﻿Ebvu-ọma.
52.
?Dẹnu g'o gude ị nọdu eku onwongu l'eme ẹjo-iphe; oke, dụ ike? ?Tị madụ lẹ n-yemobu Chileke a-nọ jeye l'ojejoje? 
Iphe, iigudeje ire ngu epfu l'ii-me bụepho ẹjo-iphe; mbụ l'ire ngu atsụ nkọ g'akwọ, a barụ ababa. Iphemiphe, iimekpọo ememe bụkotaru ụghoshi. 
Ị ka eye ẹjo-iphe obu eme l'iphe, dụ ree. Adzụ ụka ka ngu ree eme l'epfu iphe, pfụru nhamụnha. 
Iphe, i yeru obu bụ epfubyishi nemadzụ; gụbe onye ono, adzụ-gbu onwongu l'ụka ono! 
Sụ-a; Chileke e-mebyishikwa ngu; mee ngu l'ị bụru mkpurupyata jasụru asụru. Oo-wofu ngu; mee ngu g'i ti buhẹ l'ibe ngu; l'o phefu ngu ephefu l'alị ndu nọ ndzụ. 
Ndu pfụberekoto -hụma iya; ẹphe atsụhu ebvu; ẹphe achịa ya ọchi sụ: 
“Unu lewarọ; onye ọwa-a bụ onye jịkaru lẹ ya te ewoduru Chileke eme agbaru-ike iya. Ọ kpọru obu yeru ẹku, o nweru nwegharu iya ẹka; bya egude ẹjo-iphe, ọonoduje emeshi eko dzụdzudzu.” 
Obenu lẹ mbẹdua dụ g'oshi olivu, jaru àjàjà nọdu kpukala l'ime eze-ụlo Chileke. Mu a-chịru ụpfu kwẹe lẹ n-yemobu Chileke jeye l'ojejoje. 
Mu a-nọdu ekele ngu ekele jeye l'ojejoje; kẹle ọo gụbedua l'onwongu meru iya. Mu anọdukpoepho nwadoo ele ngu ẹnya l'ẹka; kẹle ẹpha ngu dụ ree. Tẹme mu anọdukwaphọ l'iphu ndu dụru ngu nsọ tua ngu ẹpha. 
