﻿Ẹtu.
6.
Nwa mu; ọ -bụru l'ị narụ nemadzụ ibe ngu mkpalẹka; ọ -bụru l'i woru onwongu sụberu onye ọzo l'itumo; 
ọ -bụru l'opfu ono bụwaa ọ́nyà nmaa ngu; mbụ l'opfu, shi ngu l'ọnu bụwaa igbudu tụ ngu; 
wakwa iphe, ii-me baa; nwa mu; g'i nweru onwongu; eshinu ị dabawaru l'ẹka obutobu ngu. Je ewoze onwongu alị; rwọkpoepho obutobu ngu jasụ l'ị rwọ-buta iya. 
B'ekwekwa gẹ mgbẹnya zinwuta ngu ẹnya! Ọphu i kwekpọkwanu g'o shita ẹka ị nọ eshita ophu! 
Kukebe ẹhu dzọo onwongu gẹ mgbada adzọje onwiya l'ẹka ndu achị nta; mbụ g'ẹnu, ephe l'eli, a nmataru l'ọ́nyà; e mechaa ọ nahụ. 
Jekubenụ ụnwehu; gụbe onye ẹnyiru! Gbua igo l'iphe, oome gude maru iphe! 
Lenu l'ụnwehu te nwedu onye-ishi; ọphu ẹphe enwedu onye edu phẹ nụ; ọzoo onye agbapheje ozi, ẹphe eje; 
ọle ọo bụjeru; o -rwua l'ọnanwu; l'ookukebe ẹhu seta nri; mbụ lẹ ndiphe -nọdu ebu ereshi; yẹbedua apakọ nkiya. 
?Bụ teke ole bẹ ịi-zẹkpo ẹgube ono zẹ-beru; gụbe onye ẹnyiru? ?Bụ teke ole bẹ ii-tehu lẹ mgbẹnya ọphu iiku? 
Ịisuje l'ọ kwa-a g'i kuta mgbẹnya nwanshịi; mbụ g'i dobe ishi l'oshi ilile; mbụ l'ọ kwa-a g'i jiru ẹka ye l'iphu ụtapfu tụta unme nwanshịi; tẹme l'ị gbẹshi je aharu ẹhu ngu zọo ọkpa. 
Ọle g'ị makwarụ l'ọkpa-nri a-fụkwaru ngu g'onye ndu abalidebvu byaru ibe iya; mbụ l'ụko-iphe akwatakwa ngwọgu byapfuta ngu. 
Unu ngabẹ nchị gẹ mu pfuaru unu kẹ mkpọkoro nemadzụ; mbụ onye ẹjo-iphe; onye bụepho opfu, gberu nggọ bẹ oogudeje tsoru aghaphe; 
onye anọduje ataburu nwibe iya ẹnya; tẹme ọ nọdu egudeje ọkpa eme iphe-ọhubama; bya ajajẹru nwibe iya ẹka. 
Onye egudeje ẹregede, dụ iya l'obu chịa ìdzù eme ẹjo-iphe; tẹme ọ nọdu anọduje akpa opfu. 
Noo g'o gude eze-iphe-ẹhuka je atụ iya l'ụpfu. A -bya ajị ẹnya birimu bẹ ee-mebyiwa iya k'ọphu e tee mekọtabaedu iya. 
Ọ dụru iphe ishii, dụ Chipfu ashị; mbụ ụzo iphe ẹsaa, bụ ẹbyi l'iphu iya. 
Iphe ono bụ: eku-onwonye; adzụ ụka egbu ndu adụdu iphe, ẹphe meru; 
arị k'eme ẹjo-iphe; ekwo gburumu gbaba l'eme ẹjo ememe; 
agba ekebe ẹregede; mbụ onye opfu, eshije iya l'ọnu abụkotajeru ụka; waa akpa opfu l'unuphu. 
Nwa mu; mejekwa iphe, nna ngu sụru g'i mee; ọphu ị zọhakwa eme iphe, ne ngu ziru ngu. 
Kee ya kpụkpurukpu l'obu ngu g'ọ nọo ojejoje! L'i wokwaru iya phọ tụkpoo onwongu l'olu! 
Noo kẹle ị -nọdu eje ije; bụ iya a-nọdu edu ngu. Ị -nọdu eku mgbẹnya; bụ iya a-nọdu eche ngu nche. Ọ -bụru l'i tehuru nwụru ẹnya; l'oopfu eyeru ngu. 
Kẹle iphe, a sụru g'i meje ono bụ orọku; tẹme iphe ono, e ziru ngu ono bụru ìphóró; tẹme mba, a barụ ngu gude gbọoru ngu ụja bụru ụzo ndzụ. 
Ọo ya e-phufuje ngu l'ẹka ẹjo nwanyị ono nọ; bya abụru iya e-selajẹ ngu azụ l'ẹka ọ nọ mbụ nwanyị-ụkpara, opfu iya anọduje akwọ tẹretere. 
Gẹ mma, nwanyị ụkpara ama te emekwa g'ọ wata ngu agụgu l'ime obu ngu! Ọphu i kwekwa g'o gude ẹnya deritaru ngu! 
Kẹle nwanyị-ụkpara bẹ bụkwa g'ị bụru onye mmanụ bẹ oomeje. Mbụ-a; nwanyị, eri ogori bụkwa ishi ndzụ ngu bẹ ọonoduje achị nta iya. 
?O dụru onye a-gụta ọku kpọbe onwiya l'ụtapfu; g'ọku te eke uwe iya? 
Mbụ-a; ?ọ dụru onye e-je ije l'eli ovokọku; g'ọku ta ahụ iya l'ọkpa? 
Nokwa g'onye yẹe nyee nwibe iya akwa dụ bụ ono. Onye denyiru nyee nwibe iya ẹka bẹ a taa hakwa kẹ mmanụ! 
Ndiphe te epfubyishijekwa onye ẹgu eme; m'ọ tụgbua je ezita nri, oo-ri. 
Ọle ọ -bụru l'e guderu iya bẹ ọ tọo kpọshijekwa g'ọ tọ pfụ ụgwo iphe ono, o zitaru ono mgbo ẹsaa; m'obetakpọru o je l'atụko iphe, dụ l'ụlo iya reshigbua gude pfụa ya. 
Obenu l'onye jepfuru nyee nwibe iya bẹ egomunggo swehuru; kẹle onye eme nno bụ onwiya bẹ oomebyishi. 
Urwu, ooritajẹ iya bụ ẹka-nchị yẹe iphe-iphere, eemeje iya; tẹme ujikputeru, o meru onwiya bụru iphe, e te hufubaẹdu ehufu. 
Kẹle ọo okophoo-nwanyị akpatsuje nwoke ẹhu-eghu; ọphu ọophujedu obu-imemini; m'ọ bya emelata onye jepfuru nyee ya. 
Ọphu ọ dụdu iphe, e gude arwọ iya dụru ọphu ọ bya anata; tẹme ọphu ọ dụdu m'obeta ị nụ iya gụnu g'o nworu kẹ mmanụ, ọ bya iya ebyi ẹka. 
