﻿Azáya.
60.
Gbalihu agbalihu! Wata egbu nwịinwii; kẹle ìphóró nkengu byawaru! Tẹme Chipfu nọdu egbuwa nwịinwii l'ẹhu ngu! 
Tii ledu; ọchii tụkoakwaru eliphe l'ophu gbachia. Tẹme oke-ọchii gbapyabẹ ndiphe l'ophu. Obenu lẹ Chipfu gbalihuru pfụru pfụ-doru ngu. Tẹme e je ahụma o-gbu-nwịinwii ya l'eli ẹhu ngu. 
Ndu ọhozo a-bya anọdu l'ìphóró, dụru ngu nụ. Ndu eze abya anọdukwapho l'ìphóró ono, dụru ngu nụ ono; mẹ nchi bọhueru ngu phọ. 
Palinaa ẹnya lephee mgburugburu hụma gẹ ndibe ngu dzukọberu awụ awụpfuta ngu. Ụnwu ngu kẹ nwoke shi ẹka dụ ẹnya alwa. Tẹme ẹphe kwọru ụnwuada ngu l'ukuvu akwọlataru ngu. 
Noo teke ii-le iya ẹnya nwụjaa. Ọkpoma evuahaa ngu evuvu; l'ị wata anya ndụ́. L'e shi l'oke-ẹnyimu kporu ẹku kpotaru ngu. Tẹme l'ọ bụkwaru ngu phọ bẹ aa-chịtaru ẹku ọhamoha. 
Ọ-dọru-nyịmunyimu ịnya-kamẹlu atụko alị ngu sweta. Mbụ ụnwu ịnya-kamẹlu, shigba alị ndu Midiyanu yẹle kẹ ndu Ifa. Tẹme iphe, bụ ndu shi alị Sheba azarụ bya. Ẹphe eguderu ngu mkpọla-ododo yẹle ụ̀nwù-isẹnsu. Tẹme ẹphe ara iya arara g'e tua Chipfu ẹpha. 
Eghu mẹ atụru ndu Keda g'ọ ha bẹ aa-tụko chịtaru ngu. Mbụ-a; ebili ndu Nebayotu e-mechakwaa jeeru ngu ozi. L'a nata phẹ gude gweeru mu ngwẹja l'ọru-ngwẹja mu. Mu abya eworu ẹguru eze-ụlo mu mee g'ọ dụ ùbvù l'ẹnya. 
?Bụ ndu ole baa? ?Bụ ndu ole asọ raaraa g'urwukpu, asọ l'igwe phọ; mbụ ndu ono, eze gbiigbiigbi g'ẹka ndo-nwẹnu l'eze gbiigbiigbi ephe ala l'ẹpfune iya ono? 
Tororo bụ lẹ ndu bukube eze-ẹnyimu bụ mu bẹ ẹphe achọ abya. Ụgbo, vutagbaaru phẹ ụzo bụru ụgbo-mini ndu Tashishi. Ọ bụru ndu ẹphe achịlata bụ ụnwu ngu, shi ẹka dụ ẹnya; yẹle mkpọla-ọchaa mẹ mkpọla-ododo, ẹphe vugbaa alwa. Ono bụru ùbvù, aakwabẹ Chipfu, bụ Chileke ngu ono; mbụ onye ono, bụ Onye Nsọ kẹ ndu Ízurẹlu; kẹle o meru g'ị dụ akpabiri. 
Ọo ndu shi eshishi a-kpụkwa igbulọ ngu ono. Ọ bụru ndu eze phẹ a-nọdu ejeru ngu ozi. A makwarụ-a lẹ mu gude ẹhu-eghu chitsua ngu. Obenu lẹ mu e-mechaa gude n-yemobu phụaru ngu obu-imemini. 
Ọnu-abata gụbe mkpụkpu ono e-ghejeru ọnu mkpụrumkpuru. A ta abyadụ agụ-chije iya agụ-chi eswe l'ẹnyashi. Ọo ya bụ gẹ ndiphe anọdu achịbataru ngu ẹku ụnwu-eliphe. Ọ bụru ndu eze phẹ a-chịjeru phẹ abya; 
kẹle iphe, bụ ọha; ọzoo alị-eze, a-jịka l'ẹphe te ejeduru ngu ozi a-bụru mkpurupyata; ndu ono bẹ ee-mebyishikọta l'ophu. 
