﻿Azáya.
53.
?Bụ onye kwetarụ ozi, anyi ziru? Tọo ?bụ onye bẹ e meru g'ọ maru g'ike Chipfu habe shii? 
Kẹle ọ nọ iya l'iphu vua g'oshi, rwuru irwu ọ̀phúú; mbụ g'ọgbarabvu-oshi, gbafụtaru iphe l'alị ọkponku. Ọ tọ madụ mma; ọphu ọ dụdu ùbvù l'ẹnya kẹ g'ọ gụ anyi ẹgu anọ-kube. Mbụ l'ọ tọ dụdu ụgbugba, dụ iya l'ẹhu, bụ iphe, aasụ l'ọo ya meru; ọ nọdu agụ ẹgu. 
Ndiphe nmarụ iya phulaphula bya ajịka iya. Ọ bụ nwoke, aphụ tsọru; bya abụru onye eje iphe-ẹhuka kwọwaru ẹhu; onye ndiphe abụjeru: ẹphe -hụma iya; ẹphe aghaa iphu l'ibiya ọzo. Mbụ l'a nmarụ iya phulaphula; ọphu ọ dụdu iphe, anyi gụberu iya. 
Tororo opfu bụ l'o jeru iphe-ẹhuka, anyi gege eje; bya evuta aphụ gege atsọru anyi. Anyi gbẹ dobesụ l'ọo Chileke echi iya iphe; l'ọo ya chitsuru iya; anụ iya aphụ. 
Obenu l'e mekarụ iya iphe; kẹle anyi mesweru. Mbụ l'e tsuru iya pyaapyaa; kẹle anyi meru ẹjo-iphe. Aphụ, a nụru iya mecharu mee; ẹhu bya adụ anyi guu. Tẹme ọ bụru ọ́nyá, e chibashịru iya bẹ e gude eme g'ẹhu dụ anyi ike. 
G'anyi hakọta kpaphuhuakwaru akpaphuhu g'atụru. G'anyi ha l'onye l'onye ghawarụ iphu eshi ụzo ọphu dụ iya ree. Ọle Chipfu woru ẹjo-iphe anyi l'ophu woru tụ-kobe iya l'ishi. 
“A kpapyarụ iya ishi bya emekpaa ya ẹhu; ọphu ọ saduru ọnu pfua opfu. A kpụtaru iya g'onye kpụ nwatụru eje aphụphu. Ọ nọduepho nggujingguji g'atụru, nọ l'iphu ndu ebushi iya ẹji. 
E meru iya mkpawere; bya ekpee ya mpfụ-gbu; kpụru iya je emegbua. A -bya l'ọgbo kẹ teke nkiya; ?bụkwanu onye kpakwanụru ishi? Kẹle e meru iya; ọ chịhu l'alị ndu dzụ ndzụ. Ọ bụru emeswe, ndibe mu mesweru bẹ e gude chia ya iphe. 
E doberu iya ilu l'ẹka eelije ndu ẹjo-iphe. Ọ nwụhu; e lia ya l'ilu oke amadụ; ọle o to wejeduru iwashị; ọphu ntuphu-ire adụjeduru iya l'ọnu.” 
“Obenu l'ọo Chipfu bẹ ọ bụ uche iya g'o gwee ya arakabya ono; mee ya g'o jee iphe-ẹhuka ono. Tẹme Chipfu bya eworu ndzụ iya mee iphe ngwẹja-apfụ-ụgwo. Ọo-mecha hụma ụnwu nwanwa iya; bya anọdu ndzụ ogologo. L'ọ bụru l'ẹka iya bẹ aa-gbẹ eme uche Chipfu emeshi iya ike. 
O -jechaa iphe-ẹhuka ono; l'ọ bya ahụma ìphóró kẹ ndzụ; ono abya eji iya ẹpho. Ọ bụru amaru ono, onye ono, pfụberekoto, ejeru mu ozi a-maru iya ono l'e-me gẹ ndu dụ igwerigwe bụru ndu aa-gụ lẹ ndu pfụberekoto Yẹbedua evutakwanụ ẹjo-ememe, ẹphe meru. 
Ọo ya bụ lẹ mu a-hẹ iya oke, a hẹru ndu oke amadụ. Ọ bụru ẹphe lẹ ndu dụ ike l'ọgu l'e-ke iphe, a kwatarụ l'ọkwata; noo kẹle ọ mịru ẹnya lẹ ndzụ iya nwụhu; tẹme a gụru iya yeru ndu ẹjo-iphe; kẹle o vutaru iphe-ẹji ndu dụ igwerigwe; tẹme ọ rwọchiru ndu ẹjo-ememe arwọrwo.” 
