﻿Ebvu-ọma.
78.
Unubẹ ndu mu; unu nụma iphe, mu ezi! Unu ngabẹ nchị nụma opfu, shi mu l'ọnu! 
Gẹ mu bya asaa ọnu nmarụ ẹtu nụ unu; gẹ mu bya avọshichaa opfu, e domiru edomi e -shi teke ndiche. 
Iphe ono bụ iphe, anyi nụmajehawaru; bya abụru iphe, anyi maru. Ọ bụ iphe, nna anyi oche phẹ shi akọjehawaru anyi. 
G'ike Chipfu habe shii; tẹme waa iphe, gbaru k'etu ẹpha; yẹe iphe, dụ biribiri, o mekọtaru bẹ anyi te edomiduru ụnwu phẹ edomi; Anyi e-pfucharu iya ọgbo ọphu dụkwadu l'iphu. 
O doberu ụnwu Jiékọpu omelalị, ẹphe e-tsoje; bya atụa ekemu dobe; ọ ngụru angụru l'alị Ízurẹlu; bya akaru ndiche anyi phẹ g'ẹphe zikwaa ya ụnwegirima phẹ. 
K'ọphu ọgbo ọphu abya nụ a-maru iya; mbụ ndu ọphu e teke anwụkpodaa nụ anwụnwu. Ẹphebedua egudekwa iya phọ zia ụnwu nkephẹ. 
Ọo ya bụ g'ẹphe akpọru obu ye lẹ Chileke. Ẹphe ta azọhaedu iphe, o meshiru. Ẹphe edobedzua ekemu iya g'ọ ha. 
Ẹphe ta adụedu gẹ nna phẹ oche phẹ shi bụru ọgbo ẹjo ọkpoma; bụru ọgbo, kwefuru Chileke ike; mbụ ọgbo, adụdu teke obu phẹ ngụjeru angụru l'ẹka Chileke nọ; tẹme ọphu ọ dụdu teke ẹphe pfụshijeru ike l'iphu iya. 
A makwarụ-a l'unwoke Ifuremu gude apfụ kwaa onwophẹ ngwọgu; obenu l'ọgu tsuru; ẹphe ye ọkpa l'ọso gbalachaa. 
Ọgbandzu ẹphe lẹ Chileke bẹ ẹphe mebyiru; ọphu ẹphe emeduru kụnyabe iphe, ọ tụru l'ekemu. 
Ẹphe zọhaa iphe, Chileke meshiru; mbụ iphe, dụ biribiri, o meshiru goshi phẹ. 
O meshiru iphe, dụ biribiri l'iphu nna phẹ oche l'alị Ijiputu lẹ mgbẹgu Zowanu. 
Eze Ẹnyimu bẹ o keru ẹbolechiko dua phẹ dughata. O mee mini; ọ kpụa oronmono g'igbụlo. 
Iphe, o gude dua phẹ l'eswe bụ urwukpu; bya egude ìphóró ọku dua phẹ l'ẹnyashi mbọku-mbọku. 
Agbara-mkpuma bẹ ọ gbajaharu ẹbo l'echiẹgu; shi l'ẹka ono nụ phẹ mini, dọru nyịmunyimu g'oke-ẹnyimu. 
Ọ bụru ẹka mkpuma gbaru ọru bẹ o meru; mini sọshihu sọaha gborogboro gẹ nggele. 
Obenu l'ẹphe emeẹle iya-a iphe-ẹji. Ẹphe nọele-a l'echiẹgu ono ekwefụru Ọkalibe-kakọta-shii ike. 
Ẹphe lekebekpọo ẹnya wata ahụ Chileke ama; mbụ kebekpọepho g'ọ nụ-dzujeru phẹ ụdu nri, agụ phẹ nụ. 
Ẹphe pfuaru Chileke ẹjo opfu sụ: “?Bụ gẹ Chileke adụ ike zụa anyi l'echiẹgu-a? 
