﻿Ebvu-ọma.
99.
Chipfu bụakwaa Eze. Gẹ ndiphe nmahụkwa pyaapyaapyaa. Aba-eze iya nọ l'echilabọ chierobu. Gẹ mgboko l'ophu nmaa yigayiga. 
Chipfu pakwarụ ẹka; mbụ onye ono, bu lẹ Zayọnu. E woliru iya eli; ọ kakọta ọhamoha shii. 
G'ẹphe jaa ẹpha ngu, bụ Ọkalibe ajaja; mbụ ẹpha ngu ono dụ nsọ; ndiphe nọdu atsụ iya ebvu. 
Eze ọbu parụ ẹka. Iphe, adụje iya ree bụ ikpe, pfụru ọto. Eme iphe ẹnya-nhamụnha bẹ i meru dobe; ọ ngụru angụru. L'ẹhu ụnwu Jiékọpu bẹ i meru iphe, pfụru ọto; waa umere, pfụru nhamụnha. 
Unu kutsee Chipfu, bụ Chileke anyi. Unu bya ephozeta lẹ mgboru ọkpa iya baarụ iya ẹja. Ọ dụ nsọ. 
Mósisu yẹe Erọnu shi yịru lẹ ndu bụ uke kẹ Chileke. Sámẹlu shi yịru lẹ ndu shi akpọ-kuje ẹpha iya. Ndu ono shi ekuje ẹpha Chipfu; l'ọ za phẹ ẹnu. 
O shi anọduje l'urwukpu, kpụru oronmono pfuru opfu nụ phẹ. Ẹphe shi edobeje ekemu iya bya eme omelalị, ọ tọru phẹ ọkpa iya. 
Gụbe Chipfu, bụ Chileke anyi; i shi azajẹ phẹ ẹnu. A makwarụ-a l'i shi ahụ̀je ndu Ízurẹlu ahụ̀hù m'ẹphe shiswee ụzo ngu; obenu l'i shi bụru phẹ Chileke, agụjeru onye meru iphe-ẹji nvụ. 
Unu kutsee Chipfu, bụ Chileke anyi. Unu baarụ iya ẹja l'úbvú iya, dụ nsọ; kẹle Chipfu, bụ Chileke anyi dụkwa nsọ. 
