﻿Ẹtu.
27.
E kukwa onwongu kẹ l'ọwa-a iphe, ii-me echele; kẹle ị tị madụ iphe, mbọku e-wota. 
Haa g'onye ọzo jaa ngu ajaja. B'egudeshi ọnu ngu jaa onwongu. Haarụ iya onye ọzo; g'ọ tọ bụshi gụbedua l'onwongu. 
Mkpuma anyịkwa ẹrwa; tẹme ẹja bụru oke-ivu. Obenu l'onye-eswe -kpatsu ngu iwe bẹ ọ kakọta iphe labọ ono anyị ẹrwa. 
Ẹhu-eghu te enwedu obu-imemini; ọvuma nọdu abya ẹnari. Obenu ?bụ onye adụ ike apfụru l'iphu ijiẹnya? 
Mba, a barụ nemadzụ lẹ sagaa kakwa ree eme l'eye obu, e yeru lẹ mpya. 
Onye gụ l'iya dụ l'opfu -nmaa ngu akpa bụkwa akpa ẹregede bẹ ọ nmarụ ngu. Obenu l'ọ́nyá, onye gụ l'iya eshi ọ̀nyà gburu ngu bẹ ntụcha adụdu. 
Onye ẹpho jiru bẹ manụ-ẹnwu adụjechakwaa ẹji. Obenu l'onye ẹgu agụ bẹ iphe, atsọ ilu atụkoje atsọcha rẹngurengu. 
Onye gbẹshiru l'ibe iya tụgbua bya akpaphuhu dụkwa g'ẹnu, shi l'ẹpfune iya phelihu phefu bya ephuaha ụzo ẹpfune iya ọbu. 
Manụ eshi mkpọ yẹe manụ isẹnsu, emeje g'obu nọdu atsọ ụtso. Nokwaphọ g'akpọ-zi ụzo, shi l'ẹka ọ̀nyà nemadzụ emeje; ẹhu akpọ-vohu iya. 
B'ahakwa onye gụ l'iya eshi ọ̀nyà; yẹe onye yẹe nna ngu eshi ọ̀nyà. Ọphu i gbakwarụ jeshia ibe nwune ngu nwoke mẹ ẹjo iphe-ẹhuka dapfuta ngu. L'obutobu ngu, nọ ngu ntse kakwa ree eme lẹ nwune ngu, bu ngu ụzenya. 
Manụru iphe; nwa mu; menaa g'obu kpọ-vohu mu; k'ọphu mu e-yeje ọnu yeru onye anma mu phulaphula. 
Onye nweru egomunggo ahụmaje iphe, bụ ẹjo-ememe domia onwiya. Obenu l'onye amazidu iphe anọdujeepho eje dukuu dukuu g'ooje je ejee iphe-ẹhuka, nọ iya nụ. 
Nemadzụ -sụ l'ọo onye ọ madụ bẹ ya a-nọduru l'itumo; natakwa iya uwe iya. Gudeshikwaa ya mẹ ọ -bụru onye ọhozo bẹ ọ nọru l'itumo ọbu. 
Amadụ -gbẹshi lẹ nchi-abọhu ara gbagbagba; l'ẹka ọogo ọnu-ọma anụ obutobu iya bẹ ọo-dụkwa g'ọ bụ ìphù bẹ oophu iya. 
Nwanyị, anọduje abapheru ji iya mba; dụkwa gẹ mini-odzeru, atụ paapaa. 
Egbogbo iya dụkwapho g'onye egbo phẹrephere g'o to zihẹ. Ọzoo g'onye gude ẹka egbobuta manụ, alwa torotoro. 
Ọo g'ikpegiri abajẹ ígwè-a bụ g'amadụ abajẹru ọkwenya nụ ibe iya. 
Ọo onye dzarụ oshi figu erije akpụru, ọ mịtaru. Ọ bụru onye eleta nnajịuphu iya ẹnya bẹ ọokwabeje ùbvù. 
Ọo g'amadụ eleje ẹnya lẹ mini hụma onwiya iphu bụ g'ọkpoma amadụ egoshije ụgbugba iya. 
Ẹpho te ejikwa alị-maa; ọphu ẹpho ejidu alị ọla-l'iswi. Nokwaphọ g'ẹpho te ejijedu ẹnya l'iphe, ọohumaje. 
Ite bẹ e gude eghe mkpọla-ọchaa egheghe. E gude ọku ahụ mkpọla-ododo ama. Obenu l'amadụ bụ ajaja, aaja iya bẹ e gude ahụ iya ama. 
Ọ tọ dụkwa m'obeta ị tsụa onye-eswe l'ikwe; mbụ gude ọ́dzú gwee ya g'onye egwe ereshi; i tii mekwa g'ọ haa eme-eswe. 
Makwarụ l'ị maru g'ẹku ngu gbaru ọkpobe amaru. Obu ngu adụkwapho l'ẹka ọka-eswi ngu dụ. 
Kẹle iphe-enweru ta anọjedu ojejoje. Ọphu okpu-eze anọjedu shi l'ọgbo sweru ọgbo l'ishi onye lanụ. 
E -kpofu akahụ ẹswa, e shi gbutaru ẹku ngu; ọ bya erwua irwu ọ̀phúú; a bya eje l'eli úbvú je egbua ẹswa ọ̀phúú; 
ụnwu-atụru ngu anụaha ngu uwe eye l'ẹhu; iireaha eghu ngu gude ereta iphe, ii-gude zụa alị. 
Ii-nweru ẹra-eghu dụ shii, ii-gude azụ onwongu gụ lẹ ndibe ngu; gude iya azụ̀ nwamgbọko, gụ l'iya bu ebubu. 