Teke o chiru iphe l'agbara-mkpuma bẹ mini shi iya sọshihu; nggele bụru gborogboro. Ọle ọ bụ; ?bụ g'ọo-dụfua ike nụ anyi nri? Tọo ?ọo-dụfukwapho ike nụ anyi anụ?” 
Chipfu -nụmae ya phọ; ẹhu ghua ya oke eghu. O woru onwu taphutaphu ọku kpọberu Jiékọpu; mbụ woru oke ẹhu-eghu iya doberu ndu Ízurẹlu. 
Kẹle ẹphe te ekwetadụru lẹ Chileke dụru iphe, ọ bụ; tẹme ọphu ẹphe ekwetakwarụpho l'ọo-dụ ike dzọo phẹ. 
Obenu l'ọ sụru akpaminigwe l'ọwa-a iphe, oo-me; o mee ya; tẹme ọ gụhashia ụzo imigwe; 
bya edzeeru ndu Ízurẹlu nri ono, bụ mana gẹ mini. Ọ bụru akpụru-iphe, shi l'igwe bẹ ọ nụru phẹ ẹgube ono. 
Amadụ ria nri ụnwu imigwe. Chileke nụ-dzukọtaru phẹ nri, sụru phẹ eriri. 
Phẹrephere, eshije l'ụzo ẹnyanwu-awawa bụ yẹbedua tụharu iya ụzo imigwe; ọ wata ezizi. Nokwaphọ g'o gude ike iya nwuhaa ọphu eshije l'ụzo ndọhali; ọ wata ezizi. 
Anụ, aata atata b'o dzeru phẹ; ọ nọdu etsu gbiigbiigbi g'udzu, nọ l'alị. Ẹnu, ephe l'eli bẹ o nwuru nụ phẹ; ọ ghakashịhuru phẹ g'ẹja, kụru l'agụga ẹnyimu. 
O mee; ẹphe phebatachaa l'ẹka ẹphe dọru. Ụlo-ẹkwa phẹ bẹ o shi anọdujecha ephephe mgburugburu. 
Ẹphe ria nri jasụ ẹpho jigharu phẹ ẹka; kẹle ọ nụru phẹ iphe, agụ phẹ nụ. 
Ọle ẹphe byaru erighe nri ono, shi agụ phẹ nụ ono; mbụ l'ẹphe kpụkwadu iya l'ọnu; 
Chileke watawaa phẹ atukoshi oke ẹhu-eghu iya. Ọ tụkoepho ndu kachaa okporokpo l'echilabọ phẹ gbushia; mbụ l'ọ tụkoru ụnwokorobya Ízurẹlu ono mebyishia. 
O mechakpọkwa phẹ ẹgube ono; ẹphe nọdu emekwaphọ iphe-ẹji. O mechakpọoru phẹ iphe-ọhumalenya ono; ọphu ẹphe ekwekwaphọ l'ọ dụru iphe, ọ bụ. 
Noo g'o gude o mee ndzụ phẹ chịhu g'udzu ọnu; bya egude keteketekpaa mebyia ndzụ phẹ. 
Teke ọ haẹru phẹ phọ gbushia; ẹphe agbẹ teke ono chọahaa ya; mbụ ẹphe alwụkorohu dakọbe; ghaaru iya iphu ọzo lwapfuta iya. 
Ẹphe anyata lẹ Chileke shi bụru agbara-mkpuma phẹ; l'ọo Chileke ono, bụ Ọkalibe-kakọta-shii ono bụ onye gbafụtaru phẹ nụ. 
Ọle ẹphe gude ọnu phẹ aja iya ewenu; mbụ l'ẹphe gude ire phẹ adzụru iya ụka. 
Obu phẹ ta anọdu l'ẹka ọ nọ; ọphu ọ dụdu teke ẹphe pfụjeru pfụshia ike l'ọgbandzu ẹphe l'iya. 
