﻿Azáya.
41.
Unubẹ ndu bukube eze-ẹnyimu; unu nọdukwa nggujingguji l'iphu mu! G'ike kabakwaa adụ ọhamoha! G'ẹphe kpịritakwaru bya eyee ọnu! G'anyi je edzuda l'ụlo-ikpe! 
“Sụ-a; ?bụ onye jeru je akpalia onye pfụberekoto l'ụzo ẹnyanwu-awawa; mbụ onye abụjeru; ọ -halia ọkpa l'ọ lwụa lwụta. Mbụ lẹ Chipfu ewojeru ọhamoha ye iya l'ẹka; bya akwatsushiaru iya ndu eze. Ọ nọdu egudeje ogu-echi gwee phẹ arakabya; gbaa phẹ apfụ jasụ ẹphe phekashịhu g'ẹswa ereshi. 
Ọochije phẹ ọso; ejerọ l'iphu l'iphu. Ọ tọ dụdu iphe, eme iya nụ. Mbụ eshichaa ụzo, ọkpa iya teke eshiswee lẹ mbụ. 
?Bụ onye meru iphemiphe ono; mee ya meghaa; mbụ shiẹpho lẹ mbụ ebu ọgbo l'onwiya? Ọ kwa mbẹdua, bụ Chipfu; onye nọ swiru ndu kẹ mbụ; tẹme mu jekwa anọdu swiru ndu k'ikpazụ; ọo mu bụ onye ọbu!” 
Ndu bukube eze-ẹnyimu hụma iya; ndzụ gụhu phẹ. Ndu bu l'ẹka eliphe jeberu nọdu anma pyaapyaapyaa eje akpịritaru. 
Onyenọnu nọdu eyeru nwibe iya ẹka. Ẹphe nọdu asụje nwibe phẹ-a: “Shihukpọekwapho ike!” 
Ndu maru eme ọna nọdu adụkpoepho ndu ụzu mkpọla-ododo obu. Onye ọphu egudeje ọngu akwọ iphe tẹretere nọdu agba onye ọphu edzepfuje iya edzepfu unme. Ọ -nọdu l'ọ sụ onye ọphu agbajẹ iya ọku gude dzepfua ya: “Ọ dụkwaa ree!” L'ọ bya akụa ntẹkpe ono ngga g'o to rikashịhu. 
A -byakwanụ lẹ gụbe Ízurẹlu, bụ onye-ozi mu; mbụ gụbe Jiékọpu; onye mu gude ẹka mu họta; mbụ gụbe oshilọkpa Ébirihamu, bụ onye mu l'iya eshi ọ̀nyà; 
mu jekpọeruro l'ẹka igwe beru alị beru je eduta ngu. Mbụ l'ọo ẹka ọ kachaa omilomi bẹ mu jeru je ekua ngu. Mu sụ ngu: Ị bụakwaa onye-ozi mu. Mu họtaakwaru ngu; ọphu mu ajịkaekwa ngu. 
Ọo ya bụ; ba atsụkwa ebvu; kẹle mu nọkwa swiru ngu. Gẹ meji ba tọfukwa ngu; kẹle ọ kwa mu bụ Chileke ngu. Mu e-me g'ike dụ ngu; mu e-yeru ngu ẹka. Mu e-gude ẹkutara mu ono, bụ ẹka mu egudeje mee iphe, pfụru ọto ono gudeshia ngu. 
Iphe, bụkpoo ndu aba hanyịhanyi ekpu ngu bẹ ọ tọ dụdu iphe, e-me g'e te meru iphe-iphere kpua phẹ. Ndu etso ngu opfu bẹ ee-me; ẹphe alaa l'iyi bụru mkpurupyata. 
Mbụ l'ịi-chịka ẹnya ndu ọhogu ngu; ị tịi hụmadu phẹ. Ndu etso ngu ọgu a-dụepho g'iphe-iphoro. 
Noo kẹle ọo mbẹdua bụ Chipfu; bya abụru Chileke ngu; onye sekpu ngu l'ẹkutara ngu; bya asụ ngu g'ị ba tsụshi ebvu; lẹ mu e-yeru ngu-a ẹka. 
“Ba atsụkwa ebvu; gụbe nworishi ono, bụ Jiékọpu; mbụ gụbe nwata-une, bụ Ízurẹlu; kẹle ọo mbẹdua l'onwomu e-yeru ngu ẹka.” Noo iphe, Chipfu epfu; mbụ onye ono, gbafụtaru ngu nụ ono; bya abụru Onye nsọ kẹ ndu Ízurẹlu. 
Lenu; mu e-mekwa ngu g'ị bụru iphe, e gude echi ereshi; mbụ iphe, bụ k'ọ̀phúú; bya atsụ nkọ; bya enweru ézé. Ii-chi úbvú úbvú gbiigbii tsutọo ya etsutọ; mbụ mee ya l'ọ dụ swakịri-swakịri g'ẹswa ereshi. 
