﻿Ebvu-ọma.
132.
Gụbe Chipfu; nyatanụ Dévidi yẹe iphe-ẹhuka, ọ nọ jegbabẹ. 
Ọ gụru ẹnwa; ria nte l'iphu Chipfu; mbụ ria angụ l'iphu Ọkalibe kẹ Jiékọpu sụ: 
“Mu te eyedu ishi l'ụlo mu; ọphu mu abyadụ abahụ ẹka mu azẹje azẹe. 
Mu ta abyadụ ekwe gẹ mgbẹnya shisweta mu ẹnya; mbụ lẹ mu ta abyadụ ekwe gẹ mgbẹnya mia mu ẹka l'ẹnya; 
jasụ mu ahụma ẹka mu a-chọtaru Chipfu g'o buru; mbụ ẹka Ọkalibe kẹ Jiékọpu e-buru.” 
Anyi nụmaru l'ọ nọ lẹ Ifurata. Anyi tụgbua je ahụma iya l'ọma ẹgu Kiriyatu-Jiarimu. 
Unu g'anyi jenụ l'ụlo-ẹkwa Chileke. Unu g'anyi jenụ apfukube iya baarụ iya ẹja. 
Gbalihunụ jiko Chipfu; bya l'ọkpoku ngu; gụ l'okpoko ọgbandzu ngu ono, egoshi ike ngu ono. 
Gẹ ndu-uke ngu yenaa apfụbekoto g'uwe. Ndu dụru ngu nsọ agụa ebvu ẹhu-ụtso. 
Gudenụ iswi ẹhu Dévidi, bụ onye-ozi ngu nyata onye ono, ị wụru manụ l'ishi gude mee ya; ọ bụru eze ono. 
Chipfu riburu Dévidi angụ; mbụ angụ, keru jịngujingu, ọ tọ byadu emebyi emebyi. Ọ sụru iya: “Ọo onye lanụ lẹ ndu bụ oshilọkpa ngu bẹ mu e-me g'ọ nọdu l'aba-eze ngu. 
Ọ -bụru l'ụnwu ngu doberu ọgbandzu mu l'ẹphe; bya eme iphe, mu tụru l'ekemu; ọo ya bụ; ụnwu phẹ anọwaro l'aba-eze ngu jasụ l'ojejoje.” 
Chipfu gudewaa ẹka iya họta Zayọnu; kẹle ẹka ono dụ iya ree k'eburu; noo kẹle ọ sụru: 
“Ọo ẹka-a bẹ mu e-me ọkpoku mu jasụ lẹ tuutuutuu lẹ mịimiimii; tẹme ọ bụru ẹka-a bẹ mu e-dobe aba-eze mu sụgaru; noo kẹle ọo g'ọ dụ mu ree bụ ono. 
Mu a-gọru ọnu-ọma nụ iya g'o nweru iphe nweru k'etsutsu iya. Ndibe iya ndu ọphu daru ụkpa bẹ mu a-nọdu azụ-ji ẹpho. 
Ndu uke Chileke nkiya bẹ mu adzọta ọkpobe adzọta; mbụ lẹ ndu dụru Chipfu nsọ a-nọduepho agụ ebvu ẹhu-ụtso. 
Ọ bụru ẹka ono bẹ mu a-gbẹ mee g'onye ike dụ shi l'ọnu-ụlo Dévidi fụta; tẹme mu anwụru ọku ye l'orọku onye mu wụru manụ l'ishi gude mee ya; ọ bụru eze. 
Mu e-me g'iphere dụ ndu ọhogu iya ọkpobe adụdu; obenu lẹ yẹbedua bẹ mu e-kpube okpu-eze, a-nọdu eke paapaapa.” 
