﻿Azáya.
51.
“Unu ngabẹru mu nchị; unubẹ ndu eme g'unu bụru ndu pfụberekoto; mbụ unubẹ ndu achọ Chipfu. G'ẹnya unu dụkwa l'agbara-mkpuma ono, bụ ẹka a kụkpofutaru unu ono; mbụ lẹ wukirima ẹka ono, e bvutaru unu ono! 
Mbụ-a; g'ẹnya unu dụkwa lẹ Ébirihamu, bụ nna unu! Wafụa lẹ Sera; onye bụ iya tsụru ime unu! Teke mu kuru iya bụkwa onye lanụ bẹ o shi bụru. Mu bya ekebe iya l'ọma bya emee ya; ọ dụ igwerigwe. 
Chipfu te nwedu iphe, e-me g'ọ tọ dụ Zayọnu obu; bya egude obu-imemini lee ẹnya l'iswi, yiru iya nụ. Alị iya ono, shi bụwaru echiẹgu ono bẹ oo-me g'ọ dụ gẹ Édẹnu. Alị iya ono, dabyiru iphoro ono adụ gẹ mgbabu Chipfu onoya. Noo teke ẹhu a-wata iya atsọtso; l'ọowata ete ẹswa; l'o keleahaa ekele; gụahaa ebvu. 
Unu ngabẹkpodaaru mu phọ nchị; ndibe mu! Unu nụmakpodapho iphe, mu epfu; unubẹ ọha mu! Mu a-tụkwaru unu ekemu; mbụ l'ikpe, pfụru ọto ono, mu ekpeje ono a-bụkwaru ìphóró, dụru ọhamoha. 
Mu a-nafụta unu ẹgwegwa. Mbụ lẹ mu abyaakwaa unu adzọta. Ọ bụru ẹka mu bẹ mu e-gude kpee ọhamoha ikpe. Ndu bukube eze-ẹnyimu bụ mu bẹ ẹphe a-nọdu ele ẹnya l'ẹka. Tẹme ẹphe anọdu kwabẹ; ele ẹnya g'ẹphe maru iphe, mu e-me l'ẹka. 
Unu palinaa ẹnya unu lee l'imeli! Unu lenaa ẹnya l'eliphe-a! Igwe e-mechakwaa chịhu g'ẹnwuru-ọku. Eliphe-a l'ophu anwachaa anwacha g'uwe. Ndu bu iya nụ anwụshihu g'ijiji. Obenu lẹ ndzọta nkemu a-dụ ojejoje. Apfụbekoto nkemu taa dadụ adada. 
Unu nụmakpodapho iphe, mu epfu; unubẹ ndu maru iphe, pfụru nhamụnha; mbụ unubẹ ndu ekemu mu dụ l'ọkpoma! Unu ba atsụjekwa ebvu l'ọkonu, nemadzụ akọ unu; ọphu iphu, oophu unu eyejekwa unu ebvu; 
kẹle nsụ́ e-mecha sụkashia phẹ g'uwe. Ẹka-alị atakashịa phẹ g'ukpo. Obenu l'apfụbekoto nkemu a-nọ jasụ l'ojejoje. Ndzọta nkemu a-nọo shi l'ọgbo sweru ọgbo.” 
Tehunu etehu! Tehu etehu yenaa onwongu ọkpehu g'uwe; gụbe oshi-ẹka kẹ Chipfu! Tehunu etehu dụ g'i shi adụjehewaa teke k'azụ; mbụ l'ọgbo teke ndiche. ?Tọ bụnaa ngu-a bụ onye gbubushiru Réhabu mkpirikpu mkpirikpu; mbụ gụbe onye mekarụ ẹjo nwanụ-ẹgbudu ono iphe? 
?Tọ bụnaa ngu-a bụ onye ono, meru eze-ẹnyimu; ọ tahụ; mbụ mee; mini, nọ l'ogbu-ẹnyimu tahụ; i woru gbororo tọgbo l'ọma ọhulohu ẹnyimu k'ọphu ndu ono, a gbafụtaru ono wụghataru? 
Ọo ya bụ gẹ ndu ono, a gbatarụ ono alwa. Ẹphe agụru ebvu bahụ lẹ Zayọnu. Ẹhu-ụtso ojejoje abụru okpulishi, ẹphe e-kpuru. Ete ẹswa; yẹle ẹhu-ụtso asọpyabe phẹ asọpyabe. Agụ aphụ; yẹle atsụ ude e-gude ọso ghata. 
