﻿Ebvu-ọma.
19.
Igwe l'ophu atụ ọnu gẹ Chileke dụ-be biribiri. Akpaminigwe nọdu egoshi g'oomebe ọna. 
Eswe mbọku-mbọku atụ ọnu iya; tẹme ẹnyashi nọdu emeje g'a kabaa ya amaru. 
A taa nụdu olu phẹ; ọphu ọ dụdu iphe, ẹphe epfu, aanụ lẹ nchị; 
Obenu l'olu phẹ tụkoru eliphe l'ophu ngakọta. Ozi, ẹphe ezi jerwuchaa ẹka mgboko beru. Ọo Chileke kpụru ụlo doberu ẹnyanwu l'imigwe. 
Ẹnyanwu nọdu eshije l'ụlo iya ọbu kpufuta gẹ nwoke, lụru nwanyị k'ọ̀phúú. Ẹhu nọdu atsọ iya gẹ mkparawa, ike dụ, l'eje atụ ẹgo ọso. 
Ọowaje l'akpaminigwe l'ishi lanụ; o shi l'ishi iya ono jee jasụ l'ishi iya ọphuu. Ọphu ọ dụdu iphe, a-sụ lẹ ya nọ l'ẹka okpomọku iya te erwudu iya l'ẹhu. 
Ekemu Chipfu dụebe ree. Oomeje g'obu gụ-zeta nemadzụ. Omelalị, Chipfu doberu ta angadu anganga. Oomeje g'onye amazidu iphe kabaa amaru iphe. 
Iphe, Chipfu tụru ọkpa iya pfụkwaru nhamụnha. Oomeje g'ẹhu tsọo nemadzụ ụtso. Iphe, Chipfu sụru g'e meje doru rịsaa. Oomeje nemadzụ g'ọ hụma-rweta ụzo ree. 
Ntsumebvu Chipfu dụ ree. Ọo-nọ jasụ l'ojejoje. Iphe, Chipfu tụru l'ekemu bụ eviya. Ọ pfụkotaru nhamụnha. 
Ọ ka mkpọla-ododo agụ ẹgu; gẹ mkpọla-ododo ono adụhabe ree. Tẹme ọ tsọhaa manụ-ẹnwu l'ụtso; m'o rwuhaa ọ bụru ẹbakala-ẹnwu. 
Ọonoduje alọ mụbe onye-ozi ngu ẹka lẹ nchị. Obunggo dụru iya onye anọduje eme iphe, o pfuru. 
Ọle ọ bụ; ?bụ onye amajẹru teke ya eme iphe-ẹji? Jiko sachafụkwa mu iphe-ẹji, mu meru ọphu mu amadụ. 
Yetarụ mụbe onye-ozi ngu ẹka jiko gẹ mu te elekebeje ẹnya mee iphe-ẹji. Te kwekwa g'iphe-ẹji kapyabẹje mu ẹnya. Ọo ya bụ gẹ mu a-dụebe ree; tẹme l'a haarụ mu enge lẹ mu ta tụpyajeduru gụbe Chipfu. 
Jiko Chipfu; g'opfu, shi mu l'ọnu; mẹ iphe, mu arị l'ime obu mu dụje ngu rọ ree; kẹle ọo ngu bụ agbara-mkpuma mu; bya abụru onye agbafụtaje mu nụ. 
