﻿Ebvu-ọma.
89.
Mu a-gụ ebvu gude pfua gẹ n-yemobu Chipfu habe shii. Mu a-gụ iya jasụ l'ojejoje. Mu e-gude ọnu mu pfua g'ọgbo l'ọgbo maru l'ị bụ onye apfụshije ike l'iphe, i pfuru. 
N-yemobu ngu a-dụ g'ọ dụ jasụ l'ojejoje. Ọo g'akpaminigwe ngụru angụru-a bụ g'apfụshi ike l'iphe, i pfuru angụjeru. 
Ị sụru l'onye ị họtaru bẹ gụ l'iya gbawaru ndzụ; mbụ l'i rifuwaru Dévidi, bụ onye-ozi ngu angụ sụ: 
“Awa ngu bẹ mu e-me g'ọ ngụru angụru nọo ojejoje; mee g'aba-eze ngu kpọo g'abara shi l'ọgbo sweru ọgbo.” 
Imigwe l'ophu atụ ọnu g'ị dụ-be biribiri gụbe Chipfu; tẹme ọ nọdu egoshikwaphọ ndu dụru ngu nsọ l'ị bụ onye apfụshije ike l'iphe, i pfuru. 
Kẹle-a; ?bụ onye nọ l'imigwe bụ onye aa-nọdu atụ eyeru Chipfu? ?Mbụ dẹnu onye imigwe ọphu aa-nọdu atụ eyeru Chipfu? 
Ẹka ndu dụ nsọ k'imigwe dzukọberu bẹ aanọdujekwa atsụ Chileke ebvu. Ọ kakọta ndu nọ-pheru iya mgburugburu adụ ebvu. 
Gụbe Chipfu, bụ Chileke, bụ Ọkalibe-Kakọta-Ike; ?bụ onye dụ gẹ ngu? Ị parụ ẹka gụbe Chipfu; tẹme ị nọdu apfụjeru pfụshia ike l'iphemiphe, i pfuru gbaa mgburugburu. 
Ọo ngu anọduje eleta oke akparamini eze-ẹnyimu ẹnya; tẹme ọ -bụru l'akparamini sọru kẹ kpukumu; l'i mee ya l'ọ daa gbẹe. 
Réhabu bẹ i chitaru tụa l'alị. Ọ dabyiru g'onye e gburu l'ọgu. I gude ike ngu chịa ndu ọhogu ngu; ẹphe gbaa nanụ nanụ. 
Igwe l'ophu bụ nkengu. Eliphe l'ophu bụkwarupho nkengu. Ọo gụbedua tụru ọkpa mgboko l'ophu; yẹe iphemiphe, nọ iya nụ. 
Ndẹgu iya mẹ ndọhali iya bụkota gụbedua meru phẹ dobe. Úbvú Tabọ; yẹe úbvú Hamọnu agụje ebvu ẹhu-ụtso m'ẹphe nụma ẹpha ngu. 
Oshi-ẹka ngu bụ iphe, swetaru iya nụ bụ ọkpehu. Ẹka ngu shihuru ike; ẹkutara ngu kangoo. 
Aba-eze ngu bụ apfụbekoto yẹe ikpe, pfụru ọto bẹ e gude tụa ọkpa iya. Ị nọdu akpajẹru n-yemobu ngu; yẹe apfụshi ike l'iphe, i pfuru vuru ụzo l'iphemiphe, iimekpọo ememe. 
Ẹhu-ụtso bẹ a gọru nụ ndu maru g'eetuje ngu ẹpha; mbụ ndu bụ ìphóró, shi l'ẹka gụbe Chipfu nọ bẹ ẹphe egudeje eje ẹkameka, ẹphe eje. 
Ẹphe egudeje ẹpha ngu ete ẹswa mkpụrumkpuru. Ẹphe nọdu anọduje ekutse ngu l'ị bụ onye pfụberekoto. 
Kẹle ọo ngu bụ ike, dụ biribiri, ẹphe nweru. Ọ bụru l'ọo l'anyi dụ ngu l'obu meru iphe, iimeje g'ike anyi kangoo. 
Mbụ lẹ-a; l'onye mgbobuta anyi bụkwa Chipfu bẹ nụru iya anyi; mbụ l'eze anyi bụkwa Onye Nsọ kẹ ndu Ízurẹlu bẹ o shi l'ẹka. 
O nweru teke i gudeje ọphulenya zia ndibe ngu ozi; sụ l'i mewaru g'ọkpehu kalẹru ojọgu lanụ. Ị byaru l'echilabọ ndibe ngu bya ahọta nwokorọbya lanụ; mee g'ọ bụru onye ndiphe a-nọdu ekutse. 
Ị hụmawaru onye-ozi ngu, bụ Dévidi. I woru manụ ngu, dụ nsọ wụa ya l'ishi. 
Sụ l'ọo ẹka ngu bẹ ii-gude mee ya l'ọ ngụru angụru; mbụ l'ọ kwa oshi-ẹka gụbe Chileke a-nọduje eme g'ike ka iya adụdu. 
Ọ tọ dụdu ndu ọhogu iya, dụru ndu ọphu a-dụ ike ekebuta iya g'ọ tụru phẹ ụtu; ọphu ndu ẹjo-iphe asụdu iya emekpa ẹhu. 
Ndu achị iya lẹ njọ bẹ ịi-nọdu l'iphu iya zọpyashia; l'i chitsushikọta ndu ọ dụ ashị. 
