﻿Ebvu-ọma.
65.
Gụbe Chileke; ọ dụ ree g'anyi nọdu lẹ Zayọnu tua ngu ẹpha! Anyi e-medzukọtaru ngu iphe, anyi riburu angụ l'anyi e-meru ngu. 
Ọo gụbe onye ono, azajẹ oku m'e pfuru nụ ngu bẹ onyemonye a-wụ-pfuta. 
Teke iphe-ẹji shi kapyabẹ anyi bẹ i shiẹle-a anọduje agụru anyi nvụ l'ẹjo-iphe anyi. 
Ẹhu-ụtso bẹ a gọru nụ onye ono, ị họtaru dokube onwongu Gẹ gụ l'iya nọdu l'ibe ngu. Iphe, dụ ree, nọ l'ibe ngu ejije anyi ẹpho; mbụ iphe, dụ ree, nọ l'eze-ụlo ngu, dụ nsọ. 
Gụbe Chileke, bụ onye ndzọta anyi; iphe, iigudeje zaa anyi ẹnu bụ iphe, dụ ebvu, egoshi apfụbekoto nkengu. Ndu bu l'ẹka igwe beru alị beru; waa ndu bu lẹ mgboru ẹnyimu, kachakpọo anọdu ẹnya bụ ngu bẹ ẹphe tụko chịru ụpfu kwẹe; 
mbụ gụbe onye bụ ọkpehu ngu bẹ i gude mee úbvú; ẹphe ngụchaaru angụru l'ẹka ẹphe nọgbaa. I keru onwongu ọkpehu g'onye keru akpọ l'upfu. 
Ẹnyimu, asọ gborogboro bẹ iimeje l'oderu yẹkete; mbụ l'ọotu-buhu akpara. Ọhamoha -nọdu aba hanyịhanyi bẹ iimeje; ẹphe adaa kẹ nyọnyoronyo. 
Ndu bu ụzenya bẹ anọduje anma pyaapyaapyaa M'ẹphe nụma k'iphe, dụ biribiri, iimegbabẹ. Ndu shi l'ụzo ẹnyanwu-awawa; waa ndu ụzo ẹnyanwu-arịba bẹ iimeje g'ẹphe tụa ụzu-ẹhu-ụtso. 
Ị gbaru mini l'eliphe teke ị byaru iya agbaphe; shi nno mee ya; ọ bụru alị ọma. Ẹnyimu nkengu bẹ i meru gẹ mini ji ejiji. Ndiphe l'ophu bẹ i meru g'iphe, ẹphe kọberu l'alị nọdu emehuru; kẹle ọo ẹgube ono bẹ i meru iya g'ọ dụ. 
Mini bẹ i dzeru; ọ dọru adọru l'ẹnyoru. Ị bya alwaa yẹgeyege mini gude mee igbo; ọ dụ nwuhanwuha; shi nno gọru ọnu-ọma nụ iya mee iphe, a kọberu iya wata efushi. 
Ị bya eworu ẹka-atụtu nkengu kpube apha g'okpu-eze. Tẹme iphe, bụkpoo ụzo, i shiru bẹ i dzeru iphe, dụ ree gẹ mini. 
Ẹswa bya erwushia nọdugbaa kẹ nyịmunyimu l'echiẹgu. Tẹme ẹhu-ụtso dọerupho kẹ nyịmunyimu l'úbvú. 
Ẹka eecheje iphe-edobe bẹ atụru kụru ata nri. Nsụda bụ iphe, jiru iya nụ bụ iphe-akụku, a kụru iya. Iphemiphe ono tụkoru akwa ẹvu; agụ ebvu ẹhu-ụtso. 
