﻿Ebvu-ọma.
53.
Ndu eswe anọduje arị l'ime obu phẹ lẹ Chileke ta adụdu. Ẹphe mebyishiwaru onwophẹ; iphe, ẹphe eme bụru akpamara; ọphu ọ dụdu m'onye lanụ eme iphe, dụ ree. 
Chileke gbẹ l'imigwe lee ẹnya lẹ mgboko-a; mbụ l'ẹhu ụnwu-eliphe; gẹ ya maru ?o nweru onye kwarụ ẹnya? Mbụ g'ọ maru ?o nweru onye achọ yẹbe Chileke? 
Ọle g'ẹphe ha tụkowaru haa ụzo jephuhu. Ẹphe tụkowaru g'ẹphe ha mebyishihukọta. Ọ tọ dụdu g'ọ ka mma l'ọo onye lanụ eme iphe, dụ ree. 
Ọ dụkwa gẹ ndu ono, eme ẹjo-ememe ono te nwedu egomunggo; mbụ ndu anọduje eri ndibe mu g'onye eri nri; ọphu ẹphe epfujedu anụ Chipfu. 
Ẹphe bụ ndu ndzụ-agụgu rwutaru; l'ẹka adụdu iphe ndzụ-agụgu, dụ iya nụ; teke Chileke e-woru ọkpu ndu tsoru ndibe iya ọgu tụkashia nanụ nanụ; meru iphe-iphere kpua phẹ; kẹle ọ jịkawaru phẹ. 
Ọ dụ mu g'e shi lẹ Zayọnu bya adzọta ndu Ízurẹlu. Jiékọpu e-te ẹswa; ẹhu atsọo Ízurẹlu ụtso mẹ Chileke dophuẹpho ndibe iya azụ l'ọnodu phẹ. 
