ нэмәԓты па верты ӑт верәтәԓ.
LUK 12:5 Туп йастәԓәм нынана, хŏй эԓты пӑԓты мосәԓ: Щит эԓты пӑԓаты, хŏй, пӑратмаԓ йўпийән, шук туты тӑхайа пайәтты веритԓәԓы. Йӑна пŏтәртԓәм нынана, Щит эԓты пӑԓаты.
LUK 12:6 Вет щищки кӑт пӑтәр ŏх карты сӑхат ӑт тыныԓа? Турәмән ит нэш ӑт йŏрэмәм.
LUK 12:7 Нын ŏхԓәнән ŏхсŏхԓән хŏԓна хŏԓ ԓўӈәтман уԓԓайәт. Аԓ пӑԓаты: нын ар ай щищкет эԓты тыныӈшәкәт, сӑмәӈашәк тӑйԓайты.
LUK 12:8 Нынана пŏтәртԓәм: кашәӈ хŏйат, хŏй эԓпат Мӑнэм хŏйатәт хŏща, вана уԓԓы, щит Хŏйат Пŏхән ищи Турәм ангеләт хŏща вана ўԓа.
LUK 12:9 Хŏй хŏйатәт хŏща Ма эԓтэм йŏвра керԓәԓ, щит эԓты па Турәм ангеләт хŏща йŏвра керԓәԓа.
LUK 12:10 Кўш хŏйа, хŏй йŏвра йасәӈ Хŏйат Пŏха йастәԓ, щи нўрәԓ йŏрэмәԓа; хŏй Йэмәӈ Ԓыԓ эԓты ӑт рӑхты йасәӈ йастәԓ, щит нўрәԓ ӑт йŏрэмәԓа.
LUK 12:11 Хун нын Турәм йасӈа утәԓтәты хотәта, кущайәт пӑ ŏха уԓты кущайәт хŏща туԓайты, аԓ нумәсаты, хŏты мўй пӑ йŏхԓы йастәԓты, мўй пӑ пŏтәртты верән уԓ,
LUK 12:12 Йэмәӈ Ԓыԓ нынан щи пўԉаӈ утәԓтәԓԓы, мўй йастәты".
LUK 12:13 Мŏԓты хŏйат мŏхет кўт эԓты Ԓўвеԓа йастәс: "Утәԓтәты Ху! Йайәма йаста, ащемән-анԏэмән хӑйәм хот тэԓ ма пиԓэмән ат ортԓәԓы!"
LUK 12:14 Иисус ԓўвеԓа йастәс: "Нын сўтән верты хŏйән Ма ԓощәԓтәсайәм мўй пӑ нынан ортԓыты?"
LUK 12:15 Щӑԓта пӑ ԓывиԓаԓа йастәс: "Ватман уԓаты, щӑр кўш щир эԓты шаващаты. Хŏты кепа хŏйат тащәӈ ат ус, ԓўв уԓәпсайәԓ ӑнта щиԓта уԓ".
LUK 12:16 Щӑԓта Ԓўв утәԓтәты пŏтәр пŏтәртәс: "И тащәӈ ху хŏща мўв хӑрәԓән энмәԓты ԓэвпәс йӑма энмәс;
LUK 12:17 пӑ ԓўв щирәԓән нумәсәԓ: "А мўй мӑнэм верты? Энмәм ԓэтәтԓам хŏԓта пŏнты?"
LUK 12:18 Нŏмәс верәс: "Тӑмиты верԓәм: ампарԓам нŏх лосытԓыԓам пӑ ԓӑщкамшәк ампарәт верԓәм, щита энмәм ԓат сэмԓам пӑ па пŏрмасԓам урәӈән тэԓыйэ пŏнты тӑха питәԓ.
LUK 12:19 Щӑԓта ма мӑнэма йастәты верәтԓэм: тэԓыйэ йӑм тӑйԓән, ар тӑԓа тӑрмәԓ. Ин щутща, ԓэва, йиԋща, каш вера!"
LUK 12:20 Турәм ԓўвеԓа туп щиты йастәс: "Ŏшԓы ŏт! Тӑм ат уԓәпсайэн нŏх уԓа; тащтәм ŏтԓан хŏйа питԓәт?"
LUK 12:21 Щиты, щимәщ хŏйат пиԓән уԓԓыйәԓ, хŏй тащ ԓўв урӈәԓа ӑкәтәԓ, Турәм хŏща тащәӈа ӑт уԓ".
LUK 12:22 Щӑԓта Иисус утәԓтәты йохԓаԓа йастәс: "Щишән Ма нынана пŏтәртԓәм: уԓәпсайән эԓты аԓ нумәсаты, мўй нынан ԓэты, эԓԓәна мўй ԓумәтты.
LUK 12:23 Уԓәпса ԓэтәт эԓты ԓӑтәӈшәк, пӑ хŏйат эԓ - ԓумтәм эԓты ԓӑтәӈшәк.
LUK 12:24 Хулхәт пеԓа вантаты: мўва ԓат ӑт омәсԓәт, ԓат тŏрән ӑт ӑкәтԓәт, ԓыв ун ампарәт, ԓат сэм шавиты тӑхайәт, ӑт тӑйԓәт – Турәмән ԓыв ԓапәтԓайәт; Мўй арата нын щи тŏхԓәӈ войәт эԓты ԓӑтәӈшәкәт!
LUK 12:25 Пӑ хŏй нын эԓтан, ԓўвеԓ ԓэщатман, ԓўв пӑԓатәԓ кўш кепа и кўш оԓәӈ арата эԓәтты веритԓәԓы?
LUK 12:26 Нын ай верыйэ верты ӑт веритԓәты ки, мўй пўӈәԓ верәт эԓты нумәсԓәты?
LUK 12:27 Ӑԋа лыптәт пеԓа вантаты, хŏты ԓыв энәмԓәт: ӑт рупитԓәт, сŏхәм ӑт верԓәт. Туп нынана пŏтәртԓәм: Соломон ики хŏԓна ԓўв вŏсԓәты–вŏрԓәты щирәԓән щиты ӑт ԓумәтԓыйәс, хŏты кашәӈ ŏтԓаԓ ԓумәтԓыԓәт.
LUK 12:28 Хӑр мўвән энәмты хŏрамәӈ лыптәт, тӑм хӑтәԓ уԓԓәт, хӑԓэвәт кура вŏщкиԓайәт, Турәмән щиты ки ԓумәтыԓайәт, пӑр мŏԓты Ԓўв нынан ӑт ԓумәттәԓԓы, шимәԓ эвәԓты ŏтәт!
LUK 12:29 Щӑԓта, аԓ кӑншаты, нынан мўй ԓэты пӑ мўй йищты, аԓ пӑ нумәсаты.
LUK 12:30 Щит тӑм мир уԓәпсайән уԓты хŏйатәт кӑшԓәт; Ащан уйәтәԓ, мўй нынан мосәԓ.
LUK 12:31 Метшопәӈ Турәм Хон Уԓәпса кӑншаты, пӑ иса щитән ищи мӑԓайты.
LUK 12:32 Аԓ пӑԓа, ай тащийэ! Турәм Ащан Хон Уԓәпса нынана мойԓәты йӑм кашәԓ ус.
LUK 12:33 Пŏрмасԓән тыныйаԓән пӑ нўша хŏйатәта мийԓыйаты. Ӑт ԓыйты тўтхотәт, турәмән ӑт хŏԓаты сорԋэт нынана ԓэщататы, хŏԓта ԓŏԓмах ӑт ванамәԓ пӑ хŏта хӑхәт ӑт ԓэԓ.
LUK 12:34 Хŏта нын сорԋиԓән уԓԓәт, щита сӑмԓән уԓты питԓәт.
LUK 12:35 Ӑнтәпԓән йӑрман ат ԓойԓәт, пӑ тўт сунԓән ат ԓэԓәт.
LUK 12:36 Нын пӑ щи митйохәт иты уԓаты, кущайэԓ поры эԓты йŏхи йŏхәтты ԓавәԓԓәт, ԓуԓән, хун ԓўв йŏхәтәԓ пӑ ов хӑтщәԓԓы, ов мŏхты пелки ԓўвеԓа пўшмәты ат верәтԓэԓ.
LUK 12:37 Щи митйохәт щўԋԓәт, хŏйтат, куща ху йŏхәттаԓән, эԓәпән уԓман уйәтԓәԓы. Йӑна нынана пŏтәртԓәм, ԓўв ӑтпәԓ йӑрԓәԓы, митйохԓаԓ пӑсан сурыйа опсәԓтԓәԓы, вана рӑхиԓыман, ԓывиԓаԓ ԓапәтты питԓәԓы.
LUK 12:38 Ат кўтәпән ки йŏхәтәԓ, мўй пӑ хутԓәты йэԓпийән йŏхәтәԓ, пӑ ԓывиԓаԓ щиты уйәтԓәԓы ки, щи митйохәт ŏй тӑйԓәт.
LUK 12:39 Нын уйәтԓәԓән: хотәӈ куща уйәтсәԓы ки, хун ԓоԓмах йŏхәтәԓ, ԓўв ԓуԓән ӑт ŏԓәс пӑ хот питарәԓ ԓуԓән пел хирты ӑт эсәԓсәԓы.
LUK 12:40 Нын пӑ ԓэщатыман уԓаты, ӑт ԓавԓәсԓәты пўԉаӈ Хŏйат Пŏх йŏхәтәԓ".
LUK 12:41 Щӑԓта Петра Ԓўвеԓа йастәс: "Турәм Куща! Мўӈева мўй тӑм утәԓтәты пŏтәр пŏтәрԓэн, мўй пӑ хŏԓ хŏйатәта?"
LUK 12:42 Турәм Куща пӑ йастәс: "Хŏй вещкат пӑ ŏшәӈ хот шавиты пӑ ԓэщатты хŏйат, кущайән митйохԓаԓ нўмпийа пŏнԓа, мŏрт пŏрайән мŏрт арат ԋаԋ ортты урәӈән?
LUK 12:43 Щўԋәӈ щи митху, хŏй йŏхтәм кущайән щиты верман уйәтԓа.
LUK 12:44 Йӑна нынана йастәԓәм, ԓўв уԓпәсәԓ ватты ԓўвеԓ пŏнԓәԓы.
LUK 12:45 Щи митху пӑ сӑмәԓән ки йастәԓ: "Ма кущайэм сора ӑт йŏхәтәԓ, митйохԓаԓ пӑ митнэԓаԓ сэкты питԓәԓы, ԓэты пӑ ищты, пӑ кўтщәты унты ищты питәԓ,
LUK 12:46 щиӈәԋща щи митхуйэн кущайәԓ ӑт ԓавәԓты хӑтԓәԓән, нумԓы сысән йŏхәтәԓ, пӑ ԓўвеԓ кӑтна сэвәрмәԓԓы, пӑ ӑт эвәԓты хŏйатәт иты верԓәԓы.
LUK 12:47 Щи митху, хŏй кущайәԓ партәпса уйәтсәԓԓы пӑ йэтшәптыман ӑт ус, пӑ ԓўв ԓӑӈхатаԓ щира ӑт верәс, артан сэкты питԓа;
LUK 12:48 хŏй пӑ нэмәԓты ӑт уйтәс, пӑ сэкты хŏрпийа верәс, шимәԓшәк сэкты питԓа. Кашәӈ хŏйата, хŏйа ар мийман уса, ԓўв эԓтэԓ арәԓ кӑншәмәԓа, хŏйа ар аԉиԓыса, щит эԓты аршәк иԋщәсԓа.
LUK 12:49 Ма мўва тўт туты йŏхәтсәм, пӑ Ма щикем ԓӑӈхаԓәм, ԓуԓән ԓўв ат ўщиԓәмаԓ!
LUK 12:50 Йиӈка ԓŏӈәԓтыты верән Мӑнэм мосәԓ йиӈка ԓŏӈәԓтыты; хŏты Ма шукащԓәм, хун щит йэтшәԓ!
LUK 12:51 Нын нумәсԓәты, Ма мўва пайԓы уԓәпса туты йŏхәтсәм? Ӑнта, нынана йастәԓәм, ортәсты вер Ма тусәм;
LUK 12:52 тӑԓта йэԓԓы и хотән уԓты вет хŏйат кӑтна ортәсԓәт: хуԓәм хŏйат кӑт хŏйат йэщаԓт, пӑ кӑт хŏйат хуԓәм хŏйат йэщаԓт эԓԓәԓәт.
LUK 12:53 Ащи пŏхәԓ йэщаԓт эԓԓәԓ, пӑ пŏх ащеԓ йэщаԓт, аԋԏи эвеԓ йэщаԓт эԓԓәԓ, пӑ эви аԋԏеԓ йэщаԓт, унтәп меԋәԓ йэщаԓт эԓԓәԓ, пӑ меԋ утпәԓ йэщаԓт эԓԓәԓ".
LUK 12:54 Мир пеԓа йастәс: "Хун нын кев пеләк эԓты нŏх этты пӑԓәӈ шийаԓәԓты, нын мŏхты йастәԓты: "Йэрта йиԓ", пӑ щиты щи уԓԓыйәԓ;
LUK 12:55 пӑ хун нўм вот пŏԓәԓ, пŏтәрԓәты: "Рўва йиԓ", пӑ щиты щи уԓԓыйәԓ.
LUK 12:56 Ар вешпи хŏйатәт! Турәм пӑ мўв хŏрас мŏштәты хошԓәты, мўй щирән тӑм пŏра ӑт мŏштәԓԓән?
LUK 12:57 Мўйа пӑ нын нын щирәнән ӑт ԓэрапԓәԓән, мўй уԓты верәԓ уԓ?
LUK 12:58 Хун нӑӈ пеԓайэн нўр туты хŏйатэн пиԓән сўт хŏща мӑнԓән, йушән ԓўв эԓтайәԓ хŏԓт пайтәса. Ԓўв нӑӈен сўт ху хŏща аԓт йŏхтәптәсԓы, сўт ху пӑ нӑӈен касна хот шавиты ŏта аԓт мӑсԓы, щит пӑ нӑӈен касна хота аԓт вŏщкәсԓы.
LUK 12:59 Пŏтәртԓәм нӑӈена: хӑщәм ŏх шўкен ӑт мӑтән унты, щиԓта нӑӈ ӑт этԓән".
LUK 13:1 Щи пŏрайән тухәԓ мŏхет Иисуса Галилея хŏйатәт эԓты пŏтәртсәт, хŏй кӑԓыԓаԓ Пилатән йирԓаԓ кӑԓы пиԓән ԓыԓәтса.
LUK 13:2 Иисус ԓывиԓаԓа щиты йастәс: "Нын нумәстанән, мўй щи Галилея мŏхет па Галилея хŏйатәт киԋща кӑрэкәӈәт усәт, мўйа щиты пӑратсайәт?
LUK 13:3 Ӑнта, нынана пŏтәртԓәм, туп кӑрэкԓән эԓты шӑшән ӑт керԓәԓты ки, ищи хŏԓыйэ пӑрԓәты.
LUK 13:4 Мўй пӑ, а мўй нумәсԓәты, щи, Силоам йухтас пӑԓ хотән эԓт ӑркәмтәм пӑ пӑратәм, нийәԓхус хŏйат, ԓыв Иерусалим па хŏйатәт эԓты мўй мет атмәт усәт?
LUK 13:5 Ӑнта, нынана йастәԓәм! Кӑрэкԓән эԓты ӑт керԓәԓты ки, ищиты хŏԓ пӑрԓәты!".
LUK 13:6 Щӑԓта щимәщ утәԓтәты пŏтәр пŏтәртәс: "И хŏйат виноград йўхәӈ тӑхайәԓән смоква нэмпи йўх омәсман тӑйәс, щӑԓта ий пўш йўхән энмәм ԓэвпәсәԓ кӑшты йŏхтәс, пӑ ӑт уйәтсәԓы.
LUK 13:7 Виноград энмәԓтты митхуйәԓа йастәс: "Хуԓмет тӑԓа йис, ты йŏхтыԓыты питмем, смоква йўхән энмәм ԓэвпәс кӑштыйа, пӑ ӑт уйәтԓәм; иԓ сэвры ԓўвеԓ: мўйа ԓўв мўв рўв таԓәԓ?"
LUK 13:8 Туп митху ԓўвеԓа йŏхԓы йастәс: "Куща! Тӑм тӑԓа па хӑйиԓыйэ, керәтман мўвәԓ шўкатԓэм пӑ ԋащамән пŏнԓэм, -
LUK 13:9 мосәӈ ԓэвпәс мӑԓ; туп ӑнтом ки, папуш иԓ сэвәрԓэн".
LUK 13:10 И Турәм йасӈа утәԓтәты хотән Ԓўв шаббат хӑтәԓән хŏйатәт утәԓтәс.
LUK 13:11 Щита ԋийәԓхус тӑԓ муш верты кўԉ тӑйәм нэ ус: ԓўв хŏмта таԓман уса пӑ тўӈа верәсты ӑт веритәс.
LUK 13:12 Иисус ԓўвеԓ шийаԓәмаԓ кемән, вана вохсәԓы пӑ ԓўвеԓа йастәс: "Ими, нӑӈ мушен эԓты ин щи нŏх питԓән".
LUK 13:13 Пӑ йошӈиԓаԓ ԓўв эԓтэԓ пŏтсәԓы, пӑ ими ищи мŏхты тўӈа йис, пӑ Турәм вŏԓаӈа айәԓтты питсәԓы.
LUK 13:14 Щи пўԉаӈ Иисус пеԓа йэмәӈ йасӈа утәԓтәты хот куща, Иисус шаббат хӑтәԓән хŏйат йӑмәԓмаԓ урәӈән, ўшмащман мир пеԓа йастәс: "Рупәтты кеша хут хӑтәԓ уԓ; щи пŏрайән йӑмәԓтыты йŏхтыԓыйаты, ӑнта шаббат хӑтәԓән".
LUK 13:15 Турәм Куща ԓўвеԓа йŏхԓы йастәс: "Кӑт вешпи ŏт! Нын эԓтайән кашәӈ ŏт шаббат хӑтәԓән ԓўв мисәԓ, мўй пӑ оселәԓ ԓойты тӑхайәԓ хŏща мўй хŏԓт ӑт эӈхиԓыԓԓы пӑ йищәԓтәты мўй ӑт тутԓиԓԓы?
LUK 13:16 Тӑм Авраам рут эԓты уԓты эви пӑ сатанайән ԋийәԓхус тӑԓ йӑрман тӑйса, шаббат хӑтәԓән щи ԓыс эԓты хŏԓт эсәԓты мўй ӑт мосәԓ?"
LUK 13:17 Хун Ԓўв щит пŏтәртмаԓән, хŏԓыйэ, Ԓўв пиԓәԓән ӑт кашащәм мŏхет, йэԓәпсайәт; пӑ мир иса Ԓўв хŏԓ вŏԓаӈ верԓаԓ эԓты амтәтԓыйәс.
LUK 13:18 Иисус пӑ йастәс: "Турәм Хон Уԓәпса мўй хŏрпи? Пӑ мўй хŏрпийа ԓўвеԓ ԓэщатԓэм?
LUK 13:19 Ԓўв горчица ԓат сэм хŏрпи, хŏйат ўсԓы пӑ ԓэвпәс энмәԓты йўхԓаԓ хŏща омәссәԓы; энмәс пӑ ун йўх хŏрпийа йис, тŏхԓәӈ войәт ԓўв нўвԓаԓ кўтән тыхәԓ верыԓысәт".
LUK 13:20 Хŏԓна пӑ йастәс: "Турәм Хон Уԓәпса мўй хŏрпи?
LUK 13:21 Ԓўв имийән ўйәм ԋаԋ шўм хŏрпи, хуԓәм мŏрт арата ԓэщатәм ԓанта пŏтса пӑ рўвәтса, ԓатәԓ иса ԓыйтаԓ унты хӑйса".
LUK 13:22 Щӑԓта Иисус Иерусалим пеԓа йуш тўвман, вошәт, куртәт сӑхат йӑӈхәс, хŏйатәт утәԓтыман.
LUK 13:23 И мӑтты ŏт Ԓўвеԓ ищмәсԓы: "Турәм Куща! Пӑр мŏԓты нŏх пайтәсты хŏйат шимәԓ?" Ԓўв йŏхԓы йастәс:
LUK 13:24 "Пушас ващ овийэйа ԓŏӈты ўрататы, нынана пŏтәртԓәм, ар мŏхет ԓŏӈты ўратԓәт пӑ ӑт верәтԓәт".
LUK 13:25 Хун хотәӈ ху нŏх ԓойәԓ пӑ овәԓ лӑп петԓәԓы, щи пŏрайән нын, камән ԓойман, ов сэкты питԓәты пӑ пŏтәртты: Турәм Куща! Турәм Куща! Ов мўӈева пелки пўнши"; туп Ԓўв нынана йŏхԓы йастәԓ: "Нынан ӑт уйәтԓыԓам, хŏԉща нын уԓԓәты".
LUK 13:26 Щи пŏрайән пŏтәртты питԓәты: "Мўӈ Нӑӈ пиԓэнән ԓэсув пӑ йищсув, пӑ мўӈ вош хўлыԓувән Нӑӈ утәԓтәсән".
LUK 13:27 Ԓўв пӑ йастәԓ: "Нынана пŏтәртԓәм: нынан ӑт уйәтԓыԓам, хŏԉща нын уԓԓәты; Ма эԓтэм хŏԓыйэ ԉик верты ŏтәт пўӈԓа мӑнаты".
LUK 13:28 Щита хŏԓԓәп пӑ пек шихрәпса питәԓ, хун нын Турәм Хон Уԓәпса хŏща Авраам, Исаак, Иаков пӑ хŏԓ Турәм йасәӈ туты хŏйатәт шийаԓәԓты, нынәԓән пӑ щиԓта ким воштәты щирән шийаԓәԓԓән.
LUK 13:29 Щӑԓта хӑԓэвәт пеләкән пӑ кев пеләкән уԓты мўвәт эԓты, ным пӑ нўм мўвәт эԓты хŏйатәт йŏхәтԓәт, Турәм Хон Уԓәпса хŏща поры пӑсан сурыйән ӑктәщԓәт.
LUK 13:30 Йӑ ин, тухәԓ йŏԓта уԓты хŏйатәт оԓӈа уԓты питԓәт, пӑ тухәԓ оԓӈа уԓты хŏйатәт – йŏԓта уԓты питԓәт".
LUK 13:31 Щи хӑтәԓән Иисус хŏща фарисейәт эԓты тухәԓ мŏхет йŏхәтсәт пӑ Ԓўвеԓа пŏтәртсәт: "Ким эта пӑ мӑна тӑԓта, Ирод Нӑӈен пӑратты утщиԓԓы".
LUK 13:32 Щӑԓта ԓывиԓаԓа йастәс: "Мӑнаты пӑ йастаты щи ŏхсар икийа: 'Ма кўԉәт воштәԓәм пӑ хŏйатәт йӑмәԓтԓәм тӑмхӑтәԓ пӑ хӑԓэвәт, пӑ хуԓмет хӑтәԓән йэтшәԓәм';
LUK 13:33 туп тӑмхӑтәԓ, хӑԓэвәт пӑ па йиты хӑтәԓән Мӑнэм йэԓԓы шушты мосәԓ, щиты ӑт уԓԓыйәԓ, Турәм йасәӈ туты ики Иерусалим вош кимпийән ат пӑрәс.
LUK 13:34 Иерусалим! Иерусалим! Турәм йасәӈ туты икет веԓты пӑ Турәмән нӑӈ хŏщайэн китәм ŏтәт кевән щӑх сэкты вош! Мўй арат пўш Ма нӑӈ ԋаврэмԓан йӑха ӑкәтты утщисԓам, хŏты тŏхԓәӈ вой пŏшәхԓаԓ тŏхәԓԓаԓ иԓпийа ӑкәтԓәԓы, туп нын ӑт ԓӑӈхасты!
LUK 13:35 Тӑм, нын хотән нынана таԓа хӑщәԓ! Нынана пŏтәртԓәм, Мӑнэм нын щи унты ӑт шийаԓәԓԓән, хун пŏра йŏхәтәԓ, пӑ йастәԓты: 'Щит йӑмән мийәм Ŏт, Хŏй Турәм Куща нэмән йŏхәтәԓ!'"
LUK 14:1 Имŏԓты шаббат хӑтәԓән Ԓўв фарисейәт эԓты уԓты и куща хота ԓэтыйа йŏхтәс, ԓывәт пӑ Ԓўвеԓ эԓты ватман тӑйсэԓ.
LUK 14:2 Ин щӑԓта, Ԓўв йэщаԓтәԓ йикән пўвԓәптәм муш тӑйты хŏйат этәс.
LUK 14:3 Тӑм вер эԓты Иисус Закона утәԓтәты икет пӑ фарисейәт иԋщәсәс: "Шаббат хӑтәԓән йӑмәԓты рӑхәԓ мўй ӑнта?"
LUK 14:4 Ԓыв мӑшйайән усәт. Ԓўв мушәӈ хŏйат хŏща хӑнәмтыман йӑмәԓтсәԓы пӑ эсәԓсәԓы.
LUK 14:5 Щи пўԉаӈ ԓывиԓаԓа йастәс: "Нын мӑтты ŏтԓән хŏща осёлән мўй хор мисән йик ўйԓыты ўс ԓыпийа ки иԓ рӑкәнәԓ, шаббат хӑтәԓ кепа, ищи кўрәмән мўй ԓўвеԓ нŏх ӑт таԓԓәԓән?"
LUK 14:6 Пӑ ԓыв щит пеԓа Ԓўвеԓа йŏхԓы йастәты ӑт верәтсәт.
LUK 14:7 Иисус, вохәм мŏхет ԓӑтәӈшәк омәсты тӑхайәт пирыты щир, шийаԓәмаԓ кемән, утәԓтәты пŏтәр ԓывиԓаԓа йастәс:
LUK 14:8 "Хун нӑӈ порыйа вохԓайән, ԓӑтәӈ омәсты тӑхайа аԓ опса, щиты питты верәтәԓ, мӑтты вохәм мойәӈ хŏйат нӑӈ эԓтэн вŏԓаӈшәк питәԓ,
LUK 14:9 нӑӈен пӑ ԓўвеԓ вохәм хŏйатэн, вана шушман, нӑӈена йастәты верәтәԓ: "Тӑм омәсты лотен ԓўвеԓа мийи"; щи пŏрайән йэԓәмман мет йŏхи хӑщәм лота нӑӈен омәсты вера йиԓ.
LUK 14:10 Хун нӑӈ порыйа вохԓайән ки, йŏхәттэнән, мет йухәт омәсты тӑхайа опса, нӑӈен вохәм ŏтэн нӑӈ хŏщайэн вана шушман ат йастәԓ: "Пиԓху! Ўтԓышәк опса", щи пŏрайән омәсты хŏйатәт йэԓпийән нӑӈ ԓӑтәӈа питԓән,
LUK 14:11 кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат, ԓӑтәӈа пайәтԓа".
LUK 14:12 Ԓўвеԓ вохәм фарисей пеԓа йастәс: "Хун ԓэты пӑсан верԓән, пиԓйохԓан, йайԓан, рут йохԓан, нӑӈ ԉэпенән уԓты тащәӈ хŏйатԓан аԓ вохаԓән, ԓыв ищи нӑӈен ӑт ат вохԓэԓ пӑ ищиты нӑӈен йŏхԓы ӑт аԓт сŏхәптәсԓаԓ.
LUK 14:13 Хун ун ԓэты пӑсан вәрԓән, нўша хŏйатәт, мушмәм хŏйатәт, нŏхты хŏйатәт, сэмԓы хŏйатәт воха,
LUK 14:14 щи пŏрайән ŏйәӈа йиԓән, щит ԓыв нӑӈена йŏхԓы сŏхәптәты ӑт верәтԓәт, нӑӈена Турәм щирән уԓты хŏйатәт нŏх ԓыԓәӈԓәты хӑтәԓән сŏхәптәԓа".
LUK 14:15 Щит хуԓмаԓ кемән, Ԓўв пиԓәԓән пӑсан сурыйән опсәм и ŏт Ԓўвеԓа йастәс: "Щит ŏйәӈ питәԓ, хŏй Турәм Хон Уԓәпса хŏща поры пӑсан сурыйән ԓэԓ-йищәԓ!"
LUK 14:16 Иисус ԓўвеԓа йастәс: "И хŏйат ун ԓэты пӑсан ԓэщатәс пӑ ар хŏйат вохәс.
LUK 14:17 Хун ԓэты пŏра йŏхтәс, митхуйәԓ вохәм мŏхиԓаԓ хŏща китсәԓы йастәтыйа: "Йўваты, мўй иса ԓэщатса!"
LUK 14:18 Пӑ иса хŏԓ и йӑха йастантәм ŏтәт иты йŏхԓы рŏвемәты питсәт. Ит йастәс: "Ма мўв хӑр ԓутсәм пӑ мӑнэм ԓўвеԓ ватты йӑхты мосәԓ; щи ԓŏват йӑм вера, ԉик аԓ тӑйа".
LUK 14:19 Киметәԓ йастәс: "Ма йаӈ хор мис ԓутсәм пӑ рупатайән ԓывиԓаԓ ватты мӑнԓәм; щи ԓŏват йӑм вера, нўрэм аԓ нуми".
LUK 14:20 Хуԓметәԓ йастәс: "Ма нэ тусәм, щишән йиты ӑт веритԓәм".
LUK 14:21 Щӑԓта митху йŏхи йŏхәтмаԓән, щит иса кущайәԓа йастәсԓы. Щиӈәԋща хотәӈ куща ԓыкащәс пӑ митхуйәԓа йастәс: "Кашәӈ вош хўлы хўват йӑӈха пӑ нўша хŏйатәт, мушмәм хŏйатәт, нŏхты пӑ сэмԓы хŏйатәт тый тўваԓән".
LUK 14:22 Щӑԓта митхуйәԓ йастәс: "Куща! Версэм, хŏты нӑӈ партсэн, хŏԓна па омәсты лот уԓ".
LUK 14:23 Щиӈәԋща куща митхуйәԓа йастәс: "Йушәт хўват мӑна пӑ пушасәт пўӈәԓән йӑӈха пӑ хŏйатәт йŏхәтты эвԓәптаԓән, хотэм хŏйатән ат тэкәтса.
LUK 14:24 Нынана йастыԓыԓәм, тўм вохәм хŏйатәт эԓты, нэмәԓты хŏйат ма ԓэтŏтэм хŏща ўӈԓәԓ ӑт хойԓыйәԓ, вохәм хŏйат ар, туп пирыйәм хŏйат шимәԓ!"
LUK 14:25 Ԓўв пиԓәԓән тэԓыйэ хŏйат шушәс; Ԓўв, йŏхԓы керԓәман, ԓывиԓаԓа йастәс:
LUK 14:26 "Хŏй Ма хŏщайэма йŏхәтәԓ ки, щӑԓта ащеԓ пӑ аԋԏеԓ, имеԓ пӑ ԋаврэмԓаԓ, йайԓаԓ пӑ ŏпиԓаԓ, пӑ апщиԓаԓ, пӑ хŏԓна ԓўв уԓәпсайәԓ нŏпсәԓ эԓты хŏԓт ӑт вŏщкәԓԓы ки, щит Ма утәԓтәты хŏйатэма уԓты ӑт верәтәԓ.
LUK 14:27 Щӑԓта хŏй ԓўв пернайәԓ ӑт туԓԓы пӑ Ма йўпемән ӑт шушәԓ, Ма утәԓтәты хŏйатэма уԓты ӑт верәтәԓ.
LUK 14:28 Хŏй нын эԓтан йухтас пӑԓ хот омәсты ўтщийәԓ ки, оԓӈа иԓ ӑт омәсәԓ пӑ тынәԓ ӑт ԓўӈәтԓәԓы мўй, йухтас пӑԓ хотәԓ ԓўв йэтшәптәты веритԓәԓы мўй ӑнтом?
LUK 14:29 Хот пӑтэԓ ўԓԓы ки пӑ йэтшәптәты щир ӑт тӑйты ки питәԓ, хŏԓыйэ ватты ŏтәт ԓўв эԓтэԓ ԋӑхты питԓәт:
LUK 14:30 "Тӑм хŏйат хот омәсты питщәс пӑ ӑт йэтшәптәсԓы".
LUK 14:31 Мўй пӑ мӑты хон ики па хон хŏща ԉаԉа мӑнтаԓ йэԓпийән иԓ ӑт омәсәԓ пӑ оԓәӈән мŏхиԓаԓ пиԓән ӑт ŏшйащәԓ, ԓўв йаӈ щŏрәс ԉаԉәсты йохԓаԓ пиԓән а мўй йурәӈ, щи, ԓўв пеԓайәԓ йиты, па хон ики хус щŏрәс ԉаԉәсты йŏх йэщаԓт ԓойты а мўй верәтәԓ?
LUK 14:32 Ӑнта ки, щит йэԓән уԓтаԓ сыс, ԓўв щитәԓ хŏща хŏйатәт китәԓ, ԉаԉԓы уԓәпса вохты урәӈән.
LUK 14:33 Щиты нын эԓтан кашәӈ хŏйат, хŏй мўйәԓ-кашӈәԓ эԓты ӑт ки верәтәԓ йирԓәты, Ма утәԓтәты хŏйатэма уԓты ӑт верәтәԓ.
LUK 14:34 Сŏԓ - щит йӑм ŏт; туп сŏԓ эпԓәԓ уштәԓԓы ки, хŏты ԓўвеԓ йӑԓпа сŏԓаӈа верты?
LUK 14:35 Ӑнта мўва, ӑнта ԋащама ӑт рӑхәԓ; ким ԓўв вŏщкәԓа. Хŏй хуԓты кеша пӑԓ тӑйәԓ, ат хуԓәԓ!"
LUK 15:1 Налог ӑкәтты йох пӑ кӑрэкәӈ хŏйатәт хŏԓыйэ Ԓўв хŏщайәԓа рӑхәԓтысәт, Ԓўвеԓ хуԓәтты урәӈән.
LUK 15:2 Фарисейәт пӑ щӑԓта Закона утәԓтәты хŏйатәт ўшмащсәт, пŏтәрԓәт: "Тӑм Хойат кӑрэкәӈ мŏхәт вана ўԓԓы пӑ ԓыв пиԓԓаԓән ԓэԓ!"
LUK 15:3 Туп Ԓўв щимәщ утәԓтәты пŏтәр ԓывиԓаԓа пŏтәртәс:
LUK 15:4 "Хŏй нын эԓтан, сот ош тӑйман ки, пӑ щиԓта итәԓ уштәԓԓы, йӑрсот йӑрәԏйаӈәԓ щӑхәрән мўй ӑт хӑйԓәԓы пӑ уштәм ошәԓ йўпийән мўй ӑт мӑнәԓ, уйәттаԓ унты?
LUK 15:5 Пӑ уйәттаԓән, ўԓԓы пӑ, амәтман, порхәԓа пŏнԓәԓы;
LUK 15:6 пӑ, йŏхи йŏхәттаԓән, пиԓйохԓаԓ пӑ ԓўв ԉэпәԓән уԓты хŏйатԓаԓ вохԓәԓы пӑ ԓывиԓаԓа йастәԓ: "Ма пиԓэмән йэша амтәтԓыйаты: ма уштәм ошем уйәтсэм".
LUK 15:7 Нынана пŏтәртԓәм, щиты турәмән кӑрэкԓаԓ эԓты шӑшән керԓәты и кӑрэкәӈ хŏйат урәӈән амәт аршәк питәԓ, хун йӑрсот йӑрәԏйаӈ тўӈа–щира уԓты хŏйатәт урәӈән, хŏйа кӑрэкԓаԓ эԓты шӑшән керԓәты ӑт мосәԓ.
LUK 15:8 Мўй пӑ, ий ими йаӈ сорԋеӈ ŏх карты тӑйман, и ŏх картэԓ уштәԓԓы ки, тўт сунәԓ мўй нŏх ӑт ўщитԓәԓы, пӑ хот хӑрәԓ нŏх йовәԓты ӑт питԓәԓы, уйәтты унты йӑма кӑшты ӑт питԓәԓы?
LUK 15:9 Щӑԓта уйәттаԓән, пиԓнэԓаԓ пӑ ԓўв ԉэпәԓән уԓты нэԓаԓ вохԓәԓы пӑ йастәԓ: "Ма пиԓэмән амтәтԓыйаты: ма уштыԓыйәм сорԋеӈ ŏх картэм уйәтсэм!"
LUK 15:10 Нынана пŏтәртԓәм: щиты Турәм ангеләт, кӑрэкԓаԓ эԓты шӑшән керԓәты кӑрэкәӈ и хŏйат урәӈән, амтәтԓыԓәт".
LUK 15:11 Иисус йэԓԓы пŏтәртәс: "И хŏйат кӑт пŏх тӑйәс;
LUK 15:12 айшәк пŏхәԓ ащеԓ пеԓа йастәс: "Ащи! Ма йўкан хот уԓпәсэм мӑнэма мийи". Щӑԓта ащанән хот уԓпәсэԓ ԓынана ортса.
LUK 15:13 Кӑмәтса хӑтәԓ хӑщәм йўпийән, ай пŏхәԓ мŏԓтыԓаԓ иса ӑкәтмаԓ йўпийән, хўв мўва мӑнәс пӑ щита ԓўв йўканәԓ, уԉԋайа уԓман, посатсәԓԓы.
LUK 15:14 Хун ԓўв йўканәԓ хŏԓ ԓэсԓы-тӑйсәԓы, щи мўвән ун ԓэԓԓы пŏрайа йис, пӑ ԓўв нўшайа питәс;
LUK 15:15 щӑԓта мӑнәс пӑ щи мўвәӈ и ху хŏща ԓŏӈәԓтыйәс, щитән пӑ ԓўв мўв хӑрԓаԓа пурәщԓаԓ шавиты китса;
LUK 15:16 ԓўвеԓән пурәщ ԓэтŏтән сӑмәԓ вŏԓԓәтты ԓуԓән амәт ус, туп нэмәԓты хŏйатән щитән хŏԓна ӑт мийԓыса.
LUK 15:17 Нŏпсәԓ нумәԓмимаԓән, йастәс: 'Мўй арат митйох ащем хŏща мŏԓтас ԓэтәт тӑйԓәт, ма пӑ ԓэԓԓы тӑта щи хӑԓԓәм;
LUK 15:18 нŏх ԓойԓәм пӑ ащем хŏща мӑнԓәм, ԓўвеԓа йастәԓәм: Ащийэ! Ма турма пӑ нӑӈена кӑрэк версәм
LUK 15:19 пӑ нӑӈ пŏхена ԓўӈтәсты щирэм ӑнтом; мӑнэм митйохԓан кўта ўйи".
LUK 15:20 Нŏх ԓойәс пӑ ащеԓ хŏща мӑнәс. Хун ԓўв хŏԓна йэԓән йўвмаԓән, ащеԓән шийаԓәса пӑ щаԉәтса; щӑԓта, ащеԓ йэщаԓт хухәԓмәман, сапԓәԓа ӑпәԓмәс пӑ ԓўвеԓ мосәԓтәсԓы.
LUK 15:21 Пŏхәԓ пӑ ԓўвеԓа йастәс: "Ащи! Ма турма пӑ нӑӈена кӑрэк версәм пӑ нӑӈ пŏхена ԓўӈтәсты ўш щирэм ӑнтом".
LUK 15:22 Ащеԓ пӑ митйохԓаԓ пеԓа йастәс: "Мет йӑм ԓумәтты сŏх тўваты пӑ ԓумәттаԓән, пӑ йошәԓа веншәӈ ԓуйәт, кўрԓаԓа пӑ ԓумтәм мийаты;
LUK 15:23 щӑԓта, веԓмәӈ мис пŏшәх тўваты пӑ нŏх хŏраԓән; ԓэты пӑ каш верты питԓув!
LUK 15:24 Пӑ хŏты, тӑм пŏхем пӑрман ус пӑ нŏх ԓыԓәӈԓәс, ушман ус пӑ уйәтса". Щӑԓта ԓыв каш верты питсәт.
LUK 15:25 Ун пŏхәԓ пӑ мўв хӑрән ус; йŏхи йитаԓән, хун йŏхи ванамәс, арыты пӑ йакты сый хуԓмәс;
LUK 15:26 и митху вана вохман, ищмәсԓы: "Щит пӑ мўй?"
LUK 15:27 Митху пӑ ԓўвеԓа йастәс: "Апщен йŏхтәс, пӑ ащен веԓмәӈ мис пŏшәх хŏрәс, ԓўв пŏхәԓ тўмтака йоша пайәтмаԓ урәӈән".
LUK 15:28 Ԓўв ԉикащәс пӑ йŏхи ԓŏӈты ӑт ԓӑӈхас. Ащеԓ пӑ, ким этәс пӑ ԓўвеԓ йŏхи пойәкты питсәԓы.
LUK 15:29 Туп ԓўв ащеԓ пеԓа йŏхԓы йастәс: "Ма мўй арат тӑԓ нӑӈена ԋотԓәм пӑ нэмәԓты пŏрайән нӑӈ йасӈен шŏппи ӑт ўншиԓысэм, нӑӈ пӑ нэмәԓты пŏрайән мӑнэм пиԓйохԓам пиԓән каш верты урәӈән, хŏԓна ош пŏшәх ӑт мийԓысән;
LUK 15:30 хун пӑ тӑм пŏхен, нӑӈ хот уԓпәсэн уԉԋа нэӈәт пиԓән лакки йовәԓмаԓ йўпийән, йŏхтәс, нӑӈ пӑ ԓўв урӈәԓән веԓмәӈ мис пŏшәх хŏрсән".
LUK 15:31 Ащеԓ пӑ ԓўвеԓа йастәс: "Пŏхийэ! Нӑӈ иса ма пиԓэмән уԓԓән, хŏԓ ма ŏтэм нӑӈен,
LUK 15:32 мўӈев щит эԓты амтәтԓыты пӑ каш верты мосәс, апщен пӑрман ус пӑ нŏх ԓыԓәӈԓәс, тӑпиԓыйәс пӑ уйтантәс".
LUK 16:1 Ԓўв пӑ утәԓтәты йохԓаԓа йастәс: "И тащәӈ хŏйат хотәԓ-вещәԓ шавиты пӑ ԓэщатты хŏйат тӑйәс. Щитэн эԓты ԓўвеԓа айкеԓ туса, мӑтты ԓўв пŏрмасԓаԓ посатәԓ;
LUK 16:2 щӑԓта, ԓўвеԓ вана вохсәԓы пӑ йастәс: "Мўй ма нӑӈ эԓтэн хуԓԓәм? Йаста, хŏты хот шавиты пӑ ԓэщатты верәт версән, щиӈәԋща ма хŏщайэма рупитты ӑт питԓән".
LUK 16:3 Щишән щи хŏйат ԓўв турмәԓән нумәсыйәԓ: "Хŏты нэриты? Ма кущайэм хот шавиты пӑ ԓэщатты верэм нŏх ўԓԓы; мўв хирты йур ӑт тӑйԓәм, ԓэтŏт вохты йэԓәмԓайәм;
LUK 16:4 ԓыв хотԓаԓа ма ат ўсайәм, уйәтԓэм, мўй верты, хун хот шавиты пӑ ԓэщатты вер эԓты пўӈԓа пайәтԓайәм".
LUK 16:5 Пӑ кущайәԓ хŏща артнайәӈа уԓты хŏйатәт ԓӑтәԓ щирән вохсәԓы, пӑ оԓәӈ хŏйат ищмәсԓы: "Мўй арат артна нӑӈ кущайэм хŏща тӑйԓән?"
LUK 16:6 Щитәԓ йастәс: "Сот мера оливка вŏй". Щӑԓта щитәԓа йастәс: "Артна нэпекен ўйи, пӑ сорашәк иԓ опса, хӑнши: ветйаӈ".
LUK 16:7 Щӑԓта кимет артнайәӈ хŏйата йастәс: "Нӑӈ пӑ мўй арат артна тӑйԓән?" Ԓўв йŏхԓы йастәс: "Сот мера нŏви ԓат сэм". Щӑԓта ԓўвеԓа йастәс: "Артна нэпекен ўйи пӑ хӑнши: ԋийәԓйаӈ".
LUK 16:8 Хотәӈ куща хот шавиты пӑ ԓэщатты ӑнта вещкат хŏйатәԓ ишәксәԓы, нŏпсәӈа вермаԓ урәӈән; тӑм йисән уԓты пŏхәт ԓыв хŏрпи ŏтԓаԓ кўтән нŏви турәм пŏхәт эԓты нŏпсәӈшәкәт.
LUK 16:9 Ма пӑ нынана пŏтәртԓәм: нын пиԓйохәт ԓэщататы нӑрәӈ тащ-вещ ŏнтасән, ԓуԓән, хун нўшайа йиԓты, ԓыв нынан и пўша уԓты тӑхайа ат ўсэԓ.
LUK 16:10 Ай верән вещкат ŏт, щит ун верән па вещкат, ай верән ӑнта вещкат ŏт, щит ун верән ищи ӑнта вещкат.
LUK 16:11 Щишән, нын нӑрәӈ тащ-вещ тӑйман вещката ӑт усты ки, хŏй нынана вещката уԓты тащ-вещ эвԓәптәԓ?
LUK 16:12 Пӑ па ŏт тащ-вещ хŏща вещката ӑт усты ки, хŏйән нынана нын кешайән уԓты ŏт мӑԓа?
LUK 16:13 Нэмәԓты митху кӑт куща пеԓа уԓты ӑт верәтәԓ: мўй пӑ итәԓ ԉикән этты питԓәԓы, киметәԓ пӑ сӑмәӈа тӑйты питԓәԓы, мўй пӑ итәԓа сӑмәӈа рупитты питәԓ, киметәԓ эԓты пӑ йŏвра ватты питәԓ. И пўԉаӈ Турәм пеԓа пӑ тащ-вещ пеԓа уԓты ӑт верәтԓәты".
LUK 16:14 Щит иса ŏх сӑмәӈа тӑйты фарисейәтән па хуԓса, пӑ ԓыв Ԓўвэԓ ԋӑха ԋӑхсэԓ.
LUK 16:15 Ԓўв ԓывиԓаԓа йастәс: "Нын хŏйатәт йэԓпийән нынан тўӈа-щира уԓты ŏтәта айәԓԓәԓән, туп Турәмән нын сӑмԓән уйәтԓайәт, хŏйатәт хŏща мўй ԓӑтәӈ, Турәм йэԓпийән щит ԋим".
LUK 16:16 Закон пŏра пӑ Турәм йасәӈ туты хŏйатәт пŏра Иоанн унты ус; ин ўш эԓты Турәм Хон Уԓәпса Йӑм айкеԓ эԓты сыйәӈа пŏтәртԓа, пӑ кашәӈ хŏйат йур вевән ԓыпийа ўратәԓ.
LUK 16:17 Туп сорашәк турәм пӑ мўв хŏԓты пеԓа ушԓәтән, Закон йасӈәт эԓты и хӑнши нўвийэ хŏԓты хун ушәԓ.
LUK 16:18 Щит, хŏй имеԓ пиԓән кӑтна мӑнәԓ пӑ па ими туԓ, пакрасԓәԓ, пӑ щит, хŏй икеԓ пиԓән кӑтна мӑнәм ими вана ўԓԓы, пакрасԓәԓ.
LUK 16:19 И тащәӈ хŏйат ус, ԓўв тынәӈ питы ўрты ԓумтәма пӑ пирыйәм ухәԓ щӑшкана ԓумәтԓыйәс пӑ кашәӈ хӑтәԓ поры пӑсан верыԓыйәс.
LUK 16:20 Щӑԓта пӑ Лазарь нэмпи и куԋар хŏйат ус, ԓўв пушас овәԓ иԓпийән керәтԓыйәс, эԓәԓ ԓайӈәӈ ԋўләмән лӑп каритәм
LUK 16:21 пӑ тащәӈ ики пӑсан эԓты иԓ рыйты пўләта ԓуԓән хŏԓна амәтман ус, сӑмәԓ вŏԓәттыйа, ампәт вана йŏхтыԓысәт пӑ ԓўв карԓаԓ ԋŏԓыԓысԓаԓ.
LUK 16:22 Куԋар ху пӑрәс пӑ ԓўв ангеләтән Авраам хŏща туса. Тащәӈ ики па пӑрәс, пӑ мўва иԓ лоттәса.
LUK 16:23 Иԓта турәмән шукащман ус, ԓўв сэмԓаԓ нŏх аԓәпсәԓы пӑ йэԓән Авраам, ԓўв пўӈԓәԓән пӑ Лазарь ики шийаԓәс.
LUK 16:24 Такан ўвман йастәс: "Авраам ащи! Ма урӈемән сӑмен ат ԋŏхԓәԓ пӑ Лазарен киты, ԓўй тӑйәԓ йиӈка ат метшиԓыԓԓы пӑ ԋаԓмем ат йолхәԓԓәԓы, тӑм тўт хŏща щикем шукащԓәм!"
LUK 16:25 Авраам йастәс: "Пŏхийэ, нумәԓми, нӑӈ йӑмен уԓмен сыс мŏщатсэн; Лазарь пӑ – туп атәм тӑйәс. Ин пӑ ԓўв тӑта тŏрамтыйәԓ, нӑӈ пӑ шукащԓән;
LUK 16:26 щи тўмпийән мўӈ пӑ нын кўтәнән ун ус шики верман уԓ, тӑԓта нын хŏщайән мӑнты ԓӑӈхаты ŏтәт ӑт веритԓәт щи мӑнты, ищиты щиԓта мўӈ хŏщайэв ӑт ўншиԓыԓәт".
LUK 16:27 Щиӈәԋща тащәӈ ху йастәс: "Щи ԓŏват йӑм вера, ун ащи, ма ащем хота ԓўвеԓ киты,
LUK 16:28 ма вет ху апщи тӑйԓәм, ԓўв ԓывиԓаԓа ат йастәԓ, ԓуԓән ԓыв пӑ тӑм шукәӈ тӑхайа ӑт аԓ йŏхәтсәт".
LUK 16:29 Авраам ԓўвеԓа йастәс: "Ԓыв Моисей пӑ Турәм йасәӈ туты икет тӑйԓәт; ԓывиԓаԓ ат хуԓәтԓәт".
LUK 16:30 Ԓўв пӑ йастәс: "Ӑнта, Авраам ун ащи, туп хун пӑрәм хŏйатәт эԓты ԓыв хŏщайэԓ мӑтты ŏт йŏхәтәԓ ки, щи пŏрайән ԓыв кӑрэкԓаԓ эԓты керԓәԓәт".
LUK 16:31 Щӑԓта Авраам ԓўвеԓа йастәс: "Моисейа пӑ Турәм йасәӈ туты икета ӑт хуԓәтԓәт ки, пӑ пӑрәм хŏйатәт эԓты мӑтты ŏт нŏх ԓыԓәӈԓәс ки, хун эвәԓԓәт".
LUK 17:1 Иисус утәԓтәты йохԓаԓа па йастәс: "Хўщәпсайәт ӑт йŏхәтты щир ӑнтом, туп щи хŏйата шук, хŏй мŏхты хўщәпсайәт йŏхәтԓәт;
LUK 17:2 ԓўвеԓа, тӑм ай ŏтәт эԓты ит нэш хўщты эԓты, йӑмшәк ус ԓуԓән, сапԓәԓа ун кев шуп ки тӑхәртса пӑ щарса вŏщкәса.
LUK 17:3 Ныныԓән ватман тӑйаԓән. Нӑӈ пеԓайэна йайән мўй апщен нўр туԓ ки, ԓўвеԓа йŏхԓы йасты; ԓўв нўрәԓ эԓты шӑшән керԓәԓ ки, щи нўрәԓ йŏрэми;
LUK 17:4 хӑтәԓ хўват ԓапәт пўш кепа нӑӈена нўр верәԓ, пӑ ԓапәт пўш хӑтәԓ хўват нӑӈ хŏщайэна йŏхәтәԓ пӑ йастәԓ: "Ма нўрэм эԓты шӑшән керԓәԓәм", - нўрәԓ эсԓы, йŏрэми".
LUK 17:5 Щӑԓта апостоләт Турәм Кущайа йастәсәт: "Мўӈ эвәԓты верэв арамты!"
