﻿Ebvu-ọma.
33.
Unu gụa ebvu ẹhu-ụtso nụ Chipfu; unubẹ ndu pfụberekoto! Ọ gbaru gẹ ndu obu phẹ gụru ìphóró jajẹ iya ajaja. 
Unu kpọo une gude kele Chipfu ekele! Unu gude ogumogu gụa ebvu gude tua ya ẹpha! 
Unu gụa ebvu ọ̀phúú nụ iya! Unu kụa ya k'ẹrengete; unu agbọoru iya ọgboo! 
Kẹle Opfu Chipfu pfụru nhamụnha. Ọ bụru o-me-g'o-pfuru l'iphemiphe, oome ememe. 
Iphe, adụje Chipfu ree bụ ikpe, pfụru nhamụnha; mẹ iphe, pfụru ọto. N-yemobu Chipfu jiru mgboko bushihu. 
Ọo opfu-ọnu bẹ Chipfu gude mee igwe. Ọ bụru unme, ọ tụru atụtu bẹ o gude mee iphemiphe, nọkota iya nụ. 
Ọ bya azakọbe mini, nọ l'ẹnyimu l'ẹka lanụ; ọ dọru nyịmunyimu. Eze-ẹnyimu bẹ ọ kpachaaru oke ẹka oo-jeberu. 
G'eliphe l'ophu tsụje Chipfu ebvu. G'iphe, bụkpoo ndu nọ lẹ mgboko mgburugburu yejeru iya nsọ; 
kẹle o pfuru opfu; mgboko l'ophu dụ. Ọ tụru ekemu; iphemiphe dụkota. 
Chipfu emeje g'ìdzù, ọhamoha chịru bụru iphe-mmanụ. Iphe, ndiphe tụberu k'ememe bẹ ọokposhije. 
Obenu l'ìdzù ọphu Chipfu chịru l'adụje g'ọ chịru iya; jasụ l'ojejoje. Iphe, ọ tụberu k'ememe bẹ oomeje; l'o shi l'ọgbo sweru ọgbo. 
Ẹhu-ụtso bẹ a gọru nụ ọha ono, bụ Chipfu bụ Chileke phẹ; mbụ ndu ọ họtaru; ẹphe bụru okiphe nkiya. 
Chipfu anọduje l'imigwe lee ẹnya l'eliphe-a hụmakota ụnwu-eliphe l'ophu. 
Ọonoduje l'ẹka o bu l'imigwe hụmakota ndu bu lẹ mgboko g'ẹphe ha. 
Ọo yẹbedua meru ọriri nụ phẹ; tẹme iphemiphe, ẹphe emekọta nọdu edoje iya ẹnya. 
Eze ta alwụjedu ọgu lwụta; opfu l'ọo l'ọ chị igwerigwe ndu ojọgu. Ọphu onye ike dụ abụdu ọkpehu iya bẹ oogudeje nahụ. 
Ịnya-ọgu bụ iphe-mmanụ; ọ tọo dzọtadu nemadzụ l'ẹgu ọgu. G'ike adụhabekwa iya; ọ tọo dzọdu ndzụ. 
Obenu lẹ-a; ẹnya Chipfu dụkwa l'ẹhu ndu atsụ iya ebvu; mbụ ndu ono, daru ngabẹru n-yemobu iya; 
k'ọphu ọo-nafụta phẹ l'ọnu ọnwu; dobe phẹ ndzụ mẹ ẹgu nọdu eme. 
Anyi adajẹ ngabẹru Chipfu; kẹle ọo ya bụ onye eyejeru anyi ẹka; bya abụru onye egbobutajẹ anyi. 
Oomeje g'obu tsọo anyi ụtso; kẹle ọo ẹpha iya, dụ nsọ bẹ anyi dakoberu. 
Gụbe Chipfu; jiko goshinụ l'i yeru anyi obu; eshinu ọ bụ ngu bẹ anyi daru ngabẹru. 
