﻿Ebvu-ọma.
56.
Gụbe Chileke; phụnaaru mu obu-imemini; a -nọnyaa; ndiphe woru mu lwee elwelwe; lẹ ndu ọhogu mu anọduje akpa mu ẹhu mkpụrumkpuru. 
Mkpụrumkpuru bẹ ndu achị mu lẹ njọ anọduje achị mu kpabẹkpabe; mbụ l'a dụ igwerigwe gude eku-onwonye etso mu ọgu. 
Ndzụ -nọdu agụ mu; bụe ngu phọ bẹ mu adakobeje. 
Ọo Chileke ono, mu anọduje aja opfu iya ajaja ono bẹ mu dakoberu. Ọphu ndzụ agụdu mu; ?bụ gụnu bẹ nemadzụ mmanụ sụru mu ememe? 
Tekenteke bẹ ẹphe ewojeru opfu mu gha ịgharaphu. Iphe, bụkpoo iphe, ẹphe arịkpo arịri bụepho g'ẹphe eshi mee mu ẹjo-iphe. 
Ẹphe dzukọberu bya edomishia onwophẹ. Mbụ l'ẹphe anọduje edo ọkpa mu achọkpoepho ụzo, ẹphe e-shi gbua mu. 
?Ẹphe e-gude eme ẹjo-ememe ono nahụ tọo? Jiko Chileke; gudenụ oke ẹhu-eghu ngu chitsushia ndu ono l'ophu. 
Ị mawaru g'ọotsube mu l'ẹhu. Ị mawaru gẹ mu kwashiberu ẹnya-mini. ?Tị tụkoduru iphemiphe ono dekọta l'ẹkwo ngu? 
Mu -rakuẹ ngu phọ bẹ ndu ọhogu mu adakọbe gbaphu azụ. Ọphu doru mu ẹnya bụ lẹ Chileke nọ l'ẹka iya nkemu. 
Ọo Chileke ono, mu anọduje aja opfu iya ajaja ono; mbụ Chipfu ono, mu anọduje aja opfu iya ajaja ono; 
Ọo Chileke ono bẹ mu dakoberu; ọphu ndzụ agụdu mu; ?bụ gụnu bẹ nemadzụ sụru mu ememe? 
Gụbe Chileke; iphe, mu rifuru angụ lẹ mu e-meru ngu bụkwa mu bẹ ọ tukoru l'ishi. Mu a-bya egweru ngwẹja-ekele nụ ngu; 
noo kẹle ị nafụtaru ndzụ mu l'ẹka ọnwu; bya emekwaphọ gẹ mu te vukota iphe daa iko. Ọo ya bụ gẹ mu azọo ije l'iphu Chileke l'ẹka ìphóró dụru ndu nọ ndzụ. 
