﻿Ebvu-ọma.
18.
Mu yeru ngu obu Chipfu. Ọo ngu bụ ike mu. 
Ọo Chipfu bụ agbara-mkpuma nkemu; bya abụru ụlo-ezeru-ndzụ mu; bụru onye agbafụtaje mu nụ. Ọo Chileke mu bụ agbara-mkpuma, mu agbabajẹ je edomia onwomu. Ọo ya egbobutaje mu g'ọ tọ dụ iphe, e-me mu nụ. Ọ bụru iya bụ onye egudeje ọkpehu iya dzọo mu. Ọo l'ime iya bẹ mu agbabajẹ je anọdu zeeru ndzụ. 
Ọo Chipfu ono, bụ onye gbaru g'a jajẹ iya ajaja ono bẹ mu arakuje; l'ọ dzọo mu l'ẹka ndu ọhogu mu. 
Anwụhu shiwaa chie mu ẹgbirigba l'olu. Ọla-l'iswi nọdu asọ gborogboro gẹ mini asọ-pfuta mu. 
Ẹkpa-oyi alị-maa nwụa mu kpalaa. Anwụhu shiwaa woru ọ́nyà gbabẹru mu. 
Ọle teke mu eje iphe-ẹhuka bẹ mu rakuru Chipfu. Mu rakuru Chileke mu; sụ g'ọ dzọo mu. Ọ gbẹ l'eze-ụlo iya nụma olu mu. Mkpu, mu chiru chiku iya rwua ya lẹ nchị. 
Noo ya bụ; eliphe l'ophu tehu kparịkpari; nmakọta jiijiijii. Ọkpa úbvú l'ophu nmaghukọta anmaghu; kẹle Chileke bẹ ẹhu eghu eghu. 
Ẹnwuru ọku shi iya l'imi akpụ kẹ tụutuutuu. Ọku, shi iya l'ọnu afụshi tụkoepho iphemiphe ekepyashị. Icheku-ọku iphe, o kepyashịru tụko ẹkameka ata pfụpfupfu. 
Ọ dọjaha akpaminigwe kẹ tararara; ọ bụru iya alụfuta. Ọchii, gbahụru kẹ tsụkiribaa nọdu iya lẹ mkpula ọkpa. 
Ọ nọdu l'eli chierobu phezeta. Ọ bụru lẹ ǹkù phẹrephere bẹ o degeru ezi phuphuphu. 
O woru ọchii kpuchia onwiya; mbụ l'urwukpu, mini jiru ejiji bẹ nọ-pheru iya mgburugburu. 
Urwukpu; waa akamini-mkpuma; waa icheku-ọku, ata pfụpfupfu shi l'ogbunwịinwii ya agụshihugba. 
No iya; Chipfu gbẹ l'akpaminigwe tụa egbigwe. A nụma olu onye ono, bụ Ọkalibe-kakọta-shii ono; bya ahụma akamini-mkpuma; waa icheku-ọku, ata pfụpfupfu. 
Ọ gbaa apfụ iya gude chịkaa ndu ọhogu iya. Ebemu-igwe bẹ ọ kụru kẹ phoo. Ẹphe zẹkota l'ọso gbalachaa. 
Gụbe Chipfu ziru unme fuu gbọoru ndu ọhogu ngu ụja. Eze Ẹnyimu sọkahu ẹbo; k'ọphu a hụmachaaru ọhu-ẹnyimu l'ẹnya; kpuhachaa ẹka a tụru ọkpa-alị mgboko; a hụma. 
Chipfu gbẹ l'imigwe tụfu ẹka; zụ mu gburumu; gụfuta mu l'ogbu-mini. 
Ọ nafụtakwaru mu phọ l'ẹka ẹjo ọhogu mu; mẹ l'ẹka iphe, bụkpoo ndu mu dụ ashị; noo kẹle ẹphe kariru mu ẹka. 
Mbọku ono, mu eje iphe-ẹhuka ono bẹ ẹphe tsoru mu ọgu; obenu l'ọo Chipfu gbatarụ mu ike. 
Ọo yẹbedua kutaru mu dobe l'ẹka mu nọ tụsaru ẹhu. O yeru mu ẹka nafụta mu l'ọgu; kẹle mu dụ iya l'obu. 
Chipfu buru mu nggo; kẹle mu bụ onye pfụberekoto; mbụ kẹle mu bụ onye iswi dụ mma. 
Noo kẹle ọ bụepho ụzo, Chipfu tọru bẹ mu anọduje etso. Ọphu mu egudejedu eme ẹjo-iphe gbakụtaru Chileke azụ. 
Ekemu Chipfu bẹ mu nwụbekotaru ẹnya g'ọ ha. Tẹme ọphu mu aghajẹduru iphe, ọ sụru g'e meje okotazụ. 
Ọ tọ dụkpodaa ẹka ụta dụ mu l'ẹhu l'atatiphu iya. Mu sedekpọerupho onwomu; ọphu ọ dụdu ẹjo-iphe, mu yejeru ẹka. 
Chipfu buru mu nggo; kẹle mu bụ onye pfụberekoto; mbụ l'o buru mu nggo; kẹle mu bụ onye iswi dụ mma l'iphu iya. 