LUK 17:6 Турәм Куща йастәс: "Нын горчица ԓат сэм ԓŏват эвәԓты вер тӑйсәты ки, пӑ тӑм смоква йўха йастәсты: мўв эԓты нŏх лакәптыйа пӑ щарса опсанта", ԓўв ԓуԓән нынана хуԓәнтәс.
LUK 17:7 Хŏй нын эԓтан, мўв хӑрән рупитты мўй пӑ тащ шавиты митху тӑйман, ԓўв мўв хӑр эԓты йŏхәттаԓән, ԓўвеԓа йастәԓ: "Сорашәк мӑна, пӑсан сурыйа опса"?
LUK 17:8 Аԓт пӑ ԓўвеԓа йастәԓ: "Йэтән ԓэтәт мӑнэм кавәрта пӑ, ӑнтпен нŏх йӑрман, мӑнэм ԓавәԓман, ма ԓэтэм, йищтэм эԓты ванән ԓойа, пӑ щӑԓта веԉщи нӑӈ ԓэва, йиԋща"?
LUK 17:9 Хотәӈ куща щи митхуйәԓ, ԓўв партәм щирәԓа вермаԓ урәӈән, пумащипа йасӈәтән йастәԓԓы а мўй? Щиты ӑт нумәсԓәм.
LUK 17:10 Нын ищиты, хун партыԓыйәм щирән иса верԓәты, пŏтәртаты: "Мўӈ туп митху лэӈкет, мўй верты мосәс, щит версув".
LUK 17:11 Иерусалим вош пеԓа мӑнман, Иисус Самария пӑ Галилея мўвӈән кўтән шушәс.
LUK 17:12 Пӑ хун Ԓўв и кўрта йŏхәтмаԓән, йаӈ йэмәӈ ԓайӈәӈ ԋўлмәт тӑйты хŏйатәтән йэщаԓт этса. Ԓыв йэԓән иԓ ԓойсәт
LUK 17:13 пӑ сыйәӈ тўрән пŏтәртсәт: "Иисус Утәԓтәты Ху! Мўӈев щаԉиты!"
LUK 17:14 Ԓывиԓаԓ шийаԓәмаԓ кемән, Ԓўв йастәс: "Мӑнаты, Турма йир верты хŏйатәта аԉисыйаты". Хун ԓыв шушсәт, сыстама йисәт.
LUK 17:15 Ԓыв эԓтэԓ и хŏйат, тўмтака йўвәм шийаԓәмаԓ кемән, сыйәӈ тўрән Турәм вŏԓаӈа айәԓтман, йŏхԓы керԓәс,
LUK 17:16 пӑ Иисус кўр ԋŏԓаԓ шŏма, пумащипа йастыман, хŏмта иԓ керәптыйәс; щит Самария ики ус.
LUK 17:17 Иисус йŏхԓы йастәс: "Ӑнта мўй йаӈ хŏйат сыстапман усайәт? Йӑрәԏйаӈ пӑ хŏта?
LUK 17:18 Мўй щирән, тӑм па мўв хŏйат тўмпийән, ԓыв йŏхԓы ӑт керԓсәт, Турма ишәк йасәӈ йастәты урәӈән?"
LUK 17:19 Пӑ Иисус ԓўвеԓа йастәс: "Нŏх ԓойа пӑ мӑна; эвәԓты верэнән нӑӈ нŏх пайәтсайән".
LUK 17:20 Фарисейәтән иԋщәсса, хун Турәм Хон Уԓәпса йŏхәтәԓ? Ԓўв йŏхԓы йастәс: "Турәм Хон Уԓәпса сэмән ватман ӑт йŏхәтәԓ",
LUK 17:21 пӑ ӑт йастәԓәт: "Тӑм, Ԓўв тӑта", мўй пӑ "Ԓўв тўта". Пӑ тӑм, Турәм Хон Уԓәпса нын ԓыпанән уԓ".
LUK 17:22 Утәԓтәты йохԓаԓа па йастәс: "Хӑтԓәт йŏхәтԓәт, хун нын Хŏйат Пŏх хӑтәԓԓаԓ эԓты ит ватты ԓӑӈхаԓԓән, пӑ ӑт шийаԓәԓԓән.
LUK 17:23 Пӑ нынана йастәԓа: "Тӑм, тӑта щи", мўй пӑ: "Тўм, тўта щи" - аԓ мӑнаты пӑ аԓ ԋухԓысыйаты,
LUK 17:24 пӑ хутԓыйәм пŏхәл ԋоԓ иты турәм и кимԓәԓ эԓты, кимет кимԓәԓ унты вŏрԓыйәԓ, Хŏйат Пŏх Ԓўв хӑтԓәԓән щиты питәԓ.
LUK 17:25 Туп оԓәӈән Ԓўвеԓ ар шук туты мосәԓ пӑ ин уԓты хŏйатәтән вана ӑт ўты вер уԓ.
LUK 17:26 Пӑ хŏты Ной хӑтԓәтән ус, щиты Хŏйат Пŏх хӑтԓәтән питәԓ:
LUK 17:27 хŏйатәт ԓэсәт, йищсәт, нэ тутԓысәт, ху сайа мӑныԓысәт щи хӑтәԓ унты, хун Ной ики ковчег ԓыпийа ԓŏӈәс, пӑ ун йик йŏхтәс, пӑ хŏԓ пӑратсайәт.
LUK 17:28 И щиты, Лот нэмпи ики хӑтԓәтән ус: ԓэсәт, йищсәт, ԓутәссәт, тынассәт, мўв хӑр ԓэвпәс омассәт, хот омәссәт;
LUK 17:29 туп щи хӑтәԓән, хун Лот ики Содом вош эԓты ким этәс, турәм эԓты тўтәӈ пӑ уӈхәӈ йэрт шошмәс, пӑ хŏԓ пӑратсайәт;
LUK 17:30 пӑ щи хӑтәԓән щиты питәԓ, хун Хŏйат Пŏх сэма этәԓ,
LUK 17:31 Щи хӑтәԓән, хŏй хот ԓоӈәԓән ки уԓты питәԓ, пŏрмасԓаԓ пӑ хот ԓыпийән, щит ԓывиԓаԓ ўты иԓ аԓ ŏхԓа; хŏй пӑ мўв хӑрән ки уԓты питәԓ, ищиты йŏхԓы аԓ керԓа.
LUK 17:32 Лот ики ийими нуммәԓмийаԓән.
LUK 17:33 Хŏй уԓәпсайәԓ шавиты утщийәԓ ки, щит ԓўвеԓ пӑратԓәԓы, хŏй пӑ уԓәпсайәԓ пӑратԓәԓы, щит ԓўвеԓ ԓыԓӈатԓәԓы.
LUK 17:34 Нынана пŏтәртыԓәм: "Щи ат кӑт хŏйат и ŏԓттӑхайән: итәԓ нŏх ўԓа, киметәԓ хӑйԓа;
LUK 17:35 кӑт нэӈӈән и йӑха ԓат сэм шўкатты питԓәӈән: итәԓ нŏх ўԓа, киметәԓ хӑйԓа;
LUK 17:36 кӑтән мўв хӑрән рупитԓәӈән: итәԓ нŏх ўԓа, киметәԓ хӑйԓа".
LUK 17:37 Щи урәӈән Ԓўвеԓа йŏхԓы йастәса: "Хŏта, Турәм Куща?" Ԓўв пӑ ԓывиԓаԓа йастәс: "Хŏта хӑԓа, щита пӑ кўркәт ӑктәщԓәт".
LUK 18:1 Иисус ԓывиԓаԓа щит эԓты утәԓтәты пŏтәр пŏтәртәс, мӑтты иса пойәкщәты мосәԓ пӑ равԓы-хушԓы уԓты ӑт мосәԓ,
LUK 18:2 йастәман: "И вошән сўт ики ус, ԓўв Турәм эԓты ӑт пӑԓәс пӑ хŏйатәт эԓты ӑт йэԓамтыйәс.
LUK 18:3 Щи вошән и икиԓы хӑщәм нэ ус, пӑ ԓўв, сўт ики хŏща йŏхтыԓыман, пŏтәртәс: "Мӑнэм нўр верты хŏйат эԓты эԓт питы".
LUK 18:4 Туп ԓўв хўв ӑт кашащәс. Йухәт иԓта нŏпсәԓән йастәс: "Турәм эԓты ма кўш ӑт пӑԓԓәм пӑ хŏйатәт эԓты ӑт йэԓәмԓайәм,
LUK 18:5 туп тӑм икиԓы хӑщәм имийән рома ӑт хӑйԓайәм, ԓўвеԓ эԓт питԓэм, ԓўв мӑнэма тŏрастәтыйа ԓуԓән па ӑт aт йŏхтыԓыйәс".
LUK 18:6 Турәм Куща йастәс: "Хуԓԓәԓән, ӑнтом вещкат сўт ики мўй пŏтәртәԓ?
LUK 18:7 Турәм мўй Ԓўв пирыйәм хŏйатԓаԓ, атәԓ-хӑтәԓ Ԓўвеԓ вохты ŏтԓаԓ, эԓт ӑт питԓәԓы? Пӑр мŏԓты Ԓўв ԓывиԓаԓа ԋотәп верты рŏнәԓ?
LUK 18:8 Нынана пŏтәртԓәм, ԓывиԓаԓа сорайән эԓт питты щир мӑԓ. Туп Хŏйат Пŏх йŏхәттаԓән, эвәԓты вер мўвән а мўй уйәтәԓ?"
LUK 18:9 Тухԓәт пеԓа па, хŏй ԓыв нумәссәт ԓыв тўӈа–щира уԓты хŏйатәт, пӑ па хŏйатәт ԋэрсәт, Иисус щимәщ утәԓтәты пŏтәр пŏтәртәс:
LUK 18:10 "Кӑт хŏйатӈән Турәм хота пойәкщәты ԓŏксәӈән: итәԓ - фарисей, киметәԓ - налог ӑкәтты ики.
LUK 18:11 Фарисей, утща щира ԓойман, ԓўв турмәԓән шитаман пойәкщәс: "Йэшәк Турәм! Пумащипа Нӑӈена йастәԓәм, ма ӑнта щимәщ, ӑнта па хŏйатәт хŏрпи - ԓоԓмахәт, хорахщет, пакрасԓәты ŏтәт, мўй пӑ тӑм налог ӑкәтты ики иты:
LUK 18:12 ԓапәт кӑт пўш вўщԓыԓәм, кашәӈ шитты ŏтэм эԓты, йаӈмет шупәԓ мӑԓэм".
LUK 18:13 Налог ӑкәтты ики пӑ, йэԓәншәк ԓойман, сэмԓаԓ турма хŏԓна нŏх аԓәмты пӑԓәс; туп мевԓәԓ хӑтщиман, пŏтәртәс: "Йэшәк Турәм, ма, кӑрэкәӈ ху, ма пелайэм йӑмен этәԓты!"
LUK 18:14 Нынана йастәԓәм, щит, фарисейа пŏнман, Турәмән вещката пайәтман, йŏхи мӑнәс: кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат ԓӑтәӈа пайәтԓа.
LUK 18:15 Иисус хŏща ай ԋаврэмәт тўтԓысайәт, Ԓўв ԋаврэмәт хŏща ԓуԓән ат хӑнәмтыйәс; утәԓтәты йохԓаԓ щит шийаԓәмеԓ кемән, ԓывиԓаԓ ӑт эсәԓты питсәԓаԓ.
LUK 18:16 Туп Иисус, ԋаврэмәт вана вохман, йастәс: "Ԋаврэмәт Ма хŏщайэм йŏхтыԓыты эсԓаԓән, ԓывиԓаԓ аԓ йэртԓыйаԓән, щимәщ ŏтәт урәӈән Турәм Хон Уԓәпса уԓ.
LUK 18:17 Йӑна нынана йастәԓәм: Турәм Хон Уԓәпсайа щит ӑт ԓŏӈәԓ, хŏй ԋаврэм иты, вана ԓўвеԓ ӑт ўԓԓы".
LUK 18:18 Щӑԓта и мӑтты кущайа уԓты ŏтән Ԓўв ищмәса: "Сӑмәӈ Утәԓтәты Ху! Мўй мӑнэм верты мосәԓ, ԓуԓән и пўша уԓты уԓәпса ат мŏщатсәм?"
LUK 18:19 Иисус ԓўвеԓа йастәс: "Мўйа нӑӈ Мӑнэм сӑмәӈа айәԓԓэн? Нэмәԓты ŏт ӑнта сӑмәӈ, туп Турәм утща;
LUK 18:20 Турәм партәпса йасӈәт уйәтԓәԓан: "Па хŏйат ими пиԓән, па хŏйат ики пиԓән аԓ пакрасԓа", "Хŏйат аԓ пӑрата", "Аԓ ԓоԓма", "Аԓ ԋаԓмийа", "Аԋԏен-ащен нумман тӑйи".
LUK 18:21 Ԓўв пӑ йастәс: "Тӑм иса ма ай эԓты шависэм".
LUK 18:22 Щит хуԓмаԓ кемән, Иисус ԓўвеԓа йастәс: "Нӑӈена па ит ӑт тӑрмәԓ: иса мўй тӑйԓән, тыныйаԓән пӑ нўша хŏйатәта ортаԓән, пӑ турәмән тащ, сорԋэт тӑйты питԓән, щӑԓта йŏхта пӑ Ма йўпемән шуша".
LUK 18:23 Ԓўв пӑ, щит хуԓмаԓ кемән, рўтаԉа йис, шек тащәӈ ус.
LUK 18:24 Иисус, ԓўв рутаԉа йўвмаԓ, шийаԓәмаԓ кемән, йастәс: "Мўй хŏрпи ԓавәрт тащәӈ хŏйата Турәм Хон Уԓәпсайа ԓŏӈты!
LUK 18:25 Верблюд нэмпи войа йинтуп пўв мŏхты мӑнты хŏԓна туԓшәк, тащәӈ хŏйата Турәм Хон Уԓәпсайа ԓŏӈты эԓты".
LUK 18:26 Щит хуԓәм мŏхет йастәсәт: "Хŏй пӑ нŏх пайтәсты верәтәԓ?"
LUK 18:27 Туп Ԓўв йастәс: "Хŏйатәтән ӑт верәтты щир, Турәмән верәтԓа".
LUK 18:28 Петра пӑ йастәс: "Тӑм, мўӈ мўй тӑйсув, иса хŏԓ хӑйсәԓув пӑ Нӑӈ йўпенән мӑтсув".
LUK 18:29 Ԓўв ԓывиԓаԓа йастәс: "Йӑна нынана пŏтәртԓәм: нэмәԓты хŏйат ӑнтом, хŏй хотәԓ, мўй ащеԓ-аԋԏеԓ, мўй пӑ йайԓаԓ-опиԓаԓ-апщиԓаԓ, имеԓ мўй пӑ ԋаврэмԓаԓ Турәм Хон Уԓәпса урәӈән ԓуԓән хӑйсәԓы,
LUK 18:30 пӑ тӑм пŏрайән мет хŏԓна аршәк ԓуԓән мŏщатәԓ, йиты пŏрайән пӑ - и пўша уԓты уԓәпса".
LUK 18:31 Кӑтхŏщйаӈ утәԓтәты йохԓаԓ пўӈԓа вохман, ԓывиԓаԓа йастәс: "Тӑм мўй, мўӈ Иерусалим воша мӑнԓув, пӑ щиты иса тыйәԓ, хŏты Турәм йасәӈ туты хŏйатәт сӑхат Хŏй ат Пŏх эԓты хӑшса,
LUK 18:32 Ԓўв Турәм ӑт уйәтты па рут мира мӑԓа, пӑ Ԓўв щӑԓта кӑмән щирән ԋэрԓа, шукатԓа пӑ пŏлщәӈән ԉакԓа,
LUK 18:33 пӑ хомщийән сэкты питԓа, пӑ Ԓўв пӑратԓа: хуԓмет хӑтәԓән пӑ нŏх ԓыԓәӈԓәԓ".
LUK 18:34 Туп утәԓтәты йохԓаԓ щит эԓты нэмәԓты ŏша ӑт пайәтсәт; щи йасӈәт ԓывиԓаԓа хӑԋа щир тӑйсәт, пӑ йастәм ŏт ԓыв ŏша ӑт пайәтсэԓ.
LUK 18:35 Хун Ԓўв Иерихон воша ванамәс, и сэмԓы ики йуш пўӈәԓән, меԓащ вохман, опсәс,
LUK 18:36 щӑԓта, ԓўв пўӈԓәԓ эԓты хŏйатәт шушты хуԓмаԓ кемән, ԓўв ищмәсԓы: "Мўй щит?"
LUK 18:37 Ԓўвеԓа йастәса, щит Иисус Назарет эԓты йиԓ.
LUK 18:38 Щи йўпийән ԓўв такан ўваԓтәс: "Иисус, Давид Пŏх! Мӑнэм щаԉиты!"
LUK 18:39 Оԓӈа мӑнты хŏйатәт ԓўвеԓ мӑшйайа уԓты партԓэԓ; туп ԓўв па таканшәк ўваԓтәс: "Давид Пŏх! Мӑнэм щаԉиты!"
LUK 18:40 Иисус иԓ ԓойәс пӑ щит Ԓўв хŏщайәԓ вана туты партсәԓы: пӑ хун щит Ԓўв хŏщайәԓ вана йŏхтәс, ԓўвеԓ ищмәсԓы :
LUK 18:41 "Мўй нӑӈ Ма эԓтэм ԓӑӈхаԓән? Сэмԓы ики йастәс: "Турәм Куща! Ԓуԓән сэмәӈа ат йисәм".
LUK 18:42 Иисус ԓўвеԓа йастәс: "Сэмәӈа ат йиԓән! Нӑӈ эвәԓты верэнән нӑӈ йӑмәԓтсайән".
LUK 18:43 Щӑԓта ԓўв ищи мŏхты сэмәӈа йис пӑ Ԓўв йўпеԓән мӑнәс, Турәм вŏԓаӈа айәԓтман; пӑ мир хŏԓ щит ватман, Турма ишәк йасӈәт йастәты питсәт.
LUK 19:1 Щи йўпийән Иисус Иерихон воша йŏхтәс пӑ вош хўват шушәс.
LUK 19:2 Щита, Закхей нэмпи ий ики, ԓўв налог ӑкәтты хŏйатәт ŏх ху пӑ хŏԓна тащәӈ ху ус.
LUK 19:3 Иисус – Щит хŏй Ԓўв, ватты кӑшсәԓы, туп мир сайән шийаԓәты ӑт веритсәԓы, пӑԓатәԓ ԓэԓ ус, щишән,
LUK 19:4 пӑ, оԓӈашәк хухәԓмәман, смоква йўха нŏх хуӈхәс, Иисус кащаԓәты урәӈән, Ԓўвеԓ щи пўӈәԓта мӑнты мосәс.
LUK 19:5 Хун Иисус щи тӑхайа йŏхтәс, нŏхԓы аӈкәрмәмаԓ кемән, ԓўвеԓ шийаԓәсԓы пӑ йастәс: "Закхей! Сорашәк иԓ ŏхԓа, тӑм хӑтәԓән Мӑнэм нӑӈ хотэнән уԓты мосәԓ".
LUK 19:6 Щитәԓән ԓўв тэрматыман иԓ ŏхԓәс пӑ амәтман Ԓўвеԓ хотәԓа тусԓы.
LUK 19:7 Пӑ хŏԓыйэ, щит ватман, ўшмащты питсәт: "Ԓўв кӑрэкәӈ хŏйат хŏща мойԓәты ԓŏӈәс!"
LUK 19:8 Закхей пӑ, ԓойман, Турәм Кущайа йастәс: "Турәм Куща! Тӑйты хот тэԓэм и шупәԓ нўша хŏйатәта мӑԓэм, пӑ хŏй эԓты мŏԓтас усәм ки, щита ԋӑԓ пўш аратән йŏхԓы мӑԓэм".
LUK 19:9 Иисус ԓўвеԓа йастәс: "Тӑм хӑтәԓ тӑм хота нŏх пайтәсты щир йŏхтәс, ԓўв па Авраам пŏх, щишән.
LUK 19:10 Хŏйат Пŏх кӑншатты йŏхтәс пӑ ушәм ŏтәт нŏх пайәтты".
LUK 19:11 Хун ԓыв щит хуԓәтсәт, и утәԓтәты пŏтәр па пŏтәртәс: Ԓўв Иерусалим вош ԉэпән ус пӑ ԓыв нумассәт, йэшавуԓ Турәм Хон Уԓәпса щи йŏхәтәԓ.
LUK 19:12 Иисус щиты йастәс: "Йӑм рут эԓты уԓты и хŏйат хўв мўва мӑнәс, ԓуԓән щита хон кущайа павтәсты урәӈән, пӑ щӑԓта йŏхԓы йŏхәтты;
LUK 19:13 йаӈ митйохԓаԓ вана вохман, йаӈ сорԋеӈ ŏхән ԓывиԓаԓ мӑсԓы пӑ йастәс: "Тӑм ŏхԓән ма йŏхәттэм унты вер пеԓа мийаԓән".
LUK 19:14 Щи мўвәӈ хŏйатԓаԓән ԓўв шек ԉикән этса пӑ ԓўв йўпеԓ хўват хŏйатәт китсайәт, йастәтыйа: "Мўӈ нўмпева щи хŏйат хŏна уԓты, мўӈ ӑт ԓӑӈхаԓув!"
LUK 19:15 Хун, хон кущайа питмаԓ йўпийән, йŏхԓы йŏхтәс, щи митйохԓаԓ, хŏйа сорԋэӈ ŏх мийлыйәс, ԓўв хŏщайәԓ вохты партсәԓы, щи ŏхԓаԓән хŏй мўй шитәс, щит уйәтты урәӈән.
LUK 19:16 Оԓәӈ митхуйәԓ йŏхтәс пӑ йастәс: "Куща, нӑӈ и cорԋеӈ ŏхен йаӈ сорԋеӈ ŏх тус".
LUK 19:17 Ԓўвеԓа пӑ йастәс: "Йӑм щи, вещкат митху! Ай вер хŏща вещката уԓмен урәӈән, кущайа уԓты, йаӈ вош ўйа!"
LUK 19:18 Кимет митхуйәԓ йŏхтәс пӑ йастәс: "Куща, нӑӈ и сорԋеӈ ŏхен вет сорԋеӈ ŏх тус".
LUK 19:19 Щитәԓа па йастәс: "Нӑӈ па вет вош хŏща кущайа уԓа".
LUK 19:20 Хуԓмет митхуйәԓ йŏхтәс пӑ йастәс: "Куща, тӑм мўй нӑӈ мера сорԋеӈ ŏхен, ма ԓўвеԓ, ŏхшама йŏвәртман, шависэм,
LUK 19:21 ма нӑӈ эԓтэн пӑԓсәм, нӑӈ тарәм хŏйат: мўй ӑт пŏныԓысән, щит ўԓән, пӑ мўй мўва ӑт опсыԓысән, щит ӑкәтԓән".
LUK 19:22 Куща ԓўвеԓа йастәс: "Вевтам митху, нӑӈ ўӈԓэнән нӑӈен сўтәтты питԓэм! Нӑӈ уйәтсэн, мўй хŏрпи ма тарәм хŏйат, мўй ӑт пŏныԓысәм, щит ўԓәм, мўй мўва ӑт опсыԓысәм, щит ӑкәтԓәм?
LUK 19:23 Мўй урәӈән пӑ нӑӈ ма сорԋэӈ ŏхем вер пеԓа ӑт мӑсэн, ма, йŏхәттэмән ԓуԓән, йŏхԓы мŏԓтаса ўсэм!"
LUK 19:24 Ванән ԓойты йохԓаԓ пеԓа йастәс: "Щел ŏх ԓўв эԓтэԓ ўйаԓән пӑ йаӈ сорԋеӈ ŏх тӑйты митхуйа мийаԓән".
LUK 19:25 Ԓўвеԓа мŏхет йастәсәт: "Куща, тўмен йаӈ сорԋеӈ ŏх щи тӑйәԓ".
LUK 19:26 "Нынана пŏтәртԓәм, кашәӈ тӑйтаӈ хŏйата мӑты питԓа, ӑт тӑйты ŏт эԓты, мўй тӑйәԓ, щитәԓ нŏх ўԓа;
LUK 19:27 Щи мӑнэм веԓты ŏтԓам пӑ, хŏй, мӑнэма хона уԓтыйа ӑт ԓӑӈхас, тый тўваԓән пӑ, ма ватман, щӑх сэӈкаԓән".
LUK 19:28 Щит йастәмаԓ йўпийән, Иисус йэԓԓы Иерусалим воша нŏх мӑнәс.
LUK 19:29 Хун Ԓўв Виффагия пӑ Вифания кўртӈән ԉэпа, Элеон нэмпи кев пай ԉэпа ванамәс, кӑт утәԓтәты хуйӈәԓаԓ тŏхи китсәԓы,
LUK 19:30 йастәман: "Нын йэԓпанән уԓты кўрта мӑнатән; щи йŏхәттанән, иԓ йӑрәм айкам осёл уйәтԓәтән, ԓўв шӑншәԓа нэмәԓты пŏрайән нэмәԓты хŏйат ӑт опсыԓыйәс; хŏԓт эӈхаԓән пӑ тый ватәԓтаԓән;
LUK 19:31 мӑтты хŏйатән ищмиԓайтән ки: "Мўйа нŏх эхԓәԓән?", ԓўвеԓа щиты йастатән: "Ԓўв Турәм Кущайа мосәԓ".
LUK 19:32 Китәм кӑтӈән мӑтсәӈән пӑ хŏты Ԓўв ԓынана йастәс, щиты уйәтсәԓән.
LUK 19:33 Хун пӑ ԓын айкам осёл хŏԓт эӈхәссәԓән, войәӈ хŏйатԓаԓән ԓын иԋщәссайӈән: "Мўйа осёл пŏшәх нŏх эхсәԓән?"
LUK 19:34 Ԓын йŏхԓы йастәсӈән: "Ԓўв Турәм Кущайа мосәԓ".
LUK 19:35 Щӑԓта ԓўвеԓ Иисус хŏща тусԓән, пӑ, ԓумәтты сŏхԓаԓ вой шӑнша пŏнман, Иисус нŏх ԓэԓтсэԓ.
LUK 19:36 Щӑԓта, хун Ԓўв вой шӑшән мӑнмаԓән, хŏйатәт ԓумтәмԓаԓ йуша ԓэрәпсәԓаԓ.
LUK 19:37 Хун Ԓўв Элеон кев пай эԓты иԓ ŏхәԓты тӑхайа ванамәс, хŏԓ аратәԓ утәԓтәты йохԓаԓ, ԓыв вантәм ар йӑм йурәӈ верԓаԓ урәӈән, амәтман, сыйәӈ тўрән Турәм ишәкты питсэԓ,
LUK 19:38 пŏтәртман: "Йӑмән мийәм Хон, Турәм Куща нэм урәӈән йиты Ŏт! Турәмән пайԓы уԓәпса, пӑ нумән ишәк йасәӈ!"
LUK 19:39 Тухәԓ фарисейәт мир кўт эԓты Ԓўвеԓа йастәсәт: "Утәԓтәты ху! Утәԓтәты йохԓан аԓ эсԓаԓән пŏтәртты!"
LUK 19:40 Туп Ԓўв ԓывиԓаԓа йŏхԓы йастәс: "Нынана пŏтәртԓәм, ԓыв ки нŏх вŏԓыԓәт, кев шупәт ўвты питԓәт".
LUK 19:41 Щӑԓта, хун Иисус Иерусалим ԉэпа ванамәс, вош пеԓа ватман, ԓўв урӈәԓән хоԓԓәты питәс
LUK 19:42 пӑ йастәс: "Йэшәк, тӑм нӑӈ хӑтԓэнән ԓуԓән нӑӈ мŏштәсэн ки, нӑӈ пайԓы уԓәпсайэн шавиты мўй верәтәԓ! Туп щит ин нӑӈ сэмӈиԓан эԓты хӑԋатман уԓԓа,
LUK 19:43 хӑтԓәт йŏхәтԓәт, хун нўрмәԓтты ŏтԓанән нӑӈ, керәтман ԉаԉәсты урәӈән, мўв пайәтән хирԓайән пӑ лӑп ԓӑрәтԓайән, пӑ ар тӑха эԓты йэрмата тӑӈәртԓайән,
LUK 19:44 нӑӈ пӑтэн унты шўкатԓайән, ԋаврэмԓан па нӑӈ ԓыпенән пӑратԓайәт, пӑ нӑӈ ԓыпенән омәсты и хот ӑт хӑщәԓ, мўйа нӑӈ хŏщайэн Турәм йŏхтыԓыйәм пŏра ӑт мŏштәсэн, щи урәӈән!"
LUK 19:45 Турәм хот ԓыпийа ԓŏӈмаԓ кемән, тынасты пӑ ԓутәсты хŏйатәт ким воштәты питсәԓы,
LUK 19:46 ԓывиԓаԓа пŏтәртман: "Хӑшман уԓԓа: "Ма Хотэм – пойәкщәты хот, нын пӑ ԓўвеԓ хорахщет хота версәԓән!"
LUK 19:47 Пӑ кашәӈ хӑтәԓ Ԓўв Турәм Хотән хŏйатәт утәԓтәс. Турма йир верты хŏйатәт ŏх икет пӑ Закона утәԓтәты хŏйатәт пӑ мир хŏща уна уԓты икет Ԓўвеԓ пӑратты урәӈән, пŏра кӑшсәт,
LUK 19:48 пӑ ӑт уйәтсәт, а хŏты Ԓўвеԓ верты; мир, Ԓўвеԓ керәтман, лӑп ԓойман, хуԓәнтәс.
LUK 20:1 Щи хӑтԓәтән и пўш, хун Ԓўв хŏйатәт Турәм Хотән утәԓтәс пӑ Йӑм айкеԓ эԓты сыйәӈа пŏтәртәс, Турма йир верты хŏйатәт ŏх икет пӑ Закона утәԓтәты икет, уна уԓты икет пиԓән Ԓўв хŏщайәԓа вана хӑтсәт
LUK 20:2 пӑ Ԓўвеԓа йастәсәт: "Йаста мўӈева, хŏй партатты щирән Нӑӈ тӑм вер верԓән, ӑнты ки пӑ хŏйән Нӑӈ щи йурән мӑсайән?"
LUK 20:3 Ԓўв ԓывиԓаԓа йŏхԓы йастәс: "Ма па нын эԓтан и вер эԓты ищмәԓәм, Мӑнэма йастаты:
LUK 20:4 Иоанн йиӈка ԓŏӈәԓтыйәпса турәм эԓты ус мўй пӑ хŏйатәт эԓты?"
LUK 20:5 Ԓыв пӑ ԓыв кўтԓаԓән ŏшйащман, пŏтәртсәт: "Йастәԓув ки: 'Турәм эԓты', Ԓўв пӑ йастәԓ: 'Мўйа пӑ ԓўвеԓа ӑт эвәԓсәты?'
LUK 20:6 Йастәԓув ки: 'Хŏйатәт эԓты', хŏйатәтән кевән щӑх сэкԓайув, ԓыв эвәԓԓәт, Иоанн щит Турәм йасәӈ туты хŏйат".
LUK 20:7 Щиты йŏхԓы йастәсәт: "Ӑт уйәтԓэв хŏԓща ус".
LUK 20:8 Иисус йŏхԓы йастәс: "Ма па нынана ӑт йастәԓәм, хŏй партатты щирән щит верԓәм".
LUK 20:9 Щӑԓта Иисус мир пеԓа тӑмәщ утәԓтәты пŏтәр пŏтәртты питәс: "И хŏйат мўв хӑрән виноград йўхәт опсәс пӑ артнайа виноград ԓэвпәс энмәԓтты хŏйатәта мӑсԓы, щӑԓта йӑм хўв кеша хŏԓт мӑнәс.
LUK 20:10 Хун пŏра йŏхтәс, ԓўв митхуйәԓ виноград энмәԓтәм хŏйатәт хŏща китсәԓы, ԓуԓән ԓыв митхуйәԓа виноград йўхәӈ тӑхайәԓ эԓты ԓэвпәс ат мӑсәт; туп виноград энмәԓтты хŏйатәт митху сэксэԓ пӑ таԓты йŏхи китсэԓ.
LUK 20:11 Щӑԓта па митху китәс; туп щи митху па, сэкман, ԋэрман, йŏхԓы таԓты китсэԓ.
LUK 20:12 Хŏԓна па хуԓметәԓ китсәԓы; туп ԓыв щит па, мушмәԓтман, воштәсэԓ.
LUK 20:13 Щиӈәԋща виноград йўхәӈ тӑха куща йастәс: "А мўй мӑнэм верты?" Сӑма мосты ма пŏхем китԓэм; мосәӈ пӑ ԓўвеԓ шийаԓәтэԓ кемән, йэԓәмԓайәт".
LUK 20:14 Туп виноград энмәԓтты хŏйатәт ԓўвеԓ шийаԓәмеԓ кемән, ԓыв кўтэԓән ŏшйащԓәт, пŏтәртԓәт: "Тӑми ащеԓ ŏх вŏԓ; мӑнԓув, веԓԓэв ԓўвеԓ, пӑ ащеԓән хӑйты тащәԓ-вещәԓ мўӈева питәԓ".
LUK 20:15 Щӑԓта, виноград йўхәӈ тӑха эԓты ԓўвеԓ ким тўвман, пӑратсэԓ. Хŏты пӑ ԓывиԓаԓ виноград йўхәӈ тӑха куща верԓәԓы?
LUK 20:16 Ԓўв йŏхәтәԓ пӑ пӑратԓәԓы щи йохԓаԓ, виноград йўхәӈ тӑхайәԓ пӑ па хŏйатәта мӑԓԓы". Щит хуԓәм мŏхет пӑ йастәсәт: "Ӑт ат питәԓ!"
LUK 20:17 Туп Иисус, ԓыв пеԓайэԓ ӑӈкәртман, йастәс: "Тӑм хӑншәм йасәӈ мўй щит: "Кев хот омәсты хŏйатәтән мŏԓтсатәм кев шуп, щит щуӈ хŏща мет мосты кева йис"?
LUK 20:18 Кашәӈ ŏт, хŏй щи кев эԓты рӑкәнәԓ, ай наприйэ шўкаԓәԓ, хŏй эԓты щи кев рӑкәнәԓ, щит пŏԉха йиԓ".
LUK 20:19 Щи пўԉаӈ Турма йир верты хŏйатәт ŏх икет пӑ Закона утәԓтәты икет Ԓўвеԓ кӑтәԓтты ўтщисэԓ, туп хŏйатәт эԓты пӑԓԓысәт, ԓыв ŏша пайәтсэԓ, щи утәԓтәты пŏтәр ԓыв эԓтэԓ пŏтәртәс.
LUK 20:20 Щӑԓта ԓыв, Иисус эԓт ватман тӑйман, ŏщмарәӈ хŏйатәтән китса, йӑм хŏрпийа ԓэщатыман, мӑтты йасәӈ хŏща ԓуԓән Ԓўвеԓ ат мŏщатсэԓ, рим йохәтән пŏнәм сўт верты кущайа мӑты урәӈән.
LUK 20:21 Щӑԓта ԓыв Иисус иԋщәссэԓ: "Утәԓтәты Ху! Мўӈ уйәтԓэв, Нӑӈ вещката пŏтәртԓән пӑ утәԓтәԓән, хŏйат веш пеԓа ӑт ватԓән, туп йӑна Турәм йуш хўват мӑнты щира утәԓтәԓән;
LUK 20:22 мўӈева кесарьа налог мӑты рӑхәԓ мўй ӑнта?"
LUK 20:23 Ԓўв пӑ, ԓыв ŏщмарэԓ мŏштәман, ԓывиԓаԓа йастәс: "Мўйа Мӑнэм хўщԓәԓән?
LUK 20:24 Мӑнэм динарий ŏх этәԓтаты: хŏй хŏр пӑ нэм щита?" Ԓыв йастәсәт: "Кесарь ŏтәт".
LUK 20:25 Иисус ԓывиԓаԓа йастәс: "Кесарь ŏтәт кесарьа мийаԓән, Турәм ŏтәт па Турма мийаԓән".
LUK 20:26 Ԓыв мир йэԓпийән Ԓўвеԓ йŏвра йасәӈ урәӈән мŏщатты ӑт верәтсэԓ, пӑ, Ԓўв йŏхԓы йастәм йасәӈԓаԓ эԓты пакнысыман, шитама йисәт.
LUK 20:27 Щиӈәԋща кӑмәтса Саддукей йŏхтәс, нŏх ԓыԓәӈԓәты вер хŏԓт хуләтты ŏтәт эԓты, пӑ Ԓўвеԓ иԋщәссәԓ:
LUK 20:28 "Утәԓтәты Ху! Моисей мўӈева тӑмәщ йасәӈ хӑншәс: мӑтты, хŏй ими тӑйәм йайәԓ пӑрәԓ ки, пӑ пӑртаԓән ԋаврем ӑт тӑйәԓ, апщеԓа ԓўв имеԓ ўты мосәԓ пӑ йайәԓ ŏх вŏԓ йэԓԓы туты мосәԓ.
LUK 20:29 Ԓапәт йай усәт, оԓәӈ йай, ими тўвман, ԋаврэмԓы пӑрәс;
LUK 20:30 щи нэ оԓәӈ апщеԓән ўса, щӑԓта щитэн ԋаврэмԓы пӑрәс;
LUK 20:31 кимет апщеԓән ўса, и щиты хŏԓ ԓапәт ху, пӑ, ԋаврэм ӑт хӑйман, пӑрсәт;
LUK 20:32 мŏхиԓаԓ йўпийән щи нэ па пӑрәс;
LUK 20:33 йа щӑԓта, нŏх ԓыԓәӈԓәтыйән мӑты ŏтәԓ имийа ԓўв питәԓ, ԓапәт йай хŏԓ ԓўвеԓ нэӈа ўйԓысэԓ?"
LUK 20:34 Иисус ԓывиԓаԓа йŏхԓы йастәс: "Тӑм йис хŏйатәт ими туԓәт па ху сайа мӑнԓәт;
LUK 20:35 Щитәт пӑ, хŏй йиты турәмән уԓты щира пайәтса пӑ пӑрәм эԓты нŏх ԓыԓӈатԓа, нэ туты ӑт питԓәт, ху сайа мӑнты ӑт питԓәт,
LUK 20:36 пӑрты пӑ ӑт верәтԓәт, ԓыв ангеләт хŏрпийа йиԓәт пӑ ԓыв Турәм ԋаврэмәт, Турәмән ԓыв нŏх ԓыԓӈатсайәт.
LUK 20:37 Щи пӑрәм ŏтәт нŏх ԓыԓәӈԓәты вер, Моисейән хŏԓна пеԓантыты варәс пŏхәлән тыйиԓыйәм пищ пŏрайән этәԓтәса, хун Турәм Куща Авраам Турма, Исаак Турма пӑ Иаков Турма нэмәтса.
LUK 20:38 Турәм хŏты ӑнта пӑрәм ŏтәт Турәм, ԓыԓәӈ ŏтәт Турәм, Ԓўвеԓән хŏԓыйэ ԓыԓӈәт".
LUK 20:39 Щи йастәм ŏтәԓ пеԓа тухәԓ Закона утәԓтәты икет йастәсәт: "Утәԓтәты Ху! Нӑӈ йӑма йастәсән".
LUK 20:40 Па мŏԓты оԓәӈ эԓты Ԓўвеԓ иԋщәсты ԓыв ӑт пӑ верәтсәт.
LUK 20:41 Ԓўв пӑ ԓывиԓаԓ эԓты иԋщәсәс: "Хŏты йастәԓәт, Христос щит Давид Пŏх?
LUK 20:42 Давид пӑ Псалмәт нэмпи нэпекән пŏтәртәԓ: "Турәм Куща ма Турәм Кущайэма йастәс: Ма пўӈԓэма йӑм пеләк сӑхат опса,
LUK 20:43 щи унты, хун Ма Нӑӈена нўр верты ŏтԓан кўрԓан иԓпийа иԓ ат пŏнԓәԓам".
LUK 20:44 Йӑ ин, Давид Ԓўвеԓ Турәм Кущайа айәԓԓәԓы; Хŏты сӑхат Христос ԓўвеԓа Пŏха уԓты верәтәԓ?"
LUK 20:45 Щи пŏрайән, хун мир аратәԓән Ԓўвеԓ хуԓәтмаԓән, Ԓўв утәԓтәты йохԓаԓа йастәс:
LUK 20:46 "Закона утәԓтәты йох эԓты хурыйаты, ԓыв хўв сŏхән йӑхты сӑмәӈәт пӑ хŏйатәт ӑктәщиты тӑхайәтән ԓывиԓаԓ мосәԓ иса ўщайән верты, щит пеԓа ԓыв сӑмәӈәт, Турәм йасӈа утәԓтәты хотәтән пӑ поры пӑсан сурыйән ԓыв мет ԓӑтәӈ тӑхайән омәсты сӑмәӈәт,
LUK 20:47 Ԓыв икиԓы хӑщәм имет хот тэԓ вŏԋщала пайәтԓәт пӑ хŏйата вантәԓтәман хўв пойәкщәԓәт; ԓыв мет тарәм сўт ватԓәт!"
LUK 21:1 Иисус, ӑӈкәрмәмаԓән, тащәӈ хŏйатәт мойԓәпсайәт тащ ӑкәтты ԓараща пŏнты вер шийаԓәс;
LUK 21:2 хŏԓна Ԓўв и нўша, икиԓы хӑщәм, ими шийаԓәс, щи ими тŏхи кӑт ԉэпта нэмпи мет ай ŏх картэӈән пŏнәс.
LUK 21:3 Иисус йастәс: "Йӑна нынана пŏтәртԓәм, тӑм нўша ими па хŏйатәт эԓты аршәк пŏнәс.
LUK 21:4 Ԓыв хŏԓ мŏԓтасԓаԓ эԓты Турма мойԓәпса пŏтсәт, ԓўв па нўшайәԓ эԓты, мўй арат тӑйәс, хŏԓ пŏтсәԓы".
LUK 21:5 Щӑԓта, хун тухԓәт Турәм Хот хŏрамәӈ тынәӈ кев пŏталэтән пӑ мойԓәпсайәтән хŏрамтәм эԓты пŏтәртсәт, Ԓўв йастәс:
LUK 21:6 "Хӑтԓәт йŏхәтԓәт, хун, мўй ин тӑта ватԓәты, и кев шўк ӑт хӑщәԓ; иса хŏԓ шўкатԓайәт".
LUK 21:7 Ԓўвеԓ пӑ ищмәсэԓ: "Утәԓтәты Ху! Хун пӑ щит питәԓ? Пӑ мўй сыр пос хўват мŏштәԓэв, хун щит питты верәԓ уԓ?"
LUK 21:8 Ԓўв йастәс: "Хурийаты, аԓт ԓэпәԓԓайты; ар ŏтәт Ма нэмемән йŏхәтԓәт, йастыман: "Щит Ма", пӑ "Щи пŏра ванән": ԓыв йўпиԓаԓән аԓ мӑнаты.
LUK 21:9 Хун ԉаԉәт пӑ ўшмащты верәт эԓты хуԓԓәты, пӑԉщәма аԓ ўйаԓән, тӑм вера оԓәӈән уԓты мосәԓ, туп ӑнта щи пўԉаӈ хŏԓаԓа".
LUK 21:10 Щи пŏрайән ԓывиԓаԓа йастәс: "И сыр мир па сыр мир пеԓа ԉаԉәсты питщәԓ, и хон пеләк кимет хон пеләк пеԓа ԉаԉәсты питщәԓ;
LUK 21:11 ар тӑхайән мўв такан тӑрийты щирәт питԓәт, ԓэԓԓы пŏрайәт, пӑ атәм мушәт питԓәт, пӑ пӑԓщәмәт, пӑ турәм эԓты вŏԓаӈ посәт питԓәт.
LUK 21:12 Щитәт йэԓпийән, нын иԓ катәԓтты питԓайты пӑ ԋўхәтԓыты питԓайты, Турәм йасӈа утәԓтәты хотәта, касна хотәта мӑты питԓайты, хонәта пӑ рим йохәтән пŏнәм кущайәта Ма нэмем урәӈән туты питԓайты;
LUK 21:13 щит нынана Ма эԓтэм вещкат йасәӈ туты вер питәԓ.
LUK 21:14 Щиӈәԋща, сӑмԓәна пŏнаԓән: оԓӈа ӑт мосәԓ нумәсты, мўй щирән йŏхԓы йастәты,
LUK 21:15 Ма нынана щимәщ йасӈәт пӑ ŏш мӑԓәм, нын йэщаԓтән эԓԓәты ŏтԓән йŏхԓы йастәты пӑ йэщаԓт ԓойты ӑт верәтԓәт.
LUK 21:16 Нын хŏԓна ащиԓәнән-аԋԏиԓәнән , йайԓәнән-апщиԓәнән, пӑ па рутԓәнән, пиԓйохԓәнән эԓпа аԉԓайты, пӑ нын эԓтан тухәԓԓән пӑратԓайәт;
LUK 21:17 пӑ Ма нэмем урәӈән хŏйатәтән хŏԓ нын ԉикән этты питԓайты,
LUK 21:18 туп и ŏхсŏхийэ хŏԓна ŏхԓән эԓты ӑт ушәԓ, -
LUK 21:19 верәтты щирԓәнән нын ԓыԓԓән этәԓтаԓән.
LUK 21:20 Хун пӑ Иерусалим вош ԉаԉ йохәтән лӑп кертәм шийаԓәԓты, щи пŏрайән уйтаты, ԓўв таԓа йиты пŏрайәԓ вана йŏхтәс:
LUK 21:21 щи пŏрайән Иудея мўвән уԓты хŏйатәт кев ԓоӈԓа ат хухәԓԓәт; хŏй вошән уԓ, ким ат этәԓ, хŏй вош ԉэпән уԓ, ԓыпийа ӑт ат ԓŏӈәԓ,
LUK 21:22 щит йŏхԓы сŏхәптәты хӑтԓәт, хӑншәм ŏтәт хŏԓ йӑнәмԓәт.
LUK 21:23 Щи имета шук питәԓ, хŏй щи хӑтԓәтән ԋаврэм щирән уԓ пӑ ԋаврэм эсәмән ԓапәтәԓ; вŏԓаӈ шук мўва йŏхәтәԓ, пӑ ун ԉик тӑм мира нумәԓта питәԓ:
LUK 21:24 щӑԓта аԓты кеши йэтәԓ эԓты рыйты питԓәт, мўв ԓŏватән уԓты мирәта ԋӑрэмәман туԓайәт; Иерусалим вош пӑ Турәм ӑт уйәтты па рут мирәтән пурәтты питԓа, пŏрайэԓ хŏԓаты унты.
LUK 21:25 Хӑтәԓ, тыԓәщ пӑ хусәт хŏща Турәм посәт этԓыты питԓәт, мўв хŏща пӑ ар сыр мир туп ӑԓ пакнысыԓәт щарәс сыйащты эԓты пӑ овитаԓ-хўплытаԓ эԓты;
LUK 21:26 пӑԓщәм эԓты пӑ уԓты–омәсты мўва йиты шукәӈ верәт эԓты хŏйатәт рэԋԓы керыԓәт, турәм хусәт, тыԓщәт ԋŏхԓәԓәт.
LUK 21:27 Щӑԓта щи пŏрайән ԓыв Хŏйат Пŏх шийаԓәԓәт, пӑԓәӈән йурәԓ пиԓән пӑ вŏԓаӈ хутԓәты–вŏрԓәты щирәԓән йŏхәтәԓ.
LUK 21:28 Хун пӑ щи верәт йӑнәмты питԓәт, щи пŏрайән нŏх ԓойаты пӑ ŏхԓән нŏх аԓмаԓән, нын хŏԓт пайтәсты верән вана йŏхтәс".
LUK 21:29 Щӑԓта Иисус ԓывиԓаԓа утәԓтәты пŏтәр пŏтәртәс: "Смоква йўх пеԓа пӑ па йўхәт пеԓа ӑӈкәрматы:
LUK 21:30 хун ԓыв шўвԓаԓ пел пўншащтэԓ пŏрайән, щит пеԓа ватман, нын уйәтԓәԓән, йэшавуԓ ԓўӈ пŏра йŏхәтәԓ.
LUK 21:31 И щиты нын па, хун щи питты верәт шийаԓәԓты, уйтаты, Турәм Хон Уԓәпса ванән уԓ.
LUK 21:32 Йӑна нынана пŏтәртԓәм: ин тӑм хŏйат рут хŏԓна ӑт хŏԓаԓ, тӑм иса уԓты питтаԓән;
LUK 21:33 турәм пӑ мўв хŏԓт пеԓа хŏԓаԓәт, Ма йасәӈԓам йурԓаԓ ӑт хŏԓаԓәт.
LUK 21:34 Нынәԓән нын вантаԓән, сӑмԓән, охла-щохла ԓэвман-йищман пӑ тӑйтаӈ уԓәпса эԓты нумәсман, ӑт аԓ ԓавәртамәсайәт пӑ щи хӑтәԓән шӑӈкап ӑт аԓ йŏхәтԓайты,
LUK 21:35 щи хӑтәԓ, мўвән уԓты кашәӈ ŏта, хоԓәп иты, лӑп лопкәԓ.
LUK 21:36 Щиӈәԋща кашәӈ сыс эԓәпән уԓаты пӑ пойәкщаты, ԓуԓән нын щи питты верәт эԓты шаващты пӑ Хŏйат Пŏх йэщаԓт ԓойты ат верәтсәты".
LUK 21:37 Хӑтԓәԓән Ԓўв Турәм Хотән хŏйатәт утәԓтәс, атәтән па, вош ким пелка этман, Элеон нэмпи кев пай ԓоӈәԓән ус.
LUK 21:38 Хŏйатәт хŏԓ аԓәӈсӑхат эԓты Ԓўв хŏщайәԓ Турәм Хота йŏхтыԓысәт, Ԓўвеԓ хуԓәтты.
LUK 22:1 Пасхайа айәԓты, тўтәӈ ԋаԋ йэмәӈ хӑтәԓ ванамәты питәс,
LUK 22:2 щиӈәԋща, Турма йир верты хŏйатәт ŏх икет пӑ Закона утәԓтәты икет ар сыр пищ кӑшсәт, хŏты Иисус пӑратты ԓуԓән, ԓыв мир эԓты пӑԓсәт, щишән.
LUK 22:3 Сатана Иуда ԓыпийа ԓŏӈәс. Ԓўв Искариота нэмәтман уса, Кӑтхŏщйаӈ эԓты ит,
LUK 22:4 Ԓўв щи мӑнәс, пӑ Турма йир верты хŏйатәт ŏх икет пиԓән па Турәм Хот шавиты кущайәт пиԓән пŏтәртәс, хŏты Иисус ԓыв йошԓаԓа мӑты.
LUK 22:5 Ԓыв нŏх амәтсәт пӑ ŏх ԓўвеԓа сŏхәптәты кашащсәт;
LUK 22:6 щӑԓта Иуда аԉты йастантәс пӑ кум кӑшты питәс, хун, хŏйатԓы уԓман, Иисус ԓыв йошԓаԓа мӑты питԓәԓы.
LUK 22:7 Тўтәӈ ԋаԋ йэмәӈ хӑтәԓ йŏхтәс. Щи хӑтәԓән Пасха ош пŏшәх мосәс хŏрты,
LUK 22:8 Иисус Петра па Иоанн китсәԓы, йастәман: "Мӑнатән пӑ Пасха ԓэтŏты пӑсан ԓэщататән, мўӈев ԓэты урәӈән".
LUK 22:9 Ԓын пӑ Ԓўвеԓа йŏхԓы йастәсӈән: "Хŏта минэмәна ԓэщатты партԓән?"
LUK 22:10 Ԓўв пӑ ԓынана йастәс: "Щи, нын воша йŏхәттан пŏрайән, нын хŏщайән йиӈки пўт аԓты хŏйат уйтатәԓ; ԓўв йўпеԓән щи хота мӑнатән, хŏԓта ԓўв ԓŏӈәԓ,
LUK 22:11 щӑԓта хотәӈ кущайа йастәԓтән: "Утәԓтәты Ху нӑӈен иԋщәсәԓ: мойәӈ хŏйат урәӈән уԓты хот йӑтэн хŏта уԓ, хŏта Ма утәԓтәты йохԓам пиԓән Пасха ԓэты ԓуԓән верәтсәм?"
