﻿Ebvu-ọma.
98.
Unu gụa ebvu ọ̀phúú nụ Chipfu; kẹle o meru iphe, dụ biribiri. Ọo ẹkutara iya; waa oshi-ẹka iya ono, dụ nsọ ono bẹ o gude lwụ-kpee ọkpobe alwụ-kpe. 
Chipfu mewaru g'a maru l'ọodzofutaje; bya emewaa g'ọhamoha maru l'ọ bụ onye pfụberekoto. 
Ọ nyatawaru n-yemobu, o yeru ọnu-ụlo Ízurẹlu; yẹe ire-lanụ, oomeru phẹ. Je akpaa l'ẹka igwe beru alị beru bẹ a hụma-dzuwaru gẹ Chileke anyi egudeje adzọ nemadzụ. 
Unu tụa ụzu ẹhu-ụtso gude kwabẹ Chipfu ùbvù; unubẹ ụnwu-eliphe l'ophu! Unu gụa ebvu-ọma gụshia ya ike gude jaa Chipfu! 
Unu gude une gụa ebvu-ọma gude tua Chipfu ẹpha. Unu egudekwaphọ une; yẹe ebvu-ekwekwe jaa ya ajaja. 
Unu gburu opu ye iya; phụa ụpyi ye iya. Unu tụa ụzu ẹhu-ụtso gude kwabẹ Chipfu, bụ eze ùbvù. 
G'oke ẹnyimu yẹe iphemiphe, nọ iya l'ime tụkokwa tụa oke akparamini. Mgboko l'ophu atụa ụzu; yẹe iphemiphe, bu l'ime iya. 
G'ẹnyimu ẹnyimu, nọgbaa nụ tụko kụa ẹka. Úbvú úbvú anọkobe gụa ebvu l'ẹhu atsọ phẹ ụtso. 
G'ẹphe tụko nọdu l'iphu Chipfu gụa ebvu; kẹle ọobyawaa ekpe ụnwu-eliphe ikpe. Ndu mgboko l'ophu bẹ oo-kpe ikpe, pfụru ọto; tẹme l'ọ hakwarụpho ndiphe l'ophu enge, pfụru nhamụnha. 
