﻿Ebvu-ọma.
96.
Unu gụa ebvu ọ̀phúú nụ Chipfu! G'ụnwu-eliphe l'ophu gụnaa ebvu nụ Chipfu! 
Unu gụa ebvu nụ Chipfu; unu tua ya ẹpha! Unu rajẹ iya arara mbọku-mbọku l'ọodzoje nemadzụ! 
Unu tụaru ndu ọhozo ọnu g'ọ dụ-be biribiri! Unu epfuaru ndiphe l'ophu iphe, dụ biribiri, oomeje! 
Noo kẹle Chipfu parụ ẹka; bya abụru onye gbaru g'a jajẹ iya ajaja. G'a tsụjekwa iya phọ ebvu l'ọ kakọta iphe, bụ agwa ndu mgboko l'ophu shii. 
Kẹle agwa ndiphe l'ophu bụkota iphe, e gude ẹka mee; obenu lẹ Chipfu bụ iya gude ẹka iya mee igwe l'onwiya. 
Akpabiri yẹe ogbunwịinwii bẹ nọ iya l'atatiphu; tẹme ọkpehu waa ọdu-biribiri tụkoepho ụlo iya, dụ nsọ sweta. 
Unubẹ ipfu l'ipfu, dụ lẹ mgboko-a; unu kwabẹ Chipfu ùbvù! Unu pfua g'ọ dụ-be biribiri; yẹe g'ọkpehu iya habe shii! 
Unu kwabẹ Chipfu ùbvù, gbaru iya nụ! Unu bya anụ Chileke iphe l'ọkpoku iya! 
Unu yee adụ nsọ g'onye yeru uwe baarụ Chipfu ẹja! Unubẹ ndiphe l'ophu; unu tsụje iya ebvu! 
Unu karụ ọhamoha lẹ Chipfu bụakwaa eze; tẹme l'eliphe l'ophu bẹ e mewaru g'ọ ngụru angụru; k'ọphu bụ l'ọ tọ dụdu iphe, sụru iya enwubata. Ọ bụru Chipfu ono e-kpe ụnwu-eliphe mgburugburu ikpe, pfụru ọto. 
G'imigwe l'ophu tee ẹswa; ẹhu atsọo ndiphe l'ophu ụtso! G'eze-ẹnyimu yẹe iphemiphe, nọ iya l'ime tụkokwa tụa oke akparamini! 
G'ẹgu l'ophu mẹkpoo iphemiphe, nọ iya nụ tụko gbọo ọgboo! Noo teke iphe, bụ oshi, dụ l'ọswa a-gụ ebvu ẹhu-ụtso l'iphu Chipfu. 
Ẹphe a-nọdu l'iphu Chipfu gụa ebvu kẹle ọobyawaa ekpe ụnwu-eliphe ikpe. Oo-gude apfụbekoto iya kpee mgboko l'ophu ikpe; bya egude ire-lanụ kpee ndiphe ikpe. 
