﻿Ebvu-ọma.
141.
Gụbe Chipfu; mu araku ngu. Gbanaaru mu mkpu ẹgwegwa. Nụmanu olu mu mẹ mu raku ngu. 
G'epfupfu, mu epfu anụ ngu shikwa ngu mkpọ g'ụ̀nwù-isẹnsu. G'ẹka, mu chiliru imeli epfu anụ ngu dụkwa ngu g'anụ, e gburu wotaru ngu l'ụzenyashi. 
Yenu ndu nche g'ẹphe chee ọnu mu nche; jiko Chipfu. Jiko chenu ogbogboromọnu mu nche. 
Te ekwekwa g'obu mu ghaaru eme ẹjo-iphe iphu; mbụ gẹ mu tsoru ndu ẹjo-iphe wata eme ẹjo-ememe; ọphu mu etsokwaru phẹ ria iphe, ẹphe kwakọberu mu shi nno rirwụa onwomu. 
G'onye pfụberekoto chia mu rọ iphe. Ọo-dụ mu rọ g'ọ bụ iphe-ọma bẹ o meru mu. G'ọ baarụ mu rọ mba. Ono a-gbẹro dụ mu g'ọ bụ manụ, eshi mkpọ bẹ ọowu mu l'ishi. Ishi mu bẹ ọo-gbẹnu atsọ ntụmatu. Obenu lẹ mu anọdujeepho epfu anụ ngu sụ g'i mee g'ẹjo idzu ndu ẹjo-iphe ta vụ. 
Ndu-ishi phẹ bẹ ee-nwufu lẹ mkpakpọnu ẹka ẹphe degeru. Ọo ya bụ gẹ ndu ẹjo-iphe amaru l'iphe, mu pfuru bẹ mu pfuru nhamụnha. 
Ẹphe asụ: “Ọo g'aakọje ọkoro gbubashịa alị-a; bụ g'a tụkashiru ọkpu anyi nanụ nanụ l'ọnu ilu.” 
Obenu lẹ mbẹdua bụ l'ẹka ị nọ bẹ mu dabẹru ẹnya gụbe Chipfu, bụ Nnajịuphu anyi. Ọo l'ime ngu bẹ mu gbabarụ je anọdu ezeru ndzụ. Jiko te enwukwaru mu haarụ ọnwu. 
Menaa gẹ mu ta adalahụ l'ọ́nyà, ẹphe gbabẹru mu; mbụ l'igbudu, ndu ẹjo-iphe tụru doberu mu. 
Gẹ ndu ẹjo-iphe dalahụkwa l'ụgbu, ẹphe geberu. Gẹ mbẹdua ghata phẹ g'ọ tọ dụ iphe, e-me mu nụ. 
