﻿Jiobu.
41.
?Ịi-dụ-a ike gude ịkokoro nmata ẹjo-oke-agiyi, bụ Leviyatanu; ọzoo tụa ya eri l'ire woru libe elibe? 
?Ịi-dụ ike ye iya eri l'imi lipyia; ọzoo woru ịkokoro dzụbe iya l'agba? 
?Ịi-dụ-a ike mee ya g'ọ wata ngu arwọ sụ g'ị phụaru iya obu-imemini? ?Ọo-gọzeta olu pfuru opfu nụ ngu? 
?Ịi-dụ-a ike mee g'unu l'iya gbaa ndzụ g'ọ bụru ohu ngu jasụ g'ịi-nọ-beru? 
?Ịi-dụ-a ike mekoshi iya g'eemekoshije nwẹnu-a? Ii-woru iya haarụ ụnwumgboko ibe ngu g'ẹphe gude bvu ebvu? 
Ndu agba nghọ; ?ẹphe e-kwe ngu iya-a ọnu? Tọo ?ẹphe e-ke iya l'ẹhu l'ẹhu g'ẹphe ha agba nghọ ọbu? 
?Ịi-dụ-a ike gude mkpirikpu mkpirikpu igwe gbajashịa ya akpọ? Tọo ?ịi-dụ ike gude ịkekee sụwaa ya ishi? 
I -byikpọo ya ẹka ebyibyi ophu bẹ ịi-nyata-a iphe, gụ l'iya jeru. Ị tịi laphubaẹdu iya azụ ememe. 
I -dobekpọo ẹnya l'ii-mekpe iya; maru l'ọo ụka bẹ ị dzụru. Ị -hụmakpoo ya nụ ahụma bẹ ike bvụwaru ngu. 
Eshinu ọ dụdu onye agirigo, nọ iya l'ẹhu sụru kẹ g'o je akpatsu ẹjo-oke-agiyi; ?bụchia mụbe Chileke bẹ nemadzụ sụru k'etso opfu? 
?Bụ onye abya asụ l'ọwa-a iphe iya, ẹka mu dụ baa gẹ mu pfụa ya ụgwo iya? Noo kẹle iphemiphe, nọ lẹ mgboko bụ nkemu. 
“Mu taa hakwa gẹ mu ta tụ ọnu ọkpa ẹjo-oke-agiyi ono; tụa ọnu g'ọ dụ-be ọkpehu yẹe g'ọ bụ-be anụ, dụ ùbvù l'ẹnya. 
?Bụ onye sụru iya aswa akpọ? ?Bụ onye a-dụ ike parụ odogoro eje iya l'iphu lẹ ya eje iya ya eyeye? 
?Bụ onye a-tụkponu ama k'eje iya ajaha ọnu, o gude phengara phengara eze kpọo ọkpokuu gbaa mgburugburu? 
Okpurukpu iya bẹ iphe, kpọru iya giriri bụ iphe-mgbobuta-ọgu, nọchaa hụru ahụru; bya anọduchaa nwibe iya ntsentse; 
mbụ l'ẹphe nọchaa onwophẹ ntsentse shingushingu; k'ọphu phẹrephere te eshidu mgbaka iya abahụ iya l'ẹhu. 
Ẹphe rakụbecharu nwibe phẹ arakụbe. Ẹphe tụgbaru nanụ k'ọphu a taa tụwadu iya ẹbo. 
O -zee uze; icheku-ọku aghashịhu. Ẹnya iya dụ g'ẹka ẹnyanwu keru paa lẹ nchi-abọhu. 
Ọku-ọwa anọduje enwu iya phoophoophoo l'ọnu. Ẹkoro-ọku eshi iya agba kpịtikimu kpịtikimu kpịtikimu. 
Ẹnwuru-ọku eshi iya l'imi akpụ tụutuutuu g'ite, e shiberu chịru ẹswa kụbe iya. 
O -kushi unme l'icheku, ọku adụdu l'ọ gbanwuhu ọku; tẹme ọku, enwu phoophoophoo nọdu eshije iya l'ọnu agụshihu. 
Ọkpehu dụ iya l'olu; k'ọphu oomeje gẹ meji tọfu iphe, bụkpoo onye hụmaru iya nụ. 
Igbigirigbi akpọ ẹhu iya rakụgbaerupho l'ẹhu nwibe iya; k'ọphu ọ dụdu onye sụru iya arakụfu. 
Ọkpoma iya kpọru gbengugbengu gẹ mkpuma; mbụ l'o shihuru ike gẹ mkpuma, eegweje iphe. 
Ọ -gbalihu agbalihu; ndzụ erwuta ndu ike dụ. Ẹphe egude ẹhu-anmanma gbaphu azụ. 
E -gbua ya ogu-echi; ọ tọ dụdu iphe, oo-me iya; ọphu ọ dụdu iphe, arwa; ọzoo ịkekee; ọzoo agụgu emeje iya. 
Ígwè bẹ ọonyajishije g'onye anyapyashị ọwa. Ọ nọdu emeje onyirubvu g'onye eme oshi, rehuru erehu. 
Apfụ te emejedu iya g'ọ gbaa ọso gbala. Mkpuma rọbo nọdu adụjele iya-a g'ọ bụ udzu, etsushi ekpu iya. 
E -chia ya mgbọro l'ọ gbẹ dụ iya g'e chiru iya oshi ọwa. A -nọdu atụ iya arwa swịiswiiswii l'ọ chịle iya-a ọchi. 
Mkputẹpho iya atsụ nkọ g'igburọnu ibiribe mbeji. Ọ -wụa awụwu l'ẹpuchi l'ọ dụ g'ẹka e swiru igwe, e gude echi ereshi. 
O -rwuba l'ogbumini l'ọ phụhu ụphu g'ite, e shiberu l'ọku. Teke o rwubaru l'eze-ẹnyimu l'ọ tsụ gbudugbudu g'ẹka e shiberu manụ ụrwazi. 
Ẹka o gbaru bẹ mini asọje raa bukahụ ẹbo acha kẹ phuuphuu. Onye leru ẹnya lẹ mini teke ono l'o dobesụ l'ogbu-mini furu ẹwó. 
Ọ tọ dụdu iphe, dụ lẹ mgboko-a, aatụ eyeru iya. Ọ bụ iphe, e meru dobe lẹ mgboko; ọphu ndzụ agụjeedu iya. 
G'iphe ahahabẹ l'eli; o tọ dụdu iphe, ọo-gụbe iya. Ọo ya bụ eze l'iphe, bụkpoo iphemiphe, eku onwiya ekuku.” 
