﻿Ebvu-ọma.
39.
Mu sụru lẹ mu a-kwabẹru ụzo mu ẹnya; gẹ mu te egude ọnu mu pfuta ẹjo-iphe. Ọnu mu bẹ mu akụje ngga; mẹ ndu ẹjo-iphe nọ-kube mu. 
Mu woru ẹka hua l'ọnu nọ-kirishia; gẹ mu te epfukpọnu g'ọ ka mma l'ọo iphe, dụ ree. Ọle mgburwashị-ẹhu mu akaẹle-a shii eje. 
A nọnyaa; obu wahụahaa mu awahụ; mbụ mu nọdu rịnyae ya phọ; ọ gbanwuhu mu l'ẹhu g'ọku. Mu sanaa ọnu wata epfu opfu sụ: 
Gụbe Chipfu; menaa mu gẹ mu maru gẹ mu a-nọ-beru; gẹ mbọku e-beru mu anwụhu! Menaa gẹ mu maru gẹ ndzụ mu dụ-be mkpirikpu. 
I meru ndzụ mu; ọ dụ tsọkere. Gẹ ndzụ mu a-nọ-beru ta adụdu iphe, ọ bụ l'iphu ngu. Nemadzụ l'ophu tụkoerupho bụru udzu ọnu. 
Nemadzụ g'ọogha-phe nno bụepho phẹrephere mmanụ bẹ ọ bụ. Kpanga kpanga kpanga, ọonoduje eme bụepho g'ọ bụru. Ọokpaje ẹku kụberu onwiya; ọle ọ tọ makwanụ onye e-mechaa ria ya nụ. 
Nta-a Chipfu; ?bụkpoo gụnu bẹ mu ele ẹnya iya? Ọ kwa ngu bẹ mu daru ngabẹru. 
Nafụta mu l'emeswe ono, mu mesweru ngu ono! Be mekwa mu gẹ mu bụru onye ndu eswe e-kweru une! 
Mu shi woru ẹka hua l'ọnu nọ-kirishia; noo kẹle ọo gụbedua bẹ iphe ono, anwụkotaru mu nụ ono shi l'ẹka. 
Hanaa mu echi ẹchachi-a, iichi mu-a; kẹle ẹka iichi mu gbaa gbaa bẹ ike abvụakwa mu ree. 
Ị -baarụ nemadzụ mba gude goshi iya ẹjo-iphe, oome bẹ bụepho gẹ nsụ, asụkashije iphe-a bụ g'ịi-nọduje asụkashi iphe, dụ ree, onye ono nweru. Nemadzụ g'ẹphe ha bụkota udzu ọnu bẹ ẹphe bụ. 
“Nụmanu epfupfu, mu epfu anụ ngu gụbe Chipfu! Ngabẹnu nchị lẹ mkpu, mu echiku ngu! Ba gbakwa nkụchi g'ị tị nụma ẹkwa, mu ara ekpu ngu! Kẹle mu bụ onye lwarụ alwalwa, lwapfutaru ngu nụ; ẹgube ono, ndiche anyi phẹ shikwaphọ bụru ono. 
Jiko hafụa mu rọ; k'ọphu ẹhu a-kabẹ tsọ mu ụtso ọzo; tẹme mu alashịwaro maa.” 
