﻿Ebvu-ọma.
74.
Gụbe Chileke; ?dẹnu g'o gude ị jịka anyi jasụ l'ojejoje? ?Dẹnu g'o gude oke ẹhu-eghu ngu nọdu akpụ tụutuutuu l'iphu igwe atụru, iiche echeche? 
Nyatakwa igwe ọha ono, ị zụruro teke dụ ẹnya ẹnya ono; mbụ ọkpa-ipfu ono, ị gbatarụ l'itumo mee phẹ; ẹphe bụru okiphe ngu ono. Nyatakwaphọ úbvú Zayọnu ono, i bu ebubu ono. 
Shikpọdapho ụzo ono hụma g'e mebyishibeberu iya; mbụ ẹjo-iphe, ndu ọhogu ngu meru ọ nwụaru ụlo ngu ono, dụ nsọ ono. 
Ndu achị ngu lẹ njọ wụbatakwaru l'ụlo-ndzukọ ngu; bya agbọru ọgboo kpua ya. Ẹphe woru èchíi kpọbe iya gude goshi l'ọ kalẹru phẹ. 
Ẹphe nọdu eme g'onye pa ogbunkụ tsoru ẹgbudu ẹgbudu; egbutsushi iphe, bụkpoo oshi, ọ hụmaru. 
Iphe, bụkpoo iphemiphe, a pyịru apyịpyi b'ẹphe gude ogbunkụ gude ọngu kụkposhichaa akụkposhi. 
Ụlo ngu, dụ nsọ b'ẹphe nwụru ọku yee o tsua tsurwua alị. Ẹphe woru ẹka ono, ị họtaru g'ọ bụru ẹka ii-buru eburu ono pharwụshia. 
Ẹphe nọdu epfuje l'ime ọkpoma phẹ sụ: “Anyi e-mebyishichaa ya g'ọ hakọtakpoo!” Ẹphe tụko ẹkameka, e shi anọduje abarụ Chileke ẹja tụkota ọku o tsua ya tsufu. 
Ọphu ọ dụdu iphe-ọhubama, dụ biribiri, eemejekwaduru anyi; tẹme ọphu ọ dụedu ndu mpfuchiru phọduru nụ; ọphu ọ dụdu g'ọ ka mma l'ọo onye lanụ l'echilabọ anyi, maru g'ẹgube iphe ọwa-a l'a-nọ-beru. 
?Ndu ọhogu ngu a-nmakpọo ngu phulaphula jasụ teke ole gụbe Chileke? ?Ndu ị dụ ashị egudewarọ epfubyishi ẹpha ngu jasụ l'ojejoje tọo? 
?Bụ gụnu kparụ iphe, iisela ẹka ngu azụ; mbụ ẹkutara ngu? Chịfuta ẹka l'iphu ụtapfu gude mebyishia phẹ. 
Obenu l'ọo gụbe Chileke bụ eze nkemu, e -shi l'edenwede. Ọo ngu byaru adzọo ụnwu-eliphe. 
Ọo gụbedua gude ike ngu chiwaha eze-ẹnyimu ẹbo. Ẹjo-anụ, bu lẹ mini b'i chikpọshicharu ishi echikpọshi. 
Ọo gụbedua zọpyashiru ẹjo-oke-agiyi ishi; woru iya nụ anụ, bu l'echiẹgu g'ọ bụru nri iya. 
Ọo gụbedua gbafushiru ọgba yẹe nggele; mini shi iya sọshihu. Ị bya amịchata mini lẹ ẹnyimu, asọ gborogboro. 
Eswe bụ nkengu; ẹnyashi bụru nkengu. Ọ bụru ngu meru ẹnyanwu yẹe ọnwa dobe; ẹphe keru jịmujimu. 
Ọo gụbedua tubuhawaru ẹka oke alị a-kpagbaa lẹ mgboko-a mgburugburu; bya edobe ọnanwu dobe udzumini. 
Nyatakwa gẹ ndu ọhogu ngu chiberu ngu ọchi Chipfu; mbụ gẹ ndu-eswe pfubyishiberu ẹpha ngu. 
B'e wokwaru ndzụ nwa-ndo-nwẹnu ngu woru ye l'ẹka ẹjo anụ-ẹgbudu! Ba zọhakwa ndibe ngu, bụ ndu eje iphe-ẹhuka. Ba hakwa phẹ g'ẹphe nọdu iya nno ojejoje! 
Nyatakwa ọgbandzu anyi lẹ ngu; noo kẹle mkpawere dụkwa l'iphe, bụkpoo ẹka agba ọchii l'alị-a. 
B'ekwekwa gẹ ndu eemekpa ẹhu gude iphere tsuphu azụ. Gẹ ndu ụkpa mẹ ndu adụdu g'ọ dụ phẹ janaa ẹpha ngu ajaja! 
Gbalihunụ gụbe Chileke pfua l'ọnu onwongu! Nyatakwa gẹ ndu eswe eshije l'ụtsu chịa ngu ọchi jasụ nchi ejihu. 
Ba zọhakwa hanyịhanyi, ndu achị ngu lẹ njọ aba; mbụ wọowoowoo, ndu wulihuru etso ngu opfu atụ mkpụrumkpuru sekpu ngu. 
