﻿Ẹtu.
28.
Onye ẹjo-iphe anọduje agba ọso l'ẹbe adụ onye achị iya nụ. Obenu l'onye pfụberekoto eshihuje obu ike g'oduma. 
Teke ndu bu lẹ mkpụkpu dụ njọ bẹ ndu abụjeru ishi phẹ adụje igwerigwe. Obenu l'onye maru iphe; mbụ onye iphe edoje ẹnya -bụru ishi; l'ọonoo ọdu. 
Onye akpa nri, anọduje eme ndu ụkpa ewere dụkwa g'ọchioku mini, tụkoru iphe, a kụru l'opfu kpota. 
Ndu jịkaru eme iphe, a tụru l'ekemu anọduje aja ndu ẹjo-iphe ajaja. Obenu lẹ ndu eme iphe, a tụru l'ekemu bụ ọgu bẹ ẹphe etso ndu ẹjo-iphe. 
Ndu ẹjo-iphe bẹ iphe, pfụru nhamụnha te edojedu ẹnya. Obenu lẹ ndu achọ g'ẹphe maru Chipfu bẹ oodoje ẹnya doghee ya edoghe. 
Onye ụkpa, te emetajẹdu iphe ụta kakwa ree eme l'onye nweru iphe; ọphu o mejekwanụ iphe, pfụru ọto. 
Nwa, emeje iphe, a tụru l'ekemu bụkwa nwa, maru iphe; obenu l'onye yẹe ndu ẹkpiri aswị ọswi emetajẹ iphe-iphere kpube nna iya l'ishi. 
Onye gude ụgwo-ọnwurunwa akpa ẹku bụkwa onye aphụru ndu ụkpa obu-imemini bẹ ọokpa ẹku ọbu edoberu. 
Onye jịkaru lẹ ya ta angabẹdu nchị l'ekemu bẹ mbụkponu epfupfu, oopfu anụ Chileke adụjechaa g'ọ bụ ẹbyi bẹ oome. 
Onye dutaru onye obu iya gụru ìphóró je eshiaha ẹjo ụzo bụkwa l'ọ́nyà ono, ọ gbabẹru l'onwiya ono bẹ ọo-daba. Obenu l'onye ete emedu iphe, aata iya ụta bẹ e-keta okiphe, dụ ree. 
Onye nweru iphe; edobesụje lẹ ya maru iphe. Obenu l'onye bụ onye ụkpa; iphe nọdu edoje iya ẹnya enyovuje iya ime. 
Ọobujeru; onye pfụberekoto -nọdu atụ okoo; ẹhu atsọ-dzuru onyomonye ụtso. Teke onye ẹjo-iphe nyibaru l'ọkwa; ụnwu-eliphe achọaha ẹka ẹphe e-domi onwophẹ. 
Onye edomi iphe-ẹji, o meru edomi bẹ ta awafụjekwa awafụ. Obenu l'onye pfufutaru iphe, o meru; ọphu o mebaẹduru iya ọzo bẹ aaphụjeru obu-imemini. 
Ẹhu-ụtso bẹ a gọru nụ onye atsụje Chipfu ebvu. Obenu l'onye ọkpoma kpọru gbengu adabajẹ l'eje iphe-ẹhuka. 
Onye ẹjo-iphe -bụru eze ndu bụ ndu ụkpa; bẹ ọ dụkwa g'ẹka oduma asụ ekiri; ọzoo g'ẹka agụ abya ẹnari. 
Onye eze, dụru ndibe iya ẹhuka te nwekwa egomunggo. Obenu l'onye, ọ dụ ashị; mbụ ẹku, aakpa l'ụgho bẹ a-nọ ndzụ ogologo. 
Onye gburu ọchi; ọchi ono gude iya bẹ aghapheẹpho bọtorii jasụ l'ọ nwụhu. Ọphu ọ dụkwa onye a-gbaru iya mkpu. 
Onye ụta adụdu lẹ ndzụ iya bẹ ta adụkwa iphe, byaru eme iya nụ. Obenu l'onye ụzo iya gberu nggọ akpọ-kwofuje akpọ-kwofu daa. 
Onye kọru alị iya bẹ nri adụjeru. Obenu l'onye etso iphe-mmanụ bẹ a-kpashị nri ike. 
Onye e gude ire iya ẹka bẹ ọnu-ọma iya a-dụ igwerigwe. Obenu l'onye enweru iphe agụnuka ẹgu bẹ ọ tọ dụkwa iphe, e-me g'a ta nụ iya chịipfuu. 
Abọ nemadzụ ẹbo ta adụkwa ree. Ọle nemadzụ emeswejelẹ-a iphe l'opfu nri. 
Onye ọkpoma mgbashị bẹ enweru iphe anọduje agụ ẹgu. Ọphu ọomajedu l'ọ-kpa-nri apfụ echeru iya. 
Onye abarụ nemadzụ mba bẹ ee-mechaa ka emeru iphe-ọma eme l'onye gude ire iya enwu opfu enwunwu. 
Onye ana nna iya ọzoo ne iya nfụ bya asụ l'ọ tọ dụduro ẹji; bẹ yẹe nwa mmebyi bụkwa iphe lanụ. 
Onye ụghoro akpalije esemopfu. Obenu l'onye kpọru obu yeru Chipfu bẹ ọo-ka adụru lẹ ree. 
Onye kpọru obu ye l'ọriri onwiya bụ onye mmanụ. Obenu l'onye gude egomunggo eme iphe ta adụdu iphe, byaru eme iya nụ. 
Onye anụje onye akpa nri iphe bẹ ta adụkwa iphe, bya adụru iya ụko. Obenu l'onye ewofuje ẹnya g'ọ tọ hụma ndu ụkpa bẹ aatụje ọnu, dụ igwerigwe. 
Onye ẹjo-iphe -nyiba l'ọkwa; ndiphe achọo ụzo domishia onwophẹ. Teke ndu ẹjo-iphe lakwanụru l'iswi; ndu pfụberekoto aka shii eje. 
