﻿Ebvu-ọma.
41.
Ẹhu-ụtso bẹ a gọru nụ onye anọduje eyeru ndu ụkpa ẹka; kẹle Chipfu a-dzọta iya mẹ ọ -nọdu eje iphe-ẹhuka. 
Chipfu l'a-kwachi iya; bya edobe iya ndzụ. L'ọ bụru onye a gọru ẹhu-ụtso nụ l'eliphe; ọphu Chipfu enwuduru iya eye l'iphe, agụ ndu ọhogu iya. 
Chipfu a-gbaru iya mkpu mẹ ọ zẹe l'ẹhu. Oo-me iya l'ọ ka mma l'iphe-ememe, byapfutaru iya nụ. 
Mu sụru Chipfu: Phụnaaru mu obu-imemini. Mu mewaru ngu iphe-ẹji gụbe Chipfu; jiko menaa gẹ mu wekọrohu. 
Ndu ọhogu mu anọduje epfuru mu ẹjo opfu sụ l'ọ dụ phẹ g'a sụ lẹ mu nwụhuru; g'a zọhaa mu l'eliphe-a. 
Teke nemadzụ byaru mu ajịji; oopfuru mu opfu, te erwuduru iya ọhu-ẹpho. Obenu l'iphe, ọochiko edo l'obu iya bụ ịkpoki ntụmatu. Ọ -lụfuepho l'o jeshia ya edokashị. 
Iphe, bụkpoo ndu kpọru mu ashị anọduje adzụ-phe taba taba gude epfutọshi mu. Ọ bụerupho iphe, bụ iya kachaa ẹji bẹ ọoduje phẹ g'o mee mu. 
Ẹphe asụ: “Tụswekwa! Ọ kwa ẹjo iphe-ememe eme iya. Ọ turweakwaru iya k'ọphu ọ tọo gbẹshibaedu.” 
Mbụ je akpachaa l'onye mu l'iya eshi ọkpobe eshishi; bya abụru onye mu dakoberu; mbụ l'onye mu l'iya erigbajẹ nri gbẹchaakwa eme iphe, a-tsụru mu nụ. 
Ọlobu gụbe Chipfu; phụnaaru mu obu-imemini! Meerọ gẹ mu wekọrohu; k'ọphu mu a-pfụ phẹ ụgwo iphe-a, ẹphe eme mu-a. 
Mu maru lẹ mu dụ ngu l'obu; kẹle i ti kwedu gẹ ndu ọhogu mu tụru okoo kpua mu. 
Eshinu ụta adụdu mu l'ẹhu bẹ ị tụru mu gburumu kuru mu dobe l'atatiphu ngu gẹ mu nọdu jasụ l'ojejoje. 
G'e tua Chipfu ẹpha; mbụ Chileke kẹ ndu Ízurẹlu; e -shi lẹ gbururu jeye lẹ gbururu. Nokwa g'ọ dụ; bya abụru g'ọ dụ. 