Ọle Chileke aphụjele-a obu-imemini gụaru phẹ nvụ l'ẹjo-iphe ono, ẹphe anọduje emegbabẹ ono; ọphu o mebyishiduru phẹ. Ugbo olemole bẹ ọ lọ-phuchawaru ẹhu-eghu iya azụ; ọphu ọ tụkoduru oke ẹhu-eghu iya ono g'ọ ha wụa phẹ l'ishi. 
Ọ nọdu anyatajẹ l'ẹphe bụ anụ-ẹhu; l'ẹphe bụ phẹrephere, ezi ezizi, ete eziphujehẹdu azụ m'o zighatawa. 
Ugbo olemole bẹ ẹphe kwefuwaru iya ike teke ẹphe eje l'echiẹgu; mbụ kpatsu iya iwe l'alị, dabyiru mgbegere. 
Tekenteke kpọo bẹ ẹphe shi anọduje ahụ Chileke ama. Ẹphe shi anọduje eme Onye dụ Nsọ kẹ ndu Ízurẹlu iphe ẹhu-eghu. 
Ọphu ẹphe anyataẹduru ọkpehu iya ono; mbụ ọkpehu ono, o gude gbafụta phẹ l'ẹka ndu shi eme phẹ mkpawere ono; 
bụ iya bụ mbọku, o meru; a hụma-dzuru iphe, dụ biribiri, o meru lẹ Ijiputu; mẹ iphe, dụ ebvu, o meshiru lẹ mgbẹgu Zowanu. 
O meru nggele nggele phẹ; ọ ghọshia mee. O mee ọphu mini, dọru l'ẹnyimu adụdu k'angụngu. 
Ọ chịru ijiji ye; ọ tụru wowowo bya anụa phẹ chịipfuu; bya achịru mbara ye; o mebyishia alị phẹ. 
Iphe, ẹphe kụru l'alị bẹ ọ chịru ịnyarinya yee; ọ tapyashịa; bya achịru igube yeru ndu ọphu mịru amịmi; ọ tafụ iya. 
Oshi sịkamo phẹ bẹ o gude akamini tụpyashia; bya egude iji ụguru mebyishia akpụru vayịnu phẹ. 
Eswi phẹ bẹ o gude ẹjo akamini ono tugbushichaa; bya egude ire egbigwe tugbushikọta iphe-edobe phẹ g'ọ ha. 
Ọ tụko oke ẹhu-eghu iya g'ọ ha vuru byabẹ phẹ l'ishi. Ọ chịta ụnwu-ojozi-imigwe ye g'ẹphe je emeghe nkephẹ. 
Ọ tọru ẹhu-eghu iya ono owere; ọphu ọ machịduru ẹka iya nafụta phẹ g'ẹphe ta anwụhu. O woru phẹ haarụ ẹjo iphe-ememe g'o meghee nkephẹ. 
Iphe, bụkpoo ndu bụ ọkpara l'alị Ijiputu bẹ o gbukọtaru egbugbu; mbụ mebyishichaa nwa, vuru ụzo kpọo onyemonye iphu l'alị Hamu. 
Obenu lẹ ndibe iya bẹ ọ tọru nwẹhu rwua g'onye erwu atụru rwufuta; bya echee phẹ g'eecheje atụru-a gude dughaa echiẹgu. 
O dukpọeru phẹ phọ chiriri werere; gẹ ndzụ ba gụ phẹ; obenu lẹ ndu ọhogu iya bẹ ọ harụ; eze-ẹnyimu rigbushikọta. 
Tọbudu iya bụ; o dua phẹ durwua ẹka bụ oke alị iya, dụ nsọ; mbụ durwua phẹ l'úbvú ono, o gude ẹkutara iya lwụta ono. 