LUK 22:12 Щӑԓта ԓўв нынан ԓӑрпа ԓэрәмтәм нўм хот йӑт аԉәԓ; щита ԓэщататән".
LUK 22:13 Ԓын мӑтсәӈән, щӑԓта хŏты Ԓўв йастәс, щиты уйәтсәԓән, пӑ Пасха лэтŏт ԓэщатсәтән.
LUK 22:14 Щӑԓта, хун пŏра йŏхтәс, Ԓўв пӑ кӑтхŏщйаӈ апостоләт Ԓўв пиԓәԓән пӑсан сурыйа омәссәт,
LUK 22:15 щӑԓта Ԓўв ԓывиԓаԓа йастәс: "Ма, шука питтэм йэԓпийән, тӑм Пасха нын пиԓанән йӑха ԓэты шек ԓӑӈхасайәм,
LUK 22:16 нынана пŏтәртԓәм, па йэԓԓы ԓўвеԓ ԓэты ӑт питԓэм, щи унты, хун ԓўв Турәм Хон Уԓәпсайән ӑт пўншатәԓ".
LUK 22:17 Ан ўйман, Турма пумащипа йасӈәт ԋухәмман, йастәс: "Тӑм ан ўйаԓән пӑ нын кўтәнән ортаԓән,
LUK 22:18 нынана пŏтәрԓәм, тӑм ўш эԓты, Турәм Хон Уԓәпса йŏхәтты унты, ўна йищты ӑт питԓәм".
LUK 22:19 Щӑԓта Ԓўв, ԋаԋ ўйман пӑ Турма пумащипа йасӈәт ԋухәмман, ԋаԋ ара морәтман, утәԓтәты йохԓаԓа мӑсԓы, щиты йастәман: "Тӑм Ма Эԓэм, нын урӈәна пӑратты мӑԓа; тӑмиты, Мӑнэм нумәԓмәты урәӈән, вераты".
LUK 22:20 И щиты анәԓ йэтән ԓэтәт йўпийән ўсԓы, йастәман: "Тӑм ан - йӑԓәп йастантәм щир Ма кӑԓэмән, нын урӈәнән шошәмԓа.
LUK 22:21 Щи хŏйат, хŏй Мӑнэм ӑԉԓәԓы, йошәԓ Ма йошэм пиԓән и пӑсанән ŏԓәԓ;
LUK 22:22 Хŏйат Пŏх пиԓән иса щиты питәԓ, хŏты номәс верман уԓԓа, туп щи хŏйата шук, хŏйән Ԓўв аԉԓа".
LUK 22:23 Щӑԓта ԓыв кўтԓаԓән иԋщәсты питсәт, хŏй ԓыв эԓтэԓ ԓуԓән щиты верты веритәс.
LUK 22:24 Ԓыв кўтэԓән ўрайа хŏйсәт, хŏй ԓыв эԓтэԓ мет ԓӑтәӈа ԓўӈтәсты верәԓ уԓ.
LUK 22:25 Иисус пӑ ԓывиԓаԓа йастәс: "Хонәт мирәт нўмпийән кущайа уԓԓәт, мир кущайәт йӑм мӑты ŏтәта айәԓԓайәт,
LUK 22:26 нын пӑ па щирән уԓаты: хŏй нын эԓтайән уншәк, щит айашәк aт уԓ, пӑ хŏй кущайа уԓ – щит митху иты ат уԓ.
LUK 22:27 Хŏй уншәк: хŏй пӑсан сурыйән омәсәԓ, мўй пӑ хŏй пӑсан ԓэщатәԓ? Ӑнта мўй пӑсан сурыйән омәсты ŏт? Ма пӑ нын кўтәнән пӑсан ԓэщаттыйа уԓԓәм.
LUK 22:28 Туп нын Ма пиԓэмән Мӑнэм артаԓәты верәт хŏща усты.
LUK 22:29 Щишән Ма нынана Хон Уԓәпса мӑԓэм, хŏты Ащем Мӑнэма мӑсԓы,
LUK 22:30 нын Ма пӑсанэм сурыйән Ма Хон Уԓәпсайэм хŏща па ат ԓэсты па ат йищсәты, хон омәсты тӑхайәтән омәсты пӑ Израиль кӑтхŏщйаӈ рут сўтәтты питԓәты".
LUK 22:31 Турәм Куща йастәс: "Симон, Симон! Сатана партәс, мӑтты ки нын ԋаԋ ԓат сэм иты ат пӑркатсайты,
LUK 22:32 туп Ма нӑӈ урӈенән пойәкщәсәм, ԓуԓән нӑӈ эвәԓты верэн ӑт aт уштәсэн; щӑԓта хун нӑӈ Ма пеԓайэм керԓәԓән, йайԓан эвәԓты вер такамты".
LUK 22:33 Петра Ԓўвеԓа йŏхԓы йастәс: "Турәм Куща! Нӑӈ пиԓэнән ма кўш касна хота, кўш сŏрма питты тӑхайа мӑнты верәтԓәм!"
LUK 22:34 Туп Ԓўв йастәс: "Нӑӈена, Петра, пŏтәртԓәм, тӑм ат щищкурэк ўваԓтаԓ унты хŏԓна, нӑӈ Мӑнэм уйәтты верэн хуԓәм пўш лӑп ўратԓэн".
LUK 22:35 Щӑԓта ԓывиԓаԓа йастәс: "Хун Ма нынан тўтхотԓы, хирԓы, кўр ԓумтәм такԓы китыԓысԓам, нын мўй нўшайа питыԓысты?" Ԓыв йŏхԓы йастәсәт: "Нэмәԓты хŏща".
LUK 22:36 Щи йўпийән Иисус ԓывиԓаԓа йастәс: "Ин па, хŏй тўтхот тӑйәԓ ки, пӑтән ўйи, хир ищиты; хŏй ӑт тӑйәԓ ки, ԓумтәмен тыныйи пӑ аԓты кеши ԓута;
LUK 22:37 нынана пŏтәртԓәм: пӑ тӑм хӑншәм ŏт Ма хŏщайэм йэтшәптәты мосәԓ: "Хŏрахщэт пеԓа Ԓўв ԓўӈәтман ус"; Ма йушем щи йэтшәԓ".
LUK 22:38 Утәԓтәты йохԓаԓ йастәсәт: "Турәм Куща! Тӑм, тӑта кӑт аԓты кеши". Ԓўв утәԓтәты йохԓаԓа йастәс: "Мета".
LUK 22:39 Вŏш эԓты ким этмаԓ кемән, Ԓўв, уԓԓытаԓ иты, Элеон нэмпи кев пай ԓоӈԓа хухты мӑнәс; утәԓтәты йохԓаԓ Ԓўв йўпеԓән мӑтсәт.
LUK 22:40 Тŏхи йŏхәтмеԓ кемән, Иисус ԓывиԓаԓа йастәс: "Пойәкщаты, атәм хўщәпсайа ԓуԓән ӑт aт питсәты".
LUK 22:41 Щӑԓта Ԓўв ԓыв эԓтыԓаԓ йэԓшәк, кев шук йўвәтты хўват кема, мӑнәс пӑ шанша ԓойман, пойәкщәс,
LUK 22:42 пŏтәртман: "Турәм Ащи! Нӑӈ щи анэн Ма эԓтэм пўӈәԓта туты ԓӑӈхасән ки! Туп ӑнта Ма ԓӑӈхаты верэм щирән, Нӑӈ ԓӑӈхаты верэн щирән ат питәԓ".
LUK 22:43 Щиӈәԋща Ангел турәм эԓты Ԓўв хŏщайәԓа сэма этәс пӑ Ԓўвеԓ такмәԓтсәԓы.
LUK 22:44 Нŏпсәԓ ԓыпийән шукащман уԓман, таканшәк пойәкщәс, пӑ Ԓўв мўва посыты шӑкйиӈкәԓ ўр сэм хŏрпи ус.
LUK 22:45 Пойәкщәты йэтшәмаԓ кемән, Ԓўв нŏх ԓойәс пӑ утәԓтәты йохԓаԓ хŏща йŏхтәс. Пӑ ԓывиԓаԓ шук эԓты иԓ вŏйәмтәма уйәтсәԓы,
LUK 22:46 пӑ ԓывиԓаԓа йастәс: "Мўйа нын ŏԓԓәты? Нŏх киԓаты пӑ пойәкщаты, ԓуԓән атәм хўщәпсайа ӑт aт питсәты!"
LUK 22:47 Хун Ԓўв хŏԓна щит пŏтәртәс, ар хŏйат йэщаԓт этәс, мир йэԓпийән кӑтхŏщйаӈ утәԓтәты ху кўт эԓты уԓты Иуда нэмпи ху, шушәс. Ԓўв Иисус хŏща вана йŏхтәс, Ԓўвеԓ мосәԓтәты урәӈән. Иуда ԓывиԓаԓа щимәщ пос аԉәс: "Хŏй ма мосәԓтәԓэм, Щит щи уԓ".
LUK 22:48 Иисус пӑ ԓўвеԓа йастәс: "Иуда, мосәԓтәман мўй, Хŏйат Пŏх эԓпа аԉԓән?"
LUK 22:49 Иисус пиԓән уԓәм ŏтәт, йэԓԓы тыйты вер мŏштәман, Ԓўвеԓа йастәсәт: "Турәм Куща, аԓты кешийән кўтәртԓув?"
LUK 22:50 Щӑԓта ԓыв эԓтайэԓ ит Турма йир верты хŏйатәт ŏх ики митху аԓты кешийән рэскәсԓы пӑ ԓўв йӑм пеләк пӑԓәԓ хŏԓт тўвемәсԓы.
LUK 22:51 Щи пўԉаӈ Иисус йастәс: "Хӑйаԓән, мета". Пӑ митху пӑԓа хӑнәмтыман, ԓўвеԓ йӑмәԓтэмәсԓы.
LUK 22:52 Иисус Ԓўвеԓ ԋӑрэмәты ӑктәщәм Турма йир верты хŏйатәт ŏх икета пӑ Турәм Хот шавиты кущайәта пӑ уна уԓты икета, йастәс: "Ищи мӑтты нын хорахщи йэщаԓт аԓты кешэӈ пӑ йущәӈ йўхи тэԓән этсәты, Мӑнэм ўты урәӈән.
LUK 22:53 Кашәӈ хӑтәԓ Ма нын пиԓәнән Турәм Хотән уԓԓысәм, нын Ма пеԓайэм йош нŏх ӑт аԓмиԓысты, ин пӑ нын пŏрайән пӑ хиԋ йура уԓ".
LUK 22:54 Щи кемән ԓыв Иисус кӑтԓәпсэԓ пӑ Турма йир верты хŏйатәт ŏх ху хота тусэԓ. Петра пӑ йэԓташәк шушәс.
LUK 22:55 Хун ԓыв ов йэԓпи хӑр кўтәпән рат версәт пӑ йӑха омәссәт, Петра па ԓыв кўтэԓа опсәс.
LUK 22:56 И митнэ, ԓўвеԓ тўт пўӈәԓән омәстаԓ шийаԓәс пӑ тŏрԓы ԓўв пеԓайәԓ ватман, йастәс: "Тӑми па Ԓўв пиԓәԓән ус!"
LUK 22:57 Туп Петра Ԓўв эԓтэԓ пўӈԓа уратәс, митнэӈа щиты йастәман: "Ма Ԓўвеԓ ӑт уйәтԓэм".
LUK 22:58 Йухәт йэшавәԓ кимет хŏйат, ԓўвеԓ шийаԓәмаԓ кемән, па йастәс: "Нӑӈ па ԓыв эԓтэԓ". Петра щи хŏйата йастәс: "Ӑнта!"
LUK 22:59 Щос кем сыс мӑнмаԓ йўпийән, хŏԓна па ху па хӑрщийа пŏтәртәс: "Йӑна щи, тӑмен ищи Ԓўв пиԓәԓән ус, ԓўв Галилея мўв эԓты".
LUK 22:60 Петра па щи хŏйата йастәс: "Ӑт уйәтԓэм, мўй эԓты нӑӈ пŏтәртԓән!" Щи кумат, хун ԓўв хŏԓна пŏтәртәс, щищкурэк щи ўваԓтәс.
LUK 22:61 Щи пŏрайән Турәм Куща, йŏхԓы карэмәман, Петра пеԓа ӑӈкәрмәс. Петра щиӈәԋща Турәм Куща йасӈәт нумәԓмәсԓы, хŏты Ԓўв ԓўвеԓа йастәс: "Щищкурэк ўваԓтты йэԓпийән, нӑӈ Мӑнэм уйәтты верен хуԓәм пўш лӑп ўратысэн".
LUK 22:62 Щӑԓта, ким этмаԓ кемән, шук щирән хŏԓԓаԓтәс.
LUK 22:63 Иисус, Ԓўвеԓ кӑтәԓты хŏйатәтән, кӑмән щирән Ԓўв нухсәса пӑ сэкса;
LUK 22:64 щӑԓта, ԓыв Ԓўв сэмӈиԓаԓ лӑп йӑрыԓысԓаԓ, вешәԓ эԓты Ԓўвеԓ рэскиԓысэԓ пӑ иԋщәсысэԓ: "Нӑӈ Турәм йасәӈ туты хŏйат, йаста, хŏйән рэскәсайән?"
LUK 22:65 Па ар сыр атәм йасәӈ Ԓўв пеԓайәԓ йастәсәт.
LUK 22:66 Туп аԓәӈ сӑхата йис, уна уԓты икет, Турма йир верты хŏйатәт ŏх икет пӑ Закона утәԓтәты йох йӑха ӑктәщсәт, пӑ ԓыв синедрионэԓа Ԓўвеԓ ԓŏӈәԓтсэԓ
LUK 22:67 пӑ йастәсәт: "Нӑӈ мўй Христос? Мўӈева йасты". Иисус ԓывиԓаԓа йастәс: "Нынана йастәԓэм ки, нын ӑт эвәԓԓәты;
LUK 22:68 нынан ищмәԓәм кепа, Мӑнэма йŏхԓы ӑт йастәԓты пӑ Мӑнэм хŏԓт ӑт эсәԓԓәԓән.
LUK 22:69 Тӑԓта йэԓԓы Хŏйат Пŏх иса йурәӈ Турәм йӑм пеләк сӑхат омәсәԓ".
LUK 22:70 Щӑԓта хŏԓ йастәсәт: "Щишән Нӑӈ Турәм Пŏх?" Ԓўв йŏхԓы ԓывиԓаԓа йастәс: "Нын пŏтәрԓәты, Ма уԓԓәм".
LUK 22:71 Ԓыв пӑ йастәсәт: "Мўй сыр аԉәпса мўӈева хŏԓна мосәԓ? Мўӈ Ԓўв ўӈԓәԓ эԓты щи щит хуԓсув".
LUK 23:1 Щи арат хŏйат хŏԓыйэ нŏх ԓойсәт пӑ Ԓўвеԓ Пилат хŏща тусэԓ,
LUK 23:2 щӑԓта Ԓўвеԓ нўрмәԓтты питсэԓ, пŏтәртԓәт: "Мўӈ мŏштәсэв, тӑм Ху мирэв йŏвра хўщԓәԓы пӑ, кесарьа налог мӑты ӑт эсәԓԓәԓы, Ԓўвеԓ Христос Хона айәԓԓәԓы!"
LUK 23:3 Пилатән Ԓўв иԋщәсса: "Нӑӈ Иудейәт Хон?" Иисус ԓўвеԓа йŏхԓы йастәс: "Нӑӈ щиты йастәԓән".
LUK 23:4 Пилат Турма йир верты хŏйатәт ŏх икета пӑ мир пеԓа йастәс: "Ма нэмәԓты нўр тӑм хŏйат хŏща ӑт уйәтԓәм".
LUK 23:5 Туп ԓыв ўрайԓаԓ нŏх пайәтԓыԓаԓ, пŏтәртман, мӑтты ки Ԓўв Иудея ԓŏватән, Галилея эԓты ўйман тӑм вош унты, мир утәԓтыман, йэшащты хўщԓәԓы.
LUK 23:6 Пилат Галилея эԓты хуԓмаԓ кемән, ищмәс: "Ԓўв мўй Галилея мўв ху?"
LUK 23:7 Щӑԓта, Ԓўв Ирод хон мўв эԓты уԓтаԓ ŏша пайәтмаԓ кемән, Ԓўвеԓ Ирод хŏща китсәԓы. Ирод щи хӑтԓәтән ищи Иерусалим вошән ус.
LUK 23:8 Ирод Иисус шийаԓәмаԓ кемән, нŏх амтәс, ԓўв Иисус хўвән ватты ԓӑӈхаса, Ԓўв эԓтайәԓ ар хуԓԓыйәс, щишән. Щӑԓта пӑ мӑтты пищ Ԓўв эԓтэԓ шийаԓәты нумәсыйәс,
LUK 23:9 пӑ Ԓўвеԓ арсыр вер эԓты иԋщәссәԓы, туп Иисус ԓўвеԓа нэмәԓты ӑт йастәс.
LUK 23:10 Турма йир верты хŏйатәт ŏх икет пӑ щӑԓта Закона утәԓтәты йох ванән ԓойсәт пӑ Ԓўвеԓ шек нўрисэԓ.
LUK 23:11 Ирод соԓтанԓаԓ пиԓән Ԓўвеԓ иԓ ԋэрмаԓ пӑ ԋӑха ԋӑхмаԓ йўпийән, хон сŏха Ԓўвеԓ ԓумәттәсԓы пӑ йŏхԓы Пилат хŏща китсәԓы.
LUK 23:12 Щӑԓта, Ирод пӑ Пилат йэԓпи ԓын кўтәнән кўтәӈа усӈән, щи хӑтәԓән пӑ ԓухса верәссәӈән.
LUK 23:13 Пилат пӑ, Турма йир верты хŏйатәт ŏх икет, кущайәт пӑ мир ӑкәтмаԓ,
LUK 23:14 ԓывиԓаԓа йастәс: "Нын ма хŏщайэма тӑм хŏйат, мир йŏвра хўщты ŏт йўкана, тусԓән; тӑта щи, ма нын уԓман ԓэрапсэм пӑ тӑм хŏйат, нын Ԓўвеԓ нўрмәԓтан щирән, нэмәԓты хŏща нўрәӈа уԓтаԓ ӑт уйәтсэм.
LUK 23:15 Ирод ики ищи, ма Иисус ԓўв хŏщайәԓ китыԓысэм; сŏрәм кеша, нэмәԓты верәм вер Ԓўв хŏщайәԓ ӑт уйәтса;
LUK 23:16 щишән, хомщийән сэкты йўпийән, ма Ԓўвеԓ эсәԓԓэм".
LUK 23:17 Пилата, йэмәӈ хӑтәԓ урәӈән, ԓывиԓаԓа касна хот эԓты и хŏйат эсәԓты мосәс.
LUK 23:18 Туп ԓыв аратэԓән хŏԓыйэ и тўрән ўвты питсәт: "Щитэн ўйи, мўӈева Варавва эсԓы!"
LUK 23:19 Варавва, хŏйатәт пиԓән вошәӈ мир пеԓа йэшащман уԓмаԓ урәӈән пӑ веԓтатмаԓ урәӈән, касна хота омәсман уса.
LUK 23:20 Туп Пилат, Иисус хŏԓт эсәԓты ўтщисԓы, пӑ ипуш па ԓывиԓаԓа такан йастәс.
LUK 23:21 Ԓыв туп ўвсәт: "Пернайа сэӈки! Пернайа Ԓўвеԓ сэӈки!"
LUK 23:22 Пилат хуԓмет пўш ԓывиԓаԓа йастәс: "Мўйсыр атәм вер Ԓўв верәс? Сŏрәм кеша, ма нэмәԓты атәм вер Ԓўв хŏщайәԓ ӑт уйәтсәм; щишән, хомщийән сэкты йўпийән, Ԓўвеԓ эсәԓԓэм".
LUK 23:23 Туп ԓыв, такан ўвман сурман, партсәт, Иисус пернайа ат сэкса; ԓыв пӑ Турма йир верты хŏйатәт ŏх икет ўв сыйэԓ нŏх питәс.
LUK 23:24 Щӑԓта Пилат, хŏты ԓыв ԓӑӈхасәт, щиты кашащәс;
LUK 23:25 ԓўв щит ким эсԓәс, хŏй ԓыв вохсәт, щит, хŏй, йэшащәм пӑ веԓтантәм вер урәӈән, касна хотән ус, Иисус пӑ ԓыв ԓӑӈхатэԓ щира мӑсԓы.
LUK 23:26 Хун Ԓўвеԓ туты питсэԓ, мўв хӑрәԓ эԓты шушәм Симон, Киринея мўвәӈ ики, пӑтән хŏрэмәса; ԓўв порхәԓа перна шуп пŏтса, Иисус йўпийән ат тусԓы.
LUK 23:27 Ԓўв йўпеԓән щи арат ар мир шушәс пӑ щи кўтән нэӈәт Ԓўв урӈәԓән такан хоԓԓәсәт пӑ йирӈәԓтысәт.
LUK 23:28 Ԓыв пеԓайэԓ керԓәман, Иисус йастәс: "Иерусалим эвет, Ма урӈемән аԓ хŏԓԓаты, нын урӈәнән пӑ нын ԋавремԓән урәӈән хоԓԓаты,
LUK 23:29 хӑтԓәт щи йŏхәтԓәт, хун йастәԓа: "Ԋаврэмән ӑт партәм нэӈәт, пӑ ԋаврем хŏԓна ӑт тайәм нэӈәт, пӑ эсәмән ӑт ԓаптыԓыйәм нэӈәт ŏй тӑйԓәт!"
LUK 23:30 Щи пŏрайән кев пайәта йастәты питԓа: "Мўӈ эԓтэв ӑркәмтаты!" пӑ сӑхмәта: "Мўӈев эԓт лаӈкаԓән!"
LUK 23:31 Вŏсты лыптәӈ йўх щиты ки верԓа, сорәм йўх пӑ мўй тӑйәԓ?"
LUK 23:32 Ԓўв пиԓәԓән пӑрты тӑхайа хŏԓна кӑт хорахщи туса.
LUK 23:33 Пӑ хун "Ŏх ԓŏв" нэмпи тӑхайа йŏхәтсәт, щита Ԓўвеԓ пернайа сэксэԓ, хŏрахщэӈән па, итәԓ йӑм пеләк сӑхат, киметәԓ пӑрта пеләк сӑхат.
LUK 23:34 Иисус пӑ пŏтәртәс: "Ащи, ԓывиԓаԓ нўра аԓ ўйи, мўй верԓәт, ӑт уйәтԓәт". Пос вŏщкиман, Ԓўв сŏхԓаԓ ортԓысԓаԓ.
LUK 23:35 Хŏйатәт ԓойсәт пӑ ватсәт. Ԓыв пиԓԓаԓән кущайәт па хўләщсәт, пŏтәртман: "Па хŏйатәт нŏх пайтыԓыйәс; Ԓўв Христос, Турәм пирыйәм Ŏт ки, Ԓўвеԓ Ԓўв нŏх aт пайәтԓәԓы".
LUK 23:36 Ԉаԉ йох ищиты Ԓўв эԓтайәԓ, вана хӑтыԓыман, вŏщрем ўна ўӈԓәԓа тутԓыман, хўләщсәт
LUK 23:37 пӑ пŏтәртсәт: "Нӑӈ - Иудейәт Хон ки, Нӑӈен Нӑӈ нŏх пайты!"
LUK 23:38 Ԓўв нўмпеԓән грек, рим пӑ еврей йасӈәтән хӑшман уса: "Тӑми - Иудейәт Хон".
LUK 23:39 Пернайа сэӈкәм и хорахщи, ԉикащман, Ԓўв пеԓайәԓ пŏтәртәс: "Нӑӈ Христос ки, Нӑӈен нŏх пайты, пӑ мўӈев па!"
LUK 23:40 Киметәԓ пӑ, ԓўвеԓ нŏх вŏԓәтԓәԓы, йастыйәԓ: "Турәм эԓты мўй нӑӈ ӑт пӑԓԓән, хун нӑӈ па щиты сўтәтман ӑт уԓԓайән?
LUK 23:41 Мин хŏты вещката сутәтсаймән, мин верԓәмән хўват мŏщатсәмән. Ԓўв пӑ нэмәԓты атәм ӑт верәс".
LUK 23:42 Щӑԓта Иисуса йастәс: "Мӑнэм нумәԓмийэ, Турәм Куща, хун Нӑӈ Хон Уԓәпсайэна йŏхәтԓән!"
LUK 23:43 Иисус ԓўвеԓа йастәс: "Йӑна нӑӈена йастәԓәм, тӑмхӑтәԓ щи Ма пиԓэмән ŏйәӈ-щўԋәӈ тӑхайән уԓты питԓән".
LUK 23:44 Хӑтәԓ хутмет щос ԉэп ус, мўв ԓŏватән йӑрәԏйаӈ щос унты пӑтлама йис:
LUK 23:45 щиӈәԋща най хурԓәс, пӑ Турәм Хот ԓыпийән йэртэп сŏх кўтԓәпәԓ эԓты кӑтна тŏхнәмтәс.
LUK 23:46 Иисус, сыйәӈ тўрән ўваԓман, йастәс: "Ащи! Нӑӈ йошӈиԓана Ма ԓыԓэм мӑԓэм". Щиӈәԋща, щит йастәман, ԓыԓәԓ эсәԓсәԓы.
LUK 23:47 Сот ԉаԉ йох ŏх ху пӑ, щи тыйәм вер пеԓа ватмаԓ эԓты, Турәм ишәксәԓы пӑ йастәс: "Йӑна пӑ тӑм хŏйат тўӈа–щира хŏйат уԓмаԓ".
LUK 23:48 Щит ватты йŏхтәм мир хŏԓыйэ, тыйәм вер пеԓа ватман, мевәԓаԓ эԓты ԓывиԓаԓ ԓыв сэкман, йŏхԓы мӑтсәт.
LUK 23:49 Хŏԓыйэ, Иисус уйтәм мŏхет, пӑ Галилея эԓты Ԓўв йўпеԓән йўвәм нэӈәт йэԓәншәк ԓойсәт пӑ щийэԓ ватсәт.
LUK 23:50 Ӑктәщиты хŏйатәт кўтән Иосиф нэмпи ики ус. Ԓўв сӑмәӈ пӑ вещкат ус.
LUK 23:51 Ӑктәщиты тӑхайән хŏйатәт пиԓән ӑт кашащәс, ԓыв верэԓ хŏща ӑт ус; Ԓўв Иудеяйән уԓты Аримафея вошәӈ ху, Турәм Хон Уԓәпса ищи ԓавәԓман ус.
LUK 23:52 Пилат хŏща йŏхтәс пӑ Иисус мотавтәԓ вохсәԓы;
LUK 23:53 щӑԓта перна эԓты ԓўвеԓ иԓ ўйман, щи кеша уԓты пуԓән щӑшканән йŏвәрмәсԓы пӑ кев пай ԓыпийән хот йӑт ԓŏват сэврәм тӑхайа пŏтсәԓы. Щи тӑхайа хŏԓна нэмәԓт хŏйат пŏнман ӑт уса.
LUK 23:54 Щит шаббат хӑтԓа ԓэщатыты пŏра ус, пӑ щи хӑтԓа йиты щи питәс.
LUK 23:55 Иисус пиԓән Галилея эԓты йŏхтәм нэӈәт па Иосиф йўпийән шушсәт пӑ ӑпа пŏнты кев хот ватсэԓ пӑ хŏты Ԓўв мотавтәԓ пŏнман уса ищи;
LUK 23:56 воша йŏхәтмеԓән йӑм эпԓәӈ йик пӑ миро вŏй ԓэщатсәт. Шаббат хӑтәԓән Турәм партәпса йасәӈ щирән ԓыв щутщәман усәт.
LUK 24:1 Ԓапәт ŏх хӑтәԓән, шек аԓәӈ, нэӈәт ԓэщатәм йӑм эпԓәӈ йикԓаԓ тўвман, Иисус пŏнәм тӑхайа мӑтсәт; ԓыв пиԓэԓән йӑха тухәԓ мŏхет па мӑтсәт;
LUK 24:2 туп ов кев шупәԓ, пўӈԓа хӑтәԓтәма уйәтсэԓ.
LUK 24:3 Щӑԓта, ԓыпийа ԓŏӈмеԓән, ԓыв Иисус, Турәм Куща, мотавтәԓ щита ӑт уйәтсэԓ.
LUK 24:4 Хун ԓыв щит эԓты шоптамәман ԓойтэԓ сӑхат, и мŏԓтыйән, имет йэԓпийән вŏԉиты сŏхәӈ кӑт хуйӈән этсәӈән.
LUK 24:5 Щӑԓта, хун ԓыв пӑԓтамәсәт пӑ шанша хŏмта керәптысәт, ԓывиԓаԓа йастәсӈән: "Мўйа нын ԓыԓәӈ Ŏт пӑрәм ŏтәт кўтән кӑшԓәԓән?
LUK 24:6 Ԓўв тӑта ӑнтом: Ԓўв нŏх ԓыԓәӈԓәс; нумәԓмаԓән, хун Ԓўв хŏԓна Галилея мўвән уԓмаԓән, нынана йастыԓыйәс:
LUK 24:7 "Хŏйат Пŏх кӑрэкәӈ хŏйатәт йоша мӑты вер уԓ, щӑԓта пернайа сэкты вер уԓ, пӑ хуԓмет хӑтәԓән нŏх ԓыԓәӈԓәты верәԓ уԓ".
LUK 24:8 Щӑԓта Ԓўв йастәм йасәӈԓаԓ ԓыв нумәԓмәсԓаԓ.
LUK 24:9 Пŏнәм тӑхайэԓ эԓты йŏхԓы йŏхәтмеԓән, ихŏщйаӈ утәԓтәты йохԓаԓа пӑ па хŏйатәта вантәм вер эԓты пŏтәртсәт.
LUK 24:10 Щит Магдалинайа айәԓтты Мария, Иоанна, пӑ Иаков аԋԏи - Мария, пӑ ԓыв пиԓэԓән па имет усәт, хŏйтат апостолԓаԓа щи оԓәӈ эԓты йастәсәт.
LUK 24:11 Щӑԓта утәԓтәты йŏхәта ԓыв йасәӈԓаԓ ӑԓ мŏԓтыйа усәт, пӑ ԓыв нэӈәта ӑт эвәԓсәт.
LUK 24:12 Туп Петра, нŏх ԓойәс пӑ пŏнәм тӑхайа хухәԓмәс. Тŏхи йŏхәтмаԓән, ԓыпийа ӑӈкәрмәс пӑ щита туп пуԓән щӑщканәт ŏԓтаԓ шийаԓәс. Ԓўв нŏпсәԓән пакнысыман, йŏхԓы керԓәс.
LUK 24:13 И щи хӑтәԓән ԓыв эԓтайэԓ кӑт утәԓтәты ху Эммаус курта шушсәӈән. Щи курта Иерусалим вош эԓты кӑт щос кем кўрән шушты хўват ус;
LUK 24:14 пӑ ԓын кўтәнән иса щи верәт эԓты пŏтәртсәӈән.
LUK 24:15 Пӑ хун ԓын кўтәнән пŏтәртсәӈән пӑ ŏшйащсәӈән, пӑ Иисус Ԓўв ԓынан эԓт йŏхәтман, ԓын пиԓәнән йэԓԓы мӑнәс.
LUK 24:16 Туп ԓын сэмӈиԓән катәԓман усайтән, пӑ ԓын Ԓўвеԓ ӑт уйәтсәԓән.
LUK 24:17 Ԓўв пӑ ԓынан ищмәсԓы: "Мўй эԓты нын кўтәнән шушман пŏтәрԓәтән, мўй урәӈән нын рўтаԉӈән?"
LUK 24:18 Итәԓ, Клеопа нэмпи хŏйатәԓ, Ԓўвеԓа йастәс: "Пӑрмŏԓтты Нӑӈ туп утща, Иерусалим воша йŏхтәм хŏйатәт эԓты, ӑт уйәтԓән тӑм хӑтԓәтән щита тыйәм вер эԓты?"
LUK 24:19 Щӑԓта Ԓўв ԓынан ищмәсԓы: "Мўй эԓты?" Ԓын Ԓўвеԓа пŏтәртсәԓән: "Назарет эԓты уԓты Иисус пиԓән мўй ус, Турәм йасәӈ туты хŏйата ус, верән пӑ йасәӈән Турәм хŏща, аратәԓ мир хŏща йурәӈ ус.
LUK 24:20 Турма йир верты хŏйатәт ŏх икԓувән пӑ кущайԓувән Ԓўв сŏрма пайәтты мӑсэԓ пӑ пернайа Ԓўвеԓ сэксэԓ.
LUK 24:21 Мўӈ пӑ нŏмәс пŏныԓысув, Ԓўв Щит, Хŏй Израиль хŏԓт пайәтты верәԓ уԓ; туп щи ар вер тыймаԓ, ин хуԓмет хӑтԓәԓ.
LUK 24:22 Мўӈ нэԓув эԓты тухәԓаԓ па мўӈев пакнәптысэԓ: ԓыв пŏнәм лотәԓән аԓәӈ сӑхат аԓәӈ усәт
LUK 24:23 пӑ Ԓўв мотавтәԓ щита ӑт уйәтсэԓ, йŏхԓы йŏхәтсәт пӑ пŏтәртсәт, мӑтты ԓыв ангелӈән этԓыйәм вер па ватмеԓ пӑ щитӈән пŏтәртан, мӑтты Ԓўв ԓыԓәӈ.
LUK 24:24 Щӑԓта мўӈ эԓтэв тухԓәт ищи пŏнәм лотәԓа мӑтсәт пӑ щиты уйәтсэԓ, хŏты нэӈәт йастыԓысәт, туп Ԓўвеԓ ӑт ватсэԓ".
LUK 24:25 Щиӈәԋща Иисус ԓынана йастәс: "Нын ŏшԓы пӑ ром сӑмпи ŏтәт, нынана щи ԓавәрт Турәм йасәӈ туты икет аԉәм верәта эвәԓты!
LUK 24:26 Христоса мўй ӑнта щиты шук туты мосәс пӑ Ԓўв хутԓәты–вŏрԓәты щирәԓа ԓŏӈты?"
LUK 24:27 Щӑԓта, Моисей пӑ хŏԓ Турәм йасәӈ туты икет эԓты питщәман, ԓынана, мўй Ԓўв эԓтэԓ иса Йэмәӈ Нэпекән хӑшман уԓԓа, Ԓўв ԓэра верԓәԓы.
LUK 24:28 Щиты ԓыв щи куртэԓа ванамәсәт, хŏԓта шушсәт; щӑԓта Иисус йэԓԓы мӑнты ԓӑӈхаты щир верәс.
LUK 24:29 Туп ԓын Ԓўвеԓ иԓ вŏԓәтԓәԓән, пŏтәртман: "Мин пиԓэмән хӑща, хӑтәԓ йэтән пеԓа мӑнты питәс". Щӑԓта Ԓўв хота ԓŏӈәс пӑ ԓын пиԓәнән хӑщәс.
LUK 24:30 Пӑ хун Ԓўв ԓын пиԓәнән пӑсан сурыйән омәсмаԓән, ԋаԋ ўйман, Турма пумащипа йасӈәт йастәс, ԋаԋ морәтсәԓы пӑ ԓынана мӑсԓы.
LUK 24:31 Щи пŏрайән веԉщи ԓын сэмӈиԓән пелки пуншащсәӈән, пӑ ԓын Ԓўвеԓ мŏштәсԓән. Туп Ԓўв ԓынана ӑт ныты питса.
LUK 24:32 Ԓын кўтәнән йастәсӈән: "Мин сӑмԓәмән мўй ӑт щарисӈән, хун Ԓўв йушән минэмәна пŏтәртәс пӑ хун Йэмәӈ Нэпек йасӈәт минэмәна ԓэра верәс?"
LUK 24:33 Ищи мŏхты ԓын нŏх ԓойсәӈән пӑ Иерусалим воша йŏхԓы керԓәсӈән, щита ԓын ихŏщйаӈ йӑха ӑктәщәм апостол уйәтсәԓән пӑ ԓыв пиԓԓаԓән уԓәм мŏхет па.
LUK 24:34 Ԓыв пŏтәртсәт, мӑтты Турәм Куща йӑна нŏх ԓыԓәӈԓәс пӑ Симон хŏща этәс.
LUK 24:35 Щӑԓта ԓын йушән тыйәм вер эԓты пŏтәртсәӈән, пӑ хŏты ԓын Ԓўвеԓ ԋаԋ морәтмаԓ хўват мŏштәсԓән.
LUK 24:36 Хун ԓын щи оԓәӈ эԓты пŏтәртсәт, Иисус Ԓўв ԓыв кўтэԓән этәс пӑ ԓывиԓаԓа йастәс: "Йӑм уԓәпса нынана".
LUK 24:37 Ԓыв, ԓыԓэмәман пӑ пӑԓтамәман, нумәссәт, иԓампа сэмсай ŏт ватԓәт.
LUK 24:38 Туп Ԓўв ԓывиԓаԓа йастәс: "Мўйа нын щиты ԓыԓэмәсты? Пӑ мўй урәӈән нын сӑмԓәна щимәщ нŏпсәт ԓŏӈԓәт?
LUK 24:39 Йошԓам–кўрԓам пеԓа ӑӈкәрматы; тӑм иса Ма. Ма хŏщайэма хӑнәмтыйаты пӑ вантыйаԓән; сэмсай ŏт эԓ–ԋŏхи пӑ ԓŏв ӑт тӑйәԓ, хŏты нын Ма хŏщайэм ваттанән".
LUK 24:40 Щит йастәман, Ԓўв йошӈәԓаԓ пӑ кўрӈәԓаԓ ԓывиԓаԓа этәԓтәсԓы.
LUK 24:41 Хун ԓыв амәтмеԓ рўвән хŏԓна ӑт эвәԓсәт пӑ ӑԓ пакнысысәт, Ԓўв ԓывиԓаԓ ищмәсԓы: "Мŏԓты ԓэтәт нын тӑта ӑт тӑйԓәты?"
LUK 24:42 Ԓыв Ԓўвеԓа сӑӈхәртәм хўԓ шуп пӑ мав мӑсәт.
LUK 24:43 Щӑԓта ўсԓы пӑ, ԓыв ватман, ԓэсԓы.
LUK 24:44 Пӑ ԓывиԓаԓа йастәс: "Тӑм щит, мўй эԓты Ма нынана пŏтәртысәм, хун нын пиԓәнән уԓмемән, иса щит питты верәԓ уԓ, мўй Ма эԓтэм Моисей Закон йасӈәт хŏща, Турәм йасәӈ туты хŏйатәт хŏща пӑ Псалмәт хŏща хӑшман уԓԓа".
LUK 24:45 Щиӈәԋща Ԓўв, Йэмәӈ Нэпек йасӈәт мŏштәты урәӈән, ԓыв ŏшԓаԓ пел пайәтсәԓы.
LUK 24:46 Щӑԓта ԓывиԓаԓа йастәс: "Щиты хӑшман уԓԓа, пӑ щиты Христоса шук туты мосәс, пӑ пӑрәм эԓты хуԓмет хӑтәԓән нŏх ԓыԓәӈԓәты мосәс,
LUK 24:47 Ԓўв нэмәԓән мирәта хŏԓ, Иерусалим вош эԓты питщәман, кӑрэк эԓты шӑшән керԓәты пӑ йŏрэмәты щир сыйәӈа пŏтәртты мосәԓ.
LUK 24:48 Нын пӑ иса щи верәт вантәм хŏйатәта уԓты питԓәты.
LUK 24:49 Щӑԓта Ма Ащем аԉәм ŏт нынана китԓәм; нын пӑ нумәԓта йурән йохәттан унты, Иерусалим вошән хӑщаты.
LUK 24:50 Иисус утәԓтәты йохԓаԓ вош эԓты ким, Вифания унты тусԓы, щӑлта йошԓаԓ нŏх аԓәмман, ԓывиԓаԓ йӑмән мӑсԓы,
LUK 24:51 пӑ, хун ԓывиԓаԓ йӑмән миймаԓ сыс щи кемән ԓыв эԓтэԓ йэԓ мӑнты пӑ турма нŏх пайтәсты питәс.
LUK 24:52 Ԓыв, Ԓўв йэԓпеԓән шашԓаԓ иԓ эсәԓсәԓаԓ пӑ Иерусалима, ун амәтән амәтман, йŏхԓы керԓәсәт.
LUK 24:53 Пӑ иса Турәм Хотән уԓԓысәт, Турәм ишәкман пӑ Ԓўвеԓа йӑм йасәӈ йастәман. Амиԋ.
ACT 1:1 Оԓәӈ нэпекем ма нӑӈена, Феофил, иса щит эԓты хӑшсэм, мўй Иисус верәс пӑ мўйа утәԓтәсԓы оԓӈәԓ эԓты
ACT 1:2 щи хӑтәԓ унты, хун Йэмәӈ Ԓыԓ сӑхат Ԓўв пирыйәм апостолԓаԓа партәпсайәт мийман, Ԓўв турма нŏх ўйман уса.
ACT 1:3 Ԓўв шукәԓ йўпийән, ар тŏрԓы уԓты посԓаԓ пиԓән, щитԓаԓа щи Ԓўвеԓ ԓыԓӈат этәԓтәсԓы, ԋӑԓйаӈ хӑтәԓ хўват ԓыв хŏщайэԓ этыԓыйәс пӑ Турәм Хон Уԓәпса эԓты пŏтәртәс.
ACT 1:4 Щӑԓта, ԓывиԓаԓ йӑха ӑкәтман, Ԓўв ԓывиԓаԓа партсәԓԓы: «Иерусалим эԓты аԓ мӑнаты, Ащэм аԉәм ŏт ԓавԓаты, хŏты Ма эԓтэм хуԓԓысты,
ACT 1:5 Иоанн йиӈка ԓŏӈәԓтыйәс, нын пӑ, тӑми йўпийән кӑмәтса хӑтәԓ кемән Йэмәӈ Ԓыԓа ԓŏӈәԓтты питԓайты».
ACT 1:6 Хун ԓыв йӑха ӑктәщсәт, Ԓўвеԓ иԋщәссэԓ, пŏтәртман: «Турәм Куща, Израиль хон пеләк ӑнта мўй ин Нӑӈ нŏх йӑԓпитԓэн?»
ACT 1:7 Иисус пӑ ԓывиԓаԓа йастәс: «Ащем Ԓўв йурәԓән пŏнәм пŏрайәт мўй сысәт уйәтты, ӑнтом нын верән,
ACT 1:8 нын йур вана ўԓты, хун нын хŏщайән Йэмәӈ Ԓыԓ ŏхәԓәԓ; пӑ Иерусалимән пӑ иса Иудея пӑ Самария ԓŏватән хŏԓна пӑ мўв кимәԓ унты Мӑнэм вантәм хŏйатәта уԓты питԓәты».
ACT 1:9 Щит йастәмаԓ кемән, ԓыв ватман, Ԓўв нŏх эԓәтса, пӑ пӑԓәӈән ԓыв сэмԓаԓ эԓты лӑп ўса.
ACT 1:10 Щиӈәԋща, хун ԓыв турәм хӑр пеԓа ватмеԓән, Ԓўв нŏх эԓԓәмаԓ пŏрайән, шӑмкапан ԓыв йэԓпиԓаԓән нŏви ԓумтәмәӈ кӑт ху этсәӈән
ACT 1:11 пӑ йастәсӈән: «Галилея йох! Мўй нын ԓойԓәты пӑ турәм хӑр пеԓа ватԓәты? Тӑм Иисус, нын эԓтан турма нŏх ўйәм Ŏт, тӑм иты щи йŏхәтәԓ, хŏты нын Ԓўвеԓ турма эԓԓәтаԓ ватсәԓән».
ACT 1:12 Щиӈәԋща ԓыв Иерусалим воша, Элеона айәԓты кев пай эԓты, йŏхԓы йŏхәтсәт, ԓўв Иерусалим ԉэпән шаббат хӑтәԓ шушты хўватән уԓ.
ACT 1:13 Щӑԓта, йŏхԓы йŏхәтмеԓ йўпийән, нўм хот йӑта, хŏта уԓԓысәт, нŏх мӑтсәт: Петр пӑ Иаков, Иоанн пӑ Андрей, Филипп пӑ Фома, Варфоломей пӑ Матфей, Иаков Алфей пŏх пӑ Симон Зилот, пӑ Иуда, Иаков пŏх усәт.
ACT 1:14 Хŏԓыйэ ԓыв и йӑха пойәкщәман усәт нэӈәт пӑ Мария, Иисус аԋԏи пиԓән, пӑ Ԓўв ху апщиԓаԓ пиԓән.
ACT 1:15 Пӑ щи хӑтԓәтән Петр, утәԓтәты йŏх кўтән нŏх ԓойман, йастәс, –
ACT 1:16 сот хус кем хŏйат йӑха ӑктәщиты щир ус: «Хӑнам йох! Щита тыйты мосәс, мўй Йэмәӈ Нэпекән Йэмәӈ Ԓыԓ Давид ўӈәԓән Иуда эԓты йастәс. Иисус ԋӑрэмәм ŏтәт хŏща ԓўв ŏха ус;
ACT 1:17 Ԓўв мўӈ хŏщайэв ԓўӈәтман ус пӑ тӑм Турәм урәӈән верты верәт пеԓа пирыса»;
ACT 1:18 Туп атәм вермаԓ сӑхат ўйәм ŏхԓаԓән, мўв хӑрән ԓутса, пӑ хун оԓӈат ŏхән рӑкәнмаԓән, ԓўв пўтайәԓ пелки похәс, пӑ сӑмԓаԓ-мŏхәԓԓаԓ ким ӑркәпсәт.
ACT 1:19 Щиӈәԋща щи вер Иерусалим хŏйатәтән хŏԓ уйәтты питса, щишән щи мўв ԓыв йасӈеԓән Акелдама нэма пŏтсэԓ, щит «ўр мӑнәм мўв».
ACT 1:20 «Псалмәт нэпекән хӑшман уԓԓа: 'Ԓўв хотәԓ таԓ ат уԓ, пӑ нэмәԓты уԓты ŏт щита ӑт ат питәԓ'; пӑ: 'Ԓўв тӑйәм верәԓ па хŏйатән ат ўԓа'.
ACT 1:21 Щишән мўӈев щи хŏйатәт эԓты ит пирыты мосәԓ, хŏй мўӈ пиԓэвән иса йӑӈхәс, хун Иисус Турәм Куща мўӈ кўтэвән ус,
ACT 1:22 Иоанн йиӈка ԓŏӈәԓтыты вер уш эԓты пӑ щи хӑтәԓ унты, хун Ԓўв мўӈ эԓтэв нŏх ўса. Ԓўв и щиты Иисус нŏх ԓыԓәӈԓәм вер хŏща мўӈ пиԓэвән ватты ŏта ат ус».
ACT 1:23 Пӑ кӑт хŏйат аԉса: Варсавайа айәԓты Иосиф, Иуста нэмтәм ŏт, пӑ Матфий;
ACT 1:24 Щӑԓта пойәкщәсәт пӑ йастәсәт: «Нӑӈ, Турәм Куща, кашәӈ хŏйат сӑм уйәтԓән, тӑм кӑтӈән эԓты итәԓ, Нӑӈ пирыйәм ŏтэн, аԉи,
ACT 1:25 тӑм Турәм урәӈән верты верәт пӑ апостола уԓты щир вана ўты кеша, хŏԓща Иуда пўӈԓа мӑнәс, ԓўв тӑхайәԓа мӑнтаԓ урәӈән».
ACT 1:26 Щӑԓта ԓын эԓтан пос вŏщкәсәт, пӑ Матфия пос питәс, пӑ ԓўв ихŏщйаӈ апостоләт пеԓа ԓўӈәтты питса.
ACT 2:1 Ветйаӈ хӑтԓәп хӑтәԓ питмаԓән ԓыв хŏԓыйэ и нŏмәсән йӑха усәт.
ACT 2:2 Щӑԓта шӑмкапан турәм эԓты сый тыйәс, ищи мӑтты такан пŏԓты вот иты, пӑ хот, хŏта ԓыв усәт, лӑп ўса.
ACT 2:3 Пӑ ԓыв хŏщайэԓ лакки ортәсты тўт ԋаԓмәт хŏрпи ŏтәт этсәт, пӑ ԓыв нўмпиԓаԓа ԓӑтәԓ щирән итән, итән вŏԓыԓысәт.
ACT 2:4 Пӑ хŏԓыйэ Йэмәӈ Ԓыԓән тэкәтсайәт, щӑԓта па йасӈәтән пŏтәртты питсәт, хŏты Ԓыԓ ԓывиԓаԓа пŏтәртты щир мӑс.
ACT 2:5 Иерусалимән пӑ иудейәт усәт, Турма эвәԓты хŏйатәт, ар сыр мир кўт эԓты турәм иԓпийән уԓты ŏтәт.
ACT 2:6 Хун щи сый тыйәс, мир ӑктәщәс пӑ нŏмәсԓаԓ ԓыԓԓәсәт, кашәӈ хŏйат ԓывиԓаԓ хуԓәс, хŏты щитәт ԓыв ўӈәԓ пўншәм йасәӈԓаԓән пŏтәртсәт, щишән.
ACT 2:7 «Пӑ хŏԓыйэ ӑԓ пакнысысәт, ԓыв кўтэԓән пŏтәртман: 'Тӑм пŏтәртты ŏтәт мўй ӑнта хŏԓ Галилея мŏхет?'
ACT 2:8 Мўй щирән мўӈ, кашәӈ хŏйат ԓўв ўӈәԓ пўншәм йасӈәԓ, хуԓԓув.
ACT 2:9 Парфия пӑ Мидия хŏйатәт, пӑ Элам хŏйатәт, Месопотамияйән, Иудеяйән пӑ Каппадокияйән, Понтән пӑ Асияйән уԓты хŏйатәт,
ACT 2:10 Фригияйән пӑ Памфилияйән, Египетән пӑ Киринея пўӈәԓән ŏԓты Ливия мўв йирәтән уԓты хŏйатәт, пӑ Рим эԓты йŏхтәм ŏтәт, иудейәт пӑ прозелитәт,
ACT 2:11 Крит пӑ Аравия хŏйатәт, ԓывиԓаԓ мўӈ йасәӈԓувән Турәм вŏԓаӈ верәт эԓты пŏтәрттэԓ хуԓԓув»?
ACT 2:12 Пӑ хŏԓ ӑԓ пакнысысәт пӑ, ощатыман, кўтԓаԓән иԋщәссәт: «А мўй щит»?
ACT 2:13 Тухԓәт пӑ, ԋӑха ԋӑхман, пŏтәрсәт: «Ԓыв эпԓәӈ ўна йищсәт».
ACT 2:14 Петра пӑ, ихŏщйаӈәԓ пиԓән ԓойман, сыйәӈ тўрән ԓывиԓаԓа йастәс: «Иудей йох, пӑ хŏԓ Иерусалимән уԓты ŏтәт! Тӑм вер нын ат уйәтԓәԓән, пӑ ма йасәӈԓама хуԓәнтаты:
ACT 2:15 Ԓыв ӑнта кўтщәмәт, хŏты нын нумәсԓәты, ин хӑтәԓ хуԓмет щос ӑт уԓ;
ACT 2:16 туп тӑми Турәм айкеԓ туты хŏйатән, Иоиԉән, йастәм айкеԓ:
ACT 2:17 'Пӑ йухәт хӑтԓәтән питәԓ, Турәм пŏтәртәԓ, Ма Ԓыԓэм эԓты хŏԓ хŏйатәта шошәмԓәм, щӑԓта нын пŏхԓән нын эвиԓән Турәм айкеԓ туты питԓәт; пӑ нын энәмты йохԓән вантәпса ватты питԓәт, пӑ нын ун икиԓән уԓмәт ватты питԓәт.
ACT 2:18 Щӑԓта Мӑнэма рупитты йохԓама, пӑ Мӑнэма рупитты нэԓама щи хӑтԓәтән Ма Ԓыԓэм эԓты шошәмԓәм, пӑ Турәм айкеԓ туты питԓәт.
