﻿Ebvu-ọma.
30.
Mu a-nọdu ekutse gụbe Chipfu; kẹle ị nalitaru mu lọfuta mu l'ime nsụ; ọphu i kwedu gẹ ndu ọhogu mu teru ẹswa kpua mu. 
Gụbe Chipfu, bụ Chileke mu; mu rakuru ngu g'i yeru mu ẹka. Ị bya emee; ẹhu dụ mu ike. 
Sụ-a; gụbe Chipfu; ọo ngu lọ-litaru mu lọfuta mu l'ime alị-maa. I mee gẹ mu ta abụ onye ẹja tarụ. 
Unu gụa ebvu gude tua Chipfu ẹpha; unubẹ ndu dụru iya nsọ! Unu kele iya ekele; l'ẹpha iya dụ nsọ! 
Kẹle ẹhu te eghujedu iya eghu nọo ọdu. Obenu l'obu-ọmaa ya anọduje jasụ teke onye onoya l'a-nọ-beru. Ẹnya-mini bụ-a l'ẹnyashi bẹ aakwashịje iya; o -be l'ụtsu; ebvu ẹhu-ụtso adahaa. 
Teke ẹhu dụ mu guu bẹ mu sụru l'ọ tọ dụkpodaa iphe, byaru enwubata mu nụ. 
Gụbe Chipfu; teke i shi emeru mu obu-ọma bẹ i meru; mu ngụru angụru g'úbvú. Obenu lẹ teke ị gharu mu azụ bẹ meji tọfuru mu. 
Ọo gụbe Chipfu bẹ mu rakuru. Ọ bụru gụbe Nnajịuphu bẹ mu rwọru g'i phụaru mu obu-imemini. 
Mu sụru: “?Bụ urwu gụnu bẹ anwụhu mu a-barụ ngu? Mbụ-a? dẹnu urwu, ii-rita iya mẹ a tụa mu ẹja? ?Bụ urwuku, dụ l'alị a-wata ngu ajaja? ?Bụ iya a-ra iya arara l'ị bụ onye apfụshije ike l'iphe, i pfuru? 
Jiko Chipfu; nụmaro olu mu; phụnaaru mu obu-imemini! Jiko Chipfu; yeru mu rọ ẹka!” 
Ẹkwa, mu rarụ bẹ ị gbanweru mee; mu teahaa ebvu. Ị bya eyefu mu uwe-aphụ, mu yeru; woru ẹhu-ụtso yee mu g'uwe. 
Iphe ono bụkpoerupho g'ee-shi g'obu mu agụaha ebvu gude etu ngu ẹpha; g'ọ tọ nọhe nggujingguji. Gụbe Chipfu, bụ Chileke mu; ọo ngu bẹ mu a-nọduje ekele jasụ l'ojejoje. 
