﻿Ebvu-ọma.
64.
Jiko Chileke; nụmanu mkpu, mu echi ẹka mu epfu anụ ngu! Gbochite mu gẹ mu ta nọduhe atsụ ndu ọhogu mu ebvu. 
Domia mu g'ẹjo-idzu, ndu ẹjo-iphe achịru mu te erwu mu l'ẹhu; mbụ hanyịhanyi, ẹphe aba ekpu mu; mbụ ndu eme ẹjo-ememe. 
Ndu abajẹ ire phẹ g'onye aba mma. Mbụ ndu anọduje agba njọ opfu phẹ g'onye agba apfụ. 
Ẹphe edomije onwophẹ kwabẹru onye dụebe ree. Onye ono -bya amaru; apfụ abụwaru iya nụ l'ẹhu kẹ pfụu. O to nwedu iphe, ndzụ iya agụ phẹ mẹ nanụ. 
Ẹphe anọduje eyeru nwibe phẹ ọkpu-ikike g'ẹphe kebe ẹhu l'eme iphe-ẹji. Ẹphe epfuje sụ l'ẹphe e-je agbakacha ọ́nyà phẹ lẹ mpya. Ẹphe pfuchaa nno; ẹphe asụ: “?Bụkwanu onye abya phẹ ahụma?” 
Ọo ya bụ; ẹphe -chịchaa ẹjo-idzu; ẹphe asụ: “Idzu, anyi chịru nta-a dụkpoo ree dụ-ghee ya adụ-ghe!” Uche amadụ yẹe obu iya bẹ ẹregede pakwarụ ẹka. 
Obenu lẹ Chileke e-seta apfụ; ẹphe -bya amaru bẹ ọ-gbakata phẹ tụa l'alị. 
Chileke e-me g'ẹphe vukota abalị dagbua ọchii. Ọ bụru iphe, opfu ọnu phẹ kpatarụ. Iphe, bụkpoo ndu hụmaru iya nụ bẹ e-kwe l'ishi gude kweru phẹ une. 
Ndzụ e-rwuta amadụ l'ophu. Ẹphe e-pfukashịa iphe ono, Chileke meru ono; bya ebvuru shii rịa ya ọriri. 
G'ẹhu tsọo ndu pfụberekoto ụtso l'ime Chipfu! G'ẹphe gbabakwa l'ime iya je domia onwophẹ! G'iphe, bụkpoo ndu obu phẹ gụru ìphóró tukwaa ya ẹpha! 