ACT 2:19 Щӑԓта вантыԓԓаӈәԓ верәт нумән турәм хӑрийән пӑ йэмәӈ посәт иԓән мўвән, ўр пӑ тўт пӑ пусәӈ пŏлыйәпса этәԓтәԓәм.
ACT 2:20 Най пӑтлама йиԓ, пӑ тыԓәщ ўр иты йиԓ, йэԓпи хун Турәм Куща вŏԓаӈ пӑ вŏрԓәты хӑтәԓ йŏхәтәԓ.
ACT 2:21 Щӑԓта питәԓ: кашәӈ хŏй Турәм Куща нэм вохԓәԓԓы, нŏх пайәтԓа'.
ACT 2:22 Израиль йох! Тӑм йасӈәт хуԓәнтаԓән: Иисус, Назарет вош хŏйат, Турәм эԓты нынана йурәӈ пӑ вантыԓԓаӈәԓ верәт пӑ йэмәӈ посәт сӑхат ватәԓтәм Ху, щитәт Турәм Ԓўв мŏхтэԓ нын кўтәнән верәс, хŏты нын щи уйәтԓәԓән,
ACT 2:23 Тӑми, Турәм нŏмәс пӑ йэԓпи вантәм вер хўват мийәм Ŏт, нын ўсԓән пӑ, Турма ӑт эвәԓты хŏйатәт йошән картԓўкән пернайа сэкман, веԓсәԓән;
ACT 2:24 Туп Турәм , сŏрәм мухләт лакки мӑшман, Ԓўвеԓ нŏх ԓыԓӈатсәԓы, сŏрәм Ԓўвеԓ иԓ катәԓты ӑт верәтсәԓы, щишән.
ACT 2:25 Давид Ԓўв эԓтэԓ пŏтәртәԓ: 'Ма Турәм Куща ма йэԓпемән иса ватсәм, Ԓўв ма эԓтэм йӑм пеләк сӑхат уԓ, ма ӑт ат нŏмәнԓысәм.
ACT 2:26 Щит эԓты ма сӑмем амтәс пӑ ԋаԓмем кашәӈа йис; хŏԓна пӑ эԓ ԋŏхем, щи пеԓа нŏмәс пŏнман, уԓты питәԓ:
ACT 2:27 Нӑӈ ма ԓыԓэм хӑԓайәт кўтән ӑт хӑйԓэн пӑ Нӑӈ йэмәӈ ŏтэна шимты вер шийаԓәты ӑт мӑԓэн.
ACT 2:28 Нӑӈ мӑнэм уԓәпса йуш аԉсән, ма сӑмем амәтэн тэкәнәԓ, хун Нӑӈ веншен шийаԓәԓәм'.
ACT 2:29 Хӑнам йох! Нынана Давид опращев эԓты тŏрԓы йастәты эсәԓты ат питԓа, ԓўв пӑрәс пӑ иԓ ԓэщатса, пӑ ԓўв ԓэԓтŏтәԓ мўӈ хŏщайэв тӑм хӑтәԓ унты уԓ.
ACT 2:30 Турәм айкеԓ туты хŏйата уԓмаԓән пӑ уйәтман, Турәм так йасәӈ мийман, ԓўвеԓа йастәс, ԓўв ўрәԓ-ԓантәԓ эԓты Христос хŏйата тыйәԓтԓәԓы пӑ ԓўв хон омәсты тӑхайәԓа опсәԓтԓәԓы,
ACT 2:31 ԓўв Христос нŏх ԓыԓәӈԓәты вер эԓты йэԓпи йастәс, мўй Ԓўв ԓыԓәԓ хӑԓайәт кўтән ӑт хӑйԓа, пӑ Ԓўв мотавтәԓ шимты щир ӑт ватәԓ.
ACT 2:32 Турәм Тӑм Иисус нŏх ԓыԓӈатсәԓы, щит хŏща мўӈ хŏԓ вантәм хŏйатәта усув.
ACT 2:33 Щиӈәԋща, Ԓўв, Турәм йурәӈ йошән турма нŏх пайәтман уса пӑ Ащеԓ эԓты аԉәм Йэмәӈ Ԓыԓ вана ўйман, щит шошемәс, мўй нын ин ватԓәты пӑ хуԓԓәты.
ACT 2:34 Давид опԉа нŏх ӑт мӑнәс; туп ԓўв пŏтәртәԓ: "Турәм Куща ма Турәм Кущайэма йастәс: Ма йӑм пелкема опса,
ACT 2:35 щи унты, хун Нӑӈ кўрнатэна нӑӈен нўрмәԓтты ŏтԓан иԓ ӑт пŏнԓәԓам".
ACT 2:36 Щишән Израиль хот тэԓ такан ат уйәтԓәԓы, Тӑм Иисус, Хŏй нын пернайа сэксәԓән, Турәм Ԓўвеԓ Турәм Кущайа пӑ Христоса пŏтсәԓы!»
ACT 2:37 Щит хўԓмеԓ кемән, ԓыв сӑмԓаԓән ԋŏхԓәсәт пӑ Петрайа пӑ па апостоләта йастәсәт: «Хӑнам йох, мўй мўӈева верты»?
ACT 2:38 Петра пӑ ԓывиԓаԓа йастәс: «Кӑрэкԓән эԓты шӑнша керԓаты, пӑ нын эԓтан кашәӈ ŏт Иисус Христос нэм хўватән йиӈка ат ԓŏӈәԓтыса кӑрэкәт йŏрэмәты урәӈән; пӑ Йэмәӈ Ԓыԓ мойԓәпсайа ўйаԓән.
ACT 2:39 Аԉәм вер нын йўканәна пӑ нын ԋаврэмԓән пӑ хŏԓ йэԓта мŏхет урәӈән уԓ, хŏй Турәм Кущайән мўӈ Турмевән вохԓа».
ACT 2:40 Пӑ ар па хŏрпи йасӈәтән ԓўв пŏтәртәс пӑ пойкәс, йастәман: «Тӑм атәм хŏйат рут эԓты хŏԓт пайтәсаты».
ACT 2:41 Щиӈәԋща, ԓўв йасӈәԓ вана ўйәм ŏтәт йиӈка ԓŏӈәԓтысайәт, пӑ щи хӑтәԓ эвәԓты хŏйатәт хŏща хуԓәм щŏрәс кем хŏйата арамәс.
ACT 2:42 Щӑԓта ԓыв ван кўтԓы апостоләт утәԓтәты вер хŏща хуԓәтман, ԋаԋ морәтман, пŏтремәман пӑ пойәкщәман йӑха уԓԓысәт.
ACT 2:43 Кашәӈ сӑмән пӑԉщәм ус; щӑԓта ар вантыԓԓаӈәԓ верәт пӑ йэмәӈ посәт Иерусалимән апостоләт мŏхты тыйсәт.
ACT 2:44 Хŏԓ пӑ эвәԓты мŏхет йӑха усәт пӑ мўй иса и сура тӑйсэԓ.
ACT 2:45 Пӑ хотԓаԓ пӑ тащԓаԓ–вещԓаԓ тыныԓԓаԓ, пӑ хŏйатәта хŏԓ ортԓыԓԓаԓ, ватман, хŏйа мўй арат мосәԓ.
ACT 2:46 Щӑԓта кашәӈ хӑтәԓ, и нŏмәсән уԓман, Турәм Хотән уԓԓысәт пӑ, хотәтән ԋаԋ морәтман, амтәтԓыман пӑ вещкат сӑмән уԓман, ԓэсәт,
ACT 2:47 Турәм ишәкман пӑ мирән сӑмәӈа тӑйман. Турәм Куща пӑ кашәӈ хӑтәԓ нŏх пайтәм мŏхет эвәԓты хŏйатәт хŏща йŏхтәптысԓы.
ACT 3:1 Петра пӑ Иоанн Турәм Хота йӑрәтйаӈмет пойәкщәты щосән йӑха шушсәӈән.
ACT 3:2 Сэма питәм тэԓән уԓты нохты хŏйат ӑԓ аԓтԓыса пӑ кашәӈ хӑтәԓ Турәм Хот, Хŏрамәӈа айәԓтты, ов ԉэпа опсыԓыса. Турәм Хота ԓŏӈты хŏйатәт эԓты меԓащ вохты урәӈән.
ACT 3:3 Ԓўв, Петра пӑ Иоанн Турәм Хот ов йэԓпийән кащаԓәмаԓ кемән, ԓын эԓтайән меԓащ вохәс.
ACT 3:4 Петра Иоанн пиԓән, ԓўв пеԓайәԓ тŏрԓы ватман, йастәс: «Мин пеԓайэмән ӑӈкәрма».
ACT 3:5 Щӑԓта ԓўв ԓын пеԓайән хŏрат ӑӈкәрмәс, ԓын эԓтайән мŏԓты йоша пайәтты нумәсәс.
ACT 3:6 Туп Петра йастәс: «Щел ŏх пӑ сорԋи ма ӑт тӑйԓәм; мўй тӑйԓәм, щит нӑӈен мӑԓәм: Назарет эԓты уԓты Иисус Христос нэм хўватән ԓойа пӑ шушиԓыйа».
ACT 3:7 Щӑԓта, ԓўвеԓ йӑм пеләк йошәԓ эԓты катәԓман, нŏх ԓощәԓтәсԓы; пӑ ищи мŏхты ԓўв кўр пушәхԓаԓ пӑ шаншŏхԓаԓ такамәсәт,
ACT 3:8 Пӑ, нŏх ԓойәпман, ԓойәс пӑ шушиԓыты питәс, пӑ ԓын пиԓанән Турәм Хота ԓŏӈәс, шушиԓыман пӑ наврәтԓыман пӑ Турәм ишәкман.
ACT 3:9 Щӑԓта аратәԓ мир ԓўвеԓ шушиԓыман пӑ Турәм ишәкман ватсәԓы;
ACT 3:10 Пӑ ԓўвеԓ уйәтсэԓ, тӑм щит ус, хŏй Турәм Хот Хŏрамәӈ ов ԉэпән меԓащ вохты урәӈән опсәс; щӑԓта ԓўв тўмтака йўвмаԓ пӑтыйән, хŏйатәт шек пӑԓтәмәсәт пӑ пакнысысәт.
ACT 3:11 Пӑ тўмтака йўвәм нохәм ху Петра пӑ Иоанн эԓты пўӈԓа ӑт мӑныԓыйәԓ, щишән мир хŏԓ, шек пакәнман, ԓын хŏщайән Соломон хот йата хухәԓсәт.
ACT 3:12 Петра щит шийаԓәмаԓ кемән мир пеԓа йастәс: «Израиль йох! Мўй тӑми эԓты пакәнԓәты, мўй мўӈ пеԓайэв ватԓәты, ищи мӑтты ки мин йурԓәмәнән мўй пӑ йӑмԓәмәнән щиты версэмән, ԓўв шушиԓыйәԓ?
ACT 3:13 Авраам пӑ Исаак пӑ Иаков Турәм, мўӈ ащиԓув Турәм, Ԓўв Иисус Пŏхәԓ вŏԓаӈ щирәԓ этәԓтәсԓы, Хŏй нын веԓты мӑсԓән пӑ Хŏй эԓты, Пилат хуԓәтман, пўӈԓа ўратсәты, хун щитэн Ԓўвеԓ хŏԓт эсәԓты ўтщисԓы.
ACT 3:14 Туп нын Йэмәӈ пӑ Вещкат Ŏт эԓты пўӈԓа ўратсәты пӑ хŏйат веԓты хорахщи нынана хŏԓт эсәԓты ўратсәты,
ACT 3:15 Уԓәпса Куща пӑ веԓсәԓән. Тӑми, Турәмән пӑрмаԓ эԓты нŏх ԓыԓӈатса, мўй хŏща мўӈ вантәм ŏтәта уԓԓув.
ACT 3:16 Пӑ Иисус нэм хўватән эвәԓты урәӈән, Ԓўв нэмәԓән тӑмен такапса, хŏй пеԓа нын ватԓәты пӑ ԓўвеԓ уйәтԓәԓән. Пӑ Иисус эԓты уԓты эвәԓты щир, хŏԓ нын ватман, тўмтака йиты вер верәс.
ACT 3:17 Пӑ хŏты, ма уйәтԓэм, хӑнам йохәт, нын пӑ куща йохԓән иты, ӑт уйәтман, тӑм версәԓән;
ACT 3:18 Турәм пӑ хŏты Ԓўв хŏԓыйэ Турәм айкеԓ туты хŏйатԓаԓ уӈәԓән Христос шукащты вер йастәс, щиты пӑ щи версәԓы.
ACT 3:19 Щиӈәԋща, кӑрэкԓән эԓты шӑнша керԓаты пӑ Турәм пеԓа ӑӈкәрматы, нын кӑрэкԓән нŏх ат ушисайәт,
ACT 3:20 йӑԓпиԓәты пŏрайәт Турәм Куща эԓты ат йŏхәтԓәт, пӑ нынана йўкантәм Иисус Христос Ԓўв ат китәԓ.
ACT 3:21 Туп Иисуса опәԉән хӑщты мосәԓ, щи пŏра унты хун Турәм иса хŏԓ йӑԓпитԓәԓы, щи пŏра эԓты Турәм хŏԓ Ԓўв йэмәӈ Турәм айкеԓ туты хŏйатԓаԓ уӈәԓән хўвән йастыԓыйәс.
ACT 3:22 Моисей ащиԓува ӑт йастыԓыйәс: 'Нын хӑнам йохԓән кўт эԓты Турәм Куща нын Турмән, ма итэма, Турәм айкеԓ туты хŏйат нŏх этәԓтәԓ; Ԓўвеԓа мўй хŏща иса хуԓәнтаты, мўй Ԓўв нынана пŏтәртты питәԓ;
ACT 3:23 Щӑԓта кашәӈ ŏт, хŏй Турәм айкеԓ туты хŏйата ӑт хуԓтмәԓ, щит мир кўт эԓты пӑратԓа'.
ACT 3:24 Щит эԓты пӑ хŏԓ Турәм айкеԓ туты хŏйатәт пŏтәртысәт, Самуил эԓты ўйман пӑ щитәт, хŏй ԓўв йўпеԓән ус, ищиты тӑм хӑтԓәт аԉсәт.
ACT 3:25 Нын – Турәм айкеԓ туты хŏйатәт пӑ йастантәм вер пŏхәт, Турәм нын ащиԓәна йастантәм вер хӑйиԓыйәс, Авраама пŏтәртман: 'Пӑ нӑӈ ԋаврэмен сӑхат мўв ԓŏватән уԓты мир йӑмән мӑԓа'.
ACT 3:26 Турәм, Ԓўв Иисус Пŏхәԓ ԓыԓӈатмаԓ кемән, оԓӈа нын хŏщайәна Ԓўвеԓ китсәԓы, нынана йӑм мӑты урәӈән пӑ кашәӈ ŏтән нын ԉикәӈ верԓән эԓты шӑшән керәтты урәӈән».
ACT 4:1 Хун ԓын мир пеԓа пŏтәртсәтән, Турма йир верты йох пӑ Турәм Хот шавиты куща пӑ саддукейәт ԓын хŏщайән вана йисәт,
ACT 4:2 щит пеԓа ԉикихурыйа уԓман, мўйа ԓын мир утәԓтәԓԓән пӑ пӑрәм эԓты Иисус иты нŏх ԓыԓәӈԓәты вер айәԓәтән;
ACT 4:3 Щӑԓта ԓын ԋӑрэмәсайтән пӑ аԓәӈсӑхат унты касна хот шавиты йоха мӑсайӈән; йэтән ус, щишән.
ACT 4:4 Йасәӈ хуԓәнтәм мŏхет эԓты пӑ ар пеләк эвԓәс; пӑ эвԓәм хŏйат аратәԓ вет щŏрәс кем ус.
ACT 4:5 Кимет хӑтәԓән Иерусалимән ԓыв куща йохԓаԓ, пӑ уна уԓты икет, пӑ Закона утәԓтәты икет ӑктәщсәт,
ACT 4:6 Пӑ Анна - Турма йир верты ŏх ики, пӑ Каиафа, пӑ Иоанн, пӑ Александр, пӑ па мŏхет ԓўв рутәԓ эԓты;
ACT 4:7 Щӑԓта, ԓынан кўтԓәпа ԓощәԓтәман, иԋщәссэԓ: «Мўй йурән пӑ мўй нэмән нын тӑми версәтән?»
ACT 4:8 Щиӈәԋща Петра, Йэмәӈ Ԓыԓән тэкәнман, ԓывиԓаԓа йастәс: «Мир кущайәт пӑ Израиль ун икет!
ACT 4:9 Тӑм хӑтәԓ мин эԓтэмән кӑшаӈ хŏйат йӑма вермемән урәӈән такан иԋщәсԓаймән ки, хŏты ԓўв тўмтака верса,
ACT 4:10 нын хŏԓ пӑ хŏԓ Израиль мир уйтаԓән: тӑм хŏйат ин нын йэԓпанән тўмтака ԓойәԓ Назарет эԓты уԓты Иисус Христос нэм хўват, Хŏй нын пернайа сэксәԓән пӑ Хŏй пӑрәм эԓты Турәмән нŏх ԓыԓӈатса!
ACT 4:11 Ԓўв уԓ кев шуп, нынанән, кев хот омәсты хŏйатәтән, эртәм ŏт, туп щуӈ тӑйән мет мосты кева йис. Пӑ нэмәԓтты па ŏт хŏща нŏх пайтәсты щир ӑнтом;
ACT 4:12 Турәм иԓпийән хŏйатәта мийәм па нэм ӑнтом, мўй щирән мўӈ нŏх пайтәсты верәтсув ԓуԓән».
ACT 4:13 Петра пӑ Иоанн ӑт пӑԓты вер кащаԓәмеԓ пӑ ԓын ӑнта утәԓтыйәм пӑ аԓ хŏйата уԓты вер мŏштәмеԓ кемән, ԓыв ӑԓ щи пакнысысәт. Щи кўтән ԓын ŏша пайтыԓысайтән, ԓын Иисус пиԓән уԓԓыстән;
ACT 4:14 Тўмтака йўвәм пӑ ԓын пиԓәнән ԓойәм хŏйат пеԓа ватман, нэмәԓты шŏппи йастәты ӑт верәтсәт.
ACT 4:15 Щӑԓта, синедрион эԓты ԓывиԓаԓ ким этты партман йўпийән, ԓыв кўтэԓән нумәссәт,
ACT 4:16 пŏтәртман: «Мўӈев тӑм хŏйатӈән пиԓән а мўй верты? Иерусалимән уԓты хŏйатәтән хŏԓ уйәтԓа, ԓын йӑна вантыԓԓаӈәԓ вер версәӈән, пӑ мўӈ тӑми хŏԓт хуләтты ӑт верәтԓэв;
ACT 4:17 туп, тӑми мир ԓŏвата лакки ӑт ат ԓӑрпиԓәс, пӑԓтаптәман, ԓывиԓаԓа тӑм нэм эԓты пŏтәртты нэмәԓты хŏйата ӑт эсәԓԓэв».
ACT 4:18 Щӑԓта, ԓынан вана вохман, ԓынана нэмәԓты щирән ӑт пŏтәртты пӑ Иисус нэм эԓты утәԓтәты такан ӑт эсәԓсэԓ.
ACT 4:19 Туп Петра пӑ Иоанн ԓывиԓаԓа йŏхԓы йастәсӈән: «Нумәсаты, Турәм йэԓпийән мўй вещкат - Турәм эԓты нынан аршәк хуԓәтты?
ACT 4:20 Мин, мўй ватсәмән пӑ мўй хуԓсәмән, щит эԓты мин ӑт пŏтәртты ӑт верәтԓәмән».
ACT 4:21 Ԓыв пӑ, ԓынан пӑԓтаптәман эсәԓсэԓ, ар хŏйат уԓәм пӑтыйән, ԓынан йŏвәртты щир ӑт уйәтсәт; тыйәм вер урәӈән хŏԓыйэ Турәм ишәксәт, щишән.
ACT 4:22 Щи хŏйата ԋӑԓйаӈ мŏԓтас тӑԓ ус, хŏй хŏща щи тўмтака йиты вантыԓԓаӈәԓ вер тыйәс.
ACT 4:23 Эсәԓман йўпийән, ԓын пиԓԓән хŏща йŏхәтсәтән пӑ пŏтәртсәԓән, мўй Турма йир верты ŏх икет пӑ уна уԓты икет ԓынана йастәсәт.
ACT 4:24 Ԓыв пӑ, хуԓәтмеԓ йўпийән, и нŏмәсән Турәм пеԓа тўрԓаԓ сыйәӈа версәԓаԓ пӑ йастәсәт: «Тӑйтаӈ Турәм! Нӑӈ турәм хӑр пӑ мўв пӑ щарәс пӑ мўй щита уԓ иса хŏԓ тыйәԓтсэн.
ACT 4:25 Нӑӈ мўӈ Давид ащев, Нӑӈ митхуйэн, ўӈәԓән Йэмәӈ Ԓыԓэнән йастәсән: 'Мўй урәӈән па мирәт рома уԓты ӑт верәтԓәт, пӑ ԓыв таԓ нŏмәс туты ўтщиԓәт?
ACT 4:26 Мўвәӈ хонәт нŏх эԓԓәсәт, пӑ вŏс йохәт йӑха Турәм Куща йэщаԓт пӑ Ԓўв Христосәԓ йэщаԓт ӑктәщсәт'.
ACT 4:27 Йӑна тӑм вошән Нӑӈ Йэмәӈ Пŏхен Иисус, Нӑӈ ԋŏсытәм Ŏтэн, йэщаԓт, Ирод пӑ Понтий Пилат па мир йох пӑ Израиль йох пиԓән ӑктәщсәт,
ACT 4:28 ԓыв щит версәт, мўй Нӑӈ йурэнән пӑ Нӑӈ партты щирэнән уԓты верәԓ ус.
ACT 4:29 Пӑ ин, йэшәк Турәм Куща, ԓыв пӑԓтапԓаԓ пеԓа ӑӈкәрма, пӑ Нӑӈена рупитты йохԓана иса ӑт пӑԓман, Нӑӈ йасӈен пŏтәртты мийи,
ACT 4:30 Нӑӈ йошен йэԓ ԋинши пӑ кӑшаӈ хŏйатәт тўмтака вераԓән, Нӑӈ Иисус Йэмәӈ Пŏхен нэмән йэмәӈ посәт пӑ вантыԓԓаӈәԓ верәт вера».
ACT 4:31 Щӑԓта, ԓыв пойәкщәмеԓ йўпийән, хŏта ԓыв ӑкәтман усайәт, щи тӑхайэԓ ԋŏхԓыйәс, пӑ хŏԓыйэ Йэмәӈ Ԓыԓән тэкәтсайәт, пӑ Турәм йасәӈ хурԓы пŏтәртсэԓ.
ACT 4:32 Ар эвԓәм хŏйатәт хŏща пӑ и сӑм и ԓыԓ ус; пӑ нэмәԓты хŏйат тӑйәм ŏтԓаԓ эԓты ԓывиԓаԓа ӑт айәԓԓәԓаԓ, туп иса и сура тӑйты ŏтԓаԓа усәт.
ACT 4:33 Апостоләт пӑ ун йурән Турәм Куща Иисус Христос нŏх ԓыԓәӈԓәм эԓты пŏтәртсәт; пӑ вŏԓаӈ йӑм хŏԓыйэ ԓыв пиԓԓаԓән ус.
ACT 4:34 Ԓыв кўтэԓән и нўша хŏйат ӑнтом ус; хŏԓ хŏй мўвәт мўй хотәт тӑйәс, щитԓаԓ тынымеԓ кемән, тынасәм тынԓаԓ тутԓысәт,
ACT 4:35 пӑ апостоләт кўр шŏма пŏныԓысәт; пӑ кашәӈ хŏйата, хŏй мўй хŏща мосты вер тӑйәԓ, мийԓыса.
ACT 4:36 Щиты Иосий, апостоләтән Варнавайа айәԓтәм (щит: «торамтыты пŏх»), левит, рутәԓ Кипр мўв эԓты уԓ,
ACT 4:37 хŏй ԓўв йŏра мўв тӑйәс, щитәԓ тынымаԓ йўпийән, ŏхԓаԓ тусԓы пӑ апостоләт кўрәт шŏма пŏтсәԓы.
ACT 5:1 И ху пӑ, нэмәԓ Анания, ԓўв Сапфира имеԓ пиԓән мўвәԓ тынымаԓ йўпийән,
ACT 5:2 тынәԓ эԓты и шўкәԓ, ԓўв имеԓ уйәтман, хŏԓт хӑԋатсәԓы, пӑ хӑщәм шўкәԓ тусԓы пӑ апостоләт кўр шома пŏтсәԓы.
ACT 5:3 Туп Петра йастәс: «Анания! Мўй урәӈән нӑӈ сӑмен хиԋа ўты эсәԓсэн. Мўйа нӑӈ Йэмәӈ Ԓыԓа олмащисән пӑ мўв тынэн эԓты и шупәԓ хӑԋатсэн?
ACT 5:4 Мўй нӑӈ тӑйсән, ӑнтом мўй нӑӈен ус, пӑ тыныйәм сӑхат мŏщатәм ŏтэн ӑнта мўй нӑӈ йурэнән ус? Мўй урәӈән тӑми нӑӈ сӑмена пŏтсэн? Нӑӈ ӑнта хŏйатәт, Турәм ԓэпәԓсән».
ACT 5:5 Щи йасӈәт хуԓмаԓ кемән, Анания щӑх рӑкнәс; пӑ щит хуԓәнтәм ŏтәт хŏԓ ун пӑԉщәмән йŏхәтсайәт.
ACT 5:6 Щиӈәԋща, энәмты йох ԓўвеԓ лоттәты урәӈән ԓэщатсэԓ ким этәԓтәсэԓ пӑ иԓ лоттәсэԓ.
ACT 5:7 Тӑм йўпийән хуԓәмԓэм щос хӑщәс, тыйәм вер эԓты нэмәԓты ӑт уйәтман, пӑ ԓўв имеԓ йŏхтәс.
ACT 5:8 Петра пӑ ԓўвеԓ иԋщәссәԓы: «Мӑнэм йасты, тӑм арат сӑхат нын мўвән тынысԓән?» Ԓўв йастәс: «Па хŏты, тӑм арат сӑхат».
ACT 5:9 Туп Петра ԓўвеԓа йастәс: «Мўйа нын Турәм Куща Ԓыԓ артаԓыты кашащсәтән? Тӑта щи, нӑӈ икен лоттыйәм йох ова ԓŏӈԓәт. Нӑӈ па ким туԓайән».
ACT 5:10 Ищи мŏхты ԓўв Петра кўрӈән шŏма иԓ рӑкнәс пӑ ԓыԓәԓ мӑнәс. Пӑ энәмты йох, йŏхи ԓŏӈман, ԓўвеԓ пӑрәма уйәтсэԓ пӑ, ким этәԓтәмеԓ йўпийән, ԓўв икеԓ пўӈԓа лоттәсэԓ.
ACT 5:11 Щиӈәԋща хŏԓ пойәкщәты мŏхет пӑ хŏԓ, хŏй тӑм хуԓәс, ун пӑԉщәмән йŏхәтсайәт.
ACT 5:12 Апостоләт йошән мир хŏща тэԓыйэ йэмәӈ посәт пӑ вантыԓԓаӈәԓ верәт тыйәԓтысайәт; пӑ хŏԓыйэ и нŏмәсән Соломон хот йӑтән уԓԓысәт.
ACT 5:13 Пўӈәԓ хŏйатәт эԓты пӑ нэмәԓты ŏт ӑт веритәԓ ԓыв хŏщайэԓ пиԓтәщты, мир пӑ ԓывиԓаԓ ишәкәԓ.
ACT 5:14 Турәм Кущайа эвәԓты хŏйат пӑ ара па ара йиты питәс, тэԓыйэ йох пӑ нэӈәт,
ACT 5:15 щиты кӑшаӈ хŏйатԓаԓ вош хўлыйа ким тутԓысԓаԓ пӑ ŏԓты сŏхԓаԓа пӑ ŏԓтӑхайԓаԓа пŏныԓысԓаԓ, кўш кепа мŏхты шушты Петра исхŏрән ԓыв эԓтыԓаԓ мӑтты ŏт ат хойԓыса ԓуԓән.
ACT 5:16 Иерусалима ищиты ванән уԓты вошәт эԓты ар хŏйат, кӑшаӈ ŏтԓаԓ пӑ кўԉ сŏх тӑйты ŏтԓаԓ тўвман, ӑктәщисәт пӑ хŏԓ щитәт тўмтака йўвәнтысәт.
ACT 5:17 Турма йир верты ŏх ики пӑ ԓўв пиԓәԓән хŏԓ, саддукейәт пеԓа уԓты мŏхет, ԓоԓәмты нŏмәсән тэкәтсайәт,
ACT 5:18 щӑԓта ԓыв апостоләт ԋӑрэмәсԓаԓ, пӑ ԓывиԓаԓ вошәӈ касна хота лӑп петсәԓаԓ.
ACT 5:19 Туп Турәм Куща ангел атәԓән касна хот овәт пелки пўшсәԓы пӑ, ԓывиԓаԓ ким тўвман, йастәс:
ACT 5:20 «Мӑнаты пӑ, Турәм Хотән, мир пеԓа хŏԓ тӑм йӑԓәп уԓәпса йасӈәт пŏтәртаԓән».
ACT 5:21 Ԓыв хуԓтмәсәт пӑ аԓәӈсӑхат Турәм Хота ԓŏксәт пӑ хŏйатәт утәԓтәсәт. Щи кўтән Турма йир верты ŏх ики пӑ ԓўв пиԓәԓән уԓәм ŏтәт йŏхәтмеԓән, синедрион пӑ Израиль пŏхәт эԓты уԓты ун икет хŏԓ вохсәԓаԓ пӑ касна хота апостоләт туты хŏйат китсәт.
ACT 5:22 Туп китыԓыйәм ŏтәт, йŏхәтмеԓән, ԓывиԓаԓ касна хотән ӑт уйәтсәԓәԓ пӑ, йŏхԓы йŏхәтмеԓән, йастәсәт,
ACT 5:23 пŏтәртман: «Касна хот мўӈ лӑп такан тухәрман уйәтсэв пӑ ов йэԓпийән ԓойты касна хот шавиты йохԓаԓ пиԓән; туп, пел пўшмевән, ԓыпийән нэмәԓты хŏйат ӑт уйәтсув».
ACT 5:24 Хун тӑм йасӈәт хуԓсәт Турма йир верты ŏх ики, Турәм Хот шавиты йох куща пӑ па Турма йир верты ŏх икет, ӑԓ щи нумәссәт: «А мўй тӑм».
ACT 5:25 А хŏй йŏхтәс пӑ ԓывиԓаԓа йастәс: «Щита щи, нын касна хота тухрыԓыйәм йохԓән, Турәм Хотән уԓԓәт пӑ мир утәԓтәԓәт».
ACT 5:26 Щиӈәԋща Турәм Хот шавиты йох куща ԓӑӈкәр йохԓаԓ пиԓән ԓынан ӑнта йур-вевән тусэԓ, мир эԓты пӑԓсәт, кевән ӑт ат сэксайәт, щишән.
ACT 5:27 Ԓывиԓаԓ тўвмеԓ йўпийән, синедрион хŏща ԓощәԓтәсԓаԓ; пӑ Турма йир верты ŏх ики ԓывиԓаԓ иԋщәссәԓы, пŏтәртман:
ACT 5:28 «Нынан мўӈ такан тӑм нэм эԓты утәԓтәты ӑт ат эсԓыԓысԓув? Тӑта щи, нын Иерусалим нын утәԓтәты щирԓәнән лӑп тэкәптәман пӑ Щи Хŏйат кӑԓы мўӈева нўра пŏнты ԓӑӈхаԓты».
ACT 5:29 Петра пӑ па апостоләт йŏхԓы йастәсәт: «Хŏйатәта пŏнман, мўӈев Турма аршәк хуԓәтты мосәԓ.
ACT 5:30 Мўӈ ащиԓув Турәм Иисус нŏх ԓыԓӈатәс, Хŏй нын, акԓа нŏх сэкман, пӑратсәԓән.
ACT 5:31 Ԓўвеԓ Турәм Ԓўв йошәԓән Кущайа пӑ Нŏх пайәтты Ŏта пŏтсәԓы Израильа кӑрэк эԓты шӑнша керԓәты щир пӑ кӑрэк йŏрэмәты щир мӑты урәӈән.
ACT 5:32 Ԓўв хŏщайәԓ иса тӑм вантәм ŏтәт мўӈ пӑ Йэмәӈ Ԓыԓ, Хŏйтаԓ Турәм щитәта мӑс, хŏй Ԓўвеԓа хуԓәтәԓ».
ACT 5:33 Тӑм хуԓман, ԓыв ԉик эԓты пелки тохты уратԓәт пӑ ԓывиԓаԓ пӑратты нумисысәт.
ACT 5:34 Мӑтты Гамалиил нэмпи фарисей, Закона утәԓтәты ху, мирән хŏԓ сӑмәӈа тӑйԓа, синедрионән нŏх ԓойман, апостоләт сора кеша ким тутԓыты партсәԓы,
ACT 5:35 ԓывиԓаԓа пӑ йастәс: «Израиль йох! Нын щирәнән тӑм хŏйатәт эԓты нумәсаты, мўй нынан ԓыв пиԓԓаԓән верты.
ACT 5:36 Тӑм йэԓпийәншәк Февда, ԓўвеԓ ԓўв а хŏй ԓӑтәӈ хŏйата, айәԓтман, ус, пӑ ԓўв хŏщайәԓ ԋӑԓсот кем хŏйат пиԓтәщәс; туп ԓўв пӑратса, пӑ хŏԓ, хŏй ԓўвеԓ хуԓәнтәс, лакки мӑтсәт пӑ сэм ўш эԓты петсәт.
ACT 5:37 Ԓўв йўпеԓән хŏйат ԓат щирән хӑншәм пŏрайән Галилея эԓты уԓты Иуда этәс пӑ йӑм арат мир ԓўв йўпеԓа хўщәс; туп ԓўв пӑрәс, пӑ хŏԓ, хŏй ԓўвеԓ хуԓәнтәс, лакки питсәт.
ACT 5:38 Ин па, нынана пŏтәртԓәм, пўӈԓа мӑнаты тӑм хŏйатәт эԓты пӑ ԓывиԓаԓ хӑйаԓән; тӑм вер – хŏйатәт эԓты ки, ԓўв лакки шўкаԓәԓ,
ACT 5:39 Турәм эԓты ки, нын ԓўвеԓ шўкатты ӑт верәтԓәԓән; шаващаты, нын Турәм йэщаԓт уԓты аԓт питԓәты».
ACT 5:40 Ԓыв ԓўвеԓа хуԓмәсәт; пӑ, апостоләт йŏхԓы вохмеԓ йўпийән, ԓывиԓаԓ сэкты партсәԓаԓ пӑ, Иисус нэм эԓты пŏтәртты ӑт эсәԓмеԓ йўпийән, ԓывиԓаԓ эсәԓсәԓаԓ.
ACT 5:41 Ԓыв пӑ синедрион эԓты мӑтсәт, амәтман, Турәм Куща Иисус нэм урәӈән нўр туты ўша питсәт.
ACT 5:42 Щӑԓта кашәӈ хӑтәԓ Турәм Хотән пӑ хотәтән Иисус Христос эԓты утәԓтәты пӑ Йӑм Айкеԓ туты ӑт вŏԓыԓысәт.
ACT 6:1 Тӑм хӑтԓәтән, хун утәԓтыты хŏйат арамәс, грек йасәӈән пŏтәртты иудейәт йэврей йасәӈән пŏтәртты иудейәт пеԓа айәԓта ўшмащты питсәт, щи урәӈән, мўйа ԓыв шукаԓ имиԓаԓ кашәӈ хӑтәԓ ԓэтŏт орттыйән мŏхты хӑйԓайәт.
ACT 6:2 Щиӈәԋща кӑтхŏщйаӈ апостол, хŏԓ утәԓтәты йох йӑха ӑкәтман, йастәсәт: «Мўӈева йӑм хун, Турәм йасәӈ хӑйман, пӑсанәт пеԓа нумәсты.
ACT 6:3 Пӑ щӑԓта, хӑнам йох, нын кўтән эԓты ԓэрамтәм йӑм, Йэмәӈ Ԓыԓән пӑ ŏшән–щащән тэкнәм, ԓапәт хŏйат пирыйаты: ԓывиԓаԓ тӑм вер верты ԓощәԓтәԓув.
ACT 6:4 Мўӈ пӑ ивевән пойәк вер пӑ йасәӈ туты вер хŏща уԓты питԓув».
ACT 6:5 Пӑ тӑм йастәм щир хŏԓ ӑктәщәм мŏхета рӑхи ус; пӑ Стефан, эвәԓты щирән пӑ Йэмәӈ Ԓыԓән тэкнәм ху, пӑ Филипп, пӑ Прохор, пӑ Никанор, пӑ Тимон, пӑ Пармен, пӑ Антиохия вош эԓты уԓты Николай, прозелита уԓәм ху, пирысайәт;
ACT 6:6 Ԓыв апостоләт йэщаԓт ԓощәԓтәсайәт, пӑ апостоләт пойәкщәсәт пӑ ԓыв нўмпиԓаԓа йошԓаԓ катәԓсәԓаԓ.
ACT 6:7 Пӑ Турәм йасәӈ лакки ԓӑрпиԓәс, пӑ утәԓтәты хŏйатәт Иерусалимән йӑма арамәсәт; пӑ Турма йир верты икет эԓты ар пеләк ŏтәт эвәԓты вер пеԓа пайтәссәт.
ACT 6:8 Стефан пӑ, эвәԓты верән пӑ йурән тэкәнман, вŏԓаӈ вантыԓԓаӈәԓ верәт пӑ йэмәӈ посәт мир хŏща верәс.
ACT 6:9 Тухәԓ, щиты айәԓты Либертинәт, пӑ Киринейәт, пӑ Александрийәт иудейәт пойәкщәты хот эԓты уԓты мŏхет, пӑ тухәԓ Киликия пӑ Асия эԓты уԓты мŏхет, Стефан пиԓән ўра вортты питсәт;
ACT 6:10 туп ԓыв, Стефан Йэмәӈ Ԓыԓ йурән ŏшәӈа–щащәӈа пŏтәртәм щир йэщаԓт, нэмәԓты ԓощәԓтәты ӑт верәтсәт.
ACT 6:11 Щиӈәԋща ԓыв тухԓәт хӑԋайән йастәты утәԓтәсԓаԓ: «Мўӈ хуԓԓысэв, хŏты ԓўв нўрмәԓтты йасӈәт Моисей эԓты пӑ Турәм эԓты йастыԓыйәс».
ACT 6:12 Щӑԓта мир пӑ уна уԓты икет, пӑ Закона утәԓтәты икет хўщсайәт пӑ, ӑратман, ԓўвеԓ ԋӑрэмәсэԓ пӑ синедриона тусэԓ.
ACT 6:13 Щӑԓта ԋаԓмиты хŏйатәт этәԓтәсәт, хŏйтат пŏтәртсәт: «Тӑм хŏйат нўрасты йасӈәт Турәм Хот пӑ Закон пеԓа йастәты ӑт вŏԓыйәԓ.
ACT 6:14 Мўӈ хуԓԓысэв, хŏты ԓўв пŏтәртәс, мӑтты Назарет эԓты уԓты Иисус тӑм Турәм хот шўкатԓәԓы пӑ мўӈева Моисейән мийәм уԓәпса щирәт па щира верԓәԓы».
ACT 6:15 Пӑ хŏԓ, синедрионән опсәм ŏтәт, ԓўв пеԓайәԓ ватман, ԓўв вешәԓ ангел веш хŏрасән ватсэԓ.
ACT 7:1 Щиӈәԋща Турма йир верты ŏх ики Стефан иԋщәссәԓы: «Тӑми щиты а мўй?»
ACT 7:2 Туп ԓўв йастәс: «Хӑнам йох пӑ ащет! Хуԓәнтыйаты. Йэмәӈ нŏви Турәм мўӈ Авраам ащев хŏща Месопотамия мўвән этәс, Харран воша касәԓмаԓ йэԓпийән,
ACT 7:3 пӑ ԓўвеԓа йастәс: 'Нӑӈ мўвен эԓты пӑ нӑӈ рутэн эԓты пӑ нӑӈ ащен хот эԓты эта пӑ мӑты мўв нӑӈена аԉԓәм, щи мўва мӑна'.
ACT 7:4 Щиӈәԋща ԓўв Халдей мўв эԓты этәс пӑ Харран вошән уԓты хӑр ԓэщатәс; щиԓта пӑ, ԓўв ащеԓ пӑрмаԓ йўпийән, Турәм ԓўвеԓ тӑм мўва касԓәптәсԓы, хŏта ин нын уԓԓәты.
ACT 7:5 Пӑ ԓўвеԓа и кўр лоп арат йўкан тӑм мўвән ӑт мӑс. Туп Турәм ԓўвеԓа пӑ ԓўв ԋавремԓаԓа тӑм мўв тӑйты урәӈән мӑты йастәсԓы, щи пŏрайән хŏԓна Авраам и ԋавремийэ ӑт тӑйәс.
ACT 7:6 Щӑԓта Турәм ԓўвеԓ йастәс, ԓўв ԋавремԓаԓ па мўвән касԓәм хŏйатәта питԓәт пӑ па мўв хŏйатәта тынԓы-пелԓы рупата ԋўрты питԓәт, щӑԓта йэрмәԓтты уԓәпсайән ԋӑԓсот кем тӑԓ уԓты питԓәт.
ACT 7:7 'Туп Ма', - Турәм йастәс, - 'щи мир хŏща сўт верԓәм, хŏй хŏща ԓыв тынԓы-пелԓы рупата ԋўрԓәт; пӑ щи йўпийән ԓыв щиԓта этԓәт пӑ тӑм уԓты тӑхайән Мӑнэма йир туты питԓәт'.
ACT 7:8 Пӑ Турәм Авраама эвәтты щир йастантәпса мӑс. Авраам Исаак сэма пайтәс пӑ ԋийәԓмет хӑтәԓән эвәтты верән версәԓы; Исаак Иаков сэма пайтәс, Иаков пӑ – кӑтхŏщйаӈ опращ икет.
ACT 7:9 Ун ԓӑтәӈ опращ икет, сӑмԓаԓ щариты пӑтыйән, Иосиф Египта тынысэԓ; туп Турәм ԓўв пиԓәԓән ус,
ACT 7:10 пӑ ԓўвеԓ иса кӑмән хŏрпи шук эԓты хŏԓт павәтсәԓы, пӑ ŏш–щащ пӑ фараон, Египет хон йӑм сӑм ԓўвеԓа мойԓәсԓы, щи хонән ԓўв Египет хŏща пӑ ԓўв хон хотәԓ хŏща иса кущайа пŏтса.
ACT 7:11 Щӑԓта ԓэԓԓы пŏра пӑ ун шук Египет пӑ Ханаан мўвӈән ԓŏвата иса йŏхтәс, пӑ мўӈ ащиԓув ԓэтŏт ӑт уйтыԓысәт.
ACT 7:12 Иаков пӑ, Египетән ԋаԋ ԓат сэм уԓты хуԓмаԓ кемән, мўӈ ащиԓув оԓәӈмет пўш щи китсәԓы.
ACT 7:13 Хун кимет пўш [ԓыв тŏхи йŏхәтсәт], Иосиф ԓўв йайԓаԓа аԉәсәс, пӑ Иосиф рут фараон хонән уйәтты питса.
ACT 7:14 Щи йўпийән Иосиф ԓўв Иаков ащеԓ пӑ хŏԓ ԓўв рутԓаԓ вохты партсәԓы, ԋийәԓйаӈ пеԓа вет арат хŏйат ус.
ACT 7:15 Иаков Египта ўншәс, пӑ щита пӑрәс пӑ мўӈ ащиԓув па;
ACT 7:16 Пӑ Сихем воша тўвман пӑ хŏшапәӈ кев ԓыпийа пŏнман усайәт, щи тӑха Авраам щелŏхән Сихемән уԓты Еммор пŏхәт эԓты ԓутсәԓы.
ACT 7:17 Щи мŏртән, хун аԉәм вер тӑԓаӈа йиты пŏра ванамәты питәс, мўй эԓты Турәм Авраама так йасәӈ мийԓыйәс, мирәԓ Египетән энмәԓтыйәс пӑ арамийәс,
ACT 7:18 щи унты, хун па хон питәс, хŏй Иосиф ӑт уйәтсәԓы.
ACT 7:19 Ԓўв, мўӈ рутэв йэщаԓт ŏщмарԓыман, мўӈ ащиԓув йэрмәԓтысԓы, ԓывиԓаԓа ай ԋавремԓаԓ йовәԓты партсәԓы, ԓыԓӈа ӑт ат хӑщсәт.
ACT 7:20 Тӑм пŏрайән Моисей сэма питәс, Турәм йэԓпийән хŏрасәӈ ус. Хуԓәм тыԓәщ ԓўв ащеԓ хотән эсәмән ԓапәтман ус.
ACT 7:21 Хун вŏщкәса, фараон эвийән ўса пӑ ԓўв хŏщайәԓ, ԓўв пŏхәԓ иты, энмәԓтсәԓы.
ACT 7:22 Пӑ Моисей аратәԓ иса Египет ŏша–щаща утәԓтәма ус, йасәӈԓаԓән пӑ верԓаԓән йўрәӈ ус.
ACT 7:23 Хун пӑ ԓўв ԋӑԓйаӈ тӑԓа йис, ԓўв хӑнам йохԓаԓ, Израиль пŏхәт, хŏща йӑхты нŏмәсән йŏхәтса.
ACT 7:24 Пӑ, ԓыв эԓтыԓаԓ ит, атмащ йэшаԓәты кащаԓәмаԓ кемән, эԓт питсәԓы. Пӑ кетмәм ŏт урәӈән Египет ху пӑратсәԓы.
ACT 7:25 Моисей нумәсәс, ԓўв хӑнам йохԓаԓ ŏша пайәтԓәԓаԓ, ԓўв йошәԓ сӑхат ԓывиԓаԓа Турәм нŏх пайтәсты щир мӑԓ; тўп ԓыв ŏша ӑт пайәтсэԓ.
ACT 7:26 Кимет хӑтәԓ, хун ԓыв эԓтыԓаԓ кӑтән кўтәрмәстән, ԓўв йŏхтәс пӑ ԓынан йӑм щира уԓты пеԓа хўщиԓысԓы, пŏтәртман: «Нын – хӑнам йохӈән; мўйа кўтԓәнән йэшащԓәтән?»
ACT 7:27 Туп рутәԓ йэшаԓәты ŏт ԓўвеԓ йэԓ пŏткәсԓы, йастәман: 'Хŏйән нӑӈ мўӈ нўмпева кущайа пӑ сўт икийа пŏтсайән?
ACT 7:28 Нӑӈ мосәӈ мӑнэм па веԓты ԓӑӈхаԓән, хŏты мŏԓхатәԓ Египет ху веԓсэн?'
ACT 7:29 Тӑм йасӈәт эԓты Моисей хŏнтас пӑ Мадиам мўв хŏща йŏхтәм хŏйата йис, щита ԓўв эԓтэԓ кӑт пŏх сэма питәс.
ACT 7:30 Ԋӑԓйаӈ тӑԓәԓ тэкнәм йўпийән Синай кев таԓ хишәӈ мўвән тўтән ԓэты пеԓантыты варәс похәл кўтән Моисей йэщаԓт Турәм Куща ангел этәс.
ACT 7:31 Моисей, щит шийаԓәмаԓ кемән, щи ныты ŏт эԓты пакнысыйәс; хун йӑма вантыты урәӈән, вана шушәс, ԓўв Турәм Куща тўр сый хуԓмәс:
ACT 7:32 'Ма нӑӈ ащиԓан Турәм, Авраам Турәм пӑ Исаак Турәм пӑ Иаков Турәм'. Моисей, хŏрщәм эԓты тӑрыман, йэщаԓт ватты ӑт веритәс.
ACT 7:33 Щӑԓта Турәм Куща ԓўвеԓа йастәс: 'Нӑӈ кўрԓан эԓты ԓумтәмен хŏԓт эӈхи, щи тӑха, хŏта нӑӈ ԓойԓән - щит йэмәӈ мўв.
ACT 7:34 Ма Египетән Ма мирэм шукатты вер ватԓәм, пӑ ԓўв эӈәԓты сыйәԓ хуԓԓәм, пӑ ԓўвеԓ хŏԓт пайәтты иԓ эсԓәщсәм: Щиӈәԋща, мӑна, Ма нӑӈен Египта китԓэм'.
ACT 7:35 Тӑм Моисей, хŏй ԓыв вана ӑт ўсэԓ, йастәман: 'Хŏйән нӑӈ мўӈ нўмпева кущайа пӑ сўт икийа пŏтсайән?' Турәм кущайа пӑ хŏԓт пайәтты ŏта китсәԓы ангеләԓ сӑхат, хŏй ԓўвеԓа пеԓантыты варәс кўтән этԓыйәс.
ACT 7:36 Тӑм Моисей Египет мўвән, пӑ Ўрты щарәсән, пӑ таԓ мўвән вантыԓԓаӈәԓ верәт пӑ йэмәӈ посәт ԋӑԓйаӈ тӑԓ хўват верман, ԓывиԓаԓ Египет эԓты йэԓ тусԓы.
ACT 7:37 Тӑми щи Моисей, хŏй Израиль пŏхәта йастәс: 'Турәм айкеԓ туты хŏйат нынана Турәм Куща нын Турмән нын хӑнам йохԓән кўт эԓты ма итэмән мӑԓ; Ԓўвеԓ хуԓәнтаты'.
ACT 7:38 Тӑми щит, хŏй таԓ мўвән ӑктәщәм Израиль мир хŏща ангел пиԓән пӑ мўӈ ащиԓув пиԓән ус, ангел Синай кев ԓоӈәԓән ԓўв пеԓайәԓ пŏтәртәс, пӑ ԓўв ԓыԓәӈ йасӈәт вана ўсԓы, мўӈева мӑты урәӈән,
ACT 7:39 хŏй пеԓа мўӈ ащиԓув хуԓәтты ŏтәта уԓты ӑт ԓӑӈхасәт, ԓўвеԓ пўӈԓа хирәтсэԓ пӑ ԓўв сӑмԓаԓән Египет пеԓа керԓәсәт,
ACT 7:40 Аарона йастәман: 'Мўӈева ԓуӈхәт вера, хŏйтат мўӈ йэԓпевән ԓуԓән ат мӑтсәт ; Моисей, мўӈев Египет мўв эԓты йэԓ тувәм ŏтэв, ӑт уйәтԓэв, хŏты йис'.
ACT 7:41 Пӑ щи хӑтԓәтән мис хŏр версәт, пӑ щи ԓуӈха йир тусәт, пӑ ԓыв йошԓаԓән верәм вер йэԓпийән каш версәт.
ACT 7:42 Турәм пӑ шӑшән керԓәс пӑ ԓывиԓаԓ турәм хӑр пŏрмасәт пеԓа пойәкщәты хӑйсәԓы, хŏты Турәм айкеԓ туты хŏйатәт нэпекән хӑшман уԓԓа: 'Израиль хот! Нын мўй войәт пӑ йирәт ԋӑԓйаӈ тӑԓ сыс таԓ мўв хŏща Мӑнэма тутԓысты?
ACT 7:43 Нын Молох ԓух хӑшап пӑ Ремфан нэмпи хус ԓуӈхән, нын верәм хŏрԓән, пӑтән ўсԓән, ԓывиԓаԓа пойәкщәты урәӈән: пӑ Ма нынан Вавилон эԓты йэԓшәк касԓәптәԓԓам'.
ACT 7:44 Вантәм ŏт Йэмәӈ Хӑшап мўӈ ащиԓув хŏща таԓ мўвән ус, хŏты Пŏтәртәм Ŏт Моисейа ԓўвеԓ верты партсәԓы, щи ԓўв вантәм ŏтәԓ хŏрпийа.
