﻿Ebvu-ọma.
108.
Obu shihukwaru mu ike Chileke; k'ọphu bụ lẹ mu e-gude obu mu g'ọ ha agụ ebvu etu ngu ẹpha. Obu mu; tehu nwụru ẹnya. 
Unu tehu nwụru ẹnya; unubẹ ogelenda yẹe une; kẹle mbẹdua e-gudekwa ebvu kutee gẹregere nchi-abọhu lẹ mgbẹnya. 
Mu a-nọdu l'echilabọ ndiphe kele ngu ekele gụbe Chipfu. Mu anọdukwapho l'echilabọ ọha l'ophu gụa ebvu gude tua ngu ẹpha. 
Noo kẹle n-yemobu ngu parụ ẹka. Ọ tụkoru imigwe l'ophu kakọta ephekerephe. Tẹme ire-lanụ nkengu dzuru akpaminigwe. 
Goshinu ndiphe g'ị paberu ẹka; mbụ l'ị nọghataru akpaminigwe anọghata; gẹ ndiphe l'ophu ahụma g'ị dụ-be biribiri. 
Gudenụ ọkpehu ngu dzọo anyi; zanụ anyi ẹnu; k'ọphu ee-shi nno dzọo ndu i yeru obu. 
Chileke nọwaa l'ụlo iya, dụ nsọ pfua opfu sụ: “Mu e-gude agbọ ọgboo kee alị ndu Shẹkemu. Tẹme mu eworu nsụda Sukọtu bushia. 
Giladu bụ nkemu; Manásẹ bụkwarupho nkemu. Ifuremu bụ okpu, mu kpu l'ishi. Jiuda bụkwanuru mgbọro-eze, mu apajẹ l'ẹka. 
Mówabu bụ ochi, mu akwọje ọkpa. Ọ bụkwanuru lẹ Edọmu bẹ mu eyeshije akpọkpa mu dobe. Ndu Filisitayinu bẹ mu gbọwaru ọgboo kpua.” 
?Bụ onye e-du mu chiriri werere duba lẹ mkpụkpu ono, a kpụru kpụshia ike ono? Mbụ-a; ?bụ onye e-duru mu duba lẹ Edọmu? 
Ọ kwa gụbedua Chileke bụ onye ọbu. Obenu l'ị gbẹ jịka anyi; ọphu i tii tsojeẹduru ndu ojọgu anyi eje ọgu. 
Yeru anyi ẹka jiko g'anyi mekpee ndu ọhogu anyi; kẹle eye ẹka k'ụnwu-eliphe, bụ iphe-iphoro. 
Obenu l'anyi -nọduwaa Chileke l'ẹka bẹ anyi e-mekpe phẹ gẹ mkparawa. Ọ bụru iya e-hu ndu ọhogu anyi agbagba-nchị l'alị. 
