﻿Ẹtu.
18.
Onye akpa nkịnyi iya bụepho iphe, ọonoduje achọ bụ iphe, a-dụru iya lẹ ree. Tẹme ọkpobe mmamiphe nọdu eghuje iya eghu. 
Ọmata bẹ nkwamẹnya ta adụjedu ree. Iphe, atsọje iya ụtso bụ g'o pfu iphe, ee-me nụ. 
Ẹjo-iphe -bya bẹ ntụpya anọduje etso iya. Teke iphe-iphere byaru; ekwe une etsokwaru iya phọ. 
Opfu, shi nemadzụ l'ọnu abụjeru echi ogbu-mini. Obenu l'ishi ẹka mmamiphe futaru bẹ bụ nggele, asọ gborogboro. 
Ọ tọ dụkwa ree; mbụ eme eyeru onye ẹjo-iphe. Ọphu ọ dụkwapho ree; mbụ anma onye adụdu iphe, o meru ikpe. 
Iphe, ọmata pfutaru l'ọnu bẹ yẹe ya emeje. Tẹme ọ bụru ọnu iya ọbu bẹ oogudeje eku ẹchachi oku. 
Ọo ọnu ọmata emebyije iya. Tẹme ogbogboromọnu iya bụru ọ́nyà, e gude anmata ndzụ iya. 
Asụlasu anọduje atsọ ntụmatu. Ọotukoje iphe, bụ ẹhu vọo pfurupfuru. 
Onye tụ-gberu ẹka l'ozi, ooje bẹ yẹe onye emebyishi iphe emebyishi bụkwa nwune. 
Ẹpha Chipfu bụkwa ụlo-eli ephekerephe, shihuru dụngudungu. Ndu pfụberekoto nọdu agbabajẹ iya je anọdu; ọ tọ dụedu iphe-ọnuka, emekwadu phẹ nụ. 
Ụba onye nweru iphe bụ mkpụkpu, ọ kpụru kpụshia ya ike. Ọo ya bụ igbulọ-ephekerephe, ẹphe doberu g'o gbobeje g'ọ tọ dụ iphe, e-me phẹ nụ. 
Amadụ bụ eku-onwonye l'ime ọkpoma bẹ ọokpajeru vuru ụzo mẹ ọ -bya l'ala l'iswi. Ewoze onwonye alị bụkwanuru akwabẹ ùbvù bẹ oosetajẹ. 
Onye teke anụmadu iphe, eepfu; o vuwaru ụzo tsẹe ya ọnu bẹ ọ bụ eme eswe bya abụkwaru iya phọ eme iphe-iphere. 
Ọ kwa obu nemadzụ esedeje ndzụ iya mẹ iphe nọdu eme iya. Obenu l'obu korofụwa; a taa nyaẹdu iya. 
Onye iphe edoje ẹnya ree bẹ bụ iya akajẹ amaru iphe tekenteke. Tẹme onye mmamiphe nọdu angabẹje nchị g'ọ nụma iphe, e-me g'ọ kabaa amaru iphe. 
Eme iphe-ọma asụjeru onye eme iya nụ ụzo. Ọ nọdu emeje iya g'o jerwua iphu onye parụ ẹka. 
Onye lanụ -vuru ụzo doo edoo l'ọ dụ g'iswi dụ iya mma jasụru onye k'ẹbo abya eyeahaa ọnu. 
Iphe, eese opfu bụ: a -tụaru iya ido; opfu alaa; l'eegude nno gboo ndu eseshi opfu ike. 
Arwọ-buta nwune ngu, i mesweru kakwa ẹhuka eme l'alwụ ọgu lwụta mkpụkpu, kpọru akpaa. Tẹme opfu, gụ lẹ nwune ngu ese dụkwa g'e gude ígwè kpaa ọguzo yechia ọnu-ụlo, a kpụshiru ike. 
Nemadzụ egudeje opfu-ọnu pfutaru onwiya iphe, e-ji iya ẹpho. Ọ bụru iphe, shi iya l'ogbogboromọnu bẹ oogudeje kpajia opfuru. 
Ire tụkokwaru ike kẹ ndzụ yẹe k'ọnwu chịru. Ọ bụru ndu yeru iya obu e-ri mebyi, ọ mịtaru. 
Onye achọ nwanyị, ọo-lụ achọkwa iphe, dụ ree. Onye ono abụjekwaru onye dụ Chipfu l'obu. 
Onye akpa nri anọduje arwọ g'a phụaru iya obu-imemini. Obenu l'onye nweru iphe anọduje aba mba. 
Onye eshi igwerigwe ọ̀nyà e-mechakwaa laa l'iswi. Obenu l'o nweru ẹguru ọ̀nyà, akajẹ ngu anọ ntse eme lẹ nwune ngu. 
