﻿Ebvu-ọma.
22.
Chileke mu! Chileke mu! ?Bụ gụnu bẹ o gude ị haa mu nkịnyi mu? ?Bụ gụnu meru g'o gude ị haa mu adzọta je anọdu mu ụzenya? ?I je anọdu g'ị tị nụma ude, mu atsụ? 
Gụbe Chileke mu; eswe l'ẹnyashi bẹ mu arakuje ngu; ị tịi zadụ mu ẹnu; obenu lẹ mu ta anọkirishijedu. 
Ọle ị dụnaa nsọ g'ị dụ; mbụ gụbe onye eze ndu Ízurẹlu anọduje etu ẹpha. 
Ọo ngu bẹ nna anyi phẹ dakoberu. Ẹphe dakoberu ngu; ị nafụta phẹ. 
Ẹphe rakuru ngu; ị dzọo phẹ. Ẹphe dakobe ngu; ọphu i kpuduru phẹ iphu lẹ ntụ. 
Obenu lẹ mbẹdua bụ mgbashiride; mu ta abụdu nemadzụ. Mu bụ onye ụnwu-eliphe emeje iphe-iphere; bya abụru onye adụdu iphe, ndiphe gụberu iya. 
Iphe, bụkpoo ndu ele mu ẹnya achị mu ọchi; aphụru mu ẹgbonu; bya ekweru mu une; sụ: 
“Ọ kwa l'ọ sụru l'ọo Chipfu bẹ ya boru mkpa iya. Ngwa; gẹ Chipfu ọbu nafụtanu iya! G'ọ gbafụtanu iya; eshinu ọ sụru lẹ ya dụ Chipfu l'obu.” 
Ọle ọ kwa ngu-a kufutaru mu l'ẹpho ne mu. Ọ bụru ngu meru; mu dakobe ngu; e -shirọ teke mu angụkwadu ẹra. 
A nwụru mu bya ekuru mu ye ngu l'ẹka. E -shi teke mu nọ l'ẹpho ne mu bẹ ị bụhawaa Chileke mu. 
Ba nọdukwa mu ụzenya; kẹle iphe-ẹhuka nọkwa mu phakuu; ọphu mu enwekwa onye gbaru mu mkpu. 
Oke-eswi, dụ igwerigwe nọ-pheru mu anọ-phee; mbụ lẹ obobẹna ndu Beshanu gbaru mu mgburugburu. 
Ẹphe sagbaaru ọnu galaba eje abyapfuta mu g'oduma, l'agbọ ụja, ejepfu anụ, oo-gbu; taa. 
A wụshiru mu gẹ mini. Iphe, bụ ọkpu, nọ mu l'ẹhu gbụghashịhu. Nta-a bẹ obu mu dụwaa g'ụ̀nwù. Ọ nọwa mu l'ime zashịhu azashịhu. 
Ike bvụwaru mu; ọphu ụvohu adụhedu mu m'ilile. Ire nyakụwaru mu l'akpo. I woru mu gwọphua l'urwuku gẹ mu nọdu nwụhu. 
Nkụta nọ-phewaru mu mgburugburu. Ikpoto ndu eme ẹjo-ememe gbaphewaa mu mgburugburu; kpọ-fushia mu ẹka yẹe ọkpa. 
Nta-a bẹ ẹgara agụwa mu ọgu. Ndiphe tụkowa chịru ẹnya dzee mu ele mu kẹ phọriphori. 
Ẹphe kee uwe mu l'ẹhu l'ẹhu; o be l'ọphu mu eyeje l'ime ẹhu; ẹphe tụa ido g'ẹphe maru onye a-chịta iya nụ. 
Jiko gụbe Chipfu; ba nọdukwa mu ụzenya! Gụbe mkpakọ ike mu; bya ẹgwegwa bya agbaarụ mu mkpu! 
Gbafụta ndzụ mu g'e te gude ogu-echi phụa mu! Gbafụtaro mkpakọ iphe ono, mu nweru ono, bụ ndzụ mu; gẹ nkụta ta takashị iya! 
Jiko dzọtanu mu l'ọnu oduma; waa lẹ mgbaka mpu atsụ. Eshinu ị zawaru mu ẹnu; 
bẹ mu a-ra ẹpha ngu arara g'ụnwunna mu phẹ nụma-dzuru. Mu anọdu l'edzudzu-ọha jaa ngu ajaja. 
Unubẹ ndu atsụ Chipfu ebvu; unu jaa ya ajaja! Iphe, bụkpoo g'unu ha bụru oshilọkpa Jiékọpu; unu kwabẹje iya ùbvù! Unubẹ oshilọkpa Ízurẹlu l'ophu; unu bajẹru iya ẹja! 
Kẹle onye iphe-ẹhuka byaru b'ẹ o too lejedu olegbulẹnya; mbụ l'ọ tọo gbadojedu onye eje iphe-ẹhuka; ọphu ọ ghajẹduru iya azụ. Ọonumaje-chia olu, o gude chiku iya lẹ mkpu. 
Mu a-nọdu l'edzudzu-ọha jaa ngu ajaja iphe, i meru mu. Ọ bụru l'iphu ndu atsụ ngu ebvu bẹ mu a-nọdu mekọta iphe, mu riburu angụ ememe. 
Ndu ụkpa bẹ ẹpho e-ji. Ndu achọ Chipfu ajaa ya ajaja. “Gẹ ndzụ unu bụru ojejoje.” 
Ụnwu-eliphe l'ophu e-mechaa nyata iphe, nwụru nụ. Ẹphe adakọbe lwapfuta Chipfu. Mbụ-a; iphe, bụkota ipfu, nọkota l'ọhamoha bẹ e-mechaa bya abakọtaru iya ẹja. 
Kẹle iphe, bụkotakpoo alị-eze ndiphe l'ophu bụkota kẹ Chipfu; tẹme ọ bụru iya achịkota ọhamoha. 
Iphe, bụkpoo ndu nweru iphe l'eliphe-a bẹ e-mechaa bọoru iya ọbo-iphe; bakwaarụ iya phọ ẹja; tẹme iphe, bụkotakpoo ndu e-mechaa bụru ẹja bẹ e-mechakwaphọ gbua ikpere l'atatiphu iya; mbụ ndu ta adụdu ike edobe onwophẹ ndzụ. 
Ọgbo, nọ l'iphu e-jeru iya ozi. Ọgbo, a-bya nụ bẹ aa-kọru kẹ Nnajịuphu. 
Aa-rarụ iya ndu e teke anwụkpodanu anwụnwu lẹ Nnajịuphu bụ onye pfụberekoto; mbụ l'ọo yẹbedua meru iya. 
