﻿Ebvu-ọma.
69.
Dzọo mu jiko Chileke; kẹle mini wọwaru mu l'ẹkpiri. 
Mu emiwa emimi emiba l'ẹpuchi; ẹka adụdu iphe, kọbe nvọ, dụ iya nụ. Mu darwuwaru ọhu-mini; utso woru mu ria. 
Mu chiwaru mkpu chita ike mu. Ẹkpiri gọwaa mu agọgo. Tẹme mu nọdu aphụwaa ragaraga; ẹka mu nọ ele ẹnya Chileke mu. 
Ndu mu dụ ashị l'ẹbe adụ iphe, mu meru phẹ kakwa ẹgbushi, nọ mu l'ishi igwerigwe. Mbụ lẹ ndu ọhogu mu pakpọoru igwerigwe; mbụ ndu anọduje achọ ụzo, ẹphe e-shi mebyishia mu; l'ẹbe ọ dụkpoo iphe, mu meru phẹ. Ẹphe ekebutajẹ mu; mu apfụa ụgwo iphe, mu ezitaduru. 
Gụbe Chileke; i mawaru gẹ mu shi emeberu eswe; ọphu ọ dụdu iphe-ẹji mu ọphu eemeru ngu lẹ mpya. 
Gụbe Nnajịuphu, bụ Chipfu; bya abụru Ọkalibe-Kakọta-Ike; te ekwekwa g'e gude iswi ẹhu mu mee ndu ele ẹnya ngu iphe-iphere! Ọphu i kwekwa g'e gude iswi ẹhu mu meru iphere kpua ndu achọ ngu nụ; jiko Chileke kẹ Ízurẹlu! 
Kẹle ọo l'iswi ẹhu ngu bẹ e gude ekweru mu une; bya eme iphe-iphere ekpu mu. 
Ndibe anyi bẹ mu dụwaa gẹ mu bụ onye byaru abyabya; mbụ unwune mu gẹdegede gụbe mu onye ọhozo. 
Kẹle obu, mu yeru ụlo ngu rimiwaru mu ishi. Iphe, bụkpoo une, e kweru ngu bụru mbẹdua vutaru ọnwu iya. 
Mu rarụ ẹkwa swịa ẹgu l'iphu Chileke. Iphe ono tụkochaa bụru iphe, ẹphe gude kweru mu une. 
Mu yee uwe-aphụ; ẹphe gude iya gụaharu mu ebvu. 
Ndu dọru l'ọnu-abata nọdu epfuru mu. Mu bụru onye ndu angụ mẹe gude agụ ebvu-mẹe. 
Ọle ọo gụbe Chipfu bẹ mu anọduje epfu anụ. Gụbe Chileke; gude n-yemobu ngu ono zakpọe mu phọ ẹnu teke dụ ngu ree; bya adzọo mu ọkpobe adzọdzo. 
Lọfuta mu l'ẹpuchi; b'ekwekwa g'o ria mu! Nafụtanu mu l'ẹka ndu mu dụ ashị! Bya agụfuta mu l'echi ogbumini ono! 
B'ekwekwa g'utso ria mu! B'ekwekwa gẹ mu darwua ọhu-mini! Ọphu iikwekwa g'e lia mu lẹ ndzụ! 
Zanụ mu ẹnu gụbe Chipfu; kẹle n-yemobu ngu dụ ree. Ghanaaru mu iphu Chileke; kẹle ị phụnukaru obu-imemini. 
Be domikwaru mụbe onye ejeru ngu ozi iphu! Zanụ mu ẹnu ẹgwegwa; kẹle mu eje iphe-ẹhuka. 
Kpịritanuru ntse bya adzọo mu! Gbafụta mu rọ m'ọbvu ndu mu l'ẹphe dụ l'opfu! 
Ị mawaru g'ẹphe kweberu mu une; bya amakwarụpho g'ẹphe meberu mu iphe-iphere kparụ. Ndu bụ ọhogu mu bẹ ị makọtanuru-a. 
E kwekwaru mu une jasụ ọkpoma wahụahaa mu awahụ. Nta-a bẹ o mewaru mu; ọphu ike adụedu mu. Mu leru ẹnya onye a-phụru mu obu-imemini; ọphu ọ dụdu. Mu bya elee ẹnya onye a-dụ mu obu; ọphu ọ dụdu onye mu hụmaru. 
Ẹphe wotaru mu iphe, egbu egbugbu gẹ mu ria g'ọ bụru mu nri; bya edoberu mu mẹe-venịga gẹ mu ngụru ye iya. 
Mekwaa gẹ nri, ẹphe doberu l'iphu phẹ bụru igbudu tụpyabe phẹ. G'anụ, ẹphe gburu gude gwaa Chileke bụkwaru ọ́nyà nmata phẹ. 
G'ẹnya gbahụkwa phẹ ọchii g'ẹphe phụ-buhu ụzo. G'okwebe nyajikwaa phẹ ẹbo; g'ẹphe nyaa mgbaku jasụ l'ojejoje. 
Tukoshinụ phẹ ẹhu-eghu ngu! Gudenụ oke ẹhu-eghu ngu kpegbushia phẹ! 
G'ibe phẹ bụkwaru ochobu. G'ọ tọ dụkwa onye e-buru l'ẹka ẹphe kwarụ unuphu. 
Kẹle ndu ẹphe anọduje akpa ẹhu bụ ndu i chiru ẹchachi. Tẹme ọ bụru ndu i mekarụ iphe bẹ ẹphe anọdujekwapho epfubyishi. 
Haa phẹ g'ẹphe mebaa ẹjo-iphe yekọbe l'ọphu ẹphe mewaru; ọphu i kwekwa g'ẹphe keta oke l'apfụbekoto nkengu. 
G'e hufukwa ẹpha phẹ l'ẹkwo, e deru ẹpha ndu nọ ndzụ. Ọphu e dekwa ẹpha phẹ l'ẹka e deru ẹpha ndu pfụberekoto. 
Mu daru ụkpa; tẹme aphụ tsụbe mu ọnu. Gụbe Chileke; gẹ ndzọta nkengu dobenụ mu l'ẹka ta adụdu iphe, e-me mu nụ. 
Ọo ya bụ gẹ mu agụa ebvu gude tua Chileke ẹpha. Tẹme mu egude ebvu-ekele kutsee ya ọkpobe ekutse. 
Ono bẹ a-ka Chileke atsọ ụtso eme l'a tụru iya eswi; ọzoo l'a tụru iya oke-eswi, mpu iya hagbaa kẹ phengara phengara; tẹme ụpyi ọkpa pheshihuchaa ya epheshihu. 
Ndu wozeru onwophẹ alị hụmae ya phọ; ẹhu atsọo phẹ ụtso. G'obu unubẹ ndu achọ Chileke nọdukwa ndzụ! 
Chipfu anụmaje olu ndu adụdu g'ọ dụ phẹ. Tẹme ndibe iya, a tụru mkpọro bẹ ọ tọo gbakụtajedu azụ. 
Gẹ ndu bu l'imigwe yẹe ụnwu-eliphe tua ya ẹpha! G'ẹnyimu yẹe iphe bu l'ime iya tụkokwapho tua ya ẹpha! 
Kẹle Chileke a-dzọ Zayọnu; bya akpụkwaa mkpụkpu, nọ lẹ Jiuda. Ndiphe alaa ya je eburu mee ya l'ọo-bụru iphe phẹ. 
Ụnwu ndu ejeru iya ozi emee ya l'ọo-bụru okiphe phẹ. Iphe, bụkpoo ndu yeru ẹpha iya obu bẹ e-buru l'alị ono. 