L'ị phụshia phẹ; phẹrephere apakaa ya. Mbụ oke-phẹrephere atụkaa ya nanụnanu. Obenu lẹ gụbedua e-gude Chipfu ete ẹswa. Mbụ l'ọ Onye nsọ kẹ ndu Ízurẹlu ono bẹ ii-gude eku onwongu. 
“Ndu ụkpa mẹ ndu adụdu g'ọ dụ phẹ achọ mini angụngu. Ọphu ọ dụdu ọphu ẹphe hụmaru. Ire nọdu atụ phẹ hẹehee l'ẹka mini agụ phẹ. Ọle ọ bụ-a mbẹdua, bụ Chipfu a-za phẹ ẹnu. Mbụ lẹ mbẹdua, bụ Chileke ndu Ízurẹlu taa hadụ phẹ. 
Mu e-me gẹ mini wata asọshi gẹ nggele l'ephekerephe ẹka dụ jakpọro jakpọro jakpọro. Ọgba eshi lẹ nsụda nsụda gbafushihu. Mu emee g'echiẹgu bụru okpuru okpuru. Alị, dụ jakpọro-jakpọro abụru ẹka mini e-shi asọshihu. 
Iphe, mu e-ye l'echiẹgu bụ oshi sida; yẹe oshi akesha; mẹkpoo oshi mịturu; yẹe oshi olivu. Mbụ l'oshi payịnu; yẹe oshi fịru; yẹe oshi sipuresu bẹ mu a-tụko dzakọta lẹ chakịri chakịri chakịri alị; 
k'ọphu ndu nemadzụ a-hụma; tẹme ẹphe amakwarụpho. Ẹphe e-gbukwaa ya phọ igo; l'oodoo phẹ ẹnya l'ọo Chipfu gude ẹka iya mee iphe ono; l'ọo Onye nsọ kẹ ndu Ízurẹlu bẹ meru iphemiphe ono dobe.” 
Chipfu sụkwaru-a: “Unu byanụ edoo edo k'unu.” Mbụ l'eze ndibe Jiékọpu ono sụru-a: Unu byanụ epfua g'ọonwuru unu. 
Unu jenụ eduta agwa unu g'ọ bya epfuaru anyi iphe, e-me nụ. Ẹphe epfukwarụpho anyi ọphu mehawaru nụ; k'ọphu anyi e-gbu iya igo maru iphe, o mechaarụ nwụfuta. Ọdumeka; unu pfunaaru anyi iphe, e-mechaa mee nụ. 
Unu pfuaru anyi iphe, e-me l'iphu k'ọphu anyi a-maru l'unu bụ agwa, ere ire. Unu menaa ọhumalenya. Unu menaa iphe, dụ ree; ọzo ọphu dụ ẹji; k'ọphu anyi a-nmahụkwanu pyaapyaapyaa; ndzụ agụaha anyi. 
Obenu l'iphe-iphoro ka unu mma. Tẹme ọphu iphe, unu eme adụkpoda iphe, ọ bụkpoo ililekpọo. Onye họtaru unu bụkwa ẹbyi bẹ o meru. 
“Mu jeakwaru akpalia onye shi l'ụzo isheli; ọ nọdu abyawaa. Ọo-nọdu l'ụzo ẹnyanwu-awawa bya akpọ-kua ẹpha mu. Onye ono a-zọ ndu-ishi pyakapyaka g'onye atsụ nri l'ikwe; mbụ g'ẹka onye akpụ ite atsụ ụrwa, o gude akpụ iphe. 
?Bụnaa onye pfuru iphe-a eshikpọo lẹ mbụ; k'ọphu anyi a-maru iya? ?Bụ onye nmahawaru iya g'ọkwa k'ọphu anyi a-sụ: ‘O pfukwaru ire-lanụ?’ Ọ tọ dụdu onye pfujeru iya nụ. Ọphu ọ dụdu onye nmajẹru iya l'ọkwa. Ọphu ọ dụdu onye nụmajeru olu unu. 
Ọ bụru mbẹdua vuru ụzo pfuaru Zayọnu sụ iya: ‘Lenu; wakwa phẹ baa!’ Mbụ; ọ bụru mu yeru onye jeru ezia Jierúsalẹmu ozi-ọma ono. 
Mu leru ẹnya; ọphu ọ dụdu g'ọ ka mma l'ọo onye lanụ; mbụ g'ọ ka mma l'ọo onye lanụ, mu hụmaru l'echilabọ phẹ, adụ ike akpọ-ziru mu ụzo. Ọphu ọ dụkwapho onye azajẹ ẹnu mẹ mu jịa ya ajị. 
Lewarọ; ẹphe tụkoru bụkotaru iphe-mmanụ! Iphe, ẹphe eme bụkwarupho iphe-mmanụ. Mbụ l'agwa phẹ ono bụkota phẹrephere yẹe iphe-iphoro.” 