N-yemobu ngu waa apfụshi ike l'iphe, i pfuru l'a-nọdu swiru iya. Ọ bụru ẹpha ngu bẹ oo-gudeje mabẹ mpu iya gugugu. 
Alị-eze iya bẹ ii-me g'ọ jaa àjàjà; mbụ g'o shi l'eze-ẹnyimu nọo jasụ l'ẹnyimu Yufurétisu. 
Ọo-nọdu arakuje ngu sụ: “Ọo ngu bụ nna mu; bya abụru Chileke mu; bya abụru agbara-mkpuma, l'adzọje mu nụ.” 
Gụbedua l'onwongu emekwanaa ya l'ọ bụru ọkpara ngu; mbụ l'ọ bụru iya a-kachaa shii l'iphe, bụkpoo ndu eze, nọ l'eliphe l'ophu. 
N-yemobu, i yeru iya l'a-bụru ojejoje. Ọgbandzu gụ l'iya apfụru pfụshia ike. 
Awa iya bẹ ii-me; ẹphe angụru angụru jasụ l'ojejoje. Alị-eze iya bụ g'igwe l'ophu nọ-beru bụ g'ọo-nọ-beru. 
Ọ -bụru l'ụnwu iya jịkaru eme ekemu ngu; ọphu ẹphe etsodu iphemiphe, ị tụru ọkpa iya sụ g'e tsoje; 
ẹphe -mebyia omelalị, i doberu phẹ; bya ajịka eme iphe, ị sụru g'ẹphe meje; 
l'i gude mgbọro bya echia phẹ pyaapyaa gude hụ̀a phẹ ahụ̀hù; mbụ bya echia phẹ ẹchachi gude hụ̀a phẹ ahụ̀hù k'ẹjo-iphe, ẹphe eme. 
Ọle ọ tọo kpọshikwanu g'i ti yehẹ iya obu g'i yeru iya ya; ọphu ọ dụdu teke ịibya aha apfụshi ike l'iphe, i pfuru lẹ k'ẹhu iya. 
I tii mebyikwa ọgbandzu ngu l'ẹhu iya. Ọphu ịigbanwekwa iphe, ị sawaru ọnu pfua. 
Eshinu ị bụ onye dụ nsọ bẹ i riru angụ mgbo lanụ sefu ẹka; sụ l'ị tị byadu adzụru Dévidi ụka; 
sụ l'awa iya a-nọ jasụ l'ojejoje. Ọ bụru g'ẹnyanwu keru ngu l'iphu bụ g'alị-eze iya e-keru damudamu; 
mbụ l'oo-keru jịmujimu jasụ l'ojejoje g'ọnwa, bụ iphe, agba ekebe l'akpaminigwe; l'e gude ire iya ẹka. 
Obenu l'onye ono, ị wụru manụ l'ishi ono bẹ ị jịkawaru; bya avụaharu iya ọvuma. 
Ị jịkawaru ọgbandzu, gụ l'onye-ozi ngu gbaru. I wowaru okpu-eze iya woru gwọo l'urwuku. 
Igbulọ iya l'ophu bẹ i tsukpọshichawaru etsukpọshi. I woru ụlo-mgbobuta iya tsua yọgiri yọgiri. 
Iphe, bụkpoo ndu aghata aghata gwee ya tụtu-a. Ndu obutobu iya nọdu ekweru iya une. 
I tuliru ndu achị iya lẹ njọ ẹka l'eli; bya emee ndu ọhogu iya; ẹphe nọdu ete ẹswa. 
Atatiphu ogu-echi iya bẹ i woru ghachaa ịgharaphu; ọphu iimejeẹdu g'ọ pfụshia ike l'iphu ọgu. 
I mee; ọphu ọ dụedu akpabiri; bya eworu aba-eze iya rwụa lẹ ntụ. 
I meru iya ọ kahụ lẹ nwokoro; bya eworu iphere yee ya g'onye yeru akpawuru uwe. 
?Ọo-dụ ẹgube ọwa-a jasụ teke ole gụbe Chipfu? ?Ii-domiwarọ onwongu jasụ l'ojejoje tọo? ?Bụ teke ole bẹ ẹhu-eghu ngu e-nwu phuruphuru g'ọku nwuberu? 
Jiko nyatakwa gẹ ndzụ mu dụ-be mkpirikpu; kẹle nemadzụ, i meru bụepho udzu ọnu mmanụ. 
Lẹ-a; ?dẹnu nemadzụ, a-nọdu ndzụ g'ọ tọ nwụhu anwụhu; ọzoo g'ọ dzọo onwiya g'ọ tọ la maa? 
Gụbe Nnajịuphu; ?bụ awe bẹ i doberu eze n-yemobu ngu ono, i shi egoshije mu ono; mbụ n-yemobu ono, i gude apfụshije ike l'iphe, i pfuru rifuru Dévidi angụ l'ịi-nụ iya ono? 
Nnajịuphu; nyatanụ g'a chị-bewaru onye-ozi ngu ọchi; waa gẹ mu tabewarụ nshi l'iphu, ndiphe nọ akwagọ mu; 
mbụ iphu ono, ndu ọhogu gụbe Chipfu anọduje akwagọ onye ị wụru manụ l'ishi ono. Ẹkameka, ọ nọ bẹ ẹphe anọduje akwagọ iya iphu gude eme iya iphe-iphere. 
G'ajaja bụru kẹ Chipfu jasụ l'ojejoje! Nokwa g'ọ dụ; bya abụru g'ọ dụ. 