ACT 7:45 Щи Йэмәӈ Хӑшап, йоша пайәтмеԓ йўпийән, мўӈ ащиԓув, Иисус Навин ԓыв хŏщайэԓ ŏха уԓман, мирәт тӑйты мўва ԓŏӈәԓсэԓ, Турәм, ԓыв йэԓпеԓән, мўвәӈ хŏйатәт воштәсԓы. Тӑмиты Давид хӑтԓәт унты ус.
ACT 7:46 Тӑми Турәм хŏща йӑм мŏщатәс пӑ пойәкщәс, Иаков Турма уԓты тӑха ԓэщатты урәӈән.
ACT 7:47 Соломон пӑ Ԓўвеԓа хот опсәс.
ACT 7:48 Туп Нўм Ащи ӑнтом йошән опсәм хотәтән уԓ, хŏты Турәм айкеԓ туты хŏйат пŏтәртәԓ:
ACT 7:49 'Турәм хӑр – ма хон омәсты тӑхайэм, пӑ мўв – Ма кўр иԓпем. Мўй хŏрпи хот Мӑнэма верԓәты, Турәм Куща пŏтәртәԓ, мўй хŏрпи тӑхайән Ма щўтщәты верем уԓ?
ACT 7:50 Ӑнта мўй Ма йошем тӑм иса тыйәԓтәс?'
ACT 7:51 Нын - ўрайәӈ ŏтәт! Ӑт эвтәм сӑмпи пӑ ӑт эвтәм пӑԓпи хŏйатәт! Нын иса Йэмәӈ Ԓыԓ йэщаԓт уԓԓәты, хŏты нын ащиԓән, щиты нын па.
ACT 7:52 Турәм айкеԓ туты хŏйатәт эԓты нын ащиԓәнән хŏй ӑт воштәса? Ԓыв Вещкат Ŏт йŏхәтты айкеԓ йэԓпи йастәм ŏтәт веԓсәԓаԓ, Хŏй хŏща хŏйат аԉты пӑ веԓты ŏтәта ин нын верәссәты, –
ACT 7:53 нынана ангеләт сӑхат мийәм Закон вана ўйман йўпийән, нын ӑт шависԓын».
ACT 7:54 Тӑм хуԓәтман, ԓыв ԉикән кавәрмәсайәт пӑ ԓўв пеԓайәԓ пекԓаԓән йухрәԓсәт.
ACT 7:55 Стефан пӑ, Йэмәӈ Ԓыԓән тэкәнман уԓман, турәм хӑр пеԓа ӑӈкәрмәс, Турәм хутԓәты–вŏрԓәты щир пӑ Иисус, Турәм йӑм пеләк сӑхат ԓойтаԓ шийаԓәс,
ACT 7:56 пӑ йастәс: «Тӑм, лоӈхемәм опәԉ пӑ Хŏйат Пŏх, Турәм йӑм пеләк сӑхат ԓойтаԓ ма ватԓәм».
ACT 7:57 Туп ԓыв, сыйәӈ тўрән уваԓтман, пӑԓаԓ лӑп катәԓсәԓаԓ, пӑ и сӑмән ԓўв хŏщайәԓ ӑратсәт,
ACT 7:58 пӑ, вош ким пелка тувман, кевән ԓўвеԓ йовәԓты питсэԓ. Вантәм хŏйатәт пӑ ԓыв ԓумәтты сŏхԓаԓ Савл нэмпи, айкам ху кўрнат шŏма пŏтсәԓаԓ,
ACT 7:59 пӑ Стефан кевән йовәԓсэԓ, ԓўв пойәкщәс пӑ пŏтәртәс: «Турәм Куща Иисус! Ма ԓыԓэм ўйи».
ACT 7:60 Пӑ, шашӈәԓаԓ иԓ морәтман, сыйәӈ тўрән ўваԓтәс: «Турәм Куща! Ԓывиԓаԓа тӑми кӑрека аԓ нуми». Щӑԓта, щит йастәмаԓ кемән, пӑрәс.
ACT 8:1 Савл пӑ Стефан пӑратты вер пеԓа такан ус. Щи хӑтԓәтән Иерусалимән пойәкщәты хŏйатәт ӑктәщиты вер пеԓа вŏԓаӈ ун ԋухәтԓыты щир тыйәс; пӑ хŏԓ, апостоләт тўмпийән, Иудея пӑ Самария ԓŏвата лакки мӑтсәт.
ACT 8:2 Стефан пӑ Турма эвәԓты хŏйатәтән иԓ лоттәса пӑ ԓўв урӈәԓән вŏԓаӈ ун хоԓԓәп хоԓԓәса.
ACT 8:3 Савл пӑ пойәкщәты хŏйатәт йэшаԓәс, хотәта ԓŏӈтыман, йох пӑ нэӈәт ԋӑрэмәман, касна хота мийԓысԓы.
ACT 8:4 Щи кўтән лакки мӑнәм ŏтәт йӑӈхиԓысәт пӑ Йӑм Айкеԓ тутԓысәт.
ACT 8:5 Щиты, Филипп Самария мўв воша йŏхтәс пӑ Христос эԓты пŏтәртәс.
ACT 8:6 Мир и сӑмән хуԓәтсәт щит пеԓа, мўй Филипп пŏтәртәс, хуԓман пӑ ватман, мўй хŏрпи вантыԓԓаӈәԓ верәт ԓўв верәс.
ACT 8:7 Катәԓман уԓәм ар хŏйат эԓты кўԉ сŏхәт такан щӑлыман, ким этыԓысәт, ар пеләк щащԓы питәм ŏтәт пӑ нохты хŏйатәт тўмтака йўвиԓысәт.
ACT 8:8 Щӑԓта щи вошән вŏԓаӈ ун амәт ус.
ACT 8:9 Щи вошән ий ики ус, нэмәԓән Симон, хŏй щи йэԓпийән щӑртыԓыйәс, ԓўвеԓ ԓўв ԓӑтәӈ хŏйата айәԓман, Самария мир пакнәптыйәс.
ACT 8:10 Ԓўвеԓа айэԓ-унэԓән хŏԓ хуԓәтсәт, йастәман: «Тӑм – Турәм вŏԓаӈ йур».
ACT 8:11 Ԓўвеԓа щи пӑтыйән хуԓәтсәт, ԓўв ԓывиԓаԓ щӑртԓаԓән мŏԓты хўват пакнәптысԓы.
ACT 8:12 Туп хун Филиппа, Турәм Хон Уԓәпса пӑ Иисус Христос нэм эԓты Йӑм Айкеԓ пŏтәртты ŏта, эвәԓсәт, йох пӑ нэӈәт кашащсәт, йиӈка ат ԓŏӈәԓтысайәт.
ACT 8:13 Симон ԓўв па эвԓәс пӑ, йиӈка ԓŏӈәԓтыйәм йўпийән, Филипп эԓты пўӈԓа ӑт мӑныԓыйәс; пӑ, ԓӑтәӈ вантыԓԓаӈәԓ йурәт пӑ йэмәӈ посәт ватман, ӑԓ пакнысыйәс.
ACT 8:14 Иерусалимән уԓты апостоләт, Самария хŏйатәт Турәм йасәӈ вана ўйәм айкеԓ хуԓмеԓ кемән, Петра пӑ Иоанн ԓыв хощайэԓ китсәт,
ACT 8:15 ԓын, йŏхәтман кемән, ԓыв урәӈԓаԓән пойәкщәсӈән, ԓыв Йэмәӈ Ԓыԓ ԓуԓән вана ат ўсәт.
ACT 8:16 Йэмәӈ Ԓыԓ хŏԓна ԓыв эԓтыԓаԓ ита нэш ӑт эсԓыщийәс, туп ԓыв Турәм Куща Иисус нэм хўватән йиӈка ԓŏӈәԓтыман усайәт.
ACT 8:17 Щишән ԓыв эԓтыԓаԓа йошԓән пŏтсәԓән, пӑ ԓыв Йэмәӈ Ԓыԓ вана ўсэԓ.
ACT 8:18 Симон пӑ, Йэмәӈ Ԓыԓ апостоләт йош пŏнты сӑхат мӑты щир шийаԓәмаԓ кемән, ԓынана ŏх тус,
ACT 8:19 щиты пŏтәртман: «Мӑнэма па тӑм йур мийатән, щи хŏйат, хŏй эԓты ма йошԓам пŏнԓәԓам, Йэмәӈ Ԓыԓ ат ўс».
ACT 8:20 Туп Петра ԓўвеԓа йастәс: «Нӑӈ щелŏхен нӑӈ пиԓэнән сŏрма ат йиԓ, нӑӈ Турәм мŏйԓәпса ŏх сӑхат мŏщатты нумәссән, щишән.
ACT 8:21 Нӑӈена тӑми хŏща нэмәԓт шўк пӑ пирыйәм вер ӑнтом, нӑӈ сӑмен Турәм пеԓа ӑнта вещкат.
ACT 8:22 Щиӈәԋща, тӑм кӑрэкен эԓты шӑнша керԓа пӑ Турма пойәкща: мосәӈ нӑӈ атәм нŏпсэн нӑӈена хŏԓт йŏрэмәԓа;
ACT 8:23 Нӑӈен вŏщрэм сыпән тэкәнман иты пӑ ӑнта вещкат щирәтән йӑрман иты ватԓэм».
ACT 8:24 Симон пӑ йŏхԓы йастәс: «Ма урӈема Турәм Кущайа пойәкщаты, ма, нын йастәм ŏтԓән щира, нэмәԓтыйән ӑт ат хойсайәм».
ACT 8:25 Ԓын пӑ, вантәм ŏтәта уԓман пӑ Турәм Куща йасӈа утәԓтәман, йŏхԓы, Иерусалима, мӑтсәтән пӑ ар Самария вошәтән–куртәтән Йӑм Айкеԓ эԓты пŏтәртсәтән.
ACT 8:26 Турәм Куща ангел пӑ Филипп пеԓа йастәс: «Ԓойа пӑ мӑна хӑтәԓ кутәп пŏра шŏма, Иерусалим эԓты Газайа мӑнты таԓ йуш хŏща».
ACT 8:27 Ԓўв ԓойәс пӑ мӑнәс. Щӑԓта ин, Ефиоп мўвәӈ евнух ики, Ефиопия нэ хон Кандакия куща, ԓўв сорԋиԓаԓ шавиты куща ху, Иерусалима пойәкщәты урәӈән йŏхтыԓыйәс,
ACT 8:28 йŏхԓы мӑнмаԓән пӑ, ԓўв ухԓәԓән омәсман, Турәм айкеԓ туты хŏйат Исаия хӑншәм нэпек ԓўӈтәс.
ACT 8:29 Ԓыԓ Филиппа йастәс: «Тӑм ухәԓ ԉэпа вана мӑна пӑ ԓўв пўӈԓәԓән шуша».
ACT 8:30 Филипп вана йŏхтәс пӑ, тўмеԓ Турәм айкеԓ туты хŏйат Исаия хӑншәм нэпек ԓўӈәтмаԓ, хуԓмаԓ кемән, йастәс: «Нӑӈ мўй уйәтԓэн, мўй ԓўӈәтԓән?»
ACT 8:31 Ԓўв йастәс: «Мўй щирән уйәтԓэм, мӑтты ŏтән ӑт аԉԓайәм ки?» Пӑ Филипп нŏх хухты пӑ ԓўв пўӈԓәԓа омәсты партсәԓы.
ACT 8:32 Хӑншәм Ŏт хŏща ԓўӈтәм тӑхайәԓ щит ус: «Ош иты Ԓўв хŏртыйа тўвман ус, пӑ, ош пŏшәх иты ԓўвеԓ ԓŏртты ŏтәԓ йэԓпийән тўр сыйԓы уԓ, щиты щи Ԓўв ўӈԓәԓ пелки ӑт пўшԓәԓы.
ACT 8:33 Ԓўв иԓ ԋэрәм щирән Ԓўв сўтәԓ йэтшәс. Туп Ԓўв рутәԓ хŏйән эԓпа аԉԓа? Ԓўв уԓәпсайәԓ мўв эԓты нŏх лакәптәԓа».
ACT 8:34 Евнух пӑ Филипп пеԓа йастәс: «Нӑӈ щи ԓŏват йӑм вера, йаста: хŏй эԓты Турәм айкеԓ туты хŏйат тӑми пŏтәртәԓ? Ԓўв эԓтэԓ мўй пӑ па хŏйат эԓты?»
ACT 8:35 Филипп ўӈԓәԓ пел пўшсәԓы пӑ, тӑм Хӑншәм Ŏт эԓты ўйман, ԓўвеԓа Иисус эԓты Йӑм Айкеԓ тус.
ACT 8:36 Щи кўтән, йэԓԓы мӑнтан эԓты, ԓын йик ԉэпа йŏхәтсәтән; пӑ евнух ики йастәс: «Тӑта щи йик; мӑнэма нӑӈ эԓтэн йиӈка ԓŏӈәԓтыты мўй тŏрас верәԓ?»
ACT 8:37 Филипп пӑ ԓўвеԓа йастәс: «Сӑмен ԓоватән эвәԓԓән ки, рӑхәԓ». Ԓўв йŏхԓы йастәс: «Эвәԓԓәм, Иисус Христос – щит Турәм Пŏх».
ACT 8:38 Щӑԓта ухәԓ иԓ вŏԓыты партсәԓы, пӑ , Филипп пӑ евнух ики кинәӈтак йиӈка ŏхәԓсәтән; пӑ ԓўвеԓ йиӈка ԓŏӈәԓтысԓы.
ACT 8:39 Хун пӑ ԓын йик эԓты ким этсәтән, Йэмәӈ Ԓыԓ евнух ики эԓты эсԓәщәс, Филипп пӑ Турәм Куща ангелән аԓэмәса, пӑ евнух ики ԓўвеԓ ўш ӑт ватсәԓы, пӑ, амәтман, йушәԓ йэԓԓы мӑтсәԓы.
ACT 8:40 Филипп пӑ Азотән ԉикмантәс пӑ, мŏхты шушман, вошәтән иса Йӑм Айкеԓ эԓты пŏтәртәс, Кесарияйа йŏхәтмаԓ унты.
ACT 9:1 Савл пӑ, Турәм Куща утәԓтәты хŏйатәт пеԓа ԉикән кавәрман пӑ веԓтатты номәсән тэкәнман, Турма йир верты ŏх ху хŏща йŏхтәс
ACT 9:2 пӑ ԓўв эԓтэԓ айкеԓ нэпек Дамаск вош иудейәт пойәкщәты хотәт урәӈән вохәс. Ԓўв хŏй, тӑм утәԓтәты вер йўпи туты хŏйат, уйәтәԓ, йохәт мўй пӑ нэӈәт мŏщатты пӑ Иерусалима йŏхтәптәты ат верәтсәԓԓы.
ACT 9:3 Хун йушән ԓўв Дамаск воша ванамәты питмаԓән, шӑмкапан турәм хӑр эԓты ԓўв нŏвийән похәтса.
ACT 9:4 Ԓўв мўва иԓ рӑкнәс пӑ тўр сый хуԓтмәс, ԓўв пеԓайәԓ пŏтәртты сый: «Савл, Савл! Мўйа Мӑнэм ԋухәԓԓэн?»
ACT 9:5 Ԓўв йастәс: «Хŏй Нӑӈ, Турәм Куща?» Турәм Куща пӑ йастәс: «Ма Иисус, Хŏйтэн нӑӈ ԋухәԓԓән. Нӑӈен карты йущәӈ йўх йэщаԓт мӑнты ԓавәрт».
ACT 9:6 Ԓўв, тӑрыман пӑ пӑԉщәмән иԉапман, йастәс: «Турәм Куща! Мўй верты мӑнэм партԓэн?» Щӑԓта Турәм Куща ԓўвеԓа йастәс: «Нŏх ԓойа пӑ воша мӑна; пӑ нӑӈена йастәԓа, мўй нӑӈен верты мосәԓ».
ACT 9:7 Ԓўв пиԓәԓән шушәм хŏйатәт пӑ сӑм мӑнман ԓойсәт, тўр сый хуԓман, пӑ нэмәԓты хŏйат ӑт шийаԓәман.
ACT 9:8 Савл мўв эԓты нŏх ԓойәс пӑ пелки сэмән ԓўвеԓа нэмәԓты ӑт ныса. Щӑԓта йош пелкәԓ эԓты катәԓман туты питса, пӑ Дамаск воша йŏхтәптәса.
ACT 9:9 Щӑԓта хуԓәм хӑтәԓ ԓўвеԓа нэмәԓт ӑт ныса, пӑ ӑт ԓэс, пӑ ӑт йиԋщәс.
ACT 9:10 Дамаскән и утәԓтәты хŏйат ус, нэмәԓән Анания; пӑ Анания вантәм верәԓ хŏща Турәм Куща ԓўвеԓа йастәс: «Анания!» Ԓўв йастәс: «Тӑм Ма, Турәм Куща».
ACT 9:11 Турәм Куща пӑ ԓўвеԓа йастәс: «Ԓойа пӑ, щиты айәԓтты Тўӈ вош хўлыйа, мӑна, пӑ Иуда хот хŏща Тарс вошәӈ ху иԋщәсы, нэмәԓән Савл; ԓўв ин пойәкщәԓ.
ACT 9:12 Пӑ вантәм верәԓ хŏща Анания нэмпи ху вантәс, ԓўв хŏйщайәԓ йŏхәтәԓ пӑ ԓўв эԓтэԓ йошәԓ пŏнԓәԓы, ԓўв сэмәӈа ат йис».
ACT 9:13 Анания йŏхԓы йастәс: «Турәм Куща! Ма ар хŏйат эԓты тӑм хŏйат эԓты хуԓԓысэм, мўй арат атәм ԓўв Нӑӈ хŏйатԓана Иерусалимән верәс;
ACT 9:14 Тӑта па Турма йир верты ŏх икет эԓты хŏԓ, Нӑӈ нэмен вохты хŏйатәт йӑрты, йур тайәԓ».
ACT 9:15 Туп Турәм Куща ԓўвеԓа йастәс: «Мӑна, ԓўв Ма пирыйәм пўтэм, Ма нэмем мир пӑ хонәт пӑ Израиль пŏхәт йэщаԓт такан йастәты урәӈән.
ACT 9:16 Пӑ Ма ԓўвеԓа этәԓтәԓэм, мўй арат Ма нэмем урәӈән ԓўвеԓа шукащты мосәԓ».
ACT 9:17 Анания мӑнәс пӑ хота ԓŏӈәс, йошӈиԓаԓ ԓўв эԓтэԓ пŏнман, йастәс: «Савл хӑнам ху! Йушән, хŏԓща нӑӈ шушсән, нӑӈ хŏщайэн этԓыйәм Турәм Куща Иисус, мӑнэм китсәԓы, нӑӈ сэмәӈа ат йисән пӑ Йэмәӈ Ԓыԓән ат тэкәтсайән».
ACT 9:18 Пӑ щи пўԉаӈ сэмӈиԓаԓ эԓты ищи мӑтты сом хŏԓт рӑкнәс, пӑ ԓўв шамкапан сэмәӈа йис; нŏх ԓойәс пӑ йиӈка ԓоӈәԓтыса,
ACT 9:19 щӑԓта, ԓэтŏт ԓэвмаԓ йўпийән, такамәс. Пӑ Савл кӑмәтса хӑтәԓ утәԓтәты йох пиԓән Дамаскән ус.
ACT 9:20 Пӑ щи пўԉаӈ иудейәт пойәкщәты хотәтән Иисус эԓты айкеԓ туты питәс, «Ԓўв – Турәм Пŏх».
ACT 9:21 Щӑԓта хŏԓ хуԓәнтәм хŏйатәт аԓ пакнысысәт пӑ пŏтәртсәт: «Тӑм ӑнта мўй щит, хŏй Иерусалимән тӑм нэм вохты ŏтәт воштыԓыйәс? Йӑна щи пӑ щи урәӈән ты йŏхтәс, ԓывиԓаԓ мŏщатты пӑ Турма йир верты ŏх икет хŏща туты».
ACT 9:22 Савл пӑ щи киԋща па такамтыйәс пӑ Дамаскән уԓты иудей йох ԓыԓԓәты унты йŏхтәптәсԓы, такан аԉман, Тӑми – Христос.
ACT 9:23 Хун пӑ йӑм арат хӑтәԓ хӑщәм йўпийән, иудей йох ԓўвеԓ пӑратты нŏмәс версәт.
ACT 9:24 Туп Савл ԓыв тӑм нŏпсэԓ мŏштәсԓы. Ԓыв пӑ атаӈ хӑтәԓ вош пушас ов хŏща ԓавԓәссәт, ԓўвеԓ веԓты урәӈән.
ACT 9:25 Утәԓтыты йох пӑ атәԓән, ԓўвеԓ ўсэԓ пӑ вош кертәм пӑԓ пушас эԓты кураԋэк ԓыпийән иԓ эсәԓсэԓ.
ACT 9:26 Савл Иерусалима йŏхтәс пӑ утәԓтыты хŏйатәт хŏща ԓŏӈты ўратәс; туп хŏԓ ԓўв эԓтайәԓ пӑԓсәт, ԓўв утәԓтыты хŏйата уԓтыйа, ӑт эвәԓԓа.
ACT 9:27 Варнава пӑ ԓўвеԓ ўсԓы пӑ апостоләт хŏща тусԓы пӑ ԓывиԓаԓа пŏтәртсәԓы, хŏты йуш хŏща ԓўв Турәм Куща ватсәԓы, пӑ мўй ԓўвеԓа Турәм Куща пŏтәртәс, пӑ хŏты ԓўв Дамаскән, ӑт пӑԓман, Иисус нэм урәӈән айкеԓ тус.
ACT 9:28 Щӑԓта ԓўв ԓыв пиԓԓаԓән ус, лыпаща Иерусалим ԓŏватән йӑӈхиԓыйәс пӑ Турәм Куща Иисус нэм урәӈән ӑт пӑԓман айкеԓ тус.
ACT 9:29 Ищиты грек йаcәӈән пŏтәрты иудейәт пиԓән пŏтәртәс пӑ ўра вортәс; ԓыв пӑ ԓўвеԓ веԓты ўтщисэԓ.
ACT 9:30 Хӑнам йохԓаԓ, тӑми мŏштәмеԓ кемән, Кесарияйа ԓўвеԓ тусэԓ пӑ Тарс воша китсэԓ.
ACT 9:31 Пŏйәкщәты мŏхет пӑ Иудея мўв ԓŏватән, Галилея пӑ Самария ԓŏватән рома усәт, утәԓтыман пӑ Турәм Куща эԓты пӑԓман усәт; щӑԓта Йэмәӈ Ԓыԓән такапман, арамисәт.
ACT 9:32 Щиты тыйәс, Петра, хŏԓ мŏхет лӑп йӑхман, Лидда вошән уԓты эвәԓты мŏхет хŏща йŏхтәс.
ACT 9:33 Щита ԓўв Энея нэмпи и хŏйат уйтәс, хŏй ԋийәԓ тӑԓ ŏԓттӑхайәԓән, щащԓы питман, ŏԓәс.
ACT 9:34 Петра ԓўвеԓ йастәс: «Эней! Нӑӈ Иисус Христосән тўмтака верԓайән; ŏԓттӑхайэн эԓты нŏх ԓойа». Пӑ ԓўв ищи мŏхты нŏх ԓойәс.
ACT 9:35 Пӑ ԓўв Лиддайән пӑ Саронән уԓты хŏйатәтән хŏԓ ватса, пӑ Турәм Куща пеԓа ӑӈкәртсәт пӑ эвәԓсәт.
ACT 9:36 Иоппия вошән и утәԓтәты нэ ус, нэмәԓ Тавифа - щит «газель»; ԓўв сӑмәӈ верәтән тэкәнман уса пӑ ар йӑм вер верәс.
ACT 9:37 Щи хӑтԓәтән вер тыйәс, ԓўв кӑшаӈа йис пӑ пӑрәс. Ԓўв ԉŏхәтса пӑ нўм хот йӑта пŏтса.
ACT 9:38 Лидда пӑ Иоппия вош ԉэпән ванән ус, утәԓтәты йох Петра щита уԓты хуԓмеԓ кемән, ԓўв хŏщайәԓ кӑт хŏйат китсайтән, ԓўвеԓ вохты, ԓыв хŏщайэԓ йŏхәтты ԓўв ӑт ат рŏнәс.
ACT 9:39 Петра ԓойәс пӑ ԓын пиԓанән мӑнәс; пӑ хун ԓўв йŏхтәс, нўм хот йӑта ԓўвеԓ тусэԓ, пӑ хŏԓ шукаԓт нэӈәт, хоԓԓәман, ԓўв йэԓпәԓа ԓойсәт, йэрнасәт аԉиԓыман, Тавифа ԓыв пиԓԓаԓән уԓмаԓән верыԓыйәм ŏтԓаԓ.
ACT 9:40 Петра мŏхет хŏԓ ким партсәԓы пӑ, шанша иԓ эсԓәщман, пойәкщәс, пӑ, мотавтәԓ пеԓа ватман, йастәс: «Тавифа! Нŏх ԓойа». Щӑԓта ԓўв сэмӈиԓаԓ пел пўшсәԓы пӑ, Петра шийаԓәмаԓ кемән, нŏх опсәс.
ACT 9:41 Ԓўв, йошәԓ ԓўвеԓа мийман, нŏх ԓощәԓтәсԓы пӑ, эвәԓты мŏхет пӑ шукаԓт нэӈәт, вана вохман, ԓыв йэщаԓтэԓ ԓўвеԓ ԓыԓӈат ԓощәԓтәсԓы.
ACT 9:42 Тӑм вер Иоппия ԓŏватән иса уйәтты питса, пӑ ар хŏйат Турәм Кущайа эвԓәс.
ACT 9:43 Пӑ йӑм арат хӑтәԓ ԓўв Иоппия вошән и мŏԓты Симон ԋўки верты ики хŏща ус.
ACT 10:1 Кесария вошән и ху ус, нэмәԓ Корнилий, Италийский когорта кўт эԓты уԓты сот ԉаԉ йох куща,
ACT 10:2 хот тэԓәԓ пиԓән Турма эвәԓты хŏйат пӑ Турәм эԓты пӑԓты хŏйат, мира ар йӑм верыԓыйәс пӑ иса Турәм пеԓа пойәкщәс.
ACT 10:3 Ԓўв вантәм щирәԓән хӑтԓәԓән йӑрәтйаӈ щос кемән Турәм ангел тŏрԓы ватсәԓԓы, ԓўв хŏщайәԓ ԓŏӈәс пӑ ԓўвеԓа йастәс: «Корнилий!»
ACT 10:4 Корнилий пӑ, ԓўв пеԓайәԓ аӈкәрмәмаԓ пӑ хŏԓт пӑԓтамәмаԓ кемән, йастәс: «Мўй, куща?» Ангел ԓўвеԓа йŏхԓы йастәс: «Нӑӈ пойәкԓан пӑ нӑӈ меԓащԓан Турәм хŏща нŏпса питсәт.
ACT 10:5 Щӑԓта, хŏйатәт Иоппия воша кита пӑ, Петрайа айәԓты, Симон вохи.
ACT 10:6 Ԓўв Симон ԋўки ԓэщатты ху хŏща мойԓәԓ, ԓўв хотәԓ щарәс питарән уԓ; ԓўв нӑӈен щи йасӈәт йастәԓ, мўй йурән нӑӈ нŏх пайәтԓайән пӑ нӑӈ хот тэԓэн па».
ACT 10:7 Хун, Корнилий пиԓән пŏтәртәм, ангел йэԓ мӑнәс, ԓўв митйохԓаԓ эԓты кӑтән пӑ ԓўв пўӈԓәԓән уԓәм Турма эвәԓты ԉаԉ ху вохсәԓы
ACT 10:8 пӑ ԓывиԓаԓа иса хŏԓ пŏтәрмаԓ йўпийән, ԓывиԓаԓ Иоппияйа китсәԓы.
ACT 10:9 Кимет хӑтәԓ, хун ԓыв шушсәт пӑ воша ванамәты питсәт, Петра хут щос кемән хот ԓоӈԓа нŏх хуӈхәс, пойәкщәты урәӈән.
ACT 10:10 Щӑԓта ԓўв сӑмәԓ вохты питса, пӑ ԓэты ԓӑӈхаса. Щи кўтән, ԓэтот ԓэщатты эԓты, ԓўвеԓа ватты щир ус
ACT 10:11 пӑ ваттаԓән пел пўншаԋщәм турәм хӑр пӑ ԓўв хŏщайәԓ иԓ эсԓәщты мŏԓты пўт, ищи мӑтты ун сŏх, ԋӑԓ щуӈәԓ сӑхат йӑрман уԓԓа пӑ мўва иԓ эсәԓԓа;
ACT 10:12 щи ԓыпийән кӑмән хŏрпи ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт.
ACT 10:13 Пӑ ԓўвеԓа тўр сый ус: «Петра ԓойа, веԓа пӑ ԓэва».
ACT 10:14 Петра пӑ йастәс: «Ӑнтом, Турәм Куща, ма нэмәԓты пŏрайән нэмәԓты атәм мўй пӑ ӑнта сыстам ŏт ӑт ԓавәнтысәм».
ACT 10:15 Щиӈәԋща кимет пўш ԓўвеԓа тўр сый ус: «Мўй Турәм сыстапсәԓы, щит атма мўй пӑ ӑнта сыстама нӑӈ аԓ ԓўӈты».
ACT 10:16 Щит хуԓәм пўш ус, – щӑԓта пўт турма па нŏх эԓәтса.
ACT 10:17 Хун пӑ Петра ԓўв турмәԓән ощатымаԓән, ԓўв вантәм щирәԓ, щит а мўй, – Корнилийән китәм йохәт, Симон хŏт эԓты иԋщәсман, вана йŏхәтсәт пӑ пушас овән иԓ ԓойсәт.
ACT 10:18 Ўваԓман, ищмәсэԓ: «Петрайа айәԓтты Симон мўй тӑта?»
ACT 10:19 Петра вантәм ŏтәԓ эԓты нумисытаԓ кўтән, Йэмәӈ Ԓыԓ ԓўвеԓа йастәс: «Тӑм, хуԓәм хŏйат нӑӈен кӑшԓәт;
ACT 10:20 ԓойа, иԓ ŏхԓа пӑ ԓўв пиԓԓаԓән, йэша нэш ӑт нŏмәнԓыман, мӑна; ԓывиԓаԓ Ма китсәԓам».
ACT 10:21 Петра, Корнилия эԓты ԓўв хŏщайәԓ китәм хŏйатәт хŏща иԓ ŏхԓәс пӑ йастәс: «Mа щит, хŏй нын кӑшԓәты; мўй вер урәӈән нын йŏхәтсәты?»
ACT 10:22 Ԓыв пӑ йастәсәт: «Корнилий сот ԉаԉ йох куща, йӑм сӑмпи пӑ Турәм эԓты пӑԓты ху, иудея мирән хŏԓ йӑма нумман тӑйԓа, йэмәӈ ангел эԓты ԓўв хотәԓа нӑӈен вохты партәпса йŏхтәс пӑ нӑӈ пŏтәрԓан хуԓәтты».
ACT 10:23 Щиӈәԋща Петра, ԓывиԓаԓ йŏхи вохмаԓ йўпийән, ԓапәтсәԓы. Кимет хӑтәԓ пӑ нŏх киԓмаԓ кемән, ԓыв пиԓԓаԓән мӑнәс, тухәԓ Иоппия хӑнам йох па ԓўв пиԓәԓән мӑтсәт.
ACT 10:24 Йухәт хӑтәԓ ԓыв Кесарияйа йŏхәтсәт. Корнилий пӑ, ԓўв рутԓаԓ пӑ ван пиԓ йохԓаԓ и йӑха вохман, ԓывиԓаԓ ԓавәԓсәԓы.
ACT 10:25 Хун Петра йŏхи ԓŏӈты ўтщийәс, Корнилий ԓўв хŏщайәԓ йэщаԓт этәс пӑ ԓўв кўрԓаԓ шŏма шанша керәптыман, иԓ ԋўрәс.
ACT 10:26 Петра пӑ ԓўвеԓ нŏх ԓощәԓтәсԓы, пŏтәрман: «Нŏх ԓойа; ма ищи хŏйат».
ACT 10:27 Пӑ, ԓўв пиԓәԓән пŏтрэмәман, хота йŏхи ԓŏӈәс пӑ ар ӑктәщәм хŏйат уйтәс.
ACT 10:28 Щӑԓта ԓывиԓаԓа йастәс: «Нын уйәтԓәԓән, иудея хŏйата па сыр хŏйат пиԓән пŏтрэмәты пӑ вана рӑхиԓыты ӑт рӑхәԓ; туп мӑнэма Турәм аԉәс, ма и хŏйат нэш атма мўй пӑ ӑнта сыстама ӑт ат ԓўӈәтсәм.
ACT 10:29 Щишән ма, хун вохсайәм, пӑ йŏхи ӑт ԋŏсәрщәман йŏхәтсәм. Щӑԓта, иԋщәсԓәм: Мўй вер урәӈән нын мӑнэм вохсәԓән?»
ACT 10:30 Корнилий йастәс: «Ԋӑԓмет хӑтәԓән ма тӑм щос унты вўщԓәсәм пӑ йӑрәԏйаӈ щос пеԓа мӑнәмән йŏԓән хотэмән пойәкщәсәм; щӑԓта щи, ма йэԓпемән нŏвийән ворԓәты ԓумтәӈәӈ ики этәс
ACT 10:31 пӑ пŏтәртәԓ: 'Корнилий! Нӑӈ пойкен хуԓса пӑ меԓащԓан Турәм хŏща нумәԓмәсайәт'.
ACT 10:32 Щиӈәԋща, Иоппияйа кита пӑ Петрайа айәԓты Симон вохи: ԓўв ԋўки верты ху Симон хотән щарәс питарән мойԓәԓ; ԓўв йŏхәтәԓ пӑ нӑӈена йастәԓ'.
ACT 10:33 Ищи кумат ма нӑӈ хŏщайэн китсәм, пӑ нӑӈ йӑма версэн, йŏхәтсән. Ин мўӈ хŏԓ Турәм йэԓпийән ԓойԓув, мўй нӑӈена Турәм эԓты партман уԓ, иса хŏԓ хуԓәтты урәӈән».
ACT 10:34 Петра ўӈԓәԓ пўшсәԓы пӑ йастәс: «Йӑна мŏштәԓэм, Турәм веш пеԓа ӑт ватәԓ,
ACT 10:35 туп кашәӈ мир хŏща Ԓўв эԓтэԓ пӑԓты ŏт пӑ тўӈа–щира уԓты ŏт Ԓўвеԓа рӑхи.
ACT 10:36 Ԓўв Израиль пŏхәта йасәӈ китәс, пайԓы уԓәпса Иисус Христос сӑхат аԉәс; Тӑм хŏԓ хŏйатәта уԓты Турәм Куща.
ACT 10:37 Нын Иудея ԓŏватән, Галилея эԓты ўйман, Иоаннән утәԓтыйәм йиӈка ԓŏӈәԓтыты вер йўпийән, уԓәм верәт уйәтԓәԓән:
ACT 10:38 Хŏты Турәм Назарет эԓты уԓты Иисус Йэмәӈ Ԓыԓән пӑ йурән ԋŏсәтсәԓы. Пӑ Ԓўв йӑм верман пӑ хŏԓ хŏйатәт, хŏй хиԋән катәԓман усайәт, тўмтака верман, йӑӈхәс, Турәм Ԓўв пиԓәԓән ус, щишән.
ACT 10:39 Мўӈ пӑ щит хŏща иса вантәм ŏтәт, мўй Ԓўв Иудея мўвән пӑ Иерусалимән верәс, пӑ мет йухәт Ԓўв, акԓа нŏх сэкман, пӑратса.
ACT 10:40 Турәм хуԓмет хӑтәԓән Тӑмен нŏх ԓыԓӈатсәԓы, пӑ Ԓўвеԓа этԓыты щир мӑс
ACT 10:41 ӑнта хŏԓ мира, туп вантәм ŏтәта, Турәм эԓты пирыйәм хŏйатәта, мўӈева, пӑ мўӈ Ԓўв пиԓәԓән ԓэсув пӑ йищсув, щи йўпийән, хун Ԓўв пӑрмаԓ эԓты нŏх ԓыԓәӈԓәс.
ACT 10:42 Щӑԓта Ԓўв мўӈева мира пŏтәртты пӑ вантәм ŏтәта уԓты партсәԓы, Ԓўв Турәм эԓты ԓыԓәӈ пӑ пӑрәм хŏйатәта Сўта уԓты пŏнәм Ŏт.
ACT 10:43 Ԓўв эԓтэԓ хŏԓ Турәм айкеԓ туты хŏйатәт аԉԓәт, кашәӈ Ԓўвеԓа эвәԓты ŏт Ԓўв нэмәԓән кӑрэк йŏрэмәты щир мŏщатәԓ».
ACT 10:44 Хун Петра хŏԓна щи пŏтрәԓ йэԓԓы тусԓы, Йэмәӈ Ԓыԓ кашәӈ йасәӈ хуԓәнтәм хŏйата эсԓәщәс.
ACT 10:45 Пӑ Петра пиԓән йŏхтәм, иудейәт эԓты эвәԓты ŏтәт ӑԓ пакнысысәт, Йэмәӈ Ԓыԓ мойԓәпса па рут йоха па эсәԓман уса;
ACT 10:46 ԓыв хуԓсәт, хŏты щитәт па йасӈәтән пŏтәртсәт пӑ Турәм вŏԓаӈа айәԓтсәт, щишән. Щиӈәԋща Петра йастәс:
ACT 10:47 «Хŏй щитәта йиӈка ԓŏӈәԓтыты ӑт эсәԓты верәтәԓ, хŏйтат, мўӈ итэвән Йэмәӈ Ԓыԓән мойԓысайәт?»
ACT 10:48 Щӑԓта ԓывиԓаԓ Иисус Христос нэм хўватән йиӈка ԓŏӈәԓтыты партсәԓы. Щи йўпийән ԓыв ԓўвеԓа кӑмәтса хӑтәԓ ԓыв хŏщайэԓ уԓты вохсэԓ.
ACT 11:1 Иудеяйән уԓәм апостоләт пӑ хӑнам йох хуԓсэԓ, мӑтты па рут йох ищи Турәм йасәӈ вана ўсэԓ.
ACT 11:2 Щӑԓта хун Петра Иерусалима йŏхтәс, иудейәт эԓты уԓты хӑнам йохԓаԓән ԓўв йэщаԓт нўрыса,
ACT 11:3 пŏтәртман: «Нӑӈ ӑт эвтәм мŏхет хŏща йӑхсән пӑ ԓыв пиԓԓаԓән ԓэсән».
ACT 11:4 Петра пӑ хŏты вер ус, щиты ԓывиԓаԓа пŏтәртты питсәԓԓы, йастыйәԓ:
ACT 11:5 «Иоппия вошән ма пойәкщәсәм пӑ щи пўԉаӈ вантәпса ватсәм: и мŏԓтты пўт иԓ эсԓәщәс, ищи мӑтты ун сŏх лопәс, ԋӑԓ щуӈәԓ сӑхат турәм хӑр эԓты иԓ эсәԓты ŏт, пӑ ма хŏщайэм иԓ эсԓәщәс.
ACT 11:6 Ма пўт ԓыпеԓа ӑӈкәрмәсәм пӑ, вантыман, ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт шийаԓәсәм.
ACT 11:7 Щӑԓта ма тўр сый хуԓтмәсәм, ма пеԓайэм пŏтәртәԓ: 'Петра, нŏх ԓойа, веԓа пӑ ԓэва'.
ACT 11:8 Ма пӑ йастәсәм: 'Ӑнта, Турәм Куща, нэмәԓты атәм мўй пӑ ӑнта сыстам ŏт нэмәԓт пŏрайән ма ўӈԓэма ӑт питыԓыйәс'.
ACT 11:9 Пӑ турәм хӑр эԓты кимет пўш тўр сый мӑнэма йŏхԓы йастәс: 'Турәм мўй сыстапсәԓы, щит ӑнта сыстама нӑӈ аԓ ԓўӈты'.
ACT 11:10 Щит хуԓәм пўш ус, пӑ па хŏԓ иса турәм хӑра нŏх эԓәтса.
ACT 11:11 Щӑԓта ин, щи пўԉаӈ Кесария эԓты, ма хŏщайэм китәм хуԓәм хŏйат, хотэм ԉэпа, хŏта ма усәм, ԓойсәт.
ACT 11:12 Йэмәӈ Ԓыԓ мӑнэма йастәс, ма ԓыв пиԓԓаԓән, йэша нэш ӑт нŏмәнԓыман, ат мӑтсәм. Ма пиԓэмән щи хут хӑнам йох па мӑтсәт, пӑ мўӈ тўм хŏйатэн хота йŏхәтсув.
ACT 11:13 Ԓўв мўӈева пŏтәртсәԓы, хŏты ԓўв йŏԓән хотәԓән [йэмәӈ] ангел ватсәԓы, пӑ ангел ԓўвеԓа йастәс: 'Хŏйатәт Иоппияйа кита пӑ Петрайа айәԓты Симон вохи;
ACT 11:14 Ԓўв нӑӈена йасӈәт йастәԓ, щи йасӈәт йурән нӑӈ нŏх пайәтԓайән пӑ нӑӈ хот тэԓэн па'.
ACT 11:15 Хун пӑ ма пŏтәртты питсәм, ԓыв эԓтыԓаԓа Йэмәӈ Ԓыԓ иԓ эсԓәщәс, оԓәӈән хŏты мўӈ эԓтэва эсԓәщәс.
ACT 11:16 Щи пŏрайән ма Турәм Куща йасәӈ нумәԓмәсәм, хŏты Ԓўв пŏтәртәс: 'Иоанн йиӈка ԓŏӈәԓтыйәс, нын пӑ Йэмәӈ Ԓыԓа ԓŏӈәԓтты питԓайты'.
ACT 11:17 Щиӈәԋща, Турәм ԓывиԓаԓа ищимәщ мойԓәпса мӑс ки, мўй хŏрпи мўӈева, Турәм Куща Иисус Христоса эвԓәм ŏтәта мӑс, ма пӑ хŏй, Турма йэртԓыты ат верәтсәм?»
ACT 11:18 Щит хуԓәтмеԓ йўпийән, ԓыв иԓ ромәпсәт пӑ Турәм ишәксэԓ, пŏтәртман: «Таӈха, па рут хŏйатәта па Турәм кӑрэк эԓты уԓәпса пеԓа керԓәты щир мӑс».
ACT 11:19 Щи кўтән Стефан йўпийән уԓәм ԋўхәтԓыты вер эԓты лакки мӑнәм ŏтәт, туп иудейәта йасәӈ тўвман, Финикия унты пӑ Кипр пӑ Антиохия унты мӑтсәт.
ACT 11:20 Ԓыв эԓтыԓаԓ тухԓәт Кипр хŏйатәт, тухԓәт пӑ Киринея хŏйатәт усәт, хŏй Антиохияйа йŏхәтман, Турәм Куща Иисус эԓты Йӑм Айкеԓ грек йохәта пŏтәртсәт.
ACT 11:21 Пӑ Турәм Куща йош ԓыв пиԓԓаԓән ус, пӑ йӑм арат ар хŏйат, эвәԓман, Турәм Куща пеԓа керԓәсәт.
ACT 11:22 Щит эԓты Иерусалимән ӑктәщиты хŏйатәт унты сый йŏхтәс, пӑ Варнава Антиохияйа мӑнты партса.
ACT 11:23 Ԓўв йŏхәтмаԓ пӑ Турәм йӑм кащаԓәмаԓ кемән, нŏх амтәс пӑ хŏԓ мŏхет Турәм Куща хŏща вещкат сӑмән катԓәсты партсәԓы;
ACT 11:24 Ԓўв йӑм сӑмпи ху ус пӑ Йэмәӈ Ԓыԓән пӑ эвәԓты щирән тэкәнман уса, щишән. Щиӈәԋща йӑм арат мир Турәм Куща пеԓа керԓәс.
ACT 11:25 Йухәт Варнава Савл кӑшты урәӈән Тарса мӑнәс пӑ, ԓўвеԓ уйәтмаԓ кемән, Антиохияйа тусԓы.
ACT 11:26 Тӑԓаӈ тӑԓ–ԓўӈ ԓын пойәкщәты хŏйатәт ӑктәщиты тӑхайән йӑм арат хŏйат утәԓтәсӈән, пӑ утәԓтыты йох Антиохияйән веԓщи щи христианәта айәԓты питсайәт.
ACT 11:27 Щи хӑтԓәтән Иерусалим эԓты Антиохияйа Турәм айкеԓ туты хŏйатәт йŏхәтсәт.
ACT 11:28 Пӑ ԓыв эԓтыԓаԓ и ху, нэмәԓән Агав, нŏх ԓоймаԓ кемән, Йэмәӈ Ԓыԓән аԉман, йастәс, мӑтты иса мўв ԓŏватән ун ԓэԓԓы щир питәԓ, Клавдия кесарь пŏрайән щи уԓәм щир.
ACT 11:29 Щиӈәԋща утәԓтәты йох, кашәӈ ԓўв тӑйтŏтәԓ эԓты Иудейән уԓты хӑнам йохԓаԓа, ԋотәпса китты пŏтсәт,
ACT 11:30 щиты щи версэԓ, ӑктәм ŏхԓаԓ Варнава па Савл мŏхты эвәԓты хŏйатәт ун икета китсәԓаԓ.
ACT 12:1 Щи пŏрайән Ирод хон щи ӑктәщиты хŏйатәт эԓты тухәԓ хŏйатԓаԓ пеԓа йошԓаԓ нŏх аԓәпсәԓы, ԓывиԓаԓа атәм верты урәӈән,
ACT 12:2 пӑ Иаков, Иоанн йай, аԓтты кешийән пӑратты партсәԓы.
ACT 12:3 Ваттаԓән, щит иудейәта йӑм, щи йўпийән Петра па ўсԓы, – щи пŏрайән тўтәӈ ԋаԋ йэмәӈ хӑтԓәт усәт, –
ACT 12:4 пӑ, ԓўвеԓ иԓ катәԓмаԓ йўпийән, пӑтлам хота омәссәԓы, пӑ ԋӑԓ ԉаԉ йохпи ԋӑԓ похла ԓўвеԓ шавиты партсәԓы, Пасха йўпийән мир хŏща ԓўвеԓ этәԓтәты нумәсыйәс.
ACT 12:5 Петра пӑтлам хотән эԓт ԓавәԓтса, щи кўтән ӑктәщиты хŏйатәт ԓўв урӈәԓән тўӈа–щира Турма пойәкщәсәт.
ACT 12:6 Хун пӑ Ирод ԓўвеԓ ким этәԓтәты утщисԓы, щи ат Петра кӑт ԉаԉ йŏхӈән кўтән ŏԓәс, кӑт карты кеԓән пŏнман уса, пӑ ԉаԉ йохән ов пўӈәԓән пӑтлам хот шависа.
ACT 12:7 Щӑԓта ин, Турәм Куща ангел ԓўв йэщаԓтәԓ ԓойәс, пӑ нŏвийән пӑтлам хот нŏх хутԓәптәса. Ангел, Петра пўӈԓәԓ эԓты пŏткәман, ԓўвеԓ нŏх кўрәтсәԓы пӑ йастәс: «Сора ԓойа». Щӑԓта карты кеԓԓаԓ ԓўв йошԓаԓ эԓты иԓ рӑкәтсәт.
ACT 12:8 Пӑ ангел ԓўвеԓа йастәс: «Ӑтпен йӑры пӑ кўр ԓумтәмԓан ԓумтаԓән». Ԓўв щиты версәԓы. Щӑԓта ԓўвеԓа йастәԓ: «Нӑӈ эԓты ԓумтәмен ԓумты пӑ ма йўпемән йўва».
ACT 12:9 Петра ким этәс пӑ ԓўв йўпеԓән шушәс, ӑт уйәтман, ангелән верты вер йӑна щиты ус, нумәсман, ԓўв вантәпса ватәԓ.
ACT 12:10 Оԓәӈ ԓавәԓты ԉаԉ йох пӑ кимет ԓавәԓты ԉаԉ йох мŏхты мӑнман, ԓын вош пеԓа мӑнты карты пушас ова йŏхәтсәтән. Щи ов ԓын урӈәнән ԓўв сӑхатәԓ пелки пўншантәс; ԓын ким этсәӈән пӑ и вош хулы мӑтсәԓән, щӑԓта шамкап ангел ԓўв пўӈԓәԓ эԓты хŏԓт пентәс.
ACT 12:11 Щиӈәԋща Петра, сэмәԓ этмаԓән, йастәс: «Ин манэма йӑна щи ныԓа, Турәм Куща Ԓўв ангеләԓ китмаԓ пӑ мӑнэм хŏԓт пайәтсәԓы Ирод йош эԓты пӑ иса щит эԓты, мўй иудей мир ԓавԓәс».
ACT 12:12 Щӑԓта, тыйэԓ–тохэԓ вантымаԓ йўпийән, Мария, Марка айәԓтты Иоанн аԋԏи, хот ԉэпа йохтәс, хŏта ар хŏйат ӑктәщсәт пӑ пойәкщәсәт.
ACT 12:13 Хун пӑ Петра пушас овән хŏплэмәс, Рода нэмпи митнэ хуԓәтты ким этәс.
ACT 12:14 Щӑԓта, Петра тўр сый мŏштымаԓ кемән, амәтмаԓ рўвән пушас ов ӑт пўшсәԓы, йŏхи хухәԓмәман, такан йастәс, мӑтты Петра пушас овән ԓойәԓ.
ACT 12:15 Тўмет пӑ ԓўвеԓа йастәсәт: «Нӑӈ мўй ŏшенән уԓԓән?» Туп ԓўв и йэԓԓы ўра верәԓ. Ԓыв пӑ пŏтәртсәт: «Щит Ԓўв ангеләԓ».
ACT 12:16 Щи кўтән Петра пушас ов сэкты йэԓԓы питәс. Хун пӑ ов пўшсэԓ, ԓўвеԓ кащаԓәсәт пӑ ӑԓ пакәтсәт.
ACT 12:17 Ԓўв пӑ, йошәԓән пос верман, мӑшйайән ат усәт, ԓывиԓаԓа пŏтәртсәԓы, хŏты Турәм Куща ԓўвеԓ пӑтлам хот эԓты ким этәԓтәсԓы, пӑ йастәс: «Тӑм вер эԓты Иаков пӑ хӑнам йохәт айкеԓән вераԓән». Йухәт, ким этмаԓән, па тӑха пеԓа мӑнәс.
ACT 12:18 Хӑтԓа йўвмаԓ йўпийән, ԉаԉ йох кўтән ун хурэп тыйәс, хŏты Петра йис.
ACT 12:19 Ирод пӑ, ԓўвеԓ кӑшмаԓ пӑ ӑт уйәтмаԓ йўпийән, ԓавԓәм ԉаԉ йох сўтәтсәԓы пӑ ԓывиԓаԓ пӑратты партсәԓы. Йухәт ԓўв Иудея эԓты Кесарияйа мӑнәс пӑ щита хӑщиԓыйәс.
ACT 12:20 Ирод Тир пӑ Сидон хŏйатәт пеԓа лики хуры ус; ԓыв пӑ, ԓыв кўтэԓән йастатман, ԓўв хŏщайәԓ йŏхәтсәт пӑ хон хот куща, Власт, ԓыв пеԓайэԓ керәтман, пайԓы уԓәпса вохсәт, ԓыв мўвеԓ хон мўв эԓты ԓэс, щишән.
ACT 12:21 Йастәм хӑтәԓән Ирод, хон ԓумтәма ԓумәтԓыман, пӑԓ тӑхайа опсәс пӑ ԓыв пеԓайэԓ пŏтәртәс.
ACT 12:22 Мир такан ԋухмийәԓ: «Щит ӑнта хŏйат, Турәм тўр сый».
ACT 12:23 Туп шӑмкапан Турәм Куща ангел ԓўвеԓ мушәӈа версәԓы, щи урәӈән, мўйа ԓўв Турма ишәк йасәӈ ӑт йастәс; щӑԓта Ирод ики, суԓ войәтән шӑпиман, пӑрәс.
ACT 12:24 Турәм йасәӈ пӑ арамәс пӑ лакки ԓӑрпиԓәс.
