﻿Ebvu-ọma.
28.
Ọo ngu bẹ mu araku Chipfu, bụ oke mkpuma nkemu. Ba gbakwa mu nkụchi; kẹle ị -nọkirishia bẹ mu lẹ ndu ẹja tarụ a-bụkwaru iphe lanụ. 
Nụmaro mkpu, mu echiku ngu g'i yeru mu ẹka; gẹ mu chiliru ẹka mabẹ l'ụzo ẹka-kakọta-adụ-nsọ ngu ono. 
Ba tụkokwa mu lẹ ndu ẹjo-iphe kpụta kpụfu; mbụ ndu anọduje eme iphe, adụdu ree; ndu anọduje epfuru nemadzụ ibe phẹ opfu ẹmereme l'eli ọnu; obenu l'iphe, dụ phẹ l'obu bụ mgbashị. 
Pfụa phẹ ụgwo iphe, ẹphe meru; mẹ ụgwo ẹjo-ememe, ẹphe megbabẹru. Pfụa phẹ ụgwo iphe, ẹphe gude ẹka phẹ meta; l'i wota iphe, gbaru phẹ nụ wophutaru phẹ azụ. 
Eshinu ọ dụdu iphe, ẹphe gụberu ozi, Chipfu jeru; mbụ iphe, Chipfu gude ẹka iya mee l'onwiya; bẹ oo-gude ẹka iya dọjashia phẹ adọjashi; ọphu ọ byadu agbakwabaa phẹ agbakwa. 
Unu tua Chipfu ẹpha; kẹle ọ nụmaru mkpu, mu chikuru iya sụ g'ọ phụaru mu obu-imemini. 
Ọo Chipfu bụ ike mu; bya abụru onye egbobutaje mu nụ. Ọ bụru iya bẹ mu dakoberu; ọ nọdu eyeru mu ẹka. Mu anọduje ete ẹswa l'ime obu mu. Mu a-gụ ebvu gude kele iya ekele. 
Ọo Chipfu bụ ike ndu nkiya; bya abụru ụlo-ezeru-ndzụ onye o teru manụ l'ishi. 
Dzọtanu ndibe ngu; gọnuru ọnu-ọma nụ ndu bụ okiphe ngu! Chejenu phẹ nche g'onye eche atụru; l'i heru phẹ eheru jasụ l'ojejoje! 
