﻿Ebvu-ọma.
111.
G'ajaja bụru kẹ Chipfu. Mu e-gude obu mu g'ọ ha kele Chipfu ekele. Mu e-kele iya l'ẹka ndu obu phẹ gụru ìphóró nọ l'ìdzù; kele iya l'ẹka ẹphe nọ ndzukọ. 
Iphemiphe, Chipfu eme parụ ẹka. Iphe, bụkpoo ndu ọ dụ ree ejeje arị iya ọriri. 
Iphe, Chipfu emeje dụ ùbvù bya adụ akpabiri; tẹme apfụbekoto iya nọdu anọje jasụ l'ojejoje. 
O mewaru g'a nyata iphe, dụ biribiri, oomeje. Chipfu eme eze-iphe-ọma tẹme ọ nọdu aphụ obu-imemini. 
Ndu atsụ iya ebvu bẹ ọonoduje anụ nri. Ọgbandzu iya bẹ ọonyataje jasụ lẹ tuutuutuu lẹ mịimiimii. 
Ndibe iya bẹ o goshiwaru ike, dụ l'ozi, ooje; kẹle ọ natarụ ndu ọhozo alị phẹ woru nụ phẹ. 
Iphe, o gude ẹka iya eme bụ ire-lanụ bya abụru iphe, pfụru ọto. Ekemu, ọ tụru pfụshiru ike. 
Ekemu ono a-kpọru g'abara jasụ l'ojejoje; tẹme e gude obu, gụru ìphóró; waa ire-lanụ eme iya. 
Ndu nkiya bẹ ọ gbafụtaru; bya atụa ekemu sụ g'ọgbandzu iya dụkwa ojejoje. Ẹpha iya dụ nsọ bya adụ ebvu. 
Atsụ Chipfu ebvu bụ egbube ishi mmamiphe. Iphe, bụkpoo ndu etso ekemu iya bẹ iphe edoje ẹnya ree. G'e tua ya ẹpha jasụ l'ojejoje. 