ACT 12:25 Варнава пӑ Савл, партәм верән тӑԓаӈа верман йўпийән, Марк нэма пŏнәм, Иоанн пӑтән ўйман, Иерусалим эԓты [Антиохияйа] йŏхԓы йŏхәтсәтән.
ACT 13:1 Антиохия вошән, щита уԓты пойәкщәты хойатәт ӑктәщиты вер хŏща тухәԓ Турәм айкеԓ туты хŏйатәт пӑ утәԓтәты йох усәт: Варнава, пӑ Нигера айәԓтты Симеон, пӑ Луций, Киринея ху, пӑ Манаил, Ирод ԋӑԓмет мўв щуӈ куща пиԓән энмәм ху, пӑ Савл.
ACT 13:2 Хун ԓыв Турәм Кущайа верәт версәт пӑ вўщԓәсәт, Йэмәӈ Ԓыԓ йастәс: «Варнава пӑ Савл Мӑнэма щи вер пеԓа мийаԓән, мўй урәӈән Ма ԓынан вохсәԓам».
ACT 13:3 Щиӈәԋща ԓыв, ўщԓәмеԓ пӑ пойәкщәмеԓ йўпийән пӑ йошԓаԓ ԓын эԓтыԓән поныԓымеԓ йўпийән, ԓынан эсәԓсэԓ.
ACT 13:4 Щитӈән, Йэмәӈ Ԓыԓән китман уԓман, Селевкияйа йŏхәтсәтән, щиԓта пӑ Кипр пухра хŏпән мӑтсәӈән;
ACT 13:5 Щӑԓта Саламинән уԓман, иудейәт пойәкщәты хотәтән Турәм йасәӈ пŏтәртсәтән; ԓын ԉэпәнән Иоанн па ус, ԓынана ԋотты урәӈән.
ACT 13:6 Пухәр мўв ԓŏватәԓән Паф унты мӑнман, ԓыв и мŏԓты иудей ху, нэмәԓән Вариисус, уйәтсәтән. Ԓўв щӑртәӈ пӑ ԋаԓмәӈ ики ус, Турәм айкеԓ туты икийа верәсәс.
ACT 13:7 Ԓўв проконсул Сергий Павел, ŏшәӈ ху, пиԓән ус. Проконсул Турәм йасәӈ хуԓты ԓӑӈхас, щишән Варнава пӑ Савл вана вохсәԓы.
ACT 13:8 Елима, щӑртәӈ ики, пӑ (ԓўв кимет нэмәԓ щит айәԓԓәԓ) ԓыв пиԓԓаԓән ӑт кашащәԓ, эвәԓты вер эԓты проконсул пўӈԓа ԓавәԓԓәԓы.
ACT 13:9 Туп Савл, ԓўв хŏԓна Павел, Йэмәӈ Ԓыԓән тэкәнман пӑ сэмӈиԓаԓ ԓўв пеԓайәԓ пайәтман,
ACT 13:10 йастәс: «Йээй, кӑмән ŏщмарән пӑ кӑмән атәмән тэкнәм ŏт, хиԋ пŏх, кашәӈ вещкат вер пеԓа ԉик туты ŏт! Нӑӈ Турәм Куща тўӈ йушәт эԓты йŏвра хўщты а мўй вŏԓыԓән пеԓа?
ACT 13:11 Ин тӑм, Турәм Куща йош нӑӈ пеԓайэн нŏх аԓԓәмман уԓ: нӑӈ сэмԓы питԓән пӑ пŏра унты хӑтәԓ ӑт ватԓэн». Щӑԓта шӑмкап ԓўв эԓтэԓ тўрма пӑ пӑтлам лаӈкантәс, пӑ ԓўв, сӑм мӑнман, тыйэԓ–тохэԓ шушиԓыйәс, ватәԓтәты хŏйат кӑншәс.
ACT 13:12 Щиӈәԋща проконсул тыйәм вер кащаԓәмаԓ кемән, Турәм Куща утәԓтәпса эԓты, ощатыман, эвԓәс.
ACT 13:13 Паф эԓты нык хўвԓәмеԓ кемән, Павел пӑ ԓўв пўӈԓәԓән уԓәм ŏтӈән Памфилия мўвән уԓты Пергияйа йŏхәтсәт. Туп Иоанн, ԓын эԓтыԓән пўӈԓа йирԓәман, Иерусалима йŏхԓы мӑнәс.
ACT 13:14 Ԓын пӑ, Пергия эԓты мӑнман, Писидия ԉэпән уԓты Антиохияйа йŏхәтсәтән пӑ, иудейәт пойәкщәты хота шаббат хӑтәԓән ԓŏӈман итән, иԓ омәссәтән.
ACT 13:15 Закон пӑ Турәм айкеԓ туты хŏйатәт нэпекәт ԓўӈтәм йўпийән иудейәт пойәкщәты хот кущайәт ԓынана йастәты китсәт: «Хӑнам йохӈән! Нын мир пеԓа нŏмәс такапты йасәӈ тӑйԓәтән ки, пŏтәртатән».
ACT 13:16 Павел, нŏх ԓойман пӑ йошәԓән пос верман, йастәс: «Израиль йох пӑ Турәм эԓты пӑԓты мŏхет! Хуԓәнтаты.
ACT 13:17 Тӑм мир Турәм мўӈ ащиԓув пирысԓы пӑ тӑм рут мир Египет мўв хŏща уԓмаԓ пŏрайән ԓӑтәӈа версәԓы, пӑ йурәӈ йошәԓән щиԓта йэԓ тусԓы,
ACT 13:18 пӑ ԋӑԓйаӈ тӑԓ кем ԓывиԓаԓ таԓ мўв хŏща ԓапәтсәԓы.
ACT 13:19 Щӑԓта, ԓапәт сыр мир Ханаан мўвән пӑратмаԓ йўпийән, щитԓаԓ мўв ԓывиԓаԓа йэԓԓы тӑйты ортсәԓы.
ACT 13:20 Пӑ щи йўпийән, ԋӑԓсот ветйаӈ кем тӑԓ ԓывиԓаԓа сўт йохәт мийԓыйәс Турәм айкеԓ туты хŏйат Самуил унты».
ACT 13:21 Йухәт ԓыв хон вохсәт, пӑ Турәм ԓывиԓаԓа Саул мӑс. Кис пŏх, Вениамин рут эԓты уԓты ху. Щиты ԋӑԓйаӈ тӑԓ хӑщәс.
ACT 13:22 Ԓўвеԓ пўӈԓа пайәтмаԓ йўпийән, ԓывиԓаԓа хона Давид пŏтсәԓы. Турәм ԓўв эԓтэԓ йастәс: 'Давид, Иессей пŏх, Ма сӑмема рӑхты ху, Ма уйәтсәм щит, хŏй Ма ԓӑӈхаты ŏтԓам хŏԓ тӑԓаӈа верԓәԓы'.
ACT 13:23 Ԓўв ԋаврэмԓаԓ эԓты Турәм аԉиԓыйәм верәԓ хўват Израиль мира Нŏх пайәтты Ŏт мӑс - Иисус.
ACT 13:24 Ԓўв йӑмәс эттаԓ йэԓпийән Иоанн хŏԓ Израиль мира щит эԓты пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ.
ACT 13:25 Иоанн, ԓўв верәԓ йэтшәты питмаԓән, пŏтәртәс: 'Хŏй йўкана мӑнэм нын тӑйԓәԓән? Ма ӑнта щит; туп ин, ма йўпемән йиԓ щит, Хŏй хŏща кўр ԓумтәмәԓ эхты ма ӑт рӑхԓәм'.
ACT 13:26 Хӑнам йох, Авраам рут ԋаврэмәт, пӑ нын кўтәнән Турәм эԓты пӑԓты ŏтәт! Нынана тӑм нŏх пайтәсты йасәӈ китман уԓ.
ACT 13:27 Иерусалимән уԓты мŏхет пӑ ԓыв кущайԓаԓ, Иисус ӑт мŏштәсэԓ пӑ сўтәтсэԓ, пӑ щишән Турәм айкеԓ туты хŏйатәт йасӈәт тӑԓаӈа версәԓаԓ, щи йасӈәт кашәӈ шаббат хӑтәԓән ԓўӈәтԓайәт.
ACT 13:28 Ԓыв Ԓўв хŏщайәԓ нэмәԓты нўр ӑт уйәтсәт, мўй урәӈән Ԓўв сŏрма ат пайәтса, пӑ ищипа Пилат эԓты Ԓўвеԓ паратты щир вохсәт.
ACT 13:29 Хун пӑ хŏԓ Ԓўв эԓтэԓ хӑншәм ŏт тӑԓаӈа версэԓ, йўх эԓты иԓ ўймеԓ йўпийән, хŏшапәӈ кев ԓыпийа Ԓўвеԓ пŏтсэԓ.
ACT 13:30 Туп Турәм пӑрәм эԓты Ԓўвеԓ нŏх ԓыԓӈатсәԓы.
ACT 13:31 Ԓўв ар хӑтәԓ хўват щитәта этԓыйәс, хŏй Ԓўв пиԓәԓән Галилей эԓты Иерусалима этәс пӑ хŏй ин мир йэԓпийән Ԓўвеԓ вантәм ŏтәта уԓԓәт.
ACT 13:32 Пӑ мўӈ нынана Йӑм Айкеԓ йастәԓув: ащиԓува аԉәм вер, Турәм мўӈева тӑԓаӈа версәԓы, ԓыв ԋаврэмԓаԓа, Иисус нŏх ԓыԓӈатман,
ACT 13:33 хŏты пӑ кимет псаломән хӑшман уԓԓа: 'Нӑӈ Ма Пŏхем: Ма ин Нӑӈен сэма пайәтсэм'.
ACT 13:34 Ԓўвеԓ пӑрәм эԓты нŏх ԓыԓӈатмаԓ йўпийән, щишән Ԓўв шимты ӑт питәԓ, тӑм эԓты щиты йастәс: 'Ма нынана, Давида аԉәм йӑмԓам мӑԓәм, йӑна'.
ACT 13:35 Щишән па тӑхайән па пŏтәртәԓ: 'Йэмәӈ Нӑӈ Ŏтэна шимты щир шийаԓәты ӑт мӑԓэн'.
ACT 13:36 Давид, ԓўв пŏрайәԓән Турәм ԓӑӈхаты щир хўват вермаԓ йўпийән, пӑрәс, пӑ ԓўв ащиԓаԓ хŏща пŏтса, пӑ шимты вер шийаԓәс;
ACT 13:37 Тўми, Хŏй Турәмән нŏх ԓыԓӈатса, шимты вер ӑт шийаԓәс.
ACT 13:38 Щишән, хӑнам йох, ма ԓӑӈхаԓәм, нын ат уйәтсәԓән, Ԓўв урӈәԓән нынана кӑрэк йŏрэмәты щир такан аԉԓа;
ACT 13:39 пӑ мўй хŏща иса, нын Моисей законән вещкат щира пайтәсты ӑт верәтсәты, щит хŏща кашәӈ эвәԓты ŏт Ԓўв хўватәԓән вещката пайтәсәԓ.
ACT 13:40 Шаващаты малы, Турәм айкеԓ туты хŏйатәт хŏща йастәм ŏт нынана аԓт хойәԓ:
ACT 13:41 'Вантаты, укщәпԓәты ŏтәт, ощатыйаты пӑ хŏԓт пеԓа ушаты; Ма нын хӑтәԓԓәнын щимәщ вер верԓәм, щит мӑтты хŏйатән нынана пŏтәртса ки, нын ӑт эвәԓсәты ԓуԓән'».
ACT 13:42 Ԓын иудейәт пойәкщәты хот эԓты ким этман пŏрайән па рут йохәтән па шаббат хӑтәԓән щит эԓты пŏтәртты партсайӈән.
ACT 13:43 Хун пӑ ӑктәщийәм хŏйатәт лакки эсәԓсайәт, ар пеләк иудей йох пӑ па рут эԓты иудейәт щира эвԓәптәм Турәм пеԓа сӑмәӈ ŏтәт Павел пӑ Варнава йўпи туԓәт. Ԓын, ԓыв пиԓԓаԓән пŏтрэмәман, ԓывиԓаԓ Турәм йӑм хŏща уԓты нŏмәс такапсәтән.
ACT 13:44 Па шаббат хӑтәԓән вош тэԓ мир Турәм йасәӈ хуԓәтты хŏԓ ӑктәщәс.
ACT 13:45 Туп иудейәт, мир шийаԓәмеԓ кемән, ԓоԓәмты нŏмәсән тэкәтсайәт пӑ, кӑткўтән уԓман пӑ ўӈращтыман, Павел пŏтәртты верәт пеԓа ўра вортты питсәт.
ACT 13:46 Щиӈәԋща Павел пӑ Варнава такан йастәсӈән: «Нынана оԓәӈән Турәм йасәӈ пŏтәртты мосәс, туп хŏты нын Турәм йасәӈ пўӈԓа ушиԓԓән пӑ нынан нын и пўша уԓәпсайа ӑт рӑхтыйа верԓәԓән, щишән, мўӈ па рут йох пеԓа йастәԓув».
ACT 13:47 Тӑмиты Турәм Куща мўӈева йасәӈ хӑйәс, щишән: 'Ма Нӑӈен па рут йоха нŏви кеша пŏтсэм, Нӑӈ, нŏх пайтәсты щир урәӈән, мўв сŏхәнты унты ат усән'.
ACT 13:48 Па рут мир, щит хуԓман, амтәтԓысәт пӑ Турәм Куща йасәӈ ишәксэԓ, пӑ хŏԓыйэ, хŏй и пўша уԓты уԓәпсайа пирысайәт, эвәԓсәт.
ACT 13:49 Щӑԓта Турәм Куща йасәӈ щи мўв ԓŏватән лакки ԓӑрпиԓәс.
ACT 13:50 Туп иудейәт, Турәм пеԓа сӑмәӈ, ԓӑтәӈ нэӈәт пӑ вошән ŏха уԓты хŏйатәт хўщмәмеԓ йўпийән, Павел пӑ Варнава пеԓа воштәты нŏмәс версәт пӑ уԓты тӑхайән эԓты ԓынан воштәсэԓ.
ACT 13:51 Ԓын пӑ, кўрԓын эԓты хиш ԓывиԓаԓа пӑркатман, Икония воша мӑтсәӈән.
ACT 13:52 Утәԓтәты йох пӑ амәтән пӑ Йэмәӈ Ԓыԓән тэкәнман усайәт.
ACT 14:1 Иконияйән ԓын и йӑха иудейәт пойәкщәты хота ԓŏксәӈән пӑ щиты пŏтәртсәӈән пӑ щи арат ар иудейәт пӑ грекәт эвәԓсәт.
ACT 14:2 Ԓын айкеԓәна ӑт эвәԓты иудейәт пӑ хӑнам йохәт йэщаԓт па рут йох сӑмԓаԓ йŏвра хўщсэԓ пӑ ԉикмәԓтсэԓ.
ACT 14:3 Пӑ хŏты, ԓын щита йӑм хўват усӈән. Ԓын Турәм Куща эԓты хӑрщийа пŏтәртсәӈән, Хŏй Ԓўв йӑмәԓ йасәӈ ныты урәӈән, ԓын йошԓәнән йэмәӈ посәт пӑ вантыԓԓаӈәԓ верәт верәс.
ACT 14:4 Щи кўтән вошән мир кӑтна ортәсәс: итԓаԓ иудейәт пеԓа усәт, киметԓаԓ пӑ – апостоләт пеԓа.
ACT 14:5 Хун пӑ па рут йох пӑ иудейәт ԓыв кущайԓаԓ пиԓән ԓын пеԓайән ӑратсәт, ԓынан йэԓапты пӑ кевән йовәԓты урәӈән,
ACT 14:6 ԓын, щит эԓты хуԓман, Ликаония мўв вошӈәна, Листрайа пӑ Дервияйа, пӑ щи ԉэпән уԓты куртәта мӑтсәӈән,
ACT 14:7 пӑ щита Йӑм Айкеԓ тутԓысӈән.
ACT 14:8 Листрайән и мŏԓты, вевтам кўрпи ху опсәс, пӑтлам хот уш эԓты кўрԓы питман ус, пӑ нэмәԓты пŏрайән ӑт шушиԓыйәс.
ACT 14:9 Ԓўв Павел пŏтрәпса хуԓәнтәс. Павел ԓўв пеԓайәԓ ӑӈкәрмаԓ йўпийән, кащаԓәсԓы, ԓўв тўмтака йиты кеша эвәԓты щир тӑйәԓ,
ACT 14:10 сыйәӈ тўрән йастәс: «Нӑӈена йастәԓәм Турәм Куща Иисус Христос нэм урәӈән: нӑӈ кўрӈиԓана тўӈа нŏх ԓойа». Щӑԓта ԓўв и щишән нŏх ԓойәмтәс пӑ шушиԓыты питәс.
ACT 14:11 Мир пӑ, щит шийаԓәмаԓ кемән, мўй Павел верәс, ԓўв тўр сыйәԓ сыйәӈа версәԓы, Ликаония йасәӈән пŏтәрман: «Ԓуӈхәт хŏйат хŏрасән мўӈ хŏщайэв иԓ эсԓәщсәт».
ACT 14:12 Щӑԓта Варнава Зевса айәԓтса, Павел пӑ Ермийа айәԓтса, ԓўв йасәӈ хŏща кущайа ус.
ACT 14:13 Вошеԓ йэԓпийән Зевс ԓух хот ус, пӑ ԓўвеԓа йир верты ху, пушас ова хор мисәт пӑ сэвәм хŏрамәӈ лыптәт тўвман, мир пиԓән йирасты ўтщийәс.
ACT 14:14 Туп апостолӈән Варнава пӑ Павел, щит хуԓман кемән, ԓын сŏхԓән лакки мӑншисԓән пӑ, мир хŏща ӑратман, такан сыйәӈ тўрән пŏтәртсәӈән:
ACT 14:15 «Йох! Мўй нын верԓәты? Мин па – нын хŏрпан хŏйатӈән, пӑ нынана Йӑм Айкеԓ пŏтәртԓәмән, нын тӑм йурԓы ԓуӈхәт эԓты Ԓыԓәӈ Турәм пеԓа ат керԓәсты, Хŏй турәм хӑр пӑ мўв, пӑ щарәс, пӑ хŏԓ щит, мўй ԓыпиԓаԓән уԓ тыйәԓтәс,
ACT 14:16 Хŏй хӑщәм ишән мирәта иса ԓыв йушԓаԓән йӑхты эсԓыйәс,
ACT 14:17 Ԓўв эԓтайәԓ йӑм верәтән айкеԓ мӑты щикуш ӑт вŏԓыԓыйәс, турәм хӑр эԓты мўӈева йэрт пӑ ԓэвмаӈ пŏра мийԓыман, щӑԓта ԓэтŏтән пӑ кашән мўӈ сӑмԓув вŏԓәтман, ус».
ACT 14:18 Щиӈәԋща, щит пŏтәртман, ԓын ўрайән мир хŏща щимәщ нŏмәс такапсәтән: ԓынана йир ӑт ат версәт пӑ кашәӈ хŏйат йŏхи ат мӑнәс. Щи кўтән ԓын щита уԓман, хŏйатәт утәԓтәсӈән,
ACT 14:19 Антиохия пӑ Икония эԓты тухәԓ иудейәт йŏхәтсәт пӑ, хун апостолӈән хӑрщийа пŏтәртсәӈән, ԓыв мира ԓын эԓтан пўӈԓа мӑнты номәс такапсәт, пŏтәртман: «Ԓын нэмәԓтты тўӈа–щира йасәӈ ӑт пŏтәртԓәӈән, туп иса олмащиԓӈән». Щӑԓта, мир хущмеԓ йўпийән, Павел кевән щӑх йовәԓтса пӑ вош ким пелка таԓса, ԓўвеԓ пӑрәма нумәссэԓ, щишән.
ACT 14:20 Хун пӑ утәԓтәты йохәт ԓўв пўӈԓәԓән ӑктәщсәт, ԓўв нŏх ԓойәс пӑ воша мӑнәс, кимет хӑтәԓән пӑ Варнава пиԓән Дервияйа мӑнәс.
ACT 14:21 Йӑм Айкеԓ тӑм вошән пŏтәртман пӑ йӑм арат утәԓтәты хŏйат Турәм Куща урәӈән мŏщатман йўпийән, ԓын йŏхԓы Листра, Икония пӑ Антиохия вошәт мŏхты мӑтсәӈән,
ACT 14:22 утәԓтәты йох сӑм такапман, эвәԓты щирән уԓты таӈман пӑ утәԓтәман, ар шук тўвман, мўӈева Турәм Хон Уԓәпсайа ԓŏӈты мосәԓ.
ACT 14:23 Павел пӑ Варнава кашәӈ пойәкщәты хŏйатәт ӑктәщиты щир кеша уна уԓты йох пŏтсәӈән пӑ, вўщԓыман пойәкщәсӈән пӑ Турәм Кущайа мӑсԓән, Хойа ԓыв эвәԓсәт.
ACT 14:24 Йухәт, Писидия мŏхты мӑнман, Памфилияйа йŏхәтсәтән,
ACT 14:25 пӑ, Турәм Куща йасәӈ Пергияйән пŏтәртман йўпийән, Атталияйа охәԓсәӈән;
ACT 14:26 Щиԓта пӑ Антиохияйа хопән мӑтсәӈән, хŏта Турәм йӑма щи вер пеԓа эвләптыман усайӈән, мўй тӑԓаӈа версәӈән.
ACT 14:27 Щи йŏхәтман пӑ пойәкщәты мŏхет йӑха ӑкәтман йўпийән, ԓын хŏԓ иса пŏтәртсәԓән, мўй ԓын пиԓәнән Турәм верәс пӑ мўй щирән Ԓўв эвәԓты вер ов па рут мира пел пўшсәԓы.
ACT 14:28 Пӑ щита утәԓтәты йохәт пиԓән йам арат сыс усӈән.
ACT 15:1 Тухԓәт, Иудея эԓты йŏхтәм ŏтәт, хӑнам йох утәԓтәсәт: «Моисей щирән ӑт эвтәсԓәты ки, нŏх пайтәсты ӑт верәтԓәты».
ACT 15:2 Хун пӑ нŏмәс ар щира пӑ мŏԓты кем ўра ворты вер ԓыв пиԓԓаԓән Павел пӑ Варнава хŏща тыйәс, Павела пӑ Варнавайа пӑ ԓыв кўтэԓ эԓты па тухәԓ йохәта Иерусалима мӑнты пŏтсайәт пӑ апостоләт пӑ уна уԓты икет пиԓән тӑм вер эԓты пŏтрэмәты.
ACT 15:3 Щиӈәԋща, пойәкщәты мŏхэтән мӑнты ԋотәм йўпийән, ԓыв Финикия пӑ Самария мŏхты мӑтсәт, па рут мир Турәм пеԓа керԓәты вер эԓты пŏтәртман, пӑ хŏԓ хӑнам йох хŏща ун амәт версәт.
ACT 15:4 Иерусалима йŏхәтмеԓ кемән, ԓыв пойәкщәты мŏхетән, апостоләтән пӑ ун икетән вана ўсайәт, пӑ Павел пӑ Варнава такан иса хŏԓыйэ йастәсԓән, Турәм мўй ԓын пиԓанән верәс пӑ хŏты па рут йоха эвәԓты вер ов пел пўншәс.
ACT 15:5 Щиӈәԋща тухәԓ фарисейәт эԓты эвԓәм мŏхет ўшмащты питсәт пӑ пŏтәртсәт, па рут йох эвтәптәты пӑ Моисей закон нŏх катәԓты партты мосәԓ.
ACT 15:6 Апостоләт пӑ ун икет щи вер ватты урәӈән ӑктәщсәт.
ACT 15:7 Хув нумәсмеԓ йўпийән Петра, нŏх ԓойман, ԓывиԓаԓа йастәс: «Хӑнам йох! Нын уйәтԓәты, Турәм оԓәӈ хӑтԓәт эԓты мўӈ эԓтэв мӑнэм пирысԓы, ма ўӈԓэм эԓты па рут мир Йӑм Айкеԓ йасәӈ ат хуԓсәт пӑ ат эвәԓсәт;
ACT 15:8 пӑ Сӑм Уйәтты Турәм ԓывиԓаԓа ныты пос мӑс, ԓывиԓаԓа Йэмәӈ Ԓыԓ мўӈ итэва мойԓәс.
ACT 15:9 Щӑԓта мўӈ пӑ ԓыв кўтэԓа нэмәԓтты кӑт сыра вантәсты щир ӑт пŏнәс, эвәԓты верән ԓыв сӑмԓаԓ сыстапсәԓы.
ACT 15:10 Мўйа пӑ нын ин Турәм хўщԓәԓән, утәԓтәты хŏйатәт сапԓа ԓавәрт пŏнман, мўй ӑнта мўӈ ащиԓув, ӑнта мўӈ туты ӑт верәтсэв?
ACT 15:11 Туп мўӈ эвәԓԓув, Турәм Куща Иисус Христос мӑты йӑмән, ԓыв итэԓән, нŏх пайәтԓайув».
ACT 15:12 Щи йўпийән ӑктәщәм мŏхет хŏԓ мӑшйайа йисәт пӑ Варнава пӑ Павел хуԓәтсәт. Ԓын пŏтәртсәтән, мўй хŏрпи йэмәӈ посәт пӑ вантыԓԓаӈәԓ верәт Турәм ԓын мŏхтан па рут мир кўтән верәс.
ACT 15:13 Щи йўпийән, хун ԓын мӑшйайа йистән, Иаков пŏтәр ўс пӑ йастәс: «Хӑнам йох! Мӑнэм хуԓәнтаты.
ACT 15:14 Симон аԉиԓысԓы, хŏты Турәм оԓәӈән па рут мир пеԓа ӑӈкәрмәс, щитԓаԓ эԓты Ԓўв нэмәԓ урәӈән мир ӑкәтты.
ACT 15:15 Тӑм эԓты Турәм айкеԓ туты хŏйатәт ищи пŏтәртысәт, хŏты хӑшман уԓԓа:
ACT 15:16 'Йухәт йŏхәтԓәм пӑ Давид иԓ питәм хот нŏх верԓэм, пӑ щита мўй шўкатман уԓԓа, нŏх верԓэм пӑ ԓўвеԓ па йӑԓпа ԓэщатԓэм,
ACT 15:17 па хŏйатәт пӑ хŏԓ мирәт Турәм Куща ат кӑшсәт, хŏйтат кўтән Ма нэмем йастәԓа. Щиты Турәм Куща, тӑм мўй иса верты Ŏт, пŏтәртәԓ'.
ACT 15:18 Турма хŏԓ Ԓўв верԓаԓ йис эԓты ԓэрәт.
ACT 15:19 Щишән ма нумәстэмән па рут мир эԓты Турәм пеԓа керԓәты ŏтәт уԓәпсайэԓ ԓавәрта верты ӑт мосәԓ,
ACT 15:20 ԓывиԓаԓа хӑшты мосәԓ, ԓыв ԓуӈхәтән шӑкатәм ԓэтŏт эԓты, пакрасԓәты вер эԓты, шакәптәм вой ԋŏхи пӑ ўр эԓты йŏхи ат ԓавԓәссәт, пӑ па хŏйатәта щит ӑт ат версәт, мўй ԓывиԓаԓа ӑт ԓӑӈхасәт.
ACT 15:21 Моисей закон йис тэԓән вошәтән иса пŏтәртԓа пӑ кашәӈ шаббат хӑтәԓән иудейәт пойәкщәты хотәтән ԓўӈәтԓа».
ACT 15:22 Щиӈәԋща апостоләт пӑ ун икет аратәԓ пойәкщәты хŏйатԓаԓ пиԓән, ԓыв кўтԓаԓ эԓты йох пирыман, Антиохияйа Павел пӑ Варнава пиԓән китты нŏмәс версәт, щи мŏхет: Варсавайа айәԓтты Иуда, пӑ Сила, хӑнам йох кўтән кущайа уԓты кӑтӈән.
ACT 15:23 Ԓыв пиԓԓаԓән щимәщ хӑншәм айкеԓ мӑсәт: «Апостоләт пӑ ун икет пӑ хӑнам йохәт Антиохияйән, Сирияйән пӑ Киликияйән уԓты па рут мир эԓты уԓты хӑнам йохәта: ўща уԓаты.
ACT 15:24 Мўӈ хуԓтмәсэв, мӑтты тухәԓ, мўӈ эԓтэв ким этәм ŏтәт, ԓыв пŏтәрԓаԓән нынан ԓыԓәтсәԓаԓ пӑ нын сӑмԓән йэша мӑнәԓтсәԓаԓ, пŏтәртман, мӑтты эвтәсты мосәԓ пӑ закон хўват уԓты мосәԓ. Щит мўӈ ԓывиԓаԓа ӑт партыԓысув,
ACT 15:25 мўӈ, йӑха актәщман, йох пирыман, сӑмԓува мосты мўӈ Варнавайэв пӑ Павелэв пиԓән нын хŏщайән китты и нŏмәсән артаԓәсэв,
ACT 15:26 ԓын мўӈ Турәм Кущайэв Иисус Христос нэм урәӈән сӑмԓән мийәм хŏйатӈән.
ACT 15:27 Щиӈәԋща, мўӈ Иуда пӑ Сила китсув, нынана ԓын йасәӈән щит па ԓэра верԓәԓән.
ACT 15:28 Йэмәӈ Ԓыԓ пӑ мўӈ тӑм мосты вер тўмпийән нынан нэмәԓтты па вер верты ӑт мӑԓув:
ACT 15:29 ԓух йир, пӑ ўр, пӑ шакәптәм ԋŏхи, пӑ пакрасԓәты эԓты йŏхи ԓавԓәсты, пӑ па хŏйатәта щит ӑт верты, мўй нынана ӑт ԓӑӈхаԓты. Тӑм эԓт тӑйман, йӑма верԓәты. Тўмтака уԓаты».
ACT 15:30 Щӑԓта, китәм ŏтәт Антиохияйа йŏхәтсәт пӑ, хŏйатәт ӑкәтмеԓ кемән, хӑншәм нэпек мӑсэԓ.
ACT 15:31 Ԓыв пӑ, ԓўӈәтмеԓ кемән, щи утәԓтәпса эԓты нŏх амәтсәт.
ACT 15:32 Иуда пӑ Сила, Турәм айкеԓ туты хŏйатӈәна уԓман, хӑнам йоха йӑм арат йасәӈ утәԓтәты щира йастәсӈән пӑ ԓывиԓаԓ такапсәԓән.
ACT 15:33 Мŏԓкем щита уԓман йўпийән, ԓын хӑнам йохән апостоләт хŏща йӑм нŏмәсән эсәԓсайӈән.
ACT 15:34 Туп Сила щита хӑщты нŏмәсән йŏхәтса. [Иуда пӑ Иерусалима йŏхԓы йŏхтәс.]
ACT 15:35 Павел пӑ щӑԓта Варнава Антиохияйән усӈән. Щита ԓын утәԓтәсӈән пӑ Турәм Куща йасәӈ Йӑм Айкеԓа па мŏхет пиԓән тутԓысӈән.
ACT 15:36 Мŏԓты кем пŏра хӑщмаԓ йўпийән Павел Варнавайа йастәс: «Па мӑнԓәмән, мин хӑнам йохԓәмән хŏща йӑхԓәмән, кашәӈ вошән, хŏта мин Турәм Куща йасәӈ тутԓысмән, ватԓэмән, хŏты ԓыв уԓԓәт».
ACT 15:37 Варнава, Марка айәԓты, Иоанн пӑтән ўты ўтщисԓы.
ACT 15:38 Туп Павел щит пӑтән ўты ӑт ԓӑӈхас, хŏй Памфилияйән ԓынан хӑйсәԓы пӑ ԓынана мийәм вер тӑԓаӈа верты ӑт ԋотәс.
ACT 15:39 Тӑм эԓты нŏпса ӑт ԓэщаԓәты вер тыйәс, щишән ԓын кўтанән кӑтна мӑтсәӈән; щӑԓта Варнава, Марк ўйман, Кипр пеԓа нык хўвԓәс;
ACT 15:40 Павел пӑ, ԓўвеԓа Сила пирымаԓ йўпийән, хӑнам йохәтән Турәм йӑма эвԓәптыман, мӑнәс,
ACT 15:41 пӑ Сирия пӑ Киликия сӑхат, пойәкщәты мир такапман, йӑӈхәс.
ACT 16:1 Ԓўв Дервия пӑ Листра вошӈән унты йŏхтәс. Пӑ щита и мŏԓты утәԓтыты ху ус, нэмәԓән Тимофей. Ԓўв аԋԏэԓ эвԓәм иудей нэ, ащеԓ пӑ – грек ху,
ACT 16:2 пӑ ԓўв эԓтэԓ Листрайән пӑ Иконияйән уԓәм хӑнам йох йӑма йастыԓысәт.
ACT 16:3 Павел ԓўвеԓ пӑтән ўты нŏмәс верәс; пӑ, ўймаԓ кемән, щи тӑхайәтән уԓәм иудейәт урәӈән, эвәтты верән версәԓы; ԓўв ащеԓ грека уԓты вер хŏԓыйэ хŏйатәтән уйәтса, щишән.
ACT 16:4 Вошәт сӑхат мӑнман, ԓыв эвәԓты мŏхет апостоләтән пӑ ун икетән Иерусалимән ԓэщатәм мŏрт щирәт хўват уԓты партсәт.
ACT 16:5 Пӑ пойәкщәты актәщәм мŏхет кашәӈ тӑхайән эвәԓты верән такамтыԓәт пӑ кашәӈ хӑтәԓ арамәԓәт.
ACT 16:6 Фригия пӑ Галатия мўв сӑхат мӑнман, Йэмәӈ Ԓыԓән Асия мўвән ԓыв Йӑм айкеԓ туты ӑт эсәԓсайәт.
ACT 16:7 Мисия мўв унты йŏхәтмеԓ йўпийән, Вифиния мўва мӑнты ўтщиԓысәт; туп Йэмәӈ Ԓыԓ ԓывиԓаԓ тŏхи ӑт эсәԓсәԓы.
ACT 16:8 Мисия хӑйман, пӑ ԓыв Троада воша охәԓсәт.
ACT 16:9 Щӑԓта атәԓән Павела ватты щир ус: и мŏԓтты ху, Македония мўвәӈ ху, этәс. Ԓўв ԓойәс пӑ ԓўвеԓ вохԓәԓы: «Македонияйа йŏхта пӑ мўӈева ԋоты».
ACT 16:10 Щи вантәпса йўпийән ищи пўԉаӈ мўӈ Македонияйа мӑнты нŏмәс версув, нумәсман, Турәм Куща мўӈев щита Йӑм Айкеԓ тутԓыты вохсәԓы.
ACT 16:11 Щиӈәԋща, Троада вош эԓты нык хўвԓәмеԓ йўпийән, мўӈ тŏрԓы Самофракия пухәр мўва йŏхәтсув, кимет хӑтәԓ пӑ Неаполь воша,
ACT 16:12 щиԓта пӑ Филлиппы воша йŏхәтсув: Македония мўв щуӈән мет оԓәӈ вош, Рим пеԓа питәм вош. Тӑм вошән мўӈ кӑмәтса хӑтәԓ усув.
ACT 16:13 Шаббат хӑтәԓән пӑ мўӈ вош шӑнша йŏхан пеԓа этсув, хŏта, уԓтыйән, пойәкщәты тӑха ус, пӑ, иԓ омәсман, щита ӑктәщәм имет пиԓән пŏтәртсув.
ACT 16:14 Ԓыв кўтэԓән Фиатир вош эԓты Лидия нэмпи и нэ ус, ԓўв тынәӈ питы ўрты щӑшканәт тыныйәс. Лидия Турәм пеԓа сӑмәӈа ус, пӑ Павел мўй пŏтәртәс, Турәм Кущайән ԓўв сӑмәԓ щи пеԓа пел пўшса.
ACT 16:15 Хун пӑ ԓўв йиӈка ԓŏӈәԓтыса пӑ ԓўв йŏԓән уԓты мŏхиԓаԓ па, мўӈев ԓўв хŏщайәԓ вохсәԓы, пŏтәртман: «Нын мӑнэм Турәм Куща пеԓа тŏрԓы уԓты верэм йӑнайа ԓўӈәтсәԓԓән ки, ма хотэма ԓŏӈаты пӑ ма хŏщайэм уԓаты». Пӑ мўӈев эвԓәптәсԓы.
ACT 16:16 Щиты ус, хун мўӈ пойәкщәты тӑхайа мӑнмевән, и митнэ пиԓән уйтатсув, ԓўв кўԉ сŏхән катәԓман уса, аԉисыты щирәԓ хўват ԓўв кущайԓаԓа ар ŏх йŏхтәптыйәс.
ACT 16:17 Павел йўпийән пӑ мўӈ йўпевән шушман, ԓўв ўвәс, пŏтәртман: «Тӑм хŏйатәт – Нўм Турма рупитты йохәт, мўӈева нŏх пайтәсты йуш аԉԓәт».
ACT 16:18 Щиты ԓўв ар хӑтәԓ верыԓыйәс. Павел, ԉикащман, кўԉ сŏх пеԓа карэмәс пӑ йастәс: «Иисус Христос нэмән нӑӈен ԓўв ԓыпеԓ эԓты ким этты партԓэм». Пӑ атәм ԓыԓ ищи кумат ким этәс.
ACT 16:19 Щиӈәԋща ԓўв кущайԓаԓ, ваттэԓән, ԓыв ŏх йиты тӑхайэԓ хŏԓас, Павел пӑ Сила ԋӑрэмәсайӈән пӑ мир кущайәт хŏща вош хӑрыйа хŏрӈәԓтсайӈән.
ACT 16:20 Щӑԓта, ԓынан рим кущайӈән хŏща тўвман, йастәсәт: «Тӑм хŏйатӈән, иудейәта уԓман, мўӈ вошев уԓәпса ԓыԓԓәты щир этәԓтәԓтән
ACT 16:21 пӑ щимәщ щирәт эԓты пŏтәртԓәтән, мўй мўӈева, Рим хŏйатәта, вана ўты пӑ верты ӑт мосәԓ».
ACT 16:22 Мир ищиты ԓын пеԓайән эԓԓәс, рим кущайӈән пӑ ԓын эԓтайән сŏхԓән хŏԓт мӑшман йўпийән, ԓынан йўхән сэкты партсәԓән
ACT 16:23 пӑ ԓын, артан йўхән кўтәртыйәмӈән йўпийән, касна хота вŏщкисайӈән, касна хот шавиты хŏйата такан шавиты партсайӈән.
ACT 16:24 Щимәщ партәпса йоша павәтмаԓ йўпийән, ԓўв ԓынан ԓыпи касна хот йӑта вŏщкәсԓы пӑ ԓын кўрԓән йўх сэсыйа сэксәԓы.
ACT 16:25 Ат кўтәп кемән Павел пӑ Сила, пойәкщәман, Турәм, арыман, ишәксәԓән; касна хота питәм ŏтәт пӑ ԓынан хуԓәтсәт.
ACT 16:26 Шӑмкап мўв такан тӑриты питәс, щиӈәԋща касна хот пӑты ԋŏхԓәс; и щишән овәт хŏԓыйэ пелки пўншатсәт, пӑ хŏԓыйэ хŏйатәт хŏща сэсэт лыԋа йисәт.
ACT 16:27 Касна хот шавиты хŏйат пӑ, нŏх верԓәмаԓән, касна хот овәт пелки пуншәм шийаԓәмаԓ кемән, аԓты кешеԓ ким лакемәсԓы пӑ ԓўвеԓ ԓўв пӑратты ўтщисԓы, ԓўв нумәсәԓ, опсәм хŏйатәт хŏнтасәт.
ACT 16:28 Туп Павел сыйәӈ тўрән такан йастәс, пŏтәртман: «Нӑӈена нэмәԓтты атәм аԓ вера, мўӈ хŏԓ тӑта уԓԓув».
ACT 16:29 Ԓўв тўт такан вохәс, касна хот ԓыпийа хухәԓмәс пӑ тӑриман Павел пӑ Сила хŏща керәптыйәс,
ACT 16:30 пӑ, ԓынан ким этәԓтәман, йастәс: «Ма кущайӈәԓам! Мўй мӑнэм верты мосәԓ, нŏх пайтәсты урәӈән?»
ACT 16:31 Ԓын пӑ йастәсӈән: «Турәм Куща Иисус Христоса эвԓа, пӑ нӑӈ нŏх пайәтԓайән, нӑӈ хот тэԓэн па».
ACT 16:32 Щӑԓта Турәм Куща йасәӈ ԓўвеԓа пӑ хŏԓ, ԓўв хотәԓән уԓәм ŏтәта, пŏтәртса.
ACT 16:33 Пӑ ԓўв, ԓынан атәԓән ўймаԓ кемән, ԓын ԋўләмԓән нŏх ԉŏхәтсәԓы пӑ ищи мŏхты ԓўв йиӈка ԓŏӈәԓтыса пӑ ԓўв хотәӈ мŏхиԓаԓ па.
ACT 16:34 Щӑԓта, ԓынан йŏхи хотәԓа тўвмаԓ йўпийән, ԓэты пӑсана вохсәԓы пӑ хŏт тэԓәԓ пиԓән амтәс, Турма эвәԓмаԓ урәӈән.
ACT 16:35 Хун пӑ хӑтԓа йис, рим кущайӈән вошәӈ мит йохӈән йастәты китсәтән: «Щи хŏйатӈән эсԓаԓән».
ACT 16:36 Касна хот шавиты хŏйат щит эԓты Павела такан йастәс: «Рим кущайӈән нынан эсәԓты партсәтән; щиӈәԋща, ин ким этатән пӑ йӑм нŏмәсән мӑнатән».
ACT 16:37 Туп Павел ԓын пеԓайәна йастәс: «Минэмән, Рим хŏйатӈән, сўт такԓы хŏԓ мир сурән сэксәԓән пӑ касна хота вŏщкәсԓән, ин пӑ хӑԋайән эсәԓԓаймән? Ӑнта, ты ат йŏхәтԓәтән пӑ минэмән ԓын ким ат этәԓтәԓԓән».
ACT 16:38 Вошәӈ мит йохӈән щи йасӈәт рим кущайӈәна йастәсԓән, пӑ щитӈән, Рим йŏха уԓты вер хуԓман кемән, хŏԓт пӑԓтәмәсӈән.
ACT 16:39 Щӑԓта, щи йŏхәтсәтән, ԓын пеԓайән пойкащсәтән пӑ, ким этәԓтәман йўпийән, вош эԓты ким мӑнты партсәԓән.
ACT 16:40 Ԓын пӑ, касна хот эԓты ким этман йўпийән, Лидия хŏща йŏхәтсәӈән пӑ, хӑнам йохԓән шийаԓәман кемән, ԓывиԓаԓ утәԓтәсԓән, пӑ йэԓԓы мӑтсәӈән.
ACT 17:1 Амфиполь пӑ Аполлония мŏхты мӑнман, ԓын Фессалоника воша йŏхәтсәтән, хŏта иудейәт пойәкщәты хот ус.
ACT 17:2 Павел, ԓўв уԓԓытаԓ щирәԓән, ԓыв хŏщайэԓа ԓŏӈәс пӑ хуԓәм шаббат хӑтәԓ и йўпийән Йэмәӈ Нэпек эԓты ԓыв пиԓԓаԓән пŏтәртәс,
ACT 17:3 ԓывиԓаԓа аԉиԓыман пӑ тŏрԓы йастәман, Христоса сŏрма питты пӑ нŏх ԓыԓәӈԓәты мосәс, пӑ йастәс: «Тӑм Христос - щит Иисус, Хŏй эԓты ма нынана пŏтәртԓәм».
ACT 17:4 Щӑԓта ԓыв эԓтыԓаԓ тухәԓԓаԓ эвәԓсәт пӑ Павел пӑ Сила пеԓа пайтәссәт, хŏты грекәт эԓты, Турәм пеԓа сӑмәӈ хŏйат щи арат ар, и щиты пӑ ԓӑтәӈа уԓты нэӈәт эԓты йӑм арат.
ACT 17:5 Туп ӑт эвԓәм иудейәт, шек нŏмәсән ԉикащман пӑ вош хӑри эԓты тухәԓ ӑт рӑхты хŏйатәт ўйман, похла ӑктәщсәт пӑ вош нŏх ԋŏхаԓтты питсэԓ пӑ, Иасон хот ԉэпа ӑратмеԓ кемән, ԓынан, мир хŏща ким туты урәӈән, кӑшсэԓ.
ACT 17:6 Ԓынан ӑт уйәтмеԓ йўпийән, ԓыв Иасон пӑ па эвәԓты хӑнам йох вош кущайәт хŏща хипԉәԓтсәԓаԓ, ўвман: «Тӑм мўв ԓŏватән уԓәпса шўкатты ŏтәт ты па йŏхәтсәт,
ACT 17:7 Иасон пӑ ԓывиԓаԓ вана ўсԓы, пӑ хŏԓыйэ ԓыв, па Ŏт, Иисус, хона тӑйман, кесарь партты щира ӑт уԓԓәт».
ACT 17:8 Щиӈәԋща щит хуԓәм мир пӑ вошәӈ кущайәт хурэпа пайәтсәԓаԓ.
ACT 17:9 Туп тӑмет, Иасон пӑ па ŏтәт эԓты тын ўйман, ԓывиԓаԓ эсәԓсәԓаԓ.
ACT 17:10 Хӑнам йохәт пӑ ищи мŏхты атәԓән Павел пӑ Сила Верия воша китсэԓ, хŏԓта ԓын йŏхәтман кемән, иудейәт пойәкщәты хота мӑтсәӈән.
ACT 17:11 Тӑта уԓты ŏтәт Фессалоника мŏхет эԓты йӑм нŏпсәӈшәкәт: ԓыв йасәӈ хŏԓ сӑмәӈа вана ўсэԓ, кашәӈ хӑтәԓ Йэмәӈ Нэпек ԓэрапман, тӑми а мўй тŏрԓы щиты.
ACT 17:12 Щӑԓта ԓыв эԓтыԓаԓ ар хŏйат эвԓәс, пӑ грек ԓӑтәӈ нэӈәт эԓты пӑ йох эԓты йӑм арат.
ACT 17:13 Туп хун Фессалоника иудейәт мŏштәсэԓ, Верия хŏща па Павелән Турәм йасәӈ туса, ԓыв щи па йŏхәтсәт пӑ мир нŏх кўрәтты пӑ нŏх ԋŏхаԓты питсэԓ.
ACT 17:14 Щишән хӑнам йох ищи мŏхты Павел китсэԓ, щарәс пеԓа шушты щира; Сила пӑ Тимофей щи вошән хӑщсәтән.
ACT 17:15 Павела мӑнты ԋотәм ŏтәт ԓўвеԓ Афины вош унты ԋŏтсэԓ. Ԓыв, Силайа пӑ Тимофейа мийәм партәпса йоша павәтмеԓ кемән, мӑтты ԓын сорашәк ԓўв хŏщайәԓ ат йŏхәтсәӈән, йŏхԓы мӑтсәт.
ACT 17:16 Павел мӑнты пиԓӈәԓаԓ ԓавәԓтаԓ эԓты Афины вош хуват шушиԓыйәс пӑ, тӑм вош тэԓыйэ ԓух тӑйтаԓ урәӈән, ԓўв нŏпсәԓ ўшмащәс.
ACT 17:17 Щиӈәԋща, ԓўв иудейәт пойәкщәты хотән иудейәт пиԓән пӑ Турәм сӑмәӈа тӑйты грек йох пиԓән, пӑ кашәӈ хӑтәԓ вош хӑрийән уйтантыԓыты хŏйатәт пиԓән нумәссәс.
ACT 17:18 Ԓўв пиԓәԓән тухәԓ эпикур пӑ стоик ашкуԓайәт эԓты уԓты нŏпсәӈ йох пŏтрэмәты питыԓысәт. Итԓаԓ иԋщәссәт: «Мўй пӑ щи авашты ŏт йастәты ԓӑӈхаԓ?», па ŏтәт пӑ: «Иԓампа, ԓўв па мўв хŏйатәт ԓуӈхәт эԓты утәԓтәԓ», ԓўв ԓывиԓаԓа Иисус пӑ нŏх ԓыԓәӈԓәты вер эԓты Йӑм Айкеԓ тус, щишән.
ACT 17:19 Щӑԓта, ԓўвеԓ пӑтән ўйман, Ареопаг нэмпи тӑхайа тусэԓ пӑ йастәԓәт: «Мўӈ а мўй верәтԓэв уйәтты, мўй щит щимәщ йӑԓәп утәԓтәпса, мўй эԓты нӑӈ пŏтәртсән?
ACT 17:20 Нӑӈ мŏԓты ŏшԓы-уйтԓы ŏт мўӈ паԓԓува хуԓмәԓтԓән. Щишән мўӈ уйәтты ԓӑӈхаԓув, мўй щит?»
ACT 17:21 Афины мŏхет пӑ хŏԓ пӑ ԓўв хŏщайэԓ уԓты па мўв хŏйатәт нэмәԓты щирән пŏрайэԓ ӑт хӑщәптыԓысәт, туп щиты, мŏԓты йӑԓәп вер эԓты ат хуԓәтса пӑ ат пŏтәртса.
ACT 17:22 Щӑԓта, Павел Ареопаг кўтпа ԓойман, йастәс: «Афины хŏйатәт! Ма иса ваттэмән, нын ԓўӈхәт эԓты нумәсты вер шек такан тӑйԓәԓән.
ACT 17:23 Нын йэмәӈ лотԓән вантыман йӑхман, ма и йирасты лот уйәтсәм, хŏта хӑшман уса: 'Ӑт уйәтты Турма'. Тӑман-щи, Хŏйтан нын, ӑт уйәтман, такан нумԓәԓән, ма нынана такан айәԓԓэм.
ACT 17:24 Турәм, уԓты-омәсты мир тыйәԓтәм Ŏт, Ԓўв, опәԉән пӑ мўвән Турәм Кущайа уԓман, ӑнта йошән верәм хотәтән уԓ
ACT 17:25 пӑ хŏйат йошән верты верәт ӑт вохәԓ, ищи мӑтты Ԓўвеԓ мŏԓты мосәԓ, Ԓўв кашәӈ ŏта уԓәпса пӑ ԓыԓ, пӑ мўй иса мӑԓ.
ACT 17:26 И кӑԓы эԓты Ԓўв аратәԓ хŏйат рут тыйәԓтәс, иса мўв ԓŏватән уԓты урәӈән, хŏта Ԓўв хŏԓ хŏйат рутәта мŏрт пŏра пӑ мŏрт уԓты тӑха ԓэщатәс.
ACT 17:27 Ԓыв Турәм ат кӑшсәт, Ԓўв уԓты щащәԓ ат мŏштәсәт пӑ Ԓўвеԓ ат уйәтсэԓ - щи кўш Ԓўв кашәӈ ŏтԓув пўӈәԓән ванән уԓ,
ACT 17:28 щиты ӑт уԓ, мўӈ Ԓўвеԓән уԓԓув пӑ ԋŏхаԓув, хŏты тухәԓ нын арәт верты мŏхиԓән пŏтәртысәт: 'Мўӈ Ԓўв пиԓәԓән и рут'.
ACT 17:29 Щиӈәԋща, Турәм рута уԓман, мўӈев щиты нумәсты ӑт мосәԓ, мӑтты Турәм сорԋи, мўй пӑ щелŏх, мўй пӑ хŏйат нŏмәс хўват хŏрасән верәм кев хŏрпи.
ACT 17:30 Щиӈәԋща, Турәм йӑна вер ӑт уйтәм пŏра хӑйман, Турәм ин хŏйатәта хŏԓ кашәӈ тӑхайән кӑрэк эԓты шӑнша керԓәты партәԓ,
ACT 17:31 Ԓўв хӑтәԓ ԓэщатәс, щишән, хун уԓты-омәсты турәм вещката сўтәтты питԓәԓы, Ԓўв щи кеша пŏнәм Хŏйатәԓ сӑхат, пӑрәм эԓты Ԓўвеԓ нŏх ԓыԓӈатман, мира иса, уйәтты урәӈән, ваттәԓтәсԓы».