“Ọ kwa mbẹdua; mbụ mbẹdua gẹdegede bụ onye eyeru unu ọkpukpu-ike. ?Bụ ole bẹ bụ kẹ g'unu nọdu atsụ nemadzụ mmanụ ebvu; mbụ nwa ndiphe, bụ iphe yẹe ya gba nanụ bụ ẹswa; 
kẹ g'unu zọhaa Chipfu, bụ onye meru unu; bya abụru iya bụ onye tọsaru eligwe; ọ dabyiru; bya abụru iya tụru ọkpa mgboko l'ophu; kẹ gẹ ndzụ rwutajẹ unu tekenteke ẹgube ono; opfu l'onye eme unu ewere bẹ ẹhu eghu oke eghu; mbụ onye bụ iphe, o shiberu ite iya bụ g'o mebyia unu? Kẹle-a; ?dẹnu oke ẹhu-eghu onye ọbu, eme unu ewere ọbu? 
Ndu ono, a tụru mkpọro ono l'e-me ẹgwegwa k'ọphu ee-me g'ẹphe nweru onwophẹ; g'ẹphe ta nwụhu l'ọka; ọphu ẹgu nri eme phẹ. 
Kẹle ọ kwa mbẹdua bụ Chipfu; bya abụru Chileke unu; mụbe onye abụjeru: mu -kpakọbe mini l'eze-ẹnyimu; akpara-mini iya asụa ekiri. Chipfu, bụ Ọkalibe-Kakọta-Ike bụ ẹpha mu. 
Mu woakwaru opfu mu ye unu l'ọnu; bya egude ọbochi-ẹka mu kpuchia unu. Mbụ mụbe onye ono, bụ mu dobegbaaru igwe l'ọru iya; bya abụru mu tụru ọkpa mgboko l'ophu; tẹme ọ bụru mu sụru ndu Zayọnu-a: ‘Unu bụakwaa ndibe mu.’ ” 
Tehu etehu! Tehu etehu! Gbalihu agbalihu gụbe Jierúsalẹmu; mbụ gụbe onye ono, shiwaa l'ẹka Chipfu nata okoro k'oke ẹhu-eghu iya ngụa; mbụ gụbe onye pataru ipoti mẹe, emeje gẹ nemadzụ kpọo galagala ngụa; ngụa ụrwuku ụrwuku iya. 
L'ime ikpoto ụnwu ono, ọ nwụshiru ono ta adụdu g'ọ ka mma l'ọo onye lanụ letaru iya ẹnya. L'ikpoto ụnwu ono, o metaru ono bẹ ọ tọ dụdu mẹ nanụ setarụ iya l'ẹka. 
Mkpamẹhu-a uzi labọ-a dapfutawaru ngu; lẹ babụ l'ọ dụru onye dụa ngu obu. Ọla-l'iswi yẹle mgbu-ọnwu; ọkpa-nri yẹle ogu-echi; mbụ-a; ?bụ onye a-sụje ngu gberuma? 
Ụnwu ngu kurwuwaru ẹnya. Ẹphe dabyigbaaru l'ishi gbororo gẹ mgbada, kolahụru l'ụgbu. Iphe, zụru phẹ gburumu pfụurii bụ oke ẹhu-eghu kẹ Chipfu; yẹle aba mba kẹ Chileke ngu. 
Ọo ya bụ lẹ-a; nụmakpodapho iphe-a; gụbe onye ono, eemekpa ẹhu; mbụ onye e meru; ọ nọdu akpọ garịgari l'ẹbe ọ ngu mẹe; 
Wakwa iphe, Nnajịuphu, bụ Chipfu epfu baa; mbụ Chileke ngu; onye ono, agbajẹru ndibe iya ọdzori ono. Ọ sụru: “Tii ledu; mu nafụakwaru ngu okoro ono l'ẹka bụ ọphu meru; ị nọdu akpọ garịgari. Oke ẹhu-eghu mu ono, dụ l'ipoti ono bẹ ị tịi ngụedu. 
Mu e-woru iya pẹe ndu ono, anụ ngu aphụ ono, bụ ndu ono, sụru ngu-a: ‘Dabyiru kpube iphu l'alị; g'anyi bya eswee ngu godogodogodo!’ I woru okpurukpu ngu mee alị; mbụ mee ya; ọ dụ gẹ gbororo, nemadzụ eshi.” 
