﻿Jiobu.
38.
Tọbudu iya bụ; a nọnyaepho; oke phẹrephere wata ezizi. Chipfu gbẹ l'oke phẹrephere ono wata eyeru Jiobu ọnu. Ọ sụ Jiobu: 
?Bụ onye epfu iphe phọ? ?Bụ onye woru enweru egomunggo mu rwụtoshia; l'ẹbe abụ l'onye ọbu maru iphe, oopfu? 
Rịkota onwongu gẹ nwoke; gẹ mu bya ajịa ngu ajị! Ọ kwa g'ị zajẹ mu iya! 
Sụ-a; ?bụ awe bẹ ị nọ teke mu tụru ọkpa mgboko-a l'ophu? Karụ mu iya; m'ọ bụru l'o doru ngu ẹnya! 
?Bụ onye tụru iya ọnyeka sụ l'ọwa-a g'ọo-habe baa? ?Ị maru iya? ?Bụ onye gude eri tụa l'uswekete iya? 
?Bụ lẹ gụnu bẹ a kpọbechaaru ọkpa iya? Tọo ?bụ onye gbuberu ishi mkpuma, gude mgboko; 
mbụ teke ono, e mechaarụ; kpokpode nchi-abọhu tụ ụzu wata agụ ebvu; ụnwu-ojozi-imigwe g'ẹphe hakọta gbọaha kwakokoo. 
?Bụ onye gụru ụzo gburumu gụ-buru eze-ẹnyimu ye l'azụ teke ono, o meru kpukungu kpofuta l'ẹpho ne iya ono? 
Noo teke mu woru urwukpu mee uwe yee ya; bya eworu tsụkiribaa ọchii phụa ya g'ẹkwa; 
bya akpaaru iya oke ẹka oo-jeberu; bya asụ-chia ya woru iya gụa kpụkpurukpu. 
Noo teke mu sụru: “Lekwa ẹka ii-jeberu; ba ghatakwa ẹka ono! Lekwa ẹka akparamini ngu e-ku onwiya jeberu gbụru.” 
?Ị sụjewaru nchi-abọhu l'ọwa-a iphe, oo-me baa? ?Ọzoo karụ gẹregere ụtsu l'ọwa-a ẹka rwuberu iya nụ baa? 
?Ị sụjewaru iya g'o je egudegbaa ẹka l'igburọnu igburọnu mgboko jia ya phulaphula jịshia ya ndu ẹjo-iphe? 
Mgboko l'ophu kpụru oronmono g'ụrwa, e gude eme ọhubama; tẹme ọ nọdu adụje rwarịi g'uwe. 
Ndu ẹjo-iphe bẹ e te ekwedu g'ìphóró dụru; tẹme a nyakwoshichaa phẹ ẹka ẹphe shi palichawa ephekerephe. 
?I jejewaru ije jerwua ẹka oke-ẹnyimu agba dẹredere? ?I jejewaru ije l'ẹka ẹnyimu bụ ụtubuku? 
?E goshijewaru ngu ọnu-abata alị-maa? ?Ị hụmajewaru ẹka eeshije abahụ l'onyonyo ọnwu? 
?Ị rịjekpowaru iya; o doo ngu ẹnya sụ gẹ mgboko-a l'ophu habe phorokotoko? Karụ mu iya mẹ ọ -bụru l'ị tụkoru iphemiphe-a makọtaru! 
?Bụ awe bẹ eeshije eje ẹka ìphóró bu? ?Bụ awe bẹ ọchii chịru ụpfu yee? 
?Ị dụ-a ike dua ndu ono g'ẹphe lagbaa ẹka ẹphe shigbaa? ?Ị maru ụzo, eeshije eje ẹka ẹphe akwajẹ? 
Mu maru-a l'ị makọtaru iphemiphe ono; eshinu a nwụadaru ngu tẹme e mee iphemiphe ono. Ị nọwaru ndzụ nọgbawaa apha, dụ igwerigwe! 
?Ị bahụjewaru l'ụlo ẹka aakụbeje aka-mini-sunoo? Tọo ?ị hụmajewaru ụlo ọphu aakụbeje ire egbigwe, 
bụro iphe, mu doberu kwabẹru teke iphe-ẹhuka a-bya; mbụ kwabẹru mbọku ọgu a-da. 
?Dẹnu gbororo, eeshije eje ẹka ìphóró futaru; ọzoo ẹka phẹrephere ụzo ẹnyanwu-awawa eshije dzuru mgboko? 
?Bụ onye gbuwaru ọswawara tọgbo; ọ bụru ụzo, mini eshije edze; bya atọgboru egbigwe ụzo, ọo-nọdu eshi. 
Ọ nọdu egudeje iya agba mini l'ẹka nemadzụ te ebudu ebubu; mbụ echiẹgu, adụdu onye bu iya nụ; 
gude iya mee gẹ ncharacha alị, adụdu iphe, dụ iya nụ ngu-jia ẹpho wata efushi ẹswa ọ̀phúú. 
Mini ono, igwe edzeje ono; ?o nweru nna tọo? Mbụ-a ?bụ onye nwụru iji, akwa akwakwa? 
?Bụ nwanyị ole nwụru mkpukorophu mini oyi? ?Bụ onye tsụru ime mkpukorophu iji mini ono, eshije l'imigwe adashịhu ono, 
bụ iya emeje mini l'ọ kpụkoo ophu dụ gẹ mkpuma; mbarabata ogbumini ahụkoo ahụko? 
?Ịi-dụ-a ike swikọbe kpokpode, Puleyadesu? Tọo ?ị dụ ike atọshi kpokpode, Orayọnu g'ọ nọdu nanụ nanụ? 
?Ị dụ ike eme kpokpode, dụgbaa nụ g'ẹphe fụtaje teke gbaru phẹ nụ? Tọo ?ị dụ ike edu kpokpode, Beya; yẹe ụnwu iya? 
?Ị maru ekemu, a tụru doberu iphe, bu l'imigwe? ?Ị-dụ ike mee g'ọ bụru g'ọ dụ l'imigwe bụ g'ọ-dụ l'eliphe? 
?Ị dụ ike ara ọ́rà g'o rwua ẹka urwukpu nọ; ọzoo g'ị ratsua mini l'a-gba utso, e-ri ngu nụ? 
?Bụ ngu atụfuje ire egbigwe g'o tsoru ụzo iya? Ẹphe -jeshia; ?ẹphe abya asụ ngu l'ẹphe ejeakwa ozi, i ziru phẹ? 
?Bụ onye nụru ọkpoma egomunggo; bya emee g'iphe doje uche ẹnya? 
?Bụ onye bẹ mmamiphe iya rwuru k'agụje urwukpu ọgu? ?Bụ onye awụshije itemini, sụru l'imigwe; 
mẹ urwuku hukọepho ahụko; bya anmaa agbadagba. 
“?Bụ ngu ejeje akparu nyee oduma nri; bya anụ-jije ụnwu iya ẹpho g'ẹgu ta agụhe phẹ; 
m'ẹphe tụko nọdu l'ime ọgba phẹ; ọzoo l'ẹphe tụkoru geparu l'ote ẹka ẹphe e-gbu anụ? 
?Bụ onye anụje okpoko-ọ́hà nri, ẹphe erije; teke ono, ụnwu iya anọduje echiru Chileke mkpu nri tsoru ẹkameka aghaphe achọ nri, ẹphe e-ri?” 