Ndu yeru ngu obu bẹ iigoshije l'i yeru phẹ obu. Ndu dụebe ree bẹ ịiduebejeru ree. 
Ndu obu phẹ gụru ìphóró bẹ iidobejeru obu ìphóró. Ị nọdu emejeru ndu doberu ụzo phẹ nggọdogo nggọdogo g'umere phẹ gbaru. 
Ndu wozeru onwophẹ alị bẹ ịidzotaje; obenu lẹ ndu eku onwophẹ bẹ iiwozeje alị l'onwongu. 
Ọo gụbe Chipfu eyejeru mu ọku l'orọku mu. Ọo gụbe Chileke mu emeje g'ìphóró dụru mu l'ẹka ọchii agba. 
Eshinu iiyeru mu ẹka bẹ mu e-tso ikpoto ndu ojọgu ọgu. Igbulọ mkpụkpu phẹ bẹ mu e-nyi; eshinu mu lẹ Chileke swị. 
Ụzo Chileke bẹ ntụcha adụdu m'ilile. Opfu Chileke bụkota ọkpobe opfu. Oogbobutaje ndu gbabarụ l'ime iya je anọdu zee ndzụ. 
?Bụ onye bụba Ọkalibe, dụ nụ, abụdu Chipfu kpoloko? ?Bụ onye bụba agbara-mkpuma, abụdu Chileke anyi? 
Ọo Chileke emeje g'ike dụ mu. Ọ bụru iya meru ụzo mu; ọphu ntụcha adụdu iya. 
Oomeje gẹ mu pfụ shọoshoo gẹ mgbada; mbụ l'oomeje gẹ mu pfụru pfụshia ike l'eli úbvú. 
Ọ zụru mu; mu maru g'aalwụje ọgu; k'ọphu bụ l'ọ tọ dụdu m'obeta ọ bụru apfụ, e kweru l'igwe; mu adụele-a ike gbaa ya. 
Ọo gụbe Chipfu egbobutaje mu; shi ẹgube ono dzọo mu. Ọ bụru ẹkutara ngu bẹ iigudeje gudeshia mu. Ẹka iiyeru mu ekutseje mu. 
I mesataru ụzo mu ọsa; g'ọkpa te echiswafu mu. 
Mu gude ọso chịa ndu ọhogu mu gude; ọphu mu anmadụru nggụ; jasụ mu mee phẹ; ẹphe bụru mkpurupyata. 
Mu chiru phẹ pyakapyaka; k'ọphu ẹphe ta adụedu ike gbelibaa ishi ọzo. Ẹphe zẹgbaepho kẹ manyọo lẹ mgboru ọkpa mu. 
Ọo ike nkengu bẹ mu gude eje ọgu. Ndu etso mu opfu bẹ i meru; ẹphe gbushiru mu ikpere. 
Ndu ọhogu mu bẹ i meru; ẹphe ye ọkpa l'ọso. I mee; mu tụko ndu mu dụ ashị gbushikọta. 
Ẹphe chiru mkpu; ọphu ọ dụdu onye gbaru phẹ mkpu. Ẹphe raku Chipfu; ọphu o yedụru phẹ ọnu. 
Mu gwerụ phẹ uji mee phẹ; ẹphe dụ g'urwuku, phẹrephere zikashịru. Mu wụshia phẹ g'ẹpuchi lẹ gbororo. 
Ị nafụtaru mu l'ẹka ndu etso mu opfu; bya emee; mu mu bụru ishi ọhamoha; k'ọphu ndu mu eshidu maru byaru alwakọta mu l'ẹka. 
Ẹphe -nụma l'ọwa-a iphe, mu sụru g'e mee baa; ẹphe emee ya ẹgwegwa. Ndu ọhozo nọdu ephozekọtaru mu. 
Meji tụfukota iphe, bụ ndu ọhozo ono; tẹme ẹphe nọdu eshijegbaa l'ẹka ẹphe shi wohaa onwophẹ phụru yẹyeye byapfuta mu. 
Chipfu nọkwa ndzụ; unu tua agbara-mkpuma nkemu ono ẹpha! Unu kutsee Chileke; l'ọo ya bụ onye adzọje mu nụ! 
Ọo Chileke ejeje agwata ụgwo iphe, ndu ọhogu mu meru mu. O meru; ụnwu-eliphe nọdu mu lẹ mkpula. 
Ọonafutaje mu l'ẹka ndu ọhogu mu. Oowolije mu eli woru mu doghaa ndu etso mu opfu. Ọogbafutaje mu l'ẹka ndu emeje nemadzụ iphe-kpangangaa. 
Noo g'o gude mu je a-pfụru l'iphu ọhamoha kele gụbe Chipfu ekele. Mu a-gụ ebvu gude tua ngu ẹpha. 
Onye eze, ọ họtaru bẹ oomeje g'o mekpee l'ọgu. N-yemobu iya bẹ ọonoduje egoshi onye ọ wụru manụ l'ishi, bụ Dévidi yẹe oshilọkpa iya jasụ lẹ tuutuutuu lẹ mịimiimii. 
