﻿Ẹtu.
2.
Nwa mu; i -kwe nata opfu mu; bya eworu iphe, mu sụru g'e meje doo l'ime obu ngu; 
mbụ ị -nọdu angabẹjeru mmamiphe nchị; bya eworu obu ngu ziberu nkwamẹnya; 
ọ -bụru l'i kuru amaru iphe, dụ omilomi; bya echiku nkwamẹnya lẹ mkpu; 
mbụ-a; teke ọogu ngu ẹgu g'onye mkpọla-ọchaa agụ; tẹme ị nọdu achọ iya g'onye achọ ẹku, e domiru edomi; 
ọo ya bụ; atsụ Chipfu ebvu edoo ngu ẹnya; tẹme l'ị makwarụpho Chileke. 
Kẹle ọo Chipfu bụ onye emeje g'a maru iphe; mbụ l'ọo l'ọnu iya bẹ mmamiphe yẹe nkwamẹnya eshije. 
Ọkpobe mmamiphe bẹ ọ kwachiru akwachi doberu ndu obu phẹ gụru ìphóró. Ndu ụta ta adụdu l'iphe, ẹphe eme bụru iya bẹ ẹphe egudeje gbobuta onwophẹ. 
Ụzo ndu pfụberekoto bụru iya anọduje eleta iya ẹnya. Tẹme ọ nọdu anwụbejeru ndu yeru iya obu ẹnya. 
Noo teke oo-do ngu ẹnya; mbụ iphe, dụ ree; yẹe iphe, pfụru ọto; mẹkpoo iphe, bụkpoo ụzomuzo, bụ ụzo, dụ ree. 
Noo kẹle mmamiphe a-bahụ l'ime obu ngu; amaru iphe atsọaha ngu ụtso. 
Ọ bụru iphe, a-nọdu egbochi ngu nụ bụ amaru eye ọnu l'opfu; nkwamẹnya awata ngu awata ngu akpọ-ziru ụzo. 
Mmamiphe a-nafụta ngu l'ụzo ndu ẹjo-iphe; bya adzọta ngu l'ẹka ndu opfu phẹ apfụduru-ọto; 
mbụ ndu ahajẹ ụzo, pfụru nhamụnha je etsoru ọchii; 
ndu bụ iphe, adụje phẹ ree bụ eme ẹjo-iphe; tẹme eshi ụzo, gberu nggọ nọdu atsọje phẹ ụtso; 
mbụ ndu ụzo phẹ l'ophu dụkota nggọdogo nggọdogo; ọphu e gudedu ire phẹ ẹka l'iphemiphe, ẹphe eme. 
Ọo-dzọkwa ngu phọ l'ẹka nwanyị-ovuọba; mbụ l'ẹka nwanyị-ụkpara yẹle opfu ẹrengete iya. 
Onye lụfutaru l'ibe ji iya, kụru iya lẹ nwamgbọko; bya aghaaru ọgbandzu, ẹphe gbaru l'iphu Chileke okotazụ; 
kẹle ụlo nwanyị, dụ ẹgube ono bụkwa ẹka eeshije alụfu alụfu anwụhu; tẹme gbororo ụzo iya bụru ụzo, e shi ala maa. 
Ọ tọ dụdu onye jepfujeru iya nụ mechaa lwa; ọzoo mechaa shibaa ụzo ndzụ. 
Ọo ya bụ lẹ-a; tsoru ẹka ndu eme ree. Shije gbororo, ndu pfụberekoto eshi. 
Kẹle ndu obu phẹ gụru ìphóró l'e-buru l'eliphe. Ndu ụta adụdu l'ẹhu anọdukwa iya phọ. 
Obenu lẹ ndu ẹjo-iphe bẹ e-mekwa g'ẹphe chịhu l'eliphe. Tẹme ndu e gudedu ire phẹ ẹka bẹ ee-phefu ephefu. 