Ọ chịa ndu ọhozo ịkpabaka chịfuchaa l'iphu phẹ; bya eworu alị phẹ keeru ndu Ízurẹlu g'ọ bụru okiphe phẹ. O chịru ọkpa-ipfu Ízurẹlu ye; ẹphe buchishia alị phẹ ono. 
Ọle ẹphe mechaẹleru-a hụa Chileke ama; bya ekwefụru Ọkalibe-kakọta-shii ike; mekọta iphe, bụkpoo iphe, ọ sụru g'ẹphe te emejeshi. 
Ẹphe tsoo ọkpa nna phẹ oche; gbakụtaru Chileke azụ; tẹme ẹphe bụru ndu adụdu onye gude ire phẹ ẹka. Onye daphuberu phẹ nụ dụ g'onye daphuberu okpete. 
Ẹphe gude ẹka ẹphe agwajẹ iphe, ẹphe dobegbaaru l'ẹkameka; gude kpatsua Chileke iwe; mbụ kpatsu iya; o koaharụ ntẹkpe, ẹphe pyịshiru okophoo. 
Gẹ Chileke hụmaru iya bẹ ẹhu ghushiru iya eghu ike. Ọ jịkaepho ndu Ízurẹlu jịkanyia ẹnya. 
Ọ nọ-buhu l'ụlo-ẹkwa nkiya ono, dụ lẹ Shilo; mbụ ụlo-ẹkwa ono, bụ yẹbedua gude ẹka iya kpọbe l'echilabọ ụnwu-eliphe. 
O woru okpoko ọgbandzu iya haa; ndu ọhogu iya lwụta l'ọgu; mbụ okpoko ọgbandzu, bụ iya egoshije g'ike iya habe shii; bya abụru iphe, egoshije g'ọ dụ-be biribiri bẹ ọ parụ haa l'ẹka ndu ọhogu iya. 
Ọ harụ ndibe iya; e gbushia phẹ; noo kẹle ndu ono, bụ okiphe iya ono bẹ kpatsuru iya iwe. 
Nwada phẹ ta adụdu onye byaru phẹ alụta; noo kẹle ụnwokorobya phẹ bẹ ọku tsugbushibẹberu. 
Ndu uke Chileke phẹ bẹ e gude mma gbushia; ọphu ụnwanyi, ji phẹ nwụhuru anọjeedu l'ụlo-maa ndu shi alụ phẹ nụ. 
A -nọnyaa; Nnajịuphu kwolihu g'onye shi eku mgbẹnya; mbụ kwolihu g'onye shi ngụa mẹe; ọ lọta iya phube; 
bya enwuphu ndu ọhogu iya azụ; mee phẹ iphe-iphere, ichi iya te nwedu echihu jasụ l'ojejoje. 
Oshilọkpa Jiósẹfu l'ophu bẹ ọ jịkakotaru; mbụ l'ọkpa-ipfu Ifuremu bẹ ọ tọ họtaduru. 
Obenu l'ọ gbẹchia họta ọkpa-ipfu Jiuda; bụ iya bụ úbvú Zayọnu ono, o yeru obu ono. 
Ọ bya eworu ụlo iya, dụ nsọ kpụa; ọ ha g'oke úbvú; mbụ kpụa ya; ọ dụ g'eliphe, ọ tụru ọkpa iya; ọ bụru iphe, a-nọ jasụ l'ojejoje. 
Ọ họtaru onye-ozi iya, bụ Dévidi; bya edufuta iya l'ẹka ọ nọ l'ọdu atụru. 
O dufutaru iya l'ẹka ooche atụru g'ọ bya eleta ndibe iya, bụ ụnwu Jiékọpu ẹnya; mbụ g'ọ kpọ-zijeru ụnwu Ízurẹlu, bụ okiphe iya ụzo. 
Dévidi gudekpọepho obu, gụru ìphóró leta phẹ ẹnya; bya egude ọkpobe mmamiphe chịkota phẹ lẹ chiriri werere. 