Iphe, alị úbvú úbvú Lébanọnu gude dụ akpabiri a-larụ ngu; mbụ oshi payịnu; mẹkpoo oshi fịru; mẹchakpoo oshi sayịpuresu, bụkota oshi, dụ iya nụ. G'ọ ha bẹ ee-gude mee g'ẹka dụru mu nsọ maa mma. Tẹme mu emekwaphọ g'ẹka mu azọje ọkpa bụru ẹka dụ akpabiri. 
Ụnwu ndu ono, eme ngu ewere ono e-mechaa bya l'iphu ngu bya ephozeru ngu. Iphe, bụkpoo ndu ono, agụbeduru ngu iphe ono e-mechaa bya lẹ mgboru ọkpa ngu bya ephozeru ngu. Ẹphe e-mechaa tụko kuahaa ngu Mkpụkpu kẹ Chipfu; Úbvú Zayọnu kẹ Onye Nsọ kẹ ndu Ízurẹlu. 
A makwarụ-a l'a jịkaru ngu bya akpọo ngu ashị; ọphu ọ dụdu onye aghajajẹ ngu nụ. Obenu lẹ mu e-mechaa mee ngu mkpụkpu, ọgbo l'ọgbo e-gude eku onwophẹ; gude iya ete ẹswa. Ọ bụru g'ọo-dụwaro bụ ono jasụ l'ojejoje. 
Ịi-ngu ẹra ọhamoha; mbụ l'ọo ẹra ndu eze bẹ ee-gude hee ngu. Noo teke ịi-maru l'ọo mbẹdua, bụ Chipfu bẹ bụ onye ndzọta ngu; bụru onye aagbafụta ngu nụ; bya abụru Ọkalibe kẹ Jiékọpu. 
Ọ bụru mkpọla-ododo bẹ mu a-nụ ngu l'ọzori onyirubvu. Mu anụ ngu mkpọla-ọchaa l'ọzori mgbụguru-ígwè. Onyirubvu bẹ mu a-nụkwanu ngu l'ọzori oshi-nkụ. Mu anụ ngu mkpụrukpu-ígwè l'ọzori mkpuma. Ọ bụru nchị-ọdu-doo bẹ l'a-nọdu atụ̀ru ngu iphe, ịi-nọdu eme. Apfụbekoto abụru iya a-nọdu edu ngu. 
A ta abyadụ anụmabaa l'iphe-kpangangaa l'eme l'alị ngu l'ophu. Ọphu aanụmabaedu k'ọla-l'iswi ọzoo mgbu-ọnwu l'alị ngu gbaa mgburugburu. Iphe, ịi-nọdu eku igbulọ ngu a-bụru: Ndzọta; l'i kua ọnu-abata mkpụkpu ngu “Ajaja”. 
“Ọ tọ bụeduru ẹnyanwu bẹ ii-gude aphụ ụzo l'eswe; ọphu ọnwa echiẹduru ngu phuuphuu l'ẹnyashi. Noo kẹle Chipfu a-bụru ìphóró dụru ngu nụ jasụ l'ojejoje. Mbụ l'ọo Chileke ngu ono a-bụru ọdu-biribiri nkengu. 
Ẹnyanwu ta arịbaedu arịba; ọphu ọnwa arịbaedu arịba. Ọ bụru Chipfu a-bụru ìphóró ojejoje nkengu. Ọ tọ dụedu mbọku, aphụ byaru atsọbaaru ngu. 
Noo teke ndibe ngu l'ophu a-bụkotaru ndu pfụberekoto. Ẹphe enweru alị ono jasụ l'ojejoje. Mbụ-a; ọ kwa ẹphebedua bụ irwu oshi ono, mu dzabẹru ono; mbụ ozi, mu gude ẹka mu jee; g'e gude hụma gẹ mu dụ-be akpabiri. 
Ndu ọphu kachaa alwa alị lẹ g'unu ha a-dụje ụnu labọ l'ụkporo iri; tẹme ndu kachaa nwanshịi lẹ g'unu ha abụru mkpụkpu, ike dụ. Ọ kwa mbẹdua bụ Chipfu. Iphemiphe-a bẹ mu e-mekwa ẹgwegwa mẹ o -rwuẹpho teke mu e-me iya.” 
