﻿Wasika-à Big Ba Ya Sig Mpír IBRANIYAWAKA.
1.
Sai-à rì níng, Shìdun rì dang jírká buwá kim kim kàun nìnànn nímá á nu mpìrká ri dang kyann jir Shìdun jirà abig dinya yàkúyí big. 
Ama tàma-à níng, ku ri dinya yi jírwá á nu wùnwá ni, wùnwá í zyun-à ku ma wàníng màm sig dunyaru, í zyun-à ku sìnn kà sig á wàníng na kùr á shinn kó kai ni bidìm pár. 
Àyarwá shi sig í bu-à mpìrká má swam yan Shìdun áni. Ku zu síg Shìdun. Ku ri pànn sa myib kó kai bidìm pár ma jírwá zyun-à shi sig ma gbam níng. Barà ku wu n tu kyàr rìg mpìrká bu pyìrbá, í byar-à ku nann zu yag mà wai n shi sig mà byar gbam ùwài mà agunn vìm nù Shìdun ni. 
Ku kab hing yann aswamká mà wai. Zìnn-à Shìdun ya sig ku níng, kab hing bigbá. 
Shìdun taba dinya fig yann aswamká mà wai kó ńzyun n rag: “Wù í wùnmí, jana-à níng ǹ kàng hing Tawú,” ku dang fig bàna. Ku dinya fig wùn aswamwá n rag: “Má shi Tawá. Kwá kàng wùnmí,” ku dang fig bàna tìnn. 
Sai-à Shìdun zìg bi jag sig wùnwá á dunyaru, ku dang rag, yann aswamká buwá mà wai bidìm pár abig wib wàníng. 
Bu-à Shìdun dang sig á shinn yann aswamká buwá mà wai ni bàna í wàníng: Ku rag ku ri sìnn kàng yann aswamká mà wai àràg í wàu ri gbar nì. Mpìrká ri sa swàmwá ku ri sìnn kàng káníng àràg í anam pyìr. 
Ama á shinn wùnwá ni, ku dang rag, “Wù Shìdun, kùrwú má vinn fig ávinn bàna. Wá na kùrwú má sa bu sìsàn. 
Wù ri zìm bu-à sìsàn, mi ri ngàng bu-à bibai. Wàníng í bu-à sa Shìdun ya sig wù àjwár wà kab sig bu mpìrká bidìm pár níng.” 
Ku dang jakàng n rag, “Wù Shinn Lu kó ni sai-à jijag á màm síg nì jànn-à, n màm waisháu ma vùwú. 
Bu káníng bidìm pár má bab jànn rìg, ama buwú wá shi rìg. Big bidìm pár, bá kor rìg àràg í jà. 
Wá pìnn nann zu rìg big àràg í borgo, bá kàng rìg àkor àràg í jà, ama buwú wá shi àràg barà wù ri shi kyann. Wá kàng fig àwàutím bàna.” 
Shìdun taba dinya fig yann aswamká mà wai kó ńzyun n rag: “A shi agunn vìm numí ni, sái wà má sìnn kà hing mpìr azíbká buwú á mìr barwú ni.” 
To. Yann aswamká mà wai big í yanká bu Shìdun bàna. Big í fàuwá big. Ku ri swam bi big jirà abig myàng kwonn ma ká Yesu má pinn zu big níng. 