ACT 17:32 Пӑрәм эԓты нŏх ԓыԓӈатәм вер хуԓмеԓ кемән, итԓаԓ ӑԓ хўләщсәт, киметԓаԓ пӑ йастәсәт: «Тӑм эԓты нӑӈен па ишән хуԓәтԓэв».
ACT 17:33 Щиӈәԋща, Павел ԓыв эԓтыԓаԓ мӑнәс.
ACT 17:34 Тухәԓ йох пӑ, ԓўв хŏщайәԓа рӑхәԓтысәт пӑ эвәԓсәт; ԓыв кўтэԓән Дионисий Ареопаг ху, Дамарь нэмпи нэ пӑ ԓыв пиԓԓаԓән па мŏхет усәт.
ACT 18:1 Тӑм йўпийән Павел, Афины вош хӑймаԓ йупийән, Коринф воша йŏхтәс;
ACT 18:2 Щита ԓўв и иудей ху уйтәс, нэмәԓән Акила, Понт мўв эԓты уԓты ху. Акила тӑм ванән Италия эԓты Прискилла имеԓ пиԓән йŏхтәс, - Клавдий нэмпи кесарь иудейәта хŏԓ Рим эԓты мӑнты партсәԓы, - пӑ Павел ԓын хŏщайән йŏхтәс;
ACT 18:3 Ԓын и хŏрпи верты ŏт тӑйсәӈән: ԓын пирщин хотәт ԓэщатсәӈән, пӑ щишән Павел ԓын пиԓанән рупитты хӑщәс.
ACT 18:4 Кашәӈ шаббат хӑтәԓән ԓўв иудейәт пойәкщәты хотән иудейәт пӑ грекәт пиԓән пŏтәртәс пӑ ԓывиԓаԓ таӈиԓысԓы.
ACT 18:5 Хун пӑ Македония эԓты Сила пӑ Тимофей йŏхәтсәӈән, Павел иудейәта пŏтәртты ԓыԓәԓән иԉапса, мӑтты Иисус - щит Христос.
ACT 18:6 Хун пӑ ԓыв ԓўвеԓ йэртԓыты пӑ ԓўвеԓа атма йастәты питсәт, ԓўв ԓумтәмԓаԓ иԓ пӑркатмаԓ кемән, ԓывиԓаԓа йастәс: «Нын кӑԓыԓән нын ŏх пӑтԓәнән; ма сыстам; тӑԓта йэԓԓы па рут мир хŏща мӑнԓәм».
ACT 18:7 Павел иудейәт пойәкщәты хот эԓты ким этәс пӑ ванән уԓты хота ԓŏӈәс, хŏта Иуст нэмпи ху, Турәм пеԓа сӑмәӈ ŏт, ус.
ACT 18:8 иудейәт пойәкщәты хот куща Крисп пӑ хŏԓ ԓўв йŏԓән тӑйты мŏхиԓаԓ пиԓән Турәм Кущайа эвԓәс, пӑ Коринф мŏхәт эԓты ар хŏйат, хуԓәтман, эвәԓсәт пӑ йиӈка ԓŏӈәԓтыԓысайәт.
ACT 18:9 Турәм Куща пӑ атәԓән Павел вантәпсайәԓ хŏща йастәс: «Аԓ пӑԓа, туп пŏтәрта пӑ шитама аԓ йўва,
ACT 18:10 Ма нӑӈ пиԓэнән уԓԓәм, пӑ нэмәԓты ŏт нӑӈена атәм ӑт верәԓ, Ма тӑм вошән ар хŏйат тӑйԓәм, щишән».
ACT 18:11 Пӑ ԓўв щита, ԓывиԓаԓ Турәм йасӈа утәԓтыман, тӑԓ-ԓўӈ пӑ хут тыԓәщ арата хӑщиԓыйәс.
ACT 18:12 Щи кўтән, Ахаия мўвән Галлион проконсул уԓәм пŏрайән, иудейәт и нŏмәсән Павел йэщаԓт эԓԓәсәт пӑ сўт верты тӑхайа тусэԓ,
ACT 18:13 пŏтәрман, мӑтты ԓўв хŏйатәт, Турәм пеԓа сӑмәӈа уԓты, ӑнтом Закон щирән утәԓтәԓԓы.
ACT 18:14 Хун пӑ Павел уӈԓәԓ пел пўшты ўтщисԓы, Галлион иудейәта йастәс: «Иудейәт! Мŏԓты атәм вер мўй пӑ ԓоԓмасты, веԓтатты вер верәс ки, ма ԓуԓән нынан хуԓәтты щир тӑйсәм,
ACT 18:15 туп хун утәԓтәты вер эԓты, пӑ нэмәт эԓты, пӑ нын законән эԓты ўра вортԓа, нын щирәнән артаԓыйаԓән; ма щита сўта уԓты ӑт ԓӑӈхаԓәм».
ACT 18:16 Щӑԓта сўт верты тӑха эԓты ԓывиԓаԓ воштәсԓы.
ACT 18:17 Грекәт хŏԓыйэ иудейәт пойәкщәты хот куща Сосфен ԋӑрэмәсэԓ пӑ ԓўвеԓ сўт верты хот йэԓпийән сэксэԓ; туп Галлион щит эԓты йэша нэш ӑт нумисыйәс.
ACT 18:18 Павел йам арат хӑтәԓ Коринф вошән ус. Щи йўпийән ԓўв хӑнам йох пиԓән пайәм уԓәм верәс пӑ Акила пӑ Прискилла пиԓән Сирия мўва хŏпән мӑнәс. Мӑнтаԓ йэԓпийән Павел Кенхрей вошән ŏхәԓ ԓŏртсәԓы, Турма аԉәм вер тӑйәс, щишән.
ACT 18:19 Ефеса йŏхәтмеԓ йўпийән ԓынан щита хӑйсәԓы, ԓўв пӑ иудейәт пойәкщәты хота ԓŏӈәс пӑ иудейәт пиԓән нумәсман пŏтрэмәс.
ACT 18:20 Хун пӑ ԓыв ўратсәт, ԓўв хўвшәк ԓыв хŏщайэԓ ат ус, ԓўв ӑт кашащәс,
ACT 18:21 туп ԓыв пиԓԓаԓән пайәмуԓәм верәс, йастәман: «Мӑнэм йиты йэмәӈ хӑтәԓән мет шопәӈ Иерусалимән уԓты мосәԓ; нын хŏщайән пӑ, Турма рӑхты ки питәԓ, па йŏхԓы йŏхәтԓәм». Щӑԓта Ефес вош эԓты хопән мӑнәс. [Акила пӑ Прискилла Ефесән хӑщсәтән.]
ACT 18:22 Хоп эԓты Кесария воша ŏхәԓмаԓ йўпийән, ԓўв Иерусалима нŏх йŏхтәс, щита пойәкщәты ӑктәщиты мŏхет йӑм йасәӈән йастәсԓы пӑ Антиохия воша мӑнәс.
ACT 18:23 Щӑԓта щита мŏԓты кем сыс хӑйман, этәс, пӑ и оԓтман Галатия пӑ Фригия мўвӈән мŏхты мӑнәс, утәԓтәты йŏх такапман.
ACT 18:24 И мӑтты иудей, нэмәԓән Аполлос, Александрия вошәӈ ху, туса пŏтәртты пӑ Йэмеӈ Нэпек уйәтты ху, Ефеса йŏхтәс.
ACT 18:25 Ԓўв Турәм Куща Йуш пеԓа утәԓтәман ус пӑ шек такан пӑ эвәԓты щира пŏтәртәс, тўӈа-щира Турәм Куща эԓты утәԓтәс, кўш туп ԓўв Иоанн йиӈка ԓŏӈәԓтыйәпса уйтәс.
ACT 18:26 Ԓўв, ӑт пӑԓман, иудейәт пойәкщәты хотән пŏтәртты питәс. Ԓўвеԓ хуԓмаԓ кемән Акила пӑ Прискилла ԓўвеԓ вана ўсԓән пӑ тўӈашәк Турәм Куща Йуш ԓўвеԓа таӈсәԓән.
ACT 18:27 Хун пӑ ԓўв Ахаия мўва мӑнты утщийәс, хӑнам йох щита уԓты утәԓтәты йохәта нэпек хӑшсәт, ԓыв ԓўвеԓ вана ўты партсэԓ; ԓўв тŏхи йŏхәтмаԓ йўпийән, ар ԋотәп щи хŏйатәта верәс, хŏй Турәм йӑм хўватән эвәԓман ус.
ACT 18:28 Ԓўв мир йэԓпийән иудейәт ԓомтәтԓыты вер шек эԓпа аԉиԓысԓы, Йэмәӈ Нэпек хўват этәԓтыман, мӑтты Иисус уԓ Христос.
ACT 19:1 Аполлос Коринфән уԓмаԓ сыс, Павел нŏхԓы уԓты мўвәт мŏхты мӑнман, Ефеса йŏхтәс пӑ щита тухәԓ утәԓтәты йох уйәтмаԓ кемән,
ACT 19:2 ԓывиԓаԓа йастәс: «Йэмәӈ Ԓыԓ нын, эвәԓман йўпийән, вана ўсԓән амўй?» Ԓыв пӑ ԓўвеԓа йастәсәт: «Мўӈ хŏԓна пӑ ӑт хуԓԓысэв, Йэмәӈ Ԓыԓ амўй щит».
ACT 19:3 Ԓўв ԓывиԓаԓа йастәс: «Мўй пеԓа нын йиӈка ԓŏӈәԓтысайты?» Ԓыв йŏхԓы йастәсәт: «Иоанн йиӈка ԓŏӈәԓтыйәпса пеԓа».
ACT 19:4 Павел йастәс: «Иоанн йиӈка ԓŏӈәԓтыйәпса ус кӑрэк эԓты шӑшән керԓәты йиӈка ԓŏӈәԓтыйәпса, хŏйатәта пŏтәртман, ԓўв йўпеԓән Йиты Ŏта, Христоса Иисуса, ат эвәԓсәт».
ACT 19:5 Щит хуԓмеԓ кемән, ԓыв Турәм Куща Иисус нэм урәӈән йиӈка ԓŏӈәԓтысайәт,
ACT 19:6 пӑ, хун Павел ԓыв ŏхпӑтԓаԓ эԓты йошӈиԓаԓ пŏтсәԓы, ԓыв эԓтыԓаԓа Йэмәӈ Ԓыԓ иԓ ŏхԓәс, пӑ ԓыв па йасӈәтән пŏтәрты пӑ Турәм эԓты айкеԓ туты питсәт.
ACT 19:7 Ԓыв аратэԓән кӑтхŏщйаӈ кем хŏйат ус.
ACT 19:8 Иудейәт пойәкщәты хота йŏхәтмаԓән, ԓўв, ӑт хурыман, хуԓәм тыԓәщ утәԓтәс, Турәм Хон Уԓәпса эԓты пŏтрэмәман пӑ эвԓәптәман.
ACT 19:9 Туп ԓыв эԓтыԓаԓ тухԓәт сӑмԓаԓ така версәԓаԓ пӑ эвәԓты ӑт ԓӑӈхасәт, Турәм Куща Йуш мир йэԓпийән ԉикәӈ йасәӈән йастәман. Щиӈәԋща Павел ԓывиԓаԓ хӑймаԓ кемән, утәԓтәты йŏх утща щира ӑкәтсәԓы пӑ и мŏԓты Тиранн ху утәԓтәты хотән кашәӈ хӑтәԓ хŏйатәт утәԓтәсԓы.
ACT 19:10 Кӑт тӑԓ-ԓўӈ кем хўват щиты ус, Асия мўвән уԓты хŏйатәт, иудейәт мўй пӑ грекәт, Турәм Куща Иисус эԓты уԓты утәԓтәпса хŏԓыйэ хуԓсэԓ.
ACT 19:11 Турәм пӑ Павел йош мŏхты мŏԓты арат вантыԓԓаӈәԓ вер верәс,
ACT 19:12 кӑшаӈ хŏйатәт ԓоӈԓа ԓўв тӑйты ŏхшамԓаԓ пӑ ӑнтәп сŏхԓаԓ пŏныԓысайәт пӑ ԓыв мушԓаԓ нŏх вŏԓысәт, пӑ ԓыв эԓтыԓаԓ кўԉ сŏхәт ким этсәт.
ACT 19:13 Хŏԓна пӑ уԉԋайа йӑхты, йасәӈән кўԉ сŏх воштәты иудей йох эԓты, тухԓәт кўԉ сŏхәӈ хŏйатәт хŏща Турәм Куща Иисус нэм йастәты питсәт, пŏтәртман: «Нынан Иисус нэмән воштәԓэв, Хŏй эԓты Павел такан йастәԓ».
ACT 19:14 Щит мӑтты мŏԓты Скева нэмпи, иудей Турма йир верты ŏх ики, ԓапәт пŏх версәт.
ACT 19:15 Туп кўԉ сŏх йŏхԓы йастәс: «Иисус уйәтԓэм, пӑ Павел ищи мӑнэма ԓэр, нын пӑ хŏйтат?»
ACT 19:16 Щӑԓта ԓыв хŏщайэԓа щи кўԉ сŏхәӈ хŏйат щи ԓŏват ун йурән ӑратәс пӑ ԓывиԓаԓ иԓ пайәтсәԓы, ԓыв ԋара питман пӑ ԋўлмәӈа йўвман, щи хŏт эԓты ким хŏнтасәт.
ACT 19:17 Щит хŏԓ Ефесән уԓты иудейәта пӑ грекәта уйәтты щира питәс, пӑ хŏԓ ԓыв пӑԉщәмән йŏхәтсайәт, пӑ Турәм Куща Иисус нэм ԓӑтәӈа айәԓтты питсэԓ.
ACT 19:18 Эвԓәм ŏтәт эԓты ар хŏйат йŏхтыԓыйәс, вещкат щирән верԓаԓ эԓпа аԉсәԓаԓ.
ACT 19:19 Мўтра верыԓыйәм мŏхет эԓты йӑм ар хŏйат, мўтра верты нэпекԓаԓ йӑха ӑкәтман, хŏйатәт йэԓпийән нŏх ўщәтсәԓаԓ, пӑ тынԓаԓ йӑха пŏтсәԓаԓ пӑ ветйаӈ щŏрәс щел ŏх арата хойәс.
ACT 19:20 Щиты такан Турәм Куща йасәӈ лакки ԓӑрпиԓәс пӑ йурамәс.
ACT 19:21 Хун пӑ щит йэтшәс, Павел, Ԓыԓән тўвман, Македония пӑ Ахаия мўв сӑхат Иерусалима мӑнты нŏмәс верәс, йастәс: «Щи йŏхтыԓытэм йўпийән, мӑ Рим ватты верэм уԓ».
ACT 19:22 Щӑԓта, кӑт ԓўвеԓ ԋотты хŏйатӈәԓаԓ, Тимофей пӑ Ераст, Македония мўва китмаԓ йўпийән, ԓўв Асия мўвән мŏԓты сыс кема хӑщиԓыйәс.
ACT 19:23 Щи пўԉаӈ Турәм Куща Йуш урәӈән ун йэшащты вер тыйәс,
ACT 19:24 и хŏйат, нэмәԓән Димитрий, щелŏх верән тус ху, щелŏх эԓты Артемида ԓух ими хŏрамәӈ хот хŏр верыԓыйәс пӑ вератты тус йохәта ŏх шитты щир мийиԓыйәс.
ACT 19:25 Ԓывиԓаԓ пӑ па вератты йохәт йӑха ӑкәтман, йастәс: «Мŏхет! Нын уйәтԓәты, тӑм вератты вер эԓты мўӈ тӑйтаӈ щирэв уԓ;
ACT 19:26 щи кўтән нын ватԓәты пӑ хуԓԓәты, ӑнта туп Ефесән, иса хӑщ Асия ԓŏватән щи Павел ар хŏйат ԓўв эвԓәптәты верәԓән йŏвра хўщәс, пŏтәртман, мӑтты хŏйат йошән верты ŏт - щит ӑнта ԓуӈхәт.
ACT 19:27 Щит пӑ мўӈева атәм верәԓ ӑнта туп вератты верэв атма айәԓтты щирән, Артемида ԓух ими йэмәӈ хот па нэмәԓтты йўкана ӑт тӑйты питԓа. Ԓух ими хŏԓна ԓўв Асия мўв ԓŏватән пӑ мирән иса ԓӑтәӈа тӑйԓа, ԓух ԓатәӈ верәԓ хŏԓт павәтԓа!»
ACT 19:28 Щит хуԓәтмеԓ кемән, ԓыв ԉикән йŏхәтсайәт пӑ ўвты питсәт, пŏтәртман: «Ефес вош Артемида ԓӑтәӈ!»
ACT 19:29 Щӑԓта вош ԓŏватәԓән нŏх ԋŏхԓәс. Ԓыв Павел пиԓән йӑӈхәм Македония кӑтӈән, Гаий пӑ Аристарх, ԋӑрэмәман, и йӑха каш ватты тӑхайа ԋŏхтәсэԓ.
ACT 19:30 Хун пӑ Павел мир хŏща этты ўтщийәс, утәԓтәты йохәтән ԓўв ӑт эсәԓса.
ACT 19:31 И щиты тухәԓ Асия кущайәт эԓты па, ԓўвеԓа ԓухса уԓман, ԓўв хŏщайәԓ айкеԓ китсәт, каш ватты тӑхайа ӑт ат йис.
ACT 19:32 Щи кўтән итԓаԓ ит ўвԓәт, киметԓаԓ пӑ кимет ŏт ўвԓәт, пŏтәртты ӑктәщәм щир и нулама ус, пӑ ар пеләк йӑха ӑктәщәм ŏтәт ӑт уйәтԓәт, мўй урәӈән ӑктәщсәт.
ACT 19:33 Иудейәт йастәм щирән, мир кўт эԓты Александр ким вохса. Йошән пос верман, Александр мир пеԓа пŏтәртты ўтщийәс.
ACT 19:34 Хун ŏша пайәтсэԓ, ԓўв иудей ху, хŏԓ и турән ўваԓтсәт пӑ кӑт щос кем увсәт: «Ефес вош Артемида ԓӑтәӈ!»
ACT 19:35 Вошәӈ хӑншатты куща пӑ, хŏйатәт иԓ роммәԓтмаԓ кемән, йастәс: «Ефес йох! Мӑты хŏйат ӑт уйәтәԓ, Ефес - щит ԓӑтәӈ ԓух ими Артемида пӑ турәм эԓты иԓ рӑкнәм хŏрәԓ шавиты вош?
ACT 19:36 Щит хŏща ўра ворты вер ӑнтом ки, нынан рома уԓты мосәԓ пӑ, ӑт нумәсман, вер верты ӑт мосәԓ.
ACT 19:37 Нын тӑм икеӈән ты тусԓән, ԓын ӑнта Артемида йэмәӈ хот ԓыпи ԓоԓәпсәтән, ӑнта нын ԓух имана атәм версәтән.
ACT 19:38 Димитрий пӑ па вератты йох ԓўв пиԓәԓән мӑтты хŏйат пеԓа пŏләщ тӑйԓәт ки, щи кеша сўт верты урәӈән ӑктәщиты щир уԓ пӑ сўт кущайәт уԓԓәт: кўтԓаԓән поләщ ат тутԓыԓәт.
ACT 19:39 Нын мŏԓтты па ŏт кӑшԓәты ки, щит закон щирән ӑктәщиты тӑхайән ватты питԓа.
ACT 19:40 Мўӈ вевтам щира питсув - ин тӑм тыйәм вер урәӈән, йэшащты щира пŏнԓайув, щи урәӈән нэмәԓты сŏнтәӈ ӑнтом, мўӈ ӑктәщәм верэв ԓуԓән нŏх пайәтты». Щит йастәмаԓ йўпийән, ԓўв ӑктәщәм мŏхет лакки эсәԓсәԓы.
ACT 20:1 Йэшащты вер вŏԓыйәм йўпийән, Павел утәԓтәты йох вана вохмаԓ пӑ ԓыв номәсԓаԓ такапмаԓ йўпийән, ԓыв пиԓԓаԓән пайәмуԓәм верәс, ким этәс пӑ Македония мўва мӑнәс.
ACT 20:2 Щи тӑхайәт сӑхат мӑнман пӑ эвәԓты хŏйатәт йӑм артан утәԓтәсԓы. Еллада мўва йŏхәтмаԓән,
ACT 20:3 щита ԓўв хуԓәм тыԓәщ ус. Хун ԓўв Сирия мўва хопән мӑнты ӑктәщәс, иудейәт ԓўвеԓ пӑратты вер ԓэщатәм хуԓмаԓ кемән, Македония сӑхат йŏхԓы мӑнты нŏмәс верәс.
ACT 20:4 Ԓўв пиԓәԓән Асия унты Сосипатр, Верия вошәӈ ху, Пирр пŏх, Фессалоника эԓты уԓты Аристарх пӑ Секунд, щӑԓта Гаий - Дервия вошәӈ ху пӑ Тимофей, щӑԓта пӑ Асия эԓты уԓты Тихик пӑ Трофим йӑхсәт.
ACT 20:5 Ԓыв, йэԓԓы мӑнман, мўӈев Троада вошән ԓавәԓсэԓ.
ACT 20:6 Мўӈ пӑ, тўтәӈ ԋаԋ хӑтԓәт йўпийән, Филиппы эԓты хопән мӑтсув пӑ ветмет хӑтәԓән Троадайән ԓыв хŏщайэԓ йŏхәтсув, щита ԓапәт хӑтәԓ усув.
ACT 20:7 Ԓапәт оԓәӈ хӑтәԓән, хун утәԓтәты йох ԋаԋ морәтты урәӈән йӑха ӑктәщсәт, Павел ԓыв пиԓԓаԓән пŏтрэмәс пӑ, кимет хӑтәԓ мӑнты нумәсмаԓ хўват, ԓўв пŏтрәԓ ат кўтәп унты тусԓы.
ACT 20:8 Нўм хот йӑтән, хŏта мўӈ ӑктәщсув, йӑм ар тўт хŏшам ус.
ACT 20:9 Павел хув пŏтрэмәмаԓ эԓты, и энәмты пŏх, нэмәԓән Евтих, ишԋи хопән опсәс, такан иԓ вŏйәпса пӑ ԋŏхԓәмаԓ сӑхат, хуԓмет хот пӑԓат эԓты иԓ рӑкнәс, пӑ нŏх аԓэмәмән, пӑрмаԓ.
ACT 20:10 Павел, иԓ эсԓәщәс, энәмты пŏх эԓт ŏԓсәԓы пӑ ԓўвеԓ ӑпәԓтман, йастәс: «Аԓ хурыйаты, ԓўв ԓыԓәӈ».
ACT 20:11 Павел нўм хŏт йӑта ԓŏӈмаԓ кемән пӑ ԋаԋ морәтмаԓ пӑ ԓэвмаԓ йўпийән, йӑм хўват, хŏԓна пӑ хутԓәты унты, пŏтрэмәс, пӑ йухәт ким этәс.
ACT 20:12 Щи кўтән энәмты ԋаврэм ԓыԓӈат йŏхи туса пӑ щит эԓты хŏԓ шек амәтсәт.
ACT 20:13 Мўӈ паршәӈ ун хопа ԓэԓсув пӑ йэԓԓы Асс вош пеԓа мӑтсув, щиԓта Павел ўты урәӈән; ԓўв мўӈева щиты партсәԓы, ԓўв кўрән шушты ўтщийәԓ.
ACT 20:14 Хун пӑ ԓўв мўӈ пиԓэвән Асс вошән уйтантәс, ԓўвеԓ пӑтән паршәӈ ун хопа ўймев кемән, мўӈ Митилина воша мӑтсув.
ACT 20:15 Щӑԓта, щи мӑнман, кимет хӑтәԓ мўӈ Хиос пухәр шŏма иԓ ԓойсув, хӑтәԓ хӑйман пӑ Самос пухра хойсув пӑ, Трогиллия воша йŏхтыԓымев йўпийән, кимет хӑтәԓ Милит воша йŏхәтсув,
ACT 20:16 Павел Ефес хӑйман мӑнты нŏмәс верәс, Асияйән ӑт ат рŏнты, щишән, ԓўв тэрматыйәс, Ветйаӈ хӑтԓәп йэмәӈ хӑтәԓ кеша Иерусалимән уԓты ԓӑӈхас.
ACT 20:17 Милит эԓты Ефеса китәсәс, Турма пŏйәкщәты хŏйатәт ун икет ԓўв хŏщайәԓа вохсәԓы,
ACT 20:18 пӑ, хун ԓыв ԓўв хŏщайәԓа йŏхәтсәт, ԓывиԓаԓа йастәс: «Нын уйәтԓәԓән, хŏты ма мет оԓәӈ хӑтәԓ эԓты, хун Асияйа йŏхәтсәм, ивевән нын пиԓанән усәм,
ACT 20:19 ма Турәм Куща пеԓа рома уԓман пӑ ар сэмйик мӑнәԓтман верәт версәм, иудейәт верәм ԉикәӈ нŏпсәт пӑтыйән кӑмән кем шук мӑнэм тўты вера йис;
ACT 20:20 Ма нэмәԓтты щит эԓты ӑт хӑйсәм, мўй эԓты нынан пŏтәртты мосәс ԓуԓән, мўйа нынан утәԓтәты мосәс ԓуԓән, мир ватман пӑ хотԓән ԓыпийән.
ACT 20:21 Ма иудейәта па, грекәта па такан йастыԓысәм, ԓыв кӑрэк эԓты шӑшән керԓәман, Турәм пеԓа ат керԓәсәт пӑ мўӈ Турәм Кущайэва Иисуса Христоса ат эвәԓсәт.
ACT 20:22 Пӑ тата щи, ин ма, Ԓыԓән хўщман, Иерусалима мӑнԓәм, ӑт уйәтԓэм, мӑнэма щита мўй питәԓ;
ACT 20:23 Туп Йэмәӈ Ԓыԓ кашәӈ вошән аԉәԓ, пŏтәртман, касна хот пӑ шукәӈ щирәт мӑнэм ԓавәԓԓәт.
ACT 20:24 Туп ма нэмәԓты пеԓа ӑт ӑӈкәртыԓәм пӑ ма ԓыԓэм ӑт шавиԓэм, туп, амәтман, ԓўԓән мӑ йушем мӑнты пӑ Турәм Кущайән Иисусән мийәм ма верэм йэтшәптәты ат верәтсэм, Йӑм Айкеԓ Турәм йӑм эԓты пŏтәртты.
ACT 20:25 Пӑ ин, тӑм, ма уйәтԓэм, хŏԓ нын, хŏй кўтән, Турәм Хон Уԓәпса эԓты пŏтәртман, ма йӑхсәм, мӑнэм па ӑт ватԓәԓән.
ACT 20:26 Щишән нынана тӑм хӑтәԓ ма такан йастәԓәм: «Нэмәԓты пӑрәм хŏйат хŏща ўнавот ӑт тӑйԓәм,
ACT 20:27 ма Турәм ԓӑӈхаты вер аратәԓ нынана такан йастәты ӑт хӑԋатысэм.
ACT 20:28 Щиӈәԋща, нынан ватман тӑйаԓән пӑ хŏйат тащ аратәԓән па, хŏта Йэмәӈ Ԓыԓ нынан ŏха пŏтсәԓы, Турәм Куща пӑ Турәм ӑктәщиты мŏхиԓаԓ нын такан ат шависԓән, Ԓўв кӑԓэԓ сӑхат мŏщатәм пойәкщәты мŏхиԓаԓ.
ACT 20:29 Ма уйәтԓэм, хун ма мӑнԓәм, нын хŏщайән ԉикәӈ йэврәт ԓŏӈԓәт, ԓыв пӑ тащ ӑт щаԉәтԓэԓ.
ACT 20:30 Щӑԓта нын эԓтыԓән хŏԓна хŏйатәт нŏх ԓойԓәт, хŏй пŏтәртаԓән вещкат вер йŏвра таԓты питԓәԓы, утәԓтәты йох ԓыв йўпиԓаԓән туты урәӈән.
ACT 20:31 Щишән нумәсман уԓаты! Нумаԓән, ма нынан тӑԓаӈ хуԓәм тӑԓ-ԓуӈ атәԓ-хӑтәԓ ивевән сэмйик сурән нын эԓтайән кашәӈ ŏт утәԓтысэм.
ACT 20:32 Пӑ ин нынан, хӑнам йох, Турма пӑ Ԓўв йӑмәԓ эԓты уԓты йасӈа эвԓәптәԓԓам, хŏй нынан утәԓтәты пӑ нынана Ԓўв йэмәӈ мирәԓ кўтән ŏх вŏԓ мӑты верәтәԓ.
ACT 20:33 Ӑнта щелŏх, ӑнта сорԋи, ӑнта ԓумтәм нэмәԓты хŏйат эԓты ма ӑт ԓӑӈхасәм:
ACT 20:34 нын уйәтԓәԓән, мӑнэм мосты ŏт пӑ ма пўӈԓэмән уԓәм хŏйатԓама мосты ŏт тӑм ма йошӈиԓамән шитәптәсәм.
ACT 20:35 Кашәӈ верән ма нынана этәԓтысԓам, щиты рупитман, вевԓы хŏйатәта ԋŏтты мосәԓ пӑ Турәм Куща Иисус йасӈәт нумты мосәԓ, Ԓўв йастәс: 'Ўты эԓты, мӑты йӑмшәк'».
ACT 20:36 Щит йастәмаԓ кемән, ԓўв шашӈиԓаԓ иԓ эсәԓсәԓы пӑ хŏԓ ԓыв пиԓԓаԓән пойәкщәс.
ACT 20:37 Щи пŏрайән хŏԓыйэ хоԓԓәсәт пӑ, Павел ӑпәԓтыман, ԓўвеԓ мосәԓтәсэԓ.
ACT 20:38 Мет шопәӈ ԓўв йастәм йасәӈԓаԓ эԓты хощсәт, мӑтты ԓыв па нэмәԓты пŏрайән ԓўв вешәԓ ӑт ватԓэԓ. Щӑԓта ԓўв пиԓәԓән паршәӈ хоп унты мӑтсәт.
ACT 21:1 Хун пӑ мўӈ ԓыв пиԓԓаԓән кӑтна мӑнмев йўпийән, нык хўвԓәсув, тŏрԓы Кос воша йŏхәтсув, кимет хӑтәԓ Родос пухра, щиԓта пӑ Патара воша,
ACT 21:2 щӑԓта Финикия пеԓа мӑнты паршәӈ ун хоп уйәтмев кемән, нŏх хухсув пӑ нык хўвԓәсув.
ACT 21:3 Мўӈ Кипр пухәр мўв ныты ўшән усув пӑ ԓўвеԓ веш пеләк сӑхат хӑйман, Сирия мўва мӑтсув пӑ Тир вош хŏща ўты катәԓсув, тӑта хоп эԓты пŏрмасәт хӑйты моссәт.
ACT 21:4 Щӑԓта, утәԓтәты хŏйатәт мŏщатмев кемән, щита ԓапәт хӑтәԓ усув. Ԓыв, Йэмәӈ Ԓыԓән аԉман, Павел пеԓа пŏтәртԓәт, ԓўв Иерусалима ӑт ат мӑнәԓ.
ACT 21:5 Щи хӑтԓәт хӑйман, мўӈ этсув пӑ мӑтсув, пӑ ԓыв хŏԓыйэ имиԓаԓ пӑ ԋаврэмԓаԓ пиԓән мўӈев вош кимпи унты хŏԓна тусэԓ; намән питарән па, шаш иԓ эсәԓман, пойәкщәсув.
ACT 21:6 Пӑ, кўтԓувән пайәмуԓәм вермев йўпийән, мўӈ паршәӈ ун хопа ԓэԓсув, ԓыв пӑ йŏхи мӑтсәт.
ACT 21:7 Мўӈ пӑ, мӑнты верев йэԓԓы тўвман, Тир эԓты Птолемаида воша йŏхәтсув, хŏта хӑнам йохԓув ўщайән версәԓув пӑ ԓыв хŏщайэԓ и хӑтәԓ усув.
ACT 21:8 Кимет хӑтәԓ Павел пӑ мўӈ, ԓўв пиԓәԓән уԓәм ŏтәт, йэԓԓы мӑтсув пӑ Кесарияйа йŏхәтсув пӑ, Филлипп хота ԓŏӈман, ԓўв Йӑм Айкеԓ тутԓыты ху, ԓапәт ԋотәп ху эԓты ит, ԓўв хŏщайәԓ хӑщсув.
ACT 21:9 Ԓўв ԋӑԓ икиԓы эви тӑйәс, Турәм айкеԓ туты нэӈәт.
ACT 21:10 Щи кўтән хŏты мўӈ ԓыв хŏщайэԓ ар хӑтәԓ усув, Иудея эԓты Агав нэмпи Турәм айкеԓ туты ики йŏхтәс.
ACT 21:11 Щӑԓта, мўӈ хŏщайэв ԓŏӈман, Павел ӑнтәп кеԓ ўсԓы пӑ ԓўв йошԓаԓ-курԓаԓ йӑха йӑрман, йастәс: «Щиты Йэмәӈ Ԓыԓ пŏтәртәԓ: 'Тӑм ӑнтәп кеԓәӈ ики тӑмиты Иерусалимән иудейәтән йӑрԓа пӑ па рут мир йоша мӑԓа'».
ACT 21:12 Хун пӑ мўӈ щит хуԓтмәсув, мўӈ па, щита уԓты ŏтәт па пойкащсәт, ԓўв Иерусалима ӑт ат мӑнәс.
ACT 21:13 Туп Павел йŏхԓы йастәс: «Мўй нын верԓәты? Мўйа хоԓԓәԓты пӑ ма сӑмем мӑшԓәԓән? Ма ӑнта туп йӑрәм ŏта уԓты ԓӑӈхаԓәм, Иерусалимән Турәм Куща Иисус нэм урәӈән пӑрты таща уԓԓәм».
ACT 21:14 Хун пӑ мўӈ ԓўвеԓ вŏԓәтты ӑт верәтсэв, ромәпсув, йастәман: «Турәм Куща партәпса щирән ат питәԓ!»
ACT 21:15 Тӑм хӑтԓәт йўпийән, ԓэщатыман, Иерусалима мўӈ мӑтсув.
ACT 21:16 Мўӈ пиԓэвән тухәԓ утәԓтәты йох Кесария эԓты па шушсәт. Ԓыв мўӈев Мнасон Кипр ху, хўв тэԓән утәԓтәты ху, хота тусэԓ, хŏй хŏща мўӈев ԓуԓән уԓты рӑхәс.
ACT 21:17 Хун мўӈ Иерусалима йŏхәтсув, хӑнам йохән, амәтман, мўӈ вана ўсайув.
ACT 21:18 Кимет хатәԓ Павел мўӈ пиԓэвән Иаков хŏща йŏхтәс; ун икет па хŏԓ йŏхәтсәт.
ACT 21:19 Ԓывиԓаԓ ўщайән верман, Павел ԓӑтйан-карйан пŏтәртсәԓы, ԓўв верәм верԓаԓ мŏхты ӑт эвәԓты па рут мир кўтән Турәм мўй верәс.
ACT 21:20 Ԓыв па, хуԓәтмеԓ йўпийән, Турәм ԓӑтәӈа айәԓтсэԓ пӑ ԓўвеԓа йастәсәт: «Хӑнам ху, ватԓэн мўй арат щŏрәс эвԓәм иудей йох, пӑ ԓыв хŏԓ Закон такан тӑйты ŏтәт.
ACT 21:21 Нӑӈ эԓтэн пӑ йӑма хуԓԓысәт, мӑтты нӑӈ хŏԓ па рут мир кўтән уԓты иудейәт Моисей эԓты пўӈԓа хӑтты утәԓтәԓԓан, пŏтәртман, мӑтты ԓыв йох ԋаврэмԓаԓ хŏща эвәтты вер ӑт ат версәт пӑ ԓыв щирԓаԓ щирән ӑт ат усәт.
ACT 21:22 Щиӈәԋща, мўй пӑ? Йӑна, мир ӑктәщәԓ; хуԓԓэԓ, нӑӈ йŏхәтсән, щишән.
ACT 21:23 Вера са, мўй мўӈ нӑӈен йастәԓув: мўӈ ԋӑԓ хŏйат, йастантәм вер тӑйты ŏтәт, тӑйԓув.
ACT 21:24 Ԓывиԓаԓ ўйман, ԓыв пиԓԓаԓән сыстамтыйа пӑ ԓыв йўкан йирԓаԓ тын нӑӈ сŏхәпты, ԓыв ŏхԓаԓ ԓŏртты ат верәтсәт. Пӑ хŏԓ кащаԓәԓәт, нӑӈ эԓтайэн хуԓԓыйәм пŏԓщәт ӑнтом вещкатәт, наӈ па Закон хуват уԓԓән.
ACT 21:25 Эвԓәм па рут йоха мўӈ верәм нŏпсэв эԓты хӑшсэв: ԓыв нэмәԓты щимәщ ӑт ат версәт, туп ԓуӈха порыԓыйәм ԓэтŏт эԓты, вой ўр пӑ шакәптәм вой ԋŏхи эԓты, пӑ пакрасԓәты вер эԓты ԓывиԓаԓ ат шависԓаԓ».
ACT 21:26 Щишән Павел, щи йох ўйман пӑ ԓыв пиԓԓаԓән сыстамтыман, йухәт хӑтәԓ Турәм Хота ԓŏӈәс пӑ сыстамтыйәм хӑтԓәт хŏԓам вер такан йастәс, хун кашәӈ ху урәӈән йир туты вер уԓ.
ACT 21:27 Хун пӑ ԓапәт хӑтәԓ хŏԓаты ванамәс, щи пŏрайән Асия эԓты уԓты иудейәт ԓўвеԓ Турәм Хотән шийаԓәмеԓ кемән, мир хŏԓ йэшащты хўщсэԓ пӑ ԓўвеԓ катәԓсэԓ,
ACT 21:28 ўвман: «Израиль йох, ԋотаты! Тӑм хŏйат арат тӑхайән мŏхет мирэва пӑ Закона пӑ тӑм тӑхайа ӑт рӑхты щирән утәԓтәԓ; Щи тўмпийән грекәт Турәм Хота тус пӑ тӑм йэмәӈ тӑха щопитсәԓы».
ACT 21:29 Щи йэԓпийән вошән ԓыв Трофим, Ефес ху, ԓўв пиԓәԓән ватсәт пӑ нумәссәт, Павел ԓўвеԓ Турәм Хота ԓŏӈәԓтсәԓы.
ACT 21:30 Вош ԓŏватәԓән нŏх ԋŏхԓәс, пӑ мир тŏхи хухәԓмәс. Павел, ԋӑрэмәм йўпийән, Турәм Хот эԓты ким хипԉәԓтса, пӑ овәт ищи кўрәмән лӑп петсайәт.
ACT 21:31 Хун пӑ ԓыв ԓўвеԓ пӑратты ўтщисэԓ, щŏрәс ԉаԉ йох куща унты айкеԓ йŏхтәс, Иерусалим ԓоватәԓән ўшмащты питәс.
ACT 21:32 Ԓўв ищи кўрәмән ԉаԉ йох пӑ сот ԉаԉ йох кущайәт ўйман, ԓыв хŏщайэԓ ӑратсәт. Ԓыв пӑ, щŏрәс ԉаԉ йох куща пӑ ԉаԉ йохәт кащаԓәмеԓ кемән, Павел сэкты вŏԓәтсэԓ.
ACT 21:33 Щиӈәԋща щŏрәс ԉаԉ йох куща, вана йŏхәтмаԓ кемән, ԓўвеԓ ўсԓы пӑ кӑт карты кеԓән иԓ йӑрты партсәԓы, пӑ иԋщәсәс: «Хŏй ԓўв пӑ мўй верәс».
ACT 21:34 Мир хŏща итәт ит ўвсәт, па ŏтәт па ŏт ўвсәт. Щишән щимәщ сый кўтән ԓўв нэмәԓты ԓэр вер ŏша пайәтты ӑт веритмаԓ урәӈән, Павел ԉаԉ йох уԓты тӑхайа туты партсәԓы.
ACT 21:35 Хун пӑ ԓўв ов нухләт хŏща уԓмаԓән, мир похәл щиты хӑтәԓ пӑ, ԉаԉ йохәта, нŏх аԓәмман, ԓўвеԓ туты вера йис,
ACT 21:36 мир аратәԓән ԓыв йўпеԓән шушәс пӑ ўвәс: «Ԓўвеԓа сŏрәм ат уԓ!»
ACT 21:37 Ԉаԉ йŏхәт хота ԓŏӈты тӑхайән Павел щŏрәс ԉаԉ йох кущайа йастәс: «Мӑнэма наӈен мŏԓты йастәты рӑхәԓ амўй?» Щит пӑ йщмәс: «Нӑӈ грек йасәӈ уйәтԓән?
ACT 21:38 Щишән ки, наӈ ӑнта щи Египет хŏйат, хŏй мŏԓхашәк йэшащты щир верыԓыйәс пӑ таԓ тӑхайа ԋӑԓ щŏрәс веԓтатты хŏйат тус?»
ACT 21:39 Павел пӑ йастәс: «Ма Киликия мўвән уԓты Тарс ун вошәӈ иудей ху. Нӑӈен пойәкԓәм, мӑнэм мир пеԓа йастәты эсԓы».
ACT 21:40 Хун пӑ щитән эсәԓса, Павел, ов нухәлән ԓойман, йошәԓән мира пос мӑс. Щӑԓта, хун шек шитама йис, еврей йасәӈән щиты пŏтәртты питәс:
ACT 22:1 «Хӑнам йохәт пӑ ащет! Манэм нын йэԓпанән ӑратыты урәӈән, мӑнэм пŏтәрты эсԓаԓән».
ACT 22:2 Ԓўв пӑ ԓыв пиԓԓаԓән еврей йасәӈән пŏтәртты хуԓмеԓ кемән, мет шитама йисәт. Ԓўв йастәс:
ACT 22:3 «Ма иудей ху, Киликияйән уԓты Тарс вошән сэма питәм ŏт, тӑм вошән Гамалиил утәԓтәты ху хŏща энмәԓтәм ŏт, ащиԓув Закон щирән шек йӑма утәԓтәм ŏт, Турәм вер пеԓа такан уԓты ŏт, хŏты нын хŏԓ ин уԓԓәты.
ACT 22:4 Ма хŏԓна сŏрәм унты тӑм утәԓтәпса йўпи тўвәм хŏйатәт ԋухәтԓысԓам, иԓ йӑрман йохәт пӑ нэӈәт касна хота мийԓысԓам.
ACT 22:5 Щит вантәм ŏтәт - Турма йир верты ŏх ху пӑ йӑха актәщиты ун икет аратэԓән. Ма хŏԓна ԓыв эԓтыԓаԓ Дамаск вошәӈ хӑнам йохәта хӑншәм айкеԓ нэпекәт ўсәм пӑ щи мӑтсәм, христианәт эԓты хŏй щита ус пӑ щитәт катәԓты, пӑ ԓывиԓаԓ Иерусалима сэкты урәӈән туты.
ACT 22:6 Хун пӑ ма йушән уԓмемән пӑ Дамаск воша ванамәсәм, хӑтәԓ кўтәп кемән шӑмкап турәм хӑр эԓты щи хŏрпи нŏвийән похәтсайәм, пӑ сэм хŏԓна нŏх ӑт эԓԓәԓ.
ACT 22:7 Ма мўва иԓ рӑкәтсәм пӑ мӑ пеԓайэм пŏтәртәм тур сый хуԓмәсәм: "Савл, Савл! Мўйа нӑӈ Мӑнэм ԋухәԓԓэн?"
ACT 22:8 Ма йŏхԓы йастәԓәм: "Хŏй Нӑӈ, Турәм Куща?" Ԓўв мӑнэма йастәс: "Ма Назарет эԓты уԓты Иисус, Хŏй нӑӈ ԋухәԓԓэн".
ACT 22:9 Ма пиԓэмән уԓәм ŏтәт нŏви ватсэԓ пӑ пӑԉщәмән йŏхәтсайәт; туп ма пеԓайэма Пŏтәртәм Ŏт тўр сый ӑт хуԓсэԓ.
ACT 22:10 Щиӈәԋща ма йастәсәм: "Турәм Куща! Мӑнэм мўй верты?" Турәм Куща пӑ мӑнэма йастәс: "Нŏх ԓойа пӑ Дамаска мӑна, пӑ щита нӑӈена иса йастәԓа, мўй наӈена верты постәса".
ACT 22:11 Хŏты ма вŏԉиты нŏви эԓты сэмԓы питсәм, ма пиԓэмән йўвәм мŏхет йош пелкем эԓты Дамаска ватәԓтәсайәм.
ACT 22:12 А-хой Анания, Закон хўват уԓты Турма эвәԓты хŏйат, Дамаскән уԓты иудейәтән хŏԓ йӑма айәԓтса,
ACT 22:13 ма хŏщайэм йŏхтәс пӑ, вана шушман, мӑнэма йастәс: "Савл хӑнам ху, сэмәӈа йўва!" Пӑ ма ищи кумат ԓўвеԓ шийаԓәсэм.
ACT 22:14 Ԓўв пӑ мӑнэм йастәс: "Мўӈ ащиԓув Турәм нӑӈен пирыйәс, наӈ Ԓўв ԓӑӈхаты щирәԓ ŏша ат пайәтсэн, Вещкат Ŏт ат шийаԓәсән пӑ тўр сый Ԓўв ўӈԓәԓ эԓты ат хуԓсән.
ACT 22:15 Нӑӈ Ԓўвеԓа хŏԓ хŏйатәт йэԓпийән вантәм ŏта питԓән, щит эԓты, мўй ватсән пӑ хуԓсән.
ACT 22:16 Щиӈәԋща, мўй нӑӈ айәԓта уԓԓән? Нŏх ԓойа, Турәм Куща Иисус пеԓа пойәкща, йиӈка ат ԓŏӈәԓтыԓайән пӑ, кӑрэкԓан хŏԓт ат ԉŏхәтԓайәт".
ACT 22:17 Хун пӑ ма Иерусалима йŏхԓы йŏхәтсәм пӑ Турәм Хотән пойәкщәсәм, мӑ вантәпса ватсәм
ACT 22:18 пӑ Ԓўвеԓ шийаԓәсәм, пӑ Ԓўв мӑнэма йастәс: "Тэрматыйа пӑ Иерусалим эԓты ким эта, тӑта нӑӈ Ма эԓтайэм пŏтәртты щирэн вана ӑт ўԓа".
ACT 22:19 Ма йастәсәм: "Турәм Куща! Ԓыв уйәтԓэԓ, ма Нӑӈена эвәԓты хŏйатәт касна хота тухрыԓысԓам пӑ иудейәт пойәкщәты хотәтән сэӈкиԓысԓам,
ACT 22:20 пӑ хун Стефан, Наӈен вантәм ŏтэн, кӑԓэԓ щŏрӈәԓтәм пŏрайән, ма щита ԓойсәм, ԓўв паратты верәԓ эԓт тӑйсэм, ԓўвеԓ паратты ŏтәт ԓумтәмәт ма шависәм".
ACT 22:21 Щӑԓта ԓўв мӑнэма йастәс: "Мӑна, Ма нӑӈен хўва Турма ӑт эвәԓты па рут мир хŏща китԓэм"».
ACT 22:22 Тӑм йасәӈ унты ԓўв хуԓәтса; щи йўпийән ўвты питсәт, пŏтәртман: «Мўв сŏх эԓты ԓўвеԓ нŏх ушийи! Ԓўвеԓа уԓты ӑт рӑхәԓ».
ACT 22:23 Щи ԓыв ўвмеԓ кўтән, ԓумтәмԓаԓ йовәԓсәт пӑ кўрпӑт хиш нŏх йовәԓсәт,
ACT 22:24 щŏрәс ԉаԉ йох куща ԓўвеԓ ԉаԉ йŏх уԓты тӑхайа туты партсәԓы. Ԓўвеԓ хомщийән сэкты пӑ такан иԋщәсты партсәԓы, мўй урәӈән ԓўв пеԓайәԓ мир щиты ўвәс.
ACT 22:25 Туп хун ԓўв лаккеԓәтән йӑртсәԓәса, Павел ԓойәм сот ԉаԉ йох кущайа йастәс: «Нынан мўй Рим ху сэкты рӑхәԓ, хŏԓна пӑ сўт такԓы?»
ACT 22:26 Щит хуԓмаԓ кемән, сот ԉаԉ йох куща мӑнәс пӑ щŏрәс ԉаԉ йох кущайа щит тусԓы, пŏтәртман: «Ванта, мўй нӑӈ верты ўтщиԓән? Тӑм хŏйат - Рим ху».
ACT 22:27 Щиӈәԋща щŏрәс ԉаԉ йох куща, ԓўв хŏщайәԓ вана шушман, иԋщәсәԓ: «Йаста мӑнэма, нӑӈ Рим ху?» Ԓўв йастәс: «Па хŏты».
ACT 22:28 Щŏрәс ԉаԉ йох куща йŏхԓы йастәс: «Ма ун ŏх сӑхат щи Рим хŏйата уԓты вер ԓутсэм». Павел пӑ йастәс: «Ма пӑ щита сэма питсәм».
ACT 22:29 Щиӈәԋща ищи кумат ԓўвеԓ шукатты утщийәм ŏтәт ԓўв эԓтайәԓ пўӈԓа хӑтәмәсәт. Щŏрәс ԉаԉ йох куща пӑ, ԓўв Рим хŏйата уԓты верәԓ мŏштәмаԓ кемән, хŏԓт пӑԓтамәс, ԓўвеԓ йӑрсәԓамаԓ урәӈән.
ACT 22:30 Кимет хӑтәԓ, тŏрԓы уйәтты ԓӑӈхаман, мўй хŏща ԓўв иудейәтән ўнавота пайәтса, ԓўвеԓ кеԓԓаԓ эԓты хŏԓт пайәтсәԓы пӑ Турма йир верты ŏх икета пӑ синедриона хŏԓ ӑктәщты партсәԓы пӑ, Павел ким этәԓтәсԓы пӑ ԓыв йэԓпиԓаԓа ԓощәԓтәсԓы.
ACT 23:1 Павел синедрион пеԓа ӑӈкәрмәс пӑ йастәс: «Хӑнам йох! Ма вещкат сӑмән иса тӑм хӑтәԓ унты Турәм йэщаԓт усәм».
ACT 23:2 Турма йир верты ŏх ху Ананий пӑ Павел ԉэпән ԓойты ŏтәта ԓўвеԓ тŏрәп эԓты сэкты партсәԓы.
ACT 23:3 Щишән Павел ԓўвеԓа йастәс: «Турәм нӑӈен секты питԓәԓы, нŏвийа нэрәм хот питар! Нӑӈ, Закон щирән сўтәтты урәӈән омәсԓән, пӑ Закон шŏппи ўшман, мӑнэм сэкты партԓэн».
ACT 23:4 Ванән ԓойәм ŏтәт пӑ йастәсәт: «Хŏты сӑхат нӑӈ Турма йир верты ŏх ху накәлты верәтԓэн?»
ACT 23:5 Павел йастәс: «Хӑнам йох, ма ӑт уйәтсэм, ԓўв Турма йир верты ŏх икийа уԓты верәԓ; хӑшман ӑт уԓԓа: 'Нӑӈ мирэн хŏща кущайа уԓты хŏйат эԓты атма аԓ йаста'».
ACT 23:6 Павел уйәтсәԓԓы, итәт саддукейа усәт, киметәт пӑ - фарисейа, щишән ԓўв синедрион йох пеԓа такан йастәс: «Хӑнам йох, ма фарисей, фарисей пŏх, пӑ ма пӑрәм ŏтәт нŏх ԓыԓәӈԓәты щир пеԓа нŏмәс пŏнмем урәӈән сўтәтԓайәм».
ACT 23:7 Хун пӑ ԓўв щит йастәс, фарисейәт пӑ саддукейәт кўтԓаԓән ўра ворты питсәт, пӑ ӑктәщәм мŏхет кӑтна ортәссәт.
ACT 23:8 Саддукейәт пŏтәртԓәт: ӑнта нŏх ԓыԓәӈԓәты щир, ӑнта ангел, ӑнта ԓыԓ ӑнтом; фарисейәт пӑ тўмеԓ па, тӑмеԓ па ванән тӑйԓыԓаԓ.
