﻿Jiobu.
35.
Elihu nọdu eyekwarọ ọnu, ooye. 
Sụ-a; ?i dobesụ l'iphe ono bụ apfụbekoto; g'ị sụru l'apfụbekoto nkengu ka kẹ Chileke? 
Ọle ị jịkwaru iya nụ sụ: ?Bụ urwu gụnu bẹ iirita iya? Sụ: ?Bụ gụnu bụ obunggo, dụ iya nụ l'ị harụ eme iphe-ẹji? 
Gebe gẹ mu bya eyeeru ngu ọnu; gụ lẹ ndu unu l'iya eshi ọ̀nyà. 
Palikpọdapho ẹnya lee l'akpaminigwe. Tabẹkpodapho ẹnya tatata l'urwukpu ono, nọ ephekerephe ephekerephe l'ụzo ishi ngu ono. 
I -mee iphe-ẹji; ?i mekataru Chileke l'awe? Iphe-ẹji ngu -dụkpoo igwerigwe g'ọ dụhabe; ?oo-mebata iya gụnu? 
Teke ọ bụ l'ị pfụberekoto; ?ị nụru iya gụnu? Tọo ?bụ gụnu bẹ ọonata l'ẹka ngu? 
Ẹjo-iphe, iime bụepho onye dụ gẹ ngu bẹ oomekata. Apfụbekoto ngu bụkwarupho ụnwu-eliphe bẹ ọ dụru. 
“Ọobujeru; e -menụka ndiphe ewere; ẹphe eye mkpu l'ọnu. Ẹphe echiaha: ‘Ojilẹka tọgbo’; kẹle ndu ike dụ l'ebyi phẹ ẹka l'ẹhu. 
Ọle ọ tọ dụdu onye asụje: ?Bụ awe bẹ Chileke, bụ onye meru mu nụ nọ; onye ewojeru ebvu-ọma nụ nemadzụ l'ẹnyashi; 
onye ka anyi ezi iphe eme lẹ g'oozi anụ, bu l'eliphe; bya emee; anyi ka ẹnu, ephe l'eli amaru iphe. 
O to yejeduru nemadzụ ọnu mẹ ọ -nọdu echi mkpu. Ọ bụru iphe, kparụ iya nụ bụ lẹ ndu ẹjo-iphe kunukaru onwophẹ. 
Tororo iya bụ lẹ Chileke te eyejedu ọnu l'arwọrwo iphoro, ẹphe anọduje arwọ; mbụ lẹ Ọkalibe-kangokọtaru-nụ te eyejedu ọnu l'ẹgube iphe ono. 
?Dẹnu g'ọ bụchia gụbe onye sụru l'ị tị hụmaduru iya ahụma ophu bẹ ọo-nọdu angaru nchị; mbụ gụbe onye sụru l'ikpe ngu dabyiru l'atatiphu iya; i je l'anọdu echeru iya? 
Tẹme ị sụkwapho l'ẹhu-eghu Chileke ta adụdu iphe, oomeje; ọphu ọokpajedu onye eme ẹjo-iphe ishi. 
Ọo ya bụ lẹ gụbe Jiobu epfu mkpọkoro opfu. Iipfu mpfụkwase opfu, enwedu ishi.” 
