﻿Ebvu-ọma.
149.
Unu jaa Chipfu ajaja. Unu gụa ebvu ọ̀phúú nụ Chipfu. Unu gụa ebvu gude jaa ya ajaja l'ẹka ndu dụru iya nsọ dzukọberu. 
Gẹ ndu Ízurẹlu tee ẹswa l'ẹka onye meru phẹ nụ. G'onye eze ndu Zayọnu mee g'ẹhu tsọo phẹ ụtso. 
G'ẹphe tụko gude ete ebvu jaa ẹpha iya ajaja. Tẹme ẹphe egude nkwa yẹe une gude gụa ebvu nụ iya; 
noo kẹle Chipfu bẹ ndibe iya dụ l'obu. Ndu wozeru onwophẹ alị bẹ ookpubeje ndzọta g'okpu-eze. 
Gẹ ndu dụru Chileke nsọ teje ẹswa l'ẹgube úbvú ọwa-a, a kwabẹru phẹ-a. Tẹme ẹphe agụkwapho ebvu ẹhu-ụtso m'ẹphe zẹ azẹe l'iphe-azẹe phẹ. 
G'aja Chileke ajaja bụru iphe, ẹphe a-kpụru l'ọnu. Tẹme ẹphe atsụa ogu-echi, atsụ akpatiphu labọ l'ẹka; 
gude iya je agwata ndu ọhozo ụgwo iphe, ẹphe meru phẹ; bya egude iya nụa ụnwu-eliphe aphụ. 
Tẹme ẹphe egudekwa iya phọ tụa ndu eze phẹ ẹgbirigba; mbụ tụa ndu nweru ẹnya mkpọro. 
Ọo ya bụ g'ẹphe eshi nno meẹbekota iphe, onye-ikpe deru l'ẹkwo sụ g'ẹphe mee ndu ọhogu phẹ ono. Ọwa-a bụ iphe, o gude kwabẹ ndu dụru iya nsọ ono ùbvù. Unu jaa Chipfu ajaja. 