ACT 23:9 Щи ԓŏват ун ўв сый тыйәс; щӑԓта тухәԓ фарисейәт эԓты уԓты Закона утәԓтәты икет, нŏх ԓойман, ўра ворԓәт, йастәман: «Нэмәԓты атәм ŏт мўӈ тӑм хŏйат хŏща ӑт уйәтԓув; ԓыԓ мўй пӑ ангел ԓўв пеԓайәԓ пŏтәртыйәс ки, Турәм йэщаԓт уԓты мўӈ ӑт питԓув».
ACT 23:10 Туп ўра ворты верэԓ уна йис, щŏрәс ԉаԉ йох куща пӑԓман, Павел ԓыв лакки аԓ мӑшԓэԓ, ԉаԉ йохәта иԓ ŏхәԓты пӑ ԓыв кўтэԓ эԓты Павел ўты партсәԓы пӑ ԉаԉ йŏх уԓты хота туты партсәԓы.
ACT 23:11 Кимет ат Турәм Куща, ԓўв хŏщайәԓ этман, йастәс: «Павел, аԓ пӑԓа; хŏты нӑӈ Иерусалимән Ма эԓтэм пŏтәртсән, щиты Рим хŏща пŏтәртты па мосәԓ».
ACT 23:12 Аԓәӈсӑхата йўвмаԓ кемән тухәԓ иудейәт нŏмәс версәт пӑ, Павел пӑраттэԓ унты, ӑт ԓэты, ӑт йищты йастатсәт.
ACT 23:13 Йастантәм хŏйат ԋӑԓйаӈ мŏԓтас ус.
ACT 23:14 Ԓыв Турма йир верты ŏх икет пӑ уна уԓты икет хŏща йŏхәтсәт пӑ йастәсәт: «Мўӈ, Павел пӑраттэв унты, нэмәԓты ӑт ԓэты йастатсув.
ACT 23:15 Щиӈәԋща, ин щи нын синедрион пиԓән щŏрәс ԉаԉ йох кущайа хӑԓэвәт Павел нын хŏщайән туты партаԓән, ищи мӑтты нын ԓўв верәԓ йӑмашәк ватты верән уԓ. Мўӈ пӑ, ԓэщатыман уԓԓув пӑ ԓўвеԓ хŏԓна щи тӑхайа йŏхәттаԓ унты, пӑраттԓэв».
ACT 23:16 Щи йастантәм вер эԓты Павел ԓэхуйәԓ, опеԓ пŏх, хуԓәс. Ԓўв ԉаԉ йох уԓты хота йŏхтәс пӑ Павела йастәсԓы.
ACT 23:17 Павел пӑ, сот ԉаԉ йох куща эԓты ит вана вохсәԓы пӑ йастәс: «Тӑм пŏх щŏрәс ԉаԉ йох куща хŏща тўви, ԓўв щи кущайа мŏԓтты йастәты ŏт тӑйәԓ».
ACT 23:18 Щитэн ԓўвеԓ щŏрәс ԉаԉ йох куща хŏща тусԓы пӑ йастәс: «Касна хота опсәм Павел, мӑнэм вана вохман, тӑм пŏх нӑӈ хŏщайэн туты партсәԓы, ԓўв нӑӈена мŏԓтты йастәты ŏт тӑйәԓ».
ACT 23:19 Щŏрәс ԉаԉ йох куща, ԓўвеԓ йошәԓ эԓты катәԓман пӑ ԓўв пиԓәԓән пўӈԓа йирԓәман, иԋщәссәԓы: «Мӑнэм йастәты нӑӈ мўй тӑйԓән?»
ACT 23:20 Ԓўв йŏхԓы йастәс: «Иудейәт нӑӈен партты нŏмәс версәт, нӑӈ хӑԓэвәт Павел синедрион хŏща ким ат этәԓтәсэн, ищи мӑтты ԓыв йӑмашәк ԓўв эԓтэԓ ԓэрапты верэԓ уԓ.
ACT 23:21 Туп нӑӈ ԓывиԓаԓ аԓ хуԓәнта; ԓўвеԓ ԋӑԓйаӈ мŏԓтас хŏйат ԓыв эԓтыԓаԓ ԓомиԓәт, хŏй ӑт ԓэты пӑ ӑт йищты йастатсәт, ԓўвеԓ ӑт веԓтэԓ унты; пӑ ԓыв, нӑӈ йасӈен ԓавәԓман, ин ԓэщатыман уԓԓәт».
ACT 23:22 Щиӈәԋща щŏрәс ԉаԉ йох куща энмәм пŏх эсәԓсәԓы, йастәман: «Нэмәԓты хŏйата аԓ йасты, мӑнэм мўй йастәсән».
ACT 23:23 Щӑԓта, кӑт сот ԉаԉ йох кущайӈән вана вохман, йастәс: «Кӑт сот кўрән шушты, ԓапәтйаӈ ԓовәӈ ԉаԉ йох пӑ кӑтсот ԋоԓәӈ-йухԓәӈ ԉаԉ ху ԓэщататы, атәԓән хуԓәм щос кемән Кесария воша ат мӑтсәт.
ACT 23:24 Ԓовәт и щиты ԓэщатаԓән, Павел щи опсәԓман, Феликс нэмпи куща хŏща ԓўвеԓ йӑма туты урәӈән».
ACT 23:25 Нэпека па щимәщ айкеԓ хӑншәс:
ACT 23:26 «Клавдий Лисий эԓты ԓӑтәӈ куща Феликс икийа. Ўща уԓа.
ACT 23:27 Иудейәт тӑм хŏйат ԋӑрэмәсэԓ пӑ веԓты ўтщисэԓ; ма ԉаԉ йохԓам пиԓән йŏхәтсәм пӑ ԓўвеԓ нŏх ӑратысэм, ԓўв Рим хŏйата уԓты верәԓ мŏштәмэм пӑтыйән.
ACT 23:28 Йухәт, ԓэрапты ԓӑӈхатэм урәӈән, мўй хŏща ԓўв нўрәӈа айәԓса, ԓўвеԓ ԓыв синедрионэԓа тусэм.
ACT 23:29 Ма ŏша пайәтсэм, ԓыв законэԓ хŏща ўрайа хойәм нŏпсәт урәӈән ԓўв нўрәӈа айәԓԓа, туп нэмәԓтты нўр сŏрәм пӑ касна хот кеша ԓўв хŏщайәԓ ӑт уйәтсәм.
ACT 23:30 Туп ма хŏщайэм иудейәт тӑм хŏйат пеԓа атәм нŏмәс верты айкеԓэԓ йŏхтәс, ма ԓўвеԓ мŏхты нӑӈ хŏщайэн китсэм, нўр туты ŏтәта па ԓўв пеԓайәԓа нӑӈ хŏщайэн пŏтәртты партсәԓам. Тўмтака уԓа».
ACT 23:31 Щиӈәԋща, ԉаԉ йохәт, тӑм ԓўв партәм щирәԓ хўватән, Павел ўйман, атәԓән Антипатрида воша тусэԓ.
ACT 23:32 Кимет хӑтәԓ пӑ, ԓовәӈ ԉаԉ йохәта ԓўв пиԓәԓән мӑнты миймеԓ кемән, ԉӑԉ йох уԓты хотэԓа йŏхԓы керԓәсәт.
ACT 23:33 Ԉаԉ йох пӑ, Кесария воша йŏхәтмеԓ пӑ айкеԓәӈ нэпек куща икийа миймеԓ кемән, Павел па ԓўвеԓа мӑсэԓ.
ACT 23:34 Куща ики, айкеԓәӈ нэпек ԓуӈәтмаԓ йўпийән, иԋщәссәԓы, мӑты мўв щуӈ эԓты ԓўв уԓ. Павел Киликия эԓты уԓты мŏштәмаԓ кемән, йастәс:
ACT 23:35 «Ма нӑӈен щи пŏрайән хуԓәтԓэм, хун нўр туты ŏтԓан йŏхәтԓәт». Пӑ ԓўвеԓ Ирод хŏт шикийән, ԉаԉ йохән эԓт тӑйман, уԓты партсәԓы.
ACT 24:1 Вет хӑтәԓ хӑщәм йўпийән, Турма йир верты ŏх ху Анания ун икет пиԓән пӑ Тертулл, законәт уйәтты ху, пиԓән Кесарияйа йŏхтәс. Ԓыв куща икийа йастәсәт, мўй урәӈән Павел нўрмәԓтты питԓэԓ.
ACT 24:2 Хун пӑ Павел тŏхи ԓŏӈәԓтса, Тертулл ԓўв нўрәԓ аԉты питсәԓы, пŏтәртман:
ACT 24:3 «Иса пӑ кашәӈ тӑхайән кӑмән хŏрпи йӑм щирән мўӈ вана ўԓэв, мўӈ пайԓы уԓәпсайэв урәӈән нӑӈена, ԓӑтәӈ куща Феликс, пумащипа йастәты мўӈ верэв уԓ, пӑ тӑм мир йӑм, так уԓәпса нӑӈ ŏшәӈа парттэн хўватән уԓ.
ACT 24:4 Туп, нӑӈен шек ӑт ат тŏрастәты урәӈән, ма нӑӈен сӑмәӈ вер хўватэнән мўӈев йэша тӑхты хуԓәтты пŏйәкԓэм.
ACT 24:5 Мўӈ тӑм хŏйат рома уԓты щир ԓыԓәтты ŏта ԓўӈәтԓэв, ԓўв - иудейәт кўтән керәтман мўв ԓŏватән йэшащты вер пеԓа ŏх ху. Ԓўв Назарет эԓты уԓты Иисус ӑт рӑхты утәԓтәпса пеԓа уԓты ŏх ху,
ACT 24:6 хŏй хŏԓна Турәм Хот щопитты ўтщисԓы, мўӈ ԓўвеԓ катәԓсэв пӑ мўӈ Законэв хўватән сўтәтты ўтщисэв.
ACT 24:7 Туп щŏрәс ԉаԉ йох куща Лисий, йŏхтәс пӑ йур вевән ԓўвеԓ мўӈ йошев эԓты ўсԓы пӑ нӑӈ хŏщайэн китсәԓы,
ACT 24:8 мўӈева, ԓўвеԓ нўрәӈа айәԓтты ŏтәта, па нӑӈ хŏщайэн мӑнты партсәԓы. Хун нӑӈ ԓўвеԓ иԋщәсԓэн, наӈ щи мўй эԓты иса уйәтԓэн, мўй хŏща мўӈ ԓўвеԓ нўрәӈа тӑйԓэв».
ACT 24:9 Щӑԓта иудейәт па йастәсәт, мӑтты щит щиты.
ACT 24:10 Павел пӑ, хун куща ики ԓўвеԓа пŏтәртты щира пос аԉәс, йŏхԓы йастәс: «Уйәтԓэм, нӑӈ ар тӑԓ-ԓўӈ вещкат щирән тӑм мир сўтәтԓән, ма ԓӑрпайа ма верэм ӑратыты питԓэм.
ACT 24:11 Нӑӈ ԓэрапты верәтԓэн, ма Иерусалима Турәм ишәкты урәӈән йŏхәтмем, кӑтхŏщйаӈ кем хӑтԓа йис.
ACT 24:12 Ӑнта Турәм Хотән, ӑнта иудейәт пойәкщәты хотән, ӑнта вош ԓŏватән ԓыв мӑнэм ўра ворман мўй пӑ мир йэшащты пеԓа хущман, ӑт уйтыԓысэԓ,
ACT 24:13 пӑ щит аԉты ӑт верәтԓәт, мўй хŏща мӑнэм ин нўрмәԓԓәт.
ACT 24:14 Туп щи хŏща нӑӈен эԓпа йастәԓэм, утәԓтәпса хўват, мўй ԓыв ӑт рӑхты щира айәԓԓэԓ, йӑна ма ащиԓам Турма верәт верԓәм, иса щитәта эвәԓман, мўй Законән пӑ Турәм айкеԓ туты хŏйатәт нэпекәт хŏща хӑшман уԓԓа,
ACT 24:15 Турма нŏмәс пŏнман тӑйԓәм, пӑрәм ŏтәт, вещкат пӑ ӑнта вещкат ŏтәт нŏх ԓыԓәӈԓәты вер питәԓ, мўй ԓыв па ԓавәԓԓәт.
ACT 24:16 Щишән ма па ўратԓәм, Турәм пӑ хŏйатәт хŏща ма ԓыпем иса сыстам ат ус.
ACT 24:17 Ар тӑԓ хӑщәм йўпийән, ма мирэма меԓащ мӑты пӑ Турма йир туты урәӈән, ма Иерусалима йŏхәтсәм.
ACT 24:18 Ма Турәм Хотән уйәтсайәм, хун ма сыстамтыты верәт версәм, пӑ щита нэмәԓты мир пӑ йэшащты сый уԓмаԓ ӑнтом.
ACT 24:19 Щит тухәԓ Асия мўвәӈ иудейәт усәт, хŏйтата наӈ йэщаԓтэн ԓойты пӑ мӑнэм нўрмәԓтты мосәс, ма пеԓайэм мŏԓты тӑйԓәт ки.
ACT 24:20 Мўй пӑ щитәт ат йастәԓәт, хун ма синедрион йэщаԓт ԓоймемән, мўй хŏрпи нўр ԓыв ма хŏщайэм уйәтсәт,
ACT 24:21 мосәӈ, ма туп щита нўр тӑйԓәм, синедрион хŏща ўваԓтсәм: 'Ма тӑм хӑтәԓ нын йэщаԓтән, пӑрәм ŏтәт нŏх ԓыԓәӈԓәты вер пеԓа нŏмәс пŏнтэм урәӈән, сўтәтԓайәм?'»
ACT 24:22 Щит хуԓәтмаԓ йўпийән, Феликс, щи Йуш эԓты тŏрԓы уйәтман, ԓыв верэԓ йэԓшәк хӑтәԓтәсԓы, йастәс: «Нын верән ватԓэм, хун щŏрәс ԉаԉ йох куща Лисий йŏхәтәԓ».
ACT 24:23 Ԓўв сот ԉаԉ йох кущайа Павел эԓт тӑйты партсәԓы, туп ԓўвеԓа йэрмат щир верты пӑ ԓухәсԓаԓа ԓўвеԓа мосты верәт верты мўй пӑ йŏхтыԓыты, йэртԓыты ӑт эсәԓсәԓы.
ACT 24:24 Кӑмәтса хӑтәԓ йўпийән Феликс, Друзилла ийимеԓ, иудей нэ, пиԓән йŏхәтмаԓ кемән, Павел вохсәԓы, пӑ Иисуса Христоса эвәԓты вер эԓты хуԓәнтәс.
ACT 24:25 Пӑ хун ԓўв вещкат вер эԓты, йŏхи шаващты вер эԓты пӑ йиты Турәм сўт эԓты пŏтәртәс, Феликс пӑԉщәмән йŏхәтса пӑ йастәс: «Ин мӑна, хун пӑ кум шитԓәм, нӑӈен вохԓэм».
ACT 24:26 Ԓўв ищи кўт нумәсәс, эсәԓты урәӈән, Павел ԓўвеԓа ŏх мӑԓ: щишән ван кўтԓы ԓўвеԓ вана туты партыԓысԓы пӑ ԓўв пиԓәԓән пŏтрэмәс.
ACT 24:27 Туп кӑт тӑԓ хӑщәм кемән, Феликс рупитәм тӑхайа Порций Фест йŏхтәс, иудейәта йӑм верты урәӈән, Феликс Павел касна хотән хӑйсәԓы.
ACT 25:1 Фест, щи мўв щуӈа йŏхәтмаԓ кемән, ԋӑԓмет хӑтәԓән Кесария эԓты Иерусалима мӑнәс.
ACT 25:2 Щӑԓта Турма йир верты ŏх ху пӑ иудейәт эԓты ԓӑтәӈа уԓты йох ԓўв хŏщайәԓ Павел эԓты нўр кӑшты йŏхәтсәт пӑ ԓўв пеԓайәԓ эвԓа-йŏԓа пŏтәртсәт,
ACT 25:3 щит вохман, Фест ԓывиԓаԓа йӑм ат верәс, Павел Иерусалима ат вохсәԓы; пӑ йуш хŏща ԓўвеԓ веԓты нŏмәс версәт.
ACT 25:4 Туп Фест йŏхԓы йастәс, мӑтты Павел Кесарияйән ԉаԉ йŏхән эԓт тӑйԓа пӑ йэшавәԓ ԓўв тŏхи мӑнәԓ.
ACT 25:5 «Щиӈәԋща,» ԓўв йастәс, «нын кущайԓән, ма пиԓэмән ат мӑнԓәт, пӑ мŏԓты вер тӑм хŏйат хŏща уԓ ки, ԓўвеԓ ат нўрмәԓтԓэԓ».
ACT 25:6 Ԓыв хŏщайэԓ ԋийәԓ мўй йаӈ хӑтәԓ кем уԓмаԓ йўпийән, Кесарияйа йŏхԓы йŏхтәс, пӑ кимет хӑтәԓ, сўт ху омәсты тӑхайа омасмаԓ кемән, Павел туты партсәԓы.
ACT 25:7 Хун ԓўв этәс, Иерусалим эԓты йŏхтәм иудейәт керәтман ԓойсәт, Павел артан пӑ ԓавәртан нўрмәԓтты питсэԓ, туп ԓыв щи нўрәт тŏрԓы аԉты ӑт верәтсәԓаԓ.
ACT 25:8 Ԓўв пӑ, ԓўвеԓ ӑратыман, йастәс: «Ма нэмәԓты атәм ӑнта иудейәт Закона, ӑнта Турәм Хота, ӑнта кесарьа ӑт версәм».
ACT 25:9 Фест, иудейәта йӑм верты ԓӑӈхаман, Павел пеԓа йŏхԓы йастәс: «Иерусалима мўй мӑнты ԓӑӈхаԓән, тӑм верәт урәӈән, щита ма уԓман, нӑӈ ат сўтәтсайән?»
ACT 25:10 Павел йастәс: «Ма кесарь сўт йэщаԓт ԓойԓәм, хŏта мӑ сўтәтты верэм уԓ. Иудейәта ма нэмәԓтты атәм ӑт версәм, хŏты нӑӈ па йӑма уйәтԓэн.
ACT 25:11 Ма закон шŏппи ўшсэм ки пӑ сŏрәм ԓӑта мŏԓтты версәм ки, пӑрты эԓты шӑшән ӑт ўратԓәм; нэмәԓты ки щит ӑнтом, мўй урәӈән тӑметән мӑ нўрмәԓтԓайәм, нэмәԓты хŏйат мӑнэм ԓывиԓаԓа мӑты ӑт верәтәԓ. Кесарь сўт такан вохԓәм».
ACT 25:12 Щишән Фест, нŏмәс мӑты хŏйатәт пиԓән пŏтремәмаԓ йўпийән, йастәс: «Нӑӈ кесарь сўт вŏхсән, кесарь хŏща щи мӑнԓән».
ACT 25:13 Кӑмәтса хӑтәԓ хӑщәм йўпийән, Агриппа хон Вереника пиԓән Кесария воша Фест кущайа мойԓәпса йасәӈ йастәты йŏхтәс.
ACT 25:14 Ԓын ар хӑтәԓ щита хӑйсәтән, пӑ Фест хон пиԓән Павел вер эԓты пŏтәртәс: «Тӑта, касна хотән, Феликсән хӑйәм хŏйат уԓ.
ACT 25:15 Хун ма Иерусалимән уԓмемән, иудейәт Турма йир верты ŏх икет пӑ уна уԓты икет ԓўвеԓ нўра павәтты йŏхәтсәт. Ԓыв ԓўвеԓ сўтәтты партсэԓ.
ACT 25:16 Ма ԓывиԓаԓа йастәсәм, Рим хŏйатәт ӑԓ ишән мӑтты хŏйат сŏрма павәтты вер ӑт тӑйԓәт, щи унты хун ԓўвеԓа нўрмәԓтты ŏтԓаԓ пиԓән уйтантыты пӑ ԓўвеԓ ӑратыты щирән мӑԓа.
ACT 25:17 Хун пӑ ԓыв ты йŏхәтсәт, кимет хӑтәԓ мŏхты ма сўт ху омәсты тӑхай омәсәм пӑ щи хŏйат ты туты партсэм.
ACT 25:18 Ԓўвеԓ лӑп нӑпәтман, нўрмәԓтты ŏтәт и нўр ӑт аԉсәт, мўй хŏрпи нўрәт уԓты ма нумәссәм;
ACT 25:19 Туп ԓыв ԓўв пиԓәԓән иудейәт Турма эвәԓты верэԓ эԓты пӑ а хŏй пӑрәм Иисус эԓты ўра вортсәт, Хŏй эԓты Павел такан пŏтәртәс, мӑтты Ԓўв ԓыԓәӈ.
ACT 25:20 Ма ӑт уйәтсэм, хŏты мӑнэм щи вер ԓэрапты, пӑ ԓўвеԓ иԋщәссэм, ԓўв ԓӑӈхаԓ мўй ӑнтом Иерусалима мӑнты пӑ щита сўт йэщаԓт ԓойты.
ACT 25:21 Туп Павел такан партсәԓы, ԓўв кесарьән ватты кеша ат хӑйса, ма пӑ ԓўвеԓ кесарь киттэм унты ԉаԉ йохәта эԓт тӑйты партсэм».
ACT 25:22 Агриппа пӑ Фест пеԓа йастәс: «Ма па щи хŏйат хуԓәтты кашем ус». «Хӑԓэвәт щи хуԓԓэн» - Фест йŏхԓы йастәс.
ACT 25:23 Кимет хӑтәԓ, хун Агриппа пӑ Вереника ун ԓӑтәӈ щирән йŏхәтсәтән пӑ сўт верты тӑхайа щŏрәс ԉаԉ йŏх кущайәт пӑ ԓӑтәӈа уԓты вошәӈ хŏйатәт пиԓән ԓŏксәтән, Фест партәм хўватән Павел туса.
ACT 25:24 Щӑԓта Фест йастәс: «Агриппа хон пӑ хŏԓ тӑта уԓты йох! Нынан тўм хŏйат ныԓа, хŏй эԓты аратәԓ хŏԓ иудейәт мӑ хŏщайэм Иерусалимән пӑ тӑта, поләщ тўвман пӑ нўр кӑшман, йŏхтыԓысәт пӑ ўвсәт, ԓўвеԓа йэԓԓы уԓты ӑт мосәԓ.
ACT 25:25 Туп ма уйәтсэм, сŏрәм ԓӑта ԓўв немәԓты ӑт верәс; пӑ хŏты ԓўв Август эԓты сўт вер такан вохәс, ма ԓўв хŏщайәԓа ԓўвеԓ китты нŏмәс версәм.
ACT 25:26 Ма ԓўв эԓтэԓ нэмәԓты тŏрԓы вер кущайэма хӑшты ӑт тӑйԓәм; щишән ԓўвеԓ нын хŏщайән, мет шопәӈ Агриппа хон, нӑӈ хŏщайэна тусэм, ватты йўпийән, мӑнэм мŏԓтты хӑшты урәӈән.
ACT 25:27 Ма нумәстэмән, ŏшԓы щир щит, касна хота опсәм ŏт, ԓўв нўрәԓ ӑт аԉман, хон хŏща китты».
ACT 26:1 Агриппа Павела йастәс: «Нӑӈена нӑӈ эԓтайэн пŏтәртты рӑхәԓ». Щиӈәԋща Павел, йошәԓ йэԓ ԋиштәман, ԓўвеԓ ӑратыты щира пŏтәртты питәс:
ACT 26:2 «Агриппа хон! Мӑнэм ма ŏй тӑйтыйа айәԓԓэм, тӑм хӑтәԓ нӑӈ йэщаԓтэн кашәӈ вер эԓты мӑнэм ма ӑратыты верәтԓэм, мўй хŏща ма иудейәтән нўрмәԓԓайәм,
ACT 26:3 хŏԓна мет, нӑӈ иудейәт уԓәпса щирәт пӑ ўрайа питты нŏпсәт уйәтԓәԓан. Щишән нӑӈен тўӈа-щира мӑнэм хуԓәтты пойәкԓэм.
ACT 26:4 Мет оԓәӈән ма мирэм кўтән уԓәм верэм, Иерусалимән энәмты пŏх ԓŏватән уԓәм уԓәпсайэм иудейәта иса ԓэр.
ACT 26:5 Ԓыв хўв тэԓән ма эԓтэм уйәтԓәт, туп уйәтты вер аԉты ԓӑӈхамәԓәт ки, ма фарисейа усәм. Щит мўӈ эвәԓты верэв хŏща мет так утәԓтәпса.
ACT 26:6 Ин ма сўт йэщаԓт ԓойԓәм Турәм аԉәм вер пеԓа пŏнәм нŏмәс урәӈән, мўй мўӈ ащиԓува мӑса,
ACT 26:7 щи аԉәм вер тӑԓаӈа йиты вер кӑтхŏщйаӈ сыр рут мўӈ мирэв шийаԓәты нумәсԓәт, атәԓ пӑ хӑтәԓ сӑмәӈа Турма верәт верман. Щи пŏнәм нŏмәс урәӈән, Агриппа хон, ма иудейәтән нўрмәԓԓайәм.
ACT 26:8 Мўйа пӑ нын ӑт рӑхты щира ԓўӈәтԓәԓән щит, мўй Турәм пӑрәм ŏтәт нŏх ԓыԓӈатәԓ?
ACT 26:9 Йӑна, ма ищи нумәссәм, мӑнэм Назарет эԓты уԓты Иисус нэм йэщаԓт йэшащты ар мосәԓ.
ACT 26:10 Щит ма щи Иерусалимән версәм: Турма йир верты ŏх икет эԓты йур ўйман, ма ар Турәм хŏйатәт касна хотәта тухрыԓысәм, пӑ, хун ԓыв пӑратысайәт, ма щийэԓ кашащисәм;
ACT 26:11 Пӑ хŏԓ иудейәт пойәкщәты хотәтән ма ар пўш ԓывиԓаԓ шукатысԓам пӑ Иисус атма айәԓты иԉамтысԓам пӑ, ԓыв пеԓайэԓ шек ԉикащман, хŏԓна пӑ па мўв вошәтән ԋухәтԓысԓам.
ACT 26:12 Тӑм урәӈән, йур пӑ Турма йир верты ŏх икет эԓты партәм вер тӑйман, Дамаска мӑнты питсәм,
ACT 26:13 хӑтәԓ кўтәпән йушән, йэшәк хон, ма турәм хӑр эԓты щимәщ нŏви шийаԓәсәм, хӑтәԓ эԓты артан нŏвийа пŏӈхәртәс. Ԓўв мӑнэм пӑ ма пиԓэмән йўвәм мŏхет нŏх хутԓәптәсԓы.
ACT 26:14 Мўӈ хŏԓ мўва иԓ рӑкәтсув, пӑ ма тўр сый хуԓмәсәм, мӑнэма еврейәт йасәӈән пŏтәртәм тўр сый: 'Савл, Савл! Мўйа нӑӈ Мӑнэм ԋўхәԓԓэн? Нӑӈен карты йўщәӈ йўх пеԓа мӑнты ԓавәрт'.
ACT 26:15 Ма йастәсәм: 'Хŏй Нӑӈ, Турәм Куща?' Ԓўв йастәс: 'Ма - Иисус, Хŏйтэн нӑӈ ԋўхәԓԓән.
ACT 26:16 Щӑԓта нӑӈ кўрԓана нŏх ԓойа; Ма щи урәӈән нӑӈ хŏщайэна этсәм, нӑӈен Ма верԓам верты хŏйата пӑ щит вантәм ŏта пŏнты, мўй нӑӈ ватсән пӑ мўй Ма нӑӈена ватәԓтәԓәм.
ACT 26:17 Ма нӑӈен иудей мирэн эԓты хŏԓт пайәтԓэм пӑ па рут мир эԓты, хŏйтат хŏща Ма нӑӈен ин китԓэм,
ACT 26:18 ԓывиԓаԓа сэмԓаԓ пел пўшты, ԓыв пӑтлам эԓты нŏви пеԓа ат ӑӈкәрмәсәт пӑ хиԋ йур эԓты Турәм пеԓа, пӑ Мӑнэма эвәԓты верән кӑрэк йŏрэмәты щир пӑ йэмәӈа пайтәм мŏхет кўтән уԓты щир ат мŏщатсәт'.
ACT 26:19 Щишән, Агриппа хон, ма турәм хӑр вантәпса эԓты йŏвра ӑт керԓәсәм,
ACT 26:20 туп оԓәӈән Дамаск пӑ Иерусалимән уԓты мŏхета, йухәт Иудея ԓŏватән уԓты мŏхета пӑ па рут мира пŏтәртсәм, ԓыв кӑрэк эԓты шӑшән ат керԓәсәт пӑ Турәм пеԓа ат керԓәсәт, кӑрэк эԓты шӑшән керԓәты арат ԓӑт тӑйты верәт верман.
ACT 26:21 Щи урәӈән иудейәт мӑнэм Турәм Хотән ԋӑрэмәсэԓ пӑ лакки мӑншиты ўтщисэԓ.
ACT 26:22 Туп, Турәмән ԋотәпән миймем кемән, ма тӑм хӑтәԓ унты ԓойԓәм, айәта пӑ унәта вантәм ŏта уԓман, нэмәԓты ӑт пŏтәртман, щи тўмпийән мўй эԓты Турәм айкеԓ туты хŏйатәт пӑ Моисей пŏтәртысәт, мӑтты щит питәԓ,
ACT 26:23 тŏрԓы ки, мӑтты Христоса шук туты мосәс пӑ, мет оԓӈа парәм эԓты нŏх ԓыԓәӈԓәмаԓ йўпийән, мўӈ мирэва пӑ па рут мира нŏви такан айәԓтты мосәс».
ACT 26:24 Хун ԓўв щиты ԓўвеԓ ӑратысԓы, Фест сыйәӈ тўрән йастәс: «Павел, нӑӈ ŏхен атма йис! Ун утәԓтәпса нӑӈен ŏх атма йиты унты йŏхтәптәсԓы».
ACT 26:25 «Ӑнтом, йэшәк ԓӑтәӈ Фест», - ԓўв йастәс, - «Ма ŏхем атәм ӑнтом, туп тŏрԓы пӑ ошәӈ йасӈәт пŏтәрԓәм.
ACT 26:26 Хон щи верәт эԓты уйәтԓәԓы, хŏй йэщаԓт ма тŏрԓы пŏтәртԓәм. Ма йэша нэш ӑт эвәԓԓәм, ԓўв эԓтэԓ мŏԓты иса тӑм эԓты сайԓәман ат уса, тӑм ӑнта щуӈән ус.
ACT 26:27 Агриппа хон, Турәм айкеԓ туты хŏйатәта эвәԓԓән амўй? Уйәтԓэм, эвәԓԓән».
ACT 26:28 Агриппа Павела йастәс: «Нӑӈ мӑнэм йэша нэш ӑт эвԓәптәԓэн, Христиана йиты урәӈән».
ACT 26:29 Павел йастәс: «Ма Турәм пойәксэм ԓўԓән, шимәԓ мўй, ар мўй, ӑнтом туп нӑӈ, пӑ хŏԓ тӑм хӑтәԓ мӑнэм хуԓәтты ŏтәт, тӑмиты ат йисәт мўй хŏрпи ма, туп йӑрәм карты кеԓ такԓы».
ACT 26:30 Хун ԓўв щит йастәс, хон пӑ куща ики, Вереника пӑ ԓыв пиԓԓаԓән опсәм ŏтәт нŏх ԓойсәт;
ACT 26:31 пӑ пўӈԓа йирԓәман, ԓыв кўтэԓән пŏтәртсәт: «Тӑм хŏйат сŏрәм кеша пӑ касна хот кеша нэмәԓты атәм ӑт верәԓ».
ACT 26:32 Пӑ Агриппа Фест пеԓа йастәс: «Тӑм хŏйат эсәԓты кўш рӑхәс, кесарь эԓты сўт ӑт вохәс ки». Щишән куща ԓўвеԓ кесарь хŏща китты нŏмәс верәс.
ACT 27:1 Хун мўӈева Италия мўва хопән мӑнты нŏмәс верса, Павел пӑ тухәԓ па опсәм ŏтәт Август когорта эԓты Юлий нэмпи сот ԉаԉ йох кущайа мӑсайәт.
ACT 27:2 Мўӈ, Асия вошәт сӑхат мӑнты, Адрамит вош паршәӈ ун хопа ԓэԓтсув пӑ мӑтсув. Мўӈ пиԓэвән Аристарх, Македония ху, Фессалоника вош эԓты ус.
ACT 27:3 Кимет хӑтәԓ Сидон хŏща хойсув. Юлий, Павел пиԓән йӑм щира ус, ԓухәсԓаԓ хŏща ԓўвеԓ йӑхты эсәԓсәԓы пӑ ԓыв ԓўв верԓаԓ эԓты ат нумәссәт.
ACT 27:4 Щиԓта этман, йэщаԓт вот эԓты хŏнтаман, мўӈ Кипр пухәр вот сай пелкеԓ сӑхат мӑтсэв,
ACT 27:5 пӑ, Киликия пӑ Памфилия шŏма щарәс шŏппи ўшмев йўпийән, Ликия мўвән Миры воша йŏхәтсув.
ACT 27:6 Щита сот ԉаԉ йŏх куща Александрия вош эԓты уԓты, Италия мўва мӑнты, паршәӈ ун хоп уйтәс пӑ мўӈев щи ԓэԓтсәԓы.
ACT 27:7 Ар хӑтәԓ сыс мўӈ айәԓта йэԓԓы мӑтсув пӑ мет йухәт, ўрайән Книд вош шŏма йŏхәтсув. Пӑ вот мўӈев мосты тӑха пеԓа мӑнты кумән ӑт мийԓысԓы, мўӈ Крит пухәр сайа Салмона нэмпи ԋŏԓ пеләк сӑхат ванамәсув.
ACT 27:8 Ԓўв мŏхтэԓ ўрайән ўратмев йўпийән, и тӑхайа йŏхәтсув, Йӑм Каԓтнаӈәта айәԓтԓа, щи ԉэпән Ласея вош ус.
ACT 27:9 Мўӈ щи арат ар сыс уштәмев урәӈән пӑ мӑнты вер пӑԉщәма йиты питәс, иудейәт сўс вўщԓәты пŏра ўш хӑщәс, Павел ԓывиԓаԓа йастәс:
ACT 27:10 «Ма ваттэмән, мўӈ мӑнәпсайэв шек ԓавәрт питәԓ пӑ ун атәм тӑйты питәԓ ӑнта туп пŏрмасәта пӑ хопа, мўӈ уԓәпсайэва па».
ACT 27:11 Туп сот ԉаԉ йох куща Павел йасәӈ эԓты сэвәс тӑйты хŏйата пӑ хопәӈ кущайа аршәк эвԓәс.
ACT 27:12 Щи лух тӑԓ уԓты щирән атәм ус, пӑ ар хŏйат щиԓта йэԓ мӑнты нŏмәс мийԓысәт, верәтты кемән Финик вош унты мӑнты пӑ щита тӑԓ хӑщәптәты мосәԓ. Финик - щит Крит лух, нўм кев оԓәӈ пӑ ным кев оԓәӈ вот йэщаԓт ус.
ACT 27:13 Нўм вот пŏԓты питәс, пӑ ԓыв нумәссәт мосты щир мŏщатсәт, хопән рупитты мŏхет йакарэԓ нŏх аԓәпсәт пӑ Крит ԉэп эԓты мӑтсәт.
ACT 27:14 Туп йэшавуԓ пухәр эԓты ŏвәс пеԓа уԓты хӑԓэвәт пеләк так вотшики пŏԓты питәс, эвроклидона айәԓтты вот.
ACT 27:15 Паршәӈ ун хоп щиты аԓэмәса пӑ ԓўв вот йэщаԓт мӑнты ӑт веритәс, пӑ мўӈ, хумпәта мийәсман, тыйэԓ-тŏхэԓ тутԓысайув.
ACT 27:16 Мўӈ айшәк Клавда нэмпи пухәр вот сай пелкәԓа питсув. Щита мўӈ ўрайән ай хопев катәԓты верәтсэв.
ACT 27:17 Ай хопев нŏх аԓԓәммев йўпийән, паршәӈ хопән рупитты хŏйатәт щевма кеԓәт паршәӈ хоп иԓта таԓсәԓаԓ пӑ ԓўвеԓ лӑп йӑрсәԓәсэԓ. Сэй хишәӈ пана ӑт опсатты урәӈән, парәш иԓ эсәԓсэԓ пӑ щиты щи вотән тутԓысайув.
ACT 27:18 Кимет хӑтәԓән, вотән паршәӈ хоп щиты йовәԓты питса пӑ ԓэԓтәм пормасәт ԓыв йиӈка иԓ йовәԓты питсәԓаԓ.
ACT 27:19 Хуԓмет хӑтәԓән пӑ мўӈ йоша-кўра хоп кеԓәт-ԋўрәт иԓ йовәԓты питсув.
ACT 27:20 Ар хӑтәԓ ӑнта най, ӑнта хусәт ӑт нысайәт пӑ так вот щиты пŏԓәс, мет йухәт хŏԓна мўӈ нŏх питты щира уԓты нŏпсэв лўттәсэв.
ACT 27:21 Хŏйатәт хув нэмәԓтты ӑт ԓэсәт. Павел, ԓыв кўтэԓа ԓоймаԓ кемән, йастәс: «Йох! Мӑнэм хуԓәтты мосәс пӑ Крит эԓты пўӈԓа мӑнты ӑт мосәс, тӑмәщ шук пӑ накԓат нын ԓуԓән ӑт ватсәты.
ACT 27:22 Ин пӑ нынан такан йастәԓәм, нŏх тўӈмәԓтыйаты, нын эԓтан нэмәԓты хŏйат ӑт посаԓәԓ, туп паршәӈ хопев шўкаԓәԓ.
ACT 27:23 Хӑщәм атән мӑнэма Турәм ангел этәс, Хŏй пеԓа ма уԓԓәм пӑ Хŏйа ма пойәкщәԓәм
ACT 27:24 пӑ йастәс: 'Павел, аԓ пӑԓа! Нӑӈена кесарь йэщаԓт ԓойты мосәԓ, пӑ Турәм Ԓўв Йӑмәԓән нӑӈен щи ԓŏват йӑм верәс, хŏԓ нӑӈ пиԓэнән уԓәм ŏтәта уԓәпса мойԓәс'.
ACT 27:25 Щишән йох, нŏх тўӈмәԓтыйаты, ма Турма эвәԓԓәм, щиты питәԓ, хŏты мӑнэма йастаман ус:
ACT 27:26 Мўӈ мӑтты пўхра ўты йўвәтты верэв уԓ».
ACT 27:27 Ԋӑԓхŏщйаӈмет атән, хŏты мўӈ Адриа щарәс хўват тутԓысайув, ат кўтәп кемән хопән рупитты йох мўв ший мŏштәты питсәт, иԓампа мӑтты мўва ванамәты питсув,
ACT 27:28 пӑ, ԓыв йик мӑԓат артаԓәсэԓ, пӑ хус ԓӑԓ ус, щӑԓта йэша ус мӑԓатәԓ па артаԓәсэԓ, пӑ ветхŏщйаӈ ԓӑԓ арат ус.
ACT 27:29 Кевәӈ тӑхайа питты эԓты пӑԓман, ԋӑԓ йакар сэвәс эԓты иԓ вŏщкәсәт пӑ хӑтԓа йиты ԓавәԓсәт.
ACT 27:30 Хун пӑ хопәӈ мŏхет хопеԓ эԓты хŏнтаты ўтщисәт пӑ щарса ай хоп иԓ эсәԓсәт, щимәщ хŏрас верман, мӑтты хоп ԋŏԓ эԓты йакарәт иԓ эсәԓԓәт,
ACT 27:31 Павел сот ԉаԉ йох кущайа пӑ ԉаԉ йохәта йастәс: «Ԓыв паршәӈ хопән ӑт хӑщԓәт ки, нын ԓыԓԓән этәԓтәты ӑт верәтԓәты».
ACT 27:32 Щиӈәԋща ԉаԉ йохәт ай хоп кеԓәт шŏппи сэвәртсәԓаԓ, пӑ хоп иԓ рӑкнәс.
ACT 27:33 Хӑтԓа йиты йэԓпийән Павел мŏхет хŏԓ ԓэты пойәксәԓы, йастәман: «Тӑм хӑтәԓ ԋӑԓхŏщйаӈмет хатәԓ, хŏты нын, ԓавԓәсман, нэмәԓты ӑт ԓэвман, ԓэтŏтԓы уԓԓәты.
ACT 27:34 Щишән нынан ԓэтыйа пойәкԓыԓам: щиты нын уԓәпсайԓын шавиты туԓт; нэмәԓты ŏтԓән хŏща и ŏхсŏх нын ŏхԓән эԓты иԓ ӑт рӑкәнәԓ».
ACT 27:35 Щит йастәмаԓ кемән пӑ ԋаԋ ўймаԓ йўпийән, ԓўв, хŏйатәт ватман, Турма пўмащипа йастәс пӑ, кӑтна мŏртмаԓ кемән, ԓэты питәс.
ACT 27:36 Щиӈәԋща хŏԓыйэ каркама йисәт пӑ хŏԓыйэ ԓэты питсәт.
ACT 27:37 Паршәӈ хопән мўӈ аратэвән кӑтсот ԓапәтйаӈ хут хŏйат усув.
ACT 27:38 Хун хŏйатәт тӑрәмтыйа ԓэсәт, ԋаԋ ԓат сэми хирәт щарса йŏвәԓман, хоп кенапты питсэԓ.
ACT 27:39 Хун хӑтԓа йис, ԓыв этәм мўв ӑт мŏштәсэԓ, туп мŏԓтты пан тӑйты йик лух шийаԓәсәт, щи хойты нŏмәс версәт, хойты верәтԓа ки.
ACT 27:40 Щӑԓта, йакарәт нŏх ўйәм йўпийән, щарәс хўват мӑтсәт пӑ, сэвәс ԓупԓаԓ хŏԓт эхмеԓ кемән пӑ ай паршэԓ вот хўват нŏх аԓәммеԓ йўпийән, мўв питар пеԓа ԋŏхтәсэԓ.
ACT 27:41 Пан ŏха хойсәт, пӑ хопеԓ сорәм тӑхайа опсәс. Ԋŏԓәԓ иԓ ԓŏӈәс пӑ ӑт ԋŏхԓыйәԓ, сэвсәԓ пӑ хўмпәтән пелки сэкԓа.
ACT 27:42 Ԉаԉ йохәт касна хота омәсты ŏтәт веԓты кашащсәт, мӑтты ŏт ўты ущман ӑт ат хŏнтас.
ACT 27:43 Туп сот ԉаԉ йох куща, Павел ӑратыман, ԓывиԓаԓ щи верэԓ эԓты иԓ вŏԓәтсәԓы пӑ ущты хошты ŏтәта оԓӈа иԓ навәрмәты пӑ мўва ўты ущты партсәԓы,
ACT 27:44 па ŏтәта пӑ хŏйа сохәԓ сурән, хŏйа пӑ мŏԓтты паршәӈ хоп пелкәт сурән ўты йŏхтәптәты партсәԓы; щиты хŏԓыйэ йӑма питара ўшсәт.
ACT 28:1 Ўты пайтәсмеԓ йўпийән, Павел пиԓән уԓәм ŏтәт ŏша пайәтсэԓ, пухәр нэмәԓ Мальта.
ACT 28:2 Пухәрән шŏшийа уԓәм па сыр хŏйатәт мўӈева йӑм арат ԋотәп версәт. Йэрт пӑ ищки уԓәм пӑтыйән, ԓыв тўт пŏтсәт пӑ хŏԓыйэ мўӈев вана вохсәԓаԓ.
ACT 28:3 Хун пӑ Павел варәс аԓтэԓ ӑктәс пӑ тўта пŏныԓыйәс, ŏхты вой, тўт рўв эԓты хŏнтаман, ԓўв йошәԓа, пŏрэмәман, иԓԓы лўԋиты питәс.
ACT 28:4 Хун пухрәӈ хŏйатәт, Павел йош эԓты ŏхты вой иԓԓы лўԋиты шийаԓәсәт, ԓыв кўтԓаԓән пŏтәртты питсәт: «Уйәтман, тӑм хŏйат веԓтатты ŏт: ԓўв щарәс эԓты нŏх питәс, туп вещкат ԓух сўт ԓўвеԓ ԓыԓӈа уԓты ӑт хӑйԓәԓы».
ACT 28:5 Туп ԓўв, ŏхты вой тўта рӑԋкәмаԓ йўпийән, нэмәԓты атма ӑт хойәс.
ACT 28:6 Ԓыв ԓўвеԓ нŏх пўвԓәты мўй пӑ, шӑмкапан пӑрман, иԓ рӑкәнты ԓавәԓсэԓ; туп, хўв ԓавԓәсман пӑ ваттэԓән, нэмәԓт атәм сŏрта ӑт питәс, па щира нумәсты питсәт пӑ йастәԓәт, ԓўв иԓампа ԓух.
ACT 28:7 Щи тӑха ԉэпән Публий нэмпи пухәр куща хотәт усәт. Ԓўв мўӈев вана ўсԓы пӑ хуԓәм хӑтәԓ мойԓәптысув.
ACT 28:8 Публий ики ащи каврәма пӑ хŏнәԓ кӑшийа йўвман ŏԓтӑхайәԓән ŏԓәс. Павел ԓўв хŏщайәԓа ԓŏӈәс, пойәкщәс пӑ, ԓўв эԓтэԓ йошԓаԓ пŏнмаԓ кемән, ԓўвеԓ тўмтака версәԓы.
ACT 28:9 Тӑм вер йўпийән пухәрән уԓты, муш тӑйты па мŏхет йŏхтыԓысәт пӑ тўмтака верыԓысайәт,
ACT 28:10 ԓыв мўӈева ар йӑм вер версәт пӑ мӑнты питмевән мŏсты ŏтәтән мӑсайув.
ACT 28:11 Хуԓәм тыԓәщ хӑщәм йўпийән мўӈ Александрия эԓты уԓты, Диоскуры нэмпи паршәӈ хопән мӑтсув, щи пухәр хŏща тӑԓ хӑщәптәс,
ACT 28:12 щӑԓта Сиракузы воша йŏхәтмев йўпийән, щита хуԓәм хӑтәԓ усув.
ACT 28:13 Щиԓта мӑнмев йўпийән, Ригия воша йŏхәтсув. Йухәт хӑтәԓ нўм вот пŏԓты питәс пӑ кимет хӑтәԓән мўӈ Путеол воша йŏхәтсув,
ACT 28:14 хŏта хӑнам йохԓув уйәтсув, пӑ ԓыв хŏщайэԓ ԓапәт кем хӑтәԓ уԓты вохсайув, йухәт Рим воша мӑтсув.
ACT 28:15 Щита уԓәм хӑнам йох, мўӈ эԓтэв хуԓмеԓ кемән, мўӈ йэщаԓтэв Аппий вош хӑр лот пӑ Хуԓәм Хоԓты Хот унты этсәт. Павел ԓывиԓаԓ шийаԓәмаԓ кемән, Турма пумащипа йасӈәт йастәс пӑ нŏпсәԓ такамәс.
ACT 28:16 Хун пӑ мўӈ Рим воша йŏхәтсув, сот ԉаԉ йох куща йӑрәм ŏтәт ԉаԉ йох ун кущайа мӑсԓы, Павел пӑ атэԓ щира ԓўвеԓ ԓавәԓты и ԉаԉ ху пиԓән уԓты эсәԓса.
ACT 28:17 Хуԓәм хӑтәԓ хащәм кемән, Павел иудейәт эԓты ԓӑтәӈ йŏх йӑха вохсәԓы пӑ, хун ԓыв йӑха йŏхәтсәт, ԓывиԓаԓа пŏтәртәс: «Хӑнам йох! Мирэма мўй пӑ ащиԓув щирәта нэмәԓты атәм ӑт кўш версәм, ма йӑрман Иерусалим эԓты Рим мŏхета мӑсайәм.
ACT 28:18 Ԓыв, мӑнэм сўт вермеԓ йўпийән, эсәԓты ўтщисэԓ, ма хŏщайэм сŏрәм ԓӑта нэмәԓты нўр ӑнтом;
ACT 28:19 туп иудейәт йасәӈԓаԓ кӑтна мӑнман уԓԓәт, мӑнэм кесарь эԓты сўт вохты вера йис, туп ӑнтом ма мирэм мŏԓты хŏща нўрәӈа верты урәӈән.
ACT 28:20 Щи пӑтыйән ма нынан вохсәԓам, уйтантыты пӑ нын пиԓәнән пŏтрэмәты урәӈән, Израиль нŏмәс йэԓ пŏнты урәӈән, ма тӑмиты йӑрсайәм».
ACT 28:21 Ԓыв пӑ ԓўвеԓа йастәсәт: «Мўӈ нӑӈ эԓтэн ӑнта нэпек Иудея мўв эԓты йоша ўйԓысув, ӑнта йŏхтыԓыты хӑнам йохәт эԓты нэмәԓты хŏйат нӑӈ эԓтэн айкеԓ ӑт китыԓыйәс пӑ мŏԓты атәм йасәӈ ӑт йастыԓыйәс.
ACT 28:22 Туп мўӈева нӑӈ эԓтэн хуԓты мосәԓ, хŏты нӑӈ нумәсԓән. Мўӈ уйәтԓэв, тӑм утәԓтәты вер эԓты кашәӈ тӑхайән ўра ворԓәт».
ACT 28:23 Щӑԓта, ԓўвеԓа аԉәм хӑтәԓән, йӑм ар хŏйат ԓўв хŏщайәԓ хоԓты хотәԓа йŏхтәс; пӑ ԓўв аԓәӈсӑхат эԓты йэтән унты ԓывиԓаԓа Турәм Хон Уԓәпса эԓты пŏтәртәс. Вантәм верәт этәԓтыйәс пӑ ԓывиԓаԓ эвԓәптәман, Моисей Закон пӑ Турәм айкеԓ туты хŏйатәт нэпекәт эԓты ўйман, Иисус эԓты пŏтәртәс.
ACT 28:24 Тухԓәт ԓўв эвԓәптәсԓы, па ŏтәт пӑ ӑт эвәԓсәт.
ACT 28:25 Кўтԓаԓән ўра ворты питсәт, пӑ хун ԓыв мӑнты питсәт, Павел щимәщ йасӈәт йастәс: «Йэмәӈ Ԓыԓ Турәм айкеԓ туты хŏйат Исаия сӑхат мўӈ ащиԓува йӑма йастәс:
ACT 28:26 'Тӑм мир хŏща мӑна пӑ йасты: пӑԓԓәнән хуԓԓәԓән пӑ ӑт мŏштәԓԓән, пӑ сэмԓәнән ватты питԓәты пӑ ӑт шийаԓәԓԓән.
ACT 28:27 Тӑм мŏхет сӑм вŏйән лӑп таԓса, пӑ пӑԓԓаԓән ўрайән хуԓԓәт, пӑ сэмԓаԓ лап хӑтщәсԓаԓ, сэмән ӑт шийаԓәты щира, пӑ пӑԓԓаԓән ӑт хуԓты щира, пӑ сӑмԓаԓән ӑт мŏштәты щира, пӑ Ма пеԓайэм ӑт керԓәты щира, Ма ԓывиԓаԓ тўмтака ӑт ат версәԓам'.
ACT 28:28 Щиӈәԋща, нынана ԓэр ат питәԓ, Турәм нŏх пайәтты щир па рут мира китса: ԓыв щи хуԓԓэԓ».
ACT 28:29 Хун ԓўв тӑм йастәс, иудей йох, ԓыв кўтэԓән такан ўра ворман, мӑтсәт.
ACT 28:30 Щӑԓта Павел тӑԓаӈ кӑт тӑԓ сŏхәптәм хотәԓән ус пӑ хŏй ԓўв хŏщайәԓ йŏхтыԓыйәс, хŏԓ вана ўйԓысԓы,
ACT 28:31 ԓўв, ӑт пӑԓман пӑ ӑт йэртԓыман, Турәм Хон Уԓәпса эԓты пŏтәртәс пӑ Турәм Куща Иисус Христос эԓты утәԓтәс.
